ཚད་མ་རྣམ་འགྲེལ་རྒྱན་གྱི་འགྲེལ་བཤད་ཤིན་ཏུ་ཡོངས་སུ་དག་པ་ཞེས་བྱ་བ།
ཛ་མཱ་རི།
བཅོམ་ལྡན་འདས་ལ་གཞན་དབང་ཕྱུག་ལ་སོགས་པ་ནི་མ་ཡིན་པའོ། །དེ་ལྟ་ན་ཡང་ཞེས་བྱ་བ་ནི་ཐམས་ཅད་མཁྱེན་པ་ཉིད་ཀྱིས་སོ། །སྨོས་ཏེ་ཞེས་བྱ་བ་ནི་འབྲས་བུ་ཞེས་བྱ་བའོ།། གང་གི་ཕྱིར་བཅོམ་ལྡན་འདས་ལ་ཡང་དག་པ་ཉིད་གསུང་བའི་རྒྱུ་དེའི་ཕྱིར་སྒྲུབ་བྱེད་དེ། ཡང་དག་པ་གསུང་བའི་རྟགས་ལ་ལྟོས་པ་ཚད་མ་སྟེ་ཚད་མའི་ཐ་སྙད་བྱ་བར་བཅོམ་ལྡན་འདས་ཁོ་ན་རིགས་ཏེ། དེའི་འབྲས་བུ་མ་ཡིན་པའི་ཕྱིར་རོ། །ཕྱིན་ཅི་མ་ལོག་པར་ཐམས་ཅད་གསུངས་པའི་འབྲས་བུའི་རྟགས་ཀྱིས་བཅོམ་ལྡན་འདས་ཀྱིས་དེའི་ཡུལ་ཅན་གྱི་མཁྱེན་པ་ཉིད་རྗེས་སུ་དཔོག་གི་ཞེས་བྱ་བའི་དོན་ཏོ། །ལྡོག་པ་བརྗོད་པ་ནི་རིག་བྱེད་ནི་མ་ཡིན་ནོ་ཞེས་བྱ་བའི་དོན་ཏོ། །གང་གི་ཚེ་དབང་ཕྱུག་ལ་སོགས་པ་སྲིད་པ་དེའི་ཚེ། ཚད་མས་གནོད་པ་ཡང་དག་པ་མ་ཡིན་པ་བརྗོད་པའི་ཕྱིར་དེ་ཐམས་ཅད་ཤེས་པ་ཉིད་དུ་ངེས་པ་ཐབས་མེད་དོ། །བྱེད་པ་པོ་མེད་པའི་ཕྱོགས་ལ་ཡང་གདོན་མི་ཟ་བར་སྒྲ་རྣམས་དོན་དང་འབྲེལ་བར་འདོད་ དགོས་ན། དེ་ཡང་མེད་དོ་ཞེས་བསྟན་པ 
་ནི་རིག་བྱེད་ནི་འགའ་ཡང་ཞེས་བྱ་བའོ། །འདི་ནི་ཞེས་
བྱ་བ་ནི་བཅོམ་ལྡན་འདས་སོ། །གཞན་ལ་ནི་ཞེས་བྱ་བ་ནི་ཚད་མའི་སྤྱོད་ཡུལ་མ་ཡིན་པ་ལའོ། །བཤད་པར་བྱའོ་ཞེས་བྱ་བ་ནི་ལེའུ་འདི་ཉིད་དུའོ། །དེ་ལྟར་ཐ་སྙད་དུ་བཅོམ་ལྡན་འདས་ཚད་མར་བསྒྲུབས་ནས་དོན་དམ་པ་ལ་ལྟོས་ནས་སྦྱོར་བ་ནི། ཡང་ན་ཞེས་བྱ་བའོ། །དེ་ལྡན་ཏེ། བཅོམ་ལྡན་འདས་ཀྱང་གཉིས་སུ་མེད་པ་རྟོགས་པ་ཉིད་ཀྱི་ཞེས་བྱ་བ་ནི། མ་ཤེས་དོན་གྱི་གསལ་བྱེད་ཀྱང༌། །ཞེས་བྱ་བའི་སྐབས་ཀྱི། དེ་འདི་ལ་མངའ་ཞེས་བཤད་པའི་སྒོ་ནས་ཁྱབ་འཇུག་དང་དབང་ཕྱུག་ལ་སོགས་པས་མ་རྟོགས་པ་གཉིས་སུ་མེད་པའི་དེ་ཁོ་ན་གསལ་བར་མཛད་པ་དང༌། བཅོམ་ལྡན་འདས་ཀྱང་ཚད་མ་ཡིན་ཏེ། མངོན་སུམ་ལ་སོགས་པ་རང་གི་ཡུལ་ལ་ཚད་མ་ཡིན་པར་ནི་མི་ཟད་དོ། །ཞེས་དོན་གྱིས་འཕངས་པ་ཡིན་ནོ་ཞེས་བྱ་བའི་ཚིག་གོ །འོ་ན་ཅི་ལྟར་བཅོམ་ལྡན་འདས་ཐམས་ཅད་མཁྱེན་པ་ཡིན་ནོ་ཞེས་བརྗོད་ཅེ་ན། དོན་ཐམས་ཅད་ཡོངས་སུ་ཤེས་པ་ནི་ཞེས་གསུངས་སོ། །དེ་ལྟར་རྟག་པ་དང་མི་རྟག་པའི་རྣམ་པར་དབྱེ་བ་ལ་མ་ལྟོས་པ་སྤྱི་དབང་ཕྱུག་ལ་སོགས་པ་དོན་ཇི་ལྟ་བ་བཞིན་ཤེས་པའམ་རིག་བྱེད་དང་འབྲེལ་བར་སྒྲུབ་པར་བྱེད་པ་ཚད་མའི་ཐ་སྙད་ཀྱི་རྒྱུ་མཚན་ནི་ཡོང་པ་མ་ཡིན་ནོ་ཞེས་བསྟན་ནས། རྟག་པ་དང་མི་
རྟག་པའི་ཁྱད་པར་གྱི་རང་བཞིན་གྱིས་ཀྱང་ཚད་མར་མི་འཐད་དོ་ཞེས་བསྟན་པའི་དོན་དུ་གལ་ཏེ་ཞེས་བྱ་བ་ལ་སོགས་པས་ཕྱོགས་སྔ་མ་འགོད་དོ། །རྟག་པའི་དུས་ཐམས་ཅད་དུ་གནས་པ་ཡིན་གྱི་སྐད་ཅིག་ལས་གཞན་དུས་ཅུང་ཟད་གནས་པ་ནི་མ་ཡིན་ནོ། །སོགས་པའི་སྒྲས་ནི་འདོད་པའི་སྐྱེས་བུ་ལ་སོགས་པ་བཟུང་ངོ༌། །དབང་ཕྱུག་ལ་སོགས་པ་ལས་གཞན་དེ་བཞིན་གཤེགས་པ་བསལ་བས་སོ། །ཚད་མ་རྟག་པ་ཉིད་མིན་ཞེས་བྱ་བ་ལ་ཡོད་པའི་སྒྲས་ནི་ཡོད་པའི་ཐ་སྙད་དུ་རུང་བ་བརྗོད་དོ། །ཡོད་པའི་ཐ་སྙད་དུ་རུང་བའི་ཚད་མ་རྟག་པ་ནི་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །ཡང་ན་མེད་པ་ཁོ་ནའོ་ཞེས་བྱ་བའི་དོན་ཏོ། །དེ་ལ་ཕྱོགས་དང་པོ་ལ་གཏན་ཚིགས་སུ་བསམས་པ་ནི་འགྲེལ་པར་ཚད་མ་མེད་པའི་ཕྱིར་རོ་ཞེས་འཆད་པར་འགྱུར་རོ། །འབྲས་བུ་ཉིད་ལ་སོགས་གཏན་ཚིགས་ལྟར་སྣང་བ་ནི་བཀོད་ནས་སུན་འབྱིན་པར་འགྱུར་རོ། །ཕྱོགས་གཉིས་པ་ལ་ནི་གཏན་ཚིགས་གཉིས་ཡིད་དངོས་ཡོད་རྟོགས་པ་ཚད་ཕྱིར་དང་ཞེས་བྱ་བ་དེ་དངོས་པོ་ཡོད་པའི་རྟོགས་པ་གང་ཡིན་པ་དེ་ཚད་མ་ཡིན་པའི་ཕྱིར་རོ། །ཇི་ལྟར་ཤེས་པ་ཙམ་མམ་དབང་ཕྱུག་དང་རིག་བྱེད་རྟག་པ་ཚད་མ་ཡིན་ཞེས་པའི་དོན་ཏོ། །མི་རྟག་པ་ཡང་ཚད་མ་མ་ཡིན་པར་ནི་མི་རྟག་ན་ཡང་ཚད་མ་མེད་ཅེ་ན་ཞེས་བྱ་བ་འདིས་བསྟན་ཏོ། །གལ་ཏེ་འབྱུང་བ་དང་འཇིག་པའི་བར་དུ་དབང་ཕྱུག་གི་བློ་ཡུལ་ཐམས་ཅད་ལ་ཁྱབ་པ་གཅིག་ཡིན་ལ། ཚད་མར་འགྱུར་བ་དེ་དབང་ཕྱུག་ལ་འདུ་བའི་ཕྱིར་ཚད་མའི་ཐ་སྙད་དུ་བྱེད་ཀྱི་རང་གི་ནི་མ་ཡིན་ནོ་སྙམ་དུ་དོགས་ན། ཤེས་བྱ་མི་རྟག་པ་ཉིད་ཀྱིས་དེ་ནི་མི་རྟག་པ་ཉིད་ཕྱིར་རོ་ཞེས་གསུངས་སོ། །འོ་ན་དངོས་པོ་ཡོད་པའི་རྟོག་པའི་མི་རྟག་པ་དང་འདུ་བ་ཅན་གྱི་རྒྱུ་ཉིད་ཀྱིས་ན་འབྲེལ་བའི་ཕྱིར་དབང་ཕྱུག་ཚད་མ་ཡིན་ནོ། །རིག་བྱེད་ཀྱང་རྒྱུ་མཚན་གྱི་རྒྱུ་ཡིན་པ་ཉིད་ཀྱི་ཚད་མར་བརྗོད་དོ་ཞེ་ན། འདི་ཡང་མ་འབྲེལ་བའི་ཕྱིར་མི་རིགས་སོ་ཞེས་སྟོན་པ་ནི། རིམ་བཞིན་སྐྱེ་བ་ཅན་དག་ནི། །ཞེས་གསུངས་སོ། །གཞན་ཡང་ཞེས་བྱ་བ་ནི་ཕྱོགས་གཉིས་པ་བསྟན་པ་ཙམ་མོ། །གང་ཡང་རུང་བ་ནི་མ་ཡིན་ནོ་ཞེས་བྱ་བ་ནི་རྟོགས་པ་ཚད་མ་མ་ཡིན་ནོ་ཞེས་འབྲེལ་ཏོ། །དངོས་པོས་སྟོང་པའི་སྣང་ཙམ་ནི་ཚད་མ་མ་ཡིན་ནོ་ཞེས་པའི་དོན་ཏོ། །གལ་ཏེ་མི་སླུ་བ་
དང་ལྡན་པ་ཚད་མ་ཡིན་གྱི་དངོས་པོའི་རྟོག་པ་ནི་མ་ཡིན་གྱི་རྗེས་སུ་དཔག་པ་ཡང་ཚད་མ་ཡིན་པའི་ཕྱིར་རོ་ཞེ་ན། མི་སླུ་བའི་དེ་ཉིད་ནི་ལྷག་པར་ཞེན་པའི་བྱས་པའི་དོན་དང་འབྲེལ་པ་ལས་ཡིན་ཏེ། དེས་ན་གལ་ཏེ་འདི་འདྲ་བ་རྣམ་པར་དཔྱད་ནས། དེའི་དངོས་པོ་ཡོད་པར་རྟོགས་པ་ནི་དེ་དང་འབྲེལ་པའི་ལྷག་པར་ཞེན་པ་ལ་བརྗོད་པར་འདོད་པ་ཡིན་ནོ། །དེས་ན་ཤེས་པ་ཡུལ་ལ་རག་ལས་པར་གྲུབ་པོ། །དེ་ལས་ཅིར་འགྱུར་ཞེ་ན། གང་གིས་ཞེས་སོ། །གལ་ཏེ་ཞེས་བྱ་བ་ནི་གཞན་གྱིས་ཏེ། གཞན་གྱིས་མི་རྟག་པས་གཞན་མི་རྟག་པ་ཉིད་ནི་འཐད་པ་མ་ཡིན་ནོ་སྙམ་དུ་བསམས་པའོ། །ཤེས་བྱའི་རང་བཞིན་ལ་ཞེས་བྱ་བ་ལ་སོགས་པ་ནི་གྲུབ་པའི་མཐའོ། །བྱེད་པ་ལ་སོགས་པའི་རྣམ་པར་རྟོག་པ་གསུམ་ལས་ཤེས་བྱ་ལས་སྐྱེས་པའམ། དེའི་རང་བཞིན་དུ་ཁས་བླངས་ན་ནི་དེ་མི་རྟག་པས་ཤེས་པ་མི་རྟག་པ་ཉིད་དུ་གསལ་ལོ། །ཕྱོགས་གཞན་ཡང་མི་སྲིད་པས་བྱེད་པའི་ཕྱོགས་རྟོགས་པར་བྱེད་དོ། །འོན་ཏེ་ཞེས་བྱ་བ་ནི་གཞན་གྱིའོ། །དོན་ཉིད་ཅེས་བྱ་བ་ནི་གྲུབ་པའི་མཐའོ། །དེ་ལྟ་བུར་གྱུར་པ་ནི་གསལ་པའི་རང་བཞིན་དུ་གྱུར་པའོ། །ཤེས་པ་པོའི་བྱེད་པ་ནི་མ་ཡིན་ནོ་ཞེས་བྱ་བ་ནི་ཤེས་པའི་སྐབས་ཡིན་པའི་ཕྱིར་རོ། །རང་བཞིན་ཐ་དད་པ་མེད་པའི་ཕྱིར་དང༌། ཐ་དད་ན་ཡང་དེ་ཉིད་མི་རྟོག་པ་ཉིད་དོ་སྙམ་དུ་དགོངས་པའོ། །འོན་ཏེ་ཞེས་བྱ་བ་ནི་གཞན་གྱིའོ། །དེ་བཞིན་དུ་འདི་ཡང་ཞེས་བྱ་བ་ནི་ཤེས་པ་པོ་ཡང་སྟེ། དེ་བཞིན་དུ་བྱེད་པ་མི་འདྲ་བ་དང་ལྡན་པའི་རང་བཞིན་མ་ཡིན་ནོ་ཞེས་བྱ་བའི་དོན་ཏོ། །འདི་ལ་བཤད་པ་ཞེས་བྱ་བ་ནི་གྲུབ་པའི་མཐའོ། །གལ་ཏེ་མིག་ལ་རང་བཞིན་གྱིས་བྱས་པའི་བྱེད་པ་མི་འདྲ་བ་མེད་པ་དེ་ལྟ་ན་ཡང་ནུས་པས་བྱས་པ་ནི་ལྡོག་ཏུ་མེད་པ་ཁོ་ནའོ། །གང་གི་ཕྱིར་དེར་ཞེས་བྱ་བ་གཟུགས་འཛིན་པ་ལ་དབང་ཕྱུག་གི་བྱེད་པ་ཐ་དད་པ་ཙམ་གྱིས་ཡིན་པ་ལྟར་མིག་གི་ཡང་དེ་ལྟར་ནི་མ་ཡིན་ཏེ། འོན་ཀྱང་རྗེས་སུ་འགྲོ་བ་དང་ལྡོག་པ་ལས་ཡིན་ནོ། །དེའི་ཕྱིར་ཞེས་བྱ་བ་ནི་བྱེད་པ་པོའི་ཕྱིར་རོ། །དེ་ལྟར་འགྱུར་བ་ཞེས་བྱ་བ་ནི་གསལ་བའི་རང་བཞིན་ནོ། །འདི་ལ་ཞེས་བྱ་བའི་དོན་ལ། འཛིན་པའི་བྱེད་པ་འགའ་ཞིག་ཡང་མེད་དོ། །དེའི་ཕྱིར་ཤེས་པ་རྟག་པའི་སྒོ་ནས་དབང་ཕྱུག་ཚད་མར་ཇི་
ལྟར་འགྱུར། འོན་ཏེ་ཞེས་བྱ་བ་ནི་གཞན་གྱིའོ། །གཞལ་བྱ་ཡིན་ཡང་དོན་དེ་ཉིད་ཚད་མར་འགྱུར་ལ་རག་ལས་ཏེ། རང་ཉིད་གསལ་བའི་ཕྱིར་རོ། །འདི་ཡང་གཞན་གྱིས་ཁས་བླངས་པ་ལ་མ་ལྟོས་པར་ཇི་སྙེད་སྲིད་པའི་ཚད་དཔྱད་པ་ཡིན་ཏེ། རྩོད་པའི་གནས་ཡིན་པའི་ཕྱིར་རོ། །དེ་དང་འབྲེལ་བ་ནི་ཤེས་པ་པོ་དང་འབྲེལ་པ་སྟེ། ཡུལ་དང་ཡུལ་ཅན་གྱིས་སོ་ཞེས་བསམས་པའོ། །གྲུབ་པའི་མཐའ་ནི་འདི་ལྟར་བསམས་པ་ཡིན་ཏེ། འགའ་ཞིག་ལ་འགའ་ཞིག་ཉེ་བར་སྦྱོར་བ་དང་ཡུལ་དང་ཡུལ་ཅན་ཉིད་ཀྱིས་འབྲེལ་པ་ཡིན་ཏེ། གཟུགས་ལ་མིག་བཞིན་ནོ། །ཉེ་བར་སྦྱོར་བ་དེ་ཡང་རྟག་པ་ལས་བསམས་པ་ཡིན་ཏེ། ལོག་པ་མེད་པའི་ཕྱིར་རོ། །འོན་ཏེ་དེས་ཞེས་བྱ་བ་ནི་དོན་ཞེས་ལྷག་མའོ། །འདི་ཡང་གི་ན་ཡིན་ནོ་ཞེས་སྟོན་པ་ནི་ཅི་ལྟར་ན་ཞེས་བྱའོ། །དོན་རང་ཉིད་གསལ་བའི་ཕྱིར་དེས་མཐོང་ངོ་ཞེས་བྱ་བ་གསུམ་པའི་དོན་འཁྲུལ་པའི་ཕྱིར་རོ།། གཞན་དག་རྗེས་སུ་འགྲོ་བ་ཙམ་གྱིས་དེས་མཐོང་བར་གྲུབ་པ་ནི། དེ་ལྟར་དེ་ཡོད་ན་ཞེས་བྱ་བ་སྟེ། དབང་ཕྱུག་ནི་ཤེས་པ་ཡོད་ན་ཞེས་དེ་ལྟར་དེ་དོན་གསལ་བའི་རང་བཞིན་དུ་འགྱུར་བའི་ཕྱིར་དབང་ཕྱུག་དེས་མཐོང་ཞེས་བྱ་བར་བརྗོད་ན་ནི་ནམ་མཁའ་ལ་སོགས་པ་ཡོད་ན་ཡང་མཐོང་བདེ་ཡོད་པའི་ཕྱིར། ཇི་ལྟར་དབང་ཕྱུག་དེ་ཉིད་ལྟ་བ་པོ་ཡིན། ཡོད་ནའི་འདུན་པས་ནམ་མཁའ་ལ་སོགས་པ་ལ་ཡང་འགྱུར་བའི་ཕྱིར་དེ་དག་ཀྱང་ལྟ་བ་པོར་འགྱུར་རོ། །མཁའ་ལ་ཞེས་བྱ་བ་ནི་གཞན་གྱིའོ། །དུས་དང་ཕྱོགས་ལ་སོགས་པ་ལ་ཡང་ཉེ་བར་མཚོན་པར་བྱའོ། །དོན་དེ་ནི་མཐོང་བའི་དེའོ། །དེ་བསྟན་པ་ནི་མིང་ངོ༌། །གྲུབ་པའི་མཐའ་ནི་བསྟན་པའི་ཚིག་ལ་བརྗོད་ལ་དེ་ཡང་དབང་ཕྱུག་དེ་ལས་ཡིན་གྱི་ནམ་མཁའ་ལ་སོགས་པ་མ་ཡིན་ནོ་ཞེས་བྱ་བ་གང་ལས་འདོད། གལ་ཏེ་ནམ་མཁའ་ལ་ཤེས་པ་མེད་པའི་ཕྱིར་དེ་ལས་ཚིག་མ་ཡིན་ནོ་སྙམ་ན། དབང་ཕྱུག་བཞིན་དུ་འདུ་བ་སྲིད་པའི་ཕྱིར་ནམ་མཁའ་ལ་སོགས་པ་ལ་ཤེས་པ་ཅི་སྟེ་མི་འདོད། དེ་ལྟ་ན་འོ་ན་དེ་ཉིད་དབང་ཕྱུག་ཏུ་འགྱུར་ཏེ། མི་འཐད་པས་ནི་དོན་ཐ་དད་བར་མི་འགྱུར་རོ་ཞེ་ན། མ་ཡིན་ཏེ། ནམ་མཁའ་ལ་སོགས་པ་དབང་ཕྱུག་ལས་ཐ་དད་པར་འཇོག་པ་མེད་པར་ཐལ་བའི་ཕྱིར་རོ། །དེ་ལྟར་གཞན་གྱི་རྣམ་པར་གནས་
པའི་སུན་འབྱིན་པ་བསྟན་ནས། དབང་ཕྱུག་བཞིན་དུ་ནམ་མཁའ་ལ་སོགས་པ་ལ་ཡང་ཚིག་གི་རྒྱུ་ཉིད་དངོས་པོ་ལ་རྟོག་པར་མི་ནུས་ཏེ། རྟག་པ་ཉིད་ཀྱིས་ལྡོག་པ་མེད་པའི་ཕྱིར་རོ་ཞེས་བྱ་བའི་དངོས་པོ་ཉེ་བར་སྡུད་པ་ནི། རྣམ་པར་ཀུན་དུ་ཞེས་བྱའོ། །འདི་ནི་ཐམས་ཅད་མཁྱེན་པ་ལ་ཡང་དད་པས་རྟོགས་པར་བྱ་བ་ཡིན་ནོ་ཞེས་སྟོན་པ་ནི་དོན་གང་ཞེས་བྱ་བའོ། །འདི་ནི་འདས་པ་ཡང་མ་ཡིན་ཏེ། ཕྱོགས་གཅིག་འདས་པའི་ཕྱིར་རོ། །དེ་བཞིན་དུ་མ་འོངས་པ་ཡང་ཡིན་ནོ། །སྤྱིའི་དོན་གང་ཡིན་པ་དེ་ཅི་ལྟར་གསལ་བར་འགྱུར། ཅིའི་ཕྱིར་འདས་པ་ལ་སོགས་པ་སྣང་བར་མི་འགྱུར་ཞེ་ན། འདས་པ་ཉིད་ན་ཞེས་གསུངས་སོ། །ཉེ་བར་མཚོན་པ་ཙམ་སྟེ། མ་འོངས་པ་ཉིད་ཡིན་ན་ཞེས་བྱ་བར་ཡང་བལྟའོ། །དོན་འདས་པ་དང་མ་འོངས་པ་ཡིན་ནམ་ཤེས་ཏེ། མི་གསལ་བ་དེའི་ཕྱིར། འདས་པ་དང་མ་འོངས་པ་རང་གི་ངོ་བོས་སྣང་བ་ཇི་ལྟར་འགྱུར། མེད་པ་གསལ་ན་ནི་འཁྲུལ་པ་ཁོ་ནར་འགྱུར་ལ། རང་གི་ངོ་བོ་གསལ་ན་ཡང་ད་ལྟར་བ་ཁོ་ནར་འགྱུར་རོ། །དེ་ལྟ་ཡིན་དང་འདས་པ་ལ་སོགས་པར་མི་འཐད་དོ། །འོན་ཏེ་ཡང་མེ་ལོང་བཞིན་དབང་ཕྱུག་གི་ཤེས་པར་འཕོ་བའི་དོན་དམིགས་པའི་ཕྱིར་ཅི་ལྟར་འདས་པ་ལ་སོགས་པར་མི་ཉམས་ཤེ་ན། འདས་པ་ལ་སོགས་པ་ཅི་ལྟར་ཞེས་གསུངས་སོ། །གལ་ཏེ་མེ་ལོང་གི་དཔེ་ལ་བརྟེན་ནས་ལན་འདེབས་པར་འདོད་ན་དེའི་ཚེ་མེ་ལོང་བཞིན་དུ་ཤེས་པ་ལ་ཡང་འདས་པ་དང༌། མ་འོངས་པ་དག་མི་འཕོ་བའི་ཕྱིར་དེ་ག་ལ་རྟོགས་ཞེས་བྱ་བའི་ཐ་ཚིག་གོ །ད་ལྟར་བ་ཡང་མེ་ལོང་དུ་འཕོ་བར་མི་རིགས་ཏེ། ཕྱིན་ཅི་ལོག་གི་རང་བཞིན་གྱི་དོན་མཐོང་བའི་ཕྱིར་དང༌། ཐོགས་པ་དང་བཅས་པ་དེར་མི་འཇུག་པའི་ཕྱིར་རོ། །དེས་ན་དཔེ་དེས་དབང་ཕྱུག་ཀྱང་འཁྲུལ་པ་ཉིད་དུ་ཐལ་བ་ཟློག་དཀའོ་སྙམ་དུ་དགོངས་པའོ། །འོ་ན་གང་ཞིག་ད་ལྟར་བ་མེ་ལོང་དུ་འཕོ་བ་བརྗོད་པ་དེར་ཡང་འཕོ་བའི་དོན་ཡིན། བཅོམ་ལྡན་འདས་ཀྱིས་འདས་པ་དང་མ་འོངས་པ་རྟོགས་པ་ཡང་ཅི་ལྟར་རྟོགས་ན་ཡང་ད་ལྟར་བ་ཉིད་དུ་ཐལ་ལོ་ཞེས་དོགས་ན། དེ་ལྟ་བུའི་སྣང་བ་ནི་ཞེས་གསུངས་སོ། །མེ་ལོང་ཡོད་ན་ཞེས་བྱ་བ་ནི་མཚོན་པ་སྟེ། བཞིན་ལ་སོགས་པ་ཡོད་ནའོ། །
བཞིན་དང་མེ་ལོང་ལ་སོགས་པའི་མཐུ་དེའི་རྣམ་པ་ཅན་གྱི་ཤེས་པ་ཉིད་སྐྱེ་བ་ཡིན་ནོ་ཞེས་བྱ་བ་འདི་ཉིད་ནི་འཕྲོས་པའི་དོན་ཏེ། དེ་སྐྱོན་མེད་དོ། །དེ་བཞིན་དུ་རིམ་གྱིས་སྐྱེ་བའི་ཆོས་ཅན་གྱི་ཆོས་དང་ཕྲད་ནས་བཅོམ་ལྡན་འདས་ཀྱིས་ཤེས་པ་ཡང་དེ་དང་དེའི་རྣམ་པ་ཅན་གྱི་ཤེས་པ་ཉིད་སྐྱེ་བ་ཡིན་གྱི། དེའི་ཚེ་འདས་པ་ལ་སོགས་པའི་དངོས་པོ་ཉེ་བར་གནས་པ་ནི་མ་ཡིན་པས་གང་གིས་ཧ་ཅང་ཐལ་བར་འགྱུར། རྣམ་པ་དང་ད་ལྟར་བ་ནི་ད་ལྟར་བ་ཉིད་དུ་འདོད་པ་ཁོ་ནའོ། །དེའི་རྣམ་པར་རིག་པ་ལས་གཞན་པའི་གཞན་རིག་པ་ཡང་མེད་པའི་ཕྱིར་འཁྲུལ་བ་ཉིད་ཀྱང་མ་ཡིན་ཏེ། རྣམ་པ་གཞན་མེད་པའི་ཕྱིར་རོ། །དེའི་རྣམ་པ་ཅན་ཡང་གསལ་བའི་ཚུལ་གྱི་བྱེ་བྲག་ལས་འདས་པ་ལ་སོགས་པའི་དངོས་པོ་མཐོང་བར་རྣམ་པར་གཞག་སྟེ། ཇི་ལྟར་དེ་ནི་དོན་སོགས་དུས་ལྡན་པར་ཞེས་འཆད་པར་འགྱུར་རོ། །དེས་ན་ཉེས་པའི་དོགས་པ་མེད་དོ་ཞེས་བསྟན་པར་འགྱུར་རོ། །གཞན་ལ་ནི་ཤེས་པ་རྣམ་པར་མེད་པ་ཉིད་ཀྱི་དངོས་པོ་ཉིད་གསལ་བའི་ཕྱིར་ད་ལྟར་བ་ཉིད་དུ་ཐལ་བར་བཟློག་པར་དཀའོ། །དངོས་པོ་མི་གསལ་ན་ནི་སྣང་བ་ཙམ་ལ་རྟོགས་པར་རྣམ་པར་གཞག་པའི་ཕྱིར་འཁྲུལ་བར་འགྱུར་བས་བཟློག་དཀའོ། །འོན་ཏེ་དབང་ཕྱུག་ལ་ཡང་འདས་པ་དང་མ་འོངས་པ་དག་གི་དངོས་པོ་དང་ཕྲད་ནས། དེ་ལྟ་བུར་གྱུར་པའི་སྣང་བ་སྐྱེ་བ་ཉིད་འདས་པ་ལ་སོགས་པ་རིག་པར་འགྱུར་ཏེ། རྣམ་པ་གཞན་མི་སྲིད་པའི་ཕྱིར་རོ་སྙམ་དུ་དོགས་ནས། སྣང་བ་རྟག་པའི་འབྲས་བུ་ནི་ཞེས་གསུངས་སོ། །སྔར་བརྗོད་ཅེས་བྱ་བ་ནི་རྟག་པ་ཟློག་པ་མེད་པ་ནི་འགར་ཡང་ཉེ་བར་སྦྱོར་བ་མ་ཡིན་ནོ་ཞེས་བྱ་བ་འདིས་སོ། །དེ་ལྟ་ཡིན་དང་དབང་ཕྱུག་ལ་ཡང་འབྲས་བུ་མ་ཡིན་པའི་སྣང་བ་ཙམ་ཡོད་པའི་ཕྱིར་འདས་པ་ལ་སོགས་པ་འཛིན་པ་ཡིན་ན། ནམ་མཁའ་ལ་སོགས་པ་ལ་ཡང་དེ་བཞིན་དུ་འགྱུར་རོ་ཞེས་བྱ་བ་ནི་ཕྱེད་ཕྱི་མའི་དོན་ཏོ། །དེ་ལྟར་དབང་ཕྱུག་གི་འདས་པ་དང་མ་འོངས་པ་རྟོགས་པ་སུན་ཕྱུང་ནས། ད་ལྟར་བ་ཡི་དོན་ཐམས་ཅད་རྟོགས་པ་སུན་འབྱིན་པ་གལ་ཏེ་དོན་དེ་དོན་དེའི་ཞེས་བྱ་བའོ། །དོན་འདི་ཡིན་ཏེ་ཤེས་པ་དང་ལྡན་པ་ཚོལ་བ་ཞེས་བྱ་བ་དེས་བཤད་པའི་དོན་ནན་ཏན་བྱ་བའི་ཕྱིར་ཡང་ཡིན་ལ་ངེས་པ་མཐོང་ན་ནི་དེའི་སྟོབས་ལས་བྱུང་བའི་སྒྲ་ངེས་པའི་དོན་
རྟོགས་པར་བྱེད་པར་འགྱུར་བས་ནན་ཏན་གྱི་རྒྱུར་རུང་བར་འགྱུར་བ་ཡིན་ནོ། །གང་གི་ཚེ་དོན་མཐོང་བའི་དེ་མ་ཐག་པ་ཉིད་དུ་ངེས་པར་མ་རྟོགས་ན་ནི་དེའི་ཚེ། དོན་ཐམས་ཅད་མཐོང་བས་ན། དབང་ཕྱུག་དེའི་ཚེ་ཚིག་གང་ཡིན་པ་དེའི་དོན་གང་ཞིག་ཡིན་པར་བརྗོད་དེ། གང་ཞིག་མ་ཡིན་ནོ་ཞེས་བྱ་བའི་དོན་ཏོ། །དེས་ན་ཀུན་མཐོང་བ་ལས་བྱུང་བ་ལས་བྱུང་བའི་སྒྲ་ནི་དོན་ཐམས་ཅད་ཀྱི་རྗོད་བྱེད་ཡིན་པར་འགྱུར་རོ། །དེས་ན་དབང་ཕྱུག་མཉེས་པར་བྱ་བས་ཐར་པ་ཐོབ་པོ་ཞེས་བྱ་བའི་ངག་ལ་ཚིག་རྣམས་དོན་ངེས་པ་མེད་པའི་ཕྱིར་འགའ་ཞིག་དུ་ཡང་རྗེས་སུ་སྒྲུབ་པར་མི་འགྱུར་རོ། །དེས་ན་དོན་ཐམས་ཅད་མཐོང་བ་དོན་མེད་དོ་ཞེས་བྱ་བའོ། །གལ་ཏེ་དོན་ཐམས་ཅད་མཐོང་ཡང་ངེས་པའི་ཡུལ་ཅན་གྱི་བརྗོད་འདོད་པས་སྒྲ་བརྗོད་པའི་ཕྱིར་སྒྲ་དོན་ཐམས་ཅད་ཀྱི་རྗོད་བྱེད་དུ་མི་འགྱུར་རོ། །དེ་ལྟ་མ་ཡིན་ན། ཁྱེད་ལ་ཡང་ཉེས་པ་འདིར་ཅི་ལྟར་མི་འགྱུར་ཞེས་དོགས་ན་བརྗོད་འདོད་ངེས་པ་ཞེས་བྱ་བ་གསུངས་སོ། །བསམ་པ་ནི་འདི་ཡིན་ཏེ། བརྗོད་པར་འདོད་པ་ནི་སྐྱེས་བུ་ལས་ཐ་དད་པར་རྟོགས་པ་གཅིག་པུ་ཡིན་ནོ་ཞེས་བྱ་བ་ནི་གཞན་གྱི་ལུགས་ཡིན་ནོ། །དེས་ན་སྔོན་པོ་བརྗོད་པར་འདོད་པ་གང་ཡིན་པ་དེ་ཉིད་སེར་པོ་ལ་སོགས་པ་ཡང་ཡིན་ནོ། །དེས་ན་དོན་ཐམས་ཅད་བརྗོད་པར་འདོད་པས་སྦྱར་བ་རི་རབ་ཀྱི་དོན་ཐམས་ཅད་ཀྱི་རྗོད་བྱེད་དུ་འགྱུར་རོ་ཞེས་སྟོན་པ་ནི་བརྗོད་འདོད་ངེས་པ་ཞེས་བྱ་བ་ནི་རྟག་པ་ལ་འཐད་པ་མ་ཡིན་ནོ་ཞེས་བྱ་བ་ཡིན་ནོ། །དེས་ན་ཚིག་དེ་ལས་དོན་ངེས་པ་རྟོགས་པ་ངེས་པར་མི་འགྱུར་རོ་ཞེས་བྱ་བའོ། །ངེད་ཀྱི་ལྟར་ན་ནི་སྐད་ཅིག་མ་ཉིད་ཀྱི་དོན་སོ་སོ་ལ་ཐ་དད་པར་ཁས་བླངས་པའི་སྐྱོན་མེད་དོ། །འོན་ཏེ་ཡང་བརྗོད་པར་འདོད་པ་ནི་དོན་སོ་སོ་ལ་ཐ་དད་པ་ཁོ་ནའོ། །གྲུབ་པའི་མཐའ་གནོད་པ་ནི་ཡང་གནོད་པ་མ་ཡིན་པ་ཉིད་དེ། ཚད་མས་གནོད་པ་ཉིད་གནོད་པར་འདོད་པའི་ཕྱིར་རོ་ཞེ་ན། དེ་ལྟར་ན་འོ་ན་སྐྱེས་བུ་ལས་མ་ཡིན་ནོ་ཞེས་བྱ་བ་བརྗོད་པར་འདོད་པ་ངེས་པ་ནི་རྟག་པ་ལ་མི་འཐད་དེ། དེ་དག་ནི་རང་གི་བདག་ཉིད་དུ་གྱུར་པའི་ཕྱིར་རོ། །དེ་ལྟར་ཡིན་དང་དཔེར་ན་མཐོང་བ་བཞིན་དུ་དེས་ཀྱང་དོན་འགའ་ཞིག་ཡོངས་སུ་བཟུང་བའམ་དོར་བ་མེད་པའི་ཕྱིར་ཉེ་བར་མ་བཀོད་པ་ཟད་དོ། །འོན་ཏེ་ཁོ་བོ་ཅག་སྐྱེས་བུའི་རང་བཞིན་དུ་མི་འདོད་དེ།
ཡོན་ཏན་གཞན་ཡིན་པའི་ཕྱིར་རོ་སྙམ་ན། དེ་ལྟ་ཡང་དེ་དེའི་འབྲས་བུའམ་འབྲས་བུ་མ་ཡིན། འབྲས་བུ་ཡིན་ན་དེ་ལྟ་ན་འདི་ཡིན་གྱི་གཞན་མ་ཡིན་ནོ་ཞེས་བྱ་བ་བརྗོད་འདོད་པ་ངེས་པ་ཞེས་བྱ་བ་ནི་རྟག་པ་ལ་འཐད་པ་མ་ཡིན་ནོ། །དེ་ལྟར་བྱས་པས་བརྗོད་འདོད་མཐའ་དག་གིས་སྦྱར་བའི་སྔོན་པོ་སྒྲའི་དོན་ཐམས་ཅད་ཀྱི་རྗོད་བྱེད་དུ་འགྱུར་རོ། །འབྲས་བུ་མ་ཡིན་པ་ཉིད་ཡིན་ན་ནི་དེ་རྟག་པ་ཡིན་ལ། དེ་ལྟ་ན་དབང་ཕྱུག་རྟག་པ་ཉིད་ཀྱི་བརྗོད་འདོད་ཡིན་གྱི་གཞན་གྱི་ནི་མ་ཡིན་ནོ་ཞེས་བྱ་བའི་བརྗོད་འདོད་ངེས་པ་ཞེས་བྱ་བ་ནི་རྟག་པ་ལ་འཐད་པ་མ་ཡིན་ནོ། །གཉི་ག་རྟག་པས་ན་ཕན་གདགས་བྱ་དང་འདོགས་བྱེད་ཀྱི་དངོས་པོ་ཉིད་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ །སུན་འབྱིན་པ་གཞན་ཡང་བརྗོད་པ་ནི། བརྗོད་འདོད་དེ་དག་ཅེས་བྱ་བ་ལ་སོགས་པའོ། །གལ་ཏེ་ཡོན་ཏན་ཡིན་པའི་ཕྱིར་བརྗོད་པར་འདོད་པ་ཐ་དད་པ་ཡིན་གྱི། སྐྱེས་བུའི་རང་བཞིན་མ་ཡིན་ཞིང་དེ་བཞིན་མཐོང་བ་ཡང་ཐ་དད་པ་ཡིན་ན། དེའི་བརྗོད་པར་འདོད་པ་པོ་དང་ལྟ་བ་པོ་ལྷན་ཅིག་གཅིག་ཏུ་ཇི་ལྟར་འགྱུར། གཅིག་ཉིད་ཡིན་ན་ནི་དོན་གཅིག་པའི་རང་བཞིན་ཡིན་པའི་ཕྱིར་མཐོང་བ་ཉིད་ལ་ལྟ་བ་པོ་ཡིན་ལ་འདོད་པའི་རང་བཞིན་ཡིན་པའི་ཕྱིར་བརྗོད་འདོད་ཉིད་བརྗོད་པར་འདོད་པ་ཡིན་པར་འགྱུར་གྱི། དེ་དག་གི་རང་བཞིན་ལ་དབང་ཕྱུག་གིས་ནི་རེག་པ་མེད་དེ་མཚན་ཉིད་མི་མཐུན་པའི་ཕྱིར་རོ། །དེ་དག་ཀྱང་དབང་ཕྱུག་གིས་རང་བཞིན་མ་ཡིན་པས་ན་དེའི་སྒོ་ནས་དབང་ཕྱུག་ལྟ་བ་པོ་དང་བརྗོད་པར་འདོད་པ་པོར་ཡང་མི་འགྱུར་རོ། །དེས་ན་ལྟ་བ་པོ་ཉིད་བརྗོད་པར་འདོད་པ་པོ་མ་ཡིན་པའི་ཕྱིར། ཁྱེད་ཀྱི་དེ་ཅི་ལྟར་ཚད་མ་ཡིན། མཐོང་ནས་བརྗོད་པར་འདོད་པས་སྟོན་པའམ། མཐོང་བའི་རང་བཞིན་ཚད་མར་འགྱུར་གྲང་ན། དེ་གཉི་ག་ཡང་མེད་པ་ཁོ་ནའོ། །གཞན་གྱི་དོགས་པ་ནི་གལ་ཏེ་ཞེས་བྱ་བའི་དོན་འདི་ཡིན་ཏེ། གལ་ཏེ་བརྗོད་པར་འདོད་པའི་དོན་འཛིན་པ་མཐོང་བ་ཡང་བལྟ་བར་བྱ་བའི་དོན་འཛིན་ན་དེའི་ཚེ་ཉེས་པ་འདིར་འགྱུར་བ་ཞིག་ན། གང་གི་ཚེ་དབང་ཕྱུག་ཉིད་བརྗོད་པར་འདོད་པ་དང༌། བལྟ་བར་བྱ་བའི་དོན་འཛིན་པར་བྱེད་པ་ཡིན་པ་དེའི་མཐོང་ནས་བརྗོད་པར་འདོད་པས་སྟོན་པ་ཚད་མ་མ་ཡིན་པར་ཇི་ལྟར་འགྱུར་ཞེས་བྱ་བའོ། །ལན་
དུ་བརྗོད་པར་འདོ་དང་ཞེས་བྱ་བའོ། །བརྗོད་པར་འདོད་པ་དང་གཞན་མ་ཐོང་བར་གྱུར་པ་སྟེ། དེ་དག་གི་ངོ་བོར་ནི་བརྗོད་པར་འདོད་དང་གཞན་པ་ཉིད་དོ། །གསལ་བ་དང་མི་གསལ་བས་ན་འགལ་བའི་བདག་ཉིད་དེ་ཅི་ལྟར་དབང་ཕྱུག་གཅིག་གིས་འཛིན་པ་ཡིན། །གཟུང་པར་བྱ་བ་ཐ་དད་པའི་ཕྱིར་འཛིན་པར་བྱེད་པ་ཡང་ཐ་དད་པ་ཁོ་ནར་རིགས་སོ་ཞེས་བྱ་བའི་དོན་ཏོ། །གལ་ཏེ་ཡང་འདིར་གཟུང་བ་ཐ་དད་ཀྱང་འཛིན་པ་ཐ་དད་པར་ཁས་མི་ལེན་ན་འོན་ནི་མངོན་སྐུམ་དང་རྗེས་སུ་དཔག་པར་ཡང་ཐ་དད་པར་མི་འགྱུར་ཐོ་ཞེས་ཐལ་བར་སྟོན་པ་ནི་དེ་ལྟ་ན་ཡིན་ན་ཞེས་བྱ་བའོ། །གཉེན་མི་མཚུངས་པ་ཉིད་དུ་འགྱུར་ཏེ། གང་ཞིག་གཞན་དེ་བཞིན་པ་ཉིད་ཅེས་བྱ་བའི་ཚུལ་གྱིས་གཞན་གྲངས་ཅན་གྱི་ཕྱོགས་ལ་བརྟེན་ནས་དོགས་པར་བྱེད་པ་ནི། གལ་ཏེ་དེ་ཡང་ཞེས་བྱའོ། །ཡང་དག་ཏུ་ཞེས་བྱ་བ་ནི་རང་བཞིན་གྱི་ངོ་བོས་སོ། །ཡང་དག་ཏུ་ཞེས་བྱ་བས་ནི་མངོན་སུམ་དང་རྗེས་སུ་དཔག་པའོ། །གལ་ཏེ་དུ་བ་ལ་སོགས་པ་མཐོང་བའི་དེ་མ་ཐག་ཏུ་མེ་རྗེས་སུ་འགྱུར་བ་ནི་མངོན་སུམ་དང་རྗེས་སུ་དཔག་པ་དག་རིམ་གྱིས་ཡིན་ལ། རྗེས་སུ་པ་པའི་དུས་སུ་ཡང་དུ་བ་ལ་སོགས་པ་མཐོང་པའི་ཕྱིར་ལྷན་གཅིག་ཏུ་འབྱུང་བ་མ་ཡིན་ནམ། དེས་ན་ཅི་ལྟར་འབྱུང་པ་དང་འབྱུང་པ་དག་གཅིག་ཉིད་ཡིན་སྙམ་ན། དེ་ག་ལས་ཞེས་སྨྲས་སོ། །འདི་ལ་ལན་རང་བཞིན་གཅིག་ཉིད་ཅེས་བྱ་བ་སྟེ། ཅིག་ཅར་ཡང་ཉེ་བར་མཚོན་པར་བྱ་བའོ། །ཚ་དམ་ཡིས་ནི་རྟོགས་པ་མིན། །ཞེས་བྱ་བ་ནི་གཅིག་ཉིད་སྒྲུབ་པར་བྱེད་པའི་མངོན་སུམ་དང་རྗེས་སུ་དཔག་པ་མེད་པ་སྟེ་ཇི་སྐད་བཤད་པའི་རང་བཞིན་མ་གྲུབ་པའི་ཕྱིར་དང༌། ཆོས་རྗེས་སུ་འགྲོ་བ་ཡང་བཀག་པའི་ཕྱིར་རོ། །ཡང་ན་ཚད་མས་གནོད་པ་ཉིད་དེ་ཞེས་བྱ་བའི་དོན་ཏེ། སོ་སོར་ངེས་པའི་གཟུང་བའི་རང་བཞིན་ངེས་པར་རྟོགས་པའི་ཕྱིར་དང༌། རྣམ་པར་རྟོག་པ་དང་གཞན་པ་ཉིད་ཀྱིས་འགལ་བའི་ཕྱིར་རོ། །དེ་ལྟར་ན་བཟུང་བ་ཐ་དད་པའི་ཕྱིར་ན་མངོན་སུམ་དང་རྗེས་སུ་དཔག་པ་གཉིས་དག་བཞིན་དུ་ཐ་དད་པའི་ཕྱིར་དབང་ཕྱུག་བརྗོད་པར་འདོད་པ་དང་ཅིག་ཤོས་དག་གི་འཛིན་བྱེད་མ་ཡིན་ཏེ། དེས་ན་སྔར་གྱི་ཉེས་པ་ལས་མི་གྲོལ་ལོ། །དེས་ན་ཤེས་པའམ་བརྗོད་པར་འདོད་པ་ཐ་དད་པས་ནི་དབང་ཕྱུག་ཐམས་
ཅད་མཁྱེན་པ་ཉིད་དམ་ཉེ་བར་སྟོན་པ་ཉིད་དུ་འཐད་པ་མ་ཡིན་ནོ་སྙམ་དུ་བསྟན་ནས། འདི་རྟག་པ་ཉིད་ལ་ཚད་མ་ཡང་མེད་དོ་ཞེས་སྟོན་པ་ནི། རྟོགས་པ་དེའམ་གཞན་གྱིས་ནི་ཞེས་བྱ་བའོ། །རྟོགས་པར་བྱེད་པ་དེའམ་གཞན་གྱི་དུས་ཐ་དད་པར་ཉེ་བར་མཚོན་པའི་དངོས་པོ་གང་ཞིག་ཅིག་གིས་བྱ་བར་རྟོགས་པ་དེ་གཅིག་ཁོ་ནའོ་ཞེས་བྱ་བར་བདེན་ནམ་ཅི་མི་བདེན་པ་ཉིད་སྟོན་པ་ཉིད་ཀྱིས་སྒྲུབ་བྱེད་ངོ་ཤེས་པ་སུན་ཕྱུང་བའི་ཕྱིར་རོ། །བདེན་པ་མིན་ནོ་ཞེན་ནི་དེའི་ཚེ་རྟག་པ་ཉིད་དོ་ཞེས་བྱ་བའི་ཚིག་དོན་མེད་དོ། །དེའམ་གཞན་གྱིས་ཞེས་བྱ་བ་ནི་ཕལ་མོ་ཆེས་རྟོགས་པ་ཡིན་པ་ཞེས་བྱ་བའི་ཐ་ཚིག་གོ །འོན་ཏེ་ཞེས་བྱ་བ་ནི་གཞན་གྱི་དོགས་པ་སྟེ། དེ་གཞན་གྱིས་མ་ཞེས་མོད། རྟོགས་པ་པོ་དེ་རབ་ཉིད་ཀྱིས་ནི་བདག །དེ་རྣམ་ཀུན་ཞེས་བྱ་བ་རྟག་པ་དང་ཐམས་ཅད་ཤེས་པ་ཉིད་ལ་སོགས་པའི་རང་བཞིན་དུ་ཤེས་པར་བྱེད་དེ་ཡང་དག་པར་ངེས་པར་བྱེད་དོ་ཞི་ན། སུན་འབྱིན་པ་ནི། དེ་ནི་དེ་ལྟ་ཞེས་བྱ་སྟེ། འདི་ལ་ཚད་མ་ཅི་ཡང་མེད་དོ་ཞེས་བྱ་བའི་དོན་ཏོ། །གཞན་ཡང་དེ་ཁོ་ནའམ་ཀུན་བརྗོད་པར་ཐམས་ཅད་རིག་པར་ཡིན་ནོ་ཞེས་སྟོན་པ་ནི། རང་རིག་ཉིད་ལས་གཞན་པ་ནི་ཞེས་བྱ་བའོ། །རང་རིག་པ་ཙམ་ལ་རྟག་པའམ་ཐམས་ཅད་རིག་པ་ཉིད་གལ་ཡོད་དེ། སྔ་མ་དང་ཕྱི་མ་ཡང་གཞན་རིག་པ་མེད་པའི་ཕྱིར་རོ། །དེས་ན་དོན་དམ་པ་མ་ཡིན་ནོ། །ཀུན་རྫོབ་པ་ཡང་མ་ཡིན་ཏེ། རྟག་པ་ཉིད་དང་ཐམས་ཅད་རིག་པ་ཉིད་ནི་ད་མ་པའི་ལྟོས་ནས་ནོད་པའི་ཕྱིར་རོ། །དེས་ནི་ཞུགས་པ་ཟིན་བའི་རྣམ་འགྲེལ་གྱི་ཆ་ཉིད་བཤད་པའི་ཕྱིར་སྐབས་རྩོམ་པ་ནི་ཅི་སྟེ་ཡང་ཞེས་བྱ་བའོ། །ཤེས་བྱ་མི་རྟག་པ་ཉིད་ཅེས་བྱ་བ་ནི་རིམ་གྱིས་སྐྱེ་བའི་གཏན་ཚིགས་སོ། །ཤེས་པར་བྱེད་པ་པོ་གང་ཡིན་པ་ཞེས་བྱ་བ་ནི་སྐབས་ཀྱི་དབང་ཕྱུག་གོ །བཤད་པ་ཞེས་བྱ་བ་ནི་གྲུབ་བའི་མཐའོ། །རྟོགས་པ་སྐྱེ་པ་དང་ཅི་སྟེ་འབྲེལ་སྙམ་ན། ནམ་མཁའ་དང་ཞེས་སྨོས་སོ། །ཡུལ་འབའ་ཞིག་ནི་སྐྱེད་བྱེད་མ་ཡིན་གྱི་འོན་ཀྱང་དབང་ཕྱུག་ཀྱང་ཡིན་ནོ། །རྟག་པ་དང་ཁྱབ་པ་ཡིན་ན་དེ་ཡང་སྐྱེད་བྱེད་མ་ཡིན་ཏེ། ལྡོག་པ་མེད་པ་སྤྱོད་པའི་སྐབས་སུ་བསྟན་ཟིན་པ་བཞིན་ནོ། །རྣམ་པ་གཞན་གྱི་སྒོ་ནས་ཀྱང་རྟག་ཁ་སྒྱུ་མ་ཡིན་པར་བསྟན་པའི་དོན་དུ་གལ་ཏེ་རང་བཞིན་དེ་ཉིད་ཀྱི་ཞེས་སྨོས་སོ། །
ཅི་སྟེ་རྟག་པ་གཞན་ལ་མི་ལྟོས་མོད། ལྷན་ཅིག་བྱེད་པའི་རིམ་པས་འབྲས་བུ་རིམ་པ་ཅན་དུ་འགྱུར་བ་ལ་ནི་ཉེས་བ་མེད་དོ་སྙམ་ན། གལ་ཏེ་ལྷན་ཅིག་བྱེད་པ་དག་ཉིད་ཅེས་གསུངས་སོ། །དེ་དང་ཅིག་ཤོས་ཀྱི་གནས་སྐབས་ཅེས་བྱ་བ་ནི་ལྷན་ཅིག་བྱེད་པ་ཉེ་བ་དང་མི་ཉེ་བའི་གནས་སྐབས་སོ། །རང་ངམ་གཞན་གྱིས་ཞེས་བྱ་བ་ལ་ནི་རྟོགས་པ་པོ་འམ་གཟུ་བོས་ཞེས་བྱ་བའི་དོན་ཏོ། །ཚིག་ཙམ་ཞེས་བྱ་བ་ནི་དབང་ཕྱུག་དུ་སྨྲ་བ་དོན་དུ་གཉེར་བ་ཙམ་གྱིས་སྦྱར་བའི་ཕྱིར་རོ། །གལ་ཏེ་རྟག་པ་ལ་ཕན་གདགས་སུ་མེད་ཀྱང༌། དེས་ལྷན་ཅིག་བྱེད་པ་ལ་ཅི་སྟེ་མ་ལྟོས་སྙམ་ན། དེ་ལ་ཞེས་སྨོས་ཏེ་རྟག་པ་ལའོ། །དེས་ཞེས་བྱ་བ་ནི་རྟག་པས་སོ། །དེ་ལྟ་ན་ཞེས་བྱ་བ་ནི་གཞན་གྱིའོ། །བཅོམ་ལྡན་འདས་གྲུབ་པ་ལ་སྒྲུབ་པར་མ་གྱུར་ཅིག་སྙམ་པས། སྦྱིན་པ་ལ་སོགས་པས་ཞེས་སྨྲས་སོ། །འོན་ཅི་ལྟར་ཞེ་ན། ཆགས་པ་དང་བྲལ་བ་དང་ཞེས་སྨྲས་སོ། །དེ་ནས་ཡང་ཞེས་བྱ་བ་ནི་སྔར་འཁོར་བ་ཉིད་ཡིན་པ་ལས་ཕྱིས་ཚད་མའི་རང་བཞིན་ཉིད་དུ་སྐྱེ་བར་འགྱུར་བ་ནི་མ་ཡིན་ནོ་ཞེས་བྱ་བའི་དོན་ཏོ། །ཕན་གདགས་པས་ནི་རང་བཞིན་འགྱུར་བ་མཚོན་པར་བྱེད་པ་པོ་ཞེས་སྟོན་པ་ནི་གནོད་པར་བྱེད་པ་ཞེས་སྨྲོས་སོ། །དེ་ནི་ཞེས་བྱ་བ་ནི་ཕན་གདགས་པའམ་གནོད་པར་བྱས་པའི་རྟོགས་པ་ལ་སོགས་པའི་སྒྲས་ནི་གོམས་པ་ལ་སོགས་པ་གཟུང་ངོ༌། །དེ་སྟོན་པ་ནི་འདོད་ཆགས་ལ་སོགས་པའི་གཉེན་པོ་སྟོན་པའོ། །སེམས་ཅན་ལ་བྱམས་པ་ནི་བྱམས་པའོ། །དེ་ལ་ནི་འདི་འདྲ་བའི་བྱ་བ་ཡོད་པ་མ་ཡིན་ནོ་ཞེས་བྱ་བ་འདོད་ཆགས་ལ་སོགས་པས་གདུངས་པས་ཉམས་སུ་མ་མྱོང་བ་ནི་དེའི་རྒྱུ་མཚན་ཚོལ་བམ་ཡིན་ལ། དེ་མེད་པས་ན་གཉེན་པོ་གོམས་པ་མེད་ཅིང་དེ་མེད་པའི་ཕྱིར་ནི་རབ་ཏུ་ཞིབ་རིག་པ་མེད་དོ། །དེས་གཞན་ལ་ཅི་ཞིག་ཉེ་པར་སྟོན་ཞེས་བྱ་བའི་ཐ་ཚིག་གོ །འདིས་འཁོར་བ་སྤྲོ་བར་བྱེད་པས་ན་འཁོར་བའི་སྨྲོས་པ་སྟེ་ཆགས་པ་དང་སྡང་པ་དང་བདེ་པ་དང་སྡུག་བསྔལ་ལ་སོགས་པའོ། །དེའི་རང་གི་མཚན་ཉིད་དེ་རྟོགས་པ་དེ་མངོན་སུམ་དུ་བྱེད་བའོ། །དེས་ན་ཐམས་ཅད་ཡོངས་སུ་ཤེས་པ་མ་ཡིན་ནོ། །འོན་ཏེ་རང་གི་ངོ་བོས་སྡུག་བསྔལ་བ་ལ་སོགས་པ་མངོན་སུམ་དུ་བྱེད་པ་ཡིན་ན་དེའི་ཚེ་འདི་འཁོར་བ་ཉིད་དོ། །འཁོར་བ་ཉིད་དོ། །འཁོར་བའི་རང་བཞིན་དེ་ཙམ་དུ་ཟད་པའི་
ཕྱིར་རོ། །དེ་ཉིད་ཀྱི་ཕྱིར་ཉམས་སུ་མྱོང་ན་ནི་འཁོར་པ་ཉིད་དུ་ཞེས་གསུངས་སོ། །དགོངས་པ་ནི་འདི་ཡིན་ཏེ། ཅི་ལྟབ་བྱེད་སྡུག་བསྔལ་ལ་སོགས་པ་དམིགས་པའི་དངོས་པོར་རྟོགས་པ་གཞན་འཁོར་པར་འདོད་པ་དེ་བཞིན་དུ་དབང་ཕྱུག་ཀྱང་འགྱུར་ཏེ། དམིགས་པའི་རང་བཞིན་དུ་ཁྱད་པར་མེད་པའི་ཕྱིར་དང༌། འདུ་བ་ཡང་མཚུངས་པའི་ཕྱིར་རོ། །བདག་གི་རྣལ་འབྱོར་པ་ནི་གཞན་གྱི་སྡུག་བསྔལ་ལ་སོགས་པ་དམིགས་པའི་དངོས་པོ་ཉིད་དུ་རྟོགས་ལ་གཞན་ནི་རང་གི་ཤེས་པའི་བདག་ཉིད་དུ་རྟོགས་པས་ཉེས་པ་མེད་དོ་ཞེས་བྱ་བའོ། །གཞན་འདོད་ཆགས་ལ་སོགས་པའི་རང་བཞིན་ཡིན་ཡང་ཚད་མར་མི་འགལ་ལོ་ཞེས་སྟོན་པ་ནི། འོན་ཏེ་ཞེས་བྱ་བའོ། །འདོད་ཆགས་ལ་སོགས་པ་དང་ལྡན་པ་ལ་ནི་འདི་མི་སྲིད་དོ་སྙམ་ན། འདོད་ཆགས་ལ་སོགས་པ་དང་ལྡན་པ་ཉིད་ཅེས་སྨྲས་སོ། །མི་ཉམས་པ་ཞེས་བྱ་བ་ནི་རྒྱུན་དུ་གནས་པའི་ཕྱིར་རོ། །གང་ལ་དབང་ཕྱུག་དང་འདོད་ཆགས་མི་འགལ་བ་དེ་ཉིད་ཚད་མ་ཡིན་ནོ་ཞེས་བྱ་བའི་དོན་ཏོ། །གྲུབ་པའི་མཐའ་ནི་རྟོགས་པར་སླའོ། །ཚུལ་འདི་དེ་གཅིག་པུའི་ཡིན་གྱི་གཞན་ནི་མ་ཡིན་ནོ་ཞེས་བྱ་བ་ནི་དད་པས་ཐུན་པ་ཡིན་ནོ། །འོན་ཏེ་འདི་ནི་ཞེས་བྱ་བ་ནི་གཞན་གྱིའོ། །དེས་ན་ཞེས་བྱ་བ་ནི་དབང་ཕྱུག་མི་སྲིད་པས་སོ། །གལ་ཏེ་དེ་ལྟར་ཞེས་བྱ་བ་ལ་སོགས་པ་ནི་གྲུབ་པའི་མཐའོ། །དོན་ནི་འདི་ཡིན་ཏེ། གལ་ཏེ་དབང་ཕྱུག་ལ་སོགས་པའི་ཆེད་དུ་གཉེན་པོ་སྟོན་ན་དེའི་ཚེ་གཉེན་པོ་གོ་མས་པ་ཉིད་ཀྱིས་འདོད་ཆགས་དང་བྲལ་བ་ལ་སོགས་པར་བྱེད་པ་དོའི་ཕྱིར་གཉེན་པོ་གོམས་པ་མེད་པའི་ཕྱིར་ངེས་པར་ཆགས་པ་ལ་སོགས་པར་མི་འགྱུར་རོ་ཞེས་གྲུབ་པོ། །དེས་ན་དེའི་དབང་ཕྱུག་ལ་སོགས་པ་གློ་བུར་དེར་ཅི་ལྟར་འགྱུར། །འདི་ཉིད་འཆད་པ་ནི་འདོད་ཆགས་དང་བྲལ་བ་ལ་སོགས་པ་ཞེས་བྱ་སྟེ། བྱེད་པ་པོའི་ཚིག་གོ །དེ་ལྟར་དབང་ཕྱུག་གི་དབང་ཕྱུག་ལ་སོགས་པ་མི་འཐད་དོ་ཞེས་བསྒྲུབས་ནས། གཞན་དུ་མེད་པའི་ནུས་པ་དང་ལྡན་པ་ཉིད་རྣམ་པར་བརྟག་པར་བྱས་ནས་སེལ་བར་འདོད་པས། གཞན་ཡང་ཞེས་གསུངས་སོ། །ཚིགས་སུ་བཅད་པ་གཅིག་གི་མཐར་བྱ་རོག་གི་དྲི་བས་ཅི་ཞེས་རྟོགས་པར་བྱ་བའི་ཕྱིར་རྣམ་པར་རྟོག་པ་གཅིག་གོ །གང་གི་ཞེས་བྱ་བ་ནི་ནུས་
པ་དང་ལྡན་པས་སོ། །དོན་དུ་གཉེར་བ་ལ་མཆོག་སྦྱིན་ལ་ཞེས་བྱ་བ་ནི་བརྗོད་པར་འདོད་པས་བྱེད་པ་པོ་ཡིན་ཏེ། བདག་གིས་བྲམ་ཟེ་ལ་བྱིན་ཏེ། དེས་ནི་ཅི་བཞིན་རྟོགས་ཞེས་བྱ་བ་བཞིན་ནོ། །འོན་ཏེ་མཆོག་སྦྱིན་པའི་ནུས་པ་ནི། དེ་ལ་ནུས་པ་དེ་མེད་ན་ཞེས་བྱ་བ་ནི་རྣམ་པར་རྟོག་པ་གཉིས་པའོ། །རེ་ཞིག་འདི་ཉིད་ལ་སུན་འབྱིན་པ་གཞན་ཡང་ཅི་ལྟར་ཡོད་ཅེས་བྱ་བའོ། །གལ་ཏེ་རྒྱུ་མེད་པའི་ཕྱིར་དབང་ཕྱུག་ལ། དབང་ཕྱུག་བུ་སྦྱིན་པའི་ནུས་པ་མེད་པ་དེའི་ཚེ་དེ་ལ་མཐོ་རིས་ཐོབ་པར་བྱེད་བ་ལ་སོགས་པ་གཞན་ཡང་ཇི་ལྟར་བརྗོད་དེ། རྒྱུ་མེད་པའི་ཕྱིར་རོ། །དབང་ཕྱུག་གི་ནུས་པའི་རྒྱུ་ནི་འགལ་བ་ཡོད་པ་མ་ཡིན་ནོ། །དེས་ན་གཉི་གའི་ནུས་པ་ཡང་མེད་དོ་ཞེས་བྱ་བའི་དོན་ཏོ། །ཕྱོགས་དང་པོ་ལ་བརྗོད་བ་ནི་དེ་འདྲ་བའི་དབང་ཕྱུག་བྱིན་པས་རྗེས་སུ་འཛིན་པའི་ནུས་ཕ་ནི་དབང་ཕྱུག་དེ་ལ་ཡོད་པ་ནི་གསལ་བར་ཚད་མ་ཅན་མ་ཡིན་པར་འགྱུར་ཏེ། སེར་སྣ་ལ་སོགས་པས་ཟིན་པས་ཕྱིན་ཅི་ལོག་གི་ཉེས་པར་སྟོན་པ་ཡང་སྲིད་པའི་ཕྱིར་རོ། །དེ་བཞིན་དུ་འགའ་ཞིག་ལ་འགོར་འགོར་ནས་དབང་ཕྱུག་བྱོན་ནམ་དེ་ལྟ་མ་ཡིན་པས་ཀྱང་རུང་སྟེ་ཉེས་པའི་དབང་དུ་གྱུར་པ་སྟོན་ཏེ། ནུས་པ་ཡོད་ན་མ་ཉེས་པར་བྱས་པ་ལ་སོགས་པ་ལ་མི་ལྟོས་པའི་ཕྱིར་རོ། །བཅོམ་ལྡན་འདས་ཉིད་ཀྱིས་ཐུགས་སུ་ཆུད་པའི་ལམ་ཉེ་བར་སྟོན་པའི་སྒོ་ནས། རྟོགས་པ་པོ་རྣམས་ཀྱི་རྗེས་སུ་སྒྲུབ་པ་མེད་པ་དང༌། འཕྱོས་པ་དག་གིས་མངོན་པར་འདོད་པ་སྒྲུབ་པ་མེད་པ་དང་འཕྱོས་པ་མི་འགལ་ཏེ། དེས་བཅོམ་ལྡན་འདས་ཁོ་ན་ཚད་མ་ཡིན་ནོ། །དོན་འདི་ཡང་ཡིན་ཏེ་ཞེས་བྱ་བ་ནི་མཆོད་སྦྱིན་པ་ཉིད་དོ། །བཤད་པ། འདི་ལ། རྣམ་འགས་ཕན་འདོགས་མེད་ཕྱིར་རོ། །ཞེས་བྱ་བ་ནི་སྔ་མ་དང་འབྲེལ་པར་བྱའོ། །མི་རྟག་ན་ཡང་ཞེས་བྱ་བ་ནི་རྟག་པ་ལ་ཡང་སྟེ། ཚད་མ་མེད་པར་བརྗོད་པ་ནི་ཐུན་མོང་ཡིན་པའི་ཕྱིར་རོ། །དེ་ལྟར་སྤྲོས་ནས་འཇུག་པ་ལ་སོགས་པ། གཞན་གྱི་ཚད་མ་བཀོད་ན་སུན་འབྱིན་པར་འདོད་པ། རྗེས་སུ་འཛིན་པའི་ནུས་པ་ནི། །དེ་ལ་ཚད་མ་མེད་པར་འགྱུར། །ཞེས་བྱ་བ་འདི་ལ་བརྗོད་པར་བྱ་བའི་ལྷག་མ་སུན་དབྱུང་བའི་ཕྱིར། འོན་ཏེ་མཉེས་པར་ཞེས་ཕྱོགས་སྔ་མ་བསླང་བའོ། །མཉེས་པའི་རིམ་གྱིས་ཆོས་སྟོན་པ་དེས་འདོད་ཆགས་ལ་སོགས་པ་ཉེ་བར་ཞི་བའི་རྣམ་པ་དེའི་རྗེས་སུ་འབྱིན་པར་བྱེད་པ་སྟེ།
དེས་ན་ཚད་མ་ཡིན་ནོ། །དབང་ཕྱུག་མཉེས་པར་བྱས་པ་ལས་འདོད་པ་མཐའ་དག་གྲུབ་པོ་ཞེས་བྱ་བ་ནི་དབང་ཕྱུག་ཉིད་ཀྱིས་ཉེ་བར་བསྟན་པ་ཡིན་ནོ། །གྲུབ་པའི་མཐར་ནི་དོན་འདི་ཡིན་ཏེ། གལ་ཏེ་འཇིག་རྟེན་གྱི་ཉེ་བར་བཟུང་བ་ཇི་སྙེད་པ་དེ་ཐམས་ཅད་དེས་བཤད་པ་ནན་ཏན་དུ་བྱས་པ་ལས་གྱུར་པར་དེས་ན་དེའི་ཚེ་འདི་རིགས་པ་ཞིག་ན། འདི་ལ་ནི་ཚད་མ་འགའ་ཡང་མེད་དོ། །དེས་ན་རྟོགས་པར་བྱེད་པ་ན། དེས་བཤད་པ། རྗེས་སུ་སྒྲུབ་པ་ཡིས་ཞེས་བྱ་བའོ། །དེས་བཤད་པའི་ལུང་ནི་བླང་བའི་རང་བཞིན་ཉིད་ཀྱིས་ཁྱད་པར་ཅན་དུ་འདོད་དོ། །ལུང་ཙམ་གྱི་སྒྲས་ནི་ཚད་མ་ལྷན་ཅིག་མེད་པར་བྱ་བ་མེད་པར་སྟོན་པའོ། །ལན་དུ་དེ་ལྟར་ཕན་ཚུན་ཞེས་བྱ་བའོ། །དེ་ཉིད་བཤད་པ་ནི་དེས་བཤད་པ་ཉིད་ཀྱི་ཕྱིར་ལུང་སྟེ་ལུང་གི་ཁྱད་པར་ཡིན་ལ་ཁྱད་པར་ཅན་གྱི་ལུང་ལས་ཀྱང་དེ་བཤད་པ་ཉིད་དོ། །གལ་ཏེ་འདི་ནི་དབང་ཕྱུག་གིས་བཤད་པ་ཡིན་ནོ་ཞེས་ཁྱད་པར་ལ་ལྟོས་པ་མ་ཡིན་ཏེ། གྲགས་པ་ཉིད་ལས་གྲུབ་པའི་ཕྱིར་ཁྱབ་མཇུག་ལ་སོགས་བའི་ལུང་བཞིན་ནོ། །དེས་ཕན་ཚུན་བརྟེན་པར་ཇི་ལྟར་འགྱུར་ཞེ་ན། བརྗོད་པ་གལ་ཏེ་ཁྱབ་འཇུག་ལ་སོགས་པ་ལྟར། དབང་ཕྱུག་གི་མིང་ཙམ་གྱིས་ལྷ་ཙམ་གྱི་ལུང་བྱེད་པ་སྲིད་པ་ཡིན་ན། དེའི་ཚེ་ལུང་ཁྱད་པར་དེ་འདྲ་པ་ཅི་ལྟར་འགྱུར། དེས་ན་ཇི་སྐད་བརྗོད་པའི་ཐམས་ཅད་པ་ཉིད་ལ་སོགས་པའི་ཡོན་ཏན་དང་ལྡན་པ་ཉིད་ལུང་བྱེད་པ་པོ་ཡིན་པར་བརྗོད་
དགོས་པས་བྱེད་པ ་པོ་དེ་ཡང་ཁྱད་པར་ཅན་གྱི་ལུང་ཉིད་ལམ་ཡིན་ནོ་ཞེས་བྱ་བ་མི་སྤོང་ངོ༌། །གང་གིས་ཐམས་ཅད་ལ་ལྟ་བའི་ཐམས་ཅད་མཐོང་བ་དང༌། གང་གིས་མངོན་པར་འདོད་པ་སྒྲུབ་པའི་རྗེས་སུ་འཛིན་པར་བྱེད་པ་དེའི་རང་བཞིན་གང་ལ་ཡོད་པ་དེ་ལ་དེ་སྐད་ཅེས་བྱའོ། །ཕྱེད་སྔ་མ་བཤད་ནས་ཕྱེད་ཕྱི་མ་རྣམ་པར་འགྲེལ་པ་ནི། གལ་ཏེ་འདིར་ཞེས་བྱ་བའོ། །འདི་ལྟར་ཞེས་བྱ་བ་ནི་ཕྱོགས་སྔ་མ་ཉིད་གཞུང་འཛུགས་པའོ། །མངོན་སུམ་དུ་མ་གྲུབ་པའི་དབང་ཕྱུག་ལ་ནི་ལན་འདི་བརྗོད་པར་མི་བྱའོ་ཞེས་འབྲེལ་ཏོ། །ཅིའི་ཕྱིར་དེ་ལྟར་ཡིན་ཞེན། འདི་ལྟར་ཞེས་བྱ་བའོ། བརྒལ་ཟིང་བརྟག་པའི་རྣམ་པ་བརྗོད་པ་ནི། འདི་ཅི་ལྟར་ཞེས་བྱ་བའོ་གལ་ཏེ་འབྱུང་བ་ཉིད་ཀྱིས་ཞེས་བྱ་བ་ནས། མཚུངས་པ་ཞེས་བྱ་བའི་བར་ནི་གཞན་གྱིའོ། །གལ་ཏེ་འབྱུང་བ་ཉིད་ཀྱིས་མེ་
བསྲེག་བྱ་སྲེག་ན། དེའི་ཚེ་ནམ་མཁས་ཀྱང་སྲེག་པར་འགྱུར་རོ། །འོན་ཏེ་རང་བཞིན་སོ་སོར་ངེས་པའི་ཕྱིར་མེ་ཁོ་ནས་སྲེག་གི །ནམ་མཁས་མ་ཡིན་ན་དེའི་ཚེ་ཡོན་ཏན་ཐམས་ཅད་ག་ལ་ཡོད་པའི་རྒྱུ་དེ་དང་བྲལ་ཡང་དབང་ཕྱུག་ཡོན་ཏན་དང་ལྡན་བས་ན་དེ་འདྲ་བའི་ནུས་པ་དང་ལྡན་པ་ཡིན་ནོ་ཞེས་བྱ་བའོ། །མི་མཚུངས་ཏེ་ཞེས་བྱ་བ་ནི་ལན་ནོ། །གཞན་ནི་ཞེས་བྱ་བ་ནི་དབང་ཕྱུག་གོ །གཏན་ཚིགས་དེས་ན་རང་བཞིན་ཁོ་ནས་དབང་ཕྱུག་ནི་ནུས་པ་མཚུངས་པ་མེད་པ་དང་ལྡན་ནོ་ཞེས་བྱ་བ་འདི་ལན་མ་ཡིན་ནོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་ལན་འདི་ཡིན་ནའོ། །དེའི་ཚེ་བདག་ཉིད་མངོན་འདོད་ཅེས་བྱ་བ་ལ་སོགས་པ་གོ་སླའོ། །དངོས་པོ་རང་བཞིན་ཉིད་བརྗོད་དོ་ཞེས་བྱ་བའི་རྣམ་པ་དེ་ལྟས་གཞན་གྱིས་བརྗོད་པའི་རྣམ་པ་བསལ་བས་ཐམས་ཅད་རྒྱལ་བ་ཐོབ་པར་འགྱུར་རོ་ཞེས་བྱ་བའི་དོན་ཏོ། །འགའ་ཞིག་ཏུ་ལན་བརྗོད་པས་ཞེས་འདོད་པ་དེར་ཡང་དེ་ལྟར་ཞེས་བྱ་བ་རྣམ་པ་འདིས་གལ་ཏེ་རྩོད་པའི་རྣམ་པ་དེ་འདྲ་བའི་ལན་ཐེབས་ན་དེའི་ཐམས་ཅད་རྒྱལ་བར་འགྱུར་རོ་ཞེས་བྱ་བའི་དོན་ཏོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །དེ་ལྟར་སྔ་མའི་བརྗོད་བྱ་ལྷག་མའི་ལན་བཏབ་ནས། བརྩམ་པའི་དོན་གྱི་གཞི་འདིངས་པ་ནི། གལ་ཏེ་ཚད་མ་ཡོད་པ་ཡིན་ཏེ་ཞེས་བྱ་བ་ལ་སོགས་པའོ། །དེ་འདི་ནི་དེ་ལྟར་སྦྱར་བ་ཡིན་ནོ། །རྟོགས་པ་ནི་དེ་ལྟར་ཡིན་ཏེ་ལེགས་པར་བརྗོད་དོ་ཞེས་བྱ་བ་འདི་དེ་མ་ཐག་ཏུ་དོན་འདི་ཡང་ཡིན་ཏེ་ཞེས་བྱ་བ་ནས། ཚད་མ་ཡོད་པ་མ་ཡིན་ནོ་ཞེས་བྱ་བའི་ཐ་ཚིག་གོ་ཞེས་བྱ་བའི་བར་གྱི་གཞུང་གི་དུམ་བུ་ཡིན་ལ། ཆད་གཞུག་ཉེས་ཀྱིས་འཁྲུལ་པ་སྐྱེད་པ་ཕྱིས་འདྲི་མཁན་གྱིས་གཞན་དུ་དྲིས་པ་ཡིན་ཏེ། མི་མཐུན་པའི་ཕྱིར་རོ། །བཤད་པར་ནི་གཞན་དག་གིས་མ་དཔྱད་པ་ས་དེ་ཁོ་ན་ལྟར་དར་བ་ཡིན་ནོ། །སྡོད་འཇུག་ཅེས་བྱ་བ་ལ་སོགས་པ་ནི་བསྡད་ཅིང་འཇུག་པ་ཞེས་བཟློག་པ་གཙོར་བསྟན་པའོ། །དབྱིབས་ཀྱི་ཁྱད་པར་ཞེས་བྱ་བ་ནི་རྡུལ་ཕྲ་རབ་ལ་ཡང་དབྱིབས་ཟླུམ་པོ་སྲིད་པས། རྩོད་པ་བྱེད་པ་ནི་ཆ་ཤས་ལྡན་པ་བཟུང་བའི་དོན་དུ་ཁྱད་པར་ཞེས་སྨོས་སོ། །དོན་བྱེད་ཅེས་བྱ་བ་ནི། དོན་བྱ་བ་མེད་པའོ། །སོགས་པའི་སྒྲས་ནི་སེམས་པའི་ཉེ་བར་ལེན་པ་ཅན་མ་ཡིན་པ་འདི་དང༌། འབྲས་བུ་ཉིད་དང་སྐྱེ་བ་
དང་ལྡན་པ་ལ་སོགས་པ་བཟུང་ངོ༌། །དེ་ལ་སྡོད་ནས་འཇུག་པ་དང་དོན་བྱེད་པ་ནི་ཆོས་ཉིད་འབྲས་བུའི་གཏན་ཚིགས་ཡིན་ལ། ལྷག་མ་ནི་ཆོས་ཅན་ཉིད་དོ། །དབྱིབས་ནི་གཉི་ག་ཡང་འབྲས་བུ་ཡིན་ཏེ། དབྱིབས་ནི་ཆོས་ཅན་ཡིན་ལ། དེ་དང་ལྡན་པ་ནི་ཆོས་ཅན་ཡིན་ནོ། །ཉེ་བར་འགོད་པ་ཡང་ཆོས་ཀྱི་སྒོ་ནས་སམ། ཆོས་ཅན་གྱི་སྒོ་ནས་ཀྱང་བྱ་སྟེ། ཐམས་ཅད་ཚད་མའི་དབང་དུ་བྱས་པའི་ཕྱིར་རོ། །གལ་ཏེ་འདི་དག་འབྲས་བུའི་བདག་ཉིད་ཡིན་མོད། དེ་དེ་ལྟ་ན་ཡང་དབང་ཕྱུག་ཅི་ལྟར་འགྲུབ་སྙམ་ནས་འབྲས་བུ་ལས་ཞེས་སྨོས་སོ། །དེ་ལྟ་མིན་ན་ཞེས་བྱ་བ་ནི་གལ་ཏེ་འབྲས་བུ་ལས་རྒྱུ་མི་འགྲུབ་ན་དེའི་ཚེ་མིག་ལ་སོགས་པ་རྒྱུ་གཞན་ལས་རྗེས་སུ་དཔོག་པར་མི་འགྱུར་ན། འགྱུར་བ་ཡང་ཡིན་ནོ། །དེས་ན་འབྲས་བུ་ལས་རྒྱུ་མི་འགྲུབ་པ་མ་ཡིན་ནོ། །འབྲས་བུ་གཏན་ཚེགས་དེ་དག་ཉིད་སྟོན་པ་ནི། འདི་ལྟར་ཞེས་བྱ་བ་ལ་སོགས་པའོ། །མདོང་བསྡུས་པ་ཡིན་པའི་ཕྱིར་ཡན་ལག་གཉིས་ཀྱང་ཉེ་བར་མཚོན་པ་ཙམ་ཡིན་ནོ། །དེས་ན་ཕྱོགས་ཀྱི་ཆོས་ནི་དཔག་པར་བྱ་བ་ཉིད་དུ་བྱས་སོ། །ཆོས་མི་མཐུན་པའི་དཔེ་ནི་རྡུལ་ཕྲ་རབ་པ་ལྟའོ། །དེ་ལྟར་འབྲས་བུའི་གཏན་ཚིགས་ཐམས་ཅད་རྗེས་སུ་འགྲོ་བ་དང་ལྡོག་པ་དང་ལྡན་པར་འདོད་པ་ཡིན་ནོ། །བློ་དང་ལྡན་པའི་རྒྱུས་བྱིན་གྱིས་བརླབས་པ་ཡིན་ཏེ་ཞེས་བྱ་བ་ལ་སོགས་པ་ནི་བསྒྲུབ་བྱ་འཕངས་པ་སྟེ། རིགས་པ་ཅན་གནའ་མའི་ཡུགས་ཀྱི་རྗེས་སུ་འབྲངས་ནས་རྣམ་འགྲེལ་འཇུག་པ་སྟོན་པའོ། །འམ་གྱི་སྒྲས་ནི་དབང་ཕྱུག་བྱེད་པ་པོ་ཉིད་དཔྱད་པར་འོས་པ་དང༌། དབྱིབས་ཀྱི་ཁྱད་པར་མ་གྲུབ་པར་ཡང་སྡུད་པའོ། །དེས་ན་བཤད་པ་ཡང་དེ་ཁོ་ན་ལྟར་ཡིན་ནོ། །ལྷག་མའི་དཔྱད་ནི་མདུན་དུ་སེམས་པར་འགྱུར་རོ། །མ་གྲུབ་པའི་ཕྱོགས་ཡིན་པའི་ཕྱིར་རོ་ཞེས་བྱ་བ་ལ་སོགས་པ་འདིས་ནི་གཏན་ཚིགས་ཕྱོགས་ཀྱི་ཆོས་མ་ཡིན་པ་ཞེས་བྱ་བ་ནི་གྲུབ་པ་ལ་སྒྲུབ་པའི་ནང་དུ་འདུས་སོ་ཞེས་བརྗོད་པ་ཡིན་ནོ། །ཡང་དོན་མེད་པ་ཉིད་དེ། འཆད་པར་འགྱུར་བ་དང་བསྒྲུབ་པར་འགྱུར་བའི་ཕྱིར་རོ། །མ་ངེས་པ་བཞིན་དུ་མ་གྲུབ་པ་ནི་ཉེ་བར་སྡུད་པར་མི་འགྱུར་རོ། །ཐམས་ཅད་དུ་ཡང་དོན་མེད་པ་དང་མི་ནུས་པའི་ཉེས་པ་གཉིས་ཁོ་ན་བརྗོད་པར་འགྱུར་རོ། །དེས་ན་མཐའ་དག་པས་དེ་ཉིད་ཡིན་ཡང་གཞན་གྱི་ནང་དུ་བསྡུ་བ་བསམས་པ་ཅི་བྱ་སྟེ།
དོན་མེད་པ་ཁོ་ན་དངོས་སུ་གསལ་བའི་ཕྱིར་རོ། །དཔེར་ན་གནོད་བར་འགྱུར་བའི་ཕྱོགས་ལ་གཏན་ཚིགས་ཀྱི་སྐྱོན་ཡོད་ཀྱང་མི་བརྩི་བདེ་བཞིན་དུ་ཡང་བསྡུ་བ་ལ་ཡང་གུས་པར་མི་བྱའོ། །ནུས་པ་མེད་པ་ཡང་དབྱེ་བ་རྣམ་པ་གསུམ་ཡོད་པའི་ཕྱིར་དེའི་རྣམ་པ་གཉིས་ཀྱི་ནང་དུ་མ་གྲུབ་པ་ལ་སོགས་ པ་གསུམ་གདོན་མི་ཟ་བར་བསུ་དགོས ་སོ། །དེས་ན་དོན་མེད་པའི་ཉེས་པ་ནི་གཞན་ཁོ་ནའོ་སྙམ་དུ་དགོངས་པའོ། །གཞན་ཇི་ལྟར་ཕྱོགས་འགྲུབ་ན་གང་གི་སྒྲུབ་པ་ལ་གྲུབ་པའི་ཉེས་པར་འགྱུར་ཞེ་ན། ཐམས་ཅད་ལས་ཀྱི་མཚན་ཉིད་ཞེས་གསུངས་སོ། །དེ་ག་ལས་ཞེ་ན། འདི་ལྟར་ཞེས་བྱ་བ་ལ་སོགས་པའོ། །ལས་དེ་ཡང་ཡིད་ཡིན་གྱི་ལུས་ལ་སོགས་པ་ནི་མ་ཡིན་ཏེ། དེས་ན་དེ་ནི་སེམས་པ་ཉིད་དོ། །དེས་ན་ཆོས་མངོན་པ་ལས། ལས་ལས་འཇིག་རྟེན་སྣ་ཚོགས་སྐྱེས་བར་བརྗོད་པའི་ཕྱིར། སེམས་ཅན་ཁོ་ནར་བྱེད་པར་བསྟན་ཏོ། །དེ་བས་ན་བློ་དང་ལྡན་པའི་རྒྱུས་བྱིན་གྱིས་བརླབས་པར་བསྒྲུབ་པ་ནི་གྲུབ་པ་ལ་སྒྲུབ་པ་ཁོ་ནའོ། །གལ་ཏེ་ལས་ལས་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། ལས་ལས་སྐྱེས་པ་ཉིད་ནི་མི་འདོད་པ་མ་ཡིན་ནོ། །གལ་ཏེ་དེའི་སྒོ་ནས་འཁོར་བ་ཐམས་ཅད་རྒྱུ་ཡིན་པར་བརྗོད་ན་དེའི་འགལ་བ་ཅི་ཡོད། ཐམས་ཅད་དབང་ཕྱུག་གིས་བྱིན་གྱིས་བརླབས་པ་ཁོ་ན་རྒྱུ་ཡིན་ནོ་ཞེས་གྲུབ་པ་ན་གྲུབ་པ་ལ་སྒྲུབ་པ་ཅི་འདྲ་བ་ཞིག་ཅེས་བྱ་བའོ། །དེ་ཉིད་གཞན་གྱི་ལུགས་ཀྱིས་ཁུངས་འབྱིན་པ་ནི། དེ་སྐད་དུ་ཡང་ཞེས་བྱ་བའོ། །དེ་ནི་ཞེས་བྱ་བ་ནི་འགྲོ་བའོ། །དབང་ཕྱུག་གིས་བསྐུལ་པ་ནི་པ་བཅུག་བའོ། །ངེས་མངོན་པར་གསལ་བ་ནི་བྱིན་གྱིས་བརླབས་པ་སེམས་པའི་མཚན་ཉིད་ལས་ཀྱི་མིང་ཅན་ཆོས་ཉིད་ལས་ཡིན་ནོ། །གཞན་གྱི་ལྟར་ན་ཆོས་ཡོན་ཏན་གཞན་ཡིན་པས་དེ་ལྟ་ན་ཡང༌། སངས་རྒྱས་པ་ལ་གྲུབ་པ་སེམས་པའི་རང་བཞིན་ཁས་བླངས་ནས་ཁྱད་པར་བསྒྲུབ་པར་འདོད་པ་ཡིན་ནོ། །གལ་ཏེ་དེ་ལྟར་གྲུབ་ཀྱང་གྲུབ་པ་ལ་སྒྲུབ་པ་ཉིད་དོ་སྙམ་པ་དབང་ཕྱུག་གི་སེམས་པས་ཞེས་བྱ་བའོ། །དེ་ནི་མེད་དེ་ཞེས་བྱ་བ་ནི་གྲུབ་པའི་མཐའོ། །སེམས་པ་གཞན་དེ་ནི་དབང་ཕྱུག་གི་སེམས་པའོ། །སྒྲུབ་པར་བྱེད་པ་དོན་མེད་པས་སྨྲས་པ་ནི་དབང་ཕྱུག་པ་ལྟོས་པ་ལ་གཞན་གྱིས་བསམ་པ་མེད་པ་ནི་ཞེས་བྱ་བ་ལ་སོགས་
པས་བསྟན་ནས། དེ་ལ་ཞེས་བྱ་བ་ལ་སོགས་པས་དོན་མེད་པ་ཉིད་གཞུང་འཛུགས་པར་བྱེད་དོ། །དོན་འདི་ཡིན་ཏེ། གལ་ཏེ་འབྲས་བུ་ལ་རྒྱུ་འཇུག་པའི་ཕྱིར་ཆོས་དང་ཆོས་མ་ཡིན་པ་རྒྱུར་འདོད་ཅིང་དེ་དག་ཀྱང་སེམས་པའི་རང་བཞིན་ཡིན་ལ་ངེས་པར་རྟོགས་པའི་སྒྲའི་དོན་ཡང་དེ་ཉིད་ཡིན་ན་དེའི་ཚེ། ངེས་པར་རྟོགས་པར་གཞན་གྱི་བྱ་བ་ཅི་ཡོད་ཅེས་བྱ་བ་ཡིན་ནོ། །གལ་ཏེ་སེམས་པ་ཙམ་ངེས་པར་རྟོགས་པའི་དོན་ཡིན་ན། འཁོར་བ་ཡང་ངེས་པར་རྟོགས་པ་ཅན་དུ་ཐལ་ལོ། །འདི་ནི་དེའི་ཞེས་བྱ་བའི་སེམས་པ་ཙམ་གྱི་མཐར་ཐུག་པ་ཡིན་གྱི་དབང་ཕྱུག་གི་ཇི་ལྟ་བ་བཞིན་མ་ཡིན་ནོ། །དབང་ཕྱུག་གི་འདི་ལ་ནི་འདི་བསྒྲུབ་པར་བྱ་བ་ཡིན་ནོ། །འདི་ནི་འདིའི་ཉེ་བར་ལེན་པ་ལ་སོགས་པའོ། །འདིས་ནི་འདི་བསྒྲུབ་པར་བྱའོ་ཞེས་བྱ་བའི་རྣམ་པར་ངེས་པ་རྟོག་པར་བྱེད་བ་ཡིན་ནོ། །དེས་ན་སེམས་པ་དང་ལྡན་པར་གནས་པར་མཚུངས་ཀྱང༌། ཡོན་ཏན་ཁྱད་པར་ཅན་དང་ལྡན་པའི་དབང་ཕྱུག་སྒྲུབ་པར་བརྩོན་པ་ཡིན་པའི་ཕྱིར་རོ། །སྒྲུབ་པར་བྱེད་པ་དོན་མེད་པར་ཇི་ལྟར་འགྱུར། སྒྲུབ་པར་བྱེད་པའི་སྟོབས་ཀྱིས་གྲུབ་པ་ཡོད་ཀྱང་དོན་མེད་པར་རྩོད་པའི་སྐབས་ནི་ཡོད་པ་མ་ཡིན་ནོ་སྙམ་དུ་དོགས་པ་ན། དཔེ་མ་གྲུབ་ཅེས་བརྗོད་པ་ཉིད་གསལ་བར་བྱེད་པ་ནི་དེ་ལྟ་ན་ཡང་དཔེ་མ་གྲུབ་བོ་ཞེས་བྱ་བའོ། །དེ་ལྟ་ན་ཡང་ཞེས་བྱ་བ་ནི་བློ་དང་ལྡན་བཅོམ་དོར་ནས། དབང་ཕྱུག་ཁས་ལེན་པ་ཡིན་ནོ་ཞེས་བྱ་བའི་དོན་ཏོ། །དཔེ་མ་གྲུབ་པ་ཉིད་སྟོན་པ་ནི་བུམ་པ་ལ་སོགས་པའི་སེམས་པ་དང་ལྡན་པས་ཞེས་བྱ་བ་ནས་ཐུབ་པ་མེད་པར་འགྱུར་རོ་ཞེས་བྱ་བའི་བར་རོ། །འདིས་ནི་མཐུན་པའི་ཕྱོགས་མེད་པའི་ཕྱིར་དེ་ལ་གཏན་ཚིགས་མེད་པའི་ཕྱིར་འགལ་བ་ཡིན་ནོ་ཞེས་བསྟན་ཏོ། །ཡང་ན་ལྡོག་པ་ཁྱབ་པར་མ་བསྟན་པའི་མཐུན་པའི་ཕྱོགས་དང་མི་མཐུན་པའི་ཕྱོགས་ལ་མ་མཐོང་བ་ཙམ་ལ་ལྟོས་ནས་ལྡོག་པའི་ཕྱིར་ཐུན་མོང་མ་ཡིན་པའི་མ་ངེས་པ་ཡིན་ནོ། །དེས་ན་སྒྲུབ་པར་བྱེད་པའི་སྟོབས་ལས་རྟེན་པ་གསལ་བ་ཡིན་ནོ། །འོན་ཏེ་ཞེས་བྱ་བ་ནི་གཞན་མཐུན་ཕྱོགས་སྒྲུབ་པའོ། །བཅུག་ནས་ཞེས་བྱ་བ་ནི་དབང་ཕྱུག་གིས་སོ། །ཅིའི་ཕྱིར་ཞེ་ན་ཐམས་ཅད་ཤེས་པའི་ཕྱིར་ནའོ། །དབང་ཕྱུག་གི་ཐམས་ཅད་ཤེས་པ་ཡིན་ཞེས་བྱ་བའི་དོན་ཏོ། །ཚིགས་སུ་བཅད་པའི་དོན་ཉིད་འཆད་པ་ནི་འདི་ལྟར་ཞེས་བྱ་བ་ལ་སོགས་པའོ།།
ངེས་པར་རྟོགས་མི་ནུས་པ་ནི་ཡུལ་ཐམས་ཅད་དོ། །གལ་ཏེ་ཡང་རྫ་མཁན་རང་གི་བྱ་བའི་ཉེ་བར་ལེན་པ་སོགས་པ། དོན་ཅུང་ཟད་ཤེས་པ་ཡིན་པ་དེ་ལྟ་ན་ཡང་མ་ལུས་པར་ཤེས་པ་ནི་མ་ཡིན་ནོ། །འདིས་ཡང་དག་པར་སྦྱིན་པ་རང་གི་མཚན་ཉིད་ཀྱི་ཤེས་པ་ནི་མ་ཡིན་ནོ། །ཕན་འདོགས་བྱེད་མ་ལུས་པར་ཤེས་པ་ཡང་མ་ཡིན་ཏེ། ཆོས་ལ་སོགས་པ་མ་རྟོགས་པའི་ཕྱིར་རོ། །དབང་ཕྱུག་གིས་ནི་ཐམས་ཅད་ཤེས་པའི་ཕྱིར་བུམ་པ་ལ་སོགས་པ་ལ་རྫ་མཁན་སྐུལ་བར་བྱེད་པ་པོ་ཞེས་རྣམ་པར་འཇོག་པ་ཡིན་ནོ་ཞེས་བྱ་བའོ། །དེ་ཡང་མ་ཡིན་ཏེ་ཞེས་བྱ་བའོ། །བྱེད་པ་པོ་སྒྲུབ་པས་ཞེས་བྱ་བ་ནི་ཐམས་ཅད་གྲུབ་པ་པོར་ཐམས་ཅད་ཤེས་པ་ཉིད་འགྲུབ་པར་འགྱུར་པ་ཐབས་གཞན་མེད་པའི་ཐམས་ཅད་བྱེད་པ་པོ་ཉིད་ཀྱང་ཐམས་ཅད་ཤེས་པ་དེ་ཉིད་ལས་ཡིན་ནོ་ཞེས་རྣམ་པར་གནས་པ་ན་ཐམས་ཅད་བྱེད་པ་པོ་ཉིད་དང༌། ཀུན་ཤེས་པ་ཉིད་གཉིས་ཕན་ཚུན་རྟེན་པ་ཆེན་པོར་འགྱུར་རོ། །དེས་ན་གཅིག་ཀྱང་འགྲུབ་པར་མི་འགྱུར་རོ་སྙམ་དུ་དགོངས་པའོ། །གལ་ཏེ་དབང་ཕྱུག་དམ་པ་ཞེས་བྱ་བའོ། །གཞན་དུ་ནི་མ་ཡིན་ནོ་ཞེས་བྱ་བ་ནི་ཐམས་ཅད་བྱེད་པ་པོ་མ་ཡིན་པར་འགྱུར་རོ། །སྐུལ་བར་བྱེད་པ་ཞེས་བྱ་བ་ནི་རྫ་མཁན་ལ་སོགས་པ་བསྐུལ་བའི་སྒོ་ནས་བུམ་པ་ལ་སོགས་པ་བྱེད་པའོ། །དེ་ལྟ་མ་ཡིན་ན་ཞེས་བྱ་བ་ཐམས་ཅད་ཤེས་པ་ཉིད་དང་བྲལ་བ་ནའོ། །དེའི་ཕྱིར་ཕན་ཚུན་རྟེན་པའི་ཉེས་པ་གཅིག་ཀྱང་མི་འགྲུབ་པའི་ཕྱིར་དཔེ་བསྒྲུབ་བྱས་སྟོང་ངོ༌། །འདིའི་ཐམས་ཅད་མཁྱེན་པ་ཉིད་ནི་སྲིད་པ་ཙམ་གྱི་ཡུལ་ཡང་མ་ཡིན་ནོ་ཞེས་བསྟན་པའི་ཕྱིར། གཞན་ཡང་ཞེས་གསུངས་སོ། །ཅིའི་ཕྱིར་འཇུག་པར་ནི་མི་བྱེད་ཅེ་ན། སྤྱོད་པ་དང་ལྡན་པ་ནི་ཞེས་གསུངས་ཏེ། དམ་པ་མ་ཡིན་པའི་སྤྱོད་པ་ལ་ནི་འཇུག་པར་མི་བྱེད་དོ་ཞེས་བྱ་བའི་དོན་ཏོ། །དེ་ནི་ཞེས་བྱ་བ་ནི་དབང་ཕྱུག་གོ །ལོག་པར་འཇུག་པ་ཞེས་བྱ་བ་ནི་ཆོས་མ་ཡིན་པ་བྱེད་པའོ། །དོན་འདི་ཡིན་ཏེ་ཐམས་ཅད་ཤེས་པ་ཡིན་ན་ཐམས་ཅད་གྲུབ་པ་བཟོད་པར་དཀའ་བའི་འཁོར་བའི་སྡུག་བསྔལ་དུ་ལྟ་བའི་སྐྱེ་བོ་ལ་བརྩེ་བ་ཁོ་ནར་རིགས་ཀྱི། དམ་པ་མ་ཡིན་པའི་སྤྱོད་པ་ལ་བསྐུལ་བར་ནི་མི་འགྱུར་རོ་ཞེས་བྱ་བའོ། །འོན་ཏེ་དེའི་བསམ་བ་རྟོགས་པར་སུས་ནུས་ཤེ་ན། ཀྱེ་མ་དད་པ་འདི་ནི་ཤིན་དུ་
ཆེ་སྟེ། ཤན་པ་ལ་སོགས་པ་ཡང་ཡུལ་དུ་གྱིས་ཤིག །ཐམས་ཅད་ཤེས་པ་ཉིད་ལ་སོགས་པའི་ཡོན་ཏན་ལ་ཐེ་ཚོམ་ཟ་ཡང་འདི་དབང་ཕྱུག་དམ་པ་ཉིད་ཡིན་པར་ཅི་ལྟར་འགྱུར། བསམ་པ་མ་རྟོགས་པར་ནི་ཐམས་ཅད་ཤེས་པ་ཐེ་ཚོམ་ཟ་བ་ཡང་མི་ལྡོག་གོ །དེས་ན་བུམ་པ་ལ་སོགས་པར་བྱེད་པར་ནུས་པ་མ་ཡིན་པས་སྐབས་ཉམས་སོ། །དེས་ན་རྩ་བ་ཉིད་ཤོར་རོ་ཞེས་བརྗོད་པ་ན་དེ་ཅི་ལྟར་ཚད་མ་ཡིན་ཞེས་བྱ་སྟེ། དེ་འདྲ་བའི་རྣམ་པར་དཔྱོད་པ་མེད་པའི་ཕྱིར་རོ། །ཡོངས་སུ་རྫོགས་པའི་རྣམ་པར་དཔྱོད་པ་མེད་པས་ཐེ་ཚོམ་ཡང་གྲུབ་པའི་ཕྱིར་དེ་སྲིད་པའི་ཐ་སྙད་དུ་ནུས་པ་མ་ཡིན་ནོ། །འོན་ཏེ་ཞེས་བྱ་བ་ནི་གཞན་གྱིའོ། །དེས་ན་ཞེས་བྱ་བ་ནི་དམ་པའི་ཉེ་བར་བསྟན་པ་བྱེད་པས་སོ། །དེ་ཡང་མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །ཆོས་མ་ཡིན་པ་ཡང་ཞེས་པ་ནི་ཆོས་འབའ་ཞིག་ལ་མ་ཡིན་པའོ། །རེ་ཞིག་དང་པོར་ཞེས་བྱ་བར་ནི་འཆད་པར་འགྱུར་རོ། །འོན་ཏེ་ཞེས་བྱ་བ་ནི་གཞན་གྱིས་ཏེ་དེས་ན་སྡིག་པ་ལ་རང་དབང་དུ་འཇུག་པ་མི་བྱེད་དེ་སྙམ་དུ་བསམས་པའོ། །དེ་ལྟ་ཡིན་ན་ཞེས་བྱ་བ་ནི་ལན་ནོ། །དེའི་ལས་ཀྱིས་བྱིན་གྱིས་བརླབས་ནས་དབང་ཕྱུག་རྟོགས་པར་བྱེད་པ་ཉམས་པའོ། །རྟོགས་པ་དང་ལྡན་པ་ནི་གཞན་གྱིས་བྱིན་གྱིས་བརླབས་ཀྱང་མི་འོས་པ་མི་བྱེད་དོ། །དེས་ན་འདི་ནི་དེའི་ལས་ཀྱིས་བྱིན་གྱིས་བརླབས་ཀྱང་སྐྱེ་བོའི་སྡིག་པ་ལ་མི་འཇུག་པར་མི་འགྱུར་རོ། །ལས་གང་གིས་ཁྱོད་ཀྱིས་བརླབས་ནས་སྡིག་པ་ལ་འཇུག་པར་བྱེད་པའི་ལས་དེ་ཡང་ཞེས་གོ་སླའོ། །འོན་ཏེ་ཞེས་བྱ་བ་ནི་གཞན་གྱིའོ། །བྱེད་པ་ནི་མ་ཡིན་གྱི་འོན་ཀྱང་སྐྱེ་བོ་ནི་རང་ཉིད་ཆོས་མ་ཡིན་པ་བྱེད་པ་ཡིན་ནོ་སྙམ་དུ་བསམས་པའོ། །དེ་ལས་གཞན་པའི་དབང་ཕྱུག་བཞིན་ནོ་ཞེས་བྱ་བ་ནི་འཇིག་རྟེན་གྱི་དབང་ཕྱུག་བཞིན་ནོ། །དེ་ཡང་སྙིང་པོ་མེད་དེ་ཞེས་བྱ་བ་ནི་གྲུབ་པའི་མཐའོ། །གང་གིས་སྐྱེ་བོ་རྣམས་སྡིག་པ་བྱེད་པ་འགོག་པར་བྱེད་པར་དབང་ཕྱུག་གཞན་ལ་རྣམ་པ་འདྲ་བའི་ནུས་པ་ཡོད་པ་མ་ཡིན་ནོ། །དེས་ན་དེ་དག་གིས་ཆོས་མ་ཡིན་པའི་བྱེད་པ་དེའི་འབྲས་བུ་མྱོང་དུ་འཇུག་པ་ཡིན་ནོ། །དབང་ཕྱུག་ནི་འཇིག་རྟེན་ཐམས་ཅད་ལས་འདས་པའི་བློ་དང་ལྡན་པར་འདོད་དོ། །དེས་ན་དེ་ནི་སྡིག་པ་བྱེད་པ་དགག་པར་ནུས་པ་ཉིད་དོ། །དེ་ལྟར་ཡིན་ཡང་ཆོས་མ་ཡིན་པ་བྱེད་པ་མེད་པའི་ཕྱིར་དེའི་
འབྲས་བུ་མྱོང་བར་བྱེད་པ་མ་ཡིན་སྙམ་དུ་དགོངས་པའོ། །འོན་ཏེ་འདི་ནུས་པ་མེད་པ་ཉིད་ཡིན་ན་ཞེས་བྱ་བ་ནི་གཞན་གྱིའོ། །འདི་ནི་སྡིག་པ་བྱེད་པའི་ཟློག་པ་ལ་ནུས་པ་མེད་པ་ཁོ་ནའོ་ཞེས་བལྟ་བར་བྱའོ། །སྡིག་པའི་དབང་ཕྱུག་གི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མ་ཡིན་པ་ཁོ་ནའོ་ཞེས་བསམ་པའོ། །ལན་དུ་དེ་ལྟ་ཡིན་ན་ཞེས་བྱ་བ་སྟེ་ནུས་པ་མེད་པ་ཡིན་ནའོ། །ཅི་དང་འདྲ་བར་མ་བྱས་ཤེ་ན། སྡིག་བཞིན་ཞེས་གསུངས་སོ། །དཔེར་ན་དམ་པའི་དོན་དང་ལྡན་པ་ཉིད་མེད་པར་ཁས་བླངས་བའི་ཕྱིར་སྐྱེ་བོ་རྣམས་ཀྱི་སྡིག་པ་ཉིད་དེས་མ་བྱས་པ་བཞིན་དུ་འབྲས་བུ་གཞན་ལ་ཡང་དེས་བྱས་པར་ཡིད་ཆེས་པ་ཅི་ཡོད། དེས་ན་སྡིག་པས་འཁྲུལ་པའི་ཕྱིར་འདིས་འབྲས་བུ་ལ་མ་ཁྱབ་པས་ན་དམ་པའི་དོན་དང་ལྡན་པ་ཆོས་ལ་སོགས་པ་ཡང་དེ་ལས་ཡིན་པ་ཅི་སྟེ་ཁས་ལེན། སོགས་པའི་སྒྲས་ནི་ཐར་པ་དང་ཡོན་ཏན་གཞན་དུ་གཟུང་ངོ༌། །འདི་ལ་ཞེས་བྱ་བ་ནི་གཞན་ལ་ཆོས་མ་ཡིན་པའི་འབྲས་བུ་སྟེར་བ་ལའོ། །དེའི་ཚེ་བདེན་པ་དང་བདེན་པ་མ་ཡིན་པ་ཉེ་བར་སྟོན་པ་ཚད་མར་ཅི་ལྟར་ཁས་ལེན་ཏེ་མ་ཡིན་པ་ཁོ་ནའོ་ཞེས་བྱ་བའི་དོན་ཏོ། །ཁྱེད་ཚད་མ་དང་ལྡན་པ་ཆེན་པོ་ཡིན་ནོ་ཞེས་འབྲེལ་ཏོ། །དེ་ལྟ་ཡིན་ན་ཞེས་བྱ་བ་ནི་ཆོས་དང་ཆོས་མ་ཡིན་པས་སྐུལ་བར་བྱེད་པ་པོ་ཡིན་ན་ཡང་ངོ༌། །བདག་ཉིད་ནི་རྟག་པ་ལ་སོགས་པའི་ཡོན་ཏན་དང་ལྡན་པའོ། །གཞན་གྱི་དོགས་པ་བསུ་ནས་འགོག་པ་ནི་གལ་ཏེ་སྲོག་ཆགས་ཐམས་ཅད་ཀྱི་བདག་ཀུན་འབྲས་བུ་ཐམས་ཅད་ཀྱི་བྱེད་པ་པོ་མ་ཡིན་ཏེ། རི་ལ་སོགས་པའི་འབྲས་བུ་ལ་སེམས་ཅན་འགའ་ཞིག་གི་ཆེད་དུ་བསམ་པའི་བྱ་བ་མ་དམིགས་སོ་ཞེས་བྱ་བའི་དོན་ཏོ། །གལ་ཏེ་དེ་ལྟར་རྟོགས་ན་དེའི་ཚེ་ཡང་དབང་ཕྱུག་དེའི་ཐམས་ཅད་ཀྱི་བྱེད་པ་པོ་སྟེ། བྱེད་པ་པོར་སྨྲ་བ་གང་དུ་ དགོས་ཏེ། དེ་ལྟར་མ་དམིགས་པ ་ནི་ཐུན་མོང་ཡིན་པའི་ཕྱིར་རོ། །ལག་པའི་རྩོམ་པ་ལ་སོགས་པ་ནི་ཕ་རོལ་བོ་རང་ཉིད་ཀྱིས་འདོད་པ་མ་ཡིན་པས་འདོད་པ་ཙམ་ཡོད་དོ་ཞེས་བརྗོད་པར་བྱ་བ་ཡིན་ན། དེ་ཡང་སུན་ཕྱུང་བ་ཡིན་ཏེ། མི་རིགས་པའི་བྱ་བ་མཐོང་བའི་ཕྱིར་རོ། །དེའི་ཕྱིར་དེ་བྱིན་གྱིས་བརླབས་པ་ཙམ་གྱིས་འབྲས་བུ་ཐམས་ཅད་སྐྱེ་བ་ཡིན་ཏེ། དངོས་པོའི་ནུས་པ་ནི་བསམ་གྱིས་མི་ཁྱབ་པའི་ཕྱིར་རོ་ཞེས་བྱ་བ་ཙམ་ཞིག་ལུས་པ་ཡིན་
ནོ། དེ་ལྟ་ན་ནི་འོ་ན་ལྟ་བའི་དྲ་བས་བཅིངས་པའི་བདག་ཐམས་ཅད་ཉིད་ཀྱིས་ཐམས་ཅད་བྱེད་པ་ལ་ཆད་པ་ཅི་ཡོད་དེ། འདིར་ཡང་དངོས་པོའི་ནུས་པ་བསམ་གྱིས་མི་ཁྱབ་པའི་ཕྱིར་རོ་ཞེས་ནི་བརྗོད་པར་ནུས་པའི་ཕྱིར་རོ། །ནུས་པ་གཞི་ངེས་པ་ཅན་དུ་དམིགས་པ་ན་གཞན་དུ་དོགས་པ་ན་མི་འཐད་དོ། །འདི་ནི་མུན་པར་ལག་པ་ནོམས་པ་ཡིན་པའི་ཕྱིར། གནོད་བྱེད་མེད་པ་ལས་གཞན་དུ་རྣམ་པར་རྟོག་པ་ལ་ཡང་དགག་པ་ཅི་ཡོད། དེ་ལྟ་ཡིན་ཡང་བདག་མང་པོས་རི་ལ་སོགས་པ་གཅིག་བྱེད་པར་འགྱུར་ཏེ། ཐུན་མོང་གི་ལས་ཀྱི་སྐྱེད་པའི་ཕྱིར་ཞེས་བྱ་བའི་རྟོག་པར་ཡང་འགྱུར་བ་ཁོ་ནའོ། །དེ་ལྟ་ན་རྟོག་པ་འདི་མཐའ་ཞིག་ཏུ་འགྱུར་རོ་ཞེ་ན་རི་ལ་སོགས་པ་མང་པོ་རྣམས་ཀྱང་བདག་གཅིག་གིས་བྱེད་དོ་ཞེས་བྱ་བའི་རྣམ་པར་རྟོག་པ་ཁོ་ནར་ཡང་འགྱུར་བ་ཁོ་ན་སྟེ། གཉི་ག་ལ་ཡང་གནོད་པའི་ཚད་མ་མེད་པའི་ཕྱིར་རོ། །རི་ལ་སོགས་པ་གཅིག་ཁོ་ནས་བྱས་སོ་ཞེས་ངེས་པ་ནི་མ་ཡིན་ནོ། །གཞན་དག་རྣམ་པ་ཅི་ཞིག་ལྟར་བྱེད་པ་པོ་གཅིག་ཡོད་པར་ངེས་པའི་དོགས་པ་བསུ་ནས་སེལ་བ་ནི། འོན་ཏེ་གཞན་དང་ཞེས་བྱ་བའོ། །གལ་ཏེ་ཐམས་ཅད་ལ་བྱེད་པ་པོ་གཅིག་སྒྲུབ་པ་ལ་ཡོན་ཏན་ཅི་ཡོད་ཅེ་ན། བྱེད་པ་པོ་འདི་ཞེས་སྨོས་སོ། །དེ་ལས་མངོན་པར་འདོད་པའི་དོན་འགྲུབ་པའི་ཕྱིར། བསྙེན་ཅིང་བཀུར་བར་བྱ་བ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཐམས་ཅད་མཁྱེན་པ་ཙམ་གྱིས་བསྙེན་པར་འོས་པ་མ་ཡིན་ནམ་སྙམ་ན། ཀུན་ཤེས་པ་ཙམ་གྱིས་ཞེས་སྨྲས་སོ། །ཐམས་ཅད་བྱེད་པ་པོ་མ་ཡིན་པའི་ཕྱིར་མཆོག་སྦྱིན་ལ་སོགས་པའི་ནུས་པ་མེད་པའོ། །ཀུན་མཁྱེན་ཡིན་ཡང་ཞེས་བྱ་བ་ནི་ཐམས་ཅད་བྱེད་པ་ལ་སོགས་པའི་ཡོན་ཏན་དང་ལྡན་ཡང་ཞེས་བྱ་བའི་དོན་ཏོ། །ཅི་ལྟར་ཞེ་ན། དགོས་པ ་མེད་པའི་ཕྱིར་ཏེ། དགོས་པ ་ཆུང་བའི་ཕྱིར་རོ། །ཇི་ལྟར་ དགོས་པ ་ཆུང་སྙམ་ན། བུ་རམ་དར་བ་བྱེད་པ་པོ། །ཞེས་གསུངས་ཏེ། འདི་རིགས་པ་དང་མི་རིགས་པ་འདྲེས་པ་ལ་གྲགས་པ་ཡིན་ནོ། །དེ་ཉིད་གསུངས་པ་ནི། དོན་དང་དོན་བྱེད་ལ་འཆེལ་ཞེས་བྱ་བའོ། །རྟོག་པ་ཡིན་ན་ནི་གཞན་ལ་ཕན་པ་ཁོ་ན་རིགས་ན། དེ་ནི་ཕན་པ་འགའ་ཞིག་རེས་འགའ་བྱེད་ལ་དོན་མ་ཡིན་པ་ནི་སྣ་ཚོགས་པ་བྱེད་པས་འདྲེས་པའི་བྱ་བ་ཅན་ཡིན་ཏེ། དེས་
འདི་ལ་ཕན་པ་ཆུང་བ་ཁོ་ནའོ། །དེའི་ཕྱིར་མཆོག་སྦྱིན་པའི་འབྲས་བུ་ཐམས་ཅད་མཁྱེན་པ་ཉིད་ཀྱི་དོན་དུ་ཐམས་ཅད་བྱེད་པ་པོ་གཅིག་དོན་དུ་གཉེར་བ་ནི་དོན་མེད་དོ་ཞེས་བྱ་བའི་དོན་ཏོ། །དེ་ལྟར་བྱེད་པ་པོ་འདི་གཙོ་བོ་སྟེ་ཞེས་བྱ་བ་ལ་སོགས་པ་བསལ་ནས་ཚིག་ལེའུར་བྱས་པ་སྔ་མའི་དོན་བརྗོད་པའི་ཕྱིར་བཤད་པ། ཀུན་ཤེས་ཉིད་དུ་གྲུབ་ན། ཐམས་ཅད་བྱེད་པར་ནུས་པ་ཡིན་ཞིང་ཐམས་ཅད་བྱེད་པར་ནུས་པ་ཡིན་ན་ནི། ཐམས་ཅད་བྱེད་པ་པོ་ཡིན་ལ། ཐམས་ཅད་བྱེད་པ་པོ་ཡིན་ན་ཡང་ཐམས་ཅད་ཤེས་པ་ཉིད་ཡིན་པའི་ཕྱིར་འཁོར་ལོར་འགྱུར་རོ། །སྔར་ནི་གོ་རིམས་ཀྱི་ཁྱད་པར་ལ་ངེས་པ་ལ་ལྟོས་པ་ཁོ་ནས་ཕན་ཚུན་རྟེན་པར་བརྗོད་ལ། དེ་ལྟ་ན་དངོས་པོ་ལ་ལྟོས་ནས་ཀྱང་གཞན་གྱིས་སྨྲས་པ་ཉིད་ལས་འཁོར་ལོར་འགྱུར་བ་ཡིན་ནོ། །ཐམས་ཅད་ཀྱི་བྱེད་པ་པོ་གཅིག་འདོད་པ་ཡིན་ཏེ། དེ་ལྟ་མ་ཡིན་ན་ཐམས་ཅད་མཁྱེན་པར་མི་འགྱུར་རོ་ཞེས་སྨྲས་པས་ནི། ཐམས་ཅད་ཤེས་པ་ཡོད་པས་ཐམས་ཅད་བྱེད་པ་པོའི་བྱ་བ་བསྟན་པའི་ཕྱིར་རོ། །སུན་འབྱིན་པ་གཞན་ཡང་བརྗོད་པ་ནི་རྫ་མཁན་ལ་སོགས་པ་ཐམས་ཅད་ཤེས་པ་མ་ཡིན་པ་ཡང་བུམ་པ་ལ་སོགས་པའི་བྱེད་པ་པོར་མཐོང་ན། བུམ་པ་ལ་སོགས་པའི་རང་བཞིན་གྱི་དཔེ་དེ་ཉིད་ལས་རོ་ལ་སོགས་པ་ལ་ཡང་ཐམས་ཅད་རིག་པའི་བྱེད་པ་པོ་ཅི་ལྟར་འགྲུབ་སྟེ། ཐམས་ཅད་རིག་པ་མ་ཡིན་པ་ཁོ་ནར་འགྲུབ་པོ་ཞེས་བྱ་བའི་དོན་ཏོ། །གལ་ཏེ་འདི་འདྲ་བའི་ཁྱད་པར་དང་འགལ་བ་ནི་རྗེས་སུ་དཔག་པ་ཐམས་ཅད་ལ་རྙེད་པར་སླ་བ་ཡིན་ནམ། བྱེད་པ་པོ་ཐམས་ཅད་རིག་ པ་ཉིད་དུ་འགྱུར་དགོས ་སོ་ཞེས་ཀྱང་མི་བརྗོད་པས། གང་གིས་ཁྱད་པར་དང་འགལ་བར་དོགས་པར་འགྱུར་སྙམ་དུ་དོགས་ན། དེ་ལྟ་ཞེ་ན་ཞེས་སྨོས་སོ། །དོན་འདི་ཡིན་ཏེ། འཆད་པར་འགྱུར་བའི་ཚུལ་གྱིས་འབྲས་བུ་ཙམ་ལ་བློ་དང་ལྡན་པ་མ་ཁྱབ་པའི་ཕྱིར་དཔེ་ལ་མཐོང་བ་ཙམ་གྱིས་ཁྱབ་པར་གྲུབ་བར་འདོད་པ་ཡིན་ནོ། །མཐོང་བ་དེ་ནི་ཐམས་ཅད་རིག་པ་མ་ཡིན་པ་ལ་ཡང་ཡོད་དོ། །དེས་དཔེའི་རྗེས་སུ་འབྲངས་ནས་བརྟགས་པ་ནི། གལ་ཏེ་ཐམས་ཅད་རིག་པ་མ་གྲུབ་པ་ན་དེའི་ཚེ་གཉུག་མའི་དབང་ཕྱུག་གྲུབ་པ་ཉམས་སོ། །དཔེ་ལ་མཐོང་བ་ཙམ་སྒྲུབ་བམ། དེ་ལྟ་མ་ཡིན་འབྲས་བུ་ལ་སོགས་
པ་ལ་ཐམས་ཅད་ཤེས་པས་ཁྱབ་པ་མ་གྲུབ་པ་གང་ཡིན་པ་དེ་གཉི་ག་ནི་བློ་དང་ལྡན་པ་ལ་ཡང་མཚུངས་སོ། །གཞན་ཡང་དབང་ཕྱུག་འདི་བྱེད་པ་པོ་མེད་པ་ནམ་མཁའ་ལ་སོགས་པ་ལ་ནི་དོགས་པར་བྱ་བ་མ་ཡིན་ནོ། །འབྲས་བུ་བྱེད་པ་པོ་མཐོང་བ་རྣམས་ལ་ཡང་རྫ་མཁན་ལ་སོགས་པ་ཡིན་པ་པོ་དགེའོ།། རི་ལ་སོགས་པ་གཞན་ལ་ཡང་ལས་ཉིད་ནུས་པའི་ཕྱིར་དབང་ཕྱུག་ནི་ དགོས་པ ་མེད་དོ། །ལས་ཀྱི་ནུས་ པ་ནི་གདོན་མི་ཟ་བར་ཁས་བླང་དགོས ་ཏེ། དེ་ལྟ་མ་ཡིན་ན་ཕན་འདོགས་བྱེད་ཉིད་མི་འགྱུར་རོ་ཞེས་སྟོན་པ་ནི་རང་གི་བྱ་བ་ཞེས་བྱ་བ་ལ་སོགས་པའོ། །ཅི་ལྟར་བྱེད་པ་པོ་ཡིན་ཞེས་བྱ་བ་ནི་སྐབས་ཀྱི་ཐམས་ཅད་དབང་ཕྱུག་གིས་ཞེས་བྱ་བའོ། །གལ་ཏེ་ལས་ཀྱི་ནུས་པ་ཁས་བླངས་པས་རི་ལ་སོགས་པ་ལ་དབང་ཕྱུག་སྤོང་ན་དེའི་ཚེ་རྫ་མ་ལ་ཡང་རྫ་མཁན་དོན་མེད་དོ། །དེ་ལ་མ་མཐོང་བ་ཞེས་བྱ་བས་ནི་ནུས་པ་མ་ཡིན་ནོ་ཞེ་ན། དེ་ནི་མ་ཡིན་ཏེ་འབྲས་བུ་དེ་ལྟ་བུ་ལ་ནི་བྱེད་པ་པོའི་ནུས་པ་མངོན་སུམ་གྱིས་གྲུབ་པའི་ཕྱིར་ན་སྤང་བར་མི་ནུས་པའི་ཕྱིར་རོ། །རི་ལ་སོགས་པ་ལ་ནི་དེ་ལྟར་མ་མཐོང་ངོ༌། །དེ་ཉིད་ཀྱི་ཕྱིར་རྗེས་སུ་དཔོག་གོ་ཞེ་ན། འདི་ལ་སྒྲུབ་པར་བྱེད་པའི་ནུས་པ། ཕྱིས་སེམས་པར་འགྱུར་རོ་ཞེས་བཤད་ཟིན་ཏོ། །རྣམ་པར་གཞག་པའི་ཉེས་པ་འདི་ནི་ཞར་ལས་བྱུང་བ་ཡིན་ཏེ། འདི་ཡང་བསྟན་བཅོས་སུ་ནི་དཔྱད་པར་བྱ་བ་ཡིན་པའི་ཕྱིར་རོ། །གཞན་བུམ་པ་ལ་སོགས་པ་ལ་དབང་ཕྱུག་དོན་མེད་པར་བརྗོད་པར་མི་བཟོད་ནས། གལ་ཏེ་ཤེས་ཀྱང་བཞེས་སྨྲས་སོ། །ཁྱད་པར་མེད་ཕྱིར་ཞེས་བྱ་བ་ནི་སུན་འབྱིན་པའོ། །དེ་བཞིན་ཞེས་བྱ་བ་ནི་ཤེས་ཀྱང་ངོ༌། །གཞན་གྱི་བསམས་པས་བསྐུལ་བར་མི་རིགས་པ་ཉིད་དུ་དོགས་པ་བསུ་བ་ནི། འོན་ཏེ་ཞེས་བྱ་བའོ། །ཀུན་དུ་ཞེས་བྱ་བ་ནི། རྫ་མཁན་ལ་སོགས་པ་འབྲས་བུ་ལ་མཁས་པ་གང་ཡིན་པའི་ཡང་ངོ༌། །བསྐུལ་བའི་སྒོ་ནས་ཐམས་ཅད་བྱེད་པ་པོ་ཉིད་ཀྱིས་བདག་ཐམས་ཅད་ཤེས་པ་ཉིད་དུ་ཅི་འགྲུབ་བྱ་བའི་སྙམ་པའི་འབྲས་བུའི་བློས། དོན་མེད་ཀྱང་སྐུལ་བར་བྱེད་དོ་ཞེས་བྱ་བའི་ཐ་ཚིག་གོ །ལན་དུ་དེ་ནི་དེ་ལྟར་གང་གིས་ཤེས་ཞེས་བྱ་བའོ། །རང་གི་ཚིག་ཏུ་བརྗོད་པ་ཙམ་མོ་སྙམ་དུ་དགོངས་པའོ། །གཞན་ཡང་ཞེས་བྱ་བ་ནི། སུན་འབྱིན་པ་བཞིན་ནོ། །འོན་ཏེ་གང་ཞི་རང་ཉིད་ངེས་
པར་བརྟགས་ནས་འཇུག་པ་དེའོ། །བློ་ཡང་དབང་ཕྱུག་གི་མཐུ་ལས་དེ་འདྲ་བར་གྱུར་པ་ཡིན་ནོ་སྙམ་ན། ཀུན་གྱི་བློ་ཉིད་ཅེས་གསུངས་སོ། །རྫ་མཁན་མཁས་པར་མཐོང་བ་ནི་དགག་པར་བྱ་བ་མ་ཡིན་ནོ། །འོན་ཀྱང་དེའི་དབང་ཕྱུག་ཉིད་ལས་ཡིན་ནོ་ཞེས་གཞན་བསྐུལ་ཡང་སླར་གསོ་བར་བྱེད་དེ་སྔ་མ་བཞིན་ཚད་མ་མ་ཡིན་པ་ཁོ་ནའོ། །འོན་ཏེ་རེ་ཞིག་རྫ་མཁན་ལ་ལྷན་ཅིག་སྐྱེས་པའི་མངོན་ཤེས་ནི་ཡོད་པ་མ་ཡིན་ཏེ། བྱིས་པ་ལ་སོགས་པའི་ཚེ་ཡང་ཡོད་པར་ཐལ་བའི་ཕྱིར་རོ། །དེས་ན་དེའི་རེས་འགའ་བ་དེ་ཡང་མ་མཐོང་བ་འགའ་ཞིག་གི་ནུས་པ་ལས་ཡིན་པའི་ཕྱིར། དེ་ཉིད་དབང་ཕྱུག་ཡིན་ནོ་སྙམ་ན། རྒྱུ་ནི་ཞེས་གསུངས་སོ། །བྱེད་མཁས་པའོ་ཞེས་བྱ་བའི་དོན་བྱེད་པ་པོ་ཉིད་གང་ཡིན་པ་དེ་ནི་འཇིམ་པ་དང༌། དབྱིག་པ་དང་འཁོར་ལོ་ལ་སོགས་པ་དེ་ལྟར་ཚོགས་པ་ཡིན་ནོ་ཞེས་རྒན་པོ་རྣམས་ཀྱིས་ཉེ་བར་བསྟན་པ་ལས་ཡིན་ནོ། །སོགས་པའི་སྒྲས་ནི་བསྟན་པ་མེད་ཀྱང་བྱ་བའི་རིམ་པ་མཐོང་བ་ལས་དེ་འཛིན་པ་ཡིན་ནོ། །ཉེ་བར་སྟོན་པ་པོ་ཉིད་ལ་ཉེ་བར་བསྟན་པ་ག་ལས་ཡིན་ཞེས་ན། དེ་ལས་གཞན་པའི་ཉེ་བར་སྟོན་པའི་ཐད་ལས་སོ། །དེ་བཞིན་ཐོག་མ་མེད་པའི་ཕྱིར་སྔ་མ་སྔ་མ་ལས་ཕྱི་མ་ཕྱི་མ་འབྱུང་བ་ཡོངས་སུ་རྫོགས་པའི་ཕྱིར་དབང་ཕྱུག་རྟག་པས་ཅི་བྱ་སྙམ་དུ་དགོངས་པའོ། །དེས་ན་འཇུག་པ་ཐམས་ཅད་ནི་ཞེས་བྱ་བ་ནི་མཇུག་སྡུད་པའོ། །རྫ་མཁན་ལ་སོགས་པ་ནི་རང་བསྡད་ཅིང་བསྡད་ཅིང་འདུག་པ་ཡིན་ལ། སྟེའུ་ལ་སོགས་པ་ཡང་བཟོ་བྱ་བར་འདོད་པས་ཡིན་ཞིང༌། རྡུལ་ཕྲ་རབ་ལ་སོགས་པ་ནི་ལས་ཀྱི་མཐུ་ལས་ཡིན་ནོ། །དེ་བཞིན་དུ་དོན་བྱ་བ་བྱེད་པ་ལ་སོགས་པ་ཡང་དབང་ཕྱུག་གིས་བསྐུལ་བ་ལས་མ་ཡིན་ནོ་ཞེས་བཤད་པར་རིག་པར་བྱའོ། །དབང་ཕྱུག་ཐམས་ཅད་ཀྱི་བྱེད་པ་པོ་མ་ཡིན་མོད། གཙོ་བོ་ལ་སོགས་པ་ནི་མ་ཡིན་ནོ་སྙམ་ན། དེའི་ཕྱིར་ཞེས་གསུངས་སོ། །རིག་པ་དེ་ཉིད་ཀྱི་ཕྱིར་རོ། །གཙོ་བོ་ཡོན་ཏན་གསུམ་གྱི་རང་བཞིན་དུ་སྐྱེས་བུ་གདོད་མ་ནས་ཡོད་པ་དང༌། དབྱིག་གི་སྙིང་པོ་ལ་སོགས་པ་ལུང་ལས་ཇི་ལྟར་བརྟགས་པ་རྣམས་ནི་བྱེད་པ་པོར་ངེས་པ་མ་ཡིན་ནོ་ཞེས་བྱ་བའི་དོན་ཏོ། །དངོས་སུ་བརྗོད་པའི་གཏན་ཚིགས་གསུམ་སུན་ཕྱུང་ཟིན་ཀྱང་ད་ཡང་དབྱིབས་ཀྱི་ཁྱད་པར་ལ་
བརྗོད་པ་ནི། དབྱིག་དང་ལྡན་པའི་ཕྱིར་རོ་ཞེས་བྱ་བ་ཡང་ཞེས་བྱ་བའོ། །རྩ་བར་དབྱིབས་ཀྱི་ཁྱད་པར་ལྡན་པའི་སྒྲ་བྱས་པའི་ཕྱིར། ཆོས་ཙམ་གཏན་ཚིགས་སུ་ངེས་པར་གཟུང་དུ་འོས་པས་ན། དབྱིབས་དང་ལྡན་པ་ཞེས་སྨོས་སོ། །དེ་ཡིན་དང་གང་དང་གང་དབྱིབས་ཡིན་པའམ། དབྱིབས་དང་ལྡན་པ་གང་ཡིན་པ་དེ་དང་དེ་ནི་བློ་དང་ལྡན་པས་སྔོན་དུ་སོངས་བ་ཡིན་ཏེ་ཞེས་གཉི་ག་ཡང་སྐྱེས་བུའི་འབྲས་བུའི་འབྲས་བུར་འདོད་པ་ཡིན་ནོ། །འབྲས་བུ་ཡིན་ཡང་གཏན་ཚིགས་མ་ཡིན་པར་ཅི་ལྟར་འགྱུར་ཞེ་ན། དབྱིབས་ཐམས་ཅད་ཅེས་གསུངས་སོ། །བར་འདིར་དབང་ཕྱུག་དུ་སྨྲ་བ་ལ་གླག་ཐོད་པའི་གྲངས་ཅན་སུན་དབྱུང་བའི་ཕྱིར་ཉེ་བར་དགོད་པ་ནི། དེ་ལ་ཅི་ལྟར་ཞེས་བྱ་བ་ལ་སོགས་པའོ། །སེམས་པའི་རྒྱུ་དང་རྗེས་སུ་འབྲེལ་པ་མ་ཡིན་ཞེས་བྱ་བ་ནི་སེམས་པ་ཅན་གྱི་རྒྱུ་དང་ལྡན་པ་མ་ཡིན་པའོ། །དེ་ལྟར་ཞེས་བྱ་བ་ནི་སེམས་པ་མ་ཡིན་པའི་རྒྱུ་དང་ལྡན་པའོ། །གལ་ཏེ་གཅིག་སེམས་པ་མེད་པའི་རྒྱུ་དང་ལྡན་པ་ཡིན་པས་བུམ་པ་ལ་སོགས་པ་ཡང་དེ་བཞིན་དུ་ཡིན་ནོ་ཞེས་བྱ་བ་གོ་ག་ལས་ཤེ་ན། གཙོ་བོ་ཞེས་བྱ་བས་ཞེས་སྨོས་སོ། །གང་གི་ཕྱིར་གསལ་བ་མཐའ་དག་སེམས་པ་མེད་པའི་རང་བཞིན་ཅན་གཙོ་བོས་བཅུག་པ་ཡིན་པ་དེའི་ཕྱིར་བུམ་པ་ལ་སོགས་པ་ཡང་དེ་བཞིན་དུ་ཡིན་ནོ་སྙམ་དུ་དགོངས་པའོ། །གལ་ཏེ་བུམ་པ་ལ་སོགས་པ་རྫ་མཁན་ལ་སོགས་པས་བྱེད་པར་མ་དམིགས་སམ། དེས་དེ་སྐད་ཅི་སྟེ་བརྗོད་སྙམ་དུ་དོགས་ན། ཇི་ལྟར་ཤིང་ལས་ཞེས་གསུངས་སོ། །འདི་ནི་ཤིང་སེམས་པ་མེད་པའི་རྒྱུ་ཅན་དུ་བསྟན་ཏོ། །བུམ་པ་ལ་སོགས་པ་ཡང་མཚུངས་པ་ཉིད་དུ་སྟོན་པ་ནི་དེ་བཞིན་ཞེས་བྱ་བ་ལ་སོགས་པའོ། །འཇིམ་གོང་ལ་ཡང་བུམ་པའི་རང་པའི་རང་བཞིན་དུ་བུམ་པ་ཉིད་ཕྱིར་རོ། །འོ་ན་རྫ་མཁན་ཅི་ དགོས་སྙམ་ན། རྫ་མཁན་དག་ལ་སོགས་པ ་ནི་ཞེས་སྨྲས་སོ། །དཔེར་ན་རང་གི་བུ་ལོན་ཁྱེར་མཁན་ལ་གཏད་པའི་རྫས་ནོར་བདག་གིས་བླང་བར་བྱ་བ་ཡིན་ལ། དབང་པོའི་ཚོགས་ཙམ་གྱི་ཉེ་བར་མཁོ་བ་ཡིན་བདེ་བཞིན་དུ་གནས་པའི་བུམ་པ་ཉིད་མངོན་པར་གསལ་བ་ལ་ཡང་རྫ་མཁན་ལ་སོགས་པ་ཡང་ཉེ་བར་མཁོ་བ་ཁོ་ནའོ། །དེ་བཞིན་དུ་ལུས་དང་ཁ་དོག་དབྱིབས་དག་ནི་ཞེས་བྱ་བ་ཡང་ཉེ་བར་
མཚོན་པ་ཙམ་སྟེ། བློ་ལ་སོགས་པའི་རྣམ་པ་མ་ལུས་པ་ཡང་ཡིན་ནོ། །སྐྱེད་བྱེད་དེ་དང་འདྲ་བ་ལས་ཞེས་བྱ་བ་ནི་རྒྱུ་དེ་དང་འདྲ་བ་ཁོ་ན་ལས་སོ། །རྣམ་པར་དཔྱད་པར་བྱ་བ་བརྗོད་པ་ནི། རྫ་མཁན་གྱི་ཞེས་བྱ་བ་ལ་སོགས་པའོ། །གནས་པ་ཉིད་མངོན་པར་གསལ་བ་ཡིན་ནོ་སྙམ་དུ་བསམ་པའོ། །གལ་ཏེ་གནས་པ་ཉིད་མངོན་པར་གསལ་བ་ཞེས་བྱ་བ་འདི་ལ་ངེས་པ་ཅི་ཡོད་དེ། མི་མཁས་པ་གལ་ཏེ་སྔ་ན་མེད་པ་སྐྱེད་པར་བྱེད་ན་ཅི་སྐྱོན་སྙམ་ན། ཤིང་གིས་བོན་ཞེས་བྱ་བ་ལ་སོགས་པ་གསུངས་སོ། །ས་བོན་རིགས་མི་མཐུན་པ་ཞེས་བྱ་བ་ནི་གང་ཞིག་ས་བོན་ལ་ནུས་པའི་རང་བཞིན་དུ་རྣམ་པར་གནས་པའི་ཤིང་གི་དབྱིབས་དེ་དང་རིགས་མི་མཐུན་པའོ། །གལ་ཏེ་སྐྱེས་བུས་སྔ་ན་མེད་པ་སྐྱེད་པར་བྱེད་ན་དེའི་ཚེ་ཝ་དའི་ས་བོན་གྱིས་ཀྱང་ཤིང་ཤ་བའི་དབྱིབས་ཅི་སྟེ་མི་སྐྱེད་ཅེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་དབང་ཕྱུག་ཏུ་སྨྲ་བའིའོ། །དབྱིབས་ཞེས་བྱ་བ་ནི་བུམ་པའི་ཆ་བྱད་དོ། །མ་ཡིན་ཏེ་ཞེས་བྱ་བ་ནི་གྲངས་ཅན་གྱིའོ། །དེ་འདྲ་བ་ཉིད་ཡིན་པའི་ཕྱིར་རོ་ཞེས་བྱ་བ་ནི་བུམ་པའི་རང་བཞིན་ཉིད་ཡིན་པའི་ཕྱིར་རོ། །དེ་ཉིད་ཡིད་སྨྲས་པ་ནི་འཇིམ་གོང་གི་ཞེས་བྱ་བའོ། །དཔེར་ན་ཞེས་བྱ་བ་འདི་མ་གྲུབ་པར་དོགས་པ་ནི་དེ་ཡང་ཅི་ལྟར་ཞེས་བྱ་བ་སྟེ་ནུས་པ་ཡོད་དོ་ཞེས་བྱ་བ་དེའོ། །ཡོད་པ་དེ་ཉིད་གསལ་བར་བྱེད་པ་ནི་འདིར་ཞེས་བྱ་བའོ། །རྒྱུའི་ས་བོན་མེད་པའི་ཕྱིར་ཞེས་བྱ་བ་ནི་ས་བོན་གྱི་རྒྱུ་ཤིང་ནུས་པའི་རང་བཞིན་དུ་མེད་པའི་ཕྱིར་རོ། །དེ་ལ་ཚིག་ལེའུར་བྱས་པ་དང་པོ་རྣམ་པར་འགྲེལ་པ་ནི་ས་བོན་གྱི་རྒྱུའི་ཞེས་བྱ་བའོ། །དེ་ནི་ཞེས་བྱ་བ་ནི་ས་བོན་ནོ། །གཉིས་པ་རྣམ་པར་འགྲེལ་པ་ནི། དབང་ཕྱུག་མ་ཡིན་ཞེས་བྱ་བ་སྟེ། དབྱིབས་ཀྱི་རྒྱུ་མ་ཡིན་ནོ་ཞེས་འགྲེལ་ཏོ། །འདི་ལ་བཤད་ཟིན་པའི་སུན་འབྱིན་པ་ཉིད་ཤེས་བྱེད་དུ་དྲན་པར་བྱེད་པ་ནི་རིགས་མི་མཐུན་པའི་ཤིང་གི་རྒྱུའི་ས་བོན་གང་ཡིན་པ་དེ་ལས་མི་འབྱུང་བའི་ཕྱིར་རོ། །འདི་ཉིད་སྒྲུབ་པ་ནི་དབང་ཕྱུག་དེའི་རྒྱུ་ཡིན་ན་ཞེས་བྱ་བའོ། །རྫ་མཁན་གྱི་ཞེས་བྱ་བ་ནི་རྫ་མཁན་ལ་བརྟེན་ནས་སོ། །འཇིམ་གོང་ལས་ཞེས་བྱ་བ་ནི་ཉེ་བར་ལེན་པར་འགྱུར་བས་སོ། །རྫ་མཁན་ལ་ཡང་བུམ་པ་ལ་སོགས་པ་ཞེས་བྱ་བའི་དོན་ནི་འདི་ཡིན་ཏེ། ཡང་ན་རྫ་མཁན་བུམ་པ་མ་ཡིན་
མོད། དེ་ལྟར་ན་ཡང་བུམ་པ་དེ་ལ་ནུས་པའི་རང་བཞིན་དུ་རྣམ་པར་གནས་པའི་བུམ་པ་ལ་སོགས་པའི་དབྱིབས་ལས་བུམ་པ་ལ་སོགས་པའི་དབྱིབས་བྱུང་བ་ཡིན་ཏེ། རྒྱུའི་གཅིག་དེ་ལ་ནི་ནུས་པའི་རང་བཞིན་གྱི་འབྲས་བུ་ཡོད་པ་ཡིན་ནོ་ཞེས་བྱ་བས་ནི་ཁོ་བོ་ཅག་གི་ཕྱོགས་ཡིན་ནོ་ཞེས་བྱ་བའོ། །མཇུག་སྡུད་པས་ནི་དེས་ན་ཞེས་བྱ་བའོ། །དེ་ལ་བྱེད་པ་ནི་འགའ་ཡང་མེད་དོ་ཞེས་བྱ་བ་ནི་མེད་པའི་སྐྱེད་པ་བྱེད་པ་མེད་དོ་ཞེས་བྱ་བའི་དོན་ཏོ། །དེའི་ལོངས་སྤྱོད་པར་འདོད་པས་ཞེས་བྱ་བ་ནི་རྫ་མཁན་ལ་སོགས་པ་སྐྱེས་བུའི་ལོངས་སྤྱོད་པར་འདོད་པས་ཞེས་བྱ་བའི་དོན་ཏོ། །འཇུག་པའི་ཕྱིར་རོ་ཞེས་བྱ་བ་ནི་བྱེད་པའི་ཕྱིར་རོ་ཞེས་བྱ་བའི་ཐ་ཚིག་གོ །དབང་ཕྱུག་དུ་སྨྲ་བ་དག་གི་དོགས་པ་བསུ་བ་ནི། འོན་ཏེ་སྐྱེས་བུའི་ཞེས་བྱ་སྟེ་བློ་དང་དབང་པོ་ལ་སོགས་པའི་རང་བཞིན་ཅན་ཐ་སྙད་པའི་སྐྱེས་བུ་དག་གོ །དེ་ལྟ་མ་ཡིན་ཞེས་བྱ་བ་ནི་གལ་ཏེ་འདོད་ཆགས་ལ་སོགས་པ་དང་བྲལ་བ་གཅིག་མེད་ན་དེའི་ཚེ་དབྱིབས་དང་མདོག་ལ་སོགས་པ་སུས་བསྟན་ཅེས་སྦྱར་རོ། །བསམ་པ་ནི་འདི་ཡིན་ཏེ། གང་ཞིག་དབྱིབས་དང་མདོག་ལ་སོགས་པ་ཅི་འདྲ་བ་འདོད་པ་དེ་ལ་གཙོ་བོས་དེ་བསྟན་པར་བྱ་བ་ཡིན་ལ། འདོད་པ་དེ་ཡང་འགའ་ཞིག་གིས་སོ་སོར་ངེས་པ་ལ་བསྟན་པས་ན་ཉེ་བར་གནས་ཀྱང་གོམས་པ་ལས་དེ་ཁོ་ནར་འགྱུར་རོ། །མ་བསྟན་ན་ནི་གོམས་པ་མེད་པའི་ཕྱིར་གཙོ་བོས་ཅི་ཞིག་བསྟན་ཅེས་བྱ་བའོ། །གྲངས་ཅན་གྱི་བསམ་པ་ནི་དབང་ཕྱུག་གིས་བསྟན་པ་ལས་སོ་སོར་ངེས་པ་ལས་འདོད་པ་མ་ཡིན་མོད་གོམས་པ་ལས་གྱུར་པ་ཡིན་ཏེ། དཔེར་ན་ལྟད་མོ་པ་རྣམས་ཀྱི་འདོད་པ་ཐོག་མ་མེད་པའི་ཉེ་བར་བསྟན་པ་ལས། དེ་ལྟར་སྒེག་པ་ལ་སོགས་པའི་ཉམས་ཀྱིས་གར་ནི་དགའ་བར་བྱ་བ་ཡིན་ནོ་ཞེས་བྱ་བར་འགྱུར་བ་དང༌། རེས་འགའ་རེས་འགའ་མཐོང་བ་ལས་ནི་ཡང་དང་ཡང་དུ་བལྟ་འདོད་པར་འགྱུར་བ་དེ་བཞིན་དུ་འཁོར་བའི་སྐྱེས་བུ་རྣམས་ཀྱི་ཡང་བལྟ་འདོད་པ་བཟློག་པའི་དོན་དུ་བློ་ལ་སོགས་པ་རྣམ་པར་།འགྱུར་བའི་ཁྱད་པར་དེ་དང་དེ་དག་སྟོན་པར་བྱེད་པ་ཡིན་ནོ་།ཞེས་བྱ་བའོ། །སྐྱེས་བུ་རྣམས་ཀྱིས་འདོད་པ་དེ་ལྟར་འགྱུར་མོད། དེའི་བསམ་པའི་དབང་གིས་གཙོ་བོ་སེམས་དཔའ་མེད་པ་གོ་ཅི་ལྟར་འཇུག་སྙམ་ན། མི་ཤེས་ཕྱིར་ནའོ་མེ་ནི་ཞེས་སྨྲས་སོ། །བཤད་ཟིན་པའི་སེམས་པ་མེད་པ་རྒྱུ་ཡིན་པ་ཉིད་གསལ་བར་བྱེད་པ་ནི། འདི་ནི་རིགས་པ་མ་ཡིན་ཏེ་ཞེས་བྱ་བའོ། །དེ་རྒྱུ་ཞེས་
བྱ་བ་ནི་དོན་རྣམས་ཀྱི་རྒྱུའོ། །འོན་ཏེ་གཅིག་གི་རྒྱུ་སེམས་པའི་རང་བཞིན་མ་ཡིན་པར་དམིགས་མོད། ཐམས་ཅད་ཀྱང་དེ་ཁོ་ན་ལྟར་ཡིན་ནོ་ཞེས་བྱ་བ་གོ་ག་ལས་སྙམ་ན། དོན་རྣམས་རྒྱུ་ནི་ཞེས་སྨྲས་སོ། །སེམས་པ་མེད་པའི་རྒྱུ་ནི་མི་རིགས་པ་མ་ཡིན་ནོ། །གལ་ཏེ་ཐམས་ཅད་ཀྱི་རྒྱུ་རྟོགས་པ་དང་ལྡན་པ་ཡིན་ན། དེའི་ཚེ་ར་ལ་སོགས་བའི་རིལ་མ་ལ་སོགས་པ་ཟླུམ་པོར་བྱས་པ་ལ་ དགོས་པ ་ཅི་ཡོད། དགོས་པ ་མེད་པར་ནི་རྟོགས་པ་མེད་པ་དང་ལྡན་པ་འཇུག་པ་མ་ཡིན་ནོ། །དེས་ན་རྒྱུ་ནི་སེམས་པ་ཁོ་ནར་འཐད་དོ། །དེ་ལྟར་གྲངས་ཅན་གྱི་ལུགས་ལ་བརྟེན་ནས་དབང་ཕྱུག་བཀག་ན་གྲངས་ཅན་རང་གི་ལུགས་བཟང་པོ་ཡིན་པར་རློམ་ན་དེ་ལྟར་ན་གཙོ་བོ་ཉིད་རྒྱུར་འགྱུར་རོ་ཞེས་སྨྲས་སོ། །གཙོ་བོ་སེམས་པ་མེད་ཀྱང་རྒྱུ་ཡིན་པ་ནི་མི་འཐད་དོ་ཞེས་སྟོན་པ་ནི། དེ་ལ་འདི་སྐད་བརྗོད་དེ་ཞེས་བྱ་བའོ། །གལ་ཏེ་རྗེས་འགྲོ་ཞེས་བྱ་བ་ནི་རྗེས་སུ་འགྲོ་བར་ཁས་ལེན་ཞེས་བྱ་བའི་དོན། དེ་སྐབས་ཀྱིས་དེའི་རང་བཞིན་ཅན་གྱི་རྒྱུ་གྲུབ་པར་བྱ་པའི་དོན་དུ་ཞེས་བྱ་བ་ཡིན་ནོ། །བདེ་བ་ལ་སོགས་པ་རྣམས་དངོས་པོ་ཡིན་པ་དེའི་ཕྱིར། དེ་ཉིད་དེའི་དངོས་པོའི་རང་བཞིན་ཉིད་རྒྱུར་ཅི་སྟེ་མི་འདོད། སྐྱེས་བུ་རྣམས་ཀྱང་སེམས་པ་ཅན་དང་དངོས་པོ་ཉིད་ཡིན་པའི་ཕྱིར་སེམས་པའི་རང་བཞིན་ནམ་དངོས་པོའི་རང་བཞིན་གྱི་རྒྱུ་ཡང་དེ་དག་ལ་ཅི་མི་འདོད། དེ་ལྟར་གཙོ་བོའི་རྒྱུར་ཁས་བླངས་ནས་ཧ་ཅང་ཐལ་བ་བརྗོད་པ་ཡིན་ནོ། །ད་ནི་དེའི་རྒྱུ་ཉིད་མ་ཡིན་ནོ་ཞེས་སྟོན་པ་ནི་ཡང་དག་པར་ན་ཞེས་སྨྲས་སོ། །དབྱིབས་ལ་སོགས་པ་ཐམས་ཅད་གཙོ་བོ་དེར་འདུས་པའོ། །དེ་ག་ལས་ཤེ་ན། ནུས་ཀུན་རང་བཞིན་ཅན་གྱིས་ནི་ཞེས་གསུངས་སོ། །འདི་ནི་རྟག་བ་ཉིད་ལ་སོགས་པ་ཉེ་བར་མཚོན་པ་ཙམ་ཡིན་ནོ། །ལན་དུ་མཐོང་མིན་ཞེས་བྱ་བ་ལ་སོགས་པའོ། །དབང་པོ་ལས་འདས་པའི་གཙོ་བོ་དེ་ནི་དེ་འདྲ་བའི་རྒྱུ་ཡིན་ནོ་ཞེས་བྱ་བ་ཚད་མས་འཐད་པ་མ་ཡིན་ནོ། །དེ་འདྲ་བའི་ཞེས་བྱ་བ་ནི་རྟག་པ་ལ་སོགས་པའི་རང་བཞིན་ཅན་ནོ། །དེ་ལ་རེ་ཞིག་རྟག་པ་མ་ཡིན་ཞེས་སྟོན་པ་ནི་འབྲས་བུ་འབྲས་བུ་གཞན་ལས་ཏེ་ཞེས་བྱ་བའོ། །གང་འབྲས་བུ་ཡིན་པ་དེ་ནི་འབྲས་བུ་གཞན་སྔོན་དུ་སོང་བ་ཅན་ཡིན་ཏེ། དཔེར་ན་འབྲས་བུ་གཞན་བཞིན་ནོ། །འདི་
ཐམས་ཅད་ཀྱང་འབྲས་བུ་ཉིད་ཡིན་ནོ། །དེས་ན་གཙོ་བོ་རྟག་པ་མ་ཡིན་ནོ་སྙམ་དུ་དགོངས་པའོ། །རྒྱུ་མེད་པའི་རྒྱུ་ནི་ཞེས་བྱ་བ་ལ་སོགས་པ་ནི་བཤད་པའོ། །གང་གི་ཕྱིར་རྒྱུ་མེད་པའི་རྒྱུ་མ་དམིགས་པ་དེས་ན་དམིགས་པའི་རང་བཞིན་གྱི་རྗེས་སུ་འབྲངས་བ་ཉིད་ཀྱིས་གཙོ་བོ་རྒྱུ་ཉིད་དུ་རྣམ་པར་འཇོག་པ་ཡིན་ནོ། །གཞན་ལ་རབ་ཏུ་གྲུབ་པའི་ཚུལ་གྱིས་འདི་གྲུབ་པ་ཡིན་ནོ་ཞེས་བསྟན་བའི་ཕྱིར་རྟོག་པའི་སྒྲ་བྱས་སོ། །དམིགས་པའི་རང་བཞིན་གྱི་རྗེས་སུ་འབྲངས་པ་ཁོ་ནས་རྒྱུ་མེད་པའི་གཙོ་བོ་ས་རྒྱུ་ཉིད་དུ་རྣམ་པར་འཇོག་པར་དོགས་པ་ནི་འོན་ཏེ་ཐ་དད་པ་རྣམས་ཞེས་བྱ་བའོ། །གང་གིས་དེ་སྐད་བརྗོད་པ་དེ་ལྟར་མཐོང་བས་ཡོད་དམ་ཞེ་ན། བུམ་པ་ཁམ་ཕོར་ལ་སོགས་པ་ཞེས་སྨྲས་སོ། །ལན་ནི་དེ་ཡང་མ་ཡིན་ཏེ་ཞེས་བྱ་བའོ། །སྙིང་སྟོབས་ལ་སོགས་པ་དང་ཞེས་བྱ་བ་ནི་སྙིང་སྟོབས་དང་རྡུལ་དང་མུན་པ་རྣམས་སོ། །སྐྱེས་བུ་རྣམས་ཞེས་བྱ་བ་ནི་བདག་རྣམས་སོ། །རྣམ་པ་ཅི་ཡང་རུང་བར་གཞུང་གཟུགས་པར་འདོད་ནས་འོ་ན་ཞེས་སྨྲས་སོ། །སྙིང་སྟོབས་ལ་སོགས་པ་དང་སྐྱེས་བུ་རྣམས་དང་རི་ལ་སོགས་པ་རྣམས་དངོས་ཀྱི་རྗེས་སུ་འགྲོ་བའི་ཕྱིར་དངོས་པོའི་རང་བཞིན་གྱི་རྒྱུ་ཁོ་ནར་ཡོད་པ་ཡིན་ལ། དེ་ཉིད་ནི་དབང་ཕྱུག་དུ་འདོད་དོ་ཞེས་བྱ་བར་བསམས་པའོ། །ཡོན་ཏན་གསུམ་སོགས་རང་བཞིན་ཞེས་བྱ་བ་ནི་བདེ་བ་ལ་སོགས་པའི་རྣག་བཞིན་ཉིད་ལ་སོགས་པའོ། །།ཅིའི་ཕྱིར་མ་གྲུབ་ཅེ་ན། དངོས་པོ་ཉིད་ཀྱིས་རྗེས་སུ་འགྲོ་བའི་ཕྱིར་ཞེས་བྱ་བའོ། །དངོས་པོ་དངོས་པོ་ཞེས་བྱ་བ་ལ་སོགས་པ་ནི་བཤད་པའོ། །སུན་འབྱིན་པ་གཞན་བརྗོད་པ་ནི། འཇི་བ་ལ་སོགས་པའི་རང་བཞིན་ལས་ཞེས་བྱ་བ་ལ་སོགས་པའོ། །འཇི་བ་ལ་སོགས་པ་ཞེས་བྱ་བ་ནི་དངོས་པོ་ཐམས་ཅད་སྡུད་པའོ། །དེ་ལྟ་ཡིན་ན་ཞེས་བྱ་བ་ནི་གཞན་གྱིས་སྨྲས་བའོ། །འབྲས་བུ་དེ་དང་དེ་ལ་ལྟོས་ནས་རྒྱུའི་རང་བཞིན་དེ་དང་དེར་རྗེས་སུ་འཇུག་པ་ན་ཡོན་ཏན་གསུམ་གྱི་རང་བཞིན་དུ་འདོད་བ་ཁོ་ནའོ་ཞེས་བྱ་བའི་དོན་ཏོ། །ལན་དུ་དེ་ནི་མེད་དེ་ཞེས་སྨྲས་སོ། །འབྲས་བུ་ངོ་བོས་ཞེས་བྱ་བ་ནི་རང་གི་ངོ་བོ་རྒྱུ་ཡོད་པ་དང་མེད་པའི་རྗེས་སུ་འཇུག་པ་ཡིན་གྱི་རྣམ་པ་ཀུན་གྱིས་མིན་ཏེ། རྣམ་པ་དང་ནུས་པ་ལ་སོགས་བས་ནི་མ་ཡིན་ནོ། །འདི་ནི་མངོན་སུམ་གྱིས་གྲུབ་པ་ཁོ་ནའོ་ཞེས་སྟོན་བ་ནི་མེ་སོགས་གཞན་དུ་གྱུར་བ་ལས་གཞན་
དུ་ཞེས་བྱ་བ་ལ་སོགས་པའོ། །བཤད་བ་ནི་གང་ཞིག་གང་གིས་ཞེས་བྱ་བ་ལ་སོགས་པའོ། །གང་ཞིག་ཅེས་བྱ་བ་ནི་འབྲས་བུ་སྟེ་དེའི་རྒྱུ་ནི་དེ་ཡིན་ནོ། །རྒྱུ་གང་གིས་རྗེས་སུ་འགྲོ་བ་དང༌། ལྡོག་པའི་རྗེས་སུ་བྱེད་པ་ནི་གང་གིས་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའོ། །དེའི་རང་བཞིན་ནི་མ་ཡིན་ནོ་ཞེས་བྱ་བ་ནི་རྒྱུའི་རྣམ་པ་དང་ནུས་པའི་རྗེས་སུ་འཇུག་བའི་བདག་ཉིད་དེའི་འབྲས་བུ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ཡིན་ན་ཉེས་བ་ཅི་ཡོད་སྙམ་ན། དེ་ལྟ་ཡིན་དང་ཞེས་གསུངས་སོ། །རྒྱུའི་རང་བཞིན་གྱི་རྗེས་སུ་འཇུག་པས་འབྲས་བུ་ཉིད་ཡིན་ན་ནི་རྒྱུ་དང་འབྲས་བུའི་དངོས་པོར་མི་འགྱུར་རོ་ཞེས་འབྲེལ་ལོ། །གང་ཞིག་མི་འགྱུར་ཞེ་ན། མེ་ལས་ཞེས་བྱ་བ་ལ་སོགས་པའོ། །ཅིའི་ཕྱིར་མི་འགྱུར་ཞེ་ན། དེ་ལ་འདྲ་བ་མེད་པའི་ཕྱིར་ཞེས་སྨོས་སོ། །འོན་ཏེ་ཞེས་བྱ་བ་ལ་སོགས་བ་ནི་གཞན་གྱིའོ། །མེ་ལ་སོགས་པ་དེར་ཡང་ངོ༌། །ལན་ནི་གལ་ཏེ་ཞེས་བྱ་བའི་ཁྱབ་པ་མེད་པའི་ཕྱིར་རོ་ཞེས་བྱ་བ་ནི་མེ་དང་དུ་བ་ལ་སོགས་པ་ཉིད་ལ་འཁྲུལ་པ་མཐོང་བའི་ཕྱིར་རོ། །གང་གི་འཁྲུལ་བ་དེ་ཡང་ཞེས་བྱ་བ་ནི་གཞན་གྱིའོ། །དེ་ལྟ་ན་ཞེས་བྱ་བ་ནི་ལན་ནོ། །དེས་ན་ཐུག་པ་མེད་པར་ཐལ་བའི་ཕྱིར་ཞེས་བྱ་བ་ནི་རྣམ་པར་གནས་པ་མེད་པར་ཐལ་བའོ། །ཅི་སྟེ་གཞལ་བྱ་ཡིན་པའི་ཕྱིར་རྟག་གོ་ཞེས་བྱ་བ་འདི་ལ། གློག་ལ་སོགས་པའི་འཁྲུལ་པ་ཚད་མས་མཐོང་བའི་ཕྱིར་མ་ངེས་པར་རྣམ་པར་གནས་པ་མེད་པར་ཅི་ལྟར་ཐལ་ཞེ་ན། མ་ཡིན་ཏེ། སྐབས་སུ་བབ་པ་ལ་ཡང་ཚད་མས་གནོད་པ་སྤང་བར་དགའ་བའི་ཕྱིར་རོ། །དེ་ལྟར་གཙོ་བོའི་རྒྱུ་ཡིན་པར་གསལ་བར་སྒྲུབ་པ་ན། གྲངས་ཅན་ལ་བརྟེན་གཞན་མེད་པའི་ཕྱིར་ལས་རྒྱུ་ཉིད་ཁས་ལེན་པའི་དོགས་བ་ཅི་སྟེ་ཡང་ཞེས་བྱ་བ་ལ་སོགས་པས་བསྡུ་ནས་ཟློག་པར་བྱེད་པ་ནི། དེ་ནི་གང་ལས་གྲུབ་ཅེས་བྱ་བའོ། །འོ་ན་ཁྱེད་ཀྱིས་ཀྱང་ལས་ལས་འཇིག་རྟེན་སྣ་ཚོགས་བསྒྲུབས་པ་ཡིན་ནོ་ཞེས་ཁས་བླང་བར་མི་བྱའོ་སྙམ་ན། འདི་ནི་རེ་ཞིག་བཞག་གོ་ཞེས་གསུངས་སོ། །ཚུ་རོལ་མཛེས་པ་ལ་གཅིག་པུ་མ་གཏོགས་པའི་རྒོལ་བ་ཐམས་ཅད་ལས་སྨྲ་བ་ནི་ཐུན་མོང་ཡིན་པའི་ཕྱིར་ན་བདག་གཅིག་པུ་ལས་དྲི་བར་བྱ་བ་མ་ཡིན་ནོ། །དེ་ལ་རྗེས་སུ་འགྲོ་བ་ཚོལ་བའམ།
ལུང་གི་རྗེས་སུ་འགྲོ་བ་ནི་བདག་ལ་ཡང་རིང་བ་མ་ཡིན་ནོ། །དེ་ལས་ལྷག་པར་ཁས་ལེན་ན་ནི་ཚད་མའི་སྟོབས་ལ་ལྟོས་པ་ཡིན་ནོ། །དེ་ནི་དཔྱད་ཟིན་པའི་ཕྱིར་འདི་ནི་བཞག་གོ །དེ་ལྟར་གྲངས་ཅན་ཞར་ལས་བསལ་ནས་རྩ་བ་དབང་ཕྱུག་དུ་སྨྲ་བ་ཉིད་སེལ་བ་ནི། གཞན་བརྗོད་དོ་ཞེས་བྱ་བའོ། །ཡ་རབས་གཞན་ནི་ཞེས་བྱ་བ་ནི་དབང་ཕྱུག་ལས་སོ། །གལ་ཏེ་ཞེས་བྱ་བ་ནི་སུན་འབྱིན་པའོ། །དེ་མེད་ཅེས་བྱ་བ་ནི་སྡུག་བསྔལ་ལ་མ་སྡུག་བསྔལ་གྱིས་འཇིགས་པ་སྟེ། འདོད་ཆགས་ལ་སོགས་པ་ཡིན་ཀྱང་སྙམ་དུ་ཞེ་བཞག་པའོ། །འོ་ན་ཇི་ལྟར་འདོད་ཆགས་དང་བྲལ་བ་ལ་ཡང་སྡུག་བསྔལ་དང་སྡུག་བསྔལ་གྱི་འཇིགས་པ་མེད་ཅེ་ན་བསྒོམས་པའི་ཞེས་གསུངས་ཏེ། བདག་མེད་པའི་བསྒོམས་པ་རབ་ཀྱིས་མཐར་ཐུག་པར་འགྱུར། ཙན་དན་དང་སྟེའུ་མཉམ་པ་ལ་ནི་དམྱལ་བ་ལ་སོགས་པའི་མེས་རེག་ཀྱང་གདུང་བ་མེད་ན་བསམ་པ་ཙམ་གྱིས་ལྟ་ཅི་སྨོས་དེས་ན་འདོད་ཆགས་དང་བྲལ་བ་ལ་ནི་སྡུག་བསྔལ་ལམ་སྡུག་བསྔལ་གྱིས་འཇིགས་པ་མེད་དོ། །རྩེད་མོ་ལ་སོགས་པའི་དོན་དུ་འཇུག་པའི་རྣམ་པར་དཔྱོད་པའི་སྟོབས་ཀྱིས་བསལ་ཏོ། །དེ་ནི་དེ་ལྟར་ཉིད་འགྱུར་བ་ཞེས་བྱ་བ་ནི་བསྒོམས་པ་མེད་བར་རང་གི་ངོ་བོ་ཉིད་ཀྱིས་དེ་ཁྱད་པར་ཅན་དུ་འཕགས་པར་གྱུར་པ་ཡིན་ནོ་ཞེས་བྱ་བ་ཡང་མི་རིགས་སོ། །ཅིའི་ཕྱིར་ཞེ་ན། འདི་དེ་ཁྱད་པར་དུ་འཕགས་པ་དང་ལྡན་པ་འདི་དེའི་རང་བཞིན་ཡིན་ན་འགྲོའི་རང་བཞིན་དུ་ཡང་འགྱུར་བས་དབང་ཕྱུག་གིས་ཅི་བྱ། ཕ་རོལ་པོས་སྨྲས་པ། རང་བཞིན་འདི་ནི་དབང་ཕྱུག་དེ་གཅིག་པུའི་ཡིན་ནོ་ཞེ་ན། ལན་དུ་ནི་ཞེས་བྱ་བ་ལ་སོགས་པའོ། །འདི་ཉིད་རྣམ་པ་གཞན་གྱི་སྒོ་ནས་སུན་ཕྱུང་བའི་གཞན་ཡང་ཞེས་གསུངས་སོ། ཐ་མལ་པའི་དབང་ཕྱུག་ཁྱད་པར་ཅན་གྱིས་རྗེས་སུ་གཟུང་བས་དབང་ཕྱུག་ཐོབ་པ་འདི་ནི་རེ་ཞིག་མཐོང་བ་ཡིན་ནོ། །དེ་ཡང་དེ་བས་ལྷག་པའི་དབང་ཕྱུག་ལས་ཡིན་ཞིང་དེ་བཞིན་དུ་མི་དང་ལྷན་ཅིག་གཅིག་ནས་གཅིག་ཏུ་བརྒྱུད་པ་ཡིན་ན་ཡང་རང་བཞིན་གྱིས་གྲུབ་པའི་དབང་ཕྱུག་ག་ལ་ཡོད་ཅེས་བྱ་བའི་དོན་ཏོ། །དེ་ལྟ་ན་འོན་ཐ་མ་དབང་ཕྱུག་གང་ཡིན་པ་དེ་ནི་གཞན་ལ་ཕན་འདོགས་པར་བྱེད་པ་ཉིད་ཡིན་གྱི། ཕན་གདགས་པར་བྱ་བ་ནི་མ་ཡིན་པའི་ཕྱིར་རྟག་ཏུ་གནས་པར་འགྱུར་རོ་སྙམ་ན། བརྒྱ་བྱིན་ཚངས་
པ་ཞེས་སྨོས་སོ། །དོན་འདི་ཡིན་ཏེ། གང་དག་མི་ལ་བརྟེན་ནས་བརྒྱ་བྱིན་དང་ཚངས་པ་ལ་སོགས་པ་ཁྱད་པར་ཅན་གྱི་ཆོས་དང་ལྡན་པའི་ཐ་སྙད་ལ་བརྟེན་པ་དེ་དག་ཀྱང་བསོད་ནམས་དང་ཡེ་ཤེས་ལ་སོགས་པའི་ཡོན་ཏན་ཁྱད་པར་ཅན་དུ་བྱུང་བ་གོང་ནས་གོང་དུ་འཕེལ་བར་བསྒྲུབ་པ་ཁོ་ན་ཡིན་གྱི་དབང་ཕྱུག་བཞིན་དུ་རྟག་པ་ནི་མ་ཡིན་ནོ། །དེས་ན་བརྒྱ་བྱིན་དང་ཚངས་པ་ལ་ཡོན་ཏན་ཁྱད་འབྱུང་སྲིད་ན་སྟེ། ཤུགས་ཀྱིས་འཕངས་པས་དེའི་རྒྱུ་སྲིད་ན་ཞེས་བྱ་བའི་དོན་ཏོ། །དེའི་ཚེ་དབང་ཕྱུག་ཉིད་ཀྱང་དེ་བཞིན་དུ་ཡོན་ཏན་ཁྱད་པར་དུ་བྱུང་བ་ཕུལ་དུ་ཕྱིན་བས་ཐོབ་པ་ཡིན་པའི་ཕྱིར། རྟག་པ་མ་ཡིན་གྱིས་སླར་ལ་གཞན་བཞིན་དུ་འཁོར་བ་ཉིད་དུ་འགྱུར་སྲིད་དོ། །གཞན་གྱིས་འོན་ཏེ་དེ་ཡང་མེད་ཉིད་ན་ཞེས་སྨྲས་ཏེ། ཡོན་ཏན་ཕུལ་དུ་བྱུང་བ་དེ་ཡང་མེད་ནའོ། །དབང་ཕྱུག་ཐོབ་པ་ཞེས་བྱ་བ་ལ་སོགས་པས་སྔ་མའི་ཚུལ་ལ་ལྟོས་ནས་ཡང་གི་སྒྲ་བྱས་སོ། །ལན་དུ་ཡོན་ཏན་ཁྱད་པར་ཅན་གྲུབ་པ་མེད་པ་དེས་ན་འདི་འཁོར་བ་ཉིད་དུ་འགྱུར་གྱིས་དབང་ཕྱུག་ནི་མ་ཡིན་ཏེ་ཇི་སྐད་བརྗོད་པའི་ཡོན་ཏན་དང་ལྡན་པ་མ་ཡིན་ནོ། །འདི་ནི་བཞད་གད་དང་བཅས་བས་བསལ་བར་བྱེད་པ་ནི། གང་ཞིག་ཅེས་བྱ་བ་ལ་སོགས་པའོ། །གང་ཞིག་དཔེ་མཐོང་བ་ཡོན་ཏན་ཕུལ་དུ་བྱུང་བས་འདི་ལ་དབང་ཕྱུག་ཡིན་པ་བསྙོན་པ་དེས་དཔེ་མ་མཐོང་བ་ངོ་བོ་ཉིད་ཀྱིས་གྲུབ་པ་གཞན་དུ་འང་བཟོད་དམ་ཅི་སྟེ་མི་བཟོད་པ་ཉིད་དོ། །འདི་ཉིད་དཔེ་སྔོན་དུ་སོང་བས་སྟོན་པ་ནི་གང་ཞིག་ཅེས་བྱ་བ་ལ་སོགས་པའོ། །གོང་ནས་གོང་དུ་འགྱུར་བའི་ཞེས་བྱ་བ་ནི་དབང་ཕྱུག་གིའོ། །རང་བཞིན་ལ་ཞེས་བྱ་བ་ནི་གནས་སྐབས་གཞན་དང་གཞན་ལའོ། །དེའི་རྗེས་སུ་འབྲང་བ་ནི་ཡོན་ཏན་འཕེལ་བར་བྱས་བའི་རྗེས་སུ་འགྲོ་བ་གང་ཡིན་བ་སྟེ་དཔེ་ཡོད་པའི་ཕྱིར་རོ། །འབྲངས་ནས་ཞེས་བྱ་བ་ནི་དེའི་དབང་གིས་རབ་ཏུ་འགྱུར་བ་ལ་བསྙོན་པའོ། །དཔེ་མེད་བའི་ཕྱིར་མངོན་པར་འདོད་པའི་དབང་ཕྱུག་གིས་རང་བཞིན་གྱིས་གྲུབ་པ་རྗེས་སུ་འགྲོ་བ་མེད་པའི་དངོས་པོ་ལ་ཡིད་ཆེས་པ་ཅི་ཡོད། ཇི་ལྟར་གང་དབང་ཕྱུག་ཡིན་པ་དེ་ནི་ཡོན་ཏན་འཕེལ་བས་བྱས་པ་ཡིན་ཏེ། དཔེར་ན་དབང་པོ་ལ་སོགས་པ་བཞིན་ནོ། །རབ་ཀྱིས་མཐར་ཕྱིན་བར་གནས་པ་ཡང་དབང་ཕྱུག་ཡིན་ནོ་ཞེས་བྱ་བའི་བསྒྲུབ་པར་བྱ་བ་འདིས་དམ་པའི་སྐྱེ་
བོའི་ཚོགས་ཀྱི་རྗེས་སུ་འཇུག་པར་བྱས་པ་དང༌། རང་བཞིན་གྱིས་གྲུབ་པ་ནི་གང་དུ་མཐོང་བས་ན་རྗེས་སུ་འགྲོ་བ་མེད་པའི་ཕྱིར་ཚད་མ་མེད་པ་ཅན་དུ་བསྟན་པ་ཡིན་ནོ། སྒྲུབ་པར་བྱེད་པ་འདི་ལ་གཞི་མ་གྲུབ་པར་ནི་མི་བརྩད་དེ། གཞན་གྱི་ལུགས་ལས་ཕན་ཚུན་འགལ་བ་ཙམ་བརྗོད་པར་འདོད་པའི་ཕྱིར་རོ། །གལ་ཏེ་དབང་ཕྱུག་དུ་འདོད་ན་ཡོན་ཏན་འཕེལ་བས་བྱས་པར་འདོད་དགོས་པས་རྟགས་མ་ཡིན་ནོ། །འོན་ཏེ་ཡོན་ཏན་འཕེལ་བས་བྱས་པར་མི་འདོད་ན་ནི་དེའི་ཚེ་དབང་ཕྱུག་ཉིད་དུ་འགྱུར་རོ་ཞེས་བྱ་བས་སོ། །དེས་ན་འབྲས་བུའི་གཏན་ཚིགས་དང་རྒྱུ་མ་དམིགས་པ་ཁས་བླངས་པ་ལ་ལྟོས་ནས་ཐལ་བར་གྲུབ་པའི་རང་བཞིན་ཅན་འདི་གཉིས་ནི་འདི་འདྲ་བའི་དོན་ཁས་བླང་བར་མི་ནུས་སོ་ཞེས་བྱ་བ་འདི་གཙོར་བྱེད་པ་ཡིན་ནོ། །ཁྱབ་པ་ཅི་ལྟར་ཞེ་ན། ཡོན་ཏན་འཕེལ་བ་གཅིག་མེད་ན་ཡང་དབང་ཕྱུག་མེད་པའི་ཕྱིར་དང༌། དེ་ཡོད་ན་ཡང་ཡོད་པའི་ཕྱིར་དང༌། རྒྱུ་དང་འབྲས་བུའི་དངོས་པོ་གྲུབ་པའི་ཕྱིར་རོ་ཐམས་ཅད་དུ་དེ་ལྟར་འགྱུར་བ་ལ་ལྟོས་པས་ཀྱང་ཅི་ཞིག་བྱ། དེ་ལྟ་ཡིན་ན་ཡང་གང་ཞིག་མི་མཐུན་པའི་ཕྱོགས་ཀྱིས་ཐེ་ཚོམ་གྱིས་དཀྲུགས་པས་བསྒྲུབ་བྱ་སྤོང་བ་དེ་ཐམས་ཅད་མཐོང་བ་མེད་པར་རང་བཞིན་གྱིས་གྲུབ་པ་བཟོད་པ་ཅི་ལྟར་འགྱུར་ཏེ། དེས་ན་ཉེས་པ་སྔ་མ་ལས་མི་འགྲོལ་ལོ་སྙམ་དུ་དགོངས་པའོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །བྱེད་པ་པོས་ཞེས་བྱ་བ་ནི་ཡོན་ཏན་འཕེལ་བའི་མཐུ་ལས་སྐྱེས་པའོ། །ཁས་བླངས་ནས་དགག་པ་སྨྲས་པ་ནི་གང་ཞིག་རྒྱུའི་ཡོན་ཏན་དང་ལྡན་པ་མ་ཡིན་པ་ཏེ། གང་ལ་རྒྱུའི་བྱེད་པ་མེད་པའི་སྐྱེས་བུ་དེ་ཞེས་བྱ་བའི་དོན་ཏོ། །རྣམ་པར་འགྲེལ་པ་ནི་ཁྱད་པར་ལས་ཁྱད་པར་དུ་མཐོང་བའི་ཕྱིར། གང་ཞིག་དེ་བསྐྱེད་པ་ལ་མངོན་པར་བརྩོན་པའི་ཁྱད་པར་དེ་ལས་སོ། །ཤིན་ཏུ་མཚན་ཉིད་མི་མཐུན་པ་ཞེས་བྱ་བ་ལ་སོགས་པ་ནི་ཕྱེད་ཕྱི་མ་འཆད་བའོ། །འདིས་ནི་དབྱིབས་ཁས་བླངས་ནས་འདོད་པའི་ཁྱད་པར་མ་གྲུབ་པར་བརྗོད་པ་ཡིན་ནོ། །དེ་ཉིད་ནི་མེད་དོ་ཞེས་སྟོན་པ་ནི་གཞན་ཡང་ཞེས་བྱ་བའོ། །དེ་ལ་དབྱིབས་མེད་པ་ནི་རྡུལ་ཕྲ་རབ་བྱེད་པ་ཁོ་ན་ཡིན་པའི་ཕྱིར་རྡུལ་ཕྲ་རབ་དག་ནི་ཆོས་མི་མཐུན་པའི་དཔེ་མ་ཡིན་ནོ་ཞེས་བྱ་བའི་སྐྱོན་གཉིས་པ་ནི་མ་གྲུབ་པས་བསྡུས་པ་ཡིན་ནོ། །ཇི་ལྟར་བརྗོད་ཅེས་བྱ་བས་ནི་རྡུལ་ཕྲ་རབ་
རྣམས་འབྲས་བུ་ཡིན་པའི་ཕྱིར་རོ་སྙམ་དུ་དགོངས་པའོ། །འོན་ཏེ་ཞེས་བྱ་བ་ལ་སོགས་པས་ནི་རྡུལ་ཕྲ་རབ་རྣམས་འབྲས་བུ་ཡིན་པ་དང༌། གཏན་ཚིགས་མ་གྲུབ་པ་ཉིད་སྤོང་བའོ། །གྲུབ་པའི་མཐའི་དོན་ནི་མ་གྲུབ་པ་ཉིད་གཙོ་བོའི་སྐྱོན་ཡིན་ནོ་ཞེས་བྱ་བ་ཡིན་ནོ། །འོན་ཏེ་ཞེས་བྱ་བ་ནི་མ་གྲུབ་པ་སྤོང་བའོ། །རང་བཞིན་དེ་ཞེས་བྱ་བ་ནི་ཡུལ་དེ་དང་དེ་ནོན་པར་སྐྱེས་པས་སོ། །དེ་ལྟར་བརྗོད་དེ་ཞེས་བྱ་བ་ནི་དབྱིབས་སུ་བརྗོད་པའོ། །དེ་ལྟ་ཡིན་ན་ཞེས་བྱ་བ་ནི་ལན་ནོ། །འདི་ནི་ཉེས་པ་གཞན་བཀལ་པ་ཡིན་ཏེ། མི་མཐུན་པའི་དཔེ་མེད་པ་ནི་གནས་པ་ཁོ་ནའོ། །འོན་ཏེ་ཞེས་བྱ་བ་ནི་གཉི་ག་སྤོང་བའོ། །དེ་ལྟ་བུར་འཁྲུལ་བ་སྐྱེད་པར་བྱེད་པ་ཉིད་ཀྱིས་དབྱིབས་སུ་བརྗོད་ཀྱིས་འབྲས་བུ་ཉིད་ཀྱིས་ནི་མ་ཡིན་པས་དེ་ཁོ་ན་ལྟར་སྒྲུབ་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །སུན་འབྱིན་པ་ནི་དེ་ལྟ་ན་ནིའོ་ན་ཞེས་བྱ་བའོ། །འདི་དབྱིབས་འདི་འདྲ་བར་བྱས་སོ་ཞེས་འཇིག་རྟེན་འཁྲུལ་པར་འགྱུར་མོད། དབང་ཕྱུག་ནི་མ་ཡིན་ནོ་ཞེས་བྱ་བའི་དོན་ཏོ། །གཞན་དག་གིས་ཁས་བླངས་པར་ནི་རྟོག་ཅེ་ན་ཞེས་པའི་དོགས་པ་འདི་ནི་འདི་ཡིན་ནོ། །དབང་ཕྱུག་གི་དབྱིབས་ལོགས་ཤིག་པར་མི་མཐོང་ཡང་འདི་ལ་འཇིག་རྟེན་དབྱིབས་སུ་རྟོགས་པར་འགྱུར་རོ་ཞེས་ངེས་པར་བརྟགས་ནས་འཇུག་པ་ཡིན་ནོ་ཞེས་བྱ་བའོ། །ཕྱེད་ཕྱི་མས་ནི་སུན་འབྱིན་པའོ། །དེ་ལ་དོན་ནི་འདི་ཡིན་ཏེ། རང་གིས་ནམ་ཡང་མ་རྟོགས་པའི་དབྱིབས་ཅི་ལྟར་བྱེད་ཅེས་རྩོད་པ་ན། གཞན་གྱིས་བླངས་པའི་ཞེས་བྱ་བའི་ལན་ཅི་ཡིན། རང་གིས་མ་དམིགས་པས་ནི་གཞན་གྱིས་ཁས་བླངས་པ་ཙམ་གྱིས་བྱེད་ནུས་པ་མ་ཡིན་ནོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བ་ནི་དོགས་པའོ། །དུམ་བུའི་ཡན་ལག་ཅན་གྱི་སྒོ་ནས་རྡུལ་ཕྲ་རབ་ཀྱིས་བརྩམས་པའི་ཡན་ལག་ཅན་ནི་རེ་ཞིག་ཡོད་པ་ཡིན་ནོ། །དེ་ཡང་དུམ་བུའི་ཡན་ལག་ཅན་རྣམས་ལྡན་པ་མེད་པར་མི་འགྲུབ་བོ། །རྩོམ་པར་བྱེད་པ་དེ་དག་ཉིད་ཀྱི་ལྡན་པ་དེ་ནི་བརྗོད་པ་དེས་ན་དབྱིབས་ནི་གྲུབ་བ་ཁོ་ནའོ། །དེའི་ཕྱིར་བརྗོད་པའི་སྐྱོན་གྱིས་གོ་སྐབས་མེད་དོ་སྙམ་ན། ལན་དུ་འདི་ནི་ཕྱི་ནས་བརྟག་བྱ་སྟེ་ཞེས་བྱ་བ་ནི་ཚུ་རོལ་མཛེས་པ་པའི་སྐབས་སུའོ། །ད་ནི་ཡང་ན་ཐེ་ཚོམ་ཟ་བ་ཡིན་ཞེས་བྱ་བ་རྣམ་འགྲེལ་གྱི་ལྷག་མ་བཤད་པའི་ཕྱིར། དཔེའི་
ཚིག་བསྣན་ནས་སྐབས་འབྱེད་པ་ནི། ཡང་ན་ཞེས་བྱ་བའོ། །དཔེ་ལ་ཞེས་བྱ་བ་ནི་ཆོས་མི་མཐུན་པའི་དཔེ་ལའོ། །ཐེ་ཚོམ་ཟ་བ་ནི་གཏན་ཚིགས་ངེས་པ་མ་ཡིན་པ་སྟེ། མི་མཐུན་པའི་དཔེ་ལ་ཡང་ཡོད་པའི་ཕྱིར་རོ། །འདི་ནི་བསྒྲུབ་པར་བྱ་བ་ལ་ཐེ་ཚོམ་ཟ་བའི་རྒྱུ་མཚན་བསྒྲུབ་པའི་དོན་དུ་ཐེ་ཚོམ་གྱིས་སྒྲས་བརྗོད་བ་ཡིན་ནོ། །རྣམ་པར་འགྲེལ་པ་ནི་དེ་ཉིད་ཀྱིས་ཞེས་བྱ་བའོ། །མ་ངེས་པ་ཉིད་དོ་ཞེས་བྱ་བ་ནི་གཏན་ཚིགས་མ་ངེས་པ་སྟེ། མི་མཐུན་པའི་དཔེ་དབང་ཕྱུག་ལ་ཡང་ཡོད་པའི་ཕྱིར་རོ། །གལ་ཏེ་གཏན་ཚིགས་གསུམ་དངོས་སུ་བཤད་པ་ཡིན་ལ། སྐབས་སུ་བབ་པ་ནི་དབྱིབས་ཡིན་ན། དེ་ནི་ལུས་མེད་པའི་དབང་ཕྱུག་ལ་ཡོད་པ་མ་ཡིན་པ་མ་ཡིན་ནམ། དེས་ན་དེ་ཅི་ལྟར་དེ་མ་ངེས་པ་ཡིན་ཞེས་དོགས་པ་སེལ་བས། དེ་ལས་གཞན་གྱིས་མ་ཡིན་ནོ་ཞེས་བསྟན་པའི་དོན་དང་དབྱིབས་མ་གྲུབ་པའི་ཕྱིར་ཞེས་གསུངས་སོ། །དོན་བྱ་བ་བྱེད་པའི་རང་བཞིན་ཞེས་བྱ་བ་ནི་ཉེ་བར་མཚོན་པ་སྟེ། བསྡད་ནས་འཇུག་པ་ཡང་ངོ༌། །འོན་ཏེ་དབང་ཕྱུག་དེ་ལ་དོན་བྱ་བ་བྱེད་པ་ཉིད་མེད་པ་ཁོ་ན་བ་དེས་ན་འདི་ཡང་ཅི་ལྟར་མ་ངེས་པ་ཡིན་སྙམ་ན། དེ་ལྟ་བུའི་རང་བཞིན་དེ་ནི་ཞེས་གསུངས་ཏེ་དོན་བྱ་བ་བྱེད་པའི་རང་བཞིན་ནོ། །གལ་ཏེ་དབང་ཕྱུག་ཀྱང་གཞན་ཁོ་ནས་བསྐུལ་བར་བྱ་བ་མ་ཡིན་ནམ། དེས་ན་ཅི་ལྟར་དོན་བྱ་བ་བྱེད་པའི་ཕྱིར་མ་ངེས་བ་ཡིན་ཞེ་ན། དབང་ཕྱུག་དེ་ནི་ཞེས་གསུངས་སོ། །འདི་ཡང་ཁས་བླངས་པ་དང་འགལ་བའི་རྣམ་པ་ཉིད་དུ་རིག་པར་བྱའོ། །འོན་ཏེ་འདི་ནི་རང་ཉིད་ཅེས་བྱ་བ་ལ་སོགས་པ་ནི་སྔར་བརྗོད་པ་ཉིད་དོ། །འོན་ཀྱང་ཁྱད་པར་བསྒྲུབ་པའི་དོན་དུ་རྗེས་སུ་བརྗོད་པ་ཡིན་ནོ། །ལན་དུ་རྫ་མཁན་ལ་སོགས་པ་ཞེས་གསུངས་སོ། །གཞན་གྱིས་དོགས་པ་ནི་དེ་དག་གིས་ཞེས་བྱ་བ་སྟེ། རྫ་མཁན་ལ་སོགས་པས་སོ། །ལན་དུ་ནུས་པ་ཉིད་དུ་མཐོང་བ་ཞེས་བྱ་བའོ། །འོན་ཏེ་ཞེས་བྱ་བ་ནི་རྒོལ་བ་སྟེ། དབང་ཕྱུག་རྗེས་སུ་དཔག་པས་མཐོང་བ་ནི་ནུས་པ་ཡོད་པ་ཡིན་ནོ། །དེས་ནི་རྗེས་སུ་དཔག་པས་དབང་ཕྱུག་གཞན་རྗེས་སུ་དཔོག་ན་ནུས་པ་ཡིན་གྱི་རྫ་མཁན་གྱི་ནུས་པ་མ་ཡིན་ནོ་སྙམ་ན། སུན་འབྱིན་པ་བརྗོད་པ་ནི་དབང་ཕྱུག་ལ་ཡང་དབང་ཕྱུག་གཞན་རྗེས་སུ་མ་དཔགས་ན་ནུས་པ་མེད་པར་ཐུག་པ་མེད་དེ་དབང་ཕྱུག་གཞན་དང་གཞན་རྗེས་སུ་
དཔག་པས་སོ། །དེ་ལྟར་དབང་ཕྱུག་གཞན་དང་གཞན་དཔོག་པ་ནི་གཅིག་ཀྱང་དབང་ཕྱུག་མ་ཡིན་ཏེ། གཞན་ལ་རག་ལས་པས་འཇུག་པའི་ཕྱིར་རོ་སྙམ་དུ་དགོངས་པའོ། །རྣམ་པ་གཞན་གྱི་སྒོ་ནས་ཀྱང་ཡང་ན་དཔེ་ལ་ཐེ་ཚོམ་ཟ་བ་ཡིན་ཞེས་བྱ་བ་དེ་བཤད་པའི་དོན་དུ་གཞན་ཡང་ཞེས་གསུངས་སོ། །དབྱིབས་ཡོད་མེད་དེ་ལྟན་ཡང་དེ་ལ་ལྟོས་ན་རྡུལ་ཕྲ་རབ་ཆོས་མི་མཐུན་པའི་དཔེ་མ་ཡིན་ནོ་ཞེས་ཚེགས་སུ་བཅད་པ་ཕྱེད་ཀྱིས་དོན་ཏོ། །འདི་ནི་དཔེ་རྡུལ་ཕྲ་རབ་ལ་ཐེ་ཚོམ་ཟ་བ་ཡིན་ཞེས་བྱ་བ་ཡིན་ཏེ། སྒྲུབ་པར་བྱེད་པའི་ཚད་མ་མེད་དོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་ན་ཞེས་བྱ་བ་ནི་རྡུལ་ཕྲ་རབ་ཉིད་ཀྱི་ཕྱིར་རོ་ཞེའོ། །རྣམ་པ་དེ་ལྟ་ཞེས་བྱ་བ་ནི་མེད་པའི་རང་བཞིན་དུའོ། །ཆ་མེད་པའི་རང་བཞིན་གྱི་རྡུལ་ཕྲ་རབ་ནི་ཚད་མ་འགས་ཀྱང་རྟོགས་པ་མེད་དོ། །གཞན་གྱི་བསམ་པས་རྡུལ་ཕྲ་རབ་སྒྲུབ་པར་བྱེད་པའི་ཚད་མ་ཡོད་པའི་དོགས་པ་བསུ་བ་ནི། འོན་ཏེ་འདི་སྐད་དུ་ཞེས་བྱ་བའོ། །ལན་ནི་རྡུལ་བརྒྱད་པ་ལས་ཞེས་བྱ་བའིའོ། །དེ་ལྟར་རགས་པ་ཉིད་ཀྱིས་མཐོང་བཞིན་པའི་རགས་པའི་སྔ་མ་རྗེས་སུ་དཔོག་པར་འགྱུར་མོད། གཞན་གྱི་བལྟ་བྱའི་མཐར་འདོད་པ་དགུ་པ་བརྒྱད་པས་ཕ་རོལ་རྡུལ་བདུན་པ་ལ་སོགས་པ་ཡོད་དོ་ཞེས་ག་ལས་རྟོགས། གཞན་གྱི་ལས་ནི་གལ་ཏེ་རྗེས་དཔག་ལས་ཞེས་བྱ་བ་སྟེ་བཤད་ཟིན་པ་ལས་སོ། །དེ་ལས་གཞན་ཡང་ཞེས་བྱ་བ་ནི་གྲུབ་པའི་མཐའོ། །རྡུལ་ཕྲ་རབ་རྟོགས་པ་ལས། ཕ་རོལ་མ་རྟོགས་པ་ག་ལས། དེ་ལྟར་ན་ནི་རྗེས་སུ་དཔག་པ་བརྒྱུད་པས་ན་རྡུལ་ཕྲ་རབ་མི་གྲུབ་བོ་སྙམ་དུ་དགོངས་པའོ། །གལ་ཏེ་འབྲས་བུ་རགས་པ་ལས་ཕྲ་མོ་དཔག་པར་བྱ་བ་མ་ཡིན་ནམ། དེས་ན་གལ་ཏེ་རྡུལ་བརྒྱད་ཀྱི་བརྩམས་པ་རགས་པ་ཡང་ཡིན་ན། དེའི་ཚེ་དེས་ཕྲ་མོ་རྟོགས་པར་བྱེད་དོ། །དེ་ལྟ་ཡིན་དང་ཇི་སྲིད་དེ་དང་དེས་རྡུལ་ཕྲ་རབ་ཀྱི་བར་དུ་རྟོགས་པར་བྱེད་པའི་ཕྱིར། གང་གིས་རྗེས་སུ་དཔག་པ་གཞན་དང་འཇུག་པས་རྡུལ་ཕྲ་རབ་མི་འགྲུབ་པར་འགྱུར་བ་རྡུལ་ཕྲ་རབ་ལས་གཞན་པའི་རྗེས་སུ་དཔག་པ་འཇུག་པའི་སྐབས་གང་ལ་ཡོད་སྙམ་དུ་དོགས་ན། འདི་རྡུལ་བརྒྱད་པོའི་ཞེས་གསུངས་སོ། །གཞན་དུ་ཞེས་བྱ་བ་ནི་རྡུལ་ཕྲ་རབ་དང་རྡུལ་ཕྲ་རབ་གཉིས་པའོ། །ཅིའི་ཕྱིར་
གྲངས་ཡོངས་སུ་མ་ཆད་ཅེ་ན། རྡུལ་ཕྲ་རབ་མཐོང་བ་ཡིན་ན་ནི་ཞེས་གསུངས་སོ། །འོན་ཏེ་རྒྱུ་རྡུལ་བརྒྱད་པ་དེ་རགས་པ་ཡིན་པ་དེས་ན་དེ་ནི་རྡུལ་གཉིས་པར་ཡང་མི་འགྱུར་ན། རྡུལ་ཕྲ་རབ་ཏུ་ལྟ་ཅི་སྨོས། དེས་ན་གོ་བར་བྱེད་པ་ནི་རགས་པ་ཡིན་གྱི་གཞན་གྱི་ནི་མ་ཡིན་ལ། དེ་ཡང་གྲུབ་པ་ཁོ་ན་བས། མ་གྲུབ་པའི་ཉེས་པ་མེད་དོ་སྙམ་དུ་བསམས་པའོ། །སུན་འབྱིན་པ་ནི་གང་གི་ཚེ་ཞེས་བྱ་བའོ། །གང་གི་ཚེ་རྡུལ་གཉིས་བ་ལ་སོགས་པ་མ་མཐོང་བ་དེའི་ཚེ་གང་ལ་ལྟོས་ན་རྡུལ་བརྒྱད་པར་རགས་པ་ཡིན་རྗེས་སུ་དཔག་བྱ་ལ་ལྟོས་ན་ནི་ཞེས་བྱ་བ་ནི་དོགས་པའོ། །ཐུག་པ་མེད་པར་ཞེས་བྱ་བ་ནི་ལན་ནོ། །དོན་འདི་ཡིན་ཏེ་རག་ལས་པ་ཉིད་ཀྱིས་གཞན་རྗེས་སུ་དཔོག་ལ་རྗེས་སུ་དཔག་པས་གཞན་གྲུབ་པ་ལས་ཀྱང་རིགས་པ་ཉིད་ཡིན་པས་ན། ཇི་སྲིད་གཞན་རྗེས་སུ་དཔག་པ་དེ་སྲིད་རགས་པ་མ་ཡིན་ལ། ཇི་སྲིད་རགས་པ་མ་ཡིན་པ་དེ་སྲིད་ཀྱང་གཞན་རྗེས་སུ་དཔག་པ་མེད་དོ། །དེས་ན་ཕན་ཚུན་རྟེན་བའི་ཕྱིར། རགས་པ་ཉིད་མ་ངེས་པས་ན། དེས་ངོས་པོ་ཉིད་ཙམ་གཞན་རྗེས་སུ་དཔོག་པ་ཡིན་གྱི་འབྲས་བུ་ཉིད་དུ་ནི་མ་ཡིན་ནོ། །དེས་ན་རྡུལ་ཕྲ་རབ་ཏུ་འདོད་པ་ལས་ཀྱང་གཞན་རྗེས་སུ་དཔོག་པ་དེ་ལས་གཞན་རྗེས་སུ་དཔོག་པའི་ཕྱིར་ཐུག་པ་མེད་པར་ཐལ་ལོ། །དེ་ཉིད་བཤད་པ་ནི། རྗེས་དཔག་ལ་ནི་ལྟོས་བཅས་པས། །ཞེས་བྱ་བའོ། །དེས་ན་གང་དང་གང་དུ་རྡུལ་ཕྲ་རབ་རྣམ་པར་གཞག་ཏུ་འདོད་པ་དེ་དང་དེར་རྗེས་སུ་དཔག་པ་གཞན་དང་གཞན་གྱིས་འགོག་པའི་ཕྱིར་རྡུལ་ཕྲ་རབ་གནས་བ་མེད་དོ། །འོན་ཏེ་ཞེས་བྱ་བ་ནི་གཞན་དག་རྣམ་པ་གཞན་དུ་རྟུལ་ཕྲ་རབ་རྣམ་པར་གཞག་པའི་ཕྱིར་སྨྲས་པའོ། །ལྟ་བར་བྱ་བའི་རང་བཞིན་ཉིད་རྡུལ་ཕྲ་རབ་ཡིན་ནོ། །གང་གི་ཚེ་ཞེ་ན་མཐར་ཐུག་པར་འགྱུར་བ་ནི་སྟེ་གང་ལས་ཆུང་བའི་བལྟ་བྱ་གཞན་མེད་པ་སྟེ། རྡུལ་བརྒྱད་པ་ཞེས་བསྙད་པ་གང་ཡིན་པའོ་ཞེས་བྱ་བའི་དོན་ཏོ། །འོ་ན་ནི་དེ་ཆོས་མི་མཐུན་པའི་དཔེ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟར་ཆོས་མཐུན་པའི་བསྒྲུབ་པ་དང༌། ཆོས་མི་མཐུན་པའི་དཔེ་ལ་ཐེ་ཚོམ་ཟ་བའི་རྣམ་པ་གཉིས་བཤད་ནས། ད་ནི་རྣམ་པ་ཐམས་ཅད་དུ་གཞན་གྱིས་འདོད་པའི་འབྲས་བུ་ཉིད་ནི་མི་སྲིད་དོ་ཞེས་བྱ་བ་སྐབས་སུ་བབ་པའི་སུན་འབྱིན་པ་ཅི་སྟེ་བཏང་སྙོམས་སུ་དགོངས་ནས།
ཡང་ཐེ་ཚོམ་དྲ་བ་ཡིན་ཞེས་བྱ་བའི་རྩ་བ་རྣམ་པར་འགྲེལ་པས་གལ་ཏེ་རྡུལ་ཕྲ་རབ་ཞེས་གསུངས་སོ། །གཅིག་ནས་གཅིག་ཏུ་བརྒྱུད་ནས་རྡུལ་ཕྲ་རབ་དེ་དག་ཉིད་ཀྱིས་བརྩམས་པའི་ཕྱིར་རོ། །རྡུལ་ཕྲན་རྣམས་ནི་གྲུབ་ཅེ་ན་ཡང་དེའི་བསྒྲུབ་པར་བྱ་བ་བལྟ་བར་བྱ་བ་ལ་སོགས་པ་ནི་དེ་ཉིད་ཀྱིས་གྲུབ་པའི་ཕྱིར་རོ་ཞེས་གནས་དང་གནས་སུ་སྤྲོ་བར་འགྱུར་རོ། །དེའི་ཕྱིར་འདི་ཁས་བླངས་པས་ཅི་བྱ། རྡུལ་ཕྲ་རབ་རྣམས་ཀྱིས་བརྩམས་པའི་ཡན་ལག་ཅན་ནི་འཐད་པ་ཡང་མ་ཡིན་ནོ་ཞེས་སྟོན་ཏོ། །ཕྱོགས་གཅིག་གིས་ཞེས་བྱ་བ་ལ་སོགས་པའོ། །དགོངས་པ་ནི་འདི་ཡིན་ཏེ། རྡུལ་ཕྲ་རབ་ཕན་ཚུན་འདྲེས་པ་དག་གིས་བརྩམས་པའི་རྡུལ་བུམ་པའི་ཚོགས་ཀྱིས་ལྡན་པས་ཡན་ལག་ཅན་བསྒྲུབ་པར་བྱ་བ་ཡིན་ནོ། །དེ་ལ་དེ་དག་རྣམས་བདག་ཉིད་ཐམས་ཅད་དམ་ཕྱོགས་གཅིག་གིས་རེག་པར་འགྱུར་གྲང་ན། ཕྱོགས་དང་པོ་ལ་ནི་རྡུལ་ཕྲ་རབ་ཐམས་ཅད་གཅིག་གི་འདུལ་པར་འགྱུར་བའི་ཕྱིར་རྣམ་པ་དེ་ལྟ་བུ་ཡན་ལག་ཅན་མི་སྲིད་དོ། །འོན་ཏེ་གཉིས་པ་ཡིན་ན་དེའི་ཚེ། ཕྱོགས་གཅིག་གིས་ནི་རེག་ན་དེ། དེ་ཅི་ལྟར་རྡུལ་ཕྲན་ཡིན་པར་འགྱུར། ཅི་སྟེ་རྡུལ་ཕྲན་མ་ཡིན་ཞེ་ན། ཐམས་ཅད་ཕྱོགས་ནི་ཞེས་གསུངས་སོ། །འོ་ན་ཏེ་ཞེས་བྱ་བ་ནི་གཞན་གྱིའོ། །ལན་ནི་དེ་ཡང་མ་ཡིན་ཏེ་ཞེས་བྱ་བའོ། །གལ་ཏེ་རྡུལ་ཕྲ་རབ་རྣམས་མ་རེག་པར་ཡང་ལྡན་པ་དེ་སྐྱེས་ན། དེའི་ཚེ་ལྡན་པ་དེ་ཉིད་ཡིན་མོད་ཅེས་བལྟ་བར་བྱ་སྟེ། རྡུལ་ཕྲ་རབ་རྣམས་ནི་གཞན་དུ་འགྱུར་བ་མ་ཡིན་ནོ་སྙམ་དུ་དགོངས་པའོ། །ཡང་ན་དེ་ཉིད་ཅེས་བྱ་བ་ནི་རྡུལ་ཕྲ་རབ་ཉིད་དེ་གཞན་དུ་གྱུར་པ་ནི་མ་ཡིན་ནོ་ཞེས་བྱ་བ་ཡིན་ནོ། །དེ་ལྟ་ཡིན་མོད་མི་འཐད་པ་ཅི་ཡོད་སྙམ་ན། ཇི་ལྟར་ཞེས་གསུངས་སོ། །འོན་ཏེ་ཞེས་བྱ་བ་ནི་གཞན་གྱིའོ། །རྡུལ་ཕྲ་རབ་དེར་ཡན་ལག་ཅན་གཞན་ཡོད་པ་དེས་རྡུལ་ཕྲ་རབ་དེ་ལ་རྣམ་པ་གཅིག་པ་ཅན་གྱི་བློར་འགྱུར་རོ་སྙམ་ན། ལན་དུ་བརྟགས་པའི་ཕྱིར་ཞེས་བྱ་བའོ། །གལ་ཏེ་ཞིག་ན་ནི་ཐལ་པ་འདིར་མི་འགྱུར་རོ་ཞེས་བྱ་བའི་དོན་ཏོ། །གལ་ཏེ་ཁོ་བོ་ཅག་ལ་སོགས་པ་དག་གིས་རྡུལ་ཕྲ་རབ་མཐོང་བར་མི་ནུས་པ་ཁོ་ན་མ་ཡིན་ནམ། དེས་ན་དེ་སྐད་ཅི་སྟེ་བརྗོད་ཅེས་དོགས་པ་བསུ་ནས་བཤད་པ་ནི་གལ་ཏེ་ཞེས་བྱ་བ་ལ་སོགས་པའོ། །འོན་ཏེ་དེ་དག་གཉི་ག་ནི་ཞེས་བྱ་བ་
ནི་རྡུལ་ཕྲ་རབ་དང་ཡན་ལག་ཅན་གྱི་རང་བཞིན་ནོ། །ལན་དུ་འཕྲོ་འདུ་ཞེས་གསུངས་ཏེ། ཡན་ལག་རྣམས་ལ་ཡན་ལག་ཅན་གྱིའོ། །ཅི་ལྟར་ཡིན་ཞེས་བྱ་བ་ནི་གཉིས་པོ་སོ་སོར་རྟོགས་པའི་ཕྱིར་རོ། །སུན་འབྱིན་པ་གཞན་ནི་དེ་ལྟ་ཡིན་ན་ནི་ཞེས་བྱ་བ་ལ་སོགས་པ་སྟེ། ཡན་ལག་ཅན་དང་རྡུལ་ཕྲ་རབ་དག་དབང་ཕྱུག་གིས་སོ་སོར་མཐོང་ནའོ། །གཞན་དུ་ནི་མཐོང་བ་ཞེས་བྱ་བ་ནི་ཐ་མི་དད་པར་མཐོང་བའོ། །འོན་ཏེ་བདག་ཅག་ལ་ལྟོས་ན་ནི་འཕྲོད་པ་འདུ་བ་ཅན་ཡིན་ལ། དབང་ཕྱུག་ལ་ལྟོས་ནས་ནི་མ་ཡིན་ནོ་སྙམ་དུ་སེམས་པ་དེའི་ཚེ་ཡང་སྐྱེས་བུ་སོ་སོ་ལ་དངོས་པོ་ཐ་དད་པ་ཡིན་ནོ་ཞེས་བྱ་བ་འདི་ཤིན་ཏུ་ལེགས་པ་ཞིག་གོ །གཞན་དུ་མཐོང་བ་གཅིག་པོ་འཁྲུལ་པ་ཡིན་ནོ་ཞེས་བྱ་བ་ནི་མི་རིགས་པ་མེད་དོ། །གལ་ཏེ་རྡུལ་ཕྲ་རབ་གནས་པ་ཉིད་ལ་ཚད་མར་གྲུབ་པར་རྩོལ་བ་མ་ཡིན་ནམ། དེས་ན་རྡུལ་ཕྲ་རབ་སུན་འབྱིན་པའི་གོ་སྐབས་ག་ལ་ཡོད་ཅེ་ན་བདེན་ཏེ། རྣམ་འགྲེལ་མཛད་པས་འདི་གཞན་དུ་མ་གསུངས་པའི་ཕྱིར། འགའ་ཞིག་གི་ཚེ་རྣམ་པ་འདི་ཡང་རིག་པ་ཙམ་དུ་འགྲུབ་པའི་རྒྱུ་མཚན་དུ་འགྱུར་རོ་སྙམ་དུ་དོགས་ཏེ། འདིའི་དོན་དུ་བསམས་ནས་སྐབས་སུ་བརྗོད་པ་ཡིན་ནོ། །དངོས་པོ་ཉིད་དུ་ནི་ཕྱི་རོལ་རིག་པ་མ་ཡིན་པས་ཉིད་ཀྱིས་རྣམ་པར་རིག་པ་ཙམ་དུ་གྲུབ་པར་འགྱུར་རོ། །དེ་ལྟར་ཡིན་དང་དབང་ཕྱུག་རེ་བ་ན་ཤིན་དུ་རྒྱང་རིང་བའི་ཕྱིར་སྐབས་མ་ཤོར་ལ། ཆོས་མི་མཐུན་པའི་དཔེ་འཆད་པ་ནི་འབྲས་བུ་ཡིན་པ་ཉིད་ཀྱི་ཕྱིར་རོ། །ཡན་ལག་ལྡན་པས་ཡན་ལག་ཅན་བརྩམས་པ་ཡིན་ནོ་ཞེས་གང་བརྗོད་པ་དེ་ཡང་མ་འབྲེལ་ལོ་ཞེས་སྟོན་པ་ནི། རགས་པ་ཆ་ཤས་ལྡན་པ་ཞེས་བྱ་བ་སྟེ། གང་དང་གང་རགས་པ་དེ་ཐམས་ཅད་ཆ་ཤས་ལྡན་པ་སྔོན་དུ་སོང་བ་ཡིན་ནོ་ཞེས་བྱ་བའི་ཁྱབ་པ་མ་གྲུབ་པའོ་ཞེས་བྱ་བའི་དོན་ཏོ། །གལ་ཏེ་འཇིམ་གོང་ལ་སོགས་པ་ལ་དམིགས་པར་ཇི་ལྟར་མ་གྲུབ་ཅེ་ན། གལ་ཏེ་ཞེས་བྱ་བ་ལ་སོགས་པའོ། །དཔེར་ན་ལག་པས་འཇིམ་པ་བླངས་ནས་གོང་བུར་སྦྱོར་བར་མཐོང་བ་དེ་བཞིན་དུ་མྱུ་གུ་ལ་སོགས་པ་བསྐྱེད་པར་བྱ་བ་ལ་ནི་དེའི་ཆ་ཤས་གཞན་གྱིས་བསྡུས་པའམ་རང་ཉིད་འདུས་པ་མ་མཐོང་ངོ་ཞེས་བྱ་བའི་དོན་ཏོ། །དེ་ཉིད་གསལ་བར་བྱེད་པ་ནི་འདི་ལྟར་ཞེས་བྱ་བའོ། །ཤིང་ཝ་དཱ་
དེ་ལ་ཡན་ལག་ལྡན་པ་ཇི་ལྟར་འགྱུར་ཏེ་མི་འགྱུར་བ་ཁོ་ནའོ། །གང་གི་ཚེ་མི་འགྱུར་སྙམ་ན། ཡན་ལག་རྣམས་སྔོན་ཡོད་མིན་ན་སྟེ་མེད་པའི་ཚེའོ། །གལ་ཏེ་སྔར་ཡན་ལག་རྣམས་མེད་ཀྱང་ལྡན་པ་ནི་ཡོད་པར་འགྱུར་རོ་སྙམ་ན། ཡན་ལག་ཡོད་པ་རྣམས་ཞེས་གསུངས་སོ། །ཡན་ལག་ཅན་ཡང་ག་ལ་ཡིན་ཏེ་ཞེས་བྱ་བ་ནི་རྩོམ་པར་བྱེད་པའི་ལྡན་པ་མེད་པའི་ཕྱིར་རོ། །མུན་ཁུང་གི་བར་ནི་གཏི་མུག་ཆེན་པོས་བསྒྲིབས་བ་རྣམས་སོ། །བདག་ཅག་གིས་དེ་ཁོ་ན་བསྟན་པའི་རྒྱུ་དེ་ལས་ནི་ཞེས་བྱ་བ་ནི་མ་མཐོང་བ་ལྷན་ཅིག་བྱེད་པ་ཅན་གྱི་ཉེ་བར་ལེན་པའི་རྒྱུ་ཆུང་ངུ་ལས་སོ། །ཁོ་བོ་ཅག་ཐམས་ཅད་ཅེས་སྦྱར་བར་བྱ་སྟེ། རིགས་པ་སྨྲ་བ་ཁོ་བོ་ཅག་ཅེས་བྱ་བར་བསམ་པའི་ཕྱིར་རོ། །དེ་ལྟ་ན་ཅི་ལྟར་ངེས་པར་འགྲུབ། འོན་ཏེ་ཞེས་བྱ་བ་ནི་གཞན་གྱིའོ། །རྡུལ་ཕྲ་རབ་ཀྱི་ཚོགས་འདུས་པར་མ་མཐོང་ཡང་འཇིམ་གོང་ལ་འཇིམ་པ་འདུས་པ་མཐོང་བའི་དཔེས་ཡོད་པར་འགྲུབ་པོ་ཞེ་ན། སུན་འབྱིན་པ་ནི་སྒྲོན་མའི་དཔེ་ཞེས་གསུངས་སོ། །དཔེར་ན་མུན་ཁུང་ན་གནས་པའི་བྱིས་པ་སྒྲོན་མས་གསལ་བར་བྱེད་པ་ཞེས་བྱ་བའི་ཚུལ་གྱིས་སོ། །གྲངས་ཅན་ལྟ་བ་ཞེས་བྱ་བ་ནི་གལ་ཏེ་དཔེ་ཙམ་གྱི་བསྒྲུབ་བྱ་འགྲུབ་ནའོ། །དེ་ལྟ་ཡིན་ན་སྐྱོན་ཅི་ཡོད་སྙམ་ན། དེའི་ཕྱིར་ཞེས་སྨོས་ཏེ། གྲངས་ཅན་གྱི་ལྟ་བ་འོངས་པའི་ཕྱིར་རོ། །ཅིའི་ཕྱིར་འདི་ཐག་རིང་པོར་འགྱུར་སྙམ་ན། སྒྲོན་མ་ལ་སོགས་ཞེས་གསུངས་སོ། །དེས་ན་སེམས་པ་མེད་པས་གསལ་བའི་ཕྱིར་ཅི་ལྟར་དབང་ཕྱུག་སྒྲུབ་བྱེད་ཡིན། འོན་ཏེ་སྒྲོན་མ་ལ་ཡང་སེམས་པ་ཅན་གྱིས་བྱིན་གྱིས་བརླབས་པ་ཁོ་ན་མངོན་པར་གསལ་བར་བྱེད་པ་ཡིན་པས་དེས་ཇི་ལྟར་དབང་ཕྱུག་སྒྲུབ་བྱད་མ་ཡིན་པར་འགྱུར་སྙམ་ན། དེ་ཡང་ཞེས་གསུངས་སོ། །ལན་ནི་སྔར་བཏབ་པོ་ཞེས་བྱ་བ་ནི་ནུས་པ་ཉིད་དུ་མཐོང་བ་ཇི་ལྟར་ནུས་པ་མ་ཡིན་བ་ཞེས་བྱ་བ་ལ་སོགས་པས་སོ། །གང་གི་ཕྱིར་དེ་ལྟར་བློ་ཙམ་སྒྲུབ་ན་གཏན་ཚིགས་ཐམས་ཅད་གྲུབ་པ་དང༌། ཁྱད་པར་ཅན་དབང་ཕྱུག་ལ་ཡང་དཔེ་མ་གྲུབ་པས་ན་ཁྱབ་པ་མེད་པའི་ཕྱིར་མ་ངེས་པ་དང༌། ཅི་ལྟར་མཐོང་བ་བཞིན་རྟོགས་པ་ན་ཡང་འདོད་པ་ལ་གནོད་པའི་འགལ་བར་འགྱུར་བ་དང༌། དབང་ཕྱུག་དེ་ཉིད་ཀྱིས་
ཀྱང་མ་ངེས་པ་དང༌། དབྱིབས་ཀྱང་མེད་པས་མ་གྲུབ་པ་དང༌། ཤིང་ལ་སོགས་པས་འཁྲུལ་པའི་ཕྱིར་མ་ངེས་པ་དང༌། དབང་ཕྱུག་བྱེད་པ་པོ་ཡིན་པ་ལ་ཡང་དཔྱད་མི་བཟོད་པ་དེས་ན་ཞེས་མཇུག་སྡུད་པའོ། །དེ་དེ་དེ་དང་དེ་ལས་ཡིན། །ཞེས་བྱ་བ་ནི་དེ་དང་དེ་ལས་དེ་དང་དེ་སྐྱེས་སོ་ཞེས་ཐ་སྙད་ཀྱིས་ཏེ། འབྲས་བུའི་ཚོགས་རྣམས་སེམས་པ་ཅན་གཅིག་ལ་ངེས་པ་ཉིད་མ་ཡིན་ན་དབང་ཕྱུག་གི་གཏམ་ཡང་མེད་དོ་ཞེས་བྱ་བའི་དོན་ཏོ། །དེ་ལྟར་མིན་ན་ཞེས་བྱ་བ་ནི་གལ་ཏེ་གཅིག་ལ་བྱེད་པ་པོ་སེམས་པ་ཅན་མཐོང་བ་ཙམ་གྱིས་ཐམས་ཅད་ལ། འགྲས་བུ་ཉིད་ལ་སོགས་པ་ཙམ་མཐོང་བའི་ཕྱིར་བྱེད་པ་པོ་སེམས་པ་ཅན། རྗེས་སུ་དཔོག་ན་དེའི་ཚེ་སེར་པོ་ཡང་དཀར་པོ་ཡིན་ཏེ། དངོས་པོ་ཉིད་ཡིན་པའི་ཕྱིར་དཀར་པོ་གཞན་བཞིན་ནོ་ཞེས་བྱ་བར་འགྱུར་རོ། །ཐལ་བ་འདི་སྤང་པའི་དོན་དུ་གཞན་གྱིས། མངོན་སུམ་གནོད་པས་མིན་ཞེ་ན་ཞེས་སྨྲས་སོ། །དངོས་པོ་ཉིད་ཡིན་པ་ལ་ནི་སེར་པོ་དཀར་པོ་ཉིད་དུ་དཔོག་པར་མི་འགྱུར་རོ། །མངོན་སུམ་གྱིས་གནོད་པའི་ཕྱིར་རོ་ཞེས་བྱ་བའི་ཐ་ཚིག་གོ །དེ་འདིར་ཞེས་བྱ་བ་ནི་གྲུབ་པའི་མཐའ་སྟེ། མངོན་སུམ་གྱིས་གནོད་པ་དེ་དབང་ཕྱུག་རྗེས་སུ་དཔག་པ་འདིར་མེད་ཅེས་ཚད་མ་གང་ལ་རྟོགས་ཏེ། མཚན་ཉིད་དང་ལྡན་བ་ལ་གནོད་པ་མཐོང་ན་དེའི་མཚན་ཉིད་ཅན་གཞན་ལ་ཡང་གནོད་པ་དོགས་པ་མི་ལྡོག་པའི་ཕྱིར་དང༌། རྩྭ་ལ་སོགས་པ་ལ་སྐྱེས་བུ་མེད་པར་མཐོང་བའི་ཕྱིར་རོ། །འོན་ཏེ་དེ་ལས་མ་མཐོང་བའི་བྱེད་པ་པོ་ཡོད་པ་ཡིན་ནོ་ཞེ་ན། མངོན་སུམ་དང་མི་དམིགས་པ་གཉིས་ཀྱིས་མེད་ན་མི་འབྱུང་བ་གྲུབ་པ་ཁས་བླངས་པས་ན། རང་བཞིན་གྱིས་བསྐལ་བས་ལྟར་བཏུང་བ་དང་ཅིག་ཤོས་ཁས་བླངས་པར་མི་འཐད་པའི་ཕྱིར་དང༌། ཁས་ལེན་ན་ཡང་ལྡོག་པ་མི་འགྲུབ་པའི་ཕྱིར་མེད་ན་མི་འབྱུང་པར་མེད་པར་ཐལ་བའི་ཕྱིར་རོ། །འོན་ཏེ་ཁྱབ་པ་འཛིན་པའི་དུས་ན་སྐྱེས་ཕུར་བ་ལྟར་རུང་བ་ལས་ལྡོག་པ་གྲུབ་པ་ཉིད་ཀྱིས་མ་མཐོང་བ་སེམས་པ་མེད་པ་ལ་ལྡོག་པ་འགྲུབ་བོ་ཞེ་ན། དེ་ལྟ་ན་ནི་འོ་ན་རྩྭ་ལ་སོགས་པ་ལ་ནི་གནོད་པ་ལ་སོགས་པར་གནས་སོ། །འདིར་ཡང་མཐོང་བའི་སེམས་པ་ཅན་ལྡོག་པ་གྲུབ་པ་ཉིད་མ་མཐོང་བའི་སེམས་པ་ཅན་ལྡོག་པའི་ཕྱིར་རོ། །རྙེད་ན་ནི་འཇུག་ལ་གོང་
ན་ནི་ལྡོག་པ་ཞེས་བྱ་བར་ནི་མི་རིགས་སོ། །དེའི་ཕྱིར་གཉི་ག་ལ་ཡང་མངོན་སུམ་གྱིས་གནོད་པ་མེད་པའི་ཕྱིར་གནོད་པ་ཚད་མས་མ་གྲུབ་པའོ། །འདི་ཙམ་གྱིས་གསལ་བར་ཡིན་ཡང་གཞན་གྱིས་སྨྲས་པ་ནི་རིགས་པ་ཅན་དེའི་དབང་ཕྱུག་རྗེས་སུ་དཔོག་པ་ལ་གནོད་པ་དམིགས་པ་མེད་པའི་ཕྱིར་ན་དེའི་གནོད་པ་ཉིད་མ་ཡིན་ནའོ། །བདག་གིས་གནོད་པ་མ་མཐོང་བ་དེ་ཙམ་གྱིས་གནོད་པ་མེད་པ་ཡིན་ནོ་ཞེས་བྱ་བའི་དོན་ཏོ། །ལན་དུ་རིགས་པ་ཅན་ཁྱོད་ཀྱིས་གནོད་པ་མི་དམིགས་པའི་མཚན་ཉིད་ཀྱིས་མ་མཐོང་བ་ནི་ཚད་མ་མ་ཡིན་པ་ཁོ་ནའོ། །ཚད་མས་ཁས་བླངས་ན་ཅི་སྐྱོན་ཞེ་ན། གལ་ཏེ་ཁྱོད་ཀྱིས་མ་དམིགས་པའི་མ་མཐོང་བ་ཚད་མ་ཡིན་ན་དེའི་ཚེ་དབང་ཕྱུག་ཀྱང་མ་དམིགས་པའི་ཕྱིར་དེ་ཡང་འགོག་པར་འགྱུར་རོ། །དེ་ནི་རྗེས་སུ་དཔག་པ་ལས་གྲུབ་པའི་ཕྱིར་དེ་ལྟ་མ་ཡིན་ནོ་ཞེ་ན། འདི་ནི་སྙིང་པོ་མེད་དེ་མ་དམིགས་པ་ཙམ་ལས་ཐེ་ཚོམ་དུ་འགྱུར་ན་རྗེ་སུ་དཔག་པའི་གོ་སྐབས་ཡོད་ཀྱི་དེ་ལས་ཁྱད་པར་གཅིག་ཏུ་ངེས་པར་གྲུབ་ན་ནི་མ་ཡིན་ནོ། །འོན་ཏེ་དབང་ཕྱུག་མེད་པར་གྲུབ་པ་ལ་ནི་མ་མཐོང་བ་ཚད་མ་མ་ཡིན་ཏེ་ཐེ་ཚོམ་ཟ་བའི་ཕྱིར་རོ། །དེས་ན་རྗེས་སུ་དཔག་པ་ལ་འཇུག་གོ་སྙམ་ན། འོ་ན་ནི་གནོད་པ་མེད་པ་ལས་ཀྱང་མ་མཐོང་བ་ཚད་མ་མ་ཡིན་པ་ཁོ་ནའོ། །དེ་ལྟ་ན་ཡང་དབང་ཕྱུག་ཅི་ལྟར་འགྲུབ། དེས་ན་གནོད་པ་དང་གནོད་པ་མེད་པས་བྱས་པའི་ཁྱད་པར་ནི་ཡོད་པ་མ་ཡིན་ནོ། །དེས་ན་ལྷན་ཅིག་འབྱུང་པ་ཙམ་མཐོང་བ་ལས་ཐམས་ཅད་ཐམས་ཅད་ལ་རྗེས་སུ་དཔོག་པ་ཞེས་བྱ་བ་ནི་ལེགས་པར་གནས་པ་ཡིན་ནོ། །དུ་བ་ལ་མེ་བཞིན་དུ་སེམས་པ་ཙམ་སེམས་པ་ཅན་གྱི་ཁྱད་པར་གྱིས་ནི་འབྲས་བུ་ཉིད་ལ་སོགས་པ་ལ་ཁྱབ་པ་ཚད་མས་མ་གྲུབ་པོ་ཞེས་སྟོན་པ་ནི། གཞན་ཡང་ཞེས་བྱ་བ་ལ་སོགས་པའོ། །དངོས་པོ་ཞེས་བྱ་བ་ནི་དོན་བྱ་བ་བྱེད་པའོ། །དེ་བཞིན་དུ་སྒྲུབ་པར་བྱེད་པ་གཞན་དག་ཀྱང་ཉེ་བར་མཚོན་པར་བྱ་བ་ཡིན་ནོ། །ཅིའི་ཕྱིར་རྗེས་སུ་དབོག་པར་བྱེད་པ་མ་ཡིན་ཞེ་ན། སྐྱེས་བུའི་འདོད་པས་ཞེས་བྱ་བ་ལ་སོགས་པས་གསུངས་སོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་འདོད་པས་གཏན་ཚིགས་བསྒྲུབ་བྱ་བ་སྒྲུབ་པར་བྱ་བའི་ཕྱིར་འཇུག་
ན། དེའི་ཚེ་དབང་ཕྱུག་ལས་བཟློག་པ་ཡང་འགྲུབ་པར་འགྱུར་རོ། །ཇི་ལྟར་དབང་ཕྱུག་མེད་པར་ཐལ་ཞེ་ན། དེ་ཡང་ཞེས་སྨོས་ཏེ། དབང་ཕྱུག་མེད་པ་ཡང་ངོ༌། །དེའི་ཕྱིར་གདོན་མི་ཟ་བར་ཁྱད་པར་འཛིན་པ་ཁས་བླང་ པ་བྱ་དགོས ་སོ། །ཁྱབ་པ་རྟོག་པ་དེ་ཡང་རྣམ་པ་གཉིས་ཏེ། མངོན་སུམ་དང་རྗེས་སུ་དཔག་པ་དག་ལས་སམ། བཟློག་ན་གནོད་པ་ཅན་གྱིས་ཚད་མས་སོ། །དེ་ལ་མངོན་སུམ་དང་མི་དམིགས་པའི་དབང་དུ་བྱས་ནས་བཤད་པ་ནི་འོན་ཀྱང་ཞེས་བྱ་བའོ། །གང་ཇི་ལྟར་ཞེས་བྱ་བ་ནི་གང་ཅི་འདྲ་བ་ཞེས་བྱ་བའི་དོན་ཏོ། །དེ་འདྲ་བ་ཉིད་ཅེས་བྱ་བ་ནི་འདས་པ་ན་བྱེད་པ་པོ་དང་བྱ་བའི་ཚིག་གོ །འདིས་ནི་ངེས་པའི་འབྲས་བུ་ནི་གོ་བར་བྱེད་པ་ཡིན་ལ། ངེས་པའི་རྒྱུ་ནི་གོ་བར་བྱ་བ་ཉིད་ཡིན་ནོ་ཞེས་སྤྱི་ཆེན་པོ་སྤངས་པ་ཡིན་ནོ། །འདི་ཉིད་རྣམ་འགྲེལ་ལ་སྦྱོར་བ་ནི་ཞེས་བཤད་པ་ནི་ཞེས་བྱ་བའོ། །དབྱིབས་ལ་སོགས་པ་ཅི་འདྲ་བར་གྱུར་པའོ། །དབྱིབས་ལ་སོགས་པ་དེ་ལས་བྱིན་གྱིས་རློབ་པ་པོ་སེམས་པ་དང་ལྡན་པ་རྗེས་སུ་དཔོག་པ་གང་ཡིན་པ་དེ་ནི་རིགས་པ་ཉིད་ཡིན་ནོ། །ཅི་འདྲ་བ་ཡང་ཡིན་ལ། བྱིན་གྱིས་རློབ་པ་པོ་ཡང་དེ་ཡིན་པ་དེ་ཡོད་པ་དང༌། མེད་པའི་རྗེས་སུ་འཇུག་པར་དབྱིབས་ལ་སོགས་བ་གྲུབ་ན་ནི་དབྱིབས་ལ་སོགས་པ་དེ་ལས། བྱིན་གྱིས་རློབ་པ་པོ་དེ་འདྲ་བ་རྗེས་སུ་དཔོག་པ་གང་ཡིན་པ་དེ་ནི་རིགས་པ་ཉིད་ཡིན་ནོ། །འདིར་ནི་བུམ་པ་ལ་སོགས་པ་རྣམ་པ་གཞན་ལ་ནི་ཁྱབ་པ་ཡིན་ལ། རི་ལ་སོགས་པ་རྣམ་པ་གཞན་དུ་འགྱུར་བ་ལས་ནི་རྗེས་སུ་དཔག་པར་རྩོམ་པའི་ཕྱིར་ཚད་མའི་རྗེས་སུ་འབྲངས་པ་ག་ལ་ཡོད་ཅེས་བྱ་བའི་དོན་ཏོ། །དེ་ལྟ་ན་འོ་ན་སྒྲ་མི་རྟག་སྟེ་བྱས་པའི་ཕྱིར་བུམ་པ་བཞིན་ནོ་ཞེས་བྱ་བ་འདི་ཡང་རྗེས་སུ་དཔག་པ་མ་ཡིན་ཏེ། རིགས་ཤིན་ཏུ་མི་འདྲ་བ་ཡོད་པའི་ཕྱིར་རོ་ཞེ་ན། མ་ཡིན་ཏེ། གང་གི་ཕྱིར་བུམ་པ་ཉེ་བར་མཚོན་བྱར་བྱས་ནས་མངོན་སུམ་གྱི་རྗེས་ལས་བྱུང་བའི་རྣམ་པར་རྟོག་པས་ཡུལ་དུ་བྱས་པ་འབྲས་བུ་མ་ཡིན་པ་ལས་ལྡོག་པ་ཙམ་ཁྱད་པར་གྱིས་རྣམ་པར་མ་བཅད་པའི་སྤྱི་ནི་མི་རྟག་པ་ཙམ་གྱིས་ཁྱབ་པར་ཤེས་པར་འདོད་པ་ན། གལ་ཏེ་བཟློག་པ་ལ་གནོད་པའི་རྗེས་སུ་དཔག་པ་སྦྱར་བར་ནུས་ན་དེའི་ཚེ་མི་རྟག་པ་ཉིད་ཀྱང་རྗེས་སུ་དཔོག་གི་གཞན་
དུ་ནི་མ་ཡིན་ནོ། །སྐབས་སུ་ནི་ཅི་ལྟར་མེའི་མཚན་ཉིད་ཀྱི་དངོས་པོ་འདི་མེད་ན་སྔར་མ་དམིགས་པའི་དུ་བའི་དངོས་པོ་གཞན་གྱི་ཚེ་འདི་དམིགས་པ་ན་དམིགས་པ་དེས་འབྲས་བུ་ཡིན་པའི་ཕྱིར། ཁྱབ་པ་ཁྱད་པར་ཅན་གྱིས་སྦྱིན་ལ་བརྟེན་པ་ཡིན་ནོ། །དེ་བཞིན་དུ་དེ་འདྲ་བའི་སྐྱེས་བུའི་མཚན་ཉིད་ཀྱི་དངོས་པོའིའམ། སེམས་པ་ཅན་ཙམ་མེད་ན། ཅི་ལྟར་ཡོངས་སུ་མཐོང་བའི་བུམ་པ་ལ་སོགས་པ་མེད་ལ། དེ་ཡོད་ན་ནི་ཡོད་པ་དེའི་འབྲས་བུ་ཡིན་པའི་ཕྱིར་འབྲས་བུའི་ཁྱད་པར་ལ་ཁྱབ་པ་གྲུབ་ཀྱི་འབྲས་བུ་ཙམ་ལ་ནི་མ་ཡིན་ཏེ། སེམས་པ་ཅན་གྱི་བྱེད་པའི་སྔོན་རོལ་དུ་འབྲས་བུ་ཙམ་ལྡོག་པ་མ་གྲུབ་པའི་ཕྱིར་རོ། །མེའི་བྱ་བའི་སྔ་རོལ་དུ་ནི་དུ་བ་ཙམ་ལོག་པ་གྲུབ་པ་ཉིད་དོ། །དེས་ན་འབྲས་བུའི་ཁྱད་པར་གྱི་རང་བཞིན་ཉིད་སྒྲུབ་པར་བྱེད་པ་ཡིན་གྱི་འབྲས་བུ་ཙམ་ནི་མ་ཡིན་ནོ། །དུ་བ་ལ་ཡང་ལོ་མ་ལས་བྱུང་བ་ལ་སོགས་པ་ནང་གི་དབྱེ་བ་ཡོད་དོ་ཞེ་ན། ཡོད་མོད་གལ་ཏེ་དེ་དག་ཀྱང་མངོན་སུམ་གྱི་རྗེས་ལ་བྱུང་བའི་རྣམ་པར་རྟོག་པས་གཞན་ལས་ལྡོག་བ་ཉིད་ཀྱི་སྒོ་ནས་འཛིན་ན་དེའི་ཚེ་ཉེས་པ་ཅི་ཡོད་དེ། སྔར་བཤད་པའི་ཚུལ་གྱིས་དུ་བ་ཙམ་ལ་ཁྱབ་པར་རྟོགས་པའི་མི་ལྡོག་པའི་ཕྱིར་རོ། །སྐབས་སུ་བབ་པ་ནི་ཁྱབ་པ་རྟོགས་པ་མེད་ཅེས་བསྟན་ཟིན་ཏོ། །དེ་ཉིད་ཀྱི་ཕྱིར་ཚོང་དུས་སུ་ཕྱིན་པའི་བུམ་པས་ཀྱང་དེ་འདྲ་བའི་བཟོ་བརྗེས་སུ་དཔག་པ་ཁོ་ནའོ། །རི་ལ་སོགས་པའི་རྣམ་པས་ནི་མ་ཡིན་ནོ། །ཤིན་དུ་རིགས་མི་མཐུན་པའི་ལྷ་ཁང་ལ་སོགས་པའི་གོ་བར་བྱེད་པ་ནི་ཁྱབ་བ་སོ་སོར་བཟུང་བའི་འབྲས་བུ་ཉིད་དོ། །དེ་ཉིད་ཀྱི་ཕྱིར་དེའི་ཚེ་བཟོ་རིག་པ་ཁྱད་བར་ཅན་རྗེས་སུ་དཔོག་གི་བུམ་པ་བྱེད་པའི་བཟོ་དང་ལྡན་པ་མ་ཡིན་ནོ། །གལ་ཏེ་རི་ལ་སོགས་པ་ལ་ཡང་ཁྱད་པར་དང་ལྡན་པ་ཉིད་རྗེས་སུ་དཔོག་པར་འགྱུར་ཞེ་ན། གལ་ཏེ་ལྷའི་ཁང་པ་གཞན་བཞིན་དུ་རི་གཞན་ལ་བྱེད་པ་མཐོང་ན་ནི་འགྱུར་བ་ཁོ་ནའོ། །དེའི་ཕྱིར་མངོན་སུམ་གྱི་ཁྱབ་པ་བཟུང་ན་ནི་འབྲས་བུའི་རིགས་ཁྱད་པར་ཅན་སེམས་པ་ཅན་དང་འབྲེལ་པ་འགྲུབ་པའི་ཕྱིར་འབྲས་བུ་ཙམ་ལས་ནི་རྗེས་སུ་དཔོག་པ་མ་ཡིན་ནོ། །རྩྭ་ལ་སོགས་པས་འཁྲུལ་པ་ཡང་སྤང་བར་མི་ནུས་སོ། །འདི་ལྟར་མངོན་
སུམ་དང་མི་དམིགས་པའི་བྱེད་པ་ནི་བ་ལྟར་རུང་བའི་རང་བཞིན་མེད་ན་མི་འབྱུང་བ་ཡིན་པའི་ཕྱིར། བལྟར་རུང་བའི་ལུས་ཅན་སེམས་པ་ཅན་གྱི་ཁྱད་པར་ཁོ་ན་དང༌། ཁྱབ་པ་རྟོགས་པར་བྱ་བ་ཡིན་ལ། བལྟར་རུང་བ་ནི་རྩྭ་ལ་སོགས་པ་སྐྱེ་བོ་ལ་མ་དམིགས་པ་གྲུབ་པ་ཁོ་ནའོ། །འོན་ཏེ་བལྟར་རུང་བའི་ཁྱད་པར་དང་བྲལ་བའི་རྟོག་པ་དང་ལྡན་པ་ཙམ་དང་ཁྱབ་པ་འཛིན་པར་འདོད་པ་ཡིན་ནོ། །དེའི་ཚེ་མངོན་སུམ་ལ་བརྟེན་པ་མ་ཡིན་ནོ། །གལ་ཏེ་མི་མཐོང་བའི་སེམས་པ་ཅན་སྲིད་པར་བྱས་ནས་འཁྲུལ་བ་སྤང་ན་དེའི་སེམས་པ་ཅན་མེད་པ་ལ་འབྲས་བུ་མེད་པར་སེམས་པ་ན་སྲིད་པ་འདི་གར་སོང་ན། གང་གིས་ལྡོག་པ་འགྲུབ་པར་འགྱུར། །རྒྱུ་དང་འབྲས་བུའི་ངོ་བོ་ནི་རྗེས་སུ་འགྲོ་བ་དང༌། ལྡོག་པའི་རང་བཞིན་ཡིན་ནོ། །གལ་ཏེ་དེ་རྫ་མཁན་ལྡོག་པ་ཉིད་ལ་སེམས་པ་ཅན་ལྡོག་པར་བརྗོད་ན། རྩྭ་ལ་སོགས་པ་སྐྱེས་པ་ལ་ཡང་དེ་བཞིན་དུ་ཐལ་བར་འགྱུར་བས་འཁྲུལ་པ་ག་ལ་སྤོང། དེས་ན་སེམས་པ་ཅན་གྱི་བྱེད་པ་ནི་བུམ་པ་ལ་སོགས་པ་བསྒྲུབ་པ་ཉིད་ལ་བརྗོད་པར་བྱའོ། །གལ་ཏེ་མངོན་སུམ་གྱི་ཁྱབ་པ་འཛིན་པའི་བྱེད་བ་བལྟར་རུང་བའི་རང་བཞིན་ཁོ་ན་ལ་ལྟོས་པ་ཡིན་ལ། བལྟར་རུང་བ་ཡང་རང་བཞིན་གྱིས་བསྐལ་པ་སྤངས་པ་ཁོ་ནས་ཡིན་གྱི། ཁྱབ་པ་མེད་པར་ཐལ་བའི་ཕྱིར། །ཡུལ་དང་དུས་ཀྱིས་བསྐལ་པ་སྤངས་པས་ནི་མ་ཡིན་པ་དེའི་ཚེ། རྒོད་པ་ལ་སོགས་པ་ལ་བློས་ཁྱབ་པར་ཇི་ལྟར་རྟོགས་ཏེ། གཞན་གྱི་རྒྱུད་ནི་རང་བཞིན་གྱིས་བསྐལ་བའི་ཕྱིར་རོ། །གང་ལས་ལྡོག་པ་འགྲུབ་པར་འགྱུར་བ་འདོད་པའི་སེམས་ལོག་པ་ན་རྒོད་པའི་སེམས་ལྡོག་པའི་ཚེ་སེམས་གཞན་ལྡོག་པར་ཡང་ཇི་ལྟར་རྟོགས་ཤེ་ན་མ་ཡིན་ཏེ། རང་རིག་པའི་སྤྱོད་ཡུལ་ཉིད་ཀྱིས་བློ་གཞན་ལ་ཡང་བ་ལྟར་རུང་བ་ཉིད་མི་ལྡོག་པའི་ཕྱིར་རོ། །གང་ཞིག་ཁྱབ་པ་འཛིན་པ་ལ་ཞུགས་པའི་རང་རིག་བ་དེ་ཉིད་གཞན་དུ་མེད་དོ་ཞེས་བྱ་བ་འདིས་ཅི་བྱ་སྟེ། མེ་ལ་ཡང་ཁྱབ་པ་འཛིན་པ་མངོན་སུམ་དེ་ཉིད་ནི་མེ་གཞན་ལ་ཡང་ཡོད་པ་ནི་མ་ཡིན་ནོ། །མཐོང་བའི་ཐ་སྙད་ཀྱི་སྒྲུབ་བྱེད་དེ་འདྲ་བའི་མངོན་སུམ་གྱི་ཡུལ་ཉིད་ནི་མཚུངས་པ་ཁོ་ནའོ། །ཁྱད་པར་ནི་འདི་ཡིན་ཏེ། རིགས་པ་ནི་ནམ་ཡང་རང་
རིག་པས་བལྟ་བར་བྱ་བ་ཉིད་ལས་འདའ་བ་མེད་ལ། མེ་ནི་རེ་འགའ་རུང་བ་ཙམ་གྱིས་ཀྱང་དབང་པོའི་ཤེས་པའི་སྤྱོད་ཡུལ་ཡིན་ནོ། །དེའི་ཕྱིར་རང་གི་མངོན་སུམ་ལ་ལྟོས་པའི་བལྟ་བར་བྱ་བ་ནི་གཉི་ག་ལ་ཡོད་དོ། །འཕོ་བའི་མེ་ནི་དེ་འདྲ་བའི་མངོན་སུམ་དུ་རུང་བ་མ་ཡིན་ཏེ། དེས་ན་དེ་བཅད་པའི་དོན་ཁོ་ནར་གསལ་ཞིང་འབར་བའི་གཟུགས་ཀྱིས་མེ་ཁྱབ་བྱེད་དུ་ངེས་པར་བྱ་བ་ཡིན་ནོ། །གང་ཞིག་གི་ས་བཀབ་པར་ཐལ་བ་དེ་ལྟར་སེམས་ཀྱི་རིགས་རིག་པ་མ་ཡིན་པ་ནི་འགའ་ཡང་མེད་དོ། །འདོད་པའི་སེམས་བཀའ་བའི་དུས་སུ་སེམས་གཞན་མ་བཀབ་མོད། འདོད་པའི་སེམས་མེད་ན་རྒོད་པ་མེད་པ་ཞེས་བྱ་བ་དེ་ཙམ་གྱིས་རྒྱུད་གཞན་གྲུབ་པོ། །སེམས་ཙམ་ངེས་པ་མ་ཡིན་ནོ་ཞེས་བྱ་བ་འདི་ཅིས་བྱ་སྟེ། ཁྱད་པར་གྲུབ་ན་སྤྱི་འབད་པ་མེད་པར་གྲུབ་པའི་ཕྱིར་རོ། །ཡང་ན་དབང་ཕྱུག་རྗེས་སུ་དཔོག་པ་བཞིན་གཞན་གྱི་རྒྱུད་རྗེས་སུ་དཔག་པ་ཡང་མི་འཐད་པ་ཁོ་ནའོ། །དེ་ལ་ནི་ཁོ་བོ་ཅག་གིས་ཁས་བླངས་པ་ཙམ་ཡིན་པའི་ཕྱིར་ཉེས་པ་མེད་དོ། །དེའི་ཕྱིར་གལ་ཏེ་བློ་དང་ལྡན་པ་བལྟར་རུང་བའི་ལུས་ཀྱིས་ཁྱད་པར་ཅན་ཁོ་ན་དང་ཁྱབ་པ་བརྗོད་པར་འདོད་པ་དང༌། དེ་གྲུབ་པ་ཙམ་གྱི་སེམས་པ་ཅན་ཙམ་གྱིས་བྱས་པར་ངེས་པ་ཉིད་དུ་འདོད་པ་ཡིན་ན་འགྱུར་མོད་ཆད་པ་ཅི་ཡོད། འོན་ཀྱང་རྩྭ་ལ་སོགས་པས་འཁྲུལ་པ་ཟློག་པར་དཀའ་བ་ཁོ་ནའོ་ཞེས་བྱ་བར་གནས་སོ། །དེ་ཉིད་ཀྱི་ཕྱིར་ཅི་འདྲ་བའི་བྱིན་གྱིས་རློབ་པོ་ཞེས་བཤད་པ་གཞན་བྱས་པ་ཡིན་ནོ། །དེའི་ཕྱིར་རྒྱུ་དང་འབྲས་བུའི་དངོས་པོའི་མཚན་ཉིད་ཀྱི་འབྲེལ་པ་སྒྲུབ་པའི་དོན་དུ་ནི་མངོན་སུམ་དང་མི་དམིགས་པ་ལ་བརྟེན་པ་ལེགས་པ་མ་ཡིན་ཏེ། རང་བཞིན་གྱིས་བསྐལ་བ་སྤངས་པ་ཁོ་ནས་བལྟར་རུང་བའི་ཡུལ་ཅན་པའི་ཕྱིར་དང༌། སེམས་པ་ཅན་ལོག་པས་འབྲས་བུ་ཙམ་ལྡོག་པ་མ་གྲུབ་པའི་ཕྱིར་ན། གོ་རིམས་བཞིན་དུ་བསྒྲུབ་བྱ་དང་སྒྲུབ་བྱེད་ལ་ལྟོས་ནས་ངེས་པ་དང་ཐེ་ཚོམ་ཟ་བ་དག་གིས་མ་ངེས་པ་མི་སྤང་བའི་ཕྱིར་རོ། །བཟློག་པ་ལ་གནོད་པའི་ཚད་མས་འགོག་པ་ལ་འཇུག་པ་ཡང་འདི་ཙམ་ཉིད་ཀྱིས་བསལ་བ་ཡིན་ནོ། །འདི་ལྟར་གལ་ཏེ་ཡང་འབྲས་བུ་ཚོགས་པས་བསྒྲུབ་པར་བྱ་བ་ཡིན་
པར་ངེས་པ་དེ་ལྟ་ན་ཡང་ཚོགས་པ་སྐྱེས་བུ་ལ་རག་ལས་སོ་ཞེས་བྱ་བ་འདི་ག་ལས་ཡིན་དེ་བཞིན་དུ་མཐོང་བའི་ཕྱིར་རོ་ཞེ་ན། འོ་ན་ནི་རྗེས་སུ་འགྲོ་བ་དང་ལྡོག་པའི་སྒྲུབ་བྱེད་མངོན་སུམ་དང་རྗེས་སུ་དཔག་པའི་བྱེད་པ་དེ་ཉིད་འོངས་པ་ཡིན་ལ། དེ་ཡང་རིགས་ཀྱི་ཁྱད་པར་གྱི་ཡུལ་ཅན་ཡིན་ནོ་ཞེས་བསྟན་ཟིན་ཏོ། །དེའི་ཕྱིར་རིགས་གང་ཞིག་ཚོགས་པ་སྐྱེས་བུ་ལ་རག་ལས་བར་རྟོག་པ་དེ་འདྲ་བ་ཉིད་ན། ལྡོག་པ་ཡིན་གྱི་འབྲས་བུ་ཙམ་ནི་མ་ཡིན་ནོ། །སྐྱེས་བུའི་འབད་པ་མེད་པར་རྒྱུའི་ཚོགས་པར་འགྱུར་ན་ཐམས་ཅད་ཀྱི་ཚེ་འགྱུར་རོ་ཞེས་བྱ་བ་ཡང་རིགས་པ་མ་ཡིན་ཏེ། མ་མཐོང་བ་ཡོངས་སུ་སྨིན་པའི་ལྷན་ཅིག་བྱེད་བ་ཅན་རྒྱུ་ཐམས་ཅད་ཀྱི་ཡོངས་སུ་གྱུར་པ་བརྒྱུད་པ་ལ་ལྟོས་པ་ནི་རེས་འགའ་བ་ཉིད་དུ་འཐད་པའི་ཕྱིར་རོ། །སེམས་པ་ཅན་གྱི་བྱེད་པ་མེད་པར་ཡང་ཤིང་ཕུང་དུད་པའི་མཚན་ཉིད་ཀྱི་ཚོགས་པ་ཅན་གྱི་མེ་བྱུང་བའི་ནི་མཐོང་བ་ཡང་ཡིན་ནོ། །མ་མཐོང་བ་རྟོགས་པ་ལ་ནི་སྒྲ་ལ་སོགས་པའི་འབྲས་བུ་བཞིན་དུ་སུན་འབྱུང་བར་བྱའོ། །དུ་བའི་རྗེས་སུ་དཔག་པ་ལ་ནི་སུན་འབྱིན་པའི་སྐབས་མེད་པའི་ཕྱིར་མི་མཚུངས་སོ། །མངོན་སུམ་ལ་བརྟེན་པའི་བྱེད་པ་སུན་འབྱིན་པ་འདི་ནི་བློ་དང་ལྡན་པ་ཙམ་བཞིན་དུ་ཉེ་བར་ལེན་བ་ལ་སོགས་པ་མངོན་པར་ཤེས་པ་ལ་སོགས་པ་བསྒྲུབ་པར་བྱ་བ་ལ་ཡང་ཐུན་མོང་ཡིན་པའི་ཕྱིར། བདེ་བྱེད་ལ་སོགས་པས་ཉེ་བར་ལེན་བ་ལ་སོགས་པ་མངོན་པར་ཤེས་པའི་ཁྱད་པར་བཤད་པས་ནི་གྲུབ་པ་ལ་སྒྲུབ་པ་སྤོང་བར་རུང་ཡང༌། དེ་ལྟར་འདོད་པ་བསྒྲུབ་པར་ནི་ནི་མི་ནུས་སོ། །གང་གི་རིགས་ཅན་གྱི་འབྲས་བུལ་བྱེད་པ་པོ་རྗེས་སུ་དཔོག་པ་དེ་དང༌། དེ་ལ་དེའི་ཉེ་བར་ལེན་པ་ལ་སོགས་པ་མངོན་པར་ཤེས་པ་ཉིད་ཡིན་པའི་ཕྱིར། འདི་ལ་མི་འདོད་པ་མེད་དོ། །གང་ལས་ངེས་པར་མང་པོ་ཤེས་པ་ཉིད་དུ་ཡང་འགྱུར་བ་སྐྱེས་བུ་བྱས་པའི་འབྲས་བུའི་རིགས་ཐམས་ཅད་ལ། བྱེད་པ་པོ་གཅིག་ཉིད་དུ་ངེས་པ་ཡང་མ་ཡིན་ཏེ། མང་པོ་རྣམས་ཀྱི་བྱེད་པ་ཡང་མཐོང་བའི་ཕྱིར་རོ། །ཐམས་ཅད་མཁྱེན་པ་ཉིད་ནི་རྒྱང་རིང་དུ་སྤང་བ་ཉིད་ལས་བརྗོད་པ་དོན་མེད་དོ། །དེ་ཉིད་ཀྱི་ཕྱིར་དེའི་རྩིས་ཁོང་དུམ་བཅུག་པར་བློ་དང་ལྡན་པ་ཙམ་གྱིས་དབང་དུ་བྱས་ནས་མངོན་སུམ་ཙམ་ལ་བརྟེན་
བའི་ཁྱབ་པ་ལ་སུན་འབྱིན་པ་བརྗོད་དོ། །རེ་ཞི་ག་ཐ་དད་པ་དག་གི་དངོས་པོ་པའི་འབྲེལ་པ་ནི་རྒྱུ་འབྲས་ལས་གཞན་མ་ཡིན་ལ་དེ་ཡང་མ་གྲུབ་པ་ཞེས་སྟོན་པ་ཐེག་པ་ཁོ་ནའོ། །དེའི་ཕྱིར་ཚད་མའི་རྗེས་སུ་འབྲངས་ནས་མངོན་སུམ་དང་མི་དམིགས་པ་དག་ལས་གཞན་ནི་རྒྱུ་དང་འབྲས་བུ་གྲུབ་པ་ལ་སྒྲུབ་བྱེད་མེད་དོ། །དེ་ལ་བརྟེན་པ་ན་ཡང་ཁྱད་པར་ཉིད་རྒྱུ་དང་འབྲས་བུའི་དངོས་པོར་ངེས་བའི་ཕྱིར། དེ་ཙམ་ཞིག་མངོན་སུམ་གྱི་རྗེས་སུ་འབྲངས་ནས་སུན་ཕྱུང་པ་ཡིན་ནོ། །དེའི་ཕྱིར་དེ་ལྟར་དབྱིབས་ལ་སོགས་པ་སྒྲུབ་པར་བྱེད་པ་ནི་རིགས་སོ་ཞེས་བལྟའོ། །དེ་ལྟར་སྒྲུབ་བྱེད་ཉིད་དུ་རིགས་པ་བརྗོད་ནས་དེའི་འབྲས་བུ་རྗེས་སུ་དཔག་པ་ཡང་འཐད་པར་བརྗོད་པའི་སྒོ་ནས་དེ་ཉིད་རྣམ་པར་འགྲེལ་པ་ནི་དབྱིབས་སམ་ཞེས་བྱ་བ་སྟེ། དབྱིབས་ཀྱི་ཁྱད་པར་རོ། །དངོས་པོ་ཉིད་དམ་ཞེས་བྱ་བ་ནི་དོན་བྱ་བ་བྱེད་པའོ། །འོ་ན་ཁྱད་པར་འགྱུར་བའི་རྣམ་འགྲེལ་གྱི་དོན་ཅི་ཡིན་ཞེས་བྱ་བའི་དོགས་པ་སེལ་བ་ནི་གཞན་དུ་ནི་མ་ཡིན་ནོ་ཞེས་བྱ་བ་སྟེ། རི་ལ་སོགས་པ་རྣམ་པ་གཞན་ལས་ནི་བྱེད་པ་བོ་རྫ་མཁན་རྗེས་སུ་དཔོག་པའམ། རིལ་སོགས་པ་ཉེ་བར་ལེན་པ་ལ་སོགས་བ་རིགས་པ་རྗེས་སུ་དཔོག་པའམ། མ་མཐོང་བ་རྗེས་སུ་དཔོག་པ་ནི་མ་ཡིན་ནོ། །དེ་ལྟར་འདི་ཐམས་ཅད་རྣམ་འགྲེལ་མཛད་པས་བཤད་པའི་བུམ་པ་ལ་སོགས་པ་ཐ་དད་པའི་དངོས་པོ་བ་ཁྱབ་བྱེད་ཉིད་དུ་རབ་ཏུ་འགྲུབ་པའི་བློ་དང་ལྡན་པ་ནི་དབྱིབས་ཞེས་སྒྲ་མཚུངས་པས་ཐ་དད་ལ་མེད་པའི་རི་ལ་སོགས་པ་ལས་རྗེས་སུ་དཔག་པར་རིགས་པ་མ་ཡིན་ནོ། །དེ་ཉིད་ཀྱི་ཕྱིར་རི་ལ་སོགས་པའི་ཉེ་བར་ལེན་པ་ལ་སོགས་པ་རིགས་པ་རྗེས་སུ་དཔོག་པ་ཡང་སྤངས་པ་ཡིན་ལ། ཁྱབ་པ་མ་རྟོགས་པ་ཉིད་ཀྱིས་མཐོང་བ་རྗེས་སུ་དཔོག་པ་ཡང་སྤངས་པ་ཡིན་ཏེ། དཔེར་ན་སྐྱ་བོ་སྐྱ་བོ་ཞེས་སྦྲ་མཚུངས་པས་ཐ་དད་པ་མེད་པའི་སྐྱ་པོའི་རྫས་ལས་སྐྱ་བོའི་ཁྱད་པར་ལ་ཁྱབ་པར་བྱེད་བ་ཉིད་དུ་རབ་ཏུ་གྲུབ་པའི་མེ་རྗེས་སུ་དཔོག་པར་མི་རིགས་པ་བཞིན་ནོ། །འདི་ཉིད་འཆད་པ་ནི་གལ་ཏེ་ཞེས་བྱ་བའོ། །བྱེད་པ་པོའི་ཁྱད་པར་ནི་རྫ་མཁན་ལ་སོགས་པའི་གནས་སྐབས་ཀྱི་མཚན་ཉིད་དམ། བུམ་བའི་ཉེ་བར་ལེན་པ་
ལ་སོགས་པ་མངོན་པར་ཤེས་པའི་མཚན་ཉིད་དམ། བ་ལྟར་རུང་བའི་མཚན་ཉིད་དེ། དེའི་རྗེས་སུ་འགྲོ་བའི་དབྱིབས་བཏང་ནས་ཞེས་བྱ་བས་དེ་རྗེས་སུ་འཇུག་པ་ཅན་གྱི་དབྱིབས་བཞག་སྟེའོ། །དངོས་པོ་ཙམ་ཞེས་བྱ་བ་ནི་བསྡད་ནས་འཇུག་པ་དང༌། འབྲས་བུའི་ཉིད་ལ་སོགས་པའི་ཉེ་བར་མཚོན་པར་བྱའོ། །ཁྱད་པར་ཅན་གྱིས་ཁྱབ་པ་བོར་ནས་སྤྱི་ལ་བརྟེན་ན་ཞེས་བྱ་བའི་དོན་ཏོ། །དཔེའི་རྣམ་པར་འགྲེལ་པ་ནི་སྐྱ་བོའི་རྫས་ལས་ཞེས་བྱ་བ་ཡིན་ནོ། །ཅིའི་ཕྱིར་སྐྱ་བོའི་རྫས་ལས་མེ་རྗེས་སུ་དཔག་པར་མི་རིགས་སྙམ་ན། དེ་ལ་ཞེས་གསུངས་ཏེ། མེ་རྗེས་སུ་དཔོག་པའོ། །འོ་ན་དུ་བ་ཉིད་ལས་ཞེས་བྱ་བ་ནི་གཞན་གྱིའོ། །ལན་ནི་འདིར་སྨྲས་པ་ཞེས་བྱའོ། །གང་གིས་དུ་བ་དེ་ཉིད་ལས་ཞེས་བྱ་བ་ལ་སོགས་པ་ཇི་སྐད་བརྗོད་པའི་ཉེས་པར་འགྱུར་བ། དུ་བ་ཉིད་ཐ་དད་པ་ལས་ན་སྐྱ་བོའི་ཁྱད་པར་དུ་གྱུར་པ་མ་ཡིན་ནོ། །དུ་བ་ཁྱད་པར་མ་ཡིན་ན་དུ་བའི་ཁྱད་པར་དུ་རྟོགས་པའི་སྐྱ་བོ་གང་ཡིན་པ་ཞེས་བྱ་བའི་དོན་མ་རྟོགས་ནས་དུ་བར་རྟོགས་པའི་ཞེས་འདྲི་བར་བྱེད་དོ། །ལེན་ནི་མེའི་ཞེས་བྱ་བའོ། །དེའི་ཕྱིར་དཔེར་ན་སྐྱ་བོའི་རྫས་ལས་མེ་རྗེས་སུ་དཔག་པ་མ་ཡིན་པ་དེ་བཞིན་དུ་འབྲས་བུ་ཙམ་ལས་ཀྱང་དབང་ཕྱུག་རྗེས་སུ་མི་དཔག་སྟེ། སྐྱེས་བུས་ཁྱབ་པར་མ་གྲུབ་པའི་ཕྱིར་རོ། །འདིར་ལན་འཐད་པར་མ་མཐོང་ནས། རྣམ་པ་འགའ་ཞིག་གི་སྒོ་ནས་དཀྲུགས་པར་བྱ་བའི་ཕྱིར་གཞན་གྱི་གལ་ཏེ་ཞེས་སྨྲས་སོ། །མྱུ་གུ་འབའ་ཞིག་དུ་མ་ཟད་དེ། དུ་བ་འདིར་ཡང་ན་རྗེས་སུ་འགྲོ་བ་སྟེ་ཡོད་པ་དང༌། ལྡོག་པ་སྟེ་མེད་པ་དེ་དག་གི་རྗེས་སུ་འཇུག་པ་ཉིད་ཇི་ལྟར་རྟོགས་པར་བྱ་སྟེ། ཁྱབ་པ་རྗེས་སུ་འགྲོ་བ་ལ་སོགས་པ་ནི་བཟུང་བར་མི་ནུས་པའི་ཕྱིར་རོ་སྙམ་དུ་དགོངས་པའོ། །རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་རྣམ་པ་ཉིད་སྟོན་པ་ནི་དུ་བ་འདི་ཞེས་བྱ་བའོ། །ལན་ནི་རྒྱུ་འབྲས་དངོས་པོར་མ་བཟུང་བར་ཞེས་བྱ་བའོ། །རྣམ་འགྲེལ་གྱི་དོན་གསལ་བར་བྱེད་པས་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །དབྱིབས་ཀྱི་ཁྱད་པར་ཅན་ཡང་ཡིན་ལ་བུམ་པ་ལ་སོགས་པའི་དཔེ་ཡང་ཡིན་ཞིང་ཐ་དད་པའི་དངོས་པོ་ཡང་ཡིན་པ་སྟེ། དེ་ལ་མཐོང་བའི་དངོས་པོའི་ཁྱད་པར་སྐྱེས་བུ་བྱིན་གྱིས་བརླབས་པའི་བྱེ་བྲག་གང་ཡིན་པ་
དེ་རྗེས་སུ་དཔག་པར་རིགས་པ་མ་ཡིན་ལ་ཞེས་འབྲེལ་ཏོ། །མཐོང་བ་ཞེས་བྱ་བ་ནི་རང་སྒྲུབ་པའི་སྒྲའི་དོན་ཏེ། དོན་གྱིས་འོངས་པས་ན་དཔེ་ཞེས་བྱ་བའི་ཐ་ཚིག་གོ །དེ་ནི་སྒྲ་མཚུངས་པ་ཐ་དད་པ་མེད་པའི་རྟགས་ལས་རྗེས་སུ་དཔག་པར་རིག་པ་མ་ཡིན་ནོ་ཞེས་བྱ་བར་བལྟའོ། །དེ་བཞིན་དུ་ཉེ་བར་ལེན་པ་ལ་སོགས་པ་མངོན་པར་ཤེས་པའམ། མ་མཐོང་བའི་དབང་ཕྱུག་ཀྱང་རྗེས་སུ་དཔག་པར་མི་རིགས་སོ་ཞེས་བྱ་བ་འདི་ནི་གཅིག་ཏུ་ངེས་པ་ཡིན་ནོ། །གང་དུ་དཔེ་མཐོང་པ་ཡང་རྗེས་སུ་མི་དཔོག་ པ་དེར་མ་མཐོང་བ་ནི་སྨོས་མི་དགོས ་སོ་སྙམ་དུ་དགོངས་པའོ། །གལ་ཏེ་ཁྱད་པར་གྱིས་ཁྱབ་པར་རྟོགས་ཀྱང་སྤྱི་ལས་རྗེས་སུ་དཔོག་ན་དེའི་ཚེ་དུ་བ་མ་ཡིན་པའི་དཀར་པོ་ལས་ཀྱང་མེ་དཔོག་པར་ཐལ་ལོ་ཞེས་བྱ་བ་འདི་ལ་ལན་སྨྲས་པ་ནི། །འོན་ཏེ་ཡང་ཞེས་བྱ་བ་ལ་སོགས་པའོ། །མངོན་སུམ་གྱིས་འདོད་པ་ཉིད་གསལ་བར་བྱེད་པ་ནི་ཐམས་ཅད་དུ་ཞེས་བྱ་བའོ། །ལན་ནི་མེད་དོ་ཞེས་བྱ་བ་སྟེ། གནོད་པ་མེད་པ་ཙམ་གྱིས་ནི་རྗེས་སུ་དཔག་པ་འཇུག་པ་མ་ཡིན་ནོ། །གལ་ཏེ་གནོད་པ་མེད་པ་ལས་རྗེས་སུ་མི་དཔོག་ན་གང་ལས་དཔོག་ཅེ་ན། དེ་ནི་འབྲེལ་པ་མཐོང་བ་ལས་ཡིན་ནོ་ཞེས་ལེའུ་དང་པོར་བརྗོད་པ་ཡིན་ནོ། །འབྲེལ་པ་ཡང་དེའི་བདག་ཉིད་ལས་གཞན་དེ་ལས་བྱུང་བ་ཁོ་ན་ཡིན་ལ། བློ་དང་ལྡན་པ་དང་འབྲས་བུ་གཉིས་ལ་ནི་འདི་ཡོད་པ་མ་ཡིན་ནོ་ཞེས་དཔྱད་མ་ཐག་པ་ཁོ་ནའོ། །དེ་ལྟ་མིན་ན་ཞེས་བྱ་བ་ནི་འབྲེལ་པ་ལ་མ་ལྟོས་པར་གནོད་པ་མེད་པ་ཙམ་ལས་རྗེས་སུ་དཔོག་ནའོ། །འོན་ཏེ་འདིར་གནོད་པ་ཡོད་པ་ཁོ་ན་ཡིན་ཏེ། དེས་ན་རྫ་མཁན་རྗེས་སུ་དཔག་པར་ཅི་ལྟར་ཐལ་ཞེ་ན། གྲོག་མཁར་རྫ་མཁན་གྱིས་བྱས་པ་ལ་ནི་ཞེས་གསུངས་ཏེ། གྲོག་མཁར་རྫ་མཁན་གྱིས་བྱས་པར་རྗེས་སུ་དཔོག་པ་ལ་ནི་གནོད་པ་ཡོད་པ་མ་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་གཞན་གྱིའོ། །གལ་ཏེ་བྱེད་པ་པོ་རྫ་མཁན་ཡིན་ན་དེའི་ཚེ་ཞེས་ཁོང་ནས་དྲངས་ཏེ། དམིགས་པ་ཉིད་དུ་འགྱུར་རོ་ཞེས་སྦྱར་རོ། །ཅི་ཞེས་བྱ་བ་ནི་གྲུབ་པའི་མཐའ་སྟེ། ཅི་ལྟར་མངོན་པར་འདོད་པའི་བསྒྲུབ་བྱ་རི་ལ་སོགས་པ་ལ་དབང་ཕྱུག་ཀྱང་དམིགས་སམ་ཅི། མ་དམིགས་པ་ཁོ་ནའི་ཕྱིར་བསྒྲུབ་
པར་བྱ་བ་ཡིན་ནོ་ཞེ་ན། རྫ་མཁན་ཡང་མི་དམིགས་པ་ཁོ་ནའོ། །དེ་ནི་གྲོག་མཁར་འགའ་ཞིག་ལ་དམིགས་པ་གནོད་དོ་ཞེས་རྩྭ་ལ་སོགས་པ་ལ་ཡང་བློ་དང་ལྡན་པ་དམིགས་པ་ལ་གནོད་པ་མེད་དམ་ཅི་མངོན་སུམ་གྱི་དབང་དུ་བྱས་པའི་ཕྱིར་རོ་ཞེས་དགོངས་པའོ། །གལ་ཏེ་དེ་ལྟ་ན་ཞེས་བྱ་བ་ལ་སོགས་པ་ནི་འདི་བརྗོད་པ་ཡིན་ཏེ། །རེ་ཞིག་གནོད་ པ་ཡོད་དམ་མེད་ཀྱང་བླ་སྟེ། ལྷག་མ་ནི་གདོན་མི་ཟ་བར་བརྟག་པར་བྱ་དགོས ་སོ། །དེས་ན་ལས་བཞིན་དུ་དབང་ཕྱུག་ཀྱང་ཅི་སྟེ་མི་རྟག་ཅེས་བྱ་བའོ། །ལན་དུ་དེ་ཅི་ཞེས་བྱའོ། །དེ་ལྟ་ན་ནི་འདི་བརྟགས་པ་ཙམ་ཏུ་འགྱུར་ན་ཚད་མའི་འཇུག་པ་བསམ་པར་བྱ་བ་ཡང་ཡིན་ནོ་སྙམ་དུ་དགོངས་པའོ། །འོན་ཏེ་ཞེས་བྱ་བ་ནི་གཞན་གྱིའོ། །སུན་འབྱིན་པ་ནི་དེས་ན་དེ་ལས་ཀྱང་ཞེས་བྱ་བའོ། །འདི་ཉིད་ལ་སུན་འབྱིན་པ་གཞན་བརྗོད་པ་ནི་གཞན་ཡང་ཞེས་བྱ་བ་ལ་སོགས་པའོ། །འབྲས་བུ་གྲོག་མཁར་དེ་ལ་ཡང་ངོ༌། །གཞན་གྱིས་བརྟགས་པ་ཉིད་དུ་དཀའ་ན་ཞེས་སྨྲས་སོ། །དེ་ཞེས་བྱ་བ་ནི་གྲོག་མཁར་ལ་རྫ་མཁན་རྟོག་པའོ། །ལན་དུ་དབང་ཕྱུག་ལ་ཡང་མེད་དམ་ཅི་ཞེས་བྱ་བའོ། །ཕྱེད་ཕྱི་མའི་རྐང་པ་དང་པོ་འཆད་པ་ནི་འོན་ཏེ་ཞེས་བྱ་བའོ། །གཉིས་པ་འཆད་པ་ནི་གལ་ཏེ་ཞེས་བྱ་བའོ། །འདི་དག་ཀྱང་བྱས་པ་མ་ཡིན་ཏེ་ཞེས་བྱ་བ་ནི། རི་ལ་སོགས་པ་དག་སྐྱེས་བུས་བྱས་པ་མ་ཡིན་ནོ་ཞེས་བལྟའོ། །ཅི་ཕྱེད་རྒས་པ་འཛིན་ཏམ་ཞེས་བྱ་བ་ནི་ཕྱེད་རྒས་པ་ལ་ཡོད་པའི་ནོར་ནི་ཕྱེད་རྒས་པའི་ནོར་ཏེ། ག་ཧལ་སོགས་པའི་ཡིན་པའི་ཕྱིར་ཆའོ། །དཔེར་ན་འགའ་ཞིག་ཕྱེད་རྒས་པའི་ནོར་ནི་འདོད་ཀྱི་དེ་ནི་མ་ཡིན་པ་དེ་བཞིན་དུ་ཁྱེད་ཀྱང་རྫ་མཁན་དང༌། དབང་ཕྱུག་དུ་རྟོགས་པ་གནོད་པའི་དབང་གིས་རང་རྒས་པ་ལས་དབང་ཕྱུག་གི་ཆ་འདོད་པ་འདི་ནི་མི་འཐད་དོ། །རྣམ་པ་གཞན་དུ་ཞེས་བྱ་བ་ནི་མི་མཛེས་པར་རོ། །འཆད་པ་ནི་ཅི་སྐྱེས་བུ་ཞེས་བྱ་བ་ལ་སོགས་པའོ། །དེས་ན་འདི་ཡང་བརྟགས་པ་ཙམ་ཁོ་ནའོ། །དེའི་ཕྱིར་བུམ་བ་ལ་སོགས་པའི་དབྱིབས་སྐྱེས་བུ་མེད་ན་མི་འབྱུང་བར་དམིགས་པ་ཅི་འདྲ་དེ་འདྲ་བ་ནི་རི་དང་རྒྱ་མཚོ་ལ་སོགས་པ་ལ་མ་ཡིན་པའི་ཕྱིར་དེ་ལ་སྐྱེས་བུས་བྱས་པ་ཉིད་རྗེས་སུ་དཔོག་པ་མ་ཡིན་ནོ། །གལ་ཏེ་དེ་བཞིན་དུ་སྒྲ་ལ་བྱས་པ་ལས་མི་རྟག་བ་ཉིད་
ཀྱང་རྗེས་སུ་དཔག་པར་མི་བྱ་སྟེ། དེར་ཡང་བུམ་པ་ལ་གནས་པའི་བྱས་བ་ཉིད་སྒྲ་ལ་ཡོད་པའམ། སྒྲ་ལ་ཡོད་པ་ཉིད་བུམ་པ་ལ་ཡོད་པ་ནི་མ་ཡིན་ནོ། །སྒྲ་ལ་བྱས་པ་ཉིད་ཀྱི་ཕྱིར་དེ་ལྟ་མི་རྟག་པ་ཉིད་མི་འདོད་པ་ཡང་མ་ཡིན་ནོ། །དེས་ན་འདི་ནི་ལྟག་ཆོད་ཡིན་ཏེ། ཆོས་ཐ་དད་པ་རྣམ་པར་རྟོག་པའི་ཕྱིར་རོ། །དེ་སྐད་དུ་ཡང་སློབ་དཔོན་ཕྱོགས་ཀྱི་གླང་པོས་རང་གི་གཞུང་དུ་འདྲས་མཚུངས་ཀྱི་མཚན་ཉིད་འདི་ཉིད། འབྲས་ཉིད་གཞན་གྱི་ཆ་ཡིས་ནི། །ཞེས་བྱ་བ་ལ་སོགས་བས་གསུངས་སོ་ཞེས་བྱ་བའི་དོགས་པ་འདི་བསྡུས་ནས་རྣམ་འགྲེལ་ལས། བསྒྲུབ་བྱས་རྗེས་སུ་འགྲོ་བའི་ཕྱིར་ཞེས་བྱ་བ་ལ་སོགས་བའོ། །རེ་ཞིག་གང་གི་ཚེ་མངོན་སུམ་ལ་ལྟོས་ནས་ཁྱད་པར་ཅན་གྱི་རིགས་དང་འབྲེལ་བའི་འབྲེལ་པར་རྟོགས་པར་བྱེད་པ་དེའི་ཚེ་འདི་རིགས་པ་ཡིན་ནོ། །གང་གིས་བཟློག་ན་གནོད་པ་ཅན་གྱི་རྗེས་སུ་དཔོག་པའི་སྟོབས་ཀྱི་འབྲས་བུ་བྱས་པ་ཉིད་ལ་བསྒྲུབ་བྱ་མི་རྟག་པ་ཉིད་ཀྱི་སྤྱིས་རྗེས་སུ་འགྲོ་བའི་ཕྱིར། སྤྱིར་བསྒྲུབ་བྱར་བྱེད་པ་ལ་གང་ཞིག་འབྲེལ་པ་ཅན་ཐ་དད་པས་ཐ་དད་པའི་སྐྱོན་བརྗོད་པ་དེའི་ཚེ་ན་ཁོ་བོ་ཅག་གི་ལུགས་ཀྱིས་དེ་འབྲས་མཚུངས་སུ་འདོད་དོ། །འདིར་དབྱི་བས་ཙམ་ལ་སྐྱེས་བུས་བྱས་པས་སྒྲུབ་པའི་རྗེས་སུ་དཔག་པ་ནི་འགའ་ཡང་མེད་དེ། །མངོན་སུམ་ཡང་མེ་ལས་དུ་བ་སྐྱེ་བར་མཐོང་བ་ལྟར་རིགས་ཀྱི་ཁྱད་པར་གྱི་ཡུལ་ཅན་ཁོ་ན་རྒྱུ་དང་འབྲས་བུའི་དངོས་པོར་རྟོགས་པར་བྱེད་པ་ཡིན་ནོ། །དེས་ན་འདིར་ཡང་གལ་ཏེ་རིགས་ཀྱི་ཁྱད་པར་ལ་བརྟེན་པ་སྐྱོན་མ་ཡིན་ན་དེའི་ཚེ་གང་དུ་ཡང་མ་ཡིན་པའི་ཕྱིར་ཐམས་ཅད་ལས་ཐམས་ཅད་བརྟགས་པར་ཐལ་ལོ། །རིགས་ཀྱི་ཁྱད་པར་ལ་བརྟེན་ན་ཡང༌། ཁྱབ་པའི་རིགས་ཀྱི་ཁྱད་པར་ཉིད་ལས་རྗེས་སུ་དཔོག་པ་ཡིན་གྱི་གཞན་ལས་ནི་མ་ཡིན་ནོ་ཞེས་བྱ་བའི་རྣམ་པར་དབྱེ་བར་འགྱུར་རོ། །དེའི་ཕྱིར་ཁྱབ་པ་སྤྱིར་གྲུབ་པ་ལ་ནི་འདི་འདྲ་བ་ལྟག་ཆོད་ཁོ་ན་སྟེ། མིང་ནི་ཅིར་ཡང་གདགས་ལ་རག་གོ །ཁྱད་པར་གྱི་ཁྱབ་པ་མ་གྲུབ་ན་ནི་ལན་ཉིད་དོ་ཞེས་གནས་སོ། །གལ་ཏེ་ལང་རྣམ་འགྲེལ་ལ་འཇུག་པའི་ཚུལ་འདི་ཉིད་བཤད་པ་བྱེད་པས་ཀྱང་བཞེད་པ་ཡིན་མོད་ཀྱི། དེ་ལྟ་ན་ཡང་རྐང་
མིག་གི་ལུགས་སུན་དབྱུང་བར་དགོངས་ནས་རྣམ་པ་གཞན་དུ་སྦྱར་ནས་ཕྱིས་གཙོ་བོ་ལ་སྦྱོར་བ་ན། རྣམ་འགྲེལ་དེ་ཉིད་ལ་འཇུག་པ་ནི། གལ་ཏེ་སྐྱོན་འདི་ཞེས་བྱ་བ་ལ་སོགས་པའོ། །འབྲས་བུ་དུ་མའི་ཕྱིར་ན་འབྲས་མཚུངས་སོ་ཞེས་བྱ་བ་ནི་རྐང་མིག་གི་མདོ་སྟེ། འབྲས་བུ་རྩོལ་བྱུང་དེ་དུ་མ་ཡོད་པའི་ཕྱིར་རོ། །དེ་ཉིད་རྣམ་པར་འགྲེལ་པ་ནི། ཇི་ལྟར་ཞེས་བྱ་བ་ལ་སོགས་པའོ། །དེ་བཞིན་དུ་དབྱིབས་གཞན་གྱི་འབྲས་བུ་ཡང་མཐོང་བའི་ཕྱིར། བསྒྲུབ་པར་བྱ་བ་བློ་དང་ལྡན་པ་ལ་གཅིག་ཏུ་ངེས་པ་མ་ཡིན་ཏེ། དཔེར་ན་རྩོལ་པ་ལ་བྱུང་བ་ཉིད་བསྒྲུབ་བྱ་འབྲས་བུ་ཉིད་ལ་གཅིག་ཏུ་ངེས་པ་ལ་ཡིན་པ་བཞིན་ནོ། །དེས་ན་ཅི་ལྟར་འབྲས་མཚུངས་ཏེ་ལན་ལྟར་སྣང་བ་ཡིན་པ་དེ་བཞིན་དུ་འདི་ཡང་ཡིན་ནོ་ཞེས་བྱ་བའི་ཐ་ཚིག་གོ །རྣམ་འགྲེལ་གྱི་འབྲས་བུ་ཞེས་བྱ་བ་ནི་རྩོལ་པའི་འབྲས་བུ་སྟེ། བརྩལ་མ་ཐག་པ་ཉིད་དུ་ཞེས་བྱ་བའི་དོན་ཏོ། །བསྒྲུབ་པར་བྱ་བས་འབྲས་བུ་ཉིད་ལ་སོགས་པ་ཞེས་བྱ་བ་འདིར་མདོ་ལ་ཡོད་པའི་རྗེས་འགྲོ་ཞེས་བྱ་བ་ལ་ལྟོས་པར་བྱའོ། །སྒྲུབ་པར་བྱེད་པའི་ཡུལ་ནི་སྒྲུབ་བྱེད་བརྩལ་མ་ཐག་པ་ཉིད་ཀྱི་ཡུལ་ལའོ། །ཅི་ལྟར་ཐ་དད་བར་བརྗོད་པའི་སྐྱོན་ཡིན་ཞེ་ན། འབྲས་བུ་ཉིད་ཅེས་བྱ་བ་ལ་སོགས་པ་སྨོས་སོ། །འདི་བསྒྲུབ་བྱ་བརྗོད་པ་ནི་མ་ཡིན་གྱི་འོན་ཀྱང་རྩོལ་བའི་འབྲས་བུ་ཉིད་བརྗོད་པ་སྟེ། སྐབས་ཀྱིས་ན་བརྩལ་མ་ཐག་པ་ཡིན་ནོ་ཞེས་བྱ་བར་བསམས་པའོ། །དེས་ན་སྒྲུབ་པར་བྱེད་པ་འབྲས་བུ་རྩོལ་མ་ཐག་པ་ཉིད་ལ་འབྲེལ་པ་ཐ་དད་པའི་སྒོ་ནས་བརྟགས་པ་ཡིན་ནོ། །ཅི་ལྟར་བརྩལ་མ་ཐག་པའི་སྒྲས་སྐྱེས་པ་དང་མངོན་པར་གསལ་བ་གཉིག་བརྗོད་པ་དེ་ལྟར་ནི་གཏན་ཚིགས་ཀྱི་འཁོར་ལོ་བཤད་པའི་སྐབས་སུ་སྟོན་པར་འགྱུར་རོ། །ཚུལ་འདིས་འགྲེལ་པ་ཅན་ཐ་དད་པ་ཐ་དད་པར་བརྗོད་པའི་སྐྱོན་གང་ཡིན་པ་དེ་ནི། འབྲས་མཚུངས་ཡིན་ཏེ། རྟག་བ་ལ་གསལ་བ་མི་སྲིད་པའི་ཕྱིར་རོ། །གསལ་བ་ཡོད་ཀྱང་རིགས་པ་ཅན་གྱི་ལུགས་ཀྱིས་ལྟག་ཆོད་མ་ཡིན་ནོ་ཞེས་སྟོན་བ་ནི་དེ་ལ་ཡང་ཞེས་བྱ་བ་སྟེ། སྒྲ་ནི་འབྲས་བུ་ཡིན་ཏེ། བརྩལ་མ་ཐག་པ་ཡིན་པའི་ཕྱིར་རོ་ཞེས་བྱ་བ་ལ་སོགས་པ་ལ་ཡང་སྤང་སྟེ།
གཞན་འབའ་ཞིག་ཏུ་ཡིན་པར་ནི་མ་ཟད་པའོ། །བརྗོད་པའི་རྣམ་པ་བཤད་པས་ནི་རྩོལ་བས་སྒྲིབ་པ་གསལ་བ་གང་ཡིན་པ་དེ་ལས་མངོན་པར་གསལ་བར་གྱུར་པ་ལ་ཡང་བརྩལ་མ་ཐག་པ་ཉིད་ཡོད་པ་ཁོ་ན་ཡིན་པ་དེས་ནམ་དེས་པ་ཡིན་ནོ་ཞེས་དེ་ལྟར་ཡང་མི་འགལ་ན་ཞེས་བྱ་བ་དེའི་ཚེ་ཡང་འགལ་བ་མ་ཡིན་ནོའོ། །མ་ངེས་པའི་ཉེས་བརྗོད་པར་བྱེད་པས་འགལ་བར་མི་བྱེད་ནའོ། །དེ་ལྟར་བྱས་པའི་རིགས་པ་ཅན་ལ་སོགས་བའི་ལུགས་ལྟར་ན་ནི་མ་ངེས་པ་ཉིད་བརྗོད་པར་འགྱུར་བས་ལྟག་ཆོད་མ་ཡིན་ནོ། །འོ་ན་ཁྱོད་ཀྱི་ལྟར་ན་ཅི་ལྟར་ལྟག་ཆོད་ཡིན་ཞེ་ན། འོན་ཀྱང་ཞེས་གསུངས་ཏེ། མངོན་པར་གསལ་བ་དང་སྐྱེ་བ་ཡོངས་སུ་དོར་པའི་སྤྱིས་ཀྱང་བརྩལ་མ་ཐག་པ་ལ་སོགས་པ་སྒྲུབ་པར་བྱེད་པར་འགྱུར་བ་ཡིན་ནོ། །གལ་ཏེ་ཁྱད་པར་གཉིས་སྲིད་པ་ཡིན་ན། ཇི་ལྟར་ཡོངས་སུ་དོར་ནས་སྒྲུབ་བྱེད་དུ་འགྱུར་ཞེ་ན། གང་གི་ཕྱིར་ཞེས་རྟག་པ་ལ་ནི་ཞེས་གསུངས་ཏེ། བྱེད་པ་འབའ་ཞིག་ཏུ་ནི་མ་ཟད་ཀྱི་གསལ་བ་ཡང་ངོ༌། །འགལ་བ་ནི་ཚད་མས་མི་འཐད་པའོ། །དེས་ན་ཁྱད་པར་གཉི་ག་མི་སྲིད་པའི་ཕྱིར་ཁོ་བོ་ཅག་གི་ལྟར་ན་མ་ངེས་པ་བརྗོད་པ་ནི་ལྟག་ཆོད་དོ། །དེ་ལྟ་མ་ཡིན་ན་ཞེས་བྱ་བ་ནི་རྟག་བ་ལ་མངོན་པར་གསལ་བ་སྲིད་ནའོ། །འདིར་རྐང་མིག་གི་ལན་ནོ། །བསམ་པ་ནི་འདི་ཡིན་ཏེ། རྟག་པ་ལ་ནི་གསལ་བར་འདོད་པ་ཁོ་ནའོ། །དེ་ལྟ་ན་ཡང་སྤྱིས་ཀྱང་སྒྲུབ་བར་བྱེད་བ་ཡིན་བཞིན་དུ་ཐ་དད་པའི་སྐྱོན་བརྗོད་པ་ནི་ལྟག་ཆོད་ཁོ་ན་ཡིན་གྱིས་མ་ངེས་པ་ཉིད་དུ་བརྗོད་བ་བདེན་བ་ནི་མ་ཡིན་ཏེ། སྒྲ་མངོན་པར་གསལ་བར་མི་འཐད་པའི་ཕྱིར་རོ་ཞེས་བྱ་བའོ། །འབྲས་བུ་གཞན་ཉིད་ཡིན་ན་ཞེས་བྱ་བ་ལ་སོགས་བ་ནི་བཤད་པ་སྟེ། གཞན་ཉིད་ཡིན་ན་ཞེས་བྱ་བ་ནི་བརྩལ་མ་ཐག་བ་ཉིད་མངོན་པར་གསལ་བ་དང༌། སྐྱེ་བའི་གསལ་བ་ཉིད་རྣམ་པ་གཉིས་ཡིན་ནའོ། །འོན་ཏེ་སྒྲ་ལ་མི་དམིགས་པའི་རྒྱུ་བར་ཆོད་ལ་སོགས་པ་ཡོད་པ་ཉིད་དོ། །དེས་ན་རྩོལ་བ་རྒྱུ་མ་ཡིན་པ་ནི་འདོད་བ་ཁོ་ནའོ་སྙམ་ན། སྒྲ་ལ་ནི་ཞེས་གསུངས་སོ། །དེས་ན་ཞེས་བྱ་བ་ནི་བར་ཆོད་ཀྱི་རྒྱུ་མི་འཐད་པས་སོ། །དེ་ནི་ཞེས་བྱ་བ་ནི་སྒྲའོ། །དེ་ལ་ཞེས་བྱ་བ་
ནི་ཀ་བ་ལ་སོགས་པའོ། །ཉེ་བར་སྡུད་པ་ནི་དེས་ན་ཞེས་བྱ་བ་སྟེ། །སྐྱེ་བ་ནི་མ་ཡིན་ནོ་ཞེས་བྱ་བའི་དོན་ཏོ། །སྒྲ་ལ་ནི་བར་ཆོད་ཀྱི་རྒྱུ་འགའ་ཡང་མ་དམིགས་ཏེ། དེས་ན་བརྩལ་མ་ཐག་པ་ནི་སྐྱེ་བའི་སྒོ་ཉིད་ནས་ཡིན་ནོ་ཞེས་བྱ་བར་བསམས་པའོ། །འདི་སུན་འབྱིན་པ་ནི་ཀ་བ་འབའ་ཞིག་ཏུ་མ་ཟད་ཀྱི་སྒྲ་ལའང་གསལ་མ་ཐག་ཏུ་མངོན་པར་གསལ་བ་དེ་ནི་ཡོད་པ་མ་ཡིན་ནོ་ཞེས་བྱ་བ་འདི་གང་ལས་ཅི་ལྟར་ཞེས་བྱ་བ་ནི་གོ་རིམས་བཞིན་དུ་གཞལ་བྱ་དང་ཚད་མ་དག་སྤངས་བའོ། །གང་གི་ཚེ་འདི་རྟོགས་པར་མི་ནུས་ཤེན། གལ་ཏེ་མངོན་པར་གསལ་བ་དང་ཞེས་བྱ་བའོ། །གལ་ཏེ་མངོན་པར་གསལ་བ་དང༌། འགྲེལ་པ་རྟག་པ་ལ་ཡང་འཐད་པ་དང་ལྡན་བ་ཡིན་ཏེ། ཉེས་བ་བརྟེན་པ་མ་ཡིན་པ་དེའི་ཚེ་སྒྲ་ལ་དེ་མ་ཐག་ཏུ་གསལ་བ་ཡོད་པ་མ་ཡིན་ནོ་ཞེས་བྱ་བ་འདི་ཅི་ལྟར་རིགས་ཞེས་བྱ་བའི་དོན་ཏོ། །འོན་ཏེ་ཡང་ཞེས་བྱ་བ་ལ་སོགས་པ་ནི་གཞན་གྱིའོ། །བར་ཆོད་པ་ལ་སོགས་པའི་རྒྱུ་ནི་གསལ་བར་རྟོགས་པ་མེད་པ་མེད་དོ་ཞེས་འབྲེལ་ཏོ། །སོགས་པ་སྨོས་པས་ནི་ངེས་པ་མེད་པ་ལ་སོགས་པ་མི་དམིགས་པའི་རྒྱུ་གང་ཅི་ཡང་རུང་བ་བཟུང་སྟེ། དཔེར་ན་བྲམ་ཟེས་གནས་པའི་རླུང་བརྟགས་པའི་ལྟ་བུ་སྟེ། དེ་ཡང་མ་མཐོང་བ་ཁོ་ནའོ་སྙམ་ན། ལན་དུ་དེ་ཡང་མི་བདེན་ཏེ་ཞེས་བྱ་བའོ། །བུམ་པ་ལ་སོགས་པ་འབའ་ཞིག་ལ་བར་ཆད་ལ་སོགས་པར་བརྟག་པར་ནི་མ་ཟད་དེ་སྒྲ་ལའང་ངོ༌། །ཡང་འདི་འདྲ་བའི་རྟོག་པ་དེ་ག་ལས་ཡིན་སྙམ་ན། གང་གི་ཕྱིར་སྒྲ་ནི་འཇིག་པ་མ་ཡིན་པ་ཉིད་དེ། དམིགས་པའི་སྔ་རོལ་དུ་ཞེས་རྟོགས་པར་བྱའོ། །ཅིའི་ཕྱིར་མི་འཇིག་ཅེ་ན། ངོ་ཤེས་པ་ནི་ཡིན་པའི་ཕྱིར་ཞེས་གསུངས་སོ། །བུམ་པ་ལ་སོགས་པ་ལ་ཡང་ཞེས་བྱ་བ་ནི་འཆད་པའོ། །འོན་ཏེ་ཞེས་བྱ་བ་ནི་གཞན་གྱིའོ། །མི་དམིགས་པའི་གནས་སྐབས་ན་ཡང་སྐྱེས་བུ་གཞན་གྱིས་དམིགས་པའི་ཕྱིར་ན་བུམ་པ་འདི་ནི་གནས་བ་ཁོ་ནའོ་ཞེས་དེ་ལྟར་རྟོགས་བ་ཡིན་ནའོ། །སུན་འབྱིན་པ་ནི་གཞན་གྱིས་ཞེས་བྱ་བའོ། །དེ་ལྟར་རྟོགས་ཀྱི་ཞེས་བྱ་བ་ནི་བུམ་པ་འདི་ནི་གནས་པ་ཁོ་ནའོ་སྙམ་པར་རྟོགས་པའོ། །ཅི་ལྟར་གཞན་གྱི་དམིགས་པ་ལས་གཞན་དེ་ལྟར་རྟོགས་པ་ཡིན་ཞེན། བརྒྱུད་ནས་ཞེས་གསུངས་
ཏེ། གཞན་གྱིས་དམིགས་ནས་བུམ་པ་ཡོད་ཅེས་བརྗོད་པ་དེ་ལས་གཞན་ལ་དེ་ལྟར་རྟོགས་བ་སྐྱེ་སྟེ་དེ་ལྟར་ན་བརྒྱུད་ནས་གཞན་གྱིས་དམིགས་པ་ལས་དེ་ལྟར་རྟོགས་པ་ཡིན་ནོ། །རང་ཉིད་ཅེས་བྱ་བ་ནི་སྔ་མ་དང་སྦྱར་བར་བྱའོ། །དངོས་སུ་ཞེས་བྱ་བ་ནི་དངོས་སུ་བྱེད་པའི་ཤེས་པ་ལས་སོ། །ཆེན་པོ་ཡིན་ནོ་ཞེས་བྱ་བ་འདིས་ནི་གཞན་གྱིས་མཐོང་བས་ནི་ངོ་ཤེས་བས་བརྟན་པར་རྟོགས་པ་མ་ཡིན་ནོ་ཞེས་བྱ་བ་འདི་བསྟན་པ་ཡིན་ནོ། །གཞན་ཡང་ཞེས་བྱ་བ་ནི་སྔར་མཐོང་བ་གང་ཞིག་ད་ལྟར་མཐོང་བ་དེ་ནི་གཞན་གྱིས་བར་དུ་མཐོང་བ་ཡིན་ནོ་ཞེས་བྱ་བ་འདི་ངོ་ཤེས་པ་ལས་གཞན་གྱིས་ཤེས་པ་མ་ཡིན་ནོ། །དེ་ལྟ་མ་ཡིན་ན་རེས་འགའ་གཞན་ཁོ་ན་ཞིག་གཞན་གྱིས་རྟོགས་པར་འགྱུར་རོ། །དེས་ན་ངོ་ཤེས་པ་ལ་མ་བརྟེན་པར་གཞན་ལས་ཀྱང༌། དེ་རྟག་པ་ཉིད་དུ་ཅི་ལྟར་རྟོགས། དེའི་ཕྱིར་གང་དག་ངོ་ཤེས་པ་ཆད་མ་ཡིན་པ་དང༌། རྟག་པ་ལ་མངོན་པར་གསལ་བ་ཡང་འདོད་པ་དེའི་ལྟར་ན། མ་ངེས་པ་ཉིད་བརྗོད་པ་འདི་ནི་ལན་ལྟར་སྣང་བ་མ་ཡིན་ཏེ། སྤྱིས་སྒྲུབ་པར་བྱེད་པ་མ་ཡིན་པའི་ཕྱིར་རོ། །ཁོ་བོ་ཅག་གི་ལུགས་ལྟར་ན་ནི། བཟློག་པ་ཡིན་པའི་ཕྱིར་ན། ལན་ལྟར་སྣང་བ་ཁོ་ནའོ་ཞེས་གནས་སོ། །དེ་ཉིད་ཀྱི་ཕྱིར་ན་ཁོ་བོ་ཅག་གི་སུན་འབྱིན་པ་ཉིད་སྐབས་སུ་བབ་པ་ཡིན་ཏེ། དབྱིབས་ལ་སོགས་པའི་སྤྱི་ཆེན་པོ་ལ་ནི་མ་ཁྱབ་པར་བྱེད་པའི་ཕྱིར་རོ་ཞེས་བྱ་བར་དགོངས་པ་ཡིན་ནོ། །གང་ཡང་འདིར་ངོ་ཤེས་པ་ལ་བརྟེན་བ་ཉིད་གསལ་བའི་དོན་དུ་ཏྲེ་ལོ་ཅ་ནས་སྒྲ་ཡོངས་སུ་བརྟག་པར་བརྗོད་པ་དེ་ནི་གཞན་དུ་བསམ་པར་བྱ་བ་ཡིན་པས་རེ་ཞིག་བཞག་གོ །ད་ནི་རྣམ་འགྲེལ་གྱི་དོན་ཇི་ལྟ་བ་ཉིད་ལ་སྦྱར་བའི་དོན་དུ་ཡང་ན་ཞེས་གསུངས་སོ། །དེ་སྐད་དུ་བཤད་པ་ཡིན་ནོ་ཞེས་བྱ་བ་ནི། བསྒྲུབ་བྱའི་རྗེས་འགྲོའི་ཕྱིར་འབྲས་བུ་ཞེས་བྱ་བ་ལ་སོགས་བའི་རྣམ་པར་འགྲེལ་བའོ། འདིའི་ཞེས་བྱ་བ་ནི་འབྲས་མཚུངས་ཀྱི་མཚན་ཉིད་དོ། །འབྲས་བུ་ཞེས་བྱ་བ་ནི་བྱས་བའོ། །གཞན་གྱིས་ཞེས་བྱ་བ་ནི་བུམ་བ་ལ་ཡོད་པས་སོ། །དེའི་ཚེ་ཞེས་ཁོང་ནས་ཕྱུང་ལ་འདིར་ཅིར་འགྱུར་ཞེས་སྦྱོར་རོ། །མི་རྟག་པ་དག་ལ་མེད་དོ་ཞེས་རྩོད་པར་བྱེད་ན་ཞེས་སྦྱར་རོ། །འགལ་བ་
ལྟར་སྣང་བ་ནི་མཐུན་བའི་ཕྱོགས་ལ་མེད་པ་ཙམ་ལས་བསམས་ནས་སོ། །རྟག་པ་ལ་ཡང་མེད་དོ་ཞེས་རྩོད་པར་བྱེད་པ་ཡིན་ན་ཞེས་འབྲེལ་ཏོ། །ཅི་ལྟར་ཞེ་ན། མི་རྟག་པ་འབའ་ནི་ག་ཏུ་ནི་མ་ཟད་དེ། རྟག་པ་དག་ལ་ཡང་ཆེད་དོ་ཞེས་སོ། །གལ་ཏེ་བྱས་པ་ཙམ་ལ་མི་རྟག་པས་ཁྱབ་པ་ཚད་མས་དེས་ན་ནི་སྒྲ་ལ་ཡང་གོད་པ་མེད་དོ། །དེས་ན་གཅིག་ཀྱང་སུན་འབྱིན་བ་མ་ཡིན་ནོ་ཞེས་བྱ་བ་ནི་ལྟར་སྣང་བ་སྒྲའི་དོན་ཏོ། །དེས་ན་འདི་ཉིད་འབྲས་མཚུངས་ཀྱི་མཚན་ཉིད་དུ་རིགས་སོ་ཞེས་ཐུགས་ལ་བཞག་ནས། རྐང་མིག་གི་མཚན་ཉིད་ནི་ཞེས་བྱ་བ་གསུངས་ཏེ། ངོ་ཤེས་པའི་ཚད་མ་དང༌། རྟག་པ་གསལ་བར་ཁས་བླངས་པས་ན་མ་ངེས་པ་ཉིད་དུ་འགྱུར་བའི་ཕྱིར་རོ། །གལ་ཏེ་རྣམ་པ་འདི་ལྟ་བུའི་སུན་འབྱིན་པའི་འབྲས་མཚུངས་ཡིན་ན། འོ་ན་རྣམ་རྟོག་མཚུངས་བ་ཇི་ལྟར་གྱུར་བ་ཡིན་ཞེ་ན། རྣམ་རྟོག་མཚུངས་པ་ནི་ཞེས་གསུངས་སོ། །བྱས་པ་ཉིད་ཀྱིས་བྱས་པ་བསྒྲུབ་བྱ་དང་དཔེ་ཆོས་མཚུངས་པས་ཆོས་མཐུན་ན་ཡང་ངོ༌། །ཁྱད་པར་ཚོས་པ་ཉིད་དང༌། མིག་གི་གཟུང་བྱ་ཉིད་ལ་སོགས་པ་དང་བརྗོད་པར་ཉེ་བར་བགྲོད་པའོ། །དཔེར་ན་ཞེས་བྱ་བ་ནི་འཆད་པའོ། །སྔ་མ་བཞིན་དུ་ཞེས་བྱ་བ་ནི་བརྩལ་མ་ཐག་བའི་ཕྱིར་སྒྲ་མི་རྟག་སྟེ་བུམ་པ་བཞིན་ནོ་ཞེས་སྔར་བརྗོད་པ་གང་ཡིན་པ་དེ་བཞིན་དུ་བུམ་པ་དང༌། བསྒྲུབ་པར་བྱ་བའི་ཆོས་ཅན་སྒྲ་ཆོས་ཅན་སྒྲ་ཆོས་མཐུན་པ་ཉིད་སྒྲུབ་པར་བྱེད་པ་བྱས་པས་བྱས་པ་སྟེ། དེ་ཆོས་ཅན་སྒྲ་ལ་མི་རྟག་པ་ཉིད་བསྒྲུབ་པར་བྱས་པ་ན། སུན་འབྱིན་པ་བརྗོད་པ་ལྟ་བུའོ། །ཅི་སྐད་བརྗོད་ཅེ་ན། བུམ་པ་ཉིད་མི་རྟག་པ་ཡིན་གྱིས་གཞན་སྒྲ་ནི་མ་ཡིན་ཏེ། ཚོས་པར་བྱ་བ་ཉིད་དང༌། མིག་གིས་གཟུང་བ་ཉིད་མེད་པའི་ཕྱིར་རོ་སྙམ་དུ་བསམས་པའོ། །གལ་ཏེ་རྣམ་པ་འདི་ལྟ་བུའི་ཉེས་པ་ཁྱེད་ཅི་ལྟར་སྤང་ཞེས་དོགས་ན། མཇུག་སྡུད་པའི་སྒོ་ནས་སྤང་པ་ནི་དེའི་ཕྱིར་ཞེས་བྱ་བའོ་འདིར་ནི་ཞེས་བྱ་བ་ནི་སྐྱོན་གྱི་རྣམ་པ་འདི་ལྟ་བུ་ལ་ནི་སྔར་བརྗོད་པ་ལན་ཡིན་ནོ། །དེ་ཡང་གང་ཞེ་ན། ཕྱིས་ཀྱང་ཞེས་བྱ་བ་ལ་སོགས་པའོ། །གལ་ཏེ་ཞེས་བྱ་བ་ནི་གཞན་གྱིའོ། །འདིར་ཡང་ཞེས་བྱ་བ་དབང་ཕྱུག་སུན་འབྱིན་པར་ཡང་འབྲས་མཚུངས་དང་འདྲ་བ་ཉིད་དོ་
ཞེས་འབྲེལ་ཏོ། །དཔེར་ན་སྒྲ་ལ་སོགས་པར་མི་རྟག་པ་ཉིད་ལ་སོགས་པ་བསྒྲུབ་པར་བྱ་བ་ལ། བྱ་རོག་ནག་པོ་འབྲེལ་བ་མེད་པ་ཡིན་པ་དེ་བཞིན་ནོ། །གལ་ཏེ་འདི་གཞི་དང་གཞི་ཅན་འབྲེལ་བ་མ་གྲུབ་པ་མ་ཡིན་ནམ་སྐབས་སུ་བབ་པ་ནི་དེ་ལྟར་མ་ཡིན་ནོ་ཞེས་དོགས་པར་མི་བྱ་སྟེ། ཤིན་ཏུ་མ་འབྲེལ་བ་ཙམ་གྱིས་འདི་དཔེར་བརྗོད་པ་འདོད་པའི་ཕྱིར་རོ། །འོ་ན་གང་ཞིག་སྒྲུབ་བྱེད་དུ་འགྱུར་ཞེ་ན། དབྱིབས་ཞེས་བྱ་བ་ལ་སོགས་པ་སྨྲས་སོ། །གལ་ཏེ་ཐམས་ཅད་ཐམས་ཅད་དུ་འདོད་པ་བསྒྲུབ་པར་འགྱུར་མོད་ཅེ་ན། རིགས་གཞན་ལས་ནི་ཞེས་སྨོས་ཏེ། བུམ་པ་ལ་སོགས་བ་ལ་རབ་ཏུ་གྲུབ་པའི་སྐྱེས་བུ་ནི་དབྱིབས་དབྱིབས་ཞེས་བྱ་བའི་སྒྲའི་སྤྱི་མཐོང་བ་ལས་རིལ་སོགས་པ་ལ་སྒྲུབ་པར་བྱེད་པར་མི་རིགས་སོ། །དེ་ཡོད་པས་ཞེས་བྱ་བ་ནི་སྒྲ་ཡོད་པས་སོ། །གཞན་གྱིས་ཁས་བླངས་པ་ཞེས་བྱ་བ་ནི་སྒྲའི་བརྗོད་བྱ་ཉིད་རྗེས་སུ་འཇུག་པ་སྒྲུབ་པར་བྱེད་པར་འགྱུར་རོ་ཞེས་ཁས་བླངས་པའོ། །འདི་ནི་ཞེས་བྱ་བ་ནི་སྒྲའི་བརྗོད་བྱ་ཉིད་རྗེས་སུ་འགྲོ་བར་སྒྲུབ་བྱེད་ཡིན་པ་ཡང་སྤངས་པས་སོ། །སེར་སྐྱ་ལ་སོགས་ཀྱི་ཞེས་སོགས་པའི་སྒྲས་ནི་རྒྱལ་བ་བ་བཟུང་ངོ༌། །སེམས་མེད་སོགས་ཞེས་བྱ་བའི་སོགས་པའི་སྒྲས་ནི་ནང་མ་ཡིན་པ་ལ་སོགས་པ་གཟུང་ངོ༌། །མི་རྟག་སོགས་ཕྱིར་ཞེས་བྱ་བ་ནི་བཤད་མ་ཐག་པའི་བསྒྲུབ་བྱ་བདེ་བ་ལ་སོགས་པ་སེམས་མེད་པ་དང༌། ནང་མ་ཡིན་པ་ལ་སོགས་པའི་སྒྲུབ་བྱེད་དོ། །སོགས་པའི་སྒྲས་ནི་སྐྱེ་བ་ཅན་ལ་སོགས་པའི་གཏན་ཚིགས་གཟུང་ངོ༌། །དང་གི་སྒྲས་ནི་སོགས་པའི་སྒྲས་བསྡུས་པའི་ནམ་མཁའི་གོས་ཅན་རྣམས་ཀྱི་ཤིང་རྣམས་ཤུན་པ་ཐམས་ཅད་བཤུས་ན་འཆི་བའི་གཏན་ཚིགས་དེ་ལས་སེམས་དང་ལྡན་བ་ཡང་དཔྱད་པ་ཡིན་ནོ། །དང་གི་སྒྲ་ཡང་གི་དོན་ཅན་ནི་འདིར་ཡང་རྟོགས་པར་བྱ་སྟེ། བདེ་བ་ལ་སོགས་པ་སེམས་བ་མེད་པ་ཅན་ནམ་གཞན་ཤིང་རྣམས་སེམས་པ་ཅན་དག་མི་རྟག་བ་དང་འཆི་བ་ལ་སོགས་པའི་སྒྲུབ་བྱེད་གང་ལས་སོ། །གྲུབ་བ་ཉིད་ཁང་བཟངས་ཡིན་ཏེ་དེའི་རྩེར་འཛེག་པར་འགྱུར་བ་ནི་མི་རྟག་པ་ལ་སོགས་པའི་སྒྲུབ་བྱེད་དེ་ཡང་སྒྲ་ཙམ་མཚུངས་པ་ཉེ་བར་འདོད་པ་ཁོ་ནའོ། །ཅིའི་ཕྱིར་ཞེ་ན། དོན་གྱི་དེ་ཁོ་ན་ཉིད་
མེད་པའི་ཕྱིར་ཏེ། མི་རྟག་པ་ལ་སོགས་པའི་སྒྲས་བསྟན་པར་བྱ་བའི་དོན་དངོས་པོར་མེད་པའི་ཕྱིར་རོ། །དོན་མེད་པའི་ཕྱིར་རོ་ཞེས་འདོན་པ་ནི་མི་རྟག་པ་ལ་སོགས་པའི་དོན་དེ་མེད་པའི་ཕྱིར་རོ་ཞེས་རྟོགས་པར་བྱའོ། །རེ་ཞིག་གྲངས་ཅན་ལ་ལྟོས་ནས་འདི་ཉིད་གསལ་བར་བྱེད་པ་ནི་འདི་ལྟར་ཞེས་བྱ་བའོ། །གྲངས་ཅན་དེའི་ཕྱིར་མི་རྟག་པ་ནི་མི་གསལ་བ་ཡིན་གྱི་ཞེས་འབྲེལ་ཏོ། །མི་གསལ་བའི་མི་རྟག་བ་ཉིད་སྒྲུབ་བྱེད་དུ་ཅི་སྟེ་མི་འགྱུར་ཞེ་ན། མངོན་པར་མི་གསལ་བའི་ཞེས་བྱ་བ་སྨོས་ཏེ། ཕྱིར་རྒོལ་བ་མ་གྲུབ་བའི་ཕྱིར་རོ་ཞེས་བྱ་བའི་དོན་ཏོ། །འོ་ན་ཞེས་བྱ་བ་ནི་གཞན་གྱིའོ། །སྐལ་བ་ཞེས་བྱ་བ་ནི་འདི་ཅི་ཞིག་ཅེས་བྱ་བ་ནི་གྲུབ་པའི་མཐའ་སྨྲ་བ་འདྲི་བའོ། །མི་མངོན་པའི་བདག་ཉིད་དོ་ཞེས་བྱ་བ་ནི་གཞན་གྱིས་སྨྲས་པའོ། །འོ་ན་ཞེས་བྱ་བ་ལ་སོགས་པ་ནི་གྲུབ་པའི་མཐའོ། །གཙོ་བོ་ལ་སོགས་པ་ཞེས་ལ་སོགས་པའི་སྒྲས་ནི་སྐྱེས་བུ་རྣམས་གཟུང་ངོ༌། །འོན་ཏེ་མི་མངོན་པ་ཙམ་གྱིས་ནི་མི་རྟག་པ་མ་ཡིན་གྱི། འོན་ཀྱང་ཡོད་པ་མི་མངོན་པའི་ཞེས་བརྗོད་པར་འདོད་པ་ཡིན་ནོ་སྙམ་ན། ཡོད་པ་མི་མངོན་པའི་ཞེས་གསུངས་སོ། །གཙོ་བོ་ལ་སོགས་པ་མི་རྟག་པར་ཐལ་བ་སྤོང་བའི་དོགས་པ་བསུ་བ་ནི་སྣང་བ་ཞེས་བྱ་བའོ། །གཙོ་བོ་ལ་སོགས་པ་ནི་གཏན་དུ་མི་སྣང་བ་ཁོ་ན་སྟེ། དེས་ན་མི་རྟག་པ་ཉིད་མ་ཡིན་ནོ་སྙམ་དུ་བསམས་པའོ། །སྣང་བ་ཞེས་བྱ་བ་འདི་ཅི་ཞིག་ཞེས་བྱ་བ་སུན་འབྱིན་བ་སྟེ། ཤེས་པའམ་ཤེས་བྱ་བའི་རང་བཞིན་ཡིན་ཞེས་རྣམ་པར་རྟོག་པ་ཉིད་ཞེ་ལ་གཞག་པ་ཡིན་ནོ། །དེ་ལ་རྣམ་པར་རྟོག་པ་དང་པོ་སུན་དབྱུང་བའི་ཕྱིར་གལ་ཏེ་དོན་གྱི་ཞེས་གསུངས་སོ། །དེའི་ཚེ་ཇི་ལྟར་སྣང་བ་བལྟར་རུང་བ་མི་སྣང་བ་བལྟར་མི་རུང་བར་འགྱུར་སྣང་བཞིན་པ་གང་ཡིན་པ་དེ་ཉིད་ནི་མི་སྣང་བར་འགྱུར་བ་མ་ཡིན་ནོ། །འགྱུར་ན་ཅི་སྐྱོན་ཞེ་ན། དེ་སྤངས་ན་ཞེས་གསུངས་ཏེ། སྣང་བ་ཉིད་སྤངས་ན་སྟེ། དོན་གྱིས་ན་ཐ་མི་དད་པའི་ཕྱིར་རོ་ཞེས་དགོངས་པ་ཡིན་ནོ། །གཉིས་པ་གསལ་བའི་ཕྱིར་གསུངས་པ་ནི་འོན་ཏེ་ཞེས་བྱ་བའོ། །དེ་ཞེས་བྱ་བ་ནི་སྣང་བའི་བདག་ཉིད་མེད་པ་ཉིད་ཇི་ལྟར་རྗེས་སུ་འགྲོ་བ་མེད་པ་མ་ཡིན། རྗེས་སུ་འགྲོན་ནི་དེ་ཉིད་གནས་པར་ཐལ་བས་དངོས་པོ་སྣང་བ་ཉིད་ཡིན་པར་འགྱུར་རོ། །
ཆ་འགས་རྗེས་སུ་འགྲོ་ཡང་སྣང་བ་ཉིད་དུ་འགྱུར་བར་མི་ནུས་སོ་ཞེ་ན། འོ་ན་སྣང་བར་འགྱུར་བ་དེ་ཉིད་ཤེས་པ་ཡིན་པར་སྨྲ་བ་ཡིན་ན། དེ་ཡང་མེད་པ་ཁོ་ནའོ། །དངོས་པོའི་རང་བཞིན་གནས་ན་དེ་ལ་ཅི་ཞིག་བྱུང་ན། གང་གི་དངོས་པོ་མེད་པ་དེ་རྗེས་སུ་འགྲོ་བ་མེད་བར་མི་འགྱུར། དེའི་ཕྱིར་ཇི་ལྟར་རྗེས་སུ་འགྲོ་བ་མེད་པར་གཞིག་པ་མ་ཡིན་ཞེས་གསུངས་སོ། །འོན་ཏེ་ཡང་ཤེས་པ་ནི་རྗེས་སུ་འགྲོ་བ་མེད་པ་ཁོ་ནར་ཞིག་པ་ཡིན་ལ། དོན་ནི་བསྐལ་པ་ཡིན་ལ། མི་རྟག་པ་ཡང་དེ་ཉིད་ཡིན་ན་དེས་ན་སྒྲ་ཙམ་མཚུངས་པ་ཉེ་བར་བཀོད་པ་ཅི་ལྟར་ཡིན་ཞེ་ན། གཞན་མེད་ན་ཞེས་གསུངས་ཏེ། ཤེས་པ་མེད་ན་དོན་གཞན་བསྐལ་པ་བར་ཡང་མི་འགྱུར་རོ། །འོན་ཀྱང་དོན་གཙོ་བོ་དང་འདྲ་བར་ན་གཏན་དུ་མི་མཐོང་བའི་བདག་ཉིད་ཡིན་པས་མི་རྟག་པ་ཉིད་མེད་པར་ཐལ་ལོ་ཞེས་བཤད་པ་ནི་དེ་ཡང་ཞེས་བྱ་བ་སྟེ། དོན་དེ་ཡང་ངོ༌། །གང་གི་ཕྱིར་དེ་ལྟང་དངོས་པོའི་གནས་པར་སྒྲུབ་བྱེད་མ་གྲུབ་པ་དེའི་ཕྱིར་རོ། །མི་རྟག་པ་ཉིད་ལ་སོགས་པ་ཚད་མས་རབ་ཏུ་གྲུབ་པ་གང་ཡིན་པ་དེ་ཡང་སྒྲུབ་པར་བྱེད་པ་མ་ཡིན་ཏེ། བཟློག་ན་གནོད་པ་ཅན་གྱི་ཚད་མ་མེད་བའི་ཕྱིར་རོ་ཞེས་རྟོགས་པར་བྱའོ། །སེམས་པ་ཅན་དུ་སྒྲུབ་པའི་རྟགས་ཀྱང་སྒྲ་མཚུངས་པར་བཀོད་པ་ཙམ་ཡིན་ནོ་ཞེས་སྟོན་པར་བྱེད་པ་ནི་ཤུན་པ་ཐམས་ཅད་བཤུས་ན་ཞེས་བྱའོ། །འོན་ཏེ་འདི་ནི་སངས་རྒྱས་པ་ལ་གྲུབ་པ་ཁོ་ན་མ་ཡིན་ནམ་དེས་ན། དེ་སྐད་ཇི་སྟེ་བརྗོད་སྙམ་དུ་དོགས་ན། རྣམ་ཤེས་ལ་སོགས་ཞེས་གསུངས་སོ། །མ་གྲུབ་པ་ནི་ཐེ་ཚོམ་ཟ་བའོ། །སངས་རྒྱས་པ་གང་ལ་ཞེས་བྱ་བ་ལ་སོགས་པ་ནི་འཆད་པའོ། །དེ་ལ་སོགས་པ་ཞེས་བྱ་བ་ནི་རྣམ་པར་ཤེས་པ་དང་དབང་པོ་ལ་སོགས་པ་འགགས་པའི་རང་བཞིན་ནོ། །གལ་ཏེ་རྣམ་པར་ཤེས་པ་ལ་སོགས་པ་འགགས་པ་ནི་ཤིང་རྣམས་ལ་ཡོད་པ་ཁོ་ན་མ་ཡིན་ནམ། དེའི་ཕྱིར་འགགས་པའི་རང་བཞིན་གྱིས་འཆི་བ་ཇི་ལྟར་མ་གྲུབ་ཅེ་ན། རྣམ་པར་ཤེས་པ་འགགས་པ་ནི་ཞེས་གསུངས་སོ། །དེ་བཞིན་དུ་ཚེ་འགགས་པ་ཡང་ཚེ་མེད་པ་ལ་ཡོད་པ་མ་ཡིན་ནོ་ཞེས་བ་ལྟ་བར་བྱའོ། །གང་གིས་ཐ་དད་
པར་སྟོན་པ་ཅི་ཚེ་རྣམ་པར་ཤེས་པ་ལུས་ཐ་དད་པ་ཡིན་ནམ་ཞེས་དོགས་ན། ཚེ་ནི་སྲོག་ཡིན་ཞེས་བྱ་བ་ལ་སོགས་པ་གསུངས་སོ། །རྣམ་པར་ཤེས་པ་ལ་སོགས་པ་སྔོན་དུ་འགྲོ་བའི་འགགས་པ་ཁས་ལེན་ན་སེམས་པ་ཡོད་པའི་སྒྲུབ་བྱེད་ཉེ་བར་བགོད་པའི་དོན་མེད་པར་ཐལ་བའི་ཕྱིར་རོ་སྙམ་དུ་དགོངས་པའོ། །འོན་ཏེ་ཡང་ཤིང་དག་ལ་འཆི་བ་ཁས་བླངས་ཀྱང་སེམས་པ་ཁས་བླངས་པ་ནི་མ་ཡིན་ཏེ། དེས་ན་དེའི་སྒྲུབ་བྱེད་འགོད་པ་ཡིན་ནོ་སྙམ་དུ་སེམས་ན། འཆི་བ་ཁས་ལེན་ན་ཞེས་གསུངས་སོ། །གང་གི་ཕྱིར་ཡོད་པ་སྔོན་དུ་འགྲོ་བ་འགོགས་པའི་རང་བཞིན་འཆི་བ་ཡིན་པར་ཁས་མི་ལེན་པ་དེས་ན་སངས་རྒྱས་པ་འདི། དེ་ཡང་ཞེས་བྱ་བ་ནི་སྐམ་པ་ཙམ་མོ། །དེ་ཡང་གྲུབ་པོ་ཞེ་ན་ཞེས་བྱ་བ་ནི་འཆི་བ་དེ་ཡང་ངོ༌། །འོན་ཏེ་ཞེས་བྱ་བ་ནི་གཞན་གྱིའོ། །འཆི་བའི་དོན་མཐོང་བ་གང་ཡིན་པ་དེ་ལས་སྒྲ་དེར་བརྗོད་པར་འདོད་པ་ཡིན་ཏེ། དེ་མེད་ན་མི་འབྱུང་བ་ཡིན་ན་ཞེས་བྱ་བའི་དོན་ཏོ། །ལན་དུ། འཆི་བ་གྲུབ་ན་ཞེས་བྱ་བ་ལ་སོགས་པའོ། །དེའི་སྒྲས་ནི་འཆི་བའི་སྒྲའོ། །འབྲེལ་པ་ནི་འཆི་བ་ལས་ཞེས་རྟོགས་བར་བྱའོ། །དེ་ལས་ཞེས་བྱ་བ་ནི་འཆི་བའི་སྒྲ་ལས་སོ། །དེ་ལྟ་བུའི་འཆི་བ་ལས་ཞེས་བྱ་བ་ལ་སོགས་པ་ནི་བཤད་པའོ། །དེ་ལྟ་བུའི་འཆི་བ་མཐོང་བ་ལས་བྱུང་བ་ཡིན་ན། དེ་ལྟ་བུའི་འཆི་བ་མཐོང་བ་ལས་བྱུང་བའི་སྒྲ་ལས་འཆི་བ་གྲུབ་ལ། འཆི་བ་གྲུབ་ན་ཡང་དེ་ལྟ་བུའི་འཆི་བ་མཐོང་བ་ལས་བྱུང་བའི་སྒྲ་གྲུབ་པའི་ཕྱིར་ཕན་ཚུན་བརྟེན་པའི་ཉེས་པ་ཡིན་ནོ། །རྭ་ཅན་ཉིད་དོ་ཞེས་བྱ་བ་ནི་གོའི་སྒྲས་བརྗོད་པར་བྱ་བ་ཡིན་པའི་ཕྱིར་རོ་སྙམ་དུ་དགོངས་པའོ། །དེས་ན་འདིས་ནི་སེར་སྐྱ་ལ་སོགས་ཀྱི་ཞེས་བྱ་བའི་རྣམ་འགྲེལ་བཤད་ནས་མཇུག་སྡུད་པ་ནི་དེས་ན་ཞེས་བྱ་བ་ལ་སོགས་པའོ། །བརྒྱ་ལ་འདིར་ཚུལ་འདི་འགྲུབ་པར་འགྱུར་རོ་སྙམ་དུ་དོགས་ན་སྐབས་སུ་བབ་པ་ཉིད་བརྗོད་པ་ནི་དེ་བཞིན་དུ་ཞེས་གསུངས་སོ། །དབྱིབས་ལ་སོགས་པ་ལ་ཡང་བསྒྲུབ་བྱས་ཁྱབ་པའི་དོན་མེད་པའི་ཕྱིར། སྒྲ་ཙམ་མཚུངས་པ་ཁོ་ནའོ་སྙམ་དུ་དགོངས་པ་ཡིན་ནོ། །དེ་ངེས་པར་མ་རྟོགས་པས་བསམ་པ་གཞན་དུ་བརྟགས་ནས་རྩོད་པ་ནི། གལ་ཏེ་ཁྱད་པར་ཞེས་བྱ་བ་ལ་སོགས་པའོ། །འོ་ན་དེའི་ཚེ་ཞེས་ཁོང་ནས་བྱུང་ལ།
བྱས་པ་ཉིད་ལ་སོགས་པ་གཞན་ཡང་ཞེས་སྦྱར་རོ། །དོན་ནི་འདི་ཡིན་ཏེ། གལ་ཏེ་འཆི་བ་དང་དབྱིབས་ལ་སོགས་པའི་གཏན་ཚིགས་ལ། རྣམ་པར་ཤེས་པ་ལ་སོགས་པ་ལ་གགས་པ་དང༌། རྩོམ་པ་དང་ལྡན་པས་ཁྱབ་པའི་མཚན་ཉིད་ཁྱད་བར་ཡོངས་སུ་རྟོགས་པས་གཏན་ཚིགས་མ་ཡིན་ན། དེའི་ཚེ་བྱས་བ་ཉིད་ཀྱང་གཏན་ཚིགས་མ་ཡིན་བར་འགྱུར་རོ། །གལ་ཏེ་ཁྱད་པར་ཡོངས་སུ་བརྟགས་པས་འཆི་བ་ལ་སོགས་པ་གཏན་ཚིགས་མ་ཡིན་ཡང་བྱས་བ་ལ་སོགས་པ་ཡང་གཏན་ཚིགས་མ་ཡིན་པར་གོ་ཅི་ལྟར་འགྱུར་སྙམ་དུ་དོགས་ན། རྒོལ་བ་གཞན་ལྟོས་བས་སམ་ཞེས་སྨྲས་སོ། །གང་གི་ཕྱིར་རྒོལ་བ་གཞན་ལ་ལྟོས་པས་ཏེ། ཕྱིར་རྒོལ་བ་ལ་ལྟོས་ནས་ནི་ཐམས་ཅད་མ་སྒྲུབ་པ་ཉིད་ཡིན་ནོ། །འཆི་བ་ལ་སོགས་པའི་གཏན་ཚིགས་ཀྱི་ཁྱད་པར་མ་གྲུབ་པར་བརྗོད་པ་ཡང་ཕྱིར་རྒོལ་བ་ལ་ལྟོས་ནས་ཡིན་ནོ། །བྱས་པ་ལ་ཡང་སླར་རྒོལ་བ་བྲམ་ཟེ་ལ་ལྟོས་པ་ཁོ་ནས་རིགས་བ་ཅན་གྱིས་བརྗོད་པ་ནམ་མཁའི་ཡོན་ཏན་གྱི་སྒྲ་ལ་བརྟེན་པའི་ཁྱད་པར་མ་གྲུབ་ལ། དུ་བ་ལ་ཡང་སྐད་ཅིག་མའི་རང་བཞིན་གྱི་རིལ་སོགས་པ་ལ་བརྟེན་པ་མ་གྲུབ་པའོ། །ཁྱད་པར་རྣམ་པར་རྟོག་པས་ཀྱང་ཐམས་ཅད་མ་གྲུབ་པ་ཉིད་དེ། བསྒྲུབ་པར་བྱ་བ་དང་དཔེའི་ཆོས་ཅན་གྱི་དབྱེ་བས་གཏན་ཚིགས་ཐ་དད་པར་རྟོགས་པ་ནི་ཐམས་ཅད་མཚུངས་བའི་ཕྱིར་རོ། །འདི་ཉིད་གསལ་བར་བྱེད་པ་ནི་འདི་ལྟར་ཞེས་བྱ་བ་ལ་སོགས་པའོ། །ནམ་མཁའི་ཡོན་ཏན་ནི་སྒྲ་ཡིན་ལ། དེའི་ཆོས་བྱས་པ་ཉིད་མི་རྟག་པའི་སྒྲུབ་བྱེད་དུ་རིགས་པ་ཅན་གྱིས་བརྗོད་བ་ནི་གཞན་ཏེ། ཕྱིར་རྒོལ་བ་ལ་བྲམ་ཟེ་ལ་མ་གྲུབ་པའོ། །བསྒྲུབ་པར་བྱ་བ་སྒྲ་དང་དཔེ་བུམ་པ་ལ་སོགས་པ་དེ་དག་གི་ཆོས་བྱས་པ་ཉིད་ནི་ཕན་ཚུན་དུ་ནི་ཞེས་བྱ་བ་དཔེ་དང་བསྒྲུབ་བྱའི་ཆོས་ཅན་ལ་མ་གྲུབ་པ་ཉིད་རིམ་གྱིས་ཕྱོགས་གཉིས་གསལ་བར་བྱེད་པའོ། །དེ་ལྟ་ཡིན་དང་འགའ་ཡང་སྒྲུབ་པར་བྱེད་པར་མི་འགྱུར་ན་དེ་ལྟར་ཡང་མ་ཡིན་ནོ། །དེའི་ཕྱིར་དབང་ཕྱུག་སྒྲུབ་པ་ལ་ཡང་སུན་འབྱིན་བ་འདི་ཡོད་པ་མ་ཡིན་ནོ་ཞེས་བྱ་བ་ནི་རྩོད་པའི་དོན་ཏོ། །ཕྱོགས་དང་པོ་ལ་ནི་ཕྱེད་སྔ་མས་ལན་འདེབས་པའོ། །ལུང་
གི་ཞེས་བྱ་བ་ནི་མ་གྲུབ་ཀྱང་གནོད་པར་བྱེད་པ་མ་ཡིན་ནོ། །འགའ་ལ་ཡང་ནི་ཞེས་བྱ་བ་ནི་བྱས་པ་ལ་སོགས་པ་ལའོ། །ནམ་མཁའི་ཆོས་ཉིད་ནི་ཉེ་བར་མཚོན་པ་སྟེ། སྐད་ཅིག་མ་ཉིད་ལ་སོགས་པ་ཡང་དེ་བཞིན་དུ་འདོད་པའི་ཕྱིར་ཏེ། རྒོལ་བ་གཞན་ལ་ལྟོས་ནས་ཐམས་ཅད་མ་གྲུབ་པ་ཉིད་དོ་ཞེས་བརྗོད་ཟིན་ཏོ། །གཉིས་པ་ལ་བརྗོད་པ་ནི་ཁྱད་པར་རྟོགས་བར་བྱེད་ན་ནི་ཞེས་བྱ་བའོ། །གང་གི་ཕྱིར་ནམ་མཁའི་ཡོན་ཏན་ཉིད་མ་གྲུབ་བས་བྱས་བ་ལ་མི་གནོད་པ་དང་བྱད་པར་ཡོངས་སུ་རྟོགས་པ་ན་ཡང་གཏན་ཚིགས་མེད་པར་ཐལ་བར་འགྱུར་བ་དེའི་ཕྱིར་ཞེས་བྱ་བ་ལ་སོགས་པའོ། །དངོས་པོའི་རང་བཞིན་སྒྲུབ་བྱེད་དུ་བྱས་པས། བསྒྲུབ་བྱས་ཁྱབ་བ་ཉིད་དུ་མ་གྲུབ་པ་ལ་ནི་མ་གྲུབ་པ་ཉིད་བརྗོད་པའི་མཚན་ཉིད་ཀྱི་ཚུལ་འདི་ཡིན་ནོ། །ཆོས་ཅན་གྱི་རང་བཞིན་ནམ། བསྒྲུབ་བྱས་ཁྱབ་པའི་གཏན་ཚིགས་ཀྱི་རང་བཞིན་འདི་གྲུབ་ན་ནི་བསྟན་བཅོས་ལས་བསྟན་པའི་ཁྱད་པར་གནོད་བྱེད་མ་ཡིན་ཏེ། ཁྱད་པར་དེ་མ་གྲུབ་ཀྱང་ཞེས་བལྟ་བར་བྱའོ། །སྤྱིར་བརྗོད་པའི་དོན་ཁྱད་པར་གྱི་མཐར་ཐུག་པར་བྱས་ཏེ། སྟོན་པ་ནི་སྒྲ་ནི་ནམ་མཁའ་ལ་བརྟེན་བཞིན་ཞེས་བྱའོ། །དཔེར་ན་སྒྲ་ནམ་མཁའ་ལ་བརྟེན་པ་ཉིད་མ་གྲུབ་ཀྱང་ཆོས་ཅན་སྒྲ་གྲུབ་པ་དང། བྱས་པའི་ཁྱབ་པ་གྲུབ་པ་ལ་གནོད་བྱེད་མ་ཡིན་པ་བཞིན་ནོ། །ལུང་ལས་ཞེས་བྱ་བ་ནི་འཆད་པའོ། །གལ་ཏེ་ཆོས་ཅན་གྱི་ཁྱད་པར་དེ་འདྲ་བ་ནི་རྒོལ་བ་རིགས་པ་ཅན་རང་ཉིད་ཀྱིས་བརྟགས་པ་མ་ཡིན་ནམ། དེས་ན་དེ་མ་གྲུབ་པའི་གནོད་པའི་རྒྱུ་མཚན་དུ་ཇི་ལྟར་མི་འགྱུར་ཞེ་ན། དེ་བཞིན་དུ་ཁྱད་པར་ཞེས་གསུངས་སོ། །རང་གི་བསྟན་བཅོས་ལས་བསྟན་པ་ནམ་མཁའི་ཡོན་ཏན་གྱི་ཁྱད་པར་ཡོངས་སུ་རྟོག་པ་ཡིན་ན་ཡང་ངོ༌། །གལ་ཏེ་ནམ་མཁའི་ཡོན་ཏན་གྱི་སྒྲ་ནི་ཆོས་ཅན་ཞེས་ཁྱད་པར་བརྗོད་པ་སྔོན་དུ་འགྲོ་བ་ཅན་འདིའི་སྦྱོར་བ་ཡིན་པར་གྱུར་ན་ནི་དེའི་ཚེ་ནི་ཉེས་པ་འདིར་འགྱུར་བ་ཡིན་ན། དེ་ལྟར་ནི་མ་ཡིན་ཏེ། སྒྲ་ཙམ་ཆོས་ཅན་དུ་བཟུང་བའི་ཕྱིར་རོ། །ཁྱད་པར་དེ་ནི་མ་སྨྲས་ཀྱང་འདོད་པ་ཡིན་ནོ་ཞེ་ན། དེ་ལྟ་ན་ཡང་རེ་ཞིག་མི་རྟག་པ་ཉིད་དུ་གྲུབ་པ་ཡིན་ལ། ནམ་མཁའི་ཡོན་ཏན་གྲུབ་པ་ནི་དཔྱད་བ་གཞན་དུ་འོས་སོ་སྙམ་དུ་དགོངས་སོ། །
ཅིའི་ཕྱིར་ཆོས་ཅན་མ་གྲུབ་པ་མ་ཡིན་ཞེ་ན། ཆོས་ཅན་ཉིད་ནི་ཞེས་གསུངས་སོ། ཁྱད་པར་མ་གྲུབ་ན་ཞེས་བྱ་བ་ནི་ནམ་མཁའི་ཡོན་ཏན་ཉིད་ལ་སོགས་པའི་ཁྱད་པར་མ་གྲུབ་ནའོ། །འོ་ན་ཁྱད་པར་རྟོགས་པར་ཅིའི་ཕྱིར་མི་འགྱུར་ཞེ་ན། ཁྱད་པར་ཡོངས་སུ་རྟོགས་པ་ཡང་ཞེས་གསུངས་སོ། །ཅིའི་ཕྱིར་མཁོ་བ་མ་ཡིན་སྙམ་ན། དེ་ལ་ཞེས་སྨོས་ཏེ། བྱས་པ་ཉིད་ལ་སོགས་པ་ལའོ། །བྱས་པ་ཉིད་དང་མི་རྟག་པ་ཉིད་གཉིས་སྤྱིར་ཁྱབ་པ་གྲུབ་པའི་ཕྱིར་རོ་སྙམ་དུ་དགོངས་པའོ། །འདི་ཉིད་བསྟན་པ་ནི་འདི་ལྟར་ཞེས་བྱ་བ་ལ་སོགས་པའོ། །ཁྱད་པར་ནམ་མཁའི་ཡོན་ཏན་ཞེས་བྱ་བའི་མཚན་ཉིད་རབ་ཏུ་གྲུབ་པ་ནའོ། །ཅིའི་ཕྱིར་མི་འདོད་ཅེ་ན། རྒྱུའི་དེ་མ་ཐག་བྱུང་ཞེས་གསུངས་སོ། །ཅིའི་ཕྱིར་ཁྱད་པར་རྗེས་སུ་མ་འབྲེལ་ཅེ་ན། སྔ་མ་དང་ཞེས་གསུངས་ཏེ། སྔ་མའི་རང་བཞིན་དབེན་པའི་བྱས་པ་ཉིད་དང༌། ཕྱི་མའི་རང་བཞིན་གྱིས་དབེན་པའི་མི་རྟག་པ་ཉིད་ནི་སྒྲ་དང་བུམ་པའམ་གཞན་དུ་ཡང་རུང་སྟེ། འགར་ཡང་ཁྱད་པར་ཡོད་པ་མ་ཡིན་ནོ། །དེ་ག་ལས་ཤེ་ན། ཕྱོགས་དེ་ནི་ཞེས་གསུངས་ཏེ། རི་ལ་སོགས་པའི་མཚན་ཉིད་དོ། །ཡང་ན་ཕྱོགས་དང་ལྷན་ཅིག་གནས་པས་ན། ཕྱོགས་བཅས་ཏེ་སྒྲའོ། །དེ་ཞེས་བྱ་བ་ནི་བྱས་བ་ལ་སོགས་པའི་གཏན་ཚིགས་སོ། ཅིའི་ཕྱིར་ཞེ་ན། དེ་ནི་གཅིག་ཏུ་ཞེས་གསུངས་སོ། །དེས་ན་ཞེས་བྱ་བ་ནི་མཇུག་སྡུད་དེ། གང་གི་ཕྱིར་དེ་ལྟ་ཡིན་པ་དེས་ན་བྱས་པ་ཉིད་ལ་སོགས་པ་འདི་ལ་བསྒྲུབ་བྱ་དང་དཔེ་དབྱེ་བས་རྣམ་པར་རྟོག་པ་མེད་དོ། །འདིས་ནི་གྲུབ་ནས་མ་གྲུབ་ཀྱང༌། ཁྱད་པར་གནོད་བྱེད་མ་ཡིན་ཏེ་ཞེས་བྱ་བ་ལ་སོགས་པ་བཤད་པ་ཡིན་ནོ། །འོ་ན་དབྱིབས་ལ་སོགས་པ་ལ་ཇི་ལྟར་རྣམ་པར་རྟོག་པ་ཡོད་ཅེས་དོགས་པ་སེལ་བ་ན། དངོས་པོའི་ངོ་བོར་མ་གྲུབ་ལ། ཚུལ་འདི་ཞེས་བྱ་བའི་རྣམ་འགྲེལ་གྱི་ཆ་རྣམ་པར་འགྲེལ་པ་ནི་དབྱིབས་ལ་སོགས་པ་ལ་ནི་ཞེས་བྱ་བའོ། །དེ་དང་ཞེས་བྱ་བ་སེམས་པ་ཅན་ལ་སོགས་པའི་བསྒྲུབ་བྱ་དང་འབྲེལ་བ་མ་གྲུབ་པ་ཉིད་དོ། །དེ་ཉིད་ཀྱི་ཕྱིར་འདིར་ནི་རྣམ་པར་རྟོག་པས་ཉེས་བར་འགྱུར་བ་ཁོ་ནའོ། །འདི་ལ་སྐྱོན་གཞན་ཡང་ཡོད་པ་ཁོ་ན་མ་ཡིན་ནམ། ཅི་སྟེ་མ་བརྗོད་ཅེ་ན། ལྷག་མ་
ནི་ཞེས་གསུངས་སོ། །ཐ་དད་དངོས་ལ་རབ་གྲུབ་པ། །ཞེས་བྱ་བ་ལ་སོགས་པས། ཉེས་པ་ལྷག་མ་ནི་སྔར་བརྗོད་ཟིན་པ་ཁོ་ན་བས་ཡང་མི་བརྗོད་དོ་སྙམ་དུ་དགོངས་པའོ། །དེ་བས་ན་དབྱིབས་ལ་སོགས་པའི་སྒྲུབ་པར་བྱེད་པ་བསྒྲུབ་བྱ་དང་འབྲེལ་པ་མ་གྲུབ་པའི་ཕྱིར་ན། དབྱིབས་ལ་སོགས་པའི་སྒྲ་ཙམ་དུ་སྒྲུབ་བྱེད་དུ་ལུས་པ་ཡིན་ནོ་ཞེས་སྟོན་པ་ནི་དབྱིབས་ཀྱི་སྒྲ་ཙམ་ནི་ཞེས་བྱ་བའོ། །སྒྲ་མ་གྲུབ་ཀྱང་ཞེས་བྱ་བ་ནི་ལུས་ཅན་ཉིད་ལ་སོགས་པའི་སྒྲའོ། །སྒྲུབ་པར་བྱེད་པའི་དངོས་པོ་གྲུབ་ན་བསྒྲུབ་བྱ་གྲུབ་པར་འགྱུར་རོ། །སྤྱིར་བརྗོད་པའི་དོན་ཁྱད་པར་དུ་སྟོན་པ་ནི་འུག་པ་ལས་བྱུང་བ་ནི་འུག་པ་པས་ཏེ་བྱེ་བྲག་པའོ། །འུག་པའི་ཆ་བྱད་འཛིན་པའི་བདེ་བྱེད་ཀྱི་སློབ་མར་གྲགས་བས་ན་གཟེགས་ཟན་ནོ། །མི་རྟག་པ་ཞེས་བྱ་བ་ནི་དུས་ཅུང་ཟད་གནས་པས་སོ། །རྡུལ་ཕྲན་དག་ནི་ཞེས་བྱ་བ་ནི། གཟུགས་དང༌། དྲི་དང༌། རོ་དང༌། རེག་པ་ཡིན་གྱི་སྒྲ་ནི་མ་ཡིན་ཏེ། བྱེ་བྲག་པས་ཡོན་ཏན་ཉིད་དུ་ཁས་བླངས་པའི་ཕྱིར་དང༌། རྡུལ་ཕྲ་རབ་ཏུ་ཁས་བླངས་པའི་ཕྱིར་རོ། །ཡང་ན་དོན་དམ་པར་སྒྲ་ཡང་རྡུལ་ཕྲ་རབ་ཡིན་པའི་ཕྱིར་ཉེས་པ་མེད་དོ། །དཔེ་ནི་བུམ་པ་བཞིན་ནོ་ཞེས་བྱ་བར་བལྟའོ། །སྒྲུབ་པར་བྱེད་པ་འདི་ཡང་གཞན་གྱི་ལུགས་ཀྱིས་བརྗོད་པ་ཡིན་ཏེ། དེས་ན་མ་ཁྱབ་པ་ཉེས་པ་མེད་དེ། ལྷན་ཅིག་བྱུང་བར་མཐོང་བ་ཙམ་གྱིས་ཁྱབ་པ་ཁས་བླངས་པའི་ཕྱིར་རོ། །གཞི་མ་གྲུབ་པའི་ཉེས་པར་ཡང་དོགས་པར་མི་བྱ་སྟེ། རྡུལ་ཕྲ་རབ་དག་ལ་ལོག་པར་རྟོགས་པ་མེད་པའི་ཕྱིར་རོ། །སྒྲུབ་པར་བྱེད་པའི་སྦྱོར་བ་འདིར་ལུས་ཅན་ཡིན་པའི་ཕྱིར་རོ་ཞེས་བྱ་བའི་སྒྲ་ནི་སངས་རྒྱས་བ་དང་བྱེ་བྲག་པ་ཕན་ཚུན་མངོན་པར་འདོད་པའི་ཡུལ་རེག་པ་དང་ལྡན་པ་དང༌། ཐམས་ཅད་དུ་སོང་བ་མ་ཡིན་པའི་རྫས་ཀྱི་ཚད་ཀྱི་མཚན་ཉིད་ལ་གྲུབ་པ་མ་ཡིན་ནོ། །ཅིའི་ཕྱིར་རིགས་པ་ཅན་ལ་སྒྲ་འདི་རེག་བྱ་དང་ལྡན་པ་ལ་མ་གྲུབ་ཅེ་ན། རྫས་ཐམས་ཅད་དུ་སོང་བ་མ་ཡིན་པའི་ཞེས་གསུངས་སོ། །འདིར་སངས་རྒྱས་པ་ལ་ཅི་ལྟར་གྲུབ་ཅེ་ན། བདེ་བར་གཤེགས་པས་རྣམས་ལ་ནི་ཞེས་གསུངས་སོ། །རེག་བའི་ནི་རང་གི་ཡུལ་དང་གཞན་སྐྱེ་བའི་གེགས་བྱེད་པ་ཡིན་ཏེ། དེ་དང་ལྡན་པའོ། །སངས་རྒྱས་པ་དེས་མངོན་པར་འདོད་པའི་དོན་རེག་པ་
དང་ལྡན་པའི་མཚན་ཉིད་ནི་སངས་རྒྱས་པ་དང་བྱེ་བྲག་པ་གཉིས་ཀ་ལས་གྲུབ་པའི་ཕྱིར་རོ། །དེ་ལྟ་བུ་ཉིད་ཅེས་བྱ་བ་ནི་མི་འཁྲུལ་པའམ་གྲུབ་པ་ཉིད་ཡིན་ན་བསྒྲུབ་བྱའི་དོན་འགྲུབ་པའོ། །འདི་གཉིས་ལ་ཞེས་བྱ་བ་སྦྲ་དང་དངོས་པོ་དག་ལའོ། །དངོས་པོའི་རང་བཞིན་དེ་ཉིད་འཁྲུལ་པ་ལ་སོགས་པ་ཡིན་ན་ཞེས་སོགས་པའི་སྒྲས་མ་གྲུབ་པ་དང༌། འགལ་བ་ཡིན་ན་ཞེས་རྟོགས་པར་བྱའོ། །མི་འཁྲུལ་བར་འདོད་ཀྱང་ཞེས་བྱ་བ་ནི་བསྒྲུབ་བྱ་ལའོ། །དོན་དེ་དངོས་པོའི་རང་བཞིན་གྱིས་སྒྲུབ་བྱེད་དེ་ལ་བརྟེན་པའི་དཔྱད་པ་མི་འཁྲུལ་བའི་ཡུལ་ཅན་ཉིད་ཉེ་བར་མཁོ་བ་ཡིན་ནོ། །སྒྲའི་དཔྱད་པ་ཡང་འདི་ཉིད་དུ་བྱའོ་ཞེ་ན། དངོས་པོ་འཁྲུལ་པ་དང་ཞེས་བྱ་བ་གསུངས་སོ། །ཕྱིས་ཞེས་བྱ་བ་ནི་རྗེས་སུ་དཔག་པའི་ཡུལ་ལ་ཚིག་ཚད་མ་ཉིད་དུ་མི་འདོད་ཅིང་ཞེས་བྱ་བ་དེར་རོ། །དེ་བཞིན་དུ་རྟག་པ་ལ་ཡང་ཚད་མེད་ཉིད་ཅེས་བྱ་བར་གྲུབ་པོ་ཞེས་འབྲེལ་ཏོ། །གཞན་གྱི་ལྟ་བས་དབང་ཕྱུག་འབའ་ཞིག་ཁམས་གསུམ་གྱི་རྒྱུར་གྲུབ་པ་ནི་མ་ཡིན་ནོ་ཞེས་བསྟན་པའི་ཕྱིར། རྟག་པ་ཉིད་ཀྱིས་ནམ་མཁའ་ལ་སོགས་པ་དང་ཞེས་གསུངས་སོ། །འདི་ཉིད་བརྩལ་བས་བསལ་བར་བྱ་བའི་ཕྱིར་འདི་ལྟར་ཞེས་གསུངས་སོ། །ཅི་ལྟར་དེ་རང་བཞིན་གང་གིས་དབང་ཕྱུག་ཅེས་བྱ་བའི་དངོས་པོ་དེ་རྒྱུ་ཡིན་པ་དེ་ལྟ་ཉིད་ཅེས་བྱ་བ་རང་བཞིན་དེ་ཉིད་ཀྱི་ནམ་མཁའ་ལ་སོགས་པའི་དངོས་པོ་དེ་རྒྱུ་མ་ཡིན་པར་ཕ་རོལ་གྱིས་གང་གི་ཚེ་ཁས་བླངས་པ་དེའི་ཚེ། གང་གིས་དེ་ཅི་ལྟར་དབང་ཕྱུག་ཅེས་བྱ་བའི་དངོས་པོ་དེ་རྒྱུར་འདོད་ལ། རྒྱུ་མ་ཡིན་ཏེ་རྒྱུ་མ་ཡིན་པར་མངོན་པར་འདོད་པའི་ནམ་མཁའ་ལ་སོགས་པ་གང་གི་རྒྱུར་མི་འདོད་ཅེས་སྦྱར་རོ། །གཉི་ག་ཡང་རང་བཞིན་མཚུངས་པའི་ཕྱིར་རང་དབང་དུ་རྒྱུ་ཉིད་དམ་ཅིག་ཤོས་སུ་འགྱུར་རོ་སྙམ་དུ་དགོངས་པའོ། །ཡང་ན་ཇི་ལྟར་འབྱིན་པར་བྱེད་པའི་གནས་སྐབས་ན། དབང་ཕྱུག་ཅེས་བྱ་བའི་དངོས་པོ་དེ་ཇི་ལྟར་རྒྱུ་ཡིན་བ་དེ་ལྟ་བུ་ཉིད་ཡིན་པའི་ཕྱིར་དབང་ཕྱུག་ཅེས་བྱ་བའི་དངོས་པོ་དེ་གང་གི་ཚེ་རྒྱུ་མ་ཡིན་པ་དེའི་ཚེ། དབང་ཕྱུག་ཅེས་བྱ་བའི་དངོས་པོ་དེ་རྒྱུ་ཉིད་དུ་འདོད་ལ་རྒྱུ་མ་ཡིན་པར་མི་འདོད་པ་ཞེས་བྱ་བ་འདི་གང་གིས་དེ་ཇི་ལྟར་ཡིན། རྟག་པ་ཉིད་ཀྱིས་ཁྱད་པར་མེད་པའི་ཕྱིར་ཐམས་ཅད་ཀྱི་ཚེ་རྒྱུ་མ་ཡིན་པ་
ཁོ་ནར་འདོད་པར་བྱ་ཞེས་བྱ་བའི་དོན་ཏོ། །འཆད་པ་ནི་ཇི་ལྟར་དབང་ཕྱུག་ཅེས་བྱ་བ་ལ་སོགས་པའོ། །གལ་ཏེ་ནམ་མཁའ་ལ་སོགས་པ་ནི་སྐྱེ་བ་ཅན་མཐའ་དག་གི་རྒྱུ་མཚན་གྱི་རྒྱུ་ཡིན་ནོ་ཞེས་བྱ་བ་འདི་གཞན་ལ་རབ་ཏུ་གྲུབ་པ་ཁོ་ན་མ་ཡིན་ནམ་ཞེན་མ་ཡིན་ཏེ། བྱེད་པ་པོ་རང་དབང་ཅན་ཉིད་བརྗོད་པར་འདོད་པའི་ཕྱིར་རོ། །དེ་ཉིད་ཀྱི་ཕྱིར་འོན་ཏེ་དེ་ནི་ཞེས་བྱ་བ་ལ་སོགས་པར་དོགས་པ་ཡིན་ནོ། །དེ་ནི་ཞེས་བྱ་བ་ནི་དབང་ཕྱུག་གོ །འདོད་པའི་མཚན་ཉིད་ཀྱི་ཤེས་པ་ཞེས་བྱ་བ་ནི་རང་གི་ལུགས་ཀྱིས་བརྗོད་པ་ཡིན་ནོ། །གཞན་གྱི་ལུགས་ཀྱིས་ནི་འདོད་པ་དང་ཤེས་པ་ཐ་དད་པ་ཁོ་ནའོ། །དེ་ལ་ཡང་ཞེས་བྱ་བ་ནི་ནམ་མཁའ་ལ་སོགས་པ་ལ་ཡང་ངོ༌། །འདི་ལྟར་དཔེར་རྟག་པ་ཉིད་ཀྱིས་དབང་ཕྱུག་ལ་ཤེས་པས་ཅུང་ཟད་ཀྱང་མི་འབྱེད་པ་དེ་བཞིན་དུ་ནམ་མཁའ་ལ་ཡང་ཡིན་ནོ། །དེ་ལྟ་མོད་ཀྱི་གལ་ཏེ་ཤེས་པ་དེ་དབང་ཕྱུག་གི་ཡིན་ན་དེའི་ཚེ་ནམ་མཁའི་ཡང་ཡིན་པར་ཅི་སྟེ་མི་འདོད། དེས་ན་ཤེས་པ་ནི་གཉི་ག་ལ་མཚུངས་པ་ཡིན་ནོ། །དེས་ན་དབང་ཕྱུག་འབའ་ཞིག་ནི་རྒྱུ་མ་ཡིན་ནོ། །འོན་ཏེ་དབང་ཕྱུག་ལ་ནི་ཤེས་པ་དང་ལྷན་ཅིག་འདུ་བའི་འབྲེལ་པ་ཡོད་ཀྱི་ནམ་མཁའ་ལ་སོགས་པ་ལ་ནི་མེད་དོ། །དེས་ན་དབང་ཕྱུག་ཁོ་ནས་རྒྱུ་ཡིན་ནོ་སྙམ་ན། མ་ཡིན་ཏེ། འདུ་བའི་འགྲེལ་པ་ནི་དེ་ལ་ཡང་མཚུངས་པའི་ཕྱིར་རོ། དེས་ན་དབང་ཕྱུག་བཞིན་དུ་ནམ་མཁའ་ཡང་རྒྱུ་ཡིན་པའམ། ཡང་གཉི་ག་ཡང་མ་ཡིན་ནོ་ཞེས་གནས་སོ། །སུན་འབྱིན་པ་གཞན་མ་བརྗོད་པ་ནི་གཞན་ཡང་ཞེས་བྱ་བའོ། །དེའི་འདོད་པ་སྐྱེས་པ་དང༌། འབྲས་བུ་ཡང་སྐྱེས་པ་ནི་བྱ་རོག་དང་ཏ་ལ་ཕྲད་པ་ལྟར་གཞན་གྱིས་སྦྱར་བ་ཡིན་ནམ། འོན་ཏེ་འབྲས་བུ་འདོད་པས་སྦྱར་བ་ཡིན་ཞེས་འདི་ལ་ངེས་པ་ཅི་ཡོད། འདི་ལ་ནི་རང་དབང་དུ་བྱེད་པ་པོ་ཉིད་ཀྱང་ཡོད་པ་མ་ཡིན་ནོ་ཞེས་སྟོན་པ་ནི་གལ་ཏེ་ལ་སོགས་ཞེས་བྱ་བ་ལ་སོགས་པའོ། །དེའི་ཚེ་རྒྱུ་ཉིད་ཡིན་ཏེ། རང་དབང་གི་རང་བཞིན་ན། དེ་ལྟ་མིན་ན་སྟེ་གལ་ཏེ་རང་དབང་དུ་མི་འདོད་ན། ཀུན་གྱི་རྒྱུ་ཞེས་བྱ་བ་ལ་སོགས་པ་ནི་རྟོགས་སླའོ། །འོན་ཏེ་ལྷན་ཅིག་བྱེད་པ་ལ་མི་ལྟོས་པར་ཅི་ལྟར་བརྗོད་ཅེ་ན། འོ་ན་ནི་རང་དབང་ཉིད་ཉམས་པ་མི་ཟློགས་སོ། །རྣམ་པ་ཅི་ལྟར་
ཡང་རུང་སྟེ། འདིར་རྒྱུར་འགྱུར་རོ་ཞེ་ན། གལ་ཏེ་ལས་ལ་སོགས་པའི་ཚོགས་པ་ཡོད་པ་ན། དེའི་དབྱེ་བ་ལས་སྔར་འབྲས་བུ་མ་དམིགས་པ་ལས། དེ་ཡོད་པས་དམིགས་ནས་ནི་དེ་ལྟར་འགྱུར་བ་ཞིག་ན། དེ་ལྟར་ནི་ནུས་པ་མ་ཡིན་ཏེ། བདག་ཉིད་ཐམས་ཅད་ཀྱིས་ཚོགས་པ་མངོན་སུམ་དུ་བྱ་བར་མི་ནུས་པའི་ཕྱིར་རོ། །དབང་ཕྱུག་ནི་རྒྱུར་རིགས་པ་ཡང་མ་ཡིན་ནོ་ཞེས་སྟོན་པས་ན། རྣམ་འགྲེལ་རྣམ་པ་གཞན་དུ་སྦྱོར་བར་བྱེད་པ་ནི་ཡང་ན་ནི་ཞེས་བྱ་བའོ། །དེ་ཉིད་ཀྱི་ཕྱིར་བཤད་པ་འདིའི་རྗེས་སུ་འབྲངས་ནས་སྦྱོར་བ་གཉིས་པ་མཛད་དོ།། འོན་ཏེ་བསམས་ནས་འགྲོ་བ་སྤྲུལ་པ་ལ་འཇུག་པ་དེས་ནི་ཅི་ལྟར་རྒྱུ་མ་ཡིན་ཞེ་ན། འདོད་ཆགས་ལ་སོགས་པ་ཐམས་ཅད་ལས་ཞེས་གསུངས་སོ། །འཇིག་རྟེན་ཞེས་བྱ་བ་ལ་སོགས་པ་ནི་གཞན་གྱི་དོགས་པའོ། །ལན་མ་ཡིན་ཏེ་ཞེས་བྱ་བ་ལ་སོགས་པས་སོ། །འཇིག་རྟེན་གཞན་གྱི་ལས་གང་ཡིན་པ་དེའི་གཞན་གྱི་དབང་དུ་གྱུར་པས་ན། འདི་ནི་དབང་ཕྱུག་མ་ཡིན་པ་ཉིད་དེ་རང་དབང་མ་ཡིན་པ་ཁོ་ནའོ། །དེས་ན་ཇི་སྐད་བརྗོད་པ་འདི་ཇི་ལྟར་དབང་ཕྱུག་ཡིན་ཏེ། དབང་ཕྱུག་མ་ཡིན་པ་ཁོ་ནའོ། །འོན་ཏེ་གཞན་གྱི་ལས་ལས་ཀྱི་གཞན་དབང་དུ་གྱུར་པའི་མཚན་ཉིད་ཀྱི་ཁྱད་པར་ནི་འཇིག་རྟེན་དེ་ལ་བརྩེ་བའི་ཚུལ་གྱིས་བྱས་པ་ཡིན་ནོ། །ཞེ་ན། ལན་དུ་དམྱལ་བ་ལ་སོགས་པ་སྟེ་དུད་འགྲོ་དང་ཡི་དགས་ལ་སོགས་པ་དེ་བསྒྲུབས་པའི་ཕྱིར་བརྩེ་བ་མེད་པ་ཅིས་དབང་ཕྱུག་ཡིན་ཏེ། བརྩེ་བ་དང་ལྡན་པ་ནི་དེ་ལྟར་འགྱུར་བར་མི་རིགས་སོ། །ཐམས་ཅད་བདེ་བ་ཁོ་ནར་ཅི་སྟེ་མི་སྐྱེད་སྙམ་དུ་དགོངས་པའོ། །གཞན་གྱིས་འཇིག་རྟེན་ལས་ཉིད་ཅེས་བྱ་བ་སྨོས་སོ། །དེ་འདྲ་ཞེས་བྱ་བ་ནི་དམྱལ་བ་ལ་སོགས་པའི་སྡུག་བསྔལ་བྱེད་པ་དེས་དམྱལ་བ་ལ་སོགས་པ་སྡུག་བསྔལ་བ་ཡིན་གྱི་འགྲོ་བ་བདེ་བར་བྱ་བ་དེ་ལ་དབང་ཕྱུག་ནི་ནུས་པ་མེད་དོ་ཞེ་ན། སུན་འབྱིན་པ་ནི་འདི་དམ་པ་མིན་ཞེས་བྱ་བ་སྟེ། དེ་ལྟ་ན་ནི་འོ་ན་དབང་ཕྱུག་དམ་པ་ཉིད་དུ་མི་འགྱུར་རོ། །ཅིའི་ཕྱིར་ཞེ་ན། དམ་པ་གལ་ཏེ་ཞེས་བྱ་བ་ལ་སོགས་པ་གསུངས་སོ། །ནུས་པ་མེད་ཀྱང་ཞེས་བྱ་བ་ནི་ནུས་པ་དང་བྲལ་བའོ། །དེ་ནི་ཞེས་བྱ་བ་ནི་དམ་པའོ། །ཅིའི་ཕྱིར་མི་འཇུག་ཅེ་ན། དམ་
པ་མིན་པའི་བྱ་བ་ནི་ཞེས་སྨོས་སོ། །སྡིག་པའི་བྱ་བས་ཕུང་པོ་རྣམས་ལ་སྡུག་བསྔལ་བསྐྱེད་པ་ན། རྨ་ལ་རྒྱ་ཚྭས་འདེབས་པ་ཡིན་ནོ། །འོན་ཏེ་ཞེས་བྱ་བ་ནི་གཞན་གྱིའོ། །ཚུལ་འདི་ཞེས་བྱ་བ་ནི་གང་ཞིག་བསོད་ནམས་བྱེད་པ་དེ་ནི་བདེ་བ་མྱོང་དུ་འཇུག་ལ། གང་ཞིག་སྡིག་པ་བྱེད་པ་དེ་ནི་སྡུག་བསྔལ་མྱོང་དུ་འཇུག་པའོ། །དབང་ཕྱུག་འདི་ནི་ཚུལ་དེ་ཉིད་གསལ་བར་བྱེད་པའོ། །དེ་ཞེས་བྱ་བ་དེ་མ་ཐག་ཏུ་བརྗོད་པའི་ཚུལ་བྱ་བའི་ཕྱིར་རོ། །ཅིའི་ཕྱིར་དི་ལྟར་ཡིན་ཞེས་བྱ་བའི་དོགས་པ་སེལ་བས། དབང་ཕྱུག་གིས་བསམས་པ་སྨྲས་པ་ནི་ངའི་རང་བཞིན་འདི་ལྟ་བུ་ཞེས་བྱ་བ་སྟེ། དབང་ཕྱུག་ངའིའོ། །ལན་དེ་ནི་བདག་ལའང་ཞེས་གསུངས་སོ། །གལ་ཏེ་ཞེས་བྱ་བ་ནི་གཞན་གྱི་དོགས་པའོ། །འཇིག་རྟེན་དེ་ཡང་ངོ༌། །ལན་ཕན་ཚུན་རྟེན་དེ་ཉིད་ཅེས་བྱ་བའོ། །འཇིག་རྟེན་ནི་དབང་ཕྱུག་གིས་བསྐུལ་ནས་ལས་སྣ་ཚོགས་བྱེད་ལ། ལས་སྣ་ཚོགས་ཀྱི་སྒོ་ནས་ཀྱང་འཇིག་རྟེན་གྱི་དབང་ཕྱུག་བསྐུལ་བ་སྟེ། ལས་ལ་དབང་ཕྱུག་བསྐུལ་བ་དང༌། དབང་ཕྱུག་ལས་ལ་བསྐུལ་བ་ཞེས་བྱ་བའི་དོན་གང་ཡིན་པའོ། །དེ་ལྟར་འགྱུར་མོད་ཀྱི་ཅི་སྐྱོན་ཅེ་ན། དེ་ལྟར་ཡིན་ན་ཞེས་བྱ་བ་ཕན་ཚུན་བརྟེན་པ་ཡིན་ན། ལས་ཀྱི་བསྐུལ་བ་དང་དབང་ཕྱུག་གི་བསྐུལ་བ་གཅིག་ཀྱང་ཡོད་པར་མི་འཐད་དེ། གཅིག་མེད་ན་གཞན་ཡང་མེད་པའི་ཕྱིར་རོ། །གཞན་ཡང་དབང་ཕྱུག་ལ་དགེ་བའི་ལས་ལ་བསྐུལ་བའི་ནུས་པ་ཡོད་དམ་མེད། དེ་ལ་ཡོད་པའི་ཕྱོགས་འགོག་པ་ནི་གལ་ཏེ་ཞེས་བྱ་བའོ། །ནུས་པ་མེད་མིན་ཞེས་བྱ་བ་ནི། ནུས་པ་ཡོད་པ་ཉིད་ན་ཞེས་བྱ་བའི་དོན་ཏོ། །དེའི་ཚེ་ནི་འགྲོ་བ་ལེགས་པའི་ལས་བྱེད་པ་ཁོ་ནར་འགྱུར་ན། དེ་ལྟ་ཡང་མ་ཡིན་ཏེ། ཆོས་མ་ཡིན་པ་བྱེད་པ་དག་མཐོང་བའི་ཕྱིར་རོ་འོན་ཏེ་ལས་གཉིས་ཀ་ལ་བསྐུལ་བར་ནུས་པ་ཡིན་ན། དེ་ལྟ་ན་ནི་བུར་མ་མངར་བར་བྱེད་པ་པོ་ཡིན་པའི་ཕྱིར་རྟོགས་པ་དང་ལྡན་པས་བླང་བར་བྱ་བ་མ་ཡིན་པར་འགྱུར་རོ་ཞེས་བཤད་ཟིན་ཏོ་སྙམ་དུ་དགོངས་པའོ། །གཉིས་པ་སེལ་བ་ནི་གལ་ཏེ་འཇིག་རྟེན་དེ་འདིར་ཞེས་བྱ་བའོ། །དེའི་ཚེ་ལས་སྨྲ་བ་ཉིད་དགེ་སྟེ། གདོན་མི་ཟ་བར་ཁས་བླང་བར་བྱ་བ་ཡིན་པའི་ཕྱིར། ལྷག་པ་བཀག་པའི་ཕྱིར་རོ། །རྒྱལ་
བ་ནི་མཐོ་བའི་རྩེར་ཕྱིན་པ་སྟེ། སྒྲུབ་པར་བྱེད་པ་མེད་ཀྱང་གནོད་བྱེད་མི་སྲིད་པའི་ཕྱིར་རོ། །དེས་ན་འདིར་ཕྱོགས་གསུམ་སྲིད་དེ། འགྲོ་བ་ལས་ཀྱི་གཞན་དབང་ཡིན་པས་སམ། འདོད་པ་དང་མི་འདོད་པ་བྱེད་པའི་ངང་ཚུལ་ཡིན་པས་སམ། ཡང་ན་བཅོམ་ལྡན་འདས་དེའི་བསམ་པའི་ཁྱད་པར་བརྟག་པར་སུས་ནུས་ཞེས་བྱ་བའོ། །ཕྱོགས་དང་པོ་ལ་ནི་འབྲས་བུ་སྐྱེད་པའི་ཚོགས་པའི་ནང་དུ་གཏོགས་པ་ཡིན་ཡང༌། རྒྱུ་གཞན་བཞིན་དུ་རང་དབང་ཉིད་ཉམས་པར་བརྗོད་པ་ཡིན་ནོ། །དེའི་ངང་ཚུལ་ཡིན་པ་ལ་ཡང་བུ་རམ་དང་མངར་བར་བྱེད་པ་པོ་ཉིད་དུ་བརྗོད་པ་ཟིན་པ་ཁོ་ནའོ། །གཉི་ག་ལྟར་ན་ཡང་སྙིང་རྗེས་སྦྱོར་བར་བྱེད་པ་ཉིད་ནི་ཐག་བསྲིངས་པ་ཁོ་ནའོ། །གསུམ་པ་ནི་རྐང་པ་བརྐྱང་བ་ཙམ་དུ་ཟད་པས་འདི་ནི་ཤན་པ་བཞིན་དུ་རྟོགས་པ་དང་ལྡན་པ་དག་གིས་བླང་བྱ་ཉིད་དུ་བརྟག་པར་འདོད་པ་མ་ཡིན་ནོ། །གང་གི་ཚེ་བསམ་པ་བརྟག་པར་མི་ནུས་པ་དེའི་ཚེ་ནི་སྙིང་རྗེ་ཞུགས་པ་ཡིན་ནོ་ཞེས་བྱ་བའི་ཚིག་འཁྱར་བ་ཁོ་ན་སྟེ། གཞན་ལ་གཞན་གྱི་སྐྱོན་ཡོན་ངེས་པའི་རྟགས་མེད་པའི་ཕྱིར་རོ། །ཡོད་ཀྱང་སྙིང་རྗེ་མེད་པ་ཁོ་ན་སྟེ། དམྱལ་བ་ལ་སོགས་པ་ལ་འགོད་པའི་ཕྱིར་ཏེ། དེ་ལྟར་མང་དུ་སྨྲས་པས་ཆོག་གོ །ཅི་སྟེ་ཡང་ཞེས་བྱ་བ་ལ་སོགས་པ་ནི་རང་དབང་དུ་མ་གྱུར་མོད། རྒྱུ་ཙམ་དུ་ནི་འགྱུར་རོ་སྙམ་དུ་བསམས་པའོ། །ལན་ནི་དེ་ལྟ་ན་ནི་འོ་ན་ཞེས་བྱ་བའོ། །དེ་འདྲ་བ་བྱེད་པ་ནི་དེ་འདྲ་བ་ཁོ་ནས་ཤེས་པར་ནུས་པ་ཡིན་ནོ་ཞེས་བྱ་བ་ནི་ཁས་བླངས་པ་དང་འགལ་བ་ཡིན་ནོ། །བདག་ཅག་ལ་སོགས་པས་ནི་ཞེས་བྱ་བ་ནི་གལ་ཏེ་དེའི་བྱེད་པ་རྟོགས་པར་མི་ནུས་ཀྱང༌། རྣམ་པར་འཇོག་ན་ནི་ཞེས་ཞེ་ལ་གཞག་པ་སྟེ། དེའི་ཚེ་མཚོན་དང་ཞེས་བྱ་བ་ལ་སོགས་པ་རྟོགས་པར་སླའོ། །འོན་ཏེ་ཞེས་བྱ་བ་ནི་གཞན་གྱིའོ། །སྡོང་དུམ་གྱི་ཞེས་བྱ་བ་ནི་ཤིང་དུམ་གྱིའོ། །ལན་དུ་སྡོང་དུམ་གྱིས་ཡང་ཞེས་བྱ་བའོ། །དེ་ནི་ཞེས་བྱ་བ་ནི་བྱེད་པའོ། །འོ་ན་མ་དམིགས་པ་ཉིད་ཀྱིས་ཞེས་བྱ་བ་ནི་གཞན་གྱི་སྟེ། སྡོང་དུམ་བལྟར་རུང་བ་ལ་བལྟར་མི་རུང་བའི་བྱེད་པའི་མཚན་ཉིད་ཀྱི་རང་བཞིན་མེད་པའི་ཕྱིར་རོ་སྙམ་དུ་བསམས་པའོ། །ལན་ནི་འོ་ན་དེ་ལྟ་ན་ཞེས་བྱ་བའོ། །འདིར་བསམ་པ་ནི་སྡོང་དུམ་ལ་ནི་བྱེད་པ་མངོན་སུམ་
གྱིས་གནོད་པ་ཡིན་ལ། རྟག་པ་ལ་ནི་རང་བཞིན་ཁྱད་པར་མེད་པ་སྟེ། རིམ་དང་རིམ་མ་ཡིན་པས་དོན་བྱ་བ་ཉིད་ཀྱི་རང་བཞིན་གྱི་ཁྱད་པར་མེད་པར་བྱེད་པ་ཡང་ནི་མི་རུང་སྟེ། དོན་བྱེད་པ་ཉིད་དུ་མི་རུང་ངོ༌། དེས་ན་རིམ་དང་རིམ་མ་ཡིན་པ་དང་བྲལ་བའི་རྗེས་སུ་དཔག་པས་གནོད་པའི་ཕྱིར་མཚུངས་སོ། །འོན་ཀྱང་མངོན་སུམ་གྱིས་ནི་ནུས་པ་མ་ངེས་པ་ཉིད་དུ་ཡང་རྟོགས་བར་འགྱུར་གྱི་རྗེས་སུ་དཔག་པ་ལ་ནི་མ་ཡིན་ནོ། །བཤད་པ་འདི་ནི་བླ་བས་བཏང་སྙོམས་སུ་བཞག་ཏེ། གཞན་འཆད་པ་ཡིན་ནོ། །ཕྱོགས་དེ་ལ་ནི་འབྲས་བུའི་རང་བཞིན་ཁྱད་པར་ཞེས་སྦྱར་རོ། །དཔེར་ན་བུམ་པ་ལ་རྫ་མཁན་གྱི་ལག་པའི་བྱེད་པས་བསྒྲུབ་པར་བྱ་བ་འཇིམ་པ་ལ་སོགས་པའི་ཁྱད་པར་བཞིན་དུ། གལ་ཏེ་འབྲས་བུ་ལ་ཡང་གང་ཞིས་དབང་ཕྱུག་མེད་ན་མི་འགྱུར་བར་བརྟག་པར་བྱ་བའི་རང་བཞིན་གྱི་ཁྱད་པར་འགའ་ཞིག་དམིགས་ན་ནི་དེའི་ཚེ་རྫ་མཁན་བཞིན་དུ་དེ་མཐོང་བ་ལ་བརྟག་པ་འདིའི་བྱེད་པ་ཡང་རྟོགས་པར་རིགས་པ་མ་ཡིན་གྱིས། དེ་ལྟ་མ་ཡིན་ན་ནི་འབྲས་བུའི་ཁྱད་པར་མ་མཐོང་ན་ཡང་རྒྱུའི་ཁྱད་པར་རྟོགས་ན་ཧ་ཅང་ཐལ་བའི་ཕྱིར་རྟག་བའི་བྱེད་པ་མི་འཐད་དོ། །འཆད་བ་ནི་རྒྱུན་གྱིས་སམ་ཞེས་བྱ་བའོ། །ཇི་ལྟར་རྟག་སྙམ་ན་རྒྱུན་གྱིས་སམ་གཞན་དུ་ཐེར་ཟུག་པའི་རྟོགས་པའོ། །གང་གི་ཚེ་མི་འཐད་ཅེ་ན། རང་བཞིན་གྱི་ཁྱད་པར་མེད་པར་རོ། །སུའི་ཞེ་ན་འབྲས་བུའི་སྟེ། འབྲས་བུའི་རང་བཞིན་གྱི་ཁྱད་པར་མེད་པར་རོ། །ཉེ་བར་མཚོན་པར་ཅི་ལྟར་འཐད་ཅེས་བྱ་བ་ནི་བྱེད་པ་ཉེ་བར་མཚོན་པར་མི་འཐད་པ་ཁོ་ནའོ་ཞེས་བྱ་བའི་དོན་ཏོ། །དབང་ཕྱུག་ལ་ཡང་ཞེས་ཡང་གི་སྒྲ་ནི་རིམ་པ་བཞིན་དུ་སྦྱོར་རོ་ཞེས་བྱ་བ་ནི་སྐབས་སུ་བབ་པ་དང་སྦྱར་བའོ། །ཕྱེད་ཕྱི་མ་རྣམ་པར་འགྲེལ་བ་ནི་རྟག་ལ་ལྡོག་པ་མེད་པའི་ཕྱིར་ཞེས་བྱ་བའོ། །རྟག་པ་ལ་ནི་རི་ཞིག་ལྟ་བ་པོ་ཉིད་མེད་པ་ཁོ་ནའོ། །གལ་ཏེ་ལྟ་བ་པོ་འགའ་ཞིག་ཡོད་དུ་ཆུག་ཀྱང༌། དེ་ལྟ་ན་ཡང་ལྡོག་པ་མེད་པ་ཉིད་ཀྱིས་ན་ནུས་པ་རྟོགས་པར་དཀའོ། །ཅིའི་ཕྱིར་ཞེ་ན། རྟག་ཏུ་གནས་ཞེས་བྱ་བ་འདིས་ནེ་དུས་ཁྱད་པར་བརྗོད་ལ། །ཁྱབ་པས་ན་ཡུལ་ཁྱད་པའོ། །རྡུལ་ཕྲ་རབ་ལས་ནི་དུས་ཀྱིས་བྱས་བའི་ལྡོག་པ་ཉིད་སྦངས་པ་ཡིན་ནོ། །
གལ་ཏེ་ལྡོག་ཀྱང་དེ་རྒྱུ་ཉིད་དུ་རྟོགས་པ་དེའི་ཚེ་ཉེས་པ་ཅི་ཡོད་སྙམ་ན། གང་དག་ཡོད་ན་ཞེས་སྨོས་ཏེ། སྔར་ཡང་གང་ཞིག་མེད་ན་མ་བྱུང་བ་ཞེས་བྱ་བ་ལ་ལྟོས་པར་བྱའོ། །ལས་ཡོད་ན་ཞེས་བྱ་བ་ནི་རྫ་མ་ལ་སྤྱོད་པའི་ལས་ཡོངས་སུ་སྨིན་པ་ཡོད་ནའོ། །འདི་ནི་གདོན་མི་ཟ་བར་ཁས་བླང་བར་བྱ་བ་ཉིད་དུ་བརྗོད་པ་ཡིན་ཏེ། རྫ་མཁན་ལ་སོགས་པ་ལ་ནི་མངོན་སུམ་དང་མི་དམིགས་པ་བྱེད་པ་འཇུག་པ་ཉིད་ཡིན་པས་ལས་གཞན་ནི་དོན་མེད་དོ། །དེས་ན་གཉིས་ལས་གཅིག་ཁས་བླང་བར་བྱ་བར་འགྱུར་རོ་ཞེས་བྱ་བར་རིགས་པ་ཡིན་ནོ། །འཇིམ་གོང་ལ་སོགས་པ་ལ་ནི་སོ་སོར་རྗེས་སུ་འགྲོ་བ་དང་ལྡོག་པ་མཐོང་བའི་ཕྱིར། གཅིག་བཞག་པའི་རྩོད་པ་མེད་དོ། །ཐུག་པ་མེད་མོད་ཅི་སྐྱོན་ཅེ་ན། །རྗེས་སུ་འཇུག་པ་མེད་པའི་ཞེས་སྨོས་སོ། །རྗེས་སུ་འཇུག་པ་དང་བྲལ་བ་ནི་རྗེས་སུ་འཇུག་པ་མེད་པ་སྟེ། རྒྱུ་ཉིད་དུ་རྟོགས་པ་མེད་པ་གང་ཡིན་པ་དེ་ལ་དེ་སྐད་ཅེས་བརྗོད་དོ། །དེའི་རྟོགས་པ་དེའི་འཇུག་པ་དེ་ཁས་ལེན་ན་སྟེ། འདོད་ན་ནི་དེ་ལས་གཞན་ལ་ཡང་གེགས་འགའ་ཡང་མེད་དོ། །དེ་ཁས་ལེན་པ་ཉིད་ཉེས་པ་ཆེན་པོ་ཡིན་ནོ་ཞེས་བྱ་བའི་དོན་ཏོ། །ཐུག་པ་མེད་པར་འགྱུར་ཞེས་བྱ་བ་འདི་རྣམ་པ་གཞན་དུ་བཤད་པའི་ཕྱིར་ན་ཞེས་གསུངས་སོ། །ཅིའི་ཕྱིར་ཞེ་ན། རྒྱུ་རྣམས་ཀྱི་རྒྱུ་ཡང་ཞེས་གསུངས་སོ། །དེ་ཉིད་ཡིན་པའི་ཕྱིར་ཞེས་བྱ་བ་ནི་གནའ་མ་དེ་ཉིད་མིན་པའི་ཕྱིར་རོ། །དེ་ལེགས་ཤེས་བྱས་པ་ན་ཞེས་བྱ་བ་ནི་དེ་ལ་སོགས་པ་ལེགས་པར་བསྒྲུབས་པ་ནའོ། །དེའི་ཁྱད་པར་ནི་འབྲས་བུའོ། །གཤོལ་གྱི་བྱེད་པ་ལ་སོགས་པ་དེ་ལས་གཞན་དག་ལས་ཁྱད་པར་དུ་འགྱུར་བ་ཡིན་པས་ན་ཁྱད་པར་རོ། །སྩོགས་པའི་སྒྲས་ནི་ཤལ་བས་བཤལ་བ་ལ་སོགས་པ་གཟུང་ངོ༌། །ངེས་པའི་རྣམ་པར་འགྱུར་བའི་རྗེས་སུ་འགྲོ་བ་ནི་རྣམ་པར་འགྱུར་བ་དང་ལྡན་པ་སྟེ། དེ་དང་རྗེས་སུ་འབྲེལ་པ་སྟེ། ནས་ལ་སོགས་པའི་མྱུ་གུ་རྣམས་ཀྱི་རྒྱས་པ་ལ་སོགས་པའི་མཚན་ཉིད་དོ། །གཤོལ་གྱི་བྱེད་པ་བཞིན་དུ་ཡུལ་ལ་སོགས་པ་ལ་ཁྱད་པར་ཡོད་པར་མ་མཐོང་བས་རྩོད་པ་བྱེད་དོ། །ཕན་ཚུན་ཉེ་བར་འགྲོ་བའི་རྐྱེན་གྱིས་ཁྱད་པར་ལས་དམིགས་པ་ལ་སོགས་པ་རྣམས་
ཚོགས་པའི་སྐད་ཅིག་ལ་རང་བཞིན་ལ་བརྟེན་པའི་ཁྱད་པར་མེད་ཀྱང༌། ནུས་པས་བྱས་པའི་ཁྱད་པར་ནི་གདོན་མི་ཟ་བར་ཁས་བླང་ དགོས་སོ་ཞེས་བྱ་བ་ནི་ལན་གྱི་དོན་ཏོ། །འདི་ཡང་རྣམ་པ ་གཞན་དུ་འཆད་པ་ནི་གལ་ཏེ་འབྲས་བུར་གྱུར་པའི་བློས་ཁྱད་པར་མེད་པར། ཡུལ་དང་དབང་པོ་ཚོགས་པའི་རྒྱུ་ཡིན་པ་དེ་བཞིན་དུ་དབང་ཕྱུག་འདི་ཡང་རྒྱུ་ཡིན་ནོ་ཞེན་མ་ཡིན་ཏེ། འབྲས་བུ་རྣམ་པར་ཤེས་པ་དེ་ལ་ཡང་ཁྱད་པར་ཡོད་པའི་ཕྱིར་རོ། །དེ་ཉིད་ལྡོག་པའི་སྒོ་ནས་སྟོན་པ་ནི་རྒྱུན་གྱི་ཁྱད་པར་མེད་པར་ནི་ཞེས་བྱ་བ་ལ་སོགས་པའོ། །ཁྱད་པར་གྲུབ་པ་ཡིན་ཞེས་བྱ་བ་ནི་བཤད་པ་དང་པོ་ལྟར་ན་རྒྱུ་ལ་བརྟེན་པའི་ཁྱེད་པར་རོ། །ལྷག་མ་ནི་གོ་སླའོ། །གཉིས་པ་ནི་འབྲས་བུ་ལ་བརྟེན་པར་བརྗོད་པར་འདོད་པ་ཡིན་ནོ། །འབྲས་བུ་ཤེས་པ་ལ་བརྟེན་པ་རྟོགས་པའི་རང་བཞིན་ལ་སོགས་པའི་རང་བཞིན་གྱི་ཚོགས་བྱ་བ་ལ་རྣམ་པར་ཤེས་པའི་མཚན་ཉིད་ཀྱི་འབྲས་བུའི་རྒྱུན་དེའི་ཁྱད་པར་དོན་དང་འདྲ་བ་ལ་སོགས་པའི་མཚན་ཉིད་མེད་པར་ནི་སོ་སོ་སོ་སོར་དེ་རེ་རེ་ཞིང་ནུས་པ་མེད་པའི་གཟུགས་ལ་སོགས་པ་རྣམས་ཚོགས་པ་ལའང་སྟེ། དངོས་པོའི་བདག་ཉིད་ཐམས་ཅད་བསྐྱེད་པ་ལ་ཡང་ནུས་པ་མེད་པར་འགྱུར་རོ། །དོན་འདི་ཡིན་ཏེ། སོ་སོར་འབྲས་བུ་དེ་སྐྱེད་པར་མི་ནུས་པ་རྣམས། གལ་ཏེ་ཚོགས་པའི་གནས་སྐབས་སུ་ཡང་རང་གིས་བྱས་པའི་ཁྱད་པར་གྱིས་མཚོན་པར་མི་བྱེད་ན། ཤ་ཟ་ལ་སོགས་པ་བཞིན་དུ་དེ་རྣམས་ཀྱི་ནུས་པ་ཇི་ལྟར་བརྟག་པར་བྱ། རྒྱུ་ཉིད་ཀྱང་ཡོད་པ་ཡིན་ཏེ། དེས་ན་འབྲས་བུའི་ཁྱད་པར་གྲུབ་བོ། །དེ་ལྟ་ན་ཡང་ཡུལ་ལ་སོགས་པ་ལས་ནི་དེའི་རྣམ་པ་ལ་སོགས་པ་ཡིན་ནོ། །དེ་ལྟར་འདི་ནི་རྒྱུ་ཉིད་ལ་ནི་འབྲས་བུ་ལ་གནས་པའི་ཁྱད་པར་སྐྱེད་པར་བྱེད་པ་ཉིད་ཀྱིས་ཁྱབ་པར་བརྗོད་པ་ཡིན་ཏེ། གང་གི་ཕྱིར་དེ་མེད་པས་ན། རྒྱུར་མི་འགྱུར་རོ་སྙམ་དུ་ཐུགས་ལ་བཞག་པ་ཡིན་ནོ། །འདི་ཉིད་འཆད་པ་ནི་མིག་ལ་སོགས་པ་རྣམས་ནི་ཞེས་བྱ་བ་ལ་སོགས་པའོ། །འདྲས་བུའི་རང་བཞིན་གྱི་ཁྱད་པར་ཉིད་ལ་རྒྱུ་ཉིད་དུ་ངེས་པར་བྱེད་དོ་ཞེས་བྱ་བ་ནི་ཐ་སྙད་དུ་བྱེད་པ་སྟེ། འདི་ནི་ངེས་པར་བཟུང་བ་གཙོ་བོར་བྱེད་པའི་ཚིག་གོ །རང་བཞིན་གྱི་ཁྱད་པར་དེ་ཉིད་སྟོན་པ་ནི་འབྲས་བུ་རྣམ་པར་ཤེས་
པ་ཞེས་བྱ་བ་ལ་སོགས་པའོ། །དེའི་ཕྱིར་རང་བཞིན་འདི་དག་གོ །རྟག་པའི་རང་བཞིན་གྱི་ཁྱད་པར་ཡོད་པའི་ཕྱིར་རོ། །བྱ་བའི་རང་བཞིན་ཕན་ཚུན་སྤངས་པ་གང་ཡིན་པ་དེ་དང་ལྡན་པའི་མིག་ལ་སོགས་པ་ནི་འབྲས་བུ་རྣམ་པར་ཤེས་པའི་རྒྱུ་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །ཡང་ཇི་ལྟར་ན་རང་གིས་བསྐྱེད་པར་བྱ་བའི་འབྲས་བུའི་ཁྱད་པར་གཅིག་ལ་འདི་དག་རྣམ་པ་ཐ་དད་པའི་སྒོ་ནས་བྱེད་པ་འཇུག་པར་བརྗོད་ཀྱི་སོ་སོར་གཞན་ལ་མི་ལྟོས་པར་མཐའ་དག་བསྐྱེད་པའི་སྒོ་ནས་ནི་མ་ཡིན་ཞེ་ན། གང་གི་ཕྱིར་འདི་དག་ནི་ཞེས་གསུངས་སོ།། རྣམ་པའི་ཚོགས་ནི་རང་བཞིན་གྱི་ཚོགས་སོ། །འདི་ཉིད་སྟོན་པར་བྱེད་པ་ནི་མིག་ལས་ནི་ཞེས་བྱ་བ་ལ་སོགས་པའོ། །གལ་ཏེ་རེ་རེ་ལས་རང་བཞིན་མཐའ་དག་སྐྱེ་པར་འགྱུར་ན་ནི་དེའི་མིག་ལས་ཀྱང་རྟོགས་པའི་རང་བཞིན་དུ་འགྱུར་གྱི་ཡིད་ལ་བྱེད་པ་འབའ་ཞིག་ལས་ནི་མ་ཡིན་ནོ། །དེ་བཞིན་དུ་གཞན་ལ་ཡང་ཅི་ལྟར་རིགས་པར་ཁྱད་པར་བྱའོ། །ཡང་ཇི་ལྟ་བུ་ཉིད་དུ་མི་འགྱུར་ཞེ་ན། རེ་རེ་ལས་དེ་ལྟར་མཐོང་བ་མེད་པའི་ཕྱིར་རོ་ཞེས་གསུངས་སོ། །སོ་སོར་བདག་ཉིད་ཐམས་ཅད་སྐྱེད་པར་མ་མཐོང་བའི་ཕྱིར་རོ། །དེས་ན་རྒྱུ་ལ་ནི་ཁྱད་པར་སྐྱེད་པར་བྱེད་པས་ཁྱབ་པ་ཡིན་ལ། དེ་མེད་པའི་ཕྱིར་དབང་ཕྱུག་ནི་རྒྱུ་མ་ཡིན་ནོ་ཞེས་གྲུབ་པའི་མཐའ་སྨྲས་བས་བསམས་པར་རྟོགས་ནས་གཞན་གྱིས་འོན་ཏེ་མིག་ཅེས་སྨྲས་སོ། །དེ་བཞིན་དུ་ཞེས་བྱ་བ་དང་པོ་ནི་དཔེ་ལ་སོགས་པའོ། །འདིས་ནི་ཡུལ་དང་ཡུལ་ཅན་གཉིས་ཁྱད་པར་མེད་པའི་ཕྱིར་འབྲས་བུ་ཤེས་པ་བྱད་པར་མེད་པར་བསྟན་ཏོ། །དེ་བཞིན་དུ་ཞེས་བྱ་བ་གཉིས་པ་ནི་དོན་ལ་སྦྱོར་བའོ། །འདིར་ནི་འདི་ལྟར་བསམས་པ་ཡིན་ཏེ། དཔེར་ན་ཁྱད་པར་དེ་དང་དེ་དག་བསྐྱེད་པའི་སྒོ་ནས་རྒྱུ་ཉིད་དུ་དམིགས་བ་དེ་བཞིན་དུ་རྣམ་པ་འདི་ལྟ་བུ་ཡང་དམིགས་པ་ཁོ་ནའོ། །དེས་ན་གཟུགས་སམ་མི་གཞན་དང་གཞན་ཉེ་བར་གནས་པའི་དུས་བཞིན་དུ་ཁྱད་པར་གྱི་རང་བཞིན་སྐྱེད་པའི་བྱེད་པ་མེད་པ་བཞིན་དུ་ཡང་རྒྱུ་ཉིད་ཡིན་ནོ་ཞེས་བྱ་བ་ཡིན་ནོ། །འདི་ལ་ཞེས་བྱ་བ་ནི་གྲུབ་པའི་མཐའོ། །གལ་ཏེ་ཧ་ཅང་ཐལ་བའི་ཕྱིར་དབང་ཕྱུག་རྒྱུ་ཡིན་ལ། དེ་ལྟ་ན་མིག་དང་གཟུགས་དག་ལ་སྨོས་སུ་ཅི་ཡོད་ཅེ་ན། འདི་ལ་ཡང་རང་རང་
གི་ཁྱད་པར་བསྐྱེད་པར་བཤད་ཟིན་ཏོ། །གནས་སྐབས་དེར་ཡང་རང་གི་ཁྱད་པར་ཇི་ལྟ་བའི་ཁྱད་པར་བསྐྱེད་པ་ནི་ཡོད་པ་ཁོ་ནའོ་ཞེས་སྟོན་པ་ནི་མིག་དང་ཞེས་བྱ་བ་ལ་སོགས་པའོ། །དེའི་ཕྱིར་ཞེས་བྱ་བ་ནི་འབྲས་བུ་རྣམ་པར་ཤེས་པའི་རང་བཞིན་གྱི་ཁྱད་པར་རྟོགས་པ་ལས་གཟུགས་ལ་སོགས་པ་རྒྱུ་ཉིད་དུ་རྣམ་པར་གཞག་པ་ཡིན་ནོ་ཞེས་སྦྱར་རོ། །ཡང་ན་གང་གི་ཕྱིར་དེ་ལྟར་རྣམ་པར་ཤེས་པ་ཁྱད་པར་ཅན་ཡིན་པ་དེའི་ཕྱིར་གཟུགས་ལ་སོགས་པ་རྒྱུ་ཉིད་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །གཟུགས་ཀྱི་ཁྱད་པར་ལས་ཞེས་བྱ་བ་ནི་བཤད་པར་བྱ་བའི་ཚིག་ཉེ་བར་བཀོད་པའོ། །བཤད་པ་ནི་ཡོངས་སུ་གསལ་བ་དགའ་བ་དང་མི་གསལ་བ་མི་དགའ་བ་སྟེ། དགའ་བ་དང་མི་དགའ་བ་ལ་བརྟེན་པ་དེ་དག་ལ་སོགས་པ་གཟུགས་ཉིད་ལ་སོགས་པ་གང་དག་ཡིན་པ་དག་གོ །དེ་དག་ཉིད་ཀྱི་མཚན་ཉིད་དེ་རང་བཞིན་གང་ལ་ཡོད་པའི་གཟུགས་ཀྱི་ཁྱད་པར་དེ་ལ་དེ་སྐད་ཅེས་བྱའོ། །ནིའི་སྒྲ་ནི་ཚིག་གི་རྒྱན་ནོ། །འདིས་ནི་ཡུལ་གྱི་ཁྱད་པར་ལས་འབྲས་བུ་རྣམ་པར་ཤེས་པའི་ཁྱད་པར་བསྟན་ཏོ། །ཡུལ་ཅན་གྱི་ཁྱད་པར་ལས་འབྲས་བུ་རྣམ་པར་རྣམ་པར་ཤེས་པའི་ཁྱད་པར་སྟོན་པ་ནི་དེ་བཞིན་དུ་མིག་ཕྱེད་བཙུམས་པའི་ཞེས་བྱ་བ་ལ་སོགས་པའོ། །འབྲས་བུ་རྣམ་པར་ཤེས་པ་ལ་གནས་པའི་ཁྱད་པར་དེ་ནི་ཁྱད་པར་དང་བཅས་པའི་མིག་ལ་སོགས་པ་དང༌། འབྲེལ་པས་རྒྱུ་མིག་ལ་སོགས་པའི་འབྲས་བུར་ནི་ངའོ་ཞེས་བདག་ཉིད་འབྲས་བུ་ཉིད་དུ་རྟོགས་པར་བྱེད་ཅིང་རང་དང་འབྲེལ་པའི་འབྲས་བུ་ཡང་རྟོག་པར་བྱེད་དོ། །གལ་ཏེ་དབང་ཕྱུག་རྒྱུ་ཉིད་དུ་རྟོག་པ་ལ་ཡང་རིགས་པ་འདི་ཉིད་མ་ཡིན་ནམ་ཞེ་ན། དེ་བཞིན་དུ་དབང་ཕྱུག་ཅེས་བྱ་བ་ལ་སོགས་པའོ། །དེ་ལྟར་དབང་ཕྱུག་ནི་རང་གི་རྣམ་པར་འགྱུར་པས། འབྲས་བུ་རྣམ་པར་བསྒྱུར་བར་བྱེད་པ་ནི་ཇི་ལྟར་ཡང་རྟོགས་པར་ནུས་པ་མ་ཡིན་སྙམ་དུ་དགོངས་པའོ། །བར་སྐབས་ཀྱི་བརྗོད་པ་རྫོགས་ནས་སྐབས་ཉིད་བརྗོད་པ་ནི་དེས་ན་ཞེས་བྱ་བ་སྟེ་སྔར་བཤད་པས་ནའོ། །སྔ་མ་བཞིན་དུ་རྣམ་པ་གཉིས་སུ་བཤད་པ་ཡིན་ནོ། །རྣམ་པ་འདི་ནི་གཉི་ག་མང་དབང་ཕྱུག་ལ་
ཡོད་པ་མ་ཡིན་ནོ་ཞེས་སྟོན་པ་ནི་རྒྱུ་ལས་ལྡོག་པའི་རང་བཞིན་དེ་ཉིད་ཅེས་བྱ་བ་སྟེ། རྟག་པའི་ཕྱོགས་ལ་ནི་གོ་སླའོ། །ཁྱད་པར་བསམ་པ་ཡང་ཅི་ལྟར་སྔར་མ་སྐྱེས་པ་དེ་བཞིན་དུད་ལྟར་ཡང་ཡིན་པའི་ཕྱིར་སྡོང་དུ་མ་དང་ཤ་ཟ་ལ་སོགས་པ་བཞིན་དུ་རྟག་པ་དང་མི་རྟག་པ་ཉིད་ཀྱིས་ན་ཁྱད་པར་སྐྱེད་པའི་རྒྱུ་མཚན་ཡིན་ནའོ། །གཟུགས་ལ་སོགས་པ་ལ་ནི་དེ་ལྟར་དོགས་པར་བྱ་བ་མ་ཡིན་ནོ་ཞེས་སྟོན་པ་ནི་གཟུགས་ལ་སོགས་པ་རྒྱུ་ཉིད་དུ་རྟོགས་པ་ལ་ནི་ཞེས་གསུངས་སོ། །ལུས་པའི་དུས་ན་ཁྱད་པར་དང་ཁྱད་པར་ཅན་གྱི་རྒྱུ་སྐྱེ་པའི་ཕྱིར་མི་རྟག་པ་ཉིད་ཀྱིས་ན་ཁྱད་པར་སྐྱེད་པའི་རྒྱུ་མཚན་ཡིན་ནའོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །ཡོན་ཏན་ནི་ཁྱད་པར་ཕུལ་དུ་ཕྱིན་པའོ། །ཚོགས་ན་ཞེས་བྱ་བ་ནི་ཡོན་ཏན་སྲིད་འགྱུར་བ་ཞེས་བྱ་བའམ། ཚོགས་ན་དེ་དག་རྒྱུ་ཡིན་ནོ་ཞེས་འབྲེལ་ཏོ། །ཁྱད་པར་མེད་ཕྱིར་རོ་ཞེས་བྱ་བ་ནི་རྟག་པ་ཉིད་ཀྱིས་རང་བཞིན་གྱི་ཁྱད་པར་མེད་པའི་ཕྱིར་རོ། །བཤད་པ་གཉིས་པ་ལ་ནི་ཡོན་ཏན་འབྲས་བུ་ལ་བརྟེན་པའོ། །ལྷག་མ་ནི་སྔ་མ་བཞིན་ནོ། །དབང་ཕྱུག་ལ་སོགས་པ་མ་ཡིན་ཞེས་བྱ་བ་ནི་རྒྱུ་མ་ཡིན་པའོ། །ཁྱད་པར་མེད་ཕྱིར་རོ་ཞེས་བྱ་བ་ནི་དབང་ཕྱུག་ལ་སོགས་པ་ལས་འབྲས་བུ་ལ་བརྟེན་པའི་ཁྱད་པར་གྲུབ་པ་མེད་པའི་ཕྱིར་རོ། །དབང་ཕྱུག་ལ་སོགས་པ་ཞེས་སྩོགས་པའི་སྒྲ་ནི་རང་བཞིན་དང་སྐྱེས་བུ་ལ་སོགས་པ་བཟུང་ངོ༌། །དེ་ལྟར་ཚད་མའི་མཚན་ཉིད་ལ་རྒྱུ་དང་འབྲས་བུའི་གནས་སྐབས་ཀྱི་དབྱེ་བ་ཅན་བཅོམ་ལྡན་འདས་ཚད་མར་གྲུབ་པའི་སྐབས་སུ་ཚད་མ་གཞན་དགག་པ་བྱས་པ་ན། རྟག་པའམ། ཐོག་མ་མེད་པའི་སྐད་ཅིག་བརྒྱུད་པ་འཇུག་པའི་རང་བཞིན་ཅན་གྱི་སྐྱེས་བུ་ཁྱད་པར་འགའ་ཞིག་ཉིད་ཚད་མ་ཡིན་གྱི། སྦྱིན་པ་དང་བརྩེ་བ་ལ་སོགས་པའི་སྒྲུབ་བྱེད་ཅན་ནི་མ་ཡིན་ནོ་ཞེས་བྱ་བ་འདི་དགག་པར་བརྩམས་པས། དབང་ཕྱུག་དུ་སྨྲ་བ་བཟློག་པ་ན། གཞན་གྱིས་གལ་ཏེ་ཞེས་སྨྲས་སོ། །ཡོངས་སུ་ཤེས་པ་དང༌། སྩོགས་པའི་སྒྲས་སྐྱེད་པའི་རྒྱུ་སྟེ། གོ་རིམས་བཞིན་དུ་ཤེས་པར་བྱེད་པ་དང༌། སྐྱེད་པར་བྱེད་པའོ། །སྒྲུབ་པར་བྱེད་པ་རྣམས་སུན་
ཕྱུང་བའི་ཕྱིར་དང་བརྟག་པའི་ཕྱིར་མེད་ནའོ། །འོ་ན་ནི་རྒྱུ་རྣམ་པ་གཉིས་པོ་དེ་གཞན་བཅོམ་ལྡན་འདས་ལ་ཡང་མི་འགྱུར་ཏེ། སྲིད་པ་མ་ཡིན་ནོ་གལ་ཏེ་ཡང་རྟག་པར་ཁས་བླངས་པ་མ་ཡིན་པ་དེ་ལྟན་ཡང་བསྒྲུབ་པར་བྱ་བ་ཉིད་ཁས་བླངས་པ་ཙམ་གྱིས་གདོན་མི་ཟ་བར་རྒྱུ་རྣམ་པ་གཉིས་ཡོད་པར་འགྱུར་རམ་ཅི། གང་གི་ཕྱིར་མེད་པ་དེའི་ཕྱིར་སྐྱེ་བ་ཡང་མེད་ལ་ངེས་པ་ཡང་མེད་པ་དེས་ན་ཚད་མ་གྲུབ་པ་ཅི་འདྲ་བ་ཞིག་ཡིན། །གཉིས་པ་དེ་མེད་པ་ཉིད་བརྗོད་པ་ཡིན། འདི་ལྟར་ཞེས་བྱ་བ་སྟེ། འདི་ནི་རྣམ་འགྲེལ་ན་ཡོད་པའི་རྣམ་པར་འགྲེལ་པའོ།། དེ་སྒྲུབ་བྱེད་ནི་སྐྱེ་བའམ་ཤེས་པའིའོ། །སྐྱེད་བྱེད་མེད་ན་ཡང་ག་ལས་འགྲུབ་པར་འགྱུར་བ་གང་གིས་རྗེས་སུ་སྒྲུབ། གལ་ཏེ་འབྲས་བུ་དེ་འབྱུང་བར་ངེས་པར་ངེས་པ་ཡིན་ན་ནི་དེའི་ཚེ་གུས་པར་རྗེས་སུ་སྒྲུབ་པ་དང༌། གྲུབ་པ་དང་བཅས་པའི་རྗེས་སུ་སྒྲུབ་པར་འགྱུར་བ་ཡིན་ནོ་ཞེས་བྱ་བ་ནི། ཚུ་རོལ་མཛེས་པ་པ་དང༌། དཔྱོད་པ་པ་ལ་སོགས་པའོ། །དེ་རེ་ཞིག་སྐྱེད་བྱེད་མེད་པ་བརྗོད་པ་ནི། རེ་ཞིག་ཅེས་བྱ་བའོ། །གལ་ཏེ་གང་གི་རྒྱུ་རྗེས་སུ་བསྒྲུབས་པས་སོ། །གལ་ཏེ་མཐུ་བསམ་གྱིས་མི་ཁྱབ་པས་ན། སྔགས་ལ་སོགས་པས་དེ་འགྲུབ་པར་འགྱུར་རོ་སྙམ་ན། སྔགས་དང་ཞེས་སྨྲས་སོ། །རྒྱུད་ནི་སྨན་ནོ། །སྩོགས་པའི་སྒྲས་ནི་ནོར་བུ་ལ་སོགས་པ་སྟེ། དེའི་ལུས་ཐམས་ཅད་ལ་མཐོང་བའི་ཕྱིར་རོ། །གལ་ཏེ་དེ་སྒྲུབ་བྱེད་ཡིན་ན། དེའི་ཚེ་བྱེད་པ་ཐམས་ཅད་ཐམས་ཅད་མཁྱེན་པར་འགྱུར་ན། དེ་ནི་ཕན་ཚུན་འགལ་བའི་དེ་ཁོ་ན་ཉིད་སྟོན་པར་བྱེད་པ་རྣམ་ལ་འཐད་པ་མ་ཡིན་ནོ། །ད་ནི་ཤེས་པར་བྱེད་པ་མེད་པར་བརྗོད་པ་ནི། དེ་ངེས་པའི་རྒྱུ་ཡང་ཞེས་བྱ་བའོ། །ཀ་བ་ལ་སོགས་པ་ལ་མི་སླུ་བ་མཐོང་བའི་ཕྱིར་གཞན་ལ་ཡང་ཤེས་པར་རྗེས་སུ་དཔོག་གོ་སྙམ་ན། ཕྱོགས་གཅིག་ཅེས་སྨོས་སོ། །ཚིག་ནི་ལུང་ངོ༌། །ཡང་སྐྱེད་པར་བྱེད་པ་མེད་པའི་ཕྱིར་ཐམས་ཅད་རིག་པ་མི་སྲིད་པར་བསྟན་པའི་ཕྱིར། ཐམས་ཅད་ཡོངས་སུ་ཤེས་པའི་རྒྱུ་དབང་པོ་ཤེས་པ་ཡིན་ནམ། དབང་པོ་དང་དོན་ནམ། གོམས་པ་དང་བཅས་པའི་ཡིད་ཀྱི་ཤེས་པའམ་རྗེས་སུ་དཔག་པ་ཞིག་ཡིན་ཞེས་བྱ་
པའི་རྣམ་པར་རྟོག་པ་ཞེ་ལ་བཞག་ནས་རིམ་གྱིས་འགོག་པ་ནི། ལྐོག་ཏུ་གྱུར་པའི་དོན་ཞེས་བྱ་བ་ལ་སོགས་པའོ། །གཉིས་པ་ཟློག་པ་ནི། དབང་དོན་ཞེས་བྱ་བའོ། །དབང་པོ་ལ་ནི་ཁྱད་པར་འགའ་ཡང་མ་མཐོང་བ་ཁོ་ན་ལ། དོན་ཡང་རྒྱང་རིང་བ་དང་ཕྲ་བ་ལ་སོགས་པའི་ངོ་བོས་གནས་སྐབས་དེ་ཉིད་ཡིན་ནོ། །གལ་ཏེ་དེ་ལྟར་ན་ཡང་དེ་གཉིས་ཐམས་ཅད་རིག་པའི་རྒྱུ་ཡིན་ན་དེའི་ཚེ་སྐྱེས་བུ་མཐའ་དག་ཐམས་ཅད་རིག་པ་ཁོ་ནར་འགྱུར་རོ་ཞེས་བྱ་བ་ནི་ཧ་ཅང་ཐལ་བའོ། །དབང་པོའི་ཤེས་པས་ཐམས་ཅད་རིག་པར་ཁས་བླངས་ནས་ཉེས་པ་གཞན་སྨྲས་པ་ནི། མི་གཙང་བ་ལ་སོགས་ཞེས་བྱའོ། །འོན་ཏེ་དབང་པོ་རྣམས་ནི་ཕྲད་ནས་འཛིན་པའི་ཕྱིར་ཉེས་པ་འདི་མེད་དོ་སྙམ་ན། དབང་པོ་ཕྲད་ནས་འཛིན་བ་ན་ཞེས་གསུངས་ཏེ། དབང་པོ་ཕྲད་ནས་འཛིན་པར་གནས་པ་ན། ཐམས་ཅད་རིག་པར་ཇི་ལྟར་བརྗོད་དེ། །གང་ཞིག་མ་ཕྲད་པ་དེ་ཉིད་དུ་རྣམ་པར་ཤེས་པ་མི་སྐྱེ་བའི་ཕྱིར་རོ། །དེས་ན་དབང་པོ་མ་ཕྲད་པར་འཛིན་པ་ནི་ཁས་བླང་བར་མི་བྱ་སྟེ། དེས་ན་ཉེས་པ་སྔ་མ་ཁོ་ནའོ། །གསུམ་པ་སེལ་བ་ནི། དེའི་ཡིད་ཀྱིས་ཞེས་བྱ་སྟེ། ཐམས་ཅད་མཁྱེན་པ་ཉིད་དུ་འདོད་པ་དེའིའོ། །སྔར་ནི་དབང་པོའི་རྗེས་སུ་མི་འཇུག་པའི་ཡིད་ཀྱི་ཤེས་པ་ཡང་མེད་པ་ཁོ་ན་ཏེ། དབང་པོའི་རྗེས་སུ་འགྲོ་བ་ཁོ་ནས་འཇུག་པ་ཡིན་ནོ། །འདི་ག་ལས་སྙམ་ན། ཡིད་ཀྱི་ཤེས་པ་རང་དབང་ནི་ཞེས་སྨྲ་སྟེ། དབང་པོའི་རྗེས་སུ་མི་འཇུག་པའོ། །དེས་ན་གོམས་པ་ལས་གསལ་བ་ཡིན་ཡང་ཡིད་ཀྱི་ཤེས་པ་དེའི་ཡུལ་དུ་ཐམས་ཅད་འགྱུར་བ་མ་ཡིན་ཏེ། དེ་དབང་པོའི་རྗེས་སུ་འབྲངས་པས་ན་ངེས་པའི་ཡུལ་ཅན་ཡིན་པའི་ཕྱིར་རོ། །འོན་ལུང་ལ་བརྟེན་པ་ཡིན་གྱི་རྣམ་ཤེས་གསལ་བ་ལས་ནི་ཐམས་ཅད་ཡུལ་དུ་འགྱུར་རོ་སྙམ་ན། ལུང་ལ་བརྟེན་བ་ཁས་ལེན་ན། ཡིད་ཀྱི་རྣམ་པར་ཤེས་པ་འདི་ཐམས་ཅད་ཀྱི་ཡུལ་ཅན་མ་ཡིན་པ་འབའ་ཞིག་ཏུ་མ་ཟད་ཀྱི། འཁྲུལ་བ་ཉིད་དུ་ཡང་ཐལ་བར་འགྱུར་ཏེ། ཕྱི་རོལ་གྱི་དོན་དང་འབྲེལ་པ་མེད་པའི་ཕྱིར་རོ། །ལུང་གིས་ནི་ཁམས་གསུམ་གྱི་ཁོངས་སུ་གཏོགས་པའི་རིགས་མཐའ་དག་སྟོན་པ་ཡང་མ་ཡིན་གྱི། འོན་ཀྱང་ཉེ་
བར་མཁོ་བས་འབའ་ཞིག་ཁོ་ན་ཡིན་ནོ། །དེས་ན་དེ་ལ་བརྟེན་པའི་ཡིད་ཀྱི་རྣམ་པར་ཤེས་པས་གོམས་པ་ལས་ཚད་མའམ། ཡུལ་ཐམས་ཅད་གསལ་བ་ཉིད་ཇི་ལྟར་སྐྱེད་པར་བྱེད། དེས་ན་ཡིད་ཀྱི་རྣམ་པར་ཤེས་པ་ཡང་རྒྱུ་མ་ཡིན་ནོ། །འོ་ན་རྗེས་སུ་དཔག་པས་ཐམས་ཅད་བཟུང་ནས་བསྒོམ་པར་འགྱུར་བ་ནི་འཁྲུལ་པ་མ་ཡིན་ནོ། །སྙམ་པའི་དོགས་པ་སེལ་བས། བཞི་པས་སུན་འབྱིན་པར་བྱེད་པ་ནི། རྗེས་སུ་དཔག་པས་ནི་རང་ཉིད་ཀྱི་ལྐོག་ཏུ་གྱུར་པའི་དོན་གྲུབ་མ་ཡིན་ཏེ། རྟགས་མེད་པའི་ཕྱིར་རོ་ཞེས་བྱ་བའི་དོན་ཏོ། །དེས་ན་ཞེས་བྱ་བ་ནི་ཐམས་ཅད་བསྒྲུབ་པའི་རྗེས་དཔག་མེད་པ་དང༌། ཐམས་ཅད་ཀྱི་ཡུལ་ཅན་གྱི་བསྒོམ་པ་མེད་པས་སོ། །དེའི་ཕྱིར་རྗེས་སུ་དཔག་པ་ཡང་རྒྱུ་མ་ཡིན་ནོ་སྙམ་དུ་བསམས་པའོ། །དེ་ལྟར་རྒྱུ་མི་དམིགས་པས་ཐམས་ཅད་མཁྱེན་པ་མེད་པ་པ་ཉིད་དུ་བསྒྲུབས་ནས་མི་བཟོད་པས་ཅི་རུང་བ་སྨྲོས་ཤིག། བསྟན་བཅོས་དང་མཚོན་ཆའི་ཐབས་དང༌། བཟོ་ལ་སོགས་པ་དང༌། དེར་རབ་ཀྱི་མཐར་ཐུག་པའི་བློ་ཅན་ནི་རེ་ཞིག་མཐོང་བ་ཡིན་པ་དེ་བཞིན་དུ་དོན་གཞན་ལ་ཡང་འགྱུར་བ་ཡིན་ནོ་སྙམ་པའི་དོགས་པ་སེལ་བས། དེས་ནི་སྲིད་པ་ཙམ་ཡང་མ་ཡིན་ནོ་ཞེས་སྟོན་པ་ནི། བསྟན་བཅོས་ལ་སོགས་པ་ཞེས་བྱ་བའོ། །དོན་འདི་ཡིན་ཏེ། མཐོང་བའི་བསྟན་བཅོས་ལ་སོགས་པ་ནི། ངོ་མཚར་ལ་སོགས་པས་གོམས་པར་བྱེད་པ་སྲིད་པས་བློ་རབ་ཏུ་འགྱུར་བ་ཡང་སྲིད་ཀྱི་མ་མཐོང་བ་ལ་རེ་བ་སུ་ཡོད། རྣམ་པ་གཞན་གྱིས་ཀྱང་དེ་ངེས་པ་མེད་དོ་ཞེས་སྟོན་པ་ནི། དེའི་ཤེས་བྱ་ཞེས་བྱ་བ་ལ་སོགས་པའོ། །དེ་ངེས་པའི་རྒྱུའི་ཚིག་ཀྱང་མེད་དོ་ཞེས་སྟོན་པ་ནི། གང་ཞིག་ཆགས་པ་དང་ཞེས་བྱ་བའོ། །དོན་འདི་ཡིན་ཏེ། ཚིག་རྣམས་ནི་འདོད་ཆགས་ལ་སོགས་པ་དང༌། རྣམ་པར་རྣམ་པ་དང༌། འབྲེལ་པ་ཡིན་ལ་ཐམས་ཅད་མཁྱེན་པ་ནི་ཁྱེད་ཉིད་ཀྱིས་དེ་དང་བྲལ་བར་འདོད་པ་ཡིན་ནོ། །དེས་ན་དེ་ལ་ཚིག་སྲིད་པ་མ་ཡིན་ནོ། །གཡར་པོ་ནི་བརྙས་པ་སྟེ། དེས་བྱས་པ་ནི་གཡར་པོའོ། །དེས་སམ་དེ་བརྒྱན་པའི་དེ་ལྟར་བྱེད་པ་པོ་དང༌། ཤེས་པར་བྱེད་པ་མེད་པའི་ཕྱིར། མེད་པ་དང་མ་ངེས་པར་སྒྲུབ་པ་ཡིན་ནོ། །རྒྱུ་མི་དམིགས་པ་མེད་ཀྱང་ཐམས་ཅད་རིག་པ་མི་
འཐད་དོ། །དེ་ལྟར་རིམ་གྱིས་སམ་ཅིག་ཅར་ཐམས་ཅད་ཤེས་པར་འགྱུར་ན། དེ་ལ་རེ་ཞིག་རིམ་གྱིས་ནི་མ་ཡིན་ནོ་ཞེས་སྟོན་པ་ནི། བྱུང་གྱུར་ཞེས་བྱ་བའོ། །སོ་སོར་ཞེས་བྱ་བ་ནི་རང་གི་མཚན་ཉིད་ཀྱི་རང་བཞིན་གྱིས་སོ། །རེ་རེས་ཞེས་བྱ་བ་ནི་གཅིག་གཅིག་གོ །རྒྱ་མཚོ་ལ་སོགས་པ་རེ་རེ་ནས་བསྟན་པའི་ཕྱིར། དེ་ཡོངས་སུ་ཤེས་པ་ཉིད་ཡིན་ལ་དེ་བཞིན་དུ་ཡང་ངེས་པར་བྱའོ་སྙམ་ན། ཕྱོགས་གཅིག་ཡོངས་སུ་ཤེས་པ་ནི་ཞེས་སྨྲས་ཏེ། ཚིག་ལས་ཕྱོགས་གཅིག་ཡོངས་སུ་ཤེས་པར་རྗེས་སུ་དཔོག་པར་ནི་སུལ་མེད་པ་ཞེས་བྱ་བར་འགྱུར་ཏེ། ཐམས་ཅད་ལ་ཡོད་པ་ལོ་ནའོ་ཞེས་བྱ་བའི་དོན་ཏོ། །འོན་ཏེ་གཞན་ལ་རྣམ་པ་དེ་འདྲ་བའི་ཚིག་མེད་པ་མ་ཡིན་ནམ། དེས་ན་ཇི་ལྟར་ཕྱོགས་གཅིག་ཡོངས་སུ་ཤེས་པ་རྗེས་སུ་དཔོག་ཅེ་ན། སྐྱེས་བུ་ཞེས་སྨྲས་སོ། །དེས་ན་ཕྱོགས་གཅིག་ཡོངས་སུ་ཤེས་པ་ཡོད་པས་ཐམས་ཅད་ཐམས་ཅད་རིག་པ་ཉིད་དུ་འགྱུར་རོ། །གལ་ཏེ་བསྟན་བཅོས་ལ་སོགས་པ་གཅིག་ཉིད་གོམས་པར་བྱེད་པ་ན། འདོན་པ་པོ་རྣམས་ཀྱི་ཤེས་རབ་དང་ཡིད་གཞུངས་པ་ལ་སོགས་པ་ཆུང་ངུ་དང་འབྲིང་དང་ཆེན་པོ་ཐ་དད་པར་མཐོང་བ་མ་ཡིན་ནམ། དེ་བཞིན་དུ་རབ་ཀྱི་མཐར་ཕྱིན་པའི་ཤེས་པ་ཡང་ཡོད་པར་འགྱུར་རོ་སྙམ་ན། ཁྱད་པར་དང་ལྡན་པ་ཞེས་སྨྲས་སོ། །ཤིན་ཏུ་ཞེས་བྱ་བ་ཚིག་ཕྲད་ཀྱི་ཚོགས་ནི་ལྷགས་པའི་དོན་ཏོ། །འོན་ཏེ་ཕྱོགས་གཅིག་ཡོངས་སུ་ཤེས་པས་ནི། ཐམས་ཅད་མཁྱེན་པ་ཉིད་མ་ཡིན་གྱི། འོན་ཀྱང་ཕྱོགས་གཅིག་གི་དེ་ཁོ་ན་མངོན་དུ་བྱས་པའི་ཕྱིར་རོ་སྙམ་ན། ཕྱོགས་གཅིག་དེ་ཉིད་ཅེས་སྨྲས་སོ། །འདི་ནི་ཞེས་བྱ་བ་ཕྱོགས་གཅིག་གི་ཁོ་ན་ཤེས་པ་ནིའོ། །གཞན་ལ་ཞེས་བྱ་བ་ནི་རི་རབ་ལ་སོགས་པ་ལ་འཁྲུལ་པའི་རྒྱུ་ཡིན་ཏེ། དེའི་ཡུལ་ཅན་གྱི་ཤེས་པ་ཡོད་པ་ལ་ངེས་བ་སྐྱེད་པར་བྱེད་པ་མ་ཡིན་པའི་ཕྱིར་རོ། །ཅིག་ཅར་གྱི་ཕྱོགས་ལ་བརྗོད་པ་ནི། ཅིག་ཅར་ཞེས་བྱ་བའོ། །ཅིའི་ཕྱིར་མ་ཡིན་ཞེ་ན། དོན་གང་ལ་ཤེས་པ་ཡོངས་སུ་རྫོགས་པའི་དོན་དེ་འཁོར་པ་འདིར་ཐོག་མ་ཡིན་པར་བརྗོད་དོ། །འདི་ལ་དོན་འདི་ཡིན་ཏེ། གལ་ཏེ་འཁོར་པ་ཐོག་མ་མེད་པ་ཉིད་ཡིན་ན། དེའི་ཚེ་ཐམས་ཅད་
རིག་པ་མེད་དོ། །འོན་ཏེ་ཐམས་ཅད་རིག་པ་ཡོད་ན་དེའི་ཚེ་རང་གི་གཞུང་ལས་གྲུབ་པའི་ཐོག་མ་མེད་པ་མ་ཡིན་ནོ་ཞེས་བྱ་བའོ། །གྲུབ་པའི་མཐར་ནི་བསམ་པ་འདི་ཡིན་ཏེ། ཅི་འདྲ་བའི་ཐམས་ཅད་མཁྱེན་པ་ལ་སྐྱོན་འདི་དག་ཡོད་པ་དེ་འདྲ་བ་ནི་བསྒྲུབ་པར་མི་འདོད་དེ། ཁོ་བོ་ཅག་ནི་ངན་འགྲོ་དང་འཁོར་བས་འཇིགས་པས། དེ་སྤོང་བ་ལ་ཉེ་བར་མཁོ་བའི་དངོས་པོ་ཐམས་ཅད་ཡོངས་སུ་ཤེས་པའི་ཉེ་བར་སྟོན་པ་པོ་མངོན་པར་འདོད་པ་ཡིན་ནོ། །དེ་ལ་ནི་འདི་འདྲ་བའི་སུན་འབྱིན་པ་ཡོད་པ་མ་ཡིན་ལ། དེ་ལ་ནི་བྱེད་པ་པོ་དང༌། ཤེས་པར་བྱེད་པའི་གཏན་ཚིགས་ཀྱང་གྲུབ་པ་ཡིན་ནོ་ཞེས་བྱ་བའོ། །ཐམས་ཅད་ཐམས་ཅད་རིག་པ་རིག་པའི་ཕྱོགས་ལ་ནི་སུན་འབྱིན་པ་འདི་དག་ཡོད་པ་མ་ཡིན་ནོ་ཞེས་ཕྱིས་སྟོན་པར་འགྱུར་རོ། །ངེས་བཤད་ནན་ཏན་བྱས་པའི་ཕྱིར། །ཞེས་བྱ་བ་དེ་ནི་དེས་བཤད་པ་རྗེས་སུ་བསྒྲུབ་པའི་དོན་དུའོ། །གཞན་རྗེས་སུ་བསྒྲུབ་པར་འདོད་པས་ཞེས་བྱ་བ་ནི་ཐར་པ་ལ་སོགས་པའི་ལམ་མོ། །གཞན་ཤེས་པ་ཞེས་བྱ་བ་ནི་རྒྱ་མཚོ་ལ་སོགས་པའི་རྡུལ་ཕྲ་རབ་ཀྱི་གྲངས་ལ་སོགས་པའོ། །གང་གི་དེའི་ཉེ་བར་སྟོན་པ་བརྗོད་པར་འགྱུར་པ། དེ་ཡོངས་སུ་ཤེས་པ་ན་གདོན་མི་ཟ་བར་ཐར་པའི་ཤེས་པ་གྲུབ་པ་ཡང་མ་ཡིན་ནོ་ཞེས་བཤད་པ་ནི་དེ་ངེས་ཀྱང་ཞེས་བྱ་སྟེ། གྲངས་དེ་ལས་ཀྱང་དེ་གདོན་མི་ཟ་བར་ངེས་པ་ནི་མི་འཐད་པའི་ཕྱིར་རོ། །འོན་ཏེ་ཞེས་བྱ་བ་ནི་སྲིན་བུའི་གྲངས་ལ་སོགས་ པ་ཁོ་ན་ཤེས་བ་བྱ་དགོས ་སོ་ཞེས་བྱ་བ་འདི་ལ་ངེས་པ་ཅི་ཡོད། ཐམས་ཅད་ཤེས་པ་ན་མངོན་པར་འདོད་པ་ཡང་ཤེས་པར་འགྱུར་བ་ཡིན་ནོ་ཞེ་ན། སུན་འབྱིན་པ་ནི་མ་ཡིན་ཏེ་ཞེས་བྱ་བ་སྟེ་ངེས་པ་མ་ཡིན་ནོ་ཞེས་འབྲེལ་ཏོ། །ཅིའི་ཕྱིར་ཞེ་ན། སྲིན་བུའི་གྲངས་ལ་སོགས་པ་ཐམས་ཅད་དུ་འཛིན་པའི་ཤེས་པ་ཡོད་པས་ཤེས་པ་སྟེ། ངེས་པ་མེད་པའི་ཕྱིར་ཏེ་རྟགས་མེད་པའི་ཕྱིར་རོ། །དེ་ཉིད་ཅེས་བྱ་བ་ནི་འདོད་པ་ཉིད་དོ། །ཤེས་པར་བྱ་བ་ནི་གཞན་ལ་ཉེ་བར་བསྟན་པའི་དོན་དུ་ཤེས་པར་འོས་པ་ཡིན་ནོ། །གལ་ཏེ་སྟོན་པ་པོ་ལ་འདོད་པའི་ཤེས་པ་ཡོད་མོད། འདི་ཚད་མ་གང་གི་ཚེ་ཡིན་ཞེ་ན། གལ་ཏེ་དེ་ཤེས་པ་ན་ཞེས་སྨོས་སོ། །དེ་ལས་དེ་ཉེ་བར་སྟོན་པ་པོའི་ཐད་ནས་
མི་ཤེས་པ་གང་དག་ཡིན་པ་དེ་དག་གིས་དེའི་ཚེ་དེའི་ཡུལ་གྱིས་ཤེས་བ་ཤེས་པས་ན་སྟེ། མངོན་པར་འདོད་པའི་ཡུལ་ཅན་གྱི་ཤེས་པ་ཡོངས་སུ་ཤེས་བས་ན་འདི་མི་ཤེས་པ་རྣམས་ཀྱི་ཚད་མ་ཉིད་ཡིན་ཏེ། གལ་ཏེ་དེ་ལྟར་ཤེས་ན་གདུལ་བྱ་རྣམས་ཀྱི་ཚད་མ་ཉིད་ཡིན་ནོ་ཞེས་བྱ་བའི་དོན་ཏོ། །གཞན་ལ་ཡང་ཞེས་བྱ་བ་ནི་རྡུལ་ཕྲ་རབ་ཀྱི་གྲངས་ལ་སོགས་པ་ཡང་ངོ༌། །གལ་ཏེ་འདི་མངོན་པར་འདོད་པ་ཙམ་རིག་པས་ཚད་མ་ཡིན་ན། དེའི་ཚེ་མངོན་པར་འདོད་པ་རིག་པ་གཞན་དག་ཀྱང་ཚད་མར་འགྱུར་རོ་སྙམ་ན། སྐྱེས་བུའི་དོན་གྱིས་ཞེས་སྨོས་སོ། །སྐྱེས་བུའི་དོན་གྱིས་གཙོ་བོ་ཤེས་པ་ཞེས་བྱ་བས་ནི་བྱང་གྲོལ་གྱི་མཚན་ཉིད་ཀྱི་བསྒྲུབ་བྱ་ཤེས་བ་བརྗོད་དོ། །སྐད་ཅིག་འཇིག་པ་དང༌། བདག་མེད་པ་ལ་སོགས་པ་ཚད་མས་ཡོངས་སུ་དག་པ་ཐམས་ཅད་ཀྱི་སྤྱིའི་མཚན་ཉིད་དུ་གྱུར་པའི་དེ་ཁོ་ན་ཤེས་པ་ཞེས་བྱ་བ་འདིས་ནི་བྱང་གྲོལ་གྱི་ལམ་དེ་ཁོ་ན་ཡོངས་སུ་ཤེས་པ་བརྗོད་དོ། །དེ་ཉིད་ཚད་མ་ཡིན་གྱི་ཞེས་བྱ་བ་ནི་མངོན་པར་འདོད་པ་ཙམ་རིག་པ་ནི་མ་ཡིན་ནོ། །ཅིའི་ཕྱིར་དེ་ལྟ་བུར་གྱུར་པ་ཁོ་ན་ཚད་མ་ཡིན་ཞེ་ན། འདི་དེ་ཙམ་གྱི་ཞེས་བྱ་བ་སྐྱེས་བུའི་དོན་དང་ཚད་མས་ཡོངས་སུ་དག་པ་ཐམས་ཅད་ཀྱི་དེ་ཁོ་ན་ཡོངས་སུ་ཤེས་པ་ཙམ་གྱིས་ཉེ་བར་བརྟེན་པར་བྱ་བ་ཡིན་གྱི་སའི་དབྱིབས་ལ་སོགས་པ་མངོན་པར་འདོད་པ་ཙམ་ཤེས་པས་ནི་མ་ཡིན་ནོ། །ལྷག་མ་ཞེས་བྱ་བ་ནི་མངོན་པར་འདོད་པ་ཙམ་ཤེས་པའོ། །དེའི་ཕྱིར་སྐྱེས་བུའི་དོན་གྱི་གཙོ་བོ་དང། ཚད་མས་ཡོངས་སུ་དག་པས་ཐམས་ཅད་ཀྱི་དེ་ཁོ་ན་དག་ཤེས་པར་བྱེད་པ་ཁོ་ན་ཚད་མ་ཡིན་ནོ། །དེ་ཡང་ཞེས་བྱ་བ་ནི་གཉིས་ཤེས་པ་ཉིད་དོ། །གང་ལ་སྲིད་ཅེ་ན་ཞེས་བྱ་བ་ནི་དྲི་བའོ། །ལན་ནི་གང་གིས་ཉེ་བར་བསྟན་པའོ་ཞེས་བྱ་བའོ། །ཚིག་མེད་པར་ནི་གཞན་གྱིས་ཡོངས་སུ་ཤེས་པའི་སྤྱོད་ཡུལ་ངེས་པར་བཟུང་བ་ལ་ཡང་དག་པའི་ཐབས་གཞན་ཡོད་པ་མ་ཡིན་ནོ། །ཚད་མས་མཐོང་བ་ཞེས་བྱ་བ་ནི་འགྲོ་བའི་དོན་དེ་ཁོ་ནའོ། །གཞན་ཉིད་ཅེས་བྱ་བ་ནི་འཇིག་རྟེན་གྱི་དབྱིབས་ལ་སོགས་པའོ། །ཅིའི་ཕྱིར་ཞེ་ན། འཇིག་རྟེན་གྱི་དབྱིབས་ལ་སོགས་པ་དེ་ལ་ཡང་
མི་ཤེས་པ་ཞེས་བྱ་བ་མངོན་དུ་མ་བྱས་པ་སྲིད་པའི་ཕྱིར་རོ། །མེད་བའི་བློ་གང་ལ་ཡོད་བ་ནི་མེད་པའོ། །ཐམས་ཅད་ལ་ཞེས་བྱ་བ་ནི་ཐར་པ་ལ་སོགས་པའི་ལམ་ལ་ཡང་སྟེ། དངོས་པོའི་རྣམ་པ་ཐམས་ཅད་ཡོངས་སུ་ཤེས་པ་མ་ཡིན་པར་ཁས་བླངས་པའི་ཕྱིར་རོ། །གཞན་ལ་ཡང་ཞེས་བྱ་བ་ནི་བཅོམ་ལྡན་འདས་ལ་ཡང་ངོ༌། །འདི་ལ་ཡང་ཞེས་བྱ་བ་ནི་ཐར་པའི་ལམ་ལ་ཡང་ངོ༌། །གྲུབ་པའི་མཐར་ནི་དགོངས་པ་འདི་ཡིན་ཏེ། རྟག་པ་ལ་སོགས་པའི་དེ་ཁོ་ན་དང༌། རྫས་དང་ཡོན་ཏན་ལ་སོགས་པའི་གཞལ་བྱ་ལ་ནི་ཚད་མའི་གནོད་པ་ཡོད་པར་ངེས་དཔའི་ཕྱིར་དེ་དག་ཉེ་བར་སྟོན་པ་བརྒྱུད་པ་ཉིད་སྐྱབས་ཡིན་ནོ། །དེས་ན་འཇིག་རྟེན་གྱི་དབྱིབས་ལ་སོགས་པ་ལ་ཡང་དེ་ཉིད་དོགས་པར་བྱ་བ་ཡིན་ནོ། །བཅོམ་ལྡན་འདས་ལ་ནི་གལ་ཏེ་དངོས་པོ་ཐམས་ཅད་ཡོངས་སུ་ཤེས་པར་ཐེ་ཚོམ་ཟར་བཅུག་པ་དེ་ལྟ་ན་ཡང་བདག་མེད་པ་ལ་སོགས་པའི་དེ་ཁོ་ན་དང༌། གཞལ་བྱའི་སྤྱི་ཕུང་པོ་ལྔ་ལ་སོགས་པ་ལ་ཚད་མ་གྲུབ་པའི་སྟོབས་ཀྱིས་གཞལ་བྱའི་ཁྱད་པར་འཇིག་རྟེན་གྱི་དབྱིབས་ལ་སོགས་པ་དང༌། རྡུལ་ཕྲ་རབ་ཀྱི་གྲངས་ལ་སོགས་པ་ཡོངས་སུ་ཤེས་པ་སྲིད་པ་མི་འགལ་ཏེ། གཙོ་བོའི་དོན་མི་སླུ་བའི་ཕྱིར་རོ། །དེས་ན་བཅོམ་ལྡན་འདས་ཁོ་ན་ཚད་མ་ཡིན་ནོ། །དངོས་པོ་ནི་སྐད་ཅིག་མ་ཉིད་ལ་སོགས་པ་ཉེ་བར་བསྟན་པའོ། །དེ་ལ་ཞེས་བྱ་བ་ནི་ཚད་མས་ཡོངས་སུ་དཔྱད་པ་ལའོ། །མ་ཤེས་པ་ཡིན་པར་དོགས་པ་ཞེས་བྱ་བ་ནི་ཉེ་བར་སྟོན་པ་པོ་མ་ཤེས་པ་ཡིན་པར་དོགས་པ་གང་ཡིན་པའོ། །ཅི་ལྟར་ཞེས་བྱ་བ་ནི་འགོག་པ་སྟེ་དེ་ལ་ཉེ་བར་སྟོན་པ་པོ་ཡོངས་སུ་ཤེས་པ་པོ་ཡིན་པར་ངེས་པ་ཁོ་ནའོ་ཞེས་བྱ་བའི་དོན་ཏོ། །འདི་ལ་ཤེས་པ་ཡིན་པར་མ་ངེས་ཀྱང་སྟོན་པ་མ་ཡིན་ནོ་ཞེས་བྱ་བར་སྟོན་པ་ནི་དེ་ལ་ཉེ་བར་སྟོན་པ་པོ་མ་ཤེས་པ་ཡིན་པར་དོགས་སུ་ཆུག་པ་ཞེས་འབྲེལ་ཏོ། །མ་ཤེས་པ་ཡིན་པར་དོགས་པ་དེ་ལྟ་ན་ཡང་མི་རྟག་པ་ཉིད་ལ་སོགས་པ་དེ་ལའོ། །ཅིའི་ཕྱིར་ཞེ་ན། ཚད་མས་ཞེས་གསུངས་ཏེ། དེ་བཞིན་དུ་གཞན་གྱིས་ཉེ་བར་བསྟན་པ་རྟག་པ་ཉིད་ལ་སོགས་པ་ལ་ནི་འཇུག་པ་མ་ཡིན་ནོ་སྙམ་དུ་དགོངས་པའོ། །འོན་ཏེ་ཞེས་བྱ་བ་ནི་གཞན་གྱིའོ། །གལ་ཏེ་དེ་སྐད་ཅིག་མ་ཉིད་ལ་
སོགས་པ་ཉེ་བར་བསྟན་པ་ཚད་མས་མཐོང་དུ་ཆུག་པ་དེ་ལྟ་ན་ཡང་ཉེ་བར་སྟོན་པ་པོ་ལ་དེ་མངོན་དུ་བྱེད་པ་ཡོད་དོ་ཞེས་བྱ་བ་ནི་ངེས་པ་མ་ཡིན་ཏེ། དེའི་ཉེ་བར་བསྟན་པ་ནི་སྲིན་བུའི་ཡི་གེ་བཞིན་དུ་འགྱུར་སྲིད་པའི་ཕྱིར་རོ་སྙམ་ན། འདི་ལ། ཤེས་པ་ཡོངས་སུ་དག་མེད་པར། །བརྗོད་པ་ཡོངས་སུ་དག་པ་མེད། །ཅེས་འཆད་པར་གྱུར་པའི་ལན་བཞག་སྟེ་གཞན་གསུངས་པ་ནི་དེ་ནི་འདིར་འགྱུར་ཏེ་ཞེས་བྱ་བ་ལ་སོགས་པའོ། །ཚད་མས་མཐོང་བ་གང་ཡིན་པ་སྟེ། སྟོན་པ་ཞེས་བྱ་བའི་དོན་ཏོ། །ཞི་བས་ལྷ་ཞེས་པ་སྐྱེས་པ་གང་གིས་སོ། །གཞན་དེའོ། །ཁྱབ་འཇུག་དང༌། བདེ་བྱེད་དང༌། དབྱིག་གིས་སྙིང་པོ་ལ་སོགས་པའི་མུ་སྟེག་པ་དག་ལ་ཡོངས་སུ་ཤེས་པ་བཙིར་ཡང་ཅི་ཡོད། དེ་མེད་པ་ཁོ་ནའོ། །དེ་དག་ལ་ནི་ཁྱད་པར་དུ་ཡང་ཡོངས་སུ་ཤེས་པ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །གལ་ཏེ་ཡང་བཅོམ་ལྡན་འདས་དང་གཞན་ལ་མངོན་དུ་བྱེད་པར་ཐེ་ཚོམ་ཟ་བ་ཁྱད་པར་མེད་པ་དེ་ལྟ་ན་ཡང་བཅོམ་ལྡན་འདས་ཁོ་ན་ཚད་མ་ཡིན་ཏེ། ཚད་མ་དང་ལྡན་པའི་དོན་གསུངས་པའི་ཕྱིར་རོ། །གཞན་ནི་མ་ཡིན་ཏེ་བཟློག་པའི་ཕྱིར་རོ་ཞེས་བྱ་བ་ནི་ཁྱད་པར་ཡིན་ནོ། །འོ་ན་ད་ནི་གང་གིས་བསྟེན་པར་བྱ་བར་འགྱུར་བ་འདི་ལས་འབྲས་བུ་ལྷག་པ་ཅི་ཞིག་འཐོབ་ཅེ་ན། བདེན་ཏེ། བྱས་པ་ཤེས་པས་སམ། བསོད་ནམས་མངོན་པར་འདོད་པས་ཡིན་པའི་ཕྱིར་སྐྱོན་མེད་དོ། །མཐོ་རིས་ཞེས་བྱ་བ་ནི་བསྡུ་བའོ། །གལ་ཏེ་མཐོ་རིས་ཀྱི་ལམ་ལ་ཆད་མའི་བྱེད་པ་མེད་པ་དེ་ལྟ་ན་ཡང་དེ་ཡོངས་སུ་ཤེས་པ་སྲིད་པ་བསྟན་པ་ཡིན་ནོ་ཞེས་བརྗོད་པ་ཡིན་ནོ། །ཐིགས་པའི་ཚད་ལ་སོགས་པ་གཞན་ནི་ཡོངས་སུ་ཤེས་པ་མེད་ཀྱང་བཅོམ་ལྡན་འདས་དེའི་མཐོ་རིས་ལ་སོགས་པའི་ལམ་ཤེས་པ་དེ་ནི་སྲིད་པ་ཡིན་ནོ། །གང་གི་ཕྱིར་དེ་ལྟ་བུའི་མི་ཚད་མ་ཡིན་པ་དེའི་ཕྱིར་དེའི་ཡེ་ཤེས་ནི་ཞེས་བྱ་བ་ལ་སོགས་པ་ནི་རྣམ་འགྲེལ་ལོ། །ཆོས་ཀྱི་དངོས་པོའི་དེ་ཁོ་ན་ཉིད་དམ། བླང་བྱ་དང་སྤང་བྱའམ། མངོན་པར་མཐོ་བའི་སྒྲུབ་བྱེད་ཤེས་པ་ནི་ཆོས་མཁྱེན་ནོ། །ཀུན་ཞེས་བྱ་བ་ནི་སྦས་པ་ཤེས་པ་ལ་སོགས་པའོ་དེ་ཉིད་ཀྱི་ཕྱིར་ཐམས་ཅད་ཐམས་
ཅད་རིག་པའི་ཕྱོགས་ལ་བརྗོད་པའི་སྐྱོན་ནི་ཁས་མ་བླངས་པ་ཉིད་ཀྱིས་བསལ་བ་ཡིན་ནོ། །གཞན་ཡང་ཞེས་བྱ་བ་ནི་རིགས་བྱེད་པ་པོའི་ཐུག་པ་མེད་པ་ཉིད་དུ་འགྱུར་རོ་ཞེས་བྱ་བ་ནི་ཐམས་ཅད་མཁྱེན་པ་གཅིག་ཉིད་དུ་རྣམ་པར་གནས་པར་མི་འགྲུབ་པར་འགྱུར་རོ། །དེ་ལྟ་ཡིན་པ་ལ་ཉེས་པ་བརྗོད་པ་ནི་དེ་ལྟར་འགྱུར་བ་ཡང་མ་ཡིན་ཏེ་ཞེས་བྱའོ། །གྲུབ་པའི་མཐའ་ཐམས་ཅད་ཅེས་སྐབས་སུ་བབ་པ་ཕྱོགས་གཅིག་གི་ཁྱད་པར་ཡིན་ཏེ་གང་སུ་ཡང་རུང་སྟེ། ཤེས་བྱའི་ཕྱོགས་གཅིག་རིག་པར་བྱེད་པ་དེ་ཐམས་ཅད་ནི་ཚད་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་མ་ཡིན་སྙམ་དུ་དོགས་པ་སེལ་བས་རྣམ་འགྲེལ་རྣམ་པར་འགྲེལ་བ་ནི། གང་གི་ཕྱིར་ཞེས་བྱ་བའོ། །བླང་བ་དང་དོར་བ་ལ་ཕྱོགས་གཅིག་ཉིད་ཡིན་ནོ་སྙམ་ན། སྐྱེས་བུའི་དོན་གྱིས་མཚན་ཉིད་ཕྱོགས་གཅིག་ཅེས་གསུངས་སོ། །དགག་པ་ནི་འཕེན་པའི་དོན་ནམ་ཆུང་བའི་དོན་ཏོ། །གང་ལ་སྐྱེས་བུའི་དོན་ཙམ་མེད་པར་བླང་བྱ་དང་དོར་བྱའི་དེ་ཁོ་ན་ཉིད་དེ་ཡང་གང་ཡིན་སྙམ་ན། དེ་ལ་ཞེས་གསུངས་སོ། །འདིས་ནི་འཁོར་བའི་སྡུག་བསྔལ་དང༌། དེའི་རྒྱུ་དང༌། འཁོར་བ་ཞི་བ་དང་ཞི་བའི་ཐབས་བསྟན་པ་ཡིན་ནོ། །དེ་ལ་སྡུག་བསྔལ་གྱི་རྒྱུ་བརྗོད་པ་ནི་རབ་ཏུ་ཞི་བའི་ཐབས་དང་དེ་འགལ་བར་བསྟན་པའི་ཕྱིར་རོ། །དེས་ན་སྐྱེས་བུའི་དོན་མཆོག་བསྟན་ཏོ། །དེ་བས་ནི་མངོན་པར་མཐོ་བ་དམན་ལ། དེ་བས་ཀྱང་ཆེས་འཇིག་རྟེན་འདིའི་བདེ་བ་དམན་པའོ། །དེ་ལ་དང་པོ་ལ་ནི་ཚད་མའི་བྱེད་པ་སྟོན་པར་འགྱུར་རོ། །གཉིས་པ་ལ་ཚུལ་ཇི་ལྟར་འགྱུར་སྙམ་ན་མཐོ་རིས་ཀྱི་ལམ་ཡང་ཞེས་གསུངས་སོ། །གང་ཞིག་ཚད་མས་གཅོད་པར་སྲིད་པ་དེ་གང་གིས་རིག་པར་བྱེད་པ་དེ་ནི་ཚད་མ་ཡིན་ནོ་ཞེས་འབྲེལ་ཏེ། ཚད་མ་སྲིད་པར་བརྗོད་པ་ནི་ཡོད་པར་ལྷག་པར་མོས་པའི་དོན་དུ་ཡིན་ནོ། །དངོས་པོ་ཡོད་པ་ཁོ་ན་ལས་འགའ་ཞིག་གི་ཚེ་ཚད་མ་རྙེད་པར་སྲིད་ཀྱི་མེད་པ་ལ་ནི་མ་ཡིན་ནོ། །ཡོད་པར་ཡིད་ཆེས་པ་དེ་ཡང་སྐྱེས་བུའི་དོན་མཆོག་ཏུ་འགྱུར་བ་ངེས་པར་ལེགས་པའི་ཡན་ལག་ལ་བཅོམ་ལྡན་འདས་ཀྱི་བཀའ་སླུ་བ་མེད་པར་མཐོང་བ་ལས་འགྱུར་རོ། །གལ་ཏེ་འཇིག་རྟེན་འདི་པ་ཡང་འབྲས་བུར་འདོད་པ་མ་ཡིན་ནམ། བཅོམ་
ལྡན་འདས་ཀྱིས་གསུངས་པ་དེ་མེད་པ་ཡིན་ནམ་ཅི་ཞེ་ན། བུད་མེད་དང་དམངས་རིགས་ཞེས་གསུངས་ཏེ། རྣམ་པར་དཔྱོད་པ་དང་མི་ལྡན་པ་མཚོན་བ་ལྷུར་བྱེད་པ་ཙམ་མོ། །གཞན་ཡང་ཞེས་བྱ་བ་ནི་དུག་སེལ་བ་ལ་སོགས་པའོ། །མེད་པ་མ་ཡིན་ནོ་ཞེས་བྱ་བ་འདིས་ནི་མི་ལྡན་པ་རྣམ་པར་གཅོད་པའི་ཕྱིར་ན་འདི་ནི་འདོད་རྒྱལ་དུ་ཡང་བྱའོ། །འབྲས་བུ་སྔ་མ་དག་ཁོ་ན་ལ་འབད་ལྟོས་ནས་སོ། །གང་ཕྱིར་སྐྱེས་བུའི་དོན་གྱི་གཙོ་བོ་རིགས་པ་བྱའོ་ཞེས་སྟོན་པ་ཡིན་ནོ། །ཞིའི་སྒྲ་ནི་ཁྱད་པར་ལ་ལྟོས་ནས་སོ། །གང་ཕྱིར་སྐྱེས་བུའི་དོན་གྱི་གཙོ་བོ་རིགས་པ་ཚད་མ་མ་ཡིན་པར་མི་འཐད་པ་དེའི་ཕྱིར་ཞེས་བྱ་བ་ལ་སོགས་པའོ། །ཨེ་ཏ་ཞེས་བྱ་བ་ནི་ཚུར་ཤོག་ཅིག་པའོ། །རིང་པོ་མཐོང་བ་ཉིད་ལས་ཐམས་ཅད་མཐོང་བར་གྲུབ་པ་མ་ཡིན་ནམ། དེས་ན་ཁྱེད་ཇི་ལྟར་རིང་པོ་མཐོང་བ་ལ་མི་རྩི་སྙམ་ན། རིང་པོ་མཐོང་པ་ཡོད་དོ་ཞེས་གསུངས་སོ། །གལ་ཏེ་དེ་ལྟར་ཞེས་བྱ་བ་ནི་གལ་ཏེ་རིང་པོ་མཐོང་བས་ཐམས་ཅད་རིག་པར་འགྲུབ་ན། དེའི་ཚེ་བྱ་རྒོད་ལ་སོགས་པ་ཡང་ཐམས་ཅད་རིག་པ་དེ་ཡིན་ཏེ། རིང་པོ་མཐོང་བ་ཡོད་པའི་ཕྱིར་རོ། །ཐམས་ཅད་ཤེས་སོ་སྙམ་པའི་བློ་ནི་ཐམས་ཅད་ཤེས་པའི་ཤེས་བྱ་ཤེས་པ་ལས་འགྱུར་བ་ཡིན་ནོ། །ཐམས་ཅད་ཤེས་པའི་ཤེས་བྱ་མ་ཤེས་ན་ནི་འདིས་ཐམས་ཅད་ཤེས་སོ་ཞེས་བྱ་བ་འདི་ལ་བདག་ཅག་ལ་ཐབས་ཡོད་པ་མ་ཡིན་པ་ཉིད་དོ། །གཞལ་བྱའི་ཕྱོགས་གཅིག་ཡོངས་སུ་ཤེས་པ་ལས་ཀྱང་མཐའ་དག་ཤེས་པ་ཉིད་དུ་སྲིད་པ་ཡང་བདག་ཅག་ལ་མེད་དོ་ཞེས་བཤད་པ་ནི། དེ་ཡི་ཕྱོགས་གཅིག་རྣམ་ཤེས་པས། །ཞེས་བྱ་བ་སྟེ། ཤེས་བྱ་མང་པོ་དེའི་ཕྱོགས་གཅིག་ཤེས་པར་གྱུར་པས་རྣམ་ཤེས་ཞེས་བྱ་བ་སྲིད་པའི་མིང་ཅན་ཤེས་བྱ་གཞན་ཐམས་ཅད་ཀྱི་ཡུལ་ཅན་ནི་དེའི་ཤེས་བྱ་ཉིད་ལ་སྟེ། རིང་པོ་མཐོང་བའི་ཤེས་པ་ཅན་ཉིད་ལ་འགྲུབ་པ་ཡིན་གྱི་བདག་ཅག་ལ་ནི་མ་ཡིན་ནོ། །འགྲེལ་པ་ནི་བུད་མེད་དང་བཞེས་བྱ་བ་ལ་སོགས་པའོ། །གལ་ཏེ་དེ་ཤེས་ན་ཤིང་ལ་སོགས་པ་ཉིད་ཤེས་པར་འགྱུར་མོད་གཞན་དང་འབྲེལ་པའི་དེ་ཤེས་པ་གོ་ཅི་ལྟར་རྟོགས་ཤེ་ན། ཤིང་ལ་སོགས་པ་ནི་གཞན་དང་འབྲེལ་པའི་རྣམ་པར་ཤེས་པའི་ཁྱད་པར་ཅན་དུ་རྟོགས་པའི་ཕྱིར་རོ། །གཞན་དུ་ན་འདི་འདིས་རྟོགས་སོ་ཞེས་བྱ་བར་མི་འགྱུར་རོ་ཞེས་སྔར་
བརྗོད་ཟིན་ཏོ། །འདི་ཉིད་བཤད་པས་ནི་རང་ཉིད་ཀྱིས་ཞེས་བྱ་བའོ། །ཕྱེད་ཕྱི་མ་འགྲེལ་བ་ནི་གཟིགས་པ་རིང་དུ་སོང་བའི་ཆེན་པོ་གང་ཡིན་པ་སྟེ་ཤཱརིའི་བུ་ལ་སོགས་པའོ། །གཟིགས་བ་རིང་དུ་སོང་བས་ཞེས་བྱ་བས་ནི་བཅོམ་ལྡན་འདས་ཀྱི་མཁྱེན་པའི་ཁྱད་པར་ཅན། ཤེས་བྱའི་ཕྱོགས་གཅིག་ཡོངས་སུ་ཤེས་པའི་རྒྱུ་མཚན་བསྟན་ཏོ། །དེ་དག་གིས་བཅོམ་ལྡན་འདས་ལ་མཐའ་དག་མཁྱེན་པ་སྲིད་པར་རྟོགས་པ་གང་ཡིན་པ་དེ་ནི་བཅོམ་ལྡན་འདས་ཀྱི་མཁྱེན་པའི་ཁྱད་པར་ཅན་གྱི་ཕྱོགས་གཅིག་ཡོངས་སུ་ཤེས་པ་སྔོན་དུ་འགྲོ་བ་ཅན་ཡིན་གྱི། དེ་དག་གིས་ཀྱང་དོན་དམ་པར་ཐམས་ཅད་མཁྱེན་པ་ཉིད་རྟོགས་པ་ནི་མ་ཡིན་ནོ། །དེ་ཉིད་ཀྱི་ཕྱིར་བདག་ཉིད་ཆེན་པོ་རྒྱ་ཆེན་པོ་ནི་རིག་ལ་ཞེས་སྟོན་པར་འགྱུར་རོ། །ཤཱ་རིའི་བུ་ལ་སོགས་པ་དེ་དག་གི་ཡང་ཐམས་ཅད་ཤེས་པ་ཉིད་དེ་ཉིད་སྲིད་པ་དེ་ཡང༌། ཤཱ་རིའི་བུ་ལ་སོགས་པ་བས་དམན་པ་གཞན་གྱིས་ཡིན་ནོ། །གཉི་གའི་མཚན་ཉིད་ཀྱི་ཞེས་བྱ་བ་ནི་ཉེ་བར་མཁོ་བའི་ཐམས་ཅད་མཁྱེན་པ་དང་ཐམས་ཅད་མཁྱེན་པའི་མཚན་ཉིད་དོ། །གལ་ཏེ་ཐམས་ཅད་ཐམས་ཅད་རིག་པ་ཉིད་སྤངས་པ་ཁོ་ན་མ་ཡིན་ནམ་འདིའི་རྒྱུ་བཙལ་བས་ཅི་བྱ་ཞེ་ན། མ་ཡིན་ཏེ། དེ་འདྲ་བ་བླ་ན་མེད་པའི་ཡོན་ཏན་ཅན་ལ་མི་འདོད་པ་མེད་པའི་ཕྱིར་རོ། །འོན་ཀྱང་དེ་ངེས་པ་ཙམ་སྤངས་པ་ཡིན་ནོ། །དཔེར་ན་ཕྱོགས་དང་པོ་ལ་ཚད་མ་ས་མི་སླུ་བ་དང་ལྡན་པའི་ཉེ་བར་བསྟན་པ་ངེས་པའི་རྒྱུ་ཡོད་པ་དེ་བཞིན་དུ། རྡུལ་ཕྲ་རབ་སོ་སོར་རིག་པ་ལ་ནི་མ་ཡིན་ནོ། །གལ་ཏེ་དོན་ཐམས་ཅད་ཉེ་བར་སྟོན་པ་མི་སླུ་བ་དང་ལྡན་པ་ཡོད་ན་ནི་ཕྱོགས་དང་པོ་ལ་ཇི་ལྟ་བར་འདི་ཉིད་རྒྱུ་སྲིད་པ་ཡིན་ནོ་སྙམ་དུ་དགོངས་པའོ། །སྒྲུབ་པ་གང་ལས་ཡིན་ཏེ་རྒྱུ་མེད་པའི་ཐམས་ཅད་མཁྱེན་པ་ཁས་མ་བླངས་པའི་ཕྱིར་གྲུབ་པ་སྐྱེས་པ་གང་ལས་ཡིན་ཏེ། རྒྱུ་གང་ཡིན་པ་ཞེས་བྱ་བ་ནི་ཚིག་ཙམ་ཐ་དད་པར་ཟད་ཀྱི་སོ་སོར་དོན་གཉིས་ཉེ་བར་བཟུང་བ་ནི་མ་ཡིན་ནོ། །རྣམ་འགྲེལ་གྱི་ཆ་ལ་འདི་ལྟར་རམ་འདི་ལྟར་ཡང་འཇུག་པར་བྱའོ་ཞེས་བྱ་བའི་དོན་ཏོ། །དྲི་བ་དང་པོ་ལ་ལན་དུ། སྒྲུབ་བྱེད་ཐུགས་རྗེ་གོམས་པ་ལས། །ཞེས་བྱ་བའོ། །ཚད་མ་གྲུབ་པ་ནི་ཐུགས་རྗེ་གོམས་པ་ལས་འགྱུར་བ་ཡིན་ནོ། །དེ་ཞེས་བྱ་བ་ནི་ཐུགས་རྗེའོ། །བློ་ལུས་ཏེ་བློའི་
རང་བཞིན་གང་ཡིན་པ་དེ་ལ་བརྟེན་པའི་ཕྱིར་མངོན་པར་འདོད་པའི་གནས་སྐབས་འཐོབ་པ་ཡིན་ནོ། །འདི་ནི་འདྲི་བ་དང་པོ་ཉིད་ཀྱི་ལན་ཡིན་ནོ་ཞེས་གསལ་བར་བྱེད་པས་ན་འཆད་བ་ནི་ཚད་མ་དེའི་ཞེས་བྱ་བའོ། །གོམས་པའི་ཡན་ལག་དང་བཅས་པ་ཞེས་བྱ་བ་ནི་གོམས་པ་དང་ལྷན་ཅིག་ཏུའོ། །འདྲི་བ་གཉིས་པ་ལ་ཡང་ལན་འདི་ཉིད་ཡིན་ནོ། །ཡང་ན་ཞེས་བྱ་བ་ནི་སྒྲུབ་བྱེད་ནི་རྒྱུ་སྟེ། སྐབས་ཀྱིས་ན་ཚད་མའི་ཡིན་ནོ། །དེས་ན་ཞེས་བྱ་བ་ནི་ཐུགས་རྗེས་སོ། །ཐུགས་རྗེ་ཙམ་གྱི་གཞན་གྱི་དོན་སྟོན་པས་གཞན་ལ་ཚད་མར་འགྱུར་བ་ཡིན་ནོ་ཞེས་བཤད་པ་ནི་ཐུགས་བརྩེ་བ་དང་ལྡན་པ་ནི་ཞེས་བྱ་བའོ། །ཐབས་ནི་གཞན་གྱི་དོན་སྟོན་པའི་ཐབས་ལའོ། །ཐབས་དེ་ཡང་རང་ཉིད་ཚད་མར་གྲུབ་པ་ཡིན་ནོ་ཞེས་བྱ་བ་ནི་རང་ཉིད་ཤེས་བྱ་ཐམས་ཅད་ལ་མངོན་སུམ་གྱི་རང་བཞིན་ཉིད་དུ་གྲུབ་པ་སྟེ། རང་གི་དོན་ཕུན་སུམ་ཚོགས་པ་ཞེས་བྱ་བའི་དོན་ཏོ། །ཐུགས་རྗེ་དེ་ཉིད་ཅེས་བྱ་བ་ནི་བརྗོད་པར་འདོད་པའི་གནས་ཀྱི་ཞེས་བྱ་བའི་དོན་ཏོ། །ཐམས་ཅད་ཤེས་པ་མ་ཡིན་ནོ་ཞེས་བྱ་བ་ནི། ཅི་ལྟར་མངོན་པར་འདོད་པའི་ཐམས་ཅད་མཁྱེན་པ་ཉིད་མ་ཡིན་ནའོ། །དེའི་ཐབས་གོམས་པ་ནི་ཐམས་ཅད་མཁྱེན་པའི་ཐབས་གོམས་པའོ། །གལ་ཏེ་ཞེས་བྱ་བ་ལ་སོགས་པ་ནི་ཚུ་རོལ་མཛེས་པ་པ་ཕྱིར་ཟློག་པ་བྱེད་པའོ། །གང་གི་ལུས་མེད་པས་གོམས་པ་མི་འགྲུབ་པ། བློ་ལུས་ལ་བརྟེན་པ་ཡང་ཅི་ལྟར་ཞེ་ན། འདི་ལྟར་ཞེས་བྱ་བའོ། །ལུས་ཀྱི་བདག་ཉིད་དམ་ཞེས་བྱ་བ་ནི་རང་བཞིན་ཡང་རང་བཞིན་ཅན་ལ་བརྟེན་པ་ཞེས་བརྗོད་པར་འདོད་པས་སོ། །ཡོན་ཏན་ནི་ཆོས་སོ། །འདིས་ནི་གནས་པ་ཉིད་རྣམ་པ་གསུམ་དུ་བརྗོད་པ་ཡིན་ནོ། །གང་གི་ཕྱིར་ཚུ་རོལ་མཛེས་པ་པ་དེ་ལྟར་རྩོད་པ་དེའི་ཕྱིར་རྣམ་འགྲེལ་མཛད་པས་བཤད་བ་ནིའོ། །དེ་ལ་བཤད་པ་དང་པོའི་ཕྱོགས་ལ་ནི། བློ་ནི་ལུས་ལ་བརྟེན་ཕྱིར་རོ། །ཞེས་བྱ་བ་ནི་དོན་ཐ་དད་པ་གཉིས་ཀ་ལ་ཡང་སྦྱར་བར་བྱའོ། །གཉིས་པ་ལ་ནི་ཕྱི་མ་ཁོ་ན་དང་ཞེས་བྱ་བ་ནི་ཁྱད་པར་རོ། །ཕྱོགས་སྔ་མའི་ཆ་ནི་རྣམ་པར་བཀྲལ་ཟིན་པའི་ཕྱིར་ན། གྲུབ་བའི་མཐའི་ཆ་རྣམ་པར་འགྲེལ་བ་ནི་སྔ་མའི་ཞེས་བྱ་བའོ། །རྗེས་སུ་འགྲོ་བ་ཞེས་བྱ་བ་ནི་བློ་ནི་ཕྱི་མ་ལ་རྒྱུ་ཉིད་ཀྱིས་
ཁྱད་པར་བྱེད་པ་ཡིན་པའི་ཕྱིར་རྗེས་སུ་འཇུག་པའོ། །རྗེས་སུ་འགྲོ་བ་ཡང་ཡིན་ལ་བློ་ཡང་ཡིན་ཞེས་བྱ་བ་ནས་ཕྱིས་སྔ་མ་ཡང་འདི་ཡིན་པས་ཞེས་ཚིག་རྣམ་པར་སྦྱར་རོ། །ལུས་འབའ་ཞིག་བློའི་རྟེན་ཡིན་པ་གང་ཡིན་པ་དེ་བཀག་པའི་ཕྱིར་རོ། །གཞན་དུ་ཡང་ཞེས་བྱ་བ་ནི་རང་བཞིན་ཉིད་དུ་གྱུར་པ་ཡིན་ཡང་ངོ༌། །གཞན་དག་འབྲས་བུ་དང་རང་བཞིན་གྱི་ཕྱོགས་སྦྱར་བར་བྱ་བའི་ཕྱིར་གལ་ཏེ་ཞེས་བརྗོད་དོ། །ལུས་ལ་བརྟེན་པ་ཞེས་བྱ་བ་ནི་རང་བཞིན་ལ་ཡང་བརྟེན་པ་ཉིད་དུ་བརྗོད་པར་འདོད་པའི་ཕྱིར་ན་ལུས་ཀྱི་རང་བཞིན་ཞེས་བྱ་བའི་དོན་ཏོ། །ཅི་ལྟར་ལུས་ལ་བརྟེན་པ་ཡིན་ཞེ་ན། ཕ་མའི་ལུས་ལ་བརྟེན་པར་ཞེས་གསུངས་སོ། །གཟུགས་དང༌། ཀུན་དུ་སྤྱོད་པ་དང༌། སེམས་གསལ་བ་དང༌། སྩོགས་པའི་སྒྲས་སོ་སོར་ངེས་བའི་དངོས་པོའི་སྲེད་པ་ལ་སོགས་པ་དེ་ནི་ཕ་མ་དེ་དག་གི་རྗེས་སུ་འགྲོ་བ་སྟེ་རྗེས་སུ་འཇུག་པ་ཡིན་ནོ། །བསྐྱེད་པར་བྱ་བ་ལུས་ཀྱི་ཞེས་བྱ་བ་ནི་རང་བཞིན་གྱི་ཕྱོགས་སོ། །གཉི་ག་ལ་དཔེ་རི་མོའོ། །སྩོགས་པའི་སྒྲས་ནི་དུ་བ་ལ་སོགས་པའོ། །རི་མོ་བྱེད་པའི་གཟུགས་འདྲི་བ་ལ་བཟོ་བོའི་ཤེས་པ་ནི་གཟུགས་ཤེས་པའོ། །སྩོགས་པའི་སྒྲས་ནི་མདོག་ལ་སོགས་པའི་ཤེས་བས་ཏེ་དེའི་རྗེས་སུ་འགྲོ་བ་ཅན་ནོ། །ཅི་ལྟར་གཉི་གའི་དཔེ་ཡིན་སྙམ་ན། སྨྲས་པ་རྩིག་པ་ལ་བརྟེན་པ་སྟེ་རྩིག་པའི་རང་བཞིན་ནོ། །དེ་ལ་འཇིག་རྟེན་འདིའི་ལུས་ནི། རྩིག་པ་ལྟ་བུ་ཡིན་ནོ། །ཕ་མ་ནི་རི་མོ་བྱེད་པ་ལྟ་བུ་ཡིན་ནོ། །དཔེ་དང་མཐུན་པ་ལྷག་མ་ནི་གོ་སླའོ། །རང་བཞིན་དང་འབྲས་བུའི་ཕྱོགས་གཉིས་ཉིད་ཡིན་ཡང་དཔེ་གཞན་གྱིས་བསྟན་པ་ནི། ཡང་ན་ཨ་མྲའི་ཞེས་བྱ་བ་ལ་སོགས་པའོ། །རྩིག་པ་ལ་ནི་རི་མོའི་རང་བཞིན་ཉིད་རྩོལ་བ་ལས་ལྟོས་པ་ཡིན་གྱི་ཨ་མྲ་ལ་ནི་མ་ཡིན་ནོ། །དེ་བཞིན་རྩིག་པ་ལ་ནི་ཕའི་གནས་ལྟ་བུའི་རི་མོ་མཁན་གཞན་ཁོ་ན་ལས་རི་མོ་བྱུང་བ་ཡིན་གྱི་ལུས་གཞན་གྱི་དོད་པོའི་རྩིག་བའི་གཞན་ནས་འོངས་པ་ནི་མ་ཡིན་ནོ། །དུ་བ་ནི་མེ་ལས་སྐྱེས་པ་ཡིན་གྱི་འགའ་ཞིག་ནས་འོངས་པ་ནི་མ་ཡིན་ནོ་ཞེས་བྱ་བ་ནི་ཁྱད་པར་རོ། །ཕྱོགས་གསུམ་བ་བརྗོད་པ་ནི། ཆང་ལ་བརྟེན་པའི་མོས་པའི་ནུས་པ་ནི་ཞེས་བྱ་བའོ། །ཆང་ལ་བརྟེན་པ་ནི་ཆང་གི་ཆོས་སོ། །དེ་བཞིན་དུ་ཞེས་བྱ་བ་ནི་འཇིག་པ་ན་གཞན་ལ་བརྟེན་པ་མ་ཡིན་པ་ལ་
འགའ་ཞིག་ནས་འོངས་པ་ཡང་མ་ཡིན་ནོ་ཞེས་བྱ་བའོ། །འདིས་ནི་སྔ་མ་དང་ཕྱི་མའི་འཇིག་རྟེན་དག་མེད་བར་བསྟན་ཏོ། །འདིར་རང་བཞིན་དང་ཆོས་ཀྱི་ཕྱོགས་དག་ལ་ཁད་པར་ཅི་ཞིག་ཡོད་ཅེ་ན། དེ་ཁོ་ནར་ནི་འགའ་ཡང་མེད་མོད་ཀྱི། འོན་ཀྱང་ཐ་སྙད་ཙམ་གྱིས་བྱས་པ་ཡིན་ནོ། །ཐ་དད་པའི་ཐ་སྙད་ནི་ཐ་དད་པར་ལྷག་པར་ཞེན་པས་ཡིན་ལ། ཐ་དད་པ་མེད་པར་ལྷག་པར་ཞེན་པས་ནི་རང་བཞིན་ཉིད་དོ། །བུམ་པའི་རང་བཞིན་ཞེས་བྱ་བ་ནི་ཐ་དད་པར་བརྗོད་པར་འདོད་པ་ཡིན་ཡང་ཐ་དད་པ་མེད་པར་ལྷག་པར་ཞེན་པ་ཉིད་དོ། །དེ་བཞིན་དུ་ཨ་མྲའི་དམར་པོ། །རྩིག་པའི་རི་མོ་ཞེས་བྱ་བ་ཡང་རང་བཞིན་ཁོ་ན་ཡིན་ནོ། །ནུས་པའི་ལུགས་ཐ་དད་པས་ཐ་མི་དད་པ་ཉིད་དུ་ཐ་སྙད་དུ་བྱེད་དོ། །གང་གི་ཚེ་ནུས་པ་ཡང་ནུས་པ་ཅན་གྱིས་རང་བཞིན་ཉིད་དོ་ཞེས་དེ་ཁོ་ནའི་རྗེས་སུ་འབྲང་བ་དང་རྩིག་པ་ལ་རི་མོ་ཨ་མྲའི་དམར་པོ་ཞེས་བརྗོད་པར་འདོད་པ་དེའི་ཚེ་རང་བཞིན་དང༌། ཆོས་ཀྱི་ཕྱོགས་དག་བཟློག་པ་ཡང་ཡིན་པའི་ཕྱིར་ཐ་དད་པ་ནི་དེ་ཁོ་ན་མ་ཡིན་པ་སྤྲོས་པ་ཙམ་གྱི་དོན་ཡིན་ནོ། །ཡང་ན་གཞན་གྱི་ལུགས་ནི་འདི་འདྲ་བ་ཙམ་དུ་ཟད་པའི་ཕྱིར་ཉེས་པ་མེད་དོ། །དེ་སྐད་དུ་བཤད་པ་ཡང་ཞེས་བྱ་བ་ནི་ཕུར་བུས་སོ། །དེ་ཁོ་ནའི་སྒྲ་ནི་ཆོས་བརྗོད་པ་ཡིན་ཡང་འདིར་གྲགས་པས་ཚད་མས་ཡོངས་སུ་ངེས་པའི་དོན་ལ་བརྗོད་དོ། །ས་ལ་སོགས་པ་ཉིད་ཅེས་བྱ་བ་འདི་རྣམ་པར་བཅད་པ་བརྗོད་པ་ནི། ནམ་མཁའ་ལ་སོགས་པ་ནི་མ་ཡིན་ལ་ཞེས་བྱ་བའོ། །དེ་ཉིད་ཡིན་གྱི་དེ་ཉིད་མ་ཡིན་པ་ནི་མ་ཡིན་ནོ། །ས་ལ་སོགས་པ་དེ་ཉིད་མ་ཡིན་ན་རྣམ་པར་ཤེས་པ་ཙམ་མམ། ཆོས་ཐམས་ཅད་སྟོང་པ་དེ་ཁོ་ན་ཡིན་པར་འགྱུར་ན། འདི་གཉིས་དེ་ཁོ་ན་ཡིན་ན་ནི་དེ་ཁོ་ན་ཉིད་ཡིན་པ་ཉིད་དོ་ཞེས་ངེས་པར་བཟུང་བའི་ཕྱིར་གསལ་བ་ཡིན་ནོ། །དེའི་ཚོགས་ལ་ཞེས་བྱ་བ་ནི་ས་དང་ཆུ་དང་མེ་དང་རླུང་གི་ཚོགས་ལའོ། །དེ་ཉིད་བཤད་པ་ནི་ཚད་མེད་པ་ཞེས་བྱ་བའོ། །ཕབས་ནི་ཆང་གི་རྩིའོ། །སྩོགས་པའི་སྒྲས་ནི་ཆུ་ལ་སོགས་པའོ། །རི་མོ་བཞིན་དང་ཞེས་བྱ་བ་ནི་རྩིག་པ་ལ་ལྟོས་ནས་སོ། །རང་བཞིན་ཡིན་པའི་ཕྱིར་ཨ་མྲའི་དམར་པོ་ཡང་རྟོགས་པར་བྱ་བའོ། །དུ་བ་བཞིན་ནོ་ཞེས་བྱ་བ་ནི་འབྲས་བུ་ཡིན་པས་སོ།།
རི་མོ་མཁན་ལ་ལྟོས་པའི་རི་མོ་ཡང་རྟོགས་པར་བྱ་བ་ཡིན་ནོ། །འཕོ་བར་མཐོང་བ་ཞེས་བྱ་བ་ནི། གཞན་ནས་འདིའམ། འདི་ནས་གཞན་དུ་འཕོ་བར་མཐོང་བ་སྟེ། དེ་མེད་པའི་ཕྱིར་སྔ་མ་དང་ཕྱི་མའི་སྐྱེ་བ་དག་མེད་དོ་ཞེས་བྱ་བའི་དོན་ཏོ། །དེ་ལ་ས་དང༌། ཆུ་དང༌། མེ་དང༌། རླུང་ཞེས་བྱ་བ་ནི་དེ་ཉིད་དོ་ཞེས་བྱ་བའི་མདོ་རེ་ཞིག་སུན་འབྱིན་པ་ནི་དེ་ཉིད་མ་ཡིན་ཏེ་ཞེས་བྱ་བའོ། །འོ་ན་ནི་གཟུགས་ལ་སོགས་པ་ཉིད་དེ་ཉིད་ཡིན་པར་འགྱུར་རོ་ཞེ་ན། དེ་དག་ཀྱང་ལྔ་ཞེས་གསུངས་སོ། །གཞན་དུ་ཞེས་བྱ་བ་ནི་གཟུགས་ལ་སོགས་པ་ལས་ཐ་དད་པར་རོ། །ས་ལ་སོགས་པ་ནི་དེ་ཉིད་ཡིན་པ་ཉིད་དོ་ཞེས་ངེས་པར་གཟུང་བའི་གཙོར་བྱས་པའི་དོན་སུན་འབྱིན་པ་ནི་སྐད་ཅིག་མ་ཉིད་ལ་སོགས་པའི་སྒྲུབ་པ་ནི་ཞེས་བྱ་བའོ། །དེའི་ཕྱིར་དེ་ཉིད་ནི་རྣམ་པ་བཞི་ཁོ་ནའོ་ཞེས་བྱ་བ་མི་འཐད་དོ། །གྲངས་ངེས་པར་གཟུང་བ་ཉིད་ལ་སུན་འབྱིན་པ་གཞན་ཡང་བརྗོད་པ་ནི་གཞན་ཡང་ཞེས་བྱ་བའོ།། བལྟ་བྱ་ཞེས་བྱ་བ་ནི་མྱོང་བྱའོ། །རྟེན་ལྔ་ནི་དབང་པོ་ལྔའོ། །དེ་ཉིད་ཡིན་པ་ཉིད་དོ་ཞེས་བྱ་བ་ནི། སུན་དབྱུང་བའི་ཕྱིར་ཐམས་ཅད་སྟོང་པ་ལ་གང་བརྗོད་པ་ཞེས་བྱ་བའོ། །གལ་ཏེ་ཐམས་ཅད་སྟོང་པ་ལ་ཚད་མ་ཡོད་ན་དེའི་ཚེ་ཐམས་ཅད་སྟོང་པ་ཉིད་མ་ཡིན་ཏེ། དེ་སྒྲུབ་པའི་ཚད་མ་ཉིད་ཡོད་པའི་ཕྱིར་རོ། །གལ་ཏེ་སྟོང་ཉིད་ཅེས་བྱ་བ་ནི་ཚད་མ་ཡང་སྟོང་ནའོ། །དེའི་ཚེ་ཚང་མ་མེད་པ་དེ་ཆོས་ཐམས་ཅད་སྟོང་པ་ཉིད་དུ་སྒྲུབ་པའི་ཚད་མ་མེད་དོ། །དེས་ན་བ་དི་གཉིས་ནི་འགལ་ལོ། །ཆོས་ཐམས་ཅད་སྟོང་པ་ཞེས་བྱ་བ་འདིས་འཕངས་བའི་རྩོད་པ་དེ་ཡང་མེད་དོ་ཞེས་བྱ་བའི་དོན་ཏེ། ཚད་མ་མེད་པར་ནི་བསྒྲུབ་བྱ་མི་འགྲུབ་པོ་སྙམ་དུ་བསམས་པའོ། །འོན་ཏེ་ཀུན་རྫོབ་བའི་ཚད་མ་ལ་བརྟེན་ནས་སྟོང་བ་ཉིད་ལ་གྲུབ་ཅེ་ན། འོ་ན་ནི་ཉམས་སུ་མྱོང་བ་ལས་སྟོང་བ་ཉིད་མ་ཡིན་པར་ཅི་སྟེ་ངེས་པར་མི་བྱེད། འདི་ལ་ཀུན་རྫོབ་ཉིད་ལས་སྐྱོན་གཞན་ནི་བརྗོད་པར་བྱར་མེད་དོ། །ཀུན་རྫོབ་པར་སྒྲུབ་པ་ནི་འདོད་པ་ཉིད་ཡིན་པའི་ཕྱིར་ཅི་ལྟར་ཐམས་ཅད་སྟོང་བ་ཉིད་དུ་འགྲུབ། གལ་ཏེ་རྣམ་པར་ཤེས་བ་ཙམ་ཡང་མ་ཡིན་ཏེ་ཞེས་དང་པོ་ཁོ་ནར་སྨྲས་པ་མ་ཡིན་ནམ། ཅི་ལྟར་ན་དེ་ལ་ལ་བར་དོར་ནས་དབུ་མ་ཉིད་ཉེ་བར་དང་བཀོད་ཅེ་ན། ཐམས་ཅད་སྟོང་ཉིད་ཅིང་དྲ་དང༌། །ཞེས་བྱ་བ་ལ་སོགས་པ་
གསུངས་ཏེ། ཐམས་ཅད་སྟོང་ཉིད་ཅི་འདྲ་དང༌། །ཞེས་བྱ་བ་ནི། རྟག་བའི་ཆོས་ཐམས་ཅད་སྟོང་པ་ཉིད་ཡིན་ནོ་ཞེས་བྱ་བའི་དོན་ཏོ། །ཇི་སྐད་ཆོས་ཀྱི་རྒྱལ་ཚབ་ཀྱིས། །ཡང་དག་མ་ཡིན་ཀུན་རྟོག་ཡོད། །དེ་ལ་གཉིས་བོ་ཡོད་མ་ཡིན། །སྟོང་པ་ཉིད་ནི་དེ་ལ་ཡོད། །ཅེས་བྱ་བ། ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པ། །ཞེས་གསུངས་པ་བཞིན་ནོ། །འདི་ལ་ཡང་དག་པ་མ་ཡིན་པའི་གཟུང་བ་དང་འཛིན་པ་གཉིས་ཀུན་དུ་བརྟགས་པས་ཞེས་བྱ་བས་སོ། །དེས་ན་འདི་འདྲ་བའི་སྟོང་བར་སྨྲ་བ་ལ་བརྟེན་པ་ཡིན་ནོ། །དེ་ལྟར་ཡང་སློབ་དཔོན་ཞི་བ་མཚོའི་བཞེད་བ་བཀོད་ནས་སྣ་ཚོགས་གཉིས་མེད་ཀྱི་རྒྱས་བཏབ་པས། སྒྲོ་འདོགས་པ་དང་སྐུར་པ་འདེབས་པའི་མཐའ་གཉིས་དེ་ཁོ་ན་ཉིད་དུ་སྤངས་བའི་ཕྱིར་རྣམ་པར་ཤེས་པའི་ཚུལ་ཉིད་དབུ་མ་ཡིན་པར་རྟོགས་པར་འགྱུར་རོ། །ཇི་སྐད་དུ་མགོན་པོ་དེ་ཉིད་ཀྱིས། སྟོང་པ་མ་ཡིན་མི་སྟོང་མིན། །དེ་ལྟ་བས་ན་ཐམས་ཅད་བརྗོད། །ཡོད་པས་མེད་པས་ཡོད་པ་ན། །དེ་ནི་དབུ་མའི་ལམ་ཡིན་ནོ། །ཞེས་གསུངས་པ་བཞིན་ནོ། །དེས་ན་ལུགས་འདི་གཉིས་དེ་ཁོ་ནར་ཐ་དང་མེད་པའི་ཕྱིར་གཅིག་བསྟན་པ་ཁོ་ནས་གཉིས་པ་ཡང་བསྟན་པ་ཡིན་ནོ། །འདི་ལ་ནི་ཉམས་སུ་མྱོང་བ་དང་འགལ་བ་ཡང་མེད་དེ་གསལ་བའི་རང་བཞིན་མི་འགོག་པའི་ཕྱིར་རོ། །འོན་ཏེ་མི་འགལ་མོད། འདི་འདྲ་བའི་སྟོང་པ་ཉིད་ལ་ཡང་སྒྲུབ་པར་བྱེད་པ་ཅི་ཡོད་ཅེ་ན། དེ་ལ་ཚད་མ་ཅི་འདྲ་བ་ཞེས་གསུངས་སོ། །ཤེས་པ་ཉིད་དང་གསལ་བཞིན་པ་ཉིད་ལ་སོགས་པའོ་ཞེས་བྱ་བའི་དོན་ཏོ། །དེ་ལ་འཇིག་རྟེན་སྔ་མ་སུན་འབྱིན་པའི་སྐབས་ཀྱིས་དང་པོའི་ཕྱོགས་གཉིས་སུན་དབྱུང་བའི་ཕྱིར་རྩོད་པ་ལ་ཐ་སྙད་བཏགས་ནས་རྗེས་སུ་རྗོད་པར་བྱེད་བ་ནི་གལ་ཏེ་ཞེས་བྱ་བའོ། །ཕ་མའི་ལུས་ལ་སོགས་པ་ཞེས་བྱ་བ་ལ་སོགས་པའི་སྒྲས་ནི། ཟས་ལ་སོགས་པའི་མཐོང་བ་ཉིད་གཟུང་ངོ༌། །ལུས་ཀྱི་འབྱུང་བ་ཆེན་པོ་ཞེས་བྱ་བ་ནི་བསྐྱེད་པར་བྱ་བའི་ལུས་ཀྱིའོ། །གཞན་དུ་ཞེས་བྱ་བ་ནི་འདི་ཉིད་ཀྱིས་བཤད་པ་ནི་འཇིག་རྟེན་ཕ་རོལ་ནས་འོངས་པ་ཉིད་དུ་ཞེས་བྱ་བའོ། །དགག་བའི་དབང་དུ་བྱས་པའི་ཕྱིར་རང་བཞིན་མི་དམིགས་པ་ལྟར་བཅོས་པའོ། དེ་ལ། གལ་ཏེ་འགྲོ་འོང་མ་མཐོང་ཕྱིར། །ཞེས་
བྱ་བའི་སུན་འབྱིན་པ་འཆད་པར་འགྱུར་བས་ཐེ་ཚོམ་ཟ་བའི་ཕྱིར། སྐྱེ་བ་སྔ་མའི་འཐད་པ་བཤད་པ་ནི་དེ་ནི་མི་བདེན་ཏེ་ཞེས་བྱ་བའོ། །ཕ་མའི་ལུས་འབའ་ཞིག་ལས་སྐྱེ་བ་ནི་མ་ཡིན་ནོ། །འབྱུང་རྔུབ་ལ་སོགས་པ་ནི་རང་གི་རིགས་ལ་ལྟོས་པ་མེད་པར་མི་འཐད་དོ། །ཅིའི་ཕྱིར་དེ་ལྟར་མི་འཐད་ཅེ་ན། གཡོ་བ་ལ་སོགས་པའི་མཚན་ཉིད་ཅན་གྱི་རང་བཞིན་གྱི་ཁྱད་པར་ལས་ཏེ་དེ་དེའི་ཕྱིར་རོ། །གལ་ཏེ་གཡོ་བ་ཉིད་དང་འདོད་པའི་ཁད་པར་ལ་སོགས་པའི་ཆོས་ཀྱིས་བྱས་པའི་རང་བཞིན་གྱི་ཁྱད་པར་ལས། རང་རིགས་ལ་ལྟོས་པ་མེད་པ་སྟེ། སྔ་མའི་ཉེ་བར་ལེན་པ་ལ་མ་ལྟོས་པར་མི་འཐད་པ་ཉིད་དོ་ཞེས་བཤད་པ་ཡིན་མོད། སྔ་མའི་ཉེ་བར་ལེན་པ་ནི་ཕ་མའི་གོམས་པ་ཉིད་ཡིན་ནོ་སྙམ་ན། གཡོ་པ་ལ་སོགས་པ་ཡང་ཞེས་གསུངས་སོ། །གང་ལ་གཡོ་བ་ལ་སོགས་པར་བཞག་པ་དེའི་བདག་ཉིད་དེ། སྔར་གྱི་བློ་དང་དབང་པོ་ལ་སོགས་པ་དེ་གོམས་པ་གང་ཡིན་པ་དེའི་རྗེས་སུ་འགྲོ་བ་ཅན་ཡིན་ནོ། །རྣམ་པར་བཅད་བྱ་བརྗོད་པ་ནི། །ཕ་མའི་ཞེས་བྱ་བ་ལ་སོགས་པའོ། །བཟློག་པ་ལ་གནོད་པ་བརྗོད་པ་ནི་དེ་ལྟ་མ་ཡིན་ན་ཞེས་བྱ་བའོ། །དམ་པ་མ་ཡིན་པའི་སྐྱེ་བོ་དང་འབྲེལ་པའམ། དེ་འདྲ་བའི་བསྟན་བཅོས་མཐོང་བ་ལས་པ་ལས་སྐྱེས་པའི་ཆོས་དང་ལྡན་པ་ཉིད་ལ་སོགས་པ་ལས་ཟློག་པ་གོམས་པ་ལས་ཆོས་དང་ལྡན་པ་མ་ཡིན་པ་ལ་སོགས་པར་འགྱུར་བས་ནི། གོམས་པ་ལ་སོགས་པ་རྣམས་ཀྱི་གོམས་པ་སྔོན་དུ་སོང་བ་ཅན་ཉིད་དུ་གསལ་འདེབས་པར་བྱེད་དོ། །དེ་ལྟ་མ་ཡིན་ན་ཕ་མའི་རང་བཞིན་ཉིད་རྗེས་སུ་འཇུག་པར་འགྱུར་རོ། །འགའ་ཞིག་ལ་དངོས་པོ་འགའ་ཞིག་གི་རང་བཞིན་རྗེས་སུ་འཇུག་པ་མཐོང་བས་ནི་དེ་ཡང་དེ་ཁོ་ན་བཞིན་གོམས་པར་གྱུར་པ་ཡིན་ནོ་ཞེས་ངེས་པ་ཡིན་ནོ། །གང་དང་གང་གཡོ་བག་དང་ཆོས་དང་ལྡན་པ་ལ་སོགས་པའི་ཆོས་སུ་གྱུར་པ་དེ་ཐམས་ཅད་ནི་སྔོན་གོམས་པས་བསྐྱེད་པ་ཡིན་ཏེ། དཔེར་ན་དབུས་ཀྱི་གནས་སྐབས་ན་རྣམ་པ་གཞན་དུ་གནས་པ་གོམས་པ་ལས་རྣམ་པ་གཞན་དུ་འགྱུར་བ་བཞིན་ནོ། །སྲོག་ཆགས་རྣམས་ཀྱི་དང་པོའི་གནས་སྐབས་ཀྱི་གཡོ་བ་ལ་སོགས་པ་ཡང་དེ་བཞིན་དུ་གྱུར་པ་ཡིན་ནོ་ཞེས་བྱ་བ་ནི། དོན་གྱི་འབྲས་བུའི་གཏན་ཚིགས་སོ། །ཚད་མའི་འབྲས་བུ་བརྗོད་པ་ནི་དེའི་ཕྱིར་ཞེས་བྱ་བ་སྟེ། མ་ཡིན་པར་བཀབ་པས་རང་
གི་གོམས་པ་ཉིད་ལས་འགྱུར་བ་ཡིན་ནོ་ཞེས་བྱ་བའི་དོན་ཏོ། །གཡོ་བག་དང་གོམས་པ་དག་རྒྱུ་དང་འབྲས་བུའི་དངོས་པོར་གྲུབ་པས་ན་མ་ངེས་པ་མ་ཡིན་ནོ། །འོ་ན་གང་གི་ཚེ་ཕ་མའི་ལུས་ལ་སོགས་པ་རྒྱུར་འཐད་ཅེ་ན། གལ་ཏེ་ཞེས་བྱ་བ་ལ་སོགས་པའོ། །གལ་ཏེ་བུ་ཆུང་གི་རང་བཞིན་དེ་དག་ཕ་མའི་རང་བཞིན་ཡོད་ན་སྟེ། ཕ་མའི་རང་བཞིན་ཉེ་བར་གནས་པ་ན་ཞེས་བྱ་བའི་དོན་ཏོ། །སྔར་སྲིད་པ་གཞན་དུ་ཡོད་པར་འགྱུར་ན། དེའི་ཚེ་ཕ་མའི་ལུས་ལ་སོགས་པ་ཡང་རྒྱུ་ཉིད་དོ་ཞེས་འཐད་པ་ཡིན་ཏེ། གཉི་ག་རྒྱུ་ཡིན་ཡང་སྐབས་ལ་གནོད་པ་མེད་དོ། །ཡང་ན་གལ་ཏེ་བུ་ཆུང་གི་འདོད་པ་ལ་སོགས་པ་ཐམས་ཅད་སྔར་ཕ་མའི་རང་བཞིན་ལ་ཡོད་པར་གྱུར་ན་དེའི་ཚེའོ། །ལུས་ལ་སོགས་པ་ཡང་ཞེས་ཡང་གི་སྒྲས་ནི་སྲིད་པ་མ་ཡིན་ཏེ། མ་དང་ཕའི་ལུས་ལ་སོགས་པ་རྒྱུ་ཉིད་དུ་སྲིད་པར་རྟོགས་པ་རིགས་པ་ཡིན་ནོ་ཞེས་བྱ་བའི་དོན་ཏོ། །དེ་ལྟ་མ་ཡིན་ན་རང་ལ་བརྟེན་པའི་གཡོ་བག་ལ་སོགས་པ་ནང་ནས་རང་བཞིན་གང་ཞིག་སྐྱེད་བྱེད་དག་ལ་ཡོད་པར་མ་གྱུར་པ་དེ་ཉིད་གོམས་པ་ལས་སྐྱེས་པ་ཡིན་ནོ་ཞེས་བྱ་བར་འགྱུར་རོ། །བུ་ཆུང་རི་རང་བཞིན་མཐའ་དག་ཕ་མ་གཉིས་ལ་གདོན་མི་ཟ་བར་གནས་པ་ཡང་མ་ཡིན་ནོ། །དེ་མ་ཡིན་ཡང་བཟློག་པར་དོགས་སོ་ཞེ་ན། འོན་ཏེ་ཞེས་གསུངས་སོ། །སྔར་གོམས་པ་མེད་པ་ན་གཡོ་བག་མ་དམིགས་ལ། གོམས་པ་ཡོད་ན་ཡོད་བར་ཉམས་སུ་མྱོང་བའི་ཕྱིར་འདིར་ཡང་རྒྱུ་དང་འབྲས་བུའི་དངོས་པོ་ནི་མངོན་སུམ་དང་མི་དམིགས་བ་གསུམ་གྱིས་གྲུབ་བ་ཡིན་ནོ། །འདིར་འདི་མ་གྲུབ་ན་ནི་གཞན་དུ་ཡང་མི་འགྲུབ་པར་ཐལ་ལོ་སྙམ་དུ་དགོངས་པའོ། །འདི་ན་འཇིགས་པ་ཡང་མ་ཡིན་ནོ་ཞེས་བརྗོད་པ་ནི་དེ་ཡང་ཞེས་བྱ་བའོ། །རྒྱུ་དང་འབྲས་བུའི་དངོས་པོ་གྲུབ་པས་ན་རྒྱུ་མི་དམིགས་བས་གཏན་ཚིགས་མི་མཐུན་པའི་ཕྱོགས་ལས་ལྡོག་བར་གྲུབ་པར་བསྟན་པའི་ཕྱིར་གལ་ཏེ་ཞེས་བྱ་བ་ལ་སོགས་པའོ། །གལ་ཏེ་གོམས་པ་སྔོན་དུ་འགྲོ་བར་གྲུབ་པར་དེའི་ཚེ་རང་གི་གོམས་པ་དང་བྲལ་བ་ཞེས་བྱ་བ་ལ་སོགས་པའོ། །རྟེན་མེད་པ་ནི་རྒྱུ་མེད་པའོ། །དེས་ན་རྒྱུ་མི་དམིགས་པ་ཐལ་བ་སྒྲུབ་པའི་གཏན་ཚིགས་ཀྱིས་གཏན་ཚིགས་མི་མཐུན་པའི་ཕྱོགས་ལས་ངེས་པ་ཁོ་ནར་ཟློག་པར་བྱེད་དོ། །དེ་ལྟར་མ་ཡིན་ན་ཞེས་བྱ་བ་
རྒྱུ་མེད་པར་འབྱུང་ནའོ། །ངག་ལས་ཐ་སྙད་དུ་བྱེད་པ་ཡིན་ནོ་ཞེས་བྱ་བ་ལ་ལྟོས་པར་བྱའོ། །དཔེར་ན་འདིར་སྔར་ཞུགས་པའི་མི་དམིགས་པས་ལྡོག་པ་ངེས་པ་དང༌། གོམས་པ་ཡོད་ན་གཡོ་བ་མཐོང་བ་ན། རིམ་པར་འབྱུང་བའི་མངོན་སུམ་གཉིས་ཀྱི་རྗེས་སུ་འགྲོ་བ་རྟོགས་པ་ལྟར། གང་དུ་མངོན་སུམ་སྔོན་དུ་འགྲོ་བའི་མི་དམིགས་པ་སྲིད་པ་དེར་ཡང་རྗེས་སུ་འགྲོ་བ་ནི་མངོན་སུམ་ཉིད་ཀྱིས་འཛིན་ཅིང་ཕྱིས་ཀྱི་མི་དམིགས་པ་རིམ་པར་བྱུང་བས་ནི་ལྡོག་པ་འཛིན་པ་ཡིན་ཏེ། ཨར་ཙ་ཊས་ཅི་ལྟར་གཏན་ལ་ཕབ་པ་བཞིན་ནོ། །དེའི་ཕྱིར་ད་ལྟར་མིག་ལ་སོགས་པ་གཡོ་བ་ལ་སོགས་པ་དང་ལྡན་པ་ནི་གཡོ་བའི་རིགས་མཐུན་པ་གཡོ་བའི་གསལ་བ་གཞན་གང་ཡིན་པ་དེ་གོམས་པ་དེ་ལས་བྱུང་བའི་ངང་ཚུལ་གང་ལ་ཡོད་པའི་མིག་ལ་སོགས་པ་དེ་སྔོན་དུ་འགྲོ་བ་ཅན་ཡིན་ནོ། །སོགས་བའི་སྒྲས་བསྡུས་བའི་ཆོས་གཞན་ཡང་དེ་བཞིན་དུ་རྟོགས་པར་བྱའོ། །དེ་འདྲ་བའི་དུ་བ་དེ་ནི་གཞན་མེད་པ་ལས་ཀྱང་སྐྱེ་བ་མ་ཡིན་ཏེ། འོན་ཀྱང་དེ་ལྟ་བུ་ཉིད་ལས་ཡིན་ཏེ། རྒྱུ་རིགས་ཀྱིས་མཐུན་པར་འགྲུབ་པའི་ཕྱིར་རོ། །དེ་དང་རིགས་མི་མཐུན་པ་ལས་ཀྱང་རིགས་མི་མཐུན་པ་མ་ཡིན་པ་འབྱུང་ན་ནི་རྒྱུ་མེད་པ་ཉིད་དུ་ཐལ་བའི་ཕྱིར་རོ། །རྒྱུ་མེད་པ་ཡིན་ན་ཡང་རྟག་ཏུ་ཡོད་པའམ་མེད་པར་འགྱུར་ཞེས་བྱ་བ་ལ་སོགས་པའི་ཉེས་པའི་ཚོགས་ཀྱི་གོ་སྐབས་སུ་ཐལ་བའི་ཕྱིར་རོ། །དེ་ཉིད་ཀྱི་ཕྱིར་ནགས་དང་ཅིག་ཤོས་ཀྱི་རྒྱལ་མོ་ག་གོན་གཉིས་བཞིན་དུ་གཅིག་ཏུ་རྟོགས་པ་ཡིན་ཡང༌། རིགས་གཅིག་ཏུ་གཞག་པའི་རྒྱུ་མཚན་མ་ཡིན་ནོ། །དེས་ན་ཤིན་དུ་རྣམ་པར་ཕྱེ་བའི་རྣམ་པ་ཅན་གྱི་འབྲས་བུས་ནི་རྒྱུ་ལ་འཁྲུལ་པ་མེད་དོ། །འོ་ན་ནི་སྐྱེ་བ་དང་པོ་ན་ཡང་ཁྱད་པར་གཞན་ཉིད་ཡོད་དོ་སྙམ་ན། གོམས་པ་ལས་ཤེས་གསུངས་སོ། །ཁྱད་པར་འགྱུར་ནི་འདུས་བྱས་པ་སྟེ། བཟློག་པ་གོམས་པ་ལས་བཟློག་པའི་ཆོས་ཅན་གང་ཡིན་པའོ། །སྐྱེ་བ་དང་པོར་ཞེས་བྱ་བ་ནི་བུ་ཆུང་ལའོ། །དེ་བཞིན་གནས་ཞེས་བྱ་བ་ནི་འདི་ལྡོག་པའི་ཆོས་ཅན་ཉིད་དུ་དེ་བཞིན་དུ་གནས་སོ་ཞེས་ཚིག་རྣམ་པར་སྦྱར་རོ། །འདི་ནི་འབྲས་བུ་ཐ་མི་དང་པར་བརྗོད་དོ། །དེས་ན་རྒྱུ་ཐ་དད་པར་མི་རྟག་གོ་སྙམ་དུ་དགོངས་པའོ། །དུ་བ་ནི་དེ་ལྟ་བུར་གྱུར་པ་གཞན་ལས་མ་ཡིན་
པའི་ཕྱིར་རྒྱུ་ཐ་དད་པར་མཐོང་བ་ལས་འབྲས་བུ་ཐ་དད་པར་རྗེས་སུ་དཔོག་པར་འགྱུར་བ་ལ་རག་གོ །དེའི་ཕྱིར་འཁོར་བའི་འདུ་བྱེད་པ་ཐམས་ཅད་ནི་གོམས་པས་བྱས་པ་ཁོ་ནའོ། །དེ་ཡང་སྐྱེས་མ་ཐག་པ་དང་མངལ་དུ་ཡོད་པ་མ་ཡིན་པའི་ཕྱིར། སྐྱེ་ང་གཞན་གྱིས་གོམས་པ་ཁོ་ནས་བྱས་པ་ཡིན་ནོ་ཞེས་གནས་སོ། །གལ་ཏེ་འདུས་བྱས་པ་འདི་འཇིག་རྟེན་ཕ་རོལ་གྱི་གོམས་པས་བྱས་པ་ཡིན་ནོ་ཞེས་བྱ་བ་འདི་མི་དམིགས་པས་གནོད་པ་མ་ཡིན་ནམ་སྙམ་ན། དེ་ཞེས་གསུངས་སོ། །གལ་ཏེ་གོམས་པ་སྔོན་དུ་འགྲོ་བ་ཅན་ཅི་འདྲ་བའི་གཡོ་བ་ལ་སོགས་པའི་འདུ་བྱེད་པ་མཐོང་བ་ལས་དེ་ལྟར་གྲུབ་པ་དེ་བཞིན་དུ་འཇིག་རྟེན་ཕ་རོལ་པ་མ་ཡིན་པའི་གོམས་པ་སྔོན་དུ་འགྲོ་བ་ཅན་ཁོ་ནར་མཐོང་བའི་ཕྱིར་དེ་ལྟ་བུ་ཉིད་འགྲུབ་པར་འགྱུར་བའི་ཕྱིར་འཇིག་རྟེན་ཕ་རོལ་ནི་མི་འགྲུབ་བོ་ཞེ་ན། དེ་ཉིད་ཀྱི་ཕྱིར་ཞེས་གསུངས་ཏེ། འདུ་བྱེད་པ་དང་གོམས་པ་གཉིས་རྒྱུ་དང་འབྲས་བུའི་དངོས་པོར་གྲུབ་པ་ཉིད་ཀྱི་ཕྱིར་རོ། །འདི་ཉིད་གསལ་འདེབས་པ་ནི་འབྲས་བུ་ནི་རྒྱུ་དང་ལྷན་ཅིག་ཅེས་བྱ་བའོ། །གལ་ཏེ་དེ་ལ་རྒྱུ་ཉིད་མ་མཐོང་བའི་ཕྱིར་གང་གི་འབྲེལ་པར་འགྱུར་བ། འབྲས་བུ་དེའི་འབྲས་ཉིད་དུ་ཅི་ལྟར་འགྱུར་ཞེ་ན། རྒྱུ་མ་མཐོང་ཡང་ཞེས་གསུངས་སོ། །དེ་ལྟར་འཇིག་རྟེན་རྒྱང་འཕན་གྱི་འདོད་པ་བསལ་ནས་བཞད་གད་དུ་བྱ་བའི་ཕྱིར། དེའི་ཕྱིར་འདིར་ཞེས་གསུངས་སོ། །གླེན་པ་གཞན་གྱིས་ཁྱུ་མཆོག་དང་མ་ཧེ་དག་ཅི་ལྟ་བ་བཞིན་དུ་མ་ངེས་པའི་ཕྱིར་ཁྱུ་མཆོག་རི་སྒྲས་མ་ཧེ་ལ་བརྗོད་པ་སྟེ། མ་ཧི་ར་རིང་པོ་གང་ཡིན་པ་དེ་མའི་ལྟོ་ན་ཅི་ལྟར་གནས་ཏེ། དེ་གནས་ན་མ་ཅི་ལྟར་མཚོ་སྙམ་དུ་བས་མས་པའོ། །ངེས་ན་མ་ཧེ་གནས་པ་ཅི་ལྟར་སྲིད་པ་དག་སྨྲོས་ཤིག་ཅེས་དྲིས་པ་ནའོ། །དེ་ལྟ་བུར་གྱུར་བ་ཉིད་དོ་ཞེས་བྱ་བ་ནི་དོན་འདི་ཡིན་ཏེ། དཔེར་ན་སྔར་སྐྱེས་པ་འཕེལ་བ་ལ་སོགས་པ་མེད་པར་མ་ཧེ་དེ་ལྟར་ཐ་སྙད་བྱེད་པ་ཙམ་བཞད་གད་ཀྱི་གནས་ཡིན་པ་དེ་བཞིན་དུ་སྔོན་གོམས་པ་མེད་པ་ཉིད་དུ་སྐྱེ་བ་དང་པོའི་འདུ་བྱེད་པ་ལ་སོགས་པ་ལ་དེ་ལྟར་ཐ་སྙད་ཙམ་བྱེད་པ་ལ་བཞད་གད་ཀྱི་གནས་ཡིན་ནོ་ཞེས་བྱ་བའོ། །འོན་ཏེ་གང་ལས་ཞེས་བྱ་བ་ནི་གཞན་གྱིའོ། །དེ་ཙམ་གྱིས་ནི་ལན་མི་འཐོབ་སྟེ། ཡོངས་སུ་གྱུར་པ་ཐམས་
ཅད་ཡོད་པའི་ཕྱིར་རོ། །དེས་ན་ཁྱད་པར་དེ་ལྟ་བུ་སེམས་པ་ཡིན་ནོ་སྙམ་པས་ཕན་ཚུན་ཞེས་སྨྲས་སོ། །ནམ་གྱི་སྒྲས་ནི་བརྗོད་པའི་ཕྱོགས་མི་འདོད་པར་ཕྱོགས་གཞན་ཁས་བླངས་པའི་དོན་ཏོ། །དམིགས་ཞེས་བྱ་བ་ནི་མ་ཡིན་པ་སྟེ། མེད་པའི་ཐ་སྙད་ཉིད་ཀྱི་ཡུལ་ཡིན་ནོ་ཞེས་བྱ་བའི་དོན་ཏོ། །གལ་ཏེ་བལྟར་རུང་བར་ཁས་བླངས་ན་སྐྱོན་འདིར་འགྱུར་གྱི་མཚོན་པར་བྱ་བ་མ་ཡིན་པ་ཉིད་ཡིན་ན་ཉེས་པ་འདིར་ཅི་ལྟར་འགྱུར་སྙམ་ན། འོན་ཏེ་ཞེས་བྱ་བའོ། །འདི་ནི་བལྟར་རུང་བ་མ་ཡིན་པ་དེས་ན་མེད་པའི་ཐ་སྙད་ཀྱི་ཡུལ་ཉིད་མ་ཡིན་ནོ་སྙམ་དུ་བས་ཐས་བའོ་།དེ་ལྟ་ཡིན་ན་ཞེས་བྱ་བ་ཁྱད་པར་བལྟར་མི་རུང་བ་ཡིན་ནའོ། །མཐོང་བ་ཞེས་བྱ་བ་ནི་རྒྱུ་ཉིད་དུ་ངེས་བར་རྟོག་པའོ། །བརྟག་པར་བྱ་བ་ནི་ངེས་བར་བྱ་བའོ། །གལ་ཏེ་འགའ་ཞིག་ལ་གོམས་པ་རྒྱུར་མཐོང་བ་ནི་དེ་ལྟ་ན་ཡང་ཡོངས་སུ་གྱུར་པའི་ཁྱད་པར་ཉིད་ཅི་སྟེ་མི་རྟག་སྙམ་ན། མ་མཐོང་བ་རྟོག་ན་ནི་ཞེས་གསུངས་ཏེ། གལ་ཏེ་ཚད་མས་མཐོང་བའི་དངོས་པོའི་ངོ་བོ་དོར་ནས་ཆོས་ཀྱི་ཁྱད་པར་ཉིད་བརྟག་པར་བྱ་བ་ཡིན་ན། དེའི་ཚེ་དུ་བ་ཡང་སའི་ཡོངས་སུ་འགྱུར་བའི་ཁྱད་པར་ཉིད་ཀྱིས་བསྐྱེད་པར་འགྱུར་གྱི་མེས་བསྐྱེད་པར་ནི་མི་འགྱུར་རོ། །གང་གི་ཕྱིར་འདི་ནི་ཤིན་དུ་བརྟག་བར་དཀའོ། །དེས་ན་ལུས་ཀྱི་འབྱུང་བ་རྒྱུ་མ་ཡིན་ལ་ཕ་མའི་རང་བཞིན་ཡང་མ་ཡིན་པ་དེས་ན་འབྱུང་རྔུབ་ལ་སོགས་པ་ནི་ཞེས་མཇུག་སྡུད་པའོ། །དེ་ལྟར་སྔོན་གྱི་གོམས་པ་བསྒྲུབས་པས། རི་མོ་མཁན་གྱི་རི་མོ་ལྟར་འབྲས་སྦུ་ཉིད་ཡིན་པའི་ཕྱོགས་སུན་ཕྱུང་བ་ཡིན་ལ། དེ་ཉིད་ཀྱིས་རྩིག་པའི་རི་མོ་དང་ཨ་མྲའི་སྨིན་པ་ལྟར་རང་བཞིན་ཡིན་པའི་ཕྱོགས་དང༌། ཆང་གི་ནུས་པ་ལྟར་ཡོན་ཏན་ཡིན་པའི་ཕྱོགས་ཀྱང་སྤངས་པ་ཡིན་ནོ། །འདིའི་ལུས་ཀྱི་འབྲས་བུ་ཡིན་པ་བཀག་པས་ནི་དུ་བ་ལྟར་འབྲས་བུ་ཡིན་པའི་ཕྱོགས་བཀག་ཅིང་སྲིད་པ་སྔ་མ་ཡང་བསྒྲུབས་པ་ཡིན་ནོ། །དེ་བཞིན་དུ་འཆད་བར་འགྱུར་བ་དག་ལ་ཡང་ཅི་རིགས་པར་དཔག་པར་བྱའོ། །འཇིག་རྟེན་ཕྱི་མ་སྒྲུབ་པའི་དོན་དུ་སྐབས་རྩོམ་པ་ནི་གལ་ཏེ་ཞེས་བྱ་བའོ། །འབྲས་བུ་འདུ་བྱེད་པ་ལས་སོ། །རྗེས་སུ་དཔག་པ་དེ་བཤད་པ་ནི་མེད་པ་གང་གིས་སོ། །གང་གིས་དེ་སྐད་བརྗོད་པ་སྔར་མཚམས་སྦྱོར་བའི་ནུས་པ་དང་ལྡན་པ་ཅི་ཞིག་མཐོང་ཞེན། །སྔ་མ་སྔ་མའི་ཞེས་
གསུངས་སོ། །མཐོང་བའི་འདུ་བྱེད་པ་ལས་སྔ་མ་རྗེས་སུ་དཔགས་ཤིང་རྗེས་སུ་དཔགས་པ་དེས་ནི་དེའི་སྔ་མ། དེའི་ཡང་སྔ་མ་ཡང་རྗེས་སུ་དཔགས་པས་རྗེས་སུ་དཔགས་པའི་རྗེས་སུ་དཔག་པ་ལས་ཞེས་བྱ་བ་ལ་སོགས་པས་དེ་ལྟར་ཐོག་མ་མེད་པའོ། །གཡེར་བག་སྟེ་གོམས་པས་སོ། །རང་བཞིན་ཇི་ལྟ་བུའི་གཡེར་བག་མེད་པ་ལས་ཤེ་ན། ལུས་ལ་ལྟོས་ནས་མི་འགུལ་བ་དང༌། སེམས་ལ་ལྟོས་ནས་ཞན་པའོ། །སོགས་པའི་སྒྲས་ནི་ངག་གི་རྒྱུ་བ་ཞན་པ་ལ་སོགས་པ་གཟུང་ངོ༌། །ལྔ་ན་མེད་པའི་སེམས་ཅན་སྐྱེ་བ་ཞེས་བྱ་བ་ནི། ཐོག་མ་དང་ཐ་མ་མེད་པ་དག་ཏུ་མ་གྲུབ་པའི་ཕྱིར་རོ། །གཡོ་བག་ཅན་གྱི་གཡོ་བག་མེད་པ་དེ་ཉིད་སྟོན་པ་ནི་མི་གཞན་པ་ལ་སོགས་པ་ནི་ཞེས་བྱ་བའོ། །གཉི་གའི་མཇུག་སྡུད་པ་ནི་དེ་བས་ན་ཞེས་བྱ་བ་ལ་སོགས་པའོ། །གཞན་ནི་མིག་མི་གསལ་བ་ལ་སོགས་པའོ། །གཞན་དང་ནི་མིག་མི་གསལ་བ་གཞན་དང་ངོ༌། །དོན་ལ་ཉེ་བར་སྦྱོར་བ་ནི་དེས་ན་སྐྱེ་བ་དང་པོར་ཡང་ཞེས་བྱ་བའོ། །ཅི་ལྟར་ཞེས་བྱ་བ་ནི་གཞན་གྱིའོ། །རྫས་གཞན་ལ་ཞེས་བྱ་བ་ནི་གྲུབ་པའི་མཐའོ། །དེ་ཉིད་སྟོན་པ་ནི། སྔགས་དང་ཞེས་བྱ་བའོ། །དཔེ་འདི་ཡང་ཤིན་དུ་རྙེད་སླའོ་སྙམ་དུ་དགོངས་ནས་དཔེར་ན་རྨི་ལམ་ལུས་ལ་ནི་ཞེས་གསུངས་སོ། །རྨི་ལམ་དུ་ནི་དེའི་དུས་ཀྱི་དངོས་པོར་མ་རིག་པའི་ཕྱིར་རོ། །སད་པའི་ལུས་རྣམ་པར་འགྱུར་བ་ནི་ཚིག་འཆོལ་པ་དང་འདར་བ་ལ་སོགས་པའོ། །དེ་བཞིན་སྐྱེ་བ་གཞན་དུ་ཡང་སྐྱེ་བ་གཞན་དུ་བྱས་པའི་གོམས་པ་ལས་ལུས་རྣམ་པར་འགྱུར་བ་ཡིན་ནོ་ཞེས་ལྟའོ། །བཞད་གད་ཁོ་ན་ཡོད་པས་རྩོད་པ་སློང་བ་ནི་འོན་ཏེ་ཞེས་བྱ་བའོ། །རྨི་ལམ་གྱི་ལུས་ནི་མི་བདེན་ལ། སྐྱེ་བ་གཞན་གྱི་ལུས་ནི་བདེན་པ་ཡིན་ནོ་སྙམ་ན། བཞད་གད་ཉིད་གསལ་བར་བྱེད་པ་ནི་ཤིན་ཏུ་ཏེ་པོར་ཞེས་བྱ་བའོ། །སྣང་བཞིན་པ་དང༌། དོན་བྱ་བར་ནུས་པ་ཡིན་པ་དེ་ལྟ་ན་ཡང་མི་བདེན་ནོ་སྙམ་པའི་བླུན་པོ་ལ་ལྟོས་ཤིག་སྙམ་དུ་དགོངས་པ་མ་རྟོག་པའི་དམན་པ་དག་བརྒྱ་ལ་མི་བདེན་པ་ཁོ་ནར་འཛིན་དུ་འོང་སྙམ་པས། བདེན་དང་བདེན་མིན་ཞེས་བྱ་བ་ཞེས་གསུངས་སོ། །དེ་ལྟར་རྩོད་པ་བསལ་ནས་ཐོག་མ་མེད་པ་ཉིད་བསྒྲུབས་ཤིང་སྔ་ན་མེད་
པའི་སེམས་ཅན་སྐྱེ་བ་ཡང་བཀག་པ་ན། དུ་བའི་རྒྱུན་བཞིན་དུ་རྒྱུན་འཆད་པའི་ཕྱིར་མཐའ་མེད་པ་མ་ཡིན་ནོ་ཞེས་བྱ་བའི་རྩོད་པ་བསལ་བའི་དོན་དུ་སྐྱེ་བ་ཕྱི་མ་སྒྲུབ་པ་རབ་ཏུ་སྦྱར་བའི་རྣམ་འགྲེལ་འཆད་པ་ནི་དེའི་ཕྱིར་ཞེས་བྱ་བའོ། །ནུས་པ་དང་ལྡན་པ་ཞེས་བྱ་བ་ནི་མཐུ་དང་ལྡན་པའོ། །ཚང་བ་ནི་ལས་དང་ཉོན་མོངས་པ་ཚོགས་པས་སོ། །འདིས་ནི་ཉེ་བར་ལེན་པ་སྟོབས་དང་ལྡན་པ་ཉིད་བརྗོད་དོ། །དུ་བ་ལ་ནི་སྐད་ཅིག་སོ་སོ་ལ་འོག་ནས་འོག་ཏུ་ལ་འགྲིབ་པ་ཡོད་པའི་ཕྱིར་ཉེ་བར་ལོག་པ་མཚང་བས་ན་ཟད་པར་འཐད་པ་ཡིན་ནོ། །སེམས་ནི་དེ་ལྟ་མ་ཡིན་ཏེ། ཁྱད་པར་ལྷག་དང་ལྷག་དམིགས་པའི་ཕྱིར་ཏེ། འགའ་ཞིག་ལ་མི་གསལ་བར་གྱུར་ཀྱང༌། ཡང་དེ་ཁོ་ན་ལྟར་མཐོང་བའི་ཕྱིར་རོ། །འོན་ཏེ་འཆི་ཀའི་ནད་ལས་འོག་ནས་འོག་ཏུ་འགྲིབ་པས་མཐར་གཏན་ཆད་པར་འགྱུར་རོ་སྙམ་ན། འདི་ནི་ཉེ་བར་ལེན་པའི་སྟོབས་ཆུང་བ་ནི་དུ་བ་བཞིན་དུ་རང་བཞིན་དུ་གྱུར་པ་ནི་མ་ཡིན་གྱི། འོན་ཀྱང་འདི་ནི་འགལ་བའི་སྟོབས་ཀྱིས་ཡིན་ནོ། །སེམས་ལས་ནི་འགལ་བ་ཡང་འགའ་ཡོད་པ་མ་ཡིན་ནོ་ཞེས་ཕྱིས་འཆད་པར་འགྱུར་རོ། །དེས་ན་འདིས་ནི་ལུས་དང་ངག་མི་གསལ་བ་ཙམ་དུ་ཟད་པ་ཡིན་ནོ། །དེས་ན་རྨི་ལམ་གྱི་ལུས་བཞིན་དུ་མཐར་ལུས་དང་ངག་ཉིད་གཏན་ཆད་པར་འགྱུར་གྱི་སེམས་ནི་མ་ཡིན་ནོ། །འོན་ཏེ་ཞེས་བྱ་བ་ནི་གཞན་གྱིའོ། །རྒྱུ་མཐའ་དག་ནུས་པ་དང་ལྡན་པ་ཡིན་མོད། དེ་ལས་འབྲས་བུ་གདོན་མི་ཟ་བར་འབྱུང་བ་མ་ཡིན་ཏེ། དེས་ན་འགལ་པ་ཅི་ཡོད་ཅེ་ན། གྲུབ་པའི་མཐའ་སྨྲ་བས་རྒྱུ་དང་ཞེས་གསུངས་སོ། །དེ་ལྟར་གྱུར་ན་རྒྱུ་དང་འབྲས་བུའི་དངོས་པོ་མེད་པར་ཅི་ལྟར་འགྱུར་ཞེ་ན། འབྲས་བུ་རང་དབང་ཅན་དུ་ཐལ་བའི་ཕྱིར་རོ། །དེ་ཉིད་སྟོན་པ་ནི་རྒྱུའི་རང་བཞིན་ཐམས་ཅད་ནི་ཞེས་བྱ་བའོ། །དེ་ལྟ་ཡིན་ན་ཞེས་བྱ་བ་ནི་རང་དབང་ཡིན་ནའོ། །དེ་ལྟ་ན་ཡང་ཞེས་བྱ་བ་ནི་རྒྱུ་ནུས་པ་ཡིན་ཡང་ངོ༌། །སྐབས་ཀྱི་འབྲས་བུ་མི་འབྱུང་ནའོ། །འབྲས་བུར་མི་འགྱུར་རོ་ཞེས་བྱ་བ་ནི། གཞན་གྱི་ཚེ་ཡང་འབྲས་བུ་སྐྱེ་བར་མི་འགྱུར་ཏེ། རང་དབང་ཡིན་པའི་ཕྱིར་རོ། །འོན་ཏེ་ཞེས་བྱ་བ་ནི་ལྡོག་པ་གཙོ་བོར་གྱུར་པས་རྒྱུ་དང་འབྲས་བུའི་དངོས་པོ་ཡིན་གྱི། རྗེས་
སུ་འགྲོ་བའི་གསོས་ལ་ནི་མི་ལྟོས་སོ་སྙམ་ན། ལན་དུ་དེ་མེད་ན་མེད་དོ་ཞེས་བྱ་བ་ག་ལས་ཞེས་གསུངས་ཏེ། དེ་ཡོད་ཀྱང་འབྲས་བུ་མེད་པར་ཁས་བླངས་པའི་ཕྱིར། དེ་མེད་ན་མེད་དོ་ཞེས་བྱ་བ་ག་ལས་ཡིན་ཏེ། དེ་མ་ཡིན་པ་ཁོ་ན་ཞེས་བྱ་བའི་དོན་ཏོ། །གལ་ཏེ་དེ་ལྟ་ན་རྗེས་སུ་འགྲོ་བ་ལ་ཡང་རྟེན་ཅི་ཡོད་དེ། གང་གི་ཕྱིར་མྱུ་གུ་དང་འབྲས་བུའི་ས་བོན་ཡང་མཐོང་བའི་ཕྱིར་རོ་སྙམ་དུ་བསམས་ནས། གཞན་གྱིས་གལ་ཏེ་དེ་ཡོད་ན་ཞེས་སྨྲས་སོ། །ལན་དུ་དེ་ལྟར་ཡོངས་སུ་ཞེས་བྱའོ། །ས་བོན་ཡོད་ན་མྱུ་གུ་སྐྱེ་བར་མཐོང་བའི་ཕྱིར་རོ། དེ་ཡོད་ན་ཡོད་པ་ཉིད་དུ་ཡོངས་སུ་བཅད་པའི་ཕྱིར་རོ་ཞེས་བྱ་བའི་དོན་ཏོ། །མྱུ་གུ་མེད་པའི་ས་བོན་ནི་མྱུ་གུའི་རྒྱུ་ཉིད་མ་ཡིན་ནོ། །དེ་ལྟ་བསྙད་པ་ནི་རྒྱུའི་རྒྱུ་ཡིན་པའི་ཕྱིར་རོ། །རྒྱུ་མངོན་པར་འདོད་པ་མཐའི་སྐད་ཅིག་ཐོབ་པའི་ས་བོན་ཡང་ཡིན་ལ། དེ་ལས་འབྲས་བུ་ཡང་མི་སྐྱེ་བ་ཞེས་བྱ་བ་ནི་མི་སྲིད་དོ། །དེ་བས་ན་རྒྱུ་ཡོད་ན་གདོན་མི་ཟ་བར་འབྱུང་བ་ཞེས་རྗེས་སུ་འགྲོ་བ་ཡོངས་སུ་བཅད་པ་ཡིན་ནོ། །གལ་ཏེ་དེ་ལྟར་ན་ས་བོན་དང་བྲལ་བའི་ཞིང་ལ་སོགས་པ་ལས་མྱུ་གུ་མི་སྐྱེ་བའི་ཕྱིར་ལྡོག་པ་ཡང་སྔར་གྱི་མི་དམིགས་པས་ཡོངས་སུ་བཅད་པ་ཁོ་ན་མ་ཡིན་ནམ། གལ་ཏེ་བོང་བུ་ལ་སོགས་པ་དེའི་ཚེ་མ་དམིགས་པ་དེ་ལྟ་ན་ཡང་མྱུ་གུ་ནི་དེ་ལྡོག་པའི་རྗེས་སུ་བྱེད་པ་མ་ཡིན་ཏེ། ས་བོན་ཉེ་བར་འོངས་པ་ན། ཚོགས་པ་ཡོངས་སུ་སྨིན་པ་ཙམ་ལ་ལྟོས་ནས་སྐྱེ་བའི་ཕྱིར་རོ། །སྙམ་དུ་བསམས་ནས། དེ་མེད་ན་མེད་དོ་ཞེས་བྱ་བ་འདི་ཡང་ཞེས་སྨྲས་སོ། །གལ་ཏེ་ཡང་ད་ལྟ་དེ་ལྡོག་པའི་རྗེས་སུ་བྱེད་པ་དེ་ལྟ་ན་ཡང་ཐམས་ཅད་ཀྱི་ཚེ་དེ་ལྟ་ཡིན་ནོ་ཞེས་བྱ་བའོ། །ག་ལས་ཞེས་གྲུབ་པའི་མཐའ་སྨྲ་བའི་དོགས་པ་བསུ་ནས་ཐམས་ཅད་ཀྱི་ཚེའོ་ཞེས་སྨྲས་སོ། །དེ་ཡོད་ན་ཡོད་པ་ལ་དེ་ལྟར་བརྗོད་པར་ནུས་པའི་ཕྱིར་རོ་ཞེས་བྱ་བ་དེར་ཁྱེད་ཀྱི་ལན་གང་ཡིན་པ་དེ་ཉིད་འདིར་ཡང་འགྱུར་རོ་ཞེས་བྱ་བར་རིགས་པ་ཡིན་ནོ། །དེ་ལྟར་རྩོད་པར་སྨྲ་བས་རང་གི་གསོ་བའི་བསམ་པས་གྲུབ་པའི་མཐའ་ཉིད་བརྗོད་པའི་མཇུག་སྡུད་པས་ནི་དེའི་ཕྱིར་ཞེས་བྱ་བའོ། །གཉི་ག་མཐོང་བ་ཉིད་གསལ་བར་བྱེད་པ་ནི། དེ་ཡོད་ན་གདོན་མི་ཟ་བར་ཞེས་
བྱ་བའོ། །འདིས་ནི་ཡང་དག་པའི་ཐ་སྙད་ལ་ལྟོས་ནས་རྒྱུ་དང་འབྲས་བུ་དག་ཕན་ཚུན་ཁྱབ་པར་བསྟན་ཏོ། །དོན་དམ་པ་ལ་ལྟོས་ནས་རྩོད་པ་དོགས་པར་བྱེད་པ་ནི་དེ་ལྟར་ཞེས་བྱ་བ་སྟེ་ཁྱབ་པར་རོ། །མཐོང་བ་མེད་པའི་ཕྱིར་ཞེས་བྱ་བ་ནི་རྗེས་སུ་འགྲོ་བ་དང་ལྡོག་པ་དག་གོ །རྒྱུ་དང་འབྲས་བུའི་དངོས་པོ་མ་ཡིན་ནོ་ཞེས་བྱ་བ་ནི་སྔ་མ་དང་ཕྱི་མ་དག་གོ །རྩོད་པ་དེ་ཉིད་སྡུད་པ་ནི། །རྗེས་སུ་འགྲོ་དང་ཞེས་བྱ་བའོ། །གལ་ཏེ་ཁྱད་པར་ཞེས་བྱ་བ་ནི་གྲུབ་པའི་མཐའོ། །ཁ་ཅིག་གཅིག་ལས་འགའ་ལ་ཡང་རྒྱུ་དང་འབྲས་བུའི་དངོས་པོ་མཐོང་བ་མེད་དོ་ཞེས་ལས་ཀྱི་དྲུག་པ་གཞི་ཐ་དད་པར་བྱ་སྟེ་འདོན་ཏོ་ཞེས་བྱ་བ་ནི་ཕྱིར་གྱི་དོན་ཏོ། །དེ་ལྟར་ཡིན་ན་ཅི་གྲུབ་སྙམ་ན། འཇིག་རྟེན་གཞན་ཞེས་མ་ཡིན་ཞེས་བྱ་བའོ། །འབྱུང་བ་འབའ་ཞིག་ལུས་པར་འདོད་པ་ལ་རྣམ་པ་ཤེས་པ་འབའ་ཞིག་ལུས་པར་གྲུབ་པའི་ཕྱིར་རང་དང་གཞན་གྱི་བསྒྲུབ་བྱ་དག་གསལ་བའི་ཕྱིར་རྙེད་པ་ཆེན་པོ་ཐོབ་པའོ། །གལ་ཏེ་ཞེས་བྱ་བ་ནི་མདོ་རྣམས་ནི་བརྒལ་ཞིང་བརྟག་པ་ཙམ་ལྷུར་བྱེད་པ་ཡིན་གྱི། དོན་དམ་པར་ནི་འགའ་ཡང་ཡོད་པ་མ་ཡིན་ནོ། །རྒྱུ་དང་འབྲས་བུའི་དངོས་པོའམ། འབྱུང་བ་ནི་ཐ་སྙད་ཙམ་དུ་ཡོད་པ་ཡིན་ནོ་ཞེ་ན། ལན་དུ་འཇིག་རྟེན་ཕ་རོལ་ཡང་དེ་བཞིན་ནོ་ཞེས་བྱ་བ་སྟེ། ཐ་སྙད་དུ་ཡོད་པ་ཡིན་ནོ་ཞེས་བྱ་བ་ནི་ལྷག་མའོ། །གལ་ཏེ་རྒྱུའི་དངོས་པོ་ཐ་སྙད་དུ་ཡང་ཁས་མི་ལེན་ན། དེའི་ཚེ་འབྱུང་བ་དག་ལས་སེམས་པ་ཞེས་བྱ་བ་དང༌། འགའ་ཞིག་ཏུ་འཇུག་པའམ་ལྡོག་པ་ཡང་མི་འགྲུབ་པོ། །ཁས་ལེན་ན་ཡང་བློ་ནི་བློ་ཉིད་ལས་ཡིན་ནོ་ཞེས་བསྒྲུབས་པ་ཡིན་ནོ། །གལ་ཏེ་ཞེས་བྱ་བ་ནི་སྡུད་པའོ། །གལ་ཏེ་ཚད་མའི་གེགས་ཡིན་པའི་ཕྱིར་ན་ཐ་སྙད་ཅེས་བྱ་བ་བསླད་པ་ཉིད་མ་ཡིན་ནམ། དེས་ན་འཇིག་རྟེན་ཕ་རོལ་ལ་བསྙོན་པ་དང༌། བསྒྲུབ་པ་དག་ཁྱད་པར་ཅི་ཞིག་ཡོད་ན་གང་གིས་དེ་གྲུབ་པའི་ཐ་སྙད་ལ་གུས་ཤེ་ན། འཁྲུལ་པ་ཡིན་གྱི་འོག་ཏུ་ཞེས་གསུངས་སོ། །འདི་ཉིད་ཅེས་བྱ་བ་ནི་འཇིག་རྟེན་ཕ་རོལ་སྒྲུབ་པའི་མཚན་ཉིད་དོ། །བླ་སྟེ་ཞེས་བྱ་བ་ནི་ཅུང་ཟད་འདོད་པའི་དོན་ཏོ། །གཉིས་སུ་མེད་པའི་གཞག་པ་ལ་ལྟོས་ན་ནི་གཉིས་པོ་འགའ་ཡང་མེད་
དོ། །དེ་ལ་མ་ལྟོས་ན་ནི་འཇིག་རྟེན་ཕ་རོལ་བསྙོན་པ་བས་བསྒྲུབ་པ་ཉིད་བསྡམ་པར་བྱ་བ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། ཞི་བ་དང་ཞེས་སྨོས་ཏེ། གཉེས་སུ་མེད་པ་མངོན་དུ་བྱས་པའི་གནས་སྐབས་དེ་དེར་ཉོན་མོངས་པ་དེའི་ལས་རྣམས་རབ་ཏུ་ཉེ་བར་ཞི་བའི་ཕྱིར་རོ། །མཐོ་རིས་ནི་མངོན་པར་མཐོ་བའི་སྒྲས་བརྗོད་པར་བྱ་བ་སྟེ། རབ་ཏུ་གྲུབ་པ་ཁོ་ནའོ། །འབྲས་བུ་དེ་གཉིས་ཀ་དང་རྗེས་སུ་མཐུན་པའི་ཕྱིར་རོ། །དེ་ལྟར་འཇིག་རྟེན་གཞན་ངེས་པའི་ཡོན་ཏན་བརྗོད་ནས། དེ་མ་ངེས་པའི་ཉེས་པ་བཤད་པ་ནི། འདོད་ཆགས་པའི་ནོར་པ་ནི་ཞེས་བྱ་བའོ། །འཇིག་རྟེན་ཕ་རོལ་ངེས་ན་ནི་ཉོན་མོངས་པ་ལ་སོགས་པའི་ཚོགས་ལས་བྱང་ཞིང་གྲོལ་བར་བྱས་པའི་དོན་དུ་འབད་པ་ཡིན་ལ། དེ་ཡང་སྐྱེ་བ་བརྒྱུད་པར་གོམས་པ་མཐར་ཕྱིན་པ་ན་འགྲུབ་ཅིང༌། བར་དུ་ཡང་མི་འདོད་པའི་རང་གི་ལས་ལ་དེ་རྣམས་ཀྱི་རྒྱུ་བ་འགོག་པར་བྱེད་པ་ཡིན་ནོ། །དེ་མ་ངེས་ན་འདོད་ཆགས་ལ་སོགས་པའི་ནོར་པ་བྱུང་རྒྱལ་དུ་གཞག་པ་ནི། གཉི་གའི་མཚན་ཉིད་ཅན་གྱི་འབྲས་བུ་ཕན་པ་མཐའ་དག་དང་མཐོང་བའི་ཡོན་ཏན་སྐྱེ་བོ་དམ་པ་དེ་དག་ཉམས་པར་བྱེད་པ་ཉིད་ཡིན་ནོ། །དམ་པའི་ལམ་དུ་འཇུག་པ་ལ་ནི། སྐྱེ་བོ་དམ་པ་ཞེས་ཐ་སྙད་དུ་བྱེད་དོ། །དེས་ན་ཐ་སྙད་ལ་བརྟེན་ན་ནི་ཐ་སྙད་འདི་ལ་བརྟེན་པ་ཉིད་བླའོ། །རྨི་ལམ་དུ་ཡང་བདེ་བའི་ཆ་རྐྱེན་གྱི་རྣམ་པ་དེ་འདོད་པ་ཡིན་གྱི། འཇིགས་སུ་རུང་བའི་རྣམ་པ་ནི་རྟོག་པར་མི་འདོད་དོ། །གལ་ཏེ་མིག་ལ་སོགས་པའི་འཇིག་རྟེན་ཕ་རོལ་སྒྲུབ་པར་བྱེད་པ་ནོར་པ་ཡང་ཇི་ལྟར་འདོད། ཇི་ལྟར་རྣམ་པར་རིག་པ་ཙམ་གྱི་ཕྱོགས་ལ་ནི་དབང་པོ་རྣམས་གློ་བུར་དུ་སྐྱེ་བར་འགྱུར་གྱི། འབྱུང་བ་ཙམ་རྒྱུ་ཡིན་པ་ལ་ནི་བློ་བཞིན་དུ་ཧ་ཅང་ཐལ་བར་འགྱུར་རོ། དབང་པོ་རྣམས་ནི་བློ་བཞིན་དུ་རིགས་མཐུན་པ་སྔ་མ་དང་འབྲེལ་པར་ཡང་མི་འཐད་དེ། ནད་དང་གཞན་གྱི་གནོད་པ་དང༌། རིམས་ཀྱིས་ཕལ་ཆེར་མིག་ལ་སོགས་པ་ཉམས་པ་སྲིད་པའི་ཕྱིར་ན། དེ་དག་ལ་ཡང་དབང་པོ་འཐོབ་པ་ལྟར་འགྱུར་སྙམ་ན། འདི་ལྟར་ཞེས་བྱ་བ་ལ་སོགས་པ་གསུངས་སོ། །དེ་སྐད་
དུ་ཡང་དབུས་དང་མཐའ་རྣམ་པར་འབྱེད་པ་ལས། དོན་དང་སེམས་ཅན་བདག་རྣམ་རིག །སྣང་བའི་རྣམ་པར་ཤེས་པ་ནི། །རབ་ཏུ་སྐྱེའོ་དེ་དོན་མིན། །ཞེས་གསུངས་སོ། །དེ་བདག་ཏུ་སྣང་བ་ནི་དབང་པོར་སྣང་པའོ། །གལ་ཏེ་སྔོན་པོ་ལ་སོགས་པ་གསལ་བ་ཉིད་ཀྱིས་རྣམ་པར་རིག་པའི་ནང་དུ་འདུས་པར་རིགས་ཀྱི། རྟག་ཏུ་ལྐོག་ཏུ་གྱུར་བའི་ཕྱིར། །དབང་པོ་གོ་ཇི་ལྟར་སྙམ་ན། བདེན་ཏེ་ལུགས་འདི་ལ་དེ་མ་ཐག་བའི་ནུས་པའི་ཁྱད་པར་ཉིད་དབང་པོ་ཡིན་ལ། དེའང་དེ་མ་ཐག་པའི་རྐྱེན་གྱིས་རང་བཞིན་ཡིན་པ་དེས་ན་སྐྱོན་མེད་དོ། །དཔེར་ན་དབང་པོ་ཐ་དད་པ་ལྟ་བུར་བརྟགས་པ་དེ་ལྟར་རྣམ་པར་རྟོག་པའི་བདག་ཉིད་ཀྱིས་ཤེས་པ་ལ་དབང་པོར་སྣང་བ་ཞེས་བརྗོད་དོ། བརྟགས་པའི་དབང་པོ་ཡང་བག་ཆགས་ཀྱི་སྟོབས་ལ་བརྟེན་པའི་རྣམ་པར་རིག་པ་ཙམ་ཞེས་བརྗོད་དོ། །དེ་བཞིན་དུ་ངར་འཛིན་པ་ལ་སོགས་པས་བརྟགས་པའི་ཡོད་པ་ལ་ཡང༌། དེ་སྣང་བ་ལ་སོགས་པ་རྣམ་པར་གཞག་གོ །དེས་ན་ཞེས་བྱ་བ་ནི་གང་གི་ཕྱིར་མིག་ལ་སོགས་པ་བག་ཆགས་ཀྱི་སྟོབས་ལ་བརྟེན་པ་དེས་ན་རྣམ་པ་དེ་ལྟ་བུའི་ལས་ཀྱི་སྟོབས་ཀྱིས་བག་ཆགས་མི་མཐུན་པར་གྱུར་པས། དབང་པོ་ཚོགས་ཉམས་པར་གྱུར་ཀྱང༌། ངེས་བསྐྱེད་པའི་བག་ཆགས་ཀྱི་སྟོབས་ཀྱིས་དབང་པོ་ཉམས་པ་ཉིད་ལས་ལུས་གཞན་ལ་མིག་ལ་སོགས་པ་འབྱུང་བར་མི་འགལ་ལོ་ཞེས་བྱ་བའི་དོན་ཏོ། །ད་ནི་སྐབས་སུ་བབ་པའི་ཐོག་མ་དང་ཐ་མ་མེད་པ་ཉིད་ཀྱི་གཞི་འཛུགས་པ་ནི་དེ་བས་ན་ཞེས་བྱ་བའོ། །རྣམ་པ་འདི་ཉིད་ཅེས་བྱ་བ་ནི་དེ་ལྟ་བུའི་རྒྱུ་ཉེ་བར་གནས་པ་གྱུར་ན་ཡང་མིག་ལ་སོགས་པ་ཉམས་པ་དང་སྐྱེ་བ་ལ་སོགས་པ་ཡིན་ལ། རྣམ་པར་ཤེས་པ་ནི་རང་གི་ངོ་བོས་གནས་པའོ། །དེས་ན་འཁོར་བ་ནི་ཐོག་མ་དང་ཐ་མ་མེད་པ་ཡང་ཡིན་ཏེ། དེའི་རྣམ་པ་དང་ལྡན་པ་སྔ་མ་སྔ་མ་མཐའ་དག་ནི་སྔ་མ་སྔ་མ་ལ་ལྟོས་པའི་ཕྱིར་རོ། །དེ་ལྟ་ན་ནི་དེ་ཁོ་ན་བཞིན་དུ་ཐ་མ་ཡང་མེད་པར་འགྱུར་བས་ན། དེ་ཁོ་ན་གོམས་པ་དོན་མེད་ལ། དེའི་དོན་དུ་འཇིག་རྟེན་ཕ་རོལ་སྒྲུབ་པ་ཡང་འབྲས་བུ་མེད་དོ་སྙམ་ན། ཅི་སྲིད་ཅེས་གསུངས་སོ། །ནོར་བ་རབ་ཏུ་མ་ཞིབ། །ཞེས་བྱ་བ་ནི་
གཉིས་སུ་མེད་པ་མངོན་སུམ་ཏུ་མ་གྱུར་པའོ། །དེ་སྲིད་དུ་ནི་ཞེས་བྱ་བ་དུས་དེ་སྲིད་གནས་པ་ལ་ལྟོས་ནས་ཐམ་མེད་པའི་ཐ་སྙད་དུ་འགྱུར་རོ་ཞེས་བྱ་བའི་དོན་ཏོ། །དེ་ལྟར་རྣམ་པར་རིག་བ་ཙམ་ལ་གནས་པ་ལ་མིག་ལ་སོགས་པའི་འཇིག་རྟེན་ཕ་རོལ་སྒྲུབ་པ་འགལ་བ་མེད་དོ་ཞེས་གནས་སོ། །གལ་ཏེ་བག་ཆགས་ཀྱི་སྟོབས་ལ་བརྟེན་པས་ན་དེ་ལྟར་འགྱུར་མོད་ཕྱི་རོལ་དོན་ལ་གོ་དེ་ཅི་ལྟར་འགྱུར་ཞེ་ན། མིག་ལ་སོགས་པ་བདེན་པ་ཉིད་དམ་ཞེས་གསུངས་ཏེ། བག་ཆགས་ཀྱི་རང་བཞིན་ཉིད་མ་ཡིན་པ་ཉིད་ཡིན་ཡང་ངོ༌། །ཕྱི་རོལ་གྱི་དོན་ཡིན་པ་ཞེས་བྱ་བ་ནི་སྔོན་པོ་ལ་སོགས་པའི་ཚོགས་སོ། །ཡང་ན་མིག་ལ་སོགས་པ་རྣམ་པར་ཤེས་པའི་རང་བཞིན་དུ་བདེན་པ་ཉིད་དམ། བེམས་པོའི་རང་བཞིན་ཉིད་ཀྱི་ཕྱི་རོལ་གྱི་དོན་ཡིན་ཡང་རུང་སྟེ་ཞེས་བྱ་བ་ཡིན་ནོ། །རང་བཞིན་འདི་ཐོག་མ་མེད་པ་ཞེས་བྱ་བ་ནི་མིག་ལ་སོགས་པ་ཡང་ནས་ཡང་འཇིག་པ་དང༌། མ་མཐོང་བའི་སྟོབས་ཀྱི་དབང་པོ་ལ་སོགས་པས་ཉམས་པ་དག་ཉིད་ལས་ཡང་ནས་ཡང་ལུས་གཞན་ལ་འབྱུང་བའོ། །གཉི་ག་ལ་ཡང་སེམས་ནི་རྒྱུན་མི་འཆད་པར་གྲགས་པ་དང་མིག་ལ་སོགས་པ་རྣམས་ཀྱང་མཐའ་མེད་པའོ་ཞེས་བྱ་བ་ནི་བསྡུས་པའི་དོན་ཏོ། །ཐོག་མ་མེད་པ་ཉིད་རྣམ་པར་གནས་པ་ནི་སྔ་མ་བཞིན་ནོ། །ཕྱི་རོལ་ལ་ནི་ནོར་བ་བདག་ཏུ་ལྟ་བ་ཡིན་ལ། བདག་མེད་པ་མངོན་དུ་བྱས་པ་ནི་མཐར་ཕྱིན་པའོ། །ཇི་སྐད་དུ་སྲོག་ཆགས་བསྐྱེད་པ་དང༌། རྗེས་སུ་མཐུན་པའི་ཁྱད་པར་ལ་སོགས་པ་ལ་དམིགས་པ་མེད། དེ་རྟོག་པ་ཙམ་དུ་ཟད་དོ་ཞེས་བརྗོད་པ་དེ་ལ་སྨྲས་པ་ནི་གལ་ཏེ་ཞེས་བྱ་བ་ལ་སོགས་པའོ། །སྲ་བ་ཉིད་ལ་སོགས་པས་ཞེས་བྱ་བས་ནི་འཇམ་པ་ཉིད་དམ་དྲིང་བ་ཉིད་ལ་སོགས་པ་ཅི་ལྟར་མཐོང་བའི་ཁྱད་པར་རྣམས་སྡུད་པའོ། །དྲོད་གཤེར་ལས་སྐྱེ་བ་ཞེས་བྱ་བས་གསེབ་ནས་དྲོད་གཤེར་ལས་སྐྱེ་བ་དང༌། དེའི་རྣམ་པར་འགྱུར་བ་ཤིང་ལ་སོགས་པ་ནས་སོ། །མངལ་ནས་སྐྱེས་པ་དང༌། དྲོད་གཤེར་ལས་སྐྱེས་པ་ཡངས་སའི་རྣམ་པར་འགྱུར་བ་ཉིད་མངལ་དུ་སྐྱེ་བ་ཡིན་ནོ། །རྫུས་ཏེ་སྐྱེ་བ་ལ་ནི་རེ་ཞིག་
ལོག་པར་རྟོགས་པ་ཉིད་ཡོད་པ་ཡིན་ནོ། །འོན་ཏེ་ཞེས་བྱ་བས་ནི་སའི་རྣམ་པར་འགྱུར་བའི་རྣམ་པར་དབྱེ་བས་སྲོག་ཆགས་ཀྱི་རྒྱུ་ཡིན་ཞེས་སྟོན་པའོ། །རྡོ་དང་ཀ་བ་ལ་སོགས་པ་ལ་ནི་སྐྱེ་བ་མི་སྲིད་དོ་སྙམ་དུ་བསམས་པའོ། །གལ་ཏེ་རྡོའི་དཀྱིལ་ན་ཡོད་པའི་སྲོག་ཆགས་ཀྱང་སྐྱེ་བར་གྲགས་པ་ཡིན་མོད་ཀྱི། འོན་ཀྱང་གཞན་ཉིད་བརྗོད་པ་ནི་དེའི་ཚེ་ཞེས་བྱ་བའོ། །དེའི་རང་བཞིན་ཅན་གྱི་སྲོག་ཆགས་ཀྱིས། བདག་ཉིད་ཅེས་བྱ་བ་ནི་བདག་ཉིད་གཅིག་གིས་བསྐྱེད་པའི་རང་བཞིན་ནོ། །འདི་ཉིད་བརྗོད་པ་ནི་བསྩགས་ནས་གཞག་པའི་ཞེས་བྱ་བའོ།། མགོ་དམར་བ་ཞེས་བྱ་བ་ནི། ལུས་མདོག་གཞན་དང་ལྡན་པའོ། །གཞན་ནི་དེ་དང་མི་འདྲ་བའོ། །ལུས་སེར་པོ་ནི་མགོ་མདོག་གཞན་དང་ལྡན་པའོ། །དེ་བཞིན་དུ་ལུས་སྔོན་པོ་ལ་སོགས་པ་ཡང་རིག་པར་བྱའོ། །གལ་ཏེ་ལས་ཀྱི་དབྱེ་བ་ཁས་མི་ལེན་ན་རྣམ་པ་དེ་དག་རྒྱུ་ཅི་ལས་བྱུང་སྙམ་དུ་དགོངས་པའོ། །འོན་ཏེ་རྒྱུ་རིགས་མཚུངས་པ་ཉིད་ལས་སྲོག་ཆགས་རྣམས་ཀྱི་རྣམ་པ་ཐ་དད་པར་འགྱུར་རོ་སྙམ་ན། ནམ་ཡང་ཞེས་བྱ་བ་ལ་སོགས་པའོ། །རང་བཞིན་གཅིག་བ་ཅན་གྱི་པདྨ་དཀར་པོ་ལ་སོགས་པའི་ས་བོན་ལ་སོགས་པ་དུ་མ་དག་བདག་ལས་དཀར་པོ་དང་དམར་པོ་ལ་སོགས་པའི་རང་བཞིན་གྱི་པདྨ་ལ་སོགས་པའི་དབྱེ་བ་ངེས་པ་མེད་པར་འགའ་ཞིག་གི་ཚེ་མཐོང་བའམ། འདོད་པ་ཡང་མ་ཡིན་ནམ་ཅི། འདུས་བྱས་པ་ལས་ནི་ཐ་དད་པར་འགྱུར་སྲིད་པ་ཡིན་ཏེ། སྐྱུ་རུ་རའི་འབྲས་བུ་བཞིན་ནོ། །དེས་ན་དེའི་རང་བཞིན་ཞེས་བརྗོད་དོ། །ཆུ་ལ་སོགས་པའི་མཚན་ཉིད་ཅན་གྱི་ས་བོན་རིགས་གཅིག་ལས་ནི་སྲོག་ཆགས་ཀྱི་དབྱེ་བ་ངེས་པ་མ་ཡིན་ཏེ། འོན་ཀྱང་སྣ་ཚོགས་པ་ཁོ་ནའོ། །དེས་ན་གལ་ཏེ་མཐོང་བའི་ཁྱད་པར་ཡོངས་སུ་རྟོགས་པར་ཁས་ལེན་ན། སྲོག་ཆགས་ཀྱི་དབྱེ་བ་འདི་ལ་ལས་ཉིད་ངེས་བྱེད་ཡིན་ཏེ་རྣམ་པ་སྣ་ཚོགས་པའི་ཕྱིར་རོ། །སྐབས་ཀྱི་མཇུག་སྡུད་པ་ནི་དེའི་ཕྱིར་ཞེས་བྱ་བ་ལ་སོགས་པའོ། །ས་ལ་སོགས་པའི་ས་གཅིག་ཅི་ལྟར་གཡོ་བག་ཅན་ལ་སོགས་པའི་རང་བཞིན་དུ་ཡོངས་སུ་གྱུར་པ་དེ་བཞིན་དུ། གཞན་ཐམས་ཅད་
ཀྱང་འགྱུར་ཏེ་ཁྱད་པར་མེད་པའི་ཕྱིར་རོ་ཞེས་བརྗོད་པ་ཡིན་ནོ། །གལ་ཏེ་བློ་གནས་ཀྱང་སྔོན་ཡོད་པའི་མིག་འཆི་བའི་དུས་ན་ཞིག་པའམ་གསོན་བཞིན་དུ་ཕྱུང་བ་དེས་ན། སྲིད་པ་འདིར་འབྲས་བུ་ལ་རེ་བ་རྒྱང་རིང་ངོ་ཞེ་ན། འདི་ལས་འདས་ནས་རིང་དུ་ལོན་པ་ཡང་སྐྱེད་པར་བྱེད་པ་ཡིན་ནོ་ཞེས་བརྗོད་ཟིན་ཏོ། །དེ་ལྟ་མ་ཡིན་ན་མ་ལ་གཅིག་ནས་སྐྱེས་བ་གཉིས་ཀྱི་མིག་གཡོ་བག་ཅན་དང༌། གཡོ་བག་ཅན་མ་ཡིན་པའི་རྣམ་པར་དབྱེ་བར་མི་འགྱུར་རོ། །བློའི་འདུ་བྱེད་པ་ལས་རྣམ་པར་དབྱེ་བར་འགྱུར་རོ་ཞེ་ན། བློ་ཡང་རྣམ་པ་ཐམས་ཅད་དུ་འགགས་པར་མཐོང་བའི་དེར་ཚུལ་ཇི་ལྟར་ཡིན། དེ་ཅིའི་ཕྱིར་ཅི་ལྟར་འགགས་ནས་ཡུན་རིང་དུ་ལོན་པའི་བློ་དེ་མ་ཐག་བའི་རྐྱེན་ཡིན་པ་དེ་བཞིན་དུ་འགགས་ནས་ཡུན་རིང་དུ་ལོན་པའི་མིག་ཀྱང་མིག་གི་རྒྱུ་ཡིན་ནོ། །དེ་པས་མིག་ལ་སོགས་པས་ནི་རང་གི་རིགས་སྔ་མ་ལ་རག་ལས་པ་ཁོ་ནའོ། །དེ་བས་ན་འཇིག་རྟེན་གཞན་དག་གདོན་མི་ཟ་བར་གྲུབ་པོ། །གཞན་ཡང་ཞེས་བྱ་བ་ལ། དེའི་འདུ་བྱེད་ཀྱི་རྗེས་སུ་འཇུག་པའི་ཕྱིར་ཡིད་ཀྱི་རྣམ་པར་ཤེས་པ་ལ་བརྟེན་པའི་དབང་པོ་རྣམས་ནིའོ། །རང་གི་འབྲས་བུ་བྱེད་པ་ནི་དེས་སྐུལ་བ་ཁོ་ནས་ཁྱད་པར་དུ་ཡུལ་རྟོགས་པའི་སྒྲུབ་བྱེད་ཡིན་པའི་ཕྱིར་རོ། །གང་ལས་དེ་རྣམས་ཉམས་པས་ཡིད་ཀྱི་བློ་ཉམས་པར་དོགས་པའམ། སྤང་བར་འགྱུར་བ་མི་འདོད་པ་འགོག་པ་ནི་ཡིད་ཀྱི་རྣམ་པར་ཤེས་པ་ཉིད་ནི་ཞེས་བྱ་བའོ། །ཡང་ན་དབང་པོ་རྣམས་ནི་ཡིད་ཀྱི་རྣམ་པར་ཤེས་པ་ལ་བརྟེན་ནས་འབྲས་བུ་བྱེད་པར་མཐོང་གི །ཡིད་ཀྱི་རྣམ་པར་ཤེས་པ་ནི་དེ་ལ་བརྟེན་ནས་བྱེད་པ་མ་མཐོང་ངོ༌། །དེས་ན་དབང་པོ་ལ་སོགས་པ་ནི་ཤེས་པ་ཁོ་ན་ལས་ཡིན་པར་བརྟག་པར་བྱ་བ་ཡིན་ནོ། །དབུས་ཀྱི་གནས་སྐབས་ན། བྱེད་པ་དེ་ལ་རག་ལས་པར་མཐོང་བའི་ཕྱིར་སྐྱེ་བ་དང་པོར་ཡང་དེ་ལས་རག་ལས་པར་བརྟག་པར་བྱ་བ་ཡིན་ནོ་ཞེས་བྱ་བའི་དོན་ཏོ། །དེས་ན་འདི་དག་ནི་ཡིད་ཀྱི་རྣམ་པར་ཤེས་པ་ཁོ་ན་ལས་སམ། རང་གི་རིགས་ལས་སྐྱེ་བ་ཡིན་གྱིས་དང་ཆུ་ལ་སོགས་བདག་ལས་ནི་མ་ཡིན་ནོ། །དེས་ན་དེ་ཙམ་ལས་ནི་མ་ཡིན་ནོ་ཞེས་བྱ་བའི་དོན་ཏེ།
མཐོང་བ་ཉིད་ནི་རྣམ་པ་ཐམས་ཅད་དུ་སྤང་བ་མ་ཡིན་ནོ། །འཇུག་པ་གཉིས་པ་ལ་ནི་རྣམ་འགྲེལ་འདི་ཉིད་འདྲི་བར་འགྱུར་རོ། །དེ་ཉིད་བརྗོད་པ་ནི་ཡང་ན་ཞེས་བྱ་བའོ། །དེའི་ཚོགས་པ་ཞེས་བྱ་བ་ལ་དེའི་སྒྲས་ནི་ས་དང་ཆུ་ལ་སོགས་པ་གཟུང་ངོ༌། །དབུགས་ཕྱུང་རྔུབ་ལ་སོགས་པ་ནི་ཞེས་སོགས་པའི་སྒྲས་ནི་དབང་པོ་ཡང་ངོ༌། །ཕ་མའི་ས་བོན་ནི་ཁུ་བ་དང་ཁྲག་ལ་སོགས་པས་བསྡུས་པར་བྱུང་བའི་ཚོགས་སོ། །ཙམ་ལས་ཞེས་བྱ་བ་ནི་རིགས་མཐུན་པ་སྔ་མ་ལས་མ་ཡིན་པའོ། །འདི་ནི་འཇིག་རྟེན་རྒྱར་འཕན་པའི་འདོད་པ་སྐྱོང་བ་སྟེ། དེ་ལྟར་ཡིན་ཡང་ངེད་ཀྱི་འཁོར་བ་ལ་ཆད་པ་མེད་དོ་ཞེས་བྱ་བའི་དོན་ཏོ། །ཅི་སྟེ་དེ་ལྟར་ཡིན་ཞེ་ན། འཁོར་བ་ཡང་ཞེས་གསུངས་སོ། །ཆོས་མངོན་པ་ལས་འཁོར་བ་ནི་ཡིད་ཀྱི་རྣམ་པར་ཤེས་པ་ཉིད་ལ་བརྗོད་པ་ཡིན་ནོ་ཞེས་བཤད་པ་ནི་ལོག་པར་ལྟ་བས་ཉམས་པས་ན་དགེ་བའི་རྩ་བ་རྣམས་ཆད་པ་དང༌། དེ་བསལ་བས་དེ་དག་ཕྱིར་འབྲེལ་བའི་མཚམས་སྦྱོར་བ་དང༌། ཆད་པ་སྤངས་པའི་འདོད་ཆགས་དང་བྲལ་བ་དང༌། དབང་པོ་རྟུལ་བས་ན་འབྲས་བུ་གཉིས་པ་ལས་ཉམས་པ་དང༌། སྐལ་པ་མཉམ་པའི་སྡེ་ལས་ཉམས་པའི་འཆི་འཕོ་བ་སྟེ། འཆི་བ་ཞེས་བྱ་བའི་དོན་དག་ཡིན་པ་དང༌། སྐྱེ་བ་གཞན་ཡོངས་སུ་འཛིན་པའི་སྐྱེ་བ་རྣམས་སོ། །མཚུངས་པ་དེ་མ་ཐག་པའི་ཤེས་པའི་བདག་ཉིད་དབང་པོ་དྲུག་པ་ནི་ཡོད་དོ། །དེ་ཙམ་ལ་བརྟེན་པའི་ཤེས་པ་ནི་ཡིད་ཀྱི་རྣམ་པར་ཤེས་པ་སྟེ། མིག་ལ་སོགས་པ་ལ་མི་བརྟེན་པའི་ཕྱིར་ན་རྣམ་པར་རྟོག་པ་ཡིན་ནོ། །འདི་ལ་འཆི་འཕོ་བ་དང་སྐྱེ་བའི་ཁྱད་པར་བཤད་པ་ནི། བཏང་སྙོམས་ན་ནི་སྐྱེ་འཆི་དག །ཅེས་བྱ་བ་སྟེ། བཏང་སྙོམས་ཀྱི་རྣམ་པ་ཅན་གྱི་རྣམ་པར་རྟོག་པར་ཡོད་པར་གྱུར་པ་ན་འཆི་བ་དང་སྐྱེ་བ་དག་ཏུ་འགྱུར་རོ་ཞེས་བྱ་བའི་དོན་ནི་ཆོས་མངོན་པ་མཛོད་ནས་བཤད་པའོ། །གཞན་དུ་ནི་སྲིད་པའི་རྣམ་པར་རྟོག་པ་ཡོད་ན་སྐྱེ་བ་ཡོངས་སུ་འཛིན་པ་ཡིན་ནོ་ཞེས་ངེས་པར་བྱས་སོ། །འདིས་ནི་རྣམ་པར་རྟོག་པ་ཉིད་འཁོར་བ་ཡིན་ནོ་ཞེས་སྐབས་བསྒྲུབས་པ་ཡིན་ནོ། །ལྷག་མ་ནི་ཞར་ཡིན་ནོ། །དེ་ཉིད་བཤད་པ་ནི་དེས་ན་ཡིད་ཅེས་གསུངས་སོ། །སྐབས་ཀྱིས་ན་
རྣམ་པར་རྟོག་པ་ཅན་ཞེས་བྱ་བའི་དོན་ཏོ། །མིག་ལ་སོགས་པའི་རང་བཞིན་དུ་གྱུར་བའི་འབྱུང་བ་ལ་བརྟེན་པའི་ནི་མ་ཡིན་ཏེ། དེ་ལ་བརྟེན་ནས་འཁོར་བ་ཉིད་དུ་མི་འཐད་བའི་ཕྱིར་རོ། །རྣམ་འགྲེལ་དུ་ཡང་ཡིད་ནི་དབང་པོ་དང་བཅས་པའི་ལུས་ཀྱི་རྣམ་པའི་འབྱུང་བ་ལ་བརྟེན་པའི་མ་ཡིན་གྱི། འབྱུང་བ་རྣམས་ཉིད་ནི་དེ་ལ་བརྟེན་པ་དང་དེས་ན་འཁོར་བ་ཡིན་པར་བཤད་དོ། །འཇུག་པ་དང་པོ་ལ་ནི་སྦྱར་བསླབ་ཁོ་ནའོ། །གལ་ཏེ་བདེ་བར་གནས་པའི་གནས་སྐབས་དག་ཅུ་བདེ་བ་ལ་སོགས་པ་ཉམས་སུ་མྱོང་བ་ལས་ཡིད་བདེ་བ་ལ་སོགས་པའི་རྣམ་པར་རྟོག་པ་སྐྱེ་བའི་ཕྱིར། ཅི་ལྟར་འབྱུང་བ་ལ་བརྟེན་པའི་མ་ཡིན་ཏེ། དེ་འགྱུར་ན་འགྱུར་བའི་ཕྱིར་རོ་སྙམ་ན། དེ་བཞིན་དུ་ཞེས་གསུངས་ཏེ། ཚུལ་དེ་ལྟ་བུ་ཉིད་དུའོ། །ཇི་ལྟ་ཞེ་ན། བཤད་པ་ག་བ་ཞིག་ཡིད་ཀྱི་རྣམ་པར་ཤེས་པས་རྣམ་བར་འགྱུར་བར་བྱ་བ་དབང་པོ་ལྔའི་ཚོགས་ཀྱི་རང་བཞིན་དུ་གྱུར་པ་ལུས་དེ་ལ་བརྟེན་པའི་ཕྱིར་རོ། །འདི་སྐད་བརྗོད་པ་ཡིན་ཏེ། ཁྱེད་ཀྱི་ལུགས་གང་ཞིག་ཡིད་ཀྱི་རྣམ་པར་ཤེས་པའི་འབྲས་བུས་བསྟན་པ་དེ་ཡང་རྒྱུད་ནས་ཡིད་ཀྱི་རྣམ་པར་ཤེས་པའི་འབྲས་བུ་ཡིན་པའི་ཕྱིར་བཤད་ཟིན་པའི་ཚུལ་གྱིས་དེ་ལ་རྟོགས་པ་བསྒྲུབ་པ་ཡིན་ནོ། །དེས་ན་རྒྱུད་པ་ཆོལ་ན་ཡིད་ཀྱི་རྣམ་པར་ཤེས་པ་ནི་ཤེས་པ་སྔ་མ་ཉིད་ལ་བརྟེན་ནས་འཇུག་པ་ཡིན་ནོ། །འོན་ཏེ་དེའང་ལུས་ལ་བརྟེན་པར་བརྗོད་ན། ལུས་ཀྱང་དེ་བཞིན་དུ་སེམས་ལ་བརྟེན་པས་ན་མཐའ་ཐུག་པ་མེད་དོ། །ཡིད་ཀྱི་རྣམ་པར་ཤེས་པ་དེ་ཉིད་ལས་སོ། །གཞན་དུ་ཞེས་བྱ་བ་ནི་སོམ་བཏང་བའི་གནས་སྐབས་ནའོ། །གཞན་དུ་མཐོང་བ་དེས་ན་མེ་དེ་ཉིད་ལས་མ་ཡིན་ནོ། །དབང་བོ་ནི་ཡིད་ཀྱི་རྣམ་པར་ཤེས་པས་བྱས་པའི་རྣམ་པར་འགྱུར་བ་ལས་གཞན་དུ་མ་མཐོང་ངོ༌། །དེས་ན་མིག་ལ་སོགས་པ་ནི་ཡིད་ཀྱི་རྣམ་པར་ཤེས་པ་ཁོ་ན་ལས་ཡིན་ནོ། །འདི་ཉིད་གསལ་བར་བྱེད་བ་ནི་དབང་བོ་ལ་སོགས་པ་ཐམས་ཅད་ནི་ཞེས་བྱ་བའོ། །དེས་ན་ཡིད་ཀྱི་རྣམ་བར་ཤེས་པ་ལ་བརྟེན་པ་ཁོ་ནའོ་སྙམ་དུ་དགོངས་བའོ། །དུ་བ་དེ་མེ་དེ་ཉིད་ལས་སོ། །མངོན་སུམ་ཚད་མ་འགའ་ཡང་མེད། །ཅེས་
པ་ནི་དེ་ཁོ་ནར་ཏེ། ཡུལ་དང་དུས་གཞན་ལས་མངོན་སུམ་མི་འཇུག་པའི་ཕྱིར་རོ། །ཀུན་རྫོབ་ཏུ་ནི་དཔེར་ན་དུ་བ་མེ་སྔོན་དུ་འགྲོ་བ་ཅན་དུ་རྟོགས་བ་དེ་བཞིན་དུ་སྐབས་སུ་བབ་པ་ལ་ཡང་ཡིད་ཀྱི་རྣམ་པར་ཤེས་པ་སྔོན་དུ་འགྲོ་བ་ཅན་ཉིད་དུ་རྟོག་པ་ཡིན་ནོ་ཞེས་མཇུག་བསྡུ་བའི་སྒོ་ནས་བསྟོད་པ་ནི་དེའི་ཕྱིར་ཞེས་བྱ་བའོ། །དཔེར་ན་ཡོངས་སུ་མཐོང་བ་དེ་དུ་བ་གཞན་དུ་གཅིག་ཏུ་བྱེད་པའི་ངོ་ཤེས་པ་སྟེ། ཐམས་ཅད་གཅིག་ཏུ་ལྷག་པར་ཞེན་པ་ལས་ཞེས་བྱ་བའི་དོན་ཏོ། །དང་པོའི་སྐྱེ་བ་ནི་བྱིས་པའི་གནས་སྐབས་ཀྱི་ལུས་སོ། །དེར་འབྱུང་བའི་ངང་ཚུལ་མིག་ལ་སོགས་པ་རྣམས་ནི་ཡིད་ཀྱི་འགྱུར་བ་ཡིན་པར་རྟོགས་པ་ཡིན་ནོ། །མིག་ལ་སོགས་པ་ངོ་ཤེས་པ་དེ་དག་ནི་ཞེས་འབྲེལ་ཏོ། །ཅི་ལྟར་ངོ་ཤེས་པ་དག་ཅེ་ན། གཡེར་བག་ལ་སོགས་པ་དང་ལྡན་པའི་ཡིད་དང་རྗེས་སུ་མཐུན་པར་རྣམ་པར་འགྱུར་བ་ཉིད་དུ་ཞེས་གསུངས་སོ། །དབང་པོ་དེ་དག་ནི་དེ་ལྟ་བུ་ཉིད་དེ་ཞེས་བྱ་བ་ནི་ཡིད་ཀྱི་རྣམ་པར་ཤེས་པའི་རྣམ་པར་འགྱུར་བ་ཉིད་དུའོ། །དེའི་འབྲས་བུ་ནི་མེའི་འབྲས་བུ་སྟེ། དུ་བ་ཞེས་བྱ་བའི་དོན་ཏོ། །གང་གི་ཕྱིར་དེ་ལྟར་ཡིད་ཀྱི་རྣམ་བར་འགྱུར་བ་ཉིད་དུ་མཐོང་བ་འཁྲུལ་བ་མེད་པ་དེའི་ཕྱིར་རོ། །ཡིད་ཀྱི་རྣམ་པར་ཤེས་པ་དེ་ལས་ཡིན་ནོ། །བུ་ལ་སོགས་པའི་དབང་པོ་དེར་ཏེ་དེ་ལ་བརྟེན་པར་རོ། །འོན་ཏེ་བུ་ལ་སོགས་པའི་མིག་མེད་པར་གྱུར་ཀྱང་གདོན་མི་ཟ་བར་ཡིད་འགྱུར་བ་མ་ཡིན་བའི་ཕྱིར། དེ་ལ་བརྟེན་པ་མ་ཡིན་ནོ་སྙམ་ན། ངེས་པ་གཉི་ག་ལ་ཡང་མེད། །ཅེས་གསུངས་སོ། །འདི་ཉིད་འཆད་པ་ནི་གལ་ཏེ་ཞེས་བྱ་བ་ལ་སོགས་པའོ། །མིག་ལ་སོགས་པ་དེ་ཡང་ཡིད་ཀྱི་རྟེན་མ་ཡིན་ནོ། །ཕྱིར་ཞེས་བྱ་བ་ནི་གཏན་ཚིགས་སོ། །དེ་ལྟ་ཡིན་མོད་ཅི་སྐྱོན་ཞེ་ན། མིག་ལ་སོགས་པའི་རྣམ་པར་ཤེས་པ་དྲུག་ཅར་ཡང་ཞེས་གསུངས་སོ། །རྟེན་འགའ་ཞིག་དང་བར་འགྱུར་ དགོས་སོ་ཞེས་བྱ་བ་ནི་ཐམས་ཅད་རྟེན་དང་བཅས་པ ་མཐོང་བའི་ཕྱིར་རོ། གདོན་མི་ཟ་བར་ཞེས་བྱ་བ་ནི་ལྕི་བ་ཉིད་མེད་པའི་ཕྱིར་རྟེན་གྱིས་ཅི་བྱ་སྙམ་དུ་དགོངས་པའོ། །འོ་ན་ཏེ་མངོན་པར་ཞེན་ན་ཞེས་བྱ་བ་འཆེལ་ནའོ། །དེ་ཡང་ཞེས་བྱ་བ་ནི་དེ་ལྟ་ན་ཡང་ངོ༌། །ཁ་ཅིག་ལས་
ནི་དེའི་ཚེ་ཡང་ཞེས་འདོན་ཏོ། །དེའི་ཕྱིར་ཞེས་བྱ་བ་གང་གི་ཕྱིར་ཁྱེད་ཀྱི་ལུགས་ཀྱིས་ཐམས་ཅད་རྟེན་དང་བཅས་པ་ཁོ་ན་ཡིན་པའི་ཕྱིར་རོ། །བློ་གནས་བ་གང་ཡིན་པ་དེའི་རྟེན་ཁྱད་པར་ངེས་པར་མ་བཟུང་བ་ལས་ཀྱི་རང་བཞིན་འགའ་གང་ཡིན་པ་དེ་དབང་པོ་རྣམས་ཀྱི་རྒྱུ་མཚན་ཡིན་གྱི་ཐམས་ཅད་ནི་མ་ཡིན་ཏེ། གཟུགས་མེད་པའི་ཁམས་ན་དབང་པོ་རྣམས་མེད་པའི་ཕྱིར་རོ། །ལས་ཀྱི་རང་བཞིན་དེ་ཡང་བློ་ཉིད་ལ་བརྟེན་པ་ཡིན་གྱི་དབང་པོ་ལ་ནི་མ་ཡིན་ནོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་བློ་ལས་དབང་པོ་ཡིན་གྱི་དབང་པོ་དག་ལས་ནི་བློ་མ་ཡིན་ནོ། །འདི་ག་ལས་ཤེན། སེམས་པའི་ལས་དང་ཞེས་ཡིད་དང་དེས་བསྐྱེད་པ་ལུས་དང་ངག་གི་ལས་སོ་ཞེས་བསྟན་ཏོ། །དེ་དག་ནི་སེམས་པ་སྔོན་དུ་འགྲོ་བའི་ཕྱིར་རོ། །ཡང་ཇི་ལྟར་ཚིག་འདི་ལས་དབང་པོ་ལ་བརྟེན་པ་མ་ཡིན་བ་ཉིད་དུ་འགྱུར་ཞེ་ན། སེམས་བ་ནི་ཞེས་གསུངས་སོ། །དེ་ལྟ་ན་ཡང་ཇི་ལྟར་ཞེ་ན། དེ་ཡང་ཞེས་བྱ་བའོ། །འདི་དང་འདི་ཡོད་པའམ་བྱའོ་ཞེས་བློ་རྣམ་པར་འགྱུར་པ་ནི་སྔ་མ་དང་མཚམས་སྦྱོར་བ་ནི་རང་བཞིན་ཅན་ནོ། །བློ་ཉིད་ལ་བརྟེན་ནས་འབྱུང་བ་ཡིན་ཏེ། དེའི་ཆོས་དང་ལྡན་པའི་ཕྱིར་རོ། །ལུས་ལ་བརྟེན་པ་ནི་མ་ཡིན་ནོ་ཞེས་བྱ་བ་ནི་དབང་པོ་དང་བཅས་པའི་ལུས་ལ་བརྟེན་པ་འགོག་པ་སྟེ། འོན་ཀྱང་དབང་པོ་དག་ནི་སེམས་ལ་བརྟེན་བའི་བློ་ལ་བརྟེན་པ་ཉིད་དོ་ཞེས་བྱ་བའི་དོན་ཏོ། །གལ་ཏེ་དེ་ལྟར་ན་གཟུགས་མེད་པའི་ཁམས་ན་སེམས་ཡོད་པའི་ཕྱིར་དབང་པོ་སྐྱེ་བར་ཐལ་བར་འགྱུར་རོ་སྙམ་ན། དེ་ཡང་འགའ་ཞིག་ཉིད་ཅེས་གསུངས་སོ། །ལུས་དེ་ལ་མངོན་པར་དགའ་བ་ནི་དགའ་བ་ཉིད་དོ། །དེའི་ཕྱིར་བློ་དང་དབང་པོ་ལ་སོགས་བ་ལ་ནི་ཡིད་ཉིད་རྒྱུ་ཡིན་པས་སོ། །དེས་ད་ལྟ་བའི་ཡིད་རྣམ་པར་རྟོག་པའི་རང་བཞིན་ཅན་གྱིས་སྔ་མ་སྔ་མའི་སྐྱེ་བ་འཕངས་པ་ཡིན་ནོ། །དེ་སྐད་བཤད་པ་ན་སྔ་མ་བཞིན་དུ་སྐྱེ་བ་ཕྱི་མར་ཅི་ལྟར་འགྱུར་སྙམ་དུ་དོགས་པ་ནི་གལ་ཏེ་ངའོ་ཞེས་བྱ་བའོ། །ངའོ་ཞེས་བྱ་བ་ནི་ཉེ་བར་མཚོན་པ་སྟེ། ང་ཡིད་འཛིན་བ་ལ་སོགས་པ་ཡང་བདག་ཏུ་རྟོག་བའི་རྣམ་པ་ཡིན་པའི་ཕྱིར་རོ། །རྣམ་པ་ཐམས་ཅད་དུ་བདག་ཏུ་འཛིན་པས་ཟིན་པ་དེའི་དྲུང་ནས་ད་ལྟ་ངའི་སྐྱེ་བ་ཡིན་ནོ། །གཏན་ཚིགས་ངེས་འདི་ལས་
སྔ་མ་དེ་དཔག་པར་བྱ་བ་ཡིན་ནོ། །འདིས་ནི་བདག་ཏུ་འཛིན་པས་ཟིན་པ་ནི་སྐྱེ་བ་གཞན་ཡོངས་སུ་འཛིན་པ་དེའི་གཙོ་བོའི་རྒྱུ་ཡིན་པར་བརྗོད་དོ། །ཡིད་ནི་ཞས་བྱ་བ་ནི་རྩོད་པ་གཉིས་པ་སྟེ། ལུས་དང་སེམས་དག་ནི་ཕན་ཚུན་རྗེས་སུ་འཇུག་པ་ཡིན་ནོ་ཞེས་བསྟན་པའི་ཕྱིར་རོ་ཞེ་ན། གོ་རིམས་བཞིན་དུ་རྣམ་འགྲེལ་གྱི་བྱེད་པ་པོ་གཉིས་ཀྱིས་ལན་འདེབས་སོ། །གཞན་དུ་འགྱུར་བ་ཞེས་བྱ་བ་རྣམ་པ་གཞན་དུ་འགྱུར་བར་རོ། །དོན་འདི་ཉིད་སྦྱོར་བའི་རྒྱས་འདེབས་པ་ནི་གང་ཞིག་ཅེས་བ་ལ་སོགས་པའོ། །ཐ་མའི་གནས་སྐབས་ཀྱི་སེམས་ཀྱང་བྱེད་པའི་རང་བཞིན་དང་ཁྱད་པར་མེད་པའི་རང་བཞིན་ཡིན་ནོ་ཞེས་ཕྱོགས་ཀྱི་ཆོས་བསྡུ་བ་རྟོགས་པར་བྱའོ། །མ་ངེས་བ་ཉིད་ནི་དེ་མ་ཡིན་ན་ཞེས་བྱ་བའོ། །དེ་ཉིད་ཀྱི་ཕྱིར་ན་འགལ་བའི་ཉེས་པ་ཡང་མེད་དོ། །མ་གྲུབ་བའི་ཉེས་བ་སྤོང་བ་ནི་མདུན་ན་འཆད་པར་འགྱུར་རོ། །འདི་ལ་ལན་ནི་ཞེས་བྱ་བ་ནི་ཕྱེད་ཕྱི་མ་འཆད་པའི་མིག་ལ་སོགས་པ་ལྟར་ཞེས་བྱ་བ་ནི་ཆོས་མི་མཐུན་པའི་དཔེའོ། །དར་འཛིན་བ་ཉིད་འདིའི་མཚན་ཉིད་ཡིན་པས་ན་དེ་སྐད་ཅེས་བྱ་བའོ། །འདི་ནི་འཁོར་བའི་སྐབས་ཀྱིས་བརྗོད་པ་ཡིན་གྱི། རྣམ་པར་བཅད་པའི་དོན་དུ་ནི་མ་ཡིན་ཏེ། དབང་པོ་ལ་བརྟེན་པའི་རྣམ་བར་རྟོག་པ་ནི་འགའ་ཡང་མེད་པའི་ཕྱིར་རོ། །དབང་པོ་དང་བྲལ་བ་གཟུགས་མེད་པའི་ཁམས་ན་ཡང་ཡིད་ཀྱི་རྣམ་པར་ཤེས་པ་དེ་ཡོད་པའི་ཕྱིར་དང༌། གཟུགས་མེད་བ་དེ་ཡང་སྲིད་པར་ལུང་ལས་སྟོན་པའི་ཕྱིར་ཏེ། མཐའ་གསུམ་ཡོངས་སུ་དག་པའི་ལུང་ནི་བླང་བར་བྱ་བ་ཉིད་དུ་གྲུབ་བའི་ཕྱིར་རོ། །ཡང་ན་གཟུགས་མེད་པའི་ཁམས་སྲིད་བར་རྗེས་སུ་དཔག་པས་བསྟན་བའི་ཕྱིར་རོ། །གང་དང་གང་གོམས་པར་བྱ་བ་དེ་ནི་གསལ་བར་འགྱུར་ཏེ། འདོད་མའི་རྣམ་པ་བཞིན་ནོ། །ལུས་ཀྱི་རྣམ་པ་དང་བྲལ་བ་བཏང་སྙོམས་ཙམ་གྱི་སེམས་ཀྱང་གཟུགས་ཀྱི་འདོད་ཆགས་ཞི་བར་འདོད་པས་གོམས་པར་བྱ་བ་ཡིན་ནོ། །དེ་ལ་དེ་དག་ཐབས་མ་ཡིན་པའི་སེམས་ཀྱིས་མངོན་པར་མི་སྦྱོར་བ་ཡང་མ་ཡིན་ཏེ། རྣམ་པ་དེ་ལྟ་བུའི་སྤྱོད་པ་མེད་པས་ན་ཐམས་ཅད་ཀྱི་བློ་ཉིད་ཀྱས་འཛིན་པའི་ཕྱིར་རོ། །ཐབས་མ་ཡིན་པའི་ཡང་མ་ཡིན་ཏེ། གལ་ཏེ་འཁོར་བའི་སྡུག་བསྔལ་གཏན་འཆད་པ་མ་
ཡིན་པ་དེ་ལྟ་ན་ཡང་ཡུན་རིང་པོར་ད་ཀུན་དུ་སྤྱོད་པ་མེད་པའི་ཕྱིར་དེ་ཙམ་ཉིད་ཀྱིས་དོན་ཆེན་པོ་ཡིན་ནོ། །དེ་ལྟ་ན་ཡང་སེམས་མ་རངས་ན་ཡང་ཞེས་གསུངས་སོ། །དུས་མཚུངས་པ་དག་ཅི་སྐད་ཕན་ཚུན་རྒྱུ་ཡིན་སྙམ་ན། གཉི་ག་ཕན་ཚུན་ཞེས་གསུངས་སོ། །ཕན་ཚུན་ཕན་འདོགས་པ་ཉིད་བརྗོད་པ་ནི། ཕན་ཚུན་གྱི་རྒྱུ་ཅན་དག་གི་ཚོགས་པ་ནི་ཕུང་པོའི་ཚོགས་པ་གཞན་ལས་ཞེས་བྱ་བ་ནི་སྔ་མ་ལས་སོ། །སྔ་མས་བསྐྱེད་པའི་ཚོགས་པ་དེས་ཀྱང་ངོ༌། །དོན་འདི་ཡིན་ཏེ། ད་ལྟ་བས་སྔ་མའི་ལུས་དང་ཡིད་གང་ཡིན་པ་དེ་ནི་ཕན་ཚུན་གྱི་རྒྱུ་ཅན་ཡིན་ཏེ། དེའི་ཚོགས་ལས་སྐྱེས་པའི་ཕྱིར་རོ། །དེ་བཞིན་དུ་དེའི་སྔ་མ་འཕངས་པ་ན་ཡང་དེའི་སྔ་མ་འཕེན་པའི་ཕྱིར་ཐོག་མ་མེད་པ་ཁོ་ནའོ། །ད་ལྟ་པ་ལས་ཕྱི་མ་ལུས་དང་ཡིད་གང་ཡིན་པ་དེའི་ཕན་ཚུན་གྱི་རྒྱུ་ཅན་ཉིད་ཀྱང་ཚོགས་པ་ལས་སྐྱེས་པ་ཉིད་ལས་ཡིན་ནོ། །དེ་བཞིན་དེར་ཕྱི་མ་ཕྱི་མ་འཕེན་པས་མཐའ་མེད་པ་ཁོ་ནའོ། །དབུས་ཀྱི་གནས་སྐབས་བཞིན་དུ་ཞེས་བྱ་བ་ནི། གང་ལ་ལྟོས་པས་སྔ་ཕྱི་བསམ་པ་བྱས་པ་སྟེ། ཅི་ལྟར་དེ་ཕན་ཚུན་གྱི་རྒྱུ་ཅན་ཡིན་པ་བཞིན་ནོ་ཞེས་བྱ་བའི་དོན་ཏོ། །ལུས་ཙམ་ལ་བརྟེན་པ་དགག་པ་ལ་འཐད་པ་གཞན་བརྗོད་པ་ནི་གལ་ཏེ་ལུས་ཉིད་ཅེས་བྱ་བའོ། །དེ་ནི་ལུས་ཀྱི་རྟེན་མ་ཡིན་ནོ་ཞེས་འབྲེལ་ཏོ། །དུས་ཀྱི་དབྱེ་བས་རང་བཞིན་ཐ་དད་པ་བཞིན་དང་གཞན་དུ་གྱུར་པ་ནི་རིམ་པའོ། །འདི་ལ་འབྲས་བུའི་རིམ་པ་ལ་ནི་རྒྱུའི་རིམ་པས་ཁྱབ་པ་སྟེ། དེ་ལྟ་མ་ཡིན་ན་འབྲས་བུ་མཐའ་དག་ཅིག་ཅར་བྱེད་པར་ཐལ་བར་འགྱུར་ཏེ། ཁྱད་པར་དུ་བྱར་མེད་པ་ནི་ལྷན་ཅིག་བྱེད་པ་ལ་ལྟོས་པར་མི་འཐད་པའི་ཕྱིར་རོ། །དེ་ཉིད་བརྗོད་པ་ནི་དེ་ལ་རེ་ཞི་གཅེས་བྱ་བའོ། །འདིས་ནི་ཁྱབ་བ་བརྗོད་དོ། །ཕྱོགས་ཀྱི་ཆོས་ཉིད་བརྗོད་པ་ནི། །ལུས་ལས་རིམ་གྱིས་བློ་འགྱུར་ན། །ཞེས་བྱ་བའོ། །དོན་འདི་ཡིན་ཏེ་གང་རིམ་པ་ཅན་དེ་ནི་རྒྱུ་རིམ་པ་ཅན་གྱིས་བསྐྱེད་པ་ཡིན་ཏེ། དཔེར་ན་རིམ་ཅན་གྱི་འབྲས་བུ་གཞན་བཞིན་ནོ། །ཡིད་ཀྱི་བློ་ཡང་རིམ་གྱིས་འབྱུང་བ་ཡིན་ནོ་ཞེས་བྱ་བའོ། །འདི་ལུས་ལས་འབྱུང་བར་ཁས་ལེན་ན་ངེས་པར་ལུས་ཀྱི་རིམ་པ་གསལ་བར་བྱེད་ཅིང་རྗོད་པར་བྱེད་དེ་སྟོན་པར་བྱེད་ཅེས་བྱ་བའི་དོན་ཏོ། །གཏན་ཚིགས་
མ་གྲུབ་པ་ཉིད་སྤོང་བ་ནི་ཡིད་ཀྱི་བློ་འདི་ནི་ཞེས་བྱ་བའོ། །དེ་ལྟ་མ་ཡིན་ན་ཏེ་གང་རིམ་ཅན་མ་ཡིན་ནའོ། །སྐྱེ་བ་རིལ་ཞེས་བྱ་བ་ནི་འཇིག་པའི་མཐར་ཐུག་པ་སྟེ། སྐྱེ་བ་གཞན་ལ་ནི་རྩོད་པ་ཡོད་པའི་ཕྱིར་རོ། །འོན་ཏེ་ཞེས་བྱ་བ་ནི་གཞན་གྱིའོ། །འདི་ལ་བརྗོད་པ་ནི་གནས་སྐབས་མི་འཛིན་ཞེས་བྱ་བའོ། །ཅིའི་ཕྱིར་གནས་སྐབས་ཅན་མ་རྟོགས་ཤེ་ན། ཁྱབ་བྱ་གནས་སྐབས་རྣམས་གཟུང་བ་མེད་པར་གནས་སྐབས་ཅན་གཞན་ཁྱབ་བྱེད་དུ་མི་རྟོགས་པའི་ཕྱིར་རོ། །དེའི་གནས་སྐབས་ཁྱབ་པར་བྱེད་པའི་རང་བཞིན་དེ་བཞིན་དུའོ། །དེས་ན་འདི་རྟོགས་ཀྱང་རང་དབང་དུ་རྟོགས་པར་འགྱུར་རོ། །དེ་ལྟ་ན་ཡང་འདི་གནས་སྐབས་ཅན་ཉིད་དུ་རྟོགས་སོ་ཞེ་ན། དེའི་ཞེས་གསུངས་ཏེ། ཁྱབ་བྱེད་ཀྱི་རང་བཞིན་དུའོ། །དེ་ལྟར་ཞེས་བྱ་བ་ཁྱབ་བྱེད་དུའོ། །དེ་ཉིད་ནི་ཁྱབ་བྱེད་དོ། །གཞན་ཉིད་ནི་ཁྱབ་བྱེད་མ་ཡིན་པ་ཉིད་དོ། །སྤྱིར་བརྗོད་ན་ཁྱད་པར་ལ་སྦྱོར་བ་ནི་གལ་ཏེ་འདི་ཞེས་བྱ་བ་སྟེ། གནས་སྐབས་ཅན་འདིའོ། །དེ་ལས་རང་བཞིན་གཞན་ནི་ཁྱབ་བྱེད་ཉིད་ལས་རང་བཞིན་གཞན་དུའོ། །ཁྱབ་བྱེད་ཉིད་དུ་མ་རྟོགས་པ་དེས་ན་གནས་སྐབས་ཅན་དེ་ལའོ། །དེའི་ཕྱིར་ན་དུས་གཞན་དང་ལྡན་པའི་རྟོག་པ་གཞན་སྐྱེ་བ་ཡིན་གྱི། གནས་སྐབས་ཅན་ནི་དམིགས་པའི་སྤྱོད་ཡུལ་དུ་གྱུར་པ་མ་ཡིན་ནོ་ཞེས་བྱ་བའི་དོན་ཏོ། །མ་གྲུབ་པ་སྤངས་ནས་མཇུག་སྡུད་པ་ནི་དེས་ན་ཞེས་བྱ་བའོ། །གང་གི་ཕྱིར་དེ་ལྟར་མ་གྲུབ་པ་མ་ཡིན་པ་དེའི་ཕྱིར་དངོས་པོའི་རང་བཞིན་གང་ཞིག་རིམ་པ་དང་ལྡན་པ་དེ་རིམ་པ་མ་ཡིན་པ་ལས་འབྱུང་བ་མ་ཡིན་ནོ། །དེས་ན་གང་ཞིག་རིམ་པ་དང་ལྡན་པ་དེ་ནི་རིམ་པ་དང་ལྡན་པ་ཁོ་ན་ལས་སྐྱེ་བ་ཡིན་ནོ་ཞེས་ཁྱབ་པ་ཡིན་ནོ། །དེ་མི་བཟོད་ནས་གལ་ཏེ་ཞེས་སྨྲས་སོ། །ཐ་མི་དད་པ་ཉིད་རིགས་གཅིག་བ་ཉིད་དོ། །མི་འདྲ་བ་ནི་རིགས་མི་གཅིག་པ་སྟེ། མེ་དང་དུ་བ་བཞིན་ནོ་སྙམ་དུ་དགོངས་པའོ། །གྲུབ་པའི་མཐའི་དོན་ནི་འདི་ཡིན་ཏེ། མི་འདྲ་བའི་ཕྱིར་རིམ་པ་མ་ཡིན་པ་ལས་འབྲས་བུ་རིམ་ཅན་སྐྱེ་བ་མ་ཡིན་ནོ་ཞེས་ནི་མི་བརྗོད་ཀྱི་འོན་ཀྱང་རིགས་པའི་སྟོབས་ཀྱིས་ཡིན་ནོ་ཞེས་བྱ་བའོ། །དེའི་ཚེ་ཉིད་ནི་སྐད་ཅིག་དང་པོ་ཉིད་དོ། །དེའི་ཚེ་ཞེས་བྱ་བ་སྐད་ཅིག་མ་དང་པོའི་ཆོའོ། །ཡོངས་སུ་རྫོགས་པ་ནི་དོན་བྱ་
བ་མཐའ་དག་བྱས་པའི་ཕྱིར་རོ། །གཞན་གྱི་ཚེ་ནི་ཞེས་བྱ་བ་ནི་སྐད་ཅིག་གཉིས་པའི་ཚེའོ། །དེ་ལྟ་ན་ཡང་འབྲས་བུ་གཞན་གྱི་ཚེ་ཅི་སྟེ་མ་ཡིན་སྙམ་ན། གལ་ཏེ་ཞེས་གསུངས་སོ། །འབྲས་བུའི་དུས་ཞེས་བྱ་བ་ནི་འབྲས་བུ་ལ་ཕན་འདོགས་པའི་དུས་དེ་སྐད་ཅིག་གང་གི་མོད་ལ་འབྲས་བུ་སྐྱེ་བར་འགྱུར་བའོ། །དེའི་ཚེ་ཞེས་བྱ་བ་ནི་དེའི་དུས་འཛིན་པའོ། །གལ་ཏེ་རོལ་གྱི་ནང་དུ་གྱུར་པས་ཀྱང་བྱེད་པའི་ཕྱིར་རྒྱུ་དམིགས་པ་མ་ངེས་པ་མ་ཡིན་ནམ་ཞེ་ན། བསམ་པ་འདི་ཡིན་ཏེ། གང་གིས་དེའི་རྗེས་སུ་འབྲངས་པས་མ་མཐོང་བ་ཡང་དེ་ལྟར་གཞག་པར་འགྱུར་བ། རྒྱུ་དང་འབྲས་བུ་དག་གདོན་མི་ཟ་བ་ཁོ་ནར་ལ་ལར་དམིགས་བ་དང་གང་དུ་མཐོང་བ་དེར་ནི་དུས་དང་རྗེས་སུ་མཐུན་པ་ཉིད་ཡིན་ནོ། །དེར་རྟོགས་པ་ལྷུར་བྱས་པ་བརྗོད་པ་ནི་གལ་ཏེ་རྟོགས་ན་ནི་ཞེས་བྱ་བའོ། །མཐུན་པའི་དུས་ལྷུར་བྱས་པ་བརྗོད་པ་ནི། དེས་ན་ཞིག་པའི་འོག་ཏུ་ཞེས་བྱ་བའོ། །འོན་ཏེ་ཞེས་བྱ་བ་ནི་ཕྱོགས་གཞན་ནོ། །འོན་ཏེ་རྒྱུ་རིམ་གྱིས་རྟོགས་པར་འདོད་པ་དེས་ན། འབྲས་བུའི་དུས་གཞན་དང་གཞན་དུ་རྗེས་སུ་འགྲོ་བའི་ཕྱིར་བརྗོད་པའི་ཕྱིར་སྐྱོན་མེད་དོ་སྙམ་ན། ལན་དུ་དེ་ལྟ་ན་ཞེས་བྱ་བའོ། །དེའི་ཚེ་ཡང་འབྲས་བུ་རིམ་གྱི་རྒྱུ་རང་བཞིན་ཕན་ཚུན་རྗེས་སུ་མི་འཇུག་པར་རྟོགས་པ་ནི་རིམ་པ་དང་ལྡན་པ་ཉིད་དུ་རྟོགས་པ་ཡིན་པས་རིམ་པ་མེད་པ་མ་ཡིན་ནོ། །དེས་ན་རིམ་མེད་པའི་རྒྱུ་ལས་འབྲས་བུ་རིམ་ཅན་ལྡོག་པས་ན་རྒྱུ་རིམ་ཅན་ལ་གནས་པས་ན་དེས་ཁྱབ་པ་ཡིན་པའི་ཕྱིར་འབྲེལ་བ་གྲུབ་པས་ན་མ་ངེས་བ་མ་ཡིན་ནོ། །སྔར་བརྗོད་པའི་ཕྱོགས་ཁས་མ་བླངས་ཀྱང་མ་ངེས་པའི་སྐྱོན་མེད་དོ་ཞེས་བསྟན་པའི་ཕྱིར་ཡང་ན་ཞེས་བྱ་བའོ། །རིམ་མ་ཡིན་བའི་རྒྱུ་ལས་སོ། །དེའི་རང་བཞིན་ནི་རིམ་མ་ཡིན་པའི་རང་བཞིན་ནོ། །འོ་ན་ཅི་སྐད་བརྗོད་ཅེ་ན། འོན་ཀྱང་ཞེས་གསུངས་སོ། །ཅིའི་ཕྱིར་དེ་སྐད་མེ་བརྗོད་ཅེ་ན། འབྲས་བུ་རྒྱུ་དང་ཞེས་བྱ་བའོ། །ཅིའི་ཕྱིར་ཞེས་རྒྱུ་དང་འབྲས་བུ་ཉིད་ནི་ཞེས་བྱ་བའོ། །གལ་ཏེ་ཞེས་བྱ་བ་ནི་རྒྱུ་དང་འབྲས་བུ་ལའོ། །འབྲས་བུས་ནི་རྒྱུ་ལ་གནས་པའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱ་བ་ཡིན་པའི་ཕྱིར་གཉི་ག་ལ་ཡོད་པ་ཡིན་ནོ། །སྤྱིར་བརྗོད་པའི་དོན་སྐབས་ལ་སྦྱོར་བ་ནི་གང་ཡང་ཞེས་བྱ་བ་སྟེ་འབྲས་བུའོ། །དེ་ལྟ་བུ་
ཉིད་ནི་རིམ་མ་ཡིན་པས་སོ། །དེ་ནི་ཞེས་བྱ་བ་འབྲས་བུས་སོ། །གཞན་དག་རྗེས་སུ་འགྲོ་བ་འབྲས་བུ་ལ་ཉེ་བར་མི་མཁོ་བར་སྟོན་པ་ནི་གལ་ཏེ་ཞེས་བྱ་བའོ། །ལན་དུ་གལ་ཏེ་ཞེས་བྱ་བའོ། །རྒྱུ་མེད་ན་འབྲས་བུ་མེད་པ་ཉིད་གང་ལས་ཡིན། ནུས་བའི་རྒྱུ་ཡོད་ཀྱང་འབྲས་བུ་མེད་སྲིད་ན་རང་རྒྱུད་འགྱུར་བའི་ཕྱིར་རོ། །འོན་ཏེ་འབྲས་བུ་མེད་པ་རང་རྒྱུད་ཡིན་པའི་ཕྱིར་རྒྱུ་ཡོད་ཀྱང་འབྱུང་བ་ཡིན་ནོ་ཞེས་བྱ་བ་འདིར་རིགས་སོ་སྙམ་བའི་དོགས་པ་བསུ་ནས་དེ་མེད་པ་འདི་ཞེས་གསུངས་སོ། །དེས་ན་རྗེས་སུ་འགྲོ་བ་མེད་ན་ལྡོག་པ་ཡང་མེད་པའི་ཕྱིར། དེ་དེའི་རྒྱུ་ཉིད་དུ་མི་འགྱུར་རོ་ཞེས་བྱ་བའི་དོན་ཏོ། །འཆད་པ་ནི་གལ་ཏེ་ཞེས་བྱ་བའོ། །འོན་ཏེ་རྗེས་སུ་འགྲོ་བ་མེད་ཀྱང་ལྡོག་པ་སྲིད་པའི་ཕྱིར་དེ་དེའི་རྒྱུ་ཡིན་ནོ་སྙམ་དུ་དོགས་ན་དེ་མེད་པ་ཞེས་བྱ་བའོ། །ཡང་གི་སྒྲ་ནི་མི་བཟོད་པ་ཙམ་མོ། །ཡང་ནའི་སྒྲ་ཡིན་ནོ། །འདི་ཅི་ལྟར་མི་རྟོགས་སྙམ་ན། ཅི་ལྟར་དེའི་ཞེས་གསུངས་སོ། །གལ་ཏེ་རེ་ཞིག་དངོས་པོ་མེད་པ་ནི་རང་ཉིད་འགྱུར་བས་ཁས་བླངས་པ་ཡིན་ནོ། །དེ་བཞིན་དུ་དངོས་པོ་ཡང་རང་བཞིན་འགྱུར་བ་ན། རྒྱུ་ཉེ་བར་གནས་ཀྱང་རེས་འགའ་མི་འབྱུང་ངོ་སྙམ་ན། དོན་རྣམས་ཞེས་གསུངས་སོ། །རྒྱུ་ལས་ཞེས་བྱ་བ་ནི་མཐའི་སྐད་ཅིག་ཐོབ་བ་ལས་སོ། །མེད་ན་མེད་པ་ཉིད་གང་ལས་ཞེས་བྱ་བ་བཤད་ནས་ཕྱེད་ཕྱི་མི་བཤད་པའི་ཕྱིར་དངོས་པོ་མེད་པ་ནི་ཞེས་བྱ་བའོ། །གལ་ཏེ་ཞེས་བྱ་བ་ལ་རྒྱུ་ཡོད་པ་ཉིད་ན་ཞེས་བྱ་བ་ཉིད་ཀྱི་སྒྲ་ཡང་གང་གི་དོན་དུ་བསྒྱུར་བར་བྱའོ། །འདི་སྐད་བརྗོད་པ་ཡིན་ཏེ། གལ་ཏེ་དངོས་པོ་མེད་པ་ལྟོས་པ་མེད་པ་ཡིན་ན། དེའི་ཚེ་རྒྱུ་ནུས་པ་ཡོད་ན་འབྲས་བུ་གདོན་མི་ཟ་བར་ཞེས་འགྱུར་རོ་ཞེས་བྱ་བ་མི་རིགས་ཏེ། རང་རྒྱུད་ཡིན་པས་ན་འབྲས་བུ་མེད་པར་འགྱུར་བའི་ཕྱིར་རོ། །ལན་དུ་དེ་ལྟ་ན་ནི་འོ་ན་ཞེས་བྱ་བའོ། །རྒྱུ་མེད་པ་དེ་མེད་ན་སྟེ། རྒྱུའི་བདག་ཉིད་ཡོད་ན་འབྲས་བུའི་མེད་པ་གནས་པ་ཡིན་ནོ། །དེ་ལྟར་བྱས་པས་འབྲས་བུ་མེད་པ་ནི་རྒྱུ་མེད་པས་སྦྱར་བར་མི་འགྱུར་རོ། །དེས་ན་འབྲས་བུ་དེ་འདིའི་འབྲས་བུར་ཅི་ལྟར་འགྱུར། །གང་གི་ཕྱིར་མེད་པ་དེ་མེད་པས་སྦྱར་བ་མ་ཡིན་པ་དེས་ནའོ། །གལ་ཏེ་དེ་ལྟར་ན་ཡང་དེར་ངེས་པའི་ཕྱིར་ཏེ། དེའི་འབྲས་བུ་ཡིན་ནོ་སྙམ་ན་གང་ཞིག་ཅེས་སྨོས་སོ། །རྒྱུ་དེས་སོ། །དེས་ན་ཞེས་བྱ་
བ་ངེས་པ་མ་ཡིན་པའི་ཕྱིར་རོ། །རང་ཉིད་མི་འབྱུང་བ་དེས་ནའོ། །དེའི་རྒྱུ་ཡོད་ཀྱང་འབྲས་བུ་མེད་པ་རང་འགྱུར་རོ་ཞེས་བྱ་བ་དེ་མི་རིགས་ཏེ། རྒྱུ་དང་འབྲས་བུའི་དངོས་པོ་མེད་པར་ཐལ་བའི་ཕྱིར་རོ། །གལ་ཏེ་རྒྱུ་རྣམས་ནི་གདོན་མི་ཟ་བར་འབྲས་བུ་དང་ལྡན་པ་མ་ཡིན་ནོ་ཞེས་བྱ་བ་ནི་ལུགས་ཡིན་ནོ་ཞེ་ན། བདེན་ཏོ། རྒྱུ་དང་རྒྱུ་མ་ཡིན་པ་དག་འདྲ་བའི་ཕྱིར་ཐ་སྙད་པ་རྣམས་གཅིག་ཏུ་ཐ་སྙད་བྱེད་པའི་ཕྱིར་ལུགས་འདི་ཉིད་ཡིན་ལ། དེ་ཁོ་ནར་ནི་དཔྱད་པ་འདི་ཡིན་པའི་ཕྱིར་ཉེས་པ་མེད་དོ། །འོ་ན་གང་གི་ཚེ་འབྲས་བུ་མེད་པ་རྒྱུ་མེད་པས་སྦྱར་བ་ཡིན་ཞེས་དོགས་ན། གང་གི་ཚེ་རྒྱུ་ཡོད་ན་ཞེས་གསུངས་སོ། །དེའི་ཚེ་དེ་མེད་པ་ཉིད་ན་འབྲས་བུ་རྒྱུན་འཆད་པ་ཡིན་པས་སོ། །འདིས་ནི་རྗེས་སུ་འགྲོ་བ་ཡོད་ན་ལྡོག་པ་ཡང་འཐད་པ་ཡིན་ནོ་ཞེས་བསྟན་པ་ཡིན་ནོ། །གལ་ཏེ་དེ་མེད་པ་ཉིད་ན་རྒྱུན་འཆད་པ་ཅི་ལྟར་ཡིན་ཏེ། གང་གི་ཕྱིར་རྒྱུ་ཡོད་ན་སྐྱེས་བ་ནི་རང་ཉིད་སྐད་ཅིག་གཞན་དུ་མི་གནས་པའི་ཕྱིར་རོ་ཞེ་ན། རང་གི་ངང་གིས་འགགས་པ་ཡིན་ཡང་ཞེས་གསུངས་སོ། །གལ་ཏེ་དོན་དམ་པར་སྐད་ཅིག་གཞན་དང་གཞན་སྐྱེས་པའི་ཕྱིར་རང་གི་ངང་གིས་འགགས་པ་ཡིན་པ་དེ་ལྟ་ན་ཡང་ཐ་སྙད་པ་རྣམས་གཅིག་ཏུ་ལྷག་པར་ཞེན་པའི་ཕྱིར། རྒྱུན་ལ་རྒྱུ་དང་འབྲས་བུའི་དངོས་པོ་རྟོགས་པ་ཡིན་ཏེ། སྐད་ཅིག་ལ་བརྟག་པར་མི་ནུས་པའི་ཕྱིར་རོ། །དེས་ན་དེ་མེད་པ་ཉིད་ན་རྒྱུན་ཆགས་པར་རྟོགས་པ་ཡིན་ནོ། །འབྲས་བུའི་རྣམ་པ་གཉིས་ཏེ། བུམ་པ་ལ་སོགས་པ་ལྟར་སྐྱེ་བ་ཙམ་ལ་གཞན་གྱི་བྱེད་པ་ལ་ལྟོས་པ་དང༌། གཞན་ཏེ། དུ་བ་ལ་སོགས་པ་ལྟར་རྒྱུན་གནས་པ་ན་ཡང་དེ་ལ་ལྟོས་པའོ། །དེ་ལ་འདི་ནི་རྒྱུ་གསལ་ན་རྒྱུན་འཆད་པའི་ཕྱིར་ན་དེ་མེད་པས་བྱས་པ་ཡིན་ནོ་ཞེས་བྱ་བར་གསལ་བ་ཡིན་ནོ། །བུམ་པ་ལས་སོགས་པ་ལ་ནི་སྔར་གྱི་མི་དམིགས་པའི་བྱེད་པ་ཉིད་ལྡོག་པའི་སྒྲུབ་པར་བྱེད་པ་ཡིན་ནོ། །དེའི་ཚེ་ནི་གལ་ཏེ་འབྲས་བུ་མ་ཡིན་པའི་ཚོགས་ཀྱང་མ་དམིགས་པ་དེ་ལྟ་ན་ཡང་གང་ཞིག་ཙམ་ཉེ་བར་འོ་ངས་པས་འབྲས་བུ་དམིགས་པ་དེ་མེད་བས་འདི་མེད་པར་བྱས་པ་ཡིན་ནོ་ཞེས་རྣམ་པར་གཞག་གོ །གང་གི་ཚེ་སྔར་གྱི་མི་དམིགས་པ་ལ་ལྟོས་པ་ན་ནི་དུ་བ་ལ་སོགས་པ་ལ་ཡང་ད་ཁོ་ན་ལྟར་ཡིན་ནོ་ཞེས་བསྟན་
པ་ཡིན་ནོ། །དེ་ལྟར་ན་རྗེས་སུ་འགྲོ་བ་དང་ལྡོག་པ་ཡོད་པས་ན་རྒྱུ་དང་འབྲེལ་པ་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བའི་དོན་དུ་གནས་སོ། །དེས་ན་གང་རིམ་ཅན་ཡིན་པ་དེས་ནི་རྒྱུ་རིམ་ཅན་གྱིས་བསྐྱེད་པ་ཡིན་ནོ་ཞེས་ཁྱབ་པ་གྲུབ་པའི་ཕྱིར་གཏན་ཚིགས་མ་ངེས་པ་མ་ཡིན་ནོ། །དེ་ཉིད་ཀྱི་ཕྱིར་ན་དེའི་ཕྱིར་རིམ་ཅན་མ་ཡིན་པ་ཞེས་མཇུག་སྡུད་དོ། །ཡང་རྩ་བས་མ་ངེས་པ་ཉིད་སྤང་བའི་ཕྱིར་དོགས་པ་བསུ་བ་ནི། འོན་ཏེ་རིམ་ཅན་མ་ཡིན་པ་ལས་ཞེས་བྱ་བའོ། །ཅིའི་ཕྱིར་ཞེ་ན། དེ་ལ་ནི་ཞེས་གསུངས་སོ། །དེ་ཉིད་ལས་ཞེས་བྱ་བ་ནི་ཁྱད་པར་ཉིད་ལས་སོ། །ཁྱད་པར་དེ་ནི་ཞེས་བྱ་བ་ནི་དོགས་པ་བསུ་བའོ། །དེས་བྱས་པའི་འབྲས་བུ་ནི་རྟག་པ་ཉིད་ཀྱིས་བྱས་པ་ཡིན་ནོ་ཞེས་བྱ་བའི་ཐ་ཚིག་གོ །ལན་ནི་མ་ཡིན་ཏེ་ཞེས་བྱ་བ་ལ་སོགས་པའོ། །རྟག་པ་དེ་ལ་ཁྱད་པར་འགའ་ཞིག་བྱས་ན་ཁྱད་པར་དེ་དེའི་ཞེས་བརྗོད་པ་ཡིན་ནམ། འོན་ཏེ་ཁྱད་པར་མ་བྱས་ཀྱང་ཁྱད་པར་གྱི་རྟོགས་པ་སྐྱེད་པར་བྱེད་པས་ན་དེ་སྐད་བརྗོད་ཅེས་བྱ་བ་ནི་རྟག་པ་གཉིས་ཀྱི་དོན་ཏོ། །དེ་ལ་ཁྱད་པར་མེད་པའི་ཕྱིར་རོ་ཞེས་བྱ་བ་ནི་རྟག་པ་ལ་འགའ་ཞིག་ལས་ཁྱད་པར་གྱི་རང་བཞིན་སྐྱེ་བ་མི་འཐད་པའི་ཕྱིར་རོ། །ཁྱད་པར་ལས་ཁྱད་པར་ཞེས་བྱ་བ་ནི་རྟག་པའི་ཁྱད་པར་ལས་ཁྱད་པར་ཐ་མི་དད་དོ་ཞེས་བྱ་བའི་དོན་ཏོ། །ཐ་དད་ན་ཞེས་བྱ་བ་ནི་ཁྱད་པར་གྱིས་བྱས་པའི་ཁྱད་པར་ཐ་དད་ནའོ། །ཐལ་བ་སྔ་མ་མ་ཡིན་ནོ་ཞེས་བྱ་བ་ནི་ཁྱད་པར་དེ་ལ་ལྟོས་པའི་འབྲས་བུ་ནི་དེ་ཉིད་ལས་སྐྱེ་བར་འགྱུར་གྱི། རྟག་པ་ལས་ནི་མ་ཡིན་ནོ་ཞེས་བྱ་བའོ། །ཁྱད་པར་དེ་དེའི་ཡིན་ནོ་ཞེ་ན་ཞེས་བྱ་བ་ལ་སོགས་པ་སྔ་མ་བཞིན་ལན་འདེབས་ན། སུན་དབྱུང་བ་ཡང་སྔ་མ་ཁོ་ན་ལྟར་རོ། །དེས་ན་རྟག་པ་ནི་རིམ་གྱིས་འབྲས་བུ་བྱེད་པར་བསྒྲུབ་པ་ལ་མཐར་ཐུག་པ་ཡོད་པ་མ་ཡིན་ནོ། །རྣམ་བར་རྟོག་པ་གཉིས་པ་སྟོན་པ་ནི་འོན་ཏེ་ཞེས་བྱ་བའོ། །གལ་ཏེ་རྟག་པ་ལས་ཁྱད་པར་ཡོད་ན་དེའི་ཚེ་ཁྱད་པར་གྱི་རྟོགས་པ་འཐད་པ་ཡིན་ནོ། །གལ་ཏེ་དེ་ལྟ་ཡིན་ན་ཞེས་བྱ་བ་ནི་ཁྱད་པར་མེད་ཀྱང་དེའི་རྟོག་པ་ཡོད་པ་ཡོད་པས་ན་བྱ་ཐབས་ཅི་ཡོད་ཅེས་བྱ་བའི་དོན་ཏོ། །འོ་ན་ནི་འདི་ནི་འཁྲུལ་པ་ཉིད་ཡིན་པས་ན། ཁྱད་པར་གྱི་རྟོགས་པ་རྒྱུ་ཉིད་དུ་ཁས་བླངས་པའི་མཚན་ཉིད་ཅན་གྱི་
འབད་པ་དོན་མེད་ཅིང་རིམ་མ་ཡིན་པ་མ་གྲུབ་པའི་ཕྱིར་རོ། །འོ་ན་དེ་ལ་དེ་ལྟར་ཅི་ལྟར་རྟོགས་ཤེ་ན། ཁྱད་པར་མེད་པར་ཞེས་བྱ་བའོ། །གང་གི་ཚེ་ཁྱོད་ཀྱི་ལུགས་ཀྱིས་ཁྱད་པར་མི་རྟོགས་པར་འཁྲུལ་པ་ཉིད་དུ་རྣམ་པར་གནས་བ་དེའི་ཚེ་རྟག་པ་ལ་ཚད་མ་མེད་དོ་ཞེས་སྟོན་པ་ནི། ཁྱད་པར་ལ་ནི་འཁྲུལ་ན་ཡང༌། །རྟག་ལ་ཚང་མ་ག་ལ་ཞིག །ཅེས་བྱ་བའོ། །དེས་ན་རྟག་ཏུ་ཁྱད་པར་རྟོགས་པས་ན་འཁྲུལ་བ་ཁས་བླངས་པ་ཡང་ཁས་བླངས་པ་ཙམ་དུ་འགྱུར་རོ། །གཞན་གྱི་དོགས་པ་བསུ་བ་ནི། གལ་ཏེ་ཁྱད་མེད་རྟོགས་ན་ནི། །ཞེས་བྱ་བ་སྟེ། ངོ་ཤེས་པ་ལ་སོགས་པ་ཡོད་པ་ཡིན་ནོ་ཞེས་བྱ་བའི་དོན་ཏོ། །དོན་ནི་རྟག་པ་ལ་ཚད་མ་ཡོད་པ་ཡིན་ནོ་སྙམ་དུ་བསམས་པའོ། །ལན་དུ་དེ་ལྟ་ན་བྱ་བའོ། །ལྷན་ཅིག་བྱེད་པ་ལ་ལྟོས་པར་ཅི་ལྟར་འགྱུར། ཅིའི་ཕྱིར་ཞེ་ན། གང་གི་ཕྱིར་ཞེས་བྱ་བའོ། །ཁྱད་པར་དང་པོའི་དོན་དུ་ཅི་སྟེ་མི་ལྟོས་སྙམ་ན། ཁྱད་པར་ཡང་ནི་ཡོང་བ་མ་ཡིན་ནོ་ཞེས་གསུངས་ཏེ། གང་ཞིག་ཁྱད་པར་དུ་བྱེད་པའམ། ཁྱད་པར་གྱི་རྣམ་པར་རྟོག་པར་བྱེད་པ་ཞེས་བརྟགས་ནས་སུན་ཕྱུང་བའོ། །ཡང་གི་སྒྲས་ནི་རང་ལ་ཡོད་པ་ཡང་ངོ༌། །དེ་ལྟ་ན་ལྟོས་ཅི་ལྟར་འགྱུར་ཞེས་བྱ་བ་ལ་གསལ་བར་བྱས་པའི་ཕྱིར་དང༌། འཇིག་རྟེན་དང་མཐུན་པར་བསྟན་པའི་ཕྱིར་ན་དེ་ལ་ཞེས་བྱ་བ་ལ་སོགས་པའི་ཚིགས་སུ་བཅད་པའོ། །ཁྱད་པར་ཅན་མིན་ལྟོས་པའང་མེད། །ཅེས་བྱ་བའི་རྩ་བ་ཡིན་ལ། ཁྱད་པར་མེད་པ་ལ་ལྟོས་པ་ཡོད་པ་མ་ཡིན་ནོ་ཞེས་བྱ་བ་ནི་བཤད་པའོ། །དེས་ན་འབྲས་བུ་རིམ་ཅན་རྟག་པ་ལས་ལྡོག་པས་ན་ཁྱབ་པ་གྲུབ་པའོ། །དེས་ན་ཕྱེད་ཕྱི་མ་རྣམ་པར་འགྲེལ་པའི་སྒོ་ནས་ཕྱོགས་ཀྱི་ཆོས་ཉེ་བར་བསྡུ་བ་གསུངས་པ་ནི་ལུས་ལས་ཞེས་བྱ་བ་ལ་སོགས་པའོ། །དེ་ལྟ་མིན་ན་ཞེས་བྱ་བ་ནི་ལུས་རིམ་ཅན་མ་ཡིན་ན་གང་གིས་བློ་དེའི་རིམ་པ་བྱས་པ། ཡིད་ཀྱི་བློ་སྔ་མ་སྔ་མའི་རང་བཞིན་དེ་རྒྱུར་གསལ་དེ། ཚད་མས་ཡོངས་སུ་ངེས་པའི་ཕྱིར་རོ། །ཅིའི་ཕྱིར་ཞེ་ན། ཉམས་མྱོང་སྔ་མ་སྔ་མ་ཞེས་གསུངས་ཏེ། སྔ་མ་སྔ་མའི་མྱོང་བ་ཙམ་ཏེ། རྣམ་པར་རྟོག་པ་ཅན་ནམ་གཞན་ནོ། །ཡིད་ཀྱི་བློ་དེ་ལ་འཇུག་པར་དམིགས་པ་ཡིན་ནོ་ཞེས་བྱ་བའི་དོན་
ཏོ། །གལ་ཏེ་དེ་ལྟ་ན་ཡང་ཐོག་མ་སྤྱད་པ་ཉིད་དུ་ཅི་ལྟར་འགྱུར་ཞེ་ན། ཉམས་སུ་མྱོང་བ་དེ་ཡང་གཞན་ལས་དེ་མྱོང་བ་སྔ་མ་ལས། དེའི་སྔ་མའི་མྱོང་བ་དེ་ཡང་སྔ་མ་ལས་ཞེས་རྗེས་སུ་འཇུག་གོ །ཐོག་མ་མེད་པ་ནི་ཐུག་པ་མེད་པའོ། །གལ་ཏེ་ཡང་དེ་ལྟར་མཐོང་བ་དང༌། མཐོང་བ་ཡང་དོར་བར་མི་ནུས་པ་དེ་ལྟ་ན་ཡང་བློ་དེ་དང་ལྷན་ཅིག་པའོ། །ལུས་རིམ་པ་མེད་པ་ཉིད་སྐྱེད་པར་བྱེད་པ་ཡིན་ནོ་སྙམ་དུ་དོགས་ན་ལན་དུ་དེ་ལྟ་ཡིན་དང་ཞེས་བྱ་བ་སྟེ། ཁྱད་པར་མེད་པར་ཁས་ལན་ན་སྔར་བཤད་པའི་སྐྱོན་དུ་འགྱུར་བའི་ཕྱིར་རོ། །ཁྱད་པར་ཡོད་ན་ཡང་ཕན་ཚུན་ཕན་འདོགས་པའི་ཕྱིར་བློ་སྔ་མའི་ལྷན་ཅིག་བྱེད་པའི་ཅན་དུ་འགྱུར་བ་བསྙོན་པར་མི་ནུས་སོ་ཞེས་བྱ་བར་འགྱུར་རོ། །དེ་ལ་ལྟོས་ནས་བརྗོད་པ་ནི་དེས་ན་ཞེས་བྱ་བའོ། །དེ་ལྟར་གྱུར་བ་ཉིད་ཅེས་བྱ་བ་ནི་བློ་དང་ལྷན་ཅིག་པ་ཉིད་དོ། །ཕྱི་མ་ཕྱི་མའི་སྐད་ཅིག་རེ་རེར་རོ། །དེ་ཉིད་ནི་འགྲེལ་པའི་ཕྱི་མ་ཕྱི་མའི་ཞེས་བྱ་བ་ཡིན་ནོ། །སྐད་ཅིག་རྒྱུ་ཡིན་ནོ་ཞེས་འབྲེལ་ཏོ། །ཡིན་ཞེས་བྱ་བ་ནི་དམིགས་པ་ཞེས་བྱ་བ་གཏན་ཚིགས་ཀྱི་ཚིག་འདིས་གསལ་བར་བྱས་སོ། །སྐྱེ་བ་ཞེས་བྱ་བ་ནི་སྐྱེ་བ་སྔ་མ་འཕེན་པའོ། །འཆི་བ་ཞེས་བྱ་བ་ནི་སྐྱེ་བ་འོང་བའི་མཚན་ཉིད་ལའོ། །རྒྱུ་དེ་འདྲ་བ་ནུས་པ་དང་ལྡན་པ་མ་ཡིན་ན་འབྲས་བུ་ཤོལ་བར་ནི་བཟོད་པ་ནི་མ་ཡིན་ནོ། །གཞན་དུ་ན་ཞེས་བྱ་བ་ནི་གལ་ཏེ་ལན་གཅིག་རྟོགས་པའི་རྒྱུ་ཐམས་ཅད་དུ་ཐམས་ཅད་ཀྱི་ཚེ་མ་ཡིན་ནོ། །དེའི་ཚེ་ཁྱབ་པ་མི་རྟོགས་པའི་ཕྱིར་ན་རྣམ་པ་ཐམས་ཅད་དུ་རྒྱུ་ལ་ལྟོས་པར་འགྱུར་རོ། །རྒྱུ་དང་འབྲས་བུའི་དངོས་པོ་རྟོགས་པའི་ཐབས་གཞན་ནི་ཡོད་པ་མ་ཡིན་ནོ། །བཟློག་པ་འཇིག་རྟེན་ཕ་རོལ་མེད་པ་ལ་ཡང་ངོ༌། །འཆི་བ་དེའི་སེམས་ཡིན་པའི་ཕྱིར་ནའོ། །བཟློག་པས་ཞེས་བྱ་བ་ནི་མཚམས་སྦྱོར་བ་སྒྲུབ་པར་བྱེད་པས་སོ། །བཟློག་པ་ཡང་ཞེས་བྱ་བ་ནི་མཚམས་སྦྱོར་བའི་བསྒྲུབ་པའི་སྒྲུབ་བྱེད་ཀྱང་ངོ༌། །འདིས་ཞེས་བྱ་བ་འཆི་བའི་སེམས་ཉིད་ཀྱིས་སོ། །དེ་ལ་མེད་པར་སྨྲ་བ་གཞན་ལ་རེ་ཞིག་འགལ་བ་མེད་པ་བརྗོད་པ་ནི། འཆི་བའི་སེམས་ནི་ཞེས་བྱ་བའོ། །འོ་ཞེས་བྱ་བ་ནི་མི་བཟོད་པའོ། །མཚམས་སྦྱོར་བ་དེའམ། གང་གིས་དེ་མེད་པར་སྒྲུབ་པར་བྱེད་པ་དེའི་ཡུལ་དང་འགལ་བ་ཅི་ཞིག་ཡོད། འགལ་བ་གང་གིས་སོ། །གལ་ཏེ་རྫས་
གཉིས་ལྷན་ཅིག་མི་གནས་བའི་འགལ་བ་ཡིན་པ་དེ་ལྟར་ན་ཡང་འཆི་བའི་སེམས་ཉིད་དང་མཚམས་སྦྱོར་བ་གཉིས་ནི་མ་ཡིན་ཏེ་ཆོས་ཡིན་པའི་ཕྱིར་རོ། །དེ་ལྟ་མོད་ཀྱི་འདི་གླང་པོ་ཆེའི་ལྟ་བས་བཏང་སྙོམས་སུ་བྱས་ཏེ། དེའི་མཚན་ཉིད་དང་མི་ལྡན་པའི་ཉེས་པ་བརྗོད་པ་ནི་འཆི་བའི་སེམས་ཉིད་འོངས་ན་ཞེས་བྱ་བའོ། །མཚམས་སྦྱོར་བ་ལས་བཟློག་པ་ནི་མེད་པ་སྟེ། རྒྱུན་གྱི་འཇུག་པ་མེད་པར་ཞེས་བྱ་བར་དགོངས་པའོ། །འགལ་བ་གཉིས་པ་མེད་པ་བརྗོད་པ་ནི་དེ་ཉིད་ཀྱི་ཕྱིར་ཞེས་བྱ་བའོ། །ཡང་འདིར་ཅི་ལྟར་འགྲིབས་ཏེ། གལ་ཏེ་འདི་དག་གི་དོན་འཛིན་པ་ཡིན་ན་དེ་ལྟ་ན་ནི། དེ་ལྟ་བུར་ལྷན་ཅིག་མི་གནས་པའི་འགལ་བ་ཉིད་མ་གྲུབ་པར་རིགས་སོ། །དེ་སྟེ་མཚམས་སྦྱོར་བ་ལས་བཟློག་པ་མཐོང་བ་མེད་པ་ཞེས་པ་དག་གི་ཕྱོགས་གཅིག་འཛིན་པ་ཡིན་ན་ནི་དེའི་ཚེ་ཕན་ཚུན་སྤངས་པའི་འགལ་བ་གཉི་ག་མཐོང་བ་ལ་གདོན་མི་ཟ་བར་ལྟོས་པ་མ་ཡིན་ཏེ། རྟག་པ་དང་མི་རྟག་པ་བཞིན་དུ་ཀུན་དུ་རྟོག་པ་ལ་གནས་པར་གཅིག་ལ་ལྟོས་ནས་དེའི་འགལ་ཟླ་ངེས་པའི་རྟོགས་པ་ཙམ་གྱིས་འགལ་བར་ངེས་པའི་ཕྱིར་རོ། །ལྷན་ཅིག་མི་གནས་པ་ནི་གཉི་ག་མཐོང་བ་ལ་ལྟོས་པ་ཉིད་དེ། དེ་ལྟ་མ་ཡིན་ན་གཅིག་ཡོད་ན་གཞན་མེད་པར་ངེས་པ་མི་རུང་བའི་ཕྱིར་རོ་ཞེ་ན་བདེན་ཏེ། དེ་ཉིད་ཀྱི་ཕྱིར་ཞེས་བྱ་བ་འདི་ནི་ངག་གི་དོན་འཛིན་པ་ཡིན་ནོ། །འོན་ཀྱང་ཟུར་གཉིས་སུ་བསྟན་པའི་ཕྱིར་ན། དོན་ཐ་དད་པར་སྦྱར་བ་ཡིན་ནོ། །འདི་ལྟར་འདིར་ནི་དོན་འདི་ཡིན་ཏེ། འཆི་བའི་སེམས་འོངས་ན་ཞེས་བྱ་བ་ནི་ཡིད་ལ་འདྲེས་པར་གྱུར་ན་ཏེ། འཆི་བའི་རྣམ་པར་རྟོག་པར་གྱུར་ན་ཞེས་བྱ་བའི་དོན་གང་ཡིན་པའོ། །མཚམས་སྦྱར་བ་ལ་བཟློག་བསམ་མཐོང་བའི་ཕྱིར་ཏེ་མི་གསལ་བའི་ཕྱིར་རོ། །འདི་ལྟར་འཆི་བའི་སེམས་ཀྱི་རྣམ་པར་རྟོག་པར་གྱུར་ན། འཆི་བའི་སེམས་མ་ཡིན་པ་རྣམ་པར་གཅད་པར་མཐོང་གི་མཚམས་སྦྱོར་བ་ལས་བཟློག་པ་ནི་མ་ཡིན་ནོ། །དེས་ན་དེ་ནི་དེ་ཉིད་དང་འགལ་གྱི་མཚམས་སྦྱོར་བ་དང་ནི་མ་ཡིན་ནོ། །མཚམས་སྦྱོར་བའི་རྣམ་པར་རྟོག་པ་ལ་ཡང་མཚམས་སྦྱོར་བ་མ་ཡིན་པ་རྣམ་པར་གཅད་པ་གསལ་བ་ཡིན་གྱི་འཆི་བའི་སེམས་ཉིད་རྣམ་པར་གཅད་པ་ནི་མ་ཡིན་ནོ། །དེ་ལྟ་ན་མཚམས་སྦྱོར་བ་དང་མི་སྦྱོར་བ་
གཉིས་ཉིད་ཕན་ཚུན་སྤངས་པའི་འགལ་བ་ཡིན་ཏེ། གང་རྟོགས་ན་གང་རྣམ་པར་གཅད་པ་དེ་ཉིད་དེ་དང་འགལ་བར་རྣམ་པར་གནས་པའི་ཕྱིར་རོ། །མཚམས་སྦྱོར་བ་དེ་ཡོངས་སུ་སྤངས་ཏེ་འཆི་བའི་སེམས་གང་ཡིན་པ་དེ་གནས་པ་དེ་ལྟར་མ་མཐོང་བའི་ཕྱིར་འགལ་བ་གཉིས་པ་མེད་དོ། ལྷན་ཅིག་མི་གནས་པ་སུན་འབྱིན་པས་འཆི་བའི་སེམས་ཉིད་འོངས་ནས་མཚམས་སྦྱོར་བ་ལས་བཟློག་པ་མཐོང་བ་མེད་པའི་ཕྱིར་ཞེས་གང་བརྗོད་པ་དེ་ནི་མ་གྲུབ་སྟེ། མཚམས་སྦྱོར་ན་སྔ་མ་བཞིན་གསོན་པར་ཐལ་བའི་ཕྱིར་རོ། །དེས་ན་སྔར་རྒྱུན་གྱིས་མཚམས་སྦྱོར་པར་གྱུར་པ་དེ་ནི་འཆི་བའི་སེམས་དང་འབྲེལ་ན་མཐར་ཐུག་པར་འགྱུར་བའི་ཕྱིར་ཅི་ལྟར་ལྷན་ཅིག་མི་གནས་པའི་འགལ་བ་མ་ཡིན་ཞེ་ན། སྐྱེ་བ་གཞན་ཞེས་སྨོས་སོ། །འདི་ལྟར་བསམས་པ་ཡིན་ཏེ། མཚམས་སྦྱོར་བ་ལུས་དེ་ལ་གནས་པའི་འཚོ་བ་ནི་མ་ཡིན་གྱི། ལུས་དེ་ཉེ་བར་སྒྲུབ་པར་བྱེད་པའི་ལས་ཟད་ན་ལུས་འཇིག་པར་འགྱུར་བ་དང༌། ནུས་པའི་སེམས་ཀྱང་སེམས་གཞན་དང་མཚམས་སྦྱོར་བར་འགྱུར་བ་ཡིན་ཏེ་དེས་ན་འགལ་བ་ཅི་ཡོད། མཚམས་སྦྱོར་བ་དེ་ནི་རང་གིས་རིག་པར་བྱ་བ་ཡིན་ཡང་གཞན་གྱིས་ནི་རིག་པར་བྱ་བ་མ་ཡིན་ནོ། །འོན་ཏེ་ལུས་དང་བཅས་པའི་སེམས་ཀྱིས་བསྐྱེད་པར་བྱ་བ་ནི་ལུས་དང་བཅས་པ་ཁོ་ནར་སྐྱེ་བ་ཡིན་ནོ་ཞེས་བརྗོད་ན་ལུས་ཡང་གལ་ཏེ་དེ་འདྲ་བའི་ཚོགས་པ་ཉེ་བའི་དབང་གིས་ཤིན་དུ་དང་བ་ཉིད་ཀྱིས་འོ་སྐོལ་ལྟ་བུའི་སྤྱོད་ཡུལ་མ་ཡིན་པར་འགྱུར་རོ། །དེ་ལྟ་ན་ཡང་སྐྱེ་བ་གཞན་དུ་མཚམས་སྦྱོར་བ་ནི་སྣང་དུ་རུང་བ་མ་ཡིན་ནོ་ཞེས་བྱ་བ་ལེགས་པར་བརྗོད་པ་ཡིན་ནོ། །དེས་ན་བལྟར་མི་རུང་བ་མི་དམིགས་པ་ནི་མེད་པ་སྒྲུབ་པར་བྱེད་པ་མ་ཡིན་པའི་ཕྱིར་ལྷན་ཅིག་མི་གནས་པ་འཐད་པ་མ་ཡིན་ནོ། །གལ་ཏེ་ངེད་ཀྱིས་མཚམས་སྦྱོར་བ་མེད་པ་མ་གྲུབ་ན། །འོ་ན་ཁྱོད་ཀྱིས་མཚམས་སྦྱོར་བ་ཡང་ཅི་ལྟར་འགྲུབ་སྙམ་ན། འབྲས་བུ་ཉིད་ནི་ཞེས་གསུངས་སོ། །ལུས་དང་བཅས་པའི་སེམས་ནི་དེ་དང་འདྲ་བ་གཞན་ཁོ་ནའི་འབྲས་བུ་ཡིན་ནོ་ཞེས་བསྟན་པ་ཡིན་ནོ། །འབྲས་བུ་དེ་འདྲ་བ་ལས་སྔ་མ་དང་ཕྱི་མའི་རང་བཞིན་གྱི་རྒྱུ་དེ་འདྲ་བ་ཉིད་གྲུབ་པ་ཉིད་མཚམས་སྦྱོར་བ་གྲུབ་པ་ནི་རང་དང་འགལ་བ་ཉིད་མཚམས་སྦྱོར་བ་མེད་པ་སེལ་
བར་བྱེད་དོ་ཞེས་རིགས་སོ། །དེ་མེད་པ་སྟེ་མཚམས་སྦྱོར་བ་མེད་པ་མེད་པར་བསྒྲུབ་པའོ། །གལ་ཏེ་དེ་ལྟ་ན་ཡང་ཅི་ལྟར་འབྲས་བུ་ཉིད་མཚམས་སྦྱོར་བའི་སྒྲུབ་བྱེད་ཡིན་པ་དེ་བཞིན་དུ། འཆི་བའི་སེམས་ཉིད་གནོད་པ་བྱེད་པ་ཡིན་པའི་ཕྱིར། འདིར་གང་བདེན་པར་འགྲུབ་སྙམ་དུ་དོགས་ན། ཕན་ཚུན་འགལ་བའི་དོན་ལ་ཞེས་གསུངས་ཏེ། གཏན་ཚིགས་ཤེས་བྱ་བར་བསམས་པའོ། །གཞན་གྱི་དོན་གྱི་རྗེས་སུ་དཔག་པ་ཡིན་པར་འགྱུར་རོ། །འདིས་ནི་གང་ཞིག་གང་དང་འབྲེལ་པ་དེ་ནི་དེ་ཡོད་པར་སྒྲུབ་པར་བྱེད་པ་ཡིན་ཏེ་ཞེས་བྱ་བ་དེ་བསྒྲུབ་པ་ཡིན་ནོ། །རྣམ་འགྲེལ་གྱི་ཕྱེད་ཕྱི་མ་ལ་འཇུག་པར་བྱེད་པ་ནི་གལ་ཏེ་འདིར་ཞེས་བྱ་བ་ལ་སོགས་པའོ། །ཞི་བ་དེས་ནའོ། །མཚམས་སྦྱོར་བ་དེ་ཡོངས་སུ་སྤངས་ཏེའོ། །གཞན་གྱིས་ཕན་ཚུན་སྤངས་པའི་འགལ་བར་སེམས་པ་ནི་ཡི་གེ་འདིས་བྱས་པ་ཡིན་ཏེ། དངོས་པོ་ལ་ནི་མེད་དོ་ཞེས་བསྟན་ཟིན་པ་ཁོ་ནའོ། །དེ་ལྟ་ན་ཡང་བསག་པའི་དོན་དུ་དེ་ཡང་འབྲེལ་པ་ཡོད་པ་མ་ཡིན་ཏེ་ཞེས་གསུངས་སོ། །དགྲ་བཅོམ་པའི་སེམས་དེ་དགག་པ་ཉིད་ལའོ། །གལ་ཏེ་འཆི་བའི་སེམས་མཚམས་སྦྱོར་བ་དང་འགལ་བར་ནི་ཁྱེད་ཅག་ཉིད་ཀྱིས་ཁས་བླངས་པ་མ་ཡིན་ནམ། དེ་ལྟར་མ་ཡིན་ན་དགྲ་བཅོམ་པ་མཚམས་སྦྱོར་བ་མེད་པར་ཅི་ལྟར་འདོད་སྙམ་ན་འཆི་བའི་སེམས་ཉིད་ནི་ཞེས་གསུངས་ཏེ། འགལ་བར་ཁས་བླངས་པ་མ་ཡིན་ནོ་ཞེས་བྱ་བའི་དོན་ཏོ། །འོ་ན་དགྲ་བཅོམ་པ་ལ་ཇི་ལྟར་མེད་སྙམ་ན། ཉོན་མོངས་པ་དང་ཞེས་གསུངས་སོ།། ཉོན་མོངས་པ་དང་བྲལ་བ་དེ་གཞན་གྱི་ཡང་སོ་སོའི་སྐྱེ་བོ་རྣམས་ལ་ཁས་ལེན་པ་མ་ཡིན་ནོ། །གྲུབ་མཐའ་ཐམས་ཅད་ནི་ཞེས་བྱ་བ་ནི་བསྡུ་བའོ། །ལུང་ཐམས་ཅད་ནི་འཆི་བའི་སེམས་ཐམས་ཅད་མཚམས་སྦྱོར་བ་དང་འགལ་བ་གང་ཡིན་པ་དེ་སྒྲུབ་པར་བྱེད་པ་མ་ཡིན་ནོ། །གང་གི་ཕྱིར་འཁོར་བ་པའི་སྐྱེ་བ་ལ་ལར་ཏེ་ཁ་ཅིག་ལ་མཚམས་སྦྱོར་བར་ལུང་དེས་བསྟན་པ་ཡིན་ནོ། །འོན་ཏེ་ཞེས་བྱ་བ་ནི་གཞན་གྱིའོ། །གལ་ཏེ་ཡང་ལུང་གིས་ལ། ལ་ལ་མཚམས་སྦྱོར་བ་ཡོད་པར་བསྟན་པ་དེ་ལྟ་ན་ཡང་འདི་ཚད་མ་གྲུབ་པ་ནི་མ་ཡིན་ནོ། །དེས་ན་ལུང་གི་ཆོས་དེས་ཚད་མ་མ་ཡིན་
པ་ཉིད་དོ། །དེས་ན་དགྲ་བཅོམ་པ་ཐ་མའི་སེམས་མཚམས་སྦྱོར་བ་མེད་པར་གྲུབ་པ་ན། ཚད་མ་མ་ཡིན་པ་དེས་ན་མཚམས་སྦྱོར་བ་དང་འཆི་བའི་སེམས་གཉིས་འགལ་བ་སྲིད་པ་ཡོད་དོ་ཞེས་བྱ་བའི་དོན་ཏོ། །སུན་འབྱིན་པའི་དོན་ནི་འདི་ཡིན་ཏེ། ཚུལ་འདིས་དགྲ་བཅོམ་པའི་སེམས་མཚམས་སྦྱོར་བ་མེད་པ་ལ་ཚད་མར་བྱས་པའི་ལུང་དེ་ཉིད་འཁོར་བའི་སེམས་མཚམས་སྦྱོར་བ་ཡོད་པར་སྒྲུབ་པ་ལ་ཚད་མ་མ་ཡིན་པར་བརྗོད་ པ་ཡིན་ན་དེ་ཡང་མི་འཐད་དོ། །དེ་ནི་གཅིག་ཏུ་ཚད་མའམ་ཚད་མ་མ་ཡིན་པར་འགྱུར་དགོས ་པས་རེ་ཞིག་ཚད་མ་ཡིན་པའི་ཕྱོགས་ལ་གལ་ཏེ་གྲུབ་པའི་མཐའ་ཞེས་གསུངས་སོ། །དེས་བསྟན་པའི་མཚམས་སྦྱོར་བའི་མངོན་སུམ་གྱིས་མ་མཐོང་བས་ན་གྲུབ་པའི་མཐའ་ཚད་མས་གནོད་པ་ཡིན་ནའོ། །དགྲ་བཅོམ་པའི་སེམས་མཚམས་སྦྱོར་བ་མེད་པ་གཉིས་ཀྱི་སྒོ་ནས་འགལ་བར་འདོད་པ་འགྲུབ་པར་གལ་འགྱུར། འདི་ལ་ཚད་མས་གྲུབ་པའམ་གནོད་པའི་དོན་ཡིན་པས་ན་མ་གྲུབ་པ་དོན་ཅན་ནོ། །དགྲ་བཅོམ་པའི་སེམས་མཚམས་སྦྱོར་བ་མེད་པའི་དོན་དུ་རྗེས་སུ་འབྲང་འམ་ཅི། དགྲ་བཅོམ་པའི་སེམས་མཚམས་སྦྱོར་བ་མེད་པའི་སྒོ་ནས་འགལ་བར་མི་འགྲུབ་བོ། །འདོད་པ་ནི་ཞེས་བྱ་བ་ནི། དཔེར་ན་ཁྱེད་ཀྱི་འགའ་ཞིག་ཏུ་ཚད་མ་ཡིན་ལ། འགའ་ཞིག་ཏུ་ནི་མ་ཡིན་པ་དེ་བཞིན་དུ་ངའི་གཉིས་ཀ་ལ་ཡང་ཡིན་ནོ་ཞེས་བྱ་བའི་དོན་ཏོ། །ཕྱེད་ཕྱི་མ་བཤད་པའི་དོན་དུ་གཞན་གྱི་བསམ་པ་བརྗོད་པ་ནི་འོན་ཏེ་ནས་ཞེ་ནའི་བར་རོ། །དོགས་པ་དེའི་རྣམ་པ་རྣམ་འགྲེལ་ཉིད་ན་ཡོད་པ་བརྗོད་པ་ནི་གལ་ཏེ་ནས་མ་ཡིན་ནའི་བར་རོ། །གལ་ཏེ་དགྲ་བཅོམ་པ་འཆི་བའི་སེམས་མཚམས་སྦྱོར་བ་མ་ཡིན་པ་དེ་ལྟ་ན་ཡང་འཆི་བའི་སེམས་ཡིན་པའི་ཕྱིར་ནི་མ་ཡིན་གྱི། འོན་ཀྱང་རྒྱུ་མ་ཚང་བའི་ཕྱིར་རོ། །གལ་ཏེ་འཆི་བའི་གནས་སྐབས་ཀྱི་སེམས་མཚམས་སྦྱོར་བ་མེད་པར་གྲུབ་ན་ནི་དེའི་ཚེ་གཞན་གྱི་ཚེ་ཡང་དེ་བཞིན་དུ་འགྱུར་རོ། །ལན་དུ་རྒྱུ་དང་བྲལ་བ་དེ་ཉིད་ཅེས་གསུངས་སོ། །གལ་ཏེ་འདི་བསྒྲུབ་བྱ་བ་སྒྲུབ་པར་ནུས་པ་ཉིད་དུ་དམིགས་པ་དེ་ལྟ་ཡིན་ན་ནི། འཆི་བའི་སེམས་ནི་ཆོས་ཅན། མཚམས་སྦྱོར་བ་མེད་པའི་ཆོས་ཅན་ཡིན་ཏེ་རྒྱུ་དང་བྲལ་བའི་ཕྱིར། དགྲ་བཅོམ་པ་ཐ་མའི་སེམས་བཞིན་ནོ་ཞེས་བརྗོད་པར་རིགས་སོ་ཞེས་
བྱ་བའི་དོན་ཏོ། །སྒྲུབ་པར་བྱེད་པ་འདི་བརྗོད་ཀྱང་མངོན་པར་འདོད་པའི་བསྒྲུབ་བྱ་འགྲུབ་པ་ནི་མ་ཡིན་ནོ་ཞེས་བསྟན་པའི་ཕྱིར་དེ་ཉིད་ཡང་བཟླས་ནས་འཆད་བ་ནི་ཡང་ན་ཞེས་བྱ་བའོ། །རྒྱུ་སྟེ་སྐྱེད་བྱེད་བྲལ་བ་སྟེ་ན་དལ་སོགས་པས་ནུས་པ་མེད་པའི་ཕྱིར་ནའོ།། བྲལ་བ་གཏན་ཚིགས་ཡིན་གྱི་མ་ངེས་པའི་ཕྱིར་འཆི་བའི་སེམས་ཉིད་མ་ཡིན་ནའོ། །མཐའི་ཚིག་ཅིས་མ་བརྗོད་ཅེས་པའི་ཆ་ཁ་བསྐངས་ནས་འཆད་པ་ནི། འདིར་ལྷག་པ་ནི་ཅི་ཞིག་བརྗོད་ཅེས་བྱ་བའོ། །གལ་ཏེ་གཏན་ཚིགས་གཞན་བརྗོད་པ་མ་ཡིན་ནམ། དེས་ན་ཇི་ལྟར་ལྷག་མ་བརྗོད་ཅེ་ན། འདི་ཡང་ཞེས་གསུངས་སོ། །ཅི་ལྟར་ཞེ་ན། སྔ་མའི་ཞེས་བྱ་བ་ལ་སོགས་པའོ། །ལྷག་མ་དེ་ཉིད་ལ་ཞེས་བྱ་བ་ནི་གཏན་ཚིགས་ཉིད་དུ་སྦྱོར་བ་ནི་གང་གི་ཕྱིར་ཞེས་བྱ་བའོ། །ཅི་ལྟར་སྒྲུབ་པར་བྱེད་པ་འདི་མ་གྲུབ་སྙམ་པའི་དོགས་པ་བཟློག་པའི་དོན་དུ་ཡང་དེ་ཉིད་རྣམ་པ་གཞན་དུ་འཆད་པ་ནི་ཡང་ན་ཞེས་བྱ་བའོ། །རྒྱུ་དང་བྲལ་བ་དེའོ། །ཉིད་ཀྱི་སྒྲ་ནི་རིམ་པ་གཞན་ཡིན་ཏེ། ཅིས་མ་ཉམས་ཏེ་དེ་ནི་ཉམས་པ་ཉིད་དེ། ཅི་ཞིག་ཡོད་གྱུར་གང་མེད་པ། །གང་གིས་ཕྱི་ནས་མཚམས་སྦྱོར་མེད། །ཅེས་བསྟན་པ་ཉིད་དོ། །འོན་ཏེ་ཡང་ཞེས་བྱ་བ་ནི་གཞན་གྱི་དོགས་པ་བསུ་བའོ། །གལ་ཏེ་ཡིད་སྔ་མ་རྒྱུ་ཡིན་ན་མ་གྲུབ་པ་ཉིད་དུ་འགྱུར་བ་ཞིག་ན། རྒྱུ་ནི་ལུས་ཡིན་ལ། དེ་ཡང་ནད་ལ་སོགས་པས་མ་ཚང་བར་འགྱུར་བར་སྲིད་པ་ཡིན་ནོ་སྙམ་དུ་བསམས་པའོ། །སུན་འབྱིན་པར་ཡང་གལ་ཏེ་ལུས་རྒྱུ་ཡིན་ན་འདི་རིགས་པ་ཞིག་ན་དེ་ལྟར་ནི་མ་ཡིན་ནོ་སྙམ་དུ་དགོངས་པའོ། །དེ་ཡང་སྔར་བརྗོད་ཟིན་ཏེ། འདི་ནི་ལྷག་པ་བརྗོད་པའི་དོན་དུ་ཡིན་ནོ། །ལུས་རྣམ་པ་གཉིས་པོས་ཞེས་བྱས་གཞན་གྱིས་སྨྲས་པ་ཉིད་རྗེས་སུ་བརྗོད་ནས་སོ་སོའམ་གཞན་དུ་རྒྱུ་ཡིན་པར་འགྱུར་ཞེས་རྣམ་པར་བརྟགས་པའོ། །དེ་ལ་རྣམ་པར་རྟོག་པ་དང་པོ་སེལ་བ་ནི། དེ་བློ་བཞིན་དུ་འཛིན་འགྱུར་ཕྱིར། །ཞེས་བྱ་བའོ། །དབང་པོ་དེའི་བློ་ཡིད་ཀྱི་ཤེས་པ་ལས་གཞན་དུ་གྱུར་པ་དེ་བཞིན་དུ་ཡིད་ཀྱི་ཤེས་པས་ཀྱང་དམིགས་པར་འགྱུར་རོ་ཞེས་བྱ་བའི་དོན་ཏོ། །ཡང་དེའི་བློ་བཞིན་དུ་ཡིད་ཀྱི་ཤེས་པ་དབང་པོའི་བྱེད་པའི་རྗེས་སུ་འཇུག་པས་ཡུལ་འཛིན་པར་འགྱུར་རོ། །དེ་ནས་དབང་
པོ་བྱེད་པ་མེད་པ་ལ་ཡིད་ཀྱི་ཤེས་པ་ཡོད་པར་མི་འགྱུར་རོ། །ཡང་ན་དེའི་བློ་བཞིན་དུ་ཞེས་བྱ་བ་དབང་པོ་གྱུར་ན་འགྱུར་བ་ཉིད་དང༌། ཡིད་ཀྱི་འཛིན་པར་འགྱུར་རོ། །འདི་ཐམས་ཅད་ནི་བཤད་པར་གསལ་བར་འགྱུར་རོ། །རྣམ་པར་རྟོག་པ་གཉིས་པ་བཟློག་པ་ནི་ཤེས་བ་སྐྱེད་ཅེས་བྱ་བའོ། །རྣམ་པར་རྟོག་པ་གསུམ་པ་དབང་པོ་མེད་པ་ལ་བཤད་པ་ནི་སེམས་ཉིད་མེད་ཕྱིར་ཞེས་བྱ་བའོ། །དབང་པོའི་རང་བཞིན་དུ་གྱུར་བའི་ནུས་པ་དེ་དང་འཇུག་པ་ཞེས་བྱ་བའི་དོན་ཏོ། །དེས་ན་དབང་པོའི་རང་བཞིན་ཉིད་ཅེས་བརྗོད་པ་ཡིན་ནོ། །བྱིན་གྱིས་རློབ་པར་བྱེད་པ་ཉིད་དབང་ཡིན་ནོ་ཞེས་བྱ་བའི་ལུགས་ཀྱང་སྟོན་པར་འགྱུར་བ་ཡིན་ཏེ། འདི་ནི་དེ་ལ་ལྟོས་ནས་བརྗོད་པ་ཡིན་ནོ། །དབང་པོའི་རྗེས་སུ་འབྲངས་བའི་ཡིད་ཤེས་པ་ཡང་དེ་ཡིན་ལ་གཞན་ཡང་ཡིན་པ་སྟེ། དེའི་རང་བཞིན་དང་འདྲ་བའི་རང་བཞིན་དུ་འདི་འགྱུར་ཏེ། གསལ་བས་གཅད་པའི་རྣམ་པ་ཅན་དུ་འགྱུར་རོ། །དེ་ལྟ་མ་ཡིན་ན་དེ་དབང་པོ་ལས་སྐྱེ་ཡང་དེ་ལྟར་མི་འགྱུར་ན། དེའི་ཚེ་དབང་པོ་དེའི་རྒྱུ་ལས་དེའི་རང་བཞིན་མ་ཡིན་པ་འབྱུང་ནས་ཏེ། ཅི་སྐང་བཤད་པ་ལས་རྣམ་པར་རྟོག་པ་འབྱུང་བ་ཡིན་ན། རྣམ་པར་རྟོག་པ་དེའི་རང་བཞིན་དེ་གང་ལས་འབྱུང་བ་ཡིན་ཏེ། དེའི་ཕྱིར་རྒྱུ་མེད་པར་འགྱུར་རོ། །འདི་ལ་གཞན་གྱི་གལ་ཏེ་ཞེས་སྨྲས་སོ། །མེ་ལས་དུ་བ་དང༌། ཐལ་བ་སྐྱེ་བ་ལ་ཚོགས་ཐ་དད་པ་ཡོད་པ་ཡིན་ཏེ། བུད་ཤིང་ལ་ཡོད་པའི་སྙིང་པོ་མ་ཡིན་པ་མེ་དང་བཅས་པ་ནི་ཐལ་བ་སྐྱེད་ལ། ཤིན་དུ་སྙིང་པོ་མ་ཡིན་པ་ནི་དུ་བ་སྐྱེད་པར་བྱེད་པ་ཡིན་ན། འདིར་མི་གཅིག་ཤེས་པ་མི་འདྲ་བ་གཉིས་བསྐྱེད་པ་ལ་རྟེན་ཅི་ཡོད་སྙམ་ན། ཚོགས་པ་ཐ་དད་པ་ནི་ཞེས་བྱ་བའོ། །རྩོད་པ་འདི་ལ་དེ་ཉིད་ཡང་རྣམ་པ་གཞན་དུ་བཤད་པས་ལན་འདེབས་པ་ནི་དེ་ནི་མ་ཡིན་ཏེ་ཞེས་བྱ་བའོ། །དེ་ཉིད་ཀྱི་ཕྱིར་དེ་བློ་བཞིན་དུ་ཞེས་གསུངས་སོ།། རང་གི་ཚིག་ལེའུར་བྱས་པ་དང་བཅས་པ་རྩ་བའི་དོན་གསལ་འདེབས་པ་ནི། དབང་པོའི་བློ་ནི་ཞེས་བྱ་བའོ། །དེ་ལྟར་དབང་པོ་ལས་སྐྱེས་པར་རོ། །དབང་པོ་ལས་སྐྱེས་པ་དེ་ཡིན་ནའོ། །དབང་པོའི་རྗེས་སུ་མི་འབྲངས་པ་ཉིད་གསལ་བར་བྱེད་པ་ནི་དབང་པོ་ལས་ནི་ཞེས་བྱ་བའོ། །
ཉེ་བ་མེད་པ་ནི་ཉེ་བར་མི་གནས་པའོ། །རྩོད་པ་དེ་ཉིད་ལ་ཡང་རྣམ་པ་གཞན་དུ་བཤད་པས་ལན་དུ་འགྱུར་པར་སྟོན་པ་ནི་གང་རྣམ་པར་འགྱུར་ཡང་ཞེས་བྱ་བའོ། །གལ་ཏེ་འཛིན་འགྱུར་ཕྱིར་ཞེས་བརྗོད་པ་མ་ཡིན་ནམ། དེ་ཅི་ལྟར་ན་རྣམ་པར་ཤེས་པས་འགྱུར་རོ་ཞེས་བརྗོད་ཅེ་ན། འཛིན་པ་ནི་རྣམ་པར་ཤེས་པ་ཉིད་དོ་ཞེས་གསུངས་སོ། །ཅི་སྟེ་དེ་འགྱུར་བས་འགྱུར་བ་མ་ཡིན་ན་ཞེས་བྱ་བ་ནི་མིག་བཙུམ་ལ་ཡང་རྣམ་པར་རྟོག་པར་འགྱུར་བ་མེད་པར་གནས་པའི་ཕྱིར་རོ། །ལན་འདི་ཉིད་དོ་ཞེས་བྱ་བ་ནི་ཕྱོགས་སོ་སོར་སུན་བྱུང་བ་ཉིད་དེ་ཚོགས་པ་གཞན་མེད་པའི་ཕྱིར་རོ། །ཤེས་པ་སྐྱེད་པའི་ནུས་པ་གང་ཡིན་པ་དེ་ཐ་དད་པ་སྟེ། སོ་སོ་སོ་སོར་གྱུར་པའི་ཕྱིར་ཏེ་གཞན་ལ་ལྟོས་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་གཞན་ལ་ལྟོས་ནས་ནུས་པ་ཡིན་ན་དེའི་ཚེ་ཚོགས་པ་སྐྱེད་བྱེད་ཡིན་པས་ན་གཅིག་མེད་ཀྱང་ཚོགས་པ་མེད་པའི་ཕྱིར་ཡིད་ཀྱི་ཤེས་པ་མི་སྐྱེ་བར་འགྱུར་རོ། །ཀྱང་གི་སྒྲས་ནི་ཞེས་བྱ་བས་ནི་ནུས་པ་ཐ་དད་ཕྱིར་ཞེས་བྱ་བ་འདིའི་དེ་མ་ཐག་ཏུ་བལྟ་བར་བྱ་བས་སོ། །ཀུན་ལས་ཀྱང་ནི་ཞེས་བརྗོད་པ་གང་ཡིན་པ་དེ་ནི་ཁ་བསྐངས་པ་ཡིན་ནོ་ཞེས་བྱ་བའི་དོན་ཏོ། །རྣམ་པར་རྟོག་པ་གསུམ་པོའི་དབང་དུ་བྱས་ནས་བཤད་པ་ནི་སེམས་ཉིད་མེད་ཕྱིར་ཞེས་བྱ་བའོ། །སྐྲ་དང་སེན་མོའི་རྩེ་མོ་ལ་སོགས་པ་དབང་པོ་མེད་པ་ལས་སོ། །དེ་ནི་འདོད་པ་ཉིད་ཡིན་ཏེ། དབང་པོའི་ཤེས་པ་དང་བྲལ་བ་ནི་སྤང་བར་མི་ནུས་པའི་ཕྱིར་རོ། །འོན་ཏེ་འདི་གཏན་ཚིགས་ཅི་ལྟར་ཡིན་ཏེ། མ་ངེས་པའི་ཉེས་པས་ཉེས་ཆགས་པའི་ཕྱིར་རོ། །དེ་ཉིད་སྟོན་པ་ནི་གལ་ཏེ་ཞེས་བྱ་བའོ། །འོན་ཏེ་ཡིད་ཀྱི་རྣམ་པར་ཤེས་པ་ཞེས་བྱ་བའི་དོན་ནི་འདི་ཡིན་ཏེ། གལ་ཏེ་སྐྲ་དང་སེན་མོའི་ཙེ་མོ་ལ་སོགས་པ་ལ་ཡིད་ཀྱི་རྣམ་པར་ཤེས་པ་མེད་པའི་ཕྱིར། ཡིད་ཀྱི་རྣམ་པར་ཤེས་པ་མེད་པར་སྒྲུབ་ན་དེའི་ཚེ་དེ་ཉིད་བསྒྲུབ་བྱ་དང་སྒྲུབ་བྱེད་ཀྱང་ཡིན་པས་དམ་བཅས་པའི་དོན་གྱི་ཕྱོགས་གཅིག་ཉིད་དོ། །ཚོར་བྱེད་ཉིད་ཅེས་བྱ་བ་ནི་ཚོར་བར་བྱེད་པའི་ཚོར་བ་དེ་བྱེད་པ་སྟེ། ཚོར་བ་ཅན་ཞེས་བྱ་བའི་དོན་ཏོ། །དེའི་ཚེ་སྐྱེ་བ་དང་པོར་སྐྲ་དང་སེན་མོའི་རྩེ་མོ་ལ་སོགས་དེ་ལས་ཡིད་ཀྱི་ཤེས་པ་སྐྱེ་བ་ཡིན་ནོ་ཞེས་ཅི་ལྟར་རྟོགས། དཔེར་ན་ལུས་དང་ལྕེ་ལ་
སོགས་པ་ཤིན་ཏུ་ཉེ་བ་ན་གནས་པ་ལས་རང་གི་ཤེས་པ་དང་རྗེས་སུ་འབྲེལ་བར་རྟོགས་པས་ན་གཞན་གྱི་ཚེ་ཤེས་པའི་ཉེ་བར་ལེན་པའི་རྒྱུ་ཡང་ཡིན་ནོ་ཞེས་རེས་འགའ་འཁྲུལ་བརྟེན་པར་ཡང་འགྱུར་བ་ཡིན་ནོ། །སྐྲ་དང་སེན་མོའི་རྩེ་མོ་ལ་སོགས་པ་ནི་དེ་ལྟར་རང་གི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་ཚོར་བ་དང་ལྡན་པར་རྟོགས་པ་མ་ཡིན་ན། གང་གིས་རེས་འགའ་དེའི་ཉེ་བར་ལེན་པའི་ཐ་སྙད་ལ་བརྟེན་པར་འགྱུར། གྲང་བ་བྱེད་པར་ནམ་ཡང་མ་དམིགས་པའི་མེ་ནི་གྲང་བའི་རྒྱུ་ཉིད་དུ་ཐ་སྙད་བྱ་བར་འཐད་པ་མ་ཡིན་ནོ། །དེ་ནས་གཞན་གྱི་ཚེ་དེ་ལྟར་མ་དམིགས་པའི་ཕྱིར་སྐྱེ་བ་ནི་དང་པོའི་སེམས་སྐྱེ་བ་ན་དེ་ལྟར་ཡིན་པ་དགག་པ་བསྒྲུབ་པར་བྱ་བ་ཡིན་པས་ཉེས་པ་མེད་དོ། །གལ་ཏེ་དེ་ཉིད་ཀྱི་ཚེ་སེམས་མེད་པའི་ཕྱིར་སེམས་མི་སྐྱེ་བར་བརྗོད་ན། དེའི་ཚེ་དམ་བཅས་པའི་དོན་གྱི་ཕྱོགས་གཅིག་ཡིན་པའི་ཉེས་བར་འགྱུར་རོ། །རང་ཉིད་འཐད་པ་གཞན་འཆད་པ་ནི་དེ་དང་འབྲེལ་པ་ཉིད་ཡིན་ན་ཞེས་བྱ་བའོ། །ཐ་མི་དད་པའི་ཕྱིར་ཞེས་བྱ་བ་ལ་ཐ་དད་པར་གྱུར་པ་ན་ཐ་དད་པ་སྟེ་སོ་སོར་གནས་པ་ཐ་མི་དད་པ་ནི་སོ་སོར་མི་གནས་པ་སྟེ། ལྷན་ཅིག་གནས་པ་ཞེས་བྱ་བའི་དོན་ཏོ། །དེ་ལྟར་ཡིན་པ་ཅིའི་ཕྱིར་ཞེ་ན། ནུས་པ་དེ་ལྟར་གནས་པའི་ཕྱིར་ཞེས་བྱ་བའོ།། ལས་དེའི་ནུས་པ་ནི་ཅི་ལྟར་ལྷན་ཅིག་ཉིད་དུ་གནས་པར་བྱེད་པ་དེ་ཁོ་ན་ལྟར་གནས་པ་ཡིན་ནོ་ཞེས་བྱ་བའི་དོན་ཏོ། །སློང་བ་ནི་གཡོ་བ་མེད་པ་སྟེ་ཞན་པ་ཞེས་པ་བྱའི་དོན་ཏོ། །དོན་དེ་གཟུང་བར་བྱ་བའི་ངེས་པར་རྟོགས་པ་ཙམ་ཡོག་ཡིན་པ་སྒོའི་གནས་ལྟ་བུ་ཡིན་ཏེ་དེས་ཞེས་བྱ་བའི་དོན་ཏོ། །གདུང་བ་མི་བཟོད་པ་ཞེས་བྱ་བ་ནི་འཆད་པ་སྟེ། གདུང་བའི་རྒྱུ་མཚན་གྱིས་བརྡེག་པ་ལ་སོགས་པ་མི་བཟོད་པ་དེ་ལྟར་མི་འདོད་པའོ། །ཅི་ལྟར་མི་བཟོད་ཅེ་ན་དེ་གོམས་པས་ཏེ་གདུང་བའི་རྒྱུ་ཉིད་གོམས་པས་སོ། །གང་གི་ཆོ་མི་བཟོད་ཅེ་ན་དེ་ཡིད་ལ་མནོས་པས་ན་སྟེ། གདུང་བའི་རྒྱུ་ཡིད་ལ་མནོས་པས་ནའོ། །དོན་འདི་ཡིན་ཏེ། གང་གི་ཚེ་མཚོན་བརྡེག་པ་ལ་སོགས་པ་ཡིད་ལ་བྱེད་པས་དམིགས་པར་གྱུར་བ་དེའི་ཚེ་སྡུག་བསྔལ་གྱི་རྒྱུ་ཉིད་དུ་བསྒོམས་པས་ངེ་མི་བཟོད་པ་ནི་ཡིད་ཀྱི་རྣམ་པར་འགྱུར་བ་གདུང་བའི་མཚན་ཉིད་དུ་འགྱུར་གྱི་གཞན་དུ་ནི་མ་ཡིན་ནོ། །འདི་ཉིད་གསལ་བར་བྱེད་
བ་ནི་ཡིད་ཀྱི་དམིགས་པས་ཞེས་བྱ་བ་སྟེ། རང་གི་ཤེས་པས་མྱོང་པས་ཞེས་བྱ་བའི་དོན་ཏོ། །གལ་ཏེ་དམིགས་པ་ཉིད་རྟེན་མ་ཡིན་ནམ། དེ་ཅི་ལྟར་ན་རྟེན་དུ་འགྱུར་བ་ནི་མ་ཡིན་ཞེས་བརྗོད་ཅེ་ན། དམིགས་པའི་ཞེས་གསུངས་སོ། །ཕྱི་རོལ་ནི་ནད་ལ་སོགས་པས་ཉམས་པ་ལྟ་བུའི་ལུས་སོ། །དེ་ཞེས་བྱ་བ་ནི་ཕྱི་རོལ་ལོ། །བརྗོད་བར་འདོད་པའི་ལྷག་མ་སྟོན་པ་ནི་དེ་མེད་ཀྱང་ཞེས་བྱ་བ་སྟེ། ངལ་མཚོན་ཕོག་པར་འོང་ངོ་ཞེས་བྱ་བའི་རྣམ་བར་རོ། །དེའི་ཕྱིར་གནོད་པར་བྱེད་པ་ཡོད་ཀྱང་ཡིད་ཀྱི་རྣམ་པར་ཤེས་པས་སྒྲོ་བཏགས་པ་རྣམ་པ་ཕྱི་དང་ནང་ཡང་རིག་པ་ཡིན་གྱི། ཕྱིའམ་ནང་གི་གནོད་པར་བྱེད་པ་ནི་རང་གི་ངོ་བོས་རིག་པ་མ་ཡིན་ནོ། །དེས་ན་སྒྲོ་བཏགས་པའི་རྣམ་པ་དེའི་འགྱུར་བས་ཡིད་དེ་ཡིད་ཀྱི་རྣམ་པར་ཤེས་པ་རྒྱུན་ཕྱི་མའི་རང་བཞིན་དུ་གྱུར་པ་རྣམས་དེར་འགྱུར་ཏེ། རྣལ་དུ་གནས་པ་མ་ཡིན་པའི་གནས་སྐབས་སུ་འགྱུར་རོ། །འདི་ཙམ་གྱིས་ནི་རྣམ་པར་འགྱུར་བ་ལས་སམ། རྣམ་པར་འགྱུར་བ་བསྒྲུབ་པའི་སྒོ་ནས་ཀྱང་རུང་སྟེ། ཕྱིའམ་ནང་གི་རྟེན་མ་ཡིན་ཏེ། སྒྲོ་བཏགས་པ་ཉིད་རྣམ་པར་འགྱུར་བའི་ཕྱིར་རོ་ཞེས་བརྗོད་པ་ཡིན་ནོ། །དངོས་པོ་དམིགས་བཞིན་པ་ཉིད་རྣམ་པར་འགྱུར་བར་བྱེད་པ་ཡིན་མོད་དེ་ལྟ་ན་ཡང་དམིགས་པ་ཉིད་ནི་རྟེན་མ་ཡིན་ཏེ། བསྟན་མ་ཐག་པ་ཁོ་ནའི་ཕྱིར་རོ་ཞེས་བརྗོད་པ་ནི། རྟེན་དང་དམིགས་པ་དག་ནི་ཞེས་བྱ་བའོ། །དེ་ནས་ལུས་དེའི་རྟེན་མ་ཡིན་ནོ་ཞེས་བྱ་བ་ནི་དམིགས་པ་ཡིན་ཡང་ཡིད་ཀྱི་ཤེས་པའི་རྟེན་ནི་མ་ཡིན་ནོ། །དེས་ན་ང་དང་ངའི་ཞེས་བྱ་བ་ལ་སོགས་པའི་རྣམ་པས་འཇུག་པ་ཉོན་མོངས་པ་ཅན་ཏེ་དེ་ཉིད་ནི་འཁོར་བ་ཡིན་ནོ་སྙམ་དུ་དགོངས་པའོ། །འོ་ན་ཡིད་ཀྱི་རྣམ་པར་ཤེས་པའི་རྟེན་གང་ཡིན་ཞེས་ན། དེའི་རྟེན་གང་ཡིན་པ་ཀུན་གཞི་རྣམ་པར་ཤེས་པ་དེ་ནིའོ། །ལུང་ལས་གྲུབ་པ་དེ་ཡང་རྟགས་པར་ཡོད་པ་ཡིན་ཏེ། རྟེན་མེད་པ་ནི་བཟོད་པ་རྗེས་སུ་གཟུང་བའི་དོན་དུ་བཤད་པ་ཡིན་ནོ་ཞེས་བསམས་པའོ། །དེ་ཉིད་ཀྱི་ཕྱིར་དོན་དམ་པར་དམིགས་པ་དང༌། རྟེན་གྱིས་སྟོང་པར་སྟོན་པ་ནི་སྔ་ཕྱིར་སྒྲོ་བཏགས་པ་ཞེས་བྱ་བའོ། །ང་དེ་དང་དེ་ཞེས་བྱ་བ་ནི་སྔ་མ་དང་ཕྱི་མ་ནི་སྒྲོ་བཏགས་པ་ཙམ་ཡིན་ནོ། །དམིགས་པ་ཡིན་ཏེ་
དེའི་རྣམ་པར་ཤེས་པ་སྣང་བའི་ཕྱིར་རོ། །དེ་ཡང་འཁྲུལ་པས་ན་དམིགས་པ་མེད་པའོ། །རྟེན་མེད་པ་ནི་ཀུན་གཞི་རྣམ་པར་ཤེས་པ་བརྟགས་ཡོད་དུ་སྟོན་པའི་ཕྱིར་རོ། །དེས་ན་བློ་ཉིད་བློའི་རྟེན་ནོ་ཞེས་བྱ་བར་རིགས་སོ། །དེ་རྒྱུ་ཞེས་བྱ་བ་ནི་ཁྱད་པར་ཅན་ཏེ། བདག་ལྡོག་པ་ས་ཟློག་པར་བྱེད་པའོ། །དཔེར་ན་འོད་དང་དུ་བ་ལ་སོགས་པ་ལ་སྒྲོན་མ་དང་མེ་ལ་སོགས་པ་བཞིན་ནོ། །འདི་ཡོད་ན་ཞེས་བྱ་བར་གསུངས་པ་ནི་བདུན་པ་ཞེས་བརྗོད་དོ། །དེ་ཉིད་ནས་འདི་སྐྱེས་བའི་ཕྱིར་འདི་སྐྱེ་ཞེས་བྱ་བའི་ཆོགས་ནི་སྐྱེས་ཕྱིར་ཞེས་བྱ་བས་མཚོན་ཏོ། །དེ་ལྟ་ཡིན་དང་འདི་ལས་སྐྱེས་ཞེས་བྱ་བ་ཡང་བསྟན་པ་ཡིན་ནོ། །དེ་ཉིད་ཀྱི་ཕྱིར་དེ་ཉིད་ལས་ལྔ་ཞེས་འཆད་པར་འགྱུར་རོ། །རྒྱུ་ལོག་པས་བཟློག་པར་བྱ་བའི་འབྲས་བུ་གང་ཡིན་པ་དེའི་ཕན་འདོགས་པར་བྱེད་པའོ། །གང་ཞིག་རེས་འགའ་ཞེས་བྱ་བ་ལ་ལུས་ཀྱི་བསྐུ་བྱུག་ལ་སོགས་པ་ལྟར་རོ། །འདི་ཙམ་གྱི་ནི་རང་ལོག་པས་ཟློག་པར་བྱེད་པ་ཉིད་ནི་རྟག་ཏུ་རྗེས་སུ་འཇུག་པ་ཉིད་ཀྱིས་ཁྱབ་པར་བརྗོད་པ་ཡིན་ནོ། །བློ་ལ་ནི་ལུས་དེ་ལྟར་མ་ཡིན་པར་བརྗོད་པ་ནི་ལུས་ཡོད་པ་ནི་ཞེས་བྱ་བའོ། །ཡིད་ལ་རྟག་ཏུ་ཕན་འདོགས་པ་མ་ཡིན་ནོ་ཞེས་བྱ་བ་ནི་ལྷག་མའོ། །ཁྱབ་པར་བྱེད་པར་མི་དམིགས་པ་མ་གྲུབ་པ་སྤང་པ་ནི་སེམས་སྔ་མ་ཙམ་ཞེས་བྱ་བའོ། །ལུས་སྔ་མ་ཁོ་ན་བཞིན་གནས་ཀྱང་སྐྲག་པ་དང་མྱ་ངན་ལ་སོགས་པས་ཡིད་ཕྱི་མ་འགྱུར་བར་མཐོང་བའི་ཕྱིར་རོ། །རྟག་ཏུ་རྗེས་སུ་འཇུག་པ་མེད་པ་དེའི་ཕྱིར་རོ། །ཉེ་བར་ལེན་པའི་སེམས་དེས་ཉེ་བར་བསྟན་པ་དེ་ཡོངས་སུ་བཟུང་བ་ལས་སོ། །དེ་ལྟར་ལུས་མེད་ཀྱང་ཡོད་པར་དོགས་པས་ན་རྟག་ཏུ་རྗེས་སུ་འཇུག་པ་མེད་པའི་ཕྱིར་རང་ལོག་པས་ལྡོག་པར་བྱེད་པ་མ་ཡིན་ནོ་ཞེས་བརྗོད་པ་ཡིན་ནོ། །ལུས་དང་ཡིད་ཀྱི་རྣམ་པར་ཤེས་པ་དག་ལ་ནི་རྒྱུ་དང་འབྲས་བུའི་དངོས་པོར་སྒྲུབ་པའི་ཚད་མ་ཡང་མེད་དོ་ཞེས་བསྟན་པའི་དོན་དུ་ལུས་ནི་ཞེས་བྱ་བའོ། རང་ངམ་གཞན་འགའི་ས་ཞེས་འབྲེལ་ཏོ། །རྣམ་པ་གཞན་ནི་མ་པས་སོ། །རིག་པ་ཞེས་བྱ་བ་ནི་ཐམས་ཅད་དུ་འབྲེལ་ཏོ། །དེ་ལ་།དེ་ལ་སྐྱེས་བ་དང་མ་སྐྱེས་བའི་ཕྱོགས་སེལ་བ་ནི་དེ་ལ་རེ་ཞིག་ཅེས་བྱ་བའོ། །གཞལ་ཞེས་བྱ་བ་ནི་ངའི་ཞེས་རང་གི་ངོ་བོ་ལ་དམིགས་པ་ཞེས་འགྲེལ་ཏོ། །ཡང་ན་
དེ་ལྟར་རང་གི་ངོ་བོ་ལ་དམིགས་པའམ། གཞན་ལ་ཞེས་བྱ་བར་ཐ་དད་པར་དམིགས་པ་ལའོ་ཞེས་བཤད་པར་བྱའོ། །དེ་རྟོགས་པ་ཉིད་ནི་དམིགས་པ་རྟོགས་པ་ཉིད་དོ། །གཞན་ཏེ་དམིགས་པ་མ་ཡིན་པ་རྒྱུ་དང་འབྲས་བུའི་དངོས་པོའོ། །གང་ཞིག་རྟོགས་པ་བཀག་པ་དེའི་རྣམ་པར་བརྗོད་པ་ནི་བདག་འདི་ལས་སྐྱེས་སོ་ཞེས་བྱའོ། །འོ་ན་ཞེས་བྱ་བ་ནི་གཞན་གྱི་དེ་དག་ལ་ཡང་རྣམ་པར་རྟོག་བ་དེ་དག་ཉིད་ཉམས་བ་མེད་པའི་ཕྱིར་རོ། །མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །རྟོགས་པར་འགྱུར་བ་ཉིད་ཅེས་བྱ་བ་ལ་ཉེ་བའི་ཕྱིར་མི་ཕྱེད་བ་ཉིད་ལས་ཡིན་ནོ། །མིག་ཕྱེ་བ་ཉིད་ཅེས་བྱ་བ་ནི་དེ་ལས་སྔར་རྟོགས་པ་མ་ཡིན་ནོ་ཞེས་བྱ་བའི་དོན་ཏོ། །དེའི་ཚེ་ནི་མིག་གི་བྱེད་པ་མེད་ལ། སྔོན་པོ་ལ་སོགས་པ་རྟོགས་པ་ཡང་མེད་པའི་ཕྱིར་ལྡོག་པ་བསྒྲུབས་པ་མི་དམིགས་པའི་བྱེད་པ་བསྟན་པ་ཡིན་ལ། དེ་མ་ཐག་ཏུ་གཟུགས་མཐོང་བ་ཉིད་དུ་རྟོགས་པར་འགྱུར་བ་ཡིན་ཞེས་བྱ་བ་ནི་རྗེས་སུ་འཛིན་པ་རིམ་གྱིས་བྱུང་བའི་མངོན་སུམ་གཉིས་ཀྱི་བྱེད་པ་བསྟན་པའོ། །འདི་ཡང་སྔར་ཉམས་སུ་མྱོང་བ་ཡོད་ན་འགྱུར་བ་ཡིན་ན། སྐྱེ་བ་དང་པོའི་སྔོན་རོལ་དུ་ནི་ཉམས་སུ་མྱོང་བ་སྲིད་པ་མ་ཡིན་ནོ་ཞེས་ཞེ་ལ་བཞག་ནས་སྐྱེ་བ་དང་པོར་ཞེས་བྱ་བའོ། །ཅིའི་ཕྱིར་ཞེ་ན། ཤེས་པ་སྔ་ན་མེད་བ་ཞེས་གསུངས་སོ། །གཞན་གྱིས་ཀྱང་ཞེས་བྱ་བའི་རྣམ་པར་རྟོག་པ་གཉིས་པ་སློང་བ་ནི་གལ་ཏེ་ཞེས་བྱ་བའོ། །དེ་ཞེས་བྱ་བ་ཡིད་ཀྱི་རྣམ་པར་ཤེས་པའི་རྒྱུ་ཉིད་དོ། །སྐྱེ་བ་དང་པོ་ལས་སྔན་ཡིད་ཀྱི་རྣམ་པར་ཤེས་པ་མེད་པ་གཞན་གྱིས་ཀྱང་ག་ལ་རྟོགས་ཏེ། སེམས་ནི་སྔར་མེད་པ་ལས་ལུས་ཡོད་ན་ཡོད་དོ་ཞེས་ངེས། དེ་ནི་གཞན་གྱི་སྤྱོད་ཡུལ་མ་ཡིན་པའི་ཕྱིར་རོ། །དེ་ཉིད་ཕྱིར་བལྟར་རུང་བ་མ་ཡིན་ནོ་ཞེས་བྱ་བའོ། །དེ་ལྟར་ཡིན་དང་གཉིད་ལོག་པ་ལ་ཤེས་པ་ཡོད་པ་ཡིན་ལ། དེ་ལས་སད་པ་ལས་སྔར་ཤེས་པ་དམིགས་སུ་མེད་པ་ན། རྨི་ལམ་གྱི་གནས་སྐབས་ཀྱི་རྣམ་པར་ཤེས་པ་མེད་པར་རྟོགས་པ་སྒྲུབ་པར་བྱེད་པ་མ་ཡིན་ནོ། །གལ་ཏེ་བལྟ་བར་མི་ནུས་པ་ཡང་མཐོང་བ་ཙམ་གྱིས་འགོག་ན། དེའི་ཚེ་རྨི་ལམ་གྱི་གནས་སྐབས་ཀྱི་ཚོར་བ་ཡང་འགོག་པར་ཐལ་
ལོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བ་ནི་དོགས་པ་བསུ་བའོ། །རང་རིག་པ་ཉིད་ནི་རང་གི་དྲན་པ་ཁོ་ནའོ། །དེས་ན་མ་དྲན་པའི་ཕྱིར་རྨི་ལམ་ན་བློ་ཡོད་པར་འགྱུར་བ་མ་ཡིན་པ་ཁོ་ནའོ། །ཅིག་ཡོད་ཀྱང་བརྗེད་པ་འགྱུར་ཞེས་བྱ་བ་ནི། གསལ་བ་མེད་པའི་ཕྱིར་ཤེས་པ་བརྗེད་པའོ། །གསལ་བ་མེད་ན་ནི་ཉམས་སུ་མྱོང་བ་ཡོད་ཀྱང་བརྗེད་པ་མཐོང་བ་ཁོ་ནའོ། །འདི་ལྟར་སད་པས་བྱས་པ་ནི་རྨི་ལམ་དུ་མི་དྲན་ཏེ། དྲན་ན་ནི་དེའི་མོད་ལ་རྨི་ལམ་འདི་གནས་པ་ཡིན་ནོ་ཞེས་རྟོགས་པར་འགྱུར་བ་ན་དེ་ལྟ་ཡང་མ་ཡིན་ནོ། །དེ་ལྟ་ན་ཡང་རྨི་ལམ་གྱི་ཤེས་པ་དེ་ནི་སད་པའི་ཤེས་པ་དེ་ཉིད་ལས་ཡིན་ནོ། །དེ་བཞིན་དུ་སྲིད་པ་སྔ་མའི་རྣམ་པར་ཤེས་པ་དྲན་པར་མ་གྱུར་པ། བལྟར་མི་རུང་བས་ན་དགག་པར་མི་ནུས་པ་ལས་ཤེས་པ་འདི་འབྱུང་བ་ཡིན་ནོ་སྙམ་དུ་དགོངས་པའོ། །འོན་ཏེ་ཞེས་བྱ་བ་ནི། གལ་ཏེ་ཡང་གཉིད་ལོག་པའི་གནས་སྐབས་ན་རྨི་ལམ་གྱི་རྣམ་པར་ཤེས་པས་སད་པའི་རྣམ་པར་ཤེས་པའི་དེ་མ་ཐག་ཏུ་སྐྱེས་པ་ཡིན་ནོ་ཞེས་སུས་ཀྱང་རྟོགས་པ་མ་ཡིན་པ་དེ་ལྟ་ན་ཡང་སད་བ་ན་གཉིད་ལོག་པ་ལས་ལངས་པ་སྟེ། ང་ལས་ནི་སད་པའི་ཤེས་པའི་དེ་མ་ཐག་ཁོ་ནར་རྨི་ལམ་གྱི་རྣམ་པར་ཤེས་པ་སྐྱེས་པར་གྱུར་ཏོ་ཞེས་རྟོགས་སོ་ཞེ་ན། སྐྱེ་བ་དང་པོའི་ལུས་ཐོབ་པ་འདི་ཡང་སད་ནས་སྐྱེ་བ་སྔ་མའི་རྣམ་པར་ཤེས་པ་ལས་རྣམ་པར་ཤེས་པ་འདི་སྐྱས་སོ་ཞེས་བྱ་བར་མི་རྟོགས་ཞེས་བྱ་བ་དེ་ག་ལས་ཡིན། གང་གི་ཚེ་ཡང་རུང་སྟེ་དེ་འདྲ་བའི་སྨོས་པའི་གཉེན་པོ་ཡང་དག་པའི་ཤེས་པ་སྐྱེས་པའི་མཚན་ཉིད་ཅན་སད་པར་གྱུར་པ་ན་སྐྱེ་བ་གཞན་རྟོགས་པར་བྱ་བ་ཡིན་ནོ་སྙམ་དུ་དགོངས་པའོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །ལུས་འདི་ལོག་ནའོ། །འོན་ཏེ་ཞེས་བྱ་བ་ནི་གཞན་གྱིའོ། །ལྕི་བ་དེའོ། །བསམ་པ་ནི་ལྕི་བ་ལས་ཨུཏྤལ་སྐྱེ་བ་ཡིན་ལ་ཕྱིས་ནི་དེ་མེད་ཀྱང་ཨུཏྤལ་ཉིད་ལས་སྐྱེ་བ་ཡིན་ཞིང་དེ་ལྟ་ན་ཡང་དང་པོའི་ལྕི་པ་མེད་ན་མི་སྐྱེ་བ་ཁོ་ནའོ། །དེ་བཞི་ན་དུ་དང་པོ་ནི་ལུས་ལ་སེམས་སྐྱེ་ལ། ཕྱིས་ནི་དེ་མེད་ཀྱང་སེམས་ལས་སྐྱེ་བ་ནི་ལུས་ལ་སེམས་སྐྱེ་ལ། ཕྱིས་ནི་དེ་མེད་ཀྱང་སེམས་ལས་སྐྱེ་བ་ཁོ་ནའོ། །དེས་ན་གང་ཞིག་ཡིད་ཀྱི་རྣམ་པར་ཤེས་པ་ཡིན་པ་དེ་རྣམ་པར་ཤེས་པ་དེ་ནི་ཡིད་ཀྱི་རྣམ་པར་ཤེས་པ་སྔོན་དུ་
འགྲོ་བ་ཅན་ཡིན་ནོ་ཞེས་བྱ་བ་དེ་ཡང་མ་ངེས་པ་ཡིན་ནོ། །དེས་ན་སྲིད་པ་སྔ་མ་མ་གྲུབ་པོ་ཞེས་བྱ་བ་འདི་ཡིན་ནོ། །ལན་དུ་དེ་ཡང་གི་ན་སྟེ་ཞེས་བྱ་བའོ། །ལྕི་བ་དེ་མེད་པར་ནི་ཨུཏྤལ་ལས་མ་མཐོང་བ་ཉིད་དོ། །འོན་ཏེ་མ་ངེས་པར་བརྩད་པས་སྲིད་པ་སྔ་མ་མ་གྲུབ་པ་ལ་འདི་ནི་དཔེ་མ་ཡིན་ནོ། །ཅིའི་ཕྱིར་ཞེས་ན། གང་གི་ཕྱིར་ཤེས་པ་དེ་ལས་བཟློག་པ་ཡིན་ཏེ། དང་པོ་ཅི་འདྲ་བ་སྲིད་བ་དེ་འདྲ་བ་ཁོ་ན་ཕྱིས་ཀྱང་མཐོང་པ་ཡིན་ནོ། །དེས་ན་ཅི་ལྟར་དབུས་ཀྱི་གནས་སྐབས་ན་ཡིད་ཀྱི་རྣམ་པར་ཤེས་པ་སྔོན་དུ་འགྲོ་བ་ཅན་ཡིན་པ་དེ་བཞིན་དུ་སྐྱེ་བ་དང་བོའི་ཡང་ཡིན་ཏེ་དེ་འདྲ་བ་ཡིན་བའི་ཕྱིར་རོ་ཞེས་དགོངས་པའོ། །འཆད་པ་ནི་ཅི་འདྲ་པའི་ཨུཏྤལ་ཞེས་བྱ་བའོ། །ཨུཏྤལའི་དཔེ་དེས་སོ། །རྣམ་འགྲེལ་གྱི་ལྷག་མ་བཤད་བའི་དོན་དུ་གཞན་སློང་བར་བྱེད་པ་ནི་གལ་ཏེ་ཞེས་བྱ་བའོ། །མི་གསུང་བ་ཡང་མ་ཡིན་ཏེ་ཞེས་བྱ་བ་ནི་ཐུགས་རྗེ་ཆེན་པོ་མངའ་བའི་ཕྱིར་རོ། །དེའི་ཕྱིར་ཞེས་བྱ་བ་འདི་ནི་སྔར་སྦྱར་ཟིན་ཏོ། །ངག་གཅིག་ཉིད་བསྟན་པའི་ཕྱིར་འདི་ཡོད་ན་ཞེས་བྱ་བའོ། །རྒྱུ་མཚན་གྱི་བདུན་པ་ཞེས་བྱ་བ་གྱུར་ན་བདུན་པ་ཉིད་རྒྱུ་མཚན་གྱི་དོན་བསྟན་པའི་ཕྱིར་རྒྱུ་མཚན་གྱི་བདུན་པར་བཤད་པ་ཡིན་ཏེ་ཡོད་ན་ཞེས་བྱ་བ་འདི་ནི་ངེས་པར་གཟུང་བ་ལྷུར་བྱེད་པ་ཡིན་པའི་ཕྱིར་རོ། །དེ་ལྟ་ན་ཡང་རྟག་ཏུ་རྗེས་སུ་འཇུག་པར་ཅི་ལྟར་འགྱུར་སྙམ་ན། གཞན་དུ་ན་ཞེས་གསུངས་སོ། །གང་ཞིག་གང་མེད་པར་རྒྱུན་ཆགས་པར་མི་འབྱུང་བ་དེ་ནི་དེའི་རྒྱུ་མཚན་དུ་གྲགས་པའི་ཕྱིར་རོ་ཞེས་བྱ་བའི་དོན་ཏོ། །ལྔ་པ་ཡང་རྟག་ཏུ་རྗེས་སུ་འཇུག་པ། རྗོད་པར་བྱེད་པ་ཡིན་ནོ་ཞེས་བཤད་པ་ནི་ལྔ་བ་ཡང་ཞེས་བྱ་བའོ། །དེ་ལས་ཅིར་འགྱུར་ཞེ་ན། འབྱུང་ཁུངས་ཉིད་ཀྱང་ཞེས་གསུངས་ཏེ། སྐྱེ་བ་བྱེད་པ་པོ་ལས་འབྱུང་བ་ཞེས་བྱ་བྱ་བའི་ཚིག་འདིས་ཤེས་པར་བྱའོ། །དེ་ལ་སྐྱེ་བ་ཞེས་བྱ་བའི་དོན་ལྷུ་ར་གྱུར་བའི་ཕྱིར་སྐྱེ་བ་ཞེས་བྱ་བ་ལ་སོགས་པའི་སྦྱོར་བ་ལ་ཡང་འབྱུང་ཁུངས་ཀྱི་མིང་དུ་འགྱུར་བ་ཁོ་ནའོ། །པཱ་ཎི་ནི་མདོར་ནི་པྲ་ཀྲི་ཏའི་སྒ་ཉེ་བར་ལེན་པའི་རྒྱུ་བརྗོད་པ་ལ་སྦྱར་རོ། །འདི་ནི་ཉེ་བར་མཚོན་པ་ཡིན་པའི་ཕྱིར་
རྒྱུ་ཙམ་འཛིན་པར་བྱ་བའི་ཕྱིར་དེའི་གནས་སུ་འབྱུང་བའི་སྒྲ་བཞག་ནས་མཚན་ཉིད་བྲིས་སོ། །དེ་ལྟ་ན་ཡང་སྐབས་ལ་ཅི་ཕན་སྙམ་ན། འབྱུང་ཡང་ཞེས་གསུངས་སོ། །འདི་ལས་འབྲས་སུ་རྒྱུན་ཆགས་སུ་འབྱུང་བ་ཤེས་རབ་ཀྱི་དོན་ཏོ། །དེས་ན་རྟག་ཏུ་རྗེས་སུ་འབྲེལ་པ་བསྟན་པ་ཉིད་དོ་ཞེས་བྱ་བའི་དོན་ཏོ། །དེ་ལྟར་རྟག་ཏུ་རྗེས་སུ་འཇུག་པ་ཉིད་ཀྱིས་ནི་རང་ལོག་པས་ལོག་པར་བྱེད་པ་ཉིད་ཁྱབ་པ་ཡིན་ནོ། །ལུས་ལ་ནི་དེ་མེད་པའི་ཕྱིར་ལོག་པར་བྱེད་པ་ཉིད་མེད་ཀྱང་འཇིག་རྟེན་ཕ་རོག་སྲིད་པ་ཙམ་ཡིན་པའི་ཕྱིར། ཅི་ལྟར་རྗེས་སུ་འབྲེལ་པའི་བཤད་པ་བྱས་ཀྱང་མ་རངས་པར་རྣམ་འགྲེལ་གྱི་ཡེ་ཤེས་དང་རྗེས་སུ་མཐུན་པ་ཉིད་དུ་རང་གི་བཤད་པ་དགོད་པའི་ཕྱིར་ཡང་ན་བདག་ཅག་གིས་ཞེས་གསུངས་སོ། །སྐྱེ་བ་དང་པོ་རྣམ་པར་ཤེས་པ་དེ་ནིའོ། །རྒྱལ་འགྱུར་རོ་ཞེས་རུང་བ་ཉིད་རྗེས་སུ་དཔོག་ན་འཇིག་རྟེན་ཕ་རོལ་ལེགས་པར་བསྒྲུབ་པར་འགྱུར་བ་དང། གཞན་ཐེ་ཚོམ་མེད་པར་འཇིག་རྟེན་ཕ་རོལ་ལ་ཞུགས་པ་ཡང་ལེགས་པ་ནའོ། །དེས་འདི་པའི་འབྲས་བུ་ཉིད་ལ་ཁུར་དགོད་པ་བླའོ། །འཇིག་རྟེན་ཕ་རོལ་ལ་རེ་བས་དོན་སྟོང་པ་ལ་སོགས་པ་དཀའ་བ་སྣ་ཚོགས་པ་ལ་བརྟེན་པས་ནི་གོ་བཅད་དོ་ཞེས་འབད་པའི་སྒྲས་བསྟན་ཏོ། །འོན་ཏེ་སྔ་མ་བཞིན་དུ་རྒྱུ་མ་ཚང་པ་མེད་པ་ཉིད་ཀྱིས་འབྱུང་བའི་སྲིད་པར་འགྱུར་བ་ཁོ་ན་ཡིན་ནོ་ཞེས་འདོད་ན། འོ་ན་ནི་རུང་བ་ཉིད་རྗེས་སུ་དཔོག་པ་མ་ཡིན་ཏེ། འོན་ཀྱང་སྐྱེ་བ་གཞན་ཉིད་དོ། །དེ་ལྟ་མོད་ཀྱི་རྒྱུ་ལས་འབྲས་བུ་རྗེས་སུ་དཔོག་བའི་སྐྱོན་དུ་འགྱུར་རོ་ཞེས་བརྗོད་པ་ཡིན་ནོ་སྙམ་ན། འདིར་བཤད་པ་ཞེས་གསུངས་སོ། །དེའི་རྗེས་སུ་འཇུག་པས་ཞེས་བྱ་བ་ནི་ཡུལ་དང་དུས་ཁྱད་པར་རོ། །དེ་སྐད་དུ་ཡང་སློབ་དཔོན་ཉིད་ཀྱིས་དོན་གཞན་གོ་བར་བྱ་བ་ལ་འབྲས་བུ་ཉིད་གཏན་ཚིགས་ཡིན་ཏེ། འཁྲུལ་པ་མེད་པའི་ཕྱིར་རོ་ཞེས་གསུངས་སོ། །འབྱུང་བར་འགྱུར་བའི་རྒྱུ་ཉིད་ཡིན་ན་ཅི་ལྟར་འབྲས་བུ་ཡིན་ཞེ་ན། ལམ་དུ་མ་ཡིན་ཏེ་ཞེས་བྱ་བའོ། །ད་ལྟ་ཡོད་པའི་དངོས་པོ་དེ་འབྱུང་བའི་དངོས་པོའི་འབྲས་བུ་ཡིན་པའི་ཕྱིར་ཏེ་དེ་ནི་འབྲས་བུ་ཡང་ཡིན་ནོ་ཞེས་བྱ་བའི་དོན་ཏོ། །གལ་ཏེ་ད་ལྟར་ཡོད་པ་མ་འོངས་པའི་འབྲས་བུར་ཅི་ལྟར་འགྱུར་སྙམ་
པའི་དོགས་པ་ཞེ་ལ་བཞག་ནས་དོན་འདི་ནི་འཇིག་རྟེན་གྱི་ཐ་སྙད་དུ་གྲུབ་པ་ཁོ་ནའི་ཞེས་སྟོན་པ་ནི་འདི་ལྟར་ཞེས་བྱ་བའོ། །སེམས་དང་མིག་དང་སྣ་ལ་སོགས་པ་རྣམས་ཀྱི་རྣམ་པར་འགྱུར་བ་ནི་གསལ་བ་དང༌། ཡིད་བདེ་བ་དང༌། རྨི་ལམ་གྱི་ཁྱད་པར་དམིགས་པ་དང་འགུལ་བ་དང་ཉམས་པ་ལ་སོགས་པའི་མཚན་ཉིད་ནི་འབྱུང་བར་འགྱུར་བ་དགེ་ལེགས་ལ་སོགས་པ་སྒྲུབ་པར་བྱེད་པ་ཡིན་ཏེ། འབྱུང་བར་འགྱུར་བའི་དགེ་ལེགས་ལ་སོགས་པ་དེའི་རྣམ་པར་འགྱུར་བ་དེ་མཐོང་ལ། དེ་རྣམ་པ་བསྒྱུར་བ་དེ་ཡང་འབྲས་བུ་ཉིད་དུ་བརྗོད་དོ། །འཇིག་རྟེན་གྱི་ཐ་སྙད་ཀྱི་སྒྲས་ནི་འདི་སྐད་བརྗོད་དེ། ཧ་ཀྱང་ཐལ་བ་སྤངས་པའི་ཕྱིར་བསྟན་བཅོས་ཀྱིས་མཚན་བྱས་བ་གང་ཡིན་པ་དེ་གལ་ཏེ་འཇིག་རྟེན་གྱི་ཐ་སྙད་དུ་བྱེད་ན་དེའི་ཚེ་སྔར་འབྱུང་བ་ལ་འབྲས་བུའི་ཐ་སྙད་དུ་བྱེད་པ་ཡང་སུས་བཟློག་ཅེས་བྱ་བའོ། །འོ་ན་འདས་པ་ཞེས་བྱ་བ་ལ་རྒྱུར་མངོན་པར་འདོད་པ་རང་གི་དུས་ལ་ལྟོས་ནས་ནི་བྱུང་བ་དང་འབྱུང་བར་འགྱུར་བ་མ་ཡིན་ཏེ། ད་ལྟར་བ་ཉིད་ཡིན་པའི་ཕྱིར་རོ། །འབྲས་བུའི་དུས་ལ་ལྟོས་ནས་ནི་ཅི་ལྟར་འདི་འབྱུང་བར་འགྱུར་བ་ཡིན་པ་དེ་བཞིན་དུ་གཞན་འདས་པ་ཡིན་ནོ་ཞེས་བྱ་བའི་དོན་ཏོ། །དེས་ན་དེ་ཡང་འབྲས་བུའི་དུས་ན་མེད་པ་ཉིད་ཡིན་པས་ན་ཅི་ལྟར་ཕན་འདོགས་པར་བྱེད་པ་ཡིན་མ་ཡིན་ཏེ་བྱ་བ་ནི་གཞན་གྱིའོ། །སྐབས་ཀྱིས་ན་སྡར་སྐྱེས་བའི་རྒྱུ་ནི་ཡོད་པའི་ཕྱིར་རོ་ཞེས་བྱ་བའོ། །ལན་དུ་སྐྱེ་བའི་དུས་དེ་ཞེས་བྱ་བའོ། །སྨྲས་པ་འདིའི་བསམ་པ་ནི་འདི་ཡིན་ཏེ། སྐྱེ་བ་ཞེས་བྱ་བ་ནི་འབྲས་བུའི་ཆོས་ཡིན་པའི་ཕྱིར་རྒྱུ་དེའི་དུས་ན་དུས་མཚུངས་པར་ཐལ་བར་འགྱུར་རོ། །འོན་ཏེ་འབྲས་བུ་སྐྱེད་བར་བྱེད་པའི་དུས་ལ་སྐྱེ་པའི་དུས་སུ་བརྗོད་པར་འདོད་དང་ཞེས་བྱ་བའི་དོགས་པ་བསུ་བ་ནི། གལ་ཏེ་འབྲས་བུ་ལས་སྔ་རོལ་ཞེ་ན་ཞེས་བྱ་བའོ། །འོ་ན་ནི་དེའི་ཚེ་འབྲས་བུ་མེད་པ་དེས་ན་ཅི་ལྟར་འབྱུང་བར་འགྱུར་བ་མེད་པ་ཕན་འདོགས་པར་བྱེད་པ་མ་ཡིན་པ་དེ་བཞིན་དུ་འབྱུང་བར་འགྱུར་བའི་འབྲས་བུ་ཡང་མེད་པས་ན་ཅི་ལྟར་ཕན་གདགས་པར་བྱ་བ་ཡིན། དེས་ན་མེད་པ་ལ་ནི་ཕན་འདོགས་པ་མ་ཡིན་ནོ། །གཞན་གྱིས་དེ་ཉིད་ཀྱི་
ཕྱིར་ཞེས་སྨྲས་སོ། །གྲུབ་པའི་མཐའ་སྨྲ་བས་མེད་པ་བྱེད་དོ་ཞེས་བྱ་བའི་དོན་ཅི་ཞེས་དྲིས་པའོ། །གཞན་གྱིས་ལན་དུ་དེའི་དེ་མ་ཐག་ཅེས་བྱ་བའོ། །གྲུབ་པའི་མཐའ་སྨྲ་བས་དེ་མ་ཐག་པ་དེ་ནི་ཞེས་སོ། །དེ་ཉིད་གསལ་བར་བྱེད་པ་ནི་ཅི་ལྟར་ཞེས་བྱ་བའོ། །དེ་མ་ཐག་པ་ཉིད་ཁས་བླངས་ནས་བརྗོད་པ་ཡིན་ནོ། །དེ་མ་ཐག་པ་མེད་ཀྱང་རྒྱུ་ཉིད་དུ་གདོན་མི་ཟ་བར་འགྱུར་ཞས་གསུངས་པ་ནི་དེ་མ་ཐག་པ་ཉིད་ནི་ཞེས་བྱ་བའོ། །གཉིད་སྟུག་པོ་ལོག་པའི་གནས་སྐབས་ན་ནི་རང་ངམ་གཞན་གྱི་རྣམ་པར་ཤེས་པ་ཡོད་པའམ་མེད་པར་དེས་པ་ནི་མ་ཡིན་ཞིང་སད་པའི་དུས་སུ་གདོན་མི་ཟ་བར་དེ་ལྟར་དྲན་པ་ཡང་མ་ཡིན་ནོ། །དེ་སྐད་དུ་ཡང་སྟེ་དངོས་པོ་མེད་པའི་རིག་པ་ཅི་ཞེས་བྱ་བ་ལ་སོགས་པ་བཤད་པ་ཡིན་ནོ། །རྒྱུ་དེ་ཉིད་དུ་ངེས་པ་ནི་རིང་དུ་སྤངས་པ་ཁོ་ནའོ། །ཡོད་པ་དང་མེད་བར་ཐེ་ཚོམ་ཟ་བའི་ཕྱིར་ཤ་ཟ་ནི་དུ་བའི་རྒྱུར་ངེས་བ་མ་ཡིན་ནོ། །ལུས་ནི་མཐོང་ཡང་རྒྱུ་མ་ཡིན་ནོ་ཞེས་བཤད་པ་ནི་དེ་ལ་ལུས་ནི་ཞེས་བྱ་བ་སྟེ་ཤེས་པ་དེ་ལའོ། །ཅིའི་ཕྱིར་ཞེ་ན། དེ་ནི་སྔོན་གྱི་ཞེས་བྱ་བའོ། །འདི་སྙམ་དུ་ལུས་ནི་ཤེས་པའི་རྒྱུ་མ་ཡིན་པ་ཁོ་ནའོ། །འོན་ཀྱང་འདས་ནས་རིང་དུ་ལོན་པའི་རིག་པ་ཉིད་རྒྱུ་ཡིན་ཏེ། གཉིད་སྟུག་པོ་ལོག་པའི་གནས་སྐབས་སུ་ནི་རྣམ་པར་ཤེས་པ་ཡོད་དམ་མེད་ཐེ་ཚོམ་ཟ་བའི་ཕྱིར་ན་རྒྱུའམ་རྒྱུ་མ་ཡིན་པ་ཉིད་དུ་རྣམ་པར་བཞག་པ་ལ་ནུས་པ་མ་ཡིན་ནོ། །འཇིག་རྟེན་རྒྱང་འཕན་པ་ནི་ལུས་རྣམ་པར་ཤེས་པའི་རྒྱུ་ཡིན་པར་བསྒྲུབ་པའི་དོན་དུ་དབུས་སུ་དེ་མེད་པར་འདོད་པ་ཡིན་ན་དེ་མེད་པར་ཁས་བླངས་ཀྱང་ལུས་རྒྱུ་ཡིན་པར་ནི་མི་འགྲུབ་སྟེ། འདས་ནས་རིང་དུ་ལོན་པ་ཉིད་རྒྱུ་ཡིན་པར་ཚད་མས་གྲུབ་པའི་ཕྱིར་རོ་ཞེས་བྱ་བ་འདི་ཡིན་ནོ། །འདི་ཉིད་གསལ་པར་བྱེད་པ་ནི། ལུས་དེ་འདྲ་བའི་ཉིད་ན་ཞེས་བྱ་བའོ། །གང་གི་ཚེ་ན་ཚོད་དང་རྒྱགས་པ་ལ་སོགས་པས་ལུས་མཚུངས་པ་གཉིས་གཉིད་མཐུག་པོས་ལོག་པ་ནའོ། །གལ་ཏེ་དེའི་ཚེ་ཡང་ཁྱད་པར་ཕྲ་མོ་འགའ་ཞིག་ཡོད་པར་འགྱུར་རོ་སྙམ་ན། དེ་ལྟ་ན་འོ་ན་ཤེས་པ་ལ་ཡང་མཚོན་པར་དགའ་པའི་ཁྱད་པར་ཡོད་པར་འགྱུར་ན་ཤིན་དུ་ཡང་རིགས་མི་མཐུན་པར་ནི་མཐོང་པ་ཡིན་ནོ། །དེའི་ཕྱིར་འདས་ནས་རིང་དུ་ལོན་པ་ལས་སྐྱེས་པས་
རིགས་པ་ཁོ་ནའོ། །ཚོགས་པའི་ཁྱད་པར་འགའ་ཞིག་ལས་ནི་མྱུར་བ་དང་བུལ་བའི་ཁྱད་པར་དུ་གྱུར་ཀྱང་དེ་ཙམ་གྱིས་རྒྱུ་དང་འབྲས་བུའི་དངོས་པོ་འཛིན་པ་ནི་མ་ཡིན་ཏེ་དེའི་རྒྱུ་མཚན་རྗེས་སུ་འགྲོ་བ་དང་ལྡོག་པ་མཚུངས་པའི་ཕྱིར་རོ། །འབྱུང་བར་འགྱུར་བའི་རྒྱུ་དེ་ཉིད་མཇུག་སྡུད་པས་དེའི་ཕྱིར་ཞེས་གསུངས་སོ། །འབྱུང་འགྱུར་ལ་ཡང་ཞེས་ཡང་གི་སྒྲས་ནི་འདས་མ་ཐག་པ་དང་འདས་ནས་རིང་དུ་ལོན་པ་སྡུད་པའོ། །ཁྱད་པར་གཞན་ནི་ཞེས་བྱ་བ་ནི་སྔ་མ་ཉིད་དམ་དེ་མ་ཐག་པ་ཉིད་དོ། །བདུན་པ་དང་ལྔ་པས་ནི་རྒྱུ་སྔ་མའི་དངོས་པོར་བསྟན་པ་ཡིན་ནོ་ཞེས་རྣམ་པར་དབྱེ་བ་འདི་གཉིས་གྲུབ་པ་ཡིན་ནོ། །སྔ་མའི་དངོས་པོ་དེ་ལས་ཕྱི་མའི་དངོས་པོར་ཡང་དང་པོས་ཀྱང་བསྟན་པ་ཡིན་སྟེ། དང་པོ་ནི་བསྒྲུབ་བྱའི་རྣམ་པར་དབྱེ་བ་ཡིན་ནོ། །རྒྱུ་མཚན་ཙམ་ཞིག་ཅེས་བྱ་བ་འདིས་ནི། ལུང་ལས་ནི་འདི་རྒྱུ་དང་འབྲས་བུའི་དངོས་པོ་ཙམ་དུ་བཞེད་པ་ཡིན་ནོ་ཞེས་བྱ་བའི་དོན་ཏོ། །དེ་བཞིན་དུ་མ་སྐྱེས་པ་ལ་སྐྱེས་པ་ཡང་ངོ་ཞེས་བྱ་བ་ནི་འདི་སྐྱེས་པའི་ཕྱིར་འདི་སྐྱེ་ཞེས་བྱ་བའི་མཚན་ཉིད་འདི་མི་འཐད་དོ་ཞེས་བྱ་བའི་དོན་ཏོ། །འོ་ན་ཞེས་བྱ་བ་ནི་གྲུབ་པའི་མཐའོ། །ཞིག་པ་སྐྱེ་བར་ཡང་ཞེས་བྱ་བ་འདི་ནི་མཚན་ཉིད་གཉིས་པ་ལྟོས་པས་ཡིན་ནོ། །ཡོད་པའམ་སྐྱེས་པར་གྱུར་པ་ཡིན་ནོ་ཞེ་ན། ལན་དུ་འབྱུང་བར་འགྱུར་པ་འདི་ཡང་ཡོད་པའམ་སྐྱེས་པར་འགྱུར་རོ། །འབྱུང་བར་འགྱུར་བ་སྔ་ན་མེད་པ་དང་ངོ༌། །སྔ་མ་དང་ཕྱི་མའི་དངོས་པོའི་ཐུན་མོང་རྒྱུ་མཚན་ཙམ་ཞིག་མཚོན་པ་ཡིན་ཏེ་བསྟན་པ་ཡིན་གྱི། སྔར་གྱི་དུས་དེའི་ཚེ་ཡོད་པ་ཉིད་ནི་བསྟན་པ་མ་ཡིན་ནོ། །གལ་ཏེ་རྒྱུ་མཚན་ཙམ་ཞིག་བསྟན་པ་ཡིན་ན། གང་གི་དངོས་པོས་ཞེས་བྱ་བའི་མདོས་བདུན་པ་ཡིན་པར་ཇི་ལྟར་འགྱུར་ཞེ་ན། དེ་ཡོད་པས་ཞེས་བྱ་བའོ། །གང་གི་ཕྱིར་རྒྱུ་མཚན་ཙམ་གྱི་དངོས་པོས་འབྲས་བུ་འབྱུང་པའི་དངོས་པོ་མཚན་པ་ཡིན་ཏེ། འབྲས་བུ་ནི་རྒྱུ་མཚན་ཙམ་གྱིས་རབ་ཏུ་སྦྱར་བ་ཡིན་ནོ་ཞེས་མཚོན་པའོ། །གལ་ཏེ་དེ་ལྟ་ན་ཡང་འབྱུང་བར་འགྱུར་བ་རྒྱུ་ཉིད་ཇི་ལྟར་བརྗོད་སྙམ་ན་འབྱུང་བའི་ཡོད་པས་ཀྱང་ཞེས་གསུངས་སོ། །དཔེར་ན་ཆར་པ་དག་འབྱུང་བར་འགྱུར་ན་
གྲོག་མ་འཕོ་བ་བཞིན་ཏེ། གྲོག་མ་འཕོ་བ་ནི་ཆར་འབབ་པར་འགྱུར་བས་བྱས་པ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་འཆི་ལྟས་ནི་ཞེས་གསུངས་སོ། །འབྱུང་བར་འགྱུར་བའི་འཆི་བས་ཕུང་པོའི་རྟགས་འཆི་ལྟས་ཀྱིས་རྣམ་པར་འགྱུར་བ་མཚོན་པ་ཡིན་ནོ། །འདི་ཉིད་སྟོན་པ་ནི་གལ་ཏེ་ཞེས་བྱ་བའོ། །འདིས་སྐྱེས་པའི་ཕྱིར་འདི་སྐྱེའོ་ཞེས་བྱ་བ་འདི་ལ་བརྗོད་པ་ནི་སྐྱེས་པའི་ཕྱིར་ཞེས་བྱ་བས་ཀྱང་ཞེས་བྱ་བའོ། །བྱེད་པ་པོ་ཉིད་མེད་པ་ལ་ཇི་ལྟར་ཞེས་བྱ་བ་འདི་ནི་འོ་ན་འདས་པ་ཡང་རྒྱུར་མི་འགྱུར་ཏེ་ཞེས་བྱ་བ་དེ་ཉིད་ཀྱིས་རྟོགས་མོད་ཀྱིས་ཡང་བརྗོད་པར་ནི་ཁྱད་པར་བརྗོད་པའི་དོན་དུ་ཡིན་ནོ། །དེ་བཞིན་དུ་གཞན་དུ་ཡང་དེ་ལྟར་སྲིད་པར་བལྟའོ། །ཁྱད་པར་ཉིད་བརྗོད་པ་ནི་ཅི་ལྟར་མྱུ་གུ་སྐྱེ་ཞེས་བྱ་བའོ། །མྱུ་གུ་ལ་སོགས་པ་ལ་བློ་ལ་གནས་པས་བྱེད་པ་པོ་ཉིད་དུ་ཁས་ལེན་ན་འབྱུང་བར་བ་འདི་ནི་བློ་ལ་གནས་པས་བྱེད་པ་ཉིད་ཡིན་པ་དེ་བྱ་རོག་གིས་མ་ཟོས་སོ། །གཏིང་དུ་ཆུང་པའི་ས་བོན་རྒྱུ་ཡིན་ཞེས་དེ་ལྟར་བརྗོད་ནའོ། །མ་དམིགས་པ་ཅི་ལྟར་རྒྱུར་འགྱུར་ཞེས་བྱ་བ་ནི། གལ་ཏེ་སྔར་དམིགས་རྒྱུའི་རྒྱུ་མཚན་ཡིན་ན་དེའི་རིགས་སྔར་གང་དམིགས་པ་དེ་ཉིད་རྒྱུ་ཡིན་པར་འགྱུར་གྱི། དེའི་རིགས་ཡིན་ཡང་དེ་ལྟར་མ་དམིགས་པའི་ཕྱིར་གཏིང་དུ་ཆུད་པའི་ས་བོན་ནི་རྒྱུ་ཡིན་པར་མི་འགྱུར་རོ། །ཡོད་པར་ནི་རྟོགས་ཀྱི་སྔར་ཡོད་པར་ནི་རྟོགས་པ་མ་ཡིན་ནོ། །ཡོད་པ་མཚོན་པ་ཡིན་གྱི་སྔར་ཡོད་པ་ནི་མ་ཡིན་ནོ། །ཡོད་པ་མཚོན་པ་ཡིན་པ་དེ་ལྟ་ན་ཡང་ངོ༌། །དོན་གང་ཡིན་སྙམ་ན། འདི་ཡོད་ན་ཞེས་བྱ་བ་སྟེ། ཡོད་པའི་རྒྱུ་མཚན་གྱི་དངོས་པོ་གང་ཡིན་པ་དེ་ཉིད་དོན་ཡིན་ནོ། །རྒྱུ་མཚན་གྱི་དངོས་པོ་དེ་ཡང་མི་འཁྲུལ་བའི་ཡུལ་ཉིད་ཡིན་པ་དང་མི་འབྲལ་ལོ་ཞེས་བྱ་བའི་དོན་ཏོ། །ཧ་ཀྱང་ཐལ་བའི་ཉེས་པར་འགྱུར་བའི་ཕྱིར་ཡང་འདི་ཡང་མཚན་ཉིད་མ་ཡིན་ནོ་བརྗོད་པ་ནི། གང་ཞིག་སྔར་དམིགས་པ་དེ་རྒྱུ་ཡིན་ནོ་ཞེས་ཁོང་ནས་དབྱུང་ངོ་ཞེས་བྱ་བ་ནི་མཚན་ཉིད་དེ་ལ་ཞེས་བྱ་བའོ། །དེ་ཉིད་ཅིས་བྱ་བ་མི་འཁྲུལ་བ་དེ་ཉིད་དོ། །ཅི་འགལ་ཞེས་བྱ་བ་ནི་ཁྱོད་ཀྱི་ཞེན་པ་ལས་མ་རྟོགས་པ་དངོས་པོའི་སྐྱོན་ནི་འགའ་ཡང་མེད་དེ་ཧ་ཀྱང་ཐལ་བ་
ལ་སོགས་པ་མེད་པའི་ཕྱིར་རོ། །འོན་ཏེ་འགལ་བ་མེད་པ་ཁོ་ན་ཡིན་ན། དེའི་ཚེ་སྔ་མ་དང་ཕྱི་མའི་དངོས་པོ་ཞེས་བྱ་བ་ལ་སོགས་པ་ནི་གོ་སླའོ། །གཞན་གྱི་ཏེ་ས་བ་གཞན་གྱིས་བསམས་པ་ཡང་འདོགས་པར་བྱེད་པ་ནི་སྔ་མ་ཉིད་ནི་ཞེས་བྱ་བའོ། །འབྲས་བུ་དེ་དོན་དུ་གཉེར་བ་རྣམས་རྒྱུ་ལེན་པ་ཡིན་ནོ། །རྒྱུ་འདོད་པ་ཕྱི་མ་ལས་འབྲས་བུ་ལས་རྗེས་སུ་དཔོག་པར་བརྗོད་པའི་རྗེས་དཔག་དེ་ནི་ནུས་པ་ལས་འགྱུར་བ་ཡིན་གྱི་འབྲས་བུ་ལས་ནི་མ་ཡིན་ནོ་ཞེ་ན། འབྱུང་བར་འགྱུར་བའི་འཇིག་རྟེན་ཕ་རོལ་ནི་ཚེ་ཕྱི་མ་པའི་འདོད་པའི་བུའི་འབྲས་བུའོ། །ད་ལྟར་བའི་འཇིག་རྟེན་ནི་འཇིག་རྟེན་འདིའི་ལས་བཟང་པོའོ། །ཕྱེད་སྔ་མ་བཤད་ནས་སུན་འབྱིན་པར་བྱེད་པ་ནི་དེ་ཡང་ཞེས་བྱ་བའོ། །དཔེར་ན་སྐྱེ་བོ་གཅིག་ཉིད། འགའ་ཞིག་ལྟོས་ནས་སྐྱེད་བར་བྱེད་པ་དང༌། ཕ་ཡང་ཡིན་པ་དེ་བཞིན་དུ་དངོས་པོ་གཅིག་ཉིད་གཞན་མེད་ན་མི་འབྱུང་བས་འབྲས་བུ་ཡིན་ལ། དེས་མི་འཁྲུལ་བར་བྱས་པ་ཡིན་པས་ན་རྒྱུ་ཡང་ཡིན་ནོ། །དེས་ན་འབྱུང་བར་འགྱུར་བ་ལ་ད་ལྟར་བ་རྒྱུ་ཡིན་པའི་ཕྱིར་ལེན་པར་རིག་པར་ཡིན་ནོ། །གཞན་ཡང་བརྗོད་པ་ནི་རྒྱུ་ཉིད་ཡིན་ན་ཞེས་བྱ་བའོ། །ལན་པ་ནི་ཐོབ་པར་བྱ་བའི་ཕྱིར་ཡིན་ན་དེའི་འབྲས་བུས་ཀྱང་རྒྱུ་ངེས་པར་ཐོབ་པ་ཡིན་ནོ་སྙམ་དུ་དགོངས་པའོ། །ཕྱེད་ཕྱི་མ་རྣམ་པར་འགྲེལ་པ་ནི་གང་ཡང་ཞེས་བྱ་བའོ། །དེ་ཡང་མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །འབྲས་བུ་ཉིད་ལ་ནི་རྗེས་སུ་དཔག་པ་བླའི། རྒྱུ་ཡིན་ན་ནི་སྤྱད་པ་གཞན་འོང་བ་ཡིན་ནོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །འདི་ལ་སློབ་དཔོན་གྱིས་མ་གསུངས་པའི་ཕྱིར་ན། འདི་ནི་བཤད་པ་བྱེད་པའི་རང་དགའ་ཉིད་ཡིན་ནོ། །དོན་གཞན་ལ་ནི་མི་ལྟོས་པའི་ཕྱིར་དེ་ནི་རང་བཞིན་ཡིན་པར་འདོད། གཏན་ཚིགས་ཀྱང་རྣམ་པ་གཞན་དུ་ཁུངས་བཙུགས་སོ། །དེ་ནི་འགལ་བ་ཡང་ཡིན་ཏེ། ཅི་སྐད་དུ། མེད་པ་སྔར་ནུས་མེད་ཕྱིར་དང༌། །ཞེས་བྱ་བ་དང༌། ཕྱིས་འབྱུང་ཕྱིར་ན་རྒྱུ་ཉིད་མིན། །ཞེས་གསུངས་པ་ཡིན་ནོ་ཟེར་བ་ནི་མ་འབྲེལ་ཏེ། འདི་ལྟར་རེ་ཞིག་མ་གསུངས་པ་ཙམ་ནི་ཉེས་པ་མ་ཡིན་ཏེ། བཤད་པར་བྱ་བ་དང་བཤད་པ་གཉིས་
ཡི་གེ་གཅིག་ཉིད་དུ་གང་དུ་ཡང་མ་མཐོང་ངོ༌། །དེའི་ཚེ་ནི་པོ་ཏི་གཞན་ཙམ་དུ་འགྱུར་བའི་ཕྱིར་རོ། །འཆད་པར་བྱེད་ པ་ནི་གདོན་མི་ཟ་བར་ཅུང་ཞིང་བྱེ་བྲག་བཤད་དགོས ་སོ། །རྣམ་འགྲེལ་ལས་བཤད་པའི་ཁྱད་པར་ཐམས་ཅད་ཕྱོགས་ཀྱི་གླང་པོའམ་གསུང་རབ་ལས་དངོས་སུ་ཡོད་པ་ནི་མ་ཡིན་ནོ། །དེས་ན་གྲུབ་པའི་མཐའ་དང་བཞེད་པ་དག་དང་འགལ་བ་སྤང་བར་བྱའོ། །དེ་ལ་གྲུབ་མཐའ་དང་ནི་འགལ་བ་མ་ཡིན་ཏེ། མངོན་པར་འདོད་པའི་དོན་ལྔ་དང་མི་མཐུན་པ་མེད་པའི་ཕྱིར་རོ། །བཞེད་པ་དང་འགལ་བ་ཡང་མ་ཡིན་ནོ། །འགའ་ཞིག་ཏུ་འབྱུང་བར་འགྱུར་བའི་རྒྱུ་བརྗོད་ན་སུན་འབྱིན་པའི་འབད་པ་མེད་པའི་ཕྱིར་རོ། །གང་ཡང༌། མེད་པ་སྔར་ནུས་མེད་ཕྱིར་དང༌། །ཞེས་བྱ་བ་ལ་སོགས་པ་བརྗོད་པ་དེར་ནི་རྒྱུ་དང་འབྲས་བུ་གཉིས་ལྷན་ཅིག་འབྱུང་བ་དགག་པ་ལྷུར་བྱེད་པ་ཡིན་ཏེ་ཅི་སྐད་དུ་དེས་ན་དོན་རང་གི་བློ་ལྷན་ཅིག་འབྱུང་མིན་ཞེས་བཤད་པ་ཡིན་ནོ། །རྒྱུ་རྣམས་ཐམས་ཅད་སྔར་ཡོད་ཡིན། །ཞེས་བྱ་བ་ནི་ལྷན་ཅིག་མི་འབྱུང་བ་ཉེ་བར་མཚོན་པར་བྱེད་པ་ཡིན་ནོ། །གལ་ཏེ་ཐ་དད་པ་ཡིན་ན་ཁྱབ་པར་བྱ་བ་དང་ཁྱབ་པར་བྱེད་པ་ཉིད་རྒྱུ་དང་འབྲས་བུའི་དངོས་པོ་ཡིན་པའི་ཕྱིར་རོ། །ཡང་གཟུགས་ཀྱི་འབྲས་བུ་ཡིན་པ་དེས་ན་ཇི་ལྟར་ལྷན་ཅིག་རྒྱུ་ཡིན་བར་འགོག་ཅེ་ན་འདི་ལྟར་བསམས་པ་ཡིན་ཏེ། ཡང་དག་པའི་ཀུན་རྫོབ་ལ་བརྟེན་པའི་རྒྱུ་དང་འབྲས་བུའི་དངོས་པོ་ནི་འཇིག་རྟེན་གྱི་ཐ་སྙད་ལ་ལྟོས་པ་ཡིན་ན་ལྷན་ཅིག་འབྱུང་བ་ལ་ནི་རྭ་གཡས་གཡོན་བཞིན་དུ་འཇིག་རྟེན་དེ་ལྟར་ཐ་སྙད་བྱེད་པ་གང་ཡང་མེད་དོ། །འདི་ལ་དགོངས་ནས་འཇིག་རྟེན་གྱི་ཐ་སྙད་དུ་ཞེས་ལན་ཅིག་མ་ཡིན་པར་གསུངས་སོ། །ལྷན་ཅིག་བྱས་པར་ངེས་པ་ནི་རྒྱུའི་ཆོས་རྗེས་སུ་དཔག་པ་ཉིད་ལས་འགྲུབ་བོ། །དེས་ན་ལྷན་ཅིག་པ་ནི་རྒྱུ་དང་འབྲས་བུའི་དངོས་པོ་རྣམ་པར་གནས་པ་ཡོད་པ་མ་ཡིན་ནོ། །དེས་ན་རྣམ་འགྲེལ་གཞན་འདི་ནི་དེ་འགོག་བ་ཡིན་ནོ་ཞེས་གནས་སོ། །བྱེ་བྲག་ཏུ་སྨྲ་བ་རྣམས་ཀྱིས་ལྷན་ཅིག་པའི་རྒྱུ་དང་འབྲས་བུའི་དངོས་པོ་ནི་ལུང་ལ་བརྟེན་ནས་ཡིན་གྱི་འཇིག་རྟེན་པ་ནི་མ་ཡིན་ནོ། །ཕྱིས་འབྱུང་ཕྱིར་ན་རྒྱུ་ཉིད་མིན། །ཞེས་བྱ་བ་ནི་གང་ཡིན་པ་
དེར་ནི་རྒྱུ་ཉིད་དུ་ངེས་པ་མ་ཡིན་ནོ་ཞེས་བྱ་བའི་དོན་ཏོ། །སྤྱིར་བཏང་བས་གྲུབ་པའི་ཚུལ་དེ་ནི། ཅི་ཞིག་ཡོད་གྱུར་གང་མེད་པ། །གང་གིས་ཕྱི་ནས་མཚམས་སྦྱོར་མེད། །ཅེས་བྱ་བ་འདིས་དམིགས་ཀྱིས་བསལ་བའི་ཕྱིར་ཉེས་པ་མེད་དོ། །འདིས་ནི་འདས་པ་དུས་གཅིག་པ་རྣམ་རྟོགས་ཀྱི། མ་འོངས་པ་ནི་མ་ཡིན་ཏོ། འཁྲུལ་པའི་ཕྱིར་རོ་ཞེས་བྱ་བ་ཡང་གཞུང་བཙུགས་པ་ཡིན་ནོ། །མ་འོངས་པ་ཉིད་ཀྱིས་ནི་རྒྱུ་མ་ཡིན་པ་མ་ཡིན་ཏེ་འོན་ཀྱང་འཁྲུལ་པའི་ཕྱིར་རོ། །འདས་པ་ལ་མི་འཁྲུལ་ན་ནི་རྗེས་སུ་དཔག་པར་མངོན་པར་འདོད་པ་ཁོ་ནའོ། །དེ་ནི་རང་བཞིན་ཡིན་པར་བརྗོད། །ཅེས་བྱ་བ་ནི་ལོག་པའི་ཀུན་རྫོབ་ལ་ལྟོས་ནས་རུང་བ་ཞེས་བྱ་བའི་རྗེས་སུ་དཔག་པར་བཤད་ལ་དེ་ཡང་འདོད་པ་ཁོ་ནའོ། །འབྲས་བུ་ལ་རྣམ་པ་གཞན་དུ་ནི་རྗེས་སུ་དཔག་པར་མ་གསུངས་སོ། །ཡང་དག་པའི་ཀུན་རྫོབ་ལ་ལྟོས་ནས་ནི་དེ་སུན་དབྱུང་བ་ཡིན་ནོ། །དེ་ལྟར་གསུང་རབ་ཀྱི་མཚན་ཉིད་འབྲས་བུ་ལས་ཐམས་ཅད་མཁྱེན་པ་གྲུབ་པ་ཡིན་ནོ་ཞེས་སྟོན་པར་འགྱུར་རོ། །འོ་ན་རྣམ་པ་འདི་ཡང་དེ་ཉིད་དུ་ཅི་སྟེ་མ་བསྟན་ཞེན། མང་པོའི་མ་ཡིན་པའི་ཕྱིར་དང་འདི་ཁོ་ན་ དགོས་པའི་ཕྱིར་རོ། །ཕྱོགས་འདི་ནི་མ་གསུངས་པ ་ཉིད་ཀྱང་མ་ཡིན་ནོ། །དོན་གྱིས་གསུངས་པ་ཡང་གསུངས་པའི་ཕྱིར་རོ། །འདི་ལྟར་རྒྱུ་ནུས་པ་ཐོགས་པ་མེད་པ་ཅན་འབྲས་བུ་མེད་ན་མི་འབྱུང་བར་བསྟན་བཅོས་མཛད་པ་མི་བཞེད་ན་ཅི་ལྟར་འབྲས་བུ་མི་དམིགས་པ་ཚད་མར་མཛད། ཐ་དད་གྱུར་པར་འབྲེལ་པར་བརྗོད་པ་ཉིད་འབྲས་བུར་བརྗོད་པ་ཡིན་ནོ། །འོ་ན་རྒྱུ་མི་དམིགས་པ་ཉིད་དུ་འགྱུར་རོ་ཞེ་ན། དེ་ཁོ་ནར་དེ་ནི་དེ་ཁོ་ན་ལྟར་ཡིན་ནོ། །འོན་ཀྱང་བློ་རྩིང་པོའི་འཇིག་རྟེན་གྱི་ཐ་སྙད་ལ་ལྟོས་ནས་རྒྱུ་མི་དམིགས་པའི་རྣམ་པ་ཉིད་འབྲས་བུ་མི་དམིགས་པར་བརྗོད་པ་ཡིན་ནོ། །གང་ཡང་འབྲས་བུ་དེ་ནི་རྒྱུ་ཁྱབ་པ་དང་མི་ལྡོག་པས་ན་དེའི་རང་བཞིན་དང་ཁྱད་པར་མེད་པས་ན་དེ་མི་དམིགས་པ་ནི་རང་བཞིན་མི་དམིགས་པ་ཉིད་དུ་བཤད་དོ་ཞེས་བྱ་བ་འདི་ལ། སློབ་དཔོན་ཆོས་མཆོག་གིས་བཤད་པའི་དེ་ཡང་མ་འབྲེལ་ཏེ། འདི་ལྟར་གལ་ཏེ་རྒྱུ་ཁྱབ་པ་དང་རྒྱུ་ལས་ཐ་དད་པར་མི་འགྱུར་
པས་ཞེས་བརྗོད་པར་འདོད་ན་ནི་དེའི་ཚེ་རྒྱུ་ཁྱབ་པས་ཞེས་བྱ་བ་ཉིད་བརྗོད་པར་བྱ་བའི་འབྲས་བུ་ཐམས་ཅད་རྒྱུ་མེད་པར་མི་འབྱུང་བ་མ་ཡིན་ནོ་ཞེས་ལྡོག་པ་མེད་པར་བསྟན་པ་འདིས་ཅི་བྱ། འོན་ཏེ་ལྡོག་པ་མེད་པས་དེའི་བདག་ཉིད་བརྗོད་པ་ཡིན་ན། དེ་ལྟ་ན་འབྲས་བུ་ཐམས་ཅད་དེའི་བདག་ཉིད་དུ་ཐལ་ལོ། །འོ་ན་ཏེ་དེ་མེད་པར་རྒྱུ་མི་འབྱུང་བར་བརྗོད་པ་དེས་ན་དེའི་རང་བཞིན་ཡིན་པ་དེ་ལྟ་ན་ནི་རྒྱུ་དང་འབྲས་བུ་མེད་པར་མི་འབྱུང་བའི་ཕྱིར་དེ་ཡང་དེའི་རང་བཞིན་དུ་ཐལ་ལོ། །དེས་ན་འབྲས་བུའི་གཏན་ཚིགས་ཀྱང་རང་བཞིན་གྱི་གཏན་ཚིགས་སུ་ཐལ་བར་འགྱུར་རོ། །མེ་དུ་བ་ཙམ་དང་རྗེས་སུ་འབྲེལ་བའི་ཕྱིར་རོ། །འོན་ཏེ་ཐ་དད་པས་འབྲས་བུའི་གཏན་ཚིགས་སུ་བརྗོད་ན། དེ་ལྟ་ན་འབྲས་བུ་མི་དམིགས་པ་ཉིད་དུ་སྨོས་ཤིག་དེས་ན་འདི་ནི་གྱི་ནའོ། །དེས་ན་གཞན་དུ་བཤད་པར་བྱ་སྟེ་འབྲས་བུ་དེ་ནི་རྒྱུས་ཁྱབ་པ་སྟེ། ཁྱབ་པར་བྱེད་པ་ཉིད་དུ་དེ་ལས་མི་ལྡོག་པའི་ཕྱིར་ཏེ། ཁྱབ་པར་བྱེད་པ་དེ་ལས་ལྡོག་པར་བྱེད་པའི་ཕྱིར་ཏེ་བྱ་བ་བྱེད་ཀྱི་རང་བཞིན་ཡིན་པའི་ཕྱིར་ནའོ། །དེའི་རང་བཞིན་དང་ཁྱད་པར་མེད་པར་ཞེས་འདིར་དེའི་སྒྲ་ནི་རྒྱུ་འཛིན་པ་སྟེ་རྒྱུ་དང་ཁྱད་པར་མེད་པར་ཞེས་བྱ་བའི་དོན་ཏོ། །འདི་ལྟ་རྒྱུའི་ཁྱབ་བྱེད་ཡིན་པའི་ཕྱིར་ན་རྒྱུ་ཞེས་བརྗོད་པ་ཡིན་ནོ། །དེ་བཞིན་དུ་དེ་མེད་ན་རྒྱུ་མི་འབྱུང་བས་ན་ཁྱབ་བྱེད་ཡིན་པའི་ཕྱིར་འབྲས་བུ་ལ་རྒྱུ་ཞེས་ཅི་སྟེ་མི་བརྗོད། འོན་ཏེ་རྒྱུའི་དུས་ན་འབྲས་བུ་མེད་པའི་ཕྱིར་རྒྱུ་ཉིད་མ་ཡིན་ནོ་ཞེ་ན། འོ་ན་རྒྱུ་ཡང་འབྲས་བུའི་དུས་ན་མེད་པའི་ཕྱིར་རྩོད་པ་དེ་ཉིད་ཡིན་ནོ། །འོན་ཏེ་སྔར་ཡོད་པ་རྒྱུ་ཡིན་ཏེ་དེས་ན་འབྲས་བུ་ནི་རྒྱུ་ཉིད་མ་ཡིན་ནོ་སྙམ་ན་འདིར་རྒྱུ་ཉིད་གང་ཡིན། འབྲས་བུའི་དུས་ན་མེད་པ་ནི་འགས་ཀྱང་རྒྱུ་ཉིད་དུ་རྟོགས་པ་མ་ཡིན་ནོ། །འོན་ཏེ་དེ་ཡོད་པ་མ་ཡིན་ན་འདི་ཡང་མི་འབྱུང་ངོ་ཞེས་དེ་ལྟར་དེ་དང་འབྲེལ་པར་རྟོགས་པས་དེའི་འབྲས་བུ་ཉིད་དུ་རྟོགས་སོ་ཞེ་ན། དེ་ལྟ་ན་འདི་ནི་འབྲས་བུ་ལ་ཡང་མཚུངས་སོ། །གལ་ཏེ་འཆི་བར་མི་འགྱུར་ན་འཆི་ལྟས་འདི་ཡང་མི་འབྱུང་ངོ་ཞེས་འཆི་བ་དང་འབྲེལ་པར་རྟོགས་པ་མ་ཡིན་ནོ། །ཐ་སྙད་དེ་ལྟར་མ་ཡིན་ནོ་ཞེ་ན། དོན་གྱི་ཐ་སྙད་མེད་ན་བརྗོད་པ་ཙམ་ནི་མེད་ཀྱང་མི་སྐྱོན་ནོ། །འོན་ཏེ་འགའ་ཞིག་ཏུ་ཁྱད་པར་
མ་མཚོན་པས་འཁྲུལ་པའི་ཕྱིར་འབྲས་བུ་ནི་རྒྱུ་ཉིད་དུ་བསྙད་པ་མ་ཡིན་ནོ་སྙམ་ན། འདི་ནི་རྒྱུར་མངོན་པར་འདོད་པའི་ཁྱད་པར་ལ་ཡང་འབྲས་བུའི་སྤྱི་ལ་ལྟོས་ནས་རྒྱུ་མ་ཡིན་པར་འདོད་པ་ཉིད་དོ། །དེ་སྐད་དུ་དེ་མེད་པར་ཡོད་ཕ་ནི་དེ་ལས་སླུ་བའི་ཕྱིར་རོ་ཞེས་གསུངས་པ་དང༌། དེས་བསྐྱེད་པར་བྱ་བའི་ཁྱད་པར་བཟུང་ན་ནི་འདོད་པའི་ཕྱིར་རོ་ཞེས་ཡང་དེའི་རྒྱུ་ཉིད་དུ་གསུངས་པ་ཡིན་ནོ། །ཡང་ན་མ་གུས་པ་སྤངས་པའི་དོན་དུ་འབྲས་བུ་ལ་རྒྱུ་ཉིད་དུ་བརྗོད་པ་མ་ཡིན་ཏེ། དེ་ལྟ་མ་ཡིན་ན་གདོན་མི་ཟ་བར་སྐྱེས་བུའི་བུ་ཕའི་ཕར་གྱུར་པའི་ཕྱིར་ཕ་ལ་བརྙས་པར་འགྱུར་རོ། །དེ་མི་དམིགས་པ་ནི་རང་བཞིན་མི་དམིགས་པ་ཉིད་ཡིན་ནོ་ཞེས་ཅི་ལྟར་བརྗོད་ཅེ་ན། འདི་ལ་བཤད་པ་ཕྱོགས་གཅིག་སྦྱར་བས་དེ་སྐད་བརྗོད་པ་ཡིན་ཏེ། དཔེར་ན་འཇིགས་སྡེ་ལ་འཇིགས་པ་ཞེས་བྱ་བ་བཞིན་ནོ། །དེ་བཞིན་དུ་དེའི་རང་བཞིན་མི་དམིགས་པ་ནི་རང་བཞིན་མི་དམིགས་པར་བརྗོད་པ་ཡིན་ནོ། །དེའི་ཞེས་བྱ་བ་འདིས་རྒྱུ་བཟུང་བའི་ཕྱིར་རྒྱུའི་རང་བཞིན་གྱི་དེ་དམིགས་པ་ཡིན་ནོ་ཞེས་བྱ་བའི་དོན་ཏོ། །ཡང་འདི་ལས་འབྱུང་བས་ན་རང་བཞིན་ཏེ། རང་འབྱུང་བ་ནི་རང་བཞིན་ཏེ་རང་གི་རྒྱུའོ། །དེས་ན་དེ་མི་དམིགས་པ་ནི་རང་གི་རྒྱུ་མི་དམིགས་པ་ཞེས་བྱ་བའི་དོན་ཏོ། །དེ་ལྟར་ན་འོ་ན་དེ་མི་དམིགས་པ་ནི་རྒྱུ་མི་དམིགས་པ་ཉིད་དོ་ཞེས་བརྗོད་པར་བྱའི། བདག་ཉིད་ཀྱི་ཁྱད་པར་གྱིས་ཅི་བྱ་ཞེ་ན། འདི་ནི་བདག་ཉིད་ཀྱི་ཕྱོགས་ཡིན་གྱི། གཞན་རྣམས་ནི་དེ་ལྟར་འདོད་པ་མ་ཡིན་པའི་ཕྱིར་ཉེས་པ་མེད་དོ། །དེས་ན་འབྲས་བུ་མི་དམིགས་པ་ནི་རྒྱུ་མི་དམིགས་པའི་དབྱེ་བ་ཡིན་ནོ་ཞེས་བྱ་བ་འདི་གནས་སོ། །གཞན་ཡང་དེ་ལྟར་མི་འདོད་ན་ནི་དེ་རྒྱུ་ཞེས་བྱ་བའི་རྣམ་འགྲེལ་འདི་ལྡོག་པར་བྱེད་པ་ཞེས་ཁོང་ནས་དྲངས་ནས་ཀྱང་གོ་བར་བྱེད་པ་མ་ཡིན་ནོ་ཞེས་བྱ་བ་གསལ་བར་འགྱུར་རོ། །ཅི་ལྟར་བཤད་པ་ཡང་དེ་མ་ཐག་པའི་རྣམ་འགྲེལ་གྱི་དོན་ཡིན་པའི་ཕྱིར་དོན་མེད་པར་ཡང་འགྱུར་རོ། །གལ་ཏེ་དེ་ལྟ་ན་ཡང་འབྱུང་བར་འགྱུར་བའི་སེམས་ངེས་པར་བྱ་བ་ནི་དེའི་འབྲས་བུ་ད་ལྟ་བ་ལས་དེའི་རྗེས་སུ་དཔོག་པ་ལ་རྗེས་སུ་དཔག་པས་ཀྱང་དེ་ངེས་པའི་ཕྱིར་ཕན་
ཚུན་བསྟེན་པ་ཡིན་ནོ། །འོན་ཏེ། ཅི་ཞིག་ཡོད་འགྱུར་གང་མེད་པ། །གང་གིས་ཕྱི་ནས་མཚམས་སྦྱོར་མེད། །ཅེས་བྱ་བའི་ཤེས་པ་ཕྱི་མ་འགྲུབ་ན། འོ་ན་རྗེས་སུ་དཔག་པས་ཅི་བྱ་ཞེ་ན། དེ་ནི་མི་རིགས་ཏེ། གང་གི་ཕྱིར་འདི་ནི་སྤྱིར་ཉོན་མོངས་པ་ཅན་གྱི་སེམས་ཙམ་སེམས་ཕྱི་མ་མེད་ན་མི་འབྱུང་བ་ཉིད་ཀྱིས་ཁྱབ་པར་བསྒྲུབ་པའི་རྣམ་པ་ཡིན་ནོ། །ཁྱད་པར་ཅན་གྱི་ཡུལ་ལ་ནི་རྗེས་སུ་དཔོག་པ་ལ་ནི་རྗེས་སུ་དཔོག་པ་ཡིན་ནོ། །འདི་ལྟར་གང་དང་གང་ཐ་མལ་པའི་སེམས་ཡིན་པ་དེ་དང་དེ་ནི་སེམས་ཕྱི་མ་མེད་པར་མི་འབྱུང་སྟེ། དཔེར་ན་སྔར་གྱི་གནས་སྐབས་བཞིན་ནོ། །ལམ་པོ་ཆེའི་སྐྱེས་བུ་འཆི་བའི་སེམས་ཀྱང་ཐ་མལ་པའི་སེམས་ཡིན་ནོ་ཞེས་བྱ་བ་ནི་འབྲས་བུའི་གཏན་ཚིགས་སོ། །གང་གིས་ཕན་ཚུན་བསྟེན་པའི་ཉེས་པའི་ངེས་པར་འགྱུར་བ་འདིར་རྗེས་སུ་དཔག་པས་འབྱུང་བར་འགྱུར་པའི་སེམས་བསྒྲུབས་པས་དེའི་འབྲས་བུ་ཉིད་དུ་ངེས་པ་ཡང་མ་ཡིན་ཏེ། ཆགས་པ་སྔར་རབ་ཏུ་བསྒྲུབས་པས་ཟིན་པའི་ཕྱིར་རོ། །དེ་ལྟར་བཀོད་པ་ན་རང་བཞིན་གྱི་གཏན་ཚིགས་སུ་འདོགས་པར་ཡང་མི་བྱ་སྟེ། གང་དང་གང་དུ་དུ་བ་ཡིན་པ་དེ་དང་དེ་ནི་མེ་ལས་སྐྱེས་པ་ཡིན་ཏེ་ཞེས་བྱ་བ་འདིར་ཡང་ཐལ་བར་འགྱུར་བའི་ཕྱིར་རོ། །དེ་ལྟར་ཁས་ལེན་ན་ཡང་འབྲས་བུའི་གཏན་ཚིག་ས་མེད་པར་འགྱུར་པའི་ཕྱིར་རོ། །དེ་ལྟར་ཡང་དཔྱོད་པར་འགྱུར་རོ། །དེའི་ཕྱིར་རྒྱུའི་སྤྱིའི་མཚན་ཉིད་གསུང་རབ་ཀྱི་ཁུངས་དྲངས་ཏེ་བརྗོད་པ་འདི་ནི་མ་འོངས་པ་ཡང་རྒྱུ་ཉིད་དུ་གཞུང་གཟུགས་པ་གཙོར་བྱེད་པ་ཡིན་ནོ། །དེ་ཉིད་ཀྱི་ཕྱིར་མཇུག་སྡུད་པ་ནི་དེའི་ཕྱིར་མི་འཁྲུལ་བས་ན་ཞེས་བྱ་བའོ། །དེ་ལ་བཤད་པ་སྔ་མ་ལ་ལྟོས་ནས་འཆད་པར་འགྱུར་བ་ནི་རྣམ་འགྲེལ་དུ་བཤད་ཟིན་པའི་དོན་ཡལ་བར་དོར་ནས་དོན་གྱི་སྒོ་ནས་འགྱུར་བ་ཡིན་ཞེས་བྱ་བའི་རྣམ་འགྲེལ་གྱི་ཚད་དང་སྦྱོར་བར་བྱེད་པས་རྣམ་པ་ཅི་ཞིག་ལྟར་དོན་དང་བཅས་པ་ཉིད་སྟོན་པར་བྱེད་པ་ནི་ལུས་ལས་ནི་ཞེས་བྱ་བ་ལ་སོགས་པའོ། །རེ་ཞིག་ཅེས་བྱ་བ་རྟེན་གྱི་སྒོ་ནས་ཕན་འདོགས་པ་ཙམ་གྱིས་སོ། །དཔེ་འགྲེལ་པར་བྱེད་པ་ནི་མེ་ལ་སོགས་པས་ཞེས་བྱ་བ་ལ་སོགས་པའོ། །བུམ་པ་ལ་སོགས་པའི་དམར་པོ་ཉིད་ལ་སོགས་པའོ། །འདིས་ནི་
གྲུབ་པ་ལ་ཡོན་ཏན་གཞན་སྒྲུབ་པས་ཕན་འདོགས་པའི་ཁྱད་པར་བརྗོད་པ་ཡིན་ནོ། །དཔེ་གཞན་བརྗོད་པ་ནི་གསེར་ལ་སོགས་པའི་ཞེས་བྱ་བའོ། །འདིས་ནི་ཇི་སྐད་བཤད་པའི་རེས་འགའི་ཕན་འདོགས་པར་བྱེད་པ་ལས་བཟློག་པས་རྟག་ཏུ་རྗེས་སུ་འཇུག་པའི་ཕྱིར། གང་མེད་པར་རྒྱུན་གནས་པ་མི་འབྱུང་བ་དེ་ཉིད་ལོག་ནས་འབྲས་བུ་ལྡོག་པ་ཡིན་ཏེ། དཔེར་ན་མར་མེ་དང་མེ་ལ་སོགས་པ་ལོག་ན་འོད་དང་དུ་བ་ལ་སོགས་བ་བཞིན་ནོ། །རེས་འགའ་བའི་ཕན་འདོགས་པར་བྱེད་པ་ལོག་པས་ནི་ལྡོག་པ་མ་ཡིན་ནོ་ཞེས་གསལ་བར་བརྗོད་དོ། །ལུས་ནི་བྱེད་པ་པོ་ཉིད་དུ་ཡང་ངེས་པར་མི་ནུས་ན་རྒྱུན་གནས་པར་བྱེད་པ་ཉིད་དུ་ལྟ་ཅི་སྨོས་སྙམ་དུ་དགོངས་པ་ཡིན་ནོ། །དེས་ན་འཆི་བའི་དུས་སུ་དེ་ལོག་ཀྱང་ལྡོག་པ་མ་ཡིན་ནོ། །འོ་ན་ཅི་ལྟར་ལྡོག་ཅེ་ན། གང་ཞིག་ཅེས་གསུངས་ཏེ། རྒོལ་བ་གང་གིས་ལྟར་ནའོ། །དེ་མཚང་བ་ལས་ཞེས་བྱ་བ་ནི་སེམས་མཚང་བ་ལས་སོ། །ལུས་འགའ་ཞིག་རྒྱུ་ཡིན་པ་ལ་འགལ་བར་བརྗོད་པ་ནི་རིག་པར་རང་ངམ་གཞན་གྱིས་སམ་ཞེས་བྱ་བ་ལ་སོགས་པས་སོ། །དེ་ལྟ་ན་འོ་ན་ལྡོག་པ་ཉིད་མེད་དེ། ལོག་པའི་ལུས་ནི་ཟློག་བྱེད་མ་ཡིན་ལ་རྒྱུར་འདོད་པའི་སེམས་ནི་ཡོད་པ་ཉིད་ཀྱི་ཕྱིར་རོ་ཞེ་ན། གལ་ཏེ་རྣམ་པ་ཐམས་ཅད་དུ་ཆད་པ་ལོག་པ་ཡིན་ན་ནི་དེའི་ཚེ་ལྡོག་པར་བྱེད་པ་ཁོ་ནའོ། །དེས་ན་མི་མཐུན་པ་འགའ་ཞིག་ལས་ལུས་དེ་ལས་ལྡོག་པ་གཞན་དུ་འཕྲོ་བའི་རྒྱུ་ཡོད་པ་ཡིན་ཏེ། ཐ་ན་གནད་དུ་ན་བ་ལ་སོགས་པས་ལུས་དེ་ལ་བཏང་སྙོམས་འཇུག་པའི་ཕྱིར་རོ། །དེ་ལྟར་ཕན་འདོགས་པར་བྱེད་པའི་ཕྱོགས་ལ་ཉེས་པ་བརྗོད་ནས་ཡུལ་འགའ་ཞིག་ཉེ་བར་ལེན་པ་ཡིན་པ་ལ་ཡང་ཉེས་པ་བརྗོད་པའི་ཕྱིར་གཞན་ཡང་བརྗོད་པ་ནི་ཞེས་གསུངས་སོ། །འོན་ཏེ་ཡང་སེམས་ནི་དབུགས་ཕྱུང་བ་དང་རྔུབ་པ་དག་གི་ཡང་འབྲས་བུ་ཡིན་ཏེ། དེས་ན་འཆི་བའི་གནས་སྐབས་དེ་ཉིད་མེད་པའི་ཕྱིར་ལྡོག་པ་མེད་པར་ཐལ་པ་མ་ཡིན་ནོ་ཞེ་ན། སེམས་དེ་ཉིད་ལས་འབྱུང་རྔུབ་ཡིན་གྱི། སེམས་དེ་ཉིད་ནི་འབྱུང་རྔུབ་དག་ལས་མ་ཡིན་ནོ་ཞེས་བཟླས་ཏེ་སྦྱར་རོ། །དེས་ན་རྗོད་བྱེད་པའི་ཐལ་བམ་སྤངས་པ་ཉིད་དུ་དགོངས་པའོ། །འབྱུང་བ་རྔུབ་པ་དག་
སེམས་ཀྱི་འབྲས་བུའོ་ཞེས་ཅི་ལྟར་ངེས་སྙམ་ན། སེམས་དེ་ཡོད་ན་ཡོད་པའི་ཕྱིར་རོ། །བཟློག་པར་ནི་མ་ཡིན་ནོ་ཞེས་བྱ་བའི་དོན་ཏོ། །འདི་ཉིད་ག་ལས་ཤེ་ན། དབང་འགྱུར་ཕྱིར་ཞེས་གསུངས་སོ། །བཤད་པ་ནི་ཐལ་བར་ཞེས་བྱ་བ་ལ་སོགས་པའོ། །འོ་ན་གང་གི་ཚེ་ལྡོག་པ་མེད་པར་ཐལ་སྙམ་ན། ལུས་དེ་ལྟ་བུ་ཉིད་དུ་ཞེས་བྱ་བ་ནི་རྣམ་པར་ཤེས་པ་བསྐྱེད་པར་མངོན་འདོད་པ་སྔར་གྱིས་རང་བཞིན་རྣམ་པར་མཚུངས་པའི་རྣམ་པ་ཅན་དེ་ལྟ་བུར་གྱུར་པ་ཉིད་གནས་པ་ནའོ། །ལྡོག་པའམ་ཞེས་བྱ་བ་ནི་འཆི་བའི་གནས་སྐབས་སུ་སེམས་ལྡོག་པར་མི་འགྱུར་རོ་ཞེས་བྱ་བའི་དོན་ཏོ། །ལུས་གཞན་དུ་འགྱུར་བ་གནས་པ་ན་ཡང་ལོག་པར་མི་འཐད་དོ་ཞེས་སྦྱར་རོ། །གཉི་ག་ལྟར་ཡང་ལྡོག་པར་མི་འཐད་དོ་ཞེས་བྱ་བ་འདི་ག་ལས་ཤེ་ན། གནས་སྐབས་མཐའ་དག་ཏུ་རྗེས་སུ་འགྲོ་བའི་ཕྱིར་ཏེ། ཉམས་པ་དང་འཕེལ་བ་ལ་སོགས་པའི་གནས་སྐབས་དུ་མར་སེམས་རྗེས་སུ་འགྲོ་བར་ནི་སྔར་དམིགས་པ་ཡིན་ནོ། །དེས་ན་གནས་སྐབས་ཀྱི་ཁྱད་པར་ལ་ལྟོས་པ་མ་ཡིན་ན། དེ་བས་ན་གཉི་ག་ལྟར་ཡང་ལྡོག་པར་མི་འཐད་དོ། །འཆི་བའི་གནས་སྐབས་ན། གནད་དུ་གཟེར་བ་ལ་སོགས་པའི་གདུང་བའི་ཁྱད་པར་ལས་སེམས་ལྡོག་པ་ཁོ་ནའོ་སྙམ་ན། གདུང་པའི་སྡུག་བསྔལ་ནི་སེམས་ཀྱི་ཆོས་ཡིན་པའི་ཕྱིར་ལུས་ལ་ཅི་ཞིག་བྱུང༌། ལུས་ཀྱང་དེས་རྣམ་པར་འགྱུར་རོ་ཞེ་ན། དེ་ལྟ་ན་ནི་ལུས་ཀྱིས་རྟེན་དེ་ཡིན་གྱི་དེའི་རྟེན་ནི་ལུས་མ་ཡིན་ཏེ། །ཕན་འདོགས་པ་དང་གནོད་པ་བྱེད་པར་མི་ནུས་པའི་ཕྱིར་རོ། །ཤེས་པས་མི་མཐུན་ལུས་རྒྱུ་མིན། །ཞེས་བྱ་བ་ཡང་རྣམ་པར་སྤྱོད་པར་འགྱུར་རོ། །དེའི་ཕྱིར་ལུས་སེམས་ཀྱི་རྒྱུ་ཡིན་ན། དེ་དང་དེ་འདྲ་བ་ཤི་པ་ལས་ཀྱང་འབྱུང་བར་ཐལ་བ་ཁོ་ནའོ། །དེ་ཉིད་ཀྱི་ཕྱིར་ལུས་ནི་འབྱུང་བ་དང་རྔུབ་པ་དག་གི་ཡང་རྒྱུ་མ་ཡིན་གྱི། འོན་ཀྱང་སེམས་ཉིད་ཡིན་ཏེ་སེམས་མེད་ན་དེ་དག་མི་འབྱུང་བའི་ཕྱིར་རོ་ཞེས་བརྗོད་པ་ནི་སེམས་ཡོད་ན་དེ་དག་ཡོད་པའི་ཕྱིར་ཏེ་ཞེས་བྱའོ། །བཟློག་པ་འབྱུང་བ་དང་རྔུབ་པ་དག་ལས་ནི་སེམས་མ་ཡིན་ནོ། །སེམས་དེའི་དབང་ཉིད་དུ་མི་འགྱུར་རོ། །འོན་ཏེ་དེ་དག་སེམས་ལ་རག་ལས་པ་ཉིད་མ་ཡིན་ནོ་སྙམ་ན་དེ་དག་ནི་ཞེས་གསུངས་སོ། །རླུང་འབྱིན་པ་དང་འདྲེན་པ་ནི།
འབའ་རྩོལ་མེད་པར་གང་ལས་ཡིན། །ཞེས་འཆད་པར་འགྱུར་རོ། །རྣམ་པ་གཞན་གྱི་སྒོ་ནས་ཀྱང་སེམས་ཀྱི་དབང་དུ་གྱུར་པར་སྟོན་པ་ནི། གལ་ཏེ་གཞན་ལས་ཞེས་བྱ་བའོ། །འོ་ན་སེམས་དེ་དག་ཅི་ཡིན་པར་འོས་ཤེ་ན། སེམས་ནི་ཞེས་གསུངས་སོ། །དེ་དག་ལས་ཞེས་བྱ་བ་ནི་དེ་དག་ཉིད་ལས་ཞེས་ངེས་པ་མ་ཡིན་ནོ། །ཕན་ཚུན་ཕན་འདོགས་པར་བྱེད་པ་ཡིན་ན་ནི་སྔར་ཡང་དེ་ཁོ་ན་ལྟར་ཡིན་པའི་ཕྱིར་ཐོག་མ་མེད་པ་ཉིད་དོ། །གཞན་ལས་སྐྱེས་ཀྱང་ཞེས་ཀྱང་གི་སྒྲ་ནི་སྲིད་པ་ལའོ། །གྲུབ་པའི་མཐའི་དགོངས་པ་ནི་འདི་སྲིད་པ་ནི་ཚང་མར་སྤངས་པ་ཡིན་ནོ་ཞེས་བྱ་བ་ཡིན་ནོ། །གལ་ཏེ་དེ་དག་སེམས་ཀྱི་འབྲས་བུ་མ་ཡིན་ཏེ། གཉིད་ཀྱི་གནས་སྐབས་ན་སེམས་མེད་ཀྱང་འབྱུང་བའི་ཕྱིར་རོ་སྙམ་དུ་དོགས་བ་བསུ་བ་ནི། འོན་ཏེ་ཞེས་བྱ་བའོ། །གྲུབ་པའི་མཐའ་ནི་གཉིད་ཀྱི་གནས་སྐབས་ན་སེམས་མེད་པར་ཁས་བླངས་ཀྱང༌། དེའི་དུས་སུ་འབྱུང་བ་དང་རྔུབ་པ་དག་སེམས་ཀྱི་འབྲས་བུ་ཉིད་ཉེས་པ་མེད་དོ་ཞེས་བྱ་བའི་དོན་ཏོ། །སྔར་གྱི་སེམས་ལས་ཞེས་བྱ་བ་ནི་སད་པའི་གནས་སྐབས་ཀྱི་སེམས་ལས་སོ། །གཞན་དུ་གྱུར་པ་ལས་ཞེས་བྱ་བ་ནི་དྲག་ཏུ་འབྱུང་བ་གོམས་པ་ལས་ནི་གཞན་ཉིད་དུ་འགྱུར་ཏེ་དྲག་ཏུ་འབྱུང་བར་འགྱུར་རོ། །རྒྱུ་མ་ཡིན་པ་ཉིད་ཅེས་བྱ་བ་ནི་དོན་གྱིས་ཏེ། དངོས་སུ་ནི་རླུང་འབྱིན་པ་དང་ཞེས་བྱ་བ་ལ་སོགས་པས་སེམས་ལ་རག་ལས་པ་ཉིད་སྟོན་པར་བྱེད་དོ། །སེམས་ཀྱི་ཁྱད་པར་འབད་རྩོལ་མེད་པར་རོ། །གཞན་ཡང་གལ་ཏེ་འབྱུང་རྔུབ་ཀྱི་འབྲས་བུ་ཡིན་ན། འབྱུང་བ་དང་རྔུབ་པ་དེ་དག་འཕེལ་བ་དང་འགྲིབ་པ་ལས་སེམས་ཀྱང་འཕེལ་བ་དང་འགྲིབ་པར་འགྱུར་རོ། །དེ་ལྟར་ཡང་མ་ཡིན་ཏེ་ཞེས་བྱ་བ་ནི་འབད་རྩོལ་མེད་པར་དེ་གཉིས་འབྱུང་བ་མ་ཡིན་ནོ། །གལ་ཏེ་འབད་རྩོལ་མེད་པར་འབྱིན་པ་དང་འདྲེན་པ་མི་འབྱུང་བས་དེ་དག་རྒྱུའི་འབྲས་བུ་ཉིད་ཡིན་མོད། འབྱུང་བ་དང་རྔུབ་པ་དག་གོ །ཅི་ལྟར་ཞེ་ན། དེ་དག་ནི་ཞེས་གསུངས་སོ། །འབྱུང་བ་དང་རྔུབ་པ་དག་གོ །འོན་ཏེ་ཞེས་བྱ་བ་ནི་དེ་དག་གི་ཆོས་ཀྱི་རང་བཞིན་འབྱིན་པ་དང་འདྲེན་པ་ཉིད་ཡིན་ནོ། །འོ་ན་དེ་དག་གི་རང་བཞིན་གང་ལས་སྐྱེས་སྙམ་ན། རང་གི་ངོ་བོ་ནི་རྒྱུ་གཞན་ལས་ཞེས་སྨྲས་
སོ། །སེམས་དེ་ལས་ནིའོ། །སུན་འབྱིན་པའི་བསམ་པ་ནི་འདི་ཡིན་ཏེ། རང་གི་ངོ་བོ་ནི་རྒྱུ་གཞན་ལས་ཡིན་ནོ་ཞེས་གང་སྨས་པ་དེ་ལ་གཞན་གནས་པའི་རླུང་ངམ་ལུས་ཡིན་པར་བརྟག །དང་པོའི་དབང་དུ་བྱས་ནས་བཤད་པ་ནི་གལ་ཏེ་ཞེས་བྱ་བའོ། །གནས་པ་དེ་ནིའོ། །དེ་ལས་འབྱུང་བ་དང་རྔུབ་པ་དག་འབྱུང་བར་འགྱུར་ལ། དེ་ལས་སེམས་དེ་ལས་ཀྱང་འབྱིན་པ་དང་འདྲེན་པར་འགྱུར་ཞིང་ཡང་དེ་བཞིན་དུ་འགྱུར་བའི་ཕྱིར་ཞི་བ་ལས་སེམས་ལྡོག་པར་མི་འགྱུར་ཏེ། གནས་པའི་རླུང་གཏན་དུ་ཐམས་ཅད་ལ་ཡོད་པར་གྲུབ་པའི་ཕྱིར་རོ། །གནས་པའི་རླུང་རྒྱུ་ཡིན་ནོ་ཞེས་དེ་སྐད་དུ་སྨྲ་སྙམ་ན་གལ་ཏེ་ཞེས་གསུངས་ཏེ། ཕྱོགས་གཉིས་པ་ཞེས་བྱ་བའི་དོན་ཏོ། །དེའི་ཚེ་ཡང་སྐབས་ཀྱི་ཉེས་པ་ཉིད་ཡོད་དོ་ཞེས་སྟོན་པ་ནི་གལ་ཏེ་གནས་པའི་རླུང་ཞེས་བྱ་བའོ། །དེའི་ཚེ་ལྡོག་པ་མེད་པ་ཉིད་དུ་ཞེས་བྱ་བ་སྟེ། ལུས་ལས་འབྱུང་རྔུབ་དེ་ལས་སེམས་དེ་ལས་འབྱིན་པ་དང་འདྲེན་པ་ཡིན་པའི་ཕྱིར་ལུས་འདི་ཉིད་རྩ་བའི་རྒྱུ་ཡིན་ནོ། །དེས་ན་ལྡོག་པ་མེད་པར་ཐལ་བ་སོ་ན་འདུག་གོ །འོན་ཏེ་ཞེས་བྱ་བ་ནི་ཕྱེད་སྔ་མ་བཤད་པའོ། །རྒྱུ་ཡིན་ན་ཞེས་བྱ་བ་ནི་བརྒྱུད་པ་སྟེ་གནས་པའི་རླུང་ཉིད་ལ་བརྗོད་དོ། །འབྱུང་བ་དང་རྔུབ་པ་དེ་མེད་པས་ན་སེམས་ལྡོག་པར་འདོད་པ་གང་ཡིན་པ་དེ་མི་ཐོབ་སྟེ། འབྱུང་བ་དང་རྔུབ་པ་ཉིད་མི་ལྡོག་པའི་ཕྱིར་རོ། །དེ་ལྟར་རྣམ་འགྲེལ་གྱི་ཕྱེད་སྔ་མ་བཤད་ནས། ཕྱེད་ཕྱི་མ་འཆད་པ་ནི་འབྱུང་བ་དང་རྔུབ་པ་ཞེས་བྱ་བའོ། །འབྱུང་བ་དང་རྔུབ་པ་འཕེལ་བ་དང་འགྲིབ་པ་དག་ལས་རྣམ་པར་ཤེས་པ་འཕེལ་བ་དང་འགྲིབ་པར་ནི་མཐའ་མེད་དོ། །དེས་ན་དེ་དག་ནི་སེམས་ཀྱི་གཙོ་བོའི་རྒྱུ་མ་ཡིན་ནོ། །འབྱུང་བ་དང་རྔུབ་པ་དག་སེམས་ཀྱི་རྒྱུར་ཁས་བླངས་ཀྱང་བརྗོད་པའི་ཐལ་བ་མི་ལྡོག་གོ་ཞེས་བརྗོད་པ་ནི་དེ་དག་ལ་ཡང་ཞེས་བྱ་བ་སྟེ། འབྱུང་བ་དང་རྔུབ་པ་དག་ལ་ཡང་ཐལ་བ་མཚུངས་སོ། །དེའི་རྒྱུ་མཚང་བ་མེད་པའི་ལུས་གནས་པའི་ཕྱིར་ན་སེམས་ལྡོག་པ་མེད་པ་ཁོ་ནའོ་ཞེས་དགོངས་པའོ། །འདི་ཉིད་ནི་གཙོར་འཆད་པ་ནི་འབྱུང་བ་དང་རྔུབ་པ་དག་ཅེས་བྱ་བའོ། །འདི་སྙམ་དུ་ཞེས་བྱ་བ་ལ་སོགས་པས་ནི་ཚིག་རྐང་ལྷག་མ་གསུམ་རྣམ་པར་
འགྲེལ་བའོ། །ཅི་ལྟར་ལུས་ཡོད་ན་འབྱུང་བ་ལ་སོགས་པ་མི་ལྡོག་པས་ན་སེམས་ཡོད་པར་ཐལ་བ་དེ་ལྟར་སྦྱོར་བར་བྱེད་པ་ནི་སེམས་ནི་གནས་པ་ཉིད་ན་ཞེས་བྱ་བའོ། །ཐལ་བར་འགྱུར་བ་སྐྱེ་འདོད་པའི་སེམས་ལ་ལྟོས་ནས་སྔ་མ་འཆི་ཁ་མའི་སེམས་ཐ་མ་ཡང་དེའི་སྔ་མ་འདོད་ན་ལྡོག་པ་མ་ཡིན་ནོ། །ཐ་མ་དང་ཉེ་བ་ནི་ལུས་ཀྱི་གནས་སོ། །ཐ་མ་ན་འབྱུང་རྔུབ་ཀྱི་གནས་ཡིན་ནོ། །ལུས་དེ་ལ་སྲིད་པ་དང་ལྷན་ཅིག་འཇུག་པའི་ལས་དེ་དེའི་མིང་ཅན་ནོ། །འདིས་ནི་སྲིད་པ་དང་ལས་བསྟན་ཏོ། །རྨོངས་པ་ཡང་ཉེ་བར་མཚོན་པ་བྱ་པ་ཡིན་ནོ། །མ་རིག་པ་ལ་སོགས་པའི་རང་བཞིན་དེ་ཉིད་ནི་འདུ་བྱེད་ཅེས་བྱ་བ་བག་ཆགས་ཀྱི་ས་བོན་ཡིན་ནོ། །འདུ་བྱེད་དེ་སྐྱེ་བར་འདོད་པ་ལ་སྔ་མའི་སེམས་ལས་སད་པར་བྱས་པ་གང་ཡིན་བ་དེར་གྱུར་པ་ན་སྔ་མ་ཅི་ལྟ་བ་བཞིན་དུ་ལུས་དེ་ལས་སེམས་སྐྱེད་པར་བྱེད་པའམ། གཞན་དུ་སྟེ་སྐྱེ་བ་གཞན་དུ་སྐྱེད་པར་བྱེད་པ་ཡིན་ནོ། །རྣམ་པར་དབྱེ་བ་འདི་ག་ལས་ཤེ་ན། བག་ཆགས་ཀྱི་ཞེས་བྱ་བ་ལ་སོགས་པ་གསུངས་སོ། །གང་ཞིག་སད་པ་ན་ལུས་དེ་ཉིད་ལ་བདེ་བ་དང་སྡུག་བསྔལ་ལ་སོགས་པ་ཉེ་བར་སྤྱོད་པར་འགྱུར་བའི་བག་ཆགས་འགའ་ཞིག་ཡོད་པ་ཡིན་ལ། གང་ཞིག་སད་པའི་ལུས་གཞན་ལ་བདེ་བ་དང་སྡུག་བསྔལ་ལ་སོགས་པ་ཉེ་བར་སྤྱོད་པར་འགྱུར་བའི་བག་ཆགས་འགའ་ཞིག་ཀྱང་ཡོད་པ་ཡིན་ནོ། །དེ་ལ་དང་པོ་ནི་ཕན་འདོགས་པའི་ཁྱད་པར་རྣམས་ཀྱིས། ལུས་དེ་ལ་སྐྱེ་འདོད་པ་གཞན་དང་གཞན་ལ་ལྟོས་ནས་སྔ་མ་སྔ་མའི་སེམས་ལ་སད་པར་བྱེད་ལ། གཉིས་པ་ནི་གནད་དུ་ན་བ་ལ་སོགས་པས། སྐྱེ་བར་འདོད་པའི་སེམས་ལ་ལྟོས་ནས་སྔ་མར་གྱུར་པ་ཐ་མའི་སེམས་ལས་སད་པར་བྱེད་དོ། །དེ་བཞིན་དུ་བག་ཆགས་ཀྱི་ས་བོན་ཇི་སྐད་བཤད་པ་ནི། སྣ་ཚོགས་བར་བལྟ་བར་བྱའོ། །བག་ཆགས་ཐོག་མ་མེད་པ་ཉིད་ནི་བསྙོན་པར་མི་འོས་ཏེ། མཐོང་བའི་ཕྱིར་རོ་ཞེས་བརྗོད་པ་ནི། དཔེར་ན་ཞེས་བྱ་བའོ། །འདིས་ནི་ཤེས་པ་སྣ་ཚོགས་པར་དངོས་སུ་བཤད་པ་ཡིན་ནོ། །བག་ཆགས་སྣ་ཚོགས་བ་ནི་ཤུགས་ཀྱིས་སོ། །དེ་བཞིན་དུ་བག་ཆགས་
སད་པར་བྱེད་པའི་རྐྱེན་ཡང་རྗེས་སུ་དཔག་པར་བྱའོ། །སེམས་སྣ་ཚོགས་པ་དེ་དོན་སྣ་ཚོགས་པས་བྱས་པ་ནི་མ་ཡིན་ཏེ། དོན་གྱིས་སྟོང་བའི་ཕྱིར་རོ། །གཞན་དུ་སྣང་བའི་ཕྱོགས་ལ་ཡང་བག་ཆགས་སུ་སྨྲ་བ་ནི་སྦང་བར་དཀའོ། །འདི་ལྟར་དོན་མི་ཉེ་བའི་ཕྱིར་ན་མི་སྣང་བ་ཉིད་དམ། ཕྱིན་ཅི་མ་ལོག་པར་ཤེས་པ་ཉིད་དུ་ཅི་སྟེ་མི་འགྱུར་ཞེས་སྤྱད་པ་ན། རྣམ་པ་དེ་ལྟ་བུའི་ཤེས་པའི་རྒྱུད་འདུས་བྱས་པའི་ཁྱད་པར་ཤེས་པ་ལས་སྐྱེས་པའི་བདག་གི་ཡོན་ཏན་ཁས་བླང་བར་བྱ་བའམ། བདག་མེད་ན་ནི་དེ་མ་ཐག་པའི་རྐྱེན་གྱིས་ནུས་པའི་ཁྱད་པར་ཡིན་པའི་ཕྱིར། བག་ཆགས་ནུས་པ་ཉིད་ཡིན་ནམ། འདུས་བྱས་པ་ཡིན་ཡང་རུང་སྟེ། ཁྱད་པར་འགའ་ཡང་མེད་དོ། །དེའི་ཕྱིར་མཇུག་སྡུད་བ་ནི་བག་ཆགས་སད་བའི་རྐྱེན་དེ་སྣ་ཚོགས་པའི་ཕྱིར་ན། བག་ཆགས་སད་པ་སྣ་ཚོགས་པ་ཡིན་ལ། དེའི་ཕྱིར་ཤི་བའི་ལུས་ལ་སེམས་ལྡོག་པ་ཡིན་ནོ། །གལ་ཏེ་ལུས་ཙམ་རྒྱུ་ཡིན་ཡང་སེམས་ལྡོག་པར་འགྱུར་རོ་ཞེ་ན། ལུས་ཙམ་རྒྱུ་ཡིན་པ་ལ་ཡང་མ་ཡིན་ཏེ་ཞེས་གསུངས་ཏེ། རིགས་པ་ཞེས་བྱ་བ་ལྷག་མའོ། །ལྡོག་པ་ཞེས་བྱ་བ་ཡང་རྗེས་སུ་འཇུག་གོ །གཞན་གྱིས་ལན་ཕྲན་ཚོགས་ནི། དེ་ལྟ་བུ་ཉིད་དུ་མཐོང་བའི་ཕྱིར་རོ་ཞེས་བྱ་བའོ། །སྤོང་བ་ནི་འདི་ག་ལས་ཞེས་བྱ་བའོ། །རྒྱུ་ཉིད་དུ་ཚད་མ་ལས་མ་གྲུབ་པ་དང༌། །གནོད་པའི་ཕྱིར་རོ་སྙམ་དུ་དགོངས་པའོ། །རང་གི་འདོད་པས་སྡུད་པ་ནི། སེམས་ཀྱི་བག་ཆགས་སྣ་ཚོགས་པ་ནི། མཐོང་བ་སྟེ་ཚད་མས་ངེས་པ་ཡིན་ནོ། །ཅི་ལྟར་ཞེ་ན། དེ་ལྟ་མིན་ན་རྨི་ལམ་དུ་ཤེས་པ་སྣ་ཚོགས་པ་མི་འཐད་པའི་ཕྱིར་རོ། །ཡང་ན་གལ་ཏེ་སེམས་རྒྱུ་ཡིན་པ་བཞིན་དུ་ལུས་ཙམ་རྒྱུ་ཡིན་པ་ཡང་མཐོང་བ་ཉིད་དོ། །དེས་ན་དེ་ལོག་པས་ཀྱང་ལྡོག་པར་འགྱུར་རོ་སྙམ་དུ་དོགས་ན། ལུས་ཙམ་ཞེས་གསུངས་སོ། །སེམས་ཙམ་རྒྱུ་ཡིན་པ་ལྟར་ལུས་ཙམ་ན་སེམས་ཀྱི་རྒྱུ་ཡིན་པར་མ་མཐོང་ངོ་ཞེས་བྱ་བའི་དོན་ཏོ། །གཞན་གྱིས་འདི་ག་ལས་ཤེས་བྲས་ཏ། ལུས་ཙམ་རྒྱུར་མ་གྲུབ་པ་ཅིའི་ཕྱིར་ཞེས་བྱ་བའི་དོན་ཏོ། །ལན་ནི་སྣ་ཚོགས་པའི་སེམས་ནི་ལུས་ཙམ་གྱི་རྒྱུ་ཙམ་དུ་མི་འཐད་པའི་ཕྱིར་རོ། །སྣ་ཚོགས་པའི་རྒྱུར་གྱུར་བའི་
བག་ཆགས་མཐོང་བ་སྟེ་ངེས་པ་ན་ཤེས་པ་ཐམས་ཅད་བག་ཆགས་སད་པའི་རྒྱུ་ཅན་ཡིན་ནོ། །གང་གིས་དེ་ལ་གཞན་ཡང་དེ་ལྟར་འགྱུར་བ། གཞན་དུ་མི་འཐད་པའི་ཤེས་པའི་ཕྱིར་ན། བག་ཆགས་ཀྱི་སྣ་ཚོགས་པ་མེད་པར་མི་འབྱུང་བར་ངེས་པའི་ཤེས་པ་དེ་གང་ཡིན་སྙམ་ན། རྨི་ལམ་ཤེས་པ་ཞེས་གསུངས་སོ། །དཔེར་ན་རྨི་ལམ་གྱིས་ཤེས་པ་སྣ་ཚོགས་པ་ལུས་ཀྱི་རྒྱུ་ཅན་དུ་མི་འཐད་པའི་ཕྱིར་ན། བག་ཆགས་སྣ་ཚོགས་པ་རྒྱུ་ཡིན་པར་ངེས་པ་བཞིན་ནོ། །ངེས་པ་དེའི་ཕྱིར་ན། སྣ་ཚོགས་པའི་ཤེས་པ་གཞན་པ་གཞན་གྱི་རྒྱུ་ཡང་བག་ཆགས་སྣ་ཚོགས་པ་ཉིད་ཡིན་གྱི། ལུས་ཙམ་ལ་སོགས་པ་ནི་མ་ཡིན་པར་ངེས་པ་ཡིན་ནོ། །དེ་ལ་རེ་ཞིག་དཔེ་ཉིད་རྣམ་པར་འགྲེལ་བ་ནི། གལ་ཏེ་ལུས་དང་ཞེས་བྱ་བའོ། །དེའི་ཚེ་ཞེས་ཁོང་ནས་ཕྱུང་སྟེ་ཐམས་ཅད་སྦྱར་རོ། །ཤེས་པ་སྣ་ཚོགས་བ་ལུས་ལ་སོགས་པའི་རྒྱུ་ཅན་དུ་མེ་འཐད་པ་ན་བག་ཆགས་པ་ཉིད་གསལ་བར་བྱེད་ནུས་པ་ཡིན་ནོ་ཞེས་བསྟན་པ་ནི། འགའ་ཞིག་གིས་ཞེས་བྱ་བའོ། །དཔེ་བཤད་ནས་ལྷག་མ་མཇུག་སྡུད་པས་རྣམ་པར་འགྲེལ་པ་ནི། དེའི་ཕྱིར་སེམས་ཐམས་ཅད་ཅེས་བྱ་བའོ། །བག་ཆགས་སད་པས་བྱས་ཏེ། ངེས་པར་གནས་པ་ཡིན་གྱི་ཞེས་བྱ་བ་ནི། པ་ན་ཚུན་སྤངས་ནས་གནས་ཏེ། གཅིག་གི་རྨི་ལམ་གྱི་ཤེས་པ་ཅི་ལྟ་བ་དེ་ལྟར་གཞན་ནི་མ་ཡིན་ནོ། །འོན་ཏེ་ཞེས་བྱ་བ་ནི་རྨི་ལམ་ན་སྣང་བའི་ཤེས་པ་རྣམས་ནི་བག་ཆགས་ཙམ་ལས་སྐྱེས་པའི་ཕྱིར་མི་བདེན་པ་ཉིད་དོ་སྙམ་དུ་བསམས་བའོ། །གྲུབ་པའི་མཐར་ནི་བག་ཆགས་ཀྱིས་བསྐྱེད་པ་ཡིན་ཡང་མི་བདེན་པ་ནི་མ་ཡིན་ནོ་ཞེས་བསྟན་ནས། མི་བདེན་པར་བསྒྲུབ་པ་ལ་བག་ཆགས་ལས་སྐྱེས་པ་ཉིད་མ་ངེས་པར་བརྗོད་བ་ནི། དེ་ཡང་མི་བདེན་ཏེ་ཞེས་བྱ་བའོ། །རང་དོན་ནི་བདེ་བ་དང་ཡིད་དགའ་བ་ལ་སོགས་པའོ། །དེ་ལྟ་ཡིན་མོད། དེ་ལྟ་ན་ཡང་ཅི་ལྟར་བདེན་པ་ཉིད་ཡིན་ཞེ་ན། ཡོད་ཉིད་དོན་བྱེད་པ་ལས་ཞེས་གསུངས་སོ། །འཆད་པ་ནི་དོན་བྱེད་པ་ལས་ཀྱི་ཞེས་བྱ་བ་ལ་སོགས་པའོ། །བཙོ་བ་དང་བསྲེག་པ་ལ་སོགས་པ་མངོན་པར་འདོད་པའི་དོན་བྱ་བ་གང་ཡིན་པ་
དེ་བྱེད་པ་ལ་འདེབས་པར་ཏེ། གཟེ་བར་འཇུག་པ་གང་དག་ཡིན་པ་དེ་དག་ལ་དེ་སྐད་ཅེས་བརྗོད་དོ། །མི་བདེན་པ་ཉིད་ཡིན་ཏེ་དེས་བདེན་པའི་བདག་ཉིད་འདོར་བ་གང་ཡིན་པ་དེ་དག་ནི་དེ་སྐད་ཅེས་བྱ་བའོ། །ཅི་སྟེ་ཞེས་བྱ་བ་ནི་གཞན་གྱིའོ། །ལན་ནི་སྐྱེ་བ་ལ་སོགས་བའོ། །དེ་ལྟར་ཞེས་བྱ་བ་བདེན་པའི་ལུས་དང་འབྲེལ་པར་རོ། །མཚུངས་པ་ཉིད་བརྗོད་པ་ནི། དེ་དག་ཀྱང་ཞེས་བྱ་བ་སྟེ། ཐ་སྙད་དག་ཀྱང་ངོ༌། །དེར་ཞེས་བྱ་བ་མངོན་པར་འདོད་པ་འཆི་བ་དང་སྐྱེ་བར་འགྱུར་རོ། །བདེན་པའི་ལུས་ཕན་ཚུན་ཁྱད་པར་དང་ལྡན་པའི་ཕྱིར་གཞན་དུ་གྱུར་པ་གང་ཡིན་པ་དེ་དག་ལེན་པ་དང༌། ལེན་པ་ཐ་སྙད་གང་ལ་ཡོང་པ་དེ་རྣམས་ནི་དེ་སྐད་ཅེས་བྱ་བའོ། །དེ་ལ་འཆི་པའི་སེམས་ནི་བདེན་པའི་ལུས་དང་འབྲེལ་པར་མཐོང་བ་ཁོ་ནའོ། །སྐྱེ་བའི་སེམས་ལ་བརྗོད་པ་ནི། འདི་ལྟར་ཞེས་བྱ་བའོ། །འཇུག་པའི་ཐ་སྙད་འདོགས་བའམ་མངལ་ནས་བྱུང་བའོ། །བག་ཆགས་ཀྱི་ཞེས་བྱ་བ་ནི་རྩོད་པའོ། །དམིགས་པ་མེད་པར་ཞེས་བྱ་བ་ནི། གང་གི་ཕྱིར་མི་དམིགས་སོ་ཞེས་བྱ་བའོ་དོན་ཏོ། །རྒན་པོ་ལ་སོགས་པ་ཞེས་བྱ་བ་ནི་ལན་ཏོ། །གལ་ཏེ་ཞེས་བྱ་བ་ལ་སོགས་པ་ནི་གཞན་གྱིའོ། །རྒན་པོ་ལ་སོགས་པའི་ལུས་ལ་སུ་འཕོ་བ་ཅི་འདྲ་བ་དེ་འདྲ་བ་ནིའོ། །ལན་ནི་དེ་ལྟ་ན་ཡང་ཞེས་བྱ་བ་སྟེ། གལ་ཏེ་ཡང་བྱིས་པ་ལ་སོགས་པའི་གནས་སྐབས་སུ་ཁུ་ཁྲག་གཅིག་ལས་བྱུང་བ་ཉིད་ཡོད་པ་དེ་ལྟ་ན་ཡང་ངོ༌། །ལྡོག་པ་སྟེ་མེད་པར་འགྱུར་བ་མ་ཡིན་ནོ། །འགའ་ཞིག་ཅེ་ན་ལུས་གཞན་ཉིད་དེ། །རེ་ཞིག་ཐ་དད་པ་ཉིད་ནི་བཟློག་པར་དཀའོ། །ཅིའི་ཕྱིར་ཞེ་ན། མཚན་ཉིད་མི་མཐུན་པ་གཉིས་ནི་ཞེས་གསུངས་སོ། །བྱིས་པའི་འོག་རོལ་བག་མ་བླངས་ཀྱི་བར་ནི་གཞོན་དུ་སྟེ། དེ་ཉིད་ཀྱི་ལུས་ཀྱང་མཚན་ཉིད་མི་མཐུན་པར་གསལ་བའི་ཕྱིར་ན་ཐད་དད་པ་ཁོ་ནའོ། །ཐ་དད་པར་འཕོ་བ་ཡང་མཐོང་བའི་ཕྱིར་ན། ཁུ་ཁྲག་གཞན་གྱིས་བསྐྱེད་པ་ལ་ཡང་འགལ་བ་ཅི་ཡོད་སྙམ་དུ་བསམས་བའོ། །འོན་ཏེ་ཞེས་བྱ་བ་ནི་གཞན་གྱིའོ། །རིགས་མི་འདྲ་བ་ནི་ཤིན་ཏུ་རིགས་མི་མཚུངས་བ་ལ་འདོད་དོ། །ལན་ནི་རྨི་ལམ་གྱི་ཞེས་བྱ་བའོ། །ཤིན་ཏུ་རིགས་མི་འདྲ་བའི་ལུས་
གཞན་དུ་འཕོ་བ་མ་མཐོང་བ་དེ་ཡང་ངོ༌། །རྒས་པ་པ་ནི་དེ་ནི་ཞེས་བྱ་བ་སྟེ། རྨི་ལམ་གྱི་ལུས་དེའོ། །ལན་ནི་མ་ཡིན་ཏེ་ཞེས་བྱ་བའོ། །མཐོང་བ་ནི་ཞེས་བྱ་བ་མངོན་སུམ་དུ་སྣང་བ་སྟེ། མངོན་སུམ་གྱི་རང་བཞིན་ཞེས་བྱ་བའི་དོན་ཏོ། །གང་ལས་མི་བདེན་པར་འགྱུར་བ་དེ་ལ་གནོད་པ་ཡང་ཅི་ཞིག་ཡོད། མངོན་སུམ་ལ་གནོད་པ་འཇུག་ན་ནི་གཞན་ལ་ཡང་ཡིད་བརྟན་དུ་ཅི་ཡོད། ཟླ་བ་གཉིས་སུ་སྣང་བ་ནི། ཟླ་བའི་རྣམ་པ་ཅན་གྱི་བློ་ཉིད་སྣང་བ་ཡིན་ལ། དེ་ལ་གནོད་པ་ནི་ཡོད་པ་མ་ཡིན་ནོ། །གནོད་པ་ནི་བརྟགས་པའི་ཕྱི་རོལ་གྱི་ཟླ་བ་གཉིས་ཉིད་ལ་འཇུག་པ་ཡིན་ནོ། །དེ་ནི་སྣང་བ་མ་ཡིན་ནོ་ཞེས་སྤྱོད་པར་འགྱུར་རོ། །ལྷག་པ་བརྗོད་པའི་དོན་དུ་ལན་འདི་ལ་ངེས་པ་མ་སྐྱེས་པས་རྩོད་པ་བརྗོད་བ་ནི། ཅི་ལྟར་ཞེས་བྱ་བའོ། །རྨི་ལམ་གྱི་ལུས་དེའོ། །དེར་ནི་རྨི་ལམ་གྱི་ལུས་སུའོ། །ལྷག་པ་ཉིད་བརྗོད་པའི་དོན་དྲི་བ་ནི། ཅི་ཞིག་ཅེས་བྱ་བའི་དོན་འདི་ཡིན་ཏེ། མི་བདེན་པ་ཞེས་བྱ་བ་འདི་ཅི་ཡིན། གནོད་པ་ཉིད་དམ། ཡུན་རིང་དུ་མི་གནས་པ་ཉིད་དམ། ཐུན་མོང་མ་ཡིན་པར་དམིགས་པ་ཡིན་ཞེས་བྱ་བའོ། །དེ་ལ་དང་པོ་གསལ་པའི་དོན་དུ་དོགས་པ་བསུ་བ་ནི་སད་པའི་ཞེས་བྱ་བའོ། །གང་གི་ཚེ་ཞེས་བྱ་བ་གཉིད་ལོག་པའི་གནས་སྐབས་ནའོ། །གཞན་གྱི་ཚེ་ཞེས་བྱ་བ་ནི་སད་པའི་གནས་སྐབས་སུའོ། །དེ་ཉིད་ཀྱི་ཚེ་ཞེས་བྱ་བ་གཉིད་ལོག་པའི་གནས་སྐབས་ནའོ། །གཉིད་ལོག་པའི་དེས་ཀྱང་ངོ༌། །ཅི་སྟེ་ཞེས་བྱ་བ་ནི་གཞིན་གྱིའོ། །རྨི་ལམ་གྱི་ཤེས་པ་སད་ནམ་དམིགས་སོ་ཞེས་རྟོགས་པར་བྱས་སོ། །སད་པ་དང་མ་སད་པ་དག་ཅེས་བྱ་བ་ནི་ལན་ནོ། །གཞན་དག་ཐ་དད་པའི་རྒྱུ་མཚན་བརྗོད་པ་ནི། ང་ཞེས་བྱ་བའོ། །གྲུབ་པའི་མཐའ་འདི་མ་ངེས་སོ་ཞེས་བརྗོད་པ་ནི་བཞེས་བྱ་བའོ། །ང་སད་དོ་སྙམ་པའི་ཤེས་པ་དེ་ལས་སོ། །དེའི་ཕྱིར་ཞེས་བྱ་བ་ནི་མཇུག་བསྡུ་བའོ། །སད་པ་དང་རྨི་ལམ་གྱི་ཤེས་པ་ཉིད་དམིགས་པར་མཚུངས་པ་ལའོ། །རི་བོང་གི་རྭ་བཞིན་མེད་བའམ་ཟླ་བ་ལྟར་མི་བདེན་པའོ། །ཟླ་བ་གཉིས་མི་བདེན་པ་མི་སྣང་ཡང་གནོད་པའི་ཕྱིར་རོ་ཞེས་བྱ་བ་ལུགས་ངན་གྱི་གཞུང་ལ་
ལྟོས་ནས་བརྗོད་པ་ཡིན་ནོ། །དངོས་པོ་ལ་ནི་དངོས་པོ་དང་དངོས་པོ་མེད་པ་ལས་ཕུང་པོ་གསུམ་པ་མེད་དོ་ཞེས་བྱིས་པ་ཡང་ཆད་ལ་གྲགས་པ་ཡིན་ནོ། །དེས་ན་གལ་ཏེ་གསལ་བ་ཉིད་ཀྱིས་མེད་པ་ལ་ལྟོས་ནས་ནི། དེའི་ཚེ་དངོས་པོ་ཉིད་ཡིན་པར་ཕུང་པོ་གསུམ་ག་ལ་ཡོད། གསལ་བཞིན་པ་ལ་ནི་གནོད་པ་ཡང་ཡོད་པ་མ་ཡིན་ནོ་ཞེས་བརྗོད་ཟིན་ཏོ། །རྣམ་པར་རྟོག་པ་ལྷག་མ་གཉིས་ཀྱི་དོགས་པ་བསུ་བ་ནི། འོན་ཏེ་ཞེས་བྱ་བ་སྟེ་དང་ཞེས་བྱ་བ་ནི་སྡུད་པའོ། །དེའི་དོན་མི་འདི་ཡིན་ཏེ། བག་ཆགས་སྟོབས་ཆུང་བས་བྱས་པ་ཤེས་པ་སྟོབས་ཆུང་བའི་མིང་ཅན་རིང་དུ་མི་གནས་པ་དང་ཐུན་མོང་མ་ཡིན་པར་དམིགས་པ་གང་ཡིན་པ་དེ་རྨི་ལམ་གྱི་ཤེས་པའི་མི་བདེན་པ་ཉིད་ཡིན་གྱི་མེད་པའམ་བརྫུན་བ་མ་ཡིན་ཏེ་རིགས་པ་མེད་པའི་ཕྱིར་རོ་ཞེས་བྱ་བ་ཡིན་ནོ། །ལན་བུའོ་ན་གང་ལ་ཞེས་བྱ་བའོ། །བག་ཆགས་བརྟན་པ་ཞེས་བྱ་བ་ནི་བག་ཆགས་བརྟན་པས་བྱས་པའི་རིང་དུ་གནས་པ་ཉིད་བརྗོད་པར་འདོད་པ་ཡིན་ནོ། །བཟློག་པ་ནི་བདེན་པའོ། །ཆོས་འཕོ་བ་ཉིད་ནི་ཆོས་ཅན་བདེན་པའི་ཕྱིར་ཞེས་བྱ་བར་བསམས་པའོ། །ཐུན་མོང་དུ་དམིགས་པ་ཞེས་བྱ་བ་ལ། ཡང་གང་ལ་བག་ཆགས་བརྟན་པ་ཡོད་པ་དེར་བཟློག་པའི་ཕྱིར་འཕོ་བ་ཉིད་དོ་ཞེས་སྦྱར་རོ། །ཐུན་མོང་དུ་དམིགས་བ་ནི། གཞན་གྱིས་ས་དང་རི་ལ་སོགས་པ་ཅི་ལྟར་དམིགས་བ་དེ་ལྟར་དེ་རིང་སྐྱེས་པས་ཀྱང་དམིགས་བ་རྨི་ལམ་ནི་དེ་ལྟ་མ་ཡིན་ནོ་ཞེས་བྱ་བའི་དོན་ཏོ། །དེ་དག་སྡུད་པ་ནི་ང་འདི་ལྟར་ཞེས་བྱ་བའོ། །མི་བདེན་པའི་ཐ་སྙད་སྐྱེ་བ་ནི་བདེན་མིན་སྐྱེ་བ་སྟེ་འདི་ལས་སྐྱེ་བའོ། །ཐུན་མོང་དུ་དམིགས་པ་ཞེས་བྱ་བ་འདི་ལ་ཐུན་མོང་མ་ཡིན་པར་དམིགས་པའི་བྱ་བ་ཡོད་པ་སྟེ་འབྲུ་མང་བོ་པའོ། །སྐབས་སུ་བབ་པ་སྐྱེ་བ་དང་པོའི་གནས་སྐབས་ཅན་ཡང་སད་པའི་ཤེས་པའི་རང་བཞིན་ཉིད་ཡིན་གྱི། བདེན་པ་ལ་འདའ་བ་ནི་མ་ཡིན་ནོ་ཞེས་བྱ་བ་ནི། དེས་ན་འཕོ་བ་གྲུབ་པའི་ཞེས་བྱ་བའོ། །འོན་རྨི་ལམ་གྱིས་ཤེས་པ་ཇི་ལྟར་མི་བདེན་ཞེས་ན། བསྟན་པ་མེད་པ་ནི་ཞེས་བྱ་བའོ། །དེ་ཙམ་གྱིས་རྨི་ལམ་མི་བདེན་པར་ཐ་སྙད་བྱེད་ཀྱང་སྐབས་ཉམས་པ་མ་ཡིན་ཏེ་དེ་མེད་པའི་ཕྱིར་རོ། །རྨི་ལམ་ཡང་
མི་བདེན་པར་ངེས་པ་མ་ཡིན་ནོ་ཞེས་བརྗོད་པ་ནི། གང་དུ་ཞེས་བྱ་བ་སྟེ་རྨི་ལམ་དུའོ། །གཉིག་ལ་ཡང་ཐུན་མོང་དུ་དེ་ལྟར་སྣང་བ་དེ་ཉེ་བར་བསྟན་པའི་སྨན་ལ་སོགས་པ་ཟོས་པས་ནད་ཞི་བ་ལ་སོགས་པ་ཉམས་སུ་མྱོང་བའི་ཕྱིར་རོ། །འབྲས་བུའི་རྒྱུན་ལ་ལྟོས་ནས་ཡུན་རིང་དུ་རྗེས་སུ་འབྲེལ་བ་ཡང་ཡིན་པའི་ཕྱིར་དེར་ཅི་ལྟར་མི་བདེན་པ་ཡིན། འོན་ཏེ་དེའི་ཚེ་བདེན་པ་ཉིད་དོ་ཞེས་བྱ་བ་གཉིས་ལ་རྨི་ལམ་དུ་མཐོང་བ་སྣང་བའི་དུས་ནའོ། །དེ་ལྟར་བག་ཆགས་བརྟན་བ་དང་བཅད་པའི་རྨི་ལམ་དུ་རིགས་མི་མཐུན་པའི་ལུས་སུ་འཕོ་བ་ནི་བདེན་པས་ཁྱབ་པར་བསྟན་པ་ཡིན་ནོ། །དེས་ན་གང་འཕོ་བའི་སེམས་བག་ཆགས་བརྟན་པ་དང་བཅས་པ་དེ་ནི་བདེན་པ་ཡིན་ཏེ། དཔེར་ན་བྱིས་པ་ནས་གཞོན་ནུའི་ལུས་འཕོ་བ་བཞིན་ནོ། །འཇིག་རྟེན་གཞན་ནས་འཇིག་རྟེན་འདིའི་ལུས་འཕོ་བའི་སེམས་འདི་ཡང་བག་ཆགས་བརྟན་པ་དང་བཅས་པ་ཡིན་ནོ་ཞེས་བྱ་བ་ནི་རང་བཞིན་ནོ། །འདིར་འཕོ་བ་ཉིད་ཡོད་ཀྱང་སྔ་མ་དྲན་པའི་ཕྱིར་གཞོན་ནུའི་ལུས་འཕོ་བ་ཉིད་བདེན་པ་ཡིན་ནོ་ཞེས་སུན་འབྱིན་བའོ། །དོགས་པ་བསུ་ནས་དེ་ལྟར་ཡིན་ན་ཞེས་གསུངས་སོ། །འཕོ་བ་ཞེས་བྱ་བ་འཕོ་བ་ཙམ་བདེན་པས་ཁྱབ་པར་རབ་ཏུ་གྲུབ་བས་ནའོ། །ཁྱད་པར་ཡོངས་སུ་རྟོག་པའི་ཕྱིར་ཞེས་བྱ་བ་ནི་དྲན་པ་དང་ལྡན་པའི་ཕྱིར་ཞེས་བྱ་བར་རོ། །རྣམ་རྟོགས་དང་མཚུངས་ཞེས་བྱ་བ་ནི་སྔ་མ་བཞིན་ཆོས་མཐུན་པ་ཡིན་ཡང་ཁྱད་པར་བརྗོད་པ་ནི་རྣམ་པར་རྟོག་པ་དང་མཚུངས་པའོ། །ཡང་ན་སྦྱོར་པ་ནི་བཤད་མ་ཐག་པ་ཉིད་ཡིན་ལ། དཔེ་ནི་དཔེར་ན་བག་ཆགས་བརྟན་པ་དང་བཅས་པའི་རྨི་ལམ་གྱི་ལུས་སུ་འཕོ་པ་བཞིན་ནོ་ཞེས་གཞན་དུ་བྱའོ། །གལ་ཏེ་རྨི་ལམ་གྱི་གནས་སྐབས་སུ་བྱུང་བའི་ཕྱིར་ན། དེ་འདྲ་བའི་རྨི་ལམ་གྱི་ལུས་འཕོ་བ་བདེན་བར་འགྱུར་མོད། སྐྱེ་བ་དང་པོར་ནི་མ་ཡིན་ཏེ། བཟློག་པའི་ཕྱིར་ཞེས་སུན་འབྱིན་པའི་དོགས་བ་བསུ་ནས། དེ་ལྟ་ཡིན་ན་རྨི་ལམ་གྱི་དོན་ཐམས་ཅད་མི་བདེན་བ་མ་ཡིན་ནོ་ཞེས་གསུངས་སོ། །ཁྱད་པར་ཡོངས་སུ་རྟོག་པའི་ཕྱིར་ཞེས་བྱ་བ་ནི། རྨི་ལམ་ལ་སོགས་པའི་ཁྱད་པར་ཡོངས་སུ་རྟོག་བའི་ཕྱིར་
རོ། །ལྷག་མ་ནི་སྔ་མ་བཞིན་བཤད་པ་བྱའོ། །འཕོ་བ་གྲུབ་པ་ལ་འཐད་པ་གཞན་པ་བརྗོད་ན། ཡང་ན་ཞེས་བྱ་བའོ། །གོམས་ལས་ཁྱད་པར་གང་འགྱུར་ཏེ། །སྐྱེ་བ་དང་པོར་དེ་བཞིན་གནས། །ཞེས་བྱ་བ་འདི་བཤད་པས་རྟོགས་ཟིན་མོད་ཀྱི་དེ་ཉིད་འགྲེལ་པའི་ཚུལ་དུ་གྱུར་པ་ཡིན་ནོ། །ཁྱད་པར་ཡང་བརྗོད་པ་ནི། འོན་ཏེ་འཕོ་བ་ལ་ཞེས་བྱ་བའོ། །ཅི་ལྟར་སྐྱོན་མེད་ཅེ་ན། རྗེས་དཔག་གཡུལ་ནི་ཞེས་བྱ་བའོ། །མངོན་སུམ་གྱིས་ཡུལ་གང་ཡིན་པ་དེ་ནི་རྗེས་སུ་དཔག་པའི་ཡུལ་མ་ཡིན་ཏེ། ཕན་ཚུན་ཡུལ་སྤངས་ནས་གནས་པའི་ཕྱིར་རོ། །འདི་ཉིད་བརྗོད་པ་ནི། མངོན་སུམ་དང་ཞེས་བྱ་བའོ། །ཕན་ཚུན་སྤངས་པས་གནས་པ་དེ་ཉིད་དོ། །ལུས་སམ་གཞན་གོ་ས་ལ་སོགས་པའི་ལ་ཡང་རུང་སྟེ། ཀུན་དུ་འཛིན་པ་ནི། གོམས་པ་ཉིད་དམིགས་སོ། །དེས་ན་སྔོན་གོམས་པ་བསྒྲུབ་པར་བྱ་བ་ལ་ལྟོས་ནས་ཕྱོགས་ལ་ཡོང་པ་ནི་ དགོས་པ ་མེད་པའི་ཕྱིར་སྐྱེ་བ་དང་པོ་ཀུན་དུ་འཛིན་པ་མཐོང་བ་དེ་ཉིད་ལས། སྐྱེ་བ་དང་པོར་འཕོ་བ་ཅི་སྟེ་རྗེས་སུ་མི་དཔོག །བརྗོད་ཟིན་པའི་རྩོད་བ་ཉིད་གསལ་བར་བྱེད་པ་ནི། ཅི་སྐད་དུ་ཞེས་བྱ་བའོ། །སྐྱོན་དེ་ཡང་མེད་དེ་བྱ་བ་ཉིད་གསལ་བར་བྱེད་པ་ནི་དེ་ལ་ལན་འདི་ཡིན་ཏེ་ཞེས་བྱ་བའོ། །ཚིག་ལེ་འུར་བྱས་པ་འགྲེལ་བ་ནི། གལ་ཏེ་ཞེས་བྱ་བའོ། །འབྲས་བུའི་ཞེས་བྱ་བ་ནི་ཀུན་དུ་འཛིན་པ་ལ་སོགས་པའོ། །དེས་ན་ཀུན་དུ་འཛིན་པ་འདིའི་སྔོན་གོམས་པར་བྱས་པ་གང་ཡིན་པ་དེ་ཉིད་འདིའི་སྔོན་གྱི་སེམས་ལས་བྱུང་བ་ཡིན་ནོ། །འཕོ་བའི་དོན་འདི་ཁོ་ན་ཡིན་ཏེ་དབུས་ཀྱི་གནས་སྐབས་བཞིན་ནོ། །དེས་ན་འཕོ་བའི་སེམས་མངོན་སུམ་དུ་བྱས་པ་ཉིད་ནི་མཁོ་བ་མེད་དོ། །ཀུན་དུ་འཛིན་པའི་གོམས་པ་སྔོན་དུ་སོང་བ་ཅན་ནི་བདག་ཉིད་ལས་མཐོང་བ་ཉིད་དོ། །དེ་ལྟར་འཕོ་བ་སྤྱིར་རྗེས་སུ་དཔོག་བ་བསྒྲུབས་ནས། ཁྱད་པར་དུ་བསྒྲུབ་པའི་ཕྱིར་འགྲོ་བ་གཞན་འཕོ་བའི་དཔེ་བཤད་པ་ནི། དཔེར་ན་ཞེས་བྱ་བ་ལ་སོགས་པའོ། །ཅི་ལྟར་མེད་པའི་ཁྱད་པར་ལས་འདི་ནི་འདྲ་བ་ཞིག་ནས་འོངས་སོ་ཞེས་རྟོགས་པ་དེ་བཞིན་དུ་བདེ་བ་དང༌། གཙང་བའི་རྒྱུའི་ཉེ་བར་མཁོ་བ་ལ་དགའ་བས་ན། སྤྱོད་པའི་ཁྱད་པར་
ལས་འདི་ནི་འདི་འདྲ་བ་ཞིག་གི་འཇིག་རྟེན་ནས་སྐྱེས་སོ་ཞེས་ངེས་པ་ཡིན་ནོ། །གལ་ཏེ་ལྷ་ལ་སོགས་པའི་འགྲོ་བ་ནས་གཞན་དུ་འོངས་པ་མ་མཐོང་ཡང་ཁྱད་པར་འདི་ཅི་ལྟར་འགྱུར་སྙམ་ན། གྲོང་གཞན་ནས་འོངས་པ་ལ་ཞེས་གསུངས་སོ། །འདིས་དཔེ་དྲན་པར་བྱེད་པའོ། །འབྲས་བུའི་ཁྱད་པར་ནི་རྒྱུའི་ཁྱད་པར་མེད་པར་མི་འགྱུར་བའི་ཕྱིར་ན། ཤུགས་ཉིད་ལ་ཁྱད་པར་འགྲུབ་བོ། །དེ་ཉིད་སྟོན་བ་ནི། དུ་བ་ལས་ཞེས་བྱ་བའོ། །ཙམ་དན་ལས་བྱུང་བ་ལ་སོགས་པའི་ཁྱད་བར་དང་ལྡན་པའོ། །དེ་ལྟར་ཡང་ཙནྡན་གྱི་བསུང་དང་ལྡན་པའི་དུ་བ་ལས་ཙནྡན་གྱི་མི་རྗེས་སུ་དཔོག་པ་ཁོ་ནའོ། །དོགས་པ་བསུ་བ་ནི་མེ་ཙམ་ལས་འཇུག་གོ་ཞེས་བྱ་བ་སྟེ་མངོན་སུམ་མོ། །ལན་འདིར་ཡང་ཞེས་བྱ་བའོ། །ཡུལ་ལ་སོགས་པ་ལས་འཕོ་བའི་སྤྱི་ལ་མངོན་སུམ་འཇུག་ལ། གཞན་གྱི་ངེས་པའི་མངོན་པར་འདོད་པ་ལ་སོགས་པའི་ཁྱད་པར་ལ་དེ་ལྟར་རྗེས་སུ་དཔོག་པ་ཡིན་ནོ། །དེ་བཞིན་དུ་འཇིག་རྟེན་གཞན་ནས་འཕོ་བ་སྤྱིར་གྲུབ་པའི་ཕྱིར། མངོན་པར་འདོད་པ་ལ་སོགས་པའི་ཁྱད་པར་ཅན་གྱི་འཇིག་རྟེན་གཞན་གྲུབ་པ་ཞེས་བཤད་ཟིན་པ་ཁོ་ནའོ། །མེ་ལ་བརྟེན་པའི་སྐབས་གསལ་གྱིས་གསལ་བར་བྱེད་པ་ཡིན་ནོ། །འོན་ཏེ་ཡང་ཞེས་བྱ་བ་ནི་གཞན་གྱིའོ། །འདི་ཉིད་སྡུད་པ་ནི་འདི་ལྟར་ཞེས་བྱ་བ་ལ་སོགས་པའོ། །ལུས་གཞན་གྱིས་འཕོ་བ་གང་གིས་ཡིན་པ་དེ་དོར་ཏེ་ལུས་དེ་ཉིད་ཀྱིས་འཕོ་བ་ཞེས་བྱ་བའི་དོན་ཏོ། །བདེ་བར་བསྒྲུབ་པ་འགྱུར་བ་ཡིན་ཞེས་བྱ་བ་ནི་བསྟིང་ཆད་དོ། །གཞན་ཡང་བརྗོད་པས་སོ། །ཅི་ལྟར་རྨི་ལམ་ཞེས་བྱ་བའི་གང་གི་ཚེ་རྨི་ལམ་གྱི་དམིགས་པ་མེད་པ་ན་ཞེས་བྱ་བའི་དོན་ཏོ། །ཤི་བའི་ཕྱིར་སྐྱེ་བའི་སྔོན་རོལ་ཏུ་གལ་ཏེ་ཆད་ན། དེའི་ཚེ་འཇིག་རྟེན་ཕ་རོལ་སྨྲ་བ་རྣམས་ཀྱིས་ཅི་ཞིག་བྱས་ཞེས་སྦྱར་རོ། །ཇི་ལྟར་ཞེས་བྱེད་པ་ལ་སོགས་པས་ནི་ཚིགས་སུ་བཅད་པ་དང་པོས་བཤད་དོ། །ཕྱིན་ཅི་ལོག་ཏུ་བསྒྲུབ་པར་འགྱུར་རོ་ཞེས་བྱ་བ་ནི། ལུས་དེ་མ་བཏང་བ་ན་སྐྱེ་བ་ཉིད་དུ་འགྲུབ་བ་ཞེས་བྱ་བའི་ཐ་ཚིག་གོ །གཞན་ཡང་ཞེས་བྱ་བ་ནི་ཚིགས་སུ་བཅད་པ་གཉིས་པ་འཆད་པའོ། །འདིར་འདི་སྐད་བརྗོད་དེ་ཞེས་བྱ་བ་ནི་ལན་ནོ། །
གཞན་མཐོང་བ་ཉིད་ཅེས་བྱ་བ་ནི། ད་ལྟར་བའི་ལུས་ཀྱི་སྐད་ཅིག་མཐོང་བ་གང་ཡིན་པ་ཉིད་སྔོན་གྱི་ལུས་པོ་ཡོངས་སུ་དོར་བ་མེད་པ་ཡིན་ཏེ་མི་དམིགས་པ་ལས་མེད་པ་གཞན་མ་ཡིན་པའི་ཕྱིར་རོ། །དེ་ལྟར་ལུས་དེ་ཉིད་ཀྱིས་འགའ་ཡང་འཕོ་བ་མེད་པའི་ཕྱིར་རྩོད་པ་དང་པོ་བསལ་ཏོ། །མི་བདེན་པ་དང༌། འགྲེལ་བའི་རྩོད་པ་ལ་བརྗོད་པ་ནི། རྨི་ལམ་རིག་བ་ཐམས་ཅད་ནི་ཞེས་བྱ་བའི་རྨི་ལམ་གྱི་མི་བདེན་པ་ཇི་འདྲ་བ་ཡུལ་གྱི་རྗེས་སུ་འཇུག་པ་མེད་པ་ཙམ་གྱི་ཉེ་བར་བསྒྲུབས་པ་དེ་ཁས་བླངས་ཀྱང་རྨི་ལམ་གྱི་ཤེས་པ་དངོས་སུ་བདེན་པ་ཡིན་པའི་ཕྱིར་ན་བསྐྱེད་པར་བྱ་བ་དང་བདེན་པའི་སྐྱེད་བྱེད་དུ་མི་འགལ་བ་ཡིན་ནོ། །དེ་ལྟར་འཇིག་རྟེན་ཕ་རོལ་ལ་ཡང་དེ་གཉིས་ཀ་མི་འགལ་ལོ། །དེས་ན་ཡོད་པར་སྨྲ་བ་རྣམས་ཀྱི་འདོད་པ་ཐོག་ཏུ་བབ་པོ་སྙམ་དུ་དོགས་པ་ཡིན་ནོ། །ཇི་ལྟར་རྨི་ལམ་དམིགས་པ་མེད་པར་ཞེས་བྱ་བ་དེ་ལ་བཤད་པ། རྣམ་པར་འཆད་པ་ཐམས་ཅད་ནི་ཞེས་བྱ་བའི་བདེན་པའི་སད་པ་དང་འབྲེལ་པ་ཡིན་ཞེས་བྱ་བ་ནི་བདེན་པས་ཉེ་བར་སད་པའི་འབྲེལ་པ་སྟེ། སད་པ་ཙམ་ནི་བདེན་པ་མ་ཡིན་ནོ་སྙམ་པའི་དོགས་པར་མི་འགྱུར་བར་བྱ་བའི་ཕྱིར་རོ། །འདི་ནི་གཞན་གྱི་འདོད་པས་བརྗོད་པར་ཟད་དེ་རྣམ་པར་ཆད་པ་ནི་མ་གྲུབ་པོ་ཞེས་གསལ་བར་བྱའོ། །གལ་ཏེ་གྲོང་གཞན་ནས་འོངས་པ་ལ་སྔོན་གྱི་ལུས་དོར་བ་གལ་ཏེ་རིགས་པས་བསྒྲུབས་པ་དེ་ལྟར་ན་ཡང་སྐྱེ་བ་འདི་ལ་དེ་ལྟར་རྟོགས་པར་ནུས་པ་ནི་མ་ཡིན་ཏེ། ཡུལ་གཞན་ནས་འོངས་པ་ལྟར་སྔ་མ་དང་ཕྱི་མར་མངོན་པར་འདོད་པའི་ལུས་ནི་དམིགས་པ་མ་ཡིན་ནོ། །དེས་ན་ད་ལྟར་གྱི་སེམས་དང་བཅས་པའི་ལུས་ནི་སྔ་ན་མེད་པ་ཉིད་སྐྱེས་པ་ཡིན་ནོ་སྙམ་ན་འདི་ནི་བཤད་ཟིན་ཏོ་ཞེས་གསུངས་སོ། །དོན་གྱིས་འཕངས་པས་ན་ལུས་བྱུང་བ་ནི་ལུས་སྔ་མ་བཏང་བ་ཁོ་ནས་ཡིན་ནོ་ཞེས་བྱ་བའི་དོན་ཏོ། །དེ་ཡོངས་སུ་བརྟགས་པ་ལ་གསལ་བ་ཁོ་ནའོ། །དེས་ན་སྔོན་གྱི་ལུས་དོ་རབ་ནི་མཐོང་བ་ཉིད་དོ་ཞེས་གསུངས་སོ། །སྔོན་གྱི་ལུས་གྲུབ་པའི་དོན་དུ་འཐད་པ་གཞན་ཡང་དྲན་བར་བྱ་བའི་ཕྱིར་གཞན་གྱི་དོགས་བ་བསུ་བ་ནི། །སྔོན་གྱི་ལུས་མ་གྲུབ་པར་ཞེས་གསུངས་སོ། །མ་ཡིན་ཏེ་ཞེས་བྱ་བ་ནི་ལན་ཏོ། །ལུས་ཀྱི་ཡུལ་ཅན་ཉིད་
ཀྱིས་ན་ཁྱད་པར་ཅན་ནོ། །སྔོན་གྱི་ལུས་དེས་མོད་དོར་བ་གོ་ཅི་ལྟར་ཞེ་ན། ལུས་དེ་ཞེས་གསུངས་སོ། །འོ་ན་མ་དམིགས་པའི་ཕྱིར་སྔོན་མེད་པ་ཁོ་ནའོ་སྙམ་ན་ཁ་སད་པ་ཞེས་གསུངས་སོ། །རང་གི་དུས་དེའི་ཚེ་ཡང་ངོ༌། །ཕྱེད་ཕྱི་མ་བཤད་ནས། མཇུག་བསྡུ་བའི་སྒོ་ནས་ཕྱེད་སྔ་མ་འཆད་པ་ནི་དེས་ན་ཞེས་བྱ་བའོ། །མངོན་སུམ་དེ་ཉིད་རྨོངས་པ་ལ་མི་དམིགས་པར་བརྗོད་པ་ཡིན་ནོ། །ཇི་སྐད་དུ་ཞེས་བྱ་བ་ལ་སོགས་པས་བརྗོད་ཟིན་པའི་རྒོལ་བ་དང་ལན་བརྗོད་པ་ནི། ཁྱད་པར་བརྗོད་པའི་དོན་དུ་ཡིན་ནོ། །བདེན་པའི་རྗེས་སུ་འགྲོ་བ་ཅན་ཞེས་བྱ་བ་ནི་བདེན་པའི་ཉེས་པའི་རྒྱུ་ཅན་ནོ། །དེ་ལྟར་གྱུར་པ་ཞེས་བྱ་བ་ནི་རྨི་ལམ་དང་འདྲ་བ་བདེན་པར་འདོད་པ་སྔ་མ་དང་ཕྱི་མའི་དབུས་སུ་བྱུང་བ་དེ་ནིའོ། །སྡོད་ན་ནི་གནས་སྐབས་ཀྱི་ཁྱད་པར་རོ། །འཆད་པར་འགྱུར་རོ་ཞེས་བྱ་བ་ནི། སྲིད་བ་བར་མདོའི་ལུས་ཤིན་ཏུ་དང་བའི་མི་དམིགས་པ་མ་ཡིན་ཞེས་བྱ་བ་དེར་རོ། །འདི་ཡང་རྨི་ལམ་གྱི་ཤེས་པ་མི་བདེན་པར་ཁས་བླངས་ནས་བརྗོད་པ་ཡིན་ནོ། །ཁས་མ་བླངས་ཀྱང་ཉེས་པ་མེད་དོ་ཞེས་བརྗོད་པ་ནི་ཡང་ན་ཞེས་བྱ་བའོ། །འདི་ཉིད་དུ་ཅི་སྟེ་མི་འཆད་སྙམ་ན་འདིའི་སྐབས་ནི་དེ་ཡིན་ཞེས་གསུངས་ཏེ། རྨི་ལམ་དང་རྨི་ལམ་མ་ཡིན་པ་ཁྱད་པར་མེད་པས་སྒྲུབ་ཀྱི་སྐབས་ནི་རྣམ་པར་ཤེས་པར་སྨྲ་བ་དེ་ཉིད་ཡིན་ནོ། །འཆད་པ་ནི་རྨི་ལམ་གྱི་ཞེས་བྱ་བའི་སྐབས་ཀྱིས་འགའ་ཞིག་ཉིད་བསྟན་པ་གང་ཡིན་པ་དེ་ནི། དེ་ཁོ་ན་ཉིད་ནི་ཟབ་པ་ཡིན་པས་ནི་རིམ་གྱིས་བཟོད་པར་བྱ་བའི་དོན་ཏོ། །ཁྱད་པར་མེད་པ་དེ་ཁོ་ནའོ། །དེའི་ཕྱིར་ཞེས་བྱ་བ་ནི་འཕོ་བ་མེད་པའི་ཕྱིར་རོ། །ལུས་ཤེས་པའི་རང་བཞིན་ཡིན་ཡང་སྔ་མ་དང་ཕྱི་མའི་ལུས་གཉིས་ལ་ནི་ཐོགས་པ་དང་བཅས་པར་བརྗོད་དེ། བག་ཆགས་ཀྱིས་བྱས་པ་ན་དེའི་གནས་སུ་ཤེས་པ་གཞན་མི་སྐྱེ་བར་ངེས་པའི་ཕྱིར་རོ། །བར་མདོའི་སྲིད་པ་ལ་ནི་ཐོགས་པ་མེད་པས་བརྗོད་དེ། དེའི་གཞན་ཤེས་པ་གཞན་སྐྱེ་བ་སྲིད་པའི་ཕྱིར་རོ། །སོགས་པའི་སྒྲས་ནི་རིང་དུ་རྗེས་སུ་འཇུག་བ་དང༌། དེ་ལྟར་མ་ཡིན་པ་ལ་སོགས་པ་ཡང་བསྡུའོ། །རྒྱུན་ཉམས་པ་ནི་མ་མཐོང་བ་ཉིད་དོ་ཞེས་བྱ་བ་ནི་དེ་ལྟར་ཡང་རྣམ་པ་ཐམས་ཅད་དུ་ཤེས་པ་རྒྱུན་ཆད་པ་ནི་
མ་མཐོང་བ་ཁོ་ནའོ། །རྣམ་པར་ཤེས་པ་ཆད་པ་ནི་སད་པ་དང་འབྲེལ་བ་ཁོ་ནར་མཐོང་ངོ་ཞེས་བྱ་བའི་དོན་ཏོ། །འདིས་ནི་ཚིག་ལེའུར་བྱས་པ་གསུམ་པ་རྣམ་པར་བཀྲལ་ལོ། །སྔགས་ཀྱིས་བྱིན་གྱིས་བརླབས་པའི་སྡོང་དུ་ནི་སྒྲོན་མའི་རྒྱུ་མ་ཡིན་ལ། མར་ནག་གིས་བྱུགས་པའི་ས་བོན་ཡང་མྱུ་གུའི་རྒྱུ་མ་ཡིན་པ་བཞིན་ཏེ། དེ་བཞིན་དུ་གཞན་ཡང་རྟོགས་པར་བྱའོ། །ཉེས་པས་ཞེས་བྱ་བ་ནི་རླུང་མཁྲིས་པ་ལ་སོགས་པས་སོ། །མཉམ་གྱུར་ཚེ་ཞེས་བྱ་བ་ནི་འཆིང་བའི་ཚོགས་པས་མཉམ་པོར་བྱས་པ་ནི་སྟོང་ཆ་སྙོམས་པར་གྱུར་པ་ན་ཞེས་བྱ་བའི་དོན་ཏོ། །ཉེས་པ་རྣམས་མཉམ་པ་ནད་མེད་པ་ཡིན་ནོ་ཞེས་གང་ལས་རྟོགས་ཤེ་ན། དེ་དག་མཉམ་པ་ནད་མེད་པ། །ཞེས་གསུངས་སོ། །བཟློག་པ་ནི་མེད་པ་མ་ཡིན་པ་བརྗོད་པའི་ཕྱིར་རོ་ཞེས་བྱ་བ་ནི་སྨན་དབྱངས་ཀྱི་བསྟན་བཅོས་ལས་སོ། །འོན་ཏེ་ཞེས་བྱ་བ་ནི་གཞན་གྱི་ལན་དུ་རིམས་ལ་སོགས་པ་ཞེས་བྱ་བའོ། །ཐམས་ཅད་ཀྱི་ཚེ་ནི་འཆི་བ་ཡང་མ་ཡིན་ཏེ། དེས་ནི་རིམས་ལ་སོགས་པ་རྣམ་པར་འགྱུར་བ་མེད་པ་ཁོ་ན་འཆི་བའི་རྒྱུ་ཡིན་ཞིང༌། རིམས་ལ་སོགས་པས་རྣམ་པར་འགྱུར་བའི་མཚན་ཉིད་ཀྱིས་མི་མཐུན་པ་མེད་ཀྱང་ལོག་པས་ན་སེམས་སྐྱེས་པས་ནལ་ལ་གེགས་ཡོད་པ་མ་ཡིན་ནོ་སྙམ་དུ་དགོངས་པའོ། །དེ་ལྟ་མ་ཡིན་ན་ཞེས་བྱ་བ་ནི་ལུས་མི་མཐུན་པ་མེད་ཀྱང་སེམས་མི་འབྱུང་ནའོ། །སེམས་རྒྱུ་ཡིན་པ་ལ་ཉེས་པ་འདིར་མི་འགྱུར་སྙམ་ན། སེམས་ཀྱི་རྒྱུ་ནི་ཞེས་གསུངས་སོ། །ལུས་རྒྱུ་ཡིན་ན་ནི་ཉེས་པ་དེ་ཉིད་དོ་ཞེས་བརྗོད་པ་ནི་ལུས་རྒྱུ་ཡིན་པར་འགྱུར་ན་ནི་ཞེས་བྱ་བའོ། །མི་མཐུན་པ་དེ་ནི་ཚབས་ཆེ་སྟེ། དེས་ན་སེམས་ཕྱིར་སྐྱེ་བ་མ་ཡིན་ནོ་སྙམ་དུ་དོགས་ན། དེ་འདྲའི་ལུས་ཉིད་ནི་ཞེས་གསུངས་སོ། །མ་མཐོང་བའི་ཁྱད་པར་རྟོགས་པ་ནི་གལ་ཏེ་ཡོངས་སུ་གྲུབ་པའི་ཁྱད་པར་དེ་ལྟར་མི་རུང་ན་རྟོགས་པ་དེ་ཅི་ལྟར་ཞེས་བྱ་བ་དེར་བསལ་ཟིན་ཏོ། །ཚིག་ལེའུར་བྱས་པ་གཉིས་པ་རྣམ་པར་འགྲེལ་པ་ནི་ལུས་རྒྱུ་ཡིན་ན་ནི་ཞེས་བྱ་བའོ། །དོན་གྱིས་འབངས་པ་བརྗོད་པ་ནི། མི་མཐུན་པ་དེ་འདྲ་བ་ཉིད་ཅེས་བྱ་བའོ། །ཚིག་ལེ་འུར་བྱས་པ་དང་པོར་འཆད་པ་ནི། སེམས་རྒྱུ་ཡིན་ན་ནི་ཞེས་བྱ་བའོ། །མི་མཐུན་པ་
མེད་གསོན་པའི་རྒྱུ་མ་ཡིན་ནོ་ཞེས་བརྗོད་པ་ནི། འགའ་ཞིག་ཉེས་པ་ཡིན་ཞེས་བྱ་བའོ། །འབྲས་བུ་འཆི་བ་དང་གསོན་པ་རང་གི་རྒྱུ་ལ་ངེས་པའི་རྣམ་པར་གནས་པ་འདིར་མི་འགྱུར་རོ། །རྣམ་པར་མི་གནས་ཀྱང་འབྲས་བུར་འགྱུར་རོ་སྙམ་ན་འབྲས་བུ་ནི་ཞེས་གསུངས་སོ། །དེས་ན་ཞེས་བྱ་བ་ནི། རྣམ་པར་ཕྱེ་བ་མེད་པས་སོ། །འདི་ཉིད་གསལ་བར་བྱེད་པ་ནི། །ལུས་ཀྱི་འབྲས་བུ་ཡིན་ན་ཞེས་བྱ་བའོ། །རྣམ་པར་འགྱུར་བ་དེ་བཟློག་པའི་ཕྱིར་རོ། །འཆི་བ་ནི་ཞེས་བྱ་བ་ནི་རྣམ་པར་འགྱུར་བ་ཞེས་རྟོགས་པར་བྱའོ། །བཟློག་ཏུ་ཡོད་པ་དང་མེད་པའི་རྣམ་པར་འགྱུར་བ་གང་ལ་ཡོད་པ་དེ་དག་ལ་དེ་སྐད་ཅེས་བྱ་བའོ། །གསོད་པའི་སྦྱོར་བ་མེད་པའི་མཚན་ཉིད་འདི་ནི་ལན་ཡང་ཡིན་ནོ། །འགྱུར་བ་པ་དང་པོ་ནི་ཆུང་ཡང་ཞེས་འབྲེལ་ཏོ། །ལྡོག་པ་མིན་པ་ནི་ཕྱིར་མི་འབྱུང་བའོ། །སླར་ལྡོག་རུང་བ་ནི་མི་མཐུན་པ་ཐོབ་ནས་ཕྱིར་ལོག་པའོ། །བྱས་གང་ཞེས་བྱ་བ་ནི་གང་གིས་སམ་གང་ལས་བྱས་པ་དེ། དེ་ལ་ཞེས་བྱ་བར་བལྟའོ། །དེར་ངེས་བྱ་བའི་ཕྱིར་རྣམ་པར་འགྱུར་བ་ཡོད་ན་ཞེས་བྱ་བའི་དོན་ཏོ། །སྔ་མའི་རང་བཞིན་དེ་ནི་སླར་ཡང་འབྱུང་བར་འགྱུར་ཏེ་གསེར་གྱི་སྲ་བ་ཉིད་བཞིན་ནོ། །གལ་ཏེ་དེ་ལྟ་ན་ཡང་སླར་འཚོ་བར་ཅི་ལྟར་ཐལ་ཏེ། དེ་སྲིད་པར་ནི་འགྱུར་རོ་སྙམ་ན། གཞན་གྱི་ལུགས་ཀྱིས་སླར་འཚོ་བར་བསྒྲུབ་པའི་ཕྱིར་དེ་ལ་འགྲུབ་པར་རྣམ་པར་འགྱུར་བར་དེ་བཟློག་པ་ཉིད་སྟོན་པ་ནི་འདི་ལྟར་གཉིས་ཀྱིས་ཞེས་བྱ་བའོ། །ཚུ་རོལ་མཛེས་པ་སེམས་ཀྱི་རྒྱུ་ལུས་ཡིན་པར་བསྒྲུབ་པའི་དོན་དུ་སེམས་བ་སྐྱེས་པའི་ལུས་མངོན་སུམ་གྱིས་གྲུབ་པ་ཉིད་ཉེ་བར་བརྟགས་པ་མ་ཡིན་པར་སེམས་པ་གྲུབ་པ་ཡིན་ཞིང༌། སེམས་པ་མ་གྲུབ་པའི་ལུས་གྲུབ་པ་ཡང་སེམས་པ་མེད་པ་གྲུབ་པ་ཡིན་ནོ་ཞེས་སྨྲའོ། །དེས་ན་གལ་ཏེ་གཉིད་མ་ཐུག་པོའི་གནས་སྐབས་ན་དེ་ཆད་པ་རང་གིས་མ་རྟོགས་སུ་ཆུད་པ་དེ་ལྟར་ན་ཡང་སེམས་པ་མ་སྐྱེས་པའི་ལུས་ཀྱིས་ནི་གཞན་དག་མངོན་སུམ་གྱིས་ངེས་པར་བྱེད་པའམ། སད་པ་ལས་རང་ཉིད་ངེས་པ་ཡིན་ནོ། །དེས་ན་སེམས་པ་དང་དྲལ་བའི་རྣམ་པར་འགྱུར་བ་ནི། གཉིད་ལ་སོགས་པ་མེད་པར་སྡིག་པ་ཡིན་ནོ་ཞེས་བྱ་བ་འདི་ནི་གཞན་གྱི་ལུགས་ལ་ལྟོས་ནས་བརྗོད་པ་ཡིན་ནོ། །དེའི་གནས་སྐབས་ན་ནི་
བདག་ཉིད་ལ་སེམས་པ་མེད་པར་གྲུབ་པ་ནི་ཚད་མ་ནི་འགའ་ཡང་མེད་དོ། །ཡོད་ན་སེམས་པ་ཚད་མར་མི་འགྱུར་ཏེ། ཚད་མ་ནི་སེམས་པའི་ཁྱད་པར་ཉིད་ཡིན་པའི་ཕྱིར་རོ། །སེམས་ཆད་པ་བདག་ཉིད་ནི་སྒྲུབ་པར་བྱེད་པ་མ་ཡིན་ཏེ། དངོས་པོ་མེད་པ་ནི་འགའི་ཡང་རྟོགས་པར་བྱེད་པ་མ་ཡིན་ནོ་ཞེས་བྱ་བའི་ཚུལ་གྱིས་སོ། །སད་པའི་གནས་སུ་ཡང་བདག་ལ་སྔར་ཤེས་པ་མ་བྱུང་ངོ་ཞེས་རྟོགས་པ་ཡིན་ཏེ། རྟོགས་པ་མེད་པ་ཡིན་ནམ་ཅི། འོ་ན་ཏེ་ཡིད་ཀྱང་རྗེད་པར་གྱུར་ཅེས་རང་ཉིད་ཀྱིས་གསུངས་པའི་ཕྱིར་རོ། །ཚད་མ་ལས་ཕྱི་རོལ་ཏུ་གྱུར་པའི་ཐ་སྙད་ལས་དེ་གྲུབ་ན་ནི་འཇིག་རྟེན་ཕ་རོལ་ཡང་འགྲུབ་པ་ཉིད་དུ་འགྱུར་རོ། །རང་བཞིན་གྱིས་ཀྱང་དེའི་ཚད་མ་རྟོགས་པ་མ་ཡིན་ཏེ། གཞན་གྱིས་རྒྱུད་ནི་སྣང་དུ་མི་རུང་བའི་ཕྱིར་རོ། །ཤེས་པའི་འབྲས་བུ་དབྱུང་བ་ལ་སོགས་པ་མེད་པ་ལས་ཀྱང་དེ་འགྲུབ་པ་མ་ཡིན་ཏེ། རྒྱུ་རྣམས་ནི་གནོད་མི་ཟ་བར་འབྲས་བུ་ལྡན་བསམ་ཡིན་པའི་ཕྱིར་རོ། །དེ་བཞིན་དུ་འཆི་བའི་གནས་སྐབས་སུ་ཡང་རང་ངམ་གཞན་གྱི་སེམས་རྣམ་པར་ཆད་པས་མི་རྟོགས་སོ། །འོ་ན་ཅི་ལྟར་གཉིད་ལོག་པ་ལྟར་ཤི་བ་བཅོམ་པ་ལས་སྲོག་གཅོད་པ་ལ་སོགས་པར་མི་བཞག་ཅེ་ན་མ་ཡིན་ཏེ། འཇིག་རྟེན་གྱི་ཐ་སྙད་ནི་ལུང་ཇི་ལྟ་བ་བཞིན་ཡིན་པའི་ཕྱིར་དང་ལུང་ཡང་དེ་ཁོ་ན་ལྟར་ཡིན་ཏེ། ནད་ལ་སོགས་པས་བཅོམ་པས་གཡོ་བ་ལ་སོགས་པ་དང་བྲལ་བ་ལ་ཤིའོ་ཞེས་བརྗོད་པ་ཡིན་ནོ། །དེས་ན་འདི་ནི་འཇིག་རྟེན་རྒྱང་འཕན་པའི་ལུགས་ལ་ལྟོས་ནས་བརྗོད་པར་རྟོགས་པར་བྱའོ། །དེས་ན་གཉིད་ལ་སོགས་པ་བྱས་པ་སེམས་པ་དང་བྲལ་བའི་མཚན་ཉིད་ཀྱི་རྣམ་པར་འགྱུར་བ་ལྡོག་པ་ལྟར་འཆི་བའི་མཚན་ཉིད་ཀྱི་རྣམ་པར་འགྱུར་བ་ཡང་ལྡོག་པར་འགྱུར་བའི་ཕྱིར་སླར་འཚོ་བར་ཐལ་ལོ། །འོན་ཏེ་ཉེས་པ་འདིས་བྲེད་པས་ཅི་ཞིག་ལྟར་རྣམ་པར་མཆད་པར་ཁས་ལེན་ན། དེའི་ཚེ་ཡང་བརྗོད་པའི་ཐལ་བ་མི་ལྡོག་གོ་ཞེས་སྟོན་པ་ནི། འོན་ཏེ་དེ་ལ་ཞེས་བྱ་བ་སྟེ་གཉིད་ཀྱི་གནས་དེར་རོ། །ལྡོག་པ་མེད་པ་ཉིད་དོ་ཞེས་བྱ་བ་ནི་ཤེས་པ་ཞེས་བྱ་བར་བལྟ་སྟེ། ནུས་པའི་རང་བཞིན་དུ་རྣམ་པར་གནས་པའི་ཕྱིར་རོ་སྙམ་དུ་བསམས་པའོ། །དེ་ཉིད་ཀྱི་ཕྱིར་འགྲེལ་པར་རིག་པ་མེད་ཀྱང་ནུས་པའི་རང་བཞིན་
དུ་ཡིན་ན་ཞེས་འཆད་པར་འགྱུར་རོ། །དེས་ན་གཉིད་ལོག་པ་ལ་ནི་སད་པའི་གནས་སྐབས་ཡོད་པར་འགྱུར་གྱི་ཤི་བ་ལ་ནི་མ་ཡིན་ནོ་ཞེས་བྱ་བ་ནི་ལྷག་པའི་དོན་ཏོ། །དེ་ལྟར་གཞན་གྱིས་བརྗོད་པ་དེ་ཉིད་ཀྱི་ལུགས་ལ་བརྟེན་ནས་སེལ་བ་ནི། དེ་ལ་སྨྲས་པ་ཞེས་བྱ་བའོ། །ཅི་ལྟར་ཞེ་ན། རིག་པ་མེད་པའི་རང་བཞིན་ཅི། །ཞེས་གསུངས་སོ། །རིག་པའི་རང་བཞིན་མ་ཡིན་པ་དེ་ནི་རིག་པར་འདོད་པ་མ་ཡིན་ནོ། །དེས་ན་ནུས་པའི་རང་བཞིན་ཡང་རིག་པ་ལས་གཞན་ཡིན་པའི་ཕྱིར་ན་རིག་པའི་རང་བཞིན་ཡོད་པ་མ་ཡིན་པ་ལ་ཁྱོད་རིག་པར་འདོད་པར་མི་བྱའོ། །དེས་ན་སེམས་པའི་ནུས་པ་ནི་ལུས་ཉིད་ཡིན་ཏེ་གཞན་མེད་པའི་ཕྱིར་རོ། །དེས་ན་སེམས་པ་མེད་པ་ཁོ་ནའོ་ཞེས་བྱ་བར་དགོངས་པའོ། །དེ་ལྟ་ཡིན་ན་ཅི་སྐྱོན་ཞེ་ན། དེ་ལྟའང་ཞེས་གསུངས་ཏེ། རིག་པ་མེད་པ་དེ་ལྟར་ན་ཡང་ངོ༌། །གལ་ཏེ་གཉིད་ལོག་པའི་གནས་སྐབས་ན་དེ་ཡོད་ནའོ། །དེའི་ཚེ་ཤི་བ་ལ་ཡང་ཡོད་པར་འགྱུར་བས་སླར་འཚོ་བར་འགྱུར་རོ། །གང་ལས་ཤེ་ན། ཤིང་དང་ཞེས་གསུངས་སོ། །འོན་ཏེ་དབུགས་རྔུབ་པ་ལ་སོགས་པའི་ཁྱད་པར་ཡོད་དོ་སྙམ་ན། དབུགས་རྔུབ་ཅེས་གསུངས་སོ། །དབུགས་རྔུབ་པ་ལ་སོགས་པ་གང་ཡིན་པ་དེ་ཐམས་ཅད་ཀྱང་སྔར་དེ་མདུན་དུའོ། །སེམས་པའི་ནུས་པས་བྱས་པའི་ཁྱད་པར་ནི། རྣམ་ཤེས་ནུས་པ་དང་འབྲེལ་ཕྱིར། །ཞེས་བྱ་བ་དེ་འཆད་པའི་སྐབས་སུ་སེལ་བར་འགྱུར་རོ། །བཤད་པ་ནི་ཅི་རིགས་སུ་བསལ་བ་ཁོ་ནའོ། །དེས་ན་ཏེ་ཁྱད་པར་མེད་པ་ནའོ། །དེ་ནི་རིག་པ་མེད་ནའོ། །དེ་ཞེས་བྱ་བ་ནི་རིག་པའོ། །འོ་ན་དེ་ལུས་ཉིད་ཡིན་པས་ཞེས་བྱ་བས་ན་གཞན་མེད་པའི་ཕྱིར་རོ་སྙམ་དུ་དོགས་པའོ། །སེམས་པ་དེར་མི་ལྡོག་པ་ཉིད་དོ། །འོན་ཏེ་ཞེས་བྱ་བ་ནི་གཞན་གྱིའོ། །ལན་ནི་སྐྱེད་པར་བྱེད་པ་མ་ཡིན་པ་དེ་ཞེས་བྱ་བའི་རིག་པ་དང་ཞེས་བྱ་བ་ནི་དོགས་པའོ། །གཉིད་ལོག་པ་ལ་ཞེས་བྱ་བ་ནི་ལན་ནོ། །འོན་ཏེ་དེ་ལ་ཞེས་བྱ་བ་ནི་གཉིད་ལོག་པ་ལའོ། །དེ་ཡོངས་སུ་གྱུར་པ་ནི་རིག་པ་མེད་པ་ཡོངས་སུ་གྱུར་པའོ། །དེ་ལྟར་ལུས་ལྷན་ཅིག་བྱེད་པ་ཉིད་ཡིན་པ་སེལ་པ་བརྗོད་ནས་ཉེ་བར་ལེན་པའི་རྒྱུ་ཉིད་དགག་པར་ཡང་སྟོན་པ་ནི་དབུགས་རྔུབ་པ་ལ་སོགས་པ་ཐམས་ཅད་སྔར་ཞེས་
བྱ་བ་དེ་རྣམ་པར་འགྲེལ་པ་ནི་དབུགས་རྔུབ་པ་ལ་སོགས་པ་ནི་ཞེས་བྱ་བ་ལ་སོགས་པའོ། །དེའི་ཕྱིར་དེ་གང་ཡིན་ཡང་གཉིད་ལོག་པ་ལྟར་ཤི་བ་ལ་ཡང་རྟོག་པ་ཡོད་པའི་ཕྱིར་སླར་འཚོ་བར་ཐལ་ལོ་ཞེས་བྱ་བའི་གནས་སོ། །དེ་ལྟར་ལུས་རྒྱུ་ཉིད་དུ་ཁས་བླངས་ནས་སུན་འབྱིན་པ་དེ་བརྗོད་ནས་ལུས་དེ་ནི་རྒྱུ་ཉིད་དུ་འཐད་པ་ཡང་མ་ཡིན་ནོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །འདིར་འདས་ནས་ཡུན་རིང་དུ་ལོན་པའི་ཤེས་པའི་འདུ་བྱེད་ཉིད་སྨྲ་བ་ཡིན་ཏེ། ཚད་མས་གྲུབ་པའི་ཕྱིར་རོ། །གཉིད་ལོག་པའི་གནས་སྐབས་སུ་བྱུང་བ་འདས་མ་ཐག་པ་ནི་མ་ཡིན་ཏེ། ཐེ་ཚོམ་ཟ་བའི་ཕྱིར་རོ། །ཐེ་ཚོམ་ཟ་བ་ནི་རྒྱུའམ་རྒྱུ་མ་ཡིན་པར་གཞག་པར་མི་ནུས་ཏེ། དུ་བ་ལ་ཤ་ཟ་བ་བཞིན་ནོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་སེམས་པ་ཆད་པར་གྲུབ་པ་འབར་བ་ནི་འབྲས་བུ་དང་ལྡན་པ་མ་ཡིན་ཏེ། དེ་མེད་ཀྱང་འདས་ནས་ཡུན་རིང་དུ་ལོན་པ་ནི་རྒྱུ་ཉིད་དུ་རྣམ་པར་གཞག་པ་སླ་བའི་ཕྱིར་རོ། །འཇིག་རྟེན་རྒྱང་འཕན་པའི་འདོད་པ་ལ་ལྟོས་ནས་ནི་ཤིན་ཏུ་ཡང་ལུས་ཀྱི་འདུ་བྱེད་ཀྱི་རྗེས་སུ་འཇུག་པ་མ་མཐོང་བའི་ཕྱིར་རོ་ཞེས་བྱ་བར་བསམས་པའོ། །ལུས་མཚུངས་པར་ཡོད་པ་ཡིན་ཡང་ཞེས་བྱ་བ་ནི་གཉིད་ལོག་པ་གཉིས་སོ། །འོན་ཏེ་ཞེས་བྱ་བ་ནི་དེས་སྔོན་གྱི་འདུ་བྱེད་ཀྱི་རྗེས་སུ་འཇུག་ཀྱང་ལུས་རྒྱུ་ཡིན་པ་མི་འགལ་ལོ་ཞེས་བྱ་བའི་ཐ་ཚིག་གོ །གྲུབ་པའི་མཐར་ནི་ལ་སོགས་པ་བཞིན་དུ་མེད་པ་དང་ཅིག་ཤོས་དག་ལྷན་ཅིག་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །གཉིད་མཐུག་པ་ལ་སོགས་པ་སེམས་དང་བྲལ་བའི་སྐྱེས་བུ་ལ་སད་པའི་གནས་སྐབས་ན་ཞེས་བྱ་བ་ནི་སད་པ་ལས་མངོན་དུ་ཕྱོགས་པའི་གནས་སྐབས་ནའོ། །ལུས་བཞིན་དུ་སྔོན་གྱི་སེམས་ཀྱང་ནི་ཡོད་པ་མ་ཡིན་ནོ། །འོ་ན་ཇི་ལྟར་ཞེས་བྱ་བ་ནི་གལ་ཏེ་དུས་གཞན་ན་ཡོད་པར་ལྷན་ཅིག་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །གྲུབ་པའི་མཐའ་ནི་དོན་འདི་ཡིན་ཏེ། རྒྱ་སྐྱེགས་ཀྱི་ཁུ་བས་འདུས་བྱས་པའི་རས་བལ་གྱི་ས་བོན་དང་མེ་ཏོག་དག་ལ་གཅིག་མེད་ན། རས་བལ་གྱི་དམར་པོ་བཞིན་དུ་མེད་པར་བསྐྱེད་བྱ་རྣམ་པ་ཐམས་ཅད་དུ་མི་འགྱུར་བ་དེའི་ཚེ། འདིའི་ལྷན་ཅིག་བྱེད་བའི་ས་བོན་བསྐྱེད་དོ་ཞེས་བྱ་བའི་རྣམ་པར་གཞག་པ་འདིར་འགྱུར་བ་ཞིག་ན། དེ་ལྟར་ན་འདིར་མ་ཡིན་ཏེ། རྟོག་པ་མེད་ཀྱང་སད་པ་ཙམ་ཡོད་
པའི་ཕྱིར་རོ། །ཁྱད་པར་ཅན་ལ་ལྷན་ཅིག་བྱེད་པ་ཡིན་པ་ནི་ལུས་ལ་ཡང་བཟློག་ཏུ་མེད་དོ། །དེ་ཙམ་གྱིས་ནི་སྐབས་དང་འགལ་བ་མ་ངམ་ཡིན་ནོ། །ཡང་མེད་པ་ལྷན་ཅིག་བྱེད་པ་མི་འདོད་པ་བསལ་བའི་ཕྱིར་གལ་ཏེ་སད་མ་ཐག་ཏུ་ཞེས་གསུངས་སོ། །སད་མ་ཐག་ནི་མཐོང་མ་ཐག་གོ །མཐོང་བ་དང་སྔོན་གྱི་རྣམ་པར་ཤེས་པ་ཡོད་པ་དང་ཅིག་ཤོས་དག་གོ །ལན་ནི་དེ་ཡང་རིགས་པ་མ་ཡིན་ཏེ་ཞེས་བྱ་བའི་ཉེ་བར་གནས་པ་ལ་སད་པར་འགྱུར་རོ་ཞེས་བྱ་བའི་དོན་འདི་ལ་ངེས་པ་ཡོད་པ་མ་ཡིན་ནོ། །མཐོང་བའི་ལུས་ཡིན་པས་ན་ཉེ་བ་ཉིད་ཀྱིས་དོན་གང་ཞིག་མཐོང་བ་དེ་ཉིད་ལ་སྔོན་མཐོང་བར་རྟོགས་པའི་མཚན་ཉིད་དུ་འགྱུར་བའི་ཕྱིར་རོ། །དེ་དང་མཐུན་པ་ཉིད་དུ་ཞེས་བྱ་བ་ནི་བདག་གིས་འདི་ལྟར་བྱའོ་ཞེས་སོ། །བག་ཆགས་སད་པ་ནི་བག་ཆགས་སད་པའི་རྣམ་པར་རྟོག་པ་ལས་བྱུང་བའོ། །སད་པ་ན་ཞེས་བྱ་བ་ནི་གཉིད་སད་པ་ནའོ། །རྟོག་པ་ནི་རྣམ་པར་རྟོག་པའི་བདག་ཉིད་དོ། །གལ་ཏེ་མཐོང་བ་ལ་མི་ལྟོས་པར་རྣམ་པར་རྟོག་པར་འགྱུར་ན། ཅི་སྟེ་ཐམས་ཅད་ལ་ཐམས་ཅད་མི་འགྱུར་སྙམ་ན། བདག་གིས་ཞེས་གསུངས་ཏེ། ཅི་ལྟར་ཞེས་བྱ་བ་ནི་གནས་སྐབས་དག་ཏུའོ། །དེར་འགྱུར་གྱིས་ཐམས་ཅད་ནི་མ་ཡིན་ནོ། །དེ་ལྟ་བུར་གྱུར་པ་ཉིད་རྟོགས་ཀྱི་གཞན་ནི་མ་ཡིན་ནོ། །གལ་ཏེ་ཅི་རྣམ་པར་རྟོག་བ་ཁོ་ན་སད་པ་ཡིན་གྱི་ཅི་གཞན་མ་ཡིན་ནམ་སྙམ་པ་ལ། སད་པ་ནི་ཞེས་གསུངས་སོ། །གཉི་ག་ཡང་སད་པ་ཡིན་ཏེ། རྣམ་པ་གཅིག་ཏུ་ངེས་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལ་གཉིད་ཀྱིས་བཟའ་བཏུང་ཞུ་བར་གང་གི་ཚེ་དབང་པོ་སྐྱོན་མེད་དང་བཅས་པའི་ལུས་ཀྱིས་སྐད་ཅིག་བྱེད་བ་ཅན་འདས་ནས་རིང་དུ་ལོན་པའི་ཤེས་པ་སྔ་མས་ཕྱིའམ་ནང་གི་དོན་ཅི་ལྟར་ཉེ་བར་གནས་པ་ལ་བདེ་བ་དང༌། སྡུག་བསྔལ་ཉམས་སུ་མྱོང་བ་དང་པོར་སྐྱེད་པར་བྱེད་པ་དེའི་ཚེ་ནི་རྣམ་པར་རྟོག་པ་མེད་པའི་སད་པ་ཡིན་ནོ། །གང་གིས་གཉིད་ལོག་པ་བརྡེབས་པ་ཚར་ནས་མི་བཟད་བས་འཇིགས་པ་ལ་སོགས་པ་གོམས་པ་ལས། ལུས་ཀྱི་གནས་སྐབས་ཀྱི་ཁྱད་པར་ལྷན་ཅིག་བྱེད་པ་ཅན་གྱི་ཤེས་བ་སྔ་མས་འདི་བྱའི་སྙམ་པའི་རྣམ་པར་རྟོག་པ་སྐྱེད་པ་དེའི་ཚེ་ནི་རྣམ་པར་རྟོག་པའི་ཤེས་པ་ཉིད་སད་པ་ཡིན་ལ། དེའི་འོག་ཏུ་ནི་རྣམ་པར་རྟོག་པ་དང་
བཅས་པའམ་རྟོག་པ་མེད་པར་ཡང་འགྱུར་བ་ཡིན་ནོ། །གང་གི་ཚེ་ཚོགས་པ་ཡིན་པས་གཉི་ག་གཅིག་པར་སྐྱེ་བ་དེའི་ཚེ་ན་གཉི་ག་ཡང་སད་པ་ཡིན་ནོ། །སད་པ་གོམས་པར་བྱས་པ་ཉིད་སྟོན་པ་ནི་གང་ཞིག་ཅེས་བྱ་བའོ། །བརྟན་སོགས་ཞེས་སོགས་པའི་སྒྲས་ནི་འདོད་པར་བྱ་བའི་བུད་མེད་གཟུང་ངོ༌། །འདུ་བྱེད་ནི་གོམས་པའོ། །བདེ་བ་ལ་སོགས་པ་རིག་བ་དང་རྟོགས་པའི་རང་བཞིན་སྐྱེ་བར་འགྱུར་ཞེས་འབྲེལ་ཏོ། །དེ་ལ་འདས་ནས་ཡུན་རིང་དུ་ཡིན་པའི་འཇིགས་པ་གོམས་པ་ལས་འབྲེལ་པ་ལ་སོགས་པའི་རང་བཞིན་དང༌། བདེ་བ་སྐྱེ་བར་འགྱུར་རོ། །མ་བྲོས་ན་ནི་སྡུག་བསྔལ་དུ་རིག་པར་འགྱུར་རོ། །ཁོ་ན་པ་གོམས་པར་བྱས་པ་ལ་ནི་མཚོན་འཛིན་པ་ལ་སོགས་པའི་རྟོག་པའི་རང་བཞིན་དད་བདེ་བ་རིག་པ་ཉེ་བར་འགྱུར་རོ། །འཆད་པ་ནི་འཇིགས་པ་གོམས་པའི་ཁྱིམ་དུ་ཞེས་བྱ་བའོ། །འབྲོས་པ་དང་བདེ་བ་ལ་སོགས་པའི་རང་བཞིན་དུ་རིག་པའོ། །སོགས་པའི་སྒྲས་ནི་རྣམ་པར་རྟོག་པ་ཡོངས་སུ་གཟུང་ངོ༌། །དེ་དག་ཉིད་ཀྱིས་རང་བཞིན་གང་ལ་ཡོད་པའི་སད་པ་དེ་ལ་དེ་སྐད་ཅེས་བྱ་བའོ། །གཞན་ཞེས་བྱ་བ་ནི་འབྲོས་མི་ནུས་ནའོ། །གཞན་ལ་གནོད་པར་བྱེད་པའི་རྒྱུ་ཡང་དེ་ཡིན་ལ་མཚོན་ལ་སོགས་པའི་འཛིན་པ་ཡང་དེ་ཡིན་པ་སྟེ། རང་བཞིན་དེ་ཉིད་རྟོགས་པ་གང་ལ་ཡོད་པ་དེ་ལ་དེ་སྐད་ཅེས་བྱ་བའོ། །དེས་ན་འབྲུ་མང་པོ་ཁོ་ན་ཡོད་པ་ལས་འཛིན་པའི་བསྡུ་བའོ། །གང་གི་ཕྱིར་འདིར་རྣམ་པར་རིག་པ་ཙམ་ལས་འདས་པ་དང་ཅིག་ཤོས་དག་ལྷན་ཅིག་བྱེད་པ་ཉིད་དུ་མི་འཐད་པ་དེས་ན་ཞེས་བྱ་བ་ལ་སོགས་པའོ། །རྣམ་པར་ཤེས་པ་སྤྱིའི་ལྷན་ཅིག་བྱེད་བའི་རྒྱུ་མ་ཡིན་ནོ། །འདིས་ནི་འདུ་བྱེད་པ་དང་ལྷན་ཅིག་ཡང་ནས་སྐྱེ་བའི་ཞེས་གང་བརྗོད་པ་སྤངས་པ་ཡིན་ནོ། །འོ་ན་རྣམ་པར་ཤེས་བའི་རྒྱུ་ཅི་ཡིན་སྙམ་ན་རྣམ་པར་ཤེས་བ་སྔ་མ་ཉིད་རྒྱུ་ཡིན་ནོ་ཞེས་གསུངས་ཏེ། ཉེ་བར་སིམ་པ་ཡིན་ནོ། །འོན་ཀྱང་རྣམ་པར་ཤེས་པ་སྔ་མ་དེ་ཇི་ལྟར་རང་གི་རྒྱུས་དུས་ངེས་པར་བསྐྱེད་པ་དེ་བཞིན་དུ་བར་དུ་ཆད་བའི་དུས་དང༌། འབྲེལ་པའི་འབྲས་བུ་སྐྱེད་པར་བྱེད་པ་མ་ཡིན་པ་དེས་སང་གི་དུས་ཀྱི་དེ་མ་ཐག་ཏུ་འབྲས་བུ་མི་སྐྱེད་པ་དང༌། དུས་གཞན་དང་འབྲེལ་པའི་འབྲས་བུ་སྐྱེད་པར་བྱེད་པར་འགྱུར་བ་ཙམ་དུ་ཟད་པ་ཡིན་པའི་ཕྱིར་སྐྱོན་མེད་དོ། །
རྒྱ་སྐྱེགས་ཀྱི་ཁུ་བས་འདུས་བྱས་པའི་ས་བོན་ནི་འདས་པའི་ཡིན་ཡང༌། གཞན་གྱི་ཚེ་འབྲས་བུ་ནི་ཡོད་པར་ཐལ་བའི་ཉེས་པ་མེད་དོ། །མ་ལྡོག་པ་ལ་ལྟོས་ནས་རྣམ་པ་དེ་ལྟ་བུའི་འབྲས་བུ་སྐྱེད་པར་བྱེད་པ་ཡིན་པའི་ཕྱིར་རོ། །འབྱུང་བར་འགྱུར་བའི་རྒྱུ་ཡང་སྔར་གྱི་དུས་སུ་ཡོད་པ་ལ་ལྟོས་པ་ཁོ་ནས་སྣ་ཞོམ་པ་ལ་སོགས་པའི་འབྲས་བུ་སྐྱེད་པ་ཡིན་ནོ། །འདི་གཉིས་ནི་ལྷན་ཅིག་འབྱུང་བ་མ་ཡིན་ཡང་གཅིག་མེད་ན་འབྲས་བུ་མི་སྐྱེ་བའི་ཕྱིར་ན་དོན་བྱ་བ་གཅིག་བྱེད་པའི་མཚན་ཉིད་ཀྱི་ལྷན་ཅིག་བྱེད་པ་ཉིད་ཡིན་ཡང་མི་འགལ་ལོ། །གལ་ཏེ་དེ་ལྟར་ལྷན་ཅིག་འབྱུང་བ་མེད་ཀྱང་ལྷན་ཅིག་བྱེད་པ་ཡིན་ན་འདུ་བྱེད་པ་ཡང་ལུས་ཀྱིས་ལྷན་ཅིག་བྱེད་པར་འགྱུར་བ་དེས་ན། འདུ་བྱེད་དེ་ཡི་ཚེ་མེད་ན། །ལྷན་ཅིག་བྱེད་འགྱུར་ཕྱིར་འཐད་དཀའ། །ཞེས་ཇི་ལྟར་བརྗོད་ཅེ་ན། བརྗོད་པ། གལ་ཏེ་གཅིག་མེད་པར་འབྲས་བུ་རྟོགས་པ་ཙམ་གྱིས་སྐྱེ་ན་ནི། འདི་དེ་ལྟར་འགྱུར་བ་ཁོ་ནའོ། །ལུས་དེ་ལུས་མེད་ན་མི་སྐྱེ་བ་ཁོ་ནའོ་ཞེ་ན། འདི་གང་གིས་ངེས་པར་ཟིན་ཏེ། རང་ངམ་གཞན་གྱིས་ངེས་པར་མི་འཐད་པའི་ཕྱིར་རོ། །དེས་ན་གང་གི་ཕྱིར་འཇིག་རྟེན་རྒྱང་འཕན་པའི་མངོན་པར་འདོད་པའི་འགྲུབ་ཏུ་རེ་བ་འབྲས་བུ་དང་བཅས་པར་འགྱུར། འདི་གཉིས་ཀྱི་ལྷན་ཅིག་ལ་འདི་ཡང་ཚད་མས་རྟོགས་པ་མ་ཡིན་ནོ་ཞེས་བྱ་བར་རྟོགས་པར་བྱའོ། །གལ་ཏེ་ལུས་ཉིད་ཉེ་བར་ལེན་པ་ཡིན་ན་དེའི་ཚེ་ཉེས་པ་ཅི་ཡོད་སྙམ་པའི་དོགས་པ་སྤང་བའི་ཕྱིར། སྔར་བཤད་པའི་རིགས་པ་ཉིད་གྲགས་པར་བྱེད་པ་ནི་དེ་ཡང་ཞེས་བྱ་བ་ཡིན་ཏེ་ཤེས་པ་སྤྱིའོ། །ལྷག་མ་ཡང་བརྗོད་པ་ནི་དེ་བཞིན་དུ་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་གྱིའོ། །མི་མཐུན་པ་མེད་ན་ཞེས་བྱ་བ་ནི་ལན་ནོ། །འོན་ཏེ་མི་མཐུན་པ་ཚབས་ཆེན་པོ་སེམས་དང་བྲལ་བའི་མཚན་ཉིད་ནི་རང་གི་རྒྱུ་ལོག་ཀྱང་མི་རྟོག་པའི་ཕྱིར་ན། སྔར་གྱི་རང་བཞིན་ཡང་འབྱུང་བ་མ་ཡིན་ཏེ། སེལ་བ་ལོག་ནས་རང་བཞིན་གྱི་གནས་འབྱུང་བ་ནི་ནམ་ཡང་མེད་དོ། །དེས་ན་མི་མཐུན་པ་མེད་ན་སླར་ལུས་རྣམ་པར་ཤེས་པའི་རྒྱུ་ཡིན་ནོ་ཅི་སྟེ་བརྗོད་ཅེས་དོགས་ན་ཕྱིར་མི་འབྱུང་བའི་རྣམ་པར་འགྱུར་བར་ཞེས་གསུངས་སོ། །གང་ཞིག་རང་གི་རྒྱུན་ཡོད་ན་སྐྱེས་པ་དང༌། དེ་མེད་ན་ལྡོག་པར་
ཡང་འགྱུར་ཞིང་ཡང་ཡོད་ན་འབྱུང་བར་འགྱུར་བ་དེ་ནི་རེ་ཞིག་བྱུང་བ་དེ་ཞེས་བརྗོད་དེ་གསེར་གྱི་རྣམ་པར་འགྱུར་བ་ཞུ་བ་ཉིད་བཞིན་ནོ། །གང་ཞིག་དེ་ལྟར་མི་འགྱུར་བ་དེ་ནི་ཡང་མི་འབྱུང་བའི་རྣམ་པར་འགྱུར་བ་ཡིན་ཏེ། དཔེར་ན་བུད་ཤིང་གི་རྣམ་པས་འགྱུར་བ་ལྟ་བུའོ། །ཉེས་པ་རྣམས་སོ་དེ་རྩོམ་པར་བྱེད་པ་ཉིད་ཡིན་པར་ཁས་ལེན་ན་ནི་ཆེན་པོ་འབའ་ཞིག་ཏུ་མ་ཟད་ཀྱི་ཆུང་ངུ་ཡང་བཟློག་ཏུ་མེད་པར་འགྱུར་རོ། །དེས་བྱས་པས་ཞེས་བྱ་བ་ནི་ལུས་དེ་བྱས་པའོ། །རྣམ་པར་ཤེས་པ་ཞན་པ་ཡང་འཇུག་པའི་མཚན་ཉིད་བཟློག་ཆུ་མེད་པར་འགྱུར་རོ་ཞེས་འབྲེལ་ཏོ། །རྣམ་པར་འགྱུར་བ་གཞན་ཡང་བཟློག་ཏུ་མེད་པར་ཐལ་བ་ཉིད་དུ་སྟོན་པ་ནི་བརྒྱལ་བ་ལ་སོགས་པ་སྟེ་གཉིད་སྟུག་པོས་ལོག་པ་ལ་སོགས་པ་གང་དག་ཡིན་པ་དེ་དག་གིས་རྣམ་པར་ནི་རྣམ་པར་ཤེས་པ་མེད་པའི་མཚན་ཉིད་དེ་རང་བཞིན་དེ་ཉིད་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་དག་ནི་བཟློག་ཏུ་མེད་པ་ནི་མ་ཡིན་ཏེ། དེས་ན་ཉེས་པ་རྣམ་བཟློག་ཏུ་རུང་བའི་རྣམ་པར་འགྱུར་བ་རྩོམ་པར་བྱེད་པ་ཁས་བླངས་པ་བྱ་བ་ཡིན་ནོ། །དེ་ལྟར་ཁས་བླངས་པ་ནི་ཡང་འདོད་པ་འགྲུབ་བོ་ཞེས་གསུངས་པ་ནི། ཕྱིར་ལྡོག་པར་རུང་བ་ཞེས་བྱ་བའོ། །གང་ཞེས་བྱ་བ་ནི་ལུས་གང་ལ་བྱས་པའོ། །དེ་ནི་ཞེས་བྱ་བ་ནི་ལུས་ཀྱི་རང་བཞིན་ཏེ། གསེར་གྱི་སྲ་བ་ཉིད་བཞིན་ནོ། །གལ་ཏེ་ཞེས་བྱ་བ་ནི་གཞན་གྱིའོ། །རྣམ་པར་ཤེས་པ་འབའ་ཞིག་རྒྱུ་ཡིན་ནོ། །བསྒྲུབ་ཏུ་མེད་པ་ཉིད་མེད་པར་འགྱུར་རོ་སྙམ་དུ་བསམས་པའོ། །གསོ་བྱ་མིན་པ་ནི་བཟློག་ཏུ་མེད་པ་སྟེ། སྐབས་ཀྱི་རྣམ་པར་འགྱུར་བའི་ཅུང་ཟད་ཅེས་བྱ་བ་ཐམས་ཅད་མ་ཡིན་པའོ། །ཚུ་རོལ་མཛེས་པ་པའི་ཕྱོགས་ཁས་ལེན་ན་ནི་ཉེས་པ་འབའ་ཞིག་མི་མཐུན་པའི་བྱེད་པ་ཡིན་པར་ཁས་བླངས་པས་ན། མི་མཐུན་པ་བསྒྲུབ་ཏུ་མེད་པར་འགྱུར་རོ། །བསྒྲུབ་པར་བྱ་བ་མ་ཡིན་པ་ཉིད་ནི་ཞེས་བྱ་བ་ནི་འཆད་པའོ། །བསྒྲུབ་པར་བྱར་མེད་པ་ནི་བསྒྲུབ་པར་བྱ་བ་མ་ཡིན་པ་སྟེ་སྤྲུལ་དང་ཉེ་བ་གང་ཡིན་པ་དག་གོ །དེ་དག་ཀྱང་ཡིན་ལ་སྤྲུལ་དང་ཉེ་བར་ཡང་མ་ཡིན་པ་སྟེ། དེ་དག་གིས་བྱས་པའི་རྣམ་པར་འགྱུར་བ་ནི་སེམས་ལྡོག་པའི་མཚན་ཉིད་འཇིག་རྟེན་གྲགས་པ་དེ་སེལ་བར་ནུས་པའོ། །རྙེད་པར་དཀའ་བའི་ཕྱིར་ཞེས་བྱ་བའི་
མེད་པའི་ཉེ་བར་མཚོན་པར་བྱེད་བ་ཡིན་པའི་ཕྱིར་ན་མེད་པའི་ཕྱིར་ཞེས་གསུངས་སོ། །གཞན་གྱི་ལུགས་ལ་ཡང་དེ་ལྟར་འགྱུར་རོ་ཞེས་གསུངས་པ་ནི་སེམས་པ་ཞེས་བྱ་བའོ། །འཇིག་རྟེན་རྒྱང་འཕན་བའི་ལུགས་ལ་ནི་བསྒྲུབ་བར་བྱ་བ་མ་ཡིན་པའི་མི་མཐུན་པ་འགའ་ཡང་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཞེས་བྱ་བ་ནི་གཞན་གྱི་སྟེ། ངེད་ཀྱི་ཕྱོགས་ལ་ཞེས་འཐད་དོ། །དེ་ནི་མེད་དོ་ཞེས་བྱ་བ་ནི་ལན་ནོ། །དོན་ནི་གལ་ཏེ་རྣམ་པར་འགྱུར་བ་བཟློག་བར་བྱ་བ་མ་ཡིན་ན་དེའི་ཚེ་འཆོས་བྱེད་རྙེད་པར་དཀའ་བ་ཉིད་སླར་འཚོ་བའི་རྒྱུ་མིན་པར་འགྱུར་བ་ཉིད་དོ། །རྣམ་པར་འགྱུར་བ་ལོག་ན་ཡང་འཆོས་བྱེད་ཉིད་དོན་མེད་དོ་ཞེས་བྱ་བ་ཡིན་ནོ། །གཞན་ལ་ཡང་ཞེས་བྱ་བ་ནི་འཇིག་རྟེན་ཕ་རོལ་སྨྲ་བ་ལའོ། །གལ་ཏེ་ཚུ་རོལ་མཛེས་པ་ལ་ཡང་བསྒྲུབ་པར་བྱ་བ་མ་ཡིན་པ་ཡོད་ན་སྐྱོན་ཅི་ཡོད། དེ་ལྟར་མ་ཡིན་ན་ཁྱེད་ལ་ཡང་ཇི་ལྟར་འགྱུར་ཞེས་བྱ་བ་ནི་རྒོལ་བའི་དོན་ཏོ། །དེ་ཅིའི་ཕྱིར་སྙམ་ན། འདི་ལྟར་ཞེས་གསུངས་སོ། །ཚུ་རོལ་མཛེས་པ་པ་ལ་ནི་སྔོན་གྱི་ལས་ཀྱི་བདག་པོ་ཉིད་མེད་དོ་སྙམ་དུ་དགོངས་པའོ། །འདིར་ནད་བསྒྲུབ་པར་བྱ་བ་མ་ཡིན་པ་ནི། ཉེ་བར་མཚོན་པ་མ་ཡིན་པ་སྟེ། དེ་བདག་པོར་གྱུར་བས་བྱས་པའི་རྣམ་པར་འགྱུར་བ་ཐམས་ཅད་གཟུང་ངོ༌། །དེ་ལྟར་རང་གི་ལུགས་ལེགས་པར་བསྟན་ནས་སླར་འཚོ་བ་ཐལ་བ་འདི་ནི་གཞན་ཁོ་ན་ལས་ཡིན་ནོ་ཞེས་མཇུག་སྡུད་པའི་སྒོ་ནས་སྟོན་པ་ནི་དེའི་ཕྱིར་ཞེས་བྱ་བའོ། །དེའི་ཕྱིར་རྣམ་པར་ཤེས་པ་ནི་ལུས་ཀྱིས་རྒྱུ་ཅན་མ་ཡིན་པའི་ཕྱིར་རྣམ་པར་ཤེས་པའི་རྒྱུ་ནི་རྣམ་པར་ཤེས་པ་སྔ་མ་ཉིད་ཡིན་ནོ། །དེ་བས་ནི་ལུས་ལོག་པས་ནི་རྣམ་པར་ཤེས་པ་ལྡོག་པ་མ་ཡིན་ནོ། །ཡང་ན་ལུས་རྣམ་པར་ཤེས་པའི་རྒྱུ་ཅན་ཡིན་ཡང་དེ་ཙམ་གྱིས་ནི་དེ་ལོག་པས་ལྡོག་པ་མ་ཡིན་ཏེ། རྒྱུ་ཙམ་ལོག་པས་འབྲས་བུ་ཐམས་ཅད་མི་ལྡོག་པའི་ཕྱིར་རོ་ཞེས་བྱ་བ་འདི་བསྟན་པའི་དོན་དུ་གཞན་ཡང་ཞེས་གསུངས་སོ། །འོ་ན་ལུས་ཉིད་ཉེ་བར་མཚོན་པའི་རྒྱུ་ཡིན་ནོ་སྙམ་ན། ལུས་ཀྱང་ཞེས་གསུངས་སོ། །ཅིའི་ཕྱིར་ཞེ་ན། གལ་ཏེ་ཡིན་ན་ཞེས་གསུངས་སོ། །ལུས་དེ་རྣམ་པར་མ་གྱུར་པའོ། །རྣམ་པར་མི་འགྱུར་བར་འགྱུར་རོ་ཞེས་བྱ་བ་ནི་སྐབས་
ཀྱིས་རྣམ་པར་ཤེས་པའོ། །གལ་ཏེ་དེ་ལྟ་ན་ལུས་ཉིད་རྣམ་པར་ཤེས་པའི་ཉེ་བར་ལེན་པའི་རྒྱུར་འགྱུར་རོ་སྙམ་ན། ལུས་ནི་རྒྱུ་ཉིད་ཡིན་ཡང་ཞེས་གསུངས་སོ། །ཅིའི་ཕྱིར་སྙམ་པ་ལ། དེ་མ་གྱུར་ཀྱང་ཞེས་གསུངས་ཏེ། དེས་ན་ལུས་ནི་ཉེ་བར་ལེན་པའི་རྒྱུ་མ་ཡིན་ནོ། །འོ་ན་རྣམ་པར་ཤེས་པ་ཡང་ཅི་ལྟར་ཞེ་ན། དེ་འགྱུར་ན་ཡང་གདོན་མི་ཟ་བར་འགྱུར་བའི་ཕྱིར་རོ་ཞེས་སྨྲས་སོ། །དེ་འགྱུར་ན་ཡང་གདོན་མི་ཟ་བར་འགྱུར་བ་མ་ཡིན་པའི་ཕྱིར་རོ་ཞེས་འདོན་པ་དེ་ནི་ལུས་རྒྱུ་ཡིན་པ་འགོག་པའི་གཏན་ཚིགས་ཀྱི་དོན་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་གཞན་གྱིའོ།། འདིས་ནི་ཧ་ཅང་ཁྱབ་ཆེས་པའི་ཉེས་པ་བརྗོད་དོ། །དེ་ལ་མཚན་ཉིད་གཞན་བསྒྲུབས་པས་རེ་ཞིག་དེ་དགག་པ་བརྗོད་པ་ནི་མ་ཡིན་ཏེ་ཞེས་བྱ་བའོ། །རྒྱུན་གྱིས་ཞེས་བྱ་བ་ནི་སཱ་ལུའི་རྒྱུན་གྱི་རྒྱུའོ། །གལ་ཏེ་ཆུ་ཉིད་རྒྱུན་གྱི་རྒྱུ་མ་ཡིན་ནམ། དེས་ན་ཧ་ཅང་ཁྱབ་བའི་ཉེས་པ་ཇི་ལྟར་སྤོང་སྙམ་ན། རྒྱུན་གྱི་རྒྱུ་ཡང་ཞེས་གསུངས་སོ། །དེ་ལྟར་ན་ནི་འོ་ན་རྒྱུ་མ་ཡིན་པའི་ཆུ་ལ་ཅི་ལྟོས་སྙམ་པ་ལ་ཆུའི་ནི་ཞེས་བྱ་བ་གསུངས་སོ། །རྒྱུ་འབྱུང་བ་ཡང་དེ་ཉིད་ལས་འགྱུར་མོད་སྙམ་ན། ཆུ་ལས་ཞེས་གསུངས་སོ། །ཅིའི་ཕྱིར་སྙམ་པ་ལ་ཆུ་ནི་ཞེས་གསུངས་སོ། །དེ་ལྟར་རྗེས་སུ་འགྲོ་བ་མེད་པར་བསྟན་པའི་སྒོ་ནས་ཉེ་བར་ལེན་པའི་མཚན་ཉིད་ཧ་ཅང་ཁྱབ་ཆེས་པའི་ཉེས་པ་སྤངས་པས་ལྡོག་པའི་སྒོ་ནས་སྟོན་པ་ནི་ཆུ་ལོག་ཀྱང་ཞེས་གསུངས་སོ། །མེ་ཡོད་ན་དུ་བའི་རྒྱུན་ཡོད་ཀྱང་དེ་ཉེ་བར་ལེན་བ་ནི་མ་ཡིན་ནོ་ཞེ་ན། མ་ཡིན་ཏེ་ཙནྡན་གྱི་རྒྱུན་གྱི་ཉེ་བར་ལེན་པ་ཡིན་པའི་ཕྱིར་རོ། །ཙནྡན་གྱི་རྒྱུན་ཡང་ཙནྡན་ཡིན་གྱི་མེ་ནི་མ་ཡིན་ཏེ། མེ་ནི་དུ་བའི་གནས་སྐབས་ཀྱི་རྒྱུ་ཡིན་པའི་ཕྱིར་རོ། །མེ་ལས་ནི་ཙན་དན་གྱི་རྒྱུན་འབྱུང་བ་མ་ཡིན་ཏེ། མེ་ནི་སེང་ལྡེང་ལ་སོགས་པ་དང་ཐུན་མོང་པའི་ཕྱིར་རོ། །མེ་ལོག་པས་ནི་ཙནྡན་གྱི་རྒྱུ་ལྡོག་པ་མ་ཡིན་ཏེ། མེ་མེད་ཀྱང་ཙནྡན་གྱི་རྒྱུན་མི་ལྡོག་བའི་ཕྱིར་རོ། །དེ་བཞིན་དུ་གཞན་དག་ཏུ་ཡང་ཅི་རིགས་སུ་བརྗོད་བར་བྱའོ། །དེས་ན་བཤད་མ་ཐག་པའི་ཉེས་པ་མེད་དོ། །འོ་ན་ཆུ་རྣམ་པ་ཐམས་ཅད་དུ་མཁོ་བ་མེད་བར་འགྱུར་ཞེ་ན། མྱུ་གུ་ལ་སོགས་པ་དེའི་ཞེས་གསུངས་སོ། །དེ་ནི་
དེ་ལོག་ན་ལྡོག་པ་ཡིན་ནོ་ཞེས་བྱ་བ་ནི་སྐམ་པ་ལ་སོགས་པའི་ཚུལ་གྱིས་སོ། །འོན་ཏེ་དེ་ལྟ་ན་སཱ་ལུའི་རང་བཞིན་ལ་ཆུ་ཉེ་བར་ལེན་པ་མ་ཡིན་ནོ་། དེའི་གནས་སྐབས་ནི་དེ་ལས་སྐྱེས་པ་དང་དེ་ལོག་ན་ཡང་ལྡོག་པའི་ཕྱིར་ཉེ་བར་ལེན་པར་འགྱུར་རོ་ཞེ་ན། དེས་ན་ཆུ་ཞེས་གསུངས་སོ། །ཉེ་བར་ལེན་པའི་རྒྱུ་ཁོ་ན་སྟེ་བདག་ཅག་ལ་བཅད་པ་ཅིག་ཡོད་ཅེས་བྱ་བ་འདི་ལྷུར་བྱེད་པ་ཡིན་ནོ། །སཱ་ལུའི་རང་བཞིན་བརྒྱད་པས་གནས་པ་རྣ་ལྷན་ཅིག་བྱེད་བུ་དག་ལས་ཁྱད་པར་གཞན་དང་གཞན་པ་ན་རེ་ཞིག་ཡོད་པ་ཡིན་ནོ། །དེ་ལ་རྣམ་པ་ཇི་ལྟ་བ་དེ་ལྟར་རྣམ་པར་གཞག་པ་བགྱིས་ཏེ། ཆད་པ་ཅི་ཡང་མེད་དེ་ཞེས་བྱ་བ་ཡིན་ནོ། །དེ་ལྟར་རྒྱུན་གྱི་རྒྱུ་ཉིད་ཉེ་བར་ལེན་པའི་རྒྱུ་ཡིན་ནོ་ཞེས་བྱ་བའི་མཚན་ཉིད་ལ་ཉེས་པ་མེད་པར་བསྟན་ནས། སློབ་དཔོན་གྱིས་གསུངས་པའི་མཚན་ཉིད་ལ་ཡང་བསྟན་པའི་ཕྱིར་ཆུ་ལ་སོགས་པ་ལས་ནི་ཞེས་གསུངས་སོ། །དེ་ལ་རྣམ་པར་ཤེས་པའི་རྒྱུན་གྱི་རྒྱུ་ཡིན་པ་ཉིད་ཀྱི་ལུས་ཉེ་བར་ལེན་པའི་རྒྱུ་ཉིད་ཡིན་པ་ནི། ལུས་ལུས་ལས་དང་པོ་སྐྱེ་ན་ཞེས་བྱ་བ་འདིའི་སྐབས་སུ་ཕྱིས་སེལ་བར་འགྱུར་རོ། །དེར་འགྱུར་བས་འགྱུར་བའི་སྒོ་ནས་ལུས་ཉེ་བར་ལེན་པ་ཉིད་ཡིན་པ་ཉེ་བར་སྡུད་པའི་སྒོ་ནས་སེལ་བ་ནི་དེའི་ཕྱིར་ཞེས་བྱ་བ་སྟེ། གང་གི་ཕྱིར་དེ་ལྟར་མ་ཡིན་པ་དེའི་ཕྱིར་ཉེ་བར་ལེན་པའི་རྒྱུ་མ་ཡིན་ནོ། །ཅིའི་ཕྱིར་ཞེ་ན་སྨྲས་པ། ལུས་འགྱུར་བ་མེད་པར་ཡང་སྟེ་ཉམས་པ་དང་འཕེལ་བ་མེད་པར་ཡང་ངོ༌། །རྣམ་པར་འགྱུར་བའི་ཕྱིར་ཏེ་ཉམས་པ་དང་འཕེལ་བའི་ཕྱིར་རོ། །དོན་འདི་ཉིད་རྣམ་འགྲེལ་གྱི་གསལ་འདེབས་པ་ནི། དེ་ཉིད་བཤད་པ་ན་ཞེས་བྱ་བའོ། །ལུས་རྣམ་པ་དེ་འདྲ་བ་ཉིད་ཡིན་ནོ་ཞེས་སྟོན་པ་ནི་ལུས་མ་འགྱུར་ཡང་ཞེས་བྱ་བའོ། །དེའི་ཕྱིར་ཞེས་བྱ་བ་ནི་ཉེ་བར་ལེན་པ་མ་ཡིན་པའི་ཕྱིར་རོ། །བ་ལང་དང་བ་མེད་ཅི་ལྟར་ཡིན་ཞེ་ན། །དེ་མ་འགྱུར་ཡང་འགྱུར་བའི་ཕྱིར་ཞེས་གསུངས་སོ། །བ་ལང་དང་བ་མེན་དག་ཕན་ཚུན་གནས་སྐབས་ཀྱིས་ཁྱད་པར་བྱེད་པས་ནི་ཅི་ཡང་ཆད་པ་མེད་དོ་ཞེས་བརྗོད་པ་ནི། བ་མེན་བ་ལང་གི་ཞེས་བྱ་བའོ། །གཞན་གྱིས་གལ་ཏེ་ཞེས་སྨྲས་སོ། །སྐྱོན་ཡོན་དུ་འགྱུར་བ་མ་ཡིན་ནོ་ཞེས་པ་ནི་འདིའི་བར་གྱིས་ནི་ཉེས་གཅིག་གོ །
ཉེ་བར་ལེན་པ་ཞེས་བྱ་བ་ལ་སོགས་པས་ནི་གཉིས་པའོ། །དང་པོ་ལ་ནི་ལན་ལུས་དང་སེམས་ཀྱང་དེ་བཞིན་ནོ་ཞེས་བྱ་བ་ཡིན་ཏེ། བ་ལང་དང་མེན་ལྟར་འདི་གཉིས་ནི་ཉེ་བར་ལེན་པ་དང༌། ཉེ་བར་ལེན་པ་ལས་བྱུང་བ་ཉིད་མ་ཡིན་ནོ་ཞེས་བྱ་བའི་དོན་ཏོ། །གཉིས་པའི་ལན་ནི་རྐང་པ་ལྷག་མ་གསུམ་ཡིན་ནོ། །ལུས་དང་སེམས་ཀྱི་མཚན་ཉིད་སྐྱེ་བའི་འབྲས་བུ་ལྷན་ཅིག་གནས་པ་ཡིན་ནོ། །ཅིའི་ཕྱིར་ཞེ་ན། ལུས་དང་སེམས་འདྲིས་པ་དེ་གཉིས་ཀྱི་རྒྱུ་ནུར་ནུར་པོ་ལ་སོགས་པ་དང༌། ལྷན་ཅིག་པའི་སེམས་དེ་ལྷན་ཅིག་བྱེད་པའི་ཕྱིར་ཏེ། ཕན་ཚུན་ལྷན་ཅིག་བྱེད་པའི་ཕྱིར་རོ། །དཔེ་བརྗོད་པ་ནི་མེད་དང་ཟངས་མའི་ཞུ་ཉིད་བཞིན་ཞེས་པའོ། །དེས་ན་ཉེ་བར་ལེན་པའི་དང་ཉེ་བར་ལེན་པ་ལས་བྱུང་བ་ཉིད་མ་ཡིན་པ་ཡང་ལྷན་ཅིག་གནས་པར་འཐད་དོ་སྙམ་དུ་དགོངས་པའོ། །དེ་ལྟར་ཡང་སྔར་གྱི་རྩོད་པ་ལས་ཅི་ལྟར་འདས་སྙམ་པ་ལ། འདིར་ཞེས་བྱ་བའོ། །སྐབས་སྡུད་པ་ནི་གནས་སྐབས་རྒྱུའི་དངོས་པོ་ནི་ཞེས་བྱ་བའོ། །དངོས་པོ་ནི་ལུས་སོ། །གལ་ཏེ་དེ་ལྟ་ཡིན་ནའོ་ན་དེ་ལོག་ན་ཞིག་ལྡོག་སྙམ་ན་གནས་སྐབས་བྱེད་པ་ཞེས་གསུངས་སོ། །ནིའི་སྒྲ་ནི་གསལ་ལོ་ཞེ་བྱ་བའི་དོན་ཡིན་ནོ། །དེ་ལྟ་ན་འོ་ན་ཉེ་བར་ལེན་པའི་རྒྱུ་གང་ཡིན་སྙམ་དུ་དགོངས་ན། རང་གི་བརྗོད་པའི་ཉེ་བར་ལེན་པའི་མཚན་ཉིད་དྲན་པར་བྱེད་པས། དེ་ལོག་པ་ཉིད་ན་རྒྱུ་ལྡོག་པའོ་ཞེས་སྟོན་པ་ནི། རྒྱུན་གྱི་རྒྱུ་གང་ཡིན་པ་དེ་ཞེས་གསུངས་སོ། །འོན་ཏེ་གནས་སྐབས་ཀྱི་རྒྱུ་ལོག་པས་ཀྱང་རྒྱུ་ལྡོག་པར་འགྱུར་རོ། །དེས་ན་དེ་ཡང་ཉེ་བར་ལེན་པར་འགྱུར་རོ་སྙམ་པ་ལ། མེ་ལོག་པས་ནི་ཞེས་གསུངས་སོ། །དེ་བཞིན་དུ་མེ་ལོག་ན་ཙནྡན་གྱི་དུ་བའི་གནས་སྐབས་ཉིད་ལོག་པར་འགྱུར་རོ་ཞེས་བྱ་བར་རྟོགས་པར་བྱའོ། །གནས་སྐབས་ཀྱི་རྒྱུ་ལོག་པས་ནི་རྒྱུན་ལྡོག་པ་མ་ཡིན་ནོ་ཞེས་བྱ་བའི་དོན་ཏོ། །ལན་གཉིས་པ་སྡུད་པ་ནི་སེམས་ནི་ལུས་དང་ལྷན་ཅིག་ཅེས་བྱ་བའོ། །ལུས་དང་སེམས་འདྲེས་པ་དེ་གཉིས་ཀྱིས་འབྲས་བུ་མ་ཡིན་ན། འབའ་ཞིག་པའམ་ལུས་གཞན་དང་ལྷན་ཅིག་ཡང་རུང་སྟེ། རྒྱུན་དུ་འབྱུང་བའི་རང་བཞིན་གྱི་སེམས་ལུས་མེད་ཀྱང་གནས་པ་ཉིད་དེ། དཔེར་ན་མེ་དང་གསེར་གཉིས་ཀྱི་འབྲས་བུ་མ་ཡིན་པའི་གསེར་ནི་མེ་མེད་ཀྱང་གནས་པ་བཞིན་
ནོ། །བཤད་ཟིན་པའི་དོན་ཉིད་གསལ་བར་བྱེད་པའི་ཕྱིར་འདི་སྐད་བརྗོད་པ་ཡིན་ནོ་ཞེས་བྱ་བའོ། །ལུས་དང་སེམས་ཀྱི་མཚན་ཉིད་ཅན་འབྲས་བུ་གཉིས་ནིའོ། །རྒྱུ་དེ་གཉིས་འབྲས་བུ་མིན་ན་ནི་ཞེས་བྱ་བ་ལ་སོགས་པ་རྣམ་པར་འགྲེལ་པ་ནི། ལུས་ལོག་ན་ནི་ཞེས་བྱ་བའོ།། འོན་ཏེ་ཞེས་བྱ་བ་ནི་གཞན་གྱིའོ། །དེ་ཞེས་བྱ་བ་ནི་ཁྱད་པར་རོ། །གང་གི་ཆོ་ཆུ་ལོག་ན་ལྡོག་པ་མ་ཡིན་ནོ་ཞེས་འདོན་པ་དེའི་ཚེ་ནི་དེ་ཞེས་བྱ་བ་རྒྱུན་ལ་བྱ་སྟེ་རྒྱུན་དེ་ནི་ཆུ་ལོག་ཀྱང་མི་ལྡོག་གོ་ཞེས་བྱ་བའི་དོན་ཏོ། །ཡང་ཅི་ལྟར་ཞེས་བྱ་བ་ནི་རྩོད་པ་གཉིས་པའི་སྐྱེ་བར་འགྱུར་རོ་ཞེས་བྱ་བ་ནི་རྣམ་པར་ཤེས་པ་ནི་རྒྱུན་ནོ། །དེས་ན་རྣམ་པར་ཤེས་པའི་རྒྱུན་ནི་རྣམ་པར་ཤེས་པའི་རྒྱུན་གྱི་རྒྱུ་ཡིན་པའི་ཕྱིར་ལུས་ཉེ་བར་ལེན་པར་ཐལ་ལོ་ཞེས་བྱ་བ་ནི་གཞན་གྱི་བསམ་པའོ། །དེ་ལ་འདིར་ཞེས་བྱ་བ་ལ་སོགས་པ་དང་པོ་སྤངས་ནས། གཉིས་པ་སེལ་བར་བྱེད་པ་ནི་དང་པོར་རྣམ་པར་ཤེས་པ་ནི་ཞེས་བྱ་བའི་སྔོན་གྱི་འདུ་བྱེད་པའི་རྗེས་སུ་འཇུག་པས་ཐམས་ཅད་ལ་གྲུབ་པའི་ཕྱིར་རོ་སྙམ་པའི་དགོངས་པའོ། །ཡང་ན་རང་ངམ་གཞན་གྱིས་མ་མཐོང་བ་དེས་ན་ཉེ་བར་ལེན་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་གནོད་པས་བྱས་པ་མེད་ཀྱང་རྒྱུན་ལྡོག་པར་འགྱུར་བ་མ་ཡིན་ནམ་ཞེ་ན། ཉེར་ལེན་གནོད་པར་བྱེད་པ་ནི། །ཞེས་གསུངས་སོ། །འཆད་པར་ནི་འབྲུའི་རྒྱུན་གྱི་ཞེས་བྱ་བ་སྟེ། ཆོས་མི་མཐུན་པའི་དཔེ་བརྗོད་པའོ། །གང་ལ་གནོད་པ་མེད་པར་རྣམ་པར་ཤེས་པའི་ཉེ་བར་ལེན་པ་ཡིན་སྙམ་ན་རྣམ་པར་ཤེས་བའི་ཉེ་བར་ལེན་པ་ནི་ཞེས་སྨོས་སོ། །ཉིད་ཡིན་གྱི་ལུས་ནི་མ་ཡིན་ཏེ་ཉེ་བར་ལེན་པའི་མཚན་ཉིད་གཉི་ག་མེད་པའི་ཕྱིར་རོ། །འོན་ཏེ་འདི་ལ་ཡང་གནོད་པ་སྲིད་དོ་སྙམ་ན་དེ་ལ་ནི་ཞེས་གསུངས་སོ། །འདི་ཙམ་གྱིས་ནི་ཚིག་ལེའུར་བྱས་པ་དང་པོ་བཤད་པ་ཡིན་ནོ། །གཉིས་ལ་སོགས་པས་ཞེས་བྱ་བ་ནི་བཤད་པ་འདིའི་དང་ལག་ལ་ཡིན་ནོ། །སོགས་པའི་སྒྲས་ནི་བརྒྱལ་བ་ལ་སོགས་པའོ། །དུས་དེ་ཙམ་དུ་གནོད་པ་ཡིན་ནོ་ཞེས་བྱ་བ་འདི་ག་ལས་ཡིན། གང་གི་ཕྱིར་སྔ་མ་རྣམ་པ་ཐམས་ཅད་དུ་ཉམས་པ་ན་ཕྱིས་ལུས་ལས་སྔ་ན་མེད་པའི་སེམས་ཉིད་སྐྱེ་བའི་ཕྱིར་རོ་སྙམ་ན། སྔོན་གྱི་འདུ་བྱེད་ལ་ལྟོས་པ་ཅན་ཞེས་གསུངས་སོ། །འདི་ནི་ཚིག་ལེའུར་
བྱས་པའི་དོན་ཡང་བསྒྲུབ་པ་ཡིན་ནོ། །རྣམ་ཆད་མིན་ཏེ་རྣམ་པ་ཐམས་ཅད་དུ་མེད་བ་མ་ཡིན་ནོ། །ཅིའི་ཕྱིར་ཞེ་ན། རྣམ་ཤེས་རྣམ་ཚད་ཞེས་གསུངས་སོ། །གལ་ཏེ་དམིགས་པའི་ཕྱིར་ན་རྨི་ལམ་དུ་རྣམ་པར་ཤེས་པ་རྣམ་པར་ཆད་ཀྱང་འབྱུང་བ་ཡིན་ནོ། །གཞན་དུ་གོ་ཇི་ལྟར་སྙམ་ན། ཤི་དང་གཉིད་ལོག་པ་དག་ལ། །ཞེས་གསུངས་སོ། །དེས་ན་གང་ཞིག་རྣམ་པར་ཆད་པ་དེ་ནི་སད་པ་དང་འབྲེལ་པ་ཡིན་ཏེ། དཔེར་ན་གཉིད་མཐུག་པའི་ཚད་མ་བཞིན་ནོ། །འཆི་བ་ཡང་རྣམ་པར་འཆད་པ་ཡིན་ནོ། །དེས་ན་འཇིག་རྟེན་ཕ་རོལ་མེད་པ་མ་ཡིན་ནོ་སྙམ་དུ་དགོངས་པའོ། །གཉིད་ལ་སོགས་པའི་དཔེ་ལ་འཁྲུལ་པ་དོགས་པ་ནི་འོན་ཏེ་ཞེས་བྱ་བའོ། །ཁོ་ནར་ཞེས་བྱ་བ་ནི་ཕྱིས་མི་སྐྱེ་བའོ། །དེས་ན་རྣམ་པར་ཆད་པར་ནི་ཡང་འབྱུང་བས་མ་ཁྱབ་པོ་སྙམ་དུ་བསམ་པའོ། །དེ་ནི་མ་ཡིན་ཏེ་ཞེས་བྱ་བ་ནི་ལན་ནོ། །རེས་འགའ་རྣམ་པར་ཆད་པ་ཁོ་ནར་འགྱུར་རོ་ཞེས་བྱ་བའི་རྟོག་པ་འདི་འདྲ་བ་འདི་དེ་ག་ལས་ཡིན་འདི་སྐད་བརྗོད་པར་འགྱུར་དེ་འགའ་ཞིག་གིས་དམིགས་པའི་དངོས་པོ་ནི་དེ་ཉིད་དུ་འགྱུར་གྱི་རྣམ་པར་ཆད་པ་ནི་རང་ངམ་གཞན་འགའ་ཞིག་གིས་རྟོགས་པར་ནུས་པ་མ་ཡིན་ནོ་ཞེས་བྱ་བའོ། །རེ་ཞིག་རང་གི་དབང་དུ་བྱས་ནས་བཤད་པ་ནི་རེ་ཞིག་ཅེས་བྱ་བའོ། །ཀུན་ཏེ་ཞེས་བྱ་བ་ནི་གཞན་གྱིས་སྨྲས་པའོ་མི་དམིགས་པ་ཙམ་གྱིས་རྣམ་པར་འཆད་པར་དགག་པ་ག་ལས་ཡིན་ཏེ། གལ་ཏེ་རྣམ་པར་ཆད་པ་རྟག་ཏུ་རང་ཉིད་མི་དམིགས་པ་ཡིན་པ་དེ་ལྟ་ན་ཡང་མཐའ་གཅིག་ཏུ་བྱ་བར་མི་ནུས་པའི་ཕྱིར་ན་རེས་འགའ་གཏན་དུ་རྣམ་པར་ཆད་བར་ཡང་འགྱུར་རོ། །དེ་ལྟ་ཡིན་ཏེ་རྣམ་པར་ཆད་པ་མེད་པར་མ་ངེས་པ་ཉིད་འཇིག་རྟེན་ཕ་རོལ་ཡོད་པའི་ཐ་སྙད་མེད་པར་གྲུབ་པ་སྙམ་དུ་འདོད་པ་ནི་སྡུག་བསྔལ་བས་བརྒལ་བར་བྱའི་ཕྱིར་བརྒལ་དཀའ་བའོ། །དེ་སུན་འབྱིན་པ་ནི་དེ་ཡང་མ་ཡིན་ཏེ་ཞེས་བྱ་བའོ། །དེ་ལྟ་ན་ཡང་སྔ་ན་མེད་པ་སྐྱེ་བ་འཐད་པར་དཀའ་བའི་ཕྱིར་རོ་སྙམ་དུ་དགོངས་པའོ། །དེས་ན་རྣམ་པར་ཆད་པ་ཙམ་ཁས་བླངས་ཀྱང་སྲིད་པ་མི་འགལ་ལོ་ཞེས་བྱ་བའི་དོན་ཏོ། །སྔོན་དང་ཕྱི་མ་དག་གི་མཐའ་རྣམ་པར་ཆད་པ་དམིགས་པ་མ་ཡིན་ནོ་ཞེས་བྱ་བའི་རྗེས་སུ་འཇུག་པ་དེ་ནི་སྔོན་གྱི་འདུ་བྱེད་མེད་པར་མ་ཡིན་ལ་དེ་བཞིན་དུ་འདུ་བྱེད་སྔ་མ་སྔ་མ་ཡང་ངོ༌། །དེས་ན་ཇི་ལྟར་སྔོན་བྱུང་བའི་མཐའ་རྣམ་པར་
མ་དམིགས་པ་དེ་བཞིན་དུ་ཕྱི་མར་གྱུར་པ་ཡང་ངོ༌། །འདི་ལྟར་དཔེར་ན་འདུ་བྱེད་སྔ་མ་སྔ་མ་རང་དང་རྗེས་སུ་མཐུན་པའི་རྣམ་པར་ཤེས་པ་མཚམས་མ་སྦྱར་བ་གནས་ལ་མི་དབང་བ་དེ་བཞིན་དུ་ཕྱི་མ་ཕྱི་མ་ཡང་མཚམས་མི་སྦྱར་བ་ཅི་ལྟར་ནུས་ཏེ། ཚོགས་པ་མཚུངས་པ་ཅན་ཡིན་པའི་ཕྱིར་རོ། །ཁྱད་པར་ཡོད་ན་ཡང་བརྗོད་ དགོས་སོ། །ཉོན་མོངས་པ ་དང་ལྡན་པ་ལ་སོགས་པ་ཐུན་མོང་ཉིད་ན་བཤད་པ་དེས་ན་སྔ་མ་དང་ཕྱི་མའི་མཐའ་གཉིས་ལ་རྣམ་པར་དབྱེ་བ་མེད་དོ། །རྣམ་པར་རྟོག་པ་གཉིས་པའི་འདུས་བྱས་ནས་བརྗོད་པ་ནི་གཞན་གྱིས་ནི་ཞེས་བྱ་བའོ། །དམིགས་བའི་མཚན་ཉིད་དུ་གྱུར་པ་མེད་པའི་ཕྱིར་ཞེས་བྱ་བ་ནི་གཞན་གྱི་སེམས་གཞན་ལའོ། །རྣལ་འབྱོར་བ་རྣམས་ལ་ནི་གཞན་གྱི་ཤེས་པ་དམིགས་པའི་མཚན་ཉིད་དུ་གྱུར་པ་ཁོ་ནའོ། །འོན་ཀྱང་དེ་དགག་པ་འཇུག་པ་དེ་ཡང་རིང་བ་ཁོ་ནའོ། །དེས་ན་ཤེས་པ་རྣམ་པར་ཆད་པ་ནི་རང་ངམ་གཞན་གྱིས་དམིགས་པ་མ་ཡིན་ནོ། །དེས་ན་རྣམ་པར་ཤེས་པ་རྣམ་པར་ཆད་པར་རྟོག་པ་མེད་དོ། །འོན་ཏེ་ཡང་འདོད་ཆགས་དང་བྲལ་བ་ནི་ཉོན་མོངས་པ་མ་ལུས་པ་བྲལ་བའི་ཕྱིར་ན་སེམས་ཀྱི་རྒྱུན་གནས་པ་ལ་ཉམས་པ་སྲིད་པའི་ཕྱིར་རྣམ་པར་ཆད་པར་འགྱུར་རོ་སྙམ་ན་འདོད་ཆགས་དང་བྲལ་བས་གསུངས་སོ། །ཅིའི་ཕྱིར་ཞེ་ན། རང་གི་དོན་ལ་ཞེས་གསུངས་སོ། །ཉེས་པ་དང་བྲལ་བ་ཡང་གཞན་དོན་ལ་མི་དགའ་བ་ནི་བྲལ་བ་མ་ཡིན་ཞིང་གཞན་གྱི་དོན་ལ་མི་དགའ་ན་ཡང་ཉེས་པ་མེད་བ་ཉིད་ཀྱང་འབྲེལ་པར་འབྱུང་བ་མ་ཡིན་ནོ་ཞེས་བྱ་བའི་དོན་ཏོ། །དེས་ན། གང་དག་བརྩེ་བ་ཆེན་པོ་ཅན། །གཞན་གྱི་དོར་ནི་བཞུགས་པ་ཡིན། །ཞེས་བྱ་བའི་ཚུལ་གྱིས་འདོད་ཆགས་དང་བྲལ་བ་ཉིད་ལ་ཉམས་དམས་པ་སྲིད་པས་རྒྱུན་ཆད་པ་ནི་མ་ཡིན་ནོ་ཞེས་བྱ་བ་དགོངས་པའོ། །འདིས་ནི་ཐེག་པ་གཅིག་པའི་ཕྱོགས་བསྟན་པ་ཡིན་ནོ། །ཐེག་པ་གསུམ་གྱི་ཕྱོགས་ཀྱང་གསུངས་པ་ནི་ཡང་ན་ཞེས་བྱ་བའོ། །སྐབས་ལ་བརྟེན་ནས་བརྗོད་པ་ནི། ཉེས་པ་མ་ཡིན་ནོ་ཞེས་བྱ་བའོ། །འདོད་ཆགས་དང་བྲལ་བའི་གནས་སྐབས་ན་ནི་འབྲས་བུ་སྐྱེད་མི་ནུས་པའི་སྐད་ཅིག་འཇོག་པས་རྒྱུན་ཆད་པ་ཡིན་དུ་ཆུག་མོད། དེས་ན་མཐའ་མེད་པ་ཉིད་ནི་ཀུན་ནས་ཉོན་མོངས་པའི་གནས་སྐབས་ལ་ལྟོས་ནས་
འདོད་པ་ཡིན་ནོ་ཞེས་བྱ་བའི་དོན་ཏོ། །སྐབས་ཉེ་བར་སྡུད་པ་ནི་དེའི་ཕྱིར་ཞེས་བྱ་བའོ། །འབྲུ་ལ་སོགས་པ་ལྟར་རྣམ་པར་ཤེས་པ་ཉེ་བར་ལེན་པ་ཉམས་པས་ལྡོག་པ་མ་ཡིན་ནོ། །གལ་ཏེ་ལུས་ཀྱང་ཉེ་བར་ལེན་པ་ཡིན་ལ། དེ་ལ་ནི་མེ་ལ་སོགས་པ་ཉམས་བ་ཡོད་པ་མ་ཡིན་ནམ་ཞེན་ལུས་ཞེས་གསུངས་སོ། །ལུས་ནི་ཉེ་བར་ལེན་པ་མ་ཡིན་ཏེ་མཚན་ཉིད་གཉི་ག་མེད་པའི་ཕྱིར་རོ། །འོ་ན་སེམས་གནོད་པར་བྱ་བ་ལྡོག་པར་འགྱུར་རོ་སྙམ་ན། སེམས་ཀྱང་ཞེས་གསུངས་སོ། །སེམས་ནི་ཉེ་བར་ལེན་པ་ཡིན་ཡང་གནོད་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ཡང་ཞེས་ཁོང་ནས་ཕྱུང་ལ་རྟེན་ལོག་པར་སྦྱར་རོ། །རེ་ཞིག་རྟེན་གྱི་དངོས་པོ་ཁས་བླངས་ནས་རང་ཉིད་རྩོད་པ་འདི་སེལ་བ་ཡིན་ཡང་གནོད་པ་མ་ཡིན་ནོ་ཞེས་རྣམ་པར་ཤེས་པ་ནི་རི་མོ་བཞིན་དུ་རྟེན་སོ་སོར་ངེས་པ་མ་ཡིན་ནོ་ཞེས་འབྲེལ་ཏོ། །ཅི་ལྟར་ཞེ་ན་གང་གང་གི་ཕྱིར་དང་པོའི་སྐྱེ་བར་སྐྱེ་བ་གཞན་གྱི་ལུས་དང་ལྷན་ཅིག་སྤྱོད་པའི་འདུ་བྱེད་པ་གང་ཡིན་པ་དེ་དང་རྗེས་སུ་འབྲེལ་པ་དང༌། རྨི་ལམ་གྱི་དེ་མ་ཐག་ཏུ་སད་པའི་གནས་སྐབས་སུ་འཇིགས་པ་དང་མྱ་ངན་ལ་སོགས་པས་རྨི་ལམ་གྱི་འདུ་བྱེད་གང་ཡིན་པ་དེ་དང་རྗེས་སུ་འབྲེལ་པར་དམིགས་པ་ཡིན་ནོ་ཞེས་བྱ་བ་ལྷག་མའི་རྟེན་སོ་སོར་ངེས་པ་མ་ཡིན་མོད། དེ་ལྟ་ན་ཡང་དེ་ཞིག་པས་ཅི་སྟེ་མི་འཇིག་ཅེ་ན། རྟེན་སོ་སོར་ངེས་པ་ཡིན་ནོ་ཞེས་གསུངས་སོ། །རང་གིས་སྤངས་ནས་ད་ནི་རྟེན་ཉིད་ཡོད་པ་མ་ཡིན་ནོ་ཞེས་སྟོན་པས་རྣམ་འགྲེལ་ལ་འགྲེལ་པ་ནི་གཞན་ཡང་ཞེས་བྱ་བའོ། །འོ་ན་ཇི་ལྟར་རི་མོ་ལ་སོགས་པ་འཇིག་སྙམ་པ་ལ། རི་མོ་ལ་སོགས་པ་ནི་ཞེས་གསུངས་སོ། །དེས་ན་ཞེས་བྱ་བ་ནི་ཐ་དད་པ་མ་ཡིན་པས་སོ། །དེའི་རྒྱུ་ཉིད་ནི་འཇིག་པའི་རྒྱུ་ཉིད་དོ། །གནས་པའི་རྒྱུ་དེས་ནི་གཞག་བར་བྱ་བའི་དངོས་པོ་ཅི་ཞིག་བྱས་ཀྱང་ཅི་ལྟར་མེད་པ་ལ་རྒྱུ་ཉིད་ཀྱི་དོན་མ་ཡིན། མེད་པ་ལ་ནི་རྒྱུ་དང་འབྲེལ་པ་ཡང་འཐད་པ་མ་ཡིན་ཏེ། འབྲེལ་བ་ནི་གཉིས་ཀྱི་ཆོས་ཡིན་པའི་ཕྱིར་རོ། །མེད་པ་ལ་ནི་རྒྱུས་ཅི་ཡང་བྱེད་པ་མ་ཡིན་ནོ། །དེ་ལྟ་ན་ཡང་བྱེད་པ་མེད་དོ་ཞེས་བྱ་བའི་དོན་ཅི་ཡིན་ཞིང་རྟེན་མ་ཡིན་པ་ཡང་ཇི་ལྟར་འགྱུར་ཞེ་ན་བདེན་ཏེ། དེ་ཁོ་ནར་ནི་མེད་པ་ལ་གཉི་གར་ཡང་མེད་དོ། །ཀུན་རྫོབ་ཏུ་ཡང་སྔར་མ་དམིགས་བ་ལས་འགའ་ཞིག་ཉེ་ན་ནི་ཉེ་བར་འགྱུར་བའི་
ཡོད་པ་ལ་མེད་པ་སྐྱེའོ། །ཇི་ལྟར་ཞེས་རྣམ་པར་འཇོག་པ་དེ་བཞིན་དུ་མེད་པ་ལ་རྒྱུ་ཡོད་དོ། །མེད་པ་རྒྱུ་ལ་ལྟོས་སོ་ཞེས་བརྗོད་པ་ཡིན་ནོ། །དེ་བཞིན་བརྟེན་བ་ནི་རྣམ་པར་གནས་པ་མ་ཡིན་ཏེ། དེའི་ཚེ་ནི་རྒྱུ་དང་འབྲས་བུའི་དངོས་པོ་ཉིད་དུ་འགྱུར་རོ། །ཡོད་པ་ཉིད་འགའ་ཞིག་ལ་བརྟེན་པ་ཡིན་ནོ་ཞེས་ཐ་སྙད་ཀྱང་བྱེད་པ་ཡིན་ནོ། །དེས་ན་མེད་པ་ལ་ནི་རྟེན་པར་རིགས་སོ་ཞེས་བྱ་བ་ཡིན་ནོ། །འོ་ན་ཡོད་པ་ཉིད་ལ་འགྱུར་རོ་ཞེ་ན། ཡོད་པ་ལ་ཡང་ཞེས་གསུངས་སོ། །དེ་ཉིད་ཅེས་བྱ་བ་ནི་གནས་པར་བྱ་བའོ། །དེ་ལྟར་ན་དེ་ཉིད་བྱས་མོད་ཅེ་ན་སྐྱོན་ཅི་ཡོད་ཞེ་ན། ཡོད་པ་ནི་ཞེས་གསུངས་སོ། །ཐ་མི་དད་པའི་ཕྱོགས་ལ་ཉེས་པ་བརྗོད་ནས་ཐ་དད་པའི་ཕྱོགས་སུན་དབྱུང་བའི་ཕྱིར་དོགས་པ་བསུ་བ་ནི་འོན་ཏེ་ཞེས་བྱ་བའོ། །ཅུང་ཟད་ཡོད་པས་ཞེས་བྱ་བ་ནི་གནས་པའི་རང་བཞིན་ནོ། །རྟེན་ལ་སོགས་པ་ཞེས་སོགས་པའི་སྒྲས་ནི་ཕན་འདོགས་པ་ལ་སོགས་བའོ། །གལ་ཏེ་གནས་པ་གནས་པར་བྱ་བ་ལས་ཐ་མི་དད་པ་ཁོ་ན་མ་ཡིན་ནམ། དེས་ན་དེ་བྱས་ན་དངོས་པོ་མ་བྱས་པ་ཇི་ལྟར་འགྱུར་ཞེ་ན། གནས་པ་ནི་ཞེས་གསུངས་སོ། །རང་གི་དང་བའི་ཞེས་བྱ་བ་ནི་སྐབས་ཀྱིས་གནས་པར་བྱ་བ་ལས་སོ། །ཅིའི་ཕྱིར་ཞེ་ན། ལྟུང་བ་ཞེས་གསུངས་སོ། །ཐ་མི་དད་ན་གཞན་ཉིད་ལ་ཉེས་པ་བརྗོད་པ་ནི་གལ་ཏེ་ཞེས་བྱ་བའོ། །གནས་པར་བྱ་བ་དེའོ། །རྣམ་འགྲེལ་གྱི་ལྷག་མ་ཕྱེད་པོ་རྣམ་པར་འགྲེལ་པས་ལན་འདེབས་པ་ནི་དེ་ནི་ཞེས་བྱ་བའི་དངོས་པོ་ཞེས་པ་ནི་གནས་གང་ཡིན་པའོ། །འདིར་ཐ་དད་བ་དང་ཐ་མི་དད་པའི་ཕྱོགས་དག་ལ་ནི་ཉེས་པ་བརྗོད་ཟིན་པ་ཁོ་ནའོ། །འོན་ཀྱང་ཉེས་པ་ལྷག་པ་བརྗོད་པའི་དོན་དུ་ཅི་ཞེས་བྱ་བའོ། །གཞན་དུ་ཞེས་བྱ་བ་ནི་མ་སྐྱེས་པ་ནའོ། །དེ་ལ་དེ་མ་ཐག་པའི་རྣམ་པར་རྟོག་པའི་དབང་དུ་བྱས་ནས་གསུངས་བ་ནི་སྐྱེས་པའི་སྔོན་རོལ་དུ་ནི་དངོས་པོ་མ་ཡིན་ཏེ་ཞེས་བྱ་བ་ནི་གནས་པ་ཞེས་བྱ་བར་འབྲེལ་ཏོ། །ཅིའི་ཕྱིར་ཞེ་ན། སྐབས་ཀྱིས་གནས་པ་མེད་བ་ཉིད་ཀྱི་ཕྱིར་རོ། །རྣམ་པར་རྟོག་པ་དང་པོ་སེལ་བར་བྱེད་པ་ནི་ཐ་དད་པ་ཞེས་བྱ་བའོ། །ཅིའི་ཕྱིར་ཞེ་ན། དེའི་བདག་ཉིད་དང་ཞེས་གསུངས་སོ། །འབྲེལ་པ་མེད་བ་མ་གྲུབ་པར་དོགས་པ་བསུ་བ་ནི། དེ་དང་འདྲེས་པ་ཞེས་བྱ་བའོ། །སུན་འབྱིན་པ་ནི་དེ་དང་ཞེས་བྱ་བའོ། །གནས་པར་བྱ་བ་དེར་རོ། །ཉེས་པ་གཞན་
ཡང་བརྗོད་པ་ནི། གཞན་ཡིན་ན་ཞེས་བྱ་བའི་དོགས་པ་བསུ་བ་ནི་འཕྲོད་པ་འདུ་པས་ནི་དངོས་པོའི་རང་བཞིན་སེལ་བ་མ་ཡིན་ནོ་སྙམ་དུ་དགོངས་པའོ། །གཞན་དུ་ཞེས་བྱ་བ་ནི་ཐ་མི་དད་པར་རོ། །དེའི་ཚེ་གནས་བར་བྱ་བ་ལས་གནས་པ་གཞན་མ་ཡིན་ནོ་ཞེས་བྱ་བ་ནི་སྐབས་ལས་སོ། །དེ་ལྟ་ན་ཡང་སྔར་གྱི་སྐྱོན་ཉིད་དོ་སྙམ་དུ་དགོངས་པའོ། །གཞན་དུ་ཁྱད་པར་དོགས་པར་བྱེད་པ་ནི། སོ་སོ་བ་དང་ཞེས་བྱ་བའོ། །སོ་སོ་བར་གྲུབ་ན་ནི་ལྡན་པ་ཡིན་ལ། སོ་སོ་བ་མ་ཡིན་པར་གྲུབ་ན་ནི་འདུ་བ་ཡིན་ནོ། །སོ་སོ་བ་མ་ཡིན་པར་གྲུབ་ན་ནི་སོ་སོར་མི་རྟོག་པའམ་སོ་སོར་མ་སྐྱེས་པའོ། །དེ་ལ་རེ་ཞིག་ཕྱོགས་གཉིས་པ་ཉིད་སེལ་བ་ནི་ཤིང་ལ་སོགས་པའི་ཞེས་གསུངས་སོ། །ཡལ་ག་སོ་སོར་སྐྱེས་པ་གཉིས་འདྲེས་པ་ནི་མ་ཡིན་གྱིས་འོན་ཀྱང་ལྷན་ཅིག་ཁོ་ནར་སྐྱེས་པ་ཡིན་ནོ། །འདི་ལའོ་ཞེས་བྱ་བ་ནི་གཞན་གྱི་སྟེ་ཡལ་ག་འདི་ལ་ཡང་འདི་ཞེས་མི་རྟོག་པའི་ཕྱིར་རོ་ཞེ་ན། འགོག་པ་ནི་མ་ཡིན་ཏེ་ཞེས་བྱ་བའོ། །ཅིའི་ཕྱིར་ཞེ་ན། ལྡན་པ་ཉིད་ལ་གཉིས་མཐོང་བའི་ཕྱིར་རོ། །འདུ་བ་ལ་ནི་མ་ཡིན་ཏེ་བཟློག་པའི་ཕྱིར་རོ། །ཐལ་བའི་ཕྱིར་རོ་ཞེས་བྱ་བ་ནི་རབ་ཏུ་འབྲེལ་པ་སྟེ་དེའི་ཕྱིར་རོ། །འདི་ལའོ་སྙམ་པའི་བློའི་རྒྱུ་ནི་གཉིས་མཐོང་བ་ཡིན་ལ། དེ་ལ་ཡང་ལྡན་པའི་ཡུལ་ལ་ཡིན་ནོ། །དེས་ན་དེ་ཉིད་དུ་འདི་ལྟ་བུའོ་སྙམ་པའི་བློ་འབྲེལ་བར་འགྱུར་རོ། །འདུ་བའི་ཡུལ་ལ་ནི་དེ་མེད་པའི་ཕྱིར་མེད་དོ། །དེས་ན་དེར་ནི་བ་ལང་འདི་ལ་རིགས་ཞེས་བྱ་བ་འདི་རང་གི་རྟོག་པ་ཙམ་ཡིན་ནོ། །ཅིའི་ཕྱིར་ཞེ་ན། མགོ་ལ་གཉིས་མཐོང་བ་ལས་འགྱུར་དེ་ཡི། །ཡུལ་ལས་འགར་ཡང་གཉིས་མཐོང་མེད་དེས་ན། །རང་གི་རྟོག་པ་ཙམ་ཞིག་ཐབས་སུ་འགྱུར། །ཞེས་བྱ་བ་དགོངས་པའོ། །རྣམ་པར་རྟོག་པ་དང་པོ་སློང་བ་ནི་འོན་ཏེ་ཞེས་བྱ་བའོ། །འདུ་བ་ཅན་གྱི་ཡན་ལག་གང་ཡིན་པ་དག་སྟེ་གང་དུ་འདུ་བར་འགྱུར་བའི་འབྲས་བུའི་རྫས་སྐྱེས་པའོ། །འདི་ཡང་ཉེ་བར་མཚོན་པ་སྟེ། རྫས་གང་ལ་ཡོན་ཏན་ལ་སོགས་འདུས་པར་འགྱུར་བའམ། གང་དུ་སྤྱི་ལ་སོགས་པ་འདུ་བར་འགྱུར་བའམ། ཡང་ན་གང་ལ་རྫས་ལ་སོགས་པ་ལ་ལྟོས་པའི་འདུས་པ་ཉིད་ཡོད་པ་སྟེ། དེ་དང་སོ་སོར་མ་རྟོགས་པ་ཉིད་ནི་དང་པོ་མ་ཡིན་པར་གྲུབ་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ཡང་ཞེས་བྱ་བ་ནི་རང་གི་འདུ་བ་ཅན་རྣམས་འདུས་པ་ཉིད་ཡིན་
ཡང་འདིར་འདི་རང་གི་འདུ་བ་ཅན་གྱི་ཡན་ལག་འདུས་སོ་ཞེས་དེ་ལྟ་བུའི་རང་བཞིན་ཅན་ཐ་དད་པར་རྟོགས་པས་སོ། །དོན་འདི་ཡིན་ཏེ་གལ་ཏེ་གཉིས་རང་གི་ངོ་བོས་སྣང་ན། དེའི་ཚེ་སོ་སོར་མ་རྟོགས་པ་འདུ་བར་རྣམ་པར་འཇོག་འདོད་བའི་འདུ་བའི་གཏན་གང་ན་ཡོད། འོན་ཏེ་ཐ་དད་པར་སྣང་བ་མེད་པ་ཉིད་ཡིན་ན། དེ་ལྟ་ན་འང་འདི་ལའོ་སྙམ་པའི་རྟོགས་པ་མེད་པའི་ཕྱིར་རོ། །དེ་ལྟར་ཕྱོགས་གཅིག་གིས་འབྱར་བ་ཁས་བླངས་ནས། ལྡན་པ་དང་འདུ་བ་དག་ཁྱད་པར་འགའ་ཡང་མེད་དོ་ཞེས་བསྟན་ནས་འབྱར་བར་ཡང་མི་འཐད་དོ་ཞེས་སྟོན་པ་ནི། ཡན་ལག་མེད་པའི་ཞེས་གསུངས་སོ། །ཡན་ལག་མེད་པ་གནས་པའི་རང་བཞིན་ཅན་གཞན་གྱིས་ཁས་བླངས་པ་ནི་མ་དམིགས་པའི་ཕྱིར་ན་མེད་པ་ཁོ་ནའོ། །ཡང་ན་ཡོད་དུ་ཆུག་པ་དེ་ལྟ་ན་ཡང་དེ་ནི་ཡན་ལག་དང་འབྱར་བ་མ་ཡིན་ནོ། །ཡན་ལག་ཅན་ནི་ཡོད་པར་ཁས་མ་བླངས་པའི་ཕྱིར་ཡན་ལག་ཅན་དང་ཞེས་ནི་མ་གསུངས་སོ། །ཅིའི་ཕྱིར་ཞེ་ན། ཡན་ལག་དང་ཞེས་གསུངས་སོ། །ཐ་དད་པར་རྟོགས་པར་ཐལ་བ་ནི་གནས་དང་གནས་པ་ཅན་ཏེ། བུམ་པ་དང་སྣམ་བུ་བཞིན་ནོ་ཞེས་སྐབས་ཀྱིས་སོ། །བརྒྱ་ལ་ཕ་རོལ་པོ་ཐ་དད་པར་རྟོགས་པར་ཁས་ལེན་དུ་འོང་ངོ་ཞེས་དོགས་པ་བསུ་ནས་རྗེས་སུ་ཞུགས་པ་དང་ཞེས་གསུངས་སོ། །གནས་པ་ལ་སོགས་པའི་གནས་སྐབས་ནི་རྗེས་སུ་མ་ཞུགས་པ་ཡིན་ལ། རྫས་ནི་གནས་སྐབས་ཐམས་ཅད་དུ་རྗེས་སུ་ཞུགས་པ་ཡིན་ནོ། །རྣམ་པ་ཐམས་ཅད་དུ་རྟོག་པའི་དབྱེ་བ་མེད་ན་གང་ཞིག་གང་དུ་འདུ་བ་ཡིན། དེ་ལྟ་བུའི་ཐ་དད་པ་ནི་རྟོགས་ཀྱང་ཐ་དད་པར་གྲུབ་པ་མ་ཡིན་ཏེ། ཡུལ་དང་དུས་དག་གི་མངོན་སུམ་གྱི་རྣམ་པ་ཐ་དད་པར་མེད་པའི་ཕྱིར་རོ་ཞེ་ན། དེ་འགོག་པ་ནི་འཐད་པ་མ་ཡིན་ནོ་ཞེས་བྱ་བའོ། །ཅིའི་ཕྱིར་ཞེ་ན། མངོན་སུམ་གྱིས་ནི་ཞེས་གསུངས་ཏེ། གནས་པ་ལས་གཞན་ནི་མི་དམིགས་པའི་ཕྱིར་རོ་ཞེས་བྱ་བའི་དོན་ཏོ། །གང་གི་ཕྱིར་དེ་ལྟར་གཞི་ལས་ཐ་དད་པ་ཐ་མི་དད་པ་གནས་པར་མི་འཐད། ལྟན་ཅིག་བྱེད་པ་ཞེས་བྱ་བ་ལ་སོགས་པའོ། །དེ་ལྟ་ཡིན་ན་ཡང་ཞེས་བྱ་བ་ནི་ལྷག་མའོ། །གནས་སྐབས་བྱེད་པ་ལོག་ན་ནི་གནས་སྐབས་དེ་ཉིད་ལོག་པར་ཟད་དོ་ཞེས་བྱ་བར་དགོངས་པའོ། །འོན་ཏེ་ལུས་ནི་ཉེ་བར་ལེན་པའི་རྒྱུ་ཉིད་ཡིན་གྱི་ཁྱད་པར་གྱི་རྒྱུ་ནི་མ་ཡིན་ནོ་སྙམ་ན། ལུས་ནི་ཞེས་གསུངས་ཏེ། ཉེ་བར་ལེན་
པའི་མཚན་ཉིད་གང་ཡང་མེད་པའི་ཕྱིར་རོ། །དེས་ན་ལུས་དེ་ལོག་བ་ནི་རྣམ་པར་ཤེས་པ་ཙམ་ལྡོག་པ་མ་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་སུན་འབྱིན་པ་གཞན་ནོ། །རྣམ་པར་ཤེས་པ་ལ་སོགས་པ་གང་ལའོ། །འཇིག་པ་དེའི་གལ་ཏེ་གནས་པ་ནི་མི་གཡོ་བ་དང་མི་འཇིག་པ་ལ་བརྗོད་པ་མ་ཡིན་ནམ། དེ་ལ་རྟེན་གྱིས་ནི་མི་གཡོ་བའི་རང་བཞིན་གྱིས་གནས་པ་ཉིད་བྱེད་ཀྱི་མི་འཇིག་པའི་རང་བཞིན་ནི་མི་བྱེད་པའི་ཕྱི་མ་འདི་ཅི་ལྟར་འགྱུར་ཞེ་ན། བརྗོད་པ་མི་གཡོ་བ་ཞེས་བྱ་བ་ནི་གནས་པ་དེ་ཉིད་ན་ཡོད་པ་མ་ཡིན་ནོ། །འཇིག་པ་ཡང་ཡོད་པ་དང་འགལ་པ་ཡིན་ཏེ། འཇིག་ན་གནས་དེ་ཡང་ཡོད་མི་སྲིད་དོ། །དེས་ན་གནས་པ་ནི་འཇིག་པ་དང་འགལ་བས་ཁྱབ་པ་ཡིན་པའི་ཕྱིར་ཐལ་བར་འགྱུར་བ་རིགས་སོ། །དེ་ལ་འང་ཐལ་བར་མཚུངས་པ་ཡིན་ནོ་ཞེས་བྱ་བ་ནི་འཇིག་པ་དེ་ཡང་དངོས་པོ་ལས་ཐ་དད་པའམ་ཐ་མི་དད་པ་ཡིན། དེ་ལ་འཇིག་པས་ནི་དངོས་པོ་ཉིད་འཇིག་པ་ཡིན་ན་དེའི་ཚེ་འདི་རང་གི་རྒྱུ་ཅི་ལྟར་སྐྱེད་པ་དེ་ཁོ་ན་འདྲ་བ་ཉིད་ཡིན་པའི་ཕྱིར་གནས་པའི་རྒྱུ་རྟེན་གྱིས་ཅི་ཞིག་བྱ། ཅིའི་ཕྱིར་འཇིག་པ་མེད་པར་ཐལ་སྙམ་ན། གནས་པར་ཞེས་གསུངས་སོ། །འོན་ཏེ་ཞེས་བྱ་བ་ལ་སོགས་པས་ནི་རྣམ་འགྲེལ་གྱི་ལྷག་མ་ལ་འཇུག་པའོ། །ཐ་མི་དད་པའི་ཕྱོགས་ལ་ཉེས་པ་བརྗོད་ནས་ཐ་དད་པའི་ཕྱོགས་ལ་བརྗོད་པ་ནི། དངོས་པོ་ལས་འཇིག་པ་གཞན་ཡིན་ན་ཡང་འཇིག་པའི་རྒྱུ་དེས་དངོས་པོ་ལ་ཅི་ཞིག་བྱས་ནས་གང་གིས་དེའི་འཇིག་པར་བྱེད་པར་འགྱུར། འཇིག་པ་བྱས་པ་དེས་ན་འདི་འཇིག་པ་བྱས་པ་ཡིན་ནོ། །འཇིག་པ་བཞིན་ཞེས་གསུངས་སོ། །དེས་ན་ཞེས་བྱ་བས་འཇིག་བར་བྱེད་པས་ནའོ། །ཅུང་ཟད་ཀྱང་བྱེད་པ་མ་ཡིན་པ་དེའི་ཕྱིར་རོ། །གཉི་ག་ལྟར་ཡང་འཇིག་པར་བྱེད་པ་ཅུང་ཟད་ཀྱང་མི་བྱེད་པ་ཉིད་མཇུག་སྡུད་པ་ནི་གནས་པའི་རྒྱུས་ཅི་ཞིག་བྱ་ཞེས་བྱ་བའོ། །འཇིག་པར་བྱེད་པར་ཐལ་བར་འགྱུར། །གལ་ཏེ་དེ་འཇིག་རྒྱུ་ལས་འདོད། །གནས་པའི་རྒྱུས་ཀྱང་ཅི་ཞིག་བྱ། །ཞེས་བྱ་བ་འདི་ལ་བཤད་པ་གཞན་གསུངས་ན་ཡང་ན་ཞེས་བྱ་བའོ། །བཤད་པ་གཉི་ག་གཞན་གྱི་ལན་གྱི་ལན་གྱི་དོགས་པ་བསུ་བ་ནི། གལ་ཏེ་ཞེས་འཇིག་རྒྱུ་ཞེས་སྨོས་སོ། །གནས་པར་བྱེད་པ་དེས་འཇིག་པར་བྱེད་པ་དང་ཕྲད་ཀྱི་བར་དུ་གནས་པར་བྱ་བ་རྣམ་པར་གནས་པར་བྱ་བ་ཡིན་ཏེ། དེ་ལྟ་མ་ཡིན་ན་ནི་འཇིག་བྱེད་འོང་བ་ལ་མི་ལྟོས་པ་ཉིད་དུ་འཇུག་པར་འགྱུར་རོ་སྙམ་
ན། ལན་དུ་འཇིག་པ་དངོས་ཆོས་ཉིད། །ཅེས་བྱ་བའི་དགོངས་པ་འདི་ཡིན་ཏེ། གལ་ཏེ་གནས་པར་བྱ་བ་གནས་པའི་དོན་དུ་གནས་པར་བྱེད་པ་མ་ཡིན་ན་དེའི་ཚེ་འཇིག་པའི་རྒྱུ་མེད་པར་རང་ཉིད་འཇིག་པར་འགྱུར་ལ། བཟློག་ན་ནི་འཇིག་བའི་རྒྱུ་ལས་འཇིག་པའི་ཕྱིར་གནས་པར་བྱེད་པ་འབྲས་བུ་དང་བཅས་པར་འགྱུར་རོ། །དེ་ལྟ་ན་ཡང་འཇིག་པ་རྒྱུ་མེད་པར་ཐལ་བ་དེས་ན་འཇིག་པ་དངོས་པོའི་ཆོས་ཉིད་དོ། །ཡོད་པའི་དོན་ལ་འཇིག་པ་འདི་པ་གནོད་པ་ཡོད་པ་མ་ཡིན་པའི་ཕྱིར་ན། གནས་པའི་རྒྱུས་ནི་ཅི་ཞིག་བྱ། །ཞེས་བྱ་བ་འདི་གནས་སོ། །རེ་ཞིག་རྩོད་པའི་ཆ་རྣམ་པར་འགྲེལ་བ་ནི་གནས་པར་བྱེད་པ་མེད་ན་ཞེས་བྱ་བའོ། །གང་གི་ཕྱིར་གནས་པར་བྱེད་པ་མེད་བར་འཇིག་པ་གང་ཡིན་པ་དེ་ནི་འཇིག་བྱེད་མེད་པར་རང་ཉིད་འགྱུར་རོ་ཞེས་བྱ་བའི་དོན་ཏེ། གལ་ཏེ་དེ་ལྟ་ཡིན་མོད་དེ་ལྟ་ན་ཡང་གནས་པར་བྱེད་པར་བྱེད་པ་ཇི་ལྟར་ཉེ་བར་སྦྱོར་བ་ཡིན་སྙམ་ན། གནས་པར་བྱེད་པ་ཡོད་ན། དངོས་པོ་འཇིག་གི་འཇིག་པའི་རྒྱུ་མེད་པར་ནི་མ་ཡིན་ནོ། །གྲུབ་པའི་མཐའ་རྣམ་པར་གྲོལ་བའི་དོན་དུ་གསུངས་པ་ནི་དེ་ལྟ་ན་ཡང་ཞེས་བྱ་བ་སྟེ། གནས་པར་བྱེད་པ་མེད་ན་རང་ཉིད་འཇིག་བར་ཁས་བླངས་ནས་འོ་ན་འཇིག་བ་ཞེས་བྱ་བ་ལ་སོགས་པ་རྟོགས་པར་སླའོ། །འདི་ཞེས་བྱ་བ་ནི་འཇིག་པའོ། །འོན་ཏེ་ཞེས་བྱ་བ་ནི་གཞན་གྱིའོ། །ལན་དུ་འཇིག་པའི་གེགས་དེ་ཡང་ཞེས་བྱ་བྱ་བའོ། །འཇིག་པའི་གེགས་དེ་ཡང་ཞེས་བྱ་བ་ནི་འཇིག་པ་ལ་གནོད་པར་བྱེད་པའོ། །འོན་ཏེ་ཞེས་བྱ་བ་ནི་གཞན་གྱིའོ། །གཞན་དུ་ཞེས་བྱ་བ་འཇིག་པ་མ་ཡིན་པར་རོ། །ལན་དུ་དེའི་ཞེས་བྱ་བ་ལ་སོགས་པའོ། །རྒྱུ་མེད་པ་ཅན་ཞེས་བྱ་བ་ནི་རྒྱུ་མི་ནུས་པ་དང་དོན་མེད་པའི་ཉེས་པས་ཟིན་པའི་ཕྱིར་རོ་སྙམ་དུ་དགོངས་པའོ། །སུན་འབྱིན་པ་གཞན་ཡང་བརྗོད་པ་ནི། དེ་ཡང་ཞེས་བྱ་བ་སྟེ་འཇིག་པ་ཡང་ངོ༌། །དེས་ན་འཇིག་པ་དངོས་ཆོས་ཉིད། །ཅེས་བྱ་བ་མ་གཏོགས་པར་ལྷག་མ་ལ་བཤད་པ་གཞན་གསུངས་པ་ན་ཡང་ན་ཞེས་བྱ་བའོ། །འཇིག་པར་བྱ་བ་དང་ཕྲད་ཀྱི་བར་དུ་མི་འཇིག་པར་གནས་པར་བྱེད་པ་ལས་གནས་པ་ཞེས་བྱ་བ་གང་ཡིན། དེ་ལྟ་ཡིན་ན་མི་འཇིག་པར་སྐྱེས་པས་ཞེས་བྱ་བའི་དོན་ནི་འདི་ཡིན་ཏེ། བརྟགས་པ་ནི་སྐབས་ཀྱི་རྟེན་པ་ལ། ཕྱིན་ཅི་ལོག་ཏུ་རྟོག་བ་ཞེས་བྱ་བ་ནི། རྒྱུ་དང་འབྲས་བུའི་དངོས་པོ་ལ་རྟེན་དང་བརྟེན་པའི་དངོས་པོ་གཞན་མ་ཡིན་ནོ་ཞེས་བྱ་བར་རོ། །ཐོག་མ་མེད་པའི་བག་
ཆགས་ཀྱི་མཐུ་ལས་ཞེས་བྱ་བ་འདིས་བཟུང་བའི་དོན་ཉིད་གསལ་འདེབས་པ་ནི་དེ་ཉིད་ཀྱི་ཕྱིར་ཞེས་བྱ་བའོ། །དེ་ཉིད་གཞུང་འཛུགས་པ་འདི་ལྟར་ཞེས་བྱ་བའོ། །ཡིད་ཙམ་ལ་བརྟེན་པ་ནི་ཡིད་ཀྱིའོ། །གནས་པར་བྱེད་པ་ལ་འཇིག་པའི་རྒྱུ་དང་བྲལ་བའི་མཐར་ཐུག་པར་སུས་ཀྱང་བཟློག་པར་ནུས་པ་མ་ཡིན་ནོ། །དེས་ན་སྐད་ཅིག་གཉིས་པ་ལ་སོགས་པའི་དུས་སུ་གནས་པར་བྱེད་པ་དོན་མེད་དོ་ཞེས་བྱ་བ་ཡིན་ནོ། །འོན་ཏེ་མི་འཇིག་པའི་ཕྱིར་མེད་པ་མ་ཡིན་མོད། ལྟུང་བ་ནི་ལྡོག་ཏུ་མེད་པའི་ཕྱིར་རྟེན་ལ་ལྟོས་སོ་ཞེ་ན་མ་ཡིན་ཏེ། ལྟུང་བ་ཡང་རང་གི་ངོ་བོ་ལས་འཕོ་བའི་རང་བཞིན་ཡིན་པའི་ཕྱིར་རོ། །འོན་ཏེ་ཞེས་བྱ་བ་ནི་གཞན་གྱིའོ། །སྐད་ཅིག་གནས་པར་ཡང་གནས་པར་བྱེད་པ་ཡོད་པར་ཁས་བླངས་ཏེ། དེ་ལྟ་མ་ཡིན་ན་གནས་པར་བྱ་བར་མི་འགྱུར་རོ་སྙམ་དུ་དགོངས་པའོ། །ལན་ནི་དེ་ལྟ་ན་ཞེས་བྱ་བའོ། །དེ་ལྟ་ཡིན་ན་གནས་པར་བྱེད་པ་ལས་སོ་སོར་མི་འཇིག་པའི་དངོས་པོ་གཞན་དང་གཞན་སྐྱེ་བར་འགྱུར་རོ། །དེ་ལྟ་ན་ཡང་གནས་པའི་རྒྱུས་ཅི་བྱ་སྙམ་དུ་དགོངས་པའོ། །གཞན་ཡང་ཇི་ལྟར་གནས་པར་བྱེད་པ་གནས་པ་དེ་བཞིན་དུ་གནས་པར་བྱ་བར་ཡང་འགྱུར་རོ་ཞེས་བརྗོད་པ་ནི་གནས་པའི་ཞེས་བྱ་བའོ། །ངག་འདིར་གནས་པ་པོ་གཞན་དང་གཞན་ཁས་ལེན་རྟེན་བཅས་ཐམས་ཅད་གནས་དང་གནས་ལྡན་ཞེས་བྱ་བ་ལ་སོགས་པའི་རྣམ་འགྲེལ་ཉིད་འབྱུང་བར་འགྱུར་བའི་ཕྱིར་ལན་དོགས་པར་བྱེད་པ་ནི་རང་གི་རྒྱུས་བྱས་སོ་ཞེ་ན་ཞེས་བྱ་བའོ། །ལན་དུ་གནས་པར་བྱ་བའི་ཡང་ཞེས་བྱ་བའོ། །དེ་ལྟར་ཞེས་བྱས་པ་རྒྱུར་བྱས་པར་རོ། །རྟེན་འགོག་པ་ལ་མངོན་སུམ་དང་འགལ་བའི་བརྗོད་པའི་དོགས་པ་བསུ་བ་ནི། ཅི་སྟེ་ཡང་ས་ཕྱོགས་ཞེས་བྱ་བའོ། །མཐོང་བ་ནི་མངོན་སུམ་གྱིས་ཡུལ་དུ་བྱས་པའོ། །རྣམ་པར་རྟོག་པ་རྒྱས་ཀྱང་ཞེས་བྱ་བ་ནི་ཅི་ཡོད་དམ། དེ་སྟེ་མེད་ཅེས་བྱ་བ་ལ་སོགས་པའི་རྣམ་པར་རྟོག་པའི་སྤྲོས་པའོ། །རྣམ་པར་རྟོག་པ་ལ་ནི་རྗེས་སུ་དཔག་པའི་དངོས་པོས་བྱས་པ་ཉིད་བླང་བར་བྱ་བ་ཡིན་གྱི་མངོན་སུམ་གྱིས་གནོད་པའི་ཉེས་པ་ཡོད་པར་དོགས་ན་རང་ཉིད་ནི་ཅི་ཡང་མ་ཡིན་ནོ། །དེས་ན་དེ་བསྒྲུབ་པའམ་གནོད་ན་ནི་ངེས་པ་ཁོ་ནར་སྐབས་ཡོད་པར་མ་ཡིན་ནོ་ཞེས་བྱ་བར་གདོན་མི་ཟའོ། །དོན་དང་ཞེས་བྱ་བ་ནི། གསོག་ཏུ་གྱུར་ཏོ་ཞེས་བྱ་བ་འཐད་དོ། །
འདི་ལ་མཚུངས་ཞེས་བྱ་བ་ནི། ཡོད་མེད་དག་རྟེན་མེད་ཕྱིར་རོ། །ཞེས་བྱ་བ་ལ་སོགས་པའི་སུན་འབྱིན་པའོ། །གལ་ཏེ་རེ་ཞིག་རྟེན་དང་བརྟེན་པའི་ཐ་སྙད་འདི་ནི་ཡོད་པ་ཁོ་ན་ཡིན་ལ་དེ་ལ་ཡུལ་ངེས་པ་ཅན་ཡིན་པས་རྒྱུ་མཚན་མེད་པར་ཡང་མ་ཡིན་ནོ། །དེས་ན་འདི་ལ་རྒྱུ་མཚན་ཅི་ཡིན་སྙམ་ན། དངོས་རྣམས་ཞེས་གསུངས་ཏེ། དངོས་པོ་རྣམས་སྐད་ཅིག་སོར་འཇོག་པ་ཡིན་པར་རིགས་པ་ལས་འོངས་པ་ཡིན་པ་ན། དངོས་པོའི་རྒྱུ་གང་ཡིན་པ་དེ་ལྟར་ཏེ་ཉེ་བར་ལེན་པའི་ཡུལ་ཡོངས་སུ་མ་སྤངས་པར་སྐྱེ་བ་དེའི་རྒྱུ་ཡིན་པའི་ཕྱིར་ན་རྟེན་ཡིན་ནོ་ཞེས་བརྗོད་དོ། །དེས་ན་གནས་པར་བྱེད་པ་ནི་སྐྱེད་བྱེད་ཁོ་ན་ཡིན་ཏེ། གཞན་ལས་གྲུབ་ན་གནས་པ་ནི་མ་ཡིན་ནོ། །དེ་ལྟ་མ་ཡིན་ན་ནི་མི་འཐད་དོ། །བརྟེན་པ་ལ་ནི་གནས་པར་བྱེད་པ་ལས་ཅིར་ཡང་འགྱུར་བ་མ་ཡིན་ལ། མི་བརྟན་པ་ལ་ཡང་བསྐྱེད་པ་ལས་མ་གཏོགས་པའི་བྱ་བ་མེད་པ་ལ་མ་ཡིན་ཏེ། ཕན་འདོགས་པ་མེད་པ་ཉིད་ཀྱི་ཕྱིར་རོ། །ཡང་ན་འགྲོ་བའི་གེགས་བྱེད་པའི་ཕྱིར་ནི་རྫས་ལྕི་བ་རྣམས་ལ་རྟེན་ཡོང་དུ་ཆུག་ཀྱང༌། བློ་ལ་སོགས་པ་ལ་ནི་མ་ཡིན་ཏེ། བཟློག་པའི་ཕྱིར་རོ་ཞེས་བརྟེན་པ་ནི། འབོ་བ་ཡིས་ནི་གེགས་བྱེད་ཕྱིར། །ཞེས་བྱ་བའོ། །ཆུ་ལ་སོགས་པ་ནི་ཞེས་བྱ་བ་ནི་ཁད་ཀྱིས་འཆད་པར་བྱེད་པའོ། །མཐོང་བ་མེད་དོ་ཞེས་བྱ་བ་ནི་མ་གྲུབ་པའོ། །མཐོང་བ་འགལ་བའི་ཕྱིར་རོ་ཞེས་བྱ་བ་འདི་ཕྱིན་ཅི་ལོག་ཏུ་བསྟན་པའི་དོན་དུ་ཇི་སྐད་བརྗོད་པ་ཡིན་ནོ། །གལ་ཏེ་ཞེས་བྱ་བ་ནི་གཞན་གྱིའོ། །མ་མཐོང་བ་ཉིད་ལ་ཞེས་བྱ་བ་ནི་ལན་ནོ། །དངོས་པོ་གཉིས་ཀྱི་རང་བཞིན་ལས་གཞན་ནི་རྟེན་དང་བརྟེན་པའི་དངོས་པོ་ཡང་དམིགས་པའི་སྤྱོད་ཡུལ་དུ་གྱུར་པ་མེད་དོ། །དེ་ཉིད་སྟོན་པ་ནི་བྱ་བའི་རྟེན་གང་ཡིན་པ་དེ་ནི་བྱེད་པ་པོ་དང་ལས་དག་གིས་འཛིན་པ་ལས་ཡིན་ནོ། །བྱ་བ་ནི་བྱེད་པ་པོའམ་ལས་ལ་གནས་པ་ཡིན་ཏེ། ལས་ལ་སོགས་པ་བརྟེན་པ་དང་བྲལ་བར་མི་སྲིད་པའི་ཕྱིར་རོ། །དེས་ན་བྱེད་པ་པོ་དང་ལས་ཀྱིས་འཛིན་པ་ཉིད་ལས་བྱ་པའི་རྟེན་ཡིན་ནོ་ཞེས་བྱ་བ་ནི་ལུགས་ཡིན་ཏེ་རྒོལ་བ་ཐམས་ཅད་ཀྱིས་འདོད་པ་ཡིན་ནོ། །ལུགས་འདི་ནི་རྣམ་པར་དཔྱད་ན་མེད་པ་ཉིད་དོ། །ཅིའི་ཕྱིར་ཞེ་ན། འཛིན་པའི་ཕྱིར་ཞེས་གསུངས་སོ། །གང་འཛིན་པ་དེ་མྱུར་བར་མ་དམིགས་པ་ཅིའི་ཕྱིར་ཞེ་ན། ལྟུང་བ་དང་མི་ལྟུང་བདག་ཅེས་གསུངས་སོ།།
རིགས་པ་འདི་དག་གིས་ཅི་ཞིག་བྱ་སྟེ་མངོན་སུམ་ཉིད་ཀྱིས་སྔ་མ་དང་ཕྱི་མའི་རང་བཞིན་གཅིག་ཏུ་བྱས་ནས་གཟུང་བས་ན། ལྟུང་བ་གང་ཡིན་པ་དེ་ཉིད་མ་ལྟུང་བའི་ཆོས་ཅན་ཡིན་ནོ་ཞེས་རྣམ་པར་འཇོག་པ་ཡིན་ནོ། །མངོན་སུམ་གྱིས་ཞེས་གསུངས་སོ། །གལ་ཏེ་ཐ་དད་པར་རྟོགས་པའི་གནས་སྐབས་གཉིས་ཐ་དད་མོད་གནས་སྐབས་ཅན་གྱི་རྫས་ནི་གཅིག་ཡིན་ནོ་སྙམ་ན་ལྟུང་བ་དང་ཞེས་གསུངས་སོ། །དམིགས་པ་གང་ཡིན་པ་དེ་ནི་ཕན་ཚུན་རང་བཞིན་རྗེས་སུ་ཞུགས་པ་མེད་པ་ཁོ་ནའོ། །དེ་ལྟ་ན་ཡང་གནས་སྐབས་ཅན་མི་འཛིན་ཅེ་ན། དེ་ལྟ་ཡང་ཞེས་གསུངས་སོ། །གལ་ཏེ་ད་དུང་ཡོད་དོ་ཞེས་བྱ་བར་རྟོགས་པ་ཡོད་པ་མ་ཡིན་ནམ་ཞེ་ན། ཡོད་པ་ནི་བདེན་མོད་ཀྱི་འོན་ཀྱང་རྣམ་པར་རྟོག་པ་ཙམ་ཡིན་ནོ། །འདིས་བརྟགས་པ་དུས་སུ་མ་ཁྱབ་པར་འཛིན་པའི་རང་བཞིན་ཅན་ནི་མངོན་སུམ་བྱེད་པ་ཡིན་པར་མི་བརྗོད་དོ། །དེ་མེད་ཕྱིར་ན་རྫས་སུ་འཛིན་པ་མེད་པའི་རྣམ་པར་རྟོག་པ་ཙམ་བླང་བར་བྱ་བ་མ་ཡིན་པ་ཁོ་ནའོ། །གལ་ཏེ་དེ་ལྟ་ན་ཡང་དུས་གཞན་ཁྱབ་བ་དང་བྲལ་བའི་མངོན་སུམ་གྱིས་སྐད་ཅིག་གཅིག་ཉིད་ལ་གནས་སྐབས་འཛིན་པ་མ་ཡིན་མོད། རིམ་གྱིས་འཛིན་པར་འགྱུར་རོ་ཞེས་དགོངས་པ་བསུ་བ་ནི་རིམ་གྱིས་ཞེས་བྱ་བའོ། །སུན་འབྱིན་པ་ནི་རིམ་གྱི་དོན་ཅི་ཡིན་ཞེས་བྱ་བའོ། །དེ་ཉིད་སྤྱོད་པ་ནི་དངོས་པོ་དང་ཞེས་བྱ་བའོ། །ཡོད་པ་འབའ་ཞིག་བཟུང་ན་ནི་རིམ་གནས་པ་མ་ཡིན་ཞིང༌། འོན་ཀྱང་རང་ངམ་འབྲེལ་པ་ཅན་གྱི་ཡོད་པ་དང་མེད་པ་སྲིད་ན་ཡིན་ནོ། །རིམ་གྱི་ཐ་སྙད་དེ་ཡང་དངོས་པོ་དང་དངོས་པོ་མེད་པ་དུས་ཐ་དད་པ་དག་ཡིན་ནོ། །དངོས་པོ་དང་དངོས་པོ་མེད་པ་དེ་ཡང་གཟུང་བའམ་འཛིན་པ་ཡིན་ཞེས་བརྟགས་ནས་སུན་འབྱིན་པ་ནི་གོ་སླའོ། །གཟུང་བ་ཡང་དེར་ཞེས་བྱ་བ་ནི་རིམ་པ་དང་ལྡན་པ་སྟེ། རིམ་པ་ཅན་མ་ཡིན་པ་ལས་རིམ་པ་མི་འབྱུང་ངོ་སྙམ་དུ་དགོངས་པའོ། །དེའི་ཕྱིར་ཞེས་བྱ་བ་ནི་འཛིན་པར་བྱེད་པ་རིམ་པ་དང་ལྡན་པའི་ཕྱིར་རོ། །རྣམ་པར་རྟོག་པའི་སྤྱོད་ཡུལ་རིམ་པ་ཡིན་པས་ཞེས་བྱ་བ་ནི་རིམ་པ་འཛིན་པའི་ཐ་སྙད་ནི་རྣམ་པར་རྟོག་པར་སྒྲོ་བཏགས་པ་ཁོ་ནར་ཟད་ཀྱི་མངོན་སུམ་གྱི་སྤྱོད་ཡུལ་ནི་མ་ཡིན་ནོ་ཞེས་བྱ་བའི་དོན་ཏོ། །གང་གིས་བྱ་བ་ནི་རིམ་པ་མངོན་སུམ་དུ་གྱུར་པས་སོ། །ཡང་མངོན་སུམ་གང་གིས་དམིགས་པའི་ཞེས་སྦྱར་རོ། །དེའི་ཕྱིར་ཞེས་བྱ་བ་ནི་གཞལ་བྱ་མེད་པ་ལ་ཞུགས་པའི་རྣམ་འགྲེལ་གྱི་ཆ་ཉིད་ཚད་མ་མེད་པ་ལ་
ཡོངས་སུ་སྦྱར་བ་ཡིན་ནོ་ཞེས་བསྟན་པ་ཡིན་ནོ། །འདི་ལྟར་ཡོད་མེད་དག་ལ་བརྟེན་ཕྱིར་ཞེས་བྱ་བ་རྟེན་དང་བརྟེན་པའི་དངོས་པོ་དགག་པ་ལ་སྦྱར་བ་ཡིན་ནོ། །དེ་ལྟ་ན་ནི་མངོན་སུམ་གྱིས་གནོད་པས་རྩོད་པ་ལ་མ་ལྟོས་ནས། ཡུལ་རྟེན་དང་བརྟེན་པའི་དངོས་པོ་མེད་པས་ཡུལ་ཅན་ཉམས་སུ་མྱོང་བར་བརྟེན་པར་དགོངས་པའི་ཕྱིར་རྟེན་དང་བརྟེན་པའི་དངོས་པོ་ནི་མཐོང་བ་མེད་པ་ཁོ་ནའོ་ཞེས་སྦྱར་བར་བྱ་བ་ཡིན་ནོ། །དེས་ན་འབྲས་བུས་བཟླས་ནས་བཤད་པ་ཡིན་ནོ། །རྟེན་དང་བརྟེན་པའི་དངོས་པོ་དེ་མཐོང་བ་མེད་པར་རོ། །འོ་ན་ནི་ཞེས་བྱ་བ་ནི་བྱ་རོག་གི་ལན་ནོ། །ཕྱིན་ཅི་ལོག་གི་རྣམ་པར་རྟོག་པ་ནི་མཐོང་བ་ཡང་ཡིན་ཏེ་ནང་གི་ནི། བསླང་བ་ལས་བྱུང་གང་ཡིན་ཏེ། །ཞེས་བྱ་བ་ལ་སོགས་པས་སྟོན་པར་འགྱུར་བའི་ཕྱིར་རོ། །དེ་ལ་ཡང་ཐལ་བ་མཚུངས་པ་ཡིན་ཞེས་བྱ་བའི་མཐར་ཐུག་པར་བཤད་ནས། ལྷག་མ་འཆད་པ་ནི་གཞན་ཡང་ཞེས་བྱ་བ་ལ་སོགས་པའོ། །གལ་ཏེ་དེ་ལྟ་ན་ཡང་རྟེན་དང་བརྟེན་པའི་དངོས་པོ་འཕེལ་ན། འདི་ནི་རྒྱུ་དང་འབྲས་བུའི་དངོས་པོའི་ཁྱད་པར་ཉིད་དོ་ཞེས་བྱ་བ་ནི་བསྡུས་པའི་དོན་ཏོ། །དེ་ལྟ་མིན་ན་རིགས་མ་ཡིན། །ཞེས་བྱ་བ་འཆད་པ་ནི་སྔ་མ་དང་ཕྱི་མ་དག་ཅེས་བྱ་བའོ། །སྔ་མ་དང་ཕྱི་མ་དག་གཅིག་ཏུ་སྒྲོ་བཏགས་པ་ལ་ནི་སྐབས་ཀྱིས་བརྟེན་པ་ལའོ། །ཕྱིན་ཅི་ལོག་ཏུ་རྟོག་པ་ཞེས་བྱ་བ་ནི་རྒྱུ་དང་འབྲས་བུའི་དངོས་པོ་ལ་རྟེན་དང་བརྟེན་བའི་དངོས་པོ་གཞན་མ་ཡིན་ནོ་ཞེས་བྱ་བར་རོ། །ཐོག་མ་མེད་པའི་བག་ཆགས་ཀྱི་མཐུ་ལས་ཞེས་བྱ་བ་འདིས་གཟུང་བའི་དོན་ཉིད་གསལ་འདེབས་པ་ཉིད་ཀྱི་ཕྱིར་ཞེས་བྱ་བའོ། །དེ་ཉིད་གཞུང་འཛུགས་བ་ནི་འདི་ལྟར་ཞེས་བྱ་བའོ། །ཡིད་ཙམ་ལ་བརྟེན་པ་ནི་ཡིད་ཀྱིའོ། །གལ་ཏེ་དེ་ལྟ་ན་དམིགས་བ་མེད་པའི་རྣམ་པར་རྟོག་པ་ཉིད་ཆོས་ཅན་ཡིན་ལ་གཏན་ཚིགས་ཀྱང་དམིགས་པ་མེད་བ་ཉིད་ཡིན་པའི་ཕྱིར་བསྒྲུབ་པར་བྱ་བ་དང༌། ཁྱད་པར་མེད་པར་འགྱུར་རོ་སྙམ་ན་མ་ཡིན་ཏེ། དཔེར་ན་གོང་བུ་རྭ་ཅན་འདི་རྭ་ཅན་ཉིད་ཕྱིར་རྟ་མ་ཡིན་ཞེས་བྱ་བའི་སྐབས་ས་ལན་འདེབས་པར་འགྱུར་བའི་ཕྱིར་རོ། །འདི་ལ་སྦྱོར་བ་ནི་གང་དམིགས་པ་མེད་པ་དེ་ནི་རྣམ་པར་ཤེས་པ་སྔ་མ་ལས་བྱུང་བ་ཡིན་ཏེ། དཔེར་ན་སྨིག་རྒྱུ་ལ་ཆུར་རྟོག་པ་བཞིན་ནོ། །རྟེན་དང་བརྟེན་བའི་རྣམ་པར་རྟོག་པ་ཡང་དམིགས་པ་མེད་པ་ཡིན་ནོ། །མ་གྲུབ་པའི་ལན་བཤད་ཟིན་པ་ཉིད་ལྷག་
མ་བརྗོད་པའི་དོན་དྲན་པར་བྱེད་པ་ནི་ཞེས་བྱ་བའོ། །གཞན་གྱི་ལན་ལྷག་མ་བརྗོད་པ་ནི་དངོས་པོ་དུ་མ་ཉིད་ལས་ཤེས་ཞེས་བྱ་བའོ། །རྣམ་པར་ཤེས་པ་སྔ་མའི་འབྲས་བུ་ཉིད་དུ་མ་མཐོང་བའི་ཕྱིར་རོ། །སྔ་མ་ཕྱི་མར་སྐྱེ་བ་ཅན་ཕྱིན་ཅི་ལོག་གི་ཤེས་པ་ཅན་འདི་ནི། འདི་ལས་གཅིག་ཏུ་རྟོགས་པ་འདི་སྐྱེས་སོ་ཞེས་བྱ་བ་ནི་རྟོགས་པར་མི་ནུས་སོ། །དེས་ནི་སྔ་མ་དང་ཕྱི་མའི་དངོས་པོ་གཉིས་ཀ་མཐོང་བ་དེ་ཉིད་ལས་གཅིག་པ་ཉིད་ཀྱི་བློར་འགྱུར་བ་ཡིན་ནོ། །མཐོང་བ་སྤངས་ནས་མ་མཐོང་བ་བཟོད་པ་ནི་བཟོད་པ་ཡིན་ནོ་ཞེས་བྱ་བའི་དོན་ཏོ། །དེ་ནི་མ་ཡིན་ཏེ་ཞེས་བྱ་བའོ། །དོན་ནི་འདི་ཡིན་ཏེ། སྨིག་རྒྱུ་ལ་ཆུར་རྟོག་པ་ཡང་སྨིག་རྒྱུ་ཙམ་གྱི་རྗེས་སུ་འགྲོ་བར་འགྱུར་ཏེ། དེ་ཙམ་མཐོང་བའི་ཕྱིར་དང་ཆུ་མཐོང་བ་ན་གཞན་གྱིས་མ་མཐོང་བའི་ཕྱིར་རོ། །འོན་ཏེ་སྨིག་རྒྱུ་རྟོག་པ་ཉིད་འཐད་ཀྱི་ཆུར་རྟོག་པར་ཅི་ལྟར་འགྱུར་སྙམ་ན། དེ་ལྟ་ན་ནི་འོ་ན་དངོས་པོས་དུ་མ་ལ་དུ་མར་ཞེན་པ་ཉིད་འཐད་ཀྱི་གཅིག་ཉིད་དུ་ཅི་ལྟར་རྟོག་ཅེས་བྱ་བ་འདི་མཚུངས་སོ། །དེའི་ཕྱིར་རིགས་གང་ལས་གྲུབ་པ་དེ་ཞེས་བྱ་བའི་ཚུལ་གྱིས་འདིའི་འབྲས་བུའི་གཏན་ཚིགས་གཞན་ལས་ཁྱད་པར་ཡོད་པ་མ་ཡིན་ནོ། །ཆུར་རྟོག་པ་ཆུ་མཐོང་བ་ལས་བྱུང་བ་བཞིན་དུ། གཅིག་ཉིད་དུ་རྣམ་པར་རྟོག་པ་ཡང་གཅིག་ཏུ་མཐོང་པ་ཅན་དུ་འགྲོ་བ་ཅན་ཡིན་མོད། དེའི་ཕྱིར་དོན་གཞན་མ་ཡིན་པ་ཉིད་ཐོག་ཏུ་བབ་པོ་ཞེས་གསུངས་པ་ནི། འོ་ན་དཔེ་དང་ཆོས་མཐུན་པ་སྟེ། དཔེ་ལ་ནི་བརྟགས་བཞིན་པ་ཉིད་སྔོན་དུ་ཉམས་སུ་མྱོང་བ་ཡིན་ནོ་སྙམ་ན་དེ་ནི་མི་འཐད་ཏེ། བདག་ཉིད་ཐམས་ཅད་ཀྱི་ཆོས་མཐུན་པའི་དཔེ་ནི་འགའ་ཡང་ཡོད་པ་མ་ཡིན་ནོ། །ཕྱིན་ཅི་ལོག་གི་རྣམ་པར་རྟོག་པ་ནི་ཤེས་པ་སྔ་མ་དང་འབྲེལ་པ་ཡིན་ནོ་ཞེས་བྱ་བ་དེ་ཙམ་ཞིག་བསྟན་བར་འདོད་པའི་ཕྱིར་རོ། །སྒྲོ་བཏགས་བཞིན་པའི་ཡུལ་གྱི་དོན་ཅན་གྱི་ཤེས་པ་སྔ་མ་ནི་དོན་གྱི་དམིགས་པ་ཡིན་ནོ་ཞེ་ན་དོན་མེད་པ་ཅན་སྔ་མ་ཡང་སྒྲོ་བཏགས་བཞིན་པའི་དོན་གྱི་ཡུལ་ཅན་ཉིད་ཡིན་ཏེ། འོན་ཀྱང་དཔེ་ལ་ནི་སྔ་མ་དངོས་པོའི་ཡུལ་ཅན་གྱི་མྱོང་བ་ཡིན་ལ། དོན་ལ་ནི་རྣམ་པར་རྟོག་པ་ཙམ་ཡིན་པ་ནི་ཞེས་བྱ་བ་འདི་ཁྱད་པར་འདིས་ཅི་བྱ། གཉི་ག་ལྟར་ཡང་སྔ་མ་སྔ་མ་ནི་བག་ཆགས་འཇོག་པ་ཙམ་ལ་ཉེ་བར་འཇོག་པ་ཡིན་ནོ། །དེ་ལ་དཔེ་དོན་ཉམས་སུ་
མྱོང་བ་རྣམ་པར་རྟོག་བ་དེ་སྐྱེད་པའི་ས་བོན་འཇོག་པར་བྱེད་པ་ཡིན་པ་དེ་བཞིན་དུ་དོན་མེད་པའི་རྣམ་པར་རྟོག་པས་ཀྱང་གལ་ཏེ་རིགས་མཐུན་པ་སྐྱེ་བའི་ས་བོན་འཇོག་མོད་ཉེས་པ་ཅི་ཡོད། རིགས་མི་མཐུན་པའི་རྣམ་པར་རྟོག་པའི་ས་བོན་ནི་འཇོག་པར་མི་འཐད་དོ། །དོན་ཉམས་སུ་མྱོང་བ་ལས་བྱུང་བ་ལ་ནི་དེ་ཡང་ཆ་ཤས་ཀྱིས་ཡོད་པ་ཡིན་ནོ། །རྣམ་པར་རྟོག་པ་ཙམ་གྱིས་རྣམ་པར་རྟོག་པ་ཙམ་གྱི་བག་ཆགས་སྐྱེད་པ་ལ་ནི་དོགས་པ་ཡང་མེད་དོ་ཞེས་བསམས་ནས་དེས་ན་སྐྱེ་བ་གཞན་དུ་ཡང་ཞེས་བྱ་བའོ། །དེ་ལྟར་བློ་སྔ་མ་དང་ཕྱི་མའི་ཡུལ་ལས་གཅིག་པ་ཉིད་མེད་པའི་ཕྱིར་ལྟུང་བའི་ཆོས་ཅན་ནི་རྟེན་ལས་མི་ལྟུང་བ་ལ་བརྟེན་པར་འགྱུར་བ་མ་ཡིན་ལ། མངོན་སུམ་གྱིས་གནོད་པ་ཡང་ཡོད་པ་མ་ཡིན་ནོ་ཞེས་གནས་སོ། །དེ་ལྟར་གཅིག་ཉིད་མེད་པར་བདག་ལ་སོགས་པ་ཡང་མེད་པའི་ཕྱིར་དེའི་རྣམ་པར་རྟོག་པ་ཡང་ཐོག་མ་ཐ་མ་མེད་པ་ཡིན་ནོ་ཞེས་སྟོན་པ་ནི། དེ་བཞིན་དུ་ཞེས་བྱ་བའོ། །སོགས་པའི་སྒྲས་ནི་སྤྱི་ལ་སོགས་པ་སྡུད་པའོ། །ཇི་ལྟར་གཅིག་ཏུ་འཛིན་པ་དེ་དམིགས་པ་མེད་པ་དེ་བཞིན་དུ་བདག་ལུས་ལ་སོགས་པར་འཛིན་པའོ། །ཆོས་ཙམ་དེ་དང་ལྡན་པའི་ཆོས་ཅན་བློ་ལ། ཐོག་མ་འགོག་པ་ནི་རྒྱུན་ཐོག་མ་མེད་པ་ཞེས་བྱ་བའོ། །ཕྱིས་ཀྱང་མི་འཆད་པ་ཞེས་བྱ་བ་ནི་གཞན་དང་གཞན་སྐྱེ་བས་ཐ་མ་འགོག་པའོ། །འགའ་ཞིག་ཏུ་རྟེན་དང་བརྟེན་པའི་དངོས་པོ་ཡོད་ཀྱང་སྐབས་སུ་བབ་པ་ལ་ནི་མ་ཡིན་ནོ་ཞེས་སྟོན་པས་སྔར་དྲིས་པའི་རྣམ་འགྲེལ་ཉིད་བཤད་པའི་དོན་དུ་ཡི་གེ་འདྲི་བ་ནི་གཞན་ཡང་ཞེས་བྱ་བའོ། །དེ་ལྟར་ཡོན་ཏན་ལ་སོགས་པ་ལ་རྟེན་མེད་མོད། སེམས་ནི་དེ་ལས་བཟློག་པ་ཡིན་པའི་ཕྱིར་ཅི་ལྟར་རྟེན་མེད་པ་ཡིན་ཞེ་ན་སེམས་པ་ཞེས་གསུངས་སོ། །ལུས་ནི་སེམས་སོ་ཞེས་བྱ་བ་སྤྱི་དང༌། ལུས་ཀྱི་ཡོན་ཏན་ནི་བློ་ཞེས་བརྗོད་པའི་ཕྱིར་ཡོན་ཏན་དང༌། ཡུལ་རྟོགས་པའི་རང་བཞིན་ཡིན་པའི་ཕྱིར་ལས་ཡིན་ནམ། གཞན་དུ་ཡང་ཞེས་བྱ་བ་ཁྱད་པར་ཏེ། སེམས་ཡིན་གྱི་སེམས་མ་ཡིན་པ་ནི་མ་ཡིན་པ་ཞེས་བྱ་བ་ཐ་དད་པའི་རྟོགས་པའི་རྒྱུ་ཡིན་པའི་ཕྱིར་རོ། །ཡང་ན་ངེས་པ་མེད་པ་སྟེ། སེམས་པ་ནི་དེ་ལྟ་བུ་ཉིད་གཞན་དུ་ཡང་བརྟག་པར་བྱ་བ་ནི་མ་ཡིན་ནོ། །དེས་ན་དེ་ལས་བཟློག་པ་ནི་མ་ཡིན་ཏེ་དེའི་ཕྱིར་རྣམ་པ་གཅིག་
ཏུ་ལྟུང་བའི་དོགས་པ་མེད་དོ་ཞེས་བྱ་བའི་དོན་ཏོ། །འདུ་བའི་སྒོ་ནས་ལན་ཐེབས་པར་བསམས་ནས་གཞན་རྩོད་པར་བྱེད་པ་ནི་གལ་ཏེ་ཞེས་བྱ་བའོ། །དོན་ནི་འདི་ཡིན་ཏེ་གང་ཞིག་གང་དུ་འདུ་བ་དེ་ནི་དེ་མེད་ན་མི་འབྱུང་བ་ཡིན་ཏེ། དཔེར་ན་འདུ་བ་ཅན་གྱི་རྒྱུ་མེད་ན་དེ་དང་འདུས་པའི་ཡོན་ཏན་མེད་པ་བཞིན་ནོ། །སེམས་ཀྱང་ལུས་ལ་འདུས་པ་ཡིན་ནོ་ཞེས་བྱ་བའོ། །སུན་འབྱིན་པའི་འགྲོ་བ་ལ་སོགས་པ་ནི་ཞེས་བྱ་བ་ལ་སོགས་པའོ། །རྟེན་དང་བརྟེན་པའི་དངོས་པོ་མ་ཡིན་ཡང་འདུ་བར་འགྱུར་རོ་སྙམ་ན། རྟེན་དང་བརྟེན་པའི་དངོས་པོ་ཡིན་ཡང་ཞེས་གསུངས་སོ། །འདི་ག་ལས་སྙམ་ན་གཞན་གྱི་ཕྱིར་ཞེས་བྱ་བ་ལས་ཏེ། གང་གི་ཕྱིར་མ་གྲུབ་པ་ལ་སོགས་པ་བརྗོད་ལ། བརྗོད་པ་དེའི་ཕྱིར་ན་རྟེན་དང་བརྟེན་པ་མེད་པར་འདུ་བ་མ་ཡིན་ནོ་ཞེས་བྱ་བའི་དོན་ཏོ། །འདུ་བ་མེད་པ་འདི་ཉིད་དོ། །རྟེན་དང་བརྟེན་པའི་དངོས་པོ་བསལ་བ་འདིས་ནི་གལ་ཏེ་རྟེན་དང་བརྟེན་པའི་དངོས་པོ་བསལ་བས་འདུ་བ་ལ་སོགས་པ་རྣམས་བསལ་བར་གྱུར་མོད། དེ་བཟློག་པ་ཉིད་ཇི་ལྟར་ཞེ་ན། རྟེན་མེད་ཕྱིར་ན་ཞེས་གསུངས་ཏེ། བཤད་ཟིན་པའི་ཚུལ་གྱིས་མི་འཐད་སྙམ་དུ་དགོངས་པའོ། །འདིས་ནི་གང་ཞིག་གང་དུ་འདུ་བ་དེ་ཞེས་བྱ་བའི་གཏན་ཚིགས་མ་གྲུབ་པར་བརྗོད་པ་ཡིན་ནོ། །རྣམ་འགྲེལ་གྱི་བཤད་པ་མ་བྱས་པར་རེ་ཞིག་མ་བྱས་པ་ཉིད་བརྗོད་པ་ནི་རིགས་ལ་སོགས་པ་ནི་ཞེས་བྱ་བའོ། །གལ་ཏེ་ཞེས་བྱ་བ་ནི་གཞན་གྱིའོ། །དེ་ནི་མི་རྟག་པར་འགྱུར་བ་གང་ཞིག་གང་དུ་འདུ་བ་ཞེས་ཁྱད་པར་དུ་བྱེད་པའི་མ་ངེས་པ་ཉིད་མ་ཡིན་ནོ་སྙམ་པའི། སེམས་ཀྱང་ཞེས་བྱ་བ་ནི་ལན་ནོ། །རྒྱུ་གཞན་གྱི་སྔར་གྱི་སེམས་གང་ཡིན་པ་དེ་ཉིད་དང་འབྲེལ་བའི་ཕྱིར་རོ། །དཔེར་ན་འདུ་བ་ཉིད་ཡིན་པ་རྟག་པའི་ཕྱིར་རྟེན་མེད་ཀྱང་མེད་པ་མ་ཡིན་པ་དེ་བཞིན་དུ་རྒྱུ་གཞན་དང་རྗེས་སུ་འབྲེལ་བ་ཡང་རྒྱུ་མ་ཡིན་པ་ཞིག་ཀྱང་རྒྱུན་ཆད་པ་མ་ཡིན་པས་ཁྱད་པར་མེད་དོ། །དེས་ན་མ་ངེས་པ་ཉིད་དོ། །འོན་ཏེ་རྒྱུ་ཙམ་མེད་པས་རྒྱུན་ཆད་པར་ནི་མི་བརྗོད་ཀྱི་འོན་ཀྱང་རྟེན་པས་སོ་སྙམ་ན་རྟེན་དང་བརྟེན་པའི་ཞེས་གསུངས་ཏེ། རྒྱ་ཆེར་བཀག་པའི་ཕྱིར་རོ། །ནིའི་སྒྲ་ནི་མ་ངེས་པ་ཡོངས་སུ་རྫོགས་པའོ། །རྟེན་དང་ཞེས་བྱ་བ་ལ་སོགས་པ་ནི་རྣམ་འགྲེལ་འཆད་པའོ། །འདིས་ནི་འཕྲོད་པ་འདུ་བ་སྤངས་པ་ཡིན་ལ་ཞེས་
སྦྱར་རོ། །རྟེན་དང་བརྟེན་པའི་དངོས་པོ་ཉིད་བསལ་བ་ཅི་ལྟར་ཞེ་ན། སྤངས་པ་ཡིན་པའི་ཕྱིར་ཞེས་གསུངས་ཏེ། འདི་ནི་རྟེན་མེད་ཕྱིར་ཞེས་བྱ་བའི་འགྲེལ་པའོ། །འཕྲོད་པ་འདུ་བ་ཅན་གྱི་རྒྱུ་ཞེས་བྱ་བ་ནི་འཕྲོད་པ་འདུ་བ་ཅན་གྱི་རྒྱུར་འདོད་པ་དེ་ཁོ་ན་ཉིད་དུ་རྒྱུའམ་རྒྱུ་མ་ཡིན་པ་ཉིད་གཅིག་ཡིན་དེ་ལས་ཕྱོགས་དང་པོ་ལ་བརྗོད་པ་ནི་གལ་ཏེ་ཞེས་བྱ་བ་དེས་ན་འདུ་བ་མེད་པའི་ཕྱིར་འདུ་བ་ཅན་གྱི་རྒྱུར་ཇི་ལྟར་འགྱུར་སྙམ་དུ་དགོངས་པའོ། །གཉིས་པ་ལ་བརྗོད་པ་ནི་འོན་ཏེ་ཞེས་བྱ་བའོ། །ཁྱབ་པར་བྱེད་པ་རྒྱུ་ཉིད་མེད་པའི་ཕྱིར་ཅི་ལྟར་ཁྱབ་པར་བྱ་བའི་གདུང་བར་བྱ་བ་ཅན་གྱི་རྒྱུར་འགྱུར་ཞེས་བྱ་བ་དག་སྟེ། རིགས་ལ་སོགས་པ་གང་གི་དོན་རྒྱུ་མ་ཡིན་པ་དེ་ལ་བརྗོད་པ་ནི། རིགས་ལ་སོགས་པ་ཞེས་བྱ་བའོ། །རང་གི་རྟེན་འདུ་བ་ཅན་གྱི་རྒྱུ་མ་ཡིན་ཡང་དངོས་པོའི་ཆོས་ཉིད་དུ་རྣམ་པར་གནས་པར་བརྗོད་པ་གང་ཡིན་པའོ། །རིགས་ནི་ཚིག་གི་དོན་གསུམ་པ་ཡོད་པ་དང༌། རྡུལ་ཕྲ་རབ་ཚད་ཆུང་ངུ་དང༌། བདག་དང་ནམ་མཁའ་ལ་སོགས་པ་ཚད་ཆེན་པོ་དང༌། རྟག་པའི་རྫས་རྣམས་ལ་ཡོད་པའི་ཁྱད་པར་དང༌། དབང་ཕྱུག་ལ་སོགས་པའི་བློ་སྟེ། དེ་དག་ཀྱང་སྤངས་པ་ཡིན་ཏེ་དེ་དག་གི་རྣམ་པར་གནས་པ་དངོས་པོའི་ཆོས་ཉིད་ཀྱིས་མེད་པར་དོགས་པ་རྟེན་གཞན་མེད་པར་ཇི་ལྟར་འགྱུར། གལ་ཏེ་བརྗོད་ན་ཞེས་འདོན་པར་ནི། གལ་ཏེ་དེ་ལྟར་བརྗོད་ན་ཚུལ་འདིས་སྦྱར་བར་བྱའོ། །སྐབས་དང་སྦྱར་བའི་ཚིག་འདིའི་བཤད་པ་གཞན་གསུངས་པ་ནི་ཡང་ན་ཞེས་བྱ་བའོ། །རྟེན་དེ་ཉིད་དེའི་འདུས་པ་སྤངས་པ་ནི་བ་ཀག་པ་སྟེ། མེད་པ་ཞེས་བྱ་བའི་དོན་ཏོ། །དེ་ཉིད་གསུངས་པ་ནི་རིགས་ནི་ཞེས་བྱ་བའོ། །འདིར་སོགས་པ་སྨོས་པའི་བཤད་པ་ནི་ཡལ་བར་དོར་བ་ཡིན་ནོ་སེམས་ནི་དེ་ལྟར་འདོད་པ་མ་ཡིན་ནོ་སྙམ་ན་མ་ཡིན་ཏེ། གསལ་བ་གཞན་གྱི་སྒྲས་ནི་སྔ་ན་མེད་པའི་གསལ་བ་བརྗོད་པར་འདོད་པའི་ཕྱིར་རོ། །སྐྱེ་བ་བཞིན་བའི་གསལ་བ་རྣམས་ལ་ཡང་སྔར་ཉིད་ནས་འདུ་བ་ནི་མ་ཡིན་ནོ། །འོན་ཏེ་ཐམས་ཅད་ཐམས་ཅད་དུ་སོང་བའི་ཕྱོགས་ལ་གནས་ན་སྔར་ཡོད་པ་ཡིན་ན་ཡོད་མོང་གོང་བུ་དེ་དང་འབྲེལ་བར་འགྱུར་བ་ནི་མ་ཡིན་ཏེ། སྐད་ཅིག་མ་དང་པོ་ལ་ནི་ཡོན་ཏན་ལ་སོགས་པ་དང་འབྲེལ་བ་མེད་པའི་རྫས་ཉིད་སྐྱེ་བོ་ཞེས་བྱ་བ་གྲུབ་པའི་མཐའ་ཡིན་པའི་ཕྱིར་རོ། །དེ་བས་ན་ཇི་ལྟར་སྤྱི་གསལ་བ་སྔ་མ་
ཞིག་པ་ན། རྗེས་སུ་མ་སོང་བ་གསལ་བ་གསལ་བ་གཞན་པ་ལ་རྗེས་སུ་འགྲོ་བ་དེ་བཞིན་དུ་སེམས་ཀྱང་ལུས་གཞན་ལ་ཡིན་ནོ། །འོན་ཏེ་སྤྱི་ནི་ཡོད་པ་ཉིད་རྟེན་གཞན་ལ་རྗེས་སུ་འཇུག་པ་ཡིན་ལ། སེམས་ནི་ཐ་དད་པ་ཁོ་ན་སྐྱེ་བ་ཡིན་ནོ་ཞེ་ན་མ་ཡིན་ཏེ། མ་འབྲེལ་བ་ལས་འབྲེལ་པའི་རང་བཞིན་མི་འཐད་པའི་ཕྱིར་རོ། །སྤྱི་ཡང་གཅིག་ཉིད་དུ་སྒྲོ་བཏགས་པ་ཙམ་དུ་ཟད་ལ། སྒྲོ་བཏགས་ནས་ནི་སེམས་དེ་ཉིད་འཕོ་བ་ཡིན་ནོ་ཞེས་བྱ་བ་ཡང་མི་འགལ་ལོ། །དེས་ན་གཞན་ནི་སྒྲུབ་པར་བྱེད་པ་ནི་ད་དུང་ཡང་མ་ངེས་པ་ཁོ་ནའོ། །ཡང་གལ་ཏེ་ཚུ་རོལ་མཛེས་པ་ལ་སྤྱི་དང་འདུ་བ་ལ་སོགས་པའི་ཚུལ་ལུགས་མེད་པ་དེ་ལྟ་ན་ཡང་བརྒྱ་ལ་འདི་ལྟར་ཁས་ལེན་དུ་འོང་བས་ན་བཀོད་པས་ཡིན་ནོ། །གལ་ཏེ་དེ་ལྟར་ཁས་ལེན་ན་སྤྱི་བཞིན་དུ་རྟེན་གཞན་ལ་རྗེས་སུ་འཇུག་པར་འགྱུར་བའི་ཕྱིར་ཁས་བླངས་པ་དང་འགལ་བ་ཡིན་ན་དེ་ཁོ་ན་ནི་སྤྱི་ཞེས་བྱ་བ་ཡང་མེད་པ་ཉིད་ཡིན་པས་ན། རྟེན་གཅིག་མེད་ན་བློ་གཞན་ལ་མཚམས་སྦྱོར་བ་ལ་དཔེ་ཅི་ཡོད་ཅེ་ན། ལུས་གཅིག་མེད་ཀྱང་ཞེས་གསུངས་སོ། །གལ་ཏེ་རྣམ་པ་དང་དོན་བྱ་བ་ལ་སོགས་པ་མཚུངས་པའི་མཚན་ཉིད་ཀྱི་ཉེ་བ་འགའ་ཞིག་གིས་གཞན་ལ་བ་ལང་ཞེས་བྱ་བ་ལ་སོགས་པ་རྗེས་སུ་འགྲོ་བའི་བློར་འགྱུར་བ་ཡིན་ན། མིའི་ལུས་སྤངས་ན་དུད་འགྲོ་ལ་སོགས་པའི་ལུས་ཡོངས་སུ་འཛིན་པའི་དུས་ན་ནི་ཉེ་བ་ཅི་འདྲ་བ་ཞིག་ཡོད། གཞན་ཡང་ཇི་ལྟར་བློ་སྔ་མ་ལས་རྗེས་སུ་འགྲོ་བའི་བློ་གཞན་ཁོ་ན་སྐྱེ་བ་དེ་བཞིན་དུ་ལུས་གཞན་ལ་ཡང་ཁོ་ན་སྐྱེ་བའི་ཕྱིར་གཞན་གྱི་འདོད་པ་ཉིད་ཡིན་ནོ། །དེས་ན་འཕྲོ་བར་འདུ་བར་མ་ཡིན་ནོ་སྙམ་ན་འདི་ལ་བརྗོད་པ། རེ་ཞིག་ལུས་གཞན་རྣམ་པ་ལ་སོགས་པ་མི་འདྲ་ཡང་རྒྱུན་དེ་ལ་ལས་འཇིག་པ་ཉིད་ཉེ་བར་ཡིན་ནོ། །རང་གི་མཚན་ཉིད་ཐ་དད་པ་ནི་འཆི་བ་དང་སྐྱེ་བའི་སྲིད་པ་ལ་སོགས་པ་འདོད་པ་ཁོ་ནའོ། །འཕྲོ་བར་སྨྲ་བ་ནི་རྒྱུན་གཅིག་པས་གཅིག་ཏུ་ལྷག་པར་ཞེན་པའི་ཕྱིར་རོ། །རྒྱུན་གཅིག་པ་ཉིད་ཀྱང་ཉེ་བར་ལེན་པ་དང་ཉེ་བར་ལེན་པ་ལས་བྱུང་བས་གནས་པའི་ཕྱིར་རོ། །དེ་ཡང་སྔོན་གྱི་འདུ་བྱེད་རྗེས་སུ་འཇུག་པ་བསྒྲུབས་པའི་ཕྱིར་རོ། །འདི་ཉིད་གསུངས་པ་ནི་རྣམ་པ་དེ་ལྟ་བུའི་བློ་སྐྱེ་བ་ནི་ཞེས་བྱ་བར་རོ། །དེ་ཉིད་ཀྱི་ཕྱིར་སྔོན་ཉམས་སུ་མྱོང་བར་འགྱུར་བའི་དོན་བྱ་བ་ལ་སོགས་པའི་མྱོང་བས་གཞན་པའི་འདུ་བྱེད་དང་ལྡན་པ་ལ་དེ་ཉིད་འདི་ཡིན་ནོ་སྙམ་དུ་རྗེས་སུ་འགྲོ་བའི་
བློ་དཔེ་ཉིད་དུ་གསུངས་སོ། །དེའི་ཕྱིར་ཞེས་བྱ་བ་ནི་རྟན་སུན་འབྱིན་པ་མཇུག་སྡུད་པའོ། །མང་དུ་སྨྲས་པས་ཅི་དོགས་ཏེ། རེ་ཞིག་འཇིག་པའི་དངོས་པོ་གང་ཡིན་པ་དེ་གཞན་ལ་ལྟོས་པའམ་མི་ལྟོས་པ་ཡིན། ཕྱོགས་དང་པོ་ལ་ནི་དངོས་པོ་དེ་ལ་གནས་པའི་རྒྱུ་དེན་མེད་དེ། འཇིག་པར་བྱེད་པ་མི་གནས་པ་ནི་རང་ཉིད་གནས་པའི་ཕྱིར་རོ། །གཉིས་པ་ལ་ཡང་ནུས་པ་མེད་པ་ཡིན་ནོ། །རྣམས་ཞེས་བྱ་བ་ནི་གསལ་བ་བརྗོད་པར་འདོད་པས་མང་པོའི་ཚིག་གོ །གལ་ཏེ་རང་ང་མ་གཞན་ལས་རྟེན་གྱིས་འཇིག་པའི་གནས་བྱེད་ན་དེའི་ཚེ་གང་སྐྱེ་བ་ཅན་ཡིན་པ་དེ་ཐམས་ཅད་རྟེན་གནས་པ་དང་ལྡན་པ་ཡིན་ནོ། །ལྷག་མ་ནི་གོ་བར་སླའོ། །གཞན་ཡང་གནས་པར་བྱ་བ་རང་ཉིད་འཇིག་པའམ་མི་འཇིག་པ་ཞིག་ཡིན། འདིར་ཡང་རིམ་བ་བཞིན་མི་ནུས་པ་དང༌། མི་ དགོས་པ ་ཉིད་དོ། །སྔར་ནི་གཞན་གྱིས་ཁས་བླངས་པའི་འཇིག་པའི་ཕྱོགས་ཉིད་ལ་རྣམ་པར་པ་རྟགས་ནས་སྐྱོན་གཉིས་བསྐལ་པ་ཡིན་ནོ་ཞེས་བྱ་བ་ནི་ཁྱད་པར་རོ། །བསྡུ་བ་ནི་ལྷག་དང་བཅས་པར་བརྗོད་པར་འདོད་དོ། །བརྗོད་པ་དང་དོན་གྱིས་འཕངས་པ་སྡུད་པའི་ཚིགས་སུ་བཅད་པ་དག་གོ་ཞེས་བྱ་བའི་དོན་ཏོ། །དོན་དམ་པར་ནི་ཡུལ་ལ་གནས་པ་ཡུལ་དང་ཕྲད་པ་ཡང་མ་ཡིན་ནོ། །ཅིའི་ཕྱིར་ཞེ་ན། ཡིད་ཀྱིས་ཞེས་བྱ་བའོ། །དེའི་ནི་ཡུལ་གྱིའོ། །མཚམས་སྦྱོར་བར་བྱེད་པའི་ཡིད་ཀྱི་རྣམ་པར་ཤེས་བ་ཉིད་སེམས་དཔའ་ཡིན་ནོ་སྙམ་དུ་དགོངས་པའོ། །གལ་ཏེ་རྣམ་པར་རྟོག་པ་མེད་པ་ལ་ཡང་ཡུལ་དང་ཕྲད་པའི་རྣམ་པ་ཙམ་ལས་གཞན་ནི་མེད་དོ་ཞེ་ན། བདེན་ཏེ་རྣམ་པར་རྟོག་བ་མེད་པ་ལ་ནི་ཕྲད་པར་རྣམ་པར་གཞག་པ་རྗེས་སུ་མཐུན་པ་ཡིན་ཏེ། ཡུལ་དེར་གསལ་བའི་རྣམ་པར་མྱོང་བ་ཡོད་པའི་ཕྱིར་རོ། །རྣམ་པར་རྟོག་པ་ལ་ནི་དེ་ལྟ་མ་ཡིན་ཏེ། ཡུལ་དང་རྣམ་པ་དག་གི་ཆས་རྗེས་སུ་འཇུག་པའི་ཕྱིར་རོ། །དེ་ཉིད་ཀྱི་ཕྱིར་དོན་དམ་པར་ནི་ཞེས་བརྗོད་པ་ཡིན་ནོ། །སྒྲོན་མ་དེ་ཉམས་པ་དང༌། འཕེལ་བའི་མཚན་ཉིད་དུ་འགྱུར་བའི་ངང་ཚུལ་གང་ལ་ཡོད་པ་སྟེ། དེ་དག་གི་དངོས་པོ་གང་དག་ཡིན་པའི་ཕྱིར། ཉེ་བར་ལེན་པ་དང་ཉེ་བར་ལེན་པ་ལས་བྱུང་བ་འདོ་དང་སྒྲོན་མ་དག་ནི་རྟེན་དང་བརྟེན་པའི་དངོས་པོ་ཡིན་ནོ། །ཅི་ལྟར་དེ་འགྱུར་ན་འགྱུར་བ་ཉིད་འདི་ཉེ་བར་ལེན་པའི་མཚན་ཉིད་སྐྱོན་མེད་པ་ཡིན་པ་དེ་ལྟར་ནི་སྔར་བསྟན་ཟིན་པ་ཉིད་དོ། །ཡང་བཟླས་
པ་ནི་ཁྱད་པར་བརྗེད་པའི་དོན་དུ་ཡིན་ནོ། །གལ་ཏེ་བློ་འགའ་དང་ཡང་རྟེན་དང་བརྟེན་པའི་དངོས་པོ་མ་ཡིན་ནམ། དེ་སྟེ་ལུས་ཁོ་ན་དང་མ་ཡིན་སྙམ་དུ་དོགས་ན། བློ་ལ་བརྟེན་པ་ཉིད་ངེས་པར་བྱ་བའི་དོན་དུ་འོལ་སྤྱི་ཙམ་བརྗོད་པ་ན། འོན་ཀྱང་ཞེས་གསུངས་ཏེ། བློ་དང་ཤེས་རབ་ལ་སོགས་པ་ཉིད་རྟེན་དང་བརྟེན་པའི་དངོས་པོ་ཡིན་ནོ་ཞེས་འབྲེལ་ཏོ། །རྟོགས་པས་ན་བློ་ལ་གོམས་པའི་བདག་ཉིད་ཅན་སྔར་བྱུང་བའི་ཤེས་རབ་དང་བརྩེ་བ་ལ་སོགས་པ་རྟོགས་པའི་ཁྱད་པར་རྣམས་བརྟེན་པ་ཡིན་ནོ། །འདི་ག་ལས་སྙམ་པ་ལས། འདི་ལྟར་ཞེས་བྱ་བ་ལ་སོགས་པའོ། །བློའི་བྱེད་པ་ནི་གོམས་པ་ཡིན་ལ་དེའི་ཁྱད་པར་ནི་འཕེལ་བ་དང་འགྲིབ་པའི་མཚན་ཉིད་དོ། །དེས་ནི་ཤེས་རབ་ལ་སོགས་པ་ཕུལ་བྱུང་དང༌། འགྲིབ་པ་དག་ཏུ་འང་འགྱུར་པ་ཡིན་ཏེ་གཉི་ག་མ་ཡིན་པ་འབའ་ཞིག་ཏུ་ནི་མ་ཟད་དོ། །འདི་ཞེས་བྱ་བ་ནི་འཕེལ་བ་དང་འགྲིབ་པའི་རྗེས་སུ་མི་བྱེད་པ་སྟེ། ལུས་དང་སེམས་ལ་སོགས་པའི་ལྟ་བུའོ། །མར་མེའི་འོད་ལ་སོགས་པ་གང་དག་ཡིན་པ་ནོར་བུའི་འོད་ལ་སོགས་པ་རྣམས་སོ། །འདིས་ནི་འདི་སྐད་ཅེས་བརྟེན་པ་ཉིད་ནི་རྟེན་འཕེལ་བ་དང་འགྲིབ་པའི་རྗེས་སུ་བྱེད་པས་ཁྱབ་པ་ལ་དེ་མེད་པའི་ཕྱིར་ན་ལུས་དང༌། ཤེས་རབ་ལ་སོགས་པ་ནི་མ་ཡིན་ནོ་ཞེས་བསྟན་པ་ཡིན་ནོ། །གལ་ཏེ་ལུས་འཕེལ་བ་དང་འགྲིབ་པ་ལས་ཀྱང་ཁྱད་པར་དུ་འགྱུར་བ་མཐོང་བ་ཁོ་ན་ཡིན་ནམ། དེ་ཅི་ལྟར་ལུས་རྟེན་མ་ཡིན་ན། དེ་ལས་ཀྱང་ཞེས་གསུངས་པ་སྟེ་ལུས་ལས་སོ། །བློ་སྔ་མ་ཉིད་ཅེས་བྱ་བ་ནི་གོམས་པའི་བདག་ཉིད་ཅན་ནོ། །བློ་ཞེས་བྱ་བ་ནི་ཤེས་རབ་དང་བརྩེ་བ་ལ་སོགས་པའི་བདག་ཉིད་ཅན་གྱིའོ། །དེས་ན་ཞེས་བྱ་བ་ནི་གང་གི་ཕྱིར་བློ་ལུས་འཕེལ་བ་དང་འགྲིབ་པའི་རྗེས་སུ་མི་བྱེད་པ། དེས་ན་མར་མེའི་འོད་ནི་དཔེ་མ་ཡིན་ཏེ། སྒྲོན་མའི་འཕེལ་བ་དང་འགྲུབ་པའི་རྗེས་སུ་མི་བྱེད་པ་མ་ཡིན་པའི་ཕྱིར་རོ། །དེས་ན་དཔེར་ན་སྒྲོན་མའི་འོད་སྒྲོན་མ་ཞིག་ན་འཇིག་པ་བཞིན་ནོ་ཞེས་ཅི་སྟེ་བརྗོད། །གལ་ཏེ་ཞེས་བྱ་བ་ནི་གཞན་གྱིའོ། །གལ་ཏེ་བློ་ནི་བློའི་བྱེད་པའི་ཁྱད་པར་ཉིད་ཀྱིས་བྱས་མོད་དེ་ལྟ་ན་ལུས་ལ་ནི་བརྟེན་པ་ཁོ་ན་སྟེ། དཔེར་ན་མར་མེ་རྣམ་པར་འགྱུར་པ་མེད་ཀྱང༌། མར་མ་དང་ཉེ་བར་གནས་བ་ཙམ་དུ་གྱུར་པའི་སྦྲུལ་ལ་སོགས་པ་དག་གིས་མར་མེའི་འོད་རྣམ་པར་འགྱུར་བ་མ་ཡིན་ཡང་མར་མེ་
ལ་བརྟེན་པ་མ་ཡིན་པ་བཞིན་ནོ། །དེས་ན་རྟེན་འཕེལ་བ་དང་འགྲིབ་པ་མེད་ཀྱང་རྟེན་འཕེལ་བ་དང་འགྲིབ་པ་དང་བཅས་པ་མཐོང་བའི་ཕྱིར་ཅི་ལྟར་ན་བརྟེན་པ་ལ་དེའི་རྗེས་སུ་འབྲངས་པར་ཁྱབ་ཅེ་ན། གྲུབ་པའི་མཐའ་མ་ཡིན་ཏེ་ཞེས་བྱ་བའོ། །མར་མེ་ཉིད་རྣམ་པར་འགྱུར་གྱི་ལུས་ནི་མ་ཡིན་ནོ། །སྦྲུལ་ལ་སོགས་པ་ཉེ་བར་བྱས་པ་དེ་ནིའོ། །དཔལ་ཞན་པའི་མཚན་ཉིད་ཅེས་བྱ་བ་ནི་མ་དངས་ཆུང་བའོ། །མར་ཁུ་ལ་སོགས་པ་རང་གི་ཚོགས་པ་ལས་མར་མེའི་མ་དངས་གསལ་བའི་རྣམ་པ་དང་ལྡན་པ་ཡིན་ཡང་སྦྲུལ་ལ་སོགས་པ་ཉེ་བ་ཙམ་གྱིས་ཆུང་བར་འགྱུར་བར་མཐོང་བ་ཉིད་དོ། །འདིར་ཅི་ཞིག་བརྗོད་པར་བྱ་ཞེ་ན། སྦྲུལ་ལ་སོགས་པ་ཉེ་བས་ཀྱང་མར་མེའི་ཚོགས་པ་རྣམ་པར་འགྱུར་བ་མ་དམིགས་པའི་ཕྱིར། ཅི་ལྟར་མར་མེའི་རྣམ་པར་འགྱུར་ཞེས་བྱ་བ་འབའ་ཞིག་བརྗོད་པར་བྱ་བ་ཡིན་ནོ། །འདི་ལ་ཡང་བརྗོད་པ་ནི་གལ་ཏེ་ཚོགས་བ་དེའི་རྣམ་པར་འགྱུར་པ་མངོན་སུམ་གྱིས་ངེས་པ་མ་ཡིན་པ་དེ་ལྟ་ན་སྒྲོན་མ་འགྱུར་བར་མཐོང་བ་ལས་དེ་རྗེས་སུ་དཔོག་པ་ལ་འགལ་བ་ཅི་ཡོད། རྒྱུ་རྣམ་པར་མ་འགྱུར་བར་ནི་འབྲས་བུ་རྣམ་པར་འགྱུར་བ་མི་མཐོང་བའི་ཕྱིར་རོ། །སྐབས་སུ་བབ་པ་རྣམ་པར་འགྱུར་བ་ཅན་གྱི་འོད་སྐྱེད་པར་བྱེད་པ་མར་མེའི་རྣམ་པར་འགྱུར་བ་ནི་མ་འཁྲུལ་བའི་མངོན་སུམ་གྱིས་ངེས་པར་བཟུང་པ་ཡིན་ནོ་སྙམ་དུ་བསམས་པ་ཡིན་ནོ། །དེས་ན་ཞེས་བྱ་བ་ནི་མར་མེའི་རྣམ་པར་འགྱུར་བ་དབལ་ཞན་པའི་མཚན་ཉིད་ཀྱིས་སོ། །རྣམ་པ་གཞན་དུ་ཞེས་བྱ་བ་ནི་མི་གསལ་བའི་རང་བཞིན་དུའོ། །གལ་ཏེ་ལུས་རྣམ་པར་འགྱུར་བས་ཀྱང་སེམས་རྣམ་པར་འགྱུར་བར་འགྱུར་རོ། །དེས་ན་མར་མེའི་འོད་དཔེར་མི་འགལ་ལོ་སྙམ་ན། བློའི་ཞེས་གསུངས་སོ། །དཔེར་ན་མར་མེའི་འོད་རྣམ་པར་འགྱུར་བའི་དུས་ན་རྒྱུ་རྣམ་པར་འགྱུར་བའི་སྒོ་ནས་སྤྲུལ་ལ་སོགས་པས་མར་མེའི་རྣམ་པར་འགྱུར་བར་བྱས་པར་མཐོང་པ་དེ་བཞིན་དུ་བློའི་བྱེད་པ་གོམས་པའི་མཚན་ཉིད་དང༌། ཤེས་རབ་ལ་སོགས་པའི་བློ་དེ་དག་ཐ་དད་པ་དེའི་དུས་ན་ནི་ལུས་ཀྱི་རྣམ་པར་འགྱུར་བ་མཐོང་བ་མེད་དོ། །དེས་ན་མར་མེའི་འོད་དཔེར་ཅི་ལྟར་འགྱུར་སྙམ་དུ་བསམས་པའོ། །དེ་ལས་ཀྱང་འདི་ཞེས་བྱ་བ་བཤད་པའི་ཕྱིར་གལ་ཏེ་ཞེས་སྨོས་སོ། །དེས་ན་ལུས་ཞེས་བྱ་བ་ནི་གཉི་ག་ལྟར་ཡང་དོན་གཅིག་ཁོ་ནའོ་སྙམ་དུ་
བསམས་པའོ། །འདི་ལྟར་གཞན་ཙམ་ནི་རྟེན་དུ་མི་འདོད་དེ། གཞིའི་ལུས་གཅིག་ཞིག་ན་ལུས་གཞན་གྱི་གཞི་དང་འགྲེལ་པ་མི་འགལ་བའི་ཕྱིར་རོ། །ཆོས་ཅན་གྱི་དངོས་པོར་བརྟགས་པ་ཙམ་ནི་རྟེན་ཉིད་དུ་འདོད་པ་ཡང་མ་ཡིན་ཏེ། ལུས་ལས་ཐ་དད་པའི་བློའི་སྤྱོད་ཡུལ་ཡིན་པས་བློ་ནི་ཆོས་ཙམ་གྱིས་སྟོང་པའི་ཕྱིར་རོ། །དེས་ན་ཉེ་བར་ལེན་པའི་རྒྱུ་ཉིད་ལ་རྟེན་དུ་འདོད་པས་ན་དོན་ཐ་མི་དད་དོ། །ཤེས་རབ་ལ་སོགས་པ་དེར་ཡང་ངོ༌། །སེམས་ལ་ཕན་འདོགས་པ་ཉིད་ཀྱི་སྒོ་ནས་ལུས་རྣམ་པར་འགྱུར་བར་བྱེད་པ་ཡིན་ནོ། །ཞེས་བྱ་བ་འདི་ཡང་ག་ལས་ཤེ་ན་གང་དུ་ཞེས་གསུངས་སོ། །བཅུད་ཀྱིས་ལེན་ལ་སོགས་པའི་རྒྱུས་ལུས་རྒྱས་པས་སོ། །འགའ་ཞིག་ཅེས་བྱ་བ་ནི་ཐམས་ཅད་མ་ཡིན་པའོ། །འགའ་ཞིག་དུ་ཞེས་བྱ་བ་ནི་བསྟན་བཅོས་དང་བཟོ་ལ་སོགས་པ་འགའ་ཞིག་དུ་ཡིན་གྱི་ཐམས་ཅད་ལ་ནི་མ་ཡིན་པའོ། །འདི་ཡང་ཅི་ལྟར་ཡིན་ཏེ། གང་གི་ཕྱིར་བཅུད་ཀྱིས་ལེན་ལ་སོགས་པ་ཟོས་པ་ལས་བསྟན་བཅོས་ལ་སོགས་པ་ཤེས་པ་སྔ་ན་མེད་པ་ཉིད་སྐྱེ་བ་ཡིན་ནོ་སྙམ་ན། དེ་ལྟ་མ་ཡིན་ན་ཞེས་གསུངས་སོ། །གལ་ཏེ་ཅི་ལྟར་འདུས་བྱས་པ་ལ་སོགས་པར་འགྱུར་བ་སད་པ་ལས་ཤེས་རབ་ལ་སོགས་པའི་ཁྱད་པར་དུ་འགྱུར་བ་མ་ཡིན་གྱིས། འོན་ཀྱང་བསྟན་བཅོས་ལ་སོགས་པ་ཤེས་པ་སྔ་ན་མེད་པ་ཁོ་ན་སྐྱེ་བ་ཡིན་ནོ། དེའི་ཚེ་བཅུད་ཀྱིས་ལེན་ཟོས་པར་འདྲ་བའི་ཕྱིར་སྐྱེས་བུ་ཐམས་ཅད་བསྟན་བཅོས་དང་བཟོ་ལ་སོགས་པ་ཐམས་ཅད་ལ་ཤེས་རབ་མཚུངས་པར་ཐལ་ལོ། །དེ་ལྟ་ཡང་མ་ཡིན་ཏེ། དེས་ན་ཤེས་རབ་ལ་སོགས་པའི་ཁྱད་པར་ནི་འདུས་བྱས་པས་ཇི་ལྟར་གྱུར་པ་སད་པ་ཉིད་ལས་ཡིན་ནོ། །དེས་ན་སེམས་ལས་ཕན་གདགས་པ་ཉིད་ཀྱི་སྒོ་ནས་ལུས་རྣམ་པར་འགྱུར་བར་བྱེད་པ་ཡིན་ནོ། །འདི་ཉིད་ཁྱད་པར་གྱི་མཐར་ཐུག་པར་བྱས་ནས་སྟོན་པ་ནི། དཔེར་ན་ཞེས་བྱ་བ་ལ་སོགས་པའོ། །དེ་ལོག་ཅེས་བྱ་བ་ནི་བཀྲེས་པ་ལོག་པ་ནའོ། །དེའི་ཞེས་བྱ་བ་ནི་སྔར་བཀྲེས་པས་གནོད་པར་གྱུར་བའིའོ། །འདི་ཅིའི་ཕྱིར་སྙམ་དུ་དོགས་ན། བཤད་མ་ཐག་པའི་ཐལ་བ་ཉིད་བརྗོད་པ་ནི་བཅུད་ཀྱིས་ལེན་དང༌། དེས་བྱས་པའི་འབྲངས་པ་ཡང་མཚུངས་པའི་ཕྱིར་རོ། །གལ་ཏེ་བསྟན་བཅོས་ལ་སོགས་པ་གོམས་པ་ཇི་ལྟ་བ་བཞིན་དྲན་པར་མི་འགྱུར་བ་ཉིད་ཀྱི་འོན་ཀྱང་བསྟན་བཅོས་ལ་སོགས་པ་ཤེས་པ་སྔ་ན་མེད་པ་ཉིད་འབྱུང་བ་ཡིན་ན། དེའི་
ཚེ་བཅུད་ཀྱིས་ལེན་དེ་ལས་བསྟན་བཅོས་སམ་སྐྱེས་བུ་ཐམས་ཅད་འཆད་པར་འགྱུར་རོ་ཞེས་བྱ་བ་ནི་ཐལ་བའོ། །གང་གི་ཕྱིར་ཐམས་ཅད་ལ་བཤད་པའི་ནུས་པ་མེད་པའི་གཏན་ཚིགས་དེས་ན་ངེས་སོ་ཞེས་འབྲེལ་ཏོ། །ནིའི་སྒྲ་ཡན་ཆོད་ནི་ངེས་པའི་རྣམ་པའོ། །ནིའི་སྒྲ་ནི་གསལ་བའི་དོན་ཏེ་ངེས་པར་གསལ་བ་ཡིན་ནོ་ཞེས་བྱ་བའོ། །འདིས་ནི་འབད་མི་དགོས་པར་འཇིག་རྟེན་ཕ་རོལ་གྲུབ་པར་གྱུར་ཏོ་ཞེས་སྟོན་པའོ། །གང་ཞིག་ལ་ཐམས་ཅད་ལ་སྐྱེ་བ་གཞན་དུ་གོམས་པ་ཡོད་པ་དེ་ནི་བཅུད་ཀྱིས་ལེན་ལ་སོགས་པ་ཟོས་པར་ཁྱད་པར་མེད་པར་ཤེས་རབ་ཐམས་ཅད་ལ་འགྱུར་བ་ཡིན་ནོ་ཞེས་སྟོན་པ་ནི་གང་ལ་ཞེས་བྱ་བའོ། །ཐམས་ཅད་ལ་གོམས་པ་དང་ལྡན་པ་དེའི་ཤེས་རབ་ནི་ཐམས་ཅད་ལ་ཁྱད་པར་མེད་པར་འགྱུར་རོ་ཞེས་སྦྱར་རོ། །འདི་ནི་མངོན་པར་འདོད་པའི་ཐམས་ཅད་མཁྱེན་པ་ཉིད་འོལ་སྤྱི་སྟོན་པའོ། །འདིར་ཡང་སྔ་མ་བཞིན་བཟློག་པ་སྐྱོན་བརྗོད་པ་ནི། དེ་ལྟ་མིན་ན་ཞེས་བྱ་བའོ་ཐམས་ཅད་རིག་པ་ཞེས་བྱ་བ་ནི་དངོས་པོའི་རྣམ་པ་མ་ལུས་པ་རིག་པའོ། །སྐབས་སུ་བབ་པ་ཙམ་ཐམས་ཅད་རིག་པ་ལས་སྔོན་གོམས་པ་ཉིད་ངེས་པ་ཡིན་ནོ། །དེས་ན་ཤེས་རབ་ལ་སོགས་པའི་ཁྱད་པར་ནི་ལུས་ཀྱིས་རྒྱུ་ཅན་མ་ཡིན་ནོ་ཞེས་བྱ་བར་གནས་སོ། །གལ་ཏེ་ཤེས་རབ་ལ་སོགས་པའི་བློའི་ཁྱད་པར་ཡིན་ནོ་ཞེས་ཅི་སྟེ་བརྗོད། འདི་ལྟར་བློ་ནི་དེ་དག་ལས་ཐ་དད་པ་ཁོ་ན་ཡིན་པའི་ཕྱིར་རོ། །དེ་དག་ལུས་ཀྱི་རྒྱུ་ཅན་ཡིན་པ་བཀག་ཀྱང་གོམས་པའི་མཚན་ཉིད་ཀྱི་བློ་སྔོན་དུ་འགྲོ་བ་ཅན་དུ་མ་གྲུབ་པའི་ཕྱིར་སྔོན་གྱི་ངེས་པར་བྱེད་པའི་རྒྱུར་ཅི་ལྟར་འགྱུར་ཞེས་བྱ་བའི་དོགས་པ་ཞེ་ལ་བསྡོགས་ནས། རེ་ཞིག་ཤེས་རབ་ལ་སོགས་པ་བློའི་རང་བཞིན་དུ་བསྟན་པའི་ཕྱིར་ན་བཤད་པ་ནི་མངོན་སུམ་ཞེས་བྱ་བའོ། །འདི་ནི་རྟོག་མེད་ཀྱི་ཤེས་པ་ཉེ་བར་མཚོན་པ་ཙམ་མོ། །དེ་ལས་གཞན་པའི་ཤེས་པ་མཐའ་དག་ནི་དྲན་པ་ཡིན་ཏེ། བཟུང་ཟིན་པ་འཛིན་པའི་ཕྱིར་རོ། །དེ་ལྡན་ན་ཕུང་པོ་གཉིས་སོ། །མངོན་སུམ་དང་དྲན་པ་གཉིས་ཁོ་ན་བློ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ཡང་ཤེས་རབ་ལ་སོགས་པ་ཅི་ལྟར་བློའི་རང་བཞིན་ཉིད་སྙམ་ན། ཤེས་རབ་ཡིད་གཞུངས་ལ་སོགས་ཀྱི། །དབྱེ་བ་དྲན་པ་རབ་རྟོགས་ལས། །ཞེས་གསུངས་ཏེ། རབ་ཏུ་རྟོགས་པའི་དྲན་པ་གང་ཡིན་པ་དེ་ལས་གཞན་ཡོད་པ་མ་
ཡིན་ནོ་ཞེས་འབྲེལ་ཏོ། །དྲན་པ་ནི་ཤེས་རབ་དང་ཡིད་གཞུངས་པ་ལ་སོགས་པའི་བྱེ་བྲག་ཁོ་ན་ཡིན་ནོ་ཞེས་བྱ་བའི་དོན་ཏོ། །གལ་ཏེ་བརྩེ་བ་ལ་སོགས་པ་རྣམས་དྲན་པའི་རང་བཞིན་ཡིན་མོད། ཤེས་རབ་དང་ཡིད་གཞུངས་པ་གཉིས་གོ་ཅི་ལྟར་ཞེ་ན། ཅི་བཞིན་དྲན་པ་ཞེས་གསུངས་སོ། །ཤེས་རབ་འཆལ་པ་ཡང་ཤེས་རབ་ཀྱི་སྐབས་སུ་བསྟན་པ་ནི་དེ་ཡང་གོམས་པའི་རྒྱུ་ཅན་ཁོ་ན་ཡིན་ནོ་ཞེས་བསྟན་པའི་དོན་དུའོ། །འོ་ན་འདི་གཉིས་ཇི་ལྟར་འཐད་སྙམ་ན། དེ་ལ་ཞེས་གསུངས་ཏེ་ཤེས་རབ་དང་ཡིད་གཞུངས་པ་ལའོ། །དབྱེ་བ་གང་ཞེ་ན། སྔོན་གྱི་ཞེས་གསུངས་སོ། །སྔོན་གྱི་འདུ་བྱེད་ཙམ་ལས་ཞེས་བྱ་བ་ནི་སློབ་པའི་འབད་པ་ལ་མི་ལྟོས་པར་ཞེས་བྱ་བའི་དོན་ཏོ། །འདིས་ནི་སྐྱེ་བ་འདི་ལ་མ་གོམས་པའི་གཞལ་བྱ་རང་ཉིད་དཔྱོད་པ་ནི་ཤེས་རབ་ཡིན་ནོ་ཞེས་བསྟན་པ་ཡིན་ནོ། །དེ་ཉིད་ཀྱི་ཕྱིར་གཞན་གྱི་འབད་པ་ལ་སོགས་པས་སྔ་ན་མེད་པའི་གཞལ་བྱ་ངེས་པ་འགོག་པ་མ་ཡིན་ནོ། །འོན་ཀྱང་དེ་ནི་བློ་ཙམ་ཡིན་གྱི་ཤེས་རབ་ནི་མ་ཡིན་ནོ། །རིགས་གང་གིས་ཞེས་བྱ་བ་ལ་སོགས་པ་ཚིག་རྐང་གསུམ་གྱིས་ནི་ཡིད་གཞུངས་པའི་རང་བཞིན་ཡང་བརྗོད་པ་ཡིན་ནོ། །དེ་ཞེས་ལྐོག་ཏུ་གྱུར་པ་རྗོད་པར་བྱེད་པས་ནི་སྔོན་གྱི་གོམས་པ་འཕངས་སོ། །དྲན་པའི་རྗེས་འབྲངས་པ་ཉིད་ཀྱིས་ཞེས་བྱ་བ་ནི་བདག་གིས་ནི་དེ་ལྟར་ཐོས་པའམ་རྟོགས་པ་ཡིན་ནོ་ཞེས་སྒྲའམ་དོན་ངེས་པ་ནི་ཡིད་གཞུངས་པའོ། །ཤེས་རབ་ནི་ཏུ་བརྗོད་པ་རང་ཉིད་འཇིག་པར་བྱེད་པའི་རྣམ་པ་ཡིན་པའི་ཕྱིར་ཐ་དད་དོ། །དེ་ལྟར་བློའི་རང་བཞིན་ཡིན་མོད། དེ་ལྟ་ན་ཡང་འདི་ལས་སྔར་གོམས་ཅི་ལྟར་ངེས་ཏེ། དེ་མེད་ཀྱང་འབྱུང་བའི་ཕྱིར་རོ་སྙམ་དུ་དོགས་ན། གོམས་དང་ཞེས་གསུངས་སོ། །འདི་ནི་ཤེས་རབ་འཆལ་པ་དང༌། ཡིད་གཞུངས་པ་དང༌། དད་པ་དང༌། བརྩེ་བ་ལ་སོགས་པ་རྣམ་པ་གཉིས་ཀྱིས་ཉེ་བར་མཚོན་པ་ཡིན་ནོ། །འདི་སྐད་བརྗོད་པ་ཡིན་ཏེ། ཤེས་རབ་ལ་སོགས་པ་གོམས་པ་མེད་པར་མི་འབྱུང་བ་ཞེས་བྱ་བ་ནི་མངོན་སུམ་དང་མི་དམིགས་པ་དག་ལས་ངེས་པ་ཡིན་ནོ། །དེས་ན་དེ་དག་གི་སྔོན་གྱི་གོམས་པ་ལ་མི་འཁྲུལ་པ་ཁོ་ནའོ། །རྣམ་པ་གཞན་གྱིས་ཀྱང་ཤེས་རབ་དང་ཡིད་གཞུངས་པ་གཉིས་ཀྱི་ཁྱད་པར་བརྗོད་པ་ནི། དེ་བཞིན་དུ་ཞེས་བྱ་བའོ། །སོ་སོ་སོ་སོར་བཟུང་བའི་དོན་རྣམས་རང་བཞིན་དེ་ཉིད་ཀྱི་དེ་བཞིན་དྲན་པ་གང་ཡིན་པ་དེ་ནི་ཡིད་གཞུངས་པ་ཡིན་པར་བརྗོད་
ལ། དེ་ཉིད་ཞེས་བྱ་བ་སོ་སོ་སོ་སོར་བཟུང་བའི་དོན་དེ་དག་ཉིད་དོན་གཅིག་ལ་ཉེ་བར་སྦྱོར་བའི་དྲན་བ་གང་ཡིན་པ་དེ་ནི་ཤེས་རབ་ཡིན་པར་བརྗོད་དོ། །ཅི་ལྟར་ཞེ་ན། ཁྱད་པར་ཅན་དུ་ནི་སྟེ། ཡིད་གཞུངས་པའི་རང་བཞིན་ལས་འཕགས་པའི་ཁྱད་བར་གྱིས་ཁྱད་པར་ཅན་དུའོ། །འདི་ལྟར་ཡིད་གཞུངས་པ་དང་ལྡན་པ་གཞན་གྱིས་བརྗོད་པའི་གཞུང་དཀའ་བ་ལ་སོགས་པ་ལ། དེའི་དོན་རྟོགས་པ་མེད་ཀྱང་ཚིག་དེ་དག་དེ་ཁོ་ན་ལྟར་དྲན་པ་ཡིན་ལ། ཤེས་རབ་དང་ལྡན་པས་ནི་དོན་གཅིག་ལ་ཉེ་བར་སྡུད་པར་སྦྱོར་བར་མཐོང་པ་ཡིན་ནོ། །ཤེས་རབ་དེ་ཡང་གོམས་པ་མེད་པ་མི་འབྱུང་ཞེས་སྟོན་པ་ནི། གོམས་པ་མེད་པར་ཞེས་བྱ་བའོ། །དེ་ལྟར་རང་གི་ངོ་བོ་བསྟན་ཏེ། མི་འཁྲུལ་བ་ཡང་བསྟན་ནས། མཇུག་སྡུད་པས་གོམས་པ་རྗེས་སུ་དཔོག་པར་བྱེད་པ་སྟོན་པ་ནི། དེས་ནི་ཞེས་བྱ་བའོ། །གང་གི་ཕྱིར་དེ་ལྟར་རང་གི་ངོ་བོ་མ་གྲུབ་པ་ལ་སོགས་པ་ཉེས་པ་མེད་ན། དེ་ཡི་རིགས་ཅན་དོན་གྱིས་ནི། །སྔོན་གྱི་གོམས་པ་རྗེས་དཔོག་བྱེད། །ཅེས་བྱ་བ་ལ། དེའི་རིགས་ཅན་ཡང་ཡིན་ལ་དོན་དེ་འབྲས་བུ་འང་ཡིན་པ་དེ་ལས་ཏེ། གོམས་པས་བསྐྱེད་པ་སྦྱོར་བར་བྱེད་པའི་རིགས་མཐུན་པ་ལས་སོ། །སྦྱོར་བ་བྱེད་པའི་མཚན་ཉིད་ཀྱི་འབྲས་བུ་ལས་ཞེས་བྱ་བའི་དོན་ཏོ། །དེ་བཞིན་དུ་ཡིད་གཞུངས་པ་དང་དད་པ་ལ་སོགས་པ་ལས་ཀྱང་ངོ༌། །དེས་ནི་དོན་གྱིས་དེའི་རིགས་ཅན། སྔོན་གྱི་གོམས་པ་རྗེས་དཔོག་བྱེད། །ཅེས་འདོན་པར་ནི་གོ་བར་སླའོ། །ད་ནི་ལྷག་པ་བརྗོད་པའི་དོན་དུ་ཤེས་རབ་ལ་སོགས་པ་རྣམས་བློའི་ཁྱད་པར་དུ་བསྒྲུབས་ལ། གཞན་གྱི་དོགས་པའི་གོ་སྐབས་བསུ་བ་ནི་གལ་ཏེ་ཞེས་བྱ་བའོ། །དེ་ལྟར་མ་ཡིན་ན་ཞེས་བྱ་བ་ནི་གལ་ཏེ་ལུས་ལས་བློ་མི་སྐྱེད་ན་དེའི་ཚེ་ལུས་དེའི་རྗེས་སུ་བྱེད་པར་མི་འགྱུར་རོ། །ལུས་རྒྱས་པ་ལས་འདོད་ཆགས་འཕེལ་བ་དང༌། ཟད་པ་ལས་ཞེ་སྡང་འཕེལ་བ་གང་ཡིན་པ་དེ་ནི་ཚུལ་བཞིན་མ་ཡིན་པ་ཡིད་ལ་བྱེད་པའི་དུས་འགའི་ཚེ་ཡིན་གྱི། དོ་ཁོ་ན་ཡིད་ལ་བྱེད་བའི་བག་ཆགས་དང་འབྲེལ་བའི་དུས་ན་ནི་མ་ཡིན་ནོ་ཞེས་བྱ་བའི་དོན་ཏོ། །འཇིག་རྟེན་རྒྱང་འཕན་པས་བརྗོད་པ་བདེ་བ་དང་སྡུག་བསྔལ་ལས་སྐྱེས་པའི་འདོད་ཆགས་ལ་སོགས་པ་འཕེལ་བ་གང་ཡིན་པ་དེ་ཡང་རེས་འགའ་ཁོ་ན་ཡིན་ནོ་ཞེས་བྱ་བའི་དོན་ཏོ། །དོན་འདི་ནི་འགྲེལ་པར་
གསལ་བར་བྱེད་པར་འགྱུར་རོ། །བདེ་བ་ལ་སོགས་པ་ཡང་གལ་ཏེ་ལུས་ལས་ཡིན་པ་དེའི་ཚེ་ཡང་ལུས་ཉིད་ཀྱི་ནུས་པ་ཡིན་ནོ་སྙམ་ན། གང་ཡང་ཞེས་གསུངས་ཏེ། བདེ་བ་དང་སྡུག་བསྔལ་ལོ། །ཁམས་སྙོམས་པ་དང་མ་སྙོམས་པ་ལ་སོགས་པ་ནང་གི་དོན་ཏོ་ཡུལ་དེ་ཉིད་ལས་སྐྱེ་བ་ཡིན་ནོ་ཞེས་བྱ་བ་ནི་ལྷག་མའོ། །དེས་ན་ལུས་ནུས་པ་མ་ཡིན་ནོ་སྙམ་དུ་དགོངས་པའོ། །བུ་ལ་སོགས་པའི་ཡུལ་ཉེ་བ་ལས་སྐྱེས་པའི་བདེ་བ་ལ་སོགས་པ་ནི་ལུས་ཀྱི་ནུས་པ་མ་ཡིན་ནོ། །དེ་ལ་འགའི་ཚེ་ཞེས་བྱ་བ་ལ་སོགས་པ་རེ་ཞིག་རྣམ་པར་འགྲེལ་པ་ནི། རྒྱས་པ་ལ་སོགས་པ་ཞེས་བྱ་བའོ། །ཚུལ་ནི་དངོས་པོ་རྣམས་ཀྱི་དེ་ཁོ་ན་ཉིད་དོ། །བཞིན་ཞེས་བྱ་བ་ནི་རྟོགས་པ་སྟེ། ངེས་པར་རྟོགས་པས་སྟེ་དེས་ན་ཚུལ་བཞིན་ནོ། །གང་གིས་དེ་ལྟར་བརྗོད་པ་དེ་ལྟ་བུ་འགའ་ཞིག་མཐོང་ངམ་ཅི་སྙམ་ན། གང་ཞིག་ཅེས་གསུངས་སོ། །བདེ་སྡུག་ནི་འཕེལ་བར་འགྱུར་རོ་སྙམ་དུ་བསམས་པའོ། །རྒྱུད་ཀྱང་རང་བཞིན་གྱིས་བརྩེ་དང་ལྡན་པ་ལ་ནི་བརྩེ་བ་ཉིད་འབྱུང་ལ། ཚུལ་བཞིན་མ་ཡིན་པའི་ཡིད་ལ་བྱེད་པ་ཤས་ཆེ་བ་ལ་ནི་འདོད་ཆགས་འབྱུང་གི་སྡང་བ་ལ་ནི་མ་ཡིན་ནོ། །དེས་ན་རྒྱས་པ་ལ་སོགས་པ་འཕེལ་བའི་རྗེས་སུ་མི་བྱེད་པའི་ཕྱིར་ན། འདོད་ཆགས་ལ་སོགས་པ་ནི་རྒྱས་པ་ལ་སོགས་པའི་རྒྱུ་ཅན་མ་ཡིན་ནོ་སྙམ་དུ་དགོངས་པའོ། །འོ་ན་བདེ་བ་དང་སྡུག་བསྔལ་དག་ནི་རྒྱུར་འགྱུར་ཏེ། བརྒྱུད་ནས་ལུས་ཀྱི་རྒྱུར་མི་འགལ་བའི་ཕྱིར་རོ་སྙམ་དུ་དོགས་པ་ལ། འདོད་ཆགས་ལ་སོགས་པའི་བདེ་བ་དང་སྡུག་བསྔལ་ལས་སྐྱེས་པར་འཇིག་རྟེན་རྒྱང་འཕན་པས་བརྗོད་པའོ། །དེས་ཅི་ལྟར་བརྗོད་ཅེ་ན་བདེ་བ་མྱོང་ན་ནི་ཞེས་བྱ་བའོ། །འདི་ལས་བདེ་བ་སྐྱེས་པ་ཡོད་པ་ནི་བདེ་བ་སྟེ། ལྡོག་པའི་ཐ་དད་པ་བརྟགས་པས་སོ། །ཡང་ན་བདེ་བ་དང་ལྡན་པའི་དངོས་པོ་ནི་བདེ་བ་སྟེ། རང་རིག་བའི་སྟོབས་ཀྱིས་བདེ་བར་ཐ་སྙད་བྱེད་པའོ། །དེ་བཞིན་དུ་སྡུག་བསྔལ་བར་གྱུར་པ་ཡང་རྟོགས་པར་བྱའོ། །རྗེས་སུ་འབྲེལ་པ་ནི་ལྡན་པའོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་བདེ་བ་དང་སྡུག་བསྔལ་བ་ལས་སྐྱེས་པ་ཡང་བརྗོད་པ་ཡིན་ནོ། །འཇིག་རྟེན་རྒྱང་འཕེན་པའི་ལུགས་ལ་བརྟེན་པ་ཉིད་ཀྱིས་ཞེ་སྡང་སྡུག་བསྔལ་ལས་སྐྱེས་པར་གཞན་དག་གི་དོགས་པ་བསུ་བ་ནི། བདེ་བ་ན་ནི་ཞེས་བྱ་བའོ། །དེ་ཉིད་ཀྱིས་ཞེས་བྱ་བ་
ནི་བདེ་བ་དེ་ཉིད་ཀྱིས། སྔོན་གྱི་ཚུལ་བཞིན་མ་ཡིན་པ་ཡིད་ལ་བྱེད་པ་སད་པ་ཡིན་ནོ། །བདེ་བ་ནི་སྔོན་གྱི་དེ་ཉིད་ཀྱིས་ཚུལ་བཞིན་མ་ཡིན་པའི་ཡིད་ལ་བྱེད་པ་སད་པར་འགྱུར་བ་ཡིན་ནོ་ཞེས་འདོན་པ་དེར་ནི་བདེ་བའི་རྒྱུན་ལ་ལྟོས་ནས་སྔར་བྱུང་བའི་སྔོན་གྱི་བདེ་བ་དེ་ཉིད་ཀྱིས་ཚུལ་བཞིན་མ་ཡིན་པའི་ཡིད་ལ་བྱེད་པ་སད་པར་འགྱུར་བ་ཡིན་ནོ། །དེའི་ཕྱིར་བདེ་བ་ན་འདོད་ཆགས་རྗེས་སུ་འབྲེལ་པ་ཞེས་བྱ་བ་ནི་འཐད་པ་ཡིན་ན། སྡུག་བསྔལ་པ་ལ་གོ་ཞེས་སྡང་རྗེས་སུ་འབྲེལ་བར་འགྱུར་ཞེས་བྱ་བ་ནི་ལྷག་མའོ། །ཞེ་སྡང་འབྱུང་བ་ཅི་ལྟར་འཐད་ཅེས་བྱ་བའི་ཐ་ཚིག་གོ །འདི་ལ་འཇིག་རྟེན་རྒྱང་འཕེན་པའི་ལན་བརྗོད་པ་ནི། སྡུག་བསྔལ་བ་ནི་ཞེས་བྱ་བའོ། །སྡང་བ་ཉིད་དེ་ཆགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལྟར་བདེ་བ་དང་སྡུག་བསྔལ་བ་ལས་སྐྱེས་པར་བརྗོད་པ་ཡིན་ནོ། །རེས་འགའ་ཞེས་བྱ་བའི་དོན་ཉིད་གསལ་བར་བྱེད་པས་འདི་ཡང་སུན་འབྱིན་པ་ནི་འདིར་ཞེས་བྱ་བའོ། །གང་ཡང་ཞེས་བྱ་བ་ནི་འདིར་ཞེས་བྱ་བ་དེ་དང་འབྲེལ་ཏོ། །འདོད་ཆགས་དང་ཞེ་སྡང་དག་རིམ་པ་བཞིན་བདེ་བ་དང་སྡུག་བསྔལ་ལས་སྐྱེས་པ་ཞེས་བྱ་བ་འདི་ལ་ངེས་པ་ཡོད་པ་མ་ཡིན་ནོ་ཞེས་རྟོགས་པར་བྱའོ། །ཅིའི་ཕྱིར་དེ་ལྟ་མ་ཡིན་སྙམ་ན། ཡིད་སྡུག་བསྔལ་ན་ཡང་ཞེས་གསུངས་སོ། །སོ་སོར་ཏེ་སྟོབས་ཀྱིས་ཡང་དག་པར་རྟོགས་ཤིང་གསལ་བ་ནི་སོ་སོར་རྟོགས་པ་སྟེ་དེ་དང་ལྡན་པའོ། །རང་གི་སྡུག་བསྔལ་རྒྱུར་གྱུར་བས། གནོད་པར་བྱེད་པའི་སྡུག་བསྔལ་རྣམ་པ་དུ་མ་འབྱུང་བར་འགྱུར་བ་རྣམས་ཡིད་ཆེས་པའི་ལུང་ལས་རྗེས་སུ་དཔག་པ་གང་ཡིན་པ་དེ་ལས་གནོད་པ་བྱེད་པ་ལ་རྩ་བ་ཉིད་སྐྱེ་བར་འགྱུར་གྱི་སྡང་བ་ནི་མ་ཡིན་ནོ། །ཆགས་པ་ཡང་ཞེས་བྱ་བ་ནི་གནོད་པ་བྱེད་པ་ལ་བརྩེ་བ་འབའ་ཞིག་ཏུ་མ་ཟད་དེ། འོན་ཀྱང་སྡུག་བསྔལ་ཕྱིར་གཞིལ་བའི་རྒྱུ་ལ་ཆགས་པར་ཡང་འགྱུར་རོ། །སོ་སོར་རྟོག་པ་དང་བྲལ་ཡང་འགའ་ཞིག་རང་བཞིན་གྱིས་བཟང་བས་ན་སྡང་བ་ཤས་ཆུང་བ་ནི་སྡུག་བསྔལ་ཕྱིར་གཞིལ་བར་བྱེད་པ་ལ་མོད་ལ་ཆགས་པ་ས་སྡུག་བསྔལ་སྐྱེ་བ་སེལ་བར་བྱེད་དོ་ཞེས་བྱ་བའི་དོན་ཏོ། །འདིས་ནི་བདེ་བར་གྱུར་བ་རིག་པ་ན་ཡང༌། མི་སྡུག་པ་བསྒོམ་པ་དང་རྗེས་སུ་འབྲེལ་བས་ཞེ་སྡང་བ་དང༌། འདོད་ཆགས་ཆུང་བར་འགྱུར་བ་ཡང་བསྟན་པ་ཡིན་ནོ། །དེས་ན་བདེ་བ་ལ་སོགས་པ་
འཕེལ་བ་དང་འགྲིབ་པའི་རྗེས་སུ་མི་བྱེད་པའི་ཕྱིར་རོ། །དེ་དག་ཀྱང་རྒྱུ་མ་ཡིན་པ་ཁོ་ནའོ། །དེས་ན་ལུས་བརྒྱུད་ནས་རྒྱུར་ཅི་ལྟར་འགྱུར་སྙམ་དུ་དགོངས་པའོ། །གལ་ཏེ་གཉི་ག་ལྟར་ལུས་རྒྱུ་ཉིད་མ་ཡིན་ན། འོ་ན་གལ་ཏེ་ཞེས་བྱ་བ་ལ་སོགས་པའོ། །ཅིའི་ཕྱིར་དེ་ལྟར་སྐྱེ་བ་མ་ཡིན་སྙམ་པ་ལ་ལུས་རྟེན་དུ་གྱུར་པས་ཞེས་གསུངས་སོ། །ཉེ་བར་ལེན་པར་གྱུར་པས་ནི་མ་ཡིན་ནོ། །དེའི་ཚེ་ཉེ་བར་གནས་པ་ཙམ་གྱིས་ཤེས་པའི་ཡུལ་ཡིན་ནོ། །གལ་ཏེ་ལུས་ཡུལ་དུ་གྱུར་བ་ཡང་བདེ་བ་ལ་སོགས་པའི་སྐྱེད་བྱེད་ཡིན་པའི་བློའི་རྟེན་ཅི་སྟེ་མ་ཡིན་སྙམ་ན། ཡུལ་ནི་བདེ་བ་ལ་སོགས་པ་ཞེས་གསུངས་སོ། །བདེ་བ་དང་སྡུག་བསྔལ་དེ་དག་གིའོ། །དེའི་ཚེ་ཉེ་བར་གནས་པའི་ཡུལ་ནི་ཕྱི་དང་ནང་མཚུངས་ཏེ་དེའི་ཕྱིར་བདེ་བ་ལ་སོགས་པའི་ཡང་རྟེན་མ་ཡིན་ན་དེའི་སྒོ་ནས་སེམས་ཀྱི་རྒྱུན་གྱི་རྟེན་དུ་ལྟ་འགྱུར་རེ་ཡང་སྐན། གང་གི་ཕྱིར་དེ་ལྟར་ནང་དང་ཕྱིའི་ཡུལ་མཚུངས་པའི་གཏན་ཚིགས་དེས་ན་ནང་འབའ་ཞིག་རྟེན་དུ་འགྱུར་བར་མ་ཟད་དོ། །མེ་ཏོག་ཕྲེང་དང་ཙནྡན་ལ་སོགས་པ་ཕྱི་རོལ་ཡང་རྒྱུ་ཉིད་དུ་ཐལ་བར་འགྱུར་རོ། །འགྱུར་ན་རག་མོད་སྙམ་ན། འདོད་པ་ནི་མ་ཡིན་ཏེ་ཞེས་གསུངས་ཏེ། གཞན་གྱིས་ཀྱང་ཕྱི་རོལ་ཏུ་ཉེ་བར་ལེན་པ་ཉིད་དུ་མི་འདོད་དོ་ཞེས་བྱ་བའི་དོན་ཏོ། །གལ་ཏེ་བདེ་བ་ལ་སོགས་པ་ནི་ཐམས་ཅད་ཀྱི་ཚེ་ནང་དོན་གྱིས་ཉེ་བར་བསྟན་པ་ཉིད་དུ་སྐྱེ་བའི་ཕྱིར། ཕྱི་རོལ་ཡང་ཉེ་བར་ལེན་པ་ཉིད་དུ་ཐལ་བར་འགྱུར་རོ་ཞེས་ཅི་སྟེ་བརྗོད་སྙམ་ན། གང་གི་ཚེ་ཞེས་གསུངས་སོ། །འོན་ཏེ་ཞེས་ནང་གི་ཡན་ལག་ཉིད་དུ་ཉེ་བར་གནས་པ་ཅི་ལྟར་དམིགས་པ་མ་ཡིན་སྙམ་ན། སྙིང་དུ་སྡུག་པ་མཐོང་བ་ལ་སོགས་པ་ཞེས་གསུངས་སོ། །གང་གིས་ནང་གི་དོན་མྱོང་བར་བྱེད་པ་ཡང་མི་མཐུན་པར་སྐྱེ་བར་འགྱུར་བ། ཕྱི་རོལ་འགའ་ཞིག་ལ་ཡང་དེ་འདྲ་བར་ཆགས་པར་འགྱུར་བ་ཡིན་ནོ། །དེ་ལ་བརྟེན་པ་མ་ཡིན་ནོ་ཞེས་བྱ་བ་ནི་ནང་གི་དོན་ཏོ། །ཉེ་བར་ལེན་པ་མ་ཡིན་ཏེ། དེ་ལྟ་ན་ནི་ཕྱི་རོལ་ཡང་རྟེན་ཉིད་དུ་ཐལ་བར་འགྱུར་རོ་ཞེས་བྱ་བའི་དོན་དུ་དགོངས་པའོ། །དེ་ལྟ་ཡིན་ལ་རག་མོད་སྙམ་ན། ཡུལ་ནི་ཞེས་གསུངས་སོ། །འདི་ག་ལས་སྙམ་ན་དེ་ལྡོག་པས་ཞེས་གསུངས་སོ། །ཡུལ་གང་ཡང་རུང་བ་ཅིག་ལོག་པས་ནི་བདེ་བ་དང་སྡུག་བསྔལ་དག་མི་ལྡོག་སྟེ། ཡུལ་གཞན་ཡོད་པའི་ཕྱིར་རོ་དེས་ན་ཡུལ་ཉེ་
བར་ལེན་པར་ག་ལ་འགྱུར། དེ་ལྟ་ཡིན་དང་ལུས་འདི་ལ་གནས་པའི་སེམས་ལུས་གཞན་ལ་འཕོ་བར་ཅི་ལྟར་འགྱུར་ཞེས་བརྗོད་པ་དེ་ཡང་གསལ་པ་ཡིན་ནོ་ཞེས་བྱ་བ་ནི། དཔེར་ན་ཞེས་བྱ་བའོ། །ནང་གི་ཡུལ་ལ་རྒྱུ་བ་དེ་སྤངས་ནས་སོ། །འཇིག་རྟེན་ཕ་རོལ་ནི་གཙོ་བོའི་སྐྱེ་བའོ། །སོགས་པའི་སྒྲས་ནི་བར་མདོའི་སྲིད་པ་བཟུང་ངོ༌། །དེ་ན་ཡོད་པའི་ལུས་གཞན་གང་ཡོད་པ་དེར་གསོ་བ་ཡིན་ནོ། །བཤད་ཟིན་པའི་ཡུལ་གཞན་ལ་ཡང་སྦྱོར་བ་ནི། འདིས་ནི་ཞེས་བྱ་བ་སྟེ། འདོད་ཆགས་ལ་སོགས་པ་ལུས་ལ་བརྟེན་པ་ཉིད་གསལ་བས་སོ། །འདུས་པ་དང་གནས་མི་བཟད་པར་བསྣུན་པ་ལ་སོགས་པ་དང་ལྡན་པ་ལས་དྲན་པ་ཉམས་པ་ལ་སོགས་པ་འགྱུར་བ་ཡང་བཤད་པ་ཡིན་ནོ། །ཅི་ལྟར་འདིས་འདི་བཤད་ཅེ་ན། ནང་དོན་ཞེས་གསུངས་སོ། །ནང་དོན་ཁྱད་པར་ནི་བཟོད་པར་དཀའ་བའི་རེག་བྱའི་མཚན་ཉིད་སྡུག་བསྔལ་གྱི་བློ་སྐྱེད་པར་བྱེད་པ་གང་ཡིན་པའོ། །དེ་ཡང་དྲན་པ་ཉམས་པར་བྱེད་པས་སེམས་རྣམ་པར་འགྱུར་བར་བྱེད་པ་ཡིན་ནོ། །གལ་ཏེ་ཚུལ་འདི་ནི་འདི་ཁོ་ནར་བརྗོད་པ་ཡིན་གྱི་སྔར་ནི་མ་ཡིན་ཏེ། དེས་ན་དེ་བཞིན་དུ་འདིར་ཡང་སྦྱར་བར་ཅི་ལྟར་འགྱུར་ཞེ་ན། དེར་ཡང་ཞེས་གསུངས་སོ། །ཡང་ནི་རིམ་པ་གཞན་ཏེ། ལུས་པ་ལ་སོགས་པ་འབའ་ཞིག་ལས་ཡིན་པར་ནི་མ་ཟད་དེ་འོན་ཀྱང་བཅུད་ཀྱིས་ལེན་པ་ལ་སོགས་པས་ཀྱང་ནང་གི་དོན་ཉེ་བ་ན་བདེ་བ་ལ་སོགས་པའི་བློ་སྐྱེད་པ་ཡིན་ནོ། །དེས་ན་དེ་བཞིན་དུ་འདིར་ཡང་སྦྱར་བར་རིགས་སོ་ཞེས་བྱ་བར་བསམས་པའོ། །འདུས་པ་ལ་སོགས་པས་བསྐྱེད་པའི་བདེ་བ་ལ་སོགས་པའི་བློ་དེ་ལས་དྲན་པ་ཉམས་པ་ལ་སོགས་པར་འགྱུར་བ་ཡིན་ཏེ་ཤེས་རབ་ལ་སོགས་པ་བཞིན་ནོ་ཞེས་བྱ་བ་ནི་ལྷག་མའོ། །ལྷུར་བྱ་བ་གསུངས་པ་ནི་ལུས་ཀྱི་ཞེས་བྱ་བའོ། །འོན་ཀྱང་བདེ་བ་ལ་སོགས་པའི་ཤེས་པའི་ཡུལ་དུ་གྱུར་པ་ཉིད་ལས་དྲན་པ་ཉམས་པ་ལ་སོགས་པར་འགྱུར་བ་ཡིན་ནོ་སྙམ་དུ་དགོངས་པའོ། །གལ་ཏེ་དཔེར་ན་མིག་ལ་སོགས་པ་རྣམས་མིག་གི་རྣམ་པར་ཤེས་པ་ལ་སོགས་པ་སྐྱེ་བའི་རྟེན་ཡིན་པ་དེ་བཞིན་དུ། ལུས་ཀྱང་ཤེས་རབ་ལ་སོགས་པ་སྐྱེ་བའི་རྟེན་དུ་འགྱུར་རོ། །དེས་ན་ཅི་ལྟར་དེ་བཞིན་དུ་འདིར་སྦྱར་བ་ལས་མངོན་པར་འདོད་པ་འགྲུབ་སྙམ་དུ་དོགས་ན། ཅི་ལྟར་
མིག་ལ་སོགས་པ་ཞེས་གསུངས་སོ། །ཀྱང་ནི་ངེས་པར་གཟུང་བའི་དོན་ཏོ། །མིག་ལ་སོགས་པ་དེའི་ཤེས་པའོ་དེ་བཞིན་དུ་བཅུད་ཀྱིས་ལེན་ལ་སོགས་པས་འགྱུར་བ་ཡང་དེ་ཡིན་ཏེ། ཁྱད་པར་དང་ལྡན་པའི་ལུས་མ་དམིགས་པ་དེ་ལས་ནི། ཤེས་རབ་དང་ཡིད་གཞུངས་པ་ལ་སོགས་པ་མ་ཡིན་ནོ་ཞེས་བྱ་བ་ནི་ལྷག་མའོ། །གལ་ཏེ་མ་དམིགས་ཀྱང་རྒྱུར་འགྱུར་ན་གང་གིས་དེ་སྐད་བརྗོད་ཅེ་ན། རྣམ་པར་ཤེས་པ་མེད་པ་ཞེས་གསུངས་སོ། །བདེ་བ་ལ་སོགས་པའི་ཤེས་པས་ཡུལ་དུ་མ་བྱས་པའི་ལུས་བདེ་བ་ལ་སོགས་པའི་རྒྱུར་ཁས་ལེན་ནམ་ཤེས་པ་ཐམས་ཅད་ཀྱི་རྒྱུ་ཡིན་པར་ཐལ་ལོ། །གང་གིས་ཡིད་གཞུངས་པ་ལ་སོགས་པའི་རྒྱུར་མི་འགྱུར་བ་མ་ཤེས་པ་ཉིད་དུ་ནི་ཁྱད་པར་འགའ་ཡང་ཡོད་པ་མ་ཡིན་ནོ། །གལ་ཏེ་ཆོས་མི་མཐུན་པའི་ཕྱིར་དེ་ལྟར་ལུས་ཡིད་གཞུངས་པ་ལ་སོགས་པའི་རྒྱུར་མ་གྱུར་མོད། མིག་ལ་སོགས་པ་ལྟར། བདེ་བ་ལ་སོགས་པ་ལ་ལྟོས་ནས་ནི་རྟེན་དུ་འགྱུར་རོ་སྙམ་ན། མིག་ལ་སོགས་པ་ནི་ཞེས་གསུངས་སོ། །མིག་ཡོད་ན་ནི་དེའི་རྣམ་པར་ཤེས་པ་རྒྱུན་འབྲེལ་པར་འཇུག་ལ། ལོག་ན་ཡང་ལྡོག་ཅིང་འགྱུར་ན་ཡང་འགྱུར་བའི་ཕྱིར་ན་དེ་ནི་རྟེན་དུ་འགྱུར་རོ། །དེ་བཞིན་དུ་གཞན་ལ་ཡང་རྟོགས་པར་བྱའོ། །རྣམ་པར་ཤེས་པ་ཙམ་ལ་ལྟོས་ནས་ནི། དེ་རྣམས་རྟེན་ཉིད་དུ་འདོད་པ་མ་ཡིན་ནོ། །འདིར་ཡང་ལུས་དང་ཆོས་མཐུན་པ་མ་ཡིན་པར་བརྗོད་པ་ནི་ལུས་ནི་དེ་ལྟར་ཞེས་བྱ་བ་སྟེ། ནང་གི་དོན་གྱི་མཚན་ཉིད་ཅན་ནོ། །གཞན་གྱི་རྟེན་གྱིས་དངོས་པོར་བརྗོད་པར་བྱ་བ་ཞེས་བྱ་བ་ནི་ལྷག་མའོ། །དེ་ལྟ་ན་བདེ་བ་ལ་སོགས་པའི་ཁྱད་པར་ཁོ་ནའི་རྟེན་དུ་འགྱུར་གྱི། བདེ་བ་ལ་སོགས་པ་ཐམས་ཅད་ལས་ལྟོས་ནས་ནི་མ་ཡིན་པར་འགྱུར་ན། བདེ་བ་ལ་སོགས་པ་ཐམས་ཅད་ལ་ལྟོས་པ་ཁོ་ནས་ནི་འདོད་པ་ཡང་ཡིན་ནོ། །དེ་ལྟ་མ་ཡིན་ན་ལུས་ལོག་ན་བདེ་བ་ལ་སོགས་པ་ལྡོག་པའི་ཕྱིར་བློ་ལྡོག་བ་ཅི་ལྟར་གྲུབ་པར་འགྱུར། ཡང་དེ་ལྟར་བརྟེན་པ་ཉིད་ཅི་སྟེ་མ་གྲུབ་ཅེ་ན། དེ་མེད་ཀྱང་ཞེས་གསུངས་སོ། །ནང་གི་དོན་གྱི་མཚན་ཉིད་ཅན་བདེ་བ་ལ་སོགས་པ་སྐྱེད་པར་བྱེད་པའི་ལུས་མེད་ཀྱང་ངོ༌། །སྡུག་པའི་བུ་ལ་སོགས་པ་ཕྱི་རོལ་གྱི་དོན་ཉེ་བར་གནས་པ་ལས་ཀྱང་ངོ༌། །དེས་ན་ལུས་ནི་བདེ་བ་ལ་སོགས་པའི་རྟེན་མ་ཡིན་ན། གང་གིས་བརྒྱུད་ནས་འདོད་
ཆགས་ལ་སོགས་པའི་རྟེན་དུ་འགྱུར། དེས་ན་མིག་ལ་སོགས་པ་ལྟར་ལུས་ནི་ཤེ་སར་བ་ལ་སོགས་བའི་རྟེན་མ་ཡིན་ནོ་ཞེས་བྱ་བ་གྲུབ་པོ། །དེས་ན་ཤེས་རབ་ལ་སོགས་པ་ལྟར་དྲན་པ་ཉམས་པ་ལ་སོགས་པ་ལུས་ལ་བརྟེན་པ་མ་ཡིན་ནོ། །གང་གིས་སྐྱེ་བ་དྲན་པ་ཉམས་པ་ལ་སོགས་པ་འདུས་པ་ལ་སོགས་པས་བསྐྱེད་པའི་དྲན་པ་ཉམས་པ་དེ་ལྟར་རྟོགས་པ། དམིགས་པ་དྲན་པ་ལ་སོགས་པའི་རྒྱུ་ཡིན་པར་འགའ་ཞིག་ཏུ་མཐོང་ངམ་ཞེ་ན། དྲན་པ་ཉམས་པ་ཡང་ཞེས་གསུངས་སོ། །རྒྱུ་ཁྱད་པར་ཅན་ནི་སྔར་བའི་ཁྱད་པར་ཙམ་མོ། །གཞན་དུ་ཞེས་བྱ་བ་ནི་རྣམ་པར་གནོན་པར་རོ། །དེ་བཞིན་དུ་ཞེས་བྱ་བ་ནི་དོན་ལ་སྦྱོར་བར་བྱེད་པའོ། །ཉེས་པ་ལས་ཞེས་བྱ་བ་འདིའི་བཤད་པ་ནི་སྐྱེས་པ་ལས་ཞེས་བྱ་བའོ། །ཡང་ན་དམིགས་པ་ཉེ་བ་གང་ཡིན་པ་དེ་སྐྱེད་པའི་ཕྱིར་རོ་ཞེས་བྱ་བའོ། །སྩོགས་པའི་སྒྲས་ནི་བཅུད་ཀྱིས་ལེན་པ་ལ་སོགས་པ་ལས་དྲན་པ་སད་པ་ལ་སོགས་པ་བསྡུའོ། །མཇུག་སྡུད་པའི་ལུས་ནི་བློའི་རྟེན་མ་ཡིན་ནོ་ཞེས་བྱ་བའོ། །གལ་ཏེ་ལུས་བདེ་བ་ལ་སོགས་པའི་རྟེན་ཡིན་པའི་ཕྱིར། བློ་ཡང་བརྒྱུད་ནས་ལུས་ལ་བརྟེན་པ་ཉིད་མ་ཡིན་ནམ། དེས་ན་ལུས་ལོག་ན་བློ་ལྡོག་པ་ལ་འགལ་བ་ཅི་ཡོད་སྙམ་ན། ལུས་ནི་ཞེས་གསུངས་སོ། །དེས་དེ་དག་ཀྱང་ཞེས་བྱ་བ་བདེ་བ་ལ་སོགས་པ་ཡང་སྟེ། བློ་ཙམ་ནི་མ་ཟད་དོ། །དམིགས་པ་གཞན་ལ་ཞེས་བྱ་བ་ནི་ཕྱི་རོལ་ལའོ། །འདིའི་གཙོར་བྱ་བ་ནི། དཔེར་ན་ནང་གི་ཡུལ་ལ་ཞེས་བྱ་བ་ལ་སོགས་པས་བསྟན་པ་ཉིད་ཡིན་ནོ། །འོ་ན་སེམས་རྟེན་མེད་པར་ཐལ་ལོ་སྙམ་ན། དེའི་ཕྱིར་ཞེས་གསུངས་སོ། །གང་གི་ཕྱིར་དབང་པོ་དང༌། ཡུལ་དང་ལུས་ནི་བློའི་རྟེན་མ་ཡིན་པ་དེའི་ཕྱིར་རོ། །དགོངས་པ་ནི་གལ་ཏེ་གཞན་གྱིས་ཀུན་བརྟགས་པའི་རྟེན་དང་བརྟེན་པའི་དངོས་པོ་མེད་པ་དེ་ལྟ་ན་ཡང་ཉེ་བར་ལེན་པ་དང༌། ཉེ་བར་ལེན་པ་ལས་བྱུང་བའི་དངོས་པོར་གནས་པའི་སེམས་ཀྱི་རྒྱུན་ཁོ་ན་རྟེན་དང་བརྟེན་པའི་དངོས་པོ་ཡིན་ནོ་ཞེས་བྱ་བ་འདི་ཡིན་ནོ། །ཡང་སེམས་ལུས་ཀྱི་འདུ་བྱེད་པའི་རྗེས་སུ་འཇུག་པ་མ་ཡིན་ནོ་ཞེས་བྱ་བ་འདི་ག་ལས་ངེས་སྙམ་ན། ལུས་ནི་རྟེན་ཉིད་དོ་ཞེས་གསུངས་སོ། །འདུ་བྱེད་ཀྱི་རྗེས་སུ་འཇུག་པ་ཉིད་རྟེན་གྱི་རྒྱུ་མཚན་ཡིན་པའི་ཕྱིར་རྟེན་གྱི་སྒྲས་བརྗོད་དོ། །ལུས་ཀྱི་འདུ་བྱེད་པའི་རྗེས་
སུ་མི་འཇུག་པ་ཡང་ལུས་ཀྱི་ཕུལ་བྱུང་འགྲིབ་མེད་པར་ཞེས་བྱ་བ་ལ་སོགས་པས་བཤད་ཟིད་ཏོ། །དེ་མ་ཐག་པའི་རྐྱེན་ནི་ཆོས་མི་མཚུངས་པར་བརྗོད་པ་ནི་སེམས་གཞན་དང་ལྡན་པ་ཞེས་བྱ་བའོ། །འདི་ནི་གཞལ་བ་ལ་སོགས་པས་མི་གསལ་བ་ལ་སོགས་པ་ཉེ་བར་མཚོན་པའོ། །འདི་ཉིད་སྟོན་པ་ནི་འདི་ལྟར་ཞེས་བྱ་བ་ལ་སོགས་པའི། །གཞན་དུ་ཕྱོགས་པར་འགྱུར་ཞེས་བྱ་བ་དེའི་བཤད་པ་ནི་གང་གི་ཚེ་ཞེས་བྱ་བའོ། །རང་གི་འབྲས་བུ་རྗེས་སུ་མཐུན་པའི་རིག་པ་བསྐྱེད་པ་མ་ཡིན་ནོ་ཞེས་བྱ་བ་ནི་གཏན་མི་སྐྱེད་པའམ། རྗེས་སུ་མི་མཐུན་པ་སྐྱེད་པའོ། །གང་གི་ཕྱིར་དེ་ལྟར་འདུ་བྱེད་པའི་ཁྱད་པར་སྐྱེད་པའོ། །གང་གི་ཕྱིར་དེ་ལྟར་འདུ་བྱེད་པའི་ཁྱད་པར་གྱི་སེམས་ཐ་དད་པར་འགྱུར་བ་དེའི་ཕྱིར་རོ། །རྣམ་པར་ཤེས་པ་སྔ་མ་མེད་ན་མི་འབྱུང་བ་ཞེས་བྱ་བ་ནི། རྣམ་པར་ཤེས་པ་སྔ་མའི་ཉེ་བར་ལེན་པ་ཅན་ཉིད་དོ། །སེམས་ཉིད་ལྡོག་ན་སེམས་ལྡོག་གི་ལུས་ལྡོག་ན་ནི་མ་ཡིན་པའོ། །སེམས་ནི་རྣམ་པ་ཐམས་ཅད་བཟློག་པར་མི་ནུས་སོ་སྙམ་དུ་དགོངས་པའོ། །གལ་ཏེ་ཞེས་བྱ་བ་ལ་སོགས་པ་ནི་རྒོལ་བའོ། །ལུས་ཉིད་ལས་ཞེས་བྱ་བ་ནི་དབང་པོའི་བདག་ཉིད་ཅན་ལས་ཞེས་བྱ་བའི་དོན་ཏོ། །དབང་པོ་ལས་རྣམ་པར་ཤེས་པ་སྐྱེ་བར་བཤད་པའི་ཕྱིར་རོ། །གལ་ཏེ་དེ་ལྟར་རྟེན་ཡིན་མོད། དེ་ལྟར་ན་ཡང་རང་ལོག་ན་ལྡོག་པར་བྱེད་པ་གོ་ཅི་ལྟར་སྙམ་ན། བརྒྱུད་པས་ཞེས་གསུངས་སོ། །མེ་བརྒྱུད་པས་རྒྱུ་ཡིན་ཡང་ཞེས་འབྲེལ་ཏོ། །དུ་བའི་རྗེས་ལ་སྐྱེས་པའི་ནི་བསྐྱེད་བྱའི་དུ་བ་ལ་ལྟོས་ནས་སྐྱེད་བྱེད་དུ་འགྱུར་བའི་དུ་བའི་རྗེས་སུ་ལས་སོ། །དས་བསྐྱེད་པའི་ཟློག་པར་བྱེད་པ་མ་ཡིན་པ་ནི་མ་ཡིན་ཏེ། འོན་ཀྱང་རང་ལོག་པས་ཟློག་པར་བྱེད་པ་ཁོ་ན་ཡིན་ཏེ། བརྒྱུད་པའི་རྒྱུ་མེད་ཀྱང་དེ་མི་འགྲུབ་པའི་ཕྱིར་དང༌། གྲུབ་ཟིན་པ་ཡང་འཛིན་པར་བྱེད་པ་མེད་པ་ལས་ཉེ་བར་ལེན་པ་ཉམ་ཆུང་བས་རང་ཉིད་བཟློག་བའི་ཕྱིར་རོ། །འདི་ནི་སྐྱེ་བ་ཕྱི་མ་མེད་པའི་དཔེ་ཡིན་ནོ། །འདིས་ནི་དཔེར་ན་མེ་ལས་མཐོང་བའི་དུ་བ་ལས་ཀྱང་འབྱུང་བ་དེ་བཞིན་ཤེས་རབ་ལ་སོགས་པ་ཡང་གོམས་པ་ལས་གཞན་ལས་ཀྱང་འབྱུང་བ་ཡིན་ནོ་ཞེས་བསྟན་པ་ཡིན་ནོ། །སྔ་ན་མེད་པའི་སེམས་ཅན་སྐྱེ་བ་ལ་ཡང་བརྗོད་པ་ནི་མེ་གཞན་ཡང་ཞེས་བྱའོ། །སྐབས་ལ་ཉེ་བར་སྦྱོར་བ་ནི་དེ་བཞིན་དུ་ཞེས་བྱ་བའོ། །སྔ་ན་མེད་པ་ལུས་ལས་སྐྱེ་བས་ཞེས་སྦྱར་རོ། །འདིས་ནི་འཇིག་རྟེན་སྔ་ན་མེད་པ་བསྟན་ཏོ། །འཇིག་
རྟེན་ཕྱི་མ་མེད་པར་སྟོན་པ་ནི་རྒྱུན་ཆད་པའི་ཆོས་ཅན་དུ་འགྱུར་རོ་ཞེས་བྱ་བའོ། །དུ་བ་བཞིན་ནོ་ཞེས་བྱ་བ་ནི་གཉི་གའི་ཡང་དཔེའོ། །མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །རང་བཞིན་དང་སྐྱེས་བུ་དང་དབང་ཕྱུག་ལ་སོགས་པའི་རྣམ་པར་རྟོག་བ་རྣམས་དབང་པོ་ལ་མི་ལྟོས་པའི་ཕྱིར་རོ། །དེས་ན་གང་གིས་དེ་ལོག་ན་ལྡོག་པའམ། སྔ་ན་མེད་པའི་སེམས་ཅན་སྐྱེ་བར་འགྱུར་བ་ལུས་ནི་བརྒྱུད་པའི་རྒྱུ་མ་ཡིན་ནོ་ཞེས་བྱ་བར་དགོངས་པའོ། །ཟུར་གྱིས་བསྟན་པའི་ཕྱོགས་སྔ་མ་ལ་བརྗོད་པ་ནི། དུ་བ་མེ་ལས་ཇི་འདྲ་བ་ཞེས་བྱའོ། །འདིར་ནི་སྔར་བཤད་ཟིན་པ་ཉིད་སྐབས་ཀྱིས་ཡང་བཤད་པ་ཡིན་ནོ། །ཁྱད་པར་ཡང་བརྗོད་པ་ནི་ཐམས་ཅད་ལ་ཁྱབ་པ་ཞེས་བྱ་བ་ལ་སོགས་པ་སྟེ། སེམས་ཅན་ཐམས་ཅད་ཀྱི་རྒྱུད་ལ་ཁྱབ་བའོ། །སྐྱེ་བ་དང་པོ་ལ་སོགས་པ་ཡང་ཞེས་ཁོང་ནས་ཕྱུང་ལ། རང་བཞིན་མཚུངས་པ་ཉིད་ཡིན་པ་ཞེས་སྦྱར་རོ། །དེ་ལྟར་དུ་བའི་དཔེས་འཇིག་རྟེན་སྔ་ན་མེད་པར་མ་གྲུབ་པོ་ཞེས་བསྟན་ནས། འཇིག་རྟེན་ཕྱི་མ་མེད་པར་ཡང་མ་གྲུབ་པོ་ཞེས་བསྟན་པའི་དོན་དུ་དུ་བ་ནི་ཞེས་གསུངས་སོ། །དེས་ན་དུ་བའི་རྒྱུན་ནི་མེའི་ཁྱད་པར་ལོག་ན་རྣམ་པར་ཆད་བར་རིགས་པ་ཡིན་ནོ་སྙམ་དུ་དགོངས་པའོ། །ཡིད་ཀྱི་བློ་ནི་དེ་ལྟ་མ་ཡིན་ནོ་ཞེས་བཤད་པ་ན། ཤེས་རབ་ལ་སོགས་པ་ནི་ཞེས་བྱ་བའོ། །ཡིད་ཀྱི་རྣམ་པར་ཤེས་པའི་མཚན་ཉིད་ཀྱང་ཤེས་རབ་ལ་སོགས་པ་ཉིད་ཀྱི་ལུས་ལས་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ནི་ཕྱིས་ཀྱང་ཡོད་པའི་ཕྱིར་དུ་བ་བཞིན་དུ་ཤེས་རབ་ལ་སོགས་པ་དུས་ཕྱིས་འཆད་པར་ཇི་ལྟར་འགྱུར་ཏེ། ཅི་འདྲའི་འཕེན་བྱེད་ཡོད་གྱུར་ན། །ཕྱིས་ཀྱང་དེ་དང་འདྲ་བ་ཉིད། །ཅེས་བྱ་བ་ལུགས་ཡིན་པའི་ཕྱིར་རོ། །དེས་ན་ཞེས་ཁོང་ནས་དེ་དག་ལུས་ཀྱིས་གནས་པར་བྱས་པ་མ་ཡིན་ནོ་ཞེས་སྦྱར་རོ། །དེས་ན་ལུས་ལོག་ན་ལྡོག་པ་མ་ཡིན་པའི་ཕྱིར། འཇིག་རྟེན་ཕ་རོལ་མི་སྲིད་པ་མ་ཡིན་ནོ་སྙམ་དུ་དགོངས་པའོ། །དབང་པོ་ལ་མ་ལྟོས་པར་བསྒྲུབས་པས་རྩོད་པ་དང་པོ་སྤངས་པ་གང་ཡིན་པ་དེ་ལ། དབང་པོའི་ནུས་པ་རྣམ་པར་རྟོག་པ་ལ་ཞོག་སྟེ། ཤེས་པ་སྔ་མ་ལ་མ་ལྟོས་པར་ནི་རང་གི་ཤེས་པ་ལ་ཡང་ནུས་པ་མ་ཡིན་ནོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །གང་གི་ཚེ་རྣམ་པར་ཤེས་པ་སྔ་མ་ཉིད་ལ་ལྟོས་ནས་སྐྱེ་བ་ཡིན་པ་དེའི་ཚེ་དུ་བ་
དཔེར་ཅི་ལྟར་སྲིད་ཅེས་བྱ་བའི་དོན་ཏོ། །སྔོན་གྱི་འདུ་བྱེད་པ་ལ་མ་ལྟོས་པ་ལས་ནི་མ་ཡིན་ཏེ། འོན་ཀྱང་སྔོན་གྱི་འདུ་བྱེད་པ་ལ་ལྟོས་པས་ཁོ་ན་ལས་ཡིན་ཏེ། ཚིག་ལེའུར་བྱས་པ་ལས་སྔོན་གྱི་རྣམ་པར་ཤེས་པ་ལ་ལྟོས་པར་བརྗོད་པ་དེ་ཉིད་འགྲེལ་པར་སྔོན་གྱི་འདུ་བྱེད་པ་ལ་ལྟོས་པར་བརྗོད་པ་ནི། འདུ་བྱེད་པ་ཅི་ལྟ་བ་བཞིན་དུ་ཤེས་པ་སྔ་མ་ཡང༌། དབང་པོའི་ཤེས་པ་སྔ་མ་ཉིད་དུ་བསྟན་པའི་དོན་ཏོ། །སྔོན་གྱི་རྣམ་པར་ཤེས་པ་ལ་ལྟོས་པ་ཉིད་བརྗོད་པ་ནི། རྣམ་པར་ཤེས་པ་སྔ་མ་གཡོས་ན་ཞེས་བྱ་བའོ། །མི་སྐྱེ་བའི་ཕྱིར་རོ་ཞེས་བྱ་བ་ནི། དབང་པོའི་ཤེས་པའོ། །གཞན་དག་མི་སྐྱེ་བ་མི་བཟོད་ནས་གལ་ཏེ་ཞེས་བྱ་བའོ། །དེས་པ་མེད་ཕྱིར་ཞེས་བྱ་བ་ནི། སྔ་མ་དང་ཕྱི་མ་གཉི་ག་དང་འབྲེལ་ཏོ། དེས་ན་ངེས་པ་མེད་ཕྱིར་ཞེས་བྱ་བའི་མཐར་ཐུག་པས་དོགས་པ་བསུ་ནས། མེད་པ་ཞེས་བྱ་བ་མེད་པར་རྟོགས་པ་གང་ཡིན་པ་དེ་ཐམས་ཅད་ཀྱི་རིག་པ་ཉིད་ངེས་པ་མེད་ཉིད་ལས་ཁས་ལོང་ཤིག །གང་གི་ཕྱིར་ངེས་པ་མེད་པའི་ཕྱིར་ཞེས་བྱ་བའི་གཏན་ཚིགས་ནི་ཐམས་ཅད་ལ་ཡང་བརྗོད་པར་ནུས་པ་ཡིན་ནོ། །དེ་ལྟ་ཡིན་ན་ཅི་སྐྱོན་སྙམ་ན། གལ་ཏེ་ངེས་པ་མེད་པའི་ཕྱིར་ཞེས་བྱ་བའོ། །འོ་ན་ནི་ཞེས་བྱ་བ་ནི་ལྟ་ཡིན་ན་དབང་པོའི་རྣམ་པར་ཤེས་པ་ལྟར་འཇིག་རྟེན་ཕ་རོལ་མེད་པ་མ་ཡིན་ནོ་སྙམ་དུ་དགོངས་པའོ། །ཅིའི་ཕྱིར་མ་ཡིན་སྙམ་ན། ཐམས་ཅད་དུ་ཞེས་གསུངས་ཏེ། འཇིག་རྟེན་ཕ་རོལ་ལ་སོགས་པ་ལ་ཡང་ངོ༌། །འོན་ཏེ་ཞེས་བྱ་བ་ནི་གཞན་གྱིའོ། །ངེས་པ་མེད་པ་འབའ་ཞིག་ནི་གཏན་ཚིགས་མ་ཡིན་ཏེ། འོན་ཀྱང་རྒྱུ་མ་ཚང་བའོ། །ངེས་པ་མེད་པ་ལས་ནི་ཐ་སྙད་ལྡོག་པ་ཙམ་ཡིན་ནོ་ཞེས་བྱ་བའི་དོན་ཏོ། །གང་དུ་ངེས་པ་མེད་པའི་ཕྱིར་མ་སྐྱེས་སོ་ཞེས་ཐ་སྙད་དུ་བྱེད་པ་དེར་ནི་རིག་པའི་རྒྱུ་དབང་པོ་ལ་སོགས་པ་ཡིན་ཏེ། དེས་ན་ནུས་པའི་རྒྱུ་ཡོད་པའི་ཕྱིར། འཇིག་རྟེན་ཕ་རོལ་ལ་སོགས་པ་ལ་ནི་ཚུལ་འདི་ཡོད་པ་མ་ཡིན་ནོ། །དེས་ན་དངོས་པོ་མེད་པ་ཁོ་ན་ཡིན་པས། གང་དུ་ཡང་རིག་པ་མེད་པ་མ་ཡིན་ནོ་ཞེས་ཅི་སྟེ་བརྗོད་ཅེ་ན། གྲུབ་པའི་མཐར་ནི་རྣམ་པ་འདི་མ་བཀག་པ་ཁོ་ནར་རྣམ་པ་གཞན་གྱི་སྒོ་ནས་ཀྱང་སྐབས་འགྲུབ་པར་འགྱུར་རོ་ཞེས་སྟོན་པ་ནི། འོ་ན་ངེས་པའི་རྒྱུ་ཡང་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་གྱིའོ། །ཉམས་སུ་མྱོང་ངོ་ཅོག་ལ་ནི་རྣམ་པར་རྟོག་པ་འབྱུང་བ་མ་ཡིན་ཏེ།
འོན་ཀྱང་གསལ་བ་ལ་ལྟོས་པ་ཡིན་ནོ་ཞེས་བྱ་བར་བསམས་པའོ། །རིག་པའི་ཞེས་བྱ་བ་ནི་གྲུབ་པའི་མཐའོ། །རྣམ་པར་རྟོག་པ་སྐྱེད་པ་ལ་ཉམས་སུ་མྱོང་བ་བཞིན་དུ། ཉམས་སུ་མྱོང་པ་བསྐྱེད་པ་ལ་ཡང་དེའི་རྒྱུ་མི་གསལ་བར་མཚུངས་སོ་ཞེས་ནི་བརྗོད་པར་མི་ནུས་སོ་ཞེས་བྱ་བ་དགོངས་པའོ། །འོན་ཏེ་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། དེའི་རང་གི་རྒྱུད་ཅེས་བྱ་བ་ནི་དབང་པོ་དང་ཡུལ་ཉེ་བ་ཡིན་ལ། དེ་དག་ཉམས་པ་མེད་པའི་དུས་ན་ནི་གསལ་པ་ཡང་གནས་པ་ཁོ་ནའོ་ཞེས་བྱ་བའོ། །སྐྱེད་པར་བྱེད་པའི་ཞེས་བྱ་བ་ནི་གྲུབ་པའི་མཐའོ། །འདི་ནི་ཞེས་བྱ་བ་ནི་སྔར་གྱི་ཤེས་པ་ཉིད་ལས་ངེས་པར་གཟུང་བའི་དོན་དང་རིམ་པ་བཞིན་དུ་སྦྱར་བའོ། །ཕྱིས་ནས་རང་རིག་པའི་མངོན་སུམ་བཤད་པའི་སྐབས་སུ་བབ་པ་ནི་བཤད་པར་བྱའོ། །དེས་ན་ཤེས་པ་སྔ་མ་དང་ལྷང་ཅིག་པའི་དངོས་པོ་ཁོ་ན་སྐྱེད་པར་བྱེད་པ་ཡིན་གྱི། གཞན་དུ་ནི་མ་ཡིན་སྙམ་དུ་བསམས་པའོ། །བདེ་བ་དང་ཞེས་བྱ་བ་ལ་སོགས་པ་ནི་འཆད་པའོ། །དབང་པོའི་རྣམ་པར་ཤེས་པ་དང་གཞན་པའི་སེམས་མཐའ་དག་གོ །རྣལ་འབྱོར་སྤྱོད་པའི་ལུགས་ལ་བརྟེན་ནས་ཀྱང་སེམས་ནི་སེམས་ཀྱི་རྒྱུ་ཅན་ཡིན་གྱི། བེ་མས་པོའི་རང་བཞིན་དབང་པོའི་རྒྱུ་ཅན་ནི་མ་ཡིན་ནོ་ཞེས་སྟོན་པ་ནི་གཞན་ཡང་ཞེས་བྱ་བའོ། །དབང་པོ་ཤེས་པའི་རང་བཞིན་ཕྱིར། །ཞེས་བྱ་བ་ནི། དབང་པོའི་ཤེས་བ་ལྟ་བུའི་རང་བཞིན་དེ་སྣང་བ་གང་ལ་ཡོད་པའོ། །དབང་པོའི་ཤེས་པར་འདོད་པ་དང་རང་བཞིན་མཚུངས་པའི་ཕྱིར་རོ། །མཚུངས་པར་སྣང་བ་དེ་ཡང་གང་ཡིན་ཞེ་ན། མདུན་ན་གནས་པར་གསལ་བའི་རྣམ་པ་ཉིད་དེས། གཏན་ཚིགས་དེའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་གསལ་བའི་ཤེས་པ་ནི་དབང་པོ་ཉིད་ལས་ཡིན་པར་དམིགས་པ་མ་ཡིན་ནམ། དེ་ཅི་ལྟར་དབང་པོའི་སྟོབས་ལས་བྱུང་བར་དམ་འཆའ་ཞེས་མཐོང་བ་དང་འགལ་བར་དོགས་པ་ལ། གལ་ཏེ་ཞེས་བྱ་བ་ལ་སོགས་པའོ། །དེའི་ཚོ་ཞེས་ཁོང་ནས་ཕྱུང་ལ། དབང་པོ་མེད་པར་ཞེས་བྱ་བ་ལ་སོགས་པར་སྦྱར་བར་བྱའོ། །འོན་ཏེ་ཞེས་བྱ་བ་ནི་གཞན་གྱིའོ། །གསལ་བ་ཙམ་ནི་འཁྲུལ་བར་འགྱུར་གྱི། གསལ་བ་ཁྱད་པར་ཅན་ནི་མ་ཡིན་ནོ་ཞེས་བྱ་བ་བསམ་པའོ། །གལ་ཏེ་འདི་ལྟར་འཆེལ་ན་དེའི་ཚེ་དབང་པོའི་ཤེས་པ་ཉིད་འགའ་ཡང་མེད་དོ་ཞེས་སྟོན་པ་
ནི་དེ་ནི་མེད་དེ་ཞེས་བྱ་བའོ། །གལ་ཏེ་དབང་པོའི་ཤེས་པ་མེད་པ་ཉིད་ཡིན་ན། འོ་ན་ཅི་ལྟར་འགའ་ཞིག་ཏུ་སླུ་བ་དང༌། གཞན་དུ་དེ་ལྟ་མ་ཡིན་པར་འགྱུར་སྙམ་ན། དོན་ཡོད་པ་དང་ཞེས་གསུངས་སོ། །མདུན་ན་གནས་པར་གསལ་བའི་རྣམ་པ་ཅན་དུ་ཁྱད་པར་མེད་ཀྱང༌། སྔོན་པོ་ལ་སོགས་པའི་རྣམ་པར་སྣང་བ་འགའ་ཞིག་ནི་དོན་ཉིད་དུ་ལྷག་པར་མོས་པས་དོན་ཡིན་ལ། སྒྲ་ལ་སོགས་པ་ནི་དོན་མ་ཡིན་ཏེ། དོན་དུ་མོས་པ་མེད་པའི་ཕྱིར་རོ། །སླུ་བ་དང་ཅིག་ཤོས་ནི་ཅི་རིགས་པར་ཏེ་ཡོད་པ་དང་མེད་པ་ལས་རྣམ་པར་གནས་པ་ཡིན་ནོ། །དབང་པོས་བསྐྱེད་པ་དང་མ་བསྐྱེད་པ་དག་ལས་ནི་མ་ཡིན་ནོ་ཞེས་བྱ་བའི་དོན་ཏོ། །འདི་ཉིད་འཆད་པ་ནི་དེའི་རྣམ་པ་ཅན་གྱི་ཞེས་བྱ་བ་སྟེ། མདུན་ན་གནས་པར་གསལ་བའི་རྣམ་པ་ཅན་གྱིའོ། །འོན་ཏེ་ཞེས་བྱ་བ་ལ་སོགས་པ་ནི་ཕྱེད་ཕྱི་མ་ལ་འཇུག་པར་བྱེད་པའོ། །དེའི་རྣམ་པ་ཅན་ཞེས་བྱ་བ་ནི་ཡོད་པའམ་མེད་པ་ཡང་སྟེ། ཞེན་པར་བྱེད་པའི་གཞལ་བྱ་གང་དང་གང་ཡིན་པ་དེ་ལྟ་བུའི་རྣམ་པ་འདི་ལ་ཡོད་བའོ་ཞེས་བྱ་བ་ནི་ཐུན་མོང་གི་ཚུལ་ཡིན་ནོ། །གཟུགས་མེད་པ་ན་ཡང་ངའོ་ཞེས་བྱ་བའི་རྣམ་པ་སྲིད་པའི་ཕྱིར་རོ། །དེས་ན་མདུན་ན་གནས་པར་གསལ་བར་སྣང་བ་འདི་ཡང་ཤེས་པའི་རང་བཞིན་ཡིན་ནོ་ཞེས་བྱ་བའི་དོན་ཏོ། །དེའི་རྣམ་པ་ཅན་ཉིད་དེ་ཡང་ངོ༌། །དེའི་ཚེ་དབང་པོ་དེ་དེའི་རྣམ་པ་ཅན་ཉིད་དེའི་རྒྱུ་མ་ཡིན་ནོ། །འོན་ཅི་ལྟར་འགའ་ཞིག་ལ་མི་སླུ་བ་སྲིད་ཅེ་ན། མི་སླུ་བ་ནི་ཞེས་གསུངས་སོ། །དོན་ཡོད་པ་ཞེས་བྱ་བ་ནི་སྔ་མ་བཞིན་ནོ། །གལ་ཏེ་དེ་ལྟ་ན་ཡང་དབང་པོས་བྱས་པར་འགྱུར་རོ་སྙམ་ན། གཞན་ནི་ཞེས་གསུངས་སོ། །གཞན་ནི་ཞེས་བྱ་བ་དབང་པོ་ནི་ཇི་སྐད་བཤད་པའི་དོན་གཞན་གྱི་འབྲས་བུ་ལའོ། །འོན་ཏེ་ཞེས་བྱ་བ་ནི་གཞན་གྱིའོ། འདིས་ནི་དཔེ་བསྒྲུབ་བྱ་མ་ཚང་བའི་གཏན་ཚིགས་ཁྱབ་པ་མེད་པར་དོགས་པ་བསུ་བ་ཡིན་ནོ། །དེ་ལྟ་ན་ཡང་སྐབས་ཉམས་པ་མེད་དོ་ཞེས་བྱ་བར་གཟིགས་ནས་གྲུབ་པའི་མཐའ་གསུངས་པ་ན། དེ་ཡང་ཞེས་གསུངས་སོ། །དབང་པོ་ཞེས་བྱ་བ་ནི་ཆོས་ཅན་ནོ། །སད་པའི་ཞེས་བྱ་བ་ནི་ཆོས་ཅན་གྱི་ཁྱད་པར་རོ། །གོམས་པ་ལས་སྐྱེ་བ་ཡིན་ཏེ། ཞེས་བྱ་བ་ནི་བསྒྲུབ་པར་བྱ་བའོ། །དབང་པོ་ཡིན་པའི་ཕྱིར་ཞེས་བྱ་བ་ནི་གཏན་ཚིགས་སོ། །དེ་ལས་གཞན་རྨི་ལམ་གྱི་
དབང་པོ་གཞན་ནོ་ཞེས་བྱ་བ་ནི་དཔེའོ། །ཁྱབ་པ་ནི་ཕྱེད་ཕྱི་མས་སྟོན་ཏོ། །རྨི་ལམ་དུ་རྨིས་པ་དང་གཞན་པའི་ལུས་ངག་གི་དབང་པོ་ནི་མཚུངས་པ་ཁོ་ན་ཡིན་ཏེ། གསལ་བའི་ཤེས་པ་སྐྱེད་པར་བྱེད་པ་ཡིན་པའི་ཕྱིར་རོ། །དེས་ན་རྨི་ལམ་གྱི་དབང་པོའི་གོམས་པ་ལས་བྱུང་བ་གང་ཡིན་པ་དེ་ནི་ཐམས་ཅད་ལ་ཡང་མཚུངས་པ་ཡིན་ནོ། །དེ་ཉིད་གསལ་བར་བྱེད་པ་ནི་འབྲས་བུ་ཁྱད་པར་མེད་པ་ཞེས་བྱ་བའོ། །སྤྱིར་བརྗོད་པའི་དོན་ཁྱད་པར་ལ་སྦྱོར་བ་ནི། དབང་པོ་ནི་ཞེས་བྱ་བའོ། །དེས་ན་ཞེས་བྱ་བ་ནི་མཇུག་སྡུད་པ་སྟེ། གོམས་པས་བསྐྱེད་པ་དེས་ནའོ། །དབང་པོ་ཉིད་ལས་ཞེས་བྱ་བ་ནི་བེམས་པོའི་རང་བཞིན་འབྱུང་བ་ལས་གྱུར་པ་ཉིད་ལས་ཞེས་བྱ་བའི་དོན་ཏོ། །དེ་ཡང་སྔོན་གྱི་གོམས་པ་ལས་ཡིན་པའི་ཕྱིར་ན་ཤེས་པ་ནི་ཤེས་པ་ལས་རག་ལས་པ་ཉིད་དོ། །དེས་ན་སྔ་མའི་གཏན་ཚིགས་ཀྱང་ཁྱབ་པ་གྲུབ་པའོ། །སྐབས་ཉེ་བར་སྡུད་པ་ནི་རྣམ་པར་ཤེས་པ་སྔ་མ་ཉིད་ཅེས་བྱ་བྱའོ། །དོན་ནི་ཉེ་བར་ལེན་པའོ། །བཤད་ཟིན་པའི་རྣམ་འགྲེལ་ཉིད་ཡང་རྣམ་པ་གཞན་དུ་སྦྱར་བའི་དོན་དུ་འོན་ཏེ་ཞེས་འཇུག་པར་བྱེད་དོ། །ཕ་དང་མའི་རང་བཞིན་ནི་འདུ་བྱེད་པའོ། །ངེས་པ་ཞེས་བྱ་བ་སྔར་ནི་ལུས་ཀྱིས་ལུས་བྱེད་པ་ལ་ལྟོས་ནས་སྦྱར་པ་ཡིན་ནོ། །ཕ་དང་མའི་རང་བཞིན་དེ་རྣམ་པར་འགྱུར་བ་མེད་ཀྱང་ངོ༌། །འགྱུར་བ་སྟེ་མཁས་པ་ལ་སོགས་པའི་མཚན་ཉིད་མཐོང་བའི་ཕྱིར་རོ། །ཕ་མའི་རང་བཞིན་དེ་འགྱུར་ཡང་སྟེ་མཁས་པ་ལ་སོགས་པའི་མཚན་ཉིད་དུ་འགྱུར་བ་ཡིན་ཡང༌། མི་འགྱུར་བ་ཞེས་བྱ་བ་ལ་སོགས་པ་མཁས་པ་ལ་སོགས་པའི་མཚན་ཉིད་དུ་མ་མཐོང་བའི་ཕྱིར་རོ། །བུ་ཞེས་བྱ་བ་ནི་སྐབས་ཡིན་ནོ། །ངེས་པར་འདུ་བྱེད་པའི་རྗེས་སུ་འཇུག་པར་ཁས་བླངས་ནས་ཉེ་བར་བརྗོད་པ་ནི་གལ་ཏེ་ཞེས་བྱ་བའོ། །དེའི་ཞེས་བྱ་བ་ནི་མ་ལ་སོགས་པའིའོ། །གལ་ཏེ་དེའི་འདུ་བྱེད་པར་འགྱུར་བ་ཡིན་ན་དེའི་ཚེ་ཞེས་ཁོར་ནས་ཕྱུང་ལ་མཁས་པ་ལ་སོགས་པར་ཡང་འགྱུར་རོ་ཞེས་སྦྱར་རོ།། འོན་ཏེ་ཞེས་བྱ་བ་ནི་གཞན་གྱིའོ། །འདུ་བྱེད་པ་སྒྲུབ་པར་བྱེད་པ་གང་ཡིན་པ་སྟེ། འདོན་དུ་འཇུག་པ་པོའམ། འཆད་པ་པོ་དེའི་ལྷན་ཅིག་བྱེད་པ་པོའི་ཆོས་དེ་ལས་སུ་གྱུར་པ་གང་ལ་ཡོད་པ་དེ་ལ་དེ་སྐད་ཅེས་བརྗོད་དོ། །དེའི་ངོ་བོ་ཉིད་ནི་མཁས་པ་ལ་སོགས་པའི་ངོ་བོ་ཉིད་དོ། །འདི་སྐད་བརྗོད་པར་
འགྱུར་བ་ཡིན་ཏེ། ཅིའི་ཕྱིར་མ་ལ་སོགས་པའི་རང་བཞིན་གྱི་རྗེས་སུ་འཇུག་པར་མི་འགྱུར་ཞེས་བརྗོད་པ་གང་ཡིན་པ་དེ་ནི་འགྱུར་བ་ཁོ་ནའོ། །འདི་ལྟར་མ་ལ་སོགས་པ་ལ་ཡང་འདུ་བྱེད་པ་རང་ཉིད་བྱུང་བ་ནི་མ་ཡིན་ཏེ། འོན་ཀྱང་འདོན་དུ་འཇུག་པ་ལ་སོགས་པའི་འབད་པ་ལས་སྐྱེས་པ་ཡིན་ནོ། །བུ་ལ་སོགས་པ་ཡང་དེ་བཞིན་དུ་མི་འགྱུར་བ་ཁོ་ན་ཡིན་ལ་མ་ལ་སོགས་པའི་འདུ་བྱེད་ཀྱི་རྗེས་སུ་འཇུག་པ་ཡང་དེ་ཙམ་གྱིས་གྲུབ་པ་ཡིན་ནོ་ཞེས་བྱ་བའོ། །དེ་ནི་མ་ཡིན་ཏེ། ཞེས་བྱ་བ་ནི་གྲུབ་པའི་མཐའོ། །ཕ་མ་བཞིན་དུ་བུ་ལ་འདུས་བྱས་པ་ཡིན་ཡང་རེས་འགའ་མཁས་པ་ལ་སོགས་པའི་རང་བཞིན་མེད་པའི་ཕྱིར་རོ་དེ་ལྟ་མ་ཡིན་པར་ཡང་སྟེ། སློབ་དཔོན་གྱི་འབད་པ་མེད་པར་ཡང་ཡུལ་འགའ་ཞིག་ལ་སྤྱོད་པ་ཁྱད་པར་ཅན་དང་ལྡན་པ་ལ་སོགས་པས་ཡོད་པ་མ་མཐོང་བའི་ཕྱིར་རོ། །སྔོན་གྱི་གོམས་པ་མེད་པར་ནི་དེ་འང་མི་འགྱུར་རོ་སྙམ་དུ་དགོངས་པའོ། །རང་གི་སྔོན་གོམས་པའི་རྗེས་སུ་འཇུག་པ་ཡང་མ་མཐོང་བར་ཅི་ལྟར་རྟོག་པ་སྙམ་ན། རང་གི་རྒྱུད་ལ་ཞེས་གསུངས་སོ། །སྐྱེ་བ་འདི་ཉིད་ལའོ་ཞེས་བྱ་བ་བསམས་པའོ། །འོ་ན་དེ་བཞིན་དུ་ཕ་དང་མའི་རང་བཞིན་གྱི་རྗེས་སུ་འཇུག་པར་ཡང་ཅི་སྟེ་མི་རྟག་སྙམ་ན། རྒྱུད་གཞན་གྱི་ཞེས་གསུངས་སོ། །འདི་ཡང་བརྗོད་པ་ནི་ཁྱད་པར་བསྟན་པའི་དོན་དུའོ། །དེ་ཉིད་བརྗོད་པ་ནི་མཁན་པོ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །མཁན་པོའི་འདུ་བྱེད་པའི་རྗེས་སུ་འཇུག་པ་ནི་ཁྱད་པར་ལས་ཡིན་པར་ཞེས་འབྲེལ་ཏོ། །སློབ་མ་ནི་མཁན་པོའི་འདུ་བྱེད་པ་མངོན་པར་འདུ་བྱེད་པ་ན། དེའི་བཤད་པ་ལས་དེའི་འདུ་བྱེད་པའི་རྗེས་སུ་འཇུག་སྙིང་འདོད་པར་འགྱུར་ཏེ། དེ་མེད་ན་སྟེ་འདོད་པ་མེད་ན། ཐོས་པ་ལ་མ་ཞུགས་པའི་སྐྱེ་བོ་གཞན་ལ་དེ་རྗེས་སུ་བྱེད་པ་ཉིད་མ་མཐོང་བའི་ཕྱིར་རོ། །དེས་ན་འདུ་བྱེད་པ་དེ་ཡང་བརྒྱུད་ནས་རང་གི་འདོད་པ་ལས་བྱུང་བས་ན། རང་གི་རྒྱུད་ཁོ་ན་ལས་གྱུར་པ་ཡིན་ནོ། །མངོན་པར་འདོད་པ་དང་ལྷན་ཅིག་པ་ཞེས་བྱ་བ་ནི། གཞན་གྱི་དོགས་པའོ། །དོན་འདི་ཡིན་ཏེ། འདིར་རང་གི་རྒྱུད་ཀྱི་རྗེས་སུ་འཇུག་པ་ཅི་ཡོད་དེ་མངོན་པར་འདོད་པ་དང་ལྷན་ཅིག་པ་མཁན་པོས་འདུ་བྱེད་པ་ཁོ་ན་ལས་ཡིན་ནོ། །ཞེས་བྱ་བས་མ་ཆོག་པ་ཅི་ཡོད་ཅེས་བྱ་བ་ཡིན་ནོ། །ཡིན་མོད་ཅེས་བྱ་བ་ནི་གྲུབ་པའི་མཐའོ། །འདོད་པའི་
ལྷན་ཅིག་བྱེད་པ་ལ་ལྟོས་མོད་རང་གི་ཡོད་པའི་རིགས་ལ་ལྟོས་པ་ཉིད་དེ་རང་གི་སེམས་ཀྱི་རྒྱུན་སྔ་མ་ལ་ལྟོས་པ་ཉིད་ཀྱི་འདུ་བྱེད་པ་སྐྱེ་བས་སྤངས་བ་ཅི་ཡོད། དེས་ན་ཞེས་བྱ་བ་ནི་ཉེ་བར་སྡུད་པའོ། །འདེ་ལྟ་འོ་ན་ཕའི་རང་བཞིན་མདོག་དང་འདུ་བྱེད་པའི་ཁྱད་པར་དང༌། །མངོན་པར་འདོད་པ་ལ་སོགས་པ་རྣམས་ཀྱི་རྗེས་སུ་འཇུག་པར་ལ་ལ་དང༌། ལ་ལ་དག་ལ་མཐོང་བ་འགལ་ལོ་སྙམ་ན། ཕ་མའི་ཞེས་བྱ་བ་གསུངས་སོ། །འདི་ཉིད་འཆད་པ་ནི་གལ་ཏེ་ཞེས་བྱ་བ་ལ་སོགས་པའོ། །འདི་ལ་ལན་ནི་ཞེས་བྱ་བ་ནི་ལན་འདེབས་པའོ། །འདི་ག་ལས་ཤེ་ན། སྨྲས་པ་སྲོག་ཆགས་ཐམས་ཅད་དོ། །ཡང་ན་ཕ་གཅིག་ལས་སྐྱེས་པ་ཐམས་ཅད་དོ། །འོན་ཞེས་བྱ་བ་ནི་གཞན་གྱིས་སྨྲས་པའོ། །ཐམས་ཅད་རྗེས་སུ་མི་འཇུག་པ་ཞེས་བྱ་བ་ནི་མདོག་ལ་སོགས་པ་ཡང་རྗེས་སུ་མི་འཇུག་པར་འགྱུར་རོ་ཞེས་བྱ་བའི་ཐ་ཚིག་གོ །འགལ་བ་མེད་ཅེས་བྱ་བར་བརྗོད་པ་ཉིད་མ་ཡིན་ཏེ་ཞེས་བྱ་བས་གཞུང་འཛུགས་པར་བྱེད་དོ། །དེའི་རང་བཞིན་གྱི་རྗེས་སུ་འཇུག་པའི་བུ་དེས་ཕའི་འདུ་བྱེད་དེའི་རང་བཞིན་གོམས་པར་བྱས་པའོ། །ཐམས་ཅད་ཕའི་རང་བཞིན་གྱི་རྗེས་སུ་འཇུག་པར་ཐལ་བའི་ཕྱིར་རོ་ཞེས་བརྗོད་པ་གང་ཡིན་པ་དེ་མི་འགྲིབ་པར་བྱ་བའི་དོན་དུ་དོགས་པར་བྱེད་པ་ནི། འོན་ཏེ་ཅི་ལྟར་ཞེས་བྱ་བའོ། །ཤིང་གཅིག་ལས་དཔངས་མཐོན་པོ་ལ་སོགས་པའི་བྱེ་བྲག་ཐ་དད་པའི་ཤིང་དུ་མ་འབྱུང་བ་དེ་བཞིན་དུའོ། །ཕ་དང་འབྲེལ་པའི་ཤེས་པ་གཅིག་པ་ལས་ཕའི་རང་བཞིན་གྱི་རྗེས་སུ་འཇུག་པ་དང་མི་འཇུག་པའི་རྣམ་པར་ཤེས་པ་དུམ་འབྱུང་བའོ། །དེས་ན་ཐམས་ཅད་ཕའི་རང་བཞིན་གྱི་རྗེས་སུ་འཇུག་པར་ཐལ་བ་མ་ཡིན་སྙམ་དུ་དགོངས་པའོ། །ལན་དུ་དེ་ལྟར་ན་ཞེས་བྱ་བའོ། །འོན་ཏེ་ཡང་དེ་ལྟར་འགྱུར་མེད། འཇིག་རྟེན་ཕ་རོལ་མ་ཡིན་པའི་སེམས་ལ་བརྟེན་པ་ནི་གེགས་བྱེད་པ་མེད་པའི་ཕྱིར་རོ་སྙམ་དུ་དོགས་ན། འདི་ལ་བཤད་ཟིན་ཏོ་ཞེས་གསུངས་སོ། །ཐལ་བའི་ཕྱིར་རོ་ཞེས་བྱ་བའི་དེ་མ་ཐག་ཏུ་ཞེས་ཀྱི་སྒྲ་ནི་བལྟ་བར་བྱའོ། །བསམ་པ་ནི་འདི་ཡིན་ཏེ། འདི་ལྟར་ཤིང་ཝ་ཊ་ལས་ཤིང་དུ་མ་འབྱུང་ཡང་ཤིང་ཝ་ཊའི་རང་གི་རང་བཞིན་མ་ཡིན་པ་ནི་མ་ཡིན་ནོ། །དེ་བཞིན་དུ་ཕའི་ཤེས་པ་གཅིག་ལས་བུའི་ཤེས་པ་དུ་མ་སྐྱེ་ན་དེའི་རང་བཞིན་མ་ཡིན་པར་མི་འགྱུར་ཏེ། དེས་ན་སྔར་གྱི་ཤེས་པ་ག་ཅིག་པའི་
རང་བཞིན་གྱི་རྗེས་སུ་འཇུག་པར་ཐལ་བ་བཟློག་པར་དཀའོ། །དེས་ན་འཇིག་རྟེན་ཕ་རོལ་པོ་མ་ཡིན་པའི་སེམས་རྟེན་ཉིད་ཅི་ལྟར་འགྱུར། ཕ་རོལ་པོ་ཅི་སྐད་བརྗོད་པའི་ཚུལ་གྱི་འཇིག་རྟེན་ཕ་རོལ་པོའི་སེམས་ལ་བརྟེན་ལ་བརྟེན་པ་ཉིད་ཀྱང་མེད་པར་སྟོན་པ་ནི་འོ་ན་འཇིག་རྟེན་ཕ་རོལ་སྨྲ་བ་ལ་ཡང་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །གྲུབ་པའི་མཐའ་སྨྲ་བའི་བསམ་པ་ནི་འདུས་པ་ལ་སོགས་པས་འགའ་འགའ་དག་ཏུ་ནི་དྲན་པ་མེད་པ་དང༌། འགའ་ཞིག་ཏུ་ནི་རྗེས་སུ་འཇུག་པ་ཡང་མཐོང་བ་ཡིན་ནོ་ཞེས་བྱ་བའོ། །གལ་ཏེ་རྣམ་པར་གཡེངས་པས་འདུ་བྱེད་པ་འགའ་ཞིག་ནི་རྗེས་སུ་འཇུག་པར་ཡང་འགྱུར་ཏེ། དེ་ལྟར་མཐོང་བའི་ཕྱིར་རོ་སྙམ་དུ་གནས་པའི་ཉེས་པས་གོ་ཅི་ལྟར་སྙམ་པ་ལ་སྐྱེ་བ་དྲན་པ་ཡང་ཞེས་གསུངས་སོ། །དབང་པོ་ལས་འདས་པའི་ཕྱིར་སྐྱེ་བ་དྲན་པ་མཐོང་བ་ནི་དགག་པའི་ཡུལ་མ་ཡིན་ནོ། །འཇིག་རྟེན་ཕ་རོལ་བ་མ་ཡིན་པའི་སེམས་རྟེན་ཡིན་པར་སྨྲ་བ་ནི་ཉེས་པར་འགྱུར་བ་ཁོ་ནའི་ཞེས་སྟོན་པ་ནི། སྔོན་མེད་པ་སྐྱེད་པ་ལ་ནི་ཞེས་བྱ་བའོ། །མ་ལ་ཕན་ཚུན་ཆད་དང་འབྲེལ་པའི་ཤེས་པ་སྔ་མ་སྐྱེས་པ་ནི་རང་གི་རྒྱུད་ལས་མ་སྐྱེས་པའི་ཕྱིར་སྡུག་བསྔལ་མ་ཡིན་ནོ། །ཅིའི་ཕྱིར་ཞེ་ན། དེའི་གནས་སྐྱབས་ནི་ཞེས་བྱ་བའོ། །གཞན་མེད་པ་ནི་རང་གི་རྒྱུད་མེད་པའི་ཕྱིར་རོ། །རྗེས་སུ་མཐུན་པའི་གནས་སྐབས་གཞན་སྲིད་ན་ནི། དེ་ལས་གཞན་པའི་གནས་སྐབས་ཐོབ་པ་ན། སྡུག་བསྔལ་བར་འགྱུར་བ་ཡིན་གྱི་དེ་ཉིད་ཀྱི་ཚེ་སྐྱེས་པ་ལ་ནི་དེ་མི་སྲིད་དོ། །དེས་ན་དེ་ལ་ནི་སྡུག་བསྔལ་བ་མེད་དོ་སྙམ་དུ་དགོངས་པའོ། །དེ་ལྟར་བྱས་པས་གལ་ཏེ་ཕ་དེ་ཉིད་ཉེ་བར་ལེན་པའི་རྒྱུད་ཉིད་ཀྱིས་སྐྱེད་པར་བྱེད་པ་ཡིན་ན། དེའི་ཚེ་ཞེས་ཁོང་ནས་ཕྱུང་ལ། ལུས་གཞན་ལ་ཡང་དྲན་པར་ཐལ་ཞེས་སྦྱར་རོ། །ཧ་ཅང་ཐལ་བར་འགྱུར་དུ་འོང་བས་བུ་དང་འབྲེལ་བའི་ཞེས་གསུངས་ཏེ། རྒྱུད་གཅིག་པའི་ཕྱིར་རོ་སྙམ་དུ་དགོངས་པའོ། ཐལ་བར་འགྱུར་བའི་ལན་གྱི་དོགས་པ་བསུ་བ་ནི། སྡུག་བསྔལ་བས་ཞེས་བྱ་བ་སྟེ། མ་ལ་ལས་བྱུང་བས་སོ། །བུ་འདི་འབྲེལ་པའི་ལུས་ལ་མ་དྲན་ནོ་ཞེ་ན་ཞེས་བྱ་བའོ། །འདི་ཞེས་ལ་བསྔོགས་ནས་ནི་དེའི་གནས་སྐབས་ནི་དེ་ཉིད་ཀྱིས་ཞེས་ད་ལྟ་ཁོ་ན་སྨོན་ལམ་བཏབ་པ་དེ་ཉིད་ལེགས་པར་བསྒྲུབ་པའི་ཕྱིར་ཡང་ཉེ་
བར་བཀོད་པ་ཡིན་ནོ། །དེ་ཉིད་ཀྱི་ཚེ་ཕའི་ཤེས་པ་ལས་སྐྱེས་པ་དེ་ལ་ནི་སྡུག་བསྔལ་ཡིད་ལ་མ་ཡིན་ཏེ། རང་གི་རྒྱུན་མེད་པའི་ཕྱིར་རོ། །དཔེར་ན་དུག་གི་སྲིན་བུ་དྲུག་གིས་སྡུག་བསྔལ་བ་མ་ཡིན་པ་དེ་བཞིན་དུའོ། །སྡུག་བསྔལ་ཡོད་ན་ནི་གཞན་བཞིན་དུ་དེར་རྗེས་སུ་མཐུན་པ་དང་འདྲ་བའི་གནས་པ་མ་ཐོབ་པ་ཡིན་ནོ་ཞེས་བྱ་བར་དགོངས་པའོ། །འོན་ཏེ་དེ་ལས་རྗེས་སུ་མཐུན་པའི་གནས་སྐབས་མ་ལ་སོགས་པའི་རང་བཞིན་ཡོད་པ་ཉིད་དེ། དེས་ན་སྡུག་བསྔལ་བ་ཡིན་ནོ་སྙམ་ན། དེ་ལྟ་ན་ནི་འོ་ན་དུག་གི་སྲིན་བུ་ལ་ཡང་སྡུག་བསྔལ་བ་ཡོད་པར་འགྱུར་ཏེ། གནས་སྐབས་གཞན་སྲིད་པའི་ཕྱིར་རོ། །དེ་ལྟ་ཡང་མ་ཡིན་ཏེ་དེས་ན་དེ་བཞིན་དུ་དེ་ལ་སྡུག་བསྔལ་མེད་དོ། །དེ་ལྟར་ན་ཕས་བྱས་པ་བུས་དྲན་པ་ཐལ་བར་བཟློག་པ་དཀའོ། །འོ་ན་འཇུག་རྟེན་ཕ་རོལ་པོ་ལ་ཡང་དེ་སྡུག་བསྔལ་བ་ཡང་མ་ཡིན་ཏེ་དྲུག་གི་སྲིན་བུ་ཉིད་བཞིན་སྙམ་ན། འཇིག་རྟེན་གཞན་ནས་ཞེས་བྱ་བའོ། །གལ་ཏེ་དུག་གི་སྲིན་བུ་ལ་སྡུག་བསྔལ་མེད་པ་དེ་ལྟ་ན་ཡང་ཐམས་ཅད་ལ་ནི་མེད་པ་མ་ཡིན་ཏེ། སྔོན་གོམས་པའི་བག་ཆགས་ཀྱིས་བོན་ཡོད་པ་དང་མེད་པས་ཁྱད་པར་ཡོད་པའི་ཕྱིར་རོ། །དེས་ན་འཇིག་རྟེན་ཕ་རོལ་པོ་ལ་ནི་འགའ་ཞིག་བདེ་བ་ལ་འགའ་ཞིག་སྡུག་བསྔལ་ལོ་ཞེས་བྱ་བའི་རྣམ་པར་དབྱེ་པ་ཡོད་པ་ཡིན་ནོ། །དེ་ཉིད་ཀྱི་ཕྱིར་སྐྱེ་བ་དྲན་པ་ཡང་མཐོང་བའི་ཕྱིར་རོ་ཞེས་བརྗོད་པ་ཡིན་ནོ། །འཇིག་རྟེན་ཕ་རོལ་ནས་མ་འོངས་པས་ལ་ནི་དེ་ལྟར་འགྱུར་བ་ན་ཡིན་ཏེ་ཁྱད་པ་མེད་པའི་ཕྱིར་རོ། །ཡང་ན་དེ་ཉིད་ཀྱི་ཚེ་སྐྱེས་པ་ལ་མ་ལ་སོགས་པའི་གནས་སྐབས་སྲིད་པའི་ཕྱིར་མངལ་ན་གནས་པ་སྡུག་བསྔལ་བར་འགྱུར་མོད། དེ་ལྟ་ན་ཡང་ཉེས་པ་ཡོད་པ་ཉིད་དོ་ཞེས་སྟོན་པ་ནི་གཞན་ཡང་ཞེས་བྱ་བའོ། །གལ་ཏེ་མ་ལ་སོགས་པའི་སེམས་བུའི་སེམས་ཀྱི་རྟེན་ཡིན་ན་དེའི་ཚེ། ཁོང་ནས་ཕྱུང་ལ་ཕ་མས་སྡུག་བསྔལ་མྱོང་བར་ཐལ་ཏེ་ཞེས་སྦྱོར་རོ། །གང་གིས་དེ་སྐད་བརྗོད་པ། ཅི་འགའ་ཞིག་ཏུ་དེ་ལྟ་བུ་མཐོང་ངམ་སྙམ་པ་ལ། དཔེར་ན་ཞེས་གསུངས་ཏེ། ལུས་གཞན་ལ་ཡོད་པའི་སྡུག་བསྔལ་མྱོང་བར་གྱུར་པ་ན་ཞེས་བྱ་བ་ཞེས་ལ་གཞག་པའོ། རྨི་ལམ་གྱི་ལུས་ནི་གཉིད་ལོག་པའི་ལུས་སོ། །དེས་ན་དཔེར་ན་གཉིད་ལོག་པ་ལུས་གཞན་ལ་ཡོད་པའི་སྡུག་བསྔལ་རྨི་ལམ་གྱི་ལུས་ལ་མྱོང་བ་བཞིན་ནོ་ཞེས་རྩ་བ་
གཞན་དུ་གདོན་ཏོ། །དཔེར་ན་གཉིད་ལོག་པའི་ལུས་གཞན་དུ་གཏོགས་པས་རྨི་ལམ་གྱི་སྡུག་བསྔལ་མྱོང་བ་བཞིན་ནོ་ཞེས་བྱ་བར་གནོད་པ་ལ་ནི་གོ་སླའོ། །སྡུག་བསྔལ་བྱང་བར་ཐལ་བའི་ལན་གྱི་དོགས་པ་བསུ་བ་ནི། བསྐྱེད་པར་བྱ་བའི་ཤིང་ཞེས་བྱ་བའོ། །གང་གིས་ས་བོན་བཏབ་པས་ཤིང་གཞན་སྐྱེས་པ་དེ་ནི་སྐྱེད་པར་བྱེད་པའི་ཤིང་ངོ༌། །མ་ཡིན་ཏེ་ཞེས་བྱ་བ་ནི་ལན་ནོ། །དོན་ནི་འདི་ཡིན་ཏེ། སེམས་དང་ལྡན་པ་དང༌། སེམས་མེད་པ་རྣམས་ཀྱེ་ཚུལ་ཐ་དད་པར་ཚད་མས་མཐོང་བ་ནི་བཟློག་པར་ནུས་པ་མ་ཡིན་ནོ། །དེས་ན་གལ་ཏེ་མེས་བྱས་པའི་འབྲས་བུའི་ཤིང་འདུ་བྱེད་པ་ནི་ཤིང་སྔ་མའི་རྣམ་པར་འགྱུར་བ་བྱེད་པ་ཉིད་དུ་མ་མཐོང་བ་དེ་ལྟ་ན་ཡང་འབྲས་བུ་གྱུར་པའི་རྨི་ལམ་གྱི་ལུས་ཀྱི་རྣམ་པར་འགྱུར་བ་ནི་སྔར་བྱེད་ལུས་ཀྱི་རྣམ་པར་སྒྱུར་བྱེད་ཡིན་པར་མཐོང་བ་ཁོ་ནའོ། །དེས་ན་ཕ་མ་དག་གིས་སྡུག་བསྔལ་མྱོང་བར་འགྱུར་རོ། །དེ་ལྟར་ཡང་མ་ཡིན་ཏེ་དེས་ནམ་ལ་གནས་པ་ནི་སྡུག་བསྔལ་བར་མི་འགྱུར་རོ། །གང་གི་ཕྱིར་དེ་ལྟར་གཉི་ག་ལྟར་ཡང་དེ་སྡུག་བསྔལ་བ་མ་ཡིན་པ་དེས་ན་ཕ་མ་དག་གིས་སྔར་བྱས་པ། བུས་དྲན་པ་ཉིད་དུ་འགྱུར་རོ། །ཉེས་པ་གཞན་ཡང་བཤད་པ་ནི། དྲོད་གཤེར་ལས་ཞེས་བྱ་བ་ལ་སོགས་པའོ། །ཅིའི་ཕྱིར་ཞེ་ན། མ་ལ་སོགས་པ་མེད་པའི་ཕྱིར་རོ། །བློ་ཡོད་པ་ཡང་ཡིན་ཏེ་ཞེས་ཁོང་ནས་ཕྱུང་ལ་དེའི་ཕྱིར་ཞེས་བྱ་བ་ལ་སོགས་པ་དང་སྦྱར་རོ། དེ་ལྟར་ཡིན་དང་ཅི་འགྱུར་སྙམ་ན། དེས་ན་མ་ལ་སོགས་པའི་ཞེས་གསུངས་སོ། །བཤད་པ་གཉིས་པ་ལ་ལྟོས་ནས་རྣམ་འགྲེལ་གྱི་དོན་ཉེ་བར་སྡུད་པ་ནི། དེ་བས་ན་ཡིད་ཀྱི་ཞེས་བྱ་བ་བའོ། །གལ་ཏེ་ཞེས་བྱ་བ་ནི་གཞན་གྱིའོ། །བུ་དང་འབྲེལ་པའི་ལུས་ཕའི་རྗེས་སུ་འགྲོ་བ་གང་ཡིན་པ་དེ་ལྟར་དམིགས་པའི་ཕྱིར་རོ། །དེ་ལས་ཐ་མི་དད་པ་ཞེས་བྱ་བ་ནི་འབྲས་བུའི་ལུས་ལས་ཐ་མི་དད་པའོ། །དེའི་རྗེས་སུ་འགྲོ་བ་ནི་སྔ་མ་ཙམ་གྱིས་རྗེས་སུ་འགྲོ་བ་སྒྲུབ་པ་ནི། དེ་ལྟར་ཡང་བློ་སྔ་མས་བསྐྱེད་པ་ཉིད་དོ་ཞེས་བཤད་མ་ཐག་པ་ཁོ་ནའོ། །ཕ་མ་ལ་སོགས་པའི་ཤེས་པ་སྔ་མ་ཙམ་ནི་ལུས་ཐ་མི་དད་པར་འགྱུར་བ་ཁོ་ནའོ། །འོན་ཏེ་ཞེས་བྱ་བ་ནི་འཇིག་རྟེན་ཕ་རོལ་སྨྲ་བའི་དོགས་པ་བསུ་བའོ། །ལ་ནི་འཇིག་རྟེན་ཕ་རོལ་གྱི་ལུས་ཀྱང་ཞེས་བྱ་བ་སྟེ། ཐལ་བར་འགྱུར་བ་ཡང་ངོ༌། །དེ་བཞིན་དུ་ཞེས་བྱ་བ་ཐ་
དད་པ་ཉིད་ཡིན་པས་འཇིག་རྟེན་ཕ་རོལ་དེའི་རྗེས་སུ་འགྲོ་བ་ཅན་དུ་ཡང་མི་འགྱུར་རོ། །གལ་ཏེ་བུ་ལ་གཡོ་བག་ཅན་ལ་སོགས་པའི་རང་བཞིན་མཐོང་གི་ཕ་ལ་ནི་མ་མཐོང་བ་མ་ཡིན་ནམ། དེས་ན་དེའི་རྒྱུན་ཡིན་པར་ཅི་ལྟར་འགྱུར་ཞེ་ན། བྱིས་པ་ལ་སོགས་པའི་གནས་སྐབས་སུ་ནི་ཞེས་གསུངས་སོ། །དེ་ཉིད་ཅེས་བྱ་བ་ནི་བུ་ལ་སོགས་པ་མཐོང་བ་གང་ཡིན་པ་སྟེ། གཉི་ག་ལ་ཡང་བྱིས་པའི་གནས་སྐབས་ན་གཡོ་བག་ཅན་ལ་སོགས་པ་ནི་གཡོ་བ་མ་ཡིན་ནོ་ཞེས་བྱ་བའི་དོན་ཏོ། །དེ་རྒྱུན་ཉིད་དོ་ཞེས་བྱ་བ་ནི་བུ་རྒྱུན་ཉིད་དོ། །སྐབས་ཀྱིས་མ་ལ་སོགས་པའི་ཞེས་རྟོགས་པར་བྱའོ། །གྲུབ་པའི་མཐའ་ནི་དེ་ཡང་མི་འཐད་དོ་ཞེས་བྱ་བ་སྟེ། སྔར་ཇི་སྐད་བཤད་པ་བཞིན་དུ་ངེས་པ་རྗེས་སུ་འཇུག་པ་མ་ཡིན་ནོ་ཞེས་བྱ་བར་ཤེས་པར་བྱའོ། །ཁྱད་པར་བརྗོད་པའི་ཕྱིར་དེ་ནི་ཞེས་གསུངས་སོ། །མཐོང་བའི་ཕྱིར་རོ་ཞེས་བྱ་བ་ནི་བདག་པོ་ལས་གཞན་དུ་ནི་འགྲོ་བ་དུ་མ་དག་པ་མཐོང་བའི་ཕྱིར་རོ། །གལ་ཏེ་བུ་མ་འཁྲུལ་བ་མེད་པར་ངེས་པ་མེད་དོ་ཞེས་སྔར་བརྗོད་པ་མ་ཡིན་ནམ་ཞེས་ན་བདེན་ཏེ། ཐོག་མ་མེད་པའི་རིགས་རྒྱུད་རྣམ་པ་ཐམས་ཅད་དུ་འཁྲུལ་པ་མེད་པ་ཡིན་ནོ་ཞེས་བྱ་བར་ནི་ངེས་པར་མི་ནུས་ཀྱི། འབད་པས་ངེས་པར་བརྟག་པར་ནུས་པ་འགའ་ཞིག་ལ་ནི་གོལ་བ་མེད་པར་ཞེས་ནུས་པ་ཁོ་ནའོ། །དཔེར་ན་མ་ལ་སོགས་པའི་རང་བཞིན་རྗེས་སུ་འགྲོ་བར་མ་མཐོང་བ་དེ་བཞིན་དུ་བདག་ཉིད་ཀྱི་གོམས་པ་ནི་མ་ཡིན་ནོ་ཞེས་སྟོན་པ་ནི། བདག་ཉིད་ཀྱི་ཞེས་བྱ་བའོ། །གཡོ་བག་ལ་སོགས་པའི་ཁྱད་པར་དེའོ། །དེས་ན་ཞེས་བྱ་བ་ནི་མཇུག་སྡུད་པའོ། །གལ་ཏེ་གཡོ་བག་ལ་སོགས་པ་ཡང་དེ་དང་ཐ་མི་དད་པ་ཡིན་ནོ་ཞེས་སྔར་བཤད་ཟིན་པ་མ་ཡིན་ནམ། དེས་ན་ཇི་ལྟར་འཇིག་རྟེན་སྔ་མ་རྗེས་སུ་དཔོག་སྙམ་ན། སེམས་འབྱུང་བ་ཆེན་པོ་ཞེས་གསུངས་སོ། །གལ་ཏེ་སེམས་འབྱུང་བ་ཆེན་པོའི་རྣམ་པར་འགྱུར་བའམ། འབྱུང་བ་ཆེན་པོ་དང་ཐ་མི་དང་པོ་ཉིད་ཡིན་ཡང༌། དེ་ལྟར་ན་ཡང་དེ་འདྲ་བའི་འདུ་བྱེད་པ་མ་མཐོང་བའི་ཕྱིར། འཇིག་རྟེན་སྔ་མ་དང་ཕྱིར་མའི་རང་བཞིན་དུ་གྱུར་པའི་འབྱུང་བ་ཆེན་པོ་ཉིད་རྗེས་སུ་དཔོག་པ་ཡིན་ནོ། །དེས་ན་ཐམས་ཅད་མཁྱེན་པ་ཉིད་ཀྱང་འབྱུང་བ་ཆེན་པོའི་རྣམ་པར་འགྱུར་བ་ཡིན་པར་འགྱུར་བར་འགལ་བ་ཅི་ཡང་
མེད་དོ། །འདིས་ནི་ཁས་བླངས་ནས་བརྗོད་པ་ཡིན་ནོ་ཞེས་སྟོན་པ་ནི་ཐ་མི་དང་པར་ནི་ཞེས་བྱ་བའོ། །ཅིའི་ཕྱིར་ཞེ་ན། འདི་ལྟར་ཞེས་སོ། །ཐ་དད་མེད་པའི་ཕྱིར་ཞེས་བྱ་བ་འདིར་བཅད་དོ། །དེའི་ཕྱིར་ལུས་ལ་འང་ཡོན་ཏན་འགྱུར་ཞེས་བྱ་བ་ནི་ཐ་མི་དད་པ་དེའི་ཕྱིར་རོ། །ཐོས་པ་ལ་སོགས་པའི་འདུ་བྱེད་པ་བསལ་བར་འགྱུར་རོ་ཞེས་རྟོགས་པར་བྱའོ། །འོན་ཏེ་ཡང་ལུས་ལ་ནི་ཐ་དད་པ་མེད་པ་ཡིན་ཡང༌། ཡོན་ཏན་འགའ་ཡང་གསལ་བ་མ་ཡིན་ནོ་སྙམ་ན་དེས་ན་འདི་ལ་ཡང་མི་འགྱུར་རོ་ཞེས་གསུངས་པ་ནི་ཡོན་ཏན་ཞེས་བྱ་བ་སྟེ། དཔེར་ན་ཞེས་སྦྲེལ་བར་བྱའོ། །དེས་ནད་པར་ན་ནག་པོ་ལ་སོགས་པ་ལུས་ཀྱི་ཡོན་ཏན་གསལ་བ་དེ་བཞིན་དུ་འདི་ཡང་འགྱུར་ཏེ། ཐ་དད་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །སེམས་ལ་འདུ་བྱེད་པ་དམིགས་པ་དང༌། །ལུས་ལ་ནག་པོ་ལ་སོགས་པ་ཡང་ཐ་དད་པ་མེད་པ་ཉིད་ལས་ཡིན་ནོ། །ཐ་དད་པ་མེད་པ་དེ་ནི་སེམས་ཀྱི་བདག་ཉིད་ཡིན་པས་ན། ལུས་ལ་ཡང་སེམས་ལྟོས་ནས་ཉམས་པ་མེད་པ་ཉིད་དོ། །འཆད་པ་ནི་རང་གིས་མྱོང་བ་ཞེས་བྱ་བ་ལ་སོགས་པའོ། །ཡོན་ཏན་ཞེས་བྱ་བ་འདིའི་བཤད་པ་ནི། ཅི་ལྟར་ལུས་ཀྱི་ཡོན་ཏན་ཞེས་བྱ་བའོ། །གཞན་དུ་འགྱུར་བ་སྟེ། ནང་དུ་མ་འདུས་པར་འགྱུར་བ་མ་ཡིན་ནོ། །ནང་གི་ཞེས་བྱ་བ་ནི་གཞན་གྱི་དོགས་པའོ། །བཟོ་ལ་སོགས་པ་ནི་ནང་གི་རེག་བྱའི་ཁྱད་པར་ཡིན་ནོ་སྙམ་དུ་སེམས་པའོ། །མ་ཡིན་ཏེ་ཞེས་བྱ་བ་ནི་ལན་ནོ། །བྱེད་པ་པོ་ལ་སོགས་པས་ཕྱིར་རོལ་གྱི་རེག་པར་བྱ་བ་རླུང་རྩུབ་མོའི་རང་བཞིན་དམིགས་པ་གང་ཡིན་པ་དེ་ཡང་གཞན་གྱིས་མ་དམིགས་པའི་ཕྱིར་རོ། །དེ་ཉིད་བཤད་པ་ནི་མས་ཞེས་བྱ་བའོ། །དེའི་བདག་ཉིད་ཡིན་ཡང་ལུས་ཀྱི་ནང་གི་རེག་བྱའི་བདག་ཉིད་ཡིན་པས་ན་བཟོ་ལ་སོགས་པའི་ཕྱི་རོལ་ན་གནས་པས་མི་དམིགས་ན། དེའི་ཚེ་ཕྱིར་རོལ་གྱི་རེག་བྱའི་རང་བཞིན་རླུང་རེག་བྱ་རྩུབ་མོ་གཞན་གྱི་ཅི་སྟེ་མ་དམིགས། དམིགས་པ་མ་ཡིན་ན་ནི་རྩུབ་མོ་དེ་རླུང་གི་རེག་པ་ཉིད་མ་ཡིན་གྱི། །འོན་ཀྱང་ཉེས་པས་ཉེས་པ་ཅན་དུ་བྱས་པའི་རེག་བར་བྱེད་པའི་དབང་པོ་ཉིད་རླུང་དང་ཕྲད་ནས་སྡུག་བསྔལ་གྱི། མྱོང་བསྐྱེད་པར་བྱེད་པ་ཡིན་ནོ། །དེས་ན་སྡུག་བསྔལ་གྱི་བདག་ཉིད་ཀྱིས་ཤེས་པ་རང་གི་རིག་རང་གི་རིག་པར་བྱ་བ་ནི་ལུས་ལས་ཐ་དད་པ་ཁོ་ནའོ། །
གཞན་གྱིས་སྨྲས་པ། གང་གིས་རེག་བྱ་རྩུབ་མོའོ་རླུང་དམིགས་པ་དེ་ནི་རྨ་ཉིད་ཀྱིས་ནུས་པ་ཡིན་གྱི། རླུང་ཉེད་ནི་རེག་བྱ་རྩུམ་མོ་མ་ཡིན་ནོ། །དེས་ན་གཞན་གྱིས་དེ་ལྟར་དམིགས་པ་མ་ཡིན་ནོ་ཞེ་ན། དམིགས་པར་བྱེད་པའི་ཁྱད་པར་གྱིས་ཞེས་བྱ་བ་ནི་གྲུབ་པའི་མཐའོ། །རྨ་དང་རྨ་མེད་པའི་རང་བཞིན་གྱིས་དམིགས་པར་བྱེད་པ་ཁྱད་པར་དུ་གྱུར་པ་གང་ཡིན་པ་དེས་དམིགས་པར་བྱ་བ་རླུང་རེག་བྱ་རྩུབ་མོ་དང་དེ་ལས་གཞན་པར་དམིགས་པར་འགྱུར་རམ་ཅི་མི་འགྱུར་བ་ཉིད་དོ་ཞེས་བྱ་བའི་དོན་ཏོ། །དངོས་པོའི་རང་བཞིན་ཉིད་ནི་གཅིག་གིས་གཞན་དུ་རྟོགས་ལ་དེ་ལས་གཞན་གྱིས་ནི། གཞན་དུ་རྟོགས་པར་འགྱུར་བ་མ་ཡིན་ནོ། །དེ་ལྟར་འགྱུར་ན་ཅི་སྐྱོན་སྙམ་ན། དེ་ལྟ་ཡིན་ན་ཞེས་གསུངས་ཏེ། གཞན་དུ་དམིགས་ནའོ། །གཉི་གའམ་གཅིག་ཅེས་བྱ་བར་དགོངས་པའོ། །དེ་ལྟར་ཡིན་དང་བདེ་བའམ་སྡུག་བསྔལ་རང་གིས་རིག་པར་བྱ་བ་ནི་ལུས་ལས་གཞན་ཡིན་པར་གྲུབ་པ་ཉིད་དོ་ཞེས་བྱ་བ་ནི་གཙོར་བྱ་བའི་དོན་ཏོ། །རེག་བྱའི་ཁྱད་པར་དེ་ནི་ཞེས་བྱ་བ་ནི་གཞན་གྱི་སྟེ་ཐ་དད་པ་མ་ཡིན་ཏེ། དེ་ལྟ་ཡིན་ན་ནི་བརྗོད་མ་ཐག་པའི་ཉེས་པར་འགྱུར་རོ་སྙམ་དུ་བསམས་པའོ་ཞེས་བྱ་བ་ནི་གྲུབ་པའི་མཐའོ། །རེག་པའི་ཁྱད་པར་དེ་ནི་འགའ་ཞིག་དམིགས་པར་བྱ་བ་ཡིན་ཏེ། དེ་ལྟར་མ་ཡིན་ན་ཡོད་ཀྱང་མ་རྟོགས་པས་གནོད་པ་ཉིད་དུ་མི་འགྱུར་རོ། །རང་རིག་པ་ཡིན་ན་ཡང་ཐ་དད་པར་འགྱུར་ལ། དམིགས་པ་བྱེད་པ་གཞན་ཡང་ཉེ་བར་གནས་པ་མ་ཡིན་སྙམ་དུ་དགོངས་པའོ། །ཡིན་ནོད་ཅེ་སྐྱོན་ཅན་དེ་ལྟ་ན་ཡང་ཞེས་གསུངས་ཏེ། རླུང་དམིགས་པར་བྱེད་པ་ཉིད་ཡིན་ནའོ། །ཉམས་སུ་མྱོང་བ་ཉིད་གནོད་པར་རྣམ་པར་གཞག་པའི་ཕྱིར་རོ་སྙམ་དུ་དགོངས་པའོ། །འོན་ཏེ་ཞེས་བྱ་བ་ནི་གཞན་གྱིའོ། །རྨའི་རེག་པ་རྩུབ་མོ་དེ་ནི་རྨ་ཅན་དེ་ཉིད་ཀྱིས་དམིགས་པ་ཡིན་ཏེ། ཉེ་བའི་ཕྱིར་རོ་ཞེས་བྱ་བའི་དོན་ཏོ། །རྨ་ལ་རེག་པ་ཞེས་བྱ་བ་གྲུབ་པའི་མཐའོ། །རེག་པའི་དུས་ཉེ་བ་གཞན་ཡང་ཁྱད་པར་མེད་པའི་ཕྱིར་རེག་པ་དེ་དམིགས་པར་འགྱུར་རོ་ཞེས་བྱ་བའི་དོན་ཏོ། །འོན་ཏེ་རྨ་དང་རྨ་ཅད་བདག་ཉིད་གཅིག་ལ་གཞན་ནི་ཉེ་ཡང་ཐ་དད་པ་ཁོ་ནའོ་སྙམ་ན། ད་ནི་ཤིན་ཏུ་གསལ་བར་གནོད་པ་མི་འཐད་དེ་མྱོང་བར་བྱེད་ཐ་དད་པ་མེད་པའི་ཕྱིར་རོ། །རང་རིག་པ་
ཡིན་ན་ནི་རང་རིག་པ་མ་ཡིན་པ་ལས་ཐ་དད་པར་གྲུབ་པོ། །བཤད་པ་མཛད་པས་ནི་འདི་ཡལ་བར་དོར་ནས་རྣམ་པ་གཞན་དུ་གཞན་གྱིས་ཞེ་འདོད་བཀོད་དེ། འགོག་པ་མཛད་པ་ནི་རེག་བཞིན་བའི་ཞེས་བྱ་བའོ། །གཞན་གྱིས་རེག་བཞིན་པ་ནི་རེག་བྱ་རྩུབ་མོར་མ་དམིགས་ཏེ། རེག་བྱ་རྩུབ་མོའི་རང་བཞིན་དམིགས་པ་མ་ཡིན་ནོ། །འོན་ཀྱང་དེས་ནི་རྣམས་པའི་ཆ་འཇམ་པ་ཙམ་ཞིག་རྟོགས་པ་ཡིན་ནོ། །མ་ལ་རེག་པ་རྩུབ་མོ་ཡོད་ཀྱང་གཞན་གྱི་མ་རྟོགས་སོ་ཞེས་བྱ་བའི་དོན་ཏོ། །གྲུབ་པའི་མཐའི་དོན་ནི་འདི་ཡིན་ཏེ། ཁོ་བོ་ཅག་གིས་ནི་དེ་ཉིད་ཀྱི་རེག་བྱ་རྩུབ་མོ་དམིགས་པར་ཐལ་བར་བསྒྲུབས་སོ། །གལ་ཏེ་རེག་བཞིན་པའི་རྨའི་རེག་པ་རྩུབ་མོའི་རང་བཞིན་ལ་གཞན་གྱི་རེག་ཀྱང་མ་རིག་ན། དེའི་ཚེ་དེ་ལས་གཞན་པའི་རང་བཞིན་འཇམ་པ་ཙམ་རེག་པ་མ་ཡིན་ན། རེག་བྱ་རྩུབ་མོའི་རང་བཞིན་དེ་ཉིད་རེག་པར་ཅི་ལྟར་འགྱུར། །རེག་པར་མི་འགྱུར་མོད་སྙམ་ན། དེའི་རང་བཞིན་ནི་ཞེས་གསུངས་སོ། །ཡུལ་གྱུར་པ་རྨ་དེ་ཉིད་ཀྱི་རང་བཞིན་ནི་སྟེ་མི་བཟད་པ་ཞེས་བྱ་བར་འཕངས་སོ། །དེ་ལྟ་ཡིན་དང་ཅི་བསྒྲུབ་སྙམ་ན། མ་ཡིན་པ་ནི་དེ་དང་མཚན་ཉིད་མི་མཐུན་པའི་ཕྱིར་རོ་ཞེས་གསུངས་ཏེ། དེ་ལྟ་ཡིན་ན་ཞེས་གསུངས་སོ། །གཞན་གྱི་རིག་པ་མ་ཡིན་པར་གྱུར་ནའོ། །རྨ་ཅན་གྱིས་མི་བཟད་པའི་རང་བཞིན་ནི་རང་གི་ཡིག་པ་ཡིན་ནོ་ཞེས་བྱ་བའི་སྐབས་སོ། །གལ་ཏེ་གཞན་གྱིས་རིག་པ་མ་ཡིན་ཡང་ཤེས་པ་མ་ཡིན་པའི་རང་བཞིན་དུ་འགྱུར་གྱི། །དེ་ཅི་ལྟར་རང་རིག་པ་ཉིད་དེ་ཞེས་བརྗོད་ཅེ་ན། རིག་པ་མ་ཡིན་པ་དེ་དང་མཚན་ཉིད་མི་མཐུན་པའི་ཕྱིར་རོ་ཞེས་གསུངས་སོ། །རིག་པ་མ་ཡིན་པ་ནི་བེམས་པོ་ཞེས་བྱ་བའི་དོན་ཏོ། །དེ་དང་མཚན་ཉིད་མི་མཐུན་པ་ནི་རང་རིག་པ་དང་མཚན་ཉིད་མི་མཐུན་པའི་ཕྱིར་ཏེ། རུང་བའི་ཡུལ་ན་གནས་པ་ཉིད་ཡིན་ན་ཐུན་མོང་དུ་འགྱུར་བའི་ཕྱིར་རོ་ཞེས་བྱ་བའི་དོན་ཏོ། །དེ་ལྟ་ན་ཡང་འབྱུང་བ་ཆེན་པོ་ལས་ཐ་ནི་དད་པར་ཅི་སྟེ་མི་འགྱུར་སྙམ་ན། བདེ་བའམ་ཞེས་གསུངས་སོ། །གང་གི་ཕྱིར་བདེ་བ་ལ་སོགས་པ་རང་རིག་པ་ཉིད་ཡིན། དེའི་ཕྱིར་རྣམ་པར་ཤེས་པ་འབྱུང་བ་ཆེན་པོ་ལས་གཞན་ཡིན་ནོ། །ཐུན་མོང་དང་ཐུན་མོང་མ་ཡིན་པ་ཉིད་ཀྱིས་ཐ་དད་པའི་ཕྱིར་ཞེས་བྱ་བའི་དོན་ཏོ། །དེ་ལྟ་ན་ནི་འོ་ན་རྟེན་དང་བརྟེན་
པའི་དངོས་པོར་འགྱུར་རོ་སྙམ་ན། དེའི་ཕྱིར་ཞེས་གསུངས་སོ། །རྟེན་དང་བརྟེན་པའི་དངོས་པོར་ཡང་ཞེས་བྱ་བ་ནི་དེའི་བདག་ཉིད་ལྟ་སྨོས་སུ་ཡང་ཅི་ཡོད་ཅེས་བྱ་བའི་དོན་ཏོ། །གལ་ཏེ་རྟེན་དང་བརྟེན་པ་མེད་པ་ཉིད་ཡིན་ན་ཞེས་བྱ་བ་ལ་སོགས་པའོ། །ལན་དུ་ལག་པ་ཞེས་བྱ་བའོ། །རིག་པ་དེ་འགྱུར་བའི་ཕྱིར་རོ། །དེ་ལྟར་ཞེས་བྱ་བ་ནི་ངའི་ལག་པར་ཚོར་རོ་ཞེས་བྱ་བར་རོ། །འོན་ཅི་ལྟར་ཐ་སྙད་བྱེད་སྙམ་ན། ལག་པ་ལ་སོགས་པ་ཞེས་གསུངས་སོ། །གང་འདིས་རྣམ་པར་གཞག་པ་ཙམ་དུ་ཟད་དོ་ཞེས་བརྗོད་ལ། ཅི་ལྟར་ན་འབྱུང་བ་དང་རང་རིག་པ་ལ་རྟེན་དང་བརྟེན་པའི་དངོས་པོ་མི་འཐད་སྙམ་པ་ལ་འདི་ལྟར་ཞེས་བྱ་བའོ། །དགོངས་པ་ནི་འདི་ཡིན་ཏེ། ཅི་རྨ་ལ་སོགས་པ་དང་ལྷན་ཅིག་རྒྱུ་བ་སྡུག་བསྔལ་གྱི་རྟེན་དང་བརྟེན་པའི་དངོས་པོར་རྣམ་པར་འཇོག་གམ། འོན་ཏེ་ཤེས་པ་གཞན་གྱིས། དེ་ལ་རེ་ཞིག་དེ་ཉིད་ཀྱིས་ནི་མ་ཡིན་ནོ་ཞེས་གསུངས་པ་ནི། རང་རིག་པ་རང་བཞིན་ཙམ་ཉིད་ལས་ཞེས་བྱ་བའོ། །ཅིའི་ཕྱིར་སྙམ་པ་ལ། རང་བཞིན་ཙམ་ལ་ཞེས་གསུངས་སོ། །འདི་ཉིད་འཆད་པ་ནི་རང་བཞིན་ཙམ་རིག་པ་ལ་ཞེས་བྱ་བའོ། །ཅིའི་ཕྱིར་སྙམ་པ་ལ་གཉིས་རྟོགས་ནས་ཞེས་གསུངས་སོ། །དེ་ལྟར་ཞེས་བྱ་བ་རྟེན་དང་བརྟེན་པ་རྟོགས་པ་སྟེ། དཔེར་ནས་ཕྱོགས་དང་བུམ་པ་དག་ལ་བཞིན་ནོ། །འོན་ཏེ་སྡུག་བསྔལ་ཤེས་པ་ན། བདག་ཉིད་དང་འབྱུང་བ་ཆེན་པོ་ཡང་རྟོགས་པ་ཡོད་པ་ཉིད་དོ་སྙམ་ན། དེར་ཡང་ཞེས་གསུངས་ཏེ། སྡུག་བསྔལ་གྱི་ཤེས་པ་ལ་ཡང་ངོ༌། །དེ་ལྟར་འགྱུར་བ་ཞེས་བྱ་བ་ནི་གཉིས་རྟོགས་པ་སྟེ། རང་ཡང་དག་པར་རིག་པའི་རང་བཞིན་ཡིན་པའི་ཕྱིར་རོ་ཞེས་བྱ་བའི་དོན་ཏོ། །དེས་ན་དེ་ཉིད་ནི་རྟེན་དང་བརྟེན་པའི་དངོས་པོ་རྣམ་པར་འཇོག་པར་བྱེད་པ་མ་ཡིན་ནོ་ཞེས་གྲུབ་པོ། །འོན་ཏེ་གཞན་གྱི་ཡིན་ནོ་ཞེས་དོགས་ན། བག་ཆགས་ཅམ་གྱིས་ཞེས་གསུངས་སོ། །རང་རིག་པའི་རང་བཞིན་གྱི་མངོན་སུམ་གྱིས་ནི་གཉིས་རྟོགས་པས་མི་མཐུན་པའི་ཕྱིར་དེ་ལ་རྣམ་པར་རྟོག་པ་ཉིད་གཞན་ཡིན་པར་ལུས་པ་ཡིན་ནོ། །དེ་ཡང་བག་ཆགས་ཀྱི་སྟོབས་ལས་བྱུང་བ་ཡིན་པའི་ཕྱིར། འབྱུང་བ་དང་སྡུག་བསྔལ་གྱིས་ཤེས་བརྟན་དང་བརྟེན་པ་ཡིན་པ་ནི་བག་ཆགས་ཙམ་གྱིས་བྱས་པར་འགྱུར་རོ། །དེ་ལྟ་ཡིན་དང་རྣམ་པར་རྟོག་པ་ཙམ་དུ་འབའ་
ཞིག་ཏུ་འགྱུར་གྱི། དེས་ཀྱང་འབྱུང་བ་ཆེན་པོ་སྡུག་བསྔལ་གྱི་ཤེས་པའི་གཞི་ཡིན་པར་ནི་མི་འགྲུབ་པོ། །དེས་ན་རྟེན་ལ་སོགས་པ་ནི་རྣམ་པར་རྟོག་པ་ཙམ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་འབྱུང་བ་ཆེན་པོ་ཉིད་ཐ་དད་པ་ནི་མ་ཡིན་ཏེ་ཞེས་གསུངས་སོ། །དེ་ཡང་རྣམ་པར་རྟོག་པ་ཙམ་ཡིན་ནོ་ཞེས་བྱ་བའི་དོན་ཏོ། །ཡང་རྣམ་པར་རྟོག་པས་འབྱུང་བ་ཆེན་པོ་ལ་སོགས་པ་ཐ་དད་པ་མི་རྟོགས་པ་གཏན་ཚིགས་ཅི་སྟེ་སྙམ་ན། རང་གི་རང་བཞིན་ཙམ་གྱིས་ཞེས་གསུངས་སོ། །འོ་ན་དེ་བཞིན་དུ་རྣམ་པར་རྟོག་པའི་རང་བཞིན་གྱིས་འབྱུང་བ་ཆེན་པོ་ཡང་བག་ཆགས་ཀྱི་སྟོབས་ལས་བྱུང་བར་འགྱུར་རོ།། དེས་ན་མི་རྟོགས་པའི་ཉེས་པ་མེད་དོ་སྙམ་ན། བག་ཆགས་ཀྱི་སྟོབས་ལས་ཞེས་གསུངས་སོ། །གལ་ཏེ་རྣམ་པར་རྟོག་པའི་རང་བཞིན་ཉིད་ཀྱིས་དེ་བཞིན་དུ་འབྱུང་བ་ཆེན་པོ་རྣམས་བག་ཆགས་ཀྱི་སྟོབས་ལས་བྱུང་བར་འདོད་ན། དེའི་ཚེ་དེ་དག་དེ་ལྟར་ཡིན་ཡང་སྐྱོན་མེད་དོ། །རྣམ་པ་དེ་ལྟ་བུའི་སྔ་མ་དང་ཕྱི་མའི་འཇིག་རྟེན་ཉམས་པ་མེད་པའི་ཕྱིར་རོ་སྙམ་དུ་དགོངས་པའོ། །ཞར་ལ་འོངས་པ་རྫོགས་པར་བྱས་ནས། རྣམ་པར་ཤེས་པ་འབྱུང་བ་ཆེན་པོ་ལས་གཞན་ཡིན་ནོ་ཞེས་རྣམ་པར་གཞག་པ་གང་ཡིན་པ་དེ་ཉེ་བར་སྡུད་པ་ནི། དེའི་ཕྱིར་ཞེས་བྱ་བའོ། །ཐ་དད་པ་ཉིད་དོ་ཞེས་བྱ་བའི་དོན་ཏོ། །ཐ་དད་པ་དེས་ནའོ། །འོ་ན་གལ་ཏེ་ཞེས་བྱ་བ་ནི་ཕྱིར་བཟློག་པའོ། །གཞན་གྱིས་བཀྲི་བར་བྱ་བ་མ་ཡིན་པའི་སེམས་ཅན་མི་གཙང་བའི་ཡུལ་དུ་འགྲོ་བ་གཞན་མི་འཐད་པའི་ཕྱིར་སྲོག་ཆགས་ནི་འབྱུང་བ་ཆེན་པོ་ཙམ་ལས་སྐྱེས་པ་ཡིན་ནོ་ཞེས་བྱ་བ་ནི་རྒོལ་བའི་དོན་ཏོ། །གྲུབ་པའི་མཐར་ནི་ཐོས་པ་མེད་པ་སྨད་འཚོང་མའི་ཁྱིམ་དུ་འཇུག་པ་བཞིན་དུ། རྗེས་སུ་འགྲོ་བ་དང་ལྡོག་པ་དག་ལས་ཕྱིན་ཅི་ལོག་དང་སྲིད་པ་དག་མི་གཙང་བའི་ཡུལ་དུ་འགྲོ་བའི་རྒྱུ་ཡིན་པར་མི་འགལ་བའི་ཕྱིར་ན། གཞན་དུ་མི་འཐད་པ་ཉིད་ཉམས་སོ་ཞེས་བྱ་བའི་དོན་ཏོ། །དོན་གཉིས་པོ་འདི་ཡང་རྣམ་པར་འགྲེལ་བར་གསལ་བར་བྱ་བའོ། །གདོད་མ་ནས་ཞི་བའི་སེམས་པ་དེའི་དངོས་པོ་ནི་དེ་ཉིད་དོ། །དེ་ལ་ཞི་བ་ནི་ཉེ་བར་འཚོ་བ་དང་བྲལ་བའོ། །གདོད་མའི་སྒྲ་ནི་ཕྱིས་སྐྱེ་བ་མེད་པ་ལྷུར་སྟོན་པའོ། །ཉེ་བར་འཚོ་བ་མཐའ་དག་ནི་གཉིས་དང་འབྲེལ་བ་ཡིན་ན། གཉིས་ནི་ནམ་ཡང་སྲིད་པ་མ་ཡིན་ནོ། །དེས་ན་རྟག་ཏུ་ཞི་བ་
ནི་གདོད་མ་ནས་ཞི་བར་བརྗོད་དོ། །འོ་ན་ཅི་ལྟར་ཉེ་བར་འཚོ་བ་གཉིས་དང་འབྲེལ་བ་ཡིན་ཞེ་ན་བདེན་ཏེ། དེ་ཁོ་ན་ཡང་དག་པར་བརྟགས་ན་གཉིས་མེད་ལ་ཉེ་བར་འཚོ་བ་ཡང་མེད་དོ། །འོ་ན་ཀྱང་ཀུན་རྫོབ་ཏུ་གཉིས་སྒྲོ་བཏགས་པས་ཉེ་བར་འཚོ་བ་ཡང་ཐ་སྙད་བྱེད་དོ། །དེ་ཁོ་ན་ལ་མངོན་དུ་ཕྱོགས་ན་ནི་སྒྲོ་བཏགས་པ་ཡང་འགའ་ཡང་མེད་དོ། །དེས་ན་འདི་མཐའ་དག་ནི་ངེས་པར་མ་བཏགས་པའི་དུས་ན་ཡོད་པ་ཡིན་གྱི། རྣམ་པར་དཔྱད་ན་ནི་ཡོད་པ་མ་ཡིན་ནོ། །དེས་ན་མཆོག་ཏུ་ཡིད་ཆེས་བའི་རྒྱུ་ནི་རྣམ་པར་དཔྱོད་པ་ཁོ་ན་ཡིན་ནོ། །དེས་ན་འཁོར་བ་ཉིད་མེད་པའི་ཕྱིར་ཡོད་པ་གསལ་བར་མི་བྱ་སྟེ། འོན་ཀྱང་རྣམ་པ་ཐམས་ཅད་དུ་ཡོད་པ་མ་ཡིན་ནོ་ཞེས་རྟོགས་པར་བྱ་བའོ། །འོན་ཏེ་ཞེས་བྱ་བ་ནི་ཀུན་རྫོབ་ཀྱི་ཕྱོགས་སྡུད་པའོ། །མཆོག་ཏུ་རྟོག་པ་ནི་བློ་སྟེ། རྣམ་པ་གཉིས་སྤོང་བར་བྱེད་པའོ། །དེ་ག་ལ་ཡོད་པ་ནི་རྟོག་པ་དང་ལྡན་པའོ། །དེའི་དངོས་པོ་ནི་དེ་ཉིད་ཡིན་ཏེ། ཕྱིས་དགག་པའི་བསྡུ་བའོ། །དམན་པའི་གནས་སུ་འགྲོ་བ་ནི་རྟོག་པ་དང་མི་ལྡན་པས་སྦྱར་བ་ཡིན་ནོ་ཞེས་བྱ་བའི་དོན་ཏོ། །འདི་ཉིད་གསལ་བར་བྱེད་པ་ནི། བདག་ལ་ཆགས་པས་བསྐུལ་བ་ནི། །ཞེས་བྱ་བའོ། །ཕྱིན་ཅི་ལོག་ཉིད་དུ་ཅི་སྟེ་འགྱུར་སྙམ་ན། དེ་འདྲ་བ་དེ་ནི་ཞེས་གསུངས་སོ། །དབང་པོ་ལས་འདས་པའི་ཕྱིར་དེ་སྤང་བ་ནི་མི་རིགས་སོ་སྙམ་དུ་དགོངས་པའོ། །ལས་གང་གིས་ཕྱིན་ཅི་ལོག་བསྐྱེད་པ་གཞན་གྱིས་བཀྲི་བར་བྱ་བ་མ་ཡིན་པ་ཞེས་སྦྱར་རོ། །དེ་ལྟ་ཡིན་དང་མནར་མེད་བ། སྒྲུབ་པར་བྱེད་པའི་ལས་ཀྱིས་གྲང་བའི་རིམས་ཆེན་པོའི་དབང་གིས་དེའི་མི་ཉིད་ལ་བདེ་བའི་རྒྱུར་བསམ་པས་འཇུག་པ་ཡིན་ནོ། །དེ་བཞིན་དུ་ཕྱིན་ཅི་ལོག་གི་བློ་ཅན་རྩེ་བར་འདོད་པས་མ་ལ་སོགས་པའི་གནས་སུ་འཇོག་གོ །དེ་ལྟར་འགྲོ་བ་ཞེས་བྱ་བ་ནི། དམན་པའི་གནས་སུ་འགྲོ་བའོ། །ཕྱིན་ཅི་ལོག་གི་ནུས་པ་བརྗོད་ནས། སྲིད་པའི་ནུས་བ་བརྗོད་པ་ནི། བདེ་བ་དང་ཞེས་བྱ་བའོ།། ཀྱང་ནི་རིམ་པ་བཞིན་དུ་ཡིན་ཏེ། ཕྱིན་ཅི་ལོག་འབའ་ཞིག་གིས་ཡིན་པར་ནི་མ་ཟད་ཀྱི། བདེ་བ་ལ་སོགས་པ་ཐོབ་པ་ལ་སོགས་པར་འདོད་བས་ཀྱང་ཡིན་ནོ། །གང་གིས་གཉིས་རྒྱུ་ཡིན་པའི་ཕྱིར་གཞན་དུ་མི་འཐད་པ་ཉམས་པར་འགྱུར་བ། ཅི་ལྟ་བུ་མཐོང་བ་ཡོད་དམ་སྙམ་ན། ཐོས་པ་པོ་ཞེས་
གསུངས་ཏེ། དེས་ན་གཞན་དུ་མི་འཐད་པ་ཉམས་སོ་སྙམ་དུ་དགོངས་པའོ། །གལ་ཏེ་སྐྱེ་བ་ལ་དབང་ཕྱུག་གི་ནུས་པ་བརྗོད་ནས་གཞན་དུ་མི་འཐད་པ་ཉམས་སོ་ཞེས་ཅི་སྟེ་མི་བརྗོད་སྙམ་དུ་ཟུར་ན་འདུག་པའི་བསམ་པ་དོགས་པར་བྱེད་པ་ནི། འོན་ཏེ་དེ་ནི་དབང་ཕྱུག་གིས་ཞེས་བྱ་བའོ། །སེམས་ཅན་འདིའོ། །ལན་དུ་རང་ཉིད་ཅེས་བྱ་བའོ། །དོན་འདི་ཡིན་ཏེ། ཐར་པའི་བདག་ནི་དབང་ཕྱུག་གིས་སྐུལ་བར་བྱེད་པ་མ་ཡིན་གྱི་འོན་ཀྱང་སོ་སོའི་སྐྱེ་བོ་ཡིན་ནོ། །འཁྲུལ་པ་དེ་ཡང་ལས་ཀྱིས་འཕངས་པ་ཡིན་པའི་ཕྱིར་ངོ༌། །འདོད་པར་བྱ་བ་དོན་དུ་གཉེར་བར་ངེས་པར་འཇུག་པ་མཐོང་བའི་ཕྱིར། དབང་ཕྱུག་ཏུ་རྟོགས་པར་དཀའ་བས་ཅི་ཞིག་བྱ། འོན་ཏེ་ཚད་མས་གྲུབ་པ་ལ་དཀའ་བ་དང་སླ་བ་བསམ་པས་ཅི་བྱ་སྙམ་ན། རེ་ཞིག་མངོན་སུམ་གྱི་བྱེད་པ་མེད་པར་སྟོན་པ་ནི། དབང་ཕྱུག་གིས་བསྐུལ་བར་ནི་ཞེས་བྱ་བའོ། །རྗེས་སུ་དཔག་པའི་བྱེད་པ་ཡང་མེད་དོ་ཞེས་སྟོན་པ་ནི་དབང་ཕྱུག་ཏུ་རྟོག་པ་ཞེས་གསུངས་སོས། །རྟོག་པ་ཞེས་བྱ་བ་ནི་བརྙས་ཐབས་ཀྱིས་རྗེས་སུ་དཔག་པ་ལ་བརྗོད་དོ། །ཡང་ན་རྟོག་པའི་སྒྲས་ནི་རྣམ་པར་གཞག་པ་སུན་འབྱིན་པ་སྟོན་པར་བྱེད་དོ། །ཐེ་ཚོམ་ཙམ་ཡང་བརྟགས་པར་བསལ་བས་བཀག་པ་ཡིན་ནོ། །དེའི་ཕྱིར་བདག་ལ་ཆགས་པ་ཉིད་ཅེས་གསུངས་སོ།། འོན་ཏེ་ཞེས་བྱ་བ་ནི་གཞིན་གྱིའོ། །འཇིག་རྟེན་གཞན་དུ་ཡང་གཞན་གྱིས་བསྐུལ་ལོ་ཞེས་འབྲེལ་ཏོ། །བསལ་བ་ནི་འདི་ཡིན་ཏེ། གལ་ཏེ་བདག་ལ་ཆགས་པ་སྐུལ་བྱེད་དུ་མཐོང་བའི་ཕྱིར་དེ་ལྟར་རྣམ་པར་འཇོག་ན། དེའི་ཚེ་ཁོལ་པོ་ལ་སོགས་པ་ཡང་གཞན་གྱིས་བསྐུལ་ནས་འཇུག་པར་མཐོང་བ་ཁོ་ནའོ། དེས་ན་གཞན་གྱིས་བཀྲི་བར་བྱ་བ་ཅི་མ་ཡིན་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་འགོག་པའོ། །ངེས་པ་མེད་པའི་ཕྱིར་རོ་ཞེས་བྱ་བ་ནི་སྐུལ་བར་བྱེད་པ་ཁོ་ན་ཞེས་བྱ་བའི་ངེས་པ་མེད་པའི་ཕྱིར། ངེས་པ་མེད་པ་ཡང་རྣམ་པ་གཉིས་ཏེ། དེ་ལ་རེ་ཞིག་བསྐུལ་བར་བྱ་བ་ལ་ལྟོས་ནས་བརྗོད་པ་ནི། བདག་ལ་སྲེད་པ་དང་ལྡན་པ་ཞེས་བྱ་བའོ། །དབང་ཕྱུག་གིས་བསྐུལ་ཡང་དེ་ལས་ཁམ་གཅིག་ཀྱང་རེ་བ་མེད་ཅིང༌། ཕུང་བར་ཡང་མི་མཐོང་བ་ནི་བསྐུལ་བར་མི་ནུས་སོ། །སྐུལ་བར་བྱེད་པ་ལ་ལྟོས་ནས་ཀྱང་བཤད་པ་ནི་དེ་ཡང་ཞེས་བྱ་བའོ། །སྲེད་པ་དང་ལྡན་པ་དེ་ཡང་ངོ༌། །འདོད་ཆགས་དང་
བྲལ་བ་ལ་སོགས་པ་དེ་བསྐུལ་བར་འདོད་པའམ། སྡུག་བསྔལ་ལྡོག་པ་མ་མཐོང་བ་ནི་སྐུལ་བར་བྱེད་པ་ཉིད་དུ་མི་འཐད་དོ། །རྟོག་པ་དང་མི་ལྡན་པར་ཐལ་བའི་ཕྱིར་རོ། །དེས་ན་བསྐུལ་མཁན་ཡང་ཆགས་སྲེད་པ་དང་ལྡན་པར་ཐལ་ལོ། །དེ་ནི་སྙིང་རྗེས་འཇུག་པ་ཡང་མ་ཡིན་ནོ་ཞེས་སྔར་བསྟན་ཟིན་ཏོ། །ཆེད་དུ་བསམས་ནས་ཚིག་ལ་སོགས་པས་བསྐུལ་ན་ནི་དེའི་ཚེ་ཉེས་པ་འདིར་འགྱུར་རོ་སྙམ་དུ་བསམས་ནས་གཞན་དོགས་པར་བྱེད་པ་ནི། དེ་ལ་བསྙེན་པ་བྱས་པས་ཞེས་བྱ་བའོ། །འགྲོ་བ་ནི་བདེ་འགྲོའོ། །ལན་དུ་མུ་སྟེགས་བྱེད་ཅེས་བྱ་བའོ། །ཐམས་ཅད་ལ་བསོད་ནམས་དང་ཡེ་ཤེས་གཉིས་རབ་ཀྱི་མཐར་ཕྱིན་པ་མེད་ཀྱང༌། སྐྱེ་བོ་གཞན་ལ་ལྟོས་ནས་ཁྱད་པར་ཡོད་པའི་ཕྱིར་བསྙེན་པ་ལ་སོགས་བ་ཅུང་ཟད་ཙམ་གྱིས་བདེ་འགྲོ་ལ་སོགས་པའི་རྒྱུར་འགྱུར་རོ། །ཕུལ་བྱུང་བ་དང་བཅས་པས་དེའི་རྒྱུ་ཡིན་ན་ནི་དབང་ཕྱུག་ལ་ཡང་ངེས་པར་མི་ནུས་སོ། །དེས་ན་དབང་ཕྱུག་སྐྱེ་བ་ལ་ནུས་པ་ཡོད་པ་མ་ཡིན་ནོ། །དེའི་ཕྱིར་དེ་བཏགས་པས་གཞན་དུ་མི་འཐད་པ་ཉམས་པར་ནི་མི་ནུས་སོ་ཞེས་བྱ་བར་དགོངས་པའོ། །རྣམ་འགྲེལ་དང་པོའི་དོན་སྡུད་པ་ནི་དེའི་ཕྱིར་ཞེས་བྱ་བའོ། །གཞན་དུ་ཞེས་བྱ་བ་ནི་སྨད་འཚོད་མའི་གནས་ལ་སོགས་པར་རོ། །རྣམ་འགྲེལ་གཉིས་པའི་དོན་བརྗོད་པ་ནི་གང་ལ་དེ་ཞེས་བྱ་བའོ། །འོན་ཏེ་དེ་དག་དང་བྲལ་བ་ནི་དབང་ཕྱུག་གིས་བསྐུལ་བས་སྐྱེ་བ་ཐོབ་པར་འགྱུར་རོ་སྙམ་ན། དེ་ལ་ཞེས་གསུངས་ཏེ། །ཕྱིན་ཅི་ལོག་དང་བྲལ་བ་ལའོ། །དེ་ལྟར་ཞེས་བྱ་བ་ནི་ཕྱིན་ཅི་ལོག་ལ་སོགས་པ་དང་བྲལ་བ་ལ་དབང་ཕྱུག་གིས་སྐྱེ་བ་སྦྱིན་བར་ནུས་སོ་ཞེས་བྱ་བའོ། །འདིས་ནི་འདི་སྐད་ཅིས། གང་ལ་ལས་ཀྱི་འཕངས་པས་བློ་ཕྱིན་ཅི་ལོག་དང་སྲེད་པ་ཡོད་པ་དེ་ལ་དེ་དག་ཉིད་ཀྱིས་སྐྱེ་བར་ནུས་པའི་ཕྱིར་དབང་ཕྱུག་གིས་ཅི་བྱ་སྟེ་དོན་མེད་པའི་ཕྱིར་རོ། །གང་ལ་དེ་མེད་པ་དེ་ལ་ཡང་དབང་ཕྱུག་གིས་ཅི་བྱ་སྟེ། སྐྱེ་བར་མི་ནུས་པའི་ཕྱིར་རོ། །གལ་ཏེ་ཞེས་བྱ་བ་ལ་སོགས་པ་ནི་གཞན་གྱིའོ། །སྨན་པ་དོན་མེད་པར་འགྱུར་རོ་ཞེས་འབྲེལ་ཏོ། །དེ་ཅི་ལྟར་ཞེ་ན། མི་ནུས་ པ་དང་མི་དགོས ་པས་ཞེས་སྨྲས་སོ། །དགོས་པ་ནི་དོན་དང་ལྡན་པ་སྟེ། འབྲས་བུ་དང་བཅས་པའོ། །དེ་ལྟ་མ་ཡིན་ན་ནི་མི་ དགོས་པ ་སྟེ། འབྲས་བུ་དང་བྲལ་བའོ། །དེས་ན་དབང་ཕྱུག་མི་
དགོས་པ ་དང་མི་ནུས་པས་ནི་སྨན་པ་ཡང་མི་ནུས་པ་དང་མི་ནུས་པར་འགྱུར་ཏེ། རིགས་མཚུངས་པའི་ཕྱིར་རོ་ཞེས་བྱ་བའི་དོན་ཏོ། །དེ་ལྟ་ཡང་མ་ཡིན་ཏེ། དེ་ནས་རྩོད་པ་འདིས་ནི་དབང་ཕྱུག་ལ་ཡང་གླགས་མི་རྙེད་དོ་ཞེས་བྱ་བར་བསམས་པའོ། །ཉེས་པ་འདི་ནི་མེད་དོ་ཞེས་བྱ་བ་ནི་གྲུབ་པའི་མཐའ་སྨྲ་བའིའོ། །གང་དུ་སྨན་པའི་དཔྱད་མེད་ཀྱང་ནད་མེད་བ་གྲུབ་པར་བྱེད་པའི་ལས་ཡོད་པ་འགའ་ཞིག་ཏུ་ནི་སྨན་དོན་མེད་པ་དང༌། གང་དུ་སྨན་པའི་དཔྱད་ཡོད་ཀྱང་ནད་མེད་པ་སྒྲུབ་པར་བྱེད་པའི་ལས་མེད་པ་འགའ་ཞིག་ལ་གང་ཡིན་པ་དེས་ནི་ནུས་པ་མེད་པ་ཡིན་ནོ། །གང་ཞིག་ཏུ་སྨན་པའི་དཔྱད་དང་ལྡན་ཅིག་པ་ཉིད་དུ་གྱུར་པ་ནད་མེད་པ་སྒྲུབ་པར་བྱེད་པའི་ལས་ཡོད་པ་དེར་ནི་སྨན་པ་མི་ནུས་པ་དང་མི་ དགོས་པ ་མ་ཡིན་ནོ། །ལས་ཀྱི་སྟོབས་མ་དེས་པས་ནི་དེའི་སྨན་དཔྱད་ཐམས་ཅད་དུ་འཇུག་པ་ཡིན་ནོ། །དེ་བཞིན་ཞེས་བྱ་བ་ནི་སྨན་པ་བཞིན་ནོ། །དེ་ཉིད་ཅེས་བྱ་བ་ནི་འགའ་ཞིག་ཏུ་འདོད་པའི་མི་ནུས་པ་དང་མི་ དགོས་པ ་ཉིད་དོ། །དེ་ལྟར་ན་ཞེས་བྱ་བ་ནི་སྨན་པ་བཞིན་དུ་འགའ་ཞིག་ཏུ་དོན་མེད་པ་ཡིན་ན་དབང་ཕྱུག་ཏུ་འདོད་པ་དེ་ཅི་སྐད་བཤད་པའི་ཡོན་ཏན་དང་ལྡན་པའི་དབང་ཕྱུག་མ་ཡིན་ནོ། །ཅིའི་ཕྱིར་ཞེ་ན། དབང་ཕྱུག་གིས་འགའ་ཞིག་ནི་ཞེས་པ་གསུངས་སོ། །འོན་ཀྱང་འཁོར་བ་ལ་མཐའ་དག་བསྐུལ་ལོ་སྙམ་དུ་དགོངས་པའོ། །དེ་སྐད་དུ་ཡང་སྐྱེ་བོ་པ་འདི་ཤེས་པ་ཡོད་མིན་ལ། ང་ཞེས་བྱ་བ་ལ་སོགས་པའོ། །འཁོར་བ་བའི་སྒྲས་ནི་འདི་སྐད་བརྗོད་པ་ཡིན་ཏེ། ཐར་པ་ལྟ་ཞོག་སྟེ། འཁོར་བ་པ་ལ་ཡང་ཐམས་ཅད་ནི་མི་བསྐུལ་ལོ་ཞེས་བྱ་བའོ། །འོན་ཏེ་ཞེས་བྱ་བ་ནི། ཡང་གི་སྒྲས་ནི་འདོད་པ་འབའ་ཞིག་གིས་མ་ཡིན་པ་དེས་ན་གལ་ཏེ་ཡང་ཐམས་ཅད་མི་བསྐུལ་བ་དེ་ལྟ་ན་ཡང་འདི་ཉིད་ནི་དབང་ཕྱུག་ཡིན་ནོ་སྙམ་ན། ལན་དུ་དེ་ལྟ་ཡིན་ན་ཞེས་བྱ་བའོ། །སྐྱེ་བ་པོ་བསྙེན་པ་ཡང་བདེ་འགྲོ་ཐོབ་ལ། ཉེ་བར་མཁོ་བ་ཡིན་ནོ་ཞེས་འབྲེལ་ཏོ། །དེས་ན་བསྐོ་བ་པོ་ཡང་དབང་ཕྱུག་དུ་ཐལ་ལོ་སྙམ་དུ་དགོངས་པའོ། །སྐྱེ་བ་པོ་ནི་སྟེར་མཁན་ཏེ་སྟེར་མཁན་ཡང་ལོན་གནས་རྣམས་བདེ་བར་འདོད་པས་སོ། །ཉེ་བར་ལོངས་སྤྱོད་པ་ལ་སོགས་པ་བྱིན་པས་བདེ་འགྲོའི་རྒྱུར་འགྱུར་ཏེ། བདེ་བའི་གནས་སྐབས་ཁྱད་པར་ཅན་ཉིད་བདེ་འགྲོ་ཡིན་པའི་ཕྱིར་རོ།།
སྔར་བཤད་པ་ཧ་ཅང་ཡང་ཐལ་པའི་ཉེས་པ་སྡུད་པ་ནི་དེ་ནི་ཞེས་བྱ་བ་སྟེ་བསྙེན་པའོ། །མུ་སྟེགས་བྱེད་ཐམས་ཅད་ཅེས་བྱ་བ་ནི་སྔ་མ་བཞིན་ནོ། །དེ་ཉིད་ཅེས་ངེས་པར་བཟུང་བའི་རྣམ་པར་གཅད་པ་བརྗོད་བ་ནི་དབང་ཕྱུག་ནི་མ་ཡིན་ནོ་ཞེས་བྱ་བའོ། །དེས་ན་དབང་ཕྱུག་ཏུ་རྟོགས་པས་གཞན་དུ་མི་འཐད་པ་ཉམས་པ་ནི་མ་ཡིན་ནོ་སྙམ་དུ་དགོངས་པའོ། །དེས་ནི་བློ་ཕྱིན་ཅི་ལོག་པ་སྲེད་པས་མངལ་ལ་སོགས་པའི་ཡུལ་དུ་སྐྱེ་བ་མི་འགལ་བའི་ཕྱིར་རོ། །གཞན་དུ་མི་འཐད་པས་སྲོག་ཆགས་འབྱུང་བ་ཙམ་ལས་སྐྱེ་བ་ནི་མ་ཡིན་ནོ་ཞེས་གནས་སོ། །གལ་ཏེ་འོ་ན་ཞེས་བྱ་བ་ནི་གཞན་ནོ། །འགྲོ་བ་དང་འོང་བ་མེད་ན་ནི་སྲོག་ཆགས་ཀྱི་སྐྱེ་བ་འབྱུང་བ་ཆེན་པོ་ཙམ་ལས་ཡིན་ནོ་སྙམ་དུ་བསམས་པའོ། །དེ་ལྟ་ན་ཡང་ཞེས་བྱ་བ་ནི་མ་མཐོང་ན་ཡང་ངོ༌། །དཔེའི་དོན་དཔེ་ཅན་གྱི་དོན་ལ་གསལ་བར་སྦྱོར་བ་ནི། སྲིད་པ་བར་མ་དོའི་ལུས་ཞེས་བྱ་བའོ། །དེ་ཙམ་གྱིས་ཞེས་བྱ་བ་ནི་སྲིད་པ་བར་མདོའི་ལུས་སོ། །རྨི་ལམ་གྱི་ལུས་ནི་ཞེས་བྱ་བ་ནི་གཞན་གྱི་དོགས་བ་བསུ་བའོ། །རྨི་ལམ་གྱི་ལུས་ནི་ལོག་པ་ཡིན་ཏེ། དེས་ན་དེ་ནི་མ་དམིགས་པས་མེད་པ་མ་ཡིན་གྱི་བར་མདོའི་ལུས་ནི་ཡོད་པའི་ཕྱིར་ན་དེ་ནི་མ་མཐོང་བས་མེད་པར་འགྱུར་རོ་སྙམ་ན། ལེན་དུ་མ་ཡིན་ཏེ་ཞེས་བྱ་བའོ། །རྨི་ལམ་གྱི་ལུས་ཀྱིས་ལུས་ཀྱི་དོན་བྱ་བ་བསྐལ་པའི་ལུས་ལ་རྣམ་པར་འགྱུར་བ་བྱེད་པ་ནི་སྔར་བསྟན་ཟིན་ཏོ། །དེས་ན་སྣང་བཞིན་པ་དང༌། དོན་བྱ་བ་བྱེད་པ་མི་བདེན་པར་ཅི་ལྟར་བརྗོད་བར་ནུས། ཐོགས་པ་མེད་བ་ཉིད་ཀྱིས་ནི་ལུས་འདི་དང་རིགས་མི་མཐུན་པར་འགྱུར་ཏེ། སྲིད་པ་བར་མ་ཡང་དེ་འདྲ་བ་ཉིད་ནི་ཡིན་པ་ཁོ་ནའོ། །གང་གི་ཕྱིར་བར་མདོའི་ལུས་མེད་པ་ཡིན་པ་དེ་ཉིད་ཀྱི་ཕྱིར་ལུས་ཅན་མ་ཡིན་པའི་སེམས་ལ་ལྟ་བསམ་དུ་ཡང་ག་ལ་ཡོད་དེ། ལུས་ཅན་མ་ཡིན་ཡང་ངོ༌། །ཐོགས་པ་ནི་རྡུགས་པ་སྟེ། འགྲོ་བའི་གེགས་དང་ལྡན་པའོ། །ཐོགས་མེད་ནི་རྡུགས་པ་མེད་པ་ཅན་ནོ། །སྤྱིར་བཤད་པའི་དོན་ཁྱད་པར་དུ་སྟོན་པ་ནི་ཆུ་བཞིན་ཞེས་བྱ་བའོ། །འདིར་ཆུ་བཞིན་རྣམ་གསེར་ལ་དངུལ་ཆུ་བཞིན་ཞེས་འང་གི་སྒྲ་སྦྲེལ་བར་བྱའོ། །སྲིད་པ་བར་མདོའི་ལུས་ཀྱང་ཐོགས་པ་མེད་པར་འགྱུར་རོ་སྙམ་དུ་ཞེ་ལ་གཞག་པའོ། །དེས་ན་རྣམ་པ་དེ་ལྟ་བུའི་སྲིད་པ་བར་མདོའི་ལུས་ནི་མ་མཐོང་བའི་ཕྱིར་ན་མེད་པ་མ་ཡིན་ནོ་ཞེས་ཉེ་བར་སྡུད་པའོ། །དེས་ན་སྲོག་
ཆགས་ནི་འབྱུང་བ་ཆེན་པོ་ཙམ་ལས་སྐྱེས་པ་མ་ཡིན་ནོ་སྙམ་དུ་དགོངས་པའོ། །བཤད་པ་མཛད་པས་ནི་འདི་བོར་ནས་མ་མཐོང་བའི་ཕྱིར་སྲིད་པ་བར་མ་དོ་མེད་པ་ཡིན་ཡང་ངེད་ལ་ཆད་པ་ཅི་ཡང་མེད་དོ་སྙམ་དུ་དགོངས་ནས་ལུགས་གཞན་བསྡུ་བའི་དོན་དུ་ཡོད་པ་ཉིད་མ་དམིགས་པ་ཞེས་བྱ་བ་འདི་དགག་པ་ལ་མ་ཡིན་ཞེས་བྱ་བར་མ་མཐོང་བའི་ཕྱིར་མེད་པ་ཞེས་བྱ་བ་སྒྲུབ་པ་ཉིད་དུ་འཆད་པར་འགྱུར་རོ། །དེའི་ཚེ་ནི་མ་དམིགས་པས་མེད་པར་སྨྲ་བའི་ལུགས་ལ་བརྟེན་ཀྱང་འཇིག་རྟེན་ཕ་རོལ་མེད་པ་མ་ཡིན་ནོ་སྙམ་དུ་དགོངས་ནས་མ་མཐོང་བའི་ཕྱིར་ན་མེད་པ་འང་ཞེས་གསུངས་པས་སོ། །དེ་ཞེས་བྱ་བ་དེ་ཉིད་ལྟར་འཇུག་པར་བྱ་བའོ། །ཡང་ན་མ་མཐོང་བའི་ཕྱིར་ན་བར་མ་དོའི་ལུས་ནི་མེད་པ་ཉིད་དོ། །གང་གི་ཕྱིར་བུམ་པ་ལ་སོགས་པའི་ཡན་ལག་གི་ནང་དུ་ཞུགས་པའི་ཆུ་དང་དངུལ་ཆུ་བཞིན་དུ་སྲིད་པ་བར་མདོའི་ལུས་མ་མཐོང་བ་ནི་མ་ཡིན་གྱི། འོན་ཀྱང་མེད་པ་ཁོ་ནའོ་ཞེས་འགའ་ཞིག་འདོད་པ་དེས་ན་དེ་ནི་མེད་པ་ཁོ་ནའོ། །མེད་ཀྱང་འཇིག་རྟེན་ཕ་རོལ་མི་འགྲུབ་པ་ནི་མ་ཡིན་ནོ་ཞེས་འགྲེལ་པར་གསལ་བར་བྱའོ། །ཡང་གི་སྒྲས་འཕངས་པའི་དོན་བརྗོད་བ་ནི་རྨི་ལམ་གྱི་ལུས་བཞིན་དུ་ཞེས་བྱ་བའོ། །ཐོགས་པ་མེད་པ་ཡིན་ནོ་ཞེས་བྱ་བ་ནི་སྲིད་པ་བར་མ་དོའི་ལུས་སོ་ཞེས་བྱ་བ་བར་སྐབས་ཡིན་ནོ། །འགའ་ཞིག་ལ་ལར་ཞེས་བྱ་བ་ནི་ཐམས་ཅད་ལ་མ་ཡིན་ནོ་ཞེས་བྱ་བའི་དོན་ཏོ། །ཅི་དེ་ལྟར་འགའ་ཞིག་མཐོང་བ་ཡོད་དམ་སྙམ་ན། བུམ་པ་ལ་སོགས་པར་ཞེས་གསུངས་སོ། །སྐབས་སུ་བབ་པ་ཡང་ཐོགས་པ་མེད་པ་ཡིན་ནོ་ཞེས་བྱ་བར་ལྟའོ། །ལུགས་གཞན་བསྡུ་བའི་དོན་དུ་འང་གི་སྒྲ་ནི་རྣམ་པ་གཞན་དུ་འཆད་པ་ནི་ཡང་ན་ཞེས་བྱ་བའོ། །ཆུ་བཞིན་ཞེས་བྱ་བ་ནི་བུམ་པ་སོ་བཏང་མ་ཐག་ལ་ལྟོས་ནས་སོ། །འདིས་ཀྱང་གི་སྒྲ་སྦྲེལ་བར་བྱ་སྟེ། །དེས་ན་ཡང་ན་བར་མ་དོའི་ལུས་ནི་མེད་པ་ཉིད་དོ་ཞེས་བྱ་བར་འབྲེལ་ཏོ། །ཅིའི་ཕྱིར་སྙམ་དུ་དོགས་ན། སོ་བཏང་མ་ཐག་གི་བུམ་པ་ལས་ཆུ་བཞིན་ནམ་གསེར་ལ་དངུལ་ཆུ་བཞིན་དུ་བར་མ་དོའི་ལུས་ཡོད་བཞིན་དུ་མ་མཐོང་བ་ནི་མ་ཡིན་གྱི་འོན་ཀྱང་མེད་པ་ཉིད་ཡིན་ནོ། །དེས་ནམ་མཐོང་བའི་ཕྱིར་ཏེ།
མ་དམིགས་པའི་ཕྱིར་ན་མེད་པ་ཁོ་ནའོ་ཞེས་སྦྱར་བར་བྱའོ། །འདི་ལྟར་ཞེས་བྱ་བ་འདིས་ནི་ཁྱད་པར་བརྗོད་པའི་དོན་དུ་སྲིད་པ་བར་མ་དོའི་རྣམ་པར་གཞག་པར་སྟོན་པའོ། །ཆོས་མངོན་པའི་ཚིག་ལེའུར་བྱས་པའི་བར་དུ་ཡོངས་སུ་བཏགས་པའི་སྒྲ་བཅུག་པ་ནི་ཚད་མ་མེད་པའི་ཕྱིར་རོ། །ངེས་པ་མེད་པ་སྟོན་པ་ལྷུར་བྱེད་པའོ། །ཁྱད་པར་བརྗོད་པ་ནི་འདིར་ནི་ཞེས་བྱ་བ་སྟེ་ལུགས་གཞན་ལའོ། །དེ་ལྟར་ཞེས་བྱ་བ་ནི་ཆོས་མངོན་པའི་ཚིག་ལེའུར་བྱས་པས་བརྗོད་པའི་དོན་ཏོ། །གང་གིས་སྐྱེ་བའི་ཡུལ་དུ་ཡང་དེ་ལྟ་བུ་ཉིད་ཡིན་པར་བརྟག་པར་བྱ་བ་ཤེས་པའི་སྐྱེ་བ་རྣམ་པར་ཆད་པ་དང་མ་ཆད་པ་དག་ཏུ་སྐྱེ་བ་ལ་ལར་མཐོང་ངམ་ཅི་སྙམ་ན། ཡུལ་དང་དུས་ཞེས་གསུངས་སོ། །ཆོད་པ་ཡང་ཞེས་བྱ་བར་ལྟའོ། །དེ་ལ་གཉིད་མཐུག་པོར་ལོག་པ་ལ་སོགས་པར་སེམས་དུས་ཀྱིས་ཆོད་པ་སྐྱེ་བ་དང༌། མཆོད་པ་ཡང་ཡིན་པས་རྣམ་པ་གཉིས་ནི་སྔར་བཤད་ཟིན་ཏོ། །ཡུལ་གྱིས་ཆོད་པ་དང་མ་ཆོད་པ་རྣམ་པ་གཉིས་ནི་བརྗོད་བས་ནི། འདི་ལྟར་ཞེས་གསུངས་སོ། །འདི་རྣམ་པ་གཉི་ག་ལ་རྨི་ལམ་དུ་ཡིན་པར་རྟོགས་པར་བྱའོ། །དེ་ལྟ་ན་གཉི་ག་ལྟར་ཡང་ཤེས་པ་སྐྱེ་བའི་ཡུལ་དུ་སྐྱེ་བར་བརྟག་པར་བྱ་བ་ཡིན་ནོ་སྙམ་དུ་དགོངས་པའོ། །དེ་ཉིད་ཀྱི་ཕྱིར་དེ་བཞིན་དུ་ཞེས་གསུངས་ཏེ། བཤད་མ་ཐག་པའི་རྣམ་པ་ཡིན་ནོ། །ཁྱད་པར་མེད་དོ་ཞེས་བྱ་བ་ནི་རྨི་ལམ་ལས་སྐྱེ་བ་ཡོངས་སུ་ལེན་པ་ཞེས་བྱ་བ་ལྷག་མའོ། །གལ་ཏེ་རྨི་ལམ་དང་ཆོས་མཚུངས་པའི་ཕྱིར་བར་མ་དོའི་སྲིད་པ་མེད་ཀྱང་སྲིད་པ་གཞན་ཡོད་ན་དེའི་ཚེ་རྨི་ལམ་བཞིན་དུ་མི་བདེན་པར་ཡང་འགྱུར་རོ་སྙམ་ན། རྨི་ལམ་མི་བདེན་པ་ཞེས་གསུངས་སོ། །ཅིའི་ཕྱིར་ཞེ་ན། ཐམས་ཅད་ཀྱིས་ཞེས་གསུངས་སོ། །འོན་ཀྱང་བསྒྲུབ་པར་བྱ་བ་ལ་གནས་སྐབས་གཞན་མ་དམིགས་ཀྱང་གནས་གཞན་དུ་ཕྱིན་པར་དམིགས་པ་དེ་ཙམ་གྱིས་མཚུངས་པར་བསྟན་པའི་དོན་དུ་ཞུགས་པ་ཡིན་ན་དེ་ནི་གྲུབ་པོ། །འདི་དག་ནི་བདེན་པ་དང་མི་བདེན་པ་དག་ཀྱང་དེ་ཁོ་ན་ཉིད་ནི་མ་ཡིན་ཏེ། སྣང་བ་དང་དོན་བྱ་བ་དག་ནི་གཉི་ག་ལ་ཐུན་མོང་ཡིན་པའི་ཕྱིར་ཏེ། སྔར་ཇི་སྐད་བརྗོད་པ་ཡིན་ནོ། །དེས་ན་གཉི་ག་ཡང་རིགས་མཐུན་པ་ཁོ་ནའོ། །འོ་ན་ཅི་ལྟར་བདེན་པ་དང་མི་བདེན་པ་དག་གིས་ཐ་དད་པར་ཐ་སྙད་འདོགས་སྙམ་ན། སྐྱེ་བ་གཞན་ནི་ཞེས་གསུངས་སོ། །བདེན་པར་ཞེས་བྱ་བ་ནི་བདེན་པའི་ཐ་སྙད་དུའོ། །དེ་མེད་པའི་ཕྱིར་རོ་ཞེས་བྱ་བ་ནི་བག་ཆགས་བསྟན་པ་མེད་པའི་ཕྱིར་རོ། །དེ་ལྟ་མ་ཡིན་ན་རྨི་ལམ་དང་རྨི་ལམ་མ་ཡིན་པ་དག་ཁྱད་པར་
ཡོད་པ་མ་ཡིན་ནོ་ཞེས་བསྟན་པའི་དོན་དུ། ཐ་དད་པའི་རྒྱུ་མཚན་དེ་དང་དེ་དག་དོགས་པར་བྱས་ནས་སེལ་བ་ནི་གལ་ཏེ་ཞེས་བྱ་བའོ། །སད་བའི་ཤེས་པ་མཚན་ཉིད་ཀྱི་རྣམ་པ་གཞན་རྨི་ལམ་ལས་དུས་ཕྱིས་ཐོབ་པས་ནའོ། །དེས་ན་ཞེས་བྱ་བ་ནི་རྨི་ལམ་གྱི་ཤེས་པ་སྣང་བ་གཞན་གྱི་མཚན་ཉིད་ཡོད་པའི་ཕྱིར་རོ། །སྐྱེ་བ་གཞན་པ་ཡང་ཞེས་བྱ་བ་ནི་སད་པའི་ཤེས་པའི་མཚན་ཉིད་དོ། །གལ་ཏེ་ཞེས་བྱ་བ་ནི་འཆད་པའོ། །དེའི་རྒྱུ་ཞེས་བྱ་བ་ནི་རྫ་མཁན་ལ་སོགས་པའི་རྒྱུའོ། །ལན་ནི་སད་པའི་ཞེས་བྱ་བ་ལ་སོགས་པའོ། །སད་པ་ལ་ནི་རྒྱུ་བའི་ཁྱད་པར་ཉིད་ཚོགས་པ་ཡིན་ནོ་སྙམ་ན། རྨི་ལམ་དུ་ཡང་ཞེས་གསུངས་སོ། །སད་པའི་ཞེས་བྱ་བ་ལ་སོགས་པ་ནི་ཕྱེད་སྔ་མ་རྣམ་པར་འགྲེལ་པའོ། །དེ་དག་ནི་ཞེས་བྱ་བ་ནི་གཞན་གྱིས་སྨྲས་པའོ། །དེ་ལ་རྒྱུའི་ཁྱད་པར་ནི་ཞེས་བྱ་བ་ནི་ཕྱོགས་སྔ་མ་གཞན་ཡིན་ནོ། །དེ་ལ་རྩོད་པ་དང་པོ་སེལ་བ་ནི་རྨི་ལམ་ན་ཡང་ཞེས་བྱ་བའོ། །དེས་ན་རྨི་ལམ་དང་རྨི་ལམ་མ་ཡིན་པ་དག་ཁྱད་པར་མེད་དོ་སྙམ་དུ་དགོངས་པའོ། །གཞན་གྱིས་མི་དམིགས་པའི་ཕྱིར་སྔར་ཡོད་པ་ཟློག་པར་བྱེད་པ་ཡིན་ནོ་ཞེས་སྦྲེལ་ཏ། །གཞན་གྱིས་ཞེས་བྱ་བ་ནི་སད་བས་སོ། །སད་པས་དམིགས་པའི་རི་ལ་སོགས་པ་ལ་ཡང་རྨི་ལམ་མཐོང་བ་དག་གིས་མ་དམིགས་པ་མཚུངས་སོ། །ཚིག་ལེའུར་བྱས་པ་འདི་བཤད་ནས་ཚིག་ལེའུར་བྱས་པ་སྔ་མའི་ཕྱེད་ཕྱི་མ་རྣམ་པར་འགྲེལ་པས་རྩོད་པ་གཉིས་པ་སེལ་བར་བྱེད་པ་ལས་ནི། ཅི་ལྟར་རྒྱུ་བའི་ཞེས་བྱ་བའོ། །དེ་དག་ཅེས་བྱ་བ་ནི་རི་ལ་སོགས་པ་དག་གོ །རྒྱུ་བའི་ཚོགས་པའི་དོད་པོ་ནི་རྨི་ལམ་ཡིན་ནོ། །བུམ་པ་ལ་སོགས་པ་གློ་བུར་དུ་དམིགས་པ་ཡིན་ནོ་ཞེས་འབྲེལ་ཏོ། །གཞན་ཡང་སད་པའི་གནས་སྐབས་ཉིད་ཐ་དད་པར་རྟོགས་པར་མི་ནུས་པ་དེས་ན་སད་པ་གཞན་གྱིས་དེ་དག་དམིགས་པའི་ཕྱིར་ཞེས་ཅི་ལྟར་བརྗོད་ཅེས་བཤད་པ་ནི་སད་པའི་ཞེས་བྱ་བའོ། །དེ་ཡང་ཞེས་བྱ་བ་ནི་གཉིད་ཀྱི་གནས་སྐབས་སུ་མཐོང་བའོ། །དེ་ལྟར་ཐལ་བར་འགྱུར་ཏེ་ཞེས་བྱ་བ་ནི་ལོག་པ་ཉིད་དུ་ཐལ་བར་འགྱུར་བའོ། །འོན་ཏེ་རྨི་ལམ་དུ་མཐོང་བ་ཉིད་མི་བདེན་པ་ཡིན་ཏེ། སད་པས་མ་དམིགས་པའི་ཕྱིར་རོ་སྙམ་ན། ཕན་ཚུན་ཞེས་གསུངས་སོ། །གཉི་ག་ལ་
ཡང་ཞེས་བྱ་བ་ནི་སད་པ་དང་གཉིད་ལོག་པ་དག་ལའོ། །དེ་མཚུངས་པའི་ཕྱིར་ཞེས་བྱ་བ་ནི་མི་བདེན་ནོ་ཞེས་རྟོགས་པར་མཚུངས་པའི་ཕྱིར་རོ། །གལ་ཏེ་འདི་མི་བདེན་ནོ་སྙམ་པའི་རྟོག་པ་མེད་པའི་ཕྱིར་སད་པར་ཤེས་པ་མི་བདེན་པ་ཅི་ལྟར་འགྱུར་སྙམ་ན། དེ་ལྟར་རྟོགས་པ་ཉིད་ཀྱིས་ནི། །ཞེས་གསུངས་སོ། །དེ་ཉིད་ནི་བདེན་པ་ཉིད་དོ། །དེའི་མཚན་ཉིད་ཀྱིས་ཀྱང་ཞེས་ཀྱང་གི་སྒྲ་ནི་རིགས་པའི་སྟོབས་ཀྱིས་སྲིད་པའི་དོན་ཏོ། །དེའི་མཚན་ཉིད་ཁོ་ནས་ཡིན་ནོ་ཞེས་བྱ་བའི་དོན་ཏོ། །རྣམ་པར་རྟོག་པ་ནི་ཡོད་དམ་མེད་ཀྱང་བླའོ། དེ་ལྟ་མ་ཡིན་ན་ཤིང་ཉིད་དུ་ཐ་སྙད་མ་བྱས་པའི་ཤིང་ཤ་པ་ཤིང་མ་ཡིན་པ་ཉིད་དུ་འགྱུར་རོ། །དེས་ན་ཤིང་ཤ་པ་ཉིད་ཀྱང་དེའི་ཐ་སྙད་མི་འགྲུབ་པར་འགྱུར་རོ། །གཞན་ཡང་ཞེས་བྱ་བ་ནི་སུན་འབྱིན་པ་གཞན་ཡིན་ནོ། །ཡང་ན་རྣམ་པར་རྟོག་པའི་ཤེས་པ་འབའ་ཞིག་གིས་ཡིན་པར་ནི་མ་ཟད་ཀྱི། །རྨི་ལམ་གྱི་ཤེས་པའི་མཚན་ཉིད་ཀྱིས་ཀྱང་དེ་ཉིད་དུ་སྟེ་ལོག་པ་ཉིད་དུ་འགྱུར་བའི་ཕྱིར་རོ། །དེ་ལྟ་མ་ཡིན་ན་ཐམས་ཅད་དུ་དེའི་མཚན་ཉིད་ཀྱིས་དེ་ཉིད་དུ་རྣམ་པར་གཞག་པ་མྱོས་པར་ཐལ་པའི་ཕྱིར་རོ། །འདི་ཡང་འདི་ཡང་འདི་གཉིས་སོ་སོར་དེ་ཉིད་རྣམ་པར་འཇོག་པར་བྱེད་པ་ཡིན་པར་ཁས་བླངས་ནས་བརྗོད་པ་ཡིན་གྱི་དངོས་པོ་ལ་ནི་དེའི་མཚན་ཉིད་ཁོ་ནས་དེ་ཉིད་ཡིན་ནོ་ཞེས་བསྟན་པའི་དོན་དུ། གཞན་ཡང་ཞེས་གསུངས་སོ། །བདེན་ལས་གཞན་ནམ་ཞེས་བྱ་བའི་རྣམ་པར་རྟོག་པ་ནི་མ་ཡིན་པའི་ཕྱོགས་ལའོ། །ཅི་སྟེ་ན་བདེན་མོད་ཅེས་བྱ་བ་ནི་མེད་པར་དགག་པའི་ཕྱོགས་ལའོ། །དགག་པ་འདི་གཉི་ག་ཡང་ཤིན་ཏུ་འཐད་པར་དཀའི་ཞེས་འབྲེལ་ཏོ། །ཅིའི་ཕྱིར་ཞེ་ན། དེའི་རང་བཞིན་དམིགས་པའི་ཕྱིར་རོ། །འདིའོ་ཞེས་ལྷག་པར་འཛིན་པ་དང་ལྡན་པའི་རྨི་ལམ་གྱི་ཤེས་པ་མངོན་སུམ་དུ་གྲུབ་པའི་ཕྱིར་རོ། །རྣམ་པར་འགྲེལ་པ་ནི་དེའི་རང་བཞིན་དུ་ཞེས་བྱ་བ་སྟེ། བདེན་པའི་རང་བཞིན་དུའོ། །དེ་ལས་གཞན་ནི་བདེན་པ་ལས་གཞན་ནོ། །དམིགས་པ་ཉིད་ནི་ཞེས་བྱ་བ་ནི་གཏན་ཚིགས་ཀྱི་ཚིག་གོ །ཕྱོགས་གཉིས་པ་རྣམ་པར་འགྲེལ་པ་ནི། །དེ་མ་ཡིན་ནོ་ཞེས་བྱ་བར་ཡང་ཞེས་བྱ་བའོ། །ཕྱོགས་དང་པོ་ལ་འཐད་པ་བརྗོད་པ་ནི། དེ་ལས་གཞན་པ་ཉིད་ནི་ཞེས་བྱ་བའོ། །ཡོད་པ་ལས་གཞན་ཉིད་ནིའོ། །དེ་ལས་གཞན་པའི་རང་བཞིན་ཉིད་ཀྱིས་ཞེས་བྱ་བ་ནི་ཡོད་པ་ལས་གཞན་ནི་རང་
བཞིན་ཉིད་ཀྱིས་སོ། །དེ་ལྟར་མ་ཡིན་ན་ཞེས་བྱ་བ་ནི་གལ་ཏེ་དེ་ལས་གཞན་པའི་རང་བཞིན་ནི། །དེ་ལས་གཞན་པའི་རང་བཞིན་ཉིད་ཀྱིས་མ་ཡིན་ནའོ། །དེའི་ཚེ་བདེན་པ་དེ་ཡང་དེ་ལས་གཞན་དུ་འགྱུར་རོ། །དེ་ལྟ་ཡང་མ་ཡིན་ཏེ། དེས་ན་རྨི་ལམ་གྱི་ཤེས་པ་ནི་བདེན་པ་ལས་གཞན་ཉིད་མ་ཡིན་ནོ་ཞེས་བྱ་བར་དགོངས་པའོ། །འདི་ཞེས་བྱ་བར་དགོངས་པ་ངེས་པར་འཛིན་པ་ལས་ཀྱང་བདེན་པ་ཉིད་ཡིན་པའི་ཕྱིར་དེ་དང་འགལ་བ་མི་ལྡན་པ་ཉིད་དུ་ཇི་ལྟར་འགྱུར། མངོན་སུམ་ལ་ནི་ཚད་མ་གཞན་གྱིས་གནོད་པ་ཡང་མ་ཡིན་ནོ་ཞེས་སྔར་རྒྱ་ཆེར་བཤད་ཟིན་ཏོ། །གཉིས་པ་ལ་ཡང་འཐད་པ་དེ་ཉིད་བཤད་པ་ནི། དམིགས་བཞིན་ཉིད་ནི་ཞེས་བྱ་བའོ། །ཐམས་ཅད་དེ་ལྟར་ཐལ་བའི་ཕྱིར་རོ་ཞེས་བྱ་བ་ནི། གང་གིས་རེ་ཞིག་ཅུང་ཟད་ཁས་བླངས་པ་དེ་ལ་ཆད་པའི་གཙོ་བོ་ནི་འདི་ཡིན་ནོ། །ཐམས་ཅད་ལ་བསྙོན་འདེབས་པ་ཡང་གལ་ཏེ་ཚད་མ་ཅན་ཡིན་ན་དེའི་ཚེ་འདིའི་གནོད་པའི་ཚད་མ་བཞིན་དུ་མངོན་སུམ་ཡང་ཚད་མ་ཉིད་ཡིན་ཏེ། དེའི་མཚན་ཉིད་དང་ལྡན་པའི་ཕྱིར་རོ། །ཡང་ན་ནི་མཚན་ཉིད་གཞན་བརྗོད་དགོས་སོ། །མངོན་སུམ་ཚད་མ་མ་ཡིན་ན་ནི། ཚད་མ་གཞན་ཚད་མར་མི་འགྱུར་རོ་ཞེས་བྱ་བ་ཡང་སྔར་བསྒྲུབས་ཟིན་ཏོ། །དེ་སྟེ་ཚད་མ་ཅན་མ་ཡིན་ན་དེའི་ཚེ་ཐམས་ཅད་འདོད་པ་ལ་རག་ལས་ནས་གྲུབ་པར་འགྱུར་རོ། །དེས་ན་གལ་ཏེ་ཀུན་རྫོབ་ཏུ་ཡང་གནོད་བྱེད་ཁས་ལེན་ན་གནོད་བྱེད་ཅི་ལྟ་བ་དེ་བཞིན་དུ་སྒྲུབ་པར་བྱེད་པ་ཡང་ཚད་མ་ཉིད་ཡིན་ནོ། །འོན་ཏེ་ཞེས་བྱ་བ་རྨི་ལམ་མི་བདེན་ནོ་སྙམ་པའི་རྟོག་པ་འདི་ནིའོ། །སྐྱེས་མོད་ཀྱི་ཞེས་བྱ་བ་ནི་ལན་ནོ། །འདི་ལ་ཞེས་བྱ་བ་ནི་མི་བདེན་ནོ་སྙམ་པའི་རྟོག་པ་འདི་ལའོ། །དོན་མེད་པ་ཉིད་ཅེས་བྱ་བ་ནི། ཡུལ་དང་བྲལ་བ་ཉིད་དོ། །འདི་ལ་ཞེས་བྱ་བ་མི་བདེན་ནོ་སྙམ་པའི་རྟོག་པ་དམིགས་པ་མེད་པ་ལས་སོ། །དེས་ན་དེའི་མཚན་ཉིད་ཁོ་ནས་དེ་ཉིད་དུ་རྣམ་པར་གནས་པ་ཡིན་ནོ་ཞེས་བྱ་བར་དགོངས་པའོ། །བརྟན་པ་ནི་མི་གཡོ་བའོ། །མི་སླུ་བ་ཅན་ནི་རྨི་ལམ་དུ་དམིགས་པ་རྣམས་སད་པར་རྗེས་སུ་འཇུག་པ་མེད་པའི་ཕྱིར་རོ། །རྨི་ལམ་མི་བདེན་ནོ་སྙམ་པའི་རྟོག་པ་ཅི་ལྟར་དོན་མེད་པ་ཡིན་ཏེ། ཡུལ་མེད་པ་ཉིད་དུ་ཅི་ལྟར་འགྱུར་ཞེས་བྱ་བའི་ཐ་
ཚིག་གོ །དེ་ལྟར་སྟོན་པ་ནི་འདི་ལྟར་ཞེས་བྱ་བའོ། །མོད་ལ་ཞེས་བྱ་བས་ནི་ཁྲུས་བྱས་པར་སྣང་བ་རྒྱུན་གྱིས་རྗེས་སུ་འཇུག་པ་མེད་པར་བརྗོད་དོ། །དེས་ན་ཞེས་བྱ་བ་ནི་ཁྲུས་མ་བྱས་པར་སྣང་བའི་རྗེས་ཐོགས་སུའོ། །དེ་ལྟ་ཉིད་དུ་མི་སླུ་བའི་ཕྱིར་ཞེས་བྱ་བ་ནི་ཁྲུས་མ་བྱས་སྣང་བ་རྒྱུན་དུ་འཇུག་པའི་ཕྱིར་རོ། །དེས་ནི་མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །དོན་ནི་འདི་ཡང་སད་པ་ལ་མཚུངས་སོ་ཞེས་བྱ་བ་ཡིན་ནོ། །སད་པ་ན་མཐོང་བའི་འདོད་པ་ལ་ཉེ་བར་སྤྱོད་པ་ནི་རྨི་ལམ་མཐོང་བ་ན་མོད་ལ་ལྡོག་པ་ཡིན་ནོ། །ལྡོག་པ་དེ་ལ་ནི་སླུ་བ་ཡང་མེད་དོ། །ཅིའི་ཕྱིར་ཞེ་ན། །སྔར་ཡང་སྟེ་དུས་ཕྱིས་རྒྱུན་གྱིས་རྨི་ལམ་དུ་ལྡོག་པ་དེ་ཡང་བཟློག་པའི་ཤེས་པའི་བདག་ཉིད་དེ་ནི་མཐོང་ཕྱིར་རོ། །དེ་རིགས་ཀྱི་ཕྱིར་རོ་དེས་ན་སད་པ་ན་མཐོང་བའི་ཆགས་པའི་གནས་སྐབས་ཀྱང་ཕྱིན་ཅི་ལོག་དུ་འགྱུར་རོ་སྙམ་དུ་དགོངས་པའོ། །གལ་ཏེ་དེ་ལྟ་ན་ཡང་འདི་ནི་སད་པའི་གནས་སྐབས་ཡིན་ལ། དེ་ནི་རྨི་ལམ་གྱི་གནས་སྐབས་ཡིན་པའི་ཕྱིར། ཁྱད་པར་ཤིན་ཏུ་ཆེའོ་སྙམ་ན། རྨི་ལམ་ཅིག་ཤོས་ཞེས་གསུངས་སོ། །ཅི་ལྟར་གྲུབ་པ་ཡོད་པ་མ་ཡིན་ཏེ། གང་གི་ཕྱིར་སླུ་བ་ལས་ནི་རྨི་ལམ་དུ་རྣམ་པར་གཞག་པ་གྲུབ་པ་ཡིན་ནོ་སྙམ་ན། སླུ་བ་དེ་ཉིད་ཁྱེད་ཀྱིས་རྨི་ལམ་ཡིན་པ་ཉིད་ལས་བསྒྲུབ་པར་བྱ་བ་མ་ཡིན་ནམ། རྨི་ལམ་ཡང་སླུ་བ་ལས་ཡིན་ཏེ། དེ་ལྟ་ཡིན་དང༌། རྨི་ལམ་གྱིས་བསྒྲུབ་པར་བྱ་བ་ཡིན་པའི་ཕྱིར། སླུ་བ་ལས་རྨི་ལམ་ཉིད་དུ་གྲུབ་ན། ཕན་ཚུན་བརྟེན་པ་ཡིན་ནོ། །དེས་ན་གྲུབ་པ་ཡོད་པ་མ་ཡིན་ནོ། །ཞེས་འབྲེལ་ཏོ། །རྨི་ལམ་གྱི་སླུ་བ་དེ་དང་རྗེས་སུ་མཐུན་པའི་རྒྱུ་ཡོངས་སུ་གྱུར་བ་མེད་པའི་མཚན་ཉིད་ཅན། དེ་ལ་ལྟོས་པ་མེད་པར་གྲུབ་བ་ཅི་འདྲ་བ། དེ་འདྲ་བ་ནི་རྨི་ལམ་ཐོབ་པར་གྱུར་པ་ན་སད་བར་མཐོང་བ་ལ་ཡང་ཡོད་དོ་ཞེས་ནི་དེ་མ་ཐག་ཁོ་ནར་བསྟན་པ་ཡིན་ནོ། །དེས་ན་རྨི་ལམ་དང་རྨི་ལམ་མ་ཡིན་པ་གཉིས་ཁྱད་པར་མེད་དོ། །རྣམ་པ་གཞན་ཡང་བརྗོད་པ་ནི་གཞན་ཡང་ཞེས་བྱ་བའོ། །འདི་ནི་མེད་ཅེས་བྱ་བའི་རྣམ་པར་རྟོག་པ་ལས་ཤེས་པ་གཞན་གྱིས་ནི་རྨི་ལམ་དང་རྨི་ལམ་མ་ཡིན་པ་དག་རྟོགས་པར་འགྱུར་པ་མ་ཡིན་གྱི། འོན་ཀྱང་རྣམ་པར་རྟོག་པ་ཉིད་ཀྱིས་ཡིན་ནོ་འདི་ནི་མངོན་སུམ་གྱི་བྱེད་པའི་རྗེས་སུ་འབྲངས་པ་ཡང་མ་ཡིན་ཏེ། །མངོན་སུམ་ནི་མདུན་ན་གསལ་བའི་ཡོད་པའི་རང་བཞིན་དུ་གསལ་བར་བྱེད་ཀྱི་མེད་པའི་རང་བཞིན་དུ་ནི་མ་ཡིན་ནོ། །དེས་ན་མེད་པའི་རང་བཞིན་གྱི་རྗེས་སུ་བྱེད་པའི་རྣམ་པར་རྟོག་པ་ནི་ཡིད་
བརྟེན་པའི་ཡུལ་མ་ཡིན་ནོ། །རྗེས་སུ་དཔག་པ་ཡང་མ་ཡིན་ཏེ་རྟགས་ཀྱི་སྟོབས་ཀྱིས་སྐྱེད་པའི་ཕྱིར་རོ། །རྟགས་ཀྱི་ཁྱད་པར་འགའ་ཡང་མེད་པ་དེ་དང་འབྲེལ་བ་མ་གྲུབ་པའི་ཕྱིར་རོ། །འདི་གཉིས་ལས་གཞན་དངོས་པོ་མེད་པ་ཅན་ནམ། ཐེ་ཚོམ་གྱི་དངོས་པོ་ཅན་གྱི་རྣམ་པར་རྟོག་པ་ཡང་དོན་གྱི་དེ་ཁོ་ན་རྣམ་པར་འཇོག་པའི་རྒྱུ་མ་ཡིན་ནོ། །དེས་ན་རྗེས་སུ་འཛིན་པ་མེད་པའི་ཕྱིར་ན་རང་གི་རྒྱུད་འདི་ནི་རྟོགས་པ་ཙམ་ཡིན་ནོ། །འདིས་བསྒྲུབ་པའམ་བཀག་པའི་དོན་ལ་ནི་གུས་པ་ཡང་མེད་དེ། དེས་ན་དངོས་པོ་ལ་གནོད་པར་བྱེད་པ་བརྗོད་ཟིན་པའི་ཕྱིར་ན། ཡུལ་མེད་པ་ཉིད་དུ་གནས་པ་ཡིན་ནོ་ཞེས་གསུངས་པ་ནི་རྟོགས་པ་ཙམ་དུ་ཟད་དེ་དོན་ཡོད་པ་ནི་མ་ཡིན་ནོ། །དེ་ཉིད་ཀྱི་ཕྱིར་ཐུན་མོང་པའི་མཚན་ཉིད་ཡིན་ནོ། །གཞན་དང་ཐུན་མོང་བའི་རང་བཞིན་རིག་པར་བྱེད་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལ་འདི་སྙམ་དུ། ཅི་རྟོགས་པ་འདི་གཅིག་པུ་དེ་ལྟར་འགྱུར་བ་ཡིན་ནམ། ཡུལ་མེད་པ་སྲིད་པར་ཡང་ཅི་ལྟར་འགྱུར་སྙམ་དུ་སེམས་ན། རྟོགས་པ་འདི་དག་ནི་ཞེས་གསུངས་ཏེ། བརྟན་པ་དང་དབང་ཕྱུག་ལ་སོགས་པའི་རྣམ་པར་རྟོག་པ་ཡང་ཞེས་བྱ་བའི་དོན་ཏོ། །ཡུལ་མེད་པའི་ཕྱིར་ན། སྔོན་གལ་ཏེ་སྔོན་གྱི་འདུ་བྱེད་པའི་རྗེས་སུ་འཇུག་པ་ཡང་མ་ཡིན་ན་ནི་དེའི་ཚེ་མི་འགྱུར་བ་ཁོ་ནའོ་སྙམ་དུ་དགོངས་པའོ། །ཁྱད་པར་གང་གིས་ཤེ་ན་ཞེས་བྱ་བའི་འདྲི་བའི་དོན་ནི་འདི་ཡིན་ཏེ། ཡུལ་མེད་པ་དང་བག་ཆགས་ཉེ་བ་ནི་ཐམས་ཅད་ལ་ཐུན་མོང་བ་ཡིན་ནོ། །དེས་ན་འདི་ནི་མེད་དོ་སྙམ་པའི་རྣམ་པར་རྟོག་པ་གཞི་ངེས་པ་ཅན་དང༌། རེས་འགའ་བར་ནི་ཅི་ལྟར་འགྱུར་ཞེས་བྱ་བའོ། །ལེན་དུ་དེ་ལ་སེམས་གཏད་པས་ཞེས་བྱ་སྟེ། རྨི་ལམ་དུ་མཐོང་བའི་དོན་བདེན་པ་དང་མི་བདེན་པ་ཉིད་དུ་སེམས་གཏད་པའི་རྟོགས་པ་པོའོ། །འདིས་ནི་གང་གི་གང་ལ་སེམས་མ་གཏད་པ་དེའི་ཚེ་དེ་ལ་བསྒྲུབ་པའི་དང་དགག་པའི་རྣམ་པར་རྟོག་པར་མི་འགྱུར་རོ་ཞེས་བསྟན་པ་ཡིན་ནོ། །བདག་ཉིད་གཉིད་ཀྱིས་ཉམས་པར་བསམ་པས་ནི་རྨི་ལམ་དུ་མཐོང་བ་མ་དམིགས་ཀྱང་མེད་པར་ངེས་པ་མ་ཡིན་པའི་ཕྱིར་ཁྱད་པར་དུ་བྱེད་པ་ནི་རྟོགས་པ་པོས་སད་པའི་བདག་ཉིད་དུ་མངོན་པར་རློམ་པ་ཅན་གྱིས་རྨི་ལམ་དུ་མཐོང་བ་གང་ཡིན་པ་དམིགས་པ་དེ་མེད་པའི་ཁྱད་པར་གྱིས་ངེས་པའི་དུས་དང་རྣམ་པ་ཅན་གྱི་རྟོགས་པར་འགྱུར་རོ། །ཉམས་པའི་ལུས་ནི་རྨི་ལམ་དུ་སྐྱེས་པའི་ལུས་སོ། །དེ་དོར་བས་སད་པར་མངོན་པར་རློམ་པ་ཡིན་ནོ། །དེ་ཡང་ཅི་ལྟར་སད་པར་མངོན་པར་རློམ་པ་ཉིད་ཡིན་གྱི་སད་པ་ཉིད་
མ་ཡིན་སྙམ་ན། །འདི་ཡང་ཞེས་གསུངས་ཏེ། བདག་སད་དོ་སྙམ་དུ་ཤེས་པ་ཡང་དོ། །དེ་ལྟར་རྟོགས་པའི་ཕྱིར་རོ། །བླུན་པོ་ཉིད་དེ་ཞེས་བྱ་བ་ནི་ཤེས་རབ་དང་བྲལ་བའོ། །དེའི་ཞེས་བྱ་བ་ནི་རྨི་ལམ་དུ་གནས་པ་དེས་སོ། །དེ་དག་རྣམས་ཞེས་བྱ་བ་ནི་སད་པ་ན་དམིགས་པ་རྣམས་སོ། །ཅིའི་ཕྱིར་ཞེ་ན། སད་པ་ན་དམིགས་པ་དེ་ལ། རྨི་ལམ་ན་གནས་པ་དེ་དག་དང་འབྲེལ་བའི་འགྲོ་བ་ལ་སོགས་པའི་གེགས་མ་ཡིན་པ་སྟེ། བར་ཆོད་མ་ཡིན་པར་གྲུབ་པའི་ཕྱིར་རོ་ཞེས་བྱ་བའི་དོན་ཏོ། །སད་པ་ན་དམིགས་པའི་ར་བ་ལ་སོགས་པའི་གེགས་ཡོད་པ་མ་ཡིན་པའི་ཕྱིར་མེད་པའི་སྒྲུབ་པར་བྱེད་པ་གཞན་གྱིས་ཅི་བྱ་སྙམ་དུ་དགོངས་པའོ། །འགྲོ་བ་ལ་སོགས་པའི་ཞེས་བྱ་བ་ནི་ཕྱེད་ཕྱི་མའི་རྣམ་པར་འགྲེལ་པའོ། །བྱ་བའི་སྒོ་ནས་ཞེས་བྱ་བ་ནི་ཕྱེད་སྔ་མ་རྣམ་པར་འགྲེལ་པའོ། །རྟོགས་པས་བསྒྲུབ་པར་བྱ་བ་ཞེས་བྱ་བ་ནི་མི་བདེན་པ་ཉིད་ཀྱིས་སོ། །མི་བདེན་པ་ཉིད་དུ་ཞེས་བྱ་བ་ནི་ཉེ་བར་མཚོན་པའོ། །བདེན་པ་ཉིད་དུ་ཡང་ངོ༌། །དེ་ལྟར་རྣམ་པ་གཞན་གྱི་སྒོ་ནས་རྨི་ལམ་ལ་མི་བདེན་པ་ཉིད་ཡོད་པ་མ་ཡིན་ནོ་ཞེས་བསྟན་ནས། རང་གིས་བརྗོད་པའི་རྣམ་པས་མི་བདེན་པ་ཉིད་ཡིན་ནོ་ཞེས་བྱ་བར་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །མོད་ལ་འཇིག་པ་ནི་རྨི་ལམ་གྱི་གནས་སྐབས་ཉིད་དུ་སྟེ། བག་ཆགས་བརྟན་པ་མེད་པའི་ཕྱིར་རོ། །དེས་ན་སད་པའི་གནས་སྐབས་ཉིད་དུ་རྗེས་སུ་འབྲེལ་པ་མེད་པས་དོན་བྱས་ཟིན་པ་མ་ཡིན་ནོ། །དེ་ལྟ་མ་ཡིན་ན་ཐ་དད་པའི་ཐ་སྙད་མེད་པར་འགྱུར་རོ་སྙམ་དུ་དགོངས་པའོ། །དེ་ཙམ་གྱིས་ཞེས་བྱ་བ་ནི་འཇིག་པ་ཙམ་གྱིས་སོ། །དེའི་ཚེ་ཡང་ཞེས་བྱ་བ་ནི་སྣང་བའི་དུས་སུ་ཡང་ངོ༌། །གང་གི་ཕྱིར་དེ་ལྟར་རྨི་ལམ་མི་བདེན་པ་ཉིད་དུ་མ་ཡིན་པ་དེའི་ཕྱིར་ཞེས་བྱ་བར་སྦྱར་རོ། །ཡང་ན་ནི་ཞེས་བྱ་བ་ནི་བར་མདོའི་སྲིད་པ་མེད་པ་ལ་ལྟོས་ནས་མཇུག་སྡུད་པའོ། །དེས་ན་ཤེས་པ་ནི་འབྱུང་བ་ཆེན་པོ་ཙམ་ལས་སྐྱེས་པ་མ་ཡིན་ནོ་ཞེས་བྱ་བ་ནི་སྐབས་ཀྱི་དོན་ཏོ། །རྣམ་པ་གཞན་གྱི་སྒོ་ནས་ཀྱང༌། ལུས་དང་སེམས་ཐ་མི་དད་པ་སུན་དབྱུང་པའི་དོན་དུ། གཞན་ཡང་ཞེས་གསུངས་སོ། །རྡུལ་ཕྲ་རབ་སོ་སོར་རིག་པར་ཐལ་ལོ་ཞེས་བྱ་བ་ནི་གཅིག་ལ་རྡུལ་ཕྲ་རབ་ཀྱི་གྲངས་ཙམ་གྱི་སེམས་ཡོད་པར་འགྱུར་རོ་ཞེས་བྱ་བའི་དོན་ཏོ། །དེ་ལྟར་ཞེས་བྱ་བའི་རིག་པའི་རང་བཞིན་དུའོ། །དམིགས་པ་ཡིན་ན་ཞེས་བྱ་བ་ནི་གཏན་
ཚིགས་ཀྱི་ཚིག་སྟེ། གང་གི་ཕྱིར་དམིགས་པ་ཡིན་ཞེས་བྱ་བའི་དོན་ཏོ། །རྡུལ་ཕྲ་རབ་རྣམས་ནི་དམིགས་པར་བྱ་བ་མ་ཡིན་པས་ན། །དེ་དག་ནི་རིག་པའི་རང་བཞིན་མ་ཡིན་ནོ། །སྙམ་དུ་དགོངས་པའོ། །དེ་ལྟ་ན་ཡང་ཞེས་བྱ་བ་ནི་རྡུལ་ཕྲ་རབ་དམིགས་པར་འགྱུར་རོ་ཞེས་བྱ་བ་དང་འབྲེལ་ཏོ། །ཅིའི་ཕྱིར་ཞེ་ན། དེ་རྡུལ་ཕྲ་རབ་དག་ལ་གནས་པའི་ཕྱིར་ཏེ་འདུ་བའི་ཕྱིར་རོ། །དེ་ལྟ་ན་ཡང་དེ་དག་དེ་ལྟར་ཅི་སྟེ་ཐལ་སྙམ་ན། རྡུལ་ཕྲ་རབ་ལ་རེག་ལས་ཏེ། །རྒྱུའི་དངོས་པོ་ཉིད་དུ་བརྟེན་པས་ཏེ་དེའི་ཕྱིར་རོ། །གཏན་ཚིགས་འདི་གཉིས་ཀྱིས་ནི་རྡུལ་ཕྲ་རབ་རྣམས་འདུ་བ་ཅན་གྱི་རྒྱུར་བརྗོད་པ་ཡིན་ནོ། །དེས་ན་དེ་དག་རིག་པར་བྱེད་པ་མ་ཡིན་ན། །ཡན་ལག་ཅན་དེ་རིག་པ་ཡིན་པར་ག་ལ་འགྱུར། །འདུ་བ་ཅན་གྱི་རྒྱུའི་ཡོན་ཏན་ནི་འབྲས་བུའི་རྫས་ཀྱི་ཡོན་ཏན་རྩོམ་པར་བྱེད་པ་ཡིན་པའི་ཕྱིར་རོ། །སྐུད་པ་དཀར་པོ་ལ་འདུས་པའི་སྣམ་བུ་ནི་དམར་པོར་རིགས་པ་མ་ཡིན་ནོ། །དེས་ན་ཡན་ལག་ཅན་ཁས་བླངས་ཀྱང་ཐལ་བར་འགྱུར་བ་ནི་བཟློག་པར་དཀའོ། །གནས་པའི་འདུ་བའོ། །འདིས་ནི་རྡུལ་ཕྲ་རབ་རྣམས་རྒྱུ་བ་ཙམ་ཡིན་གྱི། །འདུ་བ་ཅན་གྱི་རྒྱུ་ནི་མ་ཡིན་ནོ་ཞེས་བྱ་བ་བརྗོད་པ་ཡིན་ནོ། །འབྲས་བུ་རྒྱུ་ཙམ་གྱི་རྗེས་སུ་འགྲོ་བ་ཡང་མ་ཡིན་ཏེ། ཐགས་མཁན་དང་སྣམ་བུ་ལ་སོགས་པ་བཞིན་ནོ། །དེས་ན་ཇི་སྐད་བརྗོད་པའི་ཐལ་བ་མེད་དེ། འོན་འདུ་བ་ཅན་གྱི་རྒྱུ་གང་ཡིན་ཞེ་ན། གདོན་མི་ཟ་བར་གཞན་གྱི་ལུགས་ཀྱི་རྗེས་སུ་འཇུག་པ་མ་ཡིན་ནོ་སྙམ་དུ་སེམས་པའོ། །དེ་ལྟ་ཡིན་ན་ཞེས་བྱ་བ་ནི་ལན་ནོ། །གལ་ཏེ་འདི་འདྲ་བ་རྒྱུ་འཇུག་ན་དེའི་ཚེ་རྡུལ་ཕྲ་རབ་རྣམས་ལས་ཡན་ལག་ཅན་གྱི་རྫས་སྐྱེས་སོ་ཞེས་ཅི་ལྟར་རྟོགས་ཏེ། །དེ་དག་ནི་ཤེས་པ་མ་ཡིན་པ་ཉིད་ཀྱི་རང་ལས་ཡན་ལག་ཅན་སྐྱེས་པར་རྟོགས་མི་ནུས་པའི་ཕྱིར་རོ། །ཡན་ལག་ཅན་གྱི་རང་བཞིན་གྱི་རིག་པ་གཞན་དུ་གྱུར་པས་རིག་པར་འགྱུར་ན། དེ་ཡང་མ་ཡིན་ནོ་ཞེས་རང་རིག་པ་ནི་ཞེས་བྱ་བའོ། །ཤེས་པ་ཉིད་ཀྱི་རང་རིག་པ་ལས་མ་འདས་པའི་ཕྱིར་རོ། །རང་གི་ངོ་བོ་རིག་པ་ལས་མ་འདས་པའི་ཕྱིར་རོ། རང་གི་ངོ་བོ་རིག་པའི་དབང་
གིས་རང་གསལ་བར་རྟོགས་པར་འགྱུར་གྱི་གཞན་གྱི་ནི་གཏམ་ཡང་རིག་པ་མ་ཡིན་ནོ། །དེས་ན་ཡན་ལག་ཅན་རིག་པའི་རང་བཞིན་ཡིན་ཡང་རང་ཉིད་རྡུལ་ཕྲ་རབ་དག་ལས་སྐྱེ་བར་རིག་པར་ཇི་ལྟར་ཤེས། འདི་མི་བཟོད་པས་གཞན་འོན་ཏེ། །ཞེས་སྨྲས་སོ།། དེས་ན་རང་རིག་གི་རིག་པའི་ཕྱོགས་ལ་བརྗོད་པ་ནི་ཉེས་པ་མེད་དོ་སྙམ་དུ་བསམས་པའོ། །གྲུབ་པའི་མཐའ་ནི་དེ་ལྟ་ན་ཡང་ཡན་ལག་ཅན་གྱིས་རང་ཉིད་རྡུལ་ཕྲ་རབ་རྣམས་ལས་སྐྱེས་པར་ཤེས་པར་ནུས་ཞེས་བྱ་བའི་སུན་འབྱིན་པ་གཞག་ནས། ཚུལ་ཆུང་ངུས་རང་རིག་པ་ཉིད་དོ་ཞེས་བྱ་བས་བསྒྲུབས་པ་ནི། འོ་ན་ཅི་ལྟར་ཞེས་བྱ་བའོ། །སྔོན་པོ་མྱོང་བ་ལས་སྔོན་པོ་ལྟར། བདེ་བ་ཡང་བདེ་བ་ཉམས་སུ་མྱོང་བ་ལས་ལོགས་སུ་གཞན་དང་ཐུན་མོང་དུ་གྱུར་བ་ནི་འགའ་ཡང་ཡོད་པ་མ་ཡིན་ནོ། །ཁོ་བོ་ཅག་གི་བདེ་བ་ནི་འདི་ཉིད་དེ། སིམ་པར་རིག་པ་ཞེས་བྱ་བ་གང་ཡིན་པའོ་སྙམ་དུ་དགོངས་པའོ། །གཞན་འདོད་པ་ཙམ་སྨྲ་བ་ནི་གཞན་དུ་གྱུར་བ་ཉིད་ཅེས་བྱ་བའོ། །བདེ་བ་དེ་ལྟར་ཏེ། རིག་པ་ཅན་རྣམས་ཀྱི་ལྟར་ན་ནི་བདག་གི་ཡོན་ཏན་ཡིན་པའི་ཕྱིར་ན། དོན་གཅིག་ལ་འདུ་བ་ཅན་གྱི་རྣམ་པར་རིག་པ་ཡིན་ནོ། །ཐུན་མོང་དུ་སུན་འབྱིན་པ་བརྗོད་པ་ནི། གཞན་དུ་འགྱུར་བ་ཉིད་རིག་ན་ནི་ཞེས་བྱ་བའོ། །མ་དམིགས་པའི་ཕྱིར་ན་གཞན་རིག་པ་ནི་མེད་པ་ཉིད་དོ་སྙམ་དུ་དགོངས་པའོ། །འོ་ན་ཅི་ཞིག་རིག་སྙམ་ན། གང་ལ་རིག་པའི་བདེ་བ་དེ་ཉིད་རིག་པ་ཡིན་ནོ། །བདེ་བ་ལ་སོགས་པའམ། སྔོན་པོ་ལ་སོགས་པ་འདི་དག་ནི་བདག་ཉིད་དུ་མ་གྱུར་པ་ཡང་མ་ཡིན་ཏེ། དེས་ན་དེ་ཉིད་རིག་པ་ཉིད་ཡིན་ནོ་ཞེས་བྱ་བ་ནི་རིག་པར་མཐོང་ངོ༌། །གལ་ཏེ་གང་ལ་བྱེད་པ་པོའི་ཆོས། རིག་པའི་བྱེད་པ་རྣམ་པར་གནས་པ་རིག་པར་བྱེད་པ་ནི་རིག་བཞིན་པ་དེ་གཉིས་ལས་གཞན་ཁོ་ན་མ་ཡིན་ནམ་སྙམ་དུ་དོགས་པ་ལ། གཞན་དུ་གྱུར་བ་ཞེས་གསུངས་སོ། །ངེས་པར་བརྟགས་བཞིན་པའི་རིག་པར་བྱེད་པ་ལ་ལྟོས་ནས་གཞན་དུ་གྱུར་པའོ། །རིག་པ་ཡིན་པའི་ཕྱིར་ཞེས་བྱ་བ་ནི་གསལ་བའི་ཕྱིར་རོ། །འདི་སྐད་བརྗོད་པར་འགྱུར་ཏེ།
གལ་ཏེ་དེ་དག་གསལ་བ་ཡིན་ན། དེ་ཙམ་གྱིས་རིག་པར་བྱེད་པའི་ཐ་སྙད་རྫོགས་པའི་ཕྱིར། རིག་པར་བྱེད་པ་གཞན་གྱིས་ཅི་བྱ། རྫ་མ་ལ་རྫ་མཁན་བཞིན་དུ། རིག་པར་བྱེད་པ་ཐ་དད་པའི་བྱེད་པ་ཡང་ཚད་མས་གྲུབ་པ་ནི་མེད་དོ། །དེ་འདྲ་བ་རྟོགས་ན་ནི་རྟོག་པ་མཐར་ཐུག་པར་ཡང་མི་འགྱུར་རོ་ཞེས་བྱ་བའོ། །ལུས་ཉིད་དོ་ཞེ་ན། ཞེས་བྱ་བ་ཚུ་རོལ་མཛེས་པ་པའི་དོགས་པའི་དོན་ནི་འདི་ཡིན་ཏེ། རྫ་མ་ལ་རྫ་མཁན་ལྟར། རིག་པ་ལ་ཡང་ལུས་ཉིད་བྱེད་པར་འཇུག་པར་དམིགས་སོ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་དགག་པའོ། །བདེ་བ་དང་སྔོན་པོ་ལ་སོགས་པ་མ་གཏོགས་པ་ནི་ལུས་ཞེས་བྱ་བ་ཡོད་པ་མ་ཡིན་ལ། བདེ་བ་དང་སྔོན་པོ་ལ་སོགས་པ་དེ་ནི་དམིགས་པར་བྱ་བ་ཉིད་དུ་ངེས་པའི་ཕྱིར། དམིགས་བྱེད་ཉིད་མ་ཡིན་ནོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ཞེས་འབྲེལ་ཏོ། །དེ་ལྟ་ཉིད་ཅེས་བྱ་བ་ནི་དམིགས་པར་བྱེད་པ་ཉིད་དོ། །དབང་པོ་ནི་དམིགས་པར་བྱ་བ་མ་ཡིན་པའི་ཕྱིར་རོ་སྙམ་དུ་བསམས་པའོ། །བོང་བ་ཞེས་བྱ་བ་ནི་ལེན་ནོ། །དེ་ལྟ་ན་ཞེས་བྱ་བ་ནི་དམིགས་བྱེད་ཉིད་དོ། །ཤིན་ཏུ་བསྐལ་པ་ཉིད་ཀྱིས་ན་འཇིག་རྟེན་ཕ་རོལ་ལ་སོགས་པ་ལྟར་མེད་པར་ཁྱད་པར་མེད་པའི་ཕྱིར་རོ། །དེ་ནུས་དངོས་ན་ཞེས་བྱ་བ་ནི་དབང་པོའོ། །མ་རྟོགས་པར་དེ་མ་ཤེས་པར་ནུས་པ་དེ་ཅི་ལྟར་ན། དེ་ལྟར་ཞེས་བྱ་བར་ཡོད་པར་འགྱུར་པ་དེ་མ་ཐག་པའི་ཚིག་ལེའུར་བྱས་པ་རྣམ་པར་འགྲེལ་པ་ནི་མིག་ལ་སོགས་པ་ཞེས་བྱ་བའོ། །དངོས་པོ་ཀུན་གྱི་ནུས་པ་ནི། །འབྲས་བུའི་དོན་གྱིས་གོ་བའི་ཡུལ། །ཞེས་བྱ་བའི་བསམ་པས་སྨྲ་བ་ནི། འབྲས་བུའི་སྒོ་ནས་ཞེས་བྱ་བ་ཡིན་ནོ། །འདིས་ནི་འཇིག་རྟེན་ཕ་རོལ་ལ་སོགས་པ་ལས་ཁྱད་པར་ཡོད་པ་བསམས་པའོ། །ལན་ནི་དེ་དག་གི་འབྲས་བུ་ཞེས་བྱ་བའོ། །མིག་ལ་སོགས་པ་དེ་དག་གིའོ། །གཞན་གྱིས་བདེ་བ་ལ་སོགས་པ་དང་གཟུགས་ལ་སོགས་པ་དམིགས་པའི་ཞེས་སྨྲས་སོ། །དེ་ཡང་ཞེས་བྱ་བ་ནི་ལན་ནོ། །དམིགས་པ་ནི་ཤེས་པ་ཡིན་ལ་དེ་ཡང་ཁྱོད་ཀྱི་ལྟ་བས་ནུས་
པའི་རང་བཞིན་ཁོ་ན་ཡིན་ནོ། །དེས་ན་མ་དམིགས་པ་དེ་ལས་མིག་ལ་སོགས་པ་ཅི་ལྟར་འགྲུབ། གང་གི་ཕྱིར་དེ་ལྟར་མིག་ལ་སོགས་པ་དང༌། དམིགས་པའི་ནུས་པ་ཡང་དམིགས་པ་མ་ཡིན་པ་དེས་ན་ལྷག་མར་གྱུར་བས་གཟུགས་ལ་སོགས་པ་དམིགས་པ་ཡིན་པར་འགྱུར་རོ། །དེ་དག་ཉིད་ལས་རྣམ་པར་ཤེས་པའི་མཚན་ཉིད་ཀྱིས་ནུས་པ་ངེས་པར་འགྱུར་རོ་སྙམ་ན། དེ་དག་ནི་ཞེས་བྱ་བ་གསུངས་སོ། །གང་གིས་དབང་པོ་ཉིད་བདེ་བ་ལ་སོགས་པ་དང་གཟུགས་ལ་སོགས་པ་དག་ལས་ལོགས་ཞིག་ཏུ་རིག་པར་བྱེད་པ་ཉིད་ཡིན་པར་བརྟགས་པ་རྣམ་པར་ཤེས་པའི་ནུས་པ་གང་ལས་དབང་པོ་ངེས་པར་འགྱུར་བ་དེ་དག་ནི་རྣམ་པར་ཤེས་པའི་འབྲས་བུ་མ་ཡིན་ནོ། །འོ་ན་ནི་གང་ལས་དངོས་སུ་མིག་ལ་སོགས་པ་ངེས་པར་འགྱུར་བ་གཟུགས་ལ་སོགས་པ་ཉིད་ནི་མིག་ལ་སོགས་པའི་འབྲས་བུར་འགྱུར་རོ་སྙམ་ནས་མིག་ལ་སོགས་པའི་ཞེས་གསུངས་སོ། །སྔ་ན་ནི་མིག་ལ་སོགས་པའི་བྱེད་པ་ལས་སོ། །གཟུགས་ལ་སོགས་པ་རྣམས་ལས་མེད་པར་ཐལ་བར་འགྱུར་རོ། །དེ་བཞིན་དུ་རྣམ་པར་ཤེས་པའི་འབྲས་བུ་ལ་ཡང་ཐལ་པ་འདི་ཉིད་ཡིན་ནོ། །དེ་ལྟར་ནི་འདོད་པ་མ་ཡིན་ནོ། །གང་གིས་སྔར་མེད་པར་ཐལ་བར་འགྱུར་བ། གཟུགས་ལ་སོགས་པ་ཉིད་ནི་རྣམ་པར་ཤེས་པའི་འབྲས་བུ་མ་ཡིན་གྱི། འོན་ཀྱང་གནས་སྐབས་ཀྱི་ཁྱད་པར་ཡང་ཡིན་ནོ་ཞེས་བྱ་བ་དཔྱོད་པ་ལ་སོགས་པ་དང་ཐུན་མོང་པའི་ལན། རིག་པ་གཞན་གང་ཡིན་པར་འགྱུར་ཞེས་བྱ་བ་ལ་སོགས་པ་གནོད་པར་བྱེད་པའི་དོགས་པ་བསུ་བ་ནི། དམིགས་པའི་གནས་སྐབས་ཞེས་བྱ་བའོ། །ལན་ནི་རྡུལ་ཕྲ་རབ་སོ་སོར་ཞེས་བྱ་བའོ། །ཕྱིས་དོན་ལ་གནས་པ་ལ་ནི། ཡན་ལག་ཅན་གཞན་མི་འཐད་པ་རྡུལ་ཕྲ་རབ་རྣམས་ཉིད་ཡོད་པ་ཡིན་པའི་ཕྱིར་ན། མིག་ལ་སོགས་པའི་འབྲས་བུ་དམིགས་པའི་གནས་སྐབས་ནི་རྡུལ་ཕྲ་རབ་དག་ལས་ཐ་མི་དད་པ་ཡིན་པའི་ཕྱིར། རྡུལ་ཕྲ་རབ་མཐའ་དག་གསལ་བར་འགྱུར་རོ། །དེས་ན་རང་རིག་གི་རང་བཞིན་དུ་རྡུལ་ཕྲ་རབ་སོ་སོར་དམིགས་པར་ཐལ་ལོ། །དེ་ལྟར་ཡང་མ་ཡིན་ཏེ། དེའི་ཕྱིར་ན་རིག་པར་བྱེད་པའི་ཐ་དད་པའི་འབྲས་བུ་དམིགས་པའི་གནས་སྐབས་ནི་ཡོད་པ་མ་ཡིན་ནོ་
སྙམ་དུ་དགོངས་པའོ། །འདིའི་ཕྱིར་ཡང་འབྲས་བུ་མ་ཡིན་ནོ་ཞེས་བརྗོད་པ་ནི། ཁྱད་པར་མེད་པའོ་ནི་ཞེས་བྱ་བའོ། །སྔ་མ་ཁོ་ན་བཞིན་དུ་གནས་པའི་ཡུལ་ལ་ནི་གནས་སྐབས་ཀྱི་ཁྱད་པར་ཞེས་བྱ་བ་ཡོད་པ་མ་ཡིན་ཏེ། སྐྱེ་བ་དང་འཇིག་པ་མེད་པ་ལ་ནི་ཁྱད་པར་ཡོད་པ་མ་ཡིན་ནོ་ཞེས་བྱ་བ་ལུགས་ཡིན་པའི་ཕྱིར་རོ། །ཁྱད་པར་སྲིད་པར་ནི་ཁས་བླང་བར་བྱར་ཡང་མི་རིགས་སོ་ཞེས་བརྗོད་པ་ནི། ཁྱད་པར་ཡོད་ན་ནི་རང་ཉིད་རིག་པར་ཐལ་ལོ་ཞེས་བྱ་བའོ། །སྔར་གྱི་བེམས་པོའི་རང་བཞིན་སྤངས་པའི་ཕྱིར་གསལ་བར་སྐྱེས་པ་ཡུལ་ཡིན་པས་ན་རང་རིག་པར་སྐྱེས་པ་ཡིན་ནོ་ཤེས་བྱ་བ་ཉིད་བརྗོད་པར་གྱུར་ལ། དེ་ལྟ་ན་ཡང་དེ་ཉིད་ཤེས་པ་ཡིན་གྱི་དེ་ལས་ཤེས་པ་གཞན་རྗེས་སུ་དཔོག་པ་ནི་མ་ཡིན་ནོ། །དེ་ལྟར་ཁྱད་པར་གཞན་མ་ཡིན་པའི་ཕྱོགས་ལ་ཉེས་པ་བརྗོད་ནས་ཐ་དད་པའི་ཕྱོགས་ལ་ཉེས་པ་བརྗོད་པའི་དོན་དུ་གཞན་གྱི་དོགས་པ་བསུ་བར་བྱེད་པ་ནི་ནུས་པ་དང་ཞེས་བྱ་བའོ། །རྣམ་པར་ཤེས་པའི་ནུས་པ་དང་ལྷན་ཅིག་སྐྱེས་པའོ། །ཚུ་རོལ་མཛེས་པ་པོའི་ལྟར་ན་ནི་ནུས་པའི་སྒྲ་གཙོ་བོར་ཡིན་ལ། ལུགས་གཞན་གྱི་ལྟར་ན་ནི་ཤེས་པ་དང་ལྷན་ཅིག་པ་ལ་རྟོགས་པར་བྱ་བའོ། །ཤེས་པ་དང་ཡུལ་ད་ལྟར་སྐྱེས་པ་ཤེས་བྱ་བ་ཉིད་ཁྱད་པར་ཡིན་ནོ། །དེས་ན་ཡུལ་རང་རིག་པར་ཐལ་བ་མ་ཡིན་ནོ་སྙམ་དུ་བསམས་པའོ། །དེ་ལྟ་ན་ནི་འོ་ན་ཤེས་པ་སྐྱེ་བ་དང་ལྷན་ཅིག་པའི་ཡུལ་གྱི་གནས་སྐབས་ཀྱི་ཁྱད་པར་ཐ་དད་པ་ཤེས་པ་གྲུབ་པའི་སྒྲུབ་བྱེད་ཡིན་ན། ཤེས་པ་མ་གྲུབ་པར་ནི་ཤེས་པ་སྐྱེ་བ་དང་བཅས་པར་འགྲུབ་པ་མ་ཡིན་ནོ་སྙམ་དུ་བསམས་ནས། དེ་ནི་མི་རིགས་ཏེ་ཞེས་གསུངས་སོ། །དེར་ཞེས་བྱ་བ་ནི་ལན་ཅིག་པ་ཉིད་དུའོ། །མ་གྲུབ་པ་ཞེས་བྱ་བ་ནུས་པ་དང་ལྷན་ཅིག་པ་ཉིད་མ་གྲུབ་ནའོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །རང་རིག་པ་ཉིད་ཅེས་བྱ་བ་ནི་རང་རིག་པ་མ་ཡིན་པའོ། །འདི་ཉིད་བརྟན་པར་བྱེད་པ་སྨྲས་པ་ནི་རྣམ་པར་ཤེས་པ་བདེ་བ་ལ་སོགས་པའོ། །གལ་ཏེ་ཤེས་པ་འདི་འདུ་བའི་སྒྲུབ་པར་བྱེད་པ་ཅན་ནམ། རང་གིས་བྱས་པ་ཡིན་གྲང་དེ་ལ་རང་གིས་བྱས་པ་ཡིན་ན་ནི་ཐུན་མོང་མ་ཡིན་
པ་ཉིད་ཀྱིས་ཐ་དད་པ་མེད་པའི་སྒྲུབ་བྱེད་མ་ཡིན་ནོ། །འཇིག་རྟེན་ནི་བདེ་བ་ཞེའམ་སྡུག་བསྔལ་གྱི་གཟུགས་ཀྱི་སྒྲའི་ཤེས་བ་ཞེས་རྟོགས་པ་ཡིན་ནོ། །ཡང་ན་རྟོགས་པ་འདིར་འགྱུར་མོད། དེ་ལྟ་ན་ཡང་སྐྱེས་བུ་དབྱུག་པ་ཞེས་བྱ་བ་བཞིན་དུ་ཐ་དད་པ་ལ་ཡང་འགྱུར་རོ་སྙམ་ན། འདི་ལ་བཤད་པ་ནི་གཞི་མཐུན་པ་ནི་ཞེས་བྱ་བའོ། །གཙོ་བོ་མ་ཡིན་པ་བཀག་པ་ན་ཅི་ནས་ཀྱང་གཞི་མཐུན་པ་གཙོ་བོ་ཉིད་དུ་འགྱུར་བར་བྱ་བའི་ཕྱིར་རོ། །གཙོ་བོ་དང་བཏགས་པའི་དབྱེ་བ་ལས་གཞན་མེད་ཅེས་བཤད་དོ། །དཔེར་བརྗོད་པ་གཉིས་ནི་ཅི་རིགས་པར་ཡིན་ནོ། །དེ་ལ་གཙོ་བོ་མ་ཡིན་པ་འགོག་པ་ནི། གལ་ཏེ་ཞེས་བྱ་བའོ། །དེ་ནི་ཞེས་བྱ་བ་གཙོ་བོ་མ་ཡིན་ནའོ། །འདིར་ཞེས་བྱ་བ་བདེ་བ་ཤེས་པར་བྱ་བ་འདིར་ནི་ཅིའི་ཕྱིར་མ་གྲུབ་སྙམ་ན། གཟུགས་ལ་སོགས་པའི་རང་བཞིན་ལས་ཞེས་གསུངས་སོ། །འདིས་ནི་གལ་ཏེ་ཡང་འཇིག་རྟེན་ཕལ་ཆེར་གཞི་མཐུན་པའི་ཐ་སྙད་མི་བྱེད་པ་དེ་ལྟ་ན་ཡང་རྣམ་པར་དཔྱོད་པ་དང་ལྡན་པའི་ཐ་སྙད་ཡོད་པ་ཉིད་དེ། རྣམ་པར་དཔྱོད་བ་དང་ལྡན་པའི་འཇིག་རྟེན་ལ་འདུ་བའི་རྒྱུ་མཚན་ཅན་གྱི་རྟོགས་པ་འདི་ནི་ཡོད་པ་མ་ཡིན་པ་ཁོ་ན་སྟེ། །རང་གི་གཞུང་ལུགས་ཙམ་དུ་ཟད་པའི་ཕྱིར་རྩོད་པ་དང་པོ་ཡང་ཐག་བསྲིང་བ་ཡིན་ནོ། །གཞན་གྱི་དཔེ་འདི་ཉིད་ཀྱིས་ཞེས་སྨོས་སོ། །ཁྲེའུ་འབོད་དེ་ཞེས་བྱ་བ་ལ་སོགས་པ་ཉིད་ཀྱིས་སོ། །གང་གཞི་མཐུན་པ་དེ་ནི་ཐ་དད་པའི་རྒྱུ་མཚན་ཉིད་དེ། དཔེར་ན་སྐྱེས་བུ་ཞེས་བྱ་བ་ལ་སོགས་པ་བཞིན་ནོ། །ཨུཏྤལ་སྔོན་པོ་ཞེས་བྱ་བ་ལ་ཡང་འཇུག་པའི་རྒྱུ་མཚན་ཐ་དད་པའི་ཡོད་པ་ཡིན་ནོ་སྙམ་དུ་བསམས་པའོ། །མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །རྗེས་སུ་དཔག་པ་མེད་པའི་ཕྱིར་རོ་ཞེས་བྱ་བ་ནི་ཐུན་མོང་གིས་མ་ངེས་པ་ཉིད་ཀྱིས་ནའོ། །དེ་ཉིད་བརྗོད་པ་ནི་གྲངས་ཅན་པ་རྣམས་ཞེས་བྱ་བའོ། །ལུགས་འདི་ནི་མི་རིགས་ཏེ། སེམས་པ་དང་ལྡན་པས་སེམས་པ་ཅན་དུ་རིགས་བའི་ཕྱིར་རོ་ཞེ་ན། རེ་ཞིག་འདི་འདྲ་བའི་དག་གིས་ཐ་སྙད་ལ་ཐ་དད་པ་ལ་མི་ལྟོས་པའི་གཞི་མཐུན་པ་ནི་མཐོང་བ་ཡིན་ནོ་ཞེས་བྱ་བ་ཉིད་དུ་སྐབས་སུ་བབ་པ་ཡིན་ནོ། །འོན་ཏེ་འཐད་པའི་
ཁྱད་པར་ཅན་གཞི་མཐུན་པའི་རྒྱུ་ཡིན་ན། འོ་ན་ནི་ཅི་སྲིད་ཐ་དད་པའི་ཤེས་པ་མ་གྲུབ་པ་དེ་སྲིད་དུ་འཐད་པ་ཉིད་མ་ཡིན་ལ། །ཅི་སྲིད་འཐད་པ་ཉིད་མ་ཡིན་པ་དེ་སྲིད་དུ་ཡང་ཐ་དད་པའི་ཤེས་པ་མ་གྲུབ་པའི་ཕྱིར་ཕན་ཚུན་བརྟེན་པས་ན་གཏན་ཚིགས་ཁྱད་པར་མ་གྲུབ་པར་འགྱུར་རོ་སྙམ་དུ་དགོངས་པའོ། །དེའི་ཕྱིར་ཞེས་བྱ་བ་ལ་སོགས་པ་ནི་དེ་ལྟར་རིགས་པ་ནི་དེ་ལྟར་ཁས་བླང་བར་རུང་བ་ཉིད་ཀྱིས་ཁྱད་པར་བརྗོད་པ་ཡིན་ནོ། །དཔེར་ན་ཟླ་བ་སྔོན་པོ་ཉིད་དུ་རིག་པའི་སྔོན་པོའི་བཞིན་ནོ་ཞེས་དཔེ་ནི་ཟླ་བ་ཁོ་ནའོ། །ཕྱོགས་ཀྱི་ཆོས་ཉེ་བར་སྡུད་པ་བརྗོད་པ་ནི། གོམས་ལས་ཞེས་བྱ་བའོ། །དེ་ལྟར་གྱུར་པའི་གཟུགས་ལ་སོགས་པས་ཞེས་བྱ་བ་ནི་གསལ་བཞིན་པའི་གཟུགས་ལ་སོགས་པ་ཉིད་ལ་རིག་པ་གནས་པར་ཤེས་པར་འགྱུར་བ་ཉིད་དོ། །གཟུགས་ལ་སོགས་པ་ལ་ནི་རང་གི་ངོ་བོར་གྱུར་པ་ཉིད་རིག་པ་ཡིན་ནོ་ཞེས་བྱ་བའི་དོན་ཏོ། །དེས་ན་གཟུགས་ལ་སོགས་པ་ནི་རང་གི་ངོ་བོར་གྱུར་པ་ཉིད་རིག་པར་ཁས་བླང་བར་བྱའོ་ཞེས་ཚད་མའི་འབྲས་བུ་དཔག་པར་བྱའོ། །གལ་ཏེ་ཡོངས་སུ་མཐོང་བཞིན་པའི་གཟུགས་ལ་སོགས་པ་ཉིད་རང་རིག་པའི་རང་བཞིན་ཡིན་ན། འོ་ན་ནི་དེའི་གཞན་དེ་ལྟར་མི་རིགས་ཏེ། རིག་པ་དེའི་རང་བཞིན་ཡིན་པས་ན་དེར་ཞུགས་པའི་ཕྱིར་རོ། །རྣམ་པ་མེད་པའི་སེམས་གཞན་ཉིད་ཡིན་ན་ནི་མ་ལོང་བ་བཞིན་དུ་ཁྱད་པར་ཐམས་ཅད་ལ་རེག་པར་འགྱུར་རོ་སྙམ་ན། གཟུགས་སོགས་ཞེས་གསུངས་སོ། །འཕོ་བ་ནི་འདྲེ་བ་སྟེ། དེའི་བདག་ཉིད་ཀྱི་རྗེས་སུ་འཇུག་པ་ཞེས་བྱ་བའི་དོན་ཏོ། །འདི་ག་ལས་ཤེ་ན། གོམས་པ་ལས་ཞེས་གསུངས་སོ། །ཡོངས་སུ་མཐོང་བཞིན་པའི་གཟུགས་ལ་སོགས་པའི་རང་རིག་པ་ཡང་སྔོན་གྱི་བག་ཆགས་ཀྱི་སྟོབས་ཉིད་ལས་ཡིན་པས་གཞན་ལ་ཡང་དེ་འགྱུར་བ་གང་གིས་ཟློག་པར་བྱེད་པ་རྣམ་པ་མེད་པ་གཞན་གྱིས་ཡོད་ཀྱང་དངོས་པོ་ལ་ཅི་ཞིག་བྱུང་ན། གང་གིས་དེ་གསལ་བར་འགྱུར་དཔེར་ན་དངོས་པོ་མེད་པ་ཡོད་ཀྱང་དངོས་པོ་ལ་ཅི་ཡང་མ་ཡིན་པ་བཞིན་ནོ། །འདི་ཡང༌། གལ་ཏེ་སྡོ་སོགས་གསལ་བ་ནི། །ཁྱེད་ལ་རྣམས་གཞན་གྱིས་ཅི་བྱ། འོན་ཏེ་སྡོ་སོགས་མི་གསལ་ན། ཁྱེད་ལ་རྣམས་གཞན་གྱིས་ཅི་བྱ། །ཞེས་དཔྱོད་པར་འགྱུར་རོ། །འོ་ན་ཕྱིའི་དོན་ལ་གནས་ནས་དཔྱོད་པའི་སྐབས་ཡིན་པའི་ཕྱིར་ན། ཅི་ལྟར་གོམས་པ་ལས་
ཞེས་བརྗོད་ཅེ་ན། བག་ཆགས་ཀྱི་ནུས་པ་ནི་རྣམ་པ་ཙམ་ལ་ཡིན་ཏེ། དོན་མེད་པའི་ཤེས་པ་ལ་ཡང་མཐོང་བའི་ཕྱིར་རོ། །གང་དུ་དོན་ཡོང་པར་ལྷག་པར་མོས་པ་དེར་ནི་ཚོགས་པ་ཁོངས་སུ་གཏོགས་པའི་དོན་ཡང་སྐྱེད་བྱེད་དང༌། རང་གི་རྣམ་པར་གཏོད་པར་བྱེད་པ་ཡིན་ནོ། །ཞེས་རྣམ་པར་གཞག་གོ །བག་ཆགས་ཀྱིས་ནུས་པ་ནི་དེ་ཉིད་ཀྱི་ཕྱིར་ཤེས་པ་ལ། རིགས་ཀྱི་དབྱེ་བ་ཚད་མ་དང༌། ཅིག་ཤོས་ཀྱིས་བྱས་ཞེས་བྱ་བ་ནི་མངོན་པའི་ད་རྒྱལ་གྱིས་བྱས་པ་ཡིན་ནོ་སྙམ་དུ་དགོངས་པའོ། །དེའི་ཕྱིར་དེ་ཁོ་ནར་ནི་སྣ་ཚོགས་ཀྱི་རྣམ་པར་ནི་གོམས་པ་ཁོ་ན་ལས་ཡིན་པའི་ཕྱིར་ན། གོམས་པ་དེ་ཉིད་རབ་ཏུ་སོན་པ་ན་སྐབས་ཀྱི་ཐམས་ཅད་མཁྱེན་པའི་འབྲས་བུའི་མཐར་ཐུག་པ་སྒྲུབ་པར་བྱེད་དོ་ཞེས་སྟོན་པ་ནི་རྣམ་པར་ཤེས་པ་དམིགས་པ་མ་གཏོགས་པར་ནི་ཞེས་བྱ་བའོ། །དམིགས་པ་ནི་གཞན་གྱི་མི་འཐད་པས་ན་རྣམ་པའི་མིང་ཅན་རང་གི་ཆ་ཉིད་ཡིན་ཏེ། གང་ལ་ཡུལ་གྱི་ཐ་སྙད་དུ་བྱེད་པའོ། །དེ་མ་གཏོགས་པར་ནི་དེ་དོར་ནས་སོ། །གཞན་དང་ཞེས་བྱ་བ་ནི་རྣམ་པ་མེད་པ་བརྟག་པ། ཐ་དད་པ་དང་ངོ་འདྲེ་བར་འགྱུར་བ་ནི་དེའི་བདག་ཉིད་ཀྱིས་འདུ་བ་སྟེ། དེ་ལྟར་ན་མ་ཡིན་པའོ། །དོན་འདི་ཡིན་ཏེ། གང་གིས་ཤེས་པ་ཞེས་བྱིས་པ་ཡན་ཆད་ལ་གྲགས་པའི་དངོས་པོ་དེ་ནི་ཡོངས་སུ་གསལ་བཞིན་པ་རྣམ་པའི་ཚོགས་ལས་ཐ་དད་པ་མ་ཡིན་ནོ་ཞེས་བྱ་བའོ། །དེ་ལྟར་སྤྱིའི་ཚུལ་བརྗོད་ནས་ཁྱད་པར་ལ་སྦྱོར་བ་ནི་དེས་ན་བདེ་བ་ལ་དང་ཞེས་བྱ་བ་ལ་སོགས་པ་སྟེ། ནང་དུ་ཡོངས་སུ་གསལ་བའི་ཕྱིར། །ཐོག་མར་བརྗོད་དོ། །གོམས་པ་ལས་བདེ་བ་ལ་སོགས་པས་རང་བཞིན་དུ་གྱུར་བའི་ཤེས་པ་ཉིད་གཟུགས་ལ་སོགས་པའི་རང་བཞིན་དུ་འགྱུར་བ་ཡིན་ནོ། །གཟུགས་ལ་སོགས་པ་དང་འདྲེས་པར་གྱུར་པ་ཞེས་བྱ་བ་ནི་གོམས་པ་དེ་ཉིད་ལས་གཟུགས་ལ་སོགས་པ་ཐམས་ཅད་ཀྱི་བདག་ཏུ་གྱུར་པ་ཡང༌། གཞན་གྱི་བདེ་བ་ལ་སོགས་པའི་བདག་ཉིད་དུ་འགྱུར་ཏེ། རྣམ་པ་ཅི་ཞིག་ལྟར་དེའི་རྣམ་པའི་རྗེས་སུ་བྱེད་པར་འགྱུར་རོ་ཞེས་བྱ་བའི་
དོན་ཏོ། །འདི་ལྟར་ཕྲ་དང་རིགས་པ་དག་གིས་རགས་པ་རིམ་གྱིས་བརྗོད་པ་ཡིན་ནོ། །གང་གི་ཚེ་དེ་ལྟར་འགྱུར་སྙམ་ན། གོམས་པ་ལས་ཞེས་བྱ་བ་ནས། རྟོགས་པ་ནས་ཞེས་བྱ་བའི་མཐར་ཐུག་པ་བརྗོད་དོ། །གཞན་གྱི་བདེ་བ་ལ་སོགས་པའི་རྣམ་པ་མཐའ་དག་རྟོགས་པ་ནི་ཆ་འགའ་ཞིག་གིས་དེའི་རང་བཞིན་གྱི་རྗེས་སུ་བྱེད་པར་རྟོགས་པར་བྱའོ། །འདིར་ཡང་དེ་མ་ཡིན་པ་ལས་ལྡོག་པས་བརྟགས་པའི་ཤེས་པ་ཅིག་ཉིད་ཉེ་བར་བཟུང་ནས། ཤེས་པ་དེ་ཉིད་འདི་ལྟ་འདི་ལྟར་སྐྱེས་སོ་ཞེས་བརྗོད་པ་ཡིན་ཏེ། དཔེར་ན་ཟན་དེ་ཉིད་ཚད་དུ་ཟོས་ན་འཚོ་བར་བྱད་ལ། ཚད་ལས་འདས་པར་ཟོས་ན་འཆི་བར་བྱེད་དོ་ཞེས་བརྗོད་པ་ལ་སོགས་པ་བཞིན་ནོ། །འོ་ན་ཅི་ལྟར་ཞེས་བྱ་བ་ནི་གལ་ཏེ་གཟུགས་ལ་སོགས་པ་ཤེས་པའི་རང་བཞིན་ཡིན་ན་ཞེས་བྱ་བའི་དོན་ཏོ། །བདག་ཉིད་ཀྱི་ཤེས་པ་ནི་ནང་དུ་ཡོངས་སུ་གསལ་བ་ཡིན་པས་ན། ཅི་ལྟར་ཕྱི་རོལ་ན་གནས་པ་བཞིན་དུ་མིན་སྙམ་ན། དེ་ནི་མ་ཡིན་ཏེ་ཞེས་གསུངས་སོ། །ལོགས་ཤིག་ཏུ་གནས་པ་དང༌། གཞན་འདི་ནིའོ། །རྟེན་ལ་ལྟོས་པ་ནི་ལུས་ལ་ལྟོས་པའོ། །གལ་ཏེ་གཞན་རིགས་པ་མེད་པར་ཇི་ལྟར་གྲུབ་ན། གང་གིས་རང་གི་ངོ་བོར་རིག་པ་ལ་ལོགས་ཤིག་ཏུ་གནས་པའི་དང་མི་གནས་པ་ཡོད་པ་མ་ཡིན་ནོ་ཞེས་བརྗོད་སྙམ་ན། རང་གི་ངོ་བོ་རིག་པ་ལས་ཞེས་གསུངས་སོ། །གཞན་གྱིས་རིག་ན་ནི་དེ་ལས་ཕྱི་རོལ་དུ་གྱུར་པ་ལོགས་སུ་གནས་པ་བཞིན་དུ་རིག་པར་འགྱུར་ན། དེ་ནི་མི་འཐད་དེ། གང་གི་ཕྱིར་རང་གི་ངོ་བོར་གྱུར་བའི་རྣམ་པ་གང་ཡིན་པ་དེ་ལས་མ་གཏོགས་པར་བདེ་བ་ལ་སོགས་པ་རིག་པའི་རྣམ་པ་གཞན་ནི་ཞེས་བཤད་མ་ཐག་པ་ཡིན་ལ་འཆད་པར་ཡང་འགྱུར་རོ། །རང་གི་ངོ་བོ་རིག་པ་དེས་ན་ཅི་ལྟར་ལོགས་ཤིག་ན་གནས་པ་མེད་པ་དེ་བཞིན་དུ་དེ་ལ་ལྟོས་པ་ལོགས་ཤིག་ཏུ་གནས་པ་མ་ཡིན་པ་ཡང་ཅུང་ཟད་ཡོད་པ་མ་ཡིན་ནོ། །རྣམ་པར་དབྱེ་བ་འདི་མཐོང་བ་ཉིད་མ་ཡིན་ནམ། དེ་ཅི་ལྟར་དེ་སྐད་བརྗོད་སྙམ་ན། ལུས་ཀྱི་རྟེན་ལ་ལྟོས་ནས་ཞེས་བྱ་བ་ལ་སོགས་པ་གསུངས་སོ། །དེ་ལྟར་འདོད་པའི་ཤེས་པའི་ཆར་གྱུར་པ་ལུས་ཉིད་རྟེན་ཡིན་ནོ། །རྣམ་པར་མ་དཔྱད་པ་གཞན་དག་ལུས་ཀྱི་རྟེན་ལ་ལྟོས་ནས་ཞེས་བྱ་བ་འདི་མི་བཟོད་པ་སྟེ། སྨྲ་བ་ལ་ནི་གལ་ཏེ་
ཞེས་བྱ་བའོ། །དེའི་རང་བཞིན་ནི་ལྟོས་པར་འདོད་པ་གཟུགས་དང༌། བདེ་བ་ལ་སོགས་པའི་ངོ་བོའོ། །རིག་པ་ནི་ཆོས་ཀྱི་མཚན་ཉིད་དེ། དེ་མེད་པ་ནི་ཕན་ཚུན་ལྟོས་པ་ཞེས་བྱ་བའི་ཆོས་ཡོད་པ་མ་ཡིན་ན། གང་གིས་གཟུང་བ་དང་འཛིན་པའི་དངོས་པོར་འགྱུར། དེའི་རང་བཞིན་ནི་རིག་པ་ཉིད་ཡོད་པ་ཡིན་ནོ། །སྙམ་དུ་བསམས་པའོ། །ཅི་ལྟར་ལྟོས་པ་མེད་ཅེ་ན། དེའི་རང་བཞིན་རིག་པ་ལས་ཞེས་སྨྲས་སོ། །གང་གི་ཕྱིར་གཟུགས་ལ་སོགས་པའི་རང་བཞིན་གྱི་རྣག་གི་ངོ་བོ་རིག་པ་ལས་ལོགས་ཤིག་ཏུ་གྱུར་པའི་ལྟོས་པ་ནི་ཤེས་པ་མེད་དོ། །སྣང་བཞིན་པ་ཉིད་ཀྱིས་རང་དབང་དུ་གྱུར་པ་གཉིས་ལ་འགའ་ཞིག་ལྟོས་པ་ཡིན་ལ། འགའ་ཞིག་ནི་ལྟོས་པར་བྱས་པ་ཡིན་ནོ་ཞེས་བྱ་བར་རྣམ་པར་དབྱེ་བར་ནི་མི་ནུས་སོ། །དེས་ན་ལུས་ཀྱི་རྣམ་པ་ནི་ལྟོས་པར་བྱ་བ་དང༌། གཞན་ལོགས་ན་གནས་པ་ནི་ལྟོས་པར་བྱེད་པ་ཡིན་ནོ་ཞེས་བྱ་བར་མི་རིགས་སོ། །དེ་ཉིད་ཀྱི་ཕྱིར་ལོགས་སུ་གནས་པ་དང་མི་གནས་པ་ཉིད་ཀྱིས་རྣམ་པར་དབྱེ་བ་མི་འཐད་དོ། །འདིས་ནི་ལྟོས་བ་འབྲས་བུ་ཉིད་ལ་བརྗོད་དོ་ཞེས་བྱ་བ་ཡང་སྤངས་པ་ཡིན་ནོ། །དུས་མཚུངས་པར་སྣང་བ་འདི་གཉིས་ལ་ནི་རྒྱུ་དང་འབྲས་བུའི་དངོས་པོ་ཡོད་པ་མ་ཡིན་ནོ། །རྒྱུ་དང་འབྲས་བུ་ཡིན་ཡང་དུས་ཐ་དད་པས་ན་གཟུང་བ་དང་འཛིན་པའི་དངོས་པོ་ནི་མ་ཡིན་ནོ་ཞེས་ཕྱིས་སྟོན་པར་འགྱུར་རོ། །དེས་ན་དེ་ལྟར་ལྟོས་པར་བྱེད་བའི་དངོས་པོར་བསྟན་པས་ཅི་བྱ། དེའི་ཕྱིར་གང་གིས་གཟུང་བ་དང་འཛིན་པའི་དངོས་པོར་འགྱུར་བ་ལྟོས་པ་ཞེས་བྱ་བའི་ཆོས་ནི་ཡོད་པ་མ་ཡིན་ནོ་ཞེས་བྱ་བར་གནས་སོ། །འདི་ནི་ཡང་དག་པའི་སུན་འབྱིན་པ་ཡིན་ནོ་སྙམ་དུ་དགོངས་ནས་ཁས་ལེན་པ་མཛད་པ་ནི་དེ་བདེན་ཞེས་བྱ་བའོ། །དེའི་ཕྱིར་དེ་ལྟོས་པར་བྱ་བ་དང་ལྟོས་པར་བྱེད་པའི་དངོས་པོ་མེད་པ་ཉིད་ཀྱི་ཕྱིར་རོ། །དབྱེ་བ་འདི་ཞེས་བྱ་བ་ནི་ལྟོས་པར་བྱ་བ་དང༌། ལྟོས་པར་བྱེད་པའི་རྣམ་པར་དབྱེ་བ་དང༌། ལོགས་ཤིག་ན་གནས་པ་དང་མི་གནས་པའི་རྣམ་པར་དབྱེ་བའོ། །སྐབས་ཉིད་ལ་སྦྱོར་བར་བྱེད་པ་ནི་དེའི་ཕྱིར་ཞེས་བྱ་བའོ། །འཕོ་བ་ཞེས་བྱ་བ་ལ། རི་དང་ཤིང་དང་ས་ལ་
སོགས་པ་རྣམས་ལ། རྣམ་པ་མེད་པའི་སེམས་འཕོ་བ་ཡིན་ནོ་ཞེས་བྱ་བའི་དོགས་པ་བཟློག་པའི་དོན་དུ། དེའི་བདག་ཉིད་ཀྱིས་ཞེས་གསུངས་སོ། །དོན་ནི་འདི་ཡིན་ཏེ། དཔེར་ན་ཤེས་པ་བདེ་བའི་རང་བཞིན་རིམ་གྱིས་གཞན་གྱི་ལུས་ལ་སོགས་པའི་རང་བཞིན་དུ་སྐྱེ་བ་དང༌། རྒྱུ་གཅིག་པ་ཉིད་ཀྱིས་དེ་ཉིད་དོ་ཞེས་ངེས་པར་འཛིན་པ་ཡང་ཡིན་པ་དེ་བཞིན་དུ་ཤི་བའི་རྗེས་ཐོགས་སུ། སྲིད་པ་བར་མ་འདི་རིམ་གྱིས་སམ། ཡང་ན་མོད་ཁོ་ན་ལ་ཕ་མའི་ཁུ་བ་ལ་སོགས་པས་སྐྱེས་པའི་ལུས་ཀྱི་རང་བཞིན་དུ་ཡང་སྐྱེ་བར་འགྱུར་ཞིང༌། དེ་ཉིད་ཡིན་ནོ་ཞེས་བྱ་བའི་གདགས་པ་ལ་ལྟོས་པར་ཡང་འགྱུར་བ་ཡིན་ནོ། །གང་གི་ཕྱིར་དེ་ལྟར་རྣམ་པར་ཤེས་པའི་རང་བཞིན་གྱིས་ནུས་པ་གཞན་མད་པ་དེའི་ཕྱིར་རོ། །གང་ལ་བྱ་བ་དང་བཅས་པར་འགྱུར་བ་ཞེས་བྱ་བ་ནི་དམིགས་པར་བྱེད་པ་ཉིད་ཡིན་པར་འགྱུར་བའོ། །ལུས་ཀྱི་རྟེན་ཅན་རྣམ་པར་ཤེས་པའི་ནུས་པ་ཞེས་བྱ་བ་ལ། གཟུགས་ལ་སོགས་པ་ཡུལ་དུ་འདོད་པའི་རྣམ་པར་སྣང་བ་དེས་རང་བཞིན་གཞན་ནི་ཡོད་པ་མ་ཡིན་ནོ། །འོན་ཀྱང་དེ་ལྟ་བུར་གྱུར་པ་ཞེས་བྱ་བ་དང༌། ལུས་དང་གཞན་གྱི་རང་བཞིན་དུ་ཡོངས་སུ་གྱུར་པ་ནི་རང་རིག་པ་ཉིད་ཀྱིས་ཤེས་པ་ཡིན་ཏེ། གཞན་གྱིས་རིག་པ་ཉིད་ནི་ཡང་ནས་ཡང་དུ་བཀག་པའི་ཕྱིར་རོ། །འོ་ན་ཅི་ལྟར་ཀ་བ་ལ་སོགས་པ་མི་གཡོ་ཞེས་སྦྲེལ་ཏོ། །དེའི་བདག་ཉིད་ཀྱིས་འཕོ་བ་ཞེས་བྱ་བ་ནི་ཀ་བའི་རྣམ་པར་ཡོངས་སུ་འགྱུར་རོ། །དེ་ཡང་ཞེས་བྱ་བ་ནི་ཀ་བ་ལ་སོགས་པ་ལ་ཡང་ངོ༌། །དེ་ནི་མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །རྣམ་པར་ཤེས་པའི་བདག་ཉིད་དུ་སྐྱེས་པ་ཙམ་གང་ཡིན་པ་དེ་ཙམ་འབའ་ཞིག་གིས་ནི་གཡོ་བ་མ་ཡིན་ནོ། །འོ་ན་ཅི་ལྟར་གཡོ་བར་འགྱུར་སྙམ་ན། རེག་པའི་རྣམ་པར་ཤེས་པ་ཞེས་གསུངས་སོ། །དགོངས་པ་ནི་འདི་ཡིན་ཏེ། རྣམ་པར་ཤེས་པའི་བདག་ཉིད་ཡིན་པ་ཙམ་གྱིས་ནི་གཡོ་བ་མ་ཡིན་གྱི། འོན་ཀྱང་གང་གིས་ལུས་ཉིད་གཡོ་བར་འགྱུར་གྱི། ཀ་བ་ལ་སོགས་པ་ནི་མ་ཡིན་པ། འབད་རྩོལ་གྱི་རང་བཞིན། རེག་པའི་རྣམ་པར་ཤེས་བ་ཉིད་ལ་དེ་འདྲ་བའི་ནུས་པ་ཡོད་པ་ཡིན་ནོ། །དངོས་པོ་རྣམས་ཀྱི་རང་གི་རྒྱུ་ལས་ངེས་པའི་རང་བཞིན་ལ་ནི་བརྒལ་ཞིང་བརྟག་པ་ཡང་འོས་པ་མ་ཡིན་ནོ། །གང་གི་ཚེ་ཞེས་བྱ་བ་ནི་འཆད་པའོ། །ལུས་ལ་སོགས་པ་ཞེས་བྱ་བ་ནི་ལུས་ལ་སོགས་པ་ཁོ་ན་སྟེ། ཀ་བ་ལ་སོགས་པ་ནི་མ་ཡིན་ཏེ། རེག་པའི་རྣམ་པར་ཤེས་པ་ནི་ནུས་པ་
དེ་འདྲ་བ་ཅན་ཡིན་པའི་ཕྱིར་རོ། །གཞན་དུ་མ་ཡིན་ནོ་ཞེས་བྱ་བ་ནི་རེག་པའི་རྣམ་པར་ཤེས་པ་མེད་པར་རོ། །འདི་ཡང་ཀུན་དུ་ཐ་སྙད་པའི་ཕྱོགས་ལ་བརྟེན་ནས་ལན་བཏབ་པ་ཡིན་ཏེ། དངོས་པོ་ལ་ནི་གཡོ་བ་དང་མི་གཡོ་བ་དག་མེད་པའི་ཕྱིར་ཏེ། དེ་དག་ནི་གཅིག་ཏུ་སྒྲོ་བཏགས་པས་བྱས་པ་ཡིན་པའི་ཕྱིར་རོ། །འདི་ལྟར་དཔེར་ན་བག་ཆགས་ཀྱི་མཐུ་ལས་ཡུལ་གཞན་དང་གཞན་ཏུ་སྐྱེས་པ་གཞན་དང་གཞན་ཉིད་ཡིན་ན་ཡང་དེ་ཉིད་དུ་སྒྲོ་བཏགས་ནས་གཡོ་བ་བརྗོད་པ་དེ་བཞིན་དུ་གནས་དེར་སྐྱེས་པའི་སྐད་ཅིག་ལ་ཡང༌། དེ་ཉིད་དུ་སྒྲོ་བཏགས་ནས་མི་གཡོ་བར་བརྗོད་པ་ཡིན་ནོ། །དེས་ན་བག་ཆགས་ཀྱི་མཐུ་ལས་དེ་ལྟར་སྐྱེད་པ་དག་ལ། གཡོ་བ་དང་མི་གཡོ་བ་ནི་ཐ་སྙད་པ་ཉིད་དང༌། འབད་རྩོལ་གྱི་ནུས་པ་ཡོད་པ་དང་མེད་པ་དག་གིས་བསྒྲུབ་པར་བྱ་བ་ཡང་ཡིན་ནོ། །རྣམ་པ་རྣམས་གཅིག་ཉིད་ཡིན་ན་ནི། གཡོ་བ་དང་མི་གཡོ་བདག་སྲིད་པ་ཐག་རིང་བ་ཉིད་དོ་ཞེས་ཕྱིས་སྟོན་པར་འགྱུར་རོ། །གང་གི་ཕྱིར་རིག་པ་ནི་རང་གི་རང་བཞིན་ལ་འཇུག་པ་ཡིན་བའི་ཕྱིར། བདག་ཉིད་རྡུལ་ཕྲ་རབ་ལས་སྐྱེས་པར་མི་རྟོགས་ལ། དེ་ལྟར་རིག་པར་བྱེད་པ་གཞན་ཡང་མེད་པའི་གཏན་ཚིགས་དེའི་ཕྱིར་རོ། །གཟུགས་ལ་སོགས་པའི་རང་བཞིན་ཉིད་དོ་ཞེས་བྱ་བ་ནི་ཕྱི་རོལ་གྱི་གཟུགས་ལ་སོགས་པའི་རང་བཞིན་ཉིད་དེ། དེར་འདུ་བའི་ཕྱིར་རོ། །དེ་ལྟ་ན་ཡང་སྔར་བཤད་པའི་ཐལ་བར་འགྱུར་བ་ཉིད་ཡིན་ནོ་ཞེས་མཇུག་སྡུད་པའི་སྒོ་ནས་སྟོན་པ་ནི། དེས་ན་རྡུལ་ཕྲ་རབ་རྣམས་ཞེས་བྱ་བའོ། །གཞན་གྱིས་ཁྱེད་ལ་ཡང་ཞེས་དྲིས་ཏ། སངས་རྒྱས་པ་ལ་ཡང་ངོ༌། །ལན་དུ་དེའི་རྣམ་པ་ཅན་གྱི་ཞེས་གསུངས་ཏེ། རགས་པའི་རྣམ་པ་པོ་མ་ཡོར་གཅིག་ཏུ་འགྱུར་བའོ། །གཞན་ཞེས་བྱ་བ་ནི་ཕྱི་རོལ་ལས་གཞན་པའོ། །དོགས་པ་པ་ནི་འདི་ཡིན་ཏེ། ཕྱི་རོལ་ནི་རྡུལ་ཕྲ་རབ་ཀྱི་རང་བཞིན་ཡིན་པས། དེ་སྣང་ན་རྡུལ་ཕྲ་རབ་སྣང་བར་ཐལ་བར་འགྱུར་གྱི། གང་གི་ཚེ་རང་གི་རྣམ་པ་མྱོང་བ་ཉིད་ལྷག་པར་ཞེན་པ་ལས་ཕྱི་རོལ་རིག་པ་ཡིན་པ་དང༌། དེ་བཞིན་འདི་བདག་ཉིད་ཅི་ལྟ་བདེ་བཞིན་དུ་རིག་པ་ཡིན་པ་དེའི་ཆེ། ཕྱི་རོལ་གྱི་རྗེས་སུ་མཐུན་པ་ལ་བློས་རེག་པ་མ་ཡིན་ནོ་ཞེས་བྱ་བའོ། །འོ་ན་ཅི་ལྟར་འདྲ་བ་ལས་དམིགས་པར་རྣམ་པར་གཞག་ཅ་ན། རྡུལ་ཕྲ་རབ་ཀྱི་རང་བཞིན་ལ་ནི་རྣམ་པ་ཐམས་ཅད་དུ་སོ་སོའི་སྐྱེ་བོས་རྗེས་སུ་མི་འཇུག་པའི་ཕྱིར་ན། ཁ་དོག་དང་དབྱིབས་ཉིད་ཀྱིས་བྱས་པ་འདྲ་བ་ཡིན་
ཏེ། དེ་ཙམ་ཐོབ་པ་ཉིད་ཀྱིས་འཇིག་རྟེན་གྱི་དོན་གྲུབ་པའི་ཕྱིར་རོ། །དབྱིབས་ཀྱང་ཡུལ་ཅི་འདྲ་བ་མངོན་པར་ཁྱབ་བར་སྐྱེས་པ་དེ་འདྲ་བ་ཐོབ་པ་ཉིད་ལས་རྣམ་པར་གཞག་པར་བྱ་བ་ཡིན་ནོ། །གཞན་གྱིས་ཁོ་བོ་ཅག་གི་ཡང་ཞེས་སྨྲས་སོ། །དེས་ན་རྡུལ་ཕྲ་རབ་སོ་སོར་རིག་པར་ཐལ་བ་མ་ཡིན་ནོ། །སྙམ་དུ་བསམས་པའོ།། དེའི་རང་བཞིན་ནི་ཤེས་པའི་རང་བཞིན་དུའོ། །རྡུལ་ཕྲ་རབ་རྣམས་ཤེས་པའི་རང་བཞིན་མ་ཡིན་པ་དེ་བརྩམས་པ་ཡན་ལག་ཅན་གྱི་རྫས་རྣམ་པར་ཤེས་པའི་རང་བཞིན་དུ་ག་ལ་འགྱུར་ཞེས་སྔར་བརྗོད་ཟིན་ཏོ། །ཐམས་ཅད་དུ་སྔ་མ་རྗེས་སུ་བརྗོད་པ་ནི་ཁྱད་པར་གྱི་དོན་ཡིན་པར་རིག་པར་བྱའོ། །དེ་ལྟར་ཡང་རྡུལ་ཕྲ་རབ་དག་ནི་ཐ་དད་པར་འགྱུར་བ་ཉིད་དོ་ཞེས་དོགས་པ་བསུ་ནས། འོ་ན་ནི་ཞེས་ལན་བརྗོད་པ་ཡིན་ནོ། །དེ་ཉིད་སྟོན་པ་ནི་འདི་ལྟར་ཞེས་བྱ་བའོ། །རྡུལ་ཕྲ་རབ་རྣམས་སེམས་པའི་རང་བཞིན་དུ་རྣམ་པར་གནས་པ་ནི་ཡན་ལག་ཅན་གྱི་ལུས་ཀྱི་ངོ་བོ་ཉིད་དུ་ཞེས་བྱ་བ་ལ་སེམས་པ་ཙམ་དང༌། དཀར་ཤམ་ལ་སོགས་པའི་རང་བཞིན་དུ་གནས་པ་ཡིན་ནོ། །དེ་ལྟ་མ་ཡིན་ན་ཡན་ལག་ཅན་དེས་བརྩམས་པ་ཞེས་བྱ་བ་ཉིད་མི་འགྱུར་རོ། །གང་གི་ཕྱིར་ཡན་ལག་ཅན་གྱི་ལུས་ཀྱང་རྡུལ་ཕྲ་རབ་རྣམས་ཀྱི་ངོ་བོ་ཉིད་སེམས་པ་ཅན་ལ་སོགས་པ་ཉིད་དུ་ཞེས་བྱ་བ་དེས་རྣམ་པར་གནས་ཏེ། སྐྱེ་བ་ཡིན་པ་དེའི་ཕྱིར། རྡུལ་ཕྲ་རབ་རྣམས་སེམས་པ་ཅན་ལ་སོགས་པའི་རང་བཞིན་དུ་ངེས་པ་ཡིན་ནོ། །དེས་ན་རྡུལ་ཕྲ་རབ་སོ་སོར་དམིགས་པར་ཐལ་ལོ། གཟུང་བར་བྱ་བའི་རང་བཞིན་གྱི་རྡུལ་ཕྲ་རབ་མཐའ་དག་སེམས་པ་ཅན་དུ་འགྱུར་རོ་ཞེས་བྱ་བའི་དོན་ཏོ། །ཉེས་པ་འདི་སྤངས་བའི་དོན་དུ་གཞན་གྱིས་རྡུལ་ཕྲ་རབ་དག་ནི་ཐ་དད་པར་གྱུར་པ་ཉིད་དོ་ཞེས་བརྗོད་པ་ཡིན་པར་སྟོན་པ་ནི། འོན་ཏེ་ཞེས་བྱ་བའོ། །གོ་རིམས་འདིར་རྩོད་པ་འདིའི་ལན་དུ་འགྱུར་རོ་ཞེས་བྱ་བའི་དོན་ཏོ། །འདི་ལ་ལན་དུ་དེ་ལྟ་ཡིན་ན་ཞེས་བྱ་བའོ། །ལུས་ཀྱི་རང་བཞིན་ཉིད་དུ་མི་འགྱུར་རོ་ཞེས་སེམས་པ་ཅན་ཡན་ལག་ཅན་གྱི་རང་བཞིན་མ་ཡིན་བ་སྟེ། ལུས་ཀྱི་སེམས་པ་ཅན་གྱི་ཡན་ལག་ཅན་གྱི་རང་བཞིན་ཡིན་པའི་ཕྱིར་རོ། །གལ་ཏེ་དེ་ལྟ་ན་ཡང་དེ་དག་མེད་པར་དམ་ཅི་ལྟར་འཆའ་ཞེ་ན། རིག་པར་བྱ་བ་ཉིད་མ་ཡིན་པས་ཞེས་གསུངས་ཏེ།
རྡུལ་ཕྲ་རབ་སོ་སོར་རིག་པར་ཐལ་བས་དེ་ལྟར་ཁས་མི་ལེན་པའི་ཕྱིར་རོ། །གང་གི་ཕྱིར་དེ་ལྟར་གཟུང་བ་དང་འཛིན་པའི་རང་བཞིན་ཡོད་པ་མ་ཡིན་པའི་ཕྱིར་ཏེ། དེའི་ཕྱིར་རྡུལ་ཕྲ་རབ་གཞན་དག་ནི་མེད་པ་ཉིད་དུ་འགྱུར་རོ། །གཟུང་བ་དང་འཛིན་པ་ལ་མ་གཏོགས་པའི་ཕུང་པོ་གཞན་མི་སྲིད་པའི་ཕྱིར་རོ། །དེའི་ཕྱིར་ཡན་ལག་ཅན་འབའ་ཞིག་གོ་ཞེས་ཁས་བླངས་པར་འགྱུར་རོ། །དེ་ཡང་མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །དེ་ནི་རྡུལ་ཕྲ་རབ་ཡོད་པ་ལ་ཡང་མཚུངས་པ་ཡིན་ནོ། །ཅི་ལྟར་ཐམས་ཅད་གཡོ་བར་འགྱུར་སྙམ་ན། གཡོ་བ་དང་མི་གཡོ་བའི་མཚན་ཉིད་འགའ་བ་ཅན་ནི་གཅིག་པ་མི་རུང་བའི་ཕྱིར་རོ། །གལ་ཏེ་གཡོ་བ་ཉིད་ལས་ཡིན་གྱི་མི་གཡོ་བ་ནི་རང་གི་རང་བཞིན་དུ་གནས་བཙམ་ཡིན་གྱི་ལས་ནི་མ་ཡིན་ན། དེའི་ཕྱིར་ཅི་ལྟར་ལས་ནི་གཅིག་ལ་ཞེས་བརྗོད་ཅེ་ན། བདེན་ཏེ་ལས་ཀྱི་སྒྲས་ནི། ཆོས་ཙམ་ཉེ་བར་མཚོན་པར་བྱ་བ་ཡིན་ནོ། །དེས་ན་འགའ་བའི་ཆོས་དག་གཅིག་ལ་མི་རུང་ངོ་ཞེས་བྱ་པའི་དོན་ཏོ། །གཞན་དུ་ཞེས་བྱ་བ་ནི་གལ་ཏེ་གཅིག་ཏུ་མངོན་པར་འདོད་པ་ལ་ཡང་འགལ་བ་ཅན་གྱི་ཆོས་གཉིས་ཡོད་ན། དེའི་ཚེ་སོ་སོར་གྲུབ་པར་ཐལ་ཏེ། རྟག་པ་དང་མི་རྟག་པ་ཉིད་ལ་སོགས་པ་བཞིན་ནོ། །གཅིག་པ་ཉིད་ནི་མངོན་པར་རློབ་པ་ཙམ་ཡིན་ནོ་ཞེས་བྱ་བའི་དོན་ཏོ། །རྫས་ཀྱི་མཚན་ཉིད་ནི་བྱ་བ་ཅན། ཡོན་ཏན་ཅན། འདུ་བ་ཅན་གྱི་རྒྱུ་ཞེས་བྱ་བ་ཙམ་ཡིན་པ་ལ། བར་དུ་ལྡན་པ་ལ་སོགས་པའི་རྒྱུ་ཡིན་ནོ་ཞེས་བརྗོད་པ་ནི་ཇི་ལྟར་འདུ་བ་ཅན་གྱི་རྒྱུ་ཡིན་ཞེས་ཤེས་པར་འདོད་པ་ལ་ལྟོས་ནས་བརྗོད་པ་ཡིན་ནོ། །ལྡན་པ་ལས་དེའི་རྒྱུར་གྱུར་པ་ན་འདུ་བ་ཅན་གྱི་གྱུར་པ་ཡིན་ནོ་ཞེས་བྱ་བའི་དོན་ཏོ། །དེ་ལ་སོགས་པའི་སྒྲས་ནི་ཡོན་ཏན་གྱི་ཚོགས་བཟུང་ནས་ལས་ལྔ་ཡང་འཛིན་ཏོ། །ཡང་ན་སྤྱི་དང༌། ནམ་མཁའ་ཆེན་པོ་ཉིད་ལ་སོགས་པའི་འདུ་བ་ཅན་རྟག་པའི་ཚོགས་རྣམ་པར་གཅོད་པས་ལྡན་པ་ལ་སོགས་པའི་རྒྱུ་ཞེས་བརྗོད་པ་ཡིན་ནོ། །དེ་ལ་འདི་ནི་བསྒྲིབས་པ་དང༌། མ་བསྒྲིབས་པའི་ཉེས་པ་བརྗོད་པའི་དོན་དུ་བྲིས་པ་ཡིན་ལ། བྱ་བ་དང་ཡོན་ཏན་ནི་གཡོ་བ་དང༌། མི་གཡོ་བ་དང༌། ཚོན་གྱིས་བསྒྱུར་བ་དང༌། མ་བསྒྱུར་བའི་ཉེས་པ་བརྗོད་པའི་དོན་དུ་ཡིན་ཞིང་འདུ་བ་ཅན་གྱི་རྒྱུ་ནི་ཐམས་ཅད་ཀྱི་ཐུན་མོང་བ་ཡིན་ནོ། །དེ་ལ་རེ་ཞིག་བྱ་བ་ལ་སྦྱོར་བ་དེ་ལ་གལ་ཏེ་ཞེས་བྱ་བའོ། །དེའི་ཞེས་བྱ་བ་ནི་བྱ་བའིའོ། །དོན་འདི་ཡིན་ཏེ་རྫས་
ལ་ཉེ་བ་ཙམ་ནི་སྤྱི་མ་ཡིན་ལ། འདི་ལ་བྱ་བ་དེས་ཟིན་པའི་ཡུལ་ལས་རང་བཞིན་གཞན་ཡང་ཡོད་པ་མ་ཡིན་ནོ། །དེས་ན་གནས་དེ་བཞིན་དུ་ཐམས་ཅད་གཡོ་བར་ཐལ་ལོ། །རྣམ་པ་ཅི་ཞིག་ལྟར་གཞན་གྱི་ལན་དོགས་པར་བྱེད་པ་ནི། །ཡན་ལག་ཅན་ནི་ཞེས་བྱ་བའོ། །དེ་དང་རྗེས་སུ་མཐུན་པའི་ལན་བརྗོད་པ་ནི་ལྷས་བྱིན་དང་ཞེས་བྱ་བའོ། །གཅིག་ཏུ་ལྷག་པར་ཞེན་པ་མེད་པའི་ཕྱིར་རོ་ཞེས་ནི་བརྗོད་པར་མི་བྱ་སྟེ། ལྷག་པར་ཞེན་པ་ཙམ་ལ་ནི་དངོས་པོ་ལ་ངེས་པ་ཡིན་པར་མི་འཐད་པའི་ཕྱིར་རོ། །འདིར་ལྷག་པར་ཞེན་པ་ཙམ་ནི་མ་ཡིན་གྱི། དེ་ལྟར་རྣམ་པར་འཇོག་པར་བྱེད་པ་ནི་མངོན་སུམ་ཉིད་ཡིན་ནོ་སྙམ་པའི་བསམ་པས་འོན་ཏེ་ཞེས་བྱ་བའོ། །ལྷ་སྦྱིན་ལ་སོགས་པ་ལ་ནི་མངོན་སུམ་གྱི་རྗེས་ལས་བྱུང་བས་གཅིག་ཉིད་དོ་ཞེས་བྱ་བ་རྣམ་པར་རྟོག་པ་མ་ཡིན་གྱི། ལག་པ་ལ་སོགས་པ་གཡོ་བའི་དུས་ན་ནི་ལུས་གཅིག་ཡིན་ནོ་སྙམ་དུ་མངོན་སུམ་གྱི་དེ་མ་ཐག་ཁོ་ན་ངེས་པར་བྱེད་དོ་ཞེས་བྱ་བའི་དོན་ཏོ། །སུན་འབྱིན་པ་ནི་གཅིག་ཅེས་བྱ་བ་འདི་ཅི་ཡིན་ཞེས་བྱ་བའོ། །གཅིག་ཉིད་དུ་རྣམ་པར་འཇོག་པར་བྱེད་པ་དེ་གང་ཡིན་པ་ཞེས་བྱ་བའི་དོན་ཏོ། །དངོས་པོ་རྣམས་ལག་པ་གྱེན་དུ་བསྒྲེངས་ནས་བདག་ཉིད་གཅིག་གམ་དུ་མ་ཡིན་ནོ་ཞེས་ནི་མི་སྨྲའོ། །དེ་ཉིད་ཀྱི་ཕྱིར་གལ་ཏེ་ཞེས་རྣམ་པར་འཇིག་བྱེད་ཀྱི་དོགས་པ་བསུ་བ་ཡིན་ནོ། །སྣང་བ་ཐ་མི་དད་པ་གཅིག་ཉིད་རྣམ་པར་འཇོག་པར་བྱེད་པ་ཡིན་ན་ཞེས་བྱ་བ་ནི་ལྷག་མའོ། །དེ་ནི་མེད་དོ་ཞེས་བྱ་བ་ནི་འགོག་པའོ། །སྣང་བ་ཐ་དད་པ་ནི་མེད་དེ། གཡོ་བ་དང་མི་གཡོ་བ་སྣང་བ་དག་ནི་ཐ་དད་པ་ཁོ་ན་ཡིན་པའི་ཕྱིར་རོ། །འོན་ཏེ་ཞེས་བྱ་བ་ནི་གཞན་གྱིའོ། །གང་ལ་ཆུ་འཛིན་པ་ལ་སོགས་པའི་འབྲས་བུ་གཅིག་ཡོད་པ་དེའི་ངོ་བོ་ནི་འབྲས་བུ་གཅིག་པ་ཉིད་དོ། །གཅིག་ཏུ་རྣམ་པར་འཇོག་པར་བྱེད་པ་དེ་ཡིན་ན། དེ་ཡང་མ་ངེས་པ་ཉིད་ཡིན་ནོ་ཞེས་སྟོན་པ་ནི། གལ་ཏེ་ཞེས་བྱ་བའོ། །ས་བོན་དང་ཆུ་ས་ལ་སོགས་པ་ལྟ་བ་དུ་མས་ཀྱང་ནི་འབྲས་བུ་གཅིག་བྱེད་པ་མ་ཐོང་བའི་ཕྱིར་དང༌། སྐོར་ཆོམས་ཀྱི་ཕྱིར་ཡང་གསལ་བའི་ཕྱིར་རོ། །ལྷག་མ་ནི་གསལ་བའི་ཕྱིར་རྣམ་པར་མ་ཕྱེའོ། །གཉིས་པ་སུན་འབྱིན་པ་ནི་ཡན་ལག་ཅན་བསྒྲིབས་པ་ན་ཞེས་བྱ་བའོ། །ལྡན་པ་ཁྱད་པར་མེད་པའི་ཕྱིར་རོ་ཞེས་པ་ནི། གང་གི་ཚེ་གོས་ལ་སོགས་པས་ཡན་ལག་ཅན་གྱི་ཆ་བསྒྲིབས་པ་དེའི་ཚེ། ཡན་ལག་ཐམས་ཅད་ལ་ལྡན་པ་འདུས་པར་འགྱུར་བ་ཡིན་ཏེ།
སྔ་མ་བཞིན་དུ་འདུ་བ་ཅན་མ་ཡིན་པའི་ཆ་མེད་པའི་ཕྱིར་ན། ཐམས་ཅད་བསྒྲིབས་པ་བཟློག་ཏུ་མེད་པའི་ཕྱིར་རོ། །འོན་ཏ་ཡན་ལག་བསྒྲིབས་ཀྱི་ཡན་ལག་ཅན་ནི་མ་ཡིན་ན་སྙམ་དུ་དོགས་ན། ཡན་ལག་བསྒྲིབས་པ་ཡིན་ན་ཞེས་སྨོས་སོ། །ཐམས་ཅད་ཅེས་བྱ་བ་ནི་ཡན་ལག་ཅན་གྱི་གཟུགས་མ་གོད་པར་རོ། །འོན་ཏེ་ཡན་ལག་གི་སྒོ་ནས་ཡན་ལག་ཅན་གྱི་རང་བཞིན་ཅུང་ཟད་བསྒྲིབས་པ་དེས་ན་ཐམས་ཅད་མཐོང་བ་མ་ཡིན་ནོ་སྙམ་ན། ཡན་ལག་གི་སྒོ་ནས་ཞེས་སྨོས་སོ། །བསྒྲིབས་པའི་ཡན་ལག་འདུས་པའི་ཡན་ལག་ཅན་ཡང་བསྒྲིབས་པ་ན་ཡན་ལག་ཅན་གྱི་རང་བཞིན་ཅུང་ཟད་ཀྱང་མི་མཐོང་བའམ། དེའི་སྒོ་ནས་བསྒྲིབས་པ་ལས་འདས་ཏེ། མཐོང་ན་ནི་རི་ལ་མཐོང་བར་འགྱུར་རོ་ཞེས་འབྲེལ་ཏོ། །དེ་ལྟར་འདིས་ནི་འགལ་བའི་ཆོས་དང་མཐུན་པའི་ཕྱིར་ཡན་ལག་ཅན་གཅིག་ནི་གང་དུ་ཡང་གྲུབ་བ་མ་ཡིན་ནོ་ཞེས་བརྗོད་པ་ཡིན་ནོ། །འདི་ཉིད་ཉེ་བར་སྡུད་པ་ནི། །དེ་ཕྱིར་ཚོགས་པ་གཅིག་ཡོད་མིན། །ཞེས་བྱ་བའོ། །ཚོགས་པ་ནི་ཡན་ལག་ཅན་ནོ། །དུ་མ་ཉིད་ནའང་སྔ་མ་བཞིན། །ཞེས་བྱ་བ་ཉིད་བཤད་པ་བྱེད་པའི་འདོད་པས་སུན་འབྱིན་པའི་ངག་ཡིན་ནོ། །རྡུལ་ཕྲ་རབ་ཀྱི་ཚོགས་ཙམ་ཡིན་ན་སྔ་མ་བཞིན་དུ་རྡུལ་ཕྲ་རབ་སོ་སོར་རིག་པར་ཐལ་བར་འགྱུར་རོ། །ཐལ་བ་འདི་ལ་གཞན་གྱི་དོགས་པ་བསུ་བ་ནི་ཁྱད་པར་མེད་ཕྱིར་ཞེས་བྱ་བའོ། །རྟོགས་མིན་ཞེས་བྱ་བ་ནི་རྡུལ་ཕྲ་རབ་སོ་སོར་དམིགས་པ་མ་ཡིན་པའོ། །ལན་ནི་ཁྱད་པར་མེད་པར་མ་གྲུབ་ཅེས་བྱ་བའོ། །ཅིའི་ཕྱིར་ཞེ་ན། ཁྱད་པར་ཅན་རྣམས་ནི་ཞེས་བྱ་བའོ། །གང་གི་ཕྱིར་རྡུལ་ཕྲ་བ་ཁྱད་པར་ཅན་རྣམས་དབང་ཡུལ་ཏེ། དམིགས་པར་བྱ་བ་ཡིན་པ་དེའི་ཁྱད་པར་མ་གྲུབ་པོ། །རྡུལ་ཕྲ་རབ་ཀྱི་རང་བཞིན་ལས་འདས་པ་མ་ཡིན་ཡང་དམིགས་པར་བྱ་བ་མ་ཡིན་པའི་རྡུལ་ཕྲ་རབ་དག་ལས། དམིགས་པར་བྱ་བའི་རྡུལ་ཕྲ་རབ་རྣམས་ཁྱད་པར་མེད་པར་རིགས་པ་ནི་མ་ཡིན་ནོ། །རྡུལ་ཕྲ་རབ་ཀྱི་ཚོགས་ལས་མ་གཏོགས་པའི་ཕྱི་རོལ་གཞན་ཡང་དམིགས་པ་མ་ཡིན་ནོ། །འདིས་ནི་ཁྱད་པར་མེད་ཕྱིར་དང༌། །ཞེས་བྱ་བའི་གཏན་ཚིགས་མ་གྲུབ་པར་བརྗོད་པ་ཡིན་ནོ། །ཕྲ་རབ་ཕྱིར་ཞེས་བྱ་བ་འདི་ཡང་བརྗོད་པ་ནི་དེ་ཕྱིར་ཕྲ་རབ་མིན་ཞེས་བྱ་བའོ། །དེའི་ཕྱིར་ཞེས་བྱ་བ་ནི་
དབང་པོའི་ཡུལ་ཡིན་པའི་ཕྱིར་རོ། །རྡུལ་ཕྲ་རབ་ནི་གང་ཞིག་དབང་པོའི་སྤྱོད་ཡུལ་མ་ཡིན་པ་དེ་ཉིད་ལ་བརྗོད་པ་ཡིན་ནོ། །གང་གི་ཚེ་འདི་དབང་པོའི་ཡུལ་ཡིན། །དེའི་ཚེ་རྡུལ་ཕྲ་རབ་ཉིད་དུ་ཡོད་ཀྱང་མེད་པ་དང་ཁྱད་པར་མེད་པའི་ཕྱིར། དེ་ནི་རྡུལ་ཕྲ་རབ་མ་ཡིན་པ་ཁོ་ནའོ་སྙམ་དུ་དགོངས་པའོ། །དེས་ན་རྡུལ་ཕྲ་རབ་སོ་སོར་དམིགས་པར་ཐལ་བ་བཟློག་པར་དཀའོ། །གསལ་བའི་ཕྱིར་ན་མཇུག་བསྡུ་བ་ནི་རྣམ་པར་བཀྲོལ་ཏོ། །ལྷག་མ་རྣམ་པར་འགྲེལ་པ་ནི་གལ་ཏེ་ལུས་ཞེས་བྱ་བའོ། །དེའི་ཚེ་ཞེས་ཁོང་ནས་ཕྱུང་ལ། དུ་མ་ཡིན་ན་ཡང་སྡེ་བ་པོ། །གལ་ཏེ་རིག་པའི་གནས་སྐབས་ཉིད་དམིགས་པ་མ་ཡིན་ནམ། རིག་པའི་གནས་སྐབས་ན་དམིགས་པར་བྱ་བ་ཡིན་པའི་ཕྱིར་རོ། །ཞེས་ཐ་དད་པར་ཅི་ལྟར་སྟོན་ཞེ་ན། ཤེས་པ་སྐྱེ་བའི་གནས་སྐབས་ན་དམིགས་པ་ཡིན་གྱི། གཞན་གྱི་ཚེ་ན་མ་ཡིན་ནོ་ཞེས་བྱ་བ་དགོངས་པའི་ཕྱིར་ན་ཉེས་པ་མེད་དོ། །དེས་ན་ཤེས་པ་བསྐྱེད་པའི་ནུས་པས་སྔར་གྱི་གནས་སྐབས་ལས་ཁྱད་པར་ཡོད་པའི་ཕྱིར་དམིགས་པར་བྱ་བ་ཉིད་དུ་རིགས་སོ། །དེ་ཉིད་བརྗོད་པ་ནི་དེས་ན་མི་དམིགས་པ་ལས་ཁྱད་པར་མེད་པ་མ་ཡིན་ནོ་ཞེས་བྱ་བའོ། །མི་དམིགས་པ་ལ་ལྟོས་ནས་ཞེས་བྱ་བ་ལས་ཀྱི་ལྔ་པར་བྱས་ནས། སྒྲུབ་པར་བྱེད་པ་ལ་བྱེད་པས་ཞེས་བསྡུ་བར་བྱའོ། །ཕྲ་རབ་ཕྱིར་ཞེས་བྱ་བ་དེ་ལ་བརྗོད་པ་ནི་དེ་ཉིད་ཀྱི་ཕྱིར་ཞེས་བྱ་བ་སྟེ། དམིགས་པར་བྱ་བ་ཉིད་ཀྱི་ཕྱིར་རོ། །རང་ཉིད་རིག་པའི་གནས་སྐབས་ན། །ཞེས་བྱ་བ་ནི་རྡུལ་ཕྲ་རབ་རྣམས་ཀྱི་བདག་ཉིད་ཀྱི་རང་བཞིན་གང་ཡིན་པ་དེ་རིག་པའི་གནས་སྐབས་ནའོ། །རྡུལ་ཕྲ་རབ་ཉིད་ཀྱང་ཞེས་བྱ་བ་ནི་ལྷན་ཅིག་སྐྱེས་པ་ཉིད་དོ། །གེགས་བྱེད་པ་མ་ཡིན་ནོ་ཞེས་བྱ་བ་ནི་དམིགས་པའོ། །ཡོད་ཀྱང་ཞེས་བྱ་བ་ནི་རྡུལ་ཕྲ་རབ་ཉིད་དོ། །རྡུལ་ཕྲན་མ་ཡིན་པ་ནི་མངོན་སུམ་གྱིས་རྟོགས་པའི་ཕྱིར་རོ། །གལ་ཏེ་ལུས་རྡུལ་ཕྲ་རབ་ཀྱི་ཚོགས་ཙམ་དུ་གནས་པའི་ཕྱིར། དེ་རྟོགས་ཀྱང་རྡུལ་ཕྲ་རབ་སོ་སོར་དམིགས་པར་ཐལ་ཐལ་ན། དེའི་ཚེ་ཐལ་བ་འདི་ནི་ཁྱེད་ཅག་ལ་ཡང་འགྱུར་རོ་ཞེས་སྨྲས་པ་ན། ཁྱེད་ཅག་གི་ཡང་ཞེས་བྱ་བའོ། །ཁྱེད་ཀྱི་ལྟར་ན་ཡང་ཡུལ་ཐམས་ཅད་ནི་རྡུལ་ཕྲ་རབ་ཀྱི་ཚོགས་ཙམ་ཡིན་ཏེ། དེས་ན་རྡུལ་ཕྲ་རབ་སོ་སོར་དམིགས་པར་ཐལ་བར་ཅི་ལྟར་བཟློག་པར་བྱ་སྟེ། རང་གི་རང་བཞིན་དུ་སྣང་བར་འགྱུར་རོ་སྙམ་དུ་བསམས་པའོ། །རང་རིག་པའི་ཞེས་བྱ་བ་ནི་ལན་འདེབས་པའོ།།
རྡུལ་ཕྲ་རབ་སོ་སོའི་རང་བཞིན་དམིགས་པར་བྱེད་པ་ཉིད་ཀྱིས་ཡུལ་དམིགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཅི་ལྟར་སྙམ་ན། འོན་ཀྱང་ཞེས་སྨྲས་སོ། །དེའི་རྣམ་པ་ཅན་ཉིད་ནི་ཁ་དོག་དང༌། དེ་ཙམ་གྱིས་ཡུལ་ཁྱབ་པའི་རྗེས་སུ་འཇུག་པས་སོ། །ཅི་ལྟར་རྡུལ་ཕྲ་རབ་ཀྱི་ཞེས་བྱ་བ་ནི་ཁ་དོག་དང་དབྱིབས་ཀྱི་རྣམ་པ་ཡང་རྡུལ་ཕྲ་རབ་དེ་འདྲ་བ་དག་གིས་བསྐྱེད་པ་ཡིན་པའི་ཕྱིར། དེ་ལས་རྡུལ་ཕྲ་རབ་ཀྱི་རྣམ་པའི་རྗེས་སུ་བྱེད་པ་ཉིད་བཟློག་དཀའོ་ཞེས་བྱ་བའི་ཐ་ཚིག་གོ །འདི་ནི་འོག་ཏུ་ཞེས་བྱ་བ་ནི་ཅི་ལྟར་སྐྲ་དང༌། སྦྲང་མ་ཤ་ལ་སོགས་པ་ཡུལ་བར་དང་བཅས་པར་གནས་པ་ཡིན་ཡང་ཞེས་བྱ་བ་ལ་སོགས་པའི་སྐབས་སུའོ། །དེ་ལ་རྡུལ་ཕྲ་རབ་ཅི་སྙེད་སྐྱེད་བྱེད་ཡིན་པ་དེ་སྙེད་ཀྱིས་རྡུལ་ཕྲ་རབ་ཀྱི་ཤེས་པ་སྐྱེ་བ་ནི་མ་ཡིན་ནོ་ཞེས་སྟོན་པར་འགྱུར་རོ། །གལ་ཏེ་ཞེས་བྱ་བ་ནི་གཞན་གྱི་ལན་དུ་འདིས་ནི་ཞེས་བྱ་བའོ། །རྡུལ་ཕྲ་རབ་ཁྱད་པར་ཅན་དུ་བསྒྲུབས་པས་སོ། །རྣམ་འགྲེལ་ལྷག་མ་བཞིས་ནི་སུན་འབྱིན་པ་གཞན་བརྗོད་པ་ཡིན་ནོ། །རྡུལ་ཕྲ་རབ་རྣམས་འབྱར་པ་མེད་པའི་ཕྱིར་ཞེས་བྱ་བ་ནི་འཆད་པའོ། །དེ་མེད་པ་ཞེས་བྱ་བ་ནི་ཡན་ལག་ཅན་མེད་པས་སོ། །གང་དུ་ཞེ་ན། རྡུལ་ཕྲ་རབ་རྣམས་ལའོ། །དེར་མི་འགྱུར་བ་ཞེས་བྱ་བ་ནི་བྱེད་པ་པོའི་ཆོས་ཀྱི་སྒྲིབ་པར་རོ། །གང་གིས་རྡུལ་ཕྲ་རབ་རྣམས་སྒྲིབ་བྱེད་དུ་མི་འགྱུར་བ་ཞེས་བྱ་བའི་དོན་ཏོ། །དེ་བཞིན་དུ་རྡུགས་པར་བྱེད་པའི་བྱ་བ་ཐགས་པ་ཡང༌། ཡན་ལག་ཅན་འབྲེལ་བ་འགར་ཡང་དམིགས་པ་མེད་དོ་ཞེས་བྱ་བ་ལ་སོགས་པར་སྦྱར་རོ། །སོགས་པའི་སྒྲས་ནི་ཆུ་འཛིན་པ་ལ་སོགས་པའོ། །རྡུལ་ཕྲ་རབ་ཀྱི་ཚོགས་གསེང་དང་བཅས་པ་ཡིན་པས་ན། སྣམ་བུ་ལ་སོགས་པ་ཅི་ལྟར་རིགས་པར་རླུང་ལ་སོགས་པའི་སྐྱབས་སུ་ཅི་ལྟར་འགྱུར། འཆད་པ་ནི་ཕན་ཚུན་ཞེས་བྱ་བ་ལ་སོགས་པའོ། །ཕན་ཚུན་ནང་དུ་འཇུག་པ་ནི་གསེབ་ཏུ་འགྲོ་བ་གང་ཡིན་པ་སྟེ། དེ་ལ་གེགས་མེད་པ་གང་ཡིན་པ་དག་གོ །དེ་ལ་ལྟོས་ནས་འདི་དང༌། འདི་ལ་ལྟོས་ནས་ཀྱང་དེ་ནང་དུ་འདུ་བ་སྲིད་པ་ཞེས་བྱ་བའི་དོན་ཏོ། །རྡུལ་ཕྲ་རབ་རྣམས་ནི་རེག་གོ་ཞེས་བྱ་བ་ལུགས་ཡིན་པའི་ཕྱིར་རོ། །ལན་ནི་འདིར་བཤད་པ་ཞེས་བྱ་བ་ཡིན་ནོ། །གལ་ཏེ་རེག་པ་རྣམས་འཛིན་པ་ལ་སོགས་པ་བྱེད་མི་ནུས་ན་ཡན་ལག་ཅན་ཉིད་ཅི་ལྟར་སྐྱེད་ཅེས་བྱ་བའི་
དོན་ཏོ། །རེག་གོ་ཞེས་བྱ་བའི་དོགས་པ་བསུ་ནས་རེག་པ་ཡང་ཞེས་སྨོས་སོ། །ཅའི་ཕྱིར་ཞེ་ན། དེ་མེད་པའི་ཕྱིར་ཏེ། ཕྱོགས་གཅིག་མེད་པའི་ཕྱིར་རོ། །ལྡན་པ་ཞེས་བྱ་བ་ནི་གཞན་གྱིའོ། །བར་དང་བཅས་པ་རྣམས་ལྡན་པ་སྐྱེད་པས་ཡན་ལག་ཅན་སྐྱེད་དོ་ཞེས་འབྲེལ་ཏོ། །ལན་དུ་དེ་ཉིད་ཅེས་བྱ་བའོ། །རེག་ན་ཞེས་བྱ་བ་ཡང་བཀོད་པ་ནི་ཉེས་པ་གཞན་བརྗོད་པར་འདོད་པས་སོ། །དེ་ཉིད་བརྗོད་པ་ནི་ལྡན་པ་གཞན་ན་མ་ཞེས་བྱ་བའོ། །བར་མཚམས་མེད་པ་ཉིད་ལས་སྐྱབས་ལ་སོགས་པར་འགྲུབ་པའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བ་ནི་བསྐྱེད་བྱ་ལ་དོན་མེད་པར་སུན་འབྱིན་པས་འཇིགས་པས་ན་བར་དང་བཅས་པ་ཉིད་ཁས་ལས་ལེན་པའོ། །ལན་དུ་དེ་ལྟར་ཡིན་ན་ཞེས་བྱ་སྟེ། དེས་ན་བར་གྱི་ཤ་ལྷག་དང་འདྲ་བ་ལྡན་པ་ལ་སོགས་པ་བརྟགས་པས་ཅི་ཞིག་བྱ་ཞེས་བྱ་བར་དགོངས་པའོ། །གལ་ཏེ་ཡང་ལག་ཅན་མེད་ཅིང་རྡུལ་ཕྲ་རབ་རྣམས་ཀྱང་རེག་པ་མ་ཡིན་ན། དེའི་ཚེ་རྡུལ་གྱི་ཕུང་པོ་བཞིན་དུ་བརྡེགས་ན། སོ་སོར་ཅི་སྟེ་མིད་དགྱེས་ཤིང་བར་དུ་བཅས་པས་སྒྲིབ་པ་ལ་སོགས་པ་སྐྱེད་པ་དང༌། གསེང་དང་བཅས་པར་ཆུ་ལ་སོགས་པ་འཛིན་པར་ཡང་ཅི་ལྟར་འགྱུར་སྙམ་ན། གང་ལ་ཞེས་བྱ་བ་སྨོས་ཏེ་ཚོགས་པ་གང་ལའོ། །སོ་སོར་དགྱེས་པར་འགྱུར་བ་ནི་སིལ་བུར་འཐོར་བའོ། །དེ་ཞེས་བྱ་བ་ནི་ཁྱོད་ཀྱིས་བརྩད་པའོ། །རྡུལ་རྣམས་མཆོག་ཏུ་ཚོགས་པ་ཡིན་ཞེས་བྱ་བ་ནི་མཐོང་བ་དང༌། མ་མཐོང་བ་དང༌། མ་མཐོང་མཐོང་བ་ཡིན་ནོ། །ཡང་ན་པ་རའི་སྒྲ་ནི་འབའ་ཞིག་གི་དོན་ཡིན་པར་རྡུལ་རྣམས་ཚོགས་པ་འབའ་ཞིག་ཡིན་ཞེས་བྱ་བ་ཡིན་ཏེ། ཡན་ལག་ཅན་གྱི་རྫས་ནི་མ་ཡིན་ནོ་ཞེས་བྱ་བའི་དོན་ཏོ། །གཉིས་པ་ལ་བརྗོད་པ་ནི་དཔེར་ན་སྒྲ་དང་ཞེས་བྱ་བའོ། །འབྲས་བུ་གཞན་ཡང་ཞེས་བྱ་བ་ནི་སྒྲིབ་པ་ལ་སོགས་པའོ། །དེར་ཞེས་བྱ་བ་ནི་གཞན་གྱིའོ། །སྒྲ་ལ་སོགས་པ་བར་དང་བཅས་པ་ཉིད་ལ་རྣམ་པ་གཅིག་ཏུ་རྟོགས་པ་འདིར་འགྱུར་རོ་ཞེས་བྱ་བར་ནི་ཡུལ་དེར་ཕྱིན་པ་ལས་གནོད་བྱེད་སྐྱེས་པས་འཇོག་པ་ཡིན་གྱི་སྐབས་ལ་ནི་དེ་ལྟར་གནོད་བྱེད་ཡོད་པ་མ་ཡིན་ནོ་སྙམ་དུ་བསམས་པའོ། །ལན་དུ་འདི་ལ་ཡང་ཞེས་བྱ་བའོ། །གལ་ཏེ་ཞེས་མ་ངེས་པའི་དོན་གྱིས་གནོད་པའམ། སྒྲུབ་པ་ཞེས་བྱ་བ་འདི་སྔ་ན་མེད་པ་ཡིན་ནོ་ཞེ་ན། བདེན་ཏེ་འདིས་ནི་སྲིད་པར་
བསྟན་པའི་ཕྱིར་འབྲས་བུ་སྐྱེད་པའི་ནུས་པ་ཞེས་སྨོས་སོ། །རྒྱུ་མཐོང་ཡང་མ་མཐོང་བར་གྱུར་པ་གང་ཡིན་པ་འབྲས་བུ་སྐྱེད་པའི་ནུས་པ་ནི་རྒྱུ་ལས་གཞན་མ་ཡིན་པ་ཁོ་ནའོ། །འདི་ནི་དེ་ལྟར་མཐོང་ཡང་རྒྱུའི་རང་གི་ངོ་བོ་བཞིན་ངེས་པ་མ་ཡིན་གྱི། འོན་ཀྱང་དེ་ཡོད་ན་འབྲས་བུ་དམིགས་པ་ཁོ་ན་ལས་སོ། །དེས་ན་འབྲས་བུ་སྒྲུབ་པར་བྱེད་བའི་ནུས་པའི་རྒྱུའི་དངོས་པོ་ཉིད་ཡིན་ཡང་འབྲས་བུ་མ་དམིགས་ན་རྒྱུ་རྟོགས་སུ་ཟིན་ཀྱང་རྟོགས་པ་པོའི་རྒྱུར་རྟོགས་པར་མི་འགྱུར་གྱི་འོན་ཀྱང་འབྲས་བུ་མཐོང་བ་ཁོ་ནས་ཡིན་ནོ། །དེ་བཞིན་དུ་མི་རྟག་པ་ཉིད་དངོས་པོའི་རང་བཞིན་ཡིན་ཡང་མཐའི་སྐད་ཅིག་མཐོང་བ་ཉིད་ན་རྟོགས་པར་འགྱུར་བ་ཡིན་ནོ། །དེས་ན་མི་རྟག་པ་ཉིད་དེ་རྟོགས་པ་མ་རྟོགས་ཀྱང་དོན་གྱི་རང་བཞིན་དུ་གྱུར་པ་ཁོ་ནར་རིགས་སོ། །དེ་ལྟར་མ་ཡིན་ཏེ་གལ་ཏེ་དངོས་པོ་ཉིད་མི་རྟག་པ་ཡིན་པར་མ་གྱུར་ན་དེའི་ཚེ་མི་རྟག་པ་ཉིད་ལས་ཐ་དད་པ་ཁོ་ནར་འགྱུར་རོ། །རྒྱུ་མཚན་གང་རྩ་བར་གྱུར་པས་དངོས་པོ་འདི་དེའི་ངོ་བོ་མ་ཡིན་པར་འགྱུར་བའི་རྒྱུ་མཚན་དེ་སྟོན་ཏེ། གཞན་གྱི་རྒྱུ་མཚན་ཅན་ཡིན་ནམ་ཞེས་བྱ་བ་ནི་འཇིག་པ་རྒྱུ་དང་ལྡན་པར་སྨྲ་བའི་འདོད་པས་སོ། །རྒྱུ་མཚན་མེད་པ་ཅན་ཉིད་ཡིན་ཡང་རུང་སྟེ་ཞེས་བྱ་བས་ནི་འཇིག་པ་འབྱུང་བ་པོ་ཉིད་དུ་དམིགས་ཏེ་རྒྱུ་མེད་པར་འདོད་པ་ཉིད་ལ་ཡིན་གྱི་དངོས་པོ་མ་ཡིན་ཏེ། དངོས་པོ་ནི་འགའ་ཡང་མེད་དོ་ཞེས་བྱ་བ་འདི་ལ་ནི་བ་རྒལ་བ་འདི་མེད་བ་ཁོ་ནའོ། །དངོས་པོ་མེད་པ་དང་དངོས་པོ་གཞན་དུ་གྱུར་པ་མ་ཡིན་མོད། འོན་ཀྱང་དེ་ནི་དངོས་པོའི་ངེས་པ་ཉིད་ཡིན་པར་བསྟན་ཏོ། །དངོས་པོ་ནི་ཁྱད་པར་ཉིད་ཀྱི་སྒོ་ནས་བསྟན་པར་འགྱུར་བ་ཡིན་ཏེ། དཔེར་ན་དེ་ཡོད་པ་ཉིད་ཀྱིས་བ་གླང་ངོ་སྙམ་དུ་རྟོགས་པའི་རྟེན་དུ་གྱུར་པའི་ཕྱིར་དེའི་རང་བཞིན་པ་ལང་ཉིད་ལ་སོགས་པས་བསྟན་བ་དེ་བཞིན་དུ་ཕན་ཚུན་མེད་པའི་བདག་ཉིད་ཀྱིས་ངེས་པ་ཡང་གཅིག་ལ་གཅིག་མེད་པས་བསྙད་པ་ཡིན་ལ་དུས་ངེས་པ་ནི་སྔ་ན་མེད་པ་དང་ཞིག་ནས་མེད་པ་ཡིན་ཏེ། དེས་ན་དོན་གཞན་ཉིད་ཡིན་མོད། ཅི་འགལ་ཞེ་ན། དེ་ལྟ་ན་ནི་ཞེས་སྨོས་སོ། །མི་རྟག་པ་ཉིད་གཞན་ཡིན་ན་དངོས་པོ་དེ་དང་ལྡན་པར་ཏེ་མི་རྟག་པར་མི་
འགྱུར་རོ། །ཅིའི་ཕྱིར་ཞེན་མི་ དགོས་པའི་ཕྱིར་རོ། །ངེས་པ ་ཞེས་བྱ་བའི་དངོས་པོ་མེད་པ་ཡོད་པའི་ཕྱིར་དོན་དེ་ངེས་པར་མི་འགྱུར་རོ། །དངོས་པོ་མེད་པའི་བདག་ཉིད་ཀྱི་ངེས་པ་ཁྱད་པ་ཡིན་ཡང༌། །དེའི་དངོས་པོ་གཞན་དང་འབྲེལ་བའམ། དུས་གཞན་ཁྱབ་པའི་རང་བཞིན་དེ་ནི་གཞན་དུ་འགྱུར་བ་མ་ཡིན་ནོ། །དེ་དང་ལྡན་པ་ཉིད་ཀྱིས་ངེས་པ་ཡིན་ནོ་ཞེ་ན། བཤད་ཟིན་ཏོ། །དེ་ལྟ་བུའི་རང་བཞིན་ནི་གཞན་ཡོད་ཀྱང་དེ་ལྟ་མ་ཡིན་པར་མི་འགྱུར་བའི་ཕྱིར་རོ། །འོ་ན་ཏེ་དངོས་པོ་གཞན་ལ་སོགས་པ་དང་མ་འབྲེལ་བ་འདིའི་རང་བཞིན་ཉིད་ཡིན་ན་དངོས་པོ་མེད་པ་གཞན་གྱིས་ཅི་ཡང་བྱར་མེད་དོ། །འདིའི་དེ་ལ་ཉེ་བར་སྦྱོར་བ་ན་ནི་འདི་ཁོ་ན་སྟེ། དེ་ཡོད་ན་དངོས་པོ་ངེས་པ་ཉིད་གང་ཡིན་པའོ་ཞེ་ན། དེ་ལྟ་ན་ཡང་དེའི་རང་གི་ངོ་བོ་ཉིད་ཡོད་ན་དེ་ལྟར་འགྱུར་བའི་ཕྱིར་ངོ་བོ་ཉིད་ཀྱིས་ནི་དངོས་པོ་མེད་པ་དངོས་པོ་མེད་པ་ལ་ཉེ་བར་སྦྱོར་བ་མ་ཡིན་གྱི། འོན་ཀྱང་ནུས་པ་ཉིད་ཀྱིས་ཡིན་ནོ། །དེས་ན་དེའི་རྒྱུ་ཉིད་དེ་ལྟ་བུ་སྒྲུབ་པར་ནུས་པར་བརྟགས་ཏེ་ཁྱད་པར་གཞན་དོར་བ་ཁོ་ནར་རིགས་སོ། །དེ་བཤད་ པ་ནི། འོན་ཏེ་དགོས ་ན་ནི་དངོས་པོ་དེའི་ངེས་པའི་མཚན་ཉིད་ལ་འདི་ཕན་འདོགས་ན་ནི་རང་གི་ངོ་བོ་ཉིད་ཀྱིས་ངེས་པ་ཡིན་པའི་ཕྱིར་དེ་ཉིད་འདིའི་བདག་ཉིད་དུ་གྱུར་པའི་མི་རྟག་པ་ཡིན་པས་མི་རྟག་པ་གཞན་གྱིས་ཅི་ཞིག་བྱ། ཞིག་པའི་མཚན་ཉིད་ཀྱི་དོན་གཞན་དང་ལྡན་པས་དངོས་པོ་ངེས་པ་འདིར་གྲུབ་པ་གང་ཡིན་པ་འདི་ནི་རིགས་པ་ཡང་མ་ཡིན་ནོ། །ཁྱད་པར་ཉིད་ཀྱིས་དེ་དེ་ལྟ་བུར་འགྲུབ་པ་ལ་ཉེ་བར་མཁོ་ན་དུས་མཚུངས་པའི་དོན་ལ་བརྟེན་ནས་ཉེ་བར་སྦྱོར་བར་བརྗོད་པར་བྱ་བ་ཡིན་ནོ། །དེས་ན་འདིར་རང་གི་རྒྱུ་ལས་དེ་ལྟ་བུའི་དངོས་པོར་མ་གྲུབ་པ་ཉིད་དོ། །དེས་ན་རང་ཡོད་པའི་དུས་བཞིན་དུ་དུས་གཞན་དང་འབྲེལ་པར་རུང་བའི་ཕྱིར་རང་གི་ངོ་བོས་འཇིག་བའི་དང་ཅན་མ་ཡིན་པའི་ཕྱིར་ན་རང་བཞིན་གྱིས་མི་གཡོ་བ་ཡིན་ནོ། །དེ་ལྟ་ཡིན་དང་དོན་གཞན་དང་ལྔ་ཡང་གཡོ་བ་ཉིད་དུ་མི་འཐད་པའི་ཕྱིར་རོ། །དེས་ན་དེ་ལྟར་དོན་གཞན་གྱི་རྒྱུ་མཚན་ཅན་ཡིན་ན་ཆོས་འགལ་བ་གནས་པས་གཞན་ཉིད་དུ་བསྒྲུབས་ཏེ། རྒྱུད་དོན་ཐ་དད་པ་
དག་ལ་འདུས་པ་ཡིན་ནོ། །དེ་ལྟ་ན་ནི་འོ་ན་ཞེས་བྱ་བ་ནི་སུན་འབྱིན་པའོ། །རྡུལ་ཕྲ་རབ་ལ་དབང་པོའི་འོད་ཟེར་དང་ཕྲད་པའི་མཚན་ཉིད་ཀྱི་དབང་པོའི་ལྡན་པ་ཡོད་པས་སོ། །ལྡན་པ་ཐམས་ཅད་ཀྱང་ཞེས་བྱ་བ་ནི་མིག་གི་འོད་ཟེར་རྣམས་ནི་ཐག་རིང་པོ་ན་གནས་པའི་རྫས་ཕྲ་མོ་རྣམས་ལྡན་པ་མེད་པ་ནི་ཐག་རིང་པོ་ཉིད་ཀྱི་ཕྱིར་རོ། །རགས་པ་རྣམས་ཀྱང་ཞེས་བྱ་བ་ནི་སུན་འབྱིན་པའོ། །དབང་པོས་ཡུལ་དེ་སྲིད་འགྲོ་མི་ནུས་ན་ནི་ཡུལ་དེ་ན་གནས་པའི་རྫས་རགས་པ་ཡང་ཅི་ལྟར་འཛིན་ཅེས་བྱ་བའི་དོན་ཏོ། །དེ་ལྟར་འབྱོར་པ་དང༌། འདུས་པ་གཞུང་མ་བཙུགས་པ་དང་རྡོ་ཚན་ལ་སོགས་པའི་མཚན་ཉིད། རྡུལ་ཕྲ་རབ་ཀྱི་ལྡན་པ་དང༌། དབང་པོ་རྣམས་ཀྱི་ལྡན་པ་ཉིད་ཕྲད་པ་ཡིན་པར་བཤད་པ་སུན་འབྱིན་པ་སེལ་བའི་སྒོ་ནས་མདུན་དུ་བྱེད་པ་ནི། འོ་ན་ཏེ་ལྡན་པ་ལས་སྐྱེས་པའི་ལྡན་པ་ཡང་ཞེས་སྨྲ་ཏེ། རྒྱུ་མཚན་གྱི་རྒྱུ་ཙམ་དུ་མི་འགྱུར་རོ་སྙམ་དུ་བསམས་པའོ། །མ་ཡིན་ཏེ་ཞེས་བྱ་བ་ནི་འགོག་པའོ། །དེ་ལ་ཞེས་བྱ་བ་ནི་གཞན་གྱི་ལུགས་ལའོ། །གང་གི་ཕྱིར་འདུ་བ་ནི་འདི་ལའོ་སྙམ་པའི་བློའི་རྒྱུ་ཡིན་བ་དེའི་ཕྱིར། འདུ་བ་ཡང་ཡོད་པ་ཡིན་ནོ། །གལ་ཏེ་འདི་ལའོ་སྙམ་པའི་བློའི་རྒྱུ་འདུ་བ་ཡིན་མོད། དེ་ལྟ་ན་ཡང་སྐབས་སུ་བབ་པ་ལ་ཅིར་འགྱུར་སྙམ་ན། ལྡན་པ་ཡང་ཞེས་གསུངས་སོ། །རྡོ་ཚན་ལ་སོགས་པའི་མཚན་ཉིད་རྡུལ་ཕྲ་རབ་རྣམས་ཀྱི་ལྡན་པ་རྟོགས་ན། འདི་ནི་དམིགས་པའི་འོད་ཟེར་དང་ལྡན་པ་ཡིན་ནོ་སྙམ་དུ་རྟོགས་པར་འགྱུར་བ་ཡིན་ནོ་ཞེས་བྱ་བའི་དོན་ཏོ། །འོ་ན་ཏེ་དེར་ལྡན་པ་མཐོང་བ་ཡང་དབང་པོ་མ་མཐོང་བའི་ཕྱིར། དབང་པོ་དང་རྡུལ་གྱི་ལྡན་པ་མི་འགལ་བའི་ཕྱིར་གང་ལ་ལྟོས་ནས་རྡུལ་ཕྲ་རབ་ཀྱི་ལྡན་པ་གཞི་ཉིད་དུ་སྟོན་ཅེ་ན་དེ་ལྟ་མ་ཡིན་ཏེ། འཐད་པས་ངེས་པ་ལ་ཡང་མ་བརྟེན་པའི་བློ་མི་འགལ་བའི་ཕྱིར་རོ། །དེ་བས་ན་ལྡན་པ་འདུ་བ་ཅན་གྱི་རྒྱུར་ཐར་བར་འགྱུར་བའི་ཕྱིར་རོ། །ཡོན་ཏན་གྱི་མཚན་ཉིད་ཉམས་པ་སོན་འདུག་གོ་སྙམ་དུ་དོགས་པའོ། །སུན་འབྱིན་པ་གཞན་བརྗོད་པའི་དོན་དུ་ཡང་ལྡན་པར་མྱུར་བར་འདུས་པ་ཡང་གླེང་སློང་བ་ནི་གཞན་ཡང་ཞེས་བྱ་བའོ། །འབྲས་བུའི་རྫས་ཡན་ལག་ཅན་གྱི་ལྡན་པ་ལྟོས་པར་བྱ་བ་མ་ཡིན་པར་འགྱུར་རོ། །དེ་མེད་ཀྱང་འཛིན་པར་ཁས་བླངས་པའི་ཕྱིར་སྙམ་དུ་དགོངས་པའོ། །འོན་ཏེ་ཞེས་བྱ་བ་ནི་གཞན་གྱིའོ། །ལན་དུ་རྡུལ་ཕྲ་རབ་ཀྱི་ཞེས་བྱ་བའོ། །བུམ་བ་ལ་སོགས་
པས་ཞེས་བྱ་བ་ནི་རྡུལ་ཕྲ་རབ་ཙམ་འདུས་པ་ཙམ་གྱི་རང་བཞིན་ནོ། །འདི་ལྟར་ཕྲ་རབ་མི་མཐོང་བ་ཡིན་ན་ནི་མཐོང་བའི་དོན་གཞན་བརྟག་པར་བྱ་བ་ཡིན་གྱི། རྡུལ་ཕྲ་རབ་རྣམས་ལ་རྟོགས་པའི་རྒྱུ་དབང་པོའི་ལྡན་པ་ཡོད་ན་དོན་གཞན་གྱིས་ཅི་བྱ། བརྗོད་མ་ཐག་པར་ནི་ཡན་ལག་ཅན་ལ་དབང་པོའི་ལྡན་པ་ལ་ལྟོས་ནས་ཅི་བྱ་ཞེས་བརྗོད་པ་ཡིན་ནོ། །ཉེས་པ་དེ་ཉིད་ཡིན་ནོ་ཞེས་བྱ་བ་འབྲས་བུའི་རྫས་ཀྱི་ལྡན་པ་དོན་མེད་དོ་ཞེས་བརྗོད་པ་གང་ཡིན་པའོ། །འོན་ཏེ་ཞེས་བྱ་བ་ནི་གཞན་གྱིའོ། །གཞན་དུ་མ་ཡིན་ནོ་ཞེས་བྱ་བ་ནི་ཡན་ལག་ཅན་ཡོད་པ་ཉིད་དུ་མ་ཡིན་པའོ། །ལན་དུ་འདི་ནི་ཞེས་བྱ་བའོ། རྡུལ་ཕྲ་རབ་རྣམས་ལ་དབང་པོའི་ལྡན་པ་མེད་ན་ཡན་ལག་ཅན་རྟོགས་པ་ཡིན་ནོ་ཞེས་ཅི་སྟེ་མི་བརྗོད་ཡན་ལག་ཅན་གྱི་ལྡན་པ་ཡོད་ན་ནི་གདོན་མི་ཟ་བར་རྡུལ་ཕྲ་རབ་ཀྱི་ལྡན་ པ་ཡོད་དགོས ་སོ་ཞེས་སྟོན་པ་ནི། ཡན་ལག་ཅན་ལྡན་ན་ཞེས་བྱ་བའོ། །ཡུལ་མཚུངས་པ་ཉིད་ཀྱང་ཡན་ལག་ཅན་རྡུལ་ཕྲ་རབ་ཀྱི་ཡུལ་ན་ཡོད་པ་ཡིན་པའི་ཕྱིར་རོ། །དེས་ན་གདོན་མི་ཟ་བར་ཁས་བླང་བར་བྱ་བ་རྡུལ་ཕྲ་རབ་ཀྱི་ལྡན་པ་ཡོད་མོད། ཡན་ལག་ཅན་གྱི་ལྡན་བའམ། ཡན་ལག་ཅན་གྱིས་ཅི་བྱ། སྔར་ནི་ལྡན་པ་དང་མི་ལྡན་པའི་རྒྱུར་ཐལ་བའི་སྒོ་ནས་གཙུག་ལག་ལ་ལྟོས་པ་ཉེས་པ་བརྗོད་པ་ཡིན་ནོ། །དེ་ལས་གཞན་པའི་གཙུག་ལག་གི་ཉེས་པ་ཡང་བརྗོད་པ་ནི་ཡང་ན་ཞེས་བྱ་བའོ། །ཡན་ལག་ཅན་ལ་ཡང་རྟོགས་པའི་དབང་པོ་ཁོ་ནས། དབང་པོའི་ལྡན་པ་བརྟགས་པ་ཡིན་ལ། །དེ་ནི་རྡོ་ཚན་ལ་སོགས་པའི་མཚན་ཉིད་ཀྱི་ལྡན་པ་ལ་ཡོད་པའི་ཕྱིར། ཅི་ལྟར་དབང་པོའི་ལྡན་པ་མེད། དེས་ན་རྫས་གཉིས་ཁོ་ན་ལ་ལྡན་པ་ཡོད་དོ་ཞེས་བྱ་བའི་རྣམ་པར་གཞག་པར་མི་འགྱུར་རོ་ཞེས་བྱ་བའི་དོན་ཏོ། །རྟེན་མཐོང་མེད་པར་ག་ལ་རྟོགས། །ཞེས་བྱ་བ་བཤད་ནས། རོ་གཟུགས་ལ་སོགས་པ་ལྡན་པ་འགལ་ཞེས་བྱ་བ་བཤད་པའི་ཕྱིར། །གཞན་ཡང་ཞེས་སྨོས་སོ། །མཐོང་བའི་ཕྱིར་ཞེས་བྱ་བ་ནི་སྐབས་ཀྱི་ལྡན་པའོ། །བཏུང་བ་ལ་སོགས་པའམ། རྡོ་ཚན་ལ་སོགས་པའི་མཚན་ཉིད་ལྡན་པ་མཐོང་བ་ལ། གཟུགས་ལ་སོགས་པ་ལྡན་པར་མི་འགྱུར་རོ། །ཅིའི་ཕྱིར་ཞེ་ན། ཡོན་ཏན་ལ་ཞེས་སྨོས་སོ། །ཡོན་ཏན་ནི་རྫས་ཁོ་ནའི་ཡིན་གྱི། ཡོན་ཏན་ལ་ནི་ཡོད་ཏན་ཡོད་པ་མ་ཡིན་ནོ། །འོན་ཏེ་གཟུགས་ལ་སོགས་པ་དེ་དག་ནི་ཡན་ལག་གི་ཡིན་གྱི། །བཏུང་བ་ལ་སོགས་པའི་ནི་མ་ཡིན་ནོ་སྙམ་ན་དེ་ལ་ཞེས་སྨོས་ཏེ། བཏུང་བའོ། །ཡན་ལག་
རྣམས་ཀྱི་ཞེས་བྱ་བ་ནི་བུར་མ་ལ་སོག་པ་རྣམས་ཀྱིའོ། །མངོན་སུམ་ལ་དེ་ལས་བཟློག་པར་སྣང་བའི་ཕྱིར་རོ་སྙམ་དུ་ཞེ་ལ་བཞག་པའོ། །ཉེ་བར་བརྟགས་པ་ལས་ཞེས་བྱ་བ་ནི་གཞན་གྱིའོ། །སུན་འབྱིན་པ་ནི་བློ་ཐ་དད་པར་ཐལ་ལོ་ཞེས་བྱ་བའོ། །དོན་འདི་ཡིན་ཏེ་བཏུང་བའི་གནས་སྐབས་ན་ཡོད་པའི་གཟུགས་ལ་སོགས་པ་ཉིད་ཉེ་བར་འདོགས་པ་ཡིན་ནོ་ཞེས་བྱ་བར་ནི་མི་རིགས་ཏེ། དེ་ནི་དངོས་སུ་ཉམས་སུ་མྱོང་བའི་ཕྱིར་རོ། །འཇིག་རྟེན་བཏུང་བ་ལ་བུ་རམ་ལ་སོགས་པ་རྫས་དུ་མའི་རང་བཞིན་དུ་ཐ་སྙད་འདོགས་པ་ཡང་མ་ཡིན་གྱི། འོན་ཀྱང་དེའི་གནས་སྐབས་ན་ཡོད་པ་ཉིད་དུའོ། །དེ་ལྟ་བུའི་ཐ་སྙད་ཡོད་དུ་ཆུག་པ་དེ་ལྟར་ན་ཡང༌། བཏུང་བ་ལ་བློ་ཐ་དད་པ་ཡོད་པར་ཐར་བར་འགྱུར་རོ། །བཏུང་བའི་གནས་སྐབས་ན་ཡོད་པའི་གཟུགས་ལ་སོགས་པ་སྣང་བའི་བློར་མི་འགྱུར་གྱི། །འོ་ན་ཀྱང་བུར་མ་ལ་སོགས་པ་ཡན་ལག་རྣམས་ཀྱི་གཟུགས་ལ་སོགས་པ་རྟོགས་པ་ཉིད་དུ་འགྱུར་ཏེ། དོན་གཅིག་ལ་འདུ་བས་ཉེ་བར་བཏགས་པ་ཡིན་པའི་ཕྱིར་རོ། །ཞོ་ལ་སོགས་པ་ཞེས་བྱ་བ་ནི་འཆད་པའོ། །གང་ལ་བཏུང་བ་ཞེས་བྱ་བའི་ལྡན་པ་འདུ་བ་དེ་ཉིད་ལ། གཟུགས་ལ་སོགས་པ་ཡིན་པའི་ཕྱིར། །དོན་གཅིག་ལ་འདུ་བ་ཡིན་གྱི་བཏུང་བའི་གནས་སྐབས་ན་ཡོད་པའི་རོ་དང་གཟུགས་གཞན་དམིགས་པར་མི་འགྱུར་རོ་ཞེས་བྱ་བ་ལྷག་མའོ། །གལ་ཏེ་ཉེ་བར་གཏུགས་པའི་མཐུ་ཁོ་ནས་གཟུགས་ལ་སོགས་པ་འགའ་ཞིག་ཏུ་འགྱུར་བ་ཡིན་ཏེ། དེ་ལྟ་མ་ཡིན་ན་གང་དུ་ཉེ་བར་འདོགས་པ་ཞེས་པ་རྒྱལ་མི་མཁས་པ་དག་རྩོད་པ་སྨྲ་འགྱུར་བས་དེ་ལ་བཤད་པ་ནི་ལྡན་པ་ཅན་གྱི་གཟུགས་གང་ཡིན་པ་ཞེས་བྱ་བའོ། །ཉེ་བར་བཏགས་ཕྱིར་ཞེས་བྱ་བ་འདིར་བཅད་དོ། །གལ་ཏེ་འདིར་ཉེ་བར་བཏགས་པའི་མཐུ་ཡིན་ན། དེའི་ཚེ་ཉེ་བར་བཏགས་བཞིན་པའི་གཟུགས་ལ་སོགས་པ་ཉིད་འདིར་མཐོང་བར་འགྱུར་གྱི་། །གང་དུ་ཉེ་བར་གདགས་ཞེས་བརྗོད་པ་དེ་ལ་ལྡན་པ་ཉིད་ཉེ་བར་བཏགས་པའི་གཞིར་འགྱུར་མོད། དེ་ཉིད་བསྟན་པ་ནི་ལྡན་པའི་ཡང་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་གྱིའོ། གང་གིས་ཉེས་པ་འདིར་འགྱུར་བ་འདི་རྣམ་པ་ཐམས་ཅད་དུ་གཟུགས་གཞན་ཁོ་ན་སྣང་བ་ནི་མ་ཡིན་གྱི། འོ་ན་ཀྱང་གཟུགས་དང་རོ་དེ་དག་ཉིད་ཡིན་ཏེ། བུར་མ་ལ་སོགས་པ་ཡན་ལག་ལ་འདུས་པ་གང་ཡིན་པའོ། །དེ་ལྟར་མ་ཡིན་ཏེ་ཞེས་བྱ་བ་ནི་བཏུང་བའི་གནས་
སྐབས་ན། སྔ་ན་མེད་པའི་རང་བཞིན་ཅན་དུའོ། །གཅིག་ཏུ་ཞེས་བྱ་བ་ནི་དེ་དག་གཞན་ཉིད་དུའོ། །གཅིག་གིས་སྨྲས་བ་ཞེས་བ་བ་ལ་སོགས་བ་ལྟར་གཅིག་གི་སྒྲ་ནི་གཞན་གྱི་དོན་བརྗོད་པའོ། །ཡང་ན་གལ་ཏེ་བུར་མ་ལ་སོགས་པའི་ཡན་ལག་རྣམས་འདྲས་པ་ཡིན་ཡང་ནོར་བུ་མདོག་སྣ་ཚོགས་པ་འདྲེས་པ་ལྟར་ཐ་དད་པར་རྟོགས་པར་བྱ་བ་མ་ཡིན་ནམ། དེ་ཇི་ལྟར་ན་བཏུང་བའི་གནས་སྐབས་ན་གཟུགས་དང་རོ་གཞན་དམིགས་ཤེ་ན། དེ་དག་ཤིན་དུ་འདྲེས་བཞི་ཞེས་སྨོས་སོ། །ནོར་བུའི་ཕུད་བོ་ཅི་ལྟ་འདྲེས་པ་དེ་འདྲ་བར་ནི་བཏུང་བའི་གནས་སྐབས་ན་བུ་རམ་ལ་སོགས་པའི་ཡན་ལག་འདྲེས་པ་མ་ཡིན་གྱི། འོན་ཀྱང་དེ་དང་མི་འདྲ་བ་ཤིན་དུ་འདྲེས་པ་ཡིན་ནོ། །གང་གི་ཕྱིར་ཤིན་དུ་འདྲེས་པའི་བུ་རམ་ལ་སོགས་པའི་ཡན་ལག་གཅིག་ཏུ་རྟོགས་པའི་རྒྱུ་ཡིན་པ་དེའི་ཕྱིར། ལྡན་པ་ཅན་གྱི་གཟུགས་དང་རོ་ཉིད་གཟུགས་དང་རོ་གཞན་མངོན་པ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ནི་ཞེས་བྱ་བ་ནི་གྲུབ་པའི་མཐའོ། །གལ་ཏེ་དེ་དག་ཉིད་ཡིན་ན་ཅི་ལྟར་གཞན་དུ་རྟོག་ཞེས་བྱ་བའི་སུན་འབྱིན་པ་ཡལ་བར་དོར་ནས་གཞན་བརྗོད་པ། ཅི་ལྟར་གཟུགས་དང་རོ་དེ་དག་ཉིད་གཞན་དུ་མངོན་པ་དེ་བཞིན་དུ་རྡུལ་ཕྲ་རབ་ཉིད་རགས་པའི་རང་བཞིན་དུ་མངོན་པའམ། དེ་ལྟ་བུའི་ཐ་སྙད་དང་ལྡན་པར་འགྱུར་མོད། ཡན་ལག་ཅན་གྱིས་ཅི་བྱ། རྣམ་པ་གཞན་དུ་སྣང་བར་ཐལ་ལོ་ཞེ་ན། ཐ་སྙད་ལ་འཚོལ་བར་བྱ་སྟེ། ཅི་སྐད་དུ། དེ་ཡི་གཟུགས་དང་བྲལ་ན་ཡང༌། །རྣམ་པར་གཞན་དུ་སྣང་བར་འགྱུར། །ཞེས་འཆད་པར་འགྱུར་བ་བཞིན་ནོ། །དེ་ཁོ་ནར་ནི་གཞན་སྣང་བ་མ་ཡིན་ལ་མེད་པ་སྣང་བ་མ་ཡིན་ཏེ། རྡུལ་ཕྲ་རབ་ཀྱི་ཆོགས་ཀྱིས་བྱས་པ་བློའི་རྣམ་པའི་དངོས་པོ་དང་འདྲ་བ་ཁོ་ན་རིག་པའི་ཕྱིར་རོ་ཞེས་བརྗོད་ཟིན་ཏོ། །སྐབས་སུ་བབ་པ་རྡུལ་ཕྲ་བབ་སོགས་པ་ཙམ་གྱི་རང་བཞིན་བུ་རམ་ལ་སོགས་པའི་རང་བཞིན་རྣམས་ཕན་ཚུན་ཕན་འདོགས་པས་དེ་དག་ཉིད་ཁྱད་པར་ཅན་སྐྱེས་པ་ཡིན་ཏེ། དེ་ལྟ་དེ་ལྟ་བུའི་རྟོགས་པ་སྐྱེད་པར་བྱེད་པ་གང་ཡིན་པའོ། །དེས་ན་ཉེས་པ་འགའ་ཡང་མེད་དོ། །འདིས་ནི་གལ་ཏེ་ཉེ་བར་བཏགས་པ་ལས་འདོད་ན་བློ་ཐ་དད་པར་མི་འགྱུར་རོ་ཞེས་བྱ་བ་བཤད་པ་ཡིན་ནོ། །ཅི་ལྟར་ཕྲེང་རིང་ཞེས་བྱར་འགྱུར། །ཞེས་ཡང་ཞེས་བྱ་བའོ། །ཁྱད་པར་ཅན་གྱི་རྟོགས་པ་ཡིན་ནོ་ཅོག་གང་ཡིན་པ་གལ་ཏེ་དོན་ཐ་དད་པའི་རྒྱུ་མཚན་ཅན་ཡིན་ནོ། །དེའི་ཚེ་ཕྲེང་རིང་ངོ་སྙམ་དུ་དོགས་པར་མི་འགྱུར་རོ་ཞེས་
བྱ་བའི་དོན་ཏོ། །ཅིའི་ཕྱིར་ཞེ་ན། ཕྲེང་ཞེས་བྱ་བ་ནི་ཞེས་བྱ་བའོ། །གལ་ཏེ་ལྡན་པ་ལ་སོགས་པ་ཉིད་ཕྲེང་བ་ཡིན་ནམ། དེས་ན་དེ་སྐད་ཅི་སྟེ་བརྗོད་སྙམ་ན། འདི་ལྟར་ཞེས་སྨོས་སོ། །ལྡན་པ་མེད་ཕྱིར་ཞེས་བྱ་བ་ནི་ཕན་ཚུན་མ་འབྲེལ་བར་གནས་པའི་ཕྱིར་ལྡན་བ་མེད་དོ། །འདི་ལྟར་ཉེ་བར་མཚོན་པ་ཡིན་པའི་ཕྱིར། ཡོན་ཏན་གྱི་ཚིག་གི་དོན་མཐའ་དག་བཀག་པ་ཡིན་ནོ། །དེའི་ནང་ན་ལྡན་པ་སྲིད་པའི་ཕྱིར་འགོག་པ་ཡིན་ནོ། །དེ་ཉིད་ཕྱིར་ཞེས་བྱ་བ་ནི་ལྡན་པ་མེད་པ་ཉིད་ཀྱི་ཕྱིར་ཕྲེང་ནི་རྫས་མ་ཡིན་ནོ། །རྫས་ནི་ལྡན་པས་རྩོམ་པའི་ཕྱིར་རོ། །དེ་ནི་རིགས་ལ་སོགས་པ་ཡང་མ་ཡིན་ཏེ། གང་གི་ཕྱིར་རིགས་ལ་སོགས་པ་ལ་ནི་རིང་པོ་ཉིད་ཡོད་པ་མ་ཡིན་པའི་ཕྱིར་རོ། །སོགས་པའི་སྒྲས་ནི་བྱ་བ་དང་སྤྱི་དང་ཁྱད་པར་རྣམས་འཕངས་པ་ཡིན་ཏེ། དེ་དག་ཀྱང་རིང་པོའི་ཚད་དང་ལྡན་པ་མ་ཡིན་ནོ། །རྫས་ལ་ལྟོས་པའི་ཕྱིར་རོ། །དེས་ན་རིང་པོ་ལ་སོགས་པའི་ཁྱད་པར་མི་འཐད་པའི་ཕྱིར་ན་རིགས་པ་མ་ཡིན་ནོ། །རིང་པོ་ལ་སོགས་པའི་ཁྱད་པར་དང་བྲལ་བ་ཡང་རིགས་ལ་སོགས་པའི་ཁོངས་སུ་འདུ་བ་པ་མ་ཡིན་ནོ་ཞེས་བརྗོད་པ་ནི་དེ་ནི་རིགས་སོགས་ཞེས་བྱ་བའོ། །དེ་དག་ཀྱང་རིང་པོའི་ཚད་དང་ལྡན་པ་མ་ཡིན་ནོ། །ཤིང་གི་བློ་བཞིན་དུ་གཅིག་ལ་ཡང་དེ་ལྟ་བུའི་བློ་སྐྱེ་བར་ཐལ་བའི་ཕྱིར་རོ་སྙམ་དུ་དགོངས་པའོ། །གལ་ཏེ་གྲངས་གཅིག་རིང་པོ་ཡིན་ནོ་སྙམ་ན། དེ་ལྟ་ན་ཡང་རིང་པོ་ལ་སོགས་པར་མི་འཐད་དོ་ཞེས། རིགས་སོགས་ལ་ནི་རིང་ཉིད་མེད། །ཅེས་བྱ་བ་འདིས་བརྗོད་པ་ཡིན་ནོ། །བཀོད་པའི་ཁྱད་པར་གྱིས་ཞེས་བྱ་བ་ལ་སོགས་པ་ནི་སྐབས་ལ་སྦྱོར་བར་བྱེད་པའོ། །ཡིན་ཞེས་རིགས་ཞེས་བྱ་བའི་ཞེས་ཀྱི་སྒྲ་ཉེ་བར་སྡུད་པའོ། །དོན་ཅན་ནི་དང་པོར་ལྟ་བར་བྱའོ། །དེས་ན་དོན་འདིར་འགྱུར་ཏེ། གང་གི་ཕྱིར་ཕྲེང་ཞེས་བྱ་བ་འགའ་ཡང་ཡོད་པ་མ་ཡིན་པ་དེའི་ཕྱིར། ཅི་ལྟར་མངོན་པར་འདོད་པའི་གནས་སྐབས་ཁྱད་པར་གྱིས་རྣམ་པར་གནས་པ་རྣམས་ལ། རིང་པོ་ལ་སོགས་པའི་བློར་འགྱུར་བ་དེ་བཞིན་དུ་མངོན་པར་འདོད་པའི་ཁྱད་པར་དུ་གནས་བ་དེ་ཉིད་ཀྱིས་ན། ཡན་ལག་ཅན་གྱི་ཡུལ་ཅན་གྱི་བློ་དེ་ནི་རྡུལ་ཕྲ་རབ་རྣམས་ལ་ཡིན་པར་རིགས་སོ། །དཔེར་ན་ཞེས་བྱ་བ་འཆད་པར་བྱེད་པའོ། །ཐ་མའི་ཡན་ལག་ཅན་གྱི་རང་བཞིན་གྱི་མེ་ཏོག་རིགས་མི་མཐུན་པའི་རང་བཞིན་གྱི་ཕྲེང་བ་ནི་རྫས་ཀྱི་ངོ་བོ་མ་ཡིན་པའི་ཕྱིར། གནས་བའི་ཁྱད་པར་ཙམ་གྱིས་མེ་ཏོག་རྣམས་ཀྱི་ཕྲེང་བ་རིང་པོ་ཞེས་བྱ་བའི་ཐ་སྙད་དུ་འགྱུར་བ་ཡིན་
ནོ། །རང་བཞིན་དུ་ཞེས་བྱ་བ་དེ་ཁོ་ན་ལྟར་ཏེ། ཕྲེང་བ་ལ་སོགས་པའི་རིང་པོ་ཉིད་ལྟ་བུ་ཁོ་ནར་རོ་ཞས་བྱ་བའི་དོན་ཏོ། །རྩོད་པའི་གནས་སུ་གྱུར་པ་ཞེས་བྱ་བ་ནི་ཡན་ལག་ཅན་གྱི་མཚན་ཉིད་དུ་འདོད་པའི་ཡུལ་གྱི་དོན་དངོས་པོ་མ་ཡིན་ནོ། །དེ་ལྟར་རང་གི་ངོ་བོ་དང་ཞེས་བྱ་བ་ལ་སོགས་པ་བཤད་པའི་ཕྱིར། འཇུག་པར་བྱེད་པ་ནི་གང་ལས་ཞེས་བྱ་བའོ། །སྨྲས་པ་ནི་ཞེས་བྱ་བ་ལ་ཅི་ཞིག་སྨྲ་སྙམ་ན། ལྡན་པ་ལ་སོགས་པའི་ཞེས་བྱ་བའོ། །རིགས་པ་མཚུངས་པས་ན་སྐབས་ཀྱི་ལྡན་པ་སུན་དབྱུང་བ་ཉེ་བར་མཚོན་པར་བྱེད་པར་སྨྲས་པ་ནི། གཟུགས་ལ་སོགས་པ་ཞེས་སྨོས་སོ། །འབའ་ཞིག་ཏུ་ཟད་དོ་ཞེས་བྱ་བ་ནི་རྫས་གཞན་བཀག་པའི་ཕྱིར་རོ། །འབྱོར་པ་ཡིན་ནོ་ཞེས་བྱ་བ་ནི་གཞན་གྱིའོ། །དེ་བཞིན་དུ་ཞེས་བྱ་བ་ནི་དམིགས་པའི་སྤྱོད་ཡུལ་དུའོ། །འདི་གཉིས་འབྱོར་པ་ཡིན་ནོ་སྙམ་པའི་བློས་ནི་ལྡན་པ་ཁྱད་པར་ཉིད་དུ་འཕེན་པར་བྱེད་དོ་ཞེས་བྱ་བའི་དོན་ཏོ། །སུན་འབྱིན་པ་ནི་འབྱོར་པ་ཞེས་བྱ་བ་ནི་ཞེས་བྱ་བའོ། །ལྡན་པ་ཅན་ཉིད་ཀྱི་ཞེས་བྱ་བ་ནི་དོན་གཉིས་ལས་ཐ་དད་པར་གྱུར་པ་ལྡན་པའི་རྟོགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །འོ་ན་སྒྲ་ལ་ཡུལ་ཐ་དད་པ་ཡོད་པ་ཡིན་ནོ་སྙམ་ན། འབྱོར་པའི་སྒྲ་ལ་ཞེས་སྨོས་སོ། །ཡང་གི་སྒྲས་ནི་ལྡན་པ་ཅན་གྱི་སྒྲ་སྡུད་པའོ། །གཞན་ནི་ཡོད་པ་མ་ཡིན་ནོ་ཞེས་བྱ་བ་ནི་ལྡན་པའི་ཁྱད་པར་རོ། །འོ་ན་ལྷག་པར་ཞེན་པ་ལ་ལྟོས་ནས་ཀྱང༌། སྒྲ་དང་རྟོགས་པ་དག་གི་ཡུལ་གང་ཡིན་སྙམ་ན། དེར་ནི་ཞེས་སྨོས་སོ། །ལྡན་པ་ཅན་དེ་ལས་གཞན་འབྱོར་བའི་བླའི་ཡུལ་དུ་གྱུར་པའི་ལྡན་པ་ནི་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་འབྱོར་པའི་སྒྲ་བརྗོད་པར་བྱ་བ་མེད་དོ། །ལྡན་པ་གཞན་ཡོད་པ་མ་ཡིན་ནོ་ཞེས་བྱ་བ་འདི་ག་ལས་ཤེ་ན། ཅི་ལྟར་ཞེས་གསུངས་སོ། །བར་མ་ཆོད་པའི་དོན་གཉིས་ལས་ཐ་དད་པར་གནས་པ་ནི་མེད་དོ་ཞེས་བྱ་བའི་དོན་ཏོ། །འོ་ན་ཅི་ལྟར་ལྡན་པ་ལ་སོགས་པའི་ཐ་སྙད་ཐ་དད་པར་འགྱུར་སྙམ་ན། རྗེས་འགྲོ་ཞེས་གསུངས་སོ། །ལྡན་པར་མ་གྱུར་པ་དག་ལ་གནས་སྐབས་དེ་མ་དམིགས་པའི་ཕྱིར་ན། གནས་སྐབས་དེ་ལྡོག་པར་བརྗོད་པ་ཡིན་ནོ། །དེ་དག་ནི་དམིགས་པའི་ཕྱིར་རྗེས་སུ་འགྲོ་བའོ། །གལ་ཏེ་ལྡན་པ་ལ་སོགས་པ་སྒྲུབ་པར་བྱེད་པའི་མངོན་སུམ་ཉིད་ཡོད་པ་མ་ཡིན་ནམ། དེ་ལ་ལོག་པར་རྟོག་པ་ཅི་འདྲ་བ་ཞིག་ཡོད་ཅེ་ན། མངོན་སུམ་གྱིས་ནི་ཞེས་གསུངས་སོ། །དེ་ལྟ་བུར་གྱུར་པ་ནི་བྲལ་བར་གྱུར་པའོ། །འདི་འདྲ་བར་ཞེས་བྱ་བ་ནི་བར་མཆོད་པར་རོ།།
གང་གི་ཕྱིར་ལྡན་པ་སྣང་བ་མེད་པའི་གཏན་ཚིགས་དེས་ན། དེ་ཉིད་ཅེས་བྱ་བ་བར་མཆོད་པའི་མཚན་ཉིང་གང་ཡིན་པའོ། །ལོགས་ཤིག་ལ་ཞེས་བྱ་བ་རྣམ་པར་དབྱེ་བའི་དངོས་པོ་གཉིས་ལས་ཁྱད་པར་གཞན་སྤངས་པས་འཇོག་པ་ཡིན་ནོ། །དེ་བཞིན་དུ་ཁྱད་པར་གཞན་ལ་ཡང་ཅི་རིགས་པར་བརྗོད་པར་བྱའོ། །གང་གི་ཕྱིར་དེ་ལྟར་ཡན་ལག་ཅན་དང་ཡོན་ཏན་ལ་སོགས་པ་མངོན་སུམ་ལ་ཐ་དད་པར་སྣང་བ་མེད་པ་དེ་ཉིད་ཀྱི་ཕྱིར། སྒྲ་ཤེས་ཏེ་སྒྲ་དང༌། རྣམ་པར་རྟོག་པའི་བློ་གང་ཡིན་པ་དེ་གཉིས་ནི་བརྟགས་པའི་དོན་ཅན་ཡིན་ཏེ། དངོས་པོར་རང་གི་མཚན་ཉིད་ཀྱི་ཡུལ་ཅན་ནི་མ་ཡིན་ནོ་ཞེས་ཁྱབ་བ་ཡིན་ནོ། གང་གིས་བརྟགས་པའི་ཡུལ་ཅན་ཡིན་ཞེ་ན། བརྡའི་དུས་ན་ཡོད་པ་དངོས་པོ་ཐ་དད་པའི་རྗེས་སུ་འབྲང་བའི་རྣམ་པར་རྟོག་པས་བརྟགས་ཏེ། བརྟག་པར་བྱ་བའི་དོན་འདི་གཉིས་ལ་ཡོད་པའི་ཕྱིར་ཏེ། དེ་བརྟགས་པའི་དོན་ཅན་ཡིན་ནོ། །དཔེར་ན་ཡོན་ཏན་ལ་སོགས་པ་རྣམ་པར་རྟོག་པ་ཙམ་ལ་སྣང་བ་རྣམས་ལེའམ། ཡང་ན་ཞི་གང་དང་མ་སྐྱེས་པ་དག་ལ་སྟེ། ར་མ་དང་སྟོབས་ཅན་དང༌། དུང་ལ་སོགས་པའི་རྣམ་པར་རྟོག་པ་དང་སྒྲ་བཞིན་ནོ། །རང་ཉིད་མཚན་ཉིད་མེད་པར་ནི་གཉི་ག་ལ་མ་གྲུབ་པའི་ཕྱིར། རྣམ་པར་རྟོག་པ་ཙམ་གྱིས་ཡུལ་ཡིན་པ་ལ་རྩོད་པ་མེད་དོ། །བཤད་བ་ནི་ཡོན་ཏན་ལ་སོགས་པ་དང༌། ཞིག་པ་དང༌། མ་སྐྱེས་པ་ལ་སོགས་པ་ལ་གཅིག་ཉིད་ཀྱི་ཐ་སྙད་དུ་བྱེད་པ་དཔེར་བརྗོད་པར་འགྱུར་རོ། །གལ་ཏེ་སྒྲ་དང་རྣམ་པར་རྟོག་པ་དག་དེ་ཁོ་ནར་དངོས་པོའི་ཡུལ་ཅན་མ་ཡིན་ནམ། དེས་ན་དེ་ཐ་དད་པ་ལ་སོགས་པ་ལས་དངོས་པོ་ཐ་དད་པར་ཅི་ལྟར་མི་འགྱུར་ཞེ་ན། སྒྲའི་ཤེས་པ་ཞེས་གསུངས་སོ། །མི་མཐུན་པ་ནི་གཞན་ཉིད་དོ། །འོ་ན་ཅི་ལྟར་ཡིན་ཞེ་ན། འོན་ཀྱང་ཞེས་གསུངས་སོ། །རྣམ་པར་རྟོག་པ་མི་མཐུན་པས་དངོས་པོ་མི་མཐུན་པ་མ་ཡིན་ནོ་ཞེས་བྱ་བ་འདི་ག་ལས་ཤེ་ན། རྣམ་པར་རྟོག་པ་ཅན་གྱི་བློ་ནི་ཞེས་གསུངས་སོ། །བསླད་པར་འགྱུར་བ་ནི་རྣམ་པའི་ཁྱད་པར་ཡོངས་སུ་འཛིན་པར་སྐྱེས་པ་ན་དེ་འདྲ་བ་ཉིད་ཀྱིས་ཕྱི་རོལ་དུ་མངོན་པར་ཞེན་པར་འགྱུར་བ་ཡིན་ནོ། །དེ་ལས་ཞེས་བྱ་བ་རྣམ་པར་རྟོག་པ་ཅན་གྱི་བློ་དེ་ལས་སོ།། འོན་ཏེ་ཡང་ལྡན་པ་ལ་སོགས་པའི་བློ་དག་ནི་དེ་ལྟ་མ་ཡིན་པ་དེས་ན། དེ་ལས་དོན་གྱི་དེ་ཉིད་ཇི་ལྟར་གནས་པར་མི་འགྱུར་སྙམ་ན། དེ་ལ་ཞེས་སྨོས་སོ། །ལྡན་པ་ལ་སོགས་པའི་བློ་ཡང་བརྟགས་པའི་ཐ་དད་པའི་རྗེས་སུ་འཇུག་བས་ན། བག་ཆགས་ཀྱི་སྟོབས་ལས་སྐྱེས་པ་ཉིད་ཡིན་ནོ་སྙམ་དུ་དགོངས་པའོ། །དེས་ནི་ལྡན་པ་ལ་
སོགས་པ་བརྟགས་པ་ཉིད་ཐ་དད་པ་སྟེ། ཐ་དད་པའི་ཐ་སྙད་དུ་བྱ་བ་ཡིན་ནོ། །དོན་གྱི་དེ་ཁོ་ན་ཉིད་ནི་ལྡན་པ་ལ་སོགས་པར་ཐ་དད་བ་མ་ཡིན་ནོ། །གལ་ཏེ་བརྟགས་པའི་དོན་ཐ་དད་པ་ཡང་དོན་ཐ་དད་པ་ཉིད་མ་ཡིན་ནམ་དེས་ན་རྣམ་པར་རྟོག་པ་བག་ཆགས་ཀྱི་སྟོབས་ལས་སྐྱེས་པ་ཡིན་ནོ་ཞེས་ཅི་སྟེ་བརྗོད་སྙམ་ན། རྣམ་པར་བརྟགས་པའི་དོན་ཐ་དད་པ་ནི་ཞེས་གསུངས་སོ། །ཐུག་པ་མེད་མོད་སྐྱོན་ཅི་ཡོད་སྙམ་པ་ལ། དེ་ལྟར་ཁས་ལེན་ན་ནི་ཞེས་གསུངས་སོ། །ཕན་ཚུན་རྩོད་པར་ཡང་མི་འགྱུར་རོ་ཞེས་བྱ་བ་ནི་ཐམས་ཅད་ཀྱི་དོན་མཐའ་དག་གྲུབ་པའི་ཕྱིར་རོ། །བག་ཆགས་ལས་བརྟགས་པའི་ཞེས་བྱ་བ་ནི་བག་ཆགས་ལས་སྐྱེས་པའི་རྣམ་པར་རྟོག་པས་བརྟགས་པ་ཞེས་བྱ་བའི་དོན་ཏོ། རྣམ་པར་རྟོག་པ་དེ་ཅི་འདྲ་བ་ཞིག་ཡིན་ཞེས་བྱ་བ་ལ་ནི་ཡིད་ལ་བཞག་པའོ། །གང་གིས་རྣམ་པར་བརྟགས་པའི་དོན་ལ་སྒྲ་དང་བློ་རྗེས་སུ་འགྲོ་བ་དང༌། ལྡོག་པ་དག་གིས་འཇུག་པ་དེ་ཉིད་དོ། །རྗེས་སུ་འགྲོ་བ་ཅན་གྱི་སྐྱེས་བུ་དང་དབྱིག་པ་ལ་སོགས་པ་ནི་རྒྱུད་ལ་ལྟོས་ཏེ་ནང་གི་དབྱེ་བ་ཞེས་བྱ་བ་བྲལ་བ་ལས། ཐ་དད་པ་གང་ཡིན་པ་རེས་འགའ་བར་བརྟགས་པ་ཐ་དད་པ་ལྟ་བུར་དེ་ཐ་དད་པ་ཉིད་ནི་མ་ཡིན་པར་སྣང་བའོ། །དངོས་པོ་དེ་ཁོ་ན་མེད་པའི་ཕྱིར་ན་ཐ་དད་པ་སྣང་བ་ཙམ་ཡིན་ནོ། །འོན་ཏེ་ཡོན་ཏན་ལ་སོགས་པ་ལ་གྲངས་ཡོད་པ་ཉིད་དེ། དེས་ན་གཅིག་གོ་ཞེས་རྟོག་པ་ཡིན་ནོ་སྙམ་ན། དེ་ལ་གྲངས་ནི་མེད་དོ་ཞེས་གསུངས་སོ། །དེ་ལ་ཞེས་བྱ་བ་ནི་ཡོན་ཏན་ལ་སོགས་པ་རྣམས་ལའོ། །རྟེན་གྱི་གྲངས་ཉེ་བར་བཏགས་པ་ལས་གཅིག་ཅེས་ཐ་སྙད་དུ་བྱེད་པ་ཡིན་ནོ་སྙམ་ན། རྟེན་གྱི་ཞེས་གསུངས་སོ། །ཡོན་ཏན་གྱི་རྟེན་ནི་རྫས་ཡིན་ནོ། །ཅིའི་ཕྱིར་སྙམ་ན་རྟེན་ཐ་དད་བྱ་ཞེས་གསུངས་སོ། །སྤྱི་ལ་སོགས་པ་ཞེས་སོགས་པའི་སྒྲས་ནི་ཡན་ལག་ཅན་ནོ། །རྫས་དུ་མ་ཅན་གྱི་གྲངས་དང་ལྡན་པ་ལ་སོགས་པ་ཉིད་ནི་གཅིག་ཉིད་དུ་ཐ་སྙད་བྱེད་དོ། །དེས་ན་རྟེན་གྱི་གྲངས་ཉེ་བར་བཏགས་པ་ལས་དེ་ལྟར་ཐ་སྙད་བྱེད་པ་ནི་མ་ཡིན་ནོ་སྙམ་དུ་དགོངས་པའོ། །འོ་ན་རྟེན་གྱི་གྲངས་ཉེ་བར་བཏགས་པ་མེད་པའི་ཕྱིར་འདི་ལ་གཅིག་ཉིད་ལ་སོགས་པའི་ཐ་སྙད་དུ་ཇི་ལྟར་འགྱུར་ཞེས་བརྗོད་པ་ནི་ཞེས་པ་དང་ཞེས་བྱ་བ་ལ་སོགས་པའོ། །འདིར་དོགས་པ་བསུ་ནས་ལན་འདེབས་པ་ནི། གལ་ཏེ་ཞེས་བྱ་བ་ལ་སོགས་པའོ། །གལ་ཏེ་ཞིག་པ་དང་མ་སྐྱེས་པ་ལ་སོགས་པ་འདིར་གཅིག་ཉིད་ལ་སོགས་པའི་ཐ་སྙད་ཀྱི་རྒྱུན་ནི་གཅིག་ཉིད་དུ་བརྟགས་པ་ཡིན་པར་འདོད་ན། དེའི་ཚེ་གང་གི་རྒྱུ་མཚན་དུ་དེ་
འདོད་པ་སྟེ། སྒྲ་དང་ཤེས་བ་གང་དག་གི་རྒྱུ་མཚན་དུ་སྟེ་སྐྱེད་བྱེད་དུ་འདིར་འདོད་པའི་ཉེ་བར་བརྟགས་པ་དེ་ཉིད་དངོས་པོ་ཐམས་ཅད་ལ། སྒྲ་དང་ཤེས་པ་དེ་དག་གི་རྒྱུར་ཅི་སྟེ་མི་འདོད། དེ་འདོད་ན་ཅུང་ཟད་ཆད་པ་ནི་མེད་ད་སྙམ་དུ་དགོངས་པའོ། །དེ་ཉིད་གསལ་བར་བྱེད་པ་ནི་ཐོག་མ་མེད་པའི་ཞེས་བྱ་བ་ལ་སོགས་པའོ། །ཐོག་མ་མེད་པའི་རྟོག་པས་གཅིག་ཉིད་ལ་སོགས་པར་ལྷག་པར་སྒྲོ་བཏགས་པ་སྟེ་ཉེ་བར་བཏགས་པ་གང་ཡིན་པ་དེ་ཉིད་རྒྱུ་མཚན་ཡིན་གྱི་གཞན་དུ་མཐོང་བ་ནི་གཞན་དུ་ལྷག་པར་སྒྲོ་བཏགས་པའི་རྒྱུ་མཚན་མ་ཡིན་ནོ། །སྒྲ་དང་ཤེས་བ་དག་གི་ཞེས་བྱ་བ་ནི་སྐབས་ལས་སོ། །གཅིག་ཉིད་ལ་སོགས་པ་དངོས་བརྟགས་པའི་སྐབས་ནི་ཡོད་པ་མ་ཡིན་ནོ། །གལ་ཏེ་ཀུན་ལ་ཉེ་བར་བཏགས་མིན་ཞེས་བྱ་བ་ནི་གཙོ་བོ་ལ་ལྟོས་པའི་ཕྱིར་རོ་སྙམ་དུ་དགོངས་པའོ། །ལན་དུ་ཐ་དད་ཁྱད་པར་ཞེས་བྱ་བའོ། །ཐ་དད་པའི་ཁྱད་པར་ཅན་མ་ཡིན་ཡང་འཁྲུལ་བ་མེད་པའི་རྟོག་པའི་ཡུལ་ཉིད་ཀྱི་གཙོ་བོ་ཡིན་པའི་ཕྱིར་རོ་ཞེས་བྱ་བར་དགོངས་པ་ཡིན་ནོ། །རྩོད་པ་ནི་ཁྱད་པར་ཐ་དད་པ་མེད་པ་ལ་ཨུཏྤལ་དང་སྔོན་པོ་ལ་སོགས་པའི་སྒྲ་ཐ་དད་དོན་མེད་དོ་ཞེ་ན། གྲུབ་པའི་མཐའི་ནི་དོན་གཞན་ཞེས་བྱ་བ་ལ་སོགས་པའོ། །གལ་ཏེ་དེར་ཡང་ཞེས་བྱ་བ་ནི་གཞན་གྱི་སྟེ། ཡོན་ཏན་ལ་སོགས་པར་ཡང་ངོ༌། །ལན་དུ་ཡོན་ཏན་རྫས་ནི་ཞེས་བྱ་བའོ། །གཞན་གྱི་ཕྱོགས་བསལ་ནས་རང་གི་འདོད་པ་ཉེ་བར་སྡུད་པ་ནི་དོན་གཞན་མ་ཡིན་པ་ཉིད་ཀྱི་དོན་ཏེ། ཡུལ་གང་ལ་ཡང་ཡོད་པའི་སྒྲ་དང་ཤེས་པ་དེ་དག་ལ་དེ་སྐད་ཅེས་བརྗོད་དོ། །དེ་དག་གི་ངོ་བོ་ནི་དེ་ཉིད་དོ། །ལྡོག་པའི་དབྱེ་བ་ལས་ཐ་དད་པ་ནི་སྒྲ་དང་རྟོགས་པའོ། །གལ་ཏེ་ཞེས་བྱ་བ་ནི་འཆད་པའི་གཙོ་བོ་ཅི་ལ་བརྗོད་སྙམ་ན། གཙོ་བོ་ཡང་ཞེས་གསུངས་སོ།། འདི་ལས་བཟློག་པ་ནི་ཕལ་པ་ཡིན་ནོ་ཞེས་བརྗོད་པ་ནི་ཁྱད་པར་ཞེས་བྱ་བའོ། །དེའི་ཕྱིར་ཐམས་ཅད་ལ་ཉེ་བར་བཏགས་པ་ནི་མི་འཐད་དོ། །སངས་རྒྱས་ལ་ནི་གཙོ་བོ་མེད་པའི་ཕྱིར་ཉེ་བར་བཏགས་པ་མི་འཐད་དོ་ཞེས་བརྗོད་པ་ནི་ཁྱད་པར་ལ་ནི་ཞེས་བྱ་བའི་ཐ་དད་པའི་ཁྱད་པར་ཅན་ཁོ་ནར་གཙོ་བོ་ཡིན་གྱི། ཁྱད་པར་ཐ་དད་པ་ཅན་མ་ཡིན་པ་ནི་མ་ཡིན་ནོ་ཞེས་བྱ་བ་ཉིད་གང་ལས་ཡིན་ཏེ་མ་ཡིན་པ་ཉིད་དོ། །ཁྱད་པར་ཐ་དད་པ་ཅན་མ་ཡིན་ཡང་གཙོ་བོ་ཉིད་དོ། །དེ་ཉིད་བརྗོད་པ་ནི་ཁྱད་པར་ཐ་དད་པ་མེད་ཀྱང་ཞེས་བྱ་བའོ། །ཐ་དད་པ་ཁྱད་པར་གཙོ་བོ་ཞེས་བྱ་བ་ཉིད་ཀྱང༌། གང་ལས་ཞེས་ཁོང་ནས་དབྱུང་བར་བྱ་བ་ཀྱང་གི་དོན་སྨྲས་པ་ནི་གཞན་ཡང་ཞེས་
བྱ་བའོ། དེའི་ཚེ་ཞེས་ཁོང་ནས་ཕྱུང་བ་ལ་རྣམ་པ་འདི་ལྟ་བུ་མཐའ་དག་ཅེས་སྦྱར་བར་བྱའོ། །ཁྱད་པར་ཐ་དད་པ་དང་ལྡན་པར་མ་དམིགས་པ་རྣམ་པ་འདི་ལྟ་བུ་མཐའ་དག་གོ །དབྱུག་བ་ཅན་ལ་སོགས་པ་ཁོ་ན་གཙོ་བོར་འགྱུར་རོ་ཞེས་བྱ་བའི་དོན་ཏོ། །ཁྱད་པར་ཅན་ཡང་ཞེས་བྱ་བ་ནི་གཅིག་ཉིད་ལ་སོགས་པའི་ཁྱད་པར་འབའ་ཞིག་ཏུ་ནི་མ་ཟད་པའི་སྐྱ་བ་སེང་གི་བུ་ལས་བྱུང་བར་འགྱུར་རོ་ཞེས་བྱ་བ་ལ་སོགས་པ་ནི་ཁྱད་པར་ཅན་སྐྱ་བ་སེང་གི་བུ་ཡང་ཉེ་བར་བཏགས་པ་ཡིན་ནོ། །གཡུལ་ངོར་བརྟན་པ་ལ་སོགས་པའི་རང་གི་མཚན་ཉིད་མེད་པའི་ཕྱིར་རོ། །ཐ་དད་པ་མེད་པ་ལ་ཐ་དད་དོན་མེད་ན་ཞེས་བྱ་བ་བཤད་པའི་ཕྱིར། གལ་ཏེ་ཞེས་སྨོས་སོ། །ཅིའི་ཕྱིར་ཞེ་ན། དེ་ནི་འཇུག་པའི་རྒྱུ་མཚན་ཐ་དད་པ་ཞེས་སྨོས་སོ། །དེ་ཞེས་བྱ་བ་ནི་གཞི་མཐུན་པའོ། །དེ་ལ་ཨུཏྤལ་སྔོན་པོ་ལ་སོགས་པའི་སྒྲ་རྣམས་རྣམ་གྲངས་པ་ཡིན་པ་སྤངས་པའི་ཕྱིར་རེ་ཞིག་གཞན་གྱིས་ཀུན་བརྟགས་པའི་གཞི་མཐུན་པ་སེལ་བར་བྱེད་པ་ནི། དེ་ལ་རྗོད་པར་མི་བྱེད་པ་ཡིན་ཏེ་ཞེས་བྱ་བའོ། །ཐ་དད་པར་གྱུར་པར་བྱེད་པས་ན་ཐ་དད་དེ། གཞི་མཐུན་པ་གང་ལ་འཇུག་པའི་རྒྱུ་མཚན་ཁྱད་པར་ཐ་དད་པ་ཡོད་པ་ནིའོ། །སྒྲ་དག་གམ་དོན་དག་གི་གཞི་མཐུན་པ་དེར་འགྱུར་ཏེ་མ་ཡིན་པ་ཉིད་དོ། །གང་གི་ཚེ་ཞེ་ན། དེའི་ཞེས་བྱ་བ་གཞན་ལ་རག་ལས་པ་མེད་པའི་ཁྱད་དང་ཁྱད་པར་ཙམ་སྒྲ་ལ་སྣང་བ་ན་སྟེའོ། །དེ་བས་ནའོ། །སྒྲ་གཉིས་ཀྱི་གཞི་མཐུན་པ་ནི་དོན་གཅིག་ལ་འཇུག་པ་ཡིན་ལ། དོན་གཉིས་ཀྱི་གཞི་མཐུན་པ་ནི་དོན་གཅིག་ལ་གནས་པ་ཡིན་ནོ། །སོ་སོར་ངེས་པའི་དོན་བརྗོད་པའི་ཕྱིར་རོ་ཞེས་བྱ་བ་ནི་སྔོན་པོའི་སྒྲས་ཡོན་ཏན་སྔོན་པོ་ཉིད་བརྗོད་ལ། ཨུཏྤལའི་སྒྲས་ནི་ཨུཏྤལའི་རིགས་ཉིད་བརྗོད་པ་ཡིན་ནོ། །དེས་ན་དོན་གཅིག་ལ་འཇུག་པར་ཅི་ལྟར་འགྱུར། ཡོན་ཏན་ནམ་རིགས་མཚོན་ཟིན་པ་དེའི་གཞི་རྫས་མཚན་པ་ཡིན་ཏེ། དེ་མེད་ན་མི་འབྱུང་བའི་ཕྱིར་རོ། །དེས་སྒྲ་གཉིས་གཞི་མཐུན་པར་འཇུག་པ་ཡིན་ནོ་སྙམ་དུ་བསམས་པའོ། །སུན་འབྱིན་པ་ནི་གཅིག་ཉིད་དང་ཞེས་བྱ་བའོ། །སྔོན་པོའི་སྒྲས་ཡོན་ཏན་སྔོན་པོ་ཉིད་དང་ལྡན་པའི་རྫས་བརྗོད་པ་ན། ཨུཏྤལའི་རིགས་དང་ལྡན་པ་ཉིད་བརྗོད་པར་འགྱུར་རོ། །མེད་དོ་ཞེས་བྱ་བ་ནི་གཞི་མཐུན་པ་སྟེ། སྦྱོར་བ་མེད་པའི་ཕྱིར་རོ། །དོན་དག་གམ་ཞེས་བྱ་བའི་ཕྱོགས་ལ། སུན་དབྱུང་བ་བརྗོད་པ་ནི་དོན་རྣམས་ཞེས་བྱ་བའོ། །སོ་སོར་ངེས་པའི་
དོན་བརྗོད་བཞིན་པའི་སྒྲ་དག་གི་དོན་དག་ནི་དང་དབང་ཁོ་ནར་སྣང་བ་ཡིན་ནོ། །མཚོན་ཟིན་པས་མཚོན་པ་ལ་དམིགས་ན་ཡང་ཉེས་བ་དེ་ཉིད་ཡིན་ནོ། །གལ་ཏེ་དེ་དག་གཉིས་དང་རང་དབང་དུ་སྣང་བ་མ་གྲུབ་སྟེ། དེ་དག་ནི་འགའ་ཞིག་དང་འབྲེལ་བར་རྟོགས་པ་ཡིན་པས་ན་དོན་གཅིག་པོ་དེ་ཉིད་དང་གཞི་ཡིན་ནོ་སྙམ་ན། འབྲེལ་པ་ཡོད་པ་ཡིན་ན་ཡང་ཞེས་སྨོས་ཏེ། མངོན་སུམ་གྱིས་མ་དམིགས་པའི་ཕྱིར། འབྲེལ་པ་ནི་མེད་པ་ཁོ་ནའོ། །དེ་ལྟ་མོད་ཀྱི་འབྲེལ་པ་ཡོད་པ་ཡིན་ན་ཡང་ཇི་ལྟར་འབྲེལ་པ་ཅན་ཡིན་ཏེ། མ་ཡིན་པ་ཁོ་ནའོ། །འབྲེལ་པ་གཞན་རྟོག་ན་ནི་ཐུག་པ་མེད་པར་ཐལ་བའི་ཕྱིར་རོ་སྙམ་དུ་དགོངས་པའོ། །འོན་ཏེ་རྗེས་སུ་དཔག་པ་ལས་རང་གི་ངོ་བོ་ཁོ་ནས་འབྲེལ་བ། འབྲེལ་པ་ཅན་དུ་གྲུབ་པོ་སྙམ་ན། ཇི་ལྟར་འཇལ་བ་ཡིན་ཞེས་གསུངས་སོ། །དེ་དང་འབྲེལ་པའི་རྟགས་མ་གྲུབ་པའི་འབྲེལ་པ་རང་གི་ངོ་བོས་འབྲེལ་པ་ཅན་ཡིན་པར་གང་ལས་འཇལ་བ་ཡིན། དེས་ན་འབྲེལ་པ་མ་གྲུབ་པའི་ཕྱིར་ན་དེ་དག་ནི་འགའ་ཞིག་གིས་འབྲེལ་པ་ཅན་དུ་རྟོགས་པ་མ་ཡིན་ནོ་ཞེས་བྱ་བར་དགོངས་པའོ། །སོ་སོར་ངེས་པ་ནི་དོན་བརྗོད་པའི་ཕྱིར་སྒྲ་དག་ནི་གཞི་མཐུན་པ་མ་ཡིན་ནོ་ཞེས་བརྗོད་པ་གང་ཡིན་པ་དེ་ལ་གཞན་གྱི་ལན་གྱི་དོགས་བ་བསུ་བ་ནི། གལ་ཏེ་ཞེས་བྱ་བའོ། །དོན་ནི་འདི་ཡིན་ཏེ། འབྲེལ་པ་རྟོགས་པས་ཅི་བྱ་སྟེ། འདུ་བའི་འབྲེལ་བའི་སྟོབས་ཀྱིས་སྔོན་པོ་ལ་སོགས་པ་ཡོན་ཏན་གྱི་མཚན་ཉིད་ཀྱི་དོན་ནི་སྔོན་པོ་ལ་སོགས་པའི་སྒྲ་ལས་རྫས་དང་ཐ་མི་དད་པར་རྟོགས་པའོ། །དེས་ན་རྫས་གཅིག་གི །གཞན་གྱི་དབང་དུ་རྟོགས་པའི་དོན་དག་དང༌། དེའི་སྒྲ་དག་གཞི་མཐུན་པ་ཡིན་ནོ་སྙམ་དུ་སེམས་ན། ལན་དུ་གཅིག་ཉིད་ཀྱིས་ཏེ། སྔོན་པོའི་སྒྲས་གང་ལ་ཡོན་ཏན་སྔོན་པོ་འདུ་བ་དེ་རྟོགས་ཕྱིར། དེ་ལ་འདུ་བ་ཨུཏྤལའི་རིགས་ཉིད་ཀྱང་རྟོགས་པ་ཉིད་དོ། །དེས་ན་ཨུཏྤལའི་སྒྲ་ནི་དོན་མེད་པར་འགྱུར་ཏེ། རྟོགས་ཟིན་པའམ་རྟོགས་པར་བྱེད་པའི་ཕྱིར་རོ། །དེས་ན་སྦྱོར་བ་མེད་པའི་ཕྱིར་གཞི་མཐུན་པར་ག་ལ་འགྱུར། ཨུཏྤལའི་སྒྲ་སྦྱར་བ་ནི་རྟོགས་ཟིན་པ་རྟོགས་པར་བྱ་བའི་དོན་ཉིད་དུ་ཡིན་ནོ་སྙམ་ན། གལ་ཏེ་གཞན་གྱིས་ཞེས་རྗེས་སུ་བརྗོད་པ་གསུངས་སོ། །དོན་དེ་ཉིད་ཅེས་བྱ་བ་ནི། དེ་ཅམ་ཞིག་སྔོན་པོའི་སྒྲས་བསྟན་པའི་དོན་གྱི་ཚོགས་སོ། །ཡོན་ཏན་སྔོན་པོའི་མཚན་ཉིད་ཀྱི་
དོན་ནི་སྔོན་པོའི་དོན་ཏོ། །དེ་ལ་སོགས་པའི་དེ་དང་འབྲེལ་པ་ཙམ་མོ། །སྔོན་པོའི་སྒྲ་ལས་རྫས་ཀྱི་རང་བཞིན། ཨུཏྤལའི་རིགས་དང་འབྲེལ་བར་ནི་མི་རྟོགས་སོ་སྙམ་ན། ལན་དུ་སྔོན་པོའི་རྫས་འདུ་བ་ཅན་གྱི་རྟོགས་པ་ན། དེ་དང་འབྲེལ་པའི་ཨུཏྤལ་ཉིད་མ་རྟོགས་པ་གཞན་ནི་ཡོད་པ་མ་ཡིན་ཏེ། དེ་ནི་དེ་ལ་འདུ་བའི་ཕྱིར་རོ། །དཔེ་བཤད་པ་ནི་ཇི་ལྟར་ཞེས་བྱ་བའོ། །དེའི་དོན་ནི་འདི་ཡིན་ཏེ། གང་གིས་གང་དང་འདུ་བ་ཅན་བཟུང་བ་དེ་ནི། དེར་འདུས་པ་ཡང་བཟུང་སྟེ། དཔེར་ན་གོང་བུ་འཛིན་པའི་མངོན་སུམ་གྱིས་རྣ་བ་ལ་སོགས་པ་བཞིན་ནོ། །སྔོན་པོའི་སྒྲ་ལས་སྐྱེས་པའི་ཤེས་པས་ཀྱང༌། ཨུཏྤལ་ཉིད་ཀྱི་རིགས་དང་འདུ་བ་ཅན་གྱི་ཨུཏྤལའི་རྫས་བཟུང་བ་ཡིན་ནོ་ཞེས་བྱ་བ་ནི་རང་བཞིན་གྱིས་ཐལ་བའོ། །དེས་ན་སྒྲ་གཞན་དོན་མེད་པར་འགྱུར་བའི་ཕྱིར་སྔར་བཤད་པའི་ཉེས་པ་ཉིད་དོ། །སྒྲ་ནི་ཞེས་བྱ་བ་ནི་གཞན་གྱིའོ། །གལ་ཏེ་ཡང་སྔོན་པོའི་སྒྲས་འབྲེལ་ཏོ། །འཕངས་པ་དེ་ལྟ་ན་ཡང་ཨུཏྤལ་ཉིད་འདུ་བའི་ཨུཏྤལའི་དོན་བརྗོད་པ་ནི་མ་ཡིན་ཏེ། དེས་ན་སྒྲ་གཞན་སྦྱོར་བ་ཡིན་ནོ་སྙམ་དུ་བསམས་པའོ། །སུན་འབྱིན་པ་ནི། ཁྱད་པར་ཅན་དང་ཞེས་བྱ་བ་ནི། སྔོན་པོ་ལ་སོགས་པ་ཡོན་ཏན་གྱི་བདག་ཉིད་ཀྱི་དོན་ནི་ཁྱད་པར་ཅན་གྱི་རྫས་ལ་འདུ་བ་ཡིན་ཏེ། དེས་ན་རྫས་དང་བྲལ་བའི་དོན་དེ་ནི་གང་ན་ཡང་མེད་དོ། །དེ་བས་ན་སྔོན་པོ་སྒྲ་ལས་འདུས་པའི་སྔོན་པོ་རྟོགས་པ་ན་འདུ་བ་ཅན་ཡང་རྟོགས་པར་འགྱུར་ཏེ། །འདུ་བ་ཅན་ལ་སོགས་པར་ནི། །འདུ་བ་རྟོགས་པ་མ་ཡིན་ནོ། །འདུ་བ་ཅན་རྟོགས་པ་ན་དེ་ལ་འདུས་པའི་ཨུཏྤལ་ཡང་རྟོགས་པར་འགྱུར་པའི་ཕྱིར། ཨུཏྤལ་བརྗོད་པ་ནི་དོན་མེད་དོ། །སྒྲ་སྦྱར་བ་ནི་དོན་རྟོགས་པར་བྱ་བའི་ཕྱིར་ཡིན་ན། གལ་ཏེ་དོན་ཇི་ལྟར་རུང་བར་རྟོགས་ན་སྒྲ་སྦྱར་བས་ཅི་བྱ། དེས་ན་གཞི་མཐུན་པར་མི་འགྱུར་རོ་སྙམ་དུ་དགོངས་པའོ། །ཤིན་དུ་གསལ་བ་མཐོན་ཏིང་ལ་སོགས་པ་ལ་མདོག་སྡུག་གུ་ཙམ་ཉིད་དབྱིབས་འདིས་གནས་པ་ཡིན་ནོ། །དེས་ན་ཁྱད་པར་ཅན་གྱི་དོན་མེད་པར་ཡང་ཁྱད་པར་རྟོགས་པ་ཡིན་ནོ་ཞེས། རྨོངས་པའི་དོགས་བ་ཟློག་པར་བྱེད་པ་ནི། མཐོན་ཏིང་ཞེས་བྱ་བ་ལ་སོགས་པའོ། །འདི་ཡང་སྔོན་པོའི་ཁྱད་པར་ཅན་གྱི་དོན་གཞན་ཉིད་དོ་ཞེས་པའི་དོན་ཏོ། །འདིས་ནི་ཇི་སྐད་བཤད་པའི་སྦྱོར་བ་ལ་མ་གྲུབ་པ་ཉིད་མ་ཡིན་ནོ། །གལ་ཏེ་ཡང་འགའ་ཞིག་ཏུ་དེ་ལྟ་ཡིན་པ་དེ་ལྟ་ན་ཡང་ངེས་པ་གང་ལས་
ཡིན་ཞེས་བྱ་བའི་མ་ངེས་པ་སྤངས་པ་བརྗོད་པ་ནི་དེ་ལྟར་མངོན་སུམ་གྱིས་ཞེས་བྱ་བའོ། །མངོན་སུམ་ལ་ཡང་འདུ་བ་ཅན་རྟོགས་པ་ཉིད་འདུས་པར་རྟོགས་པ་ཡིན་ཏེ་རྒྱུ་མཚན་གཞན་མེད་པའི་ཕྱིར་རོ། །འདུ་བ་ཅན་འཛིན་ཀྱང༌། འདུས་པ་འཛིན་པར་མི་འགྱུར་བ་གང་ཡིན་པ། སྒྲ་འཇུག་གཞན་དུ་ཇི་ལྟར་ཡིན། །གཞན་ཡང་དངོས་པོ་ལ་མངོན་པར་ཞེན་པར་སྨྲ་བ་འདི་ལ། སྔོན་པོ་ཨུཏྤལ་ལ་ངེས་སམ་མ་ངེས་ཞེས་དྲི་བར་བྱའོ། །གཉི་ག་ལྟར་ཡང་ཨུཏྤལ་གྱི་སྒྲ་མ་སྦྱར་བའི་ཕྱིར་ན། གང་དུ་གཞི་མཐུན་པར་འགྱུར་ཞེས་སྟོན་པ་ནི། གལ་ཏེ་ཞེས་བྱ་བ་སྔོ་ཉིད་ཅེས་བྱ་བའི་སྔོ་ཉིད་ཅེས་བྱ་བས་ནི་ཆོས་བསྟན་པའི་སྒོ་ནས་ཆོས་ཅན་འཛིན་པའོ། །གལ་ཏེ་ཨུཏྤལ་ལ་ངེས་པའི་སྔོན་པོ་བརྗོད་བྱ་ཡིན་ན་དེའི་ཚེ་སྔོན་པོའི་སྒྲས། དེ་ལྟ་བུའི་སྔོན་པོ་རྟོགས་པ་ན། ཨུཏྤལ་ཡང་རྟོགས་པའི་ཕྱིར་ན། ཨུཏྤལའི་སྒྲ་དོན་མེད་དོ། །འོན་ཏེ་བྱ་རོག་དང་ཁུ་བྱུག་ལ་སོགས་པ་ཨུཏྤལ་མ་ཡིན་པ་ལ་ཡོན་ཏན་སྔོན་པོ་ཡོད་པ་ཡིན་ན། དེའི་ཚེ་སྔོན་པོའི་སྒྲས་ཐུན་མོང་གི་སྔོན་པོའི་རང་བཞིན་རྟོགས་པར་འགྱུར་ལ། དེ་ལྟ་ན་ཡང་བུམ་པ་དང༌། སྣམ་བུ་ལྟར་གཞི་མཐུན་པ་མེད་པའི་ཕྱིར། ཁྱད་པར་ཅན་གྱི་དོན་རྟོགས་པ་ལ་ཉེ་བར་མི་མཁོ་བའི་ཕྱིར་ཨུཏྤལའི་སྒྲ་དོན་མེད་དོ། །འོན་ཏེ་སྔོན་པོ་ཉིད་གཞན་ཁོ་ན་ལ་ཡོད་པ་ཡིན་ནོ། དེ་ལྟ་ཡིན་ན་ཡང་སྔོན་པོའི་སྒྲས་དོན་གྱི་ཚོགས་པ་གང་བརྗོད་པ་དེ། ཨུཏྤལའི་སྒྲས་མ་བརྗོད་པའི་ཕྱིར། ཇི་ལྟར་དོན་གཅིག་ལ་འཇུག་པས་བྱས་པའི་གཞི་མཐུན་བར་འགྱུར། དེ་བཞིན་དུ་ཨུཏྤལའི་སྒྲས་དོན་གྱི་ཆོགས་གང་བརྗོད་པ་ཞེས་བྱ་བར་ཡང་སྦྱར་རོ། །འོན་ཏེ། སྔོན་པོའི་སྒྲས་ཁྱབ་པ་ཨུཏྤལའི་སྒྲས་རྣམ་པར་གཅོད་ལ། ཨུཏྤལའི་སྒྲས་ཁྱབ་པ་ཨུཏྤལའི་དཀར་པོ་ལ་སོགས་པ་ཡང་སྔོན་པོའི་སྒྲས་གཅོད་པར་བྱེད་པ་ཡིན་ནོ། །དེས་ན་ཨུཏྤལ་སྔོན་པོ་གཅིག་ལ་ཆོས་གཉི་ག་ཡོད་པའི་ཕྱིར་ན་གཞི་མཐུན་པར་འགྱུར་རོ་སྙམ་ན། དེ་ཡང་མི་འཐད་དེ། གང་གི་ཕྱིར་ཁྱབ་པ་ཞེས་བྱ་བས་ནི་གསལ་བའི་དོན་བརྗོད་པ་ཡིན་ནོ། །དེས་ན་ཇི་སྙེད་ཅིག་གིས་གསལ་བའི་དོན་དེ་མཐའ་དག་ཅི་ལྟར་གཞན་གྱིས་རྣམ་པར་བཅད་པར་ནུས། མངོན་སུམ་གྱིས་གསལ་བའི་དོན་ནི་གཞན་གྱིས་རྣམ་པར་བཅད་པར་མི་ནུས་སོ། །འོ་ན་གཉིས་ པ་སྦྱར་བ་ཅི་དགོས ་ཤེ་ན། དངོས་པོ་བརྗོད་པར་བྱ་བའི་ཕྱོགས་ལ་འདི་ཉིད་བཅད་བར་བྱ་བ་
ཡིན་ནོ། །དེ་ཉིད་ཀྱི་ཕྱིར་མཇུག་སྡུད་པ་ནི། དེའི་ཕྱིར་ཞེས་བྱ་བ་ལ་སོགས་པའོ། །ཆ་མེད་པར་མངོན་སུམ་ལ་སྣང་བའི་ཨུཏྤལ་སྔོན་པོ་ལ་སྔོན་པོ་ཉིད་དང་ཨུཏྤལ་ཉིད་ཐ་དད་བ་ཡིན་ལ། ཨུཏྤལ་གཞན་དང་ཟ་མི་དད་པ་ཡིན་ཏེ། གཅིག་ཏུ་རྟོགས་པའི་ཕྱིར་རོ། །གཟི་མཐུན་པ་ཡང་དེ་ལ་ལྟོས་ནས་ཡིན་ཏེ། དེས་ན་དོན་དེ་འདྲ་བ་མེད་ཀྱང་བློ་ཉིད་དེ་ལྟ་དེ་ལྟར་འཇུག་པའི་ཕྱིར། རྣམ་གྲངས་པ་ཉིད་ལ་སོགས་མ་ཡིན་ནོ། །སླུ་བ་ཡང་མ་ཡིན་ཏེ། དེ་མ་ཡིན་པ་ལས་ལྡོག་པའི་རྩ་བ་ཡིན་པའི་ཕྱིར་རོ། །འདི་ཡང་རྣམ་འགྲེལ་མཛད་པ་ཉིད་ཀྱིས་བཤད་པ་ཡིན་ནོ་ཞེས་སྟོན་པ་ནི་འདི་ལྟར་ཞེས་བྱ་བའོ།། བཤད་ཟིན་ཏོ་ཞེས་བྱ་བ་ནི་གྲངས་སོ་དང་ལྡན་པའི་སྒྲ་ནི་རྣམ་གྲངས་མིན་ཞེས་བྱ་བའི་མཐར་ཐུག་པས་སོ། །ལྷག་མ་ཆད་པ་ནི་དེར་ཡང་ཞེས་བྱ་བའོ། །ཡོན་ཏན་གཅིག་གོ་ཞེས་བྱ་བ་ལ་སོགས་པ་ཡོན་ཏན་ལ་ཡང་གྲངས་ཀྱི་མཚན་ཉིད་ཀྱི་ཡོན་ཏན་གཞན་ཡོད་དོ་སྙམ་དུ་དོགས་ན། དེ་ལྟར་ཡིན་ན་ཞེས་པའོ། །ཇི་ལྟར་འདི་གཉིས་ཁྱད་པར་མེད་པར་འགྱུར་ཞེ་ན། འདི་ལྟར་ཞེས་གསུངས་སོ། །གལ་ཏེ་དེ་ལྟ་ཡིན་མོད། སྐབས་ལ་ཅི་འོངས་སྙམ་ན། འཕྲོད་པ་འདུ་བ་ཅན་གྱི་རྒྱུ་ཉིད་ནི་ཞེས་གསུངས་སོ། །ལྡན་པ་ལ་སོགས་པའི་ཡོན་ཏན་གྱི་འདུ་བ་ཅན་གྱི་རྒྱུ་ཉིད་ནི་ལྡན་པ་ལ་སོགས་པའི་ཡོན་ཏན་དང་ལྡན་ན་སྟེ་འབྲེལ་འགྱུར་རོ། །བཏུང་བ་ལ་སོགས་པ་ལ་ཡང་གཟུགས་ལ་སོགས་པའི་ཡོན་ཏན་དང་ལྡན་པ་ཡང་ངོ་སྙམ་དུ་དགོངས་པའོ། །དེ་ལྟ་ན་ཡང་ཇི་ལྟར་ཁྱད་པར་མེད་པར་འགྱུར་ཏེ། བྱ་བ་དང་ལྡན་པ་ཉིད་མ་ཡིན་པའི་ཕྱིར་རོ་སྙམ་ན། ལྕི་བ་ཉིད་ཅེས་གསུངས་སོ། །འོན་ཇི་ལྟར་ཁྱད་པར་རྣམས་ཐ་དད་མེད་པའི་ཕྱིར། བློ་ཐ་དད་པར་འགྱུར། དེའི་ཐ་དད་པ་བག་ཆགས་ཀྱི་སྟོབས་ལས་བྱུང་བ་ཡིན་ན་ཡང༌། ཇི་ལྟར་སླུ་བར་མི་འགྱུར་བའི་དོགས་པ་སྤང་བར་རྣམ་འགྲེལ་གྱི་ལྷག་མ་ཉེ་བར་སྡུད་པའི་སྒོ་ནས་འཆད་པ་ནི་དེའི་ཕྱིར་ཞེས་བྱ་བའོ། །དེ་མ་ཡིན་པའི་ལས་ལྡོག་པའི་རྩ་བ་ཅན་ཡིན་པའི་ཕྱི་ན། སླུ་བ་མ་ཡིན་ནོ་སྙམ་དུ་བསམས་པའོ། །ལས་མ་ཡིན་པ་ཉིད་དམ་རྫས་མ་ཡིན་པ་ཉིད་ཀྱང་སྤྱི་ནི་མ་ཡིན་ཏེ། སྤྱི་ལ་ཡང་ཡོད་པའི་ཕྱིར་རོ། དེ་བཞིན་དུ་ཅི་རིགས་པར་དཔག་པར་བྱའོ། །ལས་མ་ཡིན་པ་དང་རྫས་མ་ཡིན་པའི་སྒྲ་དེར་ནིའོ། །དེ་དང་ལྡན་པ་ལས་གྲངས་ལ་སོགས་པ་ཐ་དད་པ་བཞིན་དུ་ཞེས་
འབྲེལ་ཏོ། །དེ་ཡང་ཆོས་གཞན་ཁྱད་པར་བྱེད་པ་ཡིན་ཞེས་བྱ་བ་ནི་ཆོས་གཞན་དཀར་པོ་ཉིད་མ་ཡིན་པ་ཟློག་པར་བྱེད་པ་ཡིན་གྱི། ཐ་དད་པར་བསྟན་པ་ཙམ་གྱིས། དངོས་བོ་ཐ་དད་པར་འགྲུབ་པ་ནི་མ་ཡིན་ནོ་ཞེས་བྱ་བའི་དོན་ཏོ། །འདི་ཉིད་བཟློག་པ་ནི་དེ་ཙམ་ཞེས་བྱའོ། །དེ་ཙམ་ཤེས་པར་འདོད་པ་ཞེས་བྱ་བ་ནི་ལྡོག་པ་ཙམ་ཤེས་པར་འདོད་པ་ལའོ། །འགྲེང་བ་ལ་སོགས་པའི་ཆོས་གཞན་ཀུན་གང་ཡིན་པ་དེ་དག་གང་གིས་འཕངས་པ་མེད་བར་རོ། །སྟོན་བར་བྱེད་པའི་སྒྲ་གཞན་གྱི་གོ་སྐབས་འབྱེད་པ་ནི་འཕངས་པ་ཡིན་ནོ། །གང་གི་ཚེ་སོར་མོ་ལྡན་པར་གྱུར་ཏོ་ཞེས་ཆོས་ཅན་དང་གཞི་མཐུན་པར་ཆོས་བརྗོད་པའི་སྒྲ་སྦྱར་བ་དེའི་ཚེ་འགྲེང་བ་ལ་སོགས་པའི་ཁྱད་པར་གྱི་སྐབས་ཡོད་བ་ཡིན་ལ། སོར་མོའི་ལྡན་པ་ཞེས་བྱ་བར་ནི་ཆོས་ཅན་དང་གཞི་མཐུན་པའི་ཁྱད་པར་གཞན་གྱི་སྒྲའི་གོ་སྐབས་ཡོད་པ་མ་ཡིན་ནོ། །རྟོགས་པར་བྱ་བས་ཤེས་པར་འདོད་པ་ཡང་དེ་ཙམ་ཉིད་ཡིན་ནོ། །དེ་བཞིན་དུ་དཀར་པོ་ལ་སོགས་པའི་སྒྲ་ལ་ཡང་ངོ༌། །གལ་ཏེ་གཉི་གས་ཀྱང་དོན་གཅིག་ཁོ་ན་བརྗོད་པའི་ཕྱིར། རྣམ་བར་དབྱེ་བ་འདིར་ཇི་ལྟར་འགྱུར་སྙམ་ན། དོན་གཅིག་བརྗོད་ཀྱང་ཞེས་བྱ་བ་གསུངས་སོ། །དེ་ལྟར་ཞེས་བྱ་བ་ནི་ཆོས་དང་ཆོས་ཅན་བརྗོད་པ་ཉིད་དུ་རྣམ་པར་གཞག་པར་བྱས་པ་གང་ཡིན་པ་སྟེ། དེ་ལ་དེ་སྐད་ཅེས་བརྗོད་དོ། །དེའི་ཕྱོགས་གཅིག་ཅེས་བྱ་བ་ནི་བ་ལང་འགའ་ཞིག་ཁོ་ན་དཀར་པོ་ཡིན་པའི་ཕྱིར་རོ། །འཛིན་པ་གཞན་དང་ལྡན་པའི་ཡོད་བའི་ཞེས་བྱ་བ་ཡི་ནི་སྣམ་བུ་ལ་སོགས་པ་ལའོ། །ཐ་དད་པ་ནི་ཞེས་བྱ་བ་ནི་བ་ལང་ཉིད་ནི་རྗེས་སུ་འགྲོ་བ་ལ་དཀར་པོ་ཉིད་ནི་ལྡོག་པ་སྟེ། རྗེས་སུ་མི་འགྲོ་བའོ། །འཛིན་པ་གཞན་དང་ལྡན་པ་ལ་ལྟོས་ནས་ནི་དཀར་པོ་ཉིད་རྗེས་སུ་འགྲོལ། །བ་ལང་ནི་ལྡོག་པ་ཡིན་ནོ། །དེས་ན་བ་ལང་དཀར་པོ་དག་ནི་ཐ་དད་པའི་ཐ་སྙང་ཙམ་དུ་ཟད་དོ། །དཀར་པོ་ཉིད་འབའ་ཞིག་ཅེས་བྱ་བ་ནི་གང་གི་ཚེ་ཐག་རིང་རབ་ཙམ་ནས་བསྒྲུབས་པའི་ཆ་གཞན་དང་བྲལ་བས་བློའི་ཚད་ཙམ་དམིགས་པ་དེའི་ཚེའོ། །སྔོན་མཐོང་བ་ལས་ཞེས་བྱ་བ་ནི་འདྲི་བའི་ལན་འདེབས་པར་བྱེད་པའི་སྡར་འབའ་ཞིག་ངེས་པའི་ཕྱིར་རོ། །ཞེས་བྱ་བ་ནི་འདྲི་བར་བྱེད་པའོ། །འདིས་ནི་ཐ་དད་པར་སྟོན་པའི་གཞུང་བཙུགས་པ་ཡིན་ནོ། །འོན་ཐ་མི་དད་པར་ཇི་ལྟར་སྟོན་སྙམ་ན། གང་གི་ཆོ་ཞེས་བྱ་བས་གཞུང་འཛུགས་པར་བྱེད་དོ། །འདིར་ཡང་
ངེས་པར་མ་ཤེས་པའི་ཁྱད་པར་ཉིད་དོ། །འོན་ཀྱང་དཀར་པོ་འདི་ཅི་ཡིན་ཆོས་ཅན་དང་གཞི་མཐུན་པས་འདྲི་བ་ན། དེ་ཁོ་ན་ལྟར་ལན་འདེབས་པ་ཡིན་ནོ། །དེ་ཁོ་ནའི་དོན་ནི་འདི་ཡིན་ཏེ་ཞེས་བྱ་བ་ནི་དེ་ཁོ་ནར་གྱུར་པའི་དོན་ནི་དེ་ཁོ་ནའི་དོན་ཏོ། །འདི་ཡིན་ཏེ་ཞེས་བྱ་བ་ནི་འཆད་པར་འགྱུར་བའི་ཚིགས་སུ་བཅད་པས་བསྟན་པར་བྱ་བ་སྟེ། ཐ་དད་པ་ཡི་གནོད་མ་ཡིན། །ཞེས་བྱ་བའི་ཐར་པའི་སྟོན་པར་བྱེད་པའོ། །འགའ་ཞིག་ལས་ཞེས་བྱ་བ་མིག་མི་གསལ་བ་དང༌། ཐག་ཅུང་ཟད་རིང་བ་ལ་སོགས་པའི་མཚན་ཉིད་ལས་ཐ་དད་པར་འདྲི་བ་ཡིན་ནོ། །དེའི་ཕྱིར་ན་དེ་ཁོ་ན་ལྟར་ཐ་དད་པ་ཉིད་དུ་མཁས་པ་ལེན་འདེབས་པས་སོ། །རྣམ་པ་གང་གིས་ལན་འདེབས་སྙམ་ན། ཡོན་ཏན་དཀར་པོ་འདི་རྟའི་ཡིན་ནོ་ཞེས་ལན་འདེབས་སོ། །དེ་ལྟ་བུའི་རྣམ་པར་ལན་འདེབས་སོ་ཞེས་བྱ་བའི་དོན་ཏོ། །འདིར་ནི་དེ་ལྟ་བུ་ཉིད་དུ་ངེས་ཞེས་བྱ་བ་ནི་འགྲོ་བ་འདིར་དོན་གཞན་གནས་བ་ནི་མེད་པའོ། །རྟོག་པ་དང་ལྡན་བ་ནི་འདྲི་བའོ།། དེ་ཞེས་བྱ་བ་ནི་དྲེས་པའོ། །ཚུལ་ལུགས་གཞན་གྱི་ཞེས་བྱ་བ་ནི་འདུ་བའི་སྟོབས་ཀྱིས་ཡོན་ཏན་གྱི་སྒོ་ནས། ཡོན་ཏན་ཅན་ལ་སྒྲ་འཇུག་པ། །ཞེས་བྱ་བ་ལ་སོགས་པའོ། །ཚད་མའི་འཇུག་པ་ལ་ལྟོས་ནས། །ཞེས་བརྗོད་པ་གང་ཡིན་པ་དེ་གསལ་ལ་བར་བྱེད་པ་ནི། མངོན་སུམ་ཉིད་དམ་ཞེས་བྱ་བའོ། །དེས་ན་ཐ་དད་སྲིད་པ་ཡིན་ཏེ། མི་སྲིད་པར་འདོད་དོ། །འོ་ན་ཐ་དད་པའི་ཐ་སྙད་དུ་ཇི་ལྟར་འགྱུར་སྙམ་ན། གང་གི་ཚེ་ཞེས་གསུངས་སོ། །སྲིད་པའི་ཕྱིར་ཞེས་བྱ་བ་ནི་ཀུན་བརྟགས་པ་ལས་སོ། །དེ་ལྟ་ཉིད་ཅེས་བྱ་བ་ནི་ཐ་དད་པ་ཉིད་དུའོ། །འོ་ན་འཇིག་རྟེན་འདི་འདྲ་བའི་ཐ་དད་པ་ཅི་སྟེ་འདོར་ཞེ་ན། འགྲོ་བའི་རྟོགས་པ་ཞེས་གསུངས་སོ། །འདི་ལྟ་བུ་ཞེས་བྱ་བ་ནི་དོན་དམ་པའི་ཐ་དད་པ་མེད་པའོ། །དངོས་པོ་སེམས་དང་ནི་དོན་དམ་པའི་ཐ་དད་པའི་སེམས་པས་སོ། །ཆ་དེ་ཙམ་གྱིས་དོན་གྲུབ་པར་ཁས་བླངས་པས་བསླད་པར་མི་སེམས་སོ་ཞེས་བྱ་བར་དགོངས་པའོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །གལ་ཏེ་ཞེས་བྱ་བ་ནི་གཞན་གྱིའོ། །བུམ་པའི་ཞེས་བྱ་བ་འདི་ནི་གཟུགས་ལ་སོགས་པ་ཉིད་བརྗོད་པ་ཡིན་ནོ། །དེ་ཉིད་ཀྱི་གཟུགས་ལ་སོགས་པ་རྣམས་ཀྱི་ཞེས་སྨོས་སོ། །གཟུགས་ལ་སོགས་བ་རྣམས་ཀྱི་ཞེས་བྱ་བ་ནི་ཉེ་བར་མཚོན་པ་སྟེ་གཟུགས་ཀྱི་གཟུགས་སོ། །རོའི་རོ་ཞེས་བྱ་བ་ལ་སོགས་པ་ལ་ཡང་བལྟ་བར་བྱའོ། །
བུམ་པའི་བུམ་པ་ཞེས་བྱ་བ་ལ་ནི་ཚོགས་པ་ལ་ལྟོས་ནས་ཏེ་གཟུགས་ལ་སོགས་པ་རྣམས་ཀྱི། གཟུགས་ལ་སོགས་བ་ཞེས་བྱ་བའི་ཐ་ཚིག་གོ །ཞེས་ཀྱི་སྒྲ་ནི་རྣམ་བ་དེ་ལྟར་གྱི་དོན་ཏོ། །གཟུགས་ལ་སོགས་པ་དེ་རྣམས་ཀྱིས་མཚུངས་པའི་འབྲས་བུ་ནི་ཆུ་འཛིན་པ་ལ་སོགས་པ་ཡིན་ལ། དེའི་རྒྱུ་མ་ཡིན་པ་ནི་སྣམ་བུ་ལ་སོགས་པ་གང་ཡིན་པ་དེ། དེ་རྣམ་པར་བཅད་པའི་དོན་དུ་བུམ་པའི་སྒྲ་འཇུག་གོ །གང་གི་ཕྱིར་གཟུགས་ལ་སོགས་པའི་ནུས་བའི་ཁྱད་པར་མ་སྤངས་པར་འཇུག་པ་དེས་ན། ཕྱོགས་གཅིག་པ་འཇུག་པ་གཟུགས་ལ་སོགས་པའི་སྒྲ་དང་འདི་གཞི་མཐུན་པར་ཇི་ལྟར་འགྱུར། འདི་ཙམ་ཉིད་ཀྱིས་ནི་རིགས་དང་ཚོགས་པའི་སྒྲ་གཉིས་ཀྱི་ཁྱད་པར་ཡང་ལེགས་པར་གནས་པ་ཡིན་ནོ་ཞེས་བཤད་པ་ནི་དེས་ན་འདི་ནི་ཞེས་བྱ་བའོ། །ཐུན་མོང་གི་བུམ་པ་བརྗོད་པ་དེ་ཉིད་ཀྱིས་རིགས་ཀྱི་སྒྲ་ལ་ཚོགས་པའི་སྒྲ་ཐ་དད་པ་ཡིན་ནོ། །རིགས་ཀྱི་སྒྲ་ཡང་སོ་སོར་ནུས་བའི་བརྗོད་པའི་ཕྱིར་ཚོགས་པའི་སྒྲ་ལས་ཐ་དད་པ་ཡིན་ནོ། །གལ་ཏེ་ཡན་ལག་ཅན་མེད་པའི་ཕྱིར་བུམ་པའི་གཟུགས་ལ་སོགས་པ་ཞེས་བྱ་བ་འདིས་ཅི་སྟོན་ཞེ་ན། བུམ་པའི་ནི་ཞེས་གསུངས་སོ། །དེ་ནུས་ཁྱད་པར་གྱི་གཟུགས་ལ་སོགས་པའི་ནུས་པའི་ཁྱད་པར་རོ། །ཅི་འདྲ་བ་ཞིག་ཅེ་ན། ཆུ་ལ་སོགས་པ་འཛིན་པ་དེ་ཉིད་སྤྱི་སྟེ་ཐུན་མོངས་བར་གྱུར་པ་ཡན་ལག་ཁྱད་པར་དུ་བྱས་པ་གང་དག་ཡིན་པ་དེ་དག་ལ་དེ་སྐད་ཅེས་བྱའོ། །ཐུན་མོང་གི་ནུས་པའི་ཁྱད་པར་ཅན་སོ་སོར་རང་གི་ནུས་པ་དང་ལྡན་པ་ཉིད་སྟོན་པ་ཡིན་ནོ་ཞེས་བྱ་བའི་དོན་ཏོ། །འོ་ན་ནུས་པའི་ཁྱད་པར་མེད་པའི་ཕྱིར་བ་ལང་ཉི་ཤུ། བ་ལང་རྣམས་ཀྱི་ཉི་ཤུ་ཞེས་ཐ་སྙད་ཐ་དད་པར་ཇི་ལྟར་འགྱུར་སྙམ་ན། ཕྱོགས་འདིས་ཞེས་གསུངས་སོ། །དེ་དག་ལ་ཞེས་བྱ་བ་ནི་བུམ་པ་ལ་སོགས་པ་དག་ལའོ། །སོ་སོར་ངེས་པའི་ནུས་པ་མ་འཕངས་བ་དེས་ནའོ། །དེས་ན་འདི་རིགས་དང་ནི་ཞེས་བྱ་བ་འཆད་པ་ནི། །དེ་ཉིད་ཀྱི་ཕྱིར་ཞེས་བྱ་བའི་ཚོགས་པའི་སྒྲ་འདི་ནི་ཞེས་བྱ་བ་ནི་དཔེར་ན་ནགས་ཞེས་བྱ་བར་འབྲེལ་ཏོ། །དུ་བ་ལ་སོགས་པའི་གནས་ནི་གཟུགས་ལ་སོགས་པ་ཡིན་ཏེ་དེས་ན་རྫས་གཅིག་ལ་མ་ལྟོས་པར་བུམ་པ་ཞེས་ཚོགས་པའི་སྒྲས་ཡིན་ནོ། །རིགས་ཀྱི་སྒྲ་ནི་ཞེས་བྱ་བ་ནི་བུམ་པའི་རྫས་སོ་སོར་ཆུ་འཛིན་པ་ལ་སོགས་པའི་འབྲས་བུ་གཅིག་པ་ཉིད་ལ་སྟེ། དཔེར་ན་ཤིང་ཞེས་བྱ་བ་བཞིན་ནོ། །དུ་བ་ལ་
སོགས་པ་སོ་སོར་གྲིབ་མ་ལ་སོགས་པའི་འབྲས་བུ་གཅིག་སྒྲུབ་པ་ལ་འཇུག་པ་ལྟ་བུའོ། །དཔེར་ན་ཤིང་གི་སྒྲ་རིགས་ཀྱི་སྒྲ་ཡིན་པ་དེ་བཞིན་དུ་བུམ་པའི་སྒྲ་ཡང་ཡིན་ནོ་ཞེས་བྱ་བའི་དོན་ཏོ། །གཟུགས་ལ་སོགས་པ་ཞེས་བྱ་བ་ནི་གཟུགས་ས་མ་སྤྲ་ཞེས་བྱ་བ་ལ་སོགས་པ་ཐ་དད་པར་བསྟན་པ་ཁྱད་པར་གང་ལ་ལྟོས་པ་ཡིན་ཞེས་བྱ་བའི་དོན་ཏོ། །འབྲས་བུ་གཅིག་ལ་ལྟོས་ནས་ནི་བུའི་ཤེས་པ་དང་འབྲེལ་བར་སྟོན་པ་ཡིན་ལ། སོ་སོ་རང་གི་འབྲས་བུལ་ལྟོས་ནས་ནི་གཟུགས་ལ་སོགས་པར་བསྙད་པ་ཡིན་ནོ་ཞེས་བྱ་བའི་དོན་ཏོ། །དིའི་འདུ་བྱེད་བའི་རྗེས་སུ་འཇུག་པ་ཞེས་བྱ་བ་ནི་བསྟན་བཅོས་གཞན་གྱི་འདུ་བྱེད་ཀྱི་རྗེས་སུ་འཇུག་པའོ། །འཇིག་རྟེན་ན་དང་པོར་བརྡ་སྤྲོད་པར་བྱེད་པ་སློབ་པའི་ཕྱིར་དེ་འདྲ་བའི་གཞལ་བྱ་ཉིད་བྱ་བར་བྱེད་དོ། །དེའི་འོག་ཏུ་མུ་སྟེགས་པའི་བསྟན་བཅོས་སམ། གཞན་ལས་དམན་པ་ཉིད་ཀྱིས་ན། དོན་དེ་མོད་ལ་འཛིན་ཏེ། དོན་ཕྲ་མོ་བསྟན་བཅོས་བྱད་པར་ཅན་ལས་འཛིན་པར་མི་ནུས་སོ། །ཕལ་ཆེར་ཞེས་བྱ་ནི། །དཔོག་པ་དང་སེལ་བའི་ནུས་པ་རྣམ་པ་ཐམས་ཅད་དུ་ནི་མི་འགོག་པའོ། །དེ་ཉིད་ཀྱི་ཕྱིར་གང་ཞིག་ཡང་དག་པར་རྟོགས་པ་དང་ལྡན་པ་ཞེས་གསུངས་སོ། །འགའ་ཞིག་ཅེས་བྱ་བ་ཉིད་གསལ་བར་བྱེད་པ་ནི་འབྲས་བུའི་ཁྱད་པར་ནུས་པ་ཞེས་བྱ་བའོ། །འདིར་འབྲས་བུའི་ཁྱད་པར་ཅི་ལ་བརྗོད་སྙམ་ན། འབྲས་བུའི་ཁྱད་པར་ཡང་ཞེས་བྱ་བའོ། །ཡང་ན་གཟུགས་ལ་སོགས་པ་ཉིད་འགའ་ཞིག་དབྱིབས་ཀྱི་ཁྱད་པར་གྱིས་རྣམ་པར་གནས་པ་ནི་བུམ་པ་ཡིན་ལ་ཞེས་འབྲེལ་ཏོ། །ཅི་ལྟར་ཞེ་ན་དབྱིབས་ཀྱི་ཁྱད་པར་གྲང་ལས་ཞེས་བྱ་བའོ། །དཔེར་ན་གཟུགས་ལ་སོགས་པ་བུམ་པ་ཡིན་ནོ་ཞེས་བྱ་བ་ལྟར་དེ་བཞིན་དུ་གཟུགས་བུམ་པ་ཡིན་ནོ་ཞེས་བྱ་བར་ཡང་འགྱུར་རོ་སྙམ་དུ་དགོངས་ན། གཟུགས་བུམ་པར་ཞེས་བྱ་བར་ནི་ཞས་སྨོས་སོ། །ཕན་ཚུན་ཁྱད་པར་མེད་པ་བརྗོད་པར་འདོད་པའི་མ་རྟོགས་པས་ཤིང་དང་སྨྲས་སོ། དེ་བཞིན་དུ་སུ་ཏྭ་ལ་སྔོན་པོ་ལ་སོགས་པ་ལ་ཡང་མི་འགྱུར་ཏེ། གཉི་ག་འཁྲུལ་བའི་ཕྱིར་རོ། །བྱས་པ་དང་མི་རྟག་པ་ལ་སོགས་པ་ཁོ་ན་ལ་འགྱུར་ཏེ། ཕན་ཚུན་འཁྲུལ་པ་མེད་པའི་ཕྱིར་རོ་ཞེས་བྱ་བ་ནི་རྩོད་པ་བོའི་བསམ་པའོ། །གྲུབ་བའི་མཐའ་ནི་འདི་ནི་ཕན་ཚུན་ཁྱབ་པའི་དོན་མ་ཡིན་གྱི། འོན་ཀྱང་གཅིག་གིས་གཅིག་འཕེན་པ་ཡིན་ནོ། དེ་ནི་ཤིང་ཞེས་བརྗོད་པ་ན་ཤ་པ་དང་སྔོན་པོ་ཞེས་བརྗོད་པ་ན་ཨུཏྤལ་ལ་ཡོད་པ་
ཡིན་ཏེ། དེས་ན་གཞི་མཐུན་པ་ཉམས་པ་མེད་དོ། འདིར་ནི་བུམ་པའི་སྒྲས་གཟུགས་ཙམ་འཕེན་པ་མ་ཡིན་ལ། གཟུགས་ཀྱི་སྒྲས་ཀྱང་བུམ་པའི་ཚོགས་འཕེན་པ་མ་ཡིན་ཏེ། དེས་ན་འདི་གཉིས་ནི་གཞི་མཐུན་པ་མ་ཡིན་ནོ་ཞེས་བྱ་བའི་དོན་ཏོ། །འདི་གང་ལས་ཤེ་ན་བུམ་པའི་སྒྲས་ཞེས་གསུངས་ཏེ། སྒྲས་ནི་ཞེས་བྱ་བའི་དོན་ཏོ། །ནུས་པའི་ཁྱད་པར་ནི་གཟུགས་ཀྱི་ཤེས་བ་སྐྱེད་པར་རུང་བའོ། །ཡང་ཇི་ལྟར་ན་ཕྱོགས་གཅིག་པའི་ཡིན་ཡང་ཤ་པ་ལ་ཤིང་གི་ཐ་སྙད་དུ་འགྱུར་གྱི་ཕྱོགས་གཅིག་ཏུ་འགྱུར་བ་གཟུགས་ལ་སོགས་པ་ལ་ནི་བུམ་པའི་སྒྲ་མི་འཇུག་སྙམ་ན། གནའི་ཐ་སྙད་ཅེས་པས་ཞེས་གསུངས་སོ། །གཞན་གྱི་ལུགས་ལ་ལྟོས་ནས་བརྗོད་པ་ནི་ནུས་པ་ངེས་པའི་ཕྱིར་རོ་ཞེས་བྱ་བ་ཡིན་ནོ། །བུམ་པའི་སྒྲ་ནི་གཟུགས་ཙམ་ལ་མི་འཇུག་འོན་ཀྱང་ངོ་བོ་ཉིད་ཀྱི་ཚོགས་བ་ཁོ་ན་ལ་འཇུག་པ་ཡིན་ནོ། །ཁྱད་པར་གྱི་ནུས་པ་དང་ལྡན་བ་ནི་ཤིང་ཤ་པའི་ནུས་བ་དང་ལྡན་པའོ། །ཇི་ལྟར་འདིར་ཁྱད་པར་ཅན་གྱི་ནུས་པ་དང་ལྡན་པ་འཕེན་ཅེ་ན། འདིར་ཡང་ཞེས་གསུངས་ཏེ། ཤིང་གི་སྒྲ་ལོག་གོ །ཕྱོགས་འདིས་གཞན་ཡང་བརྗོད་པར་བྱ་ཞེས་བྱ་བ་ལ་འཇུག་བར་བྱེད་པ་ནི་གལ་ཏེ་ཞེས་བྱ་བའོ། ཅིའི་ཕྱིར་ཞེ་ན། ཉི་ཤུ་བྱ་བ་ཞེས་སྨོས་སོ། །ཇི་ལྟར་བུམ་པའི་སྒྲས་ནུས་པ་གཞན་བརྗོད་པ་དེ་བཞིན་ཉི་ཤུའི་སྒྲས་ནི་མ་ཡིན་ནོ་ཞེས་བྱ་བའི་དོན་ཏོ། །འདི་ག་ལས་ཤེ་ན། འོན་ཀྱང་ཞེས་སྨྲས་སོ། །འདིར་ནི་ཞེས་བྱ་བ་ནི་བ་ལང་ཉི་ཤུར་རོ། །ལན་ནི་དེར་ནི་ཞེས་བྱ་བའོ། མང་པོ་ཉིད་ཀྱིས་ཞེས་བྱ་བ་ནི་མང་པོ་ཉིད་ཀྱིས་ཉེ་བར་མཚོན་པའི་བ་ལང་ལ་སོགས་པ་དག་གོ །གལ་ཏེ་འདུས་པའི་ཁྱད་པར་བརྗོད་པ་ཉི་ཤུའི་སྒྲ་ཉིད་ཀྱིས་བཞོ་བ་དང་དགལ་བ་ལ་སོགས་པའི་བྱ་བ་དང་ལྡན་པའི་བ་ལང་རྣམས་རྟོགས་པ་ཉིད་མ་ཡིན་ནམ། དེས་ན་བ་ལང་གི་སྒྲ་སྦྱར་བར་ཅི་བྱ་སྙམ་ན། དེས་ནི་བཞོ་བ་དང་ཞེས་གསུངས་སོ། །གལ་ཏེ་བཞོ་བ་དང་དག་ལ་བའི་ནུས་བས་ཀྱང་འདུས་པའི་ཁྱད་བར་རྟོགས་པར་བྱེད་ན་དེའི་ཚེ་ལང་འདུས་པའི་སྒྲ་སྦྱར་པས་ཅི་བྱ་སྙམ་པའི་དོགས་པ་སེལ་བ་ནི་དེས་ཀྱང་ཞེས་བྱ་བའོ། །དེས་ན་འདི་གཉིས་ཀྱང་ཁྱད་པར་དང་ཁྱད་པར་ཅན་གྱི་དངོས་པོར་མི་འགལ་ལོ་སྙམ་དུ་དགོངས་བའོ། །དེ་བཞིན་དོན་ཐ་དད་བ་མེད་བ་ལ་ཡང་དེ་དང་དེ་ལས་ལྡོག་པ་ལ་བརྟེན་ནས་སྒྲའི་དོན་ཐ་དད་པར་རྣམ་པར་གཞག་པ་བྱས་པ་ཡིན་ནོ། །
བག་ཆགས་ཀྱི་ཁྱད་པར་ལ་ཡང་བརྟེན་ནས་མི་འགལ་ལོ་ཞེས་བྱ་བར་བསམས་ནས་བརྗོད་པ་ནི་ཡང་ན་ཞེས་བྱ་བའོ། །ཐོག་མ་མེད་པ་ཡང་ཡིན་ལ་ཐ་སྙད་ཀྱང་ཡིན་པ་སྟེ། དེས་བསྐྱེད་པའི་བག་ཆགས་གང་ཡིན་པ་དེས་འདུས་བྱས་པའི་བདག་ཉིད་གང་ཡང་ཡོད་པ་དེ་དག་གི་ཐོག་མ་མེད་པའི་སྐད་ཅིག་འདི་ནི་རྟོག་པ་རྣམ་པར་རྟོག་པ་དང་སྒྲ་སྟེ་དེ་ལ་ཡོད་པའོ། །གང་གི་ཕྱིར་ཐ་སྙད་འདི་ཐོག་མ་མེད་པའི་བག་ཆགས་ཀྱི་རྣམ་པར་འགྱུར་བའི་དབང་གིས་ངེས་པ་ཡིན་པ་དེས་ན་གང་ལའང་ཞེས་བྱ་བ་སངས་རྒྱས་པ་ལ་མི་བརྩད་དེ་ཞེས་བྱ་བ་ནི། དོན་དམ་པའི་ཁྱད་པར་མེད་ན་ཁྱད་པར་དང་ཁྱད་པར་ཅན་ལ་སོགས་པའི་དངོས་པོར་ཇི་ལྟར་འགྱུར་ཞེས་བྱ་བར་རོ། །འདིས་ནི་བརྒལ་ཞིང་བརྟག་པར་བྱ་བ་འགའ་ཡང་ཡོད་པ་མ་ཡིན་ནོ་ཞེས་བསྟན་པ་མ་ཡིན་ནོ། །རྒོལ་ཞིང་རྟོག་པ་ཡང་ཡོད་པ་མ་ཡིན་ནོ་ཞེས་བརྗོད་པ་ནི་གང་གི་ཀྱང་ནི་བརྩད་མི་བྱ་ཞེས་བྱ་བ་སྟེ། རིགས་པ་ཅན་ལ་སོགས་པས་སོ། །གལ་ཏེ་དེ་ལྟར་སྒྲ་དོན་རྣམ་པར་གཞག་པ་ལ་འཆད་པ་མེད་མོད། དེ་ལྟ་ན་ཡང་སྤྱི་ལ་སོགས་པ་ལྟོས་པར་བྱ་བ་ཡིན་ནོ་ཞེས་གཞན་དག་བརྒྱ་ལ་སྨྲ་བར་འགྱུར་བའི་ཕྱིར་གལ་ཏེ་ཞེས་གསུངས་སོ། །ཇི་སྐད་དུ་བརྗོད་པའི་བློའི་རྣམ་པར་འགྱུར་བ་ཙམ་གྱིས་བཀོད་པ་དོན་དམ་པ་མ་ཡིན་པ་ལ། སྤྱི་བཞི་མཐུན་པ་ལ་སོགས་པ་རྣམ་ལ། གལ་ཏེ་ཇི་སྐད་བརྗོད་པའི་རིགས་པས་ཅད་པ་འགའ་ཡང་མེད་ན། དེ་དེའི་ཚེ་གང་གི་སྤྱི་སོགས་པ་དེ་ཡོད་པ་ལ་ལྟོས་པར་བྱ་བ་ཡིན་ནོ་ཞེས་རྩོད་པར་བྱེད་པ་རིགས་ལྡན་མིན་ལ་འདིར་ཅི་སྨོས་ཏེ། ཡན་ལག་ཅན་དང་ལྡན་པ་ལ་སོགས་པ་རིགས་ལྡན་མིན་ལ་སྟེ། ཚད་མ་ཅན་མ་ཡིན་པ་ལ་ཅི་ལྟོས་ཏེ་ལྟོས་པར་བྱ་བ་ཅི་ཡོད་དེ་ལྟར་བརྗོད་བྱ་བསླད་པར་བསྟན་ནས། སྐབས་ཀྱིས་རྗོད་པར་བྱེད་པ་ཡང་ལོག་པ་དང་ལོག་པ་མ་ཡིན་པའི་རྣམ་པར་དབྱེ་བ་རྣམ་པའི་བསླད་པར་བསྟན་པའི་དོན་དུ་ཐ་མལ་ཞེས་སྨོས་སོ། ཐ་མལ་པའི་བསྟན་བཅོས་ལ་སྒྲའི་འདུས་བྱས་པ་གང་ཡིན་པ་དེར་མ་འཆོལ་བ་མཐོང་བ་མེད་དོ། །གང་ཞིག་ཅེ་ན་རྟགས་སོ། །དཔེར་ན་སྟོན་ཤ་ར་དོ་ཞེས་བྱ་བ་འདི་ལ། ཤ་རད་དེ་དང་སན་གྱི་མཐའ་ཅན་དང༌། པྲ་ནེད་དང༌། ཤི་རོ་དང༌། ན་བྷ་དང༌། སྐྱེས་བུའོ་ཞེས་བྱ་བས་ཕོ་རྟགས་སུ་འགྱུར་བ་བཞིན་ནོ། །ཚིག་ཀྱང་མ་འཆོལ་བར་མཐོང་བ་མེད་དེ་པེར་ན་ཁྱེད་ཅག་རྣམས་ཀྱི་ནོར་ཞེས་བྱ་བ་ལ།
ཏུམྷ་ནང་ཞེས་བྱ་བ་དྲུག་པ་མང་པོའི་ཚིག་གི་མཐའ་ཅན་ཁྱེད་གཉིས་ཞེས་བྱ་བའི་དོན་ལ་སྦྱོར་བ་བཞིན་ནོ། །དེ་སྐད་དུ་ཡང་མདོ་ལས་གཉིས་ལ་མང་པོའི་ཚིག་གོ་ཞེས་འབྱུང་ངོ༌། །གལ་ཏེ་དེ་ལྟར་རྟགས་ལ་སོགས་པ་ཐ་དད་བར་འགྱུར་མོད། དོན་ནི་གཅིག་བོ་ནས་ཡིན་ནོ་སྙམ་ན། དེ་ལ་དོན་ཞེས་གསུངས་སོ། །དཔེར་ན་ཨས་པ་ཞེས་བྱ་བ། ཐ་མ་ལ་པར་ནི་བདག་ཉིད་རྗོད་པར་བྱེད་པ་ཡིན་ལ། ལེགས་པར་སྦྱར་བ་ནི་ཆུ་འཐུང་བ་རྗོད་པར་བྱེད་པ་བཞིན་ནོ། །རང་བཞིན་ཐ་དད་པ་ནི་གསལ་བར་གྲགས་པའི་ཕྱིར་མི་བརྗོད་དོ། །དེ་ལས་ཅིར་འགྱུར་སྙམ་ན། དེ་ལ་མི་རིགས་ཡོད་པ་ཡིན། །ཞེས་སྨོས་སོ། །དེར་ནི་རྟགས་ལ་སོགས་པ་དེ་འདྲ་བ་ཁོ་ན་ཚད་མ་ཡིན་པའི་ཕྱིར་ལེགས་པར་སྦྱར་བ་ཁོ་ན་བཟང་པོ་ཡིན་པར་འགྱུར་རོ་སྙམ་དུ་དགོངས་པའོ། །ལེགས་པར་སྦྱར་བ་ལ་ཞེས་བྱ་བ་ནི་ལེགས་པར་སྦྱར་བའི་སྦྱོར་བ་ལའོ། །དེ་ཞེས་བྱ་བ་ནི་རྟགས་ལ་སོགས་པ་ཕྱིན་ཅི་ལོག་དང་ལྡན་པ་མ་ཡིན་པའོ། །འགྱུར་བར་སྲིད་ པ་ཡིན་ནོ་ཞེས་བྱ་བ་ནི་དགོས ་པའི་དོན་ཏོ། །དེ་ཡང་མ་ཡིན་ནོ་ཞེས་བྱ་བ་བརྗོད་པ་ནི། མཚན་ཉིད་ཀྱིས་ནི་ལེགས་བསྒྲུབས་ལ། །ཞེས་བྱ་བའོ། །རང་གི་མཚན་ཉིད་ཇི་ལྟ་བ་ཡིས་བྱེ་བྲག་ཏུ་བསྒྲུབས་པའི་སྒྲ་ལས་ལེགས་པར་བྱས་བརྗོད་པ་ཡིན་ལ། དེ་ནི་ལེགས་བར་སྦྱར་བ་དང་ཐ་མལ་པ་ལ་མཚུངས་པ་ཡིན་ནོ། །དེས་ཇི་ལྟར་གཅིག་ལེགས་པར་སྦྱར་བ་ཡིན་ལ་གཞན་མ་ཡིན་ཏེ། རང་རང་གི་མཚན་ཉིད་ཀྱིས་ལེགས་པར་བསྒྲུབས་པ་ནི་ཐམས་ཅད་ལ་ཡོད་པའི་ཕྱིར་རོ། འོན་ཏེ་ལེགས་པར་སྦྱར་བའི་མཚན་ཉིད་སྟོན་པའི་སྐྱེས་བུ་ཚད་མ་ཡིན་གྱི་གཞན་ནི་མ་ཡིན་ནོ་ཞེ་ན། འདི་ལ་རིགས་པ་འགའ་ཡང་མེད་དེ། འདི་ནི་དོད་པའི་དོན་འདོན་པ་ཙམ་དུ་སྟོན་པ་ཡིན་ནོ། །དེའི་ཕྱིར་ཐ་མལ་པ་ལ་སོགས་པ་ཡང་། མཚན་ཉིད་ཀྱིས་བསྒྲུབས་པ་ཡིན་པའི་ཕྱིར་ན་ལེགས་པར་སྦྱར་བ་དང་ཅིག་ཤོས་ཀྱིས་རྣམ་པར་དབྱེ་བ་མེད་པའི་ཕྱིར་ལེགས་པ་དང་མི་ལེགས་པར་རྣམ་པར་གནས་པ་མེད་དོ། །འོན་ཏེ། ལེགས་སྦྱར་ཞེས་བྱ་ལྷ་ཡི་ངག །དྲང་སྲོང་ཆེན་པོ་རྣམས་ཀྱིས་བཤད། །ཞེས་བྱ་བས་ལྷའི་ཚིག་ནི་ལེགས་བར་སྦྱར་བ་ཡིན་ལ། དེ་ལས་གཞན་ནི་ལེགས་པར་སྦྱར་བ་མ་ཡིན་ནོ་སྙམ་དུ་དགོངས་ན། ལེགས་པར་སྦྱར་དང་ལེགས་སྦྱར་མིན། །ཞེས་སྨོས་སོ། །
འདི་ཁོ་ན་ལྷའི་ངག་ཡིན་ནོ་ཞེས་བྱ་བ་ལ་ཚད་མ་མེད་པའི་ཕྱིར་རོ། །དེས་ན་འདི་ལྟར་འགྱུར་རོ་ཞེས་བརྗོད་པ་ནི་འདིར་ནི་ཞེས་བྱ་བ་སྟེ། ལེགས་པར་སྦྱར་བ་དང༌། ལེགས་པར་སྦྱར་བ་མ་ཡིན་པ་ཉིད་དོ། །དོན་ཡོད་མ་ཡིན་ཡང་ཞེས་བྱ་བའི་སྒྲ་རྣམས་ནི་དོན་རྟོགས་པ་ཙམ་ལ་ཉེ་བར་མཁོ་བ་ཡིན་ན་དེ་ནི་ལེགས་པར་སྦྱར་བ་མ་ཡིན་པ་ལ་ཡང་ཉམས་པ་མེད་དོ། །འདི་ཞེས་བྱ་ན་ནི་སྒྲ་བྱེ་བྲག་ཏུ་བཤད་པའོ། །ཕྱིས་གཞན་ཉིད་བཅོས་ཞེས་བྱ་བ་ནི་བ་ལང་གི་ཚོགས་ཀྱི་ཚུལ་དུ་དེའི་ལམ་དུ་འཇུག་པ་དག་གོ །དེས་འདིས་འདི་དག་ལ། །ཅི་ཞིག་བརྗོད་པ་མི་ཤེས་སོ། །ཞེས་བྱ་བ་ནི་ཤིན་དུ་ཚབས་ཆེན་པོར་ལེགས་པ་དང་ལེགས་པ་མ་ཡིན་པར་འཛིན་པའི་རྨོངས་པ་བསལ་བའི་དོན་དུ་ཅི་གཞིག་བརྗོད་པར་བྱ་བ་ཡིན་ཏེ། འཛིན་པ་དམ་པ་ཉིད་ཀྱིས་རིགས་པ་བརྗོད་ཀྱང་མི་རྟོགས་པའི་ཕྱིར་རོ། །ཆོས་དང་ཆོས་མ་ཡིན་པའི་རྒྱུ་མཚན་ཉིད་ཀྱང་ལེགས་པར་སྦྱར་དང་ལེགས་པར་སྦྱར་བ་མ་ཡིན་པ་ཉིད་དུ་རིགས་པ་མ་ཡིན་ནོ་ཞེས་བརྗོད་པ་ནི། མ་མཐོང་བའི་དོན་བརྗོད་ནི་ཞེས་བྱ་བའོ། །གལ་ཏེ་ལས་ནི་འདིས་ཆོས་སུ་འགྱུར་རོ་ཞེས་བྱ་བའི་བྲོ་བའི་ཚིག་ལ་ཡིད་ཆེས་པ་མེད་པ་མ་ཡིན་ནམ། ལེགས་པར་སྦྱར་བ་མ་བརྗོད་ན་ཕུང་བར་འགྱུར་རོ་ཞེས་བྱ་བ་ལ་སོགས་པའི་ཚིག་ལ་ནི་ཡིད་ཆེས་པ་ཡིན་པའི་ཕྱིར། ཁྱད་པར་ཆེ་ཞེ་ན། དེ་ལ་ཞེས་སྨོས་ཏེ། བྲོ་བའི་ངག་བཞིན་ནོ། །དེས་ཞེས་བྱ་བ་ནི་ཉེ་བར་སྡུད་པའོ། །དེའི་ཕྱིར་བརྗོད་བྱ་དང་རྗོད་བྱེད་ཀྱི་དངོས་པོ་ལ་ཡང་རྟོག་བ་རྩམ་སྐྱབས་ཡིན་པའི་ཕྱིར་སྒྲ་ཙམ་ལས་མ་གཏོགས་པར་ནི་ཡན་ལག་ཅན་ལ་སོགས་པ་གྲུབ་པ་མེད་དོ་ཞེས་གནས་སོ། །དེ་ལྟར་ཡན་ལག་ཅན་བསལ་བའི་ཕྱིར་ན་ལུས་འབྱུང་བའི་རྡུལ་ཕྲ་རབ་ཀྱི་ཚོགས་ཙམ་ཞིག་ཡིན་པར་ལུས་པ་ཡིན་ནོ། །དེས་ན་ཤེས་པ་དེའི་ཉེ་བར་ལེན་པ་ཅན་ཡིན་པར་སྨྲ་བ་རྣམ་པར་བརྟག་པའི་དོན་དུ་གལ་ཏེ་ཞེས་གསུངས་སོ། །སྐྱེས་པ་ཡིན་ན་ཞེས་བྱ་བ་ནི་ཤེས་པའོ། །རྩ་བ་ལ་སོགས་པ་རྒྱུ་ཡིན་པ་ལྟ་བུ་ཞིག་གོ་ཞེས་འབྲེལ་ཏོ། །ཡན་ལག་གཅིག་དང་བྲལ་ནའང་མིན། །ཞེས་བྱ་བ་ནི་ལུས་སོ། །མིན་ཞེས་བྱ་བ་ནི་ཤེས་པ་སྐྱེད་བར་མི་འགྱུར་རོ། །རྡུལ་ཕྲ་རབ་འཕེལ་བ་དང་འགྲིབ་པ་ནི་རྟོགས་པར་མི་ནུས་པའི་ཕྱིར་ན་སེར་མོ་ལ་སོགས་པ་བརྗོད་པ་ཡན་ལག་གི་སྒྲས་ཐ་སྙད་དུ་བྱས་སོ། །རྣམ་པར་རྟོག་པ་
གཉིས་པ་སེལ་བ་ནི་རེ་རེ་ཞེས་བྱ་བའོ། །མང་པོར་འབྱུང་བར་འགྱུར་ཞེས་བྱ་བ་ནི་རྣམ་པར་ཤེས་པ་མང་པོ་འབྱུང་བར་འགྱུར་རོ་གལ་ཏ་འབྱུང་བ་དང་རྔུབ་པ་དག་ངེས་པར་བྱེད་པ་ཡིན་པའི་ཕྱིར་ཅིག་ཅར་མང་པོ་འབྱུང་བར་མི་འགྱུར་རོ་སྙམ་དུ་དོགས་ན། དུ་མ་ཉིད་དུ་ཞེས་གསུངས་སོ། །ལུས་བཞིན་དུ་འབྱུང་བ་དང་རྔུབ་པ་དག་ཀྱང་ཡུལ་ཐ་དད་པར་དང་འབྲེལ་བའི་ཕྱིར་དུ་མ་ཉིད་ཡིན་པར་ངེས་བར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །དེ་མེད་ཀྱང་ཞེས་བྱ་བ་ནི་གཅིག་མེད་ཀྱང་པོ། །འོན་ཏེ་ཞེས་བྱ་བ་ལ་སོགས་པས་ནི་རྣམ་པར་རྟོག་པ་གཉིས་པ་སློང་བའོ། །རྣམ་འགྲེལ་གྱི་ལྷག་མ་ཕྱེད་པོ་འཆད་པ་ནི། དེ་སྐྱེས་པར་བྱེད་པ་ནི་ཞེས་བྱ་བའོ། །གལ་ཏེ་འདི་དག་སྐྱེད་བྱེད་ཡིན་མོད། དེ་ལྟ་ན་ཡང་ལུས་ཀྱི་ཆུ་དུ་མ་ལྷན་ཅིག་བྱེད་པ་ཡིན་པའི་ཕྱིར་ཆ་གཅིག་མེད་ན་ཡང་རྣམ་བར་ཤེས་པ་སྐྱེ་བར་མི་འགྱུར་སྙམ་ན། ཆ་ཤས་གཅིག་འགའ་གང་ཡིན་པ། །ཞེས་གསུངས་ཏེ། །ཐམས་ཅད་ནི་མ་ཡིན་པའོ། །དེའི་ཞེས་བྱ་བ་ནི་ལུས་ཀྱིའོ། །ལྷན་ཅིག་བྱེད་པ་ཞེས་བྱ་བ་ནི་སྐབས་ཀྱིས་འབྱུང་རྔུབ་དག་གིའོ། །དེས་ན་རྣམ་པར་ཤེས་པ་མི་སྐྱེ་བ་ཡིན་ནོ་སྙམ་དུ་བསམས་པའོ། །འོན་ནི་ལྷན་ཅིག་བྱེད་པ་ཐ་དད་པ་གཞན་དང་གཞན་ལས་རྣམ་པར་ཤེས་པ་ཐ་དད་པར་འགྱུར་རོ་སྙམ་ན། ལྷན་ཅིག་བྱེད་པ་ཞེས་སྨོས་སོ། །འབྱུང་རྔུབ་དག་ཀྱང་ཞེས་བྱ་བ་ནི་ལུས་འབའ་ཞིག་ཏུ་མ་ཟད་པའོ། །དེ་ཉིད་དུ་ཞེས་བྱ་བ་ནི་ལུས་ལ་བརྗོད་པ་གན་ཡིན་པའོ། །འདི་དག་དུ་མ་ཉིད་ཀྱང་ཡུལ་དུ་མ་དང་འབྲེལ་པའི་ཕྱིར་རོ། །ཐལ་བདེ་གང་ཡིན་སྙམ་ན་ཡང་ལག་གཅིག་ཅེས་གསུངས་སོ། །མི་འབྱུང་བའམ་ཤེས་བྱ་བ་ནི་རྣམ་པར་ཤེས་པ་སྐྱེ་བར་ཞེས་བྱ་བ་སྐབས་ཡིན་ནོ། །སྐྱེས་བུ་གང་ལ་དབུགས་ཇི་ཙམ་ཡོད་པ་དེ་ཙམ་ལས་དམན་པའི་གནས་སྐབས་ནའོ། །འདི་ནི་ཐལ་བ་གཅིག་གོ །དུ་མ་འབྱུང་བར་འགྱུར་རོ་ཞེས་བྱ་བ་སོ་སོར་བུས་པའི་ཕྱོགས་ལ་ཐལ་བ་གཉིས་པའོ།། གལ་ཏེ་འབྱུང་བ་དང་རྔུབ་པ་དག་ལ་གཅིག་ཉིད་དུ་གྲུབ་པ་མ་ཡིན་ནམ། དེས་ན་ལུས་བཞིན་དུ་ཐལ་བར་ཇི་ལྟར་འགྱུར་སྙམ་ན། ལུས་བཞིན་དུ་ཞེས་སྨོས་སོ། །གང་གི་ཕྱིར་འགལ་བའི་ཆོས་གནས་པ་ཐམས་ཅད་ལ་མཚུངས་པའི་ཕྱིར་ན་ལུས་བཞིན་དུ་འདི་གཉིས་གཅིག་ཉིད་དུ་མ་གྲུབ་པ་དེའི་
ཕྱིར་ཐལ་བ་དེ་ཉིད་དུ་འགྱུར་རོ། །འོན་ཏེ་གཅིག་ཉིད་དུ་ཞེས་བྱ་བ་ནི་འབྱུང་བའམ་རྔུབ་པ་དེ་དུས་གཞན་དུ་ཡང་རང་བཞིན་གཅིག་ཉིད་ཡིན་ནམ། སྐད་ཅིག་མའི་རང་བཞིན་ཡིན། །དེ་ལ་ཕྱོགས་དང་པོ་ལ་བརྗོད་པ་ནི་གཅིག་ཉིད་ཡིན་ན་ཞེས་བྱ་བའོ། །མ་གསལ་འགྱུར་ཞེས་བྱ་བ་ནི་རིམ་མ་ཡིན་བར་འགྱུར་རོ། །དེ་རྒྱུ་ནི་རྣམ་པར་ཤེས་པ་དུ་མའི་རྒྱུའོ། །དེས་ན་ཞེས་བྱ་བ་ནི་དུ་མ་གསལ་བར་འགྱུར་བ་ས་ནའོ། །ཕྱེད་ཕྱི་མ་འཆད་པ་ནི་འོན་ཏེ་ཞེས་བྱ་བའོ། །ཅིའི་ཕྱིར་བརྒལ་ཞིང་བརྟག་པར་འོས་པ་མ་ཡིན་ཞེ་ན། མེ་ནི་ཞེས་གསུངས་སོ། །མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །ཁྱད་པར་མེད་ཕྱིར་ཞེས་བྱ་བ་འདིའི་བཤད་པ་ནི་ཁྱད་པར་མེད་པའི་ཕྱིར་རི་ཞེས་བྱ་བ་འདི་ཡིན་ཏེ། འབྱུང་བ་ལ་སོགས་པའོ། །རེ་ཞིག་ཇི་ལྟར་མེ་ལ་ཐལ་བ་མེད་པ་དེ་ལྟར་བརྗོད་པ་ནི་མེ་ལས་ནི་ཞེ་པའོ། །དམིགས་པ་ནི་སྐྱེ་བའམ་ཚད་མས་ངེས་པའོ། གལ་ཏེ་མེད་དེ་ཉིད་ལས་རིམ་བ་དང་ལྡན་པའི་དུ་བ་མཐའ་དག་སྐྱེ་བར་འགྱུར་ན་ནི་དེ་ལས་ཡང་ཐལ་བར་འདིར་འགྱུར་བ་ཞིག་ན། དེ་ལྟ་ནི་མ་ཡིན་ཏེ། མེ་གཞན་དང་གཞན་ཉིད་ཡིན་བར་གསལ་བར་ངེས་པར་གཟུངས་བའི་ཕྱིར་རོ། །སྐབས་ལ་ནི་ཐལ་བར་འགྱུར་བ་ཁོ་ནའོ་ཞེ་ཁྱད་པར་བརྗོད་པ་ནི་འདིར་ནི་ཞེས་བྱ་བའོ། །སད་པར་བྱེད་པའི་རྐྱེན་ནི་ཡུལ་ཉེ་བའོ། །དེ་ཡང་འདོད་ཆགས་ལ་སོགས་པའི་སེམས་ཀྱི་རྒྱུ་མ་ཡིན་ཏེ་མ་ངེས་པའི་ཕྱིར་རོ་ཞེས་བརྗོད་པ་ནི་སད་པར་བྱེད་པའི་ཞེས་གསུངས་སོ། །གཅིག་གི་སྙིང་དུ་སྡུག་པ་གང་ཡིན་པ་དེ་ནི་གཞན་ལ་མ་ཡིན་ནོ། །གཅིག་ཉིད་ལ་ཡང་སྡུག་པ་ཉིད། །རེས་འགའ་མི་སྡུག་པར་འགྱུར་རོ། །ཞེས་བྱ་བ་ལ་སོགས་པ་ནི་ངེས་པ་མེད་པའི་དོན་ཏོ། །དེས་ན་ཡུལ་ནི་འདོད་ཆགས་ལ་སོགས་པའི་རྒྱུ་མ་ཡིན་ནོ་ཞེས་བྱ་བར་བསམས་པའོ། །སད་པར་བྱེད་པ་འདོད་ཆགས་ལ་སོགས་པའི་རྒྱུ་མ་ཡིན་ནོ་ཞེས་བྱ་བ་འདི་ག་ལས་ཡིན་སྙམ་ན། སྔོན་གྱི་འདུ་བྱེད་ཅེས་བྱ་བ་གསུངས་ཏེ། སྟོབས་དང་ལྡན་པས་ནི་འདོད་ཆགས་ལ་སོགས་པ་གྲགས་པར་འགྱུར་ལ་མི་ལྡན་པས་ནི་དམན་པར་འགྱུར་རོ། །དེས་ན་ཞེས་བྱ་ན་ནི་གང་གི་ཕྱིར་དབུགས་དབྱུང་བ་ལ་སོགས་པ་གཅིག་ཉིད་ལས་འདོད་ཆགས་ལ་སོགས་པའི་སེམས་འབྱུང་བའི་གཏན་ཚིགས་དེས་ནའོ། །སེམས་ཀྱི་རྒྱུ་མ་ཡིན་ན་ཞེས་བྱ་བ་ནི་སྔར་རོ། །དེ་བས་ན་སྔར་
དང་ཕྱིས་ཀྱང་རྒྱུ་མ་ཡིན་བའི་ཕྱིར་དབུགས་དབྱུང་བ་ལ་སོགས་པ་ནི་རྒྱུ་ཉིད་དུ་མི་འགྱུར་རོ། །དེ་སྟེ་རྒྱུ་ཡིན་ན་དེའི་ཚེ། དེའི་རང་བཞིན་ནམ་ཡང་ན་ཉམས་པ་མེད་པའི་ཕྱིར་འདོད་ཆགས་ལ་སོགས་པའི་སེམས་གཞན་དང་གཞན་འབྱུང་བའི་ཕྱིར་གཅིག་ཡིན་ཡང་གཅིག་ཉིད་ཀྱིས་ཚེ་མང་པོ་གསལ་བར་འགྱུར་རོ་ཞེས་གྲུབ་པོ། །དེ་བས་ན་རིམ་གྱིས་ཀྱང་དུ་མའི་རྒྱུ་ཉིད་དུ་མི་འཐད་དོ། །དེས་ན་ཚུ་རོལ་མཛེས་པ་ལས་སྔོན་གྱི་འདུ་བྱེད་པ་ཉིད་རྒྱུ་ཡིན་པར་ཐལ་བར་འགྱུར་རོ། །སངས་རྒྱས་ལ་ལྟོས་ནས་ནི་འདི་ཐལ་བ་མ་ཡིན་ཏེ། མངོན་པར་འདོད་པ་ཉིད་ཡིན་པའི་ཕྱིར་རོ། །བརྗོད་པ་ཡིན་ཏེ་ཞེས་བྱ་བ་ནི། གཅིག་ཉིད་ནའང་མང་གསལ་འགྱུར། །ཞེས་བྱ་བ་ལ་སོགས་པ་སུན་འབྱིན་པའོ། །གཅིག་ཉིད་དུ་འཐད་པ་ནིའོ། །དེ་ལས་ཞེས་བྱ་བ་ནི་འབྱུང་རྔུབ་ལས་སོ། །ཡང་ན་གལ་ཏེ་འབྱུང་རྔུབ་ལས་ངེས་པ་མ་ཡིན་ན་འོ་ན་གང་ལས་ངེས་པ་ཡིན་སྙམ་ན། དེ་ལས་ངེས་པ་ཡིན་ཞེས་ཡང་བཟླ་བར་བྱའོ། །སྔ་མ་སྔ་མའི་འདུ་བྱེད་པ་ལས་སེམས་ཕྱི་མ་ཕྱི་མ་ངེས་པ་ཡིན་ནོ་ཞེས་བྱ་བའི་དོན་ཏོ། །འོན་ཏེ་སྔ་མ་དང་ཕྱི་མར་རང་བཞིན་གཅིག་པའི་བློ་ཉིད་ཀྱིས་དོན་དུ་མ་འཛིན་པ་ཡིན་ན། དེའི་ཚེ་གཅིག་གིས་དུ་མ་ཤེས་པར་མཁས་པར་གྱུར་པ་ན། དོན་དུ་མ་ཅིག་ཅར་ཉིད་ཤེས་པར་འགྱུར་རོ། །ཅིའི་ཕྱིར་ཞེ་ན་འགལ་བ་མེད་ཕྱིར་རོ། །རྟག་པའི་རང་བཞིན་དོན་ཅིག་ཅར་འཛིན་པ་ལ་འགལ་བ་ཅི་ཡང་མེད་དོ་ཞེས་བྱ་བའི་དོན་ཏོ། །འོན་ཏེ་དོན་ཅིག་ཅར་འཛིན་པར་ནུས་པ་མ་ཡིན་ནོ་སྙམ་ན། རིམ་གྱིས་ཀྱང་མིན་ཞེས་སྨྲས་སོ། །དབུགས་འབྱུང་བ་ལ་སོགས་པ་ལས་བློ་གཅིག་ཉིད་དུ་ངེས་པ་མ་ཡིན་པའོ། །དེས་ན་མང་པོ་གསལ་བར་ཐལ་བ་ཇི་ལྟར་སྤང་བར་བྱ་སྙམ་དུ་དགོངས་པའོ། །འོ་ན་ཞེས་བྱ་བ་ནི་གཞན་སངས་རྒྱས་པ་ལ་འདྲི་བའོ། །གལ་ཏེ་རིམ་གྱིས་དོན་མཛད་པའི་བློ་དུ་མར་གྱུར་བ་དེ་ནི་དེའི་ཚེ་དེ་དག་ཅིག་ཅར་འབྱུང་བར་བརྗོད་པ་མཛེས་པ་མཛེས་པ་ཞིག་ན། འོན་ཀྱང་དེ་ནི་གཅིག་ཁོ་ན་ཡིན་ནོ་ཞེས་དགོངས་པར་བྱེད་པ་ནི། འོན་ཏེ་ཞེས་བྱ་བའོ། །གང་གི་ཕྱིར་གཅིག་ཉིད་དོན་དུ་མར་རིམ་གྱིས་འཛིན་པའི་རང་བཞིན་ཡིན་པའི་གཏན་ཚིགས་དེས་ནའོ། །འདི་ལ་རེ་ཞིག་རང་ཉིད་ལན་འདེབས་པ་ནི་དེ་ཡང་ཞེས་བརྗོད་པའོ། །བདེ་བ་ལ་སོགས་པའི་
རྣམ་པ་ལས་མ་གཏོགས་པར་ཡིད་དམིགས་པ་མེད་པའི་ཕྱིར་དེ་དོན་དུ་མ་འཛིན་པ་ཉིད་དུ་ཇི་ལྟར་བརྗོད་ཅེས་བྱ་བའི་དོན་ཏོ། །འོན་ཏེ་གཟུགས་ལ་སོགས་པའི་རྣམ་པ་ནི་དོན་ཉིད་ཀྱི་ཡིན་གྱི་ཤེས་པའི་བདག་ཉིད་ནི་མ་ཡིན་ནོ། །དེ་ལ་སྣང་བ་ཡང་གཟུགས་བརྙན་ཡིན་ཏེ། རྣམ་པ་མེད་པ་བློ་ཙམ་གྱི་རང་བཞིན་ནི་རྣམ་པ་ཐམས་ཅད་ཀྱི་རྗེས་སུ་འཇུག་པ་ཡིན་པའི་ཕྱིར་རོ་སྙམ་དུ་བསམས་ནས། གཞན་གྱིས་གལ་ཏེ་ཡིད་ནི་ཞེས་སྨོས་སོ། །གལ་ཏེ་རྣམ་པར་ཤེས་པ་བྱ་བ་མེད་པ་ཉིད་ལ་བརྟེན་ནས། ཞེས་བྱ་བ་ནི་རྣམ་པ་དེའི་བདག་ཉིད་དུ་གྱུར་པ་དང་མ་འབྲེལ་པའི་རྣམ་པར་ཤེས་པ་ལ་བརྟེན་ནས་སོ། །དོན་གྱི་གཟུགས་བརྙན་ཙམ་སྐྱེ་བ་ཡིན་ན། དེའི་ཚེ་དོན་རྣམ་ལ་ཤེས་པ་དང་ཉེ་བའི་རིམ་པ་ཁྱད་པར་མེད་པའི་ཕྱིར་ཉེ་བའི་དོན་ཐམས་ཅད་ཅིག་ཅར་འཛིན་པར་ཐལ་བར་འགྱུར་རོ། །ཆགས་པ་ལ་སོགས་པའི་གནས་སྐབས་སུ་ནི་འགའ་ཞིག་ཁོ་ན་ལ་ཤེས་པར་ཡང་མཐོང་བ་ཡིན་ནོ། །འོན་ཏེ་ཞེས་བྱ་བ་ནི་གཞན་གྱིའོ། །གོམས་པའི་ཁྱད་པར་གྱི་རིམ་པས་གང་ལ་ཆགས་པ་དེ་ལ་གཟུགས་བརྙན་སྐྱེ་བའི་ཕྱིར་ཤེས་པ་ཡིན་གྱི། གཞན་ལ་ནི་མ་ཡིན་ཏེ། དེས་ན་ཅིག་ཅར་དོན་འཛིན་པར་ཐལ་བ་མ་ཡིན་ནོ་སྙམ་ན། ལན་དུ་འོ་ན་དེ་ཉིད་ཅེས་གསུངས་ཏེ། བསྒོམས་པ་ཉིད་དོ། །དོན་གྱི་རྣམ་པའི་ཞེས་བྱ་བ་གཟུགས་བརྙན་གྱིའོ། །དབུགས་འབྱུང་བ་ལ་སོགས་པ་ཞེས་བྱ་བ་ནི་དེ་དག་ནི་ཡོད་ཀྱང་འགའ་ཞིག་ལ་ཆགས་པ་ན་བྱ་བ་བྱེད་པའི་ཕྱིར་རོ། །དེ་ལ་ནི་ཁོ་བོ་ཅག་ཀྱང་ཤེས་པ་དང་རྣམ་པ་དག་ཐ་མི་དད་པར་སྒྲུབ་པར་བྱེད་པ་དེ་འདྲ་ང་ལ་འཆོལ་བ་མེད་དོ། །གང་གི་དབང་གིས་ཡུལ་རྟོགས་པར་རྣམ་པར་གཞག་པ། གོམས་པ་སྔ་མ་སྔ་མ་སྔོན་དུ་འགྲོ་བ་ཅན་གྱི་གཟུགས་བརྙན་དེ་གྲུབ་སྟ། འབྱུང་དང་རྔུབ་པ་རྒྱུ་མ་ཡིན་ན། དེ་ཙམ་གྱིས་རྣམ་པར་ཤེས་པ་ཐོག་མ་མེད་པ་གྲུབ་པ་དང་ཤེས་པ་དང་ཤེས་བྱའི་ཐ་སྙད་ཡོངས་སུ་རྫོགས་པས་འདིར་གཟུགས་བརྙན་དང་ཐ་མི་དད་པའི་ཤེས་པ་བཙལ་བ་ས་ས་ཅི་ཞིག་བྱ། གཟུགས་བརྙན་གྱི་སྒྲས་བརྗོད་པར་བྱ་བའི་དོན། སྔ་མ་སྔ་མའི་གོམས་པ་ལས་རྒྱུན་འཇུག་པ་དེ་ཉིད་ཁོ་བོ་ཅག་ཤེས་པ་བརྗོད་པ་ཡིན་ཏེ། དེ་ལས་གཞན་པའི་ཤེས་པ་ལ་ཚད་མ་མེད་པའི་ཕྱིར་རོ། །དེ་ལས་ཐ་དད་
པའི་ཤེས་པ་གྲུབ་པ་ནི་རིགས་པས་ཀྱང་གསལ་པའི་ཕྱིར་རོ། །དེ་བས་ན་གཟུགས་བརྙན་འདི་ནི་ལུས་ཀྱིས་བསྐྱེད་པ་ཡིན་ཡང་གོམས་པ་སྔ་མ་སྔ་མའི་བདག་པོ་ལ་སྟོས་པ་ཁོ་ནའོ། །ལྟོས་པ་མེད་ན་ནི་ཤེས་པ་ཐ་དད་པར་ཁས་བླངས་ཀྱང་ཉེས་པ་དེ་གནས་པ་ཁོ་ནའོ་ཞེས་སྟོན་པ་ནི་ཕྱེད་པོ་ཕྱི་མ་འཆད་པ་ནི། མེ་ལོང་བཞིན་དུ་ཞེས་བྱ་བའོ། །འོན་ཏེ་ཞེས་བྱ་བ་ནི་ཆགས་པའི་ཡུལ་ལས་གཞན་འཛིན་པའི་ནུས་པའོ། །དོན་གཞན་དེ་འཛིན་པར་མི་འགྱུར་རོ། །དེ་ཡན་ཆད་ཀྱིས་ནི་བརྟག་པའི་ཕྱོགས་ལ་དབུགས་འབྱུང་བ་ལ་སོགས་པའི་ཤེས་པའི་རྒྱུ་ཡིན་པ་བསལ་ནས། སྐད་ཅིག་གི་ཕྱོགས་དགག་པའི་དོན་དུ་གཞན་གྱི་དོགས་པ་བསུ་བ་ནི། འོན་ཏེ་ཞེས་བྱ་བའོ། །དེ་ལ་ཡང་ཞེས་བྱ་བ་ནི་རྣམ་པ་མེད་པའི་ཤེས་པ་འགའ་ཞིག་ཏུ་མ་ཟད་དེ་དབུགས་འབྱུང་རྔུབ་ལ་ཡང་ངོ༌། །སྐད་ཅིག་མང་པོ་ནི་ཡན་ལག་ཅན་སུན་ཕྱུང་བའི་ཕྱིར་རོ། །བརྒྱ་ལ་དུས་གཅིག་ཏུ་ཉེ་བར་གནས་པ་ཉིད་དུ་འགྱུར་རོ་སྙམ་དུ་དོགས་ན། སྔ་མ་དང་ཕྱི་མར་ཡང་དེ་ལྟ་བུར་གྱུར་པ་ཉིད་དུ་སྟོན་པས་རིམ་པ་ཅན་དུ་སྟོན་པ་ནི། རང་རིགས་མིན་པའི་དུས་ཅན་གྱི། །ཞེས་བྱ་བའོ། །འདི་དག་རང་གི་རིགས་ཀྱི་དུས་ན་ངེས་པར་ཡོད་པ་དེ་བཞེན་དུ་སྔ་མ་དང་ཕྱི་མར་ཡང་ཡིན་ཏེ། དེ་འདྲ་བའི་ཚོགས་པ་ཡོད་པའི་ཕྱིར་རོ། །དེ་འདྲ་བའི་སེམས་ཉིད་ཀྱི་ཞེས་བྱ་བ་ནི་སྐད་ཅིག་མང་པོ་དུས་གཅིག་པོ་དེར་མ་ངེས་པའིའོ། །དེ་དག་ཅེས་བྱ་བ་ནི་དབུགས་དབྱུང་བ་དང་གོ །དང་པོ་ནི་སྐྱེ་པ་དང་པོའོ། །དེའི་སྔ་རོལ་ན་རང་གི་རིགས་ཀྱི་དབུགས་འབྱུང་བ་མེད་པའི་ཕྱིར་རོ། །དེ་ཉིད་བརྗོད་པ་ནི་གང་གི་ཕྱིར་ཞེས་བྱ་བ་བསྣན་ཏེ། དེ་རྒྱུ་དེ་འདྲ་ཡོད་མ་ཡིན། །ཞེས་བྱ་བ་སྟེ། འཇིག་རྟེན་ཕ་རོལ་མི་འདོད་པའི་ཕྱིར་རོ། །ཡོད་ཀྱང་ཞེས་བྱ་བ་ནི་དེའི་རྒྱུ་དེ་འདྲ་བའོ། །དེ་ནི་མེད་བཞིན་དུ་ལ་སོགས་པ་ཁས་བླངས་བ་ཡིན་ནོ། །དབུགས་དབྱུང་བ་རྣམས་དུ་མ་ཉིད་དུ་ངེས་སོ། །ཅིའི་ཕྱིར་སྙམ་ན་དབུགས་འབྱུང་ཐ་སྙད་ཡུལ་ཅན་ཕྱིར་ཏེ། ཡུལ་རྒྱ་ཆེར་ཁྱབ་པའི་ཕྱིར་རོ། །དེའི་ཕྱིར་ཞེས་བྱ་བ་ནི་དབུགས་འབྱུང་བ་རྣམས་གཅིག་ཡིན་པའི་ཕྱིར། རྣམ་པར་རྟོག་པ་རྣམ་ཅིག་ཅར་སྐྱེ་བར་འགྱུར་རོ། །འདི་ནི་ཚུ་རོལ་མཛེས་པ་ལ་ལ་འཇིག་རྟེན་ཕ་
རོལ་གྲུབ་པར་ཐལ་བ་ཡང་བར་དོར་ནས་བརྗོད་པ་ཡིན་ནོ། །རྣམ་པར་འགྲེལ་པ་ནི་དབུགས་སྐད་ཅིག་མ་ཞེས་བྱ་བ་སྟེ། འདིས་རང་གི་གཞུང་ལས་འདས་ཀྱང་གཞན་གྱི་བསྒྲུབ་བྱ་མི་འགྲུབ་བ་ཞེས་སྟོན་པ་ཡིན་ནོ། །རིམ་གྱིས་འབྱུང་བ་ནི་ཞེས་བྱ་བ་ནི་དབུགས་འབྱུང་བ་ཡང་རིམ་གྱིས་འབྱུང་བ་ཡིན་ནོ་སྙམ་དུ་དགོངས་པའོ། །རྣམ་འགྲེལ་གཉིས་པ་རྣམ་པར་འགྲེལ་པ་ན་ལན་གསུང་པ་ནི། དབུགས་འབྱུང་བ་ལ་སོགས་པ་དེ་ཉིད་ཅེས་བྱ་བའོ། །ཇི་ལྟར་འཇིག་རྟེན་ཕ་རོལ་ཁས་མ་བླངས་ཀྱང་དབུགས་ཉིད་དབུགས་ཀྱི་རྒྱུ་ཡིན་པ་དེ་ལྟར་གཞན་དག་འདོད་པའི་དོགས་པ་བསུ་བ་ནི་ཕ་མའི་དབུགས་ཉིད་ཅེས་བྱ་བའོ། །མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །དེ་ལྟ་བུའི་བདག་ཉིད་དུ་གྱུར་པ་ཞེས་བྱ་བ་ནི་ཕ་མ་དག་གི་དབུགས་ཞན་པ་དང་དྲག་པ་ལ་སོགས་པའི་རང་བཞིན་ཅི་འདྲ་བའོ། །གཞན་ཡང་དེ་ལྟ་ན་ཕ་མ་ཉིད་ཀྱི་སེམས་འཕོས་པས་ཅི་སྟེ་མི་བརྗོད། དེ་ལ་ཡང་སྔར་བརྗོད་ཟིན་ཏོ། །དེའི་ཕྱིར་དང་པོ་དབུགས་འབྱུང་བ་མི་རུང་ངོ༌། །དབུགས་འབྱུང་ཐ་དད་ཡུལ་ཅན་ཕྱིར། །ཞེས་བྱ་བ་ལ་སོགས་པ་རྣམ་པར་འགྲེལ་བ་ནི་ཁས་བླངས་ནས་ཞེས་བྱ་བའོ། །དབུགས་དང་པོ་འབྱུང་བར་ཁས་བླངས་ནས་བརྗོད་པའོ། །ཅི་བརྗོད་པ་དེ་གང་ཞེ་ན། བཤད་པ་དབུགས་རྣམས་ནི་དུ་མ་ཉིད་དེ་ཞེས་བྱ་བའོ། །ཅིའི་ཕྱིར་ཞེ་ན། ཡུལ་ཞེས་བྱ་བའོ། །འདི་ཉིད་གསལ་འདེབས་པ་ནི་ཡུལ་དུ་མ་ཞེས་བྱ་བའོ། །དེ་ལྟར་གྱུར་ན་ཉེས་པ་ཅི་ཡོད་སྙམ་ན། དབུགས་དུ་མ་ཞེས་བྱ་བའོ། །ཡིད་ཀྱི་རྣམ་པར་ཤེས་པ་ངུ་མ་ཅིག་ཅར་སྐྱེ་བར་ཐལ་བར་འགྱུར་རོ། །སྐད་ཅིག་མའི་ཕྱོགས་ལ་ལྟོས་ནས་ཀྱང༌། ཀྱང་གི་སྒྲས་བསྡུས་པའི་གནོད་པར་བྱེད་པ་གཞན་བརྗོད་པ་ནི་རིགས་མཐུན་པའི་ཡིད་ནི་ཞེས་བྱ་བའོ། །དབུགས་ལ་སོགས་པ་སྐད་ཅིག་གཅིག་ལ་ཅི་འདྲ་བར་གྱུར་པ་དེ་འདྲ་བ་ནི་སྐད་ཅིག་གཞན་དུ་ཡང་ཡིན་ཏེ། དེས་ན་ཡིད་ཀྱི་རྣམ་པར་ཤེས་པ་ཅི་འདྲ་བ་ཞིག་གཅིག་གི་ཚེ་སྐྱེས་པས་དེ་འདྲ་ཉིད་གཞན་གྱི་ཚེ་ཡང་འགྱུར་གྱི་དེ་འདྲ་བ་མ་ཡིན་པར་མི་འགྱུར་ཏེ། རྒྱུ་རྣམས་མཚུངས་པའི་ཕྱིར་རོ། །འོན་ཏེ་སྐད་ཅིག་ཐ་དད་པ་ཉིད་ལས་རིགས་མི་མཐུན་བ་སྐྱེད་པར་འགྱུར་བ་ཡིན་ནོ་སྙམ་ན། སྐད་ཅིག་ཐ་དད་པ་ཉིད་ཀྱིས་
ཞེས་སྨོས་སོ། །འོ་ན་ཅིས་འགྱུར་སྙམ་ན། ཇི་ལྟར་རིགས་མཐུན་པའི་ཞེས་གསུངས་སོ། །དུ་མ་ཞེས་བྱ་བ་ནི་རིམ་གྱིས་འབྱུང་བའི་ཕྱིར་རོ། །གལ་ཏེ་ཞེས་བྱ་བ་ནི་གཞན་དག་ཡིད་ཀྱི་རྣམ་པར་ཤེས་པ་དུ་མ་ཅིག་ཅར་སྐྱེ་བར་ཐལ་བ་ཡོད་པའོ། །ཞིང་དང་ས་བོན་དང་ཆུ་ལ་སོགས་པ་བཞིན་ནོ་སྙམ་དུ་ཡིད་ལ་གཞག་པའོ། །འོན་ཏེ་གཞན་དུ་ཡིན་ཞེས་བྱ་བ་ནི་ཇི་ལྟར་སྲིད་པས་སོ། །དེ་ལ་ཕྱོགས་དང་པོ་སེལ་བས་ནི། ཚོགས་པའི་རང་བཞིན་གྱིས་ཞེས་བྱ་བའོ། །ཚོགས་པ་མ་ཚང་བ་ནི་ཚོགས་པའོ། །གཞན་དུ་ཡིན་ཞེས་བྱ་བའི་ཕྱོགས་ལ་བརྟེན་ནས་བཤད་པ་ནི་འོན་ཏེ་ཇི་ལྟར་ཞེས་བྱ་བའོ། །འདི་ནི་ཇི་ལྟར་ཡོད་རྒྱུ་ཡིན། །ཞེས་བྱ་བའི་འགྲེལ་པའོ། །ཉེ་བར་གནས་པ་རྒྱུ་ཉིད་མ་ཡིན་ཏེ་ཞེས་བྱ་བ་ནི་འབྲས་བུ་དེ་འདྲ་བ་ཉིད་ཀྱི་ཞེས་བྱ་བ་བསམས་པའོ། །འོན་ཀྱང་ཉེ་བར་གནས་པ་མ་ཡིན་ནོ་ཞེས་བརྗོད་པར་བྱའོ། །དེ་ལྟར་ནི་བརྗོད་པར་འཐད་པ་མ་ཡིན་ཏེ། ཆོད་པའི་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པའི་ཕྱིར་རོ། །ལྡོག་པའི་རྗེས་སུ་མི་བྱེད་ཀྱང་རྒྱུ་མ་ཡིན་པར་ཇི་ལྟར་འགྱུར་སྙམ་ན། རྒྱུ་དང་འབྲས་བུ་ཉིད་ནི་ཞེས་བྱ་བའོ། །དེས་ན་ཉེ་བར་གནས་པ་མ་ཡིན་པ་ནི་རྒྱུ་མ་ཡིན་ནོ་སྙམ་དུ་དགོངས་པའོ། །དེ་བས་ན་མེའི་བུད་ཤིང་བཞིན་དུ་ཚང་བ་དང་མཚང་བའི་རྒྱུ་ངག་ནི་དེ་འདྲ་བ་ཉིད་ཀྱི་རྒྱུ་མ་ཡིན་ནོ་ཞེས་སྟོན་པ་ནི་དེའི་ཕྱིར་ཞེས་བྱ་བའོ། །དེ་ཡོད་ན་ཡོད་ པ་ཉིང་ཅེས་བྱ་བའི་དགོས ་པའི་དོན་ནི་འདི་ཡིན་ཏེ། རྒྱུ་དང་འབྲས་བུའི་དངོས་པོ་རྣམ་པར་གནས་པའི་རྒྱུ་མཚན་ནི་དེ་ཡོད་ན་ཡོད་པ་ཉིད་ཡིན་ཏེ་འདིར་དེའི་ཁྱད་པར་སྐྱེད་པ་ལས་ལྟོས་པ་ལ་ཅི་བྱ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་དེ་ཡོད་ན་ཡོད་པ་ཉིད་རྒྱུ་མཚན་ཞེས་བྱ་བ་རྗེས་སུ་འཇུག་པའོ། །ཅིའི་ཕྱིར་ཞེ་ན། དེ་ཡོད་ན་ཡོད་པ་ཉིད་ནི་ཞེས་བྱ་བའོ། །ཁྱབ་པར་ཞེས་བྱ་བ་ནི་ལྷག་མའོ། །དེ་འགྱུར་ན་འགྱུར་བ་ཉིད་མེད་པར་དེ་ཡོད་ན་ཡོད་པ་ཉིད་མི་རྟོགས་སོ་ཞེས་བྱ་བའི་དོན་ཏོ། །འདི་ཉིད་སྟོན་པ་ནི་དེ་ཡོད་ནི་ཞེས་བྱ་བའོ། །དེ་ལྟར་ཞེས་བྱ་བ་ནི་རྣམ་འགྱུར་རྒྱུ་མེད་པ་ཅན་ཡིན་ནའོ། །ཐམས་ཅད་རྒྱུ་མེད་པར་འགྱུར་ཞེས་བྱ་བ་ནི་དེ་ཡོད་ན་ཡོད་པ་ཉིད་ཀྱང་མེད་པར་འགྱུར་རོ་ཞེས་བྱ་
བའི་དོན་ཏོ། །འོན་ཏེ་ཞེས་བྱ་བ་ནི་གཞན་གྱིའོ། །དེ་ཙམ་ཉིད་ལས་ཞེས་བྱ་བ་ནི་ཁྱད་པར་དང་བྲལ་བའི་རྒྱུ་ཙམ་འབའ་ཞིག་ལས་སོ། །ལན་ནི་དང་པོ་ཉིད་ཅེས་བྱ་བའོ། །གང་གི་ཚེ་མེ་དང་བུད་ཤིང་སྟོབས་དང་ལྡན་པ་མ་ཡིན་པ་དེའི་ཚེ་ཡང་དུ་བ་དྲག་པོ་ཉིད་དུ་འགྱུར་རམ་ཅི་ཞེས་བྱ་པའི་དོན་ཏོ། །དེའི་ཕྱིར་དེའི་ཁྱད་པར་གྱི་རྗེས་སུ་བྱེད་པ་དེའི་ཚེ་ཡང་དུ་བ་དྲག་པོ་ཉིད་དུ་འགྱུར་རམ་ཅི་ཞེས་བྱ་ཁྱབ་པའི་ཕྱིར། དེ་ཡོད་ན་ཡོད་པ་ཉིད་རྒྱུ་དང་འབྲས་བུའི་དངོས་པོ་རྣམ་པར་གནས་པའི་རྒྱུ་མཚན་དུ་ཇི་ལྟར་རྟོགས། འདིས་ནི་ཞེས་བྱ་བས་ནི་རྒྱུ་ཁྱད་པར་མེད་པས་འབྲས་བུ་ཁྱད་པར་མེད་པར་བསྟན་པས་སོ། །ཡོངས་སུ་འགྱུར་བའི་ཁྱད་པར་ལ་ལྟོས་པའི་ཞེས་བྱ་བ་ནི་ཁྱད་པར་གཞན་དང་གཞན་དག་དང་ལྡན་པ་སྟེ། དེ་ལྟ་བུའི་ལུས་ལས་རྣམ་པར་ཤེས་པ་གཞན་དང་གཞན་སྐྱེ་བ་ཡིན་ལ་ཁྱད་པར་ཐམས་ཅད་མེད་ན་འཆི་བའི་གནས་སྐབས་ན་མི་སྐྱེ་བ་ཡིན་ནོ་ཞེས་བྱ་བའི་དོན་ཏོ། །ལུས་ཁྱད་མེད་པའི་ཕྱིར་ན་ཡོངས་སུ་གྱུར་པ་འདིའི་ཡང་ཁྱད་པར་གང་ལས་འབྱུང་བ་ཡིན་ཏེ། རིམ་པ་དང་ལྡན་པའི་ལུས་རྣམས་ནི་འབྱུང་བ་ཆེན་པོ་བཞི་ཙམ་གྱི་རང་བཞིན་ཉིད་ཀྱིས་ཁྱད་པར་འགའ་ཡང་མེད་པའི་ཕྱིར་ཡོངས་སུ་འགྱུར་བ་ཁྱད་པར་ཅན་དུ་མི་འགྱུར་ལ། དེ་མེད་པའི་ཕྱིར་རྣམ་པར་ཤེས་པ་ཁྱད་པར་མེད་པར་འགྱུར་རོ། །དེ་མེད་པར་ཡང་འབྱུང་ན་ནི་རྒྱུ་མེད་པ་ཅན་དུ་འགྱུར་རོ། །དེས་ན་ལྔ་མ་སྔ་མའི་འདུ་བྱེད་པའི་དབང་གི་སྐྱེས་པ་ལ་སྐྱོན་མེད་དོ་ཞེས་བྱ་བའི་དོན་ཏོ། །རང་བཞིན་ཁྱད་པར་མེད་ཀྱང་ཡོངས་སུ་གྱུར་པ་ཁྱད་པར་ཡོད་པར་སྟོན་པ་ནི་གལ་ཏེ་འོ་མ་ཞེས་བྱ་བའོ། །སྣོད་གཉིས་ན་གནས་པའི་འོ་མ་ལ། གཅིག་ལ་ནི་ཞོ་སྐ་བ་དང་གཞན་ལ་ནི་སླ་བར་མཐོང་ངོ༌། །སྐ་བ་དང་ཅིག་ཤོས་ཀྱི་ཁྱད་པར་གང་ལས་ཡིན་སྙམ་ན། དུས་ཀྱི་མཐར་ཐུག་པ་ཙམ་ལས་ཞེས་བྱ་བའོ། །གྲང་བ་དང་དྲོ་བ་ལ་སོགས་པ་རྟེན་གཞན་གྱི་ལྷན་ཅིག་བྱེ་བ་ཙམ་ལས་ཞེས་བྱ་བའི་དོན་ཏོ། །དེ་བཞིན་དུ་ལུས་ཀྱང་ཡིན་ནོ་ཞེས་བྱ་བ་ནི་ཡོངས་སུ་གྱུར་པ་ཁྱད་པར་མེད་པ་ཅན་ཡིན་ཡང་འགྱུར་བ་ཡིན་ནོ། །ཞོ་ལ་སོགས་ཀྱི་རྣམ་འགྱུར་ནི། །ཞེས་བྱ་བ་ནི་འོ་མ་ལ་སོགས་པའི་རྣམ་པར་འགྱུར་བའོ། །མི་
མཚུངས་པ་གང་ཡིན་པ་དེ་ནི་འོ་མ་མཚུངས་པ་ལས་བྱུང་བ་ནི་མ་ཡིན་ནོ་ཞེས་བྱ་བའི་དོན་ཏོ། །ལུས་ཀྱི་རྣམ་འགྱུར་ནི། ཁྱད་པར་ཅན་དུ་གྱུར་པ་ཉིད་ཅེས་བྱ་བ་ནི་འབྱུང་བ་ཆེན་པོ་བཞིའི་རང་བཞིན་ཉིད་དུ་མཚུངས་པའི་ལུས་རྣམས་ལ། འགའ་ཞིག་ཏུ་ཡོངས་སུ་གྱུར་པ་འགའ་ཞིག་སེམས་ཀྱི་ཁྱད་བར་གྱི་རྒྱུ་ཡིན་ནོ། །དས་ན་ལུས་ནི་མཚུངས་པ་དང་མི་མཚུངས་པ་དག་ལ་རྗེས་སུ་མཐུན་པ་གོམས་པའི་བག་ཆགས་གང་ཡིན་པ་དེ་ཉིད་རྣམ་པར་རྟོག་པ་དང་རྣམ་པར་མི་རྟོག་པ་ནི་ཤེས་པ་དག་ཐ་དད་བའམ་ཐ་མི་དད་པའི་རྒྱུ་ཡིན་ནོ། །ལུས་མཚུངས་པ་དང་མི་མཚུངས་པ་དག་ཡོད་ཀྱང༌། རྣམ་པར་རྟོག་པ་དང་རྣམ་པར་མི་རྟོག་པའི་ཤེས་པ་རྣམས་ལ་ཐ་དད་པ་དང་ཐ་མི་དད་པ་མེད་པའི་ཕྱིར་རོ། །ཞར་ལ་བྱུང་བ་རྫོགས་པར་བྱས་ནས་གཉུག་མ་ཉེ་བར་སྡུད་པ་ནི། དེའི་ཕྱིར་ཞེས་བྱ་བའོ། །ཚོགས་པ་རྒྱུ་ཉིད་ཡིན་ན་ཞེས་བྱ་བ་ནི་ཐམས་ཅད་རྒྱུ་ཉིད་ཡིན་ནའོ། །དེ་ལྟ་མ་ཡིན་ན་ཞེས་བྱ་བ་ནི་སོ་སོར་སྐྱེད་པར་ནུས་པའི་ཕྱོགས་ལའོ། །དུ་མ་ཉིད་དོ་ཞེས་བྱ་བ་ནི་ཡིད་ཀྱི་ཤེས་པ་ཅིག་ཅར་སྐྱེ་བར་ཐལ་བར་འགྱུར་རོ་ཞེས་གང་བརྗོད་པའོ། །དེ་ལྟར་མི་མཐོང་བ་མ་ཡིན་ནོ་ཞེས་བྱ་བ་ནི་བཟློག་པའོ། །དེས་ན་དབུགས་འབྱུང་བ་ལ་སོགས་པ་ནི་སེམས་ཀྱི་རྒྱུ་མ་ཡིན་ནོ་ཞེས་ཚད་མའི་འབྲས་བུ་འཕངས་པ་ཡིན་ནོ། །གང་གི་ཞེས་བྱ་བ་ནི་གཞན་གྱིའོ། །དེ་ལ་དུ་མ་ཅིའི་ཕྱིར་མི་སྐྱེ་ཞེས་བྱ་བ་དེ་ནི་རེ་ཞིག་མི་རིགས་ཏེ། རྣམ་པར་རྟོག་པ་མེད་པ་འབའ་ཞིག་པ་རྣམས་སམ། རྣམ་པར་རྟོག་པ་གཅིག་དང་ལྡན་པ་རྣམས་ནི་ལྷན་ཅིག་སྐྱེད་པར་འདོད་པའི་ཕྱིར་རོ། །འོན་ཀྱང་ཇི་ལྟར་ལུས་ལས་ཡིན་པ་ལ་ཐལ་བར་འགྱུར་བ་ལྟར་ཡིད་ཀྱི་རྣམ་བར་ཤེས་པ་དུ་མ་ཉིད་སྐྱེ་བར་ཇི་སྟེ་མི་འགྱུར་ཞེས་བརྗོད་པར་འདོད་པ་ཡིན་ནོ། །དེ་ལ་བརྗོད་པ་ནི་རྣམ་ཤེས་ནུས་པ་ངེས་པའི་ཕྱིར་རོ་ཞེས་བྱ་བའོ། །དོན་གཞན་ལ་ཆགས་པས་སམ། དོན་གཞན་ལ་འཛིན་པའི་ཕྱིར་ཞེས་ཕྱོགས་གཞན་དུ་བལྟ་བར་བྱའོ། །བཤད་པ་ལ་མཚུངས་པ་དེ་མ་ཐག་པའི་རྐྱེན་གྱི་རང་བཞིན་གྱི་རྣམ་པར་ཤེས་པ་གཅིག་ཅིག་གི་རྒྱུ་ཡིན་ནོ་ཞེས་བྱ་བ་ནི་དམ་བཅའ་བའོ། །འདི་ལ་གཏན་ཚིགས་ཅི་ཡོད་སྙམ་ན། ནུས་པ་ངེས་པ་
ནི་རྗེས་སུ་མཐུན་པའི་འདུ་བྱེད་ཀྱི་བག་ཆགས་ཏེ། གཏན་ཚིགས་ཡིན་ནོ་ཞེས་འབྲེལ་པར་བྱའོ། །གཉིས་པ་བརྗོད་པ་ནི་ཆགས་པའི་ཁྱད་པར་ཏེ་ཞེས་བྱ་བའོ། །གཏན་ཚིགས་སོ་ཞེས་འབྲེལ་ཏོ། །དང་པོ་རྣམ་པར་འགྲེལ་པ་ནི་བག་ཆགས་བརྟན་པའི་ཞེས་བྱ་བའོ། །མཚུངས་པ་དེ་མ་ཐག་པའི་རྐྱེན་གྱི་ཞེས་བྱ་བ་ནི་ཇི་ལྟར་གྲགས་པའིའོ། །རྣམ་པར་ཤེས་བྱ་བ་ནི་ཡིད་དོ། །འབའ་ཞིག་གམ་ཞེས་བྱ་བ་ནི་ཇི་སྐད་བརྗོད་པའི་དེ་མ་ཐག་པ་ལ་མ་ལྟོས་པར་རོ། །ཆགས་པའི་ཁྱད་པར་ཏེ་ཞེས་བྱ་བ་འཆད་པ་ནི། ཡང་མཚུངས་པ་དེ་མ་ཐག་པའི་ཞེས་བྱ་བའོ།། རྗེས་སུ་མཐུན་པའི་ཆགས་པས་ཡུལ་གཅིག་ལ་ངེས་པའོ། །དེ་ལ་ཕྱོགས་དང་པོ་ནི་གསལ་བའི་ཕྱིར་དེ་མ་ཐག་པ་གཉིས་ལ་ཉམས་སུ་མྱོང་བ་གསལ་བར་བསྟན་བའི་དོན་དུ་འགའ་ཞིག་གམ་ཞེས་བྱ་བའི་དབང་དུ་བྱས་ནས་འདི་ལྟར་ཞེས་གསུངས་སོ། །ཆགས་པའི་ཕྱོགས་ལ་བརྟེན་ན་བཤད་པ་ནི་རྣམ་པར་ཤེས་པ་འགའ་ཞིག་ནི་ཞེས་བྱ་བའོ། །ཉེ་བ་ཉིད་ནི་ཆགས་པ་ཉིད་དོ། །རྣམ་པར་རྟོག་པ་གཞན་ནི་སྐྱེ་བར་མཐོང་བ་མ་ཡིན་ནོ། །དེ་སྐྱེ་བས་བར་དུ་བཅད་པའི་ཕྱིར་རོ། །མཚུངས་པ་དེ་མ་ཐག་པའི་རྐྱེན་གྱི་རྣམ་པར་ཤེས་པའི་བག་ཆགས་ནི་རྣམ་པར་རྟོག་པ་སྐྱེད་པར་ནུས་པ་གང་ཡིན་པ་སྟེ། རྣམ་པར་རྟོག་པ་སྐྱེ་བ་གང་དག་ལ། དེ་བར་དུ་བཅད་པ་ཞེས་བྱ་བ་ནུས་པ་མེད་པར་བྱ་པ་ཡོད་པ་དེ་དག་ནི་སྐྱེ་པར་མ་མཐོང་ངོ་ཞེས་འབྲེལ་ཏོ། །ཡང་བག་ཆགས་གང་གིས་བར་དུ་བཅད་སྙམ་ན། གཞན་གྱིས་ཞེས་སྨོས་ཏེ་རྣམ་པར་རྟོག་པ་ཞེས་བྱ་བ་སྐབས་ཡིན་ནོ། །དོན་གང་ཞིག་གཞན་ལ་མི་འབྱུང་བའི་དོན་གྱིས་ཆགས་པའི་ཡུལ་ཡིན་པའི་ཡུལ་དེ་ཤེས་བྱ་ཉིད་ཀྱིས་གང་ལ་ཡོད་པའོ། །དེ་ལྟར་རྣམ་པར་ཤེས་པ་ལས་རྣམ་པར་ཤེས་པ་སྐྱེ་བར་ཁས་བླང་བ་ན་རྣམ་པར་རྟོག་པ་གཅིག་སྐྱེ་བའི་ཚོགས་པ་ཡོད་པ་ཡིན་གྱི། ལུས་ཀྱིས་རྡུལ་ཕྲ་རབ་རྣམས་སྐྱེད་བ་ཡིན་ན་ནི་མ་ཡིན་ཏེ། ལྟོས་བར་བྱ་བ་གོམས་པ་ལ་སོགས་པ་ལ་ལོག་པ་མེད་པ་མེད་པའི་ཕྱིར་རོ་ཞེས་བརྗོད་པར་འགྱུར་རོ། །མ་ཆགས་པའི་དུས་ན་རྣམ་པར་རྟོག་པ་མེད་པ་བཞིན་དུ་ཉེ་བའི་དོན་རྣམས་ལ་དུས་གཅིག་ཏུ་རྣམ་པར་རྟོག་པ་དུ་མ་ཉིད་ཅི་སྟེ་
མི་སྐྱེ་ཞ་ན། འདི་ལ་ཡང་ནུས་པ་ངེས་པའི་ཕྱིར་རོ་ཞེས་བྱ་བ་ལན་ཡིན་ནོ། །འབད་བ་དང་ལྡན་པ་ལ་ཡང་ཅིག་ཅར་རྣམ་པར་རྟོག་པ་གཉིས་མི་སྐྱེ་བའི་ཕྱིར་ན་མཚུངས་པ་དེ་མ་ཐག་པའི་རྐྱེན་རྣམ་པར་རྟོག་པ་གཅིག་སྐྱེས་པ་ལ་ནུས་པ་ངེས་པ་ཉིད་ཡིན་ནོ་ཞེས་བྱ་བའི་དོན་ཏོ། ལུས་ཀྱིས་རྡུལ་ཕྲ་རབ་གྲངས་མེད་པ་རྣམས་སོ་སོར་ནུས་པ་ཡིན་ན་ནི་རྣམ་པར་རྟོག་པ་དཔག་ཏུ་མེད་པ་སྐྱེད་བར་ཐ་ལ་བ་ཉིད་དོ། །དེ་བས་ན་ཞེས་བྱ་བ་ནི་ཉེ་བར་སྡུད་པའོ། །གཅིག་གམ་ཞེས་བྱ་བ་ནི་རྣམ་པར་རྟོག་པ་དང་བཅས་པའོ། །དུ་མ་ཞེས་བྱ་བ་ནི་རྣམ་པར་རྟོག་པ་མེད་པའོ། །ལུས་ཙམ་ལས་སྐྱེ་ན་ནི་དེ་ལྟ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་གཞན་གྱིའོ། །རྣམ་པར་ཤེས་པ་དེ་ཉིད་ལས་ཞེས་བྱ་བ་ནི་གཅིག་གམ་དུ་མ་སྐྱེས་པ་གང་ཡིན་པ་དེ་ཉིད་ལས་སོ། །ཁྱེད་ཀྱི་ཕྱོགས་བཞིན་དུ་ཕྱིས་བློ་གཅིག་གམ་དུ་མ་སྐྱེ་མོད། དང་པོ་ནི་ལུས་ལས་སྐྱེ་བར་འགྱུར་རོ་ཞེས་བསམས་པའོ། །རེ་ཞིག་གཅིག་ལས་སྐྱེ་བ་ན་ངེས་པ་འདི་འཐད་ཀྱི་ལུས་དུ་མ་ལས་སྐྱེ་བ་ལ་གོ་ཇི་ལྟར་ཞེ་ན་དཔེར་ན་ཞེས་སྨོས་སོ། །དེ་བཞིན་དུ་འདིར་ཡང་རྒྱུ་འགའ་ཞིག་ལ་ལྟོས་པ་ཡིན་ནོ་ཞེས་བྱ་བའི་དོན་ཏོ། །ཆགས་པའི་ཁྱད་པར་དེ་ཉིད་ལས་ཞེས་བྱ་བ་ནི་འདི་ཉིད་དུ་འབྲེལ་པར་བྱའོ། །གྲུབ་པའི་མཐར་ནི་དང་པོ་སྐྱེས་པའི་རྣམ་པ་ཤེས་པ་ལས་རྒྱུན་འཇུག་པ་ལ་རྣམ་པར་རྟོག་པ་འདིར་འགྱུར་མོད། ལུས་ལ་ནི་བཞིན་དུ་སྐྱེད་བར་བྱེད་པའི་ནུས་པ་ཡོད་པའི་ཕྱིར་རྒྱུན་གཞན་དང་གཞན་ཡང་སྐྱེ་བར་འགྱུར་རོ་སྙམ་དུ་བསམས་པ་ཡིན་ནོ། །དེ་སྲིད་དུ་ཞེས་བྱ་བ་ནི་གཅིག་གི་ཚེ་ལུས་ལས་ཤེས་པའི་ཚོགས་ཚད་ཇི་ཙམ་སྐྱེས་པའི་ནུས་པ་ངེས་པར་བསྟན་པ་ཡང་མ་ཡིན་ནམ་སྙམ་པའི་ དགོས་པ ་བསུ་ནས་ཡང་གསལ་བར་བྱེད་པ་ནི་གལ་ཏེ་ཞེས་བྱ་བ་དེ་སྲིད་ཁོ་ན་སྐྱེ་བར་འགྱུར་རོ། །ཅིའི་ཕྱིར་ཞེ་ན། ལུས་ཀྱི་ནུས་པ་ནུས་པ་ཞེས་སྨོས་སོ། །གལ་ཏེ་ཁྱེད་ཀྱི་ལུགས་བཞིན་གཞན་དང་གཞན་ཡང་སྐྱེ་བར་འགྱུར་རོ་སྙམ་དུ་བསམས་པ་ཡིན་ནོ། །དེ་སྲིད་དུ་ཞེས་བྱ་བ་ནི་གཅིག་གི་ཚེ་ལུས་ལས་ཤེས་པའི་ཚོགས་ཚད་ཇི་ཙམ་སྐྱེས་ཤེས་པའི་ནུས་པ་ངེས་པར་བསྟན་པ་ཡང་མ་ཡིན་ནམ་སྙམ་བའི་དོགས་པ་བསུ་
ནས། ཡང་གསལ་བར་བྱེད་པ་ནི་གལ་ཏེ་ཞེས་བྱ་བའོ། །འོན་ཏེ་ཞེས་བྱ་བ་ལ་སོགས་པ་ནི་གོ་བླའོ། །དོན་འདི་ཞེས་བྱ་བ་ནི་རེ་ཞིག་ལུས་ལས་ཤེས་པའི་ཚོགས་སྐྱེ་ལ། ངེས་ཀྱང་དེའི་ནུས་པ་ཉམས་པའི་ཕྱིར་ཡང་ཤེས་པའི་ཚོགས་བྱེད་པ་མ་ཡིན་ནོ་ཞེས་བྱ་བའོ། །འོ་ན་གང་ཚད་མའི་སྤྱོད་ཡུལ་ཡིན་སྙམ་པ་ལ། རྣམ་པར་ཤེས་པ་ཉིད་ལས་ཞེས་བྱ་བའོ། །གོམས་པའི་རང་བཞིན་ལས་སོ། །རྣམ་ཤེས་ནི་ཞེས་བྱ་བ་ནི་ཆགས་པའི་རང་བཞིན་ནོ། །གང་གིས་ཞེས་བྱ་བ་ནི་རྟོག་པ་དང་ལྡན་པ་ཡིན་པས་སོ། །འོན་ཏེ་ཞེས་བྱ་བ་ནི་གཞན་གྱིའོ། །ལུས་ལས་རྣམ་ཤེས་ཞེས་བྱ་བ་ནི་ལན་ནོ། །རྒྱུ་མཚན་མེད་པར་དོགས་པ་ཡང་མ་ཡིན་ནོ་ཞེས་བྱ་བ་ལ། གལ་ཏེ་གཞན་གྱི་ལུགས་ལ་དེ་ལྟར་འགྱུར་མོད། སངས་རྒྱས་པའི་ལུགས་ལ་ནི་རྣམ་པར་རྟོག་པས་བྲིས་པ་ལས་སྒྲུབ་པར་བྱེད་པ་དང་གནོད་པར་བྱེད་པ་མེད་པ་ཉིད་ཀྱིས་དོགས་པའི་སྐབས་བྱེད་པ་མ་ཡིན་ནམ་དེས་ན་ཇི་ལྟར་རྒྱུ་མཚན་མེད་པ་ཡིན་སྙམ་ན་དེ་ནི་མི་འཐད་དོ། །རྣམ་པ་གཉིས་ཀ་མ་གྲུབ་པའི་ཕྱིར་རོ། །གནོད་པར་བྱེད་པ་ཉིད་ཉིད་ཡིན་པའི་ཕྱིར་རོ་ཞེས་སྟོན་པ་ན། རྣམ་ཤེས་ཉིད་ལས་རྣམ་ཤེས་ནི་སྐྱེ་བར་ཞེས་བྱ་བའི་ཕྱེད་ཕྱི་མ་རྣམ་པར་འགྲེལ་པ་ནི། ཆགས་པ་ཕྱོགས་སུ་ལྷུང་བར་བྱས། །ཞེས་བྱ་བའོ། །དེ་སྐྱེ་བ་ནི་ཕྱོགས་སུ་ལྷུང་བ་སྐྱེ་བའོ། །དེ་བས་ན་རྣམ་པར་ཤེས་པའི་ངེས་བྱེད་ཉིད་ནི་བརྒྱུད་ནས་གོམས་པ་ཉིད་ལས་སྐྱེས་པ་ཡིན་ནོ། །གལ་ཏེ་ཞེས་བྱ་བ་ནི་གཞན་གྱི་ཡིན་ནོ། །ཇི་ལྟར་མི་རིགས་སྙམ་ན་ཆགས་པའི་རང་བཞིན་མ་ཡིན་པའི་ཞེས་གསུངས་སོ། །ཚུ་རོལ་མཛེས་པ་པའི་ལ་ཡང་དེ་ལྟར་འགྱུར་རོ་སྙམ་ན། གང་ལ་འཇིག་རྟེན་གཞན་མེད་པ་ཞེས་བྱ་བའོ། །དབང་པོའི་རྣམ་པར་ཤེས་པ་དུ་མ་ཡོད་ཀྱང་རྣམ་པར་ཤེས་པ་གཅིག་འབྱུང་བ་གང་ཡིན་པ་དེ་ནི་གོམས་པ་ཁོ་ན་ལས་ཡིན་ནོ་ཞེས་བསྒྲུབས་ཟིན་ཏོ། །དེས་ན་ཞེས་བྱ་བ་ནི་རྣམ་པར་ཤེས་པ་གཞན་སྐྱེ་བ་མ་བཟློགས་པས་སོ། །དང་པོ་སྐྱེས་པའི་རྣམ་པར་ཤེས་པའི་རྒྱུན་མ་གཏོགས་པ་ནུས་པའི་ལུས་ལས་ཡང་དེ་ལྟར་སྐྱེས་པ་ན་ཚོགས་སུ་འགྱུར་རོ་ཞེས་བྱ་བའི་གནས་སྐབས་ཀྱི་མཐར་ཐུག་པའོ། །དེ་ནི་མཐོང་བ་མེད་པའི་ཅེས་བྱ་བ་ནི་བཟློག་པའོ། །
གཅིག་གི་ཚེ་རྣམ་པར་རྟོག་པའི་རྣམ་པར་ཤེས་པ་གཅིག་ཉིད་མཐོང་བའི་ཕྱིར་རོ། །འོན་ཏེ་ཞེས་བྱ་བ་ནི་གཞན་གྱིའོ། །ཕྱི་མར་གྱུར་བ་ཞེས་བྱ་བ་ནི་ནུར་ནུར་པོ་ལས་སོ། །དང་པོ་ནུར་ནུར་པོའི་གནས་སྐབས་ཉིད་སེམས་ཀྱི་སྐྱེད་བྱེད་ཡིན་ནོ། །ཁོ་ནའི་སྒྲ་ནི་འབའ་ཞིག་ཅེས་བྱ་བ་འདི་ནི་འོག་ཏུ་བལྟ་བར་བྱའོ། །མེད་པ་འབའ་ཞིག་ཁོ་ནའོ། །ཇི་ལྟར་སྙམ་ན་ཕན་གདགས་པར་བྱ་བ་དང་ཞེས་བྱ་བ་གསུངས་སོ། །འགའ་ཞིག་ལས་སྐད་ཅིག་དང་པོ་སྐྱེད་པ་ཡིན་མོད། སེམས་ཀྱི་རྒྱུན་ནི་ལུས་ལ་བརྟེན་པ་མ་ཡིན་ནོ། །ཞེས་བྱ་བའི་དོན་ཏོ། །འོན་ཏེ་ཞེས་བྱ་བ་ལ་ལུས་ལྷན་ཅིག་བྱེད་པ་ཅན་གྱི་རྣམ་པར་ཤེས་པས་ཞེས་བྱ་བ་ནི་བྱེད་པ་པོའོ། །རྣམ་པར་ཤེས་པ་ཞེས་བྱ་བ་ནི་ལས་སོ། །འདིར་ནི་མི་མཐོང་བར་རྟོག་པ་མེད་ཅེས་བྱ་བ་ནི་ལུས་ནི་ཉེ་བར་ལེན་པ་ཉིད་དུ་སྔར་མངོན་སུམ་གྱི་ངེས་པ་མེད་པ་ལ་ཉེ་བར་ལེན་པ་ངེས་པ་སྔོན་དུ་འགྲོ་བ་ཅན་གྱི་ལྷན་ཅིག་བྱེད་པ་ཉིད་དུ་ཡང་མ་ཡིན་ནོ། །རིགས་མཐུན་པ་ཉིད་ཀྱིས་ནི་ཤེས་པས་ཉེ་བར་ལེན་པ་ནི་ཤེས་པ་ཉིད་ཡིན་པར་གསལ་བ་ཡིན་ནོ་ཞེས་བྱ་བའི་དོན་ཏོ། །བ་ལང་གི་ལྕི་བ་ལས་ཀྱང་ཨུཏྤལ་སྐྱེལ། ཨུཏྤལ་ཉིད་ལས་ཀྱང་སྐྱེ་བ་ཡིན་ནོ་ཞེས་གང་བརྗོད་པ་དེ་ནི་མི་འཐད་དོ་ཞེས་བརྗོད་པ་དེ་ནི་བ་ལང་གི་ལྕི་བ་དང་ཞེས་བྱ་བའོ། །དེ་ལྟ་ཡང་འོ་ན། སྐྱེ་བ་དང་པོའི་ཤེས་པ་དང༌། བར་གྱི་གནས་སྐབས་ཀྱི་རྣམ་པར་ཤེས་པ་དག་ཤིན་ཏུ་ཁྱད་པར་ཆེ་བའི་ཕྱིར་ཇི་ལྟར་སྐྱེ་བ་དང་པོའི་རྣམ་པར་ཤེས་པ་རྣམ་པར་ཤེས་པ་གཞན་གྱི་སྒྲུབ་བྱེད་དུ་འགྱུར་སྙམ་དུ་དོགས་པ་བསུ་ནས་གསལ་བ་ལ་སོགས་ཞེས་གསུངས་སོ། །ལ་ལར་ཞེས་བྱ་བ་ནི་བར་གྱི་གནས་སྐབས་ནའོ། །དང་པོར་ཞེས་བྱ་བ་ནི་སྐྱེ་བ་དང་པོར་རོ། །ལུས་ལས་ཞེས་བྱ་བ་ནི་ཉེ་བར་ལེན་པར་གྱུར་བ་ལས་སོ། །དེའི་རྒྱུ་ནི་ལུས་ཀྱི་རྒྱུ་སྟེ་མེར་མེར་པོ་ལ་སོགས་པའོ། །དེའི་འཇུག་པ་ནི་རང་གི་འབྲས་བུའི་ལུས་སྐྱེད་པ་ལས་སྔོན་དུ་ཕྱོགས་པའོ། །དེ་ཐོབ་པའི་ཕྱིར་ཡན་ལག་ཏུ་འགྱུར་བ་ནི་ལྷན་ཅིག་བྱེད་པའི་རྐྱེན་ཉིད་དུ་འགྱུར་བའོ། །ལྡོག་པ་བརྗོད་ནས་རྗེས་སུ་འགྲོ་བ་བཤད་པ་ནི་གང་གི་ཚེ་ཞེས་བྱ་བའོ། །མིག་ལ་སོགས་པའི་དབང་པོ་ལྔ་ནི་སྐྱེ་མཆེད་ལྔ་ཡིན་ནོ། །ཚེ་
འདི་ཉིད་ནི་སྐྱེ་བ་འདི་ལ་ཡོད་པའོ། །སེམས་ཀྱི་རྒྱུན་གནས་པའི་རྒྱུ་ནི་ལྷན་ཅིག་ཁྱེད་པ་ཅན་ཡིན་ནོ་ཞེ་བལྟ་བར་བྱའོ། །བློ་དབེན་པ་ལ་སེམས་ཀྱི་རྒྱུན་གནས་རྒྱུ་ཞེས་བྱ་བ་ལ་སོགས་པ་སྡེ་བ་སྦྱོར་ཙམ་བྱས་པ་བཤད་པའི་དོན་དུ་འདི་ལྟར་ཞེས་གསུངས་སོ། །སེམས་ཀྱི་རྒྱུན་གནས་པའི་རྒྱུ་ཞེས་བྱ་བ་ནི་རྣམ་འགྲེལ་བྲིས་པ་ཙམ་དུ་ཟད་དོ། །དེའི་རྒྱུ་འཇུག་ཐོབ་ཕྱིར་ཞེས་བྱ་བ་འཆད་པ་དེ་ནི་དེའི་རྒྱུ་འཇུག་སྟེ་ཞེས་བྱ་བ་ལ་སོགས་པའོ། །སེམས་ཀྱི་རྒྱུན་གནས་རྒྱུ་ཞེས་བྱ་བ་འཆད་པ་ནི་སྔར་གྱི་སེམས་ལས་ཀྱི་མིང་ཅན་ཞེས་བྱ་བའོ། །གང་གི་ཚེ་དེ་ལུས་གཞན་སྐྱེ་བ་ཡན་ལག་ཉིད་དུ་འགྱུར་སྙམ་ན། དེའི་ཡན་ལག་ཉིད་ནི་ཞེས་བྱ་བའོ། །དེས་ན་ཞེས་བྱ་བ་ཁོང་ནས་ཕྱུང་ལ། གལ་ཏེ་དེའི་ཡན་ལག་ཏུ་མི་འགྱུར་ན་ཞེས་བྱ་བར་སྦྱར་རོ། །དེའི་ཚེ་འབའ་ཞིག་ཅེས་བྱ་བ་ནི་དཔེར་ན་གཟུགས་མེད་པའི་ཁམས་སུ་བཞིན་ནོ། །གང་ལ་ལས་ལྷན་ཅིག་བྱེད་པར་འགྱུར་བའི་རྒྱུ་དེ་གང་ཡིན་སྙམ་ན། །ལུས་གཞན་སྐྱེ་བ་ལས་ནི་ཚེ་འདིའི་སྐྱེ་མཆེད་ལྔ་ཡིན་ཏེ་ཞེས་སྨོས་སོ། །འདི་ནི་ལུས་ཀྱི་རྒྱུ་མེར་མེར་པོ་ལ་སོགས་པའི་མིང་ཅན་ཞེས་བརྗོད་ཟིན་ཏོ། །དེ་མ་ཐག་ཏུ་སྐྱེས་པའི་མིག་སོགས་པའི་སྐྱེ་མཆེད་ལྔ་ལ་སེམས་ཀྱི་བྱིན་གྱིས་བརླབས་ན་འཆི་བའི་མཐར་ཐུག་པའི་སྐྱེ་མཆེད་ལྔ་པོ་ལུས་ལ་སྲེད་པ་དང་བཅས་པའི་ལས་ཀྱི་ལྷན་ཅིག་བྱེད་པ་ལས། གནས་སྐབས་གཞན་དང་གཞན་གྱིས་རིམ་གྱིས་སྲིད་པ་བར་མདོའི་ལུས་ལ་སོགས་པ་ཡིན་ནོ། །དེ་ལྟར་ན་འོ་ན་གཟུགས་མེད་པའི་ཁམས་ནས་འཆི་འཕོས་པ་ལ་ཇི་ལྟར་ལུས་སྐྱེ་ཞེ་ན། གཟུགས་མེད་པའི་ཁམས་ནས་ཞེས་གསུངས་སོ། །དེ་ཉིད་ཅེས་བྱ་བ་ནི་ཚེ་འདི་ཉིད་ཀྱི་སྐྱེ་མཆེད་ལྔའོ། །ཇི་ལྟར་ཞེ་ན་འདུ་བྱེད་པ་པོ་ཉིད་ཀྱིས་ཏེ། བག་ཆགས་འཛིན་པར་བྱེད་པ་ཉིད་ཀྱིས་སོ། །འབྱུང་བར་འགྱུར་བའི་སྲིད་པ་ལ་ལྟོས་ནས་སྔར་བྱུང་བ་ནི་འདི་ཉིད་ཀྱི་ཡིན་པར་བརྗོད་དོ། །དོན་འདི་ཡིན་ཏེ། གལ་ཏེ་གཟུགས་མེད་པའི་ཁམས་ནས་སྲིད་པ་གཞན་དུ་འཕོ་བ་ལ། དེ་མ་ཐག་པའི་སྐྱེ་མཆེད་སྔ་མ་སྔ་མ་མེད་པ་དེ་ལྟ་ན་ཡང༌། གཟུགས་མེད་པའི་ཁམས་སུ་འཇུག་པ་ན་ཡོད་པ་འགྱུར་བ་གང་ཡིན་པ་དེ་ཉིད་སྲིད་པ་གཞན་གྱི་ལུས་ཀྱི་རྒྱུ་ཡིན་ན་སྟེ། དེས་
གཞག་པའི་བག་ཆགས་ཀྱིས་སྐྱེད་པའི་ཕྱིར་རོ་ཞེས་བྱ་བའོ། །གལ་ཏེ་ཞེས་བྱ་བ་ནི་གཞན་གྱིའོ། །དེའི་ཞེས་བྱ་བ་ནི་ལས་ཀྱིའོ། །ཡན་ལག་གི་དངོས་པོ་ནི་སྐྱེ་མཆེད་ལྔ་ལ་ཞེས་བྱ་བ་ནི་ལྷག་མའོ། །ཅིའི་ཕྱིར་ཞེ་ན། ཤི་བའི་འོག་ཏུ་ཞེས་བྱ་བ་ལ་སོགས་པའོ། །འདིས་ནི་འབའ་ཞིག་གནས་པ་ག་ལ་ཡིན་ཞེས་བྱ་བ་དེ་ནི་དམིགས་པས་གནོད་པར་བསྟན་ཏོ། །གང་ཡང་འབའ་ཞིག་གནས་པར་འདོད་པར་ཉིད་དོ་ཞེས་བརྗོད་པ་དེ་ཡང་འདིས་གནོད་དོ་ཞེས་སྨྲས་པ་ནི། གཟུགས་མེད་པའི་ཁམས་སུ་ནི་ཞེས་བྱ་བའོ། །དེའི་ཡན་ལག་དངོས་པོ་དང་རྒྱུ་ཉིད་འགོག་ལ་ཞེས་བྱ་བ་ནི་ལས་དེའི་ཡན་ལག་གི་དངོས་པོ་ནི་ལྷན་ཅིག་བྱེད་པ་ཉིད་དོ། །ནུར་ནུར་པོ་ལ་སོགས་པའི་མིང་ཅན་ལུས་ཀྱི་རྒྱུ་ནི་རྒྱུ་སྟེ། དེ་གཉིས་འགོག་པ་ལའོ། །རབ་ཏུ་བཤད་ཅེས་བྱ་བ་ནི་གལ་ཏེ་འགྲོ་བ་མ་མཐོང་ཕྱིར་ཞེ་ན་ཞེས་བྱ་བ་ལ་སོགས་པས་སོ། །སྐྱེ་མཆེད་ལྔ་ཞེས་བྱ་བའི་དྲུག་པ་ནི་སྐྱེ་བ་གཞན་གྱི་ལུས་སྐྱེད་པའི་བྱ་བ་ལ་ལྟོས་པའོ། །ཡན་ལག་གི་དངོས་པོ་ནི་སེམས་ཀྱི་རྒྱུན་གནས་པའི་རྒྱུ་ཞེས་རྟོགས་པར་བྱའོ། །དེ་ལྟ་ན་ཡང་མ་དམིགས་པ་ཙམ་གྱིས་དེ་མེད་པར་ངེས་པ་མ་ཡིན་ནོ་ཞེས་འབྲེལ་ཏོ། །དེ་མེད་པར་བརྗོད་པའི་ངེས་པའི་རྣམ་པར་བརྗོད་པ་ནི་སེམས་ཀྱི་རྒྱུན་ཞེས་བྱ་བའོ། །དེ་ལྟར་ཞེས་བྱ་བ་ནི་ཡན་ལག་གི་དངོས་པོར་རོ། །ཚིག་རྐང་ལྔ་པ་བཤད་པའི་ཕྱིར་འོན་ཏེ་ཡང་ཞེས་བྱ་བའོ། །འགལ་བས་ཁྱབ་པའི་དམིགས་པའོ་ཞེས་བྱ་བ་ནི་དང་པོ་ཉིད་ལ་ནི་དགག་པར་བྱ་བ་མཚམས་སྦྱོར་བ་དང་འགལ་བས་ཁྱབ་པའོ།། གལ་ཏེ་ལྷག་མ་དང་ལྡན་པ་ཡིན་ཡང་འདི་ལས་མངོན་པར་འདོད་པ་འགྲུབ་པར་འགྱུར་རོ་སྙམ་ན། འདི་ཞེས་བྱ་བའོ། །ལྷག་མ་དང་ལྡན་པའི་རྗེས་སུ་དཔག་པ་ལས་དོན་ཇི་ལྟ་བ་བཞིན་རྟོགས་པ་ནི་མེད་དོ་ཞེས་བྱ་བའི་སློབ་དཔོན་ཕྱོགས་ཀྱི་གླང་པོས་བཤད་པ་ཡིན་ནོ། །ཇི་ལྟར་ལྷག་མ་དང་ལྡན་པ་ཡིན་སྙམ་ན། སྐྱེ་བ་གཞན་གྱི་དབང་པོ་དང་ཞེས་བྱ་བའོ། །མི་མཐུན་པའི་ཕྱོགས་ལས་ལྡོག་པར་གྲུབ་པ་ཞེས་བྱ་བ་ནི་མི་མཐུན་པའི་ཕྱོགས་དབང་པོ་གཞན་དང་མཚམས་སྦྱོར་བ་ལས་སྒྲུབ་པར་བྱེད་པ་དབང་པོ་ཉིད་ལྡོག་པར་ངེས་པ་མ་ཡིན་པའོ། །འོན་ཏེ་ཚེ་
འདི་པའི་ཞེས་བྱ་བ་ནི་སྔོན་གྱི་སྐྱེ་མཆེད་ལྔས་སྐྱེ་མཆེད་གཞན་གྱི་རང་བཞིན་གྱི་ལུས་བསྐྱེད་པར་ཟད་ཀྱི། སྐྱེ་བ་གཞན་གྱི་ནི་མ་ཡིན་ནོ་ཞེས་བྱ་བའི་དོན་ཏོ། །གཞན་དུ་ཡང་ཞེས་བྱ་བ་ནི་བསྒྲུབ་པའི་ཆོས་ཅན་འཆི་བའི་གནས་སྐབས་ལ་ཡང་ངོ༌། །དེ་དང་མཚམས་སྦྱོར་བ་ཉིད་དུ་ཞེས་བྱ་བ་ནི། ཚ་འདི་པའི་ལུས་ལ་ཡོད་པའི་དབང་པོ་དང་མཚམས་སྦྱོར་བ་ཡིན་གྱི། སྐྱེ་བ་གཞན་གྱི་ལུས་དང་ནི་མཚམས་སྦྱོར་བ་ཡིན་པའོ། །དེ་ལ་ཡང་ཞེས་བྱ་བ་ནི་ལན་ཞེས་བྱ་བ་སྟེ། འདི་པའི་ལུས་ལ་ཡོད་པའི་དབང་པོ་དང་མཚམས་སྦྱོར་བ་ལ་ཡོད་དོ། །ཅིའི་ཕྱིར་ཞེ་ན། དེ་ཡང་ཞེས་སྨོས་ཏེ། རྗེས་སུ་དཔག་པར་བྱ་བ་མཚམས་སྦྱོར་བའི་ལུས་སོ། །དེའི་ཚེ་ཞེས་བྱ་བ་མཚམས་སྦྱོར་བའི་དུས་ནའོ། །དཔེར་ན་ལྟོས་པའི་ཕྱིར་ཚུ་རོལ་དང་པོ་ལ་གཅིག་ཏུ་ངེས་པ་མ་ཡིན་པ་དེ་བཞིན་དུ་འདི་ལ་ཡང་ཡིན་པས་ཁྱད་པར་མེད་དོ། །དེར་ཡང་ཞེས་བྱ་བ་ནི་ཁྱད་པར་དང་བཅས་པའི་གཏན་ཚིག་ལའོ། །དམིགས་པ་ཙམ་མེད་པར་མི་མཐུན་པའི་ཕྱོགས་ལ་མེད་པར་རྟོགས་པ་མ་ཡིན་ནོ། །ཁུ་ཁྲག་གཞན་གཞན་ལས་བྱུང་བའི་དབང་པོ་ཡང་ཡིན་ལ་དབང་པོ་གཞན་དང་མཚམས་སྦྱོར་བ་ཡང་ཡིན་པའི་ཕྱིར་ཁྱད་པར་དང་བཅས་པའི་གཏན་ཚིགས་ཀྱང་མ་ངེས་པ་ཡིན་ནོ། །ཡུལ་གྱི་ཁྱད་པར་བཞིན་ནམ་ཞེས་བྱ་བ་ནི་དཔེར་ན་དུ་བའི་ཡུལ་གྱི་ཁྱད་པར་མེ་རྗེས་སུ་དཔོག་པ་འཇིགས་པའི་སྐྱོབ་པ་མ་ཡིན་པ་དེ་བཞིན་དབང་པོའི་ཁྱད་པར་ཁུ་ཁྲག་གཞན་ལས་བྱུང་བ་ཡང་འཇིག་རྟེན་གཞན་གྱི་དབང་པོའི་རྗེས་སུ་དཔོག་པ་འཇིགས་པའི་སྐྱོབ་པའི་བྱེད་པ་མ་ཡིན་ནོ། །དཔེར་ན་བྱས་པའི་ཁྱད་པར་ནུས་པ་དང་སྒྲའི་ཡིན་པ་ཉིད་རྗེས་སུ་དཔག་པར་སེལ་བར་བྱེད་པ་ལ་ནུས་པ་མེད་པ་དེ་བཞིན་དུ་འདི་ཡང་ཡིན་ནོ། །འོ་ན་གང་ལས་ཁྱད་པར་ལ་བརྟེན་པའི་ཉེས་པའི་གོ་སྐབས་སུ་མི་འགྱུར་བ་ཚེ་འདི་ཉིད་ཀྱི་སྐྱེ་མཆེད་ལྔ། ལུས་གཞན་སྐྱེ་བའི་རྒྱུ་ཡིན་ནོ་ཞེས་བྱ་བའི་སྤྱིས་ཀྱང་ཇི་ལྟར་ཁྱབ་པར་འགྲུབ་པར་འགྱུར་སྙམ་དུ་དོགས་ན། འདི་ལྟར་ཞེས་གསུངས་སོ། །གལ་ཏེ་དབང་པོ་རྣམས་ལ་གཞན་དང་གཞན་སྐྱེ་བ་ཉིད་མེད་པ་མ་ཡིན་ནམ། དེ་ཇི་ལྟར་ན་སྔ་མ་རྣམས་རང་གི་རིགས་ལ་ནུས་པ་འགྲུབ་ཅེ་ན། འགྱུར་བ་མཐོང་ཕྱིར་ཞེས་བྱ་བའོ། །གསལ་
བ་ནི་ས་ཕྱོགས་ལ་སོགས་པ་རང་གི་མཚན་ཉིད་དོ། །དེ་ལྟ་མ་ཡིན་ན་ཞེས་བྱ་བ་ནི་གསལ་བའི་ཁྱད་པར་ལ་ལྟོས་ནའོ། །གལ་ཏེ་ཐ་སྙད་ཀྱང་ཁྱད་པར་གྱི་ཡུལ་ཅན་ཉིད་དུ་འགྱུར་རོ་སྙམ་ན། ཐ་སྙད་ནི་སྤྱིའི་ཞེས་གསུངས་སོ། །དེས་ན་ཞེས་བྱ་བ་ནི་སྤྱིའི་ཡུལ་ཅན་ཡིན་པས་སོ། །དེ་ལྟ་ན་ཡང་ཞེས་བྱ་བ་ནི་གསལ་བའི་ཁྱད་པར་ལ་མི་ལྟོས་ནའོ། །དེ་ལྟ་བུར་ཞེས་བྱ་བ་ནི་གཡོ་བ་ག་ལ་སོགས་པ་དང་ལྡན་པར་དབུས་ཀྱི་གནས་སྐབས་སུ་སྐྱེས་པར་གྲུབ་པ་ནའོ། །ཇི་ལྟར་མིག་ལ་སོགས་པ་ལས་དེ་དེར་ལྟར་སྐྱེས་པ་ཡིན་སྙམ་ན། གོམས་པའི་ཁྱད་པར་ལས་ཞེས་སྨོས་སོ། །དེ་ལྟ་བུར་གྱུར་པ་ཞེས་བྱ་བ་ནི་གཡོ་བ་ག་ལ་སོགས་པ་དང་ལྡན་པའོ། །གཞན་དུ་ནི་སྐྱེ་བ་དང་པོར་རོ། །དེ་ལྟ་བུར་གྱུར་པ་ནི་གཡོ་ག་ལ་སོགས་པ་དང་བཅས་པའི་དབང་པོའོ། །གལ་ཏེ་སྐྱེ་བ་དང་པོར་ཡང་ཚེ་འདིའི་དབང་པོ་ཉིད་རྒྱུ་མ་ཡིན་ནམ། དེས་ན་འཇིག་རྟེན་སྔ་མ་མི་འགྲུབ་བོ་སྙམ་ན། སྐྱེ་བ་དང་པོར་ནི་ཞེས་བྱ་བའོ། །དེ་འདྲ་བར་གྱུར་པ་ནི་འདྲི་བའོ། །དེས་ན་ཞེས་བྱ་བ་ནི་འདི་པའི་དབང་པོ་མ་མཐོང་བའི་ཕྱིར་རོ། །གཞན་གྱི་ཁྱད་པར་ནི་ཞེས་བྱ་བ་ནི་ཁུ་ཁྲག་གཞན་ལས་སྐྱེས་པ་ལ་སོགས་པའོ། །འདིས་ནི་ཕྱེད་སྔ་མ་བཤད་པ་ཡིན་ནོ། །ཕྱེད་ཕྱི་མ་བཤད་པའི་དོན་དུ་འོན་ཏེ་ཞེས་བྱ་བ་ལ་སོགས་པས་རྩོད་པའོ། །དེས་ན་ཞེས་བྱ་བ་ནི་གཅིག་པས་སོ། །འདིར་ཀྱང་ནི་སྒྲས་འཕངས་པས་ལན་རེ་ཞིག་བརྗོད་པ་ནི་གལ་ཏེ་དེ་ལྟ་ཡིན་དུ་ཆུག་པ་ཞེས་བྱ་བའོ། །བར་གྱི་གནས་སྐབས་སུ་ནི་གཡོ་བ་ལ་སོགས་པ་གོམས་པ་སྔོན་དུ་འགྲོ་བ་ཅན་དུ་མཐོང་བ་ཡིན་ནོ། །དེས་ན་སྐྱེ་བ་དང་པོའི་གཡོ་བ་ལ་སོགས་པ་ཡང་གོམས་པ་སྔོན་དུ་འགྲོ་བ་ཅན་དུ་རྗེས་སུ་དཔོག་པ་གྲུབ་པ་ཁོ་ནའོ། །དབང་པོ་རེ་གཅིག་ཡིན་ནམ་འོན་ཏེ་མ་ཡིན་ཞེས་བྱ་བ་ལ་སོགས་པ་གཞན་ནི་དོན་མེད་དོ། །འོན་ཏེ་གོམས་པ་ལས་སྐྱེས་པའི་ཡོན་ཏན་ནི་ལུས་གཞན་ལ་མཐོང་བ་མེད་པ་མ་ཡིན་ནམ། དེས་ན་གང་གིས་འཇིག་རྟེན་ཕ་རོལ་འགྲུབ་པར་འགྱུར་བ་སྐྱེ་བ་དང་པོའི་གཡོ་བ་ག་ལ་སོགས་པ་ལུས་གཞན་དང་འབྲེལ་བའི་གོམས་པ་སྔོན་དུ་འགྲོ་བ་ཅན་དུ་ཇི་ལྟར་འགྱུར་སྙམ་ན། གོམས་པ་ལས་སྐྱེས་པའི་ཞེས་
གསུངས་སོ། །དེ་བཞིན་སྐྱེ་བ་དང་པོའི་ལུས་ལ་ཡང་འགྱུར་རོ། །རྨི་ལམ་གྱི་ལུས་མི་བདེ་བ་མ་ཡིན་ནོ་ཞེས་ཀྱང་བསྒྲུབས་ཟིན་པ་ཉིད་དོ། །ཀྱང་གི་སྒྲས་བསྡུས་པའི་ལན་བརྗོད་ནས་རྣམ་འགྲེལ་ལ་འཇུག་པ་ནི་གཞན་ཡང་ཞེས་བྱ་བའོ། །གཉིད་དང་ནད་དང་ཉམས་པར་བྱས་པ་ལ་སོགས་པས་འགྱུར་བ་གཞན་དང་གཞན་མཐོང་བ་ཡིན་ནོ། །གལ་ཏེ་དབང་པོ་རྣམས་ལ་འགྱུར་བ་གཞན་སྐྱེ་ཡང་སྐྱེ་བ་གཞན་དང་གཞན་ཡིན་པར་ཇི་ལྟར་འགྲུབ་ཅེ་ན། རང་གི་ངོ་བོར་གྱུར་པའི་ཞེས་གསུངས་སོ། །རང་གི་ངོ་བོ་མ་ཡིན་ན་ནི་དེའི་རྣམ་པར་འགྱུར་བ་ཉིད་དུ་མི་འགྲུབ་སྟེ་དོན་གཞན་བཞིན་ནོ། །དེ་ན་དབང་པོའི་གནས་སྐབས་དེ་ཉིད་ཡིན་པར་འགྱུར་རོ། །དེས་ན་དེའི་རང་གི་ངོ་བོ་ཡིན་པས་ན་དེ་དང་འདྲ་བར་ཐ་དད་པ་ཁོ་ནའོ། །དཔེར་ན་ས་དང་ཆུ་དང་མེ་དང་རླུང་རྣམས་ཕན་ཚུན་ཐ་དད་པ་བཞིན་ནོ། །འདིར་ནི་ཞེས་བྱ་བ་ནི་མིག་ལ་སོགས་པ་ལའོ། །དེ་ནི་ཞེས་བྱ་བ་ནི་ལན་ཏེ། རྒྱུད་གཅིག་ཏུ་གདགས་པའི་ཡུལ་དེ་དེ་ནིའོ། །ཅི་ལྟར་ཞེ་ན། སྐྱེ་བ་གཞན་ཡང་ཞེས་བྱ་བའོ། །འོ་ན་ཇི་ལྟར་དེ་གཅིག་ཉིད་དུ་མི་རྟོགས་སྙམ་ན། དྲན་པས་བར་ཆོད་པས་ན་ཞེས་གསུངས་སོ། །བར་ཆོད་པ་ནི་མེད་པའོ། །ཐག་རིང་པོ་ནི་གཏན་བསྐལ་པ་སྟེ། མེད་པ་ཞེས་བྱ་བའི་དོན་ཏོ། །སྐྱེ་བ་གཞན་དེ་ཁོ་ནར་ཡོད་པ་ཡིན་ཡང་མེད་པ་བཞིན་དུ་རྟོགས་པ་དེས་ན་གཅིག་ཉིད་དུ་ལྷག་པར་ཞེན་པ་མ་ཡིན་ནོ། །སྔ་མ་བཞིན་དུ་ཞེས་བྱ་བ་ནི་ཇི་ལྟར་ལུས་ལས་དང་པོ་སེམས་སྐྱེ་བར་རྟོག་པ་ལ་ཐལ་བ་བཞིན་དུའོ། །ཕྱོགས་གཉིས་པ་ལ་བརྗོད་པ་ནི་དབང་པོ་མེད་པ་ལས་ཞེས་བྱ་བའོ། །དེ་ལྟ་ཡིན་དང་ཞེས་བྱ་བ་ནི་དབང་པོ་དུ་མ་འབྱུང་ནའོ། །ཐལ་བདེ་ཉིད་ཡིན་ནོ་ཞེས་འབྲེལ་ཏོ། །ཅི་འདྲ་ཞིག་སྙམ་ན་དབང་རྣམས་ཞེས་བྱ་བ་ལ་སོགས་པའོ། །ཕྱེད་ཕྱི་མ་བཤད་པའི་དོན་དུ་ཕྱོགས་སྔ་མ་འགོད་པ་ནི་འོན་ཏེ། སེམས་ཞེས་བྱ་བ་ལ་སོགས་པའོ། །ལན་ནི་གལ་ཏེ་འོན་ཞེས་བྱ་བ་ལ་སོགས་པའོ། །གལ་ཏེ་དབང་པོ་རྣམས་ལུས་དང་སེམས་ལས་སྐྱེ་བ་ཡིན་པ་དེས་ན་ཤི་བའི་ལུས་ལ་དབང་པོ་མི་སྲིད་པ་ཡིན་ན་དེའི་ཚེ་ནའོ། །སྔོན་གྱི་དབང་པོ་རྒྱུ་ཉིད་དི་རྟོག་པའི་ཞེན་པས་བདག་ཅག་ལ་མཁོ་བ་མེད་དེ། དབང་པོ་ལ་སོགས་པ་
སེམས་ལས་སྐྱེ་བ་ཁས་བླངས་པ་ཉིད་ལས་འཇིག་རྟེན་སྔ་མ་འགྲུབ་པའི་ཕྱིར་རོ། །དེས་ན་ཞེས་བྱ་བ་ལུས་ལ་སོགས་པ་ལས་སེམས་སྐྱེ་བས་ནའོ། །སྐབས་ཉེ་བར་སྡུད་པ་ནི་དེས་ན་རྒྱུ་མ་ཡིན་པའི་ལུས་མ་ཚང་བས་ཞེས་བྱ་བའོ། །དེའི་ཕྱིར། འདི་འདྲ་སྒྲུབ་བྱེད་ལྷག་ལྡན་འདོད། །ཅེས་བྱ་བ་འཆད་པ་ནི་འཆི་བའི་སེམས་ཡིན་པའི་ཕྱིར་ཞེས་བྱ་བ་ཉིད་ཅེས་བྱ་བའོ། །ལྷག་མ་དང་ལྡན་པ་ཡིན་ཏེ་ཞེས་བྱ་བ་ནི་འཆི་བའི་སེམས་ཀྱང་ཡིན་ལ། མཚམས་སྦྱོར་བ་ཡང་ཡིན་པའི་ཕྱིར་མ་ངེས་པ་ཉིད་དོ། །ཅི་ལྟར་ཞེ་ན། མ་མཐོང་བ་ཙམ་གྱིས་ཞེས་བྱ་བའོ། །ལུས་ཐ་དད་པ་ལ་གནས་པའི་ཕྱིར་ཞེས་བྱ་བའི་དོན་གང་ཅི་ཡིན། ཅི་ལུས་ལ་བརྟེན་པའི་ཡིན་ནམ། འོན་ཏེ་ལུས་ལ་དམིགས་པ་ཡིན། །དེ་ལ་རེ་ཞིག་ཕྱོགས་དང་པོ་ནི་རིགས་པ་མ་ཡིན་ཏེ། གང་གི་ཕྱིར་གནས་པའི་ཞེས་བྱ་བ་དེ་ལ་གནས་པའི་ཞེས་བྱ་བའི་ཐ་སྙད་ཀྱི་དགག་པ་ནི་སྔར་བརྗོད་པ་ཡིན་ནོ། །གང་ལས་ཤེ་ན། རྟེན་བཀག་པ་ཡིས་སོ། །དེས་ན་ལུས་ཐ་དད་པ་ལ་གནས་པའི་ཕྱིར་ཞེས་བྱ་བའི་གཏན་ཚིགས་མ་གྲུབ་བའོ། །ཕྱོགས་གཉིས་པ་སུན་འབྱིན་པ་ནི་རྣམ་ཤེས་ཞེས་བྱ་བའོ། །རྣམ་པར་ཤེས་པ་ཕྱི་མ་སྐད་ཅིག་ལུས་གཞན་དམིགས་པར་འགྱུར་རོ། །དེས་ན་ལུས་ཐ་དད་པ་ལ་གནས་པའི་ཕྱིར་ཞེས་བྱ་བའི་གཏན་ཚིགས་མ་ངེས་པ་ཉིད་དོ། །དེ་ནི་སྔར་སྤྱིར་པ་ཀག་པ་ཡིན་ནོ་ཞེས་རྟོགས་པར་བྱའོ། །འོ་ན་སེམས་ཅི་ལ་གནས་སྙམ་ན། རྣམ་པར་ཤེས་པ་ནི་ཞེས་གསུངས་སོ། །འདི་ནི་རྟེན་གྱི་རྫས་ཀྱི་ཡུལ་ལ་བསམས་ནས་བརྗོད་པ་ཡིན་ཏེ། དེ་ལྟ་མ་ཡིན་ན་ནི་འདི་ཡོད་པའི་ཡུལ་ནི་དུས་བཞིན་དུ་བརྟགས་པ་དགག་པར་མི་ནུས་སོ་དེ་ཉིད་ཀྱང་རྟེན་གྱི་རྣམ་པ་ཡིན་ནོ། །དེ་ལྟར་ཕྱེད་སྔ་མ་བཤད་པའི་སྒོ་ནས་མ་གྲུབ་པ་དེ་ཉིད་བརྗོད་ནས་ཕྱོགས་གཉིས་པ་སུན་འབྱིན་པ་ནི། དམིགས་པར་བྱ་བའི་ལུས་ནི་ཞེས་བྱ་བའོ། །དམིགས་པར་བྱ་བ་ལ་གནས་པའི་ཐ་སྙད་ནི་མེད་དོ་ཞེས་བྱ་བའི་དོན་ཏོ། །རྣམ་པ་འདིའི་སྒོ་ནས་ཀྱང་རྟེན་ཉིད་དུ་མི་འགྲུབ་པ་ཞེས་བསྟན་པའི་དོན་དུ་རྟེན་གྱི་སྒྲར་བརྗོད་དོ། །གལ་ཏེ་གང་གི་རྟེན་དུ་མི་འགྱུར་བ་དམིགས་པར་བྱ་བ་ཉིད་ཇི་ལྟར་ཡིན་སྙམ་ན་ནང་གི་རིག་པའི་
ཞེས་གསུངས་སོ། །ཕྱེད་ཕྱི་མ་འཆད་པ་ནི་མ་ངེས་པ་ཉིད་དུ་བཤད་པ་ནི་དམིགས་པ་ནི་ཞེས་བྱ་བ་ནི་རང་གི་ལུས་དམིགས་པར་གྱུར་པ་བྱེད་པ་པོས་ནི་ནང་བདེ་བ་ལ་རག་པ་ན་གཞན་ལ་འཆོལ་བའི་རྣམ་པར་ཤེས་པ་སྐྱེད་པར་བྱེད་དོ་ཞེས་བྱ་བའི་དོན་ཏོ། །དེས་ཞེས་བྱ་བ་གཞན་གྱི་ལུས་ལ་དམིགས་པ་པས་ལུས་ཐ་དད་པ་ལ་དམིགས་པའི་ཕྱིར་ཞེས་བྱ་བའི་གཏན་ཚིགས་དེ་དག་ལམ་ངེས་པ་ཡིན་ནོ། །ཁྱད་པར་ལུས་ཐ་དད་པ་ཉིད་ཀྱང་མ་གྲུབ་པོ་ཞེས་བརྗོད་པ་ནི་ལུས་གཞན་ཉིད་ཀྱང་ཞེས་བྱ་བའོ། །ཅིའི་ཕྱིར་ཞེ་ན། ལུས་གཅིག་ཉིད་དུ་བཏགས་པའི་ཕྱིར་རོ། །འོན་ཏེ་དོན་དམ་པར་ཐ་དད་པ་ཡོད་པའི་ཕྱིར། ཁྱད་པར་མ་གྲུབ་པ་ཡིན་ནོ་སྙམ་ན། དོན་དམ་པར་ནི་ཞེས་བྱ་བའོ། །ཇི་ལྟར་ཞེ་ན། ཕྱིས་པ་ལ་སོགས་པའི་ཞེས་སྨོས་སོ། །དེ་ལྟར་སླར་གཏན་ཚིགས་མ་ངེས་པ་ཡིན་ནོ་སྙམ་དུ་དགོངས་པའོ། །གལ་ཏེ་ལུས་འདི་ལ་ཤེས་པ་འདི་ཡོད་དོ་ཞེས་བྱ་བ་མི་སླུ་བ་དང་ལྡན་པའི་རྟོགས་པ་ནི་རེ་ཞིག་ཡོད་པ་མ་ཡིན་ནམ། དེས་ན་ཇི་ལྟར་ཅིང་འགོག །དེ་ཉིད་ཀྱི་ཕྱིར་ལུས་ནི་ཉེ་བར་ལེན་པ་ཉིད་དུ་མི་འགལ་ལོ་སྙམ་ན་དེ་ཕྱིར་ཞེ་གསུངས་སོ། །རྟེན་ཉིད་རྒྱ་ཆེར་བཀག་པའི་ཕྱིར་ན་ལུས་ལས་ཀྱི་རྒྱུན་ལ་ཕན་འདོགས་པ་ཡིན་ཏེ། དེས་ན་ལུས་འདི་ལ་བློ་ཡོད་དོ་སྙམ་དུ་རྟོགས་པ་ཡིན་གྱི་ཡིད་ཀྱི་རྒྱུན་སྐྱེ་བ་ནི་སེམས་ཉིད་ལས་ཡིན་ནོ། །དཔེར་ན་འབྲུའི་རྒྱུན་ལ་ཕན་འདོགས་པའི་ཕྱིར་སྦྱང་ལ་སོགས་པའི་དོན་ཡིན་ལ། སྐྱེ་བ་ནི་འབྲུ་གཞན་ལས་ཡིན་པ་བཞིན་ནོ། །དེ་ལྟ་ན་ཡང་སྦྱང་ཚིག་ན་འབྲུ་ཚིག་པ་བཞིན་དུ། ལུས་ཞིག་པ་ན་སེམས་ཀྱང་འཇིག་པར་འགྱུར་རོ་ཞེ་ན། སྦྱང་ཚིག་པ་ཙམ་གྱིས་ནི་འབྲུ་ཚིག་པ་མ་ཡིན་ཏེ། ཅི་ཞིག་ལྟར་འབྲུ་སྦྱང་ནས་སྤོས་ན་མི་འཚིག་ཀྱང་སྲིད་པའི་ཕྱིར་རོ། །བསྲེག་པར་བྱ་བ་རང་ཉིད་མེ་དང་འབྲེལ་ན་འཚིག་པ་ཡིན་ལ། ལུས་བཞིན་དུ་སེམས་ལ་ནི་བཤད་པ་དང་བསྲེག་པ་ལ་སོགས་པ་ཡོད་པ་མ་ཡིན་ནོ། །ནོའི་སྒྲ་ནི་སྐབས་ཀྱི་དོན་རྫོགས་པ་ལའོ། །སྐབས་ཀྱི་དོན་གྲུབ་ན་མངོན་པར་འདོད་པའི་དོན་འགྲུབ་པ་ཞེས་མཇུག་བསྡུ་བའི་སྒོ་ནས་སྟོན་པ་ནི་དེས་ན་ཞེས་བྱ་བའོ། །གཞན་པའི་ཡོན་ཏན་ཞེས་བྱ་བ་ནི་བརྩེ་བ་དང་ཆགས་
པ་དང་བྲལ་བ་ལ་སོགས་པའོ། །དེ་ལྟར་འཇིག་རྟེན་ཕ་རོལ་གྲུབ་ན་གོམས་པ་ཉམས་པ་མེད་པའི་ཕྱིར་ན་ཐམས་ཅད་མཁྱེན་པ་ལ་སྙོམས་པའི་རྣམ་བ་གཞན་བརྗོད་པ་ནི་གལ་ཏེ་ཞེས་བྱ་བའོ། །ཁྱད་པར་ཅུང་ཟད་དང་ལྡན་པ་ཞེས་བྱ་བ་ནི་རབ་ཏུ་འགྲོ་བ་གང་ལ་ཁྱད་པར་ཅུང་ཟད་ཙམ་ཡོད་པའོ། །གང་གི་ཕྱིར་རྣམ་པ་འགའ་ཞིག་ཙམ་དུ་རྣམ་པར་གནས་པའི་རབ་ཏུ་འགྱུར་བ་ནི་གང་གི་ཁྱད་པར་དང་ལྡན་པ་མཐོང་བ་ཡིན་ནོ། །སླར་ཡང་ནི། འབད་རྩོད་ལ་ནི་ལྟོས་འགྱུར་རམ། །ཞེས་བྱ་བ་ནི་མཆོང་བ་བཞིན་ནོ། །རྟེན་མི་བརྟེན་པ་ནི་ཆུའི་དྲོ་བ་བཞིན་ནོ་འདིའི་རྟེན་ཆུ་ནི་མི་བརྟན་པས་ནའོ། །རྟེན་བརྟན་པའི་རང་བཞིན་ཁོ་ན་འཕེལ་རབ་ཀྱི་མཐར་ཐུག་པ་ཡིན་ནོ་ཞེས་བརྗོད་པར་འདོད་པ་ཡིན་པར་བསམས་ནས་བརྗོད་པ་ནི་རང་བཞིན་དེ་འདྲ་འང་ཞེས་བྱ་བའོ། །ཡང་འབད་རྩོལ་ལ་ལྟོས་པ་གང་ཡིན་པ་དེ་འདྲ་བ་ཞེས་བྱ་བར་སྦྱར་རོ། །མཆོང་བ་ནི་ལུས་ཀྱི་རང་བཞིན་མ་ཡིན་ཏེ། སྐད་ཅིག་ཀྱང་གནས་པ་མི་འཐོབ་པའི་ཕྱིར་རོ། །དེ་ཞེས་བྱ་བ་ནི་གང་ཞིག་ཡང་འབད་རྩོལ་ལ་ལྟོས་པའི་རང་བཞིན་དུ་རྟེན་མི་བརྟན་པ་འཕེལ་བ་མ་ཡིན་པ་ཁོ་ནའོ་ཞེས་བྱ་བ་དེ་ཅིའི་ཕྱིར་ཞེ་ན། དེ་ལ་ཞེས་སྨོས་ཏེ། ཁྱད་པར་ཇི་ཙམ་ཞིག་བྱས་པའི་ཁྱད་པར་དེ་ཙམ་ལ། ཕན་བཏགས་ནུས་ཅན་ཏེ། ནུས་པ་ཟད་པའི་སྒྲུབ་པར་བྱེད་པ་རྣམས་ལ། ཁྱད་པར་ཕྱི་མ་དག་ལ་ནུས་པ་མེད་པའི་ཕྱིར་ཡང་འབད་པ་ལ་ལྟོས་པའི་ཁྱད་པར་འཕེལ་བ་མ་ཡིན་ནོ། །རྟེན་ཐམས་ཅད་ཀྱི་ཚེ་གནས་པ་མེད་པའི་ཡང་ཕྱིར་རོ། །རྟེན་མི་བརྟན་པ་ཅན་གྱི་ཁྱད་པར་འཕེལ་བ་མ་ཡིན་ནོ། །གལ་ཏེ་གང་དང་གང་ཁྱད་པར་ཡིན་པ་དེ་ཐམས་ཅད་ནི་འཕེལ་བ་གནས་པ་ཅན་ཡིན་ཏེ། །དཔེར་ན་མཆོང་བ་ལ་སོགས་པ་བཞིན་ནོ། །སེམས་ཀྱི་ཡོན་ཏན་རྣམས་ཀྱང་དེ་ལྟ་བུ་ཡིན་ནོ། །དེས་ན་དེ་དག་འཕེལ་བ་གནས་པ་མེད་པ་ཇི་ལྟར་འགྱུར་སྙམ་ན། ཁྱད་པར་ཡིན་ནོ་ཅོག་ནི་ཞེས་གསུངས་སོ། །གལ་ཏེ་མཆོང་བ་ལ་སོགས་པ་ནི་རང་བཞིན་ཡོད་པ་ཙམ་གྱིས་དེ་ལྟར་འགྱུར་བ་མ་ཡིན་ནམ། དེ་བཞིན་དུ་སེམས་ཀྱི་ཡོན་ཏན་རྣམས་ཀྱང་འགྱུར་རོ་སྙམ་ན། མཆོང་བ་དང་ཞེས་སྨོས་སོ། །དེ་ལྟར་ཞེས་བྱ་བ་ནི་བོགས་འབྱུང་བ་གནས་པ་ལ་
སྟོན་པར་རོ། །འོ་ན་ཇི་ལྟར་དེ་ལྟར་འགྱུར་སྙམ་ན། འོན་ཀྱང་ཞེས་གསུངས་སོ། ཡང་རྩོལ་བ་ལ་ལྟོས་པ་ཉིད་གསལ་བར་བྱ་བའི་དོན་དུ་མཆོང་བ་ནི་ཞེས་གསུངས་སོ། །ཇི་ལྟར་ན་ཡང་རྩོལ་བ་ལ་ལྟོས་པ་ཅན་ཡིན་སྙམ་ན། གང་ལ་འཕེལ་བ་རྣམ་པར་གནས་པ་མེད་པར་འགྱུར་ལ། མེ་དང་འབྲེལ་བ་མེད་ཀྱང་དེ་ཡོད་པ་ནི་མ་ཡིན་ནོ་ཞེས་སྨོས་སོ། །གང་ལས་ཞེས་བྱ་བ་ནི་མེ་དང་འབྲེལ་བ་ལོག་ཀྱང་གནས་པ་ལས་སོ། །འཕེལ་ན་རྣམ་པར་གནས་པ་ཉིད་ལ་གཉི་གས་ཁྱབ་པ་ཉེ་བར་སྡུད་པ་ནི་དེའི་ཕྱིར་འཕེལ་བ་མཐར་ཐུག་པ་མ་ཡིན་པ་ཉིད་ནི་ཞེས་བྱ་བའོ། །གཉི་ག་མེད་པའི་ཕྱིར་ཡིད་ཀྱི་ཡོན་ཏན་རྣམས་ནི་ཁྱབ་པར་བྱེད་པ་སྟོན་པ་ནི། དེ་མེད་པའི་ཕྱིར་དང་ཞེས་བྱ་བའོ། །བཟློག་པ་སྲིད་པའི་ཕྱིར་རོ་ཞེས་བྱ་བ་ནི་རྟེན་བརྟན་པ་ཉིད་ལ་སོགས་པ་སྲིད་པའི་ཕྱིར་རོ། །འོ་ན་ཡང་རྩོལ་བ་ལ་ལྟོས་པ་རང་གིས་འཇུག་པར་འགྱུར་རོ་སྙམ་ན། ཡང་རྩོལ་བ་ལ་ལྟོས་པ་གང་ཡིན་པ་ཞེས་བྱ་བའོ།། རང་གི་ངང་གིས་འཇུག་པར་མི་འགྱུར་རོ་ཞེས་བྱ་བའི་དོན་ཏོ། །སྔར་བྲམ་ཟེ་ཡིན་པ་ལ་ཕྱིས་ཐོས་པ་ཅན་དུ་གྱུར་པ་དེ་ནི་ལོག་པ་མེད་པ་སྟེ། བརྩོག་པ་མེད་པའོ། །བཤད་ཟིན་པའི་ཡོན་ཏན་དང་ལྡན་པས་རབ་ཀྱི་མཐར་ཐུག་པར་འགྲོ་བའི་ཕྱིར་ན་དཀར་ཡོལ་སར་པ་ལྟར་ཐོད་པ་ཡང་ཟ་བའི་ཕྱིར་རོ། །སྙིང་རྗེ་ལ་སོགས་པ་ཡང་རྟེན་བརྟན་པ་དང༌། རང་གི་ངོ་བོར་གྱུར་པ་ཡིན་ནོ་ཞེས་ཞེ་ལ་བཞག་པ་ཡིན་ནོ། །དེ་ཉིད་ཀྱི་ཕྱིར་མཆོང་བ་དང་ཆུ་བསྐོལ་བ་ལས་ཆོས་མི་མཐུན་པ་སྟོན་པ་ནི་གང་ཞིག་ཡང་རྩོལ་བ་ལ་ལྟོས་པ་དང་ཞེས་བྱ་བའོ། །རང་བཞིན་ཉིད་མིན་ཕྱིར་ཞེས་བྱ་བ་ནི་རང་གི་ངང་གིས་འཇུག་པ་ཡང་མ་ཡིན་པའི་ཕྱིར་རོ། །ཁྱད་པར་འཕེལ་ཡང་མཐར་ཐུག་པར་འཕེལ་བ་མ་ཡིན་ནོ་ཞེས་བྱ་བ་ནི་ལྷག་མའོ། །འོ་ན་གང་ཞིག་ཤིན་དུ་འཕེལ་བ་དང་ལྡན་པ་འགྱུར་སྙམ་ན། གང་ཚེ་བྱས་གྱུར་པ་ཞེས་བྱ་བའོ། །ཡང་གང་གི་ཚེ་བྱས་ཟིན་པའི་ཁྱད་པར་ཡང་རྩོལ་བ་ལ་ལྟོས་ན་དེའི་ཚེ་རྩོལ་བ་གཞན་དག་ཁྱད་པར་གཞན་བྱེད་པར་འགྱུར་རོ། །དེ་ལྟ་བུར་གྱུར་པའི་ཁྱད་པར་ནི་ཤིན་དུ་འཕེལ་བར་འགྱུར་རོ་ཞེས་བྱ་བའི་དོན་ཏོ། །ཇི་ལྟར་འདིར་རང་བཞིན་ཉིད་མ་ཡིན་སྙམ་ན། རྒྱུ་ཉེ་བ་ལ་ལྟོས་པ་ནི་ཞེས་གསུངས་སོ། །དེ་སྐད་ཅེས་བྱ་བ་ནི་རང་གི་ངོ་བོ་
ཉིད་ཡིན་པའི་ཕྱིར་རོ། །དེས་ན་ཞེས་བྱ་བ་ནི་ངོ་བོ་ཉིད་མ་ཡིན་པས་ནའོ། །ཆོས་མི་མཐུན་པར་བརྗོད་པ་ནི་བརྩེ་བ་ལ་སོགས་པ་ཞེས་བྱ་བའོ། །གལ་ཏེ་ཤེས་རབ་ལ་སོགས་པ་ཡང་གོལ་བ་ཉིད་དུ་མཐོང་སྙམ་ན། འདི་ནི་བག་ཆགས་བརྟན་པ་མེད་པ་ལས་ཡིན་ཏེ། ཤིན་ཏུ་བརྟན་པར་གོམས་པར་བྱས་པ་བརྗོད་པར་འདོད་པ་ཡིན་ནོ། །དེ་ཉིད་བསྟན་པའི་ཕྱིར་ཡང་ནས་ཡང་དུ་དེ་གོམས་པར་བྱས་པའི་ཁྱད་པར་ནི་ལྡོག་པ་ལ་བརྟེན་པ་མ་ཡིན་ནོ་ཞེས་བཤད་དོ། །དེ་ལྟ་ན་ཡང་འདི་དག་ཤིན་དུ་འཕེལ་བར་ཇི་ལྟར་འགྱུར་སྙམ་ན། དེ་བཞིན་དུ་ཞེས་གསུངས་སོ། །འདིས་ནི་འདི་ལ་ཕན་བཏགས་ནུས་ཅན་ཞེས་བྱ་བ་དང༌། བྱས་ཏེ་གལ་ཏེ་སླར་ཡང་ནི་ཞེས་བྱ་བ་ལ་སོགས་པའི་རྣམ་འགྲེལ་རྣམ་པར་བཀྲལ་བ་ཡིན་ནོ། །གཅིག་ནི་ཞེས་བྱ་བ་ནི་བརྩེ་བ་ལ་སོགས་པའོ། །གཞན་ནི་ཆུའི་དྲོ་བ་ལ་སོགས་པའོ། །མཆོང་བ་དང་ཆུ་བསྐོལ་བ་ལ་སོགས་པ་དེ་ནི་ཡང་རྩོལ་བ་ལ་མི་ལྟོས་པས་རང་གི་ངང་གིས་འཇུག་པ་མ་ཡིན་ནོ། །བརྩེ་བ་ལ་སོགས་པ་དེ་ལས་བཟློག་པ་བཤད་པ་ནི། བརྩེ་བ་ལ་སོགས་པ་ནི་ཞེས་བྱ་བའོ། །མཆོང་བ་ལ་སོགས་པ་རང་གི་ངང་གིས་འཇུག་པ་མ་ཡིན་པ་དེའི་ཕྱིར་རོ། །དེ་དག་ལ་ཞེས་བྱ་བ་ནི་སྐྱེས་བུ་རྣམས་ལའོ། །དེ་ནི་བརྩེ་བ་ལ་སོགས་པའི་ཡོན་ཏན་ནོ། །ངོ་བོ་ཉིད་སྐྱེས་ན་ནི་རང་གི་ངང་གིས་འཇུག་པའོ། །གལ་ཏེ་ཇི་ལྟར་ཡོངས་སུ་མཐོང་བའི་ཁྱད་པར་ཙམ་འགྱུར་མོད་ཇི་ལྟ་ཤིན་དུ་འཕེལ་བའི་མཐར་ཐུག་པར་འགྱུར་སྙམ་ན། གང་ཕྱིར་ཞེས་གསུངས་སོ། །དེའི་ཕྱིར་ཞེས་ཁོང་ནས་ཕྱུང་ལ། བརྩེ་བ་ལ་སོགས་པ་ཞེས་བྱ་བ་ལ་སོགས་པ་དང་སྦྱར་རོ། །དེ་ལྟ་ཡིན་དང་ཤིན་དུ་འབོགས་པའི་མཐར་ཐུག་པར་ཡང་འགྱུར་གྱི། ཇི་ལྟར་ཡོངས་སུ་མཐོང་བ་བཞིན་པའི་ཁྱད་པར་ཙམ་ནི་མ་ཡིན་ནོ། །ཇི་ལྟར་ཤེས་རབ་ལ་སོགས་པའི་བློ་རྣམས་ལ་ཡང་ནས་ཡང་དུ་ལྷག་པར་འགྱུར་སྙམ་ན། བརྩེ་བ་ལ་སོགས་པ་ནི་ཞེས་བྱ་བ་སྨོས་སོ། །དེས་ན་དེ་དག་ནི་ཤིན་དུ་འཕེལ་བར་འགྱུར་རོ་ཞེས་བྱ་བར་དགོངས་པའོ། །ཇི་ལྟར་ལྟོས་པ་དང་བཅས་པ་མ་ཡིན་སྙམ་ན་འདི་ལྟར་ཞེས་བྱ་བ་གསུངས་སོ། །གལ་ཏེ་བརྩེ་བ་ལ་སོགས་པ་ནི་ལན་དུ་
ཕན་འདོགས་པས་འཇུག་པར་མཐོང་བ་མ་ཡིན་ནམ་དེས་ན་དེ་སྐད་ཇི་སྟེ་བརྗོད་ཅེ་ན། བརྩེ་སྩོགས་ལན་དུ་ཞེས་བྱ་བའོ། །བྱང་ཆུབ་སེམས་དཔའི་བརྩེ་བ་ལ་སོགས་པ་ནི་ལན་དུ་ཕན་འདོགས་པ་ལ་ལྟོས་པ་མ་ཡིན་གྱི་འོན་ཀྱང་ཤེས་རབ་ལ་སོགས་པ་རིགས་མཐུན་པའི་བློ་ལས་བྱུང་བ་ཡིན་ནོ། །དེ་ཉིད་ཀྱི་ཕྱིར་དེ་དག་ནི་དམན་པ་མ་ཡིན་ནོ་ཞེས་གསུངས་པ་ནི་དེའི་ཞིང་དུ་ཞེས་བྱ་བའོ། །བརྩེ་བ་ལ་སོགས་པའི་བློ་དེས་ཞིང་དུ་བྱས་པའི་རྒྱུ་གང་ལ་ཡོད་པ་ཞེས་ཚིག་རྣམ་པར་སྦྱར་རོ། །དེས་ན་ཞེས་བྱ་བར་ནི་ཆུང་བར་འགྱུར་བ་མ་ཡིན་པས་ནའོ། །དེ་དག་ཅེས་བྱ་བ་ནི་བརྩེ་བ་ལ་སོགས་པའོ། །རྒྱས་པར་མི་འགྱུར་བའི་མཚན་ཉིད་ཀྱིས་ཞན་པར་ལྟ་ག་ལ་འགྱུར། ཡང་ནས་ཡང་དུ་རྒྱས་པ་ཁོ་ནར་འགྱུར་རོ་ཞེས་བྱ་བའི་དོན་ཏོ། །དེ་ཡང་ཞེས་བྱ་བ་ནི་མཆོང་བ་ཡང་ངོ༌། །དེའི་ཆོས་ནི་མངོན་པར་འཕེལ་བ་མཐར་ཐུག་པ་མེད་པའོ། །དེ་ལྟ་ན་ཡང་མ་ཡིན་ཏེ། །དེས་བཟློག་པ་ཡིན་ཏེ། སྐབས་ཀྱི་ཤེས་རབ་ལ་སོགས་པ་ལ་འཕེལ་བ་མཐར་ཐུག་པ་མེད་པ་ཡང་མ་ཡིན་ནོ་ཞེས་བྱ་བར་སེམས་ནའོ། །སྟོབས་དང་རྩོལ་བ་དག་ལས་མཆོང་པ་ཡིན་ནོ་ཞེས་འབྲེལ་ཏོ། །མཆོང་བ་སྟོབས་ལ་སོགས་པའི་འབྲས་བུ་བསྒྲུབ་པའི་དོན་དུ་ལྡོག་པ་བརྗོད་པ་ནི། ཤིན་དུ་ལེགས་མཆོང་གོམས་པར་བྱས་པ་ལ་ཡང་ཞེས་བྱ་བའོ། །དེས་ན་དེ་གཉིས་ནི་མཆོང་པའི་རྒྱུ་ཡིན་ནོ་ཞེས་བྱ་བ་དགོངས་པའོ། །འོ་ན་ནི་གང་གིས་མཆོང་པ་མཐའ་ཐུག་པ་མེད་པར་འགྱུར་བ། དེ་གཉིས་རྣམ་པར་གནས་པ་མེད་པའི་བདག་ཉིད་དུ་འགྱུར་རོ་ཞེ་ན། སྟོབས་དང་ཞེས་བྱ་བ་གསུངས་སོ། །རྣམ་པར་གནས་པའི་བདག་ཉིད་ནི་ནུས་པ་གནས་པ་ཉིད་དོ། །གནས་པའི་བདག་ཉིད་དུ་ཞེས་བྱ་བ་ནི་སོ་སོར་ངེས་པ་ཉིད་དུའོ། །གཞན་དུ་ནི་མ་ཡིན་ནོ་ཞེས་བྱ་བ་ནི་མཐའ་ཐུག་པ་མ་ཡིན་པའོ། །གོམས་པ་ཉིད་ལས་ཡིན་གྱི་སྟོབས་དང་རྩོལ་བ་ལས་ནི་མ་ཡིན་ནོ། །དེས་ན་འདི་གཉིས་ནི་དེའི་རྒྱུད་ཉིད་མ་ཡིན་ནོ་སྙམ་དུ་བསམས་པའོ། །དེ་ལྟ་མ་ཡིན་ན་ཞེས་བྱ་བ་ནི་གོམས་པའི་འབྲས་བུ་ཉིད་མ་ཡིན་ནའོ། །ཕྱིས་མ་གྲུབ་པར་ཐལ་ལོ་ཞེས་བྱ་བ་ནི་སྔར་ཡང་ཞེས་བྱ་བར་རྟོགས་པར་བྱའོ། །ཅིའི་ཕྱིར་ཞེ་ན། དེའི་རྒྱུ་
སྟོབས་ནི་སྔར་ཡང་ཡོད་པའི་ཕྱིར་རོ། །མཆོང་པའི་ཡུལ་ཅན་གྱི་སྟོབས་ཅན་གྱི་སྟོབས་དེ་ནིའོ། །དེ་ལྟ་ན་ཞེས་བྱ་བ་ནི་མཆོང་པའི་ཡུལ་ཅན་གྱི་གོམས་པས་བསྒྲུབས་པ་ཡིན་ནའོ། །དེ་ཉིད་དུ་ཞེས་བྱ་བ་ནི་མཐའ་ཐུག་པ་མེད་པ་མ་ཡིན་པ་ཞེས་བྱ་བ་ལ་སོགས་པ་དེ་ལྟ་བུའི་རང་བཞིན་དུའོ། །སྐྱེས་བུ་དེ་ནིའོ། །དེའི་ཕྱིར་ཞེས་བྱ་བ་ནི་མི་མཐུན་པ་གསལ་བའི་ཕྱིར་རོ། །སྟོབས་དེས་ནའོ། །ཇི་སྟེ་ཞེས་བྱ་བ་ནི་བཅུད་ཀྱིས་ལེན་ཟོས་པ་ལས་སྟོབས་སྐྱེ་བ་ཡིན་གྱི་སྔར་ཡོད་པ་ནི་མ་ཡིན་ནོ་ཞེ་ན། ལན་དུ་དེ་ཡང་ཞེས་བྱ་བའོ། །གནས་པ་ཉིད་དོ་ཞེས་བྱ་བ་ནི་མཐའ་ཐུག་པ་མེད་པ་མ་ཡིན་པའོ། །ཤེས་རབ་ལ་སོགས་པའི་ཚུལ་དུ་གོམས་པ་ཉིད་ལས་མཆོང་བ་ཡིན་ནོ་ཞེས་བྱ་བ་རྣམ་པ་གཞན་གྱིས་འགོག་པ་ནི་མིང་དང་ཞེས་བྱ་བའོ། །བྱ་ཁྱུང་མི་དང་སྒྲེའུ་མངལ་ནས་སྐྱེས་པ་དག་ལས་སྐྱེ་གནས་ཁྱད་པར་དུ་གྱུར་པ་ཡིན་ལ། སྤྲེའུ་ནི་མི་ལས་རིགས་ཁྱད་པར་དུ་གྱུར་པ་ཡིན་ནོ། །རིགས་མཐུན་པ་ཉིད་ཀྱི་མི་རྣམས་ལ་ཁ་ཅིག་ཉིད་བཅུད་ཀྱིས་ལེན་ཟོས་པའི་སྟོབས་ཀྱིས་ཁྱད་པར་དུ་གྱུར་པ་ཡིན་ནོ། །བརྩེ་བ་ལ་སོགས་པ་ནི་མཆོང་བ་ལས་བཟློག་པར་བརྗོད་པ་ནི་བརྩེ་བ་ལ་སོགས་པ་དག་ནི་ཞེས་བྱ་བའོ། །གཞན་ལ་མི་ལྟོས་པ་ཉིད་དོ་ཞེས་བྱ་བ་ནི་བརྩེ་བ་ལ་སོགས་པ་ནི་རིགས་ལ་སོགས་པ་གཞན་ལ་ལྟོས་པ་མ་ཡིན་ནོ། །གོམས་པ་ཙམ་ལ་ལྟོས་པ་ཡིན་ཏེ། དེ་མེད་ན་མེད་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་གཞན་གྱིའོ། །མ་ཡིན་ཏེ་ཞེས་བྱ་བ་ནི་ལན་ནོ། །དེས་ན་སྟོབས་ནི་གོམས་པའི་འབྲས་བུ་མ་ཡིན་ཏེ། དེ་འཕེལ་བ་ན་དེ་མེད་པའི་ཕྱིར་རོ་ཞེས་བྱ་བར་བསམས་པའོ། །དེའི་བདག་ཉིད་ནི་སྙིང་རྗེ་ལ་སོགས་པའི་བདག་ཉིད་དུའོ། །སྙིང་རྗེའི་བདག་ཉིད་དུ་གྱུར་པ་ཡོད་པ་ཡང་མ་ཡིན་ནོ། །རང་ས་བོན་ལས་བྱུང་བ་བརྩེ་བའི་ས་བོན་ལས་བྱུང་བའོ། །མི་མཐུན་པའི་ཕྱོགས་ཞེ་སྡང་ལ་སོགས་པས་གནོད་པ་མེད་པ་དེའི་ཚེ་སེམས་ཀྱི་རྒྱུན་ལ་དེ་བདག་ཉིད་དུ་འགྱུར་ཏེ། རང་གི་ངང་གིས་འཇུག་པར་འགྱུར་རོ། །འོ་ན་ཇི་ལྟར་དེའི་བདག་ཉིད་དུ་འགྱུར་སྙམ་ན། གལ་ཏེ་རྟེན་བརྟན་
པ་ཡང་ཡིན་པ་ཞེས་བྱ་བའོ། །དེ་ཉིད་བཤད་པ་ནི་དེ་ལ་ཞེས་བྱ་བའོ། །གདོན་མི་ཟ་བར་ཞེས་བྱ་བ་ནི་བརྩེ་བའི་བདག་ཉིད་གོམས་པ་སྔོན་དུ་འགྲོ་བ་ཅན་ནོ་ཞེས་ཁས་བླང་བར་བྱ་སྟེ། མཐོང་བའི་ཕྱིར་རོ། །མཐོང་བ་ཉིད་བཤད་པ་ནི་འདི་ལྟར་ཞེས་བྱ་བའོ། །རྩ་བ་ཡིན་ཞེས་བྱ་བ་ནི་རྒྱུ་ཡིན་པའོ། །ནིའི་སྒྲ་ནི་ཁོ་ནའི་དོན་ཏོ། །དེ་ཉིད་ཀྱི་ཕྱིར་བཤད་པ་བརྩེ་བ་ལ་སོགས་པ་གོམས་པ་ཞེས་བྱ་བའོ། །ཅིའི་ཕྱིར་སྙམ་ན། སྐྱེ་བ་ནི་ཞེས་གསུངས་སོ། །བསྒྲུབ་པར་བྱ་བ་ཡིན་ནོ་ཞེས་བྱ་བར་གཅད་དོ། །སྐྱེ་བ་ལས་ནི་ཡོད་པ་ཉིད་དེ་དེའི་ཕྱིར་རོ། །གང་ཡོད་པས་འགའ་ཡང་བླང་བར་བྱ་བ་ཉིད་མ་ཡིན་པར་སྣང་བར་འགྱུར་བ་སྣང་བར་འགྱུར་བ་ཞེས་བྱ་བ་ནི་ཁམས་གསུམ་པ་ལ་སྡང་བའི་རྣམ་པ་ཅན་གྱི་ཆོས་ཆོས་སོ། །དེ་བཞིན་དུ་ཞེས་བྱ་བ་ནི་ཡིད་ལོག་པ་བཞིན་ནོ། །ཆགས་བྲལ་ནི་མཉམ་པ་ཉིད་ཀྱི་རྣམ་པ་ཅན་དུ་འཆད་པར་འགྱུར་ལ། ཆགས་ཀྱི་རབ་ཀྱི་མཐར་ཐུག་པ་ནི་ཟད་པ་ལས་ཁྲག་འཛག་པས་འཆི་བའི་མཐར་ཐུག་པར་འགྱུར་བའོ། །དེ་ལྟ་ན་ཞེས་བྱ་བ་ནི་ཡིད་ལོག་པ་ལ་སོགས་པ་བདག་ཉིད་དུ་གྱུར་པ་བཞིན་དུ་སྙིང་རྗེ་དང་ལྡན་པ་བརྩེ་བ་ཞེན་པོའི་བདག་ཉིད་དུ་གྱུར་པ་ཡིན་ནོ། །གལ་ཏེ་བརྩེ་བ་དང་ལྡན་པ་ནི་གཞན་གྱི་སྡུག་བསྔལ་གཞོམ་པ་ཉིད་ལ་བརྩོན་མོད། རང་གི་སྡུག་བསྔལ་གཞོམ་པའི་ཐབས་བཙལ་བས་ཅི་བྱེ་ཞེ་ན། རང་གི་སྡུག་བསྔལ་མ་གསལ་བར་ཞེས་གསུངས་སོ། །འདིས་ནི་དངོས་པོ་ཐམས་ཅད་མངོན་དུ་བྱས་པ་མེད་པར་བྱ་བ་འདིའི་ཉེ་བར་མཚོན་བྱེད་ཡིན་ནོ། །དེ་ཉིད་ཀྱི་ཕྱིར་དེས་ན་ཞེས་གསུངས་ཏེ་མི་ནུས་པས་ནིའོ། །ཅིའི་ཕྱིར་ཐམས་ཅད་ཀྱི་ཚེ་དེ་སྟོན་པ་སྲིད་པ་མ་ཡིན་ཞེ་ན། རང་གི་དོན་འདོད་པ་ཞེས་སྨོས་སོ། །ཐར་པ་རྣམས་ནི་རང་གི་དོན་འདོད་པ་མེད་དོ་ཞེས་བྱ་བར་དགོངས་སོ། །དམྱལ་བ་ལ་སོགས་པར་སྐྱེས་པའི་དུས་ན་ཡང་མེད་པའི་ཕྱིར་རོ། །འདིས་ནི་རང་གི་སྡུག་བསྔལ་ཟད་པ་ལ་མངོན་པར་སྦྱོར་བར་བརྗོད་དོ། །གལ་ཏེ་གང་གིས་འདི་ཡང་བརྗོད་པར་བྱ་བ་དངོས་པོ་ཐམས་ཅད་མངོན་དུ་བྱ་བ་ལ་མངོན་པར་སྦྱོར་བ་མེད་ན་ཆད་པ་ཅི་ཡོད་སྙམ་ན། འཇིག་རྟེན་གྱི་ཁམས་འོད་ཟེར་ཅན་གྱི་ཁམས་ཞེས་བྱ་བ་ལ་སོགས་པ་གསུངས་
ཏེ། དེས་ན་འདི་བརྗོད་པར་བྱ་བ་ཡིན་ནོ། །ཐམས་ཅད་ཅེས་བྱ་བ་ནི་རང་གི་སྡུག་བསྔལ་ཟད་པ་ལ་སོགས་པའོ། །མངོན་དུ་བྱེད་པ་ན་ཞེས་བྱ་བ་འཕགས་པའི་བདེན་པ་ལ་སོགས་པ་རྣམས་སོ། །རྟོག་པ་ནི་རང་གི་ངོ་བོ་དང་རང་གི་ཆོས་ཀྱི་སྒོ་ནས་ངེས་པར་གཟུང་ནས་ངེས་པར་རྟོག་པའོ། །རྣམ་པར་དཔྱོད་པ་ཐར་པའི་འདོད་པ་ནི་ལུང་དང་རིགས་པས་སྡུག་བསྔལ་གྱི་རྟོག་པ་མཛད་དོ། །གཙོ་བོའི་དོན་ཉིད་ཀྱིས་ན་སྡུག་བསྔལ་གྱི་རྒྱུ་ཡོངས་སུ་སྨོས་ཏེ། ལུང་ལ་བརྟེན་པའི་ཕྱིར་ན་ལས་དང་འབྲས་བུ་ལ་སོགས་པ་ཡོངས་སུ་རྟོག་པར་མཛད་པ་ཡང་བསྟན་པ་ཡིན་ནོ། །དེ་བརྗོད་པ་ནི་དབང་པོ་ལས་འདས་པའི་དོན་ཤེས་པའི་རྒྱུ་ལུང་བཞིན་ནོ་ཞེས་བྱ་བའོ། །བཤད་པ་གཉིས་པ་ལ་ནི་འཇུག་པའི་རིམ་པ་གསལ་ལོ། །གཞན་དུ་ནི་མ་ཡིན་ནོ་ཞེས་བྱ་བ་ནི་དཔྱོད་པ་ལ་མངོན་དུ་ཕྱོགས་པ་མེད་པར་རོ། །དེའི་འོག་ཏུ་ནི་གཞན་གྱི་དོན་གྱི་རྗེས་སུ་དཔག་པའི་རང་བཞིན་གྱི་ལུང་དུ་ཞེས་བྱ་བ་ནི་བསྒྲུབ་པར་བྱ་བ་དང་སྒྲུབ་པར་བྱེད་པའི་ཆོས་ལ་སོགས་པ་འཕངས་པའི་ཕྱིར་ན། དོན་གྱིས་ན་གཞན་གྱི་དོན་གྱི་རྗེས་སུ་དཔག་པའི་རང་བཞིན་ཉིད་ཡིན་ནོ། །ཐམས་ཅད་ཀྱི་ཚེ་ཚུལ་གསུམ་པའི་གཏན་ཚིགས་སྦྱོར་བར་ནི་མ་ངེས་སོ། །སྒྲུབ་པར་བྱེད་པའི་ངག་སྦྱོར་བ་ན་ཡང་མ་ཚང་བ་དང༌། མ་ལྷག་པ་འདི་འདྲ་བ་ཉིད་སྦྱར་བར་བྱ་བ་ཡིན་ནོ་ཞེས་བརྗོད་པ་ཡིན་ཏེ། ངག་ཡན་ལག་ལྔ་པོའི་སྦྱོར་བ་ནི་ཐམས་ཅད་དུ་བྱ་བ་ནི་མ་ཡིན་ནོ་ཞེས་བྱ་བར་དགོངས་པའོ། །དོན་དེ་ཞེས་བྱ་བ་ནི་དཔྱོད་པས་ཡུལ་དུ་བྱས་པའོ། །བཀའ་ལུང་སྐོང་བ་ཙམ་གྱི་ལུང་ལ་ས་ནི་དོན་དེ་མཐོང་བ་མ་ཡིན་ནོ་ཞེས་འབྲེལ་ཏོ། །ཅིའི་ཕྱིར་ཞེ་ན། སྨྲ་བ་པོ་ཞེས་གསུངས་སོ། །རིགས་པར་བསྒྲུབ་པར་བྱ་བ་ནི་རིགས་པ་ཉིད་ཀྱིས་གཞན་ལ་བསྟན་པར་བྱ་བ་ཡིན་གྱི་བཀའ་ལུང་གིས་ཅི་བྱ། དེས་ན་དེ་ལྟར་མི་དཔྱོད་པ་ཇི་ལྟར་རྟོག་པ་དང་ལྡན་པ་ཡིན། རིགས་པ་མི་འདོད་ན་ཡང་མ་རྨོངས་པ་ཅི་ལྟར་འགྱུར། དེས་ན་ཞེས་བྱ་བ་ནི་རྣམ་པ་དེ་ལྟ་བུའི་ལུང་དུ་དོན་མཐོང་བས་ནའོ། །སྡུག་བསྔལ་གྱི་རྒྱུ་ཞེས་བྱ་བ་ནི་ཀུན་འབྱུང་གི་བདེན་པའི་རང་
བཞིན་ནོ། །དེའི་ཞེས་བྱ་བ་ནི་སྡུག་བསྔལ་གྱི་རྒྱུའིའོ། །དེ་བརྟགས་པས་ཞེས་བྱ་བ་ནི་འབྲས་བུར་གྱུར་པའི་སྡུག་བསྔལ་བ་དང༌། མི་རྟག་པ་ལ་སོགས་པ་བརྟགས་པས་སོ། །ཅིའི་དོན་དུ་ཞེ་ན། བཟློག་པར་རུང་བ་ཉིད་དུ་ཞེས་སྨྲས་སོ། །གང་ཞིག་དེ་མེད་པར་མི་འགྱུར་བ། བཟློག་པར་རུང་བ་ཉིད་དུ་རྟོག་པ་ལ་ དགོས་པ ་ཅི་ཡོང་སྙམ་ན། བཟློག་པར་རུང་བ་ཉིད་དུ་ཞེས་གསུངས་སོ། །འབྲས་བུ་རྒྱུ་མེད་པ་ཉིད་ནི་རྟག་ཏུ་ཡོད་པ་ཉིད་དོ། །རྟག་པའི་རྒྱུ་ཅན་མི་ལྡོག་པ་ཇི་ལྟར་ཞེ་ན། རྒྱུ་དང་བྲལ་བ་མེད་པར་ནི་ཞེས་གསུངས་སོ། །དེ་བས་ན་འབྲས་བུ་མེད་པ་དང༌། རྟག་པའི་རྒྱུ་ཅན་ནི་ལྡོག་པ་མ་ཡིན་ནོ། །འོ་ན་ནི་རྒྱུ་དང་བཅས་པ་ཇི་ལྟར་ལྡོག་སྙམ་ན། རྒྱུ་ཡིས་བྱས་པའི་ཞེས་སྨོས་སོ། །འོ་ན་མི་རྟག་པའི་རྒྱུ་ཅན་ཉིད་ལ་བརྟགས་པས་ཅི་བྱ་ཞེ་ན། མི་རྟག་རྒྱུ་ཅན་ཞེས་གསུངས་སོ། །སྡུག་བསྔལ་དེའི་རྒྱུ་ནི་ཀུན་འབྱུང་གི་བདེན་པ་གང་ཡིན་པའོ། །དེའི་མི་རྟག་པ་ཉིད་དུ་རྟག་པ་མཛད་དོ། །རྒྱུ་ནི་སྡུག་བསྔལ་གྱི་རྒྱུ་གནས་ནའོ། །སྡུག་བསྔལ་གྱི་མཚན་ཉིད་ཀྱི་འབྲས་ལྡོག་གོ །འོ་ན་སྡུག་བསྔལ་གྱི་རྒྱུའི་མི་མཐུན་པའི་ཕྱོགས་བཅུའི་ཕྱིར་རྟོགས་པར་བྱེད་སྙམ་ན། དེ་རྒྱུ་གཞོམ་ཕྱིར་ཞེས་བྱའོ་སྙམ་དུ་དགོངས་པར་འགྱུར་ཏེ་ཞེས་བྱ་བ་ནི་དེ་འདྲ་བའི་བློ་མངའ་བར་འགྱུར་བའོ། །བྱུང་བ་ནི་ཞེས་བྱ་བ་ནི་རྒྱུན་གྱིས་འཇུག་པར་འགྱུར་བ་ནིའོ། །གཉེན་པོ་མེད་ཀྱང་རྒྱུ་མེད་པར་འགྱུར་བའི་ཕྱིར་གཉེན་པོས་ཅི་བྱ་སྙམ་ན། གཉེན་པོ་མེད་པར་ནི་ཞེས་སྨོས་སོ། །གཉེན་པོ་མེད་ཀྱང་སྡུག་བསྔལ་གྱི་རྒྱུ་མེད་པར་འགྱུར་རོ་ཞེས་ནི་མི་རིགས་སོ། །དེ་ལྟ་མ་ཡིན་ན་མེའི་གཉེན་པོ་མེད་པས་ན་རྒྱུ་མེད་པ་ཅན་དུ་འགྱུར་བའི་རྟག་ཏུ་སྡུག་བསྔལ་མེད་པ་ཁོ་ན་འགྱུར་རོ་ཞེས་བྱ་བར་དགོངས་པའོ། །གལ་ཏེ་རྒྱུ་མེད་པ་ཉིད་ལས་ཞེས་བྱ་བ་ནི་གཞན་གྱི་དོགས་པ་བསུ་བའོ། །རྒྱུ་མེད་པ་ཉིད་ལས་སྡུག་བསྔལ་ལྡོག་མོད་འདི་ལ་གཉེན་པོ་ལ་བརྟེན་པས་ཅི་ཞིག་བྱ་ཞེས་བྱ་བའོ། །གང་ཞིག་འདི་སྐད་བརྗོད་པ་ཞིག་དེ་ལྟར་འདོད་པ་ཡོད་དམ་ཞེ་ན། ལས་ཟད་པ་ཉིད་ལས་ཞེས་གསུངས་སོ། །ལས་ཟད་པ་ཡང་
དཀའ་ཐུབ་ཀྱི་སྙོན་རྨོངས་པ་ལས་སོ། །གྲུབ་པའི་མཐའ་སྨྲ་བས་བཤད་པ་ནི་མ་ཡིན་ཏེ་ཞེས་བྱ་བའོ། །གལ་ཏེ་ལས་གཅིག་ཁོ་ནར་ཟད་ན་ནི་དེའི་ཚེ་སྤྱད་པས་ཟད་བ་ཞིག་ཏུ་ཡང་འགྱུར་བ་ཡིན་ན། འོན་ཀྱང་མ་རིག་པའི་མཚན་ཉིད་ཀྱི་རྒྱུ་མ་ཟད་ན། ལས་གཞན་དང་གཞན་སྐྱེ་བ་འཕེན་ཏོ་ཞེས་བྱ་བའི་དོན་ཏོ། །ལས་དང་སྡུག་བསྔལ་གྱི་རྒྱུན་ནི་མ་རིག་པ་ཡིན་ལ། མ་རིག་པ་ཡང་གཉེན་པོ་མེད་པར་མི་ལྡོག་གོ །དེ་ལྟར་འདིས་ནི་ལམ་གྱི་བདེན་པ་འཕངས་བ་ཡིན་ནོ། །སྔར་གྱི་རྒྱུ་ཡང་ཕྱིར་ཞེས་བྱ་བས་ནི་བདེན་པ་གསུམ་འཕངས་པ་ཡིན་ནོ། །དེ་དག་གི་རབ་ཏུ་སྤྲོས་པ་ནི་མདུན་བསྟན་པར་འགྱུར་རོ། །སྐྱོན་མེད་དོ་ཞེས་བྱ་བ་ནི་ལམ་ལྟོས་པའི་མཚན་ཉིད་ཉིད་སྐྱོན་ནོ། །དེས་ན་ཞེས་བྱ་བ་ནི་དུ་མའི་རང་བཞིན་ཡིན་པས་ནའོ། །རྒྱུ་ཡིན་ཞེས་བྱ་བས་ནི་སྐབས་ཀྱི་སྡུག་བསྔལ་གྱིས་བདག་ཉིད་ལ་གདུང་བར་བྱས་པས་ན་ཞེས་སྦྱར་རོ། །དེ་ལ་ཞེས་བྱ་བ་ནི་རྒྱུ་མེད་པར་གཞན་ལ་བྱམས་པ་ལའོ། །ཇི་སྟེ་དེ་ལྟ་བུ་མཐོང་ངམ་སྙམ་ན། བདག་གི་བ་ལ་ཞེས་སྨོས་ཏེ། བུ་ལ་སོགས་པ་ལའོ། །མངོན་པར་ཞེན་པ་ནི་ཤིན་ཏུ་བྱམས་པས་ཀུན་འཛིན་པའོ། །ཕྱེད་ཕྱི་མ་ཉིད་རྣམ་པར་འཆད་པ་ནི་བུ་ལ་ཞེས་སྨོས་སོ། །དེའི་ཕྱིར་ཆགས་པ་ཉིད་སྡུག་བསྔལ་གྱི་རྒྱུ་ཡིན་ནོ། །དེའི་ཕྱིར་ཆགས་པ་འོ་ན་ཆགས་པ་གང་ནས་བྱུང་སྙམ་ན། བདག་དང་བདག་གི་བ་ལ་ཆགས་པ་ཡང་ཞེས་གསུངས་སོ། །འཇིག་ལ་ལྟ་བ་ནི་འཇིག་ཚོགས་ལ་ལྟ་བ་གཞན་དང་གཞན་ཐོག་མ་ཅན་གྱིས་བསྐྱེད་པ་ཉིད་དོ། །དེས་ན་ཞེས་བྱ་བ་ནི་བརྒྱུད་པས་རྒྱུ་ཡིན་པ་ནའོ། །འཇིག་པས་ན་འཇིག་སྟེ། དེ་ཡང་ཡིན་ལ་ཚོགས་ཀྱང་ཡིན་པས་ན་འཇིག་ཚོགས་སོ། །དེར་ལྟ་བ་ནི་འཇིག་ཚོགས་སུ་ལྟ་བས་ཏེ། བདག་ཏུ་འཛིན་པའོ། །གནོད་པར་བྱེད་པ་ཡིན་ཏེ། འགལ་བའི་ཕྱིར་རོ་ཞེས་བྱ་བ་ནི་འཇིག་ཚོགས་སུ་ལྟ་བའི་རང་བཞིན་ཅན་ཡིན་པའི་ཕྱིར་དང༌། བདག་མེད་པར་མཐོང་བ་ནི་དེ་དང་མི་མཐུན་པའི་ཕྱིར་རོ། །འདི་ལ་འགལ་བ་ཅི་ཡོད། གལ་ཏེ་ཕན་ཚུན་སྤངས་ཏེ་གནས་པའི་མཚན་ཉིད་ཡིན་
ན་དེའི་ཚེ་ཆོས་ཀྱི་འགལ་བ་ཡིན་པས་ན་བདག་ཏུ་རྟོག་པ་དང་བདག་མེད་པར་རྟོག་པའི་དངོས་པོ་གཉིས་ལ་དེའི་སྐབས་མེད་པ་ཁོ་ནའོ། །འདི་ནི་བདག་ཏུ་རྣམ་པར་རྟོག་པ་ཉིད་དང༌། བདག་མེད་པར་རྣམ་པར་རྟོག་པ་ཉིད་གཉིས་ལས་འགྱུར་བ་ཡིན་ན། འོན་ཀྱང་རྣམ་པར་རྟོག་པ་གཉིས་ནི་རྣམ་པར་གཞག་པ་ཙམ་དུ་འགྱུར་ལ། དེ་ཙམ་གྱིས་ནི་གཅིག་གིས་གཞན་ལྡོག་པར་མི་འགྱུར་རོ། །འདི་ནི་དངོས་པོ་གཉིས་ཀྱི་ལྡན་ཅིག་མི་གནས་པའི་འགལ་བྱའི་བྱེད་པ་ཡིན་ནོ། །དེ་ཁས་ལེན་ན་ནི་གྲང་བ་དང་ཚ་བའི་རིག་པ་བཞིན་དུ་སྐད་ཅིག་ཀྱང་ལྟ་ན་ཅིག་གནས་པར་ཐལ་ལོ། །གཉི་གས་ནུས་པ་མེད་པའི་སྐད་ཅིག་སྐྱེ་བ་ལ་གདོན་མི་ཟ་བར་ལྟོས་པར་བྱའོ། །གལ་ཏེ་སྐད་ཅིག་ཀྱང་ལྷན་ཅིག་གནས་པ་མེད་པའི་ཕྱིར་ཆེར་ཤིན་ཏུ་འགལ་བ་མ་ཡིན་སྙམ་ན། རྣམ་པར་རྟོག་པ་ཐམས་ཅད་ཕན་ཚུན་འགལ་བར་ཐལ་བའི་ཕྱིར་དང། འགལ་བ་གསུམ་པ་རྣམ་པར་གནས་པར་ཐལ་བའི་ཕྱིར་རོ་ཞེ་ན། འདི་ལ་བརྗོད་པ་བདག་ཡོད་པ་དང་མེད་པ་དག་ནི་ཕན་ཚུན་སྤངས་ཏེ་ཁོ་ནའི་འགལ་བ་ཡིན་ནོ། །རྣམ་པར་རྟོག་པ་གཉིས་ནི་དེ་སྒོ་ཉིད་ནས་འདོགས་པ་ཡིན་ཏེ། དེ་ལ་ངེས་པའི་ཕྱིར་རོ། །འོ་ན་དེ་མེད་པ་ལ་མི་འཁྲུལ་པའི་སྒོ་ཅན་གྱི་མི་འགལ་བར་འགྱུར་རོ་སྙམ་ན་ཡིན་ཏེ། ཉེ་བར་བཏགས་པ་ཙམ་དང་ཁས་ལེན་པའི་ཕྱིར་རོ། །མེད་པ་ལ་མི་འཁྲུལ་གཞན་ལ་ཡང་ཉེ་བར་བརྟགས་པར་འགྱུར་རོ་ཞེ་ན། མ་ཡིན་ཏེ། དགོས་བ་མེད་པའི་ཕྱིར་རོ། །འགལ་བ་ནི་ལྷན་ཅིག་གནས་པ ་དགག་བའི་ཕྱིར་རོ། །དོན་དུ་གཉེར་བ་ཡིན་ལ་བུམ་པ་དང་སྣམ་བུ་དང༌། གཟུགས་དང་རོ་ལ་སོགས་པ་ལ་ནི་ལྷན་ཅིག་གནས་པ་ཡོད་པའི་ཕྱིར་ཉེ་བར་བཏགས་པས་ཅི་བྱ། འདིར་ནི་བདག་ལ་སོགས་པ་མེད་པར་བརྟན་པར་བྱས་པ་ན་ཡོད་པའི་རྣམ་པར་རྟོག་པའི་གོ་སྐབས་མེད་ལ། ཡོད་པ་ལ་ཡང་མེད་པའི་རྣམ་པར་རྟོག་པའི་གོ་སྐབས་རྣམ་གྲངས་ཀྱིས་ཀྱང་མི་སྲིད་དོ། །ཕུང་པོ་ལ་སོགས་པའི་རྣམ་པར་རྟོག་པ་ནི་རྣམ་གྲངས་ཀྱིས་མི་འགལ་ལོ། །དེས་ན་རྣམ་པར་རྟོག་པ་འགལ་བར་ཐལ་བ་མེད་པ་སྟེ། དེའི་ཕྱིར་ཅི་ལྟར་བཏགས་པར་ཤེས་པའི་ཡོད་པའི་མེད་
པའི་ཡུལ་གྱི་སྒོ་ནས་ཐ་སྙད་དུ་བྱེད་པ་དེ་བཞིན་དུ་འགལ་བ་ཡང་ཡིན་པའི་ཕྱིར་ཉེས་པ་མེད་དོ། །ལྷན་ཅིག་མི་གནས་པའི་ཐ་སྙད་ཀྱང་མི་མཐུན་པ་མ་ཡིན་ཏེ། དངོས་པོའི་བློ་འཇུག་པ་ཉིད། བག་ཆགས་ཀྱི་མཚན་ཉིད་རྒྱུ་མི་མཐུན་པ་སྐྱེད་པ་ལས་དངོས་པོ་མེད་པའི་བློས་རྒྱུན་གཅོད་པ་ཡིན་ནོ། །དེ་ལ་གལ་ཏེ་རྣམ་པར་རྟོག་པའི་བློ་གཉིས་གཅིག་གི་ཚེ་ཉེ་བར་གནས་པ་མེད་པར་བརྗོད་པར་དེ་ལྟན་ཡང་དངོས་པོའི་རྣམ་པར་རྟོག་བསྐྱེད་པའི་བག་ཆགས་དང་དངོས་པོ་མེད་པའི་རྣམ་པར་རྟོག་བསྐྱེད་པའི་བག་ཆགས་དང་དངོས་པོ་མེད་པའི་རྣམ་པར་རྟོག་པ་ཅིག་ཅར་འཕྲད་པ་ཡིན་པའི་ཕྱིར་ནུས་པ་མེད་པའི་སྐད་ཅིག་སྐྱེད་བར་མི་འགལ་ལོ། །འོན་ཏེ་ཡང་དེའི་ཚེ་མེ་ལས་གྲང་བ་ལྟར། དེའི་ཚེ་གསལ་བའི་དངོས་པོ་མེད་པའི་རྣམ་པར་རྟོག་པ་ལས་ཐ་དད་པ་བག་ཆགས་ཞེས་བྱ་བའི་རྗེས་ནི་ཡོད་པ་མ་ཡིན་ཏེ་དེའི་ནུས་པའི་རང་བཞིན་ཡིན་པའི་ཕྱིར་རོ། །དེས་ན་གང་དང་གང་ལྷན་ཅིག་ཏུ་འབྱུང་སྙམ་ན། དེ་ཁོ་ནར་ནི་འདི་དེ་བཞིན་ཉིད་ཡིན་ནོ། །འོན་ཀྱང་ཆོས་ཅན་སེམས་ཀྱི་རྒྱུ་གཅིག་བཞིན་དུ་རྟོགས་པས་བག་ཆགས་ལོགས་སུ་བསྟན་པ་ན། དངོས་པོ་མེད་པའི་རྣམ་པར་རྟོག་པ་དང༌། ལྷན་ཅིག་འབྱུང་བ་ཉིད་དུ་བསྙད་པ་ཡིན་ནོ། །དེ་ཙམ་གྱིས་ཀྱང་ལྷན་ཅིག་མི་གནས་པའི་འགལ་བར་བརྗོད་པ་ཡིན་ཏེ། དཔེར་ན་དུ་བ་ལས་བྱུང་བའི་མེའི་བློ་ལ་མེར་ཐེ་ཚོམ་ཟ་བ་དང་འགལ་བར་བརྗོད་པ་བཞིན་ནོ། །གང་གིས་ཧ་ཅང་ཐལ་བར་འགྱུར་བ་སྔོན་པོའི་རྣམ་པར་རྟོག་པ་ཡང་དེའི་བག་ཆགས་མི་མཐུན་པར་བྱེད་ནུས་པ་མ་ཡིན་ལ། དེས་ན་སྡུག་བསྔལ་བཅད་པ་ཡང་མ་ཡིན་ནོ། །དེས་ན་ཉིད་ཀྱིས་ཐ་སྙད་གྲགས་པ་ལ་བརྟེན་ནས་རྣམ་པར་མ་དཔྱད་པར་རྣམ་པར་རྟོག་པ་རྣམས་ཕན་ཚུན་འགལ་བར་བརྗོད་བས་ན་ཉེས་པ་མེད་དོ། །འདི་ཉིད་བརྗོད་པ་ནི། དེ་དང་རྣམ་པར་འགལ་བའི་ཞེས་བྱ་བའོ།། དེའི་ནི་འང་གི་ཚོགས་སུ་ལྟ་བའིའོ། །དེ་ནི་མི་རྟག་པ་ལ་སོགས་པའི་རང་བཞིན་རྟོག་པར་མཛད་ཅེས་བྱ་བ་དེའི་འབྲས་བུ་བརྗོད་པ་ནི། མི་རྟག་པ་ཡིན་པས་ལྡོག་པ་ཡིན་ནོ་ཞེས་བྱ་བའོ། །རྟག་པའི་བཟློག་པར་མི་ནུས་སོ་ཞེས་བརྗོད་ཟིན་ཏོ། །འཆི་བ་ལ་སོགས་པས་སྡུག་
བསྔལ་བ་གང་ཡིན་པ་དེར་ཇི་ལྟར་མི་འགྱུར། དེ་མེད་པའི་ཕྱིར་ན་བདག་དང་བདག་ཏུ་འཛིན་པའི་སྒོ་ཅན་གྱི་སྡུག་བསྔལ་གང་ཡིན་པ་ཉིད་མེད་པར་འགྱུར་མོད་སྙམ་དུ་བསམས་པའོ། །གོམས་པ་ལས་སྐྱེས་པའི་དྲན་པ་གསལ་བ་གང་ལ་ཡོད་པ་སྟེ། རྗེས་སུ་སྒྲུབ་པར་བྱེད་པའི་སེམས་ཀྱི་རྒྱུན་དེའི་ཡིན་ནོ། །འདི་ནི་བདག་མེད་པར་གོམས་པ་འཕེལ་བར་གྱུར་པའི་གནས་སྐབས་ན་ཡིན་ནོ། །གནོད་པ་ཅི་ཞིག་ཡོད་ཅེས་བྱ་བ་ནི་མེད་པ་ཁོ་ནའོ་ཞེས་བྱ་བའི་དོན་ཏོ། །འདི་ཉིད་སྒྲུབ་པར་བྱེད་པ་ནི་མཚམས་སྦྱོར་བ་ཞེས་བྱ་བའོ། །དེ་ཉིད་ནི་ངའོ་ཞེས་མཚམས་སྦྱོར་བ་ཡང་ཡིན་ལ། ཀུན་དུ་འཛིན་པ་ཞེས་བྱ་བ་མངོན་པར་དགའ་བ་ཡང་ཡིན་ནོ་ཡང་མཚམས་སྦྱོར་བར་ཡོད་ན་ཀུན་དུ་འཛིན་པ་གང་ཡིན་པའོ། །དེ་མེད་པར་ནི་གདུང་བར་འགྱུར་བ་མ་ཡིན་ནོ། །འདི་སྙམ་དུ་སྡུག་བསྔལ་བར་མི་འགྱུར་མོད། དེ་གོ་ཇི་ལྟར་བཟློག་སྙམ་ན། གང་ལ་ཞེས་སྨོས་སོ། །གང་ལ་ཞེས་མངོན་བར་དགའ་བའི་རྒྱུ་ཞེས་བྱ་བ་ནི་མངོན་པར་དགའ་བའི་ཡུལ་ལོ། །གལ་ཏེ་དེ་ལྟ་ཡིན་མོད། དེ་ལྟ་ན་ཡང་རྩོད་པ་ཇི་ལྟར་སྤངས་པར་སྙམ་ན། ཐ་མལ་བར་གོམས་པར་བྱས་པ་ནི་ཞེས་སྨོས་སོ། །དེ་གོམས་ན་དེ་ཉིད་ལ་མངོན་པར་དགའ་བའི་ཕྱིར་བདེ་བ་དང་སྡུག་བསྔལ་དག་ཡོད་པ་མ་ཡིན་ནོ། །གལ་ཏེ་ཚུལ་འདི་ཉན་ཐོས་དང་རང་སངས་རྒྱས་དང་ཐུན་མོང་མ་ཡིན་ནམ། དེས་ན་བཅོམ་ལྡན་འདས་ལ་ཁྱད་པར་དུ་འཕགས་པ་ཅི་ཡོད་སྙམ་དུ་དོགས་པ་བསུ་ནས། ཤིན་དུ་ཞེས་གསུངས་སོ། །ལུས་དང་ལོངས་སྤྱོད་དག་གི་གནོད་པར་བྱེད་པ་ཡོད་ཀྱང་གདུང་པར་མི་འགྱུར་རོ་ཞེས་སྦྱར་རོ། །གང་གི་ཚེ་ཞེ་ན། ཤིན་དུ་སེམས་ཅན་དུ་ལྟ་བ་ལོག་པའི་དུས་ནའོ། །བག་ཆགས་དང་བཅས་པའི་བདག་ཏུ་ལྟ་བ་ལོག་པའི་ཕྱིར་བཏང་སྙོམས་པ་གང་ཡིན་པ་དེ་དག་ལ་ཡང༌། ལུས་དང་གཞན་ལ་ཤིན་ཏུ་གནོད་པར་བྱེད་པ་ཡོད་ཀྱང་རུང་བར་མི་འགྱུར་བ་ཉིད་དོ། །དེ་པ་ཞེས་བྱ་བ་ལ་དེ་ཞེས་བྱ་བ་ནི་ཤིན་ཏུ་སེམས་ཅན་དུ་ལྟ་བ་ལོག་པའོ། །བཤད་པའི་རྒྱུ་བསྟན་པའི་སྒོ་ནས་སྨྲས་པའོ། །སྐབས་ཀྱིས་འཆད་པར་འགྱུར་བའི་བཅོམ་ལྡན་འདས་ཀྱི་དབང་དུ་བྱས་
ཏེ་ཞེས་བྱ་བ་ཡིན་ནོ། །དེ་བརྗོད་པའི་ཚིག་དེ་གང་ཡིན་ཞེ་ན། རྣམ་པ་དུ་མར་ཞེས་བྱ་བ་ལ་སོགས་པ་སྨོས་སོ། །རྟོགས་པ་ནི་རབ་ཏུ་རྟོགས་པའོ། །དེ་རྒྱས་པ་ནི་ཤིན་དུ་འཕེལ་བར་གྱུར་པའོ། །རྣམ་པ་མང་པོ་ཞེས་བྱ་བ་ནི་རྣམ་པ་དུ་མར་ཞེས་བཤད་པའོ།། གཞན་དང་གཞན་ཞེས་བྱ་བ་ནི་མང་པོ་ཞེས་བྱ་བའོ་བཤད་པའོ། །དེ་ལ་རྣམ་པ་དུ་མར་ཞེས་བརྗོད་པ་ན། དུས་གཅིག་ཏུ་ཡང་ཞེས་བྱ་བར་རྟོགས་པར་འགྱུར་བས་ན། དེ་རྣམ་པར་གཅད་པའི་དོན་དུ་མང་པོ་ཞེས་སྨྲས་སོ། །ལན་མང་པོ་ཙམ་ནི་དུས་ཆུང་ངུས་ཀྱང་བྱ་བར་ནུས་པས་དེ་བཅད་པའི་ཕྱིར་ཡུན་རིང་དུས་སུ་ཞེས་གསུངས་སོ། །ཐམས་ཅད་ཀྱི་རྣམ་པ་དེ་ལ་ཡང༌། །བ་ཅིག་ལ་ནི་ཡོན་ཏན་དང༌། ཁ་ཅིག་ལ་ནི་ཉེས་པ་གསལ་བར་འགྱུར་རོ། །དེའི་ཚེ་ནི་བདག་མེད་པ་མངོན་དུ་བྱེད་པ་ཉིད་སྐྱེས་པ་ད་ལྟར་དངོས་པོ་གཞན་ཐམས་ཅད་རྟོགས་པ་ལས་འབད་པ་ནི་བརྩེ་བ་ལས་ཡིན་ནོ། །གལ་ཏེ་དེ་ལྟ་ཡིན་མོད་དེ་ལྟ་ན་ཡང་ཅིར་འགྱུར་སྙམ་ན། ཡོན་ཏན་དང་སྐྱོན་ཞེས་གསུངས་སོ། །དེས་ན་བློས་ཉན་ཐོས་ལ་སོགས་པ་ལས་ཁྱད་པར་གྲུབ་པོ། །དེ་ཉིད་ཀྱི་ཕྱིར་ཁྱད་པར་གཞན་ཡང་བཤད་པ་ནི་དེས་ན་ཞེས་གསུངས་སོ། །དེས་ན་བཅོམ་ལྡན་འདས་བག་ཆགས་དེ་ལུས་དང་ངག་དང་ཡིད་ཀྱི་མི་མཐུན་པ་སྤངས་བ་ཡིན་ནོ། །ཉེས་པའི་རིགས་ཐམས་ཅད་ཤེས་པར་འགྱུར་རོ་ཞེས་འབྲེལ་ཏོ། །དེ་ཇི་ལྟ་བུ་ཞིག་སྙམ་ན། ཕྲ་མོ་ཞེས་བྱ་བ་ལ་སོགས་པའི་ཁྱད་པར་གསུམ་བརྗོད་དོ། །དེས་ན་ཞེས་བྱ་བ་ནི་ཤེས་པ་ནའོ། །དེའི་ཕྱིར་ཞེས་བྱ་བ་ནི་འབད་པའི་ཕྱིར་རོ། །འདི་ཉིད་ནི་ཞེས་བྱ་བ་ནི་བག་ཆགས་སྤངས་པའོ། །བསེ་རུ་ལ་སོགས་ཞེས་བྱ་བ་འདིའི་འགྲེལ་པ་ནི། རང་སངས་རྒྱས་དང་ཞེས་བྱ་བའོ། །གཞན་དོན་འཇུག་ཅན་ཞེས་བྱ་བ་འདིའི་བཤད་པ་ནི་བདེ་བར་གཤེགས་པ་ཞེས་བྱ་བའོ། །ཡང་ན་ཞེས་བྱ་བ་ནི་བཤད་པ་གཞན་ཡིན་ནོ། །དེ་ལྟར་མ་ཡིན་ན་ཞེས་བྱ་བ་ནི་སྡུག་བསྔལ་སྤངས་པ་ཉིད་ཙམ་གྱིས་ཐམས་ཅད་མཁྱེན་པ་ཉིད་ཡིན་ནའོ། །ཐབས་ཀྱི་དབྱེ་བ་ནི་རྒྱུ་འབྲས་ཀྱི་རབ་ཏུ་དབྱེ་བའོ། །གལ་ཏེ་དེ་ལྟ་ཡིན་མོད་དེས་ཅིར་འགྱུར་སྙམ་ན།
དེ་དུས་ཡུན་རིང་པོར་ཞེས་བྱ་བའོ། །རྒྱུ་འབྲས་ཀྱི་རབ་ཏུ་དབྱེ་བ་རྣམ་པ་མང་པོ་དེ་གོམས་པར་བྱས་པས་ནི་ཇི་ལྟར་དེ་གསལ་ཞེ་ན། གང་ཚེ་ཞེས་སྨོས་སོ། །དེའི་རྗེས་འབྲངས་པས་ཞེས་བྱ་བ་ནི་སྔོན་གྱི་སྐྱེ་བ་དྲན་པའི་རྗེས་སུ་འབྲངས་པས་སོ། །དེ་དག་ཐམས་ཅད་ཅེས་བྱ་བ་ནི་འཁོར་བ་པའི་སྐྱོན་ཡོན་ཐབས་དང་བཅས་པ་མཐའ་དག་དག་གོ །འདི་ལ་དཔེ་བརྗོད་པ་ནི་ཇི་ལྟར་གྲོང་གཞན་ནས་ཞེས་བྱ་བའོ། །དེ་ཡི་འདུ་བྱེད་རྗེས་འབྲེལ་ཅན། །ཞེས་བྱ་བ་ནི། གྲོང་དེར་དངོས་པོ་དེ་དང་དེ་ལ་མངོན་པར་དགའ་བའི་འདུ་བྱེད་དེ་དང་རྗེས་སུ་འབྲེལ་པ་དེ་དག་ལྡན་པའོ། །དེ་རིག་པའི་ས་ཞེས་བྱ་བ་ནི་གྲོང་གཞན་དུ་སྐྱེད་པའི་འདུ་བྱེད་རིག་པས་སོ། །དེ་བཞིན་དུ་སྐྱེ་བ་གཞན་ནས་འོངས་པའི་སྲོག་ཆགས་ཀྱང་སྐྱེ་བ་གཞན་རིག་པ་སྐྱེ་བ་དྲན་པ་ཅན་གྱིས་ཤེས་པར་འགྱུར་རོ་ཞེས་བལྟ་བར་བྱའོ། །གྲོང་དེ་དང་བརྟེན་པ་དེས་སྐྱེད་པའི་ཁྱད་པར་གང་ཡིན་པ་སྟེ། སྨྲ་ལུགས་དང་ཟས་ཀྱི་ཁྱད་པར་དང༌། མངོན་པར་འདོད་པ་ལ་སོགས་པའི་མཚན་ཉིད་ཅན་དེ་མཐོང་བ་ནའོ། །དེ་རིག་པས་ཞེས་བྱ་བ་ནི་གྲོང་གཞན་དང་སྟོན་པས་བསྐྱེད་པའི་ཁྱད་པར་རིག་པས་སོ། །དེས་ན་ཞེས་བྱ་བ་ནི་གྲོང་གཞན་ནས་སོ། །དེས་ན་ཞེས་བྱ་བ་ནི་འོངས་པ་ཉིད་དུ་ཤེས་པས་ནའོ། །དོན་ལ་སྦྱར་བ་ནི་དེ་བཞིན་དུ་ཞེས་བྱ་བའོ། །སྐྱེ་བ་གཞན་ཡང་སྐྱེ་བ་དྲན་པས་རྗེས་སུ་དཔོག་པ་ཡིན་ནོ་ཞེས་རྟོགས་པར་བྱའོ། །ཇི་ལྟར་སྙམ་ན། སྐྱེ་བ་གཞན་དེས་བསྐྱེད་པའི་ཁྱད་པར་འདུ་བྱེད་པ་གང་ཡིན་པ་དེའི་རྒྱུ་ཡིན་པ་ཉིད་ཀྱིས་སོ། །འབྲས་བུར་གྱུར་པའི་འདུ་བྱེད་དེ་ཉིད་ལས་ཞེས་བྱ་བའི་དོན་ཏོ། །དེ་ལ་བཤད་པ་དང་པོ་ལ། །བཅོམ་ལྡན་འདས་བསེ་རུ་ལ་སོགས་པ་རྣམས་ལས་ཁྱད་པར་ཉེ་བར་བསྟན་པ་བརྗོད་པར་བྱ་བ་ཡིན་ལ། གཉིས་པ་ལ་ནི་ཐམས་ཅད་མཁྱེན་པ་ཉིད་བརྗོད་པར་བྱ་བ་ཡིན་ནོ། །ཁྱད་པར་ཉེ་བར་བསྟན་པ་ཡང་དེ་ཉིད་གཙོར་བྱེད་པ་ཡང་ཡིན་ནོ། །དེ་ལྟར་སྐྱེ་བ་དྲན་པ་ཉིད་ཡིན་ན། འདུ་བྱེད་རྣམ་པ་སྣ་ཚོགས་ཀྱི་ཐབས་རྣམ་པ་སྣ་ཚོགས་ངེས་པས་ན། དེའི་རྗེས་སུ་འབྲངས་ནས་སྐྱེ་བ་གཞན་ལ་ཡང༌། ཁྱད་པར་ཅན་གྱིས་གོམས་པའི་རྒྱུ་
དང་ལྷན་ཅིག་པའི་སྐྱེ་བ་གཞན་ཡང་ཤེས་པར་འགྱུར་རོ་ཞེས་བསྟན་པ་ཡིན་ནོ། །ད་ནི་ལས་དང་འབྲས་བུ་འབྲེལ་པ་རྟོགས་པ་ཡང་སྲིད་པར་སྟོན་པ་ནི། ལྐོག་ཏུ་གྱུར་པའི་དོན་སྐྱེ་བ་གཞན་ན་ཡོད་པའི་ཞེས་བྱ་བ་སྟེ། ཚིགས་སུ་བཅད་པ་ལ་གནས་པའི་སྦྱིན་ལ་སོགས་ཞེས་བྱ་བ་འདི་དང་འབྲལ་ཏོ། །རྣམ་པ་འདི་ཡིས་ནི་སྐྱེ་བ་དྲན་པར་གྱུར་བ་ན་བདག་ཉིད་རང་ལ་སྦྱིན་པ་དང་ལོངས་སྤྱོད་ལ་སོགས་པའི་རྒྱུ་འབྲས་ཀྱི་དངོས་པོ་ཉམས་སུ་མྱོང་བ་ལས། གཞན་ལ་ལོངས་སྤྱོད་ལ་སོགས་པས་སྦྱིན་པ་ལས་ཇི་སྟེ་རྗེས་སུ་མི་དཔོག་སྟེ། རྗེས་སུ་དཔོག་པ་ཁོ་ནའོ། །འབྲས་བུར་གྱུར་པ་རྗེས་སུ་དཔག་པ་སྐྱེས་པས་ཀྱང་འབྲེལ་པ་ངེས་པ་ཉིད་བསྟན་པར་བྱ་བ་ཡིན་ཏེ། དེ་ངེས་པ་མེད་པར་ནི་དེ་མི་འབྱུང་བའི་ཕྱིར་རོ། །དེ་བརྗོད་པ་ནི་དེ་ལས་ཀྱང་ནི་ཞེས་བྱ་བའོ། །ཡུལ་འདི་དང་ཞེས་བྱ་བ་ནི་ཡུལ་ལ་སོགས་པ་ལོངས་སྤྱོད་པར་བྱ་བ་དང་ངོ༌། །རྣམ་པ་ནི་མདོག་དབྱི་བས་སོ། །རང་བཞིན་ནི་སྨྲ་ལུགས་ལ་སོགས་པའོ། །བྱེ་བྲག་གི་རང་བཞིན་ངེས་པར་རྟོགས་པ་ན་ཞེས་བྱ་བ་ནི་ཡུལ་དེ་ན་ཡང་རང་བཞིན་འདི་འདྲ་བ་ཡོད་པ་ཡིན་ལ་གྲོང་དེ་ན་ཡང་ཆ་འགའ་ཞིག་ན་རང་བཞིན་འགའ་ཞིག་ལྟར་ཡིན་ནོ་ཞེས་བྱ་བར་རོ། །དེ་བཞིན་དུ་བརྩེ་བ་ཆེན་པོའི་དང་དུ་གྱུར་པ་ལ་ནི་ཐམས་ཅད་དུ་སྐྱེས་པའི་ཕྱིར་དང༌། སྐྱེ་བ་དྲན་པས་བརྒྱུད་པས་ན་རིམ་གྱིས་འཕེལ་བ་དང་འགྲིབ་པ་ངེས་པར་བཟློག་པར་དཀའོ། །སོ་སོར་ངེས་པའི་རང་བཞིན་ཐམས་ཅད་རིག་པས་ན་ཞེས་བྱ་བ་ནི་བྱེ་བྲག་གི་ཁྱད་པར་གྱིས་ཁྱད་པར་ཅན་དུ་གྱུར་པའི་རང་བཞིན་གང་ཡིན་པ་སྟེ། རགས་པ་དང་ཕྲ་བ་དང༌། ཤིན་དུ་ཕྲ་བ་དང༌། ཆེས་ཤིན་དུ་ཕྲ་བ་དེའི་རང་བཞིན་ཐམས་ཅད་རིག་པའོ། །ལས་དང་འབྲས་བུ་ལ་སོགས་པ་ཞེས་བྱ་བ་ནི་སྦྱིན་པ་ལ་སོགས་པ་ལས་ལོངས་སྤྱོད་ཆེན་པོ་འཐོབ་པ་ལ་སོགས་པ་སྟེ། སྔོན་ཡུལ་འདི་འདྲ་བར་གནས་པ་ལ་སོགས་པས་ནི་མངོན་པར་འདོད་པ་ལ་སོགས་པ་འདི་འདྲ་བར་འགྱུར་བ་ཡིན་ནོ་ཞེས་བྱ་བ་ལྟ་བུར་རོ། །བྱང་གྲོལ་གྱི་ལམ་ནི་ཚད་མས་ངེས་པར་བྱས་ཏེ་མངོན་དུ་བྱས་པ་ཡིན་
ཏེ། དེ་བས་ན་ཉེ་བར་མཁོ་བའི་ཐམས་ཅད་མཁྱེན་པའི་ཕྱོགས་ཉེ་བར་སྡུད་པ་ནི། མཐོ་རིས་དང་ནི་ཞེས་བྱ་བའོ། །ཙམ་གྱི་སྒྲས་ནི་ཐམས་ཅད་ཐམས་ཅད་མཁྱེན་པ་ཉིད་མེད་ཀྱང་ཞེས་བྱ་བར་བསྟན་ཏེ། སྟོན་པ་ནི་སྟོན་པར་མཛད་པ་ཉིད་དོ། །ཐམས་ཅད་ཐམས་ཅད་མཁྱེན་པའི་དབང་དུ་བྱས་ནས་བཤད་པ་ནི། འགྲོ་བ་མཐའ་དག་ཀྱང་ཞེས་བྱ་བའོ། །འདི་ལྟར་བསམས་པ་ཡིན་ཏེ་རེ་ཞིག་དངོས་པོ་ལྷག་ཏུ་སྤྱོད་པ་ལ་བརྟེན་པ་ཅན་རྣམས་ནི། གཟུགས་དང་རོ་ལ་སོགས་པ་བཞིན་གདོན་མི་ཟ་བར་བརྡ་དངོས་སམ་བརྒྱུད་པས་ཀྱང་རུང་སྟེ། རྒྱུ་དང་འབྲས་བུའི་དངོས་པོ་དང༌། ཚོགས་པ་གཅིག་ལ་རག་ལས་པ་དག་གིས་ཕན་ཚུན་འབྲེལ་པ་ཡིན་ནོ། །དེ་བཞིན་དུ་འགའ་ཞིག་བར་གཅོད་དང་བཅས་པ་ཡིན་ཡང༌། འགའ་ཞིག་ཉེ་བ་དང་བཅས་པ་ཡིན་ནོ། །དེ་དག་དང་ལྷན་ཅིག་འབྲེལ་པ་ན། གང་དག་དང་བར་ཆོད་པ་ཅན་དེ་དག་དང་ཡང་འབྲེལ་པར་འགྱུར་ཏེ། འབྲེལ་པ་དང་འབྲེལ་པའི་ཕྱིར་རོ། །དེ་བཞིན་དུ་གཞན་དག་དང་ཡང་ཡིན་ནོ། །དེ་བས་ན་ཐམས་ཅད་ཀྱང་ཕན་ཚུན་རྒྱུ་དང་འབྲས་བུའི་དངོས་པོས་ཕན་ཚུན་ཉེ་བར་འབྲེལ་ཏོ། །སྐྱེ་བ་བརྒྱུད་པར་གོམས་པས་ཀྱང་རྒྱུ་དང་འབྲས་བུའི་དངོས་པོ་ལ་ཐུགས་གསལ་བར་གྱུར་པ་ཡིན་ཏེ། དེས་ན་གཅིག་རང་བཞིན་ངེས་པ་ན་ཡང་དངོས་པོ་མཐའ་དག་དང༌། རྣམ་པ་ཐམས་ཅད་རྗེས་སུ་དཔག་པ་བཟློག་ཏུ་མེད་དོ། །དེས་ན་ཐམས་ཅད་མཁྱེན་པ་ཉིད་ཡིན་ནོ་ཞེས་བྱ་བ་ནི་དངོས་པོ་ཐམས་ཅད་མཁྱེན་པ་ཉིད་དོ། །དོན་ཏེ་ཞེས་བྱ་བ་ནི་གཞན་གྱིའོ། །ལན་གྱི་དོན་ནི་འདི་ཡིན་ཏེ། རྣམ་པ་གཅིག་ལ་དམིགས་པའི་རྗེས་སུ་དཔག་པ་ལ་ནི་མི་གསལ་བ་ཉིད་དང་དོན་ལ་མ་རེག་པ་ཉིད་ལྡན་པ་ཡིན་གྱི། རྣམ་པ་ཐམས་ཅད་ཡོངས་སུ་འཛིན་པ་ལ་དངོས་པོ་ཉིད་སྣང་པ་ཡིན་ཏེ། དབང་པོའི་རྣམ་པར་ཤེས་པ་བཞིན་ནོ། །དབང་པོའི་རྣམ་པར་ཤེས་པ་ལ་ཡང་རྣམ་པ་ཐམས་ཅད་སྣང་བ་ལས་གསལ་བའི་དོན་གཞན་ནི་མ་ཡིན་ཏེ། དེ་ཙམ་གྱིས་ཡོངས་སུ་རྫོགས་པའི་ཕྱིར་རོ། །དེས་ན་ཇི་ལྟར་དབང་པོའི་མངོན་སུམ་རྣམ་པ་ཐམས་ཅད་འཛིན་པ་ཉིད་ཀྱིས་དངོས་པོའི་ཡུལ་ཅན་དང༌། མ་འཁྲུལ་
བ་ཡིན་པ་དེ་བཞིན་དུ་རྣམ་པ་ཐམས་ཅད་རྗེས་སུ་དཔོག་པ་ཡང་མ་ཡིན་ནོ། །དེའི་ཕྱིར་མངོན་སུམ་དང་དེ་ལ་ཐ་དད་པ་ཡོད་པ་མ་ཡིན་ཏེ། འོན་ཀྱང་མངོན་སུམ་དང་མཚུངས་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་མངོན་སུམ་ནི་དབང་པོ་ལ་བརྟེན་པ་ཡིན་ལ། འདི་ནི་ཡིད་མ་ཡིན་ནམ། དེས་ན་ཇི་ལྟར་མཚུངས་པ་ཡིན་སྙམ་ན། དབང་པོ་དང་ནི་འབྲེལ་པས་ཀྱང༌། །ཞེས་གསུངས་སོ། །དེ་ལས་ཞེས་བྱ་བ་ནི་རྣམ་པ་ཐམས་ཅད་ཡོངས་སུ་གཅོད་པ་ལས་སོ། །དེ་ཡོད་དོ་ཞེ་ན་ནི་དེ་ཙམ་ཉིད་ཀྱིས་དོན་མངོན་དུ་བྱེད་པས་མངོན་སུམ་ཉིད་དུ་གྲུབ་པའི་ཕྱིར། དབང་པོ་དང་འབྲེལ་པའི་སྒྲ་ནི་གཞན་ལ་རབ་ཏུ་གྲགས་པས་ཡིན་ནོ། །དབང་པོའི་བྱེད་པ་ལ་ལྟོས་པས་ཅི་བྱ་ཞེས་བྱ་བའི་དོན་ཏོ། །གལ་ཏེ་རྣམ་པ་ཐམས་ཅད་རྗེས་སུ་དཔོག་པ། ཅི་ཤེས་པ་ཉིད་གཅིག་ཡིན་ནམ་འོན་ཏེ་དུ་མ་ཡིན། རེ་ཞིག་གཅིག་ནི་མ་ཡིན་ཏེ། རྣམ་པ་སོ་སོ་ལ་རྟགས་གཞན་དང་གཞན་གྱིས་བསྐྱེད་པར་བྱ་བ་ནི་རྗེས་སུ་དཔོག་པ་གཅིག་ཏུ་འོས་པར་ཇི་ལྟར་འགྱུར། འདི་འདྲ་པའི་རྒྱུ་ལས་སྐྱེས་པར་ངེས་པ་ཉིད་ནི་འདི་འདྲ་བའི་འབྲས་བུ་བྱེད་པར་ངེས་པ་མ་ཡིན་ནོ། །འོན་ཏེ་དེ་མ་ཡིན་ན་དེ་ཡང་ཅིག་ཅར་རིམ་གྱིས་འབྱུང་བ་ཞིག་ཡིན་ཏེ། རེ་ཞིག་རྣམ་པར་རྟོག་པ་རྣམས་ལ་ནི་ཅིག་ཅར་འབྱུང་བ་མི་སྲིད་དོ། །རིམ་གྱིས་ཡིན་ན་ནི་རྣམ་པར་རྟོགས་པ་རྣམས་སོ་སོར་དམིགས་པ་རེ་རེ་ལ་དམིགས་པའི་ཕྱིར། རྣམ་པ་ཐམས་ཅད་སྤྱོད་ཡུལ་དུ་བྱེད་པའི་མངོན་སུམ་ལས་ཐ་མི་དད་པར་མི་འགྱུར་རོ། །མ་འཁྲུལ་པ་ཙམ་གྱིས་ནི་མངོན་སུམ་མ་ཡིན་གྱིས་འོན་ཀྱང་རྟོགས་པ་མེད་པར་གྱུར་ནའོ། །དེས་ན་ཇི་ལྟར་རྗེས་དཔག་རྣམ་པར་རྟོག་པ་མངོན་སུམ་ཉིད་མ་ཡིན་ཞེ་ན། འདི་ལ་སྨྲས་པ་རྣམ་པ་ཐམས་ཅད་རྗེས་སུ་དཔོག་པའི་སྒྲས་རྗེས་སུ་དཔོག་པ་ཉིད་ནི་བརྗོད་པར་འདོད་པ་མ་ཡིན་གྱི། འོན་ཀྱང་འབྲས་བུ་ལ་རྒྱུ་ཉེ་བར་བཏགས་ནས་རྣམ་པ་ཐམས་ཅད་རྗེས་སུ་དཔོག་པ་གོམས་པ་བརྒྱུད་པ་ལས་སྐྱེས་པ་རྣམ་པར་རྟོག་པ་མེད་པའི་ཡིད་རྣམ་པ་ཐམས་ཅད་མངོན་སུམ་བྱེད། སྐད་ཅིག་སོ་སོ་ཞིང་རེ་རེར་གྱུར་པ། །
རྣམ་པ་ཐམས་ཅད་ལ་རྣམ་པར་རྟོག་པ་སྐྱེད་པ་དང༌། དེ་དང་རྗེས་སུ་མཐུན་པའི་ཐ་སྙད་འཇུག་བར་རུང་བ་ཉིད་འདོད་པ་ཡིན་ཏེ། ཟོར་ཡང་བའི་ཕྱིར་རོ། །ཐབས་གཞན་གྱིས་བསྒྲུབ་པར་བྱ་བ་མ་ཡིན་པར་བསྟན་པ་ཡང་འདི་སྐད་བསྟན་པའི་འབྲས་བུ་ཡིན་ནོ། །དེ་སྐད་དུ་ཡང་ཇི་ལྟར་རྗེས་སུ་དཔག་པས་དེ་འདས་པ་དང་མ་འོངས་པ་ལ་སོགས་པ་ཉིད་དུ་རྟོགས་པ་དེ་བཞིན་དུ་རྗེས་སུ་དཔག་པ་དེས་སྐྱེས་པའི་མངོན་སུམ་ཡང་ཡིན་ནོ། །དེ་སྐད་དུ་ཡང་ཇི་ལྟར་རྗེས་སུ་དཔག་པ་དེས་བསྐྱེད་པའི་མངོན་སུམ་ཉིད་གཞན་དུ་རྟོགས་པ་ནི་མ་ཡིན་ནོ་ཞེས་འཆད་པར་འགྱུར་རོ། །དེའི་ཕྱིར་བརྗོད་པའི་སུན་འབྱིན་པ་མེད་དོ། །གལ་ཏེ་དེ་ལྟར་དེ་རྣལ་འབྱོར་གྱི་མངོན་སུམ་ཉིད་ཡིན་ན་དེ་ནི་མངོན་སུམ་ལས་གཞན་མིན་ཞེས་ཅི་ལྟར་བརྗོད་ཅེ་ན། དེའི་ངོ་བོ་ཡོངས་སུ་མ་རྫོགས་པར་ དགོས་པ ་ན་བརྗོད་ལུགས་འདི་འདྲ་བ་ཡིན་ནོ། །དཔེར་ན་འདི་བྲམ་ཟེ་ལས་གཞན་མ་ཡིན་ནོ་ཞེས་བྱ་བ་ལྟ་བུའོ་ཞེ་ན། བདེན་ཏེ་འོན་ཏེ་དབང་པོ་རྣམས་ཡོད་པ་དང་ཕྲད་ན་སྐྱེས་བུས་བློ་སྐྱེས་པ་དེ་ནི་མངོན་སུམ་ཡིན་ནོ་ཞེས་བྱ་བར་གཞན་གྱི་ལུགས་ལ་ལྟོས་ན་མ་རྫོགས་པར་དོགས་པར་ཡོད་པ་ཉིད་དོ། །དེ་ཉིད་སྟོན་པ་ནི་གལ་ཏེ་དབང་པོ་ལ་ཞེས་བྱ་བའོ། །པྲ་ཏེའི་སྒྲ་ནི་མཚན་ཉིད་ཀྱི་དོན་ཡིན་ལ། འདིར་མཚན་ཉིད་ཀྱི་དོན་ཀྱང་རྟེན་གྱི་དོན་དུ་རྟོགས་པར་བྱ་བ་ཡིན་ནོ། །དབང་པོ་ལ་རྟེན་པར་བྱེད་པའི་བློ་ནི་དབང་པོ་མཚོན་པར་བྱེད་པ་ཁོ་ནའོ། །པྲ་ཏེ་ཀྵའི་སྒྲ་ལ་ཡོད་པའི་པྲ་ཏེ་ནི། རྟེན་པའི་དོན་ཏེ། རྟེན་པའི་དོན་ཏོ་ཞེས་བྱ་པའོ། །དོན་ཡིན་པའི་ཕྱིར་ན་དབང་པོ་ལ་བརྟེན་པ་ཞེས་བྱ་བའི་ངག་བརྗོད་པ་ཡིན་ནོ། །ལན་དུ་འདི་ནི་ཞེས་བྱ་བའོ། །དབང་པོ་ལ་བརྟེན་པ་ཉིད་མངོན་སུམ་གྱི་རང་བཞིན་ནི་མ་ཡིན་ནོ། །འོ་ན་རང་བཞིན་གང་ཡིན་སྙམ་ན། འོན་ཀྱང་ཞེས་གསུངས་སོ། །འདི་ཉིད་ནི་རྟོག་པ་དང༌། བྲལ་ཞིང་མ་འཁྲུལ་པའི་མཚན་ཉིད་དག་གོ །མངོན་སུམ་ཞེས་ཐ་སྙད་འདོགས་པའམ། འདོགས་སུ་འཇུག་པ་ཡིན་ནོ། །དེས་ན་མཚན་ཉིད་ནི་རང་བཞིན་ཡིན་ནོ་ཞེས་བརྗོད་པ་ཡིན་ནོ། །ཉེ་བར་མཚན་པ་ཙམ་ནི་སྐབས་ཀྱིས་མངོན་དུ་བྱེད་པ་ཉིད་ཀྱིའོ། །དེས་ན་དབང་པོ་
དང་འབྲེལ་པ་མེད་ཀྱང་མངོན་དུ་བྱེད་པ་ཙམ་གྱིས་མངོན་སུམ་གྱི་སྒྲ་འཇུག་པར་གྲུབ་པ་ཡིན་ནོ་ཞེས་བྱ་བར་དགོངས་པའོ། །དབང་པོའི་རང་བཞིན་ངེས་པ་ནི་ཡོད་པ་མ་ཡིན་གྱི། འོན་ཀྱང་དོན་མངོན་དུ་བྱེད་པའི་ཤེས་པ་སྐྱེད་པར་བྱེད་པ་ཉིད་ཡིན་ནོ་ཞེས་བསྟན་པའི་དོན་ཏེ། །གཞན་ཡང་ཞེས་གསུངས་སོ། །རབ་རིབ་ལས་བྱུང་བ་ལ་ནི་དབང་པོའི་བྱེད་པ་ཡོད་པ་ཡིན་ན། དངོས་པོའི་རང་བཞིན་མངོན་དུ་བྱེད་པ་ནི་མ་ཡིན་ནོ། །དེས་ན་ཇི་ལྟར་དབང་པོ་ལ་བརྟེན་པ་ཙམ་གྱིས་མངོན་སུམ་ཡིན། དེ་ནི་ཞེས་བྱ་བ་ནི་གཞན་གྱི་དོགས་པ་བསུ་བའོ། །དེ་ཉིད་དུ་ཐལ་པ་ནི་དབང་པོ་ཉིད་དུ་ཐལ་བའོ། །ཡིད་ཀྱང་ཞེས་བྱ་བ་ནི་གསལ་བ་མངོན་དུ་བྱེད་པའི་མངོན་སུམ་སྐྱེ་བ་སྟེ། རྣམ་པ་ཐམས་ཅད་གོམས་པའི་མཐར་ཐུག་པའི་གནས་པ་དེའོ། །ཡིད་དེ་ནི་དོན་གསལ་བར་ཤེས་པའི་རྒྱུ་ཡིན་པའི་ཕྱིར་དབང་པོ་ཡང་ཡིན་ལ། ལྡོག་པ་གཞན་ལས་དེ་མ་ཐག་པའི་རྐྱེན་ཡང་ཡིན་པ་ལ་འགལ་བ་ཅི་ཡོད། འོན་ཏེ་དབང་པོས་བསྐྱེད་པ་ཙམ་གྱིས་ནི་མངོན་སུམ་དུ་མི་སྨྲའོ། །འོན་ཀྱང་ཡོད་པ་དང་ཕྲད་ན་སྐྱེས་པའོ། །དེས་ན་ཇི་ལྟར་ཉམས་པ་ལ་ཐལ་བར་འགྱུར་སྙམ་ན། འདི་ལྟར་བསམས་པ་ཡིན་ཏེ། དེའི་ཚེ་ཡང་ཟླ་བ་གཅིག་དང་ལྷན་ཅིག་ཕྲད་པ་ཡོད་པ་ཉིད་པས་ཇི་ལྟར་སྤོངས། འོན་ཏེ་གང་ཞིག་སྣང་བ་དེ་དང་ལྷན་ཅིག་ཕྲད་པ་བརྗོད་པར་འདོད་པ་ཡིན་ནོ་སྙམ་ན། དེ་ལྟ་ན་ནི་འོ་ན་ཡོད་པ་ཟླ་བ་གཅིག་དང་འབྲེལ་པའི་ཕྱིར་ཟླ་བ་གཉིས་སུ་ཤེས་ པ་ཉིད་མི་འཐད་དོ། །དེ་བས་གདོན་མི་ཟ་བར་འདི་སྐད་བརྗོད་དགོས ་ཏེ། དེ་ནི་དབང་པོ་ཉིད་མ་ཡིན་ཏེ། ཡོད་བའི་ཟླ་བ་གཅིག་དང་ཕྲད་ཀྱང་ཤེས་པ་ལ་དེའི་རྣམ་པར་འཇོག་པར་མི་ནུས་པའི་ཕྱིར་དང་མེད་པ་མཐོང་བའི་ཕྱིར་རོ་ཞེས་སོ། །དེ་ལྟ་ན་ནི་འོ་ན་ཡོད་པའི་རྣམ་པར་སྣང་པའི་ཤེས་པ་བསྐྱེད་པའི་ཁོ་ན་དབང་པོ་ཡིན་ན་ཞེས་བྱ་བ་འདི་ན་གྱིས་བྱུང་པ་ཡིན་ནོ། །དེ་ལྟ་ན་ནི་ཡིད་ཀྱང་དབང་པོ་ཉིད་དུ་མི་འགལ་ལོ་དེ་ལྟ་ན་འོན་ལོང་མེད་པ་ལ་སོགས་པ་ཡང་མ་ཡིན་ཏེ། དེ་དག་གི་རྒྱུད་ལས། རྣམ་པ་དེ་ལྟ་བུའི་འདུ་བྱེད་ཡོངས་སུ་སྨིན་པ་མེད་པའི་ཕྱིར་རོ། །
འདིས་ནི་མངོན་དུ་བྱེད་པ་རྒྱུ་ཉིད་ཀྱི་དབང་པོ་ཡིན་ནོ་ཞེས་བསྟན་ཏོ། །ཡང་གང་གི་ཚེ་མངོན་དུ་བྱེད་པ་ལ་ཡིད་ཀྱི་བྱེད་པ་འདོད་པ་དེའི་ཚེ་ཡང་གཙོ་བོ་ནི་ཡིད་ཁོ་ན་ཡིན་ནོ་ཞེས་སྟོན་པར་བྱེད་པ་ནི་གཞན་ཡང་ཞེས་བྱ་བའོ། །རྣམ་པར་འཁྲུགས་ལ་ཞེས་བྱ་བ་ནི་བསམ་པ་གཞན་ལ་ཞུགས་པའི་དུས་སམ། མྱ་ངན་ལ་སོགས་པའི་གནས་སྐབས་སུའོ། །གལ་ཏེ་དོན་གཞན་སེམས་པའི་དུས་ན་ཤེས་པ་ཉིད་མ་སྐྱེས་པ་ལ་ཡིན་ནམ། དེ་ལ་མི་གསལ་བ་གང་ལ་ཡོད། མྱ་ངན་ལ་ཡང་དབང་པོ་ཉིད་ཉམས་པའི་ཕྱིར་མི་གསལ་བ་ཡིན་ནོ་ཞེ་ན། སྨྲས་པ་ཤིན་ཏུ་ནུས་པ་མེད་པ་ན་ག་ལས་ཤེས་པ་མ་སྐྱེས་པ་དེ་ཉིད་ལས་ནུས་པ་མེད་པ་ཅུང་ཟད་ཟི་བ་ན་མི་གསལ་བའི་རྣམ་པ་ཅན་འགའ་ཞིག་སྐྱེ་བ་ཡིན་ནོ་ཞེས་བྱ་བ་ནི་རིགས་པ་ཁོ་ནའོ། །མྱ་ངན་གྱིས་འཁྲུགས་པ་ནི་དབང་པོ་ཉམས་པ་མི་གསལ་པའི་རྒྱུ་ཡིན་ནོ་ཞེས་བྱ་བས་ནི་མི་གསལ་བ་ཡིད་ཀྱི་ནུས་པ་ཆེན་པོ་ཉིད་དུ་གསལ་པར་བྱས་པ་ཡིན་ཏེ། དབང་པོ་ཡང་རྣམ་པར་བསྒྱུར་ནས་ཤེས་པ་ཡང་མི་གསལ་བར་བྱེད་པའི་ཕྱིར་རོ། །གལ་ཏེ་དབང་པོའི་རྣམ་པར་འགྱུར་བ་མེད་པར་མི་གསལ་བ་ཉིད་དུ་མི་འགྱུར་བའི་ཕྱིར། དེ་ཉིད་གཙོ་བོ་མ་ཡིན་ནམ་ཞེ་ན། མ་ཡིན་ཏེ། དབང་པོ་ཉམས་པར་འགྱུར་བའམ། གསལ་བར་གྱུར་པ་དེ་ཉིད་ལ་རག་ལས་པའི་ཕྱིར་ན། འདི་ནི་ཡིད་དང་འབྲེལ་པ་ཁོ་ནའོ། །འོ་ན་མྱ་ངན་ལ་སོགས་པ་ཉམས་པ་ཉིད་འཁྲུལ་པར་འགྱུར་རོ་སྙམ་ན། དེ་ལྟ་མ་ཡིན་ཏེ། ཡིད་གཙོ་བོ་ཡིན་ཡང་དབང་པོ་ལ་རྟོག་པའི་ཕྱིར་ནི་འདི་དབང་པོའི་འཁྲུལ་པ་ཡིན་ནོ་ཞེས་གནས་སོ། །གལ་ཏེ་ཞེས་བྱ་བ་ནི་རྩོད་པའོ། །དེ་ཡང་ཞེས་བྱ་བ་ནི་ལན་ནོ། །འདི་ནི་ཞེས་བྱ་བ་ནི་རྣམ་པ་ཐམས་ཅད་རྗེས་སུ་དཔག་པར་འདོད་པ་ནའོ། །ལྐོག་ཉིད་ནི་ལྐོག་གྱུར་ཤེས་པ་ཉིད་དོ། །ཡུལ་མངོན་དུ་བྱེད་པའི་བྱ་བ་ལ་འཇུག་པ་གང་ཡིན་པ་དེ་ཉིད་མངོན་སུམ་ཞེས་བརྗོད་པ་ཡིན་ནོ། །གལ་ཏེ་མངོན་དུ་བྱེད་པ་ལ་འཐད་པ་ཡིན་ན་མངོན་སུམ་ལ་ཅིས་གེགས་བྱེད། ཡང་ན་འདི་ནི་ཞེས་བྱ་བ་ནི་འདས་པ་ལ་སོགས་པ་ནའོ། །ཇི་ལྟར་ལྐོག་གྱུར་ཉིད་དེ་མ་ཡིན་པ་ཉིད་དོ། །
མངོན་དུ་བྱས་པ་ལྐོག་གྱུར་ཉིད་ཡིན་ན་ཉེས་པ་ཅི་ཡོད་སྙམ་ན། མངོན་དུ་བྱས་པས་ཞེས་གསུངས་སོ། །འོན་ཏེ་ཞེས་བྱ་བའི་རྩོད་པ་ནི་ལྷག་པ་བརྗོད་པའི་དོན་དུའོ། །དེ་ལ་སྔར་ནི་མངོན་དུ་བྱེད་པ་ཙམ་གྱིས་མངོན་སུམ་ཡིན་གྱི། དབང་པོ་ལ་ལྟོས་པ་ནི་མ་ཡིན་ནོ་ཞེས་བརྗོད་པ་ཡིན་ལ། དེ་མ་ཐག་པར་ནི་མངོན་དུ་བྱེད་པ་རྒྱུ་ཡིན་པའི་ཕྱིར་ཡིད་ཉིད་དབང་པོ་ཡིན་ནོ་ཤེས་གཞུང་བཙུགས་པ་ཡིན་ཞིང༌། དེ་ལྟ་ན་ནི་གལ་ཏེ་མངོན་དུ་བྱེད་པ་དབང་པོ་ལ་རག་ལས་ན་དེའི་ཚེ་དབང་པོ་བྱེད་པ་ཡང་རྗེས་སུ་དཔག་པས་གྲུབ་པར་ངེས་པར་ཁས་བླང་བར་བྱའོ་ཞེས་བརྗོད་པ་ཡིན་ནོ། །དེ་ཉིད་བཤད་པ་ནི། དབང་པོ་བྱེད་པ་དེ་ཉིད་ཅེས་བྱ་བའོ། །དབང་པོའི་མངོན་སུམ་འབའ་ཞིག་ཏུ་མ་ཟད་ཀྱི། རྣམ་པ་ཐམས་ཅད་རྗེས་སུ་དཔག་པ་ལ་ཡང་ངོ༌། །འོན་ཏེ་གང་གིས་ཡོད་པར་འགྱུར་རོ་ཞེས་བརྗོད་པ་འདི་ཇི་ལྟར་རྟོགས་སྙམ་ན་རྗེས་སུ་དཔག་པའི་འཇུག་པ་ནི་ཞེས་གསུངས་སོ། །ད་ལྟ་བ་དང་གཞན་པའི་མིག་ལ་སོགས་པའི་བྱེད་པ་ཡང་རྗེས་སུ་དཔག་པ་ཉིད་ལས་རྟོགས་པ་ཡིན་ཏེ། འདས་པ་ལ་སོགས་པའི་དོན་འབའ་ཞིག་ཏུ་མ་ཟད་དོ། །ཐམས་ཅད་ལ་མངོན་དུ་བྱེད་པའི་ཕྱིར། ད་ལྟར་བ་དང་གཞན་པའི་བྱེད་པ་རྟོགས་པའི་ཕྱིར་རོ། །ཡང་ན་ཡང་གི་སྒྲ་ནི་ཞེས་གནས་པ་སོ་སོའི་སྐྱེ་བོ་དང་འབྲེལ་པ་ལ་བལྟ་བར་བྱའོ། །སོ་སོའི་སྐྱེ་བོའི་དབང་པོའི་བྱེད་པ་ཡང་རྗེས་སུ་དཔག་པ་ཉིད་ལས་ཡིན་གྱི་མངོན་སུམ་ལས་རྟོགས་པ་ནི་མ་ཡིན་ནོ། །འོན་ཏེ་མིག་ལ་སོགས་པའི་བྱེད་པ་མེད་བཞིན་དུ་མངོན་དུ་བྱེད་པ་ཡིན་ནོ་ཞེས་བྱ་བར་བརྗོད་ན། འོན་ནི་མངོན་སུམ་དུ་བྱེད་པ་དབང་པོའི་བྱེད་པ་ལ་རག་ལས་པ་མ་ཡིན་ནོ་ཞེས་བྱ་བར་གྲུབ་བོ། །དེས་ན་དབང་པོའི་བྱེད་པ་མེད་ཀྱང་མངོན་དུ་བྱེད་པ་ཙམ་གྱིས་མངོན་སུམ་གྱི་སྒྲ་འཇུག་པར་གྲུབ་པོ་ཞེས་བྱ་བར་དགོངས་པའོ། །དེའི་ཕྱིར་འདས་པ་ལ་སོགས་པ་དང༌། དེ་ལ་བརྟེན་པ་དབང་པོའི་བྱེད་པ་རྗེས་སུ་དཔག་པས་རྟོགས་པ་ན་དེ་མངོན་དུ་བྱེད་པ་རྣལ་འབྱོར་པའི་ཞེས་པ་ལ་གཉི་གའི་ཡང་ནུས་པ་ཡོད་པ་ཁོ་ན་འོ། །དེས་ན་འདས་པ་ལ་སོགས་པ་རིག་པ་ཇི་ལྟར་མངོན་སུམ་
ཡིན་ཏེ། འབྱུང་བ་དང་བྱུང་བའི་དབང་པོའི་བྱེད་པས་བསྐྱེད་པ་ཡིན་པའི་ཕྱིར་རོ། །དེ་ལར་འདས་པ་ལ་སོགས་པ་ལ་རང་དང་གཞན་གྱི་དབང་པོའི་བྱེད་པ་སྲིད་པའི་ཕྱིར་རྣལ་འབྱོར་པའི་ཤེས་པ་མངོན་སུམ་ཡིན་ནོ་ཞེས་བསྒྲུབས་ནས། ད་ནི་གང་ཁོ་ན་ལ་བསྒོམ་པ་ལས་དེ་མངོན་དུ་བྱེད་པའི་ཤེས་པ་སྐྱེས་པ་དེ་ཉིད་ཀྱི་དབང་པོའི་བྱེད་པ་ནི་སྔར་ཡང་འདས་པ་ལ་སོགས་པའི་དོན་ལ་ཡོད་པ་ཡིན་ནོ་ཞེས་བསྟན་པའི་དོན་དུ་གཞན་ཡང་ཞེས་གསུངས་སོ། །དབང་པོའི་རྣམ་པར་ཤེས་པས་སྔོན་མཐོང་བའོ། །དེའི་ཚེ་བདག་གི་མིག་ལ་སོགས་པའི་ཡང་བྱེད་པ་རྟོགས་པར་བྱེད་དོ། །གཞན་གྱི་མིག་ལ་སོགས་པ་འབའ་ཞིག་གིས་ནི་མ་ཟད་དོ། །གལ་ཏེ་དེ་ལྟར་ནའང་རྣམ་པ་ཐམས་ཅད་རྗེས་སུ་དཔོག་པ་ལ་དབང་པོའི་བྱེད་པ་ཡོད་པ་ནི་ལྟར་འགྱུར་སྙམ་ན། གར་འབྱུང་ཞེས་སྨོས་སོ། །དེ་ལ་ཞེས་བྱ་བ་ནི་རྣམ་པ་ཐམས་ཅད་རྗེས་སུ་དཔོག་པ་ལའོ། །དེ་ཚེ་ཉིད་སྐྱེས་པ་ཞེས་བྱ་བ་ནི་མངོན་སུམ་མ་ཡིན་པ་དབང་པོའི་བྱེད་པ་འཇུག་ཏུ་རུང་བའོ། །དེ་ལ་ཞེས་བྱ་བ་ནི་དེ་ཚེ་ཉིད་སྐྱེས་པ་ལའོ། །གང་གི་ཚེ་བྱུང་བར་གྱུར་པའི་དོན་རྗེས་སུ་དཔག་པས་དཔོག་པ་ཞེས་འབྲེལ་ཏོ། །དེའི་ཚེ་བྱུང་བར་གྱུར་པའི་དབང་པོའི་བྱེད་པ་ཉིད་ཅེས་བྱ་བར་ཡང་འབྲེལ་ཏོ། །གལ་ཏེ་གང་གིས་དེ་སྐད་བརྗོད་པར་འགྱུར་བ་འདས་པ་ལ་སོགས་པ་ཇི་ལྟར་ཡོད་པ་ཉིད་ཡིན་སྙམ་དུ་དོགས་པ་བསུ་ནས། དེ་ནི་ཞེས་གསུངས་སོ། །སྔར་མཐོང་བ་འདས་པ་ལ་སོགས་པའི་དོན་ནིའོ། །གལ་ཏེ་ད་ལྟར་བ་ཉིད་མ་ཡིན་ན་ཇི་ལྟར་ཡོད་པ་ཉིད་ཡིན་ཏེ། མེད་པ་ཉིད་ཡིན་པའི་ཕྱིར་རོ་སྙམ་པ་ནི། གལ་ཏེ་ཞེས་བྱ་བ་ཡིན་ནོ། །འབྱུང་བར་འགྱུར་བ་ཡིན་ཡད་ཇི་ལྟར་ཡོད་པ་མ་ཡིན་པ་དེ་སྟོན་པ་ནི། མངོན་དུ་བྱེད་ཉིད་ཅེས་བྱ་བའོ། །ཐམས་ཅད་དུ་ཞེས་བྱ་བ་ནི་ད་ལྟར་བ་ལ་ཡང་ངོ༌། །ཕྱེད་ཕྱི་མ་འཆད་པ་ནི་ད་ལྟ་བར་མངོན་པར་འདོད་པའི་ཞེས་བྱ་བའོ། །གལ་ཏེ་མངོན་དུ་བྱེད་པ་མེད་ཀྱང་རྗེས་སུ་དཔག་པས་རྟོགས་པར་བྱ་བ་ལ་ཡོད་པ་མ་ཡིན་ནམ། དེས་ན་དེ་ལས་གཞན་ཡོད་པ་ཉིད་ཡོད་པ་ཡིན་ནོ་ཞེས་དོགས་པ་བསུ་བ་ནི། གལ་ཏེ་མེ་ལ་སོགས་པ་
ཞེས་བྱ་བའོ། །རྗེས་སུ་དཔག་པ་ལ་ཡང་སྣང་བཞིན་པ་ཉིད་རྣམ་པར་བརྟག་པར་བྱ་བ་ཡིན་ཏེ། དེ་ལྟར་ལྷག་པར་ཞེན་པའི་ཕྱིར་རོ་ཞེས་ལན་བཏབ་པ་ནི་མ་ཡིན་ཏེ་དེར་ཡང་ཞེས་བྱ་བའོ། །དེ་ལྟ་བུ་ཉིད་ནི་མངོན་དུ་བྱེད་པ་དང་ལྡན་པ་ཉིད་དོ། །དེ་ཅིའི་ཕྱིར་སྙམ་ན། མངོན་དུ་བྱས་པའམ་ཞེས་གསུངས་སོ། །བྱེད་པའམ་ཞེས་བྱ་བ་ནི་གཞན་གྱིས་ཞེས་བྱ་བར་བལྟ་བར་བྱའོ། །གཞན་དུ་ན་ཞེས་བྱ་བ་ནི་མཐོང་བ་མེད་པ་ཉིད་ཡིན་ནོ། །གལ་ཏེ་མཐོང་ན་ནི་བལྟ་བར་རུང་བ་ཉིད་མ་ཡིན་བལྟ་བའི་ཡུལ་ཉིད་དུ་ནི་མ་ཡིན་ཞེས་བྱ་བར་ཅི་སྟེ་མི་འགྱུར་སྙམ་ན། མི་འགྱུར་བ་ཉིད་དོ་ཞེས་བརྗོད་པ་ནི་མཐོང་བའི་རྗེས་སུ་འབྲངས་པ་ན་ཞེས་བྱ་བའོ། །ཅིའི་ཕྱིར་སྙམ་ན་དེ་ལྟ་མ་ཡིན་ན་མི་འཐད་པའི་ཕྱིར་ཏེ། མ་འབྲེལ་བའི་ཕྱིར་རོ། །མཐོང་བར་བྱ་བ་ཉིད་ཁྱབ་བྱེད་དུ་ཉེ་བར་བཟུང་ནས་རྗེས་སུ་དཔག་པ་ཡིན་ནོ། །མི་མཐོང་ན་ནི་མིག་ལ་སོགས་པ་ནི་གཞན་གྱི་དོན་ཡིན་ཏེ་ཞེས་བྱ་བ་ནི་མི་མཐོང་བའི་མ་འདུས་པ་གཞན་གྱི་དོན་ཡང་བསྒྲུབ་བར་འགྱུར་རོ། །དེས་ན་མི་མཐོང་པ་ཞེས་བྱ་བ་ནི་ཡོད་པ་ཉེ་བར་མཚོན་པ་མ་ཡིན་ནོ། །གལ་ཏེ་གང་དུ་རྟགས་ཉིད་འགའ་ཞིག་གི་མངོན་སུམ་གྱི་རྟགས་ཅན་ནི་མ་ཡིན་པའི་དེ་འདྲ་བའི་དཔྲལ་ལ་མཐོང་བར་གྱུར་པ་དང༌། མཐོང་བ་དང༌། མཐོང་བར་འགྱུར་བ་རྗེས་སུ་དཔག་པ་མ་ཡིན་ནོ་ཞེས་བྱ་བའི་ངལ་བ་མེད་པའི་ཕྱིར་ཇི་ལྟར་མངོན་དུ་བྱས་པ་ལས་ཡོད་པ་ཉིད་གཞན་མ་ཡིན་པར་འགྱུར་ཞེ་ན། མ་ཡིན་ཏེ། དེར་ཡང་འབྲེལ་བ་དང་ལྡན་པ་མཐོང་བ་གཞན་དུ་མི་འཐད་པས་ན་མཐོང་བ་ཉིད་རྗེས་སུ་དཔག་བར་བྱ་བ་ཡིན་ཏེ། མི་སླུ་བ་ཡོད་པའི་ཕྱིར་རོ། །མ་མཐོང་བ་ལ་ནི་མི་སླུ་བ་མེད་པའི་ཕྱིར་རོ། །ལྡོག་པ་བརྗོད་པ་ནི། གལ་ཏེ་ཞེས་བྱ་བའོ། །གལ་ཏེ་ནུས་པ་ཐམས་ཅད་ཀྱིས་སྟོང་པའི་མེད་པ་ཉིད་མ་ཡིན་ནམ། ཇི་ལྟར་དུས་གསུམ་དུ་མཐོང་བ་ཡིན་སྙམ་ན། །ནུས་པར་ཉེ་བར་བརྗོད་བ་ཞེས་གསུངས་སོ། །ནུས་བར་ཉེ་བར་བརྗོད་པ་ཐམས་ཅད་ཅེས་བྱ་བ་ནི་མངོན་སུམ་གྱི་རྗེས་ལས་བྱུང་བའི་རྣམ་པར་རྟོག་པས་བསྐྱེད་པ་དེ་ནི་འདིའོ་ཞེས་བྱ་བར་བསྙད་
བའོ། །དེ་དང་བྲལ་བ་ནི་མེད་པའོ། །དེ་ཉིད་ནི་གཞན་མ་ཡིན་ཏེ། ཉེ་བར་བརྗོད་པ་མེད་པ་ཉིད་ཡིན་ནོ། །ཉེ་བར་རྫོད་པར་བྱེད་པས་ན་ཉེ་བར་བརྗོད་པ་སྟེ། དེ་གང་ལ་མེད་པའོ། །དེའི་ངོ་བོ་ནི་ཉེ་བར་བརྗོད་པ་མེད་པ་སྟེ་མི་སྣང་བའོ། །དུས་གསུམ་དུ་མཐོང་བ་མེད་པ་ཞེས་བྱ་བའི་དོན་ཏོ། །གལ་ཏེ་མཐོང་བར་བྱ་བ་ཉིད་ཡིན་ན་ཁོ་བོ་ཅག་ལ་སོགས་པ་ཉིད་ཀྱིས་མཐོང་བར་འགྱུར་བ་ལ་སོགས་པའི་རྣམ་པར་དབྱེ་བ་ལས་འོངས་པ་ལ་སོགས་པའི་རྣམ་པར་དབྱེ་བ་ཡིན་གྱི། རྣལ་འབྱོར་པའི་ནི་མ་ཡིན་ནོ། །ཐམས་ཅད་མཐོང་བཞིན་པ་ཉིད་ཀྱིས་ན་ད་ལྟར་བ་ཡིན་པའི་ཕྱིར་རོ་སྙམ་དུ་ དགོས་པ ་ནི་གལ་ཏེ་ཞེས་བྱ་བའོ། །ད་ལྟར་བྱུང་བ་ཙམ་མཐོང་བ་མངོན་དུ་བྱེད་པ་ཡིན་པའི་ཕྱིར་རོ། །དེས་ན་ཞེས་བྱ་བ་ནི་འདས་པ་ལ་སོགས་པ་མཐོང་པ་མེད་པས་ནའོ། །དེ་ལ་དུས་དང་འབྲེལ་པ་ལས་ནི་ད་ལྟར་བ་ལ་སོགས་པ་མ་ཡིན་ཏེ། དེ་ནི་ཚད་མས་རྟོགས་པ་མེད་པའི་ཕྱིར་རོ་ཞེས་བཤད་པ་ནི། དུས་ནི་ཚད་མ་ཞེས་བྱ་བ་ལ་སོགས་པའོ། །འདི་ག་ལས་ཤེ་ན། མངོན་སུམ་གྱིས་ནི་ཞེས་བྱ་བའོ། །འོ་ན་རྗེས་སུ་དཔག་པས་དུས་རྟོགས་པར་འགྱུར་སྙམ་ན། རྗེས་སུ་དཔག་པ་ཡང་ཞེས་གསུངས་སོ། །འཇུག་པ་ཞེས་འབྲེལ་ཏོ། །གང་གི་ཚེ་མི་འཇུག་སྙམ་ན། མངོན་སུམ་འཇུག་པ་ལས་འདས་ནས་སོ། །མངོན་སུམ་གྱིས་ནི་ཞེས་བྱ་བ་ནི་འཆད་པའོ། །དེའི་རྣམ་པ་ཙམ་དང་ནི་གཟུགས་ལ་སོགས་པའི་རྣམ་པ་ཙམ་དང་ངོ༌། གལ་ཏེ་མངོན་དུ་གྱུར་བའི་དངོས་པོ་ཉེ་བར་གཞག་པ་ཉིད་ཀྱི་རང་བཞིན་ལ་བརྟེན་པའི་མངོན་སུམ་གྱིས་དོན་སྟོན་པ་ཡིན་གྱི་རྣམ་པ་གཞན་གྱིས་ནི་མ་ཡིན་ནོ་ཞེས་བྱ་བ་འདི་ག་ལས་སྙམ་ན། མདུན་ན་གནས་པའི་རྣམ་པ་ཞེས་སྨོས་སོ། །གལ་ཏེ་བུམ་པའམ་གཡོ་བ་ཞེས་རྣམ་པ་གཞན་གྱིས་ཀྱང་མཐོང་བ་ཁོ་ན་མ་ཡིན་ནམ་སྙམ་དུ་ དགོས་ན། དེ་ལྟ་མ་ཡིན་ན་ཞེས་གསུངས་སོ། །མདུན་ན་གནས་པ ་མ་ཡིན་པའི་རྣམ་པ་འཛིན་པ་ནི་བྱད་པར་མེད་པའི་ཕྱིར་རོ་ཞེས་བྱ་བར་དགོངས་པའོ། །གལ་ཏེ་དུས་ཀྱང་དེ་བཞིན་དུ་དམིགས་པ་ཡོད་པ་ཉིད་དོ་སྙམ་ན། དུས་ནི་ཞེས་སྨོས་སོ། །རྗེས་སུ་
དཔག་པ་ཡང་ཞེས་བྱ་བས་ནི་རྗེས་སུ་དཔག་པ་ཡང་ཞེས་བྱ་བའི་ཚིགས་སུ་བཅད་པའི་ཆ་འཆད་པའོ། །གལ་ཏེ་དུས་ནི་མངོན་སུམ་ལ་སོགས་པ་ཚད་མས་ཡང་དག་པར་རྟོགས་པར་བྱ་བ་ཉིད་མ་ཡིན་ནམ། དེས་ན་དུས་ནི་ཚད་མ་གང་གིས་ཀྱང་ཞེས་ཇི་སྟེ་བརྗོད་སྙམ་དུ་ དགོས་པར་བྱེད་པ ་ནི་འོན་ཏེ་ཞེས་བྱ་བ་ལ་སོགས་པའོ། །ཡུན་རིང་དུ་བྱས་སོ་ཞེས་བྱ་བ་ལ་སོགས་པའི་རྟོགས་པས་ནི་རྫས་ཀྱི་ཁྱད་པར་དུ་དུས་ངེས་པ་ཡིན་ནོ། །འདི་ལ་འབྲེལ་པ་ཅན་གྱི་རྟགས་ནི་འགའ་ཡང་མཐོང་བ་མེད་དོ། །གཟུགས་སྤྱོད་པ་དང་འདུ་བས་མངོན་སུམ་མ་ཡིན་པ་ཉིད་ཀྱང་མ་ཡིན་ཏེ། རྟགས་ལས་མ་སྐྱེས་པ་དང་གནོད་པ་མེད་པས་མངོན་སུམ་གྱི་ཚད་མ་ཡིན་པའི་ཕྱིར་རོ། །དེའི་ཕྱིར་དུས་ནི་མངོན་སུམ་གྱི་ཚད་མས་གཟུང་བར་བྱ་བ་ཁོ་ན་ཡིན་ནོ། །རྗེས་སུ་དཔག་པར་བྱ་བ་ཡིན་ནོ་ཞེས་བྱ་བ་ནི་ཡང་ན་བྲལ་བ་ལ་སོགས་པ་གཞན་དུ་མི་འཐད་པས་སོ། །དེ་ལ་རེ་ཞིག་ཡུན་རིང་བ་ཞེས་བྱ་བ་ལ་སོགས་པའི་བློ་མངོན་སུམ་ཡིན་པ་སེལ་བ་ནི་དུས་ནི་ཞེས་བྱ་བ་ལ་སོགས་པའོ། །མདུན་ན་གནས་པའི་དུས་གང་ལ་ཡོད་པ་ཞེས་སྤྱིར་བསྡུ་བའོ། །གལ་ཏེ་དུས་མདུན་ན་གནས་པ་མ་ཡིན་ཡང་མངོན་སུམ་ཉིད་དུ་འགྱུར་རོ་སྙམ་ན། དེ་ལྟ་རྣམ་པ་དང་ཞེས་གསུངས་ཏེ་མདུན་ན་གནས་པའི་རྣམ་པ་དང་བྲལ་ནའོ། །གྲུབ་པའི་མཐའ་སྨྲ་བས་ནི་འབྲས་བུའི་རང་བཞིན་ཉིད་ཡུན་རིང་བ་ལ་སོགས་པའི་དོན་ཡིན་པར་བརྗོད་པ་ན། རྒྱུ་རྣམས་ཞེས་བྱ་བའོ། །དུས་མེད་ཀྱང་དལ་བ་ནས་རིམ་གྱིས་ཡོངས་སུ་རྫོགས་པ་ནི་ཡུན་རིང་བའི་དོན་ཡིན་ནོ། །གལ་ཏེ་དུས་མེད་ན་དལ་བུ་དེ་ཉིད་ཇི་ལྟར་སྙམ་ན། རྒྱུ་རྣམས་ཉེ་བར་མི་གནས་ཕྱིར། །ཞེས་གསུངས་སོ། །དེས་ན་དལ་བུ་ལ་སོགས་པ་གཞན་དུ་མི་འཐད་པས། དུས་དཔག་པར་བྱ་བ་མ་ཡིན་ནོ་སྙམ་དུ་དགོངས་པའོ། །བུམ་པ་ལ་སོགས་པའི་ཞེས་བྱ་བ་ནི་འཆད་པའོ། །དེ་འཐད་བའི་ཕྱིར་རོ་ཞེས་བྱ་བ་ནི་དལ་བུ་ལ་སོགས་པ་འཐད་པའི་ཕྱིར་རོ། །དེའི་ཕྱིར་ཞེས་བྱ་བ་ནི་གཞན་དུ་མི་འཐད་པ་ཉིད་ཉམས་པའི་ཕྱིར་རོ། །ཡང་གཞན་དག་གཞན་དུ་མི་འཐད་པས་
དུས་རྗེས་སུ་དཔག་པར་བྱ་ཞེས་བྱ་བར་དོགས་པ་བསུ་བ་ནི་འོན་ཏེ་ཞེས་བྱ་བ་ནས་འཇུག་ན་ཞེས་བྱ་བའི་བར་རོ། །དེ་ལ་ཞེས་བྱ་བ་ནི་ལན་ཏེ་འབྲས་བུ་ལའོ། །རྒྱུ་མེད་པར་ཞེས་བྱ་བ་ནི་དོགས་པ་བསུ་བའོ། །འོ་ན་ཞེས་བྱ་བ་ནི་ལན་ནོ། །འོ་ན་ཇི་ལྟར་དུས་ནུས་པ་ཡིན་ཞེ་ན། གལ་ཏེ་ཞེས་བྱ་བའོ། །དེའི་ཚེ་ཞེས་ཁོང་ནས་ཕྱུང་ལ། དུས་རྒྱུའི་དངོས་པོ་ཞེས་བྱ་བ་ལ་སོགས་པའོ། །འོ་ན་གང་ལས་རྒྱུར་འགྱུར་བ་དུས་ཀྱི་མེད་པ་ནི་ཡོད་པ་ཁོ་ན་འོ་སྙམ་ན། དུས་ནི་ཞེས་གསུངས་སོ། །དུས་ནི་མི་རྟག་པ་དང་མ་ཁྱབ་པ་ཡིན་ཏེ། རྐྱེན་གྱི་སྟོབས་ཀྱིས་མངོན་པར་གསལ་བ་ཡང་ཡིན་ནོ་ཞེས་བྱ་བའི་ཕྱོགས་པར་བྱེད་པ་ནི་འོ་ན་ཏེ་ཞེས་བྱ་བའོ། །དུས་གཞན་ཞེས་བྱ་བ་ནི་ལན་ནོ། །རྒྱུ་གཞན་ལས་སོ་ཞེས་བྱ་བ་ནི་ཕ་རོལ་གྱི་ལན་ནོ། །གང་ལས་དུས་ཀྱི་རིམ་པ་གྲུབ་པ་དེ་ཉིད་ལས་འབྲས་བུའི་རིམ་པར་འགྱུར་མོད། རིམ་པ་གཞན་ལ་རག་ལས་པའི་དུས་ལས་ནི་མ་ཡིན་ནོ་ཞེས་ལན་འདེབས་པ་ནི། འོ་ན་དེ་ཉིད་ལས་ཞེས་བྱ་བའོ། །རང་ལ་གནས་པའི་རིམ་པ་མེད་པའི་ཕྱིར་ན་འདི་རང་ཉིད་རིམ་པ་དང་ལྡན་པ་མ་ཡིན་ནོ་ཞེས་བྱ་བའི་དོན་ཏོ། །དོགས་པ་བསུ་པ་ནི་རིམ་པ་ཉིད་ཅེས་བྱ་བའོ། །འབྲས་བུའི་རང་བཞིན་ནི་མ་ཡིན་པ་སྟེ། རིམ་པ་ཡང་དུས་ཡིན་ནོ་ཞེས་གཞན་མངོན་པར་འདོད་པ་ཡིན་པའི་ཕྱིར་རོ། །ལན་དུ་མ་ཡིན་ཏེ་ཞེས་བྱ་བའོ། །དེ་ཡང་ཞེས་བྱ་བའི་ལྷན་ཅིག་པ་དང་ལྷན་ཅིག་པ་མ་ཡིན་པའམ་རིམ་པའོ། རང་གི་ངོ་བོ་ལས་ཐ་དད་པ་ཞེས་བྱ་བ་ནི་གནས་སྐབས་ཁྱད་པར་ཅན་གྱི་རང་བཞིན་ལས་ཐ་དད་པ་ཞེས་བྱ་བའི་དོན་ཏོ། །ད་ནི་ཇི་ལྟར་དུས་གསུམ་པར་གནས་སྙམ་དུ་དོགས་པ་བསུ་ནས། དུས་གསུམ་རྣམ་པར་གནས་པ་བརྗོད་པ་ནི་མཐོང་གྱུར་འདས་པའི་ཞེས་བྱ་བའོ། །གལ་ཏེ་དུས་མེད་ན་མཐོང་བར་གྱུར་ལ་སོགས་པ་ཉིད་ཇི་ལྟར་ཞེ་ན་མ་ཡིན་ཏེ།། གང་གི་ཚེ་དམིགས་སུ་རུང་བ་མ་དམིགས་པ་དེ་ནི་འདས་པ་ཡིན་ལ། ཐམས་ཅད་ཀྱིས་སྡར་མ་དམིགས་པ་བྱིས་འགས་དམིགས་པར་འགྱུར་བ་ནི་མ་འོངས་པ་ཡིན་ལ། དམིགས་བཞིན་པ་ནི་ད་ལྟར་བ་ཡིན་ནོ། །དེ་
ལྟར་མཐོང་ཟིན་པ་ལ་སོགས་པའི་རྣམ་པར་དབྱེ་བ་ནི་སོ་སོ་རང་གིས་རིག་པར་བྱ་བ་ཉིད་ཀྱིས་ཉེ་བར་མཚོན་པའི་ཕྱིར་རོ། །གཞན་དུ་ན་ནི་དུས་སྨྲ་བ་ཡང་གསལ་པར་བྱེད་པའི་དབྱེ་བ་མ་རྟོགས་པར་འདས་པ་ལ་སོགས་པའི་དུས་རྣམ་པར་གནས་པར་ཇི་ལྟར་བརྗོད། དུས་ནི་དོན་ལས་ཐ་དད་པར་རང་གི་ངོ་བོས་སྣང་བ་མ་ཡིན་ནོ། །གལ་ཏེ་མི་སྣང་ན་འོ་ན་ཇི་ལྟར་ཞེས་བྱ་བའོ། །ལན་དུ་འདི་ནི་ཞེས་བྱ་བའོ། །དོན་གྱི་བདེ་བར་གནས་པ་ལ་སོགས་པའི་རང་བཞིན་ཉིད་ཁྱད་པར་གཞན་སྤོང་བའི་སྒོ་ནས་འདིའི་དུས་ཞེས་བསྟན་པ་ཡིན་ཏེ། དེ་ནི་དེ་ཁོ་ན་ལྟར་ཚད་མས་འཐད་པའི་ཕྱིར་ཏེ། གཞན་དུ་ནི་མ་ཡིན་ནོ། །དོན་འདི་ཡང་འཇིག་རྟེན་དང་འགལ་བ་མེད་པ་ཁོ་ནའོ་ཞེས་གསུངས་པ་ནི་དེ་བཞིན་ཉིད་དུ་ཡང་ཞེས་བྱ་བའོ། །ཁྱོད་ཀྱི་དུས་ནི་ཇི་ལྟར་གྱུར་ཏེ་བཟང་པོའམ་ངན་པར་གྱུར་པ་ཞིག་ཡིན་ཞེས་བྱ་བའོ། །གལ་ཏེ་དེ་ལྟར་འདིར་ཡང་ཇི་ལྟར་དོན་གྱི་གནས་སྐབས་ཀྱི་ཁྱད་པར་ཉིད་ལ་དུས་ཞེས་ཇི་ལྟར་ཐ་སྙད་བྱེད་པ་སྙམ་ན། འདིའི་དོན་བརྗོད་པ་ནི་ཁྱོད་ཅི་བདེ་བར་གནས་སམ་ཞེས་བྱ་བའོ། །ཅི་ཞེས་བྱ་བའི་དོན་ནི་འདི་ཉིད་ཡིན་ནོ་ཞེས་སྨྲས་པ་ནི་དེའི་རང་བཞིན་ཉིད་ཅེས་བྱ་བའོ། །བདེ་བར་གནས་པ་ལ་སོགས་པའི་རང་བཞིན་གྱི་ཁྱད་པར་དྲི་བར་བྱ་བ་ཡིན་ན། ཁྱོད་ཀྱི་སྐྱེས་པའི་དུས་གང་ཡིན། །ཞེས་བྱ་བའི་ཚིག་འདི་རིགས་པ་ཡིན་ནོ། །གཞན་གྱིས་ཀུན་བརྟགས་པའི་དུས་ནི་འཇིག་རྟེན་གྱི་འདྲི་བའི་ཚིག་གི་ཡུལ་མ་ཡིན་ཏེ། དེ་ནི་རང་བཞིན་གཅིག་ཉིད་ཀྱིས་ལོག་པ་དང་གཞན་པ་ལ་སོགས་པ་མི་སྲིད་པའི་ཕྱིར་རོ། །ཡང་གང་གི་ཚེ་ལ་སོགས་པར་ཁྱོད་ཀྱི་དུས་ཇི་ལྟར་འགྱུར་ཞེས་དྲི་བ་དེའི་ཚེའང་བདེ་བར་གནས་པའམ་མི་བདེ་བར་གནས་པའི་གྲོང་ལ་སོགས་པ་ཉིད་འཇིག་རྟེན་གྱི་དྲི་བའི་ཡུལ་ཡིན་གྱི་དུས་ཐ་དད་པ་ནི་མ་ཡིན་ནོ། །དེས་ན་དུས་ཐ་དད་པ་ཉིད་མ་ཡིན་པར་ནི་འཇིག་རྟེན་ཡང་འདོད་པ་ཡིན་ནོ། །གང་གི་ཕྱིར་དེ་ལྟར་དུས་ཞེས་བྱ་བ་ཡོད་པ་མ་ཡིན་པའི་གཏན་ཚིགས་དེས་ན་དེ་ལྟར་མི་མཐོང་བ་ནི་སྔར་དམིགས་པ་དང་ཕྱིས་དམིགས་པར་འགྱུར་པ་ནི་གོ་རིམས་
བཞིན་དུ་འདས་པ་དང་མ་འོངས་པ་ཡིན་ནོ་ཞེས་བྱ་བ་ནི་དོན་གྱི་དེ་ཁོ་ནའོ་ཞེས་བྱ་བ་ནི་གཞན་གྱི་རྩོད་པ་བསླང་བའི་དོན་དུ་མཇུག་བསྡུ་བའོ། །དེ་ཉིད་སྨྲས་པ་ནི་གལ་ཏེ་ཞེས་བྱ་བའོ། །དེ་ལས་ཞེས་བྱ་བ་ནི་དེ་ལྟར་གནས་པར་གྱུར་པ་ལའོ། །རྩོད་པར་སྨྲ་བ་ཉིད་མཇུག་སྡུད་པའི་སྒོ་ནས་འདྲི་བ་ནི་དེའི་ཕྱིར་ཞེས་བྱ་བའོ། །གང་གི་ཕྱིར་རང་གིས་མི་མཐོང་བ་མཐོང་བ་ཡིན་ནོ་ཞེས་བརྗོད་པ་ན་འགལ་བ་ཡིན་པའི་རྒྱུ་དེའི་ཕྱིར་རོ། །འདི་ལ་ལན་ནི་གཞན་གྱིས་ཞེས་བྱ་བའོ། །སོ་སོའི་སྐྱེ་བོས་སོ། །དེ་མཐོང་བ་ཉིད་ཀྱིས་ཞེས་བྱ་བ་ནི་རྣལ་འབྱོར་པས་མཐོང་པ་ཉིད་ཀྱིས་སོ།། དེ་ལ་ལྟོས་ཏེ་དེ་རྣམ་པར་དབྱེ་བ་ཡོད་པ་མ་ཡིན་ཏེ། ད་ལྟར་བའི་ཐ་སྙད་ནི་མཐོང་བཞིན་པ་ཙམ་གྱི་རྒྱུ་མཚན་ཡིན་པའི་ཕྱིར་རོ་ཞེས་བྱ་བའི་དོན་ཏོ། །དེ་ཙམ་དུ་ནི་ཞེས་བྱ་བ་མཐོང་བཞིན་ཙམ་གྱིས་ད་ལྟར་བའི་དུས་དང་འབྲེལ་པས་ནི་མ་ཡིན་ནོ། །དེ་ཞེས་བྱ་བ་ནི་གཞན་གྱིས་མི་མཐོང་བའོ། །སྐྱོན་མེད་དོ་ཞེས་བྱ་བ་ནི་མ་ཡང་ཡིན་ལ་མོ་གཤམ་ཡང་ཡིན་ནོ་ཞེས་བྱ་བར་བརྗོད་པའོ། །དེ་ལྟར་རྣལ་འབྱོར་པ་ལ་ཐམས་ཅད་མཐོང་བཞིན་པ་ཁོ་ན་ཡིན་པའི་ཕྱིར་འདས་པ་ལ་སོགས་པའི་རྣམ་པར་དབྱེ་བ་མེད་པས་ན་དེ་རིག་པར་ཇི་ལྟར་འགྱུར་སྙམ་ན། གཞན་ལ་ཞེས་གསུངས་སོ། །འོ་སྐོལ་ལ་ལྟོས་ནས་རྣལ་འབྱོར་བའི་འདས་པ་ལ་སོགས་པ་རྣམ་པར་དབྱེ་བ་ཡིན་གྱི་རང་ཉིད་ལ་ལྟོས་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལྟར་དུས་ཐ་དད་པ་མེད་པའི་ཕྱིར་ན་ད་ལྟར་བྱུང་བའི་དུས་དང་འབྲེལ་བས་ནི་ཡོད་པ་ཉིད་མ་ཡིན་གྱི། འོན་ཀྱང་མངོན་དུ་བྱས་པ་ཉིད་དོ་ཞེས་མཇུག་བསྡུ་བའི་སྒོ་ནས་སྟོན་པ་ནི། དེའི་ཕྱིར་མངོན་དུ་བྱས་པ་ཞེས་བྱ་བའོ། །དབང་པོའི་བྱེད་པ་མེད་པ་མ་ཡིན་ཏེ་འོན་ཀྱང་དབང་པོའི་བྱེད་པ་ཡོད་པ་ཁོ་ནའོ། །འདས་པ་ལ་སོགས་པ་ལ་དབང་པོའི་བྱེད་པ་ཇི་ལྟར་སྲིད་སྙམ་པ་ལས་མངོན་དུ་བྱས་པ་ཞེས་གསུངས་སོ། །དེ་ཞེས་བྱ་བ་ནི་དབང་པོའི་བྱེད་པའོ། །གཞན་དུ་ན་དབང་པོའི་བྱེད་པ་ལས་མངོན་དུ་བྱེད་བ་ཁས་བླངས་པར་མི་འགྱུར་རོ་སྙམ་དུ་དགོངས་བའོ། །དེ་ལྟར་དུས་མེད་པའི་ཕྱིར་ཁོ་བོ་ཅག་ལ་ལྟོས་ནས་རྣལ་འབྱོར་པའི་
འདས་པ་ལ་སོགས་པའི་རྣམ་པར་དབྱེའི་རང་ཉིད་ནི་མ་ཡིན་ནོ། །ད་ནི་དུས་ཁས་བླངས་ནས་འདས་པ་ལ་སོགས་པ་དེའི་དུས་ཀྱིས་ད་ལྟར་བའི་དུས་དང་འབྲེལ་བ་དང༌། འདས་པ་ལ་སོགས་པར་ཡང་མི་འགལ་ལོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །དེ་ཞེས་བྱ་བ་ནིའམ་ལ་སོགས་པའི་དོན་ཏོ། །དེའི་ཚེ་དེའི་དུས་དང་འབྲེལ་བ་གང་གི་ཚེ་མངོན་དུ་བྱས་པ་དེའི་ཚེ་ད་ལྟར་བར་མེད་ཀྱང་ཡོད་པ་ཉིད་འཐད་དཀའ་བར་མི་འགྱུར་ཏེ། དེའི་ཚེ་ད་ལྟར་བའི་དུས་དང་འབྲེལ་བར་འཛིན་པའི་ཕྱིར་རོ། །གལ་ཏེ་ད་ལྟར་བའི་དུས་དང་འབྲེལ་བ་མེད་པའི་ཕྱིར་ན་ཇི་ལྟར་ཡོད་པ་ཉིད་ཡིན་སྙམ་ན། གལ་ཏེ་ཞེས་གསུངས་སོ། །དེས་ན་རྣལ་འབྱོར་བའི་ཤེས་པ་ནི་མངོན་སུམ་ཉིད་དུ་ཡང་མི་འགལ་ལོ་ཞེས་མཇུག་སྡུད་པ་ནི་དེས་ན་ཞེས་བྱ་བའོ། །འོ་ན་ཇི་ལྟར་ཞེས་བྱ་བ་ནི། གཞན་གྱིའོ། །གལ་ཏེ་འདས་པ་ལ་སོགས་པའི་ཤེས་མངོན་སུམ་གྱིས་འདས་པ་ལ་སོགས་པའི་དོན་གྱི་ཡུལ་ཅན་ཡིན་ན་དེའི་དེས་ཡོངས་སུ་བཅད་པའི་དོན་འདས་པ་ལ་སོགས་པ་ཉིད་དུ་ཇི་ལྟར་འགྱུར་ཞེ་ན། ལྟ་བ་པོའི་ཞེས་བྱ་བ་ནི་ལན་ནོ། །རྣལ་འབྱོར་པས་དེའི་ཚེའི་ད་ལྟར་བ་ཉིད་ཀྱི་དུས་དང་འབྲེལ་པར་འཛིན་པའི་ཕྱིར་རོ། །གཞན་གྱིས་ནི་སྟེ་སོ་སོའི་སྐྱེ་པོས་ནི་དེའི་ཚེའི་ད་ལྟར་བའི་དུས་དང་རང་འབྲེལ་པར་མི་འཛིན་པའི་ཕྱིར་རོ། །རྣམ་པ་གཞན་གྱི་སྒོ་ནས་ཀྱང་འདས་པ་ལ་སོགས་པ་ཉིད་དུ་གནས་པར་གཞག་པ་ལ་ལེགས་པར་གནས་པ་ཡིན་ནོ་ཞེས་སྟོན་པ་ནི་རྣལ་འབྱོར་བས་ཀྱང་ཞེས་བྱ་བ་ནི་ཉེ་བར་མཚོན་པ་སྟེ། མ་འོངས་པ་ཉིད་དུ་ཞེས་བྱ་བ་འདི་ཡང་ངོ༌། །གལ་ཏེ་ཡང་དང་ཡང་ལྟ་བ་ཉིད་དུ་མཐོང་བ་དེར་ཡིན་མོད་དེ་ལྟ་ན་ཡང་ཡོད་པ་ཉིད་མ་ཡིན་ནོ་སྙམ་ན། ད་ལྟར་བའི་ཞེས་གསུངས་སོ། །ལྟ་བ་པོ་རྣལ་འབྱོར་བ་ཉིད་ཀྱི་ཡིན་གྱི་གཞན་གྱི་མ་ཡིན་ནོ། །འདི་ག་ལས་སྙམ་ན། གཞན་གྱི་དུས་ནི་ཞེས་གསུངས་སོ། །ལྟ་བ་པོ་གཞན་གྱི་དུས་གཞན་འདས་བ་ལ་སོགས་པ་བལྟ་བར་བྱ་བའི་ཁྱད་པར་དུ་བྱེད་པ་ཉིད་དུ་ཇི་ལྟར་འཐད་དེ་མི་འཐད་དོ་ཞེས་བྱ་བའི་
དོན་ཏོ། །འོན་ཏེ་དེའི་ཚེ་ཞེས་བྱ་བ་ནི་བྱེད་པ་པོའི་དུས་ན་རྟོགས་བཞིན་པ་འདས་པ་ལ་སོགས་པའི་དོན་ཇི་ལྟར་གཞན་ཏེ། བྱེད་པ་པོའི་དུས་ལས་གཞན་པའི་དུས་གང་ཡིན་པ་དེ་ནི་དེ་སྐད་ཅེས་བྱའོ། །ལན་དུ་གཞན་གྱི་དུས་ཉིད་དུ་རྟོགས་པའི་ཕྱིར་རོ་ཞེས་བྱ་བའོ། །འདི་ཉིད་སྨྲས་པ་ནི་འདི་ལྟར་ཞེས་བྱ་བའོ། །སྐྱེས་བུ་གང་ལ་དེའི་ཚེ་ཞེས་བྱ་བ་དེའི་དུས་དང་འབྲེལ་བར་རམ། གཞན་གྱི་ཚེ་གཞན་གྱི་དུས་དང་འབྲེལ་བར་ངོ་བོ་གང་ཞིག་རིག་པའི་སྔོས་པོ་དེ་ནི་སྐྱེས་བུ་དེའི་ངོ་བོ་ཉིད་དུ། དེའི་དུས་དང་འབྲེལ་པའི་ངོ་བོ་ཉིད་ཡིན་གྱི། བྱེད་པ་པོའི་དུས་ཉིད་ནི་དོན་དེའི་མ་ཡིན་ནོ། །དུས་ནི་ཞེས་བྱ་བ་ནི་འཆད་པའོ། །དོན་གྱི་ཞེས་བྱ་བ་ནི་འདས་པ་ལ་སོགས་པའིའོ། །ཅིའི་ཕྱིར་བྱེད་པ་པོའི་དུས་དོན་གྱི་མ་ཡིན་སྙམ་ན། དུས་གཞན་གྱི་ཞེས་སྨོས་སོ། །རྟོགས་པ་ནི་འདས་པ་ལ་སོགས་པའི་གཞལ་བྱ་སྟེ་བྱེད་པ་པོའོ། །དུས་གཞན་གྱི་ཞེས་བྱ་བ་ནི་ལས་སོ། །གལ་ཏེ་བྱེད་པ་པོའི་དུས་ཉིད་ལས་འདས་པ་ལ་སོགས་པའི་དོན་མཐོང་པའི་ཕྱིར་ཇི་ལྟར་གཉིས་ཀྱི་དུས་ཐ་དད་པ་ཉིད་ཅིའི་ཕྱིར་སྙམ་ན། བྱེད་པ་པོ་ན་གསུངས་སོ། །རྟོགས་པར་བྱ་བ་ནི་འདས་པ་ལ་སོགས་པའི་དུས་སོ། །དེ་ཞེས་བྱ་བ་འདས་པ་ལ་སོགས་པའི་གཞལ་བྱའོ། །གཞན་དུ་ཞེས་བྱ་བ་བྱེད་པ་པོའི་དུས་སུའོ། །དེ་ལྟར་གཞལ་བྱ་ནི་དུས་གཞན་དང་འབྲེལ་པ་ཡིན་ལ། ལྟ་བ་པོ་ནི་ད་ལྟར་བ་དུས་དང་འབྲེལ་པ་ཡིན་ཏེ། རང་གི་རྒུའི་གཞན་གྱི་དབང་ཡིན་པའི་ཕྱིར་རོ་ཞེས་བརྗོད་པ་ཡིན་ནོ། །ད་ནི་ལྟ་བ་པོ་དང་བལྟ་བྱ་གཉི་ག་ད་ལྟར་བ་ཁོ་ན་ཡིན་ཏེ། ཏིང་ངེ་འཛིན་གྱི་གནས་སྐབས་སུ་མཐོང་བའི་ཕྱིར་རོ། །དུས་ཕྱིས་ད་ལྟ་བ་དང་གཞན་ཉིད་ཀྱིས་དུས་ཐ་དད་པ་ཉིད་ནི་རྣམ་པར་རྟོག་པས་གཞག་པ་ཡིན་ནོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །བྱེད་པ་པོ་ཡང་ཞེས་བྱ་བ་ནི་ཡང་གི་སྒྲ་ནི་གཞལ་བྱ་སྡུད་པའོ། །དེའི་དུས་ཉིད་དུ་ནི་རྟོགས་པའི་དུས་ཉིད་དུའོ། །ཕྱིས་ཞེས་བྱ་བ་ནི་ལངས་པའི་དུས་སུའོ། །དུས་གཞན་ཉིད་དུ་ཞེས་བྱ་བ་ནི་ལྟ་བ་པོ་ད་ལྟར་བྱུང་བ་ཉིད་དང༌། བལྟ་བར་བྱ་བ་འདས་པ་ཉིད་
དུའོ། །ཇི་ལྟར་བྱེད་པ་པོའི་དུས་གཞན་ཡིན་སྙམ་དུ་དོགས་ན་དུས་གཞན་ཉིད་སྔར་བརྗོད་པ་དྲན་པར་བརྗོད་པ་ནི། གཞན་ཉིད་དུ་ཞེས་བྱ་བ་དེ། གཞལ་བྱའི་དུས་ལས་སོ། །བཤད་ཟིན་ཏོ་ཞེས་བྱ་བ་ནི་ལ་ལྟར་བའི་དུས་ཉིད་ནི་ཞེས་བྱ་བ་ལ་སོགས་པས་སོ། །སྐབས་ཉེ་བར་སྡུད་པ་ནི། དེའི་ཕྱིར་ཞེས་བྱ་བ་ནི་འདས་པ་ལ་སོགས་པའི་གཞལ་བྱའོ། །དེའི་དུས་ཉིད་ནི་དེའི་ཚེ་འདི་ལྟར་བའི་དུས་དང་འབྲེལ་པ་ཉིད་དུའོ། །དེ་ལྟར་ཞེས་བྱ་བ་ནི་དེའི་ཚེ་འདི་ལྟར་བའི་དུས་དང་འབྲེལ་བ་ཉིད་དུའོ། །གལ་ཏེ་རྣལ་འབྱོར་པའི་ཐ་སྙད་ནི་བདག་གི་འདས་པ་ལ་སོགས་པ་དེ་ལྟར་རྟོགས་སོ་ཞེས་བྱ་བར་འགྱུར་བ་མ་ཡིན་ནམ། དེ་ཇི་ལྟར་བའི་དུས་ཉིད་ཇི་ལྟར་གཞལ་བྱ་མ་ཡིན་སྙམ་ན། དེ་ངས་དེང་ཞེས་བྱ་བ་ལ་སོགས་པ་གསུངས་སོ། །དེ་ལ་ཞེས་བྱ་བ་ནི་གཞལ་བྱའི་དུས་ཉིད་ལའོ། །ལྐོག་ཏུ་མ་གྱུར་པ་ཙམ་གྱི་ཡུལ་ཅན་ཡིན་པས་མངོན་སུམ་འཇུག་པ་མ་ཡིན་ནོ་ཞེས་བྱ་བའི་དོན་ཏོ། །གཞན་གྱིས་ཞེས་བྱ་བ་ནི་ཕ་ལ་སོགས་པས་སོ། །འདི་ཉིད་གསལ་བར་བྱེད་པ་ནི། །གང་ལ་ཞེས་བྱ་བ་ལ་སོགས་པ་སྟེ། ལྷ་སྦྱིན་གང་ལའོ། །དེས་མྱོང་བ་ཉིད་དུ་ཞེས་བྱ་བ་ནི་ལྷ་སྦྱིན་གྱིས་ཉམས་སུ་མྱོང་བར་བྱ་བ་ཉིད་དུའོ། །དེ་ལ་ཞེས་བྱ་ནི་ལྷ་སྦྱིན་གྱིས་སོ། རྣལ་འབྱོར་བའི་ཤེས་པ་ཅི་ལྟར་འཁྲུལ་པ་མ་ཡིན། ཇི་སྟེ་འཁྲུལ་པ་ཡིན་སྙམ་ན། །རྣལ་འབྱོར་པས་ནི་ཞེས་གསུངས་སོ། །གང་གི་ཕྱིར་ངེས་ཉམས་སུ་མྱོང་པ་ཉིད་དུ་ཞེས་འབྱུང་བར་འགྱུར་བ་ཅིའི་བུ་ད་ལྟར་རྣལ་འབྱོར་པས་ཡིན་གྱི་བུ་དང་ལྡན་པས་ནི་མ་ཡིན་པ་དེའི་ཕྱིར་འཁྲུལ་པ་ཁོ་ནའོ། །བུ་འབྱུང་བར་འགྱུར་བ་ཉིད་ཡིན་ན་ནི་དེ་དང་འབྲེལ་བའི་མཚན་ཉིད་ཀྱང་འབྱུང་བ་རང་གྱུར་བ་ཁོ་ནའོ། །དེས་ན་བུ་དང་ལྡན་པའི་མི་རུང་བ་མི་དམིགས་པ་ནི་དངོས་པོ་མེད་པའི་སྒྲུབ་པ་བྱེད་མ་ཡིན་ནོ། །རྣལ་འབྱོར་པ་ནི་རྗེས་སུ་དཔོག་པ་དང༌། རྟགས་ཀྱི་ཁྱད་པར་ཁོང་དུ་ཆུད་པའི་ཕྱིར་མ་ཁྱད་པར་མ་ལུས་པ་ངེས་པར་མངོན་སུམ་དན་ལྡན་པ་ཉིད་ཅེས་བརྗོད་པ་ན་ཇི་ལྟར་བྱ་བའོ། །བུ་ལ་སོགས་པའི་དོན་འབྱུང་པའི་དོན་འབྱུང་བར་འགྱུར་བའི་དུས་དང་ལྡན་པར་རྣལ་འབྱོར་བས་མཐོང་བ།
དེ་ལྟར་དེ་འབྱུང་བར་འགྱུར་བ་སྟོན་པ་ལ་སོགས་པའི་དུས་དང་ལྡན་པ། དེ་ལྟར་ནི་བུ་ལ་སོགས་པ་དེ་ལ་གནོད་པ་མེད་དེ་བུ་དང་ལྡན་པས་མི་གནོད་དོ། །འོན་ཏེ་རྣལ་འབྱོར་པས་ད་ལྟར་བ་དང་ལྡན་པར་མཐོང་ན་དེ་ཡང་བུ་དང་ལྡན་པས་མ་མཐོང་བའི་ཕྱིར་ན་ཇི་ལྟར་མི་གནོད་སྙམ་ན། དུས་དེ་ལྡན་ནི་ཞེས་གསུངས་སོ། །ད་ལྟར་བའི་རྣལ་འབྱོར་པ་དེས་མཐོང་བ་མེད་དོ། །དེས་ན་རྣལ་འབྱོར་པ་མ་ཡིན་པས། དེ་ལྟར་མ་རྟོགས་ཏེ་ན་ཡང་སྟེ། མ་འོངས་པའི་དུས་ཉིད་དུ་ལ་དམིགས་ཀྱང་གནོད་པའི་མཚན་ཉིད་ཀྱི་ཉེས་པ་མེད་དོ། །དེ་མི་རུང་བ་མི་དམིགས་པ་ཡིན་པའི་ཕྱིར་རོ། །བསྐལ་པ་རྣམས་ལ་ནི། མེད་པར་ངེས་པ་ཡོད་པ་མ་ཡིན་ཞེས་གསུངས་པའི་ཕྱིར་རོ། །ཡང་ན་བུ་ལ་ཕས་ད་ལྟར་བའི་དུས་དང་འབྲེལ་པ་ཉིད་དུ་མ་རྟོགས་ནའང་རྣལ་འབྱོར་བའི་ཤེས་པ་ལ་གནོད་པ་ཡོད་བ་མ་ཡིན་ནོ། །འབྱུང་བར་འགྱུར་བའི་དུས་དང་ལྡན་པའི་ཡུལ་ལ་གནོད་པ་མེད་པའི་ཕྱིར་རོ། །དེས་ནི་ཞེས་བྱ་བའི་རྣལ་འབྱོར་པས་སོ། །བུ་དང་ལྡན་པ་དེའི་བུ་དེའིའོ། །དེ་ལྟར་མ་རྟོགས་ཀྱང་ཞེས་བྱ་བ་ནི་སྔ་མ་དུ་བཤད་པར་བྱའོ། །དེའི་ཚེ་ཡང་ཞེས་བྱ་བ་ནི་སྟོན་པ་ལ་སོགས་པའི་དུས་སོ། །མ་རྟོགས་ན་ཞེས་བུ་དང་ལྔ་པས་ཞེས་བྱ་བ་སྐབས་ཡིན་ནོ། །དེའི་ཚེ་ཞེས་བྱ་བ་ཁོང་ནས་ཕྱུང་ལ་མ་རྟོགས་པ་དེས་ན་གནོད་པར་འགྱུར་རོ་ཞེས་སྦྱར་བར་བྱའོ། །འོན་ཏེ་ཇི་ལྟར་བྱ་བ་ལ་འབྱུང་བར་འགྱུར་བའི་དུས་སྟོན་པ་ལ་སོགས་པ་དང་འབྲེལ་བ་ཉིད་དུའོ། །དེས་ཞེས་བྱ་བ་ནི་རྣལ་འབྱོར་པས་སོ། །དེ་ཞེས་བྱ་བ་ནི་བུ་ལ་སོགས་པའི་དངོས་པོའི། །གཞན་གྱིས་ཀྱང་ཞེས་བྱ་བ་ནི་བུ་དང་ལྡན་པས་སོ། །དེ་ཞེས་བྱ་བ་ནི་བུའོ། །དེ་མ་མཐོང་བས་ནི་རྣལ་འབྱོར་ལས་གཞན་གྱིས་མ་རྟོགས་པས་སོ། །གལ་ཏེ་ཡང་ཐག་རིང་པོ་ན་གནས་པ་མ་ཡིན་པས་ཆུང་ངུ་དང་ཆེས་ཤིན་དུ་ཆུང་ངུ་ལ་སོགས་པའི་ཁྱད་པར་དང་ལྡན་པའི་དངོས་པོ་རྟོགས་པ་དེ་ལྟ་ན་ཡང་རིང་པོ་ན་གནས་པས་ནི་མ་ཡིན་ཏེ། རུང་བ་ཉེ་བ་ཉིད་མེད་བའི་ཕྱིར་རོ་ཞེས་སྟོན་པས་ལན་བརྗོད་པ་ནི་ཇི་ལྟར་ཞེས་བྱའོ། །གཞན་ཡང་ཞེས་བྱ་བ་ནི་རིང་པོར་གནས་པ་ཡང་ངོ༌། །མཐོང་ངམ་ཅི་སྟེ་མ་ཡིན་པ་
ཉིད་དོ། །ཡང་ན་གཅིག་གིས་མཐོང་བ་གཞན་གྱིས་མཐོང་ངོ་ཞེས་ངེས་པ་མ་ཡིན་ནོ་ཞེས་བརྗོད་པ་ནི་ཇི་ལྟར་ཞེས་བྱ་བའོ། །གཞན་གྱིས་ཞེས་བྱ་བ་ནི་རྒོད་ལ་སོགས་པས་སོ། །གཞན་ཡང་ཞེས་བྱ་བ་ནི་ཐག་རིང་པོ་ན་གནས་པ་བྱ་རོག་ལ་སོགས་པའོ། །དེ་བཞིན་དུ་ཇི་ལྟར་རྣལ་འབྱོར་པས་མཐོང་པ་དེ་བཞིན་དུ་རྣལ་འབྱོར་པ་ལས་གཞན་གྱིས་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཇི་ལྟར་རྣལ་འབྱོར་བ་ལ་འདས་པ་ལ་སོགས་པའི་དུས་དང་ལྡན་པའི་བུ་ཡོད་པ་དེ་བཞིན་དུ་རྣལ་འབྱོར་པ་ལས་གཞན་པ་ལ་ཡང་མ་ཡིན་ནམ། དེས་ན་ཅི་ལྟར་དེ་ལས་གཞན་གྱིས་མཐོང་སྙམ་ན། ཕྲ་མོ་ལ་སོགས་པ་ཞེས་གསུངས་སོ། །ཆུང་བ་དང་ཆེས་ཤིན་ཏུ་ཆུང་བ་ལ་སོགས་པ་ཡོད་པར་ཁྱད་པར་མེད་ཀྱང་ཐམས་ཅད་ཀྱིས་ནི་མི་མཐོང་གི་འོན་ཀྱང་གྲོག་མོ་ལ་སོགས་འགའ་ཞིག་ཁོ་ནས་ཡིན་ནོ། །ཅིའི་ཕྱིར་ཐམས་ཅད་ཀྱིས་མི་མཐོང་སྙམ་ན། གང་ལ་གཅིག་གིས་ཞེས་གསུངས་སོ། །ཤེས་བྱ་གང་ལ་གཅིག་གིས་ཤེས་པར་ནུས་པ་ཡོད་པའི་ཤེས་བྱ་དེ་ལ་གཞན་ལ་ཡང་ཤེས་པའི་ནུས་པ་དེ་ཉིད་ཡོད་པ་ནི་མ་ཡིན་ནོ། །དེས་ན་རྣལ་འབྱོར་པ་ནི་དབང་པོ་གསལ་བའི་ཕྱིར་དང༌། རྗེས་སུ་དཔག་པར་བྱ་པ་ཉིད་ཀྱིས་ཉེ་བ་ཡིན་པའི་ཕྱིར་མཐོང་བ་ཡིན་ནོ་ཞེས་དགོངས་པའོ། །འོ་ན་དེ་ཇི་ལྟར་མ་འོངས་པ་ཡིན་སྙམ་ན། རྣལ་འབྱོར་མིན་པས་ཞེས་བྱ་བའོ། །གལ་ཏེ་ཚུལ་འདི་དང་རྣམ་པ་གཞན་གྱིས་དབང་པོ་འདས་པ་ལ་སོགས་པའི་རྣམ་པར་གནས་པའི་།བསྟན་ཟི་ན་པ་ཁོ་ན་མ་ཡིན་ནམ། དེས་ན་ཅིའི་དོན་དུ་རྣམ་པ་གཞན་ཉེ་བར་མཚོན་པར་བྱེད་པ་ཉིད་དུ་འདི་ཉིད་དུ་འདི་ཉེ་བར་བཀོད་ཅེ་ན། ལོག་པར་རྟོག་པའི་ཡུལ་ཞེས་བྱ་བ་ནི་ད་ལྟར་བ་ཁོ་ན་ཉིད་དུ་བསྟན་པའི་དོན་དུའོ། །ལོག་པར་རྟོག་པ་དེ་ཉིད་སྟོན་པའི་དོན་དུ་དོགས་པ་བསུ་བ་ནི། འོན་ཏེ་ཡང་ཞེས་བྱ་བ་ལ་སོགས་པའོ། །ཐག་རིང་པོ་ན་གནས་པས་མི་མ་ཐོང་བ་ཉེ་བར་གནས་པ་མ་ཡིན་པ་ནི་འདས་པའམ་མ་འོངས་པར་འགྱུར་བ་ལ་ཡིན་ནོ། །ཇི་ལྟར་མ་འོངས་བ་ཉིད་ཡིན་ཞེས་བྱ་བ་ནི་ད་ལྟར་བ་ཁོ་ནའོ་ཞེས་བྱ་བའི་ཐ་ཚིག་གོ །ཕ་རོལ་པོ་ཉིད་ཀྱི་ད་ལྟར་བའི་མཚན་ཉིད་
བརྗོད་པ་ནི། གང་ཕྱིར་དམིགས་པ་ཡོད་པ་ཉིད། །ཅེས་བྱ་བའོ། །རྟོགས་པ་དང་མ་རྟོགས་པ་ནི་ཡོད་པ་དང་མེད་པ་དང༌། ད་ལྟར་བ་དང་གཞན་དག་ཡིན་ནོ་ཞེས་བྱ་བའི་དོན་ཏོ། །དངོས་པོ་ནི་འདས་པ་ལ་སོགས་པའི་དུས་ཉིད་ལ། རྣམ་པ་ཐམས་ཅད་དང་ལྡན་པའི་རྗེས་སུ་དཔོག་པས་ལྐོག་ཏུ་མ་གྱུར་པར་བྱེད་པ་ཡིན་ནོ། །ལྐོག་ཏུ་མ་གྱུར་པ་ཉིད་ནི་ད་ལྟར་པ་མ་ཡིན་ཏེ། ཤེས་པས་དམིགས་པ་དང་དུས་དང་འབྲེལ་བ་དག་ཐ་དད་པའི་ཕྱིར་རོ་ཞེས་བྱ་བའི་ཕྱོགས་འདི་ལ་ཡང་ཉེས་པ་བརྗོད་པར་འདོད་པས་དོགས་པ་བསུ་བ་ནི། ཅི་སྟེ་ཞེས་བྱ་པའོ། །དཔྱོད་པ་ལ་སོགས་པ་ཡང་དོན་གྱི་ཁྱད་པར་གྱི་དངོས་པོ་ལས་ཐ་དད་པའི་ཁྱད་པར་དེ་དུས་འགའ་ཡང་མེད་དེ་ཞེས་བརྗོད་པ་ནི་དངོས་པོ་ལ་ནི་ཐ་དད་པའི་ཞེས་གསུངས་སོ། །འགའ་ཞིག་ཉིད་ཅེས་བྱ་བ་ནི་ཉི་མ་ལ་སོགས་པ་རྒྱུ་བའི་ཁྱད་པར་ཉིད་དོ། །གལ་ཏེ་དུས་མེད་ཀྱང་འདས་པའི་དུས་ཉིད་ནི་མཐོང་བར་གྱུར་པ་ཡིན་ལ་མཐོང་བར་གྱུར་པ་ནི་མ་འོངས་པ། མཐོང་བ་བཞིན་པ་ནི་འདས་པ་ལ་ཡིན་པའི་ཕྱིར་འདས་པ་ལ་སོགས་པའི་རྣམ་པར་དབྱེ་བར་འགྱུར་རོ་སྙམ་ན། དེ་དག་ནི་ཞེས་སྨྲས་སོ། །རྣམ་པ་ཐམས་ཅད་མངོན་དུ་ཕྱེད་པའི་རྣལ་འབྱོར་པ་ལ་ནི་མཐོང་ཟིན་པ་དང་མཐོང་བར་འགྱུར་བ་སྲིད་པ་མ་ཡིན་ནོ་ཞེས་བྱ་བ་ནེ་ཉིད་གསལ་འདེབས་པ་ནི་སྟོན་སྩོགས་ལ་ནི་ཞེས་བྱ་བའོ། །རྣལ་འབྱོར་པས་ཇི་ལྟར་རྟོགས་པར་འགྱུར་ཏེ་མ་ཡིན་པ་ཁོ་ནའོ། །རྣལ་འབྱོར་པ་ལ་དེ་འདྲ་བའི་དབྱེ་བ་མེད་མོད། ཚུ་རོལ་མཐོང་པ་ལ་ལྟོས་ནས་ནི་འགྱུར་རོ་ཞེས་བྱ་བ་འདི། གལ་ཏེ་གཞན་གྱིས་དམིགས་མེད་ན། །ཞེས་བྱ་བ་འདིས་དོགས་པ་བསུ་ནས་ལན་འདེབས་པ་ནི་གཉིས་པོ་ཞེས་བྱ་བ་ཡིན་ཏེ། འདས་པ་དང་མ་འོངས་པ་གཉིས་པོའོ། །དེ་ལྟར་རང་གི་ཕྱོགས་པ་རྣམས་ཀྱིས་སྡར་བཤད་པ་མངོན་བར་འདོད་པ་ལ་སོགས་པར་རྟོགས་པར་བསྟན་ནས་རང་གི་འདོད་པ་གསུངས་པ་ནི། འདོད་པ་བརྗོད་པ་ཞེས་བྱ་བ་ཡིན་ནོ། །ཇི་ལྟར་ཞེས་བྱ་བ་ནི་འདས་པ་ལ་སོགས་པའོ། །དེ་བཞིན་ཞེས་བྱ་བ་ནི་འདས་པ་དང་མ་འོངས་པའི་དངོས་པོའོ། །གལ་ཏེ་དེ་རྗེས་སུ་དཔག་པས་
རྟོགས་པ་ན། དེ་ལྟར་འགྱུར་བ་ཡིན་གྱི་མངོན་སུམ་གྱིས་ནི་མ་ཡིན་ཏེ། ལྐོག་ཏུ་མ་གྱུར་པ་ཉིད་ལ་ནི་འདས་པ་ལ་སོགས་པ་མི་སྲིད་པའི་ཕྱིར་རོ་སྙམ་དུ་དོགས་ན། མངོན་སུམ་ཡང་ནི་ཞེས་གསུངས་སོ། །མངོན་སུམ་ཡང་རྟོགས་པ་ཡིན་ནོ་ཞེས་རྗེས་སུ་འཇུག་གོ །ཅིའི་ཕྱིར་སྙམ་ན། རྗེས་སུ་དཔག་པ་དེས་ཞེས་གསུངས་སོ། །གལ་ཏེ་གང་གིས་འདས་པ་ལ་སོགས་པ་འཛིན་པའི་རྗེས་སུ་དཔག་པས་བསྐྱེད་པའི་མངོན་སུམ་འདས་པ་ལ་སོགས་པ་འཛིན་པ་ཉིད་དོ་ཞེས་བརྗོད་པ། འདས་པའི་རྒྱུས་བསྐྱེད་པའི་འབྲས་བུ་འདས་པར་འགྱུར་རམ་ཅི་སྙམ་དུ་དོགས་ན་རྗེས་སུ་དཔག་པ་དེ་བསྐྱེད་པའི་མངོན་སུམ་ཉིད་ཅེས་སྨྲས་སོ། །ཇི་ལྟར་མངོན་སུམ་གྱི་མཐོང་བ་རྗེས་སུ་དཔག་པས་རྟོགས་པ་དེ་བཞིན་དུ་རྗེས་སུ་དཔག་པས་མཐོང་བ་ཡང་མངོན་སུམ་གྱིས་ཡིན་ནོ། །རྒྱུ་དག་འབྲས་བུ་དག་གི་ཚུལ་ནི་དེ་ལྟར་མ་ཡིན་ནོ། །དེས་ན་གང་ཞེས་བྱ་བ་ནི་རང་གི་ལུགས་ཉེ་བར་སྡུད་པའོ། །དེའི་ཕྱིར་སྡར་བརྗོད་པའི་འདས་པ་ལ་སོགས་པ་རྣམ་པར་འཇོག་པར་བྱེད་པའི་ཕྱོགས་ནི་རང་གི་ཕྱོགས་པ་རྣམས་ཀྱི་འདོད་པ་ཡིན་གྱི། བཤད་པ་མཛད་པ་ནི་མ་ཡིན་ནོ་ཞེས་ཤེས་པར་བྱའོ། །གལ་ཏེ་མངོན་སུམ་རྗེས་སུ་དཔག་པས་བསྐྱེད་པ་ཉིད་ནི། རྗེས་སུ་དཔག་པའི་ཕྱོགས་ཀྱི་ཆོས་ཉིད་དང་འབྲེལ་པ་འཛིན་པའི་རིམ་གྱིས་འགྱུར་བའི་ཕྱིར། རྣམ་གྲངས་ཀྱིས་འཇུག་པར་འགྱུར་རོ། །དེས་ན་ཅིག་ཅར་དངོས་པོ་དུ་མ་འཛིན་པར་བྱེད་པ་ཉིད་དུ་མི་འགྱུར་ཏེ། དེས་ན་ཐམས་ཅད་མཁྱེན་པ་ཉིད་སྲིད་པ་མ་ཡིན་ནོ་ཞེས་དོགས་པ་ནི། གལ་ཏ་མངོན་སུམ་ཞེས་བྱ་བ་ཡིན་ནོ། །རིམ་གྱིས་རྟོགས་པ་ཡང་གོམས་པར་རབ་ཏུ་འཕེལ་ན། སྒྲ་དོན་རྣམ་པར་དུ་མའི་བདག་ཉིད་ཅན་བསྟན་བཅོས་ཀྱི་རྣམ་པར་རྟོག་པ་བཞིན་དུ་རིམ་མ་ཡིན་པར་སྣང་བར་འགྱུར་རོ་ཞེས་བཤད་པ་ནི་དེ་ཤིན་ཏུ་གོམས་པ་ལས་བྱ་བའོ། །དཔེར་ན་གོམས་པ་ཕུལ་དུ་བྱུང་བ་དང་ལྡན་པའི་དུ་བ་ལས་མེ་རྟོགས་པ་ནི་ཕྱོགས་ཀྱི་ཆོས་ལ་སོགས་པ་འཛིན་པའི་རིམ་པ་ལ་ལྟོས་པ་མ་ཡིན་པ་དེ་བཞིན་དུ་འདས་པ་ལ་སོགས་པའི་དོན་རྗེས་སུ་དཔོག་པ་ཡང་གཅིག་ཁོ་ནའི་ཆོས་དོན་མཐའ་དག་འཛིན་
བར་འགྱུར་རོ། །དེས་ན་ངེས་བསྐྱེད་བའི་མངོན་སུམ་ཡང་གཅིག་གི་ཚེ་ཁོ་ན་མཐའ་མེད་པའི་དོན་འཛིན་པའི་ཕྱིར་ན་ཐམས་ཅད་མཁྱེན་པ་ཉིད་སྲིད་པ་ཡིན་ནོ། །རྟོགས་པ་ཞེས་བྱ་བ་ནི་རྗེས་སུ་དཔག་པས་སོ། །སྐྱོན་མེད་པ་ནི་ཐམས་ཅད་མཁྱེན་པ་ཉིད་མེད་པའི་མཚན་ཉིད་དོ། །གཞན་དག་གལ་ཏེ་ཐོག་མ་ཐ་མ་མེད་པའི་དངོས་པོ་ཁས་ལེན་ན་ནི་ཇི་ལྟར་རྟོགས། དེ་སྟེ་དེ་རྟོགས་ན་དངོས་པོ་ཐོག་མ་དང་ཐ་མ་མེད་པ་ཇི་ལྟར་ཡིན་ཞེས་སུན་འབྱིན་པ་བརྗོད་པ་ནི། གལ་ཏེ་ཐོག་མ་ཐ་མ་མེད་པ་ཞེས་བྱ་བའིའོ། །གྲུབ་པའི་མཐའ་ནི་གང་ཞིག་གཉི་གའི་སྐྱོན་ཡིན་ཞིང༌། ལན་ཡང་མཚུངས་པ་ན་ཞེས་བྱ་བ། དོན་འདྲ་བའི་དོན་ནི་སྤྱོད་པ་ན། གཅིག་ལ་བརྒལ་ཞིང་བརྟག་མི་བྱ། །ཞེས་བྱ་བའི་ཚུལ་བརྗོད་པ་ནི། ཐོག་མེད་གལ་ཏེ་ཞེས་བྱ་བའོ། །དེའི་ཚེ་རིག་བྱེད་དེ་ལས་སོ། །རྟོགས་པ་ནི་འཇུག་པར་བྱེད་པའི་ངེས་པར་སྦྱོར་བ་བྱེད་པ་ཉིད་དེ་དེ་ལ་འཛིན་པར་བྱེད་བའོ། །ཇི་ལྟར་ཞེས་བྱ་བ་ནི་ད་ལྟར་གྱི་དུས་ཙམ་གྱི་ཐོག་མ་དང་ཐ་མ་མེད་པ་ཉིད་དུ་འདྲི་བའོ། །དེ་ལ་གལ་ཏེ་ཐོག་མ་དང་ཐ་མ་མེད་པ་ཉིད་དུ་ཡིན་ན་དེའི་ཚེ་རིག་བྱེད་འདི་ནི་བདག་ངེས་པར་སྦྱོར་བ་བྱེད་པ་པོ་ཡིན་ནོ་ཞེས་བྱ་བ་ལ་སོགས་པའི་རང་བཞིན་ངེས་སྦྱོར་འཛིན་པར་བྱེད་པའི་རྟོགས་པ་རྣམས་ཡོངས་སུ་རྫོགས་པ་ཉིད་ཡོད་པ་མ་ཡིན་ནོ། །དེས་ན་རིག་བྱེད་ཀྱི་བརྗོད་པ་འགའ་ཡང་རྗེས་སུ་བསྒྲུབ་པར་བྱ་བ་མ་ཡིན་པར་འགྱུར་ཏེ། གཞན་གྱི་ཚེ་ཇི་སྐད་བརྗོད་པའི་རྟོགས་པ་མེད་ན་རིག་བྱེད་ཚད་མ་མ་ཡིན་པའི་ཕྱིར་རོ། །དེ་ལས་ཞེས་བྱ་བ་ནི་རིག་བྱེད་ལས་སོ། །ཕྱེད་ཕྱི་མ་འཆང་པ་ནི་ཐོག་མ་ངང་ཐ་མ་མེད་པ་ཉིད་དུའོ། །ཡོངས་སུ་རྫོགས་པ་མེད་པའི་ཕྱིར་རོ་ཞེས་བྱ་བ་ནི་རྟོགས་པའོ། །ཅི་ཡང་ཞེས་བྱ་བ་ནི་རིག་བྱེད་ཀྱི་བསྟན་པའོ། །ཅིའི་ཕྱིར་ཞེ་ན། གལ་ཏེ་ཞེས་བྱ་བའོ། །དེའི་ཚེ་ད་ལྟར་ཡང་རིག་བྱེད་ཚད་མ་མ་ཡིན་ནོ། །ད་ལྟར་བའི་དུས་ཙམ་དུ་ཞེས་བྱ་བའི་ཕྱོགས་སློང་བར་བྱེད་པ་ནི། གལ་ཏེ་ཞེས་བྱ་བའོ། །གཞན་གྱི་ཚེ་ཞེས་བྱ་བ་ནི་ད་ལྟར་བའི་དུས་ལས་སོ། །དེ་ལྟན་ཡང་ཞེས་བྱ་བ་ནི་རྟོགས་པ་མེད་པ་ན་ཡང་ངོ༌། །འཇུག་པར་བྱེད་པ་ནི་ངེས་པར་སྦྱོར་རོ། །ད་ལྟར་བ་ཞིན་དུ་གཞན་གྱི་ཚེ་ཡང་འཇུག་པར་བྱེད་པ་
བརྗོད་པ་ཉིད་དུ་མ་རྟོགས་ན། ཇི་སྲིད་ཡོད་པར་རིག་བྱེད་དོན་དང་འབྲེལ་བར་མི་འགྲུབ་པོ་ཞེས་བརྗོད་པ་ནི་དེ་མ་ཡིན་ཞེས་བྱ་བའོ། །འདི་ཞེས་བྱ་བ་ནི་རྟོགས་བཞིན་པ་ངེས་པར་སྦྱོར་བའི་མཚན་ཉིད་དོ། །གཞན་གྱི་ཚེ་ཞེས་བྱ་བ་ནི་སྔ་མ་དང་ཕྱི་མའི་དུས་དག་ཏུའོ། །འདིའི་ཞེས་བྱ་བ་ནི་རིག་བྱེད་ཀྱིའོ། །དེ་ལྟར་ག་ལ་ཡིན་ཏེ། རྟག་པ་ཉིད་ཀྱིས་གཏན་དུ་དེའི་དོན་ཅན་མ་ཡིན་པའི་ཕྱིར་མ་ཡིན་པ་ཁོ་ནའོ། །འོན་ཏེ་སྡར་དོན་འདི་དང་ལྡན་པ་ཉིད་དུ་དོན་ལ་ད་ལྟར་ནི་ངེས་པ་ཡིན་པ་དེས་ན་ཉེས་པ་འདི་མེད་དོ་སྙམ་ན། གལ་ཏེ་ཞེས་བྱ་བའོ། །གལ་ཏེ་སྔར་ཐེ་ཚོམ་ཟ་བའི་དོན་ཅན་ཡིན་ན། དེའི་ཚེ་ད་ལྟར་འང་ཡིན་ཏ་རྟག་པའི་ཕྱིར་རོ། །དེས་ན་སྔར་ཚད་མ་མ་ཡིན་པ་དེ་བཞིན་དུ་ད་ལྟར་ཡང་མ་ཡིན་པས་ཉེས་པ་ལས་འདས་པ་མེད་དོ། །འོ་ན་ཏེ་ཞེས་བྱ་བ་ནི་གཞན་གྱིའོ། །དེ་ལྟ་བུ་ཉིད་ནི་དོན་དེ་དང་ལྡན་པ་ཉིད་དོ། །དེས་ན་ད་ལྟར་ཡང་ཚད་མ་ཡིན་ནོ་སྙམ་དུ་བསམས་པའོ། །ལན་དུ་དེའི་ཞེས་བྱ་བ་སྟེ་སྔ་མའོ། །དེ་ལྟར་སྔ་མ་དང་ཕྱི་མའི་མཐའ་དག་དོན་དང་ལྡན་པར་རྟོགས་པ་ཡོངས་སུ་རྫོགས་པ་མེད་དོ་ཞེས་བརྗོད་པ་ཡིན་ནོ། །དེས་ན་ཞེས་བྱ་བ་ནི་དོན་དང་ལྡན་པ་ཉིད་དུ་རྟོགས་པ་ཡོངས་སུ་རྫོགས་པར་བྱེད་པའི་ཕྱིར་རོ། །གཅིག་ལ་ཞེས་བྱ་བ་ནི་སྔ་མའམ་ཕྱི་མ་ལའོ། །ཐེ་ཚོམ་ཟ་ན་ཞེས་བྱ་བ་ནི་ཅི་འདིའི་དོན་འདི་ཡིན་ནམ་གཞན་ཡིན་ཞེས་བྱ་བ་དེ་ལྟ་བུའི་རྣམ་པར་རོ། །གཞན་ལ་ཡང་ཞེས་བྱ་བ་ནི་གང་གི་ཚེ་དོན་རྟོགས་པ་དེའི་ཚེ་ཡང་ངོ༌། །ཡིད་བརྟན་དུ་མེད་པ་ནི་རེས་འགའ་དོན་རྟོགས་བཞིན་པ་འདི་དོན་མ་ཡིན་ནོ་ཞེས་བྱ་བར་འགྱུར་བའི་ཕྱིར་རིག་བྱེད་ཚད་མ་མ་ཡིན། ཐེ་ཚོམ་ཟ་བའི་དོན་ཅན་ཡིན་པའི་ཕྱིར་རོ། །ཅི་སྟེ་ཞེས་བྱ་བ་ནི་གཞན་གྱིའོ། །སྔ་མ་ཞེས་བྱ་བ་ནི་ད་ལྟར་བའི་དོན་རྟོགས་པ་ལས་སོ། །སྤྱིར་ཞེས་བྱ་བ་ནི་དུས་གསུམ་ཁྱབ་པའི་དོན་རྟོགས་པར་བྱེད་པ་ཉིད་དོ། །གཅིག་གི་ཚེ་ཉིད་ཅེས་བྱ་བ་ནི་ད་ལྟར་བའི་དོན་རྟོགས་པའི་དུས་ཉིད་ནའོ། །དེས་ན་དོན་དང་ལྡན་པ་རྟོགས་པ་ཡོངས་སུ་རྫོགས་པ་ཡིན་ནོ་སྙམ་དུ་སེམས་པའོ། །ལན་དུ་དེ་ལྟ་ཡིན་ན་ཞེས་བྱ་བའོ། །འདིར་འདི་ལྟར་བསམས་པ་ཡིན་ཏེ། རིག་བྱེད་ནི་ཐོག་མ་དང་ཐ་མ་
མེད་པ་ཉིད་ཀྱིས་དོན་དང་ལྡན་པ་ཡིན་པར་རྗེས་སུ་དཔག་པ་ལས་རྟོགས་པ་ཡིན་ནོ། །དེ་ལྟ་ན་ཡང་ཐོག་མ་དང་ཐ་མ་མེད་པ་ཉིད་ཀྱིས་རང་བཞིན་ཉམས་པ་མེད་པ་ཡིན་ནོ། །དེ་བཞིན་དུ་རྗེས་སུ་དཔག་པའམ། དེས་བསྐྱེད་པའི་མངོན་སུམ་གྱིས་སམ། ཁྱབ་པ་འཛིན་པར་བྱེད་པས་ཐོག་མ་དང་ཐ་མ་མེད་པའི་དངོས་པོ་རྟོགས་པ་ན་ཐོག་མ་དང་ཐ་མ་མེད་པ་ཉིད་ཉམས་པ་མ་ཡིན་པ་ཁོ་ནའོ། །གང་གི་ཕྱིར་དེ་ལྟ་ཡིན་པའི་ཕྱིར་ན། རྣམ་པ་ཐམས་ཅད་རྗེས་སུ་དཔོག་པ་ཞེས་བྱ་བ་ནི། རྣམ་པ་ཐམས་ཅད་རྗེས་སུ་དཔོག་པས་པ་སྐྱེད་པའི་ཤེས་པ་ལའོ། །གལ་ཏེ་དེ་ལྟར་ཐམས་ཅད་རིག་པ་ཡིན་དུ་ཆུག་མོད་དེ་ལྟ་ན་ཡང་ཐོག་མ་དང་ཐ་མ་མེད་པའི་དངོས་པོ་རིག་པ་ཇི་ལྟར་འགྱུར་ཞེས་གསུངས་པ་ནི་དེས་ན་ཞེས་བྱ་བའོ། །ཀྱང་གི་སྒྲས་ནི་རྗེས་སུ་དཔག་པས་རིག་པ་ཡང་མ་ཉམས་པ་མེད་དོ། །ཐོག་མ་དང་ཐ་མ་མེད་པ་ལ་མི་གནོད་པའི་ཕྱིར་རོ། །སྐབས་ཀྱི་དོན་སྡུད་པར་བྱེད་པ་ནི་དེའི་ཕྱིར་ཞེས་བྱ་བའོ། །དེ་དང་འབྲེལ་བ་ནི་རང་གི་རྒྱུད་དང་འབྲེལ་བའོ། །གཞན་པ་དག་ཀྱང་ཞེས་བྱ་བ་ནི་དེ་དང་འབྲེལ་བ་དང་འབྲེལ་པའོ། །དེའི་མཐུ་ལས་ཀྱང་ཞེས་བྱ་བ་ནི་འབྲས་བུའི་རབ་ཏུ་བྱེད་པ་སྣང་བའི་སྟོབས་ཀྱིས་སོ། །རྒྱུའི་དབྱེ་བ་ཡང་སྣང་བ་ཡིན་ནོ་ཞེས་འབྲེལ་ཏོ། །ཐམས་ཅད་གོམས་པ་ནི་ཡང་ནས་ཡང་རྣམ་པ་ཐམས་ཅད་རྗེས་སུ་དཔོག་པ་བྱང་བར་བྱས་པའོ། །རིག་བྱེད་ནི་ཐོག་མ་དང་ཐ་མ་མེད་པ་ཉིད་ཀྱིས་རེ་ཞི་ག་རྟོགས་པར་མི་བུས་པ་ཉིད་དོ། །སྐྱེས་བུ་ཕུལ་དུ་བྱུང་བ་མེད་པའི་ཕྱིར་རོ། །རྟོགས་སུ་ཟིན་ཀྱང་ཉེ་བར་མཁོ་བ་ཡང་ཅིའང་མེད་དོ་ཞེས་བཤད་པ་ནི་རིག་བྱེད་ནི་ཞེས་བྱ་བའོ། །ཐོག་མ་མེད་པ་ཉིད་དུ་ཡོངས་སུ་ཤེས་ཀྱང་ངོ༌། །ཐབས་མ་ཡིན་ནོ་ཞེས་བྱ་བ་ནི་དོན་དང་འབྲེལ་བ་ངོ་བོ་ཅན་མ་ཡིན་པའི་ཕྱིར་རོ། །སྔར་ཞེས་བྱ་བ་ནི་སྟོང་ཕྲག་ཕྱེད་དང་བཞི་པར་རོ། །གལ་ཏེ་ཡང་ཉེ་བར་བསྟན་པ་གཞན་དུ་བྱེད་པའི་རྒྱུ་མི་ཤེས་བའམ་ཆགས་པ་ལ་སོགས་པ་མེད་མོད་དེ་ལྟ་ན་ཡང་འདོད་ཆགས་དང་བྲལ་བ་རྣམས་ལ་ཉོན་མོངས་བ་ཅན་མ་ཡིན་པ་རིམས་ནད་དང་བྲལ་བའི་ལུས་ལ་བག་ཆགས་མི་མཐུན་པ་ནི་ཡོད་པ་ཁོ་ན་ཡིན་ལ། །ཏིང་ངེ་འཛིན་གྱི་གེགས་བཀྲེས་པ་ལ་སོགས་པ་ཡང་ཡོད་པ་ཡིན་ནོ་སྙམ་དུ་དོགས་པ་ནི་
གལ་ཏེ་ཞེས་བྱ་བའོ། །བག་ཆགས་མི་མཐུན་པ་ཡིན་ཡང་རིག་བྱེད་ལས་བཅོམ་ལྡན་འདས་ཁྱད་པར་དུ་བསྟན་པའི་ཕྱིར་རེ་ཞིག་རིག་བྱེད་ཀྱི་ཁྱད་བར་དུ་བཤད་པ་ནི་རིག་བྱེད་ལ་ནི་ཞེས་བྱ་བའོ། །ཐོག་མ་མེད་པ་ཉིད་ཀྱིས་ན་གཞན་དོན་འགའ་ཞིག་དང་འབྲེལ་བར་འཛིན་པ་མེད་པའི་ཕྱིར་རོ། །དེ་ཙམ་གྱིས་ནི་ཞེས་བྱ་བ་ནི་རྣམ་པར་བརྟག་པར་བྱ་བའི་དོན་སྣང་བ་ཙམ་གྱིས་སོ། །གཞན་ལ་ཡང་ཞེས་བྱ་བ་ནི་རིག་བྱེད་ལས་གཞན་པའི་ལུས་ལའོ། །མཐོང་བའི་ཕྱིར་རོ་ནི་རྣམ་པར་བརྟག་པར་བྱ་བའི་དོན་སྣང་བའོ། །གལ་ཏེ་རིག་བྱེད་དེ་ལྟ་ཡིན་མོད་དེ་ལྟ་ན་ཡང་འདི་ལས་བཅོམ་ལྡན་འདས་ཁྱད་པར་དུ་འཕགས་པ་ཅི་ཞིག་ཡོད་ན་གང་གིས་ཚད་མར་གྱུར་སྙམ་དུ་དོགས་ན་འདི་ལ་ནི་ཞེས་གསུངས་ཏེ། ཐམས་ཅད་རིག་པ་ལ་ནི་ག་ཞི་རྗེས་སུ་དཔག་པ་ཉིད་ཡིན་ནོ། །དེས་ན་དངོས་པོ་པའི་དོན་དན་འབྲེལ་པ་ཡོད་པར་ཤེས་པ་ཡིན་ནོ། དེ་ལྟར་འདིས་ནི་རང་ཉིད་དོན་དང་འབྲེལ་བའི་ཕྱིར་ན་བག་ཆགས་གེགས་བྱེད་པ་མ་ཡིན་ནོ་ཞེས་བརྗོད་པ་ཡིན་ནོ། །དེས་ནི་བཅོམ་ལྡན་འདས་ལ་སྲིད་པ་ཡང་མ་ཡིན་ནོ་ཞེས་གསུངས་པ་ནི་གཞན་ཡང་ཞེས་བྱ་བའོ། །དེས་ན་ཞེས་བྱ་བས་ནི་ཐབས་གོམས་པ་ཕུལ་དུ་བྱུང་བ་ལས་གྱུར་པའི་གསལ་བ་སྟོན་པའོ། །དེ་ནི་ཡོད་ཀྱང་རང་གི་དོན་དང་ལྡན་པའི་ཕྱིར་ཅིའི་དོན་དུ་འབད་སྙམ་ན་ཐུབ་ཆེན་ཞེས་གསུངས་སོ། །གཞན་གྱི་དོན་དུ་འཇུག་པ་གང་ལ་མངའ་བ་དེའིའོ། །གཞན་གྱི་དོན་གྱི་གེགས་ཡིན་པའི་ཕྱིར་ན་འདི་ནི་གདོན་མི་ཟ་བར་ཡང་བྱ་བ་ཁོ་ནའོ་ཞེས་བྱ་བའི་དོན་ཏོ། །ཁྱད་འདི་ཡིན་ཞེས་བྱ་བ་ནི་བསེ་རུ་ལ་སོགས་པ་སྟེ། རང་གི་དོན་དུ་འཇུག་པ་རང་སངས་རྒྱས་ལ་སོགས་པ་ལས་མི་མཐུན་པའི་ཁྱད་པར་རོ། །དེ་ལ་ཉེས་པ་མཐའ་དག་ཡོངས་སུ་ཤེས་པ་ཡོད་མོད་དེ་ཡོངས་བར་གོ །ཅི་ལྟར་འགྱུར་སྙམ་ན། སེམས་ཅན་གྱི་དོན་ལ་དགའ་བ་ལ་ནི་ཞེས་གསུངས་སོ། །ཉེས་པ་ནི་བག་ཆགས་ཀྱི་མཚན་ཉིད་དོ། །དེའི་ཕྱིར་ཞེས་བྱ་བ་ནི་གནོད་པ་བྱེད་པ་ཡིན་པའི་ཕྱིར་རོ། །དེ་ཞེས་བྱ་བ་ནི་ཉེས་པའོ། །བྲུ་བ་ཚ་བ་ལ་སོགས་པའི་སྡུག་བསྔལ་ཡང་བདག་དང་བདག་གི་བར་འཛིན་པའི་ཆགས་པའི་སྙིང་པོ་ཅན་གྱི་བག་ཆག་སྡང་ལྡན་པ་རྣམས་ལ་ཡིན་གྱི་དམིགས་པའི་ཚོགས་པ་ཙམ་ལ་སམ་ཡིན་ཏེ།
ཐམས་ཅད་ཀྱི་ཚེ་བདེ་བ་ལ་སོགས་པ་རྣམ་པ་གཅིག་ཏུ་ཐལ་བའི་ཕྱིར་རོ་ཞེས་བརྗོད་པ་ནི། བྲུ་བ་ལ་སོགས་པ་ཡང་ཞེས་བྱ་བའོ། །སོགས་པའི་སྒྲས་ནི་སྐོམ་པ་ལ་སོགས་པའོ། །ཕྱིན་ཅི་ལོག་ལ་གོམས་པར་བྱེད་པ་ཉིད་ལ་ཞེས་བྱ་བ་ནི་བདག་དང་བདག་གིར་འཛིན་པའི་ཆགས་པའི་སྙིང་པོ་ཅན་གྱི་བག་ཆགས་དང་ལྡན་པ་རྣམས་ལའམ། བྲུ་བ་ཚ་བ་ལ་སོགས་པ་ཟློག་པར་བྱེད་པ་མེད་པ་རྣམས་ཁོ་ན་ལ་འབྱུང་བ་ཡིན་ནོ། །གཞན་དུ་ནི་མ་ཡིན་ནོ་ཞེས་བྱ་བ་ནི་དེ་སྒོམ་པ་དང་བྲལ་བ་རྣམས་ལའོ། །འདི་ག་ལས་ཤེ་ན། འདི་ལྟར་ཞེས་གསུངས་སོ། །གང་གི་ཚེ་སྔོན་གྱི་སྟོན་པ། བཏུང་བ་དང་བཟའ་བ་གྱ་ནོམ་པ་ལ་སོགས་པས་བྱས་པ་དེ་དང་འབྲེལ་ཞིང་ལྡན་པ་དེའི་ཚེ་བཀྲེས་པ་དང་སྨན་པ་ལ་སོགས་པ་མི་སྲིང་བ་ཡིན་ནོ། །སྔོན་གྱི་སྟོན་པ་ཇི་ལྟར་ཞེ་ན། ལྷ་སོགས་ངོ་བོ་ཡིས་ཞེས་གསུངས་སོ། །གཟུགས་ན་སྤྱོད་པའི་ལྷ་ལ་སོགས་པར་སྐྱེས་པས་སོ། །དེ་ལྟར་དེ་དང་འབྲེལ་པར་ཅི་ལྟར་འགྱུར་སྙམ་ན། སྐྱེ་བ་དྲན་པའི་ཞེས་གསུངས་སོ། །བཀྲེས་པ་ལ་སོགས་པ་ནི་ས་བོན་དང་མྱུ་གུ་ལ་སོགས་པ་བཞིན་དུ་ཕྱིར་རོལ་གྱི་རྒྱུ་ཙམ་ལས་འབྱུང་བ་ཡང་མ་ཡིན་གྱི་འོན་ཀྱང་གོམས་པའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཅན་དེ་དང་འབྲེལ་པ་ཉིད་ཡིན་ནོ་ཞེས་བརྗོད་པ་ན། གཞན་ཡང་ཞེས་བྱ་བའོ། །ལན་གསུམ་ཟ་བའི་སྐྱེས་བུ་གང་ཡིན་པ་དེ་ནི་གོམས་པ་ལས་གཉིས་ཟ་བ་ལས་ཀྱང་བདེ་བར་གནས་པར་འགྱུར་རོ། གཉིས་ཟ་བ་ནི་ལན་ཅིག་ཅིག་ཅར་ཟོས་པས་ཀྱང་བདེ་བར་གནས་པ་འཐོབ་པར་འགྱུར་རོ། །གཏན་མི་འགྱུར་ཞེས་བྱ་བའི་སྐབས་ཀྱིས་བཅོ་ན་ལྡན་འདས་ལའོ། །ས་བོ་ན་དང་མྱུ་གུ་བཞིན་དུ་ཕྱི་རོལ་ཙམ་ལས་བྱུང་བ་ཡིན་ན་སྐྱོན་ཅི་ཡོང་སྙམ་ན། གལ་ཏེ་ཞེས་གསུངས་སོ། །བྲུ་བ་ལ་སོགས་པ་འདི་དངོས་པོ་ལ་རག་པ་ཡིན་ན་དེའི་ཚེ་གོམས་པས་བསྒྲུབས་པ་གོམས་པ་ལ་རག་ལས་པར་མི་འགྱུར་རོ། །གཞན་གྱི་དོན་ལ་འཇུག་པ་ལས་ཀྱང་འདིའི་ཇི་ལྟ་བ་ཡིན་གྱི་གོམས་པ་རྟོགས་པར་བྱ་བ་ཡིན་ནོ་ཞེས་མཇུག་བསྡུ་བའི་སྒོ་ནས་བརྗོད་པ་ནི་དེའི་ཕྱིར་ཞེས་བྱ་བའོ། །སྔོན་གྱི་སློབ་དཔོན་གྱི་ལུགས་དང་འགལ་བས་མན་དག་མེད་པ་ཉིང་དུ་
དོགས་པ་བསུ་བ་ནི། གལ་ཏེ་སློབ་དཔོན་གྱིས་ཞེས་བྱ་བའོ། །སྦྱོར་བ་ནི་ཐམས་ཅད་དེ་སྟོན་པ་ཉིད་ཡིན་ལ་ཐབས་གོམས་པ་ཡང་གཞན་ཡིན་པའི་ཕྱིར་འགལ་བ་ཡིན་ནོ་ཞེན། སྔོན་གྱི་སློབ་དཔོན་གྱི་ནི་ཐབས་གོམས་པ་འདི་ཉིད་ལ་ཉེ་བར་བཏགས་ནས་སྟོན་པར་བརྗོད་པ་ཡིན་ནོ་ཞེས་བཤད་པ་ནི་ཐབས་གོམས་པ་འདི་ཉིད་ཅེས་བྱ་བའོ། །འདི་ཉིད་ཅེས་བྱ་བའི་ངེས་པར་གཟུང་བས་ནི། ལུས་དང་དབང་པོ་ལ་སོགས་པ་བདག་ཏུ་ལྟ་བ་ཐབས་ཡིན་པའམ། བདག་ཁམས་གསུམ་པ་ལ་སྡུག་བསྔལ་བ་ལ་སྒོམ་པ་འདོར་བའི་རྒྱུ་ཡིན་པས་ན་ཐབས་ཡིན་ནོ་ཞེས་བྱ་བ་གཞན་གྱི་ལུགས་སེལ་བར་བྱེད་པ་ཡིན་ནོ། །འདི་ཇི་ལྟར་མི་རིགས་པ་དེ་ལྟར་ཡང་ཕྱིས་སྟོན་པར་འགྱུར་རོ། །ཐབས་གོམས་པ་འདི་ཉིད་ག་ལས་ཡིན་སྙམ་ན། གང་གི་ཕྱིར་སྟོན་པ་ཡིན་པས་སོ། །གལ་ཏེ་སྟོན་པ་ནི་འབྲས་བུ་ཡིན་གྱི་ཐབས་ནི་མ་ཡིན་ནོ་སྙམ་ན། དེ་དོན་ཕྱིར་ན་ཞེས་གསུངས་ཏེ། །སྟོན་པའི་དོན་ཡིན་པའི་ཕྱིར་རོ། །སྟོན་པའི་རྒྱུ་ཡིན་པའི་ཕྱིར་ན་འདི་ཉིད་ཐབས་གོམས་པ་ཡིན་གྱི་གཞན་གྱི་འདོད་པ་ནི་མ་ཡིན་ཏེ། དེའི་རྒྱུ་མ་ཡིན་པའི་ཕྱིར་རོ། །རྣམ་པར་དབྱེ་བ་འདི་ག་ལས་སྙམ་ན། གྲུབ་ལས་ཞེས་གསུང་ཏེ་བདེ་བར་གཤེགས་པ་ཉིད་ལས་སྔར་ཡོད་པའི་ཕྱིར་རོ། །གྲུབ་པའི་རྣ་བཞིན་སྟོན་པའི་སྒྲས་ཉེ་བར་གདགས་སུ་རུང་བ་ནི་འདི་ཁ་ཡིན་གྱི། གཞིན་ནི་མ་ཡིན་ནོ། །གལ་ཏེ་འདི་རྒྱུ་ཉིད་ཡིན་པས་ཀྱང་བསྒྲུབ་པར་བྱ་བ་ཁོ་ན་མ་ཡིན་ནམ་ཞེ་ན། གཉིས་པོ་འདི་ཇི་ལྟར་ནི་ཞེས་གསུངས་སོ། །གཉིས་པོ་འདི་ཇི་ལྟར་རྒྱུ་ཡིན་པ་དེ་ལྟར་ནི་དེ་མ་ཐག་ཏུ་བཤད་ཟིན་ཏོ། །བཤད་པར་ནི་གསལ་བ་ཁོ་ནའོ། །ཕྱེད་སྔ་མ་བཤད་ནས་ཕྱེད་ཕྱི་མ་བཤད་པའི་དོན་དུ་འདྲི་བ་ནི། དེའི་དོན་ཉིད་ག་ལས་ཤེ་ན་ཞེས་བྱ་བའོ། །ཐབས་གོམས་པ་སྟོན་པའི་དོན་ཡིན་པ་ཉིད་ཅིའི་ཕྱིར་ཞེས་བྱ་བ་ལ་སོགས་པར་བསྐངས་ནས་རྩ་བས་ལན་འདེབས་པ་ནི་དེ་ལས་ཞེས་བྱ་བའོ། །ཐབས་གོམས་པ་དེ་ལས་སོ། །འབྱུང་བའི་ཕྱིར་རོ་ཞེས་བྱ་བ་ནི་སྟོན་པ་སྐྱེ་བའི་ཕྱིར་རོ། །དེ་ཉིད་ལས་འབྱུང་བ་ཞེས་ཇི་ལྟར་ཤེས་སྙམ་ན། ཐབས་གོམས་པ་དང་བློ་གསལ་བ་དག་ལས་ཞེས་གསུངས་སོ། །སྟོན་
པ་ནི་བདེ་བར་གཤེགས་པ་ཉིད་དོ། །འདིས་ནི་གྲུབ་ལས་ཞེས་བྱ་བ་བཤད་པ་ཡིན་ནོ། །དེ་ཅི་སྔོན་ཞེས་བྱ་བ་ནི་སྟོན་པའི་རྒྱུ་ཡིན་པའི་ཕྱི་སྟོན་པ་ཡིན་གྱི་དེ་ཉིད་ནི་མ་ཡིན་གྱི་ཞེས་བྱ་བ་འདི་ཅིའི་ཕྱིར་ཞེས་བྱ་བའོ། །གཉིས་པོ་འདི་ནི་རྒྱུ་རུ་བཤད། །ཅེས་བྱ་བ་ནི་རྒྱུ་ཕུན་སུམ་ཚོགས་པའི་དབང་དུ་བྱས་ནས་འགྲོ་བ་ལ་ཕན་པར་བཞེད་པ་ཉིད་དང༌། སྟོན་པ་ཉིད་བཤད་པ་ཡིན་ནོ། །འབྲས་བུ་ཕུན་སུམ་ཚོགས་པའི་དབང་དུ་བྱས་པ་ནི་མ་ཡིན་ནོ། །དེས་ན་དངོས་མ་ཡིན་ནོ་ཞེས་བྱ་བར་ཤེས་པ་ཡིན་ནོ། །རྒྱུ་ཉིད་དུ་བཤད་པ་ལ་ཡང་སྒྲུབ་པར་བྱེད་པའི་དྲི་བ་ནི། འདི་རྒྱུ་བཤད་དོ་ཞེས་བྱ་བ་ཡང་ཞེས་བྱ་བའོ། །ལན་བཏབ་པ་ནི་དང་པོ་བརྗོད་པ་ཉིད་ཀྱི་ཕྱིར་རོ་ཞེས་བྱ་བའོ། །གང་གི་ཕྱིར་ན་ཡང་དག་ཅེས་བྱ་བ་ནི་ཚིགས་སུ་བཅད་པ་འདིར་གཉིས་པོ་འདི་དང་པོར་བརྗོད་པ་དེས་ན། དེ་རྒྱུར་བཤད་པ་ཡིན་ནོ། །དངོས་ཉིད་བདེ་བར་གཤེགས་པའི་རྒྱུ་ཅི་སྟེ་མ་ཡིན་སྙམ་ན་དངོས་ཀྱི་སྟོན་པ་ནི་ཞེས་གསུང་སོ། བདག་ཉིད་ནི་བདག་ཉིད་ཀྱི་སྒྲུབ་པར་བྱེད་པ་ཉིད་དུ་མི་རིགས་སོ་སྙམ་དུ་དོགས་སོ། །སྐབས་ཉེ་བར་སྡུད་པར་བྱེད་པ་ནི་དེའི་ཕྱིར་ཞེས་བྱ་བའོ། །གཞན་ནི་མ་ཡིན་ནོ་ཞེས་བྱ་བ་ནི་དངོས་ཀྱི་སྟོན་པ་ནིའོ། །བདེ་བར་གཤེགས་པ་ཉིད་ཀྱི་རང་བཞིན་བརྗོད་པ་ནི་རྒྱུ་སྤངས་ཞེས་བྱ་བ་སྟེ། སྡུག་བསྔལ་གྱི་རྒྱུའོ། །ཡོད་ཏན་གསུམ་ནི་ལེགས་པ་ཉིད་ལ་སོགས་པའི་ཁྱད་པར་གང་ལ་མངའ་བའོ། །དེ་ལ་རེ་ཞིག་ལེགས་པ་ཉིད་སྟོན་པ་ནི་སྤངས་པ་ནི། སྡུག་བསྔལ་གྱི་རྟེན་མ་ཡིན་ཏེ། དེས་ན་ལེགས་པ་ཡིན་ནོ། །གལ་ཏེ་དེར་གྱུར་ན་ལེགས་པར་འགྱུར་བ་ཞིག་ན་དེ་ཉིད་ཇི་ལྟར་སྙམ་དུ་དོགས་ན། དེ་ནི་བདག་མེད་པའམ་ཞེས་གཏན་ཚིགས་གཉིས་གསུངས་སོ། །གལ་ཏེ་སྡུག་བསྔལ་གྱི་རྟེན་མ་ཡིན་པ་ལས་སྤངས་པ་གཞན་ཡན་ལེགས་པ་ཉིད་མ་ཡིན་ནམ། དེས་ན་འདི་བརྗོད་པས་ཅི་ཞིག་བྱ་སྙམ་དུ་དོགས་ན། བདག་དང་བདག་གིར་འཛིན་ན་ནི། །ཞེས་གསུངས་སོ། །སྡུག་བསྔལ་གྱི་རྒྱུ་གང་ཡིན་པ་དེ་སྤངས་པ་དེ་སྡུག་བསྔལ་དང་བཅས་པ་ཡིན་ནོ། །དེས་ན་ལེགས་པ་མ་ཡིན་ནོ་སྙམ་དུ་དགོངས་པའོ། །གལ་ཏེ་བདག་ཏུ་འཛིན་པ་ཡོད་ཀྱང་གཅིག་པུ་བདེ་བར་གནས་པ་མ་
ཡིན་ནམ། སྡུག་བསྔལ་གྱི་རྒྱུ་ནི་འདུ་འཛི་ཡིན་པའི་ཕྱིར་རོ་སྙམ་དུ་གཞན་སེམས་པའི་དོགས་པ་བསུ་ནས། བདག་དང་བདག་གི་བར་འཛིན་ན་ནི་ཞེས་གསུངས་སོ། །མ་འདྲེས་པ་ཡུལ་དང་བྲལ་བ་གཅིག་བུ་ནི་མི་ དགོས་ཏེ་དེ་ནི་གཉིས་པ ་འདོད་དོ་ཞེས་བྱ་བ་ལུགས་ཡིན་པའི་ཕྱིར་རོ། །ཅི་སྤངས་པ་ཐམས་ཅད་མཐོང་བ་ལས་འགྱུར་རམ་སྙམ་ན། མཐོང་བས་སྤང་བར་བྱ་བ་ཞེས་གསུངས་སོ། །གལ་ཏེ་སྦྱོར་བ་ཞེས་བྱ་བ་ཅི་ལ་བརྗོད་ན། གང་ལས་ཉོན་མོངས་པའི་ཚོགས་འོང་བ་ཡིན་སྙམ་དུ་དོགས་པ་བསུ་ནས། སྦྱོར་བ་ནི་གོམས་པ་སྟེ་ཞེས་གསུངས་སོ། །ཡུ་ཛ་ནི་ཏིང་འཛིན་ལ་བྱའོ་ཞེས་བྱ་བ་འདི་བཟུང་བའི་ཕྱིར་རོ། །སྦྱོར་བ་ནི་གོམས་པ་སྟེ་སྒོམ་པ་ཡིན་ལ། བསྒོམ་པས་ཡང་སྤང་བར་བྱ་བའི་ཚོགས་སོ་ཞེས་བྱ་བ་ནི་སྤོང་བ་ཞེས་འབྲེལ་ཏོ། །ཉོན་མོངས་པ་རྣམ་པ་གཉིས་ཏེ། མཐོང་བས་སྤང་བར་བྱ་བ་དང་བསྒོམ་པས་སྤང་བར་བྱ་བའོ། །དེ་ལ་མཐོང་བས་སྤང་བར་བྱ་བ་གང་ཡིན་པ་དེ་དག་ནི་མཐོང་བས་སྤོང་ལ། བསྒོམ་པས་སྤང་བར་བྱ་བ་གང་ཡིན་པ་དེ་དག་ནི་བསྒོམ་པའི་ལམ་གྱིས་སོ། །དེས་ན་མཐོང་བ་དང་སྦྱོར་བའི་སྒྲ་གཉིས་ནི་མཐོང་བ་དང་བསྒོམ་པའི་ལམ་རྗོད་པར་བྱེད་པ་ཡིན་པའི་ཕྱིར་ཟློས་པའི་དོགས་པ་མེད་དོ། །ཡང་ན་བདག་མེད་པ་མཐོང་བའམ་ཞེས་བྱ་བ་ནི་གཞན་གྱིས་སོ། །འདོད་པའི་བདག་དངོས་པོ་མེད་བརྗོད་པར་བྱེད་པ་ཡིན་པའི་ཕྱིར་ན་བདག་མེད་པ་མ་བསྡུས་པས་དེ་བསྟན་པའི་དོན་དུ་ཡང་སྦྱོར་བ་ནི་ཞེས་གསུངས་སོ། །ཕན་ཚུན་ལྡན་ཞེས་བྱ་བ་ནི་ཡུ་ཛི་ནི་ལྡན་པ་ལའོ་ཞེས་བྱ་བ་འདི་བཟུང་བའི་ཕྱིར་རོ། །གཉིས་སུ་མེད་པའི་རང་བཞིན་དང༌། དེ་སྒྲུབ་པར་བྱེད་པའི་ཚད་མ་ནི་ཕྱིས་འཆད་པར་འགྱུར་རོ། །ཡང་ན་བདག་མེད་པ་མཐོང་བའམ་ཞེས་བྱ་བ་ནི་འཕགས་པ་ཉན་ཐོས་སོགས་པའི་བདག་མེད་པ་གཉིས་མངོན་དུ་བྱས་པ་བརྗོད་པ་ཡིན་ལ། བྱང་ཆུབ་སེམས་དཔའ་རྣམས་ནི་བདག་མེད་པ་དེ་ལ་སྦྱོར་བ་ལྡན་པ་སྟེ། ཤེས་པ་བྱེད་པ་ཡིན་གྱི། མངོན་དུ་བྱེད་པ་ནི་མ་ཡིན་ཏེ། སངས་རྒྱས་ཀྱི་ཆོས་རྣམས་མ་ཐོབ་བར་དུ་ཡོངས་སུ་མྱ་ངན་ལས་འདས་པར་ཐལ་བ་པའི་ཕྱིར་རོ། །འདིས་ནི་ཁྱབ་འཇུག་གི་འཇིག་རྟེན་དུ་སོང་བ་
ལས་ཐར་བར་འགྱུར་བ་ཡིན་ནོ་ཞེས་བྱ་བ་དེ་གསལ་བ་ཡིན་ནོ་ཞེས་བཤད་པ་ནི་རྣམ་པ་ཐམས་ཅད་དུ་ཞེས་བྱ་བའོ། །ཕྱིར་མི་ལྡོག་པའི་རང་བཞིན་མི་ཤེས་པས་འདྲི་བ་ནི་ཕྱིར་མི་ལྡོག་པ་དེ་གང་ཡིན་ཞེ་ན་ཞེས་བྱའོ། །འདིར་དེའི་རང་བཞིན་གྱི་ངོ་བོ་བཟློག་པ་དང་བཅད་པ་བཤད་པ་ནི་སྐྱེ་དང་ཞེས་བྱ་བའོ། །བདག་གི་བ་ལ་སོས་པར་ལྟ་བའི་སྙིང་པོ་ཅན་གྱི་ཀུན་དུ་རྟོག་པ་དེ་དག་སྤང་བ་ནི་སྔར་འབྱུང་བ་མ་ཡིན་ཏེ། ས་བོན་མེད་པའི་ཕྱིར་རོ་ཞེས་བྱ་བའི་དོན་ཏོ། །སྐྱོན་མེད་པའི་གནས་སྐབས་ནི་ཐར་བའི་གྲོང་ཁྱེར་དུ་སོན་པ་ཡིན་ནོ་ཞེས་འབྲེལ་ཏེ། སྐྱེ་བ་མེད་པ་ཡང་ཐར་པའི་གྲོང་ཁྱེར་དུ་སོན་པ་ཡིན་ནོ། །འོ་ན་ཇི་ལྟར་སླར་ལྡོག་ཡིན་སྙམ་ན་བཤད་ཟིན་པའི་དོན་ཉིད་གསལ་བར་བྱ་བའི་ཕྱིར་ཉེས་པ་དང་ཞེས་བྱ་བའོ། །ཉེས་པ་མེད་པའི་གནས་སྐབས་དེ་ཡང་ག་ལས་འགྱུར་བ་ཡིན་སྙམ་ན། བདག་དུ་ལྟ་བ་མེད་པའི་ཕྱིར་ཞེས་གསུངས་སོ། །སྐྱེ་བ་མེད་པ་ལ་ཡང་གཏན་ཚིགས་བརྗོད་པ་ནི་ཉོན་མོངས་པ་མེད་པའི་ཕྱིར་ཞེས་བྱ་བའོ། །དེས་ན་ཞེས་བྱ་བ་ནི་བདག་ཏུ་ལྟ་བ་དང་ཉོན་མོངས་བ་མེད་པས་སོ། །གལ་ཏེ་བདག་ཏུ་ལྟ་བ་ལ་སོགས་པ་མེད་ཀྱང་ལས་མ་ཟད་པའི་ཕྱིར་ན་ཅི་ལྟར་སླར་མི་ལྡོག་པ་ཡིན་སྙམ་ན། སྐྱེ་བ་ནི་གཉིས་ལ་རག་ལས་པའི་ཕྱིར་ལས་ཡོད་པས་འབྱུང་བར་ཇི་ལྟར་འགྱུར་ཞེས་བྱ་བའི་དོན་ཏོ། །གལ་ཏེ་བདག་དང་བདག་གི་རང་གི་ངོ་བོས་མཐོང་བ་ནི་འདོད་ཆགས་ལ་སོགས་པའི་རྒྱུ་མ་ཡིན་གྱི། འོན་ཀྱང་བདེ་བསྒྲུབ་པར་བྱེད་པ་ལ་སོགས་པར་ཤེས་པས་སམ། ཆགས་པའི་ཡུལ་ཉིད་ཀྱིས་སམ་ཆགས་པའི་སྙིང་པོ་ཅན་ཉིད་ཀྱིས་ཡིན་ནོ། །དེས་ན་དེ་ཉིད་སྤང་བར་བྱ་བ་ཡིན་གྱི། རང་གི་ངོ་བོ་མ་ཡིན་ནོ་སྙམ་དུ་དོགས་པ་བསུ་བས། བདག་ཏུ་ལྟ་བར་ཡང་མེད་པའི་ཕྱིར་ཞེས་གསུངས་སོ། །བདག་ཏུ་ལྟ་བ་མེད་པའི་ཕྱིར་ཏེ་ལྡོག་པས་གཞན་གང་ཞིག་ལས་ཉོན་མོངས་པ་འབྱུང་བར་འགྱུར། བདག་ཏུ་ལྟ་བ་ཁོ་ན་ལས་ཉོན་མོངས་པ་འབྱུང་བ་ཡིན་ནོ་ཞེས་བྱ་བའི་དོན་ཏོ། །བདག་ཏུ་ལྟ་བའི་བག་ཆགས་སྤངས་པའི་ཕྱིར། སླར་མི་གཤེགས་པ་ཞེས་བྱ་བའི་ཚིག་གི་ཤུས་ཀྱི་མདོ་མཛད་པས་བརྗོད་ཀྱི་དངོས་སུ་ནི་མ་ཡིན་ནོ་ཞེས་བརྗོད་དེ་ཞེས་བྱ་བ་ཡིན་ནོ། དེ་ཉིད་བརྗོད་པ་ནི་བདག་ལ་ཕན་འདོགས་ལས་ཞེས་བྱ་བའོ། །བདག་སོགས་
ཞེས་སོགས་ཀྱི་སྒྲས་ནི་བདག་གི་བསྡུའོ། །བདག་ལ་ཞེས་བྱ་བ་ནི་འཆད་པའོ། །བདག་ལ་ཕན་འདོགས་པ་དང་གནོད་པ་དེ་གཉིས་ལ་གོ་རིམས་བཞིན་དུ་ཆགས་པ་དང་ལྡན་པ་དག་ཡིན་ནོ། །གང་གིས་ཉེས་པ་རྣམས་ཀྱི་སྐབས་སུ་མི་འགྱུར་བ། གཏི་མུག་ཉིད་ཇི་ལྟར་མེད་སྙམ་ན། དེ་ནི་བདག་མེད་པའི་ཞེས་གསུངས་སོ། །ཆོས་བདག་མེད་པ་མཐོང་ན་ནི་གཏི་མུག་ཤིན་ཏུ་ཡང་ལྡོག་གོ་ཞེས་བཤད་པ་ནི་གཉིས་སུ་མེད་པ་ཞེས་བྱ་བའོ། །གལ་ཏེ་བདག་མེད་པ་ཅིག་ཤེས་མཐོང་བ་དག་གནོད་བྱེད་དུ་མཚུངས་པ་མ་ཡིན་ནམ། དེས་ན་ཇི་ལྟར་བདག་མེད་པར་མཐོང་བ་ཅིག་ཤོས་ཀྱི་གནོད་བྱེད་ཡིན་པ་དེ་བཞིན་དུ་མཐོང་བ་ཡང་ཡིན་ནོ། །དེས་ན་ཉེས་བ་རྣམས་སླར་ལྡོག་པ་ཡིན་ནོ་སྙམ་དུ་དོགས་ན། གལ་ཏེ་ཞེས་སྨྲས་སོ། །ཕྱིར་མི་ལྡོག་པ་མ་ཡིན་ནོ་ཞེས་བྱ་བ་ནི་ཕྱིར་ལྡོག་པ་ཉིད་དོ་ཞེས་བྱ་བའི་དོན་ཏོ། །དེས་ན་ཞེས་བྱ་བ་ནི་ཕྱིར་ལྡོག་པས་ནའོ། །འོན་ཏེ་ལུས་པ་གཞན་ལྡོག་པ་ཡིན་ནོ་སྙམ་ན། སླར་ལྡོག་པ་ལས་ལུས་པ་གཞན་ནི་མེད་དོ་ཞེས་གསུངས་སོ། །སླར་ལྡོག་པ་ཉིད་ལུས་པ་ཡིན་ནོ་ཞེས་བྱ་བའི་དོན་ཏོ། །ཡང་དག་པ་དང་ཡང་དག་པ་མ་ཡིན་པའི་ཡུལ་ཅན་ཉིད་ཀྱི་སྟོབས་མཚུངས་བ་ཉིད་མ་ཡིན་ནོ་ཞེས་ལན་འདེབས་པ་ནི། འདིར་འདི་སྐད་བརྗོད་དེ་ཞེས་བྱ་བའོ། །བདག་མེད་པར་མཐོང་བ་དེ་ནི་བདེན་པའི་ཕྱིར་དང༌། ཐ་དད་པའི་ཕྱིར་དང༌། བདག་ཉིད་ཡིན་པའི་ཕྱིར་གནོད་བྱེད་ཡིན་ནོ། །བདག་ཏུ་ལྟ་བ་ནི་ཅིག་ཤོས་ཀྱིས་མ་ཡིན་ཏེ། །དེ་ལས་ལྡོག་པ་ཡིན་པའི་ཕྱིར་རོ། །འོ་ན་ལུས་པ་གང་ཡིན་སྙམ་ན། ལུས་ངག་ཅེས་གསུངས་སོ། །ཕྱིན་ཅི་ལོག་ཏུ་གྱུར་པ་ཡིན་པའི་ཕྱིར་ཞེས་བྱ་བ་ནི་འགལ་བ་ཕྱིར་དེ་ལས་ལྡོག་པའི་ཕྱིར་ཞེས་བྱ་བ་ནི། བདེན་པ་ཉིད་དང་འགལ་བ་ཉིད་མེད་པའི་ཕྱིར་རོ། །དེ་ལྟར་བདེན་པ་དང་ཐ་དད་པའི་སྒྲ་དག་བཤད་ནས། བདག་ཉིད་ཀྱི་སྒྲ་འཆད་པ་ནི་ཐ་དད་པའི་བདག་ཉིད་ཀྱང་ཞེས་བྱ་བའོ། །བསྡུས་པ་ཡིན་པའི་ཕྱིར་ཐ་དད་པ་སྒྲ་དང་བཅད་ཏེ་རྗེས་སུ་བརྗོད་དོ། །དེ་ལ་བདེན་པ་དང་འགལ་བདག་ནི་ཚད་མ་དང་བཅས་པའི་ཕྱིར་ཉེ་བར་བསྟན་པ་ཡིན་ལ། བདག་ཉིད་ཡིན་པའི་ཕྱིར་ནི་འབད་པས་བཟློག་པར་བྱ་བ་ཡིན་པར་བསྟན་ཏོ། །འོན་ཏེ་བདག་ཏུ་ལྟ་བ་ཡང་ད་བཞིན་དུ་འགྱུར་བ་དེས་ན་གནོད་པར་
བྱེད་པ་ཡིན་ནོ་སྙམ་ན་བདག་ཏུ་ལྟ་བ་ནི་ཞེས་གསུངས་སོ། །ཅིའི་ཕྱིར་སྙམ་ན་བདག་མེད་པའི་ཕྱིར་ཏེ་ཞེས་གསུངས་སོ། །གལ་ཏེ་ཞེས་བྱ་བ་ནི་གཞན་གྱིའོ། །ཉོན་མོངས་པས་བྱས་པ་ནི་ལུས་དང་ངག་དང་སེམས་ཀྱི་གནས་ངན་ལེན་ཏོ། །ལན་ནི་མ་ཡིན་ཏེ་ཞེས་བྱ་བའོ། །སླར་ལྡོག་པ་མེད་པས་ཉོན་མོངས་པ་མེད་པའོ། །ཕྱིར་ན་མེད་པ་ཡོངས་སུ་གདུང་བ་མེད་པ་ཡིན་ཏེ། འཁོར་བའི་སྡུག་བསྔལ་གྱིས་ཡོངས་སུ་གདུང་བ་དང་འབྲལ་བའི་ཕྱིར་རོ། །དེ་ཡང་བག་ཆགས་ཙམ་དང་འབྲེལ་བ་ལས་ལུས་ལ་སོགས་པ་མི་མཐུན་པར་འགྱུར་བ་ཁོ་ནའོ་ཞེས་བྱ་བ་ནི་ལྷག་མའོ། །ལམ་བཤད་མི་གསལ་བས་ནི་རྒྱུ་དང་འབྲས་བུའི་ལམ་གྱི་རྣམ་པ་ཐམས་ཅད་སྟོན་པ་ལ་མི་གསལ་བ་མཚོན་པ་ཡིན་ནོ་ཞེས་གསུངས་པ་ནི་ལམ་གྱི་རྣམ་པ་དུ་མ་ཞེས་བྱ་བའོ། །རྣམ་པ་དང་མ་བརྗོད་པ་ལས་མི་གསལ་བ་ནི་ངེས་པར་བརྗོད་པ་ལས་ཏེ་མ་ལུས་པར་སྟོན་པ་ལ་མི་གསལ་བའོ། །འོན་ཞེས་བྱ་བ་ནི་གལ་ཏེ་དེ་ལྟར་ལུས་པ་སྲིད་ནའོ། །དེའི་ཚེ་གང་ལས་ཡོད་པ་ཡིན་ཏེ་མ་ཡིན་པ་ཉིད་དོ་ཞེས་བྱ་བའི་དོན་ཏོ། །ཇི་ལྟར་མི་ཡོང་སྙམ་ན་བདག་མེད་པས་ཞེས་སྨྲས་སོ། །སྤོང་བ་ལ་ནི་ཞེས་གནོད་པར་བྱེད་པའི་ཚད་མ་ཡང་ཡོད་པ་ཡིན་ཏེ་དེའི་ཕྱིར་ཡང་དེ་སྲིད་པ་མ་ཡིན་ནོ་ཞེས་བཤད་པས་ནི། ཇི་སྲིད་སྨྲ་བ་དེ་སྲིད་དུ་ནི་ཞེས་བྱ་བའོ། །ཁོ་བོ་ཅག་ལ་སོགས་པ་ལ་སྨྲ་བ་པོ་ཉིད་ནི་ཉེས་པ་དང་ལྡན་པས་ཁྱབ་པ་ཡིན་ཏེ་འདོད་ཆགས་དང་བྲལ་བ་རྡོའི་དུམ་བུ་ལས་ལྡོག་པའི་ཕྱིར་རོ། །ཡང་འབྲས་བུ་སྨྲ་བས་རྒྱུན་རྣམ་པར་རྟོག་པ་གོ་བར་བྱེད་དོ་ཞེས་སྨྲས་པ་ནི། །སྨྲ་བ་ནི་ཞེས་བྱ་བའོ། །རྣམ་པར་རྟོག་པ་ནི་རང་གི་རྣམ་པ་ལ་དོན་དུ་ལྡན་པར་ཞེ་ན་འཁྲུལ་པ་ཡིན་ཏེ། དེ་མ་ཡིན་ལ་དེར་འཛིན་པའི་ཕྱིར་རོ་སྙམ་ན། གལ་ཏེ་ཡང་ལམ་ཙམ་ལས་ལུས་པ་མ་སྤངས་པའི་དེ་ལྟ་ན་ཡང་དེ་ལ་གནས་པའི་ཁྱད་པར་གྱི་རྣམ་པ་བསྟན་པ་ཉིད་ཀྱི་ལམ་གཞན་སྦྱོར་བས་ལན་འདེབས་པ་ནི། གོམས་ཕྱིར་ཞེས་བྱ་བའོ། །གོམས་ཕྱིར་ཞེས་བྱ་བ་ནི་ཁྱད་པར་ནི་རྣམ་པའི་ཡུལ་ཅན་བསྒོམ་པའི་ལམ་ཞེས་བྱ་བ་ལས་སོ། །སྤང་བ་གང་ལ་ལུས་པ་མེད་པ་དེ་ནི་ལུས་སྤངས་པའོ། །འདི་ཞེས་བྱ་བ་ནི་སྨྲ་བ་བོ་ཉིད་དོ། །དེ་ཕྱིར་ཞེས་བྱ་བ་ནི་མི་མཐུན་པའི་ཕྱོགས་ལ་ལྡོག་པར་ཐེ་ཚོམས་ཟ་བའི་ཕྱིར་རོ། །དེའི་ཕྱིར་ཞེས་བྱ་བ་ནི་
གོམས་པ་ལས་སོ། །དེ་འགོག་བ་བྱེད་པའི་ཚད་མ་ཡང་མི་མཐུན་པའི་ཕྱོགས་ལ་ལྡོག་པར་ཐེ་ཚོམས་ཟ་བ་ཉིད་ཀྱིས་མ་ངེས་པ་ཡིན་ནོ་ཞེས་གསུངས་བ་ནི། སྨྲ་བ་ཙམ་གྱིས་ཞེས་བྱ་བའོ། །འཁྲུལ་བ་བསྒྲུབ་པ་ཡང་ཐུན་མོང་གི་མ་ངེས་པ་ཡིན་ནོ་ཞེས་བརྗོད་པ་ནི་ཚིག་རྣམ་པར་རྟོག་པ་བསྒྲུབ་པར་བྱ་བ་ལ་ཡང་ཞེས་གསུངས་སོ། །རྣམ་པར་རྟོག་པ་མེད་ཀྱང་ཤིན་ཏུ་གོམས་པ་ལས་ཚིག་སོ་སོ་དང་ངག་སོ་སོར་སྨྲ་བ་མཐོང་བའི་ཕྱིར་རོ། །དེ་དག་ནི་ཡོད་ཀྱང་མི་རིགས་པ་ཡང་མ་ཡིན་ཏེ། རྣམ་བར་རྟོག་པ་འདི་དག་སྐྱེ་བ་དང་འགག་བ་མི་རིགས་པ་ཡང་མ་ཡིན་ཏེ་ཞེས་བྱ་བའི་ཚུལ་གྱིས་སོ། །འཕེལ་བའི་ཞེས་བྱ་བ་གོམས་པའི་ཤུགས་ཀྱིས་སོ། །འདུལ་བྱད་དང་དེ་དེའི་བསམ་པ་དང༌། དེའི་ལམ་མངོན་དུ་གཟིགས་པ་ཉིད་ལས་རྣལ་འབྱོར་བའི་ཚིག་འཇུག་པ་ཡིན་ནོ། །ཅི་ལྟར་ཁོ་བོ་ཅང་གི་ཀ་བ་ལ་སོགས་པ་མཐོང་བ་ན་འདི་ཀ་བའོ་ཞེས་བརྗོད་པ་བཞིན་ནོ། །དེ་བརྗོད་པ་ནི་བཤད་ཟིན་པའི་ཞེས་བྱ་བའོ། །རྣམ་པ་ཐམས་ཅད་རྣམ་རྟོག་ནི། །ཞེས་བྱ་བ་ནི་དེས་བསྐྱེད་པའི་མངོན་སུམ་གྱི་ཤེས་པ་ཞེས་བྱ་བའི་དོན་ཏོ། །གལ་ཏེ་མི་གསལ་བར་སྣང་བ་མེད་པ་རྣམ་པ་ཐམས་ཅད་པའི་མངོན་སུམ་ལས་ཇི་ལྟར་ཚིག་འཇུག་སྙམ་ན། གསལ་བར་མི་སྣང་བ་ཉིད་ལས་ཞེས་བྱ་བའོ། །དེས་པར་བཀག་པའི་ཕྱིར་ན་གསལ་བར་སྣང་བ་ལས་ཀྱང་སྒྲ་འཇུག་པ་ཡིན་ནོ་ཞེས་བྱ་བའི་དོན་ཏོ། །གང་གིས་དེ་སྐད་བརྗོད་པ་དེའི་ཅི་ལྟར་མཐོང་བ་ཡོད་དམ་སྙམ་ན། མངོན་སུམ་གྱིས་མཐོང་ཞེས་གསུངས་སོ། །སྒྲའི་རྣམ་པ་བཤད་པ་ནི་འདི་ནི་ཀ་བ་ཡིན་ནོ་ཞེས་བྱ་བའོ། །གཞན་དུ་ཞེས་བྱ་བ་ནི་གལ་ཏེ་མི་གསལ་བར་སྣང་བ་ཁོ་ན་ལས་སྒྲ་འཇུག་ནའོ། །དེའི་ཚེ་ནི་འདི་འཇུག་པ་མེད་པར་འགྱུར་རོ། །འོན་ཏེ་འདིར་མི་གསལ་བར་སྣང་བ་ལས་སྒྲ་འཇུག་པ་ཡིན་ནོ་སྙམ་ན། འདིར་ནི་ཞེས་གསུངས་ཏེ་ཀ་བ་ལ་སོགས་པར་རོ། །གཞན་ལ་ཡང་ཞེས་བྱ་བ་ནི་རྣམ་བ་ཐམས་ཅད་མངོན་སུམ་དུ་མཐོང་བ་ལའོ། །དེ་ལྟར་རྣམ་པར་རྟོག་པར་མི་བྱེད་པ་ལ་ཡང་ཚིག་ཡོད་པའི་ཕྱིར་རྣམ་པར་རྟོག་པ་ལ་ངེས་པ་མ་ཡིན་ནོ། །དེས་ན་སྨྲ་བ་ནི་ཐུན་མོང་གི་མ་ངེས་པ་ཡིན་ནོ། །འདོད་ཆགས་ལ་སོགས་པ་དང་ལྡན་པ་ལ་ནི་ལྡོག་
པ་ལ་ཐེ་ཚོམ་ཟ་བ་མ་ཡིན་ཏེ། འགལ་བ་མེད་པའི་ཕྱིར་རོ་ཞེས་བྱ་བ་མཇུག་སྡུད་བ་ནི་དེའི་ཕྱིར་ཞེས་བྱ་བའོ། །ཉེས་པ་ནི་འདོད་ཆགས་ལ་སོགས་པ་དང་ལྡན་པའམ། རྣམ་པར་རྟོག་པར་དང་ལྡན་པའོ། །གལ་ཏེ་བདག་དང་བདག་གིར་ལྟ་བ་ནི་ཉོན་མོངས་པའི་རྒྱུ་མ་ཡིན་གྱི། འོན་ཀྱང་བདེ་བ་དང་གཞན་གྱི་སྒྲུབ་པར་བྱེད་པ་ཉིད་དུ་འཛིན་པ་དང་དྲན་པ་ཡིན་ནོ། །དེ་ནི་བདག་ལ་སོགས་པ་ལྟ་བ་སྤངས་པ་ལ་ཡང་ཉམས་བ་མེད་པའི་ཕྱིར་སེམས་ཀྱི་རྒྱུན་བཞིན་དུ་ཉོན་མོངས་པའི་རྒྱུན་ཡང་ཉམས་པ་མ་ཡིན་ནོ་ཞེས་བྱ་བར་དོགས་པ་ནི་གལ་ཏེ་ཞེས་བྱ་བའོ། །གཞན་ལས་ཞེས་བྱ་བ་ནི་བདེ་བ་ལ་སོགས་པའི་སྒྲུབ་པར་བྱེད་པ་འཛིན་པ་དང་དྲན་པའི་རྒྱུན་ལས་ཉེས་པ་རྣམ་ཟད་པ་ཡོད་པ་མ་ཡིན་ནོ། །དེས་ན་བདག་ལ་སོགས་པར་ལྟ་བ་སྤངས་པ་རྣམས་ལ་ཡང་མེད་པར་མ་གྲུབ་པོ། །ཅི་སྟེ་བདག་ལ་སོགས་པ་ལྟ་བ་སྤང་པ་ལ་ཉོན་མོངས་པའི་རྒྱུ་མ་དམིགས་སོ་སྙམ་དུ་དོགས་པ་བསུ་ནས། ཤིན་ཏུ་དབང་པོ་ལས་འདས་པའི་དོན་མ་དམིགས་པ་བཞིན་དུ་བལྟར་མི་རུང་བའི་ཡུལ་ཅན་གྱི་མི་དམིགས་བ་དེ་ནི་མེད་བ་སྒྲུབ་པར་བྱེད་པ་མ་ཡིན་ནོ་ཞེས་བརྗོད་པ་ནི། ཉེས་པ་མི་ཟད་པའི་རྒྱུ་ཞེས་བྱ་བའོ། །བདག་ལ་སོགས་བར་ལྟ་བ་སྤངས་པ་ལ་ཉེས་པའི་རྒྱུ་མ་དམིགས་ཀྱང་ཤེས་པ་མི་སྲིད་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །བདག་དང་མ་འབྲེལ་བའི་བདེ་བ་ལ་སོགས་པ་ཉིད་ཤེས་པ་ནི་འདོད་ཆགས་ལས་སོགས་པའི་རྒྱུ་མ་ཡིན་པ་ཁོ་ན་ཧ་ཅང་ཐལ་བར་འགྱུར་བའི་ཕྱིར་རོ་ཞེས་བརྗོད་པ་ནི་མ་མཐོང་བ་ཇི་ལྟར་རྟོགས་པར་བྱེད་ཅེས་བྱ་བ་ཡིན་ནོ། །འོན་ཇི་ལྟར་འཇིག་པ་མེད་པ་ཉིད་དུ་རྣམ་པར་རྟོག་སྙམ་ན་རྟག་ཉིད་ཕྱིར་རམ་ཞེས་གསུངས་སོ། མི་ཟད་བ་ཉིད་དུ་རྟོགས་པ་ནི་རྒྱུ་མཚན་ཡོད་པ་ལས་ཡིན་གྱི་རྒྱུ་མཚན་ཡང་འཇིག་པ་མེད་པའི་ཕྱིར་རྟག་པ་ཡིན་པའམ། མི་རྟག་པ་ཡིན་ཡང་རྒྱུན་གཅོད་པའི་ཐབས་མེད་པས་ན། སེམས་བཞིན་དུ་རྒྱུན་དུ་འཇུག་པའམ། དེ་གཅོད་པའི་ཐབས་ཡོད་ཀྱང་སོ་སོའི་སྐྱེ་བོ་བཞིན་དུ་མི་ཤེས་པའི་ཕྱིར་ཡིན་གྲང་ནའོ། །རྒྱུ་ཞེས་བྱ་བ་ནི་རྒྱུ་མཚན་དེ་རྟག་པ་ཉིད་ལ་སོས་པའོ། །དེ་ཡང་མ་གྲུབ་སྟེ། འདོད་ཆགས་ལ་སོས་བ་ནི་སྐྱེ་བ་དང་ལྡན་པ་ཡིན་པའི་ཕྱིར་རོ་ཞེས་བརྗོད་པ་ནི་རྒྱུ་ཡོད་ཕྱིར་དང་ཞེས་བྱ་བའོ། །རྒྱུ་མ་
ཚང་བ་མེད་པ་ལས་འབྱུང་བ་ཡང་གྲང་བ་བཞིན་དུ་རྒྱུའི་གཉེན་པོ་སྲིད་ན་རྩ་བ་དང་བཅས་པ་སྟེ་འཆད་པར་འགྱུར་རོ་ཞེས་བརྗོད་པ་ནི་རྒྱུའི་གཉེན་པོ་ཞེས་བྱ་བ་ཡིན་ནོ། །གཉེན་པོ་གོམས་པར་བྱས་པས་རྒྱུ་ཟད་པའི་ཕྱིར་རོ། །རྒྱུའི་རང་བཞིན་ཤེས་ན་ནི་དེ་དང་འགལ་བའི་རྒྱུའི་གཉེན་པོ་ཡང་མཁས་པས་ཤེས་པས་འགྱུར་རོ་ཞེས་བརྗོད་པ་ནི། རྒྱུའི་རང་བཞིན་ཤེས་པའི་ཞེས་བྱ་བའོ། །བཤད་བར་ནི་རྒྱུ་དང་ལྡན་པ་ཉིད་བྱེད་པ་པོ་དང་ལྡན་པར་འདོད་པ་ཡིན་ནོ། །དེ་ཞེས་བྱ་བ་ནི་ཉེས་བ་ཟས་པའི་རྒྱུའོ། །ཏིལ་མར་གཉེན་པོ་ཡིན་པ་བཞིན་ནོ་ཞེས་རྗེས་སུ་འཇུག་གོ །ཅིའི་ཕྱིར་གཉེན་པོ་ཡིན་སྙམ་ན། དྲོ་བ་དང་སྙམ་པ་ཉིད་ཀྱིས་ཞེས་གསུངས་སོ། །ཕྱི་རོལ་ནི་ཏིལ་མར་ལ་སོགས་པའོ། །ཕྱི་རོལ་གྱི་ནི་རླུང་ལ་སོགས་པའིའོ། །མཐུ་ལ་སོས་པའི་ཁྱད་པར་མེད་པ་ནི་སྨན་གྱི་རྫས་རྣམས་ཉམས་པའི་ཕྱིར་རོ། བདག་མེད་པར་ལྷ་བ་ནི་ཞེས་བྱ་བ་ནི་ཡུལ་གྱི་ལྷན་ཅིག་བྱེད་པ་ཙམ་ཡིན་པའི་ཕྱིར་ཉམས་མེད་པ་ཡིན་ནོ། །ལོག་པར་རྟོག་པ་མེད་པ་ཡིན་ནོ་ཞེས་བྱ་བ་ནི་བདག་མེད་པར་ལྟ་བ་ཉམས་པ་མེད་པ་ནི་བདག་ཏུ་ལྟ་བ་རྩ་བ་མེད་པ་ཅན་གྱི་གནོད་བྱེད་ཡིན་པའི་ཕྱིར། གལ་ཏེ་བཅོམ་ལྡན་འདས་བདེ་བར་གཤེགས་པ་ཡིན་ཡང་སྐྱེས་བུ་གཞན་བཞིན་དུ་རང་ཉིད་ཚད་མ་ཡིན་གྱི། བདག་ཅད་རིག་བྱེད་པ་རྣམས་ལ་ནི་མ་ཡིན་ནོ། །གཞན་གྱི་ཤེས་པ་གཞན་ལ་ཚད་མར་འགྱུར་བ་ནི་མ་ཡིན་ཏེ། ཉེ་བར་སྟོན་པར་བྱེད་པ་མ་ཡིན་པའི་ཕྱིར་རོ། །རིག་བྱེད་ནི་མི་ལ་སོགས་པ་བཞིན་དུ་དེ་དང་ལྡན་པ་ལ་ཚད་མ་ཡིན་ནོ་ཞེས་དོགས་པར་བྱེད་པ་ནི་གལ་ཏེ་སྨྲ་ཡང་ཞེས་བྱ་བའོ། །ཇི་སྟེ་གཞན་ཡང་ཚིག་གི་སྒོ་ནས་གཞན་ལ་ཚད་མ་ཡིན་ནོ་ཞེ་ན་བདེན་ཏེ། ཕྱིན་ཅི་མ་ལོག་པར་སྨྲ་ན་དེ་ལྟར་འགྱུར་བ་ཞིག་ན། བདེ་བར་གཤེགས་པ་ནི་མ་ཡིན་ཏེ། རིག་བྱེད་ཀྱི་ཚད་མས་གནོད་པའི་དོན་སྟོན་པའི་ཕྱིར་རོ་ཞེས་སྨྲས་པ་ནི་ཚད་མ་ནི་ཞེས་བྱ་བའོ། །ཕྱིན་ཅི་ལོག་ཅེས་བྱ་བ་ནི་རིག་བྱེད་དང་འགལ་ལོ། །རིག་བྱེད་ནི་ཚད་མ་མ་ཡིན་ཏེ་སྐྱོབ་པ་ཉིད་མེད་པས་དོར་བའི་ཡན་ལག་ཡིན་པའི་ཕྱིར་རོ། །བཅོམ་ལྡན་འདས་ནི་ཚད་མ་ཡིན་ཏེ་ཟློག་པའི་ཕྱིར་རོ། །ཉ་ཕྱིས་ལ་དངུལ་གྱི་ཤེས་པ་ཐོབ་པ་ཙམ་གྱིས་མི་འདོར་བ་མ་ཡིན་བས་དེ་བཞིན་དུ་རིག་བྱེད་
ཀྱང་ཡིན་ནོ་ཞེས་གསུངས་པ་ནི། བཅོམ་ལྡན་འདས་ནི་ཞེས་བྱ་བའོ། །བཅོམ་ལྡན་འདས་ལ་ནི་སྐྱོབ་པ་ཉིད་མངའ་བའི་ཕྱིར་ན་བཟློག་པའི་གནོད་པར་བྱེད་པ་ཡིན་ནོ་ཞེས་བརྗོད་པ་ནི། སྐྱོབ་པ་ཞེས་བྱ་བའོ། །དིའི་རྣམ་པར་འགྲེལ་པ་ནི། ཉིད་གཟིགས་སམ་གསུང་བ་ཞེས་བྱ་བའོ། །ཚིག་ནི་མཐོང་བ་སྔོན་དུ་འགྲོ་བ་ཅན་དུ་མཐོང་སྟེ། དེས་ན་བཅོམ་ལྡན་འདས་ཀྱང་དེ་བཞིན་དུ་འགྱུར་རོ། །གལ་ཏེ་སླུ་བའི་བསམ་པ་ཅན་ལ་ནི་གཞན་དུ་ཡང་མཐོང་བ་ཡིན་ནོ་སྙམ་ན། འབྲས་མེད་ཕྱིར་ན་ཞེས་བྱ་བའོ། ཐོབ་པར་བྱ་བ་མ་ལུས་པར་ཐོབ་པ་ནི་ཕྱིན་ཅི་ལོག་ཏུ་གསུང་བ་ལ་ དགོས་པ ་ཡོད་པ་མ་ཡིན་ནོ། །ཐོབ་པར་བྱ་བ་ཐམས་ཅད་མ་ཐོབ་པ་བདག་ཏུ་ལྟ་བ་ཅན་ནོ། །ཐོབ་པར་བྱ་བའི་དོན་དུ་ཙམ་ཡང་སྨྲ་བར་འགྱུར་ཏེ། ཚད་མ་ཕུན་སུམ་ཚོགས་པ་མ་ཡིན་པའི་ཕྱིར་རོ། །གལ་ཏེ་ཐོབ་བར་བྱ་བ་ཐོབ་པ་ཡིན་ཡང་འཕགས་པ་ཉན་ཐོས་བཞིན་དུ་ཉེས་པར་སྟོན་པར་མི་འགྱུར་བ་ཁོ་ན་སྟེ། དགོས་པ ་མེད་པའི་ཕྱིར་རོ། །སྙིང་རྗེ་ཅན་ཡང་ དགོས་པ ་མེད་པར་ནི་གཞན་གྱི་དོན་ཙམ་དུ་སྨྲ་བ་མ་ཡིན་ནོ་སྙམ་དུ་དོགས་ན། ཐུག་བརྩེར་ལྡན་ཕྱིར་ཞེས་གསུངས་སོ། །གཞན་གྱི་དོན་དུ་ཞེས་བྱ་བ་ནི། །རང་གི་དོགས་པ་མེད་ཀྱང་གཞན་གྱི་དོན་དོགས་པ། ཚིག་གི་བྱེད་པ་གང་ལ་ཡོད་པ་ཞེས་ཁྱད་པར་དུ་བྱས་པའི་ཕྱིར་གསུངས་པ་ཡིན་ནོ་ཞེས་འབྲེལ་ཏོ། །གལ་ཏེ་ཐུག་བརྩེ་བ་དང་ལྡན་ཡང་ཤེས་པར་མི་ནུས་པ་དབང་པོ་ལས་འདས་པ་མ་ཤེས་པ་ན་ཡང་རྨོངས་པ་ལས་ཉེ་བར་སྟོན་པ་མཐོང་བ་ཡིན་ནོ་སྙམ་དུ་དོགས་ན། ཐམས་ཅད་མཁྱེན་པའི་དོན་དུ་རྩོམ་པ་མཐའ་དག་ནི་རྩོམ་ཀུན་ནོ། །དེ་ལ་སྦྱོར་བ་ནི་གོམས་པ་སྟེ་དེའི་ཕྱིར་རོ། །ཡིད་གསལ་བའི་ཕྱིར་རོ་ཁྱད་པར་མ་ལུས་པ་ཡོངས་སུ་ཤེས་པའི་ཕྱིར་འདི་ལ་ཤེས་པར་མི་ནུས་པ་དབང་པོ་ལས་འདས་པའི་དོན་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རིག་བྱེད་ལ་ཡང་དེ་ལྟ་བུར་གྱུར་བའི་སྐྱོབ་པ་ཡོད་པར་འགྱུར་རོ་སྙམ་ན། གང་གིས་ཞེས་གསུངས་སོ། །གལ་ཏེ་གཞན་ལ་ཡང་ཇི་ལྟར་ཡིད་ཆེས་ཏེ། མི་བདེན་པ་བརྗོད་པའི་དོགས་པ་མི་ལྡོག་པའི་ཕྱིར་རོ་སྙམ་ན། གང་ལ་ཞེས་བྱ་བའོ། །དེས་ན་ཞེས་བྱ་བ་ནི་མངོན་པར་འདོད་པར་བྱ་བ་མེད་པས་སོ། །རྒྱུ་མེད་པའི་ཕྱིར་ཡང་ཕྱིན་ཅི་ལོག་གསུང་མི་སྲིད་དོ་ཞེས་གསུངས་
པ་ནི། བརྩེ་བ་དང་ལྡན་པ་ཡིན་པའི་ཕྱིར་ཞེས་བྱ་བའོ། །རྒྱུ་མེད་དོ་ཞེས་བྱ་བ་ནི་བརྩེ་བ་ཉིད་མེད་པའོ། །ཐུག་བརྩེ་ལྡན་ཕྱིར་རྩོམ་ཀུན་ཡང༌། གཞན་གྱི་དོན་དུ་སྦྱོར་ཕྱིར་རོ། །ཞེས་བྱ་བ་འདི་ཉེ་བར་སྟོན་པའི་རྒྱུ་བརྗོད་པ་ཡིན་ནོ་ཞེས་སྟོན་པ་ནི་ཐུགས་རྗེ་མངའ་བའི་ཕྱིར་དང་ཞེས་བྱ་བའོ། །འཕེན་པའི་ཤུས་ལས་ཞེས་བྱ་བ་ནི་གོམས་པ་ཕུལ་དུ་ཕྱིན་པ་ལས་རྣམ་པར་རྟོག་པ་མི་མཛད་བཞིན་དུ་སྟོན་པའོ། །དེ་ལྟར་བཅོམ་ལྡན་འདས་མི་སླུ་བ་དང་ལྡན་པའི་ཕྱིར་ན། མངོན་སུམ་དང་རྗེས་སུ་དཔག་པ་བཞིན་དུ་ཚད་མ་ཡིན་ནོ་ཞེས་གསུངས་པ་ནི། དེས་ན་ཞེས་བྱ་བའོ། །སྟོན་པ་ནི་འཆད་པ་སྟེ། དེ་ནི་འཕེན་པ་ལས་སྲིད་པ་ཡིན་པའི་ཕྱིར་རོ། །འབྲས་མེད་ཕྱིར་ན་ཞེས་བྱ་བ་ལ་སོགས་པའི་ཁྱད་པར་གསུམ་གྱི་རྣམ་པར་གཅད་པ་ནི་གོ་རིམས་བཞིན་ལུང་རྟོགས་པ་དང༌། འཕགས་པ་ཉན་ཐོས་དང་བྱང་ཆུབ་སེམས་དཔའ་རྣམས་སོ། །རང་གིས་གཟིགས་པའི་ལམ་གསུངས་པ་ནི་མུ་སྟེགས་བྱེད་གཞན་དང་ཐུན་མོང་ཡིན་པའི་ཕྱིར། དེ་ལས་ཚད་མར་མི་འགྱུར་རོ་ཞེས་ཕྱོགས་སྔ་མ་བརྗོད་པ་ནི་གལ་ཏེ་ཞེས་བྱ་བའོ། །ཕྱོགས་སྔ་མ་སྨྲ་བ་ཉིད་དོགས་བ་བསུ་བར་བྱེད་པ་ནི་འོན་ཏེ་དེ་དག་གི་ཞེས་གསུངས་ཏེ། མུ་སྟེགས་བྱེད་རྣམས་ཀྱིའོ། །ལན་འདེབས་པ་ནི་འོན་ཞེས་བྱ་བའོ། །འདི་ལ་ཡང་ཞེས་བྱ་བ་ནི་སངས་རྒྱས་ཀྱིས་བཤད་པའི་ལམ་མོ། །གྲུབ་པའི་མཐའ་སྨྲ་བས་འདི་ལ་བཤད་ཟིན་ཏེ་ཞེས་གསུངས་སོ། །ལམ་ནི་མཐོང་བ་དང་བསྒོམ་པའི་བདག་ཉིད་ཅན་ཡིན་ནོ། །དེ་དག་གི་ནི་ཞེས་བྱ་བ་ནི་དབང་ཕྱུག་དང་ཁྱབ་འཇུག་ལ་སོགས་པའོ། །བདག་མེད་པ་མཐོང་བ་ནི་མཐོང་ལམ་མོ། རིགས་པ་ནི་བསྒོམ་ལམ་སྟེ། དེ་དག་མེད་པས་ཚད་མ་མ་ཡིན་ནོ། །གལ་ཏེ་དེ་དག་ལ་རང་གིས་མཐོང་བ་ཡོད་པ་མ་ཡིན་ནམ། དེས་ན་དེ་དག་ཚད་མ་ཡིན་ནོ་སྙམ་ན། དེ་དག་ནི་ཞེས་གསུངས་སོ། །ཅིའི་ཕྱིར་ཞེ་སྣ། ཉེ་བར་བསྟན་པ་ཞེས་གསུངས་སོ། །འོ་ན་དེ་ལས་ཚད་མ་ཡིན་ལ་སུ་ཡིན་སྙམ་ན། བཅོམ་ལྡན་འདས་ནི་ཞེས་གསུང་གོ །དེའི་ཕྱིར་ཞེས་བྱ་བ་ནི། འདི་ཉིད་ཀྱིས་གཟིགས་པའི་ལམ་གསུངས་པའི་མཚན་ཉིད་ཀྱི་ཕྱིར་རོ། །སྐྱོབ་པའི་སྒྲའི་བཤད་པ་གཞན་གསུངས་པ་ནི་ཡང་ན་སྐྱོབ་
ཅེས་བྱ་བའོ། །འདི་ནི་ཐུན་མོང་མ་ཡིན་པའི་ཕྱིར་ན་གཞན་སྐྱོབ་པ་མ་ཡིན་ནོ་ཞེས་དགོངས་པའོ། །ཡང་ན་ཚིགས་སུ་བཅད་པ་དང་པོའི་ལུགས་དང་མཐུན་པར་བཤད་ནས་ལུགས་དང་མི་མཐུན་པར་བཤད་པའི་ཕྱིར། ར་ཞིག་སྐྱོབ་པའི་སྒྲའི་དོན་གསུངས་པ་ནི་ཡང་ན་སྐྱོབ་ཅེས་བྱ་བའོ།། འཆད་པ་ནི་ཡང་ན། བདེན་པ་ཞེས་བྱ་བའོ། །གལ་ཏེ་རིགས་པའི་བསྟན་བཅོས་ལ་སོགས་པར་ལུས་ལ་སོགས་པ་བདག་མེད་པ་ལ་བདག་ཏུ་ལྟ་བ་དང་ཐམས་ཅད་ཀྱི་ཐུན་མོངས་བ་གཟུགས་ལ་སོགས་པ་ཡང་དེའི་ཞེས་ཐུན་མོང་མ་ཡིན་པར་བདག་གིར་ལྟ་བར་སྡུག་བསྔལ་གྱི་རྒྱུ་ཡིན་ལ། དེ་ལས་བཟློག་པ་མཐོང་བ་ནི་བྱང་གྲོལ་གྱི་རྒྱུ་ཡིན་ནོ་ཞེས་བྱ་བ་ལ་སོགས་པ་བསྟན་པ་ཉིད་མ་ཡིན་ནམ། དེ་ཇི་ལྟར་ན་བདེན་པ་སྟོན་པ་ཐུན་མོངས་མ་ཡིན་པ་ཉིད་ཡིན་སྙམ་དུ་དོགས་པ་བསུ་ནས། གལ་ཏེ་ཡང་ཞེས་གསུངས་སོ། །སྟོན་པར་བྱེད་པ་ནི་གསལ་བར་བྱེད་པའོ། །གལ་ཏེ་ལམ་འདི་ཡང་དངོས་པོའི་གནས་ལུགས་ལ་རིགས་པས་མི་འཐད་པ་མ་ཡིན་ནམ། དེས་ན་ཁྱད་པར་དུ་འཕགས་པ་ཅི་ཞིག་ཡོད་ན་གང་གིས་ཞིག་ཡོད་ན་གང་གིས་འདི་ཁོ་ན་ལམ་ཡིན་སྙམ་ན། བདག་ཏུ་སྲ་བའི་ལྟ་ན་ཡང་ལུགས་ལ་སོགས་པ་ལ་བདག་མེད་པར་ལྟ་བ་ཁོ་ན་འདོད་ཆགས་ལ་སོགས་པའི་གཉེན་པོ་ཡིན་གྱི། བདག་ཏུ་ལྟ་བ་ནི་མ་ཡིན་ཏེ་འགལ་བ་མེད་པའི་ཕྱིར་རོ་ཞེས་སྟོན་པ་ནི། ལམ་འདི་ནི་ཞེས་གསུངས་སོ། །གལ་ཏེ་སྡུག་བསྔལ་ལ་མི་རྟག་པ་ཉིད་དང༌། སྡུག་བསྔལ་བ་ཉིད་དང་སྟོང་པ་ཉིད་དང༌། བདག་མེད་པ་ཉིད་ཅེས་བྱ་བའི་རྣམ་པ་བཞི་ཡོད་ཀྱང་སྡུག་བསྔལ་གྱི་རྣམ་པ་ཉིད་ཀྱིས་ཐ་སྙད་དུ་བྱེད་པ་ཅིའི་དོན་དུ་ཡིན་སྙམ་དུ་དོགས་ནས། འདི་དག་ནི་མིང་གིས་ཀྱང་ཞེས་གསུངས་ཏེ། གང་ལས་དེ་སྤང་བའི་ཕྱིར་ཐབས་ཚོལ་བའི་དེ་སྐྱོ་བར་འགྱུར་བ་ཉིད་དེ། དོན་དམ་པར་དེའི་རང་བཞིན་ཡིན་པ་འབའ་ཞིག་གིས་ཡིན་པར་ནི་མ་ཟད་པའོ། །ཇི་ལྟར་ཞེ་ན། དཔེར་ན་ཞེས་གསུངས་སོ། །ཀུན་གྱི་རྣམ་པར་བཤད་པ་ན། །རྒྱུ་དང་རྐྱེན་དང་རབ་ཏུ་སྐྱེ་བའི་རྣམ་པ་རྣམས་དང་འགོག་པའི་རྣམ་པར་བརྗོད་པར་ཞི་བ་དང་གྱ་ནོམ་པ་དང་ངེས་པར་འབྱུང་བ་རྣམས་དང༌། ལམ་གྱི་རྣམ་པ་བརྗོད་པ་ཡང་རིགས་པ་དང༌། སྒྲུབ་པ་དང་ངེས་པར་འབྱིན་པའི་རྣམ་པ་རྣམས་
བསྡུས་པ་ཡིན་ནོ། །དེ་ལ་རེ་ཞིག་སྡུག་བསྔལ་གྱི་བདེན་པ་བཤད་པ་ཡང༌། སྡུག་བསྔལ་ཞེས་བྱ་བ་ནི་བསྒྲུབ་པར་བྱ་བའོ། །འགྲོ་ཞིང་འཁོར་བས་འཁོར་བ་སྟེ། །སྐྱེ་བ་དང་འཆི་བའི་རྒྱུན་ནོ། །དེ་གང་ལ་ཡོད་པ་དེ་དག་ནི་འཁོར་བ་ཅན་ནོ། །འདི་ནི་གཏན་ཚིགས་སོ། །ཕུང་པོ་ཞེས་བྱ་བ་ནི་ཆོས་ཅན་ནོ། །འཁོར་བ་ཅན་ཉིད་ནི་ཇི་ལྟར་འགྲུབ་སྙམ་ན། གོམས་ལས་ཞེས་གསུངས་སོ། །འདུ་བྱེད་ཀྱིས་བསྡུས་པའི་ཡིད་ཀྱི་གོམས་པ་ལས་འདོད་ཆགས་ལ་སོགས་པ་གསལ་བ་ཁྱད་པར་དུ་གྱུར་པ་མཐོང་བའི་ཕྱིར་རོ། །གཞན་ལས་འབྱུང་བ་ནི་ངེས་པ་དེས་ཁྱད་པར་དུ་འཕགས་པ་དེ་མ་ཡིན་ནོ། །འདོད་རྒྱལ་དུ་གློ་བུར་བར་སྐྱེ་བ་མ་ཡིན་ཏེ། འབྲས་བུ་སྐྱེ་བ་འགལ་ཕྱིར་ཏེ་མེད་པའི་ཕྱིར་རོ། །རྒྱུ་མེད་པར་ནི་འབྲས་བུ་འབྱུང་བ་མ་ཡིན་པའི་ཕྱིར་ན། རྟག་ཏུ་མེད་པར་འགྱུར་རོ། །ཡང་ན་རྒྱུ་མེད་པར་ཏེ་རྒྱུའི་དངོས་པོ་མེད་པ་ལས་སྐྱེ་བ་འབྱུང་བ་འགལ་བའི་ཕྱིར་ཏེ་མེད་པའི་ཕྱིར་ཏེ་རྟག་ཏུ་ཡོད་པར་འགྱུར་རོ། །བཤད་པ་མཛད་པས་ནི་འཁོར་བ་ཅན་ཉིད་སྡུག་བསྔལ་བ་ཉིད་དང་འགལ་བ་ཡིན་ཏེ་བཟློག་པས་ཁྱབ་པའི་ཕྱིར་ཞེས་བཤད་པ་ནི་གལ་ཏེ་འདོད་ཆགས་ཞེས་བྱ་བའོ། །ཞེ་སྡང་ཡང་བདེ་བའི་རྒྱུ་ཡིན་པའི་ཕྱིར། བདེ་བ་ཉིད་ཡིན་ཞིང་ཞེས་བྱ་བར་རྗེས་སུ་འཇུག་གོ །འོ་ན་ལུས་ལ་སོགས་པ་ཇི་ལྟར་བདེ་བ་ཡིན་སྙམ་འདོད་ཆགས་དང་ཞེ་སྡང་ལ་སོགས་པའི་ཞེས་གསུངས་སོ། །དེ་ལྟ་བུ་ཉིད་ཅེས་བྱ་བ་ནི་བདེ་བའི་རྒྱུ་ཡིན་པའི་ཕྱིར་བདེ་བ་ཞེས་བྱ་བའོ། །དེས་ན་ཞེས་བྱ་བ་ནི་ཐམས་ཅད་བདེ་བའི་རྒྱུ་ཉིད་ཡིན་པས་ནའོ། །བསྟན་པ་ནི་སྡུག་བསྔལ་གྱི་བདེན་པ་བཤད་པའོ། །དེ་ལ་རེ་ཞིག་བདེ་བའི་རྣམ་པ་ནི་སྡུག་བསྔལ་གྱི་རྣམ་པ་དང་འགལ་བ་མ་ཡིན་ཏེ་ལྷན་ཅིག་གནས་པའི་ཕྱིར་རོ། །འོན་ཀྱང་མ་ངེས་པ་ཡིན་ཏེ། དུག་དང་བཅས་པའི་ཟས་བཞིན་དུ་སྡུག་བསྔལ་དུ་རོ་གཅིག་པའི་ཕྱིར་ན་བླང་བར་བྱ་བ་མ་ཡིན་ནོ་ཞེས་བཤད་པ་ནི་འཁོར་བའི་ལམ་དུ་ཞེས་བྱ་བའོ། །འོ་ན་ཇི་ལྟར་ཕུང་པོ་རྣམས་ལ་བདེ་བ་ཉིད་དུ་མཐོང་སྙམ་ན། མ་རིགས་པས་ནི་ཞེས་གསུངས་སོ། །གཞན་དུ་ཞེས་བྱ་བ་ནི་བདེ་བ་ཉིད་དུའོ། །འདིས་ནི་སྡུག་བསྔལ་གྱི་བདེན་པ་ཞེས་བྱ་བ་མེད་དོ་ཞེས་བྱ་བ་
བསལ་ཏེ། རྩོད་པ་ལྷག་མ་བསལ་བའི་དོན་དུ་དྲན་པར་བྱེད་པ་ནི། འདོད་ཆགས་ལ་སོགས་པའི་བདེ་བའོ་ཞེས་བྱ་བའོ། །ཕུང་པོ་རྣམས་ལ་བདེ་བའི་རྣམ་པ་ཡང་དངོས་པོ་མ་ཡིན་ཏེ། གོམས་པ་ལས་བྱུང་བའི་ཕྱིར་རོ། །རི་དགས་ཤོར་བ་ལ་སོགས་པ་བཞིན་ནོ་ཞེས་བྱ་བའི་དོན་ཅན་འདོད་ཆགས་ལ་སོགས་པ་བདེ་བའི་ཞེས་བྱ་བ་འཆད་པ་ནི་འདོད་ཆགས་གོམས་པའི་ཞེས་བྱ་བའོ། །དེ་མེད་མི་འབྱུང་ནི་འདོད་ཆགས་མེད་ན་མི་འབྱུང་བའོ། །ངོ་བོ་ཉིད་དུ་གྲུབ་མིན་ཞེས་བྱ་བ་ནི་ས་བོན་ལ་སོགས་པ་ལས་མྱུ་གུ་ལ་སོགས་པ་ལྟར་གོམས་པ་ལ་མ་ལྟོས་པར་མི་སྐྱེ་བའོ། །གལ་ཏེ་རྒྱུ་ལ་མི་ལྟོས་པའམ་རྟག་པ་ཡིན་ན་ནི་དེའི་ཚེ་རྣམ་པ་གཞན་མེད་པས་ན་དོར་བར་མི་ནུས་པ་དོན་དམ་པར་ཡང་འགྱུར་བ་ཞིག་གོ་ཞེས་བཤད་པ་ནི་གལ་ཏེ་ཞེས་བྱ་བའོ། །དེའི་ཚེ་ནི་འདོད་ཆགས་ལ་སོགས་པ་དོན་དམ་པར་ཡོད་དོ་ཞེས་བྱ་བ་འཐད་པ་ཞིག་ན་ཞེས་བྱ་བའོ། །འདོད་ཆགས་ལ་སོགས་པ་གོམས་པ་ལས་འབྱུང་བ་ཡིན་ན་ནི་ཡང་དག་པ་མ་ཡིན་པ་ཉིད་དོ་ཞེས་བརྗོད་པ་ནི། གང་གི་ཚེ་ཞེས་བྱ་བ་ནིའོ། །དེ་ཉིད་ལས་ཞེས་བྱ་བ་ནི་གོམས་པ་ཉིད་ལས་སོ། །གཏན་ཚིགས་དེའི་ཕྱིར་འདོད་ཆགས་ལ་སོགས་པ་ཡང་དག་པ་མ་ཡིན་པའོ། །ཀུན་དུ་རྟོག་པ་ཙམ་ཡིན་གྱི་དོན་དམ་པ་ནི་མ་ཡིན་པའོ། །དེ་ལྟ་ནའང་དེ་ཇི་ལྟར་འདི་སྙམ་ན། དེས་ན་གོམས་ཞེས་གསུངས་སོ། །རྒྱུ་དོར་བས་འབྲས་བུ་དོར་བར་སླ་བ་ཡིན་ནོ། །དེས་ན་ཞེས་བྱ་བ་གོམས་པ་ལ་རག་ལས་པའི་ཕྱིར་རོ། །དོན་དམ་པ་ཡིན་ན་ནི་གོམས་པ་ལ་རག་ལས་པ་ཉིད་མེད་པའི་ཕྱིར་ན་མི་སྤོང་བ་ཡིན་ནོ། །དེ་ལ་རག་ལས་པ་ཡིན་ན་ནི། དེ་མེད་པས་མེད་པའི་ཕྱིར་དོན་དམ་པར་ཡོད་པར་མི་འགྱུར་རོ་ཞེས་བྱ་བར་དགོངས་པའོ། །སེམས་མངོན་པར་དགའ་བའི་རང་བཞིན་ཡིད་ཀྱི་བདེ་བ་ཡང་གོམས་པ་ལས་བྱུང་བ་ཡིན་གྱི་དངོས་པོ་པ་ནི་མ་ཡིན་ནོ་ཞེས་བརྗོད་པ་ནི་སེམས་དགའ་བའི་ཞེས་བྱ་བའོ། །འོ་ན་གང་དུ་གོམས་པ་བསྒྲུབ་པར་བྱ་བ་ཡིན་སྙམ་ན། འཁོར་བའི་ཆོས་ཞེས་བྱ་བའོ། །གལ་ཏེ་ཁོ་ན་གོམས་པ་ཞེས་བྱ་བ་བཏང་སྙོམས་སུ་གནས་པའི་རྒྱུ་ཡིན་ལ། འདོད་པ་ཡང་བདེ་བ་ཉིད་ཡིན་གྱི་བཏང་སྙོམས་པ་ནི་མ་ཡིན་པ་མ་ཡིན་ནམ། དེས་ན་ཇི་ལྟར་འདོད་པ་མ་ཡིན་པའི་
རྒྱུ་ལ་གོམས་པ་བསྒྲུབ་པར་བྱ་སྙམ་ན། བདེ་བ་ཡང་གོམས་པ་ལས་འདོད་པ་ཡིན་ཏེ་ཞེས་གསུངས་སོ། །དེ་ཁོ་ན་གོམས་པ་ལས་ནི་སེམས་མངོན་པར་དགའ་བའི་མཚན་ཉིད་བཏང་སྙོམས་ཉིད་འདོད་པ་མཆོག་ཡིན་ཏེ། འདི་ནི་ལྡོག་པ་མེད་པའི་ཕྱིར་རོ། །འདི་ཐམས་ཅད་ནི་གདུང་བའི་གཉེན་པོ་ཡིན་པའི་ཕྱིར་བདེ་བར་མངོན་པར་རློམ་བ་ཡིན་གྱི་རང་གི་ངོ་བོས་ནི་མ་ཡིན་ནོ་ཞེས་བཤད་པ་ནི། དེ་ལྟར་ཡིན་དང་ཞེས་བྱ་བའོ། །བདེ་བ་དོན་དམ་པ་པར་མ་གྱུར་ནའོ། །གལ་ཏེ་གོམས་པ་ལས་འདོད་ཆགས་པའི་གདུང་བ་སྐྱེད་ནས་གདུང་བ་དེ་ཉེ་བར་ཞི་བའི་བདེ་བ་བསྐྱེད་པའི་དོན་དུ་བུད་མེད་དང་འཁྱུད་པ་ལ་སོགས་པ་བྱ་བ་ཡིན་ཏེ་ཉེས་པ་ཅི་ཞིག་ཏུ་འགྱུར་སྙམ་ན། བློ་བཟང་འགའ་ཡང་ཞེས་བྱ་བའོ། །གལ་ཏེ་དེ་ཁོ་ན་དང་གཞན་ལ་མངོན་པར་དགའ་བ་དག་གོམས་པ་ལས་བྱུང་བ་ཉིད་ཀྱི་དངོས་པོ་དུ་མ་ཡིན་པར་ཁྱད་མེད་ན་ཇི་ལྟར་དེ་ཁོ་ན་ཉིད་ལ་གོམས་པ་ཉིད་མཆོག་ཡིན་ནོ་ཞེས་བརྗོད་སྙམ་དུ་དོགས་པ་བསུ་ནས། གལ་ཏེ་ཞེས་བྱ་བའོ། །དེའི་ཚེ་དེ་ཉིད་ལ་དགའ་བའི་བློ་དེ་ནི་འགྱུར་བ་མེད་དེ། གནོད་པ་བྱེད་པ་མེད་པར་རྟག་པར་འགྱུར་རོ། །གཞན་ནི་མ་ཡིན་ཏེ། ཡུལ་མེད་པས་ལྡོག་པའི་ཕྱིར་རོ་ཞེས་བྱ་བའི་དོན་ཏོ། །དེ་ལྟར་ནི་ཅི་ཞིག་འགྲུབ་སྙམ་ན། དེ་ལས་ཞེས་གསུངས་ཏེ། འགྱུར་བ་མེད་པ་ལས་སོ། །དེ་ཉིད་མ་ཡིན་པ་ལ་མངོན་པར་དགའ་བའི་བདེ་བ་ནི་ལྡོག་པའི་ཆོས་ཅན་ཡིན་ནོ་ཞེས་གསུངས་པ་ནི་གལ་ཏེ་དེ་ཉིད་མ་ནི་དགའ་ན་ཞེས་གསུངས་སོ། །དེའི་ཚེ་དེ་ཉིད་མ་ཡིན་པ་ལོག་ན་བདེ་བ་དེ་ག་ལ་ཡོད་དེ་མེད་པ་ཉིད་དོ། །གལ་ཏེ་དེ་ལྟར་ན་དེ་ཉིད་ལོག་ནའམ་བདེ་བ་ལྡོག་པར་ཅི་སྟེ་མི་འགྱུར་སྙམ་ན་དེ་ཉིད་ཅེས་གསུངས་སོ། །དེའི་ཕྱིར་ཞེས་བྱ་བ་ནི་ལྡོག་བའི་ཆོས་ཅན་ཡིན་པའི་ཕྱིར་རོ། །གལ་ཏེ་སྡུག་བསྔལ་བདེ་བའི་རྒྱུ་ཡིན་པའི་ཕྱིར་བདེ་བ་ཡིན་ནོ་ཞེས་བརྗོད་པ་ཡིན་ན། བདེ་བ་གང་སྡུག་བསྔལ་བ་ཇི་ལྟར་འགྱུར་སྙམ་དུ་དོགས་ན། འདི་ལྟར་ཞེས་གསུངས་སོ། །བྲལ་བ་ན་ཞེས་བྱ་བ་ནི་བདེ་བའོ། །དེས་ན་ཞེས་བྱ་བ་ནི་བྲལ་བས་ནའོ། །དེ་ལྟ་ཡིན་དང་ཞེས་བྱ་བ་ནི་བདེ་བའམ་སྡུག་བསྔལ་བ་ཉིད་དུ་ཡིན་དང་ངོ༌། །གལ་ཏེ་དེ་ལྟར་ཕུང་པོ་རྣམས་སྡུག་བསྔལ་བར་འགྱུར་མོད། འཁོར་བ་ཅན་ཉིད་དུ་
གོ་ཇི་ལྟར་གྲུབ་སྙམ་ན། གང་གི་ཕྱིར་ཞེས་གསུངས་སོ། །གོམས་པ་ལས་ཞེས་བྱ་བ་ནི་བསལ་བ་ཞེས་བྱ་བ་སྐབས་ཡིན་ནོ། །ཕྱིར་ཞེས་བྱ་བ་ནི་གཏན་ཚིགས་ཏེ་སྡུག་བསྔལ་འབའ་ཞིག་ཏུ་ནི་མ་ཟད་དེ་འཁོར་བ་པ་ཡང་གྲུབ་པ་ཡིན་ནོ། །འདོད་རྒྱལ་ཉིད་མིན་ཏེ་ཞེས་བྱ་བའི་རྣམ་འགྲེལ་གྱི་ཆ་བཤད་པའི་ཕྱིར་ཕྱོགས་སྔ་མ་འགོད་པ་ནི་གལ་ཏེ་ཞེས་བྱ་བའོ། །རྣམ་པ་འགའ་ཞིག་ལྟར་ཞེས་བྱ་བ་ནི་རྒྱུ་མེད་པ་ཁོ་ནར་རོ། །གོམས་པ་ལས་རྒྱུ་གཞན་ལས་བསམ་སྟེ། ས་བོན་ལས་མྱུ་གུ་ལྟར་རོ། །དེས་ན་ཞེས་བྱ་བ་ནི་རྒྱུ་མེད་པ་ཉིད་དམ་རྒྱུ་གཞན་ཡིན་པས་ནའོ། །དོན་དམ་པ་ཉིད་ནི་ལྡོག་པ་མེད་པའི་ཆོས་ཉིད་དོ། །དེའི་ཕྱིར་ཞེས་བྱ་བ་ནི་དོན་དམ་པ་ཉིད་ཀྱི་ཕྱིར་རོ། །རྩོད་པ་གསུམ་པ་སྨྲས་པ་ནི་ཡང་ན་ཞེས་བྱ་བའོ། །སོགས་པའི་སྒྲས་ནི་ཡིད་བདེ་བ་ལ་སོགས་པ་གཟུང་ངོ༌། །བདེ་བ་ཉིད་དོ་ཞེས་བྱ་བ་ནི་སྡུག་བསྔལ་དོན་དམ་པ་ཉིད་མ་ཡིན་པའི་ཕྱིར་རོ། །དེ་ལ་རྩོད་པ་དང་པོ་སེལ་བ་བརྗོད་པ་ནི། འདི་ཡང་ཞེས་བྱ་བའོ། །བདེ་བ་ལ་སོགས་པ་འདོད་རྒྱལ་ཉིད་ནི་མ་ཡིན་ཏེ་ཞེས་འབྲེལ་ཏོ། །ཅིའི་ཕྱིར་སྙམ་ན། གང་གི་ཕྱིར་ཞེས་བྱ་བ་ལ་སོགས་པའོ། །གཉིས་པ་སེལ་བར་བྱེད་པ་ནི་བདེ་བ་ལ་སོགས་པ་ཞེས་བྱ་བའོ། །ལྷག་མ་སེལ་བ་ནི་གང་གིས་ཞེས་བྱ་བའོ། །འོ་ན་ཇི་ལྟར་སྡུག་བསྔལ་བ་ཡིན་སྙམ་ན། འོན་ཀྱང་ཞེས་བྱ་བའོ། །དེ་མེད་ཅེས་བྱ་བ་ནི་བདེ་བ་མེད་ནའོ། །ཐམས་ཅད་ལ་ཞེས་བྱ་བ་ནི་ཡུལ་ལའོ། །རང་བཞིན་ཉིད་དུ་ཞེས་བྱ་བ་ནི་འབད་པ་ལ་མི་ལྟོས་པ་ཁོ་ནར་རོ། །བཟློག་པ་ནི་མ་ཡིན་ནོ་ཞེས་བྱ་བ་ནི། སྡུག་བསྔལ་ནི་འབད་པས་བསྒྲུབ་པར་བྱ་བ་ཡིན་ལ། བདེ་བ་ནི་དེ་མེད་པ་ལས་རང་བཞིན་གྱིས་གྲུབ་པ་ཞེས་བྱ་བར་རོ། །དེས་ན་ཞེས་བྱ་བ་ནི་བཟློག་པ་མ་ཡིན་པས་ནའོ། །སྡུག་བསྔལ་ཡང་ཞེས་བྱ་བ་ནི་བདེ་བ་འབའ་ཞིག་ཏུ་མ་ཟད་པའོ། །དེས་ན་ཞེས་བྱ་བའི་བདེ་བ་གོམས་པས་བྱས་པ་ཡིན་པས་ནའོ། །བདེ་པ་ལོག་ན་སྡུག་བསྔལ་བ་ལོག་པ་ནི་འབད་པ་མེད་པར་འགྱུར་བའི་ཕྱིར་རོ་ཞེས་བྱ་བར་དགོངས་པའོ། །འོ་ན་སྡུག་བསྔལ་ནི་དོན་དམ་པ་ཉིད་ཡིན་ཏེ། དེས་ན་སྤང་བར་མི་ནུས་སོ་སྙམ་དུ་སེམས་ན། དོན་དམ་པར་ནི་ཞེས་གསུངས་སོ། །ཇི་ལྟར་ན་སྡུག་བསྔལ་དོན་དམ་པ་ཉིད་མ་
ཡིན་སྙམ་ན། དེ་ཡང་ཞེས་གསུངས་སོ། །སྡུག་བསྔལ་ཡང་ངོ༌། །དེ་ལ་ཞེས་བྱ་བ་ནི་བདེ་བ་མེད་པ་ལའོ། །སྐྲག་པ་གོམས་པ་ལས་ནི་སྐྱོ་བ་གོམས་པ་ལས་སོ། །འདི་ལྟར་འཇུག་པ་ནི་དེས་ན་དེ་ལ་སྐྲག་པའི་བག་ཆགས་ལས་སྡུག་བསྔལ་བ་ཡིན་ནོ་ཞེས་བྱ་བའོ། །འོ་ན་ཇི་ལྟར་སྡུག་དང་བདེ་བ་དང༌། གཉི་ག་དང་བྲལ་བ་ལ་ཡང་བདེ་བའི་བློར་འགྱུར་སྙམ་ན། དེས་ན་ཞེས་གསུངས་སོ། །དེ་མེད་པའི་ཕྱིར་ཞེས་བྱ་བ་ནི་གོམས་པ་ལས་མེད་པའི་ཕྱིར་རོ། །སྡུག་བསྔལ་དེ་ཉིད་དམ་ཞེས་བྱ་བ་ནི་མི་འདོད་པའོ། །སྡུག་བསྔལ་ཡང་མ་ཡིན་པ་བདེ་བ་ཡང་མ་ཡིན་པ་ལ་ཞེས་བྱ་བ་ནི་དེའི་ཚེ་བདེ་བར་བྱེད་པའི་ཕྱིར་སྡུག་བསྔལ་མ་ཡིན་ལ་ཡོངས་སུ་འགྱུར་བས་སྡུག་བསྔལ་བར་བྱེད་པའི་ཕྱིར་བདེ་བ་མ་ཡིན་པ་སྟེ་དེ་ལའོ། །བདེ་བའི་བློར་འགྱུར་བ་ཡིན་ཏེ། དཔེར་ན་དུག་གི་ཟན་ལ་སོགས་པ་བཞིན་ནོ། །ད་ནི་སྡུག་བསྔལ་གྱི་བློ་སྲིད་པར་སྟོན་པ་ནི། དེ་མེད་པའི་ཕྱིར་ཞེས་བྱ་བའོ། །བདེ་བ་གོམས་པའི་བག་ཆགས་དང་མི་ལྡན་པའི་ཕྱིར་རོ། །བདེ་བ་ཞེས་བྱ་བ་ནི་སྔར་འདོད་པ་ལའོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལས་ཞེས་བྱ་བ་ནི་འཕྲལ་དུ་སྡུག་བསྔལ་གྱི་རྒྱུ་ཡིན་པའི་ཕྱིར་ནི་བདེ་བ་མ་ཡིན་ལ། ཡོངས་སུ་གྱུར་པས་བདེ་བ་སྒྲུབ་པའི་ཕྱིར་ནི་སྡུག་བསྔལ་མ་ཡིན་པ་སྟེ། དེ་ལ་སྡུག་བསྔལ་གྱི་བློར་འགྱུར་བ་ཡིན་ཏེ། ཞིང་རྨོ་བ་ལ་སོགས་པ་བཞིན་ནོ། །དོན་དམ་པར་ནི་མ་ཡིན་ནོ་ཞེས་བྱ་བ་ནི། བདེ་བ་དང་སྡུག་བསྔལ་གྱི་བློ་དག་ཅེས་བྱ་བ་ནི་སྐབས་ཀྱིས་སོ། །སྡུག་བསྔལ་ནི་དེ་མེད་པ་ལས་ཞེས་བྱ་བ་འདིར་བདེ་བ་སྡུག་བསྔལ་གྱི་རྒྱུ་ཉིད་ཡོངས་སུ་དོར་བའི་ཡན་ལག་ཏུ་བརྗོད་པ་མཇུག་བསྡུ་བ་ནི་དེའི་ཕྱིར་ཞེས་བྱ་བའོ། །དེ་ཞེས་བྱ་བ་ནི་བདེ་བའོ། །དཔེ་སྟོན་པ་ནི། བུ་ལ་མངོན་པར་དགའ་བ་དང་ལྡན་པ་ནི་དེ་མེད་པས་སྡུག་བསྔལ་བར་འགྱུར་ཏེ། དེ་མེད་པ་ལ་སྐྲག་པ་གོམས་པ་ལས་སོ། །གོམས་པ་མེད་ན་ནི་སྡུག་བསྔལ་གྱི་རྒྱུའི་བུ་དེ་ཉིད་ལ་བདེ་བར་འགྱུར་རོ་ཞེས་གསུངས་པ་ནི། དེ་ཉིད་ཅེས་བྱ་བའོ། །དེས་ན་བདེ་བ་དང་སྡུག་བསྔལ་ནི་དོན་དམ་པ་མ་ཡིན་ནོ། །སྡུག་བསྔལ་ཡང་བར་འདོད་པས་ནི་བདེ་བ་ཉིད་དོར་བར་བྱ་བ་ཡིན་ནོ་ཞེས་བྱ་བའི་དོན་ཏོ། །
ལྡོག་པ་མེད་པའི་བདེ་བ་དང༌། དེའི་རྒྱུ་ཡང་གོམས་པར་བྱ་བ་ཡིན་ནོ། །སྡུག་བསྔལ་ནི་མ་ཡིན་ནོ་ཞེ་ན། རྟག་ཏུ་ཞེས་གསུངས་ཏེ། མེ་ཏོག་ཕྲེང་དང་ཙནྡན་ལ་སོགས་པ་འདོད་པ་དང་ངོ༌། །སྡུག་བསྔལ་དོན་དུ་ཞེས་བྱ་བ་ནི། ཡོངས་སུ་འགྱུར་བའི་སྡུག་བསྔལ་གྱི་དོན་དུའོ། །སྡུག་བསྔལ་གྱི་སྡུག་བསྔལ་ཉིད་བརྗོད་པ་ནི། སྡུག་བསྔལ་བསྐྱེད་ཅིང་ཞེས་བྱ་བའོ། །བསྐྱེད་པར་བྱ་བའི་བདེ་བས་བསྐྱེད་པའི་སྡུག་བསྔལ་བཟློག་པར་བྱ་བ་ཡིན་ནོ་ཞེས་བྱ་བ་ནི་རྟོག་པ་དང་ལྡན་པར་མི་འགྱུར་རོ་ཞེས་བྱ་བ་འདི་ལ་འཇིག་རྟེན་པའི་དཔེ་ནི་འདམ་རྫབ་ཅེས་བྱ་བའོ། །གང་ཞིག་སྐྱེས་བུའི་དོན་ནི་བདེ་བ་ཁོ་ན་ཡིན་གྱི་གཞན་ནི་མ་ཡིན་ལ། དེ་ཡང་སྡུག་བསྔལ་གྱིས་ཆོད་པ་ཉིད་ཐོབ་པར་བྱ་བ་ཡིན་ནོ་སྙམ་དུ་སེམས་པ་དེས་ནི་དམྱལ་བ་ལ་སོགས་པའི་སྡུག་བསྔལ་གྱི་ཡང་རྗེས་སུ་འཇུག་པར་བྱ་ དགོས་ཏེ་བདེ་པའི་ཕྱིར་རོ་ཞེས་གསུངས་པ ་ནི། འོན་ཏེ་བདེ་བ་ཞེས་བྱ་བའོ། །འདི་འདྲ་ཞེས་བྱ་བ་ནི་སྡུག་བསྔལ་གྱིས་ཆོད་པ་ཉིད་དོ། །གཞན་ནི་ཞེས་བྱ་བ་ནི་སྡུག་བསྔལ་གྱིས་མཆོད་པའོ། །ཅི་བདེ་བ་སྐྱེ་བར་མི་འགྱུར་རམ་སྟེ། འོན་ཀྱང་བདེ་བ་སྐྱེ་བར་འགྱུར་བ་ཁོ་ནའོ། །གལ་ཏེ་གང་གིས་གནས་སྐབས་དེ་སྤོང་བར་མི་འགྱུར་བར། དམྱལ་བ་རྣམས་ནི་རྟག་ཏུ་སྡུག་བསྔལ་ཡོད་པའི་ཕྱིར་ཇི་ལྟར་བདེ་བ་སྐྱེ་བར་འགྱུར་སྙམ་ན། གང་གི་ཕྱིར་ཞེས་གསུངས་སོ། །སྡུག་བསྔལ་ཆེན་པོ་ལ་ལྟོས་པའི་སྡུག་བསྔལ་གཞན་གང་ཡིན་པ་སྟེ་ཆུང་ངུ་ལ་ཡང་ཡིན་ཏེ། དེ་མེད་པ་འབའ་ཞིག་ལ་འགྱུར་བར་ནི་མ་ཟད་དོ། །བདེ་བར་འགྱུར་ཞེས་བྱ་བ་ནི་གསལ་བར་ཟད་དོ། །དེའི་ཕྱིར་དམྱལ་བ་རྣམས་ལ་ཡང་སྡུག་བསྔལ་ཆེན་པོ་ལས་གཞན་པའི་སྡུག་བསྔལ་ཡོད་པ་ན་བདེ་བར་འགྱུར་བ་ཁོ་ན་སྟེ། དེས་ན་དེའི་གནས་སྐབས་སྤོང་བར་མི་འགྱུར་རོ། །ཡང་ན་འབྱུང་བ་དང་མི་འབྱུང་བའི་དངོས་པོ་འཁོར་བ་པ་གང་ཡིན་པ་དེ་དག་ནི་ཕུང་པོ་ཕུང་པོའི་རང་བཞིན་ཡིན་ནོ། །ཡན་ལག་ཅན་ནི་མེད་པར་བཤད་ཟིན་ཏོ། །རྡུལ་ཕྲ་རབ་ཀྱང་སོ་སོ་མཐོང་བར་བྱ་བ་མ་ཡིན་ཀྱང་ཚོགས་པའི་གནས་སྐབས་ན་བལྟ་བར་བྱ་བ་ཉིད་ཡིན་ནོ། །རྟག་པ་ཇི་ལྟར་ཁྱད་པར་དུ་འགྱུར་ཞེས་བྱ་བ་ཡང་གཏམ་ཙམ་ཡིན་ཏེ། ཐམས་ཅད་དེའི་གནས་སྐབས་
མ་ཡིན་པའི་ཕྱིར་རོ། །རྣམ་པར་དབྱེ་བ་མེད་ན་རྣམ་པར་དབྱེ་བ་མི་འཐད་པའི་ཕྱིར་རྡུལ་ཕྲ་རབ་རྣམས་ནི་འཇིག་པ་མ་ཡིན་ཏེ། ཆ་མེད་པའི་ཕྱིར་རོ་སྙམ་ན་མ་ཡིན་ཏེ། སྒྲ་དང་བློ་ལ་སོགས་པ་ལྟར་ཆ་ཤས་མེད་པར་ཡང་འཇིག་པའི་ཕྱིར་རོ། །དབྱིབས་དང་ལྡན་པ་ཉིད་ཀྱིས་ཆ་ཤས་དང་བཅས་པ་ལ་ཡང་འགལ་བ་ཅི་ཞིག་ཡོད། དེའི་ཕྱིར་ཡན་ལག་ཅན་གྱི་རང་བཞིན་ནི་བདག་ལ་སོགས་པའི་རང་བཞིན་ཡང་མ་ཡིན་ནོ་ཞེས་བྱ་བ་ནི་སྟོན་པར་འགྱུར་རོ། །ཡང་སྡུག་བསྔལ་གྱི་བདེན་པ་ཞེས་བྱ་བ་ནི་འགའ་ཡང་མེད་དོ་ཞེས་བྱ་བའི་རྩོད་པ་གསལ་བའི་ཕྱིར་ན། སྡུག་བསྔལ་འཁོར་བ་ཅན་ཕུང་པོ་ཞེས་བྱ་བའི་རྣམ་འགྲེལ་རྣམ་པ་གཞན་དུ་འཆད་བ་ནི་ཡང་ཞེས་བྱ་བའོ། །འདུ་བྱེད་ཀྱང་སྡུག་བསྔལ་ནི་རྒྱུའི་གཞན་དབང་ཉིད་དོ། །དེ་མཚན་ཉིད་དེ་རང་བཞིན་དེ་ཉིད་གང་ལ་ཡོད་པ་ཞེས་ཚིག་རྣམ་པར་སྦྱོར་རོ། །འོ་ན་བདེ་བ་ཅི་འདྲ་བ་ཞིག་ཡིན་སྙམ་ན། བདེ་བ་ཡང་ཞེས་བྱ་བའོ། །དེ་ལས་བཟློག་པས་ནི་འདུ་བྱེད་ཀྱི་སྡུག་བསྔལ་ཉིད་ལས་བཟློག་པས་སོ། །སོགས་པའི་སྒྲས་ནི་དེ་དང་ཉེ་བ་ལ་སོགས་པ་གཟུང་ངོ༌། །འོ་ན་དོན་དམ་པར་གྱུར་པ་དོན་དམ་པར་འགྱུར་རོ་སྙམ་ན། དེའི་ཕྱིར་དེ་ནི་དོན་དམ་པ་ལས་མ་ཡིན་ནོ་ཞེས་ཀྱང་གྲང་ལ་ཞེས་གསུངས་སོ། །དོན་དམ་པའི་དོན་ནི་བདག་སྟེ། དེ་ལས་ནི་བདེ་བ་དེ་མ་ཡིན་ནོ། །གང་གིས་དེ་རྟག་བར་འགྱུར་བ་བདག་ནི་བདེ་བའི་འདུ་བ་ཅན་གྱི་རྒྱུ་མ་ཡིན་ནོ་ཞེས་བྱ་བའི་དོན་ཏོ། །འོ་ན་དེ་ག་ལས་ཡིན་སྙམ་ན་འོན་ཀྱང་ཞེས་གསུངས་སོ། །དེ་ལྟར་ཞེས་བྱ་བ་ནི་བདེ་བ་ལ་སོགས་པའི་རང་བཞིན་ནོ། །འོ་ན་འདོད་ཆགས་ལ་སོགས་པའི་རྣམ་པ་གཞན་དུ་ནི་ཡིན་ནོ་སྙམ་ན། འདོད་ཆགས་ལ་སོགས་ཞེས་གསུངས་སོ། །དེའི་རྩ་བ་ཅན་ནི་བདེ་བའི་རྒྱུ་ཅན་ནོ། །དོན་དམ་པའི་ཞེས་བྱ་བ་ནི་བདག་ལ་སོགས་པའོ། །རྒྱུ་མེད་པ་ཉིད་དུ་འགྱུར་རོ་ཞེས་བྱ་བ་ནི་སྐབས་ཀྱི་འདོད་ཆགས་ལ་སོགས་པའོ། །རྒྱུ་མེད་པ་ལ་སྐྱོན་ཅི་ཡོད་སྙམ་ན། རྒྱུ་མེད་པར་ཞེས་བྱ་བའོ། །དེའི་ཕྱིར་འདོད་ཆགས་ལ་སོགས་པ་ནི་གོམས་བའི་རྒྱུ་ཅན་ཉིད་ཡིན་ནོ། །གལ་ཏེ་འདོད་ཆགས་ལ་སོགས་པའི་རླུང་ལ་སོགས་པའི་ཉེས་བ་ལས་བྱུང་བ་ཉིད་ཡིན་ལ།
གོམས་པ་ལས་ནི་གསལ་བ་ཙམ་དུ་ཟད་ཀྱི་རང་གི་ངོ་བོ་ནི་མ་ཡིན་པ་མ་ཡིན་ན། རྒྱུ་ལ་སོགས་པ་མེད་ན་བོང་བ་ལ་སོགས་པའང་འདོད་ཆགས་ལ་སོགས་པ་མེད་པའི་ཕྱིར་རོ་ཞེས་བྱ་བར་དོགས་པ་ནི། འོན་ཏེ་ཡང་ཞེས་བྱའོ། །རྩ་བའི་ཉེས་བ་བཞིན་དུ་ཞེས་བྱ་བ་ནི་འདོད་ཆགས་ལ་སོགས་བའི་ཉེས་པ་བཞིན་དུའོ། །ལུས་ཀྱི་བདག་ཉིད་དུ་ཡོངས་སུ་གྱུར་པའམ། གཞན་པའི་འབྱུང་བ་རྣམས་ཀྱི་ཡོན་ཏན་འདོད་ཆགས་ལ་སོགས་བ་མ་ཡིན་ནོ་ཞེས་ནི་སྔར་བཤད་ཟིན་ཏོ། །དེ་ལྟར་ནི་རླུང་དང་མཁྲིས་པ་དང་བད་ཀན་གྱི་བདག་ཉིད་ཅན་དུ་ཞེས་བྱ་བ་ནི་འདོད་ཆགས་བྱུང་བའི་ཁྱད་པར་གྱི་ཡོངས་སུ་གྱུར་པ་ལུས་ཀྱི་རང་བཞིན། འདོད་ཆགས་ལ་སོགས་པའི་རྒྱུ་ཡིན་པ་རྣམས་གཞན་གྱི་འགོག་པའི་ཕྱིར་ཟློས་པ་མ་ཡིན་ནོ། །དུས་མིན་མགོ་སྐྱ་དཀར་ཤམ་པོ། །རབ་རྡུལ་གྲོན་མ་རྟོགས་པ་ཅན། །རྨི་ལམ་དུ་ཡང་གསལ་བ་ནི། །རྟོག་ལྡན་མཁྲིས་པའི་རང་བཞིན་མི། །ཞེས་བྱ་བ་མཁྲིས་པའི་རང་བཞིན་ནི་ཞེ་སྡང་ལ་འཁྲུལ་པ་ཡིན་ཏེ། རླུང་ལ་སོགས་པའི་རང་བཞིན་ལ་ཡང་ཡོད་པའི་ཕྱིར་རོ་ཞེས་ལྡོག་པ་མེད་པར་བརྗོད་པ་ནི་འཁྲུལ་ཕྱིར་ཞེས་བྱ་བའོ། །འབྲས་བུ་མཐོང་བ་ལས་རླུང་གི་རང་བཞིན་ཅན་ལ། མཁྲིས་པའི་རང་བཞིན་ཡང་ཡོད་པ་ཡིན་ནོ་སྙམ་དུ་དོགས་པ་བསུ་བ་ནི། གལ་ཏེ་རང་བཞིན་ཞེས་བྱ་བའོ། །རང་བཞིན་གང་གིས་སྡང་བ་སྐྱེད་པར་བྱེད་པ་དེ་ཉིད་ཀྱིས་དུས་མ་ཡིན་པར་མིག་དཀར་བ་ལ་སོགས་པའི་ཆོས་ཀྱང་སྐྱེད་བར་བྱེད་བར་འགྱུར་ཏེ། ཚོགས་པ་གཅིག་ལས་བྱུང་བའི་གཟུགས་ལ་རང་བཞིན་དུ་མིག་སྐྱ་བ་ལ་སོགས་པ་འདི་ཡང་འགྱུར་རོ། །འགྱུར་བ་ཡང་མ་ཡིན་ཏེ། འབྲས་བུ་མེད་པ་ལས་ཀྱང་མཁྲིས་པའི་རང་བཞིན་ཞེ་སྡང་གི་ཚོགས་པ་མ་ཡིན་ནོ་ཞེས་རྟོགས་བ་ཡིན་ནོ་ཞེས་ལན་འདེབས་པ་ནི། དེའི་ཆོས་དེ་ལས་གཞན་ཡང་ཞེས་བྱ་བ་སྟེ། ཞེ་སྡང་ལས་གཞན་རྡུལ་ལ་སོགས་པ་ཡང་ཇི་སྟེ་མ་མཐོང༌། རྒྱུ་མ་ཚང་བ་མེད་པས་ན་ཡང་གདོན་མི་ཟ་བར་འབྱུང་བའི་ཕྱིར་རོ། །གང་ཞིག་ཅེས་བྱ་བ་ནི་འཆད་བའོ། །དེས་ནི་ཞེས་བྱ་བ་ནི་འབྲས་བུའོ། །དེ་ལ་ཞེས་བྱ་བ་ནི་རྒྱུ་ལའོ། །དེ་ཡང་མ་ཡིན་ཏེ་ཞེས་བྱ་བ་འཁྲུལ་པ་ཉིད་དོ་ཞེས་བྱ་བའི་དོན་ཏོ། །
དེས་ན་ཞེས་བྱ་བ་ནི་འཁྲུལ་པས་ནའོ། །བཟློག་པ་ཡིན་ནོ་ཞེས་བྱ་བ་རླུང་ལ་སོགས་པའི་ཆོས་མ་ཡིན་པའོ། །དེ་ལས་ཞེས་བྱ་བ་ནི་གཉི་གའི་རང་བཞིན་ཡོད་པ་ལས་སོ། །དེས་ན་ཞེས་བྱ་བ་ནི་གཉི་ག་འབྱུང་བ་ནའོ། །དེའི་ཚེ་ནི་མཁྲིས་པའི་ཆོས་སོ། ཐལ་བ་ལས་བཟློག་པ་བརྗོད་པ་ནི་དེའི་འབྲས་བུ་ཞེས་བྱ་བའོ། །རྒྱུ་ཞེས་བྱ་བ་ནི་ཚོགས་པའོ། །གལ་ཏེ་ཞེས་བྱ་བ་ནི་དོགས་པ་བསུ་བའོ། །ཞེས་སྡང་གི་མཚན་ཉིད་ཁོ་ན་མཁྲིས་བ་དེའི་འབྲས་བུ་ཡིན་གྱི་གཞན་ནི་མ་ཡིན་ན། འབྲས་གཞན་ག་ལས་ཡིན་ཞེས་བྱ་བའི་དུས་མ་ཡིན་པར་མིག་སྐྱ་བ་ལ་སོགས་པའོ། །གལ་ཏེ་དེ་ཉིད་ལས་ན་ཞེས་བྱ་བ་ནི། གལ་ཏེ་མཁྲིས་པ་ཉིད་ལས་འབྲས་བུ་གཞན་པར་ཁས་ལེན་ནའོ། །དེའི་ཚེ་འདིར་ཞེས་བྱ་བ་ཞེ་སྡང་གི་འབྲས་བུས་དཔག་པའི་མཁྲིས་པ་ཡོད་ནའོ། །དེ་ཡོད་ཕྱིར་ཏེ། མཁྲིས་པ་ཡོད་པའི་ཕྱིར་འབྲས་བུ་རྡུལ་དེའི་ཕྱིར་མ་ཡིན། དེའི་ཕྱིར་དེའི་འབྲས་བུ་གཞན་མ་མཐོང་བའི་ཕྱིར་ན། རང་བཞིན་གཞན་བརྟག་པར་མི་བྱའོ། །འོན་ཏེ་དུས་མ་ཡིན་པར་མིག་དཀར་བ་ལ་སོགས་པའི་འབྲས་བུ་མེད་པའི་ཕྱིར་མཁྲིས་པའི་རང་བཞིན་མེད་པ་ཡིན་ནོ། །དེས་ན་ཞེས་སྡང་ནི་བད་ཀན་ལ་སོགས་པ་ལས་ཡིན་ནོ་སྙམ་ན། དེ་ལ་ཞེ་སྡང་མཁྲིས་པ་མེད་ཀྱང་འབྱུང་བས་འཁྲུལ་བ་ཡིན་ནོ་ཞེས་བརྗོད་པ་ནི། གལ་ཏེ་འབྲས་བུ་དེ་ཞེས་བྱ་བ་སྟེ། ཞེ་སྡང་དེའོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །རང་བཞིན་དེ་ལ་རང་བཞིན་གཞན་ཡང་རྟོགས་ན་ནི་དྲོད་ཆེ་བ་ལ་སོགས་པའི་མཚན་ཉིད་ཀྱིས་འབྲས་བུ་གཞན་ཡང་བརྟག་པར་བྱ་སྟེ། འབྲས་བུ་གཞན་མི་བརྟག་ན་ནི་རང་བཞིན་གཞན་རྟོགས་པ་ལེགས་པ་མ་ཡིན་ནོ་ཞེས་བརྗོད་པ་ནི། འབྲས་བུ་མ་མཐོང་བས་ཞེས་བྱ་བ་དྲོད་ཆེ་བ་ལ་སོགས་པའི་མཚན་ཉིད་དོ། །རང་བཞིན་གཞན་ཡང་ཞེས་བྱ་བ་ནི་མཁྲིས་པའོ། །གལ་ཏེ་འབྲས་བུ་ལས་རྒྱུ་ཡོངས་སུ་རྟོགས་པ་ནི་འཐད་པ་ཡིན་གྱི། རྒྱུ་ལས་ནི་འབྲས་བུ་མ་ཡིན་ནོ། །འཁྲུལ་པའི་ཕྱིར་རོ་ཞེས་བྱ་བ་ནི་དོགས་པ་བསུ་ནས། ཇི་ལྟར་འབྲས་བུ་ལས་ཞེས་གསུངས་ཏེ་ཞེས་སྡང་ལས་སོ། །དེ་ལྟ་ན་མ་བརྟགས་པའི་རྒྱུ་ནི་ཚོགས་པ་ཁོ་ན་ཡིན་ཏེ། གཞན་དུ་ནི་འབྲས་བུ་འབྱུང་བ་མ་ཡིན་ནོ་ཞེས་བཤད་པ་ནི། དེ་བཞིན་འབྲས་བུ་ཡང་
རྒྱུ་ནུས་པ་ཐོགས་པ་མེད་པ་ལས་ཡིན་ནོ་ཞེས་བྱ་བའོ། །འབྲས་བུ་ཞེས་སྡང་ལས་དཔག་པའི་མཁྲིས་པ་ལས་དྲོད་ཆེ་བ་ལ་སོགས་པའི་མཚན་ཉིད་ཀྱང་འབྲས་བུ་ཡོངས་སུ་རྟོགས་པ་ཡིན་ནོ་ཞེས་རྗེས་སུ་འཇུག་གོ །འོན་ཏེ་ཞེས་བྱ་བ་ལ་སོགས་པ་ནི་དོགས་པ་བསུ་བའོ། །དྲོད་ཆེ་བ་ལ་སོགས་པའི་འབྲས་བུའི་རྒྱུ་ནུས་པ་མེད་ནའོ། །མཐོང་བའི་འབྲས་བུ་ཞེ་སྡང་གི་མཚན་ཉིད་ཀྱང་མི་འགྱུར་ཞེས་འབྲེལ་ཏོ། །གང་གི་ཚེ་ཞེ་ན། རྒྱུ་མཁྲིས་པ་མེད་ནའོ། །དེ་མེད་པར་འབྱུང་ན་ཡང་ཞེ་སྡང་མཁྲིས་པའི་འབྲས་བུ་མ་ཡིན་ནོ་ཞེས་བཤད་པ་ནི། ཡང་ན་མཁྲིས་པ་དེ་ཞེ་སྡང་དེའི་རྒྱུ་ཉིད་དུ་མི་འགྱུར་རོ། །དེའི་ཕྱིར་བད་ཀན་གྱི་རང་བཞིན་ཉིད་ལས་མཁྲིས་པ་མེད་པར་ཞེ་སྡང་འབྱུང་བ་ཡིན་ནོ། །གལ་ཏེ་ཡང་བད་ཀན་ཡོད་པ་ལ་མཐོང་བའི་ཞེ་སྡང་གི་རྒྱུ་མཁྲིས་པ་ཡིན་པར་རྟོག་ན་དེའི་ཚེ་མཐོང་བའི་བད་ཀན་ཡང་འདོད་ཆགས་ཀྱི་རྒྱུ་ཉིད་དུ་མི་འགྱུར་རོ། །ཅིའི་ཕྱིར་མ་མཐོང་བའི་རྒྱུ་གཞན་བརྟག་པར་བྱའོ་ཞེས་བཤད་པ་ནི་གལ་ཏེ་ཞེས་བྱ་བའོ། །མཐོང་བའི་རྒྱུ་ནི་བད་ཀན་གྱི་མཚན་ཉིད་དོ། །འདི་ནི་ཚུ་རོལ་མཛེས་པའི་བསམ་པ་བརྗོད་པ་ཡིན་ནོ། །མ་མཐོང་བ་ནི་མཁྲིས་པའོ། །འོན་ཏེ་རྒྱུ་མེད་པ་ཡིན་ན་ཞེས་སྡང་ལ་སོགས་པ་ངེས་པར་མི་འགྱུར་རོ་ཞེས་བརྗོད་པ་ནི། གཞན་ནི་བརྟག་པར་གྱིས་ཞེས་བྱ་བ་སྟེ། འདོད་ཆགས་ཀྱིའོ། །ངེས་པ་ཡིན་ནོ། །འོན་ཏེ་ཞེས་བྱ་བ་ནི་གཞན་གྱིའོ། །འོ་ན་ཞེས་བྱ་བ་ནི་ལན་ནོ། །དེ་ནི་དེ་ལྟ་ཡིན་ཏེ་ཞེས་བྱ་བ་ནི་དོགས་པ་བསུ་བའོ། །རྒྱུ་ཡིན་ནོ་ཞེས་བྱ་བ་ནི་ཐ་ཚིག་གོ །ཅིའི་ཕྱིར་སྙམ་ན། དེ་ལྟ་བུ་ཉིད་དུ་ཞེས་སྨྲས་སོ། །རླུང་ལ་སོགས་པ་ཇི་ལྟར་ཡོད་པ་ནི་འདོད་ཆགས་ལ་སོགས་པའི་རྒྱུ་མ་ཡིན་ཏེ། གང་གི་ཚེ་འདོད་ཆགས་འབྱུང་བ་དེ་ཉིད་ཀྱི་ཚེ་ཞེ་སྡང་ལ་སོགས་པ་འབྱུང་བར་འགྱུར་བའི་ཕྱིར་རོ་ཞེས་ལན་འདེབས་པ་ནི། འདོད་ཆགས་ལ་སོགས་པ་ནི་མཁྲིས་པ་ལ་སོགས་པ་ཀུན་གྱི་ཆོས་མ་ཡིན་ནོ། །ཅིའི་ཕྱིར་ཞེ་ན། སྲོག་ཆགས་ཐམས་ཅད་ཞེ་སྡང་ལ་སོགས་པ་དང་འདོད་ཆགས་དུས་མཚུངས་པར་ཐལ་བའི་ཕྱིར་རོ། །དེ་བཞིན་དུ་འདོད་ཆགས་ལ་སོགས་པ་དང་ཞེ་སྡང་མཚུངས་བར་ཐལ་བའི་ཕྱིར་རོ་ཞེས་བྱ་བ་ལ་སོགས་པ་ཡང་བརྗོད་པ་བྱ་བའོ། །མཁྲིས་པ་ལ་སོགས་པའི་
རྒྱུས་འབྲས་བུ་བྱེད་པ་ན་ཞེས་སྡང་ལ་སོགས་པ་དེ་ཉིད་དང་ལྷན་ཅིག་ཏུ་འདོད་ཆགས་ལ་སོགས་པ་གཞན་ཡང་བྱེད་པའི་ཕྱིར་འབྲས་བུ་རྣམས་ལྷན་ཅིག་འབྱུང་བར་ཐལ་ལོ། །ཡང་ན་འདོད་ཆགས་ལ་སོགས་པ་མཚུངས་པར་ཐལ་བར་འགྱུར་ཏེ། རྒྱུ་མཚུངས་པའི་ཕྱིར་འདོད་ཆགས་ཆེ་བ་དང་ཆེས་ཆེ་བ་ལ་སོགས་པར་མི་འགྱུར་རོ་ཞེས་བྱ་བའི་དོན་ཏོ། །གལ་ཏེ་འབྱུང་བ་ཙམ་གྱིས་བསྐྱེད་པ་ཡིན་ཡང༌། དྲི་ལ་སོགས་པ་རེག་པའི་མཐར་ཐུག་པ་ནི་སའི་ཡིན་ནོ། །དེ་ལ་ཆུ་ནི་དྲི་དང་བྲལ་བ་ཡིན་ལ། མེ་ནི་རོ་དང་བྲལ་བ། རླུང་ནི་གཟུགས་དང་བྲལ་བ་ཡིན་ནོ་ཞེས་བྱ་བ་ནི་ངེས་པ་ཅན་ཡིན་ནོ། །ཡང་དཀར་པོ་དང་སེར་པོ་ལ་སོགས་པ་ངེས་པ་དང་ལྡན་བཞིན་དུ་འདོད་ཆགས་ལ་སོགས་པ་ངེས་པ་ཅན་དུ་འགྱུར་རོ་ཞེས་བྱ་བར་དོགས་ན་ནི། གཟུགས་ལ་སོགས་བཞིན་ཞེས་བྱ་བའོ། །འབྱུང་བ་རྣམས་ཁྱད་པར་མེད་ཀྱང་གཟུགས་ལ་སོགས་པ་ཁྱད་པར་དང་ལྡན་པ་ནི་ཁྱད་པར་དུ་བྱེད་པ་རྒྱུ་གཞན་གོ་བར་བྱེད་པ་ཡིན་ནོ་ཞེས་ལན་འདེབས་པ་ནི། དེར་ཡང་ཞེས་བྱ་བ་སྟེ། གཟུགས་ལ་སོགས་པ་དེར་ཡང་ངོ༌། །རྩོད་པ་མཚུངས་པ་ནི། གཟུགས་ལ་སོགས་རྣམས་ཀྱང་མཚུངས་པར་ཐལ་ལོ་ཞེས་བྱ་བའོ། །གང་གི་ཚེ་ཞེ་ན། གལ་ཏེ་ཞེས་གསུངས་ཏེ། ལས་བདག་པོར་ཁས་མི་ལེན་ན་ཉེས་པ་མཚུངས་པ་ཡིན་ནོ་ཞེས་བྱ་བའི་དོན་ཏོ། །ཅི་ལྟར་འདོད་ཆགས་ལ་སོགས་པ་མཚུངས་པར་འགྱུར་སྙམ་ན་འདོད་ཆགས་ལ་སོགས་པ་ཞེས་གསུངས་སོ། །འགའ་ཞིག་ཏུ་ཞེས་བྱ་བ་ནི། མཁྲིས་པ་ལ་སོགས་པ་ལས་གང་རུང་ཞིག་ཏུའོ། །གང་གི་ཕྱིར་དེ་ལྟར་ཡིན་པའི་རྒྱུ་དེས་ནའོ། །འདི་ཉིད་གསལ་བར་བྱ་བའི་ཕྱིར་འདི་ལྟར་ཞེས་འཆད་དོ། །ནུས་མེད་རང་བཞིན་མེད་པས་ན། །ཞེས་བྱ་བ་ནི། འཕེལ་དང་འགྲིབ་པ་དག་ཀྱང་ཁྱད་པར་དུ་བྱེད་པ་མ་ཡིན་ཏེ། གང་གི་ཕྱིར་ཁྱད་པར་ཐམས་ཅད་ལས་བྱུང་བ་ཡིན་ནོ་ཞེས་བྱ་བའི་དོན་ཏོ། །འབྲས་བུ་མི་མཚུངས་ག་ལས་ཡིན། །ཞེས་བྱ་བ་ནི་འབྲས་བུ་མཚུངས་པ་ཁོ་ནའོ་ཞེས་བྱ་བའི་དོན་ཏོ། །བད་ཀ་ན་ལ་སོགས་པའི་རང་བཞིན་འདོད་ཆགས་ལ་སོགས་པའི་རྒྱུ་ཡིན་ཞེས་འབྲེལ་ཏོ། །གང་གི་ཚེ་ཞེ་ན། དེ་འཕེལ་བ་དང་འགྲིབ་པ་ནའོ། །
གང་གི་ཚེ་རང་བཞིན་འཕེལ་བ་དང་འགྲིབ་པ་དེའི་ཚེ་ན་བད་ཀན་ལ་སོགས་པའི་རང་བཞིན་ཉིད་འདོད་ཆགས་ལ་སོགས་པའི་རྒྱུ་ཡིན་གྱི། འཕེལ་བ་དང་འགྲིབ་པ་ནི་ཡིན་ནོ། །དེས་ན་འདོད་ཆགས་ལ་སོགས་པ་མཚུངས་པ་ཉིད་དུ་ཐལ་བ་བཟློག་པར་དཀའོ། །ཁྱད་པར་གཞན་ཡོད་པའི་ཕྱིར་ཞེས་བྱ་བ་ནི། སྐྱེས་བུ་སོ་སོ་ལ་རླུང་ལ་སོགས་པའི་རང་བཞིན་ལས་ལྷག་པར་འགྱུར་པ། འཕེལ་བ་དང་འགྲིབ་པའི་མཚན་ཉིད་ཀྱི་ཁྱད་པར་ཡོད་པའི་ཕྱིར་རོ། །ཁྱད་པར་དེ་ཞེས་བྱ་བ་ནི་འདོད་ཆགས་ལ་སོགས་པ་ལ་གནས་པའོ། །ཐམས་ཅད་ཀྱི་རྒྱུ་ཅན་མ་ཡིན་པའི་ཕྱིར་ཞེས་བྱ་བ་ནི། རླུང་ལ་སོགས་པ་ཐམས་ཅད་ཀྱི་རྒྱུ་ཁྱད་པར་འདི་ལ་ཡོད་པས་དེ་ནི་དེ་སྐད་ཅེས་བྱ་བའོ། །དེས་ན་རླུང་ལ་སོགས་པ་ཐམས་ཅད་ཀྱི་ཆོས་མ་ཡིན་ནོ། །འདོད་ཆགས་ལ་སོགས་པ་ཁྱད་པར་གྱི་ཆོས་སུ་ཁས་ལེན་ན། ཐམས་ཅད་ཀྱི་ཆོས་སུ་ཁས་བླངས་པ་ཕ་རོལ་པོ་རང་ཉིད་ཀྱིས་དོར་བ་ཡིན་ནོ་ཞེས་བྱ་བའི་དོན་ཏོ། །འདོད་ཆགས་ལ་སོགས་པ་ཐམས་ཅད་ཀྱི་ཆོས་སུ་གཞུང་འཛུགས་པའི་དོགས་པ་བསུ་བ་ནི་ཇི་སྟེ་ཡང་ཞེས་བྱ་བའོ། །འོ་ན་ཇི་ལྟར་འདོད་ཆགས་ལ་སོགས་པ་མཚུངས་པ་ཉིད་དུ་ཐལ་བ་སྤོང་སྙམ་ན། དེ་དག་ཉིད་ཀྱི་ཞེས་སྨྲས་ཏེ། བད་ཀན་ལ་སོགས་པ་དག་གིའོ། །ནང་གི་བྱེ་བྲག་གང་ཡིན་པ། དེ་ལས་འདོད་ཆགས་ལ་སོགས་པ་ཁྱད་པར་གྱི་རིམ་པ་དང་ལྡན་པ་ཡིན་ནོ། །དེས་ན་འདོད་ཆགས་ལ་སོགས་པ་མཚུངས་པ་ཉིད་མ་ཡིན་ནོ་ཞེ་ན། རྩོད་པ་འདི་ལ་ཡང་དག་པར་བསྟན་པ་ཡིན་ཞེས་བཞད་གད་བཅས་པས་སེལ་བར་བྱེད་པ་ནི། བད་ཀན་ལ་སོགས་པ་རྣམས་ཀྱི་ཁྱད་པར་ཅན་གྱི་རྣམ་པར་འགྱུར་པའི་རྒྱུའི་འབྲས་བུ་ཉིད་ཀྱིས་འབྲེལ་བ་ཅན་གྱི་ཁྱད་པར་འདོད་ཆགས་ལ་སོགས་པ་བརྟེན་པ་གང་ཞིག །ཇི་ལྟར་དེ་ཅི་འདྲ་བར་ཉེ་བར་དམིགས་པར་གྱུར་པ་དེ་ལ་ཡང་ནི་སྟེ། དེ་འདྲ་བའི་ཁྱད་པར་ལ་ཡང༌། དེ་འདྲ་བའི་བད་ཀན་ལ་སོགས་པའི་ཁྱད་པར་མེད་ཀྱང་འབྱུང་བའི་ཕྱིར་ཞེས་བྱ་བས་འཁྲུལ་པ་ཉིད་ཅེས་བྱ་བ་ནི། ཡང་དག་པར་ནི་བསྟན་པ་ཡིན་ཞེས་བཞད་གད་དུ་བྱེད་པ་སྟེ། རྩོད་པ་འདི་ནི་ཡང་དག་པར་བསྟན་པ་མ་ཡིན་ནོ་ཞེས་བྱ་བའི་དོན་ཏོ། །ཡང་འདོད་ཆགས་ལ་སོགས་པ་མཚུངས་པ་ཉིད་དུ་སྡར་ཡང་
དག་པར་ནི་བསྟན་པ་ཡིན་ཏེ། གསལ་བར་བརྗོད་པ་ཡིན་ནོ་ཞེས་བྱ་བའི་དོན་ཏོ། །འཆད་པ་ནི་རྣམ་པར་འགྱུར་བའི་ཁྱད་པར་གང་ཞིག་ཅེས་བྱ་བ་ལ་སོགས་པའོ། །རྒྱུ་གང་ལས་ཞེས་བྱ་བ་ནི་ཤེས་པར་བྱེད་པ་ལས་ཏེ། དམིགས་པ་འབྲེལ་ཏོ། །གང་གི་སྒྲ་ལ་ལྟོས་ཀྱང་རྒྱུ་དེ་ལས་ཞེས་ཁོང་ནས་ཕྱུང་སྟེ། དེ་ཉིད་གང་གི་ཚེ་སྡང་ལ་སོགས་པའི་རྒྱུ་ཡང་ཡིན་པར་ཉེ་བར་དམིགས་སོ་ཞེས་སྤྲེལ་བར་བྱའོ། །ཡང་ན་རྒྱུ་གང་ལས་ཞེས་བྱ་བ་ནི་སྔ་མ་དང་འབྲེལ་ཏེ། འདོད་ཆགས་ལ་སོགས་པའི་རྒྱུ་རླུང་ལ་སོགས་པ་གང་ཞིག་ལ་ལྟོས་ནས་རྣམ་པར་འགྱུར་བའི་ཁྱད་པར་གང་ཞིག་གཅེས་བྱ་བར་སྦྱར་རོ། །དེའི་ཆེ་ཞེས་བྱ་བ་ནི་དེའི་ཚེ་གང་གི་སྒྲ་ལ་ལྟོས་ནས་རྒྱུ་དེ་ཞེས་བྱ་བ་མདུན་དུ་བྱས་ལ། ཐམས་ཅད་ཀྱི་ཆོས་ཉིད་བྱ་བར་སྦྱར་རོ། །འདོད་ཆགས་ལ་སོགས་པ་མཁྲིས་པ་ལ་སོགས་པ་ལ་མ་ངེས་བའི་ཕྱིར་རང་བཞིན་ཐམས་ཅད་མ་ཡིན་ལ། མཁྲིས་པ་ལ་སོགས་པ་ལ་གནས་པའི་ཁྱད་པར་ཡང་འདོད་ཆགས་ལ་སོགས་པ་ཁྱད་པར་ཐམས་ཅད་ཀྱི་རང་བཞིན་དུ་འགྱུར་རོ། །འཁྲུལ་པ་མཚུངས་པའི་ཕྱིར་རོ། །གང་གི་ཕྱིར་དེ་ལྟར་འདོད་ཆགས་ལ་སོགས་པ་མཚུངས་པ་ཉིད་དུ་གསལ་བའི་རྒྱུ་དེས་ནའོ། །ཅི་ལྟར་མི་འཐད་སྙམ་ན་དེ་ཡང་ཞེས་གསུངས་ཏེ། བད་ཀན་ལ་སོགས་པའི་ཡོངས་སུ་གྱུར་པའི་ཁྱད་པར་རོ། །གལ་ཏེ་རླུང་ལ་སོགས་པའི་ཁྱད་པར་གང་ཡང་རུང་བ་ཞིག་རྒྱུ་ཉིད་ཡིན་ཡང༌། ཁྱད་པར་ཐམས་ཅད་འདོད་ཆགས་ལ་སོགས་པ་ཐམས་ཅད་དང་ལྡན་པར་ནི་མི་འགྱུར་ཏེ། ཐམས་ཅད་ཀྱི་ཚེ་ངེས་པའི་འབྲས་བུ་མཐོང་བས་རྗེས་སུ་དཔག་པར་བྱའོ། །དེས་པའི་ཁྱད་པར་གྱི་ལྷན་ཅིག་བྱེད་བ་ཅན་ཡིན་པའི་ཕྱིར་རོ་ཞེས་དོགས་པ་བསུ་བ་ནི་འོན་ཏེ་འབྲས་བུ་ཞེས་བྱ་བའོ། །འོ་ན་ངེས་པའི་རྒྱུ་ལྷན་ཅིག་བྱེད་པའི་ཁྱད་པར་དེ་ནི་གོམས་པ་ཁོ་ན་ཡིན་ཏེ། དེའི་དབྱེ་བ་ལས་འདོད་ཆགས་ལ་སོགས་པའི་དབྱེ་བ་མཐོང་བའི་ཕྱིར་རོ། །རྒྱུ་གཞན་རྟོག་ན་ནི་དུ་བ་ཡང་མེའི་རྒྱུ་ཅན་དུ་མི་འགྲུབ་པོ་ཞེས་ལན་འདེ་བས་པ་ནི་མེ་མ་མཐོང་བའི་དུ་བ་གང་ཞེས་བྱ་བའོ། །དུ་བ་མེ་དང་ལྡན་པས་མེ་ཡུལ་དེ་ན་ཡོད་པ་ཡིན་ཏེ། དེས་ན་མེ་ཉིད་དུ་བའི་རྒྱུ་ཡིན་གྱིས་ཕྱོགས་ནི་མ་ཡིན་ནོ་སྙམ་ན། མ་ཡིན་ཏེ་ཞེས་དོགས་པ་
འགོག་པའོ། །དུ་བའི་རྒྱུའི་ཁྱད་པར་དེ་ནི་གཞན་ས་ཕྱོགས་ཀྱི་ཡིན་ཏེ། མེ་ནི་མ་ཡིན་ནོ་ཞེས་བྱ་བའི་དོན་ཏོ། །དེས་ན་ཞེས་བྱ་བ་མེ་རྒྱུ་མ་ཡིན་པས་ནའོ། །གཞན་ན་ཞེས་བྱ་བ་ནི་མེ་དང་བྲལ་བའི་ཡུལ་ནའོ། །མེ་དང་བྲལ་བས་ནི་མ་ཡིན་ནོ་སྙམ་དུ་དགོངས་པའོ། །འདིས་ནི་མཐོང་བའི་རྒྱུ་དང་འབྲས་བུའི་དངོས་པོ་ཆད་པར་བསྟན་ཏོ། །འདི་ཉིད་ཀྱི་ཕྱིར་གལ་ཏེ་ཞེས་གསུངས་སོ། །ཐམས་ཅད་དུ་ཞེས་བྱ་བ་ནི། མེ་དང་དུ་བ་ལ་སོགས་པ་ཡང་ངོ༌། །འོན་ཏེ་དེར་ནི་ཞེས་བྱ་བ་ནི། མེ་མ་མཐོང་བ་དུ་བ་དང་བཅས་པའི་ཕྱོགས་སུའོ། །འོ་ན་དེར་ཡང་ཞེས་བྱ་བ་ནི་འདོད་ཆགས་ལ་སོགས་པའི་ཁྱད་པར་ལ་ཡང་ངོ༌། །མ་མཐོང་བ་བད་ཀན་ལ་སོགས་པའི་ཁྱད་པར་ཡོངས་སུ་བརྟགས་པས་ཅི་ཞིག་བྱ་སྙམ་དུ་དགོངས་པའོ། །གཟུགས་ལ་སོགས་པ་བཞིན་སྐྱོན་མེད་ཅེས་བྱ་ཞེས་བྱ་བའི་རྣམ་འགྲེལ་རྣམ་པར་འགྲེལ་བ་ནི་གལ་ཏེ་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་ལས་ཀྱི་བདག་པོ་ཁས་མི་ལེན་ནའོ། །དེ་དག་ཀྱང་ཞེས་བྱ་བ་ནི་གཟུགས་ལ་སོགས་པ་དག་ཀྱང་ངོ༌། །དེས་ཞེས་བྱ་བ་ནི་གཟུགས་ལ་སོགས་པས་སོ། །དེ་ལྟར་ཐམས་ཅད་ཀྱི་ཆོས་ཡིན་པ། འདོད་ཆགས་ལ་སོགས་པ་མཚུངས་པར་ཐལ་བས་བཟློག་པ་ཡིན་ནོ། །ད་ནི་བད་ཀན་ལ་སོགས་པ་ཁྱད་པར་ཡོད་ཀྱང་ཁྱད་པར་མེད་པའི་འདོད་ཆགས་ལ་སོགས་པ་ནི་ཁྱད་པར་ཡོད་པས་ཁྱབ་པ། རྒྱུ་ཁྱད་པར་གྱི་འབྲས་བུ་ཉིད་མ་ཡིན་ཏེ། ཁྱད་པར་བྱེད་པ་མེད་པའི་ཕྱིར་རོ་ཞེས་བཤད་པ་ནི་སྐྱོན་རྣམས་ཞེས་བྱ་བའོ། །མཁྲིས་པ་ལ་སོགས་པ་རྣམས་ལ་འཕེལ་བ་དང་འགྲིབ་པའི་མཚན་ཉིད་ཀྱི་ཁྱད་པར་ཡོད་ཀྱང་འདོད་ཆགས་ལ་སོགས་པའི་སྐྱོན་རྣམས་ཁྱད་པར་མེད་པའི་ཕྱིར་རོ། །དེའི་ཕྱིར་དེའི་འབྲས་བུ་ཉིད་མ་ཡིན་ནོ། །གལ་ཏེ་མཁྲིས་པ་ཁྱད་པར་ཅན་དུ་གྱུར་ན་ཞེ་སྡང་ཁྱད་པར་ཅན་མཐོང་བའི་ཕྱིར་ཁྱབ་པར་བྱེད་པ་མེད་པ་ནི་མ་གྲུབ་པོ་སྙམ་ན། མ་གྲུབ་པ་ཉིད་མ་ཡིན་ཞེས་གསུངས་ཏེ། མ་གྲུབ་པ་ཉིད་འགོག་པའོ། །ཅིའི་ཕྱིར་ཞེ་ན། རླུང་ལ་སོགས་པ་ཐམས་ཅད་འགྱུར་བ་ཡིས། འགྱུར་ཕྱིར་དེ་ཁྱད་པར་དུ་འགྱུར་བའི་ཕྱིར་ཏེ་ཞེས་བྱ་བར་འབྲེལ་ལོ། །ཐམས་ཅད་འགྱུར་བའི་རྗེས་སུ་བྱེད་པ་ནི་འགའ་ཞིག་ཁོ་ནའི་ཡིན་པར་ནི་མི་རུང་
དོ། །ཐམས་ཅད་ཀྱི་འབྲས་བུ་ཉིད་ཀྱང་ཀུན་གྱི་ཆོས་མ་ཡིན་ཞེས་བྱ་བ་ལ་སོགས་པས་བཀག་ཟིན་ཏོ་ཞེས་བརྗོད་པ་ནི་ཀུན་ལས་ཀྱེ་བ་མི་ན་ཞེས་བྱ་བའོ། །གལ་ཏེ་ཡང་རྒྱུ་ཁྱད་པར་ཡོད་པར་འབྲས་བུ་ཁྱད་པར་ཡོད་པར་མི་འགྱུར་དེ་ལྟར་ན་ཡང་འདི་རང་གི་ངོ་བོས་མེད་པར་ནི་མི་འཐད་དོ་ཞེས་བརྗོད་པ་ནི་རྒྱུ་ནི་འཕེལ་བར་འགྱུར་བས་ན་ཞེས་བྱ་བའོ། །ཕྱིར་ལ་བད་ཀན་འཕེལ་བ་ཁོ་ནར་འགྱུར་ཏེ། ཚད་ལ་སོགས་པ་བཞིན་ནོ་ཞེས་བརྗོད་པ་ནི་ཚ་བ་ལ་སོགས་བཞིན་ཞེས་བྱ་བའོ། །གལ་ཏེ་བཅུད་ཀྱིས་ལེན་ལ་སོགས་པ་ཟས་བཞུན་པོ་ཟོས་ན། བད་ཀན་ལ་སོགས་པ་འཕེལ་བས་འདོད་ཆགས་འཕེལ་བ་ཡིན་ནོ་སྙམ་དུ་ཞེ་ལ་བཞག་ནས། བདེ་བའི་ཁྱད་པར་སྐྱེས་པས་རང་གི་བག་ཆགས་ཡོངས་སུ་སྨིན་པའི་ཕྱིར་འདོད་ཆགས་ལ་སོགས་འཕེལ་བ་ཡིན་ནོ་ཞེས་བརྗོད་པ་ནི་ཆགས་སོགས་ཀྱི་ཞེས་བྱ་བའོ། །རྣམ་འགྲེལ་གྱི་དོན་སྡེབ་པའི་ཕྱིར་ན། གཞན་གྱི་སྨྲ་བ་དྲན་པར་བྱེད་པ་ནི་སྐད་དུ་ཞེས་བྱ་བའོ། །རྒྱུ་གཞན་ཡོད་ན་ནི་ཞེས་བྱ་བ་བད་ཀན་ཡོད་ན་ཡང་འབྲས་བུ་གཞན་ནི་ཞེ་སྡང་ངོ༌། །དེ་ནི་ཞེས་བྱ་བ་ནི་འབྲས་བུའོ། །མ་མཐོང་བའི་ཁྱད་པར་ནི་རྒྱུ་ལ་བརྟེན་པའོ། །དེ་རྟོགས་པ་ཡིན་ནོ་ཞེས་སྨྲས་སོ། །བརྗོད་མ་ཐག་པ་དེ་ལ་བརྗོད་པའོ། །ཅི་ཞིག་བརྗོད་ཅེས་དོགས་ན། གཞན་གྱིས་བརྗོད་པ་ཁས་ལེན་པ་ནི་འགྱུར་མོད་ཅེས་བྱ་བའོ། །དེར་ཞེས་བྱ་བ་ནི་རྒྱུ་ལའོ། །ཁྱད་པར་གཞན་ཞེས་བྱ་བ་ནི་རྒྱུ་ལ་གནས་པའོ། །ཡོད་པའི་གཏན་ན་ཚིགས་ཀྱི་ཕྱིར་ཞེ་སྡང་གི་མཚན་ཉིད་ཀྱི་འབྲས་བུ་གཞན་ཞེས་བྱ་བར་འགྱུར་རོ། །དེ་ལྟར་གཞན་གྱི་སྨྲ་བ་ཁས་བླངས་ནས། བཟློག་པའི་སྒོ་ནས་རྣམ་འགྲེལ་འཆད་པ་ནི། གང་གི་ཚེ་ཞེས་བྱ་བའོ། །འབྲས་བུ་ནི་འདོད་ཆགས་སོ། །གལ་ཏེ་ཇི་ལྟར་འདོད་ཆགས་ཀྱི་རང་བཞིན་ཅན་གྱི་ཞེ་སྡང་གཞན་གྱི་རྒྱུ་ཅན་ཡིན་ནོ་ཞེས་ཁྱད་པར་རྟོག་པ་དེ་བཞིན་དུ་འདོད་ཆགས་ཀྱི་ཁྱད་པར་ཡང་དེ་ལས་གཞན་པའི་ཁྱད་པར་གྱི་རྒྱུ་ཅན་ཡིན་ནོ་སྙམ་དུ་དོགས་པ་ནི་དེར་ཡང་ཞེས་བྱ་བ་སྟེ། བད་ཀན་འཕེལ་བར་ཡང་ངོ༌། དེ་ལས་གཞན་པ་ནི་བད་ཀན་འཕེལ་བ་ལས་གཞན་པའི་ཁྱད་པར་མེད་པའི་ཕྱིར། འབྲས་བུ་འཕེལ་བ་བཟློག་པ་ཡིན་ནོ་
ཞེས་རྗེས་སུ་འཇུག་གོ །ལན་ནི་དེ་ལྟ་ན་འོ་ན་ཞེས་བྱ་བའོ། །འདོད་ཆགས་ཀྱི་རང་བཞིན་ལ་གནས་པའི་ཁྱད་པར་དེའི། །རྒྱུ་དང་འབྲས་བུའི་དངོས་པོར་འཛིན་པ་ནི་བད་ཀན་དང་འདོད་ཆགས་གཉིས་སོ། །གང་ལ་འགྱུར་ཏེ་མི་འགྱུར་བ་ཁོ་ནའོ། །མཐོང་བ་ནི་མ་མཐོང་བའི་ཁྱད་པར་དུ་རིགས་པ་མ་ཡིན་ནོ་ཞེས་བྱ་བ་ལ། འབྲས་བུའི་ཁྱད་པར་མཐོང་བ་ནི་མ་མཐོང་བའི་ཁྱད་པར་ཏེ་རྒྱུ་གང་ལ་ཡོད་པ་སྟེ། མ་མཐོང་བའི་ཁྱད་པར་ཅན་གྱི་དངོས་པོ་དེར་མི་རིགས་སོ། །འོ་ན་ཇི་ལྟར་རྒྱུ་དང་འབྲས་བུའི་དངོས་པོར་འཛིན་ཞེ་ན། དེའི་ཁྱད་པར་ལ་ཞེས་གསུངས་ཏེ། བད་ཀན་འཕེལ་བ་ལས་སོ། །ཁྱད་པར་དུ་ཞེས་བྱ་བ་ནི་འདོད་ཆགས་ཁྱད་པར་དུ་འཛིན་ནའོ། །དེ་ལྟ་མ་ཡིན་ན་ནི་རྒྱུ་དང་འབྲས་བུར་འཛིན་པ་མ་ཡིན་ནོ་ཞེས་བརྗོད་པ་འདི་ཉིད་སྡུད་པ་ནི་དེ་ལས་ཞེས་བྱ་བ་སྟེ་བད་ཀན་གྱི་ཁྱད་པར་ལས་སོ། །ཁྱད་པར་ཡོད་མིན་ཞེས་བྱ་བ་ནི་སྐབས་ཀྱིས་འདོད་ཆགས་སོ། །འགྲུབ་ཉིད་ཅེས་བྱ་བ་དེའི་རྣམ་པར་འགྲེལ་པ་ནི་གལ་ཏེ་ཞེས་བྱ་བའོ། །མ་ཡིན་ཞེས་བྱ་བ་ལ་སོགས་པའོ། །དོགས་པ་བསུ་བ་ནི་རང་བཞིན་གྱིས་ཞེས་བྱ་བའོ། །འདི་ནི་ཞེས་བྱ་བ་ནི་ལ་འདེབས་པའོ། །མཚུངས་པའི་ཕྱིར་རོ་ཞེས་བྱ་བ་ནི་ཞེ་སྡང་མི་འབྱུང་བའོ། །ཀུན་ལས་སྐྱེ་བའང་མིན་ཞེས་བྱ་བ་འཆད་པ་ནི་འོན་ཏེ་ཞེས་བྱ་བའོ། །འདོད་ཆགས་ཀྱི་རྒྱུ་ཁྱད་པར་ཡོད་པ་ན་ཁྱད་པར་གཞན་མེད་པ་ལས་འདོད་ཆགས་ཀྱི་ཁྱད་པར་མི་འགྱུར་མོད། །རང་གི་ངོ་བོ་གོ་ཅི་སྟེ་མེད་པར་འགྱུར་ཞེས་བརྗོད་པ་ནི། གཞན་ཡང་ཞེས་བྱ་བ་ནི་མེད་པའོ། །ཕྱིར་ཞེས་བྱ་བ་ལ་སོགས་པས་ནི་སྤྱིར་རིགས་པ་བརྗོད་པའོ། །དེས་ན་སྐྱོན་རྣམས་ཁྱད་པར་ཡོད་ན་ཡང་ཁྱད་པར་མེད་ཕྱིར་ཞེས་བྱ་བ་འདི་ལ་ལྟོས་ནས། རྒྱུ་ནི་འཕེལ་བར་གྱུར་པ་ན། །འབྲས་བུའི་འགྲིབ་པའང་མི་རུང་སྟེ། །ཞེས་བྱ་བ་བཟློག་པ་མ་ཡིན་ལ། འབྲེལ་པ་ཉིད་ཀྱང་མ་ཡིན་ནོ་ཞེས་བྱ་བར་དགོངས་པའོ། །ཞེ་སྡང་ཉིད་དུ་ཞེས་པར་གཟུང་བས་ནི། འདོད་ཆགས་ཙམ་ཡང་མེད་པར་བསྟན་ཏོ། །ནད་ཀྱིས་གདུངས་པས་ཞེས་བྱ་བས་ནི། བད་ཀན་འཕེལ་བའི་ནད་ཀྱིས་གདུངས་པའོ། །འོན་ཏེ་ཇི་ལྟར་འདོད་ཆགས་ལ་སོགས་པ་འབྱུང་སྙམ་ན།
འདོད་ཆགས་ལ་སོགས་པ་ནི་ཞེས་གསུངས་སོ། །འདིས་ནི་ཆགས་སོགས་ཀྱི་ཞེས་བྱ་བ་བཤད་པ་ཡིན་ནོ། །གལ་ཏེ་དེ་ལྟ་ན་ཡང་ཐམས་ཅད་ཀྱི་འདོད་ཆགས་ལ་སོགས་པ་དང་ལྡན་པ་ཉིད་དུ་འགྱུར་རོ་སྙམ་ན། བདེ་བ་ཡང་གང་གི་ཞེས་གསུངས་སོ། །དེས་ན་ཞེས་བྱ་བ་ནི་བད་ཀན་ལ་སོགས་པ་ལས་སྐྱེས་པ་མ་ཡིན་པའི་ཕྱིར་རོ། །ཉེས་པ་དག་ལས་ཞེས་བྱ་བ་ནི་རླུང་ལ་སོགས་པ་ལས་སོ། །བད་ཀན་འཕེལ་ཡང་མི་འཕེལ་བའི་ཕྱིར་རམ། མེད་པའི་ཕྱིར་ཁྱབ་པར་བྱེད་པ་མེད་བས་ན་འདོད་ཆགས་ནི་འབྲས་བུ་ཡིན་ནོ་ཞེས་མི་རིགས་སོ། །ཁམས་སྙོམས་པ་ལ་བྱུང་བའི་བདེ་བ་ལྷན་ཅིག་བྱེད་པ་ཅན་རྒྱུ་ཉིད་དུ་ཁས་བླངས་པའི་ཕྱིར་ཏེ། དེ་ལྷན་ཅིག་བྱེད་པ་ཅན་གྱི་བད་ཀན་ནི་འདོད་ཆགས་ལ་འཁྲུལ་བ་མ་ཡིན་ནོ་སྙམ་པའི་དོགས་པ་བསུ་ནས། གལ་ཏེ་ཞེས་བྱ་བའོ། །དེ་ནི་བད་ཀན་ནོ། །གཞན་གྱིས་གེགས་བྱས་ན་ཞེས་བྱ་བ་ནི་ལྷན་ཅིག་བྱེད་པ་མ་ཚང་བས་གེགས་བྱས་ནའོ། །ཆ་མཉམ་ལས་ཞེས་བྱ་བ་ནི་ཆ་མཉམ་པ་ལས་བྱུང་བའི་བདེ་བ་ལས་ནི། བདེ་བ་ཡང་རང་སྐྱེས་བ་ཙམ་གྱིས་ནི་སྐྱེད་བྱེད་མ་ཡིན་གྱི། འོན་ཀྱང་ཁུ་བ་འཕེལ་བའི་རིམ་གྱིས་ཡིན་ནོ་ཞེས་སྨྲས་བ་ནི། ཁུ་འཕེལ་ཞེས་བྱ་བའོ།། དེ་ལས་ཞེས་བྱ་བ་ནི་ཁུ་བ་ལས་སོ་། །འདོད་ཆགས་ནི་ཆགས་པའོ། །སྡར་ནི་སྐྱོན་རྣམས་ཁྱད་པར་ཡོད་ན་ཡང་ཞེས་བྱ་བས་འདོད་ཆགས་ལ་བད་ཀན་འཁྲུལ་པར་བརྗོད་པ་ཡིན། དེ་ལྟ་ན་ཆ་མཉམ་བརྗོད་པ་ཡིན་ནོ། །ཉེས་པ་རྣམས་ཆ་མི་མཉམ་ལའང་ཆགས་ཅན་མཐོང་ཞེས་བྱ་བ་ནི་དེ་མེད་ཀྱང་ཡོད་པ་དང༌། གཞན་ནི་ཆ་མཉམ་ན་ཡང་མིན་ཞེས་བྱ་བས་ནི་ཡོད་ཀྱང་མེད་པ་བརྗོད་དོ། །གཞན་ནི་ཞེས་བྱ་བ་ནི་སྡུག་པ་སྒོམ་པ་ལ་མངོན་པར་དགའ་བའོ། །ཁུ་བ་ཡང་འདོད་ཆགས་ཀྱི་རྒྱུ་མ་ཡིན་ཏེ། དེའི་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པའི་ཕྱིར་རོ་ཞེས་བཤད་པ་ནི། གཞན་ནི་ཞེས་བྱ་བའོ། །གཞན་ནི་ཁུ་བ་མེད་ཀྱང་ཆགས་པ་ཅན་དུ་མཐོང་ངོ༌། །ཇི་ལྟར་དེ་དག་ཁུ་བ་དང་བྲལ་བར་རྟོགས་སྙམ་ན། གང་གི་ཕྱིར་གཙོ་བོའི་ཡན་ལག་ནས་ཁྲག་འཛག་པའི་ཕྱིར་རོ། །འདིས་ནི་བཟློག་བའི་རྗེས་སུ་བྱེད་པ་མེད་པར་བརྗོད་པ་ཡིན་ནོ། །རྗེས་སུ་འགྲོ་བ་མེད་པ་
བསྟན་པའི་དོན་དུ། རང་གི་ངོ་བོ་བརྗོད་པ་ནི་བུད་མེད་གཅིག་ལ་ཁུ་ངེས་མེད་དེ་འོན་ཀྱང་སྔོན་པོ་ལ་སོགས་པ་ལྟར་ཐམས་ཅད་ཀྱི་ཐུན་མོང་བ་ཡིན་ནོ། །ཐུན་མོང་བ་ཡིན་པ་དེས་ན་བུད་མེད་གཅིག་ལ་ཆགས་པ་དྲག་པར་མི་འགྱུར་གྱི། འོན་ཀྱང་ཐམས་ཅད་ལ་དེ་བཞིན་དུ་འགྱུར་རོ། །འགྱུར་བ་ཡང་མ་ཡིན་ཏེ་ངེས་དེས་ན་རྗེས་སུ་འགྲོ་བ་མེད་དོ། །འདི་སྙམ་དུ་གང་ཐམས་ཅད་ལ་དོད་ཆགས་འགྱུར་ན།ཁུ་བ་འབའ་ཞིག་ནི་འདོད་ཆགས་ཀྱི་རྒྱུ་མ་ཡིན་གྱི། འོན་ཀྱང་གཟུགས་དང་སྤྱོད་ཚུལ་ལ་སོགས་པའི་ལྷན་ཅིག་བྱེད་པ་ཡིན་ནོ། །དེས་ན་བུད་མེད་གཅིག་ཁོ་ན་ལ་རྗེས་སུ་འགྲོ་བ་ངེས་པ་ཡིན་ནོ་སྙམ་དུ་དོགས་པ་བསུ་བ་ནི། གལ་ཏེ་ཞེས་བྱ་བའོ། །མ་ངེས་ཕྱིར་ཞེས་བྱ་བ་ནི། གཟུགས་ལ་སོགས་པ་ལ་ཡང་འདོད་ཆགས་ལ་འཁྲུལ་པའི་ཕྱིར་རྗེས་སུ་འགྲོ་བ་མེད་ལ། གཟུགས་ལ་སོགས་པ་མེད་ཀྱང་ཁུ་བ་ཡོད་ན་ཡོད་པའི་ཕྱིར་ལྡོག་པ་མེད་པ་ཡིན་ནོ་ཞེས་བྱ་བའི་དོན་ཏོ། །འདོད་ཆགས་ལ་སོགས་པ་རྒྱུ་ངེས་པ་ཅན་མ་ཡིན་ཡང་ཁུ་བ་ལ་སོགས་པའི་རྒྱུ་ཅན་ཡིན་ནོ་སྙམ་དུ་དོགས་པ་བསུ་ནས། ངེས་པ་མེད་པར་ཞེས་གསུངས་སོ། །གལ་ཏེ་ཁུ་བ་འདོད་ཆགས་ཀྱི་རྒྱུ་ཡིན་ནོ། །དེའི་ཚེ་ཡོན་ཏན་མ་བཟུང་བ་མི་སྡུག་པ་བསྒོམ་པ་ལ་སོགས་པས་མི་སྡུག་པ་ལ་སོགས་པར་འཛིན་པ་ལ་ཡང་འདོད་ཆགས་ཡོད་པར་འགྱུར་རོ། །གཟུགས་བཟང་པོ་ལ་སོགས་པ་ཙམ་འཛིན་པ་ནི་ལྷན་ཅིག་བྱེད་པ་མ་ཡིན་གྱི། འོན་ཀྱང་སྡུག་པ་ལ་སོགས་པར་འཛིན་པ་ཡིན་ནོ་སྙམ་དུ་དོགས་པ་བསུ་བ་ནི། གལ་ཏེ་ཡོན་ཏན་ཞེས་བྱ་བའོ།། ཡོན་ཏན་ཐམས་ཅད་ཀྱིས་འཛིན་འགྱུར་ཞེས་བྱ་བ་ནི་ལན་ནོ། །ཅིའི་ཕྱིར་སྙམ་ན། རྒྱུ་ནི་ཞེས་གསུངས་ཏེ། གཟུགས་ལ་སོགས་པའི་ཡོན་ཏན་ཡོད་པ་ཙམ་མོ། །དེའི་ཕྱིར་ཡོན་ཏན་འཛིན་པ་ནི་རྒྱུ་ཡིན་ནོ། །དེས་ན་ཁུ་བ་རྒྱུ་ཡིན་ན་ཡོན་ཏན་མི་འཛིན་པ་ལ་ཡང་འགྱུར་རོ་ཞེས་བྱ་བའི་གནས་སོ། །དེ་ནི་གྲང་བ་དང་ཚ་བའི་རེག་པ་དག་བཞིན་དུ་འགལ་བའི་འདོད་ཆགས་དང་ཞེ་སྡང་གཉིས་སམ། བདེ་བ་དང་སྡུག་བསྔལ་གཉིས་ནི་ཚོགས་པ་མཚུངས་པས་བསྐྱེད་པ་ཉིད་དུ་མི་རིགས་སོ། །བད་ཀན་གྱི་རང་བཞིན་ལ་ནི་འདོད་ཆགས་བཞིན་དུ་ཞེ་སྡང་མཐོང་བ་མ་ཡིན་ནོ་ཞེས་
བརྗོད་པ་ནི། གནས་སྐབས་ག་ལ་ཞེས་བྱ་བའོ། །འབྲས་བུ་བཞིན་དུ་དེའི་རང་བཞིན་གཉིས་ཀྱང་འགལ་བ་ཁོ་ན་སྟེ། མི་འགལ་ན་ནི་འབྲས་བུ་ཡང་དེར་མི་འགྱུར་རོ་ཞེས་བརྗོད་པ་ནི་དེ་གཉིས་ཞེས་བྱ་བ་སྟེ་འདོད་ཆགས་དང་ཞེ་སྡང་གཉིས་སོ། །གང་གིས་འགལ་བར་མི་འགྱུར་པ། འདོད་ཆགས་ལ་སོགས་པ་ནི་བད་ཀན་ལ་སོགས་པའི་རང་བཞིན་ལ་ངེས་པ་ཡང་མ་ཡིན་ནོ་ཞེས་བརྗོད་པ་ནི། འདི་ལ་ངེས་པ་ཞེས་བྱ་བའོ། །གཟུགས་ལ་སོགས་པ་ཡང་ཁུ་བ་བཞིན་དུ་ནུས་པར་བརྗོད་པ་ནི་ཁྱད་པར་ཅན་གཟུགས་ཞེས་བྱ་བའོ། །སྐྱོན་མེད་དོ་ཞེས་བྱ་བ་ནི་ཐམས་ཅད་ལ་འདོད་ཆགས་དྲག་པར་འགྱུར་རོ་ཞེས་བྱ་བ་དེ་ལྟ་བུ་ལ་སོགས་པའི་རང་བཞིན་ནོ། །འདོད་ཆགས་གཟུགས་ལ་ཇི་ལྟར་འཁྲུལ་སྙམ་ན། གཟུགས་དང་བྲལ་བ་ལ་ཞེས་སྨོས་སོ། །དོགས་པ་ནི་གཟུགས་ངན་མ་ལ་སྤྱོད་ཚུལ་དག་ཡོད་ཕྱིར་མ་ཆགས་པ་ཡིན་ནོ་ཞེས་བྱ་བ་ནི་སྐབས་སོ། འོ་ན་གཟུགས་ནི་ཞེས་བྱ་བ་ནི་ལན་ནོ། །དེ་མེད་པར་ཡང་འབྱུང་བའི་ཕྱིར་རོ། །འོ་ན་སྤྱོད་ཚུལ་རྒྱུ་ཡིན་པར་འགྱུར་རོ་སྙམ་ན། སྤྱོད་ཚུལ་དང་ནི་ཞེས་གསུངས་སོ། །དེའི་ཕྱིར་སྤྱོད་ཚུལ་རྒྱུ་མ་ཡིན་ནོ། །འོ་ན་གཉི་ག་རྒྱུ་ཡིན་པར་འགྱུར་རོ་སྙམ་ན་ལ་ལར་ཞེས་གསུངས་སོ། །འོ་ན་ཅི་རུང་བ་ཞིག་རྒྱུ་ཡིན་ནོ་སྙམ་ན། ཀུན་ལ་ཞེས་གསུངས་སོ། །གཟུགས་ལ་སོགས་པ་ཇི་ལྟར་ཡོད་པ་རྒྱུ་ཉིད་ཡིན་པར་བཀག་པ་ཡིན་ནོ་ཞེས་བྱ་བའི་དོན་ཏོ། །ངེས་པ་མེད་པ་ཞེས་བྱ་བ་ནི་གང་རུང་ཞིག་མེད་པར་ཡང་མི་ལྡོག་པའོ། །དེ་ལས་ཞེས་བྱ་བ་ནི་གང་མེད་ཀྱང་འབྱུང་བ་ལས་སོ། །ངེས་བ་ལས་ནི་ཉེས་པ་གཞན་ཡང་བརྗོད་པ་ནི་འདོད་ཆགས་གཅིག་ལ་ཞེས་བྱ་བ་སྟེ། གཟུགས་དང་ཡོན་ཏན་དང་ལྡན་པ་ལའོ། །ཅིའི་ཕྱིར་དེ་ལྟར་ཐལ་སྙམ་ན། ཐམས་ཅད་ལ་ཞེས་སྨོས་ཏེ་སྐྱེས་བུའོ། །ཡོན་ཏན་འཛིན་པའི་རྒྱུ་ནི་ཡོན་ཏན་ཡོད་པ་ཙམ་མོ། །དེའི་ཚེ་ཞེས་བྱ་བ་ཁོང་ནས་ཕྱུང་ལ་ཐོག་མ་མེད་པའི་བག་ཆགས་ལས་ཞེས་བྱ་བ་ལ་སོགས་པ་སྦྱར་བར་བྱའོ། །དེ་འགྱུར་བ་མ་ཡིན་ནོ་ཞེས་བྱ་བ་ནི་ཞེ་སྡང་ལ་སོགས་པ་འགྱུར་བ་མ་ཡིན་ནོ། །འདི་ལ་ཞེས་སྡང་ལ་སོགས་པ་ལའོ། །འདི་ཉིད་ལ་ཡང་
བཀོད་པ་གཞན་གསུངས་པ་ནི་ཡང་ན་ཞེས་བྱ་བའོ། །གཅིག་ལ་འདོད་ཆགས་དང་ཞེ་སྡང་གཉི་གའོ། །འདི་ལ་ཞེས་བྱ་བ་ནི་ཆགས་པ་དང་སྡང་བ་ལའོ། །དེ་མེད་ན་ནི་ཞེས་བྱ་བ་ནི་མེ་དང་འབྲེལ་ནའོ། །དེ་ཞེས་བྱ་བ་ནི་རྡུལ་ལོ། །དེ་དག་གཞན་ཡོད་མ་ཡིན་ཞེས་བྱ་བ་ནི་རྒྱུའོ། །གཟུགས་ལ་སོགས་ཁོ་ན་འདོད་ཆགས་ལ་སོགས་པའི་རྒྱུ་ཡིན་ནོ་ཞེས་བྱ་བའི་དོན་ཏོ། །དེ་ཡོད་ན་ནི་ཞེས་བྱ་བ་ནི་གཟུགས་ལ་སོགས་པ་ཡོད་ནའོ། །འོན་ཏེ་ཞེས་བྱ་བ་ནི་གཞན་གྱིའོ། །ནང་གི་ཕན་འདོགས་པའི་བག་ཆགས་གང་ཡིན་པ་དེའི་དང་འབྲེལ་བ་ལས་ཏེ། སད་པ་ངེས་པའི་ལས་བཟློག་པ་ཞེས་བྱ་བ་དུས་མཚུངས་པ་ཉིད་དུ་ངེས་པ་ལས་བཟློག་པ་ཡིན་ནོ། །དེས་ན་རང་བཞིན་གཅིག་ཁོ་ནས་རེས་འགའ་ནི་འདོད་ཆགས། རེས་འགའ་ནི་ཞེ་སྡང་སྐྱེད་པར་བྱེད་པ་ཡིན་ནོ་ཞེས་བྱ་བ་ནི་ཞེས་བྱ་བ་ནི་གཞན་གྱི་བསམ་པའོ། །བག་ཆགས་ཉིད་ཅེས་བྱ་བ་ནི་བདག་ལ་ཕན་འདོགས་པའི་བག་ཆགས་སོ། །གལ་ཏེ་བག་ཆགས་ཀྱི་ཁྱད་པར་ཡང་གཟུགས་ལ་སོགས་པ་སད་པར་བྱེད་པ་ལ་ལྟོས་པ་ཁོ་ནས་འདོད་ཆགས་ལ་སོགས་པའི་རྒྱུ་ཡིན་ནམ། དེས་ན་དེ་ལ་ཡང་ཉེས་པ་འདི་མཚུངས་སོ་སྙམ་དུ་དོགས་པ་བསུ་བ་ནི། འོན་ཏེ་ཡང་ཞེས་བྱ་བའོ། །འདིར་ནི་ཞེས་བྱ་བ་ནི་འདོད་ཆགས་ལ་སོགས་པ་ལ་མ་ངེས་པར་རོ། །འགའ་ཞིག་གི་ཚེ་ཞེས་བྱ་བ་ནི་ལང་ཚོལ་བབ་པ་ལ་སོགས་པའི་དུས་ངེས་པར་རོ། །རྣམ་པ་འགའ་ཞིག་ལྟར་ཞེས་བྱ་བ་ནི། ཆུང་ངུ་དང་འབྲིང་པོ་ལ་སོགས་པའི་དབྱེ་བས་སོ། །རྒྱུ་འགའ་ཞིག་གིས་ཞེས་བྱ་བ་ནི། གཟུགས་ལ་སོགས་པ་ཕྱི་རོལ་གྱིས་སམ། ནང་གི་ཁྱད་པར་ཉེ་བར་མཚོན་པར་བྱ་བ་མ་ཡིན་པ་སེམས་པ་ལ་སོགས་པས་སོ། །གཟུགས་ལ་སྟོས་པ་མེད་པའི་ཕྱིར་ཞེས་བྱ་བར་བལྟ་བར་བྱའོ། །དེ་ལྟར་བད་ཀན་དང་རླུང་ལ་སོགས་པ་འབྱུང་བ་ཡོངས་སུ་གྱུར་པ་འདོད་ཆགས་ལ་སོགས་བའི་རྒྱུ་ཡིན་པ་བསལ་ནས་གཞན་གྱིས་ཁས་བླང་བའི་འབྱུང་བ་ཉིད་ཡིན་པ་བཟློག་པའི་ཕྱིར་གལ་ཏེ་ཞེས་སྨོས་སོ། །འདིས་ནི་ཞེས་བྱ་བ་ནི་རླུང་ལ་སོགས་པའི་རྗེས་སུ་མི་འཇུག་པས་སོ། །བག་ཆགས་ཀྱང་རྗེས་སུ་འཇུག་པས་སོ། །འདི་ནི་བློ་ལུས་ལ་ནི་བརྟེན་པའི་ཕྱིར་རོ། །
གོམས་པས་གྲུབ་པ་མེད་ཅེ་ན་ཞེས་བྱ་བ་ལ་སོགས་པས་བཀག་ཟིན་ཀྱང་ལོག་པར་རྟོག་པ་སྲིད་པས་ཡང་འགོག་པ་ཡིན་ནོ། །ལོག་པར་རྟོག་པ་དེ་ཡང་མཐོང་ངོ་ཞེས་བཤད་པ་ནི། འདི་དག་ནི་ཞེས་བྱ་བའོ། །ཅིའི་ཕྱིར་བཀག་པ་ཡིན་སྙམ་ན། འདིས་ནི་ཞེས་བྱ་བ་གཏན་ཚིགས་ཀྱི་ཚིག་རྣམ་པར་འགྲེལ་པ་ནི། ཐམས་ཅད་དུ་ཞེས་གསུངས་སོ། །གཟུགས་ལ་སོགས་པ་འབྱུང་བ་དག་ལས་ཐ་དད་པར་ཁས་བླངས་པས་ཞེས་བྱ་བ་ནི། རྟེན་གྱི་དངོས་པོ་ནི་ཐ་དད་པ་ལ་གནས་པའི་ཕྱིར་རོ་ཞེས་བྱ་བའི་དོན་ཏོ། །ཇི་ལྟར་གནོད་པར་འགྱུར་སྙམ་ན། འབྱུང་བ་ཙམ་ཞེས་གསུངས་སོ། །དེ་ལྟར་དཔེ་བཀག་ནས་གནས་སྐབས་ཀྱི་རྟེན་དང་བརྟེན་པའི་དངོས་པོ་ལ་ཡབ་ཉེས་པ་བརྗོད་པ་ནི། གལ་ཏེ་ཤེས་བ་ཞེས་བྱ་བའོ། །བཞི་ཁོ་ནའོ་ཞེས་བྱ་བའི་ངེས་པ་མི་འཐད་དོ་ཞེས་བྱ་བའི་དོན་ཏོ། །ཐ་དད་པ་མ་ཡིན་པར་ཁས་ལེན་པ་ལ་ཡང་སྐྱོན་བརྗོད་པ་ནི། ཐ་དད་པ་མ་ཡིན་ན་ནི་ཞེས་བྱ་བའོ། །གང་གི་ཚོ་ཤེས་པ་གཅིག་གི་ཁོངས་སུ་འདུ་བ་དེའི་ཚེ་འབྱུང་བ་རྣམས་གཅིག་ཉིད་ཡིན་ལ། དེ་ལྟ་ན་ཡང་བཞི་ཞེས་བྱ་བའི་གྲངས་ཉམས་སོ་ཞེས་བྱ་བར་དགོངས་པའོ། །གང་གི་ཚེ་འབྱུང་བ་རྣམས་ཉིད་དུ་ཤེས་པ་འདུས་པ་དེའི་ཚེ་ནི་རྡུལ་ཕྲ་རབ་སོ་སོར་རིག་པར་ཐལ་ལོ་ཞེས་སུན་འབྱིན་པ་སྔར་བཤད་ཟིན་ཏོ། །གལ་ཏེ་རྟེན་དང་བརྟེན་པའི་དངོས་པོ་འགོག་པ་ནི་ཁྱེད་ཀྱི་དེ་ཁས་ལེན་པ་ཡང་གནོད་པ་ཡིན་ནོ་ཞེས་རྩོད་པ་ནི་གལ་ཏེ་ཞེས་བྱ་བའོ། །འབྱུང་བ་དང་གཟུགས་ལ་སོགས་པ་དག་རྟེན་དང་བརྟེན་པའི་དངོས་པོ་བཀག་པ་ནི་ཁས་བླངས་པ་དང་འགལ་བ་ཡང་མེད་དོ་ཞེས་བརྗོད་པ་ནི་མ་ཡིན་ཏེ་ཞེས་བྱ་བའོ། །བརྟེན་ནས་ཀྱི་སྒྲ་ནི་རྒྱུའི་དོན་ལས་ཡིན་ཏེ། དུས་ཐ་དད་པའི་ཕྱིར་རྟེན་དང་བརྟེན་པའི་དངོས་པོར་ནི་མ་གྲུབ་པོ། །གཟུགས་དུས་མཚུངས་པ་ཡིན་ན་ནི། དེ་ལ་ནུས་པ་མེད་པའི་ཕྱིར་ལྷན་ཅིག་གི་དངོས་པོས་ཕན་འདོགས་པ་མ་ཡིན་ནོ། །ལྷན་ཅིག་པའི་དོན་ནི་ལྟོས་པ་མེད་པའི་དོན་ཡིན་པའི་ཕྱིར་རོ། །འབྱུང་བཞིན་པའི་གཟུགས་ནི་ཅི་སྲིད་མེད་ཀྱི་བར་དུ་རང་འབྱུང་བ་ལ། ལྟོས་པར་བྱ་བ་ལ་ལྟོས་པ་ཡིན་ལ།
ལྟོས་པར་བྱ་བའི་སྔར་ཡོད་པར་ཡང་དེ་ཉིད་ཡིན་ནོ། །ཇི་སྲིད་ལྷན་ཅིག་འབྱུང་བ་དེ་སྲིད་དུ་ནི་ལྟོས་པ་ཡོད་པ་མ་ཡིན་ནོ། །འོ་ན་ཇི་ལྟར་འབྱུང་བ་རྣམས་དུས་མཉམ་པར་འབྱུང་བའི་གཟུགས་ཀྱི་རྟེན་ཡིན་ཞེས་ཐ་སྙད་བྱེད་ཅེས་དོགས་པ་བསུ་ནས། ཡང་ན་རང་གི་རྟེན་དག་དང་ཞེས་གསུངས་སོ། །འབྱུང་བ་ཆེན་པོ་དག་དང་ངོ༌། །འབྱེད་མེད་པར་གནས་པའི་ཕྱིར་ཞེས་བྱ་བ་ནི། ལྷན་ཅིག་འབྱུང་བའི་ཕྱིར་རོ། །རྟེན་ཡིན་ཞེས་བྱ་བ་ནི་བརྟེན་པ་ཉིད་ཡིན་པའོ། །ཅིའི་ཕྱིར་དེ་ལྟར་རྟེན་ཡིན་སྙམ་ན། གཞན་དུ་འཐད་མ་ཡིན་ཞེས་གསུངས་སོ། །བརྟེན་པའི་དོན་ནི་ཞེས་བྱ་བ་ནི་འཆད་པའོ། །རྟེན་གྱི་དོན་དང་རྒྱུའི་དོན་གཉིས་དུས་ཐ་དད་དང་ཐ་མི་དད་པའི་ཡུལ་ཅན་ཉིད་ཀྱིས་གཅིག་མ་ཡིན་པ་འདི་ཉིད་གསལ་བར་བྱེད་པ་ནི་རྒྱུ་ནི་ཞེས་བྱ་བའོ། །ཅིའི་ཕྱིར་མི་རྟོག་སྙམ་ན། དུས་མཚུངས་པ་དག་ལ་ཞེས་གསུངས་སོ།། དེས་ནི་ཞེས་བྱ་བ་ཕན་འདོགས་པ་དང་ཕན་གདགས་པར་བྱ་བ་དག་མེད་པ་ནའོ། །འདིས་ནི་རྟེན་གནས་ཀྱི་དོན་ལ་རྒྱུའི་དོན་དུ་ཁས་བླངས་པ་ན་རྟེན་ལ་སོགས་པའི་དངོས་པོ་ཁས་བླངས་པ་མེད་པའི་ཕྱིར་བདག་ཅག་གི་རྟེན་བཀག་པ་འགལ་བ་མེད་དོ་ཞེས་སྟོན་ཏོ། །དབྱེར་མེད་པར་འཇུག་པའི་ཕྱིར་རྟེན་ཡིན་ནོ་ཞེས་འབྲེལ་ཏོ། །ཕན་ཚུན་འཁྲུལ་བ་མེད་པ་ནི་དབྱེར་མེད་པར་འཇུག་པ་ཡིན་ནོ་ཞེས་འཆད་པ་ནི་འདི་ལྟར་ཞེས་བྱ་བའོ། །དེ་དག་ཞེས་བྱ་བ་ནི་གཟུགས་ལ་སོགས་པ་དག་གོ །ཡང་ཇི་ལྟར་ན་རྟེན་ནི་རྣམ་པར་དབྱེར་མེད་པར་གནས་པ་ཙམ་ཡིན་སྙམ་པའི་དོག་ས་པ་སེལ་བས་གཞན་དུ་འཐད་མ་ཡིན་ཞེས་བྱ་བ་འཆད་པ་ནི་གལ་ཏེ་དེ་དག་ཅེས་བྱ་བའོ། །དེའི་རྟེན་ཀྱང་ཞེས་བྱ་བ་ནི་བརྟེན་པའི་རྟེན་ཡིན་ནོ། །བརྟེན་པ་ལ་ལྟོས་པའི་རང་བཞིན་ནི་རྟེན་མེད་ན་མེད་པ་ཁོ་ནས་འཇིག་པ་ཡིན་ནོ། །མི་འཇིག་ན་ནི་སྟེ། བརྟེན་པ་དང་བྲལ་བཞིན་དུ་གནས་ནའོ། །སྔར་ཡང་ཞེས་བྱ་བ་ནི་བརྟེན་པར་མངོན་པར་འདོད་པའི་དུས་ཏེའོ། །དེ་ཉིད་ནི་འདིའི་ཞེས་དོ་ཤེས་པ་ལས་ནི་རྟེན་ཉིད་མ་ཡིན་ནོ། །དེས་ན་འབྱུང་བ་རྣམས་ལ་རྣམ་པར་དབྱེར་མེད་པར་གནས་པ་ཉིད་ནི་གཟུགས་ཀྱི་རྟེན་ཉིད་ཡིན་ནོ་ཞེས་བྱ་བར་དགོངས་བའོ། །གང་
གི་ཕྱིར་དེ་ལྟར་རྟེན་དང་བརྟེན་པའི་དངོས་པོ་མི་འཐད་པའི་གཏན་ཚིགས་དེས་ན་གཟུགས་ལ་སོགས་པ་འབའ་ཞིག་ཏུ་ནི་མ་ཟད་དེ། འདོད་ཆགས་ལ་སོགས་པ་ཡང་ངོ༌། །འགྱུར་རོ་ཞེས་བྱ་བ་ནི་ཐལ་བར་འགྱུར་བའོ། །གལ་ཏེ་གཟུགས་ལ་སོགས་པ་དག་ལས་ཐ་དད་པར་མ་དམིགས་པའི་ཕྱིར་ན་འབྱུང་བ་ཆེན་པོའི་རང་བཞིན་མེད་པ་ཉིད་མ་ཡིན་ནམ། དེས་ན་ཅི་ལྟར་དེ་ལ་གཟུགས་ལ་སོགས་པ་རྣམས་རྣམ་པར་དབྱེར་མེད་པར་གནས་པར་བརྗོད་སྙམ་དུ་དོགས་པ་བསུ་ནས་གཟུགས་ལ་སོགས་པ་ལས་ཞེས་བྱ་བ་གསུངས་སོ། །། གང་གི་ཕྱིར་མ་དམིགས་པའི་ཕྱིར་ན་གཟུགས་ལ་སོགས་པ་ལས་ཐ་དད་པར་འབྱུང་བ་ཆེན་པོ་ཞེས་བྱ་བའི་རང་བཞིན་མེད་པ་ཉིད་ཡིན་པ་དེ་བས་ན་དབྱེར་མེད་པར་གནས་པ་ཉིད་ཅེས་བྱ་བ་འདི་ནི་གཞན་ཁས་བླངས་པ་ཁོ་ནས་བརྗོད་པ་ཡིན་ནོ། །ཕ་རོལ་ཚུ་རོལ་མཛེས་པའམ།། སངས་རྒྱས་པའི་ཕྱོགས་གཅིག་ཐལ་བ་ལས་བཟློག་པར་སྨྲ་བ་ནི། འདོད་ཆགས་ལ་སོགས་པས་ནི་ཞེས་བྱ་བའོ། །ཅིའི་ཕྱིར་ཞེ་ན། འགའ་ཞིག་ཅེས་བྱ་བའོ། །དེས་ན་ལུས་ནི་འདོད་ཆགས་ཀྱི་རྟེན་མ་ཡིན་ནོ། །དེ་བཞིན་དུ་ཞེ་སྡང་ལ་སོགས་པའི་ཡང་མ་ཡིན་ནོ་ཞེས་རྟོགས་པར་བྱ་བའོ། །འདོད་ཆགས་དབྱེར་མེད་པར་གནས་པ་ཉིད་ཀྱིས་ནི་ལུས་ཀྱི་རྟེན་ཉིད་ལ་ཁྱབ་པ་མ་ཡིན་ཏེ། རྣམ་པར་དབྱེར་མེད་ཀྱང་ཆང་དང་ནུས་པ་དག་ལ་རྟེན་ལ་སོགས་ཡོད་པའི་ཕྱིར་རོ་ཞེས་སྨྲས་པ་ནི་གལ་ཏེ་ཞེས་བྱ་བའོ། །དངོས་པོ་ལས་ཞེས་བྱ་ནི་ལན་ནོ། །ཅི་ལྟར་འདི་གཉིས་དབྱེར་མེད་པ་དེ་བཞིན་དུ་རྟེན་ལ་སོགས་པའི་དངོས་པོ་ཡང་མེད་དེ་ཐ་མི་དད་པའི་ཕྱིར་རོ། །དེས་ན་རྣམ་པར་དབྱེ་བ་མེད་པ་ཉིད་ཀྱིས་རྟེན་ལ་མ་ཁྱབ་བ་མ་ཡིན་ནོ་ཞེས་བྱ་བའི་དོན་ཏེ། ཐ་དད་པ་ཡིན་ན་ཡང་བརྟེན་པ་ཉེ་བར་བསྒྲུབ་པའི་རང་བཞིན་བརྟེན་པ་ཞིག་ན་འཇིག་པར་འགྱུར་གྱི་གཞན་དུ་ནི་མ་ཡིན་ནོ་ཞེས་བརྗོད་པ་ནི། དངོས་པོ་འཇིག་འགྱུར་ཏེ་རྟེན་ཚང་བར་གནས་ན་ཞེས་བྱ་བའོ། །གལ་ཏེ་ཞེས་བྱ་བ་ནི་དོགས་པ་བསུ་བའོ། །དེ་མཚུངས་ཞེས་བྱ་བ་ནི། ཆང་དང་ཆང་གི་ནུས་པ་དག་གི་ཐ་མི་དད་པ་ཉིད་ནི་
ལུས་དང་འདོད་ཆགས་ལ་ཡང་མཚུངས་པའི་ལན་དུ་མིན་ཞེས་བྱ་བའོ། །འདོད་ཆགས་དང་ལུས་གཉིས་ཐ་དད་པའི་ཕྱིར་ཐ་མི་དད་པ་ཉིད་ནི་མ་ཡིན་ནོ། །ཐ་དད་པ་ལ་ཡང་རྟེན་དང་བརྟེན་པའི་དངོས་པོ་ཡོད་པ་ནི་མ་ཡིན་ནོ་ཞེས་གསུངས་པ་ནི། སྣང་བ་དེ་མྱོང་བ་ཐ་དད་པ་དེ་རྟེན་དང་བརྟེན་པའི་དངོས་པོ་དང་བྲལ་བ་དེ་རྟོགས་པ་དེ་རིགས་པའི་ཕྱིར་རོ། །གཟུགས་དང་རོ་གཉིས་ལྷན་ཅིག་རིག་ཀྱང་རྟེན་དང་བརྟེན་པའི་དངོས་པོར་འགྱུར་བ་ནི་མ་ཡིན་ནོ། །ཆང་དང་བུ་རམ་ཆང་ཞེས་བྱ་བ་ལ་སོགས་པ་ནི། རྟེན་དང་བརྟེན་པའི་དངོས་པོ་རྣམ་པར་དབྱེ་བ་མེད་པ་ཉིད་ཀྱིས་མ་ཁྱབ་པར་བརྗོད་པ་ཡིན་ནོ། །བཤད་ཟིན་པའི་དོན་ཉིད་གསལ་བར་བྱེད་པ་ནི། འདི་ལྟར་ཞེས་བྱ་བའོ། །མངོན་པར་འབྱུང་འགྱུར་ཉིད་ཡིན་ཞིང༌། །ཞེས་བྱ་བའི་སྐྱེས་བུ་ལ་བསྲེག་པར་བྱར་མེད་པའི་རང་བཞིན་གཞན་ཡང་ཞེས་སྨྲས་མེད་པར་རོ། །དེ་ལྟ་ན་ཡང་རྟེན་ལ་སོགས་པའི་དངོས་པོ་ནི་མི་ཉམས་སོ་ཞེས་བཤད་པ་ནི་འདི་རྟེན་ཞེས་བྱ་བའོ། །དེ་བཞིན་ཉིད་དང་ནི་རྟེན་ཉིད་དུའོ། །དེ་བཞིན་ཞེས་བྱ་བ་ནི་བུམ་པ་བཞིན་དུའོ། །དེ་ཡང་མི་འཐད་དེ་ཞེས་བྱ་བ་ནི་ལན་ནོ། །འོ་ན་ཇི་ལྟར་ཐ་དད་པར་བསྙད་ཅེ་ན། རྫས་ཀྱི་ནུས་ཞེས་སྨོས་སོ། །གཞན་དག་ནུས་པ་དོན་གཞན་ཉིད་དུ་སྒྲུབ་པས་གལ་ཏེ་ཞེས་སྨྲས་སོ། །གཞན་ལ་ཞེས་བྱ་བ་ནི་སྐྱེས་བུ་བཞིན་པའོ། །རང་གི་ངོ་བོ་མ་བཀག་ན་ནི་གཞན་ལ་སྲེག་པ་འཐད་པ་ཡིན་ནོ་ཞེས་སྨྲས་པ་ནི། ནུས་པ་བཀག་ན་ནི་ཞེས་བྱ་བའོ། །དེ་ཞེས་བྱ་བ་ནི་མེའི་རང་གི་ངོ་བོའོ། །གཞན་ནི་སྐྱེས་བུ་གཞན་ནོ། །རྣམ་དབྱེ་འདི་ནི་ཞེས་བྱ་བ་ནི་འགའ་ཞིག་སྲེག་ལ་གཞན་ནི་མ་ཡིན་ནོ་ཞེས་བྱ་བར་རོ། །ཅི་ལྟར་མི་འགྱུར་སྙམ་ན་དེ་ཡང་ཞེས་བྱ་བའོ། །རང་གི་ངོ་བོ་བཞིན་དུ་ནུས་པ་ཡང་གཅིག་ཁོ་ན་ཡིན་པས་ཐམས་ཅད་ལ་ཐུན་མོང་དུ་ཡོད་པ་དང་མེད་པ་ཡིན་ནོ་ཞེས་བྱ་བའི་དོན་ཏོ། །གཞན་དག་ནུས་པ་རྣམས་མང་བའི་ཕྱིར་ན་ཉེས་པ་འདིར་མི་འགྱུར་རོ་ཞེས་བརྗོད་པ་ནི། ནུས་པ་རྣམས་ནི་མང་བས་ན། །ཞེས་བྱ་བའོ། །དེ་བས་གཞན་ནི་ཞེས་བྱ་བ་ནི་སྐྱེས་བུ་གཞན་སྲེག་པར་བྱེད་པའོ། །ཡང་ན་ནུས་པ་
གཅིག་ཁོ་ན་ཡིན་དུ་ཟད་མོད། དེ་ཡང་སྔགས་ལ་སོགས་པས་ཉམས་པར་བྱེད་པ་ནི་མ་ཡིན་ནོ། །འོ་ན་ཅི་ཞེ་ན་བསྲེག་པར་བྱ་བའི་སྐྱེས་བུ་ལ་བསྲེག་པར་བྱར་མེད་པའི་རང་བཞིན་གཞན་བྱེད་པ་ཡིན་ནོ། །དེས་ན་བྲལ་བ་ནི་སྲེག་པ་ཡིན་ནོ་སྙམ་ནས་ཡང་ཞེས་སྨྲས་སོ། །གཞན་ཉིད་དུ་ནི་བསྲེག་ཏུ་མེད་པར་རོ། །དེས་ཚིག་མ་ཡིན་ཏེ། བསྲེག་པར་འགྱུར་བ་མ་ཡིན་ནོ་ཞེས་བྱ་བ་མི་འཐད་དོ། །གཞན་གྱིས་ཞེས་བྱ་བ་ནི་གང་སྔགས་ལ་སོགས་པས་གཞན་དུ་བྱས་པ་དེ་ལས་གཞན་གྱིས་ནའོ། །ཚིག་འགྱུར་ཞེས་བྱ་བ་ནི་བསྲེག་པར་འགྱུར་རོ་ཞེས་བྱ་བའི་ཐ་ཚིག་གོ །གཞན་དུ་ནི་སྟེ་སྔགས་ལ་སོགས་པ་དང་བྲལ་པ་ལ་ནིའོ། །གང་ལས་ཞེས་བྱ་བ་ནི་རྒྱུའམ་ཚད་མ་གང་ལས་སོ། །དེ་རྣམས་མེད་ཀྱང་བྱེད་བཞིན་པའི་སྲེག་པར་བྱེད་པ་འདིའི་རྒྱུ་ཡོད་པའི་ཕྱིར་དོན་གྱིས་གོ་བ་ཉམས་པ་ཡིན་ནོ་ཞེས་བརྗོད་པ་ནི་གང་གིས་ཞེས་བྱ་བའོ། །གལ་ཏེ་རྒྱུ་རང་བཞིན་གཅིག་ཡིན་ན་འབྲས་བུ་ཡང་དེ་བཞིན་དུ་འགྱུར་ན། འབྲས་བུ་ནི་དུ་མ་ཡིན་ཏེ། དེས་ན་རང་གི་ངོ་བོ་ཐ་དད་པ་མེད་ཀྱང་དོན་གྱི་གོ་བས་ནུས་པ་ཐ་དད་པར་གནས་པ་ཡིན་ནོ་ཞེས་རྩོད་པར་ནི་དངོས་པོ་འདི་ལྟོས་པ་ཡོད་མིན་ཏེ་ཞེས་བྱ་བའོ། །འདི་ག་ལས་སྙམ་ན་ནུས་པ་མང་པོ་མེད་པར་ནི་ཞེས་བྱ་བ་སྨོས་སོ། །འདི་ཉིད་གསལ་བར་བྱེད་པ་ནི་མེ་ལས་ཚིག་པ་ལ་སོགས་བ་ཞེས་བྱ་བའོ། །ཚིག་པ་ལ་སོགས་པའི་འབྲས་བུ་དུ་བ་མེད་པ་ལ་སོགས་པ་ལས་རྣམ་པར་ཕྱེ་བར་མཐོང་བ་གང་ཡིན་པ་དེར་མི་འགྱུར་རོ། །ནུས་པ་དུ་མ་ཉིད་ཀྱི་རྗེས་སུ་དཔག་པ་བརྗོད་ནས། དེས་ཁས་མི་ལེན་པ་མ་ཉེས་པ་བརྗོད་པ་ནི་མེ་ལ་སོགས་པ་ཞེས་བྱ་བའོ། །ཡོད་དམ་ནི་སྔགས་ལ་སོགས་པ་དང་བྲལ་བ་ལའོ། །མེད་པ་ནི་མི་སྲིད་པ་མ་ཡིན་པ་ལ་སྟེ། དེ་དང་ལྡན་པ་ལའོ། །གཉི་ག་གཅིག་གི་ཚེ་ནི་མི་རུང་སྟེ། འགལ་བའི་ཕྱིར་ཞེས་བྱ་བའི་དོན་ཏོ། །དེ་ལ་སྔགས་དང་བྲལ་བ་ལ་སྲེག་བྱེད་ཉིད་དུ་ཡོད་པའི་མེ་ནི། དེ་དང་མི་ལྡན་པ་ལ་མེད་པར་མི་རིགས་ཏེ་འགལ་བའི་ཕྱིར་རོ་ཞེས་བརྗོད་པ་ནི། ཡོད་ན་སྔགས་ལ་སོགས་པ་དང་ལྡན་པ་ཐམས་ཅད་ཀྱང་སྲེག་པ་ཉིད་དོ། །དེ་མེད་པ་ཡིན་ན་སྟེ་མེ་ལ་སོགས་
པ་རང་བཞིན་གཅིག་པོ་དེ་མེད་ན་འགའ་ཡང་མིན་ཏེ་སྔགས་ལ་སོགས་པ་དང་བྲལ་བ་ཡང་མེ་ཉིད་དུ་མི་སྲེག་པར་འགྱུར་རོ་ཞེས་བྱ་བའི་དོན་ཏོ། །འདི་ག་ལས་སྙམ་དུ་དོགས་པ་ན་གཅིག་ནི་ཞེས་བྱ་བའོ། །དེ་ཡང་ཞེས་བྱ་བ་ནི་ལན་ནོ། །ནུས་པ་སྣ་ཚོགས་གང་ལ་ཡོད་པ་དེ་ལ་དེ་སྐད་ཅེས་བྱའོ། །འབྲས་བུ་སྣ་ཚོགས་གང་ལ་ཡོད་པ་ཡང་དེ་བཞིན་ནོ། །མ་མཐོང་བ་ནི་ནུས་པ་མང་པོ་ཉིད་དོ། །འབྲས་བུ་མ་མཐོང་བ་ནི་རང་གི་ངོ་བོ་ངེས་པ་ཙམ་གྱིས་འབྱུང་བས་ནུས་པ་དུ་མ་འགྲུབ་པ་ལས་བཞིན་དུ་གྲུབ་པོ་ཞེས་སྨྲས་པ་ནི། གལ་ཏེ་འབྲས་བུ་སྣ་ཚོགས་ནི། །ཞེས་བྱ་བའོ། །འདིར་ཞེས་བྱ་བ་ནི་འབྲས་བུ་དུ་མ་བྱེད་པའི་དངོས་པོ་ལའོ། །འབྲས་བུ་དེ་དག་ཉིད་ཡིན་མོད་ནུས་པ་ནི་མ་ཡིན་ནོ། །སྲེག་པར་བྱེད་པ་ཉིད་ཡོད་པ་དང་མེད་པ་ཡང་བཤད་པ་ནི་གང་གིས་ཞེས་བྱ་བའོ། །རང་བཞིན་ངེས་པ་གང་གིས་སོ། །མེ་ནི་ས་བོན་ལ་སོགས་པ་བཞིན་དུ་སྔགས་ལ་སོགས་པ་ཡོད་པ་དང་མེད་པའི་ལྷན་ཅིག་བྱེད་པ་ཅན་རྣམ་པ་ཐ་དད་པར་འབྲས་བུ་བྱེད་པར་རང་གི་རྒྱུ་ལས་སྐྱེས་པ་ཡིན་པའི་ཕྱིར་ནུས་པ་སྣ་ཚོགས་རྟོག་པ་དོན་སྐྱེད་དོ་ཞེས་བྱ་བའི་དོན་ཏོ། །འབྲས་བུ་རྣམ་པར་ཕྱེ་ནས་བྱེད་པ་ཉིད་གསལ་བར་བྱེད་པ་ནི། མེ་ནི་སྔགས་དང་ཞེས་བྱ་བའོ། །སྔགས་ལ་སོགས་པས་བསྲེག་པར་བྱ་བ་ཉིད་རྣམ་པ་གཞན་དུ་བྱེད་པ་ཡིན་ནོ་ཞེས་བརྗོད་པ་ནི། སྲེག་རྫས་རང་བཞིན་དེ་ཡིན་ཞེས་གསུངས་ཏེ། རང་བཞིན་དེ་ཡིན་ཞེས་བྱ་བ་ནི། སྲེག་ཏུ་མེད་པའི་རང་བཞིན་དང་སྔགས་ལ་སོགས་པར་བྱས་པ་ཡིན་ནོ། །གང་གིས་ཏེ་སྲེག་ཏུ་མེད་པའི་རང་བཞིན་གྱིས་སོ། །དེས་ནི་ཞེས་བྱ་བ་ནི་དེའི་རང་བཞིན་གང་ཞིག་སྔགས་ལ་སོགས་པས་བྱས་པ་དེས་ནི་མི་འཚིག་སྟེ་འཚིག་པར་མི་འགྱུར་རོ་ཞེས་བྱ་བའི་དོན་ཏོ། །གང་ཞིག་གི་རང་བཞིན་སྔགས་ལ་སོགས་པས་སྲེག་ཏུ་མེད་པ་ཉིད་དུ་མ་བྱས་པ་གཞན་དེས་ནི་འཚིག་པར་འགྱུར་ཏེ། བསྲེག་པར་བྱ་བར་འགྱུར་བ་ཡིན་ནོ་ཞེས་བྱ་བའི་དོན་ཏོ། །ཅི་ལྟར་འདོད་པས་སྤྱོད་པ་འདིར་གྱུར་ཅེ་ན། རང་གི་རྒྱུ་ལས་སྨོས་སོ། །དེས་ན་ཞེས་བྱ་བ་ནི་རྟེན་ལ་སོགས་པ་མེད་པས་སོ། །དཔེ་ནི་ཞེས་བྱ་བ་ནི། ཆང་
དང་ཆང་གི་ནུས་པའི་དཔེའོ། །རང་བཞིན་ཞེས་བྱ་བ་ནི་རྣམ་པར་དབྱེར་མེད་པར་གནས་པ་མེད་ཀྱང་རྟེན་ལ་སོགས་པའི་དངོས་པོར་འགྱུར་བའོ། །དེས་ན་ཞེས་བྱ་བ་ནི་ནུས་པ་ཐ་དད་པ་མ་ཡིན་པས་སོ། །དེར་ནི་ཞེས་བྱ་བ་ནི་རྟེན་དང་བརྟེན་དག་གི་ནང་ནས་སོ། །དངོས་པོ་ཉིད་ནི་རྟེན་དུ་མངོན་པར་འདོད་པའོ། །གལ་ཏེ་མཚུངས་ཤེ་ན་ཞེས་བྱ་བ་རྣམ་པར་འགྲེལ་པ་ནི་འོན་ཏེ་ཡང་ཞེས་བྱ་བའོ། །དེ་བཞིན་དུ་འགྱུར་བ་ཉིད་དོ་ཞེ་ན་ཞེས་བྱ་བ་ནི་སེམས་པ་བརྟེན་ནས་ཐ་མི་དད་པར་རོ། །དེས་ན་རྟེན་ཞིག་ན་དེ་འཇིག་པ་ཡིན་ནོ་ཞེ་ན། ནུས་པ་ལྟར་འབྱུང་བ་ལྟར་འབྱུང་བ་ཐ་མི་དད་པ་ཞེས་བྱ་བ་འདིའི་དེ་མ་ཐག་ཏུའམ་རྟེན་དང་བརྟེན་པའི་དངོས་པོ་མ་ཡིན་ནམ་ཞེས་བྱ་བར་ལྟ་བའོ། །དེ་ཉིད་ཅེས་བྱ་བ་ནི་གཉིས་མེད་པའོ། །ཐ་མི་དད་པ་ནི་མ་ཡིན་ཏེ། སྣང་བ་ཐ་དད་པ་རྟོགས་པ་མེད་པའི་ཕྱིར་རོ། །རྟེན་དང་བརྟེན་པའི་དངོས་པོ་ཡང་མ་ཡིན་ཏེ། སྣང་བ་ཐ་དད་པ་དེ་ཉིད་ཀྱི་ཕྱིར་ཏེ། ལོགས་སུ་གནས་པའི་ཕྱིར་རོ། །འདི་ཉིད་གཞུང་གཟུགས་པ་བརྗོད་པ་ནི། སྣང་བ་ཐ་དད་ཐམས་ཅད་དུ། །ཞེས་བྱ་བའོ། །ངེས་པ་འདི་ག་ལས་སྙམ་ན། ཐ་དད་འགྲུབ་པའི་ཞེས་གསུངས་སོ། །གཞན་ཞེས་བྱ་བ་ནི་སྣང་བ་ཐ་དད་པ་ལས་མ་གཏོགས་པའོ། །འོན་ཏེ་ཡང་རྟོག་པའི་རྒྱུ་ཐ་དད་པར་འགྲུབ་པ་ཡིན་གྱི། སྣང་བ་ཐ་དད་པ་ལས་ནི་མ་ཡིན་ནོ་སྙམ་དུ་དོགས་པ་བསུ་ནས། དབང་པོ་ཐ་དད་པ་དང་ཞེས་གསུངས་སོ། །དབང་པོ་ཐ་དད་པ་དང་རྟོག་པ་པོ་ཐ་དད་པ་དེ་དག་གིས་གཟུང་བར་བྱ་བ་ཡིན་དུ་ཟིན་དང་ངོ་སྟེ། རྒྱུ་ཐ་དད་པ་ནི་ཐ་དད་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་སྙམ་ན། ཐ་དད་པར་བྱེད་པ་ནི་ཞེས་གསུངས་སོ། །སྣང་བའི་རང་བཞིན་ཞེས་བྱ་བ་ནི་རྣམ་པར་རྟོག་པ་མེད་པའི་རྟོགས་པའི་རྒྱུ་ཐ་དད་པ་ནི་ཐ་དད་པ་མ་ཡིན་ནོ་ཞེས་འབྲེལ་ཏོ། །འོ་ན་རྟོགས་པ་ཐ་དད་པ་དེ་ཉིད་ཅེས་བྱ་བ་ནི་རྟོགས་པའི་རྒྱུ་ཐ་དད་པ་ལས་བྱུང་བའི་རྟོགས་པ་ཐ་དད་པ་གང་ཡིན་པའོ། །གཞན་ནི་ཞེས་བྱ་བ་ནི་རྒྱུ་ཐ་དད་པའོ། །དེ་ལྟར་སྣང་བ་ཐ་དད་པ་ཉིད་ཐ་དད་པར་བྱེད་པ་ཡིན་གྱི། གཞན་ནི་མ་ཡིན་ནོ་ཞེས་བསྒྲུབས་ནས་སྐབས་སུ་བབ་
པ་ལ་ཡང་སྟེ། ཡོད་པ་ཡིན་ནོ་ཞེས་སྟོན་པ་ནི་དེར་ཡང་ཞེས་གསུངས་ཏེ། འབྱུང་བ་དང་སེམས་གཉིས་ཀྱི་ནང་ནས་སོ། །ཤེས་པའི་ཐ་དད་པ་བསྟན་ནས། འབྱུང་བ་ཆེན་པོ་ལ་སྟོན་པ་དོན་ནི་སངས་པ་དང་ཞེས་བྱ་བའོ། །དོན་ནི་ཐ་དད་པར་སྣང་ངོ་ཞེས་སྦྱར་རོ། །འོན་ཏེ་ཞེས་བྱ་བ་ནི་ཐ་མི་དད་པའི་དོགས་པ་བསུ་བའོ། །གཏན་ཚིགས་དེས་ན་གང་དུ་རིག་པའི་རང་བཞིན་ཡིན་གྱི། ཐ་དད་པར་སྣང་བའི་རང་བཞིན་ནི་མ་ཡིན་ནོ། །ཤིང་ལ་སོགས་གཅིག་ཉིད་ཡིན་ཡང༌། ཐ་དད་པ་ལས་བཟློག་པར་སྣང་བ་ནི་མེད་དོ་ཞེས་བརྗོད་པ་ནི་གང་ཞིག་ཅེས་བྱ་བའོ། །དོན་ནི་འདི་སྐབས་ལ་སྦྱོར་བ་ནི་ནང་གི་རེག་བྱའི་ཁྱད་པར་ནི་ཞེས་བྱ་བའོ། །དེས་ན་ཞེས་བྱ་བ་ནི། གང་ལ་རེག་བྱའི་ཁྱད་པར་ཡོད་པ་དེས་སོ། །དེས་ཕྱི་རོལ་གྱི་ཤིང་བཞིན་དུ་རིག་པ་མ་ཡིན་ནོ་ཞེས་སྦྲེལ་ཏེ། ཅི་སྟེ་ངེ་ལྟར་རིག་པ་མ་ཡིན་སྙམ་ན། ལུས་ཀྱི་ནང་ན་གནས་པའི་ཕྱིར་ཞེས་སྨོས་སོ། །ལུས་ཀྱི་ནང་ན་གནས་པ་ཉིད་ཅི་ལྟར་སྙམ་ན། བདག་དང་ཡུལ་གཅིག་པ་ཉིད་ཀྱིས་ཞེས་གསུངས་སོ། །འདི་ནི་ཞེས་བྱ་བ་ནི་བདེ་བ་ལ་སོགས་པའོ། །དེ་ནི་ཞེས་བྱ་བ་ནི་རེག་བྱའོ། །གང་གིས་ཞེས་བྱ་བ་ནི་གང་གིས་ཀྱང་མ་ཡིན་པ་སྟེ། དེ་ལས་ཐ་དད་པ་ཁས་མ་བླངས་པའི་ཕྱིར་རོ། །འོན་ཏེ་གཞན་གྱིས་རིག་པར་ཁས་ལེན་ན་དེའི་ཚེ་གཞན་གྱིས་རིག་ན་བདེ་བ་ལ་སོགས་པ་རེག་པར་བྱ་བའི་འཛིན་བྱེད་ཀྱི། རེག་པ་ནི་ཐ་དད་ཡིན་པར་ཐལ་བར་འགྱུར་རོ། །འོན་ཏེ་ཞེས་བྱ་བ་ནི་གཞན་གྱིའོ། །དེ་ནི་ཞེས་བྱ་བ་ནི་རེག་བྱའོ། །དེས་ན་རིག་པ་ཐ་དད་པར་ཐལ་བ་མ་ཡིན་ནོ་སྙམ་དུ་བསམས་པའོ། །འབྱུང་བ་ཆེན་པོའི་རང་བཞིན་མིན། །ཞེས་བྱ་བ་ནི་ལན་ནོ། །གལ་ཏེ་རེག་བྱ་རང་རིག་པའི་རང་བཞིན་དུ་ཁས་ལེན་ན་དེའི་ཚེ་འབྱུང་བ་ཆེན་པོའི་རང་བཞིན་དུ་མི་འགྱུར་ཏེ། ཤེས་པའི་རང་བཞིན་ཁོ་ནར་འགྱུར་རོ་ཞེས་བྱ་བའི་དོན་ཏོ། །དེ་ལྟར་དེའི་རང་བཞིན་དུ་འགྱུར་མོད་ཅི་སྐྱོན་ཞེ་ན། རང་རིག་ཅེས་སྨོས་སོ། །གལ་ཏེ་རིག་བྱ་རང་གི་རང་བཞིན་གྱི་ངོ་བོ་ཡིན་ན། དེའི་ཚེ་རང་རིག་པའི་རང་བཞིན་དེ་ཁོ་ན་ལྟར་སྐྱེས་བུ་གཞན་གྱིས་ཅིའི་ཕྱིར་ཏེ་ཅི་སྟེ་མ་ཤེས། དོན་མི་ཐུན་མོང་མ་
ཡིན་པའི་ཕྱིར་ན། ཤེས་ཀྱིས་ཀྱང་ཤེས་བྱ་བཟློག་ཏུ་མེད་ཅེས་དགོངས་པའོ། །དོགས་པ་ནི་གལ་ཏེ་ཁོང་ནང་ཆུད་ཕྱིར་ན། མ་ཤེས་པ་མ་ཡིན་ནོ་སྙམ་ན། ལན་དུ་ན་རེག་ན་ཞེས་བྱ་བའོ། །འདི་ཉིད་འཆད་པ་ནི། གང་ཞིག་ཅེས་བྱ་བའོ། །ཁོང་པ་ལ་སོགས་པར་ལག་པ་ལ་སོགས་པ་བཅུག་པ་ལས་དེའི་ཁོང་ན་གནས་པའི་སྡུག་བསྔལ་ལ་སོགས་རིག་པར་ཐལ་བར་འགྱུར་རོ། །དེ་ལྟ་ཡང་མ་ཡིན་ནོ། །དེས་ན་བདེ་བ་ལ་སོགས་པ་མྱོང་བ་ནི་འབྱུང་བའི་རང་བཞིན་མ་ཡིན་ནོ། །དེ་ལྟར་བདེ་བ་ལ་སོགས་པ་ནང་གི་རེག་བྱའི་ཁྱད་པར་མ་ཡིན་ནོ་ཞེས་བསྟན་ནས། ད་ནི་ཕྱི་རོལ་གྱི་རིག་བྱའི་རང་བཞིན་ཡང་མ་ཡིན་ནོ་ཞེས་བསྟན་པའི་ཕྱིར། ཕྱིའི་འཁྱུད་པའི་རེག་པ་ཡང་ཞེས་གསུངས་སོ། །དེ་ལྟར་གྱུར་ན་ཅིའི་སྐྱོན་སྙམ་ན། གཉིས་པོ་ཞེས་གསུངས་སོ། །བུད་མེད་དམ་སྐྱེས་པ་གཉིས་ཕན་ཚུན་རེག་པ་ནའོ། །གཉི་ག་ཡང་ནི་རིག་པར་འགྱུར། །ཞེས་པ་ནི་བདེ་བ་ལ་སོགས་པའི་རང་བཞིན་གྱི་རེག་པ་གཉི་ག་ཡང་ངོ༌། །འདི་འོན་ཏེ་གཞན་གྱི་རང་བཞིན་གྱི་རེག་པ་ཉིད་རྟོགས་ཀྱི་བདག་གི་རང་བཞིན་ནི་མ་ཡིན་ནོ། །དེ་ནི་གཞན་ཁོ་ན་འཛིན་པར་བྱེད་པ་ཡིན་ཏེ། དེ་གཉི་གས་གཉི་ག་རྟོགས་པ་མ་ཡིན་ནོ་སྙམ་དུ་དོགས་པ་བསུ་ནས་གཞན་གྱི་ཞེས་སྣོས་སོ། །གཞན་གྱི་རང་བཞིན་ཞེས་བྱ་བ་ནི། རྒྱུད་གཞན་ལ་གནས་པ་བདེ་བའི་རེག་པའོ། །བདག་རང་བཞིན་ཞེས་བྱ་བ་ནི་བདག་ཉིད་ཀྱི་བདེ་བའི་རེག་པའི་རང་བཞིན་ནོ། །ཅི་ལྟར་རིག་པ་མེད་དེ་རིགས་ཁོ་ནར་འགྱུར་རོ། །དེས་ན་གཉི་གས་གཉི་ག་རྟོགས་པར་ཐལ་བ་བཟློག་པར་དཀའོ། །གཉི་གས་གཉི་ག་རིག་པར་ཐལ་བར་མི་བཟོད་ནས། གཞན་དོགས་པར་བྱེད་པ་ནི་འོན་ཏེ་གཞན་གྱིས་ཞེས་བྱ་བའོ། །བདག་གི་རང་བཞིན་ནི་བདག་ཉིད་ཀྱི་རིག་པའི་རང་བཞིན་ནོ། །དེ་ལྟ་ཡིན་ན་ཞེས་བྱ་བ་ནི་རིག་པ་བདག་གི་རང་བཞིན་དེ་ཉིད་བདེ་བར་འགྱུར་བ་ཡིན་ནའོ། །དེ་བཞིན་དུ་རིག་པར་ཐལ་ལོ་ཞེས་བྱ་བ་ནི། ཅི་ལྟར་གཅིག་གིས་རེག་པ་ན་བདེ་བར་རྟོགས་པ་དེ་བཞིན་དུ་རྟོགས་པར་འགྱུར་རོ། །རེག་བཞིན་བ་ནི་དོན་ཡིན་པས་ན་ཐུན་མོང་ཡིན་པའི་ཕྱིར་རོ་སྙམ་དུ་དགོངས་པའོ།།
དེས་ན་གཉི་ག་ཡང་བདེ་བ་ཉིད་དུ་མཚུངས་པར་འགྱུར་རོ་ཞེས་བྱ་བའི་དོན་ཏོ། །བདེ་བ་ཉིད་དུ་མཚུངས་བར་ཐལ་བ་སྤོང་བའི་དོགས་པ་བསུ་ནས་བཟློག་པ་ནི་གཞན་གྱིས་ཞེས་བྱ་བའོ། །ཅི་ལྟར་རྣམ་པ་ཐམས་ཅད་ཅེས་བྱ་བ་ནི། ཆ་ཤས་མེད་པས་ན་རྣམ་པ་གཞན་ཉིད་མེད་པའི་ཕྱིར་རོ། །དུ་མ་ཞས་བྱ་བ་ནི་ཆ་ཤས་དང་བཅས་པའོ། །དེ་ལྟ་ཡིན་ན་ཞེས་བྱ་བ་ནི་དུ་མ་ཡིན་ནའོ། །འགའ་ཞིག་ནི་རྡུལ་ཕྲ་རབ་པོ་དེ་ལྟ་ཡིན་མོད་ཅི་སྐྱོན་སྙམ་ན། གཞན་གྱི་བདེ་བའི་བཞི་ཆ་ཙམ་ཡང་ཞེས་སྨོས་སོ། །འོན་ཏེ་གཞན་གྱིས་གཞན་གྱི་བདེ་བའི་ཆ་རྟོགས་པར་ཁས་ལེན་ན་དེའི་ཚེ་རང་ཉིད་ཀྱང་རིག་པར་གྱུར་པ་བདེ་བའི་རྡུལ་ཕྲ་རབ་རྣམས་ཀྱི་ནང་ནས། རྡུལ་ཕྲ་རབ་གཅིག་ཉིད་རྟོགས་པར་འགྱུར་ཏེ། རྡུལ་ཕྲ་རབ་སོ་སོར་རིག་པ་མེད་པའི་ཕྱིར་རོ་ཞེས་བརྗོད་པ་ཉིད་ཀྱང་སོ་སོར་རིག་པ་རྣམས་ལས་གཅིག་ཉིད་རྟོགས་པར་འགྱུར་རོ་ཞེས་བྱ་བའོ། །ཡང་ན་ཅིའི་ཕྱིར་གཞན་གྱི་བདེ་བའི་ཆ་མ་རྟོགས་སྙམ་ན་རང་ཉིད་ཀྱང་ཞེས་སྨོས་སོ། །གང་གི་ཕྱིར་རང་ཉིད་སོ་སོར་རིག་པར་ཁས་བླངས་པའི་བདེ་བའི་རྡུལ་ཕྲ་རབ་རྣམས་ལ་ཆ་མེད་བ་གཅིག་པོ་གང་ཡིན་པ་དེ་ཉིད་རྟོགས་པར་འགྱུར་ཏེ། རྡུལ་ཕྲ་རབ་གཅིག་ནི་མ་ཡིན་ནོ། །དེའི་ཕྱིར་གཞན་གྱིས་ཀྱང་དེ་ཁོ་ན་ལྟར་རྟོགས་པར་འཐད་པ་ཡིན་ཏེ། གཞན་དུ་ན་འཁྲུལ་པ་ཉིད་དུ་ཐལ་བའི་ཕྱིར་རོ། །དེས་ན་གཞན་གྱིས་དེ་བཞིན་དུ་རྟོགས་པར་ཐལ་བ་ནི་ཡང་བར་དགའོ་ཞེས་མཇུག་བསྡུ་བའི་སྒོ་ནས་སྟོན་པ་དེས་ན་བུད་མེད་དམ་སྐྱེས་པ་གཉིས་མཚུངས་པར་མྱོང་བར་འགྱུར་རོ་ཞེས་བྱ་བའོ། །འཁྱུད་པ་ན་ཞེས་བྱ་བ་ནི་སྐབས་ཡིན་ནོ། །འོན་ཏེ་ཡང་རང་ཉིད་ཐམས་ཅད་རྟོགས་པ་མ་ཡིན་ནོ་སྙམ་ན། ཐམས་ཅད་རིག་པ་ཡིན་ཞེས་སྨོས་སོ། །འོན་ཏེ་ཞེས་བྱ་བ་ནི་གཞན་གྱིའོ། །མ་ཡིན་ཏེ་ཞེས་བྱ་བ་ལ་སོགས་པ་ནི་ལན་ནོ། །གལ་ཏེ་ཡང་དེ་རྣམས་འབྱར་བ་ཡིན་ན་དེའི་ཚེ་རྡུལ་ཕྲ་རབ་རྣམས་དང་དེ་དག་འབྱར་བ་གཉིས། སོ་སོར་རྟོགས་པར་འགྱུར་རོ་ཞེས་བརྗོད་པ་ནི་ཡོད་ཀྱང་ཞེས་བྱ་བའོ། །འབྱར་བས་ཞེས་བྱ་བ་ནི་དོགས་པ་བསུ་བའོ། །རྡུལ་
ཕྲ་རབ་རྣམས་དང་འབྱར་བ་གཞན་གཉིས་ཀྱང༌། འབྱར་བས་རྣམ་པར་དབྱེ་བ་མ་རྟོགས་སོ་ཞེ་ན། འོ་ན་ཞེས་ལེན་འདེབས་སོ། །མ་རྟོགས་འབྱུང་བའི་རྡུལ་ཕྲ་རབ་དག་ལས་རྟོགས་བཞིན་པའི་སེམས་ཐ་དད་པར་འགྱུར་ཏེ། རྟོགས་པ་དང་མ་རྟོགས་པ་དག་ཐ་དད་པའི་ཕྱིར་རོ། །དེ་ལྟར་རྡུལ་ཕྲ་རབ་ཙམ་ཁས་ལེན་པའི་ཕྱོགས་ལ་དེ་དག་ལས་བདེ་བ་ལ་སོགས་པ་ཐ་དད་པ་ཡིན་ནོ་ཞེས་བསྟན་ནས། ད་ནི་ཡན་ལག་ཅན་ཁས་ལེན་པའི་ཕྱོགས་ལ་མཚུངས་པ་མིན་པར་ཐལ་བ་བརྗོད་པ་ནི་འོན་ཏེ་ཞེས་བྱ་བའོ། །རྟོག་པར་མི་ནུས་སོ་ཞེས་བྱ་བ་ནི་གཞན་གྱི་རྒྱུད་ལ་ཡོད་པའི་བདེ་བ་ཞེས་བྱ་བ་ནི་སྐབས་ཡིན་ནོ། །འོ་ན་དེའི་ཞེས་བྱ་བ་ནི་བདེ་བ་ཡན་ལག་ཅན་གྱིའོ། །དེ་རྟོགས་ན་ནི་གཞན་གྱི་བདེ་བའི་ཡུལ་ལོ། །འཁྲུལ་པ་ཡིན་ཡང་ནང་གི་རིག་པའི་རང་བཞིན་ཉིད་ཀྱིས་རྟོགས་པ་བཟློག་ཏུ་མེད་དོ་ཞེས་བཤད་པ་ནི་འཁྲུལ་པ་ཡང་ཞེས་བྱ་བ་སྟེ་བདེ་བ་འབའ་ཞིག་ཏུ་མ་ཟད་པའོ། །དེས་ན་ཞེས་བྱ་བ་ནི་ནང་གི་རེག་པའི་ཁྱད་པར་གྱི་རང་བཞིན་ཡིན་པའི་ཕྱིར་རོ། །དེ་བཞིན་དང་ཞེས་བྱ་བ་འཁྲུལ་པའི་རང་བཞིན་དུའོ། །དེ་ལྟར་གཉི་ག་མཚུངས་པར་མྱོང་བར་བསྟན་ནས། ད་ནི་གཞན་གྱི་དོགས་པ་སྔོན་དུ་འགྲོ་བ་ཅན་གྱིས་འབྱུང་བ་དང་སེམས་ཐ་དད་དུ་བཤད་པ་ནི་གལ་ཏེ་ཞེས་བྱ་བའོ། །གལ་ཏེ་ལུས་འདིར་གཅིག་ནི་རེག་པར་བྱ་བ་ཡིན་ལ། བདེ་བ་ལ་སོགས་པ་ནི་གཞན་ཡིན་གྱི་རང་བཞིན་དེ་རེག་པར་བྱ་བ་ཉིད་ནི་མ་ཡིན་ལ། དེ་གཉིས་ལས་ཀྱང་གཞན་གྱི་རེག་པར་བྱ་བ་གཅིག་ཉིད་རྟོགས་པ་ཡིན་གྱི་བདེ་བ་ལ་སོགས་པ་ཡིན་ནོ་ཞེས་ཁས་ལེན་ནོ་ཞེ་ན། དེ་ལྟ་ཡིན་ན་བདེ་བ་ལ་སོགས་པ་རེག་པར་བྱ་བ་ལས་གཞན་ཡིན་ནོ་ཞེས་གྲུབ་པོ། །དེའི་ཕྱིར་ཞེས་བྱ་བ་ནི་སྡུད་པའོ། །འབྱུང་བ་དང་སེམས་པ་དག་རང་བཞིན་ཐ་དད་པ་ཡིན་པ་ཉིད་དོ་ཞེས་འབྲེལ་ཏོ། །ཅི་ལྟར་སྙམ་དུ་དོགས་ན། འགལ་བའི་ཆོས་ནི་གནས་པས་ན། །ཞེས་སྦྱར་རོ། །དེ་ཉིད་ཅི་ལྟར་སྙམ་ན། སྣང་པ་ཐ་དད་རྟོགས་པའི་ཕྱིར། །ཞེས་གསུངས་སོ། །གལ་ཏེ་ཞེས་བྱ་བ་ནི་གཞན་གྱི་དོགས་པ་
བསུ་བའོ། །འདི་ནི་བསལ་ཟིན་པ་ཡིན་མོད་ཀྱི། སྐྱོན་ལྷག་པ་བརྗོད་དུ་ཡང་དོགས་པ་བསུ་བར་ཟད་དོ། །དེ་ཉིད་བརྗོད་པ་ནི་ཞེས་བྱ་བ་སྟེ། བདེ་བ་འབྱུང་བ་དེ་ནིའོ། །ཅི་རུང་གིས་རེག་པ་ལ་ཡང་དེ་ལྟར་འབྱུང་བར་འགྱུར་རོ་ཞེས་བྱ་བའི་དོན་ཏོ། །དེ་ཞེས་བྱ་བ་ནི་ཡིད་དུ་འོང་བའོ། །རྒྱུ་ཞེས་བྱ་བ་ནི་སྐབས་ཀྱིས་བདེ་བ་འབྱུང་བའོ། །ཡིད་འོང་འདི་གང་ཡིན་པར་འདོད། །ཅེས་བྱ་བས་ནི། རྣམ་པར་དཔྱད་ན་ཡིད་དུ་འོང་བ་ཉིད་ནི་འགའ་རྣམ་པར་གནས་པ་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཅི་ལྟར་འགའ་ཞིག་སྙིང་དུ་སྡུག་སྙམ་ན། སྐལ་བདུན་འཕྲོ་ཡིས་འགའ་ཞིག་ལ། །ཞེས་གསུངས་སོ། །འོ་ན་ཏེ་ཕན་འདོགས་པར་བྱེད་པ་ལས་ཀྱང་གཞན་ཡིད་དུ་འོང་བ་ཡིན་ནོ་སྙམ་ན། ཕན་འདོགས་པའི་ཞེས་གསུངས་སོ། །དེ་ལྟ་ཡིན་ན་ཞེས་བྱ་བ་ནི་བཤད་ཟིན་པའི་ཚུལ་ལོ། །ལུས་ལས་ཡིད་དུ་འོང་བའི་རང་བཞིན་གྱི་སེམས་པ་གཞན་མེད་ཀྱང་ངོ༌། །གནས་ཞེས་བྱ་བ་ནི་ལས་ཀྱི་རང་བཞིན་རྒྱུའི་ཁྱད་པར་ཏེ། འཇིག་རྟེན་འདི་པ་ནི་མེད་པའི་ཕྱིར་རོ། །ཡིད་དུ་འོང་བ་ཉིད་ནི་ལུས་ཀྱི་ཆོས་མ་ཡིན་གྱི། འོན་ཀྱང༌། རྟོགས་པ་པོའི་ཤེས་པའི་ཆོས་ཡིན་ཏེ་ཡུལ་རུང་བ་ན་གནས་པས་མི་ཤེས་པར་རང་ཉིད་ཤེས་པའི་ཕྱིར་རོ་ཞེས་བཤད་པ་ནི་གལ་ཏེ་དེའི་ཞེས་བྱ་བའོ། །རྒྱུ་ལས་ཞེས་བྱ་བ་ནི་ཕྱི་རོལ་གྱི་དོན་ལས་སོ། །མིན་ན་ཞེས་བྱ་བ་ནི་གཞན་གྱིས་རྟོགས་པར་འགྱུར་བ་ཞེས་བྱ་བར་འབྲེལ་ཏོ། །གལ་ཞེས་བྱ་བ་ནི་གཞན་གྱིའོ། །དེ་ནི་ཞེས་བྱ་བ་ནི་ཡིད་དུ་འོང་བའོ། །ཕྱི་རོལ་དུ་ཞེས་བྱ་བ་ནི་ལན་ནོ། །དེ་ཞེས་བྱ་བ་ནི་ཡིད་དུ་འོང་བའོ། །མཐོང་བ་ཞེས་བྱ་བའི་མིང་གཞན་དང་ལྡན་པ། དེ་ལྟ་བུའི་གཟུགས་སུ་སྣང་པ་ཅན། སྐྱེས་བུ་སོ་སོ་ལ་ངེས་པར་རིག་པ་ནི་ཤེས་པ་ཉིད་ཡིན་ནོ་ཞེས་བརྗོད་པ་ནི། གཟུགས་ནི་སྣང་བར་གྱུར་ན་ཡང༌། །ཞེས་བྱ་བ་སྟེ། སྡུག་བསྔལ་ལ་སོགས་པ་འབའ་ཞིག་ཏུ་ནི་མ་ཟད་པའོ། །རྣམ་པར་རྟོག་པ་དང་བཅས་པ་འགའ་ཞེས་བྱ་བ་ནི་འཆད་པའོ། །རྣམ་པར་རྟོག་པ་དང་བཅས་པའམ། རྟོག་པ་མེད་པ་ལས་སོ། །གསལ་བའམ་མི་གསལ་བ་ཡང་རུང་སྟེ། གཟུགས་སྣང་བ་
གང་ཡིན་པ་དེ་ཡང་གཞན་གྱིས་མི་རྟོགས་པ་མ་ཡིན་ནོ། །མི་རྟོགས་པ་དེས་ན་གཟུགས་སུ་སྣང་བ་དེ་ནི་རང་རིག་པ་ཉིད་དོ། །འོ་ན་ཏེ་གཞན་གྱི་ལུས་ཀྱི་ནང་དུ་ཆུད་པས་ཞེས་བྱ་བ་ནི་གཟུགས་སུ་སྣང་བ་གཞན་གྱི་ལུས་དང་ཐ་མི་དད་པའོ། །གཞན་གྱི་ལུས་ཀྱང་ཞེས་བྱ་བ་ནི་ལན་ནོ། །དེ་ཅི་ལྟར་གཞན་དུ་དེའི་བདག་ཉིད་དེ་དགག་པ་ལ་སྣང་བ་མི་དམིགས་པ་མེད་པར་ཐལ་བའི་ཕྱིར། བལྟར་རུང་བ་ལས་ཐ་མི་དད་པ་བལྟར་རུང་བ་ཉིད་དུ་ཁས་བླངས་པ་དེ་བཞིན་བལྟར་མི་རུང་བ་ལས། ཐ་མི་དད་པ་ནི་བལྟར་མི་རུང་བར་ཁས་བླང་བར་བྱ་བ་ཡིན་ནོ། །དེས་ན་ནང་དུ་ཆུད་པ་བལྟར་མི་རུང་ན། ནང་དུ་ཆུད་པའི་ཡུལ་ཡང་ངེས་པར་བལྟར་མི་རུང་བར་གྱུར་པའི་ཕྱིར་གཞན་གྱི་ལུས་ཀྱང་མི་རིགས་པར་ཐལ་བར་འགྱུར་རོ་ཞེས་བྱ་བ་ནི་ལེགས་པར་བརྗོད་པ་ཡིན་ནོ། །འདིས་ནི་གཞན་གྱི་རྣམ་པར་རྟོག་པ་མི་རིག་ན་དེའི་ལུས་ཀྱང་མི་རིག་པར་ཐལ་བར་བརྗོད་པ་ཡིན་ནོ། །ད་ནི་རང་གི་ལུས་མ་རིག་ན་རང་གི་རྣམ་པར་རྟོག་པ་མ་རིག་པར་ཐལ་བར་བརྗོད་པ་ནི་ལུས་ཀྱི་ནང་དུ་ཆུད་ཉིད་ན་ཞེས་བྱ་བའོ། །གལ་ཏེ་ལུས་ཀྱི་ནང་དུ་གཏོགས་པར་འདོད་ན་དེའི་ཚེ་སྐྱེས་བུ་མུན་རུམ་ན་གནས་པ་ཡུལ་གཞན་ལ་རྣམ་པར་རྟོག་པར་བྱེད་པ་ན་སྟེ་རྣམ་པར་རྟོག་པའི་དུས་སུ། ལུས་དང་བྲལ་བའི་རྣམ་པར་རྟོག་པ་ལ་གནས་པའི་གཟུགས་སུ་སྣང་བ་འབའ་ཞིག་རྟོགས་པར་ཅི་ལྟར་འགྱུར་ཏེ་མི་འགྱུར་པ་ཁོ་ནའོ་ཅི་ལྟར་རིགས་པར་ཐལ་བ་གཉིས་ཀྱི་ལས་བཟློག་པ་བསྔོ་བ་ནི་རྣམ་པར་རྟོག་པ་མེད་ན་ནི་ལུས་སོ། །གཞན་གྱི་ལུས་རིག་པ་ཡིན་ལ། རྣམ་པར་རྟོག་པ་དེ་རང་གི་ལུས་ཏེ་མེད་པར་རིག་ཅེས་འབྲེལ་ཏོ། །གང་གི་ཕྱིར་དེ་ལྟ་ཡིན་པའི་གཏན་ཚིགས་དེ་ན་གཅིག་གི་ཚེ་སྒྲུབ་པར་བྱེད་པ་ལྷན་ཅིག་དམིགས་པ་ངེས་པ་མེད་པ་ཡིན་ནོ། །དེའི་ཕྱིར་སེམས་པ་ནི་ནུས་པ་བཞིན་དུ་ཐ་མི་དད་པ་ཉིད་མ་ཡིན་ནོ་ཞེས་གནས་སོ། །ཐ་དད་ཀྱང་འཁོར་བ་ཉིད་མ་གྲུབ་པོ་སྙམ་དུ་དོགས་པ་བསུ་བ་ནི་འོན་ཏེ་ཡང་ཞེས་བྱ་བའོ། །དེ་ལྟ་ན་ཡང་ཞེས་བྱ་བ་ནི་ཐ་དད་པ་ཉིད་
ཡིན་ཡང་ངོ༌། །དེ་ནི་ཤེས་པའིའོ། །དེས་ན་ནི་ལས་རྒྱུ་ཡིན་པས་ནའོ། །དེས་ན་ཞེས་བྱ་བ་ནི་བག་ཆགས་དང་འབྲེལ་པ་མ་ཡིན་པས་སོ། །དེས་ན་ཞེས་བྱ་བ་ནི་འཇིག་རྟེན་འདི་བའི་ཁུ་བ་ལ་སོགས་པ་རྒྱུ་ཡིན་པས་སོ། །དེས་ན་ཞེས་བྱ་བ་ནི་འཇིག་རྟེན་ཕ་རོལ་མེད་པས་སོ། །གལ་ཏེ་ཡིད་ལུས་ཀྱི་འབྲས་བུའམ། ལུས་ཀྱི་བདག་ཉིད་ཡིན་ན། དེའི་ཆེ་ལུས་རྣམ་པར་མ་གྱུར་ན། རྣམ་པར་རྟོག་པ་རྣམ་པ་གཅིག་ཁོ་ནར་འགྱུར་རོ་ཞེས་བྱ་བ་ནི་ཅི་སྲིད་ཅེས་བྱ་བའོ། །དེའི་འབྲས་བུ་ཉིད་ནི་དེར་འགྱུར་པས་ཁྱབ་པ་ཡིན་པས། དེ་དང་འགལ་བ་དེར་འགྱུར་བས་མི་འགྱུར་བ་ཉིད་ཡིན་ན་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ལུས་འབའ་ཞིག་གི་འབྲས་བུ་ཉིད་ཡིན་ན། དེ་ལྟར་མ་འགྱུར་བ་ཞིག་ན། འོན་ཀྱང་ཡིད་ཀྱི་རྣམ་པར་ཤེས་པ་ནི་དོན་ལྷན་ཅིག་བྱེད་པ་ཅན་གྱི་ལུས་ཀྱི་འབྲས་བུ་ཡིན་པས་ལུས་ཐ་མི་དད་ཀྱང་དོན་ཐ་དད་པས་རྣམ་པར་འགྱུར་བ་ཡིན་ནོ། །དེས་ན་དེའི་ཚེ་ཚོགས་པ་ཐ་དད་པས་ཐ་དད་པ་དེ་ནི་དེའི་འབྲས་བུ་ཁོ་ནའོ་སྙམ་དུ་དོགས་པ་བསུ་ནས་རྣམ་པར་རྟོག་པ་ནི་ཞེས་གསུངས་སོ། །རྣམ་པར་རྟོག་པ་ནི་ཡུལ་ལ་མི་ལྟོས་པའི་ཕྱིར། ལུས་ཙམ་གྱི་རྒྱུ་ཅན་དུ་ཁས་མི་ལེན་ན་འགལ་བར་བྱད་པ་གྲུབ་པ་ཞེས་བྱ་བའི་དོན་ཏོ། །གང་ཡང་ལུས་ཉིད་དེའི་རྒྱུ་ཡིན་པ་ཞེས་བྱ་བའི་དོན་ཏོ། །གང་ཡང་ལུས་ཉིད་དེའི་རྒྱུ་ཡིན་པ་ཞེས་བྱ་བ་ཕྱོགས་སྔ་མར་བཀོད་པ་དེ་ལྟ་ན་ཡང་རང་བཞིན་ཡིན་པ་ཞེས་རྗེས་སུ་བརྗོད་པ་ནི་ཉེས་པ་མཚུངས་པའི་ཕྱིར་རོ། །ཅིའི་ཕྱིར་སྙམ་ན་རྒྱུའམ་ཞེས་གསུངས་སོ། །དེ་ལྟ་མ་ཡིན་ན་ཞེས་བྱ་བ་ནི་ལུས་མ་འགྱུར་རང་བཞིན་མཚུངས་པ་ཉིད་མ་ཡིན་ནའོ། །གཟུགས་སོགས་བཞིན་དུ་ཞེས་བྱ་བ་དེ་བཤད་པའི་ཕྱིར་ལུས་ལ་བརྟེན་པའི་ཞེས་བྱ་བ་ལ་སོགས་པ་གསུངས་སོ། །ཡིད་ཀྱི་རྣམ་པར་ཤེས་པ་ལུས་ཀྱི་རྒྱུ་ཅན་ཡིན་ན་ལུས་ཐ་མི་དད་པར་དེ་ཐ་དད་པ་མཐོང་བ་མེད་པར་འགྱུར་རོ་ཞེས་བརྗོད་པ་ཡིན་པའོ། །དེ་ལྟ་ན་བག་ཆགས་སད་པ་རྒྱུ་ཉིད་ཡིན་ན་ལུས་ཐ་མི་དད་ཀྱང་དེ་ཐ་དད་པ་ལས་དེ་ཐ་དད་པ་ཁོ་ནའོ་ཞེས་བརྗོད་པ་ནི་གང་གི་ཚེ་ལུས་
ལ་ཞེས་བྱ་བའོ། །གང་གི་ཚེ་ཤེས་པ་གང་ལ་བག་ཆགས་སད་པ་ཉིད་ཀྱི་རྒྱུ་ཡོད་པའི་ཤེས་པ་དེ་ནི་འགའ་ཞིག་ཏུ་འགྱུར་བ་ཡིན་པ་དེའི་ཚེ་སྟེ། གང་དང་དེ་ནི་རྟག་ཏུ་འབྲེལ་པའི་ཕྱིར་རོ། །དེའི་ཚེ་ནི་རྒྱུ་དེས་ན་འགའ་ཞིག་ལ་འགའ་ཞིག་གི་ཚེ་འགའ་ཞིག་ལྟར་འགྱུར་བ་ཡིན་ཏེ། རང་བཞིན་དུ་ནི་མ་ཡིན་ནོ་ཞེས་འབྲེལ་ཏོ། །ཡང་ན་གང་གི་ཚེ་ཤེས་པ་འབའ་ཞིག་སྐྱེ་བར་འདོད་པའི་ཤེས་པ་འགའ་ཞིག་གི་བག་ཆགས་སད་པའི་རྒྱུར་འགྱུར་བ་དེའི་ཚེ། རྒྱུ་དེས་ན་འགའ་ཞིག་ཁོ་ནར་འགྱུར་པ་ཡིན་ནོ། །རྣམ་པར་བཤད་པ་བྱེད་པས་ནི་ལུས་ལ་ལྟོས་མེད་པར་ཞེས་ཁྱད་པར་བཀག་པས་ལྷག་མ་ཁས་བླངས་པའི་ཕྱིར་བག་ཆགས་སད་ པ་ལ་རྒྱུ་འགའ་ཞིག་ལ་ལྟོས་དགོས ་པའི་རྒྱུ་དེས་སྐྱེས་བུ་འགའ་ཞིག་གི་ཤེས་པ་དུས་འགའ་ཞིག་གི་ཚེ། འགའ་ཞིག་ཏུ་འགྱུར་བ་ཡིན་ནོ་ཞེས་བྱ་བར་ལུས་རྒྱུ་ཡིན་ན་ནི་ཞེས་བྱ་བ་ལ་སོགས་པས་བཤད་པ་ཡིན་ནོ། །ལུས་རྒྱུ་ཡིན་ན་ནི་རྣམ་པར་ཤེས་པ་འགའ་ཞིག་ཏུ་མི་འགྱུར་ཏེ། སྔར་བཤད་པའི་ཉེས་པར་འགྱུར་བའི་ཕྱིར་རོ་ཞེས་བྱ་བའི་དོན་ཏོ། །ཡང་ན་ལུས་ལྷན་ཅིག་བྱེད་ཉིད་ཀྱིས་རྒྱུ་ཡིན་དུ་ཆུག་མོད་དེ་ལྟ་ན་ཡང༌། གང་རྣམ་པར་འགྱུར་བས་ངེས་པར་རྣམ་པར་འགྱུར་བར་བྱེད་པ་དེ་ཉེ་བར་ལེན་པར་འདོད་པར་བྱ་བ་ཡིན་ནོ་ཞེས་ཤེས་པ་རྒྱུ་ཡིན་པའི་གཏན་ཚིགས་ཡང་གཞན་བརྗོད་པ་ནི་རྣམ་ཤེས་མིན་ཞེས་བྱ་བ་ལ་སོགས་པའོ། །འདོད་ཆགས་ལ་སོགས་པ་གོམས་པ་ལས་གསལ་བར་མཐོང་བའི་ཕྱིར་འཁོར་བ་བར་གྱུར་པར་ནི་མ་ཟད་ཀྱི། རྣམ་པར་ཤེས་པ་མ་ཡིན་པ་ཉེ་བར་ལེན་པ་མ་ཡིན་པའི་ཕྱིར་ཡང་ཕུང་པོ་འཁོར་བར་གྲུབ་པ་ཡིན་ནོ། །གལ་ཏེ་རྣམ་པར་ཤེས་པ་རྣམ་པར་ཤེས་པའི་ཉེ་བར་ལེན་པ་ཉིད་ཡིན་ཡང་འཇིག་རྟེན་ཕ་རོལ་ནི་མི་འགྲུབ་པོ་སྙམ་དུ་དོགས་པ་བསུ་བ་ནི་གལ་ཏེ་ཞེས་བྱ་བའོ། །ལུགས་འདི་ནི་གྲངས་ཅན་ཉིད་ཀྱི་ཡིན་གྱི། ཚུ་རོལ་མཛེས་པ་པའི་ནི་མ་ཡིན་ནོ་ཞེས་བརྗོད་པ་ནི་རྩྭ་མཆོག་ཅེས་བྱ་བ་ལ་སོགས་པའོ། །འདི་
ནི་རིགས་པ་ཡང་མ་ཡིན་ནོ་ཞེས་བརྗོད་པ་ནི་རྒྱུ་ནི་རྣམ་བརྒྱར་ཞེས་བྱ་བའོ། །རྣམ་པར་ཤེས་པའི་ངོ་བོ་གང་ཞིག་རྣམ་པར་འགྱུར་བའི་ངོ་བོ་ཐ་དད་པ་དེ་ནི་སྔར་ནུས་པའི་གནས་སྐབས་ཀྱི་ཤེས་པ་ལ་མེད་དོ། །དེས་ན་བལྟར་རུང་བའི་ཉེ་བར་ལེན་པ་ནི་བལྟར་རུང་བ་ཉིད་དུ་རྟོགས་པར་འགྱུར་གྱི་གཞན་གྱི་མ་ཡིན་ནོ་ཞེས་བྱ་བའི་དོན་ཏོ། །རྣམ་བརྒྱར་རྣམ་ཕྱེ་ཡང་ཞེས་བྱ་བས་ནི་བཞད་གད་དང་བཅས་ཏེ་མི་དམིགས་པར་བརྗོད་པའོ། །བལྟར་རུང་བའི་རྣམ་པར་ཤེས་པ་ཉིད་རྣམ་པར་ཤེས་པའི་ཉེ་བར་ལེན་པ་ཡིན་པར་བརྗོད་པ་ནི། རྣམ་པར་ཤེས་པ་མཐུན་པ་དང༌། །ཞེས་བྱ་བ་ཡང་གི་དོན་བཤད་པ་ནི་འདོད་ཆགས་ལ་སོགས་པ་ཞེས་བྱ་བའོ། །དེ་ཉིད་འཇིག་རྟེན་ཕ་རོལ་ཡིན་ནོ་ཞེ་ན། དེ་ལྟ་བུའི་ནུས་པ་ཞེས་སྨྲས་སོ། །རྩྭ་མཆོག་གི་རྩེའི་གླང་པོ་ཆེ་བཞིན་དུ་འོ་མ་ལ་ཞོ་ལ་སོགས་པ་མ་མཐོང་བ་ཁས་ལེན་པར་གསལ་པ་ཡིན་ནོ་ཞེས་བརྗོད་པ་ནི་འདི་ལྟར་ཞེས་བྱ་བའོ། །རང་བཞིན་གཞན་གྱིས་ཞེས་བྱ་བ་ནི་གཞན་གྱི་དོགས་པའོ། །ཡུལ་འཛིན་པ་ལ་སོགས་པའི་མཚན་ཉིད་ཅན་ལས་གཞན་པའི་རང་བཞིན་གང་ཡིན་པ་ནི་རང་བཞིན་གཞན་ཏེ་དེས་སོ། །དེ་ཞེས་བྱ་བ་ནི་ཡུལ་འཛིན་པ་ལ་སོགས་པ་ཉིད་དོ། །དེ་ཉིད་ཡིད་ཅེས་བྱ་བ་ལ་སོགས་པ་ནི་ལན་ནོ། །དེ་ཉིད་ནི་ཡུལ་འཛིན་པའི་རང་བཞིན་ཉིད་དོ། །ཅིའི་ཕྱིར་དེ་ལྟར་མི་བརྗོད་སྙམ་ན། རྣམ་ཤེས་ལས་གཞན་ཞེས་བྱ་བ་སྨོས་ཏེ། ཡུལ་འཛིན་པའི་མཚན་ཉིད་ལས་སོ། །དེ་ལས་གཞན་པའི་རང་བཞིན་ཡོད་པས་སོ། །དེ་ཞེས་བྱ་བ་ནི་ཤེས་པའོ། །དེའི་ཕྱིར་དངོས་པོ་ཐམས་ཅད་རྣམ་པར་ཤེས་པའི་ནུས་པ་དང་ལྡན་པ་ནི་མ་ཡིན་ནོ་ཞེས་གནས་པའོ། །རྣམ་པར་ཤེས་པ་ཉེ་བར་ལེན་པ་ཡིན་ཡང་འཇིག་རྟེན་ཕ་རོལ་མི་འགྲུབ་པོ་ཞེས་བྱས་བར་དོགས་པ་བསུ་བ་ནི་གལ་ཏེ་མ་སོགས་ཞེས་བྱ་བའོ། །དེ་ནི་རྣམ་པར་ཤེས་པའོ། །དེའི་ཞེས་བྱ་བ་ནི་ལན་ཏེ་མ་ལ་སོགས་པ་དེའིའོ། །འདུ་བྱེད་མངོན་ཕྱོགས་པའི་ཡོན་ཏན་ནི་མཁས་པ་ལ་སོགས་པའོ། །རྗེས་སུ་འཇུག་
འགྱུར་ནི་མི་ནུས་སོ། །ངེས་བར་དེའི་འདུ་བྱེད་ཀྱི་རྗེས་སུ་འཇུག་པར་དམིགས་པ་ཡང་མེད་དོ། །དེས་ན་གང་གིས་འཇིག་རྟེན་ཕ་རོལ་མེད་པར་འགྱུར་བ་མ་ལ་སོགས་པའི་ཤེས་པ་ནི་ཉེ་བར་ལེན་པའི་རྒྱུ་མ་ཡིན་ནོ། །འོན་ཏེ་ཞེས་བྱ་བ་ནི་མགོ་གསིག་པའོ། །ཕ་མའི་འདུ་བྱེད་དང་མི་མཐུན་པ་དེ་ནི་མེས་པོ་ལ་སོགས་པའི་ཡིན་ན། ཕ་ཡིན་ཞེས་བྱ་བ་ལས། ས་བོན་ལས་སྐྱེས་བའི་ཆུ་ཤིང་ཡང༌། ཕྱིས་སྡོང་བུ་ལས་སྐྱེས་པར་འགྱུར་བ་ན། རིམ་གྱིས་སྡོང་བུ་ལས་སྐྱེས་པ་གཞན་དང་ཐ་མི་དད་པར་འགྱུར་བ་ཡིན་ཏེ། དེས་ན་དེ་མ་ཐག་པའི་རྒྱུས་འབྲས་བུ་ཟ་དད་པར་བྱེད་པ་ཡིན་གྱི། ཆོད་པས་ནི་མ་ཡིན་ནོ། །དེས་ན། ཕ་ལ་སོགས་པའི་འདུ་བྱེད་ཀྱི་རྗེས་སུ་འཇུག་པར་ནི་བརྟག་པར་མི་བྱའོ། །གང་གི་ཕྱིར་དེ་ལྟར་རྒྱུན་གཞན་ལ་ཡོད་པའི་ཤེས་པ་ཡང་ཤེས་པའི་ཉེ་བར་ལེན་པ་མ་ཡིན་པ་དེའི་ཕྱིར་རོ། །ཤེས་པ་ལས་ཞེས་བྱ་བ་ནི་ཉེ་བར་ལེན་པར་འགྱུར་བ་ལས་སོ། །རེ་ཞིག་འདོད་ཆགས་ལ་སོགས་པ་འབྱུང་བ་རྣམས་ཀྱི་རང་བཞིན་ནི་མ་ཡིན་ཏེ། འདོད་ཆགས་ལ་སོགས་མེད་ཀྱང་ཤིང་དང་རྡོ་ལ་སོགས་པ་ལ་འབྱུང་བ་མཐོང་བའི་ཕྱིར་རོ། །ལུས་ཀྱི་རྒྱུ་ཅན་ཡང་མ་ཡིན་ཏེ། དེ་མེད་ཀྱང་ངེས་འགའ་འབྱུང་བའི་ཕྱིར་རོ། །གསོན་པོ་ལ་ཡང་བཏང་སྙོམས་ཀྱི་དུས་ན་དེ་མེད་ཀྱང་འབྱུང་བའི་རང་བཞིན་མཐོང་བའི་ཕྱིར་རོ། །དེ་ཉིད་ཀྱི་ཕྱིར། འབྱུང་བ་ཙམ་སྐྱེད་པ་ཡང་མ་ཡིན་ནོ། །སེམས་ཅན་ནི་སྔར་མེད་པ་སྐྱེ་བ་ཡིན་གྱི། སྔོན་ནས་ཡོད་པ་མ་ཡིན་ཏེ། དེས་ན་ཤིང་ལ་སོགས་བ་ལྟར་ལུས་ཀྱི་རྣམ་པར་འགྱུར་བ་ཡང་གསོན་པ་དང་འདོད་ཆགས་ལ་སོགས་པ་དང་ལྡན་པའམ། རྣམ་པ་གཞན་དུ་ཡང་རུང་བཞེས་བྱ་བའི་ངེས་པར་མི་འགྱུར་རོ། །ངེས་པ་ནི་རང་བཞིན་གྱིས་ཁྱབ་པ་ཡིན་ལ། རང་བཞིན་མ་ཡིན་བ་ནི་དེ་དང་འགལ་བ་ཡིན་བས་ཁྱབ་པར་བྱེད་པ་འགལ་བ་ལས་ངེས་པ་མེད་པར་འགྱུར་རོ་ཞེས་བརྗོད་པ་ནི། སྔ་ན་མེད་པ་འབྱུང་བ་ལས་ཞེས་
བྱ་བའོ། །གལ་ཏེ་འཇིག་རྟེན་གཞན་ན་ཡོད་པའི་ངེས་པར་བྱེད་པ་ཁས་མི་ལེན་ན། འབྱུང་བ་ལ་གནས་པ་ཡང་མེད་པ་ངེས་ན་ཅི་ལྟར་ངེས་པར་འབྱུང་ཞེས་བྱ་བ་རྣམ་པར་འགྲེལ་པ་ནི་གལ་ཏེ་འཇིག་རྟེན་ཕ་རོལ་ཞེས་བྱ་བའོ། །ཕ་རོལ་ཡོད་ན་ནི་སྐྱེ་བ་སྔ་མ་ཡོད་པའི་སྲིད་པ་ལ་སོགས་པ་ངེས་པར་བྱེད་པ་ཡིན་པའི་ཕྱིར་ངེས་པ་ཉིད་དུ་འགྱུར་རོ་ཞེས་བརྗོད་པ་ནི་གང་གི་ཚེ་ཞེས་བྱ་བའོ། །སྲེད་པ་སུའི་རྒྱུ་ཡིན་སྙམ་ན། ཡོད་པ་དེ་རྒྱུན་སྐྱེ་བཞིན་པའི་སྲོག་ཆགས་སྐྱེ་བ་ཡིན་གྱི། སྔ་མ་མེད་པ་ནི་མ་ཡིན་ནོ། །དེ་ལྟར་ན་ཞེས་བྱ་བ་ནི་འཇིག་རྟེན་ཕ་རོལ་རྒྱུ་ཡིན་པའི་ལྟར་ནའོ། །སྐྱེ་བོ་འདོད་ཆགས་དང་བྲལ་བར་མི་འགྱུར་ཏེ་ཞེས་བྱ་བ་ནི་སྐྱེ་བོ་ནི་འདོད་ཆགས་དང་ལྡན་པ་ཁོ་ནའོ་ཞེས་ངེས་པའོ། །དེ་ལྟར་ཞེས་བྱ་བས་བརྗོད་པའི་གཏན་ཚིགས་ཉིད་གསལ་འདེབས་པ་ནི་འདོད་ཆགས་ལ་སོགས་པ་མེད་པར་མི་སྐྱེ་བའི་ཕྱིར་རོ་ཞེས་བྱ་བའོ། །འདོད་ཆགས་ནི་འདོད་ཆགས་ཙམ་གྱི་བདག་ཉིད་དམ་འབྲས་བུ་ནི་མ་ཡིན་ནོ། །འོ་ན་ཅི་ཞེ་ན་ལུས་ཀྱི་རྣམ་པ་ཅན་གྱི་ཡིན་ནོ་སྙམ་དུ་དོགས་པ་བསུ་བ་ནི། འབྱུང་བའི་དག་ལས་ཞེས་བྱ་བའོ།། ཀུན་ཞེས་བྱ་བ་ནི་ལུས་ཀྱི་རྣམ་པ་ཅན་ནོ། །དེ་ཉིད་ཀྱིས་ཞེས་བྱ་བ་ནི་ལུས་ཀྱི་རྣམ་པ་ཅན་གྱི་འབྱུང་བའི་བདག་ཉིད་ཅན་ཡིན་པའི་ཕྱིར་རམ། འབྱུང་བའི་བདག་ཉིད་ལས་མ་འདས་བའི་ཕྱིར་རོ། །རྒྱུ་ཁྱད་པར་མེད་ན་ནི་འབྲས་བུ་ཁྱད་པར་དུ་མི་འགྱུར་ཏེ། དེའི་ཐ་དད་པས་ཁྱབ་པའི་ཕྱིར་ན་སྲོག་ཆགས་ཉིད་བཞིན་ནོ། །འོན་ཏེ་ལུས་ཀྱི་རྣམ་པ་ཅན་གྱི་འབྱུང་བ་རྣམས་ཀྱི་ཁྱད་པར་འདོད་ཆགས་ལ་སོགས་པ་རྣམས་ཀྱི་ཁྱད་པར་ལ་དཔག་པ་ལས་འདོད་ཆགས་མཚུངས་པར་མི་འགྱུར་རོ་སྙམ་དུ་དོགས་པ་བསུ་པ་ནི། གལ་ཏེ་འབྱུང་ཁྱད་ལས་མིན་ནོ། །ཞེས་བྱ་བའོ། །དེས་ན་ཞེས་བྱ་བ་ནི་ཁྱད་བར་ཡོད་པ་ནའོ། །ལུས་ཀྱི་རྣམ་པ་ཅན་གྱི་འབྱུང་བ་རྣམས་འབྲས་བུ་སྲོག་ཆགས་དང་བཅས་པར་ཁྱད་པར་མེད་པ་ཡིན་ཏེ། དེ་ཙམ་ལས་སྐྱེ་བའི་ཕྱིར་རོ། །འདོད་ཆགས་ལ་སོགས་པ་ནི་དེ་
ལྷ་མ་ཡིན་ཏེ། དེས་ན་དེ་ཙམ་གྱིས་སྐྱེད་པར་བྱེད་པ་ཁྱད་པར་གྱི་རིམ་པ་དང་ལྡན་པ་རྟོགས་པར་བྱེད་པ་ཡིན་ལ། དེ་ལྟར་རྟོགས་པ་དེ་ཡང་ལུས་ཀྱི་རྣམ་པ་ཅན་གྱི་འབྱུང་བ་དེ་དག་ལ། འདོད་ཆགས་ལ་སོགས་པ་དེ་འབྱུང་བ་ཡོད་པར་འགྱུར་རོ། །ཅིའི་ཕྱིར་སྙམ་ན་ཕུལ་བྱུང་འགྲིབ་ལྡན་པས་ཞེས་གསུངས་ཏེ། འཕེལ་འགྲིབ་ཡོད་པས་སོ། །གང་གི་ཚེ་འགྲིབ་པ་དང་ལྡན་པས་སྐྱེད་པར་མི་བྱེད་པ་དེའི་ཚེ། འདོད་ཆགས་དང་བྲལ་བ་ཉིད་དུ་འགྱུར་རོ་ཞེས་བྱ་བའི་དོན་ཏོ། །སྔ་ན་མེད་པ་འབྱུང་བ་ལ། །ཆགས་སོགས་ངེས་མེད་འབྱུང་བར་འགྱུར། །ཞེས་བྱ་བ་ལ་སོགས་པའི་ཚིགས་སུ་བཅད་པ་ཕྱེད་དང་གསུམ་གྱིས་གཙོར་བྱ་བའི་དོན་འཆད་པ་ནི་གང་བརྗོད་པ་ལ། གཞན་གྱིས་བརྩད་པ་ཞེས་འབྲེལ་ཏོ། །གང་དུ་བརྗོད་ཅེ་ན་ཆགས་སོགས་ཞེས་བྱ་བའོ། །དེ་ལ་ཅི་ཞིག་བརྩད་སྙམ་ན། ས་ལ་སོགས་པ་ཞེས་སྦྱར་རོ། །གལ་ཏེ་དེ་ལྟ་ན་ཞེས་བྱ་བ་ནི་སུན་འབྱིན་པར་བྱེད་པའོ། །གཞན་དུ་ཡིན་པ་ཞེས་བྱ་བ་ནི་ཤིང་ལ་སོགས་པ་སྲོག་ཆགས་མ་ཡིན་པར་རོ། །ཐ་དད་པར་ཡིན་ན་ཞེས་བྱ་བ་ནི་ཆེ་ཆུང་གི་རིམ་པ་དང་ལྡན་པའོ། །འབྱུང་བའི་ཁྱད་པར་ལས་ཞེས་བྱ་བ་ནི་ཡིན་ནོ། །ཐ་དད་པར་འགྱུར་བ་ཞེས་བྱ་བ་ནི་འདོད་ཆགས་ལ་སོགས་པ་ཆེ་རིམ་དང་ལྡན་པའོ། །དེ་བཞིན་དུ་ཞེས་བྱ་བ་ནི་ཐ་དད་པར་འགྱུར་བ་བཞིན་དུའོ། །དེ་ལྟ་ན་ཡང་ཞེས་བྱ་བ་ནི་ཕུལ་དུ་བྱུང་བ་དང་འགྲིབ་པ་དང་ལྡན་ན་ཡང་ངོ༌། །རྒྱུ་ཉིད་ཀྱི་ཕྱིར་གང་ཡིན་པ་དེ་ནི་མི་ལྡོག་སྟེ་བརྟག་པའི་ཕྱིར་རོ། །དེས་ན་འདོད་ཆགས་ལ་སོགས་པ་ཟད་པ་མ་ཡིན་ནོ་ཞེས་བྱ་བ་ནི་དོགས་པའི་དོན་ཏོ། །གལ་ཏེ་འདོད་ཆགས་ལ་སོགས་པའི་རྒྱུ་ཐ་དད་པར་མེད་ན་སྤྱི་ཉིད་ཅི་ལྟར་འགྱུར། རྒྱུད་གཞན་ལ་གནས་པ་ནི་རྒྱུད་གཞན་གྱི་འདོད་ཆགས་ཀྱི་མ་ཡིན་ནོ་སྙམ་ན། བརྗོད་པ་འདོད་ཆགས་ཀྱི་ལུས་ཀྱི་རྣམ་པ་ཅན་གྱི་འབྱུང་བ་ཉིད་ལས་འབྱུང་བ་ཡིན་ལ། རྒྱུའི་ཕྱིར་ཡང་དེ་ཉིད་ལ་བརྗོད་ པ་ཡིན་ནོ། །དེ་ཡོད་ན་འདོད་ཆགས་སུ་འགྱུར་དགོས ་སོ་ཞེས་བྱ་བའི་
ཐ་ཚིག་གོ །གལ་ཏེ་འདི་ནི་འབྱུང་བའི་བདག་ཉིད་ལས་མ་འདས་ཕྱིར་ཞེས་བྱ་བ་ལ་སོགས་པས་དོགས་པ་བསུ་ཟིན་པ་ཉིད་མ་ཡིན་ནམ་ཡིན་ཏེ། སྔར་ནི་འདོད་ཆགས་ལ་འགྲིབ་པའི་ན་རིམས་ཡོད་པའི་ཕྱིར་འགའ་ཞིག་འདོད་ཆགས་དང་བྲལ་བར་ཡང་འགྱུར་རོ་ཞེས་བྱ་བའི་ཐལ་བའི་ལན་དུ་འབྱུང་བའི་བདག་ལས་མ་འདས་ཕྱིར་ཞེས་བྱ་བས་དོགས་པ་བསུ་བ་ཡིན་ལ། ད་ལྟར་ནི་འདོད་ཆགས་ཀྱི་རྒྱུ་ལ་འགྲིབ་པའི་ན་རིམས་ཡོད་པའི་ཕྱིར་འགའ་ཞིག་དེ་དང་བྲལ་བར་ཡང་འགྱུར་རོ་ཞེས་བྱ་བའི་ཐལ་བ་ལ་ལན་གལ་ཏེ་ཆགས་སོགས་ཞེས་བྱ་བས་དོགས་པ་བསུ་བ་ཡིན་ནོ། །དེས་ན་དོགས་པ་ཁྱད་པར་ཡོད་དོ། །དེ་ཉིད་ཀྱི་ཕྱིར་གྲུབ་པའི་མཐའ་ལ་ཐ་དད་པ་མེད་ཀྱང་སྐྱོན་མ་ཡིན་ནོ་སྙམ་དུ་དགོངས་ནས། བདག་ཉིད་འདྲ་བའི་རྒྱུ་ཅན་གྱི། །ཞེས་གསུངས་སོ། །བདག་ཉིད་འདྲ་བ་ནི་ལུས་ཀྱི་རྣམ་པ་ཅན་གྱི་འབྱུང་བ་ཙམ་མོ། །དེ་ལྟར་རྒྱུ་མཚུངས་པ་ཉིད་ཡིན་ན་ཡང་ཞེས་བྱ་བ་ལ་དེ་ལྟར་ནི་དེ་ཚེའི་དོན་ཏེ་མཚུངས་པ་ནི་འབྱུང་བ་ཙམ་དུའོ། །རྒྱུ་མཚུངས་པ་ཉིད་ཡིན་ཡང་འབྲས་བུ་མི་མཚུངས་པར་འགྱུར་རོ་ཞེ་ན། རྒྱུ་འདྲ་བའི་ཞེས་གསུངས་སོ། །གལ་ཏེ་འབྱུང་བ་ཁྱད་པར་མི་བའི་འབྲས་སུ་ཁྱད་པར་ཅན་དུ་འགྱུར་ན་ནི་འབྱུང་བའི་འབྲས་བུ་མ་ཡིན་ནོ་ཞེས་བརྗོད་པ་ནི་གལ་ཏེ་རྒྱུ་མ་མཚུངས་ཀྱང་ཞེས་བྱ་བའོ། །འདོད་ཆགས་ལ་སོགས་པ་དེས་འབྱུང་བ་ཙམ་དེའིའོ། །ཅི་ཕྱིར་སྙམ་ན་དེའི་རྗེས་སུ་འགྲོ་བ་དང་ཞེས་གསུངས་སོ། །གང་གི་ཕྱིར་ད་ལྟར་རྒྱུ་ཁྱད་པར་མེད་པའི་འབྲས་བུ་ཁྱད་པར་དང་ལྡན་པར་མི་འཐད། འོན་ཀྱང་རྒྱུ་ཁྱད་པར་ཡོད་པ་ཉིད་ན་ཡིན་པ་དེའི་ཕྱིར་རོ། །གང་ལ་ཞེས་བྱ་བ་ནི་འབྱུང་བའི་ཁྱད་པར་རམ། འདོད་ཆགས་ལ་སོགས་པ་ལའོ། །ཅི་ལྟར་མེད་པར་འགྱུར་སྙམ་ན། འགྲིབ་པའི་ཞེས་གསུངས་སོ། །ཅི་འདྲ་བར་ཞེ་ན། དཀར་པོ་ལ་སོགས་པ་ཞེས་བྱ་བའོ། །དཔེར་ན། དཀར་པོ་ལ་སོགས་པ་ལ་ན་རིམས་ཡོད་པའི་ཕྱིར་འགའ་ཞིག་ཏུ་མེད་པར་འགྱུར་བ་དེ་བཞིན་དུ། འདོད་ཆགས་ཀྱི་རྒྱུ་ཡང་ཡིན་ནོ། །ཡང་ན་མཚུངས་པའི་ཕྱིར་
ཞེས་བྱ་བ་ནི་གཏན་ཚིགས་མེད་པ་ལ་འབའ་ཞིག་ཏུ་ནི་མ་ཟད་ཀྱི་འབྱུང་བ་ཙམ་གྱིས་བསྐྱེད་པར་བྱ་བར་འདྲ་བའི་ཕྱིར་མི་ཉམས་པར་ཡང་འགྱུར་རོ། །འདི་ཉིད་ལ་དཔེ་བརྗོད་པའི་ཕྱིར་འདྲི་བ་ནི་ཅིའི་ཕྱིར་ཞེས་བྱ་བའོ། །ལན་དུ་མཚུངས་བདག་ཅེས་བྱ་བ་ལ་སོགས་པའོ། །མཚུངས་པའི་བདག་ཉིད་བ་ལང་ཉིད་དམ། བ་ལང་མ་ཡིན་པ་ལས་ལྡོག་པ་ལས་བྱུང་བའི་བ་ལང་གི་ཤེས་པ་ནི་ཁྱད་པར་ཡོད་པ་མ་ཡིན་པའམ། ས་ལ་སོགས་པ་འདིར་ཡང་སྲོག་ཆགས་ཉིད་ལ་སོགས་པ་ནི་ཁྱད་པར་གྱི་རིམ་པ་ཡོད་པ་མ་ཡིན་ནོ་ཞེས་འབྲེལ་ཏོ། །དཔེ་གཞན་ཡིན་པར་རྟོགས་པར་བྱའོ། །འཇིག་རྟེན་རྒྱང་པན་པའི་ལྟ་བ་ལ་ལྟོས་ནས་ཞེས་བྱ་བ་ནི་སྐབས་སུ་བབ་པའི་དཔེ་ཉིད་དོ་ཞེས་བྱ་བའི་དོན་ཏོ། །དེའི་ཕྱིར་ཞེས་བྱ་བ་ནི་ཉེ་བར་སྡུད་པའོ། །འགྲིབ་པ་ཡོད་ན་ནི་ཞེས་བྱ་བ་ནི་སྔ་མའི་མཇུག་སྡུད་དོ། །གལ་ཏེ་ན་རིམས་དང་ལྡན་པའི་ཆོས་ཅན་ལ་གནས་པ་ན་ཤིན་དུ་ཆུད་པར་འགྱུར་བ་ནི་མ་ཡིན་ཏེ། མི་གནས་པ་ཉིད་ན་དྲོ་བ་ལྡོག་པ་ནི་མ་ཡིན་ནོ། །དེས་ན་ན་རིམས་དང་ལྡན་པ་ནི་གཏན་མེད་པར་འགྱུར་བས་མ་ཁྱབ་སྟེ། དེ་མེད་པར་འབྱུང་བའི་ཕྱིར་རོ་སྙམ་དུ་དོགས་པ་བསུ་བ་ནི་དྲོ་རིམ་ཞེས་བྱ་བའོ། །དེ་བཞིན་ཞེས་བྱ་བ་ནི་དྲོ་བ་བཞིན་དུའོ། །འདིར་ཡང་ནི་འདོད་ཆགས་པ་ལ་ཡང་ངོ༌། །གང་ཞིག་ཆོས་ཅན་གནས་བཞིན་པ་ལ་རིམ་དང་ལྡན་པ་དེ་ནི་འབྲེལ་བར་འགྱུར་བ་དང༌། དེ་དེར་རེས་འགའ་སྔར་མེད་པ་ཡང་ཡིན་ཏེ་ཞེས་སྒྲུབ་པ་ཡིན་ནོ། །དེ་ལྟར་དྲོ་བ་ནི་མི་ལ་སོགས་པ་གནས་བཞིན་པ་ལ་འབྲལ་བར་འགྱུར་བ་མ་ཡིན་ཏེ། དེ་མེད་ན་མེ་ཉིད་མེད་པར་འགྱུར་བའི་ཕྱིར་རོ། །དེ་ཉིད་ཀྱི་ཕྱིར་མེ་དྲོ་བ་ལ་སོགས་ཐ་དད་པ་བཀག་པས་ཐ་དད་མེད་པའི་ཐ་སྙད་ཀྱི་ཡུལ་ཉིད་དུ་བརྗོད་པ་ཡིན་ཏེ། ངེས་པར་དམིགས་པ་དང་མི་དམིགས་པ་དག་ཁོ་ནས་ཐ་དད་པ་མེད་པར་རྟོགས་པའི་ཡུལ་ཡིན་པའི་ཕྱིར་རོ་ཞེས་ལན་འདེབས་པ་ནི་མིན། མིན་དྲོ་ལས་མེ་གཞན་ཞེས་བྱ་བའོ། །རེ་ཞིག་རྩོད་པའི་ཆ་འགྲེལ་པ་ནི་མེ་ལས་ཞེས་བྱ་བའོ།།
དེ་བཞིན་དུ་ཞེས་བྱ་བ་ནི་དྲོ་བ་བཞིན་དུའོ། །ཐམས་ཅད་དུ་སྲིད་པ་མེད་པ་ནི་མ་ཡིན་ནོ་ཞེས་བྱ་བའི་དོན་ཏོ། །ལུས་ལས་ཐ་དད་པའི་ཕྱིར་རོ་ཞེས་བྱ་བ་ནི་ལུས་ཡོད་ཀྱང་མེད་པའི་ཕྱིར་རོ། །དེ་ལྟར་མེ་ཡོད་ཀྱང་དྲོ་བ་མེད་པར་མི་འགྱུར་རོ་ཞེས་བརྗོད་པ་ནི་འདིར་ཞེས་བྱ་བ་སྟེ་དཔེ་ལའོ། །ཉིད་ཀྱི་སྒྲ་ནི་རིམ་པ་གཞན་ཡིན་ཏེ། དེ་ཉིད་མེར་མི་འགྱུར་རོ་ཞེས་བྱ་བའོ། །འབྱུང་བ་ཡང་མེ་བཞིན་དུ་འགྱུར་རོ་སྙམ་ན། འདོད་ཆགས་ལ་སོགས་པ་ཞེས་སྨོས་སོ། །བཏང་སྙོམས་སུ་གནས་པ་ན་འདོད་ཆགས་ལ་སོགས་པ་མེད་ཀྱང་ལུས་ཀྱི་རྣམ་པ་ཅན་གྱི་ས་ལ་སོགས་པ་ཉིད་དུ་མི་འགྱུར་བ་ནི་མ་ཡིན་ནོ་ཞེས་འབྲེལ་ཏོ། །དེ་བཞིན་དུ་ཐལ་བའི་གནས་སྐབས་ན། དྲོ་བ་མེད་པར་མེ་ཡོད་པ་ནི་མ་ཡིན་ནོ་ཞེས་བརྗོད་པ་ནི་གལ་ཏེ་ཞེས་བྱ་བའོ། །རྒྱུན་འཆད་པ་ཉིད་དོ་ཞེས་བྱ་བ་ནི་རྒྱུན་མི་འཆད་པ་མི་སྲིད་པའོ། །དེའི་ཕྱིར་གང་ཞིག་ཆོས་ཅན་གནས་པ་ལ་འགྲིབ་པའི་ན་རིམས་དང་ལྡན་པ་དེ་ནི། གཏན་འགྲིབ་པར་འགྱུར་བས་ཁྱབ་པ་ཡིན་ཏེ་དེས་ན་འགའ་ཞིག་འདོད་ཆགས་དང་བྲལ་བར་ཡང་འགྱུར་རོ། །འགྱུར་བ་ཡང་མ་ཡིན་ནོ་ཞེས་བཟློག་པ་ཡང་དཔག་པར་བྱའོ། །ཡང་ཐུན་མོང་གི་མ་ངེས་པ་ཉིད་དུ་དོགས་པ་བསུ་བ་ནི་འོན་ཏེ་འབར་བ་ཞེས་བྱ་བའོ། །དེ་ནི་ཞེས་བྱ་བ་ནི་ཆོས་དྲོ་བའོ། །དེ་ལ་ནི་འབར་བ་ལའོ། །དྲོ་བ་ལ་མི་འཁྲུལ་བའི་ཆོས་ཅན་ཡིན་ན། འབར་བ་ནི་དེ་ལྟར་མ་ཡིན་ནོ་ཞེས་བརྗོད་པ་ནི་སྔགས་རྒྱུད་ཅེས་བྱ་བའོ། །མཐོང་བ་དེས་ནི་ཞེས་བྱ་བ་ནི་དེའི་ཕྱིར་ཏེ། ཐུན་མོང་གི་མ་ངེས་པ་ཉིད་དུ་ཉེ་བར་སྟོན་པ་འབར་བའི་འོན་ཏེ་འདི་སྙམ་དུ་དྲོ་བ་ལ་འཁྲུལ་པ་མེད་པའི་འབར་བ་ཆོས་ཅན་ཡིན་ནོ། །དེ་ལ་ནི་དྲོ་བའི་ན་རིམས་ཡོད་ཀྱང་གཏན་འཆད་པ་མེད་དོ། །དེས་ན་མ་ངེས་པས་སོ། །འདུག་གོ་སྙམ་དུ་དོགས་པ་བསུ་ནས་དབྱེར་མེད་ཕྱིར་ན་ཞེས་སྨོས་སོ། །དྲོ་བ་ལས་འཁྲུལ་པའི་ཕྱིར་འབར་བ་ནི་དྲོ་བ་ལ་ལྟོས་ནས་ཆོས་ཅན་ཉིད་ཀྱང་མ་ཡིན་ཏེ། འབའ་ཞིག་པར་ཡང་མཐོང་བའི་ཕྱིར་རོ། །དེས་ན་མ་ངེས་པ་ཉིད་མ་ཡིན་ནོ་སྙམ་དུ་དོགས་པའོ། །འོན་ཏེ་གང་གིས་ན་
སྔགས་རྒྱུད་ལ་སོགས་ནུས་པའི་ཞེས་བརྗོད་པ། དྲོ་བ་དང་བྲལ་བའི་འབར་བ་དེ་གང་ཡིན་སྙམ་དུ་དོགས་པ་བསུ་ནས། འབར་བ་མདོག་དང་དབྱིབས་ཡིན་ཏེ་ཞེས་གསུངས་སོ། །མདོག་དང་དབྱིབས་ནི་འབར་བ་ཡིན་ན་མདོག་དང་དབྱིབས་དེ་ཅི་ལྟར་འགྱུར་སྙམ་ན། དེ་ནི་མེ་ཡོད་དང་འབྲལ་འགྱུར། །ཞེས་སྨོས་སོ། །ནི་ཞེས་བྱ་བ་ནི་གང་ཕྱིར་གྱི་དོན་ཏེ་དེའི་ཕྱིར་ན་དྲོ་བ་ལ་མི་འཁྲུལ་བས་འབར་བ་དེ་ཆོས་ཅན་ཉིད་ཡིན་པར་ནི་མི་འཐད་དོ། །དེས་ན་དྲོ་བ་ལ་འཁྲུལ་པས་སོ། །འབར་བ་དེ་ནི་དཔེ་མ་ཡིན་ནོ། །དེས་ན་གཏན་ཚིགས་མ་ངེས་པ་ཉིད་དུ་སྟོན་པ་མི་མཐུན་པའི་ཕྱོགས་མ་ཡིན་ནོ། །སྔགས་རྒྱུད་ལ་སོགས་པ་ཞེས་བྱ་དེ་རྣམ་པར་འགྲེལ་པ་ནི། འབར་བ་ནི་དྲོ་བ་མེད་པར་མི་འབྱུང་བ་མ་ཡིན་ནོ་ཞེས་འབྲེལ་ཏོ། །འོན་ཀྱང་འབྱུང་བ་ཁོ་ནའོ། །འདིས་ཉེ་བར་མཚོན་པ་བརྗོད་པ་ནི་དྲོ་བ་ནི་འབར་བ་མེད་པར་ཞེས་བྱ་བའོ། །འདིར་ཡང་འབྱུང་བ་ཁོ་ནའོ་ཞེས་བྱ་བའི་དོན་ཏོ། །འདིས་ནི་གཉི་ག་ཕན་ཚན་འཁྲུལ་པར་བསྟན་ཏོ། །དབྱེར་མེད་ཕྱིར་འབར་བ་ཞེས་བྱ་བ་དེ་རྣམ་པར་འབྲེལ་པའོ། །གཏན་མི་འབྲལ་བས་ནི་ཞེས་བྱ་བའོ། །གང་གི་ཕྱིར་དེ་ལྟར་མ་ངེས་པ་ཉིད་མ་ཡིན་པ་དེས་ན་གཏན་ཚིགས་ནི་ཁྱད་པར་དང་བཅས་པ་ཡིན་ནོ། །ཁྱད་པར་དང་བཅས་པའི་གཏན་ཚིགས་དེ་ཉིད་བརྗོད་པ་ནི་ཡོན་ཏན་ཁྱད་པར་གྱི་རིམ་པ་དང་པ་ཞེས་འབྲེལ་ཏོ། །གཞན་ཞེས་བྱ་བ་ནི་ཡོན་ཏན་རྣམས་མེད་པར་ཡང་ཡོད་པའོ། །གཞན་དུ་ཡོད་པ་དེའི་གཏན་ནི་གཞན་ཡོན་ཏན་ནོ། །དེའི་ཞེས་བྱ་བ་ནི་གང་ཞིག་གཞན་ཡོད་ཅེས་བརྗོད་པའི་ཆོས་ཅན་སྤྱིའི་ཁྱད་པར་ཏེ། བྱེ་བྲག་འགའ་ཞིག་ཏུའོ། །དེ་འདྲ་བའི་ཡོན་ཏན་དེ་དག་ནི་འཆད་པར་འགྱུར་བ་ཡིན་ཏེ། དང་པོ་ཉིད་མེད་པར་འགྱུར་བ་ཡིན་ཏེ། དཀར་པོ་ལ་སོགས་པའི་ཡོན་ཏན་བཞིན་ནོ། །མངོན་པར་གསལ་བ་དང་མངོན་པར་མི་གསལ་བའི་ཆོས་ཅན་རྣམས་གང་ཞིག་མི་འབྲལ་བ་ནི་ཆོས་ཅན་ཡིན་ནོ་ཞེས་བྱ་བ་ལུགས་ཡིན་པའི་ཕྱིར། ཆོས་ཅན་གནས་པ་ན་རིམས་དང་ལྡན་པའི་ཡོན་ཏན་ནི་རང་ཉིད་བྲལ་བར་འགྱུར་བ་དང༌། འགའ་ཞིག་ཏུ་དང་པོ་ཉིད་ནས་རང་བཞིན་ཉིད་མི་
འགྱུར་བ་ཡིན་ཏེ། དེ་ལ་རག་མི་ལས་པའི་ཕྱིར་རོ་ཞེས་བྱ་བའི་དོན་ཏོ། །ཡོད་པའི་ཞེས་བྱ་བ་ཆོས་ཅན་གྱི་ཁྱད་པར་རྣམ་པར་དབྱེ་བ་གཞན་དུ་བསྒྱུར་ནས་ཡོན་ཏན་གྱི་ཁྱད་པར་དུ་ཡང་བསྟན་པ་ནི་གཉི་གར་ཡང་རྟོགས་པར་འགྱུར་རོ་སྙམ་དུ་བསམས་པ་ཡིན་ནོ། །ཅི་སྟེ་དཔེར་ན་དྲོ་བ་ཉིད་མེ་ཡིན་པ་དེ་བཞིན་དུ་དཀར་པོ་ལ་སོགས་པ་ཉིད་སྣམ་བུ་ཡིན་ནོ། །དེས་ན་དེ་ལོག་ན་ལྡོག་པ་ཁོ་ན་ཡིན་ནོ་སྙམ་པར་དོགས་པ་བསུ་བ་ནི་གང་གིས་ཞེས་བྱ་བ་ལ་སོགས་པའོ། །དྲོ་བ་ལ་སོགས་ན་ནི་མའི་རྟོགས་པའི་ཡུལ་རྗེས་སུ་མི་འཇུག་པ་ཁོ་ནའོ། །གཞན་ལ་ནི་དཀར་པོ་ལ་སོགས་པ་ལོག་ཀྱང་རང་བཞིན་གཞན་སྐྱེས་པ་ན། སྣམ་བུར་རྟོགས་པའི་ཡུལ་རེག་བྱ་ལ་སོགས་པ་རྗེས་སུ་འཇུག་པ་ཡིན་ནོ་ཞེས་ལན་འདེབས་པ་ནི་དེ་ནི་བདེན་ཏེ་ཞེས་བྱ་བའོ། །དེ་མེད་ཀྱང་ཞེས་བྱ་བ་ནི་མདོག་གི་ཁྱད་པར་མེད་ཀྱང་ངོ༌། །རྣམ་པར་ནི་རེག་བྱའོ། །དེས་ན་ཞེས་བྱ་བ་ངག་གི་ལྷུར་བྱ་བ་བརྗོད་པ་ནི་འབྱུང་བ་རྣམ་པར་འགྱུར་བ་མེད་ཀྱང་འགྱུར་བའི་འདོད་ཆགས་འབྱུང་བ་ལ་རག་མ་ལས་པ་ནི་དེ་ཡོད་ཀྱང་ལ་ལར་མེད་པར་འགྱུར་རོ་ཞེས་བྱ་བར་བསམས་པ་ཡིན་ནོ། །ཡང་ན་མེ་ཐ་དད་པ་ཡིན་ཡང་ན་རིམས་དང་ལྡན་པའི་དྲོ་བ་ནི་དེ་ཡོད་པ་ལ་གཏན་འབྲལ་བ་མ་ཡིན་ཏེ་དེ་དང་རྣམ་པར་དབྱེར་མེད་པས་ལྷན་ཅིག་སྐྱེ་བ་དང་འཇིག་པའི་ཕྱིར་རོ། །དེ་ལྟར་འདོད་ཆགས་ལ་སོགས་པ་ནི་ལུས་ལས་རྣམ་པར་དབྱེར་མེད་པ་ཡང་ཡིན་ཏེ་དེ་ཡོད་ཀྱང་འབྲལ་བའི་ཕྱིར་རོ། །དེས་ན་ལུས་འགའ་ཞིག་འདོད་ཆགས་དང་བྲལ་བར་འགྱུར་ཏེ། རྣམ་པར་དབྱེར་ཡོད་པ་ཅན་གྱི་ན་རིམས་དང་ལྡན་པ་ཡིན་པའི་ཕྱིར་གོས་ཀྱི་ཚོན་བཞིན་ནོ་ཞེས་བྱ་བའི་དོན་ཏོ། །གཟུགས་སོགས་བཞིན་དུ་ངེས་མིན་ཏེ། །ཞེས་བྱ་བའི་ཚིགས་སུ་བཅད་པ་འཆད་པ་ནི། ཡང་ན་མེ་ཉིད་ཅེས་བྱ་བའོ། །མེ་ཉིད་རྗེས་སུ་འཇུག་པ་ན་དྲོ་བ་ཁྱད་པར་གྱི་རིམ་པ་ཡོད་ཀྱང་འབྱུང་བ་དང་བྲལ་བ་མ་ཡིན་ཏེ། དེ་རྗེས་སུ་འཇུག་པ་ལ་དྲོ་བ་རྣམ་པར་མི་འཆད་པའི་ཕྱིར་རོ་སྙམ་དུ་དགོངས་པའོ། །འདོད་ཆགས་ལ་སོགས་པ་ཡང་དེ་བཞིན་དུ་འགྱུར་རོ་སྙམ་ན་དེ་བཞིན་དུ་ཞེས་སྨོས་སོ། །ཅི་ལྟར་མེ་རྗེས་སུ་འཇུག་པ་ན་དྲོ་བ་མི་འཆད་པ་དེ་བཞིན་དུ་ལུས་ཀྱི་རྣམ་པ་ཅན་གྱི་འབྱུང་བརྗེས་སུ་འཇུག་པ་ནི་འདོད་ཆགས་ལ་སོགས་པ་རྣམ་པར་
མི་འཆད་པ་མ་ཡིན་ནོ། །ཅིའི་ཕྱིར་ཞེ་ན། འཆད་བ་སྲིད་པའི་ཕྱིར་རོ། །འཆད་པ་ནི་མངོན་སུམ་དུ་རྟོགས་པ་ཁོ་ནའོ་ཞེས་དགོངས་པའོ། །གལ་ཏེ་རེས་འགའ་འདོད་ཆགས་ཀྱི་ནུས་པ་ནི་མི་འཆད་པ་ལ་མ་ཡིན་སྙམ་དུ་དོགས་པ་བསུ་བ་ནི་ནུས་པ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་འགོག་པའོ། །ག་ལས་ཤེ་ན་ནུས་པ་ཞེས་སྨོས་སོ། །ནུས་པ་ནི་འདོད་ཆགས་ལས་དོན་གཞན་ཉིད་དོ། །འདོད་ཆགས་ལ་སོགས་པ་ཞེས་བྱ་བའོ། །དེས་ན་དེ་རྒྱུན་མ་ཆད་ཀྱང་འདོད་ཆགས་ལ་སོགས་པ་མཆད་པ་ནི་མ་ཡིན་ནོ་ཞེས་དགོངས་བའོ། །ནུས་པ་ཡིན་ནོ་ཅོག་ནི་མི་འཆད་པ་ནི་མ་ཡིན་ནོ་ཞེས་བརྗོད་པ་ནི་ནུས་པ་ཡང་ཞེས་བྱ་བའོ། །ལ་ལར་ནི་ཏིལ་མར་གྱིས་བྱུག་པའི་ས་བོན་ལའོ། །དེ་བཞིན་དུ་ལུས་ཀྱི་རྣམ་པ་ཅན་གྱི་འབྱུང་བ་ལ་ཡང་འདོད་ཆགས་ལ་སོགས་པའི་ནུས་པ་འཆད་པར་འགྱུར་རོ་ཞེས་བྱ་བའི་དོན་ཏོ། །གང་གི་ཕྱིར་དེ་ལྟར་འདོད་ཆགས་པ་མེད་ཀྱང་ལུས་ཀྱི་རྣམ་པ་ཅན་གྱི་འབྱུང་བ་རྣམས་ཡོད་པའི་གཏན་ཚིགས་དེ་ཉིད་ཀྱི་ཕྱིར་རྣམ་འགྲེལ་མཛད་པས་བཤད་པའི་ཅི་བཤད་ཅེ་ན། ངེས་མིན་ཞེས་སྨོས་སོ། །འདོད་ཆགས་ལ་སོགས་པ་ཞེས་བྱ་བ་ནི་སྐབས་སོ། །ཅི་ལྟར་དཀར་པོ་ལ་སོགས་པ་གང་རུང་ཞིག་ཉམས་ཀྱང་གདོན་མ་ཟ་བར་གང་རུང་ཞིག་ཏུ་འདོད་ཆགས་ལ་སོགས་པ་ཡང་འགྱུར་རོ་སྙམ་དུ་དོགས་པ་བསུ་ནས་གཟུགས་སོགས་བཞིན་དུ་ཞེས་གསུངས་སོ། །ངེས་པ་ནི་གཞན་མེད་ཀྱང་གང་རུང་གཞན་ཡོད་པའི་རང་བཞིན་ནོ། །ཅིའི་ཕྱིར་ཞེ་ན། གཟུགས་ལ་སོགས་པ་དེ་དག་ལུས་ཀྱི་རྣམ་པ་ཅན་གྱི་འབྱུང་བ་དང་དབྱེར་མེད་པའི་ཕྱིར་ཏེ། ཕན་ཚུན་མེད་ན་མི་འབྱུང་བའི་ཕྱིར་རོ། །གཟུགས་ལ་སོགས་པ་མེད་པར་ནི་འབྱུང་བ་རྣམས་སམ། དེ་ཡང་རྣམས་མེད་པར་འབྱུང་བ་ཡིན་ནོ། །གལ་ཏེ་ལུས་ཀྱང་འདོད་ཆགས་ལ་སོགས་པ་མེད་ན་མི་འབྱུང་པ་མ་ཡིན་ནམ་སྙམ་དུ་དོགས་པ་བསུ་བ་ནི་གལ་ཏེ་མཚུངས་ཤེ་ན་ཞེས་བྱ་བའོ། །མི་ན་ཞེས་བྱ་བ་ནི་འགོག་པའོ། །ཅིའི་ཕྱིར་ཞེ་ན། གང་གི་ཕྱིར་ལུས་ཙམ་འབྱུང་བའི་འདོད་ཆགས་ལ་སོགས་པ་རྣམས་ལྷན་ཅིག་འབྱུང་བ་གང་ཡིན་པ་དེར་ཐལ་བར་འགྱུར་བའི་ཕྱིར་རོ། །འདི་ཡང༌། རྒྱུ་ནི་ཉེ་བར་ཕྱིར་བློ་རྣམས་ཀུན་ཐམས་ཅད་ཁོ་ན་སྐྱེ་
བར་འགྱུར་ཞེས་བྱ་བའི་དོན་རྟོགས་པར་དགོངས་ནས། ལུས་དང་ལྷན་ཅིག་སྐྱེ་བར་ཐལ་བའི་ཕྱིར་རོ་ཞེས་བྱ་བ་སྐབས་ཀྱིས་སྐྱེ་བ་ནི་འབྱུང་བ་ཡིན་པས་དེར་ཐལ་བར་འགྱུར་རོ་ཞེས་འཆད་པར་འགྱུར་རོ། །དེ་མེད་ཀྱང་ཞེས་བྱ་བ་ནི་འདོད་ཆགས་ལ་སོགས་པ་མེད་ཀྱང་ངོ༌། །གཟུགས་རོ་ལ་སོགས་པ་མེད་པར་ནི་འབྱུང་བ་རྣམས་ཡོད་པ་མ་ཡིན་ནོ་ཞེས་བྱ་བར་ལྟའོ། །དེས་ན་གཟུགས་ལ་སོགས་པ་ཉིད་འབྱུང་བ་དང་རྣམ་པར་དབྱེར་མེད་པ་ཡིན་གྱི་འདོད་ཆགས་ལ་སོགས་པ་ནི་མ་ཡིན་ནོ་སྙམ་དུ་དགོངས་པའོ། །གལ་ཏེ་དེ་མཚུངས་ཤེ་ན་ཞེས་བྱ་བ་རྣམ་པར་འགྲེལ་པ་ནི་འོན་ཏེ་ཞེས་བྱ་བ་ལ་སོགས་པའོ། །དེར་ཡང་ནི་འདོད་ཆགས་ལ་སོགས་པ་ཡང་ངོ༌། །དེ་ལྟ་བུ་ཉིད་དོ་ཞེས་བྱ་བ་ནི་འབྱུང་བ་དང་རྣམ་པར་དབྱེར་མེད་པར་གནས་པ་ཉིད་དུ་མཚུངས་པའོ། །མིན་ཞེས་བྱ་བ་དེའི་རྣམ་པར་འགྲེལ་པ་ནི་དེ་ཡང་མ་ཡིན་ཏེ་ཞེས་བྱ་བའོ། །ཅིའི་ཕྱིར་ཞེ་ན། འདོད་ཆགས་ལ་སོགས་པ་རྣམས་ཞེས་བྱ་བའོ། །འདོད་ཆགས་ལ་སོགས་པ་རྣམས་ལུས་དང་ལྷན་ཅིག་འབྱུང་བ་ངེས་པར་འགྱུར་རོ་ཞེས་བྱ་བའི་དོན་ཏོ། །འདོད་ཆགས་ལ་སོགས་པ་ཞེས་བྱ་བ་ནི་བཟློག་པ་བརྗོད་པའོ། །ཐམས་ཅད་ཀྱི་ཚོ་ཞེས་བྱ་བ་ནི་བདག་མེད་བ་བསྒོམ་པ་ལ་སོགས་པ་བཏང་སྙོམས་སུ་གནས་པར་སྲིད་པ་ནའོ། །ད་ནི་རྣམ་པར་དབྱེར་མེད་པའི་དོན་ཐ་མི་དད་པའི་དོན་ཏོ་ཞེས་འཆད་པ་ནི། འབྱུང་བ་ཆེན་པོ་ཙམ་ཞེས་བྱ་བའོ། །སྨྲ་བ་འཇིག་རྟེན་རྒྱང་པན་པ་རྣམས་ཀྱིའོ། །གང་གི་ཕྱིར་གཟུགས་ལ་སོགས་པ་འབྱུང་བ་ལས་ཐ་དད་པར་མ་ཡིན་པ་དེས་ན་རྣམ་པར་དབྱེ་བ་མེད་པ་ནི་ལྷན་ཅིག་སྐྱེ་བ་ཡིན་ཏེ། ལུས་དང་གཟུགས་ལ་སོགས་པ་བཞིན་དུ་འདོད་ཆགས་ལ་སོགས་པ་ཡང་འགྱུར་རོ་ཞེས་རྟོགས་པར་བྱའོ། །དེས་ན་གཟུགས་ལ་སོགས་པ་ལྟར་འདོད་ཆགས་ལ་སོགས་པ་དང་ཡང་རྟག་ཏུ་ལྡན་པར་འགྱུར་རོ། །གལ་ཏེ་ཡུལ་དང་དབང་པོ་ལ་སོགས་པ་ལྷན་ཅིག་བྱེད་པའི་རྐྱེན་ཉེ་བ་ཅན་གྱི་ལུས་ནི་རྣམ་པར་ཤེས་པ་བཞིན་དུ་འདོད་ཆགས་ལ་སོགས་པའི་རྒྱུ་ཡིན་ནོ། །བཏང་སྙོམས་ལ་སོགས་པའི་གནས་སྐབས་ན་ལྷན་ཅིག་བྱེད་པ་ཡོད་པ་མ་ཡིན་ནོ་སྙམ་པ་དོགས་པ་བསུ་བ་ནི། གལ་ཏེ་ཡུལ་གྱི་རྒྱུ་ཅན་ཡིན་པའི་ཕྱིར་རོ་ཞེས་བྱ་བའོ། །འདོད་ཆགས་ལ་སོགས་བ་ནི།
བུད་མེད་དང་སྐྱེས་པ་ལ་སོགས་པ་རྣམ་པར་རྟོག་པས་ཡུལ་དུ་བྱས་པ་རྣམས་ལ་འབྱུང་གི །དམིགས་པ་ཙམ་ལ་ནི་མ་ཡིན་ཏེ། རྣམ་པར་རྟོག་པའི་བག་ཆགས་ལས་འབྱུང་བ་ནི་ཡུལ་གྱི་དབང་གིས་འབྱུང་བ་ཡང་མ་ཡིན་ནོ་ཞེས་ལན་འདེབས་པ་ནི་རྣམ་པར་རྟོག་པ་ཡུལ་ཡིན་ཕྱིར་ཞེས་བྱ་བའོ། །འོ་ན་བདག་དང་བདག་གིར་ལྟ་བའི་སྐྱེ་གནས་ཀྱི་བག་ཆགས་ཏེ་ལུས་དང་ལྷན་ཅིག་པ་ཡིན་ནོ་སྙམ་དུ་དོགས་པ་བསུ་ནས་བཤད་པ། སྐལ་མཉམ་དེ་འདྲ་བ་ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་དང་བྲལ་བའི་ཕྱིར་ཏེ། འཇིག་རྟེན་ཕ་རོལ་ན་བསྙོན་པའི་ཕྱོགས་ལ་མེད་པའི་ཕྱིར་ལུས་ཙམ་ལས་བྱུང་བའི་འདོད་ཆགས་ལ་སོགས་པ་ངེས་པ་ཞེས་བྱ་བ་རེས་འགའ་མི་སྐྱེ་བའི་མཚན་ཉིད་ཅན་དུ་མི་འགྱུར། འོན་ཀྱང་ལུས་འདོད་ཆགས་ལ་སོགས་པ་དང་ལྷན་ཅིག་འབྱུང་བར་འགྱུར་རོ། །འམ་གྱི་སྒྲས་ནི་སྐྱེ་བར་འགྱུར་ཞེས་བྱ་བ་ལྟོས་ནས་སྡུད་པའོ། །ཡང་ན་ཅིག་ཆར་འབྱུང་བར་འགྱུར་རོ་ཞེས་བརྗོད་པ་ནི་ཐམས་ཅད་ཚེ་ན་ཞེས་བྱ་བའོ། །ཡང་ན་སྐལ་མཉམ་རྒྱུ་དང་བྲལ་བའི་ཕྱིར། འདོད་ཆགས་ལ་སོགས་པ་ངེས་པ་ཞེས་བྱ་བ་རེ་རེ་སྐྱེ་བ་འམ་བརྗོད་པའི་རང་བཞིན་གྱི་ངེས་པ་མེད་པར་འགྱུར་ཏེ། རྣམ་པ་ཐམས་ཅད་དུ་མི་སྲིད་པར་འགྱུར་རོ་ཞེས་བྱ་བའི་དོན་ཏོ། །ཡང་ན་འདོད་ཆགས་ལས་སོགས་པའི་བློ་རྣམ་པ་ཐམས་ཅད་འབྱུང་བར་འགྱུར་རོ་ཞེས་བརྗོད་པའི་རྒྱུ་ནི་ཉེ་ཕྱིར་ཞེས་བྱ་བའོ། །དེ་མེད་པར་ཞེས་བྱ་བ་ནི་ཡུལ་མེད་པར་རོ། །འདོད་ཆགས་ལ་སོགས་པ་འབྱུང་སྟེ་སྐྱེ་བ་ཉམས་སུ་མྱོང་བའི་ཕྱིར་རོ། །འོ་ན་བག་ཆགས་ཉིད་རྒྱུ་ཡིན་པར་འགྱུར་རོ་སྙམ་ན། སྐལ་བ་མཉམ་པའི་རྒྱུ་ཡང་ཞེས་བྱ་བའོ། །དེ་འདོད་ན་ནི་འཇིག་རྟེན་གཞན་གྲུབ་པར་ཐལ་བའི་ཕྱིར་རོ་ཞེས་དགོངས་པའོ། །གང་གི་ཕྱིར་ཡུལ་གྱི་སྟོབས་ལ་སོགས་པ་ལས་འདོད་ཆགས་ལ་སོགས་པ་འབྱུང་བ་མ་ཡིན་པ་དེས་ནའོ། །དེ་མེད་པའི་ཕྱིར་ནི་སྐལ་པ་མཉམ་པའི་རྒྱུ་མེད་པའི་ཕྱིར་རོ། །རེས་འགའ་མི་སྐྱེ་བར་མི་འགྱུར་ཏེ་འོན་ཀྱང་གཏན་དུ་སྐྱེ་བར་འགྱུར་རོ། །དེ་ཡང་རྣམ་པ་གཉིས་སུ་འགྱུར་ཏེ། འདོད་ཆགས་ལ་སོགས་པ་རེ་རེ་སྐྱེ་བ་ལས་སམ། འདོད་ཆགས་ལ་སོགས་ཐམས་ཅད་སྐྱེ་བ་ལས་འགྱུར། དེ་ལ་རེ་ཞིག་དང་པོ་མཇུག་བསྡུ་བའི་སྒོ་ནས་
བརྗོད་པ་ནི་དེས་ན་ངེས་པར་ལུས་འདོད་ཆགས་ལ་སོགས་པ་རེ་རེ་དང་ཞེས་བྱ་བའོ། །གཉིས་པ་གསལ་བར་བྱེད་པ་ནི་ཡང་ན་ཞེས་བྱ་བའོ། །ཐམས་ཅད་ཀྱི་ཞེས་བྱ་བ་ནི་འདོད་ཆགས་ལ་སོགས་པ་རེས་འགའ་བར་འགྱུར་བ་ཡིན་ནོ་སྙམ་དུ་དོགས་པ་བསུ་བ་ནི་འོན་ཏེ་གང་གིས་ཞེས་བྱ་བའོ།། ཡོངས་སུ་གྱུར་པའི་ཁྱད་པར་གང་གིས་སོ། །གལ་ཏེ་ཡོངས་སུ་གྱུར་པའི་ཁྱད་པར་ཡང་ལུས་ཙམ་ལས་འབྱུང་བའི་ཚེའི་ལུས་བཞིན་དུ་ཐམས་ཅད་ཀྱི་ཚེ་ཡོད་པའི་ཕྱིར་ཅིག་ཅར་བ་ཉིད་དུ་འགྱུར་རོ་ཞེས་ལན་འདེབས་པ་ནི་གལ་ཏེ་དེ་ལྟ་ན་ཞེས་བྱ་བའོ། །གང་གིས་ཞེས་བྱ་བ་ནི་མི་ཡོངས་སུ་གྱུར་པ་ཡོད་པས་སོ། །དེ་དག་ནི་འདོད་ཆགས་ལ་སོགས་པའོ། །དེ་ལྟར་འགྱུར་བ་ནི་རེས་འགའ་དེའི་ནི་ལུས་ཀྱིའོ། །དེ་བས་ན་འདོད་ཆགས་སྐྱེད་པར་བྱེད་པའོ། །གལ་ཏེ་འབྲས་བུའི་རིམ་པ་མཐོང་བ་ལས། རྒྱུའམ་རྒྱུའི་རྒྱུ་འགའ་ཞིག་ཀྱང་རྟོགས་པ་མ་ཡིན་སྙམ་དུ་དོགས་པ་ནི་གང་རུང་ལས་ཤེ་ན་ཞེས་བྱ་བའོ། །གང་ཡང་རུང་བ་ཞིག་ནི་ཐམས་ཅད་ཀྱི་ཚེ་ཡོད་པའི་ཕྱིར་དེའི་རྒྱུ་ཅན་ཡང་ཐམས་ཅད་ཀྱི་ཚེ་འགྱུར་རོ་ཞེས་ལན་འདེབས་པ་ནི་མ་ཡིན་ཞེ་ན་ཞེས་བྱ་བའོ། །གང་ཡང་རུང་བ་ཞིག་ཀུན་ཚེའང་འགྱུར་རོ་ཞེས་བྱ་བའོ། །ཀུན་ཚེའང་འགྱུར་ཞེས་བྱ་བ་ནི་ཐམས་ཅད་ཀྱི་རྒྱུ་ཅན་ནི་ཐམས་ཅད་ཀྱི་ཚེ་འབྱུང་པར་འགྱུར་རོ། །གལ་ཏེ་མ་མཐོང་བས་མི་འགྱུར་རོ་ཞེས་བརྗོད་ན། རྒྱུ་མེད་པས་ཐམས་ཅད་ཐམས་ཅད་ཀྱི་ཚེ་མི་འགྱུར་རོ་ཞེས་བྱ་བར་ཡང་འགྱུར་རོ་ཞེས་བརྗོད་པ་ནི་འགའ་ཡང་ཞེས་བྱ་བའོ། །དོན་འདི་ཡིན་ཏེ། ཡོངས་སུ་གྱུར་བའི་ཁྱད་པར་ནི་རྒྱུ་ངེས་པ་མེད་པར་ཡིན་པའི་ཕྱིར་རྟག་ཏུ་ཡོད་པར་འགྱུར་བར་བརྗོད་དོ། །དེ་ལ་གལ་ཏེ་མ་མཐོང་བ་ཉིད་ལན་ཡིན་ན། དེའི་ཚེ་འགའ་ཡང་རྒྱུད་དང་བཅས་པར་མི་འགྱུར་ཏེ། ཐམས་ཅད་དུ་དེ་བསྙེན་པར་བྱ་ནུས་པའི་ཕྱིར་རོ་ཞེས་བྱ་བའོ། །གལ་ཏེ་ཡང་མཐོང་བའི་ཚུལ་བཞིན་མ་ཡིན་པ་ཉིད་ལ་བྱེད་པའི་ས་བོན་སྤངས་ནས་འདོད་ཆགས་ལ་སོགས་པ་ངེས་པའི་རྒྱུ་ཡོངས་སུ་གྱུར་པའི་ཁྱད་ཡིན་པར་ཁས་ལེན་ན་དེའི་ཚེ་དུ་བ་ཡང་མེས་བསྐྱེད་པར་མི་འགྱུར་རོ། །ཐམས་ཅད་ལས་འབྱུང་བ་ཡང་མ་ཡིན་ཏེ། །ཡོངས་སུ་གྱུར་པའི་ཁྱད་པར་མེད་པའི་ཕྱིར་རོ་ཞེས་བརྗོད་པ་ནི།
མེ་མིན་ལས་ཀྱང་དུ་བ་འབྱུང༌། །ཞེས་བྱ་བའོ། །དེ་ལ་ཞེས་བྱ་བ་ནི་མེ་མ་ཡིན་བ་ལས་བྱུང་བའི་དུ་བ་ལའོ། །རྒྱུ་མེད་པའི་དུ་བ་ལ་ཡང་མཐོང་བའི་སྟོབས་ཀྱི་ཡུལ་ལ་སོགས་པ་མ་ངེས་པར་འགྱུར་བ་ཁོ་ནའོ་ཞེས་བརྗོད་པ་ནི་དངོས་པོ་རྒྱུ་མེད་པ་ལ་ཡང་ཞེས་བྱ་བའོ། །དེར་ཡང་ཞེས་བྱ་བ་ནི་དུ་བ་ལའོ་དེའི་ཕྱིར་དེ་ལྟར་འདོད་ཆགས་ལ་སོགས་པ་ཡད་ཐམས་ཅད་ཀྱི་རྒྱུ་ཅན་ནམ། རྒྱུ་མེད་པ་ཅན་དུ་འགྱུར་གྱི་ལུས་ཀྱི་རྒྱུ་ཅན་ནི་མ་ཡིན་ནོ། །ངེས་པ་ནི་ཡོངས་སུ་གྱུར་པའི་ཁྱད་པར་རམ། མཐོང་བ་ལས་འགྱུར་བ་ཡིན་ནོ་ཞེས་གནས་སོ། །གལ་ཏེ་ཡང་མ་ངེས་པའི་རྒྱུ་ཅན་ཉིད་ཀྱིས་རྟག་ཏུ་ཡོད་པར་ཐལ་བ་ལས། མ་མཐོང་བ་ཉིད་ལན་ཡིན་པ་དེའི་ཚེ་རྣམ་པ་ཐམས་ཅད་དུ་མཐོང་བ་གང་ཡིན་པ་དེ་ཁོ་ན་ཡོད་པ་ཡིན་ནོ་ཞེས་གཞན་གྱིས་ཁས་བླང་བར་བྱ་བར་འགྱུར་ལ། དེ་ལྟ་ན་ཡང་གཉིས་སུ་མེད་པ་ཉིད་རྣམ་པར་གནས་པར་འགྱུར་རོ། །དེས་ན་འབད་པ་མེད་པར་ཐ་སྙད་མཐའ་དག་རྣམ་པར་ཞིག་པར་འགྱུར་རོ་ཞེས་བརྗོད་པ་ནི་མཐོང་བ་ཙམ་ལ་བརྟེན་པ་ནི་ཡོད་པ་ཉིད་དུ་འཛིན་པ་སྟེ། དེ་ལྟར་བྱེད་ན་དེའི་ཚེ་རྣམ་པ་ཐམས་ཅད་ཀྱིར་མཐོང་བ་ནི་གཉིས་སུ་མེད་པ་ཁོ་ན་ཡིན་གྱི་འབྲས་བུ་ལ་སོགས་པ་ནི་མ་ཡིན་ནོ། །དེ་ལྟ་ཡིན་ན་མི་འདོད་པ་ཅི་ཡོད་སྙམ་ན་འདིར་ནི་ཞེས་སྨོས་ཏེ་གཉིས་མེད་དུ་གྱུར་ནའོ། །འཇུག་པ་དང་ལྡོག་པའི་མཚན་ཉིད་དམ་རྒྱུ་དང་འབྲས་བུ་སྒྲུབ་པར་བྱེད་པའི་རྣམ་པར་རྟོག་པའི་མཚན་ཉིད་ཀྱི་ཐ་སྙད་འཇིག་པར་འགྱུར་རོ། །འོན་ཏེ་འདོད་ཆགས་ལ་སོགས་པ་ལུས་ཀྱི་རྒྱུ་ཅན་ཉིད་དུ་མཐོང་བ་ཡིན་ནོ། །རྗེས་སུ་འགྲོ་བ་དང་ལྡོག་པའི་ཁྱད་པར་ཅན་གྱི་རང་རིག་པས་ནི་རྒྱུ་ལ་སོགས་པའི་རྣམ་པར་རྟོག་པ་ཐ་སྙད་ཀྱི་མིང་ཅན་གྲུབ་པ་ཡིན་ཏེ། དེས་ནི་རྒྱུ་ལ་སོགས་པ་གྲུབ་པ་ཡིན་ནོ་སྙམ་དུ་དོགས་པ་བསུ་ནས། འདོད་ཆགས་ལ་སོགས་པ་ནི་བདག་དང་བདག་གིར་འཛིན་པས་ཆགས་པའི་རྒྱུ་ཅན་ཡིན་གྱི། ལུས་ཀྱི་རྒྱུ་ཅན་ནི་མ་ཡིན་ཏེ། དེ་ལྟར་རྟོགས་པའི་ཕྱིར་རོ་ཞེས་བརྗོད་པ་ནི་གལ་ཏེ་ཐ་སྙད་ཅེས་བྱ་བའོ། །གཞན་དུ་ཞེས་བྱ་བ་ནི་དོར་བར་ནུས་པའོ། །གལ་ཏེ་སྐྱེ་བ་དང་པོ་ལ་སོགས་པར་རང་རིག་པ་ལས་བྱུང་བའི་རྣམ་པར་རྟོག་པས་འདོད་ཆགས་ལ་སོགས་པ་ལུས་ཀྱི་རྒྱུ་ཅན་ཉིད་དུ་རྟོགས་པ་ཡིན་གྱི་འདས་པའི་
བདག་དང་བདག་གིར་འཛིན་པས་ཆགས་པའི་རྒྱུ་ཅན་དུ་ནི་མ་ཡིན་ནོ་སྙམ་དུ་དོགས་པ་བསུ་ནས། ཅི་ལྟར་འགའ་ཞིག་ཏུ་དུ་བ་མེའི་རྒྱུ་ཅན་དུ་མཐོང་ནས། གཞན་དུ་མེ་མ་མཐོང་ཡང་དེའི་རྒྱུ་ཅན་དུ་རིག་པ་དེ་བཞིན་དུ་འདི་ཡང་བལྟ་བར་བྱ་སྟེ། ངེས་པ་དེ་ལྟར་གནས་པའི་ཕྱིར་རོ་ཞེས་གསུངས་པ་ནི་ཅི་ལྟར་ཞེས་བྱ་བའོ། །སོགས་པའི་སྒྲས་ནི་སྐད་ཅིག་མ་ཉིད་ལ་སོགས་པ་ཡང་ངོ༌། །དེ་བཞིན་ཞེས་བྱ་བ་ནི་རྗེས་སུ་དཔག་པས་གྲུབ་པའོ། །འདི་ནི་ཞེས་བྱ་བ་ནི་རྗེས་སུ་དཔག་པ་ཅི་ལྟར་ཞེས་བྱ་བ་ནི་མི་བྱ་བ་ཁོ་ནའོ། །གལ་ཏེ་ཁྱབ་པ་མེད་ན་མི་འབྱུང་མངོན་སུམ་མ་ཡིན་པའི་ཕྱིར་མ་མཐོང་པ་ལ་ཡང་རྗེས་སུ་དཔག་པ་ཚད་མ་མ་ཡིན། དེའི་ཚད་མ་ནི་དེ་ཙམ་གྱི་རྩ་བ་ཅན་ཡིན་པའི་ཕྱིར་རོ་སྙམ་དུ་དོགས་པ་བསུ་ནས་ཐ་དད་ཤེས་དང་ཞེས་གསུངས་སོ། །ཤེས་པ་དོན་གྱི་ཐ་དད་པ་མངོན་སུམ་གྱིས་མ་གྲུབ་ལ། སྔོན་པོ་ལ་སོགས་པས་བྱས་པ་ཡང་མ་ཡིན་ལ། སྔ་མ་དང་ཕྱི་མའི་ངོ་བོར་ཐ་དད་པ་མ་ཡིན་ནོ། །འདི་ལྟར་མེད་ན་མི་འབྱུང་བ་ནི་བདག་ཉིད་ཉམས་སུ་མྱོང་བ་ལས་བྱུང་བའི་རྣམ་པར་རྟོག་པ་ལས་ཁོང་དུ་ཆུད་པར་བྱ་བ་ཡིན་ནོ། །དེས་རྟོགས་པར་བྱ་བ་ཡིན་ནོ་སྙམ་པའི་མངོན་པར་རློམ་པ་ཁས་མི་ལེན་ན་ནི་ཁྱད་པར་དང་བྲལ་བ་དང་རིག་པ་ཙམ་དུ་འགྱུར་ན། དེ་ལ་ནི་གཟུང་བ་དང་འཛིན་པ་དང་སྔོན་པོ་དང་གཞན་ལ་སོགས་པའི་རྣམ་པར་དབྱེ་བ་སྲིད་པ་མ་ཡིན་ནོ། །འོ་ན་རྣམ་པར་དབྱེ་བ་ག་ལས་ཡིན་སྙམ་ན། དེས་ན་ཞེས་གསུངས་སོ། །རང་རིག་པ་ལ་ཕྱིས་རྗེས་སུ་དཔོག་པས་ན་རྗེས་སུ་དཔག་པའི་རྣམ་པར་རྟོག་པ་དང་བཅས་པའི་ཤེས་པའོ། །ཡང་ན་རྗེས་སུ་དཔག་པའི་རྒྱུ་ཡིན་པའི་ཕྱིར་རྗེས་སུ་དཔག་པ་ཡིན་ཏེ་བྱས་པའོ། །ཐ་སྙད་ཐམས་ཅད་བྱས་ཞེས་བྱ་བ་ལ། འཇུག་པ་དང་ལྡོག་པའི་མཚན་ཉིད་ཀྱི་ཐ་སྙད་དམ་རྟགས་ངེས་པ་སྔོན་དུ་འགྲོ་བ་ཅན་གྱི་རྗེས་སུ་དཔག་པའི་ཐ་སྙད་བྱས་པ་ཡིན་ནོ། །གང་གི་ཕྱིར་ཐ་དད་པ་དེ་ལྟར་ཡིན་པ་དེས་ནའོ། །རྗེས་སུ་དཔག་པ་ཞེས་བྱ་བ་ནི་སྔ་མ་བཞིན་ནོ། །གང་གི་ཕྱིར་དེ་ལྟར་མཐོང་བ་དོར་བ་མ་ཡིན་པ་དེའི་ཕྱིར་རོ། །གང་དག་ཅེས་བྱ་བ་ནས། ཅི་བཞིན་ནོ་ཞེས་བྱ་བའི་བར་དེ་གསལ་བ་ཡིན་ནོ། །མཐོང་བ་ནི་མེ་ཏོག་ཕྲེང་དང་ཙནྡན་ལ་སོགས་པའོ། །མ་མཐོང་བ་ནི་འཇིག་
རྟེན་ཕ་རོལ་ལ་སོགས་པའོ། །རྨོངས་པ་ནི་ཡོད་པར་ལྟ་བའོ། །གལ་ཏེ་མངོན་སུམ་ལས་ཤེས་པ་དང་དོན་དག་གི་རྣམ་པར་དབྱེ་བར་མི་འགྱུར་མོད། སྤང་བྱ་དང་དོར་བྱ་ཉིད་ཀྱིས་ཐ་དད་པ་ནི་དེ་ལས་འགྱུར་རོ་སྙམ་དུ་དོགས་པ་བསུ་ནས་བཤད་པ་ནི། བླང་དང་དོར་བྱ་ཞེས་བྱའོ། །བླང་བྱ་དང་དོར་བྱའི་ཁྱད་པར་ཡང་མངོན་སུམ་ལས་གྲུབ་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་བླང་བྱ་དང་དོར་བྱ་ནི་མངོན་སུམ་གྱིས་རྟོགས་པར་བྱ་བའི་རང་བཞིན་ལས་གཞན་མ་ཡིན་པ་ཉིད་མ་ཡིན་ནམ། དེ་ཅི་ལྟར་མངོན་སུམ་གྱིས་མི་རྟོགས་སྙམ་དུ་དོགས་ལ་བསུ་ནས། འདི་ནི་ཞེས་བྱ་བ་གསུངས་སོ། །སྡུག་བསྔལ་གྱི་སྒྲུབ་པར་བྱེད་པ་འབྲས་བུ་ལ་བརྟེན་པའི་རང་བཞིན་ནོ། །རང་གི་ངོ་བོ་ཙམ་འཛིན་པའི་མངོན་སུམ་གྱིས་གང་ལ་རྟོགས་ཏེ་མི་རྟོགས་པ་ཁོ་ནའོ། །དེ་ཉིད་ཀྱི་ཕྱིར་དེ་ལས་གཞན་བདེ་བའི་སྒྲུབ་པར་བྱེད་པ་བླང་བྱ་ཡང་མི་རྟོགས་སོ་ཞེས་བརྗོད་པ་ནི་མིན་ནོ་ཞེས་བྱ་བ་སྟེ་སྤང་བྱའོ། །མངོན་སུམ་ཙམ་གྱིས་གལ་འགྱུར་ཏེ། མི་འགྱུར་བ་ཁོ་ནའོ། །ཅི་ལྟར་འབྲས་བུའི་མཐར་ཐུག་པའི་རང་བཞིན་ལ་མངོན་སུམ་མི་འཇུག་པ་དེ་ལྟར་རྒྱས་པར་བསྟན་པའི་ཕྱིར་རྣམ་པར་རྟོག་པར་མཛད་པ་ནི་བླང་བྱ་ཉིད་ནི་ཞེས་བྱ་བའོ། །བླང་བྱ་ཉིད་དུ་རྣམ་པར་གཞག་པ་ནི་བདེ་བའི་སྒྲུབ་པར་བྱེད་པ་ཡིན་པའི་ཕྱིར་རམ། སྡུག་བསྔལ་གྱི་སྒྲུབ་པར་བྱེད་པ་དོར་བར་བྱ་བ་ཉིད་བཀག་པ་ལས་ཡིན་ཞེས་རྣམ་པར་རྟོག་པ་རྣམ་པ་གཉིས་སོ། །དོར་བྱ་ཉིད་དུ་རྣམ་པར་གཞག་པ་ཡང༌། བླང་བྱ་ཉིད་དུ་རྣམ་བར་གཞག་པ་ལས་ཟློག་པས་ཡིན་ཏེ། སྡུག་བསྔལ་གྱི་སྒྲུབ་པར་བྱེད་པ་ཡིན་པའི་ཕྱིར་རམ། བདེ་བའི་སྒྲུབ་པར་བྱེད་པ་བཀག་པ་ལས་སོ་ཞེས་སྨྲས་པ་ནི་དོར་བྱ་ཉིད་ནི་ཞེས་བྱ་བ་རྣམ་པར་གཞག་པ་ནི་ཞེས་འབྲེལ་ཏོ། །བཟློག་པ་ལས་ཞེས་བྱ་བ་ནི་བླང་བྱ་ཉིད་དུ་རྣམ་པར་གཞག་པ་ལས་བཟློག་པ་ལས་སོ། །དེ་ལ་རེ་ཞིག་བདེ་བ་མངོན་སུམ་ཉིད་མ་ཡིན་པར་ནི་དངོས་པོ་ལ་བདེ་བའི་སྒྲུབ་པར་བྱེད་པ་ཉིད་མངོན་སུམ་གྱིས་རྟོགས་པར་བྱ་བ་མ་ཡིན་ནོ་ཞེས་བརྗོད་པ་ནི། དོན་བྱེད་དོན་དུ་ཞེས་བྱའོ། །དོན་སྲེག་པ་ལ་སོགས་པ་དོགས་པའོ། །བྱ་བ་སྟེ་བྱེད་པ་པོ་ཉིད་ནི་ནའོ། །བླང་བྱ་ནི་དེ་ཉིད་ཡིན་
ན་དེ་ནི་ཉེ་བའི་རང་བཞིན་འཛིན་པའི་མངོན་སུམ་གྱིས་མི་མཐོང་ངོ་མངོན་སུམ་དེ་ལས་འཇུག་པར་བྱེད་འདོད་པ་རྣམས་སོ། །མ་མཐོང་བ་དེས་ན་བླང་བྱའི་དངོས་པོ་ཉིད་རིག་མ་ཡིན་ཞེས་འབྲེལ་ཏོ། །ཅི་ལྟར་མངོན་སུམ་གྱིས་མ་མཐོང་སྙམ་ན། མངོན་སུམ་འབྱུང་འགྱུར་ཞེས་གསུངས་སོ། །འདིས་ནི་བླང་བྱ་ཉིད་ཡིན་པའི་ཕྱིར་ཞེས་བྱ་བའི་ཕྱོགས་གསལ་བ་ཡིན་ནོ། །དོར་བྱ་ཉིད་ནི་བཀག་པ་ལས་ཞེས་བྱ་བའི་ཕྱོགས་འགོག་པ་ནི། སྤང་བྱ་ཞེས་བྱ་བའོ། །སྤང་བྱ་ཉིད་བཀག་པ་ག་ལ་ཡོད་དེ་མ་ཡིན་པ་ཉིད་དོ། སྤང་བྱ་དབང་པོ་ལས་འདས་ཕྱིར་ཏེ། སྡུག་བསྔལ་སྒྲུབ་པར་བྱེད་པ་ནི་མངོན་སུམ་མ་ཡིན་པའི་ཕྱིར་རོ། །གང་གི་ཕྱིར་དེ་ལྟར་དོར་བྱ་མངོན་སུམ་མ་ཡིན་པ་དེས་ན་བླང་བྱ་འདི་ལ་སྤང་བྱའི་དངོས་པོ་མེད་དོ་ཞེས་རྟོགས་པ་འདི་ནི་མངོན་སུམ་ལས་མ་ཡིན་ཏེ། དབང་པོའི་བྱེད་པའི་རྗེས་སུ་འབྲང་བ་མ་ཡིན་ནོ་ཞེས་བྱ་བའི་དོན་ཏོ། །དེ་བཞིན་དུ་དོར་བྱ་བཟློག་པ་ལས་ཉིད་རྣམ་པར་གཞག་པ་ཡང་མེད་དོ་ཞེས་རྟོགས་པར་བྱ་བའོ། །བཤད་ཟིན་མ་ཐག་པའི་ཚུལ་དུ་རང་གི་དུས་ན་ཡོད་པ་ཙམ་འཛིན་པའི་མཚན་ཉིད་ལས་ན། རིམ་གྱིས་འབྱུང་བའི་མངོན་སུམ་གཉི་གས་ཀྱང་བསྒྲུབ་པར་བྱ་བ་དང༌། སྒྲུབ་པར་བྱེད་པའི་དངོས་པོ་འཛིན་པ་མ་ཡིན་ནོ་ཞེས་བརྗོད་པ་ནི་བླང་དང་ཞེས་བྱ་བའོ། །དེར་ཡང་ཞེས་བྱ་བ་ནི་བསྒྲུབ་བྱ་དང་སྒྲུབ་བྱེད་ཀྱི་མངོན་སུམ་དག་ལའོ། །རིགས་པ་ནི་རང་གི་དུས་ན་ཡོད་པ་ཙམ་འཛིན་པའི་མཚན་ཉིད་དོ། །བཟློག་ནས་འཇུག་པ་ནི་བསྐྱར་ནས་འཇུག་པའོ། །ཤིན་ཏུ་གོམས་པ་ལས་མངོན་སུམ་གྱི་བླང་བྱ་ལ་སོགས་པ་ཐམས་ཅད་འཛིན་ནོ་སྙམ་དུ་དོགས་པ་བསུ་བ་ནི་གལ་ཏེ་ཞེས་བྱ་བའོ། །མ་རྟོགས་པ་ལ་ཞེས་བྱ་བ་ནི་ལན་ཏེ། གང་གི་ཕྱིར་བླང་བྱ་ལ་སོགས་པ་མ་རྟོགས་པ་ལ་གོམས་པ་མེད་པ་དེས་ན་ཕན་ཚུན་བསྟེན་པ་ཞེས་བྱ་བའོ། །འདི་ཉིད་བརྗོད་པ་ནི། ཅི་སྲིད་ཅེས་བྱ་བའོ། །དོན་བྱ་བ་དང་སྒྲུབ་པར་བྱེད་པ་ལ་དམིགས་པ་རིམ་གྱིས་འབྱུང་བ་དག་ནི་ཕན་ཚུན་རིག་པ་མེད་པས་ན་རུང་བ་ཉིད་དུ་མ་མྱོང་བའི་ཕྱིར། ཕན་ཚུན་བསྟེན་པར་གསལ་བ་ཡིན་ནོ་ཞེས་དགོངས་པའོ། །མངོན་སུམ་ནི་རུང་བ་ཉིད་ཀྱི་ཡུལ་ཅན་ཏེ། དེ་གོམས་པ་གང་ལས་འབྱུང་བའི་གོམས་པ་དེ་ནི་
གོམས་པ་མངོན་སུམ་འབྱུང་བ་སྟེ་དེ་མེད་དོ། །དོར་བྱ་དང་བླང་བྱ་ནི་མཐོང་བར་བྱ་བ་མ་ཡིན་ནོ་ཞེས་གང་བརྗོད་པ་དེ་སྡུད་པ་ནི། གལ་ཏེ་མངོན་སུམ་ཙམ་ཞེས་བྱ་བའོ། །ཙམ་སྨོས་པ་ནི་མངོན་སུམ་གྱི་རྗེས་ལས་བྱུང་བའི་རྣམ་པར་རྟོག་པ་བསལ་བའི་དོན་དུའོ། །གལ་ཏེ་དོར་བྱའམ་བླང་བྱ་མངོན་སུམ་གྱི་ཡུལ་མ་ཡིན་ན། འོ་ན་ཡུལ་གང་ཡིན་སྙམ་ན། དེ་ནི་ཞེས་གསུངས་ཏེ་མངོན་སུམ་དེ་ནིའོ། །རང་གི་ངོ་བོ་ཙམ་ཞེས་བྱ་བ་ནི། མངོན་སུམ་རྣམ་པར་ཤེས་པའི་རང་བཞིན་ཡིན་ཡང་བསྒྲུབ་བྱའི་ཤེས་པའི་མཐར་ཐུག་པ་ནི་མ་ཡིན་ནོ་ཞེས་བསྟན་པའི་ཕྱིར་ཙམ་སྨོས་སོ། །དེས་ཞེས་བྱ་བ་ནི་རང་གི་ངོ་བོ་ཙམ་རིག་པ་དེའི་ཕྱིར་རོ། །འོ་ན་གང་ལས་སྤང་བྱ་ལ་སོགས་པ་སྙམ་ན། རྗེས་སུ་དཔག་པ་ཞེས་གསུངས་ཏེ། དེའི་རང་བཞིན་མཐོང་བ་ལས་དེའི་དོན་བྱ་བ་རྗེས་སུ་དཔོག་པ་ལ་སྟེ། དེ་ལ་བརྟེན་ནས་སོ། །གལ་ཏེ་གཉི་ག་མི་རིག་པའི་མངོན་སུམ་ནི་འབྲེལ་བ་འཛིན་པར་བྱེད་པ་ཉིད་མ་ཡིན་ནོ་སྙམ་དུ་དོགས་པ་བསུ་ནས། མངོན་སུམ་གཉིས་ལས་བྱུང་བའི་རྣམ་པར་རྟོག་པའི་འབྲེལ་པ་གྲུབ་པ་ནི་མངོན་སུམ་གྱིས་གྲུབ་པ་ཁོ་ན་སྟེ། ཐ་སྙད་པ་རྣམས་དེ་ལྟར་ལྷག་པར་ཞེན་པའི་ཕྱིར་རོ་ཞེས་བཤད་པ་ནི་དོན་ཞེས་བྱ་བ་སྟེ་གཉིས་ཀྱི་འབྲེལ་པ་ཉིད་དོ། །ཐ་སྙད་ནི་རྣམ་པར་རྟོག་པ་སྟེ་དེས་གྲུབ་པ་ཡིན་པས། གཞན་ཞེས་བྱ་བ་མཆོག་ཏུ་གྱུར་པ་ནི་ཡོངས་སུ་ཚོལ་བར་མི་བྱེད་དེ་མེད་པའི་ཕྱིར་དང༌། ཐ་སྙད་པ་རྣམས་དེ་ཙམ་གྱིས་ཡོངས་སུ་ཚིམ་པའི་ཕྱིར་རོ། །གལ་ཏེ་དོར་བྱ་ལ་སོགས་པ་ནི་མངོན་སུམ་གྱི་མཐོང་བ་མ་ཡིན་ཏེ། དེས་ནི་རང་གི་ངོ་བོ་ཙམ་གྱི་ཡུལ་ཅན་ཡིན་པའི་ཕྱིར་རོ། །འོན་ཀྱང་སྒྲུབ་པར་བྱེད་པ་གཞན་མེད་པ་ལྐོག་ཏུ་གྱུར་པ་མ་ཡིན་ལ། ཐ་དད་པ་མེད་པའི་རང་བཞིན་ལ་བསམས་ན། གང་དག་མཐོང་བའི་དོན་སྤངས་ནས་ཞེས་བྱ་བ་ལ་སོགས་པ་འཇིག་རྟེན་ཕ་རོལ་སྤངས་པ་མ་ཡིན་ནམ་སྙམ་དུ་དོགས་པ་བསུ་བ་ནི་འོན་ཏེ་ཞེས་བྱ་བའོ། །འདི་ཡང་ཞེས་བྱ་བ་ནི་འཇིག་རྟེན་འདི་ཉིད་ཀྱང་སྤོང་པར་བྱེད་བ་ལ་རག་སྟེ་གྱིས་ཤིག །གང་གི་ཕྱིར་འདི་ཙམ་གྱིས་ཏེ། འཇིག་རྟེན་ཕ་རོལ་བཟློག་བ་ཙམ་ཁོ་ནས་སོ། །འདི་ནི་ཞེས་བྱ་བ་རང་རིག་པའི་མངོན་སུམ་
རྣམ་པར་གནས་པ་མ་ཡིན་གྱིས། འོན་ཀྱང་གཉི་ག་ཡང་དགག་པར་བྱ་བ་ཡིན་ནོ། །འཇིག་རྟེན་ཀྱང་ཕན་པ་འགའ་ཞིག་གཉི་ག་ཡང་མེད་དོ་ཞེས་བརྔོད་པ་ན། འཇིག་རྟེན་འདི་ཡང་ཡོད་མིན་ནི། །ཞེས་བྱ་བའོ། །དེས་ནས་ཞེས་བྱ་བ་ནི་ལན་ནོ། །ཐར་པ་ཁས་བླངས་པའི་ཕྱིར་རོ་སྙམ་དུ་དགོངས་པའོ། །གལ་ཏེ་འཇིག་རྟེན་གཉི་ག་ལ་བསྙོན་འདེབས་པ་ནི་ཤིན་ཏུ་ཡང་ཆད་པར་ལྟ་བ་མ་ཡིན་ནམ། དེས་ན་མེད་པ་པ་ཡང་མེད་ཅེས་ཅི་ལྟར་བརྗོད་སྙམ་ན། དེ་ལྟ་ཡིན་ན་ཞེས་བྱ་བས་ཏེ། འཇིག་རྟེན་འདི་ཡང་བཀག་པ་ནའོ། །བླང་བྱ་དང་དོར་བྱ་ཐམས་ཅད་སྤངས་པ་སྟེ་བྱ་བ་བཟློག་པའི་ཕྱིར་ཏེ། གཏན་ཚིགས་དེའི་ཕྱིར་རང་རིག་པའི་གནས་སྐབས་ན་སེམས་ནི་གྲོལ་བ་ཉིད་དེ་ཐར་པ་ཉིད་དུ་འགྱུར་རོ། །དེ་སྐད་སྨྲ་བ་ན་ནི་མེད་པ་པར་མི་འགྱུར་ཏེ། སྐྱེས་བུའི་དོན་གྱི་གཙོ་བོ་ལ་སྐུར་པ་བཏབ་པ་མེད་པའི་ཕྱིར་རོ། །དེ་ལ་སྐུར་ན་དེ་སྐད་བརྗོད་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་འདི་ནི་བདེན་ཏེ་རང་རིག་པའི་མངོན་སུམ་གྱིས་ནི་འཇིག་རྟེན་ཕ་རོལ་སྒྲུབ་པར་མི་བྱེད་ལ། འཇིག་རྟེན་འདི་ཡང་སྒྲུབ་པ་མ་ཡིན་ནའོ། །ས་ལ་སོགས་པ་དེ་ཁོ་ན་ཉིད་བཞིར་བརྗོད་པ་ནི་དཔེར་བསྟན་པའི་དོན་ཏེ། འདི་ལྟར་རྣམ་པར་དཔྱད་ན་ཤིན་ཏུ་གྲགས་པའི་ས་ལ་སོགས་པ་ཡང་དེ་ཁོ་ན་མ་ཡིན་ན། འཇིག་རྟེན་ཕ་རོལ་ལ་སོགས་པ་ལྟ་ཅི་སྨོས། འདི་ཙམ་གྱིས་ནི་ཐར་པ་སྐྱེས་བུའི་དོན་དུ་འགྱུར་བ་མ་ཡིན་ཏེ། རང་རིག་པ་བཞིན་དུ་འཇིག་རྟེན་འདིའི་ཡུལ་ཅན་གྱིས་རྣམ་པར་རྟོག་པ་ཡང་ངོ་བོ་ཉིད་ཡིན་པའི་ཕྱིར་རོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །རྨོངས་པ་གཞན་དག་ཅེས་བྱ་བ་ནི་འཇིག་རྟེན་ཕ་རོལ་ལ་སོགས་པའི་ཡུལ་ཅན་གྱི་རྣམ་པར་རྟོག་པ་གཞན་ཏེ། རབ་ཏུ་མ་གྲུབ་པ་ཉིད་ཀྱིས་འདོད་པ་མ་ཡིན་ནོ་ཞེས་བྱ་བའི་དོན་ཏོ། །རྨོངས་པ་འདི་ཉིད་ཅེས་བྱ་བ་ནི་ལན་ནོ། །འཇིག་རྟེན་འདིའི་ཡུལ་ཅན་ག་ལས་ཞེས་བྱ་བ་ནི་མ་ཡིན་པ་ཁོ་ནའོ་ཞེས་བྱ་བ་སྟེ། གལ་ཏེ་རང་རིག་པའི་རང་བཞིན་གྱི་ཐར་པ་གནོད་བྱེད་དུ་མི་འགྱུར་ནའོ་ཞེས་བྱ་བར་དགོངས་པའོ། །དེའི་ཕྱིར་ངེས་པར་གང་ཉིད་ཀྱི་འདུ་བྱེད་ཀྱི་རྗེས་སུ་འཇུག་པ། སེམས་ནི་དེ་མེད་མི་འབྱུང་བ། །དེ་ཕྱིར་སེམས་ལ་བརྟེན་པ་
ཡིན། །ཞེས་བྱ་བའི་ཚུལ་གྱིས། གང་གི་ཚེ་རྣམ་པར་རྟོག་པ་ཐོག་མ་དང་ཐ་མ་མེད་པ་ཉིད་དང༌། རང་གི་རིགས་མཐུན་པ་ཙམ་ལས་བྱུང་བར་གྲུབ་པ་དེའི་ཚེ་འཇིག་རྟེན་ཕ་རོལ་གྲུབ་པ་ཁོ་ན་སྟེ། ཐོག་མ་དང་ཐ་མ་མེད་པ་ཉིད་ལ་དེ་སྐད་བརྗོད་པའི་ཕྱིར་ཞེས་བརྗོད་པ་ནི། གལ་ཏེ་ཐོག་མཐའ་ཞེས་བྱ་བའོ། །མང་དུ་སྨྲ་བ་གཞན་གྱིས་ཅི་ཞིག་བྱ་སྟེ། དོན་མེད་པ་ཡིན་པའི་ཕྱིར་རོ། །རྒྱུ་དང་བཅས་པ་ཉིད་ཀྱིས་འཇིག་རྟེན་ཕ་རོལ་གྲུབ་པའི་ཕྱིར་རོ་ཞེས་བྱ་བའི་ཐ་ཚིག་གོ །རྒྱུ་དང་བཅས་པའི་ཕྱོགས་ལ་ཉེས་པ་བརྗོད་ནས། རྒྱུ་མེད་པའི་ཕྱོགས་ཀྱི་དོགས་པ་བསུ་བ་ནི། འོན་ཏེ་ཞེས་བྱ་བའོ། །རྣམ་པར་རྟོག་པ་ནི་སྔ་མ་སྔ་མའི་རྣམ་པར་རྟོག་པའི་བག་ཆགས་ཀྱི་རྗེས་སུ་བྱེད་པ་ཡིན་ཡང༌། རྣམ་པར་རྟོག་པ་དེས་བསྐྱེད་པར་བྱ་བ་མ་ཡིན་ན། འབྱུང་བའི་བསྐྱེད་པར་བྱ་བ་ལྟར་འགྱུར་རེ་ཡང་སྐན་ཏེ། དེ་ཁྱད་པར་མེད་ཀྱང་ཁྱད་པར་དུ་འགྱུར་བའི་ཕྱིར་རོ། །དེས་ན་འདི་རྒྱུ་མེད་པ་ཅན་ཡིན་ན་འབྲས་བུ་ཐམས་ཅད་རྒྱུ་མེད་པ་ཅན་དུ་འགྱུར་ཏེ། འདི་ལ་རྒྱུ་མེད་པས་ཞེས་བཤད་པས་སོ། །ཡང་ན་རྒྱུ་མ་ཡིན་པར་འགྱུར་རོ། །རྒྱུ་མེད་པ་ནི་རྒྱུ་མ་ཡིན་ཏེ། རང་གི་དོན་ལ་ཀ་ནོའི་རྐྱེན་བརྗོད་པའི་ཕྱིར་ན་རྒྱུ་མེད་པ་ཡིན་ནོ། །དེ་ལྟར་ལན་འདེབས་པ་ནི་ཐམས་ཅད་རྒྱུ་མེད་ཅེས་བྱ་བའོ། །དེ་ལྟ་ཡིན་ན་ཞེས་བྱ་བ་ནི་ཐམས་ཅད་རྒྱུ་མེད་པ་ཡིན་ནའོ། །མེད་པ་པ་ཁྱོད་ཀྱིས་སྨྲས་པའི་དོན་མེད་པར་འགྱུར་ཏེ། ཁྱོད་ཀྱིས་སྨྲས་ཀྱང་གཞན་རྟོགས་བྱའི་རྒྱུ་མ་ཡིན་ནོ་ཞེས་བྱ་བའི་དོན་ཏོ། །འདི་ཉིད་བརྗོད་པ་ནི་གལ་ཏེ་འགར་ཡང་ཞེས་བྱ་བའོ། །ཅི་དོན་ཉིད་དེ་སྨྲས་པ་ནི་ དགོས་པ ་དང་བཅས་པ་མ་ཡིན་ནོ་ཞེས་བྱ་བའི་དོན་ཏོ། །ཡང་ན་ཁྱོད་ཀྱི་དོན་དུ་གཉེར་བ་གང་དུ་ཡིན་ཏེ་ཁྱོད་ཀྱིས་སྨྲས་པ་ལ་ དགོས་པ ་ཅི་ཡོད་སྙམ་དུ་དགོངས་པའོ། །འོན་ཏེ་འདི་ལ་ཞེས་བྱ་བ་ནི་བརྗོད་ པ་འདི་ལའོ། །དོན་ནི་དགོས ་པའོ། །འདིར་དེ་ཉིད་ཀྱི་ཞེས་བྱ་བ་ནི་ལན་ནོ་འདིར་ཞེས་བྱ་བ་ནི་འབྲས་བུ་ལའོ། །འོན་ཏེ་ཞེས་བྱ་བ་ནི་གཞན་གྱིའོ། །ལན་ནི་གལ་ཏེ་ཞེས་བྱ་བའོ། །དེ་ཞེས་བྱ་བ་ནི་གཞན་ལ་བརྒལ་ཞིང་བརྟག་པའོ། །གལ་ཏེ་བརྒལ་ཞིང་བརྟག་པ་ལ་བསྒྲུབ་པར་བྱ་བ་ཅི་ཡང་མེད་མོད་ཀྱི་འོན་ཀྱང་
དེ་ནི་མ་རིག་པ་ལས་བྱུང་བ་ཡིན་ནོ་སྙམ་ན་ནི་གལ་ཏེ་འདི་ནི་ཞེས་བྱ་བའོ། །དེ་ལྟ་ན་ཡང་དོན་མེད་པར་སྨྲ་བཙམ་ཡིན་པའི་དེ་བཞིན་ཁོ་ནར་ཉེས་པར་འགྱུར་རོ་སྙམ་ན། སུ་ཡིས་ལན་ཞེས་སྨྲས་ཏེ། དགོས་པ ་མེད་པའི་ཕྱིར་མ་རིག་པ་ཉིད་ཀྱིས་ཉེས་པ་ཡིན་གྱི། ངེད་ཀྱིས་གོ་ཅི་ལན་ཞེས་བྱ་བ་ནི་གཞན་གྱི་བསམ་པའོ། །ལན་དུ་གལ་ཏེ་བསྟན་པར་བྱ་བའི་མ་རིག་པ་ཆད་པ་མ་ཡིན་ན་དེའི་ཚེ་དོན་མེད་ཉིད་དེ། དགོས་པ ་མེད་པར་སྨྲས་པ་ཙམ་དུ་ཟད་དོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བ་དེ་དོགས་པ་བསུ་ནས་དེ་གཅོད་པར་བྱེད་པའི་ཚིག་ནི་རྒྱུ་ཉིད་ཡིན་པའི་ཕྱིར་ཅི་ལྟར་རྒྱུ་མེད་པར་སྨྲ་ཞེས་ལན་ལྡོན་བ་ནི། འོན་ཏེ་མི་རིག་ཆད་ན་ཡང༌། །ཞེས་བྱ་བའོ། །བརྒལ་ཞིང་བརྟག་པ་མ་རིག་པའི་རྒྱུ་ཅན་ཡིན་ན། འཇིག་རྟེན་གཞན་འབད་མི་ དགོས་པར་གྲུབ་བོ་ཞེས་བརྗོད་པ ་ནི། མ་རིག་རྒྱུ་དང་ལྡན་ཉིད་ན། །ཞེས་བྱ་བའོ། །ཅི་ལྟར་ན་མ་རིག་པ་ཐོག་མ་མེད་པར་གྲུབ་པས་འཁོར་བ་ཉིད་གྲུབ་སྙམ་ན། མ་རིག་རྣམ་རྟོག་ལས་གཞན་མིན། །ཞེས་སྨོས་སོ། །དེ་ལྟར་ཐལ་བར་འགྱུར་བའི་ཞར་ལ་འོངས་པ་རྫོགས་པར་བྱས་ནས་མཇུག་སྡུད་པ་ནི། དེའི་ཕྱིར་ཞེས་བྱ་བའོ། །གང་གི་ཕྱིར་ལུས་ཀྱི་རྒྱུ་ཅན་དུ་མི་འཐད་པའི་རྒྱུ་དེའི་ཕྱིར་རོ། །ཐོག་མ་མེད་པ་ཡང་དེ་ཡིན་ལ། བག་ཆགས་ཀྱང་ཡིན་པ་སྟེ། དེ་ཡོངས་སུ་སྨིན་བསད་པ་དེས་བྱ་བ་བསྐྱེད་པ་ཡིན་ནོ་ཞེས་བྱ་བ་ནི་འདོད་ཆགས་དང་བདེ་བ་ལ་སོགས་པ་རྣམས་གོམས་པ་ཡིན་པར་མཇུག་བསྡུས་བའོ། །གལ་ཏེ་རྒྱུ་མེད་པར་སྐྱེ་བ་འགལ་བའི་ཕྱིར་གོམས་པས་སྡུག་བསྔལ་བསྐྱེད་པ་ཞེས་བྱ་བ་ནི་མི་འཐད་དེ། རྟག་པ་རྒྱུ་མེད་པ་ཅན་ཉིད་གོམས་པ་ལས་མངོན་པར་བསལ་བའི་ཕྱིར་རོ་སྙམ་ན། དེ་ནི་རེས་འགའ་དམིགས་པའི་ཕྱིར་རོ་ཞེས་གསུངས་སོ། །དམིགས་པར་བྱ་བ་མ་ཡིན་དམིགས་པར་བྱ་བ་ཉིད་དུ་འགྱུར་བ་ཡང་སྔར་མེད་པ་ཁོ་ན་ཡིན་ཏེ། ཡོད་པ་ཡང་དེ་ཉིད་ཡིན་ནོ། །གལ་ཏེ་བདེ་བ་ལ་སོགས་པ་ངེས་འགའ་དམིགས་པས་མི་རྟག་པ་ཡིན་མོད། སྡུག་བསྔལ་གོ་ཅི་ལྟར་མི་རྟག་པ་ཞེས་བྱ་བ་ཙམ་ནི་མི་མཐུན་པར་འགྱུར་བའི་སྡུག་བསྔལ་མ་ཡིན་ཏེ། ཟག་བ་མེད་པ་རྣམས་ཀྱང་མི་རྟག་པ་ཉིད་དེ་ལྟར་ཐལ་བའི་ཕྱིར་སྙམ་ན་བཤད་པ། བདག་ཏུ་འཛིན་
པ་དང་ཆགས་བ་ལ་སོགས་པ་གོམས་པ་ལས་བྱུང་བ་འདོད་ཆགས་ལ་སོགས་པ་རྣམས་ཀྱི་རྟེན་ཕྱིར་ཏེ། རྟེན་ཡིན་པའི་ཕྱིར་རོ། །ཟག་པ་དང་བཅས་པའི་ཕྱིར་རོ་ཞེས་བྱ་བའི་དོན་ཏོ། །རྒྱུ་ནི་བདག་དང་བདག་གིར་འཛིན་པ་ཡིན་གྱི་རྒྱུ་ཙམ་ནི་མ་ཡིན་ཏེ། སྔ་མ་བཞིན་དུ་ཐལ་བའི་ཕྱིར་རོ། །དེའི་དབང་ནི་དེ་ལ་རག་ལས་པའོ། །དེའི་དངོས་པོ་ནི་ཉིད་དེ་དེའི་ཕྱིར་རོ། །རྒྱུ་དབང་ཕྱིར་ན་སྡུག་བསྔལ་ཡང༌། །ཞེས་ཡང་གི་སྒྲ་རིམ་པ་གཞན་དུ་སྦྱར་རོ། །བཤད་པ་ལས་ནི་གོམས་པ་ལས་བྱུང་བ་ཉིད་བསྡུ་བའི་དོན་དུ་ཡང་གི་སྒྲ་ཡིན་ནོ་ཞེས་སོ། །ཇི་ལྟར་བདག་ཏུ་འཛིན་པ་ལ་སོགས་པ་འདོད་པ་ལ་རག་ལས་པས་གོམས་པ་ལས་བྱུང་བ་དག་ནི་སྡུག་བསྔལ་གྱི་རྒྱུ་ཡིན་པའི་གོམས་པར་མ་བྱས་པ་ཉིད་མཆོག་ཡིན་ལ། དེ་ལས་བཟློག་པ་ནི་མི་མཐུན་པའི་ཕྱིར་ན་གོམས་པ་ཉིད་མཆོག་ཡིན་ནོ་ཞེས་བཤད་ཟིན་ཏོ། །གལ་ཏེ་ང་ཞེས་བདག་ཏུ་འཛིན་པ་རྒྱུ་མ་ཡིན་ནམ། འདི་ནི་གོམས་པ་ལས་བྱུང་བ་མ་ཡིན་པ་ཡང་མ་ཡིན་ཏེ། ལུས་དང་དབང་པོ་ལ་སོགས་པ་ལས་ཐ་དད་པའི་ཡུལ་ཅན་ཡིན་པའི་ཕྱིར་རོ། །སེམས་པ་ལ་སོགས་པའི་གནས་སྐབས་སུ་ནི་དབང་པོ་བྱེད་པ་མེད་པ་ཅན་ལུས་དམིགས་པར་མ་གྱུར་པ་ཡིན་ཡང༌། དའི་ཞེས་བདག་ཏུ་འཛིན་པར་ཉམས་སུ་མྱོང་བ་ཡིན་ཏེ། དེ་སྐད་དུ་ཡང་ལུས་མ་དམིགས་ཀྱང་བདག་ལ་དེ་འདི་ལྟར་འགྱུར་བ་ཡིན་ནོ་ཞེས་བརྗོད་པ་ཡིན་ནོ་སྙམ་དུ་དོགས་པ་བསུ་ནས་བདག་མིན་ཞེས་གསུངས་སོ། །བདག་ནི་དམིགས་པ་ཡང་མ་ཡིན་ནོ། །དེ་ཞིག་རང་རིག་པ་ནི་ཡུལ་དང་དུས་ལ་སོགས་པ་མ་བཅད་པར་ཡོད་པའི་ཡུལ་ཅན་མ་ཡིན་ཏེ། ཉེ་བའི་ཡུལ་ཅན་ཡིན་པའི་ཕྱིར་རོ། །ལྷག་པར་ཞེན་པ་ཡང་མ་ཡིན་ཏེ། མཐོང་བའི་རྗེས་སུ་འབྲངས་པ་ན་མཐོང་བའི་ལུས་ལ་སོགས་པ་ཕྱི་རོལ་ལས་ཐ་དད་པ་ལ་ཡུལ་དང་དུས་རྣམ་པར་ཆད་པར་འཛིན་པའི་ཕྱིར་རོ།། དེས་ན་ལུས་ལས་ཐ་དད་པའི་དངོས་པོ་རྣམ་པར་མཆད་པའི་ཡོད་པ་ཅན་ཅི་ལྟར་འགྲུབ་བདེན་ཏེ། བདག་མངོན་སུམ་ནི་མ་ཡིན་ཏེ། ཉེ་བར་གནས་པ་ཙམ་ཡིན་པས་སྐད་ཅིག་མ་ཉིད་དུ་ཐལ་བའི་ཕྱིར་རོ། །འོ་ན་ཅི་ཡིན་ཞེ་ན། རྔེས་སུ་དཔག་པར་བྱ་བ་ཡིན་ནོ། །འདི་ལྟར་འདོད་པ་དང་
སྡང་བ་དང་འབད་རྩོལ་དང༌། བདེ་བ་དང་སྡུག་བསྔལ་གྱི་ཤེས་པ་འབྲས་བུར་གྱུར་པ་རྣམས་ནི་རྟེན་དུ་གྱུར་བའི་རྒྱུ་བདག་ཅེས་བྱ་བ་རྟོགས་པར་བྱེད་པ་ཡིན་ནོ། །ཉམས་སུ་མྱོང་བ་དང་དྲན་པ་དང་འདོད་པ་ལ་སོགས་པ་དུས་ཐ་དད་པ་ཅན་རྣམས་ནི་དེའི་དུས་ན་ཡོད་པའི་དངོས་པོ་མེད་པར་འབྱུང་བ་མ་ཡིན་ཏེ། གཞན་གྱི་དྲན་པ་དང་ལོངས་སྤྱོད་ལ་སོགས་པར་ཐལ་བའི་ཕྱིར་རོ་སྙམ་དུ་དོགས་པ་བསུ་ནས་བཤད་པ། འདོད་པ་ལ་སོགས་པ་ནི་རྟེན་དུ་གྱུར་པའི་བདག་གིས་བྱིན་གྱིས་བརླབས་པའང་མ་ཡིན་ཏེ། བརྟེན་པ་ཉིད་དུ་མ་དམིགས་པའི་ཕྱིར་ཏེ། ཉམས་སུ་མྱོང་བའི་བག་ཆགས་ཙམ་བྱིས་འབྱུང་བའི་ཕྱིར་རོ། །བཤད་པ་ནི། བདག་མིན་བྱིན་གྱིས་བརླབས་པ་མིན། །ཞེས་སྡུག་བསྔལ་དང་གཞི་མཐུན་པར་བྱས་ཏེ། སྔ་མ་དང་འབྲེལ་བའི་ཕྱིར་རོ། །བག་ཆགས་ལས་བྱུང་བ་ནི། གཞན་དུ་ཡང་འཐད་པར་བརྗོད་པ་ནི་རྒྱུ་མིན་ཞེས་བྱ་བའོ། །དེ་ལ་བརྟེན་པ་ཉིད་དུ་མ་དམིགས་པར་བརྗོད་པ་ནི་རྟག་པའང་ཅི་ལྟར་ཞེས་བྱ་བའོ། །ཁས་བླངས་ནས་ཀྱང་རྟག་པ་ཉིད་ཀྱིས་མི་སྟོང་པའི་ཕྱིར་རིམ་གྱིས་བྱེད་པ་ཉིད་དང་འགལ་ལོ་ཞེས་བརྗོད་པ་ནི། དེའི་ཕྱིར་གཅིག་ལས་ཞེས་བྱ་བའོ། །དགོངས་པ་འདི་ཉིད་ཀྱིས་བཅོམ་ལྡན་འདས་ཀྱིས་སྡུག་བསྔལ་གྱི་བདེན་པ་ལ་རྣམ་པ་བཞི་བསྟན་ཏོ་ཞེས་བརྗོད་པ་ནི། མི་རྟག་པ་ཉིད་དང་ཞེས་བྱ་བ་ལ་སོགས་པའོ། །དེ་ཞེས་བྱ་བ་ནི་སྡུག་བསྔལ་འཁོར་བ་ཅན་ཕུང་པོ་ཞེས་བཤད་པ་འཛིན་ཏོ། །གལ་ཏེ་རྟག་པ་ཉིད་ལ་གོམས་པའི་དབང་གིས་དམིགས་པར་བྱ་བ་ཉིད་གཞན་འབྱུང་བ་ཡིན་ལ། རང་བཞིན་ནི་རྟག་པ་ཉིད་དོ་སྙམ་ན། དམིགས་པར་བྱ་བ་ཉིད་ནི་ཞེས་གསུངས་སོ། །རྟག་པ་ཉིད་ཀྱིས་ན་མ་དམིགས་པའི་དུས་ན་ཡང་དམིགས་པར་བྱ་བ་ཉིད་ཡོད་སྙམ་དུ་དོགས་པ་བསུ་ནས་ཐམས་ཅད་ཀྱི་ཚེ་ཞེས་གསུངས་སོ། །དེ་ལྟ་ན་ཡང་རྟག་པ་ལ་ཆད་པ་ཅི་ཡོད་སྙམ་ན། རིམ་གྱིས་དམིགས་པ་ནི་ཞེས་གསུངས་སོ། །གང་རིམ་གྱིས་དམིགས་པ་དེ་ནི་རྟག་པ་ཉིད་དོ། །ཅིའི་ཕྱིར་སྙམ་ན། གཅིག་ལ་ནི་ཞེས་གསུངས་སོ། །གང་གི་རྟག་པ་ཉིད་ལ་རིམ་མི་སྲིད་པ་དེའི་ཕྱིར་དེ་ལས་ལྡོག་པ་ན་མི་རྟག་པ་ཉིད་ལ་གནས་པས་དེས་ཁྱབ་པ་ཡིན་ནོ་ཞེས་དགོངས་པའོ། །གང་གིས་འདི་དེས་ཁྱབ་པོ་ཞེས་
བརྗོད་པ་ཅི་ལྟར་དེ་ལ་མི་སྲིད་པར་རྟོགས་སྙམ་ན། རིམ་པ་དང་ལྡན་པ་ནི་ཞེས་གསུངས་སོ། །འོ་ན་རྗེས་སུ་དཔག་པར་རིམ་པ་དང་ལྡན་པ་གཅིག་པ་ཉིད་དུ་རྟོགས་སོ་སྙམ་ན། དེ་མེད་ན་ཞེས་གསུངས་ཏེ། མངོན་སུམ་དེ་མེད་ནའོ། །ཅི་ལྟར་སྙམ་ན། མངོན་སུམ་སྔོན་དུ་འགྲོ་བ་ཅན་ཡིན་པའི་ཕྱིར་རོ་ཞེས་གསུངས་སོ། །འོ་ན་རྗེས་སུ་དཔག་པ་སྔོན་དུ་འགྲོ་བ་ཅན་ཡིན་ལ་རག་མོད་དེ་ལྟ་ན་ཡང་རྗེས་སུ་དཔག་པ་མེད་པར་ཅི་ལྟར་འགྱུར་སྙམ་དུ་དོགས་པ་བསུ་ནས་རྗེས་སུ་དཔག་པ་ཞེས་གསུངས་སོ། །དེ་ཕྱིར་ཞེས་བྱ་བ་ནི་རིམ་གྱིས་དམིགས་པར་བྱ་བ་ཡིན་པའི་ཕྱིར་རོ། །འདིས་ནི་ནི་རྟ་པ་ཉིད་ཅེས་བྱ་བའི་རྣམ་པར་བརྗོད་པ་ཡིན་ནོ། །སྡུག་བསྔལ་ཉིད་ཅེས་བྱ་བ་ནི་རྣམ་པ་བཤད་པའི་དོན་དུ་བཤད་པ། སྡུག་བསྔལ་ཉིད་ནི་ཞེས་བྱ་བ་ནི་འཁོར་བ་ཅན་གྱི་ཕུང་པོའི་ཞེས་འབྲེལ་ཏོ། །ཅིའི་ཕྱིར་སྙམ་ན། ཆགས་པ་ལ་སོགས་པ་ཞེས་གསུངས་སོ། །མི་རྟག་པ་ཙམ་ནི་སྡུག་བསྔལ་ཉིད་མ་ཡིན་ཏེ། ཟག་པ་མེད་པ་རྣམས་ཀྱང་དེར་འགྱུར་བའི་ཕྱིར་རོ། །འོན་ཀྱང་ཟག་པ་དང་བཅས་པའི་ཕྱིར་རོ་སྙམ་དུ་དགོངས་པའོ། །རྒྱུ་ནི་བདག་དང་བདག་གིར་འཛིན་པའོ། །འབྲེལ་པའི་ཕྱིར་ནི་རག་ལས་པའི་ཕྱིར་སྡུག་བསྔལ་ཡིན་གྱི་རྒྱུ་ཙམ་དང་འབྲེལ་པའི་ཕྱིར་ནི་མ་ཡིན། སྔ་མ་བཞིན་དུ་ཐལ་བའི་ཕྱིར་རོ་ཞེས་བྱ་བའི་དོན་ཏོ། །གཞན་དབང་ཞེས་བྱ་བ་ནི་བདག་དང་བདག་གིར་འཛིན་བའི་རྒྱུའི་དབང་ངོ༌། །ཡང་གི་སྒྲ་ནི་ཞེས་བྱ་བ་ནི་མ་བཤད་པ་སྡུད་པའི་དོན་ཅན་ནིའོ། །གོམས་པ་ཙམ་ལ་བརྟེན་པའི་ཕྱིར། འཁོར་བའི་ཕུང་པོ་རྣམས་སྡུག་བསྔལ་བ་ཉིད་དོ་ཞེས་བྱ་བ་ནི་སྐབས་ཡིན་ནོ། །སྟོང་པ་ཉིད་དང་བདག་མེད་པ་ཉིད་ཅེས་བྱ་བ་ནི་རྣམ་པར་གཉིས་གོ་རིམས་སུ་བརྗོད་པ་ནི། བདག་གི་རང་བཞིན་མ་ཡིན་ལ། །ཞེས་བྱ་བ་ལ་སོགས་པའོ། །ཅི་ལྟར་བདག་གིས་བྱིན་གྱིས་མ་བརླབས་སྙམ་པའི་དོགས་པ་སྤོང་བས། རྒྱུ་མིན་ཞེས་བྱ་བ་རྣམ་པར་འགྲེལ་པ་ནི་རྒྱུ་མ་ཡིན་པ་ནི་ཞེས་བྱ་བའོ། །དེ་ལྟ་ན་ཡང་བྱིན་གྱིས་རློབ་པ་པོ་རྒྱུར་ཅི་ལྟར་འགྱུར་སྙམ་ན། ཕན་འདོགས་པའི་རྒྱུ་ཡང་ཞེས་བྱ་བའོ། །དེ་ལྟར་ན་བདག་གི་རང་བཞིན་མ་ཡིན་རྣམ་པའི་
དོགས་པ་སེལ་བས་རྟག་པའང་ཅི་ལྟར་སྐྱེད་བྱེད་ཡིན་ཞེས་བྱ་བ་དེ་འཆད་པ་ནི། གལ་ཏེ་ཕུང་པོ་རྣམས་ཞེས་བྱ་བའོ། །དེའི་ཚེ་ཞེས་ཁོང་ནས་ཕྱུང་ལ། རྟག་པ་ཉིད་དུ་འགྱུར་རོ་ཞེས་སྦྱར་རོ། །རྟག་པ་ཡིན་མོད་ཅི་སྐྱོན་སྙམ་ན། རྟག་པ་ནི་ཞེས་གསུངས་སོ། །སྐྱེད་བྱེད་མ་ཡིན་ན་ཡང་དངོས་པོ་ཉིད་མ་ཡིན་ནོ་ཞེས་བརྗོད་པ་ནི། སྐྱེད་པར་བྱེད་པ་མ་ཡིན་པ་ཡང་ཞེས་བྱ་བ་སྟེ། རྗེས་སུ་འགྲོ་བ་དང་ལྡོག་པ་དག་དམིགས་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་ཡང་ཕུང་པོ་རྣམས་བདག་གི་རང་བཞིན་དུ་ཁས་ལེན་ན། དེའི་ཚེ་ཤེས་པ་དུས་ཐ་དད་པ་ལ་སོགས་པ་ཡིན་ནོ། །བྱིན་གྱིས་བརླབས་པའང་མིན་ཞེས་བྱ་བ་འདི་ལ་མི་དམིགས་པའི་ཚད་མ་བརྗོད་པ་ནི་བདག་གིས་བྱིན་གྱིས་ཞེས་བྱ་བའོ། །བདག་མིན་ཞེས་བྱ་བ་དེ་ལ་ཡང་འདི་ཉིད་བརྗོད་པ་ནི་ཕུང་པོ་རྣམས་ཀྱིས་ཞེས་བྱ་བའོ། །བྱིན་གྱིས་རློབ་པ་པོ་དབང་པོ་ལས་འདས་སྨྲ་བ་དག་གིས་སྨྲས་པ་ནི་གལ་ཏེ་ཞེས་བྱ་བའོ། །ཐུབ་པའི་མཐར་ནི་སེམས་མི་རྟ་པ་བྱིན་གྱིས་བརླབས་པ་ཡིན་ཡང་འཐད་པའི་ཕྱིར། རྟག་པའི་སེམས་ཀྱིས་བྱིན་གྱིས་བརླབས་པར་མ་གྲུབ་པོ་ཞེས་སྨྲས་པ་ནི་མ་ཡིན་ཏེ་ཞེས་བྱ་བའོ། །རྫོགས་པའི་ཕྱིར་རོ་ཞེས་བྱ་བ་ནི་བྱེད་པ་འཇུག་པ་ཞེས་བྱ་བ་སྐབས་ཡིན་ནོ། །གལ་ཏེ་ཅི་ལྟར་ན་མི་རྟག་པའི་སེམས་ཀྱིས་བྱིན་གྱིས་བརླབས་པ་ཙམ་གྱིས་རྫོགས་པར་འགྱུར་ཏེ། འཇིག་རྟེན་ཕ་རོལ་མ་གྲུབ་པའི་ཕྱིར་རོ་སྙམ་ན། སེམས་པ་ཡང་ཞེས་གསུངས་སོ། །གལ་ཏེ་ཡང་འབྲས་བུ་ཉམས་སུ་མྱོང་བའི་བག་ཆགས་ལས་བྱུང་བ་ཡིན་མོད། དེ་ལྟ་ན་ཡང་འདིར་གཞན་རྗེས་སུ་འབྲེལ་པ་མ་ཡིན་ནོ་ཞེས་བྱ་བག་ལས་ཡིན་ཏེ། དབང་པོ་ལས་འདས་པ་སྤོང་བར་བྱེད་པ་ནི་ཡོད་པ་མ་ཡིན་ནོ་སྙམ་དུ་དོགས་པ་བསུ་ནས། དབང་པོ་ལས་འདས་པ་ནི་མི་སྤོང་གི་འོན་ཀྱང་གཞན་རྒྱུ་ཡིན་ན། མཐོང་བ་ཙམ་ལས་བྱུང་བའི་འབྲས་བུའི་ཁྱད་པར་བྱེད་པ་དང་འགལ་བ་ཡིན་ནོ་ཞེས་མཇུག་བསྡུ་བས་སྟོན་པ་ནི། དེས་ན་ཞེས་བྱ་བ་སྟེ། གཞན་གྱི་རྒྱུ་ཅན་ལ་ནི་དེ་ཙམ་ལས་མི་འབྱུང་བས་ཁྱབ་ལ། མི་འབྱུང་བ་དང་འགལ་བ་ཡང་འབྱུང་བ་ཡིན་ཏེ། དེས་ན་འབྱུང་བའི་མཚན་ཉིད་ལ་ཁྱབ་པར་བྱེད་པ་མེད་ན། ཡོད་པ་ཡིན་ཡང་ཁྱབ་པར་བྱ་བ་ནུས་སྲིད་པར་ཅི་ལྟར་འགྱུར་ཞེས་བྱ་
བའི་དོན་ཏོ། །དེ་ནི་ཞེས་བྱ་བ་ནི་འབྲས་བུ་སྐྱེ་བ་མེད་པའི་རྒྱུ་རྟག་པ་རྣམས་ལའོ། །དེ་ལྟར་འདིར་ནི་འབྲས་བུ་སྐྱེ་བ་མེད་པ་མ་མཐོང་ངོ༌། །ཅིའི་ཕྱིར་ཞེ་ན། མཚུངས་པ་ཞེས་གསུངས་སོ། །རུང་བའི་ཁྱད་པར་ནི་བག་ཆགས་ཀྱི་ཁྱད་པར་རོ། །གང་གིས་དེ་མེད་པས་ཞེས་བྱ་བ་ནི་རྟག་པ་མེད་པས་འབྲས་བུ་མེད་པར་རོ། །དེས་ན་ཁྱད་པར་བྱེད་བ་དེ་ཙམ་ལས་མི་འབྱུང་བ་མེད་པ་ཡིན་ནོ། །ཁྱབ་པར་བྱེད་པ་མེད་ཀྱང་ཁྱབ་པར་བྱ་བ་ཡོད་པར་སྲིད་ན་ནི་རྒྱུ་རྣམས་ཀྱི་ཚད་མ་ངེས་པར་འགྱུར་རོ་ཞེས་བརྗོད་པ་ནི་རྗེས་སུ་འགྲོ་བ་ཙམ་གྱིས་ཞེས་བྱ་བའོ། །ནམ་མཁའ་ལ་སྲེག་པ་དེ་དག་ནི་རྒྱུ་རྣམས་ཞེས་བྱ་བ་ནི་དབང་པོ་རྣམས་སོ། །འོན་ཏེ་ནམ་མཁའ་ལ་སོགས་པ་ཁྱབ་བ་མ་ཡིན་ནོ་སྙམ་དུ་དོགས་པ་བསུ་ནས། དེ་དག་ཀྱང་ཞེས་གསུངས་སོ། །མི་མཚུངས་བར་དོགས་པ་བསུ་བ་ནི། དེ་དག་ནི་ཞེས་བྱ་བ་སྟེ་ནམ་མཁའ་ལ་སོགས་པ་དག་གོ །ཁྱབ་པ་དང་ཞེས་བྱ་བ་ནི་ལན་ནོ། །དེ་ཉིད་ཅེས་བྱ་བ་ནི་བྱིན་གྱིས་རློབ་པར་བྱེད་པ་པོ་མ་ཡིན་པ་ཉིད་དོ། །ཡུལ་ཁྱབ་པ་ཉིད་མེད་བའི་ཕྱིར་ན། དེ་ལ་ནི་མེད་པས་མེད་པ་ཡིན་ཏེ། དེས་ན་གཞན་གྱི་རྒྱུ་ཅན་གྱི་ཁྱབ་པ་བྱར་མེད་པ་ཡོད་བས་ན། དེའི་ནུས་པ་སྲིད་པ་ཁོ་ནའོ་སྙམ་དུ་དོགས་པ་བསུ་ནས་བཤད་པ་ནི། རྟག་པ་ཁྱབ་བྱེད་ཅེས་བྱ་བའོ། །ཐམས་ཅད་དུ་ཞེས་བྱ་བ་ནི་འབྲས་བུ་ལའོ། །འོན་ཏེ་མ་ཁྱབ་པས་རྒྱང་རིང་པོ་ན་གནས་པ་རྣམས་ཅི་ལྟར་རྒྱུ་ཡིན་སྙམ་ན། ཉེ་བ་ཉིད་ཀྱིས་ཞེས་གསུངས་སོ། །ཅིའི་ཕྱིར་དེ་ལྟར་རྒྱུ་མ་ཡིན་སྙམ་ན། རིང་བ་ཡིན་ཡང་རྒྱུར་ཞེས་གསུངས་སོ། །གང་གིས་མ་ཁྱབ་པའི་རྟག་པ་དེ་ལྟར་འགྱུར་བ་རྣམ་བ་དེ་ལྟ་བུའི་རྒྱུར་མཐོང་བ་གང་ཡིན་སྙམ་དུ་དོགས་པ་བསུ་ནས་སྒྲ་སོགས་ཞེས་གསུངས་སོ། །དེའི་ཕྱིར་རྟག་པ་ཉིད་ཐམས་ཅད་དུ་རྒྱུ་ཉིད་ཡིན་ཏེ། རྟག་པ་ཉིད་ཀྱིས་སྐྱེད་བྱེད་དུ་རང་བཞིན་གཅིག་པའི་ཕྱིར་རོ་ཞེས་བྱ་བའི་དོན་ཏོ། །དེས་ན་སྐད་ཅིག་མ་ཡང་ཅིའི་ཕྱིར་ཐམས་ཅད་ཀྱི་སྐྱེད་བྱེད་མ་ཡིན་ཞེས་བྱ་བའི་ཐལ་བ་མེད་དོ། །སྐབས་ཉེ་བར་སྡུད་བ་ནི་དེའི་ཕྱིར་ཞེས་བྱ་བའོ། །གང་གི་ཕྱིར་སྡུག་བསྔལ་དེ་རྟག་པ་མ་ཡིན་ཏེ་རེས་འགའ་བ་ཡིན་པ་དེས་ན་གྲུབ་པ་ལ་བག་ཆགས་ལ་སོགས་པ་རྒྱུར་བྱེད་པ་ཡིན་ཏེ། རྗེས་སུ་
འགྲོ་བ་དང་ལྡོག་པ་དང་ལྡན་པའི་ཕྱིར་རོ། །རྟག་པ་ལྟར་མི་རྟག་པ་ཡང་ཅི་ལྟར་རྒྱུ་ཡིན་ཞེས་བྱ་བ་ནི་མི་འཐད་དོ་ཞེས་བརྗོད་པ་ནི། རེས་འགའ་བ་ཉིད་ཡིན་པས་ན་ཞེས་བྱ་བའོ། །རྒྱུ་དང་བཅས་པ་ཉིད་མ་ཡིན་ན། རེས་འགའ་བ་ཉིད་དུ་མི་འཐད་དོ་ཞེས་བརྗོད་བ་ནི། རྒྱུ་མེད་གཞན་ལ་མི་ལྟོས་ཕྱིར། །ཞེས་བྱ་བའོ། །འདི་རང་གྲུབ་བར་བྱ་བའི་དོན་དུ། མེད་པ་གཞན་ལ་ལྟོས་པ་ན་ཕྱིས་ཀྱང་དེ་ཁོ་ན་བཞིན་དུ་འགྱུར་རོ། །དེ་བཞིན་དུ་ཡོད་པ་ཡང་རང་བཞིན་སྔ་མ་ཁོ་ནར་ཡོད་པའི་ཕྱིར་དང་རང་གི་ངོ་བོ་མི་འགྱུར་བའི་ཕྱིར་ན། ལྟོས་པ་མེད་པ་ཉིད་དོ་ཞེས་བརྗོད་པ་ནི་གཞན་ལ་མི་ལྟོས་ཕྱིར་རོ་ཞེས་བྱ་བ་ཡིན་ནོ། །དགོངས་པ་འདི་ཉིད་ཀྱིས་ན་ཀུན་འབྱུང་གི་བདེན་པ་བསྟན་པ་ཡིན་ནོ་ཞེས་བརྗོད་པ་ནི་ཀུན་འབྱུང་གི་བདེན་པ་ཡང་ཞེས་བྱ་བའོ། །སྡུག་བསྔལ་ལ་རྒྱུ་མེད་དོ་ཞེས་བྱ་བ་དགག་པའི་ཕྱིར་རྒྱུ་ཉིད་ཅེས་བྱ་བ་ནི་རྣམ་པ་ཡིན་ནོ་ཞེས་བརྗོད་པ་ནི་དེ་ལ་རྒྱུ་ནི་ཞེས་བྱ་བའོ། །རྒྱུ་གཅིག་ཉིད་ནི་གཙོ་བོ་ལ་སོགས་པ་སྟེ། དེ་ཡོངས་སུ་སྤངས་པས་སོ། །གཙོ་བོ་ལ་སོགས་པ་ལྟར་སྲེད་པ་ལ་ནུས་པ་མེད་པ་ཡིན་ནོ་སྙམ་ན། རབ་ཏུ་སྐྱེ་བ་ནི་ཞེས་བྱ་བ་སྨོས་སོ། །གཙོ་བོ་ནི་ཉེ་བར་ལེན་པ་ཉིད་དེ་དེ་སྤངས་པས་སོ། །དེ་ལ་རེས་འགའ་བ་ཉིད་ཡིན་པས་ན་ཞེས་བྱ་བ་ནི་ཚིགས་སུ་བཅད་པས་ནི་རྣམ་པ་དང་པོ་སྒྲུབ་བ་གཙོར་བྱེད་པ་ཡིན་ནོ་ཞེས་བརྗོད་པ་ནི་སྡུག་བསྔལ་གྱི་ནི་ཞེས་བྱ་བའོ། །དེ་ལྟར་ཅི་སྟེ་བསྟན་སྙམ་ན། གཞན་ནི་ཞེས་གསུངས་སོ། །གཞན་ནི་རྒྱུ་མེད་པའོ། །འོ་ན་ཅི་ལྟར་རེས་འགའ་བ་ཡིན་སྙམ་ན། རྒྱུ་ལྡན་ལ་ནི་ཞེས་གསུངས་སོ། །འོ་ན་རྒྱུ་མེད་པ་ལ་ཅི་ཞིག་འཐད་སྙམ་ན། རྒྱུ་མེད་པའི་ཞེས་གསུངས་སོ། །ཡང་ན་གཞན་ཉིད་འགྱུར་ཞེས་བྱ་བ་ནི་མེད་པ་ཉིད་དུའོ། །ཅོ་གང་གིས་དེ་སྐད་བརྗོད་པ། རྒྱུ་མེད་པ་འགའ་ཞིག་དེ་ལྟར་མཐོང་བ་ཡོད་དམ་སྙམ་ན། དཔེར་ན་རབ་རིབ་ཅན་གྱི་སྒྲ་ལ་སོགས་པའི་ཤེས་པ་ཡུལ་གྱི་རྒྱུ་དང་བྲལ་བ་ཡིག་བྱེ་བ་ཙམ་ལས་བྱུང་བ་ཐམས་ཅད་དུ་འབྱུང་བ་སྡུག་བསྔལ་ཡང་རྒྱུ་དང་བྲལ་ན་དེ་བཞིན་དུ་འགྱུར་རོ་ཞེས་བརྗོད་པ་ནི་ཅི་ལྟ་ཞེས་བྱ་བའོ། །སྐྲ་ལ་སོགས་པ་ཞེས་བྱ་བ་འདི་ཉིད་དུ་བཅད་དོ། །ཅི་ལྟར་རྟག་པར་འགྱུར་སྙམ་ན། ཡུལ་མེད་ན་ཡང་ཞེས་གསུངས་སོ། །ཡང་ན་རྒྱུ་མ་ངེས་པ་ཉིད་
ཀྱིས་རྒྱུ་མེད་པའི་ཕྱིར་ཏེ། དཔེར་ན་ཆོས་ཀྱི་དབྱིངས་རྟག་ཏུ་ཡོད་པ་དེ་བཞིན་དུ་སྡུག་བསྔལ་ཡང་འགྱུར་རོ་ཞེས་བརྗོད་པ་ནི། རང་རིག་པས་ནི་རྟོགས་བྱ་བ། །ཞེས་བྱ་བའོ། །རང་རིག་པས་ཞེས་བྱ་བས་ནི་ཚད་མ་བརྗོད་དོ། །དེས་ན་ཞེས་པ་ནི་སྟོང་པ་ལ་དམིགས་པ་རྣམ་པར་རྟོག་པ་མེད་པ་ཡིན་ཏེ། རྨི་ལམ་བཞིན་ནོ། །རང་གི་ངོ་བོ་ནི་རྨི་ལམ་ན་ཡང་ཚད་མ་ཅན་ཡིན་པའི་ཕྱིར་རོ། །གཟུང་བ་དང་འཛིན་པ་དང་བྲལ་བའི་མཚན་ཉིད་ཆོས་ཀྱི་དབྱིངས་ཀྱི་རང་བཞིན་ཡང་དེས་རྟོགས་པར་བྱ་བ་ཡིན་ནོ། །དེ་ཡང་མ་ངེས་པ་ཉིད་ཀྱིས་རྒྱུ་མེད་པ་ཅན་དང་བྱུང་པ་འབྱུང་བར་འགྱུར་བ་དང༌། ད་ལྟར་བའི་དུས་ཁྱབ་པས་ན་རྟག་ཏུ་ཡོད་པ་ཡིན་ནོ། །དེ་ཉིད་ཀྱིས་རེས་འགའ་བ་མ་ཡིན་པ་ཡིན་ནོ། །ཅི་ལྟར་མི་རྟག་པ་ཉིད་རྒྱུ་ངེས་པ་མེད་པས་རྒྱུ་མེད་པ་ཅན་ཡིན་པ་དང་རེས་འགའ་བ་མ་ཡིན་པ་བཞིན་ནོ། །མེད་པར་འགྱུར་ཞེས་བྱ་བ་ནི་འཆད་པ་ནི་མོ་གཤམ་བུ་སོགས་ཞེས་བྱ་བའོ། །གལ་ཏེ་རེས་འགའ་བ་ཉིད་ཀྱིས་སྡུག་བསྔལ་ལ་རྒྱུ་ཡོད་མོད་དེ་ནི་འབྱུང་བ་ཆེན་པོའི་བདག་ཉིད་ཁོ་ན་ཡིན་གྱི། མ་རིག་པ་དང་སྲེད་པ་དང་ལས་ལ་སོགས་པའི་རང་བཞིན་ནམ། དབང་ཕྱུག་ལ་སོགས་པའི་རང་བཞིན་ནི་མ་ཡིན་ནོ། །འབྱུང་བ་ཆེན་པོ་རྒྱུ་ཡིན་པ་ཉིད་ན། འཇིག་རྟེན་ཕ་རོལ་གྲུབ་པ་བཀག་པ་ཡང་མ་ཡིན་ཏེ། སྲེད་པ་དང་པོའི་སེམས་འདུ་བྱེད་ཀྱི་རྗེས་སུ་བྱེད་པ་ཉིད་ཀྱིས་སེམས་གཞན་གོ་བར་བྱེད་པ་ཡིན་པའི་ཕྱིར་སེམས་ཀྱི་རང་བཞིན་གྱི་འཇིག་རྟེན་གཞན་གྲུབ་ཀྱང་བདེ་བ་དང་སྡུག་བསྔལ་ལ་སོགས་པའི་རང་བཞིན་གྱི་གནས་སྐབས་རྣམས་འབྱུང་བ་ཆེན་པོ་ཙམ་གྱི་རྒྱུ་ཙམ་དུ་གྲུབ་པས་ན། ལས་ལ་སོགས་པའི་སེམས་པའི་རྒྱུ་ཅན་དུ་མི་འགྲུབ་པོ་ཞེས་རྩོད་པར་བྱེད་པ་ནི་ཇི་ལྟར་ཞེས་བྱ་བ་ལ་སོགས་པའོ། །དཔེར་ན་ཆོས་ཅན་སྐྱེད་པར་བྱེད་བའི་འབྱུང་བ་ཙམ་ལས་སྐྱེས་པའི་ཕྱིར་སེམས་དང་ལྡན་པའི་རྒྱུ་མེད་པ་དེ་བཞིན་དུ་སྲིང་པའི་ཕྱིར་རང་བཞིན་འཇིག་རྟེན་གཞན་ན་ཡོད་པའི་སེམས་ཅན་གྱི་བདེ་བ་དང་སྡུག་བསྔལ་ལ་སོགས་པའི་ཁྱད་པར་དུ་རྟོགས་པ་འདི་དག་ཀྱང་རྒྱུ་མེད་འགྱུར་ཏེ། སེམས་པ་དང་ལྡན་པའི་རྒྱུ་ཡོད་པ་མ་ཡིན་པར་འགྱུར་རོ་ཞེས་ནི་ཁ་ཅིག་སྟེ། རྒྱུ་མེད་པར་
སྨྲ་བ་རབ་ཏུ་བརྗོད་དོ། །རང་བཞིན་ཉིད་ཀྱིས་བྱ་བ་ལ་སོགས་པ་ནི་འཕང་མདུང་ཞེས་བྱ་བ་ལ་སོགས་པས་རྣམ་པར་འགྲེལ་ཏོ། །དེ་ལ་ཁྱད་པར་དག་ཀྱང་ཞེས་བྱ་བ་ལ་སོགས་པ་ནི་མགར་བ་ལ་སོགས་པ་མེད་ཀྱང་ཞེས་བྱ་བ་ལ་སོགས་པར་རྣམ་པར་འགྲེལ་ཏོ། །དེ་ལ་དོན་ནི་འདི་ཡིན་ཏེ། འབྱུང་བ་ཆེན་པོའི་རང་བཞིན་ནི་འབྱུང་བ་ཆེན་པོ་ཉིད་ལས་བྱུང་བའི་ཕྱིར་སེམས་པ་དང་ལྡན་པས་མི་བྱེད་དོ། །འོན་ཀྱང་བདེ་བ་དང་སྡུག་བསྔལ་ལ་སོགས་པའི་རང་བཞིན་ཁྱད་པར་འབའ་ཞིག་བྱེད་པ་ཡིན་ནོ། །ཚོར་བའི་རྣོ་བ་ལ་སོགས་པའི་རང་བཞིན་དེ་དག་ཀྱང་ཆོས་ཅན་གྱི་རྒྱུས་བསྐྱེད་པར་བྱ་བ་ཉིད་དུ་མཐོང་ངོ་ཞེས་བྱ་བའོ། །སེམས་འཆི་བ་ཞེས་བྱ་བའི་དོན་གང་ཡིན་པ་དང༌། སྐྱེ་བ་གཞན་ཡོངས་སུ་འཛིན་པའི་སྐྱེ་བ་རྣམས་སོ། །མཚུངས་པ་དེ་མ་ཐག་པའི་ཤེས་པའི་བདག་ཉིད་དབང་པོ་ནི་ཡོད་དོ། །དེ་ཙམ་ལ་བརྟེན་པའི་ཤེས་པ་ནི་ཡིད་ཀྱི་རྣམ་པར་ཤེས་པ་སྟེ། མིག་ལ་སོགས་པ་ལ་མི་རྟེན་པའི་ཕྱིར་ན། རྣམ་པར་རྟོག་པ་དང་ལྡན་པའི་རྒྱུ་མེད་ཀྱང༌། རྣོ་བ་ཡོད་པའི་ཕྱིར་རོ་ཞེས་འབྲེལ་ཏོ། །གང་གི་ཚེ་ཞེས་ དགོས་ན། ཁྱད་པར་མགར་བ་ལ་སོགས་པ ་མེད་ཀྱང་ཞེས་བྱ་བའོ། །ཡང་ན་མགར་བ་ལ་སོགས་པ་མེད་ན་རྣོ་བ་ཡོད་པའི་ཕྱིར་རྒྱུ་མེད་པ་ཅན་ཡིན་ནོ་ཞེས་འབྲེལ་ཏོ། །གང་གི་ཚེ་ཞེ་ན་དེ་མེད་ཀྱང་ཞེས་བྱ་བ་འཕང་མདུང་ལ་སོགས་པ་མེད་ཀྱང་ངོ༌། །གལ་ཏེ་དེ་ནི་མགར་བའི་ཡང་འབྲས་བུ་ཡིན་ནོ་ཞེ་ན། རྒྱུ་ངེས་པ་མེད་པ་ཅན་འདི་ཉིད་ཅེས་གསུངས་སོ། །གང་ལ་རྒྱུ་ངེས་པ་མེད་པ་ཡོད་པ་དེ་ནི་རྒྱུ་མེད་པ་ཅན་ནོ། །གལ་ཏེ་དེ་ལྟར་རྒྱུ་མེད་པར་འགྱུར་བས་རྒྱུ་མེད་པ་ཅན་དུ་ཅི་ལྟར་འགྱུར་སྙམ་ན་མ་ཡིན་ཏེ། རྒྱུ་ངེས་པ་མེད་པ་ཅན་ནི་དེའི་རྒྱུ་ཅན་གྱི་དུས་ན་གཞན་གྱི་རྒྱུ་ཅན་ཉིད་ཡོད་པ་ཡིན་ལ། གཞན་གྱི་རྒྱུ་ཅན་གྱི་དུས་ན་ཡང་དེའི་རྒྱུ་ཅན་ཡོད་པ་ཡིན་ནོ། །ངེས་ན་རྒྱུ་མེད་པ་ཅན་ཁོ་ནར་འགྱུར་རོ། །དོན་ལ་སྦྱོར་བ་ནི་དེ་བཞིན་དུ་ཞེས་བྱ་བའོ། །དཔེ་གང་གི་སྟོབས་ཀྱིས་སྡུག་བསྔལ་རྒྱུ་མེད་པ་ཅན་དུ་འགྱུར་བ་དེ་ཉིད་སུན་འབྱིན་པ་ནི་གང་ཡོད་ཉིད་ན་ཞེས་བྱའོ། །དེ་ནི་ཞེས་བྱ་བ་ནི་རང་གི་རྒྱུའི་རྗེས་སུ་འགྲོ་བ་དང་ལྡོག་པའི་རྗེས་
སུ་བྱེད་པའོ། །དེ་རྣམས་ལ་ཞེས་བྱ་བ་ནི་ཚེར་མའི་རྣོ་བ་ལ་སོགས་པ་དག་ལའོ། །གལ་ཏེ་དེ་ལྟ་ན་ཡང་གང་གིས་སྡུག་བསྔལ་རྒྱུ་དང་བཅས་པར་འགྱུར་བ་ཚོར་བ་ལ་སོགས་པ་རྒྱུ་དང་བཅས་པར་ཅི་ལྟར་འགྱུར་སྙམ་ན། འདི་ལ་བསམ་པ་ནི་ཞེས་བྱ་བའོ།། དེའི་ཚེ་ཞེས་ཁོང་ནས་ཕྱུང་ལ་ཁྱད་པར་དེ་དག་ནི་ཞེས་སྦྱར་བར་བྱའོ། །ཇི་ལྟར་རྒྱུ་མེད་པར་འགྱུར་ཞེ་ན། རྒྱུ་ཤུག་གི་ཞེས་བྱ་བ་སྨོས་སོ། །རྒྱུ་ངེས་པ་མེད་པའི་ཕྱིར་རྒྱུ་མེད་པ་ཅན་དུ་དོགས་པ་བསུ་བ་ནི། འོན་ཏེ་མགར་བས་ཀྱང་ཞེས་བྱ་བའོ། །དེས་ན་ནི་མགར་བས་བྱེད་པས་ནའོ། །དེ་སྐད་ཅེས་བྱ་བ་ནི་རྒྱུ་མེད་པ་ཉིད་དུའོ། །ལས་ཀྱི་རང་གི་སེམས་པས་བསྐྱེད་པར་བསམས་ནས་ལན་འདེབས་པ་ནི་བློ་སྔོན་བྱེད་པ་ཞེས་བྱ་བའོ། །གལ་ཏེ་རྒྱུ་ཤུག་གི་ཚེར་མ་ལ་སོགས་པ་མགར་བས་བྱས་པའི་རྣོ་བ་ལས་ཁྱད་པར་མེད་པ་ཡིན་ན་དེ་བཞིན་དུ་དེ་ཡང་བློ་དང་ལྡན་པའི་རྒྱུར་འགྱུར་བ་ཡིན་ལ། དེ་ལྟ་ན་ཡང་དབང་ཕྱུག་བྱེད་པ་པོ་ཉིད་དུ་འགྱུར་ལ། དབང་ཕྱུག་ཀྱང་སེམས་པའི་རང་བཞིན་ལས་ཐ་མི་དད་པ་ཡིན་ནོ། །གང་གི་ཕྱིར་དེ་ལྟ་ཡིན་པའི་གཏན་ཚིགས་དེའི་ཕྱིར་རྒྱ་ཤུག་གི་ཚེར་མ་ལ་སོགས་པ་རྒྱུ་མེད་པ་མ་ཡིན་ནོ། །དཔེ་དེ་ཉིད་ལས་ཞེས་བྱ་བ་ནི་མགར་བས་བྱས་པའི་རྣོ་བ་ལས་སོ། །འོ་ན་ཏེ་ཐ་དད་པའི་ཞེས་དོགས་པ་བསུ་བ་ནི་ཁྱད་པར་ཞེས་བྱ་བའོ། །ལྕགས་དང་རྒྱ་ཤུག་གི་རྣོ་བ་གཉིས་ལ། ཁྱད་པར་རྟོག་པ་དེས་ན་བློ་དང་ལྡན་པ་རྒྱུ་ཉིད་ནི་ཞེ་ན། ལན་དུ་ཁྱད་པར་ཡོད་མོད་ཅེས་བྱ་བའོ། །ལྕགས་དང་རྒྱ་ཤུག་གི་ཚེར་མའི་རྣོ་བ་ལ་ཡོད་པའི་ཁྱད་པར་རྒྱུ་དང་བཅས་པ་ཉིད་ཡིན་གྱི། རྒྱུ་མ་ངེས་པ་ནི་མ་ཡིན་ནོ། །དེ་ཉིད་བརྗོད་པ་ནི་འགའ་ཞིག་ཅེས་བྱ་བའོ། །འབྲས་བུ་གང་ཞིག་རྒྱ་ཤུག་གི་ས་བོན་ལས་སྐྱེ་བ་དེ་ཉིད་ནི་མགར་བ་ལ་སོགས་པ་ལས་མ་ཡིན་ཏེ། དེས་ན་རྒྱུ་ངེས་པ་མེད་པ་ཉིད་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རྩིས་བསྒྱུར་བའི་གསེར་བྱས་པ་ཡིན་ཡང་མ་བྱས་པ་བཞིན་དུ་མཐོང་བ་མ་ཡིན་ནམ། དེ་བཞིན་དུ་ལྕགས་དང་རྒྱ་ཤུག་གི་ཚེར་མ་དག་གི་ཁྱད་པར་མི་མཐོང་བ་ཡིན་ནོ་སྙམ་དུ་དོགས་པ་བསུ་ནས། བདེན་
པར་སྣང་བར་འདོད་པ་ཡང་མི་བདེན་པར་འགྱུར་ཏེ། མི་བདེན་པ་རྨི་ལམ་གྱི་སྣང་བ་དང་ཁྱད་པར་མེད་པའི་ཕྱིར་རོ་ཞེས་བརྗོད་པ་ནི། ཁྱད་པར་མེད་པ་ཁོ་ནར་ཟད་ཅེས་བྱ་བའོ། །ཇི་ལྟར་ཁྱད་པར་མི་སྲིད་སྙམ་ན། གང་གི་ཕྱིར་ཞེས་བྱ་བའོ། །མཐོང་བ་ཙམ་གྱིས་ཞེས་བྱ་བ་ནི་རང་བཞིན་གསལ་བ་ཙམ་གྱིས་སོ། །དེ་ལྟ་ན་ཡང་ཁྱད་པར་མེད་པ་སྣང་བ་ཙམ་ནི་གཉིས་སུ་མེད་པར་འགྱུར་ཞེས་བརྗོད་པ་ནི། གཉིས་མེད་དེ་ཉིད་ཅེས་བྱ་བ་སྟེ། སྔར་བཤད་ཟིན་པ་གང་ཡིན་པའོ། །གང་ཞིག་སྔར་བརྗོད་ཟིན་པ་དེ་ཉིད་རྒྱུ་མེད་པ་ཡིན་པར་འགྱུར་རོ། །འོ་ན་ཇི་ལྟར་རྒྱུ་དང་བཅས་པར་འགྱུར་སྙམ་དུ་དོགས་ན། དེའི་ཕྱིར་གང་ལས་ཞེས་བྱ་བའོ། །འདི་གང་ལས་སྙམ་ན། འདི་ལྟར་ཞེས་བྱ་བའོ། །འདི་ཉིད་གསལ་འདེབས་པ་ནི་དེའི་ཕྱིར་གལ་ཏེ་ཞེས་བྱ་བ་ནི་ཁྱད་པར་མེད་པ་ཡིན་ནའོ། །བཟློག་པ་ནི་རྒྱུ་མེད་པ་ཉིད་དོ། །རྒྱུ་ཉིད་བསྒྲུབ་པའི་ཕྱིར། སྒྲུབ་པར་བྱེད་པ་བརྗོད་པ་གང་ཡིན་པ་དེ་ལ་མ་ངེས་པ་ཉིད་དུ་དོགས་པ་བསུ་བ་ནི་གལ་ཏེ་ཞེས་བྱ་བའོ། །མེད་པའི་ཕྱིར་རོ་ནི་སྐབས་ཀྱིས་ན་མཐོང་བའོ། །འདི་ལ་ནི་རྒྱུ་ཉིད་ཀྱི་སྒྲུབ་བྱེད་དུ་གྱུར་པའི་ལྡོག་པ་མེད་དོ་ཞེས་རེ་ཞིག་རང་ཉིད་ལན་འདེབས་པ་ནི་དེ་ནི་མ་ཡིན་ཏེ་ཞེས་བྱའོ། །དེས་ན་ཞེས་བྱ་བ་ནི་རྣམ་དབྱེ་མེད་པས་ནའོ། །ཇི་ལྟར་འདི་གཉིས་དབྱེ་བ་མེད་ན་གང་གིས་དེ་མེད་ན་མི་མཐོང་བའི་ཕྱིར་མི་འགྱུར་སྙམ་དུ་དོགས་པ་བསུ་ནས་དེར་ནི་ཞེས་སྨོས་སོ། །དེས་ན་དེ་མེད་པར་མཐོང་བ་མི་སྲིད་པ་ཡིན་གྱི་རེག་པ་མེད་པ་ནི་མ་ཡིན་ནོ་ཞེས་བྱ་བའི་དགོངས་པའོ། །ཅི་སྟེ་གཟུགས་ཡོད་ཀྱང་རེག་པ་མེད་པར་མཐོང་བ་མ་ཡིན་ནོ་སྙམ་དུ་དོགས་པ་བསུ་ནས་བཤད་པ། གལ་ཏེ་གཟུགས་ན་ནི་ཞེས་བྱ་བ་ནི་རེག་པ་མེད་པར་ཞེས་བྱ་བ་དང་འབྲེལ་ཏོ། །དེའི་ཚེ་ཞེས་ཁོང་ནས་ཕྱུང་ལ། མཐོང་བར་འགྱུར་བ་ཁོ་ནའོ་ཞེས་སྦྱར་རོ། །གཟུགས་མེད་ན་རླུང་ལ་མིག་གི་རྣམ་པར་ཤེས་པ་མི་འབྱུང་བའི་ཕྱིར་རོ་སྙམ་དུ་དགོངས་པའོ། །ཅི་སྟེ་འདི་ལྟ་བུར་གྱུར་པའི་ལྡོག་པ་ཡང་རྒྱུ་ཉིད་ཀྱི་རྒྱུ་མཚན་དུ་འགྱུར་རོ་སྙམ་ན། རྣམ་པ་འདི་ལྟ་བུའི་ལྡོག་པ་ལས་ནི་ཞེས་གསུངས་སོ། །རྒྱུར་ཞེས་བྱ་བ་ནི་རེག་པ་མཐོང་བ་ལ་ལྟོས་ནས་ཞེས་བྱ་བ་
ནི་སྐབས་ཡིན་ནོ། །འོ་ན་ཇི་ལྟར་རྒྱུ་ཡིན་སྙམ་ན། འོན་ཀྱང་ཞེས་སྨོས་སོ། །དེ་ལྟར་བསྟན་པར་ནུས་ན་ནི་དེའི་ཚེ་རེག་པ་རྒྱུ་ཉིད་དུ་འགྱུར་རོ། །དེ་ལྟར་ནི་ནུས་པ་མ་ཡིན་ཏེ། །དེས་ན་རྒྱུ་མ་ཡིན་ནོ། །ཡང་ན་བརྒྱུད་ནས་རྒྱུ་ཡིན་པ་ཉིད་དོ་ཞེས་རྩ་བས་ལན་འདེབས་པ་ནི་ཡང་ན་ཞེས་བྱ་བའོ། །ཅི་གང་གིས་མཐོང་བའི་རྒྱུ་མཚན་དུ་འགྱུར་བ། ཇི་ལྟར་རེག་པ་གཟུགས་ཀྱི་རྒྱུ་ཉིད་ཡིན་སྙམ་དུ་དོགས་པ་བསུ་ནས་བརྗོད་པ་ནི་ཕན་ཚུན་མི་འབྲལ་ཉིད་ཀྱིས་ཞེས་བྱ་བའོ། །ལྷན་ཅིག་འབྱུང་བའི་རྒྱུ་ཁས་བླངས་ནས་དེ་སྐད་བརྗོད་པར་རྟོགས་པར་བྱའོ། །ཡང་ན་སྔ་ཕྱིར་རྒྱུ་ཡིན་ནོ་ཞེས་བརྗོད་པ་ནི་བརྟེན་པའི་རང་བཞིན་གཟུགས་ཀྱི་ཞེས་བྱ་བ་སྟེ། ལུང་གི་སྐད་ཀྱིས་འབྱུང་བ་ལས་གྱུར་པའི་གཟུགས་བརྗོད་པ་ཡིན་ནོ། །གང་གི་ཕྱིར་དེ་ལྟར་རེག་པའི་གཟུགས་ཀྱི་རྒྱུ་ཡིན་པའི་གཏན་ཚིགས་དེས་ནའོ། །གཏན་ཚིགས་ནི། གང་ཡོད་ཉིད་ན་གང་སྐྱེ་བ། ཞེས་བྱ་བ་དེའོ། །དེའི་ཕྱིར་ཅི་ལྟར་ཚེར་མ་ལ་སོགས་པ་རྒྱུ་དང་བཅས་པ་ཡིན་པ་དེ་བཞིན་དུ་བདེ་བ་ལ་སོགས་པ་ཡང་ཡིན་ནོ་ཞེས་བྱ་བ་གནས་སོ། །དེ་ལྟར་རྣམ་པ་དང་པོ་བསྒྲུབས་ནས་མཇུག་སྡུད་པ་ནི་དེ་ལྟར་ན་རེ་ཞིག་ཅེས་བྱ་བའོ། །གཉིས་པ་ཞེས་བྱ་བ་ནི་རྒྱུ་གཅིག་ཉིད་བཀག་པའོ། །རྒྱུ་དང་བཅས་པ་ཡིན་ཡང་ཞེས་བྱ་བ་ནི་རྣམ་པ་དང་པོ་དང་བཅས་པ་ཡིན་ཡང་ངོ༌། །རྒྱུ་གཅིག་ཉིད་དུ་མི་འདོད་དེ་དེས་ན་དེ་དགག་པའི་ཕྱིར་རྣམ་པ་གཉིས་པ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་རྟག་པ་གཅིག་པུ་རྒྱུ་ཡིན་པ་བཀག་ཅེ་ན། གལ་ཏེ་ཞེས་བྱ་བའོ། །གཅིག་ཅེས་བྱ་བ་ནི་གལ་ཏེ་སྔ་མ་དང་ཕྱི་མར་གཅིག་པའི་རྒྱུ་རང་བཞིན་རྒྱུ་ཡིན་ན། དེའི་ཚེ་རྟག་པ་ཉིད་དུ་འགྱུར་རོ་ཞེས་བྱ་བ་ཐམས་ཅད་ཀྱི་ཚེ་འབྲས་བུ་ཐམས་ཅད་འགྱུར་ཞེས་བྱ་བའི་དོན་ཏོ། །ལྷན་ཅིག་བྱེད་པ་ལ་ལྟོས་ནས་རིམ་གྱིས་བྱེད་དོ་སྙམ་ན། ལྟོས་པ་མེད་པའི་ཕྱིར་རོ་ཞེས་གསུངས་སོ། །འདི་ཉིད་གང་ལས་ཤེ་ན། རྟག་པ་ནི་ཞེས་གསུངས་སོ། །ཅིག་ཅར་ནི་མ་ཡིན་ནོ་ཞེས་བརྗོད་པ་ནི་གཙོ་བོ་ལ་སོགས་པ་ཞེས་བྱ་བའོ། །འགོག་པའི་རྒྱུ་མཚན་རིམ་དང་རིམ་གྱིས་མ་ཡིན་པ་
དང་བྲལ་བ་འདི་ཡང༌། དེ་ག་ལས་ཤེ་ན་ཞེས་བྱ་བའི་རྩོད་པ་སྔོན་དུ་འགྲོ་བ་ཅན་གྱིས་གསལ་བར་བྱེད་པ་ནི་ནུས་པ་མེད་པའི་ཕྱིར་རོ་ཞེས་བྱ་བའོ། །དེ་ཉིད་ཀྱི་ཕྱིར་དབང་ཕྱུག་ལ་སོགས་པ་ནི་རབ་ཏུ་སྐྱེ་བ་ཉིད་མ་ཡིན་ནོ་ཞེས་བརྗོད་པ་ནི། རྣམ་པ་གསུམ་པ་རབ་ཏུ་སྐྱེ་བ་ཉིད་མ་ཡིན་ནོ་ཞེས་བྱ་བའོ། །འོ་ན་དེ་སུའི་ཡིན་སྙམ་ན། རྣམ་པ་འདི་ནི་ཞེས་གསུངས་སོ། །དེ་ཉིད་ཅེས་བྱ་བ་ནི་རབ་ཏུ་སྐྱེ་བ་སྲིད་པ་ཉིད་ཀྱི་ཡིན་པའོ། །རྟག་པ་རྣམས་ནི་ནུས་པ་མེད་པའི་ཕྱིར་རོ་ཞེས་འབྲེལ་ཏོ། །གང་གི་ཕྱིར་རྟག་པ་རྣམས་ནུས་པ་མེད་པའི་ཕྱིར་རབ་ཏུ་སྐྱེ་བ་ཉིད་མ་ཡིན་པ་དེའི་ཕྱིར་སྲིད་པའི་འདོད་པ་ཉིད་སྐྱེ་བ་ཡོངས་སུ་འཛིན་པའི་མཚན་ཉིད་སྡུག་བསྔལ་གྱི་རྒྱུ་ཡིན་ནོ། །འདི་ག་ལས་སྙམ་ན་གང་གི་ཕྱིར། འཇིག་རྟེན་རྣམས་ཀྱི་ཡུལ་གྱི་ཁྱད་པར་ཡོངས་སུ་འཛིན་པ་བདག་གིར་བྱེད་པ་ནི་ཡུལ་གྱི་ཁྱབ་བར་འདོད་པས་བྱས་པར་མཐོང་བ་ཡིན་ནོ། །ལས་དང་ལུས་མ་རིག་པ་ལ་སོགས་པ་ནི་རྒྱུ་ཡིན་ཡང་ཡུལ་གྱི་ཁྱད་པར་དུ་ཕྱིན་པ་ནི་སྲིད་པ་ཉིད་ཀྱིས་བྱ་བ་ཡིན་ནོ་ཞེས་བཤད་པ་ནི་རྒྱུ་གཞན་ནམ་ཞེས་བྱ་བའོ། །འདི་ཉིད་གསལ་བར་བྱེད་པ་ནི་ལས་སམ་ཞེས་བྱ་བའི་གཏན་ཚིགས་བརྗོད་པ་ནི་སྲེད་པ་པ་མེད་ན་ཞེས་བྱ་བའོ། །ཡོངས་སུ་འཛིན་པ་དེས་བྱ་བ་ཡིན་ཡང་སྐྱེ་བ་ཐོབ་པ་དེ་ལྟར་ཅི་སྟེ་འགྱུར་སྙམ་ན། ཡོངས་སུ་འཛིན་པ་དེ་ཡང་ཞེས་བྱ་བའོ། །གང་གི་ཕྱིར་སྐྱེ་བ་རྗེས་སུ་འབྲེལ་པ་ཡོངས་སུ་འཛིན་པ་ལས། གཞན་མ་ཡིན་པ་དེས་ན་སྐྱེ་བ་རྗེས་སུ་འབྲེལ་པ་འདི་རབ་ཏུ་སྐྱེ་བ་ནི་སྲིད་པ་ཁོ་ན་ཡིན་ནོ། །ཕྱིན་པར་བྱེད་པའི་བྱ་བ་ཅན་ཡིན་པའི་ཕྱིར་ན་སྲེད་པ་ཉིད་རབ་ཏུ་སྐྱེ་བ་ཡིན་མོད། སྲེད་པ་འདོད་གོ་ཇི་ལྟར་ཡིན་སྙམ་ན་དེ་ནི་དེ་ཉིད་ཡིན་ནོ་ཞེས་བརྗོད་པས་ནི་སྲེད་འདོད་ནི་ཞེས་བྱ་བའོ། །གལ་ཏེ་སྲེད་པ་ཙམ་ནི་ཀུན་འབྱུང་མ་ཡིན་ཏེ། མདོ་ལས་འདོད་པའི་སྲེད་པ་ལ་སོགས་པ་གསུམ་ཀུན་འབྱུང་དུ་བསྟན་པའི་ཕྱིར་རོ་སྙམ་དུ་དོགས་པ་བསུ་བ་ནི། གལ་ཏེ་ཡུལ་གྱི་ཞེས་བྱ་བའོ། །སྲེད་པ་ཞེས་བྱ་བ་ནི་མ་འོངས་པའི་སྐྱེ་བོ་དོན་དུ་གཉེར་བའི་རྣམ་པའོ། །དེ་ཉིད་ཀྱི་ཕྱིར་ཡང་སྲེད་པའི་ དགོས་པ ་ཅན་ཡིན་པའི་ཕྱིར་ཡང་འབྱུང་བ་ཅན་ནོ། །དགའ་བ་དང་འདོད་ཆགས་
དེ་གཉིས་དང་ལྡན་པའི་འདྲེས་པ་སྟེ། སྐྱེ་བ་དང་འཆི་བའི་རྒྱུན་གྱིས་འཆོལ་མར་སྐྱེ་བའི་ཕྱིར་ཡིན་གྱི་མཚུངས་པར་ལྡན་པའི་ཕྱིར་ནི་མ་ཡིན་ཏེ། འདོད་ཆགས་གཉིས་མཚུངས་པར་ལྡན་བ་མེད་བའི་ཕྱིར་རོ། །དེ་ལ་དགའ་བ་ནི་ད་ལྟར་བའི་དོན་ལ་དམིགས་པ་ཉོན་མོངས་པ་ཅན་གྱི་རྟོགས་པའོ། །འདོད་ཆགས་ང་ལྟར་བའི་དོན་ལ་དམིགས་པའི་མངོན་པར་ཞེན་པ་ཉིད་དོ། །འདི་སྐད་བརྗོད་པར་འགྱུར་ཏེ། གང་གི་ང་ལྟར་གྱི་ཚེའི་དངོས་པོ་ལ་ཉོན་མོངས་པ་ཅན་གྱི་རྟོག་བ་དང་མངོན་པར་ཞེན་པ་རབ་ཏུ་སྐྱེ་བ་དེས་ན། །དེ་ལྟ་བུར་གྱུར་པའམ། དེ་ལས་ཁྱད་པར་འཕགས་པའི་མ་འོངས་པ་ལ་ཡང་འདོད་པ་ཡིན་ནོ། །གང་དག་ང་ལྟར་བའི་དངོས་པོ་ཉིད་ལ་དགའ་བ་དང་འདོད་ཆགས་ལས་གྲོལ་པ་དེ་དག་ཇི་ལྟར་མ་འོངས་པའི་དངོས་པོ་དོན་དུ་གཉེར་བར་བྱེད། དེ་དང་དེར་མངོན་པར་དགའ་བ་ཅན་ཞེས་བྱ་བ་ནི་སྲིད་པ་དང་ལོངས་སྤྱོད་པ་ལ་སོགས་པ་ཐམས་ཅད་ལ་དོན་དུ་གཉེར་པའི་རྣམ་པ་ཅན་ཞེས་བྱ་བའི་དོན་ཏོ། །དེ་ལ་འདོད་བའི་ཁམས་དོན་དུ་གཉེར་བའི་རྣམ་པ་ནི་འདོད་པའི་སྲེད་པའོ། །འདོད་པར་བྱས་པས་ན་འདོད་པས་དེ་གཟུགས་ལ་སོགས་བའོ། །དེ་ལ་དོན་མེད་པ་མང་པོ་དང་ལྡན་ཞིང་སྙིང་པོ་མེད་པ་རྣམས་ལ་སྙིང་པོར་འདུ་ཤེས་པ་རྣམས་སྲིད་པ་བརྒྱུད་པ་ཐོག་མ་མེད་བ་ནས་གོམས་པས་བསྐྱེད་པ་བདེ་བར་སྲེད་པ་སྐྱེ་བ་ནི་འདོད་པའི་སྲེད་པ་ཞེས་བརྗོད་དོ། །གཟུགས་དང་གཟུགས་མེད་པ་དོན་དུ་གཉེར་བ་ནི་སྲིད་པའི་སྲེད་པའོ། །སྡུག་བསྔལ་དང་བྲལ་བར་འདོད་པ་ནི་འཇིག་པའི་སྲེད་པའོ། །གང་ལས་ཞེས་བྱ་བའི་ཡང་གི་སྒྲ་ནི་སྡུད་བའི་དོན་ཅན་ནི་འབྲེལ་བའི་ཕྱིར་ན་དེ་ཡང་ཞེས་བྱ་བར་འགྱུར་རོ། །སྲིད་པའི་སྲེད་པ་འབའ་ཞིག་ནི་སྲིད་འདོད་མ་ཡིན་གྱི་འོན་ཀྱང་དེ་ཡང་ཡིན་ནོ། །དེ་ཞེས་བྱ་བ་གང་ཡིན་ཞེ་ན། འདོད་པ་གང་ལས་སྲོག་ཆགས་ཤེས་རབ་དང་བྲལ་བ་འཇུག་པའི་ཇི་ལྟར་འཇུག་སྙམ་ན། བདེ་བ་དང་སྡུག་བསྔལ་དང་འབྲེལ་པ་ཐོབ་དང་དོར་བར་འདོད་པས་སོ། །འདིར་ནི་ཉེ་བར་མཁོ་བ་ལ་སོགས་བའི་ཡུལ་ཅན་གྱི་སྲེད་པ་འཇུག་བའི་རྒྱུར་བརྗོད་པ་ཡིན་ནོ།།
བདེ་བ་དང་སྡུག་བསྔལ་ཐོབ་པ་དང་དོར་བར་འདོད་པ་དེ་དག་ཉིད་ལ་མདོ་ལས་རྣམ་པར་ཕྱེ་ནས་འདོད་པའི་སྲིད་པ་དང་འཇིག་པའི་སྲེད་པའི་སྒྲས་བརྗོད་དོ་ཞེས་བཤད་པ་ནི། འདོད་པ་དང་འཇིག་པའི་འདོད་པ་དེ་དག་ཉིད་ཡིན་ནོ་ཞེས་བྱ་བའོ། །དེ་ཇི་ལྟར་ན་དེ་འདྲ་སྲིད་འདོད་ཡིན་སྙམ་ན། གང་འདི་ཞེས་གསུངས་སོ། །སོགས་པའི་སྒྲས་ནི་བདེ་བ་དང་ལྡན་པ་དང༌། སྡུག་བསྔལ་དང་བྲལ་བ་དག་གཟུང་ངོ༌། །དོན་འདི་ཡིན་ཏེ་སྲིད་བའི་སྒྲས་ནི་འཁོར་བའི་རྣམ་གྲངས་སུ་ཡིན་ལ། འཁོར་བ་དང་གནས་དང་ཉེ་བར་མཁོ་བ་དང༌། བདེ་བ་དང་ལྡན་པ་དང༌། སྡུག་བསྔལ་དང་བྲལ་བའོ། །དེ་ལ་འདོད་པ་ཡང་རྣམ་པ་གསུམ་འབྱུང་བ་ཡིན་ནོ་ཞེས་བྱ་བའོ། །སྲིད་པའི་འདོད་པ་དེ་ནི་ཐམས་ཅད་ཉིད་ཡིན་ཏེ། གཅིག་ཁོ་ན་ནི་མ་ཡིན་ནོ། །འདི་ཉིད་རྣམ་པར་དབྱེ་བ་ནི་འདོད་པའི་ཞེས་བྱ་བ་ལ་སོགས་པའོ། །རྣམ་པར་ཕྱེ་བ་ཉིད་ངེས་བར་སྟོན་པ་ནི་གང་ཞིག་ཅེས་བྱ་བའོ། །སོགས་པའི་སྒྲས་ནི་ཉེ་བར་མཁོ་བ་རྟོགས་པར་བྱེད་དོ། །གང་ལ་འགལ་བ་ཡོད་པ་མ་ཡིན་པ་དེ་ལ་དེ་སྐད་ཅེས་བྱའོ། །ཀུན་འབྱུང་བའི་བདེན་པ་བསྟན་པ་ནི་སྲིད་འདོད་ཅེས་བྱ་བར་རོ། །དེའི་ཕྱིར་སྲེད་པ་འདི་གསུམ་ཀ་ཡང་ཀུན་འབྱུང་གི་བདེན་པ་ཡིན་ཏེ། འཇུག་པའི་དབྱེ་བ་ལམ་རྣམ་པ་གསུམ་དུ་གཞག་པ་ཡིན་ནོ་ཞེས་བྱ་བ་ནི་སྐབས་ཀྱི་དོན་ཏོ། །སྲེད་པ་ཉིད་སྐྱེ་བའི་རྒྱུ་ཡིན་ནོ་ཞེས་རྣམ་པ་གཞན་གྱི་སྒོ་ནས་སྒྲུབ་པའི་ཕྱིར་བདག་ཏུ་ཆགས་པའི་ཞེས་གསུངས་སོ། །ཀུན་ལ་ཞེས་བྱ་བ་ནི་གནས་དང་ཉེ་བར་མཁོ་བ་ལ་སོགས་པ་ལའོ། །བདེ་བ་མ་ཡིན་པ་ལ་བདེ་བར་འདུ་ཤེས་འཇུག་པའི་རྒྱུ་ནི་བདག་ཏུ་ཆགས་པ་ཉིད་ཡིན་གྱི་གཞན་ནི་མ་ཡིན་ནོ། །འཇུག་པའི་རྒྱུ་ཡིན་བ་དེ་ཕྱིར། སྲིད་པ་ཉིད་སྲེད་པའི་རྟེན་ཡིན་ནོ། །གལ་ཏེ་བདག་མེད་པའི་ཕྱིར་བསྟན་པ་འདི་ཇི་ལྟར་འཐད་སྙམ་ན་ངར་འཛིན་པའི་ཞེས་གསུངས་སོ། །དེ་ལ་ཆགས་པ་སྲེད་པ་ཞེས་བྱ་བའི་མིང་གཞན་དང་ལྡན་པ་གང་ཡིན་པ་དེ་ནི་རྒྱུ་ཡིན་ཏེ། ཕན་འདོགས་པར་བྱེད་པ་ཡིན་ནོ། །ཇི་ལྟར་རྒྱུ་ཡིན་སྙམ་དུ་དོགས་ན། ཀུན་ལས་རབ་ཏུ་འཇུག་འགྱུར་བ། །ཞེས་བྱ་བའི་རྩ་བའི་རྗེས་སུ་བརྗོད་ནས་འཆད་
པ་ནི། གནས་དང་ལོངས་སྤྱོད་ལ་སོགས་པ། །ཞེས་བྱ་བའོ། །སུ་ཞིག་འཇུག་སྙམ་ན། ཕྱིན་ཅི་ལོག་བཞིས་ཉམས་པ་དག །ཅེས་བྱ་བ་སྨོས་སོ། །འདི་ནི་བདེ་བར་འདུ་ཤེས་པ་ཞེས་བྱ་བ་རྣམ་པར་འགྲེལ་པའོ། །དེའི་ཕྱིར་ཞེས་བྱ་བ་ནི་རྒྱུ་ཡིན་པའི་ཕྱིར་རོ། །འདི་ག་ལས་སྙམ་ན། སྙིང་རྗེར་ལྡན་པ་ཞེས་གསུངས་སོ། །བདག་ཏུ་སྲེད་པ་དང་བྲལ་བ་ནི་གནས་དང་ལོངས་སྤྱོད་ལ་སོགས་པ་ལ་ཡང་འཇུག་པ་མ་ཡིན་ཏེ། སྙིང་རྗེ་དང་ལྡན་པ་ཡིན་ན་ནི་འགྱུར་རོ། །དེ་ཉིད་ཀྱི་ཕྱིར། སྙིང་རྗེར་ལྡན་པ་མ་གཏོགས་པར། །ཞེས་བྱ་བའོ། །དེ་ནི་ཞེས་བྱ་བ་ནི་སྙིང་རྗེར་ལྡན་པའོ། །འཁོར་བའི་སྡུག་བསྔལ་གྱིས་ཡོངས་སུ་མི་གདུང་བའི་ཕྱིར་འཁོར་བའི་རྒྱུ་མ་ཡིན་ནོ། །དེ་ཉིད་ཀྱི་ཕྱིར་ཞེས་བྱ་བ་ནི་ཆགས་པའི་རང་བཞིན་གྱི་སྲེད་པ་ནི་ཐམས་ཅད་དུ་དོགས་པ་ཉིད་ཀྱིས་ལྷན་ཅིག་བྱེད་པ་ཡིན་པའི་ཕྱིར་རོ། །དེའི་ནི་སེམས་ཀྱིའོ། །གལ་ཏེ་སྲེད་པ་མེད་ན་མི་འབྱུང་བའི་ཕྱིར་རྐྱེན་ཉིད་ཡིན་ན་དེའི་ཚེ་ལུས་མེད་པར་ཡང་སྐྱེ་བ་མི་འབྱུང་བ་དེས་ན། དེ་ཡང་རྐྱེན་དུ་འགྱུར་རོ་ཞེས་བྱ་བའི་རྣམ་འགྲེལ་གྱི་དོན་བརྗོད་པ་ནི་གལ་ཏེ་རྐྱེན་ཉིད་ཀྱང་ཞེས་བྱ་བའོ། །ཇི་ལྟར་ཞེས་བྱ་བ་ནི་ཚིག་གི་དོན་རྣམ་པར་འགྲེལ་པའོ། །གང་ལས་ལུས་འདོད་ཆགས་ཀྱི་རྒྱུ་ཡིན་པར་འགྱུར་བའི་རིགས་པ་དེ་གང་ཡིན་སྙམ་ན། ལུས་མེད་པར་ཞེས་བྱ་བའོ། །རྒྱུ་མཚན་ཁས་བླངས་ཕྱིར་ན་ཞེས་བྱ་བའི་ཚིགས་སུ་བཅད་པའི་དོན་བརྗོད་པ་ནི་འདོད་ཆགས་མེད་ཀྱང་ཞེས་བྱ་བའོ། །འོ་ན་དེ་རྒྱུ་ཇི་ལྟར་ཡིན་སྙམ་ན་དེའི་མངོན་པར་དགའ་བའི་ཡུལ་ཉིད་ནི་ཞེས་གསུངས་སོ། །དེའི་ཞེས་བྱ་བ་ནི་སྐྱེ་བའིའོ། །རྐྱེན་ཙམ་ནི་ཉེ་བར་ལེན་པ་མ་ཡིན་ནོ་ཞེས་བྱ་བའི་དོན་ཏོ། །ཉེ་བར་ལེན་པའི་རྒྱུ་ནི་གཙོ་བོའི་རྒྱུའོ། །བསྒྲུབས་པ་ཡིན་ནོ་ཞེས་བྱ་བ་ནི་ཡང་དག་པར་ཞུགས་པ་ཡིན་ནོ་ཞེས་བྱ་བའི་དོན་ཏོ། །རྒྱུ་མཚན་དུ་ཁས་བླངས་པའི་ལུས་ནི་འདོད་ཆགས་ལ་སོགས་པའི་རྒྱུ་ཉིད་དུ་འདོད་པ་ཁོ་ནའོ། །ཉེ་བར་ལེན་པ་རྟེན་ཡིན་པ་ནི་སེལ་བ་ཡིན་ནོ། །འདི་ཞེས་བྱ་བ་ནི་ལུས་ནི་འདོད་ཆགས་ཀྱི་བག་ཆགས་སད་པར་བྱེད་པ་ཉིད་ཀྱི་
རྒྱུ་མཚན་ཡིན་ནོ་ཞེས་བྱ་བའི་རིགས་པའོ། །འདོད་ན་ཞེས་བྱ་བ་ནི་ཁས་ལེན་ནའོ། །རང་འདོད་ལ་ཞེས་བྱ་བ་ནི་ཉེ་བར་ལེན་པ་ཡིན་ནོ་ཞེས་རང་གིས་ཁས་བླངས་པ་ལ། ཚུ་རོལ་མཛེས་པས་རང་ཉིད་ཀྱིས་གནོད་པ་ཡིན་ནོ། །དེ་ལྟ་ན་ཡང་འཇིག་རྟེན་ཕ་རོལ་གྲུབ་པོ་སྙམ་དུ་དགོངས་པའོ། །དེ་ལྟ་ན་འོ་ན་འདོད་ཆགས་གཏན་དུ་འབྱུང་བར་འགྱུར་རོ་སྙམ་ན། དེ་ནི་ཡུལ་བཞིན་དུ་ཞེས་གསུངས་སོ། །དེས་ན་འདོད་ཆགས་གཏན་དུ་འབྱུང་བ་མ་ཡིན་ནོ་སྙམ་དུ་དགོངས་པའོ། །གང་ལ་རྒྱུ་འདོད་ཆགས་ཡོད་པ་དེའི་དངོས་པོ་ནི་དེ་ཉིད་དོ། །ངེས་པར་བརྟགས་པ་ནི་མེ་འདྲ་བ་ཁྱེད་རང་གིས་ཟོས་པ་ཡིན་ནོ། །ཕ་རོལ་ཕན་ཚུན་རྒྱུ་ཉིད་ཡིན་པ་མི་བཟོད་ནས། གལ་ཏེ་ཞེས་སྨྲས་པའོ། །ལུས་སྐྱེ་བ་དང་ལྷན་ཅིག་སྟེ། འདོད་ཆགས་དུས་མཉམ་པར་འབྱུང་བ་དེས་ན་རྒྱུ་ཉིད་མ་ཡིན་ཏེ། རྒྱུ་ནི་སྔར་ཡོད་པའི་ཕྱིར་རོ། །འདི་ཉིད་གཞུང་གཟུགས་པའི་ཕྱིར་གལ་ཏེ་ཡོན་ཏན་དང་བཅས་པའི་རྗེས་ཉིད་ཅེས་བྱ་བ་ནི་བརྗོད་ཟིན་པ་ཡིན་ནོ། །ལྷན་ཅིག་འབྱུང་བ་ལ་ཚད་མ་ཅི་ཡོད་སྙམ་ན། སྐྱེ་ལ་ཆགས་མཐོང་ཕྱིར་ཞེས་སྨྲས་སོ། །སྐྱེ་བའི་སྔོན་རོལ་དུ་འདོད་ཆགས་མཐོང་བ་མེད་པས་ན་སྐྱེ་བ་ལ་ཆགས་པ་མཐོང་བའི་ཕྱིར་ལྷན་ཅིག་འབྱུང་བ་ངེས་པ་ཡིན་ནོ། །འདི་ལ་ལན་ནི་སྐལ་མཉམ་སྐྱེ་ལས་ཞེས་བྱ་བའོ། །དཔེར་ན་ལྷན་ཅིག་འབྱུང་བའི་འདོད་ཆགས་སྐྱེ་བའི་རྒྱུ་མ་ཡིན་པ་དེ་བཞིན་དུ་སྐྱེ་བ་ཡང་འདོད་ཆགས་ཀྱི་མ་ཡིན་ཏེ། ལྷན་ཅིག་འབྱུང་བའི་ཕྱིར་རོ།། དེས་ན་སྔར་ཡོད་པ་རྒྱུར་རྟོགས་ན་སྐལ་མཉམ་སྟེ། ཚུལ་བཞིན་མ་ཡིན་པའི་ཡིད་ལ་བྱེད་པའི་མཚན་ཉིད་འདྲ་བ་ཉིད་ལ་རྟག་པར་བྱ་བ་ཡིན་ཏེ། དབུས་ཀྱི་གནས་སྐབས་ན་དེ་བཞིན་དུ་མཐོང་བའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་བདག་དང་བདག་གིས་ལྟ་བ་ཆགས་པའི་རྒྱུ་ཡིན་གྱི་ཆགས་པ་ཉིད་ནི་མ་ཡིན་པ་མ་ཡིན་ནམ། དེ་སྐད་དུ་ཡང༌། བདག་དང་བདག་གིར་འཛིན་བྱས་པ། །འདུས་བྱས་སྤྱོད་ཡུལ་ཅན་ཆགས་ནི། །ཞེས་བཤད་པ་ཡིན་ནོ། །དེས་ན་དེ་བཞིན་དུ་ལྟ་བ་ཡང་རྒྱུ་ཉིད་ཡིན་གྱི་སྲེད་པ་འབའ་ཞིག་ནི་མ་ཡིན་ནོ་སྙམ་ན།
སྲིད་ལ་ཞེས་གསུངས་སོ། །མི་ཤེས་པ་མ་རིག་པ་ནི་རྒྱུ་ཉིད་ཀུན་འབྱུང་གི་བདེན་པ་བསྟན་པར་རྒྱུ་ཉིད་དུ་མ་བརྗོད་དེ། སྒྲིབ་པར་བྱེད་བ་ཉིད་ཀྱིས་སྐུལ་བར་བྱེད་པ་ཉིད་མ་ཡིན་པའི་ཕྱིར་རོ། །སྲེད་པ་ནི་བརྗོད་པ་ཡིན་ཏེ། སྐུལ་བར་བྱེད་པ་ཡིན་པའི་ཕྱིར་རོ་ཞེས་བརྗོད་པ་ནི་སྲེད་པ་ཉིད་བཤད་པ་ཞེས་བྱ་བའོ། །ཇི་ལྟར་གཅིག་པུ་རྒྱུ་མ་ཡིན་སྙམ་ན། མ་རིག་པ་དང་ཞེས་སྨྲས་སོ། །གསུམ་རྒྱུ་ཡིན་པའི་ཕྱིར་རོ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བའི་ཡན་ལག་རྣམས་སུ་རིག་པ་དང་ལས་ཀྱང་བརྗོད་པའི་ཕྱིར་རོ་ཞེས་བྱ་བའི་དོན་ཏོ། །འདི་ཉིད་ལུང་ལས་བདེན་པ་ཉིད་དུ་བསྟན་པ་ཡང་མི་རིགས་སོ་ཞེས་བརྗོད་པ་ནི་དེ་དང་དེར་ཞེས་བྱ་བའོ། །དེ་མ་ཐག་པའི་ཞེས་བྱ་བ་ནི་ཉེ་བར་གནས་པས་སོ། །དེ་མ་ཐག་པ་ཉིད་སྒྲུབ་པ་ནི་གཏི་མུག་དང་ལས་དག་ནི་ཞེས་བྱའོ། །དེ་མ་ཐག་པས་སྲེད་པ་ཉིད་རྒྱུ་ཡིན་ནོ་ཞེས་སྔ་མ་དང་འབྲེལ་ཏོ། །ལས་ཀྱང་དེ་ལྟར་རྒྱུར་གྱུར་པ་ནི་མ་ཡིན་ནོ། །ཅིའི་ཕྱིར་སྙམ་དུ་དོགས་ན། སྲེད་པ་དང་བྲལ་ན་ལས་ལ་ནུས་པ་མེད་དོ་ཞེས་བརྗོད་པ་ནི་དེ་ཡོད་པ་ན་ཞེས་བྱ་བའོ། །སྲེད་པ་མེད་ན་ནི་ཞེས་བྱ་བ་ནི་དེ་ཉིད་ཀྱི་རྣམ་པར་འགྲེལ་པའོ། །ཡོངས་སུ་འདོར་བ་སྲེད་པ་དང་བྲལ་བས་བྱས་པ་ནི་མ་ཡིན་ཏེ། འོན་ཀྱང་དེའང་ལས་གཞན་ཁོ་ནས་བྱས་པ་ཡིན་ནོ་ཞེས་བྱ་བ་དང༌། ཐར་པ་རྣམས་ལ་སྐྱེ་བ་མེད་པ་ཡང་ལས་མེད་པས་བྱས་པ་ཉིད་ཡིན་གྱི། སྲེད་པ་དང་བྲལ་བས་བྱས་པ་ནི་མ་ཡིན་ནོ་ཞེས་རྩོད་པར་བརྗོད་པ་ནི། གལ་ཏེ་ཞེས་བྱ་བ་ལ་སོགས་པའོ། །དེ་ལྟ་མ་ཡིན་ན་ཞེས་བྱ་བ་ནི་ལས་ཟད་པ་མེད་པར་རོ། །རེ་ཞིག་སྲེད་པ་དང་བྲལ་ན་ཡོངས་སུ་འདོར་བས་ནི་ལས་གཞན་གྱིས་ནུས་པ་འཕེན་པ་མ་ཡིན་ཏེ། གཞན་དུ་ཡང་སྲིད་པའི་ཕྱིར་རོ། །འོན་ཏེ་སྲེད་པ་མེད་ན་ལས་ཉིད་མི་འབྱུང་བ་དེས་ན་ཡོངས་སུ་འདོར་བ་ལས་མེད་པ་བྱས་པ་ཡིན་གྱི་ལས་གཞན་གྱིས་བྱས་པ་ནི་མ་ཡིན་ནོ། །དེ་ལ་ཡང་བརྗོད་པ་ནི་གལ་ཏེ་ལས་ནི་ཞེས་བྱ་བའོ། །ལས་མེད་པའི་སྒོ་ནས་སྲེད་པ་དང་བྲལ་བ་ཉིད་ཡོངས་སུ་འདོར་བ་ལ་བྱེད་པ་ཡིན་ཏེ། དེས་ན་སྲེད་པ་དང་བྲལ་བ་ཁོ་ན་གཙོ་
བོ་ཡིན་ཏེ། རབ་ཏུ་སྦྱོར་བ་པོ་ཡིན་པའི་ཕྱིར་རོ། །འོན་ཏེ་སྲེད་པ་ཡོད་ཀྱང་ལས་མེད་པ་ཉིད་རབ་ཏུ་སྦྱོར་བར་བྱེད་པ་ཡིན་ན། དེའི་ཚེ་དེ་མེད་ན་ལས་མེད་པའི་ཕྱིར་རོ་ཞེས་བྱ་བར་གྲུབ་སྟེ། དེ་ཡོད་ན་དེ་མེད་པ་ཉིད་མི་འགྲུབ་པའི་ཕྱིར་རོ་ཞེས་བརྗོད་པ་ནི། འོན་ཏེ་འདི་ལ་ཞེས་བྱ་བའོ། །སྡུག་བསྔལ་དེ་ནི་རེས་འགའ་མེད་པའི་ཕྱིར་ན་གཏན་དུ་བ་མ་ཡིན་ཏེ། རྟག་ཏུ་བ་མ་ཡིན་ནོ་ཞེས་བརྗོད་ཟིན་ཏོ། །དེ་ཅིའི་ཕྱིར་ཞེ་ན། རྒྱུ་ཀུན་འབྱུང་ལ་གགས་ཏེ་འགལ་བའི་ལམ་མོ། །སོགས་པའི་སྒྲས་ནི་ལྷན་ཅིག་བྱེད་པ་མ་ཚང་བའོ། །འདིས་ནི་རྒྱུ་མེད་པ་བརྗོད་དོ། །གལ་ཏེ་གང་ཞིག་འཁོར་བ་པའི་ཕུང་པོའི་རང་བཞིན་ཡིན་པ་དེ་ནི་རྒྱུ་ཚང་བ་ཅན་ཡིན་པའི་ཕྱིར་འདི་ཇི་ལྟར་འགོག་པ་ཅན་ཡིན་སྙམ་དུ་དོགས་པ་བསུ་བ་ནི་འཁོར་བ་ཞེས་བྱ་བའོ། །མ་ཡིན་ཞེས་བྱ་བ་ནི་སྔ་མ་འགོག་པའོ། །ཅིའི་ཕྱིར་སྙམ་ན་འདོད་པའི་ཕྱིར་རོ། །འཁོར་བ་གང་ཡིན་པ་དེ་ཐར་པ་མ་ཡིན་ནོ་ཞེས་བྱ་བ་འདི་འདོད་པ་ཡིན་ནོ། །སྐད་ཅིག་ལ་ལྟོས་ནས་ནི་འགལ་བ་ཉིད་ཡིན་ན། རྒྱུན་ལ་ལྟོས་ནས་འགལ་བར་མ་གྲུབ་པོ་ཞེས་བརྗོད་པ་ནི་མ་གྲུབ་པའི་ཕྱིར་ཞེས་བྱ་བའོ། །གང་འཁོར་བ་པ་ཡིན་པ་དེ་ཉིད་འཁོར་བ་པ་མ་ཡིན་པ་ནི་མ་ཡིན་གྱི། འོན་ཀྱང་འཁོར་བ་པའི་སེམས་ཀྱི་རྒྱུན་ལས་རྒྱུའི་ཁྱད་པར་ཐོབ་པས་ཕྱི་མའི་ཆར་ཐར་པ་སྐྱེ་བ་ཡིན་ནོ། །དེས་ན་འདི་འཁོར་བ་པ་ཉིད་དུ་མ་གྲུབ་པོ། །འཁོར་བ་པ་ཡིན་པའི་ཕྱིར་ཞེས་བྱ་བ་ལ་སོགས་པས་ནི་སྐད་ཅིག་ལ་ལྟོས་ནས་འགལ་བ་ཉིད་གཞུང་བཙུགས་པ་ཡིན་ལ། འོན་ཀྱང་ཞེས་བྱ་བ་ལ་སོགས་པས་ནི་རྒྱུན་ལ་ལྟོས་ན་འགལ་བ་ཉིད་མ་གྲུབ་པོ་ཞེས་བརྗོད་པ་ཡིན་ནོ། །མ་གྲུབ་ཕྱིར་ཞེས་བྱ་བ་འདི་ཉིད་ཀྱི་དོན་གཞན་བརྗོད་པ་ནི་དོན་དམ་པར་ནི་ཞེས་བྱ་བའོ།། དོན་དམ་པར་རྣམ་པར་དཔྱད་པས་ནི། འཁོར་བ་པ་ཉིད་མི་འགྲུབ་ཀྱི། ཀུན་རྫོབ་ཏུ་ནི་སྡུག་བསྔལ་འཁོར་བ་ཅན་ཕུང་པོ་ཞེས་བྱ་བ་མི་འགལ་ལོ། །གལ་ཏེ་བཅིངས་པ་དང་གྲོལ་བ་དག་གཅིག་ཅིག་པ་མ་ཡིན་ན་དེའི་ཚེ་རྟོག་པ་དང་ལྡན་པ་ཇི་ལྟར་རྒྱུ་སྦྱོར་བ་ལ་བརྩོན་ཞེས་
དོགས་པ་ནི་གལ་ཏེ་ཞེས་བྱ་བའོ། །བསྟན་བཅོས་སྦྱོར་བས་ངལ་ཞེས་བྱ་བ་ནི་བསྟན་བཅོས་གོམས་པ་འབད་བ་དང་ལྡན་པའོ། །བདག་མེད་བར་སྨྲ་བ་ལ་འགའ་ཞིག་ལ་སོགས་པ་འགའ་ཞིག་ལ་ཞུགས་པ་མེད་པའི་ཕྱིར་འཇིག་རྟེན་པའི་ལེགས་པ་མང་པོ་རྣམ་པར་ཉམས་པར་འགྱུར་རོ་ཞེས་བསྟན་པའི་དོན་དུ་དཔེར་བརྗོད་པ་མང་དུ་བྱས་སོ། །བདག་ཏུ་སྨྲ་བ་ལ་ཡང༌། བདག་ཡོད་པ་ཙམ་གྱིས་ནི་འཇུག་པ་དང་ལྡོག་པར་བྱེད་པ་མ་ཡིན་ནོ། །འོ་ན་ཅི་ཞེ་ན་དེའི་ཤེས་པས་སོ། །དེ་ནི་བདག་མེད་པར་སྨྲ་བ་ལ་ཡང་མཚུངས་སོ་ཞེས་བརྗོད་པ་ནི། ཇི་སྲིད་དུ་བདག་ལ་ཆགས་པ་ཞེན་པའི་སྙིང་པོ་ཅན་གྱི་ཤེས་པ་མ་བཅོས་པར་གྱུར་པ་དེ་སྲིད་དུ་བདག་ཉིད་སྡུག་བསྔལ་བ། འཁོར་བ་ཉིད་དུ་སྒྲོ་བཏགས་ནས་ཏེ། རློམ་ནས་ཡོངས་སུ་གདུང་བར་འགྱུར་རོ། །སྡུག་བསྔལ་གྱིས་གདུང་བ་དང་ལྡན་པར་འགྱུར་རོ། །དེས་ན་སྡུག་བསྔལ་དེ་སྤང་བའི་དོན་དུ་ཐམས་ཅད་རྗེས་སུ་བསྒྲུབ་པས་དཀྲུགས་པས་ན་རང་བཞིན་དུ་གནས་བ་ཉིད་མི་འཐོབ་པོ། །དེས་ན་གྲོལ་བ་པོའི་བདག་མེད་ཀྱང༌། བདག་ཏུ་ཆགས་པའི་མཚན་ཉིད་ལོག་པར་སྒྲོ་བཏགས་པ་དེ་ཉིད་ཀྱི་གཞོལ་བའི་ཕྱིར་བརྩོན་ཏེ། བཅོམ་ལྡན་འདས་ཀྱིས་ཉེ་བར་བསྟན་པ་དང༌། དེ་རྗེས་སུ་བསྒྲུབ་པ་ལ་བརྩོན་པར་འགྱུར་བའི་ཕྱིར་ན། ཚངས་པར་སྤྱོད་པ་ལ་སོགས་པ་རྗེས་སུ་བསྒྲུབ་པ་འབྲས་བུ་མེད་པ་མ་ཡིན་ནོ། །འདི་ཉིད་བརྗོད་པ་ནི་འོན་ཏེ་ངེད་ལྟ་བུ་ཞེས་བྱ་བའོ། །དེ་ཞེས་བྱ་བ་ནི་ངེད་ལྟ་བུའིའོ། །དེ་དག་ཅེས་བྱ་བ་ནི་བཅིངས་པ་དང་ཐར་པའོ། །གལ་ཏེ་བཅིངས་པ་དང་ཐར་པ་དག་གཞི་གཅིག་པ་ཉིད་མ་ཡིན་ན། །དེ་ཁོ་ན་ལྟར་ཐ་སྙད་ཅི་སྟེ་མི་བྱེད་སྙམ་ན། དངོས་པོ་དོན་དམ་པར་ཞེས་བྱ་བའོ། །རྟོགས་པ་ལ་ལྟོས་པའི་ཕྱིར་ན་ལྷག་བར་ཞེན་པ་ལ་ལྟོས་པའི་ཕྱིར་རོ། །འདི་ཉིད་སྒྲུབ་པར་བྱེད་པ་ནི་འདི་ལྟར་ཞེས་བྱ་བའོ། །ལྷག་བར་མོས་པའི་ཡུལ་ནི་སྤང་བའི་ཡུལ་ཡིན་ནོ་ཞེས་འབྲེལ་ཏོ། །གལ་ཏེ་དེ་ཁོ་ན་མཐོང་བ་དོན་བྱས་ཟིན་པའི་ཕྱིར་རང་གི་དོན་དུ་མི་འཇུག་
པ་ཡིན་དུ་ཟིན་ཀྱང་གཞན་གྱི་དོན་ལ་ནི་འཇུག་པ་ཁོ་ན་ཡིན་པས་ན། དེ་འདིའི་ཆེད་དུ་ལམ་འདི་བདག་གིས་བསྟན་པར་བྱའོ་ཞེས་རྣམ་པར་རྟོག་པས་འབད་པར་ཅི་ལྟར་བྱེད་སྙམ་དུ་དོགས་པ་བསུ་བ་ནི་འོན་ཏེ་ཞེས་བྱ་བའོ། །ཀུན་རྫོབ་ཏུ་ཐ་སྙད་ཡོད་པར་འགྱུར་མོད་ཅེས་བྱ་བ་ནི་སློབ་མ་ཡོངས་སུ་མ་རྫོགས་པའི་ཕྱིར་རོ། །དོན་དམ་པར་ཅི་ལྟར་ཞེས་བྱ་བ་ནི་དོན་སྟོན་པ་པོ་ཡོངས་སུ་རྫོགས་ཟིན་པའི་ཕྱིར་རོ། །དེ་ཞིག་སློབ་མ་ནི་བདག་ཉིད་བཞིན་དུ་སྟོན་པ་པོ་ཡང་གཅིག་ཉིད་ཡིན་པར་རིག་གོ་ཞེས་ལན་འདེབས་པ་ནི། ཅི་ལྟར་གཅིག་ཉིད་ཅེས་བྱ་བའོ་། སྟོན་པ་པོ་ཡང་རྟོགས་པ་མེད་ཀྱང་སྔོན་གྱི་འཕེན་པ་ལས་འཇུག་པ་ན། དོན་དམ་པར་གཅིག་ཉིད་དམ་ཐ་སྙད་ཀྱང་མཐོང་བ་མེད་བ་མ་ཡིན་ནོ་ཞེས་བརྗོད་པ་ནི་ད་ལྟར་དེ་ཉིད་དུ་ཞེས་བྱ་བའོ། །འདོད་ཆགས་དང་བྲལ་བའི་འབད་པ་ཡང་རང་རིག་པ་ཙམ་ཡིན་གྱི་རྣམ་པར་རྟོག་པ་ནི་མ་ཡིན་ནོ་ཞེས་བརྗོད་པ་ནི། རང་གི་ངོ་བོ་ལས་གཞན་པ་ཞེས་བྱ་བའོ། །རྣམ་པར་རྟོག་པར་མི་བྱེད་ན་ཇི་ལྟར་ཐ་སྙད་དུ་དོགས་པ་བསུ་ནས། ཇི་ལྟར་ས་བོན་ལ་སོགས་པ་རྣམ་པར་རྟོག་པར་མི་བྱེད་ཀྱང་མྱུ་གུ་སྐྱེད་པར་བྱེད་པ་དེ་བཞིན་དུ་གྲུབ་ཟིན་པའི་ཕྱིར་རྣམ་པར་རྟོག་པར་མི་བྱེད་ཀྱང་སྔོན་གྱི་འདུ་བྱེད་པའི་ཐ་སྙད་སྐྱེད་པར་བྱེད་དེ་ཞེས་བརྗོད་པ་ནི། རྒྱུ་དང་འབྲས་བུའི་དངོས་པོ་ནི་ཞེས་བྱ་བའོ། །ཅིའི་ཕྱིར་འདི་མཁས་པའི་ཚུལ་མ་ཡིན་སྙམ་ན། གྲུབ་ཟིན་པ་ལ་ཡང་རྒྱུ་དང་འབྲས་བུའི་དངོས་པོ་ནི་རྣམ་པར་རྟོག་པ་ལས་གཞན་པའི་ཚད་མས་རྟོགས་པ་མ་ཡིན་ནོ་ཞེས་བརྗོད་པ་ནི་དེ་ལྟར་ཞེས་བྱ་བའོ། །རྒྱུ་དང་འབྲས་བུ་དངོས་པོ་བརྟགས་ནས་ཞེས་བྱ་བ་ནི་ལྷག་མའོ། ཅིའི་ཕྱིར་འཇུག་པ་དང་ལྡོག་བར་མི་འགྱུར་སྙམ་ན། སྔོན་དང་ཕྱི་མར་ཞེས་གསུངས་སོ། །དེའི་ཕྱིར་རྒྱུ་དང་འབྲས་བུ་དངོས་པོ་ནི་རྩོད་པའི་ཡུལ་མ་ཡིན་ནོ། །སྐད་ཅིག་གཉིས་པར་མི་སྡོད་པ་ལ་ནི་འགའ་ཞིག་ཏུ་ཡང་འཇུག་པ་མི་སྲིད་དོ་ཞེས་བརྗོད་པ་ནི་སྐད་ཅིག་ཙམ་ལ་ཞེས་བྱ་བའོ། །དེས་ན་ཞེས་བྱ་བ་ནི་འཇུག་པ་མེད་པས་སོ། །ནོར་པ་ནི་ཐར་པའི་དོན་དུ་འབད་དོ་སྙམ་པའི་རྣམ་པར་རྟོག་པའོ། །སྐད་ཅིག་ཙམ་རིག་པར་བྱེད་པའི་མངོན་
སུམ་ནི་གྲུབ་ཟིན་པ་དང་མ་ཟིན་པ་གཉིས་ཀྱི་བརྩེ་བ་དང་རྣམ་པར་རྟོག་པས་འཇུག་པར་བྱེད་པ་ཡིན་ནོ་ཞེས་བརྗོད་པ་ནི་ཁས་བླངས་ནས་ཀྱང་ཞེས་བྱ་བའོ། །སངས་རྒྱས་བཅོམ་ལྡན་འདས་རྣམས་ནི་ཐུགས་བརྩེ་བས་འཁོར་བ་ཅི་སྲིད་བཞུགས་པ་ཡིན་ལ། འདོད་ཆགས་དང་བྲལ་བ་རྣམས་ནི་ལས་ཀྱིས་དུས་ཅུང་ཟད་གནས་པ་ཡིན་ནོ། །བཅོམ་ལྡན་འདས་རྣམས་ལ་ཡང་སྐུ་ཚེ་རིང་པོ་མངོན་པར་གྲུབ་པར་བྱེད་པའི་ལས་ནི་མངའ་བ་ཁོ་ནའོ། །ཚིགས་སུ་བཅད་པའི་ཆ་ཉིད་ལ་རྩོད་པ་ནི་དམ་པའི་དོན་ཞེས་བྱ་བའོ། །འདི་ཉིད་ལ་ལན་གདབ་པའི་སྒོ་ནས་ཚིགས་སུ་བཅད་པའི་དོན་སྦྱོར་བར་བྱེད་པ་ནི་སྤྱོད་པའི་ཡུལ་ཅན་གྱི་ཤེས་པའམ། མ་ཁོང་ནས་དབྱུང་བས་མ་དམིགས་པའོ། །དེ་རྟོགས་པ་ནི་རང་རིག་པའི་རང་བཞིན་ཉིད་དོ། །དེར་གྱུར་པ་ན་ཡང་སངས་རྒྱས་རྣམས་ཀྱི་འཇུག་པ་ནི་ཐུགས་རྗེའི་དབང་གིས་ཡིན་ནོ། །ཡང་ན་སྐད་ཅིག་གི་རང་བཞིན་གྱི་ཤེས་པ་རྟོགས་ཀྱང་ཐུགས་རྗེའི་དབང་གིས་རང་གི་རྒྱུད་གནས་པར་བྱ་བའི་དོན་དུ་སྤྱོད་པ་འཇུག་པ་ཁོ་ནའོ་ཞེས་བྱ་བ་ཡིན་ནོ། །གང་གིས་དེ་སྐད་བརྗོད། ཅི་དེ་ལྟར་འཇུག་པ་མཐོང་ངམ་ཞེས་དོགས་པ་བསུ་ནས། ཅི་ལྟར་རྒྱལ་པོའི་ཞེས་བྱ་བའོ། །སྐྱེ་དགུ་བསྲུང་བའི་བསམ་པ་ཅན་གྱི་རྒྱལ་པོ་ནི་རྒས་པས་བདག་ཉིད་འཆི་བར་རྟོགས་པ་ན་ཡུལ་དེ་ལ་བདག་ཉིད་བསྲུང་བར་མཐོང་ཡང་དེའི་དོན་དུ་བུ་ལ་སོགས་པ་འབད་པས་རྣམ་པར་གཞག་པའི་དོན་དུ་བརྩོན་པ་དེ་བཞིན་དུ། བཅོམ་ལྡན་འདས་ཀྱང་ཐུགས་རྗེས་རང་གི་རྒྱུན་གནས་དོན་དུ་འབད་པས་མཛད་པ་ཡིན་ནོ་ཞེས་བྱ་བའི་དོན་ཏོ། །དེས་ན་བསྐལ་པ་གྲངས་མེད་པ་གསུམ་དུ་བསམས་པའི་སྐུ་ཚེ་མངོན་པར་འགྲུབ་པའི་བསོད་ནམས་ཀྱི་ཚོགས་དང་ལྡན་པའི་ཕྱིར། བཅོམ་ལྡན་འདས་ལ་ལྟོས་པ་ཁོ་ནས། ཡང་ན་ལས་ཀྱི་ཡིན་ཞེས་བྱ་བའི་རྣམ་པར་རྟོག་པ་འཐད་པ་ཡིན་ནོ། །འདོད་པའི་རྗེས་སུ་སྟོན་པ་ཡང་བསོད་ནམས་ཀྱི་འབྲས་བུ་ཡིན་ཏེ། དེས་ན་བཅོམ་ལྡན་འདས་ནི་མཐའ་མེད་པ་ཉིད་དོ་ཞེས་བརྗོད་པ་ནི། སྨོན་ལམ་གཙོ་བོར་བྱེད་པ་ཞེས་བྱ་བའོ། །མཐའ་
མེད་པར་གནས་པའི་ཆུན་གྲུབ་པ་ཉིད་ལས་ཀྱི་འབྲས་བུ་ཡིན་ནོ་ཞེས་བྱ་བའི་དོན་ཏོ། །གང་གི་ཕྱིར་དོན་དམ་པར་སྤྱད་པ་ཞེས་བྱ་བ་ཡོད་པ་མ་ཡིན་པ་དེའི་ཕྱིར་རྣམ་པ་དེ་ལྟ་བུའི་ཞེས་བྱ་བ་ལ་སོགས་པའོ། །རྣམ་པ་དེ་ལྟ་བུའི་ཞེས་བྱ་བ་ནི་བདག་ནི་སྡུག་བསྔལ་བའི་ཞེས་བྱ་བ་ལ་སོགས་པ་གཅིག་ཉིད་དུ་སྒྲོ་བཏགས་པའོ། །གལ་ཏེ་ཞེས་བྱ་བ་ནི་གཞན་གྱིའོ། །དེའི་ཚེ་ཞེས་ཁོང་ནས་ཕྱུང་ལ་སྐྱེ་བ་གཞན་ཞེས་བྱ་བ་དང༌། དེའི་ཚེ་ཞེས་ཁོང་ནས་ཕྱུང་ལ་གནས་པར་ཡང་ཞེས་བྱ་བ་ལ་སོགས་པར་སྦྱར་རོ། །དེ་ལ་གལ་ཏེ་ཞེས་བྱ་བའི་རྩོད་པ་ནི། ལྷན་ཅིག་བྱེད་པ་ཟད་ཕྱིར་རོ། །ཞེས་བྱ་བས་སྤངས་ལ། འོན་ཏེ་ཞེས་བྱ་བའི་རྩོད་པ་ནི། འཕངས་ལས་ལྡོག་མེད་འདོད་ཕྱིར་རོ། །ཞེས་སྤངས་པ་ཡིན་ནོ། །གལ་ཏེ་འབད་པ་མེད་པར་མི་ལྡོག་ན་འོ་ན་རྩོལ་བ་ལས་འགྱུར་རོ་སྙམ་ན། རྩོལ་བ་ཡང་ཞེས་གསུངས་སོ། །དེ་བཏང་སྙོམས་པ་ཉིད་ཅི་ལྟར་སྙམ་ན། དེ་ནི་འགལ་བ་ཡང་ཞེས་གསུངས་སོ། །གལ་ཏེ་སེམས་ཅན་དུ་ལྟ་བ་སྤངས་ནས། ཅི་ལྟར་སེམས་ཅན་གྱི་ངོར་བརྩེ་བ་ཡིན། བརྩེ་བ་སྐྱེ་ན་ཡང་ཇི་ལྟར་བདག་ཏུ་ལྟ་བ་སྤངས་པ་ཡིན་ནོ་སྙམ་དུ་དོགས་པ་བསུ་བ་ནི། གལ་ཏེ་བརྩེ་བ་ནི་ཞེས་བྱ་བའོ། །འདིས་ནི་སེམས་ཅན་དུ་ལྟ་བ་བསྒྲུབ་པར་བྱ་བ་ལ། བརྩེ་བ་འབྲས་བུའི་གཏན་ཚིགས་སུ་བསྟན་པ་ཡིན་ནོ། །སེམས་ཅན་དུ་ལྟ་བ་མེད་ཀྱང་བརྩེ་བ་སྐྱེས་ཏེ། དེའི་འབྲས་བུ་ནི་མ་ཡིན་ནོ་ཞེས་ལན་འདེབས་པ་ནི་སྡུག་བསྔལ་ཤེས་ལ་ཞེས་བྱ་བའོ། །གཞན་གྱི་སྡུག་བསྔལ་ཤེས་པས་ཕྱི་རོལ་རྒྱུར་ཤེས་པ་ཡིན་ནོ། །བཤད་པ་མཛད་པས་ནི་སྲེད་པ་མེད་པར་བཤད་དོ། །དེས་ན་འགལ་མེད་པ་ནི་སྡང་པ་མེད་པའོ། །སྲེད་པ་དང་བཅས་པ་ནི་དེའི་བགེགས་འགའ་ལ་སྡང་བར་འགྱུར་རོ། །འདིས་ནི་མི་མཐུན་པའི་ཕྱོགས་མེད་པ་བརྗོད་དོ། །འདུ་བྱེད་སྔ་མ་ཞེས་བྱ་བ་ལ་སོགས་པས་ནི་ནང་གི་རྒྱུ་བརྗོད་ལ། དངོས་ཆོས་ཞེས་བྱ་བས་ནི་འདོད་པ་དང་རྨོངས་པ་ལ་སོགས་པ་ལ་མི་ལྟོས་པར་བརྗོད་པ་ཡིན་ནོ། །དེ་སེམས་ཅན་རྗེས་འབྲེལ་ཅན་མ་ཡིན་ཞེས་བྱ་བ་ནི། སེམས་ཅན་དུ་ལྟ་བ་དང་རྗེས་སུ་འབྲེལ་བ་མ་ཡིན་པ་སྟེ། འདིས་ནི་བརྩེ་བ་ལས་རྗེས་སུ་དཔག་པར་བྱ་བ་མ་ཡིན་ནོ་ཞེས་བསྟན་པ་ཡིན་
ནོ། སྡུག་བསྔལ་ཉིད་གསུམ་ནི། སྡུག་བསྔལ་དང་འདུ་བྱེད་དང་འགྱུར་བའི་རང་བཞིན་ནོ། །མཉམ་པ་ཉིད་དོ་ཞེས་བྱ་བ་ནི་དེ་དག་བདག་ཁོ་ན་ཡིན་གྱི་གཞན་ནི་མ་ཡིན་ནོ་ཞེས་བྱ་བར་རོ། །ཇི་སྐད་དུ། སེམས་ཅན་ཀུན་ལ་རྟག་ཏུ་བྱམས་དང་བདག་གི་ཐུགས། །མངའ་བས་ཁྱོད་ལ་བདག་གིས་ཀྱང་ནི་ཅི་ཞིག་བྱ། །སྡུག་བསྔལ་དག་བཞིན་དེ་དག་ལ་ཡང་མགོན་ཁྱོད་ཀྱི། །ངོ་བོ་ཉིད་ཀྱིས་རྩུབ་པའི་ཚིག་ནི་ཇི་ལྟར་འཇུག །ཅེས་གསུངས་པ་བཞིན་ནོ། །སེམས་ཅན་དུ་ལྟ་བ་ནི་བརྒྱུད་ནས་སྡུག་བསྔལ་གྱི་རྒྱུ་ཡིན་པའི་ཕྱིར། ཡོངས་སུ་དོར་བའི་ཡུལ་ཡིན་ནོ་ཞེས་བརྗོད་པ་ནི་དེ་ལྟ་བུར་གྱུར་པའི་ཞེས་བྱ་བའོ། །བརྩེ་བ་ནི་སེམས་ཅན་དུ་ལྟ་བ་དང་འགལ་བ་ཡིན་ནོ་ཞེས་བརྗོད་པ་ནི་དེ་ཡང་ཞེས་བྱ་བའོ། །འགལ་བ་དེ་ཉིད་སྟོན་བའི་བདག་ཏུ་ལྟ་བ་མ་སྤངས་པ་ཞེས་བྱ་བ་ནི་བརྩེ་བ་ནི་ཆགས་པའི་རང་བཞིན་ཡིན་པའི་ཕྱིར། བདག་ཏུ་ཆགས་པ་མེད་ཀྱང་སེམས་ཅན་རྣམས་ལ་བདག་གི་བ་ཉིད་དུ་ཆགས་པས་ན་དེ་མེད་པའི་རང་བཞིན་འདོད་ཆགས་དང་བྲལ་བར་མི་འགྱུར་རོ་ཞེས་དོགས་པ་བསུ་བ་ནི། གལ་ཏེ་འདོད་ཆགས་དང་བརྩེ་བ་ཞེས་བྱ་བའོ། །བདག་གམ་དེ་དང་འབྲེལ་པ་ལ་ཆགས་པ་ནི་འདོད་ཆགས་ཡིན་ནོ་ཞེས་བཤད་པ་དེ་ནི་བདག་མིན་ཞེས་བྱ་བའོ། །བདག་གཞན་སྒྲོ་འདོགས་པ་ལས། བདག་གིས་མ་འོངས་པའི་བདེ་བ་མྱོང་བར་བྱའོ་ཞེས་བྱ་བ་ནི་འདོད་ཆགས་སོ། །འདིས་ནི་རྒྱུའི་ཁྱད་པར་བརྗོད་དོ། །དེ་བདག་མིན་པའི་ཆོས་ལ་ནི། །ཞེས་བྱ་བས་རི་ཡུལ་གྱི་ཁྱད་པར་བརྗོད་དོ། །བདག་དང་འབྲེལ་བའི་བདེ་བ་སྒྲུབ་པར་བྱེད་པ་ཉིད་དུ་མ་བཟུང་བའི་སེམས་ཅན་གྱི་ཚོགས་ལ་བརྩེ་བ་ནི་འདོད་ཆགས་མ་ཡིན་ནོ་ཞེས་བརྗོད་པ་ནི། །སྡུག་བསྔལ་གྱི་རྒྱུན་ལ་རེག་པ་ནི་འཛིན་པའོ། །དེ་ཉིད་འབའ་ཞིག་ནི་ཙམ་མོ། །དེས་ན་བདག་དང་འབྲེལ་བ་དང་བྲལ་བའི་སེམས་ཅན་ལ་ཆགས་པ་ཙམ་ནི་བརྩེ་བ་ཡིན་ནོ་ཞེས་བྱ་བའི་དོན་ཏོ། །འདོད་ཆགས་ནི་སྒྲོ་བཏགས་པ་དེ་ལས་འཇུག་པ་ཡིན་པ་ཞེས་འབྲེལ་ཏོ། །དེ་ཅི་འདྲ་བ་
ཞིག་ཅེ་ན། བདག་ཉིད་མ་འོངས་པའི་ཞེས་སྨོས་སོ། །མ་འོངས་པའི་བདེ་བ་དེ་ལ་འདོད་པ་ནི་དགའ་བའོ། །དེ་ལ་སྦྱར་བ་ནི་སྟོབས་པར་བྱེད་པ་སྟེ། དེས་བདག་ཉིད་དབང་དུ་བྱས་པའི་འདོད་ཆགས་ཡིན་ནོ། །ཅི་ཞིག་བྱས་ནས་འཇུག་སྙམ་ན། མ་འོངས་པ་མེད་ནས་སྒྲོ་བཏགས་ནས་སོ། །དེའི་བདག་ཉིད་མ་ཡིན་པ་ལ་ནི་བདེ་བ་ལ་སོགས་པའི་རང་བཞིན་མ་ཡིན་པ་ལའོ། །དེའི་བདག་ཉིད་དུ་ཞེས་བྱ་བ་ནི་བདེ་བ་ལ་སོགས་པའི་རང་བཞིན་དུའོ། །མངོན་དུ་བྱས་པ་ཉིད་ལས་འཇུག་པ་ཡིན་ནོ་ཞེས་འབྲེལ་ཏོ། །ཅིའི་དོན་དུ་ཞེ་ན། ལོག་པར་མངོན་པར་ཞེས་བྱ་བའོ། །གལ་ཏེ་ཡང་བདག་ལ་རང་གི་བདེ་བ་དང༌། འབྲེལ་པ་ཉིད་དུ་མི་འཛིན་པ་ཡིན་ཡང༌། གཞན་གྱི་བདེ་བའི་བྱེད་པ་པོ་ཉིད་དུ་ནི། བདག་ལ་སྒྲོ་འདོགས་པར་འགྱུར་བ་ཁོ་ནའོ་ཞེས་དོགས་བ་བསུ་བ་ནི། །གལ་ཏེ་བདག་གིས་ཞེས་བྱ་བའོ། །འཇུག་པར་ཅི་ལྟར་འགྱུར་ཞེས་བྱ་བ་ནི་སྐབས་སུ་བབས་པ་ཡིན་ནོ། །བདེ་བ་དག་གི་མཐར་ཐུག་པ་ཡིན་ན་ནི་གདོན་མི་ཟ་བར་བདག་སྒྲོ་འདོགས་པར་འགྱུར་བ་ཡིན་ནོ་ཞེས་བཤད་པ་ནི་གལ་ཏེ་ཞེས་བྱ་བའོ། །དེ་ལྟ་ཉིད་དུ་ཞེས་བྱ་བ་ནི་སེམས་ཅན་དུ་ལྟ་བ་མེད་པར་མི་འཇུག་པ་ཞེས་བྱ་བར་རོ། །གཞན་གྱི་མཐར་ཐུག་བ་ཡིན་ན་བདག་སྒྲོ་འདོགས་པས་ཅི་ཞིག་བྱ་ཞེས་བརྗོད་པ་ནི། གཞན་དོན་ཞེས་བྱ་བའོ། །ཇི་ལྟར་ཆེད་ཀ་མི་ཆེ་སྙམ་ན། རྒྱལ་པོའི་ཞེས་གསུངས་སོ། །འདི་ལ་ཞེས་བྱ་བ་ནི་ངའི་སྙམ་པའི་བློ་དང་བྲལ་བ་འཇུག་པའོ། །མི་འཐད་མེད་ཅེས་བྱ་བ་ནི་འཐད་པ་ཉིད་དོ་ཞེས་བྱ་བའི་ཐ་ཚིག་གོ །ཡང་ན་རྣམ་པར་རྟོག་པར་མི་བྱེད་ཀྱང་སྔ་མ་སྔ་མའི་འདུ་བྱེད་ལས་འཇུག་པ་ཡིན་ནོ་ཞེས་བརྗོད་པ་ནི་ཡང་སྔ་མ་སྔ་མའི་ཞེས་བྱའོ། །འདི་ཉིད་གསལ་འདེབས་པ་ནི་རྒྱུན་མཐོང་ཞེས་བྱ་བ་ལ་སོགས་པའ་། །མཐོང་བ་ཡོད་པ་མ་ཡིན་ན་ནི་མངོན་སུམ་གྱི་ཡུལ་མ་ཡིན་པའི་ཕྱིར་རོ། །བདག་འགའ་ཞིག་ཡོད་བ་ཡང་མ་ཡིན་ནའོ། །གནས་མ་ཡིན་ན་ནི་སེམས་ཅན་གྱི་དོན་གྱིས་སྟོང་པ་མ་ཡིན་པའོ། །ཁྱེད་ཅག་ཅེས་
བྱ་བ་ནི་འཁོར་བ་པའོ། །ཞེ་སྡང་གི་རང་བ་ཞིན་དུ་ཞེས་བྱ་བ་ནི་ཞེ་སྡང་གི་ཕྱོགས་གཅིག་དང་མཚུངས་པར་ལྡན་པའི་ཕྱིར་རོ། །གལ་ཏེ་བ་དག་ལ་གནོད་བར་བྱེད་པ་ལ་སྡང་བ་ནི་བདག་ཏུ་ལྟ་བའི་སྙིང་པོ་ཅན་ཉིད་ལས་བྱུང་བ་ཡིན་གྱི། བདག་ཏུ་ལྟ་བ་སྤངས་པ་ལ་ནི་མ་ཡིན་ནོ་སྙམ་ན། དེའི་སྙིང་པོ་ཅན་མ་ཡིན་མོད་རྒྱབ་ཀྱིས་ཕྱོགས་པ་ཙམ་ནི་འགྱུར་བ་ཡིན་ནོ་ཞེས་བརྗོད་པ་ནི། མི་གཙང་བ་ལ་སོགས་པ་མཐོང་བ་ལས་ཞེས་བྱ་བའོ། །འདིར་ཡང༌། བྱམས་སོགས་རྨོངས་དང་འགལ་མེད་ཕྱིར། །ཤིན་ཏུ་ཉེས་པ་ཚར་གཅོད་མིན། །ཞེས་འཆད་པར་འགྱུར་བའི་ལན་བརྗོད་པ་ནི། མི་སྡུག་པ་བསྒོམས་པས་ནི་ཞེས་བྱ་བའོ། །མི་རྟག་པ་ལ་སོགས་པ་མཐོང་ཡང་ཞེ་སྡང་ཅི་སྟེ་མི་འགྱུར་སྙམ་ན། བདག་ཡོད་ནི་ཞེས་གསུངས་སོ། །བདག་དེ་བདག་ཅག་ལ་སོགས་པ་གཞན་ལ་སྡུག་བསྔལ་བར་བྱེད་པ་ཡིན་ནོ། །མི་རྟག་པ་ཉིད་དུ་མཐོང་བ་ནི་ཁྲོ་བ་དང་འགལ་བ་ཡིན་ནོ་ཞེས་བཤད་པ་ནི། གང་གི་ཚེ་ཞེས་བྱ་བའོ། །འདི་ཞེས་བྱ་བ་ནི་བདག་ཅག་ལ་གནོད་པར་བྱེད་པའོ། །དེ་ལ་ཞེས་བྱ་བ་ནི་བདག་ཅག་ལ་སོགས་པ་ལ་གནོད་པར་བྱེད་པ་ལའོ། །དེའི་ཚེ་ཞེས་ཁོང་ནས་ཕྱུང་ལ་སྡང་བར་འཛིན་པ་དོན་མེད་དོ་ཞེས་སྦྱར་རོ། །འདོད་ཆགས་དང་བྲལ་བ་རྣམས་ལ་ནི་བདག་ཏུ་ལྟ་བ་མེད་པའི་ཕྱིར་བདག་ཏུ་ལྟ་བའི་སྙིང་པོ་ཅན་གྱི་སྡང་བ་མི་འབྱུང་ངོ༌། །དེས་ན་དེ་དག་གི་བརྩེ་བ་ཞེ་སྡང་དང་མཚུངས་པར་ལྡན་པ་མ་ཡིན་ནོ་ཞེས་བརྗོད་པའི་གཏི་མུག་ཅེས་བྱ་བ་ལ་སོགས་པའོ། །ཉེས་རྒྱུ་ན་གནོད་པ་བྱེད་པའོ། །ཉེས་མེད་ནི་སྡང་བ་དང་མཚུངས་པར་མི་ལྡན་པའོ། །དེའི་ཚེ་ཞེས་ཁོད་ནས་ཕྱུང་ལ། འཁྲུག་པར་འགྱུར་བ་ཡིན་ན་ཞེས་བྱ་བར་རོ། །གལ་ཏེ་བཅོམ་ལྡན་འདས་འདོད་ཆགས་དང་བྲལ་བ་འཁོར་བ་ཇི་སྲིད་དུ་བ་ཞུགས་ན་ལུས་ཀྱི་འཆི་བ་ཡོད་པའི་ཕྱིར་མ་ཐར་བར་འགྱུར་རོ་སྙམ་པའི་དོགས་པ་བསུ་བ་ནི། གལ་ཏེ་འདོད་ཆགས་དང་བྲལ་བ་ཞེས་བྱ་བའོ། །ཐུགས་རྗེས་སྐུ་མངའ་བ་ཡིན་ཡང་འདོད་ཆགས་ལ་སོགས་པ་དྲི་མ་དང་བྲལ་བའི་ཕྱིར་
ཐུགས་རྣམ་བར་གྲོལ་བ་ཁོ་ནའོ་ཞེས་གསུངས་པ་ནི། མ་ཡིན་ཏེ་ཞེས་བྱ་བའོ། །གྲོལ་མེད་མ་ཡིན་ཞེས་བྱ་བ་ནི། བཅོམ་ལྡན་འདས་ལ་ལྟོས་པ་སྟེ། མ་གྲོལ་བ་མ་ཡིན་གྱི་གྲོལ་བ་ཁོ་ནའོ། །མ་གྲོལ་བའི་རང་བཞིན་ནི་འདི་ཡིན་ཏེ། སྔོན་གྱི་འདུ་བྱེད་ཀྱི་ཕུང་པོ་རྣམས་ཟད་ན་གཞན་མཚམས་སྦྱོར་བའོ། །འདི་ཡང་བཅོམ་ལྡན་འདས་ལ་མི་མངའ་སྟེ། ངེས་ན་གྲོལ་བ་མེད་པ་མ་ཡིན་ནོ། །བྱང་ཆུབ་སེམས་དཔའ་རྣམས་ནི་མཚམས་སྦྱོར་བ་དང་བཅས་པ་ཡིན་ཡང་ཐུགས་རྗེའི་དབང་གིས་ཉེས་པ་ཁོ་ནར་གནས་པ་ཡིན་གྱི། འཁོར་བའི་སྐྱེ་བོ་ལྟ་བུ་ནི་མ་ཡིན་ནོ་ཞེས་སྨྲས་པ་ནི། འདུ་བྱེད་ནུས་པ་མ་ཟད་པ་ཞེས་བྱ་སྟེ། སྔ་མ་ཟད་ཀྱང་གཞན་འབྱུང་བའི་ཕྱིར་རོ། །གནས་པ་ནི་མྱ་ངན་ལས་མི་འདའ་བའོ། །ཡང་ན་སྔ་མ་ནི་ཉན་ཐོས་ལ་ལྟོས་པ་ཡིན་ལ། ཕྱི་མ་ནི་བཅོམ་ལྡན་འདས་ལ་ལྟོས་པས་བརྗོད་པ་ཡིན་ནོ། །འདུ་བྱེད་ཀྱི་སྒྲ་ཡང་ལེགས་པའི་ལས་ལ་འཇུག་པ་ཡིན་ནོ། །འདུ་བྱེད་ཡོད་པ་དང་མེད་པ་ལས་གནས་པ་དང་མི་གནས་པ་འབའ་ཞིག་ཏུ་ཡང་མ་ཟད་དེ་འོན་ཀྱང་ཐུགས་རྗེའི་ཁྱད་པར་ཡོད་པ་དང་མེད་པ་དག་ལས་ཀྱང་ཡིན་ནོ་ཞེས་བརྗོད་པ་ནི། སྙིང་རྗེ་དམན་པ་ཉིད་ཕྱིར་ཡང༌། །ཞེས་བྱ་བའོ། །སེམས་ཅན་གཞན་གྱི་ངོར་མཛད་པ་རག་ལས་པ་ཅན་དེ་དག་ནིའོ། །ཡང་གི་སྒྲས་འཕངས་པའི་གཏན་ཚིགས་བཤད་པ་ནི། འདུ་བྱེད་ཟད་པའི་རྒྱུའི་ཕྱིར་གནས་པའི་འབད་རྩོལ་མེད་ཅེས་འབྲེལ་ཏོ། །དེར་ཞེས་བྱ་བ་ནི་གནས་པའམ། ཐུགས་རྗེ་དང་ལྡན་པ་ལའོ།། བདག་ཏུ་ལྟ་བ་ཙམ་ནི་རྨོངས་པ་མ་ཡིན་ཏེ། དེ་མེད་ཀྱང་རྒྱུན་དུ་ཞུགས་ལ། རྨོངས་པར་ཁས་བླངས་པའི་ཕྱིར་རོ་ཞེས་དོགས་པ་བསུ་བ་ནི། གལ་ཏེ་ཞེས་བྱ་བའོ། །སྲིད་པ་ཆད་བ་ནི་འཁོར་བ་ལྡོག་བའོ། །ཇི་ལྟར་སྙམ་ན་འཇིགས་ཞེས་སྨོས་སོ། །ཇི་ལྟར་རྒྱུན་དུ་ཞུགས་པ་ལ་འཇིག་ཚོགས་དང་བྲལ་བ་ཡོད་པར་རྟོགས་སྙམ་ན་འདི་ལྟར་ཞེས་སྨོས་སོ། །ཅི་སྟེ་ཡང་འཇིག་ཚོགས་སུ་ལྟ་བ་དང་བྲལ་བ་ཡང་ཉེས་པ་འབྱུང་བའི་རྒྱུ་ཡོད་པས་ན། སྲིད་པ་ཚད་མ་ཡིན་ནོ་སྙམ་དུ་དོགས་པ་བསུ་ནས་སྨྲས་པ་ནི་གཏི་མུག་ཅེས་བྱ་བའོ། །དེས་ན་
དེ་དང་བྲལ་ན་སྲིད་པ་མི་འཆད་སྙམ་དུ་བསམས་པའོ། །དེས་ན་ཞེས་བྱ་བ་ནི་འཇིག་ཚོགས་སུ་ལྟ་བ་དང་བྲལ་བས་སོ། །ལམ་གཞན་ནི་བསྒོམ་པའི་ལམ་མོ། །རྩོད་པ་འདི་ལ་ལན་བཤད་པ་གལ་ཏེ་ཞེས་བྱ་བའོ། །རྒྱུན་དུ་ཞུགས་པའི་ལམ་དུ་སྤང་བར་བྱ་བའི་བདག་ཏུ་ལྟ་བ་ནི། མངོན་པར་འདུས་བྱས་པ་ལས་གྱུར་པ་ཉིད་ཡིན་གྱི། ལྷན་ཅིག་སྐྱེས་པ་ནི་མ་ཡིན་ནོ། །དེས་མངོན་པར་འདུས་བྱས་པ་ཉིད་ལྡོག་གི་ལྷན་ཅིག་སྐྱེས་པ་ནི་མ་ཡིན་ནོ། །དབང་པོ་རྣོན་པོའི་ཡང་རྣོན་པོ་ནི་ལམ་དང་པོ་ཉིད་དུ་སྨོས་པ་གང་དང་བྲལ་བའི་ཕྱིར་སྲིད་པ་སྲིད་པ་མེད་པར་འགྱུར་བ་ཁོ་ནའོ་ཞེས་བརྗོད་པ་ནི། སྤངས་ན་ཞེས་བྱ་བ་ཡིན་ནོ། །ཅིའི་ཕྱིར་ཐམས་ཅད་མི་སྤོང་སྙམ་ན། མངོན་པར་འདུ་བྱེད་པ་ལས་བྱུང་བ་ཞེས་སྨོས་སོ། །འདི་ཉིད་སྤོང་གི་གཞན་མ་ཡིན་ནོ་ཞེས་བྱ་བ་གང་ལས་ཤེ་ན། ལམ་དང་པོ་ནི་ཞེས་གསུངས་སོ། །མཐོང་བ་ཙམ་གྱིས་ཀྱང་མངོན་པར་འདུ་བྱེད་པ་ལས་བྱུང་བའི་བདག་ཏུ་ལྟ་བ་ཇི་ལྟར་ལྡོག་ཅེ་ན། གཞི་མེད་པའི་ཉོན་མོངས་པ་ཡིན་པའི་ཕྱིར་ཞེས་སྦྱར་རོ། །གང་གིས་དེ་སྤོང་བ་གཞི་མེད་པའི་ཉོན་མོངས་པ་ཡིན་པ་ཅིའི་ཕྱིར་སྙམ་ན། ཉེ་བར་བསྟན་པ་ལས་བྱུང་བ་ཞེས་བྱ་བའོ། །བཟློག་པ་ནི་བདག་མེད་པའོ། །འདི་ནི་ལན་དང་པོ་གཉི་ག་ལྡོག་པ་ལ་གསལ་བ་མེད་པར་བརྗོད་དོ། །འོ་ན་ལྷན་ཅིག་བྱེད་པ་ཇི་ལྟར་ལྡོག་ཅེ་ན། ལྷན་ཅིག་སྐྱེས་པའི་ཞེས་བྱ་བའོ། །བསྟན་པའི་ཕྱིར་གཞི་ཟུག་པའི་ཕྱིར་རོ། །བསྒོམ་པའི་ལམ་ཉིད་ཀྱིས་ཞེས་བྱ་བ་ནི་གོམས་པས་བསྐྱེད་པའི་བསྟན་པ་དང་ལྡན་པ་ཉིད་ཀྱིས་སོ། །ཇི་ལྟར་དེ་ཉིད་ཀྱིས་ཞེས་ངེས་པར་འཛིན་སྙམ་ན་ཞེས་བྱ་བ་བདེན་པ་མཐོང་བ་ཙམ་གྱིས་ལྷན་ཅིག་སྐྱེས་པ་མ་སྤངས་པའི་ཕྱིར་ཏེ། མ་བཅོམ་པའི་ཕྱིར་རོ། །གང་གིས་འདོད་པས་ཞེས་བྱ་བ་ནི་དབང་པོ་རྣོན་པོའི་རྣོན་པོའོ། །དེ་བཤད་པ་ནི་ཤེས་རབ་རྣོན་པོ་ཞེས་བྱ་བའོ། །ཤེས་རབ་རྣོན་པོ་དེའི་ལམ་དང་པོ་ཉིད་དོ། །དངོས་པོ་མེད་ན་ཉེ་བར་བསྟན་པ་ཙམ་རྒྱུ་ཡིན་པའི་ཕྱིར། ལྷན་ཅིག་སྐྱེས་པ་མངོན་པར་འདུས་བྱས་པ་ལས་གྱུར་པ་ལས་ཐ་མི་དད་བར་དོགས་པ་བསུ་བ་ནི། གལ་ཏེ་ཞེས་བྱ་བའོ། །དེ་ལ་ནི་བདག་ལའོ། །གཞན་དུ་ནི་
མ་ཡིན་ནོ་ཞེས་བྱ་བར་ནི་མངོན་བར་འདུས་མ་བྱས་པའོ། །སྐྱེད་པར་བྱེད་པ་ནི། སྐྱེད་པར་བྱེད་པའི་ཞེས་བྱ་བའོ། །རྣམ་པ་ཐ་མི་དད་ཀྱང་ལྷན་ཅིག་སྐྱེས་པ་བག་ཆགས་ཙམ་ལས་བྱུང་བས་ན། རྒྱུ་ཐ་དད་པའི་ཕྱིར་ཐ་དད་པར་བརྗོད་པ་ནི་བདེ་བར་ཞེས་བྱ་བའོ། །མངོན་པར་འདུས་བྱས་པ་ལས་ནི་དེ་ལྟར་མ་ཡིན་ཏེ། དེ་མེད་ཀྱང་བསྟན་བཅོས་མི་ཤེས་པ་རྣམས་དང༌། རྒྱུན་དུ་ཞུགས་པ་ཡོད་པའི་ཕྱིར་རོ། །འོན་ཏེ་དེ་རྣམས་ལ་ཉེ་བར་བསྟན་པ་མེད་པའི་ཕྱིར་མཉམ་པ་ཉིད་དུ་མི་འགྱུར་རོ་སྙམ་ན། ང་ཞེས་མཐོང་བ་མེད་པར་ནི། །ཞེས་གསུངས་སོ། །དེ་དག་གི་བདག་ལ་ཆགས་པ་ཉིད་བདག་ཏུ་ལྟ་བའི་རྣམ་པ་ཅན་དུ་ཉམས་སུ་མྱོང་བས་གྲུབ་པོ་ཞེས་བྱ་བའི་དོན་ཏོ། །ཆགས་པ་ཉམས་སུ་མྱོང་བ་ལ་བྱེད་པ་འབྲས་བུའི་རྟགས་ཡིན་ནོ་ཞེས་བརྗོད་པ་ནི། བདག་ལ་སྲེད་པ་མེད་པར་ཡང་ཞེས་བྱ་བའོ། །རྒྱུའི་ཁྱད་པར་བཤད་པ་ནི་ཐོག་མ་མེད་པའི་བག་ཆགས་ཀྱི་དབང་གིས་ཞེས་བྱ་བའོ། །དེ་མ་སྤངས་པའི་ཕྱིར་ན་ཞེས་བྱ་བ་ནི་ངའོ་སྙམ་པའི་བློ་མ་སྤངས་པའི་ཕྱིར་རོ། །དེ་ལྟ་ན་ཡང་འདི་འཁོར་བ་པ་མ་ཡིན་ནོ་སྙམ་དུ་དོགས་པ་བསུ་ནས་གང་ཞིག་ཅེས་གསུངས་སོ། །སེམས་ཅན་དུ་ལྟ་བ་གང་གིས་བཅུག་པའི་བདག་ཏུ་ཞེ་ན་པ་དང་འབྲེལ་པ་དེ་ལ་དེ་སྐད་ཅེས་བརྗོད་དོ། །ཇི་ལྟར་སྲིད་པ་མེད་པར་འགྱུར་ཏེ། སྲིད་པ་དང་བཅས་པ་ཉིད་དོ་ཞེས་བྱ་བའི་དོན་ཏོ། །ལམ་དང་པོར་ལྷན་ཅིག་སྐྱེས་པ་མ་སྤངས་པའི་ཕྱིར་ཐར་པ་མེད་པར་སྨྲས་པ་ན་ཐར་པ་ལ་ཉོན་མོངས་པ་མེད་དོ་ཞེས་བརྗོད་པ་ཡིན་ནོ་ཞེས་བརྗོད་པ་ནི། འདིས་ནི་ཞི་བའི་ཞེས་གསུངས་སོ། །གལ་ཏེ་བདག་མེད་པའི་སྨྲ་བ་ལྟར་ན་ཡོངས་སུ་ཚིམ་པ་མེད་བའི་ཕྱིར་ཐར་པ་གྱ་ནོམ་པར་མི་འགྱུར་ཏེ། དེས་ན་བདག་ཁས་བླངས་པ་ཁོ་ན་ལ་ཐར་བ་གྱ་ནོམ་ཡོད་པ་ཡིན་ནོ་ཞེས་དོགས་པ་བསུ་བ་ནི་གལ་ཏེ་བདག་ཅེས་བྱ་བའོ། །གལ་ཏེ་འགྱུར་ན་ཞེས་བྱ་བ་ནི་སྐབས་ཀྱིས་ཡོངས་སུ་ཚིམ་པར་རོ། །བདག་ཁས་ལེན་པ་ཐར་པ་ཉིད་མེད་དོ་ཞེས་བརྗོད་པ་ནི། སྡུག་བསྔལ་སྐྱེ་བའི་ཞེས་བྱ་བ་སྟེ། འཁོར་བ་མི་སྐྱེ་བའིའོ། །སྡུག་བསྔལ་སྐྱེ་བའི་རྒྱུ་དེ་རྟག་པ་ལ་ག་ལས་ཡིན་ཏེ། མ་ཡིན་པ་ཁོ་ནའོ། །རིམ་དང་ཅིག་ཅར་གྱི་དོན་བྱེད་པ་འགལ་བའི་
ཕྱིར་རོ། །དེ་བཞིན་དུ་སྡུག་བསྔལ་མི་སྐྱེ་བའི་རྒྱུ་ཉིད་ཀྱང་རྟག་པ་ལ་ཡོད་དེ་དེ་མེད་པ་ཁོ་ནའོ། །འདི་ལྟར་བཅིངས་པ་དང་ཐར་པ་བདག་འབྲེལ་པ་ནི་རྒྱུ་ཉིད་ཡིན་ན་དེ་ཡང་རྟག་པ་ལ་སྲིད་པ་མ་ཡིན་ནོ། །དེ་ཉིད་དང་གཞན་ཉིད་ཀྱི་ཕྱོགས་དག་ལ་ཁྱད་པར་མེད་བ་འདུག་པ་དང་ལྡན་པ་ཡང་མེད་པ་ཁོ་ནའོ་ཞེས་བྱ་བའི་དོན་ཏོ། །དེའི་ཚེ་ཞེས་བྱ་བ་ནི་རྟག་པ་དང་ཁྱབ་པའི་ཚེའོ། །དོན་འདི་ཡིན་ཏེ། ཇི་ལྟར་ཁྱབ་པ་དང་རྟག་པའི་རང་བཞིན་ཉིད་ཀྱིས་ན་ནམ་མཁའ་ལ་རྗེས་སུ་འགྲོ་བ་དང་ལྡོག་པ་མེད་པའི་ཕྱིར་འགར་ཡང་ནུས་པ་མེད་བ་དོ་བཞིན་དུ་བདག་ཀྱང་འགྱུར་ཏེ་དེའི་རང་བཞིན་ཡིན་པས་སོ་ཞེས་བྱ་བའོ། །གཞན་ཡང་བདག་ནི་རང་དབང་དང་ནུས་པ་ཡིན་ན་དེའི་ཚེ་ཇི་ལྟར་བདག་ལ་སྡུག་བསྔལ་བ་སྐྱེད་ནུས་ཀྱང་རང་དབང་མེད་པའི་ཕྱིར་མི་སྐྱེད་པ་ཡིན་ནོ། །དེ་བཞིན་དུ་རང་དབང་ཡོད་ཀྱང་ནུས་པ་མེད་པའི་ཕྱིར་སྐྱེད་པ་མ་ཡིན་ནོ་ཞེས་རྟོགས་པར་བྱ་བའོ། །ཇི་ལྟར་མི་སྐྱེད་སྙམ་ན། རང་གསད་པར་ཞེས་གསུངས་སོ། །རྟོག་པ་དང་ལྡན་པ་ཡང་རྨོངས་པའི་དབང་གིས་བྱེད་དོ་ཞེ་ན། འོན་ཏེ་འདི་ཞས་གསུངས་སོ། །བདག་ཤེས་པ་ཤེས་པ་དེ་ཁོ་ནའི་ཤེས་པ་གལ་ཏེ་རྨོངས་པའི་དུས་ན་མེད་ན་མ་དམིགས་པ་མེད་པར་སྒྲུབ་པར་བྱེད་པ་ཡིན་ནོ་ཞེས་བརྗོད་པ་ནི། དེའི་ཚེ་བདག་ཉིད་ཅེས་བྱ་བའོ། །དེའི་རང་བཞིན་ཞེས་བྱ་བ་ནི་རྨོངས་པའི་རང་བཞིན་ཉིད་དོ། །གཞན་དུ་ཞེས་བྱ་བ་ནི་མ་རྨོངས་པའི་རང་བཞིན་ཉིད་དོ། །རྨོངས་བས་སྡུག་བསྔལ་བ་ནི་མ་ཡིན་ཏེ། འོན་ཀྱང་ལས་ཀྱིས་ཡིན་ནོ་སྙམ་དུ་དོགས་པ་བསུ་བ་ནི་འོན་ཏེ་ཞེས་བྱ་བའོ། །དེ་ལྟ་ན་ཡང་ཞེས་བྱ་བ་ནི་ལན་ནོ། །རྟག་པ་དང་ཁྱབ་པའི་སྡུག་བསྔལ་གང་ཡིན་པ་དེ་སྐྱེད་པ་ལ་ནི། ཆོས་མ་ཡིན་པ་ལ་སོགས་པའི་རྒྱུ་ནི་འགའ་ཡང་མེད་དོ། །འདི་ལྟར་ཆོས་མ་ཡིན་པས། བདག་སྡུག་བསྔལ་གྱི་རང་བཞིན་ནམ། གཞན་ལ་བསྐྱེད་པའི་སྡུག་བསྔལ་ཐ་མི་དད་པའམ་ཐ་དད་བ་ཞིག་ཏུ་འགྱུར། དེ་ལ་ཕྱོགས་དང་པོ་སུན་འབྱིན་པ་ནི་གལ་ཏེ་ང་དེ་དེའི་ཆེ་ཞེས་བྱ་བའོ། །ཆོས་མ་ཡིན་པས་སྐྱེད་པའི་སྡུག་བསྔལ་གྱིས་བདག་སྡུག་བསྔལ་གྱི་རང་བཞིན་ཅན་
ལ་ནི་ཅིའང་བྱར་མེད་དོ། །རང་ཉིད་སྡུག་བསྔལ་གྱི་རང་བཞིན་ཡིན་པའི་ཕྱིར་ཞེས་བྱ་བའི་དོན་ཏོ། །ཉེས་པ་གཞན་ནི་དེའི་ངོ་བོ་ཡིན་ན་ཞེས་བྱ་བ་སྟེ། སྡུག་བསྔལ་གྱི་ངོ་བོ་ཡིན་ནའོ། །།གཞན་དུ་མི་འགྱུར་ཏེ་ཞེས་བྱ་བ་ནི་སྡུག་བསྔལ་མ་ཡིན་པའི་ངོ་བོར་རོ། །དེས་ན་ཞེས་བྱ་བ་ནི་གཞན་དུ་མི་འགྱུར་ནའོ། །རང་བཞིན་གཞན་དུ་འགྱུར་ན་ཡང་མི་རྟག་པ་ཉིད་ཀྱིས་བདག་མ་ཡིན་པ་ཁོ་ནར་འགྱུར་རོ་ཞེས་བརྗོད་པ་ནི་གཞན་གྱི་དངོས་པོར་འགྱུར་ན་ནི་ཞེས་བྱ་བའོ། ཕྱོགས་གཉིས་པ་སུན་འབྱིན་པ་ནི། དེ་སྟེ་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་ནོ། །འདུ་བ་ཡང་ཞེས་བྱ་བ་ལ་སོགས་པ་ནི་ལན་ནོ། །གང་གིས་དེའི་སྟོབས་ལས་བདེ་བ་གཞན་གྱི་བདེ་བར་འགྱུར་བ་བདེ་བལ་སོགས་པ་འདུ་བ་དང་ཡང་འབྲེལ་བ་ཡང་ཅི་ཞིག་ཡོད་སྙམ་དུ་དགོངས་པའོ། །འོན་ཏོ་བདག་དང་བདེ་བ་དག་ལས་འདུ་བ་གཞན་མ་ཡིན་དེའི་ཚེ་གཞན་མ་ཡིན་པ་ཉིད་ན་ནི། གང་གིས་དེའི་སྟོབས་ཀྱིས་ཞེས་བྱ་བ་ལ་སོགས་པ་བརྗོད་པའི་སྐྱོན་དེ་ཉིད་དོ། །བཤད་ཟིན་ཀྱང་ལྷག་པ་བརྗོད་པའི་དོན་དུ་ཡང་ཟློས་པ་ནི། བདེ་བ་དང་བདེ་བ་མ་ཡིན་པ་ཞེས་བྱ་བ་ལ་སོགས་པའོ། །སོགས་པའི་སྒྲས་ནི་བསྟང་སྙོམས་གཟུང་ངོ༌། །ལྷག་པ་ཉིད་བརྗོད་པ་ནི་ཅི་སྟེ་འདི་ཞེས་བྱ་བའོ། །གལ་ཏེ་འཁྲུལ་པ་དག་ལས་ཐ་སྙད་པ་ཡིན་ན་དེའི་ཚེ་བདག་མེད་དོ། །ཅིའི་ཕྱིར་ཞེ་ན་རིག་མེད་པའི་ཕྱིར་རོ། །བདག་བདེ་བའོ། །བདག་གི་བའི་རྒྱུ་ནི་འདིའི་སྙམ་པའི་འཁྲུལ་པ་ལས་མ་གཏོགས་པར་ནི་བདག་གི་པ་ཡོད་པ་མ་ཡིན་ནོ། །བདག་མ་དམིགས་པ་མ་གྲུབ་པར་དོགས་པ་བསུ་བ་ནི་དེའི་ཞེས་བྱ་བ་སྟེ། བདག་ཐམས་ཅད་རྗེས་སུ་སོང་བའི་ཕྱིར་འཁྲུལ་བའི་རང་བཞིན་ནོ། །རིག་པ་ནི་དམིགས་པའོ། །ལན་ནི་རང་རིག་ཅེས་བྱ་བའོ། །རང་རིག་པ་ཡིན་ན། ཇི་ལྟར་འཁྲུལ་ཏེ། བདག་གི་རང་བཞིན་བདེ་པ་ལ་སོགས་པར་མ་འགྱུར་རོ། །དེ་གྲུབ་པ་ཉིད་བདག་གྲུབ་པའི་རང་བཞིན་ཡིན་པའི་ཕྱིར་ངོ་སྙམ་དུ་དགོངས་པའོ། །ཀུན་དགའ་ཚང་པའི་རང་བཞིན་ཏེ། །ཐར་པ་དེ་ལས་གཞན་མ་ཡིན། །ཞེས་བྱ་བ་དེ་ལས་བརྗོད་པ་ནི། གལ་ཏེ་ཐར་ཀྱང་ཞེས་བྱ་བའོ། །དེ་ལ་ནི་ཐར་
བ་ལའོ། །དེ་ནི་བདག་གོ །རྨོངས་པ་ནི་འཁྲུལ་པའོ། །དོན་འདི་ཡིན་ཏེ། གལ་ཏེ་བདེ་བ་ལ་སོགས་པར་རྟོག་པ་འཁྲུལ་པ་ཡིན་ན། དེའི་ཚེ་ཐར་པ་ཡང་འཁྲུལ་པར་ཐལ་ཏེ། དེ་ལ་ཡང་བདེ་བ་རྟོགས་པར་ཁས་བླངས་པའི་ཕྱིར་རོ་ཞེས་བྱ་བའོ། །བདག་མེད་བ་ཁས་བླངས་ན་ནི་གྱ་ནོམ་པ་ཉིད་ཡོད་དོ་ཞེས་བརྗོད་པ་ནི་གང་ལ་ཞེས་བྱ་བའོ། །གཞི་གཅིག་པར་ཤེས་ན་ནི་དོན་ཅུང་ཟད་ཀྱང་གསོ་བར་བྱེད་པ་མ་ཡིན་ནོ། །བརྗོད་བ་ནི་གང་ཞིག་ཐར་ཏེ་ཞེས་བྱ་བའོ། །བཅིངས་པས་དེ་བཅིངས་པར་ཤེས་པས་ཐར་བའི་དུས་དེའི་ཚེ་ཅི་ཞིག་བྱ་སྟེ་ དགོས་པ ་ཅི་ཡང་མེད་དོ་ཞེས་བྱ་བའི་དོན་ཏོ། །འོ་ན་དེའི་ཚེ་སྔར་བཅིངས་བ་ཉིད་ དགོས་པ ་ཡིན་ནོ་སྙམ་དུ་དོགས་བ་བསུ་བ་ནི་གལ་ཏེ་སྔོན་ཞེས་བྱ་བའོ། །ལན་དུ་དེ་ཡང་ཞེས་བྱ་བའོ། །ཅིའི་ཕྱིར་མི་མཁོ་སྙམ་ན། རྟོག་སྔོན་བྱེད་པ་ཅན་མི་འགྱུར། །ཞེས་གསུངས་སོ། །གང་གི་ཕྱིར་སྔར་གྱི་འཁོར་བའི་རང་བཞིན་དང་གཅིག་པ་ཉིད་དོན་དམ་པར་མེད་བཞིན་དུ་ངེས་པའི་ཕྱིར་ཐར་པ་རྟོག་པ་སྔོན་དུ་བྱེད་པ་ཅན་དུ་མི་འགྱུར་རོ། །སེམས་དང་བཅས་པ་ནི་སྡུག་བསྔལ་གྱི་གནས་སྐབས་བདེ་བའི་གནས་སྐབས་གཅིག་ཏུ་བྱེད་པ་མེད་དོ། །དེས་ནང་སྔོན་དུ་གྱུར་ཏོ་ཞེས་བྱ་བ་གང་དུ་ཉེ་བར་མཁོ། །འོན་ཏེ་གཞི་ཐ་དད་པ་ཉིད་དུ་མི་འཐད་དོ་སྙམ་དུ་དོགས་པ་ནི། དེ་ཡང་ཞེས་བྱ་བའོ། །དེ་ནི་ཞེས་བྱ་བ་ནི་ལན་ནོ། །འོ་ན་གཞི་ཐ་དད་པ་ཡིན་ན་ཐར་པའི་དོན་དུ་ཇི་ལྟར་འཇུག་སྙམ་ན། ཡང་ན་དེ་ནི་ཞེས་བྱ་བའོ། །ང་སྡུག་བསྔལ་བ་བདེ་བར་གྱུར་ཅིག་སྙམ་པས་ནི་མི་འགྱུར་གྱི། འོན་ཀྱང་གཞི་དད་པ་ཡིན་ཡང་གཞན་བདེ་བར་བྱའོ་སྙམ་ནས་གཞན་གྱི་དོན་དུ་འཇུག་པ་ནི་འགལ་བ་མེད་པ་ཁོ་ནའོ། །འདི་ཡང་སྡར་དཔེར་ན་རྒྱལ་པོ་ཞེས་བྱ་བ་དེར་བསྟན་ཟིན་ཏོ། །ཐར་པ་དེ་ནི་ཞེས་བྱ་བ་ནི་མཇུག་སྡུད་པའོ། །དེ་ནི་ཞེས་བྱ་བ་ནི། གང་ལ་ཡོངས་སུ་ཚིམ་པའི་ཞེས་བྱ་བ་བརྗོད་པའོ། །གཞན་པ་ཞེས་བྱ་བ་ནི་གཞན་གྱིས་ཀུན་བརྟགས་པའོ། །བཟློག་པ་ནི་གྱ་ནོམ་པ་མ་ཡིན་པའོ། །འོན་ཏེ་ཞེས་བྱ་བ་ནི་གང་ཟག་ཏུ་སྨྲ་བའི་དོགས་པ་བསུ་བའོ། །རྟག་པ་བཞིན་དུ་བརྗོད་དུ་མེད་པ་ཡང་ཁས་བླང་བར་མི་འོས་ཏེ། རིགས་པ་དང་འགལ་བའི་ཕྱིར་རོ་ཞེས་
ལན་འདེབས་པ་ནི། དེ་ཡང་ཞེས་བྱ་བའོ། །མ་ཡིན་ཞེས་བྱ་བ་ནི་མ་ཡིན་པ་ཁོ་ནའོ་ཞེས་བྱ་བའི་དོན་ཏོ། །རྟག་པ་དང་འགལ་བ་དྲི་མ་དང་དྲི་མ་དང་ཅིག་ཅར་ཉིད་ཀྱིས་ཁྱབ་པའི་རྒྱུ་ཉིད་མི་རྟག་པ་ཉིད་ལ་རྣམ་པར་གནས་ཏེ།། མི་རྟག་པ་ཉིད་ཀྱིས་ཀྱང་ཁྱབ་བོ། །དེས་ན་དེ་མེད་པའི་ཕྱིར་རོ་འཆིང་གལ་ལྟོས་ནས་རྒྱུ་ཉིད་མ་ཡིན་ནོ་ཞེས་བྱ་བའི་དོན་ཏོ། །རྟག་པ་ཉིད་དུ་ཡང་བརྗོད་པར་བྱ་བ་མ་ཡིན་པ་ནི་རྒྱུ་མ་ཡིན་པར་བསྟན་བ་ནི་བཤད་པར་གསལ་ལོ། །འཆད་པ་ནི་མི་རྟག་པ་ཉིད་དུ་ཞེས་བྱ་བའོ། །ཇི་ལྟར་མི་རྟག་པ་ཉིད་མེད་པས་རྒྱུ་ཡིན་པ་འགོག་སྙམ་ན། རྒྱུ་ལ་ནི་ཞེས་སྨོས་སོ། །དེས་ན་ཞེས་བྱ་བ་ནི་ཁྱབ་པ་ངེས་པས་སོ། །འོན་ཏེ་བཅིངས་པ་དང་ཞེས་བྱ་བ་ལ་སོགས་པ་ནི། གཉི་གའི་བདག་ཉིད་ཅན་མ་ཡིན་པ་རྒྱུ་ཉིད་དུ་དོགས་པ་བསུ་བའོ། །གཞི་གཅིག་པ་ཉིད་ནི་མི་རྟག་པ་འགོག་པའི་གཏན་ཚིགས་ཡིན་ལ། རྒྱུ་ཡིན་པ་ཉིད་ནི་རྟག་པ་འགོག་པའི་སྟེ། དེས་ན་གཉི་གའི་རང་བཞིན་ཉིད་འགོག་པའོ། །གཉི་གའི་བདག་ཉིད་ཀྱིས་བཟློག་པ་ལ་གཏན་ཚིགས་གཞན་དུ་གྲུབ་པོ་ཞེས་བརྗོད་པ་ནི། རྟག་དང་མི་རྟག་ཅེས་བྱ་བའོ། །ཅིའི་ཕྱིར་སྙམ་ན་ཐམས་ཅད་ཅེས་བྱ་བའོ། །ཐམས་ཅད་གཉི་གའི་རང་བཞིན་དུ་དམིགས་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་གཞན་དུ་མི་འགྱུར་ན་ཞེས་བྱ་བ་ནི་གཉི་ག་མ་ཡིན་པའི་རང་བཞིན་མ་ཡིན་ནའོ། །གཉི་གའི་རང་བཞིན་དུ་འགྱུར་རོ་ཞེ་ན་ཞེས་བྱ་བ་ནི་རྟག་པ་དང་མི་རྟག་པའི་རང་བཞིན་དུའོ། །མི་འཇིག་པ་ནི་འཇིག་པ་དང་འགལ་བ་ཡིན་ནོ་ཞས་ལན་ལྡོན་པ་ནི། གང་གི་རང་བཞིན་ཞེས་བྱ་བའོ། །གལ་ཏེ་གདོན་མི་ཟ་བར་བདག་ཅག་གི་འདོད་པ་ལས་བཟློག་པར་བརྗོད་པར་བྱ་བ་ཡིན་ན། རྟག་ཅེས་བྱ་བར་བརྗོད་པར་བྱ་བ་ཡིན་ནོ་ཞེས་བརྗོད་པ་ནི། དེས་ན་ངོ་ཚའི་ཞེས་བྱ་བའོ། །ཇི་ལྟར་འགལ་སྙམ་ན། གང་གི་ཕྱིར་ཞེས་བྱ་བའོ། །རྟག་པ་དང་གཞན་པ་དག་འགལ་བར་ཚད་མས་གྲུབ་པར་བྱ་བའི་ཕྱིར་ཞིག་བ་དང་མ་དམིགས་དང་ཞེས་བྱ་བ་ལ་སོགས་པའོ། །དེ་ལྟ་ན་ཡང་འདི་གཉིས་མི་འགལ་ལོ་སྙམ་ན། དམིགས་པ་དང་མ་དམིགས་པ་དག་ཀྱང་ཞེས་བྱ་བའོ། །ཅི་སྟེ་གཅིག་ཏུ་མི་འགྱུར་སྙམ་ན། གཅིག་
ཉིད་དུ་མི་འགྱུར་སྙམ་དུ་རྟོགས་པ་གང་ཞེ་ན་ཞེས་བྱ་བ་གསུངས་སོ། །གཅིག་ཉིད་དུ་རྣམ་པར་འཇོག་པ་ནི་མི་འཐད་དོ་ཞེས་བརྗོད་པ་ནི། གལ་ཏེ་མ་རྟོགས་ཞེས་བྱ་བའོ། །གལ་ཏེ་རྟག་པ་ཞེས་བྱ་བ་ནི་འཆད་པའོ། །འདིས་ནི་རྟོགས་ཡིན་ན་ཞེས་བྱ་བའི་མཐར་ཐུག་པ་རྣམ་པར་བཀྲལ་ཏོ། །འདི་ནི་ཧ་ཅང་བབ་ཅོལ་ཡིན་ཞེས་བྱ་བ་རྣམ་པར་འགྲེལ་པ་ནི་དེའི་ཚེ་རྟོགས་པ་དང་ཞེས་བྱ་བའོ། །སྔ་མ་དང་ཕྱིར་མ་གཅིག་ཏུ་ཞེས་བྱ་བ་ནི་ལྷག་མའོ། །དེ་ཁོ་ནར་ནི་དེ་ཉིད་རྟོགས་པ་མ་ཡིན་ཏེ། མི་རྟག་པ་ཉིད་དུ་ཁས་བླངས་པའི་ཕྱིར་རོ། །བཟློག་པ་ནི་བརྗོད་པ་ན་དེ་ལྟར་ན་ཡང་ཞེས་བྱ་བའོ། །ཇི་ལྟར་མ་འབྲེལ་སྙམ་ན། གཅིག་ཉིད་དུ་རྟོགས་པ་ནི་ཞེས་གསུངས་སོ། །དེ་ཉིད་འདི་ཡིན་ནོ་ཞེས་མཐོང་བའི་རང་བཞིན་དང༌། ལྷན་ཅིག་གཅིག་ཉིད་དུ་རྟོགས་པའི་རྟག་པ་གང་ཡིན་པ་དེ་ནི། གཞན་དུ་ཞེས་བྱ་བ་མི་རྟག་པའི་རང་བཞིན་དུ་རྟོགས་པར་བྱ་མི་ནུས་སོ། །རྟོགས་པ་དང་མ་རྟོགས་པ་དག་གཅིག་པ་ཉིད་ནི་མ་འབྲེལ་པ་ཡིན་ཏེ། ཚད་མས་སྤངས་པ་ཡིན་ནོ་ཞེས་བྱ་བའི་དོན་ཏོ། ཇི་ལྟར་གཞན་དུ་རྟོགས་པར་བྱ་བ་མི་ནུས་སྙམ་ན། མ་རྟོགས་པ་ཉིད་ནི་ཞེས་གསུངས་སོ། །འདི་ལ་དཔེ་བརྗོད་པ་ནི་རི་བོང་གི་རྭ་ཞེས་བྱ་བ་ཡིན་ནོ། །དེ་ལ་གཅིག་ཅེས་བྱ་བ་ནི་གཞན་གྱི་དོགས་པ་བསུ་བའོ། །རི་བོང་གི་རྭ་དང་རྟོགས་པ་དེ་ལ་རི་བོང་གི་རྭ་གཅིག་རྟོགས་པ་མེད་པའི་ཕྱིར་དེ་ནི་རྟོགས་བ་དང་གཅིག་མ་ཡིན་ནོ་ཞེ་ན། ལན་བུ་འདིར་ཡང་ཞེས་བྱ་བ་ཡིན་ཏེ། རྟོགས་པ་དང་མ་རྟོགས་པའི་ནང་ནས་སོ། །མ་རྟོགས་པ་ནི་མི་རྟག་པ་ཉིད་དོ། །དེས་ན་མ་རྟོགས་པ་མི་རྟག་པའི་རང་བཞིན་ནི། རྟོགས་པ་དང་རྟག་པའི་རང་བཞིན་དང་ལྷན་ཅིག་གཅིག་ཡིན་པར་ངེས་པ་ཇི་ལྟར་ནུས་ཏེ་རི་བོང་གི་རྭ་བཞིན་ནོ་ཞེས་བྱ་བར་དགོངས། འོན་ཏེ་མི་རྟག་པ་ཉིད་བཞིན་དུ་རྟག་པ་ཡང་མ་རྟོགས་པར་འགྱུར་ཏེ། དེས་ན་འདི་གཉིས་ལ་འགལ་བ་མེད་དོ་སྙམ་ན། བཤད་པ་མཐོང་བ་གང་ཞིག་དེ་ཉིད་འདི་ཡིན་ནོ་ཞེས་མཐོང་བཞིན་པ་དང་ལྷན་ཅིག་གཅིག་ཏུ་རྟོགས་པའི་མཐོང་བ་དེ་ནི་མེད་པ་དང་མ་སྐྱེས་པའི་མཚན་ཉིད་ཅན་མ་རྟོགས་པར་འགལ་བ་ཡིན་ཏེ་གཅིག་ཉིད་ཉམས་པར་ཐལ་བའི་ཕྱིར་རོ། །དེས་ན་འདི་ཉིད་ནི་འགལ་བ་ཁོ་ནའོ། །མཐོང་བ་ལས་
གཞན་རྟོགས་པ་ནི་མཐོང་བ་མ་རྟོགས་པ་ཡིན་ནོ་སྙམ་དུ་དོགས་པ་བསུ་བ་ནི། འོན་ཏེ་གཞན་རྟོགས་པ་ཞེས་བྱ་བའོ། །ལན་ནི་སྔར་མཐོང་བའི་རང་བཞིན་དེས་མ་རྟོགས་པ་གཞན་རྟོགས་པའི་རང་བཞིན་ནི་ཡོད་བ་མ་ཡིན་ཏེ། གཅིག་ཉིད་དུ་རྟོགས་པར་ཁས་མ་བླངས་པའི་ཕྱིར་རོ་ཞེས་བྱ་བའི་དོན་ཏོ། །ད་ལྟར་བ་གཞན་དེ་རྟོགས་པ་ཉིད་མཐོང་ཟིན་པ་དེ་མ་རྟོགས་པ་ཡིན་ནོ་ཞེས་བྱ་བ་ནི་རྩོད་པའོ། །འདི་ཡང་ད་ལྟར་བ་ཉིད་མཐོང་ངོ་ཞེས་བྱ་བ་འདི་དང་འགལ་ལོ་ཞེས་བརྗོད་པ་ནི། དེ་ལྟ་ན་ནི་ཞེས་བྱ་བའོ། །གཞན་གྱི་རང་བཞིན་ད་ལྟར་བ་གང་ཡིན་པར་རང་བཞིན་གཞན་དེ་ཉིད་ལས་སྔར་མཐོང་ཟིན་པ་དང་གཅིག་པ་ཉིད་དེ་མེད་དོ་ཞེས་བྱ་བར་འགྱུར་རོ། །དོན་འདི་ཡིན་ཏེ། སྔ་མ་གང་ཡིན་པ་དེ་ཉིད་འདི་ཡིན་ལ། དེལ་ལྟོས་ནས་ཀྱང་གཞན་ཡིན་ཏེ། དེས་ན་བདག་ཉིད་ལ་ལྟོས་ནས་དེ་གཞན་དུ་འགྱུར་རོ་ཞེས་བྱ་བའོ། །དེ་ཡང་མི་རུང་ངོ་ཞེས་བྱ་བ་ནི་མི་འགལ་བའོ། །འགལ་བ་ཉིད་བརྗོད་པ་ནི་འདི་ལྟར་ཞེས་བྱ་བའོ། །འོན་ཏེ་གཞན་ཉིད་ཡིན་ཡང་རྟག་པ་ཉིད་དུ་འགྱུར་རོ་སྙམ་ན། དེ་ནི་གཞན་ཉིད་མ་ཡིན་ན་ཞེས་བྱ་བའོ། །རྟག་པ་ཉིད་ནི་གཞན་ཉིད་བཀག་པས་འགྲུབ་པ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་གཞན་ཉིད་ཀྱིས་རྟག་པར་མི་འགྱུར་བ་དེ་སྟོན་པ་ནི་གཞན་ཉིད་ན་ནི་ཞེས་བྱ་བའོ། །མཐོང་བ་ཟིན་པ་དང་གཅིག་ཉིད་དུ་ཞེས་བྱ་བ་ནི་ལྷག་མའོ། །མ་དམིགས་ན་ནི་ཞེས་བྱ་བ་ནི་དམིགས་པ་མེད་ན་ཞེས་བྱ་བའི་དོན་ཏོ། །འོ་ན་ཇི་ལྟར་རྟག་པ་ཉིད་དུ་འགྱུར་ན། གཞན་མ་ནི་ཉིད་ན་ཞེས་བྱ་བའོ། །གཞན་དག་རྟོགས་པ་དང་མ་རྟོགས་པ་དག་གཅིག་ཉིད་དུ་བརྗོད་ན་ནི། དེ་ནི་རང་བཞིན་འགའ་ཞིག་གིས་ཞེས་བྱ་བའོ། །འགའ་ཞིག་གིས་ཞེས་བྱ་བ་ནི་ལྡོག་པའི་རང་བཞིན་གྱིས་སོ། །གཞན་གྱིས་ཞེས་བྱ་བ་ནི་རྗེས་སུ་འགྲོ་བའི་རང་བཞིན་གྱིས་སོ། །གཞན་ཞེས་བྱ་བ་ནི་དམིགས་པའོ། །ལན་ནི་རང་བཞིན་གང་གིས་ཞེས་བྱ་བའོ། །གང་གིས་ནི་ལྡོག་པའི་རང་བཞིན་གྱིས་སོ། །དེ་ནི་ཞེས་བྱ་བ་ནི། སྔར་མཐོང་ཟིན་པ་ལོག་པའི་རང་བཞིན་ནོ། །འདིའི་ཞེས་བྱ་བ་ནི་ད་ལྟར་མཐོང་བཞིན་པའིའོ། །མཐོང་མ་ཟིན་པའི་རང་བཞིན་དང་ད་ལྟར་བའི་བྲེལ་བ་དོགས་པ་བསུ་ནས་སེལ་བ་ནི་སྔ་མ་ཉིད་དུ་ཞེས་བྱ་བའོ། །དེ་ལྟ་ཞེས་བྱ་བ་ནི་སྔ་མ་ཉིད་དུ་རྟོགས་པར་ཁས་
བླངས་ནའོ། །དེ་ཞེས་བྱ་བ་ནི་སྔར་མཐོང་བའོ། །འདིས་ནི་ཡོངས་སུ་མཐོང་བཞིན་པའོ། །ཇི་ལྟར་མཐོང་བ་དང་ལྷན་ཅིག་གཅིག་ཉིད་ཡིན་ཏེ་མ་ཡིན་པ་ཉིད་དོ། །འོན་ཏེ་སྔ་མ་དང་ཕྱི་མའི་ཁྱད་པར་དད་པ་དག་ལ་རྗེས་སུ་འཇུག་པའི་རང་བཞིན་གཅིག་ཡོད་པ་ནི་དེ་དང་མ་བྲལ་བ་བར་རྟོགས་པ་ཡིན་ནོ་ཞེས་དོགས་པ་བསུ་པ་ནི། སྔ་ཕྱིའི་རང་བཞིན་དག་དང་ནི། །ཞེས་བྱ་བའོ། །བདེ་བ་དང་སྡུག་བསྔལ་གྱི་རང་བཞིན་དག་དང་མ་བྲལ་བའི་ཕྱིར་ཏེ་འབྲེལ་པའི་ཕྱིར་ན་བདག་ཉིད་གཅིག་རྟོགས་པ་ཡིན་ནོ་ཞེ་ན། ལན་ནི་བྲལ་བ་ཉིད་དུ་ཞེས་བྱ་བའོ། །གང་གི་ཚེ་བདེ་བ་ལ་སོགས་པའི་རང་བཞིན་གཅིག་ཏུ་མཐོང་བ་དེའི་ཚེ་ནི་རང་བཞིན་གཞན་མ་ཡིན་ན། དེ་ཅི་ལྟར་མི་འབྲལ་ཞེས་བྱ་བའི་དོན་ཏོ། །རིམ་གྱིས་རང་བཞིན་གཉིས་དང་བདག་མི་འབྲལ་བར་དོགས་པ་བསུ་ནས་སེལ་བ། གལ་ཏེ་རིམ་གྱིས་ཞེས་བྱ་བའོ། །དེ་བཞིན་དུ་ཞེས་བྱ་བ་ནི་རིམ་གྱིས་སོ། །བྲལ་བ་ཡང་ཞེས་བྱ་བ་ནི་མི་འབྲལ་བ་འབའ་ཞིག་ཏུ་མ་ཟད་པའོ། །བྲལ་བ་དང་ཞེས་བྱ་བ་ནི་རྩོད་པའོ། །ཇི་ལྟ་ཇི་ལྟར་ཞེས་བྱ་བ་ནི་ལན་ནོ། །དེ་བཞིན་དུ་ཞེས་བྱ་བ་ནི་ཅིག་ཅར་རོ། །ཅིག་ཅར་པ་ནི་སྔ་མ་དང་ཕྱི་མ་དག་གིས་རིམ་པ་དང་བཅས་པ་དང་ལྡན་པ་མ་ཡིན་ནོ་ཞེས་བརྗོད་པ་ནི། རིམ་མིན་པའི་ཡོད་པ་ནི་མ་ཡིན་ཞེས་བྱ་བའོ། །སྔ་མ་དང་ཕྱིས་མ་རྟོགས་པར་ན་དེ་ཁྱབ་པར་བྱེད་པ་མཐོང་བར་ཡང་མི་འཐད་དོ་ཞེས་སྟོན་པ་ནི། སྔ་ཕྱིའི་རང་བཞིན་ཞེས་བྱ་བའོ། དོན་དམ་པར་ན་ཁྱབ་བྱ་མ་རྟོགས་པར་ཁྱབ་པར་བྱེད་པ་མི་རྟོགས་ཏེ། དབྱུག་པ་མ་རྟོགས་པར་དབྱིག་པ་ཅན་བཞིན་ནོ།། དེས་ན་སྔ་མ་དང་ཕྱི་མའི་རང་བཞིན་དང་ལྡན་པའི་བདག་དང་བྲལ་བའི་རང་བཞིན་སྣང་བ་ཉིད་ནི་ཉེ་བའི་རང་བཞིན་ཅན་དུ་སྣང་བ་དེ་ལས་གཞན་བ་སྣང་བའི་རང་བཞིན་ཉིད་ཡིན་གྱི། རིམ་མ་ཡིན་པར་སྣང་བ་ནི་མ་ཡིན་ནོ་སྙམ་དུ་དགོངས་པའོ། །འོན་ཏེ་དེའི་སྔ་མ་དང་ཕྱི་མའི་རང་བཞིན་ཁྱབ་པ་ཉིད་ནི་རིམ་གྱིས་རྟོགས་པ་ཡིན་ནོ་སྙམ་དུ་དོགས་པ་བསུ་ནས་བཤད་པ་ནི། རིམ་གྱིས་ཁྱབ་པ་ཉིད་ན་ནི། །ཞེས་བྱ་བའོ། །གལ་ཏེ་རིམ་གྱིས་ཁྱབ་བར་རྟོགས་ན་དེའི་ཚེ་རིམ་མ་ཡིན་པ་ནི་ཁྱབ་པ་ཉིད་དུ་མ་རྟོགས་པར་འགྱུར་རོ། །ཅིའི་ཕྱིར་མ་རྟོགས་པར་འགྱུར་སྙམ་ན། ཕྱི་མའི་རང་
བཞིན་དང་བཅས་པར་མཐོང་བའི་དུས་ན་སྔ་མའི་རང་བཞིན་དང་ལྡན་པ་མཐོང་བ་ནི་ཐ་དད་པའི་ཐ་སྙད་ཀྱི་ཡུལ་ཡིན་ཏེ། ཐ་སྙད་དེ་ནི་དེ་ཅམ་གྱི་རྒྱུ་མཚན་ཅན་ཡིན་པའི་ཕྱིར་རོ་ཞེས་བཤད་པ་ནི། གཅིག་པོ་དེ་ནི་ཞེས་བྱ་བའོ། །གལ་ཏེ་གཅིག་གི་ཚེ་ཉིད་ནི་གཅིག་ཉིད་མཐོང་བ་དང་མ་མཐོང་བར་མི་འཐད་ཀྱི། དུས་ཐ་དད་པར་ནི་འཐད་པ་ཁོ་ནའོ་ཞེས་གཞན་དག་བརྗོད་པ་ནི་དེའི་ཚེ་ཉིད་དེ་ཞེས་བྱ་བའོ། །གྲུབ་པའི་མཐའ་སྨྲ་བས་གཅིག་ཕྱིར་ཞེས་བྱ་བ་གསུངས་སོ། །དེས་ན་གཅིག་དུས་ཐ་དད་པ་ཉིད་མེད་པའི་ཕྱིར་ན་མཐོང་བ་དང་མི་མཐོང་བ་ཉིད་དོ་སྙམ་དུ་དགོངས་པའོ། །དེ་ལྟར་རྣམ་པར་རྟོག་པ་མེད་པའི་མཐོང་བ་དང་མ་མཐོང་བ་ཉིད་མི་འཐད་དོ་ཞེས་བསྟན་པ་ཡིན་ནོ། །དེ་འདིའོ་སྙམ་པའི་རྣམ་པར་རྟོག་པ་མཐོང་ཟིན་པ་དང་མཐོང་བཞིན་པ་གཉིས་ལ་གཅིག་ཏུ་མངོན་པར་ཞེན་པ་ནི་དྲན་པའི་མངོན་སུམ་གྱིས་རང་བཞིན་དྲན་པའི་དབང་པོ་ལ་སོགས་པའི་ཚོགས་པ་ལས་བྱུང་བ་ཡིན་ནོ་ཞེས་གཞན་གྱི་བསམ་པའི་དོགས་པ་བསུ་བ་ནི། ཡང་ནས་ཡང་དུ་ཞེས་བྱ་བའོ། །ནི་ཞེས་བྱ་བ་ངེས་པར་གཟུང་བའི་དོན་ཏོ། །འཛིན་པར་ཞེས་བྱ་བ་དེའི་འོག་ཏུ་བལྟ་བར་བྱ་བའོ། །དེ་འདིའོ་སྙམ་པའི་རྣམ་པར་རྟོག་པ་ནི་གཟུང་བ་དང་གཞན་འཛིན་པའི་རིགས་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེ་ལྟ་ན་མངོན་སུམ་དུ་འགྱུར་གྱི། དྲན་པར་གོ་ཇི་ལྟར་སྙམ་ན། གཟུང་བ་དང་ངོ་ཞེས་གསུངས་སོ། །དེས་ན་དེ་འདི་སྙམ་པའི་རྣམ་པར་རྟོག་པ་ནི་དྲན་པའང་ཡིན་ནོ་ཞེས་བྱ་བའི་དོན་ཏོ། །ལན་དུ་དྲན་པ་ཚད་མ་མ་ཡིན་ཕྱིར། །ཞེས་བྱ་བའོ། །གལ་ཏེ་གཟུང་བ་ཙམ་འཛིན་པ་ནི་དྲན་པ་ཡིན་ན་འདི་ནི་དེ་ལྟ་མ་ཡིན་ཏེ། མ་བཟུང་བ་སྔ་མ་དང་ཕྱི་མའི་རང་བཞིན་གཉིས་ཀྱི་གཅིག་ཉིད་འཛིན་པའི་ཕྱིར་རོ་སྙམ་དུ་དོགས་ན་གང་གིས་མངོན་སུམ་ཞེས་སྨོས་སོ། །གཅིག་ཡིན་པའི་ཕྱིར་མཐོང་བ་སྔ་མས་ཀྱང་འདི་གཟུང་བ་ཡིན་ཏེ། དེས་ན་བཟུང་ཟིན་པ་འཛིན་པས་ན། དྲན་པ་ཚད་མ་ཡིན་ནོ་ཞེས་བྱ་བའི་དོན་ཏོ། །དེ་ནི་བདེན་ཏེ་དངོས་པོ་གཅིག་ཡིན་ལ། སྔར་བཟུང་ཟིན་པའང་ཡིན་ནོ། །འོན་ཀྱང་དེའི་ད་ལྟར་བ་ཉིད་ནི་སྔ་མ་གཟུང་བ་མ་ཡིན་ཏེ། དེའི་ཚེ་མེད་པའི་ཕྱིར་རོ་སྙམ་
དུ་དོགས་པ་བསུ་བ་ནི། གལ་ཏེ་དེ་ཚེ་ཞེས་བྱ་བའོ། །ཐ་དད་མེད་ཕྱིར་ཞེས་བྱ་བ་ནི་ལན་ནོ། །དུས་ཞེས་བྱ་བ་སྔ་མ་དང་ཕྱི་མ་ཡང་ཡོད་པ་གཞན་ནི་འགའ་ཡང་མེད་ཀྱི། འོན་ཀྱང་རྒྱུན་ལ་སོགས་པ་ཉིད་ཡིན་ན། །དེ་དང་གཅིག་རིམ་གྱིས་འབྲེལ་པ་ནི་ཚད་མས་གནོད་པ་ཡིན་ནོ། །གལ་ཏེ་མཐོང་བ་སྔ་མའམ་ཕྱི་མས་ནི། དངོས་པོ་དུས་རིང་པོར་མི་རྟོགས་ཏེ་ནུས་པ་མེད་པའི་ཕྱིར་རོ། །གཅིག་ཉིད་ནི་ངོ་ཤེས་པ་ཁོ་ནས་རྟོགས་པར་བྱེད་པ་ཡིན་ནོ་སྙམ་དུ་དོགས་པ་བསུ་ནས། དེ་ལ་མཐོང་ཟིན་ཞེས་བྱ་བའོ། །མཐོང་བ་སྔ་མ་དང་ཕྱི་མ་དག་གིས་ནི། རང་གི་དུས་ཀྱི་དངོས་པོ་རྣམ་པར་གཞག་པའི་ཕྱིར། དེས་གནོད་པར་བྱ་བའི་ངོ་བོ་ཤེས་པ་ནི། བག་ཆགས་ཀྱི་སྟོབས་ལ་བརྟེན་པ་ཡིན་གྱི་གཅིག་ཉིད་འཛིན་པ་ནི་མ་ཡིན་ནོ་ཞེས་བྱ་བའི་དོན་ཏོ། །ཡང་ན་རྣམ་པར་དབྱེ་བ་འདི་ཇི་ལྟར་ཡིན་ཏེ། ཚད་མས་མཐོང་བ་མ་ཡིན་ནོ་སྙམ་དུ་དོགས་པ་བསུ་ན་དེ་ལ་མཐོང་ཟིན་ཞེས་བྱ་བའོ། །དེ་ལྟར་སྔ་མ་དང་ཕྱི་མར་གྱུར་པའི་གཅིག་ཉིད་བསལ་ནས་དེ་ཡོད་ཀྱང་དེ་འཛིན་པའི་ཚད་མ་འགའ་ཡང་མེད་དོ་ཞེས་བསྟན་པའི་དོན་དུ་འདྲི་བ་གང་སྟེ་དེའི་སྔ་མ་དང་ཞེས་བྱ་བའོ། །དེའི་བདག་ཉིད་གང་གིས་ཇི་ལྟར་རྟོགས་ཏེ་ཚད་མ་མེད་པའི་ཕྱིར་རོ། །འདི་ལྟར་སྔ་མ་དང་ཕྱི་མ་དག་གིས་སམ། གཅིག་གིས་རྟོགས་ཏེ་དེ་ལ་རེ་ཞིག་སྔ་མ་དང་ཕྱི་མ་དག་གིས་ནི་མ་ཡིན་ཏེ། སྔ་མ་དང་ཕྱི་མ་ཉིད་ཐ་དད་པར་མ་རྟོགས་པའི་ཕྱིར་རོ་ཞེས་སྨྲས་པ་ནི་སྔ་ཕྱིའི་ཤེས་པ་ལས་ཤེས་ན་ཞེས་བྱ་བའོ། །དགོས་པ་ནི་འདི་ཡིན་ཏེ། གལ་ཏེ་སྔ་མ་དང་ཕྱི་མའི་རྟོགས་པ་དག་གིས་རང་ཉིད་ཀྱིས་སྔ་མ་དང་ཕྱི་མ་ཉིད་རྟོགས་པ་ཡིན་ན་དེའི་ཚེ་གཞན་ཡང་དེར་གཞག་པར་ནུས་པ་ཡིན་ན། དེ་དག་གི་ཐ་དད་པ་སྔ་མ་དང་ཕྱི་མའི་མཚན་ཉིད་རྟོགས་པ་ལ་ནི་ཚད་མ་འགའ་ཡང་ཡོད་པ་མ་ཡིན་ནོ་ཞེས་བྱ་བའོ། །རང་རིག་པའི་ཚད་མ་ཡོད་དོ་སྙམ་དུ་དོགས་པ་བསུ་བ་ནི་གལ་ཏེ་ཞེས་བྱ་བའོ། །རང་རིག་པ་ལ་ནི་ཤེས་པའམ་ཤེས་བྱའི་སྔ་མ་དང་ཕྱི་མ་ཉིད་སྲིད་པ་མ་ཡིན་ནོ་ཞེས་ལན་འདེབས་པ་ནི་དེ་ལས་ཞེས་བྱ་བའོ། །
རང་རིག་པ་དེ་ལས་སྔ་མ་དང༌། ཕྱི་མ་གཉིས་ཉིད་རྟོགས་པར་མི་འགྱུར་རོ། །གཞན་རིག་པ་ཡིན་ཡང་ཉེ་བར་འཛིན་པའི་ཕྱིར་སྔ་མས་ཕྱི་མའམ་སྔ་མ་འཛིན་བ་ནི་མེད་དོ་ཞེས་བརྗོད་བ་ནི་སྔ་མ་ཕྱི་མ་མེད་པ་ནི་དེའི་རྟོགས་པ་ནི་དེ་དག་གིས་རྟོགས་པའོ། །སྔ་མའམ་ཕྱི་མའི་རིག་པ་ནི་ཕན་ཚུན་ཐ་དད་པ་མ་ཡིན་ཏེ་གཅིག་ཡིན་པའི་ཕྱིར་རོ་ཞེས་བྱ་བ་ཕྱོགས་གཉིས་པའི་དོགས་པ་བསུ་བ་ནི། གལ་ཏེ་སྔ་མ་དང་ཞེས་པའོ། །གཅིག་ན་ཞེས་བྱ་བ་ནི་ལན་ནོ། །འདི་ཉིད་གསལ་བར་བྱེད་པ་ནི། མངོན་དུ་བྱས་བཞིན་པ་ཉིད་ན་ཞེས་བྱ་བའོ། །གལ་ཏེ་ཡང་སྔོན་དུ་བྱེད་པ་སྔ་མ་དང་ཕྱི་མའི་དངོས་པོ་མི་སྣང་བ་དེ་ལྟ་ན་རྣམ་པར་རྟོག་པ་ལ་ནི་སྣང་བ་ཁོ་ནའོ་ཞེས་དོགས་པ་བསུ་བ་ནི། གལ་ཏེ་སྔ་མ་ཉིད་མིན་ན། །ཞེས་བྱ་བའོ། །རྣམ་པར་རྟོག་པ་ནི་སྔོན་དུ་བྱེད་པའི་རང་བཞིན་མ་ཡིན་ཏེ། བག་ཆགས་ཀྱི་སྟོབས་ལ་བརྟེན་པའི་དྲན་པ་ཉིད་ཡིན་ནོ་ཞེས་ལན་འདེབས་པ་ནི་འདི་རྟགས་ཞེས་བྱ་བ་སྟེ། སྔ་མ་ཉིད་རྟོགས་པའོ། །དེ་རྟོགས་མིན་ནི་སྔ་མ་ཉིད་རྟོགས་པ་མ་ཡིན་པའོ། །དེ་དང་འབྲེལ་པའི་ཕྱིར་དེ་རྟོགས་པ་ཡིན་ནོ་སྙམ་པའི་དོགས་པ་བསུ་བ་ནི་འདི་ཞེས་བྱ་བའོ། །འདིའི་ནི་སྔ་མ་ཉིད་ཀྱིའོ། །དེ་མེད་པར་ཡང་ཡོད་པའི་ཕྱིར་དེ་དང་འབྲེལ་པ་ཡོད་པ་མ་ཡིན་ནོ་ཞེས་ལན་འདེབས་པ་ནི་དེའི་ཞེས་པ་ནི་ཇི་ལྟར་བརྗོད་ཅེས་བྱ་བའོ། །དེ་མེད་པར་ནི་སྔ་མ་ཉིད་མེད་པར་རོ། །འདིས་ནི་དངོས་སུ་རྒྱུ་དང་འབྲས་བུའི་དངོས་པོ་ཡིན་པ་བསལ་བ་ཡིན་ནོ། །བརྒྱུད་པས་རྒྱུ་དང་འབྲས་བུའི་དངོས་པོར་དོགས་པ་བསུ་ནས། འདི་ནི་སྐབས་ལ་ཉེ་བར་མཁོ་བ་མ་ཡིན་ནོ་ཞེས་བརྗོད་པ་ནི་རྒྱུ་དང་ཞེས་བྱ་བའོ། །དེ་ཙམ་གྱིས་ཞེས་བྱ་བ་ནི་རྒྱུ་དང་འབྲས་བུའི་དངོས་པོ་ཙམ་གྱིས་སོ། །འོན་ཏེ་རྣམ་པར་རྟོག་པ་རྣམས་ཀྱི་འཛིན་པ་ནི་ལྷག་པར་ཞེན་པ་ཡིན་ནོ་སྙམ་དུ་དོགས་པ་བསུ་ནས་བཤད་པའི་དོན་ནི་ཞེས་བྱ་བའོ། །བཟློག་པ་ལས་ནི་ལྷག་པར་ཞེན་པ་ལས་སོ། །གལ་ཏེ་གཟུང་བར་བྱ་བ་ནི་རྒྱུ་ཉིད་ཡིན་ལ། འཛིན་པར་ཡང་འབྲས་བུ་ཉིད་མ་ཡིན་ནམ། དེ་སྐད་དུ་ཡང་རྒྱུ་ཉིད་ལ་གཟུང་བར་འཐད་པ་ཤེས་པར་རིག་ན་ཞེས་བཤད་པ་ཡིན་ནོ། །འདི་ནི་དྲན་པ་
ཡང་ཉམས་པ་མེད་དོ་སྙམ་དུ་དོགས་པ་བསུ་ནས་མྱོང་བས་བར་དུ་ཆོད་པའི་ཕྱིར་ཞེས་གསུངས་སོ། །དྲན་པ་ལ་ནི་མྱོང་བ་ཉིད་ནུས་པ་ཡིན་ཏེ། དེའི་བག་ཆགས་ཀྱི་རྗེས་སུ་འཇུག་པའི་ཕྱིར་རོ་ཞེས་བྱ་བའི་དོན་ཏོ། །མྱོང་བའི་མཐུ་ལས་བྱུང་བའི་དྲན་པ་ཡང་དེའི་ཕྱེད་བའི་ཡུལ་ཙམ་ལྷག་པར་ཞེན་པར་བྱེད་ཀྱི་སྔ་མ་ཉིད་ལ་སོགས་པ་ནི་མ་ཡིན་ཏེ། དེ་ནི་མྱོང་བས་གཟུང་བའི་ཕྱིར་རོ་ཞེས་བརྗོད་པ་ནི་མྱོང་བ་སྔ་མས་ཞེས་བྱ་བའོ། །ཕྱི་མས་དེའི་སྔ་མ་ཉིད་འཛིན་པ་མ་ཡིན་ནོ་ཞེས་འབྲེལ་ཏོ། །དེས་ནི་མི་འཛིན་པས་ནའོ། །མངོན་སུམ་གྱིས་བྱེད་པའི་རྗེས་སུ་འབྲང་བའི་ཕྱིར་ན་དྲན་པས་ཀྱང་དེ་རྣམ་པར་གནས་པ་མ་ཡིན་ནོ་ཞེས་བྱ་བའི་དོན་ཏོ། །དེའི་ཕྱིར་སྔ་མ་ཉིད་ལ་སོགས་པ་ནི་ཐོག་མ་མེད་པའི་བག་ཆགས་ལས་བྱུང་བའི་རྣམ་པར་རྟོག་པས་རྟོགས་པར་བྱ་བ་ཁོ་ན་ཡིན་ནོ་ཞེས་བརྗོད་པ་ནི་འདས་པའི་མངོན་སུམ་ཞེས་བྱ་བའོ། །དེས་ན་སྔ་མ་དང་ཕྱི་མར་གྱུར་པའི་དོན་ནི་ཡོད་པ་མ་ཡིན་ཏེ། མ་དམིགས་པའི་ཕྱིར་རོ་ཞེས་གནས་སོ། །དེ་ཡན་ཆད་ནི་སྔ་མ་དང་ཕྱི་མ་དག་ཏུ་རྗེས་སུ་འགྲོ་བའི་རང་བཞིན་གཅིག་བསལ་ནས། ད་ནི་སྔ་མ་དང་ཕྱི་མ་དག་ལ་གཅིག་ཉིད་རྣམ་པར་གནས་པ་དང༌། ཡོད་པ་ཡང་དམིགས་པ་ལས་གཞན་ཁོ་ནའོ་ཞེས་འདོད་པ་ཚད་མ་ཅན་མ་ཡིན་པའི་ཕྱིར་དགག་པ་བརྗོད་པ་ནི། འོན་ཏེ་ཞེས་བྱ་བའོ། །དེ་རྣམས་ཉིད་ནི་སྐྱེ་བ་ལ་སོགས་པ་རྣམས་སོ། །ཅིའི་ཕྱིར་དེ་རྣམས་ཡོད་པར་མི་འགྱུར་སྙམ་ན། དེའི་དངོས་པོ་དང་མི་ལྡན་ཕྱིར་ཞེས་གསུངས་སོ། །གང་གིས་ཡོད་པར་གྱུར་པ་སྐྱེ་བ་ལ་སོགས་པ་རྣམས་ལ་སོ་སོར་སྐྱེ་བ་ལ་སོགས་པ་ཡོད་པ་ནི་མ་ཡིན་ནོ། །འོན་ཏེ་དེ་རྣམས་ལ་ཡང་སོ་སོར་སྐྱེ་བ་ལ་སོགས་པ་ཁས་ལེན་ན། དེ་ལྟ་ན་ནི་འོ་ན་དེ་དང་དེར་ཁས་ལེན་པས་ཐུག་པ་མེད་པའི་ཕྱིར་ཡོད་པར་མི་འགྲུབ་བོ། །དེས་ན་སྐྱེ་བ་ལ་སོགས་པ་རྣམས་དེའི་དངོས་པོ་དང་མི་ལྡན་པའི་ཕྱིར་ཡོད་པ་མ་ཡིན་པར་འགྱུར་རོ། །གང་གིས་དེ་དང་ལྡན་པ་ཡོད་ཐར་འགྱུར་པ་སྐྱེ་པ་ལ་སོགས་པ་རྣམས་ནི་ཅིག་ཅར་སྲིད་པ་ཡང་མ་ཡིན་ནོ་ཞེས་བྱ་བ་ནི་གང་ཚེ་ཞིག་པ་ཞེས་བྱ་བའོ། །དེ་ཚེ་ཡོད་པར་མངོན་པར་འདོད་པ་དེ་ཡོད་པར་ཇི་ལྟར་
འགྱུར། སྐྱེ་བ་དང་གནས་པ་དག་མེད་པའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་གང་གི་ཚེ་འདི་གཉིས་ཡོད་པ་ཡིན་ནོ་སྙམ་ན་བཤད་པ་སྐྱེ་བ་དང་གནས་པ་དེ་སྔར་ཡོད་པར་རྟོགས་ན་ནིའོ། །དེ་ཡོད་པའི་དུས་ན་ཡང་འཛིན་པ་མེད་པའི་ཕྱིར་ཡོད་པར་མི་འགྲུབ་བོ་ཞེས་བྱ་བའི་དོན་ཏོ། །བསྟན་པ་ནི་ཉེ་བའི་ཡུལ་ཅན་གྱི་མངོན་སུམ་གྱིས་རྟོགས་པ་མ་ཡིན་ནོ་ཞེས་བརྗོད་པ་ནི། །བསྟན་པ་ལ་ཡང་ཞེས་བྱ་བའོ། །ཡོད་པའི་མཚན་ཉིད་ནི་རྟོགས་པ་ཁོ་ན་ཡིན་ནོ་ཞེས་མཇུག་སྡུད་པ་ནི་ཐམས་ཅད་ཅེས་བྱ་བའོ། །གཞན་དུ་ཇི་ལྟར་ཞེས་བྱ་བ་ནི། སྐྱེ་བ་ལ་སོགས་པའི་རྣམ་པས་ཡོད་པར་ཇི་ལྟར་འགྱུར་ཞེས་བྱ་བའོ། །དེ་ཕྱིར་ཞེས་བྱ་བ་ནི་རྟོགས་པ་དང་མ་རྟོགས་པ་དག་འགལ་བའི་ཕྱིར་རོ། །རྟག་དང་མི་རྟག་པའི་ཞེས་བྱ་བ་ནི་དམིགས་པའིའོ། །འོ་ན་ཇི་ལྟར་ཡོད་པ་ཡིན་སྙམ་ན། དངོས་རྟག་པའམ་ཞེས་གསུངས་སོ། །མི་རྟག་པ་ནི་སྔ་མ་དང་ཕྱི་མའི་རང་བཞིན་དུ་མ་རྟོགས་པའོ། །རྟག་པ་ནི་དེའི་རང་བཞིན་དུ་དམིགས་པའོ། །ལམ་གྱི་ཞར་ལ་ཞེས་བྱ་བ་ནི་ལམ་སྟོན་པས་ཞར་ལ་ངེས་པར་འབྱུང་བ་ཞེས་བྱ་བ་དེ་ལྟ་བུའི་རང་འགོག་པའི་རྣམ་པ་བཞི་བསྟན་པའོ། །བཤད་ཟིན་ཞེས་བྱ་བ་ནི་དེའི་གནོད་བྱེད་ནི། བདག་མེད་མཐོང་བ་འགལ་བ་ཡིན། །ཞེས་བྱ་བ་འདིས་སོ། །ལམ་ཡང་ལམ་ཉིད་དང་རིགས་པ་ཉིད་དང༌། བསྒྲུབ་པ་ཉིད་དང༌། །ངེས་པར་འབྱིན་པ་ཉིད་ཅེས་བྱ་བ་རྣམ་པ་བཞིའོ། །དེ་ལམ་ཞེས་བྱ་བ་འདིས་ནི་རྣམ་པ་དང་པོ་ལ་ཞེས་བརྗོད་དོ། །ལམ་དེ་གོམས་པ་ནི་རྗེས་སུ་བསྒྲུབ་བ་ཡིན་པའི་ཕྱིར་གཞན་ཡང་བརྗོད་པ་ཡིན་ནོ། །སྒྲུབ་པ་ནི་རྗེས་སུ་བསྒྲུབ་བའི་རང་བཞིན་ཡིན་པའི་ཕྱིར་རོ། །དེས་ན་གནས་འགྱུར་ཞེས་བྱ་བ་འདིས་རྒོལ་བ་དེ་གྱུར་པའི་རྒྱུ་ཉིད་དུ་བརྗོད་པ་ན་རྣམ་པ་བཞི་པ་ཡང་བརྗོད་པ་ཡིན་ནོ། །རིགས་པ་ཉིད་ཅེས་བྱ་བའི་རྣམ་པ་ནི་ད་དང་དེར་སྒྲུབ་བའི་ཆད་མ་བརྗོད་པ་ཉིད་ཀྱིས་བརྗོད་པ་ཡིན་ནོ། །དེ་གོམས་པ་ལས་གནས་འགྱུར་ཞེས་བསྡུས་པས་ནི་བདག་དང་བདག་གིར་འཛིན་པས་བྱས་པའི་ཆགས་བ་དང་བྲལ་བ་གནས་བརྟན་ཡོངས་སུ་གྱུར་བ་ནི་བདག་མེད་པ་མཐོང་བ་གོམས་པ་ལས་གྱུར་པ་ཡིན་ནོ་ཞེས་བརྗོད་པ་ཡིན་ནོ། །གལ་ཏེ་
ཇི་ལྟར་བདག་དང་བདག་གིར་འཛིན་པ་དེའི་བདག་ཏུ་གྱུར་པ་ཉིད་ལ་བདག་མེད་པ་མཐོང་བས་གནོད་པར་འགྱུར་བ་དེ་བཞིན་དུ་འདི་དེའི་བདག་ཏུ་གྱུར་ཀྱང་བདག་ལ་སོགས་པའི་འཛིན་པར་འབྱུང་བ་ཁོ་ནའོ། །དེས་ན་གནས་ཡོངས་སུ་གྱུར་པ་འགལ་བའི་ཁྱད་པར་ལ་ཡིན་སྙམ་དུ་དོགས་པ་བསུ་བ་ནི། གལ་ཏེ་ཞེས་བྱ་བའོ། །བདག་གྱུར་ཀྱང་ནི་ལམ་མོ། །བདག་ཏུ་འཛིན་པ་ལ་སོགས་པའི་སྐྱོན་རྣམས་ལམ་བཞིན་དུ་འབྱུང་ཞེ་ན། ལམ་དེའི་བདག་ཏུ་གྱུར་པ་ལ་ཉེས་པ་འབྱུང་བར་ནི་རིགས་པ་མ་ཡིན་ཏེ། །ནུས་པ་མེད་ཕྱིར་རོ་ཞེས་བྱ་བ་བདག་ཏུ་འཛིན་པ་ལ་སོགས་པ་མཐུ་མེད་པའི་ཕྱིར་དང༌། ལམ་ནི་བཟློག་པའི་ཡིན་པའི་ཕྱིར་རོ། །ཀུན་གཞི་ཞེས་བྱ་བ་ནི་གང་ལས་འཇུག་པའི་རྣམ་པར་ཤེས་པ་ལྔ་འཇུག་པ་དེ་ནི་ཀུན་གཞིའོ་ཞེས་བྱ་བ་ནི་རྣལ་འབྱོར་སྤྱོད་པའི་ལུང་བསྟན་པའོ། །ཡོངས་སུ་དག་པའི་རང་བཞིན་ཉིད་བརྗོད་པ་ནི་བདག་དང་བདག་གིར་ཞེས་བྱ་བ་ནི་འདྲི་བའོ། །བདག་དང་བདག་གིར་འཛིན་པ་ལ་སོགས་པའི་ཉེས་པ་རྣམས་བཅོམ་པའི་ཕྱིར་རོ་ཞེས་འབྲེལ་ཏོ། །གང་གིས་བཅོམ་སྙམ་ན། ཡོན་ཏན་བདག་མེད་པར་ལྟ་བར་ཡོད་པས་སོ། །བཟློག་པར་ཏེ། ཡོན་ཏན་རྣམས་ཉེས་པ་འབྱུང་བས་བཅོམ་པས་དི་ལྟར་མི་འགྱུར་ཞེ་ན་ཞེས་བྱ་བ་ནི། འདྲེ་བའོ། །ཡོན་ཏན་ཞེས་བྱ་བ་ནི་ལན་ནོ། །བདག་མེད་པར་མཐོང་བ་ནི་དངོས་པོའི་ཡུལ་ཅན་ཉིད་ཀྱིས་རང་བཞིན་ཡིན་པའི་ཕྱིར་རོ། །བདག་ཏུ་འཛིན་པ་ལ་སོགས་པའི་ཉེས་པ་རྣམས་ནི་དེ་ལས་བཟློག་པའི་ཕྱིར་ཏེ། ཡུལ་མེད་པ་ཉིད་ཀྱིས་ན་རང་བཞིན་མ་ཡིན་པའི་ཕྱིར་རོ། །གལ་ཏེ་བདག་ལ་སོགས་པར་འཛིན་པའི་རྣམ་པར་ཤེས་པ་ཡང་ཐོག་མ་མེད་པའི་བག་ཆགས་ལས་བྱུང་བའི་ཕྱིར་རྒྱུ་དང་བཅས་པ་ཡིན་པས། དམིགས་པའི་རྒྱུ་དང་བཅས་པ་དེ་ལས་བཟློག་པའི་ཕྱིར་ཏེ། ཡུལ་མེད་པ་ཉིད་ཀྱིས་ན་རྣག་བཞིན་མ་ཡིན་པའི་ཕྱིར། འཛིན་པ་བདག་མེད་པར་ལྟ་བ་དང་ཐ་དད་པ་མེད་དོ། །གང་གིས་གཅིག་ནི་གནོད་བྱེད་དུ་འགྱུར་ལ། གཞན་གྱི་རྒྱུ་དང་བཅས་པ་ཉིད་ཡིན་བཞིན་དུ་དེ་ལྟར་མ་ཡིན་པ། དམིགས་པའི་རྐྱེན་དག་ལ་ཁྱད་པར་ནི་འགའ་ཡང་ཡོད་པ་མ་ཡིན་ནོ་ཞེས་འདྲི་བ་དེ་ནི་དེ་ཇི་ལྟར་ཞེ་ན་ཞེས་བྱ་བའོ། །
ཁྱད་པར་བཤད་པ་ནི། རྣམ་ཤེས་ཡུལ་འཛིན་པའི་ཆོས་ཞེས་བྱ་བའོ། །ཉ་ཕྱིས་འཛིན་པ་ལྟར་རང་བཞིན་ནི་གནོད་པ་མེད་པའི་ཕྱིར་རོ། །རྒྱུ་དང་བཅས་པའི་ཡིན་ཡང༌། ཡུལ་དང་བྲལ་བའི་འཛིན་པ་ནི་ཉ་ཕྱིས་ལ་དངུལ་དུ་འཛིན་པ་བཞིན་དུ་དེ་ནི་འདི་ལྟར་མ་ཡིན་ནོ་ཞེས་བསྐྱེད་ནས། འཇིག་པར་འགྱུར་གྱི་རང་བཞིན་ནི་དེ་ལྟ་མ་ཡིན་ནོ། །ཅིའི་ཕྱིར་སྙམ་ན། ཇི་ལྟར་ཡོད་བདེ་འཛིན་པ་ཡིན་ནོ། །འཆད་པར་འགྱུར་བ་གང་ཕྱིར་དོན། ཨེ་ཏེའི་སྒྲ་ནི་འདིར་ཡང་སྦྱར་རོ། །འདིས་ནི་རྣམ་པར་ཤེས་པ་ལ་གནས་པ་མི་གནོད་པའི་རྒྱུ་མཚན་བརྗོད་པ་ཡིན་ནོ། །ཡུལ་ལ་གནས་པ་ཡང་བརྗོད་པ་ནི་ཡུལ་དེ་རྣམ་པར་ཤེས་པ་འདིའི་སྐྱེད་པར་བྱེད་པའང་ཡིན་ནོ། །འཁྲུལ་པ་ན་ཡང་འདི་མཚུངས་པས་ཁྱད་པར་དུ་བྱེད་པ་ནི་བདག་ཉིད་དེ་རང་གི་རྣམ་པར་འཇོག་པར་བྱེད་པའོ། །འཁྲུལ་པའི་སྐྱེད་པར་བྱེད་པ་ཡིན་ཡང༌། རང་གི་བདག་ཉིད་ཀྱིས་ནི་སྐྱེད་པར་བྱེད་པ་མ་ཡིན་ནོ། །ཨེ་ཏེའི་ཕྱིར་གྱི་དོན་ཏོ། །འང་གི་སྒྲ་ནི་ཤེས་པ་ལ་གནས་པའི་རྒྱུ་མཚན་ལ་ལྟོས་ནས་སྡུད་པའོ། །གལ་ཏེ་ལམ་གྱི་རང་བཞིན་དེའི་བདག་ཏུ་གྱུར་པ་ལ་ནི་ཇི་ལྟར་མི་གནོད་ཅེས་བརྗོད་པ་ལ། རྣམས་པར་ཤེས་པའི་རང་བཞིན་གནོད་པ་མ་ཡིན་ནོ་ཞེས་ཅིའི་ཕྱིར་བརྗོད་སྙམ་ན། རྣམ་པར་ཤེས་པ་ནི་ཞེས་གསུངས་སོ། །གང་གིས་ཞེས་བྱ་བ་ནི་ཡུལ་འཛིན་པས་སོ། །དེའི་རྣམ་པར་ཤེས་པའིའོ། །ལྡོག་པ་བརྗོད་པ་ནི་རྣམ་པར་ཤེས་པ་ནི་ཞེས་བྱ་བའོ། །རིག་པ་མ་ཡིན་པ་རྣམས་ལ་ནི་ཞེས་བྱ་བ་ནི་ཡུལ་འཛིན་པ་མེད་པ་ལའོ། །དེ་ལྟ་བུ་མེད་པའི་ཕྱིར་རོ་ཞེས་བྱ་བ་ནི། རྣམ་པར་ཤེས་པ་ཉིད་མེད་པའི་ཕྱིར་རོ། །ཡུལ་འཛིན་པ་དེའི་རང་བཞིན་ཡིན་པ་ག་ལས་སྙམ་ན། ཇི་ལྟར་ཡོད་པ་ཞེས་གསུངས་ཏེ། སྔ་མ་བཞིན་དུ་སྦྱར་རོ། །བདག་མེད་པར་ལྟ་བ་ལ་ཡང་རྒྱུ་མཚན་གཉིས་ཡོད་པའི་ཕྱིར་རང་བཞིན་ཉིད་ཡིན་ནོ་ཞེས་མཇུག་སྡུད་པའི་སྒོ་ནས་རྩ་བ་བརྗོད་པ་ནི། དེས་ན་ཞེས་བྱ་བའོ། །རྒྱུ་མཚན་འདི་གཉིས་དང་བྲལ་བ་ནི་འཛིན་པ་ཡིན་གྱི་རང་བཞིན་ནི་མ་ཡིན་ཏེ། གནོད་པའི་ཕྱིར་རོ་ཞེས་བརྗོད་པ་ནི་གཞན་ནི་དེའི་རང་
བཞིན་ཞེས་བྱ་བའོ། །འདི་ཡིན་ཞེས་བྱ་བ་ནི་ཡུལ་འཛིན་པའོ། །རང་བཞིན་འདི་ལས་རྣམ་པར་ཤེས་པ་དེའོ། །རྐྱེན་གྱིས་ནི་ཞེས་བྱ་བས་ནི་ཡུལ་ལ་གནས་པའི་རྒྱུ་མཚན་མེད་པ་བརྗོད་དོ། །གོལ་འགྱུར་ཞེས་བྱ་བས་ནི་རྣམ་པར་ཤེས་བ་རང་ལ་གནས་པའི་རྒྱུ་མཚན་མེད་པ་བརྗོད་དོ། །བཟློག་པ་ལ་རྒྱུ་མཚན་མེད་པ་ག་ལས་རྟོགས་སྙམ་ན། གང་གི་ཕྱིར་ས་ལ་སྟེ། ལྡོག་པའི་རྒྱུ་མཚན་དུ་གནོད་པར་བྱེད་པའི་རྐྱེན་ལ་ལ་དེའི་ཕྱིར་མ་བསྟན་ཏེ། རང་བཞིན་མ་ཡིན་པ་ངོ་བོ་ཉིད་དུ་གྱུར་པ་མ་ཡིན་ནོ། །རང་བཞིན་མ་ཡིན་པའི་དཔེ་ན། སྤྲུལ་གྱི་བློ་བཞིན་ནོ་ཞེས་བྱ་བ་ཡིན་ནོ། །རྩ་བ་མེད་པ་ཞེས་བྱ་བས་ནི་རང་གི་སྐྱེད་པར་བྱེད་པ་ཡུལ་མེད་པར་བརྗོད་དོ། །གལ་ཏེ་བདག་ལ་སོགས་པར་འཛིན་པ་རང་བཞིན་པས་ན་སྐྱེད་པར་བྱེད་པའི་ཕྱིར་མི་སྐྱེ་བ་ཉིད་དུ་འགྱུར་རོ་ཞེས་ཕྱོགས་སྔ་མ་འགོད་པ་ནི་གལ་ཏེ་ཐག་པ་ལ་ཞེས་བྱ་བའོ། །རྩོད་པ་འདི་ལན་ཕྱོགས་གཞན་དུ་བརྗོད་པ་ནི་ཡོད་པ་ལ་དམིགས་པར་བྱེད་པས་ན་ཡོད་པ་དམིགས་པ་སྟེ། ཐོག་མ་མེད་པའི་མ་རིག་པའི་འདུ་བྱེད་དེ་དེས་སོ། །འདིས་ནི་ནང་གི་འཁྲུལ་པའི་རྒྱུ་བརྗོད་དོ། །མཐོང་བའི་ཡོད་པ་དེ་ལ་དོགས་ནི་སྲིད་པར་བྱེད་པ་སྟེ་དེས་བསླུས་པའོ། །ཡུལ་ལ་གནས་པའི་རྒྱུ་ཡང་བརྒྱུད་པ་ནི་འདི་འདྲ་པ་ཞེས་བྱ་བའོ། །འམ་གྱི་སྒྲ་ནི་དང་གི་སྒྲའི་དོན་ཏོ། །བཤད་པ་མཛད་པས་སོ། །གང་གི་ཚེ་དངོས་པོ་སྔར་མཐོང་བ་བར་དུ་མ་མཐོང་བ་ལས་ཡང་མཐོང་བ་དེའི་ཚེ་བར་དུ་ཡོད་པར་དོགས་པ་ལས་མི་རྟག་པ་ཉིད་མི་མཐོང་ངོ་ཞེས་བཤད་པ་ནི། གལ་ཏེ་ཐ་སྙད་པ་ལས་ཡང་སྣང་པ་ཐ་དད་པ་ནི་ཡོད་པ་ཁོ་ན་མ་ཡིན་ནམ་ཞེ་ན། བདེན་ཏེ་ཁད་ཀྱང་ཐ་སྙད་དུ་མི་བྱེད་དེ་ དགོས་པ ་མེད་པའི་ཕྱིར་རོ་ཞེས་བརྗོད་པ་ནི་ཐ་སྙད་ནི་ཞེས་བྱ་བའོ། །འདིས་ནི་དོན་བྱ་བ་ཙམ་གྱིས་ཚིག་པའི་ཕྱིར་ན། སྣང་བ་ཐ་དད་པ་མ་བརྟགས་པ་ནི་དེ་ཁོ་ན་མ་མཚོན་པའི་རྒྱུར་བརྗོད་པ་ཡིན་ནོ། །འདྲ་བ་གཞན་བྱུང་བ་ཡང་རྒྱུ་ཡིན་ནོ་ཞེས་བརྗོད་པ་ནི་ཡང་ན་ཞེས་བྱ་བའོ། །འདྲ་བ་གཅིག་ཏུ་སྒྲོ་འདོགས་པའི་རྒྱུ་ཡིན་པའི་དཔེ་ནི་མཚེ་མ་དང་ཞེས་བྱ་བའོ། །གལ་ཏེ་ཡོད་པ་དམིགས་པ་ཞེས་བྱ་བ་དེར་ཡང་འདྲ་བའི་གཞན་འབྱུང་བ་ཡོད་པ་ཉིད་མ་ཡིན་ནམ་ཞེ་ན།
མ་ཡིན་ནོ་ཞེས་བརྗོད་པ་ནི། སྔ་མར་ནི་ཞེས་བྱ་བའོ། །གལ་ཏེ་སྔ་མར་དེ་ལྟར་བརྗོད་པར་འདོད་པ་ཡིན་ནོ་ཞེས་བྱ་བ་ག་ལས་ཡིན་ཏེ། འདྲ་བ་གཞན་མཐོང་བ་མེད་པར་ནི་གཅིག་ཏུ་ལྷག་པར་ཞེན་པ་མི་འབྱུང་བའི་ཕྱིར་རོ་སྙམ་ན། གང་ལས་ཞེས་བྱ་བའོ། །རྩྭ་ལ་སོགས་པ་གཞན་དང་གཞན་ལས་སྐྱེས་པ་ཞེས་བྱ་བ་འདིས་ནི་མི་འདྲ་བ་ཉིད་དུ་བསྟན་ཏོ། །མི་འདྲ་ཡང་དོན་བྱ་བ་ཙམ་ལས་མི་སླུ་བས་གཅིག་ཉིད་དུ་ཞེ་ན། མ་ཡིན་ནོ། །དེས་ན་དེར་འདྲ་བ་གཞན་མཐོང་བ་ལ་ལྟོས་པས་ཅི་ཞིག་བྱ་སྙམ་དུ་དགོངས་པའོ། །འོན་ཏེ་མེའི་ཉེ་བར་མེ་ཡིན་པ་དེས་ན་དེར་ཡང་འདྲ་བ་གཞན་མཐོང་པ་ཉིད་ལས་དེ་ལྟར་ཞེན་པ་ཡིན་ནོ་སྙམ་ན། དེ་ལ་ཉེ་བར་ལེན་པ་ནི་ཞེས་གསུངས་སོ། །ཇི་ལྟར་མེ་ཉེ་བར་ལེན་པ་ཡིན་སྙམ་ན་མེ་ལས་ཞེས་བྱ་བ་སྨོས་སོ། །འདི་ལས་སྙམ་ན་དང་པོ་ཞེས་གསུངས་སོ། །ལུགས་གཞན་གྱིས་ཀྱང་འདྲ་བ་གཞན་འབྱུང་བ་ཉིད་བརྗོད་པ་ནི། ཡང་ཞེས་བྱ་བའོ། །མེ་དེ་ཉིད་ལས་ཞེས་བྱ་བ་ནི་མཐོང་བ་ནི་མཐོང་བའི་རྗེས་སུ་འབྲངས་ནས་དཔག་པ་ལས་སོ་ཞེས་བྱ་བའི་དོན་ཏོ། །འོ་ན་རྩྭ་ལ་སོགས་པ་གཞན་དང་གཞན་ཉེ་བར་ལེན་པ་ཡིན་པའི་ཕྱོགས་ལ་དང་པོ་མེ་ལས་སྐྱེད་སྙམ་ནས། རིགས་མཐུན་པ་ལས་སྐྱེ་བ་ནི་ཞེས་གསུངས་སོ།། དེ་ལྟར་ལུགས་གཉིས་ལ་བརྟེན་ནས་འདྲ་བ་གཞན་འབྱུང་བས་བསླུས་པས་ཞེས་བྱ་བའི་རྣམ་པར་རྟོག་པ་ཡིན་ནོ་ཞེས་བརྗོད་པ་ནི། དེ་ཉིད་ཀྱི་ཕྱིར་ཞེས་བྱ་བའོ། །དེ་ཡང་ཞེས་བྱ་བ་ནི་ཡོད་པ་དམིགས་པས་རྟག་ཏུ་དེ་ལྟར་ཡོད་པར་དོགས་པས་མ་བསླུས་པ་ཞེས་བྱ་བའོ།། བཤད་པ་གཞན་གསུངས་པ་ནི་ཡང་ཞེས་བྱ་བའོ། །གང་དེ་ལྟར་ཡོད་པའི་དོགས་པ་ཡོད་པ་མ་ཡིན་པའོ། །ཡང་ན་དེ་ལྟར་ཡོད་པར་དོགས་པས་ན། དེ་ལྟར་ཡོད་པ་ལ་དོགས་པའོ། །དེ་ལྟ་མ་ཡིན་པ་ནི་དེ་ལྟར་ཡོད་པ་ལ་དོགས་པ་མེད་དོ། །དེ་ཉིད་ཀྱི་ཕྱིར་མ་བསླུས་པ་སྟེ་ཡོངས་སུ་ཚིམ་པ་ཡིན་ནོ། །དེ་ལྟར་ཡོད་པ་ལ་དོགས་པ་མེད་པ་ཉིད་བརྗོད་པ་ནི། དེ་ལྟར་ཡོད་པ་ནི་ཞེས་བྱ་བའོ། །འདི་ག་ལས་སྙམ་ན། ཏག་ཏུ་ཞེས་གསུངས་སོ། །སྔར་ནི་མ་བསླུས་པ་བསྒྲུབ་པའི་ཕྱིར་ཡོད་པ་དམིགས་པས་ཞེས་བརྗོད་པ་ཡིན་ལ། ད་ལྟར་ནི་དེ་ལྟར་ཡོད་པ་ལ་དོགས་པ་
མེད་པ་ཉིད་སྒྲུབ་པའི་དོན་དུ་རྟག་ཏུ་ཞེས་ཁྱད་པར་དང་བཅས་ནས་བརྗོད་དོ། །བར་ཆད་མེད་པར་དམིགས་པ་ལ་ཡང་ཅི་སྟེ་དོགས་པ་མ་ཡིན་སྙམ་ན། མ་དམིགས་ན་ནི་ཞེས་གསུངས་སོ། །དམིགས་པ་བར་དུ་མི་དམིགས་ལས་གང་གི་ཚེ་ཡང་དམིགས་པ་དེའི་ཚེ་འདྲ་བ་གཞན་ཞེས་བྱ་བ་ལ་སོགས་པར་བལྟའོ་ཞེས་བརྗོད་པ་ནི་གང་གི་ཚེ་ཞེས་བྱ་བའོ། །གཅིག་ཉིད་དུ་དོགས་པ་བསུ་ནས་ཟློག་པར་བྱེད་པ་ནི་ཞིག་པ་ཞེས་བྱ་བའོ། །ཞིག་པ་ཤི་བར་ངོ་ཤེས་པར་བྱས་པའོ། །མ་ཞིག་པ་དང་གཅིག་ཉིད་དོ་ཞེ་ན། ཅིའི་ཕྱིར་ཚད་མ་མ་ཡིན་སྙམ་དུ་དོགས་ན། ཁྱབ་བྱེད་མེད་པའི་ཕྱིར་ཚད་མ་མ་ཡིན་ནོ་ཞེས་བརྗོད་པ་ནི། མངོན་སུམ་དང་ཞེས་བྱ་བའོ། །ཇི་ལྟར་མི་འཐད་སྙམ་ན། དེ་ལྟར་ཡང་ཞེས་གསུངས་སོ། །ཡང་ན་དོན་བྱ་བ་དམིགས་པའམ། འདྲ་བ་གཞན་སྐྱེ་བ་འབའ་ཞིག་ནི་དེ་ཁོན་མི་རྟོགས་པའི་རྒྱུ་མ་ཡིན་གྱི་འོན་ཅི་ཞེ་ན། ཐོག་མ་མེད་པ་མ་རིག་པའི་བག་ཆགས་ཀྱང་ཡིན་ནོ་ཞེས་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །དེ་ཡན་ཆད་ནི་ཀུན་ནས་ཉོན་མོངས་པའི་རྣམ་པར་གཞག་པ་བརྗོད་པ་ཡིན་ནོ། །གཉིས་སུ་མེད་པ་ལ་ཡང་འདི་ཉིད་དཔག་པར་བྱ་བའོ། །དེ་ཉིད་ཀྱི་ཕྱིར་ཞེས་བྱ་བ་ནི་དྲ་མི་རྣམས་གློ་བུར་བ་ཡིན་པ་ཉིད་ཀྱི་ཕྱིར་རོ། །འོད་གསལ་ནི་དེ་ཁོ་ན་འཛིན་པའི་བདག་ཉིད་དོ། །རང་བཞིན་གྱིས་ཞེས་བྱ་བ་ནི་ངོ་བོ་ཁོ་ནས་སོ། །ཇི་ལྟར་འོད་གསལ་སྙམ་ན། རྟག་པ་ཉིད་དང་ཞེས་གསུངས་སོ། །དེ་ལྟ་ཡིན་དང་འདི་འགྲུབ་པོ་ཞེས་བརྗོད་པ་ནི་བདག་ཏུ་འཛིན་པ་ལ་སོགས་པ་དྲི་མ་རྣམས་ནི་གློ་བུར་པ་སྟེ་རང་བཞིན་མ་ཡིན་པས་སོ། །རྩ་བ་མེད་པ་ཅན་ཉིད་ཀྱིས་ནི་ཡུལ་མེད་པ་ཅན་གྱིས་སོ། །གླན་པའི་རྒྱ་ཙམ་དུ་ཟད་པའི་ཕྱིར་རོ། །མ་བརྟགས་པར་མངོན་པར་རློམ་པ་ཙམ་ཡིན་པའི་ཕྱིར་རོ། །རྣམ་པར་དཔྱད་ན་ནི་རང་རིག་པ་ཙམ་ཡིན་པས་འདོགས་པ་ཉིད་མེད་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་བདག་གྱུར་ཀྱང་ལམ་བཞིན་སྐྱོན་ནི་འབྱུང་ཞེན་ཞེས་བྱ་བའི་རྩོད་པ་ཡོངས་སུ་སྤངས་པའི་མཇུག་སྡུད་པ་ནི་དེ་ཕྱིར་སྔར་ཡང་ཞེས་བྱ་བའོ། །དེའི་བདག་ཏུ་གྱུར་པ་ལས་སྔར་ཚུ་རོལ་པའི་གནས་སྐབས་ན་ཡང་ངོ༌། །ཅིའི་ཕྱིར་ཕྱིས་
ནུས་པ་མེད་སྙམ་ན། ལམ་བདག་ཏུ་གྱུར་པ་འགའ་ཞིག་ལ་ཉེས་པ་འབྱུང་བ་གང་ཡིན་པ་དེར་ཡང་ན་གནས་ཕ་ནི་མ་ཡིན་ཏེ། འགའ་ཞིག་ལས་ཁྱད་པར་ཐོབ་བའི་ལམ་དེ་ཉིད་ཀྱིས་གནོད་པའི་ཕྱིར་རོ་ཞེས་བརྗོད་པ་ནི་ནུས་པ་ཡོང་ན་ཡང་ཞེས་བྱ་བའོ། །གནོད་པ་ཅན་ནི་ལམ་མོ། །དེ་བསྐྱེད་པར་ནུས་པ་ནི་མཐུ་སྟེ། བག་ཆགས་ཀྱི་འདུ་ཕྱེད་ཅེས་བྱ་བའི་དོན་ཏོ། །དེའི་སྙིང་པོ་ཅན་སེམས་ཀྱི་དངོས་པོ་ལ་སྐྱེད་པ་ཙམ་དུ་ནུས་པ་ཡོད་ཀྱང་ཡུན་དུ་གནས་ཤིང་འཕེལ་བའི་ནུས་པ་མ་ཡིན་ཏེ། ཡུན་ལ་ཡོད་པ་མ་ཡིན་ནོ་ཞེས་འབྲེལ་ཏོ། །གལ་ཏེ་དད་པ་ལ་སོགས་པ་ཞེས་བྱ་བའི་རྩོད་པ་ལ་ཚིགས་སུ་བཅད་བ་འདི་ལན་ཡིན་ནོ་ཞེས་བརྗོད་པ་ནི། གལ་ཏེ་སྐྱོན་སྐྱེ་བ་ཡིན་ན་ཡང་ཞེས་བྱ་བའོ། །གལ་ཏེ་ཇི་ལྟར་བདག་ཏུ་འཛིན་པ་ལ་སོགས་པའི་མ་གོམས་པ་ལས་བྱུང་བ་ནི་འབད་པས་བཟློག་པར་བྱ་བ་ཡིན་བ་དེ་བཞིན་དུ་གོམས་པས་ལམ་དེའི་བདག་ཏུ་གྱུར་ཀྱང་འབད་པས་བཟློག་པར་བྱ་བར་འགྱུར་རོ་ཞེ་ན། འཚེ་བ་མེད་དང་ཞེས་གསུངས་སོ། །འཚེ་བ་མེད་པ་ཉེས་པ་དང་མི་ལྡན་པ་ལ་ཉེས་པ་མཐོང་བ་ཡིན་ན་སྤང་བའི་དོན་དུ་འབད་པར་འགྱུར་བ་ཞིག་ན་དེ་ཡང་ཡོད་པ་མ་ཡིན་ནོ་ཞེས་རྒྱུ་མེད་པ་བརྗོད་པ་ཡིན་ནོ། །ཡང་དག་དོན་དང་རང་བཞིན་ཞེས་བྱ་བ་གཉིས་ཀྱང་སྤང་བར་མི་ནུས་བ་རྩོལ་བ་མེད་པའི་རྒྱུར་བརྗོད་པ་ཡིན་ནོ། །ཕྱིན་ཅི་ལོག་གིས་ནི་བདག་ཏུ་འཛིན་པ་ལ་སོགས་པས་མི་གནོད་དོ། །འབད་པ་དང་ལྡན་པའི་བློ་ཉིད་ནི་མེད་འབད་པ་དང་ལྡན་པ་ཡོད་དུ་ཟིན་ཀྱང་སྤང་བའི་དོན་དུ་འབད་པ་དགག་པ་ལ་རྒྱུ་འགལ་བ་ཡོན་ཏན་མཐོང་བ་དམིགས་པར་བརྗོད་པ་ཡིན་ནོ། །དེ་ཕྱོགས་འཛིན་ཕྱིར་རོ་ཞེས་བྱ་བའོ། །ཡོན་ཏན་ལ་ཡོན་ཏན་མ་མཐོང་བ་ཡང་མ་ཡིན་ཞེས་བྱ་བ་ནི་རྣལ་འབྱོར་པས་ཡོན་ཏན་མཐོང་བ་ཉིད་དོ་ཞེས་བྱ་བའི་དོན་ཏོ། །ཅི་ལྟར་ཞེ་ན། བདག་མེད་པ་ཞེས་གསུངས་སོ། །དེའི་ཕྱིར་སྤང་བའི་དོན་དུ་འབད་པ་མ་ཡིན་ནོ། །དེའི་ཕྱིར་ཞེས་བྱ་བ་ནི་འབད་པ་མེད་པའི་ཕྱིར་རོ། །འདི་ནི་བདག་མེད་པ་མཐོང་བའོ། །དེ་ཕྱོགས་འཛིན་ཕྱིར་རོ་ཞེས་བྱ་བ་འཆད་པ་ནི་སེམས་ནི་ཞེས་བྱ་བའོ། །ཡོངས་སུ་སྤངས་
པའི་ཆོས་ཅན་དག་བཅོམ་པ་ཡང་སྦྱོར་བར་བྱེད་པ་ནི་དངོས་པོ་མ་ལུས་པ་ཞེས་བྱ་བ་ལ་སོགས་པའོ། །ཉེས་པ་རྣམས་ལ་གནས་པ་ན་ཡང་དེ་གཞོམ་པ་ཉིད་ལ་འབད་པར་བྱེད་ན་ཡོན་ཏན་རྣམས་ལ་གནས་པ་ཡིན་ན་ལྟ་ཅི་སྨོས་ཞེས་བྱ་བའི་དོན་ཏོ། །གལ་ཏེ་ནང་གི་ཆོས་ནི་འགལ་བས་འགལ་བ་ཡིན་ཡང་སླར་འབྱུང་བ་ཡིན་ཏེ། ཁོང་ཁྲོ་བས་འདོད་ཆགས་བཞིན་ནོ། །བདག་ཏུ་འཛིན་པ་ན་ང་ཉིད་ཡིན་ནོ། །བདག་ཏུ་ཞེས་བྱ་བ་ཕྱོགས་སྔ་མ་འགོད་པ་ནི་གལ་ཏེ་འདོད་ཆགས་དང་ཞེ་སྡང་དག་ཅེས་བྱ་བའོ། །ནང་ཡིན་པའི་ཕྱིར་ནི་འདོད་ཆགས་དང་ཁོང་ཁྲོ་ངག་འབྱུང་བ་མ་ཡིན་གྱི། འོན་ཀྱང་སྐྱེ་གནས་གཅིག་པའི་ཕྱིར་རོ། །འདི་གཉིས་ཀྱི་སྐྱེ་གནས་ནི་བདག་ཏུ་འཛིན་པ་ཡིན་ནོ། །རྒྱུ་དང་འབྲས་བུའི་དངོས་པོ་ཡིན་པའི་ཕྱིར་རོ། །དེ་ལྟར་བདག་ཏུ་འཛིན་པ་དང་བདག་མེད་པར་མཐོང་བ་དག་གི་སྐྱེ་གནས་གཅིག་པའམ། རྒྱུ་དང་འབྲས་བུའི་དངོས་པོ་ཉིད་མ་ཡིན་ནོ། །ནང་ཉིད་དམ་ཕྱི་རོལ་ཉིད་འགལ་བའི་ཁྱད་པར་བྱེད་པ་ཉིད་མ་ཡིན་ནོ་ཞེས་ལན་འདེབས་པ་ནི། བདག་འཛིན་རྒྱུ་གཅིག་ཅན་ཉིད་དང༌། །ཞེས་བྱ་བའོ། །རྒྱུ་དང་འབྲས་བུའི་དངོས་པོ་ཡིན་པའི་ཕྱིར་ཡང་ཕན་ཚུན་མི་མཐུན་པ་ཡིན་ཡང་བདག་ཏུ་འཛིན་པ་ཡོད་ན་ཅིག་ཅར་གཏན་འཆད་པ་ནི་མ་ཡིན་ཏེ་ཞེས་སྦྱར་རོ། །ཇི་ལྟར་འདི་དག་རྒྱུ་དང་འབྲས་བུའི་དངོས་པོ་ཡིན་སྙམ་ན། གང་ཞིག་ཅེས་གསུངས་སོ། །དམུས་བྱུང་བ་ནི་སྡང་བ་ཞུགས་པའོ། །ཞེ་སྡང་འདོད་ཆགས་ཀྱི་རྒྱུ་ཉིད་བསྟན་ནས་འདོད་ཆགས་དང་ཞེ་སྡང་གི་རྒྱུ་ཉིད་དུ་སྟོན་པ་ནི། བདེ་བའི་རྒྱུར་ཞེས་གསུངས་སོ། །དེ་ལ་གནོད་པ་མེད་པ་ལ་ནི་བདེ་བའི་རྒྱུ་ལ་གནོད་པ་བྱེད་པ་ལའོ། །གང་གི་ཕྱིར་འདོད་ཆགས་ལ་སོགས་པའི་བདག་ཏེ་འཛིན་པའི་རྒྱུ་གཅིག་པ་ཅན་ཡིན་པ་དེ་ཉིད་ཀྱི་ཕྱིར། བདག་མེད་པ་མཐོང་བ་དེ་ཉིད་ལ་ཡིན་གྱི། བྱམས་པ་ལ་སོགས་པ་ནི་མ་ཡིན་ཏེ། དེ་དང་མི་འགལ་བའི་ཕྱིར་རོ་ཞེས་གསུངས་པ་ནི། དེ་ཉིད་ཀྱི་ཕྱིར་ཞེས་བྱ་བའོ། །གལ་ཏེ་དགའ་བར་བྱ་བ་དང༌། འཁྲུག་པར་
ཀུན་དུ་རྟོག་པ་ཉིད་རྨོངས་པ་ཡིན་ལ། དེ་ནི་བྱམས་པ་ལ་སོགས་པས་ཀྱང་བཟློག་པའི་ཕྱིར་འདི་ལྟར་ལམ་མ་ཡིན་སྙམ་དུ་དོགས་པ་བསུ་ནས། དེ་ཡང་འཇིག་ཚོགས་ལྟ་བ་ཡིན། །ཞེས་བྱ་བའོ། །དག་པར་བྱ་བའི་ཀུན་དུ་རྟོག་པ་ཡང་བདག་ལ་ཕན་འདོགས་པར་འཛིན་པ་ཉིད་དོ། །དེས་ན་བདག་ཏུ་འཛིན་པ་ཉིད་རྨོངས་པ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཤིན་ཏུ་ཉེས་པར་ཚར་གཅོད་པ་མ་ཡིན་སྙམ་ན། གཏི་མུག་དང་མི་འགལ་བའི་ཕྱིར་རོ་ཞེས་གསུངས་སོ། །གཏི་མུག་དང་ངར་འཛིན་པ་གཉིས་ཐ་དད་པར་བསམས་ན་གཞན་གྱིས་གལ་ཏེ་ཞེས་སྨྲས་སོ། །གྲུབ་པའི་མཐར་ནི་འདི་གཉིས་ཐ་མི་དད་པ་ཉིད་དུ་མཐོང་ནས་དེ་ནི་མ་ཡིན་ཏེ་ཞེས་གསུངས་སོ། །གལ་ཏེ་ཆོས་སུ་འཛིན་པ་ཡང་གཏི་མུག་ཉིད་མ་ཡིན་ནམ། དེས་ན་ཇི་ལྟར་དེ་ཡང་འཇིག་ཚོགས་ལྟ་བ་ཡིན་ཞེས་བརྗོད་སྙམ་ན། ཉོན་མོངས་པ་ཅན་གྱི་ཞེས་གསུངས་སོ། །འདིར་འདོད་ཆགས་དང་ཞེ་སྡང་གི་སྐྱེ་གནས་ཀྱི་རྨོངས་པ་སྐབས་ཡིན་གྱི་རྨོངས་པ་ཙམ་ནི་མ་ཡིན་ནོ་ཞེས་བྱ་བའི་དོན་ཏོ། །དེས་ན་ཞེས་བྱ་བ་ནི་ཉོན་མོངས་བ་ཅན་མ་ཡིན་པས་ནའོ། །དེ་དག་ནི་དགྲ་བཅོམ་པའོ། །རྒྱུད་གྲོལ་བ་ཅིའི་ཕྱིར་སྙམ་ན། འཇིག་ཚོགས་ལ་ལྟ་བ་ནི་སྤངས་པ་ཞེས་གསུངས་སོ། །གལ་ཏེ་མ་རིག་པའི་རྐྱེན་གྱིས་འདུ་བྱེད་ཅེས་གསུངས་པའི་ཕྱིར་མ་རིག་པ་ལོག་པ་ཙམ་རྨོངས་པ་མ་ཡིན་ནམ། འཇིག་ཚོགས་སུ་ལྟ་བ་ནི་མ་ཡིན་ནོ་སྙམ་ན། རིག་པའི་ཞེས་གསུངས་སོ། །དགག་པ་ནི་མི་བདེན་པ་དང་ཆོས་མ་ཡིན་པ་ལ་སོགས་པ་ལྟར་འགལ་བརྗོད་པར་བྱེད་པ་ཡིན་པའི་ཕྱིར་རོ། །དངོས་པོ་མེད་པ་ནི་རྨོངས་པ་མ་ཡིན་ནོ། །སོ་སོར་རྟོག་པ་མེད་པའི་རང་བཞིན་མ་རིག་པ་ཡིན་ན། ལྟ་བ་དང་འགལ་བ་བརྗོད་པ་ནི་གལ་ཏེ་ཞེས་བྱ་བའོ། །དེར་ཞེས་བྱ་བ་ནི་མ་རིག་པར་རོ། །འོན་ཏེ་མྱ་ངན་ལས་འདས་པ་ལ་ཡང་སོ་སོར་རྟོག་པ་མེད་དོ་སྙམ་ན། ཕུང་པོ་རྣམས་ཞེས་སྨོས་སོ། །ཧ་ཅང་ཁྱད་པར་ཡོད་པ་ཉིད་གསལ་བར་བྱེད་པ་ནི་ཕུང་པོ་ལྷག་མ་མེད་པའི་ཞེས་བྱ་བའོ། །ཉོན་མོངས་པའི་གཞི་མ་ཡིན་པའི་ཕྱིར་ན། མྱ་ངན་ལས་འདས་པ་མ་རིག་པ་ཉིད་མ་ཡིན་ནོ་སྙམ་པའི་དོགས་པ་བསུ་བ་ནི། འོན་ཏེ་དེ་ནི་ཞེས་བྱ་བ་སྟེ།
མྱ་ངན་ལས་འདས་པའོ། །འོ་ན་ནི་ཞེས་བྱ་བ་ནི་ལན་ནོ། །ད་ནི་སོ་སོར་རྟོག་པ་མེད་པའོ། །དེའི་གཞི་ཡིན་པའི་ཕྱིར་ནི་ཉོན་མོངས་པའི་གཞི་ཡིན་པའི་ཕྱིར་རོ། །ཇི་ལྟར་འཇིག་ཚོགས་ལ་ལྟ་བ་ཉིད་མ་རིག་པ་ཡིན་སྙམ་པའི་དོགས་པ་སེལ་བས། རིག་པའི་མ་མཐུན་ཕྱོགས་ཉིད་ཕྱིར། །ཞེས་བྱ་བ་འཆད་པ་ནི་རིག་པ་དང་འགལ་བའི་ཞེས་བྱ་བའོ། །རིག་པ་མེད་པ་བཀག་པ་ཙམ་གྱི་བདག་ཉིད་ནིའོ། །དེ་མེད་པ་ནི་ཞེས་བྱ་བ་ནི་རིག་པ་ལྡོག་པའོ། །མྱ་ངན་ལས་འདའ་བ་ཡང་ནི་ཕུང་པོ་ལྷག་མ་མེད་པ་ལ་ཡང་ངོ༌། །འོན་ཏེ་ཉོན་མོངས་པའི་གཞི་ཉིད་ནི་མ་རིག་པ་ཡིན་ལ། དེ་ཡང་མྱ་ངན་ལས་འདས་པ་མེད་དོ་སྙམ་ན། མེད་པ་ནི་ཞེས་གསུངས་སོ། །མ་ཡིན་པའི་རང་བཞིན་ཡང་ཧ་ཅང་ཐལ་བའི་ཕྱིར་མ་རིག་པར་མི་འཐད་དོ་ཞེས་བཤད་པ་ནི། དེ་ལས་གཞན་པ་ཡང་ཞེས་བྱ་བ་སྟེ། རིག་པ་དེ་ལས་གཞན་མ་རིག་པའོ། །ཅིའི་ཕྱིར་ཞེ་ན། གཟུགས་ལ་སོགས་པ་རྣམས་ལ་ཡང་ཞེས་གསུངས་སོ། །ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་ལ་ཉོན་མོངས་པ་ཅན་མ་ཡིན་པའི་ཕུང་པོ་ལྔ་ཡོད་དོ་ཞེས་བྱ་བ་ལུང་ཡིན་ཏེ། དེས་ན་དེ་དག་ཀྱང་མ་རིག་པ་ཉིད་དུ་ཐལ་བར་འགྱུར་རོ། །དེའི་ཕྱིར་ཞེས་བྱ་བ་ནི་གཉི་གའི་རང་བཞིན་མ་རིག་པར་མི་འཐད་པའི་ཕྱིར་རོ། །འདི་ལྟར་ཞེས་བྱ་བ་ལ་སོགས་པས་ནི་དཔེ་ཉིད་གཞུང་འཛུགས་པའོ། །འོ་ན་ཆོས་མ་ཡིན་ཅི་ཞིག་སྙམ་ན། ཆོས་མ་ཡིན་པ་ནི་ཞེས་གསུངས་སོ། །གཞན་དག་གིས་བདེན་པ་དང་མི་བདེན་བའི་ཚིག་གཉིས་འཆོལ་བར་སྨྲས་པ་ནི། དེ་ལྟ་ཡིན་ན་ཞེས་བྱ་བའོ། །ཡང་དག་པ་མ་ཡིན་པ་སྟོན་པ་མི་བདེན་པ་ཡིན་ནའོ། །མི་བདེན་པ་ཉིད་དུ་མི་འགྱུར་ལ་ཞེས་བྱ་བ་ནི་ཇི་ལྟར་བསྟན་པའི་དངོས་པོ་ཡོད་པའི་ཕྱིར་ཡང་དག་པར་སྟོན་པ་ཡིན་པས། འདོད་པ་གཞན་དུ་གྱུར་པས་མི་བདེན་པར་འདོད་པར་མི་འགྱུར་རོ་ཞེས་བྱ་བའི་ཐ་ཚིག་གོ །མེད་ཀྱང་ན་ནི་འཁྲུལ་པས་ཡོད་པར་སེམས་པ་ན་གང་གི་ཚེ་ཡོད་དོ་ཞེས་སྟོན་པ་དེའི་ཚེ་ཡང་དག་པ་མ་ཡིན་པའི་དོན་མི་བརྗོད་པའི་ཕྱིར་བརྫུན་སྨྲ་བར་འགྱུར་རོ། །འདི་ཡང་སེམས་པ་ཞེས་བྱ་བ་འདིའི་དེ་མ་ཐག་ཏུ་མེད་དོ་ཞེས་སྟོན་པར་
བྱེད་པ་ཞེས་འབྲེལ་ཏོ། །སྔ་མས་ནི་མི་འདོད་པ་འཐོབ་པར་བསྟན་ལ་ཕྱི་མས་ནི་འདོད་པ་མི་འཐོབ་པར་རོ། །ཡང་དག་པ་ཉིད་དམ་ཡང་དག་པ་མ་ཡིན་པ་ཉིད་ནི་བསམ་པ་ལ་ལྟོས་པ་ཡིན་གྱི་དོན་ལ་ནི་མ་ཡིན་ནོ་ཞེས་སྟོན་པ་ནི་སྒྲ་རྣམས་ཞེས་བྱ་བའོ། །དོན་དམ་པར་དངོས་པོ་ཡོད་པ་ཡིན་ཡང་གལ་ཏེ་མེད་པར་ངེས་པས་མེད་དོ་ཞེས་སྟོན་ན་དེའི་ཚེ་ནི་ཚིག་དེ་བདེན་པ་ཁོ་ན་སྟེ། རྣམ་པར་རྟོག་པ་ཡུལ་ཡིན་པའི་ཕྱིར་རོ། །གཞན་དུ་ཞེས་བྱ་བ་ནི་ངེས་པ་དང་རྗེས་སུ་མཐུན་པར་མི་བརྗོད་ནའོ། །བྱང་ཆུབ་སེམས་དཔའ་རྣམས་ལ་ནི་དོན་ཅི་ལྟ་བ་བཞིན་གྱི་བསམ་བ་ཇི་ལྟ་བ་ཉིད་བརྗོད་པ་ནི་བདེན་པ་ཡིན་ལ། གཞན་ནི་མི་བདེན་པ་ཡིན་ནོ་ཞེས་བརྗོད་པ་ནི། བྱང་ཆུབ་སེམས་དཔའ་རྣམས་ལ་ནི། །ཞེས་བྱ་བའོ། །དེས་ན་ཞེས་བྱ་བ་ནི་ཁ་ན་མ་ཐོ་བ་ཡིན་བས་སོ། །གཞན་ཞེས་བྱ་བ་ནི་ཇི་སྐད་བརྗོད་པ་ལས་བཟློག་པའོ། །དམིགས་པ་ཡིན་པའི་ཕྱིར་ཞེས་བྱ་བ་ནི་དམིགས་པའི་རང་བཞིན་ཡིན་པའི་ཕྱིར་རོ། །འདི་སེམས་ལས་བྱུང་བ་ཉིད་དུ་ཇི་ལྟར་གྲུབ་ཅེ་ན། རྟེན་དང་ཞེས་གསུངས་སོ། །རྟེན་ལ་སོགས་པས་མཚུངས་པ་ཉིད་དུ་ལྡན་པས་ན་མཚུངས་བར་ལྡན་པ་ཞེས་ཆོས་མངོན་པ་ལས་འདི་སེམས་ལས་བྱུང་བའི་ནང་དུ་བརྗོད་དོ། །དེ་ལ་གང་མ་རྟོགས་པའི་རང་བཞིན་ཉིད་མ་རིག་པ་ཡིན་ན་དེའི་ཚེ་འདི་དམིགས་པ་དང་རྣམ་པ་ལ་སོགས་པ་མཚུངས་པར་མི་གསུང་བར་འགྱུར་རོ། །དེ་ལ་རྟེན་དང་དམིགས་པར་མཚུངས་པ་ནི་མིག་ལ་སོགས་པའི་ཤེས་པ་རྣམས་དང་རྟེན་དང་དམིགས་པ་དང་འདྲ་བའི་ཕྱིར་རོ། །རྣམ་པ་མཚུངས་པ་ནི་སེམས་བཞིན་དུ་རྟོགས་པའི་རྣམ་པ་ཡིན་པའི་ཕྱིར་རོ། །དུས་མཚུངས་པ་ནི་དུས་མཉམ་པར་བྱུང་བའི་ཕྱིར་རོ། །ཇི་ལྟར་སེམས་སྐད་ཅིག་གཅིག་ལ་རྫས་གཅིག་པ་ཡིན་པ་དེ་བཞིན་དུ་སེམས་ལས་བྱུང་བ་ཡང་རྫས་རེ་རེའི་བདག་ཉིད་ཅན་ཡིན་པ་དེས་ན་རྫས་མཚུངས་པ་ཉིད་དོ། །དེས་ན་སེམས་ལས་བྱུང་བ་ཡིན་པའི་ཕྱིར་མ་རིག་པ་རྟོགས་པའི་རང་བཞིན་ནི་མ་ཡིན་གྱི། འོན་ཀྱང་རྟོགས་པའི་རང་བཞིན་ཁོ་ནའོ། །རིགས་པས་བསྒྲུབས་ནས་དངོས་སུ་རྗོད་པར་བྱེད་པའི་ལུང་ཡང་བརྗོད་པ་ནི། གསུངས་བའི་ཡང་ཕྱིར་ཏེ་ཞེས་བྱ་བའོ། །ཤེས་རབ་ཀྱི་རྣམ་པ་
ལས་ཞེས་བྱ་བ་ནི་རྣམ་པར་འགྲོལ་བའོ། །གཞུང་གང་གིས་གསུངས་ཤེ་ན། དེ་ལ་ཞེས་བྱ་བའོ། །གསུངས་པ་གཞན་ཡང་བརྗོད་པ་ནི་དེ་བཞིན་དུ་ཞེས་བྱ་བའོ། །ལུང་ལས་མ་རིག་པ་གཞན་ཁོ་ནར་བསྟན་པ་ཡིན་ནོ་སྙམ་པའི་དོགས་པ་བསུ་བ་ནི། གལ་ཏེ་ཞེས་བྱ་བའོ། །དེ་ཡང་ཞེས་བྱ་བ་ནི་འཇིག་ཚོགས་སུ་ལྟ་བའོ། །མ་རིག་པ་ཡན་ལག་ཏུ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བ་ལ་མ་རིག་པ་ཡན་ལག་ཏུ་སྟེ། དེར་རང་གི་ངོ་བོས་བརྗོད་པར་བྱ་བ་ལས་ཉེ་བར་བཏགས་ པ་ལ་དགོས ་བ་ཅི་ཡོད་ཅེས་བྱ་བའི་དོན་ཏོ། །དེ་ལྟར་མ་རིག་པ་བསྟན་པས་ནི་ཚད་མ་འགའ་ཡང་ཡོད་པ་མ་ཡིན་ནོ་ཞེས་བརྗོད་པ་ནི་དེ་ལྟར་མ་རིག་ཅེས་བྱ་བའོ། །བཟློག་པ་ལ་ནི་ཞེས་བྱ་བ་ནི་མ་རིག་པ་ནི་འཇིག་ཚོགས་ལ་ལྟ་བ་ཉིད་ཡིན་ནོ་ཞེས་བྱ་བ་འདི་ལ་ནི་སོ་སོར་མ་བརྟགས་པའི་ཉེས་པ་ཚད་མ་ཡིན་ནོ། །ཚིགས་སུ་བཅད་པ་འདི་དག་ཉིད་འཆད་པ་ནི། ལྟ་བའི་སྒོ་ནས་ཞེས་བྱ་བའོ། །འདིས་ནི་གཞན་ནི་རིགས་པ་མ་ཡིན་ཞེས་བྱ་བ་བཤད་དོ། །རྣམ་འགྲེལ་ལ་འཇུག་པར་བྱེད་པ་ནི་གལ་ཏེ་ཞེས་བྱ་བའོ། །གཞན་དུ་ཡིན་ཡང་རུང་སྟེ་ཞེས་བྱ་བ་ནི་ཕྱིན་ཅི་ལོག་ཏུ་དམིགས་པའི་རང་བཞིན་ནོ། །དེ་ཞེས་བྱ་བ་ནི་གཏི་མུག་གོ །ཁྱད་པར་གྱི་སྒྲ་ཞེས་བྱ་བ་ནི་འཇིག་ཚོགས་ལ་ལྟ་བའི་སྒྲའོ། །སྤྱི་ནི་མ་རིག་པ་སྟེ། དེའི་དོན་ཅན་མ་ཡིན་པའི་ཕྱིར་རོ། །ལྟ་བ་མ་རིག་པ་དང་ཐ་མི་དད་ན་ཐ་དད་པ་ལ་རྟེན་པ་མཚུངས་པར་ལྡན་པར་བརྗོད་པར་མི་འགྱུར་རོ་ཞེས་རྩོད་པ་གཉིས་པའི་དོགས་པ་བསུ་བ་ནི་དེ་བཞིན་དུ་ཞེས་བྱ་བའོ། །འདིས་འགལ་བར་བྱེད་པས་འགལ་བ་སྟེ། འགལ་བར་བྱེད་པའི་ཚིག་གོ །བཤད་བྱ་ཞེས་བྱ་བ་ནི་སྤྱི་དང་ཁྱད་པར་དུ་རྟོགས་པས་སོ། །མ་རིག་པ་ཞེས་བྱ་བ་ནི་སྤྱི་ཡིན་ལ། ལྟ་བ་ཞེས་བྱ་བ་ནི་ཁྱད་པར་ཡིན་ནོ། །གཅིག་ལ་ཡང་ཉེ་བར་བསྟན་པ་ཅན་གྱི་དངོས་པོས་ཐ་དད་པར་བརྟགས་པ་ཡིན་ནོ་ཞེས་བྱ་བ་ནི་གཞན་གྱིའོ། །དེའི་བདག་དང་ཡང་མཚུངས་པར་ལྡན་བར་འགྱུར་བ་ཁོ་ནའོ་ཞེས་བྱ་བ་ཡང་གཞན་ཁ་ཅིག་གིའོ། །གལ་ཏེ་འགལ་བའི་ཕྱིར་བདག་མེད་པ་མཐོང་བས་བདག་ཏུ་ལྟ་བ་དང་འབྲལ་
མོད། ཉོན་མོངས་པ་ཐམས་ཅད་དང་བྲལ་བར་གོ་ཇི་ལྟར་འགྱུར་ཞེ་ན། སྟོང་ཉིད་ལྟ་དང་དེ་འགལ་ཕྱིར། །ཞེས་གསུངས་སོ། །འཇིག་ཚོགས་སུ་ལྟ་བ་དེ་འགལ་བའི་ཕྱིར་དེ་ལས་བྱུང་བ་བདག་ཏུ་ལྟ་བའི་རྒྱུ་ཅན་ཀུན་འགལ་བ་ཡིན་ཏེ། དེས་ན་ཉོན་མོངས་པ་ཐམས་ཅད་སྤོང་བ་ཡིན་ནོ་ཞེས་བྱ་བའི་དོན་ཏོ། །དོན་ལ་ཉེ་བར་སྦྱོར་བ་དེ་བཞིན་དུ་ཞེས་བྱ་བའོ། །དེའི་རང་བཞིན་ནི་འཇིག་ཚོགས་སུ་ལྟ་བའི་རང་བཞིན་ནོ། །འདིས་ནི་རྩོད་པ་གཉིས་པ་ཉིད་བསལ་ཏོ། །དང་པོ་ནི་ཁས་མ་བླངས་པ་ཁོ་ནས་སྤངས་པ་ཡིན་ཏེ། འཇིག་ཚོགས་སུ་ལྟ་བའི་རང་བཞིན་གྱི་མ་རིག་པ་ཉིད་བཅོམ་ལྡན་འདས་ཀྱི་གཙོར་བསྟན་པར་ཁས་བླངས་པའི་ཕྱིར་རོ། །དེས་ན་བདག་ཏུ་ལྟ་བ་ཉིད་མ་རིག་པ་ཡིན་ནོ་ཞེས་བྱ་བར་གནས་སོ། །འདི་ལྟར་ཞེས་བྱ་བ་ལ་སོགས་པ་ནི། སྟོང་ཉིད་ལྟ་དང་དེ་འགལ་ཕྱིར། །ཞེས་བྱ་བ་ལས་འཆད་པའོ། །དེ་ལྟར་བདག་མེད་པར་མཐོང་བ་ལ་སོགས་པའི་དབང་གི་སྟོབས་དང་ལྡན་པ་དང༌། བཟློག་པར་བྱ་བ་མ་ཡིན་པ་ཉིད་དུ་བརྗོད་ནས་བདག་ཏུ་ལྟ་བ་ཡང་བཟློག་པར་བྱ་བ་མ་ཡིན་པའི་རྒྱུ་མཚན་སྲོག་ཆགས་ཀྱི་རང་བཞིན་ཡིན་པ་ནི་རང་བཞིན་འདི་ཡིན་པ་དེ་ལས་འདི་རྐྱེན་གཞན་གྱིས་ནི་གོལ་འགྱུར་ཞིང་ཞེས་བྱ་བ་ལ་སོགས་པས་བཀག་ཟིན་པ་ཡིན་ནོ་ཞེས་བརྗོད་པ་ནི་མིན་ཞེས་བྱ་བའོ། །མི་ཟད་པ་ནི་བཟློག་པར་བྱ་བ་མ་ཡིན་པ་ཉིད་དོ། །སྲོག་ཆགས་ཆོས་ཉིད་ཕྱིར་ནི་སྲོག་ཆགས་ཀྱི་རང་བཞིན་ཡིན་པའི་ཕྱིར་རོ། །གཟུགས་ལ་སོགས་པ་བཞིན་དུ་ཉེས་པ་རྣམས་ནི་མ་ཡིན་ནོ། །ཅིའི་ཕྱིར་ཞེ་ན་གཟུགས་དང་རོ་ལ་སོགས་པ་ལྟར་བདག་ཏུ་འཛིན་པ་ནི་ཐོག་མ་མེད་པའི་བག་ཆགས་ཙམ་ལས་བྱུང་བས་ན་སྲོག་ཆགས་ཀྱི་ཆོས་ཉིད་དུ་མ་གྲུབ་པའི་ཕྱིར་རོ། །བདག་ཏུ་འཛིན་པ་ཡང་བཟློག་པར་བྱ་བ་མ་ཡིན་པར་དམ་འཆའ་བ་ནི་མེ་དྲོ་བ་མ་ཡིན་ནོ་ཞེས་བྱ་བ་ལྟར་མངོན་སུམ་དང་འགལ་བ་ཡིན་ནོ་ཞེས་བརྗོད་པ་ནི། གཉེན་པོའི་ཕྱོགས་བདག་མེད་པ་དང་འབྲེལ་པ་སྟེ་མངོན་དུ་གྱུར་པས་ན་ལྡོག་པའི་ཕྱིར་རོ། །གལ་ཏེ་ཆ་དང་འབྲེལ་པས་ཟངས་མའི་སྲ་བ་ཉིད་བཞིན་དུ་བདག་མེད་པ་མཐོང་བས་བདག་ཏུ་ལྟ་བ་བཟློག་ཀྱང་ཡང་འབྱུང་བ་ཡིན་ནོ་སྙམ་དུ་བསམས་ནས་
དམ་བཅས་པ་མངོན་སུམ་དང་འགལ་བ་མ་ཡིན་ནོ་སྙམ་པའི་དོགས་བ་བསུ་ནས་ཁྱད་པར་བརྗོད་པ་ནི་ཉེས་པ་བདག་ཏུ་ལྟ་བ་རྣམ་པར་འགགས་པ་བདག་མེད་པ་མཐོང་བ་དེའི་བདག་ཏུ་གྱུར་པ་ཉིད་ཀྱིས་འབྲེལ་མེད་ཕྱིར་ཏེ། ཉེ་བར་གནས་པའི་ཕྱིར་རོ། །དེ་ལྟར་མེ་དང་འབྲེལ་པའི་རྟག་པར་གནས་པ་མ་ཡིན་ནོ། །ཡང་ན་འབྲལ་བ་ཡིན་ཡང་དེས་བཟློག་པ་ཐམས་ཅད་ཡང་འབྱུང་བ་ནི་མ་ཡིན་ཏེ། མེ་ལོག་ཀྱང་ཐལ་བ་སྲ་བ་ཉིད་ཀྱང་ཕྱིར་བཟློག་པ་མ་ཡིན་ཞེས་བརྗོད་པ་ནི་ཐལ་བ་བཞིན་དུ་ཞེས་བྱ་བའོ། །དེ་ལྟར་ལམ་བདག་མེད་པ་མཐོང་བ་ལ། བདག་ཏུ་འཛིན་ པ་མི་དགོས ་པར་བརྗོད་ནས་ལམ་ཉིད་དུ་དོགས་པ་བསུ་ནས་ཟློག་པར་བྱེད་པ་ནི། གལ་ཏེ་བདག་བསྒོམ་པར་ཀྱང་ཞེས་བྱ་བའོ། །བདག་བསམ་པར་བྱ་ཞེས་བྱ་བ་ལ་སོགས་པའི་སྒྲས་ནི་ཤེས་པར་བྱ་བ་བསྒོམ་པར་བྱ་ཞེས་བྱ་བའི་ཚིག་གཉིས་བརྗོད་པ་ཡིན་ནོ། །དེས་ན་བདག་ཤེས་པར་བྱ་བ་ནི། ལུས་དང་དབང་པོ་ལ་སོགས་པའི་འབྱུང་བ་ཆེན་པོ་ལས་ཐ་དད་པར་རོ། །བསམ་པར་བྱ་བ་ནི་བློ་ལ་སོགས་པ་ལས་ཐ་དད་པར་རོ། །བསྒོམ་པར་བྱ་ཞེས་ཡུལ་འཛིན་པ་ལ་སོགས་པའི་རང་བཞིན་ལས་ཐ་དད་པར་རོ། །རིག་པ་ཀུན་དགའ་བ་གཅིག་གི་རང་བཞིན་བདག་གི་དེ་ཁོ་ནས་བསྒོམ་པར་བརྗོད་པ་ཡིན་ནོ་ཞེ་ན། དེ་ལ་རེ་ཞིག་གལ་ཏེ་རིག་པ་ཅན་ལ་སོགས་པ་ཐ་དད་པར་སྨྲ་བ་དེ་སྐད་རྗོད་པར་བྱེད་ན་དེའི་ཚེ་དེའི་བདག་ཏུ་ལྟ་བ་ནི་བདག་གི་བའི་ལྟ་བ་དང་རྗེས་སུ་འབྲེལ་པ་ཉིད་དེ། ཆགས་པའི་རང་བཞིན་ཡིན་པའི་ཕྱིར་རོ་ཞེས་བརྗོད་པ་ནི། གང་ཞིག་ཅེས་བྱ་བ་ལ་སོགས་པའོ། །བདག་དེ་ལ་ནི་བདག་ཏུ་སྨྲ་བ་དེ་ངའོ་ཞེས་ཞེན་པའི་བདག་ཉིད་ཅན་ཉིད་དུ་བདག་ལ་ཞེན་ཅིང་ལྟ་བར་འགྱུར་རོ། །འཐད་པ་ཉིད་ཀྱིས་བདག་མི་འབྲེལ་བའི་ཕྱིར་ཆགས་པའི་སྙིང་པོ་ཅན་དེར་ལྟ་བ་ཡང་མི་འབྲལ་བ་ཁོ་ནའོ་ཞེས་བརྗོད་པ་ནི། རྟག་ཏུ་ཞེན་པར་ཞེས་འགྱུར་གསུངས་སོ། །ཞེན་པ་ཡོད་ན་ཡང་ཞེན་པའི་ཡུལ་ཕན་འདོགས་པ་རྣམས་ལ་སྲེད་པར་འགྱུར་བ་དེས་ཀྱང་དེ་དག་ལ་སྡུག་བསྔལ་བ་དང་རྗེས་སུ་འབྲེལ་པའི་སྐྱོན་རྣམས་སྒྲིབ་པར་བྱེད་དོ། །དེ་ལྟ་མ་ཡིན་ན། དེ་མ་
མཐོང་བས་སྐྱོ་བར་མི་འགྱུར་རོ་ཞེས་བྱ་བའི་དོན་ཏོ། །འོན་ཏེ་བདག་གཉིས་སུ་མེད་པར་སྨྲ་བ་དག་འཁོར་བ་པའི་སྐྱེ་བོ་ལ་གྲུབ་པའི་སྤྲོས་པ་ཐམས་ཅད་འཁྲུལ་པ་ཡིན་པའི་ཕྱིར་བདག་འབའ་ཞིག་མཐོང་བ་ཐར་པའི་བདག་ཉིད་ཡིན་པའི་ཕྱིར་ཐར་པའི་གམ་དུ་རྟོགས་པར་བྱེད་ན། འདིར་ཡང་གང་ཞིག་བདག་མཐོང་ཞེས་བྱ་བ་ཉིད་བཟླས་སོ། །བདེ་བ་དང་བདེ་བའི་སྒྲུབ་པར་བྱེད་པ་ཅི་འདྲ་བ་རྣམས་ལ་སྲེད་པར་འགྱུར་ལ། སྟོབས་དང་ལྡན་པའི་ཆ་དེ་ཉིད་ཀྱིས་འཁྲུལ་པའི་རང་བཞིན་གྱིས་ཉེས་པ་དང་དེ་མཐོང་བ་མ་ཐོབ་པར་བྱས་པས་ཆགས་པ་དང་བྲལ་བ་ཉིད་མི་འཐོབ་པར་བྱེད་དོ་ཞེས་བྱ་བའི་དོན་ཏོ། །བདག་ཏུ་མཐོང་བ་ལས་ཞེན་པ་གཞན་ཡིན་པའི་དབང་དུ་བྱས་ནས་རྩོད་པ་ནི་གལ་ཏེ་ཞེས་བྱ་བའོ། །འདི་ཉིད་ལ་ཐ་དད་པར་ལྟ་བས་ལན་དུ། གལ་ཏེ་བདག་ལ་ཆགས་པར་མི་འགྱུར་ན། བུད་མེད་ལ་སོགས་པ་བདག་ལ་ཉེ་བར་མཁོ་བ་ལ་རྣམ་པ་གཞན་དུ་ཆགས་པར་མི་འགྱུར་རོ་ཞེས་བྱ་བའི་དོན་སྨྲས་པ་ནི་གང་ཞིག་གཞན་ལ་ཞེས་བྱ་བ་སྟེ་བདག་ལ་ཉེ་བར་མཁོ་བ་ལའོ། །འདི་ཉིད་གསལ་བར་བྱེད་པ་ནི། བདག་མཐོང་ཉིད་ལ་ཞེས་བྱ་བའོ། །དེའི་ཚེ་ཞེས་ཁོང་ནས་ཕྱུང་ལ་འགའ་ལ་ཡང་ཞེས་བྱ་བར་སྦྱར་རོ། །བདག་ཏུ་ལྟ་བ་ཉིད་ཆགས་པའི་སྙིང་པོ་ཅན་ཡིན་ནོ་ཞེས་བརྗོད་པ་ནི་གང་ཞིག་ཅེས་བྱ་བའོ། །བདག་ལ་ཆགས་པ་མེད་ཀྱང་གཞན་ལ་ཆགས་པ་སྲིད་པར་དོགས་པ་བསུ་བ་ནི། འོན་ཏེ་ཞེས་བྱ་བའོ། །བདག་ཏུ་ལྟ་བ་ནི་རང་གི་བཏང་ནས་གཞན་ལ་ཕན་འདོགས་པར་བྱེད་ན་རྟོག་པ་སྔོན་དུ་བྱེད་པ་ཉིད་དུ་མི་འགྱུར་རོ་ཞེས་ལན་འདེབས་པ་ནི་གལ་ཏེ་བདག་ཉིད་ཆེན་པོ་ཞེས་བྱ་བའོ། །འབྱུང་བར་འགྱུར་བའི་འབྲས་བུ་མེད་པར་གཞན་ལ་ཕན་འདོགས་པ་ཙམ་གྱིས་འཇུག་པ་ནི་ཕྱུགས་ཟན་དུ་བསྐྱེད་པ་བཞིན་དུ་རྨོངས་པ་ལས་སྐྱེས་པ་ཁོ་ན་ཡིན་ནོ་ཞེས་བྱ་བའི་དོན་ཏོ། །འོན་ཏེ་སངས་རྒྱས་པ་བཞིན་དུ་འབྲས་བུ་མེད་ཀྱང་གཞན་ལ་ཕན་འདོགས་པ་ཉིད་ཡིན་ནོ་སྙམ་དུ་དོགས་པ་བསུ་ན། དེ་ལྟ་ཡིན་ན་ཞེས་སྨྲས་སོ། །གཏད་མེད་ནི་ཁྱེད་ལ་རྗེས་སུ་མཐུན་པ་མ་ཡིན་པའོ། །སངས་རྒྱས་པ་ནི་བདག་མ་མཐོང་བས་རང་གི་དོན་གྱིས་གཞན་ལ་ཕན་
འདོགས་པ་ཉིད་ཀླན་ཀར་འོས་པ་མ་ཡིན་ནོ། །གཞན་ལ་ནི་བདག་མཐོང་བ་ཡོད་པས་ཀླན་ཀར་འགྱུར་བ་ཉིད་དོ། །འོན་ཏེ་ཞེས་བྱ་བ་ལ་སོགས་པ་ནི་རྟོག་པ་སྔོན་དུ་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ཡིན་ན་ཞེས་བྱ་བ་ནི་གཞན་གྱི་དོན་བྱེད་བ་ཉིད་བདེ་བ་ཡིན་ནོ་ཞེས་ཁས་ལེན་པ་ཡིན་ནོ། །དེ་ལྟ་ན་ཡང་ཞེས་བྱ་བ་ནི་ཐར་པ་མ་ཡིན་པ་ནའོ། །རང་གི་བདེ་བ་ལ་ཆགས་བས་རྨོངས་པ་དེ་འདྲ་བ་དག་གོ །འདི་ནི་ཞེས་བྱ་བ་ནི་ཚོགས་ཅན་མའི་ལུས་ཉིད་བའོ། །རང་གི་དོན་ལ་གནས་པ་ནི་བདག་ཏུ་མཐོང་བ་ཅན་ནོ། །འདི་ག་ལས་སྙམ་ན་དེ་འམ་གཞན་ལ་ཞེས་གསུངས་སོ། །བདེ་བ་གཉི་ག་གཅིག་ཏུ་བྱེད་པ་ཡང་བདག་ལ་ཞེན་པའི་ཕྱིར་རོ། །འདི་ལྟར་བདག་ལ་ཆགས་པ་ནི་ཕུལ་དུ་བྱུང་བའི་བདེ་བ་འདོད་ཀྱང་དེ་མ་ཐོབ་ན་ངན་བ་ཐོབ་བ་ལ་ཡང་མཚུངས་བར་སེམས་སོ། །དེ་བས་ན་བདག་ཏུ་འཛིན་པ་ལ་ནི་བདེ་བ་གཉི་ག་ཁྱད་པར་མེད་དོ། །ཚོགས་པར་དབྱུང་བ་མ་ཡིན་པར་ཞེས་བྱ་བ་ནི་ཁྱད་པར་ཡོད་པར་དོགས་པ་བསུ་བའོ། །ལན་དུ་ཚོགས་མི་དབྱུང་བ་ཉིད་ནི་ཞེས་བྱ་བའོ། །འདི་ནི་མིང་བཏགས་བ་ཙམ་དུ་ཟད་དོ་ཞེས་བྱ་བའི་དོན་ཏོ། །ཡང་ཁྱད་པར་ཡོད་པའི་དོགས་པ་བསུ་ནས་སྦོང་བ་ནི་དམྱལ་པ་ཞེས་བྱ་བའོ། །མི་རུང་བ་ནི་ཚོགས་ཅན་མ་ལ་སོགས་པ་དང་འབྲེལ་པའི་བདེ་བའོ། །གཞན་གྱི་དོན་གྱི་རྒྱུ་མཚན་ཉིད་དུའོ། །ཚོགས་པར་དབྱུང་བ་དང་ཅིག་ཤོས་ཀྱི་ཐ་སྙད་གཉིས་ལས། ཚོགས་པར་དབྱུང་བ་མ་ཡིན་པས་བདེ་བ་སྒྲུབ་པར་བྱེད་བ་བས་ནི་ཚོགས་པར་དབྱུང་པའི་ཐ་སྙད་ཉིད་བླའོ་ཞེས་དོགས་པ་ནི་འོན་ཏེ་ཞེས་བྱ་བའོ། །དེ་ལྟ་ན་ཡང་ཞེས་བྱ་བ་ནི་ཁྱད་པར་མེད་པ་ཡིན་ན་ཡང་ངོ༌། །དེའི་དབང་གིས་ནི་སྲེད་པའི་དབང་གིས་སོ། །ཉེས་བ་ལ་ཉིས་པ་མེད་པ་དང༌། ཉེས་པ་མེད་པ་ཡང་ཉེས་པར་སེམས་པ་ནི་མཉམ་པར་བྱེད་པའི་དོན་ཏོ། །འདིས་ནི་སྲིད་པས་སྐྱོན་རྣམས་སྒྲིབ་པར་བྱེད། །ཅེས་བྱ་བ་དེ་བཤད་པ་ཡིན་ནོ། །དེས་ན་ནི་སྲེད་པའི་དབང་གིས་སོ། །ཉེས་པ་བསྒྲིབས་པས་ན་ཞེས་ཁ་བསྐངས་པས་ནི་རྣམ་འགྲེལ་གྱི་ཡོན་ཏན་མཐོང་བ་ཞེས་བྱ་བ་སྡེབ་བར་བྱེད་པའོ། །ཡང་ན་གལ་ཏེ་ཡོན་ཏན་མཐོང་བ་
ཡིན་ཡང་བདག་ཉིད་དགའ་བའི་རང་བཞིན་དུ་ཉེ་བར་གནས་པའི་ཕྱིར་མ་འོངས་པའི་བདེ་བ་ལ་འདོད་པའི་རང་བཞིན་གྱི་སྲེད་པར་མི་འགྱུར་བ་མ་ཡིན་ནམ་སྙམ་དུ་དོགས་བ་བསུ་ནས་བཤད་པ་ནི། ཡོན་ཏན་མཐོང་བ་ཞེས་བྱ་བའོ། །བུད་མེད་ལ་སོགས་པ་དེ་དང་དེས་བསྒྲུབས་པའི་བདེ་བ་ནི་དེ་མེད་པར་ཡིན་ཙམ་གྱིས་འབྱུང་བ་ཡང་མ་ཡིན་ནོ། །མངོན་པར་གསལ་བར་བྱ་བ་ཡང་གསལ་བར་བྱེད་པ་མེད་པར་ནི་མི་འགྱུར་རོ། །དེས་ན་གསལ་བར་བྱེད་པའམ་སྒྲུབ་པར་བྱེད་པ་ནི་བླང་བར་བྱ་བ་ཉིད་དུ་འགྱུར་རོ་ཞེས་བྱ་བའི་དོན་ཏོ། །དེ་ནི་ཞེས་བྱ་བའི་བདག་ལ་མངོན་པར་ཆགས་བའོ། །བདག་ཏུ་སྨྲ་བ་རྣམས་ལ་ནི་བདག་མཐོང་བ་ཡོད་ན་བདག་གི་བ་བཞིན་སྣང་དང་གཞན་གྱི་རྣམ་པར་དབྱེ་བ་དང༌། རྣམ་པར་དབྱེ་བ་དེ་ལས་བྱུང་བའི་ཉེས་པར་ཡང་འགྱུར་རོ་ཞེས་མཇུག་སྡུད་པའི་སྒོ་ནས་བརྗོད་པ་ནི་དེའི་བྱིར་ཞེས་བྱ་བའོ། །བདག་གི་བ་མཐོང་བ་བཞིན་དུ་རང་དང་གཞན་གྱི་རྣམ་པར་དབྱེ་བ་ཡང་ཉེས་པའི་རྒྱུར་འགྱུར་བ་ཁོ་ནའོ་ཞས་བྱ་བའི་དོན་ཏོ། །འཛིན་པ་ནི་འཆད་པའོ། །བདག་གི་བའི་ཡུལ་ཅན་གྱི་ཆགས་པ་ནི་འཁོར་བའི་རྒྱུ་ཡིན་གྱི། བདག་གི་ཡུལ་ཅན་ནི་མ་ཡིན་ནོ་སྙམ་པར་དོགས་པ་བསུ་བ་ནི། འོན་ཏེ་བདག་ཁོ་ན་ལ་ཞེས་བྱ་བའོ། །སེམས་ལ་སོགས་པ་ལས་ཐ་དད་པའི་བདག་ནི་མི་སྣང་སྟེ། དེས་ན་སེམས་ཉིད་བདག་ཡིན་ནོ། །སེམས་ནི་སྐད་ཅིག་མ་ཡིན་བའི་ཕྱིར་བདག་མ་ཡིན་པ་ཡང་མ་ཡིན་ཏེ། རྣམ་པར་རྟོག་པ་མེད་པའི་ཤེས་པར་རྟོགས་པར་བྱ་བ་གཞན་དག་ཀྱང་ཉམས་སུ་མྱོང་བ་ཇི་ལྟ་བ་བཞིན་སྐད་ཅིག་མ་ཁོ་ནའོ། །ཁོ་བོ་ཅག་ཉིད་ཁ་ཙང་ཡིན་ལ་ཁོ་བོ་ཅག་ཉིད་དི་རིང་ཡང་ཡིན་ནོ་ཞེས་རྣམ་པར་རྟོག་པས་ཞེན་པ་འབའ་ཞིག་ཏུ་ཟད་དེ། རྣམ་པར་རྟོག་པ་དེ་ལྟར་འཇུག་པ་ནི་བདག་ཏུ་ཞེན་པ་ལས་གཞན་མ་ཡིན་ནོ་ཞེས་བརྗོད་པ་ནི་ངེས་པར་བདག་ལ་ཞེས་བྱ་བའོ། །གལ་ཏེ་བདག་དང་རྣམ་པར་རྟོག་པ་ཉིད་སྤང་བར་བྱ་བ་ཡིན་གྱི་བདག་ནི་མ་ཡིན་ནོ། །དེས་ན་རྣམ་པར་རྟོག་པ་སྤངས་བ་ལས་འདོད་ཆགས་དང་བྲལ་བ་མེད་པ་མ་ཡིན་ལ་བདག་མེད་པའི་ཕྱིར་ཐར་པ་མེད་པ་ཡང་མ་ཡིན་ནོ་སྙམ་དུ་དོགས་པ་བསུ་ནས་ཉེས་མེད་བདག་ལ་ཞེས་གསུངས་སོ། །ཚད་མས་གྲུབ་པ་ཉིད་ཀྱིས་བློ་ལ་གནས་པར་ཁས་
བླངས་པའོ། །དེའི་བློ་ཉིད་ཆགས་པ་ཡིན་ཏེ། བློའི་ཚད་མ་མེད་ན་ནི་བདག་མེད་པར་སྨྲ་བར་འགྱུར་རོ། །གལ་ཏེ་ཆགས་པ་ནི་བདག་དང་བདག་གིར་ལྟ་བ་ལས་གཞན་ཁོ་ནར་ཁས་ལེན་པ་མ་ཡིན་ནམ། དེ་ཡང་འཁོར་བའི་རྒྱུ་ཡིན་པས་ན་ཉེས་བ་དང་བཅས་པས་སྤང་བར་བྱ་བ་ཡིན་ནོ་སྙམ་དུ་དོགས་པ་ནི། འོན་ཏེ་བདག་དང་ཞེས་བྱ་བའོ། །དེ་ལ་ནི་བདག་གི་བ་ལའོ། །ཁས་བླངས་པ་འདི་ལ་བཤད་པ། གལ་ཏེ་ཞེས་བྱ་བའོ། །ཐ་དད་པར་ཁས་བླངས་ཀྱང་འདོད་པ་ཅུང་ཟད་ཀྱང་གྲུབ་པ་མེད་དོ་ཞེས་བརྗོད་བ་ནི་དེ་ལས་ཅིར་འགྱུར་ཏེ་ཅིར་ཡང་མི་འགྱུར་རོ་ཞེས་བྱ་བའི་དོན་ཏོ། །ཐ་དད་ན་ཆགས་པ་དོར་བར་ནུས་པ་ཉིད་དོ་སྙམ་དུ་དོགས་པ་ནི་ཆགས་པ་ཐ་དད་པ་དེ་སྤོང་འགྱུར་རོ། །ཆགས་པ་ཐ་དད་པ་ཡིན་ཡུལ་གྱི་ཉེས་པ་མཐོང་བ་ཉིད་ལས་སྤང་བ་ཡིན་གྱི་གཞན་དུ་ནི་མ་ཡིན་ནོ་ཞེས་ལན་འདེབས་པ་ནི་འདིའི་ཡུལ་ཞེས་བྱ་བའོ། །ཆགས་པ་འདིའི་ཡུལ་ལོ། །ཆགས་པ་དེ་སྤོང་བར་རོ། །རིགས་པ་ཉེ་བར་བསྟན་པ་སྔོན་དུ་འགྲོ་བ་ཅན་རྣམ་པར་འགྲེལ་པ་ནི། ཡུལ་གཞན་གྱིས་ཞེས་བྱ་བའོ། །སྐྱོན་གཞན་གྱིས་ཞེས་བྱ་བ་ནི་བདག་ལས་གཞན་པའི་སྐྱོན་གྱིས་སོ། །ཡུལ་སྐྱོན་ཆགས་པ་ལ་ཞེས་བྱ་བ་ནི་བདག་ལའོ། །བདེ་བའི་རྒྱུ་ལ་ཞེས་བྱ་བ་ནི་བདག་ལ་སོགས་པ་ལའོ། །གལ་ཏེ་ཆགས་པ་ནི་གོས་ལ་སོགས་པ་གཞན་དུ་འདོད་པ་དང༌། སྡང་བ་དག་གིས་ལེན་པ་དང་འདོར་བ་མ་ཡིན་ནམ། དེ་ལ་ཡུལ་གྱི་སྐྱོན་གྱི་རྗེས་སུ་འབྲེང་བ་ཅི་ཡོད་སྙམ་དུ་དོགས་ན། ཡོན་ཏན་སྐྱོན་དང་ཞེས་གསུངས་སོ། །གོ་རིམས་ཅི་བཞིན་དུ་ཡོན་ཏན་སྐྱོན་དང་རྗེས་འབྲེལ་བའི་འདོད་པ་དང་སྡང་བ་ལ་སོགས་པའི་སྤོང་བ་འདོར་བ་ནི་དེ་གང་ཡིན་སྙམ་ན། ཡོན་ཏན་དང་སྐྱོན་དེ་དག་ཡུལ་ལ་མ་མཐོང་བ་མེད་པས་ཡིན་ནོ། །ཡུལ་ལ་ཡོན་ཏན་མ་མཐོང་བས་ནི་ཆགས་པ་སྤོང་ལ། ཉེས་པ་མ་མཐོང་བས་ནི་ཞེ་སྡང་ངོ༌། །ཡུལ་གྱི་ཡོན་ཏན་དང་ཉེས་པ་མ་མཐོང་བའི་རང་བཞིན་གྱི་རྒྱུ་མི་སྐྱེ་བའི་རང་བཞིན་གྱི་སྐྱེ་བ་མེད་པ་ནི་སྤང་བ་ཡིན་ནོ། །ཕྱི་རོལ་གྱི་བུམ་པ་ལ་སོགས་པ་ཕྱི་རོལ་གྱི་རྒྱུ་ལ་རག་ལས་པའི་ཡུལ་རྣམས་ལ་ནི་ཡོན་ཏན་དང་ཉེས་པ་མཐོང་བ་ལས་ཉེ་བར་
ལེན་བ་སྤོང་བ་མཐོང་བ་ཉིད་ཡིན་ན་ཚུལ་འདི་ནི་ཞེན་པ་ལ་ཡང་ཡིན་པར་མི་འཐད་དོ། །གལ་ཏེ་དེ་དག་ཅེས་བྱ་བ་ནི་ཡུལ་ལ་བདག་གི་བདེ་བ་ལ་སོགས་པ་བསྒྲུབ་པ་མ་ཚང་བ་མེད་པ་ཡིན་ནའོ། །ཞེན་པའི་ཡུལ་ནི་བདག་དང་བདག་གི་བའོ། །དེའི་དངོས་པོ་ནི་ཉིད་དེ། ཡོན་ཏན་དང་ལྡན་པ་ཉིད་ཀྱིས་ཞེས་འབྲེལ་ཏོ། །དེ་མེད་པའི་ཕྱིར་ནི་ཡོན་ཏན་དང་ལྡན་པ་མེད་པའི་ཕྱིར་རོ། །ཡུལ་གྱི་ཚུལ་འདི་ནི་ཞེན་པ་ལ་མི་འཐད་དོ་ཞེས་བརྗོད་པ་ནི། །ཞེན་པའི་ཡོན་ཏན་དང་ཞེས་བྱ་བའོ། །ཕྱི་ཚུལ་གང་ཡིན་མིན་ཞེས་བྱ་བ་ཉིད་གསལ་བར་བྱེད་པ་ནི། ཆགས་ཡོན་ཏན་གྱིས་ཞེས་བྱ་བའོ། །རིགས་པ་བརྗོད་ནས་སྐབས་ལ་སྦྱོར་བར་བྱེད་པ་ནི། བདག་དང་བདག་གིར་ལྟ་བའི་མཚན་ཉིད་ཀྱི། རྒྱུ་མ་ཚང་བ་མེད་པ་ཅན་དེ་ལ་འབྲས་བུ་བདག་ཏུ་ལྟ་བ་ཅན་གྱི་ཞེན་པ་ནི་ཟློག་ཏུ་མེད་པ་ཁོ་ནའོ་ཞེས་བྱ་བའི་དོན་ཏོ། །ཡོན་ཏན་སྐྱོན་དང་རྗེས་སུ་འབྲེལ་པ་ཞེས་བྱ་བ་ལ་སོགས་པས་ནི། ཆགས་ཡོན་ཏན་གྱིས་ཆགས་པ་མིན། །ཞེས་བྱ་བ་འདིའི་དོན་བསྟན་པ་ཡིན་ལ། ཉེས་མེད་བདག་ལ་ཆགས་པ་དང༌། །བྲལ་བའི་རྒྱུ་ཡང་ཡོད་པ་ཡིན། །ཞེས་བྱ་བ་འདི་ནི། །མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་ཟློག་པར་བྱེད། །ཅེས་བྱ་བ་འདིའི་དོན་བསྟན་པ་ཡིན་ནོ་སྙམ་དུ་དགོངས་ནས་བསྡུ་བའི་ཚིགས་སུ་བཅད་པའོ་ཞེས་གསུངས་སོ། །ཇི་ལྟར་བཤད་པ་དེ་ལྟར་ནི་བསྟན་པའི་དོན་ཉིད་མ་ཡིན་ཏེ། ཉེས་མེད་བདག་ལ་ཞེས་བྱ་བ་ནི་བདག་ཏུ་ལྟ་བ་དང་ཞེན་གཉིས་ཐ་དད་པ་མེད་པའི་བསམ་པས་བརྗོད་པ་ཡིན་ལ། མ་ཚང་མེད་རྒྱུ་ཞེས་བྱ་བ་ནི་ཐ་དད་པའི་བསམ་པས་བརྗོད་པ་ཡིན་པའི་ཕྱིར་རོ། །ཆགས་པའི་ཉེས་པ་དང་ལྡན་པ་ཉིད་ནི་སྡུག་བསྔལ་གྱི་རྒྱུ་ཉིད་ཀྱིས་སྡུག་བསྔལ་གྱི་རྟེན་ཉིད་ཡིན་ལ་དེ་ནི་སྡུག་བསྔལ་གྱི་འདུ་བ་ཅན་ཡིན་པ་ཉིད་ཀྱིས་བདག་ལ་ཡང་མཚུངས་སོ། །བདག་ནི་བདེ་བ་སྒྲུབ་བྱེད་ཐམས་ཅད་ཤེས་པར་བྱེད་པ་དང༌། དེའི་འབྲས་བུ་སྤྱོད་པར་བྱེད་པ་ཡིན་ཏེ། དེས་ན་བདག་བཞིན་དུ་ཞེན་པ་ཡང་བདག་གི་བའི་ལྟ་བའི་ཡུལ་ཉིད་ཀྱིས་འདོད་ཆགས་དང་བྲལ་བའི་ཡུལ་དུ་མི་འགྱུར་རོ་ཞེས་བརྗོད་པ་ནི། ཆགས་ལ་སྐྱོན་ཡང་ཞེས་བྱ་བའོ། །འོན་ཏེ་བདག་ཀྱང་སྡུག་བསྔལ་གྱི་སྒྲུབ་པར་བྱེད་པ་ཤེས་པར་
བྱེད་པ་དང༌། དེའི་འབྲས་བུ་ལོངས་སྤྱོད་པར་བྱེད་པ་ཉིད་ཀྱིས་ཆགས་པ་དང་བྲལ་བའི་ཡུལ་ཉིད་དུ་འདོད་ན། འོ་ན་ནི་འདི་ལ་རང་བཞིན་གཞན་མེད་པས་ཅི་ལྟར་ཐར་པར་འདོད་པ་རྣམས་ཀྱིས་བདག་ཤེས་པར་བྱ་བ་དང༌། བསམ་པར་བྱ་བ་དང༌། བསྒོམ་པར་བྱ་བར་ཅི་ལྟར་འགྱུར། སྤང་བར་བྱ་བ་ཉིད་དུ་ཤེས་པར་བྱ་བ་ཡིན་ན་ནི་བདག་མེད་པར་ལྟ་བ་ཐར་པའི་སྒྲུབ་བྱེད་དུ་འགྱུར་རོ། །གང་གིས་འདི་དཔེ་ཉིད་དུ་ཉེ་བར་ལེན་པ་ཅི་བདག་འདི་སྡུག་བསྔལ་གྱི་རྒྱུ་ཡིན་ནམ་སྙམ་དུ་དོགས་པ་བསུ་ནས་བཤད་པ། སྡུག་བསྔལ་གྱི་རྟེན་ནི་ཞེས་བྱ་བའོ།། བདག་ཡོད་པ་ནི་ཞེས་བྱ་བ་ནི། འདུ་བ་ཅན་གྱི་རྒྱུའམ། ཐམས་ཅད་ཀྱི་ཤེས་པར་བྱེད་པ་དང༌། སྤྱོད་པར་བྱེད་པའོ། །གལ་ཏེ་ཞེན་པ་ལ་སོགས་ལས་བསྐྱེད་པའི་སྡུག་བསྔལ་ནི་བདག་འབའ་ཞིག་ལ་འདུ་བ་མ་ཡིན་ལ། བདག་ནི་སྡུག་བསྔལ་གྱི་རྒྱུ་མ་ཡིན་ཏེ། དེ་ཡོད་ན་ཡོད་པ་ཉིད་དུ་མ་ཤེས་པའི་ཕྱིར་རོ་སྙམ་དུ་དོགས་པ་བསུ་བ་ནི། འོན་ཏེ་ཞེས་འདི་སྙམ་དུ་ཞེས་བྱ་བའོ། །རྩོད་པ་འདིར་ལེན་བཤད་པ་ནི། གལ་ཏེ་དེ་མེད་ན་ཞེས་བྱ་བའོ། །འདུ་བ་ཅན་གྱི་བདག་མེད་ན། ཞེན་པ་ལ་སོགས་པ་སྡུག་བསྔལ་གྱི་རྒྱུ་མ་ཡིན་པའི་ཕྱིར་སྐྱོན་མེད་པར་འགྱུར་རོ། །དེ་ལྟར་ཞེས་བྱ་བ་ནི། ཕན་ཚུན་མེད་པར་སྡུག་བསྔལ་གྱི་རྒྱུ་མ་ཡིན་པ་ནའོ། །གཉི་ག་ནི་བདག་དང་ཞེན་པ་ལ་སོགས་པའི་ཚོགས་སོ། །དེས་ན་ཞེས་བྱ་བ་ནི་སྐྱོན་མེད་པ་ནའོ། །བདག་བཞིན་དུ་འདོད་ཆགས་ལ་སོགས་པ་ཡང་ཁྱད་པར་གཞན་དང་ལྡན་པ་ཁོ་ན། སྡུག་བསྔལ་གྱི་རྒྱུ་ཉིད་མ་ཡིན་ནོ་ཞེས་བརྗོད་པ་ནི། བདག་ཏུ་ཞེན་པ་ལ་སོགས་པ་ནི་ཞེས་བྱ་བའོ། །དེས་ན་ཞེས་བྱ་བ་ནི་རང་ལ་བརྟེན་པའི་ཉེས་པ་མེད་པས་ནའོ། །དེས་ན་ནི་སྐྱོན་མེད་པས་ནའོ། །གལ་ཏེ་བདག་ནི་སྡུག་བསྔལ་གྱི་རྒྱུ་ཡིན་ཡང་སྤངས་པ་མ་ཡིན་གྱི་བསྒོམ་པས་སྤང་བར་བྱ་བ་ནི་སྡུག་བསྔལ་སྒྲུབ་པར་བྱེད་པ་དང༌། སྡུག་བསྔལ་དང་རྗེས་སུ་འབྲེལ་བ་ཡིན་ནོ། །དེ་ལྟར་ན་སྡུག་བསྔལ་མི་བསྐྱེད་པའི་ཕྱིར་བདག་གི་དེའི་འདུ་བ་ཅན་ཉིད་ཀྱང་སྤངས་པར་འགྱུར་རོ་སྙམ་དུ་དོགས་པ་བསུ་ནས། རང་གི་བློས་བྱས་
པ་བདག་སྤང་བའི་ཡུལ་མ་ཡིན་པ་ཉིད་ནི་བདག་གི་བ་ལ་ཡང་མཚུངས་པ་ཡིན་ཏེ། དེས་ན་ཇི་ལྟར་འདིར་སྡུག་བསྔལ་བསྒོམ་པ་སྤོང་བའི་རྒྱུ་ཡིན་ཞེས་བསྟན་པའི་དོན་དུ་ལན་བརྗོད་པ་ནི། བདག་གི་བའི་བློ་བཅོམ་པས་འདིར་ཞེས་བྱ་བའོ། །འདིར་ཞེས་བྱ་བ་ནི་སྦྲུལ་གྱིས་བཟུང་བའི་ཡན་ལག་ལའོ།། དེ་མ་སྤངས་ན་ནི་རྣམ་པ་ཅི་ཞིག་ལྟར་སྤངས་པ་ཡང༌། སླར་ལེན་པར་འགྱུར་རོ་ཞེས་བརྗོད་པ་ནི། བཟློག་པ་མིན་ཞེས་བྱ་བ་སྟེ། བདག་གི་བའི་བློ་ཡིན་པ་ལའོ། །རང་གི་བའི་བློ་ཉིད་དེ་ལ་མེད་དོ་ཞེས་ཀྱང་བརྗོད་པར་མི་རིགས་ཏེ། ལུས་ནི་དེའི་ལོངས་སྤྱོད་པའི་གཞི་ཡིན་ལ། དབང་པོ་རྣམས་ནི་ལོངས་སྤྱོད་པའི་སྒྲུབ་བྱེད་ཡིན་ནོ་ཞེས་བརྗོད་པའི་ཕྱིར་རོ་ཞེས་བརྗོད་པ་ནི་དབང་པོ་ལ་སོགས་ཞེས་བྱ་བའོ། །འགལ་བ་ཡོད་པ་ཉིད་ལ་ནི་བདག་བཞིན་དུ་བདག་གི་བ་ལ་ཡང་སྡུག་བསྔལ་བསྒོམ་པར་ཡོང་པར་མི་འགྱུར་རོ་ཞེས་བྱ་བའི་དོན་ཏོ། །སྡུག་བསྔལ་བསྒོམ་པས་སྤོང་འགྱུར་ན། །ཞེས་བྱ་བའི་རྩོད་པའི་དོན་བརྗོད་པ་ནི་གལ་ཏེ་བདེ་བའི་ཞེས་བྱ་བའོ། །དེ་ལས་བཟློག་པ་སྡུག་བསྔལ་གྱི་རྒྱུ་ཡོད་པ་ལས་སོ། །དེ་དག་ལ་ནི་ལུས་ལ་སོགས་པ་དག་ལའོ། །བྱེད་དོ་ཞེས་བྱ་བ་ནི་སྲོག་ཆགས་ཀྱིས་ཞེས་བྱ་བར་བལྟའོ། །ལུས་ལ་སོགས་པ་ལ་རང་གི་བློ་ཁས་བླངས་བས་གྲུབ་པ་འབའ་ཞིག་ཏུ་མ་ཟད་ཀྱི། འོན་ཀྱང་མངོན་སུམ་གྱིས་ཀྱང་གྲུབ་པོ་ཞེས་བརྗོད་པ་ནི་ལུས་ལ་སོགས་པ་ཞེས་བྱ་བའོ། །གཞན་ལ་ཞེས་བྱ་བ་ནི་མ་བརྗོད་པ་བདག་ལའོ། །དེའི་ཚེ་ནི་ཞེན་པ་དང་བཅས་བ་བདག་གི་བའི་སྐྱེད་པ་ཅན་ཡིན་ལ་ཞེས་བྱ་བ་བདག་གི་བའི་བློས་བསྐྱེད་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །བཟློག་པ་ནི་བདག་གི་བའི་བློ་མེད་པའོ། །གལ་ཏེ་མ་ལ་སོགས་པར་འདུ་ཤེས་པ་བཞིན་དུ་ལུས་དང་དབང་པོ་ལ་སོགས་པ་བདག་གི་བ་རྣམས་ལ། བདག་གི་བ་མ་ཡིན་པའི་འདུ་ཤེས་ལ་གནས་པས་བསྒོམས་པས་ནི་སྡུག་བསྔལ་སྤངས་པ་ཐོབ་བོ་ཞེས་བྱ་བ་བྱེ་བྲག་པ་ལ་སོགས་པའི་ལུགས་ཀྱི་དོགས་པ་བསུ་ནས། དེ་ལ་འདུ་སོགས་ཞེས་བྱ་བ་གསུངས་སོ། །ལུས་དང་དབང་པོ་ལ་སོགས་པ་ལ་དམིགས་ནས་སྡུག་བསྔལ་བསྒོམ་པ་ལ་བརྟེན་པ་ཡིན་ལ། དེ་ལ་དམིགས་པ་ཡང་ལོངས་སྤྱོད་ཀྱི་གཞི་ཡིན་པའི་རང་བཞིན་གྱིས་སོ། །འདུ་བ་ལ་
སོགས་པའི་འབྲེལ་པ་དེ་ཡང་རང་གི་བའི་བློའི་རྒྱུ་ཡིན་བ་དེས་ན། སྡུག་བསྔལ་བསྒོམས་པར་གྱུར་ཀྱང་རང་གི་བའི་བློ་དང་ཇི་ལྟར་འབྲེལ་ཏེ། ལོངས་སྤྱོད་ཀྱི་གཞི་ཡིན་པ་ལ་སོགས་པའི་བློ་ཉིད་ཀྱིས་རང་གི་བློ་ཡིན་པའི་ཕྱིར་རོ། །མཐོང་དུ་ཟིན་ཀྱང་ནི་སྡུག་བསྔལ་གྱི་རྒྱུ་ཉིད་དུ་ཤེས་ཀྱང་ངོ༌། །མའི་འདུ་ཤེས་ནི་མཐོང་བའི་མའི་རང་བཞིན་སྒྲོ་འདོགས་པ་ཡིན་གྱི་སྡུག་བསྔལ་གྱི་འབྲེལ་པ་དང་བྲལ་བ་དམིགས་པ་མ་ཡིན་ནོ། །དེས་ན་སྒྲོ་འདོགས་པ་མ་ཡིན་ནོ། ཉན་པའི་དབང་པོ་མ་གཏོགས་པ་མིག་ལ་སོགས་པ་དང་ནི། ལྡན་པ་ཅན་ལུས་དང་ལྡན་པའོ། །འོན་ཏེ་ལུས་ལ་སོགས་པའི་འབྲེལ་བ་ནི་ཕན་འདོགས་པ་ཉིད་ཡིན་གྱི། ལྡན་པ་དང་འདུ་བ་ལ་སོགས་པ་ནི་མ་ཡིན་ན། དེ་ལྟ་ཡང་ཕན་འདོགས་པའི་རྒྱུ་མཚན་ཅན་གྱི་རང་བཞིན་བདག་གི་བའི་བློ་ནི་ཐམས་ཅད་ལ་ཡིན་པའི་ཕྱིར། ཇི་ལྟར་སྡུག་བསྔལ་ཉིད་སྒྲོ་དོགས་ཏེ། དེ་དང་བྲེལ་བ་ལ་སྡུག་བསྔལ་ཉིད་མ་མཐོང་བའི་ཕྱིར་རོ་ཞེས་བརྗོད་པ་ནི། འདུ་བ་ཅན་སོགས་མེད་ན་ཡང༌། ཞེས་བྱ་བའོ། །ཀུན་ལ་ཞེས་བྱ་བ་ནི་གཙོ་བོ་མེད་པའི་ཕྱིར་རོ་སྙམ་དུ་དགོངས་པའོ། །གལ་ཏེ་གཙོ་བོ་གཞན་གྱིས་ཅི་བྱ་སྟེ། ལུས་དང་དབང་པོ་ལ་སོགས་པ་བདག་གི་བ་ཉིད་སྡུག་བསྔལ་གྱི་རྒྱུ་ཉིད་ལས་བདག་གི་བ་མ་ཡིན་པར་གྱུར་པ་ནི། རང་གི་བའི་བློའི་ཡུལ་དུ་མི་འགྱུར་ཏེ། སྦྲུལ་གྱིས་བཟུང་བའི་སོར་མོ་བཞིན་ནོ། །འདི་ཡང་བདག་གི་བ་ཉིད་བདག་གི་བ་མ་ཡིན་པར་འགྱུར་བ་ཡིན་ནོ་སྙད་དུ་དོགས་པ་ནི། ཕན་འདོགས་པ་ལས་ཞེས་བྱ་བའོ། །དབང་པོ་ལ་སོགས་པ་ནི་གཅིག་ཏུ་སྡུག་བསྔལ་བ་ཉིད་མ་ཡིན་ལ། ཕལ་ཆེར་ཡང་མ་ཡིན་ཏེ་དཔེར་ན་དུག་དང་འདྲེས་པའི་ཟས་བཞིན་ནོ་ཞེས་ལེན་འདེབས་པར་བྱེད་པ་ནི། གཅིག་ཏུ་དེ་ནི་ཞེས་བྱ་བའོ། །དོན་ལ་སྦྱོར་བ་ནི་དེ་བཞིན་དུ་གོང་གི་ཞེས་བྱ་བའོ། །སྡུག་བསྔལ་དང་འདྲེས་པ་ན་བདེ་བ་ཡང་སྡུག་བསྔལ་ཉིད་ཡིན་ནོ་སྙམ་པའི་དོགས་པ་བསུ་བ་ནི་གལ་ཏེ་ཞེས་བྱ་བའོ། །དེ་ལྟ་ན་ཞེས་བྱ་བ་ནི་ལན་ནོ། །བདེ་བ་ཉིད་དོ་ཞེས་བྱ་བ་ནི་སྐབས་ཀྱིས་སྡུག་བསྔལ་ཡང་ཞེས་བྱ་བའོ། །གཞན་ཡང་ཞེས་བྱ་བ་
ནི་སུན་འབྱིན་པ་གཞན་ནོ། །བདེ་བའི་རང་བཞིན་པ་ལ་ཆེ་བ་མེད་པའི་ཕྱིར། སྡུག་བསྔལ་བ་ཉིད་དམ། ཕལ་ཆེ་བ་མ་ཡིན་མོད། དེ་ལྟ་ན་ཡང་དུག་དང་བཅས་པའི་ཟས་བཞིན་དུ། བླང་བྱ་བ་མ་ཡིན་པར་འགྱུར་ཏེ། ལུས་མཛེས་པ་ཡང་འཛིན་དག་གཅིག་གིས་སྐལ་བ་དན་པར་འགྱུར་རོ་ཞེས་བྱ་བའི་ཚུལ་གྱིས་སོ་སྙམ་དུ་དོགས་པ་བཤད་པ། སྡུག་བསྔལ་གྱི་ཆད་མེད་བ་ན། ཁྱད་པར་ཅན་དེ་ལྷག་པར་གྱུར་བ་བདེ་བ་གཅིག་པའི་རང་བཞིན་ཡོད་པས་ན། དེ་དང་འགལ་བ་སྡུག་བསྔལ་གྱི་ཆ་དང་འདྲེས་པ་ལ། ཆགས་པ་དང་བྲལ་བར་འགྱུར་ཏེ། དུག་དང་བཅས་པའི་ཟས་བཞིན་དུ་རྒྱབ་ཀྱིས་ཕྱོགས་པར་འགྱུར་རོ། །གང་གི་ཕྱིར་ཁྱད་པར་ཅན་བདེ་བ་ལ་སྲེད་པས། བདེ་བ་ཅུང་ཟད་ཡོངས་སུ་སྤོང༌། དེ་མེད་ན་ནི་བདག་ལ་ཞེན་པས་ཇི་ལྟར་རྙེད་བཞིན་ལ་འཇུག་གོ །འདི་ལ་དཔེ་ནི་བུད་མེད་དག་ནི་ཞེས་བྱ་བའོ། །འདོད་ཆགས་ཀྱིས་ཟིལ་གྱིས་གནོན་པ་ནི་ཁྱད་པར་ཅན་གྱི་བུད་མེད་མ་རྙེད་ན། བུད་མེད་ཙམ་ལ་འཇུག་གོ །དེའི་ཚེ་གཞན་དུ་ཞེས་བྱ་བ་བདེ་བའི་རྣམ་པ་ལའོ། །འོན་ཏེ་ཁྱད་པར་ཅན་གྱི་བདེ་བ་མ་རྙེད་པ་ན། དེ་ལ་སྲེད་པ་ཉིད་ཀྱིས་གཞན་ལ་ཆགས་པ་དང་བྲལ་བར་འགྱུར་རོ་སྙམ་ན། རྣམ་པར་སྤྱོད་པ་གྲུབ་པོ་སྙམ་པར་དོགས་པ་ནི། སྤྱོད་པར་འགྱུར་རོ་ཞེ་ན་ཞེས་བྱ་བའོ། །འོན་ཏེ་ཞེས་བྱ་བ་ནི་ལན་ནོ། །སྲིད་པ་ནི་སྡུག་བསྔལ་གྱི་རྒྱུ་ཡིན་ལ། སྤྱོད་པ་ཡང་ཁྱད་པར་ཅན་གྱི་བདེ་བ་ལ་སྲེད་པའི་སྐྱེད་བྱེད་ཡིན་ནོ། །དེ་ཡང་དེ་ལ་རྙེད་ན་སྡུག་བསྔལ་སྐྱེད་པར་བྱེད་པ་ཡིན་ཏེ། དེས་ན་མིག་ལ་སོགས་པ་བདག་གི་བལ་ནི་ཆགས་པ་དང་བྲལ་བར་མི་འགྱུར་གྱི། འོན་ཀྱང་ཞེན་པ་ཉིད་ལ་ཡིན་པའི་ཕྱིར་ཇི་ལྟར་གྲོལ་བར་འགྱུར། རྒྱུའི་སྟོབས་ལས་ཞེས་བྱ་བ་ནི་སྔ་མ་སྔ་མའི་དགེ་བ་གོམས་པའི་སྟོབས་ཀྱིས་སོ། །བདག་ཏུ་ལྟ་བ་ལས་ཞེས་བྱ་བ་ནི་ཐར་པ་འདོད་པའི་གནས་སྐབས་ན་ཡོད་པའམ། གཞན་ལས་ཀྱང་རུང་སྟེ། ཐར་བར་འགྱུར་འཇུག་གོ །འདི་ལ་དཔེ་ནི་བུད་མེད་དག་ནི་ཞེས་བྱ་བའོ། །འདོད་འཐད་པར་རོ་ཞེས་བསྟན་པ་ཡིན་ནོ། །དེ་བསྒོམས་ཀྱང་རྣམ་པར་བྱང་བའི་རྒྱུར་མི་འགྱུར་རོ་ཞེས་བརྗོད་པ་ནི། བདག་བསྒོམ་པ་ནི་མི་
སྲིད་པ་ཉིད་དེ་ཞེས་བྱ་བའོ། །ཇི་ལྟར་སྙམ་ན། བདག་དེ་ཞེས་གསུངས་སོ། །སྒོམ་པ་མེད་ཕྱིར་ཞེས་བྱ་བའི་མཐར་ཐུག་པ་ནི་གཏན་ཚིགས་སོ། །སྒོམ་པ་མེད་པར་ཅི་ལྟར་ཞེས་བཤད་པ་བདག་དེ་ནི་ཞེས་བྱ་བའོ། །དེས་ན་བསྒོམ་པ་དོན་ཏོ། །བསྒོམས་པ་དོན་དང་བཅས་པར་དོགས་པ་ནི། འོན་ཏེ་སྐྱེས་བུའི་ཞེས་བྱ་བའོ། །དོན་དམ་པ་སོ་ན་འདུག་གོ་ཞེས་ལན་བཏབ་བ་ནི། སོལ་བ་ཇི་ལྟར་བདར་ཡང་ནི། །ཞེས་བྱ་བའོ། །འོ་ན་ནི་བདག་དེ་ཉིད་བདག་གི་ཉེས་པ་བཟློག་པར་འགྱུར་རོ་ཞེ་ན། ཉེས་ཅན་རང་བཞིན་ཞེས་བྱ་བའོ། །ཇི་ལྟར་མི་ནུས་སྙམ་ན། ཉེས་ཅན་ཇི་ལྟར་ཞས་གསུངས་སོ། །ཉེས་པ་ཅན་དེ་ནི་གཞན་དུ་ཉེས་པ་མེད་པར་འགྱུར་བ་མིན་པ་སྟེ། གང་གི་ཕྱིར་གཞན་ཉིད་ན་འཇིག་པ་ཁོ་ནར་འགྱུར་རོ། །དོན་འདི་ཉིད་ལ་རྣམ་འགྲེལ་སྦྱོར་བ་ནི། དེ་ཉིད་ཀྱི་ཕྱིར་ཞེས་བྱ་བའོ། །འདོད་ཆགས་ལ་སོགས་བས་ཉེ་བར་བསྒྲུབས་པ་ནི་རང་བཞིན་ལས། དེ་དང་བྲལ་བའི་རང་བཞིན་གཞན་ཉིད་ཡིན་པའི་ཕྱིར་རོ། །དེ་ལ་ལྟོས་ནས་སྔ་མ་འཇིག་པ་ཉིད་དོ་ཞེས་བྱ་བའི་དོན་ཏོ། །རྣལ་འབྱོར་པ་བདག་འདོད་པ་ཞེན་པའི་ཡུལ་དུ་བྱེད་པ་གང་ཡིན་པ་དེ་ཇི་ལྟར་བདག་དེ་འཇིག་པར་འདོད་པར་འགྱུར། ཡང་ན་རང་གི་ངོ་བོས་ཞེན་པའི་ཡུལ་དུ་གྱུར་པའི་བདག་གང་ཡིན་པ་དེས། བདག་གི་རང་བཞིན་དེ་འཇིག་པར་འདོད་པར་ཇི་ལྟར་འགྱུར། གལ་ཏེ་འདོད་ཆགས་ལ་སོགས་པས་ནི་བདག་ལ་ཕན་བཏགས་པ་འགའ་ཡང་ཡོད་པ་མ་ཡིན་ཏེ། འོན་ཀྱང་ལྡན་པ་ཙམ་ཡིན་ནོ། །ཐར་པ་ཡང་དེ་དང་བྲལ་བ་ཙམ་ཡིན་ཏེ་། དེས་ན་བདག་ཞིག་པ་ཉིད་ནི་མ་ཡིན་ནོ་ཞེས་ དགོས་པ ་བསུ་བ་ནི། སྐྱོན་ཅན་མིན་ཞེས་འབྲེལ་ཏོ། །ཅིའི་ཕྱིར་སྙམ་ན་བཤད་པ། འདོད་ཆགས་ལ་སོགས་བ་དེ་དང་ལྡན་པ་ཡང་རང་ཉིད་དེ་རང་བཞིན་གྱིས་བདག་གཞན་ཡིན་ཏེ། དེ་དང་གཅིག་པར་མི་འགྱུར་རོ་ཞེས་བྱ་བའི་དོན་ཏོ། །དཔེ་ནི་དབྱུག་ལྡན་པ་ན་ཞེས་བྱ་བའོ། །དེ་བཞིན་དུ་བདག་གི་སྐྱོན་ཅན་ཉིད་ཀྱང་དངོས་པོ་པར་མི་འགྱུར་རོ། །དེས་ན་བསྒོམས་པས་འདི་བཟློག་པར་མི་ནུས་སོ་ཞེས་གཞན་སེམས་སོ། །འདོད་ཆགས་ལ་སོགས་ཞེས་བྱ་བ་ནི་ལན་ནོ། །འདོད་ཆགས་ལ་སོགས་པ་དང་ལྡན་པ་ཡིན་ཡང༌།
བདག་གང་གིས་འདོད་ཆགས་ལ་སོགས་པ་མ་མྱོང་བ། དེ་ནི་འདོད་ཆགས་ཅན་ལ་སོགས་པར་མི་སྲིད་དོ། །འདི་སྙམ་དུ་བདག་གིས་འདོད་ཆགས་ལ་སོགས་པ་ཐ་དད་པ་མྱོང་བ་ཁོ་ནའོ། །དེས་ན་འདོད་ཆགས་ཅན་ལ་སོགས་པ་མ་མྱོང་བ་མ་ཡིན་ནོ་སྙམ་པའི་དོགས་པ་བསུ་བ་ནི། གལ་ཏེ་མྱོང་ཕྱིར་ཞེས་བྱ་བའོ། །ལན་དུ་ནི་བུད་མེད་ཅེས་བྱ་བའོ། །གལ་ཏེ་འདོད་ཆགས་ལ་སོགས་པ་ཐ་དད་པར་རིགས་པས་བདག་འདོད་ཆགས་ཅན་ལ་སོགས་པ་ཡིན་ན་དེ་ལྟ་ན་ནི་བུད་མེད་རིག་པའི་ཕྱིར་བུད་མེད་རིགས་ལྡན་པར་ཡང་འགྱུར་རོ། །གང་གིས་ཉེས་པ་འདིར་འགྱུར་བ། མྱོང་བ་ཙམ་ནི་འདོད་ཆགས་ཅན་མ་ཡིན་གྱི། འོན་ཀྱང་འབྲེལ་བ་ལས་ཀྱང་མ་ཡིན་སྙམ་ན། འབྲེལ་ཕྱིར་ཞེས་བྱ་བའོ། །འདོད་ཆགས་ལ་སོགས་བ་དང་འབྲེལ་བ་ལས་ཀྱང་འདོད་ཆགས་ཉིད་དེ། མྱོང་བ་འབའ་ཞིག་ལས་ནི་མ་ཡིན་ནོ། །དེས་ན་འདོད་ཆགས་ལ་སོགས་པ་མྱོང་བས་དེའི་རང་བཞིན་ཅན་དུ་འགྱུར་བ་མ་ཡིན་ནོ་སྙམ་དུ་བསམས་པའོ། །འདི་ལ་ལན་དུ་ཆགས་སོགས་པས། །ཞེས་བྱ་བའོ། །འབྲེལ་བ་ལས་ནི་གཞན་གྱི་འདོད་ཆགས་ལ་སོགས་པ་ཡང་རྟོགས་པའི་ཕྱིར་རོ་སྙམ་དུ་དགོངས་པའོ། །འོན་ཏེ་འདུ་བའི་འབྲེལ་བས་འདོད་ཆགས་ལ་སོགས་པ་རིག་ན། འདོད་ཆགས་ཅན་ཡིན་གྱི་ལྡན་པས་ནི་མ་ཡིན་ནོ་སྙམ་དུ་དོགས་པ་བསུ་ནས། ཐ་དད་པ་ལ་ཞེས་གསུངས་ཏེ། འདོད་ཆགས་ལ་སོགས་བདག་ལས་ཐ་དད་པ་ལ་འདུ་བས་ནི་རྣལ་འབྱོར་བ་ཆགས་བ་ཅན་དུ་འགྱུར་ལ། ལྡན་པས་ནི་མ་ཡིན་ནོ་ཞེས་བྱ་བ་ནི་ཁྱད་པར་ཅི་ཞིག་ཡོད། བདག་དེ་ནི་ཡིད་དང་ལྡན་པ་ཡིན་ལ། ཡིད་ནི་གཞན་གྱི་བདག་དང་ལྡན་པ་ཡིན་ཏེ། བྲམ་ཟེའི་ལུགས་ཀྱིས་ཁྱབ་པར་བྱེད་པ་ཡིན་པའི་ཕྱིར་རོ། །དེ་ལ་གནས་པའི་འདོད་ཆགས་ལ་སོགས་པ་དང་ནི་ལྡན་པར་འགྱུར་བའི་འདུ་བའོ། །ཡང་ན་རྣལ་འབྱོར་བའི་བདག་དང་གཞན་གྱི་བདག་ནི་མ་སྐྱེས་པའི་ལྡན་པས་འགྱུར་བ་ཡིན་ལ། དེར་གནས་པའི་འདོད་ཆགས་ལ་སོགས་བ་དང་ནི་ལྡན་པར་གྱུར་པའི་འདུ་བ་ཉིད་ལྡན་པར་བརྗོད་པ་ཡིན་ནོ། །དེས་ན་ཁྱད་པར་མེད་པའི་ཕྱིར་ན། གཞན་གྱི་འདོད་ཆགས་ལ་སོགས་པ་དང་འབྲེལ་པ་ལས་ཀྱང་རྣལ་འབྱོར་པ་ཆགས་པ་དང་
བཅས་པར་འགྱུར་རོ། །འདུ་བ་དང་ལྡན་པ་ལས་ཁྱད་པར་ཡོད་པར་དོགས་པ་བསུ་བ་ནི་ཐ་དད་ཅེས་བྱ་བའོ། །འོ་ན་ཞེས་བྱ་བ་ནི་ལན་ན། །གལ་ཏེ་བདག་ལས་འདོད་ཆགས་ལ་སོགས་པ་ཐ་དད་པར་འདུ་བས་མ་རྟོགས་པ་ཡིན་ལ། ལྡན་པས་ནི་དེ་རྟོགས་པ་ཡིན་ནོ། དེའི་ཚེ་འདོད་ཆགས་ལ་སོགས་པ་ལས་བདག་ཐ་དད་པར་ཚད་མ་གང་ལས་འདོད་དེ། ཐ་དད་པ་སྒྲུབ་པའི་ཚད་མ་འགའ་ཡང་མེད་དོ་ཞེས་བྱ་བའི་དོན་ཏོ། །རང་བཞིན་ཐ་དད་པར་མ་རྟོགས་ན་རང་ཉིད་རིག་པ་ཡང་དེ་ཐ་དད་པའི་སྒྲུབ་པར་བྱེད་པ་མ་ཡིན་ནོ་ཞེས་བྱ་བ་ནི་བདག་གི་ཞེས་བྱ་བའོ། །འོན་ཏེ་བདག་གི་རང་བཞིན་ཐ་དད་པར་རང་གིས་རིག་པ་ཡིན་ཡང་འཁྲུལ་པས་ཐ་དད་པར་མ་རྟོགས་པ་ཡིན་ནོ་སྙམ་ན། རང་བཞིན་རིག་ན་ནི་ཞེས་བྱ་བའོ། །གལ་ཏེ་བདག་གི་རང་བཞིན་རིག་པ་ཡིན་ན་དེའི་ཚེ་འཁྲུལ་པས་ཐ་མི་དད་པར་རྟོགས་བར་མི་འགྱུར་ན། འགྱུར་བ་ཡང་ཡིན་ཏེ། དེས་ན་བདག་ནི་མེད་པ་ཁོ་ནར་འགྱུར་རོ་ཞེས་བྱ་བའི་དོན་ཏོ། །བདག་ནི་རིག་པའི་རང་བཞིན་མ་ཡིན་ཏེ། ཐམས་ཅད་རིག་པར་ཐལ་བའི་ཕྱིར་རོ་ཞེས་དོགས་པ་བསུ་བ་ནི། འོན་ཏེ་འདི་ནི་ཞེས་བྱ་བའོ། །ཇི་ལྟར་བུམ་པའི་རང་བཞིན་མ་ཡིན་པར་རིག་པར་བྱ་བ་དེ་བཞིན་དུ་བདག་ཀྱང་ཡིན་ནོ་ཞེས་བྱ་བའི་ཐ་ཚིག་གོ །ལན་དུ་གཟུང་བྱ་ཞེས་བྱ་བའོ། །གལ་ཏེ་བདག་གི་རང་བཞིན་དེ་གཟུང་བྱ་ཡིན་ན་འཛིན་བྱེད་དུ་མི་འགྱུར་རོ། །དེས་ན་བདག་འདི་ཟབ་པོ་ལས་ཉམས་པར་འགྱུར་རོ། །ཇི་ལྟར་ན་འདི་གཟུང་བྱ་ཡིན་པའི་ཕྱིར་ཟབ་པོར་འགྱུར་སྙམ་ན། རོ་སོགས་ཞེས་གསུངས་སོ། །གང་གི་ཕྱིར་བཤད་ཟིན་པའི་ཚུལ་གྱིས། བདག་ལོངས་སྤྱོད་པར་བྱ་བ་ཉིད་དུ་ཐལ་བ་དེ་ཉིད་ཀྱི་ཕྱིར་སྤྱོད་པ་ནི་བདག་ལས་གཞན་ཉིད་དུ་འགྱུར་རོ། །དེ་ལྟར་གྱུར་མོད་ཅི་སྐྱོན་སྙམ་ན། དེ་ལྟར་ཡིན་ཕྱིར་ཞེས་གསུངས་སོ། །ལོངས་སྤྱད་པར་བྱ་བ་ལས་ལོངས་སྤྱོད་པ་པོ་གཞན་ཡིན་ན། དེ་ལ་ཡང་གཞན་དོགས་པས་ཐུག་པ་མེད་དོ། །ལོངས་སྤྱོད་པ་དང་འདུ་བ་ཅན་ལོངས་སྤྱོད་པར་བྱེད་པ་ཡིན་པའི་ཕྱིར། ཐུག་པ་མེད་པ་མ་ཡིན་ནོ་སྙམ་པའི་དོགས་པ་བསུ་བ་ནི། གལ་ཏེ་ཞེས་བྱ་བའོ། །དེ་ནི་བདག་གོ །ལོངས་སྤྱོད་པའི་གཞི་སྤྱོད་པ་པོ་ཡིན་ན་
གཟུགས་ལ་སོགས་པའི་ཡུལ་ཉིད་སྤྱོད་པ་པོར་འགྱུར་རོ་ཞེས་ལན་འདེབས་པ་ནི། སྤྱོད་པ་ཉམས་སུ་མྱོང་ལས་ཞེས་བྱ་བའོ། །ཡུལ་དམིགས་པ་ཉིད་ཡུལ་ལོངས་སྤྱོད་པ་ཡིན་ནོ་ཞེས་བྱ་བའི་དོན་ཏོ། །དེ་ཡང་ཞེས་བྱ་བ་ནི་ལོངས་སྤྱོད་པའོ། །འཇིག་རྟེན་གྱི་ཐ་སྙད་ནི། ཡུལ་ཡང་བློའི་གཞི་ཡིན་པས་ན་མཚུངས་སོ་ཞེས་བརྗོད་པ་ནི། ང་ལ་ཞེས་བྱ་བའོ། །དེ་ནི་འཇིག་རྟེན་གྱི་རབ་ཏུ་སྨྲ་བས་སོ། །གཉི་ག་ལ་ཡང་ཞེས་བྱ་བ་ནི་བདག་དང་ཡུལ་ལ་ཡང་ངོ༌། །དེས་ན་གཉི་གར་ཡང་ལོངས་སྤྱོད་པ་འདུ་བ་ཡིན་ནོ་ཞེས་བྱ་བར་དགོངས་པའོ། །ལོངས་སྤྱད་པར་བྱ་བ་ལ་གནས་པའི་ལོངས་སྤྱོད་གཞན་དུ་མི་འཐད་པས་ལོངས་སྤྱོད་པ་པོ་རྗེས་སུ་དཔོག་གི་སྙམ་པར་དོགས་པ་བསུ་བ་ནི་ཅི་སྟེ་ཞེས་བྱ་བའོ། །ལན་ནི་མངོན་སུམ་ཞེས་བྱ་བའོ། །བལྟར་རུང་བའི་བདག་དེ་ལ་མངོན་སུམ་མི་སྲིད་དོ། །མ་དམིགས་པར་གྱུར་ན་རྗེས་སུ་དཔག་པའི་གོ་སྐབས་ཡོད་པ་མ་ཡིན་ནོ། །བདག་ཏུ་སྨྲ་བའི་ཀ་ཤ་དང་ཀུ་ཤ་ལ་འཇུག་པའི་དོགས་པ་བསུ་བ་ནི་འོན་ཏེ་དེ་ནི་ཞེས་བྱ་བའོ། །ལན་ནི་ད་ལྟར་ཞེས་བྱ་བའོ། །ཅི་ལྟར་ཁྱོད་ཀྱིས་ཡོད་པར་ངེས་པ་ལ་རྣལ་འབྱོར་བ་ཉེ་བར་འདོད་པ་དེ་བཞིན་བདག་ཅག་ཀྱང་མེད་པར་ངེས་པ་ལ་རྣལ་འབྱོར་པ་ཉེ་བར་འགོད་དོ་ཞེས་བརྗོད་པ་ནི། རྣལ་འབྱོར་པ་དངོས་ཞེས་བྱ་བའོ། །བདག་སྟེ་མེད་པར་མི་རིག་པ་མིན་ཏེ། འོན་ཀྱང་རིག་པ་ཁོ་ནའོ་ཞེས་བྱ་བའི་དོན་ཏོ། །གཞན་མེད་པའི་ལོངས་སྤྱོད་པ་པོ་བསལ་ནས་རང་རིག་པའི་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་རིག་པའི་རང་བཞིན་ནའོ་དེ་ནི་བདག་གོ་དེ་ལྟ་ཡིན་ན་ཅི་སྐྱོན་སྙམ་ནའོ་དེ་ཡང་ཞེས་བྱ་བའོ། །གཞན་དུ་ཞེས་བྱ་བ་ནི་བདེ་བ་ལ་སོགས་པ་རིག་པའི་རང་བཞིན་མ་ཡིན་པར་རོ། །འོན་ཏེ་ད་ལྟར་བ་ཁོ་ནའོ་ཞེ་ན། བདག་ནི་ཞེས་གསུངས་སོ། །འདས་པ་ཉིད་སྡུད་པ་ནི་གལ་ཏེ་ཞེས་བྱ་བའོ། །བདག་ཏུ་སྨྲ་བ་དེས་ནི་བདག་སྡུག་བསྔལ་བར་འདོད་པར་བྱ་སྟེ། དེའི་ཚེ་ནི་སྡུག་བསྔལ་བ་ཁོ་ན་ཡིན་གྱི་བདེ་བ་ནི་མ་ཡིན་ནོ། །ཀུན་ནས་ཉོན་མོངས་པ་ཉིད་ཡིན་གྱི་རྣམ་པར་བྱང་བ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ག་ལས་ཤེ་ན། སྡུག་བསྔལ་གནས་སྐབས་ཞེས་བྱ་བའོ། །གནས་སྐབས་ཅན་གྱི་རང་
བཞིན་གྱིས། འཛིན་པ་མེད་བར་དོགས་པ་བསུ་བ་ནི། གལ་ཏེ་ཞེས་བྱ་བའོ། །གནས་སྐབས་ནི་བདེ་བ་ལ་སོགས་པ་ཐ་དད་པའི་བདག་ཉིད་དོ། །དེའི་ངོ་བོ་ལས་གཞན་པ་ཞེས་བྱ་བ་ནི་ལན་ཏེ། གནས་ཀྱི་རང་བཞིན་ལས་ཐ་དད་པར་རོ། །བདེ་བ་ལ་སོགས་པ་ཐ་དད་པ་ཁོ་ན་དམིགས་ཀྱི། གནས་སྐབས་ཅན་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རང་རིག་པའི་བདག་ནི་ཤེལ་ལྟར་ཤིན་ཏུ་དང་བ་ཡིན་ཏེ། སྔོན་པོ་དང་འདོད་ཆགས་ལ་སོགས་པ་གཟུགས་བརྙན་གཞན་དང༌། གཞན་ཉིད་སྐྱེ་བ་དང༌། འཇིག་པ་ཡིན་གྱི། བློའི་རང་བཞིན་ནི་མ་ཡིན་ཏེ། ངོ་ཤེས་པའི་ཡུལ་ཡིན་པའི་ཕྱིར་རོ་སྙམ་དུ་དོགས་པ་བསུ་བ་ནི། ཅི་སྟེ་ཡང་ཞེས་བྱ་བའོ། །སྔོན་པོ་དང་འདོད་ཆགས་ལ་སོགས་པ་ཐ་མི་དད་པའི་བདག་ནི་དེ་བཞིན་ཁོ་ནར་ཐ་དད་པ་དང་མི་རྟོག་པར་འགྱུར་རོ་ཞེས་བྱ་བའི་དོན་བརྗོད་པ་ནི། བདེ་བ་ལ་སོགས་པ་ཞེས་བྱ་བའོ། །ཅིའི་ཕྱིར་སྙམ་ན། བདེ་སོགས་ལས་ནི་ཞེས་བྱ་བའོ། །རིག་པ་ནི་དེའི་བདག་ཉིད་ཡིན་པའི་ཕྱིར་རོ་ཞེས་བྱ་བའི་དོན་ཏོ། །སྔོན་པོ་དང་བདེ་བ་ལ་སོགས་པ་ནི་གཞན་ཡིན་ལ། རིག་པ་ཡང་གཞན་ཡིན་ཏེ། སྔོན་པོ་དང་བདེ་བ་ལ་སོགས་པ་ལྟར་བདག་ཉིད་ཀྱང་ཐ་དད་པ་མེད་པར་རིག་པ་ནི་མ་ཡིན་ནོ་ཞེས་བརྗོད་པ་ནི་ཐ་དད་པ་སྔོན་པོ་དང་བདེ་བ་ལ་སོགས་པའི་བདག་ཏུ་གྱུར་པ་དེ་ཁོ་ན་བཞིན་དུ་ཐ་དད་པས་ནི། ཐ་དད་པ་མེད་པ་གཅིག་གི་རང་བཞིན་ཤེས་བྱ་མ་ཡིན་ནོ། །ཅི་ལྟ་བུར་ཞེ་ན་སྨྲས་པ། ཅི་ལྟར་སྔོན་པོ་དང་ཆགས་པ་ལ་སོགས་པ་ཐ་དད་པ་ཁྱད་པར་དུ་གྱུར་པ་དེ་ཉིད་ལ་བཞིན་ནོ། །གལ་ཏེ་རང་རིག་པས་ཐ་མི་དད་པ་མི་རིག་མོད། རྣམ་པར་རྟོག་པས་ནི་རིག་པར་འགྱུར་རོ་སྙམ་དུ་དོགས་པ་བསུ་བ་ནི། རིག་པ་རིག་པ་ཞེས་བྱ་བའོ། །རྣམ་པར་བཏགས་པའི་ཉིད་ནི། །རང་དང་གཞན་དག་ལ་ཡང་འགྱུར་རོ་ཞེས་ལན་བཏབ་པ་ནི། དེའི་ཕྱིར་ཞེས་བྱ་བའོ། །རིག་པ་རིག་པ་ཞེས་ཤེས་པའི་ཕྱིར་ན། གཉི་གའི་བདག་ཉིད་ཐ་མི་དད་པར་འགྱུར་རོ་ཞེས་བྱ་བའི་དོན་ཏོ། །འོན་ཏེ་གཞན་གྱི་བདག་ནི་གཞན་གྱིས་རིག་པ་མ་ཡིན་ནོ་ཞེས་བྱ་བའོ། །རྩོད་པ་སྤངས་ནས་ལན་འདེབས་པ་ནི། དེ་ནི་ཞེས་བྱ་བའོ། །ཅི་
ལྟར་འཐད་པར་དཀའ་སྙམ་ན། རིག་པའི་དངོས་པོ་ཞེས་བྱ་བའོ། །གཞན་གྱིས་གཞན་གྱི་བདག་མི་རིག་ན། གཞན་བདག་མེད་པར་འགྱུར་རོ། །གཉི་ག་རང་བཞིན་གཅིག་ཏུ་མ་རྟོགས་པའི་ཕྱིར་རོ་ཞེས་བྱ་བའོ། །རང་དང་གཞན་ནི་བདག་ནི་ཕན་ཚུན་རྗེས་སུ་མ་ཞུགས་པས་ཐ་དད་པ་ཉིད་ཅེས་དོགས་པ་བསུ་ན། རང་གི་བདག་ཀྱང་སྐད་ཅིག་སོ་སོར་རིག་པ་ཐ་དད་པའི་ཕྱིར་ཐ་དད་པར་འགྱུར་རོ་ཞེས་ལན་འདེབས་པ་ནི། དེ་ནི་ཞེས་བྱ་བའོ། །གང་དུའང་ཞེས་བྱ་བ་ནི་རྒྱུད་གཅིག་ཉིད་ལ་ཡང་ངོ༌། །དེས་ན་ཞེས་བྱ་བ་ནི་གཅིག་ཉིད་མེད་པས་ནའོ། །སྔ་མ་ཕྱི་མ་དང་འཁོར་བ་མྱ་ངན་ལས་འདས་པ་དང་ངོ༌། །བཤད་ཟིན་པའི་ཚིགས་སུ་བཅད་པ་ཉིད་མཇུག་སྡུད་པ་ནི། དེ་ལྟར་ཡིན་དང་ཞེས་བྱ་བའོ། །བཤད་པ་གཞན་གསུངས་པ་ནི། ཐེར་ཟུག་རྟག་པ་ཉིད་ཡིན་ནོ། །ཞེས་བྱ་བའོ། །དེ་ཉིད་ལ་ནི་འཁོར་བ་ཉིད་ལ་སྟེ། ཡོངས་སུ་རྫོགས་པའི་ཕྱིར་རོ། །འོན་ཏེ་ཡང་འཁོར་བ་པའི་བདག་གང་ཡིན་པ་དེ་ཉིད་ད་ལྟར་གྲོལ་བ་ཡིན་ནོ་སྙམ་དུ་དུས་ཕྱིས་ངོ་ཤེས་པ་ལས་འཁོར་བ་པ་ཉིད་དུ་གནས་པ་མ་ཡིན་ནོ་སྙམ་དུ་དོགས་པ་བསུ་བ་ནི། གལ་ཏེ་ངོ་ཤེས་ཞེས་བྱ་བའོ། །འཁོར་བ་ཉིད་དུ་གནས་པ་མ་ཡིན་ནོ་སྙམ་ན། ལན་དུ་འདིར་ཞེས་སྨོས་ཏེ། ངོ་ཤེས་པ་ཡོད་པ་འདི་ལའོ།། ཤིན་ཏུ་ཡང་དེ་ཉིད་དུ་གནས་པར་ཐལ་བར་འགྱུར་རོ། །ད་ལྟར་བའི་རང་བཞིན་ནི་སྔོན་གྱི་རང་བཞིན་དང་ཐ་མི་དད་པར་རྟོགས་པའི་ཕྱིར་རོ། །གང་གིས་དེ་ཉིད་ལ་གནས་པར་འགོག་པར་འགྱུར་བ་ངོ་ཤེས་པ་ཡང་དུས་ཕྱིས་སྲིད་པ་མ་ཡིན་ནོ་ཞེས་བརྗོད་པ་ནི། དེའི་རང་བཞིན་ཞེས་བྱ་བའོ། །འཁོར་བ་ཉིད་དུ་བདག་གི་རང་བཞིན་ཡོངས་སུ་རྫོགས་པ་ཡིན་ཏེ། དེས་ན་དེའི་ཡུལ་ཅན་གྱི་ངོ་ཤེས་པ་ཡང་དེའི་ཚེ་ཉིད་འབྱུང་བར་འགྱུར་གྱི་དུས་ཕྱིས་ནི་མ་ཡིན་ནོ། །དེས་ན་དེ་ནི་དེ་ཉིད་དུ་གནས་པ་མི་འགོག་གོ །ཡོད་ན་ཡང་ཚད་མ་མ་ཡིན་ཏེ། ཡུལ་མེད་པའི་ཕྱིར་རོ་ཞེས་བརྗོད་པ་ནི་ཡུལ་མེད་པར་ནི་ཞེས་བྱ་བའོ། །ཐེར་ཟུག་ཏུ་གནས་པ་ཡང་རྣམ་པར་འགྱུར་བ་མེད་པའི་ཕྱིར་དང་དམིགས་པའི་རིམ་པ་མེད་པའི་ཕྱིར་ན། མི་རྟག་པ་ཉིད་དུ་མ་རྟོགས་པས་རྟོགས་པ་ཁོ་ནར་འགྱུར་རོ་ཞེས་བརྗོད་པ་ནི། གལ་ཏེ་ཐེར་ཟུག་ཅེས་བྱ་བའོ། །ཚིགས་སུ་བཅད་པ་འདི་ཉིད་འཆད་
པ་ནི། གལ་ཏེ་ཐེར་ཟུག་ཅེས་བྱ་བའོ། །རྣམ་པར་འགྱུར་བ་མེད་པ་དང༌། དམིགས་པའི་རིམ་པ་མེད་པའི་གཏན་ཚིགས་གཉིས་ནི། རྟག་པ་ཉིད་སྒྲུབ་པར་བྱེད་པར་འདོད་པ་ཡིན་ནོ། །འཁོར་བ་དང་མྱ་ངན་ལས་འདས་པའི་རིམ་པ་དམིགས་པར་འདོད་ན་ནི་མི་རྟག་པ་ཉིད་དུ་འགྱུར་རོ་ཞེས་མཇུག་བསྡུས་ནས་སྟོན་པ་ནི་གང་གི་ཕྱིར་དེ་ལྟར་རྟག་པ་ཉིད་དུ་འགྱུར་བ་དེའི་ཕྱིར། དེའི་ཚེ་ཞེས་ཁོང་ནས་ཕྱུང་ལ། དེ་ཁོལ་བུ་ཉིད་དུ་ཞེས་བྱ་བ་ལ་སོགས་པར་སྦྱར་རོ། །གལ་ཏེ་ཐེར་ཟུག་ཏུ་རྟག་པས་རྟག་པའི་བདག་ལ། གཞན་དག་གང་གིས་མི་རྟག་པ་ཉིད་དུ་འགྱུར་བའོ། །གང་ནས་གང་དུ་དམིགས་པ་མེད་པའི་བདག་ཉིད་ཅན་གྱི་མི་དམིགས་པ་ཉིད་དུ་འདོད་ཀྱི་རིམ་གྱིས་མཐོང་བར་མ་ཡིན་པ་ཉིད་ཅིའི་ཕྱིར་སྙམ་པའི་དོགས་པ་བསུ་བ་ནི། མ་དམིགས་པ་ཅི་ལྟར་ཞེས་བྱ་བའོ། །ལན་དུ་ནི་ཤི་བས་ཞེས་བྱ་བ་སྟེ། ཤི་བ་ལ་ལྟོས་ནའོ། །འདིའི་ཞེས་བྱ་བ་ནི་ཉམ་ཆུང་འདིའོ། །མཐོང་བ་ནི་བདག་ལ་རིམ་པར་མཐོང་བའོ། །མ་མཐོང་བའི་བདག་ལ་དོགས་པ་མེད་པའི་ཕྱིར། ཕྱིས་མཐོང་བ་ལ་ལྟོས་པ་ན། གཞན་གྱི་འཇིག་པར་འདོད་པ་ཉིད་དོ་ཞེས་ཟུར་ན་གནས་པའི་ཚིག་དོགས་པར་བྱེད་པ་ནི་གལ་ཏེ་མ་མཐོང་བ་དེས་ཞེས་བྱ་བའོ། །དེ་ལྟ་ཡིན་དང་ཞེས་བྱ་བ་ནི་ཡང་མཐོང་བར་ཁས་བླངས་པ་དེ་ལྟར་འགྱུར་ན། བདག་རིམ་པ་ཅན་དུ་འགྱུར་རོ། །དེས་ན་སྔར་ཐལ་བར་བསྒྲུབ་པ་གང་ཡིན་པ་དེ་ཉིད་དུ་འགྱུར་རོ་ཞེ་ན། ལན་དུ་འདི་ནི་ཞེས་བྱ་བའོ། །བདག་རྟག་པ་ལ་རང་བཞིན་གྱིས་མི་རྟག་པ་ཉིད་དུ་ཁས་བླངས་པའི་མཚན་ཉིད་དོ། །མཚུངས་པ་ཉིད་དུ་དམིགས་ན་ཡང༌། །ཞེས་བྱ་བ་ལ་སོགས་པའི་ཚིགས་སུ་བཅད་པ་འཆད་པར་བྱེད་པ་ནི། ཡང་ན་མཚུངས་པའི་ཞེས་བྱ་བ་ལ་སོགས་པ་ཡིན་ནོ། །སྐབས་ཀྱི་རྣམ་འགྲེལ་ཉིད་ལ་བཤད་པ། གཞན་གསུངས་པ་ནི། ཡང་ན་རྟོགས་པའི་རང་བཞིན་ཉིད་ཀྱིས་ཞེས་བྱ་བའོ། །རིག་པའི་རང་བཞིན་དུ་གཅིག་པའི་ཕྱིར། རྒྱུད་ཐ་དད་པ་མ་ཡིན་ལ། སྔོན་པོ་དང་བདེ་བ་ལ་སོགས་པས་ཀྱང་མ་ཡིན་ཏེ། ཐ་དད་པ་ཐམས་ཅད་ལ་ནི་འཁྲུལ་པའི་ཕྱིར་རོ། །འཁྲུལ་པ་མེད་པ་ནི་རིག་
པའི་རང་བཞིན་ཡིན་ཏེ། ཐམས་ཅད་ལ་དགག་ཏུ་མེད་པའི་ཕྱིར་རོ། །དངོས་པོ་གང་ཞིག་ཡུལ་དང་དུས་ཀྱིས་རྣམ་པར་བཅད་པ་མེད་པར་ཡོད་པ་དེ་ནི་རྟོག་པ་དང་ཁྱབ་པར་ཡང་འདོད་པ་ཡིན་པའི་ཕྱིར། བདག་ཀྱང་ཁྱབ་པ་ཉིད་དུ་བརྗོད་དོ་ཞེས་བྱ་བའི་དོན་ཏོ། །གལ་ཏེ་དེ་ལྟར་ན་ཞེས་བྱ་བ་ནི་ལན་ནོ། །གལ་ཏེ་བདག་གྲོལ་བ་ལ་འཁྲུལ་པ་མེད་པས་ན། གཞན་གྱི་བདག་ཉིད་དུ་གནས་པ་ནི། དེའི་འཁྲུལ་པའི་གནས་སྐབས་ན་ཐ་དད་པ་གང་ཡིན་པ་དེ་ཉིད་བདག་གཅིག་ཉིད་ཡིན་པར་མི་འགྱུར་རོ། །དེས་ན་འཁྲུལ་པའི་གནས་སྐབས་སུ་ནི་མ་དད་ལ། མ་འཁྲུལ་པའི་གནས་སྐབས་སུ་ནི་ཐ་དད་པ་མེད་པའི་རང་བཞིན་དུ་གྱུར་བའི་ཕྱིར། སྔ་མའི་རང་བཞིན་ཕྱི་མའི་དུས་སུ་ཞིག་པ་དེ་ཉིད་ཡིན་ནོ། །ཐར་པའི་བདག་འཁོར་བའི་བདག་དང༌། ཐ་མི་དད་ན་ནི་འཁོར་བ་ཉིད་དུ་འགྱུར་རོ་ཞེས་བརྗོད་པ་ནི། དེའི་གནས་སྐབས་ཉིད་དུ་ཞེས་བྱ་བའོ། །སྲིད་གནས་སྐབས་ཉིད་ཅེས་གསུངས་སོ། །གལ་ཏེ་གྲོལ་བ་ཞེས་བྱ་བ་ལ་སོགས་པའི་རྐང་པ་གསུམ་འཆད་པ་ནི། གལ་ཏེ་བུམ་པའི་ཞེས་བྱ་བའོ། །ཇི་ལྟར་རང་དང་གཞན་གྱི་རྣམ་པར་དབྱེ་བ་མེད་ཀྱང་ཞིག་པར་ཅི་ལྟར་འགྱུར་ཞེ་ན། ངའོ་ཞེས་གསུངས་སོ། །རྣམ་པར་དབྱེ་བ་མེད་པའི་གནས་སྐབས་སུ་ཡང་ངའོ་སྙམ་པའི་རྟོག་པའི་ཡུལ་མ་ཡིན་པའི་ཕྱིར། དེ་ཁོ་ནར་བདག་མེད་པར་ཐལ་བར་འགྱུར་རོ་ཞེས་བརྗོད་པ་ནི། ནམ་མཁའ་ཉིད་དུ་ཞེས་བྱ་བའོ། །འདི་ནི་དངོས་པོའི་སྟོབས་ཀྱིས་ཞེས་བྱ་བ་ནི་གཞན་གྱི་དོགས་པ་སྟེ། རྣམ་པར་དབྱེ་བ་མེད་པས་བདག་རིག་པ་ཉིད་འདི་ནིའོ། །འོ་ན་ནི་ཞེས་བྱ་བ་ནི་ལན་ཏེ། ངའོ་སྙམ་པར་རྟོགས་པའི་ཡུལ་མ་ཡིན་པ་ནི། བདག་མ་ཡིན་པའི་ཕྱིར་རོ། །རིག་པའི་རང་བཞིན་ནམ། ཡོད་པའི་རང་བཞིན་ནི་རྟག་པའམ། ཁྱབ་པར་འཐད་པ་མ་ཡིན་ཏེ། སྣང་བཞིན་པ་ཉེ་བར་འགག་པ་ཡིན་པའི་ཕྱིར་རོ། །ཉེ་བར་གནས་པར་སྣང་བ་ནི་ཡུལ་དུས་གཞན་ན་ཡོད་པ་མ་ཡིན་ནོ། །དེ་ལྟ་ཡིན་ན་ཡང་ཉེ་བར་གནས་པའི་རང་བཞིན་ཡང་དེ་ལྟར་འགྱུར་རོ་ཞེས་བརྗོད་པ་ནི། རང་བཞིན་ཙམ་ཞེས་བྱ་བའོ། །གལ་ཏེ་གཅིག་ཏུ་མཐོང་བ་ཡོད་པའི་རང་བཞིན་ནམ། རིག་པའི་རང་བཞིན་ནི་གཞན་དུ་ཡང་དེ་
ཉིད་ཡིན་ཏེ། དེ་ལྟར་ངོ་ཤེས་པའི་ཕྱིར་རོ་སྙམ་དུ་དོགས་པ་ནི། འོན་ཏེ་འདི་ཞེས་བྱ་བའོ། །ངོ་ཤེས་པས་ཐར་པ་དང་འཁོར་བ་དག་ཀྱང་གཅིག་ཉིད་དུ་སྒྲུབ་པོ་ཞེས་ལན་འདེབས་པ་ནི། དེ་ལྟ་ཡིན་ན་ཞེས་བྱ་བ་སྟེ། ངོ་ཤེས་པ་དང་མ་བྲལ་བའི་ཕྱིར་རོ། །གང་གི་ཕྱིར་ཐར་པ་དང་འཁོར་བ་དག་གཅིག་ཉིད་མ་ཡིན་པའི་ཕྱིར་རོ། །ནམ་མཁའ་བཞིན་དུ་ཞེས་བྱ་བ་ནི། ཅི་ལྟར་བུམ་པ་མེད་ན་བུམ་པའི་ནམ་མཁའ་མེད་པ་དེ་བཞིན་དུའོ། །འོན་ཏེ་ཐར་པ་ནི་གནས་སྐབས་ན། བདག་ནམ་མཁའ་དང་འདྲ་བར་འགྱུར་མོད་ཅེ་ན། དེ་འདྲིའི་ཞེས་གསུངས་སོ། །ནམ་མཁའ་དང་མཚུངས་པའོ། །ངའོ་ཞེས་བྱ་བ་ལ་སོགས་པར་ཉམས་སུ་མྱོང་བའི་ཡུལ་བྱེད་པ་པོ་དང༌། ལོངས་སྤྱོད་པ་པོ་ཞེན་པའི་ཡུལ་ནི་མ་རིག་པའི་དབང་གིས་ཡིན་ནོ་ཞེས་བྱ་བར་འོན་ཏེ་ཞེས་བྱ་བ་ལ་སོགས་པས་དོགས་བ་བསུ་ནས། ཐར་བའི་གནས་སྐབས་ན། མྱོང་བ་ཐམས་ཅད་དང༌། བུ་མོ་ལ་སོགས་པའི་ཡུལ་ཅན་གྱི་ཐམས་ཅད་དང༌། ཤེས་རབ་དང༌། ཡིད་གཞུངས་པ་ལ་སོགས་པའི་ཡོན་ཏན་ཐམས་ཅད་ལོག་པའི་ཕྱིར་ན། དེ་ལ་རྒྱུ་མཚན་མེད་པས་ཞེན་པ་མི་འབྱུང་བ་ཁོ་ནའོ། །དེས་འདིར་རྟོག་པ་དང་ལྡན་པ། དོན་དུ་གཉེར་བ་ཅི་ལྟར་འགྱུར། །ཞེས་བརྗོད་པ་ནི། ཐར་པའི་གནས་ཀྱི་བདག་ཉིད་གང་ལ་མྱོང་བ་དང་ཐ་སྙད་དང༌། ཡོན་ཏན་གྱི་རང་བཞིན་ཞེན་པའི་རྒྱུའི་རྟེན་ཐམས་ཅད་ཡོད་པ་དེ་ལ་ཞེས་པ་སྟེ། ཆགས་པས་ཅི་ལྟར་འདོད་ཅིང་ཁས་ལེན་ཞེས་པའོ། །རྒྱུ་མཚན་མེད་བཞིན་དུ་ཞེན་པར་ཇི་ལྟར་འགྱུར་ཞེས་བྱ་བའི་དོན་ཏོ། །ཞེན་པའི་ཡུལ་ནི་འདི་འདྲ་བ་ཡིན་ན། གཞན་འདྲ་བར་ག་ལ་འགྱུར་ཞེས་བྱ་བར་དགོངས་པའོ། །ཅིའི་ཕྱིར་ཞེ་ན་ཞེས་བྱ་བའི་རང་བཞིན་གསུངས་སོ། །རྡོ་དང་ཤིང་བལ་ལ་སོགས་པ་ལ་ཁྱབ་པའི་ནམ་མཁའི་བདག་གང་ལ་ཡོད་པ་དེའི་སྟེ། བདེ་བ་དེ་ཉིད་ནིའོ། །ཐ་སྙད་ཐམས་ཅད་ནི་བླང་བྱ་དང་དོར་བྱ་བ་ལ་སོགས་པའོ། །དེ་ལས་འདས་པ་ནི་ཞེན་པའི་ཡུལ་ལས་བཟློག་པ་ཞེས་བྱ་བའི་དོན་ཏོ། །དེ་འདྲ་བར་ཞེས་བྱ་བ་ནི་སྔར་མི་རང་བཞིན་ལས་བཟློག་པ་ཐར་པའི་རང་བཞིན་དུའོ། །དོན་དུ་གཉེར་
བ་ཉིད་མ་སྐྱེས་པའི་ཕྱིར་ན། རྟོག་པ་དང་ལྡན་པའི་འཇུག་པ་ཉིད་འགལ་བ་ཡིན་ནོ་ཞེས་བྱ་བའི་དོན་ཏོ། །འཁོར་བའི་བདེ་བ་ནི་ཞེས་བྱ་བ་ནི་དོགས་པ་བསུ་བའོ། །དོགས་པའི་དོན་ནི་མྱ་ངན་ལས་འདས་པའི་བདེ་བ་ནི་འཁོར་བའི་བདེ་བ་ལས་ཁྱད་པར་དུ་གྱུར་པ་ཡིན་པས་ན། ཡོངས་སུ་ཚིམ་པ་སྐྱེད་པར་བྱེད་པ་ཡིན་ཏེ། དེས་ན་དེ་ཉིད་དོན་དུ་གཉེར་བར་བྱ་བ་ཡིན་ནོ། །གང་བདེ་བ་ཡིན་པ་དེ་ནི་དོན་དུ་གཉེར་བར་བྱ་བ་ཡིན་ལ། གང་ཞིག་དོན་དུ་གཉེར་བར་བྱ་བ་ཡིན་པས་དེ་ཡང་ཡོངས་སུ་ཚིམ་པར་བསྐྱེད་པ་བཟོད་པ་མ་ཡིན་ནོ་ཞེས་བྱ་བ་ནི་ལན་གྱི་དོན་ཏོ། །དེས་ན་ཞེས་བྱ་བ་ནི་དོན་གཉེར་བར་བྱ་བ་ཡིན་པས་ནའོ། །གལ་ཏེ་ཞེས་བྱ་བ་ནི་གཞན་གྱིའོ། །མ་མཐོང་བ་ནི་ཞེས་བྱ་བ་ནི་ལན་ནོ། །དེ་ནི་འདོད་ཆགས་དང་བྲལ་བའོ། །བདག་ལ་ཞེན་པ་མེད་པ་ནི་མངོན་དུ་བྱེད་པ་མ་ཡིན་ནོ་ཞེས་འབྲེལ་ཏོ། །གང་གི་ཕྱིར་དོན་དུ་གཉེར་བ་ཞེས་བྱ་བ་ལ་ལྟོས་ནས། དེ་ཉིད་ཀྱི་ཕྱིར་ཞེས་གསུངས་སོ། །ཡང་ན་ཐར་པའི་གནས་སྐབས་ན་བདག་ནམ་མཁའ་བཞིན་དུ་ངོ་བོ་མེད་པར་འགྱུར་བའི་ཕྱིར་མི་རིགས་པ་ཡིན་ཏེ། བདག་ཏུ་རྟོགས་པའི་ཡུལ་ཡིན་པའི་ཕྱིར་རོ། །བདག་ནི་འདི་དག་གིའོ། །འདི་དག་ནི་བདག་གིའོ་ཞེས་བྱ་བའི་འབྲེལ་པའམ། ཐུན་མོང་མ་ཡིན་པ་ནི་འཆིང་བར་བརྗོད་པ་ཡིན་ལ། ཐར་པ་ལ་ནི་མེད་པ་ཡིན་ནོ་སྙམ་ན། རྣམ་པ་ཀུན་དུ་ཞེས་བྱ་བའོ། །བདག་གོ་ཞེས་བྱ་བ་ལ་སོགས་པར་རིག་པ་ཡང༌། དེའི་ཚེ་མེད་པ་ཁོ་ན་སྟེ། གཉིད་ཀྱིས་ལོག་པའི་རྨི་ལམ་དུ་མཐོང་བའི་རང་བཞིན་ཐར་པའི་དཔེར་དེར་སྨྲ་བ་དག་གིས་བརྗོད་པ་ཡིན་ནོ། །ཡང་ན་བདག་གོ་ཞེས་བདག་ཏུ་མཐོང་བའི་རྣམ་པར་འབྲེལ་པའམ། དེ་དང་ཐུན་མོང་མ་ཡིན་པའི་རྣམ་པ་ཡོད་དུ་ཆུག་ཀྱང༌། བདག་ཏུ་འཛིན་པ་ནི་རྣམ་པ་ཐམས་ཅད་དུ་ཞེན་པའི་སྙིང་པོ་ཅན་ཉིད་དོ། །དེ་ལས་ཀྱང་ཐུན་མོང་པའམ། ཐུན་མོང་མ་ཡིན་པའི་བདག་གི་བ་ལ་ཞེན་པ་འདྲེན་པར་བྱེད་དོ། །དེ་མེད་ན་རང་མེད་པའི་འགྱུར་བའི་ཕྱིར་རོ། །འགའ་ཞིག་ཅེས་གཞན་དུ་འཆད་དོ། །བཤད་པ་མཛད་པའི་གསལ་བ་ཁོ་ནའོ། །བདག་ཏུ་འཛིན་པ་སྤངས་པས་ནི་བདག་གིར་ཞེན་པ་ལ་སོགས་པ་སྲིད་པ་མ་ཡིན་ནོ་
ལ་སྤྱི་ལ་སོགས་པའི་ཐ་སྙད་ཇི་ལྟར་ཡིན་པ་དེ་སྟོན་ཏེ། ཤེས་པ་སྐྱེ་བ་གང་ཡིན་པ་འདི་ནི་དེ་ལ་ཡོད་པའི་དོན་ཀྱང་རྣམ་པ་གང་ཡིན་པའི་དོན་དེ་དག་མཚུངས་སོ་ཞེས་འཛིན་ཏོ་ཞེས་བྱ་བར་འབྲེལ་ཏོ། །ཤེས་པའི་རང་གི་ངོ་བོ་རྒྱུ་དང་རང་གི་ངོ་བོའི་སྒོ་ནས་སྟོན་པ་ནི། དངོས་པོའི་རང་གི་ངོ་བོ་འཛིན་པས་ཞེས་བྱ་བའོ། །དེའི་ཡུལ་ཅན་མ་ཡིན་ཡང་དེའི་ཡུལ་ཅན་གྱི་རྒྱུ་མཚན་ནི་དེ་ཉམས་སུ་མྱོང་བ་གཞན་པའི་བག་ཆགས་ལ་བརྟེན་ནས་སྐྱེ་བ་ཡིན་ལ། འབྲས་བུ་ཐ་མི་དད་པའི་དངོས་པོ་ལས་སྐྱེ་བ་ནི་དོན་ཐ་མི་དད་པར་འཛིན་པའི་རྒྱུ་མཚན་ཡིན་ནོ། །གང་གི་ཕྱིར་འདི་ཉམས་སུ་མྱོང་བའི་དངོས་པོ་ལས་དེའི་འདུ་བྱེད་པའི་དབང་གིས་སྐྱེ་བ་དེའི་ཕྱིར་དངོས་སུ་ནི་དེའི་ཡུལ་ཅན་ནམ་ཡིན་པ་དེ་ལྟར་ལྷག་པར་ཞེན་པ་ཡིན་ནོ། །དེ་བས་ན་དེའི་ཡུལ་ཅན་མ་ཡིན་ཡང་དེའི་ཡུལ་ཅན་ལྟ་བུ་ཞེས་བྱ་བས་ནི་དེ་མ་ཡིན་པ་ལ་དེར་ལྷག་པར་ཞེན་པ་ཉིད་བརྗོད་པ་ཡིན་ནོ། །དོན་ཐ་མི་དད་པ་འཛིན་པ་ཞེས་བྱ་བ་འདིར་ཡང་ལྟ་བུའི་སྒྲ་བྱས་པ་ནི་སྤྱི་ལྷག་པར་ཞེན་པའི་རྩ་བ་ཅན་ཡིན་པའི་ཕྱིར་རོ། །དམིགས་པ་མ་ཡིན་ཡང་རང་བཞིན་ཉིད་ཀྱིས་མཚུངས་པར་རྟོགས་པ་དེའི་ས་བོན་ནི་གཞན་ལས་ཐ་དད་པ་ཁོ་ན་ཡིན་ནོ་ཞེས་སྟོན་པ་ནི། དོན་དམ་པར་ཞེས་སྨོས་སོ། །དེ་ཉིད་ཀྱི་ཕྱིར་ཐ་དད་པ་ནི་དེ་དང་འབྲེལ་པ་ཡིན་ནོ། །ཤེས་པའི་རང་བཞིན་བརྗོད་ནས་དེ་དང་རྗེས་སུ་མཐུན་པར་དེའི་ཡུལ་གྱི་རང་བཞིན་བཤད་པ་ནི། དེ་ལ་ཞེས་སྨོས་སོ། །དོན་དེ་ཉམས་སུ་མྱོང་བའི་བག་ཆགས་ལས་སྐྱེས་པའི་ཕྱིར་འདི་ཕྱི་རོལ་ལྟ་བུ་དང་རྣམ་པ་ཐ་མི་དད་པ་འཛིན་པ་ཉིད་ཀྱིས་གཅིག་པ་ལྟ་བུ་དང༌། དེའི་ཡུལ་ཅན་མ་ཡིན་ཡང་དེའི་ཡུལ་ཅན་ལྟ་བུ་ཉིད་ཀྱིས་ནི་དོན་མི་བྱེད་ཀྱང་དེ་བྱེད་པ་ལྟ་བུའོ། །འདི་ཉིད་གཞུང་གཟུགས་པའི་ཕྱིར། ཐ་སྙད་འདོགས་པ་རྣམས་ཞེས་སྨོས་སོ། །དོན་བྱ་བ་བྱེད་པ་ཉིད་དུ་ལྷག་པར་ཞེན་པའི་ཕྱིར་དེའི་ཡུལ་ཅན་ལྟ་བུ་ཞེས་བརྗོད་ལ། ལྷག་པར་ཞེན་པ་དེ་ཡང་ཐ་སྙད་འདོགས་པ་རྣམས་ལ་ཡོད་པ་ཡིན་ཏེ། གལ་ཏེ་མེད་ན་ནི་འཇུག་པ་ཉིད་དུ་མི་འགྱུར་རོ། །འདི་ལྟར་རིག་པར་མ་འགྱུར་པའི་དོན་ལ་གལ་ཏེ་དེར་ཞེན་པ་ཡང་མེད་ན་ནི་གཞན་ལས་ཐ་དད་པ་ལ་མི་འཇུག་པ་ཁོ་ནར་འགྱུར་རོ། །རིགས་མི་མཐུན་པ་ཐ་དད་པའི་ཡུལ་ཅན་ཉིད་ཀྱིས་ཀྱང་དེ་མི་བྱེད་བ་དག་
ལས་ཀྱང་ཐ་དད་པ་ལྟ་བུའོ། །གལ་ཏེ་འདིར་ལྡོག་པར་སྣང་བ་མེད་པའི་ཕྱིར་ཇི་ལྟར་ཐ་དད་པ་ལྟ་བུ་ཞེས་བརྗོད་ཅེ་ན། དེ་ནི་དོན་བྱ་བ་བྱེད་པ་ཉིད་དུ་ཞེས་སྨོས་སོ། །དེ་ལྟར་སྣང་བ་ཉིད་དེ་མ་ཡིན་པ་ལས་ཐ་དད་པར་སྣང་བ་ཡིན་ཏེ། ཇི་སྐད་བཤད་ཟིན་པ་བཞིན་ནོ། །རྣམ་པར་དེ་ཉིད་ཀྱང་རྣམ་པར་རྟོག་པའི་གཟུགས་བརྙན་ཡིན་པའི་ཕྱིར། ཐ་དད་པ་ཞེས་བརྗོད་དོ། །དེ་ཡང་དངོས་པོའི་ངོ་བོ་མ་ཡིན་ནོ་ཞེས་བཤད་པ་ནི། །དེ་ཡང་བརྟག་པའི་ཞེས་བྱ་བའོ། །དེ་ནི་སྤྱིའི་ཐ་སྙད་དེ་ལ་བརྟེན་པ་ཉིད་དུ་བཤད་པ་ན་ནི་བློ་ལ་གནས་པའི་དོན་དེ་དག་ནི་ཞེས་བྱ་བ་ཡིན་ནོ། །གལ་ཏེ་ཡང་དོན་རྣམ་པ་གཅིག་ཉིད་ཀྱི་སྐབས་ཡིན་པ་དེ་ལྟ་ན་ཡང་སྤྱི་ཉིད་གཞན་ལ་ལྟོས་པའི་ཕྱིར་མང་པོའི་ཚིག་ཏུ་བརྗོད་དོ། །དེ་ཞེས་བྱ་བའི་ཐ་དད་པའི་མཚན་ཉིད་སྤྱིས་མཚུངས་སོ་ཞེས་བྱ་བར་འཛིན་ཏོ། །གང་གི་ཕྱིར་འདིར་ལོག་པའི་བདག་ཉིད་དེ་དག་སྣང་བ་ཡིན་ནོ། །རང་གི་མཚན་ཉིད་ནི་མ་ཡིན་ཏེ། ཇི་སྐད་བརྗོད་པའི་ཤེས་པ་དེ་ལ་མི་སྣང་བ་ཉིད་དོ། །གཞི་མཐུན་པ་ཡང་དེ་ཉིད་ལ་ཡིན་པར་བཤད་པ་ནི། དེ་དག་ཉིད་ཅེས་བྱ་བའོ། །བ་ལང་མ་ཡིན་པ་ལས་ལོག་པར་སྣང་བ་ནི་སྐར་པོ་མ་ཡིན་པ་ལས་ཀྱང་ལོག་པར་སྣང་ངོ༌། །དེས་ན་བ་ལང་ཞེས་བྱ་བ་སྣང་བ་གང་ཡིན་པ་དེ་ལ་རྟེན་ཉིད་དུ་དཀར་པོ་ཞེས་སྣང་བ་ན་དེ་དང་ཐ་མི་དད་པར་སྣང་བ་ཡིན་ཏེ། དེ་ཉིད་དཀར་པོ་ཡིན་པའི་ཕྱིར་རོ། །དེས་ན་རྣམ་པར་འདི་གཉིས་རྣམ་པར་རྟོག་པ་ལ་སོ་སོར་ཐ་དད་པར་སྣང་བ་ཡིན་ཡང་པན་ཚུན་འབྲེལ་པས་བྱས་པས་གཅིག་ཏུ་སྣང་བའི་འདི་ཉིད་གཞི་མཐུན་བ་ཡིན་གྱི། གང་གིས་འདི་གཉིས་གཞི་མཚུངས་པ་ཡིན་པའི་ཕྱིར་གཞི་མཐུན་པར་འགྱུར་བ་ཆོས་ཅན་གསུམ་པ་ནི་འདིར་ཡང་སྣང་བ་མེད་དོ། །བ་ལང་ངོ་སྙམ་པ་འདི་ཉིད་དུས་ཅན་རྟོགས་པ་ཡིན་ལ་དེ་ཉིད་ཀྱང་དཀར་པོའི་བདག་ཉིད་དུ་གྱུར་བ་ཡིན་ནོ། །འདི་ལ་ཇི་ལྟར་ཤེས་དང་ཐ་དད་མ་ཡི་པ་ཞེས་བྱ་བའི་ཚུལ་འདིས་བློའི་དོན་རྣམས་ལོག་པའི་རྣམ་པར་རྟོག་པ་ལས་བྱུང་བའི་བདག་ཉིད་དུ་བཤད་པ་དེ་བཞིན་དུ། ཐ་དད་རྣམས་འབྲེལ་པར་རྟོགས་པ་ཡང་མ་གྲུབ་པའི་ཕྱིར་གཞི་མཐུན་གཅིག་པ་ཉིད་ཀྱང་ལྷག་པར་ཞེན་པ་ཅམ་གྱི་རང་བཞིན་ལོག་པའི་དོན་ཁོ་ན་ཡིན་ནོ་ཞེས་བསྟན་པའི་ཕྱིར། བདག་ཉིད་ཀྱི་
བྱ་བའོ། །བདག་གི་བ་ལྟར་བདག་ཀྱང་མ་སྤངས་པ་ནི་ཡིན་ནོ་ཞེས་བྱ་བའི་དོན་ཏོ། །འོ་ན་གང་སྤངས་སྙམ་ན་ཆགས་པ་འབའ་ཞིག་ཅེས་བྱ་བ་གསུངས་སོ། །བེ་ར་ག་ནི་འདོད་ཆགས་མེད་པ་སྟེ། བེ་རའི་སྒྲ་ནི་དགག་པའི་དོན་ཡིན་པའི་ཕྱིར་རོ་ཞེས་བྱ་བའི་དོན་ཏོ། །བདག་ལ་ཐར་པའི་བདེ་བ་འདོད་པ་ནི་བདག་ལ་ཆགས་པ་དང་བྲལ་བ་མི་སྲིད་དོ་ཞེས་རེ་ཞིག་རང་རིག་ཉིད་ལན་འདེབས་པ་ནི་བདེ་བར་ཞེས་པའོ། །ད་ནི་རྣམ་འགྲེལ་གྱི་དོན་གལ་ཏེ་ཞེས་བྱ་བས་བརྗོད་དོ། །དེ་ཉིད་ཅེས་བྱ་བ་ནི་དོགས་པའོ། །བདག་ཉིད་ཆགས་པ་དང་མ་བྲལ་བ་ལས་བདག་ལ་ཆགས་པ་དང་བྲལ་བ་ཡིན་ནོ་ཞེས་བྱ་བའི་དོན་ཏོ། །བདག་དོར་བ་ཉིད་དུ་མི་ནུས་སོ་ཞེས་བརྗོད་པ་གང་ཡིན་པ་དེ་ནི་ཆགས་པ་དང་བྲལ་བ་ལ་ཡང་མཚུངས་སོ་ཞེས་ལན་བརྗོད་པ་ནི། བདག་ལ་བདག་ཅེས་བྱ་བའོ། །ཅིས་ཞེས་བྱ་བ་ནི་གཞན་གྱི་དྲི་བའོ། །འོ་ན་ཏེ་ཆགས་པ་ཉིད་ཆགས་པ་དང་བྲལ་བར་འགྱུར་ན། འདི་ལ་བརྗོད་པ་ནི་དེ་ནི་གཞན་དུ་ཞེས་བྱ་བ་སྟེ། ཆགས་པ་དེ་ནི་གཞན་དུ་འདོད་ཆགས་དང་བྲལ་བ་ཉིད་དུ་མི་འགྱུར་རོ། །གཞན་ཏེ་འདོད་ཆགས་དང་བྲལ་བ་ཡང་དེ་ལྟར་ཆགས་བའི་རང་བཞིན་གྱིས་གནས་པ་མིན་ནོ། །ཅིའི་ཕྱིར་དེ་ལྟར་མ་ཡིན་སྙམ་ན། བདག་ཉིད་ཀུན་ནམ་ཞེས་བྱ་བའོ། །བདག་ཉིད་ཀུན་གྱིས་རྣམ་པ་གཞན་དུ་འགྱུར་ན། རང་གི་གྲུབ་པའི་མཐའ་དང་འགལ་བ་ཉིད་ཀྱིས་འཐད་པར་དཀའོ། །ཕྱོགས་གཅིག་གིས་གཞན་དུ་འགྱུར་ན་འཐད་པར་དཀའ་བ་ཉིད་གསལ་བར་བྱེད་པ་ནི་གཅིག་ལ་ཞེས་བྱ་བའོ། །བདག་གཅིག་ལ་ནི་ཕྱོགས་གཅིག་མེད་དོ། །གང་གི་ཕྱིར་ཕྱོགས་གཅིག་ཡོད་ན་བདག་དེ་ཐ་མི་དད་པ་ཉིད་མེད་པར་འགྱུར་རོ། །དེ་ཅིའི་ཕྱིར་ཞེ་ན། བཤད་པ་གང་ཞིག་ཅེས་བྱ་བའོ། །དེས་ན་ཕྱོགས་གཅིག་གཞན་དུ་གྱུར་ཀྱང་བདག་ནི་གཞན་དུ་གྱུར་པ་མ་ཡིན་ནོ་ཞེས་བསྟན་པ་ཡིན་ནོ། །འོན་ཏེ་ཡང་ཕྱོགས་གཅིག་གཞན་དུ་གྱུར་པས་བདག་གཞན་དུ་འགྱུར་བ་ཉིད་དུ་འདོད་ན། དེ་ལ་ཡང་བརྗོད་པ་ནི་དེ་ལྟར་ཡིན་ན་ཞེས་བྱ་བ་སྟེ། ཡང་ཕྱོགས་གཅིག་གིས་གཞན་དུ་འགྱུར་བ་ཡིན་ན་ཐུག་པ་མེད་པར་འགྱུར་ཏེ་
ཕྱོགས་གཅིག་པོ་དེ་ལས་གཞན་ཡིན་ལ། དེ་ལས་གཞན་ཡང་དེ་ལས་གཞན་ཡིན་པ་ཞེས་བྱ་བ་ལ་སོགས་པའི་ཚུལ་དུའོ། །དེ་ནས་བདག་གཞན་དུ་འགྱུར་བ་མ་ཡིན་ནོ། །གང་མ་ཕྱོགས་གཅིག་པོ་གཞན་དུ་གྱུར་པ་དེ་ཡང་བདག་མ་ཡིན་ནོ། །ཐ་དད་པར་མེད་པའི་ཕྱོགས་དོགས་པར་བྱས་ནས་འགོག་པ་ནི་ཕྱོགས་གཅིག་པ་གཞན་མིན་པར་འགྱུར་རོ་ཞེ་ན། དེ་ལྟ་ན་ཡང་ཞེས་བྱ་བ་ནི་གཞན་མ་ཡིན་ན་ཡང་ངོ༌། །ཅི་ལྟར་ཐུག་པ་མེད་ཅེ་ན། དེར་ཡང་ཞེས་བྱ་བའོ། །གཞན་མ་ཡིན་པ་གང་ཡིན་པ་ད་ནི་བདག་བཞིན་དུ་འགྱུར་བ་མ་ཡིན་ལ། གང་ཞིག་གཞན་དུ་འགྱུར་བ་དེ་ནི་གཞན་ཡིན་ནོ། །དེ་ཡང་རྣམ་པ་འགས་གཞན་མ་ཡིན་ན། ཡང་དེ་ཉིད་བཟླས་པར་བྱ་བའོ། །དེས་ན་ཐུག་པ་མེད་དོ། །གང་གི་ཕྱིར་དེ་ལྟར་ཆགས་པ་དང་མ་བྲལ་བར་གྱུར་པ་ལས་ཆགས་པ་དང་བྲལ་བར་འགྱུར་བར་མི་འཐད་པའི་ཕྱིར་རོ། །དེས་ནི་ཐར་པར་འདོད་བས་སོ། །དེ་ལྟ་ན་ཡང་འདོད་ཆགས་དང་བྲལ་བ་བསྒོམས་པ་དོན་མེད་དོ་ཞེས་བརྗོད་པ་ནི་དེ་ནི་ཇི་ལྟར་ཞེས་བྱ་བའོ། །བདག་དོར་བ་ཉིད་ཀྱིས་བདག་གི་བ་ལ་ཆགས་པ་དང་བྲལ་བ་གྲུབ་པའི་ཕྱིར་དེ་ལ་ཆགས་པ་དང་བྲལ་བ་བསྒོམས་པ་ནི་དོན་མེད་དོ། །འོན་ཏེ་ཡང་རྣམ་བ་གང་གིས་ཀྱང་བདག་ཡོངས་སུ་མི་འདོར་བ་དེས་ན་ཆགས་པ་དང་བྲལ་བ་བསྒོམ་པ་དོན་དང་བཅས་པ་ཡིན་ནོ་སྙམ་ན། རྣམ་པ་གང་གིས་དོན་མེད་པ། །ཞེས་བྱ་བའོ། །དོན་མེད་ཅེས་བྱ་བ་ནི་མི་ནུས་པའོ། །ཅིའི་ཕྱིར་ཞེ་ན། སྡུག་བསྔལ་ཞེས་གསུངས་སོ། །རྣམ་པ་གཞན་དུ་སྦྱར་བ་ཞེས་པ་ནི། ཡང་ན་ཞེས་བྱ་བའོ། །གང་ལ་ཞེས་བྱ་བ་ལ་ལྟོས་ནས། དེ་ནི་འདིར་མིན་པ་ཞེས་འབྲེལ་ཏོ། །ཆགས་པ་དང་བྲལ་བའི་ཡུལ་མི་སྤང་ངོ་སྙམ་དུ་དོགས་པའོ། །གཞན་ལ་གྲུབ་པའི་དཔེ་བརྗོད་པ་ནི་བདག་བཞིན་ཞེས་བྱ་བའོ། །བསྒོམ་པ་དོན་མེད་པ་ཉིད་གསལ་བར་བྱེད་པ་ནི་སྡུག་བསྔལ་བསྒོམས་པས་ནི་ཞེས་བྱ་བའོ། །གལ་ཏེ་དོན་སྤྱོད་མེད་དེ་ལས་ཅིར་འགྱུར་སྙམ་ན། ཅི་ལྟར་ཞེས་བྱ་བའོ། །སྡུག་བསྔལ་བསྒོམས་པས་ཁྱབ་གྲོལ་མ་ཡིན་ནོ། །ཞེས་བྱ་བའི་དོན་ཏོ། །སྡུག་བསྔལ་བསྒོམས་པ་ནི་དངོས་སུ་འདོད་ཆགས་དང་
བྲལ་བ་མ་ཡིན་གྱི། འོན་ཀྱང་སྡུག་བསྔལ་དེ་བློ་ལ་གནས་པར་བྱས་པ་ལས་ཡིན་ནོ། །བློ་ལ་གནས་པར་བྱས་པ་དེ་ཡང་གནས་སྐབས་ཀུན་དུ་སྐྱེས་བུ་ལ་ཡོད་པའི་ཕྱིར་སྡུག་བསྔལ་བསྒོམས་པའི་ཉེ་བར་བསྟན་པས་ཅི་བྱ་སྟེ། དེ་དཔྱོད་ཀྱང་ཤེས་པར་སླ་བའི་ཕྱིར་རོ་ཞེས་སྟོན་པ་ནི་དེ་དག་ཅེས་བྱ་བའི་སྐྱེས་བུ་དེ་དག་ནི་སྡུག་བསྔལ་བསྒོམས་པའི་ཉེ་བར་བསྟན་པས་ཀྱང་སྡུག་བསྔལ་ཉིད་དེ། སྡུག་བསྔལ་གྱིས་སྒྲུབ་པར་བྱེད་པ་དང༌། སྡུག་བསྔལ་དང་རྗེས་སུ་འབྲེལ་པ་ཉིད་རྣམ་ཤེས་བྱེད་དེ་ཁོང་དུ་ཆུད་པར་བྱེད་པ་ཡིན་ན། རང་བཞིན་ཉེ་བར་བསྟན་པ་ལས་སྔར་ཡང་མངོན་སུམ་བྱས་པ་ཉིད་དོ། །དེ་ནས་ཆགས་པ་དང་མ་བྲལ་བ་ཉེ་བར་བསྟན་པས་བྲལ་བར་བྱེད་པ་ཡང་མ་ཡིན་ཏེ། དེ་ཡང་དེ་ཉིད་རྗེས་སུ་བརྗོད་པ་ཙམ་ཡིན་པའི་ཕྱིར་རོ། །སྔར་ནི་ཆགས་པ་དང་བྲལ་པར་གྱུར་པ་དང༌། ཆགས་པ་དང་བྲལ་བའི་ཡུལ་མེད་པའི་ཕྱིར་བསྒོམ་པ་དོན་མེད་པར་བརྗོད་པ་ཡིན་ལ། དེ་ལྟ་ན་ནི་ཆགས་པ་དང་བྲལ་བའི་སྒྲུབ་བྱེད་ཉིད་མེད་པར་བརྗོད་པ་ཡིན་ནོ། །ཁོ་བོ་ཅག་གིས་ནི་འདུ་བྱེད་ཀྱི་སྡུག་བསྔལ་ཉིད་ལ་བསམས་ནས་བླང་བྱ་དང་དོར་བྱ་དང་བྲལ་བའི་ཕྱིར་སྟེའུ་ཙན་དན་མཉམ་པ་ཉིད་འདོད་ཆགས་དང་བྲལ་བར་འགྱུར་བའི་ཕྱིར་བསྒོམ་པ་ཡིན་ནོ། །འདོད་ཆགས་དང་བྲལ་བའི་རྒྱུ་མ་ཡིན་པ་ཉིད་བརྗོད་པ་འདིས་ནི་ཞེས་བྱ་བའོ། །འདི་ཉིད་གསལ་བར་བྱེད་པ་ནི་སྡུག་བསྔལ་བསྒོམ་པ་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་མངོན་དུ་བྱེད་པའི་རྒྱུ་མ་ཡིན་ནོ། །དེ་ལྟ་མ་ཡིན་ན་ནི་ཞེས་བྱ་བ་ནི་སྡུག་བསྔལ་མངོན་སུམ་ཉིད་མ་ཡིན་ནའོ། །དེ་ལྟ་ན་ཡང་ཞེས་བྱ་བ་ནི་སྡུག་བསྔལ་མངོན་སུམ་ཉིད་ཡིན་ཡང་ངོ༌། །སྡུག་བསྔལ་བསྒོམ་པ་དོན་དང་བཅས་པར་དོགས་པ་བསུ་པ་ནི་གལ་ཏེ་སྡུག་བསྔལ་ཞེས་བྱ་བའོ། །དེ་བཞིན་དུ་བདེ་བ་བསྒོམས་པས་འདོད་ཆགས་པར་འགྱུར་རོ་ཞེས་ལན་བཏབ་པ་ནི་དེ་ནི་མེད་དེ་ཞེས་བྱ་བའོ། །དེས་ན་ཞེས་བྱ་བ་བདེ་བའི་ཚོགས་རྣམ་པར་ཤེས་པས་སོ། །གལ་ཏེ་འཁོར་བ་པའི་བདེ་བ་མཐའ་དག་ནི་སྡུག་བསྔལ་གྱི་གཞི་ཡིན་པའི་ཕྱིར་ན་སྡུག་བསྔལ་ཉིད་མ་ཡིན་ནམ། འདི་ལྟར་བདེ་བའི་དོན་དུ་སྦྱོར་བ་ནི་དེ་བསྒྲུབ་པ་ལ་སོགས་
པས་ཉོན་མོངས་པའི་རྣམ་པར་རྟག་པའི་སྡུག་བསྔལ་ཉིད་ལ་བདེ་བར་མངོན་པར་རློམ་པ་ཡིན་ནོ། །དེས་ན་སྡུག་བསྔལ་བསྒོམས་པ་ནི་དྲང་སྲོང་རྣམས་ཀྱིས་བསྟན་པ་ཡིན་ནོ་ཞེས་དོགས་པ་བསུ་བ་ནི་གལ་ཏེ་རབ་ཏུ་ཞི་བའི་ཞེས་བྱ་བའོ། །སྡུག་བསྔལ་བསྒོམས་པས་ནི་འཁོར་བ་པའི་བདེ་བ་ལ་སྲེད་པར་མི་འགྱུར་རོ་ཞེས་འབྲེལ་ཏོ། །བདག་ཏུ་མངོན་པར་ཞེན་པ་ཅན་ནི་སྡུག་བསྔལ་བསྒོམས་ཀྱང་བདག་ལ་ཞེན་པ་ཡོད་པའི་ཕྱིར་བདག་གི་བར་ཞན་པ་མི་ལྡོག་གོ་ཞེས་ལན་བཏབ་པ་ནི་དེ་ཡང་མ་ཡིན་ཏེ་ཞེས་བྱ་བའོ། །ཞི་བ་ཐར་པ་ནི་འཁོར་བ་བའི་བདེ་བ་ལ་སྐྱོ་བའི་རྒྱུ་མ་ཡིན་ནོ། །འོན་ཏེ་རབ་ཏུ་ཞི་བའི་བདེ་བ་ལ་རྟོག་པ་ན་འཁོར་བ་ཉིད་ལས་སྐྱོ་བའི་རྒྱུ་ཡིན་ནོ་སྙམ་ན་དུར་ཁྲོད་ཀྱི་ནི་གནས་ཞེས་བྱ་བའོ། །འདི་ག་ལས་ཤེ་ན། བྱ་རོག་ཅེས་བྱ་བ་སྟེ། བྱ་རོག་ནི་བདག་ཏུ་ལྟ་བ་ལ་མངོན་པར་ཞེན་པ་དང་འདྲ་བ་ཡིན་ནོ། །པདྨའི་ནགས་ནི་ཐར་པ་དང་འདྲ་བའོ། །མི་གཙང་བའི་གནས་ནི་འཁོར་བ་དང་མཚུངས་སོ། །གལ་ཏེ་བདག་ཏུ་ལྟ་བ་ཅན་ཡང་འགའ་ཞིག་ལ་སྡུག་བསྔལ་གྱི་རྒྱུ་ཉིད་དུ་མཐོང་བའི་ཕྱིར་ན་ཆགས་པ་དང་བྲལ་བར་མཐོང་བ་ཉིད་མ་ཡིན་ནམ་ཞེ་ན། ཚུལ་དེ་ཉིད་ཀྱིས་ཐམས་ཅད་དུ་ཡང་འགྱུར་བ་ཉིད་དོ་ཞེས་བྱ་བའི་གལ་ཏེ་ཞེས་བྱ་བ་ལ་སོགས་པས་དོགས་པ་བསུ་ནས། གལ་ཏེ་དེ་ལ་ཞེས་བྱ་བས་ལན་འདེབས་སོ། །དེ་ཉིད་གསལ་བར་བྱེད་པ་ནི་འདི་ལྟར་ཞེས་བྱ་བའོ། །ཆགས་པའི་ནུས་པ་ནི་བདག་གི་བར་འཛིན་པའོ། །གཏན་དུ་ནི་འདོད་ཆགས་དང་བྲལ་བ་ནི་མ་ཡིན་ནོ་ཞེས་འབྲེལ་ཏོ། །འཕགས་པའི་ཤེས་རབ་ཀྱིས་ཞེས་བྱ་བ་ནི། བདག་ཏུ་འཛིན་པ་དང་འབྲེལ་པའི་ཤེས་རབ་གཅད་པར་བྱ་བའི་དོན་དུ་ཁྱད་པར་དུ་བྱས་པའོ། །བླང་བ་དང་དོར་བ་བཅོམ་པའི་རྒྱུ་ནི་བདག་མེད་པར་ལྟ་བ་ཡིན་གྱི། བདག་ཏུ་འཛིན་པ་ནི་མ་ཡིན་ནོ་ཞེས་བྱ་བའི་དོན་ཏོ། །རྣམ་གྲངས་ཀྱིས་འདོད་ཆགས་པར་མཐོང་བ་དེ་ཉིད་མཇུག་བསྡུ་བས་སྟོན་པ་ནི། དེའི་ཕྱིར་ཞེས་བྱ་བའོ། །བདག་ཏུ་སྨྲ་བ་ལ་ནི་ཁམས་གསུམ་པ་ནི་སྤང་བྱ་ཡིན་ལ། བདག་དང་དེའི་ཆོས་ནི་བླང་བྱ་ཡིན་ནོ། །བླང་བར་བྱ་བ་ལ་ཆགས་པ་དེ་ལ་ཡང་ཕན་འདོགས་པར་བྱེད་པ་གཞན་ལ་ལྟོས་པ་དང་བཅས་པའི་ཕྱིར་ན་འདོད་ཆགས་
ཀྱིས་བོན་ཡིན་པར་བརྗོད་དོ། །དེའི་ཕན་འདོགས་པར་བྱེད་པ་ཉིད་ནི་ཡོད་དམ་མེད་ཀྱང་རུང་སྟེ། དེ་ལ་ལྟོས་པའི་བདག་ཏུ་འཛིན་པ་ཆགས་པའི་ས་བོན་ནི་ཡོད་པ་ཁོ་ནའོ་ཞེས་བྱ་བའི་དོན་ཏོ། །བླང་བར་བྱ་བ་ལ་ཆགས་པར་བདག་ཏུ་འཛིན་པའི་མཚན་ཉིད་དེ་ཡང་གནོད་པར་བྱེད་པ་ལ་སྡང་པའི་རྣམ་པའི་ས་བོན་ཡིན་ནོ་ཞེས་བྱ་བར་ཡང་སྤང་བ་ཤེས་པར་བྱ་བའོ། །ཇི་ལྟར་ས་བོན་སྙམ་ན་རྣམ་གྲངས་ཀྱིས་ཞེས་གསུངས་སོ། །ཡིན་པས་ན་དེ་ཅི་ལྟར་འགྲོལ་ཞེས་ཁོང་ནས་དབྱུང་ངོ༌། །གང་ལ་ཞེས་བྱ་བ་ནི་འཆད་པའོ། །དེའི་རྒྱུ་ཅན་གྱི་ཆགས་པ་དང་སྡང་བ་དེ་ཁོ་ན་བཞིན་དུ་འགྱུར་རོ་ཞེས་བརྗོད་པ་ནི་འདོད་པ་དང་སྡང་བ་ཞེས་བྱ་བའོ། །བླང་བྱ་མེད་པའི་ཕྱིར་ཆགས་པའང་མ་ཡིན་ལ་རྒྱབ་ཀྱིས་ཕྱོགས་པ་ཡང་མ་ཡིན་པའི་ཕྱིར་གང་ཞིག་སུའི་ས་བོན་ཡིན་ཞེས་བརྗོད་པ་ནི། བདག་མེད་པར་ལྟ་བ་ནི་ཞེས་བྱ་བའོ། །དེ་ལྟར་འདོད་ཆགས་དང་བྲལ་ཀྱང་རྣམ་པ་ཐམས་ཅད་དུ་འདོད་ཆགས་དང་བྲལ་བ་ནི་མ་ཡིན་ནོ་ཞེས་བསྟན་པ་ཡིན་ནོ། །ད་ནི་བདག་ཏུ་ལྟ་བ་ལ་ཆགས་པ་དང་བྲལ་བ་ཉིད་མི་སྲིད་དོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །ཅི་ལྟར་མི་འཕྲོད་པ་ཉིད་མེད་སྙམ་ན། རེ་ཞིག་ཅེས་སྨོས་སོ། །དམིགས་པའི་སྒྲུབ་པར་བྱེད་པ་ཞེས་བྱ་བ་ནི་མིག་ལ་སོགས་པ་དང་ཡུལ་ལེ། །གལ་ཏེ་བདག་ཏུ་ལྟ་བ་ཅན་ཡང་ཁམས་གསུམ་པ་ལ་ཆགས་པ་དང་བྲལ་བ་ཡིན་ལ། ཡུལ་གཞན་ཡང་མེད་པའི་ཕྱིར་ཅི་ལྟར་འགའ་ཞིག་འདོད་པའམ། སྡང་བར་འགྱུར་སྙམ་དུ་དོགས་ན། སྟོན་མེད་ཡུལ་ཅན་ཞེས་བྱ་བའོ། །བདག་ལ་ཆགས་པ་ཡོད་ན་ནི་ཁམས་གསུམ་པ་དེ་ལ་ཕན་འདོགས་པའི་ཆ་དང་ལྡན་པ་ལ། འདོད་ཆགས་དང་བྲལ་བ་ཉིད་མི་འགྲུབ་བོ་ཞེས་བྱ་བ་ནི། བསམ་མེད་བདག་ལ་ཆགས་པ་ཡིས། །ཞེས་བྱ་བ་ལ་སོགས་པས་བཤད་ཟིན་ཏོ་ཞེས་བྱ་བའི་དོན་ཏོ། །འོ་ན་ནི་ཉེས་པ་དང་ལྡན་པ་ཉིད་ཀྱིས་ན་བདག་གི་བ་ལ་བཞིན་དུ་བདག་ལ་ཡང་རྒྱབ་ཀྱིས་ཕྱོགས་པར་འགྱུར་རོ་སྙམ་པའི་བསམ་པས་དོགས་པ་བསུ་བ་ནི། འོན་ཏེ་ཞེས་བྱ་བའོ། །དེ་ནི་བདག་གི་བ་ལའོ། །སྐྱོན་མེད་པ་འབའ་ཞིག་ཏུ་ནི་མ་ཟད་དེ་སྐྱོན་བཅས་ཀྱང་ཡིན་ནའོ། །ད་ནི་ཞེས་བྱ་
བ་ནི་ལན་ནོ། །གལ་ཏེ་ཞེས་བྱ་བ་ནི་རྩོད་པའི་ཆ་རྣམ་པར་འགྲེལ་བའོ། །བདེ་བ་ཡིན་ཞེས་བྱ་བ་ནི་གྲུབ་པའི་མཐའི་ཆ་བཤད་པའི་དོན་དུ་འདྲི་བའོ། །གཞན་གྱི་ལན་སྡུག་བསྔལ་གྱི་རྒྱུ་ཉིད་དོ་ཞེས་བྱ་བའོ། །གྲུབ་པའི་མཐའ་སྨྲ་བས་རྣམ་གྲངས་ཀྱི་ཞེས་གསུངས་སོ། །རེས་འགའ་ཞེས་བྱ་བ་ནི་དོགས་པའོ། །དེ་ནི་ཞེས་བྱ་བ་ནི་ལན་ནོ། །བདག་ནི་ཞེས་བྱ་བ་ནི་གཞན་གྱིའོ། །བདག་གི་བ་ལ་ཡང་ཞེས་བྱ་བ་ནི་ལན་འདེབས་པའོ། །བདག་གི་བ་དོར་བར་དོགས་པ་བསུ་ནས་ཟློག་པར་བྱེད་པ་ནི་ཉེས་པ་ཡིན་པའི་ཕྱིར་དང་ཞེས་བྱ་བའོ། །ཇི་ལྟར་ལོག་པ་ཡིན་སྙམ་དུ་དོགས་ན། གང་དང་གང་གི་ཚེ་ཞེས་གསུངས་སོ། །དེ་ནི་བདག་གི་བའོ། །ཅི་ལྟར་གཏན་དུ་མི་འདོད་སྙམ་ན། ཅི་ལྟར་ངེས་པས་ཞེས་བྱ་བའོ། །གལ་ཏེ་ཞེས་བྱ་བ་ནི་དོགས་པའོ། །དེ་ལྟ་ན་ནི་ཞེས་བྱ་བ་ནི་ཕན་ནོ། །གལ་ཏེ་བདེ་བ་སྡུག་བསྔལ་བསྐྱེད་པའི་ཕྱིར་འདོད་ན། འོ་ན་སྡུག་བསྔལ་བདེ་བའི་སྐྱེད་བྱེད་ཡིན་པའི་ཕྱིར་བླང་བྱར་འགྱུར་རོ་ཞེས་བྱ་བའི་དོན་ཏོ། །བདག་གི་བ་ལ་ཞེན་པ་ནི་ཉེས་པ་མཐོང་བས་འདོད་པ་མ་ཡིན་ཏེ་ཡོན་ཏན་མཐོང་བསམ་བསྐྱེད་པའི་ཕྱིར་རོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །ཉེས་པ་མཐོང་བ་ནི་བསྒོམ་པས་བསྐྱེད་པའི་ཉེས་པ་མཐོང་བའོ། །སོ་སོའི་ལུས་ལ་སོགས་པ་དག་ལ་ཡོན་ཏན་མཐོང་བས་བསྐྱེད་པ་ནི་མ་ཡིན་ནོ། །རྗེས་སུ་འགྲོ་བ་དང་ལྡོག་པ་མེད་པའི་ཕྱིར་རོ་ཞེས་བཤད་པ་ནི། དེ་ལྟར་ཞེས་བྱ་བ་ཡོན་ཏན་མཐོང་བས་བསྐྱེད་པའོ། །དེ་ནི་ཞེན་པའོ། །བྱིས་སོགས་ལ་ཞེས་བྱ་བ་ནི་ལྡོག་པ་མེད་པའོ། །ཡོན་ཏན་ལས་སྐྱེས་པ་ཡང་མ་ཡིན་ཏེ། ལྡོག་པ་མེད་པའི་ཕྱིར་རོ་ཞེས་བཤད་པ་ནི། སྐྱོན་ལྡན་ལ་ཡང་ཞེས་བྱ་བའོ། །རྗེས་སུ་འགྲོ་བ་མེད་པ་བརྗོད་པ་ནི་ཡོན་ཏན་ལྡན་པ་ཞེས་བྱ་བའོ། །གཞན་དག་ལ་ནི་གཞན་གྱི་ལུས་དང་དབང་པོ་ལ་སོགས་པའོ། །བདག་གི་ཡང་ཡོན་ཏན་དང་ལྡན་པ་འདས་པ་དང་མ་སྐྱེས་པ་ལ་མེད་པའི་ཕྱིར་ཞེས་རྗེས་སུ་འགྲོ་བ་མེད་པར་བཤད་པ། སྔར་བདག་གི་བར་གྱུར་པ་ལས་གང་གི་ཚེ་འདས་པར་གྱུར་པ་དེ་ལ་བདག་ཏུ་ཞེན་པ་མེད་པའི་ཕྱིར་ཏེ་བྲལ་བའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་ཡོན་ཏན་མཐོང་བས་བསྐྱེད་པ་མ་ཡིན་ནོ། །འོ་ན་ཅིས་བསྐྱེད་པ་ཡིན་སྙམ་དུ་དོགས་པ་བསུ་ནས། བདག་གི་བ་བློ་བཅོམ་པས་འདི་འདོར་བ་ཡིན་གྱི་བཟློག་
པས་མིན་ཞེས་བྱ་བར་བསམས་ནས། འོན་ཀྱང་ཞེས་བྱ་བའོ། །བདག་གི་བའི་བློ་ཡོན་ཏན་མཐོང་བ་ལས་བྱུང་བ་ནི། སྡུག་བསྔལ་བསྒོམས་པས་བསྐྱེད་པའི་ཉེས་པ་མཐོང་བས་མེད་པར་འགྱུར་རོ་ཞེས་དོགས་པ་བསུ་བ་ནི། དེ་ལྟ་ན་ནི་ཞེས་བྱ་བའོ། །ཞེན་པ་བཞིན་དུ་བདག་གི་བློའི་རྒྱུ་ཡང་ཡོན་ཏན་མཐོང་བ་མ་ཡིན་ནོ་ཞེས་ལན་འདེབས་པ་ནི། དེ་ཉིད་ཕྱིར་ན་ཞེས་བྱ་བའོ། །སྐྱོན་ལྡན་ལ་ཡང་ཡོད་ཕྱིར་དང༌། །ཞེས་བྱ་བ་ལ་སོགས་པའི་ཕྱིར་རོ། །བདག་གི་བའི་བློ་དེ་ཡང་ཡོན་ཏན་མ་ཡིན་པ་མཐོང་བ་ཉེས་པ་མཐོང་བས་སྤོང་བ་མ་ཡིན་ནོ། །བདག་མེད་པ་མཐོང་བ་ཁོ་ནས་སྤོང་བ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཕྱིར་ཞེས་བྱ་བ་རྣམ་པར་འགྲེལ་པ་ནི་ཉེས་པ་དང་ལྡན་པ་ཞེས་བྱ་བའོ། །ལྷག་མ་ནི་གསལ་བའི་ཕྱིར་རྣམ་པར་མ་བཀྲལ་ཏོ། །ཕྱིར་ལ་ཡོན་ཏན་མཐོང་བ་ཉིད་བདག་གི་བའི་བློ་དང་ཞེན་པ་དག་ལས་སྐྱེ་བ་ཡིན་ནོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །ཞེན་པའི་རྒྱུ་ནི་བདག་གི་བར་འཛིན་པ་ཡིན་ལ་དེ་དང་འགལ་པ་མེད་པ་སྡུག་བསྔལ་བསྒོམ་པ་བསྒྲུབས་བས་ནི་དེའི་འབྲས་བུ་ཞེན་པ་ལ་མི་གནོད་དོ་ཞེས་མཇུག་སྡུད་པ་ནི་དེས་ན་ཞེས་བྱ་བའོ། །གལ་ཏེ་ཞེས་བྱ་བ་ནི་འཆད་པའོ། །དེ་ནི་ཉེས་པ་མཐོང་པའོ། །མི་རྙེད་པ་ཅིའི་ཕྱིར་སྙམ་ན། གང་གི་ཕྱིར་ཞེས་བྱ་བའོ། །ཉེས་པ་མཐོང་བ་དང་འགལ་པ་ཡོན་ཏན་མཐོང་བ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་དོགས་པ་བསུ་བའོ། །མ་ཡིན་ཏེ་ཞེས་བྱ་བ་ལན་ནོ། །འོ་ན་ཅི་ལྟར་བདག་ཏུ་ལྟ་བ་ཅན་རྣམས་ཀྱི་ཞེན་པའི་གནོད་པ་ཅི་ལྟར་འགྱུར་སྙམ་ན། དེ་ནི་ཞེས་བྱ་བའོ། །དེ་ལྟར་གྱུར་ན་ཅི་སྐྱོན་སྙམ་ན། དེ་ལྟ་ན་ཡང་ཞེས་གསུངས་སོ། །ཞེན་པས་ཞེན་པ་གཞན་ལ་གནོད་པར་གྱུར་པ་ནའོ། །དེ་ལྟར་ཡིན་ཞེས་བྱ་བ་ནི་ཉེས་བ་མཐོང་བ་གཅོད་བྱེད་ཡིན་ནའོ། །ཉེས་པ་མཐོང་བ་འདིའི་ནི་གནོད་བྱེད་དེ་ཉིད་དེ། བཟློག་པར་བྱ་བའི་ཞེན་པས་བསྐྱེད་པ་ཉིད་ཟློག་པར་བྱེད་པའི་ཞེན་པ་ལ་ཡིན་ནོ། །དེ་ལས་ཅིར་འགྱུར་སྙམ་ན། སྤྲོས་པ་ཡིན་ནོ། །ཉེས་པ་མཐོང་བ་ཞེས་འབྲེལ་ཏོ། །ཡོན་ཏན་མཐོང་ན་ཡང་ག་ལ་ཡོད་སྙམ་དུ་དོགས་པའོ། །འོན་ཏེ་ཡུལ་སྔ་མ་ལ་བྱུང་བ་ལྡོག་གོ །སྐྱོན་གྱི་རྒྱུ་ནི་མ་ཡིན་ནོ་སྙམ་ན། མ་ཡིས་ཞེས་
གསུངས་སོ། །དེའམ་གཞན་དུ་ཡང་རུང་སྟེ། ཞེན་པ་མི་མཐོང་བ་གནོད་པས་ཡོན་ཏན་མཐོང་བའི་ཕྱིར། ཡོངས་སུ་མ་སྤངས་པ་འཁོར་བ་པ་ཉིད་ཀྱི་མཚན་འཆི་བ་དང་མཚུངས་པ་ལ་ཁྱད་པར་ཅི་ཡོད། ཇི་ལྟར་མའམ་གཞན་གྱིས་ཟོས་པ། གཞན་གྱིས་ཟོས་པ་ལ་འཆི་བ་ལ་ལྟོས་ནས་ཁྱད་པར་འགའ་ཡང་མེད་པ་བཞིན་ནོ། །ཨེ་ཏིའི་སྒྲ་ཁོང་ནས་ཕྱུང་བའི་དོན་བསྟན་པ་གསུངས་པ་ནི། དེའི་ཕྱིར་ཞེས་བྱ་བའོ། །རང་བཞིན་ནི་ལུས་ལ་སོགས་པ་བདག་མ་ཡིན་པའོ། །སྐྱེས་བུ་ནི་བདག་གོ །དེ་གཉིས་ཀྱི་བྱེ་བྲག་ནི་ཐ་དད་པ་སྟེ། དེ་ཡོངས་སུ་ཤེས་པ་ལས་ཐར་བར་འགྱུར་བ་ཡིན་ནོ། །དེ་མ་ཤེས་པ་ནི་དེ་དང་འགལ་བའི་ཕྱིར་རོ། །དེ་མ་ཤེས་པ་ནི་ཞེན་པ་ལ་སོགས་པའི་སྒྲུབ་བྱེད་ཡིན་པའི་ཕྱིར་འཁོར་བའི་རྒྱུ་ཡིན་ནོ་ཞེས་བརྗོད་པ་ནི། འདི་ལྟར་ཞེས་བྱ་བའོ། །རང་བཞིན་གཞན་དུ་ནི་སྐྱེས་བུ་ལས་རང་བཞིན་ཐ་དད་པར་རོ། །ཅི་ལ་སྡུག་བསྔལ་ཤེས་པ་ཐར་པའི་ཡན་ལག་མ་ཡིན་པའི་ཕྱིར་ན། མ་རྟོགས་པ་དང་རྟོགས་པར་བླ་བའི་ཕྱིར། ཉེ་བར་བསྟན་པར་བྱ་བ་དེ་བཞིན་དུ། བདག་ཐ་དད་པར་ཤེས་པ་ཡང་ཡིན་ནོ་ཞེས་ལན་ལྡོན་པ་ནི། མཆོག་གཞན་ཞེས་བྱ་བའོ། །ལུས་དང་དབང་པོ་ལ་སོགས་པའི་ཚོགས། བདག་མེད་ལ་བདག་ཉིད་དུ་བཟུང་ན་སྤོང་བར་སྤྲོ་བ་ཉིད་མེད་དེ། དེས་ན་དེ་དེ་ལ་འདི་ནི་བདག་མ་ཡིན་ནོ་ཞེས་བདག་མ་ཡིན་པ་ཉིད་དུ་ཉེ་བར་སྟོན་པ་མ་ཡིན་ནོ། །བདག་མེད་པར་ལྟ་བ་ཉིད་ཐར་པའི་རྒྱུ་ཡིན་པའི་ཕྱིར་རོ། །བདག་ཐ་དད་པར་ཤེས་པ་ནི་མ་ཡིན་ཏེ། དེ་ལས་ཟློག་པའི་ཕྱིར་རོ། །གང་གིས་ཁྱད་པར་མཐོང་བ་ནི་ཞེན་པ་བཟློག་པ་ལས་ཐར་བར་འགྱུར་ན། གཅིག་ཏུ་མཐོང་བས་ནི་ཞེན་པ་མ་ཡིན་ནོ་ཞེས་བརྗོད་པ་ནི། བདག་ལ་ཆགས་པ་དེ་ཞེས་བྱ་བའོ། །དམིགས་པ་ལོངས་སྤྱོད་ཀྱི་ནང་གི་ཡན་ལག་དབང་པོ་ལ་སོགས་པ་ཉེ་བར་གནས་པའི་སྒྲུབ་བྱེད་དག་ལའོ། །ཐ་དད་པ་མཐོང་བ་ནི་མི་རྟག་པ་ཉིད་མཐོང་བའོ། །དབང་པོ་ལ་སོགས་པ་མི་རྟག་བ་ཉིད་ཡིན་ཡང༌། བདག་གི་རང་བཞིན་ལས་ཐ་དད་པར་རྟོགས་པར་ཇི་ལྟར་འགྱུར་སྙམ་ན། རྗེས་སུ་འགྲོ་བ་དང་ཞེས་གསུངས་སོ། །འདི་ཉིད་གསལ་བར་བྱེད་པ་ནི་བདག་གི་ཞེས་བྱ་བའོ། །བདེ་བ་ལ་སོགས་པ་ཞེས་སོགས་པའི་སྒྲས་ནི་དབང་པོ་ལ་
སོགས་པའོ། །ལྡོག་པ་ནི་གཙོ་བོ་ཡོངས་སུ་གྱུར་པའི་རང་བཞིན་ཡིན་པའི་ཕྱིར་རོ། །དེ་ཉིད་ཅེས་བྱ་བ་ནི་རང་བཞིན་དང་སྐྱེས་བུ་ཐ་དད་པ་ཉིད་དོ། །དེ་ལྟ་ཡིན་ན་ཐར་པ་མེད་དོ་ཞེས་བྱ་བ་ནི། རྣམ་པར་དབྱེ་བའི་ངེས་པ་མེད་ན། ཐ་དད་པའི་ཉེ་བར་བསྟན་པ་ཚད་མས་འཐད་པ་ཉིད་དུ་མི་འགྱུར་རོ་ཞེས་བྱ་བའི་དོན་ཏོ། །དེས་ན་སྐྱེ་བོ་རྣམས་ལ་ཐ་དད་པའི་བློ་ཡོད་པ་ཉིད་ཡིན་པའི་ཕྱིར་ན། དེ་ཉེ་བར་བསྟན་པར་མི་རིགས་སོ། །དེ་བསྒོམས་པས་ནི་དངོས་སུ་རྣམ་པར་དབྱེ་བ་མཐོང་བར་ཡང་མི་འཐད་དོ་ཞེས་བརྗོད་པ་ནི་བདེ་བ་དོན་དུ་གཉེར་བ་ཞེས་བྱ་བ་སྟེ། བདག་ལ་ཞེན་པར་དོན་དུ་གཉེར་བའོ། །ཅིའི་ཕྱིར་གུས་པ་མེད་སྙམ་ན། བདེ་བ་ལ་སོགས་པ་དང་ཞེས་གསུངས་སོ། །དེའི་ཕྱིར་གཅིག་ཉིད་མཐོང་བས་ཀྱང་ཞེས་བྱ་བ་ལ་སོགས་པ་འཆད་པས་ཀྱང༌། བདག་ནི་ཞེས་བྱ་བའོ། །དེ་ནི་ཞེས་བྱ་བ་ནི་དོགས་པ་བསུ་བའོ། །སྔར་གཅིག་ཀྱང་སྤྲོ་བའི་དུས་ན་གཙོ་བོ་དང་གཅིག་པར་སློབ་པ་ཡིན་ནོ་སྙམ་དུ་བསམས་པའོ། །ཕྱེད་དང་པོ་འཆད་པ་ནི་གཙོ་བོའི་ནང་དུ་ཞེས་བྱ་བའོ། །ཡུལ་ཉིད་ཀྱི་གཙོ་བོ་ནང་དུ་ཞུགས་པ་ཡོད་པ་ཉིད་དོ་ཞེས་བརྗོད་པ་ནི། གལ་ཏེ་ཡུལ་ཉིད་ཅེས་བྱ་བའོ། །བློ་མེད་པར་ཡང་ཞེས་བྱ་བ་ནི་སྤྲོས་པ་ལས་སྔར་རོ། །ཕྱེད་ཕྱི་མ་འཆད་པ་ནི་སྐྱེས་བུ་རྣམས་ཀྱི་ཞེས་བྱ་བའོ། །བློ་དང་འདོད་པ་དག་ནི་གཙོ་བོ་ལས་མ་ཡིན་གྱི། འོན་ཀྱང་ཐོག་མ་མེད་པའི་བག་ཆགས་ལས་ཡིན་ནོ། །དེས་ན་ཕན་ཚུན་བསྟེན་པའི་ཉེས་པ་མེད་དོ་སྙམ་དུ་དོགས་པ་ལ། གལ་ཏེ་དེ་ལྟ་ན་བདེ་བ་དང་སྡུག་བསྔལ་དག་ཀྱང་དེ་ལྟར་འགྱུར་བའི་ཕྱིར་གཙོ་བོ་སྤྲོས་པའི་རྒྱུ་མ་ཡིན་ནོ་ཞེས་བརྗོད་པ་ནི་ཐོག་མེད་བག་ཆགས་ཞེས་བྱ་བ་ལ་སོགས་པའོ། །འདེ་ནི་བདག་གིས་བག་ཆགས་ཀྱང་བདག་ལས་ཐ་དད་པའམ་ཐ་མི་དད་པ་ཞིག་ཏུ་འགྱུར་ན། ཐ་དད་པའི་ཕྱོགས་ལ་བརྗོད་པ་ནི་གཙོ་བོའི་ཞེས་བྱ་བའོ། །ཐ་དད་པའི་ཕྱོགས་ལ་བརྗོད་པ་ནི་དེའི་ཕྱིར་ཞེས་བྱ་བའོ། །དེ་ནི་བག་ཆགས་སོ། །ཞེ་སྡང་ཡང་འདོད་ཆགས་དང་འབྲེལ་བ་སྒྲུབ་པར་བྱེད་པའི་ཕྱིར་ཉེས་པ་མ་ཡིན་ན་སྙམ་ན། ཆགས་བྲལ་མ་ཡིན་ཞེས་གསུངས་སོ། །ཅིའི་ཕྱིར་ཞེ་ན། དེ་ཚེ་ཡང་ཞེས་གསུངས་སོ། །ད་ལྟར་བའི་བདེ་བའི་དུས་སུ་ཡང་ངོ༌།།
སྐབས་གཞན་ནི་བདེ་བའི་སྒྲུབ་བྱེད་དེ་དེ་ཚོལ་བའི་ཕྱིར་རོ། །ཞེ་སྡང་སྐྱེད་པས་དབང་དུ་བྱས་པའི་འགལ་བའི་རྒྱུད་ལ། གནས་སྐབས་གཞན་ཚོལ་པས་འདོད་ཆགས་འབྱུང་བར་ཇི་ལྟར་འགྱུར་སྙམ་ན། ཞེ་སྡང་ནི་སྡུག་བསྔལ་གྱི་རྒྱུ་ཅན་ཡིན་ཏེ། སྐྱེད་བྱེད་ཅན་ཡིན་ཏེ། དེ་ཡིན་པའི་ཕྱིར་རོ། །དེ་ནི་ཞེ་སྡང་ངོ༌། །དེ་ཙམ་དུ་སྟེ། སྡུག་བསྔལ་བསྒོམ་པ་ཙམ་དུ་གནས་ཏེ། རྣམ་པར་གནས་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་ལོག་ན་ནི་འགལ་བ་མེད་པའི་ཕྱིར་འདོད་ཆགས་འབྱུང་བ་ཁོ་ནའི་ཞེས་བྱ་བའི་དོན་ཏོ། །དེ་ནི་ཞེས་བྱ་བ་ནི་གང་ཕྱིར་གྱི་དོན་ཏོ། །དོན་དམ་པ་ནི་འཆད་པར་འགྱུར་བའོ། །ཞེ་སྡང་སྡུག་བསྔལ་རྒྱུ་ཅན་ཕྱིར། །ཞེས་བྱ་བ་བཤད་པའི་ཕྱིར། ཕྱོགས་སྔ་མ་འགོད་པ་ནི། ཞེ་སྡང་གཏན་དུ་ཞེས་བྱ་བའོ། །སྡང་བ་ཉིད་དུ་གལ་འགྱུར་ཏེ་མི་འགྱུར་བའོ། །འདོད་ཆགས་པ་ཉིད་དོ་ཞེས་བྱ་བའི་དོན་ཏོ། །གང་གི་ཕྱིར་འདི་སྡུག་བསྔལ་དང་ཞེ་སྡང་དང་རྗེས་སུ་འབྲེལ་པའི་ཕྱིར་འདི་ནི་ཐར་པ་ཉིད་མ་ཡིན་ཏེ། དེ་ནི་སྡུག་བསྔལ་གཏན་ལྡོག་པའི་རང་བཞིན་པའི་ཕྱིར་རོ་ཞེས་བཞད་པ་ནི་སྡུད་དང་སྡང་བས་ཞེས་བྱ་བའོ། །གལ་ཏེ་ཞེས་བྱ་བ་ལ་སོགས་པ་ནི་རྣམ་འགྲེལ་འཇུག་པའོ། །ཐར་པ་ནི་སྐྱེ་བའི་རང་བཞིན་ཡིན་པའི་ཕྱིར་རོ་ཞེས་བྱ་བའི་དོན་ཏོ། །འདི་ཉིད་བརྗོད་པ་ནི་འཁོར་བ་ལས་ཡིད་མ་བྱུང་བའི་ཞེས་བྱ་སྟེ། ཐར་པའི་མཚན་ཉིད་ཀྱི་དོན་དང་ལྡན་པ་ནི་མི་སྐྱེ་བ་མ་ཡིན་ནོ་ཞེས་བྱ་བའི་དོན་ཏོ། །དེ་ལས་ཅིར་འགྱུར་སྙམ་ན། སྡུག་བསྔལ་གྱིས་གདུངས་ཞེས་བྱ་བའོ། །དེས་ན་ཁྱེད་ཀྱིས་རྣལ་འབྱོར་པ་ཡང་སྡུག་བསྔལ་གྱིས་ཟིལ་གྱིས་ནོན་པ་ཉིད་དོ་ཞེས་བྱ་བའི་དོན་ཏོ། །ཡང་ན་གལ་ཏེ་སྡུག་བསྔལ་ལ་ཆགས་པ་འདོད་ཆགས་དང་བྲལ་བ་མ་ཡིན་ལ་དེའི་སྒྲུབ་པར་བྱེད་པ་ཡང་མ་ཡིན་ན། དེ་ཅི་ཡིན་སྙམ་ན། བླང་དང་ཞེས་བྱ་བའོ། །བདག་མེད་པར་མཐོང་བས་དེ་ལ་ཕན་འདོགས་པ་མེད་པའི་ཕྱིར་ནི་ལེན་པ་མེད་ལ། གནོད་པར་བྱེད་པ་མེད་པས་ན་འདོར་བ་མེད་པ་ནི་སྙམ་སྙོམ་ཅན་འདོད་ཆགས་དང་བྲལ་བ་ཡིན་ནོ། །གལ་ཏེ་གནས་སྐབས་འདི་གོམས་པས་དེའི་བདག་ཏུ་གྱུར་པ་ཐར་པར་འདོད་པ་མ་ཡིན་ནམ། འདིས་ཕན་འདོགས་པར་མ་མཐོང་ན་གོམས་པར་ཇི་ལྟར་བྱེད་ཅེ་ན། ཅི་ལྟར་གོམས་པར་མི་བྱེད།
ཕན་གདགས་པར་བྱ་བ་དང་ཕན་འདོགས་པ་ཉིད་དུ་ལྷག་པར་ཞེན་པ་གོམས་པར་མི་བྱེད་པ་ཇི་ལྟར་ཡིན། འོན་ཏེ་དེར་ལྷག་པར་ཞེན་པ་མེད་ན། དེ་ལྟ་ན་ཡང་ཅི་ལྟར་གོམས་པ་མེད་པར་འགྱུར་ཏེ། གོམས་བ་མེད་པར་དེ་ལྟར་ལྷག་པར་ཞེན་པ་དང་འབྲལ་བར་མ་འགྱུར་བའི་ཕྱིར་རོ། །དེས་ན་འདི་ནི་གྱི་ནའོ། །དེ་སྐད་དུ་ཡང༌། བདེ་བར་གྱུར་པའམ། སྡུག་བསྔལ་བར་མ་གྱུར་ཞེས་སྲེད་པ་ལས། ངའོ་སྙམ་པའི་བློ་གང་དེ། །སེམས་ཅན་ལ་ལྟ་ལྷན་ཅིག་སྐྱེས། །ཞེས་བཤད་ཟིན་ཏོ། །དེ་ལྟར་མཐོང་བ་ནི་མི་ལྡོག་ལ། མ་མཐོང་བ་ནི་ཐར་པ་ལ་གནས་པ་ཁོ་ནའོ། །ཆོས་ཙམ་ནི་བདག་མེད་པའོ། །མཉམ་པ་ཉིད་ནི་བདག་དང་གཞན་ནམ། བླང་བྱ་དང་དོར་བྱའོ། །གལ་ཏེ་སྡུག་བསྔལ་བསྒོམས་པས་ཞེ་སྡང་བར་འགྱུར་གྱི། འདོད་ཆགས་དང་བྲལ་བར་མི་འགྱུར་ན། འོ་ན་མདོ་ལས་སྡུག་བསྔལ་གྱི་སྡུག་བསྔལ་གྱི་སྡུག་བསྔལ་ཉིད་དང་འདུ་བྱེད་ཀྱི་སྡུག་བསྔལ་ཉིད་ཅེས་བྱ་བ་ལ་སོགས་པར་བསྒོམ་པར་ཅི་ལྟར་འགྱུར་ཞེ་ན། འདུ་བྱེད་སྡུག་བསྔལ་ལ་ཞེས་གསུངས་སོ། །སྡུག་བསྔལ་དང་རྣམ་པར་འགྱུར་བའི་སྡུག་བསྔལ་པ་སྒོམ་པར་གསུངས་བ་གང་ཡིན་པ་དེ་ནི་འདུ་བྱེད་ཀྱི་སྡུག་བསྔལ་ཉིད་ལ་དགོངས་ནས་གསུངས་པ་ཡིན་གྱི། དགོངས་པ་གཞན་གྱིས་ནི་མ་ཡིན་ནོ། །འོ་ན་དེ་ཉིད་ཞེ་སྡང་གི་རྒྱུ་ཡིན་སྙམ་ན། ངེད་ཀྱི་འདུ་བྱེད་ཀྱི་སྡུག་བསྔལ་ཉིད་དེ་ཡང་རྐྱེན་ལས་སྐྱེས་ཏེ། རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ཡིན་ལ། རྐྱེན་ལས་སྐྱེས་པ་དེ་ཡང་བདག་མེད་པའི་ལྟ་བའི་རྟེན་དེ་དམིགས་པ་ཡིན་ནོ། །འདུ་བྱེད་ཀྱི་སྡུག་བསྔལ་དང་རྟེན་ཅིང་འབྲེལ་པར་འབྱུང་བ་དང༌། བདག་མེད་པ་ཞེས་བྱ་བ་འདི་ནི་གཉིས་སུ་བྱར་མེད་དོ། །འདུ་བྱེད་ཀྱི་སྡུག་བསྔལ་ཉིད་མཐོང་བ་ནི་སྔར་ཡིན་ལ། དེའི་རྗེས་ལ་བདག་མེད་འབྱུང་བ་ནི། བྱང་གྲོལ་སྒྲུབ་པར་བྱེད་པ་ཡིན་ནོ་ཞེས་བརྗོད་པ་ནི། སྟོང་ཉིད་ལྟ་བས་ཞེས་བྱ་བའོ། །བདག་མེད་པར་ལྟ་བ་ཉིད་ཐར་པའི་ནང་གི་ཡན་ལག་ཡིན་ཏེ། ཞེན་པའི་གཉེན་པོ་ཡིན་པའི་ཕྱིར་རོ། །འདུ་བྱེད་ཀྱི་སྡུག་བསྔལ་ཉིད་ལ་སོགས་པར་མཐོང་བ་ནི་དེ་ཉིད་ཀྱིས། །སྐྱེད་བྱེད་སྐྱེད་བྱེད་ཡིན་པའི་ཕྱིར་ན་རྟེན་ཡིན་ནོ་ཞེས་བརྗོད་པ་ནི། བསྒོམ་བ་ལྷག་མ་
ཞེས་བྱ་བའོ། །འདུ་བྱེད་ཀྱི་སྡུག་བསྔལ་ཉིད་ཀྱིས་སྡུག་བསྔལ་བ་ཞེས་བྱ་བ་འདི་ལ། ཤེས་པར་བྱེད་པ་བརྗོད་པ་ནི། དེ་ཕྱིར་ཞེས་བྱ་བའོ། །བདག་མེད་པར་ཐར་པའི་ནང་གི་ཡན་ལག་ཡིན་ནོ་ཞེས་བྱ་བ་འདི་ལ་བརྗོད་པ་ནི་སྡུག་བསྔལ་ལས་ནི་ཞེས་བྱ་བའོ། །བསྟན་པ་ནི་བདག་མེད་པའི་མཐར་ཐུག་པ་ཡིན་པའི་ཕྱིར་དེ་ཉིད་ནང་གི་ཡན་ལག་ཡིན་ནོ་ཞེས་བྱ་བའི་དོན་ཏོ། །སྡུག་བསྔལ་གྱི་སྡུག་བསྔལ་ཞེས་བྱ་བ་ནི་འཆད་པའོ། །ཙམ་གྱི་སྒྲ་ནི་འདུ་བྱེད་ཀྱི་སྡུག་བསྔལ་བཅད་པའི་ཕྱིར་ཏེ། འགྱུར་བའི་སྡུག་བསྔལ་ནི་མ་ཡིན་ནོ། །འོ་ན་བཅོམ་ལྡན་འདས་ཀྱིས་འདི་ཅི་ལྟར་བསྟན་སྙམ་ན། འདོད་ཆགས་ཅན་རྣམས་ནི་ཞེས་གསུངས་སོ། །དེ་བསྒོམས་པས་ཀྱང་ཐར་པར་ཅི་ལྟར་མི་འགྱུར་ལ། སྟོང་པ་ཉིད་བསྒོམས་པས་ཐར་པར་འགྱུར་བ་ཡང་ཅི་ལྟར་སྙམ་ན། འདུ་བྱེད་ཀྱི་ཞེས་གསུངས་སོ། །འདི་ཉིད་ཀྱི་ཕྱིར་ཞེས་བྱ་བ་ནི། ཤེས་པར་བྱེད་པ་འཆད་པའོ། །འདི་ནི་ཞེས་བྱ་བ་ནི། བདག་གི་བའོ། །འདི་ནི་ང་ཡང་ཡིན་ནོ་ཞེས་བྱ་བ་ནི། བདག་ཐ་མི་དད་པར་རྟོགས་པའོ། །འདི་ནི་ངའི་བདག་གོ་ཞེས་བྱ་བ་ནི། བློ་དང་དབང་པོ་ལ་སོགས་པ་བརྟེན་པ་རྣམས་ཀྱི་རྟེན་དུ་གྱུར་པ་ཐ་དད་པའོ། །བལྟར་རུང་ངམ་ཞེས་བྱ་བ་ནི་རིགས་སམ་རུང་ངམ་ཞེས་བྱ་བའི་དོན་ཏོ། །བདག་མེད་པ་མཐོང་བ་མེད་ན་ནི་མི་རྟག་པ་ཉིད་དོ། །སྡུག་བསྔལ་བ་ཉིད་དོ་ཞེས་མཐོང་ཡང་ཐར་པ་མ་ཡིན་ནོ་ཞེས་ལྡོག་པས་ནུས་པར་བརྗོད་པ་ནི་བདག་ཏུ་ལྟ་བ་གང་ཡིན་པ་དེས་ཞེས་བྱ་བའོ། །ཅི་ལྟར་དེ་མི་འགྲེལ་སྙམ་ན། ཆགས་བྲལ་མིན་དང་ཞེས་གསུངས་ཏེ། འབྲས་བུ་ལ་རྒྱུས་བརྗོད་པའི་ཕྱིར་ཆགས་བྲལ་མིན་ནི་བདག་ལྟ་ཅན་ནོ། །སྲེད་ལྡན་མིན་ནི་བདག་དང་བདག་གི་བ་ལ་ཞེན་པ་དང་ལྡན་པ་སྟེ། སྤང་བ་དང་བླང་བའི་དོན་དུ་རྩོམ་པ་ལ་བརྟེན་པའོ། །འཁོར་བ་པ་ཞེས་བྱ་བ་ནི། ཐར་པ་མ་ཡིན་པ་ཉིད་དོ། །གལ་ཏེ་འདི་ཐམས་ཅད་སྐྱེས་བུ་ཉིད་དོ་ཞེས་ལྟ་བ་ལ་བདག་གི་བ་མེད་པ་དེ་ལ་ཞེན་པ་རྩོམ་པ་ཡང་མེད་པ་མ་ཡིན་ནམ། དེས་ན་བདག་ཏུ་ལྟ་བ་ཅི་སྟེ་མི་འགྲོལ་སྙམ་དུ་དོགས་པ་བསུ་བ་ནི། ཇི་སྟེ་ཡང་ཞེས་བྱ་བའོ། །གལ་ཏེ་ཟ་བ་པོ་མེད་མོད། དེས་ཅིར་འགྱུར་སྙམ་ན། བྱ་དང་ཞེས་
གསུངས་སོ། །བྱ་བའི་རང་བཞིན་དང་བྲལ་བ་ཡོད་པ་ཙམ་ནི་བདག་གི་རང་བཞིན་མ་ཡིན་ཏེ། ནམ་མཁའ་བཞིན་ནོ་ཞེས་བྱ་བའི་དོན་ཏོ། བདག་གི་བ་ཞེས་བྱ་བ་ནི་འཆད་བའོ། །བདེ་བ་དང་སྔོན་པོ་ལ་སོགས་པ་མཐོང་བ་བཞིན་དུའོ། །ཐམས་ཅད་ཅེས་བྱ་བ་ནི་དོགས་པ་བསུ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །འདི་ག་ལས་ངེས་སྙམ་ན། མ་རིག་པ་ནི་ཞེས་སྨྲས་སོ། །དེས་ན་ཞེས་བྱ་བ་ནི་ཐ་དད་པ་མེད་པས་ནའོ། །བྱ་བ་དང་ལོངས་སྤྱོད་པ་མེད་ན་ཡང་བདག་མེད་པ་ཉིད་དེ། དེའི་བདག་ཉིད་ཅན་ཡིན་ནོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །འདི་ཡང་ཞེས་བྱ་བ་ནི། བྱ་བ་དང་ལོངས་སྤྱོད་པའི་བདག་ཉིད་ཅན་ནོ། །བདག་ཡོད་པ་ལ་མྱོང་བ་ཙམ་ཚད་མ་ཡིན་པར་དོགས་པ་བསུ་བ་ནི། དེ་ནི་རིག་པས་ཞེས་བྱ་བའོ། །རིག་པ་གཞན་ཡིན་ལ་རིག་བྱ་ནི་བདག་ཡིན་ནོ་ཞེས་ཁས་བླངས་པ་ན། གཟུང་བར་བྱ་བ་ཐམས་ཅད་ཀྱང་རིག་པར་ཐལ་ཏེ། ཁྱད་པར་མེད་པའི་ཕྱིར་རོ་ཞེས་ལན་བཏབ་པ་ནི། ཐམས་ཅད་རིག་པར་ཐལ་ལོ་ཞེས་བྱ་བ་སྟེ། དེས་ན་དོན་དམ་པ་ཉིད་དུ་འགྱུར་རོ་ཞེས་དོགས་པའོ། །གཟུང་བར་བྱ་བ་རིག་པར་བྱས་ཀྱང༌། དོན་དམ་པ་མ་ཡིན་པར་དོགས་པ་ནི། རྨི་ལམ་ལ་སོགས་པ་ལྟར་ཞེས་བྱ་བའོ། །རིག་བཞིན་བ་ཉིད་མེད་པ་ཡིན་ན། ཁྱད་པར་མེད་པའི་ཕྱིར་ན་བདག་ཀྱང་འགྱུར་རོ་ཞེས་གྲུབ་པའི་མཐའ་བརྗོད་པ་ནི། བདག་ཀྱང་ཞེས་བྱ་བའོ། །གཟུང་བ་མེད་ལ་འཛིན་པ་ཡང་མེད་དོ་ཞེས་ཁས་བླངས་པ་ཡིན་ཡང་མངོན་སུམ་ད་ལྟ་བའི་ཕྱིར། སྣང་བ་ནི་བསལ་བར་མི་སྲིད་དོ། །དེས་ན་སྣང་གཉིས་མེད་པ་ནི། དངོས་པོ་མེད་པ་མ་ཡིན་ནོ་ཞེས་བརྗོད་པ་ནི། དེ་སྟེ་གཉིས་མེད་པ་ཡིན་པ་དེའི་ཚེ་སྣ་ཚོགས་གཉིས་མེད་ཡིན་པའི་ཕྱིར་ཞེས་གསུངས་སོ། །སྣང་བ་ཙམ་ནི་རྟག་པ་ཉིད་ཀྱིས་བདག་གཉིས་སུ་མེད་པ་མ་ཡིན་ཏེ། ཉེ་བར་གནས་པ་ཙམ་རིག་པས་ན་རྟག་པ་ཉིད་དུ་མི་འཐད་པའི་ཕྱིར་རོ་ཞེས་བརྗོད་པ་ནི། བདག་ཅེས་བྱ་བའོ། །མངོན་སུམ་གྱིས་ཞེས་བྱ་བ་ནི། རང་རིག་པས་སོ། །མངོན་སུམ་གྱིས་མ་བཟུང་བ་ཉིད་སྟོན་པ་ནི། སྔ་མ་དང་ཕྱི་མའི་མངོན་སུམ་དག་རེ་རེས་ནི། རྟག་པ་ཉིད་རྟོག་
པ་མ་ཡིན་ནོ་ཞེས་འབྲེལ་ཏོ། །འོ་ན་གཉི་གས་དེ་རྟོགས་སོ་སྙམ་ན། ཅིག་ཅར་མེད་པའི་ཕྱིར་རོ་ཞེས་གསུངས་སོ། །དེ་ཉིད་འདི་ཡིན་ནོ་ཞེས་འབྲེལ་པ་ཡང་དེ་རྟོགས་པ་མ་ཡིན་ནོ་ཞེས་བརྗོད་པ་ནི། འབྲེལ་པ་ཡང་ཞེས་བྱ་བ་ཡིན་ནོ། །ཅིའི་ཕྱིར་ཞེ་ན། དྲན་པ་ཞེས་བྱ་བའོ། །མངོན་སུམ་མེད་ན་ནི་དེ་བསྒྲུབ་པའི་རྗེས་སུ་དཔག་པ་ཡང་མེད་དོ་ཞེས་བརྗོད་པ་ནི། མངོན་སུམ་མེད་ན་ཞེས་བྱ་བའོ། །དེས་ན་ཞེས་བྱ་བ་ནི། དོན་དམ་པར་བདག་མེད་པས་ནའོ། །མངོན་པར་འདོད་པའི་དོན་ནི་ཐར་པའོ། །གལ་ཏེ་བདག་མེད་ན་འཇིག་རྟེན་གྱི་ངའོ། །ངའིའོ་ཞེས་བྱ་བའི་རྟོགས་པ་གནོད་པ་མེད་པ་ཅི་ལྟར་ཞེ་ན། དེ་ཕྱིར་ཞེས་གསུངས་ཏེ། གང་གི་ཕྱིར་བདག་ཏུ་ལྟ་བ་ཅན་མི་འགྲོལ་བ་དེའི་ཕྱིར་རོ། །ཐོག་མ་མེད་པའི་རྒྱུན་ཏེ་རྒྱུན་ཆགས་པ་གང་ལ་ཡོད་པ་དེ་ནི་ཐོག་མ་མེད་པའི་རྒྱུ་ཅན་ནོ། །དེ་དང་རིགས་མཐུན་པ་དེ་དག་གི་ས་བོན་སེམས་ཅན་དུ་ལྟ་བ་གང་ལ་ཡོད་པ་དེ་ལ་དེ་སྐད་ཅེས་བརྗོད་དོ། །འདིས་ནི་བདག་མེད་ཀྱང་ཁྱད་པར་ཅན་གྱི་བག་ཆགས་རྩ་བ་ཡིན་པའི་ཕྱིར་འབྱུང་བར་བརྗོད་དོ། །བདག་མེད་པ་བསྒོམས་པ་ན་ཡང་བག་ཆགས་གཞན་འབྲེལ་པས་ན་དེའི་བག་ཆགས་འགགས་པའི་ཕྱིར། ངར་འཛིན་པ་འགག་པ་ཡིན་ནོ་ཞེས་བརྗོད་པ། སེམས་ཅན་ལྟ་བ་དག་ཅེས་བྱ་བའོ། །བདག་ཏུ་སྨྲ་བ་རྣམས་ཀྱི་ཐར་པ་ནི་ཡིད་ཆེས་པར་བྱས་པས་ལུང་ནི་གྲུབ་པ་ཡིན་ནོ་སྙམ་དུ་དོགས་པ་ནི། གལ་ཏེ་ཞེས་བྱ་བའོ། །དབང་བསྐུར་བ་ལ་སོགས་པའི་ཆོ་ག་ནི། དབྱུག་པ་གསུམ་ལ་སོགས་པ་འཛིན་པ་ལ་སོགས་པ་ཞི་བ་པའི་འདུ་བྱེད་ལ་སོགས་པའོ། །རྗེས་སུ་དཔག་པས་ཞེས་བྱ་བ་ནི་ཉེ་བར་མཚོན་པ་ཙམ་སྟེ། མངོན་སུམ་གྱིས་ཀྱང་ངོ༌། །སྐྱེས་བུས་མ་བྱས་པ་ལ་ཡང་རྒྱུའི་ཉེས་པ་མེད་པ་ཉིད་ལས་མི་འཁྲུལ་བ་ཅན་དུ་གྲུབ་པོ་ཞེས་བརྗོད་པ་ནི། སྐྱེས་བུས་མ་བྱས་པའི་ཞེས་བྱ་བའོ། །སྐྱེས་བུས་མ་བྱས་པའི་ཚིག་ལ་ཡང༌། རྗེས་སུ་དཔག་པས་གནོད་པ་མ་ཡིན་ཞེས་འབྲེལ་ཏོ། །ལུང་ནི་དེ་ལྟ་བུའི་དངོས་ཡིན་པ་ནི་དོན་ལ་མི་འཁྲུལ་པ་ཡིན་པའོ། །དེའི་རྒྱུ་མཚན་ནི་མངོན་སུམ་ལ་རང་གི་ངོ་བོ་སྣང་བའམ། རྗེས་སུ་དཔག་པར་དེ་དང་འབྲེལ་པ་
ཅན་ནོ། །འདི་ནི་དེ་གཉི་ག་ཡང་ཡོད་བ་མ་ཡིན་ནོ། །རབ་རིབ་ཀྱི་ཤེས་བ་ནི་སྐྱེས་བུས་མ་བྱས་ཀྱང་ཚད་མ་མ་ཡིན་ནོ། །གནོད་པར་བྱེད་བ་རྙེད་པ་ཡང་མི་སྲིད་དེ། མི་རུང་བའི་ཕྱིར་རོ། ཡིད་ཆེས་པས་བཤད་པ་ཡང་མ་ཡིན་ཏེ། སྔགས་དང་ཚེའི་རིག་བྱེད་སྨྲ་བ་པོས་བྱས་པ་ཉིད་ལ་ཚད་མ་མེད་པའི་ཕྱིར་རོ། །གཞན་དེ་དང་འདྲ་བས་གང་བྱས་པ་ཡིན་ནོ་ཞེས་བྱ་བ་ལ་ཡང་ཚད་མ་ཡོད་པ་མ་ཡིན་ནོ། །ཚད་མ་མ་ཡིན་པའི་རྒྱུ་མཚན་ནི། དོན་དང་འབྲེལ་པ་ཉིད་ཡིན་ནོ་སྙམ་དུ་དོགས་བའོ། །ཅི་ལྟར་མི་རྟོགས་སྙམ་ན། དེ་ནི་ལུང་ཐམས་ཅད་ལ་ཞེས་བྱ་བའོ། །འོ་ན་ནི་ཐམས་ཅད་ཀྱང་ཚད་མ་མ་ཡིན་ནོ་སྙམ་ན། ལུང་ཐམས་ཅད་ནི་ཞེས་གསུངས་སོ། །འདི་ག་ལས་སྙམ་ན། དེའི་དོན་རྗེས་སུ་སྒྲུབ་པ་ཡང་ཞེས་གསུངས་སོ། །གལ་ཏེ་བདག་མེད་པར་མཐོང་བ་ལ་སོགས་པ་འདོད་ཆགས་ལ་སོགས་པ་དང་འགལ་བཞིན་དུ། དབང་བསྐུར་བ་ལ་སོགས་པའི་ཆོ་ག་ཡང་སྐྱེས་བུ་དང་འགལ་བར་ས་བོན་ལ་སོགས་པ་དག་ལ་མཐོང་བ་ཉིད་མ་ཡིན་ནམ་སྙམ་དུ་དོགས་པ་བསུ་ནས། ས་བོན་ལ་སོགས་པ་ལ་གྲུབ་པའི་ཆོ་ག་མི་སྐྱེད་བ་ཉིད་ཀྱི་ཆོས་ཅན་ནི། ནུས་མིན་ཏེ་མཐུ་ཡོད་པ་མ་ཡིན་པའོ།། ཅི་ལ་ཞེ་ན། སྐྱེས་བུ་མི་སྐྱེད་པར་རོ། །ཏིལ་མར་གྱིས་བསྐུས་པ་ལ་སོགས་པ་ཐར་པའི་སྒྲུབ་པར་བྱེད་པ་མ་ཡིན་པར་འདོད་པ་རྣམས་ཀྱང༌། ས་བོན་ལ་སོགས་པ་ལ་མི་སྐྱེད་པའི་ཆོས་ཅན་ཉིད་དུ་མཐོང་བའི་ཕྱིར་རོ། །ཅི་སྟེ་ཞེས་བྱ་བ་ནི་གཞན་གྱིའོ། དེ་ལྟ་མ་ཡིན་ན་ཞེས་བྱ་བ་ནི་ལན་ནོ། །དབང་བསྐུར་བ་དེ་ཙམ་ཉིད་ལ་ནུས་པ་ཡིན་ནོ་ཞེས་བརྗོད་པར་ནུས་པ་ཁོ་ནའོ། །འོ་ན་ཏེ་ཏིལ་མར་གྱིས་བསྐུས་པ་ལ་སོགས་པ་བྱུང་ན་སྐྱེ་བ་དང་འགལ་བ་དག་ཀྱང༌། སྐྱེ་བ་དང་འགལ་བ་མེད་པའི་ཕྱིར། དེ་དང་འདྲ་བ་དབང་བསྐུར་བ་ལ་སོགས་པའི་ཆོ་ག་ཡང་སྐྱེ་བ་དང་འགལ་བ་མ་ཡིན་མོད། །ལས་དང་འགལ་བར་མི་འགྱུར་བ་ཁོ་ན་སྟེ། དབང་བསྐུར་བ་དབང་ཕྱུག་དམ་པ་འདི་ནི་ཆོས་དང་ཆོས་མ་ཡིན་པ་ཟད་པར་བྱེད་པ་ཡིན་ནོ། །འདི་ལྟར་སྐྱེས་བུ་ལྕི་མོ་དབང་བསྐུར་མ་ཐག་ཏུ་ཡང་བར་འགྱུར་བ་ཡིན་ནོ་སྙམ་དུ་དོགས་པ་བསུ་ནས། དེ་བཞིན་
དུ་ཞེས་གསུངས་སོ། །སྔར་ལྕི་བ་ལས་དབང་བསྐུར་བའི་ཕྱིས་ཡང་བ་མ་ཡིན་ཏེ། དེའི་ཕྱིར་ཡང་སྡིག་བཅོམ་བར་བྱས་པ་ནི་མ་ཡིན་ནོ། །ཅིའི་ཕྱིར་སྙམ་ན། གང་གི་ཕྱིར་དེ་ཡོད་ན། དེ་མེད་པའི་ལས་འགལ་བར་རྟོགས་པའི་ཕྱིར། འདིའི་ལྕི་བ་ཉིད་དབང་བསྐུར་བས་བཅོམ་པས་མེད་མོད། །སྡིག་པ་ནི་མ་ཡིན་ནོ། །འདོད་ཆགས་ལ་སོགས་པའི་སྡིག་པ་ཡིས། དེའི་འདུ་བྱེད་ནི་ལྕི་བ་མ་ཡིན་ཏེ། ལུས་ཅན་མ་ཡིན་པའི་ཕྱིར་རོ། །དེ་ཙམ་གྱིས་ཞེས་བྱ་བ་ནི། ལྕི་བ་ཙམ་གྱིས་སོ། །དབང་བསྐུར་བ་ན་ཡང་སྐྱེད་པར་བྱེད་ལ། དེ་ཡང་ལྕི་བ་སྤངས་པའི་ཕྱིར་དེ་དག་འགལ་བ་ཡིན་གྱི། སྡིག་པ་དང་ནི་མ་ཡིན་ནོ་ཞེས་གསུངས་པ་ནི། ལྕི་བ་དང་འགལ་བའི་ཞེས་བྱ་བའོ། །སྡིག་པ་ལྕི་བའི་རྒྱུའམ་ཁྱབ་བྱ་ཡིན་ན། ཡང་བ་འབྲས་བུ་དང་འགལ་བའམ། ཁྱབ་བྱེད་དང་འགལ་བ་ཡིན་ནོ་ཞེས་དོགས་པ་བསུ་བ་ནི། དེ་ནི་ཞེས་བྱ་བའོ། །དེ་ག་ལས་ཞེས་བྱ་བ་ནི་ལན་ནོ། །འདི་ལ་སྒྲུབ་པར་བྱེད་པའི་ཚད་མ་ཅི་ཡང་མེད་དོ་ཞེས་བྱ་བའི་དོན་ཏོ། །ལུང་ཡང་ཚད་མ་མ་ཡིན་པ་དེས་ན་དེ་ནི་སྒྲུབ་པར་བྱེད་པ་མ་ཡིན་ནོ། །འགལ་བར་ཁས་བླངས་ནས་བརྗོད་པ་ནི་གཞན་ཡང་ཞེས་བྱ་བའོ། །སྡིག་པ་གང་གིས་ལྕི་བར་འགྱུར་བ་དེ་ཙམ་གྱི་སྡིག་པ་དབང་བསྐུར་བའི་ཆོ་གས་བཤིག་མོད། དེ་ལྟ་ན་ཡང༌། དེ་ལས་གཞན་པའི་སྡིག་པ་མ་བཟློག་པའི་ཕྱིར་ཅི་ལྟར་ཐར། འོན་ཏེ་དེ་ལས་གཞན་བཟློག་པ་ལ་དབང་བསྐུར་གྱི་ཆོ་ག་ནུས་པ་ཡོད་པ་ཡིན་ནོ་སྙམ་དུ་དོགས་པ་བསུ་ནས་བཤད་པ། ལྕི་བ་ནི་རྒྱུའི་སྡིག་པ་དེ་བཟློག་པ་ལ་མཐུ་ཡོད་པའི་ཕྱིར། གཞན་དུ་ཡང་བཟློག་པར་ནུས་སོ་ཞེས་བྱ་བའི་དོན་འདི་བརྟགས་པ་མིན་ཏེ། རྟོག་པར་བྱེད་པའི་ཚད་མ་ཡོད་བ་མ་ཡིན་ནོ་ཞེས་བྱ་བའི་དོན་ཏོ། །ལྕི་བ་ནི་སྡིག་པའི་འབྲས་བུ་ཡང་མ་ཡིན་ཏེ། མངོན་སུམ་དང་མི་དམིགས་པ་དག་མེད་པའི་ཕྱིར་རོ་ཞེས་དོགས་པའོ། །འོན་ཏེ་ལྷ་མཐོང་བ་ལས་ཐམས་ཅད་ཟད་པར་རྟོགས་སོ་ཞེ་ན། ལྷ་ལ་སོགས་པ་མཐོང་བ་ནི་ཞེས་གསུངས་སོ། །གལ་ཏེ་མྱུ་གུ་མི་སྐྱེད་པའི་ཆོས་ཅན་དབང་བསྐུར་བ་ལ་སོགས་པའི་ཆོ་གས་སྐྱེ་བསད་མི་
འགལ་ན་འོ་ན་གང་དང་འགལ་ཞེས་བྱ་བ་ལ་སོགས་པས་བསུ་ནས། རྒྱུ་དང་འགལ་བས་འགལ་བ་ཡིན་ནོ་ཞེས་གསུངས་པ་ནི། དེ་ཡང་ཞེས་བྱ་བའོ། །ལོག་ཤེས་ནི་ཞེན་པའི་སྙིང་པོ་ཅན་བདག་ལ་སོགས་པར་འཛིན་པའོ། །དེ་ལས་བྱུང་བའི་ཞེན་པ་ནི་སྲེད་པའོ། །དེ་ཉིད་སེམས་པ་ཡིན་ཏེ། དེའི་དབང་ངམ་དེའི་མཐུས་སོ། །མ་ལ་སོགས་པར་ཕྱིན་པའི་རང་བཞིན་དམན་པའི་གནས་སུ་འགྲོ་བ་ནི་སྐྱེ་བ་ཡིན་ནོ། །འགལ་བ་བདག་མེད་པར་ལྟ་བ་དེས་རྒྱུ་ལོག་པའི་ཤེས་པ་དེ་བཅད་པར་གྱུར་ན་ནི་སྐྱེ་བར་མི་འགྱུར་རོ། །དབང་བསྐུར་ལ་གོམས་པའི་ཆོ་ག་ནི་དེ་དང་འགལ་བ་མ་ཡིན་ན་སྙམ་དུ་དགོངས་པའོ། །གལ་ཏེ་དབང་བསྐུར་བ་ལ་སོགས་པ་དང་བྲལ་བའི་འབྱུང་བ་ཆེན་པོ་སྐྱེ་བའི་རྒྱུ་ནི་དབང་བསྐུར་བ་ལ་སོགས་པའི་ཆོ་གས་ཟློག་པར་བྱེད་པ་ཡིན་ནོ་སྙམ་དུ་དོགས་པ་བསུ་ནས་བཤད་པ་ནི། འདི་ལྟར་ཞེས་བྱ་བའོ། །དེ་དག་ཉིད་ནི་ལོག་པའི་ཤེས་པ་དང༌། སྲེད་པ་སེམས་པ་དག་ཉིད་དེ། སྐྱེ་བ་ལ་ནུས་པ་ཡིན་ནོ། །འདི་ལྟར་བདག་ཏུ་མངོན་པར་ཞེན་ནས་ཆགས་པའམ། སྡང་བ་ལ་རྩོམ་པར་བྱེད་ལ། དམན་པའི་ཡུལ་དུ་མ་ཕྱིན་པར་བྱེད་ཀྱི། དབང་བསྐུར་བ་ལ་སོགས་པ་ལས་བཟློག་པས་ནི་མ་ཡིན་ནོ། །དབང་བསྐུར་བ་དང་ནི་ལོག་པའི་ཤེས་པ་ཡང་འགལ་བ་མ་ཡིན་ནོ། །འོན་ཏེ་སེམས་པ་དེ་དག་ཉིད་ནི་སྐྱེ་བའི་རྒྱུ་ཡིན་ནོ་ཞེས་མི་རིགས་ཏེ། ལས་ཀྱང་རྒྱུ་ཡིན་པའི་ཕྱིར་རོ། །ལས་ལས་འཇིག་རྟེན་སྣ་ཚོགས་སྐྱེས། །ཞེས་བྱ་བ་ཡིན་ནོ་ཞེས་དོགས་པ་བསུ་ནས། སེམས་པ་དེ་དག་ཉིད་ཅེས་གསུངས་སོ། །ཉམས་པ་མེད་པ་ནི་མ་ཚང་བ་མེད་པའོ། མ་རིག་པ་དང་སྲེད་པ་དང་ལས་འདི་གསུམ་ནི། གཉིས་ཙམ་ཡིན་པའི་ཕྱིར་རོ། །དབང་པོའི་གནས་སུ་ཕྱིན་པ་ལ་སྲིད་པའི་ནུས་པ་སྟོན་བ་ནི། ཡུལ་ལ་སོགས་པར་ཞེས་བྱ་བའོ། །གལ་ཏེ་སྐྱེ་བ་སྔར་བྱས་པའི་སྦྱིན་པ་ལ་སོགས་པ་ཡང་ལས་ཉིད་མ་ཡིན་ནམ་སྙམ་པའི་དོགས་པ་ཞེ་ལ་བཞག་ནས། དེ་ཡང་བདག་གི་འདུ་བྱེད་པ་འདི་གཉིས་ཁོ་ནའི་རྒྱུ་ཡིན་གྱི། དངོས་སུ་སྐྱེ་བའི་རྒྱུ་མ་
ཡིན་ནོ་ཞེས་བརྗོད་པ་ནི། སྐྱེ་བ་གཞན་འབྱུང་བྱེད་པའི་ངང་ཚུལ་ཅན་ཡིན་པའི་ཕྱིར་སྐྱེ་བ་གཞན་འབྱུང་བའོ། །འདིས་སུ་བྱེད་པའི་ཕྱིར་ན། ལས་ནི་དངོས་སུ་ཞེས་བྱ་བའོ། །འོ་ན་སྔ་མ་ཇི་ལྟར་ལས་ཡིན་སྙམ་ན། སྔ་མ་དག་ནི་ཞེས་གསུངས་ཏེ། སྦྱིན་པ་ལ་སོགས་པའོ། །འོ་ན་རྣམ་པ་དེ་ལྟ་བུའི་སྐྱེ་བའི་རྒྱུ་དབང་བསྐུར་བས། འདི་གཉིས་ཉིད་བཅོམ་པའི་ཕྱིར་ན་སྐྱེ་བ་མི་འབྱུང་ངོ་སྙམ་དུ་དོགས་པ་བསུ་ནས། ཅི་སྟེ་ཡང་ཞེས་བྱ་བའི་རྩོད་པ་ལ་དོན་འདི་ཡིན་ཏེ། ལོག་པའི་ཤེས་པ་དང་སྲེད་པ་སེམས་པའི་དབང་གིས་འགྲོ་བཞེས་བྱ་བ་ནི་མི་རིགས་ཏེ། འགྲོ་བ་ནི་འགྲོ་བར་བྱ་བ་རྟོགས་པ་སྔོན་དུ་འགྲོ་བ་ཅན་ཡིན་པའི་ཕྱིར་དང༌། རྟོགས་པ་ཡང་མིག་ལ་སོགས་པ་བྱེད་པའི་ཚོགས་མེད་ན་མི་འབྱུང་བ་ཡིན་པའི་ཕྱིར་རོ། །ཡང་ན་འགྲོ་བར་བྱ་བ་འགྲོ་བའི་རྟེན་ནི་བྱེད་པ་ལས་ཀྱི་དབང་པོ་ཡིན་ལ། སྒྲ་ལ་སོགས་པ་དམིགས་པ་རྟོགས་པ་ལོངས་སྤྱོད་པ་ལ་ནི་བློའི་དབང་པོ་རྟེན་ཡིན་ཏེ། དེས་ན་མེད་ན་མེད་པའི་ཕྱིར་ན་སེམས་པ་དག་ནི་རྟེན་བྱེད་པ་རྣམས་ཁོ་ན་ཡིན་ལ། བྱེད་པ་དེ་ནི་དེ་ལས་གཞན་དུ་མི་འཐད་པས་བརྟགས་པ་མཐོང་བ་ལས་འགྱུར་བ་ཡིན་ནོ། །མ་མཐོང་བ་དེ་ཉིད་སེམས་པ་ཡང་མ་ཡིན་ཏེ། ཁྱད་པར་ལ་ཚད་མ་མེད་པའི་ཕྱིར་རོ། །མ་མཐོང་བ་དེ་ཡང་དབང་བསྐུར་བ་ལ་སོགས་པའི་ཚོགས་ཞིག་པར་འགྱུར་བའི་ཕྱིར་ཐར་པ་ཡིན་ནོ། །དེ་དང་འགལ་བ་ཡང་ལུང་ལས་རབ་ཏུ་གྲུབ་པ་ཡིན་ཏེ། དེ་ཁས་མི་ལེན་ན་སེམས་པ་དེ་དག་ཉིད་མི་འགྲུབ་པོ་ཞེས་བརྗོད་པ་མ་མཐོང་འཇིག་ཕྱིར་ཞེས་བྱ་བའོ།། བསྟན་བཅོས་ཀྱི་རྗེས་སུ་འབྲངས་ནས། ཁྱད་པར་སེམས་ན་ནི། ངེད་ཀྱི་ལུགས་ཀྱི་རྗེས་སུ་འབྲངས་ཏེ། སེམས་པ་ལས་མ་ཡིན་གྱི། འོན་ཀྱང་བདག་གི་ཆོས་གཞན་ཉིད་ཡིན་ནོ་ཞེས་བརྗོད་པ་ནི། དེ་ནི་འདུ་བྱེད་སེམས་པ་མིན། །ཞེས་བྱ་སྟེ། མ་མཐོང་བ་དེ་ནི་འདུ་བྱེད་དེ། སྦྱིན་པ་ལ་སོགས་པའི་བྱ་བས་བསྐྱེད་པ་བདག་གི་ཆོས་ཏེ། དེས་ན་དེ་ལྟར་རྣམ་པ་གཞན་དུ་ཡང་རྣམ་པ་སྣ་ཚོགས་པར་འགྱུར་བས་འདི་སེམས་པའི་རང་བཞིན་དུ་མི་འགྲུབ་བོ་ཞེས་བྱ་བའི་དོན་ཏོ། །ཐ་མ་ཚིག་འདི་ཉིད་འཆད་པ་ནི། དགེ་བའི་ལས་ཞེས་བྱ་བའོ། །དེ་ཡང་ནི་དགེ་
བ་ལ་སོགས་པའོ། །འདིར་གཞན་གྱི་མ་ཡིན་ནམ་ཞེས་བྱ་བར་ཡང་མ་ཡིན་ན་ཞེས་བྱ་བས་འཕགས་པའི་ལན་བརྗོད་པ་ནི། དོན་འདི་མ་གྲུབ་པའི་ཕྱིར་རོ་ཞེས་བྱ་བ་སྟེ། དབང་བསྐུར་མ་ཐག་ཏུ་དེ་འཇིག་གོ་ཞེས་བྱ་བའི་དོན་འདིའོ། །ཡང་ན་བྱེད་པ་མ་མཐོང་བ་ལས་འགྱུར་རོ་ཞེས་བྱ་བའོ། །ཡང་ན་སེམས་པ་ལས་ཐ་དད་པའི་འདུ་བྱེད་པས་ཡིན་ནོ་ཞེས་བྱ་བའོ། །མ་མཐོང་བའི་རྟེན་བྱེད་པ་ནི་མ་ཡིན་གྱི་འོན་ཀྱང་བློ་ཉིད་དོ། །དེས་ན་དབང་བསྐུར་བ་ལ་སོགས་པའི་ཚོགས་སྐྱེ་བ་མེད་པ་མ་ཡིན་ནོ་ཞེས་གསུངས་པ་ནི། གཞན་ཡང་ཞེས་བྱ་བའོ། །བྱེད་པ་སྐྱེད་པ་ལ་ནི་ཡིད་ཀྱི་བློ་ཉིད་ནུས་པར་མཐོང་ངོ༌། །དབང་རྣམས་སོ་སོར་མནོད་ན་ཡང༌། །ཡིད་བློའི་གནོད་པ་ཡོད་པ་ཡིན། །འདི་འགྱུར་ན་ནི་དེ་དག་ཀྱང༌། །འགྱུར་བ་དག་ཏུ་མཐོང་བ་ཡིན། །ཞེས་བྱ་བའི་རིགས་པ། ཡོང་དང་མེད་པའི་རྗེས་འཇུག་ཕྱིར། །ཞེས་བྱ་བ་འདི་ལ་བརྗོད་པ་ཡིན་ནོ། །མཐོང་བ་ཡོད་ན་མ་མཐོང་བ་ཤུགས་ཀྱིས་འགྲུབ་པ་ནི་མ་ཡིན་ནོ་ཞེས་བརྗོད་བ་ནི། གཞན་གྱི་མ་ཡིན་ན་ཞེས་བྱ་བའོ། །ལུང་གི་སྟོབས་ཀྱིས་ཁྱད་པར་རྟོགས་པ་མ་ཡིན་ནོ་ཞེས་བྱ་བའི་དོན་ཏོ། །བྱེད་པ་དེ་ནི་དབང་བསྐུར་ཡང་བློ་ཡོད་པ་ལས་རྒྱུན་གྱིས་འཇུག་པར་ཡོད་པ་ཡིན་པས་ཅིས་མི་འགྲོ་སྟེ། མངལ་གྱི་གནས་སུ་འགྲོ་བ་ཁོ་ནའོ་ཞེས་བྱ་བའི་དོན་ཏོ། །འོན་ཏེ་བྱེད་པ་རྣམས་བློས་བསྐྱེད་བར་བྱ་བ་ཡིན་ནོ་ཞེས་བྱ་བ་ནི་བདེན་ཏེ། དེའི་ལྷན་ཅིག་བྱེད་པ་མ་མཐོང་པ་ནི། དབང་བསྐུར་བས་བཅོམ་པ་དེས་ན། ལྷན་ཅིག་བྱེད་པ་མ་ཚང་བའི་ཕྱིར་དེ་དག་སྐྱེ་བ་གཞན་དུ་སྐྱེད་པ་མ་ཡིན་ནོ་སྙམ་དུ་དོགས་པ་བསུ་ནས། དེ་ལྟ་ཡིན་ན་ཞེས་གསུངས་སོ། །འཛིན་པ་ནི་ཞུགས་པ་ཟློག་པའོ། །འཇུག་པ་ནི་མ་ཞུགས་པ་གཏོད་པའོ། །གཡེང་བ་ནི་རྣམ་པར་འགྱུར་བའོ། །འགོག་བ་ནི་ཞིག་པའོ། །དབང་པོ་ལ་སོགས་པ་དེ་དག་དེ་ལྟར་སེམས་པའི་དབང་གིས་མི་འགྱུར་རོ། །གང་གི་ཆ་ཞི་ན། དབང་བསྐུར་མ་ཐག་ཁོ་ནར་མ་མཐོང་བ་ལྷན་ཅིག་བྱེད་པ་བཅོམ་པས་བློ་དེ་ནུས་པ་མེད་ནའོ། །སྐྱེ་བ་གཞན་བཞིན་ནོ་ཞེས་བྱ་བའོ། །བློ་
ཉམས་པས་ནི་ཞེས་བྱ་བའོ། །ལྷན་ཅིག་བྱེད་བ་མ་མཐོང་བ་བཅོམ་པའི་ཕྱིར་རོ། །འདི་ཡང་རྒྱུ་ཡིན་པ་ལ་ནི་རྩོད་པ་མེད་པའི་ཕྱིར་རོ། །བློ་ཙམ་ལས་འབྱུང་བ་ཡིན་ན་བྱེད་པ་རྣམས་ཁྱད་པར་མེད་པར་ཐལ་བའི་ཕྱིར་རོ་ཞེས་དོགས་པའོ། །གལ་ཏེ་ས་དང་ཆུ་དང་ས་བོན་གྱི་འདུས་པ་བཞིན་དུ་ཡོངས་སུ་འགྱུར་བ་ལ་ལྟོས་པའི་དབང་བསྐུར་བ་དང༌། བློ་དང་མ་མཐོང་བའི་ཚོགས་རྣམས་ཉེ་བར་གནོད་པར་བྱས་ན་ནུས་པ་མེད་པ་ཡིན་ནོ་སྙམ་དུ་དོགས་པ་བསུ་བ་ནི། འོ་ན་ཏེ་ཤི་མ་ཐག་ཏུ་ཞེས་བྱ་བའོ། །ཡོངས་སུ་གྱུར་པ་ལྟོས་པའི་རྒྱུ་ཡང༌། ཟླ་བ་ཕྱེད་པ་དང་ཟླ་བ་དང༌། ལོ་ལ་སོགས་པ་ལ་ལྟོས་པ་ནི་མ་ཡིན་ནོ་ཞེས་ལན་འདེབས་པ་ནི། གལ་ཏེ་ཞེས་བྱ་བའོ། །མེད་ན་དེའི་ཚེ་ཤི་བའི་འོག་ཏུ་འགྱུར་རོ་ཞེས་བྱ་བ་འདི་ལ། གང་གིས་ཐར་པ་དོན་དུ་གཉེར་བ་འཇུག་པར་འགྱུར་བ་དེ་འདྲ་བའི་ཚད་མ་ཡོད་པ་མ་ཡིན་ནོ། །གལ་ཏེ་ལུས་དང༌། དབང་པོ་དང་བློ་ལ་སོགས་པ་ཆོས་མ་ཡིན་པ་བསྐྱེད་པ་དག་ནི། ཅི་སྲིད་ཡོད་པ་མ་མཐོང་བ་དེ་སྲིད་འབྱུང་བ་ཡིན་ཏེ། དེས་ན་ལུས་དང་དབང་པོ་ལ་སོགས་པ་བཞིན་དུ་བློ་ཡང་མཚམས་མི་སྦྱོར་རོ་ཞེས་དོགས་པ་བསུ་བ་ནི། ཅི་སྟེ་དེ་ཚེ་ཞེས་བྱ་བའོ། །སྔར་ནི་འབྱུང་བས་བསྐྱེད་པར་བྱ་བ་ཡིན་པས་དེ་མེད་ན་མི་འབྱུང་བར་རྟོགས་པར་བྱ་བ་ཡིན་ལ། ད་ནི་མ་མཐོང་བས་བསྐྱེད་པར་བྱ་བ་ཡིན་པས་དེ་མེད་ན་མི་འབྱུང་བ་ཡིན་ནོ་ཞེས་བྱ་བའི་ཁྱད་པར་རོ། །མི་འགྱུར་བ་ནི་བྱེད་པ་རྣམས་སོ། །དེས་ན་གྲོལ་བར་འགྱུར་རོ་སྙམ་དུ་དགོངས་པའོ། །ལན་དུ། བདག་ཏུ་འཛིན་པ་ལ་སོགས་པ་མཚམས་སྦྱོར་བའི་རྒྱུ་དྲི་མ་རྣམས་ཀྱིས་སམ། མ་མཐོང་བ་གཞན་རྣམས་ཀྱིས་བློ་མཚམས་སྦྱོར་བ་ཁོ་ནའོ། །དྲི་མ་དེ་རྣམས་སྔགས་དང་རྒྱུད་ལ་སོགས་པ་དང་དབང་བསྐུར་བས་ཉམས་པར་བྱས་པའི་ཕྱིར་ནུས་པ་མེད་པ་ཡིན་ན་ནི། གསོན་པོའི་གནས་སྐབས་ཉིད་ན་ཡང་ནུས་པ་མེད་པར་འགྱུར་རོ་ཞེས་བརྗོད་པ་ནི། དེ་རྣམས་ནུས་ཀྱིས་ནི་ཞེས་བྱ་བའོ། །བློ་མེད་པ་མ་གྲུབ་པོ་ཞེས་བརྗོད་པ་ནི། མཚམས་བརྗོད་པའི་ཞེས་བྱ་བའོ། །འོན་ཏེ་དབང་བསྐུར་བ་ཡོད་ཀྱང་དྲི་མ་རྣམས་ཀྱི་མཚམས་སྦྱོར་བར་མཐོང་ངོ་སྙམ་ན། འོ་ན་ནི་དྲི་མ་ཉིད་མ་མཐོང་
པའམ། འབྱུང་བའི་ཡོངས་སུ་འགྱུར་བ་ལས་འབྱུང་བས་འཆི་བ་ན་མེད་པར་འགྱུར་རོ་སྙམ་དུ་དོགས་པ་བསུ་ནས། གཉེན་པོ་དང་ནི་རང་གི་ཕྱོགས། །འགྲིབ་དང་འཕེལ་ན་འཕེལ་བའི་ཕྱིར། །ཞེས་གསུངས་སོ། །གཉེན་པོ་འགྲིབ་པ་ལས་དང་རང་གི་ཕྱོགས་འཕེལ་བ་ལས་ཉེས་པ་རྣམས་འཕེལ་བའི་ཕྱིར། ཉེས་རྒྱུན་རང་གི་ས་བོན་ཅན་ཡིན་ཏེ། རིགས་མཚུངས་པ་སྔོན་དུ་འགྲོ་བ་ཅན་ཡིན་གྱི་མ་མཐོང་བ་དང་འབྱུང་བ་ཆེན་པོ་ལ་སོགས་པ་སྔོན་དུ་འགྲོ་བ་ཅན་ནི་མ་ཡིན་ནོ། །གཉེན་པོ་འཕེལ་ན་ཉེས་པ་རྣམས་འགྲིབ་པའི་ཕྱིར་དང༌། རང་གི་ཕྱོགས་འཕེལ་ན་འཕེལ་བའི་ཕྱིར། རང་གི་ས་བོན་ལས་མྱུ་གུ་འབྱུང་བ་ཡིན་ནོ་ཞེས་བྱ་བ་ནི་བཤད་པ་མཛད་པ་ཡིན་ནོ། །བདག་མེད་པ་ལ་འཆིང་བ་དང་བྲལ་བའི་མཚན་ཉིད་ཀྱི་ཐར་པ་མི་འཐད་དོ་ཞེས་དོགས་པ་བསུ་བ་ནི། གལ་ཏེ་ཞེས་བྱ་བའོ། །བཅིངས་པ་དང་ཐར་པ་གཉིས་གཞན་ཉིད་དུ་ཐལ་བར་བྱས་པ་ཁས་ལེན་པ་ནི། དག་པ་གང་ཡིན་དེ་ཞེས་བྱ་བའོ། །གཞན་ནི་མ་དག་པའོ། །དཔེ་བརྗོད་པ་ནི་མེ་ཤི་བ་ནི་ཞེས་བྱ་བའོ། །ཐ་སྙད་དུ་གཅིག་ཉིད་དོ་ཞེས་བརྗོད་པ་ནི། དེ་ལྟ་ན་ཡང་ཞེས་བྱ་བ་སྟེ་དཔེ་མ་ཡིན་ཡང་ངོ༌། །འོན་ཏེ་བདག་ཏུ་སྨྲ་བ་ལ་ཡང་དཔེ་ཡོད་དོ་ཞེ་ན། འདི་ལ་ནི་ཞེས་གསུངས་སོ། །རྟག་པ་དཔེ་མེད་པ་ཉིད་འདི་ལྟར་ཞེས་བྱ་བ་ལ་སོགས་པས་གསལ་བར་བྱེད་དོ། །ཡང་ན་དབང་བསྐུར་བ་ལ་སོགས་པའི་ཆོ་གས་ཐར་པར་འགྱུར་བ་ཡང་བདག་ནི་མ་ཡིན་ཏེ། རྟག་པ་ཉིད་ཀྱིས་འཁོར་བ་ལ་སོགས་པ་འབྲས་བུའི་རིམ་པ་མི་འཐད་པའི་ཕྱིར་རོ་ཞེས་བརྗོད་པ་ནི། རྟག་པ་ལྟོས་པ་མེད་པའི་ཕྱིར། །ཞེས་བྱ་བའོ། །ལྟོས་པ་མེད་པའི་ཕྱིར་ནི་ཞེས་བྱ་བ་ནི་འབྲས་བུ་གཅིག་སྐྱེད་པའི་དུས་ཉིད་ན། འབྲས་བུ་གཞན་བསྐྱེད་པར་རུང་བ་ཡང་ཡོད་པའི་ཕྱིར་རོ། །རིམ་གྱིས་བསྐྱེད་པ་འབའ་ཞིག་འགལ་བར་ནི་མ་ཟད་དེ། བྱེད་པ་ཡང་འགལ་ལོ་ཞེས་འབྲེལ་ཏོ། །གང་གི་ཞེ་ན། འདྲ་བའི་བདག་ཉིད་དོ། །བྱེད་དང་མི་བྱེད་པ་དག་ནའོ། །མི་བྱེད་པའི་རང་བཞིན་གང་ཡིན་པ་དེ་ཉིད་ནི་བྱེད་པའི་དུས་ན་ཡང་ཡིན་ཏེ། དེས་ན་མི་བྱེད་པ་ཁོ་ནར་འཐད་དོ་ཞེས་
དོགས་པའོ། །ལོངས་སྤྱོད་པའི་དུས་ན་ཡོད་པ་ཉིད་བྱེད་པའི་དུས་ན་ཡོད་པ་ཡིན་ན། བྱེད་པ་བོའི་དུས་ཉིད་ན་ལོངས་སྤྱོད་པ་པོ་ཉིད་འགལ་བ་ཡིན་ནོ་ཞེས་བརྗོད་པ་ནི། རྒྱུ་དང་འབྲས་བུའང་ཞེས་བྱ་བའོ། །དྲན་པ་དང་ལོངས་སྤྱོད་པ་དེ་དག་བདག་དེ་ལས་ཐ་དད་ན་ཡང་དེ་དང་འབྲེལ་པ་ལས་བྱེད་པ་པོ་དང་ཟ་བ་པོ་ཉིད་ཡིན་པར་མི་འགྱུར་རོ་ཞེས་བཤད་པ་ནི། ཐ་དད་ན་སྟེ་དེའི་བདག་ཉིད་མ་ཡིན་པའི་ཕྱིར་གཞན་ཉིད་ཡིན་ན། བྱེད་བ་པོ་དང་ཟ་བ་པོར་ཡང་མི་འགྱུར་ཏེ། དེའི་རང་བཞིན་ནི་དེ་ལྟར་མ་རྟོགས་པའི་ཕྱིར་རོ། །འོན་ཏེ་དེ་དག་བྱེད་པའི་ཕྱིར་དེ་ལྟར་ཡིན་ནོ་སྙམ་ན་ནུས་པ་ཡང་ནི་ཞེས་གསུངས་སོ། །བྱེད་པ་པོ་ཉིད་ཡིན་ན་རིམ་གྱིས་སྐྱེ་བར་མི་འགྱུར་ཏེ། སྟོང་པར་མི་རུང་བའི་ཕྱིར་རོ། །བྱེད་པ་པོ་མ་ཡིན་ཡང་བྱ་བ་མེད་དོ་ཞེས་བཀག་པ་ཡིན་པའི་ཕྱིར་ན། ནུས་པ་ཡང་ནི་འགྲུབ་པ་མ་ཡིན་ཞེས་བྱ་བའོ། །དེའི་བདག་ཉིད་ཡིན་ན་ཞེས་བྱ་བ་ནི། བྱེད་པ་དང་ལོངས་སྤྱོད་པ་དག་ཕན་ཚུན་བདག་ཉིད་གཅིག་ཡིན་ནའོ། །འོན་ཏེ་བྱེད་པ་དང་ལོངས་སྤྱོད་པ་དག་བདག་ཉིད་ཉམས་སུ་མྱོང་བ་ཡིན་པས། དེ་དག་དང་འབྲེལ་པ་ཡིན་ནོ་སྙམ་ན། ཉམས་སུ་མྱོང་བ་ལས་ཀྱང་ཞེས་གསུངས་སོ། །གཞན་གྱི་བདག་བཞིན་ནོ་ཞེས་བྱ་བ་ནི། ཅི་ལྟར་དབང་པོ་ལས་འདས་པ་མཐོང་བ་གཞན་གྱི་བདག །བདག་གཞན་གྱི་བྱེད་པ་དང་ལོངས་སྤྱོད་པ་ཉམས་སུ་མྱོང་བར་བྱེད་པ་ཡིན་ཡང་དེ་བདག་དང་འབྲེལ་པ་མ་ཡིན་པ་དེ་བཞིན་དུའོ། །གལ་ཏེ་དེ་དག་ཉམས་སུ་མྱོང་བར་བྱེད་པ་དེ་དག་དང་འབྲེལ་པ་ཡིན་ལ། དེ་ལྟ་ན་ཡང་བྱེད་པ་པོ་དང་ལོངས་སྤྱོད་པར་བྱེད་པ་ཉིད་ཡིན་ན། དེའི་ཚེ་རྣལ་འབྱོར་པ་ཡང་དེ་བཞིན་དུ་འགྱུར་རོ་ཞེས་བརྗོད་པ་ནི། རྣལ་འབྱོར་པ་ཞེས་བྱ་བའོ། །ཉམས་སུ་མྱོང་བ་ལས་ནི་བྱེད་པ་པོ་དང་ལོངས་སྤྱོད་པར་བྱེད་པ་པོ་མ་ཡིན་གྱི། འོན་ཀྱང་འབྲེལ་པའི་ཁྱད་པར་ལས་ཡིན་ནོ་སྙམ་པའི་དོགས་པ་བསུ་བ་ནི། འོན་ཏེ་འདུ་བའི་ཞེས་བྱ་བའོ། །འདུ་བ་ལས་དེ་ལྟར་བྱེད་པ་པོ་དང་ལོངས་སྤྱོད་པ་པོ་ཉིད་ཡིན་ནོ་སྙམ་ན། ལན་དུ་མ་ཡིན་ཏེ་ཞེས་བྱ་བའོ། །འདུ་བ་མེད་པའི་ཕྱིར། སྐབས་སུ་བབ་པའི་བདག་ཀྱང་དེ་དག་དང་འབྲེལ་པ་མ་ཡིན་ནོ་ཞེས་བྱ་བའི་དོན་ཏོ། །སྲིད་ཀྱང་འདི་ནི་རྣལ་འབྱོར་པ་རྣམས་བློ་གཅིག་གི་རྒྱུ་མ་ཡིན་
ནོ་ཞེས་བཤད་པ་ནི། འདུ་བ་ནི་ཞེས་བྱ་བའོ། །རྣལ་འབྱོར་པས་ནི་འདུ་བ་ཡོད་ཀྱང་གཞན་གྱི་བདག་གི་བྱེད་པ་དང་ལོངས་སྤྱོད་པ་དག་དེ་ལས་ཐ་དད་པར་ཤེས་པ་ཡིན་པ་དེ་བཞིན་དུ་བདག་ཉིད་ཀྱི་ཡང་ཡིན་ནོ། །དེས་ན་གལ་ཏེ་དེ་དག་དང་གཞན་གྱི་བདག་འབྲེལ་ན། རང་གི་བདག་ལ་ཡང་དེ་ལྟར་ཅི་སྟེ་མི་རྟོགས། བདེ་བའི་འབྲས་བུ་སྐྱེད་པ་ལ་རྟག་པ་ལ་ནུས་པ་འགྲུབ་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེ་ཡང་རྟག་པའི་ཕྱིར་རིམ་གྱིས་སྐྱེ་བ་དང་བྱ་བ་འགལ་བ་ཡིན་ནོ། །འོ་ན་ནི་བདག་མེད་པ་ལ་ཡང་ཞེས་བྱ་བའི་དྲན་པ་དང་ལོངས་སྤྱོད་པ་ལ་སོགས་པ་ནི་ཡོད་པ་ཡང་ཡིན་ཏེ། དེས་ན་བདག་ཡོད་པ་ཡིན་ནོ། །འདི་ལྟར་གཞན་གྱིས་མྱོང་བ་ནི་གཞན་གྱིས་དྲན་པ་མ་ཡིན་པའི་ཕྱིར་ན། དྲན་པ་མི་མཐུན་པའི་ཕྱོགས་ལས་ལྡོག་པ་ན། གཅིག་ཉིད་ཀྱིས་ཁྱབ་པ་ཡིན་ནོ། །གཅིག་ཉིད་གོ་བར་བྱེད་དོ། །དེ་བཞིན་གཞན་གྱིས་བྱས་པ་ནི་གཞན་གྱིས་ལོངས་སྤྱོད་པ་མ་ཡིན་ཏེ། བྱས་པ་ཆུད་ཟོས་པ་དང༌། མ་བྱས་པ་དང་ཕྲད་པར་ཐལ་བའི་ཕྱིར་རོ། །དེས་ན་བྱེད་པོ་ལོངས་སྤྱོད་པར་གྲུབ་པོ། །དེ་བཞིན་དུ་བུམ་པ་ལ་སོགས་པ་བདག་མེད་པ་ལ་བདག་མེད་པས་སྲོག་ལ་སོགས་པ་མེད་པར་འགྱུར་བ་ཡིན་ལ། ཡོད་པ་ན་ཡང་དེ་གོ་བར་བྱེད་པ་ཡིན་ནོ། །མི་མཐུན་པའི་ཕྱོགས་ལས་མི་ལྡོག་གི །མཐུན་པའི་ཕྱོགས་མེད་པའི་ཕྱིར་དེ་ལས་ནི་མ་ཡིན་ནོ། །དེས་ན་རྗེས་སུ་འགྲོ་བ་འཁྲུལ་པ་མེད་པ་ལྟར་ལྡོག་པ་འཁྲུལ་པ་མེད་པ་ཡང་གོ་བར་བྱེད་པ་ཡིན་ནོ། །མཉན་བྱ་ཉིད་ནི་ལྡོག་པ་འཁྲུལ་པ་མེད་པ་ཅན་མ་ཡིན་ཏེ། མཐུན་པའི་ཕྱོགས་ལས་ཀྱང་ལྡོག་པའི་ཕྱིར་རོ། །མལ་ཆ་དང་སྟན་ལ་སོགས་པ་འདུས་པ་དག་ནི་གཞན་གྱི་དོན་དུ་མཐོང་ལ། མིག་ལ་སོགས་པ་འདུས་པ་ཡིན་པའི་ཕྱིར་གཞན་གྱི་དོན་ཡིན་ནོ། །གཞན་ནི་འདིར་མ་འདུས་པ་ཡིན་ནོ་བཟློག་པ་ཡིན་ན་ནི་དེ་ཡང་གཞན་གྱི་དོན་ཡིན་ལ། དེ་ཡང་དེ་བཞིན་དུ་འགྱུར་བའི་ཕྱིར། ཐུག་པ་མེད་པས་ན་སྒྲུབ་པར་ནུས་པ་མ་ཡིན་ནོ། །དེས་ན་མི་མཐུན་པའི་ཕྱོགས་བདག་མེད་པ་ལ་གནོད་
པར་བྱེད་པ་ནི་བདག་དང་བཅས་པ་སྒྲུབ་པར་བྱེད་པ་ཡིན་ནོ་ཞེ་ན། འདི་འགོག་པ་ནི་དེ་ནི་མ་ཡིན་ཏེ་ཞེས་བྱ་བའོ། །ཉམས་སུ་མྱོང་བ་ལས་གཞན་གྱིས་དྲན་པ་དང་བྱེད་པ་པོ་ལས་གཞན་གྱིས་ལོངས་སྤྱོད་པའོ། །སོགས་པའི་སྒྲས་ནི་སྲོག་ལ་སོགས་པ་དང༌། འདུས་པ་ཉིད་ལ་སོགས་པ་ཡང་གཟུང་ངོ༌། །འདི་དག་ནི་བདག་པའི་གནོད་པར་བྱེད་པ་མ་ཡིན་ནོ་ཞེ་ན། ཅིའི་ཕྱིར་ཞེ་ན། བཤད་པ་འགའི་ཡང་དྲན་པ་མེད་པའི་ཕྱིར་རོ། །གང་གིས་རྒྱུད་གཞན་ལ་དེ་མེད་པས་མེད་པར་འགྱུར་རོ་ཞེས་རྟོགས་པར་འགྱུར་བ་དྲན་པ་ནི། དྲན་པ་དང་མེད་པའི་དུས་ན་ཡོད་པ་གཅིག་གིས་ཁྱབ་པར་ནི་དམིགས་པ་མ་ཡིན་ནོ། །མེད་པ་གཉིས་ལྷན་ཅིག་འབྱུང་བ་ཙམ་གྱིས་ནི་ཁྱབ་པ་མི་འགྲུབ་སྟེ། དངོས་པོའི་འབྲེལ་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །གལ་ཏེ་དྲན་པར་བྱེད་པའི་ཆར། མྱོང་བར་བྱེད་པའི་ཆ་རྗེས་སུ་ཞུགས་པ་ཡིན་ནོ་སྙམ་ན། དེས་ན་ཞེས་གསུངས་ཏེ། ཉམས་སུ་མྱོང་བའི་ཁྱད་པར་དེས་མྱོང་བ་ལས་དྲན་པ་དྲན་པར་བྱེད་པ་འབྱུང་ངོ༌། །དྲན་པ་ནི་ཉམས་སུ་མྱོང་བའི་བག་ཆགས་ཀྱིས་བསྐྱེད་པ་ཡིན་ནོ་ཞེས་བྱ་བའི་དོན་ཏོ། །བདག་ཉིད་ལ་ནི་དྲན་པ་ཡོད་པ་མ་ཡིན་ཏེ། ཉམས་སུ་མྱོང་བར་གྱུར་པ་ཐམས་ཅད་ཀྱིས་དྲན་པ་ཡོད་པར་ཐལ་བའི་ཕྱིར་རོ། །དེས་ན་བདག་ཀྱང་ཉམས་སུ་མྱོང་བའི་བག་ཆགས་ཀྱི་དབང་གིས་དྲན་པ་ཡིན་ནོ། །ཉམས་སུ་མྱོང་བའི་བག་ཆགས་དང་ལྡན་པ་སྐད་ཅིག་སོ་སོར་འཇིག་པ་ཅན། རྒྱུ་དང་འབྲས་བུར་གྱུར་པའི་སེམས་ལ་དྲན་པ་ཡོད་པས་ནི། དོན་གྱིས་བདག་ཡོད་པར་གོ་བ་མ་ཡིན་ནོ། །སྲོག་ལ་སོགས་པ་ཡང་མཉན་བྱ་བཞིན་དུ་ལྡོག་པ་མ་ངེས་པ་ཡིན་ཏེ། མཐུན་པའི་ཕྱོགས་མེད་པར་གྱུར་པ་ན། མི་མཐུན་པའི་ཕྱོགས་ལ་ཡོད་པའི་ཕྱིར་རོ། །དེས་ན་ངེས་པ་ལྡོག་པ་མ་ཡིན་ཏེ། དེ་མེད་ཀྱང་མི་མཐུན་པའི་ཕྱོགས་ལ་ཡོད་པར་ཐེ་ཚོམ་མི་ལྡོག་པའི་ཕྱིར་རོ། །ཐེ་ཚོམ་དེ་ནི་མི་མཐུན་པའི་ཕྱོགས་ལ་མེད་པའི་ཁྱད་པར་ཅན་མཐུན་པའི་ཕྱོགས་ལ་ཡོད་པའི་ཕྱིར་རོ། །དེས་ན་ངེས་པ་ལྡོག་པ་ཡིན་ནོ། །མི་མཐུན་པའི་ཕྱོགས་ལ་མ་
མཐོང་བ་ཙམ་ནི་ལྡོག་པ་མ་ཡིན་ཏེ། འོན་ཀྱང་བསྒྲུབ་པར་བྱ་བ་ལས་ལྡོག་པ་ལས་ཆོས་འགལ་བ་ཡིན་ཏེ། ཡོད་པ་དང་རྟག་པ་ཉིད་ཡིན་ནོ། །དེ་ལྟར་སྲོག་ལ་སོགས་པ་ནི་བདག་ལྡོག་པ་དང་འགལ་བ་མ་ཡིན་ནོ། །འདུས་པ་ཉིད་ཀྱང་མལ་ཆ་ལ་སོགས་པར་འདུས་པ་གཞན་གྱི་དོན་བྱེད་པ་ཉིད་ཀྱིས་ཁྱབ་པ་ཡིན་ནོ། །དེ་ཙམ་ཤེས་པར་འདོད་པ་ལ་ཐུག་པ་མེད་པ་ཡང་མ་ཡིན་ཏེ། འབྲས་བུ་ཉིད་ཀྱིས་དུ་བས་མེ་གོ་བར་བྱེད་པ་ན། འབྲས་བུ་གོ་བར་མི་བྱེད་པའམ། ཐུག་པ་མེད་པར་འགྱུར་བ་ནི་མ་ཡིན་ནོ། །གལ་ཏེ་བྱ་བ་དང་དྲན་པ་དང་ལོངས་སྤྱོད་པ་ནི། རྟེན་དང་དྲན་པ་པོ་དང་ལོངས་སྤྱོད་པ་པོ་མེད་པར་མི་འགྱུར་བ་མ་ཡིན་ནམ། འགྱུར་བ་ནི་འགྱུར་བ་པོ་ལ་ལྟོས་པ་ཡིན་པའི་ཕྱིར་རོ་སྙམ་པའི་དོགས་པ་བསུ་ནས། དྲན་པར་བྱེད་པ་པོ་ཞེས་གསུངས་སོ། །གལ་ཏེ་ཡང་དྲན་པ་དང་ལོངས་སྤྱོད་པ་དག་གིས་སྐྱེད་པར་བྱེད་པ་གཞན་ཁོ་ན་ཡིན་པ་དེའི་ཚེ། རང་དང་གཞན་དག་ནི་མྱོང་བ་དང་ལས་དག་ཁྱད་པར་མེད་པའི་ཕྱིར། དྲན་པ་དང་ལོངས་སྤྱོད་པ་ཁྱད་པར་མེད་པར་འགྱུར་རོ་སྙམ་དུ་དོགས་པ་བསུ་བ་ནི། གལ་ཏེ་ཞེས་བྱ་བའོ། །བདག་གི་ཉམས་སུ་མྱོང་བ་ཡང་དྲན་པ་ལ་ལྟོས་ནས་གཞན་ཉིད་ཡིན་པ་ཁོ་ནའོ་སྙམ་དུ་དོགས་ན་གཞན་གྱིས་མངོན་པར་འདོད་པ་ཞེས་ཁྱད་པར་དུ་བྱས་སོ། །ལན་དུ་རྒྱུ་དང་ཞེས་གསུངས་སོ། །གང་གིས་དྲན་པ་དང་ལོངས་སྤྱོད་པ་དག་ཁྱད་པར་མེད་པར་འགྱུར་བ་རང་དང་གཞན་དག་གིས་མྱོང་བ་དང་ལས་དག་ནི་ཁྱད་པར་མེད་པ་མ་ཡིན་ཏེ། རྒྱུ་དང་འབྲས་བུ་ངེས་པས་ཁྱད་པར་ཡོད་པའི་ཕྱིར་རོ་ཞེས་བྱ་བའི་དོན་ཏོ། །གཞན་པ་ཉིད་ནི་བག་ཆགས་ལས་བྱུང་བའི་དྲན་པ་ལ་གནོད་པར་བྱེད་པ་མ་ཡིན་ཏེ། བདག་ཉིད་ཀྱི་ཡང་དེ་ལྟར་ཐལ་བར་འགྱུར་བའི་ཕྱིར་རོ་ཞེས་གསུངས་པ་ནི། བདག་ཏུ་སྨྲ་བ་ལ་ཡང་ཞེས་བྱ་བའོ། །ཅི་ལྟར་རང་དང་གཞན་དང་ཉམས་སུ་མྱོང་བ་ཉིད་དམ་གཞན་ཉིད་དང་ཁྱད་པར་མེད་པའི་ཕྱིར། དྲན་པ་མ་ཡིན་པ་དེ་བཞིན་དུ་བདག་ཉིད་དུ་ཁྱད་པར་མེད་པར་ཡང་འགྱུར་རོ། །གཞན་
གྱིས་བདག་ཐ་དད་པའི་ཕྱིར་རོ་ཞེས་སྨྲས་ཏེ། ཉེས་པ་འདིར་མི་འགྱུར་རོ་ཞེས་རྗེས་སུ་འཇུག་གོ །ཐ་དད་པ་དེ་ཉིད་ཅེས་བྱ་བ་ནི་ལེན་ནོ། །སྐྱེས་བུ་སོ་སོའི་བདག་རྣམས་ནི་བདག་ཉིད་དུ་ཁྱད་པར་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །དེས་ན་བདག་ཏུ་སྨྲ་བ་གཞན་དུ་བདག་མེད་པར་སྨྲ་བ་རྣམས་ལ་ཡང་གཞན་ལས་དྲན་པ་སྐྱེ་བ་མ་ཡིན་ནོ་ཞེས་བརྗོད་པ་ནི། ཅི་ལྟར་བདག་ལ་ཞེས་བྱ་བའོ། །ཉམས་སུ་མྱོང་བ་བོ་དག་གི་རང་བཞིན་ཁྱད་པར་ཡོད་པ་ལས་དྲན་པ་ངེས་པའི་ཕྱིར། རྣམ་པར་ཤེས་པ་སྨྲ་བ་ལ་ནི་མྱོང་བ་པོ་ངེས་པར་འཐད་པ་ཡིན་ཏེ། རྒྱུ་ངེས་པའི་ཕྱིར་རོ། །བདག་ཏུ་སྨྲ་བ་ལ་ནི་མ་ཡིན་ཏེ། རྟག་པ་ཉིད་དུ་ཁས་ལེན་པའི་ཕྱིར་རོ། །རྟག་པ་ཉིད་རྒྱུ་མ་ཡིན་པ་ཉིད་ཀྱིས་རྣམ་པར་དབྱེ་བ་དང་འགལ་བ་རྣམ་པར་དབྱེར་མེད་པས་ཁྱབ་པ་ཡིན་ནོ་ཞེས་བརྗོད་པ་ནི། ཡིད་ལས་ཞེས་བྱ་བའོ། །གལ་ཏེ་ཉི་མ་སྔ་མ་ལ་དམིགས་པ་རྣམས་ལ། ཕྱི་དེ་ཉིད་ན། བདག་གིས་འདི་མཐོང་བར་འགྱུར་རོ་ཞེས་མཐོང་བ་པོ་དང་དྲན་པ་པོ་གཅིག་ཏུ་མཚམས་སྦྱོར་བ་ནི། དེ་མཐོང་བ་མེད་པར་མི་འགྱུར་བ་མ་ཡིན་ནམ་སྙམ་དུ་དོགས་པ་བསུ་བ་ནི། གལ་ཏེ་བདག་གཅིག་མེད་ན་ཞེས་བྱ་བའོ། །མཚམས་སྦྱོར་བར་བྱེད་པ་ནི། དེ་མཐོང་བ་སྔོན་དུ་འགྲོ་བ་ཅན་མ་ཡིན་ནོ་ཞེས་ལན་འདེབས་པ་ནི། ཉམས་སུ་མྱོང་བ་དང་དྲན་པ་དག་གཅིག་ཏུ་འབྲེལ་པ་ཡོད་པ་མ་ཡིན་ནོ་ཞེས་བྱ་བའི་སྐྱོན་འདི་ནི། བདག་ཡོད་པ་ལའང་མཚུངས་སོ། །དེ་ཅིའི་ཕྱིར་ཞེ་ན། གང་གི་ཕྱིར་མཐོང་བ་དང་དྲན་པ་དག་གཅིག་ཏུ་འབྲེལ་པ་འདི་ལ་ཚད་མ་ཡོད་པ་མ་ཡིན་ནོ། །ཡང་ན་གཅིག་ཉིད་འདི་ལའོ། །བདག་ཡོད་པ་ཙམ་གྱིས་མ་མཐོང་ཡང་དེ་ལྟར་རྟོགས་པ་ནི་མ་ཡིན་ཏེ། གཞལ་བྱ་རྣམས་ལ་འདི་ཡང་ཚད་མ་ལྟོས་པ་ཡིན་པའི་ཕྱིར་རོ་ཞེས་གསུངས་པ་ནི། བདག་ཡོད་ཀྱང་ཞེས་གསུངས་སོ། །མངོན་སུམ་གྱིས་སོ་ཞེས་བྱ་བའི་དོགས་བ་བསུ་བའོ། །སྔ་ཕྱི་ཉིད་ལ་ཞེས་བྱ་བ་ནི་ལན་ནོ། །འོ་ན་དེ་རྗེས་སུ་དཔག་པས་རྟོགས་པ་ཡིན་ནོ་སྙམ་ན། མངོན་
སུམ་མེད་ཕྱིར་ཞེས་གསུངས་སོ། །དེ་བས་ན་སྔ་མ་དང་ཕྱི་མ་ཉིད་དུ་རྟོགས་པ་ནི་མེད་པ་ཁོ་ནའོ། །ཁས་བླངས་ཀྱང་ཉེས་པ་འདི་ནི་འཇུག་གོ་ཞེས་གསུངས་པ་ནི། གལ་ཏེ་བདག་ནི་ཞེས་བྱ་བའོ། །གལ་ཏེ་བདག་གིས་སྔ་མའི་རང་བཞིན་དུ་དོན་དམ་པར་བདག་རིག་ན་དེའི་ཚེ། སྔ་མའི་མྱོང་བ་ད་ལྟར་ཡོང་པར་འགྱུར་རོ། །དེ་ལྟ་མ་ཡིན་ན་བདག་གིས་དེ་ལྟར་རྟོགས་པ་ནི་འཁྲུལ་པ་ཁོ་ནར་འགྱུར་རོ། །སྔོན་གྱི་མྱོང་བ་ད་ལྟར་ཡོད་པ་ཡང་མ་ཡིན་ཏེ། རྒྱུ་དེས་ན་བདག་དེ་ལ་སྔ་མའི་རང་བཞིན་ཉིད་དུ་རིག་པ་ག་ལ་སྲིད་དེ་མི་སྲིད་པ་ཁོ་ནའོ། །ཅི་སྟེ་མི་སྲིད་སྙམ་ན་ཉམས་སུ་མྱོང་བཞིན་པ་ཉིད་དོ་ཞེས་གསུངས་སོ། །མཚམས་སྦྱོར་བ་ཉིད་ཚད་མ་ཡིན་ནོ་ཞེས་བྱ་བ་ནི། །དྲན་པ་ལས་སྔ་མ་ཉིད་ཅེས་བྱ་བའོ། །མ་ཡིན་ཏེ་ཞེས་བྱ་བ་ནི་རྩོད་པ་འགོག་པའོ། །ཅིའི་ཕྱིར་ཞེ་ན། གང་གི་ཕྱིར་དྲན་པ་ཉིད་ནི་ཚད་མ་ཡིན་ནོ། །མངོན་སུམ་ནི་མ་ཡིན་ཏེ། ཡུལ་ཉེ་བ་ཅན་མ་ཡིན་པའི་ཕྱིར་རོ། །རྗེས་སུ་དཔག་པ་ཡང་མ་ཡིན་ཏེ། རྟག་པ་ལས་མ་སྐྱེས་པའི་ཕྱིར་རོ་ཞེས་བྱ་བའི་དོན་ཏོ། །ཉེ་བར་གནས་པ་ཉམས་སུ་མྱོང་བས་ངེས་པར་བྱས་པའི་ཐོག་མ་མེད་པ་ཅན་གྱི་མཚམས་སྦྱོར་བའི་བག་ཆགས་ནི་སེམས་ཀྱི་རྒྱུན་གྱི་ལྷན་ཅིག་བྱེད་པའི་རྒྱུ་ཡིན་པ་དེས་ན། དོན་གྱིས་བདག་འཕན་པ་མ་ཡིན་ནམ་ཞེས་བརྗོད་པ་ནི། གལ་ཏེ་དྲན་ལས་ཞེས་བྱ་བའོ། །གལ་ཏེ་བདག་གཅིག་ཉིད་དོན་དམ་པ་མ་ཡིན་ན། དེའི་ཚེ་བདག་མེད་པའི་སེམས་ཀྱིས་རྒྱུན་གཞན་དུ་བ་གཅིག་ཉིད་ཅིའི་ཕྱིར་མི་འདོད་དེ། འདོད་པར་བྱ་བ་ཁོ་ནའོ། །གང་གི་ཕྱིར་གཅིག་ཉིད་ཚད་མས་གྲུབ་པ་མ་ཡིན་པ་དེའི་ཕྱིར། བདག་མེད་པར་སྨྲ་བ་འབའ་ཞིག་ཏུ་མ་ཟད་ཀྱི་བདག་ཏུ་སྨྲ་བ་ལས་ཡང་ངོ༌། །ཅི་ལྟར་ལོག་པའི་བག་ཆགས་ཀྱིས་སྔ་མ་དང་ཕྱི་མའི་མྱོང་བ་དང་དྲན་པ་དག་གཅིག་ཉིད་དུ་སློབ་པར་བྱེད་པའི་དེ་བཞིན་ད་ལྟ་བ་དག་ཀྱང་ཡིན་ནོ་ཞེས་བཤད་པ་ཡིན་ནོ། །དེ་དག་ཅེས་བྱ་བའོ། །གལ་ཏེ་དོན་དམ་པར་ཐ་དད་པའི་ཕྱིར། རྣམ་པར་དབྱེ་བ་མེད་པར་ཐ་དད་བྱེད་པ་ཅི་ལྟར་སྙམ། གཅིག་ཉིད་ཙམ་དང་ཞེས་གསུངས་སོ། །བལྟ་བར་བྱ་བའི་རྒྱུད་བཞིན་
དུ་མཐོང་བའི་རྒྱུད་ཀྱང་གཅིག་ཏུ་འཛིན་པའི་འབྲས་བུ་ཉིད་ཀྱིས་དེ་ལྟར་མངོན་པར་རློམ་པའི་སྤྲལ་ཡིན་ནོ་ཞེས་བརྗོད་པ་ནི། གཅིག་པ་ཉིད་ཀྱིས་ཐ་སྙད་འདི་ཞེས་བྱ་བའོ། །འདི་ནི་དབང་པོ་དུ་མ་ལས་བྱུང་བའི་མཐོང་བ་རྣམས་དང༌། དེ་དྲན་པ་རྣམས་ཀྱིས་མཚམས་སྦྱོར་བའི་བག་ཆགས་ལས་སྐྱེད་པར་བཤད་པ་ཡིན་ནོ། །གཅིག་ཏུ་མི་སྣང་བར་རློམ་པའི་རྒྱུ་མཚན་ཡུལ་བཤད་ནས། ནང་གི་བཤད་པ་ནི། འདི་ནི་ཐོག་མ་མེད་ཅེས་བྱ་བའོ། །གལ་ཏེ་བདག་མེད་ཅིང་མཚམས་སྦྱོར་བ་ཡང་བག་ཆགས་ཀྱིས་བསྐྱེད་པའི་ཕྱིར་ལོག་པ་ཡིན་ལ། སེམས་ཀྱང་སེམས་སྔ་མའི་དབང་གིས་རྒྱུན་འཇུག་པ་ཡིན་ནོ་ཞེས་བྱ་བར་ལྟ་བ་ཡིན་ན། བདག་ཏུ་འཛིན་པ་དང༌། ཞེན་པ་ལ་སོགས་པ་གདོད་མ་མི་སྐྱེ་བའི་ཕྱིར་འཁོར་བར་མི་འགྱུར་ན། འགྱུར་བ་ཡང་ཏེ། དེས་ན་འཁོར་བ་གཞན་དུ་མི་འཐད་པས་བསྒྲུབ་བོ་སྙམ་དུ་དོགས་པའོ། །འོ་ན་ཇི་ལྟར་ཞེས་བྱ་བའོ། །འོན་ཏེ་དྲན་པ་ཉིད་གཅིག་དང་དུ་མ་ཉིད་དུ་སྟོན་པས་ན་འཇིག་ཚོགས་སུ་ལྟ་བ་ཡིན་ནོ་སྙམ་ན་དྲན་པ་ཡང་ཞེས་བྱ་བའོ། །གཅིག་པ་ཉིད་དང་རྟག་པ་ཉིད་གཞན་གྱི་བསམ་པས་བརྗོད་པས་ཡིན་ཏེ། གཞན་ནི་བུམ་པ་ལ་སོགས་པ་རྣམས། སྔ་མ་དང་ཕྱི་མ་ཉིད་ཀྱིས་གཅིག་པར་སེམས་ཀྱིས་བརྟག་པར་ནི་མ་ཡིན་ཏེ། བདག་ལ་སོགས་པ་རྣམས་ཉིད་ཀྱིས་རྟག་པར་ཁས་བླངས་པའི་ཕྱིར་རོ། །དེས་ན་ཞེས་བྱ་བ་ནི། འཇིག་ཚོགས་ལ་ལྟ་བ་མེད་པས་ནའོ། །འདི་ལ་བཤད་ཟིན་ཏོ་ཞེས་བྱ་བ་ནི་ལན་ལོན་ནོ། །འོ་ན་ཅི་ལྟར་ཀུན་ནས་ཉོན་མོངས་པ་རྣམ་པར་གནས་སྙམ་ན། དེ་ལྟར་ན་ཡིད་ཀྱིས་ཞེས་གསུངས་སོ། །འདི་ནི་ཞེས་བྱ་བ་ནི་བདེན་པ་བཞིའོ། །དེ་ལྟར་ཞེས་བྱ་བ་ནི་རྟག་པ་ལ་སོགས་པའི་རང་བཞིན་དུའོ། །དེ་ཉིད་སྟོན་པ་ནི། འདི་ལྟར་ཞེས་བྱ་བའོ། །བདག་མེད་ཀྱང་ངའོ་ཞེས་བདག་ཏུ་འཛིན་པ་ཐོག་མ་མེད་པའི་བག་ཆགས་ལས་འབྱུང་བ་ནི་ཞེས་པ་སྐྱེས་པས་འཁོར་བ་རྒྱས་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ངའི་སྙམ་པ་བདག་ཏུ་འཛིན་པའི་རྒྱུ་མེད་པར་ནི་རེ་ཞིག་འབྱུང་བ་མ་ཡིན་ལ་
རྒྱུ་ཡང་ཡུལ་ལམ་བག་ཆགས་ཀྱིས་ཡིན་པར་འགྱུར་ལ། དེ་ལ་ཡུལ་གྱིས་བསྐྱེད་པ་ལྟར་བག་ཆགས་ཀྱིས་བསྐྱེད་མ་བཟློག་པར་བྱ་བ་མ་ཡིན་པར་འགྱུར་རོ། །དེས་ན་ཅི་ལྟར་རྣམ་པར་བྱད་བར་འགྱུར་སྙམ་ན། དེ་ཉིད་ལ་ནི་ཞེས་གསུངས་ཏེ། བདེན་པ་བཞི་པོ་དེ་ཉིད་ལའོ། །སྒྲོ་བཏགས་པའི་རྣམ་པ་དེ་དག་དང་འགལ་བ་དོན་གྱི་དེ་ཉིད། དེ་ཡུལ་གྱི་དེ་ཁོ་ན་ཉིད་དེའི་རྣམ་པ་དེ་རྗེས་སུ་རྟོགས་པར་བདག་གིར་བྱེད་པ་གང་ཡིན་པའི་ཡང་དག་པའི་ལྟ་བ་དེ་ལ་དེ་སྐད་ཅེས་བརྗོད་དོ། །འདིས་ནི་ཡུལ་གྱི་ལྷན་ཅིག་བྱེད་པ་ཅན་ཡིན་པའི་ཕྱིར། སྟོབས་དང་ལྡན་པ་ཉིད་དུ་བརྗོད་པ་ཡིན་ནོ། །ལེགས་བསྒོམས་ནི་ལེགས་པར་གཏན་ལ་ཕེབས་པའོ། །ཡང་དག་ཅེས་བྱ་བ་ནི། ཕྱིན་ཅི་མ་ལོག་པའི་ལྟ་བའོ། །ལོག་པའི་ལྟ་བའི་ཡུལ་དང་བྲལ་བའི་ཕྱིར་འགའ་ཞིག་ལས་འབྱུང་བ་ན། རྗེས་འབྲང་བཅས་ཏེ་འཇིག་ཚོགས་སུ་ལྟ་བ་དང་བཅས་པའི་སྲེད་པ་འཛོམས་པར་བྱེད་དེ། ཉ་ཕྱིས་སུ་མཐོང་བས་དངུལ་དུ་མཐོང་བ་བཞིན་ནོ། །དེས་ན་རྣམ་པར་བྱད་བ་ཡང་འཐད་པ་ཡིན་ནོ་ཞེས་དགོངས་པ་ཡིན་ནོ། །རྒྱུ་འབའ་ཞིག་ཡང་དག་པ་མ་ཡིན་པ་སྒྲོ་བཏགས་པ་ཡིན་པར་ནི་མ་ཟད་དོ། །འབྲས་བུ་ཡང་དེ་ལྟ་བུ་ཉིད་ཡིན་ནོ་ཞེས་བརྗོད་པ་ནི། ཡང་དག་པ་མ་ཡིན་པ་ཉིད་ཅེས་བྱ་བའོ། །རྒྱུ་ཡང་དག་པ་མ་ཡིན་པར་སྒྲོ་བཏགས་པར་བརྗོད་པ་ནི། དེ་སྒྲོ་འདོགས་པའི་ཕྱིར་ན་ཞེས་བྱ་བའི་ལས་དང་འཁོར་བ་དག་ཏུ་མངོན་པར་རློམ་པ་པའོ། །གཞན་དུ་ན་ཞེས་བྱ་བ་ནི་ཡང་དག་པ་མ་ཡིན་པར་སྒྲོ་འདོགས་པ་མེད་པ་ནའོ། །འོ་ན་ནི་མངོན་པར་རློམ་པ་ཉིད་དོན་དམ་པར་འཁོར་བ་ཡིན་ནོ་སྙམ་ན། མངོན་པར་རློམ་པ་ཡང་ཞེས་གསུངས་སོ། །མྱོང་བ་ལས་ཞེས་བྱ་བ་ནི་རང་རིག་པ་ལས་སོ། །མྱོང་བ་མེད་ཀྱང་ཞེས་བྱ་བ་ནི་མངོན་སུམ་གྱིས་སོ། །གལ་ཏེ་དེ་ལྟ་ཡིན་དུ་ཆུག་མོད་དེ་ལྟ་ན་ཡང་རྣམ་པར་བྱང་བར་ཅི་ལྟར་འགྱུར་སྙམ་ན། བརྗོད་མ་ཐག་པའི་ཚུལ་དེས་ན། དེ་ལྟ་བུར་གྱུར་པ་ཉིད་དུ་ཞེས་བྱ་བ་མྱོང་བ་མེད་ཀྱང་མྱོང་བ་ཉིད་དུ་མངོན་པར་རློམ་པ་ལས་མྱོང་བ་ཉིད་དུའོ། །དེ་ཁོ་ན་ཡིད་ལ་བྱེད་པར་གྱུར་པ་ན། ཕུང་པོ་ལྔ་པོ་འདི་ལ་བརྟན་པ་ལ་སོགས་པ་ཅུང་ཟད་ཀྱང་ཡོད་པ་མ་ཡིན་ནོ་
ཞེས་རྣམ་པར་དཔྱོད་པ་དང་ལྡན་པའི་སྐྱེས་བུ་ནི་རྣམ་པར་དག་པ་ཉིད་དུ་འགྱུར་རོ། །གང་གི་ཚེ་སྙམ་ན་བདག་མེད་པར་བསྟན་པར་འགྱུར་བས་ན་ཞེས་སྦྱར་རོ། །བསྟན་པ་ཉིད་ཇི་ལྟར་སྙམ་ན། གོམས་པ་ལས་ཞེས་གསུངས་སོ། །ཅི་ལྟར་ཐར་པ་ཡིན་ཞེས་བྱ་བ་ནི་བདག་ཏུ་འཛིན་པ་དང་སྲེད་པ་དག་ཁོ་ན་དང༌། བདག་མེད་པར་ལྟ་བ་དངོས་དང་བརྒྱུད་པས་འགལ་བ་ཡིན་གྱི་ཟིན་པའི་ལུས་དང་ལས་དག་དང་ནི་མ་ཡིན་ཏེ་དེས་ན་ཡང་ལྟ་བ་ཡོད་ཀྱང་དེས་བསྐྱེད་པའི་སྲིད་པ་འབྱུང་བ་ཁོ་ནའོ་སྙམ་དུ་དོགས་པ་བསུ་ནས་ལས་དང་ལུས་དག་ཅེས་གསུངས་སོ། །རྒྱུན་ནི་གསུམ་སྐྱེ་སྟེ། ལས་དང་ལུས་དང་སྲེད་པའོ། །སྲེད་པ་མེད་ན་ནི་གཞན་ཡོད་ཀྱང་མི་འབྱུང་སྟེ་རྒྱུ་མ་ཚང་བའི་ཕྱིར་རོ། །ས་བོན་མེད་པར་མྱུ་གུ་སྐྱེ་བ་མི་སྲིད་པ་བཞིན་ནོ་ཞེས་འབྲེལ་ཏོ། །གལ་ཏེ་སྲེད་པ་དང་བྲལ་བ་བཞིན་དུ་སྲིད་པ་ཡོད་ཀྱང་ལས་ལ་སོགས་པ་མེད་ན། རྒྱུ་མ་ཚང་བར་འགྱུར་བ་ཁོ་ནའོ་སྙམ་དུ་དོགས་པ་བསུ་བ་ནི། དེ་ལྟ་ན་ནི་འོ་ན་ཞེས་བྱ་བའོ། །སྲིད་པ་ནི་བདག་མེད་པར་མཐོང་བའི་མི་མཐུན་པའི་ཕྱོགས་ཡིན་གྱི་ལས་ལ་སོགས་པ་ནི་མ་ཡིན་ནོ་ཞེས་ལན་འདེབས་པ་ནི། ལས་དང་ལུས་དག་ཅེས་བྱ་བའོ། །གཉེན་པོ་ཡོད་ཀྱང་སྲེད་པའི་ས་བོན་ཡོད་ན་ལས་གཞན་དང་གཞན་དུ་འགྱུར་བ་ཁོ་ན་ཞེས་བརྗོད་པ་ནི། ནུས་མེད་ཕྱིར་རོ་ཞེས་བྱ་བའོ། །འབྱུང་བར་འགྱུར་བའི་ལས་ལ་སོགས་པ་ལ་ལྟོས་ནས་བརྗོད་པ་ནི། སྲེད་པ་ཟློག་པར་མ་རྟོགས་པར། །ཞེས་བྱ་བའོ། །འོན་ཏེ་བདག་མེད་པ་ལས་གཞན་ལས་དང་ལུས་དང་འགལ་བ་ལུང་ལས་རྟོགས་སམ་སྙམ་ན་ཡང་ཞེས་གསུངས་སོ། །སྲེད་པ་ཡོད་ཀྱང་ལས་འབྱུང་བ་མ་ཡིན་ནོ་སྙམ་ན་སྲེད་པ་དང་འབྲེལ་པ་ནི་ཞེས་གསུངས་སོ། །དེ་ལས་ནི་སྲེད་པ་ལ་སོགས་སོ། །འོ་ན་གཉིས་ཟད་ པ་འགྲུབ་དགོས ་སོ་སྙམ་ན། གཉིས་ཟད་དོན་དུ་འབད་ན་ཡང༌། །ཞེས་གསུངས་སོ། །གལ་ཏེ་གྲང་བ་ལ་མེ་བཞིན་དུ་ལས་ཟད་པའི་དོན་དུ་ཟླ་བ་ཤར་ན་ཟ་བ་དང༌། སྐྲ་འཕལ་བ་ལ་སོགས་པའི་གདུང་བ་གཉེན་པོར་འགྱུར་བ་ཉིད་མ་ཡིན་ནམ། དེས་ན་གཉེན་པོ་མི་སྲིད་པར་ཅི་ལྟར་འགྱུར་སྙམ་དུ་ དགོས་པ ་བསུ་ནས་
འདི་ལྟར་ཞེས་གསུངས་སོ། །འབྲས་བུ་སྣ་ཚོགས་མཐོང་བའི་ཕྱིར་བདེ་བ་དང་སྡུག་བསྔལ་ལ་སོགས་པ་འབྲས་བུ་དུ་མའི་དངོས་པོ་ཉིད་གཞན་དུ་མི་འཐད་པས་ལས་རྣམས་ཀྱི་ནུས་པ་ཐ་དད་པ་རྗེས་སུ་དཔོག་པར་བྱེད་དེ། རྒྱུ་དེས་ན་དཀའ་ཐུབ་ཀྱི་ཉོན་མོངས་པ་རང་བཞིན་གཅིག་ཏུ་གྱུར་པ་འབྲས་བུ་དཔྱད་ཟིན་པ་ནི་ནུས་པ་སྣ་ཚོགས་དང་ལྡན་པའི་ལས་རྣམས་ཀྱི་ནུས་པ་ཟད་པར་མི་འཐད་དོ། །འདི་ལྟར་ལས་ནི་འབྲས་བུའི་མཐར་ཐུག་པ་ཡིན་པས། སྡུག་བསྔལ་ཉེ་བར་སྤྱོད་པའི་རང་བཞིན་ནི་གདུང་བས་དེའི་འབྲས་བུ་ཅན་གྱི་ལས་ཉིད་འཇིག་པར་འགྱུར་གྱི་གཞན་ནི་མ་ཡིན་ནོ་སྙམ་དུ་དགོངས་པའོ། །བཤད་ཟིན་པའི་དོན་ཉིད་ཁྱད་པར་གྱི་མཐར་ཐུག་པར་བྱེད་པ་ནི། དཀའ་ཐུབ་ཀྱིས་ཉོན་མོངས་པ་ཞེས་བྱ་བའོ། །གལ་ཏེ། ཤིན་ཏུ་མི་བཟད་ལས་རྣམས་བྱས་པ་ཡང༌། །བདག་ལ་རྣམ་པར་སྨོད་པས་སུན་པར་འགྱུར། །རབ་ཏུ་བཤགས་དང་སྡོམ་པར་བྱས་པ་ལས། །དེ་དག་རྩ་ནས་འཇོམས་བར་ང་སྨྲའོ། །ཞེས་གསུངས་པའི་ཕྱིར་ཁྱོད་ཀྱིས་ཀྱང་བྱས་ཟིན་པའི་ལས་རྣམས་ཀྱང་ཟད་པར་འདོད་པ་མ་ཡིན་ན། དེས་ན་ཅི་ལྟར་ལས་ཟད་པ་མི་རིགས་སྙམ་ན་གང་གི་ཕྱིར་ཞེས་གསུངས་སོ། །བདག་གི་ལུགས་ཀྱིས་ནི་བདག་ལ་སྨོད་པ་དང་རབ་ཏུ་བཤགས་པ་ལ་སོགས་པ་རྣམ་པ་འགས་ཏེ་བསྐྱེད་པའི་འབྲས་བུ་ནི་ཆུང་བར་འགྱུར་བའམ། ཡང་ན་སྐབས་ཀྱིས་ཟད་པར་འགྱུར་གྱི་རིགས་མི་མཐུན་པ་ཅན་གཞན་གྱིས་བསྐྱེད་པ་ནི་མ་ཡིན་ནོ། །ལས་གང་ཞིག་གི་འབྲས་བུའི་ཆ་ཉམས་སུ་མྱོང་བའི་གདུང་བས་ནི་དིས་བསྐྱེད་པའི་འབྲས་བུ་ཆུང་བའམ། ཟད་པར་ཡང་འགྱུར་གྱི་རིགས་མི་མཐུན་པའི་ལས་ཀྱིས་བསྐྱེད་པ་ནི་ཆུང་བའམ་ཟད་པར་འགྱུར་བ་མ་ཡིན་ནོ་ཞེས་བྱ་བའི་བཤད་པ་མཛད་པའོ། །དེ་བཤད་པ་ནི་འབྲས་བུ་ཉམས་སུ་མྱོང་བའི་ནི་ཞེས་པའོ། །ནུས་འདྲེས་ཞེས་བྱ་བ་ནི་སྡིག་པའི་འབྲས་བུ་ཉམས་སུ་མྱོང་བ་ཉིད་ལས་བསོད་ནམས་ཀྱི་འབྲས་བུ་ཡང་ཟད་པས་ཇི་ལྟར་སྙམ་ན། དཀའ་ཐུབ་ནུས་པས་སོ། །ནུས་པ་ཉིད་གང་ལས་སྙམ་ན་ཉོན་མོངས་བ་འགའ་ཞིག་ལས་ཞེས་གསུངས་སོ། །
དེ་ལྟ་བུར་གྱུར་པས་ནུས་པ་འདྲེས་པས་ཟད་པས་ཅིར་འགྱུར་སྙམ་ན་ལྷག་མས་ཏེ། ལྷག་མར་བྱས་པ་བསྲབ་པར་བྱས་པར་འགྱུར་རོ། །དེས་ཀྱང་ཅིར་འགྱུར་སྙམ་ན་སྤོང་བར་འགྱུར་རོ། །གང་ལས་ཤེ་ན། ཉོན་མོངས་ནི་མེད་པའམ་སྟེ་ཉོན་མོངས་པ་མེད་པར་རམ། ཉོན་མོངས་པའི་ཆ་ལས་སོ། །གལ་ཏེ་ཞེས་བྱ་བ་ལ་སོགས་པའི་བཤད་པ་ནི་ཕྱོགས་སྔ་མ་འདི་ཉིད་བསྟན་པར་བྱེད་པའོ། །གལ་ཏེ་དཀའ་ཐུབ་ལ་ནུས་པ་ཡོད་ཅེས་ཁས་ལེན་ན་དེའི་ཚེ་འབྲས་བུ་ཅན་གྱི་ལས་ནུས་པ་འདྲེས་པ་ལ་སོགས་པས་ལྷག་མར་གྱུར་པ་ཉོན་མོངས་པ་མེད་པར་རམ་སྤོང་བར་འགྱུར་རོ་ཞེས་བྱ་བ་ནི་ཕྱོགས་སྔ་མའོ། །གལ་ཏེ་དཀའ་ཐུབ་དེ་སྐྲ་འབལ་བ་དང༌། ཟླ་བ་ཤར་ན་ཞེས་བྱ་བ་ལ་སོགས་པ་ལས་གཞན་ཡིན་ན། དེའི་སྦྱིན་པ་དང་ཚུལ་ཁྲིམས་ལ་སོགས་པ་བསོད་ནམས་དང་ཡེ་ཤེས་ཀྱི་རྩོམ་པ་དང༌། བཤགས་པ་དང་སྡོམ་པར་བྱེད་པ་ལ་སོགས་པས་ཁྱེད་ཀྱིས་བརྗོད་པ་ལྟར་འདོད་པ་ཉིད་དེ། ཉོན་མོངས་པའི་ཆ་མ་ཡིན་པའི་ཕྱིར་རོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །གལ་ཏེ་སྦྱིན་པ་དང་ཚུལ་ཁྲིམས་ལ་སོགས་པ་བཞིན་དུ་གདུང་བ་ལྔ་ལ་སོགས་པའི་ཉོན་མོངས་པ་ཡང་དཀའ་ཐུབ་ཉིད་མ་ཡིན་ནམ་སྙམ་ན་ནི། ཉོན་མོངས་པ་ཉིད་ཅེ་ན་ཞེས་བྱ་བའོ། །ལན་དུ་ཉོན་མོངས་པ་དེ་ནི་ལས་འབྲས་ཡིན་ཡང་དཀའ་ཐུབ་མ་ཡིན་ནོ། །གཏན་ཚིགས་དེའི་ཕྱིར་ལས་འབྲས་སུ་འདུས་སོ། །བློ་སྔོན་དུ་བཏང་བས་བརྩམས་པའི་ཉོན་མོངས་པ་ལ་སྦྱིན་པ་ལ་སོགས་པ་དང་བྲལ་བ་ཡང་ལས་ཀྱི་འབྲས་བུ་ཉིད་དོ། །སྦྱིན་པ་ལ་སོགས་པ་ལྟར་ལས་ནི་མ་ཡིན་ནོ། །ལུང་ལས་ལས་ཡིན་ནོ་སྙམ་ན། ཐར་པ་མ་ཡིན་ཏེ་ལས་ནི་འབྲས་བུ་དང་འབྲེལ་པའི་ཕྱིར་རོ། །གཏན་དུ་བདེ་བ་འདིའི་འབྲས་བུ་ཡིན་ནོ་ཞེས་བྱ་བ་ཡང་མི་འཐད་དེ། ཉོན་མོངས་ཆ་ལས་གཏན་ཏུ་བདེ་བར་འགྱུར་རོ་ཞེས་ནི་མི་རིགས་སོ། །བདེ་བ་བཞིན་དུ་ཉོན་མོངས་པ་ཡང་རྒྱུན་དུ་འཇུག་པ་ཡིན་ནོ་སྙམ་ན། འོན་ནི་ཐར་པ་མ་ཡིན་ཏེ། འཁོར་བ་པ་བཞིན་དུ་ཉོན་མོངས་པ་དང་རྗེས་སུ་འབྲེལ་པའི་ཕྱིར་རོ། །དེ་ཉིད་ལས་ཞེས་བྱ་བ་ནི་སྦྱིན་པ་ལ་སོགས་པའི་
དཀའ་ཐུབ་ཉིད་ལས་སོ། །བསོད་ནམས་དང་ཡེ་ཤེས་ཞེས་བྱ་བ་ནི་དཀའ་ཐུབ་ཀྱིས་ལས་མ་ལུས་པར་སྤངས་བར་བྱས་པ་གང་ཡིན་པ་དེ་ནི་གཞན་ཉོན་མོངས་པའི་ནུས་པའོ། །འོན་ཉོན་མོངས་པ་ཉིད་དཀའ་ཐུབ་ཡིན་ནོ་སྙམ་ན། ཉོན་མོངས་པ་ཉིད་ནི་ཞེས་གསུངས་སོ། །འོན་ཏེ་དཀའ་ཐུབ་དེ་ནི་ལས་ཀྱི་འབྲས་བུ་ཉིད་དོ་སྙམ་ན། ལས་ཀྱི་འབྲས་བུ་ཉིད་ཅེས་གསུངས་སོ། །ཅིའི་ཕྱིར་ཞེ་ན། ཚ་གྲང་ཞེས་གསུངས་སོ། །འོན་ཏེ་དེ་ནི་ཞེས་བྱ་བ་དཀའ་ཐུབ་བོ། །འོ་ན་ལས་ཀྱི་འབྲས་བུ་གང་ཡིན་སྙམ་ན། ལས་ཀྱིས་ཞེས་གསུངས་སོ། །དེ་འདོད་པ་མེད་པ་ནི་ལས་ཀྱི་འབྲས་བུ་འདོད་པ་མེད་པའོ། །དེས་ན་ཕྱུགས་ལ་སོགས་པ་རྣམས་དཀའ་ཐུབ་ཉིད་དུ་ཐལ་བ་མ་ཡིན་ནོ་ཞེས་གཞན་དག་སེམས་པའོ། །རྒྱལ་སྲིད་ཅེས་བྱ་བ་ལེན་ནོ། །གལ་ཏེ་གང་དང་གང་འདོད་པས་འགྲུབ་པ་དེ་ལས་ཀྱི་འབྲས་བུ་མ་ཡིན་ན། དེའི་ཚེ་རྒྱལ་སྲིད་ལ་སོགས་པ་འདོད་པས་འཐོབ་པས་ཅི་དེ་ལས་ཀྱི་འབྲས་བུ་མ་ཡིན་ནམ། འོན་ཏེ་འདོད་པས་རྒྱལ་སྲིད་འཐོབ་པ་ནི། སུ་ཡང་མ་མཐོང་དོ་སྙམ་ན་ལས་ཅི་འདྲ་བས་འདོད་པའི་ལྷན་ཅིག་བྱེད་པ་ཅན་གྱིས་རྒྱལ་སྲིད་འཐོབ་བར་བྱེད་པ་དེ་འདྲ་བའི་ལས་ཀྱང་ཡོད་པ་ཡིན་ཏེ། སྤོང་པར་བྱེད་པའི་ཚད་མ་མེད་བའི་ཕྱིར་རོ། །གལ་ཏེ་ཞེས་བྱ་བ་ནི་ཁས་བླངས་པ་དང་འགལ་བ་བརྗོད་པའོ། །དེ་ནི་དཀའ་ཐུབ་ཉོན་མོངས་པའོ། །དེས་ན་ཞེས་བྱ་བ་ནི། དཀའ་ཐུབ་ཀྱི་ཉོན་མོངས་པ་ཉམས་སུ་མྱོང་བས་ནི་རྣམ་པ་དེ་འདྲའི་ཉོན་མོངས་པར་བྱེད་པའི་སྡིག་པ་ཉིད་ཟད་པར་འགྱུར་རོ། །དེས་ན་ཞེས་བྱ་བ་ནི་རྒྱལ་སྲིད་ལ་འབོགས་པའི་ལས་ཟད་པ་མ་ཡིན་པས་ནའོ། །དེས་ན་ཞེས་བྱ་བ་ནི་གདོན་མི་ཟ་བར་མྱོང་བར་བྱ་ དགོས་པས་ནའོ། །དེ་ལྟ་ན་འོ་ན་ནི་ཞེས་བྱ་བ་ནི་གདུངས་པ ་ཉིད་ཡིན་ཡང་དམྱལ་བ་ལ་སོགས་པའི་སྡུག་བསྔལ་གདོན་མི་ཟ་བར་ཉམས་སུ་མྱོང་བར་བྱ་དགོས་ཏེ། གང་གིས་དེའི་ལས་ཟད་པར་འགྱུར་བ་སྡུག་བསྔལ་དེ་ཉམས་སུ་མྱོང་བས་ནི་དམྱལ་བའི་སྡུག་བསྔལ་ཉམས་སུ་མྱོང་བམ་ཡིན་ནོ། །དཀའ་ཐུབ་ཀྱི་སྡུག་བསྔལ་སྐྲ་འབལ་བས་ཞེས་འབྲེལ་ཏོ། །མ་ངེས་ན་ཞེས་བྱ་བ་ནི་སྒྲ་འབལ་བ་ལ་སོགས་པའི་སྡུག་བསྔལ་གྱིས་སོ། །དེ་ཁྱོད་སྨྲས་ལ་
མེད་དམ་ཅི་ཉེས་བྱས་པ་ནི་ཕྱུགས་ཀྱི་སྡུག་བསྔལ་གྱིས་མ་ངེས་པའོ། །གལ་ཏེ་རྒྱལ་སྲིད་ལ་སོགས་བ་བདེ་བ་དོར་བ་ནི་ཞེན་པ་མེད་བར་གོམས་པ་དེའི་བདག་ཏུ་འགྱུར་བའི་ཕྱིར་གནོད་པར་བྱེད་བ་མ་ཡིན་ན། དེའི་ཚེ་དམྱལ་བ་ལ་སོགས་པ་སྡུག་བསྔལ་ཡང་བཏང་སྙོམས་གོམས་པའི་བདག་ཏུ་གྱུར་པ་ལས་གནོད་པར་བྱེད་པ་མ་ཡིན་ནོ། །དེས་ན་གདུངས་པས་ཅི་བྱ་ཞེས་བརྗོད་པ་ནི། གཞན་ཡང་ཞེས་བྱ་བའོ། །དེ་ལ་ཞེས་བྱ་བ་ནི་ཐར་བ་ལའོ། །ཅི་ལྟར་གནོད་པར་བྱེད་པ་མ་ཡིན་སྙམ་ན། གོམས་པའི་སྟོབས་ལས་ཏེ། དེས་ན་གནོད་བྱེད་ཡིན་ནོ་ཞེས་བྱ་བའི་དོན་ཏོ། །ཐར་པ་འདི་བཏང་སྙོམས་ཀྱི་བདག་ཉིད་ཁོ་ན་ཡིན་གྱི་བདེ་བའི་བདག་ཉིད་ནི་མ་ཡིན་ནོ། །དེས་ན་འདོད་པ་ལ་གནོད་དོ་ཞེས་བརྗོད་པ་ནི། དེས་ན་ཞེས་བྱ་བའོ། །ལས་ཡོད་དེ་ཞེས་བྱ་བ་ནི་བྱམས་པ་བསྒོམས་པ་ལ་སོགས་པའོ། །ཁྱོད་ཉིད་ཀྱིས་ཞེས་བྱ་བ་ནི་སངས་རྒྱས་པས་སོ། །ཞེ་སྡང་ལ་སོགས་པའི་སྐྱོན་རྣམས་འགོག་པར་བྱེད་པའི་བྱམས་པ་ལ་སོགས་པ་གང་ཡིན་པ་ཡང་ཞེ་སྡང་གིས་བསྐྱེད་པའི་ལས་བཟློག་པར་བྱ་བ་ལ་ནུས་པར་འགྱུར་ཏེ། ཟློག་པར་བྱེད་པ་ཡིན་པར་འགྱུར་རོ། །ཅིའི་ཕྱིར་ཞེ་ན། སྐྱེ་འགྲོ་ཉེས་པ་བཅོམ་པའི་ཕྱིར་སྤངས་པའི་ཕྱིར་རོ། །ལས་བྱས་ཟིན་པ་བསགས་ཤིང་ཡོངས་སུ་བཟུང་ཟིན་པ་ཅི་ལྟར་ཉམས་པར་འགྱུར། གང་གིས་རྒྱུ་མེད་པས་མེད་པར་བསྐྱུར་བ་དེ་བྱས་མ་ཟིན་པ་ནི་མ་ཡིན་ནོ། །བྱས་ཟིན་པ་ལས་ནི་གནོད་པར་བྱེད་པ་མེད་པའི་ཕྱིར་ན་གཞན་གྱིས་མངོན་པར་འདོད་པའི་དེ་ཁོ་ན་ཤེས་པའི་ལས་འཁོར་བར་འཁྱམས་པར་འགྱུར་བ་ཉིད་དོ། །གང་ཡང་སྐྱེས་བ་ཐ་མར་ལས་ཀྱི་འབྲས་བུ་མ་ལུས་པ་མྱོང་བ་ཡིན་ནོ་ཞེས་བརྗོད་པ་དེ་ཡང་ལུས་ལས་གཞན་པའི་ཚད་མས་རྟོགས་པར་ནུས་པ་མ་ཡིན་ནོ། །སྐྱེ་བ་དུ་མའི་བདེ་བ་དང་སྡུག་བསྔལ་གྱི་རྣམ་པར་སྨིན་པ་ནི་རིམ་པ་དང་ལྡན་པའི་ལས་ཀྱི་འབྲས་བུ་ནི་ལུས་གཅིག་གི་སྐད་ཅིག་ཙམ་གྱིས་སྤྱད་པར་ནུས་པ་མ་ཡིན་ནོ། །གལ་ཏེ་སངས་རྒྱས་པ་ལ་ལས་ཉམས་པ་མེད་པ་ཡིན་ཏེ། བཤགས་པ་ལ་སོགས་པ་ཉམས་པའི་རྒྱུ་ནི་ལུང་ལས་གཞན་གྱིས་མི་རྟོགས་པའི་ཕྱིར་རོ། །ལས་ཡོད་ན་ཡང་སྲེད་པ་ལ་སོགས་པ་འབྱུང་བ་ཉིད་དེ།
དེའི་རྒྱུ་ཅན་ཡིན་པའི་ཕྱིར་རོ། །ཕུག་རོན་ལ་སོགས་པའི་འདོད་ཆགས་དང༌། སྦྲུལ་ལ་སོགས་པའི་ཞེ་སྡང་དང༌། སྲོག་ཆགས་ས་ཛ་གར་ལ་སོགས་པའི་གཏི་མུག་གི་ལས་ལས་སྐྱེ་བ་ཡིན་ཏེ། དེས་ན་འཁོར་བ་ཉིད་དོ་སྙམ་དུ་དོགས་ན་ལས་ལས་ནི་ཉེས་པ་འབྱུང་བ་མ་ཡིན་ཏེ། འོན་ཀྱང་བདག་ཏུ་ལྟ་བ་དང་བདག་གིར་ལྟ་བར་མངོན་བར་འདོད་པ་ཚུལ་བཞིན་མ་ཡིན་པ་ཡིད་ལ་བྱེད་པ་ལས་ཡིན་ནོ། །ཉེས་པ་ཉིད་ལས་ཀྱི་རྒྱུ་ཡིན་ནོ་ཞེས་བརྗོད་པ་ནི། སྐྱོན་ལྡན་བྱེད་འགྱུར་ཞེས་བྱ་བའོ། །འདོད་ཆགས་ལ་སོགས་པ་ཉེས་པ་རྣམས་ཉིད་ལས་སྐྱེད་པར་ནུས་པ་ཡིན་ཏེ། ཆགས་པ་དང་སྡང་བདག་བྱེད་པར་མཐོང་བའི་ཕྱིར་རོ། །བདག་ཏུ་འཛིན་པ་དང་ཞེན་པ་ལ་སོགས་པ་མེད་ན་ནི། །གཞན་ཡོད་ཀྱང་མི་བྱེད་པ་ཁོ་ནའི་ཞེས་བྱ་བ་བརྗོད་པ་ནི་བཟློག་པས་མིན་ཞེས་བྱ་བའོ། །གལ་ཏེ་དགྲ་བཅོམ་པ་འཇིག་ཚོགས་ལ་ལྟ་བར་ཟད་པ་ལ་ཡང་བདེ་བར་སྐྱེ་བ་ལུས་ཀྱི་དེ་ནི་ཡུལ་མེད་པར་འབྱུང་བ་མ་ཡིན་ནོ། །རྣམ་པར་རྟོག་པ་ལས་བྱུང་བའི་ཡིད་བདེ་བ་ནི་རྣམ་པ་གཞན་དུ་འགྱུར་བ་ཡིན་ནོ། །རྗེས་སུ་འཛིན་པའི་བདག་ཉིད་དེ་ལ་ནི་དེས་པར་མངོན་པར་འདོད་པ་འབྱུང་ངོ༌། །འདིས་ནི་སྡུག་བསྔལ་བ་ཡང་བཤད་པ་ཡིན་ནོ། །དེ་ལྟ་ན་ལས་བྱེད་ཉིད་ཡིན་པའི་ཕྱིར་ན་ཇི་ལྟར་ཐར་པ་ཡིན་སྙམ་དུ་དོགས་ནས་ལོག་པའི་རྣམ་རྟོག་ཅེས་གསུངས་སོ། །འདོད་པ་ནི་བདག་དང་བདག་གི་བ་ལོག་པར་དཔྱད་པར་བྱ་བ་ལ་སྲེད་པ་ཡིན་ནོ། །དེ་ཡང་སྐྱེ་གནས་ངེར་འཛིན་པ་དེ་མེད་ན་མི་འབྱུང་བ་ཉིད་དོ། །ཉམས་སུ་མྱོང་བ་དེ་ལ་ནི་འདོད་པ་མ་ཡིན་ལ། མ་འོངས་པ་དོན་དུ་གཉེར་བའི་རྣམ་པ་ཅན་གྱི་རྟོག་པ་ཡང་རྣམ་པར་རྟོག་པ་སྤངས་པ་རྣམས་ལ་སྲིད་པ་མ་ཡིན་ནོ། །བསྒོམས་པ་ལས་འབྱུང་བ་བདེ་བ་རེ་ཞིག་བ་ཡང་འདོད་པ་དང་སྒྲོ་འདོགས་པའི་ཡུལ་མ་ཡིན་ནོ། །སྡུག་བསྔལ་གོམས་པ་ཡང་བདག་ཏུ་འཛིན་པའི་གོམས་པ་སྤངས་པ་རྣམས་ལ་མི་འབྱུང་སྟེ། བདག་ཏུ་འཛིན་པའི་གོམས་པ་སྙིང་པོ་ཅན་གྱི་བག་ཆགས་ལྷན་ཅིག་བྱེད་བ་ཅན་གྱི་ཡུལ་གྱིས་བསྐྱེད་པར་བྱ་བ་ཡིན་པའི་ཕྱིར་རོ། །དེས་ན་ཉེས་པ་ནི་འདོད་ཆགས་ལ་སོགས་པ་བདེ་
བ་ཉམས་སུ་མྱོང་བ་ལས་འབྱུང་བ་ཡིན་ནོ། །དེ་ལྟ་མ་ཡིན་པར་དེ་ཞེས་བྱ་བ་ནི་སྙིང་རྗེས་སོ། །དེ་ནི་མ་ཡིན་ནོ་སྟེ་ཞེས་བྱ་བ་ནི་འཇུག་པའི་ཡུལ་འབྱུང་བར་འགྱུར་བ་ལ་བསམས་ནས་བརྗོད་པ་ཡིན་ནོ། །རང་གིས་རིག་པའི་ད་ལྟར་བ་ལ་དེ་དོན་དུ་གཉེར་བའི་རྣམ་པ་ཅན་མངོན་པར་འདོད་པ་མ་ཡིན་ཏེ། ཉེ་བར་གནས་པའི་ཕྱིར་རོ། །དུས་གཞན་དུ་འབྱུང་བ་ཉིད་ཀྱིས་དོན་དུ་གཉེར་ན་ནི་རྣམ་པར་རྟོག་པར་ཐལ་བར་འགྱུར་རོ་ཞེས་བརྗོད་པ་ནི། བདེ་བ་དེ་ཡང་ཞེས་བྱ་བའོ། །དེ་ལྟར་བདག་ཏུ་ལྟ་བའམ། སྡུག་བསྔལ་བསྒོམ་པའམ། དབང་བསྐུར་བ་ལ་སོགས་པའམ། སྐྲ་འབལ་བ་དང༌། ཟླ་བ་ཤར་ན་ཟ་བ་ལ་སོགས་པ་ནི་ཐར་པ་སྒྲུབ་པར་བྱེད་པ་ཡིན་གྱི། འོན་ཀྱང་སྲིད་པའི་རྒྱུ་སྲིད་པ་དང༌། དེའི་རྒྱུ་བདག་ཏུ་འཛིན་པ་ལ་སོགས་པ་སྤོང་བ་ཡིན་ནོ་ཞེས་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །གཞན་དུ་ནི་མ་ཡིན་ནོ་ཞེས་བྱ་བ་ནི་དབང་བསྐུར་བ་ལ་སོགས་པའི་ཆོ་གས་མ་ཡིན་ནོ། །འཕགས་པའི་བདེན་པ་འདི་སྟོན་པར་མཛད་པ་ཉིད་སྐྱོབ་པ་ཡིན་གྱི། བདག་ལ་སོགས་པ་སྟོན་པ་ནི་མ་ཡིན་ནོ། །བདེན་པ་བཞི་སྟོན་པའི་རང་བཞིན་གྱིས་སྐྱོབ་པ་ལ་ཅི་ཞིག་རྟོགས་སྙམ་ན། དེས་ན་ཞེས་གསུངས་ཏེ། སྐྱོབ་པ་ཉིད་གཟིགས་ལ་མི་གསུང་བའོ་ཞེས་བྱ་བ་ལ་སོགས་པས་ནི་རང་གི་དོན་དང་གཞན་གྱི་དོན་གྱི་མཚན་ཉིད་ཀྱི་འབྲས་བུ་ཕུན་སུམ་ཚོགས་པ་རྒྱུ་ཕུན་སུམ་ཚོགས་པ་གཤེགས་པ་འགྲོ་བའི་དོན་ལ་བརྟེན་ནས་བཤད་དོ། །དེ་ནི་རྟོགས་པའི་དོན་ལ་བརྟེན་ནས་ཡེ་ཤེས་ཕུན་སུམ་ཚོགས་པ་དང༌། དེའི་རྒྱུ་ཕུན་སུམ་ཚོགས་པ་བཤད་པ་ཡིན་ནོ་ཞེས་བྱ་བའི་ཁྱད་པར་རོ། །སུའི་སྒྲ་ལེགས་པའི་དོན་ཉིད་ཡིན་པ་ལ་ནི་དེ་ཁོ་ན་མཁྱེན་པའོ། །དེས་ན་བཅོམ་ལྡན་འདས་ཕྱི་རོལ་པ་རྣམས་ལས་ཁྱད་པར་དུ་འཕགས་པ་ཡིན་ནོ། །སླར་མི་ལྡོག་པའི་དོན་ཉིད་ཡིན་པ་ལ་ནི་མངོན་པར་མཁྱེན་པ་སྟེ། དེས་ན་རྒྱུན་ཏུ་ཞུགས་པ་དང༌། བྱང་ཆུབ་སེམས་དཔའ་ལ་སོགས་སློབ་པ་རྣམས་ལས་ཁྱད་པར་དུ་འཕགས་པ་ཡིན་ནོ། །མ་ལུས་པའི་དོན་ཉིད་ལས་ནི་ཁྱད་པར་མ་ལུས་པར་མཁྱེན་པ་སྟེ། དེས་དགྲ་བཅོམ་པ་དང༌། བསེ་རུ་མི་སློབ་པ་རྣམས་ལས་ཁྱད་དུ་འཕགས་
པ་ཡིན་ནོ། །གལ་ཏེ་འདི་སྐྱོབ་པ་ཡིན་ན་དེ་ལས་སུ་དཔག་པར་འགྱུར་བ་བཞིན། འོན་ཀྱང་དེ་མེད་པར་ཡང་དེ་སྟོན་པར་འཐད་པ་ཡིན་ཏེ། རྗེས་སུ་དཔག་པས་མཐོང་བ་མི་སྟོན་པ་མ་ཡིན་ནོ། །དེས་ན་དེ་ལས་བསྟན་པར་མཁྱེན་པ་ལ་སོགས་པ་སུ་ཉིད་ཡིན་སྙམ་དུ་དོགས་ནས། རྗེས་སུ་དཔག་པ་ལས་ནི་ཞེས་གསུངས་ཏེ། འོན་ཀྱང་མངོན་སུམ་ཁོ་ན་ལས་ཡིན་ནོ་ཞེས་བྱ་བའི་དོན་ཏོ། །འདི་གང་ལས་སྙམ་ན། གཞན་ལ་ནི་ཞེས་གསུངས་ཏེ། དེ་ལྟ་བུར་གྱུར་པ་ཞེས་བྱ་བ་ནི་ཚད་མས་འཐད་པའོ། །དེ་ཁོ་ན་ཉིད་མཁྱེན་པ་ལ་སོགས་པ་མངོན་སུམ་ཉིད་ཡིན་ཡང་བདེན་པ་བཞི་སྟོན་པའི་རང་བཞིན་སྐྱོབ་པའི་རྟགས་ཀྱི་ཁྱད་པར་ལས་ཤེས་པ་ཡིན་ནོ། །སྡུག་བསྔལ་ལ་ཆོས་ཤེས་པ་ནི་རང་བཞིན་ཤེས་པ་ཡིན། དེ་ཤེས་པ་མཐོང་བར་བྱ་བ་རྣམ་པར་གྲོལ་བའི་ཤེས་པ་ནི་ཆོས་ཤེས་པའི་བཟོད་པ་དང༌། དེ་དག་བསྒྲུབ་པར་བྱ་བ་དང༌། སྒྲུབ་པར་བྱེད་པའི་དངོས་པོར་ཤེས་པ་ནི་རྗེས་སུ་བྱེད་པ་ཡིན་པ་དང༌། དེ་ཡང་བདག་ལ་ཡོད་དོ་ཞེས་བྱ་བ་ཤེས་པ་ནི་རྗེས་སུ་ཤེས་པའི་བཟོད་པ་ཡིན་ནོ་ཞེས་བྱ་བ་ལ་སོགས་པ་མཐོང་བ་དང་བསྒོམ་པའི་ལམ་གྱི་འབྲས་བུ་སྣ་ཚོགས་པ་ཅན་འདོགས་པ་མེད་པར་སྟོན་པ་ནི་ཁྱད་པར་རྣམས་མངོན་སུམ་དུ་མཛད་པ་མེད་པར་རྗེས་སུ་དཔག་པ་ཙམ་ལས་འགྱུར་བ་མ་ཡིན་ནོ་ཞེས་གསུངས་སོ་ནི། རྗེས་སུ་དཔག་པས་ཞེས་བྱ་བའོ། །འོན་ཏེ་ཞེས་བྱ་བའི་རྩོད་པ་ལ་ཡང་ལན་དེ་ཉིད་གསུངས་པ་ནི། དེ་ལྟ་ཡིན་ན་གཞན་དག་ཀྱང་ཞེས་བྱ་བའོ། །ཅིའི་ཕྱིར་སྙམ་ན་རྗེས་སུ་དཔག་པ་འགའ་ཞིག་ལ་ནི་ཞེས་གསུངས་སོ། །འོན་ཏེ་རྗེས་སུ་དཔག་པ་ལ་གསལ་བ་དང་མི་གསལ་བས་བྱས་པའི་རྣམ་པར་དབྱེ་བ་ཡོད་པ་དེས་ན། འགའ་ཞིག་ལ་རྗེས་སུ་དཔག་པ་ཡིན་ནོ་སྙམ་ན། གཅིག་ལ་ཡང་ཞེས་གསུངས་སོ། །དེས་ན་ཞེས་བྱ་བ་ནི་སྐྱོབ་པ་ཉིད་རྗེས་སུ་དཔག་པས་བསྐྱེད་པ་མ་ཡིན་པའོ། །དེ་ཡང་ཞེས་བྱ་བ་ནི་བཅོམ་ལྡན་འདས་ཀྱང་ངོ༌། །འདི་ལ་ལན་བདག་ཅག་གིས་ནི་ཞེས་པའོ། །གལ་ཏེ་ཅི་ལྟར་གཞན་མུ་སྟེགས་པ་རྣམས་བཞིན་དུ་འཁྲུལ་པས་སྟོན་པ་ལས་སྲིད་པ་མ་ཡིན་ནམ་སྙམ་དུ་དོགས་པ་བསུ་བ་ནི། འོན་ཏེ་འཁྲུལ་པ་ལས་ཀྱང་ཞེས་བྱ་བའོ། །རྟག་པར་ཉེས་པ་བཞིན་དུ་སྐད་ཅིག་མ་ལ་
སོགས་པ་ཤེས་པ་ལ་ནི་ཕྱིན་ཅི་ལོག་གི་རྒྱུ་སྲིད་པ་མ་ཡིན་ནོ་ཞེས་གསུངས་པ་ནི་འདྲ་བ་གཞན་དག་ཅེས་བྱ་བའོ། །ཐེ་ཚོམ་ལས་སྟོན་པ་ལ་ཡང་མི་སྲིད་དོ་ཞེས་བརྗོད་པ་ནི། ཐེ་ཚོམ་ཡང་ཞེས་གསུངས་སོ། །མངོན་སུམ་དུ་མཛད་པ་ལ་ནི་གཉི་ག་མཐོང་བ་ཡོད་པ་མ་ཡིན་ནོ་སྙམ་དུ་དགོངས་པའོ། །གལ་ཏེ་བདག་ཅག་ལྟ་བུ་ལ་རྗེས་སུ་དཔག་པ་ལས་ངེས་པ་ཡོད་པ་མིན་ནམ། ཅི་ལྟར་མངོན་སུམ་དུ་མཛད་པ་ཉིད་ལས་ངེས་པ་ཡིན་ཞེས་བརྗོད་སྙམ་ན། བདག་ཅག་གི་ཞེས་གསུངས་སོ། །དེ་སྐད་ཅེས་བྱ་བ་ནི་དོན་ཐམས་ཅད་ནི་སྐད་ཅིག་མར་འཇིག་པ་ཡིན་ནོ་ཞེས་བྱ་བ་ལ་སོགས་པའོ། །གཉི་ག་ཡང་ཞེས་བྱ་བ་ནི། རྟག་པ་དང་མི་རྟག་པ་ཉིད་དུའོ། །དེས་ན་ཞེས་བྱ་བ་ནི་བདེ་བར་གཤེགས་པ་ཡིན་པས་ནའོ། །དེ་ལྷན་ཅིག་གནས་པ་ལ་སྐབས་ཀྱི་དོན་ནི་འདི་ཡིན་ཏེ། གང་ཞིག་ཚད་མ་མི་སླུ་བ་ངེས་པའི་དོན་རྗོད་པར་བྱེད་པ་དེ་ནི་དངོས་སམ་བརྒྱུད་ནས་དོན་སྔོན་དུ་འགྲོ་བ་ཅན་ཡིན་ཏེ། དཔེར་ན་མེ་ནི་སྲེག་པར་བྱེད་པ་ཡིན་ནོ་ཞེས་བྱ་བའི་ཚིག་བཞིན་ནོ། །འདུ་བྱེད་ཐམས་ཅད་སྐད་ཅིག་མ་ཡིན་ནོ་ཞེས་བརྗོད་པ་འདི་ཚད་མས་ངེས་པར་མི་སླུ་བ་ངེས་པའི་དོན་རྗོད་པར་བྱེད་པ་ཡིན་ནོ་ཞེས་བྱ་བའི་དོན་གྱི་འབྲས་བུའི་གཏན་ཚིགས་སོ། །འདི་མ་གྲུབ་པ་ནི་མ་ཡིན་ཏེ། ཆོས་ཐམས་ཅད་སྐད་ཅིག་གིས་འཇིག་པར་བསྒྲུབས་པས་ན་ཚིག་འདི་བདེན་པའི་དོན་ཅན་ཡིན་པའི་ཕྱིར་འགལ་བ་ཡང་མ་ཡིན་ཏེ། མཐུན་པའི་ཕྱོགས་ལ་ཡོད་བའི་ཕྱིར་རོ། །མ་ངེས་པ་ཡང་མ་ཡིན་ཏེ། བརྗོད་པ་འགའ་ཞིག་ཐེ་ཚོམ་དང་ཕྱིན་ཅི་ལོག་སྔོན་དུ་འགྲོ་བ་ཅན་ཡོད་ན་ཡང་ཚད་མས་ངེས་པའི་དོན་ཅན་ནི་དངོས་སམ་བརྒྱུད་ནས་དོན་དེ་མངོན་དུ་བྱེད་པའི་ཤེས་པ་སྔོན་དུ་འགྲོ་བ་ཅན་དུ་མངོན་སུམ་དང་མི་དམིགས་པ་དག་གིས་དམིགས་པའི་ཕྱིར་རོ། །དེ་ལྟ་མ་ཡིན་ན་དུ་བ་ལ་སོགས་པ་ལ་ཡང་ལག་ཏུ་ཐོབ་པའི་འདོད་པར་ཐལ་བའི་ཕྱིར་ཆུ་དང་འབྲས་བུ་མ་ལུས་པར་ཆད་པར་ཐལ་ལོ། །དེ་སྐད་དུ་ཡང་ཤེས་པ་ཡོངས་སུ་མ་དག་པར་བརྗོད་པ་ཡོངས་སུ་མ་དག་པ་མེད་ཅེས་བཤད་ཟིན་པ་ཡིན་ནོ། །བདེ་བར་གཤེགས་པ་ཉིད་ལས་སྟོན་པ་ཉིད་འགྲུབ་པ་དེའི་ཕྱིར་རོ། །བདེ་བར་གཤེགས་པ་བདག་ཉིད་ཅན་གཞན་དོན་མཁྱེན་པ་ལ་སྦྱོར་བ་བྱེད་པ་
བསྒྲུབ་པ་ཡིན་ནོ། །གང་གི་ཕྱིར་གཞན་དོན་མཁྱེན་པ་སྦྱོར་བ་བདེ་བར་གཤེགས་པའི་རྒྱུ་ཡིན་བ་དེའི་ཕྱིར་གཞན་གྱི་དོན་མཁྱེན་པ་ལ་སྦྱོར་བ་དེ་སྟོན་པ་ཡིན་པར་བརྗོད་དོ། །རྒྱུ་ལ་འབྲས་བུ་ཉེ་བར་བཏགས་པས་ཐབས་གཞན་མེད་པ་ཉིད་དུ་བསྟན་པའི་དོན་དུའོ། །སྦྱོར་བ་དེ་ལས་ཀྱང་བརྩེ་བ་འགྲུབ་བོ། །གང་ཞིག་ཅེ་ན་གནས་སྐབས་ཐམས་ཅད་དུ་གཞན་གྱི་དོན་གྱི་ངོར་མཛད་པ་དེ་གཙོར་གྱུར་པ་ཉིད་དོ། །གཙོ་བོ་དེའི་རང་བཞིན་ཅན་ཡིན་པར་ཇི་ལྟར་རྟོགས་སྙམ་ན། །བཤད་པ་བདེ་བར་གཤེགས་པ་ཉིད་དུ་བསྟན་པའི་དོན་གྲུབ་པས་འཐོབ་པར་བྱ་བ་གཞན་མི་མངའ་བ་མཛད་པ་མི་འདོར་བར་འཇུག་པ་སྟེ། དེ་ཡང་གཞན་གྱི་དོན་ཉིད་ཡིན་ནོ། །དེའི་རང་བཞིན་ཅན་གྱི་བརྩེ་བ་དང་ལྡར་པར་ནི་དེས་སྟོན་པ་ཡིན་ནོ། །འཆད་པ་ནི། བཅོམ་ལྡན་འདས་ལ་ཞེས་བྱ་བའོ། ཚད་མས་བསྒྲུབ་པ་དོན་དུ་མེད་པའི་ཕྱིར་མངའ་བ་ནི་བདེན་པ་ཞེས་བྱ་བར་བསམས་པའོ། །འོན་ཀྱང་དེའི་རྒྱུ་ཅི་ཡིན་ཞེས་བྱ་བའི་འདྲི་བ་ལ་ལན་དུ། གཞན་གྱི་དོན་ཞེས་གསུངས་སོ། །དེ་ལྟ་མ་ཡིན་ན་ཞེས་བྱ་བ་གཞན་གྱི་དོན་ལ་སྦྱོར་བ་མི་མངའོ། །གཞན་དུ་ན་ཞེས་བྱ་བ་ནི་ཐུགས་བརྩེ་བ་ཅན་ཉིད་མ་ཡིན་ནོ། །དེ་ཞེས་བྱ་བ་ནི་ཐུགས་རྗེས་བསྐུལ་བ་གཞན་གྱི་དོན་ལ་སྦྱོར་བའོ། །བཅོམ་ལྡན་འདས་ནི་དེ་ཁོ་ན་ཉིད་ལ་སོགས་པ་མཁྱེན་པ་ཙམ་གྱིས་ནི་བདག་ཅག་ལ་ཚད་མ་མ་ཡིན་ནོ། །འོན་ཇི་ལྟར་ཚད་མ་ཡིན་སྙམ་ན། དེའི་ཚད་མ་ཉིད་ཅེས་གསུངས་སོ། །དེ་ལྟ་མ་ཡིན་ན་ཞེས་བྱ་བ་ནི་ཉེ་བར་བསྟན་པ་མེད་ནའོ། །གང་གི་ཕྱིར་འདི་ལྟར་ཚད་མ་ཉིད་ཡིན་པ་དེ་ཞེས་བྱ་བ་དེའི་ཕྱིར་རྣམ་འགྲེལ་མཛད་པས་བཤད་པ་ནིའོ། །རབ་ཀྱི་མཐར་ཕྱིན་པར་གནས་པ་དེ་ནི་འགའ་ཞིག་ལ་ཡོད་འགའ་ཞིག་ལ་ནི་མ་ཡིན་ནོ་ཞེས་ཤེས་པར་ནུས་པ་ཡང་མ་ཡིན་ཏེ། དེས་དེའི་དབང་དུ་འགྱུར་བ་ཉིད་ཡིན་ནོ་ཞེས་བརྗོད་པ་ནི། རྩོལ་བར་ཞེས་བྱ་བའོ། །གཞན་གྱི་དོན་ནི་ཉེ་བར་བསྟན་པའི་མཚན་ཉིད་ཁོ་ན་ཡིན་ཏེ། གཞན་གྱི་དོན་གཞན་ནི་ཚད་མས་མི་མཐུན་པའི་ཕྱིར་རོ། །ཇི་ལྟར་སྔར་བཤད་པ་བཞིན་ནོ་ཞེས་བྱ་བ་ནི། གང་དག་བརྩེ་བ་ཆེན་པོ་ཅན། །གཞན་གྱི་དོར་ནི་བཞུགས་པ་ཡིན། །ཞེས་བྱ་བ་དེར་རོ། །དེ་ལྟར་སྐྱོབ་པ་ལས་ནི་མཁྱེན་པ། དེ་ལས་ནི་མཛད་པ་དེ་ཡང་བརྩེ་བ་ཡིན་པའི་ཕྱིར་རོ། །དངོས་སམ་
བརྒྱུད་པས་མཁྱེན་པ་ལ་སོགས་པ་རྣམས་རྒྱུ་ཉིད་དུ་བརྗོད་པ་ཡིན་ནོ། །དེ་ནི་དངོས་ཉིད་དུ་ཡིན་ནོ་ཞེས་བརྗོད་པ་ནི་བརྩེ་བས་ཞེས་བྱའོ། །ཡང་ན་སྔར་གྱི་གོ་བར་བྱེད་པ་འབྲས་བུ་གོ་བར་བྱ་བ་ལ་བྱེད་པ་ཡིན་པར་བརྗོད་ལ། ད་ནི་རྒྱུའི་བྱེད་པ་བསྐྱེད་པར་བྱ་བ་ལ་ཡིན་པར་བརྗོད་བ་ཡིན་ནོ་ཞེས་བྱ་བ་ནི་རྣམ་པར་གཡེང་བའོ། །འདིས་ནི་ཞེས་བྱ་བ་ནི་བརྩེ་བས་ལེགས་དང་ཞེས་བྱ་བ་འདིས་ནིའོ། །དང་པོ་བརྩེ་བ་ལས་ནི་ཐ་མ་སྐྱོབ་པ་ཡིན་ལ། དང་འོག་མཛད་པ་ལས་ནི་ཐ་མ་ལྷག་པ་མཁྱེན་པ་ཉིད་དུ་འགྱུར་བ་ཡིན་ནོ། །བཞི་བོ་འདི་ནི་ཚད་མའི་རྒྱུ་ཡིན་ཏེ། ངེས་པའི་རྒྱུ་ཡིན་པའི་ཕྱིར་རོ་ཞེས་གསུངས་སོ་ནི། དེའི་ཕྱིར་ཞེས་བྱ་བའོ། །དེ་ཉིད་ཀྱི་ཕྱིར་ཞེས་བྱ་བ་ནི་ཚད་མར་ངེས་པ་ཉིད་ཀྱི་ཕྱིར་རོ། །དེ་ལྟའི་དངོས་སྟོན་ནི་ཚད་མ་ཉིད་དོ། །ངག་དང་པོའི་ཚིགས་སུ་བཅད་པ་དེས་བསྟོད་པ་གང་ཡིན་པ་དེ་ནི་བཅོམ་ལྡན་འདས་ཀྱིས་ཉེ་བར་བསྟན་པ་ཉིད་ལས་ཚད་མའི་དེ་ཁོ་ན་ཉིད་བསྒྲུབ་པར་བྱ་བའི་དོན་དུ་བརྗོད་པ་ཡིན་ནོ། །གལ་ཏེ་བཅོམ་ལྡན་འདས་ལ་ཡོན་ཏན་དཔག་ཏུ་མེད་པ་བཞིན་སྔར་བཤད་ཟིན་པ་དེ་ལྟ་ན་ཡང༌། འདི་ནི་ཚད་མར་གྱུར་པ་ཉིད་ཀྱིས་དམ་པ་རྣམས་ཀྱིས་བསྟན་པར་བྱ་བ་ཡིན་བའི་ཕྱིར་ན། དེ་ཉིད་ཀྱི་བསྟོད་པ་ནི་ཚད་མའི་དེ་ཁོ་ན་བསྒྲུབ་པར་བྱ་བའི་དོན་དུ་ཡིན་ནོ་ཞེས་བྱ་བའི་ཐ་ཚིག་གོ །གལ་ཏེ་གང་གིས་དེ་བརྗོད་པར་བྱ་བ་ཅི་བཅོམ་ལྡན་འདས་ཀྱིས་རྗེས་སུ་དཔག་པ་གསུངས་སམ་ཞེ་ན། བཤད་པ་རྗེས་སུ་དཔག་པ་ཚད་མ་ཉིད་དུ་གསུངས་པ་ཡིན་ནོ། །གང་ལས་ཤེ་ན། མི་ཟློག་ཕྱིར་ཏེ། གང་གི་ཕྱིར་རྗེས་སུ་དཔག་པ་བཀག་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །ཡང་མངོན་སུམ་བཞིན་དུ་རྗེས་སུ་དཔག་པ་ཡང་ཕྱོགས་གཅིག་གིས་གསུངས་བ་ཡིན་ནོ་ཞེས་བཤད་པ་ནི། ཅུང་ཟད་སྐྱེ་བའི་བདག་ཉིད་ཅན། །ཞེས་བྱ་བའོ། །སྦྱོར་བ་ནི་གཞན་གྱི་དོན་གྱི་རྗེས་སུ་དཔག་པ་ཡིན་ནོ། །གལ་ཏེ་ཚུལ་གསུམ་བརྗོད་པ་གཞན་གྱི་དོན་གྱི་རྗེས་སུ་དཔག་པ་མ་ཡིན་ནམ། གང་ཅུང་ཟད་སྐྱེ་བའི་བདག་ཉིད་ཅན་ཞེས་བྱ་བ་ལ་སོགས་བ་ལ་ནི་དེ་ཡོད་པ་མ་ཡིན་ཏེ། མེད་ན་མི་འབྱུང་བ་ཙམ་ཞིག་བརྗོད་བའི་ཕྱིར་རོ་སྙམ་དུ་དོགས་པ་བསུ་ནས་བཤད་པ་ནི། མེད་ན་མི་འབྱུང་མཚན་ཉིད་ཅན། །ཞེས་བྱ་བའོ། །དེ་ཡང་ཞེས་བྱ་བ་ནི་མེད་ན་མི་འབྱུང་བ་ཡང་ངོ༌། །རྗེས་སུ་
དཔག་པ་ལ་ནི་མེད་ན་མི་འབྱུང་བ་ཉིད་གཙོར་གྱུར་པའི་རང་བཞིན་ཡིན་པར་དེ་བརྗོད། །ངག་ཐམས་ཅད་བརྗོད་པ་ཉིད་དོ་ཞེས་བྱ་བའི་དོན་ཏོ། །གང་གི་ཕྱིར་བཅོམ་ལྡན་འདས་ཀྱིས། ཚད་མ་གཉིས་བཀའ་སྩལ་པ་དེ་ཉིད་ཀྱི་ཕྱིར་གཞན་ནི་ཚད་མ་མ་ཡིན་ནོ་ཞེས་གསུངས་པ་ནི། གང་གི་ཕྱིར་ཞེས་བྱ་བའོ། །སླུ་བ་སྤྱོད་པ་ཅན་དང༌། མ་ཤེས་པའི་ངོན་གསལ་བར་བྱེད་པའི་མཚན་ཉིད་གཉིས་དང་ལྡན་པའི་ཚད་མའི་དེ་ཉིད་དོ། །གཏན་ཚིགས་དེའི་ཕྱིར་ན་མངོན་སུམ་དང་རྗེས་སུ་དཔག་པ་གཉིས་དེ་ལས་ཆད་མ་གཞན་ཡོད་པ་མ་ཡིན་ནོ། །དེ་ལས་ཅིར་འགྱུར་སྙམ་ན། དེ་བཞིན་གཤེགས་པ་ཉིད་ལས་ཞེས་གསུངས་སོ། །ཡང་ན་དབང་ཕྱུག་ལ་སོགས་པ་ཚད་མ་མ་ཡིན་ནོ་ཞེས་བྱ་བ་འདི་ལ་ཡང་དེ་བཞིན་གཤེགས་པའི་གསུང་ཡོད་པ་ཉིད་ཡིན་ཏེ། དེས་ན་དེ་དག་ཀྱང་ཚད་མ་མ་ཡིན་ནོ་ཞེས་བཤད་པ་ནི། གང་གི་ཕྱིར་བཅོམ་ལྡན་འདས་ཀྱི་རང་བཞིན་གྱི་ཚད་མའི་དེ་ཉིད་ཉེ་བར་བསྟན་པའི་དོན་ཐོབ་པར་བྱེད་པ་ཉིད་ནི་རྒྱུ་དང་འབྲས་བུའི་གནས་སྐབས་ཀྱི་མཚན་ཉིད་གཉིས་དང་ལྡན་པ་ནི་བཅོམ་ལྡན་འདས་བདེ་བར་གཤེགས་པ་ཉིད་ཀྱིས་བསྟན་པ་མཛད་དོ། །རྒྱུ་དེའི་ཕྱིར་ན་ཉེ་བར་སྟོན་པར་མཛད་པའི་ཚད་མ་དེ་ལས་དབང་ཕྱུག་ལ་སོགས་པའི་ཚད་མ་གཞན་ནི་ཡོད་པ་མ་ཡིན་ནོ། །གང་གི་ཕྱིར་དེ་དག་ཚད་མ་ཉིད་ཀྱི་གཏན་ཚིགས་དེ་ཉིད་ཀྱི་ཕྱིར་དེ་བཞིན་གཤེགས་པ་ཉིད་ལས་བླང་བར་བྱ་བ་དང་དོར་བར་བྱ་བའི་ཐབས་དང་བཅས་པའམ། བསྒྲུབ་པར་བྱ་བ་དང་སྒྲུབ་པར་བྱེད་པ་ལ་སོགས་བའི་ཚད་མ་ཐམས་ཅད་འགྲུབ་ཀྱི་དབང་ཕྱུག་ལ་སོགས་པ་ལས་ནི་མ་ཡིན་ནོ། །དེའི་ཕྱིར་རིགས་པ་དང་ལུང་གིས་བཅོམ་ལྡན་འདས་ཉིད་ཚད་མ་ཡིན་གྱི། དབང་ཕྱུག་ལ་སོགས་པ་ནི་མ་ཡིན་ནོ་ཞེས་བྱ་བར་གནས་སོ། །བདག་འདྲ་ལ་ནི་འདི་འདྲའི་བློ་ཡོད་མིན། །དེ་ལྟར་སྐྱེ་བོ་འགའ་ཞིག་འདིར་འདོད་པ། །དེས་ན་བདག་གི་ལག་གིས་འདི་བཤད་བྱས། །བརྩེ་བའི་གཞན་དབང་ལས་ཡིན་རློམ་པས་མིན། །ཚུལ་བཞིན་ཊཱི་ཀཱ་འདི་ནི་བྱས་པ་ལས། །བསོད་ནམས་ཚད་མེད་བསགས་པ་གང་ཡིན་པ། །དེས་ནི་འཇིག་རྟེན་གཤིན་རྗེའི་དགྲ་འཇོམས་ནི། །མི་བཟད་རབ་བསྒྲུབ་གཉིས་མེད་ཐོབ་པར་ཤོག །དཔལ་མཁས་པ་ཛ་མཱ་རིས་སྦྱར་བ་ཚད་མ་རྣམ་འགྲེལ་གྱི་རྒྱན་གྱི་ལེའུ་དང་པོའི་ཊཱི་ཀཱ་རྫོགས་སོ།། །།