ཚད་མ་རྣམ་འགྲེལ་རྒྱན་གྱི་འགྲེལ་བཤད་ཤིན་ཏུ་ཡོངས་སུ་དག་པ་ཞེས་བྱ་བ།
ཛ་མཱ་རི།
བཅོམ་ལྡན་འདས་ཀྱིས། ཇི་ལྟར་བྱིས་པས་རྣམ་བརྟགས་ལྟར། །ཕྱི་རོལ་དོན་ནི་ཡོད་མ་ཡིན། །བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་དབྱེ། །ཞེས་གསུངས་སོ། །དེ་ལ་རྣམ་པར་བརྟགས་པའི་རང་བཞིན་མཐའ་དག་གིས་བདེན་པ་རང་ཉིད་ཡོངས་སུ་གསལ་བ་ཡིན་ཡང༌། ཁ་ཅིག་གིས་སྔོན་པོ་ལ་སོགས་པ་ནི་ཕྱི་རོལ་གྱི་དོན་ཡོན་ཏན་དང་བྱ་བ་ལ་སོགས་པའི་རང་བཞིན་ཅན་བེམས་པོ་རྣམ་པ་མེད་པའི་ཤེས་པས་གཟུང་བར་བྱ་བ་ཉིད་དང༌། བདག་དང་བདེ་བ་ལ་སོགས་པ་ཡང་མ་ཡིན་ནོ་ཞེས་བྱ་བར་རྟོགས་སོ། །གཞན་ནི་སྔོན་པོ་ལ་སོགས་པ་ཉིད་བེམས་པོ་རྡུལ་ཕྲ་རབ་འདུས་པ་ཙམ་ཡིན་ལ། བདེ་བ་ལ་སོགས་པ་ནི་རིག་པ་ཉིད་དོ་ཞེས་སོ། །གཞན་དག་ན་ནི་སྔོན་པོ་ཤེས་པ་ཡང་བློ་ཉིད་དེ། དེའི་རྣམ་པ་ཅན་གྱི་བློས་རིག་པར་བྱ་བའི་ཕྱི་རོལ་དུ། གཞན་ཉིད་དེ་རྟག་ཏུ་ལྐོག་ཏུ་གྱུར་པ་ཡིན་ནོ་ཞེས་སོ། །དེ་ལ་ཕྱི་རོལ་གཞན་ནི་མ་ཡིན་གྱི། འོན་ཀྱང་སྔོན་པོ་ལ་སོགས་པ་དེ་ཉིད་གཅིག་ཏུ་ཕྱི་རོལ་མ་ཡིན་ལ། གཅིག་ཏུ་ནང་ཁོ་ན་ཡང་མ་ཡིན་ནོ་ཞེས་བྱ་བ་ནི་ནམ་མཁའི་གོས་ཅན་ནོ། །ཤེས་པ་ཉིད་ཡིན་ཏེ་
རྟག་པ་ཁྱབ་པ་གཅིག་པུ་དང༌། མ་རིག་པའི་ནུས་པ་དང་འབྲེལ་བ་ལས་མི་བདེན་པའི་རྣམ་པའི་ཚོགས་ཀྱིས་ཟིན་པ་ཡིན་ནོ་ཞེས་བྱ་བ་ནི་རིག་བྱེད་པའིའོ། །འདི་འདྲ་བ་ཉིད་མི་རྟག་པ་དང་མ་ཁྱབ་པ་དང༌། དུ་མ་གསལ་བ་ཙམ་གྱི་རང་བཞིན་དུ་ཡོད་པའི་ཕྱིར་རོ་ཞེས་བྱ་བ་ནི་རྣམ་པ་མེད་པར་སྨྲ་བའིའོ། །སྣ་ཚོགས་གསལ་བ་ལས་མ་གཏོགས་པ་གང་ལ་དངོས་པོར་མངོན་པར་ཞེན་པ་འམ་རྟག་པ་དང་མི་རྟག་པ་ལ་སོགས་པའི་རང་བཞིན་དུ་དཔྱད་པར་བྱ་བ་གསལ་བ་ཙམ་ཞེས་བྱ་བ་ནི་འགའ་ཡང་ཡོད་པ་མ་ཡིན་ནོ། །སྣ་ཚོགས་ཀྱང་མི་བདེན་པ་ཡིན་ནོ་ཞེས་བྱ་བ་ནི་དབུ་མ་པའི་ཁྱད་པར་རོ། །གཞན་ནི་ཕུང་པོ་ལྔ་ཡང་ཀུན་རྫོབ་ཏུ་ཡིན་ནོ་ཞེས་འདི་ནི་ཆེ་ལོང་ཇི་ལྟ་བ་བཞིན་ཉེ་བར་བཀོད་པ་ཡིན་ཏེ། སྒྲོ་འདོགས་པ་དང་སྐུར་པ་འདེབས་པས་བསྡུས་པས་རང་གི་རང་བཞིན་མི་གསལ་བར་བྱེད་པའི་ལོག་པར་རྟོག་པའི་ནི་གྲངས་མེད་དོ། །དེ་དག་ལ་ནི་མངོན་པར་འདོད་པའི་རང་གི་དོན་འགྲུབ་པ་ཡོད་པ་མ་ཡིན་ཏེ། དེས་ན་སྒྲོ་འདོགས་པ་དང་སྐུར་བ་འདེབས་པ་དགག་པའི་དོན་དུ་ཆོས་ཙམ་གྱིས་མདོར་བསྡུས་ཏེ། ཡོད་པ་དང་མེད་པའི་མཚན་ཉིད་ཀྱི་དབང་དུ་མཛད་ནས། ཡང་དག་མ་ཡིན་ཀུན་རྟོག་ཡོད། །དེ་ལ་གཉིས་པོ་ཡོད་མ་ཡིན། །སྟོང་པ་ཉིད་ནི་དེ་ལ་ཡོད། །དེ་ལ་ཡང་ནི་
དེ་ལ་ཡོད། །ཅེས་བྱ་བ་དང༌། ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པ། །ཞེས་གསུངས་སོ། །ཡང་དག་པ་མ་ཡིན་པ་ནི་གཟུང་བ་དང་འཛིན་པ་གཉིས། རྗེས་ལ་སྐྱེས་པའི་རྣམ་པར་རྟོག་པའི་སྒོ་ནས་འདི་ལའམ་འདིས་ཡོངས་སུ་རྟོག་པའི་ཕྱིར་ན་ཡང་དག་པ་མ་ཡིན་པའི་ཀུན་དུ་རྟོག་པའོ། །དེ་ཉིད་ནི་གཞན་དབང་གི་རང་བཞིན་དུ་མདོ་ལས་གསུངས་སོ། །ཡོད་ཅེས་བྱ་བ་འདི་ནི་དེ་ལ་སྐུར་བ་འདེབས་པ་བཀག་ཅིང༌། ལོངས་སྤྱོད་རྫོགས་པའི་སྐྱེ་བར་འགྱུར་བའི་ཐ་སྙད་དུ་བྱ་བའི་ས་བོན་བསྟན་པ་ཡིན་ནོ། །ཡང་དག་པ་མ་ཡིན་པའི་ཀུན་ཏུ་བརྟགས་པའི་སྒྲས་ནི་ཀུན་ནས་ཉོན་མོངས་པའི་དུས་ལ་ལྟོས་ནས་སྣ་ཚོགས་སུ་སྣང་བའི་ཤེས་པ་ཉེ་བར་མཚོན་པ་ལྷུར་ལེན་པའོ། །གཞན་གྱི་དབང་དུ་ཞེས་བྱ་བའི་སྣང་བ་དེ་ལ་སྣང་བ་མ་ཡིན་པ་མུ་སྟེགས་པའི་ཚོགས་མ་ལུས་པ་དང་རང་གི་ཕྱོགས་པ་དག་གིས་གང་ཅུང་ཟད་སྒྲོ་བཏགས་པ་ནི་ཀུན་བརྟགས་པའི་རང་བཞིན་དུ་བརྗོད་དོ། །སྒྲོ་བཏགས་པའི་ཚོགས་འདི་ཡང་གཟུང་བ་དང་འཛིན་པའི་མཚན་ཉིད་གཉིས་ཀྱིས་ཕལ་ཆེར་བསྡུས་སོ། །མདོར་བསྡུ་ན་སྒྲོ་བཏགས་པ་ནི་རྣམ་པ་གཉིས་ཏེ། ཆོས་ཅན་ལས་སམ་ཆོས་ཙམ་ལས་སོ། །དེ་ལ་རེ་ཞིག་གང་གི་ཚེ་གསལ་བ་མ་ཡིན་པ་རྫས་སུ་ཡོད་པ་ཡན་ལག་ཅན་དང་བདག་ལ་ཐ་དད་པར་བཏགས་པ་དེའི་ཚེ་ནི་དེ་གཟུང་བ་དང་འཛིན་པའི་རང་བཞིན་ཉིད་དོ། །ཡང་གང་གི་ཚེ་སྣང་བཞིན་པ་ཉིད་ལ་གཟུང་བ་དང་འཛིན་པའི་ཆ་གཉིས་སུ་རྟོག་པ་དེའི་ཚེ་ཡང་ཉེ་བར་བསྟན་པ་དངོས་པོ་གཙོ་བོར་གྱུར་པ་ཡིན་པའི་ཕྱིར། གཟུང་བ་དང་འཛིན་པ་ཉིད་དུ་རིག་པར་བྱའོ། །ཡང་གང་གི་ཚེ་ཤེས་པ་དེས་གསལ་བ་མ་ཡིན་པ་ཉིད་རིག་པ་ཞེས་གནས་པ་དེའི་ཚེ་ན་གཟུང་བར་བྱ་བ་ལ། ཆོས་ཅན་དང་འཛིན་པར་བྱེད་པ་ལ་ཆོས་སུ་བརྟགས་པ་ཡིན་ནོ། །ཡང་གང་གི་ཚེ་ཤེས་པ་དེ་ཉིད་ཤེས་པ་གཞན་གྱིས་རིག་པ་ཡིན་ནོ་ཞེས་སྒྲོ་འདོགས་པ་དེའི་ཚེ་ཡང༌། འཛིན་པར་བྱེད་པའི་ཆོས་ཅན་དང་གཟུང་བར་བྱ་བའི་ཆོས་སོ་ཞེས་བྱ་བར་རོ། །མཐའ་གཅིག་མ་ཡིན་པར་སྨྲ་བ་ལ་ཡང་གཟུང་བ་དང་འཛིན་པའི་སྒྲོ་འདོགས་པ་ཡིན་པ་ཁོ་ནའོ། །དེས་ན་ཚིག་རྐང་གཉིས་པས་ནི་དེ་འགོག་པ་ཡིན་ནོ། །གཉིས་པོ་ནི་ཀུན་བརྟགས་པ་ཉེ་བར་མཚོན་པ་ལྷུར་ལེན་
པའོ། །དེས་ན་རྟག་པ་ལ་སོགས་པའི་ཆོས་དང་གཟུང་བ་འཛིན་པའི་རང་བཞིན་མ་ཡིན་པའི་བེམས་པོ་དང༌། རང་གི་རྒྱུད་ལ་ཡོད་ཀྱང་ཉམས་སུ་མྱོང་བར་བྱ་བ་མ་ཡིན་པ་གསལ་བཙམ་ལ་སོགས་པའི་ཐ་དད་ལྡན་པ་འགག་པ་འགྲུབ་པ་ཁོ་ནའོ། །གཉིས་པའི་སྒོ་ནས་བརྟགས་པ་དེ་ཐམས་ཅད་ཀྱིས་སྟོང་པ་ཉིད་གང་ཡིན་པ་དེ་ནི་དེ་ལ་ཡོད་པ་ཡིན་ནོ། །གཙོར་བྱས་པ་འདིས་ཀྱང་ཆོས་ཀྱི་སྐུ་རྣམ་པར་གནས་པའི་ས་བོན་བསྟན་པ་ཡིན་ནོ། །དེ་སྐད་དུ་ཡང༌། མདོ་སྡེ་རྒྱན་ལས། སྒྱུ་མ་ཇི་ལྟར་དེ་བཞིན་དུ། །ཡང་དག་མ་ཡིན་ཀུན་རྟོག་བརྗོད། །སྒྱུ་མས་བྱས་པ་དེ་བཞིན་དུ། །དེ་བཞིན་གཉིས་ནི་འཁྲུལ་བར་བརྗོད། །ཇི་ལྟར་དེ་ལ་དེ་མེད་པ། །དེ་བཞིན་དོན་དམ་ཡིན་པར་འདོད། །ཇི་ལྟར་དེ་དག་དམིགས་པ་བཞིན། །ཀུན་རྫོབ་ཀྱི་ནི་བདེན་པ་ཉིད། །ཅེས་བྱ་བ་ལ་སོགས་པ་རྒྱས་པར་བཤད་པ་ཡིན་ནོ། །གཉིས་པོ་སྟོང་པ་དེ་ཉིད་མདོ་དག་ལས་ཡོངས་སུ་གྲུབ་པའི་རང་བཞིན་དུ་བཤད་དོ། །དབུས་དང་མཐའ་རྣམ་པར་འབྱེད་པ་ལས། དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་ཉིད། །ཆོས་ཀྱི་དབྱིངས་དང་སྟོང་ཉིད་དེ། །རྣམ་གྲངས་ཉིད་ནི་མདོར་བསྡུས་པའོ། །ཞེས་གསུངས་སོ། །གང་ཞིག་མངོན་སུམ་བྱས་པའི་མཚན་ཉིད་ཀྱི་ལོངས་སྤྱོད་པ་ལས། མཚན་མ་ལ་སོགས་པའི་རྣམ་པའི་ཚོགས་དང་ལྡན་པ། རྣམ་པར་བྱང་བའི་རྣམ་པར་དག་པ། ཡང་དག་པ་མ་ཡིན་པའི་ཀུན་དུ་རྟོག་པ་དང་བྲལ་བ་ལ་སོགས་པར་བསྙད་པས་ལོངས་སྤྱོད་རྫོགས་པའི་སྐུར་བརྗོད་པ་ནི། རང་གི་དོན་ཕུན་སུམ་ཚོགས་པ་བརྗོད་དེ། མདོ་སྡེ་རྒྱན་ལས། ལོངས་སྤྱོད་རྫོགས་པའི་སྐུ་ནི་རང་གི་དོན་ཕུན་སུམ་ཚོགས་པའི་མཚན་ཉིད་ཡིན་ནོ་ཞེས་གསུངས་པ་ཡིན་ནོ། །དེ་ལ་ཡང་ནི་དེ་ཡོད་དོ་སྙམ་ཞེས་བྱ་བ་ནི། ཆོས་ཅན་ཡང་དག་པ་མ་ཡིན་པའི་ཀུན་དུ་རྟོག་པ་ཞེས་བྱ་བའི་འབད་པ་འདི་ནི་ཚད་མས་གནོད་པ་ཉིད་ཀྱིས་ན། འདི་ནི་མི་བདེན་པ་ཡིན་ནོ་སྙམ་པའི་དོགས་པར་མི་འགྱུར་བར་བྱ་བའི་ཕྱིར་རོ། །དེ་སྐད་དུ་ཡང༌། མངོན་པར་རྟོགས་པའི་རྒྱན་ལས། བཏགས་པ་ཉིད་ཀྱི་ཆོས་བདག་མེད་པར་ཅི་ནས་ཀྱང་འགྱུར་བར་བྱ་བའི་དོན་དུ། འདི་ལ་བསལ་བྱ་ཅི་ཡང་མེད། །བསྣན་པར་བྱ་བའང་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་
ན་རྣམ་པར་གྲོལ། །ཞེས་གསུངས་སོ། །ཐེག་པ་ཆེན་པོ་རྒྱུད་བླ་མ་ལས་ཀྱང༌། སྟོང་པ་ཉིད་ཀྱི་དོན་གཞན་གསལ་ནས་ཚིགས་སུ་བཅད་པ་འདི་ཉིད་གསུངས་སོ། །འདིས་ནི་རྣམ་པའི་ཆས་དང་ཐམས་ཅད་ལ་མི་བདེན་པ་ཉིད་དུ་སྨྲ་བ་བསལ་བ་ཡིན་ནོ། །ལེའུའི་ཆ་འདིར་ཡང་མི་བདེན་པར་སྨྲ་བ་རྣམ་པར་ཤེས་པ་རྣམ་པར་མེད་པར་སྨྲ་བ་དང༌། རིག་བྱེད་ཀྱི་མཐའ་བར་སྨྲ་བའི་རྣམ་པར་ཤེས་པའི་བདག་ཉིད་དུ་བསྒྲུབ་པས་བསལ་བ་ཡིན་ནོ། །ཐམས་ཅད་མི་བདེན་པར་སྨྲ་བ་ནི། འདི་ནི་དངོས་སྟོབས་འོངས་པ་ཡིན། །ཞེས་བྱ་བས་བསླངས་ནས་རང་རིག་པའི་སྟོབས་ལ་བརྟེན་པ་སྣ་ཚོགས་གཉིས་མེད་ཀྱི་རྒྱས་འདེབས་པར་འགྱུར་རོ། །དེའི་ཕྱིར་གཉིས་ཀྱིས་སྟོང་གང་ཡིན། །དེ་ནི་དེའི་ཡང་མཚན་ཉིད་ཡིན། །ཞེས་བྱ་བ་འདིས་ནི། སྐུ་ཉེ་བར་མཚོན་པར་འགྱུར་རོ། །རྣམ་པ་དང་བཅས་པའི་ཤེས་པ་བསྒྲུབ་པའི་གཞུང་གིས་ནི་གཞན་གྱི་དབང་འཆད་པར་འགྱུར་རོ། །དང་པོ་ལ་སོགས་པ་ལྷག་མ་ཐམས་ཅད་ཀྱིས་ནི་རང་དང་གཞན་གྱི་ཕྱོགས་པ་དག་གིས་ཀུན་དུ་བརྟགས་པའི་དངོས་པོའི་ཚོགས་མ་ལུས་པ་རང་གི་ངོ་བོ་ཉིད་ཡིན་པ་སེལ་བ་ཡིན་ནོ། །གཟུང་བ་དང་འཛིན་པའི་མཚན་ཉིད་དང་ལྡན་པ་ནི་སྤྱིར་བསལ་བ་ཙམ་ཡོད་པར་སྨྲ་བས་བསལ་བ་མ་ཡིན་པའི་གཉིས་མེད་པའི་ཡང་བཀག་པ་ཡིན་ནོ་ཞེས་བྱ་བ་ནི། མདོར་བསྡུས་ནས་ལེའུའི་བསྡུས་པའི་དོན་ཏོ།། །།གལ་ཏེ་འདི་གསུང་རབ་ཀྱི་རྣམ་གྲོལ་ཡིན་ནོ་ཞེས་བརྗོད་པ་མ་ཡིན་ནམ། དེ་ཇི་ལྟར་ན་རྒྱལ་ཚབ་ཀྱི་གསུངས་དང་སྦྱར་ཞེ་ན། དེ་ནི་མ་ཡིན་ཏེ་གསུང་ཆེན་པོ་ལས་རིམ་པ་བཞིན་བཏུད་དེ་བརྗོད་པ་ནི་གསུང་རབ་ཉིད་དོ། །སློབ་དཔོན་གཞན་གྱི་ངག་བཞིན་དུ། མདོ་སྡེའི་གསུང་ཡང་ཁུངས་ཙམ་དུ་ནི་བརྗོད་པར་ནུས་པ་མ་ཡིན་ནོ། །ཇི་ལྟར་དོན་ནི་ཕ་རོལ་ཏུ་ཕྱིན་པའི་ཚུལ་གྱིས་རབ་ཏུ་དབྱེ་བ་གཞན་དུ་རྒྱས་པར་གནས་པ་དང༌། ལུང་ལ་སོགས་པ་དང་འགལ་བར་སྣང་བ་སྤང་བ་དང༌། དབུ་མ་དང་རྣམ་པ་མེད་པ་ཤེས་པ་སྟོབས་ཆེ་ཆུང་ནི་མཐར་ཐུག་པ་ཇི་ཙམ་པ་དང༌། ཞར་ལ་བྱུང་བ་གང་ཡིན་པ། དེ་ཐམས་ཅད་ནི་གསུང་དེ་དང་འཆད་པ་ན་གསལ་བར་འགྱུར་རོ། །སྐབས་སུ་བབ་པ་ཐམས་ཅད་ནི་རྒྱུ་དང་འབྲས་བུ་ཕུན་སུམ་ཚོགས་པས་ཚད་མ་ཡང་དག་པ་ཉིད་ཀྱི་བཅོམ་ལྡན་འདས། རབ་ཏུ་བསྒྲུབ་པར་གསལ་བ་ཡིན་ནོ། །འདིས་
སྤྲོས་པས་འཇིགས་པའི་ཕྱིར་ནང་དུ་ན། ལེའུ་གཉིས་པ་འཇུག་པ་བརྗོད་པ་ནི། དེ་ལྟར་སྤྱིའི་མཚན་ཉིད་བརྗོད་ནས་ཞེས་བྱ་བའོ། །ལེའུ་གཉིས་ཀྱིས་བརྗོད་པ་རྒྱུའི་གནས་སྐབས་གཉི་གའི་བདག་ཉིད་ཅན་ཡང་བྱང་ཆུབ་སེམས་དཔའ་ལ་སོགས་པ་དང་ཐུན་མོང་ཡིན་པའི་ཕྱིར་ན་སྤྱིའི་མཚན་ཉིད་ཡིན་ནོ། །ད་ནི་རང་དང་གཞན་གྱི་དོན་ཕུན་སུམ་ཚོགས་པའི་བདག་ཉིད་ཅན་འབྲས་བུའི་གནས་སྐབས་ཅན་ཐོས་པ་ལ་སོགས་པ་དང་ཐུན་མོང་མ་ཡིན་པའི་ཕྱིར་ན་ཁྱད་པར་གྱི་མཚན་ཉིད་དུ་གྱུར་པ་བརྗོད་པར་བྱའོ་ཞེས་བྱ་བའི་དོན་ཏོ། །གང༌། ཚད་མ་སླུ་བ་མེད་ཅན་གྱི། །ཞེས་བྱ་བ་ནི་སྤྱིའི་མཚན་ཉིད་ཡིན་ལ། མངོན་སུམ་རྟོགས་དང་བྲལ་བ་ཅན། །ཞེས་བྱ་བ་ལ་སོགས་པ་ནི་ཁྱད་པར་གྱི་མཚན་ཉིད་ཡིན་ནོ་ཞེས་བྱ་བ་དེས་ཀྱང་བཅོམ་ལྡན་འདས་ཀྱིས་འབྲས་བུའི་གནས་སྐབས་མཚན་ཉིད་དང་ལྡན་པ་ཡིན་ནོ་ཞེས་བསྟན་པ་ཡིན་ནོ། །འོ་ན་ཆོས་བདག་མེད་པ་དེ་ཇི་ལྟར་རྟོགས་པར་བྱ་སྟེ། གཞལ་བྱ་རྟོགས་པ་ནི་ཚད་མ་ལ་རག་ལས་པ་ཡིན་ནོ་ཞེས་གསུངས་པའི་ཕྱིར་རོ། །གཞལ་བྱ་རྟོགས་པ་ཡང་སྒྲུབ་པ་དང་དགག་པས་རྣམ་པ་གཉིས་ཡིན་ཡང་རྗེས་སུ་དཔག་པས་དམིགས་པར་བྱས་པ་ཡིན་ནོ། །མངོན་སུམ་གྱི་དམིགས་པ་ཡང་མཚན་ཉིད་དང་སྤྱོད་ཡུལ་དང་འབྲས་བུ་དཔྱད་པས་མངོན་སུམ་གྱིས་ལེའུ་བསྒྲུབ་པར་བྱ་བ་ཡིན་ནོ།། དེ་ལ་གལ་ཏེ་ཚད་མ་གཞན་གྱི་དམིགས་པར་འགྱུར་ན་ཉེས་པ་ཅི་འདྲ་བ་ཞིག་ཡོད་སྙམ་ན། དང་པོར་རྣམ་འགྲེལ་ལ་འཇུག་པའི་དོན་དུ་ཞེ་ལ་གནས་པའི་སྐབས་འབྱེད་པ་ནི། མངོན་སུམ་དང་ནི་རྗེས་དཔག་དག །ཚད་མ་ཞེས་བྱ་བའོ། །རྒྱུ་བའི་ཕྱིར་བཅོམ་ལྡན་འདས་མངོན་སུམ་དང་རྗེས་སུ་དཔག་པའི་གནས་སྐབས་ཉིད་བརྗོད་དེ། གཞན་གྱིས་ཀུན་དུ་བརྟགས་པའི་ཚད་མའི་གནས་སྐབས་སུ་ནི་མ་ཡིན་ནོ་ཞེ་ན། དང་པོར་རྣམ་འགྲེལ་ལ་འཇུག་པར་བྱ་བའི་ཕྱིར། མངོན་སུམ་དང་ནི་རྗེས་སུ་དཔག །ཅེས་གསུངས་སོ། །དག་ཅེས་བྱ་བ་ནི་རྣམ་གཉིས་ཁོ་ན་ཚད་མ་ཡིན་ཞེས་བསྟན་པའི་དོན་དུའོ། །དེ་ལྟ་མ་ཡིན་པ་ནི། མངོན་སུམ་དང་ནི་རྗེས་དཔག་དག །ཚད་མ་ཞེས་མི་ལྡན་པའི་རྣམ་པར་ཡང་དོགས་པར་འགྱུར་རོ། །རྣམ་པ་གཉིས་སུ་ངེས་པར་གཟུང་པ་ཡང༌། བརྡ་སྤྲོད་པ་བཞིན་དུ་མངོན་སུམ་དང་ལུང་གཉིས་ཁོ་ནས་གྲངས་ངེས་པར་མི་འགྱུར་བར་བྱ་བའི་དོན་དུ། མངོན་སུམ་དང་ནི་རྗེས་སུ་དཔག་གསུངས་
སོ། །གལ་ཏེ་ཇི་ལྟར་དེ་གཉིས་ཁོ་ན་ཚད་མ་ཡིན་སྙམ་ན། སྤྱིའི་མཚན་ཉིད་དྲན་པར་བྱེད་པ་ནི་ཚད་མ་དེ་ཡང་མི་སླུ་བའི་ཕྱིར་རོ་ཞེས་བྱ་བའོ། །མི་སླུ་བ་ནི་དོན་ལ་མི་འཁྲུལ་བའི་ཕྱིར་རོ། །དོན་ལ་མི་འཁྲུལ་པ་ཡང་དོན་ལ་སྐྱེས་པས་སོ་ཞེས་བྱ་བའི་དོན་ཏོ། །འདིས་ནི་འདི་གཉིས་ཁོ་ན་དེ་ལས་སྐྱེས་པའི་ཕྱིར་ཚད་མའི་ཐ་སྙད་དུ་བྱ་བ་ཡིན་གྱི་གཞན་དུ་མ་ཡིན་ཏེ། དེ་མེད་པའི་ཕྱིར་རོ་ཞེས་བརྗོད་པ་ཡིན་ནོ། །འདི་ལ་ཕྱིར་བཟློག་པ་ནི་གལ་ཏེ་ཞེས་བྱ་བའོ། །མངོན་སུམ་དང་ཞེས་བྱ་བ་ནི་གྲུབ་པའི་མཐའོ། །འདི་ཉིད་འགྲེལ་པ་ནི་མངོན་སུམ་ཡིན་པའི་ཕྱིར་དང་ཞེས་བྱ་བའོ། །གལ་ཏེ་མི་འཁྲུལ་པ་ཉིད་སྤོང་བ་ལ་ཚད་མ་ཡིན་པར་ལན་འདེབས་པ་ཇི་ལྟར་ཡིན་སྙམ་ན། དོན་དེ་ཁོ་ནར་ནི་འདི་གཉིས་གཅིག་ཡིན་པའི་ཕྱིར་ན་འདི་ནི་ཕན་ཚུན་ཉེ་བར་མཚོན་པ་ལྷུར་བྱེད་པ་ཡིན་ནོ། །དེ་ལྟར་ན་ཡང་གཏན་ཚིགས་འདི་དམ་བཅས་པའི་དོན་གྱི་ཕྱོགས་གཅིག་ཡིན་ཏེ། མངོན་སུམ་དང་ནི་རྗེས་སུ་དཔག་པ་དག་ནི་ཚད་མ་ཡིན་ཏེ་མངོན་སུམ་དང་རྗེས་སུ་དཔག་པ་ཡིན་པའི་ཕྱིར་རོ། །སྒྲ་ལས་བྱུང་བ་དང་ཉེ་བར་འཇལ་བ་ལ་སོགས་པ་ནི་ཚད་མ་མ་ཡིན་ཏེ། སྒྲ་ལས་བྱུང་བ་ལ་སོགས་པ་ཡིན་པའི་ཕྱིར་རོ་ཞེས་བྱ་བར་རོ་ཞེ་ན། དེ་ལྟ་མ་ཡིན་ཏེ་ཐ་སྙད་སྒྲུབ་པར་འདོད་པའི་ཕྱིར་རོ། །འདི་ལྟར་མངོན་སུམ་ལ་ནི་དངོས་སུ་དོན་གྱི་རང་བཞིན་སྣང་བའི་ཕྱིར་དང༌། མེད་ན་མི་འབྱུང་བའི་རྟགས་ཀྱི་སྟོབས་ཀྱིས་བསྐྱེད་པའི་རྗེས་སུ་དཔག་པ་ལ་ནི། མི་སྣང་བར་དོན་དང་འབྲེལ་བའི་ཕྱིར་མི་སླུ་བ་བསྒྲུབ་པ་ཡིན་གྱི། སྒྲ་ལས་བྱུང་བ་ལ་སོགས་པ་རྣམས་ནི་དེ་ལྟ་མ་ཡིན་ནོ་ཞེས་བྱ་བ་ཡིན་ནོ། །འདི་ལ་གལ་ཏེ་ཞེས་བྱ་བ་ལ་སོགས་པ་ནི་གཞན་གྱི། འདི་ལྟར་ཞེས་བྱ་བ་ལ་སོགས་པའི་གྲུབ་པའི་མཐའོ། །གཞལ་བྱ་ཡོད་ན་འཁྲུལ་པ་མེད་པས་བསམ་པར་བྱ་བ་ཡང་ཡིན་ཏེ། རི་བོང་གི་རྭ་ལ་ནི་གཞལ་བྱ་ལ་མི་འཁྲུལ་པ་བསམ་པའི་སྐབས་ཡོད་པ་མ་ཡིན་ནོ། །གང་བཤད་པ་ཡིན་ནོ་ཞེས་བྱ་བ་ནི་སྔོན་གྱི་སློབ་དཔོན་གྱིས་སོ། །འོ་ན་ནི་གཞལ་བྱ་གཉིས་པོ་གཉིས་ལ། རེས་འགའ་ནི་མངོན་སུམ་མ་མ་རྗེས་སུ་དཔག་པའམ། རེས་འགའ་ནི་དེ་སྐྱེ་བའི་ཚོགས་པ་དང་བྲལ་བ་ན་ཚད་མ་གཞན་དུ་འཇུག་པར་འགྱུར་རོ་སྙམ་ན། རང་གི་མཚན་ཉིད་ནི་ཞེས་བྱ་བ་ལ་སོགས་པའོ། །དོན་འདི་ཡིན་ཏེ། མངོན་སུམ་གྱི་དོན་ནི་རེ་ཞིག་རང་ཉིད་ཤེས་པ་
ལ་གསལ་བཞིན་བ་ལ་བརྗོད་དོ། །གང་ལ་དེ་ལྟར་གསལ་བ་དེ་ཉིད་ནི་མངོན་སུམ་ཡིན་ནོ། །རང་གི་ངོ་བོས་མི་གསལ་བ་ནི་གལ་ཏེ་མེད་ན་ནི་མི་འབྱུང་བའི་སྒོ་ནས་ཀྱང་མི་རྟོག་ན་ནི་མི་རྟོག་པ་ཁོ་ནར་འགྱུར་རོ། །མེད་ན་མི་འབྱུང་བ་མ་ཡིན་པ་ལས་ཀྱང་རྟོག་ན་ནི་ཧ་ཅང་ཐལ་བར་འགྱུར་རོ། །དེས་ན་མེད་ན་མི་འབྱུང་བའི་དོན་མཐོང་བ་ལས་མེད་ན་མི་འབྱུང་བ་ཉིད་རྟོགས་པས་འགའ་ཞིག་ཏུ་ལྐོག་ཏུ་གྱུར་པ་འགའ་ཞིག་རྟོགས་པ་ཡིན་ལ། དེ་ཉིད་ནི་རྗེས་སུ་དཔག་པ་ཡིན་ནོ། །དེས་ན་གལ་ཏེ་མངོན་སུམ་དང་རྗེས་སུ་དཔག་པར་བྱ་བ་ལས་དོན་གཞན་ཡོད་པར་བསྙོན་པར་བྱ་བ་མ་ཡིན་པར་ལྟ་ཡང་ཚད་མའི་ཡུལ་མ་ཡིན་ཏེ། དེས་ན་དེ་འདྲ་བ་ཉིད་ནི་ཐེ་ཚོམ་ཟ་བ་མ་ཡིན་ནོ། །དེས་ན་གཞལ་བྱ་མེད་ཅེས་བརྗོད་ཀྱི། དོན་གཞན་མེད་དོ་ཞེས་ནི་མི་བརྗོད་དོ། །དེ་ལ་ཡང་ཇི་སྲིད་མ་ཤེས་པ་དེ་སྲིད་དུ་ནི་ཐེ་ཚོམ་ཁོ་ནའོ། །འདི་ཡང་མདུན་དུ་རྒྱས་པར་འཆད་པར་འགྱུར་རོ། །འདི་ཉིད་ཅེས་བྱ་བ་ནི་ཁོ་བོ་ཅག་གིས་མདོར་བསྡུས་ཏེ་བཤད་པ་ཉིད་དོ། །རིག་པར་བྱེད་པའི་ཚད་མ་གཉིས་ཏེ་ཡུལ་གཞལ་བྱ་གཉིས་ཕྱིར་རོ། །ཅི་ལྟར་གཉིས་ཡིན་ཞེ་ན། ཤེས་པའི་མཚན་ཉིད་ཀྱི་དོན་བྱེད་པར་དངོས་སུ་ནུས་པ་སྟེ། གསལ་བར་སྣང་བ་གང་ཡིན་པ་དང༌། གཞན་བརྒྱུད་པས་ནུས་པ་ཉིད་ནི་མི་ནུས་པ་སྟེ། དཔེར་ན་རྗེས་སུ་དཔག་པ་ལ་ལྟོས་ནས་ཡིན་པ་བཞིན་ནོ། །འདི་ཉིད་ནི་རང་གི་མཚན་ཉིད་དང་སྤྱིའི་མཚན་ཉིད་དོ་ཞེས་རིམ་གྱིས་འཆད་པར་འགྱུར་རོ། །འདིས་ནི་ཕུང་པོ་གཞན་མེད་པར་བསྟན་ཏོ། །དེས་ན་ཚད་མ་གཞན་གྱི་ནི་སྐབས་ཡོད་པ་མ་ཡིན་ནོ་སྙམ་དུ་དགོངས་པ་ཡིན་ནོ། །གལ་ཏེ་གསལ་བར་སྣང་བ་རང་གི་མཚན་ཉིད་ཡིན་ན། རབ་རིབ་ཅན་གྱིས་དམིགས་པའི་སྐྲ་ཤད་ལ་སོགས་པ་ཡང་རང་གི་མཚན་ཉིད་དུ་ཐལ་བར་འགྱུར་རོ་སྙམ་ན་བཤད་པ། སྐྲ་ཤད་ལ་སོགས་དོན་མེད་དོ། །རང་གི་མཚན་ཉིད་མ་ཡིན་ཏེ། །ཐ་སྙད་དུ་ནི་བྱེད་པ་རྣམས་དོན་དུ་མོས་པ་མེད་པའི་ཕྱིར་རོ། །མངོན་སུམ་དང་ཞེས་བྱ་བ་ལ་སོགས་པ་ནི་རྣམ་པར་འགྲེལ་པའོ། །དེ་ལྟ་མ་ཡིན་ན་ཞེས་བྱ་བ་མངོན་སུམ་དང་རྗེས་སུ་དཔག་པའི་ཁྱད་པར་མེད་པ་ནིའོ། །སྟོན་པར་འགྱུར་རོ་ཞེས་བྱ་བ་ནི། དེ་ནི་རང་གཞན་ངོ་བོ་ཡིས། །ཞེས་བྱ་བའི་ནང་དུའོ། །དེ་ལ་འདི་སྙམ་དུ་གཞལ་བྱ་གཉིས་ཕྱིར་ཞེས་བྱ་བའི་གཏན་ཚིགས་ནི། གཞི་དང་འབྲེལ་པར་མ་གྲུབ་
པ་ཡིན་ཏེ། བསྒྲུབ་པར་བྱ་བ་ནི་ཚད་མ་གཉིས་སུ་བསྒྲུབ་པར་བྱ་བ་ཡིན་ལ། དེ་ལས་གཞན་གཞལ་བྱ་གཉིས་ནི་གཏན་ཚིགས་ཡིན་པའི་ཕྱིར་རོ་སྙམ་ན། བཤད་པ་མངོན་སུམ་ཉིད་རྗེས་སུ་དཔག་པར་བྱ་བའི་རྣམ་པ་ལས་གཞན་པའི་རྟོག་པ་ཡོད་པ་མ་ཡིན་ཏེ། རྒྱུ་དེའི་ཕྱིར་ན་གཞལ་བྱ་གཉིས་པོ་དེ་ལས་གཞན་པའི་ཚད་མར་མངོན་པར་འདོད་པ་མཆོག་ཏུ་གྱུར་པ་ཡོད་པ་མ་ཡིན་ཏེ། ཚད་མ་ལ་སྟོན་པ་གཞན་མེད་དོ་ཞེས་བྱ་བའི་ཐ་ཚིག་གོ །དེ་ཉིད་རྣམ་པར་འགྲེལ་བ་ནི་མངོན་སུམ་དང་ཞེས་བྱ་བ་ལ་སོགས་པའོ། །བསམ་པ་ནི་འདི་ཡིན་ཏེ། གཞལ་བྱ་ལ་གནས་པའི་ཆོས་ཉིད་བཟུང་ནས་གཏན་ཚིགས་སུ་ལེན་པ་མ་ཡིན་གྱི། འོན་ཀྱང་མངོན་སུམ་གྱི་རྣམ་པའམ། རྗེས་སུ་དཔག་པར་བྱ་བའི་རྣམ་པར་རྟོག་པར་འཇུག་པ་ཤེས་པ་ལ་གནས་པར་ཆོས་གང་ཡིན་པའོ། །དེས་ནི་འཛིན་པ་ཁྱབ་པ་ཡིན་ནོ། །དེས་ན་ཚད་མ་གཞན་དུག་ལ་འགྱུར་སྙམ་དུ་དགོངས་པའོ། །གལ་ཏེ་དེ་ལྟ་ན་ཡང་འདི་ཉམས་སུ་མྱོང་བ་དང་འགལ་བ་མ་ཡིན་ནམ་དོན་འགའ་ཞིག་ཀྱང་མངོན་སུམ་ལ་འབའ་ཞིག་གམ། རྗེས་སུ་དཔག་པར་བྱ་བ་ཁོ་ན་ཡིན་པར་ནི་མཐོང་བ་མེད་དོ་སྙམ་ན། ཡུལ་གཅིག་ཉིད་ཀྱང་ཞེས་གསུངས་སོ། །མངོན་སུམ་ལ་སོགས་པ་རང་བཞིན་གྱི་ཡུལ་ཐ་དད་པ་ནི་མ་ཡིན་གྱི་འོན་ཀྱང་གཅིག་ཉིད་རེས་འགའ་ནི་དངོས་སུ་སྣང་བ་ཡིན་ལ། རེས་འགའ་ནི་རྣམ་པ་གཞན་དུ་ཡིན་ཏེ། དེས་ན་ཉམས་སུ་མྱོང་བས་གྲུབ་བས་རྟོག་པའི་ཚུལ་ཐ་དད་པར་རྣམ་པར་གཞག་པ་ཡིན་ནོ་ཞེས་བྱ་བའི་དོན་ཏོ། །འོ་ན་འདི་རྟོག་པའི་དབྱེ་བ་ཁོ་ནར་འགྱུར་མོད། ཡུལ་གྱི་དབྱེར་བར་རྣམ་པར་གཞག་པར་གོ་ཇི་ལྟར་བྱེད་སྙམ་ན། རྟོག་པའི་དབྱེ་བ་ཡང་ཞེས་གསུངས་སོ། །གལ་ཏེ་ཡུལ་གྱི་དབྱེ་བ་བརྗོད་པར་རྩོམ་པ་མ་ཡིན་ནམ། ཚད་མའི་དབྱེ་བ་ཉེ་བར་བསྟན་པ་ཡང་ཚད་མའི་དབྱེ་བར་གྲུབ་པའི་དོན་དུ་ཡིན་ན། གལ་ཏེ་དེ་ན་གྲུབ་པར་ཡང་ཚད་མའི་དབྱེ་བ་གྲུབ་ན་ནི་གཞལ་བྱའི་དབྱེ་བ་ལ་སྟོན་པ་དོན་མེད་པར་འགྱུར་ལ། ཕན་ཚུན་དོན་མེད་ཉེས་པས་འགྱུར་རོ་སྙམ་ན། དེ་ཉིད་ནི་ཞེས་གསུངས་སོ། །ཚད་མའི་དབྱེ་བ་ཉིད་ཡུལ་གྱི་དབྱེ་བ་ཡིན་པའི་ཕྱིར་རྩོད་པའི་དང་པོ་མེད་དོ། །གལ་ཏེ་ཞེས་བྱ་བ་ནི་གཞན་གྱིའོ། །དེ་ནི་བདེན་ཏེ་ཞེས་བྱ་བ་ནི་གྲུབ་པའི་མཐའོ། །དོན་ནི་འདི་ཡིན་ཏེ། རྣམ་པ་ཐམས་ཅད་དུ་གཞན་ཐ་དད་པ་གཞན་གྱིའོ། །
གཞན་ཐ་དད་པས་ཁྱབ་པ་ནི་མ་ཡིན་ཏེ་འབྲེལ་བ་མེད་པའི་ཕྱིར་རོ། །ཤེས་པ་དང་ཤེས་བྱ་དག་ནི་མ་འབྲེལ་པ་མ་ཡིན་ནོ། །གཅིག་ཐ་དད་པ་ན་གཞན་ཐ་དད་པར་སྒྲུབ་པར་བྱེད་པའི་འབྲེལ་པ་དེ་ཉིད་སྟོན་པ་ནི་ཤེས་པ་དང་ཤེས་བྱ་དག་ནི་ཞེས་བྱ་བའོ། །ངེས་པ་ཞེས་བྱ་བ་ནི་དེ་ཁོ་ན་ལྟར་ཡིན་ནོ་ཞེས་བྱ་བར་མོས་པའོ། །འདི་ག་ལས་ཡིན་སྙམ་ན་ཤེས་པ་གཞན་ལས་ཞེས་བྱ་བའོ། །གང་ལའང་ངོ་བོ་སྣང་གི་མེད་པའི་དོན་གཞན་ཉིད་དུ་སྟེ་སྤྱིའི་རྣམ་པ་ཅན་ལྐོག་ཏུ་གྱུར་པ་ཉིད་དུ་ཤེས་པར་བྱེད་དོ། །དེས་ན་ཤེས་པའི་ཚུལ་ཐ་དད་པ་ལས་ཡུལ་ཐ་དད་པ་རྣམ་པར་གཞག་གོ་ཞེས་རིགས་ཏེ། བེམས་པོའི་བདག་ཉིད་ཅན་དོན་གྱི་རྣམ་པར་གཞག་པ་ནི་དེ་ལ་རག་ལས་པའི་ཕྱིར་རོ། །འདིས་ནི་མངོན་སུམ་ཚད་མ་གཉིས་གྲུབ་པར་བརྗོད་པ་ཡིན་ནོ། །འོན་ཀྱང་དོན་རྟོགས་པ་ཇི་སྙེད་པ་དེ་སྙེད་ནི་རྣམ་པ་གཉིས་ཀྱིས་ཡིན་ཏེ། མངོན་སུམ་སྣང་བ་དང་སྤྱིའི་རྣམ་པའོ། །ཚད་མ་འདི་ཇི་སྙེད་པ་དང་ཅི་འདྲ་བ་ཞིག་ཡིན་པ་མ་ཡིན་ཏེ། དེས་ནི་འདི་ནི་གཞལ་བྱ་གཉིས་ཀྱིས་རྣམ་པར་གཞག་པ་ཡིན་ཏེ། དེ་གྲུབ་པ་ན་ཡང་གང་ཞིག་དངོས་སུ་བྱེད་པས་ཤེས་པ་དེ་ནི་མངོན་སུམ་ཉིད་ལ་ཡིན་ལ། གཞན་ནི་རྗེས་སུ་དཔག་པ་ཉིད་ཡིན་ནོ། །དེས་ན་ཚད་མ་ཡང་རྣམ་པ་གཉིས་ཡིན་པར་ཐ་སྙད་གྲུབ་པ་ཡིན་ནོ། །དེ་ན་མཐའ་ཡོངས་སུ་དགག་པ་ལ་ལྟོས་ནས་ཚད་མའི་དབྱེ་བ་ཡིན་ནོ་ཞེས་བརྗོད་པ་ཡིན་ནོ། །ཕྱིས་ཀྱི་རྩོམ་པ་ལ་ལྟོས་ཏེ་དེ་ནི་ཤེས་པ་ལ་རག་ལས་པ་ཡིན་ཏེ། དེས་རྩད་གཅོད་པ་གཉིས་པ་ཡང་མེད་དོ། །ཕན་ཚུན་བསྟན་པ་ཡང་མ་ཡིན་ཏེ། ཚད་མ་གཉིས་དང་པོར་གྲུབ་པར་བརྗོད་པར་མི་འདོད་པའི་ཕྱིར་རོ། །ཤེས་བྱའི་དོན་རྣམས་ལ་གཉིས་ཞེས་བྱ་བ་ཙམ་གྱིས་ཡུལ་རྣམ་པ་གཉིས་གྲུབ་པའི་ཕྱིར་རོ། །གལ་ཏེ་དེ་ལྟ་ན་ཤེས་བྱའི་དོན་རྣམ་པ་གཉིས་ཞེས་བྱ་བ་ཙམ་གྱིས་ཚད་མ་གཉིས་སུ་བརྗོད་པར་བྱའི་དེའི་སྒོ་ནས་ཡུལ་རྣམ་པ་གཉིས་ཡིན་ཞིང་དེ་ལས་ཀྱང་ཚད་མ་རྣམ་པ་གཉིས་ཡིན་ནོ་ཞེས་བྱ་བའི་བརྒྱུད་པ་ལ་དོན་ཅི་ཡོད་སྙམ་ན། བདེན་ཏེ་ཡུལ་གྱི་དབྱེ་བ་མ་བསྟན་ན་ནི་དེ་ཉིད་རྣམ་པ་གཉིས་ཀྱིས་རིག་པར་བྱ་བ་ཡིན་པའི་ཕྱིར་ཚད་མ་གཅིག་ཉིད་དུ་འཛིན་པར་འགྱུར་རོ། །མིག་གཉིས་ཀྱིས་འཛིན་པ་བཞིན་ནོ། །འོན་ཏེ་མིག་གཉིས་ཀྱིས་བཟུང་བ་དང་ཆོས་མི་མཐུན་པར་གཅིག་ཉིད་རྣམ་པ་གཞན་དུ་སྣང་བའི་ཕྱིར་
ན་ཚད་མ་ཐ་དད་པ་ཡིན་ནོ་སྙམ་ན། དེ་ལྟ་ན་ནི་འོ་ན་སྣང་བཞིན་པ་ཡུལ་གྱི་རྣམ་པ་ཐ་དད་པའི་ཕྱིར་ཚད་མ་ཐ་དད་པ་ཡིན་པའི་ཕྱིར་ན། ཚད་མའི་དབྱེ་བ་ནི་ཡུལ་གྱི་དབྱེ་བ་ཉིད་ཀྱིས་བྱ་བར་འགྱུར་བ་ཡིན་ནོ་སྙམ་དུ་དགོངས་པའོ། །དོན་བྱེད་ནུས་དང་མི་ནུས་ཕྱིར། །ཞེས་བྱ་བ་བཤད་པའི་ཕྱིར་གང་གི་ཚེ་ཞེས་པ་བསྐྱེད་པ་ལ་ཞེས་གསུངས་སོ། །གང་གིས་དོན་བྱེད་པ་ལ་ཞེས་སྤྱིར་བསྟན་པ་ཁྱད་པར་འདི་ཡང་ག་ལས་ཡིན་ཏེ། འདི་སྐད་དུ་འགྲེལ་པ་བྱེད་པས་རྣམ་པ་གང་ཞིག་གིས་དོན་བྱ་བས་འགའ་ཞིག་ལ་ནུས་པ་དེ་ནི་རང་གི་མཚན་ཉིད་ལ། ནུས་པ་ཐམས་ཅད་དང་བྲལ་བ་ནི་སྤྱིའི་མཚན་ཉིད་ཡིན་ནོ་ཞེས་བཤད་པ་ཡིན་ནོ། །དེ་ཉིད་ནི་རིགས་པར་ཡང་མཐོང་ངོ་སྙམ་ན། འདི་བཟློག་པའི་ཕྱིར་ན་མ་ཡིན་པར་འཇུག་པས་ཞེས་གསུངས་སོ། །འདི་ལ་བསམ་པ་ནི་གང་གི་ཕྱིར་ཚད་མའི་ཡུལ་དཔྱད་པའི་སྐབས་ཡིན་ལ། ཚད་མ་ཡང་དོན་བྱ་བའི་ཡུལ་ཅན་ཉིད་དཔྱད་པར་བྱ་བ་ཡིན་ཏེ། དོན་བྱེད་ནུས་པ་མ་ཡིན་ལ། །དེ་འདོད་བརྟགས་པས་ཅི་ཞིག་བྱ། །མ་ནིང་གཟུགས་བཟང་མི་བཟང་ཞེས། །འདོད་ལྡན་མས་ནི་བརྟགས་ཅི་ཕན། །ཞེས་གསུངས་པའི་ཕྱིར་རོ། །མི་དམིགས་པ་ཡང་རང་བཞིན་གྱི་གཏན་ཚིགས་ཀྱི་རྣམ་པ་ཉིད་ཡིན་པས་དངོས་པོའི་ཡུལ་ཅན་ལས་འདས་པ་མ་ཡིན་ནོ། །དེ་ལ་རང་གི་མཚན་ཉིད་ཀྱི་ཡུལ་མངོན་སུམ་སྤྱིའི་མཚན་ཉིད་ཀྱི་ཡུལ་ཅན་ནི་རྗེས་སུ་དཔག་པ་ཡིན་ནོ་ཞེས་དགོངས་ན་ས་ཡུལ་གཉིས་རྣམ་པར་གཞག་པ་ཡིན་ནོ། །གལ་ཏེ་སྤྱིའི་མཚན་ཉིད་དོན་བྱེད་ནུས་པ་མ་ཡིན་ན། དེའི་ཚེ་རྗེས་སུ་དཔག་པ་ཚད་མ་ལས་ཉམས་པ་ཉིད་དུ་འགྱུར་རོ། །ལྷག་པར་ཞེན་པའི་ཡུལ་ལ་ལྟོས་ནས་ཚད་མ་ཡིན་གྱི། གཟུང་བའི་ཡུལ་ལ་ལྟོས་ནས་ནི་མ་ཡིན་ནོ། །འོན་ཏེ་དེའི་ཡུལ་ཅན་ཚད་མ་འགག་པ་ཡོད་པ་མ་ཡིན་མོད། དེ་ལྟ་ན་ཡང་སྤྱིའི་མཚན་ཉིད་བརྗོད་པ་ཡིན་ན། དེ་ལྟ་ན་ཡང་སྐབས་མ་ཡིན་པ་བརྗོད་པ་ཉིད་ཉེས་པ་ཡིན་ནོ། །གཞན་ཡང་གལ་ཏེ་དོན་བྱ་བ་མི་ནུས་པ་ཉིད་སྤྱིའི་མཚན་ཉིད་ཡིན་པར་བརྗོད་ན། དེའི་ཚེ་སྒྲ་ལ་སོགས་པ་ཡང་སྤྱིའི་འགྱུར་རོ། །གསལ་བར་སྣང་བ་དང་འགར་ཡང་རྗེས་སུ་འགྲོ་བ་མེད་པའི་ཕྱིར་ན་སྤྱིའི་ནང་དུ་འདུ་བ་མ་ཡིན་ནོ་སྙམ་ན། དེ་ལྟ་ན་ཡང་ཁྱད་པར་གཞན་ལ་ལྟོས་ནས་མཚན་ཉིད་ཡིན་པར་ཉེ་བ་ཆེན་པོ་ཡིན་ནོ། །དེས་ན་ཡུལ་གསུམ་
པར་དོགས་པ་ན། སྐྲ་ཤད་ལ་སོགས་པ་དོན་མིན་ཏེ་ཞེས་བྱ་བས་འཇུག་པར་བྱེད་པ་ཡང་མི་འཐད་དེ། སྤྱི་ཉིད་ཀྱི་ནང་དུ་འདུ་བའི་ཕྱིར་རོ། །དེ་བས་ན་ཤེས་པའི་སྣང་བའི་དབྱེ་བས་ཡུལ་རྣམ་པ་གཉིས་སུ་བརྗོད་པའི་སྐབས་ཡིན་ཏེ། ངེས་ན་སྐབས་ལས་སམ་ཉེ་བ་ལས་བརྒྱུད་ནས་ཤེས་པ་སྐྱེད་པར་ནུས་པ་ཉིད་དོན་བྱེད་མི་ནུས་པར་བརྗོད་པ་ཡིན་ནོ། །གཞུང་ནི་རྟོགས་པར་སླ་བ་ཉིད་དོ། །གལ་ཏེ་གསལ་བར་སྣང་བ་དག་གིས་དངོས་སམ་བརྒྱུད་ལས་ནུས་པ་ཉིད་དུ་རྣམ་པར་གཞག་ན་སྒྲ་ལ་སོགས་པར་སྣང་བ་དང༌། སྒྲ་ལས་བྱུང་བ་ཡང་སོགས་པའི་སྣང་བ་ཡང་དེ་ལྟར་ཐལ་བར་འགྱུར་ཏེ། གོ་རིམས་བཞིན་དུ་གསལ་བ་དང་མི་གསལ་བ་དག་ཡོད་པའི་ཕྱིར་རོ། །དེས་ན་དེའི་ཡུལ་ཅན་གྱི་ཤེས་པ་ཚད་མར་ཐལ་བར་འགྱུར་རོ་སྙམ་དུ་དོགས་པ་བསུ་ནས་རབ་རིབ་ཅན་གྱིས་ཞེས་གསུངས་སོ། །དོན་འདི་ཡིན་པ་ཡང་སྟེ་གང་དང་གང་དུ་གསལ་བ་དང་མི་གསལ་བར་སྣང་བ་ཡོད་པ་དེ་དང་དེར་དེ་ལྷག་པར་ཞེས་བྱས་པ་དངོས་སམ་བརྒྱུད་པས་ནུས་པ་ནི་མ་ཡིན་གྱི། འོན་ཀྱང་གང་ལ་དོན་བྱ་བར་ནུས་པ་ཡོད་པ་དེར། དངོས་སམ་བརྒྱུད་པས་ཡིན་ཏེ། རྣམ་པ་གཞན་མི་སྲིད་པའི་ཕྱིར་རོ། །གང་དུ་དངོས་སུ་ནུས་པ་དེར་ནི་གསལ་བར་སྣང་བ་ཡིན་ལ། གང་དུ་བརྒྱུད་ནས་ནུས་པ་ཡོད་པ་དེར་ནི་གསལ་བར་སྣང་བ་ཡིན་ནོ། །དེས་ན་གང་གིས་དེའི་ཡུལ་ཅན་ཚད་མར་འགྱུར་བ། སྐྲ་ལ་སོགས་པ་ནུས་པར་ཇི་ལྟར་ཐལ། རབ་རིབ་ཅན་གྱིས་དམིགས་པ་ཞེས་བྱ་བ་ནི་དམིགས་པ་ཉིད་དུ་ལྷག་པར་ཞེན་པའོ། །དེ་བཞིན་དུ་སྐྲ་ལས་བྱུང་བ་ལ་སོགས་པས་དམིགས་པ་ལ་ཡང་དོན་ཉིད་ཡོད་པ་མ་ཡིན་ཏེ། གཉི་ག་ལྟར་ཡང་ནུས་པ་མ་གཏོགས་པའི་ཕྱིར་རོ། །ཅིའི་ཕྱིར་ཞེ་ན་དོན་དུ་མོས་པའི་ཕྱིར་རོ། །ཇི་ལྟར་བདེན་པའི་སྐྲ་ལ་སོགས་པའི་སྣང་བའི་ཤེས་པའམ། མེ་ལ་སོགས་པའི་རྗེས་སུ་དཔག་པ་ལ་སྣང་བ་ལས་བླ་ལྷག་ཏུ་གྱུར་པ། འཆིང་བ་དང་བུད་ཤིང་བསྲེགས་པ་ལ་སོགས་དོན་བྱ་བ་བྱེད་པའི་སྟོབས་ཀྱིས་ལོགས་ཤིག་ཏུ་དོན་དུ་མོས་པས་དེས་ན་སྣང་བ་འདི་ནི་དེས་བྱས་པ་ཡིན་ནོ་ཞེས་རྣམ་པར་འཇོག་པ་དེ་བཞིན་དུ་འདིར་ནི་རྣམ་པར་གཞག་པར་མི་ནུས་ཏེ། བྱེད་པ་ཐ་དད་པ་མེད་པའི་ཕྱིར་དང༌། སྒྲ་ལས་བྱུང་བ་ལ་སོགས་པར་ནི་ངེས་པ་མེད་པའི་ཕྱིར་རོ། །མོས་པའི་སྒྲས་ནི་འདི་སྐད་དུ་བརྗོད་པ་ཡིན་ཏེ། ཡོད་པར་མངོན་པར་འདོད་ཀྱང་དེ་ནི་མོས་པ་ཙམ་
དུ་ཟད་པ་ཡིན་ལ། སྐྲ་ལ་སོགས་པ་ལ་ནི་དེ་ཡང་ཡོད་པ་མ་ཡིན་ནོ་ཞེས་བྱ་བ་ཡིན་ནོ། །འདི་ལ་ཡང་གཏན་ཚིགས་བཤད་པ་ནི་མོས་པ་མེད་པ་ཡང་ཞེས་བྱ་བའོ། །འདི་ཡང་ལྷག་པར་ཞེན་པར་བྱ་བའི་ཡུལ་ལ་ལྟོས་པ་ཁོ་ནས་སྦྱར་བ་ཡིན་ནོ། །ཡང་གང་གི་ཚེ་འབྲེལ་པ་བྱེད་པའི་དབང་གིས། སྣང་བཞིན་པ་ཉིད་ལ་དཔྱད་པ་འདི་ཡིན་པ་དེའི་སྐྲ་ལ་སོགས་པ་དང་སྐྲ་ལས་བྱུང་བ་ལ་སོགས་པའི་སྣང་བ་དོན་མིན་ཏེ། དངོས་པོ་མ་ཡིན་ཏེ། དེར་སྣང་བའི་ཤེས་པ་ལ་རྣམ་པ་གཉིས་ཀ་ལྟར་ཡང་ནུས་པ་རྟོགས་པ་མེད་པའི་ཕྱིར་ཏེ། ཐ་མི་དད་པ་ཉིད་ཀྱི་ཕྱིར་ཏེ། རང་གི་བདག་ཉིད་ལ་ནུས་པ་ཡོད་པ་ནི་འགའ་ལའང་མི་སྲིད་དོ། །དེ་ལྟ་ན་ཡང་ཅིའི་ཕྱིར་དངོས་པོ་མ་ཡིན་ཏེ། ནུས་པ་ཐམས་ཅད་ཀྱིས་སྟོང་པའི་ཕྱིར་རོ་ཞེ་ན། དེ་ནི་མ་གྲུབ་བོ། །བདག་གིས་སྒྲ་ལ་སོགས་པ་དམིགས་སོ་སྙམ་དུ་ལྷག་པར་ཞེན་པ་དང༌། དེས་བྱས་པ་འཇུག་པ་ངེས་པ་ལ་སོགས་པ་ལ་གོ་རིམས་བཞིན་དུ་དངོས་དང་བརྒྱུད་པས་ནུས་པ་གྲུབ་པའི་ཕྱིར་རོ། །དེ་ལ་ནི་ལྷག་པར་ཞེན་པར་བྱས་པའི་འཆིང་བའི་ནུས་པ་ཉིད་མེད་པ་ཡིན་གྱི། རྣམ་པ་ཐམས་ཅད་དུ་དེའི་འབྲས་བུ་ལ་དེའི་ནུས་པ་མེད་པ་ནི་མ་ཡིན་ནོ། །དེས་ཇི་ལྟར་དངོས་པོ་མ་ཡིན་སྙམ་དུ་དོགས་ན། དོན་དུ་མོས་པ་མེད་པའི་ཕྱིར་ཏེ་ཞེས་གསུངས་སོ། །འདི་སྐད་བརྗོད་པ་ཡིན་ཏེ། དེ་ཁོ་ནར་ནི་དོན་མེད་པ་མ་ཡིན་མོད་ཀྱི་ཐ་དད་པ་རྣམས་ལྷག་པར་མོས་པ་མེད་པས་ནི་དོན་མ་ཡིན་པར་བརྗོད་པ་ཡིན་ནོ། །དེའི་དོན་བྱ་བ་དོན་དུ་གཉེར་བ་དེ་དག་ནི་དེ་ལ་འཇུག་པར་བྱ་བའི་དོན་དུ། དེར་ལྷག་པར་ཞེན་པ་ལ་ཡང་ལྟོས་པ་ཡིན་ནོ། །མངོན་པར་འདོད་པའི་དོན་བྱ་བ་མེད་ན་ནི་ལྷག་པར་ཞེན་པས་ཀྱང་དོགས་པ་ཅུང་ཟད་མེད་དོ། །དེས་ན་དོན་མེད་པ་ཉིད་དུ་ལྷག་པར་མོས་པ་ཡིན་ནོ། །འདིས་ནི་གང་འགའ་ཞིག་ཏུ་དོན་མེད་པ་སྣང་བར་བརྗོད་པ་དེར་ནི་འཇིག་རྟེན་གྱི་ངོར་ཡིན་གྱི། དེ་ཁོ་ནས་ནི་མ་ཡིན་ནོ་ཞེས་བྱ་བའོ། །འོ་ན་ཐ་སྙད་བྱེད་པ་པོ་རྣམས་ཀྱང་དོན་མེད་པར་མོས་པར་ཇི་ལྟར་འགྱུར་ཏེ། མཐོང་བ་དང་ལྷག་པར་ཞེན་པ་དང་འཇུག་པ་རྣམས་ནི་དེ་ལ་ཡང་ཡོད་པའི་ཕྱིར་རོ་སྙམ་ན། མོས་པ་མེད་པ་ཡང་ཞེས་གསུངས་སོ། །ཡང་ན་སྣང་བའི་རྣམ་པ་ལ་ཡང་དེ་ཁོ་ནར་དོན་མེད་པ་ཡང་མ་ཡིན་པ་ཅི་སྟེ་མེད་སྙམ་ན། མོས་པ་མེད་པ་ཡང་ཞེས་གསུངས་སོ། །སྣང་བ་ལ་ནི་གནོད་པར་བྱེད་པ་ཡོད་པ་མ་ཡིན་ནོ་སྙམ་དུ་དོགས་པའོ། །གནོད་
བྱེད་ནི་རྗེས་སུ་དཔག་པ་ལས་གཞན་མེད་པ་ལ། སྣང་བའི་རང་བཞིན་ནི་རང་རིག་པའི་མངོན་སུམ་དུ་འདུས་པའི་ཕྱིར་གནོད་པ་འགའ་ཡང་མེད་དོ། །གང་གི་ཚེ་དོན་གྱི་སྒྲ་ཡུལ་གྱི་དོན་ལ་འཇུག་པ་དེའི་ཚེ། ཐ་སྙད་འདོགས་པ་པོ་རྣམས་ཡུལ་ཉིད་དུ་ལྷག་པར་མོས་པ་མེད་དོ་ཞེས་བྱ་བའི་དོན་ཏོ། །དེ་ལ་གལ་ཏེ་ཡུལ་ཙམ་ཞིག་བརྗོད་པར་འདོད་ན་དེའི་ཚེ་ནི་དེ་མོས་པ་གྲུབ་པ་ཁོ་ན་སྟེ། བདག་ལ་སྐྲ་ལ་སོགས་པ་སྣང་ངོ་ཞེས་མོས་པ་ཡོད་པའི་ཕྱིར་རོ། །བརྫུན་པའི་ཁྱད་པར་ཅན་དུ་ངེས་ཀྱང་དེའི་ཡུལ་ཙམ་ཞིག་སྙམ་དུ་མེད་པའི་ཕྱིར་རོ། །དེའི་ཕྱིར་ཁྱད་པར་ཅན་གྱི་ཡུལ་ཉིད་ནི་བདེན་པའི་ཁྱད་པར་ཅན་དུ་བརྗོད་པར་བྱ་བ་ཡིན་པའི་ཕྱིར། བདེན་པ་ཉིད་ལ་རྒལ་བ་དང༌། ལན་གདབ་པར་རིགས་པ་ཡིན་ནོ། །དེས་དེ་ལྟར་དངོས་སམ་བརྒྱུད་པས་ནུས་པ་ཐ་དད་པ་ན་ཡུལ་རྣམ་པ་གཉིས་སུ་རྣམ་པར་གཞག་ནས། གཞན་རྣམ་པ་གསུམ་གྱི་སྒོ་ནས་བསྟན་པའི་ཕྱིར་བརྗོད་པ་ནི། འདི་ལས་ཀྱང་ཞེས་བྱ་བའོ། །གང་ཞིག་དཔེ་དང་འདྲ་བའི་ངོ་བོ་ཉིད་དུ་རྟོགས་པ་དེ་ལ་ནི་སྤྱིའི་མཚན་ཉིད་ཡིན་ལ། གང་ཞིག་ཐམས་ཅད་ལས་ལྡོག་པ་ཉིད་དུ་རྟོགས་པ་དེ་ནི་རང་གི་མཚན་ཉིད་ཡིན་ནོ། །དེ་བཞིན་དུ་གང་ཞིག་སྒྲའི་ཡུལ་ཉིད་དུ་རྟོགས་པ་ད་ནི་སྤྱི་ཡིན་ལ། གཞན་ནི་རང་གི་མཚན་ཉིད་ཡིན་ནོ། །དེ་བཞིན་གང་ལ་ཡུལ་ལས་གཞན་པའི་རྒྱུ་མཚན་རྣམས་ཡོད་པ་པོ་ཡོད་པ་དེ་ནི་སྤྱི་ཡིན་ལ་གང་ལ་མེད་པ་དེ་ནི་རང་གི་མཚན་ཉིད་དོ་ཞེས་བྱ་བ་ནི་རྣམ་འགྲེལ་གྱི་སྡེ་བ་སྦྱོར་ཙམ་ཡིན་ནོ། །རྣམ་པ་དང་པོ་ལ་ཧ་ཅང་ཁྱད་པར་དོགས་པ་བསུ་བ་ནི། གལ་ཏེ་ཞེས་བྱའོ། །དེ་ལས་ཀྱང་ཅིར་འགྱུར་ཞེ་ན། བརྗོད་པ་ལ་གལ་ཏེ་ཁྲ་བོ་ལ་སོགས་པ་དང་འདྲ་བ་ལ་སེར་སྐྱ་ལ་སོགས་པར་རྟོགས་པ་སྤྱི་ཡིན་ན། དེའི་ཚེ་རང་གི་མཚན་ཉིད་ཀྱང་སྤྱིར་འགྱུར་ལ། སྤྱི་ཡང་རང་གི་མཚན་ཉིད་དུ་འགྱུར་རོ། །དེས་ན་ཚད་མ་གཉིས་ཡུལ་གཅིག་ལ་མི་འཇུག་པར་མ་ངེས་པར་འགྱུར་ལ་དེ་ལྟ་ཡིན་ཡང་ཇི་ལྟར་ཡུལ་གཅིག་ལ་གཉིས་འཇུག་པ་དེ་བཞིན་དུ་གསུམ་པ་འཇུག་པར་འགྱུར་རོ། །ཡུལ་གྱི་རང་བཞིན་མ་འཆོལ་བ་ལ་ནི་ཉེས་པ་འདིར་མི་འགྱུར་ཏེ། ཡུལ་གཉིས་ལ་ཚད་མ་གཉིས་ཀྱིས་འཇུག་པ་ངེས་པའི་ཕྱིར་རོ། །དེ་ཡང་འཐད་པ་མ་ཡིན་ནོ་ཞེས་བརྗོད་པ་ཡིན་ནོ། །དེའི་ཡུལ་ཅན་འདྲ་བར་རྟོགས་པ་ཡང་ཚད་མ་གཞན་དུ་ཐལ་བར་འགྱུར་ཏེ། རྟགས་ལས་མ་
སྐྱེས་པའི་ཕྱིར་རོ། །དེ་བཞིན་དུ་ཞེས་བྱ་བ་ནི་མཚུངས་པར་བརྗོད་པ་དང༌། འབྲེལ་བའི་རྟོགས་པ་ནི་ཉེ་བར་འཇལ་བ་ཡིན་ནོ་ཞེས་བྱ་བ་རིག་པ་ཅན་གྱི་ཉེ་བར་འཇལ་བ་སྟོན་པའོ། །འདི་ལྟར་བ་མེན་ནི་བ་ལང་དང་འདྲ་བ་ཡིན་ནོ་ཞེས་བྱ་བ་ཉེ་བར་སྟོན་པའི་ངག་གིས་འདུ་བྱེད་བསྐྱེད་པ་ཅན་ནི་བ་མེན་མཐོང་བ་ལས་དེ་བསད་པ་ན་བ་མེན་གྱི་སྒྲ་བརྗོད་པར་བྱ་བ་དེ་ནི་འདི་ཡིན་ནོ་སྙམ་དུ་རྟོགས་པ་ནི་ཉེ་བར་འཇལ་བ་ཡིན་ནོ། །དེའི་ཡུལ་ཡང་སྤྱིའི་མཚན་ཉིད་ཡིན་ན་ནི། ཉེ་བར་འཇལ་བ་ཡང་རྗེས་སུ་དཔག་པའི་ཡུལ་ཉིད་དེ། སྐྱེ་བའི་ཚོགས་པ་དང་བྲལ་བ་ལ་ཚད་མ་གཞན་ཡིན་པར་ཐལ་བར་འགྱུར་རོ་ཞེས་བྱ་བ་ནི་རྩོད་པའི་དོན་ལ་ཡང་གང་ཞིག་འདྲ་བའི་རང་བཞིན་དུ་རྟོགས་པ་དེ་ནི་སྤྱིའི་མཚན་ཉིད་དོ་ཞེས་ནི་ངེས་པར་མི་འཛིན་ནོ་ཞེས་བརྗོད་པ་ནི། འདྲ་བའི་ངོ་བོ་ཉིད་དུ་ནི་ཞེས་བྱ་བའོ། །འདྲ་བའི་ངོ་བོ་ཉིད་དུ་ཞེས་བྱ་བ་ནི་ཁྱད་པར་གྱི་ངོ་བོ་ནི་མ་ཡིན་པའོ། །འདིར་ནི་ངོ་བོ་ཞེས་བྱ་བ་ནི་ཁྱད་པར་ཡང་རིག་པ་ཡོད་པ་ཡིན་ཏེ། དེས་ན་སྤྱིའི་མཚན་ཉིད་དུ་འགྱུར་བའི་གོ་སྐབས་མེད་དོ། །འོ་ན་རང་བཞིན་གཉིས་ཀ་ཡུལ་དུ་འགྱུར་རོ་ཞེས་བྱ་བའི་རྩོད་པའང་གཞལ་བྱ་དེས་ན་ཁ་དོག་གི་རྟགས་ནི་རྟོགས་མི་འགྱུར་ཞེས་བྱ་བ་དེའི་སྐབས་སུ་སྤངས་བར་བྱ་བའོ། །འོ་ན་འགྲེལ་པར་ཡང་གི་སྒྲ་ཅི་སྟེ་མི་སྟོན་སྙམ་ན། དེ་ཁོ་ན་ནི་འདྲ་བར་རྟོགས་པ་མེད་པ་ཉིད་དེ། འོན་ཀྱང་དེའི་འདོད་པའི་རྗེས་སུ་འབྲང་ནས་གཉི་གའི་རང་བཞིན་ཡོད་ཀྱང་ཅིའི་མཚན་ཉིད་དུ་འགྱུར་བའི་གོ་སྐབས་མེད་དོ་ཞེས་བརྗོད་པ་ཡིན་ནོ། །འདི་གཞན་གྱིས་གལ་ཏེ་འདྲ་བའི་ཞེས་སྨྲ་བའོ། །མ་ཡིན་ཏེ་ཞེས་བྱ་བ་ནི་འདྲ་བའི་ངོ་བོ་ཉིད་དུ་རྟོགས་པ་འགོག་པའོ། །མདུན་ན་གནས་པའི་རང་བཞིན་ལས་ཐ་དད་པར་འདྲ་བར་དེའི་ངོ་བོ་རྟོགས་པ་མེད་པའི་ཕྱིར་རོ་ཞེས་བྱ་བ་ནི་གཏན་ཚིགས་སོ། །འོ་ན་ཇི་ལྟར་ཞེས་བྱ་བའི་རྩོད་པ་ལ་བསམ་པ་ནི་འདི་ཡིན་ཏེ། འདྲ་བ་ཞེས་བྱ་བ་སྤྱི་ལས་དོན་གཞན་དུ་འགྱུར་བ་ནི་མ་ཡིན་གྱི་འོན་ཀྱང་ཆ་ཤས་མང་པོ་རྣམས་ཀྱང་སྤྱི་ཉིད་ལ་འདྲ་བ་ཞེས་ཐ་སྙད་བྱེད་པ་ཡིན་ནོ། །སྤྱི་མེད་པར་ནི་སྤྱིའི་བློ་དང་སྒྲ་འབྱུང་བ་མ་ཡིན་ནོ། །དེ་བས་ན་འདི་འདྲ་བའོ་སྙམ་པའི་རྟོགས་པས་ནི། རང་གི་རྒྱུ་མཚན་འདྲ་བ་ཉིད་ཉེ་བར་འཇོག་པ་ཡིན་ནོ། །ཡང་ན་འདི་འདྲའོ་སྙམ་པའི་ཞེན་པས་ནི་གོང་དུ་ལས་ཐ་དད་པའི་འདྲ་བར་རིགས་པར་ཉམས་སུ་མྱོང་བ་ཡིན་པའི་ཕྱིར་ཇི་ལྟར། འདྲ་བ་མ་རྟོགས་ཡིན་ཞེ་ན། །ལྷག་པར་ཞེན་ཀྱང་ཞེས་བྱ་བ་
ལ་སོགས་པ་གྲུབ་པའི་མཐའི་དགོངས་པ་ནི་འདི་ཡིན་ཏེ། གལ་ཏེ་ལྷག་པར་ཞེན་པ་ཡོད་དུ་ཆུག་མོད་དེ་ལྟ་ན་ཡང་འདྲ་བ་ཞེས་བྱ་བའི་དངོས་པོ་དེའི་ཆོས་ཉིད་འདོད་པ། ཁ་དོག་དང་རྣམ་པ་དང་ཡི་གེས་སྟོང་པ་ནི་ཐ་དད་པ་དབང་པོའི་བློ་ལ་སྣང་བ་མེད་དོ། །ཐ་དད་པར་མཐོང་བ་མེད་ན་ཡང་དེ་ཁས་བླངས་པའི་སྐབས་ཡོད་པ་མ་ཡིན་ནོ། །རང་གི་མཚན་ཉིད་ཀྱི་དངོས་པོ་དེ་ཉིད་གཉིས་མེད་ཤེས་པ་ཡིན་ཏེ། སྤྱི་དང་ཁྱད་པར་གྱི་རྣམ་པ་མེད་པའི་ཁྱད་པར་གྱི་ཤེས་པ་འདི་ལ་ཡོད་པ་སྟེ། དེས་ན་སྤྱི་ཞེས་བྱ་བ་གཞན་ནི་ཡོད་པ་མ་ཡིན་ནོ། །དབང་པོའི་ཤེས་པས་འཛིན་པ་ལྟ་ཞོག་སྟེ། འདྲ་བར་ལྷག་པར་ཞེན་པ་དང་ལྷན་ཅིག་པས་ཀྱང་འདྲ་བ་ཐ་དད་པར་རྟོགས་པ་མེད་དོ་ཞེས་བྱ་བའི་དོན་ཏོ། །འདི་ཉིད་ཀྱི་རྣམ་པར་འགྲེལ་པ་ནི་འདི་འདྲ་བའོ་ཞེས་བྱ་བ་ལ་སོགས་པའོ། །གལ་ཏེ་ལྷག་པར་ཞེན་པ་ཉིད་འདྲ་བ་འཛིན་པར་བྱེད་པ་ཡིན་ནོ་ཞེས་བརྗོད་ཟིན་མ་ཡིན་ནམ་ཞེ་ན། དེ་ལ་ཡང་བཞི་པོར་ལྷག་པར་ཞེན་པ་ལ་ཡང་དངོས་པོའི་རང་བཞིན་ལས་ལོགས་ཤིག་ཏུ་ནི་འདྲ་བ་འཛིན་པ་ཡོད་པ་མ་ཡིན་ཏེ། ལྷག་པར་ཞེན་པས་ཀྱང་འདྲ་བ་འཛིན་པ་མ་ཡིན་ནོ་ཞེས་བྱ་བའི་དོན་ཏོ། །དེས་ན་སོ་སོར་རྟོགས་པ་ཡོད་མིན་པ། དེ་ཉིད་རང་གི་མཚན་ཉིད་འབའ་ཞིག་ཡིན་ནོ། །འགྲེལ་པར་ནི་རྟོགས་པས་ནི་ཞེས་བྱ་བ་བྱེད་པ་པོའི་གསུམ་པར་བྱས་སོ། །འདྲ་བ་ཞེས་བྱ་བ་ནི་ཁ་དོག་དང་རྣམ་པ་དང་ཡི་གེས་སྟོང་པའོ། །འདྲ་བ་ནི་དངོས་པོའི་ཆོས་སུ་འདོད་པ་ཡིན་ལ་དབང་པོའི་རྣམ་པར་ཤེས་པ་དེ་འཛིན་པར་བྱེད་པ་ལ་ནི་སྣང་བ་ཡང་མ་ཡིན་ཏེ། དེས་ན་བག་ཆགས་ཙམ་ལས་འབྱུང་བའི་རྣམ་པར་རྟོག་པ་ལ་སྣང་བ་ཡིན་ཡང༌། ཡོད་པ་ཉམས་སུ་མྱོང་བར་ཇི་ལྟར་འགྱུར་ཏེ། །ཉ་ཕྱིས་ལ་དངུལ་བཞིན་ནོ། །གང་གི་ཕྱིར་དབང་པོའི་བྱེད་པའི་རྗེས་སུ་བྱེད་པ་ཉིད་དམ། དབང་པོའི་རྣམ་པར་ཤེས་པ་སྐྱེད་པར་བྱེད་པ་ཉིད་དུ་མཚུངས་པ་ཁོ་ནའོ། །གནོད་པར་བྱེད་པ་ལས་ཁྱད་པར་ཡོད་པ་མ་ཡིན་ནོ་སྙམ་ན། གལ་ཏེ་འཇུག་པ་ཚད་མ་གཞན་གྱིས་བསལ་བའི་ཕྱིར་གནོད་པ་ཡིན་ན། དེའི་ཚེ་ཉིད་ཁྱད་པར་དང་བྲལ་བའི་དོན་རྟོགས་པར་བྱེད་པའི་དབང་པོའི་རྣམ་པར་ཤེས་པར་བྱེད་པ་ཉིད་གནོད་པར་བྱེད་པ་ཅི་སྟེ་མ་ཡིན། དངུལ་བཞིན་དུ་སླུ་བ་དང་ལྡན་པའི་ལྷག་པར་ཞེན་པ་མེད་པའི་ཕྱིར་རོ་ཞེ་ན། འོ་ན་ཇི་ལྟར་སྐྱེ་བོ་ཉ་ཕྱིས་དངོས་པོ་གཞན་དུ་རྟོག་པར་
རློམ་པ་དེ་བཞིན་དུ་འདི་འདྲ་བའོ་སྙམ་པར་རྟོགས་ལ། ཡང་དངོས་པོ་གཞན་འཛིན་པར་རློམ་པ་ནི་མེད་དོ། །འོན་ཀྱང་གསལ་བས་འཛིན་པ་ཁོ་ན་རློམ་པ་ཡིན་ཏེ། དེ་ན་མི་སླུ་བ་དང་ལྡན་པར་རྟོགས་པར་ག་ལ་ཐལ། དེ་ཁོ་ན་སེམས་པར་བྱེད་པ་ནི་རྣམ་པར་རྟོག་པ་ལ་དངོས་པོ་སྣང་བར་མ་མཐོང་བ་དང༌། དངོས་པོ་སྣང་བ་ལ་ཡང་བརྟག་པའི་རྣམ་པར་སྒྲོ་མི་འདོགས་པ་ན། འདི་ནི་ཤེས་པའི་རྣམ་པ་ཙམ་མམ་བརྫུན་པ་སྣང་བ་ཡིན་ནོ་ཞེས་བྱ་བའི་བློར་འགྱུར་བ་ཁོ་ནའོ། །དབང་པོའི་རྣམ་པར་ཤེས་པའི་བྱེད་པ་དེ་ཉིད་སྟོན་པ་ནི། མདུན་དུ་གནས་པའི་ཞེས་བྱ་བ་ལ་སོགས་པའོ། །གལ་ཏེ་ཡང་ལྷག་པར་ཞེན་པའི་དབང་གིས་སྤྱི་ངེས་པ་ཡིན་ནོ་ཞེས་བརྗོད་པ་དེ་ལ་ཡང་ལྷག་པར་ཞེན་ཀྱང་སྟེ། ལྷག་པར་ཞེན་པ་སྒྲུབ་པར་བྱེད་པ་ཡིན་ཡང་ལོགས་ཤིག་ཏུ་འདྲ་བ་སྟེ། སྤྱི་རྟོགས་པ་ངེས་པ་ཡོད་པ་མ་ཡིན་ཏེ། རྗེས་སུ་འགྲོ་བ་དང་ལྡོག་པ་ནི་འདྲ་བའི་རྫས་གཅིག་པུའི་ཡུལ་ཅན་ཡིན་པའི་ཕྱིར་རོ། །དེ་ལྟར་མ་ཡིན་ན་དུ་བ་ཡང་མེའི་རྒྱུ་ཅན་དུ་མི་འགྱུར་རོ། །དེས་ན། སོ་སོར་རྟོག་པ་ཡོད་མིན་པ། ཞེས་བྱེད་པ་ལ་སོགས་པ་སྨོས་ཏེ། སྔ་མ་བཞིན་དུ་རིག་པར་བྱའོ། །གལ་ཏེ་སྤྱི་མེད་པར་མཚུངས་པའི་བློ་འགྱུར་ན་རྟ་ལ་ཡང་བ་ལང་གི་བློར་ཅི་སྟེ་མི་འགྱུར་སྙམ་ན་འོ་ན་ནི་ཆུ་ལ་ཡང་དུ་བ་ཅི་སྟེ་མེད་ཅེས་མཚུངས་སོ། །འོ་ན་དེ་ལ་ཡང་མེ་ཉིད་ཀྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཡིན་ནོ་སྙམ་ན་དེ་ལྟ་ན་ནི་འོ་ན་མཐོང་བའི་མེ་ནི་བསྙོན་ལ་མ་མཐོང་བའི་མེ་ཉིད་ཀྱི་སྒྲོ་འདོགས་པའི་ཕྱིར་རྟོག་པ་དང་ལྡན་པ་ཆེན་པོ་ཡིན་ནོ། །མེ་ཡང་རྒྱུར་འགྱུར་ལ་རག་གོ་ཞེ་ན། དེ་ཉིད་ཀྱིས་འགྲུབ་པའི་ཕྱིར་གཞན་གྱིས་ཅི་བྱ། མེ་ཉིད་མེད་ན་མེར་ཇི་ལྟར་འགྱུར་ཏེ་དེ་ལྟ་མ་ཡིན་ན་ཆུ་ཡང་མེ་ཅིའི་ཕྱིར་མ་ཡིན་སྙམ་ན་མེ་ཉིད་ཀྱང་མེ་ཉིད་མེད་པར་ཇི་ལྟར་འགྱུར་ཏེ། དེ་ལྟ་མ་ཡིན་ན་ཆུ་ཡང་མེ་ཉིད་དུ་ཐལ་བའི་ཕྱིར་རོ་ཞེས་མཚུངས་པའོ། །དེའི་ཕྱིར་རང་གི་རྒྱུ་བརྒྱུད་པས་བྱས་པའི་ནུས་པ་ཅན་གྱི་དངོས་པོ་ནི་འགའ་ཞིག་ཉིད་རྣམ་པ་དེ་ལྟ་བུའི་དོན་བྱེད་པ་ཡིན་པའི་ཕྱིར་འདྲ་བའི་བློ་ཡང་འདྲ་བའི་རྒྱུས་བསྐྱེད་པའི་དངོས་པོའི་ཁྱད་ཉམས་སུ་མྱོང་བ་ལས་བྱུང་བ་ཡིན་མོད་ཀྱི། དེ་ནས་ཤུགས་ཀྱིས་འདྲ་བ་མི་འགྲུབ་པའོ། །དའི་ཕྱིར་ཞེས་བྱ་བ་ནི་མཇུག་སྡུད་པའོ། །དོན་གཞན་རྟོགས་པ་མེད་པའི་ཕྱིར་རོ་ཞེས་བྱ་བ་ནི་འདྲ་བའི་རྟོགས་པ་མེད་པའི་ཕྱིར་རོ། །རིགས་པ་ཅན་གྱི་འདྲ་བ་
ལས་རྟོགས་པ་གང་ཡིན་པའི་ཉེ་བར་འཇལ་བ་དེ་ནི་དམིགས་པ་མེད་པ་ཡིན་ཏེ། །ཚད་མ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་འདྲ་བ་མེད་དུ་ཆུག་མོད། །དེར་ཞེན་པ་ནི་རེ་ཞིག་ཡོད་པ་ཉིད་ཡིན་ཏེ། དེས་བྱས་པ་མིང་དང་འབྲེལ་པའི་རྟོགས་པ་གོ་ཅི་སྟེ་ཚད་མ་མ་ཡིན། འོན་ཏེ་ཚད་མ་ཡིན་པའི་ཞེས་པས་བྱས་པ་ཚད་མར་ཇི་ལྟར་འགྱུར་ཞེས་བརྗོད་ན། ཇི་ལྟར་ཚད་མ་ཡིན་པས་སྐྱེད་པ་རྟོག་པ་མེད་པའི་མངོན་སུམ་ཚད་མ་ཡིན། དེས་ན་རྒྱུ་ཚད་མ་ཡིན་པས་ནི་ཅི་ཡང་བྱར་མེད་དོ་ཞེ་ན། གལ་ཏེ་འདྲ་བར་བརྟགས་ན་མིང་དང་མིང་ཅན་གྱི་འབྲེལ་བ་ཞེས་བྱ་བ་ནི་བརྡ་ཙམ་ལ་རག་ལས་པ་ཉིད་ཀྱི་དངོས་པོ་པ་མ་ཡིན་པ་ཁོ་ནའོ། །དེ་བས་ན་དེའི་རྒྱུ་ཚུལ་ཅན་གྱི་རྟོག་པ་ཡང་དམིགས་པ་མེད་པ་ཉིད་དོ་ཕྱོགས་འདི་ལ་ནི་འདྲ་བའི་ཤེས་པ་ཞེས་བྱ་བ་ནི་ལྔ་པའི་བསྡུ་བར་འགྱུར་ཏེ། འདྲ་བ་ལས་རྟོགས་པ་ཞེས་བྱ་བའི་དོན་ཏོ། །སྤྱིའི་ཤེས་པ་ཞེས་དྲུག་པའི་བསྡུ་བ་ནི། བྲམ་ཟེའི་ཉེ་བར་འཇལ་བ་ཡང་བཟུང་ངོ༌། །ཇི་སྐད་དུ། གང་ཞིག་དེ་ལས་འདྲ་བ་ཡིས། །ཁྱད་པར་ཅན་ནམ་དེར་བརྟེན་པའི། །འདྲ་བ་ཉིད་དུ་དྲན་འགྱུར་ཏེ། །ཉེ་བར་འཇལ་བའི་གཞལ་བྱ་ཡིན། །ཞེས་བརྗོད་པ་ཡིན་ནོ། །འདིས་ནི་བ་ལང་མཐོང་ནས་བ་མིན་མཐོང་བ་ན། འདི་དང་འདྲ་བ་དེ་ནི་བ་ལང་གི་སྒྲས་བརྗོད་པར་བྱ་བ་ཡིན་ནོ་ཞེའམ་དེའི་འདི་དང་འདྲ་བ་ཉིད་ནི་བ་ལང་གི་སྒྲས་བརྗོད་པར་བྱ་བ་ཡིན་ནོ་ཞེས་བྱ་བར་ཆོས་ཅན་དང་ཆོས་ཀྱི་རྟོགས་པའི་ཡུལ་ཉིད་ཀྱིས་རྟོགས་པའི་རྣམ་པ་གཉིས་ཉེ་བར་འཇལ་པ་ཡིན་ཡང་བརྗོད་པ་ཡིན་ནོ། །དེ་ལ་འདྲ་བར་རྟོགས་པའི་རང་བཞིན་ཡུལ་མེད་པར་བསྟན་པས་དེའི་ཁྱད་པར་ཅན་འདྲ་བ་ཅན་དུ་རྟོགས་པའི་རང་བཞིན་ཡང་སུན་ཕྱུང་བར་བསམ་པར་བྱའོ། །གང་ཡང་བ་ལང་དང་འདྲ་བ་བ་མིན་ཡིན་ནོ་ཞེས་བརྗོད་པ་ལས་བ་མིན་གྱི་བ་ལང་དང་འདྲ་བ་ཉིད་རྟོགས་པ་ཡིན་ནོ་ཞེས་གནའ་རབས་དག་ཟེར་བ་དེ་ཡང་འདི་ཉིད་ཀྱིས་བསལ་བ་ཡིན་ནོ། །གལ་ཏེ་འདྲ་བ་ཉིད་མེད་པའི་ཕྱིར་འདྲ་བར་རྟོགས་པ་དམིགས་པ་མེད་པ་ཉིད་ཡིན་ན། ཇི་ལྟར་རྗེས་སུ་དཔག་པའི་ཚད་མ་འདྲ་བའི་ཡུལ་ཅན་དུ་འདོད་སྙམ་ན། རྗེས་སུ་དཔག་པའི་རྟོག་པ་ལ་ནི་ཞེས་གསུངས་སོ། །དབང་པོ་རྣམ་པར་ཤེས་པས་མ་མཐོང་བའི་འདྲ་བ་ཉིད་དམ་དེའི་ཁྱད་པར་ཅན་གྱི་འདྲ་བ་ངེས་པར་བྱེད་པ་ནི་རྗེས་སུ་དཔག་པ་ཚད་མ་མ་ཡིན་གྱི་འོན་ཀྱང་དཔེ་ལ་མཐོང་བའི་རང་བཞིན་ཉིད་ལྷག་པར་སྒྲོ་
བཏགས་ཏེ་འདྲ་བར་ཤེས་པའོ་ཞེས་བརྗོད་པ་ཡིན་ནོ། །འདི་ལྟར་རི་ཞོལ་ན་གནས་པའི་མེ་ནི་རང་གི་མཚན་ཉིད་ཀྱི་རྣམ་པར་རྟོག་པ་མ་ཡིན་ལ་དེ་ཉིད་ནི་རྟོགས་པ་ཡང་མིན་ནོ། །དེ་ཡང་དཔེ་ལ་མཐོང་བ་མེད་པ་ནི་མ་ཡིན་ཏེ། དེས་ན་དེ་དང་འདྲ་བར་བརྗོད་པ་ཡིན་ནོ། །འདྲ་བ་གཞན་མེད་ཀྱང་དེ་ཡིན་པ་ལས་བཟློག་པས་འདི་ནི་འདྲ་བའི་ཐ་སྙད་ཙམ་ཡིན་ནོ། །རྗེས་སུ་དཔག་པའི་ཚད་མ་ནི་དངོས་ཡུལ་ཅན་ཡིན་ཏེ། མངོན་པར་བསམ་པ་ལས་མི་སླུ་བའི་ཕྱིར་རོ། །གཞན་གྱི་ཉེ་བར་འཇལ་བ་ནི་དངོས་པོར་གྱུར་པའི་འདྲ་བའི་ཡུལ་ཅན་དང༌། དེ་རྟོགས་པར་བྱས་པ་མིང་དང་མིང་ཅན་གྱི་འབྲེལ་པའི་ཡུལ་ཅན་ཡིན་པའི་ཕྱིར་ཉེས་པར་འགྱུར་བ་ཉིད་དོ། །གལ་ཏེ་དེ་ལྟ་ན་ཞེས་བྱ་བ་ནི་གཞན་གྱིའོ། །བརྡའི་དུས་སུ་མཐོང་བ་ཉིད་དུས་གཞན་སྒྲ་ལས་དྲན་པ་ཡིན་ནོ། །སོགས་པའི་སྒྲས་ནི་གཞན་དུ་མཐོང་བའི་མཚན་མོ་ཟ་བ་འགའ་ཞིག་ཏུ་དོན་གྱིས་གོ་བས་དྲན་པའོ། །འདི་ལ་ཞེས་པ་ནི་ལན་ནོ། །སྐྲ་ཤད་ལ་སོགས་དོན་མིན་ཏེ། །ཞེས་བྱ་བ་འདིས་འདི་ལྟ་བུ་ཐམས་ཅད་བཤད་པ་ཡིན་ནོ་ཞེས་བྱ་བའི་དོན་ཏོ། །དེ་བཞིན་དུ་གཞན་དུ་ཡང་ཞེས་བྱ་བ་ནི། གང་དང་གང་དུ་སླུ་བར་མོས་པའམ། བསྒྲུབ་པར་བྱ་བ་དེ་བཞིན་དུ་འབྱུང་བར་ངེས་མི་ནུས་པར་ཏེ། དཔེར་ན་གཟུགས་བརྙན་དང་གཏན་ཚིགས་ལྟར་སྣང་བས་བསྐྱེད་པའི་ཤེས་པ་ལ་སོགས་པ་རྣམས་ལའོ། །སྒྲ་ཡི་ཡུལ་དང་ཡུལ་མིན་ཕྱིར། །ཞེས་བྱ་བ་འཆད་པ་ནི་ཞེས་བྱ་བ་ལ་སོགས་པའོ། །གལ་ཏེ་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། འདིར་ནི་ཚད་མའི་ཡུལ་ཉིད་གྱུར་པའི་སྤྱི་དཔྱད་པར་བྱ་བ་ཡིན་ཏེ། དེས་ན་དེའི་ཡུལ་ཅན་གྱི་ཤེས་པའི་རྒྱུ་ཡིན་པའི་ཕྱིར་ཡང་ཚད་མར་འགྱུར་རོ་ཞེས་བྱ་བ་ཡིན་ནོ། །འོན་ཏེ་ཤེས་པ་ཉིད་ཚད་མར་འདོད་དེ་ཞེས་བརྗོད་ན། འདི་ལ་ཞེན་པ་མེད་དོ། །སྒྲ་ལས་བྱུང་བའི་ཤེས་པ་ཉིད་ཚང་མར་འགྱུར་རོ། །དེས་ན་མི་འདོད་པ་མི་ལྡོག་གོ་ཞེ་ན། ལན་སྨྲས་པའི་བསམ་པ་ནི་གལ་ཏེ་སྒྲ་ཙམ་གྱི་དབང་དུ་བྱས་ནས་དེ་སྐད་བརྗོད་པ་ནི་དེའི་ཚེ་དེ་ལ་སྤྱིའི་ཡུལ་ཅན་ཉིད་ཡོད་པ་མ་ཡིན་ཏེ། སྤྱིའི་མཚན་ཉིད་ནི་རང་གི་མཚན་ཉིད་ཁོ་ན་ཡིན་ནོ་ཞེས་བརྗོད་པ་ཡིན་ནོ། །སྒྲ་ཙམ་གྱི་བརྗོད་པར་བྱ་བ་ནི་ཡོད་པར་མ་ངེས་པས་ན་དེ་རང་གི་མཚན་ཉིད་ག་ལ་ཡིན་ཞེས་བྱ་བའོ། །གལ་ཏེ་སྒྲ་རྣམས་སྤྱིའི་ཡུལ་ཅན་དུ་འདོད་པ་ཉིད་མ་ཡིན་ནམ་སྙམ་ན། མ་ཡིན་ཏེ་སེལ་བ་ཡུལ་ཅན་དུ་འདོད་པའི་ཕྱིར་རོ།།
རྗེས་སུ་འགྲོ་བར་སྣང་བའི་དབང་གིས་དེ་ཉིད་ལ་སྤྱིའི་ཐ་སྙད་ཙམ་དུ་བྱས་པར་ཟད་དོ། །འདིས་ནི་གལ་ཏེ་སེལ་བ་ཐམས་ཅད་ལ་སྤྱིའི་ཐ་སྙད་ཡིན་པ་དེ་ལྟ་ན་ཡང་གང་ལ་ལྷག་པར་ཞེན་པར་བྱས་པའོ། །དངོས་པོ་ཡོད་པར་ཞེན་པ་དེར་དེ་ཁོ་ནར་སྤྱི་ཉིད་དུ་རྣམ་པར་གཞག་གོ །གཞན་དུ་ནི་ཐ་སྙད་ཙམ་མོ་ཞེས་རྟོགས་པར་བྱའོ། །དེས་ན་གཞན་གྱི་དོན་གྱི་རྗེས་སུ་དཔག་པའི་བདག་ཉིད་ཀྱི་སྒྲ་ཉིད་སྤྱིའི་ཡུལ་ཅན་ཡིན་པའི་ཕྱིར་ན་ཚད་མར་རིགས་སོ། །གལ་ཏེ་སྒྲ་ནི་ཉེ་བར་བཏགས་པའི་ཚད་མ་མ་ཡིན། སྤྱིའི་ཡུལ་ཅན་ཉིད་ཡིན་ན་ནི། དངོས་ཀྱི་ཚད་མ་ཉིད་དུ་འགྱུར་རོ་སྙམ། དེ་ལྟ་མ་ཡིན་ཏེ་གཞན་གྱི་དོན་གྱི་རྗེས་སུ་དཔག་པ་ལ་སྤྱིའི་ཡུལ་ཅན་ཉིད་དུ་ཉེ་བར་བཏགས་པ་ཡིན་པའི་ཕྱིར་རོ། །སྤྱིའི་ཡུལ་ཅན་ནི་སྒྲ་བརྟན་པ་ཚུལ་གསུམ་པའི་རྟགས་ཀྱིས་བསྐྱེད་པའི་རྗེས་སུ་དཔག་པ་ཁོ་ན་ཡིན་ནོ། །གལ་ཏེ་སྒྲ་བསྒྲུབ་པར་བྱ་བའི་ཡུལ་ཅན་ཉིད་ཀྱིས་སྤྱིའི་ཡུལ་ཅན་མ་ཡིན་ནོ། །སྒྲུབ་པར་བྱེད་པ་ཚུལ་གསུམ་པའི་ཡུལ་ཅན་ཉིད་ཀྱིས་སྤྱིའི་ཡུལ་ཅན་ཡིན་པར་འགྱུར་ཏེ། དེས་བསྟན་པར་བྱ་བ་ནི། དེ་ཡིན་པའི་ཕྱིར་རོ་སྙམ་ན། མ་ཡིན་ཏེ་དེ་ལ་ཡང་དེས་བསྟན་པ་ཙམ་བྱས་པ་ཡིན་པའི་ཕྱིར་རོ། །ཚུལ་གསུམ་ངེས་པ་ནི་ཚད་མ་གསུམ་ཁོ་ན་ལས་ཡིན་ནོ། །འོ་ན་སྤྱིའི་ལུས་ཅན་གྱི་སྒྲ་གང་ཡིན་ཞེ་ན། དེ་ཁོ་ནར་ནི་འགལ་ཡང་མ་ཡིན་ནོ། །དེ་ཉིད་ཀྱི་ཕྱིར་སྒྲ་ནི་འགའ་ཡང་ཚད་མ་ཉིད་མ་ཡིན་ནོ། །ཚད་མས་མི་སླུ་བའི་དངོས་པོ་སྟོན་པར་བྱེད་པ་ན། ཇི་ལྟར་སྒྲ་གཞན་ལ་ལྟོས་ནས་གཞན་གྱི་དོན་གྱི་རྗེས་སུ་དཔག་པ་དང་གཞན་གྱི་དོན་གྱི་རྗེས་སུ་དཔག་པ་འཕེན་པར་བྱེད་པ་སྐད་ཅིག་མ་ལ་སོགས་པ་སྟོན་པར་བྱེད་པའི་ངག་ལ་མི་སླུ་བ་ཉིད་དུ་ལྷག་པར་ཞེན་པ་དེ་བཞིན་དུ་ཚད་མའི་ཐ་སྙད་ཀྱང་ཡིན་ནོ། །སྤྱིའི་མཚན་ཉིད་གང་ཡིན་པ་དེ་ཉིད་སྒྲའི་ཡུལ་ཡིན་གྱི། གཞན་སྒྲའི་ཡུལ་མ་ཡིན་པ་ནི་མ་ཡིན་ནོ། །མི་འདོད་པའི་ངེས་པར་གཟུང་བ་དགག་པ་བརྗོད་པ་ནི་སྒྲའི་ཡུལ་ཞེས་བྱ་བ་ལ་སོགས་པའོ། །དེས་ན་མེའི་སྦྱིན་སྲེག་མཐོ་རིས་སྒྲུབ་པར་བྱེད་པ་ལ་སོགས་པའི་ངག་ཚད་མར་ག་ལ་འགྱུར་ཏེ། དེའི་ཡུལ་དངོས་པོ་ཉིད་ཡིན་པར་ཐེ་ཚོམ་ཟ་བའི་ཕྱིར་རོ། །ཚད་མ་དྲུག་སྔོན་དུ་འགྲོ་བ་ཅན་དོན་གྱིས་གོ་བའི་ཚོགས་ལ་ཡང་མདོར་ན་གང་ལ་མེད་ན་མི་འབྱུང་བའི་དངོས་པོའི་སྟོབས་ཀྱིས་འགའ་ཞིག་ཏུ་ལྐོག་ཏུ་གྱུར་པའི་དོན་རྟོགས་པ་དེ་ནི་རྗེས་སུ་
དཔག་པ་ཉིད་ཚད་མ་ཡིན་ལ་གང་དུ་ཚུལ་གསུམ་ལས་གང་ཡང་རུང་བ་ཞིག་མེད་དམ་ཐེ་ཚོམ་ཟ་བ་དེ་ནི་བསྒྲུབ་བྱ་ངེས་པ་མེ་དཔའི་ཕྱིར་ན་སྤྱིའི་མཚན་ཉིད་རྣམ་པར་གནས་པ་མ་ཡིན་ལ། དེའི་ཡུལ་ཅན་གྱི་ཤེས་པ་ཡང་ཚད་མ་ཡིན་ནོ་ཞེས་བྱ་བ་ཡིན་ནོ། །དངོས་པོ་མེད་པའི་ཚད་མ་ཡང་ཚ་མ་གྲུབ་པའི་ལེའུ་ཉིད་དུ་སུན་ཕྱུང་པ་ཡིན་ནོ། །ཇི་སྐད་དུ་སྒྲའི་ཡུལ་མ་ཡིན་པ་རང་གི་མཚན་ཉིད་ཡིན་ནོ་ཞེས་བརྗོད་པ་དེར་ཡང་གང་ཞིག་སྒྲའི་ཡུལ་མ་ཡིན་པ་དེ་ཐམས་ཅད་རང་གི་མཚན་ཉིད་ཡིན་ཞེས་བརྗོད་པ་དེར་ཡང་གང་ཞིག་སྒྲའི་ཡུལ་མ་ཡིན་པ་དེ་ཐམས་ཅད་རང་གི་མཚན་ཉིད་ཡིན་ནོ་ཞེས་རྟོགས་པར་མི་འགྱུར་བར་བྱ་བའི་ཕྱིར་ན། ཡུལ་མ་ཡིན་པར་ཡང་ཞེས་བྱ་བའི། དེས་ན་འདི་ལ་སྐྱོན་མེད་དོ་ཞེས་བྱ་བ་ནི། ཕྱིན་ཅི་ལོག་ཏུ་ངེས་པར་བཟུང་བས་བྱས་ཏེ། སྒྲ་ཚད་མར་ཐལ་བའམ། དེས་ཉེ་བར་མཚོན་པའི་སྒྲ་ལ་སོགས་པའི་བསྲུང་བ་ཡང་རང་གི་མཚན་ཉིད་དུ་ཐལ་བར་འགྱུར་རོ་ཞེས་བརྗོད་པ་གང་ཡིན་པ་སྟེ་དེ་གཉི་ག་ཡང་སྐྱོན་གྱི་སྒྲས་བསྒོས་པ་ཡིན་ནོ། །དེས་ན་ཞེས་བྱ་བ་ལ་སོགས་པ་ནི་མཇུག་སྡུད་པའོ། །འགའ་ཞིག་ནི་སྤྱི་ཡིན་ལ་ཞེས་བྱ་བ་ནི་རྗེས་སུ་དཔག་པའི་ཡུལ་ལོ། །འགའ་ཞིག་ནི་དོན་མེད་པ་ཞེས་བྱ་བ་ནི་སྒྲ་དང་གཏན་ཚིགས་ལྟར་སྣང་ལ་སོགས་པའི་ཡུལ་ལོ། །གཅིག་ནི་རང་གི་མཚན་ཉིད་ཅེས་བྱ་བ་ནི་མངོན་སུམ་གྱི་ཡུལ་ལོ། །དོན་མེད་པ་ཞེས་བྱ་བ་ནི་སྐྲ་ཤད་ལ་སོགས་པའོ། །ཇི་ལྟར་ཤེས་པའི་རང་བཞིན་གྱི་དོན་ཡིན་ཡང་དོན་མེད་པ་ཉིད་དུ་འགྱུར་བ་དེ་ལྟར་ནི་བཤད་ཟིན་ཏོ། །མཚན་ཉིད་གཞན་འཆད་པ་ནི་རྒྱུ་མཚན་གཞན་ཞེས་བྱ་བའོ། །འདིར་ཡང་སྔ་མ་བཞིན་དུ་བརྗོད་པར་བྱའོ་ཞེས་བྱ་བ་ནི་རྒྱུ་མཚན་གཞན་ཡོད་པ་ནི་གང་ལ་བློ་ཡོད་པར་འགྱུར་བ། དེ་ནི་སྤྱི་ཉིད་དོ་ཞེས་ནི་ངེས་པར་མི་བཟུང་སྟེ། རི་བོང་གི་རྭ་ལ་སོགས་པ་ཡང་དེ་ལྟར་ཐལ་བའི་ཕྱིར་རོ། །འོན་ཀྱང་རྒྱུ་མཚན་གཞན་ཡོད་ན་རུང་བའི་ཡུལ་ན་གནས་པ་ལ་མི་ལྟོས་པར་དངོས་པོར་མངོན་པར་འདོད་གང་ལ་བློ་ཡོད་པ་དེ་ཁོ་ན་སྤྱིའི་མཚན་ཉིད་ཡིན་ནོ། །འདིས་ནི་གལ་ཏེ་རུང་བའི་ཡུལ་ན་དེ་གནས་པར་ན་བློ་ཡོད་ན་དེའི་ཚེ་སྤྱི་ལ་མ་ཡིན་ཏེ། རང་གི་མཚན་ཉིད་ཁོ་ན་ཡིན་ནོ་ཞེས་བརྗོད་པ་ཡིན་ནོ། །ཡང་ན་ཞེས་བྱ་བ་ནི་བཤད་པ་གཞན་གསུངས་པའོ། །ཕྱོགས་སྔ་མ་ལ་ནི་རྒྱུ་མཚན་གཞན་ཞེས་བྱ་བས་ལྟ་དང་རྩོལ་བ་ལ་སོགས་པ་བཟུང་ངོ༌། །དེ་ལྟ་ན་ནི་ཡུལ་འཛིན་བར། བློའི་
ཡུལ་རུང་བའི་ཡུལ་ན་གནས་པ་ལ་ལྟོས་ནས་རྒྱུ་མཚན་གཞན་མིག་ལ་སོགས་པ་ཡིན་པར་འདོད་དོ། །རྒྱུ་མཚན་གཞན་ཞེས་བྱ་བ་ནི་མིག་ལ་སོགས་པ་ཡོད་ཀྱང་རུང་བའི་ཡུལ་ན་གནས་པ་མེད་པའི་ཕྱིར་ན་གང་ལ་དེ་འཛིན་བའི་བློ་སྐྱེ་བ་མེད་པ་དེ་ནིའོ། །དེ་ཉིད་བརྗོད་པ་ནི་རང་གི་ངོ་བོས་ཞེས་བྱ་བ་ལ་སོགས་པ་ཡིན་ནོ། །དལ་རང་གི་ངོ་བོས་ཞེས་བྱ་བ་ལ་སོགས་པ་ནི་སྐབས་དོན་བསྡུས་པའོ། །འདི་ལ་གལ་ཏེ་ཞེས་བྱ་བ་ལ་སོགས་པས་རྩོད་དོ། །གལ་ཏེ་ཡང་རྟོགས་པའི་རྣམ་པ་ཐ་དད་པས་ན་ཡུལ་རྣམ་པ་གཉིས་སུ་བརྗོད་པ་དེ་ལྟ་ན་ཡང་ཚད་མའི་ཁྱད་པར་གྱི་བཤད་པ་ནི་མ་ཡིན་ནོ། །ལྡེ་བྱེད་པ་ཡང་ནི་ཉེས་པ་མ་མཐོང་ནས་རྩོད་པའོ། །རྣམ་པར་རྟོག་པ་ཐམ་ལ་ཚིགས་སུ་བཅད་པ་གཅིག་གིས་འགལ་བ་བརྗོད་པ་ཡིན་ནོ། །འདི་སྙམ་དུ་ཚད་མ་གཉིས་སུ་མེད་པའི་ཕྱིར་གཞལ་བྱ་གཉིས་སུ་འགྱུར་རོ་སྙམ་དུ་དོགས་པ་བསུ་ནས་བརྗོད་པ་ནི་འོན་ཏེ་ཚད་མ་གཉིས་ཀྱིས་ཞེས་བྱ་བའོ། །ཡུལ་གཉིས་ཀྱིས་ཚད་མ་གཉིས་ཡིན་ལ། ཚད་མ་གཉིས་ཀྱིས་ཀྱང་ཡུལ་གཉིས་ཡིན་པའི་ཕྱིར་ཕན་ཚུན་བསྟེན་པ་ཡིན་ནོ། །འདིས་ནི་མ་གྲུབ་པ་མ་ཡིན་ནོ། །ཅི་སྟེ་ཚད་མ་གཉིས་ལ་ལྟོས་ནས་གཞལ་བྱ་གཉིས་སུ་བརྗོད་པ་ནི་མ་ཡིན་གྱི། འོན་ཀྱང་རྟོགས་པའི་གཞལ་བྱ་གཉིས་ཉིད་ཀྱིས་ཚད་མ་གཉིས་སྒྲུབ་པར་བྱེད་པ་ཡིན་པ་དེས་ན་ཕན་ཚུན་བསྟེན་པ་མ་ཡིན་ནོ་སྙམ་ན་ཚད་མ་གསུམ་ལ་སོགས་པའི་ཞེས་བྱ་བའོ། །དོན་ནི་འདི་ཡིན་ཏེ། ཇི་ལྟར་མངོན་སུམ་གྱིས་རྟོགས་པ་ནི་མངོན་སུམ་ཡིན་ལ་རྗེས་སུ་དཔག་པས་རྟོགས་པ་ནི་རྗེས་སུ་དཔག་པར་བྱ་བ་ཡིན་པ་དེ་བཞིན་དུ་རིག་བྱེད་ཀྱིས་རྟོགས་པ་ནི་ཉེ་བར་བསྟན་པར་བྱ་བ་ཉེ་བར་འཇལ་བས་ནི་ཉེ་བར་གཞལ་བར་བྱ་བ་དོན་གྱིས་གོ་བ་ལ་སོགས་པས་ནི་དོན་གྱིས་གོ་བའི་ཡུལ་བསྒྲུབ་པར་བྱ་བ་མིན་པའི་ཕྱིར་བླར་འགལ་བ་ཉིད་དོ། །འདི་ལྟར་གཞལ་བྱ་དེ་ཡུལ་གྱི་ཉེ་བ་གང་ཡིན་པ་དེ་ནི་ཚད་མའི་དབྱེ་བ་འཇུག་པས་གྲུབ་པར་བྱེད་པ་ཡིན་ནོ། །དེས་ན་ཇི་ལྟར་མངོན་སུམ་ལས་ཐ་དད་པའི་རྗེས་སུ་དཔག་པས་རྗེས་སུ་དཔག་པར་བྱ་བའི་ཡུལ་ཉེ་བར་འཇོག་པ་དེ་བཞིན་དུ་སྒྲ་ལ་སྒོ་པས་ཀྱང་རང་རང་གི་ཡུལ་ཉེ་བར་འཇོག་པར་བྱེད་པར་འགྱུར་རོ་ཞེས་བྱ་བའི་དོན་ཏོ། །རྣམ་པར་རྟོག་པ་གཉིས་པའི་དབང་དུ་བྱས་ཏེ་བརྗོད་པ་ནི་ལྐོག་ཏུ་གྱུར་པ་ཉིད་ཀྱང་ཞེས་བྱ་བའོ། །དོན་འདི་ཡིན་ཏེ། རེ་ཞིག་རྗེས་སུ་དཔག་པས་མངོན་
སུམ་གྱི་ཡུལ་འགྲུབ་པ་མ་ཡིན་པ་ཁོ་ནའོ། །ཁས་བླངས་པ་ཡང་མ་ཡིན་ནོ། །གལ་ཏེ་དེས་ལྐོག་ཏུ་གྱུར་པ་ཡང་རྟོགས་པར་མི་ནུས་ན་ནི་དེའི་ཚེ་རྗེས་སུ་དཔག་པར་ཡུལ་རྣམ་པ་གཉིས་གྲུབ་པར་ཇི་ལྟར་འགྱུར་ཞེས་བྱ་བ་ཡིན་ནོ། །གཏན་ཚིགས་བརྗོད་པ་ནི་ལྐོག་ལ་འཇུག་ན་ཡང་རྗེས་སུ་དཔག་པ་དོན་མེད་དོ་ཞེས་བྱ་བ་ལ་སོགས་པ་ནི་རྟོགས་པར་སླའོ། །མིག་མེད་མཐོང་བ་ཞེས་བྱ་བ་བཞིན་ཞེས་བྱ་བ་ལ་ཇི་ལྟར་ཞེས་བྱ་བ་བསྣན་པར་བྱའོ། །དེའི་ཕྱིར་ཞེས་བྱ་བ་ནི་མཇུག་བསྡུས་བའི་ཐབས་ཀྱིས་རྣམ་པར་རྟོག་པ་དང་པོ་ཡང་བསལ་བར་བརྗོད་པ་ཡིན་ནོ། །འདི་སྐད་བརྗོད་པ་ཡིན་ཏེ། །མངོན་སུམ་ནི་ཡུལ་གཅིག་ཁོ་ན་ལ་བྱེད་པ་ལ་འཇུག་པ་ཡིན་ལ། རྗེས་སུ་དཔག་པ་ནི་གཅིག་ལ་ཡང་མ་ཡིན་དེས་ན་གང་ལྟར་ཚད་མ་གཉིས་ན་གང་ལས་ཚད་མ་གཉིས་སུ་འགྱུར་བ་གཞལ་བྱ་གཉིས་སུ་ཇི་ལྟར་སྒྲུབ་ཅེས་བྱ་བ་ཡིན་ནོ། །འགལ་བ་ཡིན་ནོ་ཞེས་བྱ་བ་ནི་གང་གི་ཚེ་ཚད་མ་གཉིས་ཀྱིས་གཞལ་བྱ་གཉིས་འགྲུབ་པ་ནའོ། །མ་ངེས་པ་ཉིད་དུ་ཡང་བརྗོད་པ་ལ་གལ་ཏེ་ཡང་ཞེས་བྱ་བའོ། །ཡུལ་གཅིག་ལ་ཡང་ཚད་མ་གཞན་འཇུག་པ་མི་འགལ་བའི་ཕྱིར་ན་གཞལ་བྱ་གཉིས་ལས་ཚད་མ་གཉིས་ཀྱིས་མ་ཁྱབ་པའོ་ཞེས་སྟོན་པ་ནི་འབྲེལ་པ་གྲུབ་པ་མེད་པར་ནི་ཞེས་བྱ་བའོ། །མངོན་སུམ་ནི་ཁྱབ་པ་གྲུབ་པར་བྱེད་པ་ཉིད་དུ་ཉེ་བར་བསྟན་པ་ཅུང་ཟད་ཀྱང་མི་ནུས་སོ། །དེ་ནི་སྤྱིའི་ཡུལ་ན་དུ་མི་འཐད་པའི་ཕྱིར་རོ། །རྗེས་སུ་དཔག་པ་ཡང་གསལ་མ་ཐག་པ་ཡིན་ནོ་སྙམ་དུ་བསམས་པ་ཡིན་ནོ། །དེ་ལྟར་ཞེས་བྱ་བ་ལ་སོགས་པ་ནི་བསྡུ་བའོ། །གྲུབ་པའི་མཐའ་ནི་རྟོག་པ་དང་པོ་ཁས་བླངས་པ་ཡིན་ནོ། །གལ་ཏེ་ཡུལ་གཉིས་མངོན་སུམ་གྱིས་གྲུབ་ན། རྗེས་སུ་དཔག་པས་ཅི་བྱ་བའི་རྩོད་པ་ཡོད་པ་མ་ཡིན་ཏེ། འདི་ལྟར་མངོན་སུམ་གྱིས་ནི་ཡུལ་གྱི་གཉིས་ཉིད་གྲུབ་ཀྱི་ཡུལ་གཉིས་ནི་མ་ཡིན་ནོ། །གལ་ཏེ་དེ་ལྟ་ན་ཡང་ཆོས་ཅན་མངོན་སུམ་གྱིས་མ་གྲུབ་པ་ལ་ཆོས་ནི་གྲུབ་པོ་ཞེས་བྱ་བ་འདི་ཇི་ལྟར་ཡིན་ཏེ། ཆོས་རྟོགས་པ་ནི་ཆོས་ཅན་རྟོགས་པ་མེད་ན་མེད་པའི་ཕྱིར་རོ་ཞེ་ན་བཤད་པ་འདྲ་བ་དང་མི་འདྲ་བ་ཉིད་འདྲ་བ་ཉིད་དུ་རྟོགས་པ་ནི་བྱ་བའི་རང་བཞིན་ཡིན་ལ། དེས་ན་རྟོགས་པར་བྱ་བ་འདྲ་བ་དང་མི་འདྲ་བ་ཉིད་མཚོན་པ་ཡིན་ནོ། །གནག་གི་ཕྱིར་འདར་བ་ཉིད་དུ་རྟོགས་པ། རྟོགས་པར་བྱ་བ་འདྲ་བ་དང་མི་འདྲ་བ་ཉིད་མཚོན་པར་བྱེད་པ་དེ་ནི། ཤེས་པའི་རྣམ་པ་ལ་བརྟེན་པ་ཡིན་པའི་ཕྱིར་ཤེས་པ་ཉིད་
དེ་རྟོགས་པ་ཉིད་ཀྱི་ཆོས་ཡིན་གྱི་ཡུལ་གྱི་ནི་མ་ཡིན་ནོ་ཞེས་འདིས་ནི་ཡུལ་མ་རྟོགས་པའི་ས་བོན་བསྟན་པ་ཡིན་ནོ། །ཡུལ་མ་རེག་པར་དེ་ཇི་ལྟར་འགྲུབ་པ་དེ་སྟོན་པ་ནི། དེ་ཡང་ཞེས་བྱ་བའོ། །ཡུལ་ལ་རང་རིག་པ་མི་འཇུག་པའི་ཕྱིར་ན། རྗེ་སུ་དཔག་པ་དོན་མེད་པར་ཇི་ལྟར་འགྱུར་ཞེས་བྱ་བའི་དོན་ཏོ། །འོན་ཇི་ལྟར་ཡུལ་མ་རེག་པ་དེ་བཞིན་དུ་དེའི་འདྲ་བ་དང་མི་འདྲ་བ་ཡང་མི་རྟོགས་པར་འགྱུར་ལ། རྟོག་པ་གང་ཡིན་པ་དེ་ཡང་ཤེས་པའི་རྣམ་པར་གྱུར་པ་ཁོ་ན་ཡིན་ཏེར། དས་ན་ཡུལ་གཉིས་སུ་འགྲུབ་པར་ཇི་ལྟར་འགྱུར། འོན་ཏེ་རང་གི་རྣམ་པ་ཉིད་ལ་ཕྱི་རོལ་ཏུ་ལྷག་པར་ཞེན་པའི་ཕྱིར་ན་དེ་ལ་གནས་པའི་རྣམ་པ་གཉིས་ཉིད་རྟོགས་པར་བརྗོད་ན། དེ་ལྟ་ན་ནི་འོ་ན་རང་གི་རྣམ་པར་རྟོག་པ་ཉིད་ཕྱི་རོལ་རྟོགས་པ་ཡིན་པའི་ཕྱིར་རྗེས་སུ་དཔག་པ་དོན་མེད་པ་སོ་ན་འདུག་གོ་སྙམ་ན། དེ་ལ་ནི་སྙིང་པོ་མེད་དེ། རྗེས་སུ་དཔག་པའི་རྣམ་པར་རྟོག་པའི་རྣམ་པ་ཉིད་ལ་དེ་ལྟར་ངེས་པར་རྟོགས་པའི་ཕྱིར་རོ། །མངོན་སུམ་གྱི་ནི་ལྐོག་ཏུ་གྱུར་པ་མངོན་དུ་བྱེད་པ་མི་སྲིད་དོ། །དེ་ལ་ཡང་གལ་ཏེ་ཡང་རྗེས་སུ་དཔག་པའི་རང་གི་རྣམ་པ་རིག་པ་ཉིད་ཀྱིས་ཕྱི་རོལ་རིག་པར་རྣམ་པར་གཞག་པ་དེ་ལྟ་ན་ཡང་ཕྱི་རོལ་ལ་ལྟོས་ནས་ནི་དེ་རྗེས་སུ་དཔག་པ་ཉིད་དུ་ཐ་སྙད་འདོགས་པ་ཡིན་གྱི་རང་རིག་པ་ནི་མ་ཡིན་ནོ། །དབང་པོའི་མངོན་སུམ་བཞིན་དུ་རྟོགས་པ་འཆོལ་བ་བཀག་པའི་དོན་དུའོ། །རྟོགས་པར་བྱ་བའི་ཕྱི་རོལ་གྱི་དོན་དེ་ཡང་རྗེས་སུ་དཔག་པའི་དུས་ན་འདྲ་བའི་རྣམ་པ་ཉིད་དུ་རྟོགས་ལ། དེ་ཡང་རྗེས་སུ་དཔག་པ་ཉིད་ཀྱི་བྱེད་པ་པོ་ཡོད་པ་ནི་མ་ཡིན་ནོ། །མེ་བཞིན་དུ་རྣམ་པ་དེ་ཡང་ལྐོག་ཏུ་གྱུར་པ་ནི་མ་ཡིན་ནོ། །ལྐོག་ཏུ་གྱུར་པའི་ཕྱོགས་ལ་ནི་རང་གི་སྣང་བ་ལྟར་རུང་བས་ཁྱབ་ལ་སེམས་ཀྱི་ཆོས་འགའ་ཡང་རྟོགས་པར་ནུས་པ་མ་ཡིན་ནོ། །དེ་བས་ན་རང་གིས་རིག་པའི་རང་གི་རྣམ་པའི་སྒོ་ནས་འདྲ་བ་དང་མི་འདྲ་བ་ཉིད་དུ་རྣམ་པར་འཇོག་པ་ན། ཡུལ་ལ་བརྟེན་པ་ཡང་རིག་པ་ཉིད་ཀྱིས་གྲུབ་པར་བརྗོད་པ་ཡིན་ལ་རྗེས་སུ་དཔག་པ་དོན་མེད་པ་ཡང་མ་ཡིན་ནོ། །གལ་ཏེ་ཁྱོད་ཀྱི་ལྟར་ན་རྣ་པར་རྟོག་པ་ཐམས་ཅད་འཁྲུལ་པ་ཉིད་མ་ཡིན་ནམ་དེས་ན། དེའི་སྣང་བ་ལ་ཡང་ཇི་ལྟར་འདྲ་བ་ཉིད་དུ་ངེས་ན། གང་ཞིག་ཕྱི་རོལ་གྱི་དོན་དུ་ལྟག་པར་ཞེན་པ་ན་ཡུལ་གཉིས་སུ་གྲུབ་པར་འགྱུར་སྙམ་ན། ཤེས་པའི་རང་གི་ངོ་བོ་ལ། །ཞེས་གསུངས་སོ། །
ཅི་འདི་རྒྱལ་པོའི་བཀའ་འམ་སྙམ་ན་དེ་ལ་ཞེས་བྱ་བ་ལ་སོགས་པ་གསུངས་སོ། །དེ་ཉིད་གསལ་བར་བྱེད་པ་ནི་འདི་ལྟར་ཞེས་བྱ་བའོ། །བརྗོད་པར་བྱ་བའི་ཁྱད་པར་གྱི་ཡིད་ཀྱི་འགྱུར་བ་ཉམས་སུ་མྱོང་ལ། དེ་དང་རྗེས་སུ་མཐུན་པར་གནས་པ་དང་བྱེད་པ་ཕྲད་པའི་འཐད་པ་འབྱུང་བ་ཡིན་ཏེ། དེ་ལྟ་མ་ཡིན་ན་གཞན་གྱི་ཡིད་བཞིན་དུ་ཉམས་སུ་མ་མྱོང་ངམ། ཉམས་སུ་མྱོང་བ་ལ་ཡིད་མ་ཆེས་ན། བསྙོན་པ་ཡིན་པ་ཚིག་ཇི་ལྟར་འགྱུར། དེ་ཉིད་ཀྱི་ཕྱིར་འབྲེལ་མེད་རྟེན་ལ་ཞེས་གསུངས་སོ། །བརྗོད་པའི་རྟེན་ནི་བསམ་པ་མ་ཡིན་ལ་དེ་ཡང་རྣམ་པ་གཉི་ག་ལྟར་ཡང་འདིའི་རྒྱུ་ཉིད་དུ་འབྲེལ་པ་མ་ཡིན་ནོ་ཞེས་བྱ་བའི་དོན་ཏོ། །དེ་བས་ན་གཞལ་བྱ་གཉིས་ནི་རང་རིག་པར་གྲུབ་པ་ཡིན་ནོ་ཞེས་བྱ་བ་ལ་གནོད་པ་ཡོད་པ་མ་ཡིན་ནོ། །འོ་ན་ཡུལ་ཉིད་ཐ་དད་པར་འགྱུར་མོད། ཚད་མ་གོ་ཇི་ལྟར་ཐ་དང་པ། བསྒྲུབ་པར་བྱ་བའི་གཙོ་བོ་ནི་དེ་ཉིད་ཡིན་ནོ་སྙམ་དུ་དོགས་པ་བསུ་ནས་ཚད་མའི་དབྱེ་བ་ནི་དེ་ཙམ་ཉིད་ཡིས་འགྲུབ་པ་ཡིན་ནོ་སྙམ་དུ་དགོངས་ནས་དངོས་གཞན་དག་གི་ཞེས་གསུངས་སོ། །དངོས་གཞན་དག་གི་ནི་ཤེས་པ་ལས་ཐ་དད་པ་དག་གིའོ། །ཤེས་པ་ཐ་དད་པ་དེ་ཉིད་ཀྱི་ངོ་བོ་གང་ལ་ཡོད་པ་དེ་ནི་དེའི་ངོ་བོར་འགྱུར་བའི་ཚད་མའི་དབྱེ་བ་སྟེ་དེ་ཅིས་མི་གྲུབ། དེའི་ཕྱིར་རྟོགས་པའི་དབྱེ་བ་དང་གཞལ་བྱའི་དབྱེ་བ་འདི་གཉིས་ནི་ཕན་ཚུན་ཁྱབ་པ་ཡིན་ཏེ། གང་གི་ཚེ་གཅིག་ལ་ཐེ་ཚོམ་ཞུགས་པ་དེའི་ཚེ་གཞན་གྱིས་ཐ་སྙད་བྱེད་པ་ཡིན་ནོ། །དེ་ལྟ་ན་ཡང་ཚད་མ་གཉིས་སུ་ཐེ་ཚོམ་ཟ་བ་ལ་གཞལ་བྱ་གཉིས་ཉེ་བར་བཀོད་པ་ཡིན་ནོ། །དེ་ལ་ཐེ་ཚོམ་ཞུགས་པ་ལ་རྟོགས་པའི་དབྱེ་བ་ལས་སྐྱབས་གཞན་མེད་དོ། །ཚད་མའི་དབྱེ་བ་གྲུབ་པ་ཡང་དེ་ཉིད་ཡིན་ནོ། །འདི་ལ་གཞན་དག་རྨོངས་ནས་སྨྲས་པ་ནི་རྟོགས་པ་ཉིད་ནི་ཞེས་བྱ་བའོ། །གྲུབ་པའི་མཐའ་སྨྲ་བ་ནི་བཟོད་ནས་མིན་ནམ་ཞེས་གསུངས་སོ། །འདི་ལྟར་ཅིའི་ཚད་མ་རྟོགས་པ་ལས་གཞན་ཉིད་ཡིན་ནམ། འོན་ཏེ་རྟོགས་པ་ཙམ་ནི་ཚད་མ་ཡིན་གྱི་འོན་ཀྱང་ཁྱད་པར་ཅན་ཁོ་ན་ཞིག་ཡིན་ཞེས་ཁྱེད་འདོད། དེ་ལ་ཕྱོགས་དང་པོ་ནི་མ་གྲུབ་ལ། གཉིས་པ་ནི་གྲུབ་པ་ལ་སྒྲུབ་པ་ཡིན་ནོ། །དེ་ཉིད་ཀྱི་ཕྱིར་སྒྲ་ལས་བྱུང་བ་ལ་སོགས་པ་ནི་ཚད་མ་མ་ཡིན་ནོ། །འདི་ཡང་སྔར་བཤད་པའི། །ཚད་མ་སླུ་བ་མེད་ཅན་གྱི། །ཤེས་པ་ཞེས་བྱ་བ་ཉིད་ལས་འགྲུབ་སྟེ། ཤེས་པའི་སྒྲས་ཤེས་པ་མ་
ཡིན་པ་དང༌། སླུ་བ་མེད་པའི་སྒྲས་ནི་རྟོགས་པ་ཙམ་རྣམ་པར་བཤད་པའི་ཕྱིར་རོ། །ཡང་ན་རྟོགས་པ་ཉིད་ནི་ཐ་དད་འགྱུར། །ཞེས་བྱ་བ་ནི་ཚད་མའི་རྣམ་པ་ཉིད་ཐ་དད་པར་འགྱུར་མོད། ཚད་མའི་དབྱེ་བས་ཞེས་བྱ་བ་མངོན་སུམ་དང་རྗེས་སུ་དཔག་པའི་མཚན་ཉིད་ཚད་མ་ཁྱད་པར་ཅན་དུ་ཇི་ལྟར་ཡིན་ཏེ། ཅི་གཞན་ཡང་ཚད་མ་ཉིད་མ་ཡིན་ནམ་ཞེས་བྱ་བའི་དོན་ཏོ། །ཇི་ལྟར་ཐུན་མོངས་མ་ཡིན་པའི་རྣམ་ཅན་ལས། ཐུན་མོང་གི་རྣམ་པ་ཅན་ལས། ཐུན་མོང་གི་རྣམ་པ་ཅན་གྱི་ཤེས་པ་ཐ་དད་པ་དེ་བཞིན་དུ་ཐུན་མོང་གི་རྣམ་པ་ལ་ཡང་སྒྲ་དང་ཉེ་བར་གཞལ་བ་ལ་སོགས་པའི་དབྱེ་བ་ཡོད་པ་ཁོ་ནའོ། དེས་ན་ཡུལ་ཐ་དད་པ་ཉིད་ལས་ཚད་མ་གཞན་ཡང་ཡོད་པར་འགྱུར་རོ། །འོན་ཏེ་ལྐོག་ཏུ་གྱུར་པ་ཐམས་ཅད་ནི་ཐུན་མོང་གི་རྣམ་པ་ཅན་ཉིད་ཀྱིས་གཅིག་ཉིད་ཡིན་ན་དེའི་ཚེ་མངོན་སུམ་དང་ལྐོག་ཏུ་གྱུར་པ་དག་ཀྱང་དངོས་པོ་ཉིད་དུ་གཅིག་པའི་ཕྱིར་ཚད་མ་གཉིས་སུ་ཡང་མི་འགྱུར་རོ་ཞེ་ན་འདིར་གྲུབ་པའི་མཐའ་ནི་མངོན་སུམ་དུ་ཞེས་བྱ་བ་ལ་སོགས་པའོ། །ལྐོག་ཏུ་གྱུར་པ་ལ་ནི་རྗེས་སུ་དཔག་པ་ལས་གཞན་མི་སླུ་བ་མ་ངེས་པ་ཉིད་ལས་ཚད་མ་ཡིན་པ་སྤངས་པ་ཡིན་ནོ། །དེས་ན་ཐོས་པ་ལ་སོགས་པའི་རང་བཞིན་གྱིས་རྟོགས་པ་ཐ་དད་པ་ཡིན་ཡང་གཞལ་བྱ་ཡོད་པར་ངེས་པར་མི་བྱེད་པས་ཇི་ལྟར་ཚད་མ་ཡིན་སྙམ་དུ་དགོངས་པའོ། །གལ་ཏེ་སྔར་འདི་མཚན་ཉིད་ཀྱིས་སྤངས་ཟིན་པ་ཉིད་མ་ཡིན་ནམ། ད་ལྟར་ཅི་ཞིག་སྒྲུབ་ཅེ་ན། བཤད་པ་མངོན་སུམ་དང་རྗེས་སུ་དཔག་པ་དེ་ཉིད་ཀྱིས་ཐ་དད་དེ་རིགས་མི་འདྲ་བ་ཉིད་དོ། །དེ་ཡང་རང་རིག་པས་གྲུབ་པའི་ཕྱིར། ཐ་སྙད་ཉིད་ཙམ་པོ་འདི་ད་ལྟར་བསྒྲུབ་བྱར་བྱེད་པ་ཡིན་ནོ། །གལ་ཏེ་འདིའི་ཐ་སྙད་ཀྱང་གྲུབ་པ་ཟིན་པ་ཉིད་མ་ཡིན་ནམ་མངོན་སུམ་དང་རྗེས་སུ་དཔག་པས་གྲུབ་པའི་མ་གཉིས་ལ་རྗེས་སུ་དཔག་པ་དང་མངོན་སུམ་གྱིས་གྲུབ་པར་ནི་གཞན་ཡང་མི་སེམས་སོ་སྙམ་ན། བསྟན་བཅོས་བྱེད་པ་རྣམས་ཀྱིས་ཡང་འཁྲུལ་པའི་ཡུལ་ཉིད་དུ་དཔེར་བརྗོད་པ་ནི་འདི་མེ་ཞེས་བྱ་བའོ། །འདི་ལ་ཕ་རོལ་པོ་དག །ལྟ་བའི་ཤེས་པའི་དེ་མ་ཐག་ཏུ། རིགས་ལ་སོགས་པས་ཁྱད་པར་ཅན་གྱི་དོན་གསལ་བར་སྣང་བ་རྣམ་པར་རྟོག་པ་དང་བཅས་པའི་ཤེས་པ་གཅིག་ཉིད་ནི། དབང་པོ་ལ་སོགས་པའི་བདག་པོས་བསྐྱེད་པའི་ཕྱིར་ན། མངོན་སུམ་གཞན་ཉིད་ཡིན་ནོ་ཞེས་འདོད་དོ། །
འདི་ཞེས་བྱ་བ་ནི་མངོན་སུམ་ཉིད་དུ་སྣང་བའོ། །མེ་ཞེས་བྱ་ནི་མེ་ཉིད་ཀྱི་རིགས་སོ། །དེ་ལ་རིག་པ་བརྗོད་པ་ནི། གསལ་ལ་འབར་བའི་རྣམ་པ་ཅན་གྱི་ངོ་བོ་ཙམ་འཛི་པ་དང༌། གསལ་བར་སྣང་བ་རྣམ་པར་རྟོག་པ་མེད་པ་ནི་གཞན་གྱི་ཡིན་ལ། བཙོ་བ་དང་བསྲེག་པ་ལ་སོགས་པ་བསྒྲུབ་པ་ལ་ཡང་དེའི་རང་བཞིན་གྱི་རྗེས་སུ་དཔག་པ་གཞན་ཁོ་ན་ཡིན་ནོ་ཞེས་བྱ་བའོ། །འོན་བཙོ་བ་ལ་སོགས་པར་ནུས་པ་སྨོས་པས་ཅི་ཞིག་བྱ་རིགས་ཙམ་རྟོགས་པ་ཉིད་ལས་ཚད་མར་འགྱུར་མོད་ཅེས་ཁ་ཅིག་ཟེར་བ་དེ་ལ་བརྗོད་པ་ནི། དེ་ལྟར། ནུས་པ་གཟུང་བ་མེད་པར་ནི། །འཇུག་ པ་མེད་དོ་སུ་ཞེ་ན། དགོས 
་པའི་དོན་སྒྲུབ་པའི་དོན་ཏེ། དངོས་པོ་དོན་གཉེར་བའི་ངང་ཚུལ་ཅན་རྟོགས་པར་འདོད་པ་དེ་བསྙོན་པ་མ་ཡིན་པ་ཞེས་བྱ་བའི་དོན་ཏོ། །དེའི་ཕྱིར་རང་གི་ངོ་བོ་ལས་ལྷག་པར་སྔོན་མྱོང་བའི་དོན་བྱ་བ་འཇལ་བ་ན་རྣམ་པར་རྟོག་པའི་ཤེས་པ་འདི་སྟེ་རང་གི་ངོ་བོ་ཙམ་སྣང་བའི་མངོན་སུམ་ལས་ཐ་དད་པ་ཉིད་དོ། །རིགས་ཞེས་བྱ་བ་ཐ་དད་པ་ནི་ཡོད་པ་མ་ཡིན་ནོ་ཞེས་བྱ་བ་འདི་ཡང་བཤད་ཟིན་ཏོ། །གལ་ཏེ་ཚད་མ་སླུ་བ་མེད་ཅན་གྱི་ཤེས་པ་ཞེས་བྱ་བ་སྤྱིའི་མཚན་ཉིད་ཡིན་ན་མི་དེ་ཡང་གང་ལས་ངེས་ཤེ་ན། འདི་ལ་ཡང་སྔར་བཤད་པའི་ཐ་སྙད་ལས་ནི་ཚད་མ་ཉིད་ཅེས་བྱ་བ་དྲན་པར་བྱེད་པ་ནི་འཇུག་པ་དང་ལྡོག་པའི་མཚན་ཉིད་ཀྱི་ཞེས་བྱ་བའོ། །ལེའུ་དང་པོར་ཞེས་བྱ་བར་ནི་རང་གིས་བཤད་པར་བྱ་བ་ལྟོས་པའིའོ། །གང་དུ་གང་ལ་རྣམ་པ་གནག་གི་སྙམ་ན། དེ་ལ་ཞེས་བྱ་བ་ནི་རྣམ་པར་རྟོག་པ་དང་བཅས་པས་ཤེས་པའི་དུས་ལའོ། ལྷག་མ་ནི་གོ་སླའོ། །ལྷག་མ་ནི་གོ་སླའོ། །འོ་ན་དེ་རྣམ་པ་གཉིས་སུ་ག་ལས་འགྲུབ་སྙམ་ན་རྟོགས་པའི་རྣམ་པ་ཐ་དད་པས་ནི་ཞེས་གསུངས་སོ། །བ་ལང་མཐོང་བ་ལྟར་རྣམ་པར་རྟོག་པའི་དུས་བཞིན་དུ་གཙིག་ནི་བརྗོད་པ་མེད་པར་གསལ་བ་དང༌། བརྗོད་པ་དང་འདྲེས་པ་མ་གསལ་བ་ནི་གཞན་ཉིད་ཉམས་སུ་མྱོང་བ་ཁོ་ནའོ། །རྟོག་པ་དེའི་ངོ་བོར་གྱུར་པའི་ཚད་མ་ལྟ་ཅི་སྨོས། མངོན་སུམ་དེ་ནི་ཞེས་བྱ་བ་ནི་འབར་བའི་རྣམ་པ་ཅན་ནོ། །གང་ཞིག་འདི་འདྲ་བའི་རང་བཞིན་ཅན་དེ་ནི་འདི་འདྲ་བའི་དོན་བྱ་བ་བྱེད་པ་ཡིན་ཏེ་དཔེར་ན་སྔོན་མྱོང་བ་བཞིན་ནོ། །དེ་བཞིན་དུ་འདི་ཡང་ཡིན་ནོ་ཞེས་བྱ་བར་དོན་བྱ་བའི་ནུས་པ་འདྲ་བ་ཉིད་ནི་རྗེས་སུ་དཔག་པ་ཁོ་ནའི་ཡུལ་ཡིན་ནོ། །འོན་ཏེ་
ཞེས་བྱ་བ་ལ་སོགས་པས་ནི་རང་གི་ཕྱོགས་པའི་རྩོད་པ་སློང་བའོ། །བྲམ་ཟེ་ཨ་ཙ་ཊ་མ་གཏོགས་པ། གཞན་དག་ནི་དོན་བྱ་བ་གྲུབ་པའི་ཡུལ་ཅན་གྱི་རྣམ་པར་རྟོག་པའི་ཤེས་པ་མངོན་སུམ་ལས་གཞན་ཡིན་མོད། དེ་ཚད་མ་ནི་མ་ཡིན་ཞེས་བྱ་བར་སེམས་སོ། །དེ་ཉིད་གཞུང་འཇུག་པ་ནི་དེ་དང་ལྡན་ཅིག་ཡོད་དོ་ཅོག་ཅེས་བྱ་བའོ། །གལ་ཏེ་ལུས་ལ་སོགས་པ་ནི་བེམས་པོ་ཡིན་པའི་ཕྱིར་རོ་ཞེས་ལན་འདེབས་པ་ནི་ཤེས་པ་ཉིད་ཡིན་པ་ལ་ནི་
དགོས་པ ་མེད་པའི་ཕྱིར་རོ། །དངོས་པོའི་རང་བཞིན་མངོན་སུམ་གྱིས་བཟུང་བའི་ཕྱིར་རོ་སྙམ་དུ་བསམས་པ་ཡིན་ནོ། འདིར་སྨྲས་པ་ཞེས་བྱ་བ་ནི་སུན་འབྱིན་པའོ། །གལ་ཏེ་ཉེ་བར་མཁོ་བ་ཙམ་ནི་ལུས་ལ་སོགས་པ་ཡང་ཉམས་པ་མེད། དེས་ན་ཤེས་པ་ཉིད་ཀྱི་ཁྱད་པར་དུ་བྱས་པ་ཡིན། །དེ་ལ་ནི་རྣམ་པར་རྟོག་པ་མེད་པའི་ཤེས་པ་ལ་ལྟོས་ཏེ། ཉེ་བར་མཁོ་བ་མེད་པ་ཉིད་བརྗོད་ཟིན་པ་ཉིད་དོ་སྙམ་ན། དེ་ཉིད་ལ་འདི་སྐད་ཅེས་བརྗོད་པར་བྱ་སྟེ། གལ་ཏེ་མངོན་སུམ་ལ་ལྟོས་ན་རྣམ་པར་རྟོག་པ་ཉེ་བར་མཁོ་བ་མེད་པ་ཡིན་ནོ། །དེ་མེད་པར་ཡང་མངོན་སུམ་འཇུག་པར་བྱེད་པར་ཇི་ལྟར་མི་འགྱུར། །ཇི་སྲིད་དོན་བྱ་བར་བྱེད་པ་དེ་སྲིད་དུ་ནི་མཐོང་བའི་དངོས་པོ་ལ་ཡང་འཇུག་པ་སུ་ཡང་མེད་དེ། འགྲོ་བ་ན་རྩ་ལོ་རག་པ་ལ་སོགས་པ་བཞིན་ནོ་ཞེས་སོ། །ཅི་སྟེ་ཞེས་བྱ་བ་ནི་གཞན་གྱིའོ། །རྗེས་སུ་དཔག་པ་ནི་འཇུག་པར་བྱེད་པ་མ་ཡིན་ནོ་ཞེས་སྦྱར་རོ། །ཇི་ལྟར་བུ་ཞིག་ཅེས་འདྲ་བ་འཛིན་པ་གང་ཡིན་ཏེ་ངེས་པར་བྱེད་པ་དེའི་རང་བཞིན་ཏེ། དེའི་རང་བཞིན་གྱི་རྗེས་སུ་དཔག་པ་ཞེས་བྱ་བའི་དོན་ཏོ། །འདི་ལྟར་ནུས་པའི་རྣམ་པར་རྟོག་པ་ནི་ཡོད་ཀྱང་མངོན་སུམ་ཙམ་ལས་སྐྱེས་པ་ཡིན་གྱི་དེའི་རང་བཞིན་གྱི་རྟགས་ལ་བརྟེན་པ་ནི་མ་ཡིན་ཏེ། འདི་ལྟར་མོད་ཁོ་ནར་མངོན་སུམ་ཙམ་ལས་སྐྱེ་བར་ཉམས་སུ་མྱོང་བ་དེའི་རང་བཞིན་གྱི་ཕྱིར་འདི་ནི་དྲན་པ་ཙམ་ཡིན་གྱི་ཚད་མ་ནི་མ་ཡིན་ནོ། །དེ་ཡང་མི་བདེན་ཏེ་ཞེས་བྱ་བ་ནི་གྲུབ་པའི་མཐའོ། །དོན་ནི་འདི་ཡིན་ཏེ་གལ་ཏེ་ཡང་གོམས་པའི་གནས་སྐབས་ན་རྟགས་དང་རྟགས་ཅན་གྱི་དངོས་པོ་ལྷག་པར་ཞེན་པར་མཚོར་བར་དེ་ལྟ་ན་ཡང༌། དང་པོའི་འཇུག་པ་ལ་ནི་དེའི་རང་བཞིན་གྱིས་རྗེས་སུ་དཔག་པ་མེད་ན་མོད་ཁོ་ནར་ལྷག་པར་ཞེན་པ་དེ་ཉིད་རྣམ་པ་ཐམས་ཅད་དུ་སྲིད་པ་མ་ཡིན་ནོ་ཞེས་བྱ་བ་ཡིན་
ནོ། །གཞན་དག་བསམ་པ་མི་རིག་ནས། རྣམ་པ་ཐམས་ཅད་དུ་མངོན་སུམ་འཇུག་པར་བྱེད་པ་ཉིད་ཡིན་པ་འགོག་པ་ཡིན་ནོ་སྙམ་པས་དད་པོ་མ་ཡིན་ཡང་ཞེས་སོ། །འདི་གླེན་པའི་གཏམ་དང་འདྲ་བར་བྱ་ནས་བཞད་གང་དུ་བྱེད་པ་ནི་འདི་ཞེས་བྱ་བའོ། །དེ་ཉིད་སྟོན་པ་ནི་གལ་ཏེ་ཞེས་བྱ་བའོ། །གལ་ཏེ་དུས་གཉི་གར་ཡང་མངོན་སུམ་གྱིས་འཇུག་པ་ཡིན་ནོ་ཞེས་བྱ་བ་འདི་ལ་འགལ་བ་ཅི་འདྲ་བ་ཞིག་ཡོད་སྙམ་ན། འདི་ལྟར་ཞེས་བྱ་བ་ལ་སོགས་པ་གསུངས་སོ། །མངོན་སུམ་མི་གསལ་བ་ལས་ནི་དེའི་རང་བཞིན་ལས། དམིགས་པ་མེད་པར་ཡང་དང་པོ་འཇུག་པ་ཉིད་མེད་པའི་ཕྱིར་ན་གོམས་པ་མེད་ལ། དེ་མེད་པའི་ཕྱིར་ན་ཕྱིས་ཤིན་ཏུ་གསལ་བ་མངོན་སུམ་སྐྱེ་བར་མི་འགྱུར་རོ་ཞེས་བྱ་བའི་དོན་ཏོ། །དེའི་ཕྱིར་ཞེས་བྱ་བ་ནི་འཇུག་བསྡུ་བའོ། །འཇུག་པར་བྱེད་པ་ཉིད་དོ་ཞེས་བྱ་བ་འདིས་ནི་མི་ལྡན་པ་རྣ་པར་གཅོད་པ་བརྗོད་པ་ཡིན་ནོ། །གོམས་པའི་གནས་སྐབས་ན་ཡང་དེའི་རང་བཞིན་ཅན་གྱི་རྗེས་སུ་དཔག་པ་ཉིད་འཇུག་བར་བྱེད་པ་ཞེས་བྱ་བ་ནི་མ་ཡིན་ནོ་ཞེས་བྱ་བའི་དོན་ཏོ། །གཞན་མཁོ་བ་མེད་ཅེས་ཏེ་གཞན་ཚེའི་མཁོ་བ་མེད་པ་ཡིན་ཞེས་དེ་མ་ཐག་ཁོ་ནར་འཆད་པར་འགྱུར་རོ། །ཊཱི་ཀཱ་མཛད་པ་དེ་ནི་ཚེ་ཡང་མངོན་སུམ་ཁོ་ནར་འཇུག་པར་བྱེད་པ་ཡིན་གྱི་དེའི་རང་ཟིན་ཅན་རྗེས་སུ་དཔག་པ་ནི་མ་ཡིན་ནོ་སྙམ་དུ་དོགས་པ་ཡིན་ནོ། །གལ་ཏེ་ཡང་གོམས་པའི་གནས་སྐབས་ཀྱི་དབང་དུ་བྱས་པ་ཉིད་ཀྱིས་སྔོན་གྱི་རང་བཞིན་དང་ཆོས་མཚུངས་པ་ལས་དེ་ལྟར་རྟོགས་པ་རྗེས་སུ་དཔག་པ་ནི་མ་ཡིན་ཏེ་དོན་ལྐོག་ཏུ་མ་གྱུར་པའི་ཕྱིར་ནོར་བུ་དང་དངུལ་ལ་སོགས་པའི་གཟུགས་རྟོགས་པ་བཞིན་ནོ་ཞེས་གསུངས་པ་དེ་ལྟ་ན་ཡང་ཕྱིས་ཐེ་ཚོམ་ཟ་བའི་མངོན་སུམ་པའི་སྐབས་ཡིན་པའི་ཕྱིར་རོ། །མངོན་སུམ་མེད་ན་ཡང་ཞེས་བྱ་བ་ནི། རྗེས་སུ་དཔག་པར་བྱ་བའི་མེའི་ཡུལ་ཅན་མེད་པར་རོ། །དེ་ཡང་ཞེས་བྱ་བ་ནི་མངོན་སུམ་ཡང་ངོ༌། །རྗེས་སུ་དཔག་པ་ལས་འཇུག་པའི་དུས་ན་ནི་དེའི་ཡུལ་ཅན་གྱི་མངོན་སུམ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །ཅི་སྟེ་ཡང་ཞེས་བྱ་བ་ལ་སོགས་པ་ནི་གཞན་གྱིའོ། །དེ་མེད་པར་ནི་རྗེས་སུ་དཔག་པ་མེད་པར་རོ། །དེ་མེད་པར་ཡང་ཞེས་བྱ་བ་ནི་རྗེས་སུ་དཔག་པ་མེད་པར་ཡང་ངོ༌། །དེ་གྲུབ་པ་ནི་མངོན་སུམ་གྱིས་འགྲུབ་པའོ། །རྗེས་སུ་དཔག་པ་ནི་གདོན་མི་ཟ་བར་ཕྱོགས་ཀྱི་ཆོས་ལ་སོགས་
པའི་རྒྱུ་མཚན་དུ་མངོན་སུམ་ལ་ལྟོས་པ་ཡིན་གྱི། གོམས་པས་སྐྱེད་པའི་མངོན་སུམ་ནི་དེ་ལ་ལྟོས་པ་མ་ཡིན་ནོ་ཞེས་བྱ་བ་ནི་ དགོས་པའི་དོན་ཏོ། །འདིར་ཡང་རྣམ་པ ་ཐམས་ཅད་དུ་རྗེས་སུ་དཔག་པ་ལ་སྐུར་པའམ། མངོན་སུམ་གཙོ་བོར་འགྲུབ་པར་འགྱུར་གྲང༌། དེ་ལ་སྔར་བརྗོད་པ་དྲན་པར་བྱེད་པས་ཕྱེད་སྔ་མས་ཕྱོགས་དང་པོ་འགོག་ལ་གཉིས་པ་ནི་ཕྱེད་ཕྱི་མས་སོ། །དེ་ཕྱིར་བྱ་བ་ནི་རྗེས་སུ་དཔག་པའི་དྲིན་གྱིས་མངོན་སུམ་གསལ་བ་ཡིན་པའི་ཕྱིར་རོ། །ད་ཉིད་གསལ་བར་བྱེད་པ་ནི་གཞན་ཚེ་ཞེས་བྱ་སྟེ། གསལ་བའི་གནས་སྐབས་ཀྱི་ཚེའོ། །གཞན་ཚེ་ཞེས་བྱ་བ་ནི་མ་གོམས་པའི་ཚེ་ནའོ། །འོན་ཏེ་དེའི་ཚེ་རྗེས་སུ་དཔག་པ་མི་ དགོས་པ ་ཉིད་དོ་སྙམ་ན། གོམས་པ་མེད་པར་ཞེས་གསུངས་སོ། །འོན་ཏེ་ཉེ་བར་མཁོ་བ་མེད་ཀྱང་དོན་དུ་ཉེ་བར་འགྱུར་རོ་སྙམ་ན། མཁོ་བ་མེད་ན་ཞེས་གསུངས་སོ། །འོན་ཏེ་དོན་དུ་གཉེར་བའི་ཡུལ་གྱི་རྗེས་སུ་དཔག་པ་ཡང་ཉེ་བར་མི་མཁོ་བ་ཉིད་དོ་སྙམ་ན། དངོས་པོ་དོན་དུ་གཉེར་བའི་ཡུལ་ཞེས་གསུངས་སོ། །འདི་ནི་བྲམ་ཟེ་ཨ་ཙས་ཀྱང་དེའི་རང་བཞིན་ཅན་གྱི་རྗེས་སུ་དཔག་པ་ནི་མ་གོམས་པའི་གནས་སྐབས་ཁོ་ནར་ཡིན་ནོ་ཞེས་ཁྱད་པར་བརྗོད་པར་རིགས་སོ་ཞེས་བསྟན་ཏོ། །ཅི་སྟེ་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། གལ་ཏེ་ཡང་རྗེས་སུ་དཔག་པ་ཉེ་བར་མཁོ་བ་དེ་ལྟ་ན་ཡང་དེར་མངོན་སུམ་ཉིད་བསྒྲུབ་པར་བྱ་བ་ཡིན་པའི་ཕྱིར་དེ་ཉིད་གཙོ་བོ་ཡིན་ནོ་ཞེས་བྱ་བའོ། །ཕྱེད་ཕྱི་མས་ནི་གྲུབ་པའི་མཐའོ། །བསྒྲུབ་པར་བྱ་བ་གཞན་གྱི་ཁྱད་པར་དུ་གྱུར་བའི་མཚན་ཉིད་ཀྱི་ཚུལ་འདི་ཉིད་ལས་ཏེ། རིམ་པ་འདི་ཉིད་ལས་འདའ་བར་མི་འགྱུར་རོ། །གང་དུ་ཞེ་ན་ཡུལ་རྟགས་ལའོ། །ཚུལ་གསུམ་པ་ཉིད་ཀྱི་ངེས་པ་འཇུག་པའི་དོན་དུའོ་ཞེས་བྱ་བའི་དོན་དུའོ། །གལ་ཏེ་རྗེས་སུ་དཔག་པ་དེ་ཡང་མངོན་སུམ་སྐྱེ་བ་ཉིད་ཀྱི་འབྲས་བུ་དང་བཅས་པ་མ་ཡིན་ནམ་ངེས་ན་གལ་ཏེ་མངོན་སུམ་འགའ་ཞིག་རྗེས་སུ་དཔག་པ་སྐྱེད་པའི་ཡན་ལག་ཡིན་དུ་ཆུག་པ་དེ་ལྟ་ན་ཡང༌། སླར་དེ་ཉིད་ཀྱི་མཐར་ཐུག་པ་ཡིན་ཏེ། རྗེས་སུ་དཔག་པ་མངོན་སུམ་བྱས་ན་ཡང་རྗེས་སུ་དཔག་པ་དོན་དུ་གཉེར་བ་ཡོད་པ་མ་ཡིན་གྱི། རྗེས་སུ་དཔག་པ་ལ་ནི་གདོན་མི་ཟ་བར་མངོན་སུམ་དོན་དུ་གཉེར་བ་ཡིན་ཏེ། དེ་ལྟ་མ་ཡིན་ན་རྗེས་སུ་དཔག་པས་ཅི་བྱ། འོན་ཏེ་རྗེས་སུ་དཔག་པ་ཐམས་ཅད་ནི་མངོན་སུམ་དུ་བྱ་བ་མ་ཡིན་
ནོ་ཞེ་ན། །འོན་ནི་རྗེས་སུ་དཔག་པ་སྟེ་གལ་ཏེ་འབྲས་བུ་འགའ་ཞིག་གི་དབང་དུ་བྱས་ནས་བཏོན་ན་དེའི་ཚེ་དེ་ཐོབ་བ་ཉིད་ཀྱིས་དེ་འབྲས་བུ་དང་བཅས་པར་འགྱུར་ལ། ཐོབ་པ་ཡང་མངོན་སུམ་གྱི་རང་བཞིན་ཁོ་ནའོ། །འདོད་རྒྱལ་དུ་ཐོབ་པའམ། བསྙོན་པས་འཇུག་པ་ནི་བླང་བར་བྱ་བ་མ་ཡིན་པ་ཁོ་ནའོ། །དེ་ལ་ཇི་ལྟར་འཇུག་པར་བྱེད་པའི་མངོན་སུམ་དུ་བྱ་བ་སྣང་བའི་མངོན་སུམ་གྱི་འབྲས་བུ་དང་བཅས་པ་དེ་བཞིན་དུ་རྗེས་སུ་དཔག་པ་ཡང་མངོན་སུམ་གྱིས་ཡིན་ནོ། །དེའི་ཕྱིར་བསྒྲུབ་པར་བྱ་བ་ཡིན་པས་ན་མངོན་སུམ་ནི་གཙོ་བོ་ཡིན་ལ་རྗེས་སུ་དཔག་པ་ནི་སྒྲུབ་པར་བྱེད་པ་ཉིད་ཀྱིས་ན་ཡན་ལག་ཡིན་ནོ་ཞེས་བྱ་བར་རིགས་སོ། །དེ་ལྟ་ཡིན་དང་རྒྱུའི་གནས་སྐབས་ནི་རྗེས་སུ་དཔག་པ་ཡིན་ལ་འབྲས་བུའི་གནས་སྐབས་ནི་མངོན་སུམ་ཡིན་ནོ་ཞེས་བྱ་བ་གྲུབ་པའི་མཐའ་ཡིན་ཏེ། དེས་ན་གཉི་ག་མཚུངས་པར་ཇི་ལྟར་འགྱུར་ཞེས་དགོངས་པ་ལ་འཇུག་པ་བསྡུ་བའི་ཚུལ་གྱིས་སེལ་བ་བརྗོད་པ་ནི། དེའི་ཕྱིར་མངོན་སུམ་དང་རྗེས་སུ་དཔག་པ་གཉིས་ཡང་ཚད་མ་ཡིན་ནོ་ཞེས་བྱ་བའོ། །དགོས་པ་ནི་འདི་ཡིན་ཏེ། དངོས་པོ་པའི་གཙོ་བོ་དང་ཕལ་པའི་དངོས་པོ་དཔྱོད་པའི་སྐབས་ནི་མ་ཡིན་གྱི་འོན་ཀྱང་ཚད་མའོ། །དེ་ལ་ནི་གཉི་ག་ཡང་དོན་རྟོགས་པ་དང་འཇུག་པའི་རྒྱུ་ཡིན་ནོ། །གཞན་སྐྱེ་བ་ལ་ཡན་ལག་ཡིན་ནོ། །ཚད་མ་ནི་གཙོ་བོ་དང་ཕལ་བའི་དངོས་པོ་ཅུང་ཟད་ཀྱང་མེད་དོ། །ཡན་ལག་ཉིད་དུ་མཚུངས་པ་ནི་དེ་ཙམ་ཞིག་རྟོགས་པར་བྱ་བ་ལ་བརྗོད་པ་ཡིན་ནོ། །གལ་ཏེ་ཚད་མ་ལ་ཡང་ཁྱད་པར་ཡོད་པ་ཉིད་དེ་འདི་ལྟར་རྗེས་སུ་དཔག་པ་ནི་མངོན་སུམ་ཡོད་པ་ལ་འཇུག་པ་ཡིན་ཏེ། དེ་གནོད་པའམ་བསྒྲུབ་པ་ལ་དེའི་སྐབས་མེད་པའི་ཕྱིར་རོ། །མངོན་སུམ་ནི་རྗེས་སུ་དཔག་པ་ཡོད་པ་དང་མེད་པ་ལ་མི་ལྟོས་སོ་སྙམ་དུ་དོགས་ན་རང་གི་ཡུལ་ལ་ཞེས་གསུངས་སོ། །མངོན་སུམ་ཞུགས་པའི་ཡུལ་ལ་ནི། རྗེས་སུ་དཔག་པ་འཇུག་པ་མ་ཡིན་ཏེ། ཡུལ་མ་ཡིན་པ་ཉིད་ཀྱི་ཕྱིར་རོ། །རྗེས་སུ་དཔག་པའི་ཡུལ་ལ་ནི་མངོན་སུམ་གྱིས་གནོད་པ་མ་ཡིན་ཏེ། མངོན་སུམ་དང་ལྐོག་ཏུ་གྱུར་པའི་ཡུལ་དབྱེ་བས་གཉི་ག་རྣམ་པར་གནས་པ་ཡིན་པའི་ཕྱིར་རོ། །མངོན་སུམ་གྱིས་གནོད་པའི་ཐ་སྙད་ཀྱི་རྗེས་སུ་དཔག་པའི་ཡུལ་མ་ཡིན་པ་ཉིད་སྟོན་པ་ཡིན་ནོ། །དེའི་ཕྱིར་གཉི་ག་ཡང་ཁྱད་པར་མེད་པ་ཡང་ཚད་མ་ཉིད་ཡིན་ནོ། །གཉིས་མེད་པ་ལ་ནི་རྗེས་སུ་དཔག་པ་ལ་སོགས་པ་ཡོད་པ་ཡིན་ཏེ། དེ་ཉིད་ཀྱི་
ཕྱིར་གཙོ་བོ་དང་ཅིག་ཤོས་ཡོད་པ་མ་ཡིན་ནོ། །འདི་ཉིད་བརྗོད་པ་ནི་དེ་ཁོ་ན་ལྟར་འཇིག་རྟེན་པ་ལ་གྲགས་པའི་ཕྱིར་རོ་ཞེས་བྱ་བའོ། །ཡང་དག་པའི་ཐ་སྙད་ལ་བརྟེན་པས་གནས་པ་ཡིན་ནོ་ཞེས་བྱ་བའི་དོན་ཏོ། །འདིར་ཚུ་རོལ་མཛེས་པ་པའི་དོགས་པ་བསུ་བ་དེ་ཅི་སྟེ་ཞེས་བྱ་བའོ། །དེ་ཞེས་བྱ་བ་ནི་རྗེས་སུ་དཔག་པའོ། །མ་ཡིན་ཏེ་ཞེས་བྱ་བ་ནི་འགོག་པའོ། །དབང་པོའི་མངོན་སུམ་ཚད་མར་འདོད་ན་རིགས་པ་མཚུངས་པས་ན་རྗེས་སུ་དཔག་པས་ཚད་མ་ཡིན་པར་ནན་གྱིས་འགྲུབ་པོ་ཞེས་སྟོན་པ་ནི། འདི་ལྟར་ཞེས་བྱ་བ་ལ་སོགས་པའོ། །མདོར་བསྡུ་ན་བརྡ་སྤྲོད་པ་ལ་ཡང་ལན་འདི་ཉིད་ཡིན་ནོ། །ཚུ་རོལ་མཛེས་པ་ལ་ཁ་ཅིག་མ་མཐོང་བ་འཇིག་རྟེན་ཕ་རོལ་ལ་སོགས་པའི་ཡུལ་ཅན་རྗེས་སུ་དཔག་པ་ནི་འགོག་ལ། །མཐོང་བའི་ཡུལ་ཅན་དུ་བླ་སོགས་པ་ལ་རྗེས་སུ་དཔག་པ་འདོད་ལ། དེ་ལ་ཡང་མཐོང་བའི་ཡུལ་ཅན་གྱི་རྗེས་སུ་དཔག་པ་དག་འཇུག་པ་མཚུངས་པ་ཉིད་ཡིན་ཡང་ཞེས་བྱ་བ་ལ་སོགས་པར་སྦྱར་རོ། །མཐོང་བའི་ཡུལ་ཅན་གྱི་རྗེས་སུ་དཔག་པ་ཡང་ཚུལ་གསུམ་པ་ཡོངས་སུ་དག་པའི་དབང་ཉིད་ཀྱིས་འཇུག་པར་བྱེད་པ་ཡིན་ལ། དེ་ནི་མ་མཐོང་བའི་ཡུལ་ལ་ཡང་མཚུངས་སོ་ཞེས་བྱ་བའི་དོན་ཏོ། །འདིར་མངོན་སུམ་དང་ཅིག་ཤོས་གཉི་ག་ཞེས་བྱ་བ་མངོན་སུམ་སྨོས་པ་ནི་དཔེར་བརྗོད་པའི་དོན་ཏོ། །དེ་ནི་སྤང་བར་ནུས་པ་མ་ཡིན་ཏེ་མཐོང་བ་དང་འགལ་བ་ཉིད་ཀྱི་ཕྱིར་རོ། །དེ་ལྟ་མ་ཡིན་ན་མངོན་སུམ་ཚད་མར་ཇི་ལྟར་འགྱུར། །འོ་ན་ཏེ་ཡང་ཞེས་བྱ་བ་ལ་སོགས་པས་ནི། འོ་ན་མཐོང་བའི་རྗེས་སུ་དཔག་པར་ཡོད་ཀྱང་མངོན་སུམ་ཉིད་ལ་འཇུག་པར་འགྱུར་བ་དེས་ན་འཇུག་པ་ལ་མཚུངས་པ་ཞེས་བྱ་བ་འདི་མ་གྲུབ་པར་དོགས་པ་བསྡུ་བའོ། །མངོན་སུམ་མ་ཡིན་ཞེས་བྱ་བ་ནི་རྗེས་སུ་དཔག་པའོ། །དེ་ཡང་མི་བདེན་ཏེ་ཞེས་བྱ་བ་ནི་སུན་འབྱིན་པའོ། །རང་གི་ཕྱོགས་ལ་རྗེས་སུ་ཆགས་པས་ཉམས་སུ་མྱོང་བས་ཁྱད་པར་དུ་བསད་ནས། རང་གི་ཕྱོགས་བསལ་བ་ཡང་རྩིས་ཁོངས་སུ་མི་འཇུག་སྟེ། ཉམས་སུ་མྱོང་བ་ནི་མངོན་སུམ་ཡིན་པའི་ཕྱིར་རོ། །དེ་ཉིད་དེ་ལ་ཞེས་བྱ་བ་ལ་སོགས་པས་བསྟན་པར་བྱའོ། །དེའི་ཚེ་ནི་གདོན་མི་ཟ་བར་དྲན་པའི་རང་བཞིན་གྱི་ངེས་པར་འགྱུར་བ་ཡིན་ཏེ། དེ་ནི་དེ་ཙམ་དང་རྗེས་སུ་འབྲེལ་བའི་ཕྱིར་རོ། །འགའ་ཡང་ཞེས་བྱ་བ་འདིས་ནི། འཇིག་རྟེན་དང་འགལ་བ་ཡང་
སྟོན་པར་བྱེད་པ་ཡིན་ནོ། དེ་ལྟར་རྟོགས་པའི་འགལ་བར་བསམས་པས། རྣམ་པ་གཞན་ཡང་བརྗོད་པ་ནི། །མངོན་སུམ་ལ་ཡང་ཞེས་བྱ་བ་ལ་སོགས་པའོ། །བྱ་བ་ཞེས་བྱ་བ་དེའི་ཆོས་གཞན་གྱི་རང་བཞིན་རྗེས་སུ་འགྲོ་ལྡོག་དང་བཅས་པའི་ཡོད་པ་ཉིད་ཡིན་པར་འདོད། །ཕྱོགས་དང་པོར་ནི་མངོན་སུམ་ལ་ཡང་མེད་དོ། །གཉིས་པ་ནི་རྒྱུ་ཐམས་ཅད་ཀྱི་ཐུན་མོང་བ་ནི་རྗེས་སུ་དཔག་པའི་ཡང་འཇུག་པ་ལ་ཡོད་པ་ཡིན་ནོ། །དེ་ལྟར་རྣམ་པ་ཅི་ཞིག་ལྟར་རྗེས་སུ་དཔག་པར་མ་སྐྱེས་པ་ནི། དོན་དུ་གཉེར་ཡང་རྒྱུ་ལ་མི་འཇུག་པ་ཡིན་ནོ། །གལ་ཏེ་ཡོད་པ་ལས་མ་གཏོགས་པའི་བྱེད་པ་མེད་ན། འོ་ན་རྒྱུ་འབྲས་བུ་ལ་བྱེད་པ་དང་བཅས་པ་ཡིན་ནོ་ཞེས་ཇི་ལྟར་བརྗོད་སྙམ་ན། འདི་ནི་རྟེན་ཅིང་འབྲེལ་པར་འབྱུང་བ་ཞེས་བྱ་སྟེ། སྣ་ཚོགས་འདི་ནའོ། །སྣ་ཚོགས་ལ་སོགས་པའི་ཐ་སྙད་ནི་དེ་ཙམ་དུ་ཟད་པ་ཡིན་ནོ། །དེ་ལྟར་ནི་མི་འཐད་པ་ཡང་ཅི་ཡང་མེད་དོ། །དེ་ལྟ་མ་ཡིན་ན་བྱེད་པ་མེད་པའམ། བྱེད་པ་དང་བཅས་པ་ལས་ཇི་ལྟར་བྱེད་པར་འགྱུར། མངོན་སུམ་གྱི་བྱེད་པས་རྗེས་སུ་དཔག་པ་ལ་བསྙོན་འདེབས་པ་རྣམ་པ་གཞན་གྱི་སྒོ་ནས་བཟློག་པའི་དོན་དུ་གཞན་ཡང་ཞེས་གསུངས་སོ། །འདིར་ཡང་ན་འཇིག་རྟེན་གཞན་ཁས་བླངས་པ་ལ་ཡང་ངོ༌། །འབྲེལ་པའི་སྤྲོས་པ་ནི་གོ་བར་བླའོ། །འོ་ན་རྗེས་སུ་དཔག་པ་ཚད་མ་མ་ཡིན་པ་ཇི་ལྟར་སྤོང་སྙམ་ན། རྗེས་དཔག་ཚད་མ་ཉིད་མིན་ན། །ཞེས་གསུངས་སོ། །རྗེས་སུ་དཔག་པ་ཚད་མར་མི་སྒྲུབ་པར་ཅིའི་ཕྱིར་སྙམ་ན། འདི་ལྟར་ཞེས་གསུངས་སོ། །གང་ཡིན་པ་ཞེས་བྱ་བ་ནི་འཇིག་རྟེན་ཕ་རོལ་ལ་སོགས་པའོ། །གཞན་མངོན་སུམ་ཡིན་པའི་ཕྱིར་གཞན་ལ་མངོན་སུམ་ཡིན་པར་ནི་འཐད་པ་མ་ཡིན་ནོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །ཇི་ལྟར་དུ་བ་མཐོང་བ་ལ་ཚད་མ་ཡིན་པ་དེ་བཞིན་དུ་ཐམས་ཅད་ལ་ཡིན་པར་འགྱུར་རོ། །དེས་ན་གལ་ཏེ་རྟགས་ཀྱི་མངོན་སུམ་གྱིས་ལྐོག་ཏུ་གྱུར་པ་ཡང་འགྲུབ་ན་ཡང་དེའི་ཚེ་ལྐོག་ཏུ་གྱུར་པ་ཐམས་ཅད་གྲུབ་པར་འགྱུར་རོ། །ད་ལྟ་ཡིན་ན་ཅི་སྙམ་ན། །ཐམས་ཅད་དོན་ཀུན་རིགས་པར་འགྱུར། །ཞེས་གསུངས་སོ། །འབྲེལ་པ་མེད་ཕྱིར་ཞེས་བྱ་བ་ནི་གཞན་གྱིས་དོགས་པ་སྟེ། ཐམས་ཅད་རིགས་པར་འགྱུར་བ་མིན་ནོ། །འབྲེལ་པ་མེད་པའི་ཕྱིར་ཞེས་བྱ་བའི་གཞུང་འདིས་ནི་དྲན་པ་མེད་པ་ཡང་ཉེ་བར་མཚོན་པའོ། །ལན་ནིའོ་ན་ཞེས་བྱ་བའོ།།
དེ་ལྟར་རང་རིག་པས་ཡུལ་རྣམ་པ་གཉིས་གྲུབ་པར་དམ་བཅས་ཏེ། རྣམ་པར་རྟོག་པ་དང་མི་རྟོག་པ་གཉིས་ཐ་དད་པར་བསྒྲུབ་པས་འོངས་པ་དེའི་རང་བཞིན་གྱི་རྗེས་སུ་དཔག་པ་ལ་ལོག་པར་རྟོགས་པ་གཞན་དག་ཀྱང་བཀག་ནས་སྐབས་སུ་བབ་པ་མཇུག་སྡུད་པ་བརྗོད་པ་ནི་དེའི་ཕྱིར་ཞེས་བྱ་པའོ། །གལ་ཏེ་ཡུལ་གྱི་དབྱེ་བ་བརྗོད་པར་བྱ་བ་ཡིན་ལ་དེ་ནི་རྣམ་པ་གཅིག་གིས་ཀྱང་འགྲུབ་པ་མ་ཡིན་ནམ། དེས་ན་ནུས་པ་ལ་སོགས་པ་རྣམ་པ་བཞི་ཉེ་བར་བཀོད་པས་ཅི་བྱ་སྙམ་དུ་བསུ་ནས་རེ་ཞིག་བརྗོད་མ་ཐག་པ་གསུམ་ནི་གཏན་ཚིགས་གསུམ་ལ་ལྟོས་ནས་ཡིན་ནོ་ཞེས་སྟོན་པ་ནི་འདིས་ནི་ཞེས་བྱ་བ་སྟེ་འདུ་བའི་རང་བཞིན་ཉེ་བར་བཀོད་པས་སོ། །གལ་ཏེ་དཔེ་དང་འདྲ་བ་ཉིད་ཅེས་བྱ་བ་གཏན་ཚིགས་གསུམ་གའི་ཡང་ཡུལ་མ་ཡིན་ནམ། དེ་ཇི་ལྟར་ན་འདིས་ནི་འབྲས་བུའི་གཏན་ཚིགས་ཀྱི་ཡུལ་བསྟན་ཏོ་ཞེས་བརྗོད་ཅེ་ན། བདེན་ཏེ་འདྲ་བ་ནི་གཉིས་ཏེ་དངོས་པོའི་དང་ཆོས་ཙམ་གྱི་སྟེ་ཐ་སྙད་ལས་ཡིན་ནོ། །འབྲས་བུའི་གཏན་ཚིགས་ལས་ནི་མེ་ལ་སོགས་པའི་དངོས་པོ་ཉིད་དཔེ་ལ་མཐོང་བ་དང་འདྲ་བར་རྟོག་པའི་ཕྱིར་དངོས་པོ་ལ་བརྟེན་པ་བརྗོད་ལ། རང་བཞིན་ནམ་མི་དམིགས་པ་ལ་ནི་ཆོས་ལ་བརྟེན་པ་ཉིད་དོ། །དེ་ལ་དང་པོ་ནི་ཆོས་ཅན་གྱི་རང་བཞིན་ལས་ཐ་དད་པར་རང་གི་ངོ་བོ་སྣང་པའི་ཕྱིར་ན་དེ་ལ་བརྟེན་པའི་འདྲ་བ་ཡང་དངོས་སུ་མཐོང་བར་རྣམ་པར་གཞག་གོ །ཆོས་ཙམ་གྱིས་ནི་དེ་ལས་བཟློག་པའི་ཕྱིར་ན་བཏགས་པ་ཙམ་ཡིན་ནོ། །གལ་ཏེ་ཡང་དེ་ཁོ་ནར་འདྲ་བ་ཐམས་ཅད་བཏགས་པ་ཁོ་ན་ཡིན་པ་དེ་ལྟ་ན་ཡང་རྟོགས་པ་དང་དངོས་པོ་ལ་བརྟེན་པར་རློམ་པའི་ཕྱིར་ན་འདྲ་བའི་བློས་ནི་དངོས་པོ་ལ་བརྟེན་པའི་འདྲ་བ་ཉིད་དུ་ཡུལ་དུ་བྱེད་པ་ཡིན་ནོ། །དེས་ན་དེ་ཙམ་གྱི་འབྲས་བུའི་གཏན་ཚིགས་ཀྱི་དབང་དུ་བྱས་ནས་འདྲ་བའི་རྣམ་པར་བརྗོད་པར་འོས་པ་ཡིན་ནོ། །དེ་བཞིན་དུ་སྒྲའི་ཡུལ་ཉིད་ཀྱང་སྒྲ་ལས་བྱུང་བའི་ཤེས་པས་རྟོགས་པར་བྱ་བ་ཡིན་ནོ་ཞེས་བྱ་བ་ནི་ཤིང་ལ་སོགས་པའི་ཚིག་བརྗོད་པ་ལས་ཡལ་ག་ལ་སོགས་པ་དང་ལྡན་པའི་དོན། སྒྲ་ལས་བྱུང་བའི་ཤེས་པ་ལ་རྟོག་པ་ན་དེའི་ཡུལ་དུ་རྣམ་པར་གཞག་པ་ཡིན་ནོ། །དེས་ན་དེའི་ཡུལ་ཉིད་ནི་དེའི་རྟོགས་པ་ལ་སྣང་བ་ཉིད་དེ་ཙམ་དང་རྗེས་སུ་འབྲེལ་པ་ཡིན་པས་ན། དེའི་ཁྱབ་པར་བྱེད་པ་དང་གོ་བར་བྱ་བ་ཡང་ཡིན་ནོ། །དེ་ལ་སྒྲ་ལས་བྱུང་
བའི་ཤེས་པས་རྟོགས་པར་བྱ་བ་ཞེས་བྱ་བ་ནི། སྒྲ་ལས་བྱུང་བའི་རྟོགས་པ་ལས་སྡང་བ་ཉིད་དོ་ཞེས་བྱ་བའི་དོན་ཏོ། །དེ་ཉིད་བརྗོད་པ་ནི་སྒྲ་ལས་བྱུང་བའི་ཤེས་པ་དེ་ཉིད་ཀྱང་ཞེས་བྱ་བ་སྟེ། ཆོས་ཅན་གྱི་ཆོས་སྣང་བ་བསྟན་པར་བལྟ་བར་བྱ་སྟེ། སྒྲ་ལས་བྱུང་བའི་རྟོགས་པ་ལ་སྣང་བ་ནི་སྣང་བ་ཅན་གྱི་དོན་སྒྲའི་རྟོགས་པའི་ཡུལ་ཉིད་དུ་རྟོགས་པར་བྱེད་པ་ཡིན་ནོ། །དོན་གང་ཞིག་ཤེས་པ་གང་ལ་སྣང་བ་ཅན་དེ་ནི་དེའི་ཡུལ་ཡིན་ཏེ། དཔེར་ན་དབང་པོའི་ཤེས་པ་ལ་སྣང་བ་ཅན་གྱི་རང་གི་མཚན་ཉིད་དེའི་ཡུལ་ཡིན་པ་བཞིན་ནོ། །ཕྱིར་མངོན་པར་འདོད་པ་ལ་ཡང་སྒྲ་ལས་བྱུང་བའི་ཤེས་པ་ལ་སྣང་བ་ཅན་ཡིན་ནོ་ཞེས་བྱ་བ་ཐ་སྙད་སྒྲུབ་པའོ། །གལ་ཏེ་མེའི་ཚིག་གི་དོན་འབྲས་བུའི་གཏན་ཚིགས་ཀྱི་ཡུལ་མ་ཡིན་ནམ། གང་གིས་ན་སྒྲའི་ཡུལ་ཉིད་ཀྱིས་རང་བཞིན་གྱི་གཏན་ཚིགས་ཁོ་ནའི་ཡུལ་དུ་བརྗོད་པར་ཁྱད་པར་ཡང་ཅི་ཞིག་ཡོད་སྙམ་ན། དེ་ལྟ་ནི་མ་ཡིན་ཏེ། གཏན་ཚིགས་གཞན་ལ་ལྟོས་ནས་ཁྱད་པར་ཡོད་པའི་ཕྱིར་རོ། །དཔེར་ན་འདི་ན་མེ་ཡོད་དོ་ཞེས་བྱ་བ་འདིར་དུ་བ་ལ་སོགས་པ་ལ་ལྟོས་པ་དེ་བཞིན་དུ་ཤིང་ལ་སོགས་པའི་ཚིག་ཐོས་པ་ན་ནི་ཡལ་ག་དང་ལྡན་པ་ལ་སོགས་པའི་སྤྱི། །དེའི་ཡུལ་ཅན་གྱི་ཐ་སྙད་དུ་བྱ་བ་ལ་གཏན་ཚིགས་གཞན་ལ་མི་ལྟོས་ཏེ་དེའི་རྣམ་པར་སྣང་བ་ཙམ་གྱིས་དེ་བཞིན་དུ་རྣམ་པར་འཇོག་པའི་ཕྱིར་རོ། །ངག་གི་དོན་ལ་ནི་ཐམས་ཅད་དུ་སྒྲུབ་པ་དང་རྗེས་བརྗོད་པ་ཡོད་པའི་ཕྱིར་ན་རང་བཞིན་ཁྱད་པར་ཅན་གྱི་རྗེས་སུ་དཔག་པ་ཡང་གཞན་ལ་ལྟོས་པ་མེད་དོ། །དཔེར་ན་བ་ལང་འདི་ནི་དཀར་པོ་ཡིན་ནོ། །བ་ལང་ཁྱེར་ལ་ཤོག་ཅིག་ཅེས་བྱ་བ་འདིར་བ་ལང་རྗེས་སུ་བརྗོད་ནས་དཀར་པོའི་ཐ་སྙད་དུ་ཡུལ་དུ་རུང་བར་སྒྲུབ་པའི་ཕྱིར་རོ། །རྟོགས་པ་བཞིན་ནོ། །ཁ་ཅིག་དུ་ནི་ཁྱད་པར་གཞན་ཡང་རྟོགས་ཏེ། དཔེར་ན་བ་མེད་ནི་བ་ལང་དང་འདྲའོ་ཞེས་བྱ་བ་འདིར་མིང་ཙམ་གྱིས་གྲུབ་པའི་བ་མེན་ལ་བ་ལང་དང་འདྲ་བར་རྟོགས་པར་བྱེད་དེ་བ་ལང་འདྲ་བའི་ཐ་སྙད་ཀྱི་ཡུལ་དུ་རུང་བར་བསྒྲུབ་པའི་ཕྱིར་རོ། །ཁྱད་པར་དེ་ཉིད་སྟོན་པ་ནི་འདི་ལྟར་ཞེས་བྱ་བའོ། །ཧི་ཞེས་བྱ་བ་ནི་ལོགས་སུ་གསལ་བ་ཞེས་བྱ་བའི་དོན་འདི་ལ་ཡིན་ནོ། །ཉེ་བར་འཇལ་བ་ཞེས་བྱ་བ་ནི་ཇི་སྐད་བརྗོད་པ་ཉེ་བར་འཇལ་བ་དག་གིས་སོ། །དེ་ལྟར་སྤྱིར་ངེས་པ་ན་བ་མིན་མཐོང་བས་ཁྱད་པར་གྱི་མཐར་ཐུག་པར་བརྗོད་པ་ནི་འདི་ནི་ཞེས་བྱ་བའོ། །དེ་ལ་བ་མེན་གྱི་
རང་གི་ངོ་བོ་ལ་ཡང་རྗེས་སུ་དཔག་པ་འཇུག་པ་དང་འདྲ་བ་ལ་ཡང་མངོན་སུམ་འཇུག་པར་དོགས་པ་བཟློག་པའི་དོན་དུ་དེའི་ངོ་བོ་མངོན་སུམ་དུ་ཞེས་གསུངས་སོ། །འདི་ནི་བྲམ་ཟེའི་ལུགས་ཀྱིས་འདི་དེ་དང་འདྲ་བ་ཞེས་བྱ་བ་མི་འདྲ་བའི་ཁྱད་པར་ཅན་གྱི་བ་མེན་འཛིན་པར་བྱེད་པ་རྣམ་པར་རྟོག་པ་དང་བཅས་པ་ནི་མངོན་སུམ་གྱི་ཚད་མ་ཉིད་ཡིན་ལ། དེ་འདི་དང་འདྲའོ་ཞེས་བྱ་བ་ནི་ཉེ་བར་འཇལ་བ་ཡིན་ཏེ། དེ་ལྐོག་ཏུ་གྱུར་པའི་ཆོས་དང་ཆོས་ཅན་རྟོགས་པའི་ཕྱིར་རོ། །དེས་ན་ཇི་ལྟར་འདྲ་བ་སྒྲ་ལས་བྱུང་བའི་ཤེས་པའི་སྤྱོད་ཡུལ་ཡིན་སྙམ་དུ་དོགས་པ་བསུ་ནས་འདི་ལྟར་ཞེས་གསུངས་སོ། །དོན་གཅིག་པ་ཉིད་ཡིན་ལ་ཞེས་བྱ་བ་ནི་གཉིས་ཀ་ལ་བརྟེན་པའི་འདྲ་བ་སྟོན་པའི་ཕྱིར་རོ། །འོན་ཀྱང་ཚིག་ཚུལ་ཙམ་ཞིག་ཐ་དད་པ་ཡིན་ཏེ། དཔེར་ན་གཅིག་གི་སྤུན་ཟླ་ཉིད་རྟོགས་ན་གཞན་གྱི་ཡང་སྦུན་ཟླ་ཉིད་རྟོགས་པ་བཞིན་ནོ། །དེ་ལ་ཡང་གཞན་གྱི་སྤུན་ཟླ་ཉིད་དོན་གྱིས་གོ་བས་རྟོགས་པ་ཡིན་ནོ་སྙམ་ན་མ་ཡིན་ཏེ། དོན་ཐ་དད་པའི་ཕྱིར་རོ། །རྟོགས་པའི་ཚུལ་ཐ་དད་པ་ཙམ་གྱིས་དོན་ཐ་དད་པ་ནི། ཨུ་པ་གོའི་བུ་དང་ཨུ་པ་གོ་ལས་སྐྱེས་པ་ཞེས་བྱ་བ་དང༌། ཆུང་མ་དང་བཙུན་མོ་ཞེས་བྱ་བ་ལ་སོགས་པ་ལ་ཡང་དེ་ལྟར་ཐལ་བའི་ཕྱིར་རོ། །དེ་ལ་གལ་ཏེ་འདི་དེ་དང་འདྲ་བ་ཡིན་ནོ། ཞེས་བྱ་བ་མངོན་སུམ་ཉིད་ཡིན་ན་དེའི་ཚེ་ཡིན་ལ་རག་ན། འོན་ཀྱང་དེ་འདི་དང་འདྲ་བ་ཞེས་བྱ་བའམ་དོན་དེ་ཉིད་ཡིན་ཏེ། དེས་ན་མངོན་སུམ་གྱིས་གྲུབ་པ་ལ་ཉེ་བར་འཇལ་བས་བརྟགས་པས་ཅི་ཞིག་བྱ། གྲུབ་པའི་མཐའ་ནི་མངོན་སུམ་ནི་རྟོགས་པ་མེད་པ་ཁོ་ན་མངོན་སུམ་ཡིན་པའི་ཕྱིར་དེས་ནི་བ་ལང་དམ་པ་མེན་གྱི་རང་བཞིན་ངོ་བོ་ཙམ་ཞིག་རྟོགས་པ་ཡིན་ནོ་ཞེས་བྱ་བ་ནི་ཕྱེད་སྔ་མའི་དོན་ཏོ། །ཕྱེད་ཕྱིས་མ་འཆད་པ་ནི་དེའི་རྗེས་སུ་བྱེད་པའི་ཞེས་བྱ་བའོ། །འདི་ལྟར་དེའི་རྗེས་སུ་བྱེད་པ་ཞེས་བྱ་བའི་མིང་ཙམ་གྱི་འདྲ་བ་ནི་གཉི་ག་ལ་གནས་པའི་ཕྱིར་རོ། །གལ་ཏེ་དེ་ལྟ་ན་ཡང་གང་གིས་ཁྱེད་ཀྱང་རྗེས་སུ་དཔག་པ་དོན་དུ་གཉེར་བ་མངོན་སུམ་གྱིས་ཅི་སྟེ་མི་འཛིན་སྙམ་ན་མངོན་སུམ་གྱིས་ནི་ཞེས་གསུངས་སོ། །གཅིག་གིས་སྙམ་དུ་བསམས་པ་ཡིན་ནོ། །གལ་ཏེ་ཡང་མངོན་སུམ་གཉིས་ཀྱིས་གཉི་གའི་རང་བཞིན་འཛིན་པ་དེ་ལྟ་ན་ཡང་གཉི་ག་ལ་གནས་པའི་འདྲ་བ་ནི་གཅིག་གིས་ཀྱང་རྟོགས་པ་རྨི་ནུས་ཏེ། གཉིས་
པ་མཐོང་བ་མེད་པའི་ཕྱིར་རོ། །དེས་ན་རང་བཞིན་གྱི་གཏན་ཚིགས་ཁོ་ནས་རྟོགས་པ་ཡིན་ནོ་ཞེས་གནས་སོ། །རྗེས་སུ་དཔག་པའི་རྣམ་པ་བརྗོད་པ་ནི། དེ་ནི་འདི་དང་འདྲ་བ་ཞེས་བྱ་བའོ། །གལ་ཏེ་དེའི་རྣམ་པ་ཡོད་པ་ཁོ་ན་འདྲ་བ་མ་ཡིན་ནམ། ཇི་ལྟར་རྟགས་དང་རྟགས་ཅན་གྱི་དངོས་པོ་ཡིན་སྙམ་ན། འདྲ་བའི་ཐ་སྙད་ཙམ་ཞེས་སྨོས་སོ། །སྦྱོར་བ་ནི་གང་ཞིག་གང་གི་རྣམ་པར་འཛིན་པ་དེ་ནི་དེ་ཐམས་ཅད་ནི་དེ་དང་འདྲ་བའོ་ཞེས་ཐ་སྙད་དུ་བྱ་བ་ཡིན་ཏེ། དཔེར་ན་གཡས་པ་དང་གཡོན་པའི་མཛུབ་མོ་གཉིས་ཕན་ཚུན་བཞིན་ནོ། །བ་ལང་དང་བ་མེན་ཡང་དེ་བཞིན་དུ་བྱ་བའོ། །མ་ངེས་པ་ནི་མ་ཡིན་ཏེ་འདྲ་བའི་ཐ་སྙད་ཀྱི་རྒྱུ་མཚན་དེ་ཙམ་དུ་ཟད་པའི་ཕྱིར་རོ། །སྒྲ་ལས་བྱུང་བའི་རྟོགས་པ་ལ་སྣང་བས་རྣམ་པ་འདྲེས་པར་འཛིན་པའི་ཕྱིར་མ་གྲུབ་པ་མ་ཡིན་ཏེ། ཕྱི་རོལ་གྱི་ཐ་སྙད་ཉམས་པ་ཡང་མ་ཡིན་ཏེ་སྣང་བ་དང་རྣམ་པར་བརྟགས་པ་ངག་གཅིག་ཏུ་བྱས་པའི་ཕྱིར་རོ། །འོ་ན་དེའི་ཚེ་རྣམ་པར་རྟོག་པ་ཉིད་ཀྱི་ཆོ་འཕུལ་ཡིན་པའི་ཕྱིར་དངོས་པོ་མཐོང་བ་མེད་པ་ན་གང་དང་གཅིག་ཏུ་བྱེད་པ་ལས་ཐ་སྙད་བྱེད་ཅེ་ན། དེ་ལྟ་བུའི་ཤེས་པའི་ཞེས་བྱ་བ་ལ་སོགས་པའོ། །འདི་དེ་དང་འདྲ་བའོ། །དེ་འདི་དང་འདྲ་བའི་ཞེས་བྱ་བའི་རྟོགས་པ་གཉིས་ཀྱི་རྒྱུ་མཚན་དུ་གྱུར་པ་ཞེས་བྱ་བ་དྲུག་པའི་བསྡུ་བའོ། །གང་གི་ཕྱིར་ཉམས་སུ་མྱོང་བའི་སྒོ་ནས་དེ་འདྲ་བའི་རྣམ་པར་རྟོག་བ་སྐྱེ་བར་འགྱུར་བ་གོང་དུ་གཉིས་ལ་དེ་ལྟ་བུའི་རང་བཞིན་གྱི་ཁྱད་པར་ཡོད་པ་ནི་རྒྱུའི་ཁྱད་པར་གྱི་ནུས་པ་ཉིད་ལས་ཡིན་ནོ་ཞེས་བྱ་བའི་དོན་ཏོ། །འོ་ན་འདྲ་བའི་ཐ་སྙད་ལ་ཉམས་སུ་མྱོང་བ་ཉིད་ཚད་མར་འགྱུར་མོང༌། འདྲ་བ་གཉིས་བདག་གིས་མཐོང་ངོ་སྙམ་པའི་རྣམ་པར་རྟོག་པའི་རང་གི་བྱེད་པ་ནི་དེ་ཉིད་ལ་སྒྲོ་འདོགས་པའི་ཕྱིར་རོ་སྙམ་ན། བདེན་ཏེ་གསལ་བའི་གནས་སྐབས་ན་ནི་དེ་ཁོ་ན་ཡིན་ནོ། །ལྐོག་ཤལ་ལ་སོགས་པས་བ་ལང་ཉིད་དུ་ཐ་སྙད་འདོགས་པ་ཡང་རྨོངས་པ་ཁོ་ན་མ་ཡིན་ནོ། །དེའི་ཕྱིར་བློ་གསལ་བ་ནི་མངོན་སུམ་ཁོ་ན་འདྲ་བ་འགྲུབ་ལ་གཞན་ལ་ནི་རྗེས་སུ་དཔག་པ་ལས་ཐ་སྙད་ཙམ་སྒྲུབ་པ་ཡིན་ནོ། །དེས་ན་ཉེ་བར་འཇལ་བ་ནི་ཅི་ཡང་བྱར་མེད་དོ། །མིང་དང་མིང་ཅན་གྱི་འབྲེལ་བ་རྟོགས་པས་ནི་ཉེ་བར་བསྟན་པའི་ངག་གིས་བསྐྱེད་པ་འབྲེལ་པ་འཛིན་པའི་འདྲ་བ་ལས་ཡིན་པའི་ཕྱིར། རྗེས་སུ་དཔག་པར་གསལ་བ་ཡིན་ནོ། །དཔེ་
མེད་པའི་ཕྱིར་མ་ཡིན་ནོ་སྙམ་ན། དེ་ལྟ་མ་ཡིན་ཏེ་གང་ཞིག་བ་ལང་དང་འདྲ་བ་དེ་ནི་བ་མེན་གྱི་མིང་གི་བརྗོད་པར་བྱ་བ་ཡིན་ཏེ། དཔེར་ན་ཉེ་བར་བསྟན་པའི་ངག་གི་གནས་སྐབས་ཀྱི་རྣམ་པར་རྟོག་པ་ལ་སྣང་བ་བཞིན་ནོ། །འདི་ཡང་དེ་དང་འདྲ་བ་མིན་ཞེས་བྱ་བ་ཡིན་པའི་ཕྱིར་རོ། །རྣམ་པར་རྟོག་པའི་ཡུལ་ཐམས་ཅད་འདོད་པའི་སྒྲས་བརྗོད་པར་རུང་བ་ནི་མི་མཐུན་པའི་ཕྱོགས་ལ་འཇུག་པའི་གནོད་བྱེད་ཡིན་ནོ། །དེ་བས་ན་མ་ངེས་པ་མ་ཡིན་ནོ། །གལ་ཏེ་དེ་ལྟ་ན་དཔེའི་དུས་བཞིན་དུ་རྣམ་པར་རྟོག་པའི་ཡུལ་ཉིད་ལ་སྒྲ་འཇུག་པར་འགྱུར་ལ། སྣང་བ་དང་རྣམ་པར་བརྟག་པར་བྱ་བ་གཅིག་ཏུ་བྱེད་པ་ལས་འཇུག་པ་ནི་དེ་ལྟ་བུའི་ཡོད་པ་ནི་མི་སླུ་བ་དང་ལྡན་པ་ཡང་ཡིན་ནོ། །དེས་ན་སྒྲ་རྣམས་ཕྱི་རོལ་གྱི་ཡུལ་ཅན་ནི་མ་ཡིན་ནོ་ཞེ་ན། འདི་ནི་དེ་བཞིན་དུ་ཡིན་ནོ་ཞེས་མཇུག་བསྡུ་བ་སྟེ། བརྗོད་པ་ནི་དེའི་ཕྱིར་སྒྲའི་ཡུལ་ནི་ཞེས་བྱ་བའོ། །གལ་ཏེ་གཞན་དོན་རྗེས་དཔག་གང་ཡིན་པ། །སྤྱི་ནི་དེ་ཡི་སྤྱིའི་ཡུལ་ཡིན། །ཞེས་བརྗོད་པ་མ་ཡིན་ནམ། དེ་ཇི་ལྟར་ན་སྒྲ་ཙམ་གྱི་ཡུལ་སྤྱོད་ཅེ་ན། དེ་ནི་ཞེན་པའི་ཡུལ་ལ་ལྟོས་ནས་བརྗོད་པ་ཡིན་ཏེ། སྒྲ་ལས་བྱུང་བའི་རྟོག་པའི་ཡུལ་སྣང་བ་ཉིད་ནི་རང་གི་རྣམ་པ་རང་གི་མཚན་ཉིད་དུ་གྱུར་པ་ཁོ་ན་ཡིན་ནོ། །དེ་ལ་ཐ་སྙད་དུ་བྱ་བའི་སྤྱི་ནི་གཞན་གྱི་དོན་གྱི་རྗེས་སུ་དཔག་པའི་སྤྱོད་ཡུལ་ཡིན་པའི་ཕྱིར་འགལ་བ་མེད་དོ། །རྣམ་པར་རྟོག་པ་དངོས་པོའི་ཡུལ་ཅན་ཡིན་པ་ཉིད་ནི་དངོས་སུ་འགོག་པ་མ་ཡིན་སྙམ་དུ་བརྒྱ་ལ་ཐེ་ཚོམ་ཟའོ་སྙམ་ན། སྒྲ་སྨོས་པས་ནི་ཞེས་གསུངས་སོ། །རྒྱུ་མཚན་གཞན་ཡང་ཡོད་པ་ན་ཞེས་བྱ་བ་ལ་སོགས་པ་ཞེས་བྱ་བ་ནི། དངོས་པོ་མེད་པ་སྤྱིའི་ཆོས་ནི་མི་དམིགས་པའི་ཡུལ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཡོད་པའི་རྣམ་པར་ཤེས་པས་ནི་རེ་ཞིག་ཡོད་པ་ཉིད་དུ་ཐ་སྙད་དུ་བྱ་བ་མ་ཡིན་ནམ། མེད་པ་ནི་འགར་ཡང་ནུས་པ་ཡོད་པ་མ་ཡིན་ནམ། དེས་ན་གང་ལ་བློ་མེད་པ་ཇི་ལྟར་ཡིན་ཞེ་ན། དེ་ལ་ཞེས་གསུངས་ཏེ། བློ་མེད་པའི་ཡུལ་ལའོ། །མ་ཡིན་འཇུག་པས་ཟླ་བའི་ཤེས་པ་ལ་མི་དམིགས་པར་བསྟན་པས་ལན་བཏབ་པ་ཡིན་ནོ། །ས་ཕྱོགས་ལ་སོགས་པའི་རང་བཞིན་གྱིས་ངེས་པའི་རྣམ་པ་ཅན་ཡིན་པའི་ཕྱིར་རོ། །དེ་ཉིད་བརྗོད་པ་ནི་དེས་ཞེས་བྱ་བའོ། །ངེས་པའི་རྣམ་པ་ཅན་གྱི་དོན་གྱིས་བསྐྱེད་པའི་ཤེས་པ་ནི་བདག་ཉིད་ངེས་པའི་རྣམ་པ་ཅན་ཁོ་ནར་
རང་རིག་པས་ཉམས་སུ་མྱོང་བ་ཡིན་པའི་ཕྱིར། འདི་ཙམ་གྱིས་འདི་མི་དམིགས་ལ་གཞན་ནི་མ་ཡིན་ནོ། །འདི་ལ་བདག་ཞུགས་ཀྱི་གཞན་ནི་མ་ཡིན་ནོ་ཞེས་བྱ་བར་སྒྲུབ་པ་དང་འགོག་པའི་རྣམ་པར་རྟོག་པ་གཉིས་འཕངས་པ་ཡིན་ནོ་ཞེས་རིགས་སོ། །འབྲས་བུ་བརྗོད་པ་ནི་དེས་ཞེས་བྱ་བའོ། །དངོས་པོའི་རྟོགས་པ་ནི་རྣམ་པ་གཉིས་ཏེ། གཅིག་གི་རང་བཞིན་སྒྲུབ་པ་དང༌། གཞན་འགོག་པའོ། །སྐབས་སུ་བབ་པའི་རྣམ་པ་གཉིས་ལ་ཡང་རྣམ་པ་གཉིས་ཏེ། ཡིན་ནོ་ཞེས་བྱ་བ་རྣམ་པ་གཞན་མེད་པར་སྟོན་པའི་དོན་དུ་ཡིན་ནོ། །འདི་སྐད་དུ་རྣམ་པ་གཞན་མེད་པར་ཡང་སྟོན་པ་ཡིན་ནོ་ཞེས་བཤད་པ་བཞིན་ནོ། །མངོན་སུམ་ཉིད་ཀྱིས་ཞེས་བྱ་བ་ནི་སྒྲུབ་པའི་རྣམ་པར་རྟོག་པའི་མངོན་སུམ་གཞན་མ་ཡིན་ལ། དགག་པའི་རྣམ་པར་རྟོག་པ་ཡང་དངོས་པོ་མེད་པའི་ཚད་མའི་འབྲས་བུའམ། མངོན་སུམ་གཞན་ཉིད་མ་ཡིན་ཏེ། ལྡན་པར་འགྱུར་བའི་ཁྱད་པར་ཅན་གྱི་དངོས་པོའི་ཉེ་བས་དངོས་པོ་མེད་པའི་གཞལ་བྱ་འཛིན་པར་བྱེད་པ་ཞེས་པའི་དོན་ཏེ། ཐ་དད་པར་སྨྲ་བའི་ཞེས་བྱ་བ་ནི་ཕྱི་རོལ་སྨྲ་བ་ཞེས་བྱ་བའི་དོན་ཏོ། །ཕྱི་རོལ་སྨྲ་བ་ལ་ཐ་དད་པར་སྨྲ་བར་བརྗོད་པ་ནི། ཕྱི་རོལ་དུ་སྨྲ་བ་མེད་ན་མི་འབྱུང་བ་ཉིད་དུ་བསྟན་པའི་དོན་དུའོ། །ཡང་ན་བློ་ལ་ལྟོས་ནས་ཐ་དད་པའི་ཕྱིར་དེ་ལྟར་བརྗོད་དེ། བློའི་རང་བཞིན་ལ་ནི་ཁྱད་པར་བརྗོད་པར་བྱའོ་ཞེས་བྱ་བའི་དོན་ཏོ། །རྣམ་པ་གཉིས་སུ་རྟོགས་པའི་གཏན་ཚིགས་བརྗོད་པ་ནི། རྟོག་པའི་རྣམ་པ་གཞན་མེད་པའི་ཕྱིར་རོ་ཞེས་བྱ་བ་ཡིན་ནོ། །སྒྲུབ་པ་དང་དགག་པའི་རྟོགས་པ་སྤངས་ནས་བློའི་རྣམ་པ་གཞན་ནི་ཡོད་པ་མ་ཡིན་ནོ། །ཡང་མངོན་སུམ་ཉིད་ཀྱིས་ཞེས་བྱ་བ་འདི་ལ་གཏན་ཚིགས་སུ་བརྗོད་པ་ཡིན་ཏེ། འདི་འདྲ་བའི་ཡུལ་རྟོགས་པའི་ཞེས་བྱ་བ་དེས་པའི་ཐབས་ནི་མངོན་ལས་གཞན་ཡོད་མ་ཡིན་ཏེ། གཞན་མེད་པའི་ཕྱིར་དང་དེ་ཉིད་ཀྱིས་ནུས་པའི་ཕྱིར་རོ། །དེ་ལྟར་གང་ལ་བློ་མེད་པ་དེ་མི་བལྟར་རུང་བའི་ཁྱད་པར་ཅན་དུ་གྱུར་པ་ན་དངོས་པོ་མེད་པའི་སྒྲུབ་པར་བྱེད་པ་མི་དམིགས་པའི་ཡུལ་ཡིན་ལ་ཁྱད་པར་དང་བྲལ་བ་ནི་ཡོད་པའི་ཐ་སྙད་དགག་པའི་འབྲས་བུ་ཅན་ཡིན་ནོ་ཞེས་བྱ་བར་དགོངས་པའོ། །ཡང་ན་སྒྲའི་རྟོགས་པའི་ཡུལ་ནི་ཉེ་བར་མཚོན་པའི་ཕྱིར་ན་རྣམ་པ་ཐམས་ཅད་དུ་ཐ་སྙད་དུ་རུང་བ་ཉིད་
ནི་རང་བཞིན་གྱི་གཏན་ཚིགས་ཁོ་ན་ལས་ཡིན་ནོ། །འདི་སྐད་བརྗོད་པའི་གཙོ་བོར་གྱུར་པའི་འདྲ་བ་ཉིད་ནི་འབྲས་བུའི་གཏན་ཚིགས་ཁོ་ནའི་ཡུལ་ཏེ། དེས་ན་ཡུལ་ངེས་པ་རྣམ་པ་གསུམ་བརྗོད་པ་ཡིན་ནོ། །ཡང་ན་རྣམ་པ་གསུམ་པ་འདི་ཡང་སྒྲོ་འདོགས་པ་འགོག་པ་ལྷུར་བྱེད་པའི་གཏན་ཚིགས་ཉིད་ཀྱི་ངེས་པ་ཡིན་ནོ། །འདི་ལྟར་འདྲ་བ་ཉིད་འབྲས་བུའི་ཡུལ་ཡིན་ནོ་ཞེས་བྱ་བ་ནི། དབང་ཕྱུག་ལ་སོགས་པ་མི་འདྲ་བ་དཔོག་པ་བཀག་པའི་ཕྱིར་ན་དངོས་པོ་ལ་སྒྲོ་འདོགས་པ་བཀག་པ་བསྟན་པ་ཡིན་ནོ། །ཐ་སྙད་ཉིད་ནི་རང་བཞིན་གྱི་གཏན་ཚིགས་ལས་ཡིན་ནོ་ཞེས་བྱ་བས་ནི་དངོས་པོའི་ཆོས་སུ་སྒྲོ་འདོགས་པ་འགོག་པ་བསྟན་ཏེ། །གལ་ཏེ་སྐད་ཅིག་མ་ལ་སོགས་པ་དངོས་སུ་མ་ཡིན་ཡང་རྣམ་པར་རྟོག་པ་མེད་པའི་ཕྱིར་ན་ཐ་སྙད་སྒྲུབ་པར་བྱེད་པར་རྣམ་པར་གཞག་པ་མ་ཡིན་པ་དེ་ལྟ་ན་ཡང་རི་ལ་མེའི་རྣམ་པ་སྤངས་པ་ལྟར། དེའི་མངོན་སུམ་ནི་སྐད་ཅིག་མའི་རྣམ་པ་དང་བྲལ་བར་སྐྱེ་བ་མ་ཡིན་ཏེ། དེས་ན་དེ་ཁོ་ན་སྐད་ཅིག་མ་ལ་སོགས་པ་སྒྲུབ་པར་བྱེད་པར་ཐ་སྙད་སྒྲུབ་པར་བྱེད་པ་ཁོ་ནའོ། །འདིས་ནི་གང་ཞིག་མངོན་སུམ་ལ་སྣང་བའི་དངོས་པོའི་རང་བཞིན་དེ་ཉིད་ཡོད་པ་མ་ཡིན་པའི་ཕྱིར་སྤྱི་ལ་སོགས་པའི་གཟུང་བ་ནི་མི་དམིགས་པས་ཟིན་པའི་ཕྱིར་མི་སྣང་བ་དགག་པར་བརྗོད་པ་ཡིན་ནོ། །སྣང་བ་ཉིད་ཀྱང་ངེས་ཟིན་པར་མ་གྱུར་ཅིག་ཅེས། གང་ལ་བློ་མེད་པ་ཉིད་མི་དམིགས་པའི་ཡུལ་ཡིན་ནོ་ཞེས་བརྗོད་པ་ཡིན་ཏེ་དེས་ན་སྐུར་པ་འདེབས་པ་བཀག་པ་བསྟན་ཏོ། །མི་དམིགས་པ་མེད་པར་ནི་དགག་པ་འགྲུབ་པ་མ་ཡིན་ནོ། །གང་ལ་མངོན་སུམ་གྱི་བཀག་པ་དེ་ལ་ནི་གཞན་མངོན་སུམ་ཡིན་པའི་ཕྱིར་དེ་ནི་མ་ཡིན་ནོ། །དེ་ལ་ནི་དེ་ཉིད་མི་དམིགས་པ་ཡིན་ནོ། །རྨོངས་པ་ལ་ནི་དེ་ཉིད་རྟགས་སུ་ཉེ་བར་བཀོད་པ་ཡིན་ནོ། །འོ་ན་ནུས་དང་མི་ཕྱས་ཕྱིར། །ཞེས་བྱ་བ་ཅིའི་དོན་དུ་བརྗོད་ཅེ་ན། སྐབས་སུ་བབ་པ་ཉིད་དྲན་པར་བྱེད་པ་ནི་འདྲ་བ་ཞེས་གསུངས་སོ། །འདྲ་བ་ཉིད་ལ་སོགས་པ་ཆོས་སུ་བསྟན་པ་ཡིན་ཡང་ཆོས་ཅན་ཉིད་ལ་རྟོགས་པར་བྱའོ། །དེས་ན་འདྲ་བ་ཉིད་ནི་ལྐོག་ཏུ་གྱུར་པའི་རྟོགས་པ་རྗེས་སུ་དཔག་པའི་ཡུལ་ཡིན་ལ། མི་འདྲ་བ་རང་གི་མཚན་ཉིད་ནི་ཅིག་ཤོས་མངོན་སུམ་གྱི་ཡུལ་ཡིན་ནོ། །དེ་བཞིན་དུ་སྒྲའི་ཡུལ་དང་ཡུལ་མ་ཡིན་པ་དང་རྒྱུ་མཚན་གཞན་ཡོད་ན་གང་ལ་བློ་ཡོད་
པ་དང་མེད་ཅེས་བྱ་བ་ལ་ཡང་སྦྱར་བར་བྱའོ། །དེ་ལས་ཅིར་འགྱུར་ཞེ་ན། བརྗོད་པ་དེ་ཡང་དོན་བྱེད་པར་ཞེས་བྱ་བའོ། །དངོས་སུ་ནུས་པ་ནི་རང་གི་མཚན་ཉིད་ཡིན་ལ་བརྒྱུད་པའི་ནུས་པ་ནི་སྤྱིའི་མཚན་ཉིད་དོ། །ཤེས་པ་ཡིན་ནོ་ཞེས་བྱ་བ་འདིས་ནི་ནུས་པ་མ་ངེས་པའི་རྒྱུ་མཚན་ལ་བྱའི་སྐྱེ་བ་ལ་ནི་མ་ཡིན་ནོ་ཞེས་བྱ་བའི་དོན་ཏོ། །འདྲ་བ་དང་མི་འདྲ་བ་ཉིད་ནི་ནུས་པ་ལས་བྱུང་བ་མ་ཡིན་གྱི་འོན་ཀྱང་ཤེས་པ་ཡིན་ནོ། །དེ་ཡང་མངོན་སུམ་མ་མ་རྗེས་སུ་དཔག་པ་དེ་ལས་སྐྱེས་པ་ཡིན་ནོ། །རེ་ཞིག་རང་བཞིན་གྱི་གཏན་ཚིགས་ཀྱང་གཞན་ལ་མངོན་སུམ་གྱིས་དངོས་སུ་སྐྱེད་པར་བྱེད་པའི་ཡུལ་མིན་མོད། གང་གི་ཚེ་རྣམ་པར་རྟོག་པའི་རྣམ་པ་ལ་ཐ་དད་སྒྲུབ་པར་བྱེད་པ་དེའི་ཚེ་ཚུལ་ཇི་ལྟར་ཡིན། དེའི་ཚེ་ནི་རང་རིག་པའི་མངོན་སུམ་ཉིད་ཡིན་ནོ་ཞེ་ན། དེའི་ཚེ་བྱེད་པ་དང་བཅས་པ་ཉིད་དུ་རྟོགས་པ་ཉེ་བར་གཟུང་བས་ཚད་མ་དང་འབྲས་བུ་ལ་བརྟེན་བས་སམ། རྗེས་ལས་སྐྱེས་པའི་རྣམ་པར་རྟོག་པ་ལ་ལྟོས་ནས་ཐ་སྙད་བྱེད་པ་ལ་ཡིན་ནོ། །དེའི་སྟོབས་ཀྱིས་མངོན་སུམ་ཉིད་དུ་རྣམ་པར་འཇོག་པའི་ཕྱིར་ན་དེ་ཉིད་ལ་མངོན་སུམ་དུ་ཉེ་བར་འདོགས་པ་ཡིན་ནོ། །དེའི་དངོས་སུ་སྐྱེད་པར་བྱེད་པ་ཡིན་ལ། དེའི་དེ་མ་ཐག་པའི་ནི་བརྒྱུད་ནས་སྐྱེད་པར་བྱེད་པ་ཡིན་ནོ། །འདིས་ནི་ཤེས་པ་ཡང་དོན་བྱ་བར་ནུས་པ་ཉིད་ཀྱིས་ཡོད་པ་ཡིན་ནོ་ཞེས་བསྟན་པ་ཡིན་ནོ། །དེས་ན་ནུས་དང་མ་ནུས་དང༌། །ཞེས་བྱ་བ་འདི་ནི་སྤྱིའི་མཚན་ཉིད་ཡིན་ལ། གཞན་མ་དག་ནི་དེའི་དབྱེ་བ་ཡིན་ནོ། །དེ་ཉིད་ཀྱི་ཕྱིར་དེ་བསལ་ན་ཚད་མའི་རྣམ་པར་གཞག་ནས་དེ་རྩོད་པའི་འདི་ནི་གཞལ་བྱ་གཉིས་ཀྱིས་ཚད་མ་གཉིས་གྲུབ་པ་ལ། རྒྱས་པར་རྩོད་པ་གང་ཡིན་པ་སྤངས་པའི་ཞར་ལ་འོངས་པ་ཡིན་ཏེ་བར་དུ་གཏན་ཚིགས་གསུམ་གྱི་ཡུལ་ངེས་པ་རྣམ་པར་གཞག་ནས་དེ་རྩོད་པའི་ལྷག་མ་བསལ་བར་རྩོམ་པ་ནི་དེ་ལ་ཞེས་བྱ་བའོ། །གང་ལ་མངོན་སུམ་ནི་མེད་པ་དེ་ཞེས་སྐབས་ལས་ཡིན་ནོ། །མངོན་སུམ་ལས་གཞན་ནི་གཞལ་བྱ་ལས་ཏེ་ལྐོག་ཏུ་གྱུར་པ་ཞེས་བྱ་བའི་དོན་ཏོ། །མངོན་སུམ་གྱི་ཚད་མའི་རྣམ་པ་བརྗོད་པ་ནི་ངས་གསལ་ཞེས་བྱ་བ་སྟེ། མྱོང་བའི་བདག་ཉིད་མངོན་སུམ། དེ་ལྟར་བདག་ཉིད་རིགས་པ་ཉིད་ཅེས་བྱ་བར་སྦྱར་རོ། །འདི་ཙམ་ཉིད་ཀྱི་ཞེས་བྱ་བར་འདི་ཉིད་ཀྱི་དོན་བརྗོད་པ་ནི། ངེས་པ་ཉིད་དུ་ཞེས་བྱ་བའོ། །འདི་སྐད་བརྗོད་པ་ཡིན་ཏེ།
ལྐག་ཏུ་གྱུར་པ་ཞེས་བྱ་བ་ཤ་ཟ་དང་འདྲ་བར་རིགས་ངེས་པ་ནི་ཅི་ཡང་མེད་ཀྱི་འོན་ཀྱང་གང་ཞིག་གང་གི་ཚེ་མ་དམིགས་པ་དེའི་ཚེ་ན་ལྐོག་ཏུ་གྱུར་པར་བརྗོད་པ་ཡིན་ནོ། །གཅིག་ལ་ཞུགས་པའི་མངོན་སུམ་འདི་ནི་མི་དམིགས་པ་གཞན་ནི་མ་ཡིན་ནོ་ཞེས་རྣམ་པར་རྟོག་པ་སྐྱེད་པ་ཁོ་ན་མངོན་སུམ་དང་ལྐོག་ཏུ་གྱུར་པའི་ཡུལ་རྣམ་པར་གཞག་པ་ཡིན་ནོ། །འདི་མ་དམིགས་སོ་སྙམ་པ་ནི་རེས་འགའ་མཐོང་བ་ལ་ཡང་འགྱུར་ཏེ། མེ་ལ་སོགས་པ་ལ་འགྱུར་བ་བཞིན་ནོ། །དེ་ལ་ལྟོས་ནས་ཁྱབ་པ་འཛིན་པར་འཐད་པའི་ཕྱིར་ཇི་ལྟར་རྗེས་སུ་དཔག་པ་མི་འཇུག་པ་ཡིན། དེས་ན་མངོན་སུམ་ཁོ་ནས་ལྐོག་ཏུ་གྱུར་པ་ཉིད་རྟོགས་སོ་ཞེས་པར་རིགས་སོ། །འོ་ན་ཇི་ལྟར་ན་ལྐོག་ཏུ་གྱུར་པ་ཉིད་ཀྱི་ཆོས་མངོན་སུམ་གྱིས་རྟོགས་པ་དེ་བཞིན་དུ་ཆོས་དེ་དང་ལྡན་པའི་དོན་ཡང་ཡིན་པར་འགྱུར་རོ་ཞེས་བྱ་བའི་དོགས་པ་བཟློག་པའི་ཕྱིར་བཤད་པ་དོན་གྱི་ངོ་བོ་ནི་ལྐོག་ཏུ་གྱུར་པ་ཉིད་དེ་ཞེས་བྱ་བའོ། །ཅིའི་ཕྱིར་ཞེ་ན་དོན་དེ་ལ་ཞེས་བྱ་བ་ལ་སོགས་པའོ། །དེ་འཇུག་ན་ནི་འདི་མ་དམིགས་སོ་ཞེས་བྱ་བ་ཉིད་དུ་མི་འགྱུར་རོ། །མངོན་སུམ་མངོན་ཤེས་ཞེས་བྱ་བ་ལ་སོགས་པ་ནི་གཞན་གྱིའོ། །འོ་ན་ཇི་ལྟར་དེ་རིག་སྙམ་ན། དེ་རིག་ན་ནི་ཞེས་གསུངས་སོ། །ཁ་ཅིག་གི་ལྟར་ན་ཆོས་དང་ཆོས་ཅན་གྱི་དངོས་པོ་ཐ་དད་པ་ཉིད་ཡིན་བས་དེའི་དོགས་པ་བསུ་ནས་བརྗོད་པ་ནི་ངོ་བོ་ཉིད་འགྱུར་ཞེས་བྱ་བའོ། །གང་ཞིག་གང་ལས་དོན་གཞན་ཡིན་པ་དེ་ནི་དེའི་ཆོས་མ་ཡིན་ཏེ། དཔེར་ན་གངས་ཅན་ལས་མ་ལ་ཡ་བཞིན་ནོ། །ལྐོག་ཏུ་གྱུར་པ་ལས་ཀྱང་ལྐོག་ཉིད་ཐ་དད་པ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་འགལ་བ་དམིགས་པ་ཐལ་བར་འགྱུར་རོ། །བཟློག་པ་ནི་གང་ཞིག་གང་གི་ཆོས་ཡིན་པ་དེ་ནི་དེའི་རིག་གི་ངོ་བོ་ཁོ་ན་ཡིན་ཏེ། དཔེར་ན་སྤྱིའི་ཕྱིར་རང་བཞིན་ཉིད་བཞིན་ནོ། །ལྐོག་ཉིད་ཀྱང་ལྐོག་ཏུ་གྱུར་པའི་ཆོས་ཡིན་ནོ་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །ཆོས་དང་ཆོས་ཅན་གྱི་དངོས་པོ་ལ་ནི་འདི་འདིའི་ཡིན་ནོ་ཞེས་སྦྱོར་བས་ཁྱབ་པ་ཡིན་ལ། དེའི་བདག་ཉིད་དང་བྲལ་བའི་ཡུལ་ལ་ནི་རྒྱུ་མཚན་མེད་པའི་ཕྱིར་ན་སྦྱོར་བ་ལོག་པ་ན་རིགས་ཁྱབ་བར་བྱ་བའི་ཆོས་ཅན་གྱི་དངོས་པོ་ལྡོག་པ་ཡིན་ཏེ། །དེས་ན་དེའི་བདག་ཉིད་ཀྱིས་ཁྱབ་པ་ཡིན་ནོ། །དེས་ན་མ་ངེས་པ་མ་ཡིན་ནོ། །དེས་ན་འབྲེལ་བའི་ཕྱིར་ཞེས་བྱ་བ་ནི་གཞན་གྱི་
དོགས་པ་བསུ་བའོ། །ཐ་དད་ཀྱང་འབྲེལ་པ་འགའ་ཞིག་ལ་བརྟེན་ནས་སྦྱོར་བར་འགྱུར་བའི་ཕྱིར་ན་ལྡོག་པ་ལ་རྒྱུ་མཚན་མེད་པ་མ་གྲུབ་པས་ན་ལྡོག་པ་མ་ཡིན་ཏེ། དེས་ན་དེའི་བདག་ཉིད་ཀྱི་ཁྱབ་པ་གལ་ཡོད་དེ་དེའི་ཕྱིར་མ་ངེས་པ་ཉིད་དོ་སྙམ་ན། འདི་ལ་ལན་དུ་འོ་ན་ནི་ཞེས་བྱ་བའི་ཆོས་ཅན་གྱི་རང་བཞིན་ཅན་གྱི་རང་བཞིན་ལས་ཐ་དད་པར་ཞེས་བྱ་བ་ནི་ངག་གི་ལྷག་མའོ། །དེའི་བདག་ཉིད་མ་ཡིན་པའི་འབྲེལ་བ་པ་གང་ཇི་སྙེད་པ་དེ་ཐམས་ཅད་ནི་འབྲེལ་པ་ཅན་གྱི་རང་བཞིན་གཉིས་མཐོང་བ་མེད་པར་རྟོགས་པར་ནུས་པ་མ་ཡིན་ནོ། །རྣམ་པར་རྟོགས་པས་ནི་གཅིག་རྟོགས་པར་འགྱུར་བའི་ཞེས་བྱ་བ་བཟློག་པའི་མངོན་སུམ་གྱིས་ཞེས་གསུངས་སོ། །མཐོང་བ་གཉིས་ཉིད་ལ་དངོས་པོ་པའི་འབྲེལ་པ་རྟོགས་པར་ནུས་ཀྱི་རྣམ་པར་རྟོག་པ་ནི་བག་ཆགས་ཙམ་གྱི་དབང་གིས་འབྲེལ་པ་རྟོགས་པའི་ཕྱིར་འགའ་ཡང་ཆོས་དང་ཆོས་ཅན་གྱི་རང་བཞིན་ཐ་དད་པར་རྟོག་པ་མ་ཡིན་ནོ་ཞེས་དོན་གྱིས་འཕངས་པ་ཡིན་ནོ། །དུ་བ་ཡང་རྟེན་དང་བརྟེན་པར་གྱུར་པའི་དངོས་པོ་རྣམ་ཉིད་ལ་རྟོག་པ་ཡིན་གྱི། ཕན་ཚུན་རང་བཞིན་དབེན་བར་རྟོགས་པ་མེད་པ་ལ་ནི་འདི་ལའོ་སྙམ་པའི་བློ་སུ་ལ་ཡང་མེད་དོ། །དེའི་ཕྱིར་འགྲེལ་པ་གཞན་མི་སྲིད་པ་ཉིད་དེ། དེས་ན་བཟློག་པ་ལ་རྒྱུ་མཚན་མེད་པ་གྲུབ་བོ། །འོན་ཏེ་དེའི་བདག་ཉིད་ལ་ཡང་འདི་ནི་ཆོས་འདི་ནི་ཆོས་ཅན་ནོ་ཞེས་རྣམ་པར་དབྱེ་བ་མེད་པའི་ཕྱིར། འདིའི་ནས་སྦྱོར་བ་མི་འཐད་པ་ཉིད་དོ་ཞེ་ན། མ་ཡིན་ཏེ་རྟོགས་པས་སྦྱར་བ་ནི་དག་པར་མི་ནུས་པའི་ཕྱིར་རོ། །གཅིག་ཡིན་ཡང་ལྡོག་པའི་དབྱེ་བ་ཡོད་པའི་སྐྱོན་མེད་དོ། །ཡང་འབྲེལ་པ་ཞེས་བྱ་བ་ནི་གཞན་གྱི་དབང་ཡིན་ལ། དེ་ཡང་རེ་ཞིག་སྐྱེ་བར་ནི་མ་ཡིན་ཏེ་ཁས་མི་ལེན་པའི་ཕྱིར་དང༌། མངོན་སུམ་དང་མི་དམིགས་པ་གསུམ་མི་འཇུག་པའི་ཕྱིར་རོ། །གནས་པས་ཀྱང་མ་ཡིན་ཏེ་ལྟུང་བའི་མེད་པའི་ཕྱིར་རོ། །དེ་མེད་ན་ནི་ལྟོས་པ་ཡང་འགའི་ཡང་མེད་དོ། །དེའི་ཕྱིར་གལ་ཏེ་རྟོགས་པའི་གཞན་གྱི་དབང་ཡང་མ་ཡིན་ན་འདི་འདིའི་ཞེས་བྱ་བ་འདི་ཞེས་བྱས་པ་ཡིན། དེ་ཉིད་ཀྱི་ཕྱིར་འོན་ནི་མངོན་སུམ་གྱིས་ཞེས་གསུངས་ཏེ། ཐམས་ཅད་ཀྱི་ཚེ་ཞེས་བྱ་བ་ལྷག་མའོ། །དེ་མེད་ཀྱང་རེས་འགའ་མཐོང་བ་དེའི་རང་བཞིན་གྱི་དབང་དུ་རྟོགས་པར་ཇི་ལྟར་འགྱུར་སྙམ་དུ་དགོངས་པའོ། །དེའི་ཕྱིར་ཁོ་བོ་ཅག་ལ་གཅིག་ཏུ་བསྒྲུབས་པས་ཅི་ཞིག་བྱ་སྟེ། ཐ་དད་ཀྱང་འགྲུབ་བྱ་འགྲུབ་པའི་
ཕྱིར་རོ་ཞེས་སྟོན་པ་ནི་དངོས་པོ་དེ་དང་འབྲེལ་པའི་ཞེས་བྱ་བའོ། །ཡང་ན་གཞན་དང་འབྲེལ་པ་ཉིད་དུ་རྟོགས་ན་ཆོས་རྟོགས་པར་འགྱུར་ལ། གཞན་དང་འབྲེལ་བར་འགྱུར་བའི་རང་བཞིན་ནི། །གཞན་རྟོགས་པ་མེད་པར་མི་རྟོགས་པ་ཁོ་ནའོ། །དེས་ནི་ཆོས་མངོན་སུམ་དུ་གྱུར་པས་ཆོས་ཅན་ཡང་མངོན་སུམ་དུ་འགྱུར་རོ་ཞེས་བྱ་བའི་དོན་ཏོ། །ལྷག་མ་ནི་རྟོགས་པར་བླའོ། །འདིར་སྨྲས་པས་ཞེས་བྱ་བའི་གྲུབ་པའི་མཐའི་ནི་འདི་ཡིན་ཏེ། ཆོས་དང་ཆོས་ཅན་གྱི་དངོས་པོ་འདི་ནི་རྟག་པ་ཉིད་ཡིན་ལ། ཆོས་གཅིག་ཉིད་ལ་ཡང་རྣམ་པར་རྟོག་པ་ཉིད་དེ། དཔེར་ན་སྔོན་པོའི་སྔོན་པོ་ཉིད་དོ་ཞེས་རྣམ་པར་རྟོག་པ་ན་ཐ་དད་པ་ལྟ་བུ་དང་གཅིག་པ་ལྟ་བུར་སྣང་ངོ༌། །དེ་བཞིན་དུ་རྣམ་པར་དཔྱོད་པས་ན་སྔོན་པོའི་རང་བཞིན་དེ་ཉིད་སྔོན་པོ་ཉིད་ཡིན་ནོ་ཞེས་རྣམ་པར་རྟོག་ན་ཐ་དད་པ་མེད་པ་ལྟ་བུ་དང༌། དུ་མ་ལྟ་བུར་སྣང་ངོ༌། །དེ་ལ་གལ་ཏེ་དེ་མ་ཐག་པའི་རྟོགས་པ་ལ་ལྟོས་ནས་བརྗོད་ན་ནི། དེའི་ཚེ་ཐམས་ཅད་གྲུབ་པ་ལ་སྒྲུབ་པ་ཁོ་ནའོ། །རྟོགས་པ་དང་པོ་ལ་ལྟོས་ནས་ནི་ཐ་སྙད་དུ་བྱ་བ་གཅིག་གི་རང་བཞིན་མེད་པ་ཁོ་ན་སྟེ། མ་རིག་པའི་དབང་གིས་བསལ་བ་ལ་དངོས་པོའི་ཆར་ལྷག་པར་ཞེན་ཀྱང་དངོས་པོར་རྟོགས་པ་ལ་ལྟོས་པ་ཉིད་ནི་མ་ཡིན་ནོ། །སྔོན་པོ་ཉིད་དུ་རྟོགས་པ་ལ་ཡང་སྔོན་པོའི་དངོས་པོ་ཉིད་རྟོགས་པ་ཡོད་པ་མ་ཡིན་ནོ། །འོན་ཏེ་སྔོན་པོ་ཉིད་དུ་རྟོགས་པ་ན་སྤྱིར་རྣམ་པར་རྟོག་པ་ཅན་འཕངས་པ་ཉིད་ཡིན་ནོ། །འོ་ན་ནི་དེ་དེ་བཞིན་དུ་ལྐོག་ཏུ་གྱུར་པ་ཉིད་རྟོགས་པ་ལ་ཡང་འཕངས་པ་ཡོད་པ་ཉིད་དོ། །དེ་བས་ན་ཁྱད་པར་ལ་སྦྱར་བའི་དོན་དེ་ཉིད་ལ་གཞན་དུ་ཚད་མ་གཞན་འཇུག་པར་རིགས་པ་ཡིན་ནོ་ཞེས་སྟོན་པ་ནི། རང་རིག་པའི་ཞེས་བྱ་བའོ། །གཞན་མི་དམིགས་སོ་ཞེས་སྤྱིར་རྣམ་པར་རྟོག་ཅེས་པ་ནི་ལྐོག་གྱུར་ཉིད་རྟོགས་པ་ཡིན་པར་བརྗོད་པ་ཡིན་ནོ། །ཕྱིས་ནི་སེར་པོ་ལ་སོགས་པ་མཐོང་བ་ནི་སྔོན་ལྐོག་ཏུ་གྱུར་པ་ནི་འདི་ཡིན་ནོ་ཞེས་ཁྱད་པར་སྤྱོད་པར་བྱེད་དོ། །དེས་ན་འབྲེལ་པ་རྟོགས་པ་ཡང་འཐད་པ་ཡིན་ནོ། །གལ་ཏེ་དེ་ལྟ་ན་ཡང་གཅིག་གིས་གཉིས་མི་རྟོགས་པའི་ཕྱིར་ཇི་ལྟར་འབྲེལ་བ་རྟོགས་སྙམ་ན། གཉིས་རྟོགས་ན་ཞེས་གསུངས་སོ། །མ་ཡིན་ནོ་ཞེས་བྱ་བ་ནི་གདོན་མི་ཟ་བར་ཞེས་བྱ་བ་ལ་ལྟོས་པའོ། །གཟུགས་དང་རོ་དག་རྟོགས་པ་ཡང་ཐ་དད་པ་ལ་འབྲེལ་པ་འཛིན་པ་
མེད་པ་ནི་མ་ཡིན་ནོ། །དེ་ལ་ཞེས་བྱ་བ་སྐབས་ལ་སྦྱོར་བའོ། །ཇི་ལྟར་འབྲེལ་བ་འཛིན་པའི་མངོན་སུམ་གྱི་གོ་སྐབས་ཡོད་པ་དེ་བཞིན་དུ་རྗེས་སུ་དཔག་པའི་ཡང་ཡིན་ནོ། །འདིས་ནི་བསྒྲུབ་པའི་རང་བཞིན་ཉིད་ལྐོག་ཉིད་དུ་ཉེ་བར་བཟུང་ནས་ཀླན་ཀ་སྤངས་པ་ཡིན་ནོ་ད་ནི་མངོན་སུམ་གྱི་རྟོགས་པ་བཀག་པ་ཙམ་ལ་བརྟེན་ནས་ཀླན་ཀ་སྤང་བ་བརྗོད་པ་ནི་གཞན་ཡང་ཞེས་བྱ་བ་ལ་སོགས་པའོ། །བཟློག་པ་མིན་ཞེས་ཡ་བ་ནི་དགག་པ་ཙམ་མངོན་སུམ་གྱི་རྟོགས་པ་ལས་དངོས་པོར་རིགས་པ་མ་ཡིན་པའོ། །འགྲེལ་པའི་ཐ་མི་དད་པར་ཞེས་བྱ་བ་ནི་སོ་སོར་སྣང་བ་ཡང་རྣམ་པར་རྟོག་པ་ལ་ཞིབ་མོར་རྟོགས་པ་མེད་པས་ན་ལྷག་པར་ཞེན་པས་ཐ་དད་པ་མི་རྟོགས་པའི་ཕྱིར་རོ། །མངོན་རྩོལ་གྱི་རྟོགས་པ་དང་བྲལ་བ་ཙམ་ལྐོག་ཏུ་གྱུར་པ་ཡིན་ན་ཆོས་ཅན་འཛིན་པ་ལྟོས་པར་ག་ལ་འགྱུར། གལ་ཏེ་དངོས་པོ་མེད་པ་ཙམ་རང་རིག་པའི་མངོན་སུམ་གྱི་ཡུལ་དུ་ཇི་ལྟར་འགྱུར། །རང་རིག་པ་ནི་དངོས་པོའི་ཆོས་ཡིན་པས་དེ་ཉིད་ཡུལ་དུ་བྱེད་པར་འགྱུར་རོ་ཞེ་ན་གཞན་དུ་ཡང་མངོན་སུམ་གྱི་དངོས་པོ་མེད་པ་འཛིན་པ་ནི་ཟླའོ་རང་བཞིན་ངེས་པ་ཉམས་སུ་མྱོང་བ་ལས་གཞན་མ་ཡིན་ནོ། །འདིས་ནི་གཉིས་མེད་པའི་དངོས་པོ་ནི། དངོས་པོ་སྟོང་པའི་མཚན་ཉིད་དོ་ཞེས་བྱ་བ་ལ་སོགས་པར་ཆོས་ཀྱི་དབྱིངས་དངོས་པོ་མེད་པ་ཅམ་དུ་བཤད་པ་ལ་མངོན་སུམ་ཉིད་ཉམས་པ་མེད་པར་འགྱུར་པ་སྟེ། ཐ་སྙད་པ་ལ་ནི་གཞན་མེད་པའི་རྣམ་པར་རྟོག་པ་སྐྱེ་བར་ངེས་པས་དེ་ལྟར་རྣམ་པར་གཞག་པ་ཡིན་ནོ་ཞེས་བསྟན་པ་ཡིན་ནོ། །དེ་ལྟར་དོན་མེད་པ་ཉིད་སྤངས་པ་ན་འབྲེལ་པ་འཛིན་པ་མེད་པའི་ཕྱིར་རྗེས་སུ་དཔག་པར་མི་ནུས་པར་སྔར་བརྗོད་པ་ཉིད་དྲན་པར་བྱེད་པ་ནི་ཅི་སྟེ་ཞེས་བྱ་བ་ལ་སོགས་པའོ། །འདི་ནི་ཅུང་ཟད་ཀྱང་ཞེས་བྱ་བ་ནི་གྲུབ་པའི་མཐའོ། །འདི་ལ་ཆོས་ལྐོག་ཉིད་ལ་འབྲེལ་བ་འཛིན་པའི་མངོན་སུམ་འཇུག་གམ། དེ་སྟེ་དེ་དང་འབྲེལ་བ་རུང་བའི་དངོས་པོ་ལ་འཇུག་ཅེ་ན་རྣམ་པར་རྟོག་པ་གཉིས་སོ། །རེ་ཞིག་དང་པོ་ནི་རྗེས་སུ་དཔག་པས་ལྐོག་ཉིད་སྒྲུབ་པར་མི་འདོད་པ་དེས་ན་དེ་ལ་འབྲེལ་པར་རུང་བའི་དངོས་པོ་ལ་འཇུག་ཅེ་ན་རྣམ་པར་རྟོག་པ་གཉིས་སོ། །རེ་ཞིག་དང་པོ་ནི་རྗེས་སུ་དཔག་པས་ལྐོག་ཉིད་སྒྲུབ་པར་མི་འདོད་པ་དེས་ན་དེ་ལ་འབྲེལ་པ་འཛིན་པའི་མངོན་སུམ་གྱིས་ཅི་ཞིག་བྱ། དབང་པོ་ལས་འདས་པ་ཉིད་ཡིན་ཡང་ཞེས་བྱ་བ་འདིས་ནི་ཕྱོགས་གཉིས་པ་མ་གྲུབ་པར་
བརྗོད་པ་ཡིན་མོད། གང་གི་ཚེ་མངོན་སུམ་ཉིད་གྱུར་པ་ཡང་ཞེས་འདོན་པ་དེའི་ཚེ་ནི་ལྐོག་ཉིད་ནི་རང་རིག་པ་ཡིན་ན་ཡང་ཞེས་བྱ་བའི་དོན་ཏོ། །ཡང་ན་སྔ་མ་བཞིན་ལ་སོགས་པའི་ཆོས་ཅན་མངོན་སུམ་དུ་གྱུར་པ་གང་ཡིན་པ་དེ་ལའོ། །ཆོས་ཅན་གྱི་རང་བཞིན་ཡང་རྗེས་སུ་དཔག་པར་ཅིའི་ཕྱིར་འདོད་སྙམ་ན་དོན་གྱི་ཞེས་བྱ་བ་ལ་སོགས་པ་གསུངས་སོ། །དེ་བས་ན་ལྐོག་ཉིད་ལ་སྔར་ཞུགས་པ་ལ་ལྟོས་པས་ནི་ཅི་ཡང་བྱར་མེད་དོ། །ཡང་དེ་ཉིད་ཀྱང་རྣམ་པ་གཞན་གྱིས་གྲུབ་པོ་ཞེས་སྟོན་པ་ནི་གཞན་ཡང་ཞེས་བྱ་བའོ། །ཤུགས་ཀྱིས་རྣམ་པར་གནས་པ་ཞེས་བྱ་བ་ནི་རང་ཉིད་ཐ་དད་ཀྱི་ཡུལ་དུ་འགྱུར་གྱི་ཚད་མ་གཞན་ལ་ལྟོས་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེའི་ངོ་བོ་ལ་རྗེས་སུ་དཔག་པ་མི་ནུས་པ་ཉིད་ཅེས་བྱ་བ་ནི་མེ་ལ་སོགས་པ་བསྒྲུབ་པར་བྱ་བ་དེའི་རང་གི་ངོ་བོ་དེ་ལ་འཇུག་པ་དེ་ནི་ཞུགས་པ་སྟེ། དེ་ཡུལ་དུ་བྱེད་པའོ། །དེ་ལ་ནུས་པ་མེད་པའོ། །མེད་ཀྱི་བྱ་བ་ནི་ཆོས་ཙམ་ལ་འབྲས་བུ་མེད་པའི་ཕྱིར་རོ། །འོ་ན་ཇི་ལྟར་དེ་ལ་ལྟོས་སྙམ་ན་དེ་ནི་འདོད་ཀྱང་ཞེས་བྱ་བའོ། །རྗེས་སུ་དཔག་པ་གྲུབ་བོ། ཚད་མ་ནི་མ་ཡིན་ནོ་སྙམ་ན། འདིས་ནི་ཞེས་གསུངས་སོ། །རྗེས་སུ་དཔོག་པ་ལས་ལྐོག་ཏུ་གྱུར་པའི་དངོས་པོ་གྲུབ་མོད་ཚད་མ་ལ་ཅི་འབྱུང་སྙམ་ན། ལྐོག་གྱུར་ཞེས་གསུངས་སོ། །འདིའི་ཞེས་བྱ་བ་ནི་རྗེས་སུ་དཔག་པའིའོ། །དེ་དང་འབྲེལ་བར་ཞེས་བྱ་བ་ནི་ལྐོག་ཏུ་གྱུར་པའི་དངོས་པོ་དང་འབྲེལ་བའོ། །དངོས་པོ་དང་འབྲེལ་བ་ལས་འཐོབ་པར་བྱེད་པའི་ཤེས་པ་ནི་ཚད་མ་ཡིན་ནོ། །དེ་ཡང་དངོས་པོ་དང་འབྲེལ་བའི་རྟགས་ལས་སྐྱེས་པ་ཉིད་ཀྱི་ཡིན་ནོ་སྙམ་དུ་དགོངས་པའོ། །དེ་ཉིད་འཆད་པ་ནི་དངོས་དང་འབྲེལ་པ་ཙམ་གྱིས་ནི། །ཞེས་བྱ་བའོ། །དེའི་ཕྱིར་གང་ཞིག་དངོས་པོ་དང་འབྲེལ་བ་གྲུབ་པ་དེ་ཉིད་ཚད་མ་ཡིན་ནོ། །ཚད་མ་ཡིན་པས་ན་རྟགས་ལས་རིག་པ་ཡིན་ཏེ། ཚད་མ་ཉིད་དུ་རྣམ་པར་གནས་པར་འགྱུར་རོ་ཞེས་བྱ་བའི་དོན་ཏོ། །ལྷག་མ་དག་ཅེས་བྱ་བ་ནི་བརྒལ་བ་དང་ལྡན་ནོ། །སྔར་ཉིད་ཞེས་བྱ་བ་ནི། ཐ་སྙད་ལས་ནི་ཚད་མ་ཉིད་ཅེས་བྱ་བ་དེར་བསྟན་ཟིན་ཏོ། །གལ་ཏེ་ཞེས་བྱ་བ་ལ་སོགས་པས་ནི་ཡང་མ་ངེས་པ་ཉིད་བརྗོད་པའི་དངོས་པོ་ཡིན་པ་ཙམ་གྱིས་ནི་འདྲ་བ་དང་མི་འདྲ་བའི་དངོས་པོ་རྩོམ་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །གྲུབ་པའི་མཐའི་དོན་ནི་འདི་ཡིན་ཏེ་རྣམ་པ་ཐམས་ཅད་དུ་
དེ་ལྟར་མ་ཡིན་མོད་ཚོགས་པ་ཡོད་ན་འགྱུར་བ་ཡིན་ནོ། །རྣམ་པ་གཉིས་གྲུབ་པ་སྟེ་དེ་ཙམ་གྱིས་ཀྱང་ཉམས་པ་མེད་པ་ཡིན་ནོ། །ཕྱིར་བསྟན་པར་བྱའོ་ཞེས་བྱ་བ་ནི། དེ་བཞིན་བརྡ་ལ་ལྟོས་མེད་པར། དངོས་ནུས་ཉིད་ལ་མིག་བློར་འགྱུར། །ཞེས་བྱ་བ་དང༌། འབྲེལ་པ་ཅན་གྱི་ཆོས་ལ་ནི། །ཆོས་ཅན་བས་ནི་རྟོགས་སྐྱེས་གང༌། །ཞེས་བྱ་བར་རོ། །གཞན་ཡང་འདྲ་བ་དང་མི་འདྲ་བ་དང་ཉམས་སུ་མྱོང་བའི་རྣམ་པར་གཞག་པ་ནི་ཚད་མ་གཉིས་མེད་པར་འགྱུར་བ་མི་འོངས་སོ་ཞེས་སྟོན་པ་ནི་གཞལ་བྱ་གཉིས་གྲུབ་པས་ནི་ཞེས་བྱ་བའོ། །དེ་ལྟར་གཉི་ག་ཚད་མ་ཡིན་ནོ་ཞེས་མ་འབྲེལ་བ་རྣམ་པར་བཅད་པ་གྲུབ་པ་ཡིན་ནོ་ཞེས་གཞན་དང་ལྡན་པ་རྣམ་པར་བཅད་པའི་དབང་དུ་བྱས་ཏེ་བཅད་པ་ནི་གང་གི་ཚེ་ཞེས་བྱ་བའོ། །གང་ཡུལ་དང་མི་ལྡན་པའི་ཤེས་པ་དེ་ནི་ཚད་མ་ཡིན་ཏེ། དཔེར་ན་རི་བོང་གི་རྭའི་ཤེས་པ་བཞིན་ནོ། །མངོན་སུམ་དང་རྗེས་སུ་དཔག་པ་ལས་ཐ་དད་པའི་ཤེས་པའི་ཡུལ་དང་ལྡན་པ་མ་ཡིན་དོ་ཞེས་བྱ་བ་ནི་ཁྱབ་པར་བྱེད་པ་མེད་པའོ། །མ་ངེས་པ་ཉིད་སྤང་བའི་དོན་དུ་ཁྱབ་པ་བརྗོད་པ་ནི་གཞལ་བར་བྱ་བ་དང་བྲལ་བའི་ཞེས་བྱ་བ་ལ་སོགས་པའོ། །ཅིའི་ཕྱིར་ཞེ་ན། རང་གི་ངོ་བོ་འམ་སྟེ་ཐུན་མོང་མ་ཡིན་པ་དང་གཞན་གྱི་ངོ་བོ་ཞེས་བྱ་བ་དེ་དང་ཐུན་མོང་དུ་གྱུར་པ་དེ་བཞིན་དུ་གཞལ་བྱ་ཡང་རྣམ་པ་གཉིས་ཀྱིས་ཁྱབ་པ་ཡིན་ནོ་ཞེས་བརྗོད་ཟིན་པ་ཉིད་དོ། །སྒྲ་ལས་བྱུང་བ་ལ་སོགས་པ་ལ་ནི་འབྲེལ་བ་མེད་པའི་ཕྱིར་ན་དོན་འགའ་ཡང་ཡོངས་སུ་གཅོད་པར་བྱེད་པ་མ་ཡིན་ཏེ། དེས་ན་ཐེ་ཚོམ་ལ་སོགས་པ་དང༌། ཐུན་མོང་བ་སེམས་ཅན་ཙམ་ཡོད་ཀྱང་འདིས་ཤེས་པར་བྱེད་པའི་ཞེས་བྱ་བའི་ཤེས་པ་ནི་ཡོད་པ་མ་ཡིན་ནོ། །གཟུང་བ་དང་འཛིན་པ་ལ་སོགས་པ་དང་བྲལ་བའི་ཕྱིར་ན་དེའི་ཁྱད་པར་ནི་ཚད་མ་ཡིན་ནོ། །དེས་ན་ཤེས་པ་མེད་པའི་ཕྱིར་ན་ཚད་མའི་ཐ་སྙད་དག་ལ་ཡོད། འདིས་ནི་ཚད་མའི་ཐ་སྙད་ལ་ནི་ཡོངས་སུ་གཅོད་པའི་སྒྲུབ་པར་བྱེད་པའི་དམ་པ་ཉིད་ཀྱིས་ཁྱབ་ལ་ཡོངས་སུ་གཅོད་པ་ཡུལ་ཡོད་པས་ཁྱབ་པ་དེས་ན་གཞལ་བྱ་མེད་ན་ཡོངས་སུ་གཅོད་པར་བྱེད་པ་ཉིད་མེད་པས་ན་ཁྱབ་པར་བྱ་བ་ཚད་མ་ཉིད་ཀྱང་ཟློག་པར་བྱེད་དོ། །དེས་ཁྱབ་པ་ཐུག་པའི་ཕྱིར་མ་ངེས་པ་ཉིད་མ་ཡིན་ནོ། །མ་གྲུབ་པ་ནི་གཉིས་ཀྱིས་ཁྱབ་པའི་གཞལ་བྱའི་ཁྱབ་པར་བྱེད་
པ་མེད་པ་ཉིད་ཀྱིས་སྤངས་པ་ཡིན་ནོ། །ཇི་སྐད་དུ་ཤེས་པ་ཉིད་མེད་པའི་ཕྱིར་གང་ཞིག་ཚད་མར་འགྱུར་ཞེས་བརྗོད་པ་དེ་ལ་ཤེས་པ་ཡོངས་སུ་གཅོད་པར་བྱེད་པ་མེད་མོད་སྙམ་དུ་བསམས་ནས་གཞན་དག་བརྗོད་པ་ནི། བདག་ཡོད་དོ་ཞེ་ན་ཞེས་བྱ་བའོ། །འཇལ་བར་བྱེད་པ་པོ་དེ་ཉིད་ཚད་མ་ཡང་མ་ཡིན་མོད་དེས་ན་བཟློག་པ་ལ་ཚད་མ་མེད་པ་ཉིད་མ་ཡིན་ནོ་སྙམ་དུ་སེམས་པའོ། །ལན་དུ་དེ་ཉིད་ཅེས་བྱ་བ་སྟེ་བདག་གི་གལ་ཏེ་དེ་ཚད་མའི་རང་བཞིན་ཉིད་དུ་འདོད་ན་དེའི་ཚེ་འདི་ལྟར་འགྱུར་རོ། །འོན་ཏེ་རྣམ་པ་གཞན་དུ་ཡིན་ན་དེའི་ཚེ་བཟློག་པ་ལ་ཚད་མ་མེད་པ་ཉིད་དོ་ཞེས་བྱ་བ་མ་ངེས་པ་ཉིད་མ་ཡིན་ནོ། །དེའི་ཕྱིར་ཞེས་བྱ་བ་ནི་སྐབས་ཀྱི་དོན་ཉེ་བར་སྡུད་པའོ། །རང་གི་ངོ་བོས་ཞེས་བྱ་བར་ཐུན་མོང་མ་ཡིན་གྱིས་ཏེ། གང་ལ་དངོས་སུ་བསྐྱེད་པའི་ནུས་པ་ཡོད་པའོ། །དེ་ལས་གཞན་དུ་ཞེས་བྱ་བ་ནི་ཐུན་མོང་ཉིད་དུ་སྟེ། གང་ལ་བརྒྱུད་པས་སྐྱེད་པའི་ནུས་པ་ཡོད་པའོ། །དངོས་དང་བརྒྱུད་པས་ནུས་པའི་སྒོ་ནས་ཡུལ་རྣམ་པར་གཞག་པས་ཅི་ཞིག་བྱ་སྟེ། འདྲ་བ་དང་མི་འདྲ་བ་ཉིད་ཀྱིས་སྣང་བ་ཙམ་གྱི་འགྱུར་ལ་རག་མོད། དེ་ལ་ཡོད་པའི་ཡུལ་ཅན་ནི་མ་ཡིན་ལ། ཡོད་པ་མ་ཡིན་པའི་ཡུལ་ཅན་ནི་ཚད་མ་མ་ཡིན་པའི་ཕྱིར་སྐབས་ཉམས་པ་ཡང་མ་ཡིན་ནོ། །དེ་ལྟ་ན་འོ་ན་ཅི་དེ་ཉིད་ཡོད་པ་དང་མེད་པའི་མཚན་ཉིད་ཡིན་ནམ་ཞེ་ན། ཁྱེད་ཀྱི་མཚན་ཉིད་ཀྱང་ཅི་ཞིག་ཡིན་ནམ་ཞེ་ན། དོགས་པ་བསུ་ནས་ཡོད་པ་དང་ལྡན་པ་ལ་སོགས་པ་གསལ་བ་གསུངས་པ་ནི་དོན་དམ་དོན་བྱེད་ཅེས་གསུངས་སོ། །དགོངས་པ་ནི་འདི་ཡིན་ཏེ། གང་གི་ཚེ་ཤེས་པ་ལ་དགོངས་སམ་བརྒྱུད་པས་ནུས་པ་ཡོད་པ་དེའི་ཚེ་དེ་ཙམ་ཉིད་ཀྱིས་ཡོད་པ་མ་ཡིན་ལ་དོན་བྱེད་པ་གཞན་ཡོད་ན་ནི་ང་འཇུག་པར་ཡང་འགྱུར་རོ། །གང་ཞིག་ཤེས་པ་ཙམ་གྱི་དོན་བྱེད་པར་ཡང་མི་རུང་བ་དེ་ནི་མེད་པ་ཡིན་ནོ། །དོན་དམ་པའི་སྒྲའི་རྣམ་པར་བཅད་པ་བརྗོད་པ་ནི། གཞན་ནི་ཀུན་རྫོབ་ཡོད་པ་ཡིན་ཞེས་བྱ་བའོ། །འདིར་གཞན་གྱི་སྒྲ་ནི་ཟླ་བོ་བརྗོད་པར་བྱེད་པའོ། །དེས་ན་རི་བོང་གི་རྭ་དང་སྐྲ་ཤད་ལ་སོགས་པ་ཡང་ཀུན་རྫོབ་ཏུ་བརྗོད་པ་ནི་མ་ཡིན་ནོ། །མེད་པ་ནི་ཡིན་པ་ཁོ་ནའོ། །གཞན་ཡང་གང་ལ་འཇིག་རྟེན་རྣམ་པར་དབྱེ་བ་ཡོད་པའི་ཐ་སྙད་དུ་བྱེད་པ་དང༌། དོན་དམ་པར་ནི་ཤེས་པ་ཡིན་གྱི་དོན་བྱེད་པར་ནི་ནུས་པ་དེ་ནི་ཀུན་རྫོབ་ཏུ་ཡོད་པ་ཡིན་ལ། དེ་ཡང་གང་ཟག་དང་ཡན་ལག་ཅན་དང་སྤྱི་ལ་
སོགས་པ་ཡིན་ནོ་ཞེས་བྱ་བའི་དོན་ཏོ། །འདིས་ནི་ཞར་ལ་ཐ་ཤལ་གྱི་རྣམ་པར་གཞག་པ་ལ་ལྟོས་ནས་བདེན་པ་གཉིས་རྣམ་པར་གནས་པ་ཡང་སྦྱར་བ་ཡིན་ནོ། །དེ་ཉིད་ཀྱི་ཕྱིར་འདི་ནི་བར་སྐབས་ཏེ་སྐབས་ལས་སྤྲོས་བའི་ཚིགས་སུ་བཅད་པ་ཡིན་ནོ། །དེ་དག་རང་དང་སྤྱི་མཚན་བཤད། །ཅེས་བྱ་བ་ནི། སྐབས་སུ་བབ་པ་རང་དང་སྤྱིའི་མཚན་ཉིད་བརྗོད་པ་གང་ཡིན་པ་དེ་དག་ནི་ཞེས་འདི་ནི་སྐབས་ཡོངས་སུ་རྫོགས་པར་བསྟན་པ་ཙམ་ཡིན་ནོ། །མཆོག་གི་རྣམ་པར་གཞག་པ་ལ་རྣམ་པར་གཞག་པ་བཟློག་པར་བསམས་ནས། ཇི་སྐད་བརྗོད་པའི་ཀུན་རྫོབ་དང་དོན་དམ་པའི་རྣམ་པར་དབྱེ་བ་མི་བཟོད་པའི་དབུ་མའི་རྩོད་པ་བླང་བ་བརྗོད་པ་ནི་གལ་ཏེ་ཞེས་བྱ་བ་ལ་སོགས་པའོ། །འདིས་ནི་དངོས་སུ་ཞེས་བྱ་བ་ལ་ཉེ་བར་བརྗོད་པའོ། །དེའི་སྒོ་ནས་ཚད་མ་ལ་ཡང་ཤུགས་ཀྱིས་ཉེས་བ་འགྲུབ་བོ། །དེས་ན་སྐབས་སུ་བབ་པ་ཚད་མའི་མཚན་ཉིད་བསྟན་པ་ལ་གནོད་པ་ཡིན་ནོ། །དེ་ཉིད་འདི་ལྟར་ཞེས་བྱ་བ་ལ་སོགས་པས་རྒྱས་པར་བསྟན་པར་བྱེད་དོ། །ཚད་མ་དང་གཞལ་བྱ་སྨོས་པ་ནི་དེ་གཉིས་སྐབས་སུ་བབ་པ་ཡིན་པའི་ཕྱིར་རོ། །རྟག་པ་དང་མི་རྟག་པ་བརྗོད་པ་ནི། བསྟན་པའམ་མི་བསྟན་པ་ཡང་རུང་སྟེ། ནུས་པ་སྲིད་པ་པ་ཡིན་ནོ་ཞེས་ཆོས་ཀྱི་སྒོ་ནས་མ་ལུས་པར་བསྟན་པའི་དོན་དུའོ། །ཤེས་པ་དང་ཤེས་བྱ་སྨོས་པས་ནི་དངོས་པོའི་སྒོ་ནས་མ་ལུས་པར་རྟོགས་པར་བྱ་བའི་དོན་དེ་བེམས་པོ་དང་བེམས་པོ་མ་ཡིན་པའི་ཕུར་པོ་བརྗོད་པར་འདོད་པའི་ཕྱིར་རོ། །ཚད་མ་དང་གཞལ་བྱ་ནི་དེའི་ཁྱད་པར་ཡིན་ཏེ། མ་ལུས་པ་ཉིད་མ་ཡིན་ཡང་སྐབས་སུ་བབ་པ་ཡིན་པའི་ཕྱིར་བརྗོད་པ་ཡིན་ནོ། །དེ་ལྟར་གནོད་པར་བྱེད་པའི་དམ་བཅས་པ་བྱས་ནས་སྒྲུབ་པར་བྱེད་པ་མེད་པ་ཡང་བརྗོད་པ་ནི། དོན་དུ་བྱ་བ་ཉིད་དུ་ཡང་ཞེས་བྱ་བའོ། །རེ་ཞིག་རྟག་པ་དང་མི་རྟག་པའི་རྣམ་པར་རྟོག་པ་ཉེ་བར་བཟུང་ནས་དེ་ཉིད་འདི་ལྟར་ཞེས་བྱ་བ་ལ་སོགས་པས་སྟོན་པར་བྱེད་དོ། །རྗེས་འགྲོ་ལྡོག་པ་དག་གིས་ནི། །ཞེས་བྱ་བའི་འབྲས་བུ་ལ་གནས་པའི་རྗེས་སུ་འགྲོ་བ་དང་ལྡོག་པར་རབ་ཏུ་སྦྱོར་བར་བྱེད་པ་རྒྱུ་ལ་གནས་པའི་རྗེས་སུ་འགྲོ་བ་དང་ལྡོག་པ་གང་ཡིན་པ་དེ་དག་གིས་ཁྱབ་པ་ནི་ནུས་པ་ཡིན་ནོ། །དེ་ལ་ལྷག་པའི་སྔར་ཡང་ཡོད་པའི་ཕྱིར་ན་དེ་མེད་པས་རབ་ཏུ་སྦྱར་བ་འབྲས་བུ་མེད་པ་རྟོགས་པར་མི་ནུས་སོ། །དེ་བས་ན་རྟག་པ་ལ་ལྡོག་པ་
མེད་པ་ཡིན་ནོ། །མི་རྟག་པ་ལ་ཡང་དེ་མེད་ན་འབྲས་བུ་མེད་པ་ཡིན་མོད་ཀྱི། དེ་ཡོད་ཀྱང་རེས་འགའ་མེད་པའི་ཕྱིར་རྗེས་སུ་འགྲོ་བ་མ་ཡིན་ནོ། །འདིར་ནི་ཇི་ལྟར་གང་གི་ཚེ་རྗེས་སུ་འགྲོ་བ་དང་ལྡོག་པ་དག་མ་རྟོགས་པའི་ཕྱིར་ན་ནུས་པར་ཐ་སྙད་བྱ་བ་མ་ཡིན་ནོ་ཞེས་བྱ་བའི་ཚུལ་ཡིན་པ་དེའི་ཚེ་སྒྲུབ་པར་བྱེད་པ་མེད་པ་ཡིན་ལ། གང་གི་ཚེ་རྗེས་སུ་འགྲོ་བ་དང་ལྡོག་པ་དག་མེད་པ་ཁོ་ན་ཡིན་ཏེ། དངོས་པོའི་ཆོས་ནི་རྟག་པ་དང་གཞན་ལས་མི་འདའ་བའི་ཕྱིར་རོ་ཞེས་བརྗོད་པར་འདོད་པ་དེའི་ཚེ་ནི་གནོད་པར་བྱེད་པ་ཉེ་བར་བཀོད་པ་ཡིན་ནོ། །དེ་བཞིན་དུ་གཞན་དག་ཏུ་ཡང་ཅི་རིགས་པར་རྟོགས་པར་བྱའོ། །དེ་ལྟ་ཡིན་ཡང་གང་ཞིག་གང་དང་རྗེས་སུ་འགྲོ་བ་དང་ལྡོག་པ་མེད་པ་དེ་དག་ནི་དེ་དང་རྒྱུ་དང་འབྲས་བུའི་དངོས་པོ་མ་ཡིན་ནོ། །དཔེར་ན་རྔ་མོ་དང་བོང་བུ་བཞིན་ནོ། །རྟག་པ་དང་མི་རྟག་པའི་ཆོས་དག་ལ་ཡང་གང་ཡང་གང་དང་དེ་དག་ཡོད་པ་མ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །ཡང་གང་གི་ཚེ་གང་ཞིག་གང་དང་རྗེས་སུ་འགྲོ་བ་རྟོགས་པ་མེད་པ་དེ་ནི་དེ་དང་རྒྱུ་དང་འབྲས་བུའི་དངོས་པོར་རྣམ་པར་མི་གཞག་སྟེ། དཔེར་ན་རྔ་མོ་དང་བོང་བུ་བཞིན་ནོ། །རྟག་པ་དང་མི་རྟག་པའི་ཆོས་དག་ལ་ཡང་གང་ཡང་གང་དང་རྗེས་སུ་འགྲོ་བ་དང་ལྡོག་པ་རྟོགས་པ་ཡོད་པ་མ་ཡིན་ནོ་ཞེས་གང་གི་ཚེ་སྦྱར་བར་བྱས་པ་དེའི་ཚེ་ནི་རྒྱུ་མི་དམིགས་པའོ། །གལ་ཏེ་རྒྱུ་ལ་བསྙོན་པ་ལ་རྒྱུ་མི་དམིགས་པའོ་ཞེས་བྱ་བ་འདི་ནི་ཁ་ན་མ་ཐོ་བ་དང་བཅས་པ་ཡིན་ལ། ཁྱབ་པར་བྱེད་པ་མི་དམིགས་པ་ཡང་ཁྱབ་པར་བྱ་བ་མེད་པར་རྟོགས་པའི་རྒྱུ་ཉིད་ཡིན་ན་རྟག་པ་ཉིད་དུ་གྱུར་པ་ཡིན་པའི་ཕྱིར། ཇི་ལྟར་རྒྱུ་དང་འབྲས་བུའི་དངོས་པོ་རྣམས་ལ་བསྙོན་པར་འགྱུར་ལ། རྗེས་སུ་འགྲོ་བ་དང་ལྡོག་པས་ཁྱབ་པར་མཐོང་བའི་ནུས་པ་དེ་ཡང་གང་ཞིག་ཡིན། དེ་ལྟ་ཡིན་ན་ནི་རྣམ་པ་ཐམས་ཅད་དུ་རྒྱུ་དང་འབྲས་བུའི་དངོས་པོའི་འཇིག་པ་མ་ཡིན་ནོ་ཞེ་ན། འདི་ནི་མདུན་དུ་བཤད་པར་བྱའོ། །ལྡོག་པ་མེད་པར་བརྗོད་པ་གང་ཡིན་པ་དེ་ལ་གལ་ཏེ་རྟག་པ་ལས་དུས་ཀྱི་ཁྱད་པར་གྱིས་ལྡོག་པ་མེད་པ་དེ་ལྟ་ན་ཡང་ཡུལ་གྱི་ཁྱད་པར་འགྱུར་རོ། །རྗེས་སུ་འགྲོ་བ་དང་ལྡོག་པ་དག་ནི་མངོན་སུམ་དང་མི་དམིགས་པ་རྣམ་པ་གསུམ་གྱིས་ངེས་པར་བྱེད་ལ། དེ་ནི་ཇི་ལྟར་དུས་ལ་ལྟོས་ནས་འགྱུར་བ་དེ་བཞིན་དུ་ཡུལ་ལ་ལྟོས་ནས་ཀྱང་ཡིན་ཏེ། ཤིང་ལ་སོགས་
པའི་ཚོགས་ཇི་སྙེད་པ་མེད་པ་གཅིག་ལ་མཐོང་བའི་དུ་བ་གང་གི་ཚེ་དེ་ཉིད་ཀྱི་ཚེ་ཕྱོགས་གཞན་དུ་མེ་དང་བྲལ་བའི་ཚོགས་པ་དེ་སྙེད་ཉིད་ལ་མ་དམིགས་པ་དེའི་ཚེ་ཇི་ལྟར་ཡུལ་ལ་ལྟོས་ནས་ཇི་ལྟར་ལྡོག་པ་མི་འགྲུབ་པ་སྙམ་པའི་དོགས་པ་བསུ་ནས་རྟག་པ་ནི་རྒྱུ་མེད་པ་ཉིད་ཀྱིས་ཏེ། ཡུལ་མ་ཁྱབ་པར་མི་སྲིད་པར་སྟོན་པ་ནི་རྟག་པ་ཞེས་བྱ་བའོ། །རྒྱུ་ལ་རིག་པ་ནི་སོ་སོར་ངེས་པའི་རྒྱུས་ཡུལ་འགའ་ཞིག་ཏུ་ངེས་པར་བྱེད་པར་འགྱུར་གྱི། དེ་མེད་པའི་ཕྱིར་ན་གཏན་དུ་ཐམས་ཅད་ན་ཡོད་པར་འགྱུར་བའི་ཕྱིར་རེས་འགའ་ཡང་གང་དུ་ཡང་འབྲས་བུ་འཆད་པ་མ་ཡིན་ཏེ་ལྷན་ཅིག་བྱེད་པ་ལ་ལྟོས་པ་མེད་པའི་ཕྱིར་རོ། །དེ་ཉིད་བརྗོད་པ་ལ་ནི་འབྲས་བུ་འགའ་ལ་ཡང་བྱེད་པ་མེད་པ་ནི་ཞེས་བྱ་བའོ། །གཞན་བསམ་པ་མ་རིག་ན་ཁྱབ་པ་དང་རྟག་པ་ཉིད་སུན་ཕྱུང་བ་ཉིད་ཀྱིས་ན་བཏང་སྙོམས་སུ་བཞག་སྟེ། ཉེས་པ་གཞན་བརྗོད་པ་ནི། དེའི་ཡུལ་ཁྱབ་མེད་ག་ལས་ཡིན། །ཞེས་བྱ་བའོ། །རྟོག་མེད་ལས་ཡིན་ཞེས་བྱ་བས་ནི་གཞན་གྱིའོ། །འདི་ལྟར་སྣམ་བུ་ལ་སོགས་པའི་ཡུལ་ངེས་པ་ཉིད་དུ་ཡོངས་སུ་བཅད་པ་ཡིན་ནོ་ཞེས་བྱ་བའི་དོན་ཏོ། །གལ་རྟག་ཅེས་བྱ་བ་ནི་རྒོལ་བའོ། །གལ་ཏེ་ཡུལ་གཞན་མ་ཁྱབ་པ་ལ་མ་རྟོགས་པ་ལན་ཡིན་ན། དེའི་ཚེ་དུས་གཞན་དུ་ཁྱབ་པར་ཡང་ཇི་ལྟར་བརྗོད། །དེ་ལ་ཡང་མི་རྟོགས་པ་ནི་ཡོད་པའི་ཕྱིར་རོ། །དབང་པོའི་རྣམ་པར་ཤེས་པ་ནི་སྐད་ཅིག་མ་ཡིན་པས་ན་དེའི་དུས་ན་ཉེ་བར་གནས་པའི་དངོས་པོ་ཉིད་འཛིན་པས་ན་སྐད་ཅིག་གཞན་དང་བྲལ་བ་ཁོ་ན་འཛིན་པ་ཡིན་ནོ་ཞེས་སྟོན་པར་འགྱུར་རོ། །དེ་བརྗོད་པ་ནི་ཇི་ལྟར་ཁྱབ་བྱེད་ཅེས་བྱ་བའོ། །ད་ལྟར་རྟག་པའི་ཕྱོགས་མི་བཟོད་པར་བྱས་ནས། །སྟོབས་དང་ལྡན་པའི་རྟག་པའི་ཕྱོགས་ལ་བརྟེན་ནས་སུན་འབྱིན་པར་རྩོམ་པ་ནི་སྐད་ཅིག་ཡིན་ཕྱིར་ཞེས་བྱ་བའོ། །མི་རྟག་པ་ཉིད་ནི་སྐད་ཅིག་མ་ཁོ་ནའི་མཐར་ཐུག་པ་ཡིན་ཏེ། དེ་ལྟ་མ་ཡིན་ན་མཐར་ཡང་འཇིག་པ་མི་འཐད་པའི་ཕྱིར་རོ། །སྐད་ཅིག་མ་བྱ་བ་བྱེད་པའི་དུས་མ་ཡིན་ནོ་ཞེས་བྱ་བ་འདིག་ལས་ཤེ་ན། སྐད་ཅག་མའི་ཞེས་བྱ་བའི་དངོས་པོ་ཙམ་ནི་སྐྱེ་བ་ཙམ་སྟེ་སྐད་ཅིག་མ་རྣམ་པར་གནས་པ་ཡིན་ཏེ། བྱེད་པའི་དུས་ལ་རེག་པ་མེད་པའི་ཕྱིར་རོ། །གལ་ཏེ་དེ་སྐྱེས་པའི་དུས་ཉིད་བྱེད་པའི་དུས་མ་ཡིན་ནམ་ཇི་ལྟར་འགའ་ཞིག་སྐྱེ་བའི་དེ་མ་ཐག་པར་དེ་སྐྱེ་བ་དེ་བཞིན་དུ་དེ་སྐྱེ་བ་དེ་མ་ཐག་ཏུ་གཞན་སྐྱེ་ཞེས་བྱ་བ་འདི་ཉིད་
རྗེས་སུ་འགྲོ་བ་ཡིན་ལ། གཞན་གྱི་ཚེ་ནི་ལྡོག་པ་ཡིན་ནོ། །ནུས་པ་ཡང་དེ་ཙམ་གྱིས་གྲུབ་པ་ཡིན་ནོ་ཞེས་སྟོན་པ་ནི་གལ་ཏེ་དེའི་དེ་མ་ཐག་ཅེས་བྱ་བའོ། །རྒོལ་བས་བརྗོད་པ་ནི་དེ་ནི་གཞན་གྱི་ཡང་དེ་མ་ཐག་པ་ཡིན་ཕྱིར། དེས་ན་འདི་ནི་བོང་བུ་ལ་སོགས་པ་གཞན་དེའི་ཡང་འབྲས་བུར་འགྱུར་རོ། །མངོན་པར་འདོད་པས་ལས་གཞན་ཡང་རྒྱུར་ཐལ་ལོ་ཞེས་བྱ་བའི་དོན་ཏོ། །དེ་ཉིད་གསལ་བར་བྱེད་པ་ནི་དངོས་པོ་ཞེས་བྱ་བའོ། །གཞན་གྱིས་བརྗོད་པ་བོང་བུ་ལ་སོགས་པའི་སྐད་ཅིག་དེ་མེད་པར་ཡང་དུ་བ་ལ་སོགས་པ་དེ་ཡོད་པ་ཞེས་དགོངས་པས་སྐད་ཅིག་ལ་ཇི་ལྟར་ཞེས་གསུངས་སོ། །འགྲེལ་པ་ནི་གོ་བླའོ། །ཅི་སྟེ་ཞེས་བྱ་བ་ནི་གཞན་གྱི་མ་ཡིན་ཞེས་བྱ་བ་ནི་དེ་ལྟ་མ་ཡིན་པའོ། །དེ་ལས་ཐ་དད་པའི་ཞེས་གསུངས་སོ། །ཡོད་པར་ཁས་བླངས་ནས་ཀྱང་སུན་དབྱུང་བར་བརྗོད་པ་ནི་ཡོད་ན་ཡང་ཞེས་བྱ་བའོ། །རྒྱུན་དེ་ཉིད་ཀྱི་ཡིན་གྱི་སྐད་ཅིག་རྣམས་ཀྱི་ནི་མ་ཡིན་ནོ། །དེ་ལྟ་ཡིན་མོད་ཅི་སྐྱོན་སྙམ་ན་སྐད་ཅིག་རྣམས་ནི་ཞེས་གསུངས་སོ། །གཞན་གྱི་དེ་དང་འབྲེལ་པ་ཅན་ཞེས་སྨྲས་ཏེ། དེ་དག་གི་ཡང་ཞེས་བྱ་བ་ནི་སྐད་ཅིག་རྣམས་ཀྱིའོ། །དེས་ན་མེད་པ་མ་ཡིན་ནོ་སྙམ་དུ་བསམས་པའོ། །མ་ཡིན་ཏེ་ཞེས་བྱ་བ་ནི་དེ་ལྟ་མ་ཡིན་པའོ། །ཐ་དད་པའི་ནི་ཞེས་བྱ་བ་ནི་སྐད་ཅིག་དང་གཞན་དག་ལའོ།། དེ་ལ་ཡང་ཞེས་བྱ་བ་ནི་རྒྱུན་ལའོ། །ཡང་བཤད་པ་ཞེས་བྱ་བ་ནི་སྐབས་ཀྱི་དོན་སྡུད་པའི་ཚིགས་སུ་བཅད་པའོ། །དེ་ལས་ཞེས་བྱ་བ་ནི་སྐད་ཅིག་རྣམས་ལས་སོ། །དེ་ཉིད་ཅེས་བྱ་བ་ནི། རྒྱུན་དེ་ཉིད་ཡིན་འགྱུར་ན་སྟེ། སྐད་ཅིག་རྣམས་ནི་མ་ཡིན་ནའོ། །སྐད་ཅིག་དེ་དང་འབྲེལ་པ་རྒྱུན་གྱིས་ནུས་པའི་ཕྱིར་རོ། །གལ་ཏེ་ནུས་པར་རྟོག་བྱེད་ན། །ཞེས་བྱ་བ་ནི་སྐབས་ཀྱི་སྐད་ཅིག་མ་རྣམས་སོ། །འོན་ཏེ་ཡང་རྒྱུན་རྟག་པ་ནི་ལྡོག་པ་མེད་པའི་ཕྱིར་དོན་བྱེད་ནུས་པ་མ་ཡིན་གྱི། མི་རྟག་པ་ཉིད་ཀྱི་རྒྱུན་གཞན་ལ་ལྟོས་ནས་ནུས་པར་འགྱུར་རོ་སྙམ་ན། གལ་ཏེ་རྒྱུན་གཞན་དག་ཏུ་ནི་ཞེས་སྨོས་སོ། །སྐད་ཅིག་མ་ཉིད་ཀྱི་ཕྱོགས་ལ་ནི་རྒྱུན་ལ་ཡང་གཞན་ཁས་བླངས་ལ་དེ་བཞིན་དུ་དེ་ལ་ཡང་གཞན་ཡིན་པའི་ཕྱིར་ཐུག་པ་མེད་དོ། །དེས་ན་ནུས་པ་ངེས་པ་མ་ཡིན་ནོ། །འབྲས་བུ་ཉིད་དུ་ཡང་ངེས་པར་མི་ཟིན་ཏེ། ཐུག་པ་མེད་པའི་ཉེས་པ་ཉིད་ཀྱི་ཕྱིར་རོ་ཞེས་བརྗོད་པ་ནི། རྒྱུན་ནི་འབྲས་བུ་ཉིད་ཅེས་བྱ་བའོ།།
རྒྱུན་གཞན་འབྲས་བུ་ཉིད་དུ་ཁས་ལེན་ན། སྐད་ཅིག་མ་ཞེས་བྱ་བ་སྐད་ཅིག་ཉིད་ཀྱི་ཕྱོགས་ལ་ནི་སྔ་མ་བཞིན་འབྲས་བུ་ཉིད་མེད་དོ། །དེ་ལྟ་ན་ཡང་ཐུག་པ་མེད་པར་ཇི་ལྟར་འགྱུར་སྙམ་ན། གང་གི་ཕྱིར་རྒྱུན་འདི་ཡང་རྒྱུན་གཞན་གྱི་འབྲས་བུ་ཉིད་བྱེད་པར་འགྱུར་ཏེ། རྟེན་ཡིན་པར་འགྱུར་རོ། །དེ་ལྟར་རྟག་པ་དང་མི་རྟག་པའི་རྣམ་པར་རྟོག་པ་བཀག་པ་ན་ཤེས་པ་དང་ཤེས་བྱའི་རྣམ་པར་རྟོག་པའི་སྐབས་སུ་བབ་པོ། །དེ་ལ་ཤེས་པ་གཉིས་རྒྱུ་དང་འབྲས་བུར་འགྱུར་རམ། ཤེས་བྱ་གཉིས་སམ་ཤེས་པ་དང་ཤེས་བྱ་གཉིས་ཡིན་ཞེས་རྣམ་པར་རྟོག་པའོ། །དེ་ལ་ཤེས་བྱའི་རྣམ་པར་རྟོག་པ་ལ་ནི། ཉེས་པའི་ཚོགས་སྔ་མ་ཉིད་ཡིན་ཏེ། རྟག་པ་དང་མི་རྟག་པའི་རྣམ་པར་རྟོག་པ་ལས་མ་འདས་པའི་ཕྱིར་རོ། །ཉེས་པ་གཞན་བརྗོད་པས་ཤེས་པ་དང་ཤེས་བྱའི་རྣམ་པར་རྟོག་པ་ལ་འཇུག་པ་ནི་གཞན་ཞེས་བྱའོ། །འདི་ལ་ས་བོན་གྱི་ཡོད་པའི་ཐ་སྙད་ནི་མྱུ་གུའི་འབྲས་བུས་བྱས་པ་ཡིན་ལ། མྱུ་གུའི་ཡང་ལྗང་པས་ཡིན་ཏེ། དེ་བཞིན་དུ་སྔ་མ་སྔ་མའི་ཡོད་པ་ཕྱི་མ་ཕྱི་མའི་འབྲས་བུ་བྱེད་པར་ནུས་པས་ཡིན་ནོ། །དེ་ལ་རེ་ཞིག་ལྗང་པ་མེད་པའི་མྱུ་གུ་ཙམ་མོ། །དེ་སྲིད་དུ་ནི་དེ་མེད་པ་ཁོ་ནའོ། །དེ་མེད་ན་ནི་སྔ་མ་ཡང་མེད་པར་འགྱུར་ཏེ། འབྲས་བུ་མེད་པའི་ཕྱིར་རོ། །གལ་ཏེ་སྐད་ཅིག་སོ་སོ་ལ་འདྲ་བ་དང་མི་འདྲ་བ་སྐྱེ་བ་རྒྱུན་མི་འཆད་པའི་ཕྱིར་ན་ཇི་ལྟར་འགའ་ཞིག་འབྲས་བུ་དང་འབྲལ་བར་འགྱུར་སྙམ་ན། བདེན་ཏེ་འོན་ཀྱང་རྒྱུན་ཏེ་དེ་ལ་གནས་པའི་འབྲས་བུ་ཐམས་ཅད་ནི་སྐད་ཅིག་ལ་མཐར་ཕྱིན་པ་ནི་མ་ཡིན་ཏེ། དེ་ཉིད་ཀྱི་ཚིག་གང་ལ་འབྲས་བུ་སྨིན་པ་ལོངས་སྤྱོད་པར་ཐལ་བའི་ཕྱིར་རོ། །དེས་གང་ལ་སྔོན་གྱི་འབྲས་བུ་མེད་པ་དེ་ཁོ་ན་མེད་པར་འགྱུར་ལ། དེ་མེད་ན་ནི་དེའི་སྔ་མ་ཡང་མེད་པར་འགྱུར་བའི་ཕྱིར་རོ། །དེ་བཞིན་དུ་སྔ་མ་སྔ་མ་མེད་པར་ན་ཐམས་ཅད་ཇི་སྲིད་པ་མེད་པར་འགྱུར་རོ། །འོན་ཏེ་ཡང་འབྲས་བུ་ནི་འབྲས་བུ་གཞན་མ་མཐོང་བར་ཡང་འབྲས་བུ་ཉིད་ལས་མི་ཉམས་ཏེ་དེ་ལས་འབྱུང་བར་མཐོང་བའི་ཕྱིར་རོ།། དེས་ན་དོན་བྱ་བའི་མཚན་ཉིད་ཀྱི་ཡོད་པ་མ་ངེས་ཀྱང་མ་བྱུང་བ་ལས་བྱུང་བ་ཉིད་དུ་གྲུབ་པ་ཁོ་ན་སྔ་མ་ནུས་པར་རྣམ་པར་འཇུག་པར་བྱེད་པ་ཡིན་ནོ་ཞེ་ན། མ་ཡིན་ཏེ་དོན་གྱི་ནུས་པ་མ་ངེས་ན་འབྲས་བུ་ཉིད་དུ་ངེས་པ་ཉིད་མི་རུང་བའི་ཕྱིར་རོ། །མ་བྱུང་བ་ལས་བྱུང་བ་ཞེས་འབྱུང་བའི་སྒྲས་ནི་ནུས་པ་ཉིད་བརྗོད་པ་ཡིན་ནོ།།
སྐྱེས་པ་ཙམ་ཡིན་ནོ་ཞེ་ན། སྐྱེས་པ་ཡང་སྔར་མེད་པ་ཡོད་པ་མ་ཐོབ་པ་ཁོ་ན་མ་ཡིན་ནམ། ཡོད་པའང་ཡོད་པ་མ་ཡིན་པའི་ཕྱིར་ལྷག་པར་སྨྲས་པས་ཅི་བྱ། རང་གི་ངོ་བོ་ཐོབ་པ་ཡིན་ནོ་ཞེ་ན། དངོས་པོའི་རང་གི་ངོ་བོ་ཞེས་བྱ་བ་ཡང་ནུས་པ་ཉིད་མ་ཡིན་ནམ་རང་གི་ངོ་བོ་ནི་སྔོན་པོ་ལ་སོགས་པ་ཡིན་ལ། ནུས་པ་ནི་ལྡོག་པ་ཡིན་ནོ་ཞེ་ན། སྐྲ་ཤད་ལ་སོགས་པ་ཡང་རང་གི་ངོ་བོ་ཐལ་བར་འགྱུར་རོ། །ནུས་པ་ལ་མི་འཁྲུལ་པའི་སྔོན་པོ་ལ་སོགས་པ་ནི་རང་གི་ངོ་བོ་ཡིན་ནོ་ཞེ་ན། འོ་ན་ནི་ནུས་པ་མ་ངེས་ན་རང་གི་ངོ་བོ་མ་ངེས་པའི་ཕྱིར་སྒྲ་ལ་སོགས་པ་ལྟར་འབྲས་བུ་ཉིད་མ་ཡིན་ནོ་ཞེས་བྱ་བར་འགྱུར་རོ། །དེས་ན་སྔ་མ་ལ་ནུས་པའི་མཚན་ཉིད་ཀྱི་ཡོད་པ་ཉིད་ཇི་ལྟར་འགྱུར། འོན་ཏེ་མཐའ་དག་པའི་ཕྱིར་ན་སྔ་མ་ཐམས་ཅད་ཕྱི་མ་ཕྱི་མ་ལ་ནུས་པ་ཡོད་པ་ཉིད་དོ། །འོན་ཀྱང་འབྲས་བུ་མ་མཐོང་བར་ངེས་པ་ཙམ་མི་འཇུག་པར་ཟད་པ་ཡིན་ནོ། །ངེས་པ་མེད་པ་ཉིད་ནི་དངོས་པོ་མེད་པ་ཡང་མ་ཡིན་ལ། དེ་ཡང་མཐོང་བ་ཇི་ལྟ་བ་བཞིན་འཇུག་པ་ཡིན་ནོ། །ཐ་མའི་ནུས་པ་འབྲས་བུ་མ་མཐོང་བས་ནི། འབྲས་བུ་མཐོང་བ་སྔ་མའི་ཚོགས་མཐའ་དག་རྒྱུད་ཉིད་ལས་ཉམས་པར་བྱེད་ནུས་པ་ཡང་མ་ཡིན་གྱི་འོན་ཀྱང་ཕྱིར་ལ་དེའི་དབང་གིས་ཕྱི་མ་ལ་ཡང་ནུས་པ་ཉིད་དུ་རྟོགས་པ་ཡིན་ནོ། །ཡང་ན་གོམས་པའི་གནས་སྐབས་འཐོབ་པའི་མངོན་སུམ་གསལ་བས་ནི་འབྲས་བུ་མ་མཐོང་ཡང་ནུས་པ་མིན་ནོ་ཞེ་ན། འདི་མཐའ་དག་ནི་གསོག་ཡིན་ཏེ། འདི་ལྟར་མཐའ་དག་པ་ཞེས་བྱ་བ་འདི་ནི་ཕྱིས་ངེས་པའི་འབྲས་བུ་ཡིན་ན། ཕྱི་མ་ཕྱི་མ་ལ་ལྟོས་ནས་ནི་ངེས་པའི་གོ་སྐབས་ཡོད་པ་མ་ཡིན་ནོ། །ངེས་པ་ཡང་མེད་ལ་ཡོད་པར་ཐ་སྙད་ཀྱང་བྱེད་དོ་ཞེས་བྱ་བ་འདི་ནི་གཟུ་ལུམས་ཡིན་ནོ། །དེས་ན་ཐེ་ཚོམ་བསྐྱེད་པ་ཉིད་ལ་གནོད་པ་ཡིན་ཏེ། ངེས་པ་མེད་པ་ཁོ་ནར་བརྗོད་པར་འདོད་པའི་ཕྱིར་རོ། །ངེས་པ་ཡང་འགའ་ཞིག་ཏུ་འཇུག་པར་ནུས་པ་མ་ཡིན་ཏེ། ཕྱི་མ་ཕྱི་མ་ལ་ལྟོས་པའི་ཕྱིར་རོ། །ཐ་མའི་ནུས་པ་མཐོང་ན་ནི། སྔ་མ་ཐམས་ཅད་ནུས་པ་མེད་པར་འགྱུར་བས་ཕྱི་མའི་ནུས་པ་བསྒྲུབ་པར་ཇི་ལྟར་འགྱུར། །འདིས་ནི་གོམས་པའི་གནས་སྐབས་ལ་བརྟེན་པ་ཡང་བསལ་བ་ཡིན་ཏེ། འགའ་ཞིག་གི་ཚེ་མངོན་སུམ་གྱིས་བཟུང་བ་ཡང་ནས་ཡང་དུ་བཟུང་ན་གོམས་པ་ཞེས་བརྗོད་པ་ཡིན་ན་དེ་ཡང་ཡོད་པ་མ་ཡིན་ནོ། །སྔ་མ་ཡོད་པ་ཡིན་ནོ། །
དེས་ན་ཐེ་ཚོམ་འདི་ཡང་ངོ་ཤེས་པ་ལ་སོགས་པ་ལྟར་རྟོགས་པ་ཙམ་ཡིན་ནོ་ཞེས་རིགས་པ་ཡིན་ནོ། །གཉི་ག་ལ་ནུས་པ་མཚུངས་པར་འགྲུབ་པ་ཡིན་ན་འདི་རིགས་པས་ལོག་པར་རྟོགས་པ་མེད་པར་འགྱུར་བ་ཡིན་ནོ། །དེའི་ཕྱིར་ཤེས་པ་ལས་གཞན་པའི་འབྲས་བུས་ནི། སྔ་མ་ཡོད་པར་མི་འགྲུབ་བོ་ཞེས་བྱ་བར་གནས་སོ། །འོ་ན་ཤེས་པའི་མཚན་ཉིད་ཀྱིས་འགྱུར་རོ། །དེ་ཡོད་པ་ནི་འབྲས་བུ་གཞན་ལ་ངེས་པར་ལྟོས་པ་མ་ཡིན་ནོ། །ཕྱི་རོལ་གྱི་སྐྲ་ལ་སོགས་པ་སྣང་བ་ལྟར་གསལ་བ་འབའ་ཞིག་གི་རང་བཞིན་ཅན་ཤེས་པའི་གསལ་བ་ནི་ཡོད་པ་ལ་འཁྲུལ་བ་མི་སྲིད་དོ། །གལ་ཏེ་དེའི་རྣམ་པ་ཅན་གྱི་ཤེས་པ་ཙམ་སྐྱེས་པ་ཡིན་པའི་ཕྱིར་ན་འདི་ནི་ཕྱི་རོལ་གྱི་སྐྲ་ལ་སོགས་པ་སྣང་བ་ཉིད་མ་ཡིན་པས་དེ་ཇི་ལྟར་སྐྲར་སྣང་བ་ཡོད་པ་ལས་འཁྲུལ་པར་ཇི་ལྟར་འགྱུར། དེས་ན་གལ་ཏེ་སྣང་བ་དེ་ཡོད་པ་ལ་འཁྲུལ་ན། དེའི་ཚེ་ཤེས་པའི་ཡོད་པ་ཉིད་ལ་འཁྲུལ་པར་ཐལ་བར་འགྱུར་རོ་ཞེ་ན། བརྗོད་པ་སྐྲར་སྣང་བའི་ཤེས་པ་གཞན་དང་ཐུན་མོང་པ་ཉིད་ཡིན་ཡང༌། འདི་སྐྲར་སྣང་བ་མ་ཡིན་ནོ་ཞེས་བྱ་བ་འདི་ཇི་ལྟར་རྟོགས་པར་བྱ་ནུས་པ་མེད་པ་ཉིད་ལས་སོ། །དེས་ན་ལྷག་པར་ཞེན་པས་བྱས་ནས། སྐྲ་སྣང་བའི་ཐ་སྙད་དང༌། ཡོད་པའི་ཐ་སྙད་དུ་གྱུར་པ་དེའི་ཕྱིར་ཉེས་པ་མེད་དོ། །ཤེས་པའི་རང་བཞིན་ཉིད་བརྟགས་ནས་ནི་གསལ་བ་ཁོ་ན་ཡོད་པ་ཡིན་ཏེ་དེས་ན་ནུས་པ་མ་ངེས་པས་ཀྱང་ཡོད་པ་ལ་འཁྲུལ་པ་མེད་དོ། །གལ་ཏེ་དེའི་ཡོད་པ་ཡང་ནུས་པ་ཁོ་ན་ཡིན་པ་དེ་ལྟ་ན་ཡང་ཤེས་པའི་གསལ་བ་ཉིད་དེ་ལ་འཁྲུལ་པ་མེད་པ་ཡིན་ཏེ། དེས་ན་ཕྱི་རོལ་བཞིན་དུ་འབྲས་བུ་མཐོང་བ་ལ་ལྟོས་པ་མ་ཡིན་ནོ། །དེའི་ཕྱིར་སྔ་མའི་ཡོད་པ་ཤེས་པའི་འབྲས་བུ་ཡིན་པ་ལ་ཐུག་པ་མེད་པའི་ཉེས་པ་མེད་དོ་ཞེ་ན། འདི་ལ་བརྗོད་པ་ནི་ཤེས་པའི་འབྲས་བུ་ཞེས་བྱ་བའོ། །ཐམས་ཅད་དུ་བསལ་བའི་དོན་དང༌། ལྷན་ཅིག་རྒྱུ་དང་འབྲས་བུའི་དངོས་པོར་འགྱུར་བའི་ཕྱིར་རྨི་ལམ་ལ་སོགས་པར་མཐོང་བ་ཡང་ཡོད་པར་ཐལ་བར་འགྱུར་ན་འགའ་ཞིག་ཁོ་ན་ལ་ཡང་འདོད་པ་ཡིན་ཏེ། འོན་ཏེ་འཁྲུལ་པའི་ཤེས་པ་ལ་སྣང་བའི་དོན་དང་ཤེས་པ་ལ་བཟུང་བ་ཉིད་མེད་དོ་སྙམ་ན་འདི་ལའང་ཞེས་གསུངས་སོ། །མ་འཁྲུལ་པའི་ཤེས་པའི་སྐྱེ་བའི་དུས་ནའོ། །ཤེས་པའི་འབྲས་བུ་དེ་དང་ལྡན་པ་ཞེས་བྱ་བ་སྟེ། རྒྱུ་ལྡན་པར་ཇི་ལྟར་རིག་པར་འགྱུར། གལ་ཏེ་རྨི་ལམ་ལ་
སོགས་པ་དོན་མེད་པ་ཉིད་ཀྱི་ཕྱིར་འབྲེལ་པ་རིག་པ་མ་ཡིན་ནོ་ཞེས་རིགས་ཀྱི་དོན་ཡོད་པར་གོ་ཇི་ལྟར་མི་འགྱུར་ཞེ་ན། ཤེས་བྱ་གཉིས་ནི་ཞེས་གསུངས་སོ། །འདི་སྙམ་དུ་གཉི་ག་སྣང་བ་ཞེས་བྱ་བ་འབྲེལ་པ་རྟོགས་པའི་སྒྲུབ་པར་བྱེད་པ་ཡིན་ལ། དེ་ནི་ཤེས་པ་དང་ཤེས་བྱ་དག་ལ་ཡང་ཡོད་པས་ཇི་ལྟར་དེ་མི་རྟོགས་སྙམ་ན། མདུན་ན་གནས་པ་ཉིད་དུ་ནི་ཞེས་བྱ་བའོ། །ལྷུར་བྱ་བའི་དོན་ནི་འདི་ཡིན་ཏེ། ཤེས་པ་ཐམས་ཅད་ནི་བདག་རིག་པ་ཡིན་ཡང་དངོས་སུ་བདག་ལ་ཤེས་པ་སྐྱེད་པ་ནི་མ་ཡིན་ཏེ། ཞེན་པ་ཐམས་ཅད་ནི་ཁ་ཕྱིར་བ་ལྟས་པས་འཇུག་པ་ཡིན་པའི་ཕྱིར་རོ། །དེས་ན་གལ་ཏེ་མཐོང་བ་མྱོང་བ་མེད་པར་འདི་མཐོང་བར་འགྱུར་ཏེ་ཞེས་ཁྱད་པར་དང་བཅས་པའི་ཞེན་པར་མི་འགྱུར་བ་དེ་ལྟ་ན་ཡང༌། སྔོན་པོ་འདི་མཐོང་ངོ་ཞེས་གཙོར་ཕྱི་རོལ་ཉིད་ལ་གནས་པར་བྱེད་དོ། །དེ་ལྟར་ནི་གཉིས་ལ་བརྟེན་པའི་འབྲེལ་པ་འགྲུབ་པ་མ་ཡིན་ནོ། །ཕྱི་རོལ་གྱི་གཉིས་རྟོག་པ་ལ་ནི། གོ་སྐབས་སུ་ཡང་འགྱུར་བ་ཡིན་ན་ཤེས་པ་དང་ཤེས་བྱ་དག་རྒྱུ་དང་འབྲས་བུའི་དངོས་པོ་ཉིད་དུ་དཔྱོད་པ་ལ་ནི་དེ་སྲིད་ཀྱི་ཚུལ་ཡོད་པ་མ་ཡིན་ནོ། །གལ་ཏེ་རེ་ཞིག་རྟོགས་པ་ལ་ནི་ཡོད་པ་ཁོ་ནའོ། །དེ་ཡན་ལག་གི་དངོས་པོ་ཡིན་པ་དང་དོན་གཙོར་འགྱུར་བ་ཡིན་ནོ་ཞེས་བྱ་བས་གང་དུ་ཉེ་བར་མཁོ། །དེས་ན་དེའི་འབྲས་བུ་ཉིད་དུ་མི་རྟོགས་པར་ཇི་ལྟར་འགྱུར་སྙམ་ན། ཤེས་པ་འབྲས་བུ་ཉིད་དུ་ནི་ཞེས་བྱ་བ་ནི་སྐབས་སྐབས་ཀྱི་དོན་ལ་ལྟོས་ནས་སོ། །དེ་ཉིད་ཀྱིས་ནི་དེ་རྟོགས་པ་མ་ཡིན་ནོ། །རྒྱུ་ཉིད་ཀྱིས་དུས་མི་མཚུངས་པའི་ཕྱིར་རོ། །གཞན་གྱིས་ཀྱང་མ་ཡིན་ཏེ། འབྲས་བུ་ཤེས་པ་ཉིད་ཤེས་པ་མེད་པའི་ཕྱིར་རོ། །གལ་ཏེ་ཕྱི་རོལ་གྱི་གཉིས་ཀྱང་གཅིག་གིས་མི་རྟོགས་སོ་ཞེ་ན། མི་རྟོགས་མོད་དེ་ཡང་རྟོགས་པ་མེད་པ་ཁོ་ནའོ་ཞེས་མང་དུ་བཤད་ཟིན། གལ་ཏེ་དེ་ལྟ་ན་ཡང་འདྲ་བ་དང་བཅས་པའི་ཤེས་པས་བསྐྱེད་པ་ཉིད་གཟུང་བ་ཡིན་པའི་ཕྱིར་དུ་ཐ་མི་དད་པ་མི་རྟོགས་པར་ཇི་ལྟར་འགྱུར་ཞེ་ན། བདེན་ཏེ་འདི་ནི་ལུགས་གཞན་དཔྱད་པ་ཡིན་ནོ། །རྣམ་པ་དང་བཅས་པའི་ཕྱོགས་ལ་ནི་ཕྱི་རོལ་གྱིས་སྟོང་པའི་ཕྱིར་ཤེས་པ་རྣམས་ཉིད་རྒྱུ་དང་འབྲས་བུའི་དངོས་པོར་འགྱུར་ན་དེ་ཡང་འཆད་པར་འགྱུར་ཞེ་ན། ཇི་སྐད་དུ། ཤེས་པ་འབྲས་བུ་ཉིད་དུ་ནི། །དེའམ་གཞན་གྱིས་རྟོགས་པ་མེད། །ཅེས་བརྗོད་བ་དེ་ལ་དེའམ་
ཞེས་བྱ་བའི་ཕྱོགས་བསལ་བར་བྱེད་པ་ནི། མངོན་སུམ་དེ་ཉིད་ལ་མིན་ཏེ། །ཞེས་བྱ་བ་ལ་སོགས་པའོ། །འཇུག་པར་ཁས་ལེན་ན་གནོད་བྱེད་བརྗོད་པ་ནི། འཇུག་ན་ཁྱོད་ཀྱི་འབྲས་མི་འགྱུར། །ཞེས་བྱ་བ་སྟེ་སྔར་མེད་པར་འབྱུང་བའི་དོན་མི་འཐད་པའི་ཕྱིར་རོ། །འོ་ན་དེ་ལས་སྔར་མེད་པའི་འབྲས་བུ་ཉིད་དུ་འགྱུར་རོ་སྙམ་ན། གལ་ཏེ་དེ་ལྟ་ན་ཇི་ལྟར་སྔར་མེད་པ་དེ་བཞིན་དུ་དེ་ལས་སྔར་ཡང་ཡོད་པའི་རྒྱུ་མ་གཏོགས་པར་འགྱུར་ཏེ། དེས་ན་ཡང་ནས་ཡང་དུ་འཇུག་པ་ན་ཐུག་པ་མེད་པར་འགྱུར་རོ། །ཡང་ན་འཇུག་ན་དེའི་འབྲས་བུ་ཉིད་ཅེས་བྱ་སྟེ། མངོན་སུམ་འཇུག་པ་དེས་བདག་ཉིད་འབྲས་བུ་ཉིད་དུ་རྟོགས་པ་མ་ཡིན་ཞེས་བྱ་བ་རྗེས་སུ་འཇུག་པ་སྟེ་དོན་གྱི་སྔར་ཡོད་པ་ཉིད་མ་བཟུང་བའི་ཕྱིར་རོ། །དོན་སྔར་ཡོད་པའི་བཟུང་བའི་དོན་དུ་སྔར་ཡང་འཇུག་ན་ནི་ཐུག་པ་མེད་དོ་ཞེས་བརྗོད་པ་ནི། སྔ་མ་ཡང་ནི་འཇུག་འགྱུར་ཏེ། །གསུངས་སོ། །འོ་ན་མདུན་དུ་གསལ་བཞིན་པ་དུས་མཚུངས་པའི་དོན་ཉིད་རྒྱུར་གྱུར་ཏོ་ཞེ་ན་གལ་ཏེ་ཞེས་བྱ་བའོ། །ཧ་ཅང་ཁྱབ་ཆེས་བའི་དོགས་པ་འདེ་བསུ་ནས་བཟློག་པ་ནི་གཞན་དུ་འགྱུར་བ་ན་ཞེས་བྱ་སྟེ། མཐོང་བའི་ཀ་བ་དང་བུམ་པ་དག་གཅིག་མེད་པར་གཞན་ཡོད་ན་དེ་རྒྱུ་དང་འབྲས་བུ་མ་གྲུབ་ན་དེ་ལྟ་ན་འོ་ན་ཤེས་པ་དང༌། ཤེས་བྱ་ཞེས་བྱ་བ་ནི། རྣམ་པ་ཉིད་ཀྱང་འགྲུབ་མི་འགྱུར། །ཞེས་གཉི་གར་ཡང་འབྲེལ་པར་བྱའོ། །འདི་ནི་དོགས་པ་དང་བཅས་ཏེ་བསལ་བར་བྱེད་པ་ནི་གལ་ཏེ་ཞེས་བྱ་བ་ལ་སོགས་པའོ། །འདི་ནི་གཞན་དུ་གྱུར་པ་མ་གྲུབ་པོ་ཞེས་བྱ་བ་བསལ་བར་བྱའོ། །སྐབས་སུ་བབ་པ་ལ་ཡང་མ་གྲུབ་པོ་ཞེས་བྱ་བར་སྟོན་པ་ནི་ཤེས་པའི་མཐོང་བ་གང་ཡིན་ཡང་དོན་མེད་པར་འཇུག་པར་མི་འགྱུར་རོ། །ཅི་ཤེས་པ་ཡང་དོན་མེད་ཀྱང་མཐོང་ངོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་རྩོད་པའོ། །དེས་ན་ཞེས་བྱ་བ་ནི་གཞན་ཡིན་པས་ནའོ། །ལན་ནི་ཀ་བའང་ཞེས་བྱ་བའོ། །ངོ་ཤེས་སྐྱེ་བ་མཚུངས་པ་ཡིན། །ཞེས་བྱ་བ་ནི་དཔེར་ན་བུམ་པ་བུམ་པ་ཞེས་རིགས་གཅིག་ཏུ་གྲུབ་པ་ལ་བརྟེན་ནས་འཁྲུལ་བ་དེ་བཞིན་དུ་ཤེས་པ་ཤེས་པ་ཞེས་བྱ་བར་ཡང་འགྱུར་བའི་ཕྱིར་མཚུངས་སོ། །འོ་ན་གང་གི་ཚེ་བུམ་པ་དེ་ཉིད་གཞན་དག་ཏུ་མཐོང་བས་འཁྲུལ་པ་སྨྲ་བ་དེའི་ཚེ་ཇི་ལྟར་མཚུངས་ཏེ། ཤེས་པ་ནི་རྒྱུ་གཅིག་ལ་གནས་ཀྱང་ཀ་བ་ལ་སོགས་པ་བཞིན་དུ་གསལ་བའི་ངོ་ཤེས་པ་ཡོད་པ་མ་ཡིན་ནོ། །ཤེས་པ་
ཤེས་པ་ཞེས་རིགས་ངོ་ཤེས་པ་ནི་འདིར་ཉེ་བར་མཁོ་བ་མ་ཡིན་ནོ། །རིགས་ནི་གཞན་གྱིས་འདོགས་པའམ་བཏགས་པ་ཡིན་ཡང་རུང་སྟེ། གཉི་ག་ལྟར་ཡང་ཤེས་པ་གཅིག་ནི་གསལ་བ་རང་བཞིན་མ་ཡིན་ནོ། །དེས་ན་བུམ་པ་བཞིན་འཁྲུལ་པ་ཇི་ལྟར་འགྱུར། དེས་ན་གསལ་བ་ངོ་ཤེས་པའི་ཕྱོགས་ལ་ལན་གང་ཞིག་ཡིན་སྙམ་ན། དེར་ཡང་ཀ་བས་སྐྱེད་པས་བུམ་པ་ཉིད་གཞན་དུ་མཐོང་བ་མི་འགལ་ཏེ་རྫ་མཁན་གྱིས་སྐྱེད་པ་དེ་མེད་པར་མཐོང་བ་བཞིན་ནོ། །དེས་ན་ལྷན་ཅིག་དམིགས་པ་དག་རྒྱུ་དང་འབྲས་བུའི་དངོས་པོར་འགྱུར་བ་མི་སྤོངས་སོ། །གཞོན་ནུ་མ་ལེན་གྱིས་ལུགས་ལ་བརྟེན་ཏེ། རིང་ཉིད་ལ་སུན་འབྱིན་པ་གཞན་བརྗོད་པ་ནི། དེ་ལྟ་ན་ནི་རག་འགྱུར་ན། །ཞེས་བྱ་བ་སྟེ། ཤེས་པ་དང་དངོས་པོ་དག་ཅེས་བྱ་བ་ནི་སྐབས་ཀྱིས་སོ། །དེ་ནི་བདག་སེམས་ཀྱི་རང་བཞིན་དུ་འདོད་པས། ཤེས་པའི་གསལ་བ་ངོ་ཤེས་པ་ལ་མ་བརྟེན་པར་གཞག་པར་མི་ནུས་སོ། །དེས་ན་ཤེས་པ་རྣམས་སྔ་མ་དང་ཕྱི་མའི་རང་བཞིན་གྱིས་གཅིག་ཉིད་དུ་འཐད་པའི་ཕྱིར་ན་རྟག་པ་ཉིད་དུ་འགྱུར་རོ། །དེས་ན་ཤེས་པ་ལ་ལྟོས་ནས་འགའ་ཞིག་རྒྱུ་དང་འབྲས་བུར་ཇི་ལྟར་འགྱུར་བློ་ཞེས་བརྗོད་པ་དེའི་གནས་སྐབས་ཀྱི་ཁྱད་པར་སྐྱེ་བ་དང་འཇིག་པའི་ཆོས་ཅན་ཡིན་པ་དེ་ལ་ལྟོས་ནས་ནི་ཡུལ་རྒྱུ་ཉིད་ཡིན་ནོ་ཞེས་བྱ་བ་ཡང་མི་འཐད་དེ་སེམས་ཀྱི་རང་བཞིན་དུ་ཁས་བླངས་པའི་ཕྱིར་རོ། །ཕྱོགས་འདི་ནི་ཐ་དད་པ་དང་མི་འཐད་པའི་རྟོགས་པས་ཡང་གནོད་པ་མ་ཡིན་ནོ་ཞེས་བཤད་པ་ཡིན་ནོ། །ཕྱོགས་གཞན་ནི་བརྗོད་པར་བྱ་བ་མང་བའི་ཕྱིར་བཏང་སྙོམས་སུ་དོར་བ་ཡིན་ནོ། །གལ་ཏེ་འོ་ན་ངོ་ཤེས་ཀྱི་སྟོབས་ཀྱིས་དེའི་རང་བཞིན་གྱིས་བདག་གྲུབ་ན་ནི་གྲུབ་ལ་རག་གོ་ཞེ་ན། དགག་པ་བརྗོད་པ་ནི་ངོ་ཤེས་ཚད་མ་ཉིད་མ་ཡིན་ནོ་ཞེས་བྱ་བ་སྟེ། འགའ་ཞིག་ཏུ་ཡང་ཞེས་བྱ་བར་བསམས་པའོ། །ཅིའི་ཕྱིར་སྙམ་ན་སྔ་མ་ཞེས་གསུངས་སོ། །གང་ཞིག་གང་གི་རང་བཞིན་ཡིན་པ་དེ་ནི། དེ་རྟོགས་ན་ངེས་པར་རྟོགས་པ་དང་ལྡན་པ་ཡིན་ཏེ་སྔོན་པོ་ལ་ཟླུམ་པོ་བཞིན་ནོ། །སྔ་མ་དང་ཕྱི་མ་ཉིད་ཀྱང་དངོས་པོའི་རང་བཞིན་ནོ། །ཐལ་བར་འགྱུར་བའི་རང་བཞིན་གྱི་གཏན་ཚིག་སོ། །བཟློག་པ་ནི་གང་ཞིག་གང་རྟོགས་པ་ན་མ་རྟོགས་པ་མེད་པ་དེ་ནི་དེའི་རང་བཞིན་མ་ཡིན་ཏེ། དཔེར་ན་ཨུཔྟལའི་དཀར་པོ་ཉིད་བཞིན་ནོ། །སྔ་མ་དང་ཕྱི་མ་ཉིད་ཀྱང་དངོས་པོ་མངོན་སུམ་དུ་གྱུར་པ་ན།
རྟོགས་པ་ཡིན་ནོ་ཞེས་བྱ་བ་ནི་པར་བྱེད་པ་མེད་པའོ། །དེ་ལྟ་མ་ཡིན་ན་ཧ་ཅང་ཐལ་བར་འགྱུར་བཞི་བཟློག་པ་ལ་གནོད་པར་བྱེད་པ་ཡིན་ནོ། །སྔ་མའི་ཤེས་པ་ལ་ནི་ཕྱི་མ་ལ་ཡང་སྔ་མ་ཉིད། སྣང་པ་མ་ཡིན་པའི་ཕྱིར་གཉི་ག་གྲུབ་པས་ན་མ་གྲུབ་པ་ནི་མ་ཡིན་ནོ། །དེའི་རང་བཞིན་ཉིད་ན་ནི་སྔོན་པོ་བཞིན་དུ་དེ་གཉི་ག་སྣང་བ་ན་སྐད་ཅིག་ཙམ་མཐོང་བས་གནས་སྐབས་མཐའ་དག་མཐོང་བར་ཐལ་བར་འགྱུར་རོ། །དེས་ན་སྔ་མ་ལ་ནི་སྔ་མའི་རང་བཞིན་ཉིད་སྣང་ལ་ཕྱི་མ་ལ་ཡང་ཕྱི་མ་ཉིད་ཡིན་ནོ། །དེས་ན་སོ་སོའི་མངོན་སུམ་དག་གིས་ནི་སྔ་མ་དང་ཕྱི་མ་ཉིད་རྟོགས་པ་མ་ཡིན་ཏེ། རང་བཞིན་རེ་རེ་ཙམ་གཟུང་བའི་ཕྱིར་རོ། །དྲན་པ་ཙམ་ནི་སྔ་མ་དང་ཕྱི་མར་ཡང་གཅིག་ཁོ་ན་གཟུང་བ་ཡིན་ནོ་ཞེས་དྲན་པ་ཙམ་ཞིག་འཇུག་པ་ཡིན་ན་ད་ནི་མ་ཡིན་ནོ། །དེ་ནི་རང་རྒྱུད་དུ་ཚད་མར་འགྱུར་རམ། མཐོང་ངམ་རྗེས་སུ་འབྲང་བས་ཡིན་གྲང་ན། ཕྱོགས་དང་པོ་ལ་ནི་དྲན་པ་ཞེས་ཁོ་ནར་ཟད་ཀྱི་འདི་དོན་དང་འབྲེལ་པར་གོ་ཇི་ལྟར་འགྱུར། ཡང་ན་རྣམ་པར་རྟོག་པ་ཐམས་ཅད་ཚད་མར་ཅི་སྟེ་མི་ཐལ། ཕྱོགས་གཞན་ལ་ནི་དེ་མཐོང་བའི་རྗེས་སུ་འབྲང་བ་ཁོ་ནར་འགྱུར་ དགོས་སོ་ཞེས་སྟོན་པ ་ནི། །རྟོག་པ་སྔ་མ་ཕྱི་མ་དག །ཅེས་བྱ་བའོ། །རྟོག་པ་སྔ་མས་ནི་རང་གི་ཡུལ་གཞན་གྱི་ཡུལ་དང་མི་བསྲེལ། ཕྱི་མས་ཀྱང་མ་ཡིན་ནོ། །དེ་དག་གི་ཡུལ་མ་འདྲེས་པ་མེད་པ་ན་སྟེ། ཐ་དད་པར་བཟུང་ན་དྲན་པ་གཅིག་ཉིད་ཤེས་པར་བྱེད་པ་མ་ཡིན་པར་རིགས་སོ་ཞེས་བྱ་བ་ནི་ལྷག་མའོ། །མེད་པ་གཅིག་གི་ལྷག་པར་ཞེན་པར་བྱེད་པའི་མངོན་སུམ་དེ་ཇི་ལྟར་མངོན་སུམ་གྱི་མཚན་ཉིད་དུ་མ་བཟོད་དེ་འཁྲུལ་པའི་ཕྱིར་རོ་ཞེས་དགོངས་པའོ། །ཡང་ན་རྟག་པར་སྨྲ་བ་ལ་ང་མ་དང་ཕྱི་མའི་རང་བཞིན་སྔ་མ་འམ་ཕྱི་མའི་ཤེས་པ་ལ་སྣང་བ་མ་ཡིན་ཏེ། གཅིག་ཉིད་ཀྱིས་ཕན་ཚུན་འགལ་བའི་རང་བཞིན་གཉིས་མི་འཐད་པའི་ཕྱིར་རོ་ཞེས་བྱ་བ་ནི། སྔ་མ་ཕྱི་མའི་ངོ་བོ་དག་ཅེས་བྱ་བ་ལ་སོགས་པའི་དོན་ཡིན་ནོ། །ཐ་དད་འདི་ནི་བྱ་བ་དང་དུས་ལ་སོགས་པའི་ཁྱད་པར་གྱིས་བྱས་པ་ཡིན་ནོ་ཞེ་ན། དེ་ལྟ་ན་ལྷན་ཅིག་སྐྱེས་པ་མ་ཡིན་ནོ་ཞེས་བྱ་བར་གྲུབ་བོ། །ཁྱད་པར་དེ་དང་ལྡན་ལ་ཐ་དད་པ་དང་མི་དད་པར་དཔྱད་བཟོད་པ་མ་ཡིན་ཏེ། དེས་ན་སྔ་མ་དང་ཕྱི་མ་ཉིད་ནི་རྣམ་པར་རྟོག་པས་སྤྲུལ་པ་ཡིན་ནོ་ཞེས་བརྗོད་པ་ནི་གཉིས་ལ་དན་པ་ཞེས་བྱ་བའོ། །དྲན་པ་ནི་རྣམ་པར་རྟོག་པ་ཙམ་ཞིག་ལོ་ཕྱིར་སྨྲས་པ་ཡིན་ནོ། །
དེ་ཉིད་ཀྱི་ཕྱིར་འདི་ནི་ཚད་མ་ཉིད་མ་ཡིན་ཞེས་གསུངས་སོ། །ཡང་ན་དྲན་པར་འདོད་པའི་ངོ་ཤེས་པ་འདི་ནི་འདི་ཡིན་ནོ་ཞེས་སྔ་མ་དང་ཕྱི་མ་དག་ལ་འཇུག་པ་ཡིན་ལ། དེས་ན་མངོན་སུམ་གྱིས་བསལ་བའི་ཡུལ་ཅན་ཡིན་པའི་ཕྱིར་འདི་ནི་ཚད་མ་ཉིད་མ་ཡིན་ཞེས་བྱ་བའི་དོན་ཏོ། །འདི་སྙམ་དུ་སྔ་མ་དང་ཕྱི་མའི་མངོན་སུམ་དག་གིས་སོ་སོར་སྔ་མ་ཕྱི་མ་ཉིད་མ་རྟོགས་མོད། སྔ་མས་ནི་སྔ་མའི་རང་བཞིན་འཛིན་ལ་ཕྱི་མས་ནི་ཕྱི་མ་ཡིན་ཏེ། དེས་ན་དེ་ལྟར་རྗེས་སུ་བྱ་བའི་ངོ་ཤེས་པ་ཇི་ལྟར་འཁྲུལ་པ་ཡིན་སྙམ་ན། གལ་ཏེ་དེ་ལྟ་ན་ཤེས་པ་སྔ་མས་ནི་ཕྱི་མ་མི་འཛིན་ལ། ཕྱི་མས་ཀྱང་སྔ་མ་འཛིན་ནོ་ཞེས་བརྗོད་པ་ནི་རྟོགས་པ་སྔ་མ་ཞེས་བྱ་བའོ། །དེ་ལས་ནི་མྱོང་བ་གཉིས་ལས་སོ། །ཉམས་སུ་མྱོང་བ་གཉིས་སྟོབས་ལས་ནི་བྱུང་བར་འདོད་པ་ཁོ་ན་སྟེ། འོན་ཀྱང་དེ་དག་གིས་མ་བཟུང་བའི་གཅིག་ཉིད་ངེས་པར་གོ་ཇི་ལྟར་འགྱུར་བ་དེ་ཉིད་ཚད་མ་ཡིན་ནོ་ཞེ་ན། འོ་ན་སློབ་མའི་རྣམ་པར་རྟོག་པའི་ཚོགས་ཀྱང་ཚད་མར་ཐལ་ཏེ། སློབ་དཔོན་གྱི་ང་རོ་ལྟ་བ་ལ་སོགས་པ་ལས་བྱུང་བའི་ཕྱིར་རོ། །གལ་ཏེ་ཡང་རྣམ་པར་རྟོག་པ་དེའི་གཞལ་བྱ་ལ་མངོན་སུམ་འཇུག་པར་མི་སྲིད་པར་བརྗོད་ན། འདིར་གང་གིས་ཟློག་པར་བྱེད། མིག་གཉིས་ཕྱེ་བ་ཙམ་ནི་གཉི་གར་ཡང་མཚུངས་པ་ཡིན་ནོ། །འོན་ཏེ་གནོད་པ་དང་མི་གནོད་པ་དག་གི་ཁྱད་པར་ཡོད་ན་འབྱུང་བར་འགྱུར་བའི་དོན། སློབ་མས་རྣམ་པར་བརྟག་པ་གང་གིས་བསལ་བར་ནུས། དེ་ལྟ་མ་ཡིན་ན་མཐོ་རིས་ཀྱི་སྒྲུབ་བྱེད་མེའི་སྦྱིན་སྲེག་ལ་སོགས་པའི་ངག་ཀྱང་གནོད་པའི་དོན་ཅན་ཉིད་དུ་ཐལ་ལོ། །བསྐུལ་བའི་གདོན་མི་ཟ་བར་འབྱུང་བ་ནི་སློབ་མའི་རྣམ་པར་རྟོག་པ་ནི་ཡུལ་མ་ཡིན་ནོ་ཞེ་ན། རྣམ་པར་དབྱེ་བ་འདི་དག་ལས་ཡིན་ཏེ། ཚད་མ་དང་ཚད་མ་མ་ཡིན་པར་ནི་བརྗོད་པར་ནུས་པ་མ་ཡིན་ནོ། །ཇི་ལྟར་གཅིག་ལ་སྒྲ་ལས་བྱུང་བ་ཚད་མ་ཡིན་པ་དེ་བཞིན་དུ་མངོན་སུམ་ཐམས་ཅད་ཀྱི་གཙོ་བོ་ཡིན་ཏེ་ངོ་ཤེས་པ་བཞིན་ནོ། །འོན་ཏེ་མངོན་སུམ་གཉིས་ཀྱིས་རང་བཞིན་རེ་རེ་བཟུང་བའི་ཕྱིར་རོ། །འོ་ན་ཏེ་སྔ་མ་ཉིད་འཛིན་པའི་མངོན་སུམ་གྱིས་ནི་དེ་ལ་འབྲེལ་བ་རྣམ་པར་གཅོད་པ་ཙམ་བྱས་ཀྱི་ཕྱི་མའི་ཉིད་ནི་མ་ཡིན་ཏེ། དེ་བཞིན་དུ་གཞན་དུ་ཡང་བརྗོད་པར་བྱའོ་ཞེ་ན། འོ་ན་ཕྱི་མ་ཉིད་དེ་སྔར་ཡོད་དམ་མེད། གལ་ཏེ་ཡོད་ན་ནི་གདོན་མི་ཟ་བར་ཡོངས་སུ་གཅད་པར་བྱ་བར་འགྱུར་རོ། །
དེ་ལྟ་མ་ཡིན་ན་ནི་སྔ་མ་ཉིད་ཀྱང་མི་འགྱུར་རོ། །མེད་པ་ཉིད་མ་ཡིན་ནི་ན་རྣམ་པར་གཅད་པར་གྲུབ་པོ། །དེ་བཞིན་དུ་ཕྱི་མ་ཉིད་ལ་ཡང་བརྗོད་པར་བྱའོ། །འོན་ཏེ་རང་བཞིན་གཉི་ག་ཡང་རྟགས་ཉེ་བར་གནས་པ་ཉིད་ཡིན་ཞིང་མངོན་སུམ་གཉི་གས་མངོན་སུམ་དུ་བྱས་པ་ཉིད་ཡིན་ན་དེ་ལྟ་ན་ཡང་དྲན་པ་ཙམ་གྱིས་རང་བཞིན་ཅན་ངོ་ཤེས་པ་ཉེ་བར་དགོད་པས་ཅི་ཞིག་བྱ་ཞེས་དྲན་པའི་སྒྲས་སྟོན་པར་བྱེད་དོ། །དེའི་ཕྱིར། མ་ཤེས་ཆ་ལ་རང་བཞིན་དང༌། །དབང་པོས་མཐོང་བ་དྲན་པའི་ཕྱིར། །རྟགས་ཀྱི་མ་སྐྱེས་རྣམ་རྟོག་རྣམས། །རྣམ་པ་ཀུན་དུ་ཚད་མེད་ཉིད། །གལ་ཏེ་གཟུགས་ཀྱི་ཤེས་པའི་དེ་མ་ཐག་པའི་རེག་པའི་ཤེས་པ་རང་རྒྱུད་ཡིན་ཡང་མི་བླུ་བའི་ཕྱིར་ཚད་མ་ཡིན་པ་དེ་བཞིན་དུ། ངོ་ཤེས་པ་ཡང་ཡིན་པར་འགྱུར་རོ། །སྐྱེ་བའི་ཚོགས་པ་གཞན་དུ་གྱུར་པ་ཉིད་ཀྱང༌། ཐུན་མོང་བ་ཁོ་ནའོ་ཞེས་བྱ་བ་ཡང་བརྩད་པར་མི་བྱ་སྟེ། མི་སླུ་བ་ལ་ཉིད་མེད་པའི་ཕྱིར་ཏེ། འགའ་ཞིག་ཏུ་གཅིག་པ་ཉིད་མ་རྟོགས་པའི་ཕྱིར་རོ། །ཐམས་ཅད་དུ་སྔ་མའི་དང་ཕྱི་མའི་རང་བཞིན་འཛིན་པའི་མངོན་སུམ་གཉིས་འབྱུང་བ་ཕྱིས་ནི་མཚམས་སྦྱོར་བའི་རྣམ་པར་རྟོག་པར་འགྱུར་རོ་ཞེས་བྱ་བ་དེ་ལྟ་བུ་ཉིད་དུ་རྟོགས་པའི་ཕྱིར་རོ། །གཅིག་ཉིད་མངོན་སུམ་གྱིས་མ་བཟུང་བའི་ཕྱིར་ན་དེ་དང་འབྲེལ་བའི་རྟགས་ལས་སྐྱེས་པའི་རྗེས་སུ་དཔག་པ་ཡང་ཡོད་པ་མ་ཡིན་ཏེ། །གཅིག་ཉིད་ཀྱིས་བསྒྲུབ་པར་བྱ་བའི་དོན་བྱ་བ་འགའ་ཞིག་ཀྱང་དམིགས་པ་མེད་དོ། །ཇི་ལྟར་ཤིང་ཐ་དད་པ་སྐྱེས་བ་དེ་བཞིན་དུ་ཕྱིས་འབྱུང་བའི་གྲིབ་མ་ཡང་ཐ་དད་པ་ཁོ་ན་ཡིན་ལ། ཇི་ལྟར་གྲིབ་མ་རིགས་མཐུན་པ་དེ་ལྟར་ནི་ཤིང་ཡང་ཡིན་ནོ། །དེ་བས་ན་ཐམས་ཅད་དུ་དོན་བྱ་བ་ནི་དེ་དང་འདྲ་བས་བསྒྲུབ་པར་བྱ་བས་ཡིན་གྱི་དེ་ཉིད་ཀྱིས་བསྒྲུབ་པར་བྱ་བ་ནི་མ་ཡིན་ནོ། །གཏམས་པ་ཕྱིར་ལེན་པ་ལ་སོགས་པ་ནི། གཞན་གྱིས་དྲན་དང་ལོངས་སྤྱོད་སོགས། །ཐལ་པ་གནོད་བྱེད་མ་ཡིན་ཏེ། །དེས་འགའ་དྲན་པ་མེད་པའི་ཕྱིར། །ཉམས་སུ་མྱོང་བ་ལས་ནི་དྲན་པ་འབྱུང༌། །ཞེས་བྱ་བ་དེར་བཤད་ཟིན་ཏོ། །རོ་ལ་སོགས་པའི་ཤེས་པ་ལ་ནི་དོན་བྱ་བའི་ཁྱད་པར་གྱིས་བྱས་པའི་མི་སླུ་བ་བསྙོན་པར་རིགས་པ་མ་ཡིན་ནོ། །གཞན་ཡང་གཟུགས་དང་སྒྲ་དང་དྲི་དང་རོ་དང་རེག་བྱ་རྣམས་ནི་བདག་ཉིད་ཇི་ལྟ་བ་བཞིན་དབང་པོའི་རྣམ་པར་ཤེས་པ་ལ་དངོས་སུ་གསལ་བ་ཡིན་ཡང་གལ་ཏེ་ལོག་པ་ཉིད་དུ་དོགས་ན་ནི། སྲིད་པ་རང་བཞིན་མེད་པ་ཁོ་
ནར་འགྱུར་རོ། །དེའི་ཚེ་ནི་ངོ་ཤེས་པའི་གཏམ་ཡང་ག་ལ་ཡོད། ངོ་མ་ཤེས་པ་ནི་རྣམ་པར་རྟོག་པ་ཡིན་ལ། རྣམ་པར་རྟོག་པ་ཡང་དོན་དུ་ལྷག་པར་ཞེན་པ་ཙམ་གྱིས་དངོས་སུ་མྱོང་བ་ནི་མ་ཡིན་ཏེ། དེས་དེའི་ཡུལ་བཀག་ཀྱང་དངོས་པོའི་རང་བཞིན་ཉམས་པ་མེད་དོ། །དངོས་པོ་སྣང་བ་ལ་དངོས་པོ་ཉིད་དུ་རྣམ་པར་འཇོག་པའི་ཕྱིར་རོ། །གལ་ཏེ་རྣམ་པར་རྟོག་པ་ཡང་རྟགས་ཀྱིས་བསྐྱེད་པ་ཡིན་ན་ནི་དེའི་ཆེ་དེས་གྲུབ་པ་སྤངས་ན་ཐམས་ཅད་སྤངས་པར་འགྱུར་བ་ཁོ་ན་སྟེ། མངོན་སུམ་སུན་མ་ཕྱུང་བ་ནི། དེས་གྲུབ་པའི་ཚུལ་གསུམ་གྱིས་མཚོན་པའི་རྟགས་ལས་སྐྱེས་པའི་རྗེས་སུ་དཔག་པ་སུན་དབྱུང་བར་མི་ནུས་པའི་ཕྱིར་རོ། །དེས་ན་དེའི་སྐྱེས་བུ་བྱེད་པ་ནི་མངོན་སུམ་གྱི་མཐར་ཐུག་པ་ཁོ་ནའོ། །དེས་ནི་རྗེས་སུ་དཔག་པས་ངེས་པར་བྱས་པས་ནི་དངོས་སུ་བསལ་བའི་དོན་དང༌། གྲུབ་པ་དང་བདེ་བ་གཅིག་པ་ཁོ་ནའོ། །རྣམ་པར་རྟོག་པ་གཞན་གྱིས་ཞེན་པར་བྱས་པས་ན་དངོས་སུ་སྣང་བ་མ་ཡིན་པ། དངོས་སུ་བསལ་བ་དང་གྲུབ་པ་དང་བདེ་བ་གཅིག་པ་ཡང་མ་ཡིན་ཏེ། རྗེས་སུ་དཔག་པ་ལྟར་ནུས་པ་ཡོད་པ་མ་ཡིན་པའི་ཕྱིར་རོ། །དེས་ན་ཡིད་ཀྱི་རྒྱལ་སྲིད་དུ་རྟོགས་པས་བརྟགས་པ་བཞིན་དུ་དེ་བཀག་ཀྱང་གནོད་པ་ཅི་ཡོད། ཁྱོད་ཀྱིས་མངོན་སུམ་གྱི་མིང་བྱས་ཀྱང་དོན་མངོན་སུམ་བསལ་བར་ནི་བྱ་བར་མི་ནུས་ཏེ། དེས་ན་རྣམ་པར་རྟོག་པ་གཞན་ལས་འདི་ལྷག་པར་ཞེན་པ་ཙམ་ཡིན་པར་ཁྱད་པར་འགའ་ཡང་ཡོད་པ་མ་ཡིན་ནོ། །དེའི་ཕྱིར་སྐྱོན་མེད་པའི་དབང་པོས་བསྐྱེད་པའི་སེམས་ལ་དངོས་སུ་སྣང་བའི་དོན་དང༌། བརྟགས་པ་ཙམ་མཚུངས་པ་ཅི་ཡོད། ཡང་སྣང་བ་དང་ལྷག་པར་ཞེན་པ་དག་གི་ཁྱད་པར་གང་ཞེ་ན། རྣམ་པར་རྟོག་པ་ཙམ་གྱིས་སྤྱོད་ཡུལ་མངོན་པར་འདོད་པའི་དངོས་པོ་སྟོང་པའམ། དངོས་སུ་ཉམས་སུ་མྱོང་བཞིན་པ་ལ་སྲོག་ཆགས་ཐམས་ཅད་ཀྱི་སོ་སོ་རང་གིས་རིག་པ་ནི་བསྙོན་པར་མི་ནུས་སོ། །ངོ་ཤེས་པ་ལ་ཡང་ཉམས་སུ་མྱོང་བའི་དོན་ཉིད་ཡོད་པ་མིན་གྱི་ལྷག་པར་ཞེན་པ་ཙམ་ནི་མ་ཡིན་ནོ་ཞེས་ནི་བརྗོད་པར་མི་ནུས་ཏེ། བྱམས་པ་ལ་སོགས་པ་རེས་འགས་ངོ་ཤེས་པར་གྱུར་པ་ཙམ་ལ་དུས་ཐམས་ཅད་ཁྱབ་པའི་རང་བཞིན་གྱིས་ངེས་པ་དང་རྗེས་སུ་མཐུན་པར་འཇུག་པ་ལ་སོགས་པར་ཐལ་བའི་ཕྱིར་རོ། །རྣམ་པར་རྟོག་པ་ཉིད་ཀྱིས་ངེས་པའི་རང་བཞིན་ནི་དེ་སྣང་བར་ཡང་ཁས་
བླང་བར་བྱ་བ་ཡིན་ཏེ། དེ་ལྟ་མ་ཡིན་ན་ངོ་ཤེས་པའི་ཐ་སྙད་ཉམས་པར་ཐལ་བའི་ཕྱིར་རོ། །གལ་ཏེ་བསལ་བའི་རང་བཞིན་ཡང་ཡིན་ལ་རྣམ་པར་རྟོག་པ་ཡང་ཡིན་པར་ཇི་ལྟར་འགྱུར་ཞེ་ན། འདི་ཡང་འདི་ཉིད་ཀྱི་ཉེས་པ་གཞན་ཡིན་ནོ། །འོན་ཏེ་གནས་སྐབས་ཙམ་དུས་གསུམ་པ་ཉིད་ཡིན་པར་ངེས་ཀྱི། གནས་སྐབས་ནི་མ་ཡིན་ཏེ། དེས་ན་འཇུག་པ་དང་ལྡོག་པ་གནས་སྐབས་དང་འབྲེལ་བ་ཡོད་པ་མ་ཡིན་ནོ་ཞེ་ན་གནས་སྐབས་ཅན་དེའང་དོན་བྱ་བར་འགའ་ཞིག་ལ་ཉེ་བར་མཁོ་བའང་མ་ཡིན། རེ་ཞིག་མ་མཁོ་བ་ཡིན་ན་ནི། གལ་ཏེ་གནས་སྐབས་དག་ལས་ཐ་དད་པར་མི་སྣང་བའི་ཤེས་པ་ཙམ་ལ་བརྗོད་ན། པའི་རྭའི་ཤས་པ་ཉེས་པ་ཅི་བྱས། འོན་ཏེ་འགའ་ཞིག་ཏུ་ཉེ་བར་མཁོ་བར་ཁས་ལེན་ན། དེ་ཡང་མི་འཐད་དེ་གནས་ལས་ཐ་དད་པའི་རང་བཞིན་དུ་མི་སྣང་བ་ནི་མངོན་སུམ་དང་མི་དམིགས་པའི་སྒྲུབ་པར་བྱེད་པ་ཅན་གྱི་ཉེ་བར་མཁོ་བ་ཅན་དུ་ཇི་ལྟར་བརྗོད་པར་ནུས། དེ་ལྟ་ན་ནི་མཐའ་ཡས་པའི་དངོས་པོ་རྟག་པར་ཡང་ཐལ་ལོ། །དེའི་ཕྱིར་གནས་སྐབས་ལས་ཐ་དད་པ་ནི་སྣང་བ་མ་ཡིན་ལ། དོན་བྱ་བ་དང་ལྡན་པ་ཡང་མ་ཡིན་ཏེ། དེས་ན་རུས་སྦལ་གྱི་སྤུ་དང་ཁྱད་པར་མེད་དོ། །དེའི་ཕྱིར་རྣམ་པར་འཆད་པའི་རང་བཞིན་ཅན་གནས་སྐབས་ཉིད་དུ་ཤེས་པས་གཅིག་ཏུ་བྱེད་པ་ཡིན་པའི་ཕྱིར་དེ་ཙམ་གྱིས་འཁྲུལ་པ་ཉིད་ཡིན་ནོ། །འདས་པ་དང་མ་འོངས་པ་དེ་དག་ངེས་པར་བྱ་བར་འགྱུར་རོ་ཞེས་བྱ་བ་འདི་ལ་ནི་ལན་གྱི་སྐད་ཙམ་ཡང་ག་ལ་ཡོད། འདིས་ནི་གང་རྟགས་ལས་མ་སྐྱེས་པའི་རྣམ་པར་བརྟེན་པའི་ཤེས་པ་དེ་ཐམས་ཅད་ནི་ཚད་མ་མ་ཡིན་ཏེ། དཔེར་ན་ཡིད་ཀྱིར་གྱལ་སྲིད་ཀྱི་རྣམ་པར་རྟོག་པ་བཞིན་ནོ། །ངོ་ཤེས་པ་ཡང་རྟགས་ལས་མ་སྐྱེས་པའི་རྣམ་པར་རྟོག་པ་ཡིན་ནོ་ཞེས་བྱ་བ་འདི་འགལ་བས་ཁྱབ་པ་དམིགས་པའོ། །བཟློག་པ་ཚད་མ་ལ་ནི་ཁྱབ་པར་བྱེད་པ། དྲན་པ་རང་རྒྱུད་པའི་མཚན་ཉིད་མེད་པས་ན་གཏན་ཚིགས་རྟགས་ལས་མ་སྐྱེས་པའི་རྣམ་པར་རྟོག་པ་ལ་གནོད་པར་བྱེད་པ་ཡིན་པའི་ཕྱིར་རྟགས་ལས་མ་སྐྱེས་པའི་རྣམ་པར་རྟོག་པ་ཉིད་ཚད་མ་མ་ཡིན་པ་ཉིད་ལ་གནས་པས་དེ་ཁྱབ་པ་ཡིན་ནོ། །དེའི་ཕྱིར་ངོ་ཤེས་པ་ནི་ཚད་མ་མ་ཡིན་ནོ་ཞེས་གནས་སོ། །གལ་ཏེ་མངོན་སུམ་གཉིས་ཀྱི་སྔ་མ་དང་ཕྱི་མ་གཅིག་ཉིད་མ་བཟུང་བ་དེ་ལྟ་ན་ཡང༌། འཛིན་པར་བྱེད་པ་དག་ཡོད་དོ་ཞེ་ན་གལ་ཏེ་ཞེས་གསུངས་
སོ། །གཅིག་ཅེས་བྱ་བ་ནི་སྔར་དང་ཕྱིས་ཀྱི་དུས་དག་ཏུའོ། །ཤེས་པ་བཞིན་དུ་དུས་གཞན་མ་ཁྱབ་པ་མ་ཡིན་ནོ་ཞེས་བྱ་བའི་དོན་ཏོ། །དེས་ཀྱང་ཞེས་བྱ་བ་ནི་བདག་གིས་སོ། །རེ་ཞིག་གང་གི་ལྟར་ན་བདག་མེད་བེམས་པོ་ཡིན་པ་དེའི་ལྟར་ན་ནི། ཇི་ལྟར་བློ་དང་དུ་བ་ལས་རྟོགས་པ་ཡིན་པ་དེ་བཞིན་དུ། མངོན་སུམ་ལ་སོགས་པའི་ཡུལ་མ་ཡིན་པ་ལ་མ་རྟོགས་པ་ཡང་ཡིན་ནོ། །དེས་ན་རིགས་བརྗོད་པ་ནི་དེ་ཡང༌། མངོན་སུམ་ལ་སོགས་པ་ཡི་དང༌། །ཞེས་བྱ་བའོ། །སེམས་ཀྱི་རང་བཞིན་ཉིད་ལ་ནི། །མངོན་སུམ་ལ་སོགས་པའི་རང་བཞིན་ཡིན་ཡང༌། ཇི་ཞིག་ལྟར་ཐ་དད་པར་ཡང་ཁས་བླངས་པའི་ཕྱིར་ན་མི་རིགས་པར་བརྗོད་པ་མ་ཡིན་ནོ། །མངོན་སུམ་ལ་སོགས་པའི་འཇུག་པ་ཡང་དཔྱད་ཟིན་ཏོ། །དེས་བདག་ཉེ་བར་བཀོད་པས་ཅི་ཞིག་བྱ། འོན་ཏེ་ཡང་འགའ་ཞིག་ལ་བརྟེན་པའི་ཤེས་པ་ནི་བྱེད་པ་ཉིད་དུ་གྱུར་པས་ཚད་མ་ཡིན་ཏེ། བྱེད་པ་པོ་རྟེན་གྱི་གཞན་གྱི་དབང་ཡིན་པའི་ཕྱིར་རོ། །དེ་མེད་ན་དེ་གང་གི་བྱེད་པ་ཡིན་ཏེ། དེ་ནི་ངོ་བོ་ཞེས་བྱ་བའི་ངོ་བོ་ཤེས་པ་ཡལ་བར་དོར་ན་ནི་བདག་ཡོད་པ་ཉིད་དུ་མི་འགྱུར་རོ། །དེས་ན་རྣམ་པ་ཐམས་ཅད་དུ་ངོ་ཤེས་པ་ལ་བརྙས་པར་ཇི་ལྟར་བྱེད་སྙམ་དུ་དོགས་པ་བསུ་ནས་བདག་ལ་བརྟེན་པ་ཉིད་དུ་ཚད་མ་རྗེས་སུ་འགྲོ་བ་དང༌། ལྡོག་པ་མེད་པར་སྟོན་པར་བྱེད་པ་ནི་བདག་ལ་བརྟེན་པ་ཙམ་གྱིས་ནི་ཞེས་བྱ་བའོ། །བདག་ལ་བརྟེན་པར་ཤེས་པ་ཙམ་གྱིས་ཞེས་བྱ་བར་ལྟའོ། །དེ་ལྟ་ན་ཡང་ཤེས་པ་བདག་ལ་བརྟེན་པ་ཡིན་ནོ། །ཚད་མ་གོ་ག་ལས་ངེས་ན་ཚད་མའི་ཐ་སྙད་ནི་མི་སླུ་བ་ལ་ལྟོས་པ་ཉིད་དོ། །ཤེས་པ་མི་སླུ་བ་ཡིན་པར་གྲུབ་ཀྱང་གལ་ཏེ་འདི་བདག་ལ་བརྟེན་ན་ཚད་མར་འགྱུར་གྱི། དེ་ལྟ་མ་ཡིན་ན་ནི་མི་འགྱུར་རོ་ཞེས་བྱ་བ་འདི་ནི་རྟོགས་པ་དང་ལྡན་པ་སུམ་ཀྱང་བཟོད་པ་མ་ཡིན་ནོ། །དེ་ཉིད་སྟོན་པར་བྱེད་པ་ནི་མཐོང་བས་ཕྱིས་ནས་ཞེས་བྱ་བའོ། །བྱེད་པ་པོ་དང་ལས་སུ་བརྗོད་པར་འདོད་པ་ཙམ་ནི་བདག་གིས་སྒྲུབ་པར་བྱེད་པ་མ་ཡིན་ཏེ། དེས་ནི་དངོས་པོ་ཇི་ལྟ་བ་བཞིན་ཡིན་པར་མ་ངེས་པའི་ཕྱིར་རོ། །ཕུང་པོའི་ཚོགས་བྱེད་པ་པོར་བརྗོད་པ་དང༌། དེའི་ཕྱོགས་གཅིག་ཤེས་པར་བྱེད་པར་བརྗོད་པས་འདོད་པ་ཡོད་པའི་ཕྱིར་ན་གཞན་གྱིས་ཅི་བྱ། ཤེས་པ་ཉིད་ནི་བྱེད་པ་པོ་ཡིན་ལ། འདྲ་བ་ནི་བྱེད་པ་ཡིན་ནོ་ཞེས་ཀྱང་འཆད་པར་འགྱུར་རོ། །བདག་མེད་པ་ནི་ཞེས་
བྱ་བ་ནི་གཞན་གྱིའོ། །བདག་ནི་ཡིད་དང་སྦྱོར་བར་བྱེད་ལ་ཡིད་ལ་ཡིད་ཀྱང་དབང་པོ་ཞེས་བྱ་བ་ལ་སོགས་པར་དུས་ལ་ལྡོག་པ་ལ་ལྟོས་པ་དང་བཅས་པའི་དངོས་པོ་ཤེས་པ་ནི་བདག་རྟག་པ་མེད་པར་མི་འགྱུར་རོ་སྙམ་དུ་བསམས་པའོ་ཞེས་བྱ་བ་ནི་ཐེ་ཚོམ་དང་ཕྱིན་ཅི་ལོག་ཚོགས་སོ། །འདི་ནི་སྔར་བསྟན་པ་ད་ལྟར་བཤད་པ་ཡིན་ནོ། །མི་སླུ་བ་ལ་ལྟོས་ན་བདག་ལ་བརྟེན་པས་ཅི་ཞིག་བྱ་སྟེ། ཤེས་པ་མི་རྟག་པ་ཡང་མི་སླུ་བ་དང་ལྡན་པར་དེ་མ་ཐག་པ་ལ་སོགས་པའི་སྟོབས་ཀྱིས་སྐྱེས་པ་མི་འགལ་བའི་ཕྱིར་རོ། །དེས་ན་མངོན་སུམ་དང་རྗེས་སུ་དཔག་པ་དག་ཁོ་ན་བདག་ཡོད་པ་དེར་ཡང་མི་སླུ་བ་དང་ལྡན་པའི་ཚད་མ་མ་ཡིན་ནོ། །དེ་ནི་སྲིད་པར་ཡང་མི་འཐད་དོ་ཞེས་གསུངས་པ་ནི་སྔ་མ་ཕྱི་མའི་ཞེས་བྱ་བ་ནི། འདི་གང་གི་ཞར་ལས་འཕྲོས་པ་དེ་ཉིད་མཇུག་སྡུད་པ་ནི། དེས་ན་ཤེས་པ་ཞེས་བྱ་བའོ། །ཤེས་པ་ནི་རྒྱུ་དོན་གྱི་འབྲས་བུ་ཡིན་ནོ་ཞེས་བྱ་བར་མི་རྟོགས་སོ་ཞེས་བྱ་བའི་དོན་ཏོ། །གལ་ཏེ་རེ་ཞིག་འགའ་ཞིག་རྟོགས་པ་ཡིན་ཏེ། དེས་ན་འབྲས་བུ་ཉིད་དུ་རྟོགས་པས་ཀྱང་ཉེས་པ་ཅི་ཞིག་བྱས་ཤེ་ན། ཤེས་པ་ཞེས་གསུངས་སོ། །བདག་དང་དེའི་རིག་པར་བྱ་བ་བདུན་དུ་སྣང་བ་རིག་པ་ཡིན་ནོ། །དེ་ཁོ་ན་རིག་པ་ཡིན་ཞེས་རྣམ་པར་བཅད་པར་བྱ་བར་བརྗོད་པ་ནི་སྔ་ཕྱིའི་བདག་ཉིད་ཅེས་གསུངས་སོ། །སྔ་མ་དང་ཕྱི་མའི་རང་བཞིན་རྒྱུ་དང་འབྲས་བུ་ཉིད་ལ་ནི་མངོན་སུམ་འཇུག་པ་མ་ཡིན་ནོ། །མངོན་སུམ་ཅན་འཇུག་པ་འགོག་པ་ལ་གླགས་ཡོད་པར་མཐོང་ནས་གཞན་དག་སྨྲ་བ་ནི་འོ་ན་ཞེས་བྱ་བའོ། །འབྲས་བུ་ནི་མངོན་སུམ་གྱིས་རྟོགས་ལ། དེ་ལས་སྔར་རྒྱུ་ཉིད་པར་ནི་རྗེས་སུ་དཔག་པས་དཔོག་པ་ཡིན་ཏེ། དེས་ན་སྔ་མ་དང་ཕྱི་མ་རིག་པར་མེད་པ་མ་ཡིན་ནོ། །དེ་ལས་ཞེས་བྱ་བ་ནི་རྗེས་སུ་དཔག་པས་རྟོགས་པ་ལས་སོ། །ལན་ནི་རྗེས་སུ་དཔག་པ་དེ་ཡང་ཞེས་བྱ་བའོ། །རྗེས་སུ་དཔག་པ་དེ་ཡང་འཇུག་པ་ཡོད་པ་མ་ཡིན་ནོ་ཞེས་འབྲེལ་ཏོ། །གང་ལ་ཞེ་ན་བསྒྲུབ་པར་བྱ་བ་མངོན་སུམ་གྱིས་རབ་ཏུ་རྟོགས་པ་མེད་པའི་དངོས་པོ་ལའོ། །ཁྱབ་པ་ཉིད་མ་གྲུབ་པའི་ཕྱིར་རོ་ཞེས་བྱ་བའི་དོན་ཏོ། །རྗེས་སུ་དཔག་པ་གཞན་གྱི་ཁྱབ་པ་འཛིན་པར་འགྱུར་རོ་ཞེ་ན། སྔོན་རོལ་མངོན་སུམ་ཞེས་གསུངས་སོ། །མངོན་སུམ་འདི་ནི་བདག་གི་འབྲས་བུར་མངོན་པར་འདོད་པ་དང༌། ལྷན་ཅིག་གསལ་བ་མདུན་ན་གནས་པའི་དོན་འཛིན་པར་བྱེད་
ལ། རྒྱུར་མངོན་པར་འདོད་པའི་དངོས་པོ་སྔ་མ་ལ་ནི་མངོན་སུམ་སྔ་མ་ཚད་མ་ཡིན་ནོ། །གང་གི་ཚེ་སྔ་མ་དང་ཕྱི་མ་ཉིད་ལ་མངོན་སུམ་ཚད་མ་མ་ཡིན་པ་དེའི་ཚེ་ནི་རྗེས་སུ་དཔག་པ་གཞན་ཡང་ཡོད་པ་མ་ཡིན་ཏེ། དེ་ནི་ཁྱབ་པ་འཛིན་པ་ལ་ལྟོས་པའི་ཕྱིར་རོ། །འདི་ལ་ཡང་སྔར་རྗེས་སུ་དཔག་པ་གཞན་ཡོད་པ་མ་ཡིན་ནོ་ཞེས་རྟོགས་པར་བྱེད་ན་ཐུག་པ་མེད་པར་འགྱུར་རོ། །དེ་ལྟར་ཤེས་པ་དང་ཤེས་བྱ་དག་རྒྱུ་དང་འབྲས་བུ་ཉིད་ཡིན་པའི་ཕྱོགས་བསལ་བ་ཡིན་ནོ། །ཤེས་བྱ་ཉིད་ཤས་པའི་འབྲས་བུ་ཡིན་པའི་ཕྱོགས་ལ་ནི། གལ་ཏེ་ཤེས་པའི་འབྲས་བུས་ཡོད་པ་མིན་ན་ནི་དེའི་ཚེ་ཉེས་པ་འདི་ཉིད་ཡིན་ནོ།། འོན་ཏེ་དོན་གཞན་གྱིས་ཡིན་ན་དེའི་ཚེ་ཡང༌། འབྲས་བུ་གཞན་སྐྱེས་མེད་པར་ནི། །འབྲས་བུའང་ཡོད་པན་ཡིད་མི་འགྱུར། །ཞེས་བྱ་བ་ཉིད་རིགས་པ་ཡིན་ནོ། །ཕལ་ཆེར་དེ་ལྟར་སྨྲ་བ་ནི་མེད་དེ་དེས་ན་ཕྱོགས་འདི་ནི་དངོས་སུ་མ་བསྟན་པར་ཡང་རྣམ་པར་རྟོག་པ་དེ་ཉིད་ལ་ཐབས་ཅིག་གིས་བསལ་བར་འདོད་ནས་འབྲས་བུ་སོགས་གཞལ་བྱ་ཞེས་གསུངས་སོ། །ཕལ་ཆེར་འཇིག་རྟེན་གྱི་གྲགས་པས་ཕྱི་རོལ་གྱི་དངོས་པོའི་རྒྱུ་དང་འབྲས་བུ་དངོས་སེམས་པ་ཡིན་ནོ། །དེ་ནི་སྒྲུབ་པ་མ་ཡིན་ནོ་ཞེས་དགོངས་པའོ། །འབྲས་སོགས་ཞེས་བྱ་བ་ནི་ཆོས་ཀྱི་རང་བཞིན་ནོ། །ཕྱི་རོལ་གྱི་ཆོས་ཅན་གང་ལ་འབྲས་བུ་ཉིད་ལ་སོགས་པའི་གཞལ་བྱ་དེ་ཡོད་པའོ། །ཕྱི་རོལ་དེ་ནི་རྟོགས་པ་མེད་པའོ། །དེ་ནི་མ་རྟོགས་མོད་དེ་ལྟ་ན་ཡང་འབྲས་བུ་ཉིད་ལ་སོགས་པའི་གཞལ་བྱ་ལ་ཆད་པ་ཅི་ཡོད་སྙམ་ན་གཞི་མེད་ཅེས་གསུངས་སོ། །ཆོས་ཀྱི་གཞི་ནི་ཕྱི་རོལ་གྱི་དངོས་པོ་ཉིད་ཡིན་ཏེ། དེ་མེད་པའི་ཕྱིར་དེ་ཡང་འབང་མི་དགོས་པར་མེད་པར་གྲུབ་བོ། །ཆོས་ཅན་མ་རྟོགས་པར་ནི་ཆོས་རྟོགས་པར་མི་འཐད་དོ་ཞེས་བྱ་བའི་དོན་ཏོ། །ཇི་ལྟར་ཕྱི་རོལ་གྱི་དངོས་པོ་མ་གྲུབ་སྙམ་ན། ཤེས་པ་ཞེས་སྨོས་ཏེ། གང་གི་ཚེ་ཞེས་བྱ་བ་ནི་གཏན་ཚིགས་ཏེ། དམིགས་པ་དང་བཅས་པ་ལ་མ་ཡིན་པའི་ཕྱིར་རོ་ཞེས་བྱ་བར་ལྟའོ། །དེ་ཉིད་ཀྱི་ཕྱིར་དམིགས་པ་དང་བཅས་པ་ཉིད་དུ་ཇི་ལྟར་མ་གྲུབ་ཅེ་ན་ཞེས་དྲིས་པ་ཡིན་ནོ། །དེར་འགྱུར་ཞེས་བྱ་བ་ནི་དམིགས་པ་དང་བཅས་པར་འགྱུར་རོ། །མིག་ལ་སོགས་པའི་བློ་དམིགས་པ་རྒྱུ་ཉིད་ཡིན་ན་ཐལ་བ་ཅི་ཡོད་ཅེ་ན། གང་ཞིག་ཅེས་བྱ་བའོ། །དམིགས་པ་མེད་པར་གནས་པར་འགྱུར་བ་ཡང་ཡིན་ནོ་ཞེས་བཟློག་པ་རྟོགས་པར་བྱའོ། །
ཡང་གང་གིས་བཟློག་པ་རྟོགས་པར་བྱ་བ་ཡང་འགྲུབ་པར་འགྱུར་བ་མིག་ལ་སོགས་པའི་བློ་དམིགས་པ་མེད་པ་གང་དུ་མཐོང་ཞེ་ན། །ཟླ་གཉིས་རྣམ་ཅན་ཞེས་བྱ་བའོ། །གང་གི་སྐྱེད་པས་འདི་དམིགས་པར་འགྱུར་བ་ཟླ་བ་གཉིས་ཞེས་བྱ་བའི་དངོས་པོ་འདི་འགའ་ཡང་ཡོད་པ་མ་ཡིན་ནོ། །རེ་ཞིག་ཟླ་བ་གཅིག་ནི་ཡོད་ཅེ་ན་དེས་ཅིར་འགྱུར། ཟླ་བ་གཉིས་ཀྱི་ཤེས་པ་འདི་ནི་དེ་ལ་དམིགས་པ་མ་ཡིན་ནོ། །ཅིའི་ཕྱིར་དེ་ལ་དམིགས་པར་མི་འགྱུར་ཞེ་ན་དེ་ལྟར་ལྷག་པར་ཞེན་པ་མེད་པའི་ཕྱིར་རོ། །ལྷག་པར་ཞེན་པ་ཉིད་ཀྱི་ཉེས་པ་ཡིན་ནོ་ཞེས་བྱ་བ་ཡང་ལན་མ་ཡིན་ཏེ། དེའི་རྣམ་པ་ཅན་མ་ཡིན་པའི་ཕྱིར། གལ་ཏེ་རྣམ་པ་འདི་ཉིད་ནི་ཟླ་བ་བརྒྱའི་ཡང་ཡིན་ལ་ཟླ་བ་གཉིས་ཀྱི་ལྟ་ཅི་སྨོས་ཤེ་ན། ཟླ་བ་དུ་མ་ཡང་རྣམ་པ་མཚུངས་པ་ཡིན་མོད། འོན་ཀྱང་གཅིག་པོ་དེ་ལ་དུ་མའི་རྣམ་པ་ཅན་གྱི་ཤེས་པ་འཛིན་པར་བྱེད་པ་ཇི་ལྟར་ཡིན་ཏེ། རང་བཞིན་འདྲ་བམ་ཡིན་པའི་ཕྱིར་རོ་ཞེས་བརྗོད་དོ། །དེ་ལྟ་མ་ཡིན་ན་འདི་ཡང་དག་པའི་ཤེས་པ་ཁོ་ནར་འགྱུར་རོ། །གལ་ཏེ་ཟླ་བ་ཉིད་སྐྱེ་བར་བྱེད་པ་ཡིན་ལ། ཟླ་བ་ཉིད་དུ་སྣང་བ་ཡང་ཡིན་པའི་ཕྱི་རྗི་ལྟར་མི་འདྲ་ལྷག་པར་མི་འཛིན་པས་མི་འཁྲུལ་པར་འགྱུར་བ་མ་ཡིན་ནོ་ཞེ་ན། དངོས་པོ་གཞན་དང་ལྡན་པའི་དངོས་པོ་རང་གི་རང་བཞིན་དུ་རྟོགས་པ་ཡིན་ན་ནི་ལྷག་པར་འཛིན་པས་འཁྲུལ་བར་མི་འགྱུར་ཏེ་དབྱིག་པ་ཅན་ནོ་ཞེས་བྱ་བར་རིགས་ཀྱི། མེད་པའི་རང་བཞིན་གྱིས་དངོས་པོ་འགའ་ཞིག་བཟུང་ན་ནི་མ་བཟུང་བ་ཁོ་ནར་འགྱུར་རོ། །དེས་ན་ཤེས་པ་དེ་ནི་དོན་དང་ལྡན་པར་སུས་ཀྱང་སྒྲུབ་པར་མི་ནུས་སོ། །རྟ་ལ་རྭ་ཅན་དུ་འཛིན་པ་བཞིན་ནོ། །ལྡན་པ་ཅན་གྱི་རྭ་ཐ་དད་པར་བཟུང་ན་ནི་ཁྱད་པར་ངེས་པར་མ་བཟུང་ན་ནི་ཁྱད་བར་ངེས་པར་མ་ཟིན་ཡང་རྟ་མཐོང་བ་འཁྲུལ་པར་མི་གཞག་གོ །དེ་བཞིན་དུ་ཡལ་ག་དང་ལོ་མ་ལ་སོགས་པའི་དབྱིབས་རྟོག་པ་ལ་རྡུལ་ཐ་དད་པ་རྟོགས་པ་ན་རང་བཞིན་གྱིས་ཁྱད་པར་ངེས་པར་མ་རྟོགས་ཀྱང་འཁྲུལ་པ་མ་ཡིན་གྱི། རྒྱུད་རིང་པོར་གོང་བུའི་རྣམ་པར་རྟོག་པ་ནི་འཁྲུལ་པ་ཁོ་ན་ཡིན་ནོ། །དེ་བཞིན་དུ་མེད་པ་ཐ་དད་པར་ཟླ་བ་རྟོགས་པ་ནི་དམིགས་པ་མེད་པ་ཁོ་ན་སྟེ། གཅིག་དང་མི་འདྲ་བའི་ཕྱིར་དང་གཉིས་ནི་མེད་པས་སྐྱེད་བྱེད་མ་ཡིན་པའི་ཕྱིར་རོ། །འདིར་གཞན་དག་གི་དོགས་པ་བསུ་བ་ནི་ཅི་སྟེ་རྒྱུ་ཉིད་ཀྱིས་ཞེས་བྱ་བའོ། །གལ་ཏེ་རྒྱུ་ཉིད་ཀྱིས་དམིགས་པར་བརྗོད་ན་དེའི་ཚེ་དེ་ལྟ་བུའི་རྒྱུ་མེད་པར་ཡང་འབྲས་བུའི་ཤེས་པ་ནི་
དམིགས་པ་མེད་པར་འགྱུར་གྱི། འོན་ཀྱང་ཕྱི་རོལ་གྱི་དངོས་པོ་ནི་བཟུང་བ་ཉིད་ཀྱིས་དམིགས་པ་ཡིན་ནོ་ཞེས་བྱ་བར་བསམས་པའོ། །ལམ་གྱི་དོན་ནི་འདི་ཡིན་ཏེ། དེས་སྐྱེད་པ་ཉིད་འཕངས་པའི་བཟུང་བའི་དོན་སྣང་བ་ཙམ་མིན་ནམ། མདུན་དུ་གསལ་བར་སྣང་བ་ཡིན་ཏེ། གཉི་ག་ནི་འཁྲུལ་པ་ཁ་ཡང་ཡོད་པ་ཡིན་ནོ། །དོན་ཞེས་བྱ་བ་ལ་སོགས་པ་ལ་དོན་བྱ་བ་སྔོན་པོ་ལ་སོགས་པ་མྱོང་བ་ལས་གཞན་དོན་གྱི་བདག་ཉིད་དུ་འདོད་དམ་ཞེས་བྱ་བ་ནི་རྣམ་པར་རྟོག་པ་གཅིག་གོ །འོན་ཏེ་མྱོང་བ་ཞེས་བྱ་བའི་རྣམ་པར་རྟོག་པ་རྣམ་པ་གཉིས་སུ་བྱེད་དེ་རིགས་མཚུངས་པའི་མྱོང་བ་དེ་ཉིད་དམ་མིན་ཞེས་བྱ་བར་རིགས་མི་མཐུན་པ་གཞན་ཡིན། ཕྱོགས་དང་པོ་ལ་སུན་འབྱེན་པ་ནི་མེད་པས་དེ་དོན་གཞན་དུ་གྱུར་པའི་ཁྱབ་པ་དང་བྲལ་བའི་ཕྱིར་རོ། །དོན་མེད་པར་འགྱུར་བར་མི་རིགས་སོ། །དེ་མེད་པས་ན་དེ་མེད་མིན། །ཞེས་ཇི་ལྟར་བརྗོད་དོ། །གང་གི་ཕྱིར་འབྲས་བུ་མེད་པར་ནི་རྒྱུ་ཞེས་བྱ་བར་མི་འགྱུར་རོ་ཞེ་ན་ད་ལྟར་ཡང་ཕྱོགས་གཉིས་ཏེ། འབྲས་བུ་མེད་ན་རྒྱུར་འདོད་པའི་རང་བཞིན་ཉམས་པའམ། རྒྱུའི་ཐ་སྙད་གཉིས་པའི་རྒྱུ་དེ་བྱེད་པའི་ནུས་པ་དང་བྲལ་བ་ཡིན། དེ་ལ་ཕྱོགས་དང་པོ་ལ་བརྟེན་ནས་བཤད་པ་ནི་འབྲས་བུ་ཞེས་བྱ་བའོ། །རང་གི་ངོ་བོས་གྲུབ་ཅིང་རྟོགས་འགྱུར་བ་ནི་གཞན་མེད་པས་མེད་པ་ཞེས་བྱ་བ་ནི་བབ་ཅོལ་ཡིན་ནོ། །གཞན་མེད་ན་ནི་འབྲས་བུའོ། །གཞན་མེད་པར་ནི་རྒྱུའོ། །ཧ་ཅང་ཐལ་བར་འགྱུར་བའི་ཕྱིར་རོ་ཞེས་བྱ་བ་ནི་བུམ་པ་མེད་པར་ཡང་སྣམ་བུ་མེད་པར་འགྱུར་བའོ། །རྣམ་པར་རྟོག་པ་གཉིས་པའི་དབང་དུ་བྱས་ཏེ་གྲུབ་པ་གསུངས་པའོ། །གལ་ཏེ་འབྲས་བུ་ཞེས་བྱ་བའོ། །འོན་གལ་ཏེ་ནུས་པ་མེད་ཀྱང་རང་གི་ངོ་བོ་མེད་པ་མ་ཡིན་ན། ནུས་པ་ཉིད་དོན་གྱི་རང་བཞིན་དུ་ཇི་ལྟར་བརྗོད་དེ། དེས་ན་འགལ་ལོ་ཞེ་ན། མི་འགལ་ཏེ་དེ་ཉིད་ཅི་ཙམ་གྱི་མཐར་ཐུག་པ་ཡིན་ཞེས་བྱ་དཔྱོད་པར་རྩོམ་པའི་ཕྱིར་རོ། །དེ་ཡང་ཕྱིས་འཆད་པར་འགྱུར་རོ། །ཡང་ན་ཕྱི་རོལ་དུ་སྨྲ་བ་ལ་ནུས་པ་ཉིད་ཡོད་པ་ཡིན་ཏེ་ཞེས་རྣམ་པར་འཇོག་པ་ཡིན་ཏེ། བེམས་པོ་མངོན་པར་རློན་པ་ཙམ་དུ་ཡོད་པ་ནི་བསལ་བ་མེད་པས་ན། གལ་ཏེ་དོན་བྱ་བར་ནུས་པ་མེད་པ་ཡིན་ན། སྐྲ་ལ་སོགས་པར་སྣང་བ་དང་ཁྱད་པར་མེད་པའི་ཕྱིར་རོ། །གང་དུ་ཕྱི་རོལ་གནས་པར་འགྱུར། །དེའི་ཕྱིར་ཕྱི་རོལ་ལ་ལྟོས་ནས་ནི་ནུས་པ་
ཡོད་པར་བརྗོད་པ་ཡིན། དེ་ནི་རྣམ་པར་ཤེས་པ་ལ་ཡང་ཡོད་པས་ཁོ་བོ་ཅག་གི་རྙེད་པ་ཁོ་ན་ཡིན་ནོ། །དེས་ན་གལ་ཏེ་ཤེས་པ་ནི་བསལ་བ་ཉིད་ལས་ཡོད་པར་བསྙོན་དུ་མེད་པ་ཡིན་མོད་ཀྱི། །དེ་ལྟ་ན་ཡང་དོན་གྱིས་ནུས་པ་ཡང་ཡོད་པ་ཡིན་ཏེ་དེས་ཁྱབ་པར་ན་སྐད་ཅིག་མ་དང་སྡུག་བསྔལ་བ་ལ་སོགས་པར་གྲུབ་པས་ཡོན་ཏན་ཉིད་ཡིན་ནོ། །རྒྱུ་དང་འབྲས་བུའི་དངོས་པོ་གསལ་བ་ལ་སྐད་ཅིག་མ་ཉིང་ཇི་ལྟར་འགྲུབ་པ་དེ་ནི་ཕྱིས་འཆད་པར་འགྱུར་རོ། །འདིས་ནི་ཕྱོགས་དང་པོ་བསལ་ནས་གཉིས་པའི་རྣམ་པར་རྟོག་པ་གཉིས་སློང་བ་ནི་ཅི་སྟེ་ཞེས་བྱ་བའོ། །རབ་རིབ་ལ་སོགས་པའི་ཤེས་པ་ནི་དེ་རབ་ཏུ་མ་ཞི་བའི་བར་དུ་རྒྱུན་དུ་འཇུག་པ་ཁོ་ནའོ། །རྨི་ལམ་གྱི་ཤེས་པ་རྒྱུན་ཅུང་ཟད་འཇུག་པ་ཡིན་གྱི་སྐད་ཅིག་གཅིག་ཉིད་འབྱུང་བ་ནི་མ་ཡིན་ནོ། །རྒྱུན་ཅུང་ཟད་འཇུག་པ་ནི་ཡོད་པ་མ་ཡིན་པ་ཉིད་དོ་ཞེས་ཀྱང་ངེས་པར་བྱ་མི་ནུས་ཏེ། གློག་གི་ཤེས་པ་བདེན་པའི་ཡུལ་ཅན་དུ་འདོད་པ་ཡང༌། རྨི་ལམ་གྱི་ཤེས་པའི་དུས་སུ་རྗེས་སུ་འབྲེལ་པ་ནི་མ་ཡིན་ནོ། །གློག་གི་ཐུན་མོང་ཡིན་ནོ་ཞེ་ན། རབ་རིབ་ཅན་གྱི་ཚོགས་ལ་ཟླ་བ་གཉིས་ཀྱང་ཐུན་མོང་ཁོ་ནའོ། །དེར་ནི་ཐུན་མོང་ལྷག་པར་ཞེན་པ་ཙམ་ཡིན་གྱི། ཤེས་པའི་རྣམ་པར་དངོས་པོ་ནི་ཐུན་མོང་མ་ཡིན་པ་ཁོ་ནའོ་ཞེ་ན། གཞན་དུ་དེ་ལྟ་མ་ཡིན་ནོ་ཞེས་བྱ་བ་ལ་ནི་རྟག་ཏུ་དངོས་པོ་ལ་རེག་པ་ཚད་མ་ཡིན་ནོ། །དེའི་ཕྱིར་དེའི་རིགས་ཅན་གྱི་ཤེས་པ་སྐྱེ་བ་དོན་དམ་པ་ཡིན་ནོ་ཞེས་བྱ་བ་དེ་ནི་མ་ཡིན་ནོ། །རྣམ་པར་རྟོག་པ་ཐ་མ་བརྗོད་པ་ནི། ཅི་སྟེ་རེག་པ་ལ་སོགས་པའི་ཤེས་པ་ཡིན་ནོ་ཞེ་ན་ཞེས་བྱ་བ་སྟེ་དོན་བྱ་ཞེས་འབྲེལ་ཏོ། །དེ་ཡང་མི་བདེན་ཏེ་ཞེས་བྱ་བ་ལ་སོགས་པ་ནི་སུན་འབྱིན་པ་སྟེ་གོ་བར་སླའོ། །དེ་འདི་སྙམ་དུ་རང་ཉིད་འོལ་མ་སེའི་ཕུང་པོར་ཐེ་ཚོམ་ཟ་བའི་མེ་ནི་དུ་བ་གཞན་མཐོང་བས་ཡོད་པར་ཇི་ལྟར་མི་འགྱུར་སྙམ་ན། གཟུགས་རང་ཉིད་མྱོང་བ་ཡང་ངོ་གཞན་མྱོང་བ་ལ་ནི་རེག་བྱ་མྱོང་བ་ལའོ། །མི་ལ་ནི་ཕྱིས་ཐེ་ཚོམ་ཟ་ན་མངོན་སུམ་ཉིད་དེ་དེས་ན་དེའི་དུ་བ་ལ་ལྟོས་པར་རིགས་ཀྱི་ཐེ་ཚོམ་མེད་ན་ནི་གལ་ཏེ་རང་མྱོང་བ་ཡང་ཡིད་ཆེས་པ་མེད་ན་གཞན་མྱོང་བ་ལ་སྨོས་སུ་ཅི་ཡོད་དེ། དུ་བ་བརྒྱ་མྱོང་ཡང་ངོ༌། །དེ་མྱོང་བ་ཁྱབ་པ་འཛིན་པ་ལ་མོས་པའི་ཕྱིར་རོ། །ཡང་ན་གལ་ཏེ་མངོན་སུམ་གྱི་མེ་ལ་ཡང་ཡིད་མི་ཆེས་ན་དུ་བ་ཡང་མངོན་སུམ་ཁོ་ན་ཡིན་པས་ཡིད་ཆེས་པ་ཁོ་ནའོ། །དེའི་ཕྱིར་རིགས་པ་མཚུངས་པ་ཉིད་ཀྱིས་རང་མྱོང་བ་
ལ་ཡང་ཡིད་ཆེས་ན། གཞན་གྱི་མྱོང་བ་ལ་ཡང་སྟེ་ཤེས་པ་ལ་སྨོས་སུ་ཅི་ཡོད། གཟུགས་སྣང་བ་ལ་ཐེ་ཚོམ་མི་ཟ་སྟེ་གྲུབ་པའི་ཕྱིར་རོ། །གཞན་ནི་མ་དམིགས་པ་སྤངས་པའི་ཕྱིར་རོ། །འོན་ཏེ་གཟུགས་ཀྱི་ཕྱི་མཐོང་བ་ལས་རེག་པ་དང་ལྷན་ཅིག་རྒྱུ་བ་དང་མི་རྒྱུ་བ་ཐེ་ཚོམ་གྱི་ཡུལ་ཡིན་ཞེ་ན། དེ་ལྟ་ན་ཡང་ཁྱད་པར་རྣམ་པར་གཞག་པ་རེག་པ་ལས་ཡིན་གྱི་གཟུགས་དེ་ཉིད་ཡོད་པར་ནི་མ་ཡིན་ནོ། །རེག་བྱ་དང་ལྷན་ཅིག་ཡོད་པའི་གཟུགས་འདི་ལ་གཟུགས་སུ་བརྗོད་དོ་ཞེ་ན། རེ་ཞིག་སྣང་བ་ནི་བསྙོན་པར་མི་ནུས་སོ། །གལ་ཏེ་གཟུགས་སོ་ཞེས་བྱ་བ་མི་བརྗོད་པ་དེ་ཙམ་གྱིས་དེ་དེ་ཉིད་ལ་ཉམས་པར་འགྱུར་རམ། དེ་ལྟ་མ་ཡིན་ན་ཤེས་པའི་རྣམ་པ་ཉིད་ལ་གཟུགས་སུ་བརྗོད་དོ་ཞེས་སྨྲ་བར་ནུས་སོ། །དེའི་ཕྱིར་རེག་པའི་ཤེས་པ་མེད་ཀྱང་གཟུགས་ལས་ཉམས་པ་མེད་དོ། །དེ་ལྷན་ཅིག་སྤྱོད་པའི་སྤྱི་ཡོད་པ་ནི་རེག་པའི་ཤེས་པ་ལས་འགྲུབ་པའམ། ཡང་ན་དེ་ལས་དེ་ཡང་ཡོད་པར་མི་འགྲུབ་པའོ། །ཅིའི་ཕྱིར་ཞེ་ན། དེ་མྱོང་ལ་ཡང་སྟེ་རེག་པ་མྱོང་བ་ལ་ཡང་མི་བདེན་པར་ཏེ། མི་བདེན་པའི་ཡུལ་ཅན་ཉིད་དུ་དོགས་པར་ཇི་ལྟར་མི་འགྱུར་ཏེ། རེག་པ་ཡོད་པས་རང་དང་ལྷན་ཅིག་སྤྱོད་པའི་གཟུགས་བདེན་པར་རྟོགས་པར་བྱ་བ་ཡིན་ན། རེག་པ་དེ་ཡང་ཡོད་པར་ད་རུང་མ་གྲུབ་པའི་ཕྱིར་གཞན་གྱི་སྒྲུབ་པར་བྱེད་པར་ཇི་ལྟར་འགྱུར། དེ་ཉིད་གསལ་བར་བྱེད་པ་ནི་ལུས་ཀྱི་ཞེས་བྱ་བ་ལ་སོགས་པའོ། །ཡང་ན་རེག་པ་དེ་མྱོང་བ་ལ་ཡང་གཟུགས་མི་བདེན་པར་དོགས་པར་ཇི་ལྟར་འགྱུར་བ་མ་ཡིན་ཏེ། དོགས་པར་འགྱུར་བ་ཁོ་ནའོ། །རེག་པ་མྱོང་བ་བདེན་ན་ཡུལ་ཅན་དུ་མ་གྲུབ་པའི་ཕྱིར་རོ། །མིག་གི་ཡུལ་ལ་དོགས་པ་འདིར་འགྱུར་གྱི། རེག་པ་ལ་ནི་མ་ཡིན་ནོ་ཞེ་ན། ལུས་ཀྱི་མྱོང་བ་ཞེས་བྱ་བའོ། །གཞན་གྱིས་སྨྲས་པ། གལ་ཏེ་རེག་པ་མྱོང་བར་འགྱུར་བ་དེར་ནི་དེ་དོན་ཡིན་ནོ་ཞེས་ཚིམ་པའམ་ཡང་དོགས་པ་སྟེ་དེས་བྱས་པས་ཚིམ་པ་སྟེ། དེས་ན་ཁྱད་པར་ཡོད་དོ་ཞེ་ན། རྒོལ་བས་སྨྲས་པ་ནི་ཡོངས་སུ་ཚིམ་པ་དེ་ག་ལས་ཞེས་བྱ་བ་སྟེ། གཅིག་ཏུ་འགྱུར་བ་གཞན་ལ་ནི་མ་ཡིན་ནོ་ཞེས་བྱ་བ་ལས་ཡིན་ཏེ། མ་ཡིན་པ་ཁོ་ནའོ། །བྱིས་པ་བཞིན་དུ་མ་དཔྱད་པར་ཡོངས་སུ་ཚིམ་པ་ནི་འདིར་བརྗོད་པར་བྱ་བ་མ་ཡིན་ནོ། །རྣམ་པར་བརྗོད་པ་ལ་ནི་གཉི་ག་ཡང་དོན་དུ་སྣང་བར་མཚུངས་སོ། །དགོས་པའི་ཕྱོགས་ལ་ནི་ཡང་ཇི་ལྟར་མཐོང་བ་འགའ་
ཞིག་ལ་རེག་པའི་འབྲས་བུའི་མཐར་ཐུག་པ་མེད་པ་དེ་བཞིན་དུ་རེག་པ་འགའ་ཞིག་ལ་ཡང་མཐོང་བ་ཡོད་པ་མ་ཡིན་པའི་ཕྱིར་མཚུངས་སོ། །དབང་པོའི་སྒོ་ནས་ཁྱད་པར་ཡོད་པ་ཡིན་ནོ་ཞེས་རྣམ་པར་འགྲེལ་པ་བཤད་པ་ནི་ཇི་ལྟར་མིག་གི་རྣམ་པར་ཤེས་པ་ཞེས་བྱ་བའོ། །གལ་ཏེ་མིག་ལ་རབ་རིབ་ལ་སོགས་པ་ཡོད་པ་ལྟར་རེག་པར་བྱེད་པ་ལ་ནི་མ་ཡིན་ཏེ། དེས་ན་མཚུངས་པ་ཇི་ལྟར་རྟོགས་སྙམ་ན། རབ་རིབ་ལ་སོགས་པས་ཞེས་སོགས་པའི་སྒྲས་བསྡུས་པ་ཉིད་འཆད་པ་ནི་མཁྲིས་པའི་རིམས་ཀྱིས་ཞེས་བྱ་བའོ། །དེས་ན་མིག་དང་ལུས་ཀྱི་མྱོང་བ་གཉིས་ལ་ཁྱད་པར་ཅི་ཡང་མེད་དོ། །གལ་ཏེ་དོན་དེར་ཚིམ་ཞེ་ན་ཞེས་བྱ་བ་རྣམ་པར་འགྲེལ་པ་ནི་ཡོངས་སུ་ཚིམ་པའི་ཕྱིར་རོ་ཞེ་ན་ཞེས་བྱ་བ་སྟེ། ཁྱད་པར་ཡོད་དོ་ཞེས་བྱ་བ་བསམས་བའོ། །ལམ་གྱི་གྲང་བའི་དུས་སུ་ཞེས་བྱ་བའོ། །གཞན་ཡང་ཞེས་བྱ་བ་ནི་ཉེས་པ་གཞན་སོགས་པའོ། །གལ་ཏེ་ཞེས་བྱ་བ་ལ་སོགས་པས་ནི་རྣམ་པར་རྟོག་པ་དང་པོ་ལ་ནི་དོན་མེད་པ་ཉིད་བཤད་པའོ། །རྣམ་པར་རྟོག་པ་གཉིས་པ་ལ་ནི་ཕྱེད་ཕྱི་མས་བསྟན་པའི་ནུས་པ་མེད་པ་ཉིད་མྱོང་བས་གྲུབ་པ་གང་ཡིན་པ་ཞེས་བྱ་བ་ལ་སོགས་པའི་ཚིགས་སུ་བཅད་པས་བཅད་དོ། །འདིར་ཡང་གཞན་པའི་ཞེས་བྱ་བ་ལ་སོགས་པ་རྣམ་པར་འགྲེལ་པ་ནི་མྱོང་བ་ལས་ཐ་དད་ཡིན་པའི་ཕྱིར་ཞེས་བྱ་བ་ལ་སོགས་པ་ཡིན་ནོ། །ཡོངས་སུ་ཚབ་མྱོང་བའི་བདག་ཉིད་ཡིན་ན་ནི་ལྷག་པར་ཅུང་ཟད་ཀྱང་མ་བརྗོད་པར་འགྱུར་རོ། །དེས་ན་གཞན་གྱིས་ཡོངས་སུ་ཚིམ་པར་དེ་ལས་གཞན་ཁོ་ནར་ཁས་བླངས་དགོས་སོ། །དེ་ཡང་ཅི་ དགོས་དྲིས་པ ་ན་གཞན་གྱི་དོན་སྒྲུབ་པར་བྱེད་དོ་ཞེས་སྨྲས་ཏེ་ དགོས་སོ་ཞེས་འབྲེལ་ཏོ། །ལམ་དུ་ཇི་ལྟར་གཞན་གྱིས་གཞན་འགྲུབ་ཅེས་གསུངས་སོ། །ཇི་ལྟར་ཡོངས་སུ་ཚིམ་པ ་གཞན་དོན་གཞན་གྱི་གྲུབ་པའི་རང་བཞིན་ནམ་གྲུབ་པའི་རང་བཞིན་ཇི་ལྟར་འགྱུར། རིགས་པ་ནི་རང་ཉིད་གྲུབ་པའི་ངོ་བོ་ཉིད་ཡིན་ན་ཚད་མའི་འབྲས་བུ་རྣམ་པར་གནས་པའི་སྒྲུབ་པར་བྱེད་པ་ཡང་ཡིན་ནོ། །ཐ་དད་པ་མེད་པར་སྨྲ་བ་ལ་ནི་གཞལ་བྱ་ཡང་དེ་ཉིད་ཡིན་ནོ་སྙམ་དུ་དགོངས་པའོ། །འོ་ན་ཡོངས་སུ་ཚིམ་པ་ཡང་དངོས་པོ་མེད་ན་མི་འབྱུང་བས་དེའི་གྲུབ་པར་བྱེད་པར་འགྱུར་རོ། །འདི་ལྟར་རིགས་པ་ཡང་དངོས་པོ་དང་མེད་ན་མི་འབྱུང་བ་ཉིད་ཀྱིས་དེ་ལྟར་འགྱུར་བ་ཡིན་ནོ་སྙམ་དུ་དོགས་པ་ནི་འབྲེལ་པའི་ཕྱིར་རོ། །ལན་ནི་
འབྲེལ་པ་གང་གིས་འགྲུབ་ཅེས་བྱ་སྟེ། ཡོངས་སུ་ཚིམ་པའམ་རིགས་པ་ལས་ཡིན་ཞེས་བྱ་བར་བསམས་པའོ། །ཕྱོགས་དང་པོའི་དོགས་པ་བསུ་ནས་ཡོངས་སུ་ཚིམ་པ་དེའི་འབྲེལ་པ་གང་ཡོངས་སུ་ཚིམ་པ་གཞན་ལས་ཡིན་ནོ་ཞེས་ཐུག་པ་མེད་པ་ཉིད་གསལ་བར་བྱས་པ་ཡིན་ནོ། །ཕྱོགས་གཉིས་པ་ལ་ཡོངས་སུ་ཚིམ་པ་མེད་པར་མྱོང་བ་ཉིད་དོན་དང་འབྲེལ་པའི་གྲུབ་པར་བྱེད་པ་ཡིན་པའི་ཕྱིར། མྱོང་བའི་ནུས་པ་ལ་གེགས་བྱེད་པ་སུ་བྱེད། །དེས་ན་ཡོངས་སུ་ཚིམ་པ་དང་པོ་ལ་དོན་མེད་དོ། །དེ་ལྟ་ཡིན་མོང་སྙམ་ན། དེ་ལ་ཡང་ཞེས་སྨོས་སོ། །དེ་གང་ཡང་ཡིན་སྙམ་ན་གལ་ཏེ་ཉམས་སུ་མྱོང་བ་ལས་ཞེས་བྱ་བའོ། །སྔར་ཉམས་སུ་མྱོང་བ་ལས་ཞེས་བྱ་བ་ནི། གཟུགས་རིག་པ་ལས་སོ། །དེས་ན་འཁྲུལ་པ་དང༌། མ་འཁྲུལ་པ་ཁྱད་པར་མེད་དོ་ཞེས་བྱ་བར་འགྲུབ་པོ། །གལ་ཏེ་འཁྲུལ་པ་ལ་ཡང་ཡོད་པའི་ཕྱིར་ཡོངས་སུ་ཚིམ་པ་ཉིད་དེ་སྒྲུབ་པར་བྱེད་པ་མ་ཡིན་ནོ། །ཡོངས་སུ་ཚིམ་པ་མ་ཡིན་པའི་རྒྱུ་སྤྲུལ་ལ་སོགས་པ་དངོས་པོ་མེད་པ་ཡང་མ་ཡིན་མོད་ཀྱི། འོན་ཀྱང་དོན་སྒྲུབ་པར་བྱེད་པ་ནི་ལྷག་པར་མོས་པ་ཡིན་ནོ། །ཇི་སྲིད་དུ་འདི་ནི་དོན་ཉིད་དོ་སྙམ་དུ་ལྷག་པར་ཞེན་བ་བརྟན་པ་དེ་ཐམས་ཅད་ནི་དོན་ཉིད་ཡིན་ལ། དེ་ནི་གནས་སྐབས་ཀྱི་ཁྱད་པར་ལ་ལྟོས་ནས་ཕན་པ་དང་གནོད་པ་དང༌། གཉི་ག་མ་ཡིན་པར་སྒྲུབ་པར་བྱེད་པ་ཐམས་ཅད་ལ་མཐོང་བ་ཡིན་ནོ། །དེས་ན་འདི་ལ་ཡོངས་སུ་ཚིམ་པའམ། དོན་མྱོང་བས་ཅི་ཞིག་བྱ་སྙམ་ན་འདི་ནི་ཞེས་གསུངས་སོ། །མོས་པར་མྱོང་བ་ལས་གཞན་ནམ་གཞན་མ་ཡིན་ཞེས་བྱ་བ་ལ་སོགས་པ་རྟོགས་པར་སླའོ། །འོན་ཏེ་མྱོང་བ་ནི་སྤྱི་ཡིན་ལ། ལྷག་པར་ཞེན་པ་བརྟན་པའི་མོས་པ་ནི་ཁྱད་པར་གྱི་རང་བཞིན་ནོ་ཞེ་ན། རང་གི་རང་བཞིན་མྱོང་བ་ལས་མ་གཏོགས་པའི་བརྟན་པ་ཞེས་བྱ་བ་འདི་ཅི་ཞིག་གཡོ་བ་མེད་པའོ་ཞེ་ན་གཡོ་བ་ཡང་རང་གི་ངོ་བོ་རིག་པ་ལས་གཞན་མ་ཡིན་པ་མ་ཡིན་ནམ། དེ་ཡང་རེ་ཞིག་སྔ་མའི་ནི་མ་ཡིན་ཏེ། དེ་ལ་ནི་རང་གི་ངོ་བོའི་རིག་པ་ལས་རྣམ་པ་གཞན་མེད་པའི་ཕྱིར་རོ། །ཕྱི་མའི་ཡང་དེ་ཡང་རང་གི་ཡུལ་འཛིན་པ་ལས་ཉམས་པ་མེད་པའི་ཕྱིར་རོ། །འདི་གཡོས་ཀྱང་སྔ་མ་ལས་ཅིས་ཡང་མི་འགྱུར་རོ། །ཕྱིས་གཞན་དུ་རིག་པ་ན་དེ་ལ་གཡོ་བ་ཉིད་དུ་འཇོག་ན། སྔ་མས་གཞན་དུ་རིག་པས་ཕྱི་མ་ཡང་དེ་ལྟར་འགྱུར། འཁྲུལ་
བ་དང་མ་འཁྲུལ་པ་དག་རིམ་གྱིས་འབྱུང་བའི་ངེས་པ་ཡང་མེད་པའི་ཕྱིར། ཕྱིས་རབ་རིབ་ཅན་དུ་གྱུར་པ་བཞིན་ནོ། །འདིས་ནི་གནོད་པར་བྱ་བ་དང༌། གནོད་པར་བྱེད་པའི་དངོས་པོ་སྐབས་སུ་བྱེད་པ་ཡང་གསལ་བ་ཡིན་ནོ། །རྒྱས་པར་ནི་ལེའུ་དང་པོར་བཤད་ཟིན་པའི་ཕྱིར་ན་རེ་ཞིག་གཞག་གོ ། དེས་རྣམ་པ་འདི་ལྟ་བུ་དག་ལ་ནི་ལྷག་པར་མོས་པ་ལ་བརྟེན། གཞན་མད་ཀྱང་དེས་ཡང་དཔྱད་པ་ཡིན་ནོ། །གཞན་ཡང་རང་གི་ངོ་བོ་མངོན་སུམ་དུ་བྱེད་པའི་མྱོང་བ་ནི་གཡོ་བ་ཡིན་ལ་དོན་གྱིས་སྟོང་པའི་རྣམ་པར་རྟོག་པ་ལྷག་པར་མོས་པའི་སྒྲས་བརྗོད་པར་བྱ་བ་ནི་མ་ཡིན་ནོ་ཞེས་བྱ་བ་འདི་ལ་སུ་ཞིག་དད་པར་བྱེད་དེ། ཚད་མས་བསལ་བའི་བདག་ལ་སོགས་པ་ལ་ཡང་ལྷག་པར་མོས་པ་སྲིད་པའི་ཕྱིར་རོ། །དེའི་ཕྱིར་མོས་པ་ཉིད་དོན་ཐམས་ཅད་ཀྱིས་སྒྲུབ་པར་བྱེད་པ་ཡིན་གྱི། ཡོངས་སུ་ཚིམ་པ་ལ་སོགས་པ་གཞན་གྱི་མ་ཡིན་ནོ་ཞེས་བྱ་བ་ནི་རིག་པར་བརྗོད་པ་ཡིན་ནོ། །ཡང་ན་མྱོང་བ་ཀུན་དོན་གྱིས་སྒྲུབ་པར་བྱེད་པ་ཁོ་ན་ཡིན་ཏེ། གཞན་འགས་ཀྱང་གནོད་པ་འམ་ཕན་འདོགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །འདིས་ནི་ཞེས་བྱ་བ་ལ་སོགས་པས་འཁྲུལ་པ་དང་མ་འཁྲུལ་པའི་ཐུན་མོང་དུ་གྱུར་པ་རྣམ་པར་རྟོག་པའི་ཁྱད་པར་གྱི་བདག་ཉིད་ཀྱང་མ་འཁྲུལ་པར་སྒྲུབ་པར་བྱེད་པ་མ་ཡིན་ནོ། །གཞན་ཡང་ཞེས་བྱ་བ་ལ་སོགས་པའི་དོན་འདི་ཡིན་ཏེ། གང་གིས་དེ་དག་ཉིད་དོན་རྣམ་པར་འཇོག་པར་བྱེད་པ་ཡིན་ལ་མྱོང་བ་ནི་བྱ་བ་མེད་པར་འགྱུར་རོ། །དོན་མྱོང་བ་ལ་སྔར་ནི་འདོད་པ་ལ་སོགས་པ་ཡོད་པ་མ་ཡིན་ནོ། འོན་ཀྱང་མྱོང་བས་དོན་གནས་པར་བྱས་ལ་དེ་དག་སྐྱེ་བ་ཡིན་ནོ། །གང་ཡང་སློབ་དཔོན་ཆོས་མཆོག་གིས་ཕྱི་རོལ་གྱི་དོན་ཡོད་པར་གྲུབ་པར་རྒྱུན་གྱིས་འཇུག་པའི་དོན་བྱེད་པར་མ་འཁྲུལ་པའི་གྲུབ་བྱེད་དུ་བསྟན་པ་དེ་ཡང་འདི་ཉིད་ཀྱིས་གསལ་བ་ཡིན་ཏེ། དོན་བྱ་བ་ཅི་དོན་གྱི་བདག་ཉིད་ཡིན་ནམ་ཞེས་བྱ་བ་ལ་སོགས་པའི་རྣམ་པར་རྟོག་པ་གསུམ་བསལ་བས་ན་དོན་བྱེད་པ་ལྷག་པར་མོས་པ་ཙམ་དུ་གནས་པར་འགྱུར་བའི་ཕྱིར་རོ། །དེ་ལྟར་དམིགས་པ་མེད་པའི་ཤེས་པ་དང་ཁྱད་པར་བྱེད་པ་ཁོ་ན་ཡིན་ནོ། །མེད་མེད་པའི་ཕྱིར་རྣམ་པར་ཤེས་པ་འགའ་ཞིག་དམིགས་པ་དང་བཅས་པ་ཡིན་ནོ་ཞེས་བྱ་བའི་ཕྱོགས་བཟློག་པ་ཡིན་ནོ། །ད་ནི་གཞན་དག་རྣམ་པར་ཤེས་པ་ཐམས་ཅད་དམིགས་པ་དང་བཅས་པ་ཡིན་ནོ་ཞེས་སྨྲས་པ་ནི་
ཅི་སྟེ་ཡང་ཞེས་བྱ་བའོ། །དེ་ཉིད་རྒོལ་བའི་དོགས་པ་བསུ་བ་ནི་ཚད་མ་དང་ཞེས་བྱ་བའོ། །འཇིག་རྟེན་ཞེས་བྱ་བ་ནི་ལན་ནོ། །རྣམ་པར་དབྱེ་བ་འདི་ནི་ཅི་ལྟར་ཤེས་ཞེས་བྱ་བའི་རྒོལ་བའིའོ། །གང་ལས་འཇིག་རྟེན་པའི་དོན་གྱི་ཡུལ་ཅན་ནི་ཚད་མ་ཡིན་ལ། གཞན་ནི་ཚད་མ་མ་ཡིན་ནོ་ཞེས་ངེས་པར་འགྱུར་བ། ཐམས་ཅད་དམིགས་པ་དང་བཅས་པ་ཉིད་ལ་འདི་ནི་འཇིག་རྟེན་པ་ལ་ཡིན་ནོ་ཞེས་བྱ་བའི་རྣམ་པར་དབྱེ་བ་འདི་ཇི་ལྟར་འགྱུར། གཞན་གྱི་གནོད་བྱེད་ཅིག་ཤོས་དང་བཅས་འབྲེལ་ཕྱིར་ཞེས་སྨྲས་སོ། །གང་ལ་གནོད་པ་ཡོད་པ་དེ་ནི་འཇིག་རྟེན་པ་མ་ཡིན་པ་ཡིན་ལ། གང་ལ་སྒྲུབ་པའི་ཚད་མ་གཞན་ནམ། རྗེས་ལས་སྐྱེས་པའི་ནི་ལྷག་པར་ཞེན་པར་མི་འགྱུར་པ་ཡོད་པ་དེ་ནི་འཇིག་རྟེན་པ་ཡིན་ནོ། །གང་གིས་ཞེས་བྱ་བ་ནི་རྒོལ་བའིའོ། །སྨིག་རྒྱུའི་ཚོགས་ཐོབ་པའི་མཚན་ཉིད་ཆུར་སྒྲོ་འདོགས་པ་ལ་གནོད་པར་བྱེད་པའི་ཤེས་པ་གང་ཡིན་པ་དེ་ཉིད་གནོད་པར་བྱེད་པ་ག་ལས་ཡིན་ན་དེ་བཞིན་དུ་གཅིག་ཤེས་པ་ལ་ཡང་བརྗོད་པར་བྱའོ། །དེ་ལ་གལ་ཏེ་གནོད་བྱེད་ཅིག་ཤོས་ཡོད་པ་ལས་སོ་ཞེ་ན་དེའི་ཚེ་ཐུག་པ་མེད་དོ། །ཇི་ལྟར་སྒྲུབ་པར་བྱེད་པར་རིགས་མཐུན་པ་འམ་མི་མཐུན་པའི་སྒྲུབ་པར་བྱེད་པ་གཞན་ལ་ལྟོས་ནས་སྒྲུབ་པར་བྱེད་པ་ཉིད་དུ་ངེས་པར་བྱེད་པ་དེ་བཞིན་དུ། གནོད་པར་བྱེད་པ་ཡང་རིགས་མཐུན་པའམ་མི་མཐུན་པའི་གནོད་པར་བྱེད་པ་གཞན་ལ་ལྟོས་ནས་གནོད་པར་བྱེད་པ་ཡིན་པར་འགྱུར་ལ། དེ་ཡང་དེ་བཞིན་དུ་སྒྲུབ་པར་བྱེད་པ་དང་གནོད་པར་བྱེད་པ་གཞན་ལ་ལྟོས་ནས་དེ་འདྲ་བར་འགྱུར་རོ། །དེ་བཞིན་དུ་གཞན་དང་གཞན་ལ་ལྟོས་པ་ན་མཐར་ཐུག་པ་མེད་དོ། །དོན་བྱ་བ་སྣང་བས་ཀྱང་མཐར་ཐུག་པ་མ་ཡིན་ཏེ། དེ་ལ་ཡང་འཇིག་རྟེན་པ་མ་ཡིན་པའི་དོན་སྣང་བ་མཐོང་བའི་ཕྱིར་ཇི་ལྟར་ཐེ་ཚོམ་ལྡོག །དེས་ན་གལ་ཏེ་ལྷག་པར་མོས་པ་ཙམ་ལ་མི་བརྟེན་ན་དེའི་ཚེ་སྒྲུབ་པར་བྱེད་པ་དང༌། གནོད་པར་བྱེད་པ་གཞན་ཚོལ་བས་ཐུག་པ་མེད་པ་ཁོ་ནའོ། །ད་ནི་ཐུན་མོང་དང་ཐུན་མོང་མ་ཡིན་པ་ཉིད་ཀྱིས་འཇིག་རྟེན་དང་ཅིག་ཤོས་གནས་པར་བྱེད་པའི་དོགས་པ་བསུ་བ་ནི། གལ་ཏེ་ཐུན་མོང་བ་ཞེས་བྱ་བའོ། །སུན་འབྱིན་པར་ནི་ཐུན་མོང་དང་ཐུན་མོང་མ་ཡིན་པ་དག་རིག་པ་སྟེ། ངེས་པ་ཡོད་པ་མ་ཡིན་ཏེ་དེས་ན་མ་གྲུབ་པའི་ཕྱིར་དེ་ཡང་མཚན་ཉིད་མ་ཡིན་ནོ་ཞེས་བྱ་བའི་དོན་ཏོ། །
ཅིའི་ཕྱིར་ཞེ་ན། གང་ཕྱིར་ཐུན་མོང་བ་ལ་སོགས་པ་ལ་མངོན་སུམ་དང་རྗེས་སུ་དཔག་པ་ཡོད་པ་མ་ཡིན་པས་སོ། །འདི་ལ་ཡང་གཏན་ཚིགས་སུ་མངོན་སུམ་གྱིས་ཞེས་བྱ་བའོ། །རྗེས་སུ་དཔག་པ་མི་འཇུག་པའི་རྒྱུ་མཚན་ཡང་འདི་ཉིད་ཡིན་ནོ་ཞེས་གཞུང་ཕྱི་མ་འཆད་པ་ཡིན་ནོ། །རང་དང་གཞན་གྱིས་རིག་པར་བྱ་བ་མངོན་སུམ་གྱིས་མ་བཟུང་བར་བསྟན་ནས་རྗེས་སུ་དཔག་པས་ཀྱང་མ་བཟུང་བར་སྟོན་པ་གསུམ་པ་ནི་རྗེས་སུ་དཔག་པས་ཞེས་བྱ་བའོ། །གཞན་གྱི་སྤུ་ལྡང་ལ་སོགས་པ། །འབྲས་མཐོང་ཕྱིར་ན་ཞེས་བྱ་བ་གསུངས་སོ། །སྡུ་གུ་གང་ཞིག་བདག་གིས་མཐོང་བ་དེ་ཉིད་འདིས་ཀྱང་མཐོང་ངོ་ཞེས་ཐུན་མོང་པ་ཉིད་ནི་འབྲས་བུ་སྤུ་ལྡང་བ་ལ་རྗེས་སུ་དཔག་པས་གྲུབ་པོ་ཞེས་བྱ་བའི་དོན་ཏོ། །ལན་ནི་རང་ཉིད་མཐོང་ལ་རྗེས་སུ་དཔག་པ་མེད་ཅེས་བྱ་བའོ། །འབྲས་བུ་སྤུ་ལྡན་པ་ལས་ནི་ཇི་ལྟར་འདིས་མཐོང་བ་དེ་བཞིན་དུ་འདིས་ཀྱང་མཐོང་ངོ་ཞེས་གྲུབ་ཏུ་ཆུག །ངས་མཐོང་བ་གང་ཡིན་པ་དེ་ཉིད་འདིས་ཀྱང་མཐོང་ངོ་ཞེས་ནི་རྟོགས་པར་མི་ནུས་ཏེ། དེ་དང་འདྲ་བར་མཐོང་བ་ལས་ཀྱང་སྤུ་ལྡང་བ་སྐྱེ་བའི་ཕྱིར་རོ། །གལ་ཏེ་ཡུལ་དེ་ལ་གནས་པའི་ལུས་མཛེས་པ་གཞན་དག་རེ་རེ་ཁོ་ནས་མཐོང་བར་ཇི་ལྟར་འགྱུར་སྙམ་ན། འོ་ན་རབ་རིབ་ལ་སོགས་པ་ལྟར་བག་ཆགས་མཚུངས་བར་སད་པའི་སྐྱེས་པ་བདག་ཉིད་སོ་སོར་ངེས་པའི་ཤེས་པའི་རྣམ་པ་ཉིད་ཡིན་མོད་དེ་ཇི་ལྟར་ཐུན་མོང་པ་ཉིད་ཡིན། ཚུལ་འདི་ནི་རབ་ཏུ་གྲགས་པའི་འབྲས་བུའི་རྗེས་སུ་དཔག་པ་ལ་ཡོད་པ་མ་ཡིན་ནོ་ཞེས་སྟོན་པ་ནི། འབྲས་བུ་དུ་བ་མཐོང་བ་ལས་ཞེས་བྱ་བའོ། །དཔེ་ལ་མཐོང་བའི་རང་གི་མཚན་ཉིད་ཀྱི་བདག་ཉིད་དེ་ཉིད་དོ། །ཁྱད་པར་རིག་པ་མིན་ཞེས་བྱ་བ་ནི་མཐོང་བའི་རང་གི་མཚན་ཉིད་རིག་པ་མ་ཡིན་པའོ། །གལ་ཏེ་དཔེ་ལ་ཡོད་པ་དང་ཕྱོགས་ལ་ཡོད་པའི་དུ་བ་གང་ཡིན་པ་དེ་གཉིས་ཐ་དད་པ་ཡིན་པ་དེས་ན་ཕྱོགས་ལ་ཡོད་པའི་མེ་མི་སྒྲུབ་སྟེ་འོན་ཀྱང་སྤྱི་ཡིན་ནོ་སྙམ་དུ་དོགས་པ་ནི། དེར་དུ་བ་ཞེས་བྱའོ། །ལན་ནི་སྤུ་ལྡང་བ་འདི་ཞེས་བྱ་བའོ། །སྤུ་ལྡང་བ་ཡང་ཐ་སྙད་པ་ཉིད་པས་ཇི་ལྟར་དེ་ལས་ཀྱང་རང་གིས་མཐོང་བ་འགྲུབ་ཅེས་བྱ་བའི་དོན་ཏོ། །འོ་ན་གཅིག་ཏུ་མངོན་པར་ཞེན་པ་ལས་ཐུན་མོང་པ་ཉིད་དུ་འགྲུབ་པོ་ཞེས་གཅིག་ཏུ་མངོན་པར་ཞེན་པ་ཡང་གསུངས་སོ། །གཅིག་ཉིད་དུ་མངོན་པར་ཞེན་པ་ཡང་ཤེས་
པ་ལས་གཞན་མ་ཡིན་ཏེ། འོན་ཀྱང་དེ་གཅིག་ཏུ་མངོན་པར་ཞེན་པ་དེ་ནི་རིག་པ་སྟེ། ཤེས་པ་ཁོ་ནའོ། །དེ་ནི་རབ་རིབ་ཅན་གྱིས་དམིགས་པའི་སྐྲ་ཤད་ལ་སོགས་པ་ལ་ཡང་ཡོད་པའི་ཕྱིར་དེ་ལས་ཀྱང་ཐུན་མོང་བ་ཉིད་ཀྱང་ཇི་ལྟར་འགྲུབ་སྙམ་ན་དགོངས་པའོ། །ཚིག་ལེའུར་བྱས་པ་འདི་ཉིད་བཤད་པའི་ཕྱིར་དོགས་པ་བསྡུ་བ་གལ་ཏེ་ག་ལ་ཞེས་བྱ་བའོ། །འདི་ནི་ཞེས་བྱ་བ་ནི་ལན་ནོ། །འདི་ཉིད་བསལ་བར་བྱེད་པ་ནི་དེ་ལ་ཡང་ཞེས་བྱ་བ་སྟེ། རབ་རིབ་ཅན་གྱིས་དམིགས་པའི་སྐྲ་ཤད་ལ་སོགས་པ་ལ་ཡང༌། གལ་ཏེ་དེ་ལྟར་ན་ཡང་རབ་རིབ་ཅན་གྱིས་དམིགས་པ་ནི་བུམ་པ་ལ་སོགས་པ་ནི་ཐམས་ཅད་ཀྱི་ཐུན་མོང་ཡིན་ནོ་སྙམ་དུ་དོགས་པ་ན་གཞན་ཡང་ཞེས་གསུངས་སོ། །གཞན་ཞིག་གིས་ཞེས་བྱ་བ་ནི་རབ་རིབ་ཅན་གྱིས་སོ། །གལ་ཏེ་ཞེས་བྱ་བ་ནི་གཞན་གྱིས་དོགས་པའོ། །འདི་ལ་ཚད་མ་མེད་དོ་ཞེས་བྱ་བ་ནི་གྲུབ་པའི་མཐའོ། །སྐྱེས་བུ་གཉིས་པས་ཀྱང་དེ་ཉིད་འཇིག་པའོ་ཞེས་བྱ་བ་འདི་ལ་ཚད་མ་ཡོད་པ་མ་ཡིན་ནོ་ཞེས་བཤད་ཟིན་ཏོ། །ཐམས་ཅད་ཀྱིས་ལྟ་ཅི་སྨོས་བུམ་པ་ལ་སོགས་པ་ནི་ཐུན་མོང་དུ་གྲུབ་པ་ཡང་མ་ཡིན་ནོ་ཞེས་བརྗོད་པ་ནི་རབ་རིབ་ཅན་གྱིས་ཞེས་བྱ་བ་ལ་སོགས་པའོ། །ཚབས་ཆེར་ཉམས་པར་གྱུར་ན་ཐམས་ཅད་ལ་མདོག་དང་དབྱིབས་མི་མངོན་པར་དུང་ཁའི་རྣམ་པ་ཉིད་དུ་མཐོང་བ་ཡིན་ཏེ། དཔེར་ན་བུམ་པ་ལ་སོགས་པ། ཐུན་མོང་སྣང་བ་མ་ཡིན་ནོ། །ཞེས་བྱ་བར་དགོངས་པའོ། །གལ་ཏེ་དབང་པོ་ཞེས་བྱ་བ་ནི་དོགས་པ་བསུ་བའོ། །ཐུན་མོང་བ་ཉིད་མ་ཡིན་པའི་སྐྱོན་མེད་དོ་ཞེ་ན། དབང་པོའི་ཞེས་བྱ་བ་ནི་ལན་ནོ། །མི་བདེན་པའི་ལན་ཞེས་བྱ་བ་ནི་གཞན་གྱིའོ། །འདི་ནི་ཞེས་བྱ་བ་ནི་སུམ་འབྱིན་པའོ་སྙམ་པ་མིན་ན་ཞེས་བྱ་བ་ནི་དེ་ཉིད་བསལ་བར་བྱེད་པའོ། །གང་གི་ཕྱིར་དེ་ལྟ་བུར་ཐུན་མོང་བ་ཉིད་མ་གྲུབ་པ་དེས་ནའོ། །ཅུང་ཟད་ཀྱང་ཞེས་བྱ་བ་ནི་གཞན་གྱིས་དམིགས་པར་བྱ་བ་ལ་ལྟོས་པའོ། །གལ་ཏེ་ཞེས་བྱ་བ་ནི་གཞན་གྱིའོ། །གཞན་གྱིས་ཞེས་བྱ་བ་ལ་སོགས་པ་ནི་ལན་ནོ། །མངོན་སུམ་ཉིད་ཀྱིས་དམིགས་པར་བྱ་བ་ལ་སོགས་པ་ཡིན་ནོ། །ཅིའི་ཕྱིར་གང་ཞིག་གིས་ཀྱང་ཞེ་ན། གཞན་གྱིས་དམིགས་པར་བྱ་བས་ཞེས་བྱ་བ་ལ་སོགས་པའོ། །འདིར་དོན་ནི་འདི་ཡིན་ཏེ། གང་ཞིག་གང་གིས་རང་བཞིན་དུ་མ་དམིགས་པ་
དེ་ནི་དེའི་རང་བཞིན་དུ་རྣམ་པར་གཞག་པར་བྱ་བ་ཡིན་ཏེ། དཔེར་ན་སྔོན་པོ་ལ་སེར་པོའི་རང་བཞིན་བཞིན་ནོ། །སྣང་བ་ཡང་གཞན་གྱིས་དམིགས་པར་བྱ་བ་ཉིད་དུ་དམིགས་པ་མ་ཡིན་ནོ་ཞེས་བྱ་བ་ནི་དམིགས་པའོ། །མ་གྲུབ་པ་ནི་མ་ཡིན་ཏེ། ཆོས་ཅན་སྣང་བ་ལ་གཞན་གྱིས་དམིགས་པར་བྱ་བ་ཉིད་མ་དམིགས་པར་གྲུབ་པའི་ཕྱིར་རོ། །དེས་ན་མེད་པར་ངེས་པ་ཉིད་དུ་དོགས་པ་བསུ་བ་ནི་གལ་ཏེ་ཞེས་བྱ་བའོ། །དེའི་ནི་རྟོགས་པའོ། །ཡུལ་མ་ཡིན་པའི་ཕྱིར་རོ་ཞེས་བྱ་བ་ནི་བལྟ་བར་བྱ་བ་མ་ཡིན་པའི་ཕྱིར་རོ། །གལ་ཏེ་གཞན་གྱིས་དམིགས་པར་བྱ་བའི་རང་བཞིན་གཞན་གྱི་ཡུལ་མ་ཡིན་ནོ། །འོ་ན་གཞན་ངེས་གཞན་གྱིས་དམིགས་པར་བྱ་བའི་རང་བཞིན་དམིགས་པར་ཇི་ལྟར་འགྱུར་ཏེ་མི་དམིགས་པ་ཁོ་ནའོ། །དེའི་ངོ་བོར་ཞེས་བྱ་བ་ནི་གཞན་གྱིས་དམིགས་པར་བྱ་བའི་རང་བཞིན་གྱིས་ཐ་དད་པ་ངོ་བོའོ། །འོ་ན་ཅི་ཞིག་མི་དམིགས་ཤེ་ན། གཞན་གྱིས་དམིགས་བྱ་ཉིད་དུ་ནི། །ཞེས་གསུངས་སོ།། འདི་བཟློག་པའི་རྣམ་པར་རྟོག་པ་ནི་དེའི་ངོ་བོ་ལས་ནི་དངོས་པོའི་ངོ་བོ་ལས་སོ། །ཕྱོགས་གཉིས་པ་ལ་བརྗོད་པ་ནི་དེའི་ངོ་བོ་ཉིད་ཡིན་ན་ཞེས་བྱ་བ་སྟེ། གཞན་གྱིས་དམིགས་པར་བྱ་བ་ཉིད་དངོས་པོའི་རང་བཞིན་ཉིད་ཡིན་ན་དངོས་པོ་དམིགས་པ་ན་ཇི་ལྟར་མ་དམིགས། དེས་ན་གཞན་གྱིས་དམིགས་པར་བྱ་བ་ཉིད་དུ་མ་དམིགས་སོ་ཞེས་བྱ་བར་མི་འཐད་དོ་སྙམ་དུ་དགོངས་པའོ། །ཕྱོགས་དང་དང་པོ་ལ་བརྗོད་པ་ནི་ཞེས་བྱ་བ་སྟེ་གཞན་གྱི་ངོ་བོ་ཡིན་ན་ཞེས་བྱ་བ་སྟེ་གཞན་གྱི་ངོ་བོ་དམིགས་པར་བྱ་བ་ཉིད་དོན་གྱི་རང་བཞིན་ལས་གཞན་དུ་གྱུར་པའི་ངོ་བོ་ཉིད་ཡིན་ན། དོན་གྱི་ངོ་བོ་དེ་གཞན་གྱིས་དམིགས་པར་ཇི་ལྟར་གྱུར་ཏེ་མི་འགྱུར་བ་ཉིད་དོ། །གལ་ཏེ་དེས་དངོས་པོའི་དངོས་པོ་ཉིད་ན་འོ་ན་ཅི་ཞིག་དམིགས་པར་བྱ་བ་ཉིད་ཅེས་སྨོས་སོ། །གང་གི་ཕྱིར་གཞན་གྱིས་ནི་དམིགས་པར་བྱ་བ་ཉིད་དམིགས་ཀྱི་དོན་དེ་ནི་མ་ཡིན་པ་དེའི་ཕྱིར་རོ། །མི་དམིགས་པ་དེ་ཡང་གང་ཞིག་ཡིན་སྙམ་ན། གང་ཞིག་ཅེས་བྱ་བའོ། །དེ་ཉིད་མི་དམིགས་པ་ཡིན་གྱི། གཞན་ནི་མ་ཡིན་ཏེ། དེ་ལས་གཞན་ཡིན་པའི་ཕྱིར་རོ། །འོ་ན་གཞན་གྱིས་དམིགས་པར་འགྱུར་རོ་ཞེ་ན། དེ་ལྟ་ན་ཡང་ཞེས་གསུངས་སོ། །དམིགས་པ་ཉིད་ལས་ཐ་དད་པར་འགྱུར་ནའོ། །འོ་ན་གང་ཞིག་དམིགས་ཤེ་ན། རང་རང་གིས་ཞེས་བྱ་བ་ལ་སོགས་
པའོ། །གང་གི་ཕྱིར་དེ་ནི་ཐམས་ཅད་ཀྱིས་དམིགས་པ་མ་ཡིན་པ་དང༌། དམིགས་པར་བྱ་བ་ཡང་རང་རང་ལ་ངེས་པ་ཡིན་པའི་ཕྱིར་ན། ཐུན་མོང་དུ་དམིགས་པ་ནི་མེད་དོ། །མ་དམིགས་པའི་ཕྱིར་ན་དེ་ཉིད་དོན་ཡིན་གྱི་གཞན་ནི་མེད་དོ་ཞེས་བྱ་བ་གསུངས་སོ། །དམིགས་པ་ལས་ཐ་དད་པའི་ཞེས་བྱ་བའོ། །བདེན་ཏེ་ཕྱི་རོལ་གྱི་དོན་ནི་དོན་བྱེད་པར་ནུས་པ་མ་ཡིན་གྱི། འོན་ཀྱང་སྔོན་པོ་ལ་སོགས་པར་སྣང་བ་ཡང་རིགས་པ་འགའ་ཞིག་ཉིད་ནི་འདོད་ཆགས་པ་རིགས་པའི་རང་བཞིན་གྱི་དོན་བྱེད་པ་ཡིན། དོན་བྱེད་ལ་འགའ་ཞིག་ནི་མ་ཡིན་ནོ། །དེས་ན་ནུས་པ་དང་མི་ནུས་པའི་དབང་གིས་ཡོད་པ་དང་མེད་པར་རྣམ་པར་འཇོག་པ་ཡིན་ནོ་སྙམ་དུ་དོགས་པ་བསུ་བ་ནི་ཅི་སྟེ་ཞེས་བྱ་བའོ། །རྣམ་པར་རིག་པ་ཙམ་གྱི་ཕྱོགས་ལ་ནི་ཤེས་པ་རང་རིག་པ་ལ་ལྐོག་ཏུ་གྱུར་པ་ཉིད་མེད་པའི་ཕྱིར་དེའི་ཡུལ་ཅན་གྱི་རྗེས་སུ་དཔག་པ་མེད་པས་གཉིས་ཉིད་ཉམས་སོ་ཞེས་བརྗོད་པ་ནི་རང་རིག་ཙམ་ཞེས་བྱ་བའོ། །གལ་ཏེ་རྒྱུད་གཞན་གྱིས་ཤེས་པ་ལྐོག་ཏུ་གྱུར་པ་ན་དེའི་ཡུལ་ཅན་གྱི་རྗེས་སུ་དཔག་པར་འགྱུར་རོ་སྙམ་དུ་དོགས་པ་བསུ་ནས་ཤེས་གཉིས་ཞེས་བྱ་བའོ། །རང་གི་རྒྱུད་ལ་ནི་ལུས་ཀྱི་རྣམ་པར་རིག་བྱེད་ལ་སོགས་པར་སྣང་བ་དང༌། འདོད་པ་ལ་སོགས་པའི་མཚན་ཉིད་ཀྱི་ཤེས་པ་གཉིས་རྒྱུ་དང་འབྲས་བུའི་དངོས་པོར་བཟུང་བར་བྱས་པ་ཡིན་ཏེ། དེ་ན་གཞན་ལ་འབྲས་བུ་མཐོང་བ་ལས་ཤེས་པ་དེ་རྗེས་སུ་དཔོག་པ་ཡིན་ན། དེ་ཡང་ཇི་ལྟར་ཞེས་བྱ་བར་ཚད་མ་སྙམ་དུ་གང་གིས་འཛིན་ཏེ། ཅི་རིགས་པ་གཉིས་པོ་དེ་ཉིད་ཀྱིས་ཡིན་ནམ། འོན་ཏེ་དེའི་རྗེས་ལས་བྱུང་བའི་དྲན་པས་ཡིན། །རེ་ཞིག་རིག་པ་གཉིས་པོ་དེ་ཉིད་ཀྱིས་ནི་མ་ཡིན་ཏེ། ཅིའི་ཕྱིར་ཞེ་ན། རང་ཙམ་ཞེས་གསུངས་སོ། །འདི་ཉིད་བརྗོད་པ་ནི་གང་གི་ཚེ་རྒྱུ་ནི་ཞེས་བྱ་བའོ། །སྔར་མངོན་སུམ་གྱི་རིག་པའི་རྒྱུ་ནི་ཉམས་སུ་མྱོང་བའི་བག་ཆགས་ལས་བྱུང་བའི་དྲན་པས་ཕྱི་ནས་ཤེས་པ་ཡིན་ནོ་ཞེས་བྱ་བའི་དོགས་པ་བསུ་བ་ནི། གལ་ཏེ་རྒྱུ་ནི་ཞེས་བྱ་བའོ། །རྗེས་དཔག་པའི་ཞེས་བྱ་བ་ནི་དྲན་པས་སོ། །ལན་ནི་དེ་ཚེ་ཞེས་བྱ་བ་ནི། ཉམས་སུ་མྱོང་བའི་དུས་སུ་ནི་མངོན་པར་འདོད་པའི་རྒྱུ་ཉིད་དུ་མ་ཤེས་ན། ད་ལྟར་རྗེས་སུ་དཔག་པ་ལས་ཤེས་པ་ཇི་ལྟར་འགྱུར་ཏེ་མི་འགྱུར་བ་ཉིད་དོག་ལ་ཏེ་དྲན་པ་དེ་ད་ལྟར་ཡོད་པ་མ་ཡིན་ནམ། དེས་ན་དེ་ཡང་དེ་ཁོ་ན་ལྟར་ཡིན་
ནོ་ཞེས་དོགས་པ་བསུ་བ་ནི། སྔར་ནི་ཞེས་བྱ་བའོ་གསུངས་སོ་དེའི་ཤེས་པ་ད་ལྟར་ཡོད་པ་ཡིན་གྱི་དེ་ནི་མ་ཡིན་ནོ། །ཤེས་པ་ཡོད་པ་ཙམ་གྱིས་ཤེས་བྱ་ཡང་དེ་ལྟར་འགྱུར་བ་མ་ཡིན་ནོ་ཞེས་ལམ་བརྗོད་པ་ནི་ཤེས་ཏེ་ཞེས་གསུངས་སོ། །རྒྱུའི་ཤེས་པ་དེའི་རྒྱུར་མངོན་པར་འདོད་པ་ཇི་ལྟར་རིག་པར་འགྱུར་ཏེ། མ་ཡིན་པ་ཉིད་དོ། །འོན་ཏེ་གང་གི་ཚེ་ཡོད་པ་དེའི་ཚེ་རྗེས་སུ་དཔོག་པ་མ་ཡིན་ནོ་སྙམ་དུ་དོགས་པ་ནི་སྔ་མ་ཉིད་དུ་ཞེས་བྱའིའོ། །གལ་ཏེ་ཡོད་པ་ཉིད་དུ་རྗེས་སུ་དཔོག་པ་ཉེས་པ་འདིར་འགྱུར་བ་ཞིག་ན། མངོན་སུམ་གྱིས་རིག་པ་ལ་རྗེས་སུ་དཔོག་པ་དོན་མེད་དོ་ཞེས་ལན་འདེབས་པ་ནི་མ་ཡིན་ཏེ་མངོན་སུམ་གྱིས་རིག་ཕྱིར་ཞེས་བྱའོ། །འོན་ཏེ་སྔོན་གྱི་རིག་པ་ལ་ཡང་མངོན་སུམ་གྱིས་མ་རིག་པའི་སྔ་མ་ཉིད་ཡོད་པས་རྗེས་སུ་དཔག་པའི་ཡུལ་ཡིན་ནོ་སྙམ་དུ་དགོངས་པ་ནི། དེའི་སྔ་མ་ཉིད་ཅེས་བྱ་བའོ། །དེའི་སྔ་མ་ཉིད་རྗེས་སུ་དཔག་གིས་རིག་པ་ཡིན་ནོ་ཞེས་རྗེས་སུ་འཇུག་གོ །ཇི་ལྟར་སྔ་མ་ཉིད་མི་སྲིད་ཅེ་ན། མངོན་སུམ་གྱིས་ནི་ཞེས་བྱ་བའོ། །དེའི་ཕྱིར་ཞེས་བྱ་བ་ནི་མངོན་སུམ་གྱིས་གནོད་པའི་ཕྱིར་རོ། །དེར་ནི་སྔ་མ་ཉིད་ལའོ། །འོ་ན་དེ་ཉིད་ལས་དེ་འགྲུབ་པོ་ཞེ་ན། དེས་ཞེས་སྨོས་ཏེ། དྲན་པ་ནི་ཚད་མ་ཡིན་ནོ། །ཅིའི་ཕྱིར་ཞེ་ན་རང་རིག་ཕྱིར་ནའོ། །དེ་ལྟར་དྲན་པས་རྒྱུ་ཉིད་དུ་ངེས་པ་གསལ་ནས། འབྲས་བུ་ཉིད་དུ་ཤེས་པ་ཡང་སེལ་བ་ནི་གང་གི་ཕྱིར་བ་ཙམ་དེ་རང་རིག་པ་ཙམ་ལ་མངོན་སུམ་ཡིན་ནོ། །རང་རིག་ལ་ནི་བདག་ཉིད་རིག་པ་ལའོ། །དེའི་ཕྱིར་དྲན་པ་དེས་ད་ལྟར་བ་དེ་རིག་པ་ཡོད་པ་མ་ཡིན་ནོ། །ཇི་ལྟར་ཞེ་ན། གཞན་གྱི་འབྲས་ཞེས་གསུངས་སོ། །དེའི་ཕྱིར་ཞེས་བྱ་བ་ནི་གཞན་གྱི་འབྲས་བུ་ཉིད་དུ་མ་གྲུབ་པའི་ཕྱིར་རོ། །ད་ནི་རྟོག་གེ་བ་དགའ་བར་བྱ་བའི་གཞལ་བྱའི་རྣམ་པར་རྟོག་པ་བརྗོད་པ་ནི། རྒྱུ་དང་འབྲས་བུའི་དངོས་པོ་འདི་ཞེས་བྱ་བའོ། །གཉི་ག་ཡོད་པའམ་མེད་པ་ལ་ཡང་རྒྱུ་དང་འབྲས་བུའི་དངོས་པོ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །རེ་ཞིག་འབྲས་བུ་མེད་པའི་ཕྱོགས་ལ་ནི། རྒྱུ་གཉི་ག་འགའ་ཡང་ཡོད་པ་མ་ཡིན་ནོ་ཞེས་སྟོན་པ་ནི། མེད་པ་རྟ་ཡི་རྭ་ཉིད་ལ། །ཞེས་བྱ་བའོ། །འདིར་གཞན་གྱི་ཚིག་གི་དོགས་པ་བསུ་བ་ནི། གལ་ཏེ་དེ་ནི་གཏན་མེད་ཕྱིར། །ཞེས་བྱ་བའོ། །རྟའི་རྭ་དེ་ལའོ། །འོ་ན་འབྲས་བུ་གང་ཞེ་ན། བཤད་པ་སྔར་མེད་པ་ནི་འབྲས་བུ་མིན་པ་མིན་ཏེ། འབྲས་བུ་ཁོ་ནའོ་ཞེས་བྱ་བའི་དོན་ཏོ། །
ལན་འདི་ཡང་ལན་ཉིད་ཅེས་བྱ་བའོ། །ཅིའི་ཕྱིར་ཞེ་ན། ཡོད་ན་ཞེས་གསུངས་སོ། །དེ་ནི་ཞེས་བྱ་བ་ནི་འབྲས་བུའོ། །ཅིའི་ཕྱིར་མེད་པ་ལ་སྔ་ན་མེད་པ་མི་རུང་ཞེ་ན། མེད་པའི་རི་བོང་རྭ་ལ་ནི། །ཞེས་གསུངས་སོ། །རི་བོང་གི་རྭ་ནི་མེད་པ་ཉིད་ཀྱིས་སྔར་མེད་པ་དང་བྲལ་བ་ཡིན་ནོ། །འབྲས་བུ་ཡང་མེད་པ་ཉིད་ཡིན་པ་དེས་ན་སྔ་མ་མེད་པ་དང་བྲལ་བར་འགྱུར་རོ། །མཐོང་བ་ཞེས་བྱ་བ་ནི་དོགས་པ་བསུ་བའོ། །འབྲས་བུ་ཡོད་པ་ཉིད་དུ་ཤེས་པས་ན་སྔ་མ་མེད་པར་རྟོགས་པ་ཡིན་གྱི། གཞན་དུ་ནི་མ་ཡིན་ཞེ་ན། ལན་ནི་ཕན་ཚུན་བསྟེན་པར་ཞེས་བྱ་བའོ། །དེ་ཉིད་གསལ་བར་བྱེད་པ་ནི་ཇི་སྲིད་ཅེས་བྱའོ། །ཇི་སྲིད་དུ་ཞེས་བྱ་བ་ནི་རྣམ་པར་འབྲེལ་པའོ། །གལ་ཏེ་འཇིམ་གོང་དང༌། དབྱུག་པ་ལ་སོགས་པ་རྒྱུར་འདོད་པའོ། །འབྲས་བུ་སྟོང་པའི་མཚན་ཉིད་ཀྱི་མེད་པ་ཁྱབ་པར་མེད་པ་ནི། རྒྱུ་རྟོགས་པ་ཉིད་ཀྱི་རྟོགས་པ་ཡིན་ཏེ། དེས་ཕན་ཚུན་བསྟེན་པ་ཉིད་མ་ཡིན་ནོ་སྙམ་དུ་དོགས་པ་བསུ་བ་ནི་གལ་ཏེ་ཞེས་བྱ་བའོ། །འདི་ཡང་སྔར་བཤད་པའི་ཉེས་པ་ལས་མི་འདའོ། །དེ་ལྟ་ན་ཡང་དེ་ཡལ་བར་དོར་ནས། སུན་འབྱིན་པ་གཞན་བརྗོད་པ་ནི། སྟོང་ཉིད་དེ་ནི་ཞེས་བྱ་བའོ། །དེ་དང་ཡང་ཞེས་བྱ་བ་ནི་རྒྱུ་མ་ཡིན་པ་དང་ངོ༌། །དེའི་ནི་རྒྱུ་མ་ཡིན་པ་དེའི་འོ། །གཞན་པ་དག་ཀྱང་ཞེས་བྱ་བ་ནི་རྒྱུ་མ་ཡིན་པ་དག་གོ །དེ་དང་ཡང་ནི་རྒྱུ་མ་ཡིན་པ་དང་ཡང་ངོ༌། །དེའི་རྗེས་སུ་འགྲོ་བའི་ཞེས་བྱ་བ་ནི་དོགས་པ་བསུ་བའོ། །བཤད་ཟིན་ཏོ་ཞེས་བྱ་བ་ནི་སྐད་ཅིག་མ་དང་གཞན་གྱི་ཕྱོགས་དག་ལ་རྗེས་སུ་འགྲོ་བ་དང་ལྡོག་པ་མེད་དོ་ཞེས་སོ། །འདིས་ནི་འབྲས་བུ་སྟོང་པའི་རང་བཞིན་སྔ་ན་མེད་པ་ཉིད་ཡིན་པ་ལ། འབྲས་བུ་ཉིད་ཧ་ཅང་ཐལ་བ་ཡིན་ནོ་ཞེས་བསྟན་པ་ཡིན་ནོ། །ད་ནི་སྔ་ན་མེད་པ་དེ་ནི་ཚད་མས་བསལ་བ་ཡིན་ནོ་ཞེས་བརྗོད་པ་ནི་སྔ་ན་མེད་པ་ཞེས་བྱ་བ་ལ་སོགས་པའོ། །དེ་ལྟར་ཞེས་བྱ་བ་སྔ་ན་མེད་པར་འགྱུར་རོ། །དེ་ཡང་ཞེས་བྱ་བ་འདིས་འབྲས་བུ་ཡང་ངོ༌། །འབྲས་བུ་ཉིད་ལ་སོགས་པ་མེད་ན་ཐམས་ཅད་མེད་པར་ཐལ་བའི་ཕྱིར་ན། རྟོག་པ་དང་འགལ་བ་མ་ཡིན་ཏེ། རྟོག་པ་ནི་སྔོན་པོ་ལ་སོགས་པ་ཙམ་གྱི་ཡུལ་ཅན་ཡིན་པའི་ཕྱིར་རོ་ཞེས་བརྗོད་པ་ནི། དེའི་ཕྱིར་ཚད་ཡོངས་སུ་ཞེས་བྱ་བའོ། །རང་བཞིན་སྔོན་པོ་ཉིད་ལ་སོགས་པར་རོ། །སྔོན་པོ་ལ་སོགས་པ་དེ་ལའོ། །མངོན་སུམ་ནི་སྔ་ན་མེད་པ་ལ་
སོགས་པ་རྣམ་པར་འཇིག་པར་བྱེད་པ་ཉིད་དུ་མི་རིགས་སོ་ཞེས་བརྗོད་པ་ནི། སྔ་མ་དང་ཕྱི་མའི་ཞེས་བྱ་བའོ། །དེ་ལྟར་མེད་པ་འབྲས་བུ་ཉིད་ཡིན་པ་བསལ་ནས། ཡོད་པ་ཡང་ཁོ་ན་འབྲས་བུ་ཡིན་ཞེས་གཞན་གྱིས་བསལ་བའོ། །རྒྱུའི་ནུས་པ་འགའ་ཞིག་ལ་ཡོད་པ་དང་མེད་པ་ཁོ་ན་ཉེ་བར་གནས་པ་ཡིན་ཏེ་གཞན་ནི་མེད་དོ་ཞེས་ལན་གདབ་པ་ནི། བལྟས་མཉན་ཞེས་བྱ་བའོ། །བལྟས་ཞེས་བྱ་བ་ནི་མིག་གི་དབང་པོས་སོ། །མཉན་པ་ནི་རྣ་བའི་དབང་པོས་སོ། །ཤེས་བྱས་ནས་ཞེས་བྱ་བ་ནི་དེ་ལས་གཞན་པའི་དབང་པོའམ། རྗེས་སུ་དཔག་པ་མཐོང་བྱེད་ལ་ཅི་སྟེ་མེད་པ་ཉད་ད། །ཅིའི་ཕྱིར་ཞེ་ན་བླུན་ཕྱིར་རོ། །དེ་ནས་བརྟགས་ནས་མི་བྱེད་པའི་ཕྱིར་འབྲས་བུ་ཡོད་པ་མ་ཡིན་ནོ་ཞེས་དགོངས་པའོ། །གལ་ཏེ་དེ་ལྟ་ན་ཡང་མེད་པ་སྐྱེ་ན་མེད་པར་ཁྱད་པར་མེད་པའི་ཕྱིར་མེད་པ་ཐམས་ཅད་སྐྱེ་བར་འགྱུར་ན་དེ་ལྟར་ན་ཡང་མ་ཡིན་ཏེ། དེའི་ཕྱིར་རྒྱུ་ལས་འབྲས་བུ་ཡོད་པ་ཡིན་ནོ་ཞེ་ན་བཤད་པ། རྒྱུའི་རང་བཞིན་དེ་འདྲ་བ་གང་ཡིན་པ་དེ་ནི་རྒྱུ་ལ་རག་ལས་པ་ཡིན་པར་བྱེད་དོ། །དེ་འདྲ་བ་ཞེས་བྱ་བ་འབྲས་བུ་མེད་པ་འགའ་ཞིག་གི་རྒྱུ་ཡིན་གྱི། ཐམས་ཅད་ཀྱི་མ་ཡིན་པའོ། །དེས་ན་ཧ་ཅང་ཐལ་བ་མེད་པའི་ཕྱིར་ན་འབྲས་བུ་སྔ་ན་ཡོད་པ་མ་ཡིན་ནོ་ཞེས་དགོངས་པའོ། །ཡང་ན་འབྲས་བུའི་རང་བཞིན་རྒྱུ་ལ་རག་ལས་པར་མཐོང་བ་གང་ཡིན་པའོ། །དེ་འདྲ་བ་ཞེས་བྱ་བ་ནི། རྒྱུའི་བདག་ཉིད་ལ་མེད་པ་ཉིད་དོ། །འདོད་པ་ནི་ཤེས་པ་སྟེ་ངེས་པ་ཞེས་བྱ་བའི་དོན་ཏོ། །འོ་མ་ལ་ནི་ཞོའི་རང་བཞིན་མེད་པ་ཉིད་དུ་ངེས་པ་ཡིན་ནོ། །ནུས་པའི་རང་བཞིན་དུ་གནས་པ་ཡང་དེ་ཉིད་གནས་པ་མ་ཡིན་ནོ་ཞེས་བྱ་བ་ནི་བརྟགས་ཟིན་ཏོ། །མེད་པར་ཁྱབ་པར་མེད་པའི་ཕྱིར་ན་མེད་པ་ཐམས་ཅད་སྐྱེ་བ་ཡང་མ་ཡིན་ཏེ། རྒྱུའི་ནུས་པ་རང་གི་རྒྱུ་ལ་རག་ལས་པ་ཅན་ཡིན་པའི་ཕྱིར་རོ། །དེས་ན་མེད་པ་སྐྱེ་བ་ཡིན་ནོ་ཞེས་བྱ་བ་འདིའི་དོན་ནི། མེད་དོ་ཅོག་གང་ཡིན་པ་དེ་སྐྱེས་པ་ཡིན་ནོ་ཞེས་བྱ་བ་ནི་མ་ཡིན་གྱི་འོན་ཀྱང་སྐྱེ་བ་གང་ཡིན་པ་དེ་ནི་མེད་པ་ཁོ་ན་ཡིན་ནོ་ཞེས་བྱ་བ་ཡིན་ནོ། །དེས་ན་རྒྱུ་དང་འབྲས་བུའི་དངོས་པོ་ཡོད་དོ་ཞེ་ན་ནི་འབྲས་བུ་མེད་པར་སྨྲ་བ་ཉིད་བླའོ། །གལ་ཏེ་དབང་ཕྱུག་རྒྱུ་ཡིན་པའི་ཕྱོགས་ལས་འབྲས་བུ་མེད་ན་མཐོང་ནས་བྱེད་པ་མི་སྲིད་པའི་ཕྱིར་འབྲས་བུ་ཡོད་པ་ཁོ་ན་ཡིན་ནོ་སྙམ་ན། གལ་ཏེ་དབང་ཕྱུག་རྒྱུ་ཡིན་ཡང་ཞེས་བྱ་བའོ། །
གལ་ཏེ་མེད་པ་ལ་ཤེས་པ་མེད་པའི་ཕྱིར་ཇི་ལྟར་དེའི་རྒྱུའི་སྦྱོར་བྱེད་ཡིན་ཞེ་ན། མེད་པ་ཤེས་པར་མི་འདོད་མིན། །ཞེས་སྨོས་ཏེ། མེད་པ་ཡང་ཤེས་པ་ཁོ་ནའོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། གང་ཕྱིར་དབང་པོ་ལས་འདས་བློ། །ཞེས་གསུངས་ཏེ། དེས་ན་འབྲས་བུ་མེད་པ་ཡང་དབང་པོ་ལས་འདས་པའི་ལྟ་བས་མཐོང་ནས་ངེས་པའི་རྒྱུ་ངེས་པར་སྦྱར་ནས་བྱེད་པ་ཁོ་ནའོ་ཞེས་བྱ་བའི་དོན་ཏོ། །དེ་ལྟ་ན་ཡང་མེད་པ་ཡང་བྱེད་པ་སྲིད་པས་འབྲས་བུ་ཡོད་པར་སྨྲ་བས་ཅི་བྱ་ཞེས་བརྗོད་པ་ནི་འདིར་འབྲས་བུ་ཞེས་བྱ་བའོ། །འདི་ཉིད་རྣམ་པར་འབྲེལ་པ་ནི་ཅི་ཐམས་ཅད་ཅེས་བྱ་བ་སྟེ། དབང་ཕྱུག་མེད་པ་འགོག་པའོ། །ཅིའི་ཕྱིར་འདི་མ་ཡིན་ཞེ་ན། ཡོད་པ་ཉིད་ཅེས་བྱ་བའོ། །དབང་ཕྱུག་དང་བཅས་པ་འགོག་པ་ནི་གཅིག་ཡོད་པ་ཉིད་ལ་བརྟེན་ནས་ཞེས་བྱ་བའོ། །དབང་ཕྱུག་དང་བཅས་པ་དང་ཅིག་ཤོས་དག་མཚུངས་པར་དོགས་པ་བསུ་བ་ནི། ཐམས་ཅད་སྔ་ན་ཡོད་དོ་ཞེ་ན་ནི་ཞེས་བྱ་བའོ། །ཕྱོགས་གཉི་ག་ལ་ལན་ཡང་མཚུངས་པར་བརྗོད་པ་ནི་ཐམས་ཅད་ཀྱི་ཚེ་དམིགས་པར་ཞེས་གསུངས་སོ། །ཐམས་ཅད་ཀྱི་ཚེ་ཞེས་བྱ་བ་ནི་ཐམས་ཅད་དུ་ཞེས་བྱ་བ་འདི་ཉེ་བར་མཚོན་བྱེད་ཡིན་ནོ། །གལ་ཏེ་རྒྱུ་ངེས་པའི་ཕྱིར་ན་འབྲས་བུ་རྣམས་ཡུལ་ལ་སོགས་པར་ངེས་པ་ཡིན་ཏེ་དེས་ན་འགྲོ་བ་འཆོལ་བ་གནས་པ་མ་ཡིན་ནོ་ཞེས་དོགས་པ་བསུ་ནས་བཤད་པ་ནི། དམིགས་པར་བྱེད་པ་རྣམས་ཞེས་བྱ་བ་ལ་སོགས་པའོ། །དམིགས་པར་བྱེད་པ་ནི་རྒྱུ་སྟེ། འབྲས་བུ་དམིགས་པ་ཉིད་དུ་བྱེད་པ་ཞེས་བྱ་བས་སོ། །དེ་ལྟར་འབྲས་བུ་ཡོད་པ་དང་མེད་པ་ཉིད་དུ་རྣམ་པར་བརྟགས་ནས་རྒྱུ་རྣམ་པར་རྟོག་པར་བྱེད་པ་ནི། གཞན་ཡང་ཞེས་བྱ་བ་ནིའོ། །མེད་པའི་རྒྱུ་ལས་ཞེས་བྱ་བ་ནི་ཞིག་པ་ལས་སོ། །རྣམ་པར་རྟོག་པ་དང་པོ་སུན་འབྱིན་པ་ནི་མེད་པའི་རྒྱུ་ལས་ཞེས་བྱ་བའོ། །མེད་པ་ཐམས་ཅད་འབྲས་བུ་བྱེད་པ་ཉིད་དུ་འགྱུར་རོ་ཞེས་བྱ་བའི་དོན་ཏོ། །འོན་ཏེ་སྔར་བྱུང་བ་ལས་འབྲས་བུ་སྐྱེའོ། །གཏན་མེད་ལས་ནི་མ་ཡིན་ནོ་ཞེ་ན་ཞིག་ནས་ཞེས་བྱ་བའོ། །ཞིག་ནས་མེད་པ་ནི་འབྲས་བུའི་སྔོན་དུ་རྒྱུ་ཞིག་པའི་ཕྱིར་རོ། །གཏན་ནས་མེད་པ་ནི་རི་བོང་གི་རྭའོ། །ཁྱད་པར་ཡོད་པས་དོགས་པ་བསུ་བ་ནི། གལ་ཏེ་སྔོན་ཡོད་མྱོང་བ་ཞེས་བྱ་བའོ། །གང་གི་ཚེ་ཞེས་བྱ་བ་ནི་ལན་ནོ། །གཞན་
གྱི་ཚེ་ཞེས་བྱ་བ་ནི་མེད་པའི་ཚེའོ། །གཞན་གྱི་ཚེ་རྒྱུ་ཡིན་ན་ནི་མེད་པ་ལ་ཡང་རྒྱུ་ཉིད་དུ་ཐལ་བའོ། །དེ་ཉིད་ཀྱི་ཕྱིར་ལེགས་པར་སྨྲས་པ་ཡིན་ནོ་ཞེ་ན་གཏན་ཚིགས་སུ་བྱས་སོ། །ཇི་ལྟར་འདི་ལེགས་པར་སྨྲས་པ་ཡིན་ཞེ་ན། གང་གི་ཕྱིར་འདི་ལྟར་འགྱུར་ཏེ་ཞེས་བྱ་བའོ། །ཡོད་པ་ནི་རང་གི་དུས་བཞིན་དུ་དུས་གཞན་དུ་ཡང་རྒྱུ་མ་ཡིན་གྱི། མེད་པ་ནི་སྔར་ཞིག་པ་བཞིན་དུ་རྒྱུར་འགྱུར་རོ་ཞེས་བྱ་བའི་དོན་ཏོ། །འོན་ཏེ་བྱེད་པ་ཡོད་པའི་ཕྱིར་ཡོད་པ་རྣམས་ཁོ་ན་རྒྱུ་ཉིད་ཡིན་གྱི་མེད་པ་དག་ནི་མ་ཡིན་ཏེ། དེ་མེད་པའི་ཕྱིར་རོ་ཞེ་ན། དེ་དང་ཞེས་གསུངས་སོ། །འདི་དག་རྣམས་ནི་སྔར་བྱུང་བའི་རྒྱུར་འདོད་པ་རྣམས་སོ། །དེས་ན་གཉི་ག་ལ་བྱེད་པ་མི་སྲིད་པའི་ཕྱིར་བྱེད་པ་ཡོད་པ་ལས་ཡོད་པ་རྒྱུ་ཡིན་པར་ཇི་ལྟར་འགྱུར། བྱེད་པ་ཡོད་པ་དེ་ལྟ་ན་ཡང་ཡོད་པ་དག་ནི་རྒྱུར་མི་འཐད་དོ་ཞེས་བརྗོད་པ་ནི་གལ་ཏེ་བྱེད་པས་ཞེས་བྱ་བའོ། །གང་ལས་འགྱུར་ཞེས་བྱ་བ་ནི་རྒྱུ་འདྲི་བའོ། །གང་ལས་བྱུང་བ་དེ་ལས་སྐྱེད་པར་དོགས་པ་བསུ་བ་ནི་བྱེད་པ་ན་ཡང་ཡིན་ལ། དོན་ཡང་ཡིན་པའི་ཕྱིར་དེ་སྐད་ཅེས་བྱ་བ་ནི་དེ་ལས་སོ། །འདི་སུན་དབྱུང་བའི་ཕྱིར་དེར་ཅི་ཞེས་གསུངས་སོ། །བྱེད་པ་བསྐྱེད་པར་བྱ་བ་དེར་བྱེད་པ་ལྡན་པའི་དོན་ལས་བྱེད་པ་གཞན་ཐ་དད་པ་ཡིན་ནམ་ཅི། གཞན་མ་ཡིན་པ་ཉིད་ནས་མདུན་ནས་སེལ་བར་འགྱུར་རོ། །གཞན་ཁོ་ནའོ་ཞེ་ན་གལ་ཏེ་དེ་ལ་འང་ཞེས་གསུངས་སོ། །གལ་ཏེ་བྱེད་པ་བསྐྱེད་པའི་བྱེད་པ་དེ་ལ་ཡང་བྱེད་པ་གཞན་ཡོད་ན་དེའི་ཚེ་དོན་ཏེ། ཆོད་པར་འགྱུར་བ་ཡིན་ཏེ། འབྲས་བུ་བྱེད་པ་པོ་ཉིད་དུ་མི་འགྱུར་ཞེས་བྱ་བའི་དོན་ཏོ། །གཞན་གྱི་དོགས་པ་བསུ་བ་ནི། བྱེད་པ་ཉིད་ལས་ཞེས་བྱ་བ་སྟེ། དོན་ལས་ནི་མ་ཡིན་པའི་ལམ་ནི་ཤི་ཡང་ཞེས་བྱ་བའོ། །འདི་ཁས་ལེན་སུན་འབྱིན་པ་གཞན་ཡང་འཇུག་གོ་ཞེས་གསུངས་པ་ནི་དེ་ལྟར་ཞེས་བྱ་བའོ། །འོན་ཏེ་འབྲས་བུའི་དུས་ན་རྒྱུ་ཡོད་པ་ཡིན་ན་དེ་ནས་ཇི་ལྟར་ཞིག་པ་ལས་འབྲས་བུ་འབྱུང་ཞེ་ན་བྱེད་འཕྲེང་འདི་ནི་ཞེས་གསུངས་སོ། །དེ་ལྟར་བྱེད་པ་ཐ་དད་པ་བསལ་ནས་འདི་དག་རྣམས་ཀྱི་འབྱུང་བ་གང་དེ་ཉིད་བྱ་བ་ཡིན་ཞེས་བྱ་བའི་ཚུལ་གྱིས་བྱེད་པ་ཐ་དད་པ་ཡིན་པ་བཟློག་པའི་ཕྱིར་དོགས་པ་བསུ་བ་ནི། དེ་སྟེ་རང་བཞིན་ཞེས་བྱ་བའོ། །དེ་ཚེ་ཞེས་བྱ་བ་ནི་རང་བཞིན་གྱི་དུས་སུའོ། །དེས་ན། ཤི་ན་འབྲས་བུ་འབྱུང་བར་མི་ཐལ་ལོ། །ཞེས་བྱ་བ་ནི་གཞན་གྱི་བསམ་
པའོ། །རྩོད་པ་རྗེས་སུ་བརྗོད་ནས་སུན་འབྱིན་པ་རྗོད་པར་བྱེད་པའི་དུས་སུ་བྱ་བའོ། །རྒྱུ་ཡོད་པའི་དུས་སུ་འབྲས་བུ་ཡོད་པ་མ་ཡིན་ན་ཞེས་འབྲེལ་ཏོ། །གྲུབ་པའི་མཐའ་གསུང་བ་ནི་གནའ་ཞིག་ཅེས་བྱ་བའོ། །འདིའི་ལན་གྱི་དོགས་པ་བསུ་བ་ནི། དེའི་དེ་མ་ཐག་པ་འབྱུང་བ་ཞེས་བྱ་བའོ། །དེའི་དེ་མ་ཐག་ཏུ་འབྱུང་བའི་འབྲས་བུ་སྐྱེ་བའི་དུས་སུ་རྒྱུ་ཡོད་པ་དེ། དེས་ན་ཞིག་ནས་རིང་དུ་ལོན་པ་ལས་འབྲས་བུ་འབྱུང་བ་མ་ཡིན་ཞེས་བྱ་བར་དོགས་པའོ། །ལན་བཤད་པ་ནི་སྐྱེ་བ་ཞེས་བྱ་བའོ། །དུས་མཉམ་པ་དག་ནི་རྒྱུ་དང་འབྲས་བུའི་དངོས་པོ་མ་ཡིན་ཏེ། འབྲས་བུའི་དུས་ན་མེད་པ་ནི་རྒྱུ་ཉིད་དུ་མི་འཐད་པའི་ཕྱིར་རོ། །དེའི་དུས་ན་ཡོད་པ་ཡིན་ན་ཡང་ཇི་ལྟར་རྒྱུ་ཉིད་དུ་འགྱུར་ཏེ། རྒྱུ་བཞིན་དུ་འབྲས་བུ་ཡང་ལྟོས་པ་མེད་པའི་ཕྱིར་རོ་ཞེས་དཔྱོད་པར་འགྱུར་རོ། །དེས་ན་རྒྱུ་དང་འབྲས་བུའི་དངོས་པོ་ནི། །ཡོད་མེད་ཉིད་ལ་རྟོགས་པ་མེད། །ཅེས་བྱ་བ་འདི་གནས་སོ། །གཉི་ག་ཡང་ཡོད་པ་མ་ཡིན་ཏེ། གཉི་གའི་རང་བཞིན་ནི་འཆད་པར་འགྱུར་བས་བཟློག་པའི་ཕྱིར་རོ་ཞེས་བརྗོད་པ་ནི། ཅི་ཡང་ཡིན་སྨྲ་སུན་འབྱིན་པས། །ཞེས་བྱ་བས་སོ། །གལ་ཏེ་སྔོན་པོར་སྣང་བའི་ཤེས་པ་རེས་འགའ་བ་དབང་པོ་ལ་སོགས་པ་ལས་སྐྱེ་བ་རང་དང་རྗེས་སུ་མཐུན་པའི་རྒྱུ་གོ་བར་བྱེད་དོ། །ཡིན་ནོ་ཞེས་དོགས་པ་བསུ་བ་ནི་ཅི་སྟེ་ཡང་ཞེས་བྱ་བའོ། །སྔ་མར་ཞེས་བྱ་བ་ནི་སྔོན་འབྱུང་བར་རོ། །མངོན་སུམ་གྱིས་མཐོང་བའི་དངོས་པོ་འདི་ནི་མངོན་སུམ་གྱི་རྒྱུ་ཡིན་ནོ། །རྗེས་སུ་དཔག་པས་ངེས་པས་གཟུང་བར་མི་ནུས་སོ་ཞེས་ལན་འདེབས་པ་ནི་རྣམ་པར་ཤེས་པའི་མཚན་ཉིད་ཀྱི་འབྲས་བུ་ལྡོག་པའི་སྟོབས་ལས་བྱུང་བའི་རྗེས་སུ་དཔག་པ་ལས་རིག་པ་སྔ་མ་དང༌། མངོན་སུམ་ལ་ནི་སྣང་གྱུར་པ་སྟེ། རང་གི་རྣམ་པར་གནོད་པས་མངོན་སུམ་ལ་སྣང་བའི་ངང་ཚུལ་གང་ལ་ཡོད་པ་ཐུན་མོང་མ་ཡིན་པ་མངོན་སུམ་དང་རྗེས་སུ་དཔག་པ་དག་གི་ཡུལ་ཕན་ཚུན་འདྲེ་བ་མེད་པ་ན་སྟེ། འཆོལ་པ་མེད་པ་ནའོ། །འཆོལ་བ་ན་ནི་རྗེས་སུ་དཔག་པ་མངོན་སུམ་དུ་འགྱུར་རོ། །དེ་ལྟར་གྱུར་པ་དེའི་ཚེ་རྗེས་སུ་དཔག་པ་དེ་ལས་ནི་རྗེས་སུ་དཔག་པར་གྱུར་པ་ཉིད་མངོན་སུམ་གྱི་འབྲས་བུ་ཅན་དུ་རྟོགས་པར་འགྱུར་གྱི་མངོན་སུམ་ལ་སྣང་བ། མངོན་སུམ་དེ་ཉིད་ཀྱི་འབྲས་བུ་ག་ལ་ཡོད་པ་དེའི་འབྲས་
བུ་ཇི་ལྟར་རྟོགས་པར་འགྱུར། གལ་ཏེ་ཞེས་བྱ་བ་འདི་འཆད་པའོ། །འོན་ཏེ་འདི་ཡང་རྗེས་སུ་དཔག་པས་རྟོགས་སོ་ཞེ་ན། རྗེས་སུ་དཔག་པ་ནི་ཞེས་བྱ་བའོ། །ཅིའི་ཕྱིར་རྗེས་སུ་དཔག་པས་དེ་ལྟར་མི་རྟོགས་སྙམ་པའི་དོགས་པ་སེལ་བས་ཕན་ཚུན་འདེ་བ་མེད་པ་ནི་ཞེས་བྱ་བ་འགྲེལ་པ་བྱེད་པས་ན། ཉམས་སུ་མྱོང་བ་ཉིད་ལ་ནི་ཞེས་བྱ་བ་སྟེ། ཐུན་མོང་མ་ཡིན་པ་མྱོང་བ་ཉིད་ལའོ། །ཅིའི་ཕྱིར་ཞེ་ན། དེའི་ཡུལ་ནི་ཞེས་གསུངས་སོ། །འོ་ན་མངོན་སུམ་རྗེས་སུ་དཔག་པ་ལ་འཇུག་པ་ན་རྗེས་སུ་དཔག་པ་དང༌། ཅིག་ཤོས་ཀྱི་རྒྱུ་ཡིན་པར་རྟོགས་པར་ནུས་སོ་ཞེས་དོགས་པ་བསུ་ནས་རྗེས་སུ་དཔག་པར་བྱ་བ་ལ་ཞེས་གསུངས་སོ། །དེས་ན་རྗེས་སུ་དཔག་པར་བྱ་བ་ནི་མངོན་སུམ་གྱི་རྒྱུ་ཡིན་པར་རྟོགས་པར་མི་ནུས་སོ་ཞེས་བྱ་བའི་དོན་ཏོ། །རྗེས་སུ་དཔག་པས་དོན་གྱི་རང་བཞིན་རྟོགས་ན་ནི། ལྐོག་གྱུར་ཉིད་དུ་མི་འཐད་དོ། །ཞེས་གསུངས་པ་ནི་རྟོགས་པར་འགྱུར་བ་ཉིད་ནི་ཞེས་བྱ་བའོ། །ལྐོག་ཏུ་གྱུར་པ་ཉིད་དུ་ཞེས་བྱ་བ་ནི་དོགས་པ་བསུ་བའོ། །དེ་ནི་མེད་དེ་ཞེས་བྱ་བ་ནི་ལན་ནོ། །གལ་ཏེ་རྗེས་སུ་དཔག་པས་དོན་རང་གི་ངོ་བོ་རྟོགས་ན་དེའི་ཚེ་ལྐོག་ཏུ་གྱུར་པ་ཉིད་མེད་པ་ཁོ་ནའོ་ཞེས་བྱ་བའི་དོན་ཏོ། །འོན་ཏེ་ངོ་བོ་ལ་གསལ་བ་དང་མི་གསལ་བའི་རང་བཞིན་གཉིས་ཡོད་པ་ཡིན་ནོ། །དེ་ལ་མི་གསལ་བ་ནི་རྗེས་སུ་དཔག་པའི་ཡུལ་ཡིན་ནོ་ཞེས་དོགས་པ་བསུ་བ་ནི། རྣམ་པར་མི་གསལ་སྣང་ཡིན་ན། །ཞེས་བྱ་བའོ། །མི་གསལ་བ་སྣང་བའི་རྣམ་པ་གང་ལ་ཡོད་པའི་དོན་དེ་ནི་ལྐོག་ཏུ་གྱུར་པ་ཡིན་ཏེ། དེས་ལྐོག་ཏུ་གྱུར་པ་ཉིད་མེད་པར་ཇི་ལྟར་འགྱུར་སྙམ་དུ་བསམས་པའོ། །འདིར་ཡང་མངོན་སུམ་གྱི་རང་བཞིན་ཉིད་ཡིན་ཏེ་དེས་ན་མངོན་སུམ་ལ་རང་བཞིན་གཉིས་སྣང་བར་འགྱུར་རོ་ཞེས་ལན་འདེབས་པ་ནི་མངོན་སུམ་དེ་ལྟ་ན་ཅིས་མི་འདོད་ཅེས་བྱ་བའོ། །མི་གསལ་བར་སྣང་བའི་དོན་གང་ཡིན་པ་དེ་མངོན་སུམ་དུ་ཅི་སྟེ་མི་འདོད་དེ་འོན་ཀྱང་འདི་ནི་མངོན་སུམ་ཉིད་ཡིན་ནོ། །དེས་ན་དེའི་རང་བཞིན་འཛིན་པའི་མངོན་སུམ་ཡང་རྗེས་སུ་དཔག་པར་ཐལ་བར་འགྱུར་རོ་ཞེས་དགོངས་པའོ། །གལ་ཏེ་ཡང་གཉིས་ཅིག་ཅར་མི་སྣང་བ་དེ་ལྟ་ན་ཡང་ཚུ་རོལ་དང་ཕ་རོལ་གྱི་ཆ་འཛིན་པ་བཞིན་དུ་རིམ་གྱིས་རྟོགས་པ་ཡང་མངོན་སུམ་ཁོ་ན་ཡིན་ནོ། །བཤད་པ་ནི། རང་བཞིན་གཉིས་ནི་ཞེས་བྱའོ། །རྗེས་སུ་དཔག་པ་ཡང་མི་གསལ་བའི་དངོས་པོ་
རང་བཞིན་རེག་པའི་ཕྱིར་ན་མངོན་སུམ་ཁོ་ནའོ་ཞེས་བྱ་བའི་དོན་ཏོ། །ཁྱད་པར་གཞན་གྱི་དབང་གིས་ཞེས་བྱ་བ་ནི་ཐག་ཉེ་བར་རིང་བ་ལ་སོགས་པའི་ཁྱད་པར་གཞན་གྱི་མཐུས་སོ། །རང་བཞིན་ན་ཡང་མ་རྟོགས་པའི་དངོས་པོའི་རང་བཞིན་ཉིད་རྟོགས་པ་མེད་དོ་ཞེས་ལན་འདེབས་པ་ནི་གལ་ཏེ་ཁྱད་པར་ཞེས་བྱ་བའོ། །ཅི་སྟེ་སྔོ་ལ་སོགས་པའི་ཞེས་བྱ་བའོ། །གཞན་གྱིའོ་རང་གི་རང་བཞིན་ཞེས་བྱ་བ་ནི་ལན་ནོ། །དེའི་ཕྱིར་རྗེས་སུ་དཔག་པ་ཉིད་ཀྱང་མངོན་སུམ་དུ་འགྱུར་རོ། །རྗེས་སུ་དཔག་པ་ལ་དོན་མངོན་སུམ་དུ་བྱེད་པ་དང༌། སྤོང་བའི་དོགས་པ་བསུ་བ་ནི་རྗེས་སུ་དཔག་པ་ཉིད་ནི་དབང་པོ་དང་ཞེས་བྱ་བའོ། །ཡུལ་དབང་པོ་དང་མ་ཕྲད་པའི་ཕྱིར་རྗེས་སུ་དཔག་པ་མངོན་སུམ་པ་ཡིན་ནོ་ཞེས་བྱ་བའི་དོན་ཏོ། །ལན་ནི་ཡུལ་དབང་པོ་དང་ལྡན་པ་ཡང་མངོན་སུམ་བཞིན་དུ་དངོས་པོའི་རང་བཞིན་འཛིན་པ་ལས་རྗེས་སུ་དཔག་པས་ཅི་མི་དཔོག་སྟེ། འོན་ཀྱང་དཔོག་པ་ཁོ་ནའོ་ཞེས་བྱ་བའི་དོན་ཏོ། །འོན་ཏེ་དེ་ལས་བཟློག་པར་འགྲུབ་པ་ན་འདི་ཇི་ལྟར་རྗེས་སུ་དཔག་སྙམ་ན། དབང་པོ་དང་བྲལ་བ་ཉིད་ཅེས་བྱ་བའོ། །ཅིའི་ཕྱིར་ཞེ་ན། རྗེས་སུ་དཔག་པས་ཞེས་སྨོས་སོ། །དེའི་ནི་དོན་གྱིའོ། །འོན་ཏེ་དངོས་པོ་མེད་པའི་ཕྱིར་ཞེས་བྱ་བ་ནི་རྗེས་སུ་དཔག་པའི་ཡུལ་ལོ། །དབང་པོའི་ཞེས་བྱ་བ་ནི་ལན་ནོ། །གལ་ཏེ་ཇི་ལྟར་ཤེས་པ་དབང་པོ་ལ་སོགས་པ་རྟག་པར་རྗེས་སུ་དཔག་པར་བྱ་བ་དཔོག་པ་ན། དབང་པོ་དང་འབྲེལ་པ་རྗེས་སུ་དཔོག་པ་དེ་བཞིན་དུ་འཇུག་པའི་ཡུལ་འདི་ལ་ཡང་རྗེས་སུ་དཔོག་པ་ཡིན་པ་ཁོ་ནའོ་སྙམ་དུ་དོགས་པ་བསུ་བ་ནི། ཅི་སྟེ་དབང་པོ་དང་འབྲེལ་པར་ཞེས་བྱ་བའོ། །རྟག་ཏུ་རྗེས་སུ་དཔག་པར་བྱ་བ་བཞིན་དུ་རྗེས་སུ་དཔག་པར་བྱ་ཡུལ་གཞན་ཡང་འཇུག་པའི་ཡུལ་དུ་མི་འགྱུར་ལ་དེས་ན་འཇུག་པར་བྱེད་པ་མ་ཡིན་པའི་རྗེས་སུ་དཔག་པ་ཚད་མར་མི་འགྱུར་རོ་ཞེས་ལན་འདེབས་པར་ནི་འདིས་ནི་ཞེས་བྱ་བའོ། །གང་གི་ཕྱིར་རྗེས་སུ་དཔག་པས་འཇུག་པར་མི་བྱེད་པས་ན་དོན་མེད་དོ། །ཅིའི་ཕྱིར་འཇུག་པར་མི་བྱེད་སྙམ་ན་ལྷ་མིན་ཞེས་གསུངས་སོ། །དེ་ལྟ་ན་ཡང་འཇུག་པར་འགྱུར་རོ་སྙམ་ན། དོན་མེད་ཉིད་ཅེས་སྨོས་ཏེ། འབྲས་བུ་མེད་པ་ཉིད་དོ། །འོ་ན་ཇི་ལྟར་འཇུག་སྙམ་ན། མཁོ་བ་དོན་དུ་གཉེར་བར་ཞེས་བྱ་བ་ལ་སོགས་པ་གསུངས་སོ། །ཚད་མ་མ་ཡིན་
པ་ཉིད་དུ་འགྱུར་རོ་ཞེས་བྱ་བ་ནི་སྐབས་ཀྱི་རྗེས་སུ་དཔོག་པའོ། །དེ་དང་ཞེས་བྱ་བ་ནི་ཕྱིས་འབྱུང་བས་སོ། །ལན་ནི་དེ་ཡང་མི་བདེན་ཏེ་ཞེས་བྱ་བའོ། །དབང་པོ་དང་འབྲེལ་པར་འགྱུར་བར་འཛིན་ན། དེའི་ཁྱད་པར་ཅན་གྱི་དོན་གྱི་རང་བཞིན་ཉིད་རྗེས་སུ་དཔག་པ་ལས་རྟོགས་པ་ཡིན་གྱི་སྔ་མའི་རང་བཞིན་ནི་མ་ཡིན་ཏེ། དེས་རྒྱུ་ཉིད་དུ་རྟོགས་པར་མི་འགྱུར་རོ། །དེ་རྟོགས་པའི་དོན་དུ་རྗེས་སུ་དཔག་པ་ཉེ་བར་ལེན་པ་ཡིན་ན། དེ་མི་བྱེད་ན་ཇི་ལྟར་དོན་མེད་པར་མི་འགྱུར། དེས་ན་འབྲལ་བར་འགྱུར་བ་ནི་རྗེས་སུ་དཔོག་པ་མ་ཡིན་ནོ། །རང་གི་ངོ་བོས་རྟོགས་བཞིན་པ་ནི་འབྱུང་བར་འགྱུར་བ་ཉིད་དུ་འཐད་པ་ཡང་མ་ཡིན་ཏེ་ཞེས་གསུངས་པ་ནི་དེའི་ཚེ་ཞེས་བྱ་བའོ། །གལ་ཏེ་ཞེས་བྱ་བ་ནི་དོགས་པ་བསུ་བའོ། །རང་གི་ངོ་བོས་སྣང་ཡང་ད་ལྟར་བ་ཉིད་མ་ཡིན་ཏེ། འདས་པ་ལ་སོགས་པའི་རང་བཞིན་དུ་སྣང་བའི་ཕྱིར་རོ་ཞེས་བྱ་བའི་དོན་ཏོ། །མངོན་སུམ་གྱིས་མཐོང་བ་ལ་རྗེས་སུ་དཔག་པ་དྲན་པའི་རང་བཞིན་གྱིས་འཇུག་པ་ན་འདས་པ་ཉིད་རྗེས་སུ་དཔག་པའི་ཡུལ་དུ་འགྱུར་བ་མ་ཡིན་ཏེ། དེའི་ཡུལ་མ་ཡིན་པའི་ཕྱིར་ཞེས་ལན་འདེབས་པ་ནི་རྗེས་སུ་དཔག་པས་ཞེས་བྱ་བའོ། །ཅི་སྟེ་མི་རྟོགས་སྙམ་ན་འདི་ལྟར་ཞེས་བྱ་བའོ། །རྗེས་སུ་དཔག་པ་ནི་དྲན་པའི་རང་བཞིན་ཡིན་པའི་ཕྱིར་རོ་ཞེས་བྱ་བར་དགོངས་པའོ། །འོན་ཏེ་དེ་ལ་དེ་འཇུག་པ་ཡོད་དོ་ཞེ་ན། མངོན་སུམ་ཡང་ཞེས་གསུངས་སོ། །གང་གི་ཚེ་ཞེས་བྱ་བ་ནི་དོགས་པ་བསུ་བའོ། །དེ་ལྟར་ཞེས་བྱ་བ་ནི་རྗེས་སུ་དཔག་པའི་དུས་ནའོ། །འོ་ན་ནི་ཞེས་བྱ་བ་ནི་ལན་ནོ། །དེ་ལ་ཞེས་བྱ་བ་ནི་འདས་པའི་རང་བཞིན་ནོ། །དེ་ལྟ་ན་ཡིན་མོད་ཅི་སྐྱོན་ཞེ་ན། དེ་ལ་ཡང་ཞེས་གསུངས་སོ། །འདས་པའི་རང་བཞིན་སྐྱེས་པ་ལ་ནི་ནམ་ཡང་མངོན་སུམ་ཡོད་པ་མ་ཡིན་ནོ། །གཏན་ཚིགས་དེའི་ཕྱིར་ཇི་ལྟར་རྗེས་སུ་དཔོག་པ་གང་ཞིག་ལ་ཡང་མངོན་སུམ་གྱི་ཡུལ་མ་ཡིན་པ་དེ་ནི་དྲན་པ་མེད་དེ། ཉམས་མྱོང་ལས་ནི་དྲན་པ་འབྱུང་བ་ཞེས་བྱ་བ་ལུགས་ཡིན་པའི་ཕྱིར་རོ། །རྗེས་སུ་དཔག་པ་ཡང་དྲན་པ་ཡིན་པས་ཇི་ལྟར་མངོན་སུམ་གྱིས་མ་རྟོགས་པ་ལ་འབྱུང་བར་འགྱུར། འབྱུང་བར་འགྱུར་བ་ལ་ཡང་རྗེས་སུ་དཔོག་པ་མ་ཡིན་ཏེ། ནམ་ཡང་མངོན་སུམ་མ་ཡིན་པའི་ཕྱིར་རོ་ཞེས་གསུངས་པ་ནི་གང་ཡང་ཞེས་བྱ་བའོ། །དེ་ནི་འབྱུང་བར་འགྱུར་བ་ལའོ། །
མཚུངས་པ་ནི་འདས་པ་ཉིད་དང་འབྱུང་བར་འགྱུར་བ་ཉིད་དོ། །གཉི་ག་ཡང་ནམ་གྱི་ཚེ་ཡང་ཡུལ་མངོན་སུམ་གྱི་ཡུལ་ཉིད་མ་ཡིན་པའི་ཕྱིར་རོ། །གལ་ཏེ་སངས་རྒྱས་པ་ལ་ཡང་མངོན་སུམ་གྱི་རང་གི་ཡུལ་འདས་པའམ། མ་འོངས་པར་རིག་པ་མ་ཡིན་ཏེ། རང་གི་ཡུལ་ན་ཡོད་པ་ཉིད་ཀྱི་ཡུལ་ཅན་ཡིན་པའི་ཕྱིར་རོ། །དེ་རྗེས་སུ་དཔག་པ་དེའི་རྣམ་པ་ཅན་དུ་མི་འགྱུར་རོ་ཞེས་བརྗོད་པ་ནི་གལ་ཏེ་ཞེས་བྱ་བའོ། །འདི་ལྟར་ཞེས་བྱ་བ་འདི་འདས་པ་ཉིད་ལ་སོགས་པར་རོ། །དེའི་རྣམ་པ་ནི་འདས་པ་ལ་སོགས་པའི་རྣམ་པར་རོ། །སྣང་བ་ནི་རྗེས་སུ་དཔག་པའི་བདག་ཉིད་ཀྱི་ཤེས་པའོ། །ལན་ནི་མ་ཡིན་ཏེ་ཞེས་བྱ་བའོ། །སངས་རྒྱས་པ་དེ་ནིའོ། །དེ་ལྟ་ནི་འདས་པ་ལ་སོགས་པ་ཉིད་དུའོ། །གཞན་ཡང་ལས་ཀྱང་ནི་ཆགས་པ་ལ་སོགས་པས་སོ། །གང་གི་ཕྱིར་དེ་ལྟར་འཆད་པར་འགྱུར་བའི་རྒྱུ་དེས་ན་དོན་འཛིན་པར་འདོད་པའི་ཤེས་པ་ཡིན་ནོ། །རྣམ་པ་གཞན་དུ་ནི་འདས་པ་ལ་སོགས་པའི་རྣམ་པའོ། །གལ་ཏེ་དེ་ལྟ་ན་ཡང་འདས་པ་སྣང་བར་ཇི་ལྟར་འགྱུར་ཞེ་ན་བག་ཆགས་དང་འབྲལ་པ་དེས་ནའོ། །འདས་པའི་དུས་ཀྱི་རང་བཞིན་ལ་ནི་མངོན་མཐོང་བ་ལས་སོ། །འོངས་པའི་ཤེས་པ་ནི་རྗེས་སུ་དཔག་པའོ། །འདས་པར་ཞེས་པ་ནི་དོན་དམ་པ་ལ་འཛིན་པ་མ་ཡིན་པས་སོ། །ཡང་ན་བག་ཆགས་དང་འབྲེལ་པ་དེ་དགའ་བ་འདས་པ་མད་པའི་དུས་ཏེ། འབྱུང་བར་འགྱུར་བ་གང་ཡིན་པའོ། །དོན་གྱི་རང་བཞིན་དེ་ལས་འོངས་པའི་ཕྱིར་རྗེས་སུ་དཔག་པ་འདས་པར་ཞེན་པ་སྟེ་སྣང་བ་གསལ་བ་ཡོད་པ་དེ་ལ་དེ་སྐད་ཅེས་བྱ་བའོ། །དཔེར་ན་ཟླ་བ་གཅིག་ལས་འོངས་པ་རབ་རིབ་ལ་སོགས་པའི་དབང་གིས་ཟླ་བ་གཉིས་ཀྱི་རྣམ་པར་སྣང་བ་དེ་བཞིན་དུ་བག་ཆགས་ཀྱི་དབང་གིས་འདས་པ་མ་ཡིན་པ་ལས་འོངས་པ་ཡང་འདས་པའི་རྣམ་པར་སྣང་བ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རྗེས་སུ་དཔག་པའི་འདས་པའི་རྣམ་པ་ཅན་ཡིན་པ་ཡང་དོན་གྱི་རང་བཞིན་དེ་ཇི་ལྟར་འདས་པ་ཞེ་ན། དེ་ནི་འདས་པའི་ཞེས་གསུངས་སོ། །དེ་ཞེས་བྱ་བ་ནི་དོན་གྱི་རང་བཞིན་ཐུན་མོང་མ་ཡིན་པའོ། །དཔེར་ན་སྔོན་པོ་ཉིད་དུ་འཛིན་པས་སྔོན་པོ་ཉིད་དུ་ཡིན་པ་བཞིན་ནོ། །དེ་ཡང་མེད་པ་ཡིན་ནོ་ཞེས་བྱ་བ་ནི་རྗེས་སུ་དཔག་པས་བཟུང་བའི་དོན་གྱི་རང་བཞིན་ནོ། །ནི་ཞེས་བྱ་བ་ནི་གང་གི་ཕྱིར་ཏེ་དོན་གྱི་རང་བཞིན་དེའི་ད་ལྟར་
བ་ཉིད་དེ་ཐུན་མོང་མ་ཡིན་པ་ཉིད་ལ་ནི་རྗེས་སུ་དཔག་པ་ཚད་མ་མ་ཡིན་ཏེ་ལྷག་པར་ཞེན་པ་ཙམ་ཡིན་པའི་ཕྱིར་རོ། །གལ་ཏེ་ཚད་མ་མ་ཡིན་ན་འོ་ན་དོན་གྱི་རང་བཞིན་དེ་དེ་ལྟར་འཐོབ་སྟེ། མི་འཐོབ་པ་ཉིད་དོ། །ལན་ནི་ཡོད་པ་ཉིད་ཀྱི་ཕྱིར་རོ་ཞེས་བྱ་བའོ། །དོན་དམ་པར་རྗེས་སུ་དཔག་པའི་ཡུལ་ཡིན་པའི་ཕྱིར་ནི་དོན་གྱི་རང་བཞིན་མ་ཡིན་གྱི་འོན་ཀྱང་ཡོད་པ་ཉིད་ཀྱི་ཕྱིར་རོ། །གལ་ཏེ་དོན་གྱི་རྣག་བཞིན་རྗེས་སུ་དཔག་པའི་ཡུལ་མ་ཡིན་ན། དེ་ཡོད་པ་ཉིད་དུ་ཇི་ལྟར་བརྗོད་ཅེ་ན། ལན་དུ་མཐོང་བའི་ཞེས་བྱ་བའོ། །ད་ལྟར་བའི་རྟགས་ནི་དུས་གཞན་དང་ལྡན་པའི་རྟགས་ཅན་གྱི་ཁྱབ་པ་མ་ཡིན་ཏེ། དེས་ན་ཤུགས་ཀྱིས་བསྒྲུབ་པར་བྱ་བ་ནི་དེའི་ཚེ་ཡོད་པ་མ་ཡིན་ཏེ། དེ་མེད་ན་དེའི་རྒྱུན་འཆད་པའི་ཕྱིར་རོ། །ཡང་གང་ཞིག་དེ་རྣམ་པར་མི་འཆད་པ་དེ་ནི་དེའི་དུས་ན་ཡོད་པ་མ་ཡིན་ཏེ། དཔེར་ན་བུམ་པའི་འདུས་ན་རྫ་མཁན་བཞིན་ནོ། །དེས་ན་ཁྱད་པར་ཅན་གྱི་འབྲས་བུ་ལ་ལྟོས་ན་བསྒྲུབ་པར་བྱ་བ་དེའི་དུས་ན་ཡོད་པར་བརྗོད་པ་ཡིན་ནོ་ཞེས་དགོངས་པའོ། །དེའི་སྒོ་ནས་ནི་རྟགས་ཀྱི་སྒོ་ནས་སོ། །གལ་ཏེ་ཤེས་པས་ཞེས་བྱ་བ་ནི་རྗེས་སུ་དཔག་པས་སོ། །ལན་ནི་མི་འཁྲུལ་པ་ཉིད་ལས་ཞེས་བྱ་བའོ། །གལ་ཏེ་དུ་བ་ཞེས་བྱ་བ་ནི་གཞན་གྱིས་བརྗོད་པའོ། །དུ་བ་ཡང་མི་འཁྲུལ་པ་ཡོད་པའི་ཕྱིར་རོ། །ཇི་ལྟར་ཞེས་བྱ་བ་ནི་ལན་ནོ། །རང་གི་ཤེས་པ་དང་བཅས་པ་མིའི་ཤེས་པ་སྐྱེད་པར་བྱེད་པའོ། །དེ་ཡི་རང་བཞིན་དང་འབྲེལ་ཕྱིར། །ཞེས་བྱ་བ་འདི་རྣམ་པར་གཞག་པར་བྱ་བའི་རང་བཞིན་དང་འབྲེལ་པའི་ཕྱིར་རོ། །རང་བཞིན་མ་ཡིན་ཞེས་བྱ་བ་ནི་དུ་མ་ལ་སོགས་པའོ། །དེ་ལ་ཞེས་བྱ་བ་ནི་རྗེས་སུ་དཔག་པའི་ཤེས་པ་ལའོ། །དོན་དུ་ཞེན་པ་ནི་དོན་དུ་སྣང་བའོ། །སྐབས་ཉེ་བར་སྡུད་པ་ནི་དེའི་ཕྱིར་ཞེས་བྱ་བའོ། །དེ་ནི་མི་མཐོང་བ་ཉིད་དོ་ཞེས་བྱ་བ་ནི་རྗེས་སུ་དཔག་པ་སྟེ། ལྷག་པར་ཞེན་པ་ཙམ་གྱི་རང་བཞིན་ཡིན་པའི་ཕྱིར་རོ། །དེས་ན་ཞེས་བྱ་བ་ནི་མི་མཐོང་བས་ནའོ། །འོ་ན་རྗེས་སུ་དཔག་པས་ལྐོག་ཉིད་དུ་ཇི་ལྟར་རྟོགས་ཤེ་ན། དེ་ནི་ཞེས་གསུངས་སོ། །རྟོགས་པ་མེད་པ་ཉིད་ནི་རང་གི་ངོ་བོས་སོ། །དེ་ལྟར་རང་གི་ཕྱོགས་ལ་གཞན་གྱིས་བརྗོད་པའི་སྐྱོན་སྤངས་ནས། ཡང་རྗེས་སུ་དཔག་པ་དངོས་པོའི་ཡུལ་ཅན་ཉིད་ཡིན་ན། དེ་མངོན་སུམ་ཉིད་དོ་ཞེས་བསྟན་པའི་དོན་དུ་བཤད་པ་ནི། ལྐོག་གྱུར་ཞེས་བྱ་བ་སྟེ། ལྐོག་གྱུར་པ་ལ་ཞེས་བྱ་
བའི་རྣམ་པ་འདི་གལ་ཏེ་རྗེས་སུ་དཔག་པས་དོན་གྱི་རང་བཞིན་ལྐོག་ཏུ་གྱུར་པ་ཉིད་རྟོགས་པ་ཡིན་ན་དེའི་ཚེ་འདི་ནི་ལྐོག་ཉིད་དོ་ཞེས་རྟོགས་པ་གང་ཡིན་པ་དེ་ནི་མངོན་སུམ་ཉིད་དོ། །དེས་ན་འདི་ནི་ལྐོག་ཏུ་གྱུར་པའི་ཞེས་མཐོང་བ་ལ་དེ་ལ་རྗེས་སུ་དཔོག་པ་ནི་མངོན་སུམ་ཁོ་ནར་གྱུར་གྱི། རྗེས་སུ་དཔག་པ་ནི་མ་ཡིན་ཏེ། དངོས་པོའི་རང་བཞིན་འཛིན་པའི་ཕྱིར་རོ། །རྗེས་སུ་དཔག་པ་དངོས་པོའི་ཡུལ་ཅན་ཉིད་ཡིན་ན་ནི་ལོ་མ་ལས་བྱུང་བ་ལ་རྩྭ་ལས་བྱུང་བ་ཡིན་ཞེས་ཐེ་ཚོམ་དང་འབྲེལ་པར་ཡང་མི་འགྱུར་ཏེ། བདག་ཉིད་ཐམས་ཅད་རང་གི་ངོ་བོ་རྗེས་སུ་དཔག་པ་ལས་ངེས་པ་ཡིན་ན་ཐེ་ཚོམ་མི་འཐད་པའི་ཕྱིར་རོ། །མངོན་སུམ་གྱིས་མཐོང་བའི་སྐད་ཅིག་མ་ཉིད་ལ་སོགས་པ་ལ་ནི་ཐེ་ཚོམ་འབྱུང་བར་མི་འགྱུར་རོ། །ཅི་སྟེ་ཡང་དོན་དང་ཤེས་པ་དག་གཅིག་པའི་ཕྱིར་ན་དེ་མཐོང་བ་ཡིན་པ་དེས་ན། ལྐོག་ཏུ་གྱུར་པ་མ་མཐོང་བ་ཁོ་ནའོ་ཞེས་ཅི་སྟེ་བརྗོད་སྙམ་ན། ཤེས་དོན་དག་ཀྱང་ཤེས་གསུངས་ཏེ། བེམས་པོ་དང་བེམས་པོ་མ་ཡིན་པ་ཉིད་ཀྱིས་ཐ་དད་པའི་ཕྱིར་རོ། །དེའི་ཕྱིར་ཞེས་བྱ་བ་ནི་གཅིག་ཉིད་མ་ཡིན་པའི་ཕྱིར་རོ། །དོན་དེ་ནི་དོན་བྱ་བ་བྱེད་པ་ཅན་ནོ། །དེས་མངོན་སུམ་གྱི་རྒྱུ་ཡིན་པར་རྗེས་སུ་དཔག་པས་ཇི་ལྟར་རྟོགས་ཞེས་བྱ་བ་མཇུག་སྡུད་པ་ནི་དེ་ཕྱིར་ཞེས་བྱ་བའོ། །དེས་ན་ཞེས་བྱ་བ་ནི་རྗེས་སུ་དཔག་པར་བྱ་བ་མངོན་སུམ་མ་ཡིན་པས་ནའོ། །རྗེས་སུ་དཔག་པ་ནི་དེའི་འབྲས་བུ་ཅན་ཡང་མ་ཡིན་ཏེ། དོན་མེད་པ་ཡིན་པའི་ཕྱིར་རོ་ཞེས་མཇུག་སྡུད་པ་བཤད་པ་ནི། དེའི་ཕྱིར་ཞེས་བྱ་བ་སྟེ། དོན་འཛིན་པའི་རང་བཞིན་མ་ཡིན་པའི་ཕྱིར་རོ། །རྟོགས་པ་ནི་དོན་མེད་པའོ། །རྒྱུའི་དངོས་པོ་མ་ཡིན་པ་ནི་སྐབས་ཀྱི་མངོན་སུམ་གྱིའོ། །དེ་ཉིད་ཀྱི་ཕྱིར་ཞེས་བྱ་བ་ནི་རྒྱུ་དང་འབྲས་བུའི་དངོས་པོས་མེད་པ་ཉིད་ཀྱི་ཕྱིར་རོ། །ནུས་མེད་ཅེས་བྱ་བ་ནི་ནུས་པ་འབའ་ཞིག་འགོག་པ་ཡིན་གྱི། རང་གི་ངོ་བོ་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ནུས་མཐོང་ཞེས་ལན་དུ་མཐོང་བའི་ཕྱིར་ན་ཕྱོགས་སྔ་མ་ཡང༌། མཐོང་བའི་ཡུལ་ཅན་ཁོ་ན་མ་ཡིན་ནམ། མཐོང་བའི་མངོན་སུམ་གྱི་རང་བཞིན་དུ་མཐོང་བ་མེད་དོ་ཞེས་བྱ་བ་ཉིད་རིགས་སོ་ཞེ་ན། འདི་ལྟར་ཞེས་བྱ་བའོ། །མཐོང་ཞེས་བྱ་བ་ནི་རང་བཞིན་གྱི་ཡུལ་ཅན་ནི་མ་ཡིན་ཏེ། འོན་ཀྱང་ནུས་པའི་ཡུལ་ཅན་ཡིན་ནོ། །དེ་ནི་མངོན་སུམ་མ་ཡིན་ཏེ་ཇི་སྐད་བརྗོད་པ་ཡིན་
ནོ། །དེས་ན་མཐོང་བ་ནི་འདིར་རྟོགས་པ་བརྗོད་པ་ནི་བྱེད་པ་ཡིན་པས། རྒྱུ་ཉིད་ལ་སོགས་པར་འཇིག་རྟེན་གྱིས་རྟོགས་པ་ཡིན་ནོ་ཞེས་བྱ་བའི་དོན་ཏོ། །རྣམ་པར་དབྱེར་མེད་པར་ཞེས་བྱ་བ་ནི་མཐོང་བ་འདྲ་བས་མཐོང་བར་གདགས་པ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཕྱིར་ན་ཞེས་བྱ་བ་ནི་འཇིག་རྟེན་གྱི་རྟོགས་པ་ཉིད་ལས་སོ། །མཐོང་བ་ཡིན་ཞེས་བྱ་བ་ནི་སྐབས་ཀྱི་རྒྱུ་དང་འབྲས་བུའི་དངོས་པོའོ། །ལྷག་པར་མོས་པ་ནི། རྣམ་པར་རྟོག་པ་བསྟན་པའོ། །འཇིག་རྟེན་གྱི་ཐ་སྙད་ནི་ཕལ་ཆེར་རྣམ་པར་རྟོག་པ་ཁོ་ནས་བྱེད་པ་ཡིན་ནོ་ཞེས་བརྗོད་པ་ནི་འདི་ལྟར་ཞེས་བྱ་བའོ། །གལ་ཏེ་དྲན་པ་ནི་དངོས་པོ་དང་འབྲེལ་པ་ཡོད་པ་ཁོ་ན་ཡིན་ཏེ། དེས་ན་དྲན་པས་དེ་གྲུབ་པས་ན་ལྷག་པར་མོས་པས་གྲུབ་པ་ཇི་ལྟར་ཡིན་སྙམ་ན། དྲན་པ་དང་དངོས་དང་ཞེས་བྱ་བའོ། །རེ་ཞིག་མངོན་སུམ་གྱིས་ནི་དྲན་པའི་འབྲེལ་པ་རྟོགས་པ་མ་ཡིན་ཏེ་ཞེས་འབྲེལ་ཏོ། །ཅིའི་ཕྱིར་ཞེ་ན། དྲན་པ་ནི་མངོན་སུམ་མ་ཡིན་པའི་ཕྱིར་ཏེ། དབང་པོའི་མངོན་སུམ་གྱི་ཡུལ་མ་ཡིན་པའི་ཕྱིར་རོ། །རང་རིག་པས་ཀྱང་དངོས་དང་འབྲེལ་པ་རྟོགས་པ་མ་ཡིན་ནོ་ཞེས་བརྗོད་པ་ནི་རང་རིག་པས་ནི་ཞེས་བྱ་བའོ། །འོ་ན་དོན་གྱི་མངོན་སུམ་གྱི་དྲན་པའི་འབྲེལ་པ་རྟོགས་པར་ནུས་སོ་སྙམ་ན། སྔར་གྱི་ཞེས་གསུངས་སོ། །དེས་ན་ཞེས་བྱ་བ་ནི་འཇུག་པ་མ་ཡིན་པས་ནའོ། །ཀུན་རྫོབ་ཏུ་ནི་རེག་པ་ཡོད་ཉིད་དོ། །ཞེས་བརྗོད་པ་ནི་འདི་བདག་གིས་ཞེས་བྱ་བའོ། །ཁྱིམ་ནས་བྱུང་བ་སླར་ཁྱིམ་དུ་འོང་བ་མི་དྲན་པའི་རང་བཞིན་ལྷག་པར་མོས་པའི་དབང་གིས་ཡིན་ནོ། །རྣམ་པར་གཞག་པ་ཐམས་ཅད་ཀྱི་ནི་རྒྱུ་དང་འབྲས་བུ་དང༌། གཟུང་བ་དང་འཛིན་པ་ལ་སོགས་པའི་སྒྲུབ་པར་བྱེད་པ་ལྷག་པར་མོས་པ་ཁོ་ན་ཡིན་ནོ། །མངོན་སུམ་ནི་རང་གི་ངོ་བོ་ཙམ་གྱིས་མཐར་ཐུག་པ་ཡིན་པའི་ཕྱིར་རོ། །སྒྱུ་མ་བཞིན་དུ་མ་བརྟགས་ན་ཉམས་དགའ་བ་མངོན་སུམ་གྱིས་རྟོག་པ་ཉིད་ཀུན་རྫོབ་ཡིན་ནོ་ཞེས་བྱ་བ་བཤད་པ་ནི། གང་གིས་རང་གི་ངོ་བོ་ཡིས། །གཞན་གྱི་ངོ་བོ་སྒྲིབ་བྱེད་པ། །ཀུན་རྫོབ་ཅེས་བྱ་བ་ཀུན་རྫོབ་ཀྱི་མཚན་ཉིད་དང་འགལ་བ་ཡིན་ཞེས་བཤད་པ་ནི་བསམ་པ་ནི་ཞེས་བྱ་བའོ། །ཚད་མས་གནས་པའི་དོན་དམ་པའི་རང་བཞིན་ནི་ཡོད་པ་མ་ཡིན་ནོ་ཞེས་བྱ་བའོ། །ལྷག་པར་མོས་པ་ཙམ་ཀུན་རྫོབ་ཡིན་ནོ་ཞེས་བྱ་བ་འདི་ག་ལས་སྙམ་ན་
ཀུན་རྫོབ་ཀྱི་དོན་ནི་ཞེས་བྱ་བའོ། །ཚད་མ་ཡིན་པའི་རྣམ་པར་རྟོག་པས་རྟོགས་པའི་དོན་ནོ་ཞེས་བྱ་བའི་དོན་ཏོ། །གང་གིས་ཀུན་རྫོབ་ཏུ་འགྱུར་བ་ལྷག་པར་མོས་པ་ཙམ་གྱིས་འཇིག་རྟེན་གྱི་ཐ་སྙད་དུ་འགྱུར་བ་ཇི་ལྟ་བུ་ཡིན་ཞེ་ན། དཔེར་ན་ཞེས་བྱ་བ་ལ་སོགས་པའོ། །དེ་ལྟ་ན་ཡིན་དང་ཞེས་བྱ་བ་ནི་རྣམ་པར་དཔྱད་པར་ལྡོག་པ་ནའོ། །འདི་ཞེས་བྱ་བ་ནི་མཐོང་བར་མངོན་པར་རློམ་པའོ། །འཇིག་རྟེན་གྱི་ཐ་སྙད་ཐམས་ཅད་ཀྱང་ཞེས་བྱ་བ་ནི་འཇིག་རྟེན་པ་རྣམས་ཀྱི་འབྲས་བུ་ལ་སོགས་པའི་ཐ་སྙད་དོ། །དེ་ལྟ་བུ་ཉིད་ནི་མ་མཐོང་བ་ལ་མཐོང་བར་མངོན་པར་རློམ་པའི་མཚན་ཉིད་དོ། །ཇི་ལྟར་ཐམས་ཅད་ཀུན་རྫོབ་པ་ཡིན་སྙམ་ན་ཚད་མ་མེད་པར་ཞེས་གསུངས་སོ། །གལ་ཏེ་རྒྱུ་དང་འབྲས་བུ་དངོས་པོ་ཀུན་རྫོབ་ཙམ་ཡིན་པ་ཇི་ལྟར་འགྱུར་ཏེ། མངོན་སུམ་དང་མི་དམིགས་པས་རབ་ཏུ་གྲུབ་པའི་རྗེས་སུ་འགྲོ་བ་དང་ལྡོག་པ་དག་གིས་རབ་ཏུ་བཅུག་པ་ཡིན་པའི་ཕྱིར་རོ་སྙམ་དུ་དོགས་ནས་བཤད་པ། གལ་ཏེ་རྗེས་སུ་འགྲོ་བ་དང་ལྡོག་པ་དག་ལས་རྒྱུ་དང་འབྲས་བུ་ཉིད་དུ་རྟོགས་པ་ཡིན་ནོ། །དེའི་ཚེ་དེ་ལ་རྗེས་སུ་སྟེ་རྗེས་སུ་འགྲོ་བ་དང་ལྡོག་པ་དག་ལ་མངོན་སུམ་སྟེ། མངོན་སུམ་དང་མི་དམིགས་པའི་བདག་ཉིད་ཅན་གྱི་ཚད་མ་ཡོད་པ་མ་ཡིན་ཏེ། དངོས་པོ་ཙམ་འཛིན་པའི་ཕྱིར་རོ། །དེའི་བདག་ཉིད་ཅན་གྱི་རྗེས་སུ་དཔག་པ་ཡང་རྗེས་སུ་འགྲོ་བ་དང་ལྡོག་པ་རྗེས་སུ་དཔོག་པ་ལ་དེ་བཞིན་ཏེ། དེས་མཚན་ཉིད་མ་ཡིན་ཏེ། ཐུག་པ་མེད་པའི་ཉེས་པར་འགྱུར་བའི་ཕྱིར་རོ། །འོ་ན་མི་དམིགས་པའི་བདག་ཉིད་ཀྱི་རྗེས་སུ་དཔོག་པ་དང་ལྷན་ཅིག་པའི་མངོན་སུམ་དེ་དག་གི་ཚད་མ་ཡིན་ནོ་སྙམ་ན་མངོན་སུམ་དང་མི་དམིགས་པ་དག་ལས་ཞེས་བྱ་བའོ། །མི་དམིགས་པའི་བདག་ཉིད་ཅན་གྱི་རྗེས་སུ་དཔག་པ་ཁས་ལེན་ན་དེའི་ཚེ་ཕན་ཚུན་ཏེ། རྗེས་སུ་དཔག་པ་གཅིག་ལ་གཅིག་ལྟོས་པ་དེས་ན་ཐུག་པ་མེད་པའི་རྗེས་སུ་འགྲོ་བ་དང་ལྡོག་པ་མི་འགྲུབ་པ་དང༌། ཡང་ན་རྗེས་སུ་དཔག་པ་ཡོད་ན་རྗེས་སུ་འགྲོ་བ་ལ་སོགས་པ་འཛིན་པ་ཡོད་པ་ལ། དེ་ཡོད་ན་ཡང་རྗེས་སུ་དཔག་པ་ཡིན་པའི་ཕྱིར་ན་ཕན་ཚུན་བརྟེན་པ་ནི་ཕན་ཚུན་བརྟེན་པ་ཁོ་ན་ཡིན་ནོ། །དེ་མ་ཐག་པའི་ཚིག་ལེའུར་བྱས་པའི་དོན་འཆད་པ་ནི། རྗེས་སུ་འགྲོ་བ་དང་ལྡོག་པ་དག་གཅིག་བྱ་བའོ། །གལ་ཏེ་མངོན་
སུམ་ནི་དངོས་པོ་འཛིན་པ་ཉིད་ཀྱིས་གཉི་ག་མི་འཛིན་པ་ཡང་རྗེས་སུ་འགྲོ་བ་འཛིན་པ་ནི་བཟློག་ཏུ་མེད་པ་ཉིད་དོ་ཞེས་དོགས་པས་སུ་ནས་དེ་ཡང་མེད་པ་ཁོ་ནའོ་ཞེས་གསུངས་པ་ནི་རྗེས་སུ་འགྲོ་བ་མངོན་སུམ་གྱིས་འཛིན་པ་ནི་ཞེས་བྱ་བའོ། །ཅིའི་ཕྱིར་ཞེ་ན། འདི་ཡོད་ན་ཞེས་གསུངས་སོ། །ཅིའི་ཕྱིར་དེ་བྱ་བ་མ་ཡིན་ཞེ་ན། གཉིས་འཛིན་པ་ཙམ་གྱིས་ཞེས་གསུངས་ཏེ། སྦྱོར་བར་བྱེད་པའི་བདག་ཉིད་མ་ཡིན་པའི་ཕྱིར་རོ། །གལ་ཏེ་མེའི་དེ་མ་ཐག་ཏུ་དུ་བ་མཐོང་བའི་ཕྱིར་དེའི་རྗེས་སུ་འགྲོ་བ་ཡོད་པ་ཉིད་མ་ཡིན་ནམ། དེ་ལྟ་མ་ཡིན་ན་དེ་མ་ཐག་ཏུ་མཐོང་བ་ཉིད་དུ་མི་འགྱུར་རོ་སྙམ་ན། དེ་མ་ཐག་པར་འཛིན་པ་ཡོད་ཀྱང་རྗེས་སུ་འགྲོ་བ་ནི་སྲིད་པ་མ་ཡིན་ནོ་ཞེས་གསུངས་པ་ནི་འདིའི་དེ་མ་ཐག་ཏུ་ཞེས་གསུངས་སོ། །རྗེས་སུ་འགྲོ་བ་མེད་ཀྱང་དེ་མ་ཐག་ཏུ་མཐོང་བ་སྲིད་པའི་ཕྱིར་ཇི་ལྟར་དེ་ལ་དེ་རྟོགས་སྙམ་དུ་དགོངས་པའོ། །ཇི་ལྟར་རྗེས་སུ་འགྲོ་བ་མེད་སྙམ་ན་འདི་ལྟར་ཞེས་གསུངས་སོ། །འདི་ཉིད་ལས་བྱུང་བ་ཞེས་བྱ་བ་ལ་སོགས་པ་ནི་གོ་རིམས་བཞིན་དུ་གཞན་དང་ལྡན་པ་དང་ཤིན་ཏུ་མི་ལྡན་པ་དང༌། མི་ལྡན་པ་རྣམ་པར་དཔྱོད་པ་ལྷུར་བྱེད་པའོ། །ཡང་ཅིའི་ཕྱིར་འདི་ཙམ་ཞིག་རྣམ་པར་བརྟག་པར་བྱ་བ་ཡིན་ཞེ་ན། དོན་གཞན་ཞེས་གསུངས་སོ། །དང་པོ་ལ་བརྗོད་པ་ནི། གལ་ཏེ་འདི་ལས་ཞེས་བྱ་བའོ། །འདི་ལས་ཅིར་འགྱུར་སྙམ་ན། དེ་ལ་ཡང་ཞེས་བྱ་བ་གསུངས་སོ། །ངེས་པ་མེད་པའི་ཕྱིར་ཞེས་བྱ་བ་ནི་ཁྱབ་པ་མེད་པའི་ཕྱིར་རོ། །གཉིས་པ་ལ་བརྗོད་པ་ནི་འདི་ལས་ཞེས་བྱ་བའོ། །ཅིའི་ཕྱིར་འདི་ལྟར་ངེས་པར་མི་གཟུང་ཞེ་ན། དུས་གཞན་དུ་རེས་འགའ་ཞེས་གསུངས་སོ། །གསུམ་པ་སེལ་བ་འདི་ལས་ཀྱང༌། །ཞེས་བྱ་བའོ། །མི་དམིགས་པ་ལ་སྲིད་པའི་རྣམ་པར་རྟོག་པ་ལས་བསམས་ནས་བརྗོད་པ་ནི་ཅི་སྟེ་ཞེས་བྱ་བའོ། །དེ་ལྟར་གྱུར་ན་ཡང་ཞེས་བྱ་བ་ནི། མི་དམིགས་པ་ལས་རྟོགས་པར་ཁས་བླངས་པ་ནའོ། །གཅིག་ལ་གཅིག་བརྟེན་པའི་ཉེས་པ་ཉེད་བསལ་བར་བྱ་བའི་ཕྱིར་བརྗོད་པ་ནི་འདི་ལྟར་ཞེས་བྱ་བའོ། །གཞན་མ་ཡིན་པ་ནི་དེ་ཉིད་དེ་མངོན་སུམ་མོ། །གཞན་དམིགས་པ་ཉིད་མི་དམིགས་པ་ཡིན་པའི་ཕྱིར་རོ། །གཞན་མ་ཡིན་པའི་ཕྱོགས་སེལ་བ་ནི། མངོན་སུམ་ལས་ནི་ཞེས་བྱ་བའོ། །ཐ་དད་པའི་ཕྱོགས་སེལ་བ་ནི་
འཇུག་པ་མེད་པའི་ཕྱིར་ཏེ་ཞེས་བྱ་བ་ནི་སྐབས་ཀྱི་མི་དམིགས་པའོ། །མངོན་སུམ་ལས་གཞན་ནམ་ཞེས་པ་ནི་གལ་ཏེ་ཞེས་བྱ་བའོ། །འཇུག་པ་མེད་འགྱུར་ཏེ་ཞེས་བྱ་བ་འཆད་པ་ནི་དེ་སྟེ་ཞེས་བྱ་བའོ། །མེད་ན་ཡང་ཞེས་བྱ་བ་ནི་རྗེས་སུ་འགྲོ་བ་དང་ལྡོག་པ་འཛིན་པ་མེད་ན་ཡང་ངོ༌། །རྗེས་སུ་དཔག་པ་གཞན་གྱིས་འཛིན་ན་ཐུག་པ་མེད་དོ་ཞེས་བརྗོད་པ་ནི། རྗེས་སུ་དཔག་པ་ཞེས་བྱ་བའོ། །གལ་ཏེ་མི་དམིགས་པ་རྗེས་སུ་དཔག་པར་ཁས་བླངས་ན་ཕན་ཚུན་བརྟེན་པའི་ཉེས་པར་འགྱུར་གྱི། དངོས་པོ་མེད་པའི་ཚད་མར་ཁས་བླངས་ན་ནི་ཉེས་པ་འདི་མེད་དོ། །དེས་ན་དེ་ནི་མེད་ན་མེད་པར་འཛིན་པ་ཡིན་ནོ་ཞེས་དོགས་པ་ནི། འོན་ཏེ་ཞེས་བྱ་བའོ། །དངོས་པོ་གཟུང་བྱས་ཤིང༌། །འགལ་ཟླ་དག་ཀྱང་དྲན་བྱས་ནས། །དབང་པོ་ལ་ནི་དེ་མེད་པར། །མེད་པར་ངེས་པའི་ཡིད་སྐྱེའོ། །ཞེས་བྱ་བའི་ཚུལ་གྱིས་དངོས་པོ་མེད་ཀྱང་ངེས་པའི་ཡུལ་ཉིད་དུ་དངོས་པོ་མེད་བ་རྟོགས་པ་ཡིན་ནོ་ཞེས་ལན་འདེབས་པ་ནི་དངོས་པོ་མེད་པར་ཆད་མ་དེ་ལས་ཀྱང་ངོ༌། །གལ་ཏེ་ཡོད་ན་ཡོད་པ་ནི་རྟགས་ཡིན་པ་དེ་ལས་ཀྱང་རྟགས་ཅན་དེའི་འབྲས་བུ་ཉིད་རྟོགས་པ་ནི་རྗེས་སུ་དཔག་པ་མ་ཡིན་ཏེ། འབྲེལ་པ་འཛིན་པ་ལ་མི་ལྟོས་པའི་ཕྱིར་རོ། །གནོད་བྱེད་མེད་པའི་ཕྱིར་ན་རྟོགས་པ་ཞེས་བྱ་བའི་ཚད་མས་ནི་ཡུལ་ལ་སོགས་པ་མ་ངེས་པར་དེའི་འབྲས་བུ་ཉིད་དུ་རྣམ་པར་འཇོག་པ་ཡིན་ནོ་ཞེས་བྱ་བར་གཞན་གྱི་རྩོད་པ་བློ་ནི་གཞན་དག་ནི་ཞེས་བྱ་བའོ། །འབྲེལ་པ་མཐོང་པ་མེད་པ་ནི་རྟགས་སོ། །འདི་སྐབས་ལ་ཉེ་བར་སྦྱོར་བ་ནི་འདི་ལྟར་ཞེས་བྱ་བའོ། །ངེས་པའི་ཚད་ཉིད་ཅེས་བྱ་བ་བའོ། །རྟགས་དེ་ཡོད་ན་ཡོད་པ་ལས་རྟགས་ཅན་ཐ་དད་པར་བརྗོད་པ་ཡིན་ནོ། །འབྲེལ་པ་འཛིན་པ་ལས་མི་ལྟོས་པ་ཉིད་དུབ་རྗོད་པ་ཡིན་ནོ། །ཡོད་པ་ན་ཡོད་པ་དེ་དང་ཞེས་བྱ་བའོ། །འོན་ཏེ་འབྲེལ་པ་མ་རྟོགས་ན་རྟགས་ལས་དེའི་འབྲས་བུ་ཉིད་དུ་རྟོགས་པ་མེད་པ་ཁོ་ནའོ་སྙམ་ན། འཇིག་རྟེན་པས་རྟོགས་པ་ཡིན་ནོ་ཞེས་གསུངས་སོ། །རྟོགས་པའི་རྣམ་པར་བརྗོད་པ་ནི། གང་གི་ཕྱིར་དེ་ལས་ཞེས་བྱ་བའོ། །གང་གི་ཕྱིར་དེ་ལྟར་རྟོགས་པ་དེའི་ཕྱིར་རོ། །རྣམ་པ་གཞན་གྱིས་ཀྱང་དེའི་འབྲས་བུ་ཉིད་དུ་རྟོགས་པའི་དོགས་པ་བསུ་བ་ནི། ཡང་ན་ཞེས་བྱ་བའོ། །གཉི་ག་ལྟར་ཡང་དེའི་འབྲས་
བུ་ཉིད་དུ་རྟོགས་པ་དགག་པ་བཤད་པ་ནི་མི་འཐད་དེ་ཞེས་བྱ་བའོ། །ཇི་ལྟར་མི་འཐད་སྙམ་དུ་དོགས་པ་བསུ་ནས། དེ་ཡོད་པ་ཉིད་ན་ཡོད་པ་ཞེས་ངེས་པ་ཁོ་ན་ཡོད་པ་རྟགས་ཡིན་གྱི་དེ་ཙམ་ནི་མ་ཡིན་ཏེ་འཁྲུལ་པའི་ཕྱིར་རོ། །གལ་ཏེ་དེ་གྲུབ་པོ་ཞེ་ན་ནི་རྟགས་ཅན་གཞན་ཡོད་པ་མ་ཡིན་ཏེ། དེས་ན་སྤྱོད་པའམ་དོན་གྱིས་གོ་བ་ནི་ཚད་མ་གཞན་ནི་མ་ཡིན་ནོ་ཞེས་ལན་གསུངས་པ་མ་ཡིན་ནོ། །གལ་ཏེ་རྟགས་དེ་ཡོད་ན། ཡོད་པ་ཉིད་རྟོགས་པ་ལས་དེའི་འབྲས་བུ་ཉིད་དུ་རྟོགས་པ་གཞན་ཡིན་པར་འགྱུར་ན་ནི་དེའི་ཚེ་དཔྱོད་པའམ་དོན་གྱིས་གོ་བ་ལས་གྲུབ་བོ་ཞེས་འཐད་པ་ཡིན་ནོ། །གལ་ཏེ་ཞེས་བྱ་བའོ། །འོ་ན་འདི་འཐད་པ་ཁོ་ནའོ་སྙམ་ན། དེ་ལས་འགྱུར་བ་མ་གཏོགས་པར་ཞེས་གསུངས་ཏེ། དེའི་འབྲས་བུ་ཉིད་དེ་ཁོ་ན་ཡོད་པ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ཡིན་ལ་རག་མོད་ཅན། །དེ་ལ་སྐྱོན་ནི་སྔར་བརྗོད་དེ། །ཞེས་གསུངས་སོ། །དེ་ཁོ་ན་ལས་སོ་ཞེས་ཁྱབ་བ་ནི་ངེས་པ་ཡིན་ན། དེ་ལའང་མངོན་སུམ་མམ་དེས་བསྐྱེད་པའི་རྣམ་པར་རྟོག་པས་རྟོགས་པར་བྱ་བ་ནི་མ་ཡིན་ཏེ་ཡུལ་དང་དུས་ངེས་པ་ཅན་ཡིན་པའི་ཕྱིར་རོ། །གལ་ཏེ་ཞེས་བྱ་བ་ནི་འཆད་པའོ། །རྟོགས་པའི་ཡུལ་དུ་སྲིད་པ་ནི། །ཞེས་བྱ་བ་ནི་རྟགས་དེ་མེད་ན་ནི་ཡོད་པ་ལས་ཐ་དད་པར་རོ་ཞེས་རྟོགས་པར་བྱའོ། །ཚིག་ལེའུར་བྱས་པའི་གཉིས་པའི་ཕྱེད་སྔ་མ་རྣམ་པར་འགྲེལ་པ་ནི། དེ་ནི་ཞེས་བྱ་བའོ། །འོན་ཏེ་ཡང་དེ་ཡོད་པ་ལས་དེའི་འབྲས་བུ་ཉིད་གཞན་མ་ཡིན་མོད། དེ་ཉིད་ནི་ཡིན་པར་འགྱུར་རོ་སྙམ་དུ་དོགས་པ་སེལ་བས་ཕྱེད་ཕྱི་མ་འཆད་པ་ནི་ངེས་པར་ཞེས་བྱ་བའོ། །འོན་ཏེ་དུས་ཉིད་དུ་དེ་ཡོད་ན་ཡོད་པ་ཉིད་དེའི་འབྲས་བུ་ཉིད་ཡིན་ནོ་ཞེ་ན། །དེ་ནི་ཞེས་གསུངས་སོ། །དེའི་ཁྱབ་པ་ཉིད་ཀྱི་ཡིན་པའི་ཕྱིར་རོ། །འོན་ཏེ་དེ་ཡོད་ན་ཡོད་པ་ཙམ་ནི་རྟགས་ཡིན་ལ། དེ་ཡོད་པ་ཉིད་ན་ཡོད་པ་ནི་རྟགས་ཅན་ཡིན་ནོ་སྙམ་ན་ནི་གལ་ཏེ་ཞེས་བྱ་བའོ། །དེ་ཙམ་ལ་ནི་ངེས་པ་ཁྱབ་པར་མངོན་སུམ་གྱིས་གྲུབ་པ་མེད་དོ་ཞེས་ལན་འདེབས་པ་ནི། གལ་ཏེ་དེ་ལྟར་དེ་ལས་ཞེས་བྱ་བའོ། །མ་ཁྱབ་པའི་དེ་ཡོད་ནི་ཡོད་པ་ལས་ཀྱང་དེའི་འབྲས་བུ་ཉིད་དུ་རྟོགས་སོ་སྙམ་དུ་དོགས་པ་བསུ་བ་ནི་དེ་ལྟ་བུ་ཁོ་ནར་རྟོགས་པའི་ཕྱིར་རོ་ཞེ་ན་ཞེས་བྱ་བའོ། །མ་ཁྱབ་པ་ལས་རྟོགས་པ་གཅིག་ཏུ་ངེས་པར་མི་འགྱུར་རོ་ཞེས་
ལན་འདེབས་པ་ནི། འོ་ན་བུམ་པ་ཡང་ཞེས་བྱ་བའོ། །དེ་ལ་བུམ་པ་ལ་ཡང་ངོ༌། །དེ་ལྟར་ཞེས་བྱ་བ་ནི་དེའི་འབྲས་བུ་ཉིད་དུ་རྟོགས་པར་འགྱུར་རོ། །འདི་ཉིད་སྣམ་བུ་ནི་སྣམ་བུ་ལ་འཁྲུལ་པར་མཐོང་བ་དེ་ནི་དེའི་འབྲས་བུ་ཉིད་དུ་རྟོགས་པ་མ་ཡིན་ཞེས་དོགས་པ་བསུ་བ་ནི། དེ་ལ་ནི་འཁྲུལ་པ་ཞེས་བྱ་བའོ། །འོ་ན་ནི་ཇི་ལྟར་དེ་ཡོད་ན་ནི་ཡོད་པ་ཙམ་སྲིད་པ་ཡིན་ཡང་བུམ་པ་དེའི་འབྲས་བུ་ཉིད་མ་ཡིན་པ་དེ་བཞིན་དུ་མངོན་པར་འདོད་པའི་དུ་བ་ལ་སོགས་པ་ཡང་མེ་ལ་སོགས་པས་འབྲས་བུ་ཉིད་དུ་མི་འགྱུར་རོ་ཞེས་ལན་འདེབས་པ་ནི། འདི་ཉིད་ཀྱིས་ཞེས་བྱ་བ་སྟེ་བུམ་པ་ཉིད་ཀྱིས་སོ། །དེ་ལ་ཡང་ནི་དུ་བ་ལ་སོགས་པ་ཡང་ངོ༌། །འོན་ཏེ་དུ་བ་ལ་སོགས་པ་ནི་འཁྲུལ་པ་མ་མཐོང་བའི་ཕྱིར་ན། ཡིད་མི་ཆེས་པ་ནི་རྟོགས་པ་མེད་པའོ། །དེས་ན་འབྲས་བུ་ཉིད་ནི་དེ་ཙམ་ལས་རྟོགས་པ་ཡིན་ནོ་སྙམ་པ་ནི་ཡིད་མི་ཆེས་པའི་རྟོགས་པ་ཞེས་བྱ་བའོ། །རིང་པོ་མཐོང་བ་མ་ཡིན་པ་ཞེས་བྱ་བ་ནི་ལན་ནོ། །བསུ་བ་དེ་ནི་ཞེས་བྱ་བ་ཡིད་མི་ཆེས་པ་མེད་པའོ། །རིང་པོ་མཐོང་བ་རྣམས་ནི་ལྷན་ཅིག་མ་ཡིན་པར་ལྷན་ཅིག་ཏུ་མཐོང་བ་རྣམས་ལ་ཡང་འཁྲུལ་པ་མཐོང་བའི་ཕྱིར་མ་མཐོང་བ་ཡང་ཡིད་ཆེས་ཕའོ། །ཡུལ་དང་དུས་ལ་སོགས་པས་བསྐལ་པ་དག་ནི། མ་མཐོང་བས་མེད་པ་སྒྲུབ་པ་མ་ཡིན་ཏེ། དེ་ན་དེ་ཙམ་ལས་ནི་དེའི་འབྲས་བུ་ཉིད་དུ་རྟོགས་པ་གཅིག་ཏུ་ངེས་པ་མེད་དོ། །འོན་ཏེ་འཇིག་རྟེན་པ་དག་གི་དེའི་འབྲས་བུ་ཉིད་ཡིད་ཆེས་པའི་རྟོགས་པ་ནི་མང་དུ་མཐོང་བ་ཉིད་ལས་ཡིན་ནོ་ཞེས་དོགས་པ་བསུ་བ་ནི་འཇིག་རྟེན་གྱི་ཐ་སྙད་ནི། དེ་ལྟ་བུ་ཉིད་དོ་ཞེ་ན་ཞེས་བྱ་བའོ། །རིང་པོ་མ་མཐོང་བ་རྣམས་ཀྱིས་ཡིད་བརྟན་དུ་མེད་པའི་ཡུལ་ལ་ཤེས་པའི་ཐ་སྙད་དུ་བྱེད་པ་ཡང་ཀུན་རྫོབ་ཁོ་ན་ཡིན་གྱི། དོན་ཚད་མ་ཅན་ནི་མ་ཡིན་ནོ་ཞེས་ལན་འདེབས་པ་ནི་ནུས་པ་ཞེས་བྱ་བའོ། །དེ་ལྟ་ན་རྒྱུ་དང་འབྲས་བུའི་དངོས་པོ་ལ་སྒྲུབ་པར་བྱེད་པའི་ཚད་མ་མེད་དོ་ཞེས་བསྟན་པ་ཡིན་ནོ། །རྒྱུ་དང་འབྲས་བུ་རྟོགས་པ་ལ་ཡང་སྒྲུབ་པར་བྱེད་པའི་ཚད་མ་མེད་དོ་ཞེས་བསྟན་པའི་ཕྱིར་དོགས་པ་བསུ་བ་ནི་ཅི་སྟེ་དུས་གཞན་དུ་ཞེས་བྱ་བའོ། །དེ་ལྟ་མ་ཡིན་ཞེས་བྱ་བ་ནི་སྔར་འབྲས་བུ་ཉིད་མ་རྟོགས་ནའོ། །མཐོང་བ་ངོ་ཤེས་པ་དག་ལ་ཡང་སྔ་མ་བཞིན་དུ་དེའི་འབྲས་བུ་ཉིད་དུ་འཛིན་
པའི་ཚད་མ་མེད་དོ་ཞེས་ལན་འདེབས་པ་ནི། ངོ་ཤེས་སྔར་གྱི་ཞེས་བྱ་བའོ། །འོན་ཏེ་དེ་ནི་དོན་གྱིས་གོ་བ་ལ་སོགས་པས་རྟོགས་སོ་སྙམ་ན། དཔྱོད་པའམ་ཞེས་བྱ་བ་སྨོས་སོ། །ཅི་སྟེ་དྲན་པ་ལས་ཞེས་བྱ་བ་ནི་སྐབས་ཀྱིས་མཐོང་བས་འབྲས་བུ་ཉིད་འཛིན་པ་ནི་ཞེས་བྱ་བའོ། །ཇི་ལྟར་དྲན་པ་དེ་འཇོག་པར་བྱེད་པ་ཡིན་སྙམ་ན། འདི་ལྟར་ཞེས་སྨྲས་སོ། །དྲན་པའང་ཞེས་བྱ་བ་ནི་ལན་ཏེ། ངོ་ཤེས་འབའ་ཞིག་ཏུ་མ་ཟད་པའོ། །དྲན་པ་ཉམས་སུ་མྱོང་བ་དང་འབྲེལ་པར་ནི་དེའམ་གཞན་གྱིས་ཤེས་པ་ནུས་པ་མ་ཡིན་ལ། འབྲེལ་པ་རྟོགས་པ་ལས་དེ་རྟོགས་པ་ཡང་མ་ཡིན་ནོ་ཞེས་དགོངས་པ་ཡིན་ནོ། །འོན་ཏེ་འབྲེལ་པ་འཛིན་པ་མེད་པའི་ཕྱིར་དྲན་པ་རྟགས་མ་ཡིན་མོད། །ཚད་མ་མ་ཡིན་ནོ་སྙམ་དུ་དོགས་ན། དྲན་པ་ནི་ཞེས་བྱ་བའོ། །དེས་ན་དེ་གྲུབ་ཀྱང་ཚད་མ་གྲུབ་པ་ནི་མ་ཡིན་ཞེས་མ་གུས་པ་བརྗོད་པ་ནི། དེ་གྲུབ་པ་ནི་ཞེས་བྱ་བའོ། །དེ་ལྟར་དོགས་པ་བསུ་ནས་ཞེས་བྱ་བ་ནི། འདོད་ན་ཞེས་བྱ་བའི་བར་གྱིས་སོ། །གསུངས་སོ་ཞེས་བྱ་བ་ནི་ཅི་ལྟར་དེ་ལྟར་འགྱུར་ཞེས་བྱ་བ་ལ་སོགས་པས་སོ། །ཅི་ལྟར་དེ་ལྟར་གྱུར་ཞེས་བྱ་བ་འདི་ནི་ཇི་ལྟར་ཡིན་ན་ཡང་ཡིན་ཞེས་མ་གུས་པ་བརྗོད་པ་ནི་མ་ཡིན་གྱི། འོན་ཀྱང་ཀུན་རྫོབ་ཇི་ལྟར་དེ་ལྟར་ཡིན་མོད། ཚད་མ་འཇུག་པ་པས། ཀུན་རྫོབ་བཀུག་པར་མ་བྱེད་ཅིག །ཅེས་རྣམ་པར་དབྱེ་བ་བརྗོད་པ་ཡིན་ནོ། །ཚད་མ་བཅུག་ན་ནི་འབྲས་བུ་ཉིད་ལ་སོགས་པའོ། །ཀུན་རྫོབ་རྣམ་པར་འཇིག་པར་འགྱུར་ཏེ། རྣམ་པར་དབྱེ་བ་མེད་པའི་ཕྱིར་རོ་ཞེས་གསུངས་པ་ནི་འཇིག་རྟེན་གྱི་ཐ་སྙད་ཅེས་བྱ་བའོ། །འདི་ཁོ་ན་ལྟར་ཞེས་བྱ་བ་ནི་ཚད་མ་མ་ཡིན་པའོ། །དོན་དམ་པ་ནི་ཞེས་བྱ་བ་ནི་ཚད་མས་རྣམ་པར་དཔྱད་པའོ། །འོ་ན་འཇིག་རྟེན་གྱི་འབྲས་བུ་ཉིད་ལ་སོགས་པ་ཇི་ལྟར་འགྲུབ་སྙམ་ན་མོས་པའི་རྣམ་པར་དབྱེ་ཞེས་གསུངས་སོ། །འདི་ལ་དཔེ་ནི་རྨི་ལམ་གྱི་ཞེས་བྱ་བའོ། །ཅི་ལྟར་རྨི་ལམ་ན་བཏུང་བ་དང༌། རྐྱལ་བ་ལ་སོགས་པ་ཆུ་ལ་ངེས་པའི་ཐ་སྙད་དུ་མོས་པ་ཙམ་གྱིས་ཡིན་པ་དེ་བཞིན་དུ་ཡང་འདིར་ཡང་ཡིན་ནོ། །གལ་ཏེ་བུམ་པ་དང་སྣམ་བུ་བཞིན་དུ་དུ་བ་དང་མེ་དག་ཀྱང་རྒྱུ་འབྲས་མ་ཡིན་པའི་ཕྱིར་ཅི་ལྟར་གཅིག་ལས་འབྲས་བུ་ཉིད་ལ་སོགས་པའི་ཐ་སྙད་དུ་བྱེད་ཀྱི་གཞན་དུ་ནི་མ་ཡིན་སྙམ་དུ་དོགས་པ་བསུ་ནས། ཀུན་རྫོབ་ཁོ་ནར་
ཐོག་མ་མེད་པའི་བག་ཆགས་ངེས་པ་ལས་དེ་ངེས་པ་ཡིན་ནོ་ཞེས་གསུངས་པ་ནི་འཇིག་རྟེན་གྱི་ཐ་སྙད་ཀྱི་ཞེས་གསུངས་སོ། །ཡང་ན་གལ་ཏེ་ཉམས་སུ་མྱོང་བ་མེད་ན་ཚད་མ་དང་ཚད་མ་མ་ཡིན་པ་རྣམ་པར་དབྱེ་བ་ནི་རྣམ་པར་རྟོག་པ་དང༌། འབྲས་བུ་དང༌། ཅིག་ཤོས་ལ་སོགས་པའི་རྣམ་པར་མི་འགྱུར་རོ་ཞེས་དོགས་པ་བསུ་ནས། ཐོག་མ་མེད་པའི་རྣམ་པར་རྟོག་པའི་བག་ཆགས་ཡོད་ན་འགྱུར་བ་ཁོ་ནའོ་ཞེས་བརྗོད་པ་ནི་འཇིག་རྟེན་གྱི་ཐ་སྙད་ཀྱི་ཞེས་བྱ་བའོ། །འདི་ནི་གདོན་མི་ཟ་བར་རྣམ་པར་ཤེས་པར་སྨྲས་པས་ཁས་བླངས་ དགོས་སོ་ཞེས་བརྗོད་པ ་ནི་དེ་ལྟ་མ་ཡིན་ན་ཞེས་བྱ་བ་སྟེ། བག་ཆགས་རྒྱུར་ཁས་མི་ལེན་ནའོ། །ཡང་ན་གང་དག་ཅེས་བྱ་བ་ནི་འབྲེལ་པ་བྱེད་པའོ། །ཀུན་རྫོབ་ཅེས་བྱ་བ་འདི་ཅི་ཞིག་ཡིན་ཞེས་བྱ་བ་ལ་སོགས་པས་འབྲི་བ་ཉིད་བྱས་ནས། བདེན་ན་ཞེས་བྱ་བ་ལ་སོགས་པས་སུན་འབྱིན་པའོ། །ཨུཏྤལའི་སྔོན་པོ་བཞིན་དུ་བདེན་པའོ། །ཁྱད་པར་དུ་ནི་ཀུན་རྫོབ་འཐད་པ་མ་ཡིན་ནོ་ཞེས་བརྗོད་པ་ནི་བརྫུན་དང་དམ་པའི་ཞེས་བྱ་བའོ། །ཇི་ལྟར་སྔོན་པོ་དང་སྔོན་པོ་མ་ཡིན་པའི་ཐུན་མོང་བ་ཨུཏྤལ་ཉིད་སྔོན་པོས་ཁྱད་པར་དུ་བྱེད་པ་དེ་བཞིན་དུ་བདེན་པ་ནི་བརྫུན་པ་དང་དོན་དམ་པ་དག་གི་ཐུན་མོང་བ་ཉིད་མ་ཡིན་པ་དེ་ཇི་ལྟར་ན་དེ་དག་གིས་ཁྱད་པར་དུ་ཕྱེད་སྔ་མའི་འབྲེལ་པ་ནི་ཀུན་རྫོབ་ཀྱང་ཞེས་བྱ་བའོ། །ལྷག་མ་ནི་མ་བཀྲལ་ཏེ་གསལ་བའི་ཕྱིར་རོ། །རེ་ཞིག་དབུ་མའི་ལུགས་ལ་བརྟེན་ནས་འགལ་བ་མེད་པར་བསྟན་པའི་དོན་དུ་ཀུན་རྫོབ་ཀྱི་རང་བཞིན་གསུངས་སོ། །ཀུན་རྫོབ་ཅེས་བྱ་བ་འདི་ནི་ཞེས་བྱའོ། །གང་གི་ཕྱིར་ཀུན་རྫོབ་ཀྱི་རང་བཞིན་དེ་འདྲ་བ་ཡིན་པ་དེས་ནའོ། །དོན་ནི་ཞེས་བྱ་བ་ནི་འཆད་བཞིན་པ་འགལ་བ་མེད་པའི་མཚན་ཉིད་དོ། །དེ་ཉིད་བརྗོད་པ་ནི་ཐོག་མ་མེད་པ་ཞེས་བྱ་བ་ནས་མི་འགལ་ལོ་ཞེས་བྱ་བའི་བར་ཡིན་ནོ། །བྱིན་པོ་ལ་སོགས་པ་ནི་སྣང་བ་ཚད་དུ་ཟད་དེ་བདེན་པ་ནི་མ་ཡིན་ནོ་ཞེས་བྱ་བའི་དོན་ཏོ། །སྣང་པ་ཙམ་ཡིན་ནོ་ཞེས་བྱ་བ་འདི་ག་ལས་སྙམ་ན། སྔོན་པོ་ལ་སོགས་པ་ནི་ཞེས་གསུངས་སོ། །གཅིག་དང་དུ་མ་དང་བྲལ་བའི་ཕྱིར་སྙམ་དུ་དགོངས་པའོ། །འོ་ན་ཤེས་པ་ནི་ཡོད་པ་ཡིན་ནོ་སྙམ་ན་རྣམ་པར་ཤེས་པ་ཡང་ཞེས་བྱ་བའོ། །དེས་ན་ཞེས་བྱ་བ་ནི་སྔོན་པོ་ལ་སོགས་པ་ལས་ཐ་དད་པ་མ་ཡིན་
པས་ནའོ། །སྔོན་པོ་ལ་སོགས་པ་ཉིད་བཞིན་དུ་ཤེས་པ་ཡང་ཡོད་པ་མ་ཡིན་ནོ། །འོ་ན་སྔོན་པོ་ལ་སོགས་པ་ཇི་ལྟར་ཡིན་སྙམ་ན། གང་གི་ཕྱིར་འཇིག་རྟེན་གྱི་ཐ་སྙད་འདི་ནི་སྔོན་པོའོ་འདི་ནི་སེར་པོའོ་ཞེས་བྱ་བ་ལ་སོགས་པའི་རང་བཞིན་ཅན་དེ་ཚད་མ་ཡིན་ཏེ། མེད་པ་ཉིད་མ་ཡིན་པ་དེས་ན་ཐ་སྙད་ལ་ཉེ་བར་མཁོ་བས་ན་བདེན་པ་ཡིན་ནོ། །དེ་ལས་ཅིར་འགྱུར་སྙམ་ན། དེ་ལྟར་ན་ཞེས་གསུངས་སོ། །དོན་འདི་ཡིན་ཏེ། སྔོན་པོ་ལ་སོགས་པ་ནི་གཅིག་དང་དུ་མ་དང་བྲལ་བའི་ཕྱིར་མེད་པས་ན་དེ་དང་ཐ་མི་དད་པའི་ཤེས་པ་ཡང་མེད་པས་ཀུན་རྫོབ་པ་ཡིན་ནོ། །འཇིག་རྟེན་གྱི་ཐ་སྙད་དུ་མགུ་བ་བསྐྱེད་པ་ཉིད་ཡིན་པའི་ཕྱིར་ན་དེའི་མངོན་པའི་ང་རྒྱལ་གྱིས་བདེན་པ་ཡིན་ནོ་ཞེས་བྱ་བར་མི་འགལ་ལོ་ཞེས་བྱ་བའོ། །འོ་ན་དོན་དམ་པའི་བདེན་པ་གང་ཡིན་སྙམ་ན། མཇུག་བསྡུ་བའི་སྒོ་ནས་དེ་ཡང་སྟོན་པ་ནི་དེས་ན་ཞེས་བྱ་བའོ། །གང་གི་ཕྱིར་ཀུན་རྫོབ་ཀྱི་བདེན་པ་དེ་ལྟར་གནས་པ་དེས་ན་དོན་དམ་པའི་བདེན་པ་ནི་བདག་ཉིད་ཐམས་ཅད་དབེན་པ་ཡིན་ནོ། །དེ་ཉིད་ཀྱི་ཕྱིར་བདེན་པ་ཉིད་ནི་ཀུན་རྫོབ་དང༌། ཅིག་ཤོས་ཀྱི་ཐུན་མོང་ཡིན་པས་ཀུན་རྫོབ་དང་དོན་དམ་པས་ཁྱད་པར་དུ་བྱེད་པ་ཡིན་ནོ་སྙམ་དུ་དགོངས་པའོ། །གལ་ཏེ་སྣང་བའི་ཕྱི་རོལ་གྱི་རྗེས་སུ་འགྲོ་བ་དང་རྟོག་པ་པའི་རྗེས་སུ་འགྲོ་བའི་ཕྱིར་ན་དེ་ནི་དོན་བྱ་བ་བྱེད་པ་ཉིད་ཀྱི་ཡོད་པ་ཡིན་པའི་ཕྱིར་བདག་ཉིད་ཐམས་ཅད་ཇི་ལྟར་དབེན་སྙམ་ན། ཕྱི་རོལ་གྱི་ཞེས་གསུངས་སོ། །གལ་ཏེ་དེ་ལྟ་མ་མཐོང་མོད། །དེ་ལྟ་ན་ཡང་དེ་རྒྱུད་ཉིད་ཡིན་པ་ཇི་ལྟར་དག་སྙམ་ན་འོན་ཀྱང་ཞེས་གསུངས་སོ། །འོ་ན་ཇི་ལྟར་སད་པའི་རྟོག་པ་ལ་དེ་དགག་སྙམ་ན། གཞན་ཡང་ཞེས་བྱ་བ་སྟེ། སད་པའི་རྟོག་པ་ཡང་ངོ༌། །དེ་བཞིན་ཞེས་བྱ་བ་ནི་བག་ཆགས་ཀྱི་རྒྱུ་ཡིན་པར་རོ། །ཕྱི་རོལ་རྒྱུ་ཡིན་པ་བཀག་པའི་བདག་ཉིད་ཐམས་ཅད་དབེན་པ་ཡིན་ནོ་སྙམ་དུ་དགོངས་པའོ། །དེ་ལྟར་དབུ་མ་པའི་ལུགས་ཀྱིས་འགལ་བ་མེད་པར་བསྟན་ནས་རང་རིག་པའི་མངོན་སུམ་གྱིས་ཤེས་པ་ཡོད་པ་ལས་ཐ་དད་པ་མ་ཡིན་པའི་སྔོན་པོ་ལ་སོགས་པ་ཡང་དེའི་བདག་ཉིད་དུ་བྱེད་པ་ཡིན་ནོ། །སྐྱེ་བ་ལ་སོགས་པ་ཉིད་ནི་དེ་ལྟ་མ་ཡིན་ཏེ། དེ་ལ་མེད་པའི་ཀུན་རྫོབ་ཡིན་ལ་སྔ་མ་དང་ཕྱི་མའི་མངོན་སུམ་ལས་སྐྱེས་པའི་རྣམ་པར་རྟོག་པས་རྟོགས་པར་
བྱ་བ་ཡིན་པའི་ཕྱིར། ཡོད་པ་ཉིད་ཡིན་ནོ་ཞེས་རྣལ་འབྱོར་སྤྱོད་པའི་ལྟ་བ་བཤད་པ་ནི། ཡང་ན་ཞེས་བྱ་བའོ། །དེ་ལྟར་ཚད་མ་དང་འཇིག་རྟེན་གྱི་ཐ་སྙད་ལ་ལྟོས་ནས་ཡོད་པ་དང་མེད་པ་དག་མི་འགལ་ཡང་འགྲེལ་པ་བྱེད་པས་འགལ་བ་བརྗོད་པ་ནི་རྩོད་པ་བསླང་བ་ནི། ཅི་སྟེ་ཀུན་རྫོབ་ཅེས་ཞེས་བྱ་བའོ། །འགོག་པར་བྱེད་པ་ནི་དེ་ཡང་མི་བདེན་ཏེ་ཞེས་བྱ་བའོ། །དེ་ལྟར་ཞེས་བྱ་བ་ནི་དོན་དམ་པར་ནུས་པ་ལྟར་རོ། །དེ་ལྟར་ནི་ཞེས་བྱ་བ་ནི་རྟོགས་པ་ཙམ་གྱིས་རྣམ་པར་གཞག་པའི་ནུས་པས་སོ། །དགོངས་པ་འདི་ཡིན་ཏེ། གལ་ཏེ་རང་བཞིན་གང་གིས་ནུས་པ་མེད་པ་དེ་ལྟར་སྐྱེ་པ་ཡིན་ན་ནི་འགལ་བར་འགྱུར་བ་ཞིག །གང་གིས་ཆོས་ཇི་ལྟར་ནུས་པ་མེད་པ་དེ་ལྟར་ནི་མི་སྐྱེ་ལ། ཇི་ལྟར་སྐྱེ་བ་དེ་ལྟར་ཡང་ནུས་པ་ཚད་མ་དང་བྲལ་བ་ཡིན་པ་དེའི་ཚེ་འགག་པའི་གཏམ་ག་ལ་ཡོད་ཅེས་བྱ་བ་ཡིན་ནོ། །གལ་ཏེ་སྐྱེ་བ་ལ་སོགས་པ་ཉིད་ཀུན་རྫོབ་ཡིན་པ་དེའི་ཚེ་ཀུན་རྫོབ་ཏུ་སྐྱེའོ་ཞེས་བྱ་བ་ནི། སྐྱེ་བ་པོ་ཞེས་བྱ་བའི་ཉེས་པར་འགྱུར་རོ་སྙམ་དུ་དོགས་ན། སྐྱེ་པ་པོ་ཞེས་བྱ་བར་ཡང་ཞེས་གསུངས་སོ། །གང་གི་རང་བཞིན་དུ་ཞེས་བྱ་བའི་དྲི་བའོ། །ཀུན་རྫོབ་ཏུ་ཞེས་བྱ་བ་ནི་ལན་ཏེ། ཚད་མས་མ་བཅད་པ་ཉིད་ཀྱིས་སོ། །གང་ཡང་འགྲེལ་བ་བྱེད་པས་ཀུན་རྫོབ་སུན་ཕྱུང་ནས། ཀུན་རྫོབ་ཅེས་མིང་ཙམ་བྱས་པ་ཡིན་ན་ཡང་ཞེས་བརྗོད་པ་དེ་མིང་མ་གཏོགས་པའི་ཆོ་འཕྲུལ་ཡིན་ནོ་ཞེས་གསུངས་པ་ནི། དེ་བཞིན་ཀུན་རྫོབ་ཅེས་བྱ་བའོ། །དེ་སྨྲས་པ་གཞན་དག་ཀྱང་བཀོད་ནས་སུན་འབྱིན་པའོ། །གང་ཡང་རྒྱུ་དང་འབྲས་བུ་དག །ཅེས་བྱ་བའོ། །འདས་པ་ཉིད་ནི་འདས་མ་ཐག་པའོ། །འདས་ནས་ཞེས་བྱ་བ་ནི་ཁྱད་པར་གྱི་དོགས་པ་བསུ་བའོ། །བཟློག་པའི་ཕྱིར་མི་སྐྱེ་བའི་དུས་ན་ཡོད་པའི་ཕྱིར་རོ། །ཁྱད་པར་མེད་པར་གྲུབ་པའི་དོན་དུ་འདྲི་བ་ནི། སྐྱེ་བའི་དུས་དེ་གང་ཡིན་ཞེས་བྱ་བ་སྟེ། འབྱུང་བའི་དུས་ལྷ་འབྱིན་པའི་དུས་ཡིན་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་དང་པོ་སེལ་བའོ། །འབྱུང་བ་པོ་འབྲས་བུའི་རྒྱུ་ཡོད་པར་འགྱུར་ཞེས་བྱ་བའི་དོན་ཏོ། །གཉིས་པ་སེལ་བ་ནི་འོན་ཏེ་ཞེས་བྱ་བའོ། །འབྱིན་པ་ཞེས་བྱ་བ་ནི་སྐྱེད་པར་བྱེད་པའོ། །ཡོད་པ་ནི་འདས་མ་ཐག་པའི་རྒྱུའོ། །དེ་ལྟ་ཡིན་ན་ཅི་སྐྱོན་སྙམ་ན། དེའི་ཕྱིར་ཆོད་པ་ཡང་ཞེས་བྱ་
བའོ། །དེ་མ་ཐག་པའི་རྒྱུ་ནི་གལ་ཏེ་འབྲས་བུ་ལས་སྔར་ཡོད་པ་ཡིན་ལ་འདས་ནས་ཡུན་རིང་དུ་ལོན་པ་ནི་མེད་པ་ཡིན་ནོ། །དེས་ན་གང་ཞིག་དེ་མ་ཐག་པ་ཉིད་ཀྱིས་འབྲས་བུ་མེད་པའི་དུས་ན་ཡོད་པའི་དེ་ཉིད་ནི་རྒྱུ་ཡིན་གྱི། སྔ་མ་དག་ནི་མ་ཡིན་ཏེ་ཆོད་པའི་ཕྱིར་རོ་ཞེས་དོགས་པ་ན་སྐད་ཅིག་གིས་ཞེས་གསུངས་སོ། །དྲི་ལ་སོགས་པའི་སྐད་ཅིག་ཀྱང་གཟུགས་ཀྱི་སྐད་ཅིག་བཞིན་དུ་གཟུགས་ཀྱི་འབྲས་བུའི་དེ་མ་ཐག་པ་ཡིན་པ་དེ་དག་ཀྱང་རྒྱུར་འགྱུར་རོ་ཞེས་བྱ་བའི་དོན་ཏོ། །ཧ་ཅང་ཐལ་བ་སྤང་བའི་དོགས་པ་བསུ་བ་ནི་རྒྱུད་ཐ་དད་པའི་ཕྱིར་ཞེས་བྱ་བའོ། །དེ་མ་ཐག་པ་ཉིད་ཀྱི་རྒྱུ་ཡིན་ན་དྲི་ལ་སོགས་པ་རྒྱུད་ཐ་དད་པ་ཉིད་དུ་མི་འགྲུབ་ཅེས་ལན་འདེབས་པ་ནི། འདི་ནི་ཞེས་བྱ་བའོ། །རྒྱུད་ཐ་དད་པ་ཉིད་ནི་རྒྱུ་ཉིད་དང་འགལ་བ་ཡང་མ་ཡིན་ཏེ། གནོད་པ་མེད་པའི་ཕྱིར་རོ། །མ་བརྟགས་པ་ནི་རྣམ་པར་རྟོག་པ་མེད་པར་ཤེས་པ་ཡིན་པས། དེས་གྲུབ་པ་ཡང་མ་བརྟགས་པས། གྲུབ་པ་ཡིན་ཡང་ཚད་མས་གྲུབ་པ་ཁོ་ན་ཡིན་པས་ཇི་ལྟར་ཀུན་རྫོབ་ཡིན་ཞེས་སུན་འབྱིན་པ་བརྗོད་པ་དེ་ཡང་མི་བདེན་པ་སྟེ་ཞེས་ཁོང་ནས་དབྱུང་ངོ༌། །ཇི་ལྟར་མི་བདེན་ཞེ་ན། བརྟགས་པ་ནི་ཚད་མ་ལ་བརྗོད་ཀྱི་ཞེས་བྱ་བའོ། །དེས་ན་ཞེས་བྱ་བ་ནི་བརྟག་པ་ཚད་མ་ཡིན་པས་ནའོ། །འོ་ན་རྒྱུ་མི་འདོད་ན་གང་ཡིན་སྙམ་ན་སྒྱུ་མའི་དོན་ཡང་ཞེས་བྱ་བའོ། །འདི་ཉིད་ཅེས་བྱ་བ་ནི་ཚད་མ་མ་ཡིན་པས་རྟོགས་པའི་དོན་ཉིད་དོ། །འཇིག་རྟེན་ལ་གྲགས་པའི་སྒྲས་ཚད་མ་ཅན་མ་ཡིན་པའི་རྟོགས་པ་འདོད་པ་ཡིན་ནོ་ཞེས་བརྗོད་པ་ནི་འཇིག་རྟེན་ལ་གྲགས་པའི་ཞེས་བྱ་བའོ། །ཚད་མ་ཅན་མ་ཡིན་པའི་རྟོགས་པ་ནི་ཀུན་རྫོབ་དང་སྒྱུ་མ་ལ་སོགས་པའི་སྒྲས་བརྗོད་པ་ཡིན་ནོ་ཞེས་བྱ་བའི་དོན་ཏོ། །གང་གི་ཕྱིར་དེ་ལྟར་ཀུན་རྫོབ་དང་སྒྱུ་མ་ལ་སོགས་པའི་སྒྲའི་དོན་མ་རྟོགས་པར་གྲགས་པའི་དོན་ཡིན་པའི་རྒྱུ་དེས་ན་མ་བརྟགས་ན་གྲགས་པའི་དོན་ནི་ཚད་མས་གྲགས་པའི་དོན་དུ་འགྱུར་རོ་ཞེས་བྱ་བའི་དོན་སྐྱོན་མེད་དོ། །རྟོགས་པ་གང་ལ་ཚད་མ་རྗེས་སུ་འགྲོ་བ་ཡོད་པ་དེ་ནི་ཀུན་རྫོབ་མ་ཡིན་ནོ་ཞེས་གསུངས་པ་ནི་བསྟན་བཅོས་བྱེད་པའི་ཞེས་བྱ་བའོ། །རང་རིག་པ་ལས་ཕྱི་རོལ་དུ་གྱུར་པའི་ཚད་མ་ཅིག་ཤོས་ཀྱི་རྣམ་པར་དབྱེ་བ་ནི། ཀུན་རྫོབ་ཉིད་ཡིན་ཏེ། ཕྱི་རོལ་ལྟོས་པའི་ཕྱིར་རོ་ཞེས་གསུངས་པ་ནི། ཚད་མ་དང་ཚད་མ་མ་ཡིན་པའི་ཞེས་བྱ་བའོ། །ཅིའི་
ཕྱིར་ཞེ་ན་འདི་ལྟར་ཞེས་གསུངས་སོ། །མི་སླུ་བའི་རང་བཞིན་བརྗོད་པ་ན་ནི་མི་སླུ་བ་ཡང་ཞེས་བྱ་བའོ། །གང་ལ་ལྟོས་ནས་སྒྲུབ་པར་བྱེད་པའི་ཤེས་པ་ཚད་མར་འགྱུར་བ་དེ་ནི་ཤེས་པ་གཞན་ཡིན་ནོ་ཞེས་བརྗོད་པ་ནི་ཐོབ་པ་ཡང་ཞེས་བྱ་བའོ། །དེ་ལས་ཅིར་འགྱུར་སྙམ་ན་གལ་ཏེ་དོན་ཞེས་བྱ་བའོ། །ཤེས་པ་སྔ་ན་དོན་མྱོང་ན་ཤེས་པ་ཕྱི་མ་དོན་མེད་པ་ལ་ཅི་སྟེ་ལྟོས་ཏེ། དེ་ཙམ་གྱིས་རྟོགས་པའི་ཕྱིར་རོ། །དེས་ན་ཐོབ་པ་དོན་དུ་གཉེར་བ་ལ་དོན་ཅི་ཞིག་ཡོད་པར་འགྱུར་རོ། །དེས་ན་ཞེས་བྱ་བ་ནི་ཐོབ་པ་དོན་དུ་གཉེར་བ་མེད་པའི་ཕྱིར་རོ། །ཤེས་པ་ཕྱི་མས་ལྷག་པར་རྟོགས་པར་དོགས་པ་བསུ་བ་ནི། འོན་ཏེ་ཕྱིས་པ་དེ་ནི་གཞན་ཡིན་ནོ། །ཞེས་བྱ་བའོ། །འདི་དེས་བསྟན་པ་ན་མེ་ཡིན་ནོ་ཞེས་བྱ་བ་ནི་ལན་ནོ། །དེས་ཞེས་བྱ་བ་ནི་ཤེས་པ་སྔ་མས་སོ། །དེ་ཐོབ་པས་ཚད་མར་འགྱུར་རོ་ཞེས་བྱ་བ་ནི་གཞན་གྱིས་སྨྲས་པ་སྟེ། དེ་ནི་ཤེས་པ་སྔ་མའོ། །ཐོབ་པ་ཞེས་བྱ་བ་འདི་སྐབས་ཀྱི་གཞན་ནོ། །དེ་ལྟ་ན་ཞེས་བྱ་བ་ནི་ལན་ཏེ། གལ་ཏེ་གཞན་ཐོབ་པས་གཞན་ཚད་མས་ཡིན་ན་ཤེས་པ་ཐམས་ཅད་ལ་ཅི་ཡང་རུང་བ་ཐོབ་པ་ཡོད་པའི་ཕྱིར། ཚད་མར་ཐལ་ལོ་ཞེས་བྱ་བའི་དོན་ཏོ། །བསལ་ཟིན་བའི་ཕྱོགས་གཉིས་ལ་ནི་མི་འཐད་པ་ཉིད་དོ་ཞེས་བརྗོད་པ་ནི་ཅི་སྟེ་ཉེ་བར་བསྟན་པ་ལ་ཡང་ཞེས་བྱ་བའོ། །དེ་ལྟ་ཡིན་ན་ཚད་མ་དང་ཚད་མ་མ་ཡིན་པའི་རྣམ་པར་དབྱེ་བ་མེད་པར་འགྱུར་རོ་ཞེས་བརྗོད་པ་ནི་དེའི་ཕྱིར་ཞེས་བྱ་བའོ། །ཅུང་ཟད་ཀྱང་ཞེས་བྱ་བ་ནི་གཞལ་བྱ་བ་ལ་སོགས་པའོ། །འོན་ཏེ་གཞན་ཙམ་གྱི་ཡུལ་ཅན་ནི་ཚད་མ་མ་ཡིན་གྱི་འོན་ཀྱང་མངོན་པར་འདོད་པ་ཐོབ་པའི་མཐར་ཐུག་པ་ཅན་འཇིག་རྟེན་མངོན་པར་འདོད་པ་ཡིན་ནོ་ཞེ་ན། དེ་ལྟ་ན་ནི་དེ་ཀུན་རྫོབ་པ་ཁོ་ནར་འགྱུར་རོ་ཞེས་བརྗོད་པ་ནི་ཀུན་རྫོབ་ཏུ་ཇི་ལྟ་བ་དེ་ལྟར་ཡིན་དུ་ཟད་དོ་ཞེས་བྱ་བའོ། །ཅིའི་ཕྱིར་མངོན་པར་འདོད་པ་ཡིན་སྙམ་ན། དངོས་པོའི་དེ་ཉིད་ལས་འདས་ནས། །ཞེས་བྱ་བའོ། །གང་ཞིག་ཇི་ལྟར་ཡོད་པ་དེ་ཁོ་ན་ལྟར་དེ་ཉིད་དུ་ཡོད་པ་ལ། ཚད་མ་ལ་སོགས་པའི་རྣམ་པར་དབྱེ་བ་ཡང་ཀུན་རྫོབ་ཏུ་ཡོད་པ་ཡིན་ནོ། །དེ་ལྟ་ཡིན་དང་དེ་ནི་དེ་ཁོ་ནར་ཡོད་པ་ཡིན་ནོ། །གལ་ཏེ་ཞེས་བྱ་བ་ལ་སོགས་པས་ནི་རྣམ་འགྲེལ་བ་འཇུག་པའོ། །སྤྱི་ལ་ཡང་ཞེས་བྱ་བ་ནི་དོན་བྱ་བ་ཡོད་པའོ། །སྤྱི་ནི་ཤེས་པ་དང་བརྗོད་པ་ཐ་དད་པ་
མེད་པའི་མཚན་ཉིད་ཀྱི་དོན་བྱེད་པ་ཡིན་ནོ། །ཀུན་ལ་ཞེས་བྱ་བ་ནི་སྤྱི་ལ་སོགས་པ་ལ་ཡོད། མིན་ཏེ་ཞེས་བྱ་བ་ནི་སྤྱི་ལ་དོན་བྱ་བ་ཡོད་པ་ཞེས་འབྲེལ་ཏོ། །ཅིའི་ཕྱིར་ཞེ་ན། སྤྱིའི་མཚན་ཉིད་ལ་བློ་དང་འབྲེལ་པའི་རྗེས་སུ་འགྲོ་བ་དང་ལྡོག་པ་དག་མི་སྣང་བའི་ཕྱིར་རོ། །མིག་དང་གཟུགས་སོགས་བློ་བཞིན་ནོ། །ཞེས་བྱ་བ་ནི་ཆོས་མི་མཐུན་པའི་དཔེའོ། །དམིགས་པ་དང་བདག་པོའི་རྐྱེན་གྱིས་ཡུལ་ལ་ཞེས་བྱ་བ་ནི་གཟུགས་ལ་སོགས་པའི་ཡུལ་དང་མིག་ལ་སོགས་པ་བདག་པོ་སྟེ། དེ་དག་ཉིད་རྐྱེན་ཡིན་ཏེ་ལྷན་ཅིག་བྱེད་པ་ཡིན་པའི་ཕྱིར་རོ། །ཡུལ་གང་ཡིན་པ་ཞེས་ཚིག་རྣམ་པར་སྦྱར་རོ། །དེ་བཞིན་དུ་སྤྱིའི་བློ་དག་ནི་མ་ཡིན་ཏེ་ཞེས་བྱ་བ་ནི་དམིགས་པ་དང་བདག་པའི་རྐྱེན་གྱི་ཡུལ་ལ་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མ་ཡིན་ནོ། །ཅིའི་ཕྱིར་ཞེ་ན། སྔོན་མཐོང་བའི་འབད་རྩོལ་ཞེས་གསུངས་སོ། །གལ་ཏེ་སྤྱིའི་བློ་བཞིན་དུ་དམིགས་པ་ལ་སོགས་པའི་བློ་དག་ཀྱང་ནང་གི་བྱེད་པ་ཙམ་ལས་འབྱུང་བ་མ་ཡིན་ཞེ་ན། དེ་ལྟར་ཞེས་གསུངས་སོ། །ཅིའི་ཕྱིར་འགྱུར་རོ་ཞེས་བྱ་བ་ནི་དངོས་པོ་སྔར་ཡོད་པའོ་ཞེས་བྱ་བར་བལྟའོ། །གལ་ཏེ་གང་གིས་དོན་སྔར་ཡོད་པར་རྟོག་པ་དོན་ལ་མི་ལྟོས་ན་ཉེས་པ་ཅི་ཞིག་ཡོད་སྙམ་ན། གལ་ཏེ་ཞེས་བྱ་བ་གསུངས་སོ། །དེའི་ཚེ་ཞེས་ཁོང་ནས་ཕྱུང་ལ། གང་ལ་དང་གང་དུ་ཞེས་བྱ་བ་ལ་སོགས་པ་དང་སྦྱར་རོ། །ཅི་དང་འདྲ་བར་ཞེ་ན། རབ་རིབ་ཅན་གྱིས་ཞེས་བྱ་བའོ། །བཟློག་པ་བརྗོད་པ་ནི་དེ་དང་ཞེས་བྱ་བའོ། །དེས་ན་ཞེས་བྱ་བ་ནི་བཟློག་པས་སོ། །དེ་ལྟ་ན་ཡང་ཇི་ལྟར་ནུས་པ་རྟོག་སྙམ་ན། དེས་ན་ཞེས་བྱ་བ་དེ་ལྟར་གྱི་དོན་ཏོ། །སྣམ་བུ་ལ་སོགས་པའི་དོན་དེ་ལས་བློ་སྐྱེ་བ་ན་ཞེས་བྱ་བ་འབྲེལ་ཏོ། །ཇི་ལྟར་དེ་ལས་སྐྱེ་ན། རྗེས་སུ་འགྲོ་བ་དང་ཞེས་བྱ་བ་ལ་སོགས་བ་གཏན་ཚིགས་ཀྱི་ཚིག་སྦྱར་ཏེ། སྤྱིའི་བློ་ནི་དེ་ལྟར་མ་ཡིན་ཏེ་ཞེས་བྱ་བ་ནི། སྤྱིའི་བློ་ནི་དེ་ལྟ་མ་ཡིན་ཏེ་ཞེས་འབྲེལ་ཏོ། །ཅིའི་ཕྱིར་ཞེ་ན། གང་གི་བྱེད་པ་ཙམ་ལས་ཞེས་བྱ་བའོ། །འདི་ཉིད་སྦྱོར་བས་རྒྱས་འདེབས་པ་ནི། འབྲས་བུ་གང་ཞིག་ཅེས་བྱ་བའོ། །སྤྱིའི་བློ་ཡང་འབད་རྩོལ་ཙམ་ལས་སྐྱེས་པ་ཡིན་ནོ་ཞེས་ཕྱོགས་ཀྱི་ཆོས་བསྡུ་བ་ནི་མ་བརྗོད་དེ། གསལ་བའི་ཕྱིར་རོ། །དགག་པར་བྱ་བ་དངོས་པོ་ཐ་དད་པར་ནུས་པ་
རྟོགས་པར་བྱེད་པའི་ཁྱབ་བྱེད་ནི་དེ་ཙམ་ལས་མི་འབྱུང་བ་ཡིན་ལ། དེ་དང་འགལ་བ་ནི་དེ་ཙམ་ལས་བྱུང་བ་ཉིད་ཡིན་ཏེ། དེས་ན་ཁྱབ་པར་བྱེད་པ་འགལ་བ་དམིགས་པའོ། །འདི་མ་གྲུབ་པར་དོགས་པ་བསུ་བ་ནི། བ་ལང་ཉིད་ཀྱི་ཞེས་བྱ་བ་ལ་སོགས་པའོ། །འོན་མི་སྐྱེ་བ་ཇི་ལྟར་ཡིན་ཞེ་ན། བག་ཆགས་སད་བྱེད་དེ་མིན་པས། །ཞེས་བྱ་བ་སྟེ། རྟ་དེ་མིན་པས་སོ། །ཕྱེད་ཕྱི་མ་འཆད་པ་ནི་རྟ་དེ་ནི་ཞེས་བྱ་བའོ། །ཅིའི་ཕྱིར་རྟ་དེ་མི་ཕྱེད་པ་སྙམ་ན། དེ་ཉིད་ལ་ཞེས་བྱ་བ་སྟེ། ནོག་ལ་སོགས་པ་དང་ལྡན་བ་ཉིད་ལས་སོ། །ཕྱེད་སྔ་མ་འཆད་པ་ནི་བ་ལང་ཉིད་མེད་པ་ལས་ནི་ཞེས་བྱ་བ་སྟེ། དེ་ལ་བ་ལང་ཉིད་ཀྱི་བློ་ཞེས་འབྲེལ་ཏོ། །འོ་ན་དེ་ལ་བ་ལང་གི་བློ་མེད་པ་ཅིའི་ཕྱིར་ཞེ་ན། འོན་ཀྱང་ཞེས་བྱ་བའོ། །བ་ལང་གི་ཚོགས་ལ་ཡང་གོང་བུ་བཞིན་དུ་རྟ་ལ་སོགས་པ་དང་མི་མཐུན་པ་རྗེས་སུ་འགྲོ་བའི་རང་བཞིན་ནི་མཐོང་བ་ལ་སྣང་བ་མ་ཡིན་ནོ་ཞེས་བཤད་པ་ནི། གང་གིས་ཞེས་བྱ་བ་སྟེ་རྟོགས་པ་ཉིད་ཀྱིས་སོ། །དེ་ཡོད་དམ་ཞེས་བྱ་བ་ནི་བ་ལང་གི་ཚོགས་ལའོ། །མ་ཡིན་ཞེས་བྱ་བ་ནི་རྟ་ལ་སོགས་པ་ལ་སྟེ། དེ་ལྟར་རྣམ་པར་གཞག་པའི་བྱ་བའོ། །གང་གི་ཕྱིར་དེ་ལྟར་རྟོགས་པ་ལས་སྔ་ཕྱིར་ཡོད་པ་ཉིད་མ་ཡིན་པ་དེའི་ཕྱིར་ཞེས་བྱ་བའོ། །གལ་ཏེ་ཞེས་བྱ་བ་ནི་ཡང་མ་གྲུབ་པར་དོགས་པ་བསུ་བའོ། །དོན་དམ་པ་ནི་དངོས་པོའོ། །ཕན་ཚུན་ཞེས་བྱ་བ་ནི་ལན་ནོ། །ཐོག་མ་མེད་པའི་བག་ཆགས་ཀྱི་དབང་གིས་ནི་རྣམ་པར་རྟོག་པའི་བློ་ཕན་ཚུན་ལྡོག་པ་ཡིན་གྱི་གསལ་བ་ནི་རང་གི་རྒྱུའི་སྟོབས་ལས་ཕན་ཚུན་ལྡོག་པར་སྐྱེ་བ་ཡིན་ནོ། །དེས་ན་གྲུབ་པ་ཉེ་བར་འཇུག་པའི་ཕྱིར་ཅི་ཞིག་བྱ། གལ་ཏེ་རྟོགས་པར་བྱ་བ་ཡོད་པ་ལ་བློ་མི་ལྡོག་པ་མ་ཡིན་ནམ་ཞེ་ན། བདེན་ཏེ་འོན་ཀྱང་རྟོགས་པར་བྱ་བའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཡིན་གྱི། གཞན་ནི་མ་ཡིན་ནོ་ཞེས་བརྗོད་པ་གལ་ཏེ་ཞེས་བྱ་བའོ། །བསལ་བར་བྱ་བས་ན་བསལ་བ་སྟེ་སྤྱིའོ། །གལ་ཏེ་དེ་མེད་ཀྱང་མི་འགྱུར་གྱི། འོན་ཀྱང་དེ་ཡོད་པ་ཉིད་ན་དེ་ཡོད་པ་ཡིན་ན་ནི། དེའི་ཚེ་ནུས་པ་མེད་པར་མི་འགྱུར་རོ། །གལ་ཏེ་ཐམས་ཅད་ལ་བློ་ཡོད་ན་རྟོགས་པར་བྱ་བ་ཡང་ཐམས་ཅད་ན་ཡོད་པར་འགྱུར་རོ་ཞེས་དོགས་པ་བསུ་བ་ནི་དེ་ནི་སྤྱི་ནི་ཞེས་བྱ་བའོ། །རབ་རིབ་ཅན་གྱིས་ཞེས་བྱ་བ་ནི་ལན་ནོ། །དེ་ལྟ་བུ་
ཁོ་ནར་ནི་ཁྱབ་པ་ཉིད་དུའོ། །སྤྱི་དེ་ལ་ཡང་གཞན་གྱིས་མཐོང་བའི་ཕྱིར་ཁྱབ་པར་བྱེད་པ་མ་ཡིན་པ་ཞེས་བྱ་བའི་སྐྱོན་དུ་འགྱུར་རོ། །དེ་ཡོད་པ་ནི་འབད་རྩོལ་ལ་སོགས་པ་ཡོད་ནའོ། །རབ་རིབ་ཅན་གྱིས་ཞེས་བྱ་བ་ལ་སོགས་པའོ། །ཇི་ལྟར་རབ་རིབ་ཉམས་པའི་རྒྱུ་ཡིན་པའི་ཕྱིར་ན་དེ་ཁོ་ན་མ་ཡིན་པ་དམིགས་པར་བྱེད་པ་ཉིད་ཡིན་པ་དེ་བཞིན་དུ་ཕྱིན་ཅི་ལོག་གི་འདུ་བྱེད་སད་པ་ཡང་ནང་གི་བྱེད་པ་ཉམས་པའི་རྒྱུ་ཡིན་པའི་ཕྱིར་ན་དེ་ཁོ་ན་མ་ཡིན་པ་དམིགས་པར་བྱེད་པ་ཡིན་ནོ་ཞེས་གསུངས་པ་ནི་གཞན་ཡང་ཞེས་བྱ་བའོ། །གལ་ཏེ་ཞེས་བྱ་བ་ནི་སྡུད་པའོ། །དོགས་པ་ལྷག་པ་བསུ་བ་ནི། དོན་བྱ་བ་གྲུབ་པ་ཞེས་བྱ་བའོ། །སྒྲ་ལ་སོགས་པ་ལ་དོན་བྱ་བ་གྲུབ་པ་མེད་པས་ན། མི་བདེན་པའི་ཕྱིར་དབང་པོ་ཉམས་པར་གྲུབ་པ་དེས་ན་ཕན་ཚུན་བསྟེན་པའི་ཉེས་པ་མེད་དོ་ཞེ་ན། ལན་དུ་འདི་ནི་བརྗོད་མ་ཐག་པའི་སྤྱི་ལ་ཡང་མཚུངས་ཏེ། དོན་བྱ་བ་མེད་པས་མི་བདེན་པ་ཡིན་ལ། དེ་ལས་ནི་སྤྱིའི་འཛིན་པའི་ཤེས་པ་ཉམས་པ་ཡིན་ནོ་ཞེས་བྱ་བར་འགྱུར་རོ། །དེས་ན་ཞེས་བྱ་བའི་དོན་བརྗོད་པ་ནི། ཤེས་པ་ཙམ་ལ་ཡང་ཞེས་བྱ་བའོ། །དེས་ཞེས་བྱ་བ་ནི་སྤྱིའི་བློ་ནང་གི་བྱེད་པ་ལས་བྱུང་བར་བསྟན་པས་སོ། །རྩོལ་བ་ནི་དྲན་པའི་ནུས་པའོ། །སོགས་པའི་སྒྲས་ནི་མ་འོངས་པ་ལ་སོགས་པས་བསྡུའོ། །དེ་དག་ཉིད་ནང་གི་ཡན་ལག་སྟེ། ཉེ་བར་གནས་པའི་རྒྱུ་ཡིན་ནོ། །དེ་དག་རྗེས་སུ་འཇུག་པ་ནི་རྗེས་སུ་བྱེད་པ་སྟེ། དེའི་ཕྱིར་ན་བློ་ནང་གི་བྱེད་པ་ལས་བྱུང་བར་བཤད་པ་ཡིན་ནོ། །སྤྱི་ནི་འདོགས་པ་ཉིད་ཀྱིའོ། །གྲངས་སོགས་ཞེས་བྱ་བ་ནི་སོགས་པའི་སྒྲས་བཤད་པ་འདི་ལའོ་ཞེས་བྱ་བ་ལ་སོགས་པའི། གལ་ཏེ་རྣམ་པར་དབྱེ་བ་མེད་པའི་རྫས་ཁོ་ན་སྣང་བ་མ་ཡིན་ནམ། རྡུལ་ཕྲ་རབ་རྣམས་ནི་སོ་སོར་དབང་པོ་ལས་འདས་པས་ན། ཚོགས་པ་རྣམས་ཀྱང་དབང་པོ་ལས་འདས་པའི་ཕྱིར་རོ། །དེས་ན་གཅིག་ཏུ་མངོན་པར་ཞེན་པའི་རྫས་ཀྱི་བློ་སྣང་གི་བྱེད་པ་ཙམ་ལ་རག་ལས་པ་ཇི་ལྟར་ཡིན་སྙམ་དུ་དོགས་པ་བསུ་བ་ནི། ནང་བྱེད་པ་ཙམ་ལ་རག་ལས་པར་བསྟན་པའི་དོན་དུ་གཟུགས་ཅན་མ་ཡིན་པ་ལ་སོགས་པའི་རང་བཞིན་ཅན་སྣང་བ་ཉིད་དུ་ཁས་བླངས་པའི་རྫས་ལ་ནི་མ་དམིགས་པས་གནོད་དོ་ཞེས་བརྗོད་ན་ནི། འདི་ལྟར་ཞེས་བྱ་བའོ། །གཟུགས་མེད་པ་ལ་སོགས་པའི་
རང་བཞིན་ནི། རྣམ་པར་རྟོག་པ་དང་བཅས་པ་འམ། རྟོག་པ་མེད་པའི་མངོན་སུམ་ལ་སྣང་བ་མེད་དེ། གསལ་བ་དང༌། མི་གསལ་བ་ཉིད་དུ་གཟུགས་ལ་སོགས་པ་ཁོ་ན་སྣང་བའི་ཕྱིར་རོ། །དེས་ན་ཡན་ལག་ཅན་ནི་སྲིད་པ་མ་ཡིན་ནོ། །རྡུལ་ཕྲ་རབ་རྣམས་ནི་སོ་སོར་དབང་པོ་ལས་འདས་པ་ཡིན་ཡང༌། ཚོགས་པ་རྣམས་ཕན་ཚུན་ཕན་འདོགས་པས་མངོན་སུམ་ཉིད་དུ་འགྱུར་བའི་ཕྱིར་དབང་པོ་ལས་འདས་པ་མ་ཡིན་ནོ། །ཇི་ལྟར་རབ་རིབ་ཅན་ལ་སྐྲ་གཅིག་ལ་མངོན་སུམ་མ་ཡིན་ཡང༌། མང་པོ་རྣམས་ནི་ཕན་ཚུན་ཕན་འདོགས་པས་མངོན་སུམ་མ་ཡིན་ནོ། །རབ་རིབ་མེད་པ་ལ་སྐྲ་རེ་རེ་མངོན་སུམ་དུ་འགྱུར་བ་ནི་རབ་རིབ་ཅན་ལ་ཕན་པ་མ་ཡིན་ནོ། །ཕན་པ་ཡིན་ལ་ཡང་ཕྲ་རབ་རྣམས་ཀྱི་རྣལ་འབྱོར་གྱི། མངོན་སུམ་ཡིན་པ་ཉིད་ཀྱང་བདག་ཅག་ལ་སོགས་པ་ཉེ་བར་མཁོ་བར་འགྱུར་རོ། །དེ་བས་ན་རང་རིབ་ཅན་གྱིས་སྐྲ་ཤད་མངོན་སུམ་ཉིད་ཡིན་པ་དེ་བཞིན་དུ་རྡུལ་ཕྲ་རབ་རྣམས་མངོན་སུམ་ཉིད་ཡིན་པ་མི་འགལ་ལོ། །འདི་སྐད་དུ་ཡང་འགལ་བ་ཡང་ཅི་ཡོད་ཅེས་བྱ་བ་ལ་སོགས་པ་འཆད་པར་འགྱུར་རོ། །དེས་ན་བུམ་པའི་བདག་ཉིད་ཀྱི་རྫས་ལ། བུམ་པའི་བློ་རྗེས་སུ་འགྲོ་བ་དང་ལྡོག་པ་མ་ཡིན་ཏེ། དེ་མེད་ཀྱང་ཡོད་པའི་ཕྱིར་རོ། །ནང་གི་བྱེད་པ་ཙམ་ལ་རག་ལས་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཡན་ལག་ཅན་མ་ཡིན་ན་ཇི་ལྟར་དམིགས་ཤེ་ན། མིག་ལ་སོགས་པའི་བློས་ནི། ཞེས་གསུངས་སོ། །གལ་ཏེ་གཟུགས་ལ་སོགས་ལ་བུམ་པ་དང་སྣམ་བུ་གཉིས་ལ་ཁྱད་པར་མེད་པའི་ཕྱིར། གཅིག་ཁོ་ན་ལ་བུམ་པའི་བློ་ཇི་ལྟར་འགྱུར་སྙམ་ན། རང་གི་རྒྱུའི་མཐུ་ལས་ཡུལ་དེ་དང་དེར་ཁྱབ་པས་མི་འདྲ་བ་ཉིད་དུ་སྐྱེས་པའི་གཟུགས་ལ་སོགས་པ་ཁྱད་པར་ཅན་གྱི་དོན་བྱ་བ་བྱེད་པ། བརྡའི་ཁྱད་པར་གྱི་ཡུལ་དུ་གྱུར་པ་འགའ་ཞིག་ཁོ་ན་དེའི་བག་ཆགས་སད་པའི་རྒྱུར་འགྱུར་བས། དེའི་སྒྲས་བརྗོད་པ་ཡིན་ནོ་ཞེས་བྱ་བའི་དོན། བརྗོད་པ་ནི་དེས་ན་ཞེས་བྱ་བའོ། །འོན་ཏེ་མིག་ལ་སོགས་པའི་བློ་ནི་གཟུགས་ཙམ་ལ་མ་ཡིན་གྱི། མཐོང་བ་ཉིད་ལ་རེག་གོ་སྙམ་པའི་རྣམ་པར་རྟོག་པ་ནི་མཐོང་བ་ལས་བྱུང་བ་ཡིན་གྱི། རང་རྒྱུད་ནི་མ་ཡིན་ནོ། །མཐོང་བ་ཡང་གཟུགས་ལ་སོགས་པ་དག་ལས་ཐ་དད་པའམ། ཐ་མི་དད་པའི་རྫས་ལ་ཡིན། ཐ་དད་པ་དང་མི་དད་པའི་རྫས་
མ་མཐོང་བར་འབྱུང་བའི་རྣམ་པར་རྟོག་པའི་བག་ཆགས་ཙམ་ལས་བྱུང་བ་ཡིན་ནོ་ཞེས་རྟོག་པ་ཡིན་ནོ་ཞེས་བྱ་བའོ། །གཞན་མིན་བའམ་ཞེས་བྱ་བ་ནི་ཐ་མི་དད་པའོ། །དང་པོ་ལ་བརྗོད་པ་ནི་གཞན་མ་ཡིན་པར་ཞེས་བྱ་བའོ། །འདི་ལ་གཟུགས་ཡོད་པ་ན་གཟུགས་ལྡན་ནོ། །བཟློག་པར་འཛིན་པ་ཞེས་བྱ་བ་འདི་ལ་བརྗོད་པ་ནི་གཞན་དུ་ཞེས་བྱ་བའོ། །རྣམ་པ་གཉིས་སུ་ཞེས་བྱ་བ་ནི་བཟློག་པ་བརྗོད་པའོ། །གལ་ཏེ་བག་ཆགས་ཙམ་ལས་བྱུང་བའི་རྣམ་པར་རྟོག་པས་ཀྱང་ཕྱི་རོལ་རྣམ་པར་འཇོག་པ་མ་ཡིན་ནམ་སྙམ་ན་ཡང་ཐ་དད་པ་དང༌། མི་དད་པ་རིག་པ་མེད་པ་ཉིད་བལྟར་རུང་བ་མེད་པར་རིག་པར་བྱེད་པ་ཡིན་ནོ་ཞེས་བྱ་བ་ལན་ཡིན་པར་ལྟའོ། །གལ་ཏེ་བྱ་བའམ་རྣམ་པར་རྟོག་པའི་ཕྱི་རོལ་རྟོགས་པར་བྱེད་པ་ཡང་རང་རྒྱུད་ཁོ་ན་ཡིན་ཏེ། གནོད་པ་མེད་པའི་ཕྱིར་རོ། །རྒྱུ་ནི་དེ་གཞན་དུ་མི་འཐད་པས་བག་ཆགས་ཀྱི་རང་བཞིན་ནམ་གཞན་ཡང་རུང་སྟེ། ཅི་ཡང་རུང་བ་ཞིག་ཡིན་པར་འགྱུར་རོ་ཞེས་དོགས་པ་བསུ་བ་ནི་ཅི་སྟེ་ཞེས་བྱ་བའོ། །འཁྲུལ་པ་མེད་པ་ཡིན་ཞེས་བྱ་བ་ནི་གནོད་པ་མེད་པའོ། །བུམ་པའོ་སྙམ་པའི་རྣམ་པར་རྟོག་པས་ནི་བུམ་པ་གཟུགས་ལ་སོགས་པ་ལས་ཐ་དད་པར་རྟོགས་པ་པ་ཡིན་ནོ་ཞེས་བྱ་བའི་དོན་ཏོ། །བརྡ་ཐུན་མོང་མ་ཡིན་པས་བྱས་པ། བརྡ་ཇི་ལྟ་བ་བཞིན་བརྗོད་པ་དང༌། རྟོག་པ་དག་ཏུ་འགྱུར་བའི་ཕྱིར་དེ་ལས་དངོས་པོ་ཐ་དད་པ་མི་འགྲུབ་པོ་ཞེས་ལན་འདེབས་པ་ནི། དེ་ཡང་མི་བདེན་ཏེ་ཞེས་བྱ་བའོ། །དེས་ན་ཞེས་བྱ་བ་ནི་བརྡ་ཐ་སྙད་པས་སོ། །དེ་བཞིན་ནི་ཐ་དད་པར་རོ། །གཞན་དུ་ཞེས་བྱ་བ་ནི་རང་གི་དོན་གྱི་རྗེས་སུ་དཔག་པར་རོ། །གལ་ཏེ་གང་ལ་གཟུགས་ཡོད་པ་དེ་ཉིད་ལ་རེག་བྱ་ཡོད་དེ་ཞེས་བྱ་བ་ནི་བརྡ་ཙམ་ལས་འབྱུང་བ་མ་ཡིན་གྱི་འོན་ཀྱང་དངོས་པོ་དེ་ལྟར་གྱུར་པ་ལས་ཡིན་ནོ་ཞེས་བྱ་བར་དོགས་པ་ནི་ཅི་སྟེ་གལ་ཏེ་ཞེས་བྱ་བའོ། །དེ་ལྟ་བུའི་དངོས་པོ་མེད་ཀྱང་དེ་ལྟ་བུའི་སྒྲས་བརྗོད་པ་ནི། དམག་ལ་སོགས་པ་དག་ལ་མཐོང་བ་མ་ཡིན་ནོ་ཞེས་ལན་འདེབས་པ་ནི། ཚོགས་པ་གཅིག་ལ་ཞེས་བྱ་བའོ། །ཚོགས་པ་གཅིག་ལ་རག་ལུས་པ་དང༌། འབྲས་བུ་གཅིག་ལ་སྦྱོར་བས་ན་གཟུགས་ལ་སོགས་པ་ཚོགས་པ་གཅིག་ཏུ་རབ་ཏུ་བརྟགས་པ་ཡིན་ལ། དེ་ལས་ནི་གང་ལ་དེ་ལ་ཞེས་རྟོག་པ་ཡིན་གྱི་ཡན་ལག་ཅན་ཡོད་པ་ནི་མ་ཡིན་ནོ། །གང་གིས་དེ་སྐད་
བརྗོད་པ་ན་ཡན་ལག་ཅན་མེད་པ་དེ་ལྟར་ཐ་སྙད་དུ་བྱེད་པ་འགའ་ཞིག་ཏུ་མཐོང་ངམ་ཅི་སྙམ་ན། དམག་གང་ལ་ཞེས་བྱ་བའོ། །འོན་ཏེ་ཡང་གླང་པོ་ལ་སོགས་པ་ལ་ནི་དམག་གམ་ནགས་མང་པོ་ཉིད་ཡོད་པ་ཡིན་ནོ། །དེས་ན་གང་ཡང་དེ་ལ་ཞེས་བྱ་བར་བརྗོད་པ་ཡིན་ནོ་སྙམ་ན་སྐྱེས་བུ་ལ་སོགས་པ་ཞེས་གསུངས་སོ། །དམག་ལ་སོགས་པ་ཐ་དད་པ་ཡོད་ཀྱང་ཐ་སྙད་འདི་རྫས་ལ་མི་འཁྲུལ་བ་ནི་མ་ཡིན་ཏེ། དེ་མེད་ཀྱང་ཡོད་པའི་ཕྱིར་རོ། །དེས་ན་དེ་ལས་ཇི་ལྟར་གྲུབ། གཅིག་ཙམ་སྒྲུབ་པར་བྱེད་པ་ཡིན་ཏེ། མི་དམིགས་པས་གནོད་པ་ལ་རིགས་མེ་སྲིད་པའི་ཕྱིར་རོ། །དེའི་ཕྱིར་ཐམས་ཅད་དུ་སྒྲ་ལས་བྱུང་བའི་རྟོག་པ་ནི། བརྟགས་པའི་ཡུལ་ཅན་ཡིན་གྱི། དངོས་པོའི་དེ་ཁོ་ན་ལ་ལྟོས་པ་ནི་མ་ཡིན་ཏེ། ཇི་ལྟར་བརྟགས་པ་མི་འཐད་པའི་ཕྱིར་རོ་ཞེས་བརྗོད་པ་ནི། དེའི་ཕྱིར་ཞེས་བྱ་བའོ། །གལ་ཏེ་ཡན་ལག་ཅན་ཐ་དད་པ་མེད་ན། དེ་ལྟ་ན་ནིའོ་ན། ཐ་དད་པ་མེད་པའི་ལུས་སུ་གྱུར་པ་སྟེ་དང་པོ་འོག་གི་ཐ་དད་ཀྱང་གྲུབ་པ་དང་བདེ་བ་གཅིག་པའི་ཕྱིར་གཅིག་ཉིད་དུ་འགྱུར་བ་ཡོད་པ་ཡིན་ནོ་ཞེས་བྱ་བ་ཡང་འདིས་ཉེ་བར་མཚོན་པ་ཡིན་ནོ། །གལ་ཏེ་ཡན་ལག་ཅན་ཡན་ལག་ཉིད་ཡིན་ན། དེའི་ཚེ་ཡན་ལག་ཅན་གྱི་ཡན་ལག་ཅེས་ཐ་དད་པའི་ཐ་སྙད་ཇི་ལྟར་འགྱུར་སྙམ་ན། དེའི་ཡན་ལག་ནི་ཞེས་གསུངས་ཏེ། གྲུབ་པ་དང་བདེ་བ་གཅིག་པ་དང་འབྲེལ་པར་གྱུར་པའི་ཡན་ལག་ཅན་དེའིའོ། །ཡན་ལག་ནི་ཕན་ཚུན་ལྡོག་པའི་གཟུགས་ལ་སོགས་པའོ། །དེ་ལྟར་ན་ཐ་དད་པར་རོ། །རྗེས་སུ་འགྲོ་བ་དང་ལྡོག་པའི་རྟོག་པ་དེ་ཉིད་བརྗོད་པ་ནི་འདི་ལྟར་ཞེས་བྱ་བའོ། །མཐོང་བ་གང་ཡིན་པ་དེ་ལ་རག་གོ་སྙམ་པའི་རྟོག་པ་ནི་གཟུགས་ལ་སོགས་པ་རྣམས་ཀྱིས་གྲུབ་པ་དང་བདེ་བ་གཅིག་པ་ཉིད་རྗེས་སུ་འབྲེལ་པའི་རང་བཞིན་ཡུལ་དུ་བྱེད་པའི་རྗེས་སུ་འགྲོ་བའི་རྟོགས་པའོ། །གཟུགས་སོ་སྙམ་པ་ལ་སོགས་པའི་རྟོགས་པས་ནི། ལྡོག་པའི་གཟུགས་ཡུལ་དུ་བྱེད་པའི་ཕྱིར་ལྡོག་པའི་རྣམ་པར་ལྡོག་པའོ། །གཟུགས་ལ་སོགས་པ་རྣམས་ལ་མི་འབྲལ་བའི་རང་བཞིན་རྫས་ཡིན་པ་འབའ་ཞིག་ཏུ་ནི་མ་ཟད་ཀྱི་འོན་ཀྱང༌། ཡུལ་ཐ་མི་དད་པར་ཡང་ཞེས་བྱ་བའོ། །གྲུབ་པ་དང་བདེ་བ་གཅིག་པ་ཉིད་གཅིག་རྟོགས་ན་རྟོགས་པའམ། རྣམ་པ་གཞན་དུ་རྟོགས་པར་ཁས་བླང་བར་བྱ་བ་ཡིན་ནོ། །
དེ་ལྟ་མ་ཡིན་ན་ནི་བརྟགས་པ་ཁོ་ནར་འགྱུར་རོ། །གཟུགས་ལ་སོགས་པ་ནི་དེ་ལྟ་མ་ཡིན་ཏེ། རྟོགས་པ་ཐ་དད་པ་ཅན་ཡིན་པའི་ཕྱིར་རོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །རང་བཞིན་ཐ་དད་མེད་གྱུར་ན། །ཞེས་བྱ་བ་ནི་གྲུབ་པ་དང་བདེ་བ་གཅིག་པ་ནི་ཐ་དད་པར་རྟོགས་པའི་མཚན་ཉིད་ཡིན་ནོ། །གཟུགས་སོགས་དབྱེ་བ་ཞེས་བྱ་བ་ནི་གྲུབ་པ་དང་བདེ་བ་ཐ་དད་པ། བརྡ་ཐ་དད་པའི་རྟོགས་པའི་མཚན་ཉིད་དོ། །དེ་ཉིད་བརྗོད་པ་ནི་སྣང་བ་ཐ་དད་པར་ཐལ་བའི་ཕྱིར་རོ་ཞེས་བྱ་བའོ། །གལ་ཏེ་བུམ་པ་ཞེས་རྟོགས་པ་ནི་གྲུབ་པ་ནི་བདེ་བ་མི་འཐད་པ་ཡིན་ཏེ། རྟོགས་པ་གཅིག་པ་ཅན་ཡིན་པའི་ཕྱིར་རོ། །གཟུགས་དང་རོ་ལ་སོགས་པ་ཐ་དད་པར་རྟོགས་པ་ནི་ཁྱད་པར་ཐ་དད་པས་བྱས་པའི་འཁྲུལ་པ་ཁོ་ན་ཡིན་ནོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །འོ་ན་ཇི་ལྟར་ཐ་དད་པར་རྟོགས་སྙམ་ན། དབང་པོ་ཐ་དད་པས་ཞེས་གསུངས་སོ། །ཐ་དད་པ་ལྟ་བུ་འམ་ཐ་དད་པ་དང་ལྡན་པར་རྟོགས་པའོ།། འདི་ཉིད་བརྗོད་པ་མིག་གི་དབང་པོ་ཞེས་བྱ་བའོ། །མངོན་སུམ་ནི་ཐ་དད་པར་འཛིན་པ་ཡིན་ལ། རྣམ་པར་རྟོག་པས་ཐ་མི་དད་པར་འཛིན་པ་ཡིན་ཏེ། དེས་ན་སྟོབས་ཆུང་བས་སྟོབས་དང་ལྡན་པ་ལ་གནོད་པར་འགྱུར་ཞེས་ལན་འདེབས་པ་ནི། འཛིན་པའི་དབྱེ་བས་ཞེས་བྱ་བའོ། །གཞན་དུ་ཞེས་བྱ་བ་ནི་ཐ་དད་པ་དང་ལྡན་པར་རོ། །གཅིག་ཉིད་དོ་ཞེས་བྱ་བའི་རྣམ་པར་རྟོག་པ་ནི་མ་ཡིན་ནོ། །ཅིའི་ཕྱིར་ཚད་མ་མེད་ཅེ་ན་གཅིག་ཉིད་དོ་སྙམ་པའི་རྣམ་པར་རྟོག་པའི་ཤེས་པ་ནི་ཐ་དད་པར་མཐོང་བས་གནོད་པའི་ཕྱིར་འཁྲུལ་པ་ཁོ་ནའོ་ཞེས་བརྗོད་པ་ནི་གཅིག་ཉིད་ནི་ཞེས་བྱ་བའོ། །གཞན་དུ་འཛིན་བ་མེད་པར་ཞེས་བྱ་བ་ནི་ཐ་མི་དད་པར་འཛིན་པའོ། །དེ་ཉིད་ཅེས་བྱ་བ་ནི་ཐ་དད་པར་འཛིན་པ་ཉིད་གཅིག་ལ་མི་འཁྲུལ་པ་ཡིན་ཏེ། དེ་ནི་དེ་ལྟར་ནི་མངོན་སུམ་གྱིས་མཐོང་བའི་རང་བཞིན་དུའོ། །ཐ་མི་དད་པར་རྟོགས་པ་མེད་ན་ནི་དེ་རྟོགས་པ་མ་ཡིན་ནོ་ཞེས་བརྗོད་པ་ནི་ཐ་དད་པར་ཞེས་བྱ་བའོ།། མི་འབྲལ་བ་དང་ཡུལ་གཅིག་པ་ཉིད་དེ་ལྟ་མ་ཡིན་པར་མི་འཐད་པས་ཐ་མི་དད་པར་དོགས་པ་བསུ་བ་ནི། ཅི་སྟེ་ཡང་ཞེས་བྱ་བའོ། །ཡུལ་མེད་པའི་ཕྱིར་ཡུལ་གཅིག་བ་ཉིད་མ་གྲུབ་བོ་ཞེས་ལན་བརྗོད་པ་ནི་དེ་ནི་རྟོགས་པར་བླ་སྟེ་ཞེས་བྱ་བའོ། །འོ་ན་ཡུལ་ཅན་ཉིད་ཐ་མི་དད་དོ་སྙམ་ན།
གཟུགས་ལ་སོགས་པ་ཡུལ་ཅན་ཡང་སྣང་བ་ཐ་དད་པའི་ཕྱིར་གང་ལས་ཐ་མི་དད་པ་ཡིན་ཏེ། མ་ཡིན་པ་ཁོ་ནའོ། །རྐང་པ་གཉིས་པ་འབྲེལ་པ་ནི། །ཡུལ་ཞེས་བྱ་བའོ། །དེ་ལས་གཞན་དུ་སྣང་མེད་ཕྱིར། །ཞེས་བྱ་བའི་གཏན་ཚིགས་ཀྱི་ཚིག་ནི་འདིར་ཡང་སྦྲེལ་བར་བྱའོ། །གཞན་ཡང་གཟུགས་ལ་སོགས་པ་དག་ལས་གཞན་བའི་ཡུལ་ནི་སྣང་བ་ཐ་དད་པ་ཉིད་ལས་ཡིན་ལ་སྣང་བ་ཐ་དད་པར་ནི་གཟུགས་ལ་སོགས་པ་རྣམས་ལ་ཡོད་པའི་ཕྱིར། ཇི་ལྟར་ཕན་ཚུན་ཐ་མི་དད། །ཅེས་བརྗོད་པ་ནི། དེ་དག་ལས་ཞེས་བྱ་བ་སྟེ་ཡུལ་དེའོ། །འོན་ཏེ་ཡུལ་གཟུགས་ལ་སོགས་པ་ལས་ཐ་དད་པ་ནི་ཡུལ་གཞན་ཐ་དད་པར་ནི་ཞེས་བྱ་བའོ། །ཡུལ་བཞིན་ཐ་དད་པས་ནི་གཟུགས་ལ་སོགས་པ་ལས་ཡུལ་ཐ་དད་པར་འགྲུབ་པ་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། ཐུག་པ་མེད་པར་ཞེས་གསུངས་སོ། །ཡུལ་གཟུགས་ལ་སོགས་པ་ཐ་དད་པ་ཡུལ་གཞན་ཐ་དད་པ་ལས་ཡིན་ལ། དེ་ཡང་ཡུལ་གཞན་ཐ་དད་པས་ཐ་དད་པ་ཡིན་ལ། དེ་བཞིན་གཞན་ཡང་ཡིན་པའི་ཕྱིར་ཐུག་པ་མེད་པས་ཡུལ་ཐ་དད་པ་ནི་མི་རྟོགས་པ་ཉིད་དུ་འགྱུར་རོ། །འོན་ཏེ་རང་གི་ངོ་བོ་ཁོ་ནས་དེ་དག་ལས་ཡུལ་ཐ་དད་པ་ཡིན་ནོ་ཞེ་ན། གལ་ཏེ་ཐུག་པ་མེད་པར་འགྱུར་བའི་ཕྱིར་རོ། །གཞན་གྱི་ཐ་དད་པ་བྱེད་པ་མ་ཡིན་ན་རང་གི་ངོ་བོ་ཡང་ཇི་ལྟར་ཡིན་སྙམ་ན། སྣང་བའི་གཟུགས་ལས་ཞེས་བྱ་བའོ། །འོན་ཏེ་གཟུགས་ལ་སོགས་པའི་སྣང་བ་ཐ་མི་དད་པའི་བྱ་བའོ། །འོན་ཏེ་གཟུགས་ལ་སོགས་པའི་སྣང་བ་ཐ་མི་དད་པའི་སོ། །ཅིའི་ཕྱིར་ཞེ་ན། གཟུགས་ཞེས་གསུངས་སོ། །གཟུགས་སྣང་བ་ན་རོ་ནང་དུ་འདུ་བ་མ་ཡིན་ནོ་ཞེས་བྱ་བའི་དོན་ཏོ། །དེ་ནང་དུ་འདུ་ན་མྱོང་བས་གནོད་པ་གཞན་ནས་སུན་འབྱིན་པ་གཞན་ཡང་བརྗོད་པ་ནི། དབང་པོ་གཞན་ཞེས་བྱ་བའོ། །གཟུགས་དང་རོ་དག་ཐ་མི་དད་པར་ཐལ་བར་འགྱུར་བའི་ཕྱིར་རོ་ཞེས་སྦྱར་རོ། །ཐ་མི་དད་པ་མ་གྲུབ་པར་དོགས་པ་བསུ་བ་ནི། དབང་པོ་ཐ་དད་པའི་ཕྱིར་རོ་ཞེས་བྱ་བའོ། །ཐ་མི་དད་པ་ནི་གཞན་ཐ་དད་པས་ཐ་དད་པར་སྣང་བ་མ་ཡིན་ནོ་ཞེས་ལན་བརྗོད་པ་ནི། དེ་ནི་མི་བདེན་ཏེ་ཞེས་བྱ་བའོ། །དེ་ལྟ་མ་ཡིན་ན་ནི་ཞེས་བྱ་བ་ནི་ཐ་མི་དད་པ་དབང་པོ་ཐ་དད་པས་ཐ་དད་པ་ཡིན་ནོ། །འདིས་ནི་གཅིག་སྣང་
བ་ན་གཞན་སྣང་བ་ནང་དུ་འདུས་པའི་མཚན་ཉིད་མི་འབྲལ་བ་ཡིན་པ་ཡང་གསལ་བ་ཡིན་ནོ། །བཟློག་པ་ནི་ཚོགས་པ་གཅིག་ལ་རག་ལས་པས་ཀྱང་ཐ་དད་པ་ཡིན་ཏེ། དེས་ན་ཐ་མི་དད་པ་སྒྲུབ་པར་ནི་མི་ནུས་སོ་ཞེས་བྱ་བ་ནི་དགོངས་པའོ། །གཟུགས་ལ་སོགས་པ་ཙམ་ཞེས་བྱ་བ་ནི་རྟོགས་པ་ཐ་དད་པ་ཅན་ནོ། །དངོས་པོ་གཅིག་ཡིན་ན་ནི་དབང་པོ་ལས་བྱུང་བའི་བློ་ཐམས་ཅད་ཚད་མ་མ་ཡིན་པར་འགྱུར་རོ་ཞེས་བརྗོད་པ་ནི་གལ་ཏེ་ཞེས་བྱ་བའོ། །གཞན་དུ་གྱུར་ཞེས་བྱ་བ་ནི་གཅིག་གོ །རྣམ་པ་གཞན་དུ་ནི་ཐ་དད་པར་རོ། །དེའི་ཚེ་ཞེས་ཁོང་ནས་ཕྱུང་ལ། འཁྲུལ་པ་ཉིད་དུ་འགྱུར་རོ་ཞེས་སྦྱར་རོ། །ཚད་མ་མ་ཡིན་པར་ཐལ་བའོ་ཞེས་བྱ་བའི་དོན་ཏོ། མ་འཁྲུལ་པ་ཉིད་ནི་ཚད་མའོ། །དབང་པོའི་ཁྱད་པར་ཉིད་ལས་ཏེ་ཞེས་བྱ་བ་ནི་དོན་གྱི་ཁྱད་པར་ལས་མ་ཡིན་པའོ། །སྣང་བ་རྣམ་པ་དེ་ལྟ་བུ་ནི་རེག་བྱ་ལ་སོགས་པར་སྣང་བ་ཐ་དད་པའོ། །དེ་ལྟར་ཞེས་བྱ་བ་ནི་མི་བླུ་བའོ། །མི་བླུ་བ་མ་གྲུབ་པས་སོ། །དབང་པོ་ཐ་དད་པ་ཉིད་ལས་སྣང་བ་ཐ་དད་པ་ཡིན་ན་ནི། དེ་ལས་ཐ་དད་པའི་དོན་མེད་པ་ཉིད་དོ་ཞེས་ཐལ་བར་བརྗོད་པ་ནི། མི་བླུ་བའམ་ཞེས་བྱ་བ་འམ། ཇི་ལྟར་འདི་གཞན་གང་དུ་བྱ་བ་ཡིན་སྙམ་ན། དོན་མེད་པར་ཞེས་གསུངས་སོ། །ཅི་སྟེ་དེ་ལྟ་མ་ཡིན་ཞེ་ན། དེ་ནི་ཞེས་གསུངས་སོ། །ཡན་ལག་ཅན་ནོ། །གང་གི་ཕྱིར་དེ་ལྟར་དོན་མེད་པར་ཐལ་བ་དེའི་ཕྱིར་རོ། །གཅིག་མེད་པ་དེའི་ཕྱིར་ཇི་ལྟར་རྫས་མེད་པས་ན། དེའི་བློ་ནང་གི་བྱེད་པ་ལ་རག་ལས་པ་ཡིན་ནོ་ཞེས་བསྒྲུབས་ནས། འདོགས་པའི་བློ་ཡང་དེ་མེད་པའི་ཕྱིར་དེ་བཞིན་ནོ། །སྟོན་པ་ནི་འདོགས་པར་རྟོགས་པ་ཡང་ཞེས་བྱ་བའོ། །ནང་གི་བྱེད་པ་ཉིད་ལས་ཞེས་ངེས་པར་བཟུང་བས་ཐོབ་པས་ལྡོག་པར་བརྗོད་པ་ནི། ཡུན་གྱི་སྟོབས་ཀྱི་ཞེས་བྱ་བའོ། །ནང་གི་བྱེད་པ་ཉིད་ལས་ཡིན་ནོ་ཞེས་བྱ་བ་འདི་ག་ལས་ཡིན་སྙམ་ན། རྟོགས་པ་སྒྲོ་འདོགས་པ་ཡིན་པའི་ཕྱིར་རོ། །གལ་ཏེ་ནང་གི་བྱེད་པ་ལས་བྱུང་བ་ཡིན་ན་ཁྱད་པར་མེད་པའི་ཕྱིར་ཐམས་ཅད་ལ་འགྱུར་བ་ཞིག་ན་དེ་ལྟ་ཡང་མ་ཡིན་ནོ། །དེས་ན་རྫས་ཀྱི་སྟོབས་ཀྱིས་འབྱུང་བ་ཡིན་ནོ་སྙམ་ན། དེ་ཚོགས་འབའ་ཞིག་ལ་ཞེས་སྦྱར་རོ། །ལག་པ་ལ་སོགས་པའི་སྐད་ཅིག་གིས་ཚོགས་པ་ཉིད་ལ་བྱུང་བ་ཡིན་ཏེ། །དེའི་བག་ཆགས་
ནི་དེ་ཉིད་ཀྱིས་སད་པའི་ཕྱིར་རོ། །གཞན་དུ་མ་ཡིན་ནོ་ཞེས་དགོངས་པའོ། །ཡང་ཅིའི་ཕྱིར་དེ་ལ་འདུས་པའི་བྱ་བ་རྒྱུ་མཚན་མ་ཡིན་གྱི་འོན་ཀྱང་ཚོགས་པ་ཉིད་ཡིན་སྙམ་ན་ལག་པ་ལ་སོགས་པའི་སྐད་ཅིག་གིས་གསུངས་སོ། །དེ་ལས་མ་རྟོགས་པར་བྱ་བའི་སྐད་ཅིག་མ་རྣམས་མ་དམིགས་པའི་ཕྱིར་རོ། །རྒྱུ་དེའི་ཕྱིར་ན་ཚོགས་པ་ཁོ་ན་རྒྱུ་ཡིན་པས་དེ་ཁོ་ན་ལས་འགྱུར་བ་ཡིན་ནོ། །འདོགས་པའི་སྤྱི་བཟློག་པའི་དོན་དུ་གཞན་གྱི་འདོད་པ་སློང་བར་བྱེད་པ་ནི་གལ་ཏེ་འདོགས་པའི་བྱ་བ་དེའི་ཡུལ་མ་ཡིན་ན། དེ་ལྟ་ན་འོ་ན་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་འགོག་བའོ། །གསལ་བས་གསལ་བར་བྱ་བའི་ཕྱིར་རོ་ཞེས་བྱ་བ་ནི་རང་གི་གསལ་བས་གསལ་བར་བྱ་བའི་ཕྱིར་རོ། །འདི་ཉིད་སྐབས་ལ་ཉེ་བར་སྦྱོར་བར་བྱེད་པ་ནི་ལས་ཀྱི་སྤྱི་ནི་ཞེས་བྱ་བའོ། །དེ་ལྟ་ཡིན་མོད་སྙམ་དུ་དོགས་པ་བསུ་ནས་མི་དམིགས་པའི་ཕྱིར་ན་ལས་ཀྱི་སྤྱི་མེད་དོ་ཞེས་བརྗོད་པ་ནི། ལག་པ་ལ་སོགས་པའི་སྐད་ཅིག་གིས་གསལ་བ་དེ་ལ་ནི་བརྟེན་པའམ་ཞེས་བྱ་བ་སྨོས་སོ། །དེ་ལྟ་མ་ཡིན་པའི་ཞེས་བྱ་བ་ནི་བརྟེན་པ་མ་ཡིན་པའོ། །བར་གྱི་གསལ་བ་མེད་པའི་ཕྱིར་ན། དེ་གཞན་གྱི་གསལ་བར་བྱ་བར་འགྱུར་རོ་ཞེ་ན། གསལ་བ་གཞན་གྱིས་ཀྱང་ཞེས་གསུངས་སོ། །རིགས་འགའ་ཞིག་ནི་གསལ་བས་གསལ་བ་གཞན་གྱིས་ཀྱང་གསལ་བར་འགྱུར་རོ་སྙམ་ན་ནི་འོན་ཏེ་ཞེས་བྱ་བའོ། །གསལ་བར་བྱ་བ་མ་ཡིན་པ་ཉིད་གསལ་བར་བྱེད་པ་ནི་འདོགས་པ་ཉིད་ཅེས་བྱ་བའོ། །ཅིའི་ཕྱིར་སྙམ་ན་སྐད་ཅིག་དང་པོ་ཉིད་ལ་ཞེས་གསུངས་སོ། །དུས་ཐ་དད་པ་དུ་མས་གསལ་བར་བྱེད་དོ་སྙམ་པ་ནི་འོན་ཏེ་ཞེས་བྱ་བའོ། །ཕྱོགས་འདི་ཡང་བརྡ་སྤྲོད་པ་རྣམས་ཀྱི་ཡིན་ནོ། །དེ་ཉིད་ཀྱི་ཕྱིར་བརྡ་སྤྲོད་པ་པས་ཞེས་བྱ་བའོ། །གལ་ཏེ་ཇི་སྐད་བརྗོད་པའི་སྐྱོན་ཡོད་པའི་ཕྱིར་ན། རིགས་རེ་རེ་གསལ་བ་མིན་ན་ལན་ནི་ཚོགས་ལས་གསལ་བར་བྱ་བར་འགྱུར་རོ། །ཅིའི་ཕྱིར་ཞེ་ན། རྣམ་པ་གཞན་མེད་པའི་ཕྱིར་རོ་ཞེས་གསུངས་སོ། །གང་གིས་ཅིག་ཅར་མ་ཡིན་བ་རྣམས་ཀྱིས་གསལ་བར་འགྱུར་བ་འདས་པ་ནི་གསལ་བར་བྱེད་པ་མ་ཡིན་ཏེ་རང་ཤེས་པས་གཞན་གྱི་བློའི་རྒྱུ་ཉིད་མི་སྲིད་པའི་ཕྱིར་རོ། །དེ་ན་རྣམ་པ་གཉིས་ལས་རྣམ་པ་གཞན་ནི་མི་སྲིད་པ་མ་ཡིན་ནོ། །དེ་ལ་སྐད་ཅིག་རེ་རེས་
གསལ་བར་བྱེད་པ་ཉིད་ནི་གསལ་མ་ཐག་པ་ཡིན་ནོ། །ཅིག་ཅར་ཚོགས་པ་ཡང་མི་སྲིད་དེ། དེས་ན་དེ་གསལ་བར་བྱ་བ་ཉིད་ཀྱང་མ་ཡིན་ནོ་ཞེས་དགོངས་པ་ཡིན་ནོ། །གལ་ཏེ་གོམས་པ་ལས་ནོར་བུ་དང་དངུལ་ལ་སོགས་པ་གསལ་བ་དེ་བཞིན་དུ་སྐད་ཅིག་གཅིག་གིས་གསལ་བར་བྱེད་པ་ཡིན་ནོ་སྙམ་པ་ནི་དོགས་པ་ལས་ཞེས་བྱ་བའོ། །ནོར་བུ་དང་དངུལ་ལ་སོགས་པའི་དངོས་པོ་སྣང་བ་ནི། གོམས་པ་ལས་དེ་ལྟར་གསལ་བར་འགྱུར་རོ་ཞེས་རིགས་ཀྱི། འདོགས་པ་ལ་སོགས་པར་ནི་མ་ཡིན་ཏེ། བཏགས་པ་ཡིན་པའི་ཕྱིར་ཞེས་བཏབ་པ་ནི་འོག་ན་ནི་ཞེས་བྱ་བའོ། །ཤེས་པ་དེ་ཞེས་བྱ་བ་ནི་འདོགས་པའི་ཤེས་པའོ། །གྲངས་ལ་སོགས་པའི་རྟོགས་པ་རྣམས་ཀྱང་དམིགས་པ་མེད་པ་ཉིད་དུ་སྟོན་པའོ། །དེ་བཞིན་དུ་ཞེས་བྱ་བའོ། །གལ་ཏེ་གང་གིས་དེའི་རྟོགས་པ་རྣམས་དམིགས་པ་མེད་པ་ཉིད་དུ་འགྲུབ་པ་ལྡན་པ་ལ་སོགས་པ་རྣམས་ཇི་ལྟར་མེད་པ་ཡིན་སྙམ་ན་དེ་སྐད་དུ་ཡང་ཞེས་བྱ་བའོ། །དེའི་ཕྱིར་སྤྱི་ལ་སོགས་པ་ལས་དོན་བྱ་བ་ཡོད་པ་མ་ཡིན་ཏེ། དེས་ན་མཚན་ཉིད་ཧ་ཅང་ཁྱབ་པའི་ཉེས་པ་མེད་དོ། །དེའི་ཕྱིར་དོན་བྱེད་ནུས་པ་ནི་རང་གི་མཚན་ཉིད་དོ་ཞེས་བྱ་བ་འདི་གནས་པ་ཡིན་ནོ། །ད་ནི་དོན་ཞེས་བྱ་བའི་ཁྱད་པར་དང་བྲལ་བའི་ནུས་པ་མེད་པ་སྤྱིའི་མཚན་ཉིད་ཧ་ཅང་ཁྱབ་པ་ཡིན་ཏེ། དོན་མེད་པ་ལ་ཡོད་པའི་ཕྱིར་རོ་ཞེས་དོགས་པ་བསུ་བ་ནི་གལ་ཏེ་ཞེས་བྱ་བའོ། །དོན་ཉིད་ནུས་པའི་རང་བཞིན་དུ་སྣང་བ་ནི་རང་གི་མཚན་ཉིད་ཡིན་ལ། ནུས་པ་མེད་པའི་རང་བཞིན་དུ་སྣང་བ་ནི་སྤྱི་ཡིན་ནོ་ཞེས་ཁྱད་པར་དུ་བྱེད་པས་ཉེས་པ་མེད་དོ་ཞེས་བརྗོད་པ་ནི། སྐྲ་ཤད་ལ་སོགས་ཞེས་བྱ་བའོ། །རབ་རིབ་ཅན་གྱིས་མཐོང་བའོ། །འདི་དོན་གྱི་མཚན་ཉིད་ནི་མ་ཡིན་གྱི། འོན་ཀྱང་ཐ་དད་པའི་མཚན་ཉིད་ཡིན་ནོ་ཞེས་བྱ་བའི་དོན་ཏོ། །གལ་ཏེ་འདི་ནི་དོན་གྱི་ཐ་དད་པའི་མཚན་ཉིད་ཡིན་པའི་ཕྱིར་ན་དངོས་པོ་མེད་པ་ལ་མི་འགྱུར་ཏེ། དོན་མ་ཡིན་པའི་ཕྱིར་རོ་ཞེས་དོགས་པ་བསུ་བ་ནས་བཤད་པ་ནི་ཤེས་བྱར་གསུངས་སོ། །མེད་པ་ཡང་ཤེས་བྱ་ཉིད་ཡིན་ཏེ། གཞན་ཡོད་པའི་མཚན་ཉིད་ཡིན་པའི་ཕྱིར་རོ། །ཡང་ན་ཚད་མས་ཡོངས་སུ་བཅད་པ་ཉིད་ཡིན་ལ། དོགས་པ་མེད་པར་འགྲོ་བའི་དོན་ཡིན་པའི་ཕྱིར་དོན་ཀྱང་ཡིན་ནོ། །དེས་ན་དོན་མེད་པར་མངོན་པར་ཞེན་པ་ཡིན་པའི་ཕྱིར་ན་དོན་
མ་ཡིན་ནོ་ཞེས་བྱ་བ་ནི་ཉེས་པ་མེད་དོ། །གལ་ཏེ་སྐྲ་ལ་སོགས་པ་སྤྱི་མ་ཡིན་ན་འོ་ན་དེ་དག་སྤྱི་ཡིན་སྙམ་ན་སྤྱིའི་རང་བཞིན་བཤད་པ་ནི། དོན་ཉིད་ཅེས་གསུངས་སོ། །རང་གི་མཚན་ཉིད་ཀྱི་བདག་ཉིད་ཇི་ལྟར་སྤྱི་ཡིན་སྙམ་ན། སྤྱིའི་རང་བཞིན་དུ་རྟོགས་པ་ན་ཞེས་སྦྱར་རོ། །གལ་ཏེ་དོན་ཡིན་ན། ཇི་ལྟར་མེད་པའི་དོན་གྱི་རང་བཞིན་དུ་སྨྲ་ཞེས་བྱ་བའི་དོགས་པ་བསུ་བ་ནི། གལ་ཏེ་འདི་ཞེས་བྱ་བའོ། །ནུས་པ་མེད་པར་སྣང་བ་ཉིད་བཤད་པ་ནི་དངོས་སུ་ཞེས་བྱ་བའོ། །ཤེས་པའི་མཚན་ཉིད་ཀྱི་དོན་བྱེད་པ་དངོས་སུ་མི་ནུས་པ་དེ་ནི་སྤྱི་དང་ནུས་མེད་ཉིད་ཅེས་སྦྱར་རོ། །དོན་ཉིད་བརྗོད་པ་ནི་བརྒྱུད་པ་ཡིས་ནི་ཞེས་བྱ་བའོ། །བརྒྱུད་པས་ནུས་པ་གང་ཡིན་པ་དེ་ནི་དོན་དང་ནུས་པ་ཞེས་བརྗོད་པ་ཡིན་ནོ་ཞེས་སྦྱར་རོ། །གལ་ཏེ་ཕྱི་རོལ་གྱི་དོན་དེ་ལྟ་ཡིན་མོད། རྣམ་པར་རྟོག་པ་ལ་སྣང་བའི་སྤྱིའི་ཇི་ལྟར་དོན་དུ་བརྗོད་སྙམ་ན་སྤྱིའི་ཞེས་གསུངས་སོ། །འདི་ནི་ཞེས་བྱ་བ་ནི་རྣམ་པར་རྟོག་པ་ལ་སྣང་བའི་སྤྱིའོ། །ཉེ་བར་འདོགས་པའི་རྒྱུ་མཚན་བརྗོད་པ་ནི་བརྒྱུད་ནས་ཞེས་བྱ་བའོ། །ནུས་པའི་རང་བཞིན་དུ་སྣང་བའི་དོན་དེ་འབྲས་བུ་ག་ལ་ཡོད་པ་དེའི་དངོས་པོ་ཉིད་ཡིན་པའི་ཕྱིར་རོ། །ཡང་ན་དོན་གྱི་འབྲས་བུ་ཉིད་ཡིན་པའི་ཕྱིར་རོ། །དགོས་པ་ནི་ལྐོག་ཏུ་གྱུར་པའི་དོན་རྟོགས་པ་ལ་ཐབས་གཞན་མེད་པར་བསྟན་པའི་ཆེད་དུའོ། །གལ་ཏེ་རྣམ་པར་རྟོག་པ་རྣམ་པའི་སྤྱིའི་དོན་གྱིས་བྱས་པའམ། དོན་གྱིས་འབྲས་བུ་ཅན་ཡིན་ན་འོ་ན་ཇི་ལྟར་ཞེས་བྱ་བའོ། །འོན་ཏེ་འདི་ཡང་དོན་ཀྱང་བྱས་པའམ་དེའི་འབྲས་བུ་ཡིན་ན་དེ་ཇི་ལྟར་སྤྱི་མ་ཡིན་པ་སྙམ་ན། ཆུ་ཀླུང་གི་ཞེས་སྨྲས་སོ། །གང་གི་ཕྱིར་ཆུ་ཀླུང་གི་འགྲམ་ན་ཞེས་བྱ་བ་ལ་སོགས་པའི་ངག་གི་ཡུལ་རྣམ་པར་རྟོག་པའི་རྣམ་པ་གང་ཡིན་པ་དེ་ནི་བརྒྱུད་པས་ཀྱང་དོན་བྱ་བ་མ་ཡིན་ཏེ། དེས་ན་འདི་ནི་སྤྱི་མ་ཡིན་ནོ་ཞེས་བྱ་བའི་དོན་ཏོ། །འདི་ནི་ངེད་ཀྱི་འདོད་པ་ཉིད་ཡིན་ནོ་ཞེས་ལན་འདེབས་པ་ནི་དེ་སྤྱི་མེད་མོད་ཅེས་བྱ་བའོ། །གལ་ཏེ་སྒྲ་སྤྱིའི་ཡུལ་ཅན་ཡིན་ཡང་ཚད་མར་མི་འགྱུར་བ་ཅི་སྟེ་སྙམ་ན། འདི་ལྟར་ཞེས་གསུངས་སོ། །དེའི་ཚེ་ཞེས་ཁོང་ནས་ཕྱུང་ལ་སྒྲ་ཚད་མར་འགྱུར་རོ་ཞེས་སྦྱར་རོ། །སྒྲ་སྤྱིའི་ཡུལ་ཅན་ཡིན་ན་ནི་ཚད་མ་མ་ཡིན་པར་མི་འགྱུར་རོ་ཞེས་བྱ་བའི་དོན་ཏོ། །གལ་ཏེ་སྒྲའི་ཡུལ་སྤྱི་མ་ཡིན་ནི་འོ་ན་ཇི་ལྟར་ཞེས་
བྱ་བའོ། །བརྗོད་ཅེས་བྱ་བ་ནི། སྒྲ་ཡི་ཡུལ་དང་ཡུལ་ཡིན་ཕྱིར། །ཞེས་བྱ་བ་འདིས་སོ། །གཞན་གྱི་དོན་གྱི་རྗེས་སུ་དཔག་པའི་བདག་ཉིད་ཅན་སྒྲ་འགའ་ཞིག་གི་ཡུལ་ནི་སྤྱི་ཡིན་ཏེ། དོན་གྱི་འབྲས་བུ་ཡོད་པའི་ཕྱིར་རོ། །ཐམས་ཅད་ཀྱི་ནི་མ་ཡིན་ཏེ་དེ་མེད་པའི་ཕྱིར་རོ་ཞེས་ལན་བརྗོད་པ་ནི། སྤྱི་ཁོ་ན་ཞེས་བྱ་བའོ། །གལ་ཏེ་སྒྲའི་ཡུལ་ཡང་འགའ་ཞིག་སྤྱི་མ་ཡིན་ན། འོ་ན་ཇི་ལྟར་ཡུལ་ཉིད་དུ་བསྟན་ཅེ་ན། སྒྲའི་ཡུལ་ཉིད་ཀྱིས་ནི་རྗེས་སུ་འགྲོ་བ་རྣམ་པ་ཉིད་མཚོན་པ་ཡིན་ནོ་ཞེས་གསུངས་སོ། །གང་གིས་འགལ་བར་འགྱུར་བ་སྤྱི་ནི་མ་ཡིན་ནོ་ཞེས་བྱ་བར་དོགས་པའོ། །ཡུལ་མིན་ཞེས་བྱ་བ་རང་གི་མཚན་ཉིད་ལ་ཡང༌། ཧ་ཅང་ཐལ་བ་སྤང་བའི་དོན་དུ་དོན་ཁྱད་པར་ཡིན་ནོ་ཞེས་བཤད་པ་ནི། དེ་བཞིན་དུ་ཞེས་བྱ་བའོ། །གལ་ཏེ་རང་གི་མཚན་ཉིད་སྒྲའི་ཡུལ་མ་ཡིན་པ་འགའ་ཞིག་རང་གི་མཚན་ཉིད་ཡིན་ནོ་ཞེས་བྱ་བ་འདི་ལྟར་སྙམ་ན་འདི་ཡང་ཞེས་བྱ་བའོ། །ཚད་མའི་ཡུལ་མ་ཡིན་པ་ཡང་སྒྲའི་ཡུལ་མ་ཡིན་པ་ཡང་མ་ཡིན་པས། སྤྱིའམ་རང་གི་མཚན་ཉིད་མ་ཡིན་ཏེ། ཚད་མའི་ཡུལ་གྱི་དབྱེ་བས་དེའི་དབྱེ་བ་བསྟན་པའི་སྐབས་ཡིན་པའི་ཕྱིར་རོ་ཞེས་བརྗོད་པ་ནི། སྒྲའི་ཡུལ་མ་ཡིན་ཞེས་བྱ་བ་སྨོས་སོ། །གལ་ཏེ་ཚད་མ་མ་ཡིན་ཡང་དེའི་ཡུལ་རང་གི་མཚན་ཉིད་ཅི་སྟེ་མ་ཡིན་དོགས་ན་འདི་ལྟར་ཞེས་གསུངས་སོ། །དེ་ཐ་དད་པ་ནི་ཚད་མ་ཐ་དད་པའོ། །དེའི་ཕྱིར་ཚད་མ་དེ་ཡུལ་ཉིད་ཐ་དད་པར་རོ། །དེས་ན་ཞེས་བྱ་བ་ནི་ཚད་མའི་ཡུལ་ཐ་དད་པར་བསྟན་པར་བྱ་བ་ཡིན་པས་ནའོ། །སྐྲ་ཤད་ལ་སོགས་པའི་ཚད་མའི་ཡུལ་མ་ཡིན་པ་ཡུལ་ཉིད་དུ་སྟེ། སྤྱི་དང་རང་གི་མཚན་ཉིད་དུའོ། །ཕྱེད་ཕྱི་མ་བཤད་པའི་དོན་དུ་ཕྱོགས་སྔ་མ་འགོད་པ་ནི་གལ་ཏེ་ཞེས་བྱ་བའོ། །དེའི་ཚེ་ཁོང་ནས་ཕྱུང་ལ། དངོས་པོ་མེད་པ་ཉིད་ནི་ཞེས་བྱ་བ་ལ་སོགས་པར་སྦྱར་རོ། །འོན་ཏེ་དངོས་པོ་མེད་པ་ནི་ཚད་མའི་ཡུལ་མ་ཡིན་པ་ཉིད་དོ་སྙམ་ན། དེ་ནི་ཞེས་སྨོས་སོ། །དངོས་པོ་མེད་པ་སྤྱི་ཉིད་དུ་ཡང་བསྒྲུབ་པ་ནི། སྤྱིའི་ངོ་བོ་ཡང་ཡིན་ཏེ་ཞེས་བྱ་བའོ། །ཤེས་བྱ་ཉིད་གསལ་བར་བྱེད་པ་ནི། དངོས་པོ་མེད་པ་ཡང་ཞེས་བྱ་བའོ། །འགའ་ཞིག་གི་ཞེས་
བྱ་བ་ནི་ས་ཕྱོགས་ལ་སོགས་པས་སོ། །འདི་ནི་རང་གི་འདོད་པ་ཙམ་ཡིན་ནོ་ཞེ་ན། བཤད་པ་གཞན་གྱི་དངོས་པོ་ཞེས་བྱ་བའོ། །གལ་ཏེ་དེ་ལྟར་ཡང་ཇི་ལྟར་དོན་ཉིད་ཡིན་ཞེ་ན། དེ་ཡང་ཞེས་བྱ་བའོ། །བཤད་པ་གཞན་གསུངས་པ་ནི་ཡང་ན་ཞེས་གསུངས་སོ། །གལ་ཏེ་གང་གིས་ཚད་མར་གཅད་པར་བྱ་བ་ཉིད་འགྱུར་བ་དེ་ཇི་ལྟར་དོན་ཉིད་ཡིན་སྙམ་ན། དགོས་པ ་ཡོད་པའི་ཕྱིར་ཞེས་གསུངས་སོ། །དེ་ཉིད་སྟོན་པ་ནི་དངོས་པོ་མེད་ཀྱང་ཞེས་བྱ་བའོ། །དེས་ན་ཞེས་བྱ་བ་ནི་ དགོས་པ ་དང་ལྡན་པས་ནའོ། །དེ་ལ་ཞེས་བྱ་བ་ནི་དངོས་པོ་མེད་པ་ལའོ། །གལ་ཏེ་དོན་ཡིན་ན་ཇི་ལྟར་དངོས་པོའི་ཐ་སྙད་དུ་མི་འགྱུར་སྙམ་ན་རང་གི་ངོ་བོས་ཞེས་གསུངས་སོ། །སྐྲ་ཤད་ལ་སོགས་པ་ཡང་དེ་བཞིན་དུ་འགྱུར་རོ་ཞེ་ན། སྐྲ་ལ་སོགས་པ་ནི་ཞེས་གསུངས་སོ། །དོན་མ་ཡིན་པ་སྟེ་ཞེས་འབྲེལ་ཏེ། ཅིའི་ཕྱིར་ཞེ་ན་འཁྲུལ་པའི་ཞེས་གསུངས་སོ། །གལ་ཏེ་སྒྲ་ལ་སོགས་པ་ཡང་ཞེས་བྱ་བ་ནི་ དགོས་པ ་དང་ལྡན་པའི་ཕྱིར་དོན་ཡིན་ནོ་ཞེས་འབྲེལ་ཏོ། །ཇི་ལྟར་དེ་ལ་ དགོས་པ ་ཡོད་སྙམ་ན། གང་གི་ཕྱིར་ཞེས་གསུངས་སོ། །འདི་ལྟ་བུར་གྱུར་པ་ཞེས་བྱ་བ་ནི་ཡུལ་ངེས་པ་མེད་པ་སྟེ། དེས་ནི་སྒྲུབ་པར་བྱེད་པའི་རང་བཞིན་བརྗོད་པ་ཡིན་ནོ། །མི་བདེན་ནོ་ཞེས་བྱ་བ་ལ་སོགས་པ་ནི་བསྒྲུབ་པར་བྱ་བ་གཉིས་བསྟན་པའོ། །དེ་ལ་ཡང་ཞེས་བྱ་བ་ནི་དངོས་པོ་མེད་པ་འགའ་ཞིག་ཏུ་ནི་མ་ཟད་ཀྱི། སྐྲ་ཤད་ལ་སོགས་པ་ཡང་ངོ༌། །དེའི་ཕྱིར་ཞེས་བྱ་བ་ནི་ དགོས་པ ་དང་ལྡན་པའི་ཕྱིར་རོ། །རྩོད་པ་སྨྲ་བ་ཉིད་ཀྱིས་མི་བདེན་པ་ཉིད་དུ་ཡོངས་སུ་དམ་བཅས་པའི་ཕྱིར་དེ་དག་ཀྱང་སྤྱིའི་རང་བཞིན་ཁོ་ན་ཡིན་ནོ་ཞེས་བྱ་བའི་དོགས་པ་བསུ་ནས། དེ་ལྟ་ཡིན་ན་གསལ་བར་སྣང་བ་ཉིད་དུ་མི་འགྱུར་རོ་ཞེས་བརྗོད་པ་ནི་ཅི་སྟེ་ཞེས་བྱ་བའོ། །དེ་ལྟར་ཞེས་བྱ་བ་ནི་མི་བདེན་པར་ཡོངས་སུ་བཅད་པའོ། །དེ་ལྟ་ན་ནི་ཞེས་བྱ་བ་ནི་སྤྱིའི་རང་བཞིན་ཉིད་ནའོ། །གལ་ཏེ་སྐྲ་ཤད་ལ་སོགས་པ་དང་སྤྱིར་ཤེས་པའི་ཡུལ་ཡིན་ན་སྔོན་པོ་ལ་སོགས་པ་བཞིན་དུ་གསལ་བར་སྣང་བ་ཇི་ལྟར་ཞེས་བྱ་བའི་དོན་ཏོ། །གསལ་བ་ཡང་སྤྱི་མ་ཡིན་ནོ་ཞེས་བརྗོད་པ་ནི། གསལ་བར་སྣང་བ་ཉིད་ཀྱིས་ཞེས་བྱ་བའོ། །དེས་ན་སྐྲ་ལ་སོགས་པའི་ཤེས་པ་ཡུལ་མེད་པར་མི་འགྱུར་རོ་ཞེ་ན། དེ་དག་གི་ཡང་ཞེས་གསུངས་ཏེ་
སྐྲ་ཤད་ལ་སོགས་པའི་ཡང་ངོ༌། །ད་ལྟའི་དངོས་ནི་མི་བདེན་པར་ཡོངས་སུ་བཅད་པའོ། །སྤྱིའི་རང་བཞིན་ནི་བཀག་པ་མེད་པའི་ཕྱིར་རོ། །འདིས་ནི་ཚད་མའི་ཡུལ་ཉིད་དུ་འགྱུར་རོ་ཞེས་ལན་གྱིས་ཐལ་བར་བསྒྲུབས་པས་འདོད་པ་ཉིད་དོ་ཞེས་བསྟན་ཏོ། །གསལ་བར་སྣང་བ་ཉིད་དུ་མི་འགྱུར་རོ་ཞེས་བྱ་བའི་རྩོད་པ་གསལ་བ་ནི་ཤེས་པའི་ངོ་བོས་ཞེས་གསུངས་སོ། །ད་ནི་མི་བདེན་པའི་ཡུལ་ཅན་སྤྱིའི་རྟོགས་པ་གང་ཞིག་ཡིན་སྙམ་དུ་དོགས་ན། །སྐྲ་སོགས་ཞེས་བྱ་བ་གསུངས་སོ། །སྐྲ་སོགས་ཞེས་བྱ་བའི་རྟགས་ཐོགས་སུ་མ་ཡིན་ནོ་ཞེས་བྱ་བ་འཐོབ་སྟེ། དེ་གང་གི་ཡང་དེ་ལྟའི་དངོས་ཞེས་བྱ་བའི་སྐབས་ཡིན་པའི་ཕྱིར་རོ། །འདིས་ནི་རང་གི་མཚན་ཉིད་པས་ཞེས་བྱ་བའི་མཐར་ཐུག་པའི་རྩོད་པ་བསལ་བ་ཡིན་ནོ། །འོ་ན་དོན་མེད་གང་ཡིན་སྙམ་ན་སྐྲར་སྣང་ཞེས་གསུངས་སོ། །ཕྱིའི་དོན་གྱི་དོན་མེད་པ་ཡིན་ནོ། །ཤེས་པ་གང་ཞིག་སྐྲ་ཤད་ཀྱི་རང་བཞིན་དུ་སྣང་བ་དེ་ནི། ཕྱི་རོལ་གྱི་ཡུལ་ཅན་ཉིད་དུ་ཁས་བླངས་བ་མེད་པས་ན། གནོད་བྱེད་ཀྱི་ཚད་མའི་ཡུལ་ཡིན་ནོ་ཞེས་བྱ་བའི་དོན་ཏོ། །སྐྲར་སྣང་བ་རང་གི་ངོ་བོས་འགོག་པ་མ་ཡིན་ནོ་ཞེས་བཤད་པ་ནི། གལ་ཏེ་ཞེས་བྱ་བའོ། །སྐྲ་ཤད་ལ་སོགས་པ་ནི་ཡོད་པ་དང༌། མེད་པ་དག་གིས་སྤྱིའི་རང་བཞིན་དུ་སྣང་བ་དེ་ནི། ཕྱི་རོལ་ཉིད་ཀྱི་སྒོ་ནས་བརྗོད་པ་ནི་མི་བདེན་པས་ཞེས་བྱ་བའི་དོན་གཅིག་ཡིན་ཞེ་ན་ཞེས་བྱ་བའོ། །དེས་ཞེས་བྱ་བ་ནི་ཤེས་པ་གཞན་ནམ། སྐྱེས་བུ་གཞན་དེས་དམིགས་པར་རུང་བ་ཉིད་མེད་པར་ཡོངས་སུ་བཅད་པས་སྐྲ་ལ་སོགས་པ་དངོས་པོ་མེད་པར་ནི་དགག་པ་ལ་ལྟོས་ནས་གཞལ་བྱ་ཉིད་ཡིན་ཏེ། ས་ཕྱོགས་བཞིན་ནོ། །གང་ཞིག་ཡུལ་ངེས་པ་མེད་པ་དེ་ནི་མི་བདེན་པ་ཡིན་ནོ། །དཔེར་ན་སྔོན་མཐོང་བའི་སྐྲ་ཤད་ལ་སོགས་པ་བཞིན་ནོ། །སྐྲ་ཤད་ལ་སོགས་པ་འདི་ཡང་ཡུལ་མ་ངེས་པ་ཡིན་ནོ་ཞེས་བྱ་བ་ནི་རང་བཞིན་མི་དམིགས་པ་སྟེ། ཡུལ་མ་ངེས་པར་དམིགས་པ་ནི་ཡོད་པ་ཉིད་མི་དམིགས་པའི་རང་བཞིན་ཡིན་པའི་ཕྱིར་རོ། །སྐྲ་ཤད་ལ་སོགས་པ་མེད་པ་སྤྱིའི་རང་བཞིན་དུ་བཤད་ནས་ཡོད་པའི་སྒོ་ནས་ཀྱང་བརྗོད་པ་ནི་ཡང་གང་གི་ཚེ་ཞེས་བྱ་བའོ། །གང་ཞིག་འདི་ལྟ་བུར་གྱུར་པ་དེའི་ཚེ་སྐྲ་གཞན་དང་འདྲ་བ་ཡིན་ཏེ། དཔེར་ན་སྔོན་མཐོང་བའི་སྐྲ་ནི་ཚོགས་རྣམ་
པ་དེ་ལྟ་བུ་གཞན་དང་འདྲ་བཞིན་ནོ། །འདི་ཡང་འདི་ལྟ་བུར་གཞན་དང་འདྲ་བཞིན་ནོ། །འདི་ཡང་འདི་ལྟ་བུར་གྱུར་པ་ཡིན་ནོ་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །གལ་ཏེ་སྤྱིའི་རང་བཞིན་ཉིད་ཡིན་ན་འོ་ན་ཇི་ལྟར་ཞེས་བྱ་བའོ། །ཤེས་པའི་རང་བཞིན་གྱི་ཞེས་བྱ་བ་ནི་རྩ་བ་ལས་འདེབས་པའོ། །འདིར་གཞན་གྱི་དེ་ལྟ་ན་ནི་ཞེས་སྨྲས་སོ། །དེ་ལྟ་ན་ཡང་སྤྱི་མ་ཡིན་ནོ་སྙམ་དུ་བསམས་པས་སོ། །ལན་ནི་འགྱུར་པ་ཁོ་ན་ཞེས་བྱ་བའོ། །གལ་ཏེ་མངོན་སུམ་གྱི་ཡུལ་ཉིད་ཡིན་ན་ཇི་ལྟར་སྤྱིའི་རང་བཞིན་ཉིད་ཡིན་ཞེས་བྱ་བ་ནི་དྲི་བའོ། །ལན་ནི་རྣམ་པར་རྟོག་པའི་ཞེས་བྱ་བ་སྟེ་མངོན་སུམ་རྗེས་ལས་བྱུང་བའོ། །སྔར་གྱི་རྗེས་སུ་དཔག་པ་ལ་ལྟོས་ནས་སྤྱིའི་རང་བཞིན་དུ་བརྗོད་པ་ཡིན་ལ། དེ་ལྟ་ནི་ངོན་སུམ་གྱི་རྗེས་ལས་བྱུང་བའི་རྣམ་པར་རྟོག་པའི་ཤེས་པ་ལ་ལྟོས་ནས་ཡིན་ནོ། །རྣམ་པར་རྟོག་པའི་ཡུལ་དེ་ཉིད་བརྗོད་པ་ནི་འདི་ལྟར་ཞེས་བྱ་བའོ། །རྣམ་པར་རྟོག་པ་མེད་པས་ཡོངས་སུ་བཅད་པ་ཉིད་དུ་ཅིའི་ཕྱིར་མི་འདོད་སྙམ་ན། སྔ་མ་དང་ཕྱི་མའི་རང་བཞིན་ལས་ཞེས་གསུངས་སོ། །དེས་ནི་སྔ་མ་དང་ཕྱི་མས་སོ། །གལ་ཏེ་སྐྲ་ལ་སོགས་པ་ཞེས་བྱ་བའི་བློ་སྤྱིའི་ཡུལ་ཅན་ཡིན་ན། དེ་ཡུལ་མེད་པ་གང་ཡིན་ཞེ་ན། བརྗོད་པ་ནི་འོ་ན་ཞེས་བྱ་བའོ། །དབང་པོའི་ཤེས་པ་ཞེས་བྱ་བ་ནི་དེའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་ཕྱིར་རོ། །དོན་མེད་པ་ཞེས་བྱ་བ་ནི། ཕྱིའི་དོན་མེད་པའི་ཕྱིར་རོ། །གལ་ཏེ་མངོན་སུམ་ཡིན་ན་ཇི་ལྟར་དོན་མེད་པ་ཡིན་སྙམ་དུ་དོགས་ན། བསམས་པ་ནི་ཞེས་གསུངས་སོ། །རྗེས་སུ་དཔག་པ་ཞེས་བྱ་བ་ནི། མངོན་སུམ་ལས་ཕྱིས་འཇལ་བའོ། །རང་རིག་པ་དབང་པོ་ལ་བརྟེན་ནས་སྐྱེ་བའི་ཕྱིར་ན། དེའི་ཤེས་པ་ལས་གཞན་པའི་རང་རིག་པ་མེད་དོ་སྙམ་དུ་དོགས་པ་བསུ་བ་ནི། དེ་ཉིད་ཅེས་བྱ་བའོ། །དོན་ལ་དེ་ནི་ཞེས་བྱ་བ་ནི་ལན་ནོ། །དེ་མེད་པར་ཡང་ནི་དངོས་པོ་མེད་པར་ཡང་ངོ༌། །གང་གི་ཕྱིར་གསལ་བར་སྣང་བ་དང༌། ཅིག་ཤོས་ཀྱི་རྣམ་པར་དབྱེ་བ་ནི། ཕྱི་རོལ་ལ་ལྟོས་པ་ཁོ་ན་ཡིན་གྱི། རང་རིག་པ་མ་ཡིན་པའི་གཏན་ཚིགས་དེའི་ཕྱིར་མི་གསལ་བ་ཐམས་ཅད་ཅེས་བྱ་བའོ། །གསལ་བར་སྣང་བ་ཉིད་དབང་པོའི་རྗེས་སུ་འགྲོ་བ་དང༌། ལྡོག་པའི་རྗེས་སུ་བྱེད་པ་ནི་མ་ཡིན་ཏེ། དེ་མེད་ཀྱང་ཡོད་
བའི་ཕྱིར་རོ་ཞེས་བརྗོད་པ་ནི། རྨི་ལམ་གྱི་ཞེས་བྱ་བའོ། །གང་གི་ཕྱིར་དེ་ལྟར་གསལ་བར་སྣང་བ་ཉིད་ཀྱིས་དབང་པོའི་ཤེས་པ་ནི་མ་ཡིན་གྱི། འོན་ཀྱང་མི་འཁྲུལ་པས་ན་དོན་གྱི་ཡུལ་ཉིད་ཀྱིས་ཡིན་པ་དེས་ན་དབང་པོ་ཞེས་བྱ་བའོ། །དེ་མེད་ན་ནི་དོན་ལ་འཇུག་པ་མེད་ནའོ། །གང་གི་ཕྱིར་སྐྲ་ཐོབ་པ་མེད་པ་དེའི་ཕྱིར་དོན་ལ་ལྟོས་ནས་ཡིན་གྱི། རང་གི་རྣམ་པ་ལ་ལྟོས་ནས་ནི་མ་ཡིན་ནོ། །འགལ་ལོ་ཞེས་བྱ་བ་ནི་སྤྱིའི་རང་གི་མཚན་ཉིད་དང་གསལ་བར་སྣང་བ་ཉིད་ཡོངས་སུ་སྤངས་ནས་གནས་པའི་ཕྱིར་རོ། །སྤྱི་ནི་དོན་ཉིད་ཡིན་པར་ཐལ་བར་འགྱུར་ཏེ། དེ་ཡང་ཤེས་པའི་རང་བཞིན་དུ་ཁས་བླངས་པའི་ཕྱིར་རོ་ཞེ་ན་དེ་ལྟར་འདོད་ཕྱིར་ཞེས་བྱ་བ་ནི་ཤེས་པའི་རང་བཞིན་གྱི་དོན་ཉིད་དང་གསལ་བར་སྣང་བ་ཉིད་དུ་འདོད་པའི་ཕྱིར་དེར་ཐལ་བ་ནི་ཉེས་པ་མ་ཡིན་ནོ། །འོ་ན་དེ་ལྟར་དེ་སྤྱི་ཡིན་ཞེ་ན། དོན་གྱི་ངོ་བོ་ཉིད་ཀྱིས་ཏེ། ངེས་པར་བརྟག་པར་བྱ་བ་ཉིད་ཀྱིས་སོ། །སྤྱི་ནི་རྣམ་པར་རྟོག་པ་སྣང་བའོ། །གང་གི་ཕྱིར་རྣམ་པ་ཕྱི་རོལ་དུ་ངེས་པར་བརྟག་པར་བྱ་བ་ཡིན་པ་དེའི་ཕྱིར་དེའི་སྤྱི་ཡིན་ནོ། །ཤེས་པའི་རང་བཞིན་རང་རིག་པའི་ཡུལ་ནི་གསལ་བ་ཡིན་པས་དེ་ལྟར་ནི་སྤྱི་མ་ཡིན་ནོ། །སྤྱི་ནི་དོན་རྣམས་ཀྱི་མཚུངས་པའི་ངོ་བོ་ཡིན་པས་ན་དོན་ལ་བརྟེན་པ་ཉིད་དུ་རྟོག་པ་ཡིན་ལ། དེ་ལྟར་ནི་གསལ་བ་མ་ཡིན་ནོ། །འདིས་ནི་ཤེས་པའི་རང་བཞིན་ཉིད་ཕྱིའི་དོན་གྱི་དངོས་པོར་ཅི་སྟེ་མི་འདོད་ཅེས་བྱ་བ་གསལ་བ་ཡིན་ནོ། །གལ་ཏེ་ཤེས་པའི་རང་བཞིན་ལ་ནི་གསལ་བ་ཉིད་ཡོད་པ་མ་ཡིན་ནོ། །དེས་ན་ཅི་སྟེ་དེ་ལྟར་འདོད་ཅེས་དོགས་ན། ཤེས་པ་ནི་རང་བཞིན་ཉིད་ཀྱིས་ནི་ཞེས་གསུངས་སོ། །འོན་ཏེ་དེའི་གསལ་བར་སྣང་བ་ནི། གཞན་འདྲ་བ་ཡིན་པས་དེ་མེད་པའི་ཕྱིར། དེ་ལྟར་ཇི་ལྟར་འགྱུར་སྙམ་ན། དེའི་གསལ་བར་སྣང་བ་ཉིད་ནི་ཞེས་བྱ་བའོ། །གལ་ཏེ་ཤེས་པའི་རང་བཞིན་མི་གསལ་བ་ཉིད་དུ་མི་འཐད་ན། འོ་ན་མི་གསལ་བར་སྣང་བ་ཅི་ཡིན་ཞེ་ན། དོན་ནི་ཞེས་གསུངས་པའོ། །སྤྱིའི་ཤེས་པ་ལའོ། །ཅིའི་ཕྱིར་ཞེ་ན། གཞན་ལ་ལྟོས་ནས་ཞེས་བྱ་བ་ནི་དབང་པོའི་རྣམ་པར་ཤེས་པ་ལའོ། །ཤེས་པའི་རྣམ་པ་ལ་ནི་དེ་ལྟར་མི་འགྱུར་རོ་ཞེས་བརྗོད་པ་ནི་ཤེས་པའི་རྣམ་པར་ནི་ཞེས་བྱ་བའོ། །དེའི་ཕྱིར་ཞེས་བྱ་བ་གཞན་མེད་པའི་ཕྱིར་རོ། །འོན་ཏེ་སྤྱིའི་ཤེས་པ་ལ་དོན་གྱི་རྣམ་པ་ཐམས་ཅད་ཀྱང་སྣང་བ་ཡིན་ཏེ། དེས་ན་ཇི་ལྟར་
དམིགས་པ་སྙམ་དུ་དོགས་ན། དོན་གྱི་རང་བཞིན་ནོ་ཞེས་བྱ་བ་བློ་རང་བཞིན་ནི་དབང་པོའི་རྣམ་པར་ཤེས་པ་ལ་སྣང་བ་བཞིན་ནོ། །གཞན་ཞེས་བྱ་བ་ནི། སྤྱིའི་ཤེས་པ་ལ་སྣང་བའི་རང་བཞིན་ལས་སོ། །དེ་མི་སྣང་བར་ཞེས་བྱ་བ་ནི། རང་བཞིན་མི་སྣང་བའོ། །གལ་ཏེ་ཤེས་པའི་རང་བཞིན་གྱིས་རང་གི་མཚན་ཉིད་ཡིན་ན། འོ་ན་ཇི་ལྟར་ཤེས་པའི་རང་བཞིན་དེའོ། །ངོ་བོ་ཉིད་ཀྱིས་ཞེས་བྱ་བ་ནི་ལན་ནོ། །འདི་ཉིད་རང་གི་ཚིག་གིས་འཆད་པ་ནི། དཔྱད་པས་ན་ཞེས་བྱ་བའོ། །དེ་ཉིད་ཀྱིས་ནི་གཉི་ག་ཡང་འགྲུབ་པོ་ཞེས་བརྗོད་པ་ནི། དོན་དུ་ངེས་པར་ཞེས་བྱ་བའོ། །གལ་ཏེ་དེ་ལ་དོན་སྣང་བའི་ཕྱིར། ཇི་ལྟར་གཉི་གའི་རང་བཞིན་ཡིན་ཞེ་ན། དེ་ཡང་ཞེས་གསུངས་སོ། །སྤྱིའི་ཤེས་པ་ལའོ། །གལ་ཏེ་དོན་དུ་ངེས་པར་བརྟགས་པ་ཡིན་ཡང་འདི་ཅིའི་རྣམ་པར་ཇི་ལྟར་འགྱུར་སྙམ་དུ་དོགས་པ་བསུ་ནས་འདི་ལྟར་ཞེས་གསུངས་སོ། །རྩྭ་ལས་བྱུང་བ་དང་ལོ་མ་ལས་བྱུང་བ་ལ་སོགས་པ་ཐམས་ཅད་ལ་མེ་མེ་ཞེས་རྣམ་པར་རྟོག་པའི་རྣམ་པ་ལ་སྒྲོ་བཏགས་པ་དེ་དག་གིས་མཚུངས་པ་ཉིད་དུ། ལྷག་པར་ཞེན་པ་དེའི་སྤྱིའི་རྣམ་པ་ཉིད་ཡིན་ནོ། །སྒྲུབ་པའི་རང་བཞིན་སྤྱིའི་རྣམ་པ་བརྗོད་ནས། ལྡོག་པའི་རང་བཞིན་བསྟན་པའི་ཕྱིར་བཤད་པ། དོན་དེ་དག་གི་རིགས་མི་མཐུན་པ་ལས་ལྡོག་པ་གང་ཡིན་པ་དེ་ལ་བརྟེན་པའོ། །ཤེས་པའི་བརྟེན་པ་ནི་རྣམ་པ་གཉིས་ཏེ། དེ་ལས་སྐྱེས་པ་དང་དེ་ལ་འཇུག་པའོ། །དེས་ན་ལྡོག་པ་དང་འབྲེལ་པའི་ཕྱིར་དང་ལྡོག་པའི་རང་བཞིན་ཉིད་ཀྱིས་སྤྱིའི་རྣམ་པ་ཡིན་ནོ། །རྣོ་བ་དང་ཞེས་བྱ་བ་ནི་རྣམ་པར་འབྲེལ་པའོ། །ཙནྡན་ལ་སོགས་པ་སེང་གེའི་ལ་སོགས་པ་གང་ལ་ཡོད་པ་དེ་ལ་མིག་ཤེས་པ་ངོ་བོ་མཚུངས་པ་ཉིད་དོ། །ཇི་ལྟར་ངོ་བོ་མཚུངས་པ་ཉིད་དུ་རྣམ་པར་གཞག་སྙམ་ན། སྣང་བ་དང་ཞེས་སྨོས་སོ། །ཤེས་པའི་རང་བཞིན་དེ་ཐམས་ཅད་ལ་ཐུན་མོང་གི་རང་བཞིན་ཉིད་དུ་རྟོགས་པའི་ཕྱིར་རོ། །དེ་མ་བཟུང་ན་ཇི་ལྟར་དེ་ཐམས་ཅད་ཀྱི་ཡུལ་ཅན་དུ་ཇི་ལྟར་བརྗོད་སྙམ་ན། གཅིག་ཉིད་དུ་ལྷག་པར་ཞེན་པས་ཞེས་གསུངས་སོ། །འདི་ཉིད་ཇི་ལྟར་སྙམ་ན་སྣང་བ་དང་ཞེས་བྱ་བའོ། །གལ་ཏེ་ཤེས་པའི་རང་ལ་དོན་དུ་ལྷག་པར་ཞེན་ཀྱང་སྤྱི་ཇི་ལྟར་ཡིན་ཏེ། གཞན་གྱིས་ཁས་བླངས་པའི་སྤྱིའི་མཚན་ཉིད་མེད་པའི་ཕྱིར་རོ་སྙམ་ན། དེས་བརྗོད་
པའི་སྤྱིའི་མཚན་ཉིད་ནི་འདི་ཁོ་ན་ལ་ཡོད་པ་ཡིན་ནོ་ཞེས་བཤད་པ་ནི་འདི་ལྟར་ཞེས་བྱ་བའོ། །འདི་ལས་ཅི་ཞིག་འགྲུབ་པར་འགྱུར་སྙམ་ན། དེ་འང་ཤེས་པའི་རྣམ་པ་ཉིད་ཅེས་བྱ་བ་སྨོས་ཏེ། མཚུངས་པ་རྣམས་ཀྱི་ངོ་བོ་སྤྱི་དེའོ། །ཇི་ལྟར་དེ་གསལ་བ་རྣམས་ཀྱི་ཡིན་སྙམ་ན། གསལ་བའི་ངོ་བོར་ཞེས་སྨོས་ཏེ། སྤྱིའི་རྣམ་པ་ཅན་དུ་གྱུར་པའི་ཤེས་པའི་རྣམ་པ་ཁྱད་པར་ཅན་ནི་སྤྱིའི་ངོ་བོ་ཡིན་ཏེ་ཞེས་འབྲེལ་ཏོ། །གལ་ཏེ་རྣམ་པའི་ཁྱད་པར་ཤེས་པ་ནི་བདག་ཉིད་ཡིན་པས་ན། འདི་སྤྱིའི་རྣམ་པ་ཇི་ལྟར་ཡིན་ཞེ་ན། ཁྲ་བོ་ལ་སོགས་པ་ཞེས་སྨོས་སོ། །དེ་དེ་ལ་གནས་པ་ཉིད་ཇི་ལྟར་ཡིན་ཞེ་ན། ཀུན་རྫོབ་ཏུ་ལྷག་པར་ཞེན་པ་གང་ཡིན་པ་དེས་སོ། །གལ་ཏེ་དེར་ལྷག་པར་ཞེན་པའི་རྒྱུ་མཚན་ཉིད་ཅི་ཡིན་སྙམ་ན། དེ་ལ་ཞེས་སྨོས་ཏེ་དོན་ལའོ། །དེ་ལས་ནི་དོན་ལས་སོ། །དངོས་སུ་སྐྱེས་ནས་རྣམ་པར་རྟོག་པར་འགྱུར་རོ་སྙམ་ན་བག་ཆགས་ཀྱི་ཞེས་གསུངས་སོ། །དེ་ལྟར་སྣང་བ་དང་རྣམ་པར་བརྟག་པར་བྱ་བ་གཅིག་ཏུ་བྱས་ནས་སྒྲུབ་པའི་རང་བཞིན་ཉིད་སྤྱིར་བརྗོད་པ་ཡིན་ནོ། །ལྡོག་པའི་རང་བཞིན་གྱི་སྤྱི་སྟོན་པ་ནི་དེ་ནི་ཞེས་བྱ་བའོ། །ཤེས་པའི་རྣམ་པ་དེ་ནིའོ། །གལ་ཏེ་དོན་གྱི་རང་བཞིན་ལ་མ་རེག་པའི་ཕྱིར་ན་ཇི་ལྟར་དེ་དང་དེ་དག་གི་ལྡོག་པ་ལ་བརྟེན་ནས་སྐྱེ་སྙམ་ན། དེ་ནི་བརྒྱུད་པས་ཞེས་གསུངས་སོ། །དེ་ལ་སྐྱེ་བའི་མཚན་ཉིད་བརྟེན་པར་བཤད་ནས། དེ་ལ་འཇུག་པ་བཤད་པ་ནི། ལྡོག་པའི་དོན་རྣམས་ལ་ཞེས་གསུངས་སོ། །འཇུག་པར་བྱེད་པའི་ཕྱིར་རོ་ཞེས་བྱ་བ་ནི་དེ་ནི་ལྷག་པར་ཞེན་པ་ལས་སྤྱིའི་རང་བཞིན་ནོ་ཞེས་བྱ་བར་འབྲེལ་ཏོ། །གལ་ཏེ་ཕྱོགས་འདི་ལ་ཇི་ལྟར་ལྡོག་པ་ཅི་ཡིན་སྙམ་ན་ལྡོག་པ་ཉིད་ནི་ཞེས་གསུངས་སོ། །གལ་ཏེ་དེ་ལྟ་ན་ཡང་རྣམ་པར་རྟོག་པའི་རྣམ་པ་ལྡོག་པའི་རང་བཞིན་གྱི་སྤྱིར་ཇི་ལྟར་འགྱུར་ཞེ་ན། ལྡོག་པ་དང་འབྲེལ་པས་ཞེས་གསུངས་ཏེ། རང་བཞིན་གཉིས་ཀྱིས་སོ། །ལྡོག་པས་བསྐྱེད་པའི་རྣམ་པ་ནི་ལྡོག་པ་ཉིད་དུ་ངེས་པ་ཡིན་ཏེ། དེས་ན་ལྡོག་པའི་བདག་ཉིད་ཅེས་བྱའོ། །གལ་ཏེ་ཤེས་པ་ཉིད་རང་བཞིན་དེ་གསལ་བ་ལས་སྐྱེ་བ་དང༌། གསལ་བའི་རང་བཞིན་དུ་ལྷག་པར་ཞེན་པ་ཡིན་ན་ཁྱད་པར་མཚོན་པ་མེད་པའི་གསལ་བ་ཉིད་སྤྱིར་འགྱུར་གྱི། ཤེས་པའི་རང་བཞིན་གཞན་ནི་མ་ཡིན་ནོ་ཞེས་བརྗོད་པ་ནི། ཇི་ལྟར་རྣམ་པ་སྤྱི་ཡིན་ཞེས་བྱ་བ་ཡིན་ནོ། །ཇི་ལྟར་ཁས་བླང་བར་བྱ་
སྙམ་ན། མཚོན་ཟིན་པ་ཤེས་པའི་རྣམ་པའམ། སྤྱིས་མཚོན་པ་ཉིད་དེས་སོ། །རྣམ་པ་ཙམ་གྱིས་མཐར་ཐུག་པས་ནི་ཁས་བླང་བར་བྱ་བ་མ་ཡིན་ནོ་ཞེས་འབྲེལ་ཏོ། །ཅིའི་ཕྱིར་ཞེ་ན། འཇུག་པར་བྱེད་པ་ཉིད་མ་ཡིན་པར་ཞེས་སྨྲས་སོ། །འོ་ན་ཅི་ཙམ་གྱིས་མཐར་ཐུག་པ་ཡིན་ན། ཉེས་པ་ལ་བརྟེན་པ་ཡིན་ནོ་སྙམ་ན། སྤྱི་འབའ་ཞིག་ཅེས་སྨྲས་སོ། །རྣམ་པ་བཞིན་དུ་ལྕེ་ཡང་དོན་བྱེད་པ་དང་བྲལ་བའི་ཕྱིར་རོ་ཞེས་བསམས་པའོ། །གང་གི་ཕྱིར་དེ་ལྟར་དེའི་མཐར་ཐུག་པ་མ་ཡིན་པ་དེའི་ཕྱིར་ཤེས་པའི་རང་བཞིན་གྱི་དོན་སྤྱི་གང་ལ་ཡོད་པ་དེར་སྨྲ་བ་རྣམས་ཀྱིའོ། །ཤེས་པའི་རང་བཞིན་དུ་སྨྲ་བ་ནི་སངས་རྒྱས་པ་ཡིན་ལ། དོན་གྱི་རང་བཞིན་དུ་སྨྲ་བ་ནི་རིགས་པ་ཅན་ལ་སོགས་པ་ཡིན་པའི་ཕྱིར་རོ། །སྤྱི་འབའ་ཞིག་ཏུ་མ་ཟད་ཀྱི་ཤེས་པའི་རྣམ་པ་དེ་ལས་ཀྱང་ངོ༌། །འོན་ཏེ་ཕྱིས་གསལ་བ་རྗེས་སུ་དཔོག་པ་དེ་ན་དེ་ཡུལ་མ་ཡིན་ན་སྙམ་ན། དེ་ལ་ཕྱིས་ཀྱང་ཞེས་སྨྲས་ཏེ། ཤེས་པའི་རྣམ་པ་འབའ་ཞིག་ཏུ་ནི་མ་ཟད་ཀྱི། རིགས་པ་ཅན་ལ་སོགས་པས་འདོད་པའི་སྤྱིས་ཀྱང་ངོ༌། །དེ་གང་ལ་སྙམ་ན་དེ་ལ་ཡང་ཞེས་སྨོས་ཏེ། རྗེས་སུ་དཔག་པ་ལ་ཡང་ངོ༌། །འདི་ནི་ཁས་བླངས་ནས་བརྗོད་པར་ཟད་ཀྱི། འདི་ནི་ཡོད་པ་ཡང་མ་ཡིན་ནོ་ཞེས་གསུངས་པ་ནི། སྤྱི་བརྒྱུད་པ་ཞེས་སྨྲས་སོ། །ཅི་སྟེ་བརྒྱུད་པ་མ་ཡིན་སྙམ་ན། ཐུག་པ་མེད་པའི་ཉེས་པ་བརྗོད་པ་ནི་སྤྱི་ལས་ཞེས་བྱ་བའོ། །གང་གི་ཕྱིར་སྤྱི་དང་ཤེས་པའི་རྣམ་པ་དག་ལས་གསལ་བ་རྗེས་སུ་དཔོག་པ་ནི་འཐད་པ་དེའི་ཕྱིར་མཐར་ཡང་ཞེས་བྱ་བའོ། །གལ་ཏེ་རྗེས་སུ་དཔག་པ་གསལ་བའི་ཡུལ་ཅན་ཉིད་དུ་སངས་རྒྱས་པས་ཀྱང་ཁས་བླངས་པ་ཉིད་མ་ཡིན་ནམ་དེས་ན་ཇི་ལྟར་དེ་ཡང་མ་ཡིན་ནོ་ཞེས་སྤོང་སྙམ་ན། བདེན་ཏེ་འོན་ཀྱང་ཀུན་རྫོབ་ཏུ་དེའི་ཡུལ་ཅན་ཉིད་བརྗོད་པ་གང་ཡིན་པ་དེ་ནི་འདིས་སྤོང་བ་མ་ཡིན་གྱི། འོན་ཀྱང་དངོས་པོའི་འཇུག་པ་གཞན་གྱིས་ཁས་བླངས་པས་ཏེ་སྤོང་བ་ཡིན་ཏེ། འདི་གང་ལས་སྙམ་ན། འདི་ལྟར་ཤེས་པའི་རང་བཞིན་དངོས་མིན་དེ་བྱེད་པར་བཟུང་བའི་རང་བཞིན་མ་ཡིན་ནོ། །ཅིའི་ཕྱིར་ཞེ་ན། བརྗོད་བྱ་ཉིད་ཕྱིར་ཏེ་དོན་དང་དབང་པོ་ལ་སོགས་པ་མེད་ཀྱང༌། སྒྲ་ལས་བྱུང་བ་ལ་སྣང་བའི་ཕྱིར་རོ། །དབང་པོ་ལ་སོགས་པ་མེད་ཀྱང་སྒྲ་ལས་བྱུང་བ་ནི་དངོས་པོ་ཉིད་ཡིན་ནོ་སྙམ་ན། དེའི་ཚེ་དབང་པོའི་
ཚོགས་འབྲས་བུ་དང་བཅས་པར་མི་འགྱུར་རོ། །དེ་བཞིན་དུ་སྒྲ་ཐོས་པ་ན་ངོ་བོ་ཉིད་ཀྱི་དོན་གོ་བར་འགྱུར་གྱི། བརྡར་བྱས་པ་ནི་མ་ཡིན་ནོ། །དེས་ན་རྟོགས་པ་ནི་ཅི་ཡང་མ་ཡིན་ནོ། །གལ་ཏེ་ཉེས་པ་འདི་བདག་ཅག་ལ་ནི་མེད་དེ་དངོས་པོའི་རང་བཞིན་མི་བརྗོད་པའི་ཕྱིར་རོ། །སྒྲ་ནི་སྒྲའི་གཟུགས་བརྙན་ཞེས་བྱ་བའི་མིང་ལ་འཇུག་པ་ཡིན་ནོ། །མིང་ནི་མཚན་མ་ལ་དེས་ནི་དོན་གོ་བར་བྱེད་པ་ཡིན་ནོ་སྙམ་དུ་དོགས་པ་བསུ་བ་ནི་མིང་སོགས་ཞེས་སྨོས་སོ། །སོགས་པའི་སྒྲས་ནི་དོན་གྱི་གཟུགས་བརྙན་གྱི་མཚན་མ་བརྗོད་པ་ཡིན་ནོ། །འདི་ནི་ཟད་པར་སྒོམ་པ་ལ་སོགས་པར་གསལ་བ་ཡིན་ནོ། །གལ་ཏེ་དོན་བརྗོད་བྱ་བ་མ་ཡིན་གྱི། འོན་ཀྱང་མིང་དང་མཚན་མ་ཡིན་ན། དེའི་ཚེ་དོན་ལ་མི་འཇུག་པ་ཉིད་དུ་མི་འགྱུར་རོ། །བུམ་པ་བརྗོད་པ་ན་སྣམ་བུ་ལ་འཇུག་པ་ནི་མ་ཡིན་ནོ། །འོན་ཏེ་དེ་དང་འབྲེལ་པ་ཅན་བརྗོད་ན་དེར་མི་འཇུག་པ་ཇི་ལྟར་ཞེ་ན། འབྲེལ་པ་དང་མ་འབྲེལ་པ་བརྗོད་ན་ཉེས་པ་སོ་ན་འདུག་གོ་ཞེས་བརྗོད་པ་ནི། འཆད་པ་པོ་དང་ཉན་པ་པོ། །ཞེས་གསུངས་སོ། །འབྲེལ་པ་མེད་པ་ཅན་ཞེས་བྱ་བ་ནི་གསུམ་ཀ་དང་མ་འབྲེལ་པའོ། །བརྗོད་བྱ་ཡིན་པར་རྟོགས་ཀྱང་དོན་དེ་མ་རྟོགས་ན་མི་འཇུག་པར་འགྱུར་རོ་ཞེས་བྱ་བའི་དོན་ཏོ། །གཟུགས་ལ་སོགས་པ་ཉིད་ནི་སྤྱི་མ་ཡིན་ཏེ། དངོས་པོ་མ་ཡིན་ནོ། །ཅིའི་ཕྱིར་ཞེ་ན། སྤྱིའི་ཤེས་པ་རྟོགས་པ་སྟེ། བརྗོད་བྱ་ཡིན་པའི་ཕྱིར་རོ་ཞེས་བྱ་བའོ། །བརྗོད་བྱ་ཡིན་ཡང་དངོས་པོ་མ་ཡིན་པར་ཇི་ལྟར་འགྱུར་ཞེ་ན། གཟུགས་ལ་སོགས་པས་ཞེས་གསུངས་སོ། །གལ་ཏེ་ཞེས་བྱ་བ་ནི་རྣམ་པར་རྟོག་པ་གཉིས་པ་སེལ་བའོ། །གསལ་བ་ཞེས་བྱ་བ་གཟུགས་ལ་སོགས་པའི་གསལ་བའོ། །དེ་ཡང་ཞེས་བྱ་བ་ནི་དབང་པོ་ལས་བྱུང་བའི་བདེ་བ་དང༌། བཟློག་པ་བརྗོད་པ་ནི་དེ་ལྟར་ནི་མ་ཡིན་ནོ་ཞེས་བྱ་བ་སྟེ། འབྲས་བུ་མེད་པའོ། །དེའི་ཕྱིར་ཞེས་བྱ་བ་ནི་འབྲས་བུ་དང་བཅས་པའི་ཕྱིར་རོ། །དེས་ན་ཞེས་བྱ་བ་ནི་གསལ་བའི་རང་བཞིན་མ་རྟོགས་པས་སོ།། །འདིས་ནི་ཕྱོགས་དང་པོ་ཡང་གསལ་བ་ཡིན་ནོ། །མིང་སོགས་པ་ཞེས་བྱ་བ་བཤད་པའི་ཕྱིར་ཕྱོགས་སྔ་མ་འགོད་པ་ནི་དེ་ལྟ་ན་ནི་འོ་ན་ཞེས་བྱ་བའོ། །མི་ལྡན་པ་ནི་མིང་དང་མཚན་མའི་མཚན་ཉིད་དོ། །འབྲེལ་མེད་ཅེས་བྱ་བ་ནི་གསུམ་ཀ་དང་མ་འབྲེལ་པའོ། །དེ་ལ་མིང་ལ་སོགས་པ་མ་འབྲེལ་པ་དང་
དོན་དང་འབྲེལ་པ་ལ་ནི་འབྲེལ་པ་མེད་ན་ཡང་འཇུག་པ་མི་འཇུག་པར་འགྱུར་རོ་ཞེས་བྱ་བ་ལ་སོགས་པས་སུན་འབྱིན་པར་བརྗོད་པར་མི་འགྱུར་རོ། །འཆད་པ་པོ་དང་ཉན་པ་པོ་འབྲེལ་པ་ལ་བརྗོད་པ་ནི་འཆད་བ་པོ་ལ་སོགས་པ་དང་ཞེས་བྱ་བའོ། །འོན་ཏེ་མ་རྟོགས་པ་ལ་ཡང་འཇུག་པ་སྐྱོན་ཅི་ཡོད་སྙམ་ན། མ་རྟོགས་པ་ལ་ཡང་ཞེས་བྱ་བའོ། །གང་ལ་འཇུག་པ་དེ་རྟོགས་པ་དོན་མེད་པར་ཐལ་བའི་ཕྱིར་ནི་མ་རྟོགས་པ་ལ་འཇུག་པ་འདི་ནི། རིགས་པ་མ་ཡིན་ནོ། །ཙི་ཏྲ་ཨངྒ་དང༌། སྣ་ཚོགས་བརྩོན་འགྲུས་གཉིས་ལས་གཅིག་བརྗོད་པས་གཞན་ལ་འཇུག་པ་དེར་ནི་འཁྲུལ་པ་ཡིན་ཏེ། འཁྲུལ་པས་འཇུག་པའི་རྒྱུ་ཡིན་གྱི། མཚན་མ་དང་དོན་དག་ལས་དེ་ལྟར་རྟོགས་པ་འདིར་ནི་མ་འཁྲུལ་པ་ཡིན་ནོ། གང་ལ་མ་རྟོགས་པའི་དོན་ལ་འཇུག་པར་འགྱུར། འཁྲུལ་ན་ཅི་སྐྱོན་སྙམ་ན་འཁྲུལ་ན་ཞེས་གསུངས་སོ། །དེ་ལྟར་གྱུར་ན་ཞེས་བྱ་བ་ནི་དམིགས་པ་མེད་པ་ཉིད་དུ་འགྱུར་ནའོ། །དམིགས་པ་མེད་པར་འགྱུར་བའི་སྐྱོན་སྤངས་པའི་དོན་དུ་མིང་དང་མཚན་མ་གཞན་དང་གཞན་རྟོགས་ན་ནི་ཐུག་པ་མེད་དོ་ཞེས་བརྗོད་པ་ནི་དེ་ལ་ཡང་ཞེས་གསུངས་ཏེ། དམིགས་པ་མེད་པའི་ཉེས་པ་བཀལ་བ་གང་ཡིན་པ་ལའོ། །ཐུག་པ་མེད་པར་འགྱུར་རོ་ཞེས་བྱ་བ་ནི་དེ་ལ་ཡང་རང་གི་དོ་བོས་བཟུང་བ་མེད་པའི་ཕྱིར་མིང་དང་མཚན་མ་གཞན་བརྟག་པར་བྱ་བ་ཡིན་ལ། དེ་བཞིན་དུ་ཡང་གཞན་དང་གཞན་ནི་བརྟག་པར་བྱ་བ་ཡིན་པའི་ཕྱིར་རོ། །དེས་ན་མིང་དང་མཚན་མར་སྣང་བའི་རྟོགས་པ་ནི་འཁྲུལ་པ་མ་ཡིན་པ་དེས་ན་ཇི་ལྟར་དེས་དོན་ལ་འཇུག་པར་འགྱུར། དཔེ་ཡང་བསྒྲུབ་བྱའི་ཕྱོགས་སུ་བསླན་པ་ན་དེའི་སྟོབས་ཀྱིས་ཀྱང་འདི་འགྲུབ་པ་མ་ཡིན་ནོ་ཞེས་གསུངས་པ་ནི་དེའི་ཕྱིར་ཞེས་བྱ་བའོ། །ཡུལ་དུ་འགྱུར་བའི་མཚན་མ་དག་ལ་གཅིག་བརྗོད་པ་འཁྲུལ་པས་གཞན་རྟོགས་པ་ལ་ནི་མིང་ལ་སོགས་པ་ཉིད་སྣང་བ་ཡིན་གྱི་དོན་སྣང་བ་ནི་མ་ཡིན་ཏེ། དབང་པོའི་ཚོགས་འབྲས་བུ་མེད་པར་ཐལ་བའི་ཕྱིར་རོ། །མ་གྲུབ་པ་ཉིད་བརྗོད་པ་ནི་དེ་ཡང་ཞེས་བྱ་བ་སྟེ་དཔེ་ལའོ། །དེ་རྟོགས་པ་ཉིད་ཀྱིས་ནི་མིང་ལ་སོགས་བ་རྟོགས་པ་ཉིད་ཀྱིས་སོ། །དེ་ལྟར་ན་རེ་ཞིག་དོན་ལ་མི་འཇུག་པ་ཡིན་ནོ་ཞེས་བཤད་པ་ཡིན་ནོ། །ཁས་བླངས་ནས་ཀྱང་སུན་འབྱིན་པ་བརྗོད་པ་ནི། གལ་ཏེ་དོན་ལ་ཞེས་བྱ་བའོ། །སྐྲ་
ལས་མི་རྟོགས་པ་ནི་དོན་གྱི་གཟུགས་བརྙན་ཡིན་པའི་ཕྱིར་དོན་དུ་འཁྲུལ་པར་འགྱུར་ཞིང་དེ་ལས་ནི་དོན་ལ་འཇུག་པ་ཡིན་ནོ། །དེ་བཞིན་ཟད་པར་བསྒོམས་པ་ལ་སོགས་པར་མཚན་མ་རྟོགས་པ་ན་སའོ་ཞེས་ལྷག་པར་ཞེན་པ་ལས་འཇུག་པ་ཡིན་ནོ་ཞེས་བྱ་བའི་དོན་ཏོ། །དུས་ཀུན་དུ་འཁྲུག་པ་ལས་འཇུག་པར་མི་འགྱུར་རོ། །གང་མིང་ལ་འཇུག་པར་མཐོང་བས་འཇུག་པར་མི་འགྱུར་རོ། །མཐོང་ན་ནི་ལོང་བ་དང་ལྐུགས་པར་འགྱུར་བས་སྐྲའི་ཐ་སྙད་ཉམས་པར་འགྱུར་རོ། །འོན་ཏེ་ཐོག་མ་མེད་པའི་མ་རིག་པའི་བག་ཆགས་ལས་དེ་ལྷག་པར་ཞེན་པ་ཉིད་དེ། ཤེས་པ་ཡིན་ནོ་ཞེས་གཞན་གྱི་ལུགས་ཁས་ལེན་ནོ་ཞེ་ན། ཡུལ་ལ་འཁྲུལ་འགྱུར་ཞེས་གསུངས་སོ། །ཡུལ་སྨོས་པ་ནི་ཉེ་བར་མཚོན་པའི་ཕྱིར་རང་བཞིན་ལ་འཁྲུལ་པ་ཡང་བཟུང་ངོ༌། །འཁྲུལ་པར་མི་འདོད་ཀྱང་འཁྲུལ་པར་ཐལ་ལོ་ཞེས་བྱ་བའི་དོན་ཏོ། །ཡུལ་འཁྲུལ་པ་ཡང་ཡོད་པ་ཡིན་ལ། དེ་ཡང་ཁྱེད་ཀྱི་ལྟར་ན་མིང་ལ་སོགས་པ་ཡུལ་ལ་མི་གནས་པའི་ཕྱིར་ན་མི་འགྱུར་རོ་ཞེས་བཤད་པ། ལྡོག་པའི་སྒོ་ནས་བཤད་དོ། །རྗེས་སུ་འགྲོ་བའི་སྒོ་ནས་ནི་མིན་ཞེས་བྱ་བ་དགག་པའི་སྒྲ་དང་མ་འབྲེལ་པའི་ཕྱིར་རོ། །བཤད་པ་སྔ་མ་ལྟར་ཡིན་ནོ། །ཤེས་པའི་རྣམ་པ་ཡིན་ན་ནི་དེ་བག་ཆགས་ཀྱི་རྒྱུ་ལས་བྱུང་བའི་འཁྲུལ་པ་ཉིད་ཡིན་ནོ་ཞེས་བརྗོད་པ་ནི་ཤེས་པ་ལ་ཞེས་བྱ་བའོ། །ཅིའི་ཕྱིར་ཞེ་ན། རྣམ་པ་དེ་འདྲའི་བློ་སྐྱེ་བའི་ཕྱིར་རོ། །རང་གི་རྣམ་པ་ལ་དོན་དུ་ལྷག་པར་ཞེན་པའི་བློ་ཉིད་བག་ཆགས་ལས་བྱུང་བ་ཡིན་ནོ་ཞེས་བྱ་བའི་དོན་ཏོ། །མིང་གི་བློ་ཉིད་ནི་དེ་ལྟར་འཛིན་པས་འཇུག་པ་ཡིན་ནོ་ཞེས་བྱ་བ་མི་རིགས་ཏེ། ཁས་མི་ལེན་པའི་ཕྱིར་རོ་ཞེས་བརྗོད་པ་ནི་གཞན་ལ་ཞེས་བྱ་བ་སྟེ། མིང་དང་མཚན་ཉིད་ལྟ་བ་ལའོ། །དེ་ཞེས་བྱ་བ་ནི་རྣམ་པ་དང་བཅས་པའི་རྣམ་པར་ཤེས་པ་སྨྲ་བ་ལ་བརྗོད་པ་གང་ཡིན་པ་དེ་མེད་དོ། །ཅིའི་ཕྱིར་ཞེ་ན། ཕྱི་རོལ་གྱི་དོན་དུ་སྣང་བའི་བློ་ཁས་ལེན་པ་མེད་པའི་ཕྱིར་རོ། །ཤེས་པ་ཕྱི་རོལ་གྱི་རྣམ་པ་ཅན་དུ་ཁས་ལེན་ན་ཡང༌། རྣམ་པར་ཤེས་པ་དང་ཕྱི་རོལ་གྱི་དོན་ལས་ཐ་དད་པའི་མིང་ནི་ཚད་ཅན་མིན་ཏེ། ཚང་མ་ཡོད་པ་མ་ཡིན་ནོ། །དེ་སྐྱེད་པའི་ཁྱད་པར་མ་གྲུབ་པའི་ཕྱིར་ལྡོག་པའི་རྗེས་སུ་དཔག་པ་གྲུབ་པ་མེད་པ་ཉིད་ཀྱི་ཕྱིར་རོ། །འདི་ནི་འདྲ་བར་ཁས་བླངས་ནས་བརྗོད་པ་ཡིན་གྱི། གང་གིས་དེ་རྟོགས་པས་
དེ་ལ་འཇུག་པར་འགྱུར་བ་མིང་ནི་དོན་དང་ཚུལ་འདྲ་བ་ཡང་མེད་དོ། །ཅིའི་ཕྱིར་ཞེ་ན། ལུས་ཅན་དང་ལུས་ཅན་མ་ཡིན་པ་ཞེས་གསུངས་སོ། །ལུས་ཅན་དང་ལུས་ཅན་མ་ཡིན་པ་ནི་དབྱིབས་ཅན་དང་དབྱིབས་ཅན་མ་ཡིན་པའོ། །དེ་ཡོད་ན་ནི་འདྲ་བ་ཡོད་ནའོ། །ཡུལ་འདི་ཉིད་དུ་ཞེས་བྱ་བ་ནི་འཁྲུལ་པའི་རྣམ་པར་བརྗོད་པ་ཡིན་ནོ། །འོན་ཏེ་མིང་དང་མཚན་མ་དོན་གྱི་ཡུལ་དང་ཚུལ་འདྲ་བའི་ཕྱིར་ན་འཁྲུལ་པ་ཡིན་ནོ་སྙམ་ན་དེ་དང་ཞེས་གསུངས་སོ། །དེ་ཞེས་བྱ་བ་ནི་མིང་དང་མཚན་མ་དང་མཚུངས་པ་དང་འཇུག་པའི་ཡུལ་གྱི་དོན་གྱི་ཡུལ་དག་ནི་ཚུལ་འདྲ་བ་མ་ཡིན་ནོ། །ལུས་ཅན་དང་ལུས་ཅན་མ་ཡིན་པ་དག་འདྲ་བ་མེད་པའི་ཕྱིར་རོ་ཞེས་བརྗོད་པའི་ཕྱིར་རོ། །ཚུལ་འདྲ་བ་མེད་ཀྱང་འཁྲུལ་བ་ལས་དེ་རྟོགས་པར་དོགས་པ་བསུ་བ་ནི་འོན་ཏེ་ཞེས་བྱ་བའོ། །དོན་འབའ་ཞིག་ཏུ་ནི་མ་ཟད་ཀྱི་ཡུལ་དེ་ཡང་ངོ༌། །དེ་ལྟ་ན་ནི་ཞེས་བྱ་བ་ནི་ལན་ནོ། །གལ་ཏེ་ཡུལ་མ་རྟོགས་ཀྱང་མ་རྟོགས་པ་ལས་དེ་དང་འབྲེལ་བའི་གཟུགས་ལ་སོགས་པ་ལ་འཇུག་པ་ཡིན་ནོ་ཞེ་ན། ཡུལ་མེད་པའི་ཞེས་གསུངས་སོ། །ཇི་ལྟར་ཡུལ་མེད་པའི་སེམས་དང་སེམས་ལས་འབྱུང་བ་རྟོགས་པ་ལས་དེ་དང་འབྲེལ་བའི་གཟུགས་ལ་སོགས་པ་མི་འཇུག་པ་དེ་བཞིན་དུ་ཡུལ་མེད་པའི་མིང་དང་མཚན་མ་རྟོགས་པས་ཀྱང་ཡིན་ནོ་ཞེས་བྱ་བའི་དོན་ཏོ། །གཞན་མིང་དང་མཚན་མ་ལ་གཞན་ཞེས་བྱ་བ་འཇུག་པའི་ཡུལ་དོན་གྱི་རང་བཞིན་དུའོ། །ཅིའི་ཕྱིར་དེ་ལྟར་མི་རྟོགས་སྙམ་ན་བུམ་པ་ནི་ཞེས་བྱ་བའོ། །དོན་དེའིའོ། །དོན་ནི་མིང་དང་མཚན་མ་ལའོ། །འོ་ན་ཞེས་བྱ་བ་ལན་ནོ། །གང་ལྷག་པར་ཞེས་བྱ་བ་ནི་སུན་འབྱིན་པ་གཞན་དེ་མིང་དང་མཚན་མ་གང་ངོ༌། །གལ་ཏེ་གཞན་ལ་ལྷག་པར་ཞེན་པ་ལས་ཀྱང་འཇུག་པ་མཐོང་བ་ཡིན་ནོ་སྙམ་པར་དོགས་པར་བསུ་བ་ནི། ཉ་ཕྱིས་ལ་ཞེས་བྱའོ། །ཉ་ཕྱིས་ཀྱང་ཞེས་བྱ་བ་ནི་ལན་ནོ། །དེས་ན་ཞེས་བྱ་བ་ནི་གང་དུ་དངུལ་དུ་ལྷག་པར་ཞེན་པ་ནའོ། །མིང་དང་མཚན་མའི་ཞེན་པ་ལས་ཡང་དེ་ལྟར་འཇུག་པ་ཡིན་ནོ་སྙམ་ན་མིང་དང་ཞེས་གསུངས་སོ། །ཅིའི་ཕྱིར་ཞེ་ན། ཡུལ་ཡོངས་སུ་འཛིན་ན་ཞེས་གསུངས་སོ། །ཡུལ་ནི་མི་གནས་པར་ཡང་ཁས་བླངས་པ་ཡིན་ཞེས་དགོངས་པའོ། །ཡུལ་ན་མི་གནས་པ་ཉིད་དུ་དོགས་པ་བསུ་བ་ནི་དེ་ནི་ཞེས་བྱ་བའོ། །དོན་གང་ལ་ཡང་དེ་ལྟར་འཇུག་
པ་ཡིན་ནོ་སྙམ་ན་མིང་དང་ཞེས་གསུངས་སོ། །ཡུལ་ནི་མི་གནས་པར་ཡང་ཁས་བླངས་པ་ཡིན། མིང་དང་མཚན་མའི་ནི་མ་ཡིན་ནོ། །དེས་ན་ཡུལ་ན་མི་གནས་པ་ཉིད་དོ། །དེ་ནི་རིགས་པ་མ་ཡིན་ཏེ། རྣམ་པར་དབྱེ་བ་མེད་པའི་ཕྱིར་རོ། །འདི་ལྟར་དོན་ནི་མིང་དང་མཚན་མ་ཉིད་དུ་དོགས་ཀྱི། དོན་ལས་ཐ་དད་པར་རྟོགས་པ་ནི་མེད་དོ། །དེས་ན་དོན་གྱི་ཡུལ་ཉིད་མིང་དང་མཚན་མའི་ཡུལ་ཡིན་པས་ཡུལ་ལ་མི་གནས་པ་མ་ཡིན་ནོ། །ཡུལ་ལ་མི་གནས་པ་དེས་གནས་པའི་དོགས་པ་བསུ་བ་ནི་ཉ་ཕྱིས་ཀྱི་ཞེས་བྱ་བའོ། །དེ་བཞིན་དུ་ནི་དངུལ་བཞིན་དུའོ། །འདིར་ཡང་ནི་མིང་དང་མཚན་མ་ལའོ། །ཡུལ་མེད་བ་ཡིན་ནོ་སྙམ་དུ་དོགས་པ་བསུ་ནས་སྔར་ནི་ལྷག་པར་ཞེན་པར་བྱས་པའི་དངུལ་སྐྲ་ཤད་བཞིན་ཡུལ་དེར་མངོན་སུམ་གྱིས་གཟུང་བའི་ཕྱིར་ཡུལ་དང་བཅས་པར་བརྗོད་པ་ཡིན་ལ། ད་ནི་བཏང་སྙོམས་སུ་གཞག་ནས་དེ་མེད་པའི་ཕྱིར་ན། །ཡུལ་མེད་ཀྱང་མིང་དང་མཚན་མའི་དེ་ལྟ་མ་ཡིན་ནོ་ཞེས་བསྟན་པའི་ཕྱིར་རོ། །འགོག་པ་ནི་མ་ཡིན་ཏེ་ཞེས་བྱ་བའོ། །ཅིའི་ཕྱིར་ཞེ་ན། ལྷག་པར་ཞེན་པར་བྱས་པའི་དངུལ་ནི་ཕྱི་རོལ་ན་མེད་པའི་ཕྱིར་ཡུལ་མེད་པ་ཡིན་གྱི་ཞེས་བྱ་བའོ། །ཡུལ་མེད་པའི་ཕྱིར་འདོན་པ་ནི་མ་ཡིན་ནོ། །དོན་ལ་ཡང་དངུལ་གྱི་ཡུལ་མེད་པ་ཡིན་ནོ་ཞེས་འབྲེལ་པར་བྱ་བའོ། །ཅིའི་ཕྱིར་ཞེ་ན། སྤྱོད་པའི་ཡུལ་མེད་པའི་ཕྱིར་ནའོ་ཞེས་བྱ་བ་ནི་ཁྱབ་པ་བརྗོད་པའི་ཚིག་གོ །དེས་ན་གང་མེད་པ་དེ་ནི་ཡུལ་མེད་པ་ཡིན་ཏེ། དཔེར་ན་སྐྲ་ཤད་ལ་སོགས་པ་བཞིན་ནོ། །ལྷག་པར་ཞེན་པར་བྱས་པའི་དངུལ་ཡང་མེད་པ་ཡིན་ནོ་ཞེས་བྱ་བ་ནི་ཚད་མ་འདོད་དོ། །མིང་དང་མཚན་མ་དོན་ལས་ལྷག་པར་ཞེན་པར་བྱས་པ་ནི་ཡུལ་མེད་པ་མ་ཡིན་ཏེ། ཡོད་པའི་ཕྱིར་རོ། །འདི་ནི་ལྷག་པར་མེད་པ་དེ་ནི་ཡུལ་མེད་པ་ཡིན་ཏེ། དཔེར་ན་སྐྲ་ཤད་ལ་སོགས་པ་འདི་ནི་འཐད་པ་མ་ཡིན་ནོ་ཞེས་གསུངས་པ་ནི་དངུལ་ནི་ཞེས་པའོ། །གང་གི་ཕྱིར་ཡུལ་ཡོངས་སུ་འཛིན་ན་ཡུལ་ན་མི་གནས་པར་མི་འགྱུར་བ་དེ་བས་ན་མིང་དང་མཚན་མའི་ཡུལ་འཛིན་པ་མ་ཡིན་ནོ། །དེའི་ཕྱིར་ཞེས་བྱ་བ་ནི་མིང་དང་མཚན་མའི་ཡུལ་མི་འཛིན་པའི་ཕྱིར་དང་སྒྲོ་འདོགས་པ་མི་འཐད་པའི་ཕྱིར་རོ། །འོན་ཏེ་ཡང་མིང་ལ་སོགས་པའི་འཛིན་པ་སྒྲའི་རྟོགས་པས་ནི་ཉེ་བར་བཏགས་ནས་དོན་འཛིན་པ་ཡིན་ནོ། །དེས་
ན་འཇུག་པའི་ཡུལ་ཡིན་ནོ་སྙམ་དུ་དོགས་པ་བསུ་ནས་བྲམ་ཟེ་ཞེས་གསུངས་སོ། །ཇི་ལྟར་བྲམ་ཟེའི་ཁྱེའུ་ལ་ཉེ་བར་བཏགས་པའི་མིང་རྟོགས་པར་བྱེད་པ་མིང་བཏགས་པས་བཟུང་བ་དེ་བཞིན་དུ་དོན་ནི་སྒྲ་ལས་བྱུང་བའི་རྟོགས་པ་འཁྲུལ་པས་འཛིན་པ་ནི་མ་ཡིན་ཏེ། དེས་ན་མིང་དང་མཚན་མ་འཛིན་པ་ནི་ཉེ་བར་བཏགས་ནས་དོན་འཛིན་པ་ཡིན་ནོ་ཞེས་བྱ་བའི་དོན་ཏོ། །འོན་ཏེ་མིང་དང་མཚན་མ་འཛིན་པ་ཡིན་ཡང་ཤིན་ཏུ་གོམས་པའི་ཕྱིར་ན་དོན་ལ་འཁྲུལ་པ་མ་ཡིན་ནོ་ཞེས་དོགས་པ་ནི་ཤིན་ཏུ་ཞེས་བྱ་བའོ། །གང་ལས་ཞེས་བྱ་བ་ནི་ལན་ནོ། །ཤིན་ཏུ་གོམས་པ་ལས་མ་འཁྲུལ་པའི་རང་བཞིན་དུ་འགྱུར་བ་ནི་མ་ཡིན་ནོ། །ཅིའི་ཕྱིར་ཞེ་ན། ཚད་མ་མེད་པའི་ཕྱིར་རོ་ཞེས་གསུངས་སོ། །འདི་ཉིད་འཆད་པ་ནི་ཚད་མས་ཞེས་བྱ་བའོ། །དེ་ལྟར་ཞེས་བྱ་བ་ནི་བསྒོམ་པའི་ཡུལ་ཉིད་དུའོ། །གཞན་དུ་ནི་ཞེས་བྱ་བ་ནི་མ་རྟོགས་པར་རོ། །མིང་དང་མཚན་མ་ཡང་ཚད་མའི་ཡུལ་མ་ཡིན་པའི་ཕྱིར་ན་གོམས་པའི་ཡུལ་མ་ཡིན་ནོ་ཞེས་དགོངས་པ་ཡིན་ནོ། །ཐ་སྙད་དུ་གཞན་དུ་མི་འཐད་པ་ཉིད་ལས་དེ་སྒྲུབ་པའི་ཚད་མ་གྲུབ་པོ་ཞེས་དོགས་པ་བསུ་བ་ནི་གཞན་དུ་ནི་ཐ་སྙད་ཅེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །དེ་ལྟ་མ་ཡིན་ན་ཡང་ཞེས་བྱ་བ་ནི། མིང་དང་མཚན་མ་མེད་ཀྱང་ངོ༌། །འཆད་པར་འགྱུར་རོ་ཞེས་བྱ་བ་ནི། ཇི་སྲིད་རང་གི་ངོ་བོ་ལ་ཞེས་བྱ་བ་ལ་སོགས་པས་སོ། །ཤེས་པ་ལ་མཚུངས་མིན་ཞེས་བྱ་བ་དེ་བཤད་པའི་ཕྱིར་དོགས་པ་བསུ་བ་ནི་གང་གིས་ཞེས་བྱ་བའོ། །ཤེས་པ་ལ་ཞེས་བྱ་བ་ནི་བཤད་པར་བྱ་བ་དགོད་པའོ། །གལ་ཏེ་མིང་དང་མཚན་མ་བཞིན་དུ་འདིར་ཡང་སུན་འབྱིན་པར་མཚུངས་སོ་ཞེ་ན། བག་ཆགས་ཀྱི་སྟོབས་ཀྱིས་ཞེས་བྱ་བའོ། །འདི་ག་ལས་སྙམ་ན་འདི་ལྟར་ཞེས་བྱ་བའོ། །གཞན་གྱིས་ཞེས་བྱ་བ་ནི་མིང་དང་མཚན་མས་སོ། །མིང་དང་མཚན་མ་རྟོགས་པ་ནི་ཐ་སྙད་ཀྱི་ཡན་ལག་མ་ཡིན་ལ་རྟོགས་པ་ནི་ཤེས་པ་ཁོ་ན་ཡིན་ནོ་ཞེས་བསྟན་བའི་དོན་དུ་མིང་དང་མཚན་མ་ཞེས་བྱ་བའོ། །རྣམ་པར་རྟོག་པ་དང་པོ་བསལ་བའི་དོན་བརྗོད་པ་ནི་གལ་ཏེ་ཞེས་བྱ་བའོ། །མ་རྟོགས་པ་ནི་ཐ་སྙད་ཀྱི་ཡན་ལག་ཉིད་མ་ཡིན་ནོ་ཞེས་བྱ་བ་དེ་ཙམ་གྱིས་སུན་ཕྱུང་བ་ཡིན་ནོ་སྙམ་དུ་དགོངས་པའོ། །ཇི་ལྟར་དོན་ཉིད་དུ་མ་རྟོགས་སྙམ་ན་རང་གི་ངོ་བོས་ཞེས་
གསུངས་སོ། །དེ་མ་ཡིན་ཏེ་ཞེས་བྱ་བ་ནི་མིང་དང་མཚན་མ་མ་ཡིན་པའོ། །གང་གི་ཕྱིར་དངོས་པོ་ལ་གཞན་གྱི་རྣམ་པ་ཉིད་དུ་ལྷག་པར་ཞེན་པ་མ་ཡིན་པ་དེའི་ཕྱིར་རོ། །མིང་དང་མཚན་མ་ནི་ཞེས་བྱ་བ་ནི་རྣམ་པར་རྟོག་པས་རྟོགས་པ་མི་གསལ་བའི་རྣམ་པ་ཅན་ནོ། །འདི་ནི་ཞེས་བྱ་བ་ནི་རྣམ་པར་རྟོག་པའོ། །ཅིའི་ཕྱིར་ཞེ་ན། དེ་ན་གསུངས་ཏེ་རྣམ་པར་རྟོག་པས་རྟོགས་པའི་མིང་ལ་སོགས་པ་ལའོ། །མིང་དང་མཚན་མ་ལ་ཡང་ཞེས་བྱ་བ་ནི། །དོན་གྱི་རྣམ་པ་ཞེས་བྱ་བ་ནི་རྗེས་སུ་འཇུག་གོ །ཅིའི་ཕྱིར་ཞེ་ན། དོན་གྱི་རྣམ་པར་རྟོག་པས་མི་འཐད་པའི་ཕྱིར་ཏེ་རང་གི་ངོ་བོ་ཙམ་འཛིན་པར་བྱེད་པ་ཡིན་པའི་ཕྱིར་རོ། །དོན་གྱི་རྣམ་པ་ཉིད་ཁས་ལེན་པ་ལ་ཡང་སུན་འབྱིན་པ་བརྗོད་པར་འགྱུར་རོ། །ཤེས་པ་ཉིད་ཀྱིས་ཞེས་བྱ་བ་ནི་དོན་གྱི་མ་ཡིན་ལ་མིང་ལ་སོགས་པའི་ཡང་མ་ཡིན་པའོ། །དེས་ན་ཞེས་བྱ་བ་ནི་དེའི་ཕྱིར་རོ། །བར་གྱི་ཤ་ལྷག་པ་ཞེས་བྱ་བ་ནི་རྣམ་པ་མེད་པ་དང༌། དེ་དག་གི་བར་ན་གནས་ཞེས་བྱ་བའི་དོན་ཏོ། །གཞན་ལ་མེད་མིང་ཏེ་ཞེས་བྱ་བའི་རྩ་བ་བཤད་པར་འགྱུར་རོ་ཤེས་པ་དོན་གྱི་རྣམ་པ་ཅན་ཉིད་ཞེས་བྱ་བར་ནི་འཐད་པ་ཡིན་ཏེ། རང་རིག་པའི་ཚད་མས་རྟོགས་པའི་ཕྱིར་རོ་ཞེས་བརྗོད་བ་ནི་ཞེས་བྱ་བ་སྟེ། སྒྲ་ལས་བྱུང་བའོ། །གང་གིས་དབང་པོའི་ཚོགས་འབྲས་བུ་མེད་པར་འགྱུར་བ་དེའི་དོན་གྱི་རྣམ་པ་ཉིད་ནི་དངོས་པོར་འགྱུར་བ་མ་ཡིན་ནོ། །འོན་ཀྱང་དོན་ལ་བརྒྱུད་ནས་སྐྱེད་པའི་ཤེས་པ་ནི་འཁྲུལ་པ་དོན་གྱི་རྣམ་པ་ཅན་དུ་འགྱུར་རོ་ཞེས་བྱ་བར་རིགས་པ་ཡིན་ཏེ་ཚད་མས་གྲུབ་པའི་ཕྱིར་རོ། །མིང་དང་མཚན་མ་ཡང་དོན་གྱི་རྣམ་པ་ཅན་དུ་འགྲུབ་པོ་སྙམ་ན་བཤད་པ། རྣམ་པར་རྟོག་པས་རྟོགས་པའི་མིང་དང་མཚན་མ་འཁྲུལ་པས་ན་དོན་གྱི་རྣམ་པ་ཅན་ཡིན་ནོ་ཞེས་བྱ་བ་འདི་དག་ལས་གྲུབ་པ་ཡིན་གྱི་མིང་དང་མཚན་མ་ལས་ནི་དོན་གྱི་རྣམ་པ་ཉིད་མ་གྲུབ་པོ་ཞེས་བྱ་བའི་དོན་ཏོ། །ཅིའི་ཕྱིར་སྙམ་དུ་དོགས་ན། བློ་ནི་ཁས་ལེན་མེད་ཕྱིར་ཞེས་ལན་རྩ་བར་གསལ་ལོ། །།གང་གི་རང་བཞིན་མྱོང་མིན་པ། །དེ་ནི་དེ་ཡི་རིག་བྱེད་མིན། །ཞེས་བྱ་བ་ དགོས་པའོ། །རྣམ་པ ་མེད་པའི་ཕྱོགས་ལ་ཡང་འཛིན་པར་བྱེད་པ་དེ་ཉིད་ཁས་བླངས་ནས་རང་ཉིད་ལན་འདེབས་པ་ནི་དེ་དོན་གྱི་ཞེས་བྱ་བའོ། །མིང་དང་མཚན་མའི་ཚད་མ་ནི་རྣམ་པར་རྟོག་པའི་ཤེས་པ་ཡིན་ན་དེ་ཇི་ལྟར་
གནས་པའི་རང་བཞིན་འཛིན་པར་བྱེད་པ་ཡིན་ན། ཇི་ལྟར་དོན་གྱི་རྣམ་པ་ཉིད་དུ་འཛིན་ན། གང་གིས་ཤེས་པའི་དོན་ཉིད་ཀྱིས་རྣམ་པ་བཞིན་དུ་འཁྲུལ་པར་རྟོགས་པར་འགྱུར། དེས་ན་མིང་དང་མཚན་མའི་དོན་གྱི་རྣམ་པ་ཅན་ཡིན་པ་ལ་ནི་ཚང་མ་ཅི་ཡང་ཡོད་པ་མ་ཡིན་ནོ། །གལ་ཏེ་དོན་གྱི་རྣམ་པ་མིང་དང་མཚན་མ་ལས་ཐ་དད་པ་ཡིན་ན་ནི་ཚད་མ་མེད་པར་འགྱུར་གྱི། ཐ་དད་པ་མ་ཡིན་ན་ནི་མི་འགྱུར་རོ་ཞེས་དོགས་པ་བསུ་བ་ནི་ཅི་སྟེ་ཞེས་བྱ་བའོ། །འོ་ན་ནི་ཞེས་བྱ་བ་ནི་ལན་ནོ། །རྣམ་པར་རྟོག་པས་རྟོགས་པ་དེའི་དོན་དང་ལྡན་པར་དོགས་པ་བསུ་བ་ནི་ཅི་སྟེ་ཞེས་བྱ་བའོ། །རྣམ་པར་རྟོག་པས་རྟོགས་པའི་རྣམ་པ་མིང་དང་མཚན་མ་ཞེས་བྱ་བ་དེ་ནི་དོན་བྱ་བ་བྱེད་པ་མ་ཡིན་པས་ནའོ། །བས་ན་ཞེས་བྱ་བ་ནི་དེ་ཕྱིར་རོ། །དེ་ཡང་མི་རིགས་པ་སྟེ་ཞེས་བྱ་བ་ནི་ལན་ནོ། །དོན་བྱ་བ་བྱེད་པ་ཉིད་དུ་སྒྲོ་བཏགས་པ་ལས་འཇུག་པར་དོགས་པ་བསུ་བ་ནི། ལྷག་པར་སྒྲོ་བཏགས་པ་ལས་ཞེས་བྱ་བའོ། །བཤད་ཟིན་ཏོ་ཞེས་བྱ་བ་ནི་རྣམ་པ་དེ་ནི་ཞེས་པ་ཉིད་ཀྱིས་ཞེས་བྱ་བས་སོ། །དེ་ལྟ་མ་ཡིན་པ་ཞེས་པས་ནི་ཤེས་པའི་རྣམ་པ་ལ་སྒྲོ་བཏགས་པར་ཁས་ལེན་ནའོ། །མིང་དང་མཚན་མ་ལ་དོན་བྱ་བ་བྱེད་པ་སྒྲོ་བཏགས་པར་འགྱུར་ལ། དེས་མིང་དང་མཚན་མ་དེ་ལ་ཡང་མིང་དང་མཚན་མ་གཞན་བཏགས་ དགོས་སོ། །དེ་བཞིན་དུ་དེ་ལ་ཡང་གཞན་ཡིན་པས་ཐུག་པ ་མེད་དོ། །དེ་བས་ན་ཤེས་པའི་རྣམ་པ་ཉིད་ལ་ལྷག་པར་སྒྲོ་འདོགས་པར་འཐད་པ་ཡིན་ནོ། །ཁས་ལེན་ན་ཡང་ཚད་ཅན་མིན། །ཞེས་བྱ་བ་འཆད་པ་ནི། དེ་ལ་ཡང་ཞེས་བྱ་བ་མིང་དང་མཚན་མར་སྣང་བ་ལ་ཡང་ཤེས་པའི་རྣམ་པ་ལ་ཕྱི་རོལ་དུ་འཁྲུལ་པ་བཞིན་དུ་འཁྲུལ་པ་ཉིད་དུ་འདོད་ན་ནི་མིང་དང་མཚན་མ་ཅུང་ཟད་ཀྱང་མེད་པར་འགྱུར་རོ། །འཁྲུལ་པའི་ཤེས་པ་ཉིད་ལ་དེ་འགྲུབ་པོ་ཞེ་ན། བཤད་པ་འཁྲུལ་པའི་ཤེས་པས་བྱ་བའོ། །ལྷག་མ་བཤད་པའི་ཕྱིར་དོགས་པ་བསུ་བ་ནི། རྣམ་པ་དེ་ཉིད་ཅེས་བྱ་སྟེ། སྔོན་པོ་ལ་སོགས་པའི་རྣམ་པ་མི་གསལ་བའོ། །དོན་ནི་མིང་དང་མཚན་མའོ། །མ་ཡིན་ཏེ་ཞེས་བྱ་བ་ལ་སོགས་པ་ནི་ལན་ནོ། །གལ་ཏེ་དེ་ལྟ་ན་ཤེས་པའི་རྣམ་པ་བཞིན་དུ་མིང་དང་མཚན་མ་ལ་སྒྲོ་བཏགས་པ་ཡང་དོན་ལ་འཇུག་པར་བྱེད་པ་ཉིད་ཡིན་ནོ་སྙམ་དུ་དོགས་པ་བསུ་བ་ནས་ཤེས་པའི་དོན་གྱི་རྣམ་པ་ཅན་དུ་ཁས་ལེན་
ན་ནི་ཞེས་གསུངས་སོ། །དོན་གྱི་རྣམ་པ་ཉིད་ལ་སྒྲོ་བཏགས་པ་ཡིན་པར་རིགས་ཏེ་ཤེས་པའི་བདག་ཉིད་ཡིན་པས་མ་མཐོང་བའི་ཕྱིར་རོ། །མིང་དང་མཚན་མ་ལ་ནི་མ་ཡིན་ཏེ། དེའི་བདག་ཉིད་མ་ཡིན་པས་ན་མ་མཐོང་བའི་ཕྱིར་རོ། །བདག་ཉིད་ཐམས་ཅད་ཀྱིས་ཞེས་བྱ་བ་ནི་དེའི་རྣམ་པར་ཤེས་པ་ཁ་སྐོང་ངོ༌། །གལ་ཏེ་ཤེས་པ་ཐམས་ཅད་ནི་རྣམ་པ་མེད་པ་དང་དོན་དང་ལྡན་པ་ཡང་ཡིན་ནོ། །དེ་ན་རྣམ་པར་རྟོག་པའི་རྣམ་པར་ཤེས་པ་ཡང་དོན་ཁོ་ན་ལྟར་ཁས་བླང་པར་བྱ་བ་ཡིན་ནོ། །དེས་རྣམ་པ་དེ་ལྟ་བུར་འཁྲུལ་པའི་བློ་སྐྱེས་པ་ཉིད་ཀྱིས་འཇུག་པ་ཡིན་ནོ་ཞེས་ཇི་ལྟར་བརྗོད་ཅེས་དོགས་པ་བསུ་བ་ནི། ཤེས་པ་ཐམས་ཅད་ནི་རྣམ་པ་མེད་པ་ཁོ་ན་ཡིན་པ་དེ་ཕྱི་རོལ་སྣང་བ་ཡིན་ནོ་ཞེས་བྱ་བ་འདི་གང་ལས་རྟོགས་སྙམ་ན། རྣམ་པ་འདི་ནི་ཞེས་གསུངས་སོ། །ཤེས་པ་ཐམས་ཅད་ཡུལ་ནི་ཐ་དད་པ་ཅན་ཁོ་ན་ཡིན་པའི་ཕྱིར་ན་མ་འཁྲུལ་པ་དང་རྣམ་པ་མེད་པར་སེམས་བློ་ཤེས་པ་ཐམས་ཅད་ནི་དོན་དང་ལྡན་པར་མི་འཐད་དེ་རྨི་ལམ་ལ་སོགས་པར་ཕྱི་རོལ་མེད་པར་ཤེས་པ་མཐོང་བའི་ཕྱིར་རོ། །རྨི་ལམ་དུ་ཡང་མིང་ལ་སོགས་པ་མི་ལྡན་པའི་འདུ་བྱེད་ལ་བརྟེན་ནས་མཐོང་བ་ཡིན་ནོ་སྙམ་ན། འདུ་བྱེད་ལས་ཀྱང་མིན་ཞེས་གསུངས་སོ། །ཅིའི་ཕྱིར་འདུ་བྱེད་ལས་དམིགས་པ་མ་ཡིན་ཞེ་ན། འགལ་བ་དམིགས་པའི་ཕྱིར་རོ་ཞེས་བརྗོད་པ་ནི་སྔོན་པོ་ལ་སོགས་པར་ཞེས་གསུངས་སོ། །རྨི་ལམ་དུ་རྨིས་པ་ནི་སྔོན་པོ་ལ་སོགས་པ་ཉིད་ཀྱང་མ་ཡིན་ཏེ། ཐོགས་མེད་ཕྱིར་ན་སྟེ། རང་གི་ཡུལ་དུ་གཞན་སྐྱེ་བའི་གེགས་མ་ཡིན་པའི་ཕྱིར་རོ། །བར་མ་དོའི་གཟུགས་བཞིན་དུ་ཐོགས་པ་མེད་པ་ཉིད་ཡིན་ནོ་སྙམ་ན། དེ་ཤེས་ཡིན་ཞེས་གསུངས་སོ། །གཞན་གྱི་སེམས་བཞིན་དུ་ལྷའི་མིག་གིས་བལྟ་བར་བྱ་བ་ཡིན་ཡང་ཐུན་མོང་མ་ཡིན་པའི་ཕྱིར་ན། བར་མ་དོར་ཡང་ཤེས་པ་ཁོ་ན་ཡིན་ནོ། །དེ་ལྟ་ན་ཡང་གཟུང་བ་ཡིན་ཡང་ཕྱི་རོལ་དུ་མ་གྲུབ་པོ། །སྔོན་པོ་ལ་སོགས་པའི་རང་བཞིན་ཅན་གྱི་མི་ལ་སོགས་པ་ཡང་ཤེས་པ་ཁོ་ན་ཡིན་ཏེ། ཐུན་མོང་མ་ཡིན་པའི་ཕྱིར་དང་གཟུང་བ་ཉིད་དུ་མ་དམིགས་པའི་ཕྱིར་རོ་ཞེས་བརྗོད་པ་ནི། དེས་ནི་མིང་སོགས་ཞེས་བྱའོ། །དེ་ལྟ་ཡིན་ནོ་ཞེས་བྱ་བ་ནི། མདུན་ན་གནས་པའི་རྣམ་པར་དབྱེ་བར་མྱོང་བ་ཙམ་གྱི་དོན་དང་ལྡན་པ་ཡིན་ནའོ། །འཁྲུལ་པ་དང་ཞེས་བྱ་བ་
ནི་སུན་འབྱིན་པའོ། །དམིགས་པ་དང་བཅས་པ་ཡིན་ན་ཡང་ཞེས་བྱ་བ་རྣམ་པར་དབྱེ་བ་ཡོད་པར་དོགས་པ་བསུ་བའོ། །ཐམས་ཅད་དམིགས་པ་མེད་པ་ལ་ཡང་ཚད་མ་དང་ཚད་མ་མ་ཡིན་པའི་རྣམ་པར་དབྱེ་བར་འགྱུར་རོ་ཞེས་ལན་བརྗོད་པ་ནི། དེ་ལྟ་ན་འོ་ན་ཞེས་བྱ་བའོ། །ཅི་ཐམས་ཅད་དམིགས་པ་དང་བཅས་པ་ཡིན་ནམ་འོན་ཏེ་དམིགས་པ་མེད་པ་ཡིན་ཞེས་བྱ་བ་འདི་ལ་ལན་གང་ཡིན་ཞེས་དོགས་པ་ལ་ལན་དུ་དམིགས་པ་མེད་པ་ཉིད་དོ་ཞེས་གསུངས་སོ། །འདི་ཉིད་དེ་ཁོ་ན་ཡིན་པར་ཇི་ལྟར་འགྱུར་སྙམ་དུ་དོགས་པ། འདི་ལྟར་དམིགས་པ་དང་བཅས་པར་ནི་མི་འཐད་དོ་ཞེས་འབྲེལ་ཏོ། །ཇི་ལྟར་ཞེ་ན་རྨི་ལམ་ལ་སོགས་བ་དག་ན་ཞེས་གསུངས་སོ། །གང་གི་ཕྱིར་མདུན་ན་གནས་པར་འཛིན་པ་ནི་མ་ངེས་པ་ཡིན་པའི་ཕྱིར་དམིགས་པ་དང་བཅས་པར་སྒྲུབ་པར་ནུས་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་སད་བའི་གནས་སྐབས་ན་དམིགས་པ་དང་བཅས་པ་ཉིད་དམིགས་པའི་ཕྱིར་གཞན་དུ་ཡང་དེ་ལྟར་ཅི་སྟེ་མི་འདོད་པ་ཞེས་དོགས་པ་བསུ་ནས་བཟློག་པར་ཞེས་བྱ་བའོ། །དམིགས་པ་དང་བཅས་པ་ཉིད་མ་གྲུབ་པའི་ཕྱིར་ཏེ། གཟུང་བར་བྱ་བ་མ་དམིགས་པའི་ཕྱིར་རོ། །འདི་ཉིད་གསུངས་པ་ནི་དམིགས་པ་དང་བཅས་པ་ཉིད་ནི་ཞེས་བྱ་བའོ། །གར་ཡང་ཞེས་བྱ་བ་ནི་སད་པའི་གནས་སྐབས་སུ་ཡང་ངོ༌། །དེས་ན་དམིགས་པ་དང་བཅས་པ་ཉིད་མི་འཐད་པས་དམིགས་པ་མེད་པ་ཉིད་དེ་ཁོ་ན་ཡིན་ནོ། །སད་པའི་གནས་སྐབས་ཞེས་བྱ་བ་ནི་དམིགས་པ་དང་བཅས་པ་གྲུབ་པའི་དོགས་པ་བསུ་བའོ། །འོ་ན་ཞེས་བྱ་བ་ནི་ཁས་བླངས་པ་བརྗོད་པ་ནས་ལན་འདེབས་པའོ། །འོ་ན་ཞེས་བྱ་བ་ནི་ཤེས་པ་དམིགས་པ་མེད་པ་ཡིན་པ་དེའི་ཕྱིར་ཤེས་པ་ནི་མ་ཡིན་ནོ། །གཞན་དུ་ཞེས་བྱ་བ་ཕྱི་རོལ་མེད་པར་ཡང་མཐོང་བའི་ཕྱིར་རོ། །འདུ་བྱེད་ལས་ཀྱང་མི་ན་ཞེས་བྱ་བ་བཤད་པའི་ཕྱིར་ན་དོགས་པ་བསུ་བ་ནི་ཅི་སྟེ་ཞེས་བྱ་བའོ། །སྔོན་པོ་ལ་སོགས་པའི་རྣམ་པ་ཉིད་མིང་དང་མཚན་མ་ཡིན་ནོ་ཞེ་ན་མིང་དང་མཚན་མ་ལ་ནི་ཞེས་གསུངས་ཏེ། སྔོན་པོ་ལ་སོགས་པའི་རྣམ་པ་མེད་པའི་ཕྱིར། ཐོགས་མེད་ཕྱིར་ན་སྔོ་སོགས་མི་ན། །ཞེས་བྱ་བ་འཆད་པ་ནི་དེར་ཞེས་བྱ་བ་སྟེ། རྨི་ལམ་གྱི་ཤེས་པ་ལའོ། །སྔོན་པོ་ལ་སོགས་པ་ཉིད་ཅེས་བྱ་བ་ནི། བདེན་པའི་སྔོན་པོ་ལ་སོགས་པའོ། །ཅིའི་ཕྱིར་མི་འབད་ཅེ་
ན་རྣམ་པ་དེ་ནི་ཞེས་གསུངས་ཏེ། རྨི་ལམ་དུ་མཐོང་བའི་སྔོན་པོ་ལ་སོགས་པའི་རྣམ་པ་ནི་བདེན་པའི་སྔོན་པོ་ལ་སོགས་པ་དང་མི་མཐུན་པའི་ཕྱིར་རོ། །མི་མཐུན་པ་ཉིད་སྟོན་པ་ནི། བཟློག་པའི་ཕྱིར་རོ་ཞེས་བྱ་བ་ནི་ཐོགས་པ་མེད་པ་ཉིད་ཡོད་པའི་ཕྱིར་རོ། །ཅིའི་ཕྱིར་ཞེ་ན། དེ་ལྟར་ལ་ཡང་ཞེས་བྱ་བ་སྟེ། རྣམ་པ་དེས་སོ། །རེག་པར་ཞེས་བྱ་བ་ནི་བཅད་པར་རོ། །དེ་ཉིད་དུ་བདེན་པའི་གླང་པོའི་ཁྱུ་ཡོད་པས་ན་དེ་མཐོང་བ་ཡིན་ནོ་སྙམ་ན། གང་གིས་ཞེས་གསུངས་སོ། །འོ་ན་ཕྱི་རོལ་ན་འདུག་པ་མཐོང་བ་ཡིན་ནོ་སྙམ་ན། བཅད་པའི་ནང་ནས་ཞེས་གསུངས་སོ། །གང་གི་ཕྱི་རོལ་ན་འདུག་པ་མཐོང་བར་འགྱུར་བ་སྒོ་བཅད་པའི་ནང་ནས་སྐྱེས་བུ་ཕྱིར་འགྲོ་བ་ནི་ནུས་པ་མ་ཡིན་ནོ། །དེས་ན་རྨི་ལམ་དུ་མཐོང་བ་ནི་ཕྱི་རོལ་དང་མི་མཐུན་པ་ཉིད་ཡིན་ནོ། །ཕྱིའི་འབྲས་བུ་མ་མཐོང་བའི་ཕྱིར་ཡང་དེ་དང་མི་འདྲ་བ་ཉིད་དུ་བརྗོད་པ་ནི་གླང་པོའི་ཁྱུའི་འབྲས་བུ་ཞེས་བྱ་བའོ། །འོན་ཏེ་ཇི་ལྟར་ཤིང་བཅད་པ་ལ་སོགས་པ་མེད་པ་དེ་ལྟར་དེའི་རང་བཞིན་ནོ་ཞེ་ན། མེའི་འབྲས་བུ་ཞེས་གསུངས་སོ། །གླང་པོའི་ཁྱུའི་རང་བཞིན་དེ་འདྲ་བ་ཡིན་ཡང་མེའི་རང་བཞིན་ནི་དེ་འདྲ་བ་མ་ཡིན་ཏེ། སྲེད་པར་མི་ནུས་པ་ནི་མེ་མ་ཡིན་པའི་ཕྱིར་རོ། །དེས་ན་གལ་ཏེ་རྨི་ལམ་དུ་རྟོགས་པའི་མེ་བདེན་པ་ཉིད་ཡིན་ན་དེའི་འབྲས་བུ་ཚིག་པ་ལ་སོགས་པས་སད་པའི་གནས་སྐབས་སུ་ཡང་མཐོང་བར་འགྱུར་རོ། །དེ་ལྟར་ཡང་མ་ཡིན་ཏེ་དེས་ན་རྨི་ལམ་དུ་མཐོང་བ་ནི་བདེན་པའི་སྔོན་པོ་ལ་སོགས་པ་ལས་ཕྱིན་ཅི་ལོག་ཏུ་གྱུར་པ་ཡིན་ནོ། །རྨི་ལམ་དུ་མཐོང་བ་མི་མཐུན་པ་ཡིན་ཡང་ཕྱི་རོལ་ཉིད་དུ་དོགས་པ་བསུ་བ་ནི། གལ་ཏེ་ཞེས་བྱ་བའོ། །དེ་ལྟར་ཡིན་ན་ཞེས་བྱ་བ་ནི་ལན་ཏེ། ཕྱི་རོལ་ཉིད་ཡིན་ནའོ། །ཤེས་པ་ལས་ཐ་མི་དད་པ་ནི་ཐམས་ཅད་ཀྱིས་མི་མཐོང་བར་འཐད་ཀྱི་ཐ་དད་ན་གོ་ཇི་ལྟར་དེས་ན་སད་པ་ཐམས་ཅད་དང་གཞན་གྱིས་ཀྱང་མཐོང་བར་འགྱུར་རོ། །གཞན་གྱིས་དེ་ལ་ཞེས་སྨྲས་ཏེ། སད་པ་དེ་ལ་དེ་འདྲ་བའི་ཚོགས་པ་མེད་པའི་ཕྱིར་མ་མཐོང་བ་ཡིན་ནོ་ཞེས་བྱ་བ་ནི་སྐབས་ཡིན་ནོ། །གང་ཞིག་མ་ཚང་བ་མཐོང་བའི་ཚོགས་པ་དེ་གང་ཡིན་ཞེ་ན། གཉིད་ཚོགས་པ་ཅན་ཞེས་བྱ་བའོ། །གྲུབ་པའི་མཐའ་སྨྲ་བས་གལ་ཏེ་ཞེས་གསུངས་སོ། །ཐལ་བ་ལས་བཟློག་པ་ནི་དེ་ལྟར་ནི་མ་ཡིན་ཏེ་ཞེས་བྱ་བའོ། །ཅིའི་ཕྱིར་
སྙམ་ན་ཡུལ་དེ་ཉིད་དུ་ཞེས་གསུངས་སོ། །གང་དུ་གཉིད་ལོག་པ་གཅིག་གིས་གླང་པོ་མཐོང་བའི་ཡུལ་དེ་ཉིད་དུ་གཞན་གྱིས་ནི་རི་ཁོ་ན་མཐོང་སྟེ་དེས་ན་དེ་ནི་མཐོང་བར་བྱེད་པ་མ་ཡིན་ནོ། །འོ་ན་བག་ཆགས་ཡོངས་སུ་སྨིན་པ་འཛིན་པའི་རྒྱུ་ཡིན་ལ། དེ་ཡང་མཚུངས་པ་མ་ཡིན་ནོ། །དེས་ན་ཐམས་ཅད་ཀྱིས་ཐམས་ཅད་མཐོང་བ་མ་ཡིན་ནོ་ཞེས་གཞན་དག་གིས་སྨྲས་པ་ནི། རྣམ་པ་གཞན་དུ་མཐོང་བ་ནི་ཞེས་བྱ་བའོ། །འདི་ལྟར་ཞེས་བྱ་བ་ནི་དེ་ཉིད་གཞུང་འཛུགས་པའོ། །འདུ་བྱེད་ཅེས་བྱ་བ་ནི་གྲུབ་པའི་མཐའོ་དེས་ན་ཞེས་བྱ་བ་ནི་གཞན་མེད་པས་ནའོ། །དེ་ལས་ཞེས་བྱ་བ་ནི་འདུ་བྱེད་པ་ལས་སོ། །ཅིའི་ཕྱིར་སྙམ་དུ་དོགས་ན། མིག་གི་རྣམ་པར་ཤེས་པ་བཞིན་དུ་ཤེས་པ་འདུ་བྱེད་ལས་སྐྱེས་ཀྱང་རང་ལ་བརྟེན་པའི་ཁྱད་པར་མེད་པའི་ཕྱིར་ཐམས་ཅད་འཛིན་པར་འགྱུར་རོ་ཞེས་བརྗོད་པ་ནི་མིག་ལ་སོགས་པའི་ཞེས་བྱ་བའོ། །འགའ་ཞིག་ཅེས་བྱ་བ་ནི་ཕྱི་རོལ་གྱི་དངོས་པོའོ། །རྣམ་པ་དང་བཅས་པའི་ཁྱད་པར་ཡོད་ན་ནི་ཐམས་ཅད་འཛིན་པ་མ་ཡིན་ནོ་ཞེས་དགོངས་པའོ། །གང་གི་ཕྱིར་ཐོགས་པ་མེད་པའི་གཟུགས་སྐྱེས་པ་ཡིན་ན། ཉེ་བ་མཐའ་དག་གིས་འཛིན་པར་འགྱུར་བ་ལས་རྣམ་པར་ཕྱེ་ནས་ཀྱང་འཛིན་པ་ཡིན་ཏེ། དེའི་ཕྱིར་རྨི་ལམ་དུ་ནི་ཐོགས་པ་དང་བཅས་པའམ། ཐོགས་པ་མེད་པའི་ཕྱི་རོལ་གྱི་སྔོན་པོ་ལ་སོགས་པ་ནི་འགའ་ཡང་སྐྱེས་པ་མེད་དོ། །དེའི་ཕྱིར་ཞེས་བྱ་བ་འདི་ཉིད་ཀྱི་དོན་བཤད་པ་ནི་རྣམ་པ་ཐ་དད་པར་འཛིན་པའི་ཕྱིར་རོ་ཞེས་བྱ་བའོ། །དེ་ཉིད་འོ་ན་ཇི་ལྟར་ཐ་དད་པ་ཡིན་སྙམ་ན། སྔོན་མཐོང་ན་འདུ་བྱེད་པའི་སྟོབས་ཀྱིས་རྣམ་པར་དབྱེ་བ་ཡོད་པར་འགྱུར་རོ་ཞེས་བརྗོད་པ་ནི་སྔོན་གྱི་རང་བཞིན་ཞེས་བྱ་བའོ། །ཇི་ལྟ་ཞེ་ན། སྔོན་མཐོང་བ་གང་གིས་ཞེས་བྱ་བའོ། །དེ་ཉིད་ཅེས་བྱ་བ་ནི་སྔོན་པོ་ལ་སོགས་པའོ། །གཞན་གྱིས་ཞེས་བྱ་བ་ནི་སྔོན་མ་མཐོང་བས་སོ། །གལ་ཏེ་སྔོན་གྱི་རང་བཞིན་མཐོང་བ་ན་རྣམ་པར་ཕྱེ་ནས་མཐོང་བ་འཐད་པ་ཡིན་ནའོ། །ན་ཞེས་བྱ་བ་ནི་གཞན་གྱིའོ། །དེ་ཉིད་གསལ་བར་བྱེད་པ་ནི་སྔོན་གྱིའོ་ཞེས་བྱ་བའོ། །དེའི་དུས་སུ་ནི་ད་ལྟར་གྱི་དུས་སུའོ། །མ་ཡིན་ཏེ་ཞེས་བྱ་བ་ནི་ལན་ནོ། །དངོས་པོ་དེའི་འདུས་པའི་ཞེས་བྱ་བ་ནི་སྐབས་ཡིན་ནོ། །ཅིའི་ཕྱིར་ཞེ་ན་མེད་པའི་ཕྱིར་རོ་ཞེས་བྱ་བ་སྟེ། རྨི་
ལམ་དུ་ནི་ཤི་བ་ཡང་མཐོང་བའི་ཕྱིར་རོ། །དེ་ཉིད་ཀྱི་ཕྱིར་ཞེས་བྱ་བ་ནི་དོགས་པ་བསུ་བ་སྟེ། དེའི་དུས་ན་མེད་པ་ཉིད་ཀྱི་ཕྱིར་རོ། །གཅིག་སྣང་བ་ལ་ལོག་པར་འདོད་དམ་ཡང་ན་སྣང་བ་ལ་ལོག་པར་འདོད། རེ་ཞིག་རྣམ་པར་རྟོག་པ་གཉིས་པ་སེལ་བ་ནི་གལ་ཏེ་ཞེས་བྱ་བའོ། །དེའི་ཚེ་ཕྱིན་ཅི་མ་ལོག་ཏུ་མངོན་པར་འདོད་པ་དེ་ལ་ཕྱིན་ཅི་ལོག་ཉིད་ཅེས་བྱ་བའི་ཆོས་སུ་གྱུར་པ། ཕྱིན་ཅི་ལོག་ཡོད་མིན། གལ་ཏེ་ཞེས་བྱ་བ་ནི་རྣམ་པར་འབྲེལ་པའོ། །སྣང་བ་འང་ཡིན་ལ་ལོག་པའང་ཡིན་ནོ་ཞེས་བྱ་བ་ནི་མ་འབྲེལ་ལོ་ཞེས་བྱ་བའི་དོན་ཏོ། །འོན་ཏེ་སྣང་བ་ཡིན་ཡང་རྨི་ལམ་དུ་མཐོང་བ་ཕྱིན་ཅི་ལོག་ཉིད་ཡིན་ནོ་ཞེ་ན། ཐམས་ཅད་ཅེས་གསུངས་ཏེ་ཐམས་ཅད་ཅེས་བྱ་བ་ནི་སད་པས་མཐོང་བའི་བདེན་པའི་སྔོན་པོ་ལ་སོགས་པའོ། །དེ་ལྟར་ཞེས་བྱ་བ་ནི་ཕྱིན་ཅི་ལོག་ཉིད་དུའོ། །དེ་ལྟར་འཛིན་པར་ཁས་ལེན་པ་མིན་པ་ན་ནི་ཕྱིན་ཅི་ལོག་ཉིད་མེད་པའི་ཕྱིན་ཅི་མ་ལོག་པ་ཡང་མེད་དོ་ཞེས་བསྟན་པའི་ཕྱིར་བཤད་པ། དེ་དག་ཀྱང་ཞེས་བྱ་བ་སྟེ། སད་པས་མཐོང་བ་དག་ཀྱང་ཕྱིན་ཅི་ལོག་གི་རང་བཞིན་དུ་སྣང་བ་ཡིན་ནོ་ཞེ་ན། གལ་ཏེ་རྨི་ལམ་དང་གཞན་པ་མཐོང་བ་ཐམས་ཅད་སྣང་བ་སྟེ་ཤེས་པ་ཡིན་པའི་ཕྱིར་ལོག་པ་ཡིན་ན་འོ་ན་ནི་ལོག་པ་ཉིད་དུ་འདོད་པའི་ལོག་པ་ཉིད་གང་གང་ལ་ལྟོས་ནས་ནི་ལོག་པ་ཉིད་དུ་རྣམ་པར་འཇོག་པ་མ་ཡིན་ནོ་ཞེས་བཤད་པ་ནི། འཁྲུལ་པ་ཉིད་ལ་ཞེས་བྱ་བའོ། །དེ་བཞིན་དུ་དངོས་པོའི་ཕྱིན་ཅི་ལོག་པ་ཡང་ཕྱིན་ཅི་ལོག་གཞན་ལ་ལྟོས་པ་མ་ཡིན་ནོ། །དེས་ན་ཐམས་ཅད་རང་བཞིན་གཅིག་ཁོ་ནར་འགྱུར་གྱི། རྣམ་པར་དབྱེ་བར་ནི་མི་འགྱུར་རོ། །གཞན་ལ་ནི་རྨི་ལམ་དུ་མཐོང་བ་ལའོ། །དེ་ནི་དང་པོ་གསལ་བའི་ཕྱིར་ཅི་སྟེ་ཞེས་གསུངས་སོ། །གཞན་དག་སྣང་བ་ཁོ་ན་ཕྱིན་ཅི་ལོག་པ་ཡིན་གྱི་དོན་ནི་མ་ཡིན་ཏེ། མཐོང་བ་མེད་པའི་ཕྱིར་ཞེས་སྟོན་པས་ཕྱིན་ཅི་ལོག་ཏུ་སྣང་བ་ཉིད་དུ་གཞུང་འཛུགས་པ་ནི་སྣང་བ་ཡིན་ནོ་ཞེས་བྱ་བ་ཡིན་ནོ། །དེ་གང་ཡིན་སྙམ་ན་ཕྱིན་ཅི་ལོག་ཅེས་བྱ་བ་སྟེ། དོན་རྣམ་པ་གཞན་དུ་གྱུར་པ་གཞན་དུ་འཛིན་པར་བྱེད་པ་གང་ཡིན་པའོ། །འོ་ན་དོན་ཀྱང་ཕྱིན་ཅི་ལོག་ཉིད་ཡིན་ནོ་ཞེས་ན། གང་གིས་ཞེས་གསུངས་སོ། །སྣང་བའི་རང་བཞིན་གང་གིས་དོན་གཞན་ཡང་དེ་ལྟར་ཕྱིན་ཅི་ལོག་ཉིད་དུ་རྟོགས་པར་འགྱུར་བ་སྣང་བའི་རང་བཞིན་དུ་གྱུར་པའི་ཕྱིན་ཅི་ལོག་གཞན་གང་ཡིན་པ་དེ་ནི་གཞན་དོན་གྱི་ཡིན་
ནོ། །ཅིའི་ཕྱིར་ཞེ་ན་ཐ་དད་པའི་དོན་ལས་ཐ་དད་པ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །གྲུབ་པའི་མཐའ་ནི་དོན་གྱི་རང་བཞིན་མེད་པར་མཐོང་བའི་ཕྱིར་རྟོགས་པ་དམིགས་པ་མེད་པ་ཉིད་ཡིན་གྱི། ཕྱིན་ཅི་ལོག་གཞན་སྣང་བ་ནི་མ་ཡིན་ནོ་ཞེས་བཤད་པ་ནི་དེ་ལྟ་ན་ནི་འོ་ན་ཞེས་བྱ་བའོ། །དེ་ལྟར་ཞེས་བྱ་བ་ནི་སྔོན་པོ་ལ་སོགས་པའི་རྣམ་པར་རོ། །དམིགས་པ་མེད་པའི་གཞུང་འཛུགས་པ་ནི་འདི་ལྟར་ཞེས་བྱ་བའོ། །དེར་ཞེས་བྱ་བ་ནི་རྨི་ལམ་གྱི་དུས་སུའོ། །ཇི་ལྟར་དེ་དོན་དུ་མཐོང་ཞེ་ན། འདུ་བྱེད་ལས་ནི་ཞེས་གསུངས་སོ། །དེ་ལྟར་ཞེས་བྱ་བ་ནི་མཐོང་བའི་སྔོན་པོ་ལ་སོགས་པའི་རྣམ་པར་རོ། །གང་གི་ཕྱིར་ཡོད་པ་མ་ཡིན་པ་ནི་མཐོང་བ་དེའི་ཕྱིར་ན། དེའི་ཚེ་ན་དེ་ལྟར་སྐྱེས་པའི་ཤེས་རབ་ཁོ་ན་རང་རིག་པ་ཡིན་གྱི་དོན་ནི་མ་ཡིན་ནོ། །ཡུལ་གཞན་ན་ཡུལ་གཞན་དུ་མཐོང་ཞེས་བྱ་བ་འདི་ནི་ཁས་བླངས་པ་ཙམ་དུ་ཟད་དེ་དངོས་པོ་ལ་ནི་ཇི་ལྟར་དུས་གཞན་ན་ཡོད་པ་དུས་གཞན་དུ་མཐོང་བ་མེད་པ་དེ་བཞིན་དུ་ཡུལ་གཞན་ཡོད་པ་ཡང་ཡུལ་གཞན་དུ་མི་མཐོང་ངོ༌། །དེ་ནི་ཞེས་བྱ་བའི་དོན་ཏོ། །དེས་ན་ཤེས་པ་ཐམས་ཅད་དམིགས་པ་དང་བཅས་པ་ཉིད་དོ་ཞེས་བྱ་བའི་ཁྱབ་པ་གང་ལ་ཡོད་པ་བསལ་ཟིན་པའི་ཕྱོགས་ཀྱང་རྗེས་སུ་བརྗོད་ནས་ལྷག་པ་བརྗོད་པའི་དོན་དུ་བཤད་ཟིན་པའི་སྐྱོན་ཉིད་ཟློས་པ་ནི་གལ་ཏེ་དུས་གཞན་ཡང་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་རྩོད་པ་སྨྲ་བའོ། །ཅིའི་ཕྱིར་ཞེ་ན། དེ་ལ་ཞེས་སྨོས་ཏེ་ཀ་བ་ལ་སོགས་པ་མཐོང་བ་དེའོ། རེ་ཞིག་གནོད་བྱེད་མ་སྐྱེས་པ་ཙམ་ནི་གནོད་མེད་མ་ཡིན་ཏེ། ཧ་ཅང་ཐལ་བའི་ཕྱིར་རོ། །འོན་ཀྱང་གནོད་བྱེད་པ་ལས་གཞན་ཤེས་པ་ཁོ་ན་ཡིན་ནོ་ཞེས་ལན་འདེབས་པ་ནི་གནོད་བྱེད་མེད་པ་ཉིད་ཀྱང་ཞེས་བྱ་བའོ། །གང་གིས་ཕྱིན་ཅི་ལོག་ཏུ་སྣང་བར་འགྱུར་བ་གང་ཡང་རུང་བ་ནི་གནོད་བྱེད་མེད་པ་མ་ཡིན་གྱི། འོན་ཀྱང་ཐོབ་པའི་ཤེས་པའི་རང་བཞིན་ནོ་ཞེས་དོགས་པ་བསུ་བ་ནི་དོན་ཐོབ་པའི་ཕྱིར་རོ་ཞེས་བྱ་བའོ། །འདི་ལ་ཡང་ཉེས་པ་ཉིད་ཡོད་དོ་ཞེས་བརྗོད་པ་ནི། དོན་ཐོབ་པ་ཡང་ཞེས་བྱ་བའོ། །ཧ་ཅང་ཐལ་བ་སྤོང་བའི་དོགས་པ་བསུ་བ་ནི་དོན་ཡོད་པ་ལ་ཞེས་བྱ་བའོ། །ཀ་བ་ལ་སོགས་པ་མཐོང་བ་ན་ཡོད་པའི་ཕྱིར་ཕྱིན་ཅི་ལོག་ཏུ་སྣང་བ་མ་ཡིན་ནོ་ཞེ་ན་ལན་དུ་དོན་མཐོང་བ་ཉིད་ལ་ཞེས་བྱ་བའོ། །གང་གིས་ཕྱིན་ཅི་ལོག་ཏུ་
སྣང་བར་འགྱུར་བ་རྨི་ལམ་མཐོང་བ་ལ་ཡང་དོན་མཐོང་བ་ཡོད་པའི་ཕྱིར་ཇི་ལྟར་མེད། ཐོབ་པ་མེད་པའི་རྒྱུ་མཚན་གྱི་དོགས་པ་བསུ་བ་ནི་དེའི་ཚེ་ཞེས་བྱ་བ་སྟེ། རྨི་ལམ་གྱི་ཚེ། རིགས་པ་མེད་པ་ལ་ཡང་འདི་ཉིད་རྒྱུ་མཚན་ཡིན་ནོ་ཞེས་ལན་བརྗོད་པ་ནི་མེད་ན་ཞེས་བྱ་བའོ། །རིགས་པ་ལ་མེད་པ་མི་འགྲུབ་པོ་ཞེས་དོགས་པ་བསུ་བ་ནི་གཞན་གྱི་ཚེ་ཞེས་བྱ་བ་ནི་ལན་ནོ། །མི་འཐོབ་པའི་རྒྱུ་མཚན་གྱི་ཁྱད་པར་ཅན་གྱི་ཚེ་ཉིད་ཅེས་བྱ་བ་ལ་སོགས་པས་ཉེ་བར་བཀོད་ནས་བཟློག་པ་ནི་འོ་ན་ཇི་ལྟར་ཞེས་བྱ་བའོ། །དེའི་ཞེས་བྱ་བ་ནི་དུས་གཞན་གྱིའོ། །དུས་གཞན་པ་ཡང་མཐོང་བ་དང་འཐོབ་པར་ཡང་ཅི་སྟེ་མི་འགྱུར་བ་ཞེས་བརྗོད་པ་ནི་ཐོབ་པ་ཡང་ཞེས་བྱའོ། །ཐོབ་པར་མི་ནུས་ན་ལྟ་བར་ཡང་ནུས་པ་ཇི་ལྟར་འགྱུར། མྱོང་བ་ནི་དོར་བར་མི་ནུས་སོ་ཞེས་དོགས་པ་བསུ་བ་ནི་མཐོང་བ་ཉིད་ཀྱི་ཕྱིར་ཞེས་བྱ་བའོ། །ཅི་ཞིག་ཅེས་བྱ་བ་ནི་ལན་ནོ། །ཅི་ཞེས་བྱ་བ་ནི་ཤེས་པ་ཙམ་མམ། ཐ་དད་པ་ཡིན་ཞེས་བྱ་པར་རོ། །གཞན་གྱིས་མངོན་པར་འདོད་པ་ཐ་དད་པ་ངེས་པ་ལ་ངོ་ཤེས་པའི་ཚད་མར་ངོས་ཤེས་པའི་ཕྱིར་ཞེས་བྱ་བ་ལ་སོགས་པས་བཀོད་ནས་མ་ཡིན་པའི་ཕྱིར་ཏེ་ཞེས་འགོག་པའོ། །ཅིའི་ཕྱིར་ཞེ་ན། རྨི་ལམ་དུ་སྐྱེ་བ་གཞན་དུ་མཐོང་བ་ངོ་ཤེས་པ་མེད་པའི་ཕྱིར་རོ་ཞེས་གསུངས་སོ། །སྐྱེ་བ་གཞན་དུ་མཐོང་བ་ནི་རྨི་ལམ་དུ་མཐོང་ངོ༌། །ཤེས་པ་མ་ཡིན་ཏེ། དེས་ན་ངོ་ཤེས་པ་མེད་པས་སྔོན་གྱི་ཡུལ་ཅན་གྱི་རང་བཞིན་མ་ཡིན་པའི་ཕྱིར་རྨི་ལམ་གྱི་ཤེས་པ་འགའ་ཞིག་དམིགས་པ་མེད་པ་ཡིན་པའི་ཕྱིར། ཤེས་པ་ཐམས་ཅད་དམིགས་པ་དང་བཅས་པ་ཡིན་ནོ་ཞེས་བྱ་བའི་ཁྱབ་པ་ཇི་ལྟར་ཡིན། གལ་ཏེ་ངོ་ཤེས་པ་གཞན་དང་འདྲ་བའི་ཕྱིར་སྐྱེ་བ་གཞན་དུ་མཐོང་བ་ལས་ཡང་སྔར་མཐོང་བ་ཉིད་རྗེས་སུ་དཔོག་པ་ཡིན་ནོ་ཞེས་དོགས་པ་བསུ་བ་ནི་ངོ་ཤེས་པར་འགྱུར་བ་གཞན་དང་ཞེས་བྱ་བའོ། །གལ་ཏེ་འདིར་ཡང་ངོ་ཤེས་པ་ཉིད་ལས་སྔོན་མཐོང་བ་ཉིད་འགྲུབ་པ་ན་རྗེས་སུ་དཔག་པས་ཅི་ཞིག་བྱ་ཞེས་དོགས་པ་བསུ་བ་ནས་དྲི་ཟའི་གྲོང་ཁྱེར་ཞེས་སྨྲས་སོ། །ཇི་ལྟར་མེད་སྙམ་ན་དེ་ལ་ནི་ཞེས་སྨྲས་ཏེ། དྲི་ཟའི་གྲོང་ཁྱེར་ལ་སོགས་པ་དག་ལའོ། །དེ་ལྟ་ཡིན་ན་ནི་ཞེས་བྱ་བ་ནི་ལན་ནོ། །བདེན་པའི་བུམ་པ་ལ་སོགས་པ་སྔར་མཐོང་བ་ཉིད་དེ་གང་གི་ཕྱིར་ངོ་ཤེས་པར་འགྱུར་བ་དང་འདྲ་བས་ན་ངོས་ཤེས་པར་བྱ་བ་
ཡིན་པའི་ཕྱིར་རོ་ཞེས་བྱ་བའི་དོན་ཏོ། །དེ་ལྟ་ཡིན་ན་ཐམས་ཅད་ཀྱང་ལོག་པར་སྣང་བ་ཁོ་ནར་འགྱུར་རོ། །འདི་ནི་ཞེས་བྱ་བ་ནི་ཤེས་པ་ཐམས་ཅད་ལོག་པར་སྣང་བར་ཐལ་བས་སོ། །དན་པ་ཉམས་པ་ཡང་ཞེས་བྱ་བ་ནི་ལོག་པར་སྣང་བ་འབའ་ཞིག་ཏུ་མ་ཟད་པའོ། །དྲན་པ་ཉམས་པས་ནི་ཉ་ཕྱིས་ལ་འདི་དངུལ་ལོ་ཞེས་ཤེས་པར་འགྱུར་རོ། །འདི་ལྟར་ཤེས་པ་དེས་ནི་ཚོང་ཁང་ན་གནས་པའི་དངུལ་ཉིད་ལ་ཡུལ་གཞན་ན་གནས་དྲན་པ་ཡིན་ཏེ་དེས་ནི་ཤེས་པ་དེས་ན་དྲན་པ་ཉམས་པ་ཡིན་ལ། དེ་ཡང་གལ་ཏེ་ཡུལ་གཞན་ན་ཡོད་པའི་དངུལ་ལ་སོགས་པ་ཉིད་ཤེས་པ་གཞན་ལ་སྣང་བ་ཡིན་པ་ནི་བདེན་པའི་བུམ་པ་ལ་སོགས་པ་ཡང་དེ་བཞིན་དུ་སྣང་བ་ཡིན་པར་འགྱུར་རོ་ཞེས་གསལ་བ་ཡིན་ནོ། །འདི་ཉིད་ཀྱིས་བཤད་པ་ཡིན་ཏེ་ཞེས་བྱ་བ་ལ་ཐུན་མོང་མ་ཡིན་པ་ཉིད་དང་བཟུང་བ་ཉིད་མ་དམིགས་པ་ཉིད་ཀྱིས་སོ། །ཇི་ལྟར་འདི་ཉིད་ཀྱིས་གསལ་སྙམ་ན། འདི་ལྟར་ཞེས་བྱ་བའོ། །གང་ཡིན་ཞེས་བྱ་བ་ནི་གང་ཡང་ཡིན་ནོ་ཞེས་བྱ་བའི་དོན་ཏོ། །གཞན་དག་ལ་འཇིག་རྟེན་པ་མ་ཡིན་པའི་རང་བཞིན་དྲིས་སོ་སྙམ་དུ་བསམས་ནས། དེའི་རང་བཞིན་སྨྲ་བ་ཉིད་ནི་གཞན་གྱིས་ཞེས་བྱ་བའོ། །ལན་ནི་འདིར་བརྗོད་པ་ཞེས་བྱ་བའོ། །དེས་ནི་ཞེས་བྱ་བ་སྟེ་འཇིག་རྟེན་མ་ཡིན་པའི་བློ་དེ་ནི་དོན་ཉིད་ཡིན་གྱི་ཤེས་པ་ནི་མ་ཡིན་ནོ་ཞེས་ཕྱོགས་སྔ་མ་འགོག་པ་ནི་བཟུང་བ་ཉིད་དུ་ཞེས་བྱ་བའོ། །དེ་ལ་ཞེས་བྱ་བ་ལན་ཏེ་འཇིག་རྟེན་པ་མ་ཡིན་པར་འདོད་པ་ལའོ། །འདི་ག་ལས་ཞེས་དོགས་པ་ལ་རང་གི་ངོ་བོར་ཞེས་སྨོས་སོ། །འཐད་པ་བརྗོད་པ་ནི་དོན་དེ་ནི་ཞེས་བྱ་བའོ། །གང་གི་ཕྱིར་དེ་མ་དམིགས་པས་ནི་དོན་དེ་ནི་རང་གི་ངོ་བོ་ཁོ་ནར་འཛིན་པ་ཡིན་གྱི་གཟུང་བ་ཉིད་དུ་ནི་མ་ཡིན་པ་དེའི་ཕྱིར་རང་གི་ངོ་བོ་ཁོ་ནར་འཛིན་པའོ། །གཟུང་བར་བྱ་བ་ཉིད་ཀྱིས་དོན་ཡིན་པར་དོགས་པ་བསུ་ནས་ཟློག་པར་བྱེད་པ་ནི་གཟུང་བར་བྱ་བ་ཉིད་ཀྱིས་ཞེས་བྱ་བའོ། །དེ་ཉིད་ནི་སྣང་བའོ། །གཟུང་བ་པོ་རྣམས་པ་ཉིད་ཀྱིས་དོན་ཉེ་བར་མཚོན་པ་ཡིན་ནོ་ཞེས་བྱ་བའི་རྩོད་པ་བཀོད་ནས་སེལ་བ་ནི་ཇི་ལྟར་ཞེས་བྱ་བའོ། །གཞན་གྱིས་ཞེས་བྱ་བ་ནི་གཟུང་བའི་རྣམ་བས་སོ། །གཞན་ཞེས་བྱ་བ་ནི་གཟུང་བའི་རྣམ་པ་ལས་ཐ་དད་པའོ། །མཐོང་བས་མ་རྟོགས་པའི་དོན་ཡང་རྣམ་པར་རྟོག་པས་རྗེས་སུ་རྟོགས་པར་བྱེད་པ་ཡིན་ནོ་ཞེས་དོགས་པ་བསུ་
བ་ནི་དོན་ཞེས་བྱ་བའོ། །ཤེས་པ་འདི་ནི་རྨི་ལམ་དུ་མཐོང་བ་ལས་མེད་དོ་ཞེས་བརྗོད་པ་ནི་མ་ཡིན་ཏེ་ཞེས་བྱ་བའོ། །དེའི་ཕྱིར་དེ་ནི་ཤེས་པ་ཁོ་ན་ཡིན་ནོ། །འོ་ན་དེ་ནི་སྔོན་པོ་ལ་སོགས་པའི་རང་བཞིན་ཅན་མིང་དང་མཚན་མ་ཡིན་ནོ་སྙམ་ན། འདིས་ནི་ཞེས་གསུངས་སོ། །ཐུན་མོང་མ་ཡིན་པ་ཉིད་དང༌། གཟུང་བ་མ་དམིགས་པ་ཉིད་དུ་བསྟན་པས་སོ། །གཞན་ཡང་ཞེས་བྱ་བ་ནི་འཆད་པར་འགྱུར་བའི་རྣམ་འགྲེལ་གྱི་ཕྱེད་དང་པོའི་ཡང་གཞན་གྱི་ལྟར་ན་ཤེས་པའི་བློ་གང་ཡིན་པ་འདི་ཉིད་དེ་འདོད་པའི་དོན་གང་ཡིན་པ་དེ་དང་ལྡན་པར་རྒྱུ་མཚན་གང་གིས་འདོད། གཟུང་བ་ཉིད་དུ་སྣང་བས་ནི་མ་ཡིན་ཏེ། རྨི་ལམ་ལ་སོགས་པ་དང་ཐུན་མོང་ཡིན་པའི་ཕྱིར་རོ། །གནོད་བྱེད་མེད་པ་ཡང་སླུ་བ་མེད་པའོ། །མི་སླུ་བ་ཁོ་ན་ཡིན་ལ། དེ་ཡང་ཐོབ་པའི་མཐར་ཐུག་པ་ཡིན་ནོ་ཞེས་བརྗོད་པ་ནི་གལ་ཏེ་དོན་ནུས་ཞེས་བྱ་བའོ། །གཞན་ལ་ནི་རྨི་ལམ་དང་སྤྱི་ལ་སོགས་པའི་ཤེས་པའོ། །དོན་མེད་པ་ཅན་ཐོས་པ་ནི་རྒྱུ་མཚན་མེད་པའི་ཕྱིར་རོ། །གཞན་ཞེས་བྱ་བ་ལ་སོགས་པས་བཤད་པ་དེ་ཉིད། དེ་ཉིད་རྣམ་འགྲེལ་འཆད་པར་བྱེད་པ་ན་བརྗོད་པ་ནི་གཞན་ཡང་ཞེས་བྱ་བའོ། །འདི་ལ་ཞེས་བྱ་བ་འདི་དོན་གྱིས་བསྐྱེད་པ་ཉིད་དུ་རྣམ་པར་གཞག་པའོ། །འོན་ཏེ་གང་གིས་དེ་ལྟར་རྣམ་པར་འཇོག་པ། མིག་ལ་སོགས་པའི་ཤེས་པ་ལ་ཁྱད་པར་ཡོད་པ་ཁོ་ནའོ་སྙམ་དུ་དོགས་ན་སྣང་བ་ཉིད་དུ་ཞེས་གསུངས་སོ། །རྗེས་སུ་འགྲོ་བ་དང་ཞེས་བྱ་བ་ནི་ཁྱད་པར་ཡོད་པར་དོགས་པ་བསུ་བའོ། །ཇི་ལྟར་མཐོང་ཞེ་ན། འདི་ལྟར་ཞེས་བྱ་བའོ། །སྔར་ནི་ཐོབ་པ་ལས་སོ། །རང་དང་གཞན་གཉིས་ཀས་ཀྱང་མངོན་གསུམ་གྱིས་ནི་མཐོང་བ་མ་ཡིན་ནོ་ཞེས་བརྗོད་པ་ནི་རང་ཉིད་ཀྱིས་ཞེས་བྱ་བའོ། །རྣམ་པ་དེ་ལྟ་བུའི་སྣང་བ་ལྡོག་པའི་སྟོབས་ལས་བྱུང་བའི་རྗེས་སུ་དཔག་པས་སོ། །མིག་ལ་སོགས་པའི་རྣམ་པར་ཤེས་པ་ནི། བཤད་པའི་ཁྱད་པར་གྱི་དོན་དང་ལྡན་པ་ཡིན་ཡང་རྨི་ལམ་གྱི་ཤེས་པ་ནི་དོན་མེད་པ་ཡིན་ཏེ། གལ་ཏེ་དེ་ལྟ་ན་ནི་ཞེས་བྱ་བའོ། །དམིགས་པ་དང་བཅས་པ་ལ་སོགས་པའི་རྣམ་པར་དབྱེ་བ་འདི་ནི་ཐ་སྙད་པ་དང་འདའ་བར་བྱ་བ་མ་ཡིན་པ་ཡང་ཡིན་ནོ་ཞེས་བརྗོད་པ་ནི། འདི་ལྟར་ཞེས་བྱ་བའོ། །འདི་ལ་ནི་དོན་མེད་པ་ལ་ཞེས་བྱ་བ་ནི་རྨི་ལམ་གྱི་ཤེས་པ་ལ་སྟེ་དོན་བྱ་བ་མེད་པའི་ཕྱིར་རོ། །འོན་ཏེ་ཡང་གཞན་གྱི་ལྟར་ན་ཤེས་
པ་ཐམས་ཅད་དམིགས་པ་དང་བཅས་པ་ཡིན་པའི་ཕྱིར་ཁྱད་པར་རྟོགས་པ་མེད་དོ་སྙམ་ན། འདི་ལྟར་ཞེས་གསུངས་སོ། །འདི་ལ་ནི་རྨི་ལམ་གྱི་ཤེས་པ་ལའོ། །རྨི་ལམ་དུ་མཐོང་བ་འདི་བག་ཆགས་ཞེས་སྔོན་གོམས་པའི་མཐུ་ལས་གང་གིས་བདག་ལ་འདི་ལྟར་སྣང་བར་འགྱུར་བ་ཡིན་ནོ་སྙོམ་པའི་བློར་འགྱུར་གྱི། སད་པའི་རྟོག་པ་ལ་ནི་དེ་སྙམ་དུ་སེམས་པའི་བློར་མི་འགྱུར་ཏེ། དེས་ན་གཞན་གྱི་ལྟར་ན་ཡང་རྣམ་པར་དབྱེ་བ་རྟོགས་པ་ཡོད་པ་ཁོ་ན་ཡིན་ནོ། །བློ་གང་ཞིག་ཡོད་པ་ལས་འདིར་དམིགས་པ་དང་བཅས་པ་ཉིད་དུ་འདོད་པ་དེ་ནི་མེད་དོ་ཞེས་བརྗོད་པ་ནི་སྔོན་མཐོང་བ་དེ་བདག་གིས་མཐོང་ངོ་ཞེས་བྱ་བའི་བློ་ཞེས་བྱ་བ་ནི་སྐབས་ཀྱི་ཡིན་ནོ། །བདག་གིས་དྲན་ནོ་ཞེས་བྱ་བའམ། དོན་འདི་ནི་འཇིག་རྟེན་པ་མ་ཡིན་ནོ་ཞེས་བྱ་བ་ནི་བློ་ནི་མ་ཡིན་ནོ། །འོན་ཏེ་དེ་ལྟ་བུའི་བློ་མེད་ཀྱང་གནོད་པར་བྱེད་པས་འཇིག་རྟེན་པ་མ་ཡིན་པ་ཉིད་དུ་རྟོགས་པ་ཡིན་ནོ་སྙམ་ན། གནོད་པར་བྱེད་པ་གང་གིས་ཞེས་བྱ་བའོ། །འོན་ཏེ་དོན་མེད་པ་ཉིད་དུ་ཐལ་བའི་ཕྱིར་འཇིག་རྟེན་པ་ཉིད་དུ་ནི་ཞེས་བྱ་བའོ། །དེ་ལྟར་ཁས་ལེན་ན་ཡང་མི་འདོད་པ་ཐོག་ཏུ་བབ་པོ་ཞེས་བརྗོད་པ་ནི་དེ་ལ་ཞེས་བྱ་བ་སྟེ། གནོད་པར་བྱེད་པ་ལའོ། །ཁྱེད་ནི་ཕྱིན་ཅི་ལོག་ཏུ་སྣང་བར་སྨྲ་བ་ཡང་མ་ཡིན་ཏེ། འཇིག་རྟེན་པ་མ་ཡིན་པར་སྨྲ་བ་ཁས་བླངས་པའི་ཕྱིར་རོ། །གལ་ཏེ་ཡང་གནོད་པ་བྱེད་པ་ལ། །ཕྱིན་ཅི་ལོག་གི་སྣང་བར་ཁས་ལེན་ན་གནོད་པར་བྱ་བ་ཡང་དེ་ལྟར་ཅི་སྟེ་ཁས་མི་ལེན་ན། དེ་ཡང་སྔར་བསལ་ཟིན་པ་ཡིན་ནོ་ཞེས་དགོངས་པའོ། །དེ་ཉིད་ཀྱི་ཕྱིར་ཕྱིན་ཅི་ལོག་སྣང་བ་ལས་ལོག་པར་དོགས་པ་བསུ་བ་ནི་དེ་ཡང་ཞེས་བྱ་བའོ། །རྨི་ལམ་གྱི་ཤེས་པ་འབའ་ཞིག་འཇིག་རྟེན་པ་ཡིན་པར་ནི་མ་ཟད་ཀྱི། འཇིག་རྟེན་པ་ཡིན་པ་ལས་འཇིག་རྟེན་པ་ཉིད་རྟོགས་པ་གནོད་བྱེད་གང་ཡིན་པ་དེ་ཡང་འཇིག་རྟེན་པ་མ་ཡིན་པ་ཉིད་དོ། །དེས་ན་ཕྱིན་ཅི་ལོག་ཏུ་སྣང་བ་ནི་མ་ཡིན་ནོ་ཞེན། ལན་ནི་མ་ཡིན་ཏེ་ཞེས་བྱ་བ་སྟེ། དེ་ཡང་འཇིག་རྟེན་པ་ཉིད་མ་ཡིན་ནོ། །ཅིའི་ཕྱིར་ཞེ་ན། ཐུག་པ་མེད་པར་ཞེས་བྱ་བའོ། །ཇི་ལྟར་གནོད་པ་བྱེད་པས་འཇིག་རྟེན་པ་མ་ཡིན་པ་ལ་འཇིག་རྟེན་པ་ཉིད་དུ་རྟོགས་པ་དེ་བཞིན་དུ། གནོད་པར་བྱེད་པ་ཡང་གནོད་པར་བྱེད་པ་གཞན་གྱིས་དེ་ལྟ་བུ་ཉིད་དུ་རྟོགས་པ་ནི་དེ་དང་འདྲ་བར་འགྱུར་རོ། །དེ་བཞིན་དུ་གནོད་པ་གཞན་ཡང་ཡིན་པས་ཐུག་པ་མེད་པར་
གྱུར་རོ། །མཐར་ཐུག་བར་ཁས་ལེན་པ་ནི་གཅིག་ཀྱང་འཇིག་རྟེན་བ་ཉིད་དུ་མི་འགྲུབ་བོ་ཞེས་དགོངས་པའོ། །དེ་བས་ན་གནོད་པར་བྱེད་པས་འཇིག་རྟེན་པ་མ་ཡིན་པ་ཉིད་དུ་རྟོགས་པ་ནི་དོན་དུ་མོས་པ་མེད་པའི་ཕྱིར་དོན་མེད་པ་ཉིད་དུ་རྟོགས་པ་མ་ཡིན་ནོ་ཞེས་བྱ་བ་ཉིད་ལེགས་པ་ཡིན་ནོ། །ཅི་སྟེ་ཡང་གནོད་པར་བྱེད་པས་ནི་འཇིག་རྟེན་པ་མ་ཡིན་པ་ཉིད་དུ་རྟོགས་པ་མ་ཡིན་ན་གང་གིས་དོན་མེད་པ་ཉིད་དུ་འགྱུར། འོན་ཀྱང་ཐུན་མོང་མ་ཡིན་པ་ཉིད་དུ་ཡིན་ནོ་བ་ནི་ཅི་སྟེ་ཞེས་བྱ་བའོ། །ཅིའི་ཕྱིར་ཞེ་ན། འདི་ཞེས་བྱ་བ་སྟེ། གང་གི་ཕྱིར་རྟོགས་པ་ནི་མེད་དོ་ཞེས་འབྲེལ་ཏེ། རྟོགས་པའི་རྣམ་པ་བརྗོད་པ་ནི་འདི་གཞན་གྱིས་རྟོགས་སོ་སྙམ་བ་ཞེས་བྱ་བ་སྟེ། རྨི་ལམ་གྱི་ཤེས་པ་འདིའོ། །དོན་ལ་ནི་ཐུན་མོང་མ་ཡིན་པར་རྟོགས་པ་ཡོད་པ་ཡིན་ཏེ། དེ་ལས་བཟློག་པ་སྒྲུབ་པར་རྗེས་སུ་དཔག་པ་ཡོད་པའི་ཕྱིར་རོ་ཞེས་བརྗོད་པ་ནི་དོན་གྱི་ཡུལ་ལ་ནི་སྤུ་ལངས་པ་ལ་སོགས་པའི་རྟོག་པ་ཅན་གྱི་རྗེས་སུ་དཔག་པས་ཐུན་མོང་པ་ཉིད་དུ་རྟོགས་པ་ཡིན་ནོ། །གང་གི་ཚེ་ཞེ་ན། ཤེས་པ་ཡོད་པ་ནའོ། །སྦུ་ལྡང་པ་ལ་སོགས་པ་གང་ཡིན་པ་དེས་ན་དེའི་དོན་ཅན་གྱི་ཤེས་པ་ཡོད་པ་ན་དེ་ནི་དེ་ཤེས་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །འདི་ལྟ་ན་རྨི་ལམ་གྱི་ཤེས་པ་ཡང་དམིགས་པ་མེད་པར་མི་འགྲུབ་པོ་ཞེས་ལན་བརྗོད་པ་ནི་དེ་ལྟ་ན་ནི་འོན་ཞེས་བྱ་བའོ། །གཞན་གྱི་གནོད་བྱེད་ཀྱི་སྒོ་ནས་དོན་མ་ཡིན་པར་རྟོགས་པར་འགྱུར་རོ་ཞེས་འབྲེལ་ཏོ། །རྣམ་པ་གང་གིས་ཤེ་ན། འདི་ལ་ནི་མེད་ཀྱི་ཞེས་སྨོས་སོ། །ཁྱེད་ཀྱི་ཞེས་བྱ་བ་ནི་རྨིའམ་མཐོང་བའིའོ། །འདི་ལ་ཡང་དོན་བཤད་པ་ནི་འདི་ནི་རྟོགས་པ་ཉིད་ཡིན་ནོ་ཞེས་བྱ་བར་རོ་ཞེས་བྱ་བ་ཡིན་ནོ། །བསམ་པ་ནི་འདི་ཡིན་ཏེ། གལ་ཏེ་འདི་གཞན་གྱིས་མ་རྟོགས་སོ་ཞེས་རྟོགས་པའི་ཕྱིར་རོ། །ཐུན་མོང་མ་ཡིན་པ་ཉིད་ཡིན་ན་དེའི་ཚེ་གནོད་པར་བྱེད་པ་ལས་དོན་མེད་དོ་ཞེས་རྟོགས་པ་ལས་དོན་མ་ཡིན་པར་ཡང་འགྱུར་རོ་ཞེས་བྱ་བའོ། །གང་གི་ཕྱིར་དེ་ལྟར་ཤེས་པ་ཐམས་ཅད་དམིགས་པ་དང་བཅས་པ་ཡིན་ནོ་ཞེས་ཁྱབ་པ་གྲུབ་པ་དེའི་ཕྱིར་རོ། །མིང་དང་མཚན་མ་འཆད་པ་པོ་དང་ཉན་པ་པོ་འབྲེལ་པར་ཁས་ལེན་ན་མིང་ལ་སོགས་པ་སྣང་བ་གང་ཡིན་པ་དེར་དམིགས་པ་དང་བཅས་པར་ནི་རིགས་པ་མ་ཡིན་ཏེ། སྒྲུབ་པར་བྱེད་པ་མེད་པའི་ཕྱིར་དང་གནོད་པར་བྱེད་པ་གཟུང་བ་དམིགས་པ་མེད་པ་ཉིད་ཀྱང་ཡོད་པའི་ཕྱིར་རོ། །འབྲེལ་པ་
ཡོད་ཀྱང་བརྗོད་པ་ན་འཇུག་པར་མི་འགྱུར་ན་འབྲེལ་པ་མེད་པ་སྨོས་སུ་ཅི་ཡོད་ཅེས་བཤད་པ་ནི་འབྲེལ་པ་མེད་ན་ཡང་ཞེས་བྱ་བའོ། །གལ་ཏེ་དོན་དང་ཞེས་བྱ་བ་ལ་སོགས་པ་དོན་དང་འབྲེལ་པར་དོགས་པ་བསུ་ནས་འདས་པ་དང་ཞེས་བྱ་བ་ལ་སོགས་པ་སྐྱོན་བརྗོད་པའོ། །དོན་དང་འབྲེལ་པ་ཞེས་བྱ་བ་ནི་དོན་ཞིག་ན་ཞིག་པ་ཡིན་པ་དེས་དེ་ནི་བརྗོད་པར་བྱ་བ་མ་ཡིན་ནོ་ཞེས་བྱ་བའི་དོན་ཏོ། །མི་འཇུག་པ་ཁོ་ན་སྟེ་ཞེས་བྱ་བ་ནི་སྐྱེས་བུ་དང་སྒྲའོ། །འདི་ཉིད་བཤད་པ་ནི་གང་ལ་དོན་དང་ཞེས་བྱ་བའོ། །འབའ་ཞིག་ནི་མིང་དང་མཚན་མའོ། །གལ་ཏེ་འདས་པ་ལ་སོགས་པའི་དོན་མེད་ཀྱང་མིང་དང་མཚན་མ་ཡོད་པའི་ཕྱིར་ན་ཇི་ལྟར་མི་འཇུག་པར་འགྱུར་ཞེ་ན། གལ་ཏེ་ཞེས་གསུངས་སོ། །ཅིའི་ཕྱིར་ཞེ་ན། དོན་དེ་རང་གི་མཚན་ཉིད་ཀྱི་རྣམ་པ་སྒྲ་ལས་སྣང་བ་དེ་མེད་པའི་ཕྱིར་རོ། །འོན་ཏེ་རྣམ་པ་མེད་ཀྱང་དེ་ལ་འཇུག་གོ་སྙམ་ན། གཞན་རྟོག་པས་ཞེས་གསུངས་སོ། །འོན་ཏེ་དེའི་རང་བཞིན་དུ་སྒྲོ་བཏགས་ནས་དེར་འཇུག་པ་ཡིན་ནོ་སྙམ་ནས་ལྷག་མ་ནི་ཞེས་གསུངས་ཏེ། དེའི་རང་བཞིན་དུ་ལྷག་པར་ཞེན་པས་ཞེས་བྱ་བ་ལ་སོགས་པའོ། །གལ་ཏེ་དོན་དང་འབྲེལ་པ་ཞེས་བྱ་བ་དོན་ཞིག་ནས་འཇིག་པ་ཡིན་ཏེ། མི་རྟག་པའི་ཕྱིར་རོ། །སྤྱི་ནི་མ་ཡིན་ཏེ་རྟག་པའི་ཕྱིར་རོ་ཞེས་དོགས་པ་ནི་སྒྲའི་སྤྱི་ནི་ཞེས་བྱ་བའོ། །མིང་དང་མཚན་མ་བརྗོད་པ་ལ་ཐལ་བར་མི་འགྱུར་རོ་ཞེས་བྱ་བའི་དོན་ཏོ། །མཚུངས་པ་རྣམས་ཀྱི་ངོ་བོ་ཉིད་ནི་ངོ་བོ་ཅན་ལ་ལྟོས་པའི་ཕྱིར་ན་དེ་འཛིན་པ་ཉིད་དོ། །དེས་ན་དེ་འཛིན་པ་ལས་བརྗོད་པའི་ཉེས་པ་ཉིད་དུ་འགྱུར་རོ་ཞེས་ལན་བརྗོད་པ་ནི། དེ་མིན་ཞེས་བྱ་བའོ། །ཅི་སྟེ་མཚུངས་པ་རྣམས་ཀྱང་ངོ་བོ་ཞེས་བྱ་བའི་ནི་བཤད་པ་ཙམ་ཡིན་གྱི། དངོས་པོ་ལ་ནི་ཡོད་པའི་སྤྱི་རང་གི་ངོ་བོ་ཡོད་པ་ཉིད་གསལ་བ་རྣམས་ལ་འཇུག་པ་ཡིན་གྱི་དེའི་རང་བཞིན་དོན་ལ་ལྟོས་པ་ནི་མ་ཡིན་ནོ་སྙམ་དུ་དོགས་ན། འཛིན་པ་ཡང་ཞེས་བྱ་བའོ། །ནམ་མཁའ་བཞིན་དུ་རང་རྒྱུད་པར་གཟུང་ཡང་གསལ་བ་དེ་དག་གི་སྤྱི་མ་ཡིན་ཏེ་གསལ་བྱེད་དེ་དག་གིས་གསལ་བ་ཡང་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ཡིན་ན་ཅི་སྐྱོན་སྙམ་ན། དེས་ན་ཞེས་གསུངས་ཏེ་གསལ་བ་ལ་ལྟོས་པ་མེད་པ་ཉིད་ནའོ། །གསལ་བ་ཡོད་པ་དང་མེད་པའི་དུས་དེ་གཉི་གར་དམིགས་པར་འགྱུར་རོ་ཞེས་བྱ་བའི་དོན་ཏོ། །གསལ་བ་ལ་མི་ལྟོས་པའི་ཕྱིར་འབའ་ཞིག་ཏུ་ནི་
མཛད་དེ་རྟག་པའི་ཕྱིར་ཡང་རྟག་པར་དམིགས་པར་འགྱུར་རོ། །འོན་ཏེ་ཡང་ཇི་ལྟར་ནམ་མཁའ་རྟག་པ་ཡང་མིག་ལ་སོགས་པ་ལ་ལྟོས་ནས་མངོན་སུམ་དུ་གྱུར་པ་དེ་བཞིན་དུ་སྤྱི་ཡང་གསལ་བ་འབྲེལ་པས་མངོན་པར་གསལ་བ་ལ་ལྟོས་ནས་མངོན་སུམ་དུ་འགྱུར་རོ་སྙམ་པ་ནི། གལ་ཏེ་ཡང་གསལ་བ་སྟེ་ཁྱད་པར་ལས་སྤྱི་མངོན་སུམ་ལ་གསལ་བར་འགྱུར་བ་ཡིན་ཏེ། གསལ་བ་གསལ་བ་ཉིད་སྤྱི་མངོན་སུམ་དུ་གྱུར་པའི་རྒྱུ་མཚན་ནོ་ཞེས་བྱ་བ་ཡིན་གྱི། གསལ་བའི་ཐད་ནས་མངོན་སུམ་དུ་གསལ་བ་ཡིན་ནོ་ཞེས་བྱ་བ་ནི་འཐད་པར་དཀའ་སྟེ། མངོན་སུམ་དང་གསལ་བ་དག་ཁྱད་མེད་པའི་ཕྱིར་རོ། །གལ་ཏེ་སྤྱིའམ་ནམ་མཁའ་མངོན་སུམ་གྱི་རང་བཞིན་ཡིན་ན་ནི་གསལ་བར་བྱེད་པ་ལ་ལྟོས་པ་མ་ཡིན་ཏེ་དོན་མེད་པའི་ཕྱིར་རོ། །དེའི་རང་བཞིན་གསལ་བར་བྱེད་པ་ལ་ལྟོས་པ་མ་ཡིན་ཏེ། ཁྱད་པར་དུ་བྱར་མེད་པའི་ཕྱིར་རོ་ཞེས་ལན་འདེབས་པ་ནི་བདག་ལ་ཞེས་བྱ་བའོ། །གཞན་དུ་ཞེས་བྱ་བ་ནི་གསལ་བར་མཐར་ཐུག་པའི་རང་བཞིན་དུའོ། །ཅིའི་ཕྱིར་འདས་པ་ལ་སོགས་པའི་རང་བཞིན་དུ་རྟོགས་པར་མི་འགྱུར་ཞེ་ན། སྤྱི་ནི་ཞེས་བྱ་བའོ། །གཞན་དུ་ཞེས་བྱ་བ་སྟེ་བརྗོད་པ་ནི་གལ་ཏེ་སྤྱི་ཞེས་བྱ་བའོ། །དེ་ལྟ་ཡིན་ན་ཞེས་བྱ་བ་ནི་འདས་པ་ལ་སོགས་པའི་གསལ་བ་དང་ལྡན་པས་དེ་ལྟར་ལྷག་པར་ཞེན་པ་ཡིན་ནའོ། །དེ་ལྟར་གྱུར་པ་ལ་རག་གོ་ཞེ་ན་གསལ་བ་ཞེས་གསུངས་སོ། །དེ་མེད་ཀྱང་དེའི་སྒོ་ནས་དེ་ལྟར་རྟོགས་པར་མི་འགྱུར་བའི་ཕྱིར་ཞེ་ན། གང་གི་ཕྱིར་འདས་པ་ལ་སོགས་པ་དེའི་རང་བཞིན་ཡུལ་དུ་བྱས་པ་གང་ལ་ཡོད་པའི་ཁྲ་བོ་ལ་སོགས་པ་དེ་ནི་གཞན་སྤྱི་ལ་སོགས་པ་དེའི་རང་བཞིན་དེས་ཉེ་བར་རྒྱུ་བ་ཉིད་དུ་འཛིན་པར་མི་ནུས་སོ། །དེས་ན་དེ་མེད་པ་ནི་དེའི་སྒོ་ནས་རྟོགས་པ་མ་ཡིན་ནོ། །འཛིན་ན་ཡང་ཞེས་བྱ་བ་འཆད་པ་ནི་ཅི་སྟེ་ཞེས་བྱ་བའོ། །དེའི་ཞེས་བྱ་བ་ནི་གསལ་བའི་རང་བཞིན་གྱིའོ། །དེ་གང་ལས་ཤེ་ན་དེ་མེད་པར་ཞེས་བྱ་བའོ། །གསལ་བ་ཤེས་པ་མེད་པར་རོ། །ཅིའི་ཕྱིར་དེས་གསལ་བར་བྱེད་པ་མ་ཡིན་སྙམ་དུ་དོགས་ན། དེའི་རང་བཞིན་ནི་གསལ་བར་བྱེད་པའི་རང་བཞིན་ལ་ལྟོས་པས་དེ་མེད་ན་མི་འགྱུར་རོ་ཞེས་བསྟན་པའི་དོན་དུ་གསལ་པའི་རང་བཞིན་བརྗོད་པ་ནི། སྒྲོན་མ་ལ་སོགས་པའི་ཞེས་བྱ་བའོ། །དེས་ན་ཞེས་བྱ་བ་ནི་གསལ་བས་གསལ་བར་བྱ་བ་མ་ཡིན་པས་སོ། །འདི་ཉིད་གསལ་བར་བྱེད་
པ་ནི་གསལ་བས་སྟོང་པའི་ཞེས་བྱ་བའོ། །དཔེར་ན་ཞེས་བྱ་བ་ནི་དཔེར་འགོད་བའོ། །གལ་ཏེ་ཡང༌། གསལ་ལས་མངོན་སུམ་ལ་གསལ་ཡིན། །ཞེས་བྱ་བ་འཆད་པ་ནི་འོན་ཏེ་ཞེས་བྱ་བའོ། །སྐྱོན་མེད་དོ་ཞེས་བྱ་བ་ནི་རྟག་ཏུ་དམིགས་པའི་མཚན་ཉིད་དོ། །འདི་ལ་རེ་ཞིག་རང་ཉིད་ཀྱིས་རང་དཔེ་མི་མཐུན་པར་བྱེད་པ་ནི་དེ་ནི་མི་རིགས་ཏེ་ཞེས་བྱ་བའོ། །དེ་ཉིད་ནི་སྤྱིའོ། །ཅིའི་ཕྱིར་དཔེ་མ་ཡིན་ཞེ་ན། སྤྱི་ནི་ཞེས་བྱ་བ་གསུངས་སོ། །ཅིའི་ཕྱིར་ཕྱོགས་ཉིད་དཔེ་མ་ཡིན་སྙམ་ན། ཕྱོགས་ཉིད་ནི་ཞེས་གསུངས་སོ། །གསལ་བ་དང་མ་འབྲེལ་ན་གསལ་བ་ཉིད་ལ་རྟོགས་པར་ཇི་ལྟར་འགྱུར་ཏེ། གཞན་དུ་ཡང་རྟོགས་པར་འགྱུར་རོ་ཞེས་བྱ་བ་ནི་རྩོད་པའི་ཡུལ་ཡིན་ནོ། །དེ་ལྟ་ན་ནི་བསྒྲུབ་བྱ་དང་སྒྲུབ་བྱེད་མ་གྲུབ་པ་ལ་སོགས་པ་དག་དཔེ་མ་ཡིན་པར་འགྱུར་རོ་ཞེས་བརྗོད་པ་ནི་དཔེའི་སྐྱོན་མེད་བར་ཞེས་བྱ་བའོ། །གང་གི་ཕྱིར་དེ་ལྟར་སྤྱི་དཔེ་མ་ཡིན་པ་དེས་ནའོ། །དེ་ལ་ནི་སྤྱི་ལའོ། །མངོན་སུམ་གྱི་རྟོགས་པས་ཞེས་བྱ་བ་ནི་གསལ་བའི་ཡུལ་དུ་ཞེས་ཁ་བསྐངས་ཏེ། ཐམས་ཅད་དུ་སྒྲ་ཁོ་ན་ལས་སྤྱི་རྟོགས་པར་འགྱུར་རོ་ཞེས་བྱ་བའི་དོན་ཏོ། །མངོན་སུམ་གྱིས་གཟུང་ན་བ་རྡ་མེད་པའི་ཕྱིར་སྒྲ་ལས་རྟོགས་པར་མི་འགྱུར་ཏེ། དེས་ན་མངོན་སུམ་གྱིས་འཛིན་པ་ཡིན་ནོ་ཞེས་དོགས་པ་བསུ་བ་ནི་གལ་ཏེ་ཞེས་བྱ་བའོ། །སྒྲ་ཉིད་ལས་འབྲེལ་པ་འཛིན་ན་ནི་ཐུག་པ་མེད་པར་འགྱུར་རོ་སྙམ་དུ་བསམས་པའོ། །མངོན་སུམ་གྱིས་རྟོགས་པ་ཉིད་ནི་སྒྲ་ལས་རྟོགས་པ་མ་ཡིན་ཏེ་ཐ་དད་པའི་ཕྱིར་རོ། །དེས་ན་དེ་ལྟར་དེ་མངོན་སུམ་གྱིས་འཛིན་ཞེས་ལན་གདབ་པའི་ཕྱིར་རྣམ་པར་རྟོག་པར་བྱེད་པ་ནི་སྤྱི་ཞེས་བྱ་བའོ། །དང་པོ་ལ་བརྗོད་པ་ནི་གལ་ཏེ་ཞེས་བྱ་བའོ། །དེ་ཉིད་ནི་སྒྲ་རྟོགས་པ་གང་ཡིན་པའོ། །ཤེས་པ་ལ་ལྟོས་ཏེ་བརྗོད་ནས་དོན་ལ་ལྟོས་ནས་བརྗོད་པ་ནི་རང་བཞིན་ཉིད་ཀྱིས་ཞེས་བྱ་བ་སྟེ། སྒྲས་ཉེ་བར་བསྟན་པས་སོ། །འོན་ཏེ་ཞེས་བྱ་བ་ནི་གཉིས་པ་ལ་བརྗོད་པའོ། །དེ་ལ་ནི་མངོན་སུམ་གྱིས་མཐོང་བ་ལའོ། །གཞན་དུ་ཞེས་བྱ་བ་ནི་བརྡའི་ཡུལ་མ་ཡིན་པ་སྟེ། རྣམ་པ་མི་གསལ་བར་རོ། །འོན་ཏེ་དེ་ཉིད་སྒྲ་ལས་དེ་ལྟར་སྣང་བ་ཡིན་ནོ་སྙམ་ན། སྒྲའི་ཤེས་པ་ལ་ཡང་ཞེས་བྱ་བའོ། །མངོན་སུམ་གྱིས་རྟོགས་པའི་རང་བཞིན་ཁོ་ནར་ཞེས་བྱ་བ་ནི་རང་
བཞིན་གྱིས་མ་ཡིན་ཏེ། གཅིག་ལ་རང་བཞིན་གཉིས་མི་སྲིད་པའི་ཕྱིར་རོ། །འོ་ན་རང་བཞིན་གཅིག་ཉིད་ཀྱང་ཤེས་པ་གཞན་ལ་རྣམ་པ་གཞན་དུ་སྣང་བ་ཡིན་ནོ་སྙམ་ན། སྒྲའི་རང་བཞིན་ནི་ཞེས་བྱ་བའོ། །ཅིའི་ཕྱིར་ཞེ་ན། སྤྱི་ནི་ཞེས་གསུངས་སོ། །དེའི་རང་བཞིན་ཉིད་མངོན་སུམ་གྱིས་རྟོགས་པའི་རང་བཞིན་ནོ། །དེས་ན་ཤེས་པ་གཞན་ལ་རྣམ་པ་གཞན་དུ་སྣང་བ་མ་ཡིན་ནོ་ཞེས་བྱ་བར་དགོངས་པའོ། །ཐལ་བ་འདི་འབའ་ཞིག་ཏུ་ཡང་མ་ཟད་དེ། ཐམས་ཅད་ཚེ་ཡང་སྣང་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཞེས་བྱ་བའོ། །ཅི་མི་དམིགས་པར་བྱ་བའི་རང་བཞིན་ལ་རྣམ་པ་གཞན་དུ་འགྱུར་བ་མ་ཡིན་ནོ། །གཞན་གྱིས་རྣམ་པ་གཞན་དུ་བྱེད་ན་ནི་མི་རྟག་པ་ཉིད་དུ་འགྱུར་རོ་ཞེས་བྱ་བའི་དོན་ཏོ། །སྔོན་པོ་ལ་སོགས་པའི་རང་བཞིན་མཚན་ཉིད་དམིགས་པ་ན་སྐྱེ་བོ་ལ་ཐོགས་པ་མེད་པའི་བག་ཆགས་ཀྱིས་བསྐྱེད་པ་སྔོན་པོ་ལ་སོགས་པ་མི་གསལ་བར་སྣང་བའི་ཤེས་པ་སྐྱེ་ལ་དེའི་སྣང་བ་ལ་ཕྱི་རོལ་ཉིད་དུ་ལྷག་པར་ཞེན་པས། དེ་ལ་མངོན་པར་རྟོགས་པས་ཅི་ཞིག་བྱ་ཞེས་གསུངས་པ་ནི། དེ་ལའང་ཞེས་བྱ་བ་སྟེ། སྤྱིའི་རྣམ་པར་ཤེས་པ་ལ་སྒྲ་ལས་བྱུང་བ་ལས་སུ་གྱུར་པའོ། །རྗེས་འབྲེལ་ནི་རྗེས་སུ་ཞུགས་པ་སྟེ། སྔོན་པོ་ལ་སོགས་པའི་རྣམ་པའི་ཆ་མི་གསལ་བའོ། །གང་གིས་སྤྲུལ་ཞེས་བྱ་བ་ནི་སྤྱི་ས་མ་ཡིན་ལ། བསལ་བས་ཀྱང་མ་ཡིན་པ་སྟེ། གཉི་ག་ལ་ཡང་དེ་འདྲ་བའི་རྣམ་པ་མེད་པའི་ཕྱིར་རོ། །དེ་ཉིད་ཀྱང་སྤྱི་མ་ཡིན་ཏེ། དེ་ནི་རྣམ་པ་མེད་པ་ཡིན་པའི་ཕྱིར་རོ། །རྣམ་འགྲེལ་དང་པོ་ནི་མ་བཀྲལ་ཏེ་གསལ་བའི་ཕྱིར་རོ། །གཉིས་པ་འཆད་པ་ནི་གསལ་ཏེ་སྒྲ་ལས་ཞེས་བྱ་བའོ། །དེའི་ཚེ་སྤྱིའི་རྣམ་པ་འབའ་ཞིག་ཏུ་སྟེ་གསལ་བའི་རང་བཞིན་དང་འབྲེལ་པར་རོ། །གསལ་བ་ལས་ཡིན་པར་སྲིད་པའི་དོགས་པ་བསུ་ནས་སེལ་བ་ནི་གསལ་བ་ལས་ཞེས་བྱ་བའོ། །གང་ལས་ཞེས་བྱ་བ་ནི་གསལ་བའི་རྣམ་པ་མ་ཡིན་ནོ་ཞེས་བྱ་བའི་དོན་ཏོ། །དེས་བསྐྱེད་པའི་ཕྱིར་ཏེ་དེའི་ཡིན་ནོ་ཞེ་ན་གསལ་བས་བསྐྱེད་པའི་ཕྱིར་རོ་ཞེས་གསུངས་སོ། །ཅིའི་ཕྱིར་ཞེ་ན། སྤྱི་མེད་པར་ཞེས་གསུངས་སོ། །ཇི་ལྟ་ཞེ་ན། དེ་ལས་ཐ་དད་པར་ཞེས་གསུངས་ཏེ། སྔོན་པོ་ལ་སོགས་པའི་རྣམ་པ་ལས་ཐ་དད་པར་རོ། །རྗེས་སུ་སོང་བའི་རྣམ་པ་ནི་སྣང་བ་ཉིད་ཡིན་ལ། སྤྱི་ཡང་
དེ་ཉིད་ཡིན་ནོ་སྙམ་ན་རྗེས་སུ་སོང་བའི་ཞེས་གསུངས་སོ། །སྔོན་པོ་ལ་སོགས་པའི་རྣམ་པ་མི་གསལ་བའི་སྤྱིའི་རྣམ་པ་ཉིད་འདོད་ན་ཡང་དོན་དེ་རྣམས་ཀྱིས་མི་འགྱུར་རོ་ཞེས་བརྗོད་པ་ནི་དེའི་ཕྱིར་ཞེས་བྱ་བའོ། །སྒྲ་ལས་སྔོན་པོ་ལ་སོགས་པའི་རྣམ་པ་གནས་པའི་སྤྱི་དང་དོན་གཉིས་ཀ་རྟོགས་པའི་ཕྱིར་ཏེ་དོན་རྣམས་ཀྱིས་སྤྱི་ཡིན་ནོ་སྙམ་དུ་དོགས་པ་བསུ་བ་ནི། གཉིག་ཡང་ཞེས་བྱ་བའོ། །ལན་ནི་དབང་པོས་གཟུང་བར་བྱ་བ་ཉིད་དུ་མི་འགྱུར་རོ་ཞེས་བྱ་བའོ། །སྒྲ་ལས་བྱུང་བ་ཁོ་ནས་གཉི་ག་རྟོགས་ན་དབང་པོ་དོན་མེད་པའི་ཕྱིར་དབང་པོས་གཟུང་བ་ཉིད་དུ་མི་འགྱུར་རོ། །འོན་ཏེ་སྒྲ་ལས་འབྱུང་བས་མི་གཉི་ག་འཛིན་ལ་དབང་པོས་ནི་ཁྱད་པར་ཙམ་འཛིན་པ་དེས་ན་དབང་པོ་འབྲས་བུ་དང་བཅས་པ་ཡིན་ནོ། །བརྗོད་པ་ནི་དབང་པོ་ཞེས་བྱ་བའོ། །དབང་པོའི་གཟུང་བ་ཞེས་བྱ་བ་ནི་ཁྱད་པར་ཙམ་ཞེས་བྱ་བ་ལྷག་མ་ཡིན་ནོ། །འདི་ཇི་ལྟར་མི་རིགས་སྙམ་ན། སྤྱི་དབང་པོས་མ་བཟུང་ན་བརྡ་མེད་པར་འགྱུར་བའི་ཕྱིར་ཏེ། སྒྲས་རིགས་པ་མ་ཡིན་ནོ་ཞེས་བརྗོད། ལན་བརྗོད་པ་ནི་སྒྲ་ལ་ལྟོས་པ་མ་ཡིན་ནོ། །གལ་ཏེ་སྒྲ་ལས་རྟོགས་པ་ཡོད་པ་ཉིད་མ་ཡིན་ནམ། དེས་ན་མི་འགྱུར་རོ་ཞེས་ཇི་སྟེ་བརྗོད་ཅེ་ན། གང་གི་ཕྱིར་སྒྲ་ལས་ནི་མངོན་སུམ་གྱིས་གཟུང་བའི་སྤྱི་ཡོད་དོ་ཞེས་རྟོགས་པས་ནི་མེད་དོ། །ཅིའི་ཕྱིར་དེ་ལྟ་བུ་རྟོགས་པ་མེད་སྙམ་ན། ཡིད་ཆེས་པ་ཞེས་གསུངས་སོ། །ཇི་ལྟར་མངོན་སུམ་ལས་བ་ལང་འདི་ནི་བ་ལང་ངོ་ཞེས་ཡིད་ཆེས་པ་སྐྱེ་བ་དེ་བཞིན་དུ་སྒྲ་ལས་ནི་ཡིད་ཆེས་པ་མེད་པའི་ཕྱིར་རོ། །ཡང་ན་མ་ཡིན་ཏེ་ཞེས་བྱ་བ་ནི་རྩོད་པ་དགག་པའོ། །གསལ་བ་བཞིན་དུ་སྤྱི་ཡང་དབང་པོས་གཟུང་བར་བྱ་བ་ཉིད་དུ་འགྱུར་རོ། །འོན་ཏེ་དབང་པོས་གསལ་བ་རྟོགས་པ་ན་སྤྱི་མི་འཛིན་པ་ཉིད་དོ་ཞེ་ན། དབང་པོས་ཞེས་བྱ་བའོ། །དབང་པོས་བཟུང་བ་ཞེས་བྱ་བ་ལ་སྤྱི་ཞེས་བྱ་བ་ནི་ལྷག་མའོ། །ལྷག་མ་ནི་བཤད་པ་སྔ་མ་དང་མཐུན་ནོ། །འདི་ལས་ཀྱང་དེ་ལྟར་རྟོགས་པ་མ་ཡིན་ནོ་ཞེས་བརྗོད་པ་ནི་སྣང་བ་ཐ་དད་པའི་ཕྱིར་རོ་ཞེས་བྱ་བའོ། །དེའི་ཕྱིར་སྤྱི་སྒྲ་ལས་ནི་རྟོགས་པ་མ་ཡིན་ནོ། །གང་གི་ཕྱིར་སྒྲ་ལས་བྱུང་བའི་ཤེས་པ་ལ་སྔོན་པོ་ལ་སོགས་པའི་རྣམ་པའི་ཆ་འབའ་ཞིག་སྣང་ལ་གཞན་ནི་འགའ་ཡང་མ་ཡིན་པ་དེའི་ཕྱིར་རོ། །དེས་ན་དབང་པོ་དོན་མེད་པ་ནི་སོ་ན་འདུག་གོ་ཞེས་ཐལ་བའི་
དོན་ཉེ་བར་སྡུད་པ་ནི་དེས་ན་གསལ་བ་ཉིད་ཅེས་བྱ་བའོ། །སྔོན་པོ་ལ་སོགས་པའི་རང་བཞིན་སྤྱིར་སྨྲ་བ་ཉིད། གསལ་བ་དང་མི་གསལ་བ་སྔོན་པོ་ལ་སོགས་པའི་རྣམ་པར་དབྱེ་བ་དབང་བོ་དང་སྒྲ་ལས་སྐྱེས་པའི་ཤེས་པ་དག་གི་ཡུལ་རྣམ་པར་འཇོག་པའི་ཕྱིར་ན་དབང་པོ་དོན་མེད་པར་འགྱུར་རོ་ཞེས་བརྗོད་པ་ནི་གལ་ཏེ་ཞེས་བྱ་བའོ། །མངོན་སུམ་ཤེས་དོན་ཉིད་ཕྱིར་ན། །ཞེས་བྱ་བའོ། །གསལ་བའི་ཤེས་པའི་དོན་ཡིན་པའི་ཕྱིར་རོ། །འདི་ལ་ལན་ནི་དེ་དངོས་ཤེས་པ་ལ་སོགས་པའོ། །སྒྲ་དང་གཟུགས་དང་རོ་ལ་སོགས་པ་དངོས་པོ་གཅིག་ལས་གསལ་བ་དང་མི་གསལ་བ་ག་ལས་ཡིན་ཏེ། མངོན་སུམ་གྱིས་རྟོགས་པ་རྣམ་པར་མཚུངས་པ་ཁོ་ནར་འགྱུར་རོ་ཞེས་བྱ་བའི་དོན་ཏོ། །གང་ཞིག་སྒྲ་ལས་བྱུང་བ་ལ་ཡོད་པའི་ཕྱིར་དབང་པོ་རྣམས་འབྲས་བུ་མེད་པར་འགྱུར་བ་མངོན་སུམ་ཉིད་དེ། ཅི་འདྲ་བ་ཞིག་ཡིན་ཞེ་ན། མངོན་སུམ་ཉིད་ནི་ཞེས་གསུངས་སོ། །དེ་ཡོད་ན་ཞེས་བྱ་བ་ནི་སྒྲ་ལས་འབྱུང་བའོ། །གཞན་དག་རྣམ་པ་གཞན་དུ་མངོན་སུམ་གྱི་མཚན་ཉིད་བརྗོད་པ་ནི། མདུན་ན་གནས་པ་ཉིད་དུ་ཞེས་བྱ་བའོ། །དེ་ལྟ་བུའི་རྟོགས་པ་ནི་སྒྲ་ལས་འགྱུར་བ་མ་ཡིན་པས་ན་དབང་པོ་རྣམས་དོན་མེད་པར་མི་འགྱུར་རོ་ཞེས་བསམས་པའོ། །མ་ཡིན་པ་སྟེ་ཞེས་བྱ་བ་ནི་འགོག་པའོ། །ཅིའི་ཕྱིར་ཞེ་ན། སྒྲ་ནི་རྣམ་པ་གཞན་དུ་ཞེས་སྨོས་ཏེ། མདུན་ན་མི་གནས་པ་ཉིད་དོ། །མཚན་ཉིད་འདི་ལ་ནི་མ་ཁྱབ་པའི་ཉེས་པ་ཡོད་དོ་ཞེས་བྱ་བའི་དོན་ཏོ། །ཇི་སྐད་དུ་དོན་གྱི་རང་གི་ངོ་བོ་རྟོགས་པ་ཁོ་ན་ཞེས་བརྗོད་པ་དེ་ཉིད་རྣམ་པ་གཞན་མི་སྲིད་པ་ཉིད་ཀྱིས་ཚིག་གཞན་གྱི་སྒོ་ནས་དོགས་པ་བསུ་བ་ནི། བདག་ཉིད་ཐམས་ཅད་ཅེས་བྱ་བའོ། །དེ་ལྟ་ན་ཡང་སྔ་མ་བཞིན་དུ་དབང་པོ་འབྲས་བུ་མེད་པར་འགྱུར་རོ་ཞེས་ལན་འདེབས་པ་ནི་སྒྲ་ལས་ཀྱང་ཞེས་བྱ་བའོ། །དེ་ཉིད་ནི་དབང་པོ་ལས་རྟོགས་པ་གང་ཡིན་པ་ཉིད་དེ་དེ་ཉིད་ལ་ནི་དབང་པོས་རྟོགས་པར་བྱ་བ་ལའོ། །དེས་ན་དབང་པོ་རྣམས་དོན་མེད་པར་འགྱུར་རོ་ཞེས་བྱ་བར་འདི་གནས་པའོ། །གལ་ཏེ་སྒྲ་ཡོངས་སུ་ཚིམ་པར་བྱེད་པ་མ་ཡིན་གྱི། དབང་པོས་དེ་བྱེད་པའི་ཕྱིར་དོན་མེད་པ་མ་ཡིན་ནོ་ཞེས་དོགས་པ་བསུ་བ་ནི་ཡོངས་སུ་ཚིམ་པའི་དོན་གྱི་ཕྱིར་དབང་པོ་རྣམས་དོན་མེད་པ་མ་ཡིན་ནོ་ཞེ་ན། ཡོངས་སུ་ཚིམ་པའི་སྒྲ་ཉིད་ལས་དེར་འགྱུར་བའི་ཕྱིར་ན། དེ་དག་དོན་མེད་པ་ཁོ་ནའོ་ཞེས་ལན་འདེབས་པ་ནི་
མ་ཡིན་ཏེ་ཞེས་བྱ་བའོ། །སྲིད་པའི་ཕྱིར་ཞེས་བྱ་བ་ནི་ད་ལྟ་བ་དང་ཉེ་བ་ས་ད་ལྟར་གྱུར་པ་དང་འདྲ་བ་ཞེས་པའི་དོན་ཡིན་པའི་ཕྱིར་རོ། །དངོས་པོའི་རང་བཞིན་གསལ་བ་གཅིག་པུ་ཉིད་ཡིན་མོད། དེ་ནི་ཉེ་བ་དང་ད་ལྟར་བ་ཉིད་མངོན་སུམ་གྱི་ཡུལ་ཏེ། དེ་ལ་སྒྲ་སྦྱོར་བ་ནི་དོན་མེད་པས་ནི་གཞན་དུ་སྦྱོར་བ་ཡིན་ནོ་ཞེས་བརྗོད་པ་ནི་དེ་ལྟ་ན་ཡང་ཞེས་བྱ་བའོ། །ཅིའི་ཕྱིར་གཉིས་པོ་ཡོངས་སུ་ཚིམ་པའི་རྒྱུ་མ་ཡིན་ཞེ་ན། བལྟར་མི་སྣང་བ་ཞེས་བྱ་བར་སྦྱར་རོ། །དེས་ན་ཞས་བྱ་བ་ནི་ཡོངས་སུ་ཚིམ་པར་བྱེད་པ་ཉིད་ཀྱིས་སོ། །སྣང་བ་མེད་པ་ཉིད་འདས་པ་ལ་སོགས་པ་ཡིན་ནོ་ཞེས་བྱ་བའི་དོན་ཏོ། །རང་གི་ངོ་བོ་མཐོང་བ་ཉིད་ལས་མ་མཆོད་པ་དང༌། ཡོངས་སུ་ཚིམ་པར་བྱེད་པ་ཉིད་དུ་གྲུབ་པོ་ཞེས་བརྗོད་པ་ནི་མིག་ལ་སོགས་པས་ཞེས་བྱ་བའོ། །རང་གི་ངོ་བོས་མཐོང་བ་དེ་ཡང་སྒྲ་ལས་རྟོགས་པ་འདས་པ་ལ་སོགས་པ་ལ་ཡང་ཡོད་དོ། །དེས་ན་དེ་དག་མཆོད་པ་དང་ཡོངས་སུ་ཚིམ་བར་བྱེད་པ་ཉིད་དུ་ཇི་ལྟར་མི་འགྱུར་སྙམ་དུ་དོགས་པའོ། །ཇི་སྐད་དུ། མཆོད་པ་ཡོངས་སུ་ཚིམ་པར་བྱེད་པ་མ་ཡིན་ནོ་ཞེས་བརྗོད་པ་དེ་ཡང་མི་འཐད་དོ་ཞེས་བརྗོད་པ་ནི་གླུའི་སྒྲ་ནི་ཞེས་བྱ་བའོ། །སྒྲུབ་པར་མི་བྱེད་པ་ནི་མ་ཡིན་ཏེ། འོན་ཀྱང་སྒྲུབ་པར་བྱེད་པ་ཉིད་དོ། །དེ་བཞིན་དུ་འདས་པ་ལ་སོག་པ་ལ་ཡང་རང་གི་ངོ་བོ་རྟོགས་པ་ནི་སྒྲུབ་པར་བྱེད་པ་ཉིད་དུ་འགྱུར་རོ་ཞེས་བྱ་བའི་དོན་ཏོ། །སྒྲ་མ་ཆོད་པ་ཉིད་དུ་དོགས་པ་བསུ་བ་ནི་ཆུ་རླབས་ཀྱི་ཚུལ་དུ་ཞེས་བྱ་བའོ། །འོངས་པ་མ་དམིགས་པས་གནོད་དོ་ཞེས་ལན་འདེབས་པ་ནི་ཉེ་བར་ལེན་པ་ཞེས་བྱ་བའོ། །ཉེ་བར་ལེན་པ་ནི་སྒྲ་འཛིན་པའོ། །དེ་ནི་ཞེས་བྱ་བ་ནི་སྒྲའོ། །ཚད་མས་མ་རྟོགས་པའི་ཕྱིར་འོངས་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ཡང་འོང་བར་རྟོགས་ན་ནི་ཧ་ཅང་ཐལ་བར་འགྱུར་རོ་ཞེས་བརྗོད་པ་ནི་ཧ་ཅང་ཐལ་བར་འགྱུར་ཞེས་བྱ་བའོ། །གལ་ཏེ་སྒྲ་དབང་པོའི་ཡུལ་དུ་ཐག་རིང་པོར་རྟོགས་པ་རྣམས་ཀྱང་འོང་བར་འགྱུར་རོ་ཞེས་ཧ་ཅང་ཐལ་བར་འགྱུར་རོ། །འདི་ཉིད་རྣམ་པར་འགྲེལ་པ་ནི་གལ་ཏེ་ཞེས་བྱ་བའོ་ཡུལ་རྒྱང་རིང་པོ་ནི་སྒྲའོ། །ཕྲད་པ་དེའི་ཚེ་གཟུགས་ལ་སོགས་པ་ཡང་ཞེས་བྱ་བ་ཡིན་ནོ། །དེས་ན་ཞེས་བྱ་བ་ནི་ལུས་ལ་གནས་པ་རྣམས་དང་ཕྲད་པས་སོ། །གང་གི་ཕྱིར་དེ་ལྟ་ཡིན་པ་དེས་ནའོ། །འོན་ཏེ་མི་སླུ་བ་མེད་
པའི་ཕྱིར་ན་འདས་པ་ལ་སོགས་པ་ཉིད་ཡོད་པ་ཉིད་མ་ཡིན་ནོ་སྙམ་དུ་དོགས་ན་མི་སླུ་པ་ཡང་ཞེས་བྱ་བའོ། །དབང་པོ་ལས་རྟོགས་པ་ཡོད་པ་ཡིན་གྱི་སྒྲ་ལས་རྟོགས་པ་ནི་མ་ཡིན་སྙམ་དུ་དོགས་པ་བསུ་བ་ནི་ཅི་སྟེ་ཞེས་བྱ་བའོ། །རྩོད་པ་རྗེས་སུ་བརྗོད་ནས་ལན་འདེབས་པ་ནི་གལ་ཏེ་ཞེས་བྱ་བ་ནི་སྐྲ་ཤད་ལ་སོགས་པ་ཡང་དབང་པོས་རྟོགས་པར་བྱ་བ་ཉིད་ཀྱིས་ཡོད་པར་ཐལ་བར་འགྱུར་རོ་ཞེས་བྱ་བའི་དོན་ཏོ། །གལ་ཏེ་དབང་པོ་ཉམས་པའི་ཕྱིར་སྦྲང་བུ་ལ་སོགས་པ་ཡོད་པ་མ་ཡིན་ན། དེའི་ཚེ་ཉམས་པ་དེ་ཚད་མ་གང་གིས་ངེས། གལ་ཏེ་དེ་ལྟ་མ་ཡིན་པར་རྟོགས་པའི་ཕྱིར་ན་དབང་པོ་རྣམས་ཉམས་པའི་རྟོགས་པ་ལ་ནི་སྦྲང་བུ་ལ་སོགས་པ་མེད་པ་ཡིན་ན་དེ་ལྟར་འོ་ན་ཞེས་བྱ་བ་ལ་སོགས་པ་ལན་ཡིན་ནོ། །གང་གི་ཕྱིར་དེ་ལྟར་དབང་པོ་ལས་རྟོགས་པས་ཡོད་པ་ཉིད་མ་ཡིན་པ་དེའི་ཕྱིར་རོ། །དེ་དངོས་གཅིག་ཕྱིར་ཞེས་བྱ་བ་དེའི་དོན་ཉེ་བར་སྡུད་པ་ནི་སྒྲ་དང་དབང་པོའི་ཞེས་བྱ་བའོ། །འདི་ཕྱིར་ཡང་ཞེས་བྱ་བ་ནི་འཆད་པའི་ཚུལ་ལས་སོ། །གསལ་བའི་ངོ་ཐ་དད་དུ་སྟེ་ཕན་ཚུན་ལྡོག་པར་རོ། །གལ་ཏེ་ཞེས་བྱ་བ་ནི་གཞན་གྱིས་ཀྱང་ཁས་བླངས་པ་ཉིད་དུ་སྟོན་པའོ། །གྲུབ་པ་སྟེ་རང་གི་རྒྱུ་ལ་སྐྱེས་པ་ན་དེའི་ཚེ་འདི་རིགས་ལྡན་ཉིད་ཀྱི་རིགས་ནི་མེད་དོ། །ཅིའི་ཕྱིར་ཞེ་ན། གང་ཕྱིར་ཏེ་གཞན་ལ་བརྟེན་ནོ། །དེ་ལྟ་མ་ཡིན་ན་ནི་གཞན་ལ་བརྟེན་མེད་དེ་གཞན་དང་མ་འདྲེས་པ་འམ་གཞན་ལ་མི་ལྟོས་པའི་ཕྱིར་ཞེས་བྱ་བའི་དོན་ཏོ། །ཁྲ་བོ་ལ་སོགས་པ་ལ་ནི་སེར་སྐྱ་ལ་སོགས་པ་མ་མཐོང་ངོ༌། །ཐ་དད་པ་གཞན་ལ་བརྟེན་པ་ཡང་འབྲས་བུ་ཉིད་ཡིན་ལ། དེ་ན་རྒྱུ་ལ་སོགས་པ་ལ་ཕན་ཚུན་ཡོད་པ་མ་ཡིན་ན་གང་ལས་འབྲས་བུ་ཉིད་ཀྱི་ལྟོས་པར་འགྱུར། རང་གི་རྒྱུ་ལ་ལྟོས་ནས་འབྲས་བུ་ཉིད་ཡོད་པ་ཡིན་ནོ་ཞེ་ན། དེ་ལྟ་ན་ཡང་གྲུབ་པ་ནི་ལྟོས་པ་མ་ཡིན་ཏེ། གཞན་ལ་རག་ལས་པའི་ཕྱིར་རོ་ཞེས་གསུངས་པ་ནི། གྲུབ་ཕྱིར་ཞེས་བྱ་བ་སྟེ་སྐྱེས་ཟིན་པའི་ཕྱིར་རོ། །འབྲས་བུ་ཡང་གཞན་ལ་རག་ལས་པ་མ་ཡིན་ཏེ་དེས་ན་ལྟོས་པ་མེད་པ་ཡིན་ནོ། །མ་གྲུབ་པ་ན་བསྐྱེད་པར་བྱ་བ་འབའ་ཞིག་ཏུ་ཟད་ཀྱི་ལྟོས་པ་ནི་མ་ཡིན་ཏེ་རང་ཉིད་མེད་པའི་ཕྱིར་རོ། །སེར་སྐྱ་ལ་སོགས་པ་འབྲས་བུ་མ་ཡིན་པ་ནི་གྲུབ་པའམ་མ་གྲུབ་པ་ལ་ལྟོས་པས་ཀྱང་མ་ཡིན་ཏེ། དེ་ལ་ལྟོས་ནས་ཀྱང་འབྲས་བུ་ཉིད་དུ་ཁས་བླངས་པའི་ཕྱིར་རོ་ཞེས་བརྗོད་པ་ནི། འབྲས་
མིན་ཇི་ལྟར་ཞེས་གསུངས་ཏེ། གཉི་ག་ལྟར་ཡང་ངོ༌། །ཅི་ཞིག་ཅེས་བྱ་བ་ཉིད་དོ་ཞེས་བྱ་བའི་དོན་ཏོ། །གལ་ཏེ་འདི་དེའི་འབྲས་བུ་ཡིན་ནོ་ཞེས་རང་གི་རྒྱུ་དང་འབྲེལ་པར་རྟོགས་པ་མ་ཡིན་ནམ། དེ་བཞིན་དུ་འབྲས་བུ་མ་ཡིན་ཡང་དེ་ཉིད་འདི་ཡིན་ནོ་ཞེ་ན། རང་གི་རྒྱུ་ཞེས་གསུངས་སོ། །རྒྱུ་དང་འབྲེལ་བར་བྱེད་པ་ནི་རྟོགས་པ་འབའ་ཞིག་གིས་ཡིན་གྱི། མངོན་སུམ་གྱིས་ནི་མ་ཡིན་ཏེ། དེ་ལས་བཟློག་པར་དམིགས་པའི་ཕྱིར་རོ། །གསལ་བའི་རང་བཞིན་ལས་གཞན་ཡིན་ཡང་གསལ་བའི་རང་བཞིན་དེས་འབྲེལ་པ་མེད་པར་གྲུབ་བོ། །གང་གི་ཕྱིར་ཐ་དད་པ་དང་ཅིག་ཤོས་ཀྱི་རྣམ་པར་རྟོག་པ་མི་སྲིད་པ་དེའི་ཕྱིར་རིགས་ནི་རང་བཞིན་མེད་པ་ཉིད་དོ། །གང་ཞིག་ཐ་དད་པ་དང་གཞན་དུ་མེད་པ་དེ་ནི་དངོས་པོ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་རྣམ་པར་འབྲེལ་བ་ནི་རིགས་དང་ལྡན་པའམ་ཞེས་བྱ་བའོ། །ཁས་བླངས་པ་དང་པོ་ཟློག་པར་བྱེད་པ་ནི་དེ་རེ་ཞིག་ཅེས་བྱ་བའོ། །གཉིས་པ་ནི། གཞན་ཉིད་ཡིན་ན་དེ་འབྲེལ་མེད། །ཅེས་བྱ་བ་རྣམ་པར་འབྲེལ་པ་ན་བཟློག་པར་འགྱུར་རོ། །བཤད་པ་མཛད་པ་ཡང་གལ་ཏེ་ཐ་དད་གྲུབ་ཅེ་ན་ཞེས་བྱ་བ་དང༌། འབྲས་བུ་མིན་ཇི་ལྟར་ཡང༌། ཅི་ཞིག་བྱ་བ་ཅི་ཞེས་བྱ་བ་དང་སྦྱར་ནས་ཐ་དད་པའི་ཕྱོགས་ལ་ལྟོས་ནས་འཆད་པ་ཡིན་ན། གཞན་ཉིད་ཡིན་ན་དེ་འབྲེལ་མེད། །ཅེས་བྱ་བ་འདི་དོན་གང་ཞིག་གསལ་བའི་ངོ་བོ་ཐ་དད་དུ་གལ་ཏེ་གྲུབ་ན་ཞེས་བྱ་བ་འདི་གསལ་བའི་ཡུལ་ཅན་ཉིད་དུ་འཆད་པ་ནི་དེ་བཞིན་དུ་ཁྲ་བོ་ལ་སོགས་པ་ཞེས་བྱ་བའོ། །གཉི་ག་ལྟར་ཡང་ལྟོས་བ་དང་བཅས་པ་ཉིད་དུ་རྟོགས་པའི་རྣམ་པ་བརྗོད་པ་ནི། འདི་ནི་དེ་དང་མཚུངས་སོ་ཞེས་བྱ་བའོ། །འབྲས་བུ་མིན་ཇི་ལྟར་ཡང་ཅི་ཞིག་བྱ་བ་འདི་ཡང་གསལ་བའི་ཡུལ་ཅན་དུ་བརྗོད་པ་ནི། ཤེས་ལྡན་ཅི་ལྡོག་པ་ལ་མ་ཡིན་ནམ་ཞེས་བྱ་བ་སྟེ། འབྲས་བུ་མ་ཡིན་པ་གསལ་བའི་རང་བཞིན་ལས་རིགས་གཞན་ཡིན་ནོ་ཞེ་ན། གསལ་བ་ལས་གཞན་དང་དེ་ལས་སྤྱི་ཐ་དད་ཡིན་ཞེས་གསུངས་ཏེ། སྤྱི་གཞན་ཉིད་ཡིན་ནའོ། །གསལ་བ་ལས་གསལ་བ་གཞན་དང་ཞེས་བྱ་བ་ནི་མ་འབྲེལ་པའི་ཕྱིར་རོ། །དེ་ཉིད་གསལ་བར་བྱེད་པ་ནི། འབྲེལ་པ་མེད་པར་ཞེས་བྱ་བའོ། །འོ་ན་ནི་བ་ལང་ཉིད་གསལ་བ་ལ་སོགས་པའི་སྤྱིར་མི་འགྱུར་ཏེ། རི་བོང་གི་རྭ་བཞིན་དུ་དངོས་པོ་མེད་པས་ཉེ་བ་མེད་པའི་ཕྱིར་རོ། །
གལ་ཏེ་འགྱུར་ན་ནི་རི་བོང་གི་རྭ་ཡང་འགྱུར་རོ་ཞེས་འོ་ན་ནི་ཞེས་བྱ་བ་ལ་སོགས་པས་དོགས་པ་བསུ་ནས། མེད་པར་རིགས་སུ་ཐལ་མི་འགྱུར། །ཞེས་གསུངས་སོ། །ཅིའི་ཕྱིར་རི་བོང་གི་རྭ་དང་ཁྲ་བོ་ལ་སོགས་པ་དེ་གཉིས་ལ་ལྟོས་པ་མེད་པའི་ཕྱིར་རོ། །དངོས་པོ་མེད་པ་ཡང་སྤྱིར་འགྱུར་རོ་ཞེས་དེ་སྐད་བརྗོད་པ་སྟེ། ཅི་ཡང་གི་གསལ་བ་ལ་ལྟོས་ནས་སམ། གསལ་བ་གཞན་ལ་ལྟོས་ནས་རང་གི་གསལ་བ་ལ་ལྟོས་ནས་ནི་སྐྱོན་མེད་དོ་ཞེས་གསུངས་པ་ནི་རི་བོང་གི་རྭ་རི་བོང་གི་རྭ་ཞེས་བྱ་བའོ། །གཞན་གྱི་གསལ་བའི་ཞེས་བྱ་བ་ལ་སོགས་པ་ཕྱོགས་གཉིས་པའི་དོགས་པ་བསུ་ནས། བརྗོད་པ་ནི་ཅི་དངོས་པོར་སྨྲ་བ་ལ་ཡང་ཞེས་བྱ་བའོ། །གཞན་དག་མ་ཡིན་པའི་རྒྱུ་མཚན་བརྗོད་པ་ནི། ལྟོས་པ་མེད་པའི་ཕྱིར་ཞེས་བྱ་བའོ། །དེ་ནི་བ་ལང་ཉིད་དེ་དེ་ལྟ་ན་ནི་འོ་ན་ཞེས་བྱ་བ་ནི་གྲུབ་པའི་མཐའ་སྨྲ་བའོ། །འོ་ན་ཇི་ལྟར་རྣམ་པར་རྟོག་པས་ཡོངས་སུ་བརྒྱུད་པའི་བ་ལང་ཉིད་དེའི་སྤྱིའི་རང་བཞིན་ཉིད་ཡིན་ཞེ་ན། བཤད་པ་བ་ལང་ནི་ལྟོས་པའི་མཚན་ཉིད་ཀྱིས་འབྲེལ་པར་འགྱུར་བ་ཡིན་ནོ་ཞེས་འབྲེལ་ཏོ། །དེས་ནི་དངོས་པོ་མེད་བཞིན་དུ་སྐྱོན་ཡོད་པ་མ་ཡིན་ནོ། །ཇི་ལྟར་འབྲེལ་ཞེ་ན། གཏན་ཚིགས་གཉིས་གསུངས་ཏེ། བརྟེན་ནས་ཞེས་བྱ་བ་ནི་ཁྲ་བོ་ལ་སོགས་པ་ལ་བརྟེན་ནས་སོ། །དེ་ལ་ཞེས་བྱ་བ་ནི་ཁྲ་བོ་ལ་སོགས་པ་ལའོ། །ཅི་སྟེ་ཡང་རང་བཞིན་གང་ཞིག་རྣམ་པར་རྟོག་པ་ལ་སྣང་བའི་རང་བཞིན་དེ་ནི་ཐ་དད་པའམ་ཐ་མི་དད་པ་ཡིན་ཡང་སླ་སྟེ། ཁྲ་བོ་ལ་སོགས་པ་རྣམས་ལ་ཡོད་པ་ཉིད་ཡིན་ཏེ་དེ་ལྟ་མ་ཡིན་ན་རྣམ་པ་དེ་ལྟ་བུའི་བློང་ཇི་ལྟར་འགྱུར་ཞེས་དོགས་ནས་བཤད་པ། སྤྱི་དེའི་རང་བཞིན་ནི་ཁྲ་བོ་ལ་སོགས་པ་དེ་རྣམས་ལ་འབྲེལ་པ་ཐ་དད་པ་ཡོད་པ་མ་ཡིན་ལ། ཐ་མི་དད་པར་ཡང་མ་ཡིན་མོད་ཀྱི་འོན་ཀྱང་ཐ་དད་པ་དང་ཐ་མི་དད་པ་དེའི་རང་བཞིན་མེད་ཀྱང་རང་བཞིན་དང་ལྡན་པ་དེ་ལྟར་འགྱུར་བ་ཡིན་ནོ། །གང་གི་ཕྱིར་རིགས་གསལ་བའི་རང་བཞིན་ལས་དེ་ཉིད་དང་གཞན་ཉིད་དུ་བརྗོད་པར་བྱ་བ་མ་ཡིན་པ་དེའི་ཕྱིར་ངོ་བོ་མེད་པ་ཡིན་ནོ། །གལ་ཏེ་ངོ་བོ་མེད་པ་ཡིན་ན་དེའི་ཚེ་དངོས་པོ་ལ་ཉེ་བ་མེད་པའི་ཕྱིར། ཁྲ་བོ་ལ་སོགས་པ་ད་དང་འབྲེལ་པ་འདོད་པ་ཙམ་ལས་བྱུང་བས་རྟོགས་པ་ཙམ་གྱིས་བཀོད་པར་འགྱུར་ལ། དེ་ལྟ་ན་ཡང་རི་བོང་གི་རྭ་དང་ཡང་འབྲེལ་པར་འགྱུར་རོ་ཞེས་དོགས་པ་བསུ་ནས་ཁྱད་པར་བརྗོད་པ་ནི།
ངོ་བོ་ལ་བརྟེན་ན་ཞེས་བྱ་བའོ། །བྱི་བ་དང་ཕྱུགས་ལ་སོགས་པ་ཡང་ཁྲ་བོ་མཐོང་ནས་ཁུ་ཡུ་མཐོང་བ་ན་དེ་ཉིད་ནི་འདི་ཡིན་ནོ་ཞེས་དེ་ཉིད་དུ་མངོན་པར་རློམ་གྱི། ངང་པ་ལ་སོགས་པ་ན་ནི་མ་ཡིན་ནོ། །རི་བོང་གི་རྭ་ནི་དོན་མཐོང་བ་ལས་བྱུང་བའི་རྣམ་པར་རྟོག་པས་ཉེ་བར་བསྟན་པ་ཡང་མ་ཡིན་ནོ། །དོན་མཐོང་བ་ལས་བྱུང་བའི་རྣམ་པར་རྟོག་པས་ཉེ་བར་བཀོད་པའི་རིགས་དེ་ཉིད་བརྡ་ཡོད་ན་སྒྲ་རྣམས་ཀྱིས་བརྗོད་པ་ཡིན་ཏེ། དེ་ཉིད་ཀྱི་ཕྱིར་དོན་མཐོང་བ་ལས་བྱུང་བའི་རྣམ་པར་རྟོག་པས་བྱ་བའི་ཡུལ་ཅན་གྱི་སྒྲ་རྣམས་བརྒྱུད་ནས་དོན་གྱི་ཡུལ་ཅན་དུ་གྱུར་པ་ཡིན་ནོ་ཞེས་བརྗོད་པ་ནི་རིགས་དེའི་ཁྱད་པར་དུ་གྱུར་པའི་གསལ་བ་གང་ཡིན་དེ་ལ་འཇུག་དོན་ཏེ། དགོས་པ ་གང་དག་ལས་ཡོད་པའི་སྒྲ་དེ་རྣམས་ཀྱིས་རབ་ཏུ་བསྟན་པ་ཡིན་ནོ། །རྟོགས་པ་ཡང་ཡུལ་མཚུངས་པའི་སྒྲ་རྣམས་ཅི་ལྟར་གསལ་བའི་ཡུལ་ཅན་དུ་འགྱུར་ཞེ་ན། གང་གི་ཕྱིར་རྟོགས་པ་ཡང་ལྷག་པར་ཞེན་པས་དེའི་ཡུལ་ཅན་ཡིན་ཏེ། དེས་ན་རྟོགས་པ་དང་ཡུལ་མཚུངས་པ་ཡིན་ཡང་གསལ་བའི་ཡུལ་ཅན་ཁོ་ནའོ། །ཁ་ཅིག་ནི་ངོ་བོ་ཕན་ཚུན་ཁྱད་པར་ཅན་དུ་གྱུར་ལ། བརྒྱུད་ནས་བརྟེན་ནས་རྟག་པ་ཞེས་བྱ་བ་བཀོད་པ་ཡིན་ནོ། །ཁྱད་པར་ཡང་ཡིན་ལ་རིགས་ཀྱང་ཡིན་ལ་སྟེ་རྣམ་པར་བཅད་པས་སོ། །དེ་ལ་འཇུག་པ་ནི་རྟོགས་པར་བྱེད་པ་གང་ཡིན་པའི་སྒྲ་རྣམས་ཀྱིས་ཞེས་འཆད་དོ། །གལ་ཏེ་ངོ་བོ་མེད་པ་ཡིན་ན་ནི་ཅི་ལྟར་ངོ་བོ་དང་ལྡན་པ་ལྟ་བུར་རྟོགས་ཤེ་ན། འོན་ཀྱང་ཞེས་གསུངས་སོ། །འདིར་ཞེས་བྱ་བ་ནི་རྟོགས་པས་ཡོངས་སུ་བསྒྱུར་བའི་རིགས་ལའོ། །གལ་ཏེ་གཞན་རྟོགས་པས་གཞན་ལ་ཅི་ལར་འཇུག་སྙམ་ན། དེ་ལས་སྐྱེས་པ་དེ་ཉིད་ཀྱི་ཕྱིར་ཞེས་གསུངས་སོ། །རིགས་དེ་རྟོགས་པ་ན་ཞེས་བྱ་བ་ནི་རང་བཞིན་དང་ལྡན་པའི་རིགས་རྟོགས་པར་འགྱུར་ནའོ། །གང་གི་ཕྱིར་དེ་རྟོགས་ན་ཁྱད་པར་རྣམས་ལ་འཇུག་པ་དེས་ནའོ། །དེ་ཉིད་རྣམ་པར་རྟོག་པས་ཡོངས་སུ་བསྒྱུར་བ་ཉིད་ལའོ། །རྣམ་པར་གཅད་པར་བྱ་བ་བརྗོད་པ་ནི་གཞན་ཞེས་བྱ་བའོ། །རིགས་ངོ་བོའི་རྣམ་པ་དང་ལྡན་པ་ཡིན་དུ་ཟིན་ཀྱང་ཞེས་བྱ་བ་ནི་ངོ་བོ་མཐོང་བའི་ཕྱིར་རོ། །གསལ་བ་དང་ལྷན་ཅིག་གཅིག་ཏུ་ལྷག་པར་ཞེན་པ་ག་ལས་ཡིན། མ་ཡིན་པ་ཉིད་དེ་གཅིག་ཉིད་མ་མཐོང་བའི་ཕྱིར་རོ། །གལ་ཏེ་གཅིག་ཉིད་བཞིན་དུ་ངོ་བོ་ཡང་མ་མཐོང་བ་མ་ཡིན་ནམ། དེས་
ན་ཇི་ལྟར་ངོ་བོའི་རྣམ་པ་ཉིད་ཡིན་ཞེ་ན། ངོ་བོ་ཉིད་ནི་ཞེས་གསུངས་སོ། །འོ་ན་གཅིག་ཉིད་ཀྱང་ཅི་སྟེ་མ་མཐོང་ཞེ་ན་མ་མཐོང་བར་ཞེས་སྨྲས་སོ། །གསལ་བ་དང་སྣང་བའི་རྣམ་པ་ཐ་དད་པའི་ཕྱིར་རོ་ཞེས་བྱ་བའི་དོན་ཏོ། །གྲུབ་པའི་མཐའ་ནི་མ་མཐོང་ཡང་འདི་ནི་འཐད་དོ་ཞེས་བརྗོད་པ་ནི། དེ་ལ་ཞེས་བྱ་བའོ། །རྣམ་པར་རྟོག་པ་སྣང་བའི་རིགས་དེ་ལ་ངོ་བོར་སྣང་བ་ཡང་སྟེ། མི་གསལ་བའི་རང་བཞིན་གྱི་རྣམ་པ་ཉིད་དམ། དོན་ལ་དེ་ཉིད་དུ་འཛིན་པ་ཞེས་བྱ་བ། གསལ་བ་ཉིད་དང་ལྷན་ཅིག་ཉིད་དུ་འཛིན་པའོ། །གལ་ཏེ་དེའི་རང་བཞིན་མ་གྲུབ་ན་འདི་འདྲ་བའི་འཁྲུལ་པར་ཇི་ལྟར་འགྱུར་ཞེ་ན། དུས་ཐོག་མ་ཡོད་པ་མ་ཡིན་པ་ཅན་གྱི་མཐོང་བ་གང་ཡིན་པ་དེ་གོམས་པ་སྤྲུལ་པའོ། །དེ་ཁོ་ན་ཉིད་མཐོང་བ་ཉིད་ཀྱིས་ཞེས་བྱ་བ་ནི་ཐ་མི་དད་པ་མཐོང་བ་ཉིད་ཀྱིས་སོ། །དེའི་ངོ་བོར་ནི་ཐ་མི་དད་པའི་རང་བཞིན་དུ་སྒྲོ་འདོགས་པའོ། །འོ་ན་དེ་ཅི་ལྟར་འགྱུར་སྙམ་ན་འཁྲུལ་པ་གཅིག་ནས་ཞེས་གསུངས་སོ། །དོན་དེ་ཉིད་དུ་འཛིན་པ་བྱ་བ་བཤད་ནས་ལྷག་མ་འཆད་པ་ནི་མི་གསལ་བར་ཞེས་བྱ་བའོ། །འདི་ལ་ཡང་ཞེས་བྱ་བ་ནི་མི་གསལ་བར་སྣང་བ་ལ་ཡང་ངོ༌། །གང་གི་ཕྱིར་དེ་ལྟ་ཡིན་པ་དེའི་ཕྱིར་རོ། །དེའི་རང་བཞིན་གཅིག་ཉིད་དུ་མི་གསལ་བ་དག་གི་རང་བཞིན་ནོ། །དེ་ལྟར་སྤྱིར་དངོས་པོར་འགྱུར་བ་གསལ་ནས་རྣམ་པར་རྟོག་པའི་རྣམ་པ་ལ་དོན་གྱི་རང་བཞིན་ཉིད་ཀྱིས་སྤྱིར་རྣམ་པར་གཞག་སྟེ། ད་ནི་གཞན་ལས་ལྡོག་པའི་རང་བཞིན། བརྗོད་པའི་རང་བཞིན་པ་ནི་ཡང་ན་ཞེས་བྱ་བའོ། །གཞན་རིགས་མི་མཐུན་པ་རྣམས་ལ་རྟོགས་པ་སྟེ། ལྡོག་པར་བྱེད་པ་ཉིད་ཀྱི་མཚན་ཉིད་དེ་ངོ་བོ་ཉིད་གང་ལ་ཡོད་པར་གཞན་ལྡོག་པར་བྱེད་པའི་བདག་ཉིད་ཀྱི་དངོས་པོ་དེ་ཉིད་སྤྱི་ཡིན་ལ། སྒྲ་ཡང་དེའི་མཐར་ཐུག་པ་ཡིན་ཏེ། དེ་སྤྱི་ཐ་དད་པར་སྨྲ་བ་བཞིན་དུ་བུམ་པ་ཡོད་པ་ཞེས་བྱ་བ་ནི། འདི་བཞི་མཐུན་པ་མ་ཡིན་པ་ཡིན་ནོ། །དེ་ལ་ངོ་བོ་ཡང་ཅུང་ཟད་ཡོད་པ་མ་ཡིན་ཏེ། ཐུན་མོང་མ་ཡིན་པའི་རང་བཞིན་གྱིས་སྟོང་པའི་ཕྱིར་རོ། །གལ་ཏེ་གཞན་ལས་ལྡོག་པ་ཡང་གཞན་ལས་ལོག་པའི་བདག་ཉིད་ཀྱི་དངོས་པོ་ཉིད་མ་ཡིན་ནམ། ཇི་ལྟར་ངོ་བོ་མེད་སྙམ་ན་གཞན་ལ་ལྡོག་པའི་མཚན་ཉིད་ཀྱི་ཞེས་གསུངས་སོ། །རང་བཞིན་ཞེས་ལྟ་བ་ནི། ཐུན་མོང་མ་ཡིན་པའོ། །གལ་ཏེ་ལྟ་ན་ཡིན་མོད། དེ་ལྟ་ན་ཡང་དེ་ནི་སྒྲས་ཤེས་པར་བྱེད་པ་མ་ཡིན་ཏེ། དེས་
ན་དེ་བརྟགས་པས་ཅི་ཞིག་བྱ་སྙམ་ན། རིགས་མི་མཐུན་པ་དེ་ལས་ཞེས་གསུངས་སོ། །རིགས་མི་མཐུན་པ་དེ་ལས་ལྡོག་པ་གང་ཡིན་པ་དེ་ཡང་འཇུག་པ་མེད་པ་སྟེ། སྒྲུབ་པ་མེད་པ་ཁོ་ན་ཡིན་ཏེ། ཐུན་མོང་མ་ཡིན་པའི་རང་བཞིན་མེད་པ་ཡིན་ནོ་ཞེས་བྱ་བའི་དོན་ཏོ། །འཇུག་པར་ཡང་ཞེས་བྱ་བ་ནི་སྒྲུབ་པར་ཡང་ངོ༌། །དེ་ལྟ་ན་ཞེས་བྱ་བ་ནི་ཁྱེར་ཏེ་མི་འོང་བ་བཀག་པ་ལས་སོ། །རང་ཉིད་ཅེས་བྱ་བ་ནི་སྒྲའི་བྱེད་པ་མེད་པར་རོ། །ཁྱེར་ནས་འོང་བ་ནི་ཁྱེར་ནས་འོང་བར་རོ། །བུམ་པ་མ་ཡིན་པ་དེ་འགོག་པ་ནི་བུམ་པ་ཞེས་བྱ་བའོ། །དགག་པ་ལ་ནི་གཞན་ལོག་པའི་མཚན་ཉིད་ལའོ་ཞེས་བྱ་བ་ནི་རྟོགས་པའི་སྤྱོད་ཡུལ་དུའོ། །དེ་ཡང་ནི་ཁྱེར་ནས་འོང་བའོ། །བུམ་པ་མ་ཡིན་པ་དེ་འགོག་པ་ནི་བུམ་པ་ཞེས་བྱ་བའོ། །དགག་པ་ལ་ནི་ཞེས་བྱ་བ་ནི་གཞན་ལས་ལྡོག་པའི་མཚན་ཉིད་ལའོ། །གལ་ཏེ་བ་ལང་མ་ཡིན་ཐེ་ཚོམ་ཟ་བ་ན་བ་ལང་མ་ཡིན་པར་ཐལ་བ་ཡིན་པས། དེར་པ་ལང་ཞེས་བྱ་བ་བ་ལང་མ་ཡིན་པ་ལས་ལྡོག་པར་བྱེད་པར་འགྱུར་གྱི། གཞན་དག་ཏུ་ནི་དང་པོ་ཉིད་བ་ལང་ཞེས་སྦྱར་བ་ན། བ་ལང་ཉིད་སྒྲུབ་པའི་རང་བཞིན་དུ་རྟོགས་པར་འགྱུར་བ་ཡིན་ནོ་ཞེས་དོགས་པ་བསུ་བ་ནི། གལ་ཏེ་སྒྲ་དང་པོའི་ཞེས་བྱ་བའོ། །དག་ལ་ནི་བྱ་བའི་ཚིག་གཙོ་བོ་ཡིན་ཏེ། ལས་སུ་བྱ་བ་ཉེ་བར་སྟོན་པའི་ཕྱིར་རོ་ཞེས་བརྗོད་པ་ནི་དེ་ཡང་མ་ཡིན་ཏེ་ཞེས་བྱ་བའོ། །གཞན་མིན་པར་ནི་ལེན་པར་མི་བྱེད་པའོ། །དེ་ནི་ཞེས་བྱ་བ་ནི་ལེན་པར་མི་བྱེད་པའོ། །འགོག་པ་ནི་ཁྱེར་ལ་ཤོག་ཅིག་ཅེས་བྱ་བའོ། །འདིར་ཐལ་བ་ཡིན་ཞེས་བྱ་བ་ཉིད་བརྗོད་པ་ནི། དེ་ལ་ཐལ་བ་གཞན་ཅི་ཡོད་ཅེས་བྱ་བའོ། །དེ་ནི་ཐལ་བ་ལའོ།། ཁྱེར་ནས་མི་འོང་བ་འགོག་པའི་ཁྱེར་ནས་འོང་བ་དང་པོ་སྨོས་པ་ན། དེ་ནི་བ་ལང་མ་ཡིན་པ་ཡང་ཐལ་བ་བ་གླང་ཞེས་སྦྱར་བ་ཡིན་ནོ། །དེས་ན་ཡང་ནག་པོ་མ་ཡིན་པ་ཐལ་བ་ནག་པོ་ཞེས་སྦྱོར་བ་ཡིན་ཏེ། དེས་ན་གཞན་སེལ་བ་ཁོ་ན་སྒྲའི་དོན་ཡིན་ཞེས་བྱ་བའི་དོན་ཏོ། །མ་ཡིན་པ་དགག་པ་ཁོ་ན་ཡིན་པར་མེད་པའི་རང་བཞིན་ནི་མ་ཡིན་ཏེ། དེ་ལས་གཞན་པའི་དོན་ནི་དེ་མེད་པའི་ཕྱིར་རོ། །ཡོད་པ་ཡང་སྤྱི་ལ་བརྗོད་པའི་སྐྱོན་བཞི་མཐུན་པ་ལ་སོགས་པ་མེད་པ་ཉིད་དུ་འགྱུར་རོ། །མ་ཡིན་པ་ཡང་སྒྲུབ་པ་ཁོ་ན་ཡིན་ནོ་ཞེས་རྩོད་པ་བརྗོད་པ་ནི་གལ་ཏེ་དེ་བཀག་པ་ནི་ཞེས་བྱ་བ་དེ་རིགས་མི་མཐུན་པ་དེའོ། །གཞན་ནི་ཐུན་མོང་མ་
ཡིན་པའི་རང་བཞིན་ནོ། །དེ་ལ་ཞེས་བྱ་བ་དགག་པའོ། །བདེན་ཏེ་མ་ཡིན་པ་ཡང་རིགས་མི་མཐུན་པ་བཟློག་པའི་བདག་ཉིད་ཁོ་ན་ཡིན་གྱི། གཞན་ཐུན་མོངས་ཡིན་པའི་རང་བཞིན་དུ་ནི་མ་ཡིན་ནོ། །དེས་ན་མེད་པ་དགག་པའི་རང་བཞིན་དུ་བརྗོད་པ་ཡིན་གྱི། དངོས་པོ་ལས་ཐ་དད་པའི་ཕྱིར་རམ་ཐུན་མོང་མ་ཡིན་པའི་རང་བཞིན་རྟོགས་པས་ནི་མ་ཡིན་ནོ་ཞེས་ལན་བརྗོད་པ་ནི། འདིར་ནི་འདི་སྐད་ཅེས་བྱ་བའོ། །བཀག་པ་ན་ཞེས་བྱ་བ་ནི་རིགས་མི་མཐུན་པ་འགོག་པར་བྱེད་པ་ནའོ། །གཞན་གྱིས་ཞེས་བྱ་བ་ནི་ཐུན་མོང་མ་ཡིན་པའི་རང་བཞིན་རྟོགས་པའོ། །གང་གི་ཕྱིར་ཐུན་མོང་མ་ཡིན་པ་དེ་ལ་སྒྲའི་བྱེད་པ་མེད་པ་ཡིན་ནོ། །གལ་ཏེ་ཡང་ཐུན་མོང་མ་ཡིན་པའི་རང་བཞིན་སྒྲ་ལས་རྟོགས་པ་མ་ཡིན་ལ་འོན་ཀྱང་ལྡོག་པའི་བདག་ཉིད་ཀྱི་དེ་ཉིད་རྟོགས་པ་དེས་ན་འཇུག་པར་འགྱུར་བ་ཉིད་དོ་ཞེས་བརྗོད་པ་ནི་རང་གིས་ཞེས་གསུངས་སོ། །རྟོགས་པ་ནི་འཇུག་པའོ། །གལ་ཏེ་གཞན་ལ་མེད་པར་རྟོགས་པ་ན་གཞན་ཡོད་པ་མི་རྟོག་པ་ལ་སོགས་པ་མེད་པ་ཉིད་ལ་གཞན་ལ་གླང་ཡོད་པ་ཉིད་དང་ཡིན་པར་ཇི་ལྟར་འགྱུར། འདི་ལྟར་ཐུན་མོང་མ་ཡིན་པའི་རང་བཞིན་གྱིས་སྟོང་པ་ལྡོག་པའི་རང་བཞིན་ཡང་དངོས་པོ་མང་བ་ཙམ་ཡིན་ནོ་ཞེས་བརྗོད་པ་ནི་གཞན་ཡོད་པ་ཞེས་བྱ་བའོ། །གཞན་རྟོགས་ན་སྟེ་ཡུལ་གཞན་རྟོགས་པ་འདིར་གང་ལས་གཞན་ཡིན་པ་དེ་མེད་པའི་རྟོགས་པ་སྐྱེ་བའི་ཕྱིར་ན་གཞན་ལྡོག་པའི་བདག་ཉིད་ཀྱིས་རང་གི་མཚན་ཉིད་ཁོ་ན་རྟོགས་པའི་ཡུལ་འགྱུར་བ་ཡིན་ནོ། །གལ་ཏེ་རང་གི་མཚན་ཉིད་རང་གི་ངོ་བོ་ཉིད་ཀྱིས་ནི་རྣམ་པར་རྟོག་པ་ལ་མི་སྣང་བ་མ་ཡིན་ནམ། མི་སྣང་མོད་འོན་ཀྱང་རྣམ་པར་བརྟག་པར་བྱར་ནི་འགྱུར་བ་ཡིན་ནོ་ཞེས་བརྗོད་པ་ནི་རྟོག་པའི་རང་བཞིན་གྱིས་ཞེས་བྱ་བའོ། །དེ་སྐད་བཤད་པ་ནི་ཞེས་བྱ་བ་ནི་གཞན་ཡོད་པ་ཉིད་གཞན་མེད་པ་ཡིན་ནོ་ཞེས་བྱ་བར་རོ། །གལ་ཏེ་ཇི་ལྟར་རྟོགས་པས་གཞན་ལ་ལྡོག་བ་རྟོག་པ་དེ་བཞིན་དུ་དེའི་ཐུན་མོང་མ་ཡིན་པ་ལྡོག་པ་ཡང་ཡིན་ནོ། །དེས་ན་ཇི་ལྟར་རང་གི་མཚན་ཉིད་རྣམ་པར་བརྟག་པར་བྱ་བ་ཡིན་ཞེས་དོགས་ན། ཇི་ལྟར་དེ་ལས་གཞན་མེད་པར་རྟོགས་པ་དེ་བཞིན་དུ་དེའི་ཐུན་མོང་བ་རང་གི་མཚན་ཉིད་མེད་པ་ནི་མ་ཡིན་ནོ་ཞེས་བརྗོད་པ་ནི་རང་གི་བློ་ཉིད་གཞན་དེས་དབེན་པར་ཉམས་སུ་མྱོང་བ་དག་མེད་དོ་ཞེས་རྟོགས་པའི་ཕྱིར་རོ། །ཐུན་མོང་མ་ཡིན་པར་ལྡོག་པར་རྟོགས་པ་ནི་
མེད་དོ། །དེས་ན་ཐུན་མོང་མ་ཡིན་པར་བརྟག་པར་བྱ་བ་ཡིན་ནོ། །ཐུན་མོང་མ་ཡིན་པ་ལ་མེད་དོ་ཞེས་བྱ་བའི་དོན་ཏོ། །གལ་ཏེ་རིགས་ལྡན་རིགས་མིན་ཞེས་བྱ་བ་ལ་སོགས་པའི་སུན་འབྱིན་པས་སྤྱི་གཞན་མ་ཡིན་པ་མེད་པ་ལྟ་ན་ཡང་རྣམ་པར་མེད་པའི་བློ་ལ་མི་གསལ་བའི་རྣམ་པ་སྣང་བ་གང་ཡིན་པ་དེ་ཉིད་རྫས་སུ་ཡོད་པའི་སྤྱི་མིན་ནོ་ཞེས་རྩོད་པ་བརྗོད་པ་ནི་གལ་ཏེ་རེ་ཞིག་ཅེས་བྱ་བའོ། །དོན་མེད་རྣམ་པ་གཞན་དུ་ཞེས་བྱ་བ་ནི་མི་གསལ་བའི་རང་བཞིན་དུའོ། །དེ་ལ་ཞེས་བྱ་བ་ནི་སྤྱི་ལའོ། །སྤྱིའི་བློ་ལ་སྣང་བ་ནི་སྤྱིར་འདོད་དེ། ནམ་གྱི་ཚེ་ཞེ་ན་རང་བཞིན་མེད་ན་སྟེ། གལ་ཏེ་རང་བཞིན་མེད་པར་གྲུབ་ན་དེའི་ཚེའོ་ཞེས་བྱ་བའི་དོན་ཏོ། །གལ་ཏེ་རྣམ་པ་མེད་པ་ཉིད་ཡིན་ཡང་དེ་ལ་སྣང་བ་སྤྱིར་ཇི་ལྟར་འགྱུར་ཞེ་ན། བཤད་པ་དེ། སྤྱི་ཉིད་དུ་ནི་མཐོང་ཕྱིར་རོ། །དེ་ལྟར་ན་དོན་དམ་པར་ཡོད་པར་འགྱུར་རོ་ཞེ་ན། བཤད་པ་དེ་སྤྱི་ཉིད་དུ་ནི་འཁྲུལ་པ་ཡིན་ཡང་ཞེས་གསུངས་སོ། །དེས་ན་དོན་དམ་པར་ཡོད་པ་མ་ཡིན་ནོ་ཞེས་དགོངས་པའོ། །འོ་ན་ཇི་ལྟར་དེ་སྤྱི་ཡིན་ཞེ་ན་དོན་དུ་འཁྲུལ་པ་དེ་ནི་དོན་རྣམས་མ་བསླད་པ་ཡིན་པའི་ཕྱིར་དང༌། དོན་གྱི་ངོ་བོར་དེ་ཉིད་དུ་མེད་པའི་ཕྱིར་སྤྱི་ཡིན་ནོ། །དེ་ཉིད་ཀྱི་ཕྱིར་རང་བཞིན་ཅན་མ་ཡིན་ཏེ། དམིགས་པ་དང་བཅས་པའི་རང་བཞིན་གྱི་སྤྱིའི་བློ་རང་བཞིན་དང་བཅས་པ་མ་ཡིན་ནོ།། དེ་ཞེས་བྱ་བ་ནི་སྣང་བའོ། །སྣང་བ་དེ་སྤྱིའི་ངོ་བོར་མཐོང་བའི་ཕྱིར་རོ། །དེ་ལྟ་ན་ཡང་གཞན་གྱིས་འདོད་པའི་སྤྱི་མི་འགྲུབ་བོ་ཞེས་བརྗོད་པ་ནི་འོན་ཀྱང་ཞེས་བྱ་བའོ། །ཀྱང་གི་སྒྲའི་དོན་བརྗོད་པ་ནི་ཇི་ལྟར་ཞེས་བྱ་བའོ། །རྣམ་པ་མེད་པའི་བློ་ལ་ཡང་གང་ཅི་སྣང་བ་དེ་ཐམས་ཅད་དོན་དམ་པར་ཡོད་པ་ནི་མ་ཡིན་ཏེ། དཔེར་ན་ཟླ་བ་གཉིས་ཀྱི་རྣམ་པ་དེ་བཞིན་དུ་སྤྱི་ཡང་ཡིན་པར་འགྱུར་རོ། །འོ་ན་ཇི་ལྟར་དེ་ཁྱེད་ཀྱི་སྤྱི་ཡིན་སྙམ་ན། དེ་ཡང་ཞེས་བྱ་བའོ། །དོན་གྱི་རང་བཞིན་འབའ་ཞིག་ཏུ་ནི་མ་ཟད་ཀྱི་དེ་ཡང་ཡིན་ནོ། །ཅིའི་ཕྱིར་དེ་ཁོ་ནར་མེད་པར་རྟོགས་ཤེ་ན། སྤྱི་འདི་ནི་ཞེས་གསུངས་སོ། །དེ་ལྟ་མ་ཡིན་ན་ཞེས་བྱ་བ་ནི་བརྟག་མི་བཟོད་པར་ཡང་ཡོད་པར་ཁས་ལེན་ནའོ། །གང་གི་ཕྱིར་བློ་རྣམ་པར་མེད་པ་ལས་ཡང་རྣམ་པ་དོན་དམ་པར་ཡོད་པ་མ་ཡིན་པ་དེའི་ཕྱིར་རོ། །རིགས་ལྡན་རིགས་མིན་ཞེས་བྱ་བ་ལ་སོགས་པས་དེ་ཉིད་དང་གཞན་དག་ཏུ་བརྗོད་པར་བྱ་བ་མ་ཡིན་པའི་ཕྱིར་སྤྱི་དངོས་པོ་མ་ཡིན་ནོ་ཞེས་
བརྗོད་ཟིན་བ་ཉིད། མ་ངེས་པ་ཉིད་ལ་སོགས་པའི་ཉེས་པ་སྤངས་པའི་དོན་དུ་ཟློས་པར་བྱེད་པ་ནི་བརྗོད་བྱ་མ་ཡིན་པའི་ཕྱིར་ཡང་ཞེས་བྱ་བའོ། །ཅིའི་ཕྱིར་ཞེས་བྱ་བ་ལ་བརྗོད་པར་བྱ་བ་ཉིད་མ་ཡིན་པ་ཡང་ཡིན་ལ་དངོས་པོ་མ་ཡིན་པ་ཡང་མ་ཡིན་ནོ་ཞེས་བྱ་བ་ནི་དྲི་བའི་དོན་ཏོ། །ལན་ནི་ངོ་བོ་མེད་པས་ཞེས་བྱ་བ་སྟེ། ངོ་བོ་མེད་པར་ཁྱབ་པར་བྱ་བ་བརྗོད་བྱ་མ་ཡིན་པ་ཉིད་ཁྱབ་སྟེ། དེས་ན་གང་བརྗོད་པར་བྱ་བ་མ་ཡིན་པ་དེ་ནི་དངོས་པོ་མ་ཡིན་པ་ཉིད་དོ། །གལ་ཏེ་དངོས་པོ་མ་ཡིན་པའི་གཏན་ཚིགས་བརྗོད་པར་བྱ་བ་མ་ཡིན་པ་ཉིད་མ་གྲུབ་བོ་ཞེས་དོགས་པ་བསུ་ནས་སེལ་བ་ནི་གལ་ཏེ་རྟ་ལ་སོགས་པའི་གསལ་བ་ལས་ཐ་དད་པའི་ཕྱིར་ན། བ་ལང་ཉིད་དེ་དངོས་པོ་འདོད་ན་དེའི་ཚེ་རྣམས་ནི་ཇི་ལྟར་ཡང་བརྗོད་པར་བྱ་བ་ཉིད་མ་ཡིན་པ་མ་ཡིན་ཏེ། འོན་ཀྱང་རང་གི་གསལ་བ་ལས་ཀྱང་ཐ་དད་པར་བརྗོད་པར་བྱ་བ་ཡིན་ནོ། །ཁྱབ་པར་བྱ་བ་ཡོད་པའི་ཕྱིར་ཁྱབ་པར་བྱེད་པ་ཡོད་པར་བརྗོད་པ་ནི། གང་ཞིག་ཅས་བྱ་པའོ། །བརྗོད་པར་བྱ་བ་མ་ཡིན་པ་ཉིད་མ་གྲུབ་པོ་ཞེས་བརྗོད་པ་ནི་ཅི་སྟེ་སྤྱི་གཞན་ལས་ཞེས་བྱ་བའོ། །གལ་ཏེ་དངོས་པོ་ཡིན་ན་དེའི་ཚེ་ཞེས་ཁོང་ནས་ཕྱུང་ལ་རང་བཞིན་གསལ་བ་ལས་ཀྱང་ཞེས་སྦྱར་རོ། །དེ་ལྟ་ཡང་མ་ཡིན་ནོ། །དེ་ཉིད་ལས་ཞེས་བྱ་བ་ནི་རང་གི་གསལ་བ་ལས་སོ། །ཅི་དངོས་པོ་ཡང་རང་གི་རྟེན་ལས་ཐ་དད་པར་བརྗོད་པར་བྱ་བ་མ་ཡིན་པར་དོགས་པ་བསུ་བ་ནི་དེ་དང་འབྲེལ་བའི་ཕྱིར་ཞེས་བྱ་བ་སྟེ། རང་གི་གསལ་བ་དང་འབྲེལ་པའི་ཕྱིར་རོ། །དེ་ལས་ནི་གསལ་བ་ལས་སོ། །དངོས་པོ་མ་ཡིན་པས་བརྗོད་བྱ་མ་ཡིན་པ་ལ་མ་ཁྱབ་པོ་ཞེས་བྱ་བའི་དོན་ཏོ། །འབྲེལ་པས་བརྗོད་བྱ་མ་ཡིན་ན་ཧ་ཅང་ཐལ་བར་འགྱུར་རོ་ཞེས་ལན་བཏབ་པའི་རྒྱུ་དང་འབྲས་བུའོ་ཞེས་བྱ་བའོ། །དེས་ན་ཞེས་བྱ་བ་ནི་འབྲེལ་པས་ནའོ། །ཐལ་བ་བཟློག་པ་བརྗོད་པ་ནི་དུ་བ་ནི་ཞེས་བྱ་བའོ། །ཡུལ་ཐ་དད་པས་ཞེས་བྱ་བ་ནས་ཧ་ཅང་ཐལ་བ་སྤོང་བར་དོགས་པ་བསུ་བའོ། །འབྲེལ་པ་ཡོད་ཀྱང་མེ་ལ་ལྟོས་ནས་དུ་བའི་ཡུལ་ཐ་དད་པའི་ཕྱིར་ན་བརྗོད་པར་བྱ་བ་མ་ཡིན་ན་མ་ཡིན་ནོ་ཞེས་བྱ་བའི་དོན་ཏོ། །ཡུལ་ཅན་ལས་ཐ་དད་པའི་ཡུལ་མེད་པའི་ཕྱིར་དེ་ཐ་མི་དད་པའི་ཕྱིར་རོ་ཞེས་སྒྲུབ་པར་བྱེད་པ་མ་ཡིན་ནོ་ཞེས་གསུངས་པའི་ཡུལ་ཞེས་བྱ་བའོ། །ཡུལ་ཅན་གྱི་གོང་བུ་ལས་ཐ་དད་པ་སྣང་བ་ཡིན་ནམ་མ་ཡིན། སྣང་བ་མ་ཡིན་པ་
ལ་བརྗོད་པ་ནི་ཐ་དད་པའི་མི་སྣང་བ་ཞེས་བྱ་བའོ། །སྣང་བ་ལ་བརྗོད་པ་ནི་ཐ་དད་པར་ནི་ཞེས་བྱ་བའོ། །གང་གིས་ཞེས་བྱ་བ་ནི། ཇི་ལྟར་ཐ་མི་དད་པར་མྱོང་བར་འགྱུར་རོ། །གང་གིས་ཡོད་པར་འགྱུར་བ་རྣམ་པ་གཞན་ཡང་ཞེས་བྱ་བའོ། །དེས་ན་དེ་ཉིད་དང་ཞེས་བྱ་བའོ། །འགའ་ཞིག་ལས་ཞེས་བྱ་བ་ནི་རང་གི་གསལ་བ་ལས་སོ། །འདི་ནི་སྤྱི་གཞན་ཁས་བླངས་ནས་བརྗོད་པ་ཡིན་ནོ། །ད་ནི་དེའང་མེད་དོ་ཞེས་གསུངས་པ་ནི། སྤྱི་གཞན་པས་ཀྱང་ཞེས་བྱ་བའོ། །ལན་ནི་རི་བོང་གི་རྭ་ལ་སོགས་པ་ཡང་ཞེས་བྱ་བའོ། །དེ་དག་དོན་དམ་པར་ཐ་དད་པ་མེད་པའི་ཕྱིར་དངོས་པོ་ཉིད་མ་ཡིན་ནོ་ཞེས་དོགས་པ་བསུ་བ་ནི་གལ་ཏེ་དེ་དག་གི་ཞེས་བྱ་བ་སྟེ། རི་བོང་གི་རྭ་ལ་སོགས་པ་རྣམས་ཀྱིའོ། །དེ་ཉིད་གཞུང་འཛུགས་པ་ནི་རི་བོང་གི་རྭ་ཞེས་བྱ་བ་ལ་སོགས་པའོ། །ལན་ནི་འདི་ལ་ཡང་ཞེས་བྱ་བ་སྟེ་མི་ལའོ། །བརྗོད་པའི་རྣམ་པ་ཉིད་སྟོན་པ་ནི་འདིར་ཡང་ཞེས་བྱ་བའོ། །གང་གི་ཕྱིར་དེ་ལྟར་སྤྱི་ཐ་དད་པར་གཞན་ལས་སྤྱི་ཐ་དད་པར་མི་འདོད་པ་དེས་ན་ཞེས་བྱ་བ་ནི་སྤྱི་ཡིན་ཏེ། དེ་ནི་དེའི་ཕྱིར་གྱི་དོན་ཏོ། །དེས་རྣམ་འགྲེལ་མཛད་པས་བཤད་པའོ། །ཅི་བཤད་ཅེ་ན། སྤྱི་ནི་སྤྱི་གཞན་ལས་ཐ་དད་པར་བརྗོད་པ་མིན་པ་ཉིད་དོ། །འོ་ན་ཇི་ལྟར་སྤྱི་རྣམས་ཐ་དད་ཅེ་ན། ཉེར་ལེན་ནོ། །འོ་ན་གཞན་ལས་གཞན་དུ་ཉེར་བཏགས་ཕྱིར་རོ། །གལ་ཏེ་ཞེས་བྱ་བ་ལ་སོགས་པ་ནི་རྣམ་འགྲེལ་ལ་འཇུག་པའོ། །དེ་ལྟ་ཡང་མ་ཡིན་ནོ་ཞེས་བྱ་བ་ནི་བརྗོད་པར་བྱ་བ་མ་ཡིན་པ་ཡང་མ་ཡིན་ཏེ། འོན་ཀྱང་བརྗོད་པར་བྱ་བ་ཉིད་ཡིན་ནོ། །ཇི་ལྟར་ཞེ་ན། གང་གི་ཕྱིར་ཞེས་གསུངས་སོ། །ད་ལྟར་བ་ནི་མ་ཟད་དེ་འདས་པ་དང་ནི་མ་འོངས་པའི་དོན་ལ་འོང་ངོ༌། །ཅི་སྟེ་དེ་ལ་སྤྱི་ཡོད་པ་དེས་ན་དེའི་རྒྱུ་མཚན་ཅན་གྱི་སྒྲ་འཇུག་པ་ཡིན་ནོ་སྙམ་ན། ཡོད་པ་ཅི་འདས་པ་ལ་སོགས་པ་མེད་པའི་ཆོས་སུ་ཇི་ལྟར་འགྱུར། ཅིའི་ཕྱིར་ཞེ་ན། ཡོད་པ་ནི་ཞེས་སྨོས་སོ། །ཡོད་པའི་ཆོས་སུ་དོགས་པ་བསུ་བ་ནི་གསལ་བ་གཞན་ཞེས་བྱ་བའོ། །དེའི་ཆོས་སུ་ཞེས་བྱ་བ་ནི་ལན་ཏེ། ད་ལྟར་བའི་གསལ་བའི་ཆོས་ཉིད་དོ། །འོ་ན་ཇི་ལྟར་དེ་འདས་པ་ཉིད་ཡིན་ཞེ་ན་སྤྱི་ནི་ཞེས་བྱ་བའོ། །དེ་ལྟ་ན་ཡང་མེད་པའི་ཆོས་ཉིད་ནི་ཡོད་པ་དང་འགལ་བས་ཁྱབ་པར་འགྱུར་རོ་ཞེས་བརྗོད་པ་ནི་མེད་པའི་ཆོས་ཞེས་བྱ་བའོ། །ཡོད་པ་ཉིད་ནི་ཁྱབ་
པར་བྱེད་པ་མེད་པའི་ཆོས་དང་འགལ་བ་མ་ཡིན་ནོ་ཞེས་བརྗོད་པ་ནི་ཡིན་ན་ཡང་ཞེས་བྱ་བའོ། འདི་གཉིས་མ་ངེས་པ་ཉིད་དུ་དོགས་པ་བསུ་བ་ནི་ཅི་འགལ་ཞེ་ན་ཞེས་བྱ་བའོ། །དེ་འབྲེལ་པ་མེད་པ་ཉིད་དོ་ཞེས་བྱ་བ་ནི་ལན་ནོ། །ཇི་ལྟར་ཞེ་ན་མེད་པ་ནི་ཞེས་གསུངས་སོ། །དེ་ལྟ་ཡིན་ནོ་ཞེས་བྱ་བ་ནི་མེད་པ་དང་ཡོད་པ་འབྲེལ་པ་རྟོགས་པ་ནའོ། །སྤྱི་ཡང་མེད་པ་ཉིད་དུ་རྟོགས་པར་འགྱུར་རོ། །འོན་ཏེ་མེད་པ་རྟོགས་པར་མི་ནུས་སོ། །དཔེར་ན་ཞེས་གསུངས་ཏེ། མེད་པ་རྟོགས་པ་མེད་པ་རྟོགས་པ་བཞིན་ནོ་ཞེས་འབྲེལ་ཏོ། །གང་གིས་གསལ་བ་ཁོ་ན་མེད་པར་རྟོགས་པ་ཡིན་གྱི་སྤྱི་ནི་མ་ཡིན་པ་རྟོགས་པ་གཉིས་ཀ་ཁྱད་པར་ཡོད་པ་མ་ཡིན་ནོ་ཞེས་གསུངས་པ་ནི་ཁྱད་པར་མེད་པའི་ཕྱིར་ཞེས་བྱ་བའོ། །སྤྱི་མེད་པ་སྤང་བའི་དོན་ཏོ། །གསལ་བ་ཉིད་ཡོད་པར་བརྗོད་པ་ནི། འོ་ན་ཞེས་བྱ་བའོ། །ཅིའི་ཕྱིར་ཞེ་ན། འདས་པ་དང་ཞེས་གསུངས་སོ། །གལ་ཏེ་ཞེས་བྱ་བ་ནི་ལན་ནོ། །ཤེས་པ་ཞེས་བྱ་བ་ནི་གཞན་གྱིས་སྨྲས་པའོ། །ཤེས་པ་དེ་ཡང་ཞེས་བྱ་བ་ནི་གྲུབ་པའི་མཐའོ། །ལྐོག་ཏུ་གྱུར་པ་ཉིད་དུ་རྟོགས་པ་ཉིད་དུ་ན་འདས་པ་ཉིད་དོ་ཞེས་དོགས་པ་བསུ་བ་ནི་མངོན་སུམ་ཉིད་དུ་ཞེས་བྱ་བའོ། །རང་གི་ངོ་བོས་ཞེས་བྱ་བ་ནི་ལན་ནོ། །དེས་ན་འདས་པ་དང་མ་འོངས་པ་དངོས་པོ་མེད་ཅེས་བྱ་བ་འདི་རྣམས་སོ། །དེ་གནས་པ་ན་མཇུག་བསྡུ་བ་ནི་དེའི་ཕྱིར་ཞེས་བྱ་བའོ། །ད་ལྟར་བ་ཡོད་པ་ལ་ནི་བུམ་པའི་སྒྲ་གཙོ་བོ་ཡིན་ལ། འདས་པ་ལ་སོགས་པ་མེད་པ་ལ་ནི་ཚད་མའི་ཡུལ་དུ་གྱུར་པའི་སྤྱི་འམ་གཞན་ལས་ཉེ་བར་འདོགས་པ་ཡིན་ནོ་ཞེས་དོགས་པ་བསུ་བ་ནི། གལ་ཏེ་ཉེ་ར་བཏགས་ལས་ཞེས་བྱ་བའོ། །འདས་པ་ལ་སོགས་པ་ལ་ནི་སྤྱི་ཉེ་བར་བཏགས་པ་ཡིན་པའི་ཕྱིར་ན་ཡོད་པ་དང་འགལ་བས་ཁྱབ་པ་མེད་པའི་ཆོས་ནྙིད་དུ་མ་གྲུབ་པོ་ཞེས་བྱ་བའི་དོན་ཏོ། །དེ་ཉིད་འཆད་པ་ནི་མེད་པའི་ཆོས་ཞེས་བྱ་བའོ། །ཁྱབ་པར་བྱེད་པ་མེད་པའི་ཆོས་དང་འགལ་བ་ཡོད་པ་ཞེས་བྱ་བ་འདི་ཡང་མ་གྲུབ་པོ་ཞེས་བརྗོད་པ་ནི་གང་ཞིག་ཉེ་བར་བཏགས་པ་ཞེས་བྱ་བའོ། །འདི་ནི་འདོད་ཅེས་བྱ་བའི་མཐར་ཐུག་པ་བཤད་པ་ཡིན་ནོ། །གང་གིས་དེ་ཉིད་ལ་བུམ་པ་ཉིད་ཀྱི་སྤྱི་བར་འདོགས་ཀྱི། སྣམ་བུ་ལ་སོགས་པ་མ་ཡིན་པ་འདས་པའི་བུམ་པ་དང་ད་ལྟར་བའི་བུམ་པ་ལ་ཉེ་བ་ཅི་ཞིག་ཡོད། གཞལ་བྱར་འདྲ་
བ་ལས་ད་ལྟར་བའི་བུམ་པ་ཉིད་འདས་པ་ལ་ཉེ་བར་འདོགས་ན་ནི་སྣམ་བུ་ལ་ཡང་ཁྱད་པར་མེད་དོ། །དེས་ན་བུམ་པ་འདས་སོ་ཞེས་བྱ་བ་སྣམ་བུ་འདས་སོ་ཞེས་བྱ་བའི་དོན་དུ་འགྱུར་རོ་ཞེས་རྣམ་པར་རྟོག་པའི་སྒོ་ནས་ལན་འདེབས་པ་ནི། འདིར་ལན་ནི་ཞེས་བྱ་བའོ། །དེ་ལྟ་མ་ཡིན་ཞེས་བྱ་བ་ནི་འབྲེལ་པ་ལ་སོགས་པ་མེད་ནའོ། །འོན་ཏེ་འབྲེལ་པའམ་འདྲ་བ་ཡོད་དོ་ཞེ་ན། མེད་པ་དང་ཞེས་བྱ་བའོ། །ཅིའི་ཕྱིར་ཞེ་ན། ཡོད་པར་ཐལ་བའི་ཕྱིར་རོ་ཞེས་གསུངས་སོ། །རྒྱལ་གཞན་དག་ཐལ་བ་ཁས་ལེན་པར་འགྱུར་དུ་འོང་བས་འདས་པ་ལ་སོགས་པ་ཡང་ཞེས་བྱ་བའོ། །ཉེ་བར་བཏགས་པས་ཀྱང་མེད་པ་ལ་སྒྲ་འཇུག་པ་ནི་དངོས་པོ་མེད་པ་ཡུལ་ཅན་དུ་འགྱུར་རོ་ཞེས་བརྗོད་པ་ནི་ཞེས་བྱ་བའོ། །དེ་ལྟར་འགྱུར་ན་ཅི་སྐྱོན་སྙམ་ན། དེ་ཡང་ཞེས་གསུངས་ཏེ། སྒྲའི་བརྗོད་བྱ་དངོས་པོ་མེད་པ་ལ་བརྟེན་པའི་སྤྱིའོ། །དེས་ན་ཞེས་བྱ་བ་ནི་དངོས་པོ་མེད་པ་ལ་བརྟེན་པས་ན་དངོས་པོ་མེད་པ་འགྲུབ་སྟེ་རི་བོང་གི་རྭ་ལ་སོགས་པ་བཞིན་ནོ། །དེ་ལ་ཡང་ཞེས་བྱ་བ་ནི་གསལ་བ་ལ་ཉེ་བར་འདོགས་པ་ལ་ཡང་ངོ༌། །ཉེ་བར་ཡོད་པ་ཡང་མ་ཡིན་ཞེས་དགོངས་པའོ། །འདི་ཉིད་གཉིས་པ་ལ་ཡང་གསུངས་པ་ནི་སྒྲ་ཉེ་བར་འདོགས་པ་ལ་ཡང་ཞེས་གསུངས་ཏེ། ཉེ་བར་ཡོད་ དགོས་ཏེ་ཞེས་བྱ་བ་ལ་སོགས་པ ་ཉིད་དོ། །གལ་ཏེ་འདས་པ་དང་མ་འོངས་པ་དག་ལ་དོན་བྱ་བ་མེད་པ་དེས་ན་ད་ལྟར་བའི་བུམ་པ་དང་འབྲེལ་པ་དེ་དེ་དག་ལ་ཉེ་བར་འདོགས་པ་ཡིན་ཏེ། ད་ལྟར་བའི་བུམ་པ་དང་རྫས་ཀྱི་རང་བཞིན་དུ་གཅིག་པས་འདྲ་བའི་ཕྱིར་རོ། །དེས་ན་སྒྲ་འཇུག་པ་ཡིན་ནོ་སྙམ་པ་ནི་འོན་ཏེ་ཞེས་བྱ་བའོ། །གཅིག་ཡིན་པའི་ཕྱིར་ཞེས་བྱ་བ་ནི་ད་ལྟར་བ་དང་ངོ༌། །འདས་པ་ལ་སོགས་པ་ཉིད་ནི་དུས་སུ་རྒྱུ་བ་ཙམ་ཡིན་ནོ་ཞེས་བྱ་བ་ནི་ལྟ་བ་ལ་སོགས་པ་འདས་པ་ལ་སོགས་པ་གཅིག་ཏུ་བརྗོད་པ་ཡིན་ནོ། །ཇི་ལྟར་གཅིག་ཉིད་ཀྱི་ཕྱིར་འདྲ་བ་ཡིན་ཞེ་ན། འདས་བ་ནི་དེ་ཉིད་ཡིན་ཏེ་ཞེས་སྨྲས་ཏེ། ད་ལྟར་བ་ཉིད་དོ། །འོ་ན་ཅི་འདོགས་སྙམ་པ་ནི་འོན་ཀྱང་ཞེས་སྨྲས་སོ། །དེ་ལ་ཞེས་བྱ་བ་ནི་འདས་པ་ལ་སོགས་པའི་གནས་སྐབས་ལའོ། །སྤྱི་ལྟ་བུར་ཞེས་བྱ་བ་ནི་དངོས་པོའི་རང་གི་ངོ་བོ་རྟོགས་པ་ཡིན་ཡང་དོན་བྱ་བ་དང་བྲལ་བ་ཉིད་ཀྱིས་སྤྱི་ལྟ་བུར་རྟོགས་པ་ཡིན་ནོ། །གཞན་དུ་ནི་མ་ཡིན་ནོ་ཞེས་བྱ་བ་ནི་དོན་བྱ་བ་གཙོ་
བོ་ཉིད་ཡིན་ན། ད་ལྟར་བའི་རང་བཞིན་གཅིག་ཏུ་གྱུར་པའི་དངོས་པོ་ཉིད་རྟོགས་པར་འགྱུར་གྱི་དུས་དེ་དང་ཐུན་མོང་བ་ཉིད་དུ་ནི་མ་ཡིན་ནོ་ཞེས་བྱ་བའི་དོན་ཏོ། །ལེན་ནི་འོ་ན་ནི་དེ་ལྟར་ཞེས་བྱ་བའོ། འདས་པ་ལ་སོགས་པ་ད་ལྟར་བ་དང་ལྷན་ཅིག་གཅིག་ཡིན་ན་དངོས་པོའི་རྣམ་པ་ཐམས་ཅད་ད་ལྟར་བའི་རང་བཞིན་དུ་ཡོད་པས་ཇི་ལྟར་འདས་པ་ཉིད་ཡིན། དོན་བྱ་བ་དང་བྲལ་བའི་ཕྱིར་འདས་པ་ཉིད་དུ་དོགས་པ་བསུ་བ་ནི། དེ་ཞེས་བྱ་བའོ། །དེ་དོན་བྱེད་པ་མེད་པའི་ཕྱིར་འདས་པ་ཡིན་ནོ་ཞེས་འབྲེལ་ཏོ། །ད་ལྟར་བ་བཞིན་དུ་དོན་བྱ་བ་དང་བྲལ་བ་ཉིད་ཡིན་ཡང་དོན་གྱི་རང་བཞིན་ནི་སྤྱི་ཉིད་དུ་འགྱུར་བ་མ་ཡིན་ཏེ། སྣང་བ་ཐ་དད་པའི་ཕྱིར་རོ་ཞེས་ལན་འདེབས་པ་ནི་གལ་ཏེ་ཞེས་བྱ་བའོ། །ཇི་ལྟར་འདས་པ་དངོས་པོ་ཡིན་ཞེས་འབྲེལ་ཏོ། །འདས་པའི་དོན་བྱ་བ་དང་ལྡན་པའི་ཕྱིར་ན་དངོས་པོ་ཡིན་ཡང་འདས་པ་ཉིད་ཡིན་ནོ་སྙམ་དུ་དོགས་པ་ནི། དེ་དང་ལྡན་པའི་ཕྱིར་ཞེས་བྱ་བའོ། །དེ་དང་ལྡན་པར་ཅིས་ཞེས་བྱ་བ་ནི་ལན་ནོ། །ཡོད་པ་ནི་མེད་པ་དང་འབྲེལ་པར་རྟོགས་པ་མ་ཡིན་ནོ་ཞེས་དགོངས་པའོ། །ཁས་བླངས་ནས་ཀྱང་སྐྱོན་བརྗོད་པ་ན་ཤེས་ན་ནི་ཞེས་བྱ་བའོ། །དོན་བྱ་བ་དང་བྲལ་བ་བཞིན་དུ་སྤྱི་མེད་པ་ཡང་རྟོགས་པར་འགྱུར་རོ་ཞེས་དགོངས་པའོ། །གཞན་ཡང་ཞེས་བྱ་བ་ནི་དོན་བྱ་བ་ནི་དོན་བྱ་བ་མེད་དོ་ཞེས་བརྗོད་པ་གང་ཡིན་པ་དེ་ནི་མ་འབྲེལ་ཏེ། གང་གི་ཕྱིར་ཐམས་ཅད་ཡོད་ཅེས་བལྟ་བ་ལས་འདས་པ་དེའི་དོན་བྱེད་པ་ཡང་ཡོད་པ་ཡིན་ཏེ། དེ་ལྟ་མ་ཡིན་ན་དོན་བྱེད་པ་བཞིན་དུ། དངོས་པོ་ཡང་ཡོད་པར་མི་འགྱུར་རོ། །དོན་བྱ་བ་དེ་ཡོད་པ་ཡིན་ན་ཡང་འདས་པའི་དངོས་པོའི་མེད་པ་དེ་འདས་པ་ཉིད་ཇི་ལྟར་འགྱུར་ཏེ་མི་འགྱུར་བ་ཁོ་ནའོ་ཞེས་བྱ་བའི་དོན་ཏོ། །འདི་གྲུབ་པ་ལ་སྒྲུབ་པ་ཉིད་ཡིན་ནོ་ཞེས་དོགས་པ་བསུ་བ་ནི། འོན་ཏེ་ཞེས་བྱ་བའོ། །ལན་ནི་ཀུན་རྫོབ་འདི་ཞེས་བྱ་བའོ། །གལ་ཏེ་འདས་པ་དང་མ་འོངས་པའི་དོན་ཤེས་པའི་དམིགས་པར་ཡོད་པ་ཉིད་ཡིན་ནོ། །དེའི་ཚེ་འདི་ཅི་ཞིག་ཀུན་རྫོབ་ཉིད་མ་ཡིན་ཏེ། མ་ཡིན་པ་ཁོ་ནའོ། །མཐའ་དག་དོན་དམ་པ་ཉིད་དུ་ཐལ་བར་འགྱུར་ཏེ། ད་ལྟར་བ་བཞིན་དུ་ཤེས་པ་འདས་པ་ལ་སོགས་པ་རྟོགས་པའི་ཕྱིར་རོ། །འོ་ན་ཀུན་རྫོབ་བདེན་པ་ཉིད་དོ་ཞེ་ན། ཀུན་རྫོབ་བདེན་
པར་ཇི་ལྟར་འགྱུར་ཞེས་བྱ་བའོ། །ཅིའི་ཕྱིར་བདེན་པ་མ་ཡིན་ཞེ་ན། མེད་པའི་ཞེས་གསུངས་སོ། །ཤེས་པས་དམིགས་པའི་ཕྱོགས་ལ་ཀུན་རྫོབ་མེད་པར་བསྟན་པ་ཡིན་ནོ། །འདས་པ་ལ་སོགས་པ་ཀུན་རྫོབ་ཡིན་ནོ་ཞེས་བྱ་བའི་ཕྱོགས་ལ་ནི་དོན་དམ་པ་མེད་དོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །ལན་ནི་འདས་པ་ལ་སོགས་པ་ནི་ཞེས་བྱ་བའོ། །གང་གི་ཕྱིར་འདས་པ་ལ་སོགས་པ་དོན་དམ་པ་མ་ཡིན་པའི་རྒྱུ་དེས་ན་དེའི་ཚེ་ཆོས་སུ་གྱུར་པའི་ཚེ་དངོས་པོ་མེད་དོ་ཞེས་བྱ་བ་གྲུབ་པོ། །ཇི་ལྟར་དེའི་ཆོས་ཉིད་ཡིན་ཞེ་ན། ད་ལྟར་བ་ཙམ་གྱི་ཞེས་གསུངས་སོ། །སྐབས་ཉེ་བར་སྡུད་པ་ནི་དེའི་ཕྱིར་ཞེས་བྱ་བའོ། །དངོས་པོ་བརྗོད་བྱར་ཁས་བླངས་ན་ནི་ཉེ་བར་བཏགས་པར་མི་འཐད་དེ། དངོས་པོ་ཉིད་དུ་ཐལ་བའི་ཕྱིར་རོ། །དངོས་པོ་མེད་པ་བརྗོད་པར་བྱ་བ་ཡིན་ན་ནི་འགྱུར་བ་ཡིན་ནོ། །དེའི་ཕྱིར་དངོས་པོ་མེད་པ་བརྗོད་བྱར་ཐལ་བར་འགྱུར་རོ་ཞེས་དགོངས་བའོ། །གལ་ཏེ་བརྗོད་པར་བྱ་བ་ཐ་དད་པ་ཡིན་ན་གཙོ་བོར་འགྱུར་བ་ཡིན་ཏེ་བ་ལང་བ་ལང་ཞེས་བྱ་བ་བཞིན་ནོ། །དེ་མེད་པའི་ཕྱིར་ནི་བཏགས་པར་འགྱུར་བ་ཡིན་ཏེ། ཁུར་བུར་བ་ལང་ཞེས་བྱ་བ་བཞིན་ནོ་ཞེས་བརྗོད་པ་ནི་འོན་ཏེ་ཞེས་བྱ་བའོ། །མེད་པའི་ཡུལ་ཅན་ཉིད་བསྒྲུབ་པ་ནི་འདི་ལྟར་ཞེས་བྱ་བའོ། །ལན་ནི་དེ་ཡང་ཞེས་བྱ་བའོ། །ངོ་བོ་གང་དུ་ཞེས་པ་ནི་སྣང་བ་ཐ་དད་པར་ཏེ་དེ་ལ་མི་ནུས་པའི་ཕྱིར་རོ། །གང་གིས་ཏེ་དངོས་པོ་མཐོང་མིན་པ་ཞེས་བྱ་བ་ནི་མེད་པའི་ཡུལ་ཅན་དུ་ཐལ་བའི་ཕྱིར་རོ། །ཡང་སྔོན་མཐོང་བ་སྒྲོ་འདོགས་ཕར་ནུས་པ་བསུ་བ་ནི། འོན་ཏེ་ཞེས་བྱ་བའོ། །སྔོན་མཐོང་བ་སྒྲོ་འདོགས་པར་ཁས་བླངས་ཀྱང་ཇི་ལྟར་འདས་པ་ལ་དེའི་ངོ་བོར་རྟོགས་པ་ཉིད་ད་ལྟར་སྒྲོ་བཏགས་པ་ཡིན་པ་དེ་བཞིན་དུ་འདས་པ་མ་ཡིན་པ་ལ་ཡང་འགྱུར་ལ་དེ་ལྟ་ན་ཡང་སྤྱི་དོན་དམ་པར་མི་འགྱུར་རོ་ཞེས་ལན་བརྗོད་པ་ནི། དེ་ལྟ་ན་ནི་འོ་ན་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་སྔོན་མཐོང་བ་སྒྲོ་འདོགས་པ་མེད་པར་རོ། །སྒྲ་ལས་བྱུང་བ་འབའ་ཞིག་ཏུ་ནི་མ་ཟད་ཀྱི་རྗེས་སུ་དཔག་པས་ཀྱང་ངོ་དེའི་ཕྱིར་ཞེས་བྱ་བ་ནི་རྗེས་སུ་དཔག་པས་ཀྱང་སྔོན་མཐོང་བ་སྒྲོ་བཏགས་ནས་རྟོགས་པའི་ཕྱིར་རོ། །ཐམས་ཅད་དུ་ཞེས་བྱ་བ་ནི་འདས་པ་དང་མ་འོངས་པ་དང་ད་ལྟར་བྱུང་བ་རྣམས་ལའོ། །ཅིའི་ཕྱིར་ཞེ་ན། ཐམས་ཅད་དུ་ཞེས་བྱ་བའོ། །གལ་ཏེ་རྗེས་སུ་
དཔག་པས་གཟུང་བ་དོན་དམ་པ་མ་ཡིན་པ་ཡང་མངོན་སུམ་གྱིས་གཟུང་བ་ནི་དོན་དམ་པར་འགྱུར་རོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །ཡོད་པ་ཉིད་ཅེས་བྱ་བ་ནི་སྒྲོམ་བཏགས་པའོ། །འོ་ན་ནི་ཞེས་བྱ་བ་དེ་ནི་སྒྲོ་མ་བཏགས་པའི་རང་བཞིན་ནོ། །ཅི་དེ་ཞེས་བྱ་བ་ནི་རྗེས་སུ་དཔག་པའི་ཡུལ་ལོ། །གལ་ཏེ་མངོན་སུམ་གྱིས་མཐོང་བ་གསལ་བའི་རང་བཞིན་ནི་རྗེས་སུ་དཔག་པའི་ཡུལ་མ་ཡིན་ལ། མི་གསལ་བ་དེ་དེ་ཉིད་འདི་ཡིན་ནོ་ཞེ་འམ། རྒྱང་རིང་པོ་ནས་རྟོགས་པ་ནི་ཡུལ་ཉིད་དོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །དེ་འདི་ཡིན་ནོ་སྙམ་པ་ནི་རྣམ་པར་རྟོག་པ་ཡིན་པའི་ཕྱིར་དང་རྒྱང་རིང་པོའི་རབ་རིབ་ལ་སོགས་པ་ལྟར། རྒྱུའི་ཉེས་པ་ཡིན་པའི་ཕྱིར། མངོན་སུམ་མ་ཡིན་ནོ་ཞེས་ལན་འདེབས་པ་ནི་དེ་ཡང་མི་བདེན་ཏེ་ཞེས་བྱ་བའོ། །དེ་འདིའོ་སྙམ་པའི་ཤེས་པ་སྔོན་དང་ཐུན་མོང་བའི་ཡུལ་ཅན་ནི་མངོན་སུམ་ཉིད་ཡོད་པ་མ་ཡིན་པ་ཁོ་ན་སྟེ། འོན་ཀྱང་རྣམ་པར་རྟོག་པ་དང་བཅས་པ་ཉིད་དོ། །ཇི་ལྟར་ཞེ་ན། དབང་པོ་ལས་སྐྱེས་པ་མེད་པའི་ཕྱིར་རོ། །འོན་ཏེ་དབང་པོ་ལས་མ་སྐྱེས་ཀྱང་མངོན་སུམ་དུ་བྱེད་པའི་ཕྱིར་མངོན་སུམ་ཡིན་ནོ་སྙམ་དུ་དོགས་ན། མངོན་སུམ་བྱ་བ་མེད་པའི་ཕྱིར་ཞེས་སྨོས་སོ། །འདི་ཉིད་བརྗོད་པ་ནི་སྔ་མ་དང་ཞེས་བྱ་བའོ། །མངོན་སུམ་ནི་དངོས་པོའི་ཡུལ་ཅན་ཉིད་ཡིན་ན། སྔོན་དང་ཐུན་མོང་བ་ཉིད་ནི་དངོས་པོ་མ་ཡིན་ནོ། །དེས་ན་ཇི་ལྟར་དེའི་ཡུལ་ཅན་མངོན་སུམ་དུ་གྱུར་ཅེས་བརྗོད་པ་ནི་ཁྱད་པར་ཞིག་ཀྱང་ཞེས་བྱ་བའོ། །ཅིའི་ཕྱིར་ཞེ་ན། ཡོད་པ་མེད་ཆོས་ཞེས་བྱ་བའོ། །གཉི་ག་ཐུན་མོང་ཉིད་ཡིན་ན། །ཞེས་བྱ་བ་ནི་དེ་ཉིད་འདི་ཡིན་ནོ་ཞེས་བྱ་བ་འདས་པ་དང་ད་ལྟར་བ་གཉི་ག་ཡིན་ལ་དེ་དག་གི་ཐུན་མོང་བ་ཉིད་ཡིན་ན་ནི་དངོས་པོར་ཡང་འགྱུར་ཏེ། ཡོད་པའི་ཆོས་ཡིན་པའི་ཕྱིར་རོ་ཞེས་བྱ་བའི་དོན་ཏོ། །འདས་པར་སྣང་བ་དང་ལྷན་ཅིག་ད་ལྟར་བ་ཐ་མི་དད་པར་ནི་མངོན་སུམ་གྱིས་རྟོགས་པ་མེད་དོ་ཞེས་བརྗོད་པ་ནི། དེ་ཡང་མི་འཐད་དེ་ཞེས་བྱ་བའོ། །རྣམ་པར་རྟོག་པ་ལ་ཡང་དེའི་བྱེད་པ་ལས་མ་གཏོགས་པར་ཐུན་མོང་བའི་རང་བཞིན་ཡོད་པ་མ་ཡིན་ནོ་ཞེས་བརྗོད་པ་ནི་དུ་མ་ཉིད་དུ་ཞེས་བྱ་བའོ། །དེའི་ཕྱིར་མེད་པ་ཁོ་ན་ཞེས་བྱ་བ་དོན་དམ་པ་མ་ཡིན་པ་ཉིད་དོ། །དེ་ལྟར་རྒྱུ་མཚན་མེད་པའི་ཕྱིར་འདས་པ་ལ་སོགས་པ་ལས་འགའ་ཡང་ཉེ་བར་བཏགས་པ་མ་ཡིན་ནོ་ཞེས་བསྟན་པ་
ཡིན་ནོ། །དེ་ནི་འཇིག་རྟེན་པའི་ཉེ་བར་བཏགས་པ་ཡང་མེད་དོ་ཞེས་བརྗོད་པ་ནི་འདིར་ཞེས་བྱ་བའོ། །བློ་ནི་འཁྲུལ་པའང་མེད་པ་དང༌། འཁྲུལ་པའང་གི་སྒྲ་རིམ་པ་བཞིན་དུ་ཡིན་ནོ། །དེ་དག་ནི་གོ་རིམས་བཞིན་དུ་དངོས་དང་སྒྲོ་འདོགས་པ་ནི་རྒྱུ་མཚན་ཡིན་ནོ། །དེ་སྐད་དུ་ཡང་ཅིག་ཤོས་ནི་ཞེས་འཆད་པར་འགྱུར་ཏེ། འཁྲུལ་པའོ། །ཅི་འགའ་ཞིག་ཏུ་དེ་ལྟར་གྲུབ་པ་ཡོད་དམ་སྙམ་ན་བྲམ་ཟེའི་ཁྱེའུ་ལ་ནི་ཞེས་བྱ་བའོ། །དེས་ན་ཞེས་བྱ་བ་ནི་འཁྲུལ་པས་སོ། །དེ་ལྟར་ཞེས་ནི་མ་འཁྲུལ་པར་རོ། །གཏན་ཚིགས་དེའི་ཕྱིར་ན་དེ་ནི་དངོས་ཡིན་ནོ་ཞེས་གྲུབ་པོ། །སྐབས་སུ་བབ་པ་ལ་ཡང་གཉི་ག་དེ་ལྟ་བུ་ཉིད་དོ་ཞེས་གསུངས་པ་ནི་འདིར་ཞེས་བྱ་སྟེ། སྒྲ་ལས་བྱུང་བའི་ཤེས་པ་ལའོ། །གཉི་ག་ནི་ད་ལྟར་དང་ད་ལྟར་མ་ཡིན་པའི་ཡུལ་ཅན་དག་ལའོ། །དེས་ན་ཞེས་བྱ་བ་ནི་མ་འཁྲུལ་པའི་བློའི་ཡུལ་ཡིན་པས་ནའོ། །འདི་སྙམ་དུ་འཁྲུལ་པའི་ཤེས་པའི་ཡུལ་ཡིན་པས་ནི་ཉེ་བར་བཏགས་པ་མ་ཡིན་གྱི་འོན་ཀྱང་དོན་མེད་པ་ཡིན་པའི་ཕྱིར་རོ་ཞེས་དོགས་པ་བསུ་བ་ནི་མེད་པའི་དོན་ཉིད་ཀྱིས་ཞེས་བྱ་བའོ། །གལ་ཏེ་ཞེས་བྱ་བ་ནི་ལན་ནོ། །དེ་ཉིད་ལས་ཞེས་བྱ་བ་ནི་མེད་པའི་དོན་ཅན་ཉིད་ལས་སོ། །འདི་ནི་དངོས་མ་ཡིན་པའི་མཚན་ཉིད་དུ་འཐད་པ་མ་ཡིན་ཏེ། བཟློག་པའི་ཕྱིར་ཞེས་བརྗོད་པ་ནི་གཞན་ཡང་ཞེས་བྱ་བའོ། །སྒྲ་ཞེས་བྱ་བ་ནི་དངོས་པོ་མེད་པར་བརྗོད་པའོ། །དེ་ལ་ནི་དངོས་པོ་མེད་པ་ལའོ། །དངོས་པོ་མེད་པ་དེ་དང་མཚུངས་པའི་ཕྱིར་བུ་ལ་སོགས་པའི་དེའི་དོན་མི་བྱེད་པའི་དངོས་གཞན་ལ་བྲལ་བ་ཡིན་ཏེ། གང་གི་ཕྱིར་འཁྲུལ་པར་རྟོགས་པ་ཅན་ཡིན་པས་སོ། །དེས་ན་ཞེས་བྱ་བ་ནི་གྲགས་པའི་དབང་གིས་སོ། །མཚུངས་ཕྱིར་ཞེས་བྱ་བ་ནི་མ་འཁྲུལ་པ་ཅན་དུའོ། །གལ་ཏེ་དངོས་པོ་དང་དངོས་པོ་མེད་པའི་ཡུལ་ཅན་ཉིད་ཀྱིས་དོན་ཐ་དད་པ་མ་ཡིན་པའི་ཕྱིར་བ་ལང་གི་སྒྲ་བཞིན་དུ་དངོས་ཀྱི་དོན་དུ་འགྱུར་རོ་སྙམ་དུ་དོགས་པ་བསུ་ནས་གཉིས་ཀར་ཡང་བསྟན་པར་བྱ་བ་གཅིག་ཉིད་པར་བསྟན་པར་ནི་དངོས་པོ་མེད་པ་འཛིན་པའི་ཞེས་བྱ་བའོ། །བུམ་པ་ཞེས་བྱ་བའི་སྒྲ་ནི་འདས་པ་འམ་མ་འོངས་པ་ལ་ཐ་དད་པར་འཇུག་པ་མ་ཡིན་ནོ་ཞེས་བྱ་བའི་དོན་ཏོ། །ཅི་སྟེ་ཞེས་བྱ་བ་སྟེ་འཇུག་པ་ནི་སྒྲ་དང་ཤེས་པ་དག་གོ །སྤྱིའི་རྣམ་པ་ཞེས་བྱ་བ་ནི་ལན་ནོ། །ད་ལྟར་བ་དང་འདས་པ་ལ་སོགས་པ་རྣམ་པ་མཚུངས་པ་ཉིད་ཡིན་ན་ནི་མེད་པ་
ཉིད་དུ་མི་འགྱུར་ཏེ། ད་ལྟར་བ་ཉིད་བཞིན་ནོ། །དེ་ན་འདས་པ་ལ་སོགས་པ་མེད་པ་ལ་འཇུག་པ་ཞེས་བྱ་བ་འདི་ག་ལས་ཡིན་ཏེ་མ་ཡིན་པ་ཉིད་དོ་ཞེས་བྱ་བའི་དོན་ཏོ། །རྟོགས་པ་ཉིད་ལས་ཞེས་བྱ་བ་ནི་དོགས་པ་བསུ་བ་སྟེ་རྟོགས་པར་བྱ་བ་ལས་སོ། །དེ་ལྟར་འགྱུར་བས་ཞེས་བྱ་བ་ནི་ཡོད་པར་འགྱུར་བའོ། །དེའི་ཕྱིར་མེད་པ་ལ་འཇུག་པར་འཐད་དོ་ཞེ་ན། ཞིག་པ་ཞེས་བྱ་བ་ནི་ལན་ནོ། །འདས་པ་ལ་སོགས་པ་ཞིག་པར་མ་ཤེས་པ་ལའོ། །འདས་པ་ལ་སོགས་པའོ་སྙམ་པའི་རྟོགས་པ་ཐ་དད་པ་གང་ཡིན་པ་དེ་ཡང་མེད་པ་ཉིད་དོ། །ཁྱད་པར་མ་བཟུང་བ་ནི་ཐ་དད་པའི་བློར་འགྱུར་བ་མ་ཡིན་ནོ། །བཟུང་ན་ཡང་དེ་ཡང་ད་ལྟར་བ་བཞིན་དུ་བཟུང་བའི་ཕྱིར་ཇི་ལྟར་མེད་པ་ལ་འཇུག་པས་ཉེ་བར་བཏགས་པ་ཉིད་དུ་འགྱུར། འོན་ཏེ་ཁྱད་པར་མ་བཟུང་ཡང་རྟོགས་པ་ཐ་དད་པ་ཡོད་པ་ཉིད་དོ་སྙམ་དུ་དོགས་པ་བསུ་ནས་གང་ལས་ཞེས་གསུངས་ཏེ། འདས་པའི་ཁྱད་པར་ལའོ། །གཉི་གའི་ཐུན་མོང་ཡིན་པའི་ཕྱིར་ན་ཐེ་ཚོམ་ཉིད་དུ་འགྱུར་རོ་ཞེས་ཁས་ལེན་པའི་དོགས་པ་བསུ་བ་ནི། ཐེ་ཚོམ་ཟ་བ་ཞེས་བྱ་བ་སྟེ། ཇི་ཞིག་པའམ་འོན་ཏེ་མ་ཞིག་པ་ལ་ཡིན་ཏེ་དེ་ལྟ་བུའི་རང་བཞིན་དུའོ། །དེ་ལ་དངོས་པོ་འཛིན་པར་མི་འཐད་དོ་ཞེས་ལན་འདེབས་པ་ནི། གལ་ཏེ་ཞེས་བྱ་བའོ། །དངོས་པོ་འཛིན་ཀྱང་འདྲ་བའི་རྒྱུ་མཚན་ཅན་གྱི་ཐེ་ཚོམ་དུ་འགྱུར་རོ་ཞེས་དོགས་པ་བསུ་བ་ནི་སྣང་ཡང་ཞེས་བྱ་བའོ། །འདྲ་བ་མེད་པའི་ཕྱིར་དེས་ཐེ་ཚོམ་མེད་པ་མ་ཡིན་ནོ་ཞེས་ལན་འདེབས་པ་ནི་གལ་ཏེ་ཞེས་བྱ་བའོ། །དེ་ཉིད་དུ་ཞེས་བྱ་བའོ། །ཐ་དད་པར་མཚོན་པ་འདྲ་བའི་རྒྱུ་མཚན་ཡིན་པའི་དོགས་པ་བསུ་བ་ནི་ཅི་སྟེ་དུས་ཞེས་བྱ་བའོ། །ཐ་དད་པར་བསྒྲུབ་པར་བྱ་བ་དུས་ཐ་དད་པར་ནི་མ་ངེས་པ་ཡིན་ནོ་ཞེས་ལན་འདེབས་པ་ནི་དེ་ཡང་ཞེས་བྱ་བའོ། །དེ་ལས་ཞེས་བྱ་བ་ནི་དུས་ཐ་དད་ལས་སོ། །དེ་དང་གཞན་ནི་དོན་ཡོད་པ་ཉིད་དང་དོན་མེད་པ་ཉིད་དོ། །ཅིའི་ཕྱིར་ཞེ་ན་དོན་ཡོད་ཉིད་ལའང་ཞེས་གསུངས་སོ། །ཅི་སྟེ་དེ་ལྟར་གྲུབ་པར་ཡོད་སྙམ་ན་ཇི་ལྟར་ཁྱེད་ཀྱི་ཞེས་བྱ་བའོ། །གང་རྗེས་སུ་དཔག་པ་ཡིན་པ་དེ་ནི་བདེན་པའི་དོན་ཅན་ཡིན་ཏེ། དཔེར་ན་རྗེས་སུ་དཔོག་པ་བཞིན་ནོ། །སྒྲའི་ཤེས་པ་ཡང་རྗེས་སུ་དཔོག་པ་ཡིན་ནོ་ཞེས་པའི་དོགས་པ་བསུ་བ་ནི་འོན་ཏེ་ཞེས་བྱ་བའོ། །དོན་ཡོད་པ་ཉིད་མ་ཡིན་ནོ། །ཅིའི་ཕྱིར་ཞེ་ན་རྗེས་སུ་དཔག་པ་ཡང་ཞེས་གསུངས་སོ། །འདི་ནི་ཐུན་མོང་གི་མ་ངེས་
པ་ཡིན་ནོ་ཞེས་བྱ་བའི་དོན་ཏོ། །རྟགས་ཀྱི་ཁྱད་པར་ལས་བདེན་པའི་དོན་ཅན་དང་ཅིག་ཤོས་ཀྱི་རྣམ་པར་དབྱེ་བ་དོགས་པར་བྱེད་པ་ནི་རྟགས་ཀྱི་ཁྱད་པར་ལས་ཞེས་བྱ་བའོ། །འདི་ཉིད་རྣམ་པར་འབྲེལ་པ་ནི་འདི་ལྟར་ཞེས་བྱ་བའོ། །རྟགས་ལས་ཞེས་བྱ་བ་ནི་ཐལ་བ་དང་དུ་བ་ལ་སོགས་པ་ལས་སོ། །དངོས་པོའི་ཡུལ་ཅན་ཉིད་མ་ཡིན་པའི་ཕྱིར་ན་མཚུངས་པ་ཁོ་ནའོ་ཞེས་ལན་འདེབས་པ་ནི་དེ་ཡང་ཞེས་བྱ་བའོ། །དེ་ནི་ཞེས་བྱ་བ་ནི་རྗེས་སུ་དཔག་པའི་བློའོ། །དངོས་ལ་ཞེས་བྱ་བ་ནི་དངོས་པོའི་ཡུལ་ལའོ། །དེའི་ཚེ་ལོ་མ་ལས་བྱུང་བ་དང༌། རྩ་བ་ལས་བྱུང་བ་ལ་སོགས་པའི་རྣམ་པ་གཞན་ལ་ཐེ་ཚོམ་མེད་པར་འགྱུར། ཅིའི་ཕྱིར་ཞེ་ན། རྣམ་པ་ཐམས་ཅད་ཅེས་སྨོས་སོ། །གང་གི་ཕྱིར་དེ་ལྟར་དངོས་པོའི་ཡུལ་ཅན་ཉིད་ཡིན་གྱི་ཐེ་ཚོམ་མེད་པར་འགྱུར་བ་དེའི་ཕྱིར་རྗེས་སུ་དཔག་པ་དེ་ལ་ཡང༌། མེ་ལ་སོགས་པའི་རྣམ་པ་དངོས་པོ་མེད་པ་ཡིན་ནོ་ཞེས་བྱ་བར་རིགས་སོ། །ཇི་ལྟར་ཞེ་ན། བཤད་པ་ལོ་མ་ལས་བྱུང་བ་ལ་སོགས་པའི་རང་བཞིན་དུ་ཐེ་ཚོམ་གྱི་ཡུལ་ཡིན་པའི་ཕྱིར་རོ། །དཔེ་ནི་སྒྲའི་རྣམ་པ་བཞིན་ནོ་ཞེས་བྱ་བའོ། །དཔེར་ན་སྒྲ་ལས་བྱུང་བའི་རྟོགས་པ་མ་ལུས་པ་ལ་སོགས་པའི་རྣམ་པ་གང་ཡིན་པ་དེ་ནི་དཀར་པོ་ལ་སོགས་པའི་ངོ་བོར་ཐེ་ཚོམ་ཟ་བའི་ཕྱིར་དངོས་པོ་མ་ཡིན་པ་དེ་བཞིན་ནོ། །གལ་ཏེ་རྣམ་པ་ཐམས་ཅད་གཟུང་བ་ལ་ཡང་ཇི་ལྟར་ཐེ་ཚོམ་དུ་མི་འགྱུར་ཞེས་དོགས་ན། རྟོགས་པ་ཉིད་ལ་ནི་ཞེས་གསུངས་སོ། །གལ་ཏེ་གཟུང་བ་ཡང་མངོན་སུམ་ལྟར་ཆ་འགའ་ཞིག་ལ་ངེས་པ་མེད་པའི་ཕྱིར་མ་བཟུང་བར་མངོན་པར་རློམ་པ་ཡིན་ནོ་སྙམ་པ་ནི། རྣམ་པ་གཞན་ལས་ཞེས་བྱ་བའོ། །ངེས་པའི་བདག་ཉིད་ཅན་གྱི་རྗེས་སུ་དཔག་པ་ལ་ནི་མངོན་སུམ་གྱི་ཚུལ་ཡོད་པ་མ་ཡིན་ནོ་ཞེས་ལན་འདེབས་པ་ནི། ཐེ་ཚོམ་གྱི་རྣམ་པ་གཞན་གང་ཡིན་པ་དེར་ནིའོ། །དེ་ལྟ་མིན་ཞེས་བྱ་བ་ནི་མ་རྟོགས་པའོ། །དེ་ལྟར་རྣམ་པར་རྟོག་ནས་རིམ་བཞིན་སེལ་བ་ནི་གལ་ཏེ་ཞེས་བྱ་བའོ། །གཞན་དུ་ཞེས་བྱ་བ་ནི་མ་རྟོགས་པ་ཐེ་ཚོམ་ག་ལས་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །གལ་ཏེ་ཞེས་བྱ་བ་ནི་འཆད་པའོ། །དེ་ལ་ཞེས་བྱ་བ་ནི་མ་རྟོགས་པའི་རྣམ་པ་གཞན་ལའོ། །གལ་ཏེ་འདི་ལ་ཐེ་ཚོམ་ཟ་ན་སྐྱོན་ཅི་ཡོད་སྙམ་དུ་དོགས་ན། གལ་ཏེ་མ་རྟོགས་པ་ཉིད་ལ་ཞེས་བྱ་བའོ། །ཐེ་ཚོམ་ནི་ཐེ་ཚོམ་གྱི་ཡུལ་ལ་བྱའོ། །མི་སྣང་བ་ཞེས་བྱ་བ་ནི་སྣང་བ་
ཉམས་པ་ཙམ་ལའོ། །གལ་ཏེ་ཞེས་བྱ་བ་ནི་དོགས་པ་བསུ་བ་སྟེ། མི་རྟོགས་པ་ཉིད་ལའོ། །གང་གིས་ཧ་ཅང་ཐལ་བར་འགྱུར་བ་ལ་རྟོགས་པ་ལ་ནི་མ་ཡིན་ནོ། །གཡོ་བ་དང་མི་གཡོ་བ་ལ་ནི་རྩྭ་ལས་བྱུང་བའམ་ལོ་མ་ལས་བྱུང་བ་ཞེས་བྱ་བ་སྟེ་དེ་ལྟ་བུའི་རང་བཞིན་ཅན་ནོ། །གཞན་ཞེས་བྱ་བ་རྗེས་སུ་དཔག་པའི་རྫས་ལས་བྱུང་བ་ལའོ། །གལ་ཏེ་རྟོགས་ན་ཞེས་བྱ་བ་ནི་ལན་ཏེ། རྗེས་སུ་དཔག་པ་རྩྭ་ལས་བྱུང་བ་ལ་སོགས་པ་ངེས་ནའོ། །གཞན་ཡང་ཞེས་བྱ་བ་ལ་སོགས་པ་ནི་རྣམ་པར་རྟོག་པ་གཉིས་བྱས་ནས་དང་པོ་སེལ་བ་ན། རྣམ་པར་རྟོག་པའི་རང་གི་ངོ་བོ་ཞེས་བྱ་བའོ། །གཞལ་བྱ་རྩྭ་ལས་བྱུང་བ་ལ་སོགས་པ་ལ་ཐེ་ཚོམ་ཟ་བར་མི་འགྱུར་ཏེ། ངེས་པ་ཉིད་ཀྱིས་གཡོ་བ་མེད་པའི་ཕྱིར་རོ། །གཉིས་པ་སེལ་བ་ནི་འོན་ཏེ་ཞེས་བྱ་བའོ། །འོན་ཏེ་འདི་ལས་ཞེས་བྱ་བ་ནི་སྣང་བའོ། །གལ་ཏེ་གང་གི་ཧ་ཅང་ཐལ་བར་འགྱུར་བ་ལ་མཐོང་བ་ཙམ་ལ་ནི་ཐེ་ཚོམ་ཟ་བ་མ་ཡིན་ནོ། །འོན་ཀྱང་སྤྱིར་ཆོས་ཅན་མཐོང་ལ། དེའི་ཁྱད་པར་ནི་མ་མཐོང་བ་ལ་དེ་མཐོང་བར་འདོད་པ་ཐེ་ཚོམ་དུ་འགྱུར་བ་ལ་མཐོང་བ་ཡིན་ནོ་ཞེས་བརྗོད་པ་ནི། གལ་ཏེ་སྤྱི་ཞེས་བྱ་བའོ། །ཁྱད་པར་མངོན་སུམ་མ་ཡིན་པའི་ཕྱིར་ཞེས་བྱ་བ་འདིའི་དོན་འདྲི་བ་ནི་ཁྱད་པར་མངོན་སུམ་ནི་གང་དེའི་ཞེས་བྱ་བའོ། །མངོན་སུམ་ལས་གཞན་པའི་མངོན་སུམ་མ་པ་ཡིན་པ་དྲན་པའི་ཤེས་པའམ། མངོན་སུམ་བཀག་པ་ཙམ་ཞིག་ཡིན་པར་འགྱུར། དེ་ལ་དྲན་པའི་ཤེས་པའང་ཁྱད་པར་གྱི་རང་གི་ངོ་བོ་ལ་དམིགས་པ་ཡིན་པ་དེས་ན་ཇི་ལྟར་ཐེ་ཚོམ་དུ་འགྱུར། མེད་བར་དགག་པ་ནི་མ་མཐོང་ཙམ་གྱི་ཐེ་ཚོམ་དུ་འགྱུར་རོ་ཞེས་བཤད་ཟིན་ཏོ་ཞེས་བརྗོད་པ་ནི་མེད་པ་མ་ཡིན་པ་དག་ལས་ཞེས་བྱ་བའོ། །གལ་ཏེ་ཁྱད་པར་དྲན་པ་ནི་དམིགས་པ་དང་བཅས་པ་ཉིད་དུ། མ་ངེས་པའི་ཕྱིར་ཐེ་ཚོམ་ཟ་བ་ཡིན་ནོ་ཞེས་དོགས་པ་བསུ་བ་ནི། འོན་ཏེ་ཅི་ཞེས་བྱ་བའོ། །དེའི་ཕྱིར་ཞེས་བྱ་བ་ནི་དམིགས་པ་དང་བཅས་པ་ཉིད་དུ་མ་ངེས་པའི་ཕྱིར་རོ། །དེ་ལ་ཡང་ཞེས་བྱ་བ་ནི་ཁྱད་པར་དྲན་པ་ལ་ཡང་ངོ༌། །འདི་ལ་ཉེས་པ་ཡང་སྔ་མ་བཞིན་ནོ་ཞེས་བྱ་བའི་དོན་ཏོ། །སྣང་བ་གཉིས་ཀའི་ཐུན་མོང་ཡིན་པའི་ཕྱིར་ཐེ་ཚོམ་ཟའོ་ཞེས་དོགས་པ་བསུ་བ་ནི་ཅི་སྟེ་དེ་ནི་སྟེ་དེ་ནི་ཞེས་བྱ་བ་སྟེ། རིགས་པ་གཞན་དེ་ནིའོ། །བཟློག་པར་ཡང་ནི་དམིགས་པ་དང་བཅས་པར་རོ། །དོན་དང་དོན་མ་
ཡིན་པ་ཐུན་མོང་བའི་སྣང་བ་ནི་དོན་མ་ཡིན་ནོ་ཞེས་ལན་འདེབས་པ་ནི་འོ་ན་ནི་ཞེས་བྱ་བའོ། །མ་ཡིན་པས་དྲན་པ་ཐེ་ཚོམ་གྱི་རྒྱུ་མཚན་ཡིན་ན་སྤྱི་མངོན་སུམ་ཡིན་པའི་ཕྱིར་རོ་ཞེས་མངོན་སུམ་ཁྱད་པར་དུ་མི་རིགས་སོ་ཞེས་བྱ་བའོ། །ཁྱད་པར་གང་ལས་ཞེས་བྱ་བ་ནི་སྡོང་གྲུ་ལ་སོགས་པ་ལའོ། །དེ་ཉིད་ཡིན་ནམ་ཞེས་བྱ་བ་ནི་སྣང་བཞིན་པ་འབྲེལ་པའི་སྤྱིའོ། །གཞན་ཡིན་ཞེས་བྱ་བ་ནི་འགྲེང་བ་ལས་གཞན་པའོ། །དེ་ཉིད་ཀྱི་རང་བཞིན་ཡིན་ནོ་ཞེ་ན་ཞེས་བྱ་བ་ནི་འགྲེང་བ་ཉིད་དོ། །ཇི་ལྟར་སྡོང་གྲུ་ལ་སོགས་པའི་སྣམ་བུ་མཐོང་བ་ལས་བུམ་པ་ཉིད་ལ་ཐེ་ཚོམ་དུ་འགྱུར་བ་ནི་མེད་དོ། །དེ་ལས་ཡང་ཞེས་བྱ་བ་ནི་དོགས་པའོ། །དེ་ཞེས་བྱ་བ་ནི་ཁྱད་པར་གྱི་རང་བཞིན་ནོ། །དེ་ཡང་རེ་རེ་པོ་ཉིད་ལའོ། །གལ་ཏེ་ཞེས་བྱ་བ་ནི་ལན་ནོ། །རེས་འགའ་ཞེས་བྱ་བ་ནི་དོགས་པའོ། །རེ་རེ་པོ་ཉིད་ཀྱི་སྤྱི་ལ་སྡོང་གྲུ་དང་སྐྱེས་པ་དག་ཅིག་ཅར་མེད་པས་ན་གང་རུང་ཞིག་མ་མཐོང་ངོ་ཞེས་བྱ་བའི་དོན་ཏོ། །གཞན་གྱི་ཚེ་ཞེས་བྱ་བ་ནི་ལན་ནོ། །དོགས་པ་ནི་གཉིས་ཀར་ཞེས་བྱ་བ་སྟེ། སྡོང་གྲུབ་དང་སྐྱེས་བུའི་བདག་ཉིད་དོ། །ལན་ནི་ཇི་ལྟར་ཞེས་བྱ་སྟེ་གཅིག་གི་ཚེ་གཉིས་ཀ་མཐོང་བ་མེད་དོ་ཞེས་བྱ་བའི་དོན་ཏོ། །དུས་ཀྱི་དབྱེ་བ་གཉིས་ཀར་མཐོང་བར་དོགས་པ་བསུ་བ་ནི་དུས་ཐ་དད་པར་འགྱུར་རོ་ཞེས་བྱ་བའོ། །ལན་ནི་དྲན་པ་ཡང་ཞེས་བྱ་བའོ། །དེ་ཁོ་ན་ལྟར་ཞེས་བྱ་བ་ནི་མཐོང་བ་ཉིད་ལས་མ་འདས་པར་རོ། །འདིར་ཞེས་བྱ་བ་ནི་གཞན་གྱིས་བརྗོད་པ་ནིའོ། །རེ་རེ་པོ་ཉིད་ལ་ནི་སྡོང་གྲུ་ཉིད་དང་སྐྱེས་བུ་ཉིད་སྔར་རིམ་གྱིས་མཐོང་བ་ལ། འདིར་ནི་ད་ལྟར་གཉི་ག་མི་མཐོང་བ་དེས་ན་ཐེ་ཚོམ་ཟ་བ་མ་ཡིན་ནོ་ཞེ་ན། གྲུབ་པའི་མཐའ་ནི་འོ་ན་ཞེས་བྱ་བའོ། །གལ་ཏེ་ཁྱོད་ཀྱི་ནི་ལུགས་ལ་ཡང༌། མཐོང་བ་དང་མ་མཐོང་བ་ལ་ཡང་ཐེ་ཚོམ་དུ་མི་འགྱུར་བ་ཞེས་བྱ་བའི་ཉེས་པར་ཇི་ལྟར་ཟེར་བའི་ཕྱིར་ཇི་ལྟར་ཉེས་པར་མི་འགྱུར་ཞེས་དོགས་པ་ལ། བག་ཆགས་ལས་དམིགས་པ་མེད་པའི་ཤེས་པ་རེས་འགའ་སྐྱེ་བ་ནི་ཐེ་ཚོམ་གྱི་རྒྱུ་ཡིན་ནོ་ཞེས་བརྗོད་པ་ནི་དེའི་ཕྱིར་ཞེས་བྱ་བ་སྟེ། དངོས་པོའི་རང་བཞིན་མ་མཐོང་བའི་ཕྱིར་རོ། །ཤེས་པ་ནི་འདི་འབྲང་བ་ཡིན་ནོ་ཞེས་བྱ་བར་ངེས་པའོ། །ཐེ་ཚོམ་ནི་སྡོང་གྲུ་འམ་སྐྱེས་བུ་ཞེས་བྱ་བ་དེ་ལྟ་བུའི་རང་བཞིན་ཅན་ནོ། །གལ་ཏེ་
སྤྱིའི་ཤེས་པ་དམིགས་པ་མེད་པ་ཉིད་ལ་ཡང་ཐེ་ཚོམ་གྱི་ཤེས་པ་ནི་དམིགས་པ་དང་བཅས་པ་ཉིད་མ་ཡིན་ནམ་ཞེས་དོགས་པ་བསུ་བ་ནི་ཅི་སྟེ་ཞེས་བྱ་བའོ། །ཐེ་ཚོམ་ཞེས་བྱ་བ་ནི་ཐེ་ཚོམ་གྱི་ཡུལ་ཡིན་པ་ནི་དེ་ལྟ་བུར་གྱུར་པ་ནི་གཉི་གའི་རྣམ་པར་གྱུར་པའོ། །མ་ཡིན་ཏེ་ཞེས་བྱ་བ་ནི་དགག་པའོ། །ཅིའི་ཕྱིར་ཞེ་ན། དོན་དུ་མོས་ཞེས་གསུངས་སོ། །མི་སླུ་བ་དང་བཅས་པ་དོན་དུ་མོས་པ་མེད་པའི་ཕྱིར་རོ། །འོ་ན་དེ་ལ་མོས་པ་ཅི་འདྲ་བ་བཞིན་ཡོད་སྙམ་ན་འདི་ནི་ཞེས་གསུངས་སོ། །འོ་ན་ཇི་ལྟར་འཇིག་རྟེན་ཡིན་པ་ཐེ་ཚོམ་གྱི་དོན་ཡིན་པར་འགྱུར་རོ་སྙམ་ན། འཇིག་རྟེན་པ་མ་ཡིན་པ་ཉིད་ཁས་ལེན་ན་ཤེས་པ་ཉིད་དུ་ཁས་བླངས་པར་འགྱུར་རོ་ཞེས་བརྗོད་ཟིན་ལ། དེ་ལྟ་ན་ཡང་དམིགས་པ་མེད་པ་ཉིད་དུ་གྲུབ་པོ་ཞེས་བྱ་བའི་དོན་ཏོ། །འདིའི་ཕྱིར་ཞེས་བྱ་བ་ནི་དམིགས་པ་མེད་པ་ཉིད་ཀྱི་ཕྱིར་རོ། །སྣང་བ་མེད་པས་ཞེས་བྱ་བ་ནི་ཁྱད་པར་གཉི་ག་གསལ་བ་མེད་པས་སོ། །མ་མཐོང་བ་ཉིད་འགའ་ཞིག་ལ་ཐེ་ཚོམ་ཟ་བ་ཡིན་ནོ་ཞེས་བྱ་བའི་དོན་ཏོ། །གཞན་ནི་མ་ཡིན་ནོ་ཞེས་བྱ་བ་ནི་དེ་སྣང་བ་ལས་ནི་མ་ཡིན་པའོ། །གང་གི་ཕྱིར་དེ་ལྟར་དངོས་པོའི་ཡུལ་ཉིད་ལ་ཐེ་ཚོམ་མི་སྲིད་པ་དེས་ནའོ། །རྗེས་སུ་དཔག་པའི་ཡུལ་དངོས་པོ་ཉིད་ཡིན་པར་དོགས་པ་བསུ་བ་ནི་འོན་ཏེ་རེ་ཞིག་ཅེས་བྱ་བའོ། །གལ་ཏེ་རྗེས་སུ་དཔག་པ་དངོས་པོ་རང་བཞིན་འཛིན་པ་ཡིན་པ་མངོན་སུམ་བཞིན་དུ་རྣམ་པ་བཞིན་དུ་རྟོགས་པ་ན་ཡང་མི་གཡོ་བར་འགྱུར་རོ། །སྔར་གྱི་རྟོགས་པའི་རྒྱུན་གཡོ་བ་མ་ཡིན་ལ། རྒྱུན་གཞན་དག་ཀྱང་འདོད་པས་འཇུག་པ་ཡིན་ནོ་ཞེས་བརྗོད་པ་ནི་འདི་ལ་བརྗོད་པ་ཞེས་བྱ་བའོ། །དེར་ནི་རྗེས་སུ་དཔག་པ་ལའོ། །མངོན་སུམ་ཡང་དེར་ཡང་གཡོ་བ་ཉིད་མཚུངས་སོ། །དེ་མེད་པའི་ཕྱིར་ནི་གཡོ་བ་མེད་པའི་ཕྱིར་རོ། །རྣམ་པར་རྟོག་པ་ཡོད་པ་ན་ཡང་རྒྱུ་ཡོད་ན་རང་གི་ངོ་བོ་འཛིན་པ་ལྡོག་པ་ཡིན་ནོ། །རྒྱུ་མེད་པའི་ཕྱིར་མ་སྐྱེས་པ་ནི་རྗེས་སུ་དཔག་པ་ལ་ཡང་མཚུངས་སོ་ཞེས་དོགས་པ་བསུ་བ་ནི། རྗེས་སུ་དཔག་པ་ལ་ཡང་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་བཏགས་པ་མེད་པ་མེས་མ་སྐྱེས་པ་ནའོ། །ཅིའི་ཕྱིར་ཞེ་ན་དེ་ནི་ཞེས་སྨོས་ཏེ། རྗེས་སུ་དཔག་པའོ། །གཡོ་བར་མཐོང་བའི་ཕྱིར་རོ་ཞེས་བྱ་བ་མེས་མ་སྐྱེས་པ་འབྲེལ་ཏོ། །གཞན་དུ་ཞེས་བྱ་བ་མེས་མ་སྐྱེས་པ་ཉིད་དུ་དོགས་
སོ། །གལ་ཏེ་གཞན་དུ་དོགས་པ་ན་རྟག་པ་རྒྱུ་ཉིད་མ་ཡིན་ཏེ། རྟགས་ཀྱི་བྱེད་པ་ནི་མེད་ན་མི་འབྱུང་བར་ངེས་པ་ཁོ་ན་ཡིན་ནོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །རྗེས་སུ་དཔག་པས་དངོས་པོའི་རང་བཞིན་མཐོང་བ་ནི་མེད་ན་མི་འབྱུང་བ་ཡང་ངེས་པ་ཁོ་ནའོ་ཞེས་འདོན་པ་དེ་ནི་མི་འཐད་དེ་ཞེས་བྱ་བའོ། །དེ་ཞེས་བྱ་བ་དངོས་པོའི་རང་བཞིན་ནོ། །གང་གི་ཕྱིར་དེ་ལྟར་དངོས་པོ་འཛིན་པ་ཡིན་ན་མི་གཡོ་བ་དེའི་ཕྱིར་དེ་ལས་ཞེས་བྱ་བ་ནི་རྗེས་སུ་དཔག་པ་ལས་སོ། །ཅི་སྟེ་དངོས་པོ་འཛིན་པ་ཡིན་ཡང་གཞན་གྱི་ཉེ་བར་བསྟན་པ་ལས་གཡོ་བར་འགྱུར་སྙམ་དུ་དོགས་ན། མཐོང་བ་ཉིད་ནི་ཞེས་གསུངས་སོ། །རྗེས་སུ་དཔག་པའི་ཤེས་པའོ། །མཐོང་བ་ཉིད་གཡོ་བ་མ་ཡིན་ནོ་ཞེས་བྱ་བ་སྟེ་གང་དུ་གྲུབ་སྙམ་ན། དཔེ་གསུངས་པ་ནི་མངོན་སུམ་ལ་ནི་ཞེས་གསུངས་ཏེ། རང་གི་རང་བཞིན་འཛིན་པའི་བདག་ཉིད་ཅན་ལའོ། །གལ་ཏེ་ཐག་རིང་པོ་ནས་མཐོང་བ་ནི་འདི་ནི་མེ་མ་ཡིན་ནོ་ཞེས་བྱ་བར་གཡོ་བ་མེད་པ་ཉིད་མ་ཡིན་ནམ་ཞེས་དོགས་པ་བསུ་བ་ནས། གཡོ་བ་ཡིན་ན་ཞེས་གསུངས་སོ། །གཡོ་བ་ནི་རེག་བྱ་ལ་སོགས་པ་ཡིན་ན། དེ་ལ་ནི་མཐོང་བ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །མངོན་སུམ་ལ་ནི་གཡོ་བ་མེད། །ཅེས་བྱ་བ་དེ་ཉིད་འཆད་པ་ནི་མཐོང་བའི་དོན་གང་ཡིན་པ་ཞེས་བྱ་བའོ། །གཡོ་བ་ཡིན་ཞེས་བྱ་བ་སྟེ། འཆད་པ་ནི་ཅི་སྟེ་ཡང་ཞེས་བྱ་བའོ། །མཐོང་བ་ཡིན་ཞེས་བྱ་བ་དེ་ནི་རྣམ་པར་འབྲེལ་པ་ན་ལན་འདེབས་པར་ནི་ཞེས་བྱ་བའོ། །ཅིའི་ཕྱིར་སྙམ་ན་མིག་གིས་རེག་པ་ཞེས་གསུངས་སོ། །འབྱུང་བར་འགྱུར་བ་ཡང་མངོན་སུམ་གྱི་ཡུལ་མ་མ་ཡིན་ནོ་ཞེས་བཤད་པ་ནི། འབྱུང་འགྱུར་རང་བཞིན་ཞེས་བྱ་བའོ། །དེས་ན་རང་གི་ངོ་བོ་མ་མཐོང་བ་ཉིད་གཡོ་བ་ཡིན་ནོ་ཞེས་བྱ་བའི་དོན་ཏོ། །འདི་ཉིད་བསྒྲུབ་པའི་དོན་དུ་རྣམ་པར་རྟོག་པར་བྱེད་པ་ནི་ཅི་འདི་ཞེས་བྱ་བའོ། །དང་པོ་སེལ་བ་ནི་འདི་ཞེས་བྱ་བའོ། །གཉིས་པ་སེལ་བ་ནི་འོན་ཏེ་གཟུགས་ཞེས་བྱ་བའོ། །དེ་ཞེས་བྱ་བ་ནི་ཚོགས་པའོ། །དེས་ན་ཞེས་བྱ་བ་ནི་མ་བཟུང་བ་ནའོ། །མ་མཐོང་བ་ཁོ་ནའོ་ཞེས་བྱ་བ་ནི་གཟུགས་ལ་སོགས་པའི་ཚོགས་པའོ། །དེའི་ཕྱིར་ཞེས་བྱ་བ་ནི་མཐོང་བའི་ཕྱིར་རོ། །མ་མཐོང་བ་ཁོ་ནའོ་ཞེས་བྱ་བ་ནི་སྣང་བཞིན་པ་ཉིད་ལ་ནི་གཡོ་བ་ཡོད་བ་མ་
ཡིན་ཏེ། མངོན་སུམ་དང་འགལ་བའི་ཕྱིར་རོ་ཞེས་བྱ་བའི་དོན་ཏོ། །གསུམ་པ་ལ་ཡང་འདི་ཉིད་སྦྱོར་བར་བྱེད་པ་ནི་གང་གི་ཕྱིར་མཐོང་བ་གཡོ་བ་མ་ཡིན་པའི་ཕྱིར་རོ། །རྣམ་པར་རྟོག་པ་ཞེས་བྱ་བ་ནི་རྩ་བ་ལས་བྱུང་བ་འམ་ལོ་མ་ལས་བྱུང་བ་ཞེས་བྱ་བ་དེ་ལྟ་བུ་རང་བཞིན་གྱི་ཐེ་ཚོམ་མོ། །ཐེ་ཚོམ་ཡང་ཡོད་དེ་དེས་ནའོ། །མཐོང་བ་ལ་ཡང་གཡོ་བ་ཡོད་པར་དོགས་པ་བསུ་བ་ནི་གལ་ཏེ་ཞེས་བྱ་བའོ། །རྣམ་པ་གཞན་གྱི་ཞེས་བྱ་བ་ནི་སྐད་ཅིག་ཉིད་དམ་ཐག་རིང་ནས་ཁྱད་པར་ལའོ། །དཔག་བྱ་ལ་ཞེས་བྱ་བ་ནི་མངོན་སུམ་གྱི་མ་ངེས་པའི་སྐད་ཅིག་མ་ཉིད་ནི་རྗེས་སུ་དཔག་པས་ངེས་པ་ཁོ་ནས་ཡིན་ལ། ཐག་རིང་པོ་ནས་ཁྱད་པར་གྱི་ཆ་མ་མཐོང་བ་ལ་ཡང་ངོ༌། །འོག་གི་ཆ་ལ་སོགས་པ་འགའ་ཞིག་ནི་མཐོང་བ་ཡིན་ཡང་རྗེས་སུ་དཔག་པ་ཁོ་ནས་ཡིན་ཏེ། དངོས་པོ་ནི་དུ་མ་ཉིད་ཡིན་པའི་ཕྱིར་རོ། །གལ་ཏེ་མཐོང་བ་དང་རྗེས་སུ་དཔག་པར་བྱ་བ་དག་ཐ་མི་དད་པའི་ཕྱིར་ན། དེ་ལ་ཐེ་ཚོམ་ཡིན་ན་ནི་མཐོང་བ་ལ་ཡང་འགྱུར་རོ་ཞེས་དོགས་ན། མཐོང་བ་ཉིད་དཔག་བྱ་ཡིན་ཞེས་གསུངས་སོ། །དེ་གཉིས་ནི་གཅིག་ཉིད་མ་ཡིན་ནོ་ཞེས་བྱ་བའི་དོན་ཏོ། །སྣང་བཞིན་པའི་སྐད་ཅིག་མ་ཉིད་ནི་གཡོ་བ་མ་ཡིན་མོད་ཀྱི་མི་གསལ་བས་ན་རྗེས་སུ་མཐུན་པའི་རྣམ་པར་རྟོག་པ་མེད་པ་འབའ་ཞིག་ཏུ་ཟད་དོ། །དེ་བས་ན་མཐོང་བས་ནི་གཡོ་བ་མ་ཡིན་ནོ་ཞེས་རྣམ་པར་གནས་པ་ཡིན་ནོ། །གལ་ཏེ་དོན་བཞིན་དུ་སྣང་བ་ལ་ཡང་རྗེས་སུ་དཔག་པ་ཇི་ལྟར་མི་གཡོ་སྙམ་ན་སྣང་བ་ལ་ནི་ཞེས་གསུངས་སོ། །མངོན་སུམ་ཉིད་དུ་ཡང་མཚུངས་པ་མེད་པ་འབའ་ཞིག་ཏུ་ཟད་དོ། །དེ་བས་ན་གཡོ་བ་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཇི་ལྟར་མངོན་སུམ་དང་རྗེས་སུ་དཔག་པ་དག་ཐ་དད་ཅེ་ན། ཕྱི་རོལ་གྱི་དངོས་པོ་ལ་ལྟོས་ནས་ཞེས་གསུངས་སོ། །མངོན་སུམ་དང་དེར་སྣང་བ་ཉིད་ཀྱིས་ཐ་དད་པ་ཡང་ཕྱིའི་དངོས་པོ་ལ་ལྟོས་པ་ཁོ་ན་ཡིན་ནོ་ཞེས་བརྗོད་པ་ནི་དེས་ན་ཞེས་བྱ་བ་སྟེ་གསལ་བའི་རང་བཞིན་གྱིས་སོ། །འགའ་ཞིག་ཅེས་བྱ་བར་རབ་རིབ་ཅན་ལ་སོགས་པའི་སྣང་བ་དང་རྗེས་སུ་དཔག་པ་ཉིད་ཀྱང་མངོན་སུམ་ལྟར་སྣང་བ་ཉིད་ཡིན་ཏེ། མངོན་སུམ་དང་རྗེས་སུ་དཔག་པ་ལ་སོགས་པའི་དབྱེ་བ་རྣམ་པར་རིག་པ་ལ་ལྟོས་པ་ནི་མ་ཡིན་ནོ་ཞེས་བྱ་བའི་དོན་ཏེ། དེའི་ཕྱིར་མངོན་སུམ་བཞིན་དུ་རྗེས་
སུ་དཔག་པ་ནི་དངོས་པོའི་རང་བཞིན་སྣང་བ་མ་ཡིན་ནོ། །ཡང་ན་དེ་སྣང་བ་ཡིན་དུ་ཟིན་ཀྱང་དེ་ཙམ་གྱིས་ན་འབྱུང་བར་འགྱུར་བའི་རང་བཞིན་ལ་མི་སླུ་བ་མེད་ན་ཚད་མ་མ་ཡིན་ཏེ་རབ་རིབ་ལས་བྱུང་བ་བཞིན་ནོ་ཞེས་བརྗོད་པ་ནི་ཡང་ན་ཞེས་བྱ་བའོ། །རྗེས་སུ་དཔག་པ་དེ་བདེན་པ་ཉིད་དུ་ཇི་ལྟར་འགྱུར་བ་ཁོ་ནའོ། །གཞན་གྱིས་འགྱུར་ཏེ་ཞེས་སྨྲས་ཏེ་བདེན་པར་ཞེས་འབྲེལ་ཏོ། །ཅིའི་ཕྱིར་ཞེ་ན། དེ་ནི་ཞེས་བྱ་བ་སྨོས་ཏེ་རྗེས་སུ་དཔག་པ་དེ་ནིའོ། །རྟོགས་པའི་ཕྱིར་རོ་ཞེས་བྱ་བ་ནི་མངོན་སུམ་གྱིས་སོ། །གལ་ཏེ་ཞེས་བྱ་བ་ནི་གྲུབ་པའི་མཐའོ། །དེ་ལ་ཞེས་བྱ་བ་ནི་སྐྱེས་བུ་གཞན་གྱིས་ཤེས་པས་སོ། །འབྱུང་བར་འགྱུར་བའི་རང་བཞིན་དུ་ཞེས་བྱ་བ་ནི་ད་ལྟར་བ་ནི་རབ་རིབ་ལས་བྱུང་བ་ཡང་ཡོད་པའི་ཕྱིར་རོ། །དེ་ཞེས་བྱ་བ་ནི་སྐྱེས་བུ་གཞན་གྱིས་ཤེས་པའོ། །དེ་ཉིད་ཀྱི་ཕྱིར་རབ་རིབ་ཅན་གྱི་ཞེས་གསུངས་སོ། །མི་བདེན་པ་ཁོ་ནར་འགྱུར་རོ་ཞེས་བྱ་བ་ནི་སྐྱེས་བུ་གཞན་གྱི་མངོན་སུམ་མོ། །དེའི་ཕྱིར་སྐྱེས་བུ་གཞན་གྱིས་ཀྱང་འབྱུང་བར་འགྱུར་བའི་རང་བཞིན་ཉིད་དུ་རྟོགས་པར་བྱ་བ་ཡིན་ཏེ། རང་བཞིན་དེ་ལ་ནི་མངོན་སུམ་མ་ཡིན་ནོ། །དེས་ན་སྐྱེས་བུ་གཞན་གྱིས་འབྱུང་བར་འགྱུར་བ་རྟོགས་པ་ཡང་རྗེས་སུ་དཔག་པ་ཉིད་ཡིན་པས་ཇི་ལྟར་མ་གྲུབ་པ་ཉིད་ཀྱིས་མ་གྲུབ་པ་སྒྲུབ་པ་དེའི་ཕྱིར་སྐྱེས་བུ་གཞན་གྱིས་ཤེས་པ་ལས་ནི་ཡུལ་དང་བཅས་པ་ཉིད་མ་ཡིན་ཏེ། དེས་ན་རབ་རིབ་ཅན་གྱིས་ཤེས་པ་བཞིན་དུ་ཡུལ་མེད་པ་ཁོ་ནར་འགྱུར་རོ། །འོ་ན་དེ་མ་འོངས་པའི་རང་བཞིན་གྱི་ཡུལ་ཅན་ཉིད་ཡིན་པས་ན། ཇི་ལྟར་ཡུལ་མེད་པར་འགྱུར་སྙམ་ན། འབྱུང་བར་འགྱུར་བའི་རང་བཞིན་སྲིད་པ་ཡིན་ཡང་ཞེས་གསུངས་སོ། །འོན་ཏེ་དེ་སྲིད་པ་ནི་ཡོད་པ་ཁོ་ནའོ་ཞེ་ན། དེ་ནི་དེའི་ཚེ་ཞེས་གསུངས་སོ། །དེ་ནི་ཞེས་བྱ་བ་ནི་མ་འོངས་པའོ། །དངོས་པོའི་ཡུལ་ཅན་ནི་དངོས་པོ་སྣང་བའོ། །གལ་ཏེ་དེ་ལྟར་རྗེས་སུ་དཔག་པ་ཡུལ་མེད་པ་ཡིན་ནམ་མངོན་སུམ་ཡང་དེ་བཞིན་དུ་འགྱུར་རོ་ཞེས་དོགས་པ་བསུ་བ་ནི་མངོན་སུམ་ཡང་ཞེས་བྱ་བའོ། །དེ་ཉིད་ལ་ནི་འབྱུང་བར་འགྱུར་བ་ལའོ། །འདི་ག་ལས་ཤེ་ན་འདི་ལྟར་དེ་ལས་ཞེས་གསུངས་སོ། །དེ་ལྟ་མ་ཡིན་ན་ཞེས་བྱ་བ་ནི་ད་ལྟར་བའི་རང་བཞིན་རྟོགས་པས་སོ། །དེ་ནི་ཞེས་བྱ་བ་ནི་ལན་ནོ། །དེས་ན་
ཞེས་བྱ་བ་ནི་དངོས་པོའི་རང་བཞིན་མི་སྣང་བས་སོ། །མེད་པ་ལ་ཡང་ཞེས་བྱ་བ་ནི་དངོས་པོའི་རང་བཞིན་མ་ཡིན་པ་འཛིན་པར་མཚུངས་པའོ། །མངོན་སུམ་གྱི་བློ་ཡང་དེ་ལྟ་བུ་ཉིད་ཡིན་ནམ་ཅི་སྙམ་ན། མངོན་སུམ་གྱི་བློ་ནི་ཞེས་གསུངས་སོ། །དངོས་པོ་མེད་པ་ལ་མི་འབྱུང་བ་ཞེས་བྱ་བ་ནི་དངོས་པོ་འཛིན་པ་ཞེས་བྱ་བའི་དོན་ཏོ། །དངོས་པོ་མེད་པའི་ཡུལ་ཅན་ཁོ་ན་གཙོ་བོ་མ་ཡིན་པའི་མཚན་ཉིད་ཅེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །རྗེས་སུ་དཔག་པ་ཐམས་ཅད་བཏགས་པར་འགྱུར་རོ་ཞེས་ལན་འདེབས་པ་ནི་རྗེས་སུ་དཔག་པ་ཞེས་བྱ་བའོ། །འདི་ནི་ཞེས་བྱ་བ་ནི་དངོས་པོ་མེད་པའི་ཡུལ་ཅན་ནོ། །ཅིའི་ཕྱིར་ཞེ་ན་ཕྱིན་ཅི་ལོག་ཏུ་ཞེས་གསུངས་སོ། །དངོས་པོའི་ཡུལ་ཅན་ཡང་དངོས་པོ་མ་ཡིན་པ་དང་དངོས་པོའི་ཡུལ་ཅན་ཡང་དངོས་སུ་མཐོང་བའི་ཕྱིར་རོ། །ཕྱིན་ཅི་ལོག་ཏུ་མཐོང་བ་ཉིད་གསལ་བར་བྱེད་པས་ཡོད་པ་དང་མེད་པའི་ཡུལ་ཅན་ཉིད་ནི་བཏགས་པ་དང་དངོས་པོ་ཉིད་ཀྱི་མཚན་ཉིད་མ་ཡིན་གྱི། འོན་ཀྱང་འཁྲུལ་པ་དང་མ་འཁྲུལ་པའི་རྟོགས་པའི་ཡུལ་ཉིད་དེ། དེ་ལྟ་བུ་ཁོ་ནར་འཇིག་རྟེན་པས་རྟོགས་པའི་ཕྱིར་རོ་ཞེས་བརྗོད་པ་ནི་འདི་ལྟར་ཞེས་བྱ་བའོ། །ཇི་ལྟར་ཞེས་བྱ་བ་ནི་དཔེའོ། །མེད་པ་སྨྲ་བས་ན་མེད་པ་བརྗོད་དེ། གཙོ་བོ་ལ་སོགས་པའི་མཉན་པོའོ། །ཁྱོད་ཀྱིས་འདོད་པ་ནི་གཙོ་བོ་ལ་སོགས་པ་དངོས་པོ་མ་ཡིན་ཏེ། ཚད་མས་གནོད་པའི་ཕྱིར་རོ། །མེད་པ་རྗོད་པར་བྱེད་པའི་མཉན་པ་དེ་ནི་གྲངས་ཅན་གྱི་སྐྱེས་བུ་ཞེས་ནུས་པ་མེད་པའི་དངོས་པོ་ལ་ཡང་བྱེད་ལ་གཙོ་བོའི་སྒྲ་ནི་འབྲས་བུ་དུ་མ་ནུས་པ་ལ་ཡང་བྱེད་པ་ཡིན་ནོ། །དེས་ནི་འབྲས་བུ་དུ་མ་རུང་བ་ཉིད་དུ་ཁས་བླངས་པ་ཡིན་ཏེ། དེས་ན་ཡོད་པའི་ཡུལ་ཅན་ཡིན་ཡང་ཉེ་བར་བཏགས་པ་ཉིད་ཡིན་ནོ། །མེད་བའི་ཡུལ་ཅན་ལ་ཡང་དངོས་པོ་ཉིད་ཡིན་པར་བརྗོད་པ་ནི་རྟོགས་པ་ཅི་བཞིན་ཉིད་ཅེས་བྱ་བའོ། །གྲངས་ཅན་གྱི་རྟོགས་པ་དང་རྗེས་སུ་མཐུན་པའི་དངོས་པོ་མེད་ཀྱང་གཙོ་བོ་ལ་སོགས་པའི་མཉན་པར་བྱེད་པ་བཞིན་ཞེས་འབྲེལ་ཏོ། །འཇིག་རྟེན་ནི་ཁྱོད་ཀྱི་འདོད་པ་དང་མི་མཐུན་པར་མཐོང་ངོ་ཞེས་བྱ་བའི་དོན་ཏོ། །ཁྱོད་ཀྱི་འདོད་པས་གྲངས་ཅན་གྱི་སྐྱེས་བུ་ལ་སོགས་པའི་སྒྲ་ཕལ་བ་ཡིན་ནོ་ཞེས་འབྲེལ་ཏོ། །ཇི་ལྟར་ཞེ་ན་དེ་དག་གི་ཞེས་སྨོས་ཏེ། གཙོ་བོ་ལ་སོགས་པ་དག་ནི་ཐལ་བ་
དག་གི་བཟློག་པ་བརྗོད་པ་ནི། དེ་ལྟ་ཡང་མ་ཡིན་ནོ་ཞེའོ། །གལ་ཏེ་བུ་ལ་སོགས་པ་དག་ལ་ནིའོ། །ལྷག་པར་སྒྲོ་བཏགས་ན་གཙོ་བོ་དང་སྐྱེས་བུ་ལ་སོགས་པའི་སྒྲ་རྣམས་འཇུག་པས་ན་དངོས་པོ་མ་ཡིན་ནོ་ཞེས་དོགས་པ་བསུ་བ་ནི་ཅི་སྟེ་གཞན་ཞེས་བྱ་བའོ། །འོན་ཏེ་ཞེས་བྱ་བ་ནི་དངོས་པོ་མ་ཡིན་པ་ཉིད་ཡིན་ལ་ལྷག་པར་སྒྲོ་མ་བཏགས་པར་འཇུག་པ་ནི་དངོས་པོ་མཚན་ཉིད་ཐལ་ལོ་ཞེས་བྱ་བའི་དོན་ཏོ། །གལ་ཏེ་དངོས་པོ་ལ་ཡང་གཙོ་བོ་ལ་སོགས་པ་ལྷག་པར་སྒྲོ་བཏགས་པ་ནི་མེད་པའི་ཡུལ་ཅན་ཉིད། དངོས་མ་ཡིན་པའི་མཚན་ཉིད་ཡིན་ཏེ། སྒྲོ་བཏགས་པ་མེད་པའི་ཕྱིར་རོ་ཞེས་རྩོད་པ་བརྗོད་པ་ནི་དེ་གཞན་ཞེས་བྱ་བ་སྟེ། བུ་ལ་སོགས་པ་དེ་ལ་གཙོ་བོ་ལ་སོགས་པའོ། །དེ་ནི་བུ་ལ་སོགས་པའོ། །དེའི་ཞེས་བྱ་བ་ནི་སྒྲོ་བཏགས་པའིའོ། །དེས་ན་ཞེས་བྱ་བ་ནི་མེད་པས་ནའོ། །དེ་ཉིད་ཅེས་བྱ་བ་ནི། དངོས་པོ་དང་ཅིག་ཤོས་ཀྱི་ཡུལ་ཅན་ཉིད་དོ། །འོ་ན་ནི་ཞེས་བྱ་བ་ནི་ལན་ནོ། །དེ་ལྟ་ན་ཅི་ཞིག་འགྲུབ་སྙམ་ན། རྗེས་སུ་དཔག་པས་ཞེས་གསུངས་སོ། །བུམ་པ་ལ་སོགས་པའི་སྒྲ་ནི་ཉེ་བར་བཏགས་པ་འཁྲུལ་པར་རྟོགས་པའི་ཡུལ་ཉིད་ཀྱང་འདས་པ་ལ་སོགས་པ་ལ་ནི་མེད་པ་ཉིད་དོ་ཞེས་བརྗོད་པ་ནི་དེའི་ཕྱིར་ཞེས་བྱ་བ་སྟེ། དངོས་པོའི་ཡུལ་ཅན་མ་ཡིན་པ་ཉིད་ཀྱི་ཕྱིར་རོ་ཞེས་པ་འདས་པ་དང་མ་འོངས་པ་ད་ལྟར་བ་ལ་སྟེ་ཡོད་པའམ་མེད་པ་ལ་ཡང་དེ་འདྲ་བ་ཉིད་དེ་དང་མཚུངས་པ་ཉིད་དེ། དེ་བྱས་པའི་ཁྱད་པར་ནི་ཡོད་པ་མ་ཡིན་ནོ། །མངོན་སུམ་ལ་ནི་མེད་པ་ལ་མི་འབྱུང་བ་ཉིད་དོ་ཞེས་ཁྱད་པར་བརྗོད་པ་ནི་སྣང་བ་ལ་སོགས་པ་ཞེས་བྱ་བའོ། །གལ་ཏེ་འདས་པ་དང་མ་འོངས་པ་ལ་ནི་བློ་འཁྲུལ་པ་མེད་པར་འཇུག་པ་དེ་ཉིད། སྤྱི་ཙམ་འཛིན་པས་དོན་ཡོད་པའི་ཕྱིར་རོ། །གཙོ་བོ་ལ་སོགས་པའི་བློ་ཡང་ཇི་ལྟར་བཏགས་པ་ཞིག་སྤྱི་ཡུལ་ཅན་ཉིད་དོ་ཞེས་དོགས་པ་བསུ་བ་ནི། སྤྱི་ཙམ་ཞེས་བྱ་བའོ། །སེམས་གཉིས་དག་ན་ནི་ཞེས་བྱ་བ་ནི་ད་ལྟར་བ་དང་ཅིག་ཤོས་ཀྱི་ཡུལ་ཅན་དག་གོ །གསལ་བའི་མཐར་ཐུག་པ་མ་ཡིན་པ་ན་དེ་སྤྱི་མ་ཡིན་པ་ལ་འདས་པ་ལ་སོགས་པ་མ་ཡིན་ནོ་ཞེས་ལན་བརྗོད་པ་ནི། དེ་འབའ་ཞིག་ནི་ཞེས་བྱ་བའོ། །བཟློག་ཟིན་ཏོ་ཞེས་བྱ་བ་ནི། །དེ་མཚུངས་མིན་དང་གསལ་བ་ཡིན། །ཞེས་བྱ་བ་དེར་རོ། །འབའ་ཞིག་
འཛིན་པར་ཁས་བླངས་ནས་སུན་འབྱིན་པར་བརྗོད་པ་དེ་ནི་སྤྱི་ཙམ་ཞིག་ཅེས་བྱ་བའོ། །འབའ་ཞིག་ཅེས་བྱ་བ་ནི་འཆད་པའོ། །གལ་ཏེ་ཐ་དད་པ་དང་འབའ་ཞིག་པ་བཟུང་ན་ནི་སྤྱི་མ་ཡིན་པར་འགྱུར་རོ། །ཐ་དད་པ་མ་ཡིན་པ་ལ་ནི་ཉེས་པ་འདི་མེད་དོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །ཁྱད་པར་མེད་པ་ནི་གང་གི་ཡིན་ཏེ། ཤེས་པའི་རང་བཞིན་གྱི་འམ་ཕྱི་རོལ་གྱི་ཡིན་དེ་ལ་དང་པོ་སེལ་བ་ནི་གལ་ཏེ་ཤེས་པའི་ཞེས་བྱ་བའོ། །གཉིས་པ་སློབ་པ་ནི་འོན་ཏེ་ཞེས་བྱ་བའོ། །དེ་ཞེས་བྱ་བ་ནི་ཁྱད་པར་མེད་འཛིན་པའོ། །རང་བཞིན་ཞེས་བྱ་བ་ནི་ངོ་བོ་ཉིད་ཅེས་བྱ་བའི་དོན་ཏོ། །གསལ་བ་རྣམས་ཀྱི་རང་བཞིན་ནི་ཕན་ཚུན་བཟློག་པར་འདོད་པ་ཡིན་ཏེ། ལྡོག་པ་མ་ཡིན་པ་ཉིད་དུ་ནི་རྟོགས་པར་ནུས་པ་མ་ཡིན་ནོ། །དེས་ན་རྣམ་པར་རྟོག་པ་ནི་དེ་ལ་རེག་པ་མ་ཡིན་ནོ་ཞེས་ལན་འདེབས་པ་ནི་དེ་ཡང་མ་ཡིན་ཏེ་ཞེས་བྱ་བའོ། །ཕན་ཚུན་འགལ་བ་དག་ནི་གཅིག་ཏུ་མི་འཐད་པའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་དེ་ནི་གཉིས་ཀའི་རང་བཞིན་ཡིན་ནོ། །ངོ་བོ་ཉིད་གཉིས་ཡོད་ན་ཡང༌། །ཞེས་གསུངས་སོ། །མཐོང་བ་ནི་མི་འཐད་པ་མ་ཡིན་ནོ་ཞེས་དོགས་པ་བསུ་བ་ནི་བ་ལང་ཞེས་བྱ་བའོ། །རྗེས་སུ་སོང་བ་ནི་མ་མཐོང་བ་ཉིད་དུ་བསྟན་པའི་ཕྱིར་གཞན་ལ་འདྲི་བ་ནི་རྗེས་སུ་སོང་བ་ཞེས་བྱ་བ་འདི་ཞེས་བྱ་བ་ཡིན་ནོ། །གཞན་གྱི་བ་ལང་ཞེས་སྨོས་སོ། །ཅི་ཞེས་བྱ་བ་ནི་གྲུབ་པའི་མཐའོ། །དེ་ལྟའོ་ཞེ་ན་ཞེས་བྱ་བ་ནི་གལ་ཏེ་རྗེས་སུ་སོང་བ་ལ་ཡང་རྗེས་སུ་སོང་བ་གཞན་ཡོད་པ་དེའི་ཚེ་ཐུག་པ་མེད་དོ། །རྗེས་སུ་སོང་བ་དང་པོ་བཞིན་དུ་རྗེས་སུ་སོང་བ་དང་པོའི་རྗེས་སུ་སོང་བ་གཞན་ཁས་བླངས་པའི་ཕྱིར་རོ། །དེ་བཞིན་དུ་གཞན་ལ་ཡང་ངོ༌། །ཐུག་པ་མེད་པར་ཐལ་བ་སྤང་བའི་དོན་དུ་ཐ་མི་དད་པའི་ཕྱོགས་ཀྱི་དོགས་པ་བསུ་བ་ནི་དེ་ནི་ཞེས་བྱ་བའོ། །དེ་ནི་ཞེས་བྱ་བ་ནི་རྗེས་སུ་སོང་བའི་རང་བཞིན་ནོ། །དེའི་ནི་རྗེས་སུ་སོང་བ་ཅན་གྱིའོ། །ཅི་འདི་ཞེས་བྱ་བ་ནི་སུན་འབྱིན་པའོ། །གང་གིས་དེ་ནི་དེའི་རང་བཞིན་གྱི་ངོ་བོ་ཉིད་དོ་ཞེས་བརྗོད་པར་འགྱུར་བ་ཅི་འདི་རང་གི་ངོ་བོ་ཉིད་ཀྱིས་ཞེས་བྱ་བ་གསལ་བ་ལས་ཐ་དད་པར་དམིགས་སམ་ཞེས་བྱ་བའོ། །རྟོགས་པ་ནི་མངོན་སུམ་གྱིས་སོ། །འདི་སྙམ་དུ་རྗེས་སུ་སོང་བའི་རང་བཞིན་ནི་གསལ་བའི་ངོ་བོ་ཡིན་པའི་ཕྱིར་ན་རྣམ་པ་གཉིས་མངོན་སུམ་དུ་འགྱུར་བ་མ་
ཡིན་ནོ་ཞེས་དོགས་པ་བསུ་བ་ནི་དེའི་རང་བཞིན་ནི་ཞེས་བྱ་བའོ། །དོན་གྱི་ངོ་བོ་ཉིད་ཡིན་གྱི་ངོ་བོ་ཉིད་མ་ཡིན་པ་ནི་མ་ཡིན་ནོ་ཞེ་ན་གལ་ཏེ་གསལ་བའི་རང་བཞིན་ལྡོག་པ་མེད་པ་གཅིག་ཡིན་ན་དེའི་ཚེ་གསལ་བ་ཉིད་དུ་མི་འགྱུར་རོ། །དེ་ནི་ལྡོག་པའི་མཚན་ཉིད་ཅན་ཡིན་པའི་ཕྱིར་རོ་ཞེས་ལན་འདེབས་པ་ནི་རང་བཞིན་ཞེས་བྱ་བ་སྟེ་གསལ་བ་རྣམས་ཀྱི་ངོ་བོའོ། །རྗེས་སུ་སོང་བ་ནི་ཕན་ཚུན་འདྲེས་པའོ། །དེ་ཉིད་ཡིན་པ་ཞེས་བྱ་བའོ། །སྤྱི་ནི་རེ་ཞིག་གསལ་བ་མེད་ཀྱང་གནས་སོ་ཞེ་ན་དེ་ལྟ་ན་ཡང་ཞེས་གསུངས་སོ། །གསལ་བ་མེད་པར་གྱུར་ན་སྤྱི་མེད་དེ་མཚུངས་པ་རྣམས་ཀྱི་ངོ་བོ་ནི་སྤྱི་ཡིན་ནོ་ཞེས་གྲུབ་པའི་མཐའ་ཡིན་པའི་ཕྱིར་རོ། །འོན་ཏེ་ཡང་རྗེས་སུ་སོང་བའི་རང་བཞིན་གསལ་བ་རྣམས་ཀྱི་ངོ་བོ་ནི་མ་ཡིན་གྱི། འོན་ཀྱང་ཐ་དད་པ་ཡིན་ཏེ། དེས་ན་དེ་དག་མེད་པ་མ་ཡིན་ནོ་སྙམ་དུ་དོགས་པ་ནི་འོན་ཏེ་དེ་དག་ཅེས་བྱ་བའོ། །དེ་ལྟ་ན་ཡང་ཞེས་བྱ་བ་ནི་ལན་ནོ། །ཐ་དད་པར་ཁས་བླངས་ཀྱང་སྤྱི་ཡོད་པ་མ་ཡིན་ཏེ། མངོན་སུམ་ལ་སྣང་བ་མེད་པའི་ཕྱིར་རོ། །གལ་ཏེ་ཡང་མངོན་སུམ་གྱིས་གཉི་ག་མ་ཡིན་མོད། འོན་ཀྱང་རྣམ་པར་རྟོག་པ་དང་ལྷན་ཅིག་པས་ནི་དམིགས་པར་འགྱུར་རོ་ཞེས་དོགས་པ་ནི་འོན་ཏེ་གསལ་བ་ཞེས་བྱ་བའོ། །དམིགས་པ་ཁོ་ནའོ་ཞེས་བྱ་བ་ནི་མངོན་སུམ་གྱིས་སོ། །རྗེས་སུ་སོང་བའི་རྣམ་པ་ཅན་གྱི་ཤེས་པ་ཞེས་བྱ་བ་ནི་རྣམ་པར་རྟོག་པའོ། །གཞན་དུ་ན་ཞེས་བྱ་བ་ནི་དངོས་པོ་ལ་བདག་ཉིད་གཉིས་མེད་ནའོ། །འདི་ཞེས་བྱ་བ་ནི་སྤྱི་དང་ཁྱད་པར་གྱི་ཤེས་པའོ། །རྣམ་པར་རྟོག་པ་གཉིས་བྱས་ནས་རེ་ཞིག་དང་པོ་སེལ་བ་ནི་རྗེས་སུ་སོང་བའི་རྣམ་པར་ཤེས་པ་ཡིན་ནོ་ཞེས་བརྗོད་ན་ཞེས་འབྲེལ་ཏོ། །དེ་ཡིས་ཞེས་བྱ་བ་ནི་ཤེས་པས་སོ། །ཅི་སྟེ་ཤེས་པའི་རྗེས་སུ་སྤོང་བ་བཞིན་དུ་མི་འཐད་པས་དོན་རྗེས་སུ་སོང་བ་ཡིན་ནོ་ཞེས་དོགས་པ་བསུ་བ་ནི་དོན་རྗེས་སུ་སོང་བ་ཉིད་ཀྱིས་ཞེས་བྱ་བའོ། །འདི་སྔོན་པོའི་ཞེས་བྱ་བ་བཞིན་དུ་འདི་སྤྱིའི་ཞེས་བྱ་བར་ཡང་མཛུབ་མོས་ཅི་སྟོན་ཞེས་ལན་འདེབས་པ་ནི། དེ་ཉིད་ཅེས་པ་དོན་ཉིད་དེ་ལྟར་རྗེས་སུ་སོང་བ་ཉིད་དུ་བསྙད་པར་བྱ་སྟེ། སྔོན་པོ་ལ་སོགས་པ་བཞིན་ནོ། །གཞན་ལ་ཞེས་བྱ་བ་རྗེས་སུ་སོང་བའི་ཤེས་པ་ལ་བསྙད་པས་ཅི་ཞིག་བྱ། འོན་ཏེ་ཐམས་ཅད་གཞན་ཏེ་མི་ལ་འཐད་པའི་སྒོ་
ནས་བསྙད་པ་ཡིན་ནོ་ཞེ་ན། སྔོན་པོ་ལ་སོགས་པ་དག་ཅེས་བྱ་བའོ། །མདོ་སྡེ་པའི་ལུགས་ལ་བརྟེན་ནས་བཤད་པ་ནི་སྔོན་པོ་ལ་སོགས་པ་ལ་ཡང་ཞེས་བྱ་བའོ། །དེ་ལྟར་ཞེས་བྱ་བ་ནི་ཤེས་པ་ལ་བསྙད་པས་སོ། །འདི་ནི་མ་ཡིན་ཏེ་ཞེས་བྱ་བ་ནི་ལན་གྱི་དོན་ནི་འདི་ཡིན་ཏེ། གལ་ཏེ་འགའ་ཞིག་དེ་ལྟར་ཐ་སྙད་བྱེད་པ་དེ་ལྟ་ན་ཡང་འཇིག་རྟེན་ནི་མ་ཡིན་གྱི། འོན་ཀྱང་སྔོན་པོ་དང་སེར་པོ་དག་ཤེས་པ་ལས་སམ་ཕན་ཚུན་ཐ་དད་པར་རྟོགས་ཏེ་སྔོན་པོ་མཐོང་ངོ་ཞེས་བྱ་བར་རོ། །དེ་བཞིན་དུ་སྤྱི་ལ་ཡང་འདི་རྣམས་ལ་རྗེས་སུ་སོང་བ་ཡིན་ལ། འདི་ནི་དེ་ལྟ་མ་ཡིན་ནོ་ཞེས་ཐ་དད་པར་རིགས་པར་འགྱུར་རོ། །ཐལ་བ་ལས་ལྡོག་པར་ཁས་ལེན་པའི་དོགས་པ་བསུ་བ་ནི། དེ་ནི་ཐ་དད་དུ་བྱ་བ་མ་ཡིན་པ་ཉིད་དོ་ཞེ་ན་ཞེས་བྱ་བའོ། །འདི་བཟློག་པའི་དོན་དུ་རྒྱུ་མཚན་འདྲི་བ་ནི་འོ་ན་ད་ནི་ཞེས་བྱ་བའོ། །གཞན་རྒྱུ་མཚན་སྨྲ་བ་ནི་བསྟན་པར་མི་ནུས་པའི་ཕྱིར་ཏེ་ཞེས་བྱ་བའོ། །འགལ་བ་དམིགས་པའི་ཕྱིར་རྒྱུ་མཚན་མེད་པར་བརྗོད་པ་ནི་གལ་ཏེ་ཞེས་བྱ་བའོ། །བསྒྲུབ་པར་བྱ་བ་མ་ཡིན་པ་ཉིད་དོ་ཞེ་ན། གྲུབ་ན་ཡང་ཞེས་བྱ་བ་སྨོས་པའོ། །བདེ་བ་ལ་སོགས་པ་ཡང་ཞེས་བྱ་བ་ནི་རྩོད་པའོ། །དེ་དག་ཀྱང་ནི་བདེ་བ་ལ་སོགས་པའོ། །རང་རིག་པའོ་ཞེས་བྱ་བ་ནི་ལན་ནོ། །བདེ་བ་བསྟན་པར་བྱ་བའི་རྒྱུད་ལ་ཡོད་པ་ཞེས་བསྟན་པར་བྱ་བའི་རྒྱུད་ལ་ཡོད་པ་དེ་ནི་བསྟན་པ་དོན་མེད་དོ་ཞེས་བརྗོད་པ་ནི་ཁྱོད་ལ་ཞེས་བྱ་བའོ། །མངོན་སུམ་གྱི་དོན་ལ་ནི་ཉེ་བར་བསྟན་པ་ཆེན་པོ་མ་ཡིན་ནོ། །ཕྱོགས་གཉིས་ལ་ཡང་རྣམ་པར་རྟོག་པ་གཉིས་ཏེ་ཚིག་གམ་རྟགས་ལས་རྟོགས་པར་བྱ་བ་ཡིན་ཞེས་བྱ་བའོ། །དང་པོ་ནི་ཁྱེད་ཅེས་བྱ་བ་ལ་སོགས་པས་དོགས་པ་བསུ་བ་ནས་མ་ཡིན་ཏེ་ཞེས་བྱ་བས་འགོག་པའོ། །གཉིས་བ་ལ་བརྗོད་པ་ནི་འོན་ཏེ་སྤུ་ལྡང་བ་ཞེས་བྱ་བའོ། །འོན་ཏེ་ཡང་དེ་ལ་བདེ་བ་ཡོད་དོ་ཞེས་མ་བརྗོད་པར་རྟགས་ལས་ནི་མི་རྟོགས་སོ་སྙམ་དུ་དོགས་པ་བསུ་བ་ནི་གང་གི་ཕྱིར་ཞེས་བྱ་བ་གསུངས་སོ། །སྤྱི་གྲུབ་པ་ལ་ཡང་ཚུལ་འདི་འདྲ་བར་དོགས་པ་བསུ་བ་ནི་འདིར་ཡང་ཞེས་བྱ་བ་སྟེ། སྤྱི་གྲུབ་པ་ལ་ཡང་ངོ༌། །ལན་ནི་དེ་ལྟར་ཞེས་བྱ་བའོ། །རྗེས་སུ་སོང་བའི་རྟོག་པ་ནི་བག་ཆགས་ལས་བྱུང་བ་ལས་ན་སྤྱི་དོན་གྱིས་འཕེན་པར་བྱེད་པ་མ་ཡིན་ནོ་ཞེས་བརྗོད་པ་ནི་འོན་ཀྱང་འདི་ནི་ཞེས་བྱ་བའོ། །འདི་ཉིད་གསལ་
བར་བྱེད་པ་ནི་འདིའི་རྒྱུ་མཚན་ནི་ཞེས་བྱ་བའོ། །ཇི་ལྟར་བག་ཆགས་ཉིད་འདིའི་རྒྱུ་མཚན་ཡིན་གྱི་སྤྱི་མ་ཡིན་ཞེ་ན། ཐ་དད་པར་དང་ཞེས་གསུངས་སོ། །སྐབས་སྡུད་པར་བྱེད་པ་ནི་སྤྱི་གཞན་ཉིད་ནི་ཞེས་བྱ་བའོ། །འོ་ན་གཞན་དང་གཞན་མ་ཡིན་པར་འགྱུར་རོ་སྙམ་ན། གཞན་དང་གཞན་པ་ཞེས་གསུངས་སོ། །རྣམ་པ་གཞན་ཡོད་པ་ཉིད་ན་འགྱུར་བ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་དེ་ཁས་བླངས་ཀྱང་རྣམ་པ་གཞན་སྲིད་པར་འགྱུར་ཞེ་ན། འདི་ལྟར་ཞེས་གསུངས་སོ། །གལ་ཏེ་དེ་ལྟ་ན་ཡང་ཐ་དད་པ་མ་ཡིན་པ་ཐ་དད་པ་ཅིའི་ཕྱིར་མི་འགྱུར་ཞེ་ན། བཟློག་པས་དེ་ཉིད་གང་ཡིན་པ། དེ་བཞིན་དུ་ཚོར་བ་མེད་པ་ཞེས་གསུངས་སོ། །བཟློག་པ་སྟེ་ཐ་དད་པས་དེ་ཉིད་གང་ཡིན་པ་ཞེས་བྱ་བའི་དོན་ཏོ། །དེ་ནི་ཞེས་བྱ་བ་ནི་གཞན་ཉིད་དོ། །གཞན་དུ་ཞེས་བྱ་བ་ནི་གཞན་མ་ཡིན་པར་རོ། །ཚོར་བ་མེད་པ་ནི་འགལ་བའི་ཕྱིར་རོ། །དེའི་ཕྱིར་ཐ་མི་དད་པ་ནི་ཐ་དད་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཐ་དད་པ་ནི་ཐ་མི་དད་པ་ཉིད་དུ་རིགས་པ་ཉིད་དེ་མཐོང་བ་ནི་མི་འཐད་པ་ཞེས་བསམས་ནས་གཞན་དག་སློང་བར་བྱེད་པ་ནི། ལག་དུབ་ཉིད་དང་ཐ་དད་ཀྱང་ཞེས་བྱ་བའོ། །ལག་དུབ་སོགས་པས་ཞེས་བྱ་བ་ནི་ལན་ནོ། །གང་ལས་ཞེས་བྱ་བ་ནི་ཚད་མ་འདྲི་བའོ། །བག་ཆགས་ལས་བྱུང་བའི་རྣམ་པར་རྟོག་པས་ཀྱང་དོན་འཕེན་པར་བྱེད་པ་མ་ཡིན་ནོ་ཞེས་བཤད་ཟིན་ཏོ་ཞེས་བྱ་བར་བཤད་པ་ནི་རྗེས་སུ་འགྲོ་བར་ཞེས་བྱ་བའོ། །འདི་ནི་ཞེས་བྱ་བ་ནི་རྗེས་སུ་འགྲོ་བ་ཉིད་དོ། །མེད་པ་ཉིད་དུ་བསྟན་ཟིན་ཏོ་ཞེས་བྱ་བའོ། །སྤྱི་ཐ་དད་པ་ཡིན་ན། འབྲེལ་པ་མེད་པ་ཉིད་བརྗོད་པ་ནི་ཅི་སྟེ་ཞེས་བྱ་བའོ། །འདི་ཉིད་རྩ་བ་དང་སྒྲིབ་པར་བྱེད་པ་ནི་གལ་ཏེ་ཞེས་བྱ་བའོ། །གལ་ཏེ་མཚུངས་པའི་རང་བཞིན་གསལ་བ་དེ་དག་ལས་གཞན་ཉིད་ཡིན་པར་གྱུར་ན་ཞེས་འབྲེལ་ཏོ། །རྟ་ཉིད་ནི་ཁྲ་བོ་ལ་སོགས་པ་དང་འབྲེལ་པ་མེད་པ་ཁོ་ནས་ཡིན་པས་ན་ཁྱད་པར་དུ་བྱེད་པ་ནི་དེ་དག་ཅེས་བྱ་བའོ། །དེ་དག་གི་ཞེས་བྱ་བ་ནི་ལན་ནོ། །གཞན་ལས་ལྡོག་པའི་སྤྱི་ནི་དངོས་པོ་མ་ཡིན་པས་ཐ་དད་པ་དང་ཐ་མི་དད་པའི་རྣམ་པར་རྟོག་པའོ། །བཞི་པ་ཡིན་ནོ་ཞེས་བརྗོད་པ་ནི་བཟློག་པ་ནི་ཞེས་བྱ་བའོ། །རྣམ་པར་རྟོག་པས་ནི་དངོས་པོ་དེ་མ་ཡིན་པ་ལས་ལྡོག་པར་མཚུངས་པ་བཞིན་
དུ་ཞེན་པར་བྱེད་དོ་ཞེས་བྱ་བའི་དོན་ཏོ། །ཡང་ན་གལ་ཏེ་དེ་དག་གི་མཚུངས་པའི་དངོས་པོ་དེ་ཡིན་པར་འདོད་ན། དེའི་ཚེ་དེ་དག་ལས་གཞན་ཉིད་ཡིན་པར་འགྱུར་ཞེས་འབྲེལ་ཏོ། །གལ་ཏེ་བུམ་པ་ནི་སྤྱིའི་རང་བཞིན་ཉིད་མ་ཡིན་པའི་ཕྱིར་ན་སྣམ་བུའི་སྤྱི་མ་ཡིན་གྱི་སྣམ་བུ་ཉིད་ནི་དེའི་རང་བཞིན་ཡིན་པའི་ཕྱིར་དེའི་སྤྱི་ཡིན་ནོ་ཞེས་དོགས་པ་བསུ་བ་ནི་སྤྱིའི་བདག་ཉིད་མ་ཡིན་པའི་ཕྱིར་ཞེས་བྱ་བའོ། །ལན་གྱི་དོན་ནི་འདི་ཡིན་ཏེ། སྤྱིའི་རང་བཞིན་ཉིད་ལ་ཡང་གསལ་བ་དང་འབྲེལ་པ་མེད་པ་ནི་དེའི་གནས་སྐབས་ཉིད་ཡིན་ནོ་ཞེས་བྱ་བའོ། །འབྲེལ་པ་གྲུབ་པའི་རྒྱུ་བརྗོད་པ་ནི་དེ་དང་ཞེས་བྱ་བའོ། །བསྒྲུབ་པར་བྱ་བ་ཉིད་སྒྲུབ་བྱེད་དུ་འགྱུར་ན་ནི་ཐམས་ཅད་གྲུབ་པོ་ཞེས་བརྗོད་པ་ནི་དེ་ནི་འབྱུང་བ་ཡིན་ཏེ་ཞེས་བྱ་བའོ། །གཉུག་མ་ཉིད་ལ་ཡང་རྣམ་པ་འདི་ཉིད་ཡིན་ནོ་ཞེས་བརྗོད་པ་ནི། འདི་ཞེས་བྱ་བའོ། །དེ་ཉིད་ནི་འབྲེལ་པ་ཉིད་དོ། །དེ་ལྟར་མ་ཡིན་ན་ཞེས་བྱ་བ་ནི་མ་གྲུབ་ཀྱང་གཏན་ཚིགས་ཉིད་ཡིན་ནའོ། །འདིས་ནི་སྤྱིའི་རང་བཞིན་ཉིད་ཁས་བླངས་ནས་གསལ་བ་དང་འབྲེལ་པ་མ་གྲུབ་པར་བསྟན་པ་ཡིན་ནོ། །དེ་ནི་སྤྱིའི་བདག་ཉིད་ཀྱང་མ་གྲུབ་པོ་ཞེས་བརྗོད་པ་ནི་སྤྱིའི་མངོན་པར་དོགས་པ་ལས་ཡང་ཞེས་བྱ་བའོ། །འབྲེལ་པ་གྲུབ་པར་ཁས་བླངས་ནས་སྐྱོན་བརྗོད་པ་ནི་འོན་ཏེ་ཞེས་བྱ་བའོ། །འབྲེལ་པ་ནི་རང་བཞིན་ཉིད་མ་བཟུང་བའི་ཕྱིར་ན་ཉེས་པ་མེད་དོ་ཞེ་ན། འབྲེལ་པའི་ངོ་བོ་ཉིད་ཅེས་གསུངས་སོ། །དེའི་རང་བཞིན་ནི་གཞན་ཉིད་ཡིན་ནོ་ཞེས་དོགས་པ་བསུ་བ་ནི་རྣམ་པ་ཞེས་བྱ་བའོ། །དེ་ལྟ་ན་ཡང་འབྲེལ་པ་ཉིད་བརྗོད་པ་ཡིན་ནོ་ཞེས་ལན་འདེབས་པ་ནི། རྣམ་པར་མཚུངས་པ་ཉིད་ཅེས་བྱ་བའོ། །ཇི་ལྟར་ཞེ་ན། རྣམ་པ་མཚུངས་པ་ཉིད་ནི་ཞེས་བྱ་བའོ། །རང་བཞིན་གང་ཞིག་ལ་ལྟོས་པ་དེ་མ་བཟུང་བར་ནི་དེ་མི་འཛིན་ཏོ་ཞེས་བརྗོད་པ་ནི་གསལ་བ་ལ་ཞེས་བྱ་བའོ། །མི་འཛིན་པའི་ཕྱིར་རོ་ཞེས་བྱ་བ་ནི་སྤྱིའིའོ། །འཛིན་ན་ཡང་གསལ་བ་མ་ལུས་པ་འཛིན་པར་ཐལ་བར་འགྱུར་རོ། །གཞན་ལས་ལྡོག་པ་ལ་ནི་ཉེས་པ་འདི་མཚུངས་པ་མ་ཡིན་ནོ་ཞེས་བརྗོད་པ་ནི། གཞན་ལས་ལྡོག་པ་ནི་ཞེས་བྱ་བའོ། །ཇི་ལྟར་སྐྱོན་དུ་འགྱུར་བ་མེད་ཅེ་ན། ཕན་ཚུན་ཞེས་གསུངས་སོ། །གཞན་དུ་བྱེད་ཅེས་བྱ་བ་ནི་རིགས་མི་མཐུན་པར་རོ། །འོ་ན་སྤྱིའི་ཐ་སྙད་ཇི་ལྟར་སྙམ་ན། དེ་དོན་བྱ་བ་ཞེས་
བྱ་བའོ། །གལ་ཏེ་གསལ་བ་བཞིན་དུ་དོན་བྱ་བ་ཡང་ཐ་དད་པ་ཉིད་མ་ཡིན་ནམ། དེས་ན་ཇི་ལྟར་དེའི་སྒོ་ནས། དེ་ལྟར་དེ་ཐ་སྙད་བྱེད་སྙམ་དུ་དོགས་པ་བསུ་ནས། དུ་མ་ཉིད་མ་འཕྲིགས་པའི་ཞེས་གསུངས་སོ། །མི་མཚུངས་པ་དག་ལ་ཞེས་བྱ་བ་ནི་རྩོད་པའོ། །མ་ཡིན་ཏེ་ཞེས་བྱ་བ་ནི་འགོག་པའོ། །དེ་ཉིད་ཀྱིས་ཞེས་བྱ་བ་ནི་སྤྱིའི་བློ་ཉིད་ཀྱིས་སོ། །འདི་ག་ལས་ཤེ་ན་མཚུངས་པའི་རྣམ་པ་ཅན་གྱི་ཞེས་གསུངས་སོ། །དེ་ལ་ཞེས་བྱ་བ་ནི་ཁྲ་བོ་ལ་སོགས་པ་ལའོ། །གང་གི་ཕྱིར་མཚུངས་པའི་རང་བཞིན་ནི་དངོས་པོ་ལས་དེ་ཉིད་དང༌། གཞན་དག་ཏུ་བརྗོད་པར་བྱ་བ་མ་ཡིན་པ་དེ་ཉིད་ཀྱི་ཕྱིར་དངོས་པོ་མེད་པ་ཡིན་ནོ་ཞེས་བརྗོད་པ་དེའི་ཕྱིར་ཞེས་བྱ་བའོ། །རྣམ་པར་རྟོག་པ་གཅིག་པུས་རྟོགས་པར་བྱ་བ་ནི་དེ་ཉིད་དང་གཞན་དག་ཏུ་མངོན་སུམ་གྱི་ཡུལ་དུ་འགྱུར་བ་མ་ཡིན་ནོ་ཞེས་བྱ་བའི་དོན་ཏོ། །ཡང་ན་གང་གི་ཕྱིར་སྤྱིའི་རང་བཞིན་གསལ་བ་དང་འབྲེལ་པ་ཉིད་དུ་མི་འཐད་པ་དེའི་ཕྱིར་དེ་དངོས་པོ་མེད་པ་ཁོ་ནའོ་ཞེས་བརྗོད་པ་ནི་དེའི་ཞེས་བྱ་བ་ཡིན་ནོ། །རྣམ་པར་རྟོག་པ་གཅིག་པུས་རྟོགས་པར་བྱ་བ་གསལ་བ་དང་འབྲེལ་པ་ཉིད་ནི་མངོན་སུམ་གྱི་ཡུལ་མ་ཡིན་ནོ་ཞེས་བྱ་བའི་དོན་ཏོ། །དངོས་པོར་ཡོད་པའི་སྤྱི་ནི་འབྲས་བུ་འམ་གཞན་ཞིག་ཡིན་གྲང༌། རེ་ཞིག་འབྲས་བུ་ནི་མ་ཡིན་ཏེ་དུས་ཀྱི་དབྱེ་བས་ཐ་དད་པའི་གསལ་བའི་འབྲས་བུ་ཉིད་ཀྱི་དུ་མ་ཉིད་ཡིན་ན་སྤྱི་མ་ཡིན་པར་ཐལ་བར་འགྱུར་བའི་ཕྱིར་རོ་ཞེས་བརྗོད་པ་ནི་དེ་འབྲས་ཤེ་ན་ཞེས་བྱ་བའོ། །འབྲས་བུ་ཉིད་ཡིན་པའི་ཕྱིར་གསལ་བ་བཞིན་དུ་འཇིག་པར་གྱུར་ན། དེ་ཡང་དེ་ལྟར་འདོད་པ་ནི་མ་ཡིན་ནོ་ཞེས་བརྗོད་པ་ནི་འཇིག་པར་འགྱུར། དེ་ཡང་འདོད་མ་ཡིན་ཞེས་བྱ་བའོ། །འབྲས་བུ་ཡང་མ་ཡིན་ལ་རྟག་པ་ཡང་མ་ཡིན་པ་ལ་ཅི་འགལ་ཞེ་ན། འཇིག་པ་དངོས་པོ་ཙམ་དང་ནི། །ཞེས་གསུངས་སོ། །དངོས་པོ་ཉིད་ནི་དོན་བྱ་བ་བྱེད་པའི་མཚན་ཉིད་ལ་ཡང་འབྲས་བུ་ཉིད་ལ་མི་རྟག་པ་ཉིད་ཀྱིས་ཁྱབ་པ་ཡིན་ཏེ། རྟག་པ་ཉིད་ལ་ནི་འགལ་བས་ཁྱབ་པ་ཡིན་ནོ་ཞེས་བྱ་བའི་དོན་ཏོ། །འོན་ཏེ་ཉེས་པ་འདིས་འཇིག་པས་འབྲས་བུ་མ་ཡིན་ནོ་ཞེས་དོགས་པ་ཡོད་པ་ཀུན་ལ་རག་མ་ལས་ཞེས་བྱ་བའི་ཚུལ་གྱིས་ན། སྤྱི་གསལ་བ་རྣམས་དང་མ་འབྲེལ་པས་ན། ནམ་མཁའ་
བཞིན་དུ་སྤྱི་མ་ཡིན་པར་འགྱུར་རོ་ཞེས་བརྗོད་པ་ནི་རིགས་རྣམས་ཞེས་བྱ་བའོ། །མ་འབྲེལ་བ་ནི་གསལ་བ་རྣམས་དང་ངོ༌། །དངོས་མེད་ནི་རི་བོང་གི་རྭ་བཞིན་དུ་ངོ་བོ་ཉིད་མེད་པའོ། །ཇི་ལྟར་མཚུངས་པ་ཉིད་དངོས་པོའི་མཚན་ཉིད་མ་ཡིན་ཞེ་ན། རྟོག་པ་འཁྲུལ་པའི་ཞེས་གསུངས་སོ། །གང་གི་ཕྱིར་རྣམ་པར་རྟོག་པ་གཅིག་པུས་རྟོགས་པར་བྱ་བ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་སྤྱི་ནི་རྣམ་པར་རྟོག་པའི་རྣམ་པ་ལས་ཐ་དད་པར་རྟོག་པ་ཉིད་མ་ཡིན་ན་མ་ཞེས་དོགས་པ་ནི་འོན་ཏེ་ཞེས་བྱ་བའོ། །གསལ་བ་གཉིས་ཀ་ཡོད་ན་ནི་རྣམ་པ་གཉིས་སོ། །དེ་གཞན་ཡོད་ན་ནི་རྣམ་པ་གསུམ་པ་རྟོགས་པ་ཇི་ལྟར་བསྙོན་ཞེས་བྱ་བའོ། །དེ་ལྟ་ན་ཡང་དེ་ནི་འབྲས་བུར་ཐལ་ལོ་ཞེས་བརྗོད་པ་ནི་དེ་ལྟ་ནའོ་ན་ཞེས་བྱ་བའོ། །དེ་ལྟར་གྱུར་དང་ཞེས་བྱ་བ་ནི་གསལ་བ་ཉིད་དུ་གྱུར་པའོ། །དུ་མ་ཉིད་དུ་ཞེས་བྱ་བ་ནི་རྣམ་པར་གཉིས་ལ་སོགས་པར་ཐ་དད་པའི་ཕྱིར་རོ། །འོན་ཏེ་དུ་མ་ཉིད་ནི་ངོ་ཤེས་པས་གནོད་པ་ཡིན་ནོ། །དོགས་པ་ནི་ངོ་ཤེས་པ་ཡིན་པའི་ཕྱིར་རོ་ཞེས་བྱ་བའོ། །གསལ་བ་བཞིན་དུ་འཕེལ་བའི་རྣམ་པ་ཅན་གྱི་སྤྱི་ལ་ཡང་འཕེལ་བའི་རྣམ་པ་ཅན་གཞན་ཡོད་ལ། དེ་ལ་ཡང་གཞན་ཡོད་པའི་ཕྱིར་ཐུག་པ་མེད་པར་འགྱུར་རོ་ཞེས་ལན་འདེབས་པ་ནི་སྤྱི་ལ་ཡང་ཞེས་བྱ་བའོ། །སྤྱི་ལ་སྤྱི་མ་རྟོགས་ན་ནི་གསལ་བ་ལ་ཡང་མི་རྟོགས་པས་མཚུངས་སོ་ཞེས་བརྗོད་པ་ནི་འོན་ཏེ་ཞེས་བྱ་བའོ། །གལ་ཏེ་གསལ་བ་ལ་བ་ལང་བ་ལང་ཞེས་ངོ་ཤེས་པ་ནི་སྤྱི་སྒྲུབ་པར་བྱེད་པ་ཡིན་ནོ་ཞེས་དོགས་པ་བསུ་ནས་ངོ་ཤེས་པ་ནི་ཞེས་གསུངས་སོ། །མ་ངེས་པ་ངེས་པ་མེད་པ་ནི་སྟེ་འཁྲུལ་པ་ཡིན་ནོ་ཞེས་བྱ་བའི་དོན་ཏོ། །བ་ལང་ཉིད་དང་རྟ་ཉིད་ལ་སོགས་པའི་སྤྱི་དག་ལ་ནི། སྤྱི་གཅིག་གི་རྒྱུ་མཚན་ཅན་གྱི་ངོ་ཤེས་པ་ཡོད་པ་ཡིན་ནོ། །རྣམ་འགྲེལ་ལས། །བརྗོད་པའི་འབྲས་བུ་ཡིན་པའི་ཕྱིར། །ཞེས་བྱ་བའི་གཏན་ཚིགས་སླ་བའི་ཕྱིར་བཞག་ནས་གཏན་ཚིགས་གཞན་བརྗོད་པ་ནི། གསལ་བ་ཞིག་ན་འཇིག་པའི་ཕྱིར་རོ་ཞེས་བྱ་བའོ། །གསལ་བ་དང་འདུས་པའི་རང་བཞིན་ནི་དེ་ཞིག་ན་གནས་པར་ཇི་ལྟར་འགྱུར། གནས་ན་ཡང་གསལ་བ་ཡང་གནས་པར་ཐལ་བའི་ཕྱིར་རོ། །ཇི་ལྟར་
ངོ་བོ་མེད་པར་འགྱུར་ཞེ་ན། དངོས་པོ་ཉིད་ནི་ཞེས་བྱ་བའོ། །དེ་ལས་ཅིར་འགྱུར་ཞེ་ན། སྤྱི་ཁྱབ་པ་ནི་ཞེས་གསུངས་སོ། །ཅིའི་ཕྱིར་ཡོད་པ་མ་ཡིན་ཞེ་ན། དུས་ཀྱི་ཞེས་གསུངས་སོ། །གལ་ཏེ་དེ་ལྟར་མ་དམིགས་ཀྱང་དེ་ལྟར་ཡོད་པ་ཅི་སྟེ་མ་ཡིན་ཞེ་ན་དམིགས་པ་ཉིད་ཅེས་གསུངས་སོ། །དེ་མེད་ན་ཞེས་བྱ་བ་ནི་དམིགས་པ་མེད་ནའོ། །ཡོད་པ་ནི་དམིགས་པ་ལ་གཞན་ཡིན་ནོ་ཞེས་དོགས་པ་བསུ་བ་ནི་ཡོད་པ་ཉིད་དང་ཞེས་བྱ་བའོ། །དེ་ལྟ་ན་ཐུག་པ་མེད་དོ་ཞེས་ལན་འདེབས་པ་ནི། ཡོད་པ་ཉིད་ཀྱང་ཞེས་བྱ་བའོ། །འདི་ནི་ཁས་བླངས་ནས་བརྗོད་པར་ཟད་དེ། ཁྱེད་ཀྱི་ལྟ་བ་ནི་མ་ཡིན་ཏེ། ཚིག་གི་དོན་གསུམ་ཡོད་པར་བྱེད་པ་ནི་ཡོད་པ་ཡིན་ནོ་ཞེས་བརྗོད་པའི་ཕྱིར་རོ་ཞེས་གསུངས་པ་ནི། སྤྱི་ནི་ཞེས་བྱ་བའོ། །ཡོད་པའི་ཕྱིར་རོ་ཞེས་བྱ་བ་ནི་ཡོད་པར་ཁས་བླངས་པའི་ཕྱིར་རོ། །འོ་ན་དེ་ནི་རང་གི་ངོ་བོས་ཡོད་པ་ཁོ་ན་ཡོད་པ་ཡིན་སྙམ་ན། དེ་ནི་ཞེས་གསུངས་ཏེ། རང་གི་ངོ་བོས་ཡོད་པ་དེ་ནིའོ། །དེས་ན་ཞེས་བྱ་བ་ནི་མ་དམིགས་པས་སོ། །ཡང་རང་གི་ངོ་བོས་ཡོད་པས་ཡོད་པ་ཉིད་ཡིན་པས་སུན་འབྱིན་པའི་ཕྱིར་བོང་བུའི་ཞེས་གསུངས་སོ། །ཁྱེད་ལ་ཡང་ཞེས་བྱ་བ་ནི་དོགས་པ་ནི། སངས་རྒྱས་པ་ལ་ཡང་ངོ༌། །རྒྱུ་མེད་པའི་ཕྱིར་རོ་ཞེས་བྱ་བ་ནི་ལན་ནོ། །དེ་བཞིན་ནོ་ཞེས་བྱ་བ་ནི་གལ་ཏེ་རྒྱུ་མེད་པའི་ཕྱིར་རི་བོང་གི་རྭ་མེད་པ་ཡིན་ནོ། །དེའི་ཚེ་སྤྱི་ཡང་མེད་པར་འགྱུར་རོ། །ཅིའི་ཕྱིར་ཞེ་ན། དེ་ལ་ཡང་ཞེས་གསུངས་ཏེ། སྤྱི་ལ་ཡང་ངོ༌། །ཡུལ་མེད་པར་ནི་བློ་རྣམས་མི་སྐྱེའོ་ཞེས་དོགས་པ་བསུ་བ་ནི་སྤྱི་ནི་ཞེས་བྱ་བའོ། །རི་བོང་གི་ཞེས་བྱ་བ་ནི་ལན་ནོ། །འོན་ཏེ་རི་བོང་གི་རྭ་ལ་སོགས་པ་ནི་རྣམ་པར་དཔྱད་ན་ཡོད་པ་མ་ཡིན་ནོ་ཞེས་དོགས་པ་བསུ་བ་ནས་སྤྱི་ཡང་དེ་བཞིན་དུ་འགྱུར་རོ་ཞེས་བརྗོད་པ་ནི། ངེས་པར་བརྟགས་ན་ཞེས་བྱ་བའོ། །གལ་ཏེ་སྒྲ་ལས་བྱུང་བའི་བློ་ལ་སྣང་བ་གང་ཡིན་པ་དེ་ཉིད་ཀྱི་སྤྱི་ཡིན། དེ་ཡང་ཁྱབ་པར་བྱེད་པ་འགལ་བ་དམིགས་པ་ཡང་དངོས་པོ་མ་ཡིན་ནོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །གང་ཞིག་བརྡའི་སྟོབས་ཀྱིས་སྣང་བ་དེ་ནི་དངོས་པོ་མ་ཡིན་ཏེ། དཔེར་ན་གསལ་བྱ་ལ་སོགས་པའི་སྤྱི་བཞིན་ནོ། །བ་ལང་ཉིད་ལ་སོགས་པའི་སྤྱི་
ཡང་བརྡའི་སྟོབས་ཀྱིས་སྣང་བ་ཡིན་ནོ། །གལ་ཏེ་འདི་ནི་མ་ངེས་པ་ཡིན་ཏེ། དངོས་པོ་ལ་ཡང་བརྡའི་སྟོབས་ཀྱིས་སྣང་བ་སྲིད་པའི་ཕྱིར་རོ་ཞེས་དོགས་ན། དངོས་པོ་ཉིད་ནི་བརྡའི་སྟོབས་ལ་མི་ལྟོས་པར་སྣང་བས་ཁྱབ་པ་དེ་དང་འགལ་བ་ཡོད་ན་མི་འགྱུར་རོ་ཞེས་བརྗོད་པ་ནི་འདི་ལྟར་ཞེས་བྱ་བའོ། །སྐབས་སུ་བབ་པ་ལ་ཁྱབ་པར་བྱེད་པ་དང་འགལ་བ་ཉིད་སྟོན་པ་ནི་བརྡ་ལ་མི་ལྟོས་པ་དེ་ལྟར་ནི་སྣང་བ་མེད་ཀྱི་འོན་ཀྱང་དེ་ལ་ལྟོས་པར་སྣང་ངོ༌། །གལ་ཏེ་བརྡ་ལ་ལྟོས་པའི་ཤེས་པ་ལ་ཡང་དངོས་པོ་མེད་པ་ཁོ་ན་ལ་ཇི་ལྟར་འགྱུར་ཞེས་དོགས་པ་བསུ་བ་ནས་བརྡ་བྱེད་པ་ནི་ཞེས་གསུངས་སོ། །གང་གི་ཕྱིར་དེ་ལྟར་བརྡ་བྱེད་པ་མ་ཡིན་གྱི། འོན་ཀྱང་སྔ་མ་དང་ཕྱི་མ་སྒྲོ་བཏགས་པ་ཁོ་ནས་ཡིན། དེའི་ཕྱིར་དེ་ལ་ལྟོས་པའི་ཤེས་པ་པ་ཡང་དངོས་པོ་མེད་པར་སྒྲོ་བཏགས་པ་ཁོ་ན་མ་ཡིན་ནོ། །འོན་ཏེ་ཡང་སྔ་མ་དང་ཕྱི་མ་སྒྲོ་བཏགས་པ་མེད་ཀྱང་བརྡ་བྱེད་པ་ཡིན་ཏེ། དེས་ན་དེ་ལ་ལྟོས་པའི་རྟོགས་པ་ནི་དངོས་པོ་ལ་ཡང་འགྱུར་བ་ཡིན་ནོ་ཞེས་དོགས་ན་འདི་ལྟར་ཞེས་གསུངས་སོ། །གལ་ཏེ་ཉེ་བ་ཙམ་ལ་བརྟེན་ནས་ཀྱང་བྱེད་པ་ཡིན་ན་ནི་དེའི་ཚེ་དེའི་མཐར་ཐུག་པ་ཉིད་ཀྱིས་ཐ་སྙད་ཀྱི་དུས་སུ་རྗེས་སུ་འགྲོ་བར་འགྱུར་བ་དེས་ན་སྒྲ་ལས་དོན་རྟོགས་པར་མི་འགྱུར་རོ། །གལ་ཏེ་བརྡ་ནི་རྗེས་སུ་འགྲོ་བ་མེད་ཀྱང་སྒྲའི་སྟོབས་ཁོ་ནས་དོན་རྟོགས་སོ་སྙམ་དུ་དོགས་པ་ནི། སྒྲའི་མཐུ་ཉིད་ཀྱིས་ཞེས་བྱ་བའོ། །བརྡའི་རྗེས་སུ་འགྲོ་བ་མེད་པར་སྒྲ་ལས་དོན་རྟོགས་པ་མི་སྲིད་དོ་ཞེས་ལན་འདེབས་པ་ནི། གལ་ཏེ་ཞེས་བྱ་བའོ། །གལ་ཏེ་སྤྱིའི་ཤེས་པ་བརྡ་ལ་ལྟོས་པ་ཡིན་ནོ་ཞེས་ག་ལས་རྟོགས་ཞེས་དོགས་པ་ན། བརྡ་མེད་པར་ནི་ཞེས་བྱ་བའོ། །བྷིད་རྡི་དང་ཨཱད་ཨཻ་ཞེས་བྱ་བ་ལྟར་འདི་བ་ལང་ངོ་ཞེས་བྱ་བའི་བརྡ་ལ་ཡང་ངོ༌། །འདི་ནི་བ་ལང་གི་སྒྲས་བརྗོད་པར་བྱ་བ་ཡིན་ནོ་ཞེས་པའི་དོན་ཡིན་པའི་ཕྱིར་ན། བརྡ་མེད་པར་ནི་གང་དུ་ཡང་སྒྲ་རྗོད་བྱེད་ཉིད་མ་ཡིན་ནོ་ཞེས་བྱ་བའི་དོན་ཏོ། །དངོས་གཉིས་མཐོང་ལ་ཞེས་བྱ་བའི་རྣམ་འགྲེལ་ཉེ་བར་བཀོད་པ་ཁོ་ནར་འཆད་པ་ནི་སྒྲ་མེད་པར་ཡང་ཞེས་བྱ་བའོ། །མཐོང་བའི་བ་ལང་གི་གསལ་བ་ལས་བ་ལང་གི་གསལ་བ་གཞན་ནི་གསལ་བ་གཞན་ཏེ། དེ་མཐོང་བ་ལས་ནིའོ། །སྒྲ་མེད་པར་ཡང་ཞེས་
བྱ་བར་ནི་བརྡ་ལ་མི་ལྟོས་པར་སྤྱིར་བློར་འགྱུར་རོ་ཞེ་ན་ལན་དེར་ཡང་ཞེས་བྱ་བ་སྟེ། གསལ་བ་གཞན་མཐོང་བར་ཡང་ངོ༌། །དེ་ཉིད་ནི་གསལ་བ་གཞན་ཉིད་དེ་བརྡ་ཡིན་ནོ། །དེའི་ངོ་བོ་ཞེས་བྱ་བ་ནི་སྤྱི་ལ་ཐ་སྙད་དོ། །དངོས་པོར་འགྱུར་བའི་ངང་ཚུལ་གང་ལ་ཡོད་པ་དེ་ནི་དེའི་ཐ་སྙད་ཀྱི་དངོས་པོ་སྟེ་དེ་ལའོ། །དེ་ལྟ་ན་ནི་འོ་ན་བརྡ་ལ་མི་ལྟོས་སོ་ཞེས་བྱ་བར་བརྗོད་པ་ནི་རིགས་སོ་ཞེས་དོགས་པ་བསུ་ནས་བརྡ་སྨོས་པ་ནི་ཞེས་གསུངས་སོ། །རྟགས་ལ་ཡང་ལྟོས་པ་མ་ཡིན་ནོ་ཞེས་བྱ་བ་ནི་སྐབས་ཀྱིས་དངོས་པོའི་སྟོབས་ཀྱིས་བསྐྱེད་པའི་ཤེས་པའོ། །ཅིའི་ཕྱིར་ཞེ་ན། རྟགས་ཀྱང་ཞེས་སྨོས་ཏེ། སྒྲ་འབའ་ཞིག་ཏུ་ནི་མ་ཟད་དེ། ཅི་ལྟར་བ་ལང་ཉིད་ལ་སོགས་པའི་རིགས་རྟགས་དང་བརྡ་ལ་སོགས་པས་བསྐྱེད་པའི་ཤེས་པ་ལ་རྟོགས་པར་བྱ་བ་ལ་ཡིན་པ་དེ་བཞིན་དུ་བྲམ་ཟེ་ཉིད་ལ་སོགས་པའི་རིགས་ཀྱང་ཡིན་ནོ་ཞེས་བརྗོད་པ་ནི་དེ་བཞིན་དུ་གསལ་བྱ་ལ་སོགས་པ་ཞེས་བྱ་བའོ། །གལ་ཏེ་བརྡ་དང་ལྷན་ཅིག་པའི་མངོན་སུམ་ནི་རིགས་ཀྱིས་གྲུབ་པར་བྱེད་པ་མ་ཡིན་པ་དེས་ན། དངོས་པོ་མེད་པ་མ་ཡིན་ནོ་ཞེས་དོགས་པ་བསུ་བ་ནི་བྲམ་ཟེ་ལ་སོགས་པ་ལ་ཞེས་བྱ་བའོ། །མངོན་སུམ་བརྡ་ལ་ལྟོས་པའི་ཕྱིར་ན་དེ་ལ་ལྟོས་པ་མེད་པ་ཡིན་ནོ་ཞེས་བརྗོད་པ་ནི་མ་ཡིན་ཏེ་ཞེས་བྱ་བའོ། །ཁྱབ་པར་བྱེད་པ་འགལ་བ་དམིགས་པས་དངོས་པོ་ཡུལ་ཅན་མ་ཡིན་པ་ཉིད་དུ་བརྗོད་པ་ནི་བརྡ་ཙམ་ལ་ལྟོས་པ་ནི་ཞེས་བྱ་བའོ། །མངོན་སུམ་གྱི་ལྷན་ཅིག་བྱེད་པ་ཅན་ཡིན་པའི་ཕྱིར་ན་དམུས་ལོང་བརྒྱུད་མ་ཡིན་ནོ་ཞེས་དོགས་པ་བསུ་བ་ནི། ལྷན་ཅིག་བྱེད་པའི་ཞེས་བྱ་བའོ། །བཟུང་བ་ཞེ་ན་ཞེས་བྱ་བ་ནི་དེས་ནའོ། །མ་ངེས་ན་ཡང་ཉེ་བར་བསྟན་པ་མི་འཐད་དེ། དེས་ན་རང་ཉིད་མེད་པའི་ཕྱིར་དོན་མེད་དོ་ཞེས་བརྗོད་པ་ནི། མངོན་སུམ་གྱིས་མ་བཟུང་ན་ཡང་ཞེས་བྱ་བའོ། །ཇི་ལྟར་ནི་མི་ནུས་པ་ཞེ་ན། མཐོང་བ་ལ་ནི་ཞེས་གསུངས་སོ། །ནུས་པ་ནི་ཚད་མའོ། །འདི་གཞན་གྱིས་ཀྱང་འདོད་པ་ཡིན་ནོ་ཞེས་བརྗོད་པ་ནི། དེ་སྐད་དུ་ཡང་ཞེས་བྱ་བ་སྟེ་རི་ཁྲོད་རྗེས་བཤད་པ་ཡིན་ནོ། །དེ་ནི་ཞེས་བྱ་བ་ནི་དབང་པོ་ལས་འདས་པ་དག་ལ་ཉེ་བར་བསྟན་པ་སྟེ། སྐྱེས་བུ་བློས་
བསྐྱེད་པ་ནི་ཚད་མ་མ་ཡིན་པ་ཁོ་ནའོ། །བཤད་ཟིན་པའི་རྩོད་པ་ཉིད་ལྷག་པ་བརྗོད་པའི་དོན་དུ་དགོད་པ་ནི། ཅི་སྟེ་ཡང་ཞེས་བྱ་བའོ། །བྲམ་ཟེ་ཉིད་ནི་རིགས་ནི་མི་འགྱུར་ཞེས་བྱ་བ་ཇི་ལྟར་ཞེ་ན་དེ་ནི་དེ་ལྟར་ཞེས་གསུངས་ཏེ་བྲམ་ཟེ་ཉིད་དེ་ནི་བརྡ་མེད་པར་བཏགས་པའི་ཕྱིར་རོ་ཅིའི་ཕྱིར་ཞེ་ན། བ་ལང་ཉིད་བཞིན་དུ་བྲམ་ཟེ་ཉིད་ལ་སོགས་པའི་རིགས་ནི་གསལ་བས་གསལ་བར་བྱེད་པར་མ་མཐོང་གི །འོན་ཀྱང་ཉེ་བར་བསྟན་པ་ཁོ་ནས་ཡིན་ནོ། །དེའི་གསལ་བྱེད་གསལ་སྣང་བ་ཡིན་པར་ཇི་ལྟར་རྟོགས་ཤེ་ན། བ་ལང་ཉིད་ལ་ནི་གསལ་ཏེ་འདི་བ་ལང་མ་ཡིན་ནོ་ཞེས་དག་གཞན་བརྗོད་པ་དེའི་ཚེ་བ་ལང་ཉིད་འདིར་འགའ་ཞིག་ཐེ་ཚོམ་འགྱུར་རམ་ཅི་སྟེ་མི་འགྱུར་བ་ཁོ་ནའོ། །དེས་འདིའི་གསལ་བར་བྱེད་པ་ནི་གསལ་བ་ཡིན་ནོ་ཞེས་རྟོགས་པ་ཡིན་ནོ། །བྲམ་ཟེ་ཉིད་ལ་ནི་རྟོགས་པ་འདི་ཡང་ཡོད་པ་མ་ཡིན་ནོ་ཞེས་བརྗོད་པ་ནི། བྲམ་ཟེ་ཉིད་ལ་ཞེས་བྱ་བའོ། །གཞན་ལས་ཀྱང་ངེས་པ་མ་ཡིན་ནོ་ཞེས་བརྗོད་པ་ནི་བྱ་ལས་དེར་ནི་ཞེས་བྱ་བའོ། །ཅིའི་ཕྱིར་ཞེ་ན། གཞན་གྱི་སྨོས་ཏེ། དམངས་རིགས་ལ་སོགས་པས་སོ། །བྲམ་ཟེ་ལ་སོགས་པའི་རིགས་བཞིན་དུ་གསལ་བྱ་ལ་སོགས་པའི་རིགས་ལ་ཡང་ཉེ་བར་བསྟན་པ་ཁོ་ན་གསལ་བྱེད་ཡིན་ནོ་ཞེས་བརྗོད་པ་ནི། བསྟན་པ་མེད་པར་ཞེས་བྱ་བའོ། །གསལ་བ་ནི་མངོན་པར་གསལ་བའོ། །འདི་སྙམ་དུ་གསལ་བྱ་ལ་སོགས་པའི་རིགས་ནི་རང་གི་ངོ་བོ་མེད་པའི་ཕྱིར་དེ་ཉིད་ཀྱིས་གསལ་བ་ཡིན་ནོ་ཞེས་དོགས་པ་བསུ་བ་ནི་གལ་ཏེ་ཞེས་བྱ་བའོ། །དེ་མེད་ན་ཞེས་བྱ་བ་ནི་རང་གི་ངོ་བོ་མེད་ནའོ། །ལན་ནི་བ་ལང་དང་བྲམ་ཟེ་ལ་སོགས་པའི་རིགས་ལ་ཡང་དེ་ཅི་སྟེ་འདོད། སྒྲ་གཅིག་འཇུག་པར་བྱ་བའི་དོན་དུའོ་ཞེ་ན། འོ་ན་གསལ་བྱ་ལ་སོགས་པ་ལ་སྒྲ་གཅིག་འཇུག །སྒྲ་གཅིག་གིས་བརྗོད་པར་བྱ་བ་ཉིད་ཀྱི་རང་བཞིན་དུ་གྱུར་པའི་རིགས་ཡོད་པའི་ཕྱིར་རོ་ཞེ་ན། དེ་ལྟ་ན་ནི་འོ་ན་ཇི་ལྟར་དབྱངས་ལ་སོགས་པ་ལ་ཞེས་བྱ་བའོ། །གལ་ཏེ་ཁྲ་བོ་ལ་སོགས་པའི་གསལ་བ་མཐའ་ཡས་པས་རིགས་གཅིག་མེད་པས་དེ་དག་སྒྲ་གཅིག་ཇི་ལྟར་སྦྱོར་ཏེ་ཁྱད་པར་རྣམས་ནི་མཐའ་ཡས་བས་འཁྲུལ་པའི་ཕྱིར་རོ་ཞེས་བྱ་བ་ནི་ལུགས་ཡིན་པའི་ཕྱིར་ཞེས་དོགས་པ་བསུ་བ་ནི་
བ་ལང་གི་ཉིད་ཅེས་བྱ་བའོ། །དེར་ནི་གསལ་བ་མཐའ་ཡས་པ་དེར་རོ། །དེ་ཡང་ཞེས་བྱ་བ་ནི་ལན་ནོ། །ཇི་ལྟར་མཐའ་ཡས་སྙམ་ན། གོང་དུ་སྤོང་སོགས་ཞེས་གསུངས་སོ། །ཅི་སྟེ་བརྡ་མ་བཟུང་བས་ཀྱང་གསལ་བྱ་ལ་སོགས་པ་ལ་དེ་ཉིད་ནི་འདིའོ་ཞེས་མཚམས་སྦྱོར་བ་ལས་བརྡ་བྱེད་པ་ཡིན་ནོ་སྙམ་དུ་དོགས་ན་འདི་ནི་ཁྲ་བོ་ལ་སོགས་པ་ལ་ཡང་མཚུངས་སོ་ཞེས་བརྗོད་པ་ནི་ངོ་ཤེས་པ་ལས་ཞེས་བྱ་བའོ། །གང་གི་སྒྲ་གཅིག་གི་བརྗོད་བྱ་ཉིད་ལ་གཏོགས་པར་བྲམ་ཟེ་ཉིད་ལ་སོགས་པའི་རིགས་ཡོད་པ་མ་ཡིན་པ་དེའི་ཕྱིར་རོ། །ཁྲ་བོ་ལ་སོགས་དོན་རྣམས་ཀྱི་ཉེ་བའོ། །གལ་ཏེ་རིགས་མེད་སྒྲ་དང་འཛིན་པ་གཅིག་དང་ལྡན་པ་ཇི་ལྟར་སྲིད་སྙམ་ན། དེ་མ་ཡིན་ཏེ་ཞེས་བྱ་བའོ། །ཇི་ལྟར་བ་ལང་ཉིད་རྒྱུ་མཚན་གཞན་མེད་ཀྱང་དེ་ལྟར་མཐོང་བ་ལས་ཁྲ་བོ་ལ་སོགས་པ་ཉིད་ལ་ཡོད་པ་དེ་བཞིན་དུ་དེར་འཛིན་པ་ཡང་ཡིན་ནོ། །དེ་བཞིན་དུ་མིག་ལ་སོགས་པ་ཉིད་ལ་གཟུགས་ཀྱི་ཤེས་པ་རྒྱུ་མཚན་གཞན་མེད་པར་ངོ་བོ་ཉིད་ཀྱི་ཡོད་པ་ཡིན་གྱི། རྣ་བ་ལ་སོགས་པ་ལ་ནི་མ་ཡིན་པ་བཞིན་ནོ་ཞེས་དཔེར་བྱའོ། །མིག་ལ་སོགས་པ་རྣམས་ལ་ནི་ཉེ་བ་ཡོད་པ་ཁོ་ན་སྟེ། ལྷན་ཅིག་བྱེད་པ་ཡིན་པའི་ཕྱིར་རོ། །ཁྲ་བོ་ལ་སོགས་པ་ལ་ནི་མ་ཡིན་ནོ་ཞེས་དོགས་པ་བསུ་བ་ནི། ལྷན་ཅིག་བྱེད་པ་རྣམས་ལ་ཞེས་བྱ་བའོ། །མིག་ལ་སོགས་པ་བཞིན་དུ་ཁྲ་བོ་ལ་སོགས་པ་རྣམས་ལ་ཡང་ལྷན་ཅིག་བྱེད་པ་ཉིད་ལས་བློ་གཅིག་འཇུག་པ་ཡིན་པས་སྤྱིས་ཅི་ཞིག་བྱ་ཞེས་ལན་འདེབས་པ་ནི་དངོས་པོ་གཉིས་མཐོང་བ་ལ་ཡང་ཞེས་བྱ་བའོ། །བློ་ཡང་ཡིན་ལ་གཅིག་ཀྱང་ཡིན་པ་སྟེ། རིགས་མེད་པར་ཡང་འགྱུར་རོ་ཞེས་པའོ། །རིགས་མེད་ན་བློ་གཅིག་ཏུ་ཇི་ལྟར་འགྱུར་ཞེས་དོགས་པ་བསུ་བ་ནི། མཚུངས་པའི་རྣམ་པ་ཉིད་ཅེས་སྨྲས་ཏེ། གཞལ་བྱའི་རང་བཞིན་ནོ། །མ་ཡིན་ཏེ་ཞེས་བྱ་བ་ནི་རྩོད་པ་འགོག་པའོ། །ཅིའི་ཕྱིར་ཞེ་ན་གཞལ་བྱ་ཞེས་སྨོས་སོ། །བློ་གཅིག་པ་ལས་མ་གཏོགས་པར་ནི་མཚུངས་པའི་རྣམ་པ་ཉིད་ལ་དམིགས་ཏེ། དེ་བས་ན་དེ་ནི་མེད་པ་ཁོ་ནའོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་མིག་ལ་སོགས་པ་དཔེ་ཡིན་ནོ་ཞེས་
བརྗོད་པ་ནི་དེ་ནི་ཞེས་གསུངས་ཏེ་བློ་གཅིག་བསྐྱེད་པའོ། །འདི་སྙམ་དུ་མིག་ལ་སོགས་པ་ལ་ཡང་བློ་གཅིག་སྐྱེད་པར་བྱེད་པ་ཉིད་ཀྱི་སྤྱི་ཡོད་པ་ཁོ་ནའོ། །དེས་ན་མེད་པར་བསྒྲུབ་པ་ལ་དེ་དག་དཔེ་ཉིད་དུ་ཇི་ལྟར་འགྱུར་ཞེས་དོགས་པ་བསུ་བ་ནི་དེ་དག་ལ་ཡང་ཞེས་བྱ་བའོ། །སྐྱེད་པར་བྱེད་བ་ཉིད་ཀྱང་བློ་གཅིག་སྐྱེད་པ་ལས་གཞན་ནི་མེད་དོ་ཞེས་ལན་འདེབས་པ་ནི་ཁྲ་བོ་ལ་སོགས་པ་ལ་ཡང་ཞེས་བྱ་བའོ། །བློ་གཅིག་བསྐྱེད་པ་ཉིད་སྤྱི་ཡིན་ནོ་སྙམ་པར་དོགས་པ་ནི་གལ་ཏེ་དེ་ཉིད་ཅེས་བྱ་བའོ། །དེ་ལྟ་མ་ཡིན་ཞེས་བྱ་བ་ནི་སྐྱེད་བྱེད་ཀྱི་མཚན་ཉིད་དུ་འགྱུར་བའི་སྤྱི་མེད་ནའོ། །རིགས་ཀྱི་སྟོབས་ཀྱིས་བློ་ངེས་ཀྱང་དེ་ཉིད་ག་ལས་ངེས་ཞེས་ལན་འདེབས་པ་ནི། འོ་ན་རིགས་ཀྱང་བྱ་བའོ། །རིགས་གཞན་ལས་ཞེས་བྱ་བར་ཁས་ལེན་ན་ནི། ཐུག་པ་མེད་དོ་ཞེས་བརྗོད་པ་ནི་དེ་ལ་ཞེས་བྱ་བ་སྟེ་རིགས་ལའོ། །རྣམ་པར་འབྱེད་པར་བྱེད་པ་ཞེས་བྱ་བ་ནི་ངེས་པའི་གསལ་བས་གསལ་བར་བྱེད་པ་ཉིད་དང་རྟེན་དུ་བྱེད་པ་ཞེས་བྱ་བའི་དོན་ཏོ། །གསལ་བའི་རྒྱུ་ནི་ནུས་པ་ཉིད་ལས་རྣམ་པར་དབྱེ་བ་ཡིན་པའི་ཕྱིར་ཐུག་པ་མེད་པ་མ་ཡིན་ནོ་ཞེས་དོགས་པ་མེད་པ་བསུ་བ་ནི་འོན་ཏེ་ཞེས་བྱ་བའོ། །དེ་ལྟ་ཡིན་ན་རིགས་དོན་མེད་དོ་ཞེས་ལན་འདེབས་པ་ནི་དེ་ལྟ་ན་ཡང་འོ་ན་ཞེས་བྱ་བའོ། །གལ་ཏེ་ཐ་དད་པ་རྣམས་ཀྱི་བློ་གཅིག་བསྐྱེད་པ་ཉིད་དུ་བཟློག་པར་བྱ་བ་མ་ཡིན་གྱི། འོན་ཀྱང་གཅིག་སྣང་བ་ཡིན་ནོ་ཞེས་བརྗོད་དོ་སྙམ་དུ་དོགས་ན། མིག་ལ་སོགས་པ་ལ་ཡང་ཞེས་བྱ་བའོ། །ཇི་ལྟར་ཞེ་ན་གང་གི་ཕྱིར་རྣམ་པ་འགས་ཀྱང་སྔོན་པོ་ལ་སོགས་པ་བཞིན་དུ་མངོན་སུམ་ལ་སྣང་བ་ཡོད་པ་མ་ཡིན་པའི་ཕྱིར་རོ། །གལ་ཏེ་མི་སྣང་བའི་ཕྱིར་སྤྱི་མེད་ན། མིག་ལ་སོགས་པ་ཡང་འགྱུར་རོ་ཞེ་ན། དབང་པོ་ནི་གཟུགས་དང་ལྡན་པ་ཡིན་པའི་ཕྱིར་ན་དབང་པོ་ལས་འདས་པ་ཐོབ་པ་ལ་སྣང་བར་འགྱུར་རོ་ཞེས་སྲིད་པར་སྟོན་པ་ནི་ག་ཏེ་དབང་པོ་རྣམས་ཀྱི་ལྟ་བ་པོ་ཞིག་ཡོད་ན། དེའི་ཚེ་དེའི་ལུས་ནི་སྣང་བ་ཡིན་ཏེ་གཟུགས་ཅན་ཡིན་པའི་ཕྱིར་རོ། །རིགས་རྣམས་ནི་གཟུགས་དང་ལྡན་པ་མ་ཡིན་ནོ། །ཅིའི་ཕྱིར་ཞེ་ན། ཡན་འགར་བ་གསལ་བ་ནི་འཛིན་པ་དང་བྲལ་བ་རྣམས་མི་མཐོང་བའི་ཕྱིར་རོ། །
ཅི་སྟེ་དེ་ལྟར་མཐོང་བ་ཡོད་པ་ཁོ་ནའོ། །གསལ་བ་འཛིན་པའི་ཚེ་ན་འང་གསལ་བ་དེའི་སྒྲ་དངོས་པོ་དེ་ལས་གཞན་རིགས་ཀྱི་རང་བཞིན་ནི་སྣང་བ་མེད་དོ། །མི་དམིགས་པ་མ་གྲུབ་པར་བརྗོད་པ་ནི་འབྲས་བུའི་སྒོ་ནས་ཀྱང་ཞེས་བྱ་བ་ནི་ལན་ནོ། །འབྲེལ་པ་ཡང་ཐམས་ཅད་དུ་རང་བཞིན་གཅིག་པའི་ཕྱིར་སྤྱི་ཡིན་ནོ་ཞེས་དོགས་པ་བསུ་བ་ནི་ཐམས་ཅད་དུ་གཅིག་པའི་འབྲེལ་པ་ཡང་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །འདི་ཉིད་བརྗོད་པ་ནི་དེའི་དེ་མ་ཐག་ཏུ་ཞེས་བྱ་བའོ། །དེ་ལྟར་མི་དམིགས་པ་ལ་གྲུབ་པ་ཉིད་སྤངས་པའི་དོན་དུ་མི་སྣང་ཡང་ནུས་བ་ཞེས་བྱ་བའོ། །དེ་ལ་ནི་ཞེས་བྱ་བ་ནི་དབང་པོ་ལའོ། །དབང་པོ་བཞིན་ནོ་ཞེས་བྱ་བའི་དཔེ་ཡང་མ་གྲུབ་པོ་ཞེས་བརྗོད་པ་ནི་འབྲས་བུ་ལྡོག་པས་ནི་ཞེས་བྱ་བའོ། །ལུས་ཀྱི་ནི་དབྱེ་བ་ཞེས་བྱ་བས་ནི་གསུམ་མོ། །མིག་ལ་སོགས་པ་བག་ཆགས་ཀྱི་ཁྱད་པར་ཡིན་པའི་ལུགས་བརྗོད་པ་ནི་གང་ཞིག་ཅེས་བྱ་བའོ། །གང་གི་ཕྱིར་དེ་ལྟར་ལུགས་ཐ་དད་པ་ཡིན་པ་དེའི་ཕྱིར་ནའོ། །དེའི་སྒོ་ནས་ཞེས་བྱ་བ་ནི་དབང་པོ་རྗེས་སུ་དཔོག་པའི་སྒོ་ནས་སོ། །གལ་ཏེ་དབང་པོ་རྗེས་སུ་དཔག་པས་མ་གྲུབ་ན་འོ་ན་དེའི་སྒྲུབ་པར་བྱེད་པ་གང་ཡིན་ཞེ་ན། གཟུགས་དང་ལྡན་པ་ཉིད་ནི་ཞེས་བྱ་བའོ། །ལུང་ཡིན་ཏེ་ཞེས་བྱ་བ་ནི་རྗེས་སུ་དཔག་པ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟར་ཡིན་ན་ཞེས་བྱ་བ་ནི་ལུང་ལས་གྲུབ་པའི་གཟུགས་དང་ལྡན་པ་ཉིད་ནའོ། །རིགས་རྣམས་ནི་མ་ཡིན་ནོ་ཞེས་བྱ་བ་ནི་འཆད་པ་ནི་སྤྱི་ནི་དེ་ལྟ་མ་ཡིན་ཏེ་ཞེས་བྱ་བ་སྟེ། གཟུགས་དང་ལྡན་པ་ཉིད་མ་ཡིན་ནོ། །ཇི་ལྟ་ཞེ་ན་འབའ་ཞིག་པ་ཞེས་གསུངས་སོ། །སྤྱི་འབའ་ཞིག་མི་མཐོང་བ་དེ་དེའི་རང་བཞིན་ཉིད་ལས་ཉམས་པར་འགྱུར་རོ་ཞེས་བརྗོད་པ་ནི། གལ་ཏེ་རྣལ་འབྱོར་པས་ཞེས་བྱ་བའོ། །དེའི་ནི་བློའིའོ། །འདི་ནི་སྤྱིའོ། །དེ་ལྟ་ན་ཞེས་བྱ་བ་ནི་ལན་ནོ། །རྣལ་འབྱོར་པ་བཞིན་དུ་ཁྱེད་ཀྱིས་ཀྱང་སྤྱི་མཐོང་བར་འགྱུར་རོ་ཞེ་ན། བདག་གིས་ནི་ཞེས་བྱ་བའོ། །སྤྱིའི་འབའ་ཞིག་མི་མཐོང་བའི་རྒྱུ་མཚན་དུ་གཞན་གྱི་འདོད་པ་ཉིད་བརྗོད་པ་ནི། གལ་ཏེ་སྤྱི་ནི་ཞེས་བྱ་བའོ། །གཟུགས་ནི་སྣང་བ་མེད་ཀྱང་དམིགས་པར་འགྱུར་གྱི། གསལ་བ་མེད་པར་ནི་སྤྱི་དམིགས་པ་མེད་པ་
མ་ཡིན་ནོ་ཞེས་བརྗོད་པ་ནི། དེ་ཡང་མི་རུང་སྟེ་ཞེས་བྱ་བའོ། །ཐ་དད་ཀྱང་ཡུལ་གཅིག་པའི་ཕྱིར་ཐ་དད་པ་མི་དམིགས་སོ་ཞེས་སྨྲས་པ་ནི། འོན་ཏེ་ཡུལ་ཞེས་བྱ་བའོ། །གང་ཞིག་གང་དང་ཡུལ་གཅིག་པ་དེ་ནི་དེ་དང་ཐ་དད་པར་དམིགས་པ་མ་ཡིན་ནོ་ཞེས་བྱ་བ་ནི་ཁྱོད་ཀྱི་འདོད་པས་འཁྲུལ་པ་ཡིན་ནོ་ཞེས་ལན་བརྗོད་པ་ནི་གཟུགས་དང་ཞེས་བྱ་བའོ། །གཟུགས་དང་རོ་ལ་སོགས་པ་ཡང་ཡུལ་གཅིག་པའི་ཕྱིར་ཐ་དད་དམིགས་པར་མི་འགྱུར་བ་ཞིག་མ་འགྱུར་བ་ཡང་ཡིན་ཏེ། དེས་ན་འདི་མ་ངེས་པ་ཡིན་ནོ་ཞེས་བྱ་བའི་དོན་ཏོ། །ཤིན་ཏུ་འདྲེས་པ་ན་གང་ཞིག་གང་དང་ཡུལ་གཅིག་པ་ཞེས་ཁྱད་པར་དུ་བྱེད་པའི་ཕྱིར་མ་ངེས་པ་ཉིད་མ་ཡིན་ནོ་ཞེས་དོགས་པ་བསུ་བ་ནི། དེ་རྣམས་ནི་ཞེས་བྱ་བ་སྟེ་གཟུགས་ལ་སོགས་པ་རྣམས་སོ། །དེ་ནི་ཞེས་བྱ་བ་ནི་སྤྱི་དང་གསལ་བ་གཉིས་ལའོ། །ཤིན་ཏུ་ཞེས་བྱ་བ་ནི་ལན་ནོ། །རང་བཞིན་འདྲེས་པ་ཅི་ཞེ་ན། ཅི་ག་རང་བཞིན་འདྲེས་པར་གྱུར་ཏམ་དེ་མ་འདྲེས་པ་ཉིད་དོ། །ཅིའི་ཕྱིར་ཞེ་ན། གང་གི་ཕྱིར་རང་བཞིན་འདྲེས་པར་འགྱུར་ན་ནི་སྤྱི་གང་བུ་ལས་ཐ་མི་དད་པ་ཁོ་ནར་འགྱུར་རོ། །ཅི་ལྟར་ཞེ་ན་གང་གི་ཕྱིར་འདྲེས་པར་འགྱུར་ན་ནི་སྤྱི་གང་ཕྱིར་རང་བཞིན་ཏེ་ངོ་བོ་གང་ཡིན་པ་ནི་ཐ་དད་པ་མེད་པ་ཉིད་ཡིན་པས་སོ། །འདྲེས་པས་ཐ་དད་པར་མི་རྟོགས་ན་ནི་སྤྱི་མེད་པར་ཐལ་བར་འགྱུར་རོ། །དེས་ན་ཁྱད་པར་མེད་པ་ཉིད་དུ་ཡུལ་གཅིག་པའི་གཏན་ཚིགས་རྒྱུ་ཡིན་པས་ད་ནི་དེ་ལས་དངོས་པོ་ཉིད་ཀྱང་མ་ངེས་པ་ཉིད་དུ་ཡང་བརྗོད་པ་ནི། རང་བཞིན་གཞན་ཕྱིར་ཞེས་བྱ་བའོ། །གཏན་ཚིགས་འདི་ནི་མ་གྲུབ་པ་ཡང་ཡིན་ཏེ་གང་གི་ཕྱིར། རང་བཞིན་ལས་ནི་གཞན་འགྱུར་བར་ཞེས་བྱ་བའོ། །ཡུལ་ཙམ་མ་གྲུབ་པ་ནི་ཤིན་ཏུ་གསལ་བར་དེའི་ཁྱད་པར་མ་གྲུབ་པོ་ཞེས་བྱ་བའི་དོན་ཏོ། །དངོས་པོ་ལས་ཐ་དད་པར་ཞེས་བྱ་བ་ནི་འཆད་པའོ། །ཡུལ་ཐ་དད་པ་ཡིན་དུ་ཟིན་ཀྱང་དེ་ལྟ་ན་ཡང་དེ་ཐ་དད་པ་ནི་འདིར་མ་གྲུབ་པོ་ཞེས་གསུངས་སོ། །གལ་ཏེ་དངོས་པོ་ཞེས་བྱ་བའོ། །ཡུལ་གཞན་ག་ལ་ཡོད་ཅེས་གང་བརྗོད་པ་ནི་དེ་འཐད་པ་ཉིད་དུ་དོགས་པ་བསུ་བ་ནི་གལ་ཏེ་ཡུལ་གྱི་དབྱེ་བས་སྤྱི་ལ་སོགས་པ་ཡུལ་ཅན་དང༌། ཡུལ་དག་ཐ་དད་པ་ཡིན་ནོ། །ཡུལ་ནི་དངོས་པོ་ལས་ཐ་དད་པ་
གཞན་ཁོ་ན་ཡིན་ནོ་ཞེས་བྱ་བའི་དོན་ཏོ། །དེ་ལྟར་ན་ཐུག་པ་མེད་པར་འགྱུར་རོ་ཞེས་ལན་འདེབས་པ་ནི། དེའི་དབྱེ་བ་ག་ལས་ཡིན་ཞེས་བྱ་བའོ། །དེས་ན་ཡུལ་གཅིག་པ་ཉིད་ནི་སྒྲུབ་བྱེད་མི་རུང་ངོ༌། །དེའི་ཕྱིར་ཞེས་བྱ་བའི་རྩ་བས་འཕངས་པའི་དོན་བརྗོད་པ་ནི། གང་གི་ཕྱིར་ཞེས་བྱ་བའོ། །གཅིག་གི་བློ་ནི་གསལ་བ་རྣམས་ལ་ཡིན་ནོ་ཞེས་བྱ་བར་ཡང་བལྟ་བར་བྱ་སྟེ། དེ་ཉིད་ཀྱི་ཕྱིར་རོ་སྤྱི་ཙམ་གྱི་དོན་བྱ་བ་ལྟ་ཞིག་སྟེ། རྣམ་པར་རྟོག་པ་དང་གཞན་པའི་ཤེས་པ་ཙམ་གྱི་དོན་བྱ་བ་ལ་ཡང་སྤྱི་དེ་རུང་བ་མ་ཡིན་ནོ། །དེ་ལྟར་གྱུར་པས་ཅི་གྲུབ་ཅེ་ན། དེ་མི་རུང་ཕྱིར་ཞེས་གསུངས་སོ། །དེ་ལྟ་ན་ཡང་ཇི་ལྟར་དེ་ལྟར་དངོས་པོ་མ་ཡིན་ཞེ་ན། གང་གི་ཕྱིར་མི་རུང་བ་ཉིད་ནུས་པ་ཐམས་ཅད་བརྗོད་པ་དང་བྲལ་བ་དེ་ནི་དངོས་མེད་མཚན་ཉིད་ཡིན་ནོ། །དེ་ལྟ་བས་ན་མི་རུང་བ་ཉིད་ཀྱིས་ན་དེ་ནི་ཉེ་བར་བརྗོད་པ་མེད་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རང་གི་ངོ་བོས་སྣང་བ་མ་ཡིན་ཡང་དེ་ཤེས་པ་ཙམ་གྱི་དོན་བྱ་བ་བྱེད་པ་ཡང་ཅི་མི་རུང་བར་གོ་ཅི་ལྟར་འགྱུར་ཞེ་ན། གང་དང་གང་ཞེས་བྱ་བ་ཤེས་པ་ལས་ཐ་དད་པ་ཤེས་པའི་རྒྱུར་འགྱུར་བ་ནི་དམིགས་པའི་རྐྱེན་ནམ་བདག་པོའི་རྐྱེན་ཞིག་ཏུ་འགྱུར་བ། རེ་ཞིག་བཟུང་བར་མངོན་པར་འདོད་པ་རང་གི་ངོ་བོས་སྣང་བ་མ་ཡིན་པ་དེ་ནི། དམིགས་པའི་རྐྱེན་མ་ཡིན་ཏེ་ཅིའི་ཕྱིར་ཞེ་ན། རང་གི་རྣམ་པ་ཞེས་པ་སྨོས་སོ། །བདག་པོའི་རྐྱེན་ཉིད་ཀྱང་དོགས་པ་བསུ་ནས་སྨོས་པ་ནི་མ་ཡིན་ཏེ་ཞེས་བྱ་བའོ། །ཅིའི་ཕྱིར་ཞེ་ན། དེ་ལ་ཡང་ཞེས་གསུངས་ཏེ། བདག་པོའི་རྐྱེན་ནི་ག་ལ་ཞེས་པ་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་དེ་ཉིད་ཡིན་ཏེ། དཔེར་ན་མིག་ལ་སོགས་པ་བཞིན་ནོ། །ཤེས་པ་སྤྱི་ནི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མ་ཡིན་ནོ། །དེས་ན་གཉིས་ཀ་ལྟར་ཡང་རྒྱུ་མ་ཡིན་པའི་ཕྱིར་ན་རུང་བ་ཉིད་མ་ཡིན་ནོ་ཞེས་བྱ་བའི་དོན་ཏོ། །དེ་ནི་དངོས་པོ་མ་ཡིན་ཏེ་བརྗོད་བྱ་ཡིན་པའི་ཕྱིར་དང༌། དེ་ཉིད་དང་གཞན་དག་ཏུ་བརྗོད་པར་བྱ་བ་མ་ཡིན་པའི་ཕྱིར་དང༌། ཤེས་པ་ཙམ་གྱི་དོན་བྱེད་པར་ཡང་མི་རུང་བའི་ཕྱིར་ན་སྤྱིར་མཚན་ཉིད་དོ། །དངོས་པོ་མེད་པར་ཇི་སྐད་བརྗོད་པ་དེ་ལས་བཟློག་པ་གང་ཡིན་པ་རང་གི་ངོ་བོས་སྣང་བ་དང་
བརྗོད་པར་བྱ་བ་དང༌། བརྗོད་པར་བྱ་བ་མ་ཡིན་པ་ཉིད་ཅེས་བྱ་བ་ལ་སོགས་པ་ནི། རང་གི་མཚན་ཉིད་ནི་མཚན་ཉིད་ཡིན་ནོ་ཞེས་བརྗོད་པ་ནི། ཇི་སྐད་བརྗོད་པས་ཞེས་བྱ་བའོ། །གལ་ཏེ་ཞེས་བྱ་བ་ནི་རྩོད་པའོ། །མ་ཡིན་ཏེ་ཞེས་བྱ་བ་ནི་ལན་ནོ། །རང་དགའ་ཉིད་སྤོང་བ་ཅི་བྱ་བ་ཉིད་དང་བྱེད་པའི་ཞེས་བྱ་བའོ། །རྟོགས་པ་ཐ་དད་པ་ཡིན་ཡང་རང་གི་རང་བཞིན་ཁོ་ནའི་མཚན་ཉིད་དུ་རིགས་ཀྱི་གཞན་ནི་མ་ཡིན་ནོ་ཞེས་བརྗོད་པ་ནི། རང་གི་ངོ་བོ་ཉིད་ཅེས་བྱ་བའོ། །ཇི་ལྟར་གཞན་མཚོན་སྙམ་ན། གཞན་གྱི་ངོ་བོས་ཞེས་བྱ་བའོ། །གལ་ཏེ་ཐམས་ཅད་དུ་རང་གི་རང་བཞིན་ཉིད་མཚན་ཉིད་ཡིན་ན། འོ་ན་ཇི་ལྟར་སྤྱི་མཚན་ཉིད་ཡིན་ཏེ། མ་ཡིན་པ་ཉིད་དོ་ཞེས་བྱ་བའི་དོན་ཏོ། །གལ་ཏེ་རང་བཞིན་མཚན་ཉིད་ཡིན་ནོ། ཇི་ལྟར་སྤྱི་མཚན་ཉིད་མ་ཡིན་སྙམ་ན་གསལ་བ་མ་ཁྱབ་པའི་ཕྱིར་རོ་ཞེས་སྨྲས་ཏེ། ཁྲ་བོ་ལ་སོགས་པའི་གསལ་བ་ཁྱབ་པར་བྱེད་པ་ཉིད་མ་ཡིན་པའི་ཕྱིར་ན་རང་གི་རང་བཞིན་སྤྱིའི་མཚན་ཉིད་མ་ཡིན་ནོ། །དེ་ཡང་ཞེས་བྱ་བ་ནི་རྣམ་པར་རྟོག་པ་ལ་སྣང་བའི་ཕྱིར་མངོན་པར་འདོད་པའོ། །འོ་ན་དེ་ལྟར་དེ་སྤྱི་ཡིན་ཞེ་ན། ཐ་སྙད་ལས་ཞེས་གསུངས་ཏེ། རྣམ་པར་དབྱེ་བ་མེད་པར་འཇུག་པ་ལས་དེ་ལྟར་ཞེས་བྱ་བས་སྤྱི་ཉིད་དུ་བརྗོད་པ་ཡིན། གལ་ཏེ་རྣམ་པར་དབྱེ་བ་མེད་པར་འཇུག་པ་ལ་ཡང་ཇི་ལྟར་ཏེ་གསལ་བ་དུ་མའི་ཞེས་གསུངས་སོ། །གསལ་བའི་རང་བཞིན་དུ་ལྷག་པར་སྒྲོ་འདོགས་པ་ལ་ཡང་རྒྱུ་མཚན་ཅི་ཡོད་སྙམ་ན་དེ་ལས་སྐྱེས་པའི་ཕྱིར་རོ་ཞེས་གསུངས་སོ། །དངོས་པོ་མེད་པ་ཉིད་ཡིན་ན་ཞེས་བྱ་བ་ནི་གཞན་གྱི་སྟེ་སྐབས་ཀྱི་སྤྱིའོ། །མངོན་སུམ་དང་རྗེས་སུ་དཔག་པ་གཉིས་བཞིན་དུ་བརྟགས་པ་རྣམས་ཐ་དད་པ་ཡིན་ནོ། །མངོན་སུམ་དང་ཞེས་སྨོས་སོ། །འདི་ལྟར་ཅི་སྟེ་མ་ཡིན་སྙམ་ན། འདི་ལྟར་ཞེས་གསུངས་སོ། །དེ་སྟེ་མཐོང་ངོ་ཞེ་ན་ཞེས་བྱ་བ་ནི། རྟགས་ཀྱི་དབྱེ་བ་ཞེས་འབྲེལ་ཏོ། །རྟགས་ཀྱི་དབྱེ་བསྒྲུབ་པར་བྱེད་པ་ནི་མངོན་སུམ་ཉིད་ཡིན་པས་ཡུལ་གྱི་དབྱེ་བས་ཅི་བྱ་བ་ཞེས་བྱ་བའི་དོན་ཏོ། །དེ་ལྟ་ཡིན་ན་ཧ་ཅང་ཐལ་བར་འགྱུར་རོ་ཞེས་གསུངས་པ་ནི། །འོ་ན་རྣམ་པ་དྲུག་ཏུ་ཞེས་བྱ་བ་སྟེ། རྒྱུ་དང་འབྲས་བུ་དང་ལྡན་པ་ཅན་དང་དོན་གཅིག་ལ་འདུ་བ་ཅན་དང་འགལ་བ་
ཅན་ཞེས་བྱ་བའོ། །འོན་ཏེ་ཞེས་བྱ་བ་ནི་རྩོད་པ་གཉིས་པའོ། །འདི་ལ་ཞེས་བྱ་བ་ནི་རྩོད་པ་གཉིས་པ་འདི་ལའོ། །སྤྱི་སྟེ་རྣམ་པ་གསུམ་ཁོ་ནའོ། །ཇི་ལྟ་ཞེ་ན། དངོས་དང་ཞེས་བྱ་བའོ། །གལ་ཏེ་སྤྱི་ལ་ཞེས་དབྱེ་བ་མེད་ན་འོ་ན་ནི་ཡུལ་གྱི་དབྱེ་བས་བརྟགས་པ་ཐ་དད་པར་མི་འགྱུར་རོ་ཞེས་དོགས་པ་བསུ་ནས་དངོས་པོ་དང༌། དངོས་པོ་མེད་པ་དང་གཉིས་ཀ་ལ་བརྟེན་པའི་སྒོ་ནས་ཞེས་གསུངས་སོ། །དངོས་པོ་ཤིང་དང་དངོས་པོ་མེད་པ་བུམ་པ་མེད་པ་དང་གཉི་ག་མེད་དེ། རང་གི་ངོ་བོས་ཡོད་པའི་ཕྱིར་དང༌། དུ་བའི་ངོ་བོར་མེད་པའི་ཕྱིར་རོ། །གང་ལ་རྟེན་དེ་དག་ཡོད་པ་དེའི་དངོས་པོ་སྟེ། དེའི་སྒོ་ནས་འབྲས་བུ་རྗེས་སུ་དཔག་པའི་ཕྱིར་རང་བཞིན་ལ་སོགས་པའི་གཏན་ཚིགས་ཐ་དད་པ་ཡིན་ནོ་ཞེས་འབྲེལ་ཏོ། །གལ་ཏེ་ཤེས་པ་དེ་གང་གིས་ཉེ་བར་ལེན་པ་ཅན་ཡིན་པ་དེ་ཐ་དད་པར་འགྱུར་མོད། རྟགས་གོ་ཅི་ལྟར་ཞེ་ན་དེ་བྱེད་པ་ཉིད་ཀྱིས་ཞེས་གསུངས་སོ། །འདི་ཉིད་བརྗོད་པ་ནི་འདི་ལྟར་ཞེས་བྱ་བའོ། །འབྲས་བུའི་རྟགས་ལས་སྐྱེས་པའི་རྣམ་པར་རྟོག་པ་རང་གི་ཉེ་བར་ལེན་པ་ཅན་ཇི་ལྟར་ཡིན་ཞེ་ན། འབྲས་བུའི་གཏན་ཚིགས་ནི་ཐ་དད་པ་ཞེས་བྱ་བའོ། །ཐ་དད་པ་ཇི་ལྟར་ཞེ་ན། ཐ་དད་པ་ཞེས་བྱ་བ་གསུངས་སོ། །དངོས་པོའི་རང་བཞིན་ནི་རང་དང་གཞན་ཡོད་པ་དང་མེད་པ་དག་གི་གཉི་གའི་རང་བཞིན་དུ་འགྱུར་བ་ན་རང་བཞིན་ལས་ལྡོག་པ་རིགས་གཞན་དུ་ནི་མ་ཡིན་ནོ། །དངོས་པོ་མེད་པའི་ཡིན་ན་ནི་ཐ་དད་པར་མི་འགྱུར་ཏེ། རི་བོང་གི་རྭ་བཞིན་ནོ། །གཞན་གྱི་རང་བཞིན་ཡིན་ཡང་ཐ་དད་པར་མི་འགྱུར་ཏེ་ཤིང་ཤ་པ་ལས་ཤིང་ཉིད་བཞིན་ནོ། །དེས་ན་ཐ་དད་པར་ནི་ཡོད་པ་དང་མེད་པ་དག་གིས་ཡིན་ནོ། །ཐ་དད་པ་ན་ཡང་དེའི་ཉེ་བར་ལེན་པ་ཅན་གྱི་རྣམ་པར་རྟོག་པ་གཉིས་པའི་ཉེ་བར་ལེན་པ་ཅན་ཁོ་ན་ཡིན་ནོ། །ཡང་ན་དངོས་པོ་མེད་པ་དག་ལས་ཞེས་བྱ་བ་ནི་སྣང་བ་ཐ་དད་པའི་མིང་ཅན་གྲུབ་པ་ཐ་དད་པ་དག་གིས་སོ། །སྤྱིར་ཐ་དད་པའི་དོན་སྐབས་ལ་སྦྱོར་བ་ནི། བསྒྲུབ་པར་བྱ་བ་ཐ་དད་པ་ཡང་ཞེས་བྱ་བའོ། །གཉི་ག་ལ་བརྟེན་པའི་མ་ངེས་པ་ཉིད་བསྡུ་བའི་དོན་དུ་བཤད་པ་གཞན་གསུངས་པ་ནི་ཡང་ན་ཞེས་བྱ་བའོ། །དངོས་པོ་ནི་ཤིང་ཉིད་དང་མེའོ། །དངོས་པོ་མེད་པ་ནི་བུམ་པས་
སྟོང་པའི་ས་ཕྱོགས་རྗེས་སུ་དཔག་པའི་བདག་ཉིད་ཀྱི་རྣམ་པར་རྟོག་པ་གང་ལ་ཉེ་བར་ལེན་པ་དེ་གཉིས་ཡོད་བའི་དེའི་དངོས་པོ་ཉིད་ཀྱིས་ཉེ་བར་ལེན་པ་བརྒྱུད་པའི་རྒྱུ་མེད་པ་ལ་སོགས་པའི་ཐ་དད་པ་གང་ཡིན་པ་དེ་ལས་རྣམ་པར་རྟོག་པའི་ཐ་དད་པ་ལ་བརྟེན་ནས་མེད་པ་ལ་སོགས་པའི་ཡུལ་ཐ་དད་པ་ཡིན་ནོ། །གལ་ཏེ་སྤྱི་དངོས་པོའི་ཉེ་བར་ལེན་པ་ཅན་ལས། འབྲས་བུ་དང་རང་བཞིན་གྱི་གཏན་ཚིགས་ཅི་ལྟར་ཐ་དད་ཅེ་ན། དངོས་པོ་གཉིས་ནི་ཞེས་གསུངས་སོ། །གང་གི་ཕྱིར་དེ་ལྟར་གཏན་ཚིགས་རྣམ་པ་གསུམ་དུ་འདུས་པ་དེས་ན་གཉིས་ཀའི་ཞེས་བྱ་བའོ། །གལ་ཏེ་རང་གི་མཚན་ཉིད་ཀྱིས་ནི་དངོས་པོའི་རྟེན་ཅན་མ་ཡིན་ཏེ། མི་སྣང་བའི་ཕྱིར་རོ། །སྣང་བ་ནི་འགྱུར་བ་ཡིན་ན་དེ་ལྟར་ན་ནི་སྤྱི་དངོས་པོ་ཡིན་པར་འགྱུར་རོ་ཞེས་བརྗོད་པ་ནི། གལ་ཏེ་དངོས་པོའི་རྟེན་ཞེས་བྱ་བའོ། །དེའི་ཚེ་དངོས་པོ་ཤེས་པར་འགྱུར་གྱི་དངོས་པོ་མེད་པའི་སྤྱི་ནི་ཤེས་པར་མི་འགྱུར་རོ། །འགྱུར་བ་ཡང་ཡིན་ཏེ་དེས་ན་དེ་ནི་དངོས་པོ་ཁོ་ན་ལ་མ་ཡིན་ནོ་ཞེས་བྱ་བའི་དོན་ཏོ། །དངོས་པོ་འཛིན་པ་ཉིད་ཀྱིས་དེའི་འབྲས་བུར་ཡང་འགྱུར་རོ་ཞེས་བརྗོད་པ་ནི། དངོས་པོ་འབྲེལ་ཕྱིར་ཞེས་བྱ་བའོ། །ཡང་རྣམ་པར་རྟོག་པ་དངོས་པོ་ལ་བརྟེན་པའི་ཕྱོགས་ལ་ཉེ་བར་དོགས་པ་བསུ་བ་ནི། གལ་ཏེ་རྣམ་པར་རྟོག་པ་ཅན་གྱི་ཤེས་པ་དངོས་པོ་ལ་བརྟེན་པ་ཡིན་ན་དེའི་ཚེ་དངོས་པོ་རང་གི་མཚན་ཉིད་ཤེས་པར་འགྱུར་གྱི་དངོས་པོ་མེད་པར་ནི་མ་ཡིན་ནོ། །ཅིའི་ཕྱིར་ཞེ་ན། དངོས་པོ་འབྲེལ་ཕྱིར་ཞེས་བྱ་བའོ། །བཤད་པ་གཉི་ག་ལ་ཡང་དོན་ནི་འདི་ཡིན་ཏེ། རང་བཞིན་དངོས་པོ་ལ་བརྟེན་པ་དེ་ནི་དངོས་པོའི་ཡུལ་ཅན་ཡིན་ཏེ། དཔེར་ན་མངོན་སུམ་བཞིན་ནོ། །རྣམ་པར་རྟོག་པའི་རྣམ་པར་ཤེས་པ་ཡང་དངོས་པོ་ལ་བརྟེན་པ་ཡིན་ནོ་ཞེས་བྱ་བའོ། །ལན་ནི་མིན། ལན་བཏབ་ཕྱིར་དང་ཞེས་བྱ་བའོ། །རྣམ་པ་འགས་ཀྱང་རྣམ་ཤེས་ལ། །དེ་དངོས་པོ་སྣང་བ་མེད་པའི་ཕྱིར་རོ་ཞེས་བྱ་བ་དང༌། ཤེས་པ་ཙམ་གྱི་དོན་བྱེད་པར་ཡང་མི་རུང་ངོ་ཞེས་བྱ་བ་དང༌། རང་གི་མཚན་ཉིད་སྣང་བ་ཡིན་ན་ཡང་དབང་པོའི་ཚོགས་འབྲས་བུ་མེད་པར་བསྟན་པའི་ཕྱིར་རོ། །འབྱུང་བར་འགྱུར་རོ། །འབྱུང་བར་འགྱུར་རོ་སྙམ་ན་ནི་ཤེས་པ་ཅི་ལ་དམིགས་པ་ཡང་མཐོང་བའི་ཕྱིར་འདས་པ་འམ་མ་འོངས་པ་ནི་སྤྱི་མ་
ཡིན་ནོ་ཞེས་བརྗོད་པ་ནི། རྣམ་པ་གཞན་དུ་ཞེས་བྱ་བ་སྟེ་སྤྱི་མེད་པར་ཡང་ངོ༌། །དངོས་པོ་ལ་བརྟེན་པ་ཡིན་ཡང་རང་གི་མཚན་ཉིད་ཀྱི་ཡུལ་ཅན་དུ་ནི་མི་འཐད་དོ་ཞེས་རེ་ཞིག་འཆད་པ་ནི། ཤེས་པ་དངོས་པོ་ལ་བརྟེན་པ་ཞེས་བྱ་བའོ། །དངོས་པོ་ལ་ཞེས་བྱ་བའི་རང་གི་མཚན་ཉིད་ཀྱི་ཡུལ་ལའོ། །ཅིའི་ཕྱིར་མི་འགྱུར་སྙམ་དུ་ན་དངོས་པོའི་ཡུལ་ཉིད་ནི་ཞེས་བྱ་བའོ། །འོན་ཏེ་རང་གི་རང་བཞིན་འཛིན་པ་ཡིན་པ་ཉིད་དོ། །སྤྱིའི་ཡུལ་ཅན་གྱི་ཞེས་བྱ་བའོ། །གལ་ཏེ་གང་གི་ཉེས་པ་འདིར་འགྱུར་བ་དངོས་པོ་ལ་ཞེས་བྱ་བ་འདི་ཡུལ་གྱི་བདུན་པ་ནི་མ་ཡིན་གྱི་འོན་ཀྱང་རྒྱུ་མཚན་གྱི་བདུན་པ་ཡིན་ནོ་ཞེས་དོགས་པ་ནི་འོན་ཏེ་དངོས་པོ་ཡོད་ན་ཞེས་བྱ་བའོ། །དེ་ལྟར་རང་གི་མཚན་ཉིད་ཀྱི་ཡུལ་ཅན་ཉིད་དུ་མི་འཐད་དོ་ཞེས་བརྗོད་ནས་སྤྱིའི་ཡུལ་ཅན་ཁོ་ན་ཉིད་ཀྱང་མ་ཡིན་ནོ་ཞེས་བརྗོད་པ་ནི། གལ་ཏེ་ཤེས་པ་དེ་ཞེས་བྱ་བའོ། །རྣམ་པར་རྟོག་པའི་རྣམ་པར་ཤེས་པ་དེའོ། །དེའི་ཚེ་ཞེས་ཁོ་ནར་ཕྱུང་ལ་འདས་པ་ལ་སོགས་པ་ནི་ཞེས་སྦྱར་རོ། །ཅིའི་ཕྱིར་ཞེ་ན། དངོས་པོ་ནི་ཞེས་སྨོས་ཏེ། སྤྱིའི་རང་བཞིན་མ་ཁྱབ་པར་གྱི་རང་བཞིན་ནོ། །འོ་ན་འཇིག་རྟེན་གྱི་རྟོག་པའི་དབང་གིས་འདས་པ་ཡུལ་ཉིད་ཡིན་ནོ་སྙམ་ན་འདི་ལ་ཞེས་གསུངས་ཏེ། རྣམ་པར་རྟོག་པའི་རྣམ་པར་ཤེས་པ་ལའོ། །འོ་ན་ཇི་ལྟར་རྟོགས་ཤེ་ན། དངོས་པོ་མེད་པ་དང་ཞེས་བྱ་བའོ། །རང་གི་ངོ་བོར་ཞེས་བྱ་བ་ནི་ངོ་བོར་འཛིན་པར་འགྱུར་རོ། །དེ་ལྟར་འཁྲུལ་པ་ཙམ་དུ་རྟོགས་པ་ཡིན་ནོ་ཞེས་རྗེས་སུ་འཇུག་པར་བྱ་བའོ། །གལ་ཏེ་འདི་དག་གིས་ཅི་ཞིག་སྟོན་སྙམ་ན། ལན་བཏབ་པའི་ཕྱིར་དང་ཞེས་བྱ་བས་ནི་ཞེས་གསུངས་སོ། །བཟློག་པ་སྤྱི་མེད་པ་ལ་ཚད་མ་མི་དམིགས་པ་འཇུག་པ་ཡིན་པར་རྣམ་པ་འགས་ཀྱང་རྣམ་པར་ཤེས་ལ། དེ་དངོས་པོ་སྣང་མེད་ཕྱིར་རོ་ཞེས་བྱ་བ་ལ་སོགས་པས་བསྟན་པ་བརྗོད་པ་ཡིན་ནོ། །གཞན་གྱིས་མངོན་པར་འདོད་པའི་གཏན་ཚིགས་ནི་གང་ཞིག་དངོས་པོ་ལ་བརྟེན་ཞེས་བྱ་བ་འདིའོ། །གལ་ཏེ་རྣམ་པར་རྟོག་པའི་རྣམ་པར་ཤེས་པ་ནི་གཉིས་ཀ་ལྟར་ཡང་འབྱུང་བའི་ཕྱིར་ན། ཇི་ལྟར་དངོས་པོ་ལ་བརྟེན་པ་ཉིད་དུ་བརྗོད་ཅེས་དོགས་པ་ནི་གལ་
ཏེ་ཞེས་བྱ་བའོ། །དེའི་ཕྱིར་བཤད་པ་ཞེས་བྱ་བ་ནི་དངོས་པོའི་ཆོས་ཉིད་ཉམས་པའི་དོན་དུའོ། །རྣམ་པར་རྟོག་པའི་རྣམ་པར་ཤེས་པ་ནི་རྒྱུད་ནས་རང་གི་མཚན་ཉིད་ཀྱི་རང་བཞིན་ལ་བརྟེན་པ་བརྗོད་པ་ཡིན་ནོ་ཞེས་བྱ་བའི་དོན་ཏོ། །དེ་ཤེས་ཞེས་བྱ་བར་འདིར་ངེས་པར་བཟུང་བ་བརྗོད་པར་འདོད་པ་ཡིན་ནོ་ཞེས་བཤད་པ་ནི། དེ་ནི་ཤེས་པ་ཉིད་ཅེས་བྱ་བའོ། །ཉིད་ཀྱི་སྒྲས་ནི་སྤྱི་དམིགས་པ་ཉིད་ཡིན་པ་འགོག་པའོ། །དེ་ཉིད་བརྗོད་པ་ནི་དེ་ལ་ཞེས་བྱ་བ་སྟེ། རྣམ་པར་རྟོག་པའི་རྣམ་པར་ཤེས་པ་ལའོ། །ཅིའི་ཕྱིར་དམིགས་པ་མེད་པ་ཡིན་ཞེ་ན། སྤྱི་ཞེས་སྨོས་ཏེ། གཙོ་བོ་ལ་སོགས་པ་ལྟར་མཚན་མའི་ཡུལ་མ་ཡིན་པའོ། །འདི་ལྟར་ཞེས་བྱ་བ་ནི་གསལ་བར་བྱེད་པའོ། །རང་གི་མཚན་ཉིད་ཁོ་ན་ཚད་མའི་ཡུལ་ཡིན་པའི་ཕྱིར་གཞལ་བྱ་ཡིན་ནོ་ཞེས་བརྗོད་པ་ནི་རང་གི་མཚན་ཉིད་གཅིག་ཅེས་བྱ་བའོ། །ཅིའི་ཕྱིར་ཞེ་ན། སྤྱི་ཞེས་བྱ་བ་ནི་ཞེས་གསུངས་སོ། །འོ་ན་གང་གཞལ་བྱ་ཡིན་སྙམ་ན། དོན་དམ་པར་ཞེས་གསུངས་སོ། །གལ་ཏེ་དངོས་པོ་ལ་ཤེས་པ་ཉིད་འཇུག་པ་ཡིན་ན་རང་གི་མཚན་ཉིད་སྣང་བ་མངོན་སུམ་དང་སྤྱིའི་མཚན་ཉིད་སྣང་བ་རྗེས་སུ་དཔག་པའོ། །དེ་སྐད་དུ་ཡང༌། གཞལ་བྱ་གཉིས་ཕྱིར་ཚད་མ་གཉིས། །ཞེས་བཤད་པ་ཡིན་ནོ། །དེ་ན་གཅིག་ཁོ་ནར་ཇི་ལྟར་འགྱུར་སྙམ་ན། དེ་ཉིད་ཡོད་པ་དང་ཞེས་གསུངས་སོ། །རྗེས་སུ་དཔག་པ་ལ་ཡང་རང་གི་མཚན་ཉིད་ཁོ་ན་དཔྱད་པར་བྱ་བ་ཡིན་གྱི། སྤྱི་ནི་མ་ཡིན་ནོ། །དེ་གང་ལས་ཞེས་བྱ་བས་དོགས་པ་བསུ་བ་ནས་དེ་ལས་གྲུབ་ཕྱིར་རོ་ཞེས་ལན་འདེབས་པ་སྟེ་རང་གི་མཚན་ཉིད་ལས་སོ། །རང་གི་མཚན་ཉིད་ཁོ་ན་ཐུན་མོང་དུ་མཚོན་པ་ན་སྤྱིའི་མཚན་ཉིད་ཡིན་ནོ། །དེ་ལྟ་ན་ཡང་སྣང་བ་ཐ་དད་པའི་སྒོ་ནས་གཞལ་བྱ་གཉིས་སུ་འཐད་པ་ཡིན་ནོ། །རང་གི་མཚན་ཉིད་ཁོ་ན་རྗེས་སུ་དཔག་པར་ཡོད་པ་དང་མེད་པ་ཉིད་དུ་དཔྱོད་པ་ཡིན་ཏེ། རྣམ་པར་དཔྱོད་པའི་བདག་ཉིད་ཡིན་པའི་ཕྱིར་རོ། །འཛིན་པ་ནི་མ་ཡིན་ནོ་ཞེས་བྱ་བའི་དོན་ཏོ། །རྟོག་པ་དང་ལྡན་པ་དག་ནི་རང་གི་མཚན་ཉིད་ཡོད་པ་དང་མེད་པ་གཏན་ལ་དབབ་པའི་དོན་དུ་ཚད་མ་དཔྱོད་པའི་བསྟན་བཅོས་བྱེད་པ་ཡིན་ནོ་ཞེས་བརྗོད་པ་ནི། དོན་བྱ་བ་བྱེད་པའི་དངོས་པོ་ཞེས་བྱ་བའོ། །གལ་ཏེ་རང་
གི་མཚན་ཉིད་དོན་དུ་གཉེར་ན་འོ་ན་ཚད་མ་བཙལ་བས་ཅི་སྙམ་ན། ཚད་མ་ཚོལ་བ་ཡང་ཞེས་གསུངས་སོ་ཞེས་བྱ་བ་ནི་རང་གི་མཚན་ཉིད་དོ། །དེ་ལྟ་མ་ཡིན་ན་ཞེས་བྱ་བ་ནི་རང་གི་མཚན་ཉིད་རྟོགས་པའི་དོན་དུ་མ་ཡིན་པའོ། །གང་གི་ཕྱིར་རང་གི་མཚན་ཉིད་རྟོགས་པའི་དོན་དུ་ཚད་མ་ཚོལ་བ་དེའི་ཕྱིར་རོ། །དོན་དང་ལྡན་པ་ཞེས་བྱ་བ་ནི་སྐྱེས་བུའི་དོན་དང་བཅས་པའོ། །གང་གི་ཕྱིར་བསྟན་བཅོས་རང་གི་མཚན་ཉིད་ཀྱི་དོན་དུ་ཡིན་པ་དེས་ན་དེ་དོན་སྟོན་པར་བྱེད་པའི་ཚད་མ་གཉི་ག་ཡང་རང་གི་མཚན་ཉིད་ཀྱི་ཡུལ་ཅན་གྱི་བརྗོད་པར་འགྱུར་རོ་ཞེས་བརྗོད་པ་ནི་དེས་ན་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་རང་གི་མཚན་ཉིད་ཡུལ་དུ་བྱ་བ་མ་ཡིན་ནའོ། །གལ་ཏེ་གཉི་གས་ཀྱང་ཞེས་བྱ་བ་ནས་ཤེ་ན་ཞེས་བྱ་བའི་བར་ནི་རྩོད་པའོ། །རྩོད་པ་སྨྲ་བ་ཉིད་ཀྱིས་འོན་ཏེ་ཡུལ་གཅིག་ཡིན་ཡང་ཞེས་བྱ་བ་ལ་སོགས་པས་དོགས་པ་བསུ་བ་ནས་གཞལ་བྱ་དོན་མེད་པར་འགྱུར་རོ་ཞེས་བརྗོད་པ་ནི་དེ་ལྟ་ཡིན་ན་ཞེས་བྱ་བའོ། །འགལ་མོད་སྙམ་ན་སློབ་དཔོན་གྱིས་ཀྱང་གསུངས་སོ་ཞེས་འབྲེལ་ཏོ། །གཞུང་གང་གིས་ཤེ་ན། གང་གི་ཕྱིར་ཞེས་བྱ་བའོ། །གང་གི་ཕྱིར་རང་དང་སྤྱིའི་མཚན་ཉིད་གཞལ་བྱ་ཡིན་པ་དེའི་ཕྱིར་ཚད་མ་གཉིས་ཡིན་ནོ་ཞེས་བྱ་བའི་དོན་ཏོ། །སློབ་དཔོན་དང་འགལ་བ་ནི་རུང་བ་མ་ཡིན་ནོ་སྙམ་དུ་བསམས་པའོ། །མ་ངེས་པ་ཉིད་ཡིན་པའི་ཕྱིར་ཡང་གཏན་ཚིགས་འདི་ཚད་མའི་དབྱེ་བ་སྒྲུབ་པར་མི་ནུས་སོ་ཞེས་བྱ་བ་བརྗོད་པ་ནི། ཚོགས་པའི་དབྱེ་བས་ཞེས་བྱ་བའོ། །འོན་ཏེ་གཞལ་བྱ་གཉིས་ཡིན་པ་ལས་ཚད་མ་ཐ་དད་པ་ཡིན་ནོ་ཞེས་བྱ་བའི་དོགས་པ་བསུ་ནས། དེ་ཡང་མ་ངེས་པའི་ཉེས་པས་ཉེས་པ་ཆགས་པ་ཡིན་ནོ་ཞེས་བརྗོད་པ་ནི་གཞལ་བྱའི་དབྱེ་བས་ཞེས་བྱ་བའོ། །ཚད་མ་མཐའ་ཡས་པར་ཐལ་བར་འགྱུར་བ་མ་ཡིན་ནོ། །ཅིའི་ཕྱིར་ཞེ་ན། ཐ་དད་གྱང་ཞེས་བྱ་བ་སྟེ། །གཟུགས་དང་རོ་ལ་སོགས་པའི་ཡུལ་གྱིའོ། །གལ་ཏེ་གཅིག་ཡིན་པའི་ཕྱིར་མངོན་སུམ་ཐམས་ཅད་གཅིག་ཡིན་ན། དབང་པོ་ལ་སོགས་སྐྱེས་པ་ཉིད་ཡོད་པ་ལས་ཀྱང་ཅི་སྟེ་ཅི་ལྟར་མི་འགྱུར་ཞེས་དོགས་པ་བསུ་བ་ནི་ཚོགས་པ་ཐ་དད་པ་ཡིན་ན་ཡང་ཞེས་བྱ་བའོ། །
དབང་པོ་ལས་སྐྱེས་པ་ཉིད་ནི་མངོན་སུམ་རྗེས་སུ་དཔག་པ་ལས་ཐ་དད་པའི་རྒྱུ་མཚན་མ་ཡིན་ཏེ། དེ་མེད་ཀྱང་རིག་པ་ལ་སོགས་པ་མངོན་སུམ་ཡིན་པའི་ཕྱིར་རོ་ཞེས་ལན་བརྗོད་པ་ནི། མ་ཡིན་ཏེ་ཞེས་བྱ་བའོ། །དེ་ལྟར་ཡང་ཞེས་བྱ་བ་ནི་མཚན་ཉིད་ནི་ཡིན་པའོ། །གང་གི་ཕྱིར་མངོན་སུམ་ཐམས་ཅད་ཚད་མ་གཅིག་ཁོ་ན་ཡིན་ལ། སྒྲ་དང་ཉེ་བར་འཇལ་བ་ལ་སོགས་པ་རྗེས་སུ་དཔག་པ་ལས་ཚོགས་པ་ཐ་དད་པས་བསྐྱེད་པའི་ཚད་མ་ཡིན་ཏེ། དོན་དང་འབྲེལ་པ་མ་གྲུབ་པའི་ཕྱིར་དང༌། གྲུབ་ན་ནི་རྗེས་སུ་དཔག་པ་ཉིད་དུ་འགྱུར་བའི་གཏན་ཚིགས་དེའི་ཕྱིར་གཞལ་བྱ་གཉིས་ཡིན་པ་ཉིད་ལས་ཞེས་བྱ་བ་སྣང་བ་བཞིན་པ་རྣམ་པ་གཉིས་ཡིན་པ་ཉིད་ལས་སོ། །དེ་ལྟ་མ་ཡིན་ཞེས་བྱ་བ་ནི་གཞལ་བྱ་རྣམ་པ་གཉིས་ཡིན་པའོ། །དེས་ན་ཧ་ཅང་ཁྱབ་པ་ལ་སོགས་པའི་ཉེས་པ་མེད་དོ་ཞེས་བྱ་བའི་དོན་ཏོ། །གཞལ་བྱ་གཉིས་ཕྱིར་ཞེས་བྱ་བ་ནི་མི་རིགས་ཏེ། སྔོན་པོ་ལ་སོགས་པའི་རང་བཞིན་མཐའ་ཡས་པའི་ཕྱིར་རོ་ཞེས་དོགས་པ་བསུ་བ་ནི་ཇི་ལྟར་ཞེས་བྱ་བ་སྟེ། མཐའ་ཡས་པ་ཁོ་ནའོ་ཞེས་བྱ་བའི་དོན་ཏོ། །མ་ཡིན་ཏེ་ཞེས་བྱ་བ་ནི་ལན་ཏེ། མཐའ་ཡས་པ་ཉིད་མ་ཡིན་ནོ། །ཅིའི་ཕྱིར་ཞེ་ན། སྔོན་པོ་ལ་སོགས་པ་ཞེས་གསུངས་སོ། །མཐའ་ཡས་པ་ཉིད་ཡིན་ན་ཇི་ལྟར་རྣམ་པ་གཉིས་ཡིན་སྙམ་ན་འདི་ལྟར་ཞེས་གསུངས་སོ། །མངོན་སུམ་དང་གཞན་པའི་ཚད་མ་བྱེད་པ་ཐ་དད་པ་ལས་རང་གི་མཚན་ཉིད་གཅིག་པུ་རྣམ་པ་གཉིས་སུ་འཇོག་པ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་ཞེས་དོགས་པ་བསུ་ནས་རེ་ཞིག་རང་གི་མཚན་ཉིད་ཀྱི་རང་བཞིན་རྣམ་པར་གཞག་པའི་ཕྱིར་སྔོན་པོ་ལ་སོགས་པའི་དབྱེ་བ་མཐའ་ཡས་པ་ཡིན་ཡང་ཞེས་གསུངས་སོ། །རང་གི་མཚན་ཉིད་ནི་དོན་དམ་པར་མི་འགྱུར་ལ། གཉི་གའི་རང་བཞིན་ཡིན་པ་ཡང་གཞལ་བྱ་གཞན་དུ་ཐལ་བར་འགྱུར་རོ་ཞེས་དོགས་པ་བསུ་བ་ནི། གལ་ཏེ་ཞེས་བྱ་བའོ། །དོགས་པ་དེ་ཞེས་བྱ་བ་རང་གི་མཚན་ཉིད་རྟོགས་པ་མེད་ཅིང་གཞན་ཞེས་བྱ་བ་རྗེས་སུ་དཔག་པ་རྟོགས་པའི་དུས་ནའོ། །དེ་ལྟར་རྟོགས་པ་པོ་གཅིག་ལ་ལྟོས་ནས་དོན་དམ་པ་མ་ཡིན་པ་ཉིད་དུ་བརྗོད་ནས། རྟོགས་པ་པོ་ཐ་དད་པ་ལ་ལྟོས་ཀྱང་བརྗོད་པ་ནི་དེ་བཞིན་དུ་བྱ་བའོ། །གཅིག་ལ་ཞེས་བྱ་བ་ནི་མངོན་སུམ་
མཐོང་བ་ལའོ། །གཞན་ལ་ཞེས་བྱ་བ་རྗེས་སུ་དཔོག་པ་པོ་ལའོ། །དེ་ལྟ་མ་ཡིན་ན་ཞེས་བྱ་བ་ནི་རང་གི་མཚན་ཉིད་མ་ཡིན་པའོ། །དེ་ལྟར་འགྱུར་མོད་སྙམ་ན་རྟོགས་པ་པོ་ལ་ཞེས་སྨོས་ཏེ། དངོས་པོ་རང་བཞིན་གཅིག་ཡིན་པའི་ཕྱིར་རོ་ཞེས་བྱ་བར་བསམས་པའོ། །དེ་ལྟར་ཡང་ཐ་དད་ན་ནི་རྟགས་པ་ཁོ་ནར་འགྱུར་ཞེས་གསུངས་པོའི་ནི་ལྟོས་པས་བྱས་པའི་ཞེས་བྱ་བའོ། །དེ་གཉིས་ཀའི་ཞེས་བྱ་བ་རང་སྤྱིའི་རང་བཞིན་གྱིའོ། །དེ་ལ་ཞེས་བྱ་བ་ནི་གཉིས་ཀའི་རང་བཞིན་ལའོ། །གཞན་ལ་ཞེས་བྱ་བ་གསུམ་པ་འབྱུང་བར་འགྱུར་ཏེ། འཇུག་པར་འགྱུར་རོ། །གང་གི་ཕྱིར་དེ་ལྟར་རྣམ་པར་དཔྱད་པ་ན། དེ་ནི་རང་གཞན་ངོ་བོ་ཡིན། །རྟོགས་ཕྱིར་གཞལ་བྱ་གཉིས་སུ་འདོད། །ཅེས་བྱ་བ་མི་འཐད་པའི་ཕྱིར་འདི་ནི་ཞེས་བྱ་བ་ལ་སོགས་པ་ནི་མི་རུང་ངོ༌། །ཅིའི་ཕྱིར་ཞེ་ན། དོན་དམ་པ་རང་གི་མཚན་ཉིད་དེ་གཞལ་བྱ་ཉིད་དེ་གཞལ་བྱ་ཉིད་ཡིན་ན། སྔོན་པོ་ལ་སོགས་པའི་ནང་གི་དབྱེ་བས་གཞལ་བྱ་ཉིད་ནི་མཐའ་ཡས་པར་འགྱུར་རོ། །འོན་ཏེ་གཅིག་ཉིད་ཚད་མའི་བྱེད་པ་ཐ་དད་པས་ཐ་དད་པ་ཡིན་ན་ནི་དེ་ལྟར་ན་ཐ་དད་པའི་མཚན་ཉིད་རྟོགས་པར་འགྱུར་རོ་ཞེས་བརྗོད་པ་ནི་ལྟོས་པས་བྱས་པ་ཞེས་བྱ་བའོ། །མཚན་ཉིད་མིན་པར་འགྱུར་ཞེས་བྱ་བ་ནི་ཐ་དད་པའི་ཞེས་བྱ་བས་ཁ་བསྐང་ངོ༌། །གྲུབ་པའི་མཐའ་སྨྲ་བས་དོན་དམ་པའི་མཚན་ཉིད་གསུངས་པ་ནི། དམིགས་པ་ཡིས་ནི་ཞེས་བྱ་བའོ། །གང་ཞིག་མངོན་སུམ་གྱིས་མཚོན་པ་ཉིད་དམ་པས་ཡིན་ཏེ། དེ་ལས་དོན་བྱ་བ་འཐོབ་པའི་ཕྱིར་རྗེས་སུ་དཔག་པས་དམིགས་པས་ནི་མ་ཡིན་ཏེ། དེ་ལས་དོན་བྱ་བ་མི་འཐོབ་པའི་ཕྱིར་རོ། །གལ་ཏེ་དམིགས་པས་དོན་མཚོན་པ་ཡིན་ན། འོ་ན་ཇི་ལྟར་དམིགས་པ་ཉིད་ཡོད་པ་ཡིན་ནོ་ཞེས་བརྗོད་སྙམ་ན་དོན་དམ་དམིགས་པ་ནི་མེད་པ་ཡིན་ལ། དེ་ལས་བཟློག་པས་དམིགས་པ་ཉིད་ཡོད་པ་ཡིན་གྱི་གཞན་ནི་མ་ཡིན་ནོ་ཞེས་ལན་བརྗོད་པ་ནི་དམིགས་པ་ཉིན་ནི་དངོས་པོ་རྣམས་ཀྱི་དོན་དམ་པའི་ཡོད་པ་ཡིན་ནོ་ཞེས་རྣམ་པར་གཞག་སྟེ་བཟློག་པས་དོན་དམིགས་པས་ནི་མེད་པ་ཡིན་ནོ་ཞེས་བསྟན་པའི་ཕྱིར་རོ། །རེ་ཞིག་ཕྱེད་སྔ་མ་སྔར་རྣམ་པར་འགྲེལ་བ་ནི་དངོས་པོ་རྣམས་ཞེས་བྱ་བའོ། །གལ་ཏེ་ཞེས་བྱ་བ་ལ་
སོགས་པས་ཕྱེད་ཕྱི་མ་འཕངས་ཏེ། རི་བོང་གི་རྭ་ལ་སོགས་པ་ཞེས་བྱ་བས་འཆད་པའོ། །གལ་ཏེ་མེད་ན་མི་དམིགས་པ་ཡིན་གྱི། མི་དམིགས་པ་ཉིད་ནི་མེད་པ་མ་ཡིན་ནོ། །དེས་ན། བཟློག་པ་ལས་འདས་དམིགས་པ་ནི། །ཡོད་པ་ཡིན་ནོ་ཞེས་ཅི་སྟེ་བརྗོད་ཅེས་དོགས་པ་བསུ་བ་ནི་གལ་ཏེ་དེ་ལ་ཡང་ཞེས་བྱ་བ་སྟེ། རི་བོང་གི་རྭ་ལ་སོགས་པ་ལའོ། །མ་དམིགས་པ་ལས་ཞེས་བྱ་བ་ནི་ལན་ནོ། །མེད་པ་ནི་མི་དམིགས་པ་ལས་གཞན་ཁོ་ནའོ་ཞེས་དོགས་པ་བསུ་བ་ནི་མ་དམིགས་པས་ཞེས་བྱ་བའོ། །ཅི་ཞིག་ཅེས་བྱ་བའི་དྲི་བ་སྔོན་དུ་བཏང་བ་ཅན་མི་དམིགས་པ་ཉིད་རྣམ་པ་གསུམ་དུ་རྣམ་པར་རྟོག་པ་ནི་དམིགས་པ་མེད་པ་ཡིན་ནམ་ཞེས་བྱ་བ་ལ་སོགས་པའོ། །གལ་ཏེ་ཞེས་བྱ་བ་ནི་དངོས་པོ་སེལ་བའོ། །དེའི་ཚེ་ཞེས་ཁོང་ནས་དྲངས་ལ། དེ་ལས་ཅི་ལྟར་ཞེས་སྦྱར་ཏེ། ལྡོག་པའི་མཚན་ཉིད་ཀྱི་དམིགས་པ་དེ་ལས་སོ། །ཅིའི་ཕྱིར་མི་རྟོགས་སྙམ་དུ་དོགས་པ་བསུ་བ་ནས་ཇི་ལྟར་དམིགས་པར་བྱ་བ་མེད་པར་ནི་དམིགས་པར་བྱ་བ་མ་ཡིན་པ་དེ་བཞིན་དུ་དམིགས་པ་མེད་པ་ཡང་དམིགས་པ་མ་ཡིན་པ་ཉིད་དོ་ཞེས་བརྗོད་པ་ནི། དངོས་པོ་མེད་པ་ནི་ཞེས་བྱ་བའོ། །དེ་ལྟར་དངོས་པོ་མེད་པ་ནི་འགའ་ཞིག་རྟོགས་པའམ། རྟོགས་པའི་རྒྱུ་མ་ཡིན་ནོ་ཞེས་བྱ་བར་བསྒྲུབ་པར་ཡིན་ནོ། །དེ་ཡང་ཇི་ལྟར་རྟོགས་ཞེས་བསྟན་པའི་དོན་དུ་དངོས་པོ་མེད་པ་ཡང་ཞེས་བྱ་བ་སྨོས་ཏེ། དམིགས་པ་དངོས་པོ་མེད་པ་དེ་ཡང་ངོ༌། །གལ་ཏེ་དོན་བཞིན་དུ་ཤེས་པ་ལ་ནི་དམིགས་པ་གཞན་མེད་པ་དེ་ན་དེ་མེད་པས་དམིགས་པ་མེད་པ་རྟོགས་པར་བྱ་བ་མ་ཡིན་པའི་ཕྱིར་ཇི་ལྟར་ཐུག་པ་མེད་པར་འགྱུར་སྙམ་དུ་དོགས་པ་བསུ་བ་ནི་གལ་ཏེ་ཞེས་བྱ་བའོ། །དམིགས་པ་ལས་ནི་ཞེས་བྱ་བ་ནི་རྣམ་པ་མེད་པ་ལའོ། །གང་གིས་ཞེས་བྱ་བ་ནི་དམིགས་པ་མེད་པས་སོ། །དེ་ནི་ཞེས་བྱ་བ་ནི་དམིགས་པ་མེད་པའོ། །གལ་ཏེ་ཤེས་པ་ལ་དམིགས་པ་གཞན་མེད་དོ་ཞེས་བྱ་བ་འདི་ག་ལས་ཤེ་ན། ཤེས་པ་ནི་ལྐོག་ཏུ་གྱུར་པ་ཡིན་པའི་ཕྱིར་ཞེས་སྨྲས་སོ། །གལ་ཏེ་ཤེས་པ་ཞེས་བྱ་བ་ནི་ལན་ནོ། །དེ་ཞེས་བྱ་བ་ནི་རྣམ་པ་མེད་པའི་ཤེས་པའོ། །ཡོད་པར་མ་རྟོགས་ན་ཉེས་པ་ཅི་ཡོད་སྙམ་ན། ཇི་ལྟར་དོན་ཞེས་བྱ་བའོ། །མི་དམིགས་པ་ལས་བྱ་
པ་ནི་ཚད་མ་ལ་ལོག་པའི་རང་བཞིན་ལས་སོ། །གལ་ཏེ་བློ་ནི་ཚད་མ་ལྔ་ལོག་པར་མ་གྲུབ་སྟེ། དོན་གྱི་སྒོ་བར་ཡོད་པའི་ཕྱིར་ཞེས་དོགས་པ་ནི། འོན་ཏེ་ཞེས་བྱ་བའོ། །དེ་ལ་ནི་སྣང་བཞིན་པའི་དོན་ལས་ཐ་དད་པའི་བློ་ལའོ། །དེས་ན་ཞེས་བྱ་བ་དོན་གྱིས་གོ་བར་ཡོད་པས་སོ། །དེ་ལྟ་ན་དོན་གྱིས་གོ་བའི་བློ་མེད་པར་འགྱུར་ཏེ་ཚད་མ་ལྔ་མེད་པའི་ཕྱིར་རོ་ཞེས་ལན་འདེབས་པ་ནི་དོན་གྱིས་གོ་བ་ཡང་ཞེས་བྱ་བའོ། །འོན་ཏེ་དེ་ལ་ཞེས་བྱ་བ་ནི་དང་པོ་ལའོ། །གཞལ་བྱ་རྟོགས་པ་ཞེས་བྱ་བ་ནི། དོན་གྱིས་གོ་བའི་རང་བཞིན་གྱིས་ཤེས་པ་གང་ཞིག་གྲུབ་པའི་དོན་དུ་དོན་གྱིས་གོ་བར་འགྱུར་བའི་ཤེས་པ་དེ་ནི་གཞལ་བྱ་ཡིན་ལ། དེ་རྟོགས་པ་ནི་གལ་ཏེ་གསལ་བའོ། །ཡང་དོན་གྱིས་གོ་བས་ཞེས་བྱ་བ་ནི་དེ་ལྟར་དོན་གྱིས་གོ་བའི་བློ་གཞན་དང་གཞན་གྱིས་གཞན་དང་གཞན་བསྒྲུབ་པར་བྱ་བ་ཡིན་པས་ན། ཐུག་པ་མེད་པའི་ཕྱིར་ན་གང་དུ་ཉེ་བར་མི་གནས་པ་དེ་ཁོ་ནར་མེད་པ་ཉིད་དུ་འགྱུར་རོ། །འོན་ཏེ་མཐར་གྱིས་པའི་དོན་གྱིས་གོ་བར་ནི་དེ་གཞན་ལ་མི་ལྟོས་ཏེ། མཐོང་བའི་ཕྱིར་རོ་ཞེས་དོགས་པ་བསུ་བ་ནི་གལ་ཏེ་རྟོག་པ་ཞེས་བྱ་བའོ། །གལ་ཏེ་ཞེས་བྱ་བས་ན་ཅི་ཞིག་བྱ་ཞེས་བྱ་བའི་བར་ནི་ལན་ནོ། །དོན་གྱིས་གོ་བས་ཞེས་བྱ་བ་ནི་རྩོད་པའོ། །གལ་ཏེ་དེ་ལྟར་ན་ཞེས་བྱ་བ་ནི་ལན་ནོ། །དེའི་ཕྱིར་ཤེས་པ་ལྐོག་ཏུ་གྱུར་པར་ཞེས་བྱ་བར་ནི་མི་འཐད་དེ། གལ་ཏེ་རིགས་པ་རྣམས་ནི་ཅི་ལྟར་ཤེས་པ་གཞན་གྱིས་མངོན་སུམ་དུ་བྱེད་པ་ཡིན་ན་དེའི་ཚེ་དེ་མེད་ཀྱང་དམིགས་པ་མེད་པ་གཞན་གྱིས་རྟོགས་པར་བྱ་བ་ཡིན་པའི་ཕྱིར་ན། ཐུག་པ་མེད་པ་ཉིད་གནས་པ་ཡིན་ནོ། །རང་རིག་པའི་ཕྱོགས་ལ་ཡང་དེ་བཟློག་ཏུ་མེད་པ་ཡིན་ནོ་ཞེས་བརྗོད་པ་ནི། གང་གི་ཚེ་ཞེས་བྱ་བའོ། །དེ་ཞེས་བྱ་བ་ནི་མངོན་སུམ་དུ་གྱུར་པའི་བློ་བཞིན་མེད་པར་རྟོགས་པ་ལའོ། །ཇི་ལྟར་དོན་མེད་པ་དམིགས་པ་མེད་པ་གཞན་གྱིས་རྟོགས་པ་དེ་བཞིན་དུ་དེ་མེད་པ་ཡང་གཞན་གྱིས་ཡིན་ལ་དེ་ཡང་གཞན་གྱིས་ཡིན་པའི་ཐུག་པ་མེད་དོ། །འོན་ཏེ་ཡང་ཤེས་པ་བཞིན་དུ་དེ་མེད་པར་ཡང་རང་ཉིད་ལས་འགྲུབ་པ་དེས་ན། ཐུག་པ་མེད་པ་མ་ཡིན་ན་དེ་ལྟ་ན་དོན་མེད་པ་ཡང་རང་ལས་འགྲུབ་པར་འགྱུར་ཏེ། ངོ་བོ་མེད་པར་ཁྱད་མེད་པའི་ཕྱིར་རོ། །
དེས་ན་མི་དམིགས་དོན་མེད་དོ། །དེས་ན་དོན་མེད་པ་བཞིན་དུ། །ཤེས་པ་མེད་པ་ཡང་རང་ལས་འགྲུབ་པ་མ་ཡིན་པས་ན་ཐུག་པ་མེད་པ་ཁོ་ནའོ། །གལ་ཏེ་དོན་དང་དམིགས་པ་དག་གི་མི་དམིགས་པ་གཅིག་ཡིན་པའི་ཕྱིར་ན། དེ་མེད་པར་རྟོགས་པ་ལ་ཐུག་པ་མེད་པས་མ་གྲུབ་པ་ཉིད་མ་ཡིན་ནོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །དེ་དག་གི་མི་དམིགས་པ་གཅིག་ཡིན་ན་ཡང༌། ཇི་ལྟར་དོན་ཡོད་པར་འགྱུར་བ་དེ་བཞིན་དུ་དམིགས་པ་ཡང་ཡོད་པར་འགྱུར་རོ་ཞེས་ལན་འདེབས་པ་ནི། དེ་ལྟ་ཡིན་ན་ཞེས་བྱ་བའོ། །མ་གྲུབ་པ་ཉིད་ཀྱི་ཉེས་པས་བཏང་སྙོམས་སུ་བྱས་ཏེ། མ་ངེས་པ་ཉིད་བརྗོད་པར་རྟོགས་པར་བྱའོ། །དེས་ན་དངོས་པོ་མེད་པ་ཐ་དད་པར་སྨྲ་བ་རྣམས་ཀྱི་ལྟར་ན། མ་དམིགས་པ་ལས་ནི་དོན་དང་དམིགས་པ་དག་ལས་གཅིག་ཀྱང་མེད་པ་མི་གྲུབ་པོ་ཞེས་དགོངས་པའོ། །མ་ངེས་པ་ཉིད་སྤོང་པའི་དོགས་པ་བསུ་བ་ནི། དེ་ཉིད་མེད་པ་ཡིན་ནོ་ཞེ་ན་ཞེས་བྱ་བ་སྟེ་དོན་རང་དམིགས་པ་དག་གིས་དམིགས་པ་ཉིད་མེད་པ་ཡིན་ནོ་ཞེ་ན། དེ་ལྟ་ན་དངོས་པོ་དང་དམིགས་པ་དག་ཀྱང་དེའི་བདག་ཉིད་དུ་གྲུབ་པར་འགྱུར་རོ་ཞེས་ལན་འདེབས་པ་ནི། གལ་ཏེ་ཞེས་བྱ་བའོ། །ཤེས་པ་གཅིག་ལ་བདེ་བ་དམིགས་པས་ཀྱང་དེ་ལས་གཞན་དམིགས་པ་མེད་པར་ངེས་པར་བྱེད་པ་ཡིན་ཏེ་མ་འདྲེས་པའི་ཕྱིར་རོ། །དེས་ན་བརྗོད་མ་ཐག་པའི་ཉེས་པའི་རྣམ་པ་དག་པ་ཡོད་པ་མ་ཡིན་ནོ་ཞེས་བརྗོད་པ་ནི། འོ་ན་གཞན་དམིགས་པ་ཉིད་ཅེས་བྱ་བའོ། །དེ་ལྟ་ན་ཡང་མ་ངེས་པའི་ཉེས་པ་ལས་མི་འགྲོལ་ལོ་ཞེས་བརྗོད་པ་ནི་དེ་ཡང་རིགས་པ་མ་ཡིན་ནོ་ཞེས་བྱ་བའོ། །མི་དམིགས་པ་ཞེས་མིང་བཏགས་པའོ། །དེ་ཞེས་བྱ་བ་ནི་དོགས་པ་སྟེ། དགག་པར་བྱ་བ་དེའོ། །གང་འདི་ལ་ལན་བཏབ་ཟིན་ཏོ་ཞེས་བྱ་བ་ནི་དངོས་པོ་མེད་པ་ནི་རྟོག་པ་མ་ཡིན་ནོ་ཞེས་བྱ་བས་སོ། །མིང་གིས་ནི་གཞན་དམིགས་པ་ཉིད་མི་དམིགས་པ་མ་ཡིན་གྱི། འོན་ཀྱང་དགག་པར་བྱ་བ་གཞན་ལས་འཇུག་པ་མེད་པའོ། །རྩོད་པ་སློང་བ་ནི་གཞན་དམིགས་པ་དེ་ཉིད་ཅེས་བྱ་བ་སྟེ། ས་ཕྱོགས་འབའ་ཞིག་པ་ལ་སོགས་པ་དམིགས་པ་ཉིད་དེ། དེ་ལས་གཞན་མི་དམིགས་པ་ཡིན་
ནོ་ཞེས་འབྲེལ་ཏོ། །ཅིའི་ཕྱིར་ཞེས་དོགས་ན། གཞན་ལ་མི་འཇུག་པའི་ཕྱིར་ཞེས་སྦྱར་རོ། །དེ་ན་ཡང་མ་ངེས་པ་ཁོ་ནའོ་ཞེས་ལན་འདེབས་པ་ནི་གལ་ཏེ་གཞན་ལ་ཞེས་བྱ་བའོ། །འདི་ཡོད་པར་དོགས་པ་བསུ་བ་ནི་འོན་ཏེ་ཞེས་བྱ་བ་ནས་ཞེ་ན་ཞེས་བྱ་བའི་བར་གྱིས་སོ། །དེ་ལྟ་མ་ཡིན་ན་ཞེས་བྱ་བ་ནི། མེད་པ་མ་ཡིན་ནའོ། །དེ་ལ་ཡང་ཞེས་བྱ་བ་དགག་པར་བྱ་བ་ལ། དམིགས་པ་འཇུག་པ་ཉིད་དོ་ཞེས་བྱ་བའོ། །ཅིའི་ཕྱིར་ཞེ་ན་ཡང་ཞེས་སྨྲས་སོ། །དེ་བཞིན་དུ་ནི་ཞེས་བྱ་བ་ནི་ས་ཕྱོགས་བཞིན་དུའོ། །དམིགས་པ་ཡང་མ་ཡིན་ནོ་ཞེས་བྱ་བ་ནི་བཟློག་པ་བརྗོད་པའོ། །རང་གི་རིག་པ་གཞན་གྱིས་དབེན་པ་ལས་དམིགས་པ་མེད་པའི་རང་བཞིན་གྱིས་མི་དམིགས་པ་གཞན་ནི་མ་གྲུབ་སྟེ། དེས་ན་ཐུག་པ་མེད་པ་ཁོ་ནའོ་ཞེས་ལན་འདེབས་པ་ནི་མེད་པའི་མཚན་ཉིད་ཅན་ཏེ་ཞེས་བྱ་བའོ། །གང་གིས་ཞེས་བྱ་བ་འགགས་ཀྱང་མ་ཡིན་ནོ། །དམིགས་པ་མེད་པར་དེ་ཉིད་ཡིན་ནོ་ཞེས་བརྗོད་པ་ནི་ཐུག་པ་མེད་པ་དེ་ཉིད་ཞེས་བྱ་བའོ། །སོ་སོར་ཞེས་བྱ་བ་ནི་མ་གྲུབ་པ་སྤོང་བར་དོགས་པ་བསུ་བའོ། །སོ་སོར་ངེས་པའི་རྣམ་པ་དམིགས་པའི་ཕྱིར་དེ་མི་དམིགས་པར་ངེས་པ་ཡིན་ནོ་ཞེས་འབྲེལ་ཏོ། །ཅི་འདི་ཞེས་བྱ་བ་ནི་ལན་ནོ། །ངེས་པའི་རྣམ་པར་དམིགས་པ་གཞན་དུ་ནི་མི་འཐད་པ་ནི་དམིགས་པའི་སྒྲུབ་པར་བྱེད་པ་ཡིན་ནོ། །དེ་ལྟའོ་ཞེས་ན་ཞེས་བྱ་བ་ནི་གལ་ཏེ་དོན་གྱིས་གོ་བ་ཁས་ལེན་ན་དེའི་ཐུགས་པ་མེད་དོ། །འདི་ལྟར་དོན་གྱིས་གོ་བ་ནི་བློ་ཡིན་ནོ། །དེ་ཡང་ལྐོག་ཏུ་གྱུར་པ་དེས་ན་དོན་གྱིས་གོ་བ་གཞན་གྱིས་རྟོགས་པར་བྱ་བ་ཡིན་ནོ། །དེ་ཡང་དེ་ལས་གཞན་གྱི་ཡིན་ནོ་ཞེས་བརྗོད་པ་ནི་བསྟན་ཟིན་ཏོ། །འོན་ཏེ་ངེས་པའི་རྣམ་པར་དམིགས་པ་ལས་ནི་མེད་པར་འགྲུབ་པ་མ་ཡིན་གྱི། འོན་ཀྱང་རིག་པར་བྱས་པར་ནི་མི་དམིགས་པ་དེ་ཉིད་ཡིན་གྱི་དངོས་པོ་མེད་པ་ནི་མ་ཡིན་ནོ། །དེས་ན་ཐུག་པ་མེད་པ་མ་ཡིན་ནོ་ཞེས་དོགས་པ་བསུ་བ་ནི་སོ་སོར་ངེས་པའི་རྣམ་པ་ཞེས་བྱ་བའོ། །དེ་ལྟ་ན་ནི་འོ་ན་ཞེས་བྱ་བ་ནི་ལན་ནོ། །གལ་ཏེ་དངོས་པོ་ནི་རང་དང་གཞན་ལ་ལྟོས་ནས་དངོས་པོ་དང་དངོས་པོ་མེད་པའི་རང་བཞིན་ཡིན་ཡང་དམིགས་པ་ཉིད་ཡོད་པ་ཡིན་ནོ་ཞེས་ཇི་ལྟར་
ཐ་སྙད་བྱེད་སྙམ་ན། སོ་སོར་ངེས་པའི་ཞེས་གསུངས་སོ། །དེ་ཡང་དམིགས་པ་ཉིད་ཀྱི་རང་བཞིན་ཡིན་ནོ་ཞེས་བྱ་བའི་དོན་ཏོ། །དེས་ན་ཞེས་བྱ་བ་ནི་སོ་སོར་ངེས་པའོ། །གལ་ཏེ་སོ་སོར་ངེས་པའི་རང་བཞིན་ནི་གཞལ་བྱ་མ་ཡིན་ནམ་དེས་ན་དེ་དམིགས་པར་ནི་གཞན་ཁོ་ན་ཡིན་པའི་ཕྱིར་ན། ཅི་ལྟར་དམིགས་པ་ཉིད་ཡོད་པ་ཡིན་སྙམ་དུ་དོགས་པ་ནི། གལ་ཏེ་ཞེས་བྱ་བའོ། །དེ་ཉིད་ནི་ཞེས་བྱ་བ་ནི་དམིགས་པ་ཉིད་དོ། །ལས་ནི་གལ་ཏེ་དམིགས་པར་བྱ་བའོ། །འོ་ན་ཇི་ལྟར་སོ་སོར་ངེས་པའི་བློར་འགྱུར་ཞེ་ན། དམིགས་པ་དྲན་པ་ཉིད་ལས་ཞེས་གསུངས་སོ། །གང་གི་ཕྱིར་དམིགས་པ་མེད་པར་ནི་སོ་སོར་ངེས་པའི་བློར་མི་འགྱུར་བ་དེས་ནའོ། །ཕྱོགས་གཉིས་པ་བསལ་བས་གསུམ་པ་ལ་བརྗོད་པ་ནི་འོན་ཏེ་ཞེས་བྱ་བའོ། །དཔྱད་ཟིན་ཏོ་ཞེས་བྱ་བ་ནི་མེད་པ་དང་མ་ཡིན་པའི་ཕྱིར་དབྱེ་བས་ཕྱོགས་གཉི་ག་ལ་ཡང་ཉེས་པ་བརྗོད་པའི་ཕྱིར་རོ། །དེ་ལྟར་དམིགས་པ་ཉིད་དོན་དམ་པར་ཡིན་པ་ཡིན་པ་ཡིན་ནོ་ཞེས་བྱ་བ་བཤད་ནས་གལ་ཏེ་རྟོགས་པའི་དབྱེ་བས་ཞེས་བྱ་བ་ལ་སོགས་པའི་རྩོད་པ་སྤང་བའི་དོན་དུ་དོགས་པ་བསུ་བ་ནི་གལ་ཏེ་དེ་ཉིད་ཅེས་བྱ་བའོ། །དེ་ཉིད་ནི་དམིགས་པ་ཉིད་དོ། །དེའི་ཚེ་རྗེས་སུ་དཔོག་པ་པོའི་སྐྱེས་བུའི་གཞན་ལ་ལྟོས། སྐྱེས་བུའི་གཞན་ལ་ལྟོས་ནས་ཀྱང་དམིགས་པར་བྱེད་པ་དེ་ནི་དེ་ལྟ་བུ་ཁོ་ན་ཞེས་བྱ་བ་དམིགས་པར་བྱ་བ་ཁོ་ན་ཡིན་ནོ། །ལྐོག་ཏུ་གྱུར་པ་ཉིད་ཀྱིས་ཞེས་བྱ་བའི་དོགས་པ་བསུ་བ་ནི། དེ་ཉིད་ཀྱི་ཚེ་ནི་རྗེས་སུ་དཔོག་པའི་དུས་ནའོ། །དེ་ནི་དམིགས་པར་བྱ་བའོ། །དེ་ཉིད་ཀྱིས་ཞེས་བྱ་བ་ནི་ལན་ནོ། །དམིགས་པར་བྱ་བ་ཉིད་ཀྱིའོ། །དམིགས་པར་བྱ་བའི་རང་བཞིན་ཉིད་རྗེས་སུ་དཔག་པར་བྱ་བ་ཡིན་ཏེ། འོན་ཀྱང་མི་ཉེ་བ་ལས་མངོན་སུམ་དུ་སྣང་བ་ཡིན་ནོ། །འདི་ག་ལས་ཤེ་ན། གལ་ཏེ་འགས་ཀྱང་ཞེས་བྱ་བ་སྟེ་རང་ངམ་གཞན་འགས་ཀྱང་ངོ༌། །དམིགས་པར་བྱ་བ་ཡང་ཡིན་པའི་ཡུལ་ཅན་གྱི་རྗེས་སུ་དཔག་པ་ནི་མི་སླུ་བ་མེད་པའི་ཕྱིར་ན་ཚད་མ་ཉིད་དུ་མི་འགྱུར་རོ་ཞེས་བྱ་བའི་དོན་ཏོ། །གལ་ཏེ་རྗེས་སུ་དཔག་པའི་དུས་སུ་དམིགས་པར་བྱ་བའི་རང་བཞིན་དུ་མ་རྟོགས་པར་དམིགས་པར་བྱ་བ་ཡིན་ནོ་ཞེས་ནི་རིགས་པ་མ་ཡིན་ནོ་ཞེས་བརྗོད་པ་ནི། དེའི་ཚེ་མ་རྟོགས་པ་ཞེས་བྱ་བའོ། །དེའི་ཚེ་དེ་དེ་ལྟར་
མ་ཡིན་ནོ་ཞེས་བྱ་བ་ནི་ལན་ནོ། །དེ་ལྟ་མ་ཡིན་པ་ནི་དམིགས་པ་མ་ཡིན་པའོ། །དམིགས་པ་ཞེས་བྱ་བ་ནི་དོགས་པ་དེ། རང་གི་རང་བཞིན་དུ་དམིགས་པ་མེད་པའོ། །དེ་ལྟ་མ་ཡིན་ནོ་ཞེས་བྱ་བ་ནི་དམིགས་པར་བྱ་བ་མ་ཡིན་པའོ། །འོ་ན་ཞེས་བྱ་བ་ནི་ལན་ནོ། །མ་དམིགས་པ་ནི་མ་ངེས་པས་དངོས་པོ་མེད་པར་བསྒྲུབ་པ་མ་ཡིན་ནོ་ཞེས་ཞེས་དོགས་པ་བསུ་བ་ནི་ཡོད་ཀྱང་ཞེས་བྱ་བའོ། །ཡོད་པ་ལས་ཞེས་བྱ་བ་ནི་ལན་ནོ། །མ་དམིགས་པའི་རང་བཞིན་གྱི་ཡུལ་ཡོད་པ་ལས་ཚད་མ་ཡོད་པ་སྟེ་སྲིད་པ་ཡིན་ན། དངོས་པོ་ཡོད་ཀྱང་མ་དམིགས་སོ་ཞེས་དེ་སྐད་བརྗོད་པར་བྱ་བར་འགྱུར་གྱི། གང་གི་ཚེ་མ་དམིགས་པ་ཉིད་ཚད་མས་ཡུལ་དུ་མ་བྱས་པའི་ཕྱིར་ན་མི་དམིགས་པའི་རང་བཞིན་ལ་ཚད་མ་མི་སྲིད་པ་དེའི་ཚེ་ཇི་ལྟར་ཡོད་པ་ལ་ཡང་མི་དམིགས་པ་སྲིད་དོ་ཞེས་བརྗོད་དོ། །ཤ་ཟ་བ་ལ་སོགས་པ་ཚད་མའི་ཡུ་ཉིད་དུ་སྲིད་པ་ལ་ཡང་ཡོད་ཀྱང་མ་དམིགས་པ་ཡིན་ནོ་ཞེས་བརྗོད་པ་ཡིན་ནོ། །འོན་ཏེ་མ་དམིགས་པའི་རང་བཞིན་ལ་རྗེས་སུ་དཔག་པ་ཡོད་པ་ཉིད་དེ། དེས་ན་ཡོད་ཀྱང་མ་དམིགས་སོ་ཞེས་བརྗོད་དོ་ཞེས་དོགས་པ་ནི། རྗེས་སུ་དཔག་པ་ཞེས་བྱ་བ་ནི། །དེ་ཡང་ཞེས་བྱ་བ་ལན་ཏེ། རྗེས་སུ་དཔག་པ་ཡང་མཐོང་བའི་རང་བཞིན་ཉིད་ཀྱི་རྗེས་སུ་འབྲང་བའི་དམིགས་པར་བྱ་བའི་རང་བཞིན་ལ་ནི་མ་ཡིན་ནོ། །དེས་ན་མ་དམིགས་པའི་རང་བཞིན་ནི་མེད་པ་ཁོ་ནའོ། །གལ་ཏེ་རྗེས་སུ་དཔག་པའི་དུས་ན་དོན་ལ་བལྟ་བར་བྱ་བ་ཉིད་མེད་པ་ཉིད་མ་ཡིན་ནམ། དེས་ན་མཐོང་བའི་རང་བཞིན་ཉིད་ཀྱི་རྗེས་སུ་འབྲང་ངོ་ཞེས་བྱ་བ་ཇི་ལྟར་བརྗོད་ཅེ་ན། དོགས་པ་བསུ་བ་ནི་ཕྱིས་ཞེས་བྱ་བ་སྟེ། མཐོང་བའི་དུས་ནའོ། །སྔར་རྗེས་སུ་དཔོག་པའི་དུས་སུའོ། །གལ་ཏེ་ཞེས་བྱ་བའི་ལན་ནོ། །དེའི་ཚེ་ཡོད་པ་ཉིད་ཇི་ལྟར་ཡིན་ཏེ་བལྟ་བར་བྱ་བ་མ་ཡིན་པ་ནི་ཡོད་པ་མི་འཐད་པའི་ཕྱིར་རོ། །རྟོགས་པ་བསུ་བ་ནི་ཕྱིས་ཞེས་བྱ་བ་སྟེ། མི་སླུ་བའི་དུས་ནའོ། །ཕྱིས་ཉིད་ཅེས་བྱ་བ་ནི་ལན་ནོ། །སྔར་ཇི་ལྟར་ཞེས་བྱ་བ་ནི་རྗེས་སུ་དཔག་པའི་དུས་སུའོ། །ཕྱིས་དམིགས་པར་བྱ་བ་ཉིད་གཞན་དུ་མི་འཐད་པས་སྔར་ཡོད་པ་ཡིན་ནོ་ཞེས་དོགས་པ་བསུ་བ་ནི་གལ་ཏེ་སྔར་མེད་ན་ཞེས་བྱ་བའོ། །དམིགས་པར་བྱ་བ་ཉིད་དོ་ཞེས་བྱ་བ་ལན་ནོ། །དམིགས་པའི་
ཕྱིར་ན་ཕྱིས་ཁོ་ན་ཡོད་པ་ཡིན་གྱི་སྔར་མ་ཡིན་ནོ། །གལ་ཏེ་རྗེས་སུ་དཔག་པའི་དུས་སུ་དེ་ལྟར་རྟོགས་པ་ནི་བལྟ་བར་བྱ་བ་མ་ཡིན་པ་ཁོ་ནར་འགྱུར་ཏེ་ཞེས་དོགས་པ་བསུ་པ་ནི་དམིགས་པར་བྱ་བའི་ཉིད་དུ་ཞེས་བྱ་བའོ། །དེ་ལྟ་མ་ཡིན་པ་ནི་ཞེས་བྱ་བ་ནི་རྟོགས་པ་ནི་རྗེས་སུ་འཇུག་གོ །གཞན་དུ་ཞེས་བྱ་བ་ནི་དམིགས་པར་བྱ་བ་མ་ཡིན་པའོ། །གཞན་གྱི་ཚེ་ཞེས་བྱ་བ་ནི། རྗེས་སུ་དཔག་པའི་དུས་ཡང་ངོ༌། །དེའི་རང་བཞིན་དུ་ནི་དམིགས་པར་བྱ་བའི་རང་བཞིན་དུའོ། །གཞན་དུ་ཞེས་བྱ་བ་ནི་དམིགས་པར་བྱ་བ་ཡིན་པར་རོ། །གཞན་དུ་ཞེས་བྱ་བ་ནི་དམིགས་པར་བྱ་བ་མ་ཡིན་པ་ཉིད་དུའོ། །དེ་ལྟར་རེ་ཞིག་རྗེས་སུ་དཔག་པའི་དུས་སུ་ཡང་ཡོད་པ་ཉིད་ནི་དམིགས་པར་བྱ་བ་མེད་པ་ཡིན་ནོ་ཞེས་བསྟན་ནས། ང་ནི་རྗེས་སུ་དཔག་པའི་འབྱུང་བར་འགྱུར་བའི་ཡུལ་ཅན་གྱི་ཚད་མ་ཡིན་ཏེ། དེས་ན་དེའི་ཡུལ་དུ་སོང་བ་ལས་དེའི་ཡུལ་དམིགས་པར་བྱ་བ་ཉིད་བཟློག་ཏུ་མེད་དོ་ཞེས་བརྗོད་པ་ནི། རྗེས་སུ་དཔག་པ་ནི་ཞེས་བྱ་བའོ། །འབྱུང་བར་འགྱུར་བའི་ཡོད་པ་ལ་ཞེས་བྱ་བ་ནི་ཐོབ་པའི་ཤེས་པའི་ཡུལ་ལ་ཡིན་གྱི། རྗེས་སུ་དཔག་པའི་དུས་ན་ཡོད་པའི་མ་དམིགས་པ་ལ་ནི་མ་ཡིན་ནོ། །དེ་ཉིད་ཀྱི་ཕྱིར་རྗེས་སུ་དཔག་པའི་དུས་ན་ཡོད་པ་ཉམས་སུ་མ་མྱོང་ཡང་ཡོད་པར་རྟོགས་པ་ནི་མི་འཐད་དེ། རྗེས་སུ་དཔག་པ་ལས་ཡུལ་དུ་མ་བྱས་པའི་ཕྱིར་རོ། །གལ་ཏེ་གཉི་ག་ཡང་དམིགས་པར་བྱ་བ་ཁོ་ནའི་ཡུལ་ཅན་ཡིན་ན། འོ་ན་ཇི་ལྟར་ཞེས་བྱ་བའོ། །གཞལ་བྱ་གཉིས་མེད་པ་ཁོ་ནའོ་ཞེས་བྱ་བའི་དོན་ཏོ། །དེ་ཉིད་ཅེས་བྱ་བ་ནི་ལན་ནོ། །དམིགས་པར་བྱ་བ་ཉིད་དོ། །གཞན་གྱི་ངོ་བོས་ཞེས་བྱ་བ་ནི་སྔོན་མཐོང་བའི་ངོ་བོས་སམ་ཤེས་པའི་རྣམ་པའི་ངོ་བོས་སོ། །དཔེ་དང་ཞེས་བྱ་བ་ནི་དེ་ཉིད་གསལ་བར་བྱེད་བའོ། །དེ་ལྟར་ཞེས་བྱ་བ་ནི་དམིགས་པར་བྱ་བ་ཡོད་པ་ཉིད་དུའོ། །ཇི་ལྟར་གཅིག་ཉིད་དུ་མར་འགྱུར་སྙམ་ན། དེ་ཉིད་ཅེས་སྨོས་ཏེ། དམིགས་པར་བྱ་བའི་རང་བཞིན་ཉིད་དོ། །དེའི་ཞེས་བྱ་བ་དཔེ་ལ་མཐོང་བའི་ངོ་བོར་སྒྲོ་བཏགས་པའི་ཕྱིར་རོ། །དེ་ལྟ་ན་ནི་འོ་ན་ཞེས་བྱ་བ་ལ་སོགས་པས་ལྟོས་པས་བྱས་བ་ཐ་དད་ན་དོན་དམ་མཚན་ཉིད་མིན་པར་འགྱུར་ཞེས་བརྗོད་པའི་རྩོད་པ་རྗེས་སུ་བརྗོད་པས་བདེན་ཏེ་ཞེས་བྱ་བས་ལན་འདེབས་པའོ། །འོ་ན་ཇི་ལྟར་ཞེས་ཐ་སྙད་འདོགས་སྙམ་ན།
དངོས་པོ་ལ་མི་སླུ་བའི་སྒོ་ནས་ཞེས་གསུངས་སོ། །སྣང་བ་དང་རྣམ་པར་བརྟག་པར་བྱ་བ་ཐ་དད་པ་ཉིད་དུ་གང་གིས་མ་རྟོགས་པའོ། །གང་གི་ཕྱིར་དེ་ལྟར་ཐ་སྙད་བྱེད་པའི་རྒྱུ་དེས་ན་སྣང་བ་དང༌། རྣམ་པར་བརྟག་པར་བྱ་བའི་དོན་གཅིག་ཏུ་བྱེད་པར་དངོས་པོ་ཉིད་ཡིན་པ་དེ་ལ་ལྟོས་ནས་སོ། །འོན་ཏེ་གཉི་གའི་རང་བཞིན་ཡིན་པའི་ཕྱིར་ཞེས་བྱ་བ་ལ་སོགས་པས་གཅིག་ཉིད་མཚན་ཉིད་དང་གཞན་ཡིན་ན་ནི་དེ་གཉི་གའི་རང་བཞིན་གྱི་གཞལ་བྱ་གཞན་ཡིན་པའི་ཕྱིར་ཞེས་བྱ་བའི། རྩོད་པ་བརྗོད་པ་ནས་དེ་ནི་མི་རིགས་ཏེ་ཞེས་བྱ་བ་ལ་སོགས་པར་བྱེད་དོ། །རྟོགས་པར་ཁས་ལེན་ན་ཡང་ཉེས་པ་ཡོད་དོ་ཞེས་བརྗོད་པ་ནི། རྟོགས་ཡང་ཞེས་བྱ་བའོ། །གལ་ཏེ་གཞལ་བྱ་འཆོལ་ན་ཚད་མ་གཉིས་སུ་ཇི་ལྟར་འགྱུར་སྙམ་ན། རྟོགས་པའི་དབྱེ་བ་ཉིད་ཀྱིས་ཞེས་གསུངས་ཏེ། གཞལ་བྱར་བྱ་བའི་རང་གི་ངོ་བོ་ཐ་དད་པས་ནི་མ་ཡིན་ནོ། །རྗེས་སུ་དཔག་པས་ཉེ་བར་ཟིན་པའི་རང་བཞིན་ནི་མི་གསལ་བ་ཡིན་ཏེ། དེ་ན་གཉི་གའི་རང་བཞིན་ཉིད་མེད་པའི་ཕྱིར་ན། དངོས་པོའི་མཚན་ཉིད་དང་འཆོལ་བ་མ་ཡིན་ནོ། །འདི་ཡང་རྣམ་པ་ཇི་ཞིག་ལྟར་གཅིག་ཉིད་གཉི་གའི་རང་བཞིན་ཡིན་པས་ཁས་བླངས་ནས་བརྗོད་པ་ཡིན་གྱི་དེ་ནི་དོན་དམ་པར་ནི་རིགས་པ་མ་ཡིན་ཏེ། ལྟོས་པ་བྱས་པ་ཡིན་པའི་ཕྱིར་ཞེས་བརྗོད་པ་ནི་ཡང་ན་ཞེས་བྱ་བའོ། །གཅིག་གི་མཚན་ཉིད་གང་ཞིག་གསལ་བ་ཐ་དད་པ་མི་གསལ་བ་ཉིད་ཀྱིས་རྟོགས་པ་ཐ་དད་པའི་ལས་ཡིན་པ་དེ་ནི་དོན་དམ་པ་མ་ཡིན་པ་ཁོ་ན་སྟེ། དེས་ན་གཅིག་ལ་མཚན་ཉིད་གཉིས་ཡོད་པ་མ་ཡིན་ནོ། །གལ་ཏེ་གཅིག་ལ་ཡང་ལྟོས་པས་ཐ་དད་པར་མཐོང་བ་ཉིད་མ་ཡིན་ནམ། དེས་ན་ཇི་ལྟར་གཅིག་གི་རང་བཞིན་དགག་པ་ཙམ་ཡིན་སྙམ་ན། སྔོན་པོ་ལ་སོགས་པ་ནི་ཞེས་བྱ་བའོ། །དེ་ནི་ཞེས་བྱ་བ་ནི་སྔོན་པོ་ཉིད་ལ་སོགས་པའོ། །ཐ་དད་པ་མ་ཡིན་ནོ་ཞེས་བྱ་བ་ནི་རྣམ་པ་དུ་མ་དང་ལྡན་པ་ཡིན་པའོ། །དེའི་ཕྱིར་གང་གིས་ཚད་མ་གཞན་དུ་ཐལ་བར་འགྱུར་བ་གཅིག་ལ་ནི་རང་བཞིན་གཉིས་ཡོད་པ་མ་ཡིན་ནོ། །གལ་ཏེ་གཞལ་བྱའི་དབྱེ་བ་དོན་དམ་པ་མ་ཡིན་ན། འོ་ན་ཇི་ལྟར་ཞེས་བྱ་བའོ། །ཚད་མ་ཉིད་དུ་ཞེས་བྱ་བ་ནི་རྗེས་སུ་དཔག་པའོ། །གཞལ་བྱའི་དབྱེ་བ་དེ་ཉིད་བརྟགས་པའི་རང་བཞིན་ཡིན་པའི་ཕྱིར་དོན་དམ་པ་ཡིན་གྱི། དངོས་པོ་ཉིད་མ་ཡིན་ཏེ། མངོན་སུམ་བཞིན་དུ་རྗེས་སུ་དཔག་པའི་དངོས་པོའི་རང་
བཞིན་ཐོབ་པ་གང་ཞིག་པ་དེ་ནི་དོན་དམ་པ་ལས་གཞན་མིན་ཏེ། དེས་ན་མངོན་སུམ་བཞིན་དུ་རྗེས་སུ་དཔག་པ་ཡང་ཚད་མ་ཁོ་ནའོ་ཞེས་དོགས་པའོ། །གཞན་གྱིས་ཡུལ་གཅིག་མངོན་སུམ་དང་རྗེས་སུ་དཔག་པ་དག་ཐ་དད་པ་མེད་པར་འགྱུར་རོ་ཞེས་བརྗོད་པ་ནི། འོ་ན་ཞེས་བྱ་བ་སྟེ་རྗེས་སུ་དཔག་པ་མངོན་སུམ་ལས་ཐ་དད་པ་མེད་པ་ཉིད་དུ་འགྱུར་རོ་ཞེས་བྱ་བའི་དོན་ཏོ། །དེ་ཉིད་གསལ་བར་བྱེད་པ་ནི། རང་གི་ངོ་བོ་དངོས་སུ་ཞེས་བྱ་བའོ། །འོན་ཏེ་གལ་ཏེ་རང་གི་ངོ་བོས་ཡུལ་དུ་བྱེད་པ་མ་ཡིན་གྱི་འོན་ཏེ། འོན་ཀྱང་གཞན་གྱི་ངོ་བོས་ཡིན་ན་ཇི་ལྟར་དེ་རྟོགས་ཏེ། དཀར་པོ་ནི་སེར་པོ་ཉིད་ཀྱིས་རྟོགས་པ་མ་ཡིན་ནོ་ཞེས་བརྗོད་པ་ནི། རང་གི་ངོ་བོ་དེ་ལ་མ་རིག་སྟེ། མངོན་སུམ་གཟུང་གི་འོན་ཀྱང་གཞན་གྱི་རང་བཞིན་དུ་མངོན་ཞེ་ན་ཞེས་བྱ་བའོ། །དེས་ན་འཁྲུལ་བའི་ཕྱིར་དེ་ཇི་ལྟར་རྟོགས་ཤེ་ན། རྗེས་སུ་དཔག་པ་ནི་རང་གི་སྣང་བ་དོན་མེད་པ་ལ་དོན་དུ་ལྷག་པར་ཞེན་ནས་འཇུག་པའི་ཕྱིར་ན་འཁྲུལ་བར་འདོད་པ་ཉིད་དོ་ཞེས་ལན་བཏབ་པ་ནི་ཇི་བཞིན་མངོན་ཞེ་ན་ཞེས་བྱ་བའོ། །དེ་ཁོ་ན་ཉིད་ཇི་ལྟར་བ་བཞིན་དུ་མངོན་བཞིན་ཡིན་པའི་ཕྱིར་ཏེ། ཕྱིན་ཅི་ལོག་ཏུ་མངོན་པར་ཞེན་པའི་མཚན་ཉིད་ཀྱི་ཕྱིར་ན། མངོན་སུམ་ལ་ལྟོས་པའི་གཉིས་པ་རྗེས་སུ་དཔག་པའི་རྟོག་པ་ནི་འཁྲུལ་པ་ཉིད་ཡིན་པར་འདོད་དོ། །ཅི་ལྟར་དོན་དེ་ཞེས་བྱ་བ་ནི་འཆད་པ་སྟེ། ཡུལ་དང་དུས་དང་རྣམ་པ་ངེས་པའི་དོན་དེའོ། །དུས་ལ་སོགས་པ་ངེས་པ་ཉིད་བཤད་པ་ནི། ད་ལྟར་ཞེས་བྱ་བ་ལ་སོགས་པའོ། །དེ་ལྟར་ཞེས་བྱ་བ་ནི་དུས་ངེས་པའོ། །དེས་ན་ཞེས་བྱ་བ་ནི་ཡུལ་ངེས་པའོ། །རྒྱུའི་དབྱེ་བས་ཐ་དད་པས་ཞེས་བྱ་བ་ནི་རང་བཞིན་དུ་མངོན་པའོ། །གལ་ཏེ་དེའི་རང་བཞིན་དུ་མངོན་པར་ཞེན་པ་མེད་ན། ཇི་ལྟར་དེ་ལ་འཁྲུལ་པ་ཡིན་སྙམ་ན། དངོས་པོ་ལ་མ་རེག་ཀྱང་དེར་ལྷག་པར་ཞེན་པའི་ཕྱིར་རོ་ཞེས་གསུངས་སོ། །དེ་ལ་མ་རེག་ན་ཇི་ལྟར་རེག །ལྷག་པར་ཞེ་ན་སྙམ་ན། སྔར་མཐོང་བའི་དོན་གྱིས་ཞེས་གསུངས་སོ། །རེ་ཞིག་འཆད་པར་འགྱུར་བའི་རྣམ་འགྲེལ་གྱི་དོན་ལྡོག་པའི་སྒོ་ནས་བརྗོད་པ་ནི་གལ་ཏེ་ཞེས་བྱ་བའོ། །མི་འགྱུར་རོ་ཞེས་བྱ་བ་ནི་སྐབས་ཀྱི་དོན་རྗེས་སུ་དཔག་པའོ། །དེ་ཉིད་སྨྲས་པ་ཞེས་བྱ་བ་ནི་རྗེས་སུ་དཔག་པ་ཉིད་ཚད་མ་མ་ཡིན་པའོ། །གལ་ཏེ་གཞན་གྱི་ངོ་བོས་ནི་རྟོགས་ན་འོ་ན་དེ་ཚད་མ་མ་ཡིན་ནོ། །ཅིའི་ཕྱིར་ཞེ་ན། འཁྲུལ་པ་ཞེས་གསུངས་ཏེ་གཞན་རྟོགས་པ་ན་གཞན་ཐོབ་པའི་ཕྱིར་རོ་ཞེས་བྱ་བའི་དོན་ཏོ། །རྗེས་སུ་
འགྲོ་བའི་སྒོ་ནས་འཆད་པ་ནི་གལ་ཏེ་ཞེས་བྱ་བའོ། །གལ་ཏེ་ཡང་ང་ཡི་རྣམ་པ་མཐོང་བ་ལ་གཞན་གྱི་ངོ་བོར་སྒྲོ་འདོགས་པ་ཡིན་ཡང༌། མངོན་པར་འདོད་པ་འཐོབ་པ་ལ་ནི་བསམ་པ་ཇི་ལྟར་བ་བཞིན་མི་ལུས་བར་བྱེད་པས་ན། ཚད་མ་ཡིན་ཏེ་མངོན་སུམ་བཞིན་ནོ་ཞེས་བརྗོད་པ་འདི་ནི། ལམ་དུ་ཞེས་བྱ་བའོ། །གལ་ཏེ་ཇི་ལྟར་བསམ་པ་ཐོབ་པ་ན། ཇི་ལྟར་གཞན་ལ་གཞན་གྱི་རྣམ་པས་རྟོག་པའམ། འཁྲུལ་པ་ཉིད་ཡིན་པར་འགྱུར་ཞེ་ན། རྣམ་པ་གཞན་གྱིས་ཀྱང་ཞེས་གསུངས་སོ། །ཇི་ལྟར་དཀར་པོ་ལ་སེར་པོའི་རང་བཞིན་དུ་འཁྲུལ་པར་རྟོག་པ་མཐོང་བ་དེ་བཞིན་དོན་གྱི་རང་བཞིན་གསལ་བ་ཡང་མི་གསལ་བའི་རྣམ་པར་རྟོག་པའི་ཕྱིར་འགལ་བ་མེད་དོ། །ཡང་ན་གལ་ཏེ་རྗེས་སུ་དཔག་པ་དོན་གྱི་རང་བཞིན་ལ་མ་རེག་པས་འཁྲུལ་པ་ཡིན་ན་ཇི་ལྟར་དོན་ལ་འཇུག་པར་བྱེད་པ་ཡིན་སྙམ་ན། རྣམ་གཞན་གྱིས་ཀྱང་ཞེས་གསུངས་པའོ། །རྟོག་པ་ནི་འཇུག་པ་སྟེ། སྦྱོར་བར་བྱེད་པ་ཡིན་ལ། དེ་ནི་དངོས་པོ་ལ་རེག་པ་མེད་པར་ཡང་མཐོང་སྟེ། དཔེར་ན་ལྷ་སྦྱིན་མཆོད་སྦྱིན་དུ་རློམ་པ་ལས་འཇུག་པ་ཡིན་ནོ། །ཡང་ན་རྗེས་སུ་དཔག་པའི་རང་བཞིན་ལས་འབའ་ཞིག་ཏུ་མ་ཟད་ཀྱི། རྟོག་པའང་རྣམ་པ་གཞན་དུ་མཐོང་སྟེ། རྟོགས་པ་ནི་མངོན་སུམ་ལ་བྱའོ། །གཞན་དུ་ཞེས་བྱ་བ་འཐོབ་པར་བྱ་བའི་དངོས་པོ་ལ་མ་རེག་ཀྱང་ཚད་མ་ཉིད་ཡིན་པར་མཐོང་ངོ༌། །གལ་ཏེ་ཇི་ལྟར་བསམ་པ་ཐོབ་པ་ཡིན་ན། ཐོབ་པར་བྱ་བ་ཉིད་སྣང་བ་ཡིན་ནོ་ཞེས་ཇི་ལྟར་རྟོགས་པར་མི་བྱེད་སྙམ་ན། ཕྱོགས་འདི་ལ་ཞེས་གསུངས་སོ། །ཇི་བཞིན་མངོན་ཞེན་མིན་པའི་ཕྱིར། །ཞེས་བྱ་བ་ལ་སོགས་པ་རྣམ་པར་རྟོག་པ་དངོས་པོར་འཛིན་པ་ནི་བཀག་ཟིན་ཏོ་ཞེས་བྱ་བའི་དོན་ཏོ། །གལ་ཏེ་རྗེས་སུ་དཔག་པའི་རྟོག་པ་དོན་ཇི་ལྟ་བ་བཞིན་མ་ཡིན་པར་ལྷག་པར་ཞེན་པ་ཇི་ལྟར་ཡིན་ཏེ། མངོན་སུམ་བཞིན་དུ་མི་ལུས་བ་ཡིན་པའི་ཕྱིར་རོ་ཞེས་དོགས་པ་ནི་བཞིན་དུ་ཞེས་བྱ་བ་སྟེ། མངོན་སུམ་ལ་ཡང་ངོ་དེ་ནི་བསམ་པ་ལ་སླུ་བ་མེད་པའོ། །འདི་ལ་ཡང་རྗེས་སུ་དཔག་པ་ལའོ། །རྗེས་སུ་དཔག་པ་ནི་དོན་ཅི་ལྟ་བ་བཞིན་ཞེ་ན་ཞེ་ན་པ་ཡིན་ནོ་ཞེས་བྱ་བའི་དོན་ཏོ། །འདི་ཞེས་བྱ་བ་ལ་སོགས་པ་ནི་ལན་ནོ། །ཐ་སྙད་པ་དག་ལ་ནི་མངོན་སུམ་བཞིན་དུ་རྗེས་སུ་དཔག་པ་དོན་ཅི་ལྟ་བ་བཞིན་མངོན་པར་ཞེན་པ་ཉིད་དོ། །འོ་ན་ཇི་ལྟར་རྗེས་སུ་དཔག་པ་དོན་ཇི་བཞིན་མ་ཡིན་པ་རྟོགས་པར་ཇི་ལྟར་འགྱུར་ཞེ་ན། འདི་ནི་འཆད་པར་བྱེད་པ་རྣམས་ཀྱིས་ཞེས་གསུངས་སོ། །རྗེས་སུ་དཔག་པའི་རྟོགས་
པ་ནི་དོན་ཅི་ལྟ་བ་བཞིན་དུ་མ་ཡིན་པར་མངོན་པར་ཞེན་པས་འཁྲུལ་པ་ཡིན་ནོ་ཞེས་བྱ་བའི་རྟོགས་པ་ནི་འཆད་པར་བྱེད་པ་རྣམ་པ་ཉིད་ཡིན་གྱི་ཐ་སྙད་བྱེད་པ་རྣམས་ཀྱི་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རྗེས་སུ་དཔག་པ་ལ་བདག་གིས་མེ་ཐོབ་པར་བྱའོ་སྙམ་པའི་བསམ་པ་ཇི་ལྟར་ཡོད་དེ་རང་གི་རྣམ་པ་ཙམ་མཐོང་བའི་ཕྱིར་རོ། །དེ་ན་བསམ་པ་མེད་པའི་ཕྱིར་ན་དེ་ལ་བསམ་པ་ལ་མི་སླུ་བ་ཡོད་པ་ཡིན་ནོ། །དེས་ན་འདི་ནི་དེ་ལ་ཡང་ཡོད་པའི་ཕྱིར་རོ་ཞེས་ཇི་ལྟར་བརྗོད་སྙམ་དུ་དོགས་པ་ནི། གཞན་མཐོང་བའི་ཕྱིར་ཞེས་བྱ་བའོ། །བུམ་པ་མཐོང་བ་ནི་སྣམ་བུ་ལ་བསམ་པ་འབྱུང་བ་མ་ཡིན་ནོ་ཞེ་ན། ཐ་སྙད་བྱེད་པ་པོའི་སྐྱེ་བོ་ལ་ལྟོས་ནས་བསམ་པ་ལ་མི་སླུ་བ་ཡིན་ན་ཇི་ལྟར་དེ་ལས་སོ་སོར་ངེས་པའི་དོན་ལས་དོན་ནོ་ཞེས་བྱ་བའོ། །དེ་ཁོ་ན་ལ་རིགས་པ་ལ་ལྟོས་ནས་ནི་འཁྲུལ་བ་ཡིན་ལ་གཞན་ལ་ལྟོས་ནས་ནི་བསམ་པ་ལ་མི་སླུ་བ་ཡིན་ནོ་ཞེས་བྱ་བའི་དོན་ཏོ། །འདི་ནི་ཞེས་བྱ་བ་གཞན་མཐོང་བ་ན་ཡང་གཞན་ལ་བསམ་པ་བྱེད་པ་ཉིད་ནའོ། །གལ་ཏེ་རྣམ་པར་རྟོག་པ་དོན་ལ་ངེས་པ་མ་ཡིན་ན་ནི་ཇི་ལྟར་དེ་ལས་སོ་སོར་ངེས་པའི་དོན་ལ་འཇུག་སྙམ་དུ་དོགས་པ་སེལ་བས། རྣམ་གཞན་གྱིས་ཀྱང་རྟོགས་པ་མཐོང༌། །ཞེས་བྱ་བ་རྣམ་པར་འགྲེལ་པ་ནི། དེས་ན་ཞེས་བྱ་བ་སྟེ་བག་ཆགས་པ་འཐུས་སོ། །གང་གི་དེ་ཁོ་ན་ཉིད་དངོས་པོའི་རང་བཞིན་ཡོངས་སུ་མ་དཔྱད་པའི་རྗེས་སུ་དཔག་པ་ལ་སྟེ། དངོས་པོའི་རང་བཞིན་དེ་ལའོ།། ཅིའི་ཕྱིར་འདི་བརྩད་པར་བྱ་བ་མ་ཡིན་སྙམ་ན། མཐོང་བ་ལ་ནི་ཞེས་གསུངས་སོ། །མངོན་སུམ་ཡང་དངོས་པོའི་རང་བཞིན་མ་རེག་པ་ཁོ་ནར་རྗེས་སུ་དཔག་པ་བཞིན་དུ་འཇུག་པར་བྱེད་པ་ཡིན་ཞེས་བསྟན་པའི་ཕྱིར་མངོན་སུམ་ལ་ཡང་ཞེས་གསུངས་སོ། །ཅིའི་ཕྱིར་ཞེ་ན། དེ་ཡང་ཞེས་གསུངས་པ་སྟེ། སྒྲུབ་པར་བྱེད་པའི་མངོན་སུམ་ལ་ཡང་ངོ༌། ཇི་ལྟར་ཞེ་ན་ཉེ་བར་གནས་པ་ཞེས་གསུངས་སོ། །ཉེས་ན་ཞེས་བྱ་བ་ནི་རྗེས་སུ་དཔག་པ་ནི་རྣམ་པར་རྟོག་པ་དང་བཅས་པ་ཡིན་པའི་ཕྱིར་ན། ཐོབ་པར་བྱ་བ་འབྱུང་བར་འགྱུར་ལ་རེག་པ་ཡོད་པས་འཇུག་པར་བྱེད་པར་འགྱུར་གྱི། མངོན་སུམ་ནི་མ་ཡིན་ནོ། །ཅིའི་ཕྱིར་ཞེ་ན། ཉེ་བར་གནས་པ་ཙམ་ནི་ཞེས་གསུངས་སོ། །འཇུག་པ་ནི་འཐོབ་པའི་དོན་དུ་ཡིན་ན་དེ་ལ་ཡང་བྱུང་ཟིན་པ་ཞུགས་པས་ཅི་བྱ། དེར་ཡང་ཞེས་བྱ་བ་ནི་མངོན་སུམ་ལ་ཡང་ངོ༌། །དེ་དང་ཞེས་བྱ་བ་ནི་ད་ལྟར་འབྱུང་བར་འགྱུར་བ་དང་ངོ༌། །དེས་ན་ཞེས་བྱ་བ་ནི་གཅིག་ཏུ་ལྷན་ཅིག་ལྷག་པར་ཞེན་པས་ནའི། །དེ་ལྟ་བུའི་དེ་ཞེས་བྱ་བ་ནི་མངོན་སུམ་བཞིན་
ཉིད་དོ། །མཚུངས་པ་ཉིད་དུ་ཞེས་བྱ་བ་ནི་རྗེས་སུ་དཔག་པ་མངོན་སུམ་དང་ངོ༌། །མཚུངས་པ་ཉིད་མི་འཐད་པར་དོགས་པ་བསུ་བ་ནི་འོན་ཀྱང་ཞེས་བྱ་བའོ། །མངོན་སུམ་ནི་གཅིག་ཏུ་ལྷག་པར་ཞེན་པའི་རྣམ་པར་རྟོག་པ་སྐྱེད་པའི་སྒོ་ནས་འཇུག་པར་བྱེད་པ་ཡིན་ལ། རྗེས་སུ་དཔག་པ་ནི་དེ་ལྟ་མ་ཡིན་ནོ་ཞེས་བྱ་བའི་དོན་ཏོ། །རྗེས་སུ་དཔག་པ་ལ་ཡང་དེའི་འོག་ཏུ་འབྱུང་བའི་རྣམ་པར་རྟོག་པ་གཅིག་ཉིད་དུ་ལྷག་པར་ཞེན་པ་ལས་འཇུག་པར་བྱེད་པ་ཡིན་ཏེ། མངོན་སུམ་དང་འདྲ་བར་ཡིན་ནོ་ཞེས་ལན་འདེབས་པ་ནི། དེ་ནི་མི་རིགས་ཏེ་ཞེས་བྱ་བའོ། །གང་གིས་དེ་ཡང་འཇུག་པར་བྱེད་པ་ཉིད་དུ་འགྱུར་ལ། རྗེས་སུ་དཔག་པས་ཉེ་བར་གནས། །བཟུང་བ་ན་ནི་རྣམ་པར་རྟོག་པ་གཞན་ལྷག་པར་འབྱུང་བ་ཉིད་དུ་གདོན་མི་ཟ་བ་ཡིན་ནོ། །རྣམ་པར་རྟོག་པ་གཞན་གྱིས་ཀྱང་འཇུག་པར་བྱེད་པ་ཉིད་ཇི་ལྟར་འགྱུར་སྙམ་ན། རྣམ་རྟོག་གཞན་ནི་གནས་པར་འགྱུར། །ཞེས་གསུངས་སོ། །དེས་ན་དེའི་སྒོ་ནས་དེ་ཡང་འཇུག་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །འདི་ལྟར་རྗེས་སུ་དཔག་པས་ཉེ་བར་གནས་པས་འཛིན་ཞེ་ན། རང་གི་ངོ་བོས་བཟུང་བའི་ཕྱིར་ཞེས་སྦྱར་རོ། །རྣམ་པར་འགྲེལ་པར་ནི་གསལ་བར་ཞེས་བྱ་བ་རང་གི་ངོ་བོའི་ཁྱད་པར་དུ་བྱས་པའི་ཡུལ་རུང་བ་གནས་པར་མི་ཤེས་པ། །རང་ཉིད་ཤེས་ཕྱིར་དེ་ཤེས་ཡིན། །ཞེས་བསྟན་པར་བྱ་བའི་དོན་འདུ་བ་ཡིན་ནོ། །དེར་ཡང་ནི་རྗེས་སུ་དཔག་པ་ལ་ཡང་ངོ༌། །འོན་ཏེ་ཞེས་བྱ་བ་ནི་རྣམ་པར་རྟོག་པ་ཐ་དད་པ་མེད་པའོ། །དེ་ལྟ་ན་འོ་ན་དེ་ཚད་མ་ཡིན་ནོ་ཞེ་ན་དངོས་པོ་ལ་རིག་པ་མེད་པ་ཉིད་ཅེས་སྨྲས་སོ། །འོ་ན་མངོན་སུམ་ཡང་ཚང་མར་མི་འགྱུར་རོ། །མངོན་སུམ་ཞེས་བྱ་བ་སྨོས་སོ། །དངོས་པོ་ལ་རེག་པ་ནི་ཚད་མར་འགྱུར་བའི་རྒྱུ་མཚན་མ་ཡིན་ནོ་ཞེས་ལན་འདེབས་པ་ནི་དེ་ཡང་རུང་བ་མ་ཡིན་ཏེ་ཞེས་བྱ་བའོ། །ཞེན་པ་མངོན་སུམ་ལ་ཡོད་ཡིན། །ཞེས་བྱ་བ་ནི་རྣམ་པར་རྟོག་པ་མེད་པ་ཡིན་པའི་ཕྱིར་རོ། །འོ་ན་རང་བཞིན་དེ་ཉིད་ཅེས་བྱ་བ་ནི་རྣམ་པར་རྟོག་པ་མེད་པའི་རང་བཞིན་ནོ། །རྣམ་པར་རྟོག་པ་ལ་ཡང་འཇུག་པར་བྱེད་པ་ཉིད་མེད་པའི་ཕྱིར་ན་ཇི་ལྟར་དེའི་སྒོ་ནས་མངོན་སུམ་འཇུག་པར་བྱེད་པ་ཡིན་ཞེས་བྱ་བ་ལན་འདེབས་པ་ནི། གང་གིས་ཞེས་བྱ་བ་སྟེ་འཇུག་པར་བྱེད་པ་གང་གིས་སོ། །འོན་ཏེ་འཇུག་པར་བྱེད་པ་མ་ཡིན་པའི་རྣམ་པར་རྟོག་པ་སྐྱེད་པར་བྱེད་པ་ཉིད་ཀྱིས་འཇུག་པར་བྱེད་པ་ཡིན་ནོ་ཞེ་ན་དེ་ནི་མི་རིགས་ཏེ་ཅིའི་ཕྱིར་ཞེ་ན་དེ་རང་ཉིད་ཅེས་གསུངས་སོ། །འདི་སྙམ་དུ་རང་ཉིད་མི་འཇུག་པར་བྱེད་པ་མ་ཡིན་པ་ཉིད་ཡིན་ལ། འཇུག་པར་བྱེད་པའི་རྣམ་པར་
རྟོག་པ་བསྐྱེད་པའི་སྒོ་ཁོ་ནས་འཇུག་པར་བྱེད་པ་ཡིན་ནོ་ཞེས་དོགས་པར་བྱེད་པ་ནི་གལ་ཏེ་རྣམ་རྟོག་ཅེས་བྱ་བའོ། །ལན་ནི། དངོས་འཛིན་མིན་པར་འཇུག་བྱེད་དུ། །ཇི་ལྟར་འགྱུར་ཏེ། མི་འགྱུར་བ་ཁོ་ནའོ། །རྣམ་པར་རྟོག་པ་དངོས་པོ་འཛིན་པ་མ་ཡིན་ཡང་འཇུག་བྱེད་ཡིན་ན་ནི། རྗེས་སུ་དཔག་པ་ཡང་དེར་འགྱུར་རོ་ཞེས་བརྗོད་པ་ནི། དེ་ལྟར་ཡིན་ཡང་ཞེས་བྱ་སྟེ། དངོས་པོ་འཛིན་པ་མ་ཡིན་ཡང་གལ་ཏེ་རྣམ་པར་རྟོག་པ་འཇུག་པ་སྟེ་ཡིན་ན། དེའི་ཚེ་རྗེས་སུ་དཔག་པ་ལ་ཡང་འཇུག་པར་བྱེད་པ་འདི་ཅིས་མི་འདོད་དེ། འདོད་པར་བྱའོ། །གལ་ཏེ་རྣམ་པར་རྟོག་པའི་འཇུག་པར་བྱེད་པ་ཉིད་ནི་ཚད་མའི་རྒྱུ་མཚན་དུ་མི་འདོད་པ་ཁོ་ན་མ་ཡིན་ནམ། དེས་ན་རྗེས་སུ་དཔག་པ་ཡང་དེ་འདོད་པར་བྱ་བའོ་ཞེས་ཅི་སྟེ་བརྗོད་ན། གལ་ཏེ་རྣམ་པར་རྟོག་པ་ཉིད་བསྐྱེད་པའི་སྒོ་ནས་ཞེས་བྱ་བའོ། །རྣམ་པར་རྟོག་པ་ཚད་མར་མི་འདོད་ནས་མངོན་སུམ་དེ་སྐྱེད་པའི་སྒོ་ནས་ཚད་མ་མ་ཡིན་པ་ནི་ཚད་མར་ཇི་ལྟར་འགྱུར། རང་ཉིད་ཚད་མ་མ་ཡིན་པའི་རྣམ་པར་རྟོག་པ་སྐྱེད་པའི་སྒོ་ནས་ཚད་མར་འགྱུར་རོ་ཞེས་མི་རིགས་སོ། །དེའི་ཕྱིར་མངོན་སུམ་པར་རྟོག་པ་སྐྱེད་པའི་སྒོ་ནས་འཇུག་པར་བྱེད་པ་ཉིད་དུ་འདོད་ན། དེ་ལ་ཡང་དེ་འདོད་པ་ཉིད་དོ། །དེ་ལྟ་ཡིན་ན་ཞེས་བྱ་བ་ནི་རྣམ་པར་རྟོག་པར་འཇུག་པར་བྱེད་པ་ཉིད་དུ་ཁས་ལེན་པ་ཡིན་ནའོ། །རྗེས་སུ་དཔག་པ་ནི་ཞེས་བྱ་བ་ནི་དོགས་པ་བསུ་བའོ། །འོ་ན་ཞེས་བྱ་བ་ནི་ལན་ཏེ། རྣམ་པར་རྟོག་པ་ཇི་ལྟར་ཚད་མ་ཡིན་ཞེས་འབྲེལ་ཏོ། །གཞན་གྱིས་དེར་ཞེས་སྨྲས་ཏེ། མངོན་སུམ་དང་རྣམ་པར་རྟོག་པ་དེ་གཉིས་ཀྱི་གནས་བསམ་པས་མངོན་སུམ་གྱི་དངོས་པོ་འཛིན་པའི་ཕྱིར་དེས་བསྐྱེད་པའི་རྣམ་པར་རྟོག་པ་ཚད་མ་མ་ཡིན་ནོ་ཞེ་ན། ལན་མངོན་སུམ་གྱིས་དངོས་པོ་འཛིན་པ་མ་ཡིན་ནོ་ཞེས་འགྲེལ་ཏོ། །ཅིའི་ཕྱིར་ཞེ་ན། རྣམ་པར་རྟོག་པ་ཞེས་སྨོས་ཏེ། སྔ་མ་དང་ཕྱི་མར་གྱུར་པའི་དངོས་པོའི་རྒྱུན་རྣམ་པར་བརྟག་པར་བྱ་བ་སྟེ་དེ་ལའོ། །དེ་ཞེས་བྱ་བ་ནི་མངོན་སུམ་མོ། །དེའི་རྒྱུན་ལ་ཞེས་བྱ་བ་ནི་དོགས་པ་སྟེ། འབྱུང་བར་འགྱུར་བའི་རྒྱུན་ལའོ། །ཇི་ལྟར་ཞེས་བྱ་བ་ནི་ལན་ནོ། །གཞན་ལ་ཞེས་བྱ་བ་ནི་ད་ལྟར་བའི་སྐད་ཅིག་ལའོ། །གཞན་ལ་ཞེས་བྱ་བ་འབྱུང་བར་འགྱུར་བ་ལའོ། །དེ་ལྟར་ཡིན་ནོ་ཞེས་བྱ་བ་ནི་སྐད་ཅིག་ལ་ཞུགས་པས་རྒྱུན་ལ་ཞུགས་པར་འགྱུར་བའོ། །བརྗོད་པ་ནི་རྗེས་སུ་དཔག་པ་ཡང་ཞེས་བྱ་
པའོ། །འོན་ཏེ་ཉེ་བར་བཏགས་པས་རྗེས་སུ་དཔག་པ་ལ་དོན་ལ་ཞུགས་པས་ཐ་སྙད་བྱེད་པ་ཡིན་ནོ་ཞེས་བྱ་བའི་གཞན་གྱི་ལམ་ཟློག་པར་བྱེད་པ་ནི་དེ་ཞེས་བྱ་བའོ། །མངོན་སུམ་ཞེས་བྱ་བ་ནི་ཟློག་པར་བྱེད་པའོ། །ཡང་རྣམ་པ་གཞན་གྱི་སྒོ་ནས་མངོན་སུམ་དང་རྗེས་སུ་དཔག་པ་དག་ཁྱད་པར་ཡོད་པར་དོགས་པ་བསུ་ནས་སེལ་བ་ནི་མངོན་སུམ་ནི་དེའི་རིགས་ལ་ཞེས་བྱ་བ་སྟེ། འབྱུང་བར་འགྱུར་བའི་རྒྱུན་གྱི་རིགས་དང་པོའི་སྐད་ཅིག་ལའོ། །དེ་ལ་ཡང་ནི་སྐད་ཅིག་དང་པོ་ལ་ཡང་ངོ༌། །ཇི་ལྟར་ཞེ་ན་མངོན་སུམ་གྱི་ཞེས་སྨོས་སོ། །རྗེས་སུ་དཔག་པ་བཞིན་དུ་རྣམ་པར་རྟོག་པ་ཡང་དངོས་པོའི་ཡུལ་ཅན་མ་ཡིན་པའི་ཕྱིར་ན་དེའི་རིགས་ཅན་ལ་མི་འཇུག་གོ །དེ་ལྟར་ན་ཡང་ཚད་མ་ཡིན་ན་ནི་རྗེས་སུ་དཔག་པ་ལ་ཡང་བཟློག་པར་བྱ་བ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེའི་རིགས་ལ་མངོན་སུམ་འཇུག་པའི་ཕྱིར་རྣམ་པར་རྟོག་པ་ཚད་མ་ཡིན་ནོ་ཞེས་བྱ་བ་ལན་ཡིན་ན་དེའི་ཚེ་རྗེས་སུ་དཔག་པ་ལ་ཡང་ལན་ནི་མཚུངས་སོ། །ཇི་ལྟར་ཞེ་ན་རྗེས་སུ་དཔག་པའི་ཡུལ་ཞེས་གསུངས་སོ། །ཚང་བང་གིས་ཞེས་བྱ་བ་ནི་དེ་ཉིད་གསལ་བར་བྱེད་པའོ། །རྗེས་སུ་དཔག་པའི་ཡུལ་ལ་ཞེས་བྱ་བ་ནི་དོགས་པའོ། །དེ་ནི་མངོན་སུམ་མོ། །ཐམས་ཅད་ཅེས་བྱ་བ་ནི་ལན་ནོ། །མཚུངས་པ་ཉིད་བརྗོད་པ་ནི་འདི་ལྟར་ཞེས་བྱ་བའོ། །ཇི་ལྟར་རྗེས་སུ་དཔག་པའི་ཡུལ་ལ་མངོན་སུམ་མི་འཇུག་པ་དེ་བཞིན་དུ་མངོན་སུམ་གྱིས་ཕྱིས་འབྱུང་བའི་རྣམ་པར་རྟོག་པའི་ཡུལ་ལ་མངོན་སུམ་མི་འཇུག་པ་མ་ཡིན་ནམ་ཅི། འོན་ཀྱང་མངོན་སུམ་མི་འཇུག་པ་ཁོ་ནའོ། །དེས་ན་རྗེས་སུ་དཔག་པའི་ཡུལ་དུ་རྣམ་པར་རྟོག་པ་ཡང་ཚད་མར་མི་འགྱུར་རོ་ཞེས་བྱ་བའི་དོན་ཏོ། །གཞལ་བྱ་གཞན་ལ་ཞེས་བྱ་བ་ནི་ཚང་བང་གནས་པའི་མེའི་གསལ་བ་ལ་ཞུགས་པ་ཡིན་པའོ། །དེས་ན་རྗེས་སུ་དཔག་པ་འཇུག་པར་བྱེད་པ་དང་ཚད་མ་ཉིད་དུ་མངོན་སུམ་གྱིས་མི་བྱེད་པ་ན་འདི་ནི་རྣམ་པར་རྟོག་པར་བྱེད་པ་ལ་ཡང་མཚུངས་ཏེ་དེས་ན་མངོན་སུམ་དེས་ནི་རྣམ་པར་རྟོག་པ་ཡང་ཚད་མར་བྱེད་པར་མི་འགྱུར་རོ་ཞེས་བརྗོད་པ་ནི། རྣམ་རྟོག་དེས་བསྐྱེད་མངོན་སུམ་ཅི། །ཞེས་བྱ་བའོ། །ཅི་སྟེ་ཡང་མངོན་སུམ་གྱི་ཡུལ་དང་རང་བཞིན་ཡུལ་གཅིག་ཉིད་དུ་རྣམ་པར་རྟོག་པས་ཞེན་པར་བྱེད། །དེས་ན་མངོན་སུམ་གྱི་རྣམ་པར་རྟོག་པ་ཚད་མར་བྱས་པ་ཡིན་ནོ་ཞེས་དོགས་ན་གཅིག་ཏུ་ལྷག་པར་ཞེས་གསུངས་སོ། །གཉི་ག་ལ་
ནི་རྣམ་པར་རྟོག་པ་དང་རྗེས་སུ་དཔག་པ་དག་ལའོ། །རྗེས་སུ་དཔག་པ་ཡང་རང་གི་ཡུལ་ལ་མངོན་སུམ་གྱི་ཡུལ་གཅིག་པ་ཉིད་ལྷག་པར་ཞེན་པར་བྱེད་དེ། །དེས་ན་མངོན་སུམ་གྱི་རྗེས་སུ་དཔག་པ་ཡང་ཅི་སྟེ་ཚད་མར་མི་བྱེད། གལ་ཏེ་རྣམ་པར་རྟོག་པ་ནི་འཐོབ་པར་བྱ་བའི་རང་བཞིན་འཛིན་པ་དེས་ན་ཚད་མ་ཡིན་གྱི་རྗེས་སུ་དཔག་པ་ནི་མ་ཡིན་ཏེ། དེས་ན་ཚད་མ་མ་ཡིན་ནོ་ཞེས་དོགས་པ་བསུ་ནས་བཤད་པ། དངོས་པོ་ཐོབ་པར་བྱ་བ་དེའི་སྤྱི་ནི་རྣམ་པར་བརྟག་པར་བྱ་བ་དང་རྗེས་སུ་དཔག་པར་བྱ་བ་གཉི་གར་ཡང་རྣམ་པར་རྟོག་པ་དང་རྗེས་སུ་དཔག་པ་དག་གིས་འཛིན་པ་ཡིན་ནོ། །དེས་ན་གཉི་གར་ཐོབ་པར་ཡང་བྱ་བའི་རང་བཞིན་ཉིད་མི་འཛིན་པའི་ཕྱིར་ཚད་མ་འམ་ཚད་མ་མ་ཡིན་པ་ཉིད་དུ་མཚུངས་སོ། །ལྷག་པར་བརྗོད་པའི་དོན་དུ་ཡང་དོགས་པ་བསུ་བ་ནི། རྣམ་པར་བརྟག་པར་བྱ་བའི་མེའི་སྐད་ཅིག་ཡིན་པ་དེ་དག་གི་དང་པོའི་སྐད་ཅིག་དབང་པོའི་ཡུལ་ཡིན་ནོ། །དེས་བཟུང་བ་དེའི་འཛིན་པར་འགྱུར་བ་ལ་རྣམ་པར་རྟོག་པ་འཇུག་པར་བྱེད་པ་ཡིན་པའི་ཕྱིར་ཚད་མ་ཡིན་གྱི། རྗེས་སུ་དཔག་པའི་ནི་མ་ཡིན་ཞེ་ན། ལན་ནི་གཞན་སྐད་ཅིག་དང་པོ་བཟུང་བ་ནི་གཞན་རྣམ་པར་བརྟག་པར་བྱ་བ་འབྱུང་བར་འགྱུར་བ་བཟུང་བ་མ་ཡིན་ནོ་ཞེས་དཔྱད་ཟིན་པ་ནི་མ་ཡིན་ནམ། དེ་མ་བཟུང་ན་ཡང་དེའི་ཡུལ་ཅན་གྱི་རྣམ་པར་རྟོག་པ་རྗེས་སུ་དཔག་པ་བཞིན་ཚད་མར་མི་འགྱུར་རོ་ཞེས་དོགས་པའོ། །འོན་ཏེ་གང་ཡང་རུང་བ་གཞན་བཟུང་བས་ནི་གཞན་བཟུང་བར་མི་འགྱུར་ཏེ། བུམ་པ་བཟུང་བས་ཀྱང་སྣམ་བུ་བཟུང་བར་ཐལ་བའི་ཕྱིར་རོ། །འོན་ཀྱང་འབྲེལ་བ་ཅན་བཟུང་བས་ན་འབྱུང་བར་འགྱུར་པས་བཟུང་བ་ཡིན་ནོ་ཞེས་དོགས་པ་ནི་དེ་དང་འབྲེལ་པ་ཞེས་བྱ་བའོ། །འབྱུང་བར་འགྱུར་བ་དེ་དང་འབྲེལ་བ་སྐད་ཅིག་དང་པོ་སྟེ་བཟུང་བ་ན་འབྱུང་བར་འགྱུར་བ་དེ་བཟུང་བར་འདོད་ནའོ། །འབྲེལ་པ་འཛིན་པ་ཇི་ལྟར་མཚུངས་སྙམ་ན། མངོན་སུམ་ལས་བྱུང་བའི་རྣམ་པར་རྟོག་པ་ནི་འབྱུང་བར་འགྱུར་བའི་རྒྱུ་མཐོང་ཞིང་རྗེས་སུ་དཔག་པ་ལས་ཡང་འབྲས་བུ་དུ་བ་ལ་སོགས་པའི་རྟགས་མངོན་སུམ་གྱིས་མཐོང་བ་ཡིན་ཏེ། དེས་ན་འབྲེལ་པ་འཛིན་པ་མཚུངས་སོ། །དེའི་ཕྱིར་ཇི་ལྟར་མངོན་སུམ་གྱི་འབྲེལ་པ་འཛིན་པའི་ཕྱིར་ན་མ་བཟུང་བ་ལ་འཇུག་པའི་རྣམ་པར་རྟོག་པ་ཚད་མར་བྱེད་པ་དེ་བཞིན་དུ་རྗེས་སུ་དཔག་
པ་ཡང་བྱེད་པར་འགྱུར་ཞེས་བྱ་བའི་དོན་ཏོ། །ཇི་ལྟར་འབྲེལ་པར་ཁྱད་པར་མེད་སྙམ་ན་རྒྱུ་དང་འབྲས་བུའི་འབྲེལ་པ་ཞེས་བྱ་བ་གསུངས་སོ། །རྣམ་པར་རྟོག་པ་དང་རྗེས་སུ་དཔག་པའི་ཡུལ་འབྲས་བུ་དང་རྒྱུ་དག་གིས། རྒྱུ་དང་འབྲས་བུའི་སྒོ་ནས་འབྲེལ་པ་ནི་གཉིས་ཀྱིས་མངོན་སུམ་གཉིས་ལས་མཚུངས་སོ། །དེས་ན་གཅིག་ནི་ཚད་མར་བྱེད་ལ་རྗེས་སུ་དཔག་པ་ནི་མ་ཡིན་ཞེས་མངོན་སུམ་དང་རྗེས་སུ་དཔག་པ་དག་ནི་ཐོབ་པར་བྱ་བའི་རང་བཞིན་ངོ་བོ་མི་འཛིན་པ་ཉིད་ཀྱིས་ན་ཚད་མ་འམ་ཅིག་ཤོས་དག་ཏུ་མཚུངས་པ་ཡིན་ནོ་ཞེས་བསྟན་ཟིན་ཏོ། །དེ་ནི་ཁྱད་པར་གཞན་སེམས་པ་ན་མངོན་སུམ་ཉིད་ཚད་མ་ཡིན་གྱི། རྗེས་སུ་དཔག་པ་ནི་མ་ཡིན་ནོ་ཞེས་བརྗོད་པ་ནི་རྒྱུ་ལས་ཞེས་བྱ་བའོ། །རྗེས་སུ་དཔག་པ་ནི་མ་ཡིན་ནོ་ཞེས་བྱ་བ་ནི་རྒྱུ་རྟོག་པའི་རང་བཞིན་ནི་ཚད་མ་མ་ཡིན་པ་མ་ཡིན་ནོ་ཞེས་བྱ་བ་ནི་ངེས་པའི་ཕྱིར་རོ། །འོན་ཏེ་ཞེས་བྱ་བ་ནི་དོགས་པའོ། །ལན་ནི་མངོན་སུམ་ཉིད་ནི་ཞེས་བྱ་བའོ། །གང་ལ་མ་ངེས་པ་བརྗོད་པ་ནི་དེ་ལ་ནི་མངོན་སུམ་མ་ཡིན་ནོ་ཞེས་བརྗོད་པ་ནི། འབྱུང་འགྱུར་བ་ལ་ནི་ཞེས་བྱ་བའོ། །འོན་ཏེ་དེ་ལ་ཡང་དེ་མངོན་སུམ་ཉིད་དོ་ཞེ་ན། དེའི་རིགས་ལ་ཞེས་སྨོས་ཏེ། འབྱུང་བའི་རིགས་རྒྱུའོ། །དེ་ལ་ཡང་ནི་འབྱུང་བར་འགྱུར་བ་ལ་ཡང་ངོ༌། །ཇི་ལྟར་ན་རྩོད་སྙམ་དུ་དོགས་ན། མེ་ལ་སོགས་པ་རྗེས་སུ་དཔག་པའི་ཡུལ་ལ་ཡང་མངོན་སུམ་ཉིད་དུ་འགྱུར་ཏེ། ཚང་བང་ལ་སོགས་པ་དེའི་རིགས་ལ་མངོན་སུམ་ཞུགས་པའི་ཕྱིར་རོ་ཞེས་བརྗོད་པ་ནི། རྗེས་སུ་དཔག་པའི་ཡུལ་ལ་ཡང་ཞེས་གསུངས་ཏེ། རྣམ་པར་རྟོག་པའི་ཡུལ་འབའ་ཞིག་ལ་ཡིན་པར་ནི་མ་ཟད་དོ། །གང་ཞིག་དེའི་རིགས་ཡིན་པ་དེ་ནི་ཚང་བང་ལ་སོགས་པར་མངོན་སུམ་གྱི་ཡུལ་དུ་གྱུར་པ་ཡིན་ནོ། །སྤྱིའི་ཡུལ་ཅན་ཉིད་ཡིན་ཡང༌། འདི་ནི་མངོན་སུམ་གཉིས་ཀྱི་ཁྱད་པར་ཡིན་ནོ་ཞེས་བརྗོད་པ་ནི། དེར་ཞེས་བྱ་བ་རྗེས་སུ་དཔག་པ་ལའོ། །འདི་ལ་ནི་རྣམ་པར་རྟོག་པ་ལའོ། །དེས་ན་རྣམ་པར་རྟོག་པ་བཞིན་དུ་རྗེས་སུ་དཔག་པ་ཚད་མར་འགྱུར་རོ་བསམས་པའོ། །གཞན་དག་ཁྱད་པར་བརྗོད་པ་ནི། དེར་ནི་ཞེས་བྱ་བ་སྟེ། རྗེས་སུ་དཔག་པ་ལའོ། །གསལ་བ་གཞན་ཚད་མ་ལ་སོགས་པ་ལ་ཡོད་པ་ལའོ། །འདིར་ནི་རྣམ་པར་རྟོག་པ་ལའོ། །དེ་ཉིད་ལ་ཞེས་བྱ་བ་ནི་གསལ་བ་གཅིག་ལའོ། །ལན་དུ་ཡུལ་མི་མཚུངས་པ་ཉིད་མ་ཡིན་ནོ། །ཅིའི་ཕྱིར་
ཞེ་ན། འབྱུང་བ་དང་ཞེས་གསུངས་སོ། །རྒྱུད་གཞན་ལས་ལྡོག་པ་ཡང་མཚུངས་པ་ཁོ་ནའོ་ཞེས་བྱ་བའི་དོན་ཏོ། །རྣམ་པ་གཞན་གྱིས་ཀྱང་སྤྱིའི་ཡུལ་ཅན་ཉིད་དུ་ཁྱད་པར་མེད་དོ། །འབྱུང་བར་འགྱུར་བ་དང་ཞེས་བྱ་བའོ། །དེ་ལས་གཞན་ལས་བཟུང་བ་ནི་གཅིག་ཉིད་ལ་དེ་དང་རིགས་མཐུན་པའམ་མི་མཐུན་པ་ཉིད་དུ་འཛིན་པ་མ་ཡིན་ནོ། །གཞན་དུ་ཞེས་བྱ་བ་ནི་གཞན་གྱི་ལན་གྱི་དོགས་པ་སྟེ། ཡུལ་དང་དུས་གཞན་དུ་མཐོང་བ་ལ་འབྱུང་བར་འགྱུར་བ་དང་རིགས་གཅིག་ཏུ་འཛིན་པའི་ཕྱིར་རིགས་འདྲ་བ་ཡིན་ནོ། །འདི་ལྟར་དུས་གཞན་དུ་སྔོན་པོ་བཟུང་ནས། དོན་དུ་གཉེར་ནས་འཇུག་པས་ནི་དེ་འཐོབ་པ་ཡིན་ལ་དེའི་རྗེས་སུ་དུས་གཞན་དུ་དེ་མཐོང་བ་ཉིད་ལས་གང་དང་གང་སྔོན་པོ་ཡིན་པ་དེ་དང་དེ་ནི་འབྱུང་བར་འགྱུར་བའི་སྔོན་པོ་དང་རིགས་མཚུངས་པ་ཡིན་ཏེ། དེས་ན་སྔོན་པོ་མཐོང་བ་བཞིན་ནོ། །འདི་ཡང་སྔོན་པོ་ཡིན་ནོ་ཞེས་ངེས་པར་འགྱུར་རོ་ཞེ་ན། འདི་ཡང་ལན་དུ་འོ་ན་ནི་ཞེས་བྱ་པའོ། །མ་ངེས་པ་ཡིན་ནོ་ཞེས་བརྗོད་པ་གང་ཡིན་པ་དེ་སྤོང་བའི་དོགས་པ་བསུ་བ་ནི། འོན་ཏེ་ཞེས་བྱ་བའོ། །གང་ན་ཞེས་བྱ་བ་ནི་ལན་ནོ། །གདོན་མི་ཟ་བར་འབྱུང་བར་འགྱུར་བ་ཡིན་ན་ནི་འབྱུང་བར་འགྱུར་བ་དེ་རྒྱུ་ཡིན་ནོ་ཞེས་བརྗོད་པ་ནི་གདོན་མི་ཟ་བར་ཞེས་བྱ་བའོ། །གང་གི་ཕྱིར་དེ་ལྟར་འབྱུང་བར་འགྱུར་བ་རྒྱུ་ཉིད་ཡིན་པའི་གཏན་ཚིགས་དེས་ནའོ། །འཇུག་པར་བྱ་བ་ལ་ནི་ཐོབ་པར་བྱ་བ་ལའོ། །མངོན་སུམ་གྱི་དངོས་པོ་ལ་རེག་པས་ཚད་མ་ཡིན་གྱི་གཞན་མ་ཡིན་ཏེ། དེ་མེད་པའི་ཕྱིར་རོ་ཞེས་དོགས་པ་ནི་འོན་ཏེ་ཞེས་བྱ་བའོ། །ཐོབ་པར་བྱ་བ་ནི་ཡུལ་མེད་ན་མདུན་ན་གནས་པའི་རྣམ་པ་ཉིད་ནི་འཁྲུལ་པ་དག་ལ་མཚུངས་པས་ན། དེས་ནི་ཚད་མ་དང་ཅིག་ཤོས་སུ་འགྱུར་བ་མ་ཡིན་ནོ་ཞེས་ལན་འདེབས་པ་ནི་ཐོབ་པར་བྱ་བའི་ཞེས་བྱ་བའོ། །འཁྲུལ་པ་ཡང་ད་ལྟར་བ་ཁྱད་པར་མེད་དོ་ཞེས་བྱ་བའི་དོན་ཏོ། །དོན་ཡོད་པ་དང་ཞེས་བྱ་བ་ནི་ཁྱད་པར་ཡོད་པར་དོགས་པ་བསུ་བའོ། །མ་ཡིན་པ་ཞེས་བྱ་བ་ནི་རྩོད་པ་འགོག་པའོ། །ཅིའི་ཕྱིར་ཞེ་ན། མི་སླུ་བ་མེད་པར་ཞེས་བྱ་བའོ། །མདུན་ན་གནས་པའི་རྣམ་པ་ཉིད་དུ་ཁྱད་པར་མེད་པའི་ཕྱིར་རོ་ཞེས་བྱ་བའི་དོན་ཏོ། །རང་ཉིད་མི་སླུ་བ་མ་ཡིན་ཡང་གཞན་གྱི་མི་སླུ་བ་ལས་དངོས་པོའི་ཡུལ་ཅན་ཉིད་དོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །ལན་ནི་དེ་ཡང་ཞེས་བྱ་བ་སྟེ། །
སྐྱེས་བུ་གཞན་གྱི་མི་སླུ་བ་ལས་དངོས་པོའི་ཡུལ་ཅན་ཉིད་ཡིན་པ་དེ་ཡང་རྗེས་སུ་དཔག་པས་རྟོགས་པར་བྱ་བ་ཉིད་ཡིན་ཏེ། མངོན་སུམ་མ་ཡིན་པའི་ཕྱིར་རོ། །རྗེས་སུ་དཔག་པའི་དངོས་པོའི་ཡུལ་ཅན་མ་ཡིན་པ་ན་གཞན་དངོས་པོའི་ཡུལ་ཅན་དུ་ཇི་ལྟར་རྣམ་པར་འཇིག་པར་བྱེད། དེ་བས་ན་མངོན་སུམ་དང་རྗེས་སུ་དཔག་པ་དག་ནི་ཁྱད་པར་ཡོད་པ་མ་ཡིན་ནོ། །འོ་ན་ཇི་ལྟར་དངོས་པོ་ལམ་རེག་པ་ཚད་མ་ཡིན་ཞེ་ན། དེའི་ཕྱིར་ཞེས་གསུངས་ཏེ། སྔར་བཤད་པའི་ཕྱིར་རོ། །དེ་ལྟ་མ་ཡིན་ན་ཞེས་བྱ་བ་ནི་དངོས་པོ་འཛིན་པར་ཉེ་བ་ཁོ་ན་མ་ཡིན་ནའོ། །གལ་ཏེ་དོན་འདི་ལྟར་རྩ་བ་དང་འགྲིབ་ཅེ་ན། དེ་ལ་འདི་ལྟར་ཞེས་གསུངས་སོ། །ཐོབ་པར་བྱ་བའི་རང་བཞིན་གྱི་ངོ་བོ་ནི་འཛིན་པའི་ཕྱིར་ན་འཁྲུལ་པས་ཀྱང་རྗེས་སུ་དཔག་པའི་བདག་ཉིད་ཅན་གྱི་རྟོགས་པ་མཐོང་སྟེ་ཚད་མས་སོ། །དཔེར་ན་མངོན་སུམ་དུ་མངོན་པར་ཞེན་བཞིན་དུ་ཞེས་བྱ་བའི་དོན་ཏོ། །འདིའི་བཤད་པ་ནི་མངོན་སུམ་ལ་ཡང་ན་འཇུག་པར་བྱེད་པ་ཉིད་ལྟར་འགྱུར་ཏེ་ཞེས་བྱ་བ་ནས་ཉིས་ན་མངོན་སུམ་ཉིད་ཚད་མ་ཡིན་པར་འགྱུར་བ་ཡིན། རྗེས་སུ་དཔག་པ་ནི་མ་ཡིན་ཞེས་བྱ་བའི་བར་དུ་རྒྱ་ཆེར་བརྗོད་པ་ཡིན་ནོ། །བཤད་པ་གཞན་གསུངས་པ་ནི་ཡང་ན་གལ་ཏེ་འཇུག་པའི་དོན་ཏོ་ཞེས་བྱ་བའོ། །འདི་ཡང་དེས་ན་ཇི་ལྟར་དེ་ཁོ་ན་ཡོངས་སུ་མ་བཅད་པར་ཞེས་བྱ་བས་བཤད་ཟིན་ཏོ། །གལ་ཏེ་ཐོབ་པར་བྱ་བའི་རང་བཞིན་མ་རྟོགས་ན་འོ་ན་ཇི་ལྟར་འཐོབ་ཅེ་ན། ལན་དུ་དོན་ཡོད་པའི་ཕྱིར་རོ་ཞེས་བྱ་བའོ། །འདི་ཉིད་བཤད་པ་ནི་ཡོད་པ་མ་ཡིན་པ་དེ་ནི་ཞེས་བྱ་བའོ། །ཅི་དེ་ལྟར་འབའ་ཞིག་ཏུ་མཐོང་བ་ཡོད་དམ་ཞེ་ན། འདི་ལྟར་ཞེས་གསུངས་སོ། །འདི་སྙམ་དུ་ཐོབ་པ་འདི་ནི་མ་ངེས་པ་སྟེ་ངེས་པ་ནི་དངོས་པོ་ལ་རེག་པ་མེད་པར་མི་འཐད་དོ་ཞེས་དོགས་པ་ནི་ངེས་པ་ཞེས་བྱ་བའོ། །ལན་ནི་འབྲེལ་པའི་ཞེས་བྱ་བ་སྟེ། རྟགས་དང་འབྲེལ་པའི་སྟོབས་ཀྱིས་སོ། །དེས་ན་འཐོབ་པ་འབའ་ཞིག་ཏུ་མ་ཟད་དེ་ཡོད་པ་ཉིད་ཀྱང་འབྲེལ་པ་ཅན་རྟགས་ཡོད་པ་ལས་ཏེ། ཕྱོགས་ཀྱི་ཆོས་ཉིད་ལས་སོ་ཞེས་བྱ་བའི་དོན་ཏོ། །འབྲེལ་པ་འཛིན་པའི་རྒྱུ་མཚན་ཅན་གྱི་རྗེས་སུ་དཔག་པ་ཚད་མ་ཡིན་གྱི་དེ་མེད་པར་ནི་མི་འགྱུར་རོ་ཞེས་དོགས་པ་བསུ་བ་ནི། ཇི་ལྟར་ཞེས་བྱ་བའོ། །མངོན་སུམ་ལ་ཡང་ཞེས་བྱ་བ་ནི་ལན་ནོ། །དོན་དམ་པར་འབྲེལ་བར་
ངེས་པར་བྱ་མི་ནུས་པའི་ཕྱིར་གཞན་དག་རྐང་པ་བརྐྱང་བ་ཙམ་གྱིས་དོགས་པར་བྱེད་པ་ནི་དེ་ལྟ་བུ་ཉིད་དུ་ཞེས་བྱ་བའོ། །གཉི་གར་ཡང་ཞེས་བྱ་བ་ནི་ལན་ནོ། །དེ་ལྟ་བུ་ཉིད་མཐོང་བའི་ཕྱིར་ཞེས་བྱ་བའི་ལན་ནི་མངོན་སུམ་དང་རྗེས་སུ་དཔག་པ་དག་གིས་འབྲེལ་པ་རྟོགས་པ་གཉི་གར་ཡང་མཚུངས་སོ། །དེའི་ཕྱིར་གཉི་ག་ཚད་མ་ཡིན་པ་ལ་རྩོད་པ་མེད་དོ། །གལ་ཏེ་རྗེས་སུ་དཔག་པ་ལྟར། རྣམ་པར་རྟོག་པ་ནི་ཚད་མ་མ་ཡིན་པའི་ཕྱིར་ཇི་ལྟར་དེ་ཟླར་བྱས་ནས་རྗེས་སུ་དཔག་པ་ཚད་མར་སྒྲུབ་ཅེས་དོགས་པ་བསུ་བ་ནི། འོན་ཏེ་དེར་ནི་ཞེས་བྱ་བ་སྟེ། ཐོབ་པར་བྱ་བ་དེར་རོ། །དེ་ཉིད་ཅེས་བྱ་བ་ནི་རྣམ་པར་རྟོག་པ་མ་ཡིན་པའོ། །དེས་ན་རྣམ་པར་རྟོག་པ་དེས་རྗེས་སུ་དཔག་པ་ཚད་མར་མི་གྲུབ་པོ་ཞེས་བསམས་པའོ། །ལན་ནི་རྗེས་སུ་དཔག་པ་ཞེས་བྱ་བའོ། །དེ་ཉིད་ཅེས་བྱ་བ་ནི་འབྲེལ་པ་འཛིན་པའོ། །ཁས་མི་ལེན་པའི་རྒྱུ་དོགས་པར་བྱེད་པ་ནི་དེ་ཉིད་ཅེས་བྱ་བ་སྟེ་ཁྱབ་པ་འཛིན་པའོ། །འདི་ནི་རྣམ་པར་རྟོག་པ་ལ་ཡང་མཚུངས་སོ་ཞེས་ལན་བརྗོད་པ་ནི་རྟོག་པ་སྐྱེ་བའི་ཞེས་བྱ་བའོ། །ཅིའི་ཕྱིར་ཞེ་ན། རྒྱུ་དང་ཞེས་བྱ་བ་གསུངས་སོ། །རྒྱུ་དང་རྣམ་པ་ཐམས་ཅད་སྔར་ཡོད་མིན་ཞེས་བྱ་བ་དེར་རོ། །འོན་ཏེ་ཞེས་བྱ་བ་ནི་དོགས་པའོ། །རྗེས་སུ་དཔག་པའི་དུས་སུ་ནི་དེའི་ཡུལ་ཅན་གྱི་མངོན་སུམ་ཡོད་པ་མ་ཡིན་ཏེ། དེས་ན་རྗེས་སུ་དཔག་པ་སྐྱེད་པར་བྱེད་པ་དེ་ནི་ཚད་མ་མ་ཡིན་ལ། རྗེས་སུ་དཔག་པ་ཡང་དོན་སྒྲུབ་པར་བྱེད་པ་མ་ཡིན་ནོ་ཞེས་བྱ་བར་བསམས་པའོ། །མ་ཡིན་ཏེ་ཞེས་བྱ་བ་ནི་ལན་ཏེ། དང་པོའི་མངོན་སུམ་གྱི་སྐད་ཅིག་ཁོ་ནར་ངེས་པའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བ་ནི་དོགས་པའོ། །དེ་ལྟ་མ་ཡིན་ན་ཞེས་བྱ་བ་ནི་ཚད་མ་ཡིན་པའོ། །འོ་ན་ཞེས་བྱ་བ་ནི་ལན་ནོ། །འོན་ཏེ་སྔ་མ་རྣམས་ཐོབ་པར་བྱེད་པ་ངེས་པ་སྐྱེད་པའི་ཕྱིར་ཚད་མ་མ་ཡིན་ནོ་ཞེ་ན། སྔ་མ་དག་ཅེས་གསུངས་སོ། །ཕྱི་མ་རྣམས་ཚད་མ་མ་ཡིན་པ་ནི་གྲུབ་པ་དང་བདེ་བ་མཚུངས་པའི་ཕྱིར་རོ། །ཕྱི་མ་རྣམས་ཇི་ལྟར་ཚད་མ་མ་ཡིན་ཏེ། ངེས་པར་འབྱེད་པ་ཡིན་པའི་ཕྱིར་རོ་ཞེས་དོགས་པ་བསུ་ནས། ཐེ་ཚོམ་ཟ་བ་ནི་ཞེས་གསུངས་སོ། །གལ་ཏེ་ཤེས་པ་དང་པོ་ཡོད་ཀྱང་ཐེ་ཚོམ་ཟ་ན་ཇི་ལྟར་དེ་ལས་ངེས་པ་ཡིན་པ་ངེས་སོ་ཞེ་ན་ནི་ཐེ་ཚོམ་ཟ་བ་མ་ཡིན་ཏེ་གཉི་ག་ཕན་ཚུན་འགལ་བའི་ཕྱིར་རོ། །དེས་ན་ཕྱི་མ་རྣམས་ཉེ་བར་སྦྱོར་བ་མེད་པའི་ཕྱིར་ཚད་མ་མ་ཡིན་ནོ་ཞེས་བྱ་བའི་དོན་ཏོ།།
འདིས་ནི་ཇི་སྐད་དུ་ཤེས་པའི་སྐད་ཅིག་དང་པོ་ཉིད་ཀྱིས་དོན་བཟུང་ཞིང་ནང་དུ་འདུས་པའི་ཞེན་པས་ངེས་པར་ཡང་བྱས་པ་ཡིན་ཏེ་དེ་མ་ངེས་ན་ཡུལ་དེ་ལ་འཛིན་པར་མི་འཐད་པའི་ཕྱིར་རོ་ཞེས་བརྗོད་པ་ནི་གསལ་བ་ཡིན་ཏེ། གང་གི་ཕྱིར་ཚད་མའི་བྱ་བ་ངེས་པར་མཐར་ཐུག་པས་ཡོངས་སུ་རྫོགས་པ་ལ་ནི་ཐེ་ཚོམ་ཡོད་པ་མ་ཡིན་ཏེ། ཐམས་ཅད་དུ་དེ་ལྟར་ཡིན་པར་ཐལ་བའི་ཕྱིར་རོ། །འོན་ཏེ་སྔ་མ་རྣམས་ཞེས་བྱ་བ་ནི་དོགས་པ་བསུ་བ་སྟེ། ཐེ་ཚོམ་གྱིས་ཟིན་པའི་བྱེད་པ་ཅན་ཡིན་པའི་ཕྱིར་རོ་ཞེ་ན། དེ་ལྟ་ཡིན་ཞེས་བྱ་བ་ནི་ཚད་མ་མ་ཡིན་པ་ཉིད་ཡིན་ནའོ། །དེ་ལས་འཇུག་པ་མེད་པའི་ཕྱིར་ཞེས་བྱ་བ་ནི་མངོན་སུམ་སྔ་མ་ལས་སོ། །འགའ་ཡང་ཞེས་བྱ་བ་ནི་མངོན་སུམ་སྔ་མའམ་ཕྱི་མ་ཡང་སྟེ་མདུན་ན་གནས་པའི་རྣམ་པ་ཅན་ཉིད་དུ་ཁྱད་པར་ཕྱིར། རྗེས་སུ་དཔག་པ་ཡང་ཁྱེད་ཀྱི་ལྟར་ན་ཚད་མ་མ་ཡིན་པ་ཁོ་ནའོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་འཇུག་པ་ལས་སྔར་གྱི་འཇུག་པར་བྱེད་པ་ཉིད་མ་ངེས་པའི་ཕྱིར་ན་ཐེ་ཚོམ་ཟ་བའི་ཕྱིར་ཡུལ་ལ་འཇུག་པ་ཡང་ཚད་མ་ཁོ་ན་ལས་ཡིན་ནོ་ཞེས་བརྗོད་པ་ནི་རེ་ཞིག་ཅེས་བྱ་བའོ། །དེ་ལྟར་འཇུག་པ་ཁས་ལེན་ན་ནི་ཐེ་ཚོམ་གྱིས་འཇུག་པ་དེ་ནི་རྗེས་སུ་དཔག་པ་ལ་ཡང་མཚུངས་སོ། །དེས་ན་གང་གིས་དེ་ཁོ་ན་ཚད་མ་ཡིན་ལ། རྗེས་སུ་དཔག་པ་ནི་མ་ཡིན་པར་འགྱུར་བ། མངོན་སུམ་དང་རྗེས་སུ་དཔག་པ་ལས་ཁྱད་དུ་འཕགས་པ་ཅི་ཞིག་ཡོད། དེ་ལྟར་རྣམ་པ་གཞན་གྱིས་ཀྱང་རྟོགས་པ་མཐོང་ཞེས་བྱ་བའི་རྒྱ་ཆེར་བཤད་ནས་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །བཤད་པ་སྔ་མ་གཉིས་ལ་ནི་རྟོག་པ་འཁྲུལ་པའི་རྗེས་སུ་དཔག་གི་རང་བཞིན་དང་འཇུག་པའི་རང་བཞིན་དུ་བསྟན་པ་ཡིན་ལ། འདིར་ནི་མངོན་སུམ་ཡིན་པར་འདོད་དོ། །གཞན་གྱི་རང་བཞིན་དུ་ཞེས་བྱ་བ་ནི་ཐོབ་པར་བྱ་བ་ལས་གཞན་གྱི་རང་བཞིན་དུའོ། །གཞན་ཞེས་བྱ་བ་ཐོབ་པར་བྱ་བ་ལས་གཞན་ལ་རྟོགས་པ་ཉིད་ག་ལ་ཡང་ཞེས་འབྲེལ་ཏོ། །གཞན་ཅི་འདྲ་བ་ཞིག་ཅེས་དོགས་ན། དངོས་པོའི་ངོ་བོ་ཞེས་བྱ་བ་ནི་དབང་པོས་གཟུང་བར་བྱ་བའི་སྐད་ཅིག་དང་པོ་དང༌། རང་གི་ངོ་བོ་ཞེས་བྱ་བ་རང་བཞིན་པའི་བཟུང་བ་ལ་ཞེས་བྱ་བར་སྦྱར་རོ། །དེའི་ཕྱིར་འབྱུང་བར་འགྱུར་བའི་དངོས་པོ་ལ་ནི་མངོན་སུམ་དང་རྗེས་སུ་དཔག་པ་དག་ཁྱད་པར་འགའ་ཡང་ཡོད་པ་མ་ཡིན་ནོ། །གལ་ཏེ་ཡུལ་གཅིག་ཉིད་ཡིན་ན་འོ་ན་ཞེས་བྱ་བའོ། །གཉི་ག་ཐོབ་པར་བྱ་བའི་ཡུལ་གཅིག་ཉིད་ཡིན་
ན་ཚད་མའི་དབྱེ་བསྒྲུབ་པའི་དོན་དུ་ཉེ་བར་བཀོད་པའི་གཞལ་བྱའི་དབྱེ་བ་ཇི་ལྟར་འགྲུབ་ཅེས་བྱ་བའི་དོན་ཏོ། །ལན་ནི་གསལ་བ་ཞེས་བྱ་བའོ། །གསལ་བ་མངོན་སུམ་ལ་མི་གསལ་བ་དེའི་རང་བཞིན་གྱི་རྗེས་སུ་དཔག་པས་རྟོགས་པ་འབྱུང་བར་འགྱུར་ལ། སྒྲོ་འདོགས་ལ་ནི་གསལ་བ་རྗེས་སུ་དཔག་པ་ལ་ཡང་དུས་ཕྱིས་འབྱུང་བའི་མངོན་སུམ་གྱིས་རྟོགས་པས་སྒྲོ་འདོགས་པ་ཡིན་ནོ། །རྣམ་པར་བརྟག་པར་བྱ་བ་ནི་མི་གསལ་བ་ཡིན་ལ། གཞན་ནི་གསལ་བ་ཡིན་ནོ་ཞེས་བྱ་བའི་དོན་ཏོ། །གསལ་བ་ལ་ཡང་ཕྱི་རོལ་དུ་སྒྲོ་འདོགས་པ་ནི་རྗེས་སུ་དཔག་པ་ཁོ་ན་ཡིན་ཏེ། རྗེས་སུ་དཔག་པ་གཞན་བཞིན་ནོ་ཞེས་བརྗོད་པ་ནི་ཡང་ན་རྣམ་པ་གཞན་དུ་ཡིན་ཏེ་ཞེས་བྱ་བ་སྟེ་ཚད་མའི་ཡུལ་གྱི་དབྱེ་བ་བརྗོད་པར་བྱའོ་ཞེས་བྱ་བའི་ལྷག་མའོ། །དེ་ལྟར་མདུན་ན་གནས་པའི་རྣམ་པ་ཅན་གང་དུ་འབྱུང་བར་འགྱུར་བ་རྟོགས་པ་དེར་ནི་དེའི་རང་བཞིན་གྱི་རྗེས་སུ་དཔག་པ་ཚད་མ་ཡིན་ནོ། །ད་ནི་མངོན་སུམ་གང་ཡིན་སྙམ་ན། ལྷག་པས་ཞེས་གསུངས་ཏེ་ལྷག་མ་ནི་ཁྱད་པར་དུ་འཕགས་པ་སྟེ། ཤིན་ཏུ་གོམས་པ་ལས་རྣམ་པར་རྟོག་པ་ལ་མི་ལྟོས་པ་སྟེ་དེ་མ་འོངས་པ་དོན་དུ་གཉེར་བས་ད་ལྟར་བ་ལ་འཇུག་པ་ནི་མངོན་སུམ་ཁོ་ན་ཚད་མ་མ་ཡིན་ནོ། །ཕྱེད་ཕྱི་མ་རྣམ་པར་འགྲེལ་པ་ནི་གང་དུ་ཤིན་ཏུ་ཞེས་བྱ་བའོ། །དེ་ལྟ་མ་ཡིན་ནམ་ཞེས་བྱ་བ་ནེ་རྣམ་པར་རྟོག་པ་ལ་རག་ལས་པས་འཇུག་པར་བྱེད་པ་ཉིད་ཡིན་པའོ། །འདི་ཉིད་གསལ་བར་བྱེད་པ་ནི་གལ་ཏེ་གང་ལ་ཞེས་བྱ་བའོ། །མངོན་སུམ་ཉིད་མ་བུང་བ་འཛིན་པ་ཉིད་ཀྱི་ཚད་མ་ཡིན་གྱི། །རྣམ་པར་རྟོག་པ་ནི་མ་ཡིན་ཏེ། བཟློག་པའི་ཕྱིར་རོ་ཞེས་དོགས་པ་ནི་འོན་ཏེ་ཞེས་བྱ་བའོ། །དཔྱད་ཟིན་ཏོ་ཞེས་བྱ་བ་ནི་ཅི་རྣམ་པར་རྟོག་པ་ལ་འཇུག་པར་བྱེད་པ་ཉིད་ཡོད་དམ་ཞེས་བྱ་བ་དེར་རོ། །དེས་ནི་རྣམ་པར་འཇོག་པས་སོ། །ལྡན་དུ་ཟིན་ཀྱང་ནི་འབྲེལ་དུ་ཟིན་ཀྱང་ངོ༌། །འོན་ཀྱང་སྟེ་ཞེས་བྱ་བ་རྣམ་པར་རྟོག་པས་སོ། །ལན་ནི་མངོན་སུམ་ཞེས་བྱ་བ་སྟེ། རྣམ་པར་རྟོག་པ་ཉིད་ཀྱིས་འཇུག་པའི་ཕྱིར་རོ་ཞེས་བྱ་བའི་དོན་ཏོ། །དེ་མེད་ན་ཡང་ཞེས་བྱ་བ་ནི་རྟོགས་པ་སྟེ་མངོན་སུམ་མེད་ན་ཡང་ངོ༌། །འོ་ན་ཞེས་བྱ་བ་ནི་ལན་ནོ། །ཕྱོགས་འདི་ལ་ཡང་ལན་བཏབ་ཟིན་ཞེས་བྱ་བ་བཤད་པའི་དོན་དུ་དོགས་པ་བསུ་བ་ནི་འོན་ཏེ་ཞེས་བྱ་བའོ། །འོ་ན་མངོན་སུམ་ཡང་ཞེས་བྱ་བ་ནི་ལན་ནོ། །འོན་ཏེ་ཇི་ལྟར་རྣམ་པར་རྟོག་པ་ཚད་
མ་མ་ཡིན་ཞེས་དོགས་ན། དེའི་ཕྱིར་ཞེས་བྱ་བའོ། །མངོན་སུམ་འོག་རོལ་ཞེས་བྱ་བ་ནི་དོགས་པ་བསུ་བའོ། །མངོན་སུམ་གྱི་འོག་རོལ་གྱི་དུས་སུ་འཇུག་པའི་རྣམ་པར་རྟོག་པ་འཇུག་པ་ལ་མངོན་སུམ་ནུས་པ་ཡོད་པ་ཡིན་ན་ཞེས་རྣམ་པར་དབྱེ་བ་བསྒྱུར་ཏེ་འབྲེལ་ཏོ། །ཆོད་པས་ན་ཞེས་བྱ་བ་ནི་ལན་ནོ། །སྒྲུབ་པར་བྱེད་པ་དམ་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །ཆོད་ཀྱང་ཞེས་བྱ་བ་ནི་མངོན་སུམ་མོ། །དེ་ལྟ་ན་ཞེས་བྱ་བ་ནི་ལན་ནོ། །ཤེས་པ་མ་ཡིན་པའི་ཕྱིར་ཞེས་བྱ་བ་ནི་དོགས་པ་སྟེ། མིག་ལ་སོགས་པ་ནི་བེམས་པོ་མ་ཡིན་པའི་ཕྱིར་ཚད་མ་མ་ཡིན་པ་ཉིད་དོ་ཞེ་ན། མཚུངས་པ་དེ་མ་ཐག་ཏུ་ཞེས་བྱ་བ་ནི་ལན་ནོ། །གཞན་ཞེས་བྱ་བ་ནི་འཇུག་པར་བྱ་བ་མ་ཡིན་པའི་རྣམ་པ་ཅན་ཡིན་པའི་ཕྱིར་རོ། །ཡུལ་མཚུངས་པ་ཉིད་ནི་ཞེས་བྱ་བ་ནི་ལན་ནོ། །དེ་ཚད་མར་འགྱུར་རོ་ཞེས་བྱ་བའི་དོན་ཏོ། །འགྱུར་བ་ཁོ་ནའོ་ཞེས་བྱ་བའི་དོགས་པ་སྟེ། དེ་མ་ཐག་པའི་རྐྱེན་ཡུལ་མཚུངས་པ་ཉིད་ཡིན་ན་ཚད་མར་འགྱུར་བ་ཁོ་ནའོ་ཞེ་ན་མ་ཡིན་ཏེ་ཞེས་བྱ་བའི་ལན་ཏེ། ཚད་མ་ཞེས་འབྲེལ་ཏོ། །ཅིའི་ཕྱིར་ཞེ་ན། དེ་ལ་ཞེས་གསུངས་སོ། །ཤེས་པ་མེད་ཕྱིར་རོ་ཞེས་ཡོངས་སུ་གཅོད་པར་བྱེད་པ་མ་ཡིན་པའི་ཕྱིར་འཇུག་པའི་ཡུལ་ཤེས་པ་མ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་མི་ཤེས་པ་ཞེ་ན་སྐད་ཅིག་མ་སྔ་མ་ཞེས་གསུངས་སོ། །གང་གི་ཕྱིར་དེ་ལྟར་མངོན་སུམ་ཚད་མ་ཡིན་པ་དེའི་ཕྱིར་རོ། །ཡོངས་སུ་གཅོད་པར་བྱེད་པ་མ་ཡིན་པའི་ཕྱིར་ཞེས་བྱ་བ་ནི་མ་གྲུབ་པར་དོགས་པ་བསུ་བ་ནི་འོན་ཏེ་ཡང་ཞེས་བྱ་བའོ། །དེ་ལྟར་ན་ཡང་ཞེས་བྱ་བ་ནི་ལན་ཏེ་ཤེས་པ་མ་ཡིན་པ་ཉིད་མ་གྲུབ་ན་ཡང་ངོ༌། །གཟུང་བ་འཛིན་པས་ཞེས་བྱ་བ་ནི་དོགས་པའོ། །ལན་ནི་འཇུག་པར་བྱེད་པའི་ཞེས་བྱ་བའོ། །རྣམ་པར་རྟོག་པ་མེད་པར་ནི་མངོན་སུམ་འཇུག་བྱེད་དུ་མ་མཐོང་ངོ༌། །དེས་ན་རྣམ་པར་རྟོག་པ་ཉིད་འཇུག་པར་བྱེད་པ་ཡིན་པས་ན་ཚད་མ་ཡིན་ནོ། །ཅི་དང་འདྲ་བ་ཞེ་ན། དཔེར་ན་ཞེས་བྱ་བ་སྟེ། སྐད་ཅིག་མ་ཉིད་རྗེས་སུ་དཔོག་པ་ནི་མངོན་སུམ་གྱི་བཟུང་བ་ལ་ཡང་ཚད་མ་ཡིན་པ་དེ་བཞིན་དུ་རྣམ་པར་རྟོག་པ་ཡང་ཡིན་ནོ་ཞེས་བྱ་བའི་དོན་ཏོ། །བཟུང་བ་ལ་ཟིན་པ་འཛིན་པ་ཡང་འཇུག་པར་བྱེད་པའི་ཕྱིར་ཇི་ལྟར་ཚད་མ་ཡིན་ཞེ་ན།
སྣང་བ་ཙམ་གྱིས་ནི་ཞེས་གསུངས་སོ། །ཅིའི་ཕྱིར་ཞེ་ན། སྐད་ཅིག་ཅེས་སྨྲས་སོ། །འགྱུར་བ་ཁོ་ནའོ་ཞེས་བྱ་བ་ནི་དོགས་པ་སྟེ། མངོན་སུམ་གྱིས་བཟུང་བར་རོ། །སྐད་ཅིག་མ་ཞེས་བྱ་བ་ནི་ལན་ནོ། །འོན་ཏེ་ཞེས་བྱ་བ་ནི་དོགས་པའོ། །ལན་ནི་རྣམ་པར་རྟོག་པ་ཡང་ཞེས་བྱ་བའོ། །དེ་ལྟར་ཞེས་བྱ་བ་ནི་ཐ་སྙད་སྒྲུབ་པའོ། །ཚད་མར་འགྱུར་རོ་ཞེས་བྱ་བ་ནི་དེའི་རང་བཞིན་རྗེས་སུ་དཔོག་པ་ཉིད་ཀྱིས་སོ། །གལ་ཏེ་དེ་ལྟ་ན་གཉི་ག་ཡུལ་གཅིག་ཡིན་པ་ཇི་ལྟར་ཡུལ་གྱི་དབྱེ་བས་ཐ་དད་པར་འགྱུར་ཞེ་ན། དེའི་ཕྱིར་ཞེས་བྱ་བའོ། །གང་གི་ཕྱིར་རྗེས་སུ་དཔག་པ་ཡང་ཚད་མ་ཡིན་པ་དེའི་ཕྱིར་རོ། །མངོན་སུམ་དང་རྗེས་སུ་དཔག་པ་དག་འབྱུང་པར་འགྱུར་བའི་ཡུལ་འཇུག་པར་བྱེད་པ་ཉིད་དུ་མཚུངས་པ་ཡིན་པ་ཡང་བཟུང་བའི་སྣང་བ་གསལ་བ་དང་མི་གསལ་བའི་དབྱེ་བས་ཞེས་བྱ་བས་ཞེས་བྱ་བའོ། །ཅིའི་ཕྱིར། བསམ་པ་ལ་ནི་སླུ་མེད་ཕྱིར། །འཁྲུལ་བ་ཡིན་ཡང་ཚད་མ་ཉིད། །ཅེས་བྱ་བ་ལེགས་པར་བརྗོད་པ་ཡིན་ནོ་ཞེས་བརྗོད་པ་ནི་དེས་ན་གཞན་གྱི་ཞེས་བྱ་བའོ། །གལ་ཏེ་མི་སླུ་བ་མེད་པ་ཇི་ལྟར་གཞན་གྱིས་ངོ་བོས་རྟོགས་ཤེ་ན། ཇི་ལྟར་ཞེས་བྱ་བའོ། །མི་སླུ་བ་ལས་ཚད་མ་ཡིན་ཡང༌། ཚད་མ་ཡང་འཁྲུལ་པ་དང་འགལ་བ་མེད་དོ་ཞེས་བྱ་བ་དཔེར་བརྗོད་པ་ནི། དེ་ཁོ་ན་རིག་པ་ལ་རྗེས་སུ་དཔག་པ་འཁྲུལ་པ་ཡིན་ཡང་ཐ་སྙད་པ་རྣམས་ལ་མི་སླུ་བ་ལ་ལྟོས་ནས་ཚད་མ་ཡིན་ཏེ། ནོར་བུའི་འོད་ལ་ནོར་བུར་ཤེས་པ་འཁྲུལ་པ་ཡིན་ཡང༌། ཐ་སྙད་པ་ལ་མི་སླུ་བ་ཡིན་པ་བཞིན་ནོ། །སྒོ་གསེབ་ཀྱི་བུ་ག་ན་ཡོད་པའི་ནོར་བུ་དབྱིབས་ཀྱི་ཁྱད་པར་གང་ལ་ཡོད་པ་དེ་ནི་དེ་སྐད་ཅེས་བརྗོད་དོ། །སྒྲོན་མའི་འོད་ཅེས་བྱ་བ་ལ་ཡང་སྒོ་གསེབ་ཀྱི་ཞེས་བྱ་བ་ལ་སོགས་པ་ཐམས་ཅད་རྗེས་སུ་འཇུག་གོ །ཁྱད་པར་མེད་མོད་ཅེས་བྱ་བ་ནི་གཉི་ག་ལ་ཡང་སྒོ་གསེབ་ཀྱི་བུ་གའི་ཡུལ་ན་ནོར་བུ་མེད་པའི་ཕྱིར་རོ། །འགའ་ཞིག་ནི་ཡོད་པ་ཁོ་ནའོ་ཞེས་བྱ་བ་ནི་ནོར་བུའི་འོད་ལའོ། །དེས་ན་ཞེས་བྱ་བ་ནི་ཐོབ་པས་བྱས་པའི་ཁྱད་པར་ཡོད་པས་སོ། །དོན་ཇི་ལྟ་བ་བཞིན་མ་ཡིན་པའི་ཤེས་པ་ཡང་གནོད་བྱེད་མ་སྐྱེས་ན་འཇུག་བྱེད་དུ་མཐོང་ངོ་ཞེས་བརྗོད་པ་ནི་ནོར་བུ་མ་མཐོང་ཡང་ཞེས་བྱ་བ་ནི། གལ་ཏེ་འཁྲུལ་པའི་ཕྱིར་ན་ཇི་ལྟར་གཅིག་ཚད་མ་
ཡིན་ལ་གཞན་ནི་མ་ཡིན་ཞེ་ན་འཁྲུལ་ལོ་ཅོག་ནི་ཞེས་གསུངས་སོ། །ཇི་ལྟར་མི་མཚུངས་སྙམ་ན། ཚོགས་པའི་ཞེས་གསུངས་སོ། །རྒྱུ་ཐ་དད་ལས་ཐ་དད་པར་ནི་གདོན་མི་ཟ་བར་འདོད་ དགོས་ཏེ། དེ་ལྟ་མ་ཡིན་ན་སྣ་ཚོགས་གཅིག་ཏུ་འགྱུར་རོ་ཞེས་བརྗོད་པ ་ནི་ཤེས་པ་ཡིན་པའི་ཕྱིར་ཞེས་བྱ་བ་སྟེ། འོན་ཀྱང་འགའ་ཞིག་ཁོ་ནའོ། །དེ་ལྟ་མ་ཡིན་ན་ཇི་ལྟར་འཁྲུལ་པའི་ཕྱིར་གཉི་ག་ཚད་མ་མ་ཡིན་པ་དེ་བཞིན་དུ་ཤེས་པ་ཉིད་དུ་ཁྱད་པར་མེད་པའི་ཕྱིར་ཐམས་ཅད་འཁྲུལ་པར་འགྱུར་བས་ན་མངོན་སུམ་ཡང་དེ་བཞིན་དུ་འགྱུར་རོ། །གང་གི་ཕྱིར་ཚོགས་པའི་དབྱེ་བས་ཐ་དད་པ་དེའི་ཕྱིར་རོ། །འཁྲུལ་པ་ཉིད་ཡིན་ན་ཇི་ལྟར་མི་སླུ་བས་འགྱུར་སྙམ་དུ་དོགས་པ་བསུ་བ་ནས། དཔེ་བརྗོད་པ་ནི་ཚོགས་པའི་ཞེས་བྱ་བའོ། །ཇི་ལྟར་དངོས་པོ་ཉིད་ལ་སོགས་པར་ཁྱད་པར་དང་ལྡན་པར་འགྱུར་བ་དེ་བཞིན་དུ་འཁྲུལ་པ་ཉིད་དུ་ཁྱད་པར་མེད་ཀྱང་རྒྱུའི་ཁྱད་པར་ལས་འགའ་ཞིག་མི་སླུ་བ་དང་ལྡན་པར་འགྱུར་བ་ཡིན་གྱི། གཞན་ནི་མ་ཡིན་ནོ་ཞེས་བྱ་བའི་དོན་ཏོ། །ཡང་ན་གང་གི་ཕྱིར་ཚོགས་པའི་ཁྱད་པར་ལས་ཁྱད་པར་དེ་འབྲེལ་བའི་དོན་གྱིས་བསྐྱེད་པ་ཉིད་གང་ལ་ཡོད་པ་དེ་ནི་དེ་དང་ལྡན་པ་ཡིན་ཏེ། དེས་ན་འཁྲུལ་པ་ཉིད་ཡིན་ཡང་མི་སྤུ་བ་ཡིན་ནོ་ཞེས་བྱ་བའི་དོན་ཏོ། །རྗེས་སུ་དཔག་པ་འཁྲུལ་པ་ལས་གཞན་ཁྱད་པར་ཡོད་པར་བརྗོད་པ་ནི་འབྲེལ་བའི་ལས་ཞེས་བྱ་བའོ། །ཚད་མ་སྐྱེས་པ་སྟེ་མངོན་སུམ་སྐྱེ་པའི་རྒྱུ་མཚན་ཡིན་ནོ། །དེ་ཉིད་ཀྱི་ཕྱིར་མངོན་པར་འདོད་པ་འཐོབ་པའི་རྒྱུ་ཡིན་ནོ། །དཔེ་སྟོན་པ་ནི་འཇུག་པར་བྱད་པའི་མངོན་སུམ་སྐྱེ་བ་དེ་ནི་རྒྱུ་མཚན་དེའི་རང་བཞིན་གྱི་རྟགས་ཀྱིས་བསྐྱེད་པའི་རྗེས་སུ་དཔག་པའི་ཤེས་པ་གང་ཡིན་པ་དེ་བཞིན་ནོ། །མངོན་སུམ་གྱི་དོན་ཅན་གྱི་རྗེས་སུ་དཔག་པ་བཞིན་དུ། རྗེས་སུ་དཔག་པ་ནི་ཚད་མ་ཉིད་ཡིན་ནོ་ཞེས་བྱ་བའི་དོན་ཏོ། །བསྒྲུབ་པར་བྱ་བ་ནི་རྣམ་པར་འགྲེལ་པ་ནི། རྗེས་སུ་དཔག་པ་ནི་ཞེས་བྱ་བའོ། །མངོན་སུམ་སྐྱེ་བ་ནི་དུས་ཕྱིས་འབྱུང་བའོ། །དཔེར་རྣམ་པར་འགྲེལ་པ་ནི་མངོན་སུམ་ཡང་ཞེས་བྱ་བའོ། །གལ་ཏེ་མངོན་སུམ་གྱི་སྔོན་པོ་ལ་རྗེས་སུ་དཔག་པ་མེད་པ་མ་ཡིན་ནམ། ཇི་ལྟར་དེ་དཔེ་ཡིན་སྙམ་ན་འདི་ལྟར་ཞེས་
གསུངས་སོ། །སྔོན་པོའི་མངོན་སུམ་ནི་མ་གོམས་པའོ། །གལ་ཏེ་ངེས་པ་ཡོད་ན་འཇུག་བྱེད་ཡིན་ལ། ངེས་པ་ཡང་དེའི་རང་བཞིན་གྱིས་རྗེས་སུ་དཔག་པ་ཡིན་ནོ། །དེས་ན་མངོན་སུམ་ཚད་མར་བྱེད་པ་རྗེས་སུ་དཔག་པ་ཚད་མར་བསྒྲུབས་སོ་ཞེས་བྱ་བའི་དོན་ཏོ། །རྗེས་སུ་དཔག་པའི་ཚད་མའི་རྒྱུ་མཚན་ཅན་མི་སླུ་བའི་རང་བཞིན་གྱི་མངོན་སུམ་ཡིན་པར་བགྱིད་པ་ནི། དེ་བཞིན་རྗེས་དཔག་ཅེས་བྱ་སྟེ། འཇུག་པར་བྱེད་པ་མིན་ཞེས་བྱ་བ་རྗེས་སུ་འཇུག་པར་བྱ་བའོ། །མངོན་སུམ་ཞེས་བྱ་བ་ནི་དུས་ཕྱིས་འབྱུང་བའོ། །འོ་ན་འདི་གཉིས་ལ་ཁྱད་པར་ཅི་ཡོད་སྙམ་ན་མངོན་སུམ་དང་རྗེས་སུ་དཔག་པ་གཉིས་ཀྱི་ཁྱད་པར་ནི་འདི་ཉིད་ཡིན་ཏེ། མྱོང་བའི་རྗེས་དཔག་ཉིད་འཇུག་བྱེད་མ་ཡིན་པ་ལ་མ་ཡིན་ཡང་འཇུག་པར་བྱེད་པའི་མངོན་སུམ་ལ་ཡང་སྔར་དེའི་རང་བཞིན་གྱི་རྗེས་སུ་དཔག་པ་ལ་གདོན་མི་ཟ་བར་ལྟོས་པར་བྱ་བ་ཡིན་ཏེ། དེ་ལྟ་མ་ཡིན་ན་དེར་མི་འགྱུར་རོ། །འདས་པའི་མེ་ལ་སོགས་པ་བསྒྲུབ་པ་མ་ཡིན་ཡང་མེ་ལ་སོགས་པ་སྒྲུབ་པའི་རྗེས་སུ་དཔག་པ་ལ་ལར་ནི་གདོན་མི་ཟ་བར་ཕྱིས་ཀྱི་མངོན་སུམ་ལ་ལྟོས་པར་བྱ་བ་ཡིན་ཏེ། དེ་ལྟ་མ་ཡིན་ན་སོ་སོར་ངེས་པའི་ཡུལ་ལ་ཐེ་ཚོམ་ཟ་བ་དང་འབྲལ་བར་མི་འགྱུར་རོ། །གཉི་ག་ལས་གཅིག་ཀྱང་གཞན་ལ་མི་ལྟོས་པ་ཞེས་བྱ་བའི་ཁྱད་པར་ནི་ཡོད་པ་མ་ཡིན་ནོ། །ཇི་སྐད་བརྗོད་པའི་སྔ་མ་དང་ཕྱི་མའི་དངོས་པོ་འགོག་པར་བྱེད་པའི་ཕྱེད་ཕྱི་མས་ཁྱད་པར་ཡོད་པར་དོགས་པ་བསུ་བ་ནི། རྗེས་སུ་དཔག་ལས་ཞེས་བྱ་བའོ། །འདི་རྐང་པ་གཉིས་པ་འཆད་པ་ནི་ཅི་སྟེ་ཡང་ཞེས་བྱ་བའོ། །མངོན་སུམ་ནི་རྗེས་སུ་དཔག་པ་སྔོན་དུ་འགྲོ་བ་མ་ཡིན་གྱི། རྗེས་སུ་དཔག་པ་ནི་མངོན་སུམ་སྔོན་དུ་འགྲོ་བ་ཅན་ཡིན་པའི་ཕྱིར་ཁྱད་པར་ཡོད་པས་ཇི་ལྟར་ཁྱད་པར་མེད་ངེས་ཞེས་བྱ་བའི་དོགས་པའི་དོན་ཏོ། །གལ་ཏེ་མངོན་སུམ་སྐྱེས་པས་ན་རྗེས་སུ་དཔག་པ་ལ་མི་ལྟོས་ཀྱང་ཐ་སྙད་ནི་ལྟོས་པ་ཁོ་ན་སྟེ། དེ་ལྟ་མ་ཡིན་ན་ཚད་མ་ཉིད་དུ་མི་འཐད་པའི་ཕྱིར་རོ་ཞེས་གསུངས་པ་ནི། དེ་ཡང་མི་རུང་སྟེ་ཞེས་བྱ་བའོ། །དེ་ལྟར་ཞེས་བྱ་བ་ནི་རང་རིག་པ་ཙམ་གྱིས་སོ། །ཚད་མ་ཡིན་ཡང་ཞེས་བྱ་བ་ནི་གཉིས་སུ་མེད་པ་ལས་གཞན་མ་གྲུབ་བོ་ཞེས་བྱ་བའི་དོན་ཏོ། །འདི་ཉིད་བརྗོད་པ་ནི་མངོན་སུམ་རང་རིག་ཅེས་བྱ་བའོ། །ཐ་དད་པར་ཡང་མི་འགྲུབ་བོ་ཞེས་སྦྱར་རོ། །དེའི་
ཕྱིར་ཞེས་བྱ་བ་ནི་རྗེས་སུ་དཔག་པ་ལ་ལྟོས་པའི་ཕྱིར་རོ། །དེ་ནི་མངོན་སུམ་མོ། །རྐང་པ་དང་པོ་འཆད་པ་ནི། མངོན་སུམ་ནི་ཞེས་བྱ་བ་སྟེ། རྗེས་སུ་དཔག་པའི་དབང་གིས་བྱུང་བའི་མངོན་སུམ་མོ། །མངོན་སུམ་ནི་ཐ་སྙད་ལ་རྗེས་སུ་དཔག་པ་ལ་ལྟོས་སོ་ཞེས་རིགས་ཀྱི་རྗེས་སུ་དཔག་པ་ནི་དེ་ལ་ལྟོས་པ་མ་ཡིན་ཏེ། རང་ཉིད་ངེས་པའི་བདག་ཉིད་ཅན་ཡིན་པས་ན་ཐ་སྙད་དུ་བྱེད་པའི་ཕྱིར་རོ། །མངོན་སུམ་ལ་ལྟོས་པ་མེད་པ་ཉིད་བརྗོད་པ་ནི། འདི་ལྟར་ཞེས་བྱ་བའོ། །མངོན་སུམ་ལ་མ་ལྟོས་ན་ཇི་ལྟར་དོན་ཐོབ་སྙམ་ན། ཉིད་ལས་ཞེས་སྨོས་ཏེ། རྗེས་སུ་དཔག་པ་ལས་སོ། །དེ་མ་ཡིན་ཏེ་ཞེས་བྱ་བ་ནི་མངོན་སུམ་ལ་མི་ལྟོས་པ་ཉིད་དོ། །ཅིའི་ཕྱིར་ཞེ་ན། མངོན་སུམ་མིན་ན་ཞེས་སྨོས་ཏེ། དུས་ཕྱིས་འབྱུང་བ་མེད་པར་རོ། །དུས་ཕྱིས་འབྱུང་བར་མངོན་སུམ་ཉིད་ཀྱིས། སོ་སོར་ངེས་པའི་ཡུལ་གྱི་ཁྱད་པར་ཅན་གྱི་མེ་མཐོང་བར་ནུས་པ་ཡིན་ནོ་ཞེས་བྱ་བའི་དོན་ཏོ། །རྗེས་སུ་དཔག་པ་ནི་ཕྱོགས་ཀྱི་ཆོས་ཀྱི་སྟོབས་ཀྱི་ཡུལ་གྱི་ཁྱད་པར་ཅན་རྣམ་པར་འཇུག་པར་བྱེད་པ་ཡིན་ཡང་སོ་སོར་ངེས་པའི་ཡུལ་གྱི་ཁྱད་པར་ཅན་ཉིད་ནི་རྣམ་པར་འཇིག་པར་བྱེད་པ་མ་ཡིན་ཏེ་ངེས་མངོན་སུམ་ལ་ལྟོས་པ་ཡིན་ནོ་ཞེས་བརྗོད་པ་ནི། རྗེས་སུ་དཔག་པས་ཞེས་བྱ་བའོ། །དེ་ཅིའི་ཕྱིར་སྙམ་ན། རྩིག་པ་ལ་སོགས་པས་ཞེས་གསུངས་སོ། །གལ་ཏེ་དེ་ལྟ་ན་ཡང་རྗེས་སུ་དཔག་པ་མངོན་སུམ་ལ་ཇི་ལྟར་ལྟོས་སྙམ་ན་རྩིག་པའི་ཕྱི་རོལ་གྱི་ཞེས་གསུངས་སོ། །ཅི་སྟེ་ཡང་མེད་དེ་དེ་ནི་ཡུལ་མ་ངེས་པ་ཅན་ཁོ་ན་ཡིན་ཏེ། དེས་ན་མངོན་སུམ་གྱི་སོ་སོར་ངེས་པའི་ཡུལ་དང་འཛིན་ཅེས་དོགས་ན། ཡུལ་སོ་སོར་ཞེས་བྱ་བར་རོ། །རྗེས་སུ་དཔག་པར་རྟོགས་པར་མི་སྐྱེ་བར་མི་འགྱུར་ཏེ། དེས་མངོན་སུམ་གྱིས་ཡུལ་གྱི་ངེས་པ་འཛིན་པ་ཡིན་ནོ་ཞེས་བྱ་བའི་དོན་ཏོ། །རྗེས་སུ་དཔག་པ་དང་ནོར་བུའི་འོད་ལ་ནོར་བུར་ཤེས་པ་དག་ནི་ཐེ་ཚོམ་དང་ཕྱིན་ཅི་ལོག་དག་གིས་སོ་སོར་ངེས་པའི་ཡུལ་མ་བཟུང་བར་མཚུངས་སོ་ཞེས་བརྗོད་པ་ནི། །ནོར་བུའི་འོད་ལ་ཞེས་བྱ་བའོ། །འོན་ཏེ་ཉེས་པ་འདི་ནི་ནོར་བུའི་འོད་ལ་ནོར་བུར་ཤེས་པ་ཁོ་ན་ཡིན་གྱི་རྗེས་སུ་དཔག་པའི་ནི་མ་ཡིན་ནོ་ཞེ་ན། ཐེ་ཚོམ་ཟ་དང་ཞེས་གསུངས་སོ། །ནོར་བུའི་འོད་ལ་ནོར་བུའི་ཤེས་པ་ལས་རྗེས་སུ་དཔག་པའི་ཁྱད་པར་དོགས་པར་བྱེད་པ་ནི་འོན་ཏེ་ཡང་ཞེས་བྱ་བའོ། །རྗེས་སུ་དཔག་པའི་ཡུལ་ངེས་པ་ལ་ཡང་ཐེ་ཚོམ་གྱི་བདག་ཉིད་ཡིན་
པའི་ཕྱིར་ན་དེ་ལ་འཇུག་པར་བྱེད་པ་ཉིད་དུ་འཐད་པ་མ་ཡིན་ནོ་ཞེས་བརྗོད་པ་ནི་གཉི་གའི་ཆ་ལ་ཞེས་བྱ་བའོ། །ཕྱིན་ཅི་ལོག་ནི་དེ་ལྟ་མ་ཡིན་པ་དེས་ནི་འཇུག་པར་བྱེད་པར་འགྱུར་རོ་ཞེས་བརྗོད་པ་ནི་ཕྱིན་ཅི་ལོག་ནི་ཞེས་བྱ་བའོ། །ཐེ་ཚོམ་ནི་ཞེས་བྱ་བ་ནི་འཆད་པའོ། །ཆ་གཉིས་སུ་ཞེན་པ་དེས་ན་སྟོན་པར་བྱེད་པ་མ་ཡིན་པ་དེས་ན་དེ་ལ་འཇུག་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །གང་གི་ཕྱིར་ཐེ་ཚོམ་གྱིས་དེར་འཇུག་པར་བྱེད་པ་ནི་མ་ཡིན་གྱི་འོན་ཀྱང་མེ་ཙམ་ཉིད་ཡུལ་ཁྱད་པར་ཡོད་པར་སྒྲོ་འདོགས་པས་འཇུག་པར་བྱེད་པ་ཡིན་པ་དེས་ན་ཆ་ཚོད་པ་མེད་པ་དེས་ཞེས་བྱ་བའོ། །གལ་ཏེ་དེ་ལྟར་ཡིན་ན་མངོན་སུམ་ཉིད་ཡུལ་ངེས་པར་བྱེད་པ་ཡིན་པའི་ཕྱིར་ཚད་མ་ཡིན་གྱི་རྗེས་སུ་དཔག་པ་ནི་མ་ཡིན་ཏེ། ཡུལ་ཉེ་བར་མ་བསྟན་པ་ཞིག་པའི་ཕྱིར་རོ་ཞེ་ན། མ་ཡིན་ཏེ་རྗེས་སུ་དཔག་པ་འབའ་ཞིག་ཡུལ་ལ་ཁྱད་པར་མེད་པ་རྟོགས་པ་དེ་ཉིད་མངོན་སུམ་གྱི་ཡུལ་ངེས་པར་རྣམ་པར་འཇིག་པར་བྱེད་པ་དེས་ན་མངོན་སུམ་དང་ལྷན་ཅིག་བྱ་བ་གཅིག་པ་ཅན་གྱི་རྗེས་སུ་དཔག་པ་ནི་ཡུལ་ཁྱད་པར་ཡོད་པ་ལས་བྱུང་བ་ཉེས་པ་བདག་གིར་བྱེད་པ་མ་ཡིན་ནོ་ཞེས་བྱ་བར་དགོངས་པའོ། །ནོར་བུའི་འོད་ལ་ནོར་བུར་ཤེས་པའི་ཕྱིན་ཅི་ལོག་ཀྱང་རྗེས་སུ་དཔག་པ་དང་ལྷན་ཅིག་ཏུ་གྱུར་པ་ན་བྱ་བ་ཐ་དད་པའི་ཉེས་པ་དང་ལྡན་པ་མ་ཡིན་ནོ་ཞེས་བྱ་བ་ནི་ནོར་བུའི་འོད་ལ་ཞེས་བྱ་བའོ། །རྗེས་སུ་དཔག་པ་ལས་སྤོང་བ་ཡིན་པའི་ཞེས་འབྲེལ་ཏོ། །རྗེས་སུ་དཔག་པ་ལས་ཞེས་བྱ་བ་ནི་གང་ཞིག་ནོར་བུའི་རྣམ་པ་སྣང་བ་དེ་ནི་ཡུལ་གཞན་ན་ཡོད་པའི་ནོར་བུ་ལས་འཁྲུལ་པ་མེད་པ་ཡིན་ཏེ། དཔེར་ན་སྔོན་ཉམས་སུ་མྱོང་བ་བཞིན་ནོ། །སྒོ་གསེབ་ཀྱི་བུ་གན་ཡང་ནོར་བུའི་རྣམ་པ་སྣང་བ་ཡིན་ནོ་ཞེས་བྱ་བའི་དེ་ལྟ་བུའི་རང་བཞིན་ཅན་ལས་ཏེ། མངོན་སུམ་དང་རྗེས་སུ་དཔག་པས་ཉེ་བར་བསྟན་པ་ལས་སྔར་ཉིད་ཐེ་ཚོམ་དང་ཕྱིན་ཅི་ལོག་ཏུ་གྱུར་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་ན་ནོར་བུའི་འོད་ལ་ནོར་བུར་ཤེས་པ་ཚད་མ་ཡིན་པ་ཉིད་ཀྱི་དཔེར་བཀོད་པ་ཡིན་ནོ་ཞེས་བརྗོད་པ་ནི། ནོར་བུའི་འོད་ལ་ཞེས་བྱ་བའོ། །དེ་ནི་རྗེས་སུ་དཔག་པ་ཡིན་ནོ་ཞེས་བྱ་བའི་ལོག་པར་རྟོག་པ་ཡོད་པས་ན་དེའི་ཚད་མ་གང་ཡིན་ཞེས་རང་གི་ལུགས་གསུངས་པ་ནི་དེ་ནི་ཞེས་བྱ་བའོ། །འཁྲུལ་པ་ཉིད་ཀྱིས་མངོན་སུམ་མ་ཡིན་པར་དོགས་པས་ན་འདྲི་བ་ནི་ཇི་ལྟར་ཞེས་བྱ་བའོ། །གལ་ཏེ་མངོན་སུམ་མ་ཡིན་ན་ཇི་ལྟར་འཁྲུལ་པ་
ཡིན་ཞེ་ན་ཡང་ཇི་ལྟར་མངོན་སུམ་ཡིན་ཞེས་བྱ་བའི་དོན་ཏོ། །ལན་ནི་ནོར་བུའི་འོད་ལ་ནོར་བུར་ཤེས་པ་དེ་ནི་དེ་འདྲ་ཉིད་ཡིན་བཞིན་དུ་མངོན་སུམ་གྱི་ཚད་མ་ཡིན་ནོ། །གལ་ཏེ་གང་གིས་མངོན་སུམ་དུ་འགྱུར་བ་མི་བདེན་པའི་འཁྲུལ་པ་ཉིད་ཡིན་ན་ཇི་ལྟར་ཚད་མ་ཡིན་ཞེས་དོགས། མི་སླུ་བས་ཞེས་སྨོས་ཏེ། མ་འཁྲུལ་བ་ཉིད་ཀྱིས་ནི་མ་གྲུབ་པའི་ཕྱིར་རོ། །དེ་ཉིད་ཀྱི་ཕྱིར་འཁྲུལ་པ་དང་མ་འཁྲུལ་ཞེས་གསུངས་སོ། །མཚན་ཉིད་མཚུངས་པའི་ཕྱིར་ན་རེ་ཞིག་ནོར་བུའི་ཤེས་པ་ཚད་མ་ནི་ཡིན་པ་ཉིད་དོ་ཞེས་གསུངས་པ་ནི་ཚད་མ་ནི་ཞེས་བྱ་བའོ། །མི་སླུ་བ་ལས་གཞན་པའི་མ་འཁྲུལ་བ་ཉིད་དེའི་རྒྱུ་མཚན་དུ་དོགས་པ་ནི། གལ་ཏེ་ཞེས་བྱ་བའོ། །དོན་གྱི་དེ་ཁོ་ན་ཉིད་ཇི་ལྟ་བ་བཞིན་པའི་མ་འཁྲུལ་པ་ནི་མི་སླུ་བ་ཡིན་གྱི། དོན་གཞན་ནི་མ་ཡིན་ནོ་ཞེས་བརྗོད་པ་ནི། ཡུལ་དང་ཞེས་བྱ་བ་སྟེ། མ་འཁྲུལ་བའི་ཐ་སྙད་མི་སླུ་བའི་རྒྱུ་མཚན་ཡིན་གྱི། མི་སླུ་བ་ནི་མི་འཁྲུལ་བའི་རྒྱུ་མཚན་ཡིན་ཏེ། དེ་མེད་པར་མ་འཁྲུལ་བ་ཉིད་མི་འཁྲུལ་བའི་ཕྱིར་རོ་ཞེས་བྱ་བའི་དོན་ཏོ། །མ་འཁྲུལ་བའི་རྒྱུ་མཚན་གཞན་ཉིད་ཡིན་པར་དོགས་པ་ནི་གནོད་པ་མེད་པའི་ཕྱིར་རོ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་དོགས་པ་འགོད་པའོ། །ཅིའི་ཕྱིར་ཞེ་ན། མི་སླུ་བ་ཉིད་ལ་ཞེས་གསུངས་སོ། །དེ་སྐད་ཅེས་བྱ་བ་ནི་གནོད་པ་མེད་པ་ཉིད་དུ་བརྗོད་པའི་ཕྱིར་རོ། །དེ་ཉིད་ག་ལས་སྙམ་ན་མི་སླུ་བ་མ་ཡིན་པ་ཞེས་གསུངས་སོ། །གནོད་པ་མེད་ལ་ཡིན་གྱི་ཡང་ཞེས་བྱ་བ་ནི་དང་པོའོ། །དེ་ཉིད་ཅེས་བྱ་བ་ནི་མི་སླུ་བ་མ་ཡིན་པའོ། །འོ་ན་ཞེས་བྱ་བ་ནི་ལན་ནོ། །ཅི་སྟེ་ཡང་མ་འཁྲུལ་བ་ཉིད་ནི་མི་སླུ་བ་ལས་མ་ཡིན་ཏེ། རྗེས་སུ་དཔག་པ་འཁྲུལ་པ་ཡིན་ཡང་མི་སླུ་བ་ཡོད་པའི་ཕྱིར་རོ་ཞེས་དོགས་པར་བསུ་ནས་བརྗོད་པ་ནི། རྗེས་སུ་དཔག་པ་མི་སླུ་བ་ཞེས་བྱ་བའོ། །གལ་ཏེ་ཞེས་བྱ་བ་ནི་རང་གི་ཕྱོགས་པའི་རྩོད་པའོ། །འཁྲུལ་པ་དང་མ་འཁྲུལ་པ་ཉིད་ལས་ཁྱད་པར་གཞན་ནི་མེད་དོ་ཞེས་བྱ་བའི་ཐ་ཚིག་གོ །མ་འཁྲུལ་བའི་དོན་ནི་མི་སླུ་བའི་དོན་ཡིན་པའི་ཕྱིར་ན་དེ་ལས་ནི་ཁྱད་པར་ཡོད་པ་མ་ཡིན་གྱི། འོན་ཀྱང་རྣམ་པར་རྟོག་པ་དང་ཅིག་ཤོས་ཉིད་ཀྱིས་ཡིན་ནོ་ཞེས་ལན་བརྗོད་པ་ནི། སྣང་བ་ཐ་དད་པའི་ཕྱིར་རོ་ཞེས་བྱ་བའོ། །འཁྲུལ་བ་ཉིད་དུ་ཁྱད་པར་མེད་ན་ཇི་ལྟར་སྣང་བ་ཐ་དད་སྙམ་ན་འཁྲུལ་པ་ཉིད་ལས་ཡང་ཞེས་གསུངས་སོ། །ཇི་ལྟར་མངོན་སུམ་སྣང་བ་དང་རྗེས་སུ་དཔག་པ་དག་སྣང་བ་དང་
རྣམ་པར་རྟོག་པ་དང་ཅིག་ཤོས་ཉིད་ཀྱིས་ཐ་དད་པ་དེ་བཞིན་དུ་མངོན་སུམ་དང་རྗེས་སུ་དཔག་པ་དག་ཀྱང་ཡིན་ནོ་ཞེས་བྱ་བའི་དོན་ཏོ། །དེ་ལྟར་ན་མ་འཁྲུལ་པ་མངོན་པར་འདོད་པ་ལ་མི་སླུ་བ་ཉིད་ན་ནི་གཉི་ག་ལ་ཡང་ཁྱད་པར་མེད་དོ་ཞེས་བསྟན་ནས། །ད་ནི་མངོན་སུམ་རང་གི་ངོ་བོ་ལ་ལྟོས་ནས་མ་འཁྲུལ་པ་ཉིད་ཡིན་ལ། འགལ་ཡང་འཁྲུལ་པ་ཉིད་དུ་མི་འགྱུར་རོ་ཞེས་བརྗོད་པ་ནི། ཚད་མའི་ཤེས་པ་ཐམས་ཅད་ནི་ཞེས་བྱ་བའོ། །རྗེས་སུ་དཔག་པ་གཞན་གྱི་རང་བཞིན་ལ་ལྟོས་ནས། འཁྲུལ་པ་ཉིད་ཡིན་ན་ནི། མངོན་སུམ་ཡང་དེ་ལྟར་འགྱུར་རོ། །ཞེས་བརྗོད་པ་ནི་ཞེས་བྱ་བའོ། །ཇི་ལྟར་ཁྱད་པར་མེད་ཅེ་ན། འཁྲུལ་པ་ནི་ཞེས་གསུངས་སོ། །མཚུངས་པ་ཉིད་བརྗོད་པ་ནི་ཇི་ལྟར་ཞེས་བྱ་བའོ། །གང་ཡང་དག་པའི་ཤས་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ་ཞེས་བྱ་བ་ཡང་དག་པའི་ཤེས་པ་མི་སླུ་བའི་དོན་སྐབས་སུ་མི་སླུ་བའི་དོན་བརྗོད་པ་མ་འཁྲུལ་པ་སྨོས་པས་ཅི་བྱ་ཞེས་བརྗོད་པ་དེ་ཡང་སྡུད་པར་བྱེད་པའི་བདག་ཉིད་མདོར་གཞག་པའི་ཚིག་ལ་ཉེས་པ་ཡིན་ཏེ། དེ་ལྟ་མ་ཡིན་ན་རྟོག་པ་དང་བྲལ་བ་ཉིད་ཀྱང་དོན་ལ་ཤེས་པའི་སྣང་བ་གང་ཞིག་ཅེས་བྱ་བའི་རྣམ་པར་རྟོག་པ་མེད་པའི་སྐབས་སུ་གྱུར་པ་ལས་བརྗོད་ནས་བཤད་པར་བྱ་བར་འགྱུར་རོ། །གང་གི་ཕྱིར་མི་སླུ་བ་མ་འཁྲུལ་བའི་དོན་ཡིན་ལ་ཉེས་པ་འགའ་ཡང་མེད་པ་དེའི་ཕྱིར་ཞེས་བྱ་བའོ། །འབྱུང་བར་འགྱུར་བ་དེའི་ཞེས་བྱ་བ་ནི་དོགས་པ་བསུ་བའོ། །འདི་ནི་ཞེས་བྱ་བ་ནི་ལན་ནོ། །ནོར་བུའི་འོད་ལ་ནོར་བུའི་འཛིན་པ་ལ་གཞན་སྔོན་པོ་འཛིན་པའི་མངོན་སུམ་ལའོ། །མཚུངས་པ་ཞེས་བྱ་བ་ནི་ཐེ་ཚོམ་སེལ་བར་བྱེད་པར་འབྱུང་བར་འགྱུར་བ་རྗེས་སུ་དཔོག་པ་ཚད་མས་སྒྲུབ་པའོ། །དེར་ནི་ཞེས་བྱ་བ་ནི་དོགས་པ་སྟེ། སྔོན་པོ་འཛིན་པའོ། །མངོན་སུམ་གྱི་རྗེས་ལ་འབྱུང་བ་དེའི་རང་བཞིན་གྱིས་རྗེས་སུ་དཔོག་པ་ཐེ་ཚོམ་སེལ་བར་བྱེད་པའོ། །ཡུལ་གང་དུ་མཐོང་བའི་ཡུལ་དེ་ཉིད་དུ་རྗེས་སུ་དཔོག་པ་ཡིན་ཏེ། དེས་ན་ཡུལ་མ་ཐ་མི་དད་པར་རློམ་པ་ཡིན་གྱི་ནོར་བུའི་འོད་ལ་ནོར་བུར་ཤེས་པ་ལ་ནི་དེ་ལྟ་མ་ཡིན་ནོ། །ཡུལ་གང་དུ་གཞན་དུ་སྤྱོད་ཡུལ་ཐ་དད་པས་ཚད་མ་གཞན་དུ་སེམས་པའི་ཕྱིར་རོ་ཞེས་བརྗོད་པ་ནི། ནོར་བུའི་ཤེས་པ་ལ་ནི་ཞེས་བྱ་བ་སྟེ། རྗེས་སུ་དཔག་པའི་བདག་ཉིད་ལའོ། །མ་ཡིན་ཏེ་ཞེས་བྱ་བ་ནི་འགོག་པའོ། །ཅིའི་ཕྱིར་ཞེ་ན། ཤིན་ཏུ་ཞེས་གསུངས་སོ། །འཁྲུལ་པར་རློམ་པ་ཡོད་པ་དང་མེད་པ་དག་གི་ཁྱད་
པར་ཡོད་པར་དོགས་པ་ནི་གལ་ཏེ་ཞེས་བྱ་བའོ། །ནོར་བུའི་ཤེས་པ་མངོན་སུམ་གྱི་བདག་ཉིད་ཅན་ལའོ། །མངོན་སུམ་ཐམས་ཅད་ནི་ངེས་པ་ལ་ལྟོས་པའི་བྱེད་པ་ཅན་ཡིན་ནོ། །རང་གི་ཡུལ་སྤངས་ནས་རྣམ་པར་རྟོག་པའི་ཡུལ་ལ་འགྱུར་བ་ཡིན་ནོ་ཞེས་ལན་འདེབས་པ་ནི་འདི་ལ་བརྗོད་པ་ཞེས་བྱའོ། །དོན་དམ་པར་ནོར་བུའི་འོད་ལ་ནོར་བུར་ཤེས་པ་ཀ་བ་ལ་སོགས་པའི་ཤེས་པ་མཚུངས་པ་ཉིད་དོ། །ཇི་ལྟར་ཀ་བ་ལ་སོགས་པའི་ཤེས་པ་ངེས་པ་ལ་ལྟོས་པ་རང་གི་ཡུལ་ལས་འདས་པས་དེའི་ཡུལ་ལ་མངོན་སུམ་ཡིན་པ་དེ་བཞིན་དུ་འདི་ལ་ནོར་བུར་ཤེས་པ་ཡིན་པས་དེ་ལྟར་མཚུངས་པས་ན། མངོན་པར་རློམ་པ་ཚད་མ་ཡིན་པ་ལས་ཁྱད་པར་དུ་འགྲུབ་པ་ནི་ལོག་པ་ཉིད་ཡིན་ནོ་ཞེས་བྱ་བའི་དོན་ཏོ། །དེས་ན་མ་གོམས་པའི་གནས་སྐབས་ནི་ཐམས་ཅད་ལ་འཇུག་པའི་ཡུལ་སྟོན་པར་བྱེད་པ་ནི་མངོན་སུམ་དང་རྗེས་སུ་དཔག་པ་སྡོམ་པ་རྩོམ་ན་ཡིན་གྱི་རེ་རེ་ནི་མ་ཡིན་ཞེས་གསུངས་པ་ནི། དེ་ནི་གཉི་ག་ཚད་མ་ཉིད་ཅེས་བྱའོ། །སྒོ་གསེབ་ཀྱི་བུ་གའི་ཡུལ་གྱི་ནོར་བུའི་རྣམ་པ་ཅན་གྱི་ནོར་བུའི་འོད་ཀྱི་ཤེས་པ་ནི་འདི་ནོར་བུའོ་ཞེས་ངེས་པའི་ཡུལ་གྱི་ནོར་བུ་ལ་མངོན་སུམ་གྱི་ཚད་མ་ཡིན་གྱི་རྗེས་སུ་དཔག་པའི་ཚད་མ་མ་ཡིན་ནོ། །དེའི་རྗེས་སུ་གང་ཞིག་ནོར་བུའི་རྣམ་པར་སྣང་བ་ཞེས་བྱ་བའི་རྗེས་སུ་དཔག་པ་ཡང་ནོར་བུ་དེ་ཉིད་ལ་ཕྱིན་ཅི་ལོག་ཟློག་པར་བྱེད་པའི་ཚད་མ་ཡིན་ནོ། །ཇི་ལྟར་ཀ་བ་ལ་སོགས་པའི་ཤེས་པ་མངོན་སུམ་གྱི་ཚད་མ་ཡིན་པ་དེའི་རྗེས་ལ་ཐེ་ཚོམ་ཟ་བ་ན་དེའི་རང་བཞིན་གྱི་རྗེས་སུ་དཔག་པ་ཡིན་པ་བཞིན་ནོ། །མངོན་སུམ་དང་རྗེས་སུ་དཔག་པ་དག་ལ། ཚད་མ་གཞན་ནི་ཡོད་ལ་ཞེས་བྱ་བ་ནི་གོ་རིམས་བཞིན་དུ་རྗེས་སུ་དཔག་པ་དང་མངོན་སུམ་མོ། །མངོན་པར་རློམ་པ་མེད་པས་ཐ་དད་པ་ཡིན་ནོ་ཞེ་ན། མངོན་པར་རློམ་པ་མེད་པ་ཞེས་བྱ་བ་དེ་ཙམ་གྱིས་ནི་དངོས་པོ་ཐ་དད་པར་འགྱུར་པ་མ་ཡིན་ནོ་ཞེས་གསུངས་སོ། །མངོན་པར་རློམ་པ་དེ་ཡོད་པ་མེད་པ་དག་ལ་ནི་འདི་ལ་ནི་འོད་ལ་ནོར་བུར་ཤེས་པ་དང་ཀ་བར་ཤེས་པ་དང་གཉིས་ཁྱད་པར་ཡོད་པ་མ་ཡིན་ནོ། །གང་གི་ཕྱིར་ཁྱད་པར་མེད་པ་དེའི་ཕྱིར་རོ། །མངོན་སུམ་མ་མ་ཞེས་བྱ་བ་ལ་ནི་རང་གི་ལུགས་སོ། །ཡང་ན་རྗེས་སུ་དཔག་པ་ཉིད་ཅེས་བྱ་བ་ནི་ཤཱཀྱ་བློའི་ལུགས་སོ། །འདི་ལྟར་
ནོར་བུའི་འོད་ལ་ནོར་བུར་ཤེས་པ་ནི་འཁྲུལ་པ་ཡིན་ལ་མི་སླུ་བས་ཚད་མ་ཡིན་ནོ། །གལ་ཏེ་དེ་ལྟ་ན་མངོན་སུམ་དང་རྗེས་སུ་དཔག་པ་ལས་གཞན་པའི་ཚད་མ་གསུམ་པར་ཐལ་བར་འགྱུར་ཏེ། འདི་ལྟར་འདི་རེ་ཞིག་མངོན་སུམ་མི་འདུ་སྟེ། འཁྲུལ་བའི་ཕྱིར་དང་རྟོག་པ་དང་བཅས་པའི་ཕྱིར། རྗེས་སུ་དཔག་པའང་མ་ཡིན་ཏེ་རྟགས་ལས་སྐྱེས་པ་མེད་པའི་ཕྱིར་རོ། །ཚད་མ་མ་ཡིན་པ་ཡང་མ་ཡིན་ཏེ་དངོས་པོ་ལ་མི་སླུ་བའི་ཕྱིར་རོ་ཞེ་ན། འདི་ལ་བརྗོད་པ་ཚད་མ་གཞན་དུ་ཐལ་བ་མ་ཡིན་ཏེ། རྗེས་སུ་དཔག་པ་ཁོ་ནར་འདུ་བའི་ཕྱིར་རོ། །འདི་ལྟར་རྗེས་སུ་དཔག་པའི་སྤྱིའི་མཚན་ཉིད་ནི་འབྲེལ་པ་ཅན་གྱི་དོན་གཞན་ལས་ལྐོག་ཏུ་གྱུར་པའི་དོན་རྟོགས་པ་ནི་རྗེས་སུ་དཔག་པ་ཡིན་ནོ་ཞེས་རྗེས་སུ་དཔག་པ་ཡིན། སྤྱིའི་མཚན་ཉིད་དེ་མ་ཐག་ཏུ་འཆད་པར་འགྱུར་རོ། །འདིར་ནི་ནོར་བུ་དང་འབྲེལ་པའི་ནོར་བུའི་འོད་ནི་དེའི་འབྲས་བུ་ཡིན་པའི་ཕྱིར་དང་ནོར་བུའི་འོད་དེ་ལས་ཀྱང་ནོར་བུར་འཁྲུལ་པ་སྐྱེ་བས་ན། དེའི་འབྲས་བུའི་རྟགས་ལས་སྐྱེས་པའི་ཕྱིར་རྗེས་སུ་དཔག་པ་ཁོ་ནའོ། །གལ་ཏེ་རྟགས་དུ་བ་ལས་རྟགས་ཅན་ལས་ཤེས་པ་སྐྱེ་བ་ནས་དུ་བ་ཉིད་ལ་མེ་སྒྲོན་འདོགས་པས་འཇུག་པ་ནི་མ་ཡིན་གྱི་འོན་ཀྱང་ཡུལ་ཕྱོགས་གཞན་དུ་ཡིན་ནོ། །ནོར་བུར་འཁྲུལ་པ་ནི་རྟགས་ནོར་བུའི་འོད་ཉིད་ལ་རྟགས་ཅན་སྒྲོ་འདོགས་པར་བྱེད་པ་ཡིན་ནོ་ཞེ་ན། དེ་ལས་ཆིར་འགྱུར་འདི་ཙམ་གྱིས་ནི་འབྲེལ་པ་ཅན་ལས་སྐྱེས་པ་ཉམས་པ་མ་ཡིན་ནོ། །ཡུལ་གཞན་དུ་སྒྲོ་འདོགས་པ་ལག་པ་ཡོད་དོ་ཞེས་བྱ་བ་འདི་ཙམ་ཞིག་བརྗོད་པར་བྱ་བ་ཡིན་ན་ནི། ཡུལ་དེ་ཉིད་དུ་ནོར་བུ་ཐོབ་པར་བྱེད་པ་ཉིད་ཀྱིས་ནི་ཚད་མར་འགྱུར་བ་མ་ཡིན་ནོ། །ནོར་བུ་ཙམ་ཐོབ་པས་རྗེས་སུ་དཔག་པ་ཡིན་པ་སུས་ཀྱང་བཟློག་ཏུ་མེད་དོ་ཞེས་བྱ་བ་ནི། ཐམས་ཅད་ལ་ཡང་ཡུལ་ལ་འཁྲུལ་པ་ནི་འདོད་པ་ཁོ་ནའོ། །ནོར་བུར་འཁྲུལ་པ་རྗེས་སུ་འགྲོ་བ་དང་ལྡོག་པར་དྲན་པ་མེད་དོ་ཞེ་ན། མེད་མོད་དེ་ཙམ་གྱིས་རྗེས་སུ་དཔག་པར་མི་འགྱུར་བ་མ་ཡིན་ནོ། །གང་ཞིག་རྗེས་སུ་འགྲོ་བ་དང་ལྡོག་པ་མ་དྲན་པར་མོད་ཁོ་ནར་དུ་བ་ལས་མེ་རྟོགས་པའི་ཤེས་པ་དེ་རྗེས་སུ་དཔག་པར་མི་འདོད་དམ་ཅིག །ཚུལ་གསུམ་པའི་རྟགས་ལས་དེ་སྐྱེས་པ་ཡིན་
ཏེ། དེ་ཙམ་གྱིས་ན་རྗེས་སུ་དཔག་པ་ཉིད་ཡིན་ནོ། །སྒོ་གསེབ་ཀྱི་བུ་གའི་ཡུལ་གྱི་ནོར་བུའི་འོད་ཤེས་པས་ཁང་པའི་ཕུག་གི་ཡུལ་ན་ནོར་བུའི་རང་བཞིན་མ་བཟུང་བའི་ཕྱིར་ན་ཇི་ལྟར་མངོན་སུམ་ཡིན་ཏེ། ཀ་བ་ལ་སོགས་པའི་ཤེས་པ་ནི་འབྱུང་བར་འགྱུར་བའི་རང་བཞིན་ཤེས་པ་མ་ཡིན་ཡང་དེའི་རང་བཞིན་འཛིན་པའི་ཕྱིར་མངོན་སུམ་ཡིན་ནོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །འབྱུང་བར་འགྱུར་བ་ཐོབ་པར་བྱ་བའི་རང་བཞིན་དེ་ལ་བཟུང་ན། ཤེས་བ་དང་ཤེས་བྱའི་རང་བཞིན་དེ་ནམ་གཞན་གྱི་འབྱུང་བར་འགྱུར་བ་ལས་གཞན་འཛིན་པའི་ཤེས་པ་སྔ་མ་དེ་ནི་གཉི་ག་ལ་ཡང་མཚུངས་པ་ཉིད་དོ། །དེས་ན་གཉི་ག་ལ་ཡང་མངོན་སུམ་ཡིན་པའམ་ཡང་ན་ནི་འགའ་ཡང་མ་ཡིན་ནོ། །དེའི་རང་བཞིན་མ་བཟུང་བ་དེ་ལྟར་ཐོབ་ཅེ་ན། གཉི་ག་ལྟར་ཡང་ཞེས་གསུངས་ཏེ། དེའི་བདག་ཉིད་དམ་དེ་ལས་བྱུང་བའི་འབྲེལ་པ་ལས་ཀྱང་ངོ༌། །དེ་སྐད་དུ་ཡོད་དོ། །དེ་བདག་དེ་ལས་བྱུང་བ་ཡི། །མཐུ་ཡིས་ཞེས་པ་ཚད་མ་ཉིད། །ཅེས་བཤད་ཟིན་ཏོ། །ཐོབ་པར་བྱ་བའི་ཞེས་བྱ་བ་ནི་འཆད་པའོ། །ཇི་ལྟར་ཁྱད་པར་མེད་དེ། གང་གི་ཕྱིར་ནོར་བུ་དང་དེའི་འོད་ལ་ནི་སྣང་བ་ཐ་དད་པ་ཡོད་དོ། །དེས་ན་མིག་སེར་པོར་ཤེས་པ་བཞིན་དུ་ནོར་བུ་སྣང་བ་ཙམ་ནི་མངོན་སུམ་ལྟར་སྣང་བ་ཡིན་ནོ་ཞེས་དོགས་ན་ནི་ནོར་བུ་སྣང་བ་ནི་ནོར་བུ་ཉིད་དང་ཞེས་གསུངས་སོ། །དེས་ན་ནོར་བུའི་འོད་ལ་ནོར་བུ་སྣང་བ་ཙམ་མ་ཡིན་ཏེ། བདེན་པའི་ནོར་བུའི་སྣང་བ་དང་ཁྱད་པར་མེད་པའི་ཕྱིར་རོ། །གལ་ཏེ་སྣང་བ་ཁྱད་པར་མེད་ཀྱང་ནོར་བུའི་འོད་ལ་ནོར་བུར་ཤེས་པ་ནི་ཡུལ་ལ་འཁྲུལ་པ་ཡིན་ལ་ནོར་བུའི་ཤེས་པ་ནི་དེ་ལྟ་མ་ཡིན་ནོ་ཞེ་ན། དེ་ལ་ལ་ལར་ནི་ཞེས་གསུངས་སོ། །འཁྲུལ་པ་ཉིད་དུ་ཡང་ཁྱད་པར་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །སྤྱིའི་ཞེས་པ་ལས་སྤྱི་ནི་མེ་ཙམ་མོ། །དེའི་རྗེས་སུ་དཔག་པ་ནི་འདིར་འགའ་ཞིག་ན་མེ་ཡོད་དོ་སྙམ་པའི་ཤེས་པ་སྟེ། དེ་ནི་གཉི་ག་ལ་ཡང་འཁྲུལ་པ་ཡིན་ནོ། །འདིས་ནི་ཚུ་རོལ་མཛེས་པ་ལ་སོགས་པ་གསལ་བ་མ་ཡིན་ནོ་ཞེས་མཇུག་སྡུད་པ་ནི། །དེས་ན་ཞེས་བྱ་བའོ། །ཇི་ལྟར་རིགས་པ་མ་ཡིན་སྙམ་ན། མངོན་སུམ་ཡང་ཞེས་བྱ་
བའོ། །རང་གི་ངོ་བོ་ལ་ལྟོས་ནས་མ་འཁྲུལ་པ་ཉིད་ཡིན་ན་ནི་ཐམས་ཅད་ཀྱང་མ་འཁྲུལ་པ་ཉིད་ཡིན་དུ་འགྱུར་བ་དེས་ན་ཚད་མ་དང་གཞན་པའི་རྣམ་པར་དབྱེ་བར་མི་འགྱུར་རོ་ཞེས་བརྗོད་པ་ནི་རང་གི་ངོ་བོ་ལ་ནི་ཞེས་བྱ་བའོ། །དེ་ལྟར་ཞེས་བྱ་བ་ནི་རང་གི་ངོ་བོ་ལ་ལྟོས་པ་ཉིད་ཀྱིས་སོ། །གང་དེ་ལྟ་ན་ཞེས་བྱ་བ་ནི་མངོན་སུམ་ཡང་འཁྲུལ་པ་ཡིན་པའོ། །འདི་ལ་ཞེས་བྱ་བ་ནི་དྲན་པར་བྱེད་དོ། །དེ་ལྟར་ནི་ཞེས་བྱ་བ་ནི་རྩོད་པ་སྟེ། གསལ་བ་དང་མི་གསལ་བར་རོ། །གང་ཞིག་ཅེས་བྱ་བ་ནི་ལན་ནོ། །གང་གིས་ཞེས་བྱ་བ་ནི་རང་རྒྱུད་ཉིད་ལ་སོགས་པའོ། །དེ་ཉིད་ཅེས་བྱ་བ་ནི་འཛིན་པ་པོ་རང་དབང་ཉིད་ལ་སོགས་པའོ། །གལ་ཏེ་དོན་གྱི་ནུས་པ་ལས་བློ་སྐྱེ་བ་དེ་ནི་རང་རྒྱུད་ཉིད་དང༌། བར་ཆད་མེད་པར་འཛིན་པ་ཡིན་པས་དེ་ནི་མངོན་སུམ་ཡིན་ཏེ། དོན་གྱི་ནུས་པ་ཉིད་ཇི་ལྟར་རྟོགས་སྙམ་ན། རྗེས་འགྲོ་ཞེས་བྱ་བར་སྦྱར་རོ། །དེ་ལས་ཞེས་བྱ་བ་ནི་རང་དབང་དུ་འཛིན་པའི་དོན་ལས་གཞན་ཞེས་བྱ་བ་གཞན་གྱི་དབང་གིས་གཟུང་བར་བྱའོ། །དངོས་སུ་སྣང་བ་ཡང་ཞེས་བྱ་བའོ། །རྐང་པ་ལྷག་མ་འགྲེལ་པ་ནི། གལ་ལ་ཞེས་བྱ་བའོ། །དེ་བཞིན་ཞེས་བྱ་བ་ནི་རང་གི་མཚན་ཉིད་ལས་སོ། །ཇི་ལྟར་དེ་དབང་པོ་ལས་འདས་པ་ཡིན་སྙམ་ན། དེ་ལ་ནི་ཞེས་གསུངས་ཏེ་གང་ཞིག་བག་ཆགས་སད་པས་སྣང་བའི་ཡུལ་དུ་གྱུར་པའོ། །ཇི་ལྟར་རྗེས་སུ་དཔག་པའི་ཡུལ་དབང་པོ་ལས་འདས་ཏེ་དངོས་པོ་ཉིད་ལས་རྟོགས་པའི་ཕྱིར་རོ་ཞེས་ཕྱིར་རྒོལ་བ་ནི་གལ་ཏེ་ཞེས་བྱ་བའོ། །འོན་ཏེ་རྗེས་སུ་དཔག་པས་རྣམ་པར་རྟོག་ཀྱང་མེའི་རང་བཞིན་མ་རྟོགས་པའི་ཕྱིར་ལྐོག་ཏུ་གྱུར་པ་ཡིན་ནོ་སྙམ་ན། དེའི་རྣམ་པ་ལས་ཞེས་སྨྲས་སོ། །དེས་ན་ཞེས་བྱ་བས་ནི་རྗེས་སུ་དཔག་པས་སོ། །གང་ཞིག་ཅེས་བྱ་བ་ནི་མེའི་རང་གི་མཚན་ཉིད་དོ། །འོན་ཏེ་ཞེས་བྱ་བ་ནི་རྒོལ་བའི་དོགས་པ་བསུ་བའོ། །འོངས་ཞེས་བྱ་བ་ནི་ལན་ནོ། །འོན་ཏེ་བརྒྱ་ལ་རྒོལ་བ་འདི་ལྟར་ཁས་ལེན་ནོ་སྙམ་ན། དེ་ནི་དེ་ལྟར་ཞེས་སྨྲས་ཏེ་དབང་པོའི་བྱེད་པ་མེད་པས་ལྐོག་ཏུ་གྱུར་པ་ཉིད་ཡིན་པར་ནི་མ་ཡིན་ཏེ། ཡིད་ལ་སོགས་པའི་མངོན་སུམ་མེད་པར་ཐལ་བའི་ཕྱིར་རོ། །གང་གི་ཕྱིར་རྗེས་སུ་དཔག་པ་དངོས་པོའི་རང་བཞིན་མཐོང་བ་ཡང་ཡིན་ལ། ལྐོག་ཏུ་གྱུར་པའི་ཡུལ་ཅན་གང་ཡིན་པར་ནི་འགལ་བ་དེའི་ཕྱིར་རོ། །མི་སྣང་བ་ལྐོག་ཏུ་གྱུར་པའི་ཡུལ་གང་ལ་ཡོད་པ་དེ་ལ་དེ་སྐད་ཅེས་
བརྗོད་དོ། །གལ་ཏེ་རྗེས་སུ་དཔོག་པའི་རྟོག་པ་དེ་ལྟ་བུ་ཡིན་ན། དེའི་ཚེ་དངོས་མཐོང་མིན་ཏེ། དངོས་པོ་འཛིན་པར་མི་འགྱུར་རོ། །དངོས་པོ་མཐོང་བ་ཡིན་ན་ཡང་ལྐོག་ཏུ་གྱུར་པ་ཉིད་དུ་མི་འགྱུར་རོ་ཞེས་བརྗོད་པ་ནི། རྟོག་པ་ཞེས་བྱ་བའོ། །འདི་ཉིད་རྣམ་པར་འགྲེལ་པ་ནི་གལ་ཏེ་ཞེས་བྱ་བའོ། །དངོས་པོ་ལ་ཞེས་བྱ་བ་ནི་ཕྱེད་སྔ་མ་འཆད་པ་སྟེ་བསྐལ་པའོ། །ཁྱེད་ཀྱི་ལུགས་ལ་ཡང་རྗེས་སུ་དཔག་པ་ལྐོག་ཏུ་གྱུར་པའི་ཡུལ་ཅན་ཉིད་དུ་མི་འགྲུབ་བོ་ཞེས་ལན་འདེབས་པ་ནི། འོ་ན་སྤྱིའི་ཞེས་བྱ་བའོ། །འདི་ནི་འཆད་པ་ནི་དེ་ལ་སྤྱི་ནི་ཞེས་བྱ་བའོ། །བརྒྱུད་པས་དངོས་པོའི་ཡུལ་ཅན་ཉིད་དུ་དོགས་པ་བསུ་བ་ནི། མཚན་པར་བྱས་པའི་སྤྱིས་མཚོན་པར་ངེས། དངོས་པོ་རྟོགས་པའི་ཕྱིར་རོ་ཞེ་ན། སྤྱི་དང་ཁྱད་པར་གྱི་རང་བཞིན་དག་གིས་མཚོན་པར་སྲིད་པས་ན། དྲི་བ་ནི་ཁྱད་པར་རང་བཞིན་གང་གིས་ཞེས་བྱ་བའོ། །ཁྱད་པར་གྱི་མཚོན་པ་ལས་ཉེས་པ་བརྗོད་པ་ནི། གལ་ཏེ་ཞེས་བྱ་བ་སྟེ། ཁྱད་པར་རྟོགས་པའོ། །སྒྲ་ལ་སོགས་པ་ཉིད་ལས་ཞེས་བྱ་བ་ནི་མཚོན་པར་བྱས་པའི་རྨི་ལམ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་བར་མདོའི་ཞེས་གསུངས་སོ། །སྤྱིས་མཚན་པ་ལ་ཡང་ཉེས་བ་བརྗོད་པ་ནི། སྤྱིའི་རང་བཞིན་གྱིས་ཞེས་བྱ་བའོ། །འོ་ན་ཁྱད་པར་ཉིད་ཀྱིས་མཚོན་ནོ་སྙམ་ན། བཤད་ཟིན་པའི་ཉེས་པ་ཚད་ཡོད་པར་བྱས་ནས་གཞན་བརྗོད་པ་ནི་ཁྱད་པར་གྱི་ཞེས་བྱ་བའོ། །སྤྱི་སྣང་བ་དང་ཁྱད་པར་ནི་མི་སྣང་བ་ན་ལྐོག་ཏུ་གྱུར་པའི་ཡུལ་ཅན་ཉིད་དུ་ཞེས་བྱ་བར་དོགས་པ་བསུ་བ་ནི་འོན་ཏེ་ཞེས་བྱ་བའོ། །འདི་ཡང་ཞེས་བྱ་བ་ནི་ལན་ཏེ། སངས་རྒྱས་པའི་ལུགས་ལའོ། །ཇི་ལྟར་ཞེས་བྱ་བ་ནི་རྩོད་པའོ། །དེ་ཡུལ་ཉིད་ཡིན་ཞེས་བྱ་བ་ནི་ཡུལ་ཡིན་པའོ། །དེ་ལ་ཞེས་བྱ་བ་ནི་ལན་ནོ། །མ་བརྟགས་ཞེས་བྱ་བ་ནི་ལན་ནོ། །ཐམས་ཅད་དུ་ཞེས་བྱ་བ་ནི་ལན་ནོ། །ཅི་ལ་ལར་དེ་ལྟར་མཐོང་ངམ་སྙམ་དུ་དོགས་ན། ལྷས་བྱིན་ཞེས་གསུངས་སོ། །དེ་ལ་ཞེས་བྱ་བ་ནི་དོགས་པ་སྟེ་མཚུངས་པ་མཐོང་བའོ། །འདིར་སླུ་བ་ཡིན་ན་རྗེས་སུ་དཔག་པ་ལ་ཡང་འགྱུར་རོ་ཞེས་བྱ་བའི་དོན་ཏོ། །མ་ཡིན་ཏེ་ཞེས་བྱ་བ་ནི་སླུ་བ་ཉིད་འགོག་པའོ། །ཅིའི་ཕྱིར་ཞེ་ན། འཆད་པའི་ཕྱིར་རོ་ཞེས་གསུངས་སོ། །འཆད་པར་འགྱུར་པའི་རྒྱུ་དེས་གང་ཡིན་ཞེ་ན། འབྲེལ་པ་ལས་ཞེས་བྱ་བའོ། །གལ་ཏེ་བག་ཆགས་ཀྱི་སྟོབས་ལས་བྱུང་བའི་ཕྱིར་རྗེས་སུ་དཔག་པ་
འཁྲུལ་པ་ཉིད་ཡིན་ན་གང་གིས་མི་སླུ་བར་གྱུར་པའི་དོན་དང་འབྲེལ་པ་ནི། ཅིའི་ཕྱིར་ཞེ་ན་ཞེས་དོགས་པ་བསུ་བ་ནི་གལ་ཏེ་འདི་ཞེས་བྱ་བའོ། །དོན་ནི་རྗེས་སུ་དཔག་པར་བྱ་བའོ། །མ་ཡིན་ཞེས་བྱ་བ་ནི་བག་ཆགས་འབའ་ཞིག་དང་འབྲེལ་པ་ཞེས་བྱ་བ་ངེས་པ་འགོག་པའོ། །ཅིའི་ཕྱིར་ཞེ་ན། བག་ཆགས་ཞེས་གསུངས་ཏེ་སད་པར་བྱེད་པའི་རྟགས་ཀྱང་ངོ༌། །དེ་ལྟ་ན་ཡང་ཇི་ལྟར་དོན་དང་འབྲེལ་བ་ཡིན་སྙམ་ན། དོན་ནི་བག་ཆགས་སད་པར་བྱེད་པ་དེ་དང་འབྲེལ་པས་རྒྱུ་ཡིན་པའི་ཕྱིར་ཞེས་འབྲེལ་ཏོ། །འདི་ཉིད་ཅེས་བྱ་བ་ནི་དོན་དང་འབྲེལ་པའོ། །གལ་ཏེ་དོན་རང་གི་གོ་བས་མ་བརྟགས་ན་ཇི་ལྟར་དེར་འབྲེལ་པ་མེད་པ་ཡིན་སྙམ་ན་མ་མཐོང་ཞེས་གསུངས་སོ། །ཡང་ན་གལ་ཏེ་ཡང་གང་ཞིག་རང་གི་ངོ་བོས་མ་རྟོགས་པ་དེ་གཞན་གྱིས་བརྟགས་ཀྱང་དེ་ཡོད་དོ་ཞེས་གང་ལས་ཡིན་ཏེ། གཙོ་བོ་ལ་སོགས་པ་ནི་དེ་ལྟར་རྟོགས་ཀྱང་ཡོད་པ་ནི་མ་ཡིན་ནོ་ཞེས་དོགས་ན། མ་མཐོང་ཞེས་གསུངས་སོ། །རང་གི་རང་བཞིན་མཐོང་བ་གཞན་ལས་རྟོགས་པ་ཧ་ཅང་ཐལ་བ་སྤོང་བ་ནི་གལ་ཏེ་ཞེས་བྱ་བ་སྟེ། བསྒྲུབ་པར་བྱ་བ་བརྟེན་པའི་ཆོས་ཅན་ནམ། ཡང་ན་ཆོས་ཅན་དེ་དུ་བ་གང་ལ་ཡོད་པའི་སྒྲུབ་པར་བྱེད་པའི་ཆོས་དང་འབྲེལ་པ་ཅན་དེ་ངེས་པ་ཉིད་དེ་ངེས་པར་བྱེད་པ་ཡིན་ན་དེའི་ཚེ་གཞན་གོ་བར་བྱེད་པ་ཡིན་གྱི། གང་གི་ཧ་ཅང་ཐལ་བར་འགྱུར་བ་གཞན་ཙམ་གྱིས་མ་ཡིན་ནོ། །རང་གི་ངོ་བོ་ཞེས་བྱ་བ་ནི་འཆད་པའོ། །འབྲེལ་པ་ཆོས་ཅན་དང་བསྒྲུབ་བྱ་དག་དང་ངོ༌། །གང་གི་འབྲེལ་པ་ཞེས་ཁྱད་པར་དུ་བྱེད་པ་གང་ཡང་རུང་བ་ལས་རྟོགས་པ་ཉེས་པ་ཅི་ཡོད་སྙམ་ན་གཞན་ལ་ཞེས་གསུངས་ཏེ། དེའི་ཕྱིར་འབྲེལ་པ་ཅན་ཁོ་ན་ལས་རྟོགས་པ་ཡིན་གྱི། གཞན་ཙམ་རང་གི་ངོ་བོས་ནི་མ་ཡིན་ནོ་ཞེས་གནས་སོ། །དེ་ཉིད་ཀྱི་ཕྱིར་བཤད་པ་གལ་ཏེ་རྟེན་དང་ཞེས་བྱ་བ་ལ་ཆོས་ཅན་དང༌། དེ་དང་ཞེས་བྱ་བ་ལ་བསྒྲུབ་པར་བྱ་བ་དང་ངོ༌། །འདི་ལ་ཇི་ལྟར་ཞེས་བྱ་བའི་རྩོད་པ་ཉིད་འཆད་པ་ནི་འབྲེལ་པ་ལས་ཞེས་བྱ་བའོ། །འདྲ་བ་ལས་ཀྱང་ཞེས་བྱ་བ་ནི་མ་འབྲེལ་པ་ལས་སོ། །ཐལ་བ་དེ་ཉིད་དོ་ཞེས་བྱ་བ་ནི་གཞན་ཙམ་ལས་རྟོགས་པ་ལ་བརྗོད་པ་གང་ཡིན་པའོ། །
དེ་ལྟ་བུ་ཉིད་དུ་མཐོང་བའི་ཕྱིར་རོ་ཞེས་བྱ་བའི་ལན་འཆད་པ་ནི་མ་ཡིན་ཏེ་ཞེས་བྱ་བའོ། །ཅིའི་ཕྱིར་ཞེ་ན། འཆད་པར་འགྱུར་བའི་འབད་པ་རྩོལ་བ་དང༌། སོགས་པའི་སྒྲ་མ་འབྲེལ་པའི་འདྲ་བ་མཐོང་བ་ལ་སོགས་པ་སྟེ། དེ་དག་གིས་བསྐྱེད་པའི་དྲན་པ་ནི་གཞན་དུ་རྗེས་སུ་དཔག་པ་དང་མི་མཐུན་པ་ཉིད་དུ་གྱུར་པ་ཡིན་པའི་ཕྱིར་ཏེ། སྐྱེས་པ་ཡིན་པའི་ཕྱིར་དེ་ཉིད་བརྗོད་པ་ནི། འདི་ནི་ཡུལ་འདི་ནི་ཡོད་པ་ཡིན་ནོ་ཞེས་ཡུལ་ལ་སོགས་པས་ཁྱད་པར་གྱུར་པའི་རྣམ་པར་གནས་པ་གང་ལ་ཡོད་པ་དེ་ལ་དེ་སྐད་ཅེས་བརྗོད་དོ། །རྗེས་སུ་དཔག་པ་ནི་འདི་ལས་བཟློག་པ་ཡིན་ནོ་ཞེས་གསུངས་པ་ནི་ཡུལ་དུ་བྱེད་ཅེས་གསུངས་ཏེ། ཁྱད་པར་ཅན་དྲན་པ་ཡིན་ནོ་ཞེས་རྗེས་སུ་འཇུག་གོ །འདྲི་བའི་དྲན་པ་དེ་ག་ལས་ཡིན་སྙམ་ན། དེ་རྟེན་དང་ཞེས་གསུངས་སོ། །བསྒྲུབ་པར་བྱ་བ་དེ་དང་དེའི་རྟེན་དང་འབྲེལ་པའི་རྟགས་ལས་སོ། །འདི་ཉིད་འཆད་པ་ནི་ཆོས་ཅན་དང་དབང་བསྒྲུབ་བྱ་དང་ཞེས་བྱ་བའོ། །འབད་རྩོལ་ལ་སོགས་པ་ལས་ནི་ཞེས་བྱ་བ་ནི་ཕྱེད་སྔ་མ་འཆད་པ་སྟེ། ནུས་པའི་དངོས་པོ་རྟོགས་པ་ནི་ཡིན་ནོ་ཞེས་འབྲེལ་ཏོ། །ཅིའི་ཕྱིར་ཞེ་ན། དེ་ལྟར་ཞེས་གསུངས་སོ། །དེ་ཞེས་བྱ་བ་འབད་པར་རྩོལ་བས་ནའོ། །དེ་ནས་ཞེས་བྱ་བ་ནི་བཟུང་ཟིན་པ་འཛིན་པས་ནའོ། །འོན་འདྲ་བའི་མཐོང་བས་བསྐྱེད་པའི་དྲན་པ་ནི་ཚད་མ་ཡིན་ནོ་ཞེས་དོགས་པ་འདྲ་བ་བཟུང་བ་ལས་ཞེས་གསུངས་སོ། །བ་མེན་ནི་ལང་ཇི་ལྟ་བ་དེ་ལྟ་བུའོ་ཞེས་ཉེ་བར་བསྟན་པའི་ངག་ཐོས་པ་བྲོག་ཏུ་བཟུང་ན། བ་ལང་དང་འདྲ་བའི་མེན་མཐོང་བ་ལས་བ་མེན་འདི་དང་འདྲ་བ་ནི་བ་ལང་དེ་ཡིན་ནོ་ཞེས་རྟོགས་པ་ནི་ཉེ་བར་འཇལ་བའོ། །གལ་ཏེ་དེ་ལྟ་ན་ཡང་ཇི་ལྟར་ཚད་མ་མ་ཡིན་སྙམ་ན་འདྲ་བ་ཉིད་ནི་ཞེས་གསུངས་སོ། །ཡུལ་དང་དུས་ཁྱད་པར་ཅན་ཞེས་བྱ་བ་ནི་བ་གླང་ངོ༌། །ནམ་ཡང་ཞེས་བྱ་བ་ནི་ཉེ་བར་མཚོན་པ་ཡིན་པའི་ཕྱིར་ན་ཐམས་ཅད་དུ་ཞེས་བྱ་བར་ཡང་འགྱུར་རོ། །ཅིའི་ཕྱིར་ཏེ་ཡུལ་ལ་སོགས་པ་ཡང་མ་ངེས་ཤེ་ན། དུ་མེ་ནི་ཞེས་གསུངས་ཏེ། ཟལ་པོ་དང་དཀར་པོ་ཡུལ་ལ་སོགས་པ་རྣམས་སོ། །འདི་དང་འདྲ་བར་ལྐོག་ཏུ་གྱུར་པ་རྟོགས་པ་ནི་རང་གི་ངོ་བོས་ཀྱང་ངེས་པ་མ་ཡིན་ནོ་ཞེས་བྱ་བའི་དོན་ཏོ། །འོ་ན་མི་འདྲ་བ་ནི་ཡུལ་ལ་སོགས་པ་ངེས་པ་ཡིན་ནོ་སྙམ་ན། གཞན་ནོ་ཞེས་གསུངས་ཏེ། བུམ་པ་དང་སྣམ་བུ་ལ་སོགས་པ་དུ་མའོ། །དེ་ལྟ་ན་ཡུལ་ལ་སོགས་པ་ཁྱད་པར་
སོ་སོར་ངེས་པ་ནི། འདྲ་བའམ་མི་འདྲ་བར་རྟོགས་པ་མ་ཡིན་པའི་གཏན་ཚིགས་དེའི་ཕྱིར་ན་འདྲ་བ་རྟོགས་པ་དེ་ནི་ཚད་མ་མ་ཡིན་ནོ། །ཇི་ལྟར་བ་མེན་ལ་ལྟོས་ནས་ནི་དུ་མ་འདྲ་བ་དང་ཇི་ལྟར་མི་འདྲ་བའི་ཤེས་པ་ཡུལ་ལ་སོགས་པའི་ཁྱད་པར་ཅན་ཉེ་བར་འཇོག་པར་བྱེད་པ་མ་ཡིན་པའི་ཕྱིར། ཚད་མ་མ་ཡིན་པ་དེ་བཞིན་དུ་འདྲ་བའི་ཤེས་པ་ཡང་ངོ༌། །མཐོང་བའི་བ་གླང་དེ་ཡང་འདི་དོན་བྱ་བ་དེ་བྱེད་པའམ། གཞན་གྱིས་འདྲ་བར་ཡིན་ནོ་ཞེས་བྱ་བ་ནི་མངོན་སུམ་ཡིན་ཏེ། དེ་ལྟ་མ་ཡིན་ན་འཇུག་པ་མེད་པའི་ཕྱིར་ཞེས་གསུངས་པ་ནི་མཐོང་བཞིན་པའི་བ་མེད་དེ་དང་འདྲ་བ་སྔོན་མཐོང་བའི་བ་ལང་ངེས་པར་བྱ་བ་ནི་བ་མེན་ཞེས་བྱ་བ་ནི་སྐབས་ཀྱིས་སོ། །དེའི་ཕྱིར་ན་མཐོང་བཞིན་པའི་བ་མེན་དོན་བྱ་བ་དེ་བྱེད་པ་དེ་ལ་གོམས་པའི་སྟོབས་ལས་བྱུང་བ་འདྲ་བ་འཛིན་པའི་མངོན་སུམ་ཚད་མ་ཉིད་དོ། །དེ་ལྟ་མ་ཡིན་པར་ཞེས་བྱ་བ་ནི་འདྲ་བ་འཛིན་པར་མེད་ནའོ། །ཚད་མ་ཡིན་ནོ་ཞེས་བྱ་བ་ནི་མངོན་སུམ་མ་ཡིན་པའོ། །འདིས་ནི་འདྲ་བ་འཛིན་པའི་ཕྱིར་ན་རྗེས་སུ་དཔག་པ་མངོན་སུམ་དང་མཚུངས་པ་ཡིན་ནོ་ཞེས་བརྗོད་པར་འགྱུར་རོ་ཞེས་འཆད་པ་ནི་འབྲེལ་པ་ལས་ཀྱང་ཞེས་བྱ་བའོ། །དེ་ལྟ་བུ་ཉིད་དུ་ཞེས་བྱ་བ་ནི་འདྲ་བ་འཛིན་པ་ཉིད་ལས་སོ། །གལ་ཏེ་ཡང་དེ་དང་འདྲ་བར་རང་གི་ངོ་བོས་མི་འཛིན་ཀྱང་དེ་དང་འབྲེལ་པ་ནི་རྟོག་པ་ཁོ་ནའོ་ཞེས་བརྗོད་པ་ནི་འབྲལ་པ་ལས་ཀྱང་ཞེས་བྱ་བ་སྟེ། ཆོས་ཅན་དང་བསྒྲུབ་བྱ་དག་དང་ངོ༌། །ཀྱང་གི་སྒྲ་ནི་རིམ་པ་བཞིན་དུ་ཡིན་ཏེ། རྗེས་སུ་དཔག་པའི་བདག་ཉིད་ཀྱང་ཞེས་བྱ་བའོ། །ཡང་ན་གནས་ཇི་ལྟ་བ་བཞིན་ངེས་པར་བཟུང་བའི་དོན་ཏོ། །གལ་ཏེ་གནོད་པ་མེད་པའི་ཡུལ་ཅན་ལ་སོགས་པ་ཡང་རྟགས་ཀྱི་མཚན་ཉིད་མ་ཡིན་ནམ་དེས་ན་འབྲེལ་པ་ལས་ཞེས་ཅི་སྟེ་བརྗོད་སྙམ་ན། ཆོས་དང་བསྒྲུབ་བྱ་དང་འབྲེལ་བ་ཁོ་ན་རྟགས་ཀྱི་མཚན་ཉིད་ཡིན་གྱི། གང་གི་ཕྱིར་འབྲས་སོགས་ནི་དེའི་ཞེས་གནོད་པ་མེད་པའི་ཡུལ་ཅན་ལ་སོགས་པ་ནི་མ་ཡིན་ནོ་ཞེས་བརྗོད་པ་ནི་འདི་ལྟར་ཞེས་བྱ་བའོ། །གང་གི་ཕྱིར་འབྲས་སོགས་རྟགས་ནི་དེའི་ཞེས་བྱ་བ་ཆོས་ཅན་དབང་བསྒྲུབ་བྱ་དང་འབྲེལ་པའི་མཚན་ཉིད་རྟག་པ་ག་ལ་ཡོད་པ་དེའོ། །དངོས་པོ་ཉིད་ཀྱི་གོ་བྱེད་དུ་འདོད་པ་དེའི་ཕྱིར་ན། དེའི་མཚན་ཉིད་ལས་གཞན་པ། གནོད་པ་མེད་པའི་ཡུལ་ཅན་ལ་སོགས་པའི་མཚན་ཉིད་ནི་གཞན་དུ་གསལ་བ་ཟིན་པའི་ཕྱིར་ཡོད་པ་མ་ཡིན་ནོ། །གལ་
ཏེ་དེ་ལྟ་ན་ཡང་རྗེས་སུ་དཔག་པ་འདྲ་བ་འཛིན་པར་ཇི་ལྟར་འགྱུར་སྙམ་ན། ཤིང་གི་ཞེས་གསུངས་སོ། །གང་ཞིག་དཔེ་ལ་ཤིང་གི་དོན་བྱ་བ་བྱེད་པའམ། མེས་སྐྱེད་པའི་དུ་བ་ལ་སོགས་པ་མཐོང་བ་དེ་ནི་འདི་ཡིན་ནོ་ཞེས་བརྟགས་སོ་ཞེས་ཁ་བསྐང་སྟེ། དེའི་ཁོང་ནས་ཕྱུང་བ་དུ་བ་ལ་སོགས་པའི་རྒྱུ་ཉིད་དང༌། ཤ་པ་ལ་སོགས་པའི་འབྲས་བུ་ཉིད་དོ། །དེའི་ཕྱིར་དོན་ཡང་ཞེས་གསུངས་སོ། །ཤ་པ་ལ་སོགས་པར་རོ། །ཡོད་པའི་ཕྱིར་སྐད་ཅིག་མ་ཡིན་ནོ་ཞེས་པ་འདིར་ཡང་འདྲ་བ་རྟོགས་པ་ཉིད་དོ་ཞེས་བརྗོད་པ་ནི། མི་རྟག་པའི་རང་བཞིན་གྱི་ཞེས་བྱ་བའོ། །གཞན་གྱི་ནི་དངོས་པོ་གཞན་གྱིའོ། །གལ་ཏེ་འབྲས་བུ་ལས་ནི་འདྲ་བ་རྟོགས་ཀྱི་རང་བཞིན་ལས་ནི་མ་ཡིན་ཏེ། དཔེ་མེད་པའི་ཕྱིར་ཞེས་བྱ་བ་ནི་ཁ་ཅིག་གོ །དེ་སྤང་བའི་ཕྱིར་བཤད་པ་ནི་རྗེས་སུ་དཔག་པའི་ཞེས་བྱ་བའོ། །འདས་པ་དང་ད་ལྟར་བའི་བསྒྲུབ་པར་བྱ་བ་རྟོགས་པ་ཡང་རྣམ་པ་དེ་ལྟ་བུའི་རྟགས་ལས་འགྱུར་ན་འདྲ་བར་རྟོགས་པ་ཁོ་ནའོ་ཞེས་བརྗོད་པ་ནི། ཁྱད་པར་འགའ་ཞིག་གིས་ཞེས་བྱ་བའོ། །ཐལ་བ་ལ་སོགས་པའི་རང་བཞིན་ནི་ཞེས་བྱ་བར་རྗེས་སུ་འཇུག་གོ །ཇི་ལྟར་ན་གཉི་ག་ཅི་རིགས་པར་གོ་བར་བྱེད་པ་ཡིན་སྙམ་ན། འདི་ལྟར་ཞེས་གསུངས་སོ། །དུ་བ་ལ་སོགས་པའི་དངོས་པོ་གང་ཞིག་ཁྱབ་པའི་དུས་སུ་ལན་ཅིག་ཇི་ལྟར་དེ་རྒྱུ་ཉེ་བར་གནས་པ་ཅན་ནམ། ཉེ་བར་གནས་པ་ཅན་མ་ཡིན་པར་རྣམ་པ་གང་གིས་མཐོང་བ་དེ་ནི་གཞན་ཚེ། རྗེས་སུ་དཔག་པའི་དུས་དེ་ལྟ་བུར་ཏེ། རང་བཞིན་དེ་གཉིས་ཀྱིས་དྲན་པ་སྟེ། ཉེ་བར་གནས་པའམ་ཉེ་བར་མི་གནས་པའི་རྒྱུ་ཅན་དུ་མི་འཛིན་པའི་རྗེས་སུ་དཔག་པའི་བདག་ཉིད་སད་པར་བྱེད་པའི་རྒྱུ་ཡིན་ནོ། །དེ་ལྟར་ན་ཞེས་བྱ་བ་ནི་དྲན་པ་སད་པ་ལས་མ་འདས་པར་ཅི་རིགས་པར་ཞེས་བྱ་བ་ནི་གང་དུ་ཇི་ལྟར་རིགས་པ་དེར་སྐྱེས་བུ་དེ་ལྟར་འཇུག་པར་བྱེད་པ་ཡིན་ཏེ། རྣམ་པ་དེ་ལྟ་བུའི་དྲན་པའི་སྟོབས་ཀྱིས་ནི་ཞུགས་པ་ཡིན་ཡང་མི་སླུ་བ་མ་ཡིན་ནོ་ཞེས་བརྗོད་པ་ནི་གཞན་དུ་ཞེས་བྱ་བའོ། །ཁྱབ་པའི་དུས་ས་སྔོན་གྱི་མཐོང་བ་ལས་གཡོས་ཏེ་དྲན་པ་སྟེ། དུ་བ་ལས་བཟློག་པ་སྦྲང་བུའི་ཚོགས་པ་ལ་ཡང་ཡོད་པའི་ཕྱིར་རོ། །དེའི་ཚེ་ནི་མེའི་རྒྱུན་ཅན་ཉིད་དུ་ངེས་པ་ལས་སྦྲང་བུའི་ཚོགས་པ་ལ་སོགས་པ་དེ་ལྟ་བུ་འཇུག་པ་ཡིན་ཡང༌། ལྷག་པར་ཞེན་པར་བྱས་པའི་དངོས་པོ་ལ་མི་སླུ་བ་དང་འབྲེལ་པ་ནི་རྙེད་པར་དཀའ་བ་ཁོ་ནའོ། །འོ་ན་ཇི་
ལྟར་དྲན་པ་ནི་མི་སླུ་བ་དང་འབྲེལ་བར་འགྱུར་ཞེ་ན། མངོན་སུམ་ཞེས་གསུངས་སོ། །དུ་བ་ལ་སོགས་པའི་རྟགས་དྲན་པ་ནི་མངོན་སུམ་དེ་ལ་བརྟེན་པ་མི་སླུ་བ་ཡིན་ནོ། །ཇི་ལྟར་འདི་མི་སླུ་བ་ཡིན་པ་དེ་གཞན་དུ་སྔོན་མཐོང་བའི་མེའི་འབྲས་བུ་ཉིད་གལ་ཏེ་དུ་བ་ལ་སོགས་པ་ལ་རྗེས་སུ་དཔག་པའི་བདག་ཉིད་ཀྱི་དྲན་པ་སྐྱེ་བ་ཡིན་ན། དེའི་ཚེ་ཚད་མ་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་མཐོང་བ་འཁྲུལ་བས་ན། །ཞེས་བྱ་བ་ཆུའི་རྣམ་པ་ཅན་མཐོང་བ་ནི་སྨིག་རྒྱུའི་ཚོགས་ལ་ཡང་ཡོད་པས་ན་ཆུ་ལ་འཁྲུལ་པ་ཡིན་ནོ། །དེས་ན་མཐོང་བ་འཁྲུལ་པས་ན་དེ་བཞིན་ཡིན་ཡང་དེ་མཐོང་བ་བཞིན་དྲན་པ་ཡིན་ཡང་ཆུ་དྲན་པ་ནི་ཚད་མ་ཡིན་ནོ། །དེ་བཞིན་དུ་དུ་བ་ལ་སོགས་པའི་རྟགས་དྲན་པ་ཡང་ཚད་མར་མི་འགྱུར་རོ་ཞེས་བྱ་བར་ཕ་རོལ་གྱིས་བསམས་པའོ། །རང་རིག་པའི་མཐར་ཐུག་པའི་མཐོང་བ་ནི་རང་བཞིན་གཉིས་པས་འཁྲུལ་པ་ནི་མ་ཡིན་གྱི། འོན་ཀྱང་དྲན་པ་རྣམ་པ་གཞན་དུ་གྱུར་པ་ལས་ཡིན་ནོ་ཞེས་ལན་བརྗོད་པ་ནི། མཐོང་བ་འཁྲུལ་པ་དེ་ཡང་ནི་ཞེས་བྱ་བའོ། །རྣམ་པ་གཞན་དུ་བྱུང་བ་ཉིད་བརྗོད་པ་ནི་འདི་ལྟར་ཞེས་བྱ་བའོ། །སྨིག་རྒྱུའི་ཚོགས་པ་མཐོང་བ་ནི་དམིགས་པ་མེད་པ་ཡིན་ཏེ། ལྷག་པར་ཤེས་པར་བྱས་པའི་ཆུ་དམིགས་པ་མེད་པའི་ཕྱིར་རོ། །གལ་ཏེ་དེ་ལྟ་ན་ཡང་ཚད་མ་ཇི་ལྟར་མ་ཡིན་སྙམ་ན། དྲན་པ་རྣམ་པ་གཞན་དུ་ཡིན་ཞེས་གསུངས་ཏེ། མཐོང་བ་ཇི་ལྟ་བ་བཞིན་དུ་དྲན་པ་ནི་མ་ཡིན་གྱི་འོན་ཀྱང་འདི་ནི་ཆུའོ་ཞེས་བྱ་བར་ནི། དེས་ན་ནི་ཚད་མ་མ་ཡིན་ནོ་ཞེས་བྱ་བའི་དོན་ཏོ། །དེས་ན་མཐོང་བ་དེ་ནི་སྨིག་རྒྱུའི་ཚོགས་ཀྱི་དམིགས་པ་དང་བཅས་པ་སྟེ། དམིགས་པ་དང་བཅས་པ་ཡང་དེ་མཐོང་བ་དེ་བཞིན་ཏེ་མཐོང་བའི་རྗེས་སུ་འབྲངས་ནས་དྲན་པ་མ་ཡིན་ཏེ། དེས་ན་ཚད་མར་མི་འགྱུར་རོ། །འོན་ཏེ་ཚད་མ་མ་ཡིན་ནོ། །མཐོང་བ་གོ་ཅི་སྟེ་ཚད་མ་ཡིན་ནོ་ཞེ་ན། དྲན་པས་ཞེས་གསུངས་སོ། །མཐོང་བ་བཏང་སྙོམས་སུ་གནས་ཀྱང་དྲན་པ་ཉིད་ཀྱང་ཕྱི་རོལ་གྱི་ཡུལ་ཅན་དུ་རྣམ་པར་གཞག་པ་ཡིན་ནོ། །ཇི་ལྟ་བ་བཞིན་རྣམ་པར་འཇོག་པའི་དྲན་པ་ནི་ཚད་མ་ཡིན་གྱི་གཞན་དུ་ཚད་མ་མ་ཡིན་ནོ་ཞེས་བརྗོད་པ་ནི་དྲན་པ་དེ་ཡང་ཞེས་བྱ་བའོ། །ཡང་གལ་ཏེ་མཐོང་བ་ཡོད་ཀྱང་གང་གིས་དེ་ཚད་མ་ཡིན་པར་འགྱུར་བ་རྣམ་པ་གཞན་དུ་དྲན་པར་ཇི་ལྟར་འགྱུར་ཞེས་དོགས་ན། དྲན་པ་དེར་ཡང་ཞེས་གསུངས་སོ། །གང་
གི་ཕྱིར་གསལ་བ་མ་ཡིན་པ་ལས་དྲན་པ་རྣམ་པ་གཞན་དུ་མིན་པ་དེའི་ཕྱིར་གསལ་བའི་སྟོབས་ཀྱིས་ནི་དེ་ཉིད་དུ་ཞེས་བྱ་བ་འབྲས་བུ་ཉིད་ལ་སོགས་པར་དམིགས་ཤིང་གཏན་ལ་འབེབས་པའི་འབྲས་བུ་དང་རང་བཞིན་དག་ལས་ནིའོ། །གཞན་དུ་ཞེས་བྱ་བ་ནི་ཉེ་བར་མི་མཐོང་ཞིང་དམིགས་པ་རྣམ་པ་མེད་པར་ནི་དྲན་པ་འཁྲུལ་པར་འགྱུར་པ་ཡིན་ནོ། །གང་གི་ཕྱིར་མཐོང་བ་རང་ཉིད་ལ་བརྟེན་པའི་ཉེས་པ་མ་ཡིན་པ་དེས་ནའོ། །སླུ་བ་ནི་འཁྲུལ་པའི་ཞེས་བྱ་བའི་མིང་ཅན་ནོ། །གང་གི་ཕྱིར་གཏན་ལ་ཕེབས་པའི་འབྲས་བུ་དང་རང་བཞིན་དག་ལས་མཐོང་བའི་དོན་དྲན་པ་དེའི་ཕྱིར་ཞེས་བྱ་བའོ། །དེ་ཡང་མི་དྲན་པའོ། །དེ་ཉིད་ཀྱི་ཕྱིར་ཞེས་བྱ་བ་ནི་རྗེས་སུ་དཔག་པ་ཉིད་ཀྱི་ཕྱིར་རོ་ཞེས་བཤད་པ་ནི་ཚེ་ཞེས་བྱ་བའོ། །ཡང་ན་གལ་ཏེ་ཇི་ལྟར་རང་གི་ངོ་བོ་རྟོགས་པ་དེ་བཞིན་དུ་རང་གི་ངོ་བོ་དང་འབྲེལ་པ་ལས་ཀྱང་ཡིན་ནོ། །དེས་ན་རང་གི་འཁྲུལ་པར་འགྱུར་བ་རྗེས་སུ་དཔག་པས་རང་གི་ངོ་བོ་མི་རྟོགས་པར་ཇི་ལྟར་འགྱུར་ཞེ་ན། དེ་ཚེ་ཞེས་གསུངས་སོ། །འབྲེལ་པ་འཛིན་པའི་དུས་སུ་མཐོང་བ་དང་འདྲ་བར་རྗེས་སུ་དཔག་པར་བྱ་བའི་གོ་བར་བྱེད་པ་ཡིན་ལ་གོ་བར་བྱ་བ་ཡང་ཡིན་གྱི། དེའི་དུས་སུ་དེས་འདི་ཁྱབ་པ་ཡིན་ནོ་ཞེས་བྱ་བ་ནི་མ་ཡིན་ཏེ། དེས་ནི་གོ་བྱེད་རྗེས་སུ་འགྲོ་བ་དེ་དང་འདྲ་བར་དེའི་སྤྱིའི་ངོ་བོ་ཉིད་དུ་རྟོགས་ཀྱི། རང་གི་ངོ་བོ་ཉིད་ཀྱི་ནི་མ་ཡིན་ནོ་ཞེས་བྱ་བའི་དོན་ཏོ། །ཡང་ན་སྤྱིའི་གང་ཞིག་གོ་བར་བྱེད་པའི་རྗེས་སུ་དཔག་པ་འགྲོ་བའི་བྱེད་པ་དེས་རྟོགས་པར་བྱ་བ་ལྐོག་ཏུ་གྱུར་པའི་དོན་རྟོགས་སོ། །ལུང་དང་དོན་གྱི་གོ་བ་ལ་སོགས་པ་འབྲེལ་པ་འཛིན་པ་ལ་མི་ལྟོས་པ་དག་ནི་རང་གི་ངོ་བོས་ལམ་དེ་ལྟ་མ་ཡིན་པར་ཡང་གོ་བར་བྱེད་པ་མ་ཡིན་ནོ་ཞེས་གསུངས་པ་ནི་དེས་ན་ཞེས་བྱ་བའོ། །ཡང་ཅིའི་ཕྱིར་ཁྱད་པར་དུ་མི་རྟོགས་སྙམ་ན། གོ་བར་བྱ་བ་མི་རྟོགས་པ་ནི་ཞེས་གསུངས་སོ། །དེ་ལས་ཅིར་འགྱུར་ཞེ་ན། གོ་བར་བྱེད་པ་དེ་ཡང་ཞེས་གསུངས་སོ། །དེ་ཞེས་བྱ་བ་གོ་བར་བྱེད་པ་ལ་གནས་པའི་ཁྱད་པར་རོ། །གལ་ཏེ་དེ་ལྟ་ན་ཡང་ཅིའི་ཕྱིར་ཁྱད་པར་མི་རྟོགས་སྙམ་ན། གོ་བར་བྱེད་པའི་སྤྱིའི་ནི་གོ་བར་བྱ་བའི་ཁྱད་པར་ལམ་ངེས་པ་ཡིན་ཞེས་བརྗོད་པ་ནི་དུ་བ་ལ་སོགས་པའི་ཞེས་བྱ་བའོ། །དེའི་ཕྱིར་ཞེས་བྱ་བ་ནི་ཐམས་ཅད་ལ་མཐོང་བའི་ཕྱིར་རོ། །དེ་ལས་ནི་དུ་བ་ལ་སོགས་པའི་སྤྱི་ལས་སོ། །ཁྱད་པར་ནི་རྩྭ་ལས་བྱུང་བ་དང་ལོ་མ་ལས་བྱུང་བ་ལ་སོགས་པའོ། །ཁྱད་པར་ཞེས་བྱ་བ་
ནི་དོགས་པ་སྟེ། རྟགས་ཀྱིའོ། །རྟོགས་སོ་ཞེས་བྱ་བ་ནི་ཁྱད་པར་ཉིད་དོ། །ཁྱད་པར་ཉེ་བར་མཚོན་པ་མ་ཡིན་ནོ། །ཅིའི་ཕྱིར་ཞེ་ན། ནང་ཚན་གྱི་ཞེས་གསུངས་སོ། །འགའ་ཞིག་གིས་ཞེས་བྱ་བ་ལ་སོགས་པས་རྟོགས་པ་བོའི་ཁྱད་པར་ལ་ལྟོས་ཏེ་ཁྱད་པར་ཉེ་བར་མཚོན་པར་དོགས་པ་བསུ་ནས་ཤིན་ཏུ་ཁྱད་པར་གྱུར་པ་ནི་མཚོན་པར་བྱེད་མི་ནུས་སོ། །ཞེས་བརྗོད་པ་ནི། མ་ཡིན་ཏེ་ཞེས་བྱ་བའོ། །གལ་ཏེ་ཙནྡན་གྱི་དུ་བ་ལས་ཙནྡན་གྱི་རྟོགས་པ་ནི་ཁོ་ན་མ་ཡིན་ནམ་དེས་ན་ཇི་ལྟར་ཁྱད་པར་མཚོན་པར་མི་ནུས་པ་ཞེ་ན། ཁྱད་པར་ཉེ་བར་ཞེས་གསུངས་སོ། །དེར་ནི་རྟགས་ལའོ། །ཙནྡན་གྱི་དུ་བ་ལ་རིགས་མཐུན་པ་དང་མི་མཐུན་པ་མ་ལུས་པ་ལས་ལྡོག་པའི་རང་བཞིན་གོ་བར་བྱེད་པ་མ་ཡིན་ཏེ། མཚོན་པར་མི་ནུས་པའི་ཕྱིར་རོ། །འོན་ཀྱང་ནང་གི་སྤྱིའི་རང་བཞིན་དང་ཁྱད་པར་གྱི་བདག་ཉིད་ཀྱི་ཉེ་བར་མཚོན་པའི་ཕྱི་རོ། །དེ་ཉིད་ཀྱི་ཕྱིར་གང་སྲིད་པ་དེ་ཙམ་ཞིག་ཅེས་གསུངས་སོ། །རྣམ་པ་ཐམས་ཅད་རྟོགས་པ་ནི་རྟགས་ཀྱི་གང་ཡིན་པ་ཞེས་བྱ་བ་ནི་སྐྱེས་བུ་ཁྱད་པར་ཅན་ནོ། །དེ་ནི་རྗེས་སུ་དཔག་པའོ། །གལ་ཏེ་ལྐོག་ཏུ་གྱུར་པ་ཡང་སྤྱི་མཐོང་བའི་རྗེས་སུ་དཔག་པ་ལས་ཁྱད་པར་གྱི་རང་བཞིན་དུ་རྟོགས་པ་ཡོད་པ་ཡིན་ནམ་ཞེས་དོགས་པ་ནི་ཁྱད་པར་མཐོང་བ་ལས་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །འདི་ཉིད་ཅེས་བྱ་བ་ནི་ལྐོག་ཏུ་གྱུར་པ་གོ་བར་བྱེད་པ་ཉིད་དུ་རྗེས་སུ་འགྲོ་བ་སྤྱིའི་རང་བཞིན་དུ་རྟོགས་པ་ཉིད་ནའོ། །ཡང་ན་ལྐོག་ཏུ་གྱུར་པ་ནི་གོ་བར་བྱེད་པའི་རྗེས་སུ་འགྲོ་བ་སྤྱིའི་རང་བཞིན་དུ་རྟོགས་པར་འགྱུར་མོད། །དེ་ལྟ་ན་ཡང་དེ་རྗེས་སུ་དཔག་པ་ཇི་ལྟར་ཡིན་ཞེས་དོགས་ན། ཚུལ་གསུམ་པའི་རྟགས་ལས་སྐྱེས་པ་ནི་རྗེས་སུ་དཔག་པ་ཁོ་ན་ཡིན་ཏེ། གཞན་གྱི་གོ་བར་བྱེད་པ་ཉིད་དུ་ནི་མི་འཐད་པའི་ཕྱིར་རོ་ཞེས་བརྗོད་པ་ནི། འབྲེལ་པ་ཅན་གྱི་ཞེས་བྱ་བའོ། །འབྲེལ་པ་ཅན་སྒྲུབ་པར་བྱེད་པ་དང༌། ཆོས་ཅན་དག་དང་ངོ་། །གང་གི་ཕྱིར་ལྐོག་ཏུ་གྱུར་པའི་རིགས་པ་མཐའ་དག་ནི་རྗེས་སུ་དཔག་པ་ཁོ་ན་ཡིན་པ་དེས་ན་ལྐོག་ཏུ་གྱུར་པ་རྣམས་ཀྱི་སྒྲུབ་པར་བྱེད་པ་ནི་གཅིག་ཁོ་ནར་ངེས་པ་ཡིན་ཏེ། ལུང་ལ་སོགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །གཅིག་ཁོ་ན་གོ་བར་བྱེད་པ་ཡིན་ནོ་ཞེས་བྱ་བ་འདི་ག་ལས་སྙམ་ན། མཚན་ཉིད་གཞན་ཞེས་གསུངས་སོ། །གལ་ཏེ་གཞལ་བྱ་གཞན་གྱི་ཞེས་བྱ་བ་ནི་ཤིན་ཏུ་ལྐོག་ཏུ་གྱུར་པ་མཐོ་རིས་ལ་སོགས་པའི་སྒྲུབ་པར་བྱེད་པའི་
ཡུལ་ཅན་གཞལ་བྱ་གཞན་གང་ལ་ཡོད་པ་དེ་ནི་ཚད་མ་ཡིན་ཏེ། ལུང་ཡིན་ནོ། །དེ་ལྟ་མ་ཡིན་ན་གསུམ་པ་ལ་མི་འཇུག་པར་འགྱུར་རོ། །དེས་ན་མཚན་མ་གཉིས་སུ་ངེས་པ་མི་འགྲུབ་བོ་ཞེས་བྱ་བ་ནི་རྩོད་པའི་དོན་ཏོ། །ལན་འདེབས་པ་ནི་འདེབས་པ་ཞེས་བྱ་བ་ནི། ལུང་ཡང་གཙོ་བོའི་དོན་ལ་མི་སླུ་བ་ཉིད་ཀྱིས་ཐམས་ཅད་མཁྱེན་པ་འགྲུབ་པ་དང་མཐུན་པའི་ཕྱིར་རྗེས་སུ་དཔག་པའི་རྒྱུ་ཉིད་ཀྱིས་རྗེས་སུ་དཔག་པ་ཁོ་ནའོ། །མཐོ་རིས་ཀྱི་སྒྲུབ་པར་བྱེད་པ་ལ་སོགས་པ་ནི་ལུང་ཚད་མ་ཡིན་ཏེ། ཡུལ་གཉིས་རྣམ་པར་དག་པས་ན་དོན་ལ་ལྷུར་ཕྱོགས་པའི་ཐེ་ཚོམ་གྱིས་འཇུག་པ་ཡིན་ནོ་ཞེས་དགོངས་པ་ཡིན་ནོ། །གཞལ་བྱ་ནི་ཚད་མ་འགྲུབ་པའི་རྒྱུ་མཚན་མ་ཡིན་ཏེ། བཟློག་པ་ཡིན་པའི་ཕྱིར་རོ་ཞེས་དོགས་པ་བསུ་བ་ནི། གལ་ཏེ་ཞེས་བྱ་བའོ། །ཚད་མ་ཡང་རང་རིག་པའི་མངོན་སུམ་གྱིས་གྲུབ་པ་ཁོ་ན་སྒྲུབ་པར་བྱེད་པར་འགྱུར་བ་ཡིན་ནོ་ཞེས་བཤད་པ་ནི་ཚད་མའི་རང་གི་ངོ་བོ་ནི་ཞེས་བྱ་བའོ། །གལ་ཏེ་གཞལ་བྱ་གཉིས་ལས་ཚད་མ་གཉིས་སུ་ལས་བརྗོད་པ་མ་ཡིན་ནམ། དེ་ནི་ཇི་ལྟར་ཤེས་པའི་རྣམ་པ་ཐ་དད་པ་ལས་ཡིན་པར་བརྗོད་ཅེ་ན། རང་རིག་པ་ནི་ཞེས་གསུངས་སོ། །གལ་ཏེ་དེ་ལྟ་ན་འོ་ན་གཞལ་བྱ་གཉིས་ཕྱིར་ཞེས་བྱ་བ་འདིའི་དོན་ཅི་ཡིན་ཞེ་ན། བཤད་པ་ནི་གཞལ་བྱ་གཉིས་ཕྱིར་ཞེས་བྱ་བ་ནི་ཞེས་གསུངས་སོ། །དོན་དུ་ལྷག་པར་མོས་པའི་ཡུལ་གྱི་རྣམ་པ་གཉིས་སྒྲུབ་པའི་དོན་དུ་དེ་སྐད་བརྗོད་པ་ཡིན་ནོ། །གལ་ཏེ་གཞལ་བྱ་གཅིག་ཁོ་ནའམ། ཡང་ན་སྤྱི་དང་རང་གི་མཚན་ཉིད་དང་གཉི་ག་ཞེས་བྱ་བ་གསུམ་མ་ཡིན་ནམ། དེས་ན་མངོན་པར་འདོད་པ་ཇི་ལྟར་འགྲུབ་སྙམ་ན། རང་གི་རྣམ་པ་ཞེས་གསུངས་སོ། །གཅིག་ཅེས་བྱ་བ་ནི་རང་གི་མཚན་ཉིད་དམ་སྤྱིའི་མཚན་ཉིད་གཅིག་ཁོ་ནའོ། །གསུམ་པ་ལ་སོགས་པ་ཞེས་བྱ་བའི་སྒྲས་ནི་གཉི་ག་མ་ཡིན་པའོ། །དེ་ལྟར་ཚད་མ་གཉིས་ཞེས་བྱ་བ་ལ་སོགས་པས་མཚན་ཉིད་མི་མཐུན་པའི་རྣམ་པ་གཉིས་ཉམས་སུ་མྱོང་བ་ལས་ཉམས་སུ་མྱོང་བ་རྣམ་པར་ཕྱེ་བ་གཉིས་ཡིན་གྱི། གཅིག་མ་ཡིན་ལ་གཞན་ཡང་མ་ཡིན་ནོ་ཞེས་བརྗོད་པ་ཡིན་ནོ། །ད་ནི་གཞལ་བྱ་གཉིས་པོ་འདི་ནི་རྣམ་པར་བྱེད་པ་ཁོ་ན་ཡིན་གྱི། གཉི་གའི་བདག་ཉིད་གཅིག་ཡོད་པ་ནི་མ་ཡིན་ནོ། །གང་གི་དེའི་ཡུལ་ཅན་རྣམ་པ་གསུམ་པར་འགྱུར་དེ་བཞིན་གང་གིས་གཅིག་ཁོ་ན་ཚད་
མར་འགྱུར་བ་རང་གི་མཚན་ཉིད་གཅིག་ཁོ་ན་ཡང་མ་ཡིན་ནོ། །དེ་ལྟར་ན་གསུམ་མམ་གཅིག་ཉིད་ནི་གཞལ་བྱ་གཉིས་ཀྱིས་འགོག་པར་བྱེད་དོ་ཞེས་གསུངས་སོ། །གཞལ་བྱ་གཉིས་ནི་མཐོང་བའི་ཕྱིར་ཞེས་བྱ་བའོ། །སྔར་ནི་གཞལ་བྱ་གཞན་མེད་པའི་ཕྱིར། གསུམ་པ་ལ་སོགས་པ་མ་ཡིན་ནོ་ཞེས་བརྗོད་པ་མ་ཡིན་ལ། ད་ནི་གཞན་མེད་ཀྱང་གཉིས་པོ་དེ་གཅིག་ཏུ་གྱུར་པའི་གསུམ་ལས་འཕེན་པ་མ་ཡིན་ནོ་ཞེས་བྱ་བ་ནི་ཁྱད་པར་ཡིན་ནོ། །རྣམ་པར་བཤད་པ་ཡང་ཁོ་ན་ལྟར་བཤད་པར་བྱའོ། །གལ་ཏེ་རང་གི་མཚན་ཉིད་གཅིག་ཁོ་ན་སྤྱི་དང་ཁྱད་པར་གྱི་རང་བཞིན་གྱིས་རྟོགས་པ་ཡུལ་བཞིན་པའི་ཕྱིར་ན། གཞལ་བྱ་གཉིས་པ་མེད་པ་མ་ཡིན་ནམ་ཞེས་དོགས་པ་ནི་འོན་ཏེ་ཞེས་བྱ་བའོ། །སྤྱི་མེད་པར་ནི་ལོགས་ཤིག་ཏུ་གཞལ་བྱ་མ་ཡིན་པའི་ཕྱིར་ན་རང་གི་མཚན་ཉིད་གཅིག་ཁོ་ན་རྣམ་པ་གཉིས་ཀྱིས་རྟོགས་པར་བྱེད་པ་ཡིན་ནོ་ཞེས་ལན་བརྗོད་པ་ནི་ཁོ་ནའང་འདོད་ཅེས་བྱ་བའོ། །དེ་ཡང་ཞེས་བྱ་བ་ནི་རང་གི་མཚན་ཉིད་ལས་གཞན་འོ་ན་ཅི་ལྟར་གཞལ་བྱ་གཉིས་ཡིན་ཞེ་ན། དེ་ཉིད་ཅེས་གསུངས་སོ། །མེད་པ་ཞེས་བྱ་བའི་གཏན་ཚིགས་ནི་གཞལ་བྱ་མ་ཡིན་པ་བསྒྲུབ་པར་བྱ་བ་མ་ངེས་པ་ཡིན་ཏེ། མེད་པའི་གཞལ་བྱ་ཡོད་པའི་ཕྱིར་རོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །དངོས་པོ་ཡང་ཡིན་པར་རང་བཞིན་གྱིས་མེད་པར་ནི་གཞན་གྱི་ལྟར་ན་གཞལ་བྱ་ཡིན་ནོ་ཞེས་བརྗོད་པ་ནི། སྤྱིའི་ཡུལ་ཅན་གྱི་རྗེས་དཔག་ཚད་མ་ཡིན་མོད། མེད་པ་ངེས་པའི་རང་བཞིན་ནི་ཚད་མ་གཉིས་པར་འགྱུར་རོ། །དེ་ནི་རྗེས་སུ་དཔག་པའམ་གཞན་ཡིན་ན་ཡང་རུང་སྟེ་ཁྱད་པར་མེད་དོ་ཞེས་བརྗོད་པ་ནི་དེ་ལ་ཚད་མ་ཞེས་བྱ་བའོ། །གལ་ཏེ་དབང་པོ་ནི་ཡོད་པ་གསལ་བར་བྱེད་པ་ཡིན་པས་དེའི་ཁྱད་པར་མེད་པ་ཡང་གསལ་བར་བྱེད་པ་ཡིན་ཏེ། དབང་པོ་བྱེད་པ་དང་ལྡན་པས་དེ་རྟོགས་པར་མཐོང་བའི་ཕྱིར་རོ་ཞེས་དོགས་པ་མེད་པ། དབང་སྐྱེས་ཞེས་གསུངས་སོ། །དེ་ལས་རྣམ་པར་དབྱེ་བ་མཐོང་བས་དེ་དྲན་པ་དེ་མེད་པར་ངེས་པས་བྱུང་བས་ན་བདག་ཉིད་སྐྱེ་བ་ནི་དབང་པོ་ལ་ལྟོས་པ་མ་ཡིན་ནོ། །གལ་ཏེ་དྲན་པ་དེ་མེད་པར་ངེས་པས་བྱུང་བས་ན་བདག་ཉིད་སྐྱེ་བ་ནི་དབང་པོ་ལ་ལྟོས་པ་མ་ཡིན་ནོ། །གལ་ཏེ་དྲན་པ་ལ་སོགས་པར་བསྒྲུབས་པའི་དབང་པོ་མེད་པར་ཤེས་པའི་རྒྱུ་མ་ཡིན་ནམ་ཞེ་ན། དོན་གྱི་སྟོབས་ལ་ཞེས་གསུངས་སོ། །དོན་
ཉེ་བ་དང་མི་ཉེ་བ་དག་ལས་ཤེས་པའི་སྣང་བ་ཐ་དད་པ་དང་ལྡན་པ་ནི་དེས་སྐྱེས་པ་ཡིན་ན། དངོས་པོ་ཉེ་བ་དང་མི་ཉེ་བ་དག་ལས་མི་སྣང་བ་ཐ་དད་པ་མ་ཡིན་ཏེ། ཁྱད་པར་མེད་པར་དམིགས་པའི་ཕྱིར་རོ། །འོན་ཏེ་དོན་གྱིས་སྐྱེད་པར་བྱེད་པ་ཉིད་ནི་དམིགས་པ་ཁོ་ན་ཡིན་པའི་གཞན་ནི་མ་ཡིན་ལ། དེ་ནི་དངོས་པོ་མེད་པ་ལ་ཡང་ཁྱད་པར་མེད་དོ་སྙམ་པ་དོན་གྱི་ནུས་པས་ཞེས་བྱ་བའོ། །ཉེ་བ་དང་མི་ཉེ་བ་དག་ལས་སྣང་བ་ཐ་དད་པ་ལ་མི་ལྟོས་པར་དེ་དམིགས་པ་ཙམ་གྱིས་དོན་སྐྱེད་པར་བྱེད་པ་ཉིད་ཡིན་ན་ནི། དུ་བས་མེ་རྟོགས་པ་ལ་ཡུལ་དང་ཐལ་བ་ལས་མེ་རྟོགས་ན་དུས་ཀྱིས་བར་ཆོད་པ་དང༌། སོགས་པའི་སྒྲ་རྟགས་རགས་མོས་ཕྲ་མོ་ཤེས་པ་ན། རང་བཞིན་གྱིས་བསྐལ་པ་ཡིན་ཡང་དབང་བསྐྱེད་པ་ཉིད་ཡོད་པར་འགྱུར་རོ། །དེའི་ཚེ་ནི་དབང་པོའི་བྱེད་པས་ཡོད་པ་མ་ཡིན་ནོ། །དེ་ལ་དབང་པོ་གཞན་དུ་ཞུགས་པ་ཡིན་ན་འདི་ཡང་ཅི་སྟེ་མི་འདོད། ཉེ་བ་དང་རིང་བ་དང་ལས་སྣང་བ་ཐ་དད་པ་མེད་པ་ནི་དེས་མ་བསྐྱེད་པའི་གཏན་ཚིགས་འདིར་ཁྱད་པར་ཡོད་པ་མ་ཡིན་ནོ། །ཡང་ན་གལ་ཏེ་དབང་པོ་ལས་མེད་པ་ངེས་པ་ན་དེ་ཇི་ལྟར་ཚད་མ་གཞན་ཡིན་ཞེ་ན། མེད་ལ་དབང་བསྐྱེད་བློ་མིན་ཏེ། །ཞེས་གསུངས་སོ། །འདི་ག་ལས་སྙམ་ན། དོན་གྱི་ནི་ཞེས་གསུངས་སོ། །གལ་ཏེ་དབང་པོའི་ཤེས་པ་དོན་གྱི་ནུས་པ་ལ་མི་ལྟོས་ན་དེའི་ཚེ་དུ་བ་ལས་མེ་རྟོགས་པ་ན་ཞེས་བྱ་བ་ལ་སོགས་པ་སྔ་མ་བཞིན་ནོ། །དེ་ལ་ནི་ཞེས་བྱ་བ་ནི་དབང་པོའི་རྣམ་པར་ཤེས་པ་ལའོ། །གལ་ཏེ་རོ་ལ་སོགས་པ་བཞིན་དུ་མེད་པ་ལས་ཡང་དབང་པོའི་བྱེད་པ་ཡོད་པ་ཉིད་མ་ཡིན་ནམ་དངོས་པོའི་ཁྱད་པར་དུ་འཛིན་པའི་ཕྱིར་རོ་ཞེས་དོགས་ན། དེ་འདི་ཉན་ན་ཞེས་གསུངས་ཏེ། བུམ་པ་ལ་སོགས་པ་སྟེ་ཡུལ་འདི་ནའོ། །དེའི་ནི་བུམ་པ་ལ་སོགས་པའིའོ། །མེད་ཀྱང་དབང་པོའི་སྤྱོད་ཡུལ་ཡིན་ན་ཅི་སྐྱོན་སྙམ་ན། ཆོས་ཀྱང་ཞེས་གསུངས་སོ། །རྣམ་པར་འཇིག་པའི་ཕྱིར་རོ་ཞེས་བྱ་བ་ནི་རྣམ་པར་འཇིག་པ་ཉིད་དུ་ཐལ་བའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་གང་ལ་འདི་མེད་པ་དེ་ནི་ཁྱད་པར་ཅན་དུ་མངོན་སུམ་གྱི་ཡུལ་དུ་གྱུར་པ་མ་ཡིན་ཏེ། འོན་ཀྱང་གང་ཞིག་ཡུལ་ལ་སོགས་པ་ཉེ་བར་འགྱུར་བ་བུམ་པ་ལ་སོགས་པས་དབེན་པའོ། །དེས་ན་ཆོད་པ་རྟོགས་པར་འགྱུར་བའི་ཉེས་པ་མེད་དོ་ཞེས་བརྗོད་པ་ནི། འོན་ཏེ་ཞེས་བྱ་བའོ། །དབེན་པ་ཞེས་བྱ་བ་འདི་ཅི་ཞིག་ཅེས་བྱ་བ་ལ་སོགས་པ་ནི་དངོས་པོ་
མེད་པ་ངེས་པ་དབང་པོས་བསྐྱེད་པ་མ་ཡིན་པ་ཉིད་ཀྱིས་རྒྱས་པར་སྟོན་པའོ། །འོ་ན་རིག་པ་ལས་ཞེས་བྱ་བ་ནི་མངོན་སུམ་ལས་ནི་མ་ཡིན་པའོ། །གལ་ཏེ་རིག་པ་ཉིད་མི་སྣང་བ་ལ་ལྟོས་ནས་རིག་པ་མེད་པ་ཡིན་ཏེ། དེས་ན་མངོན་སུམ་ཉིད་ལས་དངོས་པོ་མེད་པ་སེལ་བ་ཡིན་ནོ་ཞེས་རྩོད་པ་ནི། དེ་ལས་གཞན་ཞེས་བྱ་བ་ནི། གང་ལ་ལྟོས་ནས་དེ་བཞིན་དུ་འགྱུར་བ་སྣང་བཞིན་པ་ནི་གཞན་དུ་འགྱུར་བ་མ་ཡིན་ནོ་ཞེས་ལན་བརྗོད་པ་ནི་དེ་མ་རིག་པ་ཞེས་བྱ་བའོ། །དེ་སྔར་ཞེས་བྱ་བ་ནི་ དགོས་པ ་སྟེ། དགག་པར་བྱ་བ་བུམ་པ་ལ་སོགས་པ་དེ། བུམ་པ་དང་བཅས་པའི་ས་ཕྱོགས་ཀྱི་དུས་སུའོ། །དེའི་ཚེ་ཞེས་བྱ་བ་ནི་ལན་ཏེ། ས་ཕྱོགས་འགའ་ཞིག་དམིགས་པའི་དུས་དེའི་ཚེ་དགག་པར་བྱ་བ་དེའོ། །ཇི་ལྟར་བུམ་པ་ལ་སོགས་པ་དང་འབྲེལ་པ་ཉིད་ཀྱིས་ཁྱད་པར་དང་བཅས་པའི་མེད་པར་རྟོགས་ཏེ། མི་རྟོགས་པ་ཉིད་དེ་དེའི་ཕྱིར་ཞེས་བྱ་བའོ། །དབང་པོའི་བྱེད་པ་ལས་འདས་པའི་ཕྱིར་རོ། །དེས་ན་ཞེས་བྱ་བ་ནི་དབང་པོ་སྐྱེད་པ་ལས་ཡིན་པས་ནའོ། །མངོན་སུམ་ཉིད་ལྡོག་པ་ལས་དེ་མེད་པ་ལས་མེད་པར་ངེས་པ་མ་ཡིན་ནོ་ཞེ་ན་ཞེས་བྱ་བ་ནི། རང་ལོག་པ་ན་དངོས་པོ་མེད་པ་ངེས་པར་བྱེད་པ་ཡིན་ནོ་ཞེས་བྱ་བའི་དོགས་པ་རྗེས་སུ་བརྗོད་པའོ། །ལན་ནི་འགལ་བའམ་ཞེས་བྱ་བ་ནི་གནོད་པའོ། །འོན་ཀྱང་དངོས་པོ་མེད་པར་འགྱུར་བའི་ལྡོག་པས་ནི་ཡོད་པ་བཞིན་དུ་མེད་པ་ལ་ངེས་པར་བྱེད་པ་མི་འཐད་པའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་ཡང་མངོན་སུམ་ལྡོག་པ་ནི་དངོས་པོ་མེད་པར་ངེས་པར་བྱེད་པ་མ་ཡིན་གྱི། འོན་ཀྱང་དེ་བཏང་བའི་རང་བཞིན་གྱི་ལྡོག་པས་ཡིན་ནོ་སྙམ་ན། ལྡོག་པ་ལས་མེད་པ་ངེས་པར་སྨྲ་བས་རྗེས་སུ་དཔག་པ་ཁས་བླངས་པ་ཉིད་དོ་ཞེས་བརྗོད་པ་ནི། དེ་ཉིད་ཅེས་བྱ་བའོ། །ཇི་ལྟར་ན་འདི་འགལ་བ་ཡིན་སྙམ་ན། མངོན་སུམ་ཉིད་ཅེས་བྱ་བའོ། །ཇི་ལྟར་ན་རིག་པ་མེད་པར་དངོས་པོ་མེད་པར་ངེས་པའི་རྒྱུ་མ་ཡིན་ཞེ་ན། འདི་སྨྲ་བ་པོ་དག་ཅེས་གསུངས་སོ། །མ་ངེས་པའི་ཕྱིར་ཡང་ངེས་པའི་རྒྱུ་མ་ཡིན་ནོ་ཞེས་བརྗོད་པ་ནི། དེས་ན་མེད་པའི་རྒྱུ་རིག་པ་མེད་པ་ལས་ཞེས་བྱ་བའོ། །འོན་ཏེ་ཉེས་པ་འདི་གསལ་བའི་དོན་དུ་གཞན་དག་བརྒྱ་ལ་སྣང་བ་མི་དམིགས་པར་ཁས་ལེན་ན་དེས་ན་སྣང་བ་མི་དམིགས་པ་ལས་མེད་པར་ངེས་པར་རྟོག་པ་ནི་འོན་ཏེ་ཞེས་བྱ་བའོ། །སྣང་བ་མི་དམིགས་པ་ཁས་ལེན་ན་རང་གི་གཞུང་མི་འགྲུབ་པོ་ཞེས་ལན་འདེབས་པ་
ནི། འོ་ན་ནི་ཞེས་བྱ་བའོ། །གཞན་ཡང་དེ་ལྟ་ན་ནི་རྗེས་སུ་དཔག་པ་ཁས་བླངས་པར་ཡང་འགྱུར་རོ་ཞེས་བརྗོད་པ་ནི་གལ་ཏེ་ཞེས་བྱ་བའོ། །དེ་ལས་ཞེས་བྱ་བ་ནི་ཡོད་པའི་ལས་སོ། །དེ་བས་ན་ཞེས་ཁོང་ནས་བྱུང་ལ། རྗེས་སུ་དཔག་པའི་ཞེས་སྦྱར་རོ། །གལ་ཏེ་དེ་ལྟ་ན་རྗེས་སུ་དཔག་པ་ཐམས་ཅད་ཁས་བླང་པ་ཇི་ལྟ་བར་འགྱུར་ཞེ་ན། འདིས་ནི་ཞེས་གསུངས་ཏེ། དེ་ཉིད་ལྡོག་པ་དང་ཞེས་བྱ་བ་ལ་སོགས་པས་སོ། །གལ་ཏེ་གཞན་གྱི་སེམས་ཡོད་དོ་ཞེས་ག་ལས་ཤེས་ཞེས་དོགས་ན། སྒྲ་སོགས་ལ་ནི་ཞེས་གསུངས་སོ། །དེའི་ངོ་བོ་ཡང་ངེས་པར་གྲུབ་ཅེས་བྱ་བ་ནི་གཞན་གྱི་སེམས་ངེས་པར་གྲུབ་པའོ། །གཞན་ཏེ་གཞན་གྱིས་སེམས་མངོན་སུམ་ཉིད་ལས་གྲུབ་པ་མ་ཡིན་ནམ། དེས་ན་རྗེས་སུ་དཔག་པ་ཁས་བླངས་པས་ཅི་བྱ་སྙམ་ན། གཞན་གྱི་སེམས་ནི་ཞེས་གསུངས་སོ། །ཇི་ལྟར་མི་འགྲུབ་སྙམ་ན། གཞན་གྱི་སེམས་ཡོད་པ་ཡིན་ནམ་ཞེས་བྱ་བའོ། །དེའི་རྣམ་པར་ཞེས་གསུངས་སོ། །དེ་ལྟར་རྟོགས་པའི་ཕྱིར་རོ་ཞེ་ན་ཞེས་བྱ་བ་ནི་མངོན་སུམ་ཉིད་དོ། །གཞན་གྱི་སེམས་ནི་དེ་ལྟར་རྟོགས་པ་ཡང་མ་ཡིན་ན། དེའི་ཕྱིར་དེ་ནི་ཐ་སྙད་པ་རྣམས་ཀྱིས་རྗེས་སུ་དཔག་པ་ཁོ་ན་ལས་རྟོགས་པ་ཡིན་ནོ། །གལ་ཏེ་གཞན་གྱི་སེམས་ཙམ་ངེས་ཀྱང་ཞེ་སྡང་ལ་སོགས་པའི་ཁྱད་པར་ཇི་ལྟར་ངེས་ཤེ་ན། སྣང་བ་ལ་སོགས་པ་ནི་ཞེས་བྱ་བའོ། །ད་ནི་ཕྱེད་ཕྱི་མ་ཞེས་བཤད་པའི་དོན་དུ་དོགས་པ་བསུ་བ་ནས། སྡང་བ་ལ་སོགས་པ་ནི་ཞེས་བྱ་བའོ། །གལ་ཏེ་རྣམ་པ་ཅི་ཞིག་ལྟར་ཞེས་བྱ་བ་སྟེ། རྣམ་པ་གང་ཡང་རུང་བས་སོ། །ལེན་ནི་བརྗོད་པ་ལ་སོགས་པའི་ཞེས་བྱ་བའོ། །དེ་དང་རྗེས་སུ་མཐུན་པ་ཞེས་བྱ་བ་ནི་ཚད་མས་གྲུབ་པའི་སེམས་པ་དང་རྗེས་སུ་མཐུན་པའིའོ། །ཇི་ལྟར་རུང་བ་ཞེས་བྱ་བ་ནི་དོགས་པའོ། །འཇུག་པ་ཞེས་བྱ་བ་ནི་བརྗོད་པ་ལ་སོགས་པའི་མཚན་ཉིད་དོ། །ཚད་མ་མེད་པ་ཉིད་འཇུག་པ་ནི་མ་ཡིན་ནོ། །ཅིའི་ཕྱིར་ཞེ་ན། དཔྱད་ནས་ཞེས་གསུངས་སོ། །ཐབས་གཞན་ཞེས་བྱ་བ་ནི་དོགས་པ་སྟེ། བརྗོད་པ་ལ་སོགས་པ་ལ་གཞན་ནོ། །ལན་ནི་ཐབས་ཞེས་བྱ་བའོ། །ངེས་པ་ནི་མི་དམིགས་པའི་རྟགས་ཀྱིས་བསྐྱེད་པའོ། །འདི་ཇི་ལྟར་ཚད་མ་ཡིན་ཞེ་ན། དེ་ཡང་ཞེས་གསུངས་སོ། །གཞན་གྱིས་ཞེས་བྱ་བ་ནི་འཇིག་རྟེན་རྒྱང་འཕེན་པའི་
དགོས་པའོ། །དེ་སྐད་ཅེས་བྱ་བ་ནི་གཞན་གྱི་སེམས་ཡོད་པར་སྒྲུབ་པའི་རྗེས་སུ་དཔག་པའོ། །མ་ཡིན་ཏེ་ཞེས་བྱ་བ་ལ་སོགས་པའི་ལས་ཀྱི་དོན་ནི་འདི་ཡིན་ཏེ། གཞན་གྱིས་ཁས་བླངས་པ་ནི་གཞན་ཁོ་ན་རྟོགས་པར་བྱ་བ་ཡིན་གྱི་བདག་ཉིད་ནི་མ་ཡིན་ན། རང་ཉིད་གོ་ཇི་ལྟར་གཞན་གྱི་སེམས་རྟོགས་པར་བྱེད། གཞན་གྱི་སེམས་མ་རྟོགས་ན་ཡང་ཇི་ལྟར་གཞན་གྱི་དོན་དུ་བསྟན་བཅོས་བྱེད་པར་འགྱུར་ཞེས་བྱ་བའོ། །རེ་ཞིག་རྟེན་གཞན་ཞེས་བྱ་བ་ནི་རྩོད་པའོ། །རྗེས་སུ་དཔག་པ་དོར་ནས་ནི་གཞན་གྱི་སེམས་པ་རྟོགས་པ་ལ་ཐབས་གཞན་ལ་མཐོང་སྟེ། ཐབས་གཞན་མེད་པ་དེས་ན་དེ་ལྟར་ཞེས་བྱ་བ་རྗེས་སུ་དཔག་པ་ལ་སེམས་པ་ངེས་པར་བྱས་ནས་བདག་བསྟན་བཅོས་བྱེད་པ་ལ་སོགས་པ་ལ་འཇུག་པ་ཡིན་ནོ། །ལན་ནི་འཇིག་རྟེན་ཕ་རོལ་ཡང་ཞེས་བྱ་བའོ། །ཇི་ལྟར་རྟེན་གཞན་མེད་པས་བརྗོད་པ་ལ་སོགས་པའི་རྟགས་ལས་དེའི་སེམས་རྟོགས་པ་དེ་བཞིན་དུ་རྟགས་གཞན་ལས་འཇིག་རྟེན་ཕ་རོལ་ཡང་དཔོགས་ཤིང༌། འཇིག་རྟེན་ཕ་རོལ་ཡང་ཞེས་བྱ་བ་ནི་དགོས་པའོ། །དེར་ཡང་ནི་འཇིག་རྟེན་ཕ་རོལ་ལའོ། །དེ་ལྟར་ཞེས་བྱ་བ་ནི་ལན་ཏེ། འཇིག་རྟེན་ཕ་རོལ་དོར་བ་དང་ད་ལྟར་རོ། །འདི་ལས་ཞེས་བྱ་བ་ནི་འདི་ཚད་མ་ཅན་མ་ཡིན་ཏེ། འདི་ལས་ཁྱབ་པ་འཛིན་པའི་ཚད་མ་འགལ་བ་ཡང་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །སུན་འབྱིན་པ་གཞན་ཡང་བརྗོད་བཞེད། རྣམ་པར་རྟོག་པ་མཛད་པ་ནི་འཚོ་བ་དོན་དུ་གཉེར་བ་ཡང་ཞེས་བྱ་བ་ནི། དེ་ལས་ཞེས་བྱ་བ་ནི་རིམ་བཞིན་སེལ་བའོ། །རྣམ་པར་རྟོག་པ་གཉིས་བཟློག་གནས་ཕྱོགས་གཞན་ དགོས་པར་བྱེད་པ ་ནི་མ་འོངས་པའི་ཞེས་བྱ་བའོ། །འོ་ན་ནི་ཞེས་བྱ་བ་ནི་ལན་འདེབས་པ་ནི་འདིས་ཞེས་བྱ་བ་ནི་གཞན་གྱི་སེམས་ངེས་པས་སོ། །གཞན་གྱི་ནི་མ་ཡིན་ནོ་ཞེས་བྱ་བ་ནི་ཐབས་མེད་པར་རོ། །རྗེས་སུ་འགྲོ་བ་དང་ལྡོག་པ་དག་ལས་ཞེས་བྱ་བ་ནི་ཐབས་ཀྱི་རྗེས་སུ་འགྲོ་བ་དང་རྗེས་སུ་བྱེད་པའི་འཚོ་བའོ། །འདིས་ནི་འཇིག་རྟེན་རྒྱང་འཕེན་པས་མ་འོངས་པའི་རྒྱུ་རྗེས་སུ་དཔོག་པ་ཁས་བླངས་པར་འགྱུར་རོ་ཞེས་བརྗོད་པ་ཡིན་ནོ། །ཇི་ལྟར་རུང་བ་ཞེས་བྱ་བ་ནི་ཚད་མ་ཅན་མ་ཡིན་པའོ། །དང་པོ་ལ་བརྗོད་པ་ནི་གལ་ཏེ་ཞེས་བྱ་བའོ། །གཉིས་པ་ལ་བརྗོད་པ་ནི་འོན་ཏེ་གཞན་ལ་ཞེས་བྱ་བའོ། །ཐབས་མེད་པ་ཁོ་ན་ཞེས་བྱ་བ་ནི་ཚད་མ་མེད་པ་ཁོ་ནའོ། །དེ་
ལྟན་ཡང་གཞན་གྱི་སེམས་རྟོགས་པ་གྲུབ་པོ་ཞེས་བརྗོད་པ་ནི་དེ་ལྟ་ཡིན་པ་ཞེས་བྱ་བའོ། །འོན་ཏེ་འདི་ཡང་ཞེས་བྱ་བ་ནི་གཞན་ལ་ཐབས་མེད་པར་རྟོགས་པའོ། །ལན་དེ་ལྟ་ན་ནི་འོ་ན་ཞེས་བྱ་བའོ། །ཡིད་ཆེས་པས་མེད་པ་ནི་ཅི་གཞན་ལ་ཐབས་མེད་པར་རྟོགས་པ་ཡོད་དམ་འོན་ཏེ་མེད་ཅེས་བྱ་བར་རོ། །དེས་ན་འཇིག་རྟེན་རྒྱང་འཕེན་ལས་ཕ་རོལ་དུ་གྱུར་པའི་གཞན་ཇི་ལྟར་རྟོགས་པར་བྱེད་དེ་ཐབས་མེད་པར་ན་མི་རྟོགས་པ་ཁོ་ནའོ་ཞེས་བྱ་བའི་དོན་ཏོ། །བདག་རེ་ཞིག་ཅེས་བྱ་བ་ནི་དོགས་པའོ། །དེ་ལྟར་ཞེས་བྱ་བ་ནི་ཐབས་མེད་པ་ཁོ་ནར་རོ། །འོ་ན་ཞེས་བྱ་བ་ནི་ལན་ནོ། །བརྗོད་པ་ནི་གཞན་རྟོགས་པའི་དོན་དུ་ཡིན་པས་གལ་ཏེ་ཐབས་མད་པ་ཁོ་ནར་ཏེ་རྟོགས་ན་འོ་ན་བརྗོད་པས་ཅི་བྱ། ཇི་ལྟར་བདག་ཚད་མ་མེད་པར་དེ་རྟོགས་པ་དེ་བཞིན་དུ་གཞན་ཡང་ཡིན་ནོ་ཞེས་དོགས་པ་ནི་གཞན་ཡང་ཞེས་བྱ་བའོ། །མ་ཡིན་ཏེ་ཞེས་བྱ་བ་ལ་སོགས་པ་ནི་ལན་ནོ། །ཇི་ལྟར་བདག་རྟོགས་པ་དེ་བཞིན་དུ་གཞན་ཡང་ཡིན་ནོ་ཞེས་བྱ་བ་འདི་ལ་ཚད་མ་ཅི་ཡང་མེད་དེ་ཞེས་བྱ་བའི་དོན་ཏོ། །གང་གི་ཕྱིར་བརྗོད་པ་ལ་སོགས་པའི་འཇུག་པ་ལས་དེ་ཡོད་པ་ངེས་པར་ངེས་ནའོ། །གང་གི་ཕྱིར་བརྗོད་པའི་ཕྱིར་ཏེ་ཞེས་ཚུལ་དུ་རྗེས་སུ་དཔག་པ་སྤངས་ནས་གནས་པར་ནུས་པ་མ་ཡིན་པ་དེས་ན། གཞན་ན་འཇིག་རྟེན་རྒྱང་འཕེན་གྱིས་ཀྱང་རྗེས་སུ་དཔག་པ་ཁས་བླང་བར་བྱ་བ་ཡིན་ནོ། །གལ་ཏེ་རྗེས་སུ་དཔག་པ་ཁས་བླངས་མོད། ཚད་མར་གོ་ཇི་ལྟར་འགྱུར་སྙམ་ན། སླུ་མེད་ཕྱིར་ཏེ་ཞེས་གསུངས་སོ། །གལ་ཏེ་སྨྲ་བ་ཉིད་ལ་ཐམས་ཅད་མཁྱེན་པ་མ་ཡིན་པ་དང༌། འཆི་བའི་སེམས་ཉིད་ལ་ཡང་མཚམས་སྦྱོར་བ་མེད་པས་ཁྱབ་པ་ཡིན་ཡང་ངེས་པར་བྱེད་པ་མ་ཡིན་ན། འོ་ན་གཞན་ལ་ཡང་ཡིད་བརྟན་དུ་ཅི་ཡོད་དེ་དེའི་མཚན་ཉིད་ཅན་ཡིན་པའི་ཕྱིར་རོ། །དེས་མི་སླུ་བ་མ་ཡིན་ཏེ། དེ་ལྟར་ཉེ་བར་བསྟན་པ་ཐོབ་པས་མི་བྱེད་པའི་ཕྱིར་རོ་ཞེས་དོགས་པ་བསུ་བ་ནི། གལ་ཏེ་ཞེས་བྱ་བའོ། །ལན་འདེབས་པ་ནི་རྟགས་ལོག་སྟེ་རྟགས་ངན་པ་མཐོང་བ་གང་ཡིན་པ་དེ་ནི་དེ་འདྲ་སྟེ། རྟགས་མ་ཡིན་ནོ་སྙམ་པས་རྟགས་དེ་མ་ངེས་ཏེ་རྣམ་པར་མི་འབྱེད་པ་ཡིན་ཏེ། སྨྲ་བ་ཉིད་ལ་སོགས་པ་ནི་ཐམས་ཅད་མཁྱེན་པ་ཉིད་དང་འགལ་བ་མ་ཡིན་པ་ལ་སོགས་པ་འགལ་བ་ཡང་མ་ཡིན་འགལ་བ་པའི་འབྲས་བུ་ཡང་མ་ཡིན། དེས་ཁྱབ་པ་ཡང་མ་ཡིན་ཏེ། དེས་ན་ཐེ་
ཚོམ་ཟ་བ་ཡིན་ནོ། །ཤིན་ཏུ་ཕྱེ་བའི་འབྲས་བུའམ་ཁྱབ་པར་བྱ་བ་དེ་ལས་ནི་ངེས་པ་ཡིན་ནོ། །ལ་ལར་ཞེས་བྱ་བ་ནི་དེའི་བུ་ལ་སོགས་པར་རོ། །བཟློག་པར་ནི་ཚད་མ་ལ་མིན་པར་རོ། །ཇི་ལྟར་སྣང་བ་ཡིན་ཞེ་ན་འབྲེལ་བ་མེད་པས་ཞེས་གསུངས་སོ། །འབྲེལ་པ་མེད་པན་ཡིད་བརྗོད་པ་ནི་དེའི་བུ་ཉིད་ནི་ཞེས་བྱ་བའོ། །ཕ་དེ་ནི་ཚོགས་པ་གཅིག་ཡིན་ལ་དེ་ནི་དེ་དང་འབྲེལ་པ་ཉིད་དོ་ཞེས་དོགས་པ་ནི་ཚོགས་པ་གཅིག་ལ་ཞེས་བྱ་བའོ། །དེའི་བུ་ཉིད་དང་སྔོ་བསངས་ཉིད་ནི་ཚོགས་པ་གཅིག་ལ་རག་ལས་པ་དེས་ན་རང་བཞིན་མཚུངས་པ་ཉིད་ཡིན་ཏེ་ངོ་བོ་གཅིག་ཡིན་ནོ། །དེའི་བདག་ཉིད་ཡིན་ནོ་ཞེས་བྱ་བའི་དོན་ཏོ། །ལན་དུ་དེའི་བདག་ཉིད་མ་ཡིན་ནོ། །ཅིའི་ཕྱིར་ཞེ་ན། ཚོགས་པ་ཞེས་གསུངས་སོ། །ཇི་ལྟར་ཞེ་ན་ལས་དང་ཞེས་གསུངས་སོ། །སྔོ་བསངས་ཉིད་ལ་ནི་རྒྱུ་ལྷག་མ་ཡོད་པའི་ཕྱིར་རོ་ཞེས་བྱ་བའི་དོན་ཏོ། །ཚོགས་པ་གཅིག་ལ་རག་ལས་པ་ཉིད་དུ་ཁས་བླངས་པས་ཉེས་པ་བརྗོད་པ་ནི། ཚོགས་པ་གཅིག ། ལ་རག་ལས་པ་ཡིན་ལ་ནི་ཞེས་བྱ་བའོ། །ཚོགས་པ་གཅིག་ལ་རག་ལས་པའི་གཟུགས་དང་རོ་དག་ནི་དུས་གཅིག་ཁོ་ནར་སྐྱེ་བ་ཡིན་ནོ། །དེ་བཞིན་དུ་སྔོ་བསངས་ཉིད་དང་དེའི་བུ་དག་ཀྱང་གྱུར་ན་དེ་ལྟ་ན་ཡང་མ་ཡིན་ནོ། །དང་པོ་ནི་བུར་འགྱུར་བས་ཕྱིས་ནི་སྔོ་བསངས་སུ་འགྲོ་བ་དག་ཀྱང་འགྱུར་བའི་ཕྱིར་རོ།། གང་གི་ཕྱིར་དེ་དང་འབྲེལ་པ་མ་ཡིན་པའི་དེས་ན་རྟགས་ཀྱི་ཞེས་བྱ་བའོ། །འདི་ལྟ་བུའི་ཚུལ་ཅན་ཞེས་བྱ་བ་ནི། སྨྲ་བ་ཉིད་ལ་སོགས་པ་དང་འདྲ་བ་དག་གོ །གང་ཞིག་མི་འཁྲུལ་ཏེ་གང་ཡང་མ་ཡིན་ནོ། །འགལ་བའི་འབྲས་བུའམ་ཁྱབ་བྱ་ནི་འགའ་ཡང་གྲུབ་ཡང་གྲུབ་པ་མེད་དོ། །རེས་འགའ་དེ་ལ་ཡོད་པ་ཙམ་གྱིས་ནི་དེའི་འབྲས་བུའམ་དེའི་ཁྱབ་བྱར་མི་འགྲུབ་སྟེ། ཧ་ཅང་ཐལ་བའི་ཕྱིར་རོ་ཞེས་བྱ་བའི་དོན་ཏོ། །དངོས་པོ་གང་ལས་དངོས་པོ་འགའ་ལ་རྒོལ་བ་དེའི་རྟོགས་པ་གྲུབ་པར་འགྱུར་པ་སྟེ། ངེས་པའི་རང་བཞིན་ངེས་པའི་མི་མཐུན་པའི་ཕྱོགས་ལས་ལྡོག་པ་ངེས་པར་གྱུར་པའི་དངོས་པོ་ནི་དེ་ལྟར་རྟོགས་པའི་ཡུལ་དེ་ལས་སྐྱེ་བས་འབྲས་བུའམ། དེའི་ངོ་བོ་ཁྱབ་པར་བྱ་བ་ཡིན་པར་གདོན་མི་ཟའོ། །དེ་ལས་ངེས་པ་ནི་དེའི་འབྲས་བུ་འམ་ཁྱབ་པར་བྱ་བ་མ་ཡིན་པ་མི་སྲིད་དོ། །ངེས་པ་ཉིད་ལ་དེ་ལྟར་བརྗོད་པའི་ཕྱིར་རོ། །གལ་ཏེ་རྗེས་སུ་དཔག་པ་ཐམས་ཅད་དེའི་བུ་ཉིད་ལ་སོགས་པ་དང༌། མཚུངས་པ་
མ་ཡིན་ནོ་ཞེས་བྱ་བ་འདི་ག་ལས་ཡིན་སྙམ་ན་དེའི་བདག་ཉིད་དང་དེ་ལས་ཞེས་སྨོས་སོ། །གལ་ཏེ་གང་ལ་བསྒྲུབ་པར་བྱ་བ་འཁྲུལ་པ་མེད་པར་རྟོགས་པ་དེ་ཉིད་རྟགས་མ་ཡིན་ནམ། དེའི་བདག་ཉིད་དང་དེ་ལས་བྱུང་བའི་འབྲེལ་པས་ནི་ཅི་བྱ་སྙམ་ན། གང་ལས་ཞེས་བྱ་བའོ། །དེ་ལྟ་མ་ཡིན་ན་ནི་ཞེས་བྱ་བ་ནི་དེའི་བདག་ཉིད་དེ་ལས་བྱུང་བའི་འབྲེལ་པ་མེད་ནའོ། །ཧ་ཅང་ཐལ་བ་ནི་ཁས་བླངས་པར་ཡང་མི་འཐད་དོ་ཞེས་གསུངས་པ་ནི། ཐམས་ཅད་ལས་ནི་ཞེས་གསུངས་སོ། །གང་གི་ཕྱིར་གང་ཡང་རུང་བ་ལས་རྟོགས་པ་ནི་འཁྲུལ་པ་ཡིན་པར་དེའི་ཕྱིར་རོ། །གལ་ཏེ་འབྲེལ་པ་དུ་མ་ཡོད་པ་མ་ཡིན་ནམ། དེས་ན་དེའི་བདག་ཉིད་དང་དེ་ལས་བྱུང་བའི་འབྲེལ་པ་ཉིད་དང་ལྡན་པ་ཞེས་ཅི་སྟེ་ས་བརྗོད་སྙམ་ན། འབྲེལ་པ་ནི་བཀག་པའི་ཕྱིར་རོ། །ཚོགས་པ་གཅིག་ལ་རག་ལུས་པའི་འབྲེལ་པས་ཡང་དེ་ལས་བྱུང་བའི་མཚན་ཉིད་ཁོ་ན་ཡིན་ནོ་ཞེས་བརྗོད་པ་ནི་ཚོགས་པ་གཅིག་ལས་ཞེས་བྱ་བའོ། །དེ་ཉིད་ལས་ཞེས་བྱ་བ་ནི་འབྲེལ་པ་རྣམ་པ་གཉིས་ཁོ་ན་ལས་སོ། །དེ་ཡོད་ཀྱང་མི་འཁྲུལ་བ་ཇི་ལྟར་ཞེ་ན། འདི་ལྟར་ཞེས་གསུངས་སོ། །གཞན་དུ་དེ་མེད་ཀྱང་འགྱུར་བ་མེད་ཀྱང་དེས་ཀྱང་ཇི་ལྟར་དེ་ལ་མི་འཁྲུལ་པ་ཡིན་སྙམ་ན། དེ་དག་རང་བཞིན་ཞེས་བྱ་བ་སྟེ། འབྲས་བུ་དང་རང་བཞིན་དག་གི་རང་བཞིན་བསྒྲུབ་པར་བྱ་བ་མེད་ན་མི་འབྱུང་བ་ཉིད་དཔེ་ལ་མཐོང་བ་ཡིན་པ་ཉིད་གཞན་ཡང་རང་བཞིན་ཡིན་ཏེ། དེས་ན་ཇི་ལྟར་འཁྲུལ་པར་འགྱུར། རེ་ཞིག་ཕྱེད་ཕྱི་མ་འཆད་པ་ནི་འབྲས་བུ་དང་ཞེས་བྱ་བའོ། །དེ་ཉིད་ཅེས་བྱ་བ་བསྒྲུབ་པར་བྱ་བ་མེད་ན་མི་འབྱུང་བ་ཉིད་དོ། །དེའི་བུ་ཉིད་ལ་སོགས་པ་ནི་འདི་ཡོད་པ་མ་ཡིན་ནམ། ངེས་པ་ཐམས་ཅད་དེ་དང་མཚུངས་པ་ཉིད་དུ་ཇི་ལྟར་འགྱུར་ཞེས་བརྗོད་པ་ནི། དེའི་བུ་ཞེས་བྱ་བ་ལ་སོགས་པའོ། །ད་ནི་ཕྱེད་དང་པོ་འཆད་དེ་རྒྱུ་དང་ཞེས་བྱ་བའོ། །གལ་ཏེ་རེ་འགའ་རྒྱུ་དང་རང་གི་ངོ་བོ་ཡིན་ཡང་གཞན་གྱི་ཚེ་ཡང་དེ་ལྟར་ཡིན་པར་ག་ལས་ཤེ་ན། དེ་ལྟར་རྟོགས་པ་ཞེས་གསུངས་སོ། །ཅི་སྟེ་ཡང་དོན་དམ་པའི་ཚད་མ་སྤྱོད་པ་ན་ཐ་སྙད་མེད་པར་ཐལ་བ་ཅི་སྟེ་བརྗོད་སྙམ་ན་འདི་ནི་ཞེས་གསུངས་སོ། །གཞན་དོན་དམ་པའི་སྐབས་ནི་མ་ཡིན་ནོ། །དེའི་ཕྱིར་ཐ་སྙད་འཆད་པར་ཐལ་བར་གྲུབ་པ་ནི་འཐད་པ་ཡིན་ལ། ཐ་སྙད་མེད་པ་ཡང་མ་ཡིན་ཏེ། དེས་ན་ཐ་
སྙད་པ་དག་གིས་ཞེས་བྱ་བའོ། །གལ་ཏེ་རྗེས་སུ་དཔག་པ་ནི་འཇུག་པའི་ཐབས་མ་ཡིན་ན། དེས་ན་ཇི་ལྟར་དེ་དོན་དུ་གཉེར་བ་ཞེས་དོགས་པ་ནི་ཐབས་མེད་པར་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །ཅིའི་ཕྱིར་ཞེ་ན། རབ་ཏུ་གྲུབ་པའི་ཕྱིར་ཞེས་བྱ་བ་སྟེ་ཐ་སྙད་དུའོ། །རྣམ་པར་དཔྱད་ན་ཞེས་བྱ་བ་ནི་དོགས་པའོ། །མ་ཡིན་ཏེ་ཞེས་བྱ་བ་ནི་རྩོད་པ་འགོག་པའོ། །ཅིའི་ཕྱིར་ཞེ་ན། རྣམ་པར་དཔྱོད་པ་ཡང་ཞེས་བྱ་བའོ། །རྗེས་སུ་དཔག་པ་སྤངས་ཀྱང་དེ་གདོན་མི་ཟ་བར་ཁས་བླངས་པར་འགྱུར་རོ་ཞེས་བྱ་བའི་དོན་ཏོ། །འདི་ཉིད་དཔེའི་སྒོ་ནས་བཞག་གང་དུ་མཛད་པ་ནི་དེ་ནི་ཞེས་བྱ་བ་སྟེ་ཚུལ་ལུགས་དེ་ནའོ། །གང་ཞེ་ན་ལམ་དུ་ཞེས་བྱ་བའོ། །འབྲས་བུ་དང་རང་བཞིན་གྱི་རྟགས་དང་འབྲེལ་བའི་ཕྱིར་གོ་བར་བྱེད་པ་ཉིད་ཡིན་ནོ། །མི་དམིགས་པ་གོ་ཅི་ལྟར་དེ། དེ་མེད་པའི་ཕྱིར་རོ་ཞེས་དོགས་པ་བསུ་བ་ནི་འོ་ན་ཞེས་བྱ་བའོ། །འབྲེལ་པ་རྣམ་པ་གཉིས་སྲིད་པ་ཁོ་ན་ལས་གོ་བར་བྱེད་པ་ཡིན་ནོ་ཞེས་བརྗོད་པ་ནི་དེའི་བདག་ཉིད་དང་ཞེས་བྱ་བའོ། །རང་གི་ངོ་བོ་ནི་ཤིང་ལ་སོགས་པར་རང་རྒྱུན་མེ་ལ་སོགས་པ་ལའོ། །བལྟར་རུང་ཞེས་བྱ་བ་ནི་རང་བཞིན་ཁྱད་པར་ཅན་དུ་གྱུར་པའོ། །མཐོང་བའི་རྒྱུ་གཞན་དག་ཡོད་པར་ཞེས་བྱ་བ་ནི་རྐྱེན་གཞན་ཚང་བའོ། །སྣང་བ་མེད་ན་ནི་ཞེས་བྱ་བ་ནི་ཇི་ལྟར་ཡོད་ཅེས་འབྲེལ་ཏོ། །འདིར་ན་རང་བཞིན་མི་དམིགས་པ་བསྟན་ཏོ། །དེ་དང་ལྡན་པའང་ཞེས་བྱ་བ་ནི་རིམ་པ་གཞན་དུ་བྱས་པའོ། །རང་གི་ངོ་བོ་ངེས་པ་དང་ལྡན་པ་སྟེ། ཇི་སྐད་བརྗོད་པའི་མི་དམིགས་པ་དང་ལྡན་པ་ཞེས་བྱ་བ་ནི་མི་འཐད་དེ། རྒྱུ་དང་ཁྱབ་པར་བྱེད་པ་མི་དམིགས་པ་དག་གིས་ནི། དམིགས་པར་མི་རུང་པ་དང་ལྡན་པ་དག་ཁོ་ན་མེད་པར་ངེས་པའི་ཕྱིར་རོ། །འདིས་ནི་རྒྱུ་དང་ཁྱབ་པར་བྱེད་པ་དག་བཤད་པ་ཡིན་ནོ། །དེ་ལྟ་མ་ཡིན་ན་ཞེས་བྱ་བ་ནི་འབྲེལ་པ་ཉིད་མ་ཡིན་ནའོ། །གལ་ཏེ་དེ་དང་འབྲེལ་པའང་ཡིན་ལ་དེ་མེད་པར་ཡང་ཡོད་པ་ལ་འགལ་བ་ཅི་ཡོད་ཅེ་ན། གལ་ཏེ་དེ་མེད་ན་ཞེས་བྱ་བའོ། །དེ་མེད་པ་ན་ཡོད་པ་ཡང་ཡིན་ལ་མེད་པ་ཡང་ཡིན་ནོ་ཞེས་བྱ་བ་ནི་འགལ་བ་ཡིན་ལ་འགྲེལ་པ་ཡང་མེད་པ་ཉིད་ཡིན་ནོ། །གལ་ཏེ་དེ་ལྟ་ན་ཡང་རྗེས་སུ་དཔག་པ་ཚད་མ་ཡིན་ནོ་ཞེས་བསྒྲུབས་པར་ཇི་ལྟར་འགྱུར་ཏེ། ཚད་མར་ཁས་མ་བླངས་ཀྱང་ཁོ་བོ་ཅག་ལ་ཉེས་པ་མེད་པའི་ཕྱིར་རོ་ཞེས་དོགས་པ་ནི་གང་གི་ཕྱིར་ཞེས་བྱ་བའོ། །སྤྱི་ཞེས་
བྱ་བ་ལྐོག་ཏུ་གྱུར་པའི་བློ་ཚད་མ་མ་ཡིན་ན་ཡང་རང་གི་ཁས་བླངས་པའི་ལྐོག་ཏུ་གྱུར། ཁྱིམ་དང་ཀུན་དགའ་ར་བ་ལ་སོགས་པ་དེ་མེད་འཐོབ་འགྱུར་ཏེ། བདག་ཅག་གིས་འདོད་པའི་འཇིག་རྟེན་ཕ་རོལ་གྱི་དངོས་པོ་བཞིན་ནོ། །འོན་ཀྱང་ཡང་ཁྱིམ་དང་ཀུན་དགའ་ར་བ་ལ་སོགས་པ་མཐོང་བ་དག་ནི་ཡང་མཐོང་བ་ཡོད་པ་ཡིན་ཏེ། དེས་ན་མེད་པ་མ་ཡིན་ལ། འཇིག་རྟེན་ཕ་རོལ་ནི་ནམ་ཡང་མ་མཐོང་བས་ན་མེད་པར་འགྱུར་རོ་ཞེས་དོགས་པ་ནི། གལ་ཏེ་དབང་རྣམས་ཀྱིས་ཞེས་བྱ་བའོ། །ཁྱིམ་དང་ཀུན་དགའ་ར་བ་ལ་སོགས་པ་ནི་དབང་པོ་མཐོང་བ་ལས་ཕྱིས་མ་མཐོང་ཡང༌། ཡང་ཕྱིས་མཐོང་བ་ཡིན་གྱི་འཇིག་རྟེན་ཕ་རོལ་ནི་དེ་ལྟར་མ་ཡིན་ནོ་ཞེས་བྱ་བའི་དོན་ཏོ། །ལན་ནི་དེ་ཡིན་ཞེས་བྱ་བ་སྟེ། རྣམ་གྲངས་ཀྱིས་མཐོང་བ་ཞེས་བྱ་བ་དེ་ནི་མ་ཡིན་ཏེ། ཤེས་པ་སྐྱེས་པར་ནུས་པའི་བདག་ཉིད་ཀྱིས་དབང་པོ་དང་འབྲས་བུ་ཙམ་སྐྱེས་པའི་བདག་ཉིད་ཀྱི་ནུས་པ་ལའོ། །ཅིའི་ཕྱིར་ཞེ་ན་དབང་པོ་བློ་ནི་སྲིད་ཕྱིར་ཞེས་གསུངས་སོ། །དབང་པོ་དང་ནུས་པ་ལ་སོགས་པ་དག་ནི་དབང་པོའི་བློས་འཛིན་པ་མ་ཡིན་ཏེ། དེས་ན་འཇིག་རྟེན་ཕ་རོལ་བཞིན་དུ་ཁྱེད་ཉིད་ཀྱིས་འདོད་པའི་དབང་པོ་ལ་སོགས་པ་མེད་པར་ཐལ་ལོ་ཞེས་བྱ་བའི་དོན་ཏོ། །དེ་ཡང་མེད་མོད་ཅེས་བྱ་བ་ནི་མི་རིགས་ཏེ། རྒྱུ་མེད་པར་མཐོང་བ་ཁས་ལེན་པ་འགལ་བའི་ཕྱིར་རོ་ཞེས་གསུངས་པ་ནི་མེད་པར་རྟོགས་པ་ཞེས་བྱ་བའོ། །གལ་ཏེ་དབང་རྣམས་ཀྱིས་ཞེས་བྱ་བ་རྣམ་པར་འགྲེལ་པ་ནི་འོན་ཏེ་ཞེས་བྱ་བའོ། །རྣམ་པ་དེ་ལྟ་བུ་ཉིད་ཅེས་བྱ་བ་ནི་འཇིག་རྟེན་ཕ་རོལ་དང་མཚུངས་པ་དག་ཁོ་ནའོ། །དེ་མིན་ཞེས་བྱ་བའི་འང་གི་སྒྲ་ཡོད་པས་འཕངས་པའི་ལན་ཉིད་རེ་ཞིག་བརྗོད་པ་ནི་གང་གི་ཚེ་ཞེས་བྱ་བའོ། །མ་མཐོང་བའི་མོད་ཁོ་ན་ལ་ཁྱིམ་དང་ཀུན་དགའ་ར་བ་ལ་སོགས་པ་དེ་ཉིད་ཀྱི་ཚེ་མཐོང་བ་ལས་ཡོད་པར་གྲུབ་མོད། དེ་ལས་སྔར་ནི་ཡོད་པར་མི་གྲུབ་སྟེ་ཚད་མ་མེད་པའི་ཕྱིར་རོ། །དེའི་ཚེ་སྲོག་ཆགས་གཞན་གྱིས་མཐོང་བ་ཡིན་ནོ་ཞེས་དོགས་པ་ནི་སྔར་ཡང་ཞེས་བྱ་བའོ། །འཇིག་རྟེན་ཕ་རོལ་ནི་ལུས་ཀྱང་རྟོགས་པ་མ་ཡིན་ཏེ། དེས་ན་མེད་པ་ཁོ་ནའོ་ཞེས་བྱ་བའི་དོན་ཏོ། །འཇིག་རྟེན་ཕ་རོལ་ཡང་ཞེས་བྱ་བ་ནི་ལན་ནོ། །གཞན་གྱི་རྟོགས་པ་མེད་པ་བཞིན་དུ་ཁྱིམ་དང་ཀུན་དགའ་ར་བ་ལ་སོགས་པ་དག་ལ་ཡང་དེའི་རྟོགས་པ་སྒྲུབ་པར་བྱེད་པའི་ཚད་མ་ནི་འགའ་ཡང་ཡོད་པ་མ་
ཡིན་ནོ་ཞེས་བརྗོད་པ་ནི། འཇིག་རྟེན་ཕ་རོལ་ལས་ཞེས་བྱ་བའོ། །གཞན་བུམ་པ་དང་སྣམ་བུ་ལ་སོགས་པ་ཁྱེད་ཀྱིས་མཐོང་བ་ཉིད་ཀྱང་ངོ༌། །སྣམ་བུའི་རྟོགས་པ་དང་རྗེས་སུ་མཐུན་པའི་ཐ་སྙད་མཐོང་བ་ལས་གཞན་རྟོགས་པར་འགྲུབ་པོ་ཞེས་དོགས་བ་བསུ་བ་ནི་དེ་ལྟར་ཞེས་བྱ་བའོ། །ལན་ནི་རྗེས་སུ་དཔག་པ་ཞེས་བྱ་བའོ། །འང་གི་སྒྲས་འཕངས་པའི་སུན་འབྱིན་པ་བརྗོད་ནས་དེ་མིན་ཞེས་བྱ་བ་རྣམ་པར་འགྲེལ་པ་ནི་དབང་པོའི་འམ་ཞེས་བྱ་བའོ། །རུང་བ་ཉིད་ལ་ཞེས་བྱ་བ་ནི་རྒྱུ་རྣམས་ཀྱི་ནུས་པ་ལའོ། །འོ་ན་ཁྱེད་ཀྱིས་དེ་ཅི་ལྟར་རྟོགས་ཤེ་ན། འབྲས་བུ་རང་ཞེས་གསུངས་སོ། །དེ་དག་ཅེས་བྱ་བ་ནི་དབང་པོ་དང་རུང་བ་དག་གོ །དེས་ན་དབང་པོ་ལ་སོགས་པ་ལ་ཡང་མེད་པར་འགྱུར་རོ་ཞེས་དོགས་པའོ། །དེ་ལྟ་ཡིན་མོད་ཅི་སྐྱོན་སྙམ་ན། དེ་མེད་ན་ནི་ཞེས་གསུངས་སོ། །དབང་པོ་དང་རུང་བ་དབང་མད་ནའོ། །དེ་ཉིད་ཀྱི་ཕྱིར་རྩ་བར་ཡང༌། །བློ་དང་སྐྱེ་བ་རྒྱུ་མེད་འགྱུར། །ཞེས་ཟླས་དབྱེ་བ་ཡིན་ནོ། །རྒྱུ་མཚན་མེད་པ་ཉིད་ཀྱང་མ་ཡིན་ཏེ་དེའི་ཕྱིར་རོ། །འབྲས་བུ་མཐོང་བ་དང་ཞེས་བྱ་བ་ནི་རྗེས་སུ་འགྲོ་བའོ། །དེ་ལ་ཞེས་བྱ་བ་ནི་དབང་པོ་ལ་སོགས་པའོ། །དེས་ན་ཞེས་བྱ་བ་ནི་རྗེས་སུ་དཔག་པར་བྱ་བ་ཡང་ཡོད་པས་ནའོ། །དེ་ལྟ་བུ་ཉིད་དོ་ཞེས་བྱ་བ་ནི་དབང་པོ་ལ་སོགས་པ་བཞིན་དུ་ཤིན་ཏུ་ལྐོག་ཏུ་གྱུར་པ་རྗེས་སུ་དཔག་པར་བྱ་བ་ནི་ཡོད་པ་ཁོ་ནའོ། །གང་གི་ཕྱིར་ལྐོག་ཏུ་གྱུར་པ་མངོན་སུམ་འཇུག་པ་མ་ཡིན་པ་དེས་ནའོ། །སྤྱི་ཞེས་བྱ་བ་ནི་ལྐོག་ཏུ་གྱུར་པའོ། །མངོན་སུམ་གྱིས་སྤྱི་མི་རྟོགས་སོ་ཞེས་བྱ་བ་འདི་ག་ལས་ཤེ་ན། འདི་ལྟར་རྣམ་རྟོག་མེད་ཉིད་ཀྱིས་ན་ཞེས་བྱ་བའོ། །གཏན་ཚིགས་ཀྱི་གཏམ་པའོ། །འོ་ན་ཇི་ལྟར་སྤྱི་འཛིན་ཞེ་ན། རྣམ་རྟོག་མེད་པར་ཞེས་གསུངས་ཏེ། སྤྱི་ནི་རྣམ་པར་རྟོག་པ་ཁོ་ནས་འཛིན་པ་ཡིན་ནོ་ཞེས་བྱ་བའི་དོན་ཏོ། །སྤྱིར་འཛིན་པ་ཡང་རྗེས་སུ་དཔག་པ་ཁོ་ན་ཡིན་ནོ་ཞེས་བརྗོད་པ་ནི། དེ་ཕྱིར་ཞེས་བྱ་བ་མངོན་སུམ་མི་འཇུག་པའི་ཕྱིར་རོ། །དབང་པོ་ལ་སོགས་པ་དེ་ལ་རྗེས་སུ་དཔག་པ་ཉིད་ཚད་མ་ཡིན་གྱི་མངོན་སུམ་ནི་མ་ཡིན་ནོ། །དེ་ལྟར་གཞལ་བྱ་རང་གི་མཚན་ཉིད་གཅིག་ཁོ་ནའོ། །རང་དང་སྤྱིའི་མཚན་ཉིད་བཞིན་གྱི་རྟོགས་པའི་ཡུལ་ཡིན་ཏེ། དེས་ན་མཚན་མ་གཅིག་ཁོ་ན་ཡིན་ནོ་ཞེས་བྱ་བ་གསལ་བ་ཡིན་ནོ། །རྟོག་པའི་དབྱེ་བ་ཉིད་ཚད་མའི་དབྱེ་བ་ཡིན་པའི་ཕྱིར་རོ། །ད་ནི་རང་དང་སྤྱིའི་མཚན་
ཉིད་ཅན་གཅིག་ཏུ་གྱུར་པའི་གཞལ་བྱ་གསུམ་པ་ཡོད་པའི་ཕྱིར་དེའི་ཡུལ་ཅན་ཚད་མ་གསུམ་པར་འགྱུར་རོ་ཞེས་བྱ་བའི་རྩོད་པ་འགོད་པ་ནི་འོ་ན་ཁ་དོག་ལ་སོགས་པ་ཞེས་བྱ་བའོ། །གལ་ཏེ་སྤྱི་དང་ཁྱད་པར་རང་བཞིན་གྱིས་གཞལ་བྱ་རྣམས་པ་གཉིས་ཁོ་ན་ཡིན་ནོ་ཞེས་བྱ་བར་ངེས་པ་ཡིན་ན། འོ་ན་རང་གི་མཚན་ཉིད་འདི་མི་རྟག་པ་ལ་སོགས་པའི་རྣམ་པ་སྤྱིའི་བདག་ཉིད་ཅན་དག་གིས་འཛིན་པ་གང་ཡིན་པ་དེ་ཅི་ལྟར་དེ་རྟོགས་པར་མི་འགྱུར་ཏེ། རྟོགས་པ་ཡང་ཡིན་ཏེ་དེས་ན་དེའི་བློ་ནི་ཚད་མ་གཞན་ཡིན་ནོ། །ཇི་ལྟར་ཞེ་ན་འདི་ནི་ཞེས་བྱ་བའོ། །དེས་ཚད་མ་གཞན་ཡིན་ཏེ་མངོན་སུམ་དང་རྗེས་སུ་དཔག་པ་དག་ལས་གཅིག་གིས་ཀྱང་རང་བཞིན་གཉིས་ཀ་མི་འཛིན་པའི་ཕྱིར་རོ། །མངོན་སུམ་དང་རྗེས་སུ་དཔག་པ་དག་ལས་གཅིག་གིས་ཀྱང་རང་བཞིན་གཉིས་ཀ་མི་འཛིན་ཏོ་ཞེས་བྱ་བ་འདི་ག་ལས་ཤེ་ན། ཁྱོད་ནི་ཞེས་བྱ་བའོ། །རྩོད་པ་འདི་ཉིད་རྣམ་འགྲེལ་དུ་གསལ་བར་བྱེད་པ་ནི་གཞལ་བྱ་དེས་ན་ཞེས་བྱ་བ་ནི་རང་གི་མཚན་ཉིད་ནི་མངོན་སུམ་ཁོ་ནའི་ཡུལ་ཡིན་ལ། སྤྱི་ནི་རྗེས་སུ་དཔག་པ་ཁོ་ནའི་ཡིན་ནའོ། །རང་གི་མཚན་ཉིད་ཀྱི་ཁ་དོག་སྤྱི་མི་རྟག་པ་ཉིད་རྟོགས་པར་མི་འགྱུར་རོ། །རྟོགས་པ་ཡང་ཡིན་ཏེ། དེས་ན་གཉིས་ཀའི་བདག་ཉིད་དེའི་བློ་ནི་ཚད་མ་གཞན་ཉིད་དུ་འགྱུར་རོ། །མངོན་སུམ་ནི་མ་ཡིན་ཏེ། སྤྱིའི་ཆ་སྣང་བའི་ཕྱིར་རོ། །རྗེས་སུ་དཔག་པ་ཡང་མ་ཡིན་ཏེ། ཁྱད་པར་གྱི་ཆ་སྣང་བའི་ཕྱིར་རོ། །རྟགས་མེད་པའི་ཕྱིར་ཡང་རྗེས་སུ་དཔག་པ་མ་ཡིན་ནོ་ཞེས་བརྗོད་པ་ནི་རྟགས་མེད་པར་ནི་ཞེས་བྱ་བའོ། །གཞལ་བྱ་ཞེས་བྱ་བ་ནི་འཆད་པའོ། །དེ་ལྟ་ན་ཡང་ཚད་མ་གཞན་ཇི་ལྟར་ཡིན་ཞེ་ན། ཁ་དོག་ལ་སོགས་པ་ཞེས་བྱ་བའོ། །གཞལ་དུ་ཞེས་བྱ་བ་ནི་མངོན་སུམ་དང་རྗེས་སུ་དཔག་པ་ལས་ཐ་དད་པར་རོ། །ཇི་ལྟར་མཚན་མ་གཞན་ཡིན་ཞེ་ན། རྟགས་མེད་པར་ཡང་ཞེས་བྱ་བའོ། །རྗེས་སུ་དཔག་པ་མ་ཡིན་མོད། མངོན་སུམ་ཅི་སྟེ་མ་ཡིན་ཞེ་ན། སྤྱི་འཛིན་པའི་ཕྱིར་ཞེས་གསུངས་སོ། །སྤྱི་འཛིན་པའི་ཕྱིར་མངོན་སུམ་མ་ཡིན་ནོ། །རྗེས་སུ་དཔག་པར་གོ་ཅི་སྟེ་མི་འགྱུར་ཞེ་ན། རང་གི་མཚན་ཉིད་ལ་ནི་ཞེས་གསུངས་ཏེ། འཛིན་པ་ཡང་མ་ཡིན་ནོ་ཞེས་འབྲེལ་ཏོ། །རང་གི་མཚན་ཉིད་འཛིན་པར་རྗེས་སུ་དཔག་པར་ཇི་ལྟར་མི་འགྱུར་ཞེ་ན། རྟགས་མེད་པར་ཞེས་སྨྲས་སོ། །འོ་ན་ཇི་ལྟར་མངོན་སུམ་མ་ཡིན་ཞེས་དོགས་ན།
སྔར་བཤད་ཟིན་པའི་རྒྱུ་མཚན་ཉིད་དྲན་པར་བྱེད་པ་ནི་ཅི་ཡང་ཞེས་བྱ་བའོ། །ཁྱད་པར་མཐོང་བ་ནི་རྟགས་ཡོད་ཀྱང་རྗེས་སུ་དཔག་པ་མ་ཡིན་ཏེ། སྤྱིའི་ཡུལ་ཅན་མ་ཡིན་པའི་ཕྱིར་རོ་ཞེས་བརྗོད་པ་ནི། ཁྱད་པར་ཞེས་བྱ་བའོ། །ཅིའི་ཕྱིར་སྤྱིའི་ཡུལ་ཅན་ཡིན་ཞེ་ན། དེ་དང་རྟགས་འབྲེལ་བར་མ་བཟུང་བའི་ཕྱིར་རོ་ཞེས་བརྗོད་པ་ནི། སྤྱི་དང་རྟགས་ཞེས་བྱ་བའོ། །ཁྱད་པར་མཐོང་བ་དེ་ནི་ཚད་མ་གཞན་ཡིན་ནོ། །མངོན་སུམ་མ་ཡིན་ཏེ་དབང་པོ་ལས་མ་སྐྱེས་པའི་ཕྱིར་རོ། །རྗེས་སུ་དཔག་པ་ཡང་མ་ཡིན་ཏེ། སྤྱིའི་ཡུལ་ཅན་མ་ཡིན་པའི་ཕྱིར་རོ། །དེས་ན་ཚད་མ་གཞན་ཁོ་ནའོ། །གཞལ་བྱ་དེས་ན་ཞེས་བྱ་བ་དེའི་ཤུགས་ཀྱིས་གྲུབ་པ་བརྗོད་པ་ནི་གཞལ་བྱ་མང་ཕྱིར་ཞེས་བྱ་བའོ། །ཁྱད་པར་མཐོང་ལ་ཞེས་བྱ་བ་འདི་ལས་ཤུགས་ཀྱིས་གྲུབ་པ་བརྗོད་པ་ནི་གཅིག་ལ་ཡང་ཞེས་བྱ་བ་ཁྱད་པར་ལ་ཚད་མ་དུ་མ་ཉིད་ནི་འཇུག་པའི་ཕྱིར་ཏེ། མང་པོ་ཉིད་དོ་ཞེས་བྱ་བ་ནི་སྐབས་སུ་བབ་པའོ། །དཔེར་ན་ཁྱད་པར་མཐོང་བཞིན་མིན་དང་འབྲེལ་པས་ཡང་ན་མང་པོ་ཉིད་འགོག་པའི་རྣམ་པར་རྟོག་པ་སྟེ། གཅིག་ཉིད་ཀྱིས་ཡོངས་སུ་བཅད་པའི་ཕྱིར་རོ། །དཔེར་ན་བྱེད་པ་ནི་དཔེར་ན་ཁྱད་པར་མཐོང་བ་གཞལ་བྱ་ལ་དུ་མ་འཇུག་པའི་ཕྱིར་གཅིག་ཁོ་ནས་ཡོངས་སུ་བཅད་པས་ན་ཚད་མ་མ་ཡིན་ན་བཞིན་ནོ། །དེ་ལྟ་ཡིན་དང་གསུམ་གཅིག་གྲངས་ནི་གསལ་བའམ་ཞེས་གསུམ་དང་གཅིག་གི་གྲངས་གསལ་བར་བརྗོད་པ་དེར་མི་འགྱུར་རོ་ཞེས་བརྗོད་པ་ནི་གཅིག་གསུམ་ཞེས་བྱ་བའོ། །སེལ་མི་འགྱུར་ཞེས་བྱ་བ་ནི་མི་འགྱུར་བ་ཁོ་ནའོ་ཞེས་བྱ་བའི་དོན་ཏོ། །དཔེར་ན་ཁྱད་པར་མཐོང་བའི་ཚད་མ་བཞིན་ནོ་ཞེས་གསུམ་པའི་མཐའ་ཅན་བཤད་པ་ལ་ནི་གཅིག་ལ་ཡང་ཞེས་པའི་ཡང་གི་སྒྲ་ནི་འཇུག་ཕྱིར་ཡང་ཞེས་རྒྱུ་མཚན་གྱི་རྣམ་པར་རྟོག་པའོ། །ཇི་ལྟར་གཅིག་གི་གྲངས་གསལ་བར་མི་འགྱུར་སྙམ་ན་ཡུལ་ངེས་པ་ནི་ཞེས་སྨྲས་སོ། །ཇི་ལྟར་གསུམ་གྱི་གྲངས་གསལ་བར་མི་འགྱུར་སྙམ་ན། གཞལ་བྱ་གཞན་ནི་ཞེས་བྱ་བའོ། །གྲངས་ཀྱིས་གསུམ་གྱི་གྲངས་གསལ་བར་མི་འགྱུར་བ་གཞལ་བྱ་གཞན་ཡོད་ཙམ་ལས་གཞན་དུ་ཇི་ལྟར་འགྱུར་ཞེ་ན། ཁ་དོག་ལ་སོགས་པ་ཞེས་བྱ་བ་སྨྲས་སོ། །ཁྱད་པར་མཐོང་བ་ཡང་ཚད་མ་གཞན་དུ་ཐལ་ལོ་ཞེས་བཤད་པ་ནི་ཁྱད་པར་མཐོང་བ་ལ་ཡང་ཞེས་བྱ་བའོ། །དེས་ན་ཞེས་བྱ་བ་ནི་ཁྱད་པར་གྱི་ཡུལ་ཅན་ཉིད་ངེས་ནའོ། །གལ་
ཏེ་ཁྱད་པར་གྱི་ཡུལ་ཅན་ཡིན་པའི་ཕྱིར་མངོན་སུམ་ཁོ་ནར་འགྱུར་བ་མ་ཡིན་ནམ་ཚད་མ་གཞན་དུ་ཇི་ལྟར་འགྱུར་ཞེ་ན་དངོས་སུ་ཞེས་སྨྲས་སོ། །འོ་ན་རྗེས་སུ་དཔག་པར་འགྱུར་རོ་སྙམ་ན་སྤྱིའི་ཞེས་སྨྲས་སོ། །ཇི་ལྟར་གཅིག་གི་གྲངས་ངེས་པ་མེད་སྙམ་ན་དཔེར་ན་ཞེས་སྨྲས་སོ། །དེར་ཞེས་བྱ་བ་ནི་གཅིག་གི་གྲངས་གསལ་བར་རོ། །ཅིའི་ཕྱིར་ཞེ་ན་མངོན་སུམ་ཉིད་ཅེས་སྨྲས་སོ། །འོ་ན་ཇི་ལྟར་གསུམ་དང་གཅིག་གི་གྲངས་སེལ་སྙམ་ན། ཡུལ་ངེས་པར་ཡིན་ལ་ཞེས་བྱ་བའོ། །འོ་ན་གཉི་ག་ལྟར་ཡང་མངོན་པར་འདོད་པ་གྲུབ་པོ་ཞེ་ན། བཤད་པའི་ཚུལ་གྱིས་ཞེས་སྨྲས་སོ། །གཉི་ག་ལ་ཡང་ཞེས་བྱ་བ་ནི་ཡུལ་ངེས་པ་དང་གཞལ་བྱ་གཞན་པའོ། །འཇུག་ཕྱིར་ཡང་ཞེས་བྱ་བའི་རྣམ་པར་རྟོག་པ་འབྲེལ་པ་ནི། ཚད་མ་ངེས་པར་འཇུག་པའི་ཞེས་བྱ་བའོ། །མང་པོ་ཉིད་དགག་པའི་རྣམ་པར་རྟོག་པ་ནི་བསལ་བའི་ཕྱིར་དེ་བཤད་དོ། །གལ་ཏེ་ཞེས་བྱ་བ་ནི་ཟློག་པར་དོགས་པའོ། །ཐ་དད་པར་སྣང་བ་ལ་ཡང་གཅིག་ཉིད་དུ་དོགས་པ་དེས་ན་ཟློས་པ་མ་ཡིན་ན་བར་བརྗོད་པར་ནི་བདེན་མོད་ཀྱི་ཞེས་གསུངས་སོ། །འདི་ཡང་ཞེས་བྱ་བ་ནི་ཁ་དོག་མི་རྟག་ཅེས་དྲིས་པའི་རང་བཞིན་གྱི་གཞལ་བྱའོ། །འགལ་བ་མི་འཁྲུལ་བ་ཅན་ཞེས་བྱ་བ་ནི་ནུས་ཞེས་བྱ་བ་འདིས་བསྒྲུབ་པའི་གཞལ་བྱ་གཞན་གསལ་བ་གང་ཡིན་པ་དེ་དང་འགལ་བ་གཞལ་བྱ་གཞན་ཡོད་པ་དེ་ལ་མི་འཁྲུལ་པ་གཉི་གའི་བདག་ཉིད་མཐོང་བར་རིགས་པ་ཅན་ལ་སོགས་པས་ཕ་རོལ་པོས་ཉེ་བར་བྱས་པ་དེས་ན་འདི་ནི་རིགས་པ་ཉིད་ལས་ཟློས་པ་མ་ཡིན་ནོ། །གལ་ཏེ་དེའི་ཕྱིར་ལྐོག་གྱུར་དོན་རྣམས་ཀུན། །ཞེས་ཚད་མ་མ་ངེས་པ་ཡང་བསལ་བ་མ་ཡིན་ནམ་དེས་ན་འདི་ཡང་བཀོད་པས་ཅི་ཞེ་ན། དེའི་ཕྱིར་ཞེས་གསུངས་སོ། །དེས་ན་ཞེས་བྱ་བ་ནི་སྐབས་ཉེ་བར་བསྡུ་བ་སྟེ། གང་གི་ཕྱིར་གཞལ་བྱ་གཞན་སྲིད་པ་དང༌། གཅིག་ལ་ཡང་དུ་མ་འཇུག་པ་ངེས་པའོ། །འདི་ལ་ཞེས་བྱ་བ་ནི་གཞལ་བྱ་ངེས་ན་ཞེས་བྱ་བ་ནས་བརྩམས་ནས། གཞལ་བྱ་གཞན་ནི་ཡོད་ཕྱིར་རོ། །ཞེས་བྱ་བའི་བར་ལའོ། །ཁ་དོག་ཀྱང་མི་རྟག་ཉིད་བཞིན་དུ་སྤྱིའི་ངོ་བོས་རྣམ་པར་རྟོག་པའི་ཡུལ་ཡིན་ནོ་ཞེས་བཤད་པ་ནི་སྐྱོན་འདིར་ཞེས་བྱ་བའོ། །མི་རྟག་པ་ཉིད་བཞིན་དུ་ཁ་དོག་ཀྱང་སྤྱི་ཉིད་ཡིན་ཏེ། རྣམ་པར་རྟོག་པའི་ཡུལ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །སྦྱོར་བའི་རྣམ་པ་བརྗོད་པ་ནི་མི་རྟག་པའོ་ཞེས་བྱ་བའོ། །དེས་ན་ཞེས་ནི་སྦྱོར་བས་
ནའོ། །གལ་ཏེ་ཁ་དོག་ལ་སོགས་པའི་སྤྱི་ལ་མི་རྟག་པ་ཉིད་ལ་སོགས་པ་སྦྱོར་ན་དངོས་པོའི་ཆོས་ཉིད་དུ་མི་འགྱུར་ལ་ཁྱད་པར་ལ་ལྷག་པར་ཞེན་པ་དང་འཇུག་པར་ཡང་ཇི་ལྟར་འགྱུར་ཞེས་དོགས་པ་ནི། གལ་ཏེ་ཞེས་བྱ་བའོ། །སྤྱི་ཡང་ཞེས་བྱ་བ་ནི་ཁ་དོག་ལ་སོགས་པའིའོ། །དེའི་ཞེས་བྱ་བ་ནི་མི་རྟག་པ་ཉིད་ལ་སོགས་པའི་རང་བཞིན་ཏེ་ངོ་བོ་ཉིད་ཡིན་ནོ། །གལ་ཏེ་དེ་ལྟ་ན་ཡང་ཇི་ལྟར་དངོས་པོའི་ཆོས་མ་ཡིན་སྙམ་ན་སྤྱི་ནི་ཞེས་སྨྲས་སོ། །དངོས་པོ་ཉིད་དེ་ལྟར་ལྷག་པར་ཞེན་པར་བྱ་བས་སྤྱི་ཡིན་པས་དེས་ན་དངོས་པོའི་ཆོས་མ་ཡིན་པ་མ་ཡིན་ལ་དེ་ལ་ལྷག་པར་ཞེན་པ་དང་འཇུག་པ་དང་མི་འགལ་ལོ་ཞེས་ལན་འདེབས་པ་ནི། དངོས་མེད་ངོ་བོ་ཉིད་ཡིན་ཏེ། མི་རྟག་པའི་སྒྲ་ལས་ཁ་དོག་གི་སྤྱི་ནི་དངོས་པོ་ལས་གཞན་མ་ཡིན་ནོ། །ཅིའི་ཕྱིར་ཞེ་ན། དངོས་པོ་དེ་ཉིད་དེ་ལྟར་དེ་བྱས་པ་ཡིན་པར་གྲུབ་པ་སྟེ། ངེས་པར་གྲུབ་ཕྱིར་རོ། །གལ་ཏེ་རང་གི་མཚན་ཉིད་གཞན་མི་སྣང་བའི་ཕྱིར་མ་འབྲེལ་བའི་རྣམ་པར་རྟོག་པ་གཞན་གྱིས་ཇི་ལྟར་འཐོབ་སྙམ་དུ་དོགས་པ་ནི་རང་གི་མཚན་ཉིད་གཞན་ལ་མི་སྣང་བའི་ཕྱིར་མ་འབྲེལ་པའི་རྣམ་པར་རྟོག་པ་གཞན་གྱིས་འགྲུབ་པ་མ་ཡིན་ཏེ། འཐོབ་པ་མ་ཡིན་ཞེ་ན་མ་ཡིན་ཞེས་བྱ་བའོ། །རང་གི་མཚན་ཉིད་རྣམ་པར་རྟོག་པ་ལས་འགྲུབ་པ་ཡང་ཡིན་ནོ་ཞེས་བྱ་བར་ནི་མི་འཐད་དོ། །རང་གི་མཚན་ཉིད་དེ་ཉིད་བརྒྱུད་ནས་འབྲེལ་པའི་རྣམ་པར་རྟོག་པས་འགྲུབ་པའི་ཕྱིར་དེ་འཐོབ་པའི་ཕྱིར་རོ། །གལ་ཏེ་སྤྱི་ཞེས་བྱ་བ་ནས་ཞེ་ནའི་བར་གྱིས་ཁ་དོག་དང་མི་རྟག་པ་གཉི་ག་སྤྱིའི་རང་བཞིན་ཡིན་པའི་ཕྱིར་དངོས་པོ་མ་ཡིན་པར་དོགས་པ་བསུ་བའོ། །ད་ལྟ་ཁ་དོག་ཉིད་ནི་དངོས་པོའི་ཆོས་དངོས་པོའི་རང་བཞིན་མ་ཡིན་ན། མི་རྟག་པ་ལ་སོགས་པ་དེ་ཡང་དངོས་པོ་ཉིད་མ་ཡིན་པར་འགྱུར་རོ་ཞེ་ན། ལན་དུ་དངོས་པོ་མ་ཡིན་པ་མ་ཡིན་ནོ། །ཅིའི་ཕྱིར་ཞེ་ན། དངོས་པོ་ཉིད་ཅེས་བྱ་བའོ། །དེ་ལྟར་ཞེས་བྱ་བ་ནི་རྣམ་པར་རྟོག་པ་ལ་གནས་པའི་རང་བཞིན་དུའོ། །གལ་ཏེ་དངོས་པོའི་རང་བཞིན་མི་སྣང་བའི་ཕྱིར་ན་དངོས་པོ་དེ་ལྟར་ཇི་ལྟར་འགྲུབ་སྙམ་ན་རྣམ་པར་རྟོག་པ་ལ་ཞེས་བྱ་བའོ། །དེ་ལ་ཡང་ཡོད་པ་ཡིན་ནོ་ཞེས་བྱ་བ་ག་ལས་ཤེ་ན། ལན་དུ་དངོས་པོ་མ་ཡིན་པ་མ་ཡིན་ནོ། །ཅིའི་ཕྱིར་རང་གི་མཚན་ཉིད་ཉམས་སུ་མྱོང་བ་ཉིད་ལས་ཞེས་གསུངས་སོ། །འདི་ནི་ཐ་སྙད་བྱེད་པའི་སྐྱེ་བོ་ལ་ལྟོས་ནས་བཤད་པ་མ་ཡིན་ནོ། །གཞན་ལ་གཞན་འགྲུབ་ཡིན་ཞེ་ན་ཞེས་བྱ་བ་རྣམ་པར་འགྲེལ་པ་ནི་གལ་ཏེ་རྣམ་པར་རྟོག་པ་ཞེས་
བྱ་བའོ། །ལན་ནི་སྒྲུབ་པར་བྱེད་པ་ཉིད་མ་ཡིན་པ་མ་ཡིན་ནོ། །ཅིའི་ཕྱིར་ཞེ་ན་བརྒྱུད་ནས་ཞེས་གསུངས་སོ། །རང་གི་མཚན་ཉིད་མི་སྣང་ཡང་བརྒྱུད་ནས་འབྲེལ་བའི་ཕྱིར་རོ། །འདི་ཉིད་བརྗོད་པ་ནི་དངོས་སུ་ཞེས་བྱ་བའོ། །མི་སླུ་བ་དང་ལྡན་པ་ཉིད་ནི་སྒྲུབ་པར་བྱེད་པ་ཉིད་དོ། །རྗེས་སུ་དཔག་པ་དངོས་པོ་དང་འབྲེལ་བ་འགོག་པར་དོགས་པ་བསུ་བ་ནི་གལ་ཏེ་ཞེས་བྱ་བའོ། །ལན་ནི་དེའི་བག་ཆགས་དེའི་དངོས་པོ་དང་ཞེས་བྱ་བ་སྟེ། རྗེས་སུ་དཔག་པ་དེའི་བག་ཆགས་རྟགས་ཀྱིས་ཤེས་པ་ནི་ཁྱབ་པར་བྱེད་པའི་དངོས་པོ་དང་འབྲེལ་བའི་ཕྱིར་རོ། །དེའི་བག་ཆགས་དང་འབྲེལ་པ་ཡིན་ཡང་དངོས་པོ་དང་འབྲེལ་པར་ཇི་ལྟར་འགྱུར་ཞེ་ན། ཞེས་དྲིས་པ་ལ་བརྗོད་པ་ནི་མེ་དང་ཤིང་ལ་སོགས་པའོ། །དངོས་གང་ཇི་ལྟ་བུར་གྱུར་པ་ཞེས་བྱ་བ་ནི་མེ་མ་ཡིན་པའི་བདག་ཉིད་ལ་ལྡོག་པ་དེ་ནི་རྒྱུ་ཡིན་ནོ། །གང་གི་ཞེ་ན། དེ་འདྲ་བའི་རྟགས་སེམས་ཀྱིའོ། །དེ་འདྲ་བའང་ཡིན་ཏེ་དུ་མ་མ་ཡིན་པ་དང་ཤ་པ་མ་ཡིན་པ་ལས་ལྡོག་པའི་རང་བཞིན་ཡིན་གྱི། ཡོད་པ་དང་ལོ་མ་ལ་སོགས་པ་ལས་བྱུང་བ་ནི་མ་ཡིན་པས་སོ། །རྟགས་ཀྱང་ཡིན་ཏེ་འབྲས་བུའམ་ཁྱབ་པར་བྱ་བ་ཡིན་པས་སོ། །དེ་དག་གི་སེམས་ཀྱིའོ། །དེ་ལས་ཅི་འཁྲུལ་སྙམ་ན། གང་གི་ཕྱིར་དེ་ལྟ་མ་ཡིན་པ་དེའི་ཕྱིར་ཇི་ལྟ་བ་བཞིན་དུ་གྱུར་པ་དེ་ལྟ་བུའི་དངོས་པོ་ལ་སྟེ། ཡུལ་རྒྱུ་མཚན་ལ་དེས་བསྐྱེད་དེ་རྟགས་ཀྱིས་བསྐྱེད་པ་རྟགས་ཅན་གྱི་བློར་འགྱུར་བ་ཡིན་ཏེ། རྟགས་ཀྱི་སྒོ་ནས་དེ་དེས་བསྐྱེད་པའི་ཕྱིར་ན་འབྲེལ་བར་འགྱུར་བ་ཡིན་ནོ། །དབང་ཕྱུག་ལ་སོགས་པའི་བློ་ནི་མ་ཡིན་ཏེ་བཟློག་པའི་ཕྱིར་རོ། །གལ་ཏེ་དངོས་པོ་དང་འབྲེལ་ཀྱང་དེ་སྣང་བས་སྟོང་པའི་ཕྱིར་ན་ཇི་ལྟར་རྗེས་སུ་དཔག་པ་མི་སླུ་བ་ཡིན་སྙམ་ན་དེས་ན་ཞེས་སྨོས་སོ། །དེས་ན་འབྲེལ་པ་ཡིན་ནོ་ཞེས་འབྲེལ་ཏོ། །རྟགས་དང་རྟགས་ཅན་བློ་ཞེས་བྱ་བ་ནི་འཆད་པར་གྱུར་པའི་ཚུལ་གྱིས་རྗེས་སུ་དཔག་པའི་བདག་ཉིད་ཅན་དག་གོ །གལ་ཏེ་སྣང་བས་སྟོང་ན་ཇི་ལྟར་མི་སླུ་བ་ཡིན་ཞེ་ན། སྣང་བ་ཉིད་ལས་ཞེས་བྱ་བའོ། །མངོན་སུམ་ཉིད་ལས་སོ། །ལྷག་པར་ཞེན་པ་ལས་ཀྱང་ཞེས་བྱ་བ་ནི་རྗེས་སུ་དཔག་པ་ལས་ཀྱང་ངོ༌། །ཇི་ལྟར་ཞེ་ན་འཇུག་པས་ཞེས་བྱ་བའོ། །འོན་ཏེ་སྣང་བ་མེད་ན་འཇུག་པ་ཉིད་དུ་མི་འགྱུར་ཞེ་ན། འཇུག་པ་ནི་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་རྗེས་སུ་དཔག་པས་དང་པོ་མི་འཇུག་ན། ཕྱིས་མངོན་
སུམ་གྱིས་འཇུག་པར་མི་འགྱུར་རོ། །འོ་ན་ཇི་ལྟར་མངོན་སུམ་འཇུག་སྙམ་ན་དང་པོ་ཞེས་གསུངས་སོ། །ལྷག་པར་ཞེས་པས་ནི་རྗེས་སུ་དཔག་པས་སོ། །དེ་ལས་ཞེས་བྱ་བ་ནི་ལྷག་པར་ཞེན་པ་ལས་སོ། །གལ་ཏེ་གང་གིས་འཐོབ་པར་འགྱུར་པ་སྣང་བ་མ་ཡིན་པ་ཇི་ལྟར་ཡོད་པ་ཉིད་ཡིན་ཞེས་དོགས་ན། ཇི་ལྟར་ཞེས་བྱ་བའོ། །གཉི་ག་ལ་ཡང་མི་སྣང་བ་དང་གཞན་དག་ལའོ། །སྣང་བ་ཐོབ་པ་ནི་གང་ན་ཡང་མེད་པའི་ཕྱིར་འདི་ནི་ཁས་བླངས་པ་ཁོ་ནས་བརྗོད་པ་ཡིན་ནོ་ཞེས་བརྗོད་པ་ནི་སྣང་བ་ནི་ཞེས་བྱ་བའོ། །གལ་ཏེ་མི་སྣང་ན་ནི་ཡོད་ཀྱང་དེ་ཇི་ལྟར་རྟོགས་ཤེ་ན། ཇི་ལྟར་ཞེས་བྱ་བའོ། །འབྲེལ་པ་སྣང་བ་ལས་ཀྱང་ཡོད་པར་ཤེས་སོ་ཞེས་འབྲེལ་ཏོ། །འོན་ཏེ་མི་སྣང་བའི་ཕྱིར་ཐོབ་པའི་ཡུལ་མེད་པ་ཉིད་དེ་ཞེ་ན་གལ་ཏེ་ཞེས་བྱ་བའོ། །འོན་ཏེ་མི་སྣང་བའི་ཕྱིར་ཐོབ་པའི་ཡུལ་མེད་པ་ཉིད་དོ་ཞེ་ན། དེའི་ཕྱིར་ཞེས་བྱ་བ་སྟེ། གང་གི་ཕྱིར་ཐོབ་པར་བྱ་བའི་ཡུལ་མེད་ན་འཁྲུལ་པ་དང༌། ཅིག་ཤོས་ཀྱི་རྣམ་པར་དབྱེ་བ་མེད་པ་དེའི་ཕྱིར་ཐོབ་པར་བྱ་བ་ལྐོག་ཏུ་གྱུར་པ་རྟོག་ན་འཁྲུལ་པ་གཅིག་ཤོས་ཀྱི་རྣམ་པར་དབྱེ་བར་འགྱུར་བ་ཡིན་ནོ། གཞན་དུ་ནི་མ་ཡིན་ནོ་ཞེས་བྱ་བ་ནི་ལྐོག་ཏུ་གྱུར་པ་མ་རྟོགས་པར་ནི་མ་ཡིན་ཏེ། རང་གི་ངོ་བོས་ནི་ཐམས་ཅད་ཀྱང་མ་འཁྲུལ་བའི་ཕྱིར་རོ་ཞེས་བྱ་བར་ངེས་པ་ཡིན་ནོ། །འབྲེལ་བར་འགྱུར་བའི་འབྲེལ་བའི་ཡུལ་ངེས་པར་བྱེད་པ་ཉིད་རྗེས་སུ་དཔག་པའི་མི་སླུ་བ་སླུ་བ་མེད་པའི་རང་བཞིན་གྱི་ཚད་མ་ཡིན་ནོ་ཞེས་བརྗོད་ནས། འཆད་པ་པོའི་ལོག་པར་རྟོག་པ་བསལ་བའི་དོན་དུ་ཚིགས་སུ་བཅད་པ་ཡང་འདོན་པ་ནི་དེ་ལྟར་རྟགས་དང་ཞེས་བྱ་བའོ། །རྟགས་ཅན་གྱི་ཤེས་པ་བཞིན་དུ་དེ་ངེས་པར་བྱེད་པའི་རྟགས་ཀྱི་ཤེས་པ་ཡང་རྟགས་དེ་དང་འབྲེལ་པའི་ཕྱིར་དེ་ལ་མི་འཁྲུལ་བ་ཉིད་ཡིན་ནོ་ཞེས་བྱ་བའི་དོན་ཏོ། །གལ་ཏེ་དོན་དང་འབྲེལ་པ་དང་ལྷག་པར་ཞེན་པ་དང་ཐོབ་པར་བྱེད་པ་ལ་སོགས་པ་ཡིན་ཡང་ཇི་ལྟར་འཁྲུལ་པ་ཡིན་ཏེ་འགལ་བའི་ཕྱིར་རོ་ཞེས་དོགས་ན། སྒྲུབ་པར་བྱེད་པ་ཉིད་ལྷག་པར་ཞེན་པར་བྱེད་པར་རྟགས་དང་རྟགས་ཅན་གྱི་ཤེས་པ་དེ་ནི་རྟགས་ཅན་དེའི་ངོ་བོ་ཡིན་པའི་ཕྱིར། འཁྲུལ་པ་རྣམ་གཞན་བྱས་པ་ཡིན། །དེའི་ངོ་བོ་ཞེས་བྱ་བ་ནི་དེ་མངོན་དུ་བྱེད་པས་སྟོང་པ་དག་སྟེ། འདི་ནི་གཏན་ཚིགས་སོ། །རང་གི་ངོ་བོ་དངོས་སུ་བྱེད་པ་ཉིད་ནི་མ་འཁྲུལ་པ་ཡིན་ནོ། །བཤད་པ་མཛད་པ་ནི་རང་བཞིན་གྱི་རྗེས་སུ་དཔག་པ་ནི་རྟགས་ཀྱི་ཤེས་པ་ཡིན་ཏེ། རྟགས་ཅན་
ཡང་རྟགས་ཉིད་ཐ་མི་དད་པའི་ཕྱིར་རོ། །འབྲས་བུའི་རྗེས་སུ་དཔག་པ་ནི་རྟགས་ཅན་གྱི་ཤེས་པ་ཡིན་ནོ་ཞེས་འཆད་དོ། །འདི་ལ་ཁ་ཅིག་ན་རེ་ཞེས་བྱ་བ་ནི་སློབ་དཔོན་ཆོས་མཆོག་ལ་སོགས་པ་ཡིན་ཏེ། དུ་བ་ལ་སོགས་པ་ཞེས་བྱ་བ་ནས་བརྩམས་ནས་གཙོ་བོ་ཉིད་དུ་ཡིན་ནོ་ཞེས་བྱ་བའི་བར་རོ། །རྟགས་ཅན་གྱི་ཤེས་པ་བཞིན་རྟགས་ཀྱི་ཤེས་པ་ཡང་རྟགས་ཅན་གྱི་ཡུལ་ཅན་ཡིན་ཏེ། རྟགས་མེད་ན་མི་འབྱུང་བར་ངེས་པའི་རང་བཞིན་ཉིད་རྟགས་ཀྱི་བྱེད་པ་ཡིན་པས་ན་རྟགས་ཅན་ཡང་འདུས་པའི་ཕྱིར་རོ་ཞེས་བྱ་བ་ནི། སློབ་དཔོན་ཆོས་མཆོག་ལ་སོགས་པའི་ལུས་རྣམ་པར་གཞག་པའོ། །འདི་གསལ་བའི་རྩོད་པ་བརྗོད་པ་ནི། དེས་ན་ཇི་སྐད་དུ་ཞེས་བྱ་བ་སྟེ། བདེ་བྱེད་ཀྱིས་སོ་དེ་བསལ་བ་ཡིན་ཏེ་ཞེས་བྱ་བ་རྒྱང་རིང་པོར་འབྲེལ་ཏོ། །ཇི་སྐད་སྨྲས་ཤེ་ན། འདིར་ཞེས་བྱ་བའོ། །རྟགས་སྨོས་པ་ནི་སྐབས་སུ་བབ་པ་མ་ཡིན་ཏེ། རྟགས་ཅན་གྱི་བློ་ཉིད་ཀྱི་སྐབས་ཡིན་པའི་ཕྱིར་རོ། །དེས་ན་རྟགས་ཀྱི་བློ་དཔྱད་པས་ཅི་ཞིག་བྱ། ཅི་སྟེ་དེ་ཡང་ཞེས་བྱ་བ་ནི་རྟགས་ཀྱི་བློའོ། །དེ་ལྟ་ན་ནི་ཞེས་བྱ་བ་ནི་རྟགས་ཀྱི་བློ་རྗེས་སུ་དཔག་པའི་བདག་ཉིད་དུ་གྱུར་པ་ནའོ། །རྟགས་དང་རྟགས་ཅན་བློ་ཞེས་ཐ་དད་པར་སྨོས་པ་དོན་མེད་དོ། །སྔོན་གྱི་བློ་ཉིད་བདག་ཉིད་ཡིན་ན་ཡང་དེར་སྣང་བས་སྟོང་པ་ཞེས་མི་འཐད་དོ་ཞེས་བརྗོད་པ་ནི། གལ་ཏེ་རྟགས་རྟོགས་པ་ཞེས་བྱ་བའོ། །བསྒྲུབ་པར་བྱ་བའི་རྣམ་པར་སྟོང་པས་འཁྲུལ་པ་ཡིན་ན་ཡང་ཧ་ཅང་ཐལ་བར་འགྱུར་རོ་ཞེས་བརྗོད་པ་ནི། རྟགས་ཅན་སྣང་བས་ཞེས་བྱ་བའོ། །དེ་ནི་ཞེས་བྱ་བ་ནི་བསྒྲུབ་པར་བྱ་བ་སྟེ་ཡུལ་མ་ཡིན་པའི་ཕྱིར་རོ། །འདི་ག་ལས་ཤེ་ན་བུམ་པའི་ཞེས་སྨོས་སོ། །ཇི་ལྟར་འདིས་བསྒྲུབ་སྙམ་ན་རྟགས་དང་ཞེས་སོ། །ཡུལ་ཅིག་པ་ནི་རྟག་ཅན་དུའོ། །རྟག་ཅན་གྱིས་ཁྱད་པར་དུ་བྱས་པའི་རྟགས་ནི་མངོན་སུམ་ཉིད་ཀྱང་མ་ཡིན་ནོ་ཞེས་སྨོས་པ་ནི། མངོན་སུམ་མ་ཡིན་པའི་ཕྱིར་རོ་ཞེས་བྱ་བའོ། །དེ་ལྟར་གཞན་དག་འདོད་ལ། གལ་ཏེ་རྟགས་ནི་ཞེས་བྱ་བ་ལ་སོགས་པའི་རྗེས་སུ་བརྗོད་ནས་སེལ་བར་བྱེད་པ་ནི་ཕྱོགས་ཀྱི་ཆོས་ཉིད་འཛིན་པའི་དུས་ན་ཐུན་མོང་གི་རང་བཞིན་ཅན་མཚུངས་པ་ནི་ཆོས་དག་གི་འབྲེལ་པ་ནི་རྗེས་སུ་དཔག་པ་ལས་ཡིན་ཏེ། དེའི་ཡུལ་མ་ཡིན་པའི་ཕྱིར་ན་མངོན་སུམ་གྱིས་ནི་མ་ཡིན་ན། དེའི་ཚེ་ཐུག་པ་མེད་པར་འགྱུར་རོ་ཞེས་
བརྗོད་པ་ནི། དེ་ལྟ་ཡིན་ན་ཐུག་མེད་འགྱུར། །ཞེས་བྱ་བའོ། །ཇི་ལྟ་ཞེ་ན། དེ་ལའང་ཞེས་གསུངས་ཏེ། རྗེས་སུ་དཔག་པ་ལའོ། །འོན་ཏེ་རྟགས་ནི་ཞེས་བྱ་བ་ལ་སོགས་པས་ནི་ཅི་སྟེ་གོམས་པ་ལས་དེ་མེད་ན་མི་འབྱུང་བའི་རྟགས་ནི་དེ་མེད་ན་མི་འབྱུང་བ་ཉིད་དོ། །རྟོགས་པ་ཡིན་ནོ་ཞེས་བྱ་བའི་དོགས་པ་བསུ་ནས། མངོན་སུམ་དེ་ནི་རྟགས་སྣང་བ་ཁོ་ན་ཡིན་ཏེ། དེ་མི་སྣང་བ་དེ་མེད་ན་མི་འབྱུང་བ་ཉིད་དུ་འཛིན་པ་མི་འཐད་པའི་ཕྱིར་རོ་ཞེས་ལན་འདེབས་པ་ནི། དེ་ལྟ་ཡིན་ཞེས་བྱ་བ་དེ་མངོན་སུམ་གྱི་ཡུལ་ཉིད་ཡིན་ནམ། ཇི་ལྟར་འགྱུར་ཞེས་བྱ་བ་ནི་མངོན་སུམ་དེའོ། །ཅི་སྟེ་བྱ་ཞེས་བྱ་བ་ལ་གཟུང་ཡང་ཞེས་བྱ་བ་ལ་དཔེ་ལའོ། །དེའི་ཚེ་ཞེས་བྱ་བ་ནི་ཕྱོགས་ཀྱི་ཆོས་ཉིད་འཛིན་པའི་དུས་ནའོ། །དེ་ལྟ་ན་ཞེས་བྱ་བ་ནི་མེད་ན་ལའོ། །དེ་ནི་དྲན་པའོ། །དེ་ལ་ཞེས་བྱ་བ་ནི་མེད་ན་མི་འབྱུང་བ་ཉིད་ལའོ། །ཅིའི་ཕྱིར་ཞེ་ན་ཚད་མ་ཉིད་ཀྱིས་ཞེས་བྱ་བའོ། །འོན་ཏེ་ཞེས་བྱ་བ་ནི་དོགས་པའོ། །འོ་ན་ཞེས་བྱ་བ་ནི་ལན་ནོ། །རྗེས་སུ་དཔག་པ་ནི་ཞེས་བྱ་བ་ནི་དེའི་རང་བཞིན་གྱིས་རྟགས་ལས་སྐྱེས་པའི་ཕྱིར་རོ། །དེ་ཞེས་བྱ་བ་ནི་རྗེས་སུ་དཔག་པའོ། །སྔར་ཞེས་བྱ་བ་ནི་ཕྱོགས་ཀྱི་ཆོས་ཉིད་འཛིན་པ་ལས་སོ། །དེ་ལ་ཞེས་བྱ་བ་ནི་མེད་ན་མི་འབྱུང་བ་ཉིད་ལའོ། །གང་གི་ཕྱིར་དེ་ལྟར་གཞན་གྱི་བཤད་པ་མི་འགྲིག་པ་དེའི་ཕྱིར་རོ། །གལ་ཏེ་རྟགས་ཀྱི་བློའི་སྒྲས་རྟགས་ཅན་གྱི་བློ་ཅི་ལྟར་བརྗོད་ཅེ་ན། དོན་དམ་པར་ཞེས་གསུངས་སོ། །རྒྱུའི་ཡུལ་ཅན་གྱི་རྟགས་ཅན་གྱི་བློ་ཡང་རྟགས་ཀྱི་བློའི་སྒྲས་རྟགས་ཅན་གྱི་བློ་ཅི་ལྟར་བརྗོད་ཅེ་ན། དེར་ནི་ཐ་དད་པའི་ཕྱིར་ཞེས་བྱ་བ་སྟེ་རྒྱུ་དང་འབྲས་བུ་དག་ལའོ། །དེ་ཞེས་བྱ་བ་ནི་རྟགས་ཀྱི་བློའོ། །ཅི་སྟེ་ཡང་དུ་བའི་རང་བཞིན་མེ་མི་འབྱུང་བ་ཉིད་དུ་ཁས་མི་ལེན་ན་རྟགས་མ་ཡིན་ཏེ། དེས་ན་དེ་ལ་རྗེས་སུ་དཔག་པ་ཇི་ལྟར་འབྱུང་སྙམ་ན་ཤིན་ཏུ་ཞེས་བྱ་བའོ། །སྦྲང་བུའི་ཚོགས་ལ་སོགས་པ་དང་མཚན་ཉིད་མི་མཐུན་པའི་རང་བཞིན་ཤིན་ཏུ་གོམས་པ་ལས་ནི་མེ་མ་རྟོགས་ཀྱང་ཤིན་ཏུ་གསལ་བར་ཉམས་སུ་མྱོང་བས་ཉེ་བར་མཚོན་པའི་དུ་བས་རྗེས་སུ་དཔག་པ་སྐྱེད་པར་བྱེད་པ་ནི་རྟགས་ཁོ་ནའོ་ཞེས་བྱ་བའི་དོན་ཏོ། །གོམས་པ་མེད་ན་ནི་དེའི་རང་བཞིན་གྱི་རྟགས་ལས་མི་འབྲེལ་བར་འཛིན་པ་ཁོ་ན་རྟགས་བློ་ཡིན་ནོ་ཞེས་བརྗོད་པ་ནི། དུའི་ཞེས་གསུངས་སོ། །དེ་ཉིད་ནི་དུ་བ་ཉིད་དུ་ནིའོ། །མེས་བསྐྱེད་པ་རྣམ་པ་དེ་ལྟ་བུ་ཉིད་ལ་དུའོ་
ཞེས་བསྙད་པའི་ཕྱིར་དུ་བ་ཉིད་དེ་དང་འབྲེལ་པ་ཡིན་ལ། དེ་བཟུང་བ་ཉིད་ཀྱང་དེ་དང་འབྲེལ་པར་བཟུང་བ་ཡིན་ནོ། །དེ་ཉིད་ག་ལས་རྟོགས་སྙམ་ན། དུ་བ་ཉིད་ཀྱང་ངོ་ཤེས་པ་ལས་སོ་ཞེས་བྱ་བའོ། །དེ་ཉིད་རྟགས་ཀྱི་ཤེས་པ་ཡིན་ནོ་ཞེས་ངོ་ཤེས་པ་ལ་ཡང་ཞེས་གསུངས་སོ། །གལ་ཏེ་རྗེས་སུ་དཔག་པ་འདི་ལ་ཡང་དེ་རང་བཞིན་གྱི་རྟགས་ཕྱོགས་ཀྱི་ཆོས་སུ་གྲུབ་པའི་དོན་དུ་རྗེས་སུ་དཔག་པ་གཞན་དང་གཞན་གྱི་རྗེས་སུ་འགྲོ་བའི་ཕྱིར་ཐུག་པ་མེད་པར་འགྱུར་རོ་ཞེ་ན། ཤིན་ཏུ་གོམས་པ་ལས་སོ་ཞེས་བྱ་བའོ། །གང་གི་ཕྱིར་མེད་ན་མི་འབྱུང་བ་ཉིད་དུ་ངེས་པའོ་ནི་རྟགས་འཛིན་པ་ཉིད་དུ་མི་འཐད་པ་དེའི་ཕྱིར་རང་གི་མཚན་ཉིད་ཅེས་བྱ་བའོ། །གཞན་གྱིས་འབྲེལ་པ་ངེས་པ་ཉིད་རྟོགས་འཛིན་བརྗོད་པ་གང་ཡིན་པ་དེ་ནི་རྟགས་ཅན་འཛིན་པ་ཁོ་ན་ཡིན་ཏེ་རྟོག་པ་གཞན་མེད་པའི་ཕྱིར་རོ་ཞེས་བཤད་པ་ནི་དེའི་ཞེས་བྱ་བའོ། །འབྲེལ་པ་ཉིད་འཛིན་པ་ཉིད་ཡིན་པ་དེ་ནི་ཞེས་འབྲེལ་ཏོ། །དེ་ནི་སྤྱིའི་འཛིན་པ་རྗེས་སུ་དཔག་པ་ཡིན་ཞེས་འབྲེལ་ཏོ་གཞན་དུ་ཞེས་བྱ་བ་ནི་རྗེས་སུ་དཔག་པའི་རང་བཞིན་མ་ཡིན་པ་རྟགས་ཀྱི་ཤེས་པ་ཡིན་པར་རོ། །རྗེས་སུ་དཔག་པ་དངོས་པོ་དང་འབྲེལ་པ་དེ་ཉིད་ཉེ་བར་སྡུད་པ་ནི་དེའི་ཕྱིར་དངོས་པོ་ཞེས་བྱ་སྟེ། དངོས་པོར་རྟོགས་པར་བྱ་བའི་དངོས་པོ་རྟོགས་པར་བྱ་བ་ལའོ། །ཁྱབ་བྱེད་ནི་རྒྱུ་མཚན་ཡིན་ནོ་སུའི་ཞེ་ན་ཁྱབ་པར་བྱེད་པ་ཡང་སེམས་ཀྱིའོ། །ཁྱབ་པར་བྱེད་པ་ཡང་དེའི་ངོ་བོའམ་རྒྱུ་ཡིན་པར་འགྱུར་རོ། །ཁྱབ་པར་བྱ་བའི་སེམས་དེ་ཡང་ཁྱབ་པར་བྱེད་པ་དེའི་བློའི་རྒྱུ་ཡིན་ནོ། །གལ་ཏེ་གང་གིས་དངོས་པོ་རྟོགས་པར་བྱ་བ་ལའོ། །བྱེད་པ་བསྒྲུབ་པར་བྱ་བ་གཞན་དག་ཀྱང་སྲིད་དམ་སྙམ་ན་བསྒྲུབ་པར་བྱ་བ་ཞེས་གསུངས་སོ། །དེ་ལྟར་བསྒྲུབ་པར་བྱ་བ་ཡིན་སྙམ་ན། གང་གི་ཕྱིར་ཞེས་གསུངས་སོ། །ཇི་ལྟར་དེའི་རྒྱུ་ཡིན་ཞེ་ན་དེ་ཡང་ཞེས་བྱ་བའོ། །དེ་ལྟ་ན་ཇི་ལྟར་རྗེས་སུ་དཔག་པ་ཚད་མ་ཡིན་ཞེ་ན། དེ་ཡང་ཞེས་བྱ་བ་སྟེ་ཁྱབ་པར་བྱ་བའི་སེམས་ཀྱང་ངོ༌། །དེ་བསྒྲུབ་པའི་ཡུལ་ཅན་གྱི་རྗེས་སུ་དཔག་པ་ཚད་མ་ཉིད་དུ་བསྒྲུབས་ནས་དགག་པའི་ཡུལ་ཅན་ཡང་བསྒྲུབ་པའི་ཕྱིར་མི་དམིགས་པ་ཞེས་སྨོས་སོ། །གང་གིས་དེའི་ཡུལ་ཅན་གྱི་ཤེས་པ་ཚད་མར་འགྱུར་བ་ཇི་ལྟར་འབྲེལ་པ་ཡོད་ཅེས་དྲིས་པ་ལ་སྟོན་པ་ནི་ཞེས་བྱ་བའི་དོན་ཏོ། །ཐམས་ཅད་དུ་ཞེས་བྱ་བ་ནི་འགའ་ཞིག་ཏུ་དགག་པ་ཞེས་བྱ་བའོ་ཅོག་དེར་ནི་མི་དམིགས་པ་ཁོ་ན་ཡིན་ནོ། །འདི་ག་ལས་
ཤེ་ན་དམིགས་པའི་བདག་ཉིད་ཀྱིས་ཚད་གྲུབ་པ་སྟེ། ངེས་པར་སྨྲ་བ་རྣམས་ཀྱི་དོན་གྱིས་ཞེས་བྱ་བ་མེད་པ་རྟོགས་པའི་རྣམ་པ་གཞན་མེད་པའི་ཤུགས་ཀྱིས་སོ། །བཟློག་པ་ཉིད་ལས་ཞེས་བྱ་བ་ཉིད་འཛིན་པར་བྱེད་པའི་ཚད་མ་བཟློག་པ་ལས་སོ། །མི་དམིགས་པ་ཉིད་ལས་འགག་པ་འགྲུབ་པ་ཞེས་བྱ་བ་འདི་ག་ལས་ཤེ་ན། གང་དུ་དངོས་པོའི་ཞེས་བྱ་བའོ། །དངོས་པོ་དེ་དགག་པ་ནིའོ། །དེས་ན་ཞེས་བྱ་བ་ནི་དམིགས་པ་ནི་དངོས་པོ་མེད་པའི་སྒྲུབ་བྱེད་ཉིད་དུ་མི་འཐད་པའི་ཕྱིར་རོ། །བཟློག་པ་ཉིད་ཀྱིས་ཞེས་བྱ་བ་ནི་མི་དམིགས་པ་ཉིད་ཀྱིས་སོ། །གལ་ཏེ་གང་གིས་དེ་སྐད་བརྗོད་པ་མི་དམིགས་པས་དགག་པར་འགྲུབ་ལ་གཞན་གྱིས་ཆེན་ཆེར་འཛིན་པའམ་ཞེན་ཆེད་ཆེར་འཛིན་ཏོ་ཞེས་བསྟན་པའི་དོན་དུ་རྣམ་པ་གཅིག་དཔེར་བརྗོད་པ་ནི་འདི་ལྟར་ཞེས་བྱ་བའོ། །དམིགས་པར་རིགས་པ་ནི་ལྟར་རུང་བའོ། །གལ་ཏེ་གཞན་གྱི་ལྟར་ན་རྣམ་པ་ཅི་ཞིག་ལྟར་མེད་པར་རྟོགས་པར་འགྱུར་བ་ཡིན་ན། ཁྱེད་ལ་ཇི་ལྟར་ཚད་མ་དང་ལྡན་པའི་རྟོགས་པ་དང་ལྡན་པའི་མངོན་སུམ་པའམ་འབྲེལ་པ་ཅན་མ་ཡིན་པ་མེད་དོ་ཞེས་དོགས་པ་བསུ་ནས་བསྟན་པའི་འབྲེལ་པ་གསལ་བར་བྱེད་པ་ནི་དེ་ཙམ་དང་ཞེས་བྱ་བའོ། །མི་དམིགས་པ་ལས་གཞན་པའི་དགག་པ་ལ་ནི་འབྲེལ་པ་མེད་པར་ཡང་འགྱུར་གྱི། ངེད་ཀྱི་ལ་ནི་མ་ཡིན་གྱི། གཞན་མ་ཡིན་པས་ན་དེའི་བདག་ཉིད་ཡིན་པའི་ཕྱིར་རོ་ཞེས་བྱ་བའོ། །གལ་ཏེ་དགག་པ་ཉིད་ནི་ཐམས་ཅད་དུ་མི་དམིགས་པ་ལས་གྲུབ་པ་ཡིན་ཞེས་བྱ་བ་ནི་མི་འཐད་དེ། འགལ་བ་དམིགས་པ་ལ་སོགས་པ་ཡང་མེད་པའི་སྒྲུབ་བྱེད་ཡིན་པའི་ཕྱིར་རོ། །མི་དམིགས་པ་ནི་འདིར་དེའི་བདག་ཉིད་ཀྱང་མ་ཡིན་ཏེ། རུང་བ་མ་ཡིན་པའི་ཡུལ་ཅན་ཉིད་ཀྱིས་དགག་པ་ལས་ཐ་དད་པའི་ཕྱིར་ཞེས་དོགས་པ་ནི་འགལ་བ་ཡང་ཞེས་བྱ་བའོ། །དངོས་སམ་ཞེས་བྱ་བ་ནི་འགལ་བ་མི་དམིགས་པ་ལའོ། །བརྒྱུད་པས་ཞེས་བྱ་བ་ནི་རྒྱུ་འགལ་བ་ལ་སོགས་པའོ། །འདི་ལ་ཞེས་བྱ་བ་ནི་རྒྱུ་འགལ་བའོ། །འགལ་བ་འཛིན་པའི་དུས་ནས་རྟོགས་པའི་སྣང་བ་མི་དམིགས་པ་དེའི་རང་བཞིན་མཐོང་བ་ལས་དཔག་པ་ཉིད་དངོས་པོ་མེད་པའི་ཐ་སྙད་ཀྱི་རྒྱུ་ཡིན་ནོ་ཞེས་ལན་འདེབས་པ་ནི་འགལ་བ་བརྗོད་པ་མཐོང་བ་གང་ཡིན་ཞེས་བྱ་བའོ། །གང་གི་ཞེ་ན། དགག་པར་བྱ་བ་གྲང་བ་དེའམ་དེའི་རྒྱུའི་སྟེ་བ་སྤུ་ལངས་པ་ལ་སོགས་པ་གང་ལ་རྒྱུ་གྲང་བ་དེ་དགག་པ་ལའོ། །མཐོང་བ་ལ་གང་ཡིན་པ་དེ་ལ་ཡང་གྲང་བ་ལ་
སོགས་པ་དེ་ཉིད་ཚད་མ་ཉིད་མེད་པ་སྟེ། མི་དམིགས་པ་སྟོན་པར་བྱེད་པ་ཡིན་ཏེ། དཔོག་པར་བྱེད་པ་ཡིན་ནོ། །འགལ་བ་དང་དམིགས་པ་ལ་སོགས་པའི་སྒོ་ནས་མི་དམིགས་པ་ཉིད་རྗེས་སུ་དཔོག་པ་ཡིན་ནོ་ཞེས་བྱ་བའི་དོན་ཏོ། །འབར་བའི་གཟུགས་མངོན་སུམ་དུ་མཐོང་བས་ནི་ཚོགས་པ་གཅིག་ལ་རག་ལས་པ་ཉིད་ཀྱིས་གྲང་བ་མི་དམིགས་པའི་རང་བཞིན་དྲོ་བའི་རེག་པ་གོ་བར་བྱེད་པ་ཡིན་ཏེ། དེས་ནི་རྗེས་སུ་དཔག་པས་མི་དམིགས་པ་གྲུབ་པ་ཡིན་ནོ། །དེས་མི་དམིགས་པ་དང་འགལ་བ་ལ་འབྲེལ་ཅི་ཡོད་ཅེས་བརྗོད་པ་དེ་གསལ་བ་ཡིན་ནོ། །དེ་ལ་ཚོགས་པ་གཅིག་ལ་རག་ལས་པའི་མེའི་གཟུགས་ཀྱིས་ནི་དྲོ་བའི་བདག་ཉིད་ཀྱི་རེག་པ་དཔོག་པ་ཡིན་ནོ་ཞེས་ཀྱང་འཆད་པར་འགྱུར་རོ། །འགལ་བ་ནི་ཞེས་བྱ་བ་ནི་གྲངས་པའི་རེག་པའོ། །དོགས་པ་ནི་མེད་པའི་ཚུལ་དུ་ཞེས་བྱ་བའོ། །དེ་ལྟ་ན་ནི་ཞེས་བྱ་བ་ནི་ལན་ནོ། །དེ་ལྟ་མ་ཡིན་ན་དེ་མཐོང་བ་ལས་དེ་མེད་པར་ཇི་ལྟར་རྟོགས་དེ་དང་ནི་ཞེས་བྱ་བ་ནི་གྲང་བ་མེད་པ་དང་སྟེ་མེ་དང་གྲང་བ་མེད་པ་དག་ནི་ལྷན་ཅིག་ཡིན་པའི་ཕྱིར་རོ། །གང་ལ་མེད་དེ་ཡོད་པ་དེར་གྲང་བ་མེད་པར་འགྱུར་བ་ལ་ནི་དེ་ག་ལས་ཞེས་བྱ་བའོ། །དེ་ལྟ་བུ་ཉིད་དུ་ཞེས་དོགས་པ་བསུ་ནས། ཅི་ཞེས་བྱ་བའི་རྣམ་པར་རྟོག་པ་གཉིས་བྱས་ནས་གལ་ཏེ་ཞེས་བྱ་བས་དང་པོ་སེལ་བའོ། །དེ་སྟེ་ཞེས་བྱ་བ་ནི་གཉིས་པའོ། །མི་དམིགས་པ་ཁོ་ན་ལས་ཞེས་བྱ་བ་ནི་འགལ་བ་མཐོང་བས་དཔག་པ་ལས་སོ། །གཞན་དུ་ཞེས་བྱ་བ་ནི་འགལ་བར་བསྒྲུབ་པས་མི་དམིགས་པ་རྗེས་སུ་དཔག་པ་མ་ཡིན་ནའོ། །མེ་ལ་སོགས་པའི་དངོས་པོ་གཅིག་ཡོད་པར་བརྗོད་པས་གཞན་གྲང་བའི་རེག་པ་ལ་སོགས་པ་མེད་པར་རོ། །གང་ལས་ཞེས་བྱ་བ་ནི་ཚད་མས་སོ། །དེ་ཉིད་ཀྱང་ནི་འགལ་བ་ཉིད་ཀྱང་ངོ༌། །དེ་ནི་ཞེས་བྱ་བ་ནི་ལྷན་ཅིག་མི་གནས་པའོ། །ཚད་མ་མེད་པ་ཉིད་ནི་མི་དམིགས་པ་ཉིད་དོ། །འོན་ཏེ་གཅིག་ཡོད་པ་ཉིད་ལས་གཞན་འགོག་པའི་ཕྱིར་མི་དམིགས་པས་ཅི་བྱ་ཞེ་ན། གལ་ཏེ་ཞེས་བྱ་བའོ། །འོན་ཏེ་གཞན་དགག་པ་ནི་འགལ་བ་ལས་ཡིན་པ་དེས་ན་ཧ་ཅང་ཐལ་བ་མ་ཡིན་ནོ་ཞེ་ན་ལྷན་ཅིག་ཅེས་གསུངས་སོ། །གལ་ཏེ་དེ་ལྟ་ཞེས་བྱ་བ་ལ་སོགས་པས་མུ་སྟེགས་པའི་ལུགས་དོགས་པ་བསུ་བའོ། །འདི་འགོག་པ་སློབ་དཔོན་ཆོས་མཆོག་གི་ལུགས་ཀྱིས་དོགས་པ་བསུ་བ་ནི་ཅི་སྟེ་འགལ་བ་བསྒྲུབ་པའི་ཞེས་
བྱ་བའོ། །སྔོན་ཞེས་བྱ་བ་ནི་འགལ་བ་འཛིན་པའི་དུས་སུའོ། །དེའི་རྗེས་སུ་འབྲང་བ་ཉིད་ཀྱིས་ཞེས་བྱ་བ་ནི་སྔོན་ཞུགས་པའི་མི་དམིགས་པའི་རྗེས་སུ་འབྲང་བ་ལས་སོ། །དེ་ཉིད་ཅེས་བྱ་བ་ནི་སྔོན་ཞུགས་པའི་མི་དམིགས་པའོ། །འབྲེལ་བ་འཛིན་པ་ཉིད་ལས་རྗེས་སུ་དཔག་པར་བྱ་བ་འགྲུབ་པས་ན་རྗེས་སུ་དཔག་པར་ཚད་མ་དུས་སུའོ། །དེའི་རྗེས་སུ་འབྲང་བ་ཉིད་ཀྱིས་ཞེས་བྱ་བ་གལ་ཏེ་དེ་ལྟ་ན་ཞེས་བྱ་བའོ། །ཁོང་པར་མཐོང་བ་ནི་སྣང་བ་མི་དམིགས་པ་སྟེ་འགལ་བ་འཛིན་པའི་དུས་ན་ཞུགས་པ་དེས། གལ་ཏེ་བསྒྲུབ་པར་བྱ་བ་དངོས་པོ་མེད་པར་འགྲུབ་པར་འགྱུར་བ་མེའི་རྗེས་སུ་དཔག་པར་ཆད་མར་ཇི་ལྟར་འགྱུར་ཏེ་མི་འགྱུར་བ་ཉིད་དོ། །གལ་ཏེ་གཞན་རྣམ་པ་གཞན་དུ་འགྱུར་བས་གཞན་རྣམ་པ་གཞན་དུ་ཇི་ལྟར་འགྱུར་ཞེ་ན། རྗེས་སུ་དཔག་པའི་ཞེས་གསུངས་ཏེ་རྟགས་ཀྱིའོ། །དེ་ཉིད་ལས་ཞེས་བྱ་བ་ནི་མངོན་སུམ་ཉིད་ལས་སོ། །དེར་ཞེས་བྱ་བ་ནི། ལྐོག་ཏུ་གྱུར་པ་ལའོ། །ལན་ནི་ལྐོག་ཏུ་གྱུར་པའི་ཞེས་བྱ་བའོ། །འཇུག་པ་གང་ཡིན་པ་ཞེས་བྱ་བ་ནི། གྲང་བ་ལ་སོགས་པ་དགག་པར་བྱ་བ་ལྐོག་ཏུ་གྱུར་པའོ། །འོ་ན་ནི་འགལ་བ་འཛིན་པའི་དུས་ན་ཡོད་པའི་མི་དམིགས་པ་དྲན་པའི་ཡུལ་དུ་གྱུར་པ་ཉིད་མེད་པའི་སྒྲུབ་པར་བྱེད་པ་ཡིན་ནོ། །ཞེས་དོགས་པ་བསུ་བ་ནི་ཅི་སྟེ་ཞེས་བྱ་བའོ། །འདི་ཡང་མེའི་རྗེས་སུ་དཔག་པ་དང་མཚུངས་པ་ཡིན་ནོ་ཞེས་ལན་འདེབས་པ་ནི་དེའི་འདི་ཡང་ཞེས་བྱ་བའོ། །དེར་ཡང་ཞེས་བྱ་བ་ནི། ལྐོག་ཏུ་གྱུར་པའི་མེ་ལ་ཡང་ངོ༌། །འོ་ན་ཇི་ལྟར་འགལ་བ་དམིགས་པ་ལ་སོགས་པར་མི་དམིགས་པ་ལས་མི་འགྲུབ་པ་ཇི་ལྟར་ཡིན་ཞེ་ན། དོགས་པ་བསུ་ནས་མཇུག་སྡུད་པའི་སྒོ་ནས་མཇུག་གི་ལུགས་བརྗོད་པ་ནི་དེའི་ཕྱིར་ཞེས་བྱ་བའོ། །འདི་ལས་ཞེས་བྱ་བ་ནི་འཆད་པར་འགྱུར་བའོ། །དེ་ཁོ་ནའི་དོན་ཅན་ཞེས་བྱ་བ་ལུང་གི་སྐད་ཀྱིས་ནི་དོན་གྱི་དེ་ཉིད་བརྗོད་པ་ཡིན་ནོ། །གང་གི་ཕྱིར་འགལ་བ་འཛིན་པའི་དུས་ན་མེ་གྲང་བ་མེད་པ་དང་འབྲེལ་པ་ནི་དམིགས་པ་བརྟེན་པ་དེས་ན་མེ་དེ་གྲུབ་པས་གྲང་བའི་རེག་པ་མེད་པར་གྲུབ་པའོ། །དེ་ལྟ་ན་ཡང་མི་དམིགས་པ་སྒྲུབ་པར་བྱེད་པར་ཇི་ལྟར་འགྱུར་ཞེ་ན། མེད་པ་དེ་ཡང་ཞེས་བྱ་བའོ། །དེས་ན་ཞེས་བྱ་བ་ནི་གཞན་ལ་ཡིན་པས་ནའོ། །མི་དམིགས་པ་ཉིད་ཅེས་བྱ་བ་ནི་གྲང་བ་མེད་པའི་རང་བཞིན་དྲོ་བའི་རེག་པའི་ངོ་བོ་ཉིད་དེ། །གལ་ཏེ་གང་གིས་དཔེར་འགྱུར་བ་མངོན་
སུམ་གྱིས་གྲུབ་པའི་མི་དམིགས་པར་བརྗོད་པ་ཡོད་དམ་ཞེ་ན། གང་འཆད་པར་འགྱུར་རོ་ཞེས་གསུངས་སོ། །གལ་ཏེ་དེ་ལྟ་ན་ཡང་རྗེས་སུ་དཔག་པས་གྲུབ་པ་ཡིན་ནོ་ཞེས་བྱ་བར་ཇི་ལྟར་འགྱུར་སྙམ་ན། འདིར་ཡང་ཞེས་གསུངས་སོ། །མངོན་སུམ་རང་ཉིད་ལས་ཞེས་བྱ་བ་ནི་ཉེ་བར་མཚོན་པ་ཡིན་ནོ་ཞེས་བྱ་བའི་དོན་ཏོ། །འོ་ན་རྒྱུ་འགལ་བ་དམིགས་པར་མི་དམིགས་པ་ལས་དངོས་པོ་མེད་པར་ཇི་ལྟར་འགྲུབ་སྙམ་ན་གང་གི་ཚེ་ཞེས་བྱ་བ་ནི་སླ་ཞིང་འབར་བའི་གཟུགས་ཅན་གྱིས་སོ། །འདི་ཉིད་བརྗོད་པ་ནི་དེ་ལ་ཚོགས་པ་གཅིག་ལ་ཞེས་བྱ་བའོ། །དེ་ཡང་ནི་དྲོ་བའི་རེག་པའོ། །དེ་མི་དམིགས་པ་ཉིད་ནི་ཞེས་བྱ་བ་ནི་དྲོ་བའི་རེག་པ་དམིགས་པ་ཉིད་ནའོ། །གང་གི་ཕྱིར་དེ་ལྟར་སྤུ་ལངས་པ་མེད་པར་སྒྲུབ་པར་བྱེད་པའི་རྒྱུ་ངེས་ནའོ། །དྲོ་བའི་རེག་པ་གྲང་བ་མེད་པའི་རང་བཞིན་ཅན་བསྒྲུབ་པར་བྱ་བ་ལ་གཟུགས་ནི་འབྲས་བུའི་གཏན་ཚིགས་ཡིན་ལ། སྤུ་ལངས་པ་མེད་པའི་བསྒྲུབ་པར་བྱ་བ་ལ་གྲང་བ་མེད་པར་ནི་རྒྱུ་མི་དམིགས་པ་ཡིན་ཏེ། དེ་གཉིས་སུ་ལངས་པ་མེད་པའི་མཚན་ཉིད་ཀྱི་བསྒྲུབ་པར་བྱ་བ་གཅིག་ལ་འཇུག་པའི་ཕྱིར་རོ། །དེས་ན་ཞེས་བྱ་བ་ནི་འགལ་བ་རྟགས་ཅན་གཞན་མ་ཡིན་པས་ནའོ། །གྲང་བའི་མེད་པའི་རང་བཞིན་ཅན་དྲོ་བའི་རེག་པ་ལ་ནི་གཟུགས་འབྲས་བུའི་གཏན་ཚིགས་ཡིན་ལ། དེའི་འབྲས་བུ་མེད་པ་ལ་གྲང་བ་མེད་པ་རྒྱུ་མི་དམིགས་པ་ཡིན་ནོ་ཞེས་བརྗོད་པར་ནི་དེའི་ཕྱིར་དེ་ནི་ཞེས་བྱ་བའོ། །གང་ཡང་འབྲེལ་པ་འཛིན་པའི་མངོན་སུམ་རྗེས་སུ་དཔག་པ་ཉིད་ལས་རྗེས་སུ་དཔག་པར་གྲུབ་པ་ན། རྗེས་སུ་དཔག་པ་མེད་པར་ཟློག་པར་བྱེད་པ་དེ་ཡང་མི་འཐད་དེ། མངོན་སུམ་ལས་རྗེས་སུ་དཔག་པར་བྱ་བ་ཐ་དད་པར་མེད་པ་ཡིན་ན། དེ་གྲུབ་ན་རྗེས་སུ་དཔག་པར་བྱ་བ་ཉིད་གྲུབ་པ་ཡིན་པའི་ཕྱིར་རོ་ཞེས་བརྗོད་པ་ནི། གལ་ཏེ་དེ་ལྟ་ན་ནི་ཞེས་བྱ་བ་ནས་རྗེས་སུ་དཔག་པར་དངོས་པོའི་ཡུལ་ཅན་ཡིན་ནོ་ཞེས་བྱ་བ་ཡིན་ནོ། །གལ་ཏེ་དམིགས་པ་ཡོད་ན་དེའི་ཚེ་མི་དམིགས་པ་མེད་པར་འགྱུར་རོ་ཞེས་དོགས་པ་བསུ་བ་ནི། མི་དམིགས་པ་ཉིད་ཅེས་བྱ་བའོ། །ཡིན་མོད་ཅེས་བྱ་བ་ནི་ལན་ནོ། །མི་དམིགས་པ་ཉིད་མེད་པ་ཡིན་པར་ཁས་ལེན་ན། མི་དམིགས་པ་ལས་མེད་པར་བསྒྲུབ་བོ་ཞེས་བྱ་བའི་ཕྱོགས་ཉམས་པར་འགྱུར་རོ་ཞེས་དོགས་པ་བསུ་བ་ནི་མེས་ཞེས་བྱ་བའོ། །མི་དམིགས་པ་ལས་མེད་པ་ཐ་དད་པ་མ་ཡིན་ན། གང་ཞིག་གང་གིས་སྒྲུབ་
ཅེས་ལན་འདེབས་པ་ནི་མེ་ཉིད་ཅེས་བྱ་བའོ། །འོན་ཏེ་ཡང་མེ་ཉིད་ནི་གྲང་བ་མེད་པ་མ་ཡིན་གྱི། འོན་ཀྱང་དེ་ལས་གཞན་ཡིན་ནོ་སྙམ་ན། དྲོ་བས་ཞེས་བྱ་བའོ། །མེ་གྲང་བ་མེད་པའི་རང་བཞིན་ཡིན་ན་ནི་རང་བཞིན་གྱི་གཏན་ཚིགས་ཉིད་དུ་འགྱུར་རོ་ཞེས་དོགས་པ་བསུ་བ་ནི་ཞེས་བྱ་བའོ། །མི་དམིགས་པ་ནི་ཞེས་བྱ་བ་ནི་ལན་ནོ། །ཇི་ལྟར་དམིགས་པ་ལས་མེད་པ་ཉིད་ཐ་མི་དད་པ་དེ་བཞིན་དུ་གཞན་དམིགས་པའི་རང་བཞིན་གྱི་མི་དམིགས་པ་ལས་ཀྱང་ཐ་མི་དད་དེ་དེས་ན་ཐ་སྙད་ལས་མི་རྟོགས་པའི་བསྒྲུབ་པར་བྱ་བ་ནི། མེད་དོ་གང་གི་ཕྱིར་གྲང་བ་མེད་པའི་ཐ་སྙད་བསྒྲུབ་པར་བྱ་བ་ལས་མེ་རང་བཞིན་གྱི་གཏན་ཚིགས་ཡིན་པ་དེས་ན་འདི་ན་ཞེས་བྱ་བའོ། །གང་གི་ཕྱིར་ཇི་སྙེད་བསྒྲུབ་པར་བྱ་བ་ལས་མེ་རང་བཞིན་མི་དམིགས་པ་ཉིད་དངོས་པོ་མེད་པར་བསྒྲུབ་པར་བྱ་བ་ཡིན་པ་དེའི་ཕྱིར་མི་དམིགས་པ་ཞེས་བྱ་བ་རང་སྒྲས་བརྗོད་ན་ཡང་ངོ༌། །ཡང་གི་སྒྲས་ནི་འགལ་བ་དམིགས་པར་རང་གི་སྒྲ་མ་ཡིན་པས་བརྗོད་པ་ཡང་ངོ༌། །ཁ་ཅིག་ན་རེ་ཡང་སྒྲ་ནི་མ་བརྗོད་ན་ཡང་ཞེས་བྱ་བ་ཡིན་ནོ་ཞེའོ། །བཤད་པར་ནི་འགལ་བའི་སྐབས་ཡིན་པའི་ཕྱིར་རང་གི་སྒྲ་ནི་དེའི་སྒྲ་ལ་བྱའོ་ཞེའོ། །རྒོལ་བ་གང་ལ་གཞན་དམིགས་པའི་རང་བཞིན་མ་དམིགས་པ་མངོན་སུམ་མམ་རྗེས་སུ་དཔག་པ་ལས་གྲུབ་པ་ནི་མེད་པའི་ཐ་སྙད་སྒྲུབ་པའི་ཚད་མར་མི་འདོད་ཀྱི། འོན་ཀྱང་དངོས་པོ་རྣམས་ཀྱི་མེད་པན་ཡིད་འགའ་ཞིག་ལས་བསྒྲུབ་པར་བྱ་བར་འདོད་པ་ངེས་ན་དགག་པ་བརྗོད་པར་བྱ་བ་མ་ཡིན་ནོ་ཞེས་བརྗོད་པ་ནི། གང་ལ་ཞེས་བྱ་བའོ། །རྣམ་ཀུན་ཞེས་བྱ་བ་ནི་འགལ་བ་ཉེ་བར་བསྟན་པའམ། ཚད་མ་གཞན་གྱིས་ཀྱང་རུང་བའི་ཕྱིར་རོ། །ད་ནི་ཕྱེད་ཕྱི་མ་འཆད་དེ་གང་ལ་དེ་ཞེས་བྱ་བའོ། །གལ་ཏེ་རྣམ་པ་གཞན་དུ་ཡང་དགག་པ་རྟོགས་པ་ཡིན་ནོ་ཞེ་ན། དཔག་པ་ལ་ནི་ཞེས་བྱ་བའོ། །དེས་ནི་ཞེས་བྱ་བ་ནི་འགལ་བ་དམིགས་པ་ཉེ་བར་བསྟན་པའི་ཚུལ་གྱིས་སོ། །དགག་པར་བྱ་བ་དེ་དང་འགལ་བ་མེད་པ་ལ་སོགས་པའི་དོན་དེའི་འབྲས་བུ་དུ་བ་དེ་བརྗོད་པ་ཡང་བཤད་པ་ཡིན་ནོ། །འོ་ན་འགལ་བ་དམིགས་པ་ལ་སོགས་པའི་དབྱེ་བ་ཇི་ལྟར་ཞེ་ན་སྦྱོར་བ་ཉིད་ཅེས་གསུངས་སོ། །འོ་ན་རང་བཞིན་མི་དམིགས་པའི་ནང་དུ་ཇི་ལྟར་འདུ་ཤེས་ན། ཐམས་ཅད་དུ་ནི་ཞེས་གསུངས་ཏེ་རང་བཞིན་འགལ་ལ་སོགས་པ་དམིགས་པར་རོ། །གང་གི་ཕྱིར་དོན་དེ་རང་བཞིན་མི་དམིགས་པའི་
ངོ་བོ་ཉིད་དང༌། བསྒྲུབ་པར་བྱ་བས་གྱུར་པ་ཐ་སྙད་ཀྱི་ངོ་བོ་ཉིད་ཐ་དད་པ་མེད་པ་དེས་ན་ཁོངས་སུ་འདུས་པ་ཡིན་ནོ་ཞེས་བྱ་བའི་དོན་ཏོ། །དེ་ལ་ཡང་ཞེས་བྱ་བ་ན་འགལ་བའི་འབྲེལ་ལ་ཡང་ངོ༌། །ཇི་ལྟར་རྗེས་སུ་དཔག་པ་ཡིན་ཞེས་དོགས་པ་བསུ་བ་ན། དེས་ནི་འདི་ལྟར་ཡིན་ནོ་ཞེས་བརྗོད་པ་ནི་འདི་ལྟར་ཞེས་བྱ་བའོ། །སྔར་བཤད་ཚུལ་གྱིས་ཞེས་བྱ་བ་ནི་དྲོ་བའི་རེག་པ་ནི་གྲང་བ་མི་དམིགས་པའི་རང་བཞིན་ཡིན་པའི་ཕྱིར་རོ། །གཞན་དུ་ཞེས་བྱ་བ་ནི་འགལ་བའི་སྟེ་དྲོ་བའི་རེག་པ་མེད་པའི་རང་བཞིན་མ་ཡིན་ན་དེའི་ཚེ་གྲང་བ་མེད་པ་མི་འགྲུབ་པ་ཞིག་ན་འགྲུབ་པ་ཡང་ཡིན་ཏེ། དེས་ན་འགལ་བའི་འབྲས་བུ་དམིགས་པ་དེར་ཡང་བརྒྱུད་པ་ཁོ་ནས་གྲང་བ་ལ་སོགས་པ་མེད་པར་འགྲུབ་པ་ཡིན་ནོ། །དབུ་བ་ལས་ཞེས་བྱ་བ་ནི་འཆད་པའོ། །དུ་བ་ལས་རབ་ཏུ་འགྲུབ་པ་གྲང་བའི་རེག་པ་མེད་པའི་རང་བཞིན་ཅན་མེ་ལས་དེ་མེད་པའི་ཐ་སྙད་འགྲུབ་པ་ཡིན་ནོ་ཞེས་བྱ་བའི་དོན་ཏོ། །གང་གི་ཕྱིར་དེ་ལྟར་ཐམས་ཅད་ལ་དོན་ཐ་མི་དད་པ་དེས་ནའོ། །ཇི་ལྟར་བརྗོད་པའི་མི་དམིགས་པ་དང་བྲལ་བའི་སྦྱོར་བ་ལ་ནི་མེད་པ་འགྲུབ་པ་མེད་དོ་ཞེས་བརྗོད་པ་ནི་འགལ་བ་དང་ཞེས་བྱ་བ་སྟེ། འགལ་བ་མ་གྲུབ་པར་དགག་པ་བསྒྲུབ་པར་བྱ་བ་ལ་ཚད་མར་སྨྲ་བ་གང་ཡིན་པ་དེ་ནི་རིགས་པའི་རྗེས་སུ་འབྲང་བ་ཅན་མ་ཡིན་ནོ། །འགལ་བ་དེ་ཡང་ཐམས་ཅད་མཁྱེན་པ་མ་ཡིན་པ་ཉིད་ལ་སོགས་པའི་ཐབས་དང་འདི་ལྷན་ཅིག་ཏུ་འཇུག་པས་ཐབས་དང་བཅས་པར་བཀག་པར་ཏེ་བསྟན་པ་མེད་པར་རོ། །དངོས་སུ་འགལ་བ་མེད་པའི་ཕྱིར་ན་དེའི་རྒྱུའི་སྒོ་ནས་ཚིག་དགག་པར་བྱ་བ་དང་འགལ་བ་མ་བསྟན་པ་དགག་པ་བརྗོད་པ་ནི་མི་འཐད་དོ་ཞེས་བྱ་བའི་དོན་ཏོ། །ཇི་སྐད་བརྗོད་པའི་མི་དམིགས་པ་དང་བྲལ་བའི་སྦྱོར་བའི་དཔེ་བརྗོད་པ་ནི་སྨྲ་བ་ནི་ཚིག་གོ །དེ་ལ་སོགས་པ་འཆི་བའི་སེམས་ཉིད་ལ་སོགས་པ་གང་ཡིན་པ་དེས་ཀུན་མཁྱེན་དང༌། འཇིག་རྟེན་གཞན་ཞེས་བྱ་བ་མཚམས་སྦྱོར་བ་ལ་སོགས་པ་འགོག་པའོ། །དེ་ཡང་རྣམ་པ་གཞན་མི་སྲིད་པའི་ཕྱིར་ན་འགལ་བ་སྒྲུབ་པ་ལས་འགྱུར་གྲང་ན། སྨྲ་བ་ཉིད་ལ་སོགས་པ་ཡོད་ན་ཐམས་ཅད་མཁྱེན་པ་ཉིད་ལ་སོགས་པ་མེད་པའམ་སྤང་པས་གནས་པར་རྟོགས་པ་ཡང་ཡོད་པ་མ་ཡིན་ཏེ་དབང་པོ་ལས་འདས་པའི་ཕྱིར་རོ་ཞེས་བརྗོད་པ་ནི། དབང་པོ་ལས་འདས་ཞེས་བྱའོ། །སྐད་ཅིག་མ་མ་ཡིན་པ་ཉིད་ནི་སྔོན་པོ་ལ་སོགས་པའི་རང་བཞིན་དུ་སྒྲོ་
བཏགས་པས་ན། བལྟར་རུང་བ་ཡིན་པའི་སྐད་ཅིག་སྨྲ་བ་ཉིད་རང་འགལ་བ་ཁོ་ནའོ་ཞེས་དོགས་པའོ། །ཚིག་ནི་ཐམས་ཅད་རིག་པ་དང་འགལ་བ་མ་ཡིན་ཏེ། དེས་ན་དེ་བསྒྲུབ་པས་ནི་དེ་མེད་པ་མ་ཡིན་ནོ་ཞེས་བརྗོད་པ་ནི། སྨྲ་བ་ནི་ཞེས་བྱ་བའོ། །ཅིའི་ཕྱིར་ཞེ་ན། དབང་པོ་ལས་འདས་ཞེས་གསུངས་སོ། །འབྲས་བུས་རྒྱུ་མེད་པར་གོ་བར་བྱེད་པ་ཡང་མི་འཐད་དོ་ཞེས་བརྗོད་པ་ནི་ཚིག་ནི་ཞེས་བྱ་བའོ། །དེ་མེད་པར་ནི་ཤེས་པ་མེད་པའོ། །གལ་ཏེ་ཤེས་པ་ཙམ་དང་ནི་མི་འགལ་གྱི། འོན་ཀྱང་ཐམས་ཅད་ཤེས་པ་དང་ངོ་ཞེས་དོགས་པ་ནི་ཐམས་ཅད་ཤེས་པ་ཞེས་བྱ་བའོ། །འགལ་བ་འཛིན་པའི་ཚད་མ་འགའ་ཡང་མེད་དོ་ཞེས་ལན་བརྗོད་པ་ནི་གང་གིས་ཞེས་བྱ་བའོ། །གལ་ཏེ་ཉོན་མོངས་པ་དང་ལམ་ཤིན་ཏུ་འགལ་བ་ཡིན་ཏེ། ལམ་ཡོད་པ་དེ་འོག་ནས་འོག་ཏུ་འགྲིབ་པའི་ཕྱིར་རོ། །དེ་བཞིན་དུ་རིགས་པ་དང་ཚིག་དག་ཀྱང་བརྟག་པར་བྱ་བ་ཡིན་ནོ་ཞེས་བྱ་བར་ནི་མི་འཐད་དེ། རིགས་པ་འཕེལ་ན་ཚིག་འཕེལ་བས་ཕྱིན་ཅི་ལོག་ཏུ་འགྲུབ་པའི་ཕྱིར་རོ་ཞེས་བརྗོད་པ་ནི་གལ་ཏེ་ཞེས་བྱ་བའོ། །དེ་ལ་ལེགས་པ་ཅི་ཡོད་སྙམ་ན། ཐམས་ཅད་ཤེས་པ་ལ་ཞེས་གསུངས་སོ། །དེ་ལྟར་ཡིན་པ་ཁོ་ནའོ་ཞེ་ན། དེ་ལྟར་ནི་ཞེས་གསུངས་སོ། །ཚིག་ནི་རིགས་པའི་རྒྱུ་ཅན་ཡིན་ཏེ། དེས་འཕེལ་ན་འཕེལ་བའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་ཐམས་ཅད་རིགས་པ་དན་ཚིག་གཉིས་ལྷན་ཅིག་འཇུག་པ་མ་མཐོང་བའི་ཕྱིར་དེ་དང་སྨྲ་བ་འགལ་བ་ཡིན་ནོ་ཞེས་དོགས་པ་ནི་གལ་ཏེ་ཞེས་བྱ་བའོ། །དེ་ལྟ་ཡིན་ན་ཚིག་ལས་ཐམས་ཅད་རྨོངས་པ་ཉིད་དུ་རྗེས་སུ་དཔོག་པར་ཐལ་ལོ་ཞེས་ལན་འདེབས་པ་ནི་སྨྲ་བས་སོ་ཞེས་བྱ་བའོ། །མཁས་པ་མཐོང་བས་དེ་རྗེས་སུ་དཔོག་པ་ལ་གནོད་དོ་ཞེས་དོགས་པ་ནི་སྨྲ་བའོ་ཞེས་བྱ་བའོ། །ལ་ནི་དེ་ཡང་ཞེས་བྱ་བ་སྟེ་ཐམས་ཅད་རིག་པ་ཡང་ངོ༌། །གལ་ཏེ་ད་ལྟ་ཐམས་ཅད་རིག་པ་དང་སྨྲ་བ་གཉིས་ལྷན་ཅིག་རིགས་པ་མེད་པའི་ཕྱིར་ན་ཕྱིས་ཅི་སྟེ་མི་འགལ་ཞེ་ན། འདི་ལྟར་ཞེས་བྱ་བའོ། །འགལ་བའི་སྒྲུབ་བྱེད་དེ་འཕེལ་ན་འགྲིབ་པ་ཉིད་མེད་དོ་ཞེས་བྱ་བའི་དོན་ཏོ། །གལ་ཏེ་དེ་འདྲ་བ་མི་དམིགས་པའི་ཁྱད་པར་ཅན་གྱི་སྨྲ་བ་པོ་ཉིད་ནི་གྲང་བ་མ་དམིགས་པའི་ཁྱད་པར་ཅན་གྱི་དྲོ་བའི་རེག་པ་བཞིན་དུ་འགལ་བ་ཁོ་ན་མ་ཡིན་ནམ་ཞེས་དོགས་པ་བསུ་བ་ནི་དེ་འདྲ་བ་མི་དམིགས་ཕྱིར་ཞེ་ན་ཞེས་བྱ་བའོ། །འོ་ན་མི་དམིགས་
པ་དེ་ཉིད་ཐམས་ཅད་རིགས་པ་མེད་པར་གྲུབ་པ་ལ་བརྗོད་པར་བྱ་བའི་དེའི་ཁྱད་པར་ཅན་གྱི་སྨྲ་བ་ཉིད་ཀྱིས་ཅི་ཞིག་བྱ། རེ་ཞིག་ཕྱེད་སྔ་མ་འཆད་པ་ནི་དཔེར་ན་ཞེས་བྱ་བའོ། །དེ་མེད་ཀྱང་ནི་རྨོངས་པ་ཉིད་མེད་ཀྱང་ངོ༌། །གང་གི་ཚེ་ཞེ་ན་མཁས་པའི་དུས་སུའོ། །དེ་བཞིན་དུ་གལ་ཏེ་ཞེས་བྱ་བ་ནི་གནས་སུ་ཡང་ཁྱད་པར་དུ་གྱུར་ན་ཞེས་འབྲེལ་ཏོ། །དེའི་ཚེ་ཅི་འགལ་ཏེ་ཅི་ཡང་མི་འགལ་ལོ་ཞེས་བྱ་བའི་དོན་ཏོ། ཐམས་ཅད་འཕེལ་བ་དང་ནི་མི་འགལ་མོད་ཀྱི་འོན་ཀྱང་ཐམས་ཅད་རིག་པ་དང་འགལ་བ་ཡིན་ནོ་ཞེས་དོགས་པ་བསུ་བ་ནི་ཤིན་ཏུ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །ད་ནི་ཕྱེད་ཕྱི་མ་འཆད་དེ། དེ་ལྟ་བུའི་ཞེས་བྱ་བའོ། །སྣང་བ་མི་དམིགས་པ་ཁོ་ན་གོ་བར་བྱེད་པ་ཡིན་ནོ་ཞེས་བྱ་བ་འདི་ལ་རྒྱུ་ཅི་ཡོད་སྙམ་ན། མི་དམིགས་པ་ནི་དེ་ལྟ་བུ་ཞེས་བྱ་བ་གསུངས་ཏེ། བལྟར་རུང་བའི་ཁྱད་པར་དང་བྲལ་བའོ། །གལ་ཏེ་མི་དམིགས་པ་ཙམ་ལས་མེད་པར་མི་ངེས་ན་འོ་ན་ཡོད་པར་ངེས་པར་འགྱུར་རོ་ཞེས་དོགས་པ་བསུ་ནས་དེའི་ཕྱིར་ཞེས་གསུངས་སོ། །རེས་འགལ་ལྐོག་ཏུ་གྱུར་པ་ནི་ཚད་མ་དག་གིས་ཡོད་པའམ། མེད་པར་ངེས་པ་ཡིན་ནོ། །དབང་པོ་ནི་རྟག་ཏུ་ལྐོག་ཏུ་གྱུར་པ་ཡིན་ཡང་དོན་གྱིས་གོ་བས་རྟོགས་པ་ཡིན་ན་ཐམས་ཅད་མཁྱེན་པ་ལ་སོགས་པ་ནི་མ་ཡིན་ནོ་ཞེས་གཞན་གྱིས་ཁས་བླངས་པ་ཡིན་ནོ། །དེ་ལྟར་འགལ་བ་མ་བསྒྲུབ་པར་དགག་བ་བརྗོད་པའི་རིགས་པའི་རྗེས་སུ་འབྲང་བ་ཅན་མ་ཡིན་ནོ་ཞེས་བྱ་བ་བཤད་པ་ནས། དེ་ནི་ཐབས་བཅས་པར་ཞེས་བྱ་བར་བཤད་པའི་དོན་དུ་ཐམས་ཅད་རིག་པ་གསལ་བར་དོན་ཐམས་ཅད་མཐོང་བ་ནི་རྣམ་པར་རྟོག་པ་དང་འགལ་བ་ཡིན་ལ་དེའི་འབྲས་བུ་ཚིག་དང་ཡང་འགལ་བ་ཡིན་ཏེ། དེས་ན་སྨྲ་བ་ཉིད་ནི་འགལ་བའི་འབྲས་བུ་ཡིན་ཏེ་ཞེས་དོགས་པ་བསུ་བ་ནི་འོན་ཏེ་ཡང་ཞེས་བྱ་བའོ། །ཐམས་ཅད་མཁྱེན་པ་ཞེས་པ་ཞེས་བྱ་བ་ནི་གསལ་བར་རོ། །འོ་ན་ཚིག་ཇི་ལྟར་འབྱུང་བ་ཡིན་ཞེ་ན། སྔ་མ་དང་ཞེས་བྱ་བའོ། །སྨྲ་བ་པོ་གཞན་བཞིན་དུ་ཐམས་ཅད་མཁྱེན་པ་ཡང་རྟོགས་པས་འཇུག་པ་ཡིན་ཏེ། མ་བརྟགས་མ་དཔྱད་པར་ནི་ཚིག་མི་སྨྲ་བའོ་ཞེས་ལུང་ལས་གསུངས་པའི་ཕྱིར་རོ། །ཡང་ན་དེ་མེད་ཀྱང་སྔོན་གྱི་བརྗོད་པར་འདོད་པའི་འཕན་ཤུགས་ཡོད་པ་དེས་ན་གཅིག་མི་སྲིད་པར་ཇི་ལྟར་འགྱུར་ཞེས་བྱ་བ་གཉིས་པོ་འདི་ལྷན་ཅིག་བརྗོད་པས་ཚིགས་སུ་བཅད་
པ་གཅིག་གིས་བརྗོད་པས་ནི་དོན་ཀུན་ཞེས་བྱ་བའོ། །བརྗོད་འཇུག་པར་གྱུར་ཏེ། གོམས་པའི་ཕྱིར་རོ་ཞེས་བྱ་བ་ནི་ཕྱོགས་དང་པོ་ལའོ། །སྔོན་གྱི་དུས་ན་ཡོད་པའི་བརྗོད་པར་འདོད་པ་གོམས་པ་ལས་བརྗོད་འཇུག་པ་ཞེས་བྱ་བ་ནི་ཕྱོགས་གཉིས་པ་ལའོ། །དེའི་ཕྱིར་ཐམས་ཅད་མཁྱེན་པ་དེ་ལ་རྣམ་པ་གཉིས་ཀ་ལྟར་ཡང་ཚིག་མེད་པར་ཇི་ལྟར་འགྱུར། །གལ་ཏེ་མཐོང་བའི་དུས་ན་རྣམ་པར་རྟོག་པ་མེད་པའི་ཕྱིར་ཇི་ལྟར་སྨྲ་སྙམ་ན་བསྒོམས་སྟོབས་ལ་ཞེས་བྱ་བའོ། །བསྒོམས་པའི་སྟོབས་ལ་བརྟེན་ནས་དོན་དཔག་ཏུ་མེད་པའི་རྣམ་པ་ཤིན་ཏུ་གསལ་བར་མཐོང་བ་གང་ཡིན་པ་དེ་དང་དུས་མཚངས་བརྗོད་པར་འདོད་པ་མི་འབྱུང་བ་ནི་མ་ཡིན་ཏེ། འདི་ག་ལས་སྙམ་ན། ཉེ་བར་གནས་པའི་ཞེས་གསུངས་སོ། །ཅེ་དེ་ལྟར་འགའ་ཞིག་ཏུ་མཐོང་བ་སྙམ་དུ་དོགས་པ་བསུ་ནས་འདིར་མཐོང་བ་ཁོ་ནའོ་ཞེས་བརྗོད་པ་ནི། ཡིད་གཞན་དུ་ཞེས་བྱ་བའོ། །མཐོང་བ་གཞན་ཡང་བརྗོད་པ་ནི་སྔར་གོམས་པ་ཞེས་བྱ་བའོ། །ཉེ་པར་གནས་པ་ལ་ཞེས་བྱ་བ་ནི་སྔོན་ལ་མཐོང་བ་དང་པོ་ཉིད་ཉེ་བར་གནས་པ་ལ་ཞེས་བྱ་བའི་དོན་ཏོ། །ཇི་ལྟར་འདིས་འདི་གསལ་བ་ཡིན་ཞེ་ན། འགལ་ཏེ་ཞེས་བྱ་བའོ། །གཞན་གྱི་འགལ་བ་གཞན་ཏེ་དཔེར་ན་གྲང་བ་དང་མེ་བཞིན་ནོ། །གཞན་གྱིས་ཐ་མི་དད་པར་སྒྲོ་བཏགས་པའི་འགལ་བ་ཡང་འགལ་བ་ཡིན་ནོ་ཞེས་བརྗོད་པ་ནི་ཐ་མི་དད་ལ་ཞེས་བྱ་བའོ། །འགལ་བ་གཉིས་པོ་འདི་ཉིད་ཁྱད་པར་གྱི་མཐར་ཐུག་པར་བྱེད་པ་ནི་ཁ་བ་མེད་ལ་ཞེས་བྱ་བ་སྟེ་གྲང་བ་མེད་པའི། །དེ་དང་ཐ་མི་དད་པར་ཁས་བླངས་པའི་སྐྱེ་བ་ལ་ཡོད་པ་ཉིད་གནོད་པར་བྱེད་པ་ཡིན་པ་བཞིན་ནོ། །ཅི་ཐ་དད་པ་མེད་པ་ལྷན་ཅིག་མི་གནས་པའི་མཚན་ཉིད་ཀྱི་འགལ་བ་ཡོད་ན་ཞེས་དོགས་ན་ཡོད་པ་དང་ཞེས་གསུངས་ཏེ། ཡོད་པ་དང་སྐྱེ་བ་དག་ནི་འགལ་བ་ཡིན་ནོ་ཞེས་འབྲེལ་ཏོ། །རྣམ་པ་ཅི་འདྲ་བར་ཞེ་ན་ཕན་ཚུལ་ཞེན་པ་གསུངས་སོ། །ཐ་དད་པ་མེད་པ་ནི་ཡོད་པ་དང་སྐྱེ་བ་དང་ཁས་བླངས་པའི་ཡུལ་ཡིན་ནོ། །གཞན་གྱིས་ཁས་བླངས་པ་དེ་ཉིད་སྟོན་པ་ནི་སྐྱེ་བ་ནི་ཞེས་བྱ་བའོ། །ཡོད་པ་དང་སྐྱེ་བ་དག་ནི་འགལ་བ་ཡང་ཡིན་ནོ། །འགལ་བ་ཉིད་བརྗོད་པ་ནི་ཡོད་པ་ཉིད་ནི་ཞེས་བྱ་བའོ། །ཐ་དད་པ་ལ་འགལ་བ་ཉིད་མེད་པར་དོགས་པ་བསུ་བ་ནི་ཐ་དད་པ་མེད་པ་དག་ཅེས་བྱ་བའོ། །གཞན་གྱིས་ཞེས་བྱ་བ་ནི་ལན་ཏེ་གྲངས་ཅན་གྱིས་
སོ། །འགལ་བའི་རང་བཞིན་མ་རྟོགས་པ་ནི་གལ་ཏེ་ཞེས་བྱ་བའོ། །བཟློག་པར་བྱ་བ་ནི་ལན་ནོ། །འགལ་བའི་རང་བཞིན་འདི་ཉིད་སྟོན་པ་ནི་འདི་ལྟར་ཞེས་བྱ་བའོ། །འབྱུང་བ་ཞེས་བྱ་བ་ནི་རྒྱུན་གྱིས་འཇུག་པའོ། །མེད་པར་འགྱུར་བ་ནི་དེའི་ཚེ་དེ་གཉིས་བཟློག་པར་བྱ་བ་དང་ཟློག་པར་བྱེད་པ་ཡིན་པའི་མཚན་ཉིད་ཀྱི་འགལ་བ་དེ་མཐོང་བར་འགྱུར་རོ། །གང་ལ་ཞེ་ན་མེ་དང་གྲང་བའི་བདག་ཉིད་ལའོ། །རེ་ཞིག་འགལ་ན་འདི་ཉིད་རྣམ་པར་སྤྱོད་པ་ནི་གལ་ཏེ་ཞེས་བྱ་བའོ། །སྐད་ཅིག་མའི་ཕྱོགས་ལ་ཡང་གཞན་གྱིས་གཞན་འཇིག་པ་མ་ཡིན་པ་ཞེས་བརྗོད་པ་ནི་སྐད་ནི་ཞེས་བྱ་བའོ། །མ་སྐྱེས་པ་ལ་འཇིག་པ་ཇི་ལྟར་མི་འཐད་སྙམ་ན་མ་སྐྱེས་པ་ནི་ཞེས་བྱ་བའོ། །འོ་ན་སྐྱེས་པ་ལ་ཡང་དེ་ཅི་ལྟར་མི་འཐད་སྙམ་ན་སྐྱེས་པ་ཡང་ཞེས་གསུངས་སོ། །འོ་ན་གཞན་གྱིས་དུས་གཞན་དུ་འཇིག་པར་བྱེད་དོ་སྙམ་དུ་གཞན་གྱིས་དུས་སུ་ནི་ཞེས་གསུངས་སོ། །དེ་ལས་ཞེས་བྱ་བ་ནི་སྐད་ཅིག་ལའོ། །འོ་ན་རྒྱུན་གཞན་མེད་མོད། །འོན་ཀྱང་སྐད་ཅིག་ཡོད་པ་ཡིན་ལ་དེའི་འཇིག་པ་ཡང་སྐད་ཅིག་བརྒྱུད་པ་ཕྱི་མའི་གེགས་བྱས་པ་ལས་གཞན་མ་ཡིན་ནོ་ཞེས་དོགས་པ་བསུ་བ་ནི་གལ་ཏེ་ཕྱི་མའི་ཞེས་བྱ་བའོ། །རྒྱུ་ཡོད་པ་དང་མེད་པའི་ཕྱོགས་དག་ལ་རྒྱུན་གཞན་གྱིས་གེགས་བྱེད་པ་མ་ཡིན་ནོ་ཞེས་ལན་བརྗོད་པ་ནི་གལ་ཏེ་ཞེས་བྱ་བའོ། །སྐད་ཅིག་བརྒྱུད་པ་ཕྱི་མའི་རྒྱུ་ཡོད་ནའོ། །རྒྱུ་མེད་པ་ལ་ནི་འབྲས་བུ་མ་སྐྱེས་པ་འགལ་བས་བྱས་པ་ཡིན་ནོ་ཞེས་བརྗོད་པ་ནི། དེ་སྟེ་ཞེས་བྱ་བའོ། །གལ་ཏེ་ཞེས་བྱ་བ་ནི་འཆད་པའོ། །གལ་ཏེ་རྒྱུ་ཡོད་པའམ། མེད་པ་ལ་ཡང་འགལ་བས་འབྲས་བུ་བཟློག་པར་མི་ནུས་ན། འོ་ན་འགལ་བས་རྒྱུ་མ་ཚང་བར་བྱས་པའི་སྒོ་ནས་འབྲས་བུ་འགོག་པར་བྱེད་པ་ཡིན་ནོ་ཞེས་དོགས་པ་ནི། ཅི་སྟེ་འགལ་བས་ཞེས་བྱ་བའོ། །རྒྱུ་མེད་པས་ནི་འགལ་བས་མ་ཚང་བར་བྱེད་སྲིད་དེ་རང་ཉིད་ཁོ་ན་མེད་པའི་ཕྱིར་རོ་ཞེས་བརྗོད་པ་ནི་གལ་ཏེ་མེད་པ་ཞེས་བྱའོ། །རང་གི་ངོ་བོས་ཡོད་པ་ལ་འགལ་བས་ཕྱིན་ཅི་ལོག་ཏུ་བྱ་བར་མི་ནུས་སོ་ཞེས་བརྗོད་པ་ནི། རང་གི་ངོ་བོས་ཞེས་བྱ་བའོ། །ཇི་ལྟར་བྱེད་དེ་མི་བྱེད་པ་ཁོ་ནའོ་ཞེས་བྱ་བའི་དོན་ཏོ། །རྒྱུ་མ་ཚང་བ་མེད་པར་ཡོད་ན་རྒྱུ་ཡང་སུ་དང་ཡང་འགལ་བ་མ་ཡིན་ནོ་ཞེས་བརྗོད་པ་ནི་གལ་ཏེ་དེ་ལ་ཞེས་བྱ་སྟེ་རྒྱུ་ལའོ། །དེ་ནི་རྒྱུའོ། །གང་གིས་
འབྲས་བུ་ལྡོག་པར་འགྱུར་བ་ཅི་སྟེ་དེ་མེད་པར་འགྱུར། དེ་མེད་ན་ཡང་འགལ་བ་ཅི་ཡང་ཡོད་པ་མ་ཡིན་ནོ་ཞེས་བརྗོད་པ་ནི། འོན་ཏེ་མ་ཚང་ཞེས་བྱ་བའོ། །དེ་ནི་ཞེས་བྱ་བ་ནི་རྒྱུའི་བདག་ཉིད་དོ། །དེ་མ་ཐག་པའི་ཚིག་ལེའུར་བྱས་པའི་ཕྱེད་སྔ་མ་འཆད་པ་ནི་མ་ཚང་བ་ཞེས་བྱ་བའོ། །ཕྱེད་ཕྱི་མ་འཆད་པ་ནི་དེའི་རྒྱུ་ཞེས་བྱ་བའོ། །དེའི་ཕྱིར་རྣམ་པར་དཔྱད་ན་ནི་འགལ་བ་ཡོད་པ་མ་ཡིན་ནོ་ཞེས་བྱ་བ་ནི་སྐབས་ཀྱི་དོན་ཏོ། །བསྡད་ནས་བྱེད་པའི་རྒྱུ་དང་འབྲས་བུའི་ཁྱད་པར་ཉིད་འགལ་བ་ཡིན་ནོ་ཞེས་ལན་འདེབས་པ་ནི། མེ་ནི་ཞེས་བྱ་བའོ། །གང་ལ་ལྷན་ཅིག་བྱེད་པ་མེད་པའི་གྲང་བ་དེས་ནི་གྲང་བ་གཞན་སྐྱེད་དེ། ལྷན་ཅིག་བྱེད་པ་མེད་པའི་གྲང་བ་ནི་སྐྱེད་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །ལྷན་ཅིག་བྱེད་དང་ཞེས་བྱ་བ་ནི་མེད་དང་ངོ༌། །དེ་ནི་ཞེས་བྱ་བ་གྲང་བའོ། །ཕྱེད་ཕྱི་མ་ཉིད་རྣམ་པར་འབྲེལ་པ་ནི་གྲང་བའི་ཞེས་བྱ་བའོ། །གྲང་བའི་རེག་པ་སྔ་མ་ནི་མེའི་ལྷན་ཅིག་བྱེད་པ་ཉིད་ཀྱི་ཕྱིར་ཅི་སྲིད་དུ་གཞན་པ་དང་ཆེས་གཞན་པ་ལ་སོགས་པའི་གྲང་བའི་རེག་པ་ནས་སྐྱེད་པར་བྱེད་པ་ནས་གྲང་བའི་རེག་པ་གཞན་སྐྱེད་པར་བྱེད་པ་མ་ཡིན་པ་དེ་སྲིད་ཀྱི་བར་དུ་འགྱུར་རོ་ཞེས་ཇི་སྲིད་གོང་དུ་བཏོན་ལ་དེ་སྲིད་ཀྱང་ཁོང་ནས་ཕྱུང་སྡེ་སྦྱར་བར་བྱ་བའོ། །དེ་ལྟ་ན་ཡང་གང་གིས་འགལ་བར་འགྱུར་བ་གྲང་བའི་ཟློག་པར་བྱེད་པ་ཇི་ལྟར་ཡིན་ཞེ་ན། དེ་ཞེས་སྨོས་ཏེ་སྐྱེད་བྱེད་མ་ཡིན་པའི་གྲང་པའི་རེག་པའོ། །གཞན་ཡང་ཞེས་བྱ་བ་ནི་གྲང་བའི་རེག་པའོ། །གལ་ཏེ་དེའི་རྒྱུ་ནུས་པ་མེད་པས་སྐྱེད་པ་ལས་སྐྱེད་བྱེད་ཉིད་ཡིན་པའི་ཕྱིར་ཇི་ལྟར་ལྡོག་པར་བྱེད་པ་ཡིན་ཞེ་ན། དེས་བྱས་པ་ཞེས་སྨོས་ཏེ། མེ་དེས་བྱེད་པ་གྲང་པའི་རེག་པའི་དེའི་རྒྱུ་ནུས་པ་ལ་མེད་པ་སྐྱེ་བ་ཞེས་བྱ་བས་སོ། །དེ་ལ་ཞེས་བྱ་བ་ནུས་པ་མེད་པའི་སྐད་ཅིག་ལས་སོ། །ཇི་ལྟ་བུར་གྱུར་པ་སྐྱེ་བ་མེད་པ་ཞེ་ན་སྔ་ན་མེད་པའི་མཚན་ཉིད་གང་ལ་ཡོད་པ་དེ་སྟེ་མྱུ་གུ་སྐྱེ་བ་མེད་པ་བཞིན་ནོ། །གལ་ཏེ་ཕྱི་མའི་སྐད་ཅིག་ལྡོག་པ་ཉིད་དེས་བྱས་པར་ཅི་ཁས་མི་ལེན་ཞེ་ན། རྒྱུའི་བྱེད་པ་ནི་ཞེས་བྱ་བའོ། །དེའི་ཕྱིར་ནུས་པ་མེད་པའི་སྐད་ཅིག་སྐྱེས་པས་མེ་གྲང་བའི་ཟློག་པར་བྱེད་པ་ཡིན་ཏེ། གཞན་དུ་ནི་མི་འཐད་པའི་ཕྱིར་རོ་ཞེས་གནས་སོ། །ཡང་ན་སྡོད་པ་མེད་པར་དེའི་ཁྱད་པར་འགལ་བ་ཡིན་ནོ་ཞེས་བརྗོད་པ་ནི་གྲང་བའི་ཞེས་བྱ་བའོ། །གང་གིས་ཞེས་བྱ་བ་ནི་ངོ་བོ་ཉིད་ཀྱིས་སོ། །གལ་ཏེ་རང་གི་ངོ་བོ་དེ་མེ་ཉེ་བ་ཁོ་ན་ཡིན་གྱི་གཞན་གྱི་ཚེ་མ་ཡིན་ནོ་ཞེས་བྱ་བ་གང་ལས་ཞེ་ན། དངོས་པོ་
རྣམས་ཀྱི་ནུས་པ་ནི་ཞེས་བྱ་བའོ། །འགལ་བ་དག་ཚོགས་པ་མི་སྲིད་པར་དོགས་པ་ནི་འགལ་བ་ཞེས་བྱ་བའོ། །དེ་ལྟར་ཞེས་བྱ་བ་ནི་ལན་ཏེ། གཅིག་ལ་ཚིག་པ་ཉིད་དུ་གྱུར་པ་ཡིན་ནའོ། །གཞན་དུ་ནི་ཞེས་བྱ་བ་ནི་ཚོགས་པ་ཡིན་པར་རོ། །སྡོད་པའི་ཕྱོགས་ལ་ནི་མེ་དང་གྲང་བ་སྐད་ཅིག་དང་པོར་ཚོགས་པ་གཉིས་མི་འགལ་ལོ་ཞེས་བརྗོད་པ་ནི་སྐད་ཅིག་ཅེས་བྱ་བའོ། །ཇི་ལྟར་འདི་གཉིས་དེའི་ཚེ་མི་འགལ་བ་ངེས་ཤེ་ན་མེ་ཞེས་བྱ་བའོ། །ཤིན་ཏུ་གསལ་བའི་སྣང་བ་དང་མི་ཉེ་བས་མུན་པ་དང་ཁ་བ་དག་འཇིག་པ་ཁོ་ནར་བྱེད་དོ་ཞེས་དོགས་པ་ནི་ཤིན་ཏུ་གསལ་བའི་ཞེས་བྱ་བའོ། །དེ་ཉིད་ལ་ཞེས་བྱ་བ་ནི་སྣང་བ་ཚོགས་པའི་དུས་པ་ཉིད་ལའོ། །མ་ཡིན་ཏེ་ཞེས་བྱ་བ་ནི་རྩོད་པ་དགག་པའོ། །ཅིའི་ཕྱིར་ཞེ་ན། དེ་ལ་ཡང་ཞེས་བྱ་བ་ཤིན་ཏུ་གསལ་བའི་སྣང་བ་ཡོད་པ་ལ་ཡང་ངོ༌། །གསལ་བའི་དེའི་རྒྱུ་དང་ལྷན་ཅིག་པའི་མུན་པ་ནིའོ། །ཤིན་ཏུ་གསལ་བའི་མི་དང་སྣང་བ་ཉེ་བ་ན་ནི་དེ་འདྲ་བའི་རྒྱུ་དང་ལྷན་ཅིག་པ་ནི་མུན་པ་དང་ཁ་བའི་རྒྱུ་ཉིད་མ་ཡིན་ནོ། །ཡེས་ཟིན་པ་སེལ་བ་ནི་མ་ཡིན་ནོ་ཞེས་བྱ་བའི་དོན་ཏོ། །སྐྱེས་ཟིན་པ་ཉིད་བཟློག་པ་ཡིན་ནོ་ཞེས་དོགས་པ་བསུ་བ་ནི། དེ་ཉིད་ཅེས་བྱ་བ་སྟེ། སྣང་བའི་རྒྱུ་དང་ལྷན་ཅིག་པ་གང་ཡིན་པའོ། །ལན་ནི་དེ་ཉིད་ཞིག་པ་མ་ཡིན་ནོ། །ཅིའི་ཕྱིར་ཞེ་ན། སྣང་བའི་རྒྱུ་དང་ལྷན་ཅིག་པའི་མུན་པ་དེ་ནིའོ། །སྐྱེས་ཀྱང་དེ་ཉིད་མི་འཛིན་པ་དེ་ལྟར་ཞེ་ན། རང་བཞིན་གང་གིས་ཞེས་གསུངས་སོ། །སྣང་བའི་ཡུལ་ཅན་ནི་མ་སྐྱེས་པ་ཉིད་ཀྱིས་འཇིག་པ་མ་ཡིན་ནོ་ཞེས་གསུངས་པ་ནི། རང་བཞིན་གང་དུ་ཞེས་བྱ་བའོ། །གང་གི་ཕྱིར་སྐྱེས་པ་དང་མ་སྐྱེས་པ་དང་འཇིག་པ་མ་ཡིན་པ་དེའི་ཕྱིར་དེ་ཉིད་ནི་ཞེས་བྱ་བའོ། །མཐོང་བ་ཉིད་དེ་ཞིག་པ་ཡིན་པར་དོགས་པ་ནི། གལ་ཏེ་ཞེས་བྱ་བའོ། །གང་གི་ཚེ་མཐོང་བ་མེད་པ་དེའི་ཚེ་དེ་མ་རྟོགས་པའི་ཕྱིར་དེ་ཞེས་བྱ་བའི་བློ་ཇི་ལྟར་དོན་དམ་པ་ཡིན་ཞེས་ལན་འདེབས་པ་ནི་ཞིག་པའི་གནས་སྐབས་སུ་ཞེས་བྱ་བའོ། །ཇི་ལྟར་མི་སྲིད་སྙམ་ན། གང་གི་ཞེས་བྱ་བའོ། །དེས་དེའོ་སྙམ་པའི་བློ་ནི་དོན་དམ་པ་ཉིད་མ་ཡིན་ནོ་ཞེས་བྱ་བའི་དོན་ཏོ། །གང་གི་ཕྱིར་ཞེས་བྱ་བ་ལ་སོགས་པ་ཆོད་པའོ། །གལ་ཏེ་ཞེས་བྱ་བ་ནི་ལན་ནོ། །གལ་ཏེ་མ་དམིགས་པ་ཞིག་པ་ཡིན་ན། དེའི་ཚེ་བུམ་པ་དང་བྲལ་བའི་ལས་ཕྱོགས་སུ་དེ་མ་དམིགས་པས་ན་བུམ་པ་དེ་ཡང་ཞིག་པར་འགྱུར་རོ། །མ་ཡིན་
ཀྱང་ཞིག་གོ་ཞེས་བྱ་བར་ཐ་སྙད་བྱེད་པ་ནི་མ་ཡིན་ནོ། །འོན་ཏེ་ཁྱད་པར་ཅན་གྱི་མ་དམིགས་པ་ཞིག་པ་ཡིན་པ་དེས་ན། ཉེས་པ་འདི་མེད་དོ་སྙམ་པར་དོགས་པ་ནི་གང་ཞིག་སྔར་ཞེས་བྱ་བའོ། །དེ་ཡང་ཞེས་བྱ་བ་ནི་ལན་ཏེ། ཡུལ་གཞན་དུ་སོང་བའི་བུམ་པའོ། །གང་དུ་མཐོང་བ་ཞེས་བྱ་བ་ལ་སོགས་པ་ནི་རྩོད་པའོ། །དེ་ཉིད་ཀྱི་ཚེ་ནི་མཐོང་བ་ཉིད་ཀྱི་ཚེ། དེ་ཉིད་ཀྱི་ཚེ་ཞེས་བྱ་བ་ནི་ལན་ནོ། །འགལ་བ་ཉིད་སྤོང་བའི་དོགས་པ་བསུ་བ་ནི་དེ་མ་ཐག་པའི་ཞེས་བྱ་བའོ། །སྔར་དམིགས་པ་དེའི་ཡོད་པ་མ་དམིགས་པ་ནི་ཞིག་པ་ཡིན་པ་དེས་ན་མི་འགལ་ལོ་ཞེས་བྱ་བའི་དོན་ཏོ། །བར་དུ་ཞེས་བྱ་བ་ནི་ལན་ནོ། །ཇི་ལྟར་དེ་མ་ཐག་པར་ཡུལ་གཞན་དུ་མ་དམིགས་པར་ཞིག་པ་དེ་བཞིན་དུ་པར་དུ་མཆོད་པར་ཡུལ་གཞན་དུ་མི་དམིགས་པ་ཇི་ལྟར་ཞིག་པ་མ་ཡིན་ཏེ། རིགས་པ་མཚུངས་པའི་ཕྱིར་ཞིག་པ་ཉིད་དོ་ཞེས་བྱ་བའི་དོན་ཏོ། །གལ་ཏེ་ཡུལ་གཞན་དུ་མི་དམིགས་པ་ནི་དེ་ཉིད་ཀྱི་ཚེ་ཡུལ་གཞན་ན་ཡོད་པ་མ་ཡིན་གྱི་དུས་གཞན་ན་ཡོད་པ་ནི་དེ་ཉིད་ཀྱི་ཚེ་དུས་གཞན་ན་ཡོད་པ་མ་ཡིན་ནོ་ཞེས་དོགས་པ་དུས་གཞན་ཞེས་གསུངས་སོ། །གང་ཞིག་སྔར་མཐོང་བ་ལ་སོགས་པའི་དུས་གཞན་དུ་མ་མཐོང་བ་དེ་གལ་ཏེ་ཞིག་པ་ཡིན་ན་དེའི་ཚེ་ཡུལ་དུ་མ་མཐོང་བ་ཅི་སྟེ་ཞིག་པ་མ་ཡིན་ནོ། །འོན་ཏེ་ཡུལ་ཁྱབ་པའི་དོན་གཞན་དུ་མཐོང་བ་ནི་གཞན་དུམ་མཐོང་བ་ལས་འཇིག་པར་འགྱུར་བ་ཡིན་ན། དེ་ཁྱད་པར་ནི་འགའ་ཡང་ཡོད་པ་མ་ཡིན་ནོ། །དེས་ན་གཞན་དུ་མཐོང་བ་གཞན་དུ་མ་མཐོང་བས་ཞིག་པར་ཇི་ལྟར་འགྱུར་སྙམ་དུ་དོགས་པ་ནི་ཡུལ་གཞན་ཁྱབ་པ་ཞེས་བྱ་བ་སྟེ་བུམ་པའོ། །དུས་གཞན་ལ་ནི་ཇི་ལྟར་ཡོད་ཅེས་བྱ་བ་ནི་ལན་ཏེ། ཡུལ་གཞན་བཞིན་དུ་དུས་གཞན་ཁྱབ་པ་ཡང་འགའ་དང་ཡོད་པ་མ་ཡིན་ན་དེ་ཇི་ལྟར་དུས་གཞན་དུ་མཐོང་བ་དུས་གཞན་དུ་ཞིག་པ་ཡིན། གལ་ཏེ་ཞེས་བྱ་བ་ནི་འཆད་པའོ། །དེ་ཉིད་ཅེས་བྱ་བ་ནི་ཡུལ་གཞན་དུ་སོང་བའོ། །དེ་ཡང་ཞེས་བྱ་བ་ནི་དུས་གཞན་དང་འབྲེལ་པའོ། །ཡུལ་གཞན་དུ་ཞེས་བྱ་བ་ནི་རྩོད་པའོ། །ཡུལ་གཞན་བཞིན་དུ་ཞེས་བྱ་བ་ནི་ལན་ནོ། །དུས་གཞན་དུ་ཞེས་བྱ་བ་ནི་དོགས་པའོ། །མ་དམིགས་པ་འདི་ནི་ཡུལ་དང་དུས་གཉིས་ཀ་ལ་ཡང་མཚུངས་པའོ། །གང་གི་ཕྱིར་ཁྱབ་པ་མ་དམིགས་པའི་ཕྱིར་རོ། །ཇི་ལྟར་ཞེས་བྱ་བ་ནི་མ་ཁྱབ་པ་ཉིད་དུའོ། །དེ་ལྟ་ཉིད་ཡིན་ཞེས་བྱ་བ་ནི་མ་ཁྱབ་པ་ཉིད་དོ། །
གཞན་དུ་མིན་ཏེ་བྱས་པ་ཉིད་ནི་མ་ཡིན་ནོ། །དཔེ་གསུངས་པ་ནི་སྔོན་པོ་ཉིད་དུ་ཞེས་བྱ་བའོ། །དེས་ན་དེ་ཉིད་ཅེས་བྱ་བ་ནི་སྐབས་ཉེ་བར་སྡུད་པའོ། །གཞན་ཞེས་བྱ་བ་ནི་མུན་པ་དང་གྲངས་ལ་སོགས་པའི་སྐད་ཅིག་གོ །ཅི་སྟེ་མི་སྐྱེ་ཞེ་ན། རྒྱུ་མེད་པས་སོ། །དེས་ན་སུས་ཀྱང་སུ་ཡང་གཞིག་པ་མ་ཡིན་གྱི་འོན་ཀྱང་འདི་ནི་ཐ་སྙད་ཙམ་ཡིན་ནོ་ཞེས་མཇུག་སྡུད་པ་དེ་མ་མཐོང་བ་ན་ཞེས་བྱ་བའོ། །ཡུལ་དེ་ལྟ་བུ་ཞེས་བྱ་བ་ནི་རྒྱུ་མེད་པས་མ་སྐྱེས་པའི་ཡུལ་ལའོ། །འོ་ན་དེ་ཁོ་ན་ཉིད་འགལ་བ་ཅི་འདྲ་བ་ཡིན་ཞེ་ན། དོན་དམ་པར་ནི་ཞེས་བྱ་བའོ། །གྲང་བས་གྲང་བ་གཞན་སྐྱེས་པ་ནི་མེ་དང་ལྷན་ཅིག་སྐྱེས་པའི་སྐྱེད་པར་མི་ནུས་པས་ནི་རྒྱུ་དང་འབྲས་བུའི་ཁྱད་པར་ཉིད་འགལ་བ་ཡིན་ནོ། །འོན་ཕན་ཚུན་སྤངས་ཏེ་གནས་པའི་འགལ་བ་ཚུལ་ཇི་ལར་ཡིན་ཞེས་ན། དེ་ཡང་ཚུལ་འདི་ལས་འདའ་བ་ཡིན་ནོ་ཞེས་བརྗོད་པ་ནི། ཕན་ཚུན་ཞེས་བྱ་བའོ། །མེ་དང་ལྷན་ཅིག་པའི་གྲང་བས་གྲང་བ་གཞན་མི་སྐྱེད་པ་བཞིན་དུ་སྐད་ཅིག་མའི་རང་བཞིན་དང་བྲལ་བ་བརྟག་པའི་རང་བཞིན་སྐྱེད་པར་བྱེད་པ་མ་ཡིན་པའོ། །འདིར་བརྗོད་པ་ནི་སྐད་ཅིག་ཅེས་བྱ་བའོ། །དེས་ན་ཞེས་བྱ་བ་ནི་མི་ནུས་པ་དེའོ། །མི་སྐྱེད་པ་ཉིད་དོ་ཞེས་བྱ་བ་ནི་འགལ་བ་ཡིན་ནོ་ཞེས་སྐབས་ཀྱིས་སོ། །འོ་ན་སྔོན་པོ་དང་སྔོན་པོ་མ་ཡིན་པ་དག་ལ་འགལ་བ་འདི་ཇི་ལྟར་ཞེ་ན། ཇི་ལྟར་ཞེས་བྱ་བའོ། །སྔོན་པོ་ཉིད་ལ་སོགས་པ་ནི་སྔོན་པོའི་རང་བཞིན་འབའ་ཞིག་པ་ཉིད་སྐྱེད་པར་བྱེད་པ་ཡིན་གྱི། སེར་པོ་ལ་སོགས་པ་དང་ལྷན་ཅིག་པའི་རང་བཞིན་ནི་སྐྱེད་པར་ནུས་པ་མ་ཡིན་ནོ། །འོ་ན་ཇི་ལྟར་སློབ་དཔོན་ཆོས་མཆོག་གི་ལུགས་བཞིན་དུ་ཐ་དད་པར་འགྱུར་ཞེ་ན། འགལ་བ་འདི་གཉིས་ནི་ཞེས་བྱ་བའོ། །གལ་ཏེ་འདི་གཉིས་ལ་རྣམ་པ་ཅི་ཞིག་ལྟར་ཁྱད་པར་ཡོད་དུ་ཆུག་པ་དེ་ལྟ་ན་ཡང་སྐྱེ་བ་མེད་པས་བྱས་པའི་ཁྱད་པར་ནི་འགའ་ཡང་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །སེར་པོ་དང་སྔོན་པོ་བཞིན་དུ་མེ་དང་བཅས་པས་དེ་དང་བྲལ་བ་འགལ་བ་ཡིན་ནོ་ཞེས་བརྗོད་པ་ནི་དེས་ན་ཞེས་བྱ་བའོ། །རྒྱུའི་དབང་གིས་ཞེས་བྱ་བ་ནི་ཇི་སྐད་བཤད་པ་ལས་སོ། །དེ་ཡང་ཞེས་བྱ་བ་ནི་མི་མཐུན་པའི་མཚན་ཉིད་ཀྱི་རང་བཞིན་ཉིད་དོ། །དེ་ལྟ་མ་ཡིན་ན་ཞེས་བྱ་བ་ནི་དོན་གྱི་རང་བཞིན་མ་ཡིན་ན་མེ་ལ་སོགས་པའི་དོན་རྣམས་ཀྱི་ངེས་པའི་རང་བཞིན་མེད་པར་ཐལ་བར་འགྱུར་བའི་ཕྱིར་རོ། །གལ་ཏེ་འགལ་བའི་དོན་གྱི་རང་བཞིན་ཡིན་ན་
གང་གིས་མི་དམིགས་པ་ཉིད་མི་དམིགས་པ་ཇི་ལྟར་ཡིན་ཞེ་ན། དེ་དག་ནི་ཞེས་གསུངས་སོ། །དབང་པོ་ལས་འདས་པ་ནི་འགའ་ཡང་ལྷན་ཅིག་འགལ་བ་ཡོད་པར་མི་འགྲུབ་པ་དེས་ན་འགལ་བ་དམིགས་པ་སྲིད་པ་ལ་ཡིན་ནོ་ཞེས་བརྗོད་པ་ནི། དབང་པོ་ལས་འདས་པ་ཞེས་བྱ་བའོ། །མི་དམིགས་པ་ཙམ་གྱིས་ཀྱང་མེད་པ་མི་འགྲུབ་པོ་ཞེས་སྦྱར་རོ། དེ་ག་ལས་ཤེ་ན། མ་དམིགས་སོ་ཞེས་བྱ་བས་སོ། །འོ་ན་མི་དམིགས་པ་ལས་མེད་པར་བརྗོད་པ་ནི་མཛེས་པར་འགྱུར་བ་དེ་གང་ཡིན་ཞེ་ན། གང་གི་ཞེས་སྨོས་སོ། །འོ་ན་དེ་ཉིད་ཀྱིས་ཐམས་ཅད་མཁྱེན་པ་ཉིད་འགོག་པར་འགྱུར་རོ་ཞེ་ན། དེའི་ཚེ་ཡང་ཞེས་བྱ་བའོ། །འོ་ན་ཐམས་ཅད་མཁྱེན་པ་མི་སྤོང་མོད། འཇིག་རྟེན་ཕ་རོལ་ལ་སོགས་པར་འགྱུར་རོ་ཞེ་ན་འཇིག་རྟེན་ཕ་རོལ་ཞེས་གསུངས་སོ། །ཅིའི་ཕྱིར་ཞེ་ན། དེ་ལ་ཞེས་གསུངས་སོ། །དེ་ལྟར་གནོད་བྱེད་མེད་པ་བརྗོད་ནས། སྒྲུབ་པར་བྱེད་པ་ཡོད་པ་བརྗོད་པ་ནི། བཟློག་པ་ལ་ནི་ཞེས་བྱ་བ་སྟེ། ཐམས་ཅད་རིག་པ་དང༌། འཇིག་རྟེན་ཕ་རོལ་ཡོད་པའི་ཚད་མ་ནི་ཚད་མ་གྲུབ་པའི་ལེ་འུར་བཤད་ཟིན་ཏོ།། །།གང་གི་ཕྱིར་ལྐོག་ཏུ་གྱུར་པ་རྣམས་ལ་དམིགས་པ་ལས་མེད་པར་ངེས་པ་དེའི་ཕྱིར་རོ། །ཡང་ན་ཇི་ལྟར་དམིགས་པ་ལས་ཡོད་པར་གྲུབ་པ་དེ་བཞིན་དུ་མ་དམིགས་པ་ལས་ཀྱང་མེད་པ་འགྲུབ་བོ། །དེས་ན་མ་དམིགས་པར་ངེས་བྱེད་ཇི་ལྟར་མ་ཡིན་ཞེས་དོགས་པ་བསུ་ནས་ཇི་ལྟར་ཞེས་གསུངས་ཏེ། དཔེར་ན་དུ་བ་ལ་སོགས་པའི་དངོས་པོ་ཉིད་ལྐོག་ཏུ་གྱུར་པའི་དངོས་པོ་རྣམས་ཀྱིས་གྲུབ་པ་སྟེ། ངེས་པ་ལ་སྒྲུབ་པར་བྱེད་པར་འདོད་པའི་དམིགས་པ་ནི་མ་ཡིན་པ་དེ་བཞིན་དུ་དངོས་པོ་ཉིད་རང་ལོག་པ་ན་དངོས་པོ་རྣམས་ཀྱི་ལྡོག་བྱེད་དུ་འདོད་ཀྱི། མི་དམིགས་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་ཞེས་བྱ་བ་ནི་རྣམ་པར་འགྲེལ་པའོ། །ལྡོག་པ་བརྗོད་པ་ནི་འབྲེལ་པ་མེད་པ་ནི་ཞེས་བྱ་བ་ནི། དེ་བཞིན་དུ་ཞེས་བྱ་བ་ནི་འབྲེལ་པས་སོ། །ཅིའི་ཕྱིར་ཞེ་ན། འབྲེལ་པ་མེད་པར་ནི་ཞེས་གསུངས་སོ། །སྤྱིར་བརྗོད་པའི་དོན་ཁྱད་པར་གྱི་མཐར་ཐུག་པར་བྱེད་པ་ནི་དཔེར་ན་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བའོ། །གལ་ཏེ་ཁྱབ་པར་བྱེད་པ་མེད་པས་ཁྱབ་པར་བྱ་བ་མེད་པར་མི་འགྱུར་ན། དེའི་ཚེ་འབྲེལ་པ་དེ་ཡིན་ནོ། །དངོས་པོ་སྒྲུབ་བྱེད་ཉིད་དུ་བསྟན་པའི་ཞར་ལ་དངོས་པོ་མེད་པར་འདོད་པ་ཙམ་ལས་བྱུང་བའི་སྒྲུབ་པར་
བྱེད་པ་ཡིན་པ་ཉིད་དོ། །བརྗོད་པ་ནི་འདིས་ནི་ཞེས་བྱ་བ་སྟེ། དངོས་པོ་ཉིད་སྒྲུབ་པར་བྱེད་པར་བསྟན་པ་ལས་སོ། །སོགས་པའི་མི་མཐུན་པའི་ཕྱོགས་མ་ཡིན་པ་ཉིད་ཀྱི་ཆོས་བསྒྲུབ་པར་བྱ་བ་རྟག་པའམ་མི་རྟག་པ་ཉིད་ཅི་ཡང་རུང་བ་ལ་མི་སྲིད་པའི་ཕྱིར་རོ། །ཅིའི་ཕྱིར་དེ་ལྟར་སྲིད་སྙམ་ན། གང་གི་ཕྱིར་རྟོགས་པས་སྦྱར་བའི་ཆོས་ཡིན་པས་སོ། །དངོས་པོའི་ཆོས་མ་ཡིན་པ་ཁོ་ན་སྒྲུབ་པར་བྱེད་པ་ཡིན་གྱི་གཞན་ནི་མ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་འདིས་འདི་གསལ་ཞེ་ན། ཕྱོགས་དང་ཞེས་གསུངས་སོ། །ཇི་ལྟར་ན་གཉིས་ལས་གཅིག་དང་མ་འབྲེལ་ཞེ་ན། ཕྱོགས་ནི་ཞེས་གསུངས་སོ། །དེ་ལྟ་བུ་ཉིད་དོ་ཞེས་བྱ་བ་ནི་འདོད་པས་བྱས་པ་ཁོ་ནའོ། །འདི་ལྟར་བསྒྲུབ་པར་བྱ་བའི་ཆོས་ཀྱི་སྤྱི་ཕྱོགས་དང་མཐུན་པའི་ཕྱོགས་ཡིན་ནོ། །དེ་ཡང་ན་ཇི་ལྟར་དེ་དང་དེ་ལས་མཐུན་པའི་ཕྱོགས་མཚུངས་པ་དོན་དམ་པ་མ་ཡིན་པར་འགྱུར། །དངོས་པོ་ཞེས་བྱ་བ་ནི་ལས་སོ། །ཇི་ལྟར་གོ་བར་བྱེད་པ་མ་ཡིན་ནོ་ཞེས་དོགས་པ་བསུ་ནས། རྗེས་སུ་འགྲོ་བ་དང་ལྡོག་པ་མེད་པའི་ཕྱིར་རོ་ཞེས་བརྗོད་པ་ནི། གཞན་དུ་ཞེས་གསུངས་སོ་ཞེས་འདོད་པ་ལའོ། །གཞན་ནི་དངོས་པོའོ། །རྗེས་སུ་འགྲོ་བ་མེད་པ་བརྗོད་ནས་ལྡོག་པ་མེད་པ་བརྗོད་པ་ནི་གང་གིས་ཞེས་བྱ་བ་སྟེ། ལྡོག་པར་བྱེད་པས་སོ། །དེ་ཞེས་བྱ་བ་ནི་རྟག་པ་དང་མི་རྟག་པ་དག་གོ །འགའ་ཞིག་ལས་ཞེས་བྱ་བ་ནི་རྟག་པའམ་མི་རྟག་པ་ལས་སོ། །གང་གི་ཕྱིར་དེ་ལྟར་དངོས་པོ་དང་འབྲེལ་པ་མ་ཡིན་པ་དེས་ནའོ། །འོ་ན་ཇི་ལྟར་སྒྲུབ་པ་དགག་པ་འགྲུབ་ཅེ་ན། བཤད་པ་ནི་དེའི་ཕྱིར་ཞེས་བྱ་བའོ། །ཅི་དངོས་པོ་མཐའ་དག་དང་ལྡོག་པ་ན་དངོས་པོ་མཐའ་དག་གི་ལྡོག་པར་བྱེད་པ་ཡིན་ནམ། འོན་ཏེ་འགའ་ཁོ་ན་ཡིན་ཞེ་ན། དེ་ལ་ཡང་ཞེས་བྱ་བ་སྟེ་དངོས་པོ་རྣམས་ལའོ། །ཁྱབ་པར་བྱེད་པ་ལྡོག་པ་གཅིག་ཁྱབ་པར་བྱ་བ་ལྡོག་པ་གོ་བར་བྱེད་པ་ཡིན་གྱི་ཁྱབ་པར་བྱེད་པ་ཡིན་པ་ནི་མ་ཡིན་ནོ། །གང་གི་ཚེ་ཞེས་གལ་ཏེ་ཞེས་བྱ་བའོ། །འདིས་ནི་ཐམས་ཅད་ནི་སྒྲུབ་པར་བྱེད་པ་མ་ཡིན་གྱི་
འོན་ཀྱང་ཁྱབ་པར་བྱེད་པ་ཁོ་ན་མ་ཡིན་ཏེ། དེས་ན་དངོས་པོ་རྣམས་བསྒྲུབས་ལ། །དངོས་ཉིད་སྒྲུབ་པར་བྱེད་པར་འདོད། །ཅེས་བྱ་བ་ཡང་ཐམས་ཅད་ལ་ནི་མ་ཡིན་ནོ་ཞེས་བརྗོད་པར་འགྱུར་རོ། །སྤྱིར་བརྗོད་པ་ཚིགས་སུ་བཅད་པ་སྔ་མའི་དོན་འདིར་བསྡུས་ཏེ་འཛིན་པས་བསྡུ་བ་སྟེ། ཁྱད་པར་དུ་རྣམ་པར་འཇོག་པར་བྱེད་པ་ཞེས་བྱ་བའི་དོན་ཏོ། །རང་བཞིན་མི་དམིགས་པ་ལ་ཡང་ཞེས་བྱ་བའི་རྩོད་པའི་དོན་ནི་འདི་ཡིན་ཏེ། དམིགས་པ་ལོག་པ་སྣང་བ་མི་དམིགས་པའི་རང་བཞིན་ཡང་དངོས་པོའི་བྱེད་པ་ཞེས་ལྡོག་པར་བྱེད་པ་ཡིན་ནོ་ཞེས་ནི་ཅི་སྟེ་བརྗོད་ཅེས་བྱ་བ་ཡིན་ནོ། །རང་བཞིན་མི་དམིགས་པ་ནི་དངོས་པོ་མེད་པའི་གོ་བར་བྱེད་པ་མ་ཡིན་ནོ་ཞེས་ལན་འདེབས་པ་ནི་དེ་ལ་ཞེས་བྱ་བའོ། །ཅིའི་ཕྱིར་ཞེ་ན། དམིགས་པའི་ཞེས་བྱ་བའོ། །སྐབས་ཀྱི་རྩོད་པ་བསལ་ནས་གལ་ཏེ་རང་གི་ལྡོག་པ་ནི་ཞེས་བྱ་བ་འཆད་པ་ནི་དེས་ན་ཞེས་བྱ་བའོ། །སྒྲུབ་པ་དེས་ཞེས་བྱ་བ་ནི། ཁྱབ་པ་མེད་པས་སོ། །དེ་བས་ན་དངོས་པོ་ཉིད་ལྡོག་པ་ན་དངོས་པོ་མེད་པ་སྒྲུབ་པར་བྱེད་པ་ཡིན་ནོ། །གལ་ཏེ་ཁྱབ་པར་བྱེད་པ་ལྡོག་པ་ནི་གཞན་དམིགས་པའི་རང་བཞིན་ཡིན་པའི་ཕྱིར་ན་མངོན་སུམ་གྱིས་གྲུབ་པ་མ་ཡིན་རྣམ་ངེས་ན་རྣམ་འདྲར་ཞེས་ཅི་སྟེ་བརྗོད་ཅེ་ན། བཤད་པ་གང་གི་ཕྱིར་མེད་པར་བསྒྲུབ་པར་བྱ་བ་ལ་ཁྱབ་པར་བྱེད་པ་དེ་ཉིད་ཀྱི་ཚད་མ་མེད་པ་སྟེ་མི་དམིགས་པ་རྟགས་སུ་བརྗོད་པ་གང་ཡིན་པ་དེ་ནི་ཤིན་ཏུ་རྨོངས་པའི་དོན་དུ་ཡིན་ཏེ། དེས་ན་དེ་ལྟར་བརྗོད་པ་ཡིན་ནོ་ཞེས་བྱ་བའི་དོན་ཏོ། །པ་རྨོངས་པ་རྣམས་ལ་ཡང་རྟགས་ཉིད་ཅི་སྟེ་ཡིན་ཞེ་ན། གནག་རིད་མོ་བར་ཞེས་གསུངས་སོ། །དམིགས་པར་དམིགས་པ་མ་ཡིན་མ་དམིགས་པར་ནི་མེད་པའི་ཐ་སྙད་ཀྱི་ཡུལ་ཡིན་པར་བྱིས་པ་རྣམས་ཀྱིས་ཀྱང་ངེས་པ་དེས་ན་དེ་ངེས་པའི་དོན་དུ་ཁྱབ་བྱེད་མི་དམིགས་པ་ལ་སོགས་པའི་རྗེས་སུ་འབྲང་བའི་ནི་དམིགས་པ་འགལ་བ་ཡིན་ནོ། །ཡང་བརྗོད་པ་གང་ཡིན་དེ་ནི་ཤིན་ཏུ་རྨོངས་ཏེ་ཞེས་གང་གི་དོན་འཛིན་པའོ། །ཤེས་པ་གཅིག་ལ་འདྲེ་བ་ཅན་གང་གི་ཚད་མ་མེད་པ་མི་དམིགས་པ་དེ་ཉིད་ཀྱི་མེད་པ་ལ་སྟེ། མེད་པའི་ཐ་སྙད་ལ་རྟགས་སུ་བརྗོད་པ་ནི་ཤིན་ཏུ་རྨོངས་པའི་དོན་དུ་ཡིན་ནོ་ཞེས་བྱ་བའི་དོན་ཏོ། །རང་བཞིན་མི་དམིགས་པ་ལ་ཞེས་བྱ་བ་ནི་འཆད་པའོ། །གལ་ཏེ་གནག་རྫི་ལ་སོགས་པ་སྤྱོད་པ་དང་བྲལ་བ་ཡང་འདིར་མ་རྨོངས་པ་ཡིན་ན། འོན་རྨོངས་པ་དེ་གང་ཡིན་ཞེ་ན།
འོན་ཀྱང་ཞེས་བྱ་བའོ། །ཇི་ལྟར་རྟོགས་པར་བྱེད་ཅེ་ན་མེད་པའི་ཐ་སྙད་ཅེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་མི་དམིགས་པའི་རྒྱུ་མཚན་ཅན་དུ་ཁས་མི་ལེན་པའོ། །བདག་དང་བདེ་བ་ལ་སོགས་པ་ཐ་དད་པར་རྟོགས་པའི་རྒྱུ་ནི། བསྟན་བཅོས་འདི་མིན་ན་ཞེས་བྱ་བའོ་མ་ཡིན་ཏེ། བསྟན་བཅོས་ནི་དོན་དང་འབྲེལ་པ་མེད་པས་ཚད་མ་ཡིན་པའི་ཕྱིར་རོ། །བསྟན་བཅོས་ཉིད་དང་ཞེས་བྱ་བ་ནི་བདེ་བ་ལ་སོགས་པར་མ་ཟད་པའོ། །བསྟན་བཅོས་གཞན་ཁོ་ན་ལས་ཐ་དད་པ་ཡིན་ན་ནི་ཐུག་པ་མེད་པར་འགྱུར་རོ། །གལ་ཏེ་ཕན་ཚུན་ཐ་དད་པར་དམིགས་པ་ནི་ཐ་དད་པའི་སྒྲུབ་པར་བྱེད་པའི་འདོད་པ་ཉིད་ཡིན་གྱི་མི་དམིགས་པ་ནི་མ་ཡིན་ཞེས་དོགས་ན། ཐ་དད་པར་ཞེས་གསུངས་སོ། །མི་དམིགས་པ་ཁས་མི་ལེན་པ་ལ་ཡང་ཉེས་པ་གཞན་དག་བརྗོད་པ་ནི། གསལ་བ་ནི་ཞེས་བྱ་བ་སྟེ་གསལ་བ་ནི་ཆེན་པོ་པ་ཉིད་ལ་སོགས་པའི་འབྲས་བུའོ། །དམིགས་པ་ལ་ནི་གཙོ་བོའོ། །དེས་དམིགས་པ་གདོན་མི་ཟ་པར་ཚད་མར་བྱས་པ་ཡིན་ནོ། །གལ་ཏེ་དངོས་པོའི་རང་བཞིན་གང་ལ་ནི། །དངོས་པོ་ཡོད་པར་རྟོགས་དོན་ཅན། །ཚད་མ་ལྔ་པོ་མ་སྐྱེས་པ། །དེར་ནི་དངོས་མེད་ཚད་མ་མེད། །ཅེས་བརྗོད་པའི་ཕྱིར་ཚད་མ་ལྔ་པོ་མེད་པ་ཡང་ཚད་མར་ཅིའི་ཕྱིར་ཁས་མི་ལེན་ཞེ་ན་མི་དམིགས་པ་ནི་ཞེས་གསུངས་སོ། །མི་དམིགས་པའི་ཚད་མ་འདི་ཁོ་ན་ཙམ་ཞིག་བསྒྲུབ་པར་བྱ་བ་མེད་པ་ལ་དངོས་སུ་མེད་པའི་འབྲས་བུ་ཅན་ཡིན་གྱི། ཚད་མ་རྟོགས་པ་ནི་མ་ཡིན་ཏེ་སྔར་ཉིད་བཀག་ཟིན་པའི་ཕྱིར་རོ། །དེ་གང་ཡིན་ཞེ་ན་དེ་ཡང་ངོ༌། །དགག་བྱའི་རྒྱུའམ་རང་བཞིན་དེ་ཁྱབ་པར་བྱེད་པ་སྣང་བར་འདོད་བ་སྣང་མེད་ཉིད་དེ་མི་དམིགས་བ་ཉིད་དོ། །ཅིའི་ཕྱིར་འདི་ཙམ་ཉིད་མི་དམིགས་པ་ཉིད་ཅེ་ན། ཡང་ཞེས་གསུངས་ཏེ། རྒྱུ་ལ་སོགས་པ་ཡང་ངོ༌། །གཞན་དང་ཞེས་བྱ་བ་ནི་རྒྱུ་མ་ཡིན་པ་ལ་སོགས་པ་ནི། རྣམ་པ་གཞན་དུ་ཞེས་བྱ་བ་ནི་མི་རུང་བའོ། །དེའི་ཕྱིར་ཞེས་བྱ་བ་ནི་ཁྱབ་པར་བྱེད་པ་ལ་སོགས་པ་མེད་པ་ལ་ངེས་པའི་ཕྱིར་རོ། །མི་དམིགས་པ་ལ་སོགས་པ་དེ་དག་གིས་བསྐྱེད་པའོ། །དེས་ན་ཞེས་བྱ་བ་ནི་མི་སླུ་བའི་ཕྱིར་རོ། །དེས་ནི་རྟགས་ཅན་གྱི་ཤེས་པས་སོ། །དེ་ལྟར་ཞེས་བྱ་བ་ནི་ཁ་དོག་ལ་སོགས་པ་ནི་མི་རྟག་པའོ་ཞེས་བྱ་བར་རོ། །དེས་ན་མི་རྟག་པ་ལ་སོགས་པ་ནི་དངོས་པོའི་ཆོས་མ་ཡིན་ན། འདིས་ནི་མི་རྟག་པ་ཉིད་ཁ་དོག་གི་སྤྱི་ལ་སྦྱོར་བའི་ཕྱིར་ན་མི་རྟག་པ་ཉིད་དངོས་
པོའི་ཆོས་མ་ཡིན་པར་འགྱུར་རོ་ཞེས་བརྗོད་པ་ནི་གང་ཡིན་པ་དེ་སྤངས་པ་ཡིན་ནོ། །གལ་ཏེ་དངོས་པོ་མེད་ངོ་བོ་ཡིན་ཏེ། །རང་གི་མཚན་ཉིད་གྲུབ་པར་གྲུབ་ཕྱིར་རོ། །ཞེས་བྱ་བས་རྗེས་སུ་དཔག་པས་དང༌། མངོན་སུམ་གྱི་རྗེས་ལས་འབྱུང་བའི་ཤེས་པ་རང་གི་མཚན་ཉིད་ཀྱི་ཡུལ་ཅན་དུ་བསྟན་པ་མ་ཡིན་ནམ། ད་ནི་གང་ལ་ཁ་དོག་སྤྱི་ལ་སྦྱོར་ཕྱིར་རོ། །ཞེས་བརྗོད་ལ། མི་རྟག་པ་ཉིད་ཀྱི་སྤྱི་དང་སྦྱར་བའི་ཁ་དོག་གི་སྤྱི་སྣང་བ་དེ་དང་ཡིན་སྙམ་དུ་དོགས་པ་ནི། གལ་ཏེ་ཁ་དོག་འདི་ཞེས་བྱ་བ་ལ་སོགས་པ་ལ་ནི་རྗེས་སུ་དཔག་པས་ཞེས་བྱ་བ་ལ་སོགས་པའོ། །རྣམ་པར་རྟོག་པ་ནི་ལྷག་པར་ཞེན་པས་རང་གི་མཚན་ཉིད་ཀྱི་ཡུལ་ཅན་ཡིན་ཡང་དངོས་པོའི་འཇུག་པ་ལ་དེའི་རང་བཞིན་ལ་མ་རེག་པའི་ཕྱིར་ན་སྤྱིའི་ཡུལ་ཅན་ཁོ་ན་ཡིན་ནོ། །དེས་ན་རྗེས་སུ་དཔག་པས་མི་རྟོག་པ་ལ་སོགས་པ་འཛིན་ན་ཁ་དོག་སྤྱི་ལ་སྦྱོར་ཕྱིར་རོ་ཞེས་བྱ་བའི་ཚུལ་འདི་ཡིན་པར་འདོད་པ་ཉིད་དོ། །གལ་ཏེ་རྗེས་སུ་དཔག་པས་ཀྱང་ཁ་དོག་ཉིད་སྤྱི་ལ་མི་རྟག་པ་ཉིད་རྟོག་པ་ཡིན་ན་ཆོས་ཅན་གྱི་དེ་ཚད་མ་གཞན་གྱིས་རྟོགས་པར་བྱ་བ་ཡིན་ཏེ་མངོན་སུམ་གྱི་ཡུལ་མ་ཡིན་པའི་ཕྱིར་དང་རྗེས་སུ་དཔག་པས་རྟོགས་ན་ཡང་ཐུག་པ་མེད་པའི་ཕྱིར་རོ། །རྣམ་པར་དཔྱོད་པ་དང་ལྡན་པའི་མངོན་སུམ་གྱི་དེ་མ་ཐག་ཏུ་ཁ་དོག་ལ་སོགས་པ་འདི་ནི་མི་རྟག་པའོ་སྙམ་པའི་ཤེས་པ་གང་ཡིན་པ་ཡང་ཚད་མ་གཞན་ཡིན་ཏེ། རང་གི་མཚན་ཉིད་ལ་སྦྱོར་བའི་ཕྱིར་རོ་སྙམ་ན། གཞན་དུ་ཞེས་གསུངས་སོ། །ཅིའི་ཕྱིར་ཞེ་ན། ངེས་པར་སྐྱེས་པར་ནུས་པའི་མངོན་སུམ་གྱིས་བཟུང་བའི་ཁ་དོག་ཉིད་ལ་སོགས་པ་ལ་འདི་ནི་སྔོན་པོ་ཞེས་བྱ་བ་ལ་སོགས་པའི་རྣམ་པར་རྟོག་པས་འཛིན་པའི་ཕྱིར་ན། དེ་ནི་ཚད་མ་གཞན་ཉིད་དུ་འདོད་པ་མ་ཡིན་ནོ། །ཕྱེད་སྔ་མ་འཆད་པ་ནི་རང་དང་ཞེས་བྱ་བའོ། །རང་གི་མཚན་ཉིད་བརྗོད་པར་བྱ་བ་མ་ཡིན་པ་དང༌། སྤྱིའི་མཚན་ཉིད་ཁ་དོག་ཉིད་དེ། རྣམ་པ་དེ་དག་ཏུ་ཁ་དོག་ལ་སོགས་པ་མངོན་སུམ་གྱིས་བཟུང་ཞིང་ངོ༌། །རྣམ་པ་གཞན་ཡང་བཤད་པ་ནི། མི་རྟག་པ་ཉིད་དུ་ཡང་ཞེས་བྱ་བ་སྟེ། མངོན་སུམ་གྱིས་བཟུང་ནས་སོ། །འདི་ཙམ་གྱིས་ནི་དང་པོར་ཡོད་པའི་ཚད་མའི་བྱེད་པ་བསྟན་པ་ཡིན་ནོ། །དེའི་འོག་ཏུ་ཡིད་ཀྱིས་མཚམས་སྦྱོར་བར་བྱེད་པ་ཡིན་ནོ་ཞེས་གསུངས་པ་ནི། ཁ་དོག་ལ་སོགས་པ་
མི་རྟག་པ་སྟེ་ཞེས་བྱ་བའོ། །ཡིད་ཀྱིས་ཞེས་བྱ་བ་ནི་རྣམ་པར་དཔྱོད་པའི་བློ་ཅན་ལ་ལྟོས་ཏེ། མངོན་སུམ་གྱི་རྗེས་ལས་བྱུང་བ་དང༌། བློ་དམན་པ་ལ་ལྟོས་ཏེ་དེ་ནི་རྗེས་སུ་དཔག་པ་ལས་སོ་ཞེས་བྱ་བའི་དོན་ཏོ། །སློབ་དཔོན་གྱིས་ཞེས་བྱ་བ་ནི་ཕྱོགས་ཀྱི་གླང་པོས་སོ། །ཚད་མར་ཐལ་བ་ནི་དགག་པར་འོས་པ་ཡིན་པ་དེས་ན་ཐལ་བ་བརྗོད་པ་ནི་ཁ་དོག་གི་སྤྱི་ལ་ཞེས་བྱ་བའོ། །དེ་ལྟར་ཚད་མ་གཞན་ཡོད་པར་འགྱུར་སྙམ་ན། ཆོས་ཅན་སྤྱིར་ཐུག་པ་མེད་པར་འགྱུར་བས་ན། རྗེས་སུ་དཔག་པས་ནི་མི་འཛིན་ཏོ། །མངོན་སུམ་གྱིས་ཀྱང་མ་ཡིན་ཏེ། དེའི་ཡུལ་མ་ཡིན་པའི་ཕྱིར་རོ། །དེས་ན་དེའི་ཡུལ་ཅན་གྱི་ཤེས་པ་ཚད་མར་གཞན་དུ་འགྱུར་རོ་ཞེས་བརྗོད་པ་ནི། ཆོས་ཅན་གྱི་དེ་ཞེས་བྱ་བའོ་རྣམ་པར་རྟོག་པའི་ཤེས་པ་ཚད་མ་གཞན་དུ་ཐལ་བར་འགྱུར་རོ་ཞེས་གསུངས་པ་ནི། གང་གི་ཚེ་ཞེས་བྱ་བའོ། །ཐལ་ཟིན་པའི་རྩོད་པ་གཉིས་ཀ་ལ་ཡང་ངོ༌། །དེ་ལ་རྣམ་པར་རྟོག་པ་ལའོ། །གལ་ཏེ་རེ་ཞིག་ཁ་དོག་ལ་སོགས་པ་གཟུགས་དང་རོ་ལ་སོགས་པ་ནི་དངོས་པོ་ཡིན་པའི་ཕྱིར་མངོན་སུམ་གྱིས་འགྲུབ་པར་འགྱུར་བ་མིན་ན། དངོས་པོ་མེད་པའི་རང་བཞིན་ཡིན་པའི་ཕྱིར་མི་རྟག་པ་ཉིད་དེས་འགྲུབ་པར་ཇི་ལྟར་འགྱུར་སྙམ་ནས་བརྗོད་པ་ནི་མི་རྟག་པ་ཉིད་ཅེས་བྱ་བའོ། །འདི་ལྟར་ཞེས་བྱ་བ་ནི་ལན་ནོ། །སྔོན་པོ་ལ་སོགས་པའི་དངོས་པོ་ལས་མི་རྟག་པ་ཉིད་གཞན་ཡོད་པ་མ་ཡིན་ཏེ། ཐ་མའི་སྐད་ཅིག་མཐོང་བ་ན་ཐ་དད་པར་ངེས་པའི་ཕྱིར་རོ། །སྔར་ཡང་དངོས་པོ་དམིགས་པ་ནི་མི་རྟག་པ་ཉིད་ཀྱི་སྙིང་པོ་ཅན་ཡིན་ཏེ། ཐ་དད་པ་མེད་པའི་ཕྱིར་རོ་ཞེས་བརྗོད་པ་ནི། དེ་ཡང་ཞེས་བྱ་བའོ། །སྔར་ཞེས་བྱ་བའི་རྣམ་པར་རྟོག་པ་སྟོས་ནས་སོ། །གལ་ཏེ་མི་རྟག་པ་ཉིད་ཁ་ལ་སོགས་པ་ལས་ཐ་དད་པ་མ་ཡིན་ན། དེའི་ཚེ་བརྗོད་ཅེས་པར་བྱ་བ་ཐ་དད་པ་མེད་པའི་ཕྱིར་ཁ་དོག་ལ་སོགས་པ་མི་རྟག་པའོ་ཞེས་བྱ་བ་གཞི་མཐུན་པ་ཉིད་དུ་མི་འགྱུར་གྱི། འོན་ཀྱང་རྣམ་གྲངས་པར་འགྱུར་རོ་ཞེས་དོགས་པ་བསུ་ནས་བརྗོད་པ་ནི། དུ་མའི་དངོས་དེ་ཞེས་བྱ་བའོ། །བརྗོད་པར་བྱ་བ་ཐ་དད་པ་ལྡོག་པ་ཐ་དད་པའི་རྒྱུ་མཚན་ཅན་ཡིན་པའི་ཕྱིར་ཏེ་ཉེས་པ་འདི་མེད་དོ་ཞེས་བྱ་བའི་དོན་ཏོ། །གལ་ཏེ་ཐུན་མོང་མ་ཡིན་པའི་ཕྱིར་ན་དངོས་པོའི་རང་བཞིན་ཇི་ལྟར་སྤྱི་ཡིན་ཞེས་དོགས་པ་བསུ་ནས། རྣམ་པར་རྟོག་པས་ཞེས་གསུངས་སོ། །དེ་ཉིད་ཅེས་བྱ་བ་ནི་དངོས་པོའི་རང་བཞིན་
ཉིད་དོ། །ཅིའི་ཕྱིར་ཞེ་ན། མི་ནུས་པའི་ཕྱིར་རྣམ་པར་རྟོག་པས་དངོས་པོའི་རང་བཞིན་འཛིན་པར་མི་ནུས་པ་དེའི་ཕྱིར་ན་རང་བཞིན་ནོ། །དེ་བས་ན་སྤྱི་ནི་འཛིན་པའི་བྱེད་པའམ། དངོས་པོ་ལས་གཞན་ནི་མེད་དོ། །གལ་ཏེ་རྣམ་པར་རྟོག་པ་ལ་སྤྱི་ཐ་དད་པར་སྣང་བ་མ་ཡིན་ནམ། དེས་ན་གཞན་ནི་མེད་དོ་ཞེས་ཇི་ལྟར་བརྗོད་སྙམ་ན། འདིས་ནི་ཞེས་བྱ་བའོ། །མངོན་སུམ་ལས་སྣང་བའི་རང་བཞིན་གྱི་རྣམ་པར་བརྗོད་པ་ནི། འདི་ནི་སྔོན་པོ་ཞེས་བྱ་བའོ། །དེ་ཉིད་ལ་ཞེས་བྱ་བ་ནི་རང་གི་མཚན་ཉིད་ལའོ། །དེ་ལྟར་ཞེས་བྱ་བ་ནི་འདི་ནི་སྔོན་པོའོ་ཞེས་བྱ་བར་སྦྱར་རོ། །མངོན་སུམ་གྱིས་མ་བཟུང་བའི་སྤྱི་ཉིད་རྣམ་པར་རྟོག་པས་འཛིན་པ་ཡིན་ནོ་ཞེས་དོགས་པ་བསུ་བ་ནི། འོན་ཏེ་ཞེས་བྱ་བའོ། །འདིར་ཡང་ལན་འདི་ཉིད་ཡིན་ནོ་ཞེས་བརྗོད་པ་ནི། དེ་ནི་མི་རིགས་ཏེ་ཞེས་བྱ་བའོ། །དེ་ནི་རྣམ་པར་རྟོག་པས་སོ། །གལ་ཏེ་སྤྱི་མེད་པར་ཐ་སྙད་འདིར་ཇི་ལྟར་འགྱུར་སྙམ་ན། ཐ་སྙད་ཀྱི་ཞེས་གསུངས་སོ། །གལ་ཏེ་ཞེས་བྱ་བས་དོན་དམ་པའི་དུ་མ་ཉིད་དུ་དོགས་པའོ། །དེ་ནི་དོན་དམ་པ་མ་ཡིན་ཞེས་ལན་འདེབས་པའི་དོན་དུ་རང་གི་མཚན་ཉིད་ནི་རེ་ཞིག་བརྗོད་པར་བྱ་བ་མ་ཡིན་ན་ཞེས་གསུངས་པ་ནི། འདི་ལ་བརྗོད་པ་ཞེས་བྱ་བའོ། །བརྗོད་པར་བྱ་བ་ཉིད་ནི་བརྟགས་པའི་ཐ་དད་པ་མིན་ནོ་ཞེས་བརྗོད་པ་ནི་ཐ་དད་པ་ནི་ཞེས་བྱ་བའོ། །ཡང་ན་དོན་དམ་པའི་ཆོས་ཐ་དད་པ་མེད་པར་རྣམ་པར་རྟོག་པ་ཐ་དད་པར་ཇི་ལྟར་སྙམ་ན། ཐ་དད་ན་ནི་ཞེས་བྱ་བའོ། །ཇི་ལྟར་ཐོག་མ་མེད་པའི་བག་ཆགས་ཀྱི་རྒྱུ་ཅན་ཡིན་སྙམ་ན་རྣམ་པར་རྟོག་པ་ནི་ཞེས་བྱ་བའོ། །གལ་ཏེ་རྣམ་པར་རྟོག་པའི་སྤྱི་ལ་གཞི་མཐུན་པ་ཡིན་པ་དེ་ཅི་ལྟར་ན་རྣམ་པར་རྟོག་པར་གཟུང་བ་འཛིན་པར་འགྱུར་སྙམ་ན་བཤད་པ་སྤྱིའི་ཆོས་ཀྱི་རྟེན་དང་དེ་ལས་ལྡོག་པའི་དངོས་པོ་དེ་ངེས་པ་བསྐྱེད་པར་ནུས་པའི་མངོན་སུམ་གྱིས་གྲུབ་པ་ན་སྤྱི་དེ་ཉིད་ནི་གྲུབ་པ་ཁོ་ན་ཡིན་ཏེ། སྐད་ཅིག་མ་མཐོང་བ་རྣམས་ཀྱིས་ངེས་པའི་ཕྱིར་རོ། །དེས་ན་རྣམ་པར་རྟོག་པ་གཟུང་བ་འཛིན་པ་ཡིན་ནོ་ཞེས་བྱ་བའི་དོན་ཏོ། །འོ་ན་ཏེ་དེས་སྟོང་པའི་དོན་མཐོང་ཡང་གལ་ཏེ་ཐ་མའི་སྐད་ཅིག་མཐོང་སྤངས་ཡིན་པས་མི་ངེས་ན་དེ་ངེས་པར་བྱེད་པའི་དོན་རྗེས་སུ་དཔག་པར་འདོད་པར་བྱ་ དགོས་སོ་ཞེས་བརྗོད་པ ་ནི། དེ་མ་གྲུབ་པ་ཞེས་བྱ་བ་སྟེ་སྤྱི་སྟེ་མ་གྲུབ་ན་ནི་དེ་ལྟར་དེ་རྒྱུ་མཚན་རབ་ཏུ་བསྟན་པས་རབ་ཏུ་གྲུབ་ཕྱིར་ཞེས་བྱ་བ་དངོས་པོ་རབ་ཏུ་གྲུབ་པའི་ཕྱིར་ནི་མ་ཡིན་པའོ། །ཕྱེད་སྔ་མ་
འཆད་པ་ནི་སྤྱི་ནི་ཞེས་བྱ་བའོ། །གཞི་མཐུན་པར་ཞེས་བྱ་བ་ནི་སྦྲ་མི་རྟག་པའོ་ཞེས་སོ། །གཞན་དུ་ཞེས་བྱ་བ་ནི་གཞི་ཐ་དད་པར་ཏེ་སྒྲའི་མི་རྟག་པའོ་ཞེས་བྱ་བར་རོ། །ཐ་སྙད་མ་གྲུབ་ན་ནི་ཞེས་བྱ་བ་ནི་ཕྱིད་ཕྱི་མ་རྣམ་པར་འགྲེལ་པའོ། །ཐ་སྙེད་ཡུལ་གྱི་དངོས་པོ་ཉིད་དུ་དྲན་པར་བྱེད་པ་ཡིན་ནོ་ཞེས་འབྲེལ་ཏོ། །ཇི་ལྟར་ཞེ་ན་རྒྱུ་མཚན་དྲན་པའི་སྒོ་ནས་སོ། །ཇི་ལྟར་རྒྱུ་མཚན་བསྟན་པས་ཞེས་བྱ་བའོ། །གཞན་ནི་མ་ཡིན་ནོ་ཞེས་བྱ་བ་ནི་དངོས་པོ་ཉིད་དོ། །གལ་ཏེ་མཐོང་བའི་དངོས་པོ་ལ་དེའི་རྣམ་པར་རྟོག་པ་ཐ་སྙད་སྒྲུབ་པ་ཡིན་ཏེ། འདི་ལྐོག་ཤལ་ལ་སོགས་པ་དང་ལྡན་པའི་ཕྱིར་ན་བ་ལང་ངོ་ཞེས་བྱ་བ་བཞིན་ནོ། །འདི་མེ་དང་ལྡན་པ་ཡིན་ཏེ་དེ་དུ་བ་དང་ལྡན་པའི་ཕྱིར་རོ་ཞེས་བྱ་བ་ནི་མ་ཡིན་ཏེ། མེ་དང་ལྡན་པ་ཉིད་མ་མཐོང་བའི་ཕྱིར་ཞེས་དོགས་པ་ནི་གལ་ཏེ་ཞེས་བྱ་བའོ། །འབྲས་བུའི་རྗེས་སུ་དཔག་པ་ལ་ནི་དངོས་པོ་མ་མཐོང་བ་ཉིད་ཀྱིས་ཐ་སྙད་སྒྲུབ་པར་བྱེད་པ་ཡིན་ནོ་ཞེས་བརྗོད་པ་ནི། དེ་ཡང་མི་འཐད་དེ་ཞེས་བྱ་བའོ། །དེ་ཉིད་ལ་ནི་ཞེས་བྱ་བ་རྗེས་དཔག་རྟོགས་པ་ཉིད་ལའོ། །གལ་ཏེ་ཞེས་བྱ་བ་ནི་འཆད་པའོ། །གལ་ཏེ་རྗེས་སུ་དཔག་པ་བདག་ཉིད་ཐམས་ཅད་ཀྱིས་དངོས་པོ་མ་མཐོང་བ་ཉིད་ཀྱིས་ཐ་སྙེད་སྒྲུབ་པར་བྱེད་པ་ཡིན་ནོ་ཞེས་བརྗོད་པ་ནི། དེ་གལ་ཏེ་ཞེས་བྱ་བའོ། །རུང་བའི་རྒྱུ་ལས་ཞེས་བྱ་བ་ནི་དཔེ་གསུམ་བརྗོད་པའོ། །དོན་གསུམ་བརྗོད་པ་ནི་དེ་ལ་ཞེས་བྱ་བ་ལ་སོགས་པའོ། །དཔེར་ན་ཚོགས་པའི་དབང་གིས་རུང་བའི་སྐྱེས་པའི་རྒྱུ་ནི་གདོན་མི་ཟ་བར་འབྲས་བུ་སྐྱེད་པར་བྱེད་པ་དེ་བཞིན་དུ་རང་གི་རྒྱུ་ལས་སྐྱེས་པའི་སྔོན་བདག་ཉིད་ཐམས་ཅད་ཀྱིས་དངོས་པོ་འཛིན་པ་ཡིན་ནོ། །ཇི་ལྟར་རྒྱུ་མེད་པས་འབྲས་བུ་མི་སྐྱེ་བས་དེ་བཞིན་དུ་དེ་མེད་པའི་ཕྱིར་རྗེས་སུ་དཔག་པ་བདག་ཉིད་ཐམས་ཅད་འཛིན་པར་བྱེད་པ་ཡིན་ནོ། །ཡང་དཔེར་ན་མེ་གྲང་བ་ཞེས་བྱ་བ་ནི་ཚད་མ་དང་འགལ་བ་ཡིན་པ་དེ་བཞིན་དུ་རྗེས་སུ་དཔག་པར་བདག་ཉིད་ཐམས་ཅད་འཛིན་པ་ཡིན་ནོ་ཞེས་བྱ་བ་དེ་དང་འགལ་བ་ཡིན་ཏེ། ཚད་མ་གཞན་འཇུག་པའི་ཕྱིར་ཏེ། ཚད་མ་གཞན་ལ་ལྟོས་པའི་ཕྱིར་རོ་ཞེས་བྱ་བའི་དོན་ཏོ། །མི་སྲིད་པ་དང་འགལ་བ་ཁས་ལེན་ན་ནི་རྗེས་དཔག་པ་དངོས་པོ་མི་འཛིན་ཏོ་ཞེས་རང་ཉིད་ཀྱིས་ཁས་བླངས་པ་ཡིན་ནོ། །ཞེས་ལན་བརྗོད་པ་ནི་འདི་ནི་
ཞེས་བྱ་བའོ། །རྗེས་སུ་དཔག་པ་དང་བདག་ཉིད་ཐམས་ཅད་འཛིན་པ་མི་སྲིད་པ་དང༌། ཚད་མ་གཞན་འཇུག་པ་ནི་མཚན་ཉིད་ཀྱི་འགལ་བ་ཡིན་ན་དངོས་པོ་འཛིན་པ་གང་ལས་ཡིན་ཏེ་མ་ཡིན་པ་ཁོ་ནའོ། །འོན་ཏེ་དེ་ལྟ་ཡང་དངོས་པོ་འཛིན་པར་འདོད་ན་དེའི་ཚེ། འཛིན་པ་དང་མི་འཛིན་པ་འདི་གཉིས་གཅིག་གི་ཡིན་པར་ཐལ་ན་འགལ་བ་དང་ལྡན་པ་དེ་ཡང་རིགས་པ་མ་ཡིན་ནོ། །ཕྱེད་སྔ་མ་བཤད་ནས་ཕྱེད་ཕྱི་མ་འཆད་པ་ནི། དེ་འཛིན་ན་ཞེས་བྱ་བ་སྟེ། མི་ངེས་ན་དེ་དང་ཐ་མི་དད་པའི་ཁྱད་པར་མི་འཛིན་པར་ཇི་ལྟར་འགྱུར། ཇི་ལྟར་མི་འགྱུར་ཞེ་ན། དེ་ཉིད་ཀྱི་ཚེ་ཞེས་བྱ་བའོ། །གཟུགས་པར་རྟོགས་པ་མི་འཐད་པ་ཉིད་བརྗོད་ནས། འཛིན་པར་རྟོགས་པ་གསུངས་པ་ནི་དེ་བཞིན་དུ་བྱ་བའོ། །མེའི་ཁྱད་པར་ལས་མ་རྟོགས་པ་དེ་ཉིད་ནི་ཡོད་པ་ཡང་མ་ཡིན་ཏེ། དེ་མི་འཛིན་པ་ཐམས་ཅད་མི་འཛིན་པ་ཉིད་དོ། །དེས་ན་གཅིག་ལ་འཛིན་པ་དང་མི་འཛིན་པ་ནི་འཐད་པ་མ་ཡིན་ནོ། །དེའི་ཕྱིར་རྗེས་སུ་དཔག་པ་ནི་ཐ་སྙད་སྒྲུབ་པར་བྱེད་པ་ཉིད་དོ་ཞེས་དགོངས་པའོ། །གལ་ཏེ་རྟགས་མེད་ལ་མི་འཁྲུལ་བ་ཞེས་བྱ་བ་དེ་འཛིན་པའི་རྒྱུ་ཡིན་གྱི་རྣམ་པ་ཐམས་ཅད་འཛིན་པ་ནི་མ་ཡིན་ཏེ། དེ་མི་འཛིན་པ་ཐམས་ཅད་མི་འཛིན་པ་ནི་མ་ཡིན་ཏེ། འཁྲུལ་བ་ཕྱིར་རོ་ཞེས་དོགས་པ་ནི་ཅི་སྟེ་འདུ་སྙམ་དུ་ཞེས་བྱ་བའོ། །ཕྱིར་རྒྱུ་མ་ཡིན་ཞེ་ན། ལོ་མ་ལས་བྱུང་བ་ལ་སོགས་པ་ཁྱད་པར་རབ་ཏུ་འགྲུབ་པར་མི་འགྱུར་པའི་ཕྱིར་རོ། །ཅིའི་ཕྱིར་འགྲུབ་པར་མི་འགྱུར་ཞེ་ན། འཁྲུལ་ཕྱིར་ཞེས་བྱ་བའོ། །དེ་གཉིས་ག་ལས་ཤེ་ན། སྤྱི་ལ་ཞེས་གསུངས་ཏེ། གསལ་བ་ཐམས་ཅད་ལ་ཐུན་མོང་དུ་གྱུར་བའི་ཕྱིར་རོ་ཞེས་བྱ་བའི་དོན་ཏོ། །དེ་ལྟ་ཡིན་ན་རྗེས་སུ་དཔག་པ་དེ་དངོས་པོ་འཛིན་པ་མ་ཡིན་ནོ་ཞེས་ལན་བརྗོད་པ་ནི་གལ་ཏེ་དེ་ལྟ་ན་ནི་ཞེས་བྱ་བའོ། །དེའི་ཚེ་ཇི་ལྟར་ཁྱད་པར་འཛིན་པ་ཡིན་ཏེ་མ་ཡིན་པ་ཉིད་དོ། །ཁྱད་པར་འཛིན་པ་ཉིད་ཡིན་པ་ཉིད་དོ་ཞེ་ན། འདི་ན་ཞེས་བྱ་བའོ། །འོ་ན་ཅི་ཞིག་རྟོགས་ཞེ་ན། མེ་ཙམ་ཞེས་སྨོས་སོ། གང་གི་ཕྱིར་དེ་ལྟར་ཁྱབ་པར་འཛིན་པ་མིན་པ་དེས་ན་དངོས་པོ་འཛིན་ནམ་ཡིན་ནོ་ཞེས་བརྗོད་པ་ནི་སྔར་དུ་མ་ཞེས་བྱ་བའོ། །གལ་ཏེ་ཁྱད་པར་གྱི་ཐེ་ཚོམ་ཡོད་ཀྱང་རྗེས་སུ་དཔག་པ་དངོས་པོ་ལ་དགེ་བ་ཡིན་ནོ་ཞེ་ན། མངོན་སུམ་དུ་ཞེས་གསུངས་སོ། །མངོན་སུམ་བཞིན་དུ་དངོས་པོ་ལ་རེག་པ་ཡིན་ན་རྗེས་སུ་དཔག་པ་ལ་ཡང་ཁྱད་པར་ལ་ཐེ་ཚོམ་ཟ་བ་ཡོད་པར་མི་འགྱུར་ལ། ཡོད་པ་མ་
ཡིན་ཏེ་དེས་ན་དངོས་པོ་འཛིན་པ་མ་ཡིན་ནོ་ཞེས་བྱ་བའི་དོན་ཏོ། །ཐོབ་པ་གཞན་དུ་མི་འཐད་པས་ཐེ་ཚོམ་མི་སྲིད་པར་དོགས་པ་ནི་ཐེ་ཚོམ་ཟ་ན་ཞེས་བྱ་བའོ། །ཐེ་ཚོམ་ནི་ཐོབ་པ་དང་འགལ་བ་མ་ཡིན་ནོ་ཞེས་ལན་འདེབས་པ་ནི་ཐོབ་པ་ཡང་ཞེས་བྱ་བའོ། །དེས་ན་ཞེས་བྱ་བ་ནི་སྐབས་ཉེ་བར་སྡུད་པའོ། །རང་བཞིན་གྱི་ཞེས་བྱ་བ་རྩོད་པའོ། །ལན་དུ་དོན་ནི་ཞེས་བྱ་བ་འོ་ན་ཇི་ལྟར་ཐོབ་ཅེ་ན་ཀུན་ཚེ་ཞེས་བྱ་བའོ། །གང་གིས་འཐོབ་པ་དངོས་པོ་མ་བཟུང་བར་དེར་འཇུག་པར་ཇི་ལྟར་འགྱུར་ཞེ་ན། འཁྲུས་པས་ཀྱང་ཞེས་བྱ་བའོ། །དེ་དོན་དོན་གཉེར་རྣམས་ནི་དོན་དུ་གཉེར་བ་རྣམས་སོ། །དེ་ཉིད་གསལ་བར་བྱེད་པ་ནི་སྐྲ་ཤད་ལ་སོགས་པ་ཞེས་བྱ་བ་ནི་རབ་རིམ་ཅན་གྱིས་དམིགས་པ་དག་ལའོ། །ཀུན་ཚེ་ཡོད་པ་ལས་ཞེས་བྱ་བ་རྣམ་པར་འགྲེལ་པ་ནི་གང་དུ་ཞེས་བྱ་བའོ། །འབྱུང་བར་འགྱུར་བ་ཡིན་པའི་ཕྱིར་ན་ཐམས་ཅད་དུ་འཇུག་པའི་ཡུལ་འཛིན་པ་མ་ཡིན་ནོ་ཞེས་བརྗོད་པ་ནི་མངོན་སུམ་དང་ཞེས་བྱ་བའོ། །འབྱུང་བར་འགྱུར་བའི་ཞེས་བྱ་བ་ནི་དོགས་པའོ། །རང་བཞིན་གྱིས་བསྟན་གྱི་གཏན་ཚིགས་ལ་སོགས་པ་དག་ཏུ་ནི་དངོས་པོ་འབྱུང་བར་འགྱུར་བའི་རང་བཞིན་ཉིད་དུ་འཛིན་པ་ཡིན་ཏེ། དེས་ན་མ་བཟུང་བ་ཐོབ་པ་ནི་མ་ཡིན་ནོ་ཞེས་བྱ་བའི་དོན་ཏོ། །ལན་ནི་འབྱུང་བར་འགྱུར་བའི་རང་བཞིན་གྱིས་ནི་འཛིན་པ་མ་ཡིན་ནོ། །ཅིའི་ཕྱིར་ཞེ་ན་དེ་ལྟར་ཞེས་སྨོས་སོ། །འབྱུང་བར་གྱུར་པ་ཉིད་དུ་དངོས་པོ་ལ་རྟོགས་པའི་ཕྱིར་རོ། །དེའི་རང་བཞིན་དུ་རྟོགས་ན་ཡང་སྐྱོན་ཡོད་དོ་ཞེས་བརྗོད་པ་ནི་ཅི་སྟེ་ཞེས་བྱ་བའོ། །གཞན་དུ་ཞེས་བྱ་བ་ནི་ཐོབ་པའི་དུས་ན་ད་ལྟར་བྱུང་བ་ཉིད་དུའོ། །དེའི་ཚེ་ཡང་འབྱུང་བར་འགྱུར་བ་ཉིད་དུ་རྟོགས་པར་འགྱུར་རོ་ཞེས་བྱ་བའི་དོན་ཏོ། །སྤྱིའི་ཡུལ་ཅན་ཉིད་ཀྱིས་དངོས་པོ་འཛིན་པར་དོགས་པ་ནི་གལ་ཏེ་ཞེས་བྱ་བའོ། །དེ་ལྟ་ན་འོ་ན་མ་རྟོགས་པའི་ཁྱད་པར་ཇི་ལྟར་འཐོབ་ཅེས་བརྗོད་པ་ནི་སྤྱི་རྟོགས་པ་ན་ཞེས་བྱ་བའོ། །ཐོབ་པའི་རྒྱུ་མཚན་དོགས་པར་བྱེད་པ་ནི་ཡོད་པའི་ཞེས་བྱ་བའོ། །ཇི་ལྟར་གཞན་རྟོགས་པ་ནི་གཞན་ཡོད་སྙམ་ན་འདི་ལྟར་ཞེས་བྱ་བའོ། །ལན་ནི་འོ་ན་ཞེས་བྱ་བའོ། །དེ་ཉིད་ལས་ཞེས་བྱ་བ་ནི་རྟགས་ཉིད་ལས་སོ། །གཞན་ཞེས་བྱ་བ་ནི་རྩོད་པའོ། །སྤྱི་ཡང་ཞེས་བྱ་བ་ནི་ལན་ནོ། །དེས་ན་བརྒྱལ་ཞིང་བརྟག་པ་མཚུངས་ཀྱང་གཅིག་ལ་ནི་བརྒལ་ཞིང་
བརྟག་པར་བྱ་བ་ཡིན་ལ། གཞན་ལ་ནི་མ་ཡིན་ནོ་ཞེས་བྱ་བའི་ཚུལ་འདི་ཅི་ཞིག་ཡིན། གང་གིས་བརྟག་ཅིང་བརྒལ་བ་མཚུངས་པ་ཉིད་དུ་འགྱུར་བ། དུ་བ་བཞིན་དུ་ཐ་དད་ནི་མ་ཡིན་པ་ཁོ་ནའོ་ཞེས་དོགས་པར་བྱེད་པ་ནི་གལ་ཏེ་སྤྱི་ནི་ཞེས་བྱ་བའོ། །གལ་ཏེ་གཞན་ཁོ་ནར་གཅིག་ཏུ་ངེས་པ་མ་ཡིན་གྱི། འོན་ཀྱང་གཞན་མ་ཡིན་པ་ཁོ་ན་ཡིན་གྱི། དེའི་ཚེ་སྤྱི་ནི་གཟུང་བ་དང་དེ་ཉིད་ཅེས་བྱ་བ་སྤྱི་གཟུང་བ་ཉིད་དོན་ནི་གཟུང་བར་འགྱུར་རོ། །དེ་ལྟ་ཡིན་ན་ཅི་ཡོད་སྙམ་ན། དེ་ལྟ་ཡིན་ན་ཞེས་གསུངས་ཏེ་དོན་བཟུང་བ་ཡིན་ནའོ། །ཅིའི་ཕྱིར་ཞེ་ན། གཟུང་བ་ཞེས་སྨོས་སོ། །དེའི་ཐེ་ཚོམ་མོ། །སྤྱིའི་ཚུལ་གྱིས་ཞེས་བྱ་བ་ནི་དོགས་པའོ། །ཁྱད་པར་གྱི་རང་བཞིན་ལས་ཞེས་བྱ་བ་ནི་ལན་ནོ། །དེ་ཡང་ཞེས་བྱ་བ་ནི་དོགས་པ་སྟེ། ཁྱད་པར་གྱི་རང་བཞིན་ནོ། །ཅིའི་དོན་དུ་ཞེས་བྱ་བ་ནི་ལན་ནོ། །མངོན་པར་འདོད་པ་གྲུབ་ཟིན་པའི་ཕྱིར་རོ་ཞེས་བྱ་བ་ནི་དོགས་པའོ། །འགའ་ཞིག་གིས་ནི་མ་ཡིན་ནོ་ཞེས་བྱ་བ་ནི་ཁྱད་པར་གྱི་རང་བཞིན་གྱིས་སོ། །ཕྱོགས་འདི་གཉིས་ཀ་ལ་ཡང་ཡོད་པ་དང་མི་ནུས་པའི་སྐྱོན་རིམ་པ་བཞིན་བརྗོད་པར་ནི་ཚུལ་གང་གིས་ཞེས་སྦྱར་རོ། །ཅིའི་ཕྱིར་ཞེ་ན། མི་ནུས་པའི་ཕྱིར་རོ་ཞེས་བྱ་བ་སྟེ། ཁྱོད་ཀྱི་འདོད་པས་ནི་མ་ཤེས་པ་ལ་འཇུག་པར་ནུས་པ་འགའ་ཡང་མེད་དོ། །ཐེ་ཚོམ་ལས་འཇུག་པ་ཡིན་ནོ་ཞེ་ན། སྤྱི་ཤེས་པ་ལ་ནི་ཐེ་ཚོམ་མི་ཟའོ། །འོ་ན་མི་ཤེས་པ་ལ་ཐེ་ཚོམ་གྱིས་འཇུག་པ་ཡིན་ནོ་སྙམ་ན། བཤད་པ་ཁྱད་པར་གྱི་རང་བཞིན་མ་ཤེས་པ་ལ་ཡང་ཐེ་ཚོམ་ཟ་བ་མ་ཡིན་ནོ་ཞེས་འབྲེལ་ཏོ། །ཅིའི་ཕྱིར་ཞེན། ཐེ་ཚོམ་ནི་ཞེས་གསུངས་སོ། །གཞན་གྱི་ལྟར་ན་ནི་ཐེ་ཚོམ་ཡང་དངོས་པོ་ལ་རེག་པ་ཡིན་ཏེ། དེས་ན་དངོས་པོའི་གནས་ལུགས་ཀྱི་ཁྱད་པར་མ་རྟོགས་པས་ན་དེ་ལ་ཞེན་པའི་ཐེ་ཚོམ་དུ་མི་འགྱུར་རོ། །རྟོགས་པ་ལ་ཡང་ཐེ་ཚོམ་ཡོད་པ་མ་ཡིན་ཏེ། གཉིས་ཀ་ཡང་རང་གི་ངོ་བོ་རྟོགས་པའི་ཕྱིར་རོ། །དེའི་ཕྱིར་ཐེ་ཚོམ་ལས་འཇུག་པ་ཞེས་བྱ་བ་ནི་ཐེག་པ་མ་ཡིན་ནོ། །རྟོགས་པའི་སྤྱི་ལ་འཇུག་པ་ཉིད་ནི་དེ་དང་ཐ་མི་དད་པའི་ན་མ་རྟོགས་པའི་ཁྱད་པར་ལ་ཡང་འཇུག་པ་ཡིན་གྱི་ཐེ་ཚོམ་ལས་ནི་མ་ཡིན་ནོ་ཞེས་དོགས་པ་བསུ་བ་ནི། གལ་ཏེ་སྤྱི་དང་ཞེས་བྱ་བའོ། །ཁྱོད་ཀྱི་ལུགས་ཀྱིས་ཡུལ་དུ་མ་བྱས་པ་ལ་འཇུག་པ་མི་འཐད་དོ་ཞེས་ལན་བརྗོད་པ་ནི་མ་ཡིན་ཏེ་ཞེས་བྱ་བའོ། །ངོ་བོ་གཅིག་པའི་
ཕྱིར་ཞེས་བྱ་བ་ཡང་མ་གྲུབ་ཅེས་བརྗོད་པ་ནི། རྟོགས་པ་དང་ཞེས་བྱ་བའོ། །རྟོགས་པ་ནི་སྤྱིའོ། །མ་རྟོགས་པ་ནི་ཁྱད་པར་རོ། །ཇི་ལྟར་དེ་གཉིས་གཅིག་མ་ཡིན་པར་བརྗོད་སྙམ་ན། སྔར་བཤད་ཟིན་པ་དྲན་པར་བྱེད་པ་ནི་ཤེས་པ་ཞེས་བྱ་བ་སྟེ། སྤྱི་དང་ཁྱད་པར་དག་ལ་རང་བཞིན་གཅིག་ཉིད་ཀྱིས་རྟོགས་པའི་སྐྱེས་བུ་ནི་དེ་དག་གིས་གཅིག་ཉིད་རྟོགས་པར་འགྱུར་བ་ཡིན་གྱི་གཉིས་ཀ་མ་རྟོགས་པར་ནི་མ་ཡིན་ནོ། །རྗེས་སུ་དཔག་པའི་དུས་ན་ནི་ཁྱད་པར་རྟོགས་པ་ཡང་མ་ཡིན་ཏེ། སྤྱི་འབའ་ཞིག་རྟོགས་པའི་ཕྱིར་རོ་ཞེས་དོགས་པའོ། །འོན་ཏེ་ཞེས་བྱ་བ་ལ་སྤྱི་རྟོགས་པས་གཞན་པའི་དུས་ནི་དུས་གཞན་ནི་དེར་མངོན་སུམ་གྱིས་རྟོགས་པའི་ཁྱད་པར་སྔར་རྟོགས་པའི་སྤྱི་དང་གཅིག་ཏུ་རྟོགས་པའི་སྐྱེས་བུའོ། །གྲུབ་པའི་མཐར་ནི་སྔོན་གྱི་དུས་སུ་རྟོགས་པའི་སྤྱི་དུས་གཞན་དུ་མངོན་སུམ་དང་རྗེས་སུ་དཔག་པ་དག་མེད་པས་མ་རྟོགས་པའི་ཕྱིར་ཇི་ལྟར་དེ་དང་གཅིག་ཉིད་རྟོགས་ཞེས་བརྗོད་པ་ནི། དུས་གཞན་ལ་ཞེས་བྱ་བའོ། །བསྟན་ཟིན་ཏོ་ཞེས་བྱ་བ་ནི། དེ་དང་གཅིག་ལ་ཚད་མེད་མིན། །ཞེས་བྱ་བ་དེར་རོ། །གལ་ཏེ་མི་རྟག་པ་ཉིད་དངོས་པོའི་ཆོས་ཉིད་ཡིན་ན་ཆག་པའི་བུམ་པ་བཞིན་དུ་རྡོ་རྗེའི་རྡོ་རྗེ་བ་ལ་སོགས་པ་དག་ཀྱང་རྟོགས་པར་འགྱུར་རོ་ཞེས་དོགས་པ་ནི། གལ་ཏེ་ཞེས་བྱ་བའོ། །དེས་པ་ཡོད་པ་ཡང་མ་ཡིན་ཏེ། དེས་ན་མི་རྟག་པ་ཉིད་ནི་དངོས་པོའི་ཆོས་མ་ཡིན་ནོ་ཞེས་བྱ་བའི་དོན་ཏོ། །ངེས་པ་མེད་ཀྱང་དེའི་ངོ་བོར་མི་འགལ་ལོ་ཞེས་ལན་གསུངས་པ་ནི་འདི་ནི་ཞེས་བྱ་བའོ། །ལ་ལར་ཞེས་བྱ་བ་ནི་རྡོ་རྗེ་ལ་སོགས་པ་ལའོ། །དེ་ཞེས་བྱ་བ་ནི་མི་རྟག་པ་ཉིད་ཡོངས་སུ་མི་ཤེས་ཏེ་མི་ངེས་སོ། །འདྲ་བ་གཞན་རྒྱུན་འཇུག་པར་ཡོད་པའི་ཕྱིར་རོ། །རིགས་མི་མཐུན་པར་སྐྱེ་བ་མེད་པའི་ཕྱིར་རོ། །འཁྲུལ་པ་ཡིན་ཏེ་དེས་ན་ཐ་དད་པ་ལ་ངེས་པ་བསལ་བ་མེད་པའི་ཕྱིར་མཐོང་ཡང་མཐོང་བ་ཁོ་ནའོ་ཞེས་བརྗོད་པ་ནི། ཐ་དད་མཐོང་བ་མེད་ཕྱིར་རོ་ཞེས་བྱ་བ་སྟེ། དཔེར་ན་སྒོང་གི་ཐ་དད་པ་བཞིན་ནོ། །རྒྱུ་མ་བྱེད་པ་དག་ནི་སྒོང་གཅིག་བསྟན་ནས་དེ་ལས་གཞན་སྟོན་པར་བྱེད་དོ། །དེ་ད་ཀྱང་ཐ་དད་པར་མཐོང་ཡང་དེ་ཉིད་དུ་རྟོགས་པས་མཐོང་བ་དང་འདྲ་བ་ཡིན་ནོ། །མ་ངེས་པའི་ཕྱིར་རོ། །སྒོང་དེ་ལ་སྒོང་གཞན་ཉིད་དུ་རྟོགས་པའི་ཕྱིར་རོ། །གལ་ཏེ་ཞེས་བྱ་བ་ནས་ཅི་ཡིན་ཞེ་ནའི་བར་ནི་རྩོད་པའོ། །རྩོད་པ་པོ་ཉིད་ཀྱིས་
གལ་ཏེ་སྒྲིབ་པར་ཞེས་བྱ་བ་ལ་སོགས་པས་བསྐལ་བར་དོགས་པ་བསུ་ནས། བསྒྲིབས་པ་ཞེས་བྱ་བ་ཞེས་ལན་བརྗོད་པའོ། །ཅིའི་ཕྱིར་ཡོད་པ་མ་ཡིན་ཞེ་ན། རང་གི་ངོ་བོས་ཞེས་གསུངས་སོ། །དེ་ལྟ་ན་ཡང་སྟེ་ཁས་ལེན་ན་ནི་གཉི་ག་ཡང་དེ་འགྱུར་རོ་ཞེས་བརྗོད་པ་ནི་ཡང་ན་ཞེས་བྱ་བའོ། །ཇི་ལྟར་གཉི་ག་བསྒྲིབས་པར་འགྱུར་ཞེ་ན། ཕན་ཚུན་ཞེས་བྱ་བའོ། །འོན་ཏེ་སེམས་ཞེས་བྱ་བ་ནི་དོགས་པའོ། །དེ་ལྟ་ན་ནི་ཞེས་བྱ་བ་ནི་ལན་ནོ། །སྐབས་ཀྱི་དོན་ནི་འདི་ཡིན་ནོ། །གལ་ཏེ་ཐ་དད་པར་བཟུང་ནས་བསྒྲིབས་པའི་དོན་ཅི་ཡིན། དེ་འཛིན་པ་མེད་ན་ཡང་ཐ་དད་པར་མཐོང་བ་མ་འཁྲུལ་པར་གནས་པ་ཉིད་དོ་ཞེས་བྱ་བའོ། །སྔོན་གྱི་རིག་པ་དང་དེའི་ཡུལ་མེད་པའི་ཕྱིར་དེས་ནི་རྣམ་པར་རྟོག་པ་མ་ཡིན་གྱི་འོན་ཀྱང་རྗེས་སུ་མཐུན་པའི་ཐ་སྙད་ཀྱི་གེགས་བྱེད་པའི་ཕྱིར་ན། དེ་ནི་རྣམ་པར་རྟོག་པས་བསྒྲིབས་པར་འགྱུར་རོ་ཞེས་ལན་བརྗོད་པ་ནི། འདིར་སྨྲས་པ་ཞེས་བྱ་བའོ། །མཐོང་བ་དང་བལྟ་བར་བྱ་བ་དེ་ཐ་དད་པར་སྐྱེ་བོས་མཐོང་བ་མེད་དོ། །ཅིའི་ཕྱིར་ཞེ་ན་ཞིག་ཕྱིར་རོ། །འོ་ན་ཅི་མཐོང་སྙམ་ན། རྟག་པ་ཉིད་དུ་ཞེས་བྱ་བའོ། །སྔར་གྱི་ཞེས་བྱ་བ་ནི་འཆད་པའོ། །འོ་ན་འདས་ པ་ཉིད་དུ་ཐ་སྙད་གང་གིས་དགོས ་པོ། །སྙམ་ན། ཐ་སྙད་ཀྱང་ཞེས་བྱ་བའོ། །གང་གི་ཕྱིར་གཉིས་ཀ་འདས་པ་དང༌། ཐ་སྙད་ཀྱང་རྟག་པ་ཉིད་དུ་བྱེད་པ་དེས་ནའོ། །འདི་ཞེས་བྱ་བ་ནི་རྟག་པ་ཉིད་ཀྱི་ཐ་སྙད་དོ། །གལ་ཏེ་མཐོང་བ་བཞིན་དུ་རྣམ་པར་རྟོག་པ་ཡང་ཇི་ལྟར་ཐ་སྙད་བྱེད་པ་ཡིན་ཞེ་ན། ཕྱིན་ཅི་ལོག་ཏུ་གསུངས་སོ། །དེས་ན་ཞེས་བྱ་བ་ནི་ཡོད་པས་སོ། །གལ་ཏེ་དེ་དེ་ལྟ་ན་ཡང་དེ་མཐོང་བ་ཇི་ལྟར་བསྒྲིབས་ཏེ་ཅི་ཡང་མ་བྱས་པའི་ཕྱིར་རོ་ཞེ་ན། དེས་ན་ཞེས་བྱ་བའོ། །ཇི་ལྟར་ཐ་སྙད་མེད་པ་ཡིན་ཞེ་ན་གཞན་ཞེས་གསུངས་ཏེ། སྐད་ཅིག་ཕྱི་མ་སྐད་ཅིག་སྔ་མ་ལས་ཐ་དད་པར་ཉེ་བར་མ་མཚོན་པའི་ཕྱིར་རོ། །དེ་ལས་ནི་ཞེས་བྱ་བ་ནི་སྔ་མ་ལས་སོ། །གལ་ཏེ་མཁས་པས་སྒོང་ལ་སོགས་པ་ཐ་དད་པར་རྟོགས་པ་ཉིད་མ་ཡིན་ནམ་རིགས་མཐུན་པའི་སྐད་ཅིག་མ་སྐྱེས་པར་ནི་དོན་གྱི་རྒྱུ་འགལ་ཡང་ནི་ཐ་དད་པར་རྟོགས་པ་མ་ཡིན་ནོ། །དེས་དེ་བཞིན་ནོ། །འདིར་ཡང་ཐ་དད་པ་ཇི་ལྟར་ཡིན་ཞེ་ན། རིགས་མི་མཐུན་པ་ལས་སྐྱེས་ཀྱང་དེ་དམིགས་པ་བརྗོད་པ་ནི་དེ་ལྟར་ཞེས་བྱ་བ་སྟེ་མཁས་པ་ལྟ་ཞོག་སྟེ་རྟགས་མེད་དེ་རྟགས་མེད་པ་ཁོ་
ནར་འཇིག་རྟེན་བྱིས་པའི་བར་གྱི་སྐྱེ་བོས་ཀྱང་ངོ༌། །ཕྱིས་འབྱུང་བ་དང་སྔ་མ་འབྲེལ་པ་མེད་པ་གང་ཡིན་པ་དེ་ལྟར་མར་མེ་ལ་སོགས་པའི་དངོས་པོ་འདིའི་གནས་སྐབས་མ་ཡིན་པར་མཐོང་ངོ༌། །འཇིག་པ་ཡོངས་སུ་གཅོད་པ་ནི་འཛིན་པའོ། །འཇིག་པ་དང་དེའི་གནས་སྐབས་མ་ཡིན་པ་དག་ནི་དོན་གཞན་མ་ཡིན་པའི་ཕྱིར་དེས་ན་སྒྱུ་མའི་སྒོང་བཞིན་དུ་འདིར་ཡང་ཐ་དད་པར་དམིགས་པ་ཡོད་པ་ཉིད་དོ། །ཕྱིས་འབྱུང་བ་དང་མི་འབྲེལ་མེད་དེ་འབྲེལ་པ་མེད་པ་གང་ཡིན་པ་དེའི་ཐ་མའི་སྐད་ཅིག་དེས་ཞེས་སྦྱོར་བ་ནི། ལ་ལར་དེའི་ས་མི་ཤེས་ཏེ་ཞེས་བྱ་བ་ལ་སོགས་པའི་ཁྱད་པར་བརྗོད་པ་ཉིད་ཀྱིས་དོན་གོ་བ་ཡིན་ནོ། །བཀོད་པའི་རྣམ་འགྲེལ་བཤད་པའི་དོན་དུ་ཕྱོགས་སྔ་མ་འགོད་པ་ནི་གལ་ཏེ་ཞེས་བྱ་བའོ། །ངེས་པར་རྟོགས་པར་བྱེད་པས་ནི་དབང་པོའི་ཤེས་པས་ཀྱང་སྐད་ཅིག་ཉིད་འཛིན་པ་ཡིན་ནོ་ཞེས་ལན་འདེབས་པ་ནི་འདི་ལྟར་ཞེས་བྱའོ། །ཅི་སྟེ་ཡང་སྒྲོན་མ་ལ་སོགས་པ་ནི་དེའི་གནས་སྐབས་ཁོ་ན་ཡིན་ཏེ། དེས་ན་སྐད་ཅིག་མ་ཉིད་ཇི་ལྟར་འཛིན་ཞེ་ན། སྒྲོན་མ་ལ་སོགས་པ་ནི་ཞེས་བྱ་བའོ། །འོ་ན་ཇི་ལྟར་དེ་ཉིད་ཡིན་ནོ་ཞེས་རྟོགས་སྙམ་ན། དེ་ལྟ་མོད་ཀྱི་ཞེས་གསུངས་སོ། །འདྲིའི་ཞེས་བྱ་བ་ནི་རང་གི་ངོ་བོས་སོ། །ཚོགས་པ་མཚུངས་པ་ཞེས་བྱ་བ་ནི་རྒྱུའི་སྒོ་ནས་སོ། །གཅིག་ཉིད་ཀྱི་ཚེ་ཞེས་བྱ་བ་ནི་མར་མེ་འབར་བ་གཞན་དང་གཞན་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །གཅིག་ཡིན་ན་མར་མེ་ལ་སོགས་པ་ཕྱི་མ་དོན་མེད་དོ་ཞེས་ལན་འདེབས་པ་ནི་གལ་ཏེ་དེ་ནི་ཞེས་བྱ་བའོ། །དེ་ལ་ཞེས་བྱ་བ་ནི་ཏིལ་ཚིགས་མ་དང་པོ་ལས་གཞན་པའི་མར་ཁུ་ལ་སོགས་པ་དོན་མེད་དོ། །རག་ལས་པ་མེད་པའི་ཕྱིར་ཞེས་བྱ་བ་ནི་རང་དབང་ཡིན་པའི་ཕྱིར་རོ། །རང་དབང་ཇི་ལྟར་ཞེ་ན་གྲུབ་ཟིན་པས་ཞེས་བྱ་བའོ། །དུས་གཞན་དུ་གནས་པར་སྐྱེ་ནས་ཚོགས་པ་གཞན་དོན་མེད་པར་བརྗོད་ནས། དུས་གཞན་མི་གནས་པར་སྐྱེ་བ་ལ་མ་ནུས་པ་མེད་པ་བརྗོད་པ་ནི་དུས་གཞན་དུ་མི་གནས་པར་ཞེས་བྱ་བའོ། །ཚོགས་པ་གཞན་གྱིས་གཞན་སྐྱེད་པའི་ཕྱིར་ཇི་ལྟར་དོན་མེད་པ་ཡིན་ཞེ་ན་བཤད་པ་གཞན་སྐྱེད་ནས་ནི་དེ་ཉིད་ཅེས་བྱ་བའོ། །དེ་ལྟར་སྒྲོན་མ་ལ་སོགས་པ་སྐད་ཅིག་དང་པོ་ཉིད་ལས་དུས་གཞན་དུ་གནས་པར་སྐྱེས་པ་ལ་སྒོང་བུ་དང་རས་བལ་ལ་སོགས་པའི་ཚོགས་པ་མེད་པར་བརྗོད་ནས། མིག་ལ་སོགས་པས་ཀྱང་སྐད་ཅིག་དང་པོ་ཉིད་ལ་
བདག་ཉིད་ཐམས་ཅད་བཟུང་བའི་ཕྱིར་རྗེས་སུ་འཇུག་པའི་མིག་ལ་སོགས་པ་དོན་མེད་པར་འགྱུར་རོ་ཞེས་བརྗོད་པ་ནི་དེ་བཞིན་དུ་ཞེས་བྱ་བའོ། །རྣམ་པ་འཛིན་པ་རྣམ་པ་གཉིས་སུ་དོགས་པ་བསུ་ནས་ནི་འོན་ཏེ་ཞེས་བྱ་སྟེ། དུས་གཞན་དུས་གནས་པའི་དེ་ཡིན་ལ་འཛིན་པའི་ཡིན་པ་དེ་ཞེས་བྱ་སྟེ་རྣམ་པར་རྟོག་པ་གཉིས་པའོ། །ལན་ནི་དེ་ལྟར་གྱུར་ན་ཞེས་བྱ་བ་སྟེ། མཐོང་བ་གཞན་དང་གཞན་གྱིས་འཛིན་ནའོ། །རྣམ་པར་རྟོག་པ་གཉིས་པ་ལ་བརྗོད་པ་ནི་འཛིན་པ་ཞེས་བྱ་བའོ། །ཅིག་ཅར་ཚེ་ན་ཞེས་བྱ་བ་ནི་སྐད་ཅིག་གཅིག་ལའོ། །དེ་ལྟར་ཞེས་བྱ་བ་ནི་རྟག་པ་ཉིད་དུའོ། །གང་གི་ཕྱིར་དེ་ལྟར་དུས་གཞན་དུ་གནས་པ་ཉིད་འཛིན་པར་མི་འཐད་པ་དེའི་ཕྱིར་རོ། །གལ་ཏེ་ལན་མཐོང་བར་གྱུར་པ་ནི་དུས་ཡུན་རིང་པོར་གྱུར་ན། དེའི་ཚེ་གློག་ལ་སོགས་པ་ཐམས་ཅད་ཀྱང་དེ་ལྟར་འགྱུར་ཏེ། དུས་རིང་པོར་འགྱུར་སྙམ་ན། མཐོང་བ་ཞེས་གསུངས་སོ། །འདི་ནི་གཞན་གྱི་ལུགས་ཀྱིས་བརྗོད་པར་ཟད་ཀྱི་འདི་འཐད་པར་ནི་མ་ཡིན་ནོ་ཞེས་བྱ་བར་དགོངས་པའོ། །ཇི་ལྟ་ཇི་ལྟར་ཞེས་བྱ་བ་ཕྱེད་ཕྱི་མ་འཆད་པའོ། །ཕྱེད་སྔ་མ་རྣམ་པར་འབྲེལ་པ་ནི་དུས་གཅིག་ཉིད་དུ་ཞེས་བྱ་བའོ། །དེས་ན་ཞེས་བྱ་བ་ནི་དུས་ཡུན་རིང་པོར་མ་མཐོང་བས་ནའོ། །འོ་ན་ཇི་ལྟར་རྨོངས་སྙམ་ན་ནི་གལ་ཏེ་ཞེས་བྱ་བའོ། །མཐོང་བ་ཡིན་ཡང་གསལ་བ་མེད་པའི་ཕྱིར། མཐོང་བ་མ་ངེས་པར་ཡིན་ནོ་ཞེས་ལན་བརྗོད་པ་ནི་ནུས་པ་དངོས་པོ་ལས་ཐ་མི་དད་པས་བཟུང་བཞིན་དུ་ཡང་རྨོངས་འགྱུར་ཏེ་ངེས་པ་མེད་པར་འགྱུར་རོ། །གང་ལས་ཞེས་ངེས་གསལ་མེད་ཕྱིར་རོ། །གསལ་བ་མེད་པ་ཉིད་ཇི་ལྟར་ཞེ་ན་འབྲས་བུ་མཐོང་བ་མེད་པའི་ཕྱིར་རོ། །ཇི་ལྟར་མཐོང་བ་མེད་སྙམ་ན་དེ་མ་ཐག་མེད་པས་ཞེས་བྱ་བའོ། །དེ་བཞིན་དུ་མི་རྟག་པ་ཉིད་དེ་ལས་ཐ་མི་དད་པས་དེ་བཟུང་བས་བཟུང་ཉིད་ཡིན་བཞིན་དུ་ཡང་རྨོངས་པ་ནི་ངེས་པ་གསལ་བ་མེད་པའི་ཕྱིར་དེ་ཆོད་པས་ན་སྐད་ཅིག་ཐ་མའི་འབྲས་བུ་མ་མཐོང་བའི་ཕྱིར་རོ། །འདིའི་རིགས་མི་མཐུན་པའི་རྒྱུ་རྟག་ཏུ་ཉེ་བ་ནི་མ་ཡིན་ཞེས་བྱ་བ་དཔེའི་དོན་ཅི་ཤུགས་ཀྱིས་འཕགས་པ་ཡིན་ནོ་ཞེས་སྟོན་པ་ནི། དཔེར་ན་ཞེས་བྱ་བའོ། །དེ་ཉིད་ཅེས་བྱ་བ་རྨོངས་པ་བཟློག་པའི་ཆེད་དུ་ཡོད་པའི་ཕྱིར་སྐད་ཅིག་མ་ཡིན་ནོ་ཞེས་བྱ་བའི་རྗེས་སུ་དཔག་པ་བརྗོད་པ་ཡིན་གྱི་དངོས་པོའི་རང་བཞིན་གྲུབ་པའི་དོན་ནི་མ་
ཡིན་ནོ། །བགོམས་པ་ལས་དེའི་རང་བཞིན་ཉེ་བར་མཚོན་པའི་མཐོང་བ་ཉིད་ལས་ནི་མཐའ་སྐད་ཅིག་མཐོང་བ་མེད་ཀྱང་ངེས་པ་ཡིན་ནོ་ཞེས་བརྗོད་པ་ནི་བློ་གྲོས་ཆེན་པོ་ཞེས་བྱ་སྟེ། གང་ལ་བློ་གྲོས་ཆེན་པོ་མངའ་བའོ། །བློ་གྲོས་ཆེན་པོ་ཡང་བགོམས་པ་ལས་གསལ་བ་ཉིད་དོ་རྣམ་པ་ཡང་ཡིན་ལ་ཐམས་ཅད་ཀྱང་ཡིན་པས་རྣམ་པ་ཐམས་ཅད་དེ། མི་རྟག་པ་དང་སྡུག་བསྔལ་བ་དང༌། བདག་མེད་པ་དང་སྟོང་པའི་རང་བཞིན་རྣམས་སོ། །དེ་དག་ནི་མཐོང་བ་ཉིད་ལས་ངེས་པར་བྱེད་དོ། །དེས་ན་ནི་རྨོངས་པས་ནའོ། །དེའི་ཕྱིར་ནི་མ་ངེས་པའི་ཕྱིར་རོ། །དེས་ན་ཞེས་བྱ་བ་ནི་སྐབས་ཀྱི་དོན་ཉེ་བར་སྡུད་པའོ། །གང་ལས་ཞེས་བྱ་བ་ནི་མི་འདྲ་བའི་སྐད་ཅིག་མཚམས་སྦྱོར་བ་ལའོ། །དངོས་པོ་གཅིག་གི་རྗེས་སུ་འབྲང་བ་ཡིན་ལ་ཇི་ལྟར་ཆོས་ཐ་དད་པའི་རྗེས་སུ་འབྲང་བར་མི་འགྱུར་སྙམ་ན། སྔོན་པོ་ཉམས་སུ་མྱོང་བ་ཞེས་གསུངས་སོ། །རྗེས་སུ་འབྲང་བ་ན་ཡང་ངེས་པར་བརྟེན་པའི་རྗེས་སུ་དཔག་པ་བརྟག་པའི་ཡུལ་ཅན་དུ་འགྱུར་རོ། །འདོད་པ་ཙམ་ལས་བྱུང་བའི་རྟོགས་པས་ནི་ཐམས་ཅད་ལ་དཀའ་བ་མེད་པའི་ཕྱིར་རོ་ཞེས་བྱ་བར་དགོངས་པའོ། །འདི་དངོས་པོའི་རང་བཞིན་གཅིག་གི་རྗེས་སུ་འབྲང་བའམ། འདོད་པ་ཙམ་ལས་བྱུང་བ་ནི་མ་ཡིན་གྱི་འོན་ཀྱང་དེ་དང་དེ་ལས་ལྡོག་པའི་རྒྱུ་མཚན་ཅན་ཡིན་ནོ་ཞེས་བརྗོད་པ་ནི། འདི་ལ་ལན་དུ་ཞེས་བྱ་བའོ། །དེ་དང་དེ་ལས་བཟློག་པའི་རྒྱུ་མཚན་ཅན་གྱི་ཆོས་དང་ཉེ་བར་སྟོན་པར་བྱེད་པའི་བློས་ནི་ཐ་དད་པའི་རྟེན་ཅན་བཞིན་དུ་རྗེས་སུ་དཔག་པ་འཇུག་པར་འགྱུར་ཏེ། འདིས་ནི་བསྒྲུབ་པར་བྱ་བ་དང་སྒྲུབ་པར་བྱེད་པ་དག་ཐ་དད་པར་བརྗོད་པ་ཡིན་ནོ། །བརྡ་ཡོད་པ་ན་སྒྲས་ཀྱང་ཐ་དད་པ་འདི་ནི་བརྗོད་པ་ཡིན་ནོ་ཞེས་བརྗོད་པ་ནི་ཇི་ལྟར་བརྟགས་པའི་སྒྲ་ཞེས་བྱ་བའོ། །གལ་ཏེ་དངོས་པོ་ཐམས་ཅད་ལས་ལྡོག་པ་ཡིན་ན། ཇི་ལྟར་འགའ་ཞིག་ལས་ལྡོག་པ་ཉིད་དུ་ངེས་ཤེ་ན། འཁྲུལ་རྒྱུ་མེད་ན་ཞེས་གསུངས་ཏེ། གོམས་པ་བསལ་བའི་ཕྱིར་འཁྲུལ་པའི་རྒྱུ་མེད་ན་ནི་དོན་མེད་རང་དང་རྗེས་སུ་མཐུན་པའི་བློ་བསྐྱེད་པར་འགྱུར་རོ། །སྐད་ཅིག་ཡིན་པ་ལས་ལྡོག་པའི་རང་བཞིན་ལས་ནི་མ་ཡིན་ཏེ། འཁྲུལ་པའི་རྒྱུ་མཚན་སྲིད་པའི་ཕྱིར་རོ། །དེས་ན་བསྒྲུབ་པར་བྱ་བ་དང་སྒྲུབ་པར་བྱེད་པ་མི་འགལ་ལོ་ཞེས་བྱ་བར་དགོངས་པའོ། །རྣམ་པར་བཤད་པ་ཡང་མེད་བཞིན་དུ་གྲང་བར་བྱ་བའོ། །ཐབས་གཅིག་ཉིད་ཀྱིས་ཞེས་བྱ་བ་ནི་འཛིན་པའི་བདག་ཉིད་ཀྱི་བྱ་
བ་གཅིག་ཉིད་ཀྱིས་སོ། །ཇི་ལྟར་ཐམས་ཅད་ལས་ལྡོག་པ་མི་ངེས་ཏེ། ངེས་པ་ཁོ་ནར་འགྱུར་རོ། །དེས་ན་མི་རྟག་པ་ཉིད་ལ་སོགས་པ་སྒྲུབ་པར་བྱེད་པའི་རྗེས་སུ་དཔག་པས་ཅི་ཞིག་བྱ་ཞེ་ན། དེའི་རྒྱུ་མཚན་གསུངས་པ་ནི་འཁྲུལ་པའི་ཞེས་བྱ་བའོ། །འཁྲུལ་པའི་རྒྱུ་མཚན་དེ་བས་ཡིན་ཞེ་ན། ནང་གི་འཁྲུལ་པའི་རྒྱུ་མཚན་གསུངས་པ་ནི། སྔར་མཐོང་བ་ཞེས་བྱ་བའོ། །གལ་ཏེ་སྔར་མཐོང་བའི་སྐད་ཅིག་སྐད་ཅིག་ཕྱི་མའི་དུས་ན་དེ་ཁོ་ན་ཉིད་བཞིན་དུ་དྲན་པར་འགྱུར་ན་ནི་མི་རྟག་པ་ཉིད་དུ་ངེས་པར་གྱུར་པ་ཞིག་ན། དེ་ལྟར་དྲན་པ་ནི་མ་ཡིན་ཏེ། དེས་ན་འཁྲུལ་པའི་རྒྱུ་མཚན་སྲིད་པ་ཡིན་ནོ། །དེ་ཉིད་ཀྱི་ཕྱིར་དྲན་པ་ཉམས་པ་མེད་ན་རྟག་ཏུ་ལྡོག་པ་དྲན་པར་འགྱུར་རོ་ཞེས་བརྗོད་པ་ནི། སྔར་འདི་མཐོང་ཞེས་བྱ་བའོ། །གལ་ཏེ་སྔོན་མཐོང་བ་ཉིད་ཀྱིས་དྲན་པ་ཡིན་ཡང་ཇི་ལྟར་ངེས་ཤེ་ན། འདི་ལྟར་ཞེས་གསུངས་སོ། །གང་ཞིག་ཉམས་སུ་མྱོང་བ་འདི་དྲན་པ་སྐྱེ་བ་འདི་ཉིད་ནི་ཉམས་སུ་མྱོང་བ་ངེས་པ་ཡིན་ན། དེ་ཡོད་ན་ལྡོག་པ་ལས་ལྡོག་པ་མི་ངེས་པར་ཇི་ལྟར་འགྱུར། ཇི་ལྟར་འདི་ཉིད་ངེས་པ་ཡིན་ཞེ་ན། བཤད་པ་ཉམས་སུ་མྱོང་བ་ལས་གཞན་དུ་དྲན་པ་སྐྱེ་བ་གཅིག་ཏུ་ངེས་པར་གྱུར་ན་ཕྱིན་ཅི་ལོག་ཡིན་ཞེ་ན། ལོག་པ་ཉིད་དུ་ཡིན་ནོ། །དཔེར་ན་སྨིག་རྒྱུ་དག་ལ་ཆུར་ལྷག་པར་ཞེན་པ་བཞིན་ནོ། །ཉམས་སུ་མྱོང་བ་དང་དེ་ལས་བཟློག་པ་དག་ལ་ངེས་པ་མེད་པར་དྲན་པ་སྐྱེ་བ་ནི་ངེས་པ་ཡིན་ནོ། །ལྡོག་པ་བརྗོད་པ་ནི་ཉམས་སུ་མྱོང་བ་ཞེས་བྱ་བའོ། །རྗེས་སུ་འགྲོ་བ་བརྗོད་པ་ནི་ཇི་ལྟ་བ་བཞིན་དུ་ཞེས་བྱ་བའོ། །གང་གིས་ལྡོག་པ་ཐམས་ཅད་ངེས་པར་འགྱུར་བ་ཇི་ལྟར་ནི་དེ་ཁོ་ན་བཞིན་དྲན་པར་འགྱུར་ཞེ་ན། ཇི་ལྟ་བ་བཞིན་དུ་གསུངས་སོ། །དེས་ན་ཞས་བྱ་བ་ནི་འཁྲུལ་པའི་རྒྱུ་མི་སྲིད་པས་སོ། །གལ་ཏེ་ཚུ་རོལ་མཐོང་བ་རྣམས་ལ་རྣམ་པ་གཞན་དུ་དྲན་པ་འབྱུང་བའི་ཕྱིར་ན། ཇི་ལྟར་མི་རྟག་པ་ཉིད་དུ་ངེས་ཤེ་ན། དེ་ལྟ་མ་ཡིན་པ་མ་མཐོང་བའོ། །དེ་མ་ཐག་ཏུ་ངེས་པར་མི་བྱེད་ན་ནི་མི་དྲན་པ་སྟེ་ཕྱིན་ཅི་ལོག་ཏུ་དྲན་པའོ། །དེ་ལྟར་མི་རྟག་པ་ཉིད་རང་གི་ངོ་བོར་གྱུར་པ་ཡིན་པའི་ཕྱོགས་ལ་ཚད་མ་གཞན་དུ་ཐལ་བར་ཡོད་པ་མ་ཡིན་ནོ་ཞེས་བརྗོད་པ་ཡིན་ནོ། །ད་ནི་མི་རྟག་པ་ཉིད་དངོས་པོའི་ངོ་བོ་མ་ཡིན་པའི་ཕྱོགས་ལ་ཡང་ཐལ་བ་དེར་མི་འགྱུར་རོ་ཞེས་རང་གི་ཕྱོགས་པ་དག་ཁོ་ནས་བརྗོད་པ་ནི་གཞན་དག་ཅེས་བྱ་བ་སྟེ་མི་རྟག་པ་ཉིད་དངོས་པོའི་རང་བཞིན་དུ་སྨྲ་
བ་ལས་གཞན་པའང་གི་ཕྱོགས་པ་དག་གོ །ཇི་སྐད་སྨྲ་ཞེ་ན། ཡང་ན་ཞེས་བྱ་བའོ། །དངོས་པོ་ཉིད་མི་རྟག་པ་ཉིད་དུ་མངོན་སུམ་གྱིས་མ་གྲུབ་པའམ། འཇིག་པ་གཞན་མི་རྟག་པ་ཡིན་པར་འགྱུར་མོད། དེ་ལྟ་ན་ཡང་མཐའི་སྐད་ཅིག་འདིར་མི་དམིགས་པའི་རྟག་པ་ལས་འཇིག་བ་གྲུབ་པ་ཁོ་ནའོ། །དམིགས་པའི་མཚན་ཉིད་དུ་གྱུར་པ་དེ་མ་ཐག་པ་ནི་ཕྱིས་མི་དམིགས་པའི་ཕྱིར་ན་སྔར་གྱི་དངོས་པོ་ཡང་མི་རྟག་པ་ཡིན་པར་འགྲུབ་པོ། །སྐད་ཅིག་སོ་སོར་མི་འཇིག་ན་མཐའི་སྐད་ཅིག་ལ་ཡང་རང་བཞིན་དེ་ཉིད་ཡིན་ཏེ། དེས་ན་སྔར་བཞིན་དུ་ཕྱིས་ཀྱང་མི་འཇིག་པར་འགྱུར་རོ། །མཐར་འཇིག་པའི་ཕྱིར་ན་སྔར་ཡང་འདི་དེའི་ཆོས་ཅན་ཁོ་ན་ཡིན་ནོ་ཞེས་ངེས་པར་བྱེད་དོ། །མི་གལ་བ་ལ་ནི་དགག་པར་བྱ་བ་མི་དམིགས་པའི་རང་བཞིན་བཟློག་ཟླའི་མངོན་སུམ་ལས་དགག་པ་འགྲུབ་པ་ཡིན་ལ་དེ་ལྟ་ན་ཡང་ཚད་མ་གཞན་དུ་ཐལ་བ་མ་ཡིན་ནོ་ཞེས་བྱ་བར་བསམས་པའོ། །འཆད་པ་ནི་དངོས་པོ་ཐམས་ཅད་ཅེས་བྱ་བའོ། །མངོན་སུམ་ཞེས་བྱ་བ་ནི་བསྒྲུབ་པར་ལྷག་པར་ཞེན་པ་སྟེ། དགག་པར་ལྷག་པར་ཞེན་པ་ནི་མེད་པར་སྒྲུབ་པར་བྱེད་པར་མི་འགལ་པའི་ཕྱིར་ཏེ། དཔེར་ན་རང་བཞིན་འགལ་བ་དམིགས་པ་ལ་སོགས་པ་བཞིན་ནོ། །རིགས་པ་པའི་འདོད་པ་ལས་འདི་ཁྱད་པར་དུ་འཕགས་པར་བསྟན་པའི་དོན་དུ་དེའི་དོན་དུ་བའི་དོགས་པ་བསུ་བ་ནི་གལ་ཏེ་ཞེས་བྱ་བའོ། །ཡོད་པ་སྒྲུབ་པར་བྱེད་པའི་ཚད་མ་ཉིད་ཀྱིས་ཞེས་བྱ་བ་ནི་སྒྲུབ་པར་ཞེན་པ་ཡིན་པའི་ཕྱིར་མི་དམིགས་པས་མ་ཡིན་པའོ། །རང་གི་ངོ་བོ་ཙམ་གྱིས་ནི་མི་རྟག་པ་མ་ཡིན་ནོ་ཞེས་བྱ་བ་ནི་རིགས་པའི་ལྟར་ན་སྟེ། ནམ་མཁའ་ལ་སོགས་པ་ཡང་མི་རྟག་པ་ཉིད་དུ་ཐལ་པའི་ཕྱིར་རོ་ཞེས་བྱ་བའི་དོན་ཏོ། །འོ་ན་ཇི་ལྟར་མི་རྟག་པ་ཡིན་ཞེ་ན། འོ་ན་ཅི་ཞེ་ན་ཞེས་བྱ་བའོ། །དེ་ལྟ་ན་ཡང་ཚད་མ་གཞན་དུ་ཐལ་བར་ཇི་ལྟར་མི་འགྱུར་ཞེ་ན། དངོས་པོ་མེད་པ་ནི་ཞེས་བྱ་བའོ། །རྒོལ་བ་གཞན་གྱི་ལྟར་ན་ཞེས་བྱ་བ་ནི་སྣང་བྱེད་ཀྱི་ལྟར་ནའོ། །སྔ་མ་དང་ཕྱི་མའི་མཐའ་གཉིས་ཉིད་ཀྱི་ཞེས་བྱ་བ་ནི་སྔ་ན་མེད་པ་དང་ཞིག་ནས་མེད་པའི་མཚན་ཉིད་གཉིས་ཀྱིའོ། །འདི་ཇི་ལྟར་ཞེས་བྱ་བ་ནི་ཡང་ན་འདིར་ནི་ཞེས་བྱ་བ་ལ་སོགས་པའོ། །འདི་ལ་བཤད་པ་ཞེས་བྱ་བ་ནི་གྲུབ་པའི་མཐའ་སྨ་བའོ། །ཇི་ལྟར་བཤད་ཅེ་ན། སྔ་ན་མེད་པ་དང་ཞིག་ནས་མེད་པའི་མཚན་ཉིད་ཅན་གྱི་མཐའ་གཉིས་
ཀྱིས་ཆོད་བ་ནི། བར་ཆོད་བྱེད་པའི་ཡོད་པའམ། དེ་དང་འབྲེལ་པ་ཅན་མི་རྟག་པ་ཡིན་པའོ། །མི་རྟག་པ་ནི་མཐའ་གཉིས་དང་ལྡན་པའི་དངོས་པོ་ཡིན་ལ་མི་རྟག་པའི་སྒྲའི་དངོས་པོའི་རྐྱེན་ནི་ཡོད་པའམ་དེ་དང་འབྲེལ་པ་ལ་ཡིན་ན་ཞེས་བྱ་བར་འདོད་པའི་རྒོལ་བ་ནི་དེས་མཐའ་དེ་དག་གང་ལ་བརྗོད་དེ་དངོས་པོ་མེད་པ་ལས་མ་གཏོགས་པ་གང་ཞིག་ཡིན་པར་འདོད་པ་དེར་ཁས་ལེན་པ་ནི་དེ་མི་དམིགས་པས་འཛིན་གྱི་མངོན་སུམ་དང་རྗེས་སུ་དཔག་པ་ལས་མ་གཏོགས་པའི་ཚད་མ་གཞན་གྱིས་ནི་མ་ཡིན་ནོ། །རེ་ཞིག་ཅེས་བྱ་བ་ནི་འཆད་པའོ། །ཁྱད་པར་མེད་པར་ཞེས་བྱ་བ་ནི་མཐའ་གཉིས་ཀྱི་ཁྱད་པར་མེད་དོ། །མི་རྟག་པ་དང་ཐལ་བའི་ཕྱིར་རོ་ཞེས་འབྲེལ་ཏོ། །འོ་ན་མི་རྟག་པ་ཉིད་གང་ཡིན་སྙམ་ན་མཐའ་གཉིས་ཀྱི་ཞེས་བྱ་བའོ། །གལ་ཏེ་དེ་ལྟ་བུར་གྱུར་པའི་མི་རྟག་པ་ཉིད་ནི་དམིགས་པས་བསྒྲུབ་པར་བྱ་བ་མ་ཡིན་ནོ་ཞེ་ན། དངོས་པོ་མེད་པ་མ་རྟོགས་པའི་མཐའ་གཉིས་ཉིད་ནི་འགའ་ཡང་ཡོད་པ་མ་ཡིན་ནོ་ཞེས་གསུངས་སོ། །དེ་ལྟ་ན་ཡང་དངོས་པོ་མེད་པ་མི་དམིགས་པས་སྒྲུབ་པར་འགྱུར་གྱི་མི་རྟག་པ་ཉིད་ནི་མ་ཡིན་ནོ་སྙམ་དུ་དོགས་པ་སེལ་བ་ནི་གལ་ཏེ་ཞེས་བྱ་བ་ནའོ། །དངོས་པོ་མེད་པ་མི་དམིགས་པས་འཛིན་པ་ཡིན་གྱི། མི་རྟག་པ་ཉིད་ནི་མ་ཡིན་ནོ་ཞེ་ན། དེའི་ཚེ་དེ་ཉིད་ཅེས་བྱ་བ་སྔ་ཕྱིར་མེད་པ་ཉིད་མི་རྟག་ཅེས་མ་ཡིན་ཏེ་ཡིན་པ་ཉིད་དོ། །དེས་ན་ཉེས་པའི་ནི་མེད་དོ་ཞེས་བྱ་བར་བསམས་པའོ། །ཡང་ན་ཡོད་པ་དང་དེ་དང་འབྲེལ་པའི་དུས་ན་ནི་དངོས་པོ་མེད་པ་ཁོ་ན་ཡིན་ན། དེ་ཇི་ལྟར་འདི་ཡོད་པ་དང་དེ་དང་འབྲེལ་པ་དག་གི་ཁྱད་པར་དུ་འགྱུར། འོན་ཏེ་དུས་ཐ་དད་པས་ཀྱང་སྔར་དང་ཕྱིས་མེད་པ་ཡིན་ནོ། །དངོས་པོའི་དུས་ན་ནི་ཁྱད་པར་བློས་བསྡེབས་པ་ཡིན་ན། དེའི་ཚེ་དངོས་པོའི་དུས་ན་ཉེ་བར་གཟུང་བའི་དངོས་པོའི་མེད་པ་ཉིད་མི་རྟག་པར་ཇི་སྟེ་མི་འདོད་དེ། དེ་ཉིད་མི་རྟག་པ་ཡིན་མོད། མི་རྟག་པ་འཐད་པ་མེད་པ་གཞན་ཁས་བླངས་པས་ཅི་བྱ། འདོད་པ་ལ་ཉེས་པ་དོགས་པར་བྱས། སེལ་བར་བྱེད་པ་ནི་དྲུག་པ་སོགས་ཞེས་བྱ་བར་རོ། །དྲུག་པ་ལ་སོགས་པའི་སྦྱར་བ་ནི་འབྲེལ་པས་རབ་ཏུ་ཕྱེ་བ་ཡིན་ན། དངོས་པོ་སྔ་ན་མེད་པ་ལ་སོགས་པ་དང་འདུ་བ་དང་ལྡན་པ་ལ་སོགས་པའི་མཚན་ཉིད་ཀྱིས་འབྲེལ་པ་ཡོད་པ་མ་ཡིན་ནོ། །འདྲ་བ་དང་ལྡན་པ་དག་ནི་དངོས་པོ་ཁོ་ནའི་ཡིན་ནོ། །ཁྱད་པར་དང་ཁྱད་པར་ཅན་གྱི་འབྲེལ་པ་ནི་ལྡན་ལ་ལྟོས་པས་དངོས་པོ་དག་ཁོ་ནའི་ཡིན་
ནོ། །དེའི་ཕྱིར་དངོས་པོ་དང་དངོས་པོ་མེད་པ་དག་ནི། འབྲེལ་པ་འགའ་ཡང་ཡོད་པ་མ་ཡིན་ནོ། །འབྲེལ་པ་མེད་པ་དེ་བས་ན་དྲུག་པ་དང་བདུན་པ་ལ་སོགས་པའི་རྣམ་པར་དབྱེ་བ་དང༌། ཆོས་དང་ཆོས་ཅན་གྱི་ཐ་སྙད་དང་མི་འཐད་དོ། །དྲུག་པོ་ལ་སོགས་པའི་འཐད་པ་དེ་བས་ན་མེད་པ་ནི་མི་རྟག་པ་ཉིད་དུ་མི་འདོད་དོ་ཞེ་ན། དེའི་ཚེ་ཡོད་པ་ལ་སོགས་པ་དང་གཞན་འགའ་ཞིག་ཏུ་ཡང་རུང་སྟེ། བར་ཆོད་དུ་འགྱུར་བའི་ཡོད་པ་ཞེའམ། དེ་གཉིས་ཀྱི་ཁྱད་པར་ཅན་ཞེས་པ་དེ་ལྟར་སྦྱར་བ་སྔ་ན་མེད་པ་དང༌། ཞིག་ནས་མེད་པའི་མཐའ་ལ་ཡང་དྲུག་པ་ལ་སོགས་པའི་སྦྱོར་བའམ། ཁྱད་པར་དང་ཁྱད་པར་ཅན་གྱི་དངོས་པོ་དེ་ཙམ་ལྟར་འགྱུར་ཏེ། མི་འགྱུར་བ་ཁོ་ནའོ། །འགྱུར་བ་ཡང་མ་ཡིན་ཏེ། དེས་ན་དེ་དང་འདྲ་བར་དངོས་པོ་ལ་ཡང་སྔ་ན་མེད་པ་ལ་སོགས་པ་ལ་ལྟོས་ནས་དྲུག་པ་ལ་སོགས་པའི་སྦྱོར་བའམ། ཁྱད་པར་དང་ཁྱད་པར་ཅན་གྱི་དངོས་པོར་འགྱུར་བ་ཡིན་ནོ། །འགྱུར་བ་ནི་ཐམས་ཅད་ལ་འགྱུར་ལ་མི་འགྱུར་ན་ནི་འགར་ཡང་མ་ཡིན་ཏེ། ཁྱད་པར་མེད་པའི་ཕྱིར་རོ་ཞེས་དོགས་པའོ། །བཤད་པ་ནི། གལ་ཏེ་བསམ་པ་འདི་ཡིན་ཏེ། །ཞེས་བྱ་བའོ། །བསམ་པ་གང་ཞེ་ན། གལ་ཏེ་ཞེས་བྱ་བའོ། །མེད་པ་ཡིན་ན་དེའི་ཚེ་དངོས་པོའི་ཞེས་སྦྱར་རོ། །ཅིའི་ཕྱིར་མེད་པར་འགྱུར་སྙམ་ན། དངོས་པོ་དང་ཞེས་བྱ་བའོ། །ཅིའི་ཕྱིར་ཞེ་ན། དངོས་པོ་དང་ཞེས་གསུངས་སོ། །སོགས་པ་སྨོས་པས་ནི་ཁྱད་པར་ཅན་གྱི་དངོས་པོ་བཟུང་ངོ༌། །དངོས་པོ་དང་དངོས་པོ་མེད་པ་དག་འབྲེལ་པ་མི་འཐད་པའི་ཕྱིར་རོ་ཞེས་བྱ་བ་འདི་ག་ལས་ཡིན་སྙམ་ན་མི་འཐད་པའི་ཕྱིར་རོ་ཞེས་གསུངས་ཏེ། མི་འཐད་པ་ཡང་རྣམ་འགྲེལ་བཤད་པ་ཉིད་དུ་གསལ་བར་བྱས་ནས་ཡང་མི་འདོད་དོ། །ཅི་ཞིག་སྨྲས་ཤེ་ན། ཁྱད་པར་ཞེས་བྱ་བའོ། །དངོས་པོ་ནི་དངོས་པོ་མེད་པ་དང་འབྲེལ་པ་མེད་པའི་ཕྱིར་ན་དངོས་པོའི་སྔ་ན་མེད་པ་དང༌། ཞིག་ནས་མེད་པ་མི་རྟག་པ་ཉིད་ཡིན་ནོ་ཞེས་དྲུག་པ་ལ་སོགས་པའི་རྒྱུ་སྦྱོར་བར་མི་འགྱུར་རོ་ཞེས་བྱ་བའི་འདོད་པ་ནི་མི་འཐད་དེ་འབྲེལ་པ་ཡོད་པའི་ཕྱིར་རོ། །འབྱུང་བ་ལ་སོགས་པའི་འབྲེལ་པ་བཟློག་ཟིན་ཏོ་སྙམ་ན། བཟློག་མེད་ཁྱད་པར་དང་ཁྱད་པར་ཅན་གྱི་དངོས་པོ་ཡང་འདུ་བ་ལ་སོགས་པའི་འབྲེལ་པ་གང་གིས་ཟློག་པར་བྱེད་ཅིང་དྲུག་པ་ལ་སོགས་པའི་སྦྱོར་བ་ཡང་གང་གིས་བཟློག །འོ་ན་ཁྱད་པར་དང་ཁྱད་པར་ཅན་
གྱི་དངོས་པོ་ཡང་འདུ་བ་ལ་སོགས་པའི་འབྲེལ་པ་མེད་པར་མི་འགྱུར་ན་འོ་ན་ནི་ཞེས་སྨོས་ཏེ། བཤད་པ་འདི་ནི་གསལ་ལོ། །འདི་ནི་གཉིས་ཀྱི་བར་གནས་པ་ཉིད་ཀྱི་ཁས་བླངས་ནས་བརྗོད་པ་ཡིན་ནོ། །ད་ནི་དེ་ཉིད་ཡོད་པ་མ་ཡིན་ནོ་ཞེས་བརྗོད་པ་ནི། ཡོད་པ་ཉིད་དང་འབྲེལ་ཞེས་བྱ་བའོ། །འཆད་པ་ནི་མཐའ་གཉིས་ཀྱིས་ཞེས་བྱ་བ་སྟེ། དེ་ནི་སྐྱེ་འཇིག་ཅན་མ་ཡིན་ནོ་ཞེས་བྱ་བའི་དོན་ཏོ། །འོན་ཏེ་རྟག་པ་ཕྱིར་ན་ཡོད་པ་དང་དེའི་འབྲེལ་པ་མཐའ་དག་གི་ཁྱད་པར་དུ་འགྱུར་བ་མ་ཡིན་མོད་ཀྱི། འོན་ཀྱང་དོན་གང་ལ་དེ་གཉིས་ཡོད། །དེ་ཉིད་མཐའ་དག་གི་ཁྱད་པར་དུ་བྱེད་པར་འགྱུར་རོ་ཞེ་ན། དེ་ལྟ་ན་ནི་འོ་ན་ཞེས་གསུངས་སོ། །དེའི་ཁྱད་པར་ཅན་ནི་མཐའ་གཉིས་ཀྱི་ཁྱད་པར་ཅན་ནོ། །བསམ་པ་ནི་འདི་ཡིན་ཏེ། སྒྲའི་འཇུག་པའི་རྒྱུ་ནི་དངོས་པོ་ཡིན་ན་མི་རྟག་པའི་རྒྱུ་ནི་ཡོད་པའམ་དེ་དང་འབྲེལ་པ་དག་མ་ཡིན་གྱི། འོན་ཀྱང་མི་རྟག་པ་ཉིད་ཡིན་ནོ། །དེས་ན་མི་རྟག་པའི་སྒྲ་ལས་དངོས་པོ་རྟོག་པར་ཇི་ལྟར་འགྱུར་ཞེས་བྱ་བའོ། །གལ་ཏེ་ཡོད་པ་མི་རྟག་པ་ཉིད་དུ་མི་འདོད་ལ་མི་རྟག་པའི་སྒྲའི་དངོས་པོའི་རྐྱེན་ཀྱང་ཐ་དད་པའི་མི་རྟག་པ་ཉིད་རྗོད་པར་བྱེད་པ་མ་ཡིན་ནོ། །དེའི་ཚེ་ཐ་དད་པ་མེད་པའི་ཕྱིར་ན་སྒྲའི་མི་རྟག་པ་ཉིད་ཅེས་བྱ་བའི་དྲུག་པར་མི་འགྱུར་རོ་ཞེས་དོགས་པ་བསུ་ནས་བརྗོད་པ་ནི་ཡོད་པ་ཉིད་ཀྱིས་ཞེས་བྱ་བའོ། །ཇི་ལྟར་ཐ་དད་པ་མེད་ཀྱང་ཡོད་པ་ཉིད་གནས་སོ་ཞེས་བྱ་བར་འགྱུར་བ་དེ་བཞིན་དུ་དངོས་པོའི་མི་རྟག་པ་ཞེས་དྲུག་པར་ཅི་སྟེ་མི་འདོད། །དེ་ལྟ་ན་མི་རྟག་པ་ཉིད་ཐ་དད་པར་འཐད་པ་མ་ཡིན་ནོ། །ཡང་ན་སྒྲའི་ཚུལ་ལམ་རིགས་པས་མཐའ་གཉིས་ཀྱི་ཁྱད་པར་ཅན་གྱི་ཡོད་པ་མི་རྟག་པ་ཉིད་ཡིན་ནོ་ཞེས་བྱ་བའི་ཕྱོགས་མེད་པའི་ཕྱིར་ན། སྔ་ན་མེད་པ་དང་ཞིག་ནས་མེད་པ་ཉིད་ཐ་དད་པའི་མི་རྟག་པ་ཡིན་ནོ་ཞེས་བྱ་བའི་ཕྱིར་ལ་ནི་དྲུག་པ་ལ་སོགས་པ་མེད་པའི་ཉེས་པའི་གོ་སྐབས་སུ་མི་འགྱུར་རོ་ཞེས་སྨྲས་པ་ནི། གཞན་ཡང་ཞེས་བྱ་བའོ། །དེ་ལས་ཞེས་བྱ་བ་ནི་དངོས་པོ་ལས་སོ། །དེ་ལྟར་སྔ་ན་མེད་པ་དང་ཞིག་ནས་མེད་པའི་བར་ནས་ཡོད་པའི་ཡོད་པ་ཉིད་མི་རྟག་པ་ཉིད་དུ་མི་འཐད་ལ་དེར་ཁས་ལེན་ན་ཡང་དེ་གཉིས་ཉིད་མི་རྟག་པར་ཐལ་ལོ་ཞེས་བསྟན་པ་ཡིན་ནོ། །ད་ནི་དངོས་པོ་དང་དངོས་པོ་མེད་པ་གང་གི་འབྲེལ་པ་ཁས་མི་ལེན་པའི་ཕྱིར་མེད་པ་གཉིས་ཀྱི་དབུས་ན་གནས་པའི་ཡོད་པ་མི་རྟག་པ་ཉིད་མ་ཡིན་ལ། དེ་ཁས་བླངས་པ་སྔོན་དུ་སོང་བ་ཅན་གྱི་
སྔ་ན་མེད་པ་ལ་སོགས་པ་ཉིད་ཀྱང་མི་རྟག་པ་ཉིད་མ་ཡིན་གྱི། འོན་ཀྱང་རྒྱུ་དང་འབྲས་བུར་གྱུར་པའི་ཡང་གཉིས་ཀྱི་དབུས་ན་གནས་པའི་ཡོད་པ་མི་རྟག་པ་ཉིད་ཡིན་ན་ཞེས་བསམས་ནས་གཞན་དོགས་པ་བསུ་བ་ནི། ཅི་སྟེ་ཞེས་བྱ་བའོ། །བུམ་པའི་རྒྱུ་ནི་རྫ་མཁན་ལ་སོགས་པ་ཡིན་ལ། འབྲས་བུ་ནི་གྱོ་མོ་ལ་སོགས་པ་ཡིན་ནོ། །དེ་ལྟར་ཡིན་དུ་ཟད་མོད། དེས་ཅིར་འགྱུར་སྙམ་ན། རྒྱུ་དང་འབྲས་བུ་དེ་དག་གིས། །ཞེས་གསུངས་སོ། །ཇི་ལྟར་མི་རིགས་པ་མེད་པ་སྙམ་ན། རྒྱུ་དང་འབྲས་བུ་ཞེས་གསུངས་ཏེ། སྔོན་གྱི་མཐའ་དང་ཕྱི་མའི་མཐའ་མཚན་ཉིད་ཅན་དག་དང་ངོ༌། །དངོས་པོའི་ཞེས་བྱ་བ་ནི་དབུས་ན་གནས་པའིའོ། །གལ་ཏེ་དེ་ལྟ་ན་ཡང་རྒྱུ་དང་འབྲས་བུར་གྱུར་པའི་མཐའ་གཉིས་ཀྱི་དབུས་ན་གནས་པའི་ཡོད་པ་ཇི་ལྟར་མི་རྟག་པ་ཉིད་ཡིན་ཞེ་ན། ཡོད་པ་ཉིད་དང་ཞེས་གསུངས་སོ། །རྩོད་པ་རྗེས་སུ་བརྗོད་པ་སྔོན་དུ་འགྲོ་བའི་ལན་རྣམ་འགྲེལ་གྱི་ཕྱེད་ཀྱིས་སྟོན་པ་ན་གལ་ཏེ་ཞེས་བྱ་བའོ།། གལ་ཏེ་ཇི་སྐད་བརྗོད་པའི་རྒྱུ་དང་འབྲས་བུ་གཉིས་མཐའ་ཡིན་ནོ། །དེའི་ཚེ་ཁྱད་པར་མེད་པ་ཉིད་དུ་འགྱུར་ཏེ། རྒྱུ་དང་འབྲས་བུར་གྱུར་པའི་མཐའོ། །དེ་དག་ནི་ཡོད་པའི་ཁྱད་པར་མི་འགྱུར་རོ་ཞེས་བྱ་བའི་དོན་ཏོ། །ཅིའི་ཕྱིར་དེ་དག་ཁྱད་པར་དུ་མི་འགྱུར་ཞེ་ན་འབྲེལ་པ་མེད་པའི་ཕྱིར་རོ། །རྟག་པ་ནི་རྒྱུ་དང་འབྲས་བུར་གྱུར་པའི་མཐའ་དག་དང་འབྲེལ་པ་ཡོད་པ་མ་ཡིན་ཏེ། རང་གི་ངོ་བོ་ཉམས་པར་ཐལ་བའི་ཕྱིར་རོ། །འོན་ཏེ་དངོས་པོ་གང་ལ་ཡོད་པ་དང་འབྲེལ་པ་དག་གནས་པ་དེའི་ཁྱད་པར་རྒྱུ་དང་འབྲས་བུར་གྱུར་པའི་མཐའ་དག་ཡིན་ནོ་ཞེ་ན། འདི་ཡང་ལོག་པ་ཡིན་ཏེ་མཐའ་དེ་དག་ནི་དེའི་ཡང་ཁྱད་པར་མ་ཡིན་ཏེ། སྔོན་མེད་པ་དང་འབྲེལ་པ་ཁས་མི་ལེན་པའི་ཕྱིར་རིགས་པ་ཅན་པ་ཡིས་ནི་དངོས་པོ་ལ་སྔ་ན་མེད་པ་འདོད་པ་མ་ཡིན་ནོ། །དེ་ཉིད་ཀྱི་ཕྱིར་དེའི་ལུགས་ཀྱི་ནི་དངོས་པོ་སྔ་ན་མེད་པ་ཞེས་བྱ་བའི་ཐ་སྙད་ཀྱང་མེད་པ་ཁོ་ནའོ། །གལ་ཏེ་དེ་ལྟ་ཡིན་མོད་དེ་ལྟ་ན་ཡང་རྒྱུ་དང་འབྲས་བུ་དངོས་པོའི་ཡིན་པར་ཇི་ལྟར་མི་འགྱུར་ཞེ་ན། སྔ་ན་མེད་པ་དེའི་ཁྱད་པར་ཅན་གྱི་བརྗོད་པ་གང་ལ་ཡོད་པ་དེ་ནི་དེའི་ཁྱད་པར་ཅན་ནོ། །བརྗོད་པ་དེ་གང་དག་ལ་ཡོད་པའི་རྒྱུ་དང་འབྲས་བུ་དེ་ཡང་མི་འགྲུབ་པོ། །དེའི་ཁྱད་པར་ཅན་གྱི་བརྗོད་པ་སྔ་ན་མེད་པ་ལ་བརྟེན་ནས་རྒྱུ་དང་འབྲས་བུའི་ཐ་སྙད་ཐོབ་པ་ནི། །དངོས་པོའམ་རིག་པ་ཅན་དེ་
ལ་མི་འགྲུབ་བོ། །ཅིའི་ཕྱིར་ཞེ་ན་གང་ཞིག་ཅེས་བྱ་བའོ། །འོན་ཏེ་འབྲེལ་པ་ཡོད་པ་ཉིད་དོ་སྙམ་ན། དངོས་པོ་ནི་ཞེས་གསུངས་སོ། །ཅིའི་ཕྱིར་ཁས་མི་ལེན་སྙམ་ན། ཁས་ལེན་ཞེས་གསུངས་སོ། །སྔ་ན་མེད་པ་དང་ཞིག་ནས་མེད་པ་ཉིད་མི་རྟག་པ་ཡིན་ནོ་ཞེས་བྱ་བར་གསུངས་སོ། །དེས་ན་ཡོད་པའི་ཡོད་པ་ཉིད་མི་རྟག་པ་ཡིན་ནོ་ཞེས་བྱ་བར་རང་གི་གཞུང་ཉམས་པ་དང༌། སྔ་ན་མེད་པ་དང༌། ཞིག་ནས་མེད་པ་མཐའ་ཡིན་ནོ་ཞེས་བྱ་བའི་ཕྱོགས་ལས་རྒྱུ་དང་འབྲས་བུ་མཐའ་ཡིན་ནོ་ཞེས་བྱ་བའི་མཐའ་ཕྱོགས་གཞན་དེ་ལ་བརྟེན་པ་ཡང་ཉམས་པར་འགྱུར་རོ་ཞེས་རྗེས་སུ་འཇུག་གོ །གང་གི་ཕྱིར་དངོས་པོ་དང་དངོས་པོ་མེད་པ་དག་འབྲེལ་པར་ཁས་མི་ལེན་ན་ཉེས་པ་འདི་ཡོད་པ་དེས་ནའོ། །འོན་ཀྱང་འབྲེལ་པ་མེད་མོད། དེ་ལྟ་ན་ཡང་དངོས་པོའི་རྒྱུ་དང་འབྲས་བུར་འགྱུར་རོ་སྙམ་ན་བརྗོད་པའི་ཁྱད་པར་འདི་ནི་ཞེས་བྱ་བའོ། །དེ་མེད་ན་ཞེས་བྱ་བ་ན་སྔ་ན་མེད་པའི་ཁྱད་པར་མེད་པའོ། །དེར་ཞེས་བྱ་བ་ནི་བརྗོད་པའི་ཁྱད་པར་དུའོ། །གང་མེད་པར་འགྱུར་བ་བརྗོད་པའི་ཁྱད་པར་དེ་ཡང་གང་ཡིན་ཞེ་ན། འདི་ནི་ཞེས་བྱ་བའོ། །འོ་ན་རྒྱུར་འགྱུར་རོ་སྙམ་ན། འབྲས་བུ་མེད་པའི་ཞེས་གསུངས་སོ། །དེ་ལྟར་སྔ་ན་མེད་པའི་ཁྱད་པར་ལ་ལྟོས་པ་རྒྱུ་དང་འབྲས་བུ་ཉིད་ནི་དེ་མེད་ན་མི་འགྱུར་རོ་ཞེས་བརྗོད་པ་ཡིན་ན་ནི་དེའི་ཁྱད་པར་ལ་མ་ལྟོས་པའི་ཕྱིར་ཡང་ཞེས་བྱ་བའོ། །རྒྱུ་དང་འབྲས་བུ་ཉིད་ཀྱི་རང་བཞིན་དེ་ནི་གང་རྣམ་པར་གཞན་ནི་གང་ཞིག་དེས་དེ་མེད་པར་ནི་ཇི་ལྟར་འགྱུར་ཞེ་ན། འདི་ལྟར་ཞེས་བྱ་བའོ། །གང་གིས་དེ་མེད་པར་འགྱུར་བ་སྔ་ན་མེད་པ་ཉིད་དུ་ཁྱད་པར་ཅན་ནི་རྒྱུ་མ་ཡིན་གྱི་འོན་ཀྱང་འབྲས་བུ་ཡོད་པ་ཉིད་དང་འབྲེལ་པ་དེ་འདུ་བའམ། འབྲས་བུ་རང་གི་རྒྱུ་དང་འབྲེལ་པའི་འདུ་བ་དེ་བྱེད་པའི་ཕྱིར་ན་རྒྱུ་ཡིན་ནོ་ཞེས་གྲག་གོ །སྒྲ་ནི་འདོད་པ་ཉིད་མ་ཡིན་པའོ། །དེ་ལྟར་ཕྱེད་སྔ་མས་དེའི་རང་བཞིན་བརྗོད་པའོ། །རེ་ཞིག་དངོས་པོའི་རང་བཞིན་ནི་བྱེད་པ་མ་ཡིན་ལ་ཡོད་པ་དང་འབྲེལ་པ་ཡང་རྟག་པ་ཡིན་ནོ་ཞེས་བྱ་བ་ནི་རྣམ་པ་གཞན་བརྗོད་པའོ། །འོ་ན་འདིར་འབྲས་བུ་གང་ཞེས་བྱ་བ་ནི་འདོད་པ་དང་འབྲེལ་པ་དང་རྒྱུ་དང་འབྲེལ་པ་ལ་སྐྱེ་བར་ཁས་ལེན་ན་ཡོད་པ་ནི་རེ་ཞིག་བྱེད་པ་མ་ཡིན་ཏེ་རྟག་པའི་ཕྱིར་རོ། །དེ་ཉིད་ཀྱི་ཕྱིར་འབྲེལ་པ་ཡང་མི་བྱེད་དོ། །དེས་ཅི་ཡང་མི་བྱེད་པ་དེས་ན་གང་ཞིག་སྐྱེད་པར་བྱེད་པས་རྒྱུ་ཡིན། དེས་ན་ཕྱི་མས་ནི་
དེ་མེད་པར་བརྗོད་པ་ཡིན་ནོ། །སྐྱེ་བཞིན་པའི་འབྲས་བུ་ཉིད་རང་གི་རྒྱུ་དང་འདུ་བ་ཡིན་ནམ། སྐྱེས་ཟིན་པའི་འབྲས་བུ་འདུ་ཤེས་དེ་ལྟར་ལུགས་གཉིས་བསྡུ་པའི་ཕྱིར་ན་ཕལ་ཆེར་གྱི་སྒྲ་སྨྲས་སོ། །དེ་ལྟར་ཕྱེད་སྔ་མ་བཤད་ནས་ཕྱི་མ་འཆད་པ་ནི་ཡོད་པ་ཉིད་དང་ཞེས་བྱ་བའོ། །འོ་ན་དངོས་པོ་འབྲས་བུ་ཉིད་དུ་འགྱུར་རོ་སྙམ་ན། དངོས་པོ་ཡང་པ་ནི་ཞེས་བྱ་བ་ནི་ཡོད་པ་དང་འབྲེལ་པ་བྱས་པ་མེད་པར་རོ། །དེ་ཞེས་བྱ་བ་ནི་དངོས་པོའོ། །རང་གི་ངོ་བོ་ཁོ་ནས་སྔ་ན་མེད་པའི་ཁྱད་པར་མེད་པར་རོ། །གང་ཞིག་མེད་པ་དེ་བྱེད་ན་ཞེས་བྱ་བ་ནི་དེ་ལྟར་ཡིན་ནོ་ཞེས་བྱ་བའི་ཐ་ཚིག་གོ །ཁྱོད་ཀྱི་འདོད་པ་དང་སྦྱར་ན་ནི་དེ་ལྟར་ཡང་མ་གྱུར་ཏེ་ཞེས་བརྗོད་པ་ནི་དངོས་པོ་སྔར་མེད་ཅེས་བྱ་བའོ། །ལྡོག་བཞིན་པའི་དངོས་པོ་ཉིད་དངོས་པོ་མེད་པ་ཡིན་པའི་ཕྱིར་སྔ་ན་མེད་པ་དང་མ་འབྲེལ་ཡང་དངོས་པོ་འབྲས་བུ་ཉིད་དུ་འགྱུར་རོ་ཞེས་བྱ་བའི་གཞན་གྱི་འདོད་པ་བརྗོད་པ་ནི་གལ་ཏེ་ཞེས་བྱ་བའོ།། དེས་ན་ཞེས་བྱ་བ་ནི་མེད་པའི་ཕྱིར་རོ། །འདི་སེལ་བར་བྱེད་པ་ནི་གང་ཞིག་ཅེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་མེད་པ་དང་ལྷན་ཅིག་འབྲེལ་བ་མེད་པར་ཡང་མེད་པ་ཡིན་ན་དེའི་ཚེའོ། །གལ་ཏེ་དེ་ལྟ་ན་ཡིན་མོད། དེ་ལས་ཅིར་འགྱུར་ཞེན་དེ་ན་ཞེས་བྱ་བའོ། །དེ་ལྟ་ན་ཡིན་མོད་ཅེ་ན་ཁས་ཀྱང་ཞེས་གསུངས་སོ། །དེའི་ཕྱིར་ཞེས་བྱ་བ་ནི་སྔ་ན་མེད་པ་དང་ལྷན་ཅིག་མི་འབྲེལ་པའི་ཕྱིར་རོ། །གང་གི་ཚེ་དེ་ལྟར་དངོས་པོ་སྔ་ན་མེད་པ་ལ་སོགས་པ་དང་མ་འབྲེལ་ན་ཉེ་བར་འགྱུར་བ་ཁོ་ན་གང་གི་དངོས་པོའི་དངོས་པོ་མེད་པ་དེ་མི་རག་པ་ཉིད་དུ་འགྱུར་བ་སྔ་ན་མེད་པ་དང་ཞིག་ནས་མེད་པའི་མཚན་ཉིད་ཅན་དངོས་པོའི་དུས་ན་ཡོད་པ་མ་ཡིན་པའི་དངོས་པོ་མེད་པ་དང༌། དངོས་པོ་ཇི་ལྟར་འབྲེལ་ཞེ་ན། དེའི་ཕྱིར་ཞེས་བྱ་བའོ། །དོན་མེད་སྒྲོ་འདོགས་པ་ནི་དོན་ལ་རེག་པ་དང་བྲལ་བའི་སྟེ་བླའོ། །གང་དག་ལ་དོན་དུ་མངོན་པར་འདོད་པ་ཐ་དད་པ་ཡོད་པ་མ་ཡིན་པའི་སྒྲ་དེ་དག་ལ་ཡང་བརྗོད་བྱ་ཐ་དད་པར་སྦྱོར་བར་བྱེད་དོ། །དེའི་ཕྱིར་བློ་དེ་ཉིད་ལྡོག་པ་སྟེ་ཐ་དད་ཞིག་པ་དང་ཐ་དད་པ་མི་རྟག་པ་ཞེས་བྱ་བ་དེ་ལྟ་བུའི་རང་བཞིན་གྱིས་རྟེན་དེ་རྒྱུ་མཚན་ཡིན་ནོ། །དོན་ཐ་དད་དམ་ཞེས་བྱ་བ་ནི། གང་གི་སྒྲས་བསྡུས་པ་དོན་ཐ་དད་པར་མངོན་པར་འདོད་པ་དག་ལ་འབྲེལ་པ་རྟོགས་པས་བཀོད་པར་བརྗོད་པ་ནི་དངོས་པོ་ལས་ཞེས་བྱ་བའོ། །འབྲེལ་པ་ནི་
གཉིས་ལ་གནས་པའི་ཕྱིར་ཐ་དད་པ་ཁོ་ནར་འབྲེལ་པ་ཡིན་ནོ་ཞེས་བསམས་ནས་གཞན་དག་དོགས་པར་བྱེད་པ་ན་ཐ་དད་པ་ཉིད་ཅེས་བྱ་བའོ། །ཐ་དད་པ་ནི་འབྲེལ་པ་མ་ཡིན་ནོ་ཞེས་དོགས་ནས་གྲུབ་པའི་མཐའ་སྨྲ་བས་གསུངས་པ་ནི་གལ་ཏེ་ཞེས་བྱ་བའོ། །གལ་ཏེ་ཐ་དད་པ་ཉིད་འབྲེལ་པ་ཡིན་ནོ་ཞེས་བཤད་ཟིན་པ་མ་ཡིན་ནམ། དེས་ན་འདི་སྐད་ཅི་སྟེ་བརྗོད་སྙམ་ན། ཐ་དད་པར་ནི་ཞེས་གསུངས་སོ། །ཐམས་ཅད་ལ་འབྲེལ་པ་ཡོད་པར་འགྱུར་ཞེས་བྱ་བའི་དོན་ཏོ། །དེའི་བདག་ཉིད་ཅེས་བྱ་བ་ལ་སོགས་པས་འབྲེལ་པ་གཞན་དག་ཀྱང་དོགས་པ་བྱས་ནས་སྦོང་བ་ཐ་དད་ཡིན་ན་ཞེས་བྱ་བའོ། །ཕྱེད་སྔ་མ་ཡན་རྐང་པ་གཉིས་པ་འབྲེལ་པ་ནི་ཐ་དད་པ་ལ་ནི་ཞེས་བྱ་བའོ། །གལ་ཏེ་ཞེས་བྱ་བ་ལ་ནི་རྩོད་པའོ། །མ་ཡིན་ཏེ་ཞེས་བྱ་བ་ནི་རྩོད་པའོ། །དེ་ལས་ནི་ཞེས་བྱ་བ་ནི་ཐ་མི་དད་པ་ལའོ། །ཇི་ལྟར་བརྟག་པའི་ཡུལ་ཅན་དུ་འགྱུར་བ་ཞེ་ན་དེ་ལ་ཞེས་བྱ་བའོ། །རྐང་པ་དང་པོ་འཆད་པ་ནི་ཐ་དད་པ་ཉིད་ཅེས་བྱ་བའོ། །རྒྱུ་དང་འབྲས་བུའི་འབྲེལ་པའི་དོགས་པ་བསུ་བ་ནས་འགོག་པ་ནི་གལ་ཏེ་ཞེས་བྱ་བའོ། །ཇི་ལྟར་རྟག་པའི་ཡུལ་ཅན་དུ་འགྱུར་ཞེ་ན། མངོན་སུམ་གྱིས་ཞེས་གསུངས་སོ། །ཕྱེད་ཕྱི་མ་ནི་བླ་བའི་ཕྱིར་མ་བཀྲོལ་ཏོ། །གང་གི་ཕྱིར་རྣམ་པར་དཔྱད་ན་མི་གནས་པ་དེའི་ཕྱིར་འདི་ནི་འབྲེལ་པའོ། །གང་གི་ཕྱིར་དོན་དམ་པ་མིན་པ་དེའི་ཕྱིར་རོ། །སྐབས་ཀྱི་མཇུག་སྡུད་པ་ནི་དེ་བས་ན་ཞེས་བྱ་བའོ། །དེའི་ཕྱིར་དངོས་པོའི་སྔ་ན་མེད་པ་དང་ཞིག་ནས་མེད་པ་ཡང་མི་རྟག་པ་ཉིད་དང༌། བདག་ཉིད་མ་ཡིན་པ་དང་མི་དམིགས་པས་བསྒྲུབ་པར་བྱ་བ་ཡང་ཡིན་ནོ། །གང་གི་ཕྱིར་དེ་ལྟར་ཁ་དོག་ལ་སོགས་པ་མི་རྟག་གོ་སྙམ་པའི་ཤེས་པ་ཁ་དོག་གི་སྤྱི་ལ་མི་རྟག་པ་ཉིད་ལ་སོགས་པ་སྤྱི་སྦྱོར་བས་སྐྱེ་བ་ནི་ཚད་མ་གཞན་མ་ཡིན་ཏེ། གཞལ་བྱ་གཞན་གྱི་ཡུལ་ཅན་མ་ཡིན་པ་དེ་བས་ནའོ། །ཚད་མ་གཞན་ཡོད་པ་མ་ཡིན་ནོ་ཞེས་བྱ་བ་ནི་སྐབས་ཀྱིས་ཁ་དོག་ལ་སོགས་པ་སྐད་ཅིག་མ་ཉིད་ལ་སོགས་པར་ཤེས་བ་ཞེས་བྱ་བ་ཡིན་ནོ། །ཅིའི་ཕྱིར་ཞེ་ན། གཞལ་བྱ་ཞེས་སྨོས་ཏེ། སྤྱི་དང་ཁྱད་པར་ཅན་གྱི་གཞལ་བྱ་གཞན་མེད་པས་སོ། །ཅིའི་ཕྱིར་མེད་སྙམ་ན་ཁ་དོག་གི་སྤྱི་ལ་མི་རྟག་པ་ཉིད་ཀྱི་སྤྱི་སྦྱོར་བའི་ཕྱིར་ཏེ། འདི་སྐད་བརྗོད་པ་ཡིན་ཏེ། གང་གི་ཕྱིར་ཁ་དོག་ལ་སོགས་པ་ནི་མི་རྟག་པའོ་སྙམ་པའི་ཤེས་
པས་ནི་ཁ་དོག་གི་སྤྱི་ལ་མི་རྟག་པའི་སྤྱི་སྦྱར་བ་ཡིན་ཏེ། དེས་ན་དེ་ནི་གཞལ་བྱ་གཞན་མ་ཡིན་ནོ་ཞེས་བྱ་བའོ། །གལ་ཏེ་ཚད་མའི་རྗེས་ལས་བྱུང་བ་དེ་ཉིད་འདི་ཡིན་ནོ། །མཉམ་དུ་མཚམས་སྦྱོར་བར་བྱེད་སྤྱི་དང་ཁྱད་པར་གྱི་བདག་ཉིད་ཅན་གྱི་གཞལ་བྱའི་ཡུལ་ཅན་ནི་ཚད་མ་གཞན་ཡིན་ནོ་ཞེས་དོགས་ན་ཡང་དང་ཡང་ངོ་ཤེས་ཀྱང་ཚད་མ་གཞན་མིན་ཞེས་འབྲེལ་ཏོ། །དྲན་པ་དང་འདོད་པ་ཅན་ནོ། །ཅིའི་ཕྱིར་ཞེ་ན། མི་འདོད་པར་ཐལ་ཕྱིར་ཞེས་གསུངས་སོ། །མི་འདོད་པར་ཞེས་བྱ་བ་ནི་ཚད་མ་རྣམས་ཀྱི་ཚད་ངེས་པ་མེད་པའི་ཕྱིར་ན་མི་འདོད་པར་ཐལ་བའི་ཕྱིར་རོ། །དོན་འདི་ཡིན་ཏེ་ཚད་མས་མཐོང་བ་ལ་ཡང་དང་ཡང་ངོ་ཤེས་པར་བྱེད་པ་ནི་ཚད་མ་སྔ་མ་དང་ཁྱད་པར་མེད་པའི་ཡུལ་ཅན་དེ་དང་གྲུབ་པ་དང་བདེ་བ་གཅིག་པ་དེས་ན་ཚད་མ་གཞན་མ་ཡིན་ཏེ་དཔེར་ན་དྲན་པ་ལ་སོགས་པའི་ཤེས་པ་བཞིན་ནོ། །དེ་ལྟ་ན་ཡང་ཚད་མ་ཡིན་ན་ནི། ཚད་མ་རྣམས་ཀྱིས་དྲངས་པ་དེས་པ་ཉམས་པར་འགྱུར་རོ་ཞེས་བྱ་བ་ནི་ཡིན་ནོ། །འདི་ཡང་གཞན་ནི་གཟུང་བའི་འཛིན་པའི་ཕྱིར་ན་ཚད་མ་ཉིད་མི་འདོད་ཅེས་བྱ་བ་ལ་སོགས་པས་བཤད་ཟིན་པ་ཡིན་ལ་རྒྱས་པར་བཤད་པའི་ཕྱིར་ཡང་སྨྲས་པས་ན་ཉེས་པ་མེད་དོ། །ཡང་ངོ་ཤེས་པར་ཞེས་བྱ་བ་ནི་འཆད་པའོ། །དྲན་པ་ཉིད་ཅེས་བྱ་བ་ནི་ཚད་མ་མ་ཡིན་པའོ། །དབང་པོའི་བྱེད་པ་ལས་ཞེས་བྱ་བ་ལ་སོགས་པའི་ཚོད་པར་ནི་དབང་པོའི་བྱེད་པའི་རྗེས་དཔག་དང་མི་སླུ་བ་ཚད་མ་དེའི་རྒྱུ་མཚན་དུ་བརྗོད་པ་ཡིན་ནོ། །དེ་ལ་དབང་པོའི་བྱེད་པ་ལ་བརྟེན་པ་ཉིད་དེ་ཞིག་དགག་པའི་ཕྱིར་བརྗོད་པ་ནི་ཡང་ངོ༌། །ཤེས་པར་བྱེད་པ་ནི་དབང་པོའི་བྱེད་པ་བརྟེན་པ་མ་ཡིན་ནོ། །ཅིའི་ཕྱིར་ཞེ་ན། དབང་པོའི་བྱེད་པ་ནི་ཞེས་གསུངས་སོ། །གཞན་ཉེ་བ་ཙམ་གྱི་ཡུལ་ཅན་དུ་མྱོང་བས་བརྗོད་པ་ནི་གལ་ཏེ་ཞེས་བྱ་བའོ། །ཇི་ལྟར་འཇུག་སྟེ་མི་འཇུག་པ་ཉིད་དོ། །འཇུག་པ་ཡང་ཡིན་ཏེ་དེའི་ཕྱིར་ཉེ་བའི་ཡུལ་ཅན་མ་ཡིན་པ་ཉིད་དོ་ཞེས་བྱ་བའི་དོན་ཏོ། །གྲུབ་པའི་མཐའ་ནི་དེ་ཉིད་ཅེས་བྱ་བས་ནི་རྟོག་པ་དང་ལྡན་པ་འཇུག་བ་ཉིད་མིན་ཏེ་རྣམ་པ་གཞན་དུ་འཇུག་པར་མཐོང་བའི་ཕྱིར་རོ་ཞེས་བརྗོད་པ་ནི་དེ་ནི་དེ་ལྟར་ཞེས་བྱ་བའོ། །འོ་ན་ཇི་ལྟར་འཇུག་ཅེ་ན། དེ་ནི་ཕན་འབྲས་ཞེས་བྱ་བའོ། །གལ་ཏེ་དེ་ཉིད་ཅེས་བྱ་བ་ནི་འཆད་པའོ། །ཅིའི་ཕྱིར་ཞེ་ན། རྟོག་པ་དང་ལྡན་པ་ཞེས་བྱའོ། །གལ་ཏེ་ཡང་འཇུག་པའི་ཡུལ་དོན་བྱ་བ་སྒྲུབ་
བར་བྱེད་པ་ཡིན་པ་དེ་ལྟ་ན་ཡང་དོན་བྱ་བ་སྒྲུབ་པར་བྱེད་པ་དེ་ནི་དེ་ཉིད་ཡིན་ནོ་ཞེ་ན། དེ་ཉིད་ཀྱིས་ཞེས་བྱ་བ་སྟེ། སྔར་མཐོང་བ་དེ་ཉིད་ཀྱིས་སོ། །ཅིའི་ཕྱིར་ཞེ་ན། རང་གི་ཞེས་གསུངས་སོ། །འོན་ཏེ་མངོན་སུམ་ཡང་དོན་བྱ་བ་སྒྲུབ་པའི་ཡུལ་ཅན་ཉིད་ཡིན་ན་དེས་བྱས་པའི་འཇུག་པ་ནི་དེ་སྒྲུབ་པའི་ཡུལ་ཅན་དུ་གྱུར་པ་དེས་ན་ཚད་མ་མ་ཡིན་པའི་རྒྱུ་མཚན་གྱི་དྲན་པ་ཉིད་གང་ཞིག་ཡིན། དྲན་པ་ཡིན་ཡང་ཚད་མ་ཡིན་ན་ནི་ཚད་མ་རྣམས་མཐའ་མེད་པར་འགྱུར་རོ་ཞེས་བྱ་བའི་དོགས་པ་ཞེ་ལ་བཞག་པས་ལན་འདེབས་པ་ནི་དོན་བྱེད་པའི་འབྲེལ་པ་ནི་ཞེས་བྱ་བའོ། །གལ་ཏེ་དོན་བྱེད་པའི་འབྲེལ་པ་མངོན་སུམ་གྱི་ཡུལ་ཡིན་ན་ནི་ཉེས་པ་འདིར་འགྱུར་ཉིད་ནི་འོན་ཀྱང་འདི་ནི་མངོན་སུམ་གྱི་ཡུལ་མ་ཡིན་ཏེ། གསལ་བ་མེད་པའི་ཕྱིར་རོ། །འོ་ན་དེ་སུའི་ཡུལ་ཡིན་ཞེ་ན། སྔོན་མཐོང་ཉིད་ཅེས་གསུངས་སོ། །མེ་ལ་སོགས་པའི་དོན་བྱེད་པ་དང་འབྲེལ་པ་ནི་མངོན་སུམ་དང་མི་དམིགས་པ་དག་གིས་སྔར་མཐོང་བ་ཡིན་ཏེ། དེ་ཉིད་དོ་ཤེས་པས་དྲན་པའི་ཕྱིར་ངོ་ཤེས་ཉིད་ཀྱི་ཡུལ་ཡིན་ནོ། །དེས་ན་དྲན་པ་ཉིད་ལ་སོགས་པའི་ཉེས་པ་ནི་འདི་ཁོ་ནའི་ཡིན་ནོ་ཞེས་བྱ་བར་དགོངས་པའོ། །ཅི་སྟ་འདི་ཡིན་དྲན་པ་མ་ཡིན་ཏེ། དངོས་པོ་པའི་རང་གི་ངོ་བོ་འཛིན་པའི་ཕྱིར་རོ་ཞེས་དོགས་པ་བསུ་ནས། དེའི་དོན་ཞེས་གསུངས་སོ། །སྔོན་མཐོང་བའི་དོན་བྱ་བ་བྱེད་པ་ཉིད་ཀྱིས་སོ། །དེ་ལྟ་ན་ཡང་ཇི་ལྟར་དྲན་པ་ཡིན་ཞེ་ན། སྔོན་མཐོང་བ་ཉིད་དུ་ཞེས་གསུངས་སོ། །ཚད་མས་མཐོང་བ་ལ་ཡང་དེ་ཤེས་པར་བྱེད་པ་ནི། སྔར་གྱི་ཚད་དང་ཡུལ་ཁྱད་པར་མེད་པ་དེས་ན་གྲུབ་པ་དང་བདེ་བ་ཐ་དད་པ་མ་ཡིན་པས་ན། དྲན་པ་གཟུང་བ་ལ་འཛིན་པར་བྱེད་པ་ཡིན་པས་ན། དྲན་པ་གཟུང་བ་ལ་འཛིན་པར་བྱེད་པ་ཡིན་གྱི་ཚད་མ་གཞན་ནི་མ་ཡིན་ནོ་ཞེས་བྱ་བའི་དོན་ཏོ། །འོན་ཏེ་སྤྱི་དང་ཁྱད་པར་བདག་ཉིད་གཞལ་བྱའི་ཡུལ་ཅན་ཡིན་པའི་ཕྱིར་ན་ཚད་མ་གཞན་ཡིན་ནོ་ཞེ་ན་འདི་ལ་ཞེས་གསུངས་སོ། །སྦྱོར་བའི་རྣམ་པར་བརྗོད་པ་ནི་དེའི་དོན་བྱེད་པར་དུང་བའི་ཞེས་བྱ་བའོ། །འདི་ལ་ཡང་ཞེས་བྱ་བ་ནི་དཔེ་ལ་མཐོང་བ་འབའ་ཞིག་ཏུ་མ་ཟད་ཀྱི། དེ་ལྟར་མངོན་སུམ་གྱིས་མཐོང་བ་ལ་ཡང་ངོ༌། །སྤྱི་ཙམ་གྱི་ཡུལ་ཅན་ཡིན་པའི་ཕྱིར་ན་ཉེས་པ་འདིར་ཐལ་བ་མེད་དོ་ཞེས་བྱ་བར་བསམས་པའོ། །གལ་ཏེ་རྗེས་སུ་དཔག་པ་ཡང་ཇི་ལྟར་ཚད་མ་ཡིན་ཏེ། སྐད་ཅིག་མ་ཉིད་ཀྱིས་བསྟན་པའི་དོན་མི་སྐྱེ་བའི་ཕྱིར་
རོ་ཞེས་དོགས་པ་བསུ་པ་དེ་དག་ཅེས་གསུངས་སོ། །བསྟན་པ་དང་ཐོབ་པ་དེ་དག་ཐ་མི་དད་པ་ཉིད་དུ་སྒྲོ་བཏགས་ནས། གཅིག་ཉིད་ཀྱི་ཐ་སྙད་བྱེད་དེ་དེས་ན་འདི་ཡང་ཉེ་བར་ཐོབ་པར་བྱེད་པའི་ཕྱིར་ཚད་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དངོས་ལ་ཚུལ་གཅིག་བ་ཅན་མ་ཡིན། འོ་ན་མི་སླུ་བ་ཡུལ་གཅིག་པ་ཅན་དུ་འགྱུར་རོ་ཞེ་ན། མི་སླུ་བ་ཡང་ཞེས་གསུངས་ཏེ། ཚད་མ་འབའ་ཞིག་ཏུ་ནི་མ་ཟད་པའོ། །ཅིའི་ཕྱིར་ཞེ་ན། དུ་མ་ཉིད་ཡིན་ཡང་ཞེས་གསུངས་ཏེ། ཉེ་བར་བཏགས་པའི་གཅིག་པ་ཉིད་དུ་ནི་མ་ཟད་དེ། བགྲོད་པར་བྱ་བ་མ་ཡིན་པར་མ་ལ་སོགས་པར་འགྲོང་བར་ལུང་ལས་ཉེ་བར་བསྟན་པ་ནི་སྐད་ཅིག་གི་རྒྱུར་མ་ལྟོས་པ་ཡིན་གྱི། སྐད་ཅིག་གཅིག་གི་ཡུལ་ཅན་ནི་མ་ཡིན་ནོ། །ཉེ་བར་ལེན་པ་དང་ཉེ་བར་ལེན་པ་ལས་བྱུང་བའི་རྒྱུ་ནི་གཅིག་གི་ཐ་སྙད་ཀྱི་ཡུལ་ཡིན་པའི་ཕྱིར་རོ་ཞེས་བརྗོད་པ་ནི་བགྲོད་པར་བྱ་བ་མ་ཡིན་པར་བགྲོད་པ་ཞེས་བྱ་བ་ལ་སོགས་པའོ། །དེ་ལྟར་ན་མངོན་སུམ་གྱི་རྗེས་ལས་བྱུང་བའི་མཚམས་སྦྱོར་བ་ནི་གཟུང་བ་འཛིན་པས་ཐ་སྙད་ཙམ་གྱི་ཡུལ་ཅན་ཡིན་པས་ཡིད་ནི་སྤྱི་ཙམ་གྱི་ཡུལ་ཅན་ཡིན་ཏེ། དེས་ན་གཞལ་བྱ་གཞན་སྲིད་པ་མ་ཡིན་ནོ། །དེས་ན་གཞལ་བྱ་བ་རྣམ་པ་གཉིས་ཁོ་ན་ཞེས་གྲངས་ངེས་པ་གྲུབ་པོ་ཞེས་བརྗོད་པ་ཡིན་ནོ། །དེ་ནི་གང་ལས་ཡུལ་རྣམ་པ་གཉིས་ངེས་པར་འགྲུབ་པ་སྟེ་ལས་མངོན་སུམ་དང་རྗེས་སུ་དཔག་པ་དག་གི་ཡུལ་ངེས་པའི་མཚན་ཉིད་ཀྱི་ངེས་པར་གྲུབ་པ་ཡིན་ནོ་ཞེས་གསུངས་པ་ནི་དེས་ན་ཞེས་བྱ་བའོ། །སྤྱིའི་ཡུལ་ཅན་ཞེས་བྱ་བ་ནི་མངོན་དུ་གྱུར་པའི་ཡུལ་ཅན་ནོ། །ཁྱད་པར་གྱི་ཡུལ་ཅན་ཞེས་བྱ་བ་ནི་ལྐོག་ཏུ་གྱུར་པའི་ཡུལ་ཅན་ནོ། །འདི་ཙམ་གྱི་ནི་འོན་གང་ཞིག་ཁ་དོག་ལ་སོགས་པ་ཞེས་བྱ་བ་ལ་སོགས་པའི་རྩོད་པའི་ལན་བརྗོད་པ་ཡིན་ནོ། །ད་ནི་གཅིག་ལ་ཡང་དུ་མ་ཉིད་ནི་འཇུག་ཕྱིར་ཏེ་ཞེས་བྱ་བ་ལ་སོགས་པ་སྤང་བར་འདོད་པས་དེ་ཉིད་ཟློས་པར་བྱེད་པ་ནི་གལ་ཏེ་ཞེས་བྱ་བ་ལ་སོགས་པའོ། །མངོན་སུམ་གྱིས་མཐོང་བའི་ཁྱད་པར་རྗེས་སུ་དཔག་པ་དེ་ནི་ཁྱད་པར་མཐོང་བའི་རྗེས་སུ་དཔག་པའི་ཁྱད་པར་ཁོ་ན་ཞེས་བྱ་བ་ནི་མངོན་སུམ་གྱིས་མཐོང་བ་ཁོ་ནའོ། །ཁྱད་པར་མཐོང་བའི་རྗེས་སུ་དཔག་པས་ཁྱད་པར་ཁོ་ན་འཛིན་པ་ཡིན་ཏེ། སྔར་ནི་དེ་མངོན་སུམ་གྱིས་བཟུང་ནས་ཕྱིར་ཡང་དེ་ཉིད་ལ་དེས་སྔར་མཐོང་བ་ནི་དེ་ཉིད་ཡིན་ནོ་ཞེས་འདུ་བའི་སྒོ་ནས་
རྟོགས་སོ། །དེས་ན་ཚད་མ་ཡུལ་གཅིག་ལ་འཇུག་པ་ཡིན་ནོ། །འདིས་ནི་འདི་ལྟར་ཚད་མ་འདོད་པ་ཡིན་ཏེ། གང་ཚད་མ་ཡིན་པ་དེ་ནི་ཡུལ་ངེས་པ་ཅན་མ་ཡིན་ནོ། །དཔེར་ན་ཁྱད་པར་མཐོང་བའི་རྗེས་སུ་དཔག་པའི་ཤེས་པ་བཞིན་ནོ། །མངོན་སུམ་ཡང་ཚད་མ་ཡིན་ནོ། །དེས་ན་དེ་ཡང་དེ་ལྟར་འགྱུར་རོ། །སྤྱིའི་ཡུལ་ལ་ཞུགས་པ་ན་ཡང་ཚད་མ་གཅིག་ཏུ་སྨྲ་བ་ཉིད་ལ་སོགས་པ་ཡིན་ནོ། །ཡང་ན་གཞལ་བྱ་གཉིས་ཕྱིར་ཚད་མ་གཉིས་ཞེས་རྣམ་པར་གཞག་པ་གང་ཡིན་པ་དེ་སྤངས་པས་གཞལ་བྱ་བ་གཅིག་ལ་ཚད་མ་དུ་མ་འཇུག་པའི་ཕྱིར་ན། ཚད་མ་རྣམ་པ་མང་པོ་ཉིད་དུ་འདོད་པ་ཡིན་ནོ། །དེ་ཡང་ན། གཞལ་བྱ་གཉིས་ནི་མཐོང་བའི་ཕྱིར། །གསུམ་གཅིག་གྲངས་ཀྱང་བསལ་བ་ཡིན། །ཞེས་བརྗོད་པ་གང་ཡིན་པ་དེ་སེལ་ཕྱོགས་སྔ་མ་འདི་ཡིན་ནོ། །མངོན་སུམ་དང་རྗེས་སུ་དཔག་པ་དག་ཡུལ་ངེས་པས་གཅིག་ལ་འཇུག་པ་མེད་པའི་ཕྱིར་ན། གཞལ་བྱ་བ་གཉིས་ནི་སྤྱིར་ཚ་དམ་གཉིས་ཞེས་བྱ་བ་ལ་སོགས་པ་གང་བརྗོད་པ་ནི་མ་ཉམ་པ་ཁོ་ནའོ་ཞེས་ལན་འདེབས་པ་ནི་དེ་ཡང་མི་རིགས་ཏེ་ཞེས་བྱ་བའོ། །མངོན་སུམ་གྱིས་མཐོང་བའི་ཁྱད་པར་ལ་ནི་ངོ་ཤེས་པ་སྲིད་པ་མ་ཡིན་ནོ། །ཅིའི་ཕྱིར་ཞེ་ན་སྐད་སོ་སོར་ཞེས་གསུངས་ཏེ། ཐ་དད་པ་གཞན་དང་ཡོད་པའི་ཕྱིར་རོ། །ཅི་སྟེ་ཐད་པ་གཞན་ཉིད་ལ་ངོ་ཤེས་པ་ཡིན་ནོ་ཞེ་ན་དེའི་ཚེ་སྐབས་ཉམས་སོ་ཞེས་བརྗོད་པ་ནི། ཁྱད་པར་ཡུལ་ཅན་ཉིད་ཀྱང་མིན། །ཞེས་བྱ་བའོ། །དེ་ལ་གཞན་པའི་ཡུལ་ཅན་ཡིན་ན་ནི་སྐབས་སུ་བབ་པ་མངོན་སུམ་གྱིས་མཐོང་བའི་ཁྱད་པར་གྱི་ཡུལ་ཅན་ཉིད་དུ་མི་འགྱུར་རོ། །སྐད་ཅིག་དེ་རང་གི་ངོ་བོས་དེའི་ཡུན་ནི་མ་ཡིན་གྱི་འོན་ཀྱང་མངོན་ན་སུམ་གྱིས་མཐོང་བའི་སྐད་ཅིག་དང༌། །བྱི་མའི་སྐད་ཅིག་དེ་མཚུངས་པར་དུ་བའི་སྒོ་ནས་འཛིན་པའི་ཕྱིར་རོ། །དེ་ལྟར་ན་ཡང་རྗེས་སུ་དཔག་པ་དེ་ནི་སྤྱིར་མཐོང་བ་ཉིད་ནི་མི་འགྱུར་རོ་ཞེས་བྱ་བར་དགོངས་པའོ། །གང་གི་ཚེ་ཞེས་བྱ་བ་ནི་འཆད་པའོ། །ཐ་དད་པ་ནི་རྣམ་པར་གྱུར་པའོ། །གལ་ཏེ་སྔར་མཐོང་བའི་ཁྱད་པར་གྱི་ཡུལ་ཅན་མ་ཡིན་ན། ཡོད་བའི་ཁྱད་པར་གྱི་ཡུལ་ཅན་ཉིད་དུ་འགྱུར་ངོ་ཞེ་ན། ཐ་དད་པར་ཞེས་བྱ་བའོ། །གྱུར་པ་ལ་ཞེས་བྱ་བ་ནི་ཡོད་པ་ལའོ། །ལྷག་པར་ཞེ་ན་པས་ཞེས་བྱ་བ་ནི་མཐོང་བ་དང་གཅིག་པར་ལྷག་པར་ཞེན་པས་སོ། །ཕྱིར་ཉིད་ཅེས་བྱ་བ་ནི་ཁྱད་པར་ཡོད་པར་ཡུལ་དུ་བྱེད་པ་ནི་མ་ཡིན་
པའོ། །དེ་ལྟར་ན་གཉི་ག་ལྟ་ཡང་ཁྱད་པར་གྱི་ཡུལ་ཅན་ཉིད་མ་ཡིན་ནོ་ཞེས་དགོན་པའོ། །འོན་ཏེ་རྟག་པར་ཕྱོགས་ལ་སྔོན་མཐོང་བའི་ཁྱད་པར་ཡུལ་ཉིད་དུ་འགྱུར་རོ་ཞེ་ན། དོགས་པ་ནི་འོ་ན་ཞེ་ན་ཞེས་བྱ་བའོ། །དེ་ལ་ནི་བསྟན་པ་ལའོ། ལན་ནི་འདི་ཞེས་བྱ་བའོ། །འགྱུར་བ་མེད་པའོ། །ཅིའི་ཕྱིར་མི་རྟོགས་སྙམ་ན། མི་སྡང་བ་ནི་ཞེས་བྱ་བའོ། །འགྱུར་བ་མེད་པ་ཉིད་དུ་དོགས་པ་ཅི་སྟེ་ཞེས་བྱ་བའོ། །གཞན་དུ་ཡང་ནི་གསལ་བ་གཞན་དུའོ། །དེ་ལྟ་བུ་ཉིད་དུ་ཞེས་བྱ་བ་ནི་རྣམས་པར་འགྱུར་བ་མེད་པ་ཉིད་དུའོ། །དེ་ལྟར་ན་ནི་ཞེས་བྱ་བ་ནི་ལན་ཏེ། གསལ་བ་གཞན་ལ་རྣམ་པར་འགྱུར་བ་མེད་པར་མཐོང་བ་ནིའོ། །ཁྱད་པར་གྱི་ཡུལ་ཅན་མ་ཡིན་གྱི་འོན་ཀྱང་སྤྱིའི་ཡུལ་ཅན་ཡིན་ཏེ་དེས་ན་སྦྱོར་བ་མཐོང་བའི་རྗེས་སུ་དཔག་པ་ཉིད་དོ། །གལ་ཏེ་ཁྱད་པར་མཐོང་བའི་རྗེས་སུ་དཔག་པས་ནི་འབྲེལ་པ་འཛིན་པའི་དུས་སུ་མཐོང་བའི་ཁྱད་པར་ཉིད་དུ་བྱེད་པ་མ་ཡིན་ནམ། དེ་དང་འདྲ་བ་མ་ཡིན་ནོ་ཞེས་ དགོས་པ ་ནི་ཞེས་བྱ་བའོ། །དེ་ཉིད་ཅེས་བྱ་བ་ནི་མངོན་སུམ་མི་འཇུག་པའི་དུས་ན་རྗེས་སུ་དཔག་པར་བྱ་བ་གང་ཡིན་ པ་ཉིད་དོ། །དེས་ན་དགོས ་པའི་དོན་ནི་མངོན་སུམ་གྱིས་མཐོང་བའི་ཁྱད་པར་བྱེད་པ་ཁ་ནའོ་ཞེས་བྱ་བ་ཡིན་ནོ། །ལན་ནི་དཔེ་ཉིད་ཡིན་པའི་ཕྱིར་ཞེས་བྱ་བའོ། །གལ་ཏེ་ཞེས་བྱ་བ་ནི་འཆད་པའོ། །འདི་ལ་ཞེས་བྱ་བ་ནི་སྔར་མངོན་སུམ་གྱིས་གྲུབ་པ་ལའོ། །ཇི་ལྟར་འདི་ལས་རྗེས་སུ་དཔག་པ་དོན་མེད་པ་ཡིན་ཞེ་ན། གལ་ཏེ་ཞེས་བྱ་བའོ། །དེའི་ཚེ་དེ་ཉིད་ཀྱིས་ཞེས་བྱ་བ་སྔར་གྱི་མངོན་སུམ་ཉིད་ཀྱིས་སོ། །འོ་ན་དེ་གང་དུ་འཇུག་སྙམ་ན་རྗེས་སུ་དཔག་པ་ནི་ཞེས་གསུངས་སོ། །དེ་ཉིད་ལ་ནི་ཞེས་བྱ་བ་ནི་མངོན་སུམ་གྱི་ཡུལ་ཉིད་ལའོ། །གལ་ཏེ་ཞེས་བྱ་བ་ནི་གཞན་གྱི་སོགས་པ་སྟེ། མངོན་སུམ་གྱི་ཡུལ་ལ་འཇུག་པ་ཉིད་ཀྱི་ཕྱིར་རོ། །ལན་ནི་ཁྱད་པར་ཞེས་བྱ་བ་སྟེ་གཟུང་བའི་འཛིན་པའི་ཕྱིར་རོ་ཞེས་དགོངས་པའོ། །གཟུང་བ་འཛིན་པ་སྤོང་འདོད་པ་ནི་ཅི་སྟེ་ཞེས་བྱ་བའོ། །གཞན་ནི་འབྱུང་བར་འགྱུར་བའོ། །སྒྲུབ་པར་བྱེ་དམ་དམ་པ་ཡིན་པའི་ཕྱིར་ཚད་མ་ཉིད་ཡིན་ནོ་ཞེས་བྱ་བའི་ཐ་ཚིག་གོ །ལན་ནི་གལ་ཏེ་ཞེས་བྱ་བའོ། །མངོན་སུམ་གྱིས་མཐོང་བ་དང་རྗེས་སུ་དཔག་པར་བྱ་བ་དག་གཅིག་མ་ཡིན་པའི་ཕྱིར་ན་ཁྱད་པར་གྱི་ཡུལ་ཅན་མ་ཡིན་ནོ་ཞེས་དགོངས་པའོ། །འོན་ཏེ་ཞེས་བྱ་བ་ནི་
རྣམ་འགྲེལ་ལ་འཇུག་པར་བྱེད་པའོ། །དེ་ནི་རྗེས་སུ་དཔག་པར་བྱ་བའོ། །དེ་ཉིད་ཀྱི་ཕྱིར་ན་ནི་བརྗེད་པ་ཉིད་ཀྱི་ཕྱིར་ནའོ། །རེ་ཞིག་རྩོད་པའི་ཆ་རྣམ་པར་འགྲེལ་པ་ནི་གལ་ཏེ་ཞེས་བྱ་བའོ། །ཇི་ལྟ་བ་བཞིན་དུ་ཞེས་བྱ་བ་ནི་སྔར་མཐོང་བ་ཉིད་དུའོ། །འོ་ན་ནི་ཞེས་བྱ་བ་ནི་གྲུབ་པའི་མཐའོ། །དེ་ཉིད་གསལ་བར་བྱེད་པ་ནི་དཔེའི་སྒོ་ནས་ཞེས་བྱ་བའོ། །དེ་ཞེས་བྱ་བ་ནི་དཔེའོ། །འོན་ཏེ་མ་བརྗོད་ན་དེའི་ཚེ་ཉིས་པ་ཡོད་དོ་ཞེས་བརྗོད་པ་ནི། གལ་ཏེ་རྟགས་ཀྱི་ཞེས་བྱ་བའོ། །དེ་ནི་མངོན་སུམ་གྱིས་མཐོང་བའོ། །གྲུབ་ཟིན་པ་གྲུབ་ན་ནི་ཐུག་པ་མེད་པར་འགྱུར་རོ་ཞེས་བརྗོད་པ་ནི་དེ་ཉིད་ཅེས་བྱ་བའོ། །བརྗོད་བ་ཡང་ཉེས་པ་ཡོད་དོ། །ཞེས་བརྗོད་པ་ནི་འོན་ཏེ་ཞེས་བྱ་བའོ། །བརྗེད་པ་དཔེ་མ་ཡིན་མོད། །དེ་མེད་པ་ཁོ་ནར་དུ་བློར་བུར་བ་ལས་མེད་རྟོགས་པ་བཞིན་དུ་རྟགས་ལས་རྟོགས་པ་གང་གིས་ཟློག་པར་བྱེད་སྙམ་དུ་དོགས་པ་བསུ་ནས། འདུ་བྱེད་མཉམ་པའི་མངོན་སུམ་གྱིས་བཟུང་བ་ལ་དེ་མི་སྲིད་པ་ཉིད་ལ་སྲད་ཀྱི་ཚད་མ་ཉིད་ནི་མ་ཡིན་ནོ་ཞེས་ལན་བརྗོད་པ་ནི་ཅི་སྟེ་ཞེས་བྱ་བའོ། །དེ་ཞེས་བྱ་བ་ནི་མངོན་སུམ་གྱིས་མཐོང་བའོ། །ཁྱབ་པ་དེའི་ཞེས་བྱ་བ་ནི་རྗེས་སུ་དཔག་པར་བྱ་བ་གང་ཡིན་པ་དེའི་ཁྱད་པར་རྟོགས་པ་མེད་པས་སོ། །སྔར་གྱི་མངོན་སུམ་གྱིས་ཞེས་བྱ་བ་ནི། མཐོང་བའི་འདུ་བྱེད་མ་ཉམས་པ་ཅན་གྱིས་སོ། །ཇི་ལྟར་ཁྱད་པར་མ་རྟོགས་ཤེ་ན། དུས་ཀྱི་ཆ་ཞེས་གསུངས་ཏེ། རྟག་པའི་ཕྱིར་རོ་ཞེས་བྱ་བའི་དོན་ཏོ། །མཐོང་བའི་འདུ་བྱེད་ཉམས་ན་ནི་རྗེས་སུ་དཔག་པའི་ཚད་མ་ཡིན་པོ་ཞེས་དགོངས་པ་བསུ་བ་ནི། དྲན་པ་ཡོད་ན་ཞེས་བྱ་བ་དེ་རྗེས་སུ་དཔག་པ་ཡོད་ནའོ། །དེ་ལ་ཞེས་བྱ་བ་ནི་མཐོང་བའི་འདུ་བྱེད་ཉམས་པའི་མངོན་སུམ་གྱིས་བཟུང་བ་ལའོ། །ཐ་སྙད་བྱེད་པའི་ཕྱིར་དེ་ཉིད་ཚད་མ་ཡིན་ནོ་ཞེས་སྦྱར་རོ། །འདི་ཉིད་གསལ་བར་བྱེད་པ་འདི་ལྟར་ཞེས་བྱའོ། །རང་བཞིན་གྱི་གཏན་ཚིགས་ཀྱིས་ཞེས་བྱ་བ་ནི་དེའི་རང་བཞིན་ཅན་གྱི་མཚན་ཉིད་ལས་སོ། །ཇི་ལྟ་བ་བཞིན་དུ་ཞེས་བྱ་བ་ནི་དཔེ་ལ་མཐོང་བའི་བྱེད་པ་དང༌། ཆོས་མཚུངས་པར་ཐ་སྙད་བྱེད་པ་ནའོ། །རྗེས་སུ་དཔག་པ་ཚད་མ་ཡིན་ནོ་ཞེས་བྱ་བ་ནི་སྐབས་ཡིན་ནོ། །གང་ལ་ཇི་ལྟ་བ་བཞིན་ཐ་སྙད་བྱེད་སྙམ་ན་བདག་ཉིད་ཐམས་ཅད་ཅེས་གསུངས་ཏེ། མི་གསལ་བའི་མངོན་སུམ་གྱིས་བདག་ཉིད་ཐམས་ཅད་
བཟུང་ཟིན་པ་ཉིད་ལས་སོ། །མ་ཡིན་ཏེ་ཞེས་བྱ་བ་ནི་དོགས་པ་འགོག་པའོ། །ཅིའི་ཕྱིར་དེ་ལྟ་ན་མ་ཡིན་ཞེ་ན། སྔོན་ཞེས་གསུངས་ཏེ་རང་བཞིན་གྱི་གཏན་ཚིགས་ལའོ། །འདིར་ནི་ཞེས་བྱ་བ་ནི་ཁྱད་པར་མཐོང་བ་ལས་སོ། །ལྟ་ཞེས་བྱ་བ་ནི་རང་བཞིན་གྱི་གཏན་ཚིགས་ཀྱི་རྗེས་སུ་དཔག་པའམ། གློ་བུར་བའི་རྗེས་སུ་དཔག་པའི་ལྟར་ཏེ། བསྒྲུབ་པར་བྱ་བ་ཞེས་པ་ནི་སྐབས་ཡིན་ནོ། །ཅིའི་ཕྱིར་དེ་ལྟ་མ་ཡིན་ཞེ་ན། སྔོན་ཞེས་གསུངས་ཏེ་ཁྱད་པར་མཐོང་བའི་རྗེས་སུ་དཔག་པ་ལས་སྔར་རོ། །དེ་འདྲ་བ་མེད་པའི་ཕྱིར་རོ་ཞེས་བྱ་བ་ནི་འབྲེལ་པ་འཛིན་པ་ལ་བརྗོད་པ་ཉིད་མེད་པའི་ཕྱིར་ཏེ། རང་གི་གཞན་གྱི་རྗེས་སུ་དཔག་པ་ལྟར་སྒྲུབ་པར་བྱེད་པ་མ་ཡིན་ནོ། །གློ་བུར་པའི་རྗེས་སུ་དཔག་པ་དང་འདྲ་བར་སྒྲུབ་པར་བྱེད་པ་ཡང་མ་ཡིན་ནོ་ཞེས་གསུངས་པ་ན། གོམས་པས་བསྐྱེད་པ་མ་ཡིན་པའི་ཕྱིར་རོ་ཞེས་བྱ་བའོ། །གླུ་བུར་པའི་རྗེས་སུ་དཔག་པ་ལ་ནི་གོམས་པ་ཡོད་པ་ཡིན་ནོ་ཞེས་བྱ་བའི་ཐ་ཚིག་གོ །དེས་ན་དེ་ལྟར་ཁྱད་པར་མཐོང་བ་ནི་མངོན་སུམ་གྱིས་མཐོང་བའི་ཡུལ་ཅན་མ་ཡིན་ལ། དེའི་ཡུལ་ཅན་ཡིན་ཡང་ཚད་མ་གཞན་མ་ཡིན་ནོ་ཞེས་བརྗོད་ནས། ད་ནི་དེའི་ཡུལ་ཅན་མ་ཡིན་པ་རྗེས་སུ་དཔག་པ་ཁོ་ན་ཡིན་ནོ་ཞེས་བརྗོད་པ་ནི་འདི་ནི་མཐོང་བ་ཞེས་བྱ་བའོ། །ཅིའི་ཕྱིར་མ་འབྲེལ་ཞེ་ན། རྣམ་པ་གཞན་དུ་ཞེས་གསུངས་ཏེ། དེ་ལྟ་མ་ཡིན་པ་མཐོང་བ་གང་ཡིན་པ་དེ་ཉིད་སྲིད་པའི་ཕྱིར་རོ། །འདི་ཉིད་གསལ་བར་བྱེད་པ་ནི་འདི་ཞེས་བྱ་བའོ། །འོན་ཀྱང་མ་བཟུང་བ་ཉིད་ཡིན་ནོ། །གང་ཕྱིར་དེ་ལྟ་ཡིན་པ་དེས་ན་འདི་ནི་མཐོང་བ་ཡིན་ནོ། །ཞེས་བྱ་བའི་དྲན་པ་ཚད་མར་གྲུབ་པོ་ཞེས་འབྲེལ་ཏོ། །ཅིའི་ཕྱིར་ཞེས་དོགས་ན་བཤད་ཟིན་པ་ཉིད་གསལ་བར་བྱེད་པ་ནི་མ་བཟུང་བ་ཉིད་དེ། གཞན་དུ་གྱུར་བ་ཉིད་ཡིན་པའི་ཕྱིར་རོ། །དུ་བའི་རྟགས་ལས་སྐྱེས་པའི་ཚད་མ་ཡང་མངོན་སུམ་མ་ཡིན་ན་རྗེས་སུ་དཔག་པ་ཁོ་ན་ཡིན་གྱི་ཁྱད་པར་མཐོང་བ་ནི་མ་ཡིན་ནོ་ཞེས་བྱ་བར་དགོངས་པའོ། །གང་གི་རྗེས་སུ་དཔག་པར་འགྱུར་བ་རྗེས་སུ་རྣམ་པ་གཞན་དུ་འགྱུར་བར་སྲིད་སྙམ་ན། མངོན་སུམ་གྱིས་ནི་ཞེས་གསུངས་སོ། དེ་ལྟ་མ་ཡིན་ན་ཞེས་བྱ་བ་ནི་རང་གི་དུས་ཀྱི་མཐར་ཐུག་པའི་རང་བཞིན་མི་འཛིན་ནའོ། །འཆི་བའི་མཐའ་དང་བཅས་པའོ། །དེ་ཉིད་ཀྱི་ཚེ་ན་ཞེས་བྱ་བ་ནི་འཚི་མཐའ་འཛིན་དུས་ཀྱི་དེ་མ་ཐག་པའི་དུས་
ཉིད་དུའོ། །དེ་ལ་ཡང་མ་ཡིན་ཏེ། དུས་ནི་རང་གི་དུས་ཀྱི་མཐར་ཐུག་པའི་རང་བཞི་ཉིད་མངོན་སུམ་གྱིས་འཛིན་པ་ཡིན་ནོ། །དེས་ན་འདི་ན་མ་མཐོང་བ་ཉིད་ཡིན་ནོ་སྙམ་པའི་དྲན་པ་ནི་མཐོང་བ་ཡིན་པར་མི་འཐད་དོ་ཞེས་གནས་སོ། །འོན་ཏེ་འདི་ཡང༌། ཁྱད་པར་ཡུལ་ཅན་ཉིད་ཀྱང་མིན། །ཞེས་བྱ་བ་འདིས་དོན་བརྗོད་པའི་ཕྱིར་ཡང་ཟློས་པའི་དོན་ཡིན་ཞེ་ན། ཉེས་པ་ལྷག་པར་བརྗོད་པའི་དོན་ཏོ། དེ་ཉིད་བརྗོད་པའི་དོན་དུ་གཞན་དག་ དགོས་པར་བྱེད་པ ་ནི་རྗེས་སུ་དཔག་པ་ཉིད་ཀྱིས་ཞེས་བྱ་བ་སྟེ་རྒྱུན་གྱི་རྗེས་སུ་འཇུག་པ་ཉིད་ཀྱིས་སོ། །འདི་ག་ལས་ཤེ་ན། མངོན་སུམ་རིང་པོས་ཞེས་གསུངས་སོ། །གལ་ཏེ་དེ་ལྟ་ན་ཡང་འཆི་བའི་མཐའ་དང་བཅས་པར་འཛིན་པར་ཐལ་བ་ལས་ཇི་ལྟར་ཐར་སྙམ་ན། རིང་མིན་པས་ན་ཞེས་སྨྲས་སོ། །དེ་ལྟར་ན་ཅི་འགྲུབ་སྙམ་ན། དེ་ཉིད་ཀྱི་ཚེ་ན་ཞེས་སྨྲས་སོ། །དེ་ལྟ་ན་ཡང་ཉེས་པ་གཞན་ཡོད་དོ་ཞེས་བརྗོད་པ་ནི་གལ་ཏེ་ཞེས་བྱ་བའོ། །དེས་ན་ཞེས་བྱ་བ་ནི་དུས་གཞན་ཁྱབ་པ་འཛིན་པས་ནའོ། །ཅི་སྟེ་ཞེས་བྱ་བས་དོན་དམ་པར་མཐོང་བའི་ཡུལ་ཅན་མ་ཡིན་པའི་མ་ཡིན་པའི་ཡུལ་ཅན་ཡིན་ཞེས་བྱ་བའི་དོགས་པ་བསུ་ནས་འདི་ལ་བརྗོད་པ་ཞེས་བྱ་བས་སེལ་བར་བྱེད་དོ། །དེ་ལ་ཞེས་བྱ་བ་ནི་སྐྱེས་པ་ལའོ། །དེའི་དངོས་པོ་ཞེས་བྱ་བ་ནི་མངོན་མཐོང་བའི་དངོས་པོར་གྲུབ་པའོ། །ཚད་མས་ཞེས་བྱ་བ་ནི་མངོན་མཐོང་བས་སོ། །དེའི་ཚེ་དངོས་པོ་གཞན་ལ་སྟེ་མ་མཐོང་བ་ལ་མཐོང་བ་དེ་ཉིད་སྒྲོ་འདོགས་པའི་ནི་འཁྲུལ་པར་འགྱུར་རོ། །མངོན་སུམ་གྱིས་གྲུབ་པ་ཉིད་ཁྱད་པར་མཐོང་བས་གྲུབ་པ་ཡིན་ན་གཟུང་བའི་འཛིན་ཕྱིར་ཚད་མ་མ་ཡིན་པ་ཉིད་དོ་ཞེས་བརྗོད་པ་ནི་དེ་གྲུབ་ཅེས་བྱ་བའོ། །རེ་ཞིག་རྩོད་པའི་ཆ་ཉིད་རྣམ་པར་འགྲེལ་པ་ནི་གལ་ཏེ་ཞེས་བྱ་བའོ། །གཞན་མིན་ཞེས་བྱ་བ་ནི་གཞན་ཁོ་ནའོ། །དེ་ཉིད་ནི་མཐོང་བའོ། །གཞན་བ་ཡང་སྔར་གྱི་མངོན་སུམ་བཟུང་བ་ཉིད་དོ་ཞེ་ན། སྔར་མཐོང་བ་དེ་ནི་ཞེས་གསུངས་སོ། །མ་བཟུང་བ་ནི་མངོན་སུམ་གྱིས་སོ། །དེ་ཉིད་དུ་མཐོང་བ་ཉིད་དུའོ། །གཞན་དུ་མ་མཐོང་བ་ཉིད་དུའོ། །རྗེས་སུ་དཔག་པས་མ་བཟུང༌། འཛིན་པ་ནི་མ་ཡིན་ཏེ་ཞེས་འབྲེལ་ཏོ། །གལ་ཏེ་དྲན་པ་འཛིན་པའི་རྗེས་སུ་འབྲང་ན། རྗེས་སུ་དཔག་པས་ཇི་ལྟར་ཞེ་ན། རྗེས་སུ་དཔག་པ་ནི་ཞེས་བྱ་བའོ། །ཅི་སྟེ་རྗེས་སུ་དཔག་པ་ཞེས་བྱ་བ་ནི་མངོན་སུམ་གྱིས་མཐོང་བ་ཉིད་ཁྱད་པར་མཐོང་
བས་འཛིན་པ་ཡིན་ནོ་ཞེས་བྱ་བའི་དོན་ཏོ། །མངོན་སུམ་ཅིག་ཤོས་ཞེས་བྱ་བ་ནི་མངོན་སུམ་དང་རྗེས་སུ་དཔག་པའོ། །གཅིག་གྲུབ་པ་ན་ཞེས་བྱ་བ་ནི་གཉིས་ཀྱི་ནང་ནས་གཅིག་ཁོ་ན་གྲུབ་མདོ། གཉིས་ཀས་ཅི་ཞིག་བྱེད་དང་འབྲེལ་བའི་ཕྱིར་ཞེས་བྱ་བ་ནི་མིག་ལ་སོགས་པའི་བྱད་པ་དང་རྗེས་སུ་འབྲེལ་པའི་ཕྱིར་རོ། །གང་ཚེ་སྣང་བ་ཡོད་པ་དེའི་ཚེ་ཡང་འཛིན་པ་མ་ཡིན་ནོ་ཞེས་བརྗོད་པ་ནི། འོ་ན་སྣང་བ་དེ་ཞེས་བྱ་བའོ། །དངོས་པོ་འཛིན་པ་ཉིད་དུ་ དགོས་པ ་བསུ་ནས་སེལ་བ་ནི་སྣང་བ་དང་བྲལ་བ་ནི་ཞེས་བྱ་བའོ། །དེ་ལྟར་གྱུར་པ་ན་ནི་ཞེས་བྱ་བ་ནི་སྣང་བ་དང་ལྡན་པ་དེ་དང་དྲལ་བར་འཛིན་པའོ། །དེ་ཉིད་ཅེས་བྱ་བ་ནི་འབའ་ཞིག་འཛིན་པ་ཉིད་དོ། །གལ་ཏེ་ཁྱད་པར་མཐོང་བ་མ་ཡིན་ན་འོ་ན་ད་ཅི་ཡིན་ཞེ་ན། གཞན་དང་ཞེས་བྱ་བའོ། །སྔོན་མཐོང་བའི་དོན་དང་མཚམས་སྦྱར་བའི་ཞེན་པ་ངེས་པ་སྟེ་རིགས་པ་ཞེས་པས་དྲན་པ་ཡིན་པར་ཤེས་ཀྱི་ཚད་མས་ནི་མ་ཡིན་ནོ། །དེས་ན་མངོན་སུམ་ཉིད་ཡིན་ནོ་ཞེས་བྱ་བའི་དོན་ཏོ། །འོན་ཏེ་དུ་བ་ལ་སོགས་པ་ལ་ལྟོས་ནས་འགྱུར་བའི་ཕྱིར་ཇི་ལྟར་ཚད་མ་མ་ཡིན་ཞེ་ན། དོགས་པ་བསུ་ནས་སེལ་བ་ནི་གལ་ཏེ་ཞེས་བྱ་བའོ། །དེ་ནི་རྟགས་ལ་ལྟོས་པའི་ཕྱིར་དྲན་པ་ནི་མ་ཡིན་གྱི། །འོན་ཀྱང་ཚད་མ་ཡིན་ནོ་ཞེ་ན། དྲན་པ་མ་ཡིན་པ་མ་ཡིན་ཏེ། འོན་ཀྱང་དྲན་པ་ཁོ་ནའོ། །ཅིའི་ཕྱིར་ཞེ་ན་འཁྲུལ་ཕྱིར་རོ། །གཞན་ཡང་ཞེས་བྱ་བའོ། །མཚམས་ནི་ཞེས་བྱ་བའི་འགྲེལ་པའོ། །རྣམ་པར་དཔྱོད་པར་བྱ་བ་བརྗོད་པ་ནི་གསལ་བའི་རང་བཞིན་དུ་ཞེས་བྱ་བའོ། །འདི་ལ་སུམ་འབྱིན་པ་ནི་དེའི་ཚེ་དྲན་པ་ཉིད་ཡིན་ཏེ་ཁྱད་པར་མཐོང་བ་ནི་མ་ཡིན་ནོ།། འདི་ཉིད་གསལ་བར་བྱེད་པ་ནི་མངོན་སུམ་དང་ཞེས་བྱ་བའོ། །གལ་ཏེ་དེ་བཏགས་ཞེས་བྱ་བ་རྣམ་པར་འབྲེལ་པ་ནི་གལ་ཏེ་ཞེས་བྱ་བའོ། །ད་ནི་མ་ཡིན་ཏེ་ཞེས་བྱ་བ་ནི་གྲུབ་པའི་མཐའ་འགྲེལ་པའོ། །འདི་ལས་ནི་དུ་བ་ལའོ། །ཅིའི་ཕྱིར་རྟགས་ཉིད་མེད་ཅེ་ན། ཚུལ་གསུམ་པ་མེད་པའི་ཕྱིར་རོ་ཞེས་བྱ་བ་སྟེ་ཁྱད་ཀྱི་འདོད་པས་སོ། །དེ་ཉིད་ཇི་ལྟར་ཞེ་ན་དཔེ་དང་ཞེས་གསུངས་སོ། །དེས་ན་དུ་བ་ནི་འཁྲུལ་པ་ཡིན་ནོ་ཞེས་དགོངས་པའོ། །རང་གི་ངོ་བོ་འཛིན་པའི་ཕྱིར་ཇི་ལྟར་སྤྱིའི་ཡུལ་ཅན་ཞན་གང་ཞིག་ཅེས་བྱ་བའོ། །དྲན་པར་བྱ་ནི་དོང་ཡི་རང་བཞིན་དུ་ལྷག་པར་གཞན་པར་བྱ་བ་སྟེ་སྤྱི་
ཡིན་ནོ། །གཟུང་བར་བྱང་མ་ཡིན་པ་ཅིའི་ཕྱིར་ཞེ་ན། གཟུང་བར་བྱ་བ་ཉིད་དུ་ཞེས་གསུངས་སོ། །གལ་ཏེ་རྗེས་སུ་དཔག་པར་ནི་དྲན་པ་མ་ཡིན་པ་དེས་ན་དེ་ལྟར་ཇི་སྟེ་བརྗོད་སྙམ་ན་རྗེས་སུ་དཔག་པ་ནི་ཞེས་གསུངས་སོ། །སྐབས་ཉེ་བར་སྡུད་པ་ནི་དེའི་ཕྱིར་ཞེས་བྱ་བའོ་ཤེས་པ་གང་གིས་སོ། །གལ་ཏེ་ཁྱད་པར་མཐོང་བ་དངོས་པོའི་འཛིན་པའི་རང་བཞིན་མ་ཡིན་ན་འོ་ན་ཞེས་སྦྱོར་རོ། །ད་ལྟར་ཞེས་བྱ་བ་ནི་ལན་ནོ། །ཅིའི་ཕྱིར་ཞེ་ན་ཕྱོགས་དེ་ན་ཞེས་གསུངས་སོ། །གང་གི་ཕྱིར་དེ་ལྟར་ཁྱད་པར་མཐོང་བ་སྤྱིའི་ཡུལ་ཅན་ཡིན་པ་དེའི་ཕྱིར་དེ་ལྟ་ཡིན་པ་ཞེས་བྱ་བའོ། །སྐབས་ཆེན་པོ་ཉེ་བར་སྡུད་པ་ནི་དེའི་ཕྱིར་གཞལ་བྱ་གཉིས་ཞེས་བྱ་བའོ། །ཇི་ལྟར་ཚད་མ་རྣམ་པར་གཉིས་ཡིན་ཞེ་ན། མངོན་སུམ་དང་ཞེས་བྱ་བའོ། །ཡུལ་རྣམ་པ་གཉིས་ཇི་ལྟར་ཞེ་ན་དངོས་དང་ཞེས་བྱ་བའོ། །མངོན་སུམ་རྟོག་དང་བྲལ་བར་ནི། །མངོན་སུམ་ཉིད་ཀྱི་གྲུབ་པ་ཡིན། །ཞེས་བཤད་པ་མཐོང་བའི་ཕྱིར་ན་བཤད་པར་བྱ་པའི་མདོ་ཉིད་འགོད་པ་ནི། དེ་ལ་མངོན་སུམ་ནི་ཞེས་བྱ་བའོ། །དེ་དང་བྲལ་བ་ཉིད་སྒྲུབ་པའི་དོན་དུ་རྟོག་པ་དང་འཁྲུལ་པའི་རང་གི་ངོ་བོ་གསུངས་པ་ནི་ཁྱད་པར་ཞེས་བྱ་བའོ། །ཁྱད་པར་ལ་སོགས་པ་དང་སྒྲ་ལ་སོགས་པ་དང༌། འབྲེལ་པ་འདྲེས་པའི་དོན་གྱི་རྣམ་པར་གང་ལ་ཡོད་པ་སྟེ་དེ་ནི་རྟོག་པ་ཡིན་ནོ། །གཞན་དུ་ཞེས་བྱ་བ་ནི་ཕྱིན་ཅི་ལོག་ཉིད་དུའོ། །དེ་གཉིས་དང་ཞེས་བྱ་བ་ནི་སྤྱིར་རྟོག་པ་དང་འཁྲུལ་པ་གཉི་ག་དང་ངོ༌། །གཞན་དུ་ཞེས་བྱ་བ་ནི་མ་འཁྲུལ་ཏེ་དུང་དཀར་པོ་ལ་སེར་པོ་ལ་སོགས་པར་ཤེས་པ་འཁྲུལ་པ་ཉིད་ནི་མིག་སྨན་ལ་སོགས་པས་གསལ་བར་བྱས་པའི་མངོན་སུམ་དུང་དཀར་པོ་མཐོང་བ་ལས་ངེས་པ་ཡིན་ནོ། །ཆོས་ཅན་གྱི་ཆོས་བསྟན་པའི་ཕྱིར་ན་རྟོག་པ་ཉིད་དང༌། བྲལ་བ་དེའི་དངོས་དེ་ཉིད་གང་ལས་ངེས་ཡིན་ཏེ། འགའ་ལས་ཀྱང་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རྗེས་སུ་དཔག་པ་ལས་ངེས་པ་མ་ཡིན་ནམ། དེ་ན་དེ་སྐད་ཅི་སྟེ་བརྗོད་སྙམ་ན། མངོན་སུམ་དེ་མེད་ནའོ། །འོ་ན་མངོན་སུམ་གྱི་རྟོག་པ་དང་བྲལ་བ་ཉིད་ངེས་པ་ཡིན། དེ་སྔོན་དུ་འགྲོ་བའི་རྗེས་སུ་དཔག་པས་ཀྱང་ཡིན་ནོ་ཞེ་ན། མངོན་སུམ་མཐའ་དག་ཀྱང་ཞེས་བྱ་བའོ། །དེའི་ཡང་ཞེས་བྱ་བ་ནི་སྤྱོད་པ་ལ་སོགས་པའི་ཡང་ངོ༌། །དེས་ཅི་འགྱུར་ཞེ་ན་དེ་ཞེས་བྱ་བའོ། །དེ་ཡང་ནི་རྣམ་པར་རྟོག་པ་དང་བཅས་པའི་མངོན་
སུམ་ཡང་ངོ༌། །གལ་ཏེ་རྣམ་པར་རྟོག་པ་ནི་ཤ་ཟ་བཞིན་དུ་བལྟར་མི་རུང་བའི་ཕྱིར་ན་ཇི་ལྟར་མངོན་སུམ་གྱིས་མེད་པའི་ཐ་སྙད་དུ་བྱེད་སྙམ་ན་ཀུན་གྱི་རྣམ་རྟོག་ཅེས་བྱ་བའོ། །མིང་སྟེ་དགྲའི་རྟེན་ནི་མི་རྟེན་ཅན་ཏེ། སྒྲ་དང་འདྲེ་བར་རུང་བའི་སྣང་བ་ཅན་ཞེས་བྱ་བའི་དོན་ཏོ། །རྟོག་པ་པོ་གསལ་པ་ལ་ལྟོས་ཏེ་ནི་ཐམས་ཅད་མངོན་སུམ་ཉིད་ཀྱིས་དངོས་པོ་མེད་པའི་ཐ་སྙད་དུ་བྱེད་ཀྱི་མི་དམིགས་པས་ནི་མ་ཡིན་ནོ་ཞེས་བཤད་ཟིན་ཏོ། །དེ་ལས་གཞན་ལ་ལྟོས་ཏེ་ནི་འགའ་ཞིག་ཏུ་མི་དམིགས་པས་ཡིན་གྱི། ཐམས་ཅད་དུ་ནི་མ་ཡིན་གྱི། དཔེ་མེད་པར་ཐལ་བའི་ཕྱིར་རོ་ཞེས་ཀྱང་བསྟན་ཟིན་ཏོ། །དེའི་བདག་ཉིད་དགག་པ་ལ་ནི་ཁྱད་པར་དང་བྲལ་བའི་མི་དམིགས་པ་ཡིན་ལ། ཐ་དད་པ་དགག་པ་ལ་ནི་ཁྱད་པར་དང་བཅས་པ་ཉིད་ཀྱིས་ཡིན་ནོ། །ཤེས་པ་གཅིག་ལ་འདྲེ་བ་ཉིད་ཀྱང་འཁྲུལ་པ་མེད་པར་དམིགས་པའི་ཉེ་བར་མཚོན་བྱེད་ཡིན་ཏེ། ངེས་ན་དབང་པོའི་རྣམ་པར་ཤེས་པ་དང་རྣམ་པར་རྟོག་པ་དམིགས་པ་པ་ལ་འཁྲུལ་པ་མེད་པ་ཅན་དག་ལས། དབང་པོའི་རྣམ་པར་ཤེས་པ་གཅིག་དམིགས་པ་ཉིད་དམིགས་པའི་མཚན་ཉིད་དུ་གྱུར་པའི་རྣམ་པར་རྟོག་པ་མི་དམིགས་པ་ཡིན་ནོ། །འདིར་ནི་རང་བཞིན་ཁྱད་པར་ཅན་ཉིད་བརྗོད་དོ་འཆད་པ་ནི་མངོན་སུམ་ཞེས་བྱ་བའོ། །གལ་ཏེ་རྣམ་པར་རྟོག་པ་དང་གཞན་དག་ལྷན་ཅིག་འབྱུང་བས་ཐ་དད་པ་མེད་པའི་ཕྱིར་ཇི་ལྟར་རྟོག་པ་དང་གཞན་གྱི་རྣམ་པར་བྱེད་པར་འགྱུར་སྙམ་ན། རྣམ་པར་རྟོག་པར་བྱ་བ་ནི་རང་རིག་པས་ཞེས་སོ། །རྣམ་པར་བརྟག་པར་བྱ་བ་ནི་མི་གསལ་བའོ། །སྣང་ཞེས་བྱ་བ་ནི་གསལ་བའོ། །གང་གི་ཕྱིར་དེ་ལྟར་ཉམས་སུ་མྱོང་བ་དེས་ན་གསལ་བ་དང་མི་གསལ་བའི་ཆོས་འགལ་བའི་གནས་པ་ནའོ། །དེ་ཡོད་པ་ཞེས་བྱ་བ་ནི་རྣམ་པར་རྟོག་པ་དང་བཅས་པ་དང་ཅིག་ཤོས་དག་ཡོད་པས་སོ། །རྐྱེན་གཞན་ཚོགས་པ་དང་ལྡན་པར་སྟོན་པས་ལན་བརྗོད་པ་ནི་ཐམས་ཅད་ལས་ནི་ཞེས་བྱ་བ་སྟེ། ཡུལ་ཐམས་ཅད་ལས་རྣམ་པར་རྟོག་པའི་སེམས་བསྡུས་ནས་སོ། །གཡོ་མེད་པ་སྟེ་རྟོག་བའི་རླུང་དང་བྲལ་བའི་ཕྱིར་བརྟན་པར་གནས་པ་ནའོ། །འདིས་ནི་རྣམ་པར་རྟོག་པ་མེད་ཀྱང་ཡོད་པའི་ཕྱིར་ན། རྣམ་པར་རྟོག་པ་ནི་ཐ་དད་པ་ཡིན་ནོ། །ཞེས་བསྟན་ཏེ། །ཐལ་བར་འགྱུར་བའི་སྒོ་ནས་འཆད་པ་ནི། གལ་
ཏེ་ཞེས་བྱ་བའོ། །རྣམ་པར་རྟོག་པའི་ཚོགས་པ་མེད་ན་ཞེས་བྱ་བ་ནི། རིགས་མཐུན་པར་རྣམ་པར་རྟོག་པའི་རྒྱུ་མེད་ནའོ། །དེའི་ཚེ་མེད་པ་ཞེས་བྱ་བ་རགས་མཐུན་པའི་རྣམ་པའི་ཚོགས་པ་མེད་པར་དོན་འཛིན་པའི་དབང་པོའི་བྱེད་པ་མེད་པར་འགྱུར་རོ། །མེད་པ་ཡང་མ་ཡིན་ན་དེས་ནའོ། །དེའི་ཞེས་བྱ་བ་རྣམ་པར་རྟོག་པ་བསྡུས་པའི་གནས་སྐབས་ནའོ། །རྣམ་པར་རྟོག་པ་དང་མ་འབྲེལ་པ་ཞེས་བྱ་བ་ནི། རྣམ་པར་རྟོག་པ་དང་བྲལ་བའོ། །གལ་ཏེ་ཐམས་ཅད་ལ་རྣམ་པར་རྟོག་པ་ཡོད་པའི་ཕྱིར་ན་རྣམ་པར་རྟོག་པ་དང་བྲལ་བའི་གནས་སྐབས་མེད་པ་ཉིད་མ་ཡིན་ནམ་ཞེས་དོགས་པ་ནི་གལ་ཏེ་ཞེས་བྱ་བའོ། །འདི་ལ་ཞེས་བྱ་བ་ནི་རྣམ་པར་མེད་པ་ལའོ། །དེའི་ཚེ་ཉིད་ཅེས་བྱ་བ་ནི་རྣམ་པར་རྟོག་པ་མེད་པའི་དུས་ནའོ། །དེའི་ཚེ་ཞེས་ཁོང་ནས་ཕྱུང་ལ་ཇི་ལྟར་ཞེས་བྱ་བ་ལ་སོགས་པར་སྤྱར་རོ། །དེའི་ཚེ་ཞེས་བྱ་བ་ནི་རྟོག་པ་མེད་པའི་དུས་ནའོ། །ཉམས་སུ་མྱོང་བ་ནི་རང་གི་ཡུལ་ལ་རང་གི་བྱེད་པའི་རྗེས་སུ་འབྲང་བའི་རྣམ་པར་རྟོག་པ་བསྐྱོད་པས་ན། དེ་ལས་སྔར་འབྱུང་བ་ཡིན་གྱི་དེ་དང་དུས་མཚུངས་བར་ནི་མ་ཡིན་ནོ་ཞེས་ལན་འདེབས་པ་ནི་འདི་ལས་བཤད་པ་ཞེས་བྱ་བའོ། །སྔར་བཤད་གནས་སྐབས་ཀྱི་ཞེས་བྱ་བ་ནི་རྣམ་པར་རྟོག་པ་དང་མ་འབྲེལ་བའི་གནས་སྐབས་ཀྱིའོ། །དབང་པོའི་རྟོག་པ་ལས་ནི། ཁོ་བོའི་རྣམ་རྟོག་འདི་འདྲར་འགྱུར། །ཞེས་བྱ་བ་དེ་མེད་དོ། །གལ་ཏེ་རྣམ་པར་རྟོག་པ་ནི་རྣམ་པར་རྟོག་པའི་དུས་ཉིད་ན་འདི་ལ་ཡོད་པར་ཐ་སྙད་བྱེད་པ་མ་ཡིན་ནམ། དེས་ན་གནས་སྐབས་འགའ་ཞིག་རྣམ་པར་རྟོག་པ་དང་བྲལ་བར་ཇི་ལྟར་བརྗོད་སྙམ་ན། དེ་ཉིད་ཀྱི་ཚེ་ཞེས་སྨོས་སོ། །རྣམ་པར་རྟོག་པ་མེད་པའི་དུས་ཉིད་ཀྱི་ཚེའོ། །འདི་ནི་རྣམ་པར་རྟོག་པ་མེད་པའོ། །རྣམ་པར་རྟོག་པ་དེ་རྣམ་པ་ཅི་འདྲ་བ་ཞིག་སྙམ་ན། འདི་རྣམ་པར་རྟོག་པ་མེད་པའོ་སྙམ་པའོ། །གང་གིས་དེ་དགག་པར་བརྗོད་པ་ཡིན་པའི་ཐ་སྙད་དུ་བྱེད་པའི་རྣམ་པར་རྟོག་པ་ཡོད་ན་ཅི་ཉེས་སྙམ་ན། དེ་ལྟ་མ་ཡིན་པ་ཞེས་གསུངས་ཏེ། གལ་ཏེ་ཡོད་པའི་ཐ་སྙད་དུ་བྱེད་པའི་རྣམ་པར་རྟོག་བ་དེ་བཞིན་དུ་ཡོད་ན་དེའི་ཚེ་མངོན་སུམ་རྣམ་པར་རྟོག་པ་མེད་པར་སྨྲ་བ་འབའ་ཞིག་ཏུ་ནི་མ་ཟད་ཀྱི་མངོན་སུམ་རྣམ་པར་རྟོག་པ་དང་བཅས་པར་སྨྲ་ལ་ཡང་ངོ༌། །འདི་ནི་རྣམ་པར་རྟོག་པ་རྣམ་པར་རྟོག་པ་
གཞན་དང་དུས་མཚུངས་པར་ཁས་བླངས་ཏེ་བརྗོད་པར་ཤེས་པར་བྱའོ། །དེ་ལ་ཞེས་བྱ་བ་ནི་རྣམ་པར་རྟོག་པ་དང་བཅས་པའི་མངོན་སུམ་ལའོ། །གཞན་གྱི་བྱ་བ་ནི་དུས་མཚུངས་པའི་རྣམ་པར་རྟོག་པས་སོ། །ལན་ནི་རྣམ་པར་རྟོག་པ་མེད་པ་ལ་ཡང་ངོ་ཞེས་བྱ་བ་ནི་རྣམ་པར་རྟོག་པ་ཞེས་བྱ་བ་ནི་དུས་མཉམས་པར་འབྱུང་བས་སོ། །དེས་ན་དེ་ལྟར་རྣམ་པར་རྟོག་པ་དང་བཅས་པ་བཞིན་དུ་རྣམ་པར་རྟོག་པ་མེད་པ་ལ་ཡང་དུས་མཚུངས་པའི་རྣམ་པར་རྟོག་པས་ཡོད་པའི་ཐ་སྙད་བྱ་བར་མི་ནུས་ལ། རང་རིག་པའི་ཕྱོགས་ལ་ནི་དོན་མེད་དོ་ཞེས་བསྟན་པ་ཡིན་ནོ། །འོ་ན་རང་རིག་པའི་ཕྱོགས་ལ་དུས་ཕྱིས་འབྱུང་བ་ཉིད་ཀྱིས་དེ་བཞིན་དུ་རྣམ་པར་རྟོག་པ་ཡིན་གྱི་ཐམས་ཅད་ནི་མ་ཡིན་ནོ་ཞེས་དོགས་བ་པ་ནི་འོན་ཏེ་ཞེས་བྱ་བའོ། །དེ་ལྟ་ན་ནི་འོ་ན་དེ་ཉིད་ཚེ་འདི་རྣམ་པར་རྟོག་པ་མེད་པའོ་ཞེས་བྱ་བ་དེ་དག་གནས་པ་ཡིན་ནོ་ཞེས་སྟོན་པས་རྣམ་འགྲེལ་རྣམ་པར་འགྲེལ་པ་ནི་འདི་ལ་ཡང་ཞེས་བྱ་སྟེ། རྣམ་པར་རྟོག་པ་གཞན་དང་བཅས་པའི་རྟོག་པ་མེད་པ་ལའོ། །རྣམ་པར་རྟོག་པ་བསྡུས་པའི་གནས་སྐབས་ན། དེ་ལྟར་ཐ་སྙད་མི་བྱེད་པ་ཅིའི་ཕྱིར་ཞེ་ན། དེ་ལ་ཞེས་གསུངས་སོ། །རྣམ་པར་རྟོག་བ་བསྡུས་པའི་སྐབས་སུའོ། །དེའི་ཚེ་ཞེས་བྱ་བ་ནི་ཐ་སྙད་ཀྱི་དུས་ནའོ། །ཤི་བ་ལ་ཞེས་བྱ་བ་ནི་ལན་ནོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་དེ་ལ་ཐ་སྙད་མེད་ནའོ། །དེའི་ཚེ་རྣམ་པར་རྟོག་པ་དང་བཅས་པ་ཞེས་བྱ་བའོ། །ཡང་ཞེས་བྱ་བ་ནི་དོགས་པའོ། །དེའི་རིགས་ཅན་ནི་རྣམ་པར་རྟོག་པའི་རིགས་ཅན་ནོ། །གཉིག་ཡང་ཉེ་བར་སྡུད་པ་ནི་དེས་ན་ཞེས་བྱ་བའོ། །མཚན་ཉིད་ཐ་དད་པ་དང་ཞེས་བྱ་བ་ནི། གསལ་བ་དང་མི་གསལ་བའི་རང་བཞིན་ཐ་དད་པ་དང་ཕན་ཚུན་མེད་པ་ཡང་ཞེས་བྱ་བ་ནི། རྣམ་པར་རྟོག་པ་མེད་པ་དང་ཅིག་ཤོས་དག་རེ་རེ་མེད་ཀྱང་ཡོད་པའི་ཕྱིར་གཅིག་ཉིད་མ་ཡིན་ནོ། །ཕན་ཚུན་མེད་པར་འབྱུང་བར་དོགས་པ་བསུ་བ་ནི་ཅི་སྟེ་ཞེས་བྱ་བའོ། །དྲན་པ་དང་དབང་པོ་ལ་སོགས་པ་ཡོད་པའི་ཕྱིར་རོ། །དེ་མེད་པས་ནི་དེ་འདྲའི་ཚོགས་མེད་པས་སོ། །དབང་པོ་འབའ་ཞིག་ཡོད་པ་ལས། །ཞེས་བྱ་བའི་དོན་ཏོ། །གང་ཞིག་རྣམ་པར་རྟོག་པ་དང་བཅས་པའི་ཚོགས་པའི་ཁྱད་པར་ལས་གཞན་ཉིད་སྐྱེ་བ་དེ་ནི་ད་མེད་པར་འགྱུར་བ་མ་ཡིན་གྱི། གང་ཞིག་དབང་པོ་འབའ་ཞིག་ལས་བྱུང་བ་དེ་ནི་གཞན་ཁོ་ན་ཡིན་ཏེ། བཅས་
བ་གང་ཡིན་པ་དེ་ཉིད་མ་ཡིན་ནོ། །དེ་བས་ན་ཕན་ཚུན་མེད་པས་འབྱུང་བ་མ་ཡིན་པའི་ཕྱིར་འདི་ནི་རྣམ་པར་རྟོག་པ་དང་བཅས་པའི་ཚོགས་གཅིག་ཁོ་ན་ཡིན་ནོ་ཞེས་བྱ་བ་ནི་དོགས་པའི་འདོན་ཏོ། །ལན་དེ་ནི་མ་འབྲེལ་ཏེ་ཞེས་བྱ་བའོ། །ཇི་ལྟར་ཞེ་ན་བརྗོད་པ་གལ་ཏེ་རྣམ་པར་རྟོག་པ་དང་བཅས་གཅིག་པ་ཉིད་ཚོགས་པ་ལས་ཡིན་པར་རྟོག་ན་དེའི་ཚེ་སྔོན་པོ་དང་སེར་པོ་དག་ཐ་དད་པ་མེད་པར་འགྱུར། ཅིའི་ཕྱིར་ཞེ་ན། བ་སྡོམས་པས་ཞེས་བྱ་བའོ། །དེ་ནི་ཞེས་བྱ་བ་ནི་འཆད་པའོ། །དེ་ལ་ཞེས་བྱ་བ་ནི་བསྡོམས་པ་དང༌། འབའ་ཞིག་པ་དག་གི་ནང་ནས་སྔོན་པོ་དང་སེར་བོ་གཅིག་པར་མི་བཟོད་ནས་གཞན་དག་དོགས་པར་བྱེད་པ་ནི་ཅི་སྟེ་ངོ་ཤེས་པའི་ཕྱིར་ཏེ་ཞེས་བྱ་བའོ། །དེ་ཉིད་ཅེས་བྱ་བ་སོ་སོར་མཐོང་བ་གང་ཡིན་པའོ། །ལན་ནི་ཐ་དད་པར་ཞེས་བྱ་བའོ། །དེའི་ཕྱིར་ཞེས་བྱ་བ་ནི་ཐ་དད་པའི་ཕྱིར་རོ། །དབང་པོ་སོགས་པའི་ཚོགས་པ་ཁས་བླངས་ནས་སུན་ཕྱུང་བ་ཡིན་ནོ། །དེ་འཐད་པ་ཡང་མ་ཡིན་ནོ་ཞེས་བརྗོད་པ་ནི། དྲན་པ་ལ་སོགས་པ་ཞེས་བྱ་བའོ། །ཅིའི་ཕྱིར་ཞེ་ན། དབང་པོའི་ཞེས་གསུངས་སོ། །འོ་ན་དོན་གྱི་ཤེས་པ་ཉིད་རྣམ་པར་རྟོག་པ་དང་བཅས་པ་ཡིན་ཏེ། བརྡ་སྦྱར་བ་ལ་འཛིན་པའི་ཕྱིར་རོ་ཞེ་ན། དབང་བ་ཞེས་གསུངས་སོ། །ཅིའི་ཕྱིར་ཞེན་དེ་བརྗོད་པ་ཉིད་ཀྱི་ཞེས་བྱ་བ་སྟེ་རང་གི་མཚན་ཉིད་བརྗོད་བའོ། །ཇི་ལྟར་དེ་བརྗོད་པ་ཉིད་མེད་ཅེ་ན། རང་གི་མཚན་ཉིད་ལ་ཞེས་གསུངས་སོ། །འོ་ན་སྤྱི་འཛིན་པའི་དབང་པོའི་ཤེས་པ་ནི་རྟོག་པ་དང་བཅས་པ་ཡིན་ཏེ། དེ་ལ་བརྡ་སྲིད་པའི་ཕྱིར་རོ་ཞེ་ན་སྤྱི་ཞེས་གསུངས་སོ། །གལ་ཏེ་རང་གི་མཚན་ཉིད་དང༌། སྤྱི་དག་བརྡའི་ཡུལ་མ་ཡིན་པ་དང༌། དབང་པོའི་གཟུང་བ་མ་ཡིན་པར་ཇི་ལྟར་འགྲུབ་ཅེས་བསམས་ནས་གཞན་དག་དོགས་པར་བྱེད་པ་ནི་ཅིའི་ཕྱིར་ཞེས་བྱ་བའོ། །དེ་ལྟར་གཉིས་པའིའོ། །དེ་ལ་རེ་ཞིག་རང་གི་མཚན་ཉིད་བརྡའི་ཡུལ་མ་ཡིན་པར་སྒྲུབ་པ་ན་གཅིག་ཏུ་ཞེས་བྱ་བའོ། །འདིས་ནི་མངོན་སུམ་གྱི་ཡུལ་གྱི་ཁྱད་པར་ནི་རྣམ་པར་རྟོག་པའི་ཡུལ་མ་ཡིན་ནོ་ཞེས་བརྗོད་པ་ཡིན་ནོ། །སྤྱི་ནི་རྣམ་པར་རྟོག་པའི་ཡུལ་ཡིན་ཡང་དབང་པོའི་ཤེས་པའི་གཟུང་བ་ཡིན་ནོ་ཞེས་བརྗོད་བ་ཡིན་ནོ། །དེ་ལས་ཞེས་བྱ་བ་སྟེ་ཁྱད་པར་ལས་སོ། །གཞན་ནི་ཐ་དད་པ་ཞེས་བྱ་བའི་དོན་ཏོ། །ཕྱེད་སྔ་མ་འཆད་པ་ནི་ཁྱད་པར་ནི་ཞེས་བྱ་བའོ། །ཇི་ལྟར་རྗེས་སུ་འགྲོ་བ་མ་ཡིན་
ཞེ་ན། གང་གི་ཕྱིར་ཞེས་གསུངས་སོ། །གཅིག་ཏུ་ཡུལ་ལམ་དུས་སུའོ། །གཞན་དུ་ཞེས་བྱ་བ་ནི་ངེས་པར་ཡུལ་ལམ་དུས་སུའོ། །དེ་ཉིད་ནི་ད་ལྟར་བྱུང་བའོ། །གཞན་གྱི་ནི་དུས་ཕྱིས་འབྱུང་བས་སོ། །ཅིའི་ཕྱིར་མི་མཐོང་སྙམ་ན་དེ་ན་ཞེས་གསུངས་ཏེ་མངོན་སུམ་མོ། །འདི་ཉིད་གསལ་བར་བྱེད་པ་ནི་མངོན་སུམ་གྱིས་ནི་ཞེས་བྱ་བའོ། །དེས་ན་ཞེས་བྱ་བ་ནི་དུས་གཞན་དུ་གནས་པ་མེད་པས་སོ། །མངོན་སུམ་སྔ་མ་ནི་ཕྱི་མ་ལ་མི་འཇུག་ལ་མངོན་སུམ་ཕྱི་མ་ཡང་སྔ་མ་ལ་མི་འཇུག་གོ་ཞེས་བྱ་བར་སྦྱར་རོ། །ངོ་ཤེས་པའི་མངོན་སུམ་ནི་སྔ་མ་དང་ཕྱི་མ་དག་ལ་འཇུག་པ་ཡིན་ནོ་ཞེས་དོགས་པ་ནི་གལ་ཏེ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །ཇི་ལྟར་མངོན་སུམ་མ་ཡིན་ཞེ་ན་དེ་ལ་ཞེས་གསུངས་སོ། །ངོ་ཤེས་པ་ལའོ། །ཇི་ལྟར་དབང་པོའི་བྱེད་པ་མེད་སྙམ་ན། ཇི་ལྟར་ཞེས་གསུངས་སོ། །འོན་ཏེ་དབང་པོ་ལ་བརྟེན་པའི་རྣམ་པར་ཤེས་པ་འདས་པ་ལ་སོགས་པ་ལ་འཇུག་པ་ཡིན་ནོ་ཞེ་ན། དེ་ལ་བརྟེན་པའི་ཞེས་གསུངས་སོ། ཅིའི་ཕྱིར་འདས་པ་ལ་སོགས་པ་དབང་པོ་མི་འཇུག་སྙམ་ན། དབང་པོའི་ཤེས་པས་ཞེས་གསུངས་སོ། འཛིན་པ་ལ་ཉེས་པ་བརྗོད་པ་ནི་དེ་ལྟར་ཡིན་ན་ཞེས་བྱ་བ་སྟེ། ཡུལ་དང་དུས་དང་ཁྱབ་པ་འཛིན་ནའོ། །ཕྱེར་ཕྱི་མ་འཆད་པའི་ཕྱིར་དོགས་པ་བསུ་བ་ནི་གལ་ཏེ་ཞེས་བྱ་བའོ། །འཆད་པ་སྔ་མ་ལན་འདེབས་པ་ནི་གལ་ཏེ་ཞེས་བྱ་བའོ། །དེའི་ཚེ་མིག་ཀྱང་འཇུག་པར་འགྱུར་རོ། །ཇི་ལྟར་ཤེས་པ་འཇུག་ན་མིག་ཀྱང་འཇུག་པར་འགྱུར་ཞེ་ན། མིག་ཅེས་གསུངས་སོ། །ཤེས་པ་འཇུག་པ་ལས་གཞན་དུའོ། །འོ་ན་འདས་པ་ལ་སོགས་པ་འཛིན་པ་ལ་མིག་བྱེད་པ་ཡོད་པ་ཁོ་ནའོ་ཞེ་ན། སྔ་མ་དང་ཞེས་གསུངས་སོ། །ཅིའི་ཕྱིར་ཞེ་ན། སྲིད་པར་ཞེས་བྱ་བ་ནི། རྒྱུ་སྔ་མ་ལས་འབྲས་བུ་ཕྱི་མ་དང་འབྲས་བུ་ཕྱི་མ་ལས་རྒྱུ་སྔ་མ་ལས་སྲིད་པར་རྗེས་སུ་དཔོག་པའོ། །རྗེས་སུ་དཔག་པ་འཇུག་པ་ཉིད་དབང་པོ་འཇུག་པ་ཡིན་ནོ་ཞེས་དོགས་པ་ནི་གལ་ཏེ་ཞེས་བྱ་བའོ། ལན་ནི་རྗེས་སུ་དཔག་པ་ཡང་ཞེས་བྱ་བའོ། །གང་གི་ཕྱིར་ཁྱད་པར་གཅིག་ཏུ་མཐོང་བ་ནི་གཞན་དུ་མཐོང་བ་དེའི་ཕྱིར་རོ། །ཕྱེད་ཕྱི་མ་བཤད་པའི་ཕྱིར་དོགས་པ་བསུ་བ་ནི་སྤྱི་ཞེས་བྱ་བའོ། །ཁྱད་པར་ལས་ཐ་དད་པ་དང་ཐ་མི་དད་པའི་སྤྱི་ནི་ཡོད་པ་མ་ཡིན་ནོ། །དེས་ན་གང་གི་དབང་པོ་ཤེས་པ་རྣམ་
པར་རྟོག་པ་དང་བཅས་པར་འགྱུར་བ་དེ་དབང་པོས་གཟུང་བ་ཉིད་ཇི་ལྟར་ཡིན་ཞེས་བསྟན་པའི་དོན་དུ་ལན་འདེབས་པ་ནི་ཁྱད་པར་དེ་ལྟས་ཐ་དད་པ་ནི་ཡོད་པ་མ་ཡིན་ནོ། །ཅིའི་ཕྱིར་ཞེ་ན། ཐ་དད་མེད་ཕྱིར་ཞེས་བྱ་བའོ། །ཁྱད་པར་རྣམས་ལ་ནི་ཐ་དད་པ་དང་ཐ་མི་དད་པའི་སྤྱི་དང་ཁྱད་པར་གྱི་རྣམ་པ་ཅན་གྱི་བློ་ཉམས་སུ་མྱོང་བ་ནི་མེད་དེ་འོན་ཀྱང་ཁྱད་པར་རྣམ་པ་ཉིད་ཡིན་ནོ། །སྤྱི་ནི་མ་དམིགས་པའི་ཕྱིར་མེད་པ་ཁོ་ནའོ་ཞེས་པའི་དོན་ཏོ། །གལ་ཏེ་གསལ་བ་དང་སྤྱི་དག་རྗེས་སུ་འགྲོ་བར་སྲིད་པའི་ཕྱིར། ཇི་ལྟར་བརྡའི་ཡུལ་ལ་ཡིན་ཞེ་ན། ཁྱད་པར་རྣམས་ཞེས་གསུངས་སོ། །དབང་པོས་གཟུང་བར་བྱ་བའི་སྤྱི་ཡང་རྗེས་སུ་འགྲོ་བ་མ་ཡིན་ཏེ་ཞེས་འབྲེལ་ཏོ། །ཅིའི་ཕྱིར་ཞེ་ན། དེ་ནི་མེད་པའི་ཕྱིར་རོ་ཞེས་བྱ་བའོ། །ཁྱད་པར་རྣམས་རྗེས་སུ་འགྲོ་བ་མ་ཡིན་ལ་ཞེས་བརྗོད་པ་ཉིད་གསལ་བར་བྱེད་པ་ནི། །ཁྱད་པར་རྣམས་ནི་ཞེས་པའོ། །སྤྱི་ཡང་ཞེས་བརྗོད་པ་གསལ་བར་བྱེད་པ་ནི་སྤྱི་ཞེས་བྱ་བ་སྟེ། དབང་པོས་གཟུང་བ་མ་ཡིན་པའོ། །དེ་ཉིད་ཀྱི་ཕྱིར་དེ་ནི་ཞེས་གསུངས་ཏེ། སའི་དབང་པོས་གཟུང་བའི་ཞེས་བྱ་བ་ནི་སྤྱིའོ། །ཅིའི་ཕྱིར་ཞེ་ན། འདིར་ཅི་ནི་ཞེས་བྱ་བའོ། །འདིར་ནི་ཁྱད་པར་རྣམས་ལའོ། །ཅིའི་ཕྱིར་མི་སྣང་སྙམ་པའི་དོགས་པ་སེམས་པས་ཐ་དད་བློ་མེད་ཕྱིར་ཞེས་བྱ་བ་རྣམ་པར་འགྲེལ་པ་ནི་རྣམ་གཞན་ཞེས་བྱ་བའོ། །དེ་ཉིད་ཀྱི་ཕྱིར་ཞེས་བྱ་བ་ནི་མི་དམིགས་པའི་ཕྱིར་རོ། །ཐ་དད་པ་དང་ཐ་མི་དད་པའི་སྤྱི་ནི་མེད་པ་ཉིད་ཡིན་ལ། མི་དམིགས་པ་ལས་མེད་ཀྱང་བླ་སྟེ་དེ་ཁས་ལེན་ན་ཉེས་པ་གཞན་ཡང་བརྗོད་པ་ནི་བརྗོད་དུ་མེད་པ་ཡང་མེད་པ་ཉིད་དོ། །གང་གི་ཕྱིར་སྤྱི་མེད་པ་དེའི་ཕྱིར་དབང་པོ་ལས་སྐྱེས་བློ་ཞེས་བྱ་བའོ། །གལ་ཏེ་ཁྱད་པར་ཉིད་སྒྲའི་ཡུལ་ཡིན་པ་དེས་ན་དེ་འཛིན་པའི་དབང་པོ་ཤེས་པ་རྟོགས་པ་མེད་པར་ཇི་ལྟར་འགྱུར་སྙམ་ན་ཁྱད་པར་རྣམས་ལ་ཞེས་གསུངས་སོ། །ཅིའི་ཕྱིར་འཇུག་པ་མི་སྲིད་སྙམ་ན་ཁྱད་པར་ཞེས་གསུངས་སོ། །གལ་ཏེ་ཁྱད་པར་ཉིད་སྤྱི་ཡིན་པ་དེས་ན་དབང་པོའི་རྣམ་པར་ཤེས་པ་ཁྱད་པར་གྱི་ཡུལ་ཅན་དུ་ཇི་ལྟར་འགྱུར་སྙམ་ན། རྗེས་སུ་འགྲོ་བ་མེད་པར་ཞེས་གསུངས་སོ། །ཁྱད་པར་རྣམས་ལ་ཞེས་བྱ་བ་ལ་སོགས་པ་འཆད་པ་ནི་ཁྱད་པར་ཞེས་བྱ་བའོ། །ཅིའི་ཕྱིར་རྗེས་སུ་འགྲོ་བ་མེད་པ་ལ་བརྡ་མི་འཇུག་སྙམ་ན་བརྡ་ནི་ཞེས་གསུངས་སོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་ཡུལ་དང་དུས་གཞན་
དུ་ཐ་སྙད་འཇུག་པའི་དོན་དུ་བརྡ་མི་འདོད་ནའོ། །དེའི་ཚེ་ཞེན་ཞེས་པ་དེ་ཉིད་དུ་ཞེས་བྱའོ། །ཐ་སྙད་འཇུག་པའི་དོན་ཏོ། །མ་ཡིན་ནོ་ཞེས་དོགས་པ་ནི་ཆོས་ཀྱི་ཞེས་བྱ་བའོ། །ལན་ནི་དེ་ལར་ཞེས་བྱ་བའོ། །དེས་ན་ཞེས་བྱ་བ་ནི་ཡུལ་གཞན་ལ་སོགས་པར་ཐ་སྙད་པར་འཇུག་པའི་དོན་ཡིན་པས་ནའོ། །དེའི་ཕྱིར་ཞེས་བྱ་བ་ནི་སོ་སོར་ངེས་པ་ལ་བརྡ་མི་འཇུག་པའི་ཕྱིར་རོ། །ཁྱད་པར་སྒྲའི་ཡུལ་མ་ཡིན་མོད། དེ་ལྟ་ན་ཡང་དེ་སྦྱར་ནས་འཛིན་པར་ཇི་ལྟར་མི་འདོད་ཅེས་ན། སྒྲ་རྣམས་ཞེས་གསུངས་ཏེ། དེ་ལར་བརྡར་བཏགས་པ་རྣམས་ཀྱི་ཡུལ་ལོ། །གང་ཞིག་ཡིན་པ་ཞེས་བྱ་བ་ནི་ཡུལ་ལ་སོགས་པར་རྗེས་སུ་འགྲོ་བ་གང་ཡིན་པའོ། །དེ་ཉིད་ཅི་ཞེས་བྱ་བ་ནི་རྗེས་སུ་མི་འགྲོ་བ་ནི་མ་ཡིན་པའོ། །དེ་རྣམས་ཀྱིས་ཞེས་བྱང་ནི་དེ་ལྟར་བརྡར་བཏགས་པའི་སྒྲ་རྣམས་ཀྱིས་སོ། །སྦྱོར་བྱེད་ཅེས་བྱ་བ་བུམ་པ་དེ་ནི་འདིའོ་ཞེས་བྱ་བའོ། །དེས་ཞེས་བྱ་བ་ནི་ཁྱད་པར་ལ་བརྡ་མེད་པས་ནའོ། །དེའི་ཕྱིར་ཞེས་བྱ་བ་ནི་སྦྱར་ནས་འཛིན་པ་མེད་པའི་ཕྱིར་རོ། །ཅིའི་ཕྱིར་ཞེས་བྱ་བས་ནི་རྒྱུ་ཅིའི་ཕྱིར་ན་ཁྱད་པར་ཉིད་དང་སྦྱོར་གྱི་ཁྱད་པར་ནི་མ་ཡིན་ཞེས་བྱ་བའི་ཐ་ཚིག་གོ །ཞེས་པ་ལ་རྣམ་པར་རྟོག་པས་ཤེས་པ་ལའོ། །གང་ཡིན་པའི་དོན་དེ་དག་ཉིད་དོ། །ཅིའི་ཕྱིར་ཞེས་དྲིས་པ་ན་བརྗོད་པ་ནི་འདི་ཞེས་གསུངས་སོ། །ཤེས་པ་གང་གིས་ཐ་སྙད་ཀྱི་དུས་སུ་རྟོགས་པར་བྱ་བ་ཡིན་ཏེ། ཅི་གང་ལ་ལྐོག་ཏུ་གྱུར་པའི་དོན་ཡོད་པ་རྣམ་པར་རྟོག་པ་དང་བཅས་པ་དེས་སམ་ཞེས་བྱ་བའོ། །རེ་ཞིག་རྣམ་པར་རྟོག་པ་ཐ་མ་སེལ་བ་ནི་གལ་ཏེ་ཞེས་བྱ་བའོ། །རྣམ་པར་རྟོག་པ་དང་པོའི་དབང་དུ་བྱས་ཏེ་བརྗོད་པ་ནི་འོན་ཏེ་ཞེས་བྱ་བའོ། །ཅིའི་ཕྱིར་ཞེ་ན། དེའི་ཚེ་ཞེས་བྱ་བ་སྟེ། ཐ་སྙད་ཀྱི་དུས་ནའོ། །དབང་པོའི་ཡུལ་གྱི་དོན་རྟོགས་བཞིན་པ་མེད་པའི་ཕྱིར་རོ། །འདིས་ནི་འདི་སྐད་བརྗོད་དེ་གལ་ཏེ་དབང་པོའི་ཡུལ་གྱི་དོན་རང་གི་མཚན་ཉིད་ལ་བརྡ་བྱེད་པ་ཡིན་ན་ནི་དེའི་ཚེ་ཐ་སྙད་ཀྱི་དུས་སུ་དེ་ཉིད་རྟོགས་པར་འགྱུར་བ་ཞིག་ན། དེ་ལྟར་ཡང་མ་ཡིན་ཏེ། དེས་ན་དེ་ལ་བརྡ་བྱེད་པ་མ་ཡིན་ནོ་ཞེས་བྱ་བའོ། །ཡང་ན་ཞེས་བྱ་བ་ལ་སོགས་པས་ནི་རྣམ་འགྲེལ་ལ་འཇུག་པར་བྱེད་པའོ། །དོན་དང་སྒྲོ་མེད་ཀྱང་འབྲེལ་བར་བྱེད་པའི་ཕྱིར་ན་དེའི་ཚེ་དབང་པོའི་སྤྱོད་ཡུལ་གྱི་དོན་འབྲེལ་བ་མ་ཡིན་ནོ་ཞེས་འབྲེལ་ཏོ། །འོན་ཏེ་ཡང་གང་གི་ཚེ་དོན་འདས་ཏེ་མེད་པ་ན་
ཡང་བརྡ་བྱེད་པ་ཡིན་ནོ་ཞེས་བརྗོད་པ་ནི། །དེའི་ཚེ་ཡང་རྣམ་པར་རྟོག་པའི་བློ་ལ་དོན་སྣང་བ་ཡོད་པ་ཡིན་ལ། སྣང་བ་དེ་ཉིད་ཀྱང་དོན་ཡིན་པ་དེས་ན་དོན་ཀྱང་བརྡ་བྱེད་པ་ཡིན་ཞེ་ན། སྣང་བ་ཐ་དད་ཡིན་ཡང་ཞེས་གསུངས་སོ། །རྣམ་པར་རྟོག་པ་ལ་ནི་མི་གསལ་པར་སྣང་བ་ཡིན་ན། དེ་ཇི་ལྟར་ན་མངོན་སུམ་ལ་སྣང་བ་གསལ་བའི་དོན་དེ་ལ་ཅིག་ཅར་འགྱུར་ཞེས་བྱ་བར་དགོངས་པའོ། །འདིར་སློབ་དཔོན་ཆོས་མཆོག་གི་ལུགས་ཀྱི་དོགས་པ་ནི་གལ་ཏེ་ཞེས་བྱ་བའོ། །རྟག་པར་འཛིན་པས་ནི་འཁྲུལ་པ་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཇི་ལྟར་དངོས་པོ་རྣམས་ཐ་དད་ཅེ་ན། ཐ་དད་པ་ནི་ཞེས་བྱ་བ་ནི་འདི་ལ་བརྗོད་པ་ནི་དོན་བྱེད་པ་ཞེས་བྱ་བའོ། །སྣང་བ་ཐ་དད་པ་ཉིད་དོན་བྱེད་པ་ཐ་དད་པའི་སྒྲས་བརྗོད་བར་བྱ་བ་ཡིན་ནོ། །གལ་ཏེ་བུམ་པ་དང་སྣམ་བུ་དག་ཅི་ལྟར་ཐ་དད་ཅེས་བྱ་བ་འདིར་ཆུ་འཛིན་པ་ལ་སོགས་པ་འབྲས་བུ་ཐ་དད་པའི་ཕྱིར་རོ་ཞེས་བརྗོད་པ་མ་ཡིན་ནམ་དེས་ན་སྣང་བ་ཐ་དད་པ་ཉིད་དོན་བྱེད་པ་ཐ་དད་པ་ཇི་ལྟར་ཡིན་སྙམ་ན་གཞན་དུ་གྱུར་པའི་འབྲས་བུ་ཐ་དད་པ་ནི་རྒྱུ་ཐ་དད་པའི་མཚན་ཉིད་མ་ཡིན་ནོ། །རྒྱུའི་སྣང་བ་ཐ་དད་བ་མེད་བར་ཞེས་འབྲེལ་ཏོ། །དེ་ཉིད་ལས་ཞེས་བྱ་བ་ནི་སྣང་བ་ཐ་དད་པ་ཉིད་ལས་སོ། །ཐུག་པ་མེད་པར་འགྱུར་རོ་ཞེས་བྱ་བ་ནི། འབྲས་བུ་གཞན་དང་འབྲས་བུ་གཞན་ཐ་དད་པའི་སྒོ་ཁོ་ནས་ཐ་དད་པ་ཡིན་ལ་དེ་ཡང་དེ་ལས་གཞན་གྱིས་ཡིན་པའི་ཕྱིར་རོ། །འབྲས་བུ་ཐ་དད་པ་སྣང་བ་ཐ་དད་པ་ལས་ཡིན་ནོ་ཞེ་ན་ནི། དེའི་ཚེ་རྒྱུ་ཡང་སྣང་བས་ཐ་དད་པ་དེ་ཉིད་ལས་སོ། །གཞན་ཡང་བརྗོད་པ་ནི་དོན་བྱེད་པ་ཞེས་བྱ་བའོ། །དེ་ནི་ཞེས་བྱ་བ་མི་སླུ་བའོ། །དེས་ན་རྗེས་སུ་དཔག་པ་དེང་ཡང་ངོ༌། །གང་གི་ཕྱིར་དེ་ལྟ་མ་ཡིན་པ་དེའི་ཕྱིར་ཐ་དད་པ་ནི་ཐམས་ཅད་དུ་ཞེས་བལྟའོ། །དེ་ལྟར་བུ་ལ་ཞེས་བྱ་བ་ནི་མིག་མངོན་སུམ་ཕྱེ་བའི་རྟོགས་པ་པོ་ལའོ། །འོ་ན་ཇི་ལྟར་འབྲེལ་སྙམ་ན། འདིའི་ཞེས་གསུངས་ཏེ་ཞེས་རྣམ་པ་དེ་ལྟར་བསྟན་བ་སྟེ། བརྗོད་པའི་དོན་གང་ཡིན་པ་ཉིད་སྦྱོང་བ་ཡིན་ནོ། །དོད་དེ་ཉིད་དབང་བོའི་ཤེས་པའི་ཡུལ་ཡིན་པའི་ཕྱིར་རྣམ་པར་རྟོག་པ་དང་བཅས་པ་ཡིན་ནོ་སྙམ་ན། མངོན་སུམ་ལ་ནི་ཞེས་གསུངས་སོ། །དོན་རྐྱང་བ་ཙམ་ཞེས་བྱ་བ་ནི་རྟགས་ཀྱི་དོན་ཙམ་མོ། །རེ་ཞིག་འདི་ནི་ཁས་བླངས་ནས་བརྗོད་པ་ཡིན་ཏེ། རྣམ་པའི་དབྱེ་བའི་དོན་ནི་སྣད་བ་མ་ཡིན་ནོ་ཞེས་བསྟན་པའི་དོན་དུའོ། །རྟགས་ཀྱི་དོན་གཞན་དུ་རྣམ་པར་
དབྱེ་བའི་དོན་ཡང་ཅི་སྟེ་མི་སྣང་ཞེ་ན། བརྗོད་པ་ནི་འདི་ལྟ་ཞེས་བྱ་བའོ། །གལ་ཏེ་འདིའི་ཞེས་བྱ་བའི་འབྲེལ་པ་ཕན་གདགས་པར་བྱེད་པ་དང༌། ཕན་འདོགས་པར་བྱེད་པ་དག་མ་ཡིན་ན་འོ་ན་ཇི་ལྟར་འདིའི་རྗོད་པར་བྱེད་པ་ནི་འདི་ཡིན་ནོ་ཞེས་འདྲེ་ལ་པ་ཡིན། །འདིར་ནི་བརྗོད་པར་བྱ་བ་དང་རྗོད་པར་བྱད་པ་དག་ཕན་གདགས་པར་བྱ་བ་དང་ཕན་འདོགས་པར་བྱེད་པའི་དངོས་པོ་ཡོད་པ་མ་ཡིན་ནོ་ཞེས་དེས་ཞེས་བྱ་བའོ། །བློའི་ཡུལ་གྱི་དོན་ལས་རེས་འགའ་སྒྲེ་འབྱུང་སྟེ་སྐྱེ་ལ། རེས་འགའ་ནི་སྒ་ལས་བློ་ལ་གནས་པའི་དོན་ཡིན་པའི་ཕྱིར་ཏེ་རྣམ་པ་དེ་ལྟར་བློའི་རང་བཞིན་དང་ངག་གི་རྣམ་པར་རིག་བྱེད་དེ་གཉིས་སོ། །གལ་ཏེ་དེ་ལྟར་ཡང་མངོན་སུམ་ཉིད་ཀྱི་འབྲེལ་བ་བྱེད་དོ། །དེས་ན་མངོན་སུམ་ལ་སྣང་བའི་དོན་ཉིད་ལ་བརྡ་བྱེད་པ་ཡིན་ནོ་ཞེ་ན། མངོན་སུམ་ལ་ཞེས་གསུངས་སོ། །དེ་ནི་མངོན་སུམ་ལ་སྣང་བའོ། །མིག་ལ་སོགས་པ་སྐྱེད་པའི་ཤེས་པ་ལ་སྣང་བའི་དང་ཚུལ་གང་ལ་ཡོད་པ་དེ་ལ་བརྡ་བྱེད་པ་ཡིན་ན་དེའི་ཚ་རང་གི་མཚན་ཉིད་དེ་ནི་ཐ་སྙད་ཀྱི་དུས་ན་སྒྲ་བརྗོད་པའི་རྗེས་སུ་སྣང་བར་འགྱུར་རོ། །སྣང་བ་ཉིད་དོ་སྙམ་ན། དེ་ལྟར་ནི་མ་ཡིན་ཏེ་ཞེས་གསུངས་སོ། །ཅིའི་ཕྱིར་མིན་ཞེ་ན། རང་ཉིད་ཅེས་གསུངས་སོ། །གལ་ཏེ་བརྡ་མ་བྱས་ཀྱང་དོན་རྟོགས་ན་ནི་དེའི་ཚེ་བརྡ་མེད་པར་རྟོགས་ཚོགས་པར་འགྱུར་རོ་དེ་ལྟར་ཡང་མ་ཡིན་ཏེ། འདི་ཉིད་རྣམ་པ་གཞན་དུ་བཤད་པའི་ཕྱིར་ཡང་ན་ཞེས་གསུངས་སོ། །དེ་ལྟ་བུ་ཉིད་ནི་བརྡ་མེད་པ་ཉིད་དོ། །འོན་ཏེ་གསལ་བར་སྣང་བ་རྣམ་པར་རྟོག་པ་མེད་པ་ལས་མི་གསལ་བར་སྣང་བའི་རྣམ་པར་རྟོག་པའི་ཤེས་པ་འདི་ནི་གཞན་ཁོ་ན་ཡིན་ནོ་ཞེ་ན། འདིར་རྣམ་པར་རྟོག་པ་ཞེས་བྱ་བའོ། །གལ་ཏེ་རྣམ་བར་རྟོག་པ་གཞན་ཡིན་ན། དེའི་ཚེ་དེའི་གཟུང་བ་ལྐོག་ཏུ་ཡིན་པར་འགྱུར་རོ། །དེ་ལྟ་ཡང་མ་ཡིན་ནོ་ཞེ་ན་སྟོན་པ་ནི་འདི་ལ་ཞེས་བྱ་བའོ། འོན་ཏེ་ཞེས་བྱ་བ་ལ་སོགས་པ་ནི་གཞན་དག་ཉིད་སངས་རྒྱས་པའི་དོགས་པ་བསྡུ་བའོ། །སྔར་ཡང་ཞེས་བྱ་བ་ནི་མངོན་སུམ་གྱི་དུས་ན་ཡང་ངོ༌། །དེ་ཞེས་བྱ་བ་ནི་རང་གི་མཚན་ཉིད་དོ། །འདིར་ཞེས་བྱ་བ་ནི་རྣམ་པར་རྟོག་པའི་དུས་ནའོ། འོན་ཏེ་ཁྱད་ཏེ་ཁྱད་བར་འདི་ཉིད་མེད་དོ་ཞེ་ན། མཐོང་བ་ཉིད་ནི་ཞེས་བྱ་བ་གསུངས་སོ། །རྐང་པ་ཐ་མ་རྣམ་པར་འགྲེལ་པ་ནི་ཤེས་པར་གྱུར་པ་ཉིད་ནི་ཞེས་བྱ་བའོ། །ཕ་རོལ་ཉིད་ཀྱི་དོགས་པ་བསུ་བ་ནི་རྣམ་ཕྱིར་ན་ཞེས་བྱ་བ་སྟེ། མི་
བདེན་པ་ཉིད་དོ་ཞེས་བྱ་བ་སྟེ། མི་བདེན་པ་ཉིད་དོ་ཞེས་འབྲེལ་ཏོ། །འདི་གཞན་གྱི་བརྗོད་བ་ནི་འདིར་ཚད་གང་ཞེས་བྱ་བའོ། །རྣམ་པར་རྟོག་པ་ཡང་ཡིན་ལ་བདེན་པ་ཉིད་ཀྱང་ཡིན་མོད་འགལ་བ་ཅི་ཡོད། །འོན་ཏེ་དེ་ལྟ་བུ་ཁོ་ནར་རྣམ་པར་རྟོག་པའི་ཤེས་པ་མི་བདེན་པར་བརྗོད་ན་རྣམ་པར་རྟག་པ་མེད་པའི་བློ་ལ་ཡང་ཞེས་སྨྲས་སོ། །མངོན་སུམ་དུ་བྱེད་པ་ཞེས་བྱ་བ་ནི། རྣམ་པར་རྟོག་པའི་ཤེས་པ་ཞེས་བྱ་བ་ལྷག་མ་ནིའོ། །འདི་ནི་ཞེས་བྱ་བ་ནི་བ་ལང་བ་ལང་སྦྲུལ་སྦྲུལ་ཞེས་བྱ་བ་ལ་སོགས་པའོ། །མངོན་སུམ་གྱི་ཡུལ་ཅན་ཡིན་ཡང་འདི་ནི་རྗེས་སུ་དཔག་པ་ཉིད་ཡིན་ནོ་ཞེ་ན། ཡུལ་གྱི་དབྱེ་བ་ཉིད་ལས་ཞེས་བྱ་བའོ། །འོན་ཏེ་མངོན་སུམ་གྱི་ཡུལ་གཅིག་ཁོ་ན་ལས་མངོན་སུམ་དང་རྗེས་སུ་དཔག་པ་ལས་འཇུག་པ་དེས་ན་ལྐོག་ཏུ་མ་གྱུར་པའི་ཡུལ་ཅན་ཡིན་ཡང་རྗེས་སུ་དཔག་པ་ཉིད་དོ་ཞེས་ན། ཚད་མ་ངེས་པ་མེད་པ་ཉིད་ཅེས་སྨྲས་སོ། །འདི་མ་གྲུབ་པའི་མཐའ་བརྗོད་པ་ནི་དེ་ཐམས་ཅད་ནི་ཞེས་བྱ་བའོ། །འཇུག་པ་མྱུར་ཕྱིར་ཞེས་བྱ་བ་ནི་འདི་ནི་གཞན་གྱི་ལུགས་ལ་ལྟོས་པ་ཁོ་ན་གྲུབ་པའི་མཐའི་ནང་དུ་སྨོས་པ་ཡིན་ནོ། །རང་གི་མཚན་ཉིད་ཅེས་བྱ་བ་ནི་བ་ལང་ལ་སོགས་པའི་རང་གི་མཚན་ཉིད་འཛིན་པ་ལྟུང་གྱུར་པའོ། །ཡི་གེའི་རྣམ་པ་ཞེས་བྱ་བ་ནི་བ་ལ་སོགས་པའི་ཡི་གེར་ཞེན་པའོ། །དེ་ལས་ཞེས་བྱ་བ་ནི་བ་ལང་ལ་སོགས་པར་སྣང་བ་ལས་སོ། །འོ་ན་མངོན་སུམ་གྱི་ཤེས་པ་གང་ཞིག་ཡིན་སྙམ་ན། བདུན་ན་ཞེས་གསུངས་སོ། །ཅི་ལྟར་ན་ཤེས་པ་འདི་ཉིད་མངོན་སུམ་ཡིན་གྱི། སྔ་མ་ཡིན་ཞེ་ན། དེ་ལ་ནི་ཞེས་བྱ་བ་སྟེ་སྔ་མ་ལའོ། །འདི་ཉིད་ཅེས་བྱ་བ་ནི་ཕྱི་མ་ཉིད་དོ། །གྲུབ་པའི་མཐའ་སྨྲ་བར་རྣམ་པར་དཔྱོད་པར་བྱེད་པ་ལ་ལྟོས་ནས་ནི་མེད་པ་ཁོ་ན་ཞེས་བྱ་བའོ། །སྣང་བ་ཐ་དད་པས་ཞེས་བྱ་བ་ནི་བ་ལ་སོགས་བའི་ཡི་གེར་ཞེན་པ་ནི་མི་གསལ་བར་སྣང་ལ། ཁྲ་བོ་ལ་སོགས་པ་ནི་གསལ་བར་སྣང་བའོ། །རེ་ཞིག་བ་ལ་སོགས་པའི་ཡི་གེ་རྣམ་པར་རྟོག་པ་དང༌། ཁྲོ་བོ་ལ་སོགས་པ་སྣང་བ་ཡིན་པ་ལྟ་བར་ཞོག་སྟེ། ཡི་གེ་བ་དང་ད་ལ་སོགས་པའི་རྣམ་པར་རྟོག་པ་རྣམས་ཀྱང་གཅིག་ཉིད་མ་ཡིན་ནོ་ཞེས་བསྟན་པའི་དོན་དུ་ཡེ་གེ་བ་ལ་སོགས་པའི་ཞེས་བྱ་བའི་ཁྱད་པར་གྱི་དངོས་པོ་གཅིག་ཉིད་མ་ཡིན་པའི་གཏན་ཚིགས་ཀྱི་ཚིག་བརྗོད་པ་ནི་རིམ་གྱིས་ཞེས་བྱ་བའོ། །རིམ་
གྱིས་འབྱུང་བ་དག་ལ་ནི་གཅིག་ཉིད་སྲིད་པ་མ་ཡིན་ནོ། །འོན་ཏེ་ཡི་གེ་བ་ལ་སོགས་པར་ཞེན་པ་གང་ཡིན་པ་ཉིད་རྣམ་པར་རྟོག་པ་མེད་པར་ཁྲོ་བོ་རྟོག་བར་བྱེད་པ་ཡིན་ནོ་ཞེ་ན། ཡི་གེར་ཞེས་བྱ་བའོ། །དེ་ཞེས་བྱ་བ་ཡི་གེར་སྣང་བ་མེད་ཀྱང་ངོ༌། །གཞན་གྱི་དེ་མེད་ཀྱང་ཞེས་སྨྲས་ཏེ། ཡི་གེར་སྣང་བ་མེད་ཀྱང་ངོ༌། །རང་བཞིན་དེ་ཉིད་དུ་སྣང་བ་ནི་ངེས་པ་ཡིན་ནོ་ཞེ་ན་སྔོན་གྱི་ཞེས་གསུངས་སོ། །གཞན་ཞེས་བྱ་བ་ལ་སྔོན་སྣང་བ་ངེས་པ་ཞེས་བྱ་བ་དེ་ལྟར་དེ་སྔོན་སྣང་བ་དེ་དང་གཅིག་ཏུ་ངེས་པར་བྱ་བ་ཉིད་ངེས་པའི་སྒྲས་བརྗོད་པར་བྱ་བ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དོན་དམ་པར་ཤེས་པ་དེ་གཉིས་གཅིག་པ་ཉིད་མ་ཡིན་ན། །དེའི་ཚེ་ཇི་ལྟར་བློ་དམན་པ་རྣམས་གཅིག་ཏུ་ངེས་པ་ཡིན་ཞེས་བསམས་ནས་སྨྲས་པ་ནི་འོ་ན་ཞེས་བྱ་བའོ། །འབྲས་བུ་ཞེས་བྱ་བ་ནི་གྲུབ་པའི་མཐའོ། །གལ་ཏེ་དེ་དག་ཐ་དད་པ་ཁོ་ན་ཡིན་ན། དེའི་ཚེ་འོ་ན་རིམ་གྱིས་ཞེས་བྱ་བའོ། །རིམ་གྱིས་འཛིན་པར་ངེས་ན་མ་ཡིན་པ་ཞེས་བྱ་བ་ནི། འོན་ཀྱང་དུས་གཅིག་ཏུ་འཛིན་པར་ངེས་པ་ཡིན་ནོ་ཁྱེད་ཀྱི་ལྟར་ན་ནི་འཛིན་པ་འབའ་ཞིག་ཁོ་ན་རེམ་གྱེས་ཡིན་ལ། ལྷག་པར་ཞེན་པ་ནི་ཅིག་ཅར་ཁོ་ན་ཡིན་ནོ། །དེས་ན་ཇི་ལྟར་ཁྱེད་ཀྱི་འདོད་པས་དེ་དག་ཐ་དད་ཀྱང་ཅིག་ཅར་ལྷག་པར་ཞེན་པར་བྱེད་པ་ཡིན་པ་དེ་བཞིན་དུ། །ཁོ་བོ་ཅག་གི་ལྟར་ན་འཛིན་པ་ཡིན་པར་འགྱུར་རོ་ཞེས་བསམས་པའོ། །རྣམ་པར་རྟོག་པ་དེ་ལའོ། །དེ་ལ་ཡང་ཞེས་བྱ་བ་ནི་ཕ་རོལ་ཉིད་སངས་རྒྱས་བའི་དོགས་པ་བསུ་བའོ། །དེ་ཉིད་ཀྱིས་སྨྲས་བ་ནི་འོན་ནི་ཞེས་བྱ་བའོ། །ཞུགས་པས་ཞེས་བྱ་བ་ནི་ཆགས་པས་སོ། །རྣམ་པར་རྟོག་པ་དེས་སོ། །འདིར་གྲུབ་པའི་མཐའ་སྨྲ་བ་ཡུལ་མེད་པ་ཉིད་དུ་དོགས་ནས་བར་ཆད་འགོག་པར་བྱེད་པར་བྱེད་པ་ནི་མ་ཡིན་ཏེ་ཞེས་བྱ་བའོ། །གཞན་ཡང་ཞེས་བྱ་བ་ལ་སོགས་པས་ནི་དེའི་ལུགས་ཉིད་ཀྱིས་གྲུབ་པའི་མཐའ་བརྗོད་པའོ། །གཞན་གྱི་ལྟར་ན་རིགས་པ་པའི་ལྟར་ན་ཡོད་དོ། །རིགས་ནི་ཐ་དད་པའི་རྣམ་པར་རྟོག་ཚེ་ནི་བརྡར་རོ། །ཇི་ལྟར་བ་ལང་གི་མཐོང་བ་རྒྱུན་འཆད་པ་མིན་ཞེས་བྱ་བ་ནི་ལྟོས་པའོ། །ཕྱེད་སྔ་མ་འཆད་པ་ནི་མངོན་སུམ་ཞེས་བྱ་བའོ། །གཞན་གྱི་ཞེས་བྱ་བ་ནི་རིགས་པ་ཅན་གྱི་ལྟར་ནའམ། ཡང་ན་མཐོང་བའི་དོན་གྱི་མངོན་སུམ་གྱི་ཤེས་པའི་རང་བཞིན་ཉིད་མ་ཡིན་ནོ། །དེ་ལ་ཞེས་བྱ་བ་ནི་རིགས་མི་མཐུན་པའི་རྣམ་པར་རྟོག་པའི་དུས་ནའོ། །རིགས་མི་
མཐུན་པའི་རྣམ་པར་རྟོག་པ་ལས་སྔོན་རོལ་གྱི་མཐོང་བ་གང་ཡིན་པ་དང༌། དེ་བཞིན་དུས་ཀྱི་འབྱུང་བའི་མཐོང་བ་གང་ཡིན་པ་དེ་ཉིད་ཀྱི་དངོས་པོ་ནི་སྟོབས་དང་ལྡན་པས་མཐོང་བ་དེ་གཉིས་ཀྱི་བར་དུ་ཞུགས་པ་མཐོང་བ་མ་ཡིན་པ་རིགས་མི་མཐུན་པའི་རྣམ་པར་སྒྲིབ་པའོ། །མི་སྲིད་དོ་ཞེས་བྱ་བ་ནི་རིགས་མཐུན་པའི་རྣམ་པར་རྟོག་པའི་དུས་སམ། རིགས་མི་མཐུན་པའི་རྣམ་པར་རྟོག་པའི་དུས་སུ་ཡང་བར་དུ་གཅོད་པ་ནི་སྲིད་པ་མ་ཡིན་ནོ། །བར་ཆོད་རྟོགས་པར་ཐལ་བའི་ཕྱིར་རོ། །བར་ཆོད་ཡོད་ཀྱང་མྱུར་བའི་ཕྱིར་བར་དུ་མཆོད་པར་རྟོགས་པ་ཡིན་ནོ་ཞེ་ན། གྱུར་པའི་ཕྱིར་ཞེས་བྱ་བའོ། །ཡི་གེ་དག་ཀྱང་ཞེས་བྱ་བ་ནི་སར་དང་ས་ར་ཞེས་བྱ་བ་ལ་སོགས་པར་རོ། །རིམ་དང་ལྡན་པ་ལ་ཡང་ཞེས་བྱ་བ་ནི་བར་ཆོད་ཡོད་པ་ལ་ཡང་ངོ༌། །དེ་ལ་ནི་མཚོ་དང་རོ་ཞེས་བྱ་བ་ལ་སོགས་པར་རོ། །དུས་གཅིག་ཏུ་ཐོས་པ་མ་ཡིན་པ་ནི་རིམ་གྱིས་ཐོས་པའོ། །འདིར་ཞེས་བྱ་བ་ནི་གྲུབ་པའི་མཐའ་སྟེ། རིགས་མི་མཐུན་པའི་རྟོག་པ་དང་རྟོག་པ་མེད་པ་གཉིས་ལའོ། །གཞན་གྱིས་སྨྲས་པ་རྡུལ་གྱི་ཚད་ལ་སོགས་པ་དང་ལྡན་པའི་མཚན་ཉིད་ཅན་ཡིན་གྱི་དབང་པོ་དག་དུས་གཅིག་ཏུ་འཇུག་པ་མེད་པའི་ཕྱིར་རོ། །དེ་ལས་བྱུང་བའི་ཤེས་པ་རིམ་གྱིས་འབྱུང་བ་ཡིན་ཏེ། དེས་ན་མྱུར་བ་ཉིད་ལས་དུས་གཅིག་པ་མངོན་པར་རློམ་པ་ཡིན་ནོ་ཞེས་བྱ་བའི་དོན་ཏོ། །འདི་ལས་བརྗོད་པ་ནི་འདི་ནི་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་མྱུར་པ་མེད་ནའོ། །རིམ་གྱིས་སྐྱེ་བ་དག་ལ་གལ་ཏེ་མྱུར་བ་ཡང་མེད་ན་ནི། །དེའི་ཚེ་དུས་གཅིག་ཏུ་མངོན་པར་ཞེན་པར་མི་འགྱུར་རོ་ཞེས་མནོས་པའོ། །མཆོག་ཏུ་གྱུར་པ་ཞེས་བྱ་བ་ནི་ཁྱད་པར་དུ་འཕགས་པའོ། །ཡི་གེ་རྣམ་པ་གཅིག་ཐོས་པའི་རྒྱུ་མགྱོགས་པ་ཉིད་མེད་དོ་ཞས་བརྗོད་པ་གང་ཡིན་པ་དེ་ལ་བརྗོད་པ་ནི་དབང་པོའི་ཉེས་པ་ལྔ་པོ་རྣམས་ཀྱིས་ཆོས་ཀྱང་ཆོད་པ་མེད་པ་དེ་བཞིན་དུ་སྣང་བའི་རྣམ་པར་རྟོག་པའི་བློ་གང་ཡིན་པ་དེ་ཆོད་པར་སྣང་དོ་ཞེས་བྱ་བ་ནི་ངོ་མཚར་ཏེ། ཡ་མཚན་ཆེའོ། །འདིར་ཡང་ཆོད་པར་སྣང་བ་ཉིད་དུ་འགྱུར་རོ་ཞེས་བྱ་བའི་དོན་ཏོ། །ཅིའི་ཕྱིར་ཞ་ན། མིང་སྟེ་སྒྲའི་མཐར་ཐུག་པའི་སྐད་ཅིག་གང་ཡིན་པ་དེ་དང་འདྲེ་བའི་ཕྱིར་ཏེ་འདུ་བའི་ཕྱིར་རོ། །དེ་ལྟར་ལྷག་པར་ཞེན་པ་ནི་ཅིག་ཅར་བ་ཉིད་དུ་ཞེན་པའོ། །ཇི་ལྟར་མི་འགྱུར་བྱ་བ་ནི་ཙག་ཅར་བ་ཉིད་དུ་ལྷག་པར་ཞེན་པར་ཞེས་འབྲེལ་ཏོ། །དེ་བས་
ཀྱང་ཞེས་བྱ་བ་ནི་ས་ར་དང་ས་ར་ཞེས་བྱ་བས་ཀྱང་ངོ༌། །དྲི་ཞིམ་པའི་ཚིག་ནི་དྲི་ཉེ་བའོ། །བལྟ་ན་སྡུག་བའི་ན་ཆུང་ནི་གཟུགས་སོ། །ཁའི་རོ་མྱང་བ་ཞེས་བྱ་བ་ནི་རེག་བྱ་དང་རོ་དག་གོ །དེར་ནི་ཞེས་བྱ་བ་ནི་རྣམ་པར་ཤེས་པ་དྲུག་སྐྱེ་བའི་དུས་ནའོ། །དེ་འདྲ་བ་ཞེས་བྱ་བ་ནི་ཡི་གེ་རྣམས་ཀྱི་མགྱོགས་པ་ཅི་འདྲ་བ་དེ་དང་འདྲ་བའོ། །ཡི་གེ་རྣམས་ལ་ཡང་ཞེས་བྱ་བ་ནི་རོ་དང་མཚོ་ཞེས་བྱ་བ་རྣམས་ལའོ། །ས་ར་ས་ར་ཞེས་བྱ་བ་ལ་སོགས་པའི་ཡི་གེའི་ཡུལ་ཅན་སྐད་ཅིག་མའི་ཤེས་པ་གང་ཡིན་པ་དེས་བར་དུ་ཆོད་པ་དེར་མགྱོགས་པས་ཅིག་ཅར་ཞེན་པ་བསྒྲུབ་པར་ཇི་ལྟར་མི་འགྱུར་ཏེ། འགྱུར་བ་ཁོ་ནའོ་ཞེས་བྱ་བའི་དོན་ཏོ། ཁྱད་མེད་ན་ཞེས་བྱ་བ་ནི་ཐམས་ཅད་ལའོ། །དེའི་ཚེ་དོན་ཉེ་བ་ལ་ཡང་ཞེས་བྱ་བ་ཚོགས་པ་ལ་ཡོང་ངོ༌། །ཡུལ་གཞན་ལ་ཆགས་པ་གང་ཡིན་པ་དེས་ནུས་པ་ཉམས་པར་འགྱུར་བ་གང་ཡིན་པ་དེ་ཡོད་པར་ཡིན་ན་ནི་རྐྱེན་དུ་མི་འགྱུར་ཏེ་སྐྱེད་བྱེད་དུ་མི་འགྱུར་རོ། །གང་གི་ཞེ་ན་ཉེ་བར་གནས་པ་ཐམས་ཅད་ཀྱི་རྣམ་པར་ཤེས་པ་བསྐྱེད་པའིའོ། །གཞན་གྱི་མཚུངས་པ་མ་ཡིན་ཏེ་ཞེས་སྨྲས་སོ། །ཡིད་ཀྱི་ཞེས་བྱ་བ་ནི་དབང་བའིའོ། །འདི་ལ་བརྗོད་པ་ནི་དེ་ལྟ་ན་ཡང་ཞེས་བྱ་བའོ། །འདི་ནི་ཡིད་ཁས་བླངས་ཏེ་བརྗོད་པ་ཡིན་ན་ནི་དེ་ཉིད་ཀྱང་མི་སྲིད་དོ་ཞེས་བརྗོད་པ་ནི་རྣམ་པར་ཤེས་པ་སྔ་མ་ལས་མ་རྟོགས་པའི་ཞེས་བྱ་བའོ། །མཚམས་སྦྱར་བས་ཞེས་བྱ་བས་ནི་སྔ་ཕྱི་མཚམས་སྦྱར་བས་ནི་མ་ཡིན་ཏེ། མི་གསལ་བར་སྣང་བ་ཐོབ་པའི་ཕྱིར་རོ། །མགལ་མེ་ལ་སོགས་པ་མྱུར་དུ་འཇུག་པའི་རྗེས་སུ་འགྲོ་བ་འཁོར་བའི་མཚན་ཉིད་གང་ཡིན་པ་དེས་གནོད་པ་གང་ལ་ཡོད་པའི་མིག་གང་ཡིན་པ་དེ་ལ་དེ་སྐད་ཅེས་བརྗོད་དོ། །མཐོང་བ་སྟེ་ཤེས་པ་རྣམས་མཚམས་སྦྱོར་བ་ནི་མ་ཡིན་ནོ། །ད་ནི་རང་ཉིད་བློ་ཅིག་ཅར་བ་ཉིད་དུ་བསྒྲུབ་པའི་དོན་དུ་གཞན་གྱི་ཚུལ་ཉེ་བར་འགོད་པ་ནི་ཅི་སྟེ་ཡང་ཞེས་བྱ་བའོ། །གྲུབ་པའི་མཐའ་སྨྲ་བས་གསུངས་པ་འོ་ན་ནི་ཞེས་བྱ་བའོ། །ཅིག་ཅར་སྣང་བ་ལ་ཡང་ཚད་མ་ཅི་ཡོད་སྙམ་ན། ཅིག་ཅར་ཞེས་གསུངས་སོ། །དེ་ཞེས་བྱ་བ་ནི་ཅིག་ཅར་སྣང་བའོ། །དེ་ལྟར་ཞེས་བྱ་བ་ནི་འཁྲུལ་པའི་མཚན་ཉིད་དུའོ། །གཞན་གྱི་འདོད་པ་ནི་བྲམ་བྲེའི་འདོད་པའོ། །སོགས་པའི་སྒྲས་ནི་དོན་བརྗོད་པ་ན་ཉམས་སུ་མྱོང་བའི་རྣམས་པས་འཇུག་པ་ཞེས་བྱ་བའོ། །དཔེ་
ཉིད་བསྒྲུབ་པ་ནི་བྱིས་པའི་ཞེས་བྱ་བའོ། །དེ་སྐད་སྨྲ་བའི་བྲམ་ཟེ་དེ་དག་གི་ལུགས་ལྟར་ན་མངོན་སུམ་ཁོ་ནར་འགྱུར་གྱི་རྣམ་པར་རྟོག་པ་མ་ཡིན་ཏེ། བརྡ་མེད་པའི་ཕྱིར་རོ་ཞེས་དོགས་པའོ། །འགྱུར་མོད་ཅེས་བྱ་བ་ལ་སོགས་པས་གཞན་གྱི་ཚིག་གི་དོགས་པ་བསུ་ནས་བརྗོད་པ་ནི་མ་ཡིན་ཏེ་ཞེས་བྱ་བའོ། །ཅི་སྟེ་ཞེས་བྱ་བ་ནི་དོགས་པའོ། །སྔ་མ་དང་ཕྱི་མར་རྟོག་པ་ཞེས་རྗེས་སུ་འཇུག་གོ །ལན་ནི་ཕྱིས་ཀྱང་ཞེས་བྱ་བའོ། །ཐབས་མེད་པ་ཉིད་བསྒྲུབ་པ་ནི་བརྡ་འཛིན་པའི་ཞེས་བྱ་བའོ། །དེ་ནི་ཞེས་བྱ་བ་རྣམ་པར་རྟོག་པའོ། །དེས་ན་ཞེས་བྱ་བ་ནི་རྣམ་པར་དཔྱོད་པའི་ཡིད་བརྡ་འཛིན་པའི་ཕྱིར་ཕྱིས་ཞེས་བྱ་བ་རྟོག་པའི་གནས་སྐབས་ནའོ། །གནོད་པར་བྱེད་པ་ལ་གཞན་ཡང་བརྗོད་པ་ནི་བྱིས་པའི་ཞེས་བྱ་བའོ། །འབྲེལ་པ་མེད་པའི་ཕྱིར་རོ་ཞེས་བྱ་བ་ནི། གལ་ཏེ་དབང་པོའི་ཤེས་པས་ཀྱང་རྡ་འཛིན་ནུས་ན་དེ་ལ་གནོད་པར་བྱེད་པ་ཅི་ཡོད་ཅེས་བྱ་བ་དགོངས་པའོ། །ཐམས་ཅད་དུ་ཞེས་བྱ་བ་ནི་ཤེད་བྱེད་ལ་ཡང་ངོ༌། །དེ་ལྟར་ནི་རྣམ་པར་རྟོག་པ་མེད་པར་རོ། །བྱིས་པ་ཁོ་ནའི་རྣམ་པར་རྟོག་པ་མེད་པར་འགྱུར་གྱི། །གཞན་གྱི་ནི་རྣམ་པར་རྟོག་པ་དང་བཅས་པར་འགྱུར་རོ་ཞེས་བྱ་བའི་དོན་ཏོ། །འོན་ཏེ་དཔེ་དེས་གཞན་ཡང་རྟོག་པ་མེད་པ་ཉིད་དུ་འགྲུབ་པོ་སྙམ་ན། གནོད་པར་བྱེད་པའི་ཞེས་གསུངས་སོ། །གནོད་བྱེད་ཀྱི་ཚད་མས་འབྲེལ་པ་གྲུབ་པ་སྟེ། ངེས་པ་གང་ཡིན་པ་དེ་མེད་པར་རོ། །ཅི་སྟེ་གཞན་དོགས་པར་བྱས་ནས་འདི་ཞེས་བྱ་བས་ལན་འདེབས་ཏེ། དབང་པོའི་ཤེས་པ་འདིའོ། །གཞན་དག་མངོན་དུ་བྱེད་པས་སྔ་ཕྱི་འཛིན་པས་སྟོང་པར་སྟོན་པ་ནི་མངོན་སུམ་དུ་ཞེས་བྱ་བའོ། །དོན་མེད་པ་ཉིད་སྟོན་པ་ནི་རྟོག་པ་མེད་པ་ཉིད་ནི་ཞེས་བྱ་བྲོ། །དེའི་རྗེས་སུ་འབྲངས་ནས་ཞེས་བྱ་བ་ནི་མངོན་སུམ་གྱི་རྗེས་སུ་འབྲངས་ནས་སོ། །ཅི་སྟེ་ཞེས་བྱ་བ་ལ་སོགས་པ་ནི་གཞན་དག་བྱིས་པའི་རྣམ་པར་ཤེས་པ་ཉིད་རྣམ་པར་རྟོག་པ་མེད་པ་ཡིན་པར་མངོན་དུ་བྱེད་པས་བསྒྲུབ་པར་བྱ་བ་ཡིན་གྱི། གཞན་ནི་མ་ཡིན་པ་དེས་ན་དབང་པོ་ལས་སྐྱེས་པ་ལ་སོགས་པ་དོན་མེད་པར་མི་འགྱུར་རོ་ཞེས་སྟོན་པའོ། །འདིར་ཡང་ཞེས་བྱ་བ་ནི་ཤེད་བྱེད་བ་ལ་ཡང༌། །སྐལ་བ་ལ་ཞེས་བྱ་བ་ནི་སྐབས་པའི་ཡུལ་ཅན་གྱི་རྣམ་པར་རྟོག་པ་ལའོ། །གཞན་ལ་ཞེས་བྱ་བ་ནི་རྣམ་པར་རྟོག་པ་ལའོ། །ལྐོག་ཏུ་མ་གྱུར་པའི་ཡུལ་ཅན་ཡིན་པའི་ཕྱིར་ཞེས་བྱ་བ་ནི་མངོན་དུ་བྱེད་པ་ཉིད་ཡིན་པའི་ཕྱིར་རོ། །
འོན་ཁྱོད་ཀྱང་མངོན་དུ་བྱེད་པ་ཉིད་ལ་རྣམ་པར་རྟོག་པ་མེད་པ་འགྲུབ་པར་འདོད་པ་ཉིད་མ་ཡིན་ནམ། །དེས་ན་ཚིག་གང་གིས་རྟོག་པ་མེད་པ་འགྲུབ་པར་བྱ་བའི་དོན་དུ་མངོན་དུ་བྱེད་པ་སྒྲུབ་པར་བྱེད་པར་སློབ་དཔོན་གྱིས་གསུངས་ཤེ་ན། མངོན་སུམ་དུ་བྱེད་པ་དེ་ནི་ཞེས་གསུངས་སོ། །བརྗོད་དོ་ཞེས་བྱ་བ་ནི། ཉེ་བར་མཚོན་པར་བྱེད་པའོ། །རྣམ་པར་རྟོག་པ་མེད་པར་གྲུབ་པར་བྱ་བ་ལ་གཏན་ཚིགས་སྔོན་དུ་བྱེད་པ་ཉིད་གང་ཡིན་ཞེ་ན། རྣམ་པར་རྟོག་པ་ཉིད་ནི་ཞེས་སྒྲུབ་པར་བྱེད་པའི་དངོས་པོ་དགག་པར་བྱེད་པ་ནི་རྟོག་པ་དང་བཅས་པ་ཡིན་ལ། དེ་ཡང་འགལ་བ་ཡང་རྟོག་བ་མེད་པ་ཡིན་ཞིང་དེས་ནི་མངོན་དུ་བྱེད་པ་ཁྱབ་པ་ཡིན་ཏེ་དེས་ན་འགལ་པས་ཁྱབ་པ་དམིགས་པ་ཡིན་ནོ། །རྣམ་པ་གཞན་གྱིས་ཀྱང་བསྒྲུབ་པར་བྱ་བ་དང༌། སྒྲུབ་པར་བྱེད་པའི་དངོས་པོ་གསུངས་པ་ནི་ཡང་ན་ཞེས་བྱ་བའོ། །དེ་ལས་ཀྱང་ཞེས་བྱ་བ་ནི་མངོན་དུ་བྱེད་པ་ལས་ཀྱང་ངོ༌། །འཁྲུལ་པ་ཡིན་ན་མངོན་དུ་བྱེད་པ་ཡིན་ནོ། །དེས་ན་འཁྲུལ་པ་ཟླ་བ་གཉིས་སུ་སྣང་བ་རྣམ་པར་རྟོག་པ་མེད་པ་ཡིན་ཡང་མངོན་དུ་བྱེད་པ་མ་ཡིན་པས་དེ་མངོན་སུམ་དུ་གལ་འགྱུར། གལ་ཏེ་ཞེས་བྱ་བ་ལ་སོགས་པ་ནི་རྣམ་པར་རྟོག་པ་དང་བཅས་པ་ཐམས་ཅད་ནི་འཁྲུལ་པ་ཉིད་ཡིན་པའི་ཕྱིར་སྤང་བར་འགྱུར་རོ་ཞེས་བསམས་པའོ། །གལ་ཏེ་འདིའི་འདོད་པས་མ་འཁྲུལ་པ་ཞེས་པའི་ཚིག་མི་སླུ་བའི་དོན་ཡིན་པ་དེ་ལྟ་ན་ཡང་སློབ་དཔོན་ཆོས་མཆོག་གི་ལུགས་ཀྱིས་གྲུབ་པའི་མཐའ་གསུངས་པ་ནི་མ་ཡིན་ཏེ་ཞེས་བྱའོ། །གང་གིས་གཞན་གྱི་ལུགས་ལ་ལྟོས་པའི་མཚན་ཉིད་ལ་མ་འགྲུལ་བ་ཉིད་མེད་པ་ཡིན་ཏེ། མངོན་སུམ་རྟོག་པ་དང་བྲལ་བ་ཞེས་བྱ་བ་ཙམ་ཞིག་གསུངས་པའི་ཕྱིར་རོ། །དེས་ནམ་འཁྲུལ་བའི་ཚིག་མེད་པ་ཉིད་ཀྱིས་རྣམ་པར་རྟོག་པ་དང་བཅས་པ་ཇི་ལྟར་གཅོད་སྙམ་ན། འཁྲུལ་པ་མེད་པ་ཉིད་དུ་ཞེས་གསུངས་སོ། །སློབ་དཔོན་ཕྱོགས་ཀྱི་གླང་པོས་སོ། །དམིགས་ཀྱིས་བསལ་བ་ཞེས་བྱ་བ་ནི། མངོན་སུམ་ལྟར་སྣང་རབ་རིབ་བཅས་ཞེས་དམིགས་ཀྱི་བསལ་བའི་སྒོ་ནས་སོ། །དེ་ལྟར་ན་རེ་ཞིག་རྣམ་པར་རྟོག་པ་མེད་བའི་ཚིག་གིས་མངོན་དུ་བྱེད་པ་ཉིད་ཉིད་ཉེ་བར་མཚོན་ནས་བསྒྲུབ་པར་བྱ་བ་དང༌། སྒྲུབ་པར་བྱེད་པའི་དངོས་པོ་བསྟན་པ་ཡིན་ནོ། །དེ་ཉིད་རྣམ་པ་གཞན་གྱི་སྒོ་ནས་སམ་མངོན་དུ་བྱེད་པ་ཉིད་བརྗོད་པ་ཡིན་ནོ་ཞེས་སྟོན་པས་གང་ན་ཞེས་གསུངས་སོ། །དབང་
ལ་བརྟེན་པ་ཉིད་དེས་ནའོ། །ཡང་ན་ཞེས་བྱ་བ་ལ་སོགས་པ་ནི་མངོན་སུམ་གྱི་ཚིག་ཉིད་ཀྱིས་མངོན་དུ་བྱེད་པ་ཉིད་བརྗོད་པ་ཡིན་ནོ་ཞེས་གསུངས་པ་ཡིན་ནོ། །དེས་ན་བྱ་བ་ནི་མངོན་སུམ་ཉིད་ཀྱིས་ནའོ། །ཡང་ན་ཞེས་བྱ་བ་ལ་སོགས་པས་ནི་རྣམ་པར་རྟོག་པ་མེད་པས་ཞེས་བྱ་བ་འདི་འབའ་ཞིག་ཉིད་རྣལ་འབྱོར་སྤྱོད་པ་པའི་ལུགས་ཀྱིས་མཚན་ཉིད་དུ་བརྗོད་དུ་བརྗོད་པ་ཡིན་ནོ་ཞེས་གསུངས་པ་ཡིན་ནོ། །འདིར་བརྩད་པ་ནི་འོ་ན་ཞེས་བྱ་བའོ། །མངོན་སུམ་དུ་བྱེད་པ་ཞེས་བྱ་བ་ནི་ལན་བརྗོད་པའོ། །གལ་ཏེ་འགའ་ཞིག་འཁྲུལ་པས་མངོན་སུམ་ཡིན་པ་ཡོད་ན་ནི། །དེ་གཅད་པ་ཞིག་ན་དེ་ལྟ་བུ་ནི་སྲིད་པ་མ་ཡིན་ནོ་ཞེས་དགོངས་པའོ། །འོ་ན་ཕྱི་རོལ་ལ་ཡང་དེ་མངོན་སུམ་ཇི་ལྟར་མི་འགྱུར་ཞེ་ན། སྣང་བའི་རང་བཞིན་ལས་ཞེས་གསུངས་སོ། །འདིར་ནི་ཕྱི་རོལ་པ་ནི་ཚང་མ་ཡིན་ཏེ། རྟོག་པའི་རང་བཞིན་ཡིན་པའི་ཕྱིར་ཞེས་བསྟན་ཏོ། འཁྲུལ་པ་ཉིད་འདོད་པའི་ཤེས་པ་ནི་ཡིད་ཀྱི་འཁྲུལ་པ་གང་ཡིན་པ་དེའི་ཡུལ་ཅན་ཡིན་པའི་ཕྱིར་འཁྲུལ་པ་ཉིད་ཡིན་གྱི་དོན་དམ་པར་དེ་ཡོད་པ་མ་ཡིན་ནོ། །གཞན་ལ་ཞེས་བྱ་བ་ལ་སོགས་པས་རྣམ་པ་གཞན་གྱི་རྣམ་པར་རྟོག་པ་མེད་པ་ཉིད་དུ་གྲུབ་པ་བརྗོད་པ་ཡིན་ནོ། །ཐམས་ཅད་དུ་ཡང་སྦྱོར་བ་མི་སྲིད་དོ་ཞེས་སྟོན་པ་ནི་འདི་ལྟར་ཞེས་བྱ་བའོ། །གྱུར་དུ་ཆུག་ཀྱང་ཞེས་བྱ་བ་ནི་སྦྱོར་བ་ཞེས་འབྲེལ་ཏོ། །འདི་ཞེས་བྱ་བ་ནི་སོ་སོར་སྣང་བའོ། །འདི་ཉིད་བརྗོད་པ་ནི་རིགས་དང་ཞེས་བྱ་བའོ། །དེ་ཉིད་ཀྱི་ཕྱིར་ནི་ཞེས་བྱ་བ་ནི་ཐ་དད་པར་སྣང་བ་མེད་པ་ཉིད་ཀྱི་ཕྱིར་རོ། །དེ་ལྟར་འགྱུར་རོ་ཞེས་བྱ་བ་ནི་འདྲེས་པར་སྣང་བར་རོ། །རང་བཞིན་ཐ་དད་པ་ཁོ་ནའི་ཕྱིར་སྣང་བ་ཐ་དད་པར་འགྱུར་བ་ཡིན་ཏེ། དེ་ལྟར་ཞེས་བྱ་བ་ནི་ཐ་དད་པར་རོ། །དེ་ལ་ཞེས་བྱ་བ་ནི་ཡུལ་དང་དུས་ཐ་དད་པ་ལའོ། །རླུང་དང་ཉི་མ་དག་ཅེས་བྱ་བ་ནི་ཚད་མས་གྲུབ་པའི་དཔེའོ། །ཐམས་ཅད་དུ་ཞེས་བྱ་བ་ནི་སྤྱི་ལ་སོགས་པ་གཅིག་ཏུ་མངོན་པར་འདོད་པ་དག་ལ་ཡང་ངོ༌། །དེ་ལྟར་ཞེས་བྱ་བ་ནི་གཅིག་ཏུ་འདྲེས་པར་རོ། །དུ་པའི་སྟོབས་ཀྱིས་ཡོན་ཏན་དང་བྱ་བ་ལ་སོགས་པ་རྣམས་ཐ་དད་པ་མི་སྣང་བ་ཡིན་ནོ་ཞེས་རྟོག་པར་ཐལ་བར་འགྱུར་རོ། །ཐམས་ཅད་ཅེས་བྱ་བ་ནི་ཆུ་ལ་སོགས་པར་སྣང་ཡང་ཆུ་ཙམ་གྱི་སྒྲུབ་བྱེད་དུ་མི་འགྱུར་ཏེ། མེ་ལ་སོགས་པ་དག་ཀྱང་གཅིག་ཏུ་འདྲེས་ནས་སྣང་བའི་ཕྱིར་རོ། །གལ་ཏེ་བ་ལང་
ཞེས་རྟོགས་པ་ལ་དེའི་ཁྱད་པར་གང་ཡིན་ཞེས་དྲིས་པ་ན། དབྱུག་པ་བཞིན་དུ་ཐ་དད་པར་ཅི་སྟེ་མི་བརྗོད་སྙམ་ན། དེ་ནི་འདི་ཡིན་ནོ་ཞེས་བྱ་བའོ། །གཞན་དག་དཔེ་ཡང་མི་འཐད་པར་བྱེད་པ་ནི་དབྱུག་པ་ཅན་བྱའོ་ཞེས་དོགས་པ་བསུ་བ་ནི་དབྱུག་པ་ཞེས་བྱ་བའོ། །གལ་ཏེ་དབྱུག་པ་མི་སྣང་ན་དེའི་ཚེ་སྔར་ཉིད་དབྱུག་པ་ཅན་དུ་ཅི་སྟེ་མི་རྟོགས་ཤེ་ན། གཞན་ལན་འདེབས་པ་ནི་མ་ཡིན་ཏེ་ཞེས་བྱ་བའོ། །གལ་ཏེ་ཚོགས་པ་ཡོད་ཀྱང་ཅི་དེ་ཁྱད་པར་ཅན་ཉིད་དོན་གཞན་ཁོ་ན་ཡིན་ནམ་ཞེ་ན། སྐྱེས་ལ་ཞེས་གསུངས་སོ། །ཁྱད་པར་ཅན་དེ་རྟོགས་པ་མེད་པའི་ཕྱིར་རོ། །གལ་ཏེ་དེར་དབྱིག་པ་ཡང་སྣང་ན་ཅི་ཉེས་ཤེ་ན། གལ་ཏེ་དབྱིག་པ་ཡང་ཞེས་བྱ་བའོ། །གྲུབ་པའི་མཐའ་གསུངས་པ་ནི། །དེ་ཐམས་ཅད་ནི་ཞེས་བྱ་བའོ། །གལ་ཏེ་སྐྱེས་བུ་འགའ་ཞིག་སྣང་ན་ནི་དེའི་ཚེ་གང་ཞིག་རྟོགས་པ་མ་ཡིན་པ་དེ་ལ་དེ་སྐད་ཅེས་བརྗོད་དེ་དེ་ནི་ཁྱད་པར་ཉིད་དུ་མི་འགྱུར་ཏེ། རྟོག་པ་ཁོ་ན་ཁྱད་པར་ཡིན་པའི་ཕྱིར། ཁྱད་པར་མ་བཟུང་བར་ཁྱད་པར་ཅན་བློ་མི་སྐྱེའོ་ཞེས་བྱ་བ་ལུགས་ཡིན་པའི་ཕྱིར་རོ། །གལ་ཏེ་དབྱིག་པ་ལ་སོགས་པའི་ཁྱད་པར་རྟོགས་པ་ཁོ་ནའོ་ཞེ་ན། དེ་སྟེ་ཞེས་བྱ་བ་ལ་སོགས་པའོ། །འདིས་ནི་གང་དུ་ཡང་ཇི་ལྟར་ཡང་ཁྱད་པར་ཅན་གྱི་དངོས་པོ་མི་འཐད་དོ་ཞེས་བསྟན་པ་ཡིན་ནོ། །འབའ་ཞིག་ལ་ཞེས་བྱ་བ་ནི་སྐྱེས་བུ་ལའོ། །དབྱིག་པ་ཅན་ཞེས་བྱ་བའི་རྟོགས་པ་ལ་ཡང་ཁྱད་པར་ཅན་ཉིད་དུ་རྟོགས་པར་མི་འགྱུར་ཏེ། ཁྱད་པར་མི་སྣང་ན་སྐྱེས་བུ་འབའ་ཞིག་སྣང་བའི་ཕྱིར་རོ། །འོན་ཏེ་གང་གིས་དེ་ལ་རྟོགས་ན། ཁྱད་པར་ཅན་ཉིད་དུ་རྟོགས་པར་མི་འགྱུར་བ་དབྱིག་པ་ནི་ཁྱད་པར་ཅན་མ་ཡིན་ནོ། །འོན་ཀྱང་ཁྱད་པར་ཅན་གྱི་བློའི་ཡུལ་གང་ཡིན་པའི་དངོས་པོ་དེ་ཉིད་ཡིན་ནོ་ཞེས་སྟོན་པ་ནི་གལ་ཏེ་ཞེས་བྱ་བའོ། །གྲུབ་པའི་མཐའ་སྨྲ་བས་འདི་ལ་བརྗོད་པ་ནི་ཞེས་རྣམ་པར་རྟོག་པ་མཛད་ནས་ཕྱོགས་དང་པོ་སེལ་བ་ནི། བདེ་བ་ལ་སོགས་ཞེས་གསུངས་སོ། །གང་གི་ཚེ་སྔོན་པོ་ལ་སོགས་པ་ཉེ་བ་ལས་བདེ་བ་སོགས་པའི་རང་བཞིན་སྔོན་པོ་ལ་སོགས་པའི་རྣམ་པར་ཤེས་པ་སྐྱེ་བ་དེའི་ཚེ་རྣམ་པར་ཤེས་པ་ལ་རང་ལ་བརྟེན་པའི་ཁྱད་པར་ཡོད་པ་དེས་ན་ཅི་དེ་རྣམ་པར་རྟོག་པ་དང་བཅས་པར་འགྱུར་རམ་ཞེས་བྱ་བའོ། །གལ་ཏེ་བདེ་བ་ལ་སོགས་པའི་ཁྱད་པར་དེ་ཡུལ་གྱི་མ་ཡིན་ན་དེའི་ཆེ་ཡུལ་མེད་
བར་ཞེས་བྱ་བ་ལ་སོགས་པའོ། །འདི་ལ་ལ་ནི་མ་ཡིན་ཏེ་བྱ་བའོ། །རྣམ་པར་རྟོག་པ་གཉིས་པ་ལ་བརྗོད་པ་ནི་ཁྱད་པར་ཞེས་བྱ་བའོ། །འོན་ཏེ་ཁྱེད་དབྱུག་པ་ཅན་གྱི་རྟོགས་པ་ཡུལ་མེད་པ་ཉིད་དུ་འདོད་ན་དེ་ཉིད་ལྟར་དངོས་པོ་གཉིས་ཀའི་ཡུལ་ཅན་ཡིན་ཞེས་བརྗོད་སྙམ་ན། གཉིས་ཀ་ཡང་ཞེས་གསུངས་ཏེ། དབྱུག་པ་དང་སྐྱེས་བུ་གཉིས་ཀའོ། །ཐ་སྙད་ཙམ་ཞེས་བྱ་བ་ནི་ལྷག་པར་ཞེན་པ་ཙམ་མོ། །གཉི་ག་ཞེས་བྱ་བ་ནི་གཞན་གྱིས་སྨྲས་པས་སོ། །དབྱུགས་པ་དང་སྐྱེས་བུ་གཉིས་ཀའིའོ། །འདི་ནི་ཞེས་བྱ་བ་ནི་གྲུབ་པའི་མཐའ་སྟེ་གཅིག་གི་ཚིག་དང་གཉིས་ཀྱི་ཚིགས་ལ་སོགས་པའོ། །ཐ་སྙད་ཙམ་ཉིད་བསྒྲུབ་པ་ནི་གཙོ་པོ་མ་ཡིན་པའི་ཞེས་བྱ་བ་ལ་སོགས་པའོ། །དེ་ནི་ཞེས་བྱ་བ་ཁྱད་པར་རོ། །འདི་ཉིད་བཞད་གད་དུ་བྱེད་པ་འདྲ་བར་གསུངས་པ་ནི་གལ་ཏེ་ཞེས་བྱ་བའོ། །གཅིག་གི་ཚིག་བསྟན་པ་འདིས་ནིའོ། །དབྱུག་པ་སྣང་བ་ནི་ཡོད་པ་ཁོ་ནའོ་ཞེས་བྱ་བའི་དོན་ཏོ། །ཁྱད་པར་གདོན་མི་ཟ་བར་རྫོགས་པར་བྱ་བ་ཡིན་ནོ་ཞེས་བྱ་བ་ནི་བཟོད་པས་གཞན་དག་སྨྲ་བ་ནི་ཅི་སྟེ་ཞེས་བྱ་བའོ། །བུམ་བ་དང་སྣམ་བུ་ལ་སོགས་པའི་ཡུལ་དང་དུས་སོགས་ཁྱད་པར་ཅན་རྣམས་དང༌། དུས་ལ་སོགས་པ་དང་བྲལ་བ་འབའ་ཞིག་སྣང་བ་ཉིད་ཡིན་ཏེ། འདིར་ཡུལ་དང་དུས་ནི་རྟོགས་པ་མ་ཡིན་གྱི། དེ་ལ་ཡང་ཤེས་པའི་ཁྱད་པར་ཅན་ཉིད་ནི་མི་སྣང་བ་མ་ཡིན་ཏེ། སྣང་བ་ཉིད་ཡིན་ནོ། །གྲུབ་པའི་མཐའ་སྨྲ་བ་རྣམ་པར་རྟོག་པར་མཛད་པའི་ཁྱད་པར་ཞེས་བྱ་བ་ནི་དོན་གཞན་དང་འབྲེལ་པ་ཁྱད་པར་ཅན་ཡིན་ནོ། །དོན་གྱི་རང་བཞིན་མི་མཐུན་པ་ཉིད་ཁྱད་པར་ཅན་ཡིན། །དེའི་ཚེ་ཞེས་བྱ་བ་ནི་ཕྱོགས་གཉིས་ཀ་ལ་ཡང་ངོ༌། །དེ་ནི་ཞེས་བྱ་བ་ནི་དོན་གཞན་དང་འབྲེལ་བའི་མཚན་ཉིད་ཀྱི་ཁྱད་པར་ཅན་ནི་སྔ་མ་དང་ཕྱི་མ་ལ་སོགས་པའི་ཤེས་པ་ལ་སྣང་བའི་ངང་ཚུལ་གང་ལ་ཡོད་པའི་བུམ་པ་ལ་སོགས་པའི་དེ་ལ་ཡོད་པ་མ་ཡིན་ནོ། །བུམ་པ་ལ་སོགས་པ་སྣང་བ་ལ་ནི་དུས་ལ་སོགས་པར་ཡང་སྣང་བར་ཉམས་སུ་མྱོང་བར་བྱེད་དོ། །རྣམ་པར་རྟོག་པ་གཉིས་བརྗེས་སུ་བརྗོད་ནས་སུན་འབྱིན་པ་ནི་ཅི་སྟེ་ཞེས་བྱ་བའོ། །ཉེས་པ་གཞན་ཡང་བརྗོད་པ་ནི་མི་འདྲ་བ་ནི་ཞེས་བྱ་བའོ། །སྔར་སོ་སོར་མཐོང་བ་དེ་ཉིད་སྦྱོར་བ་གང་གི་སྔོན་དུ་འགྲོ་བ་དེ་ལ་དེ་སྐད་ཅེས་བྱ་བའོ། །དེ་བས་ན་རིགས་ལ་སོགས་པ་ཁྱད་པར་ཡིན་ཡང་རིགས་ལ་སོགས་པ་དེ་ཡང་གདོན་མི་ཟ་བ་སྣང་བར་
འགྱུར་བ་ཡིན་ཏེ། དེ་ལྟ་མ་ཡིན་ན་སྦྱོར་བ་མི་འཐད་པའི་ཕྱིར་རོ། །སྒྲ་དང་གསལ་བ་ཞེས་བྱ་བ་ནི་བ་ལང་ཞེས་བྱ་བ་ནི་བ་ལང་ཞེས་བྱ་བའི་སྒྲ་དང་ཚིག་གསལ་བའི་རང་བཞིན་གྱིས་གསལ་བ་སྟེ་དེ་དག་སྣང་བའོ། །འདིར་ཞེས་བྱ་བ་ནི་རྗེས་སུ་འགྲོ་བའི་ཤེས་པ་ལའོ། །མིང་ཙམ་དང་འབྲེལ་པ་ཉིད་བརྗོད་པ་ནི་འདི་ཡང་ཞེས་བྱ་བའོ་ཞེས་རྣམ་པ་འདིས་མིང་སྒྲ་དང་བཞོན་པ་དང༌། བཞོན་པ་ལ་སོགས་པའི་དོན་བྱ་བ་མཚུངས་པ་ཡིན་ནོ། །དོན་ནི་འགའ་ཞིག་གི་ཡང་ཞེས་བྱ་བ་ནི་བཞོན་པ་ལ་སོགས་པའི་ཡང་སྟེ། དེ་ཡང་གསལ་བ་སོ་སོར་ཐ་དད་པའི་ཕྱིར་རོ། །རྣམ་པ་ནི་རྣམ་པར་རྟོག་པ་ལ་སྣང་བའོ། །དེ་ཡང་ཞེས་བྱ་བ་ནི་རྣམ་པ་ཡང་ངོ༌། །སོ་སོར་ངེས་པའི་རྣམ་པར་རྟོག་པའི་རང་བཞིན་ཉིད་བརྗོད་པ་ནི་བ་ལང་ཞེས་བྱ་བའོ། །རྣམ་པ་གཅིག་ནི་རྣམ་པར་རྟོག་པ་ཐམས་ཅད་རྟོགས་པ་མ་ཡིན་ནོ་ཞེས་དགོངས་པའོ། །དེས་ན་རྣམ་པར་རྟོག་པའི་རྣམ་པ་དེ་ནི་སྤྱིའི་རྣམ་པར་རྟོག་པ་མ་ཡིན་ནོ། །རྣམ་པ་གཅིག་ཏུ་ནི་ཉམས་སུ་མྱོང་བ་ཞུགས་པ་མེད་དེ། །དེས་ན་དྲན་པ་ཡང་དེ་ལྟར་མི་འཐད་དོ་ཞེས་བྱ་བའི་དོན་ཏོ། །འོ་ན་ཇི་ལྟར་སྤྱི་མེད་པར་གསལ་བ་ཐམས་ཅད་སྒྲ་གཅིག་གིས་བརྗོད་ཅེ་ན། སྒྲས་འདི་ནི་ཞེས་སྨོས་ཏེ། བ་ལང་ལ་སོགས་པའི་སྒྲ་འདི་ནའོ། །མཐོ་རིས་ལ་སོགས་པ་དགུ་ལའོ། །གལ་ཏེ་ཡང་ད་ལྟར་གྱི་ནི་སྒྲ་དོན་བཅུ་ལ་གྲགས་པ་དེ་ལྟ་ན་ཡང་སྔོན་གྱི་གྲགས་པ་ལ་ལྟོས་ན་དེ་སྐད་བརྗོད་པ་ཡིན་ནོ། །དོན་དུག་པོ་དེ་དག་ལ་ནི་རྗེས་འགྲོ་བ་གཅིག་ཡོད་པ་མ་ཡིན་ནོ་ཞེས་དགོངས་པའོ། །བརྡ་བྱེད་པས་བྱེད་པ་གང་ཡིན་པ་དང༌། ཉན་པས་ཉན་པ་གང་ཡིན་བ་དེ་དག་གི་ཡུལ་གྱི་བརྡའོ། །འདི་ཡང་ཁས་བླངས་ནས་བརྗོད་པར་ཟད་དེ། དོན་དམ་པར་ནི་གང་ལ་སོགས་པ་དེ་དག་གི་ནང་གི་དབྱེ་ལ་སྟོས་ཏེ་མཐའ་ཡས་པའི་ཕྱིར་རོ། །འདི་ནི་མི་གསལ་བའི་རྣམ་པ་སྤྱིའི་རང་བཞིན་ཡིན་ཡང་དབང་པོ་ཤེས་པ་ལ་མི་སྣང་བའི་ཕྱིར་ན། རྣམ་པར་རྟོག་པ་མེད་པ་ཁོ་ནའོ་ཞེས་བསྟན་པ་ཡིན་ནོ། །སྔོན་གྱི་མི་གསལ་བ་གང་ཡིན་བ་དེ་ཡིད་ནི་གསལ་བ་འདི་ཡིན་ནོ་ཞེས་ངོ་ཤེས་པ་ལས་གསལ་བ་དང་མི་གསལ་བ་དག་གཅིག་ཉིད་ཡིན་ཏེ་དེས་ན་གསལ་བས་སྣང་བ་ཉིད་སྤྱིར་སྣང་བ་ཡིན་ནོ། །དེ་ལྟ་ན་ཡང་དབང་པོའི་རྣམ་པར་ཤེས་པ་རྣམ་པར་རྟོག་པ་དང་བཅས་པ་ཉིད་དོ་ཞེས་བརྗོད་
པ་ནི་དེ་ཉིད་འདིའི་ཞེས་བྱ་བའོ། །རྒྱུ་ཐ་དད་པ་བཤད་པ་ནི་མིག་ལ་སོགས་པས་ནི་དབང་པོའི་ཤེས་པ་སྐྱེད་ལ། བག་ཆགས་ཀྱིས་ནི་རྣམ་པར་རྟོག་པའི་རྣམ་པའོ། །འདིས་ནི་ཆོས་འགལ་བ་གནས་པ་དང༌། རྒྱུ་ཐ་དད་པར་བསྟན་ཏོ། །རྣམ་པའི་ཞེས་བྱ་བ་ནི་གསལ་བ་དང་མི་གསལ་བའི་རང་བཞིན་གྱིའོ། །དེ་ནི་ཞེས་བྱ་བ་ནི་དབང་པོའི་ཤེས་པ་དང་རྣམ་པར་རྟོག་པའི་མཚན་ཉིད་ཀྱི་བློའོ། །འདུ་བ་གསལ་བའི་དོན་དུ་གཞན་གྱི་ལུགས་འགོག་པ་ནི། །གལ་ཏེ་ཞེས་བྱ་བའོ། །འཕྲོད་པ་འདུ་བ་ཡོད་མེད་དེས་མི་འགྲུབ་སྙམ་ན། རིགས་ལ་སོགས་པ་ཞེས་སྨྲས་སོ།།འཕྲོད་པ་འདུ་བ་མངོན་སུམ་གྱིས་ནི་དམིགས་པ་མ་ཡིན་ནོ། །འོ་ན་ཅི་ཞེ་ན། སྣལ་མ་འདི་རྣམས་ལ་སྣ་མ་བུའོ་ཞེས་བྱ་བ་ལ་སོགས་པར་ཤེས་པ་ལས་སོ་ཞེས་གཞན་གྱི་སྨྲས་པ་ནི་ཅི་སྟེ་ཞེས་བྱ་བའོ། །འཇིག་རྟེན་འགར་ཡང་ངོ༌། །དེ་མེད་པས་ཞེས་བྱ་བ་ནི་འདི་ལའོ་ཞེས་བྱ་བའོ་བློ་མེད་པས་སོ། །གལ་ཏེ་བློ་འདི་ཉིད་ཀྱིས་འཕྲོད་པ་འདུ་བ་འགྲུབ་པའི་ཕྱིར། དེ་ལ་བཅད་པ་ཅི་ཡོད་ཅེ་ན། ལྐོག་ཤལ་ལ་སོགས་པ་ཞེས་གསུངས་ཏེ། དེ་ལ་ནི་བ་ལང་ལའོ། །གང་ཞིག་ཅེས་བྱ་བ་ནི་བ་ལང་ངོ༌། །དེ་དག་ལ་ནི་ལྐོག་ཤལ་ལ་སོགས་པ་དག་ལའོ། །ཡན་ལག་ལྷག་མ་དག་ལ་ཞེས་བྱ་བ་ནི་རིས་ལས་གཞན་པའི་ཡང་ལག་ལ་བ་ལང་ཞེས་རྟེན་ཉིད་དུ་རྟོགས་ནའོ། །ཡང་ཇི་ལྟར་ན་ཡན་ལག་ལྷག་མ་རྟེན་ཉིད་དང༌། རྭ་ནི་བརྟེན་པ་ཉིད་དུ་རྟོག་གི །དོན་དམ་པར་ནི་འདི་ཡོད་པ་མ་ཡིན་ཞེ་ན། །འདི་ལྟར་ཞེས་བྱ་བའོ། །དེའི་ཕྱིར་འབྱུང་བ་ཞེས་བྱ་བ་ནི་སྣལ་མ་ནི་ཕྱིས་འབྱུང་བའོ། །དུ་བ་དང་མེ་ལ་སོགས་པ་དུས་ཐ་དད་པ་དག་ནི་རྒྱུ་དང་འབྲས་བུའི་དངོས་པོ་འབའ་ཞིག་ཉིད་དམ། སྤྱི་བོ་སྐྱེས་དང་དུ་བ་དག་ནི་འབྲེལ་པ་མེད་པར་ཡང་འགྱུར་རོ། །གལ་ཏེ་རྒྱ་ཤུག་ལྟུང་བ་ཁར་གཞོང་གི་གནས་པར་བྱེད་པས་གནས་བརྟེན་བརྗོད་པ་མ་ཡིན་ཞེ་ན། གནས་ནི་ཞེས་གསུངས་སོ། །རྒྱ་ཤུག་དེའི་རྣག་བཞིན་གྱི་ཁྱད་པར་ལས་གནས་པ་གཞན་ནི་ཡོད་པ་མ་ཡིན་ནོ། །དེས་ན་གནས་པ་བྱས་ན་རྒྱ་ཤུག་ཉིད་བྱས་པར་འགྱུར་རོ། །ཤེས་པ་དེས་།ན་བརྟེན་པའི་དངོས་པོ་ནི་རྒྱུ་དང་འབྲས་བུ་ཁོ་ན་ཡིན་ནོ། །སྣལ་མ་དང་སྣམ་བུ་དག་ཀྱང་དེ་ཁོ་ན་ལྟར་རྟེན་དང་བརྟེན་པར་འགྱུར་རོ་ཞེས་ན། སྣལ་མ་དང་ཞེས་གསུངས་སོ། །རྒྱུའི་རང་བཞིན་འབྲས་བུ་ལ་སྒྲོ་བཏགས་པས་སོ། །ཤེས་བ་སྒྲོ་བཏགས་
པ་ལས་ཡིན་ནོ་ཞེས་ཇི་ལྟར་ཤེས་ཤེ་ན། འདི་ལྟར་གསུངས་སོ། །དེ་ལྟ་མ་ཡིན་ཏེ་གལ་ཏེ་དེར་རྒྱུ་སྒྲོ་འདོགས་པ་མ་ཡིན་གྱི་འོན་ཀྱང་དེའི་ཚེ་ཉིད་སྣལ་མ་ཡོད་པ་ཡིན་ན། དེའི་ཚེ་སྔར་གྱི་གནས་སྐབས་མ་མཐོང་བ་ཡང་སྣལ་མ་དེ་དག་ནི་འདིའོ། །ཞེས་ཤེས་པར་འགྱུར་ན། འགྱུར་པ་ཡང་མ་ཡིན་ཏེ། དེས་ན་རྒྱུ་བཏགས་པ་ཁོ་ནས་ཤེས་པ་འདིར་འགྱུར་རོ་ཞེས་རྟོགས་པ་ཡིན་ཏེ། དེ་ལྟར་ན་འབྲས་བུའི་གནས་སྐབས་ན་སྣལ་མ་མེད་དོ་ཞེས་བརྗོད་པ་ནས་སྣལ་མ་ལས་ཐ་དད་བའི་སྣམ་བུ་ལ་མེད་དོ་ཞེས་བརྗོད་པ་ནི་ཡང་ན་ཞེས་བྱ་བའོ། །དེས་ན་ཞེས་བྱ་བ་ནི་སྣམ་བུ་ཐ་དད་པ་ཡོད་པ་མ་ཡིན་པས་ནའོ། །རང་བཞིན་གཅིག་ལ་ནི་རྟེན་དང་བརྟེན་པ་ཞེས་བྱ་བ་ཡོད་པ་མ་ཡིན་ནོ། །ཕན་གདགས་པར་བྱ་བ་དང༌། ཕན་འདོགས་པར་བྱེད་པ་ཉིད་ཀྱིས་བཤད་པ་རྩོམ་པར་བྱེད་པ་ནི་དེ་ལ་ཞེས་བྱ་བའོ། །ལྡན་པའི་ཁྱད་པར་ལས་ཞེས་བྱ་བ་ནི་གཞན་གྱི་བསམ་པས་བརྗོད་པ་ཡིན་ནོ། །རྣམ་ཆད་དམིགས་སུ་མེད་པ་ཉིད་འཆད་པ་ནི་ཇི་ལྟར་ཞེས་བྱ་བའོ། །གཞན་དུ་ཡང་ཞེས་བྱ་བ་ནི། རྒྱུ་མཚན་མེད་པར་ཡང་ངོ༌། །སྤྱིའི་རྒྱུ་མཚན་ཉིད་དུ་ཅི་སྟེ་མི་འགྱུར་སྙམ་ན། དེ་ལས་ཐ་དད་པའི་ཞེས་གསུངས་ཏེ། ཁུང་བུ་བ་ལས་ཐ་དད་པའོ། །གང་ཞིག་ཅེས་བྱ་བ་ནི་དང་པོ་བརྡའི་ཡུལ་དངོས་པོ་གང་ཡིན་པ་དེ་དང་འདྲ་བས་ན་གང་ཞིག་དེའི་རང་བཞིན་སྒྲོ་བཏགས་པ་དེ་ལ་འཇུག་པ་གང་ཡིན་པ་རེ་ནི་དངོས་པོ་མ་ཡིན་ནོ། །དེར་བློ་ཇི་ལྟར་འཁྲུལ་ཞེ་ན། །སྣལ་མའི་ཞེས་གསུངས་སོ། །སྣལ་མའི་ཚུལ་ནི་འདྲ་བ་ལ་སོགས་པ་ལ་ལྟོས་པའི་འབད་པ་མེད་པར་དེ་ཉིད་ལས་བརྡ་བྱེད་པ་སྟེ་དེ་མེད་ནའོ། །ཆོས་གཞན་ནི་བ་ལང་ཉིད་ལས་གཞན་གཙང་སྦྲ་མེད་པ་ཉིད་ལ་སོགས་པ་སྟེ། འདི་རྗེས་སུ་འབྲངས་པས་འདྲ་བ་གང་ཡིན་པ་དེ་ལས་འཁྲུལ་བ་ཡིན་ནོ། །གལ་ཏེ་ཆོས་གཞན་གྱི་རྗེས་སུ་འབྲངས་པས་ཅི་བྱ་ཞེ་ན། དེའི་ཞེས་གསུངས་སྟེ། ཆོས་གཞན་དེའི་རྗེས་སུ་འབྲང་བར་ནི་བ་ལང་ལ་སོགས་པ་དེ་དང་འདྲ་བར་འགྱུར་བ་མ་ཡིན་ཏེ། གཙང་སྦྲ་ཆུང་བ་ལ་སོགས་པ་མེད་ན་ནི་འདྲ་བར་འགྱུར་པ་མ་ཡིན་ནོ། །གཞན་ཞེས་བྱ་བ་ནི་བ་ལང་གཅིག་ལས་བ་ལང་གཞན་ལའོ། །དོན་འཆད་པ་ནི་ཁྲ་བོ་ལ་སོགས་པ་མཚན་ཉིད་མི་མཐུན་པ་དག་ལ་ཡང་ན་ལང་ངོ་སྙམ་པའི་བློའོ། །དེ་ལ་ཞེས་བྱ་བའི་བ་ལང་ངོ་སྙམ་པའི་
བློ་སྐྱེ་བ་ལ་ཡང་མཚུངས་བའི་བ་ལང་ཉིད་རྒྱུ་མཚན་ཡིན་ནོ་ཞེ་ན། འདི་ནི་ལན་དུ་མི་རུང་སྟེ་ཞེས་གསུངས་སོ། །གལ་ཏེ་དཔེར་ན་དབྱུག་པ་ཅན་ཞེས་བྱ་བར་རྟོག་པ་ཉིད་ཀུན་རྫོབ་པའི་རྒྱུ་མཚན་ཅན་མ་ཡིན་པ་དེ་བཞིན་དུ་བ་ལང་གི་ཤེས་པ་ཡང་ཡིན་ནོ་ཞེ་ན། འདི་ལྟར་ཞེས་གསུངས་སོ། །དེ་ལྟར་མ་ཡིན་ཞེས་བྱ་བ་ནི་གལ་ཏེ་དབྱིག་པ་རྒྱུ་མཚན་ཡིན་ན། དེའི་ཚིག་གཅིག་ན་གནས་པའི་དབྱུག་པ་ཉིད་ཀྱིས་ཐམས་ཅད་དབྱུག་པ་ཅན་དུ་འགྱུར་རོ། །དེ་ལ་ཡང་ཞེས་བྱ་བ་ནི་འབྲེལ་བ་ལ་ཡང་ངོ༌། །ཅི་སྟེ་དབྱུག་པ་ལ་འབྲེལ་བ་མེད་པ་ཁོ་ནར་དབྱུག་པ་ནི་འབྲེལ་བ་ཅན་ཡིན་ནོ་ཞེས་རྟོགས་ན་དེ་ལྟ་ཡིན་ན་ནི་ཞེས་བྱ་བའོ། །དེ་ཉིད་ཅེས་བྱ་བ་ནི་ཀུན་རྫོབ་པ་ཉིད་དུའོ། །དེ་ལས་ཞེས་བྱ་བ་ནི། དབྱུག་པ་ལས་ཐ་དད་པའིའོ། །འོན་ཏེ་གཉིས་པོ་དེ་ཉིད་ལས་འབྱོར་བར་བརྗོད་ཅེ་ན། གཉིས་པོ་ཙམ་ཞེས་གསུངས་སོ། །ཕན་འདོགས་པར་བྱེད་པའི་དངོས་པོ་ཇི་ལྟར་ཀུན་རྫོབ་མ་ཡིན་ཞེ་ན། དེ་ཡང་ཞེས་གསུངས་སོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ཁྱད་པར་ཅན་གྱི་རྟོག་པ་ནི་འགའ་ཡང་དབང་པོ་ལས་བྱུང་བ་མ་ཡིན་ནོ། །དེ་བཞིན་དུ་པ་ལང་ཉིད་ལ་སོགས་པ་ཡང་དོན་དམ་པ་ཁོ་ན་ཡིན་ནོ་ཞེས་འབྲེལ་ཏོ། །རིགས་ལ་སོགས་པ་ནི་གསལ་བ་ལས་ཐ་དད་བར་མི་སྣང་བའི་ཕྱིར་ན་དོན་དམ་པར་མི་འགྱུར་བ་མ་ཡིན་ན་ཞེས་སྦྱར་རོ། །འཕྲོད་པ་འདུ་བའི་སྟོབས་ཀྱིས་རིགས་ལ་སོགས་པ་ཐ་དད་པར་མི་སྣང་དུ་ཆུག་མོད། འཕྲོད་པ་འདུ་བ་ཉིད་ཐ་དད་པར་ཅི་སྟེ་མི་སྣང་ཞེ་ན། བརྗོད་པ་ནི་འཕྲོད་པ་འདུ་བ་ཉིད་ཅེས་བྱ་བའོ། །བ་ལང་ཉིད་ལ་སོགས་པའི་རྒྱུ་མཚན་ཞེས་བྱ་བ་ནི་བ་ལང་ཉིད་ལ་སོགས་པར་རྟོགས་པའི་རྒྱུ་མཚན་ཡིན་ནོ་ཞེས་བྱ་བའི་དོན་ཏོ། །ཐ་དད་པ་ཉིད་ལ་ཞེས་བྱ་བ་ནི་ཕན་ཚུན་ཐད་དད་པས་དུ་མའི་རང་བཞིན་དུ་གྱུར་པའི་བཞོ་བ་ལ་སོགས་པའོ། །ཕྱེད་ཕྱི་མ་འཆད་པ་ནི་ཇི་ལྟར་ཞེས་བྱ་བའོ། །དེ་བཞིན་དུ་བ་ལང་ཉིད་ལ་ཡང་འདྲི་ནའོ། །གལ་ཏེ་རིགས་མེད་ན་ཐ་སྙད་འཇུག་པར་འགྱུར་རོ་ཞེ་ན། རིགས་ནི་ཐ་སྙད་ཀྱིས་ཞེས་གསུངས་སོ། །དེའི་ཚེ་གཞན་དུ་ཡང་དེ་ལ་ཞེས་བྱ་བ་དངོས་པ་ལ་མ་ལྟོས་པར་སྒྲ་མི་འཇུག་པར་འགྱུར་ན་ལྟོས་པ་མེད་པ་ནི་མཐོང་བ་ཡང་དངོས་པོ་མེད་ཀྱང་སྒྲ་འཇུག་པས་ནི་མཐོང་བ་ཡིན་ནོ། །དེས་ན་བ་ལང་ལ་སོགས་པ་འདི་ལ་ཡང་དེ་ཁོ་ན་བཞིན་འགྱུར་རོ་ཞེས་དགོངས་པའོ། །
གལ་ཏེ་ཚིག་དོན་དྲུག་པོ་རྣམས་ལ་དངོས་པོ་ཉིད་ཐ་དད་པ་ཡོད་པ་དེ་ཉིད་སྒྲའི་རྒྱུ་མཚན་ཡིན་ནོ་ཞེ་ན། རྫས་ལ་སོགས་པའི་ཞེས་གསུངས་ཏེ། དྲུག་པོ་འདི་རྣམས་ཉིད་ཀྱི་ནང་ནས་གང་རུང་ཞིག་དངོས་པོ་ཉིད་དུ་འགྱུར་པ་ཡིན་ཏེ། དེ་ལྟ་མ་ཡིན་ན་ཚིག་གི་དོན་བདུན་པར་ཐལ་པའི་ཕྱིར་རོ། །རེ་ཞིག་རྫས་མ་ཡིན་ནོ་ཞེས་བྱ་བའོ། དེ་བཞིན་དུ་ཡོན་ཏན་ལ་སོགས་པ་ལ་ཡང་བརྗོད་པར་བྱའོ། །དེས་ཀྱང་སྤྱི་སོགས་པ་དང་ལྡན་པའམ་འདུ་བ་མ་ཡིན་པའི་ཕྱིར་རོ། །ཁང་བཟངས་ཀྱིས་གྲ་ནི་རེ་ཞིག་རྫས་ཀྱི་རྒྱུ་མཚན་ཅན་དུ་འགྱུར་རོ་ཞེ་ན། ཁང་བཟངས་ཀྱང་ཞེས་གསུངས་སོ། །རིགས་མི་མཐུན་པའི་ཡན་ལག་གི་རྫས་མི་རྩོམ་པའི་ཕྱིར་ལྡན་པ་ཉིད་དུ་འགྱུར་རོ་ཞེ་ན། དེ་ལ་བཤད་པ་ནི་ཞེས་གསུངས་པ། །དེ་ཕྲེང་དེ་ནི་ཅི་ཞིག་ཡིན། །ཞེས་བྱ་བ་ནི། རྫས་དང་ཡོན་ཏན་དང་ལས་ནི་ཕྲེང་བ་མ་ཡིན་ནོ། །སོ་སོར་སེལ་བ་ནི་རྫས་ནི་ཡོན་ཏན་ལ་ཞེས་བྱ་བ་སྟེ། ཁང་བཟངས་ཀྱི་མཚན་ཉིད་ཀྱི་ལྡན་པ་ལའོ། །ལྡན་པ་ནི་ཡོན་ཏན་ཡིན་པས་གང་གིས་ཕྲེང་བ་དེ་ལ་འདུ་བ་འགྱུར་བ་ཡོན་ཏན་ལ་ནི་རྫས་ཀྱི་འདུ་བ་ཡོད་པ་མ་ཡིན་ནོ། །ཡོན་ཏན་ལ་མེད་པ་ཉིད་ཀྱི་ཕྱིར་ཕྲེང་བ་ཡོན་ཏན་ཡང་མ་ཡིན་ནོ། །ཡོན་ཏན་ནི་ཡོན་ཏན་མེད་པ་ཡིན་ནོ་ཞེས་བྱ་བ་ལུགས་ཡིན་པའི་ཕྱིར་ན། །ལྡན་པའི་མཚན་ཉིད་ཀྱི་ཁང་བཟངས་ཡོན་ཏན་ལ་ཕྲེང་བ་མེད་པར་ཇི་ལྟར་འགྱུར། །ཕྲེང་བ་ནི་ལས་ཀྱང་མ་ཡིན་ཏེ། ལས་ནི་རྫས་ལ་བརྟེན་པ་ཡིན་པའི་ཕྱིར་རོ། །ཡོན་ཏན་ལ་མི་བརྟེན་པའི་ཕྱིར་དང༌། ཁང་བཟངས་ཀྱང་ཡོན་ཏན་ཡིན་པའི་ཕྱིར་རོ། །འདུ་བ་དང་ཁྱད་པར་མ་ཡིན་ཏེ། དེ་དག་གི་འབྲས་བུ་གང་ཡིན་པ་འདི་ལའོ་སྙམ་པའི་བློ་དང་ཕན་ཚུན་ལྡོག་པའི་བློ་དེ་མེད་པའི་ཕྱིར་རོ། །ཡོན་ཏན་ལ་ཡང་ཞེས་བྱ་བ་ནི་ལྡན་པའི་མཚན་ཉིད་ཁང་བཟངས་ལ་སོགས་པ་ལ་ཡང་ངོ༌། །དེ་ལྟར་ཁས་ལེན་ན་ཞེས་བྱ་བ་ནི་ཐ་དད་པ་ཁས་ལེན་ནའོ། །མཚུངས་པའི་ཐ་སྙད་དོན་དུ་ཞེས་བྱ་བ་ནི་རིགས་རིགས་ཞེས་བྱ་བ་ཐད་སྙད་ཀྱི་དོན་དུའོ། །དེར་ཡང་ཞེས་བྱ་བ་ནི་རིགས་ཀྱི་རིགས་རྣམས་ལ་ཡང་ངོ༌། །ཐ་སྙད་ཀྱི་ཞེས་བྱ་བ་ནི་རིགས་ཞེས་བྱ་བ་དེ་ལྟ་བུའི་རང་བཞིན་ཅན་ནོ། །དེའི་ཕྱིར་རྟོགས་པ་འཐད་པ་མ་ཡིན་ནོ། །ཅིའི་ཕྱིར་ཞེ་ན། རྟོགས་མཐའ་མེད་པས་ཞེས་བྱ་བ་སྟེ། རྒྱ་མཚན་མཐའ་མེད་པས་ཞེས་བྱ་བའི་དོན་ཏོ། །འདི་ཉེ་བར་བཏགས་པ་ཉིད་དུ་
ཞེས་བྱ་བ་ནི་ཕྲེང་བ་ཆེན་པོ་ཞེས་བྱ་བ་ལ་སོགས་པའི་ཐ་སྙད་འདིའོ། །དེ་ལྟར་ཞེས་བྱ་བ་ཉེ་བར་བཏགས་པར་ཁས་བླངས་པར་རོ། །གལ་ཏེ་ཉེ་བར་བཏགས་པ་ཉིད་དུ་མ་གཏོགས་མོད། །དེ་ལྟ་ན་ཡང་དོན་གཞན་དུ་འགྱུར་པའི་ཆེན་པོ་ཉིད་ལ་སོགས་པ་མེད་པའི་ཕྱིར་ཉེ་བར་བཏགས་པ་ཉིད་དོ་ཞེས་བསམས་ནས་གཞན་དག་བརྗོད་པ་ནི་ཆེན་པོ་ཉིད་ཅེས་བྱ་བའོ། །གལ་ཞེས་བྱ་བ་ནི་རྟོགས་པའི་ཕྱིར་རོ་ཞེས་བྱ་བ་དགོངས་པའོ། །འོན་ཏེ་ཉེ་བར་བཏགས་པ་རྟོགས་པ་ཡིན་ནོ་ཞེས་བརྗོད་ན། །དེའི་ཚེ་མེད་པ་གྲུབ་ཅེས་བྱ་བ་ལ་སོགས་པའོ། །རྫས་ཀྱི་མཚན་ཉིད་ཡོད་པ་མ་ཡིན་ནོ་ཞེས་བྱ་བ་ནི་ཕྲེང་བ་ཆེན་པོ་ཆེ་རྟོགས་པའི་ཕྱིར། ཆེན་པོ་ཉིད་ཀྱི་མཚན་ཉིད་ཀྱི་ཡོན་ཏན་ཡོད་པའི་མ་ཡིན་ནོ། །ཡོན་ཏན་ལ་ལྟོས་ན་འདུ་བ་ཅན་གྱི་རྒྱུ་ཉིད་ཀྱང་ཡིན་ཏེ། དེས་ན་རྫས་ཀྱི་མཚན་ཉིད་དང་ལྡན་པའི་ཕྱིར། །ཕྲེང་བ་ནི་རྫས་ཉིད་དུ་འགྱུར་རོ་ཞེས་དགོངས་པའོ། །བསྡུས་པ་མཚན་ཉིད་མ་ཡིན་ནོ་།ཞེས་བྱ་བ་འདི་ཡང་ཇི་ལྟར་ཤེས་སྙམ་ན། ནམ་མཁའ་ལ་སོགས་པ་ཞེས་བྱ་བའོ། །གལ་ཏེ་ཞེས་བྱ་བས་དོགས་པ་བསུ་ནས་ལན་བརྗོད་པ་ནི་རྟོག་པ་ཡོད་པའི་ཕྱིར་ཞེས་བྱ་བའོ། གཉིས་ཀ་ཡང་དགག་པ་ཇི་ལྟ་ཞེ་ན། །རེ་ཞིག་གཙོ་བོ་ནི་ཞེས་བྱ་བའོ། །ཉེ་བར་བཏགས་པའི་རྒྱུ་མཚན་ཞེས་བྱ་བ་ནི་དོན་གཅིག་འདུ་བའོ། །དེ་ཉིད་སྟོན་པར་བྱེད་པ་ནི་དཔེར་ན་ཞེས་བྱ་བའོ། །ནགས་ཞེས་བྱ་བ་ནི་གྲངས་སམ་ཚོགས་པའི་རང་བཞིན་ནོ། །ཕྲེང་བ་ཆེན་པོ་ཞེས་བྱ་བ་ལ་སོགས་པ་ནི་དོན་གཅིག་ལ་འདུ་བ་ཡང་མེད་པ་ཉིད་དེ། ཁང་བཟངས་ལ་སོགས་པ་ལྡན་པའི་རང་བཞིན་གང་ལ་ཕྲེང་བ་འདུས་པ་ནི་མ་ཡིན་པའི་ཕྱིར་རོ། །རྒྱུ་གཞན་དང་ལྡན་པ་ཞེས་བྱ་བ་ནི་ཐ་དད་པ་གཞན་དང་ལྡན་པའོ། །སྲིད་པ་མ་ཡིན་ཏེ་ཞེས་བྱ་བ་ནི་བརྟག་པར་རུང་བ་མ་ཡིན་ནོ། །རང་གི་ངོ་བོ་ཉིད་འཇུག་པའི་རྒྱུ་མཚན་མ་ཡིན་ནོ་ཞེ་ན། རང་གི་ངོ་བོ་ཉིད་འཇུག་པའི་རྒྱུད་མཚན་ཡིན་ན་ཞེས་བྱ་བའོ། །ཆེན་པོ་ལ་སོགས་པའི་ཐ་སྙད་ནི་བུམ་པ་ལ་སོགས་པ་གཞན་དུ་ཡོན་ཏན་གཞན་ཞེས་བྱ་པ་ཡོན་ཏན་ཆེན་པོ་ཉིད་ཀྱི་རྒྱུ་མཚན་ཅན་ཡིན་པས་ཕྲེང་བ་ལ་སོགས་པ་གང་ལ་དེ་མེད་པར་འཇུག་ན་དེར་ཕལ་པ་ཡིན་ནོ། །གཞན་རུང་སྟེ་ཞེས་བྱ་བ་ནི་རྒྱུ་མཚན་མེད་པར་ཡང་ངོ༌། །དེ་དང་ནི་གྲགས་པ་དང་ངོ༌། །མཚུངས་གང་ཡིན་པ་དེ་ལ་ལྟོས་ནས་སོ། །དེ་ལྟ་མ་ཡིན་ན་ཞེས་བྱ་བ་ནི་གྲགས་པ་དངོས་ཀྱི་
རྒྱུ་མ་ཡིན་ན་དེའི་ཚེ་ཕྱིན་ཅི་ལོག་ཏུ་ཞེས་བྱ་བ་དངོས་པོ་མེད་པ་ལ་འཇུག་པའི་སྒྲ་ནི་དངོས་མ་ཡིན་པར་འགྱུར་ལ་བུ་ལ་སོགས་པ་ཡོད་མེད་པའི་སྒྲ་འཇུག་པ་ནི་གཙོ་བོ་ཉིད་དུ་མཐོང་བར་འགྱུར་རོ། །འདི་ཉིད་གསལ་བར་བྱེད་པ་ནི་གཞན་དུ་རྒྱུ་མཚན་མེད་པ་ནི་གཙོ་བོ་ལ་སོགས་པ་མེད་པ་ལ་སྒྲ་འཇུག་པའི་ཉེ་བར་བཏགས་པ་གང་ཡིན་པ་དེའི་རྒྱུ་མཚན་དུ་འགྱུར་རོ། །དེ་མེད་ཀྱང་ཞེས་བྱ་བ་རྒྱུ་མེད་ཀྱང་སྒྲ་ཡོད་པའི་ཕྱིར་རོ། །གལ་ཏེ་རྒྱུ་མཚན་མེད་པར་ཡང་དངོས་པོ་མེད་པ་ལ་སོགས་པ་ལ་སྒྲ་འཇུག་མོད། །སྒྲ་ནི་རྒྱུ་མཚན་གྱི་འབྲས་བུ་ཡིན་པའི་ཕྱིར་རོ་ཞེས་དོགས་ན། གང་ཞིག་གང་མེད་ཀྱང་ཞེས་བྱ་བའོ། །ཅི་སྟེ་སྒྲ་འཇུག་པའི་རྒྱུ་མཚན་ནི་རྒྱུ་ཉིད་མ་ཡིན་ནོ། །དེས་ན་རྒྱུ་ཉིད་བཀག་ཀྱང་རྒྱུ་མཚན་མ་བཀག་པ་ཁོ་ནའོ་ཞེས་དོགས་པ་བསུ་ནས་བརྗོད་པ་ནི། རྒྱུ་མཚན་ནི་རྒྱུ་ཡིན་ནོ་ཞེས་བྱ་བས་སྟེག །རྒྱུ་མཚན་གྱི་སྒྲས་ནི་རྒྱུ་ཉིད་བརྗོད་པ་ཡིན་ནོ་ཞེས་བྱ་བའི་དོན་ཏོ། །དཔེར་ན་སྡེ་བ་སྦྱོར་བ་དག་གི་སྡེ་བ་སྦྱོར་གྱི་དབྱེ་བ་དཔྱིད་ཀྱི་ཐིག་ལེ་དང༌། པད་མ་དང་ཕྲེང་ལྡན་མ་ལ་སོགས་པའི་རྣམ་པ་དང༌། སྒྲའི་ཆ་སུ་པ་དང༌། །ཏིང་ང་ལ་སོགས་པ་དང་མིང་དང་བཞིན་དང་རྐྱེན་སོགས་པ་སྟེ་དེ་བཞིན་ནོ། །འདིས་ནི་འདོད་པ་ལ་རག་ལས་པ་ཉིད་བསྟན་པ་ཡིན་ནོ། །ལྡོག་པ་བརྗོད་ནས་རྗེས་སུ་འགྲོ་བ་གསུངས་པ་ནི། འཇུག་པའི་རྒྱུ་མཚན་མེད་ཀྱང་ཞེས་བྱ་བའོ། །འདི་མ་གྲུབ་པའི་མཐའི་སྨྲ་བས་བརྗོད་པ་ནི་རྒྱུ་མཚན་ལ་ཡང་ཞེས་བྱ་བའོ། །འདིར་གཞན་གྱི་རྒྱུ་མཚན་མེད་ན་ཞེས་བྱ་བ་སྨོས་སོ། །འདི་འགོག་པའི་ནི་མ་ཡིན་ཏེ་ཞེས་བྱ་བའོ། །དེ་ལ་ཞེས་བྱ་བ་ནི་རིགས་མེད་པར་བྲམ་ཟེད་དོན་གྱེད་མི་ནུས་སོ་ཞེས་བྱ་བའི་གཞལ་བྱ་འདི་ལའོ། །འོན་ཏེ་རིགས་ཚད་མའི་ཡུལ་མ་ཡིན་དུ་ཆུག་པ་དེ་ལྟ་ཡང་དེ་བྲམ་ཟེའི་དོན་བྱ་བ་ལ་ནུས་པ་ཡོད་པས་དེས་དེ་མེད་པར་དེ་དོན་ཇི་ལྟར་འགྱུར་ཞེས་བརྗོད་པ་ནི། །རྗེས་སུ་འགྲོ་བ་དང་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་རྗེས་སུ་འགྲོ་བ་དང་ལྡོག་པ་མ་མཐོང་བ་ཡང་ནུས་པར་རྟོག་པ་དེའི་ཚེ། ཕྲེང་བ་འཛིན་པ་ལ་སོགས་རྣམ་པ་ཅི་ལྟར་འདོད་པར་ཡོངས་སུ་རྫོགས་པ་ཉིད་རེ་ཞིག་བརྗོད་པ་ནི། ཡི་གེའི་རིམ་པ་ལ་ནི་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་ཡི་གེའི་རིམ་པ་ལ་དེ་ཁོ་ནར་རྒྱུ་མཚན་འགའ་ཞིག་ཡོད་ན་དེའི་ཚེའོ། །འོན་ཏི་རྒྱུ་མཚན་དེ་ཉིད་བརྡས་གསལ་བར་བྱེད་དོ་ཞེན་མ་ཡིན་
ཏེ་ཞེས་བྱ་བའོ། །ཇི་ལྟར་གཟུགས་ལ་སོགས་པ་དངོས་པོར་གྱུར་བ་རྟོགས་པ་ན་བརྡ་ལ་མི་ལྟོས་པ་དེ་བཞིན་དུ་འདི་ཡང་བརྡ་ལ་མི་ལྟོས་པར་འགྱུར་རོ། །རྟོག་པ་ཞེས་བྱ་བ་ནི་ཉན་པའི་རྟོགས་པ་སྟེ། ཉན་པས་མ་རྟོགས་པའི་རང་བཞིན་ལ་ནི། །སྨྲ་བ་པོས་ཀ་ཡུང་བརྡ་བྱ་བ་མི་ནུས་སོ། །དེ་ལྟའོ་ཞེ་ན་ནི་ཐ་སྙད་ཀྱི་ཚེ་ན་ཉན་པ་པོས་མི་རྟོག་པ་ཁོ་ནར་འགྱུར་རོ། །དེ་ཉིད་འཆད་པ་ནི་ཅི་སྲིད་དངོས་པོ་མཐའ་མེད་པར་ཞེས་བྱ་བའོ། །ད་ནི་རང་བཞིན་ལ་སོགས་པ་ཇི་ལྟར་འདོད་པ་བཞིན་ཡིན་པར་བརྗོད་པ་ནི། རང་བཞིན་ལ་སོགས་པ་དག་ནི་ཞེས་བྱ་བའོ། །འོ་ན་ཇི་ལྟར་ཡོད་དོ་ཞེས་བྱ་བལ་སོགས་པ་འགྲུབ་པ་ཅེ་ན་འདི་ལྟར་ཞེས་བྱ་བའོ། །ཡང་ཇི་ལྟར་ན་བརྡ་རྒྱུ་མཚན་ཐ་དད་པས་མ་སྦྱར་ཅེ་ན། འདོད་པ་དང་ཞེས་གསུངས་སོ། །གལ་ཏེ་སྤྱི་མེད་ན་འོ་ན་ཇི་ལྟར་ཞེས་བྱ་བའོ། །རྣམ་པར་དེ་ལྟར་བུའི་ཞེས་བྱ་བ་གཅིག་ཏུ་འཛིན་པ་བསྐྱེད་པར་ནུས་པའི་མངོན་སུམ་མོ། །དཔེ་ཉིད་བསྒྲུབ་པར་བྱ་བ་ནི་བདེ་བ་ལ་སོགས་པའོ་ཞེས་བྱ་བའོ། །དེ་ལྟ་བུ་ཉིད་ཡིན་ཞེས་བྱ་བ་ནི་དོན་ལ་བརྟེན་པའི་བདེ་བ་ཉིད་ཡོད་པ་ཡིན་ནའོ་།དེ་ལྟ་བུམ་ཡིན་པ་ཉིད་ནི་སྡུག་བསྔལ་ཉིད་དོ། །ཇི་ལྟར་ཁ་དོག་དང་དབྱིབས་ཀྱི་ཕྱི་རོལ་ན་ཡོད་པས་ན་དུས་གཅིག་ཏུ་རྣམ་པར་ཤེས་པའི་རྣམ་པར་གཉིག་གར་འགྱུར་བ་དེ་བཞིན་དུ། །བདེ་བ་དང་སྡུག་བསྔལ་ཕྱི་རོལ་ན་ཡོད་པས་ན་རྣམ་བར་ཤེས་པ་དུས་གཅིག་ཏུ་གཉི་གའི་རྣམ་པ་ཅན་དུ་འགྱུར་རོ། །ཐལ་བ་སྤོང་བ་བརྗོད་པ་ཅི་སྟེ་ཞེས་བྱ་བའོ། །ལན་ནི་དེ་ལྟ་གྱུར་ན་ཞེས་བྱ་བའོ། །མ་མཐོང་བ་ཁོ་ནས་ཞེས་བྱ་བ་ནི་ཕྱིར་རོལ་ན་ནི་བདེ་བ་དང་སྡུག་བསྔལ་དག་ཡོད་པ་མ་ཡིན་ནོ་ཞེས་དགོངས་པའོ། །དེ་ལྟ་གྱུར་པ་ཞེས་བྱ་བ་ནི་བདེ་བ་དང་སྡུག་བསྔལ་གྱི་རང་བཞིན་ནོ། །མ་མཐོང་བས་ནི་ཡོད་པའི་དངོས་པོ་ངེས་པར་བྱེད་ཀྱི། །སྒྲུབ་པར་ནི་མ་ཡིན་ཏེ། །དེས་ལ་སྟེ་ཕྱི་རོལ་ན་བདེ་བ་དང་སྡུག་བསྔལ་ཡོད་པ་དེ་ལྟ་ན་ཡང་དེ་དག་གི་ནང་ན་མཐོང་བའི་དབང་གིས་གཅིག་ཁོ་ན་མཐོང་བ་ཡིན་གྱི་གཞན་ནི་མ་ཞེས་ངེས་པར་འཐད་པ་ཡིན་ན་ཞེས་བརྗོད་པ་ནི་མ་མཐོང་བ་ནི་ཞེས་བྱ་བའོ། །སྒྲུབ་པ་ཉིད་མཆོག་ཡིན་པ་ཉིད་བརྗོད་པ་ནི་མ་མཐོང་བས་ངེས་པར་བྱེད་པ་ན་རྟོག་པ་དུ་མར་འགྱུར་ཏེ། །རེ་ཞིག་ཕྱི་རོལ་བདེ་བ་དང་སྡུག་བསྔལ་བར་བརྟགས་པར་བྱ་བ་ཡིན་ལ། དེ་ལས་ཀྱང་གཞན་ངེས་པར་བྱེད་པར་ཡིན་ནོ། །འདི་ཉིད་བརྗོད་པ་ནི་འདི་ལྟར་ཞེས་བྱ་
བའོ། མ་མཐོང་བས་སྒྲུབ་པ་བྱེད་པར་རྟོགས་པ་ན་མ་མཐོང་བ་འབའ་ཞིག་རྟོག་པ་ཡིན་གྱི་གཞན་ནི་མ་ཡིན་ནོ། །འཛིན་པ་དེ་རྗེས་སུ་འགྲོ་བ་ཉིད་ལས་སྤྱིའི་དོན་རྗེས་སུ་དཔག་པ་ལ་སོགས་པ་འགྲུབ་ཀྱི་སྤྱིའི་དབང་གིས་ནི་མ་ཡིན་ནོ། །གང་གི་ཕྱིར་དེ་ལྟར་འདུ་བའི་དབང་གིས་གཅིག་ཏུ་རྟོགས་པ་མི་འཐད་པ་དེའི་ཕྱིར་ན་སྤྱི་དེ་རྟོགས་པ་གང་ཡིན་པ་དེ་ལ་ནུས་པ་མེད་དོ། །དེ་བཞིན་དུ་ཞེས་བྱ་བ་ནི་རྟོགས་པའི་ནུས་པ་མེད་པ་ནང་གི་བྱེད་པ་ལ་རག་ལས་པ་དེ་བཞིན་དུའོ། །རིགས་ཞེས་བྱ་བ་ཡང་ཤེས་པ་ཉིད་ལ་བརྗོད་དེ། །དེས་ན་རིགས་གཞན་ཁས་བླངས་བ་མི་རིགས་པ་མ་ཡིན་ནོ། །འོ་ན་ཇི་ལྟར་ཐམས་ཅད་ལ་བ་ལང་བ་ལང་ཞེས་བྱ་བའི་སྒེ་རྗེས་སུ་འགྲོ་ཞེ་ན། ལྷག་མ་ནི་ཞེས་གསུངས་ཏེ། །གང་ལ་འབྲས་བུ་ཐ་མི་དད་པར་ཞེན་པ་ཡོད་པ་བ་ལང་ལ་སོགས་པ་དེ་དག་གི་དངོས་པོ་ཉིད་དེ་དེས་སོ། །ཅི་སྟེ་ཡང་རང་གི་ངོ་བོ་ལས་ཐ་དད་པར་དེའི་འབྲས་བུ་ཅན་གྱི་སྤྱི་ཡོད་པར་འགྱུར་རོ་ཞེ་ན། འདི་ལ་བརྗོད་པ་ནི་དེ་ལྟ་ན་ནི་ཞེས་བྱ་བའོ། །ཅིག་ཏུ་རྟོགས་པར་ཞེས་བྱ་བ་ནི། །ས་བོན་ལ་སོགས་པ་ཡང་འདི་ནི་ཞིང་ངོ་ཞེས་བྱ་བར་འགྱུར་རོ། །མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །ཇི་ལྟར་བ་ལང་གི་གསལ་བ་རྣམས་ལ་དེའི་འབྲས་བུ་ཅན་ཉིད་ཁྱི་དབང་གིས་བ་ལང་བ་ལང་ཞེས་རྟོགས་པ་དེ་བཞིན་དུ་ཞིང་ལ་སོགས་པ་རྣམས་ལ་ཡང་དེའི་འབྲས་བུ་ཅན་ཉིད་ཀྱི་དབང་གིས་ས་བོན་ས་བོན་ཞེས་རྟོགས་པར་འགྱུར་རོ། །འགྱུར་བ་ཡང་མ་ཡིན་ཏེ། །དེས་ན་དེའི་འབྲས་ཅན་ཉིད་ཅེས་བྱ་བའི་སི་ཐ་དད་པ་ན་ཐ་དད་པར་རྟོགས་པའི་རྒྱུ་མ་ཡིན་ནོ། །སྤྱི་ཡོད་དམ་འོན་ཏེ་མེད་ཅེས་བྱ་བ་ལ་སོགས་པའང་དེར་དུབ་བ་སྟེ་ཉོན་མོངས་པ་དེ་ནི་ དགོས་པ ་མེད་དོ། །འཇུག་པའི་རྒྱུ་མཚན་ཞེས་བྱ་བ་ནི་འཇུག་པ་ནི་ཡོད་པ་ཡིན། །དེ་ཉིད་རྒྱུ་མཚན་ཡིན་ཏེ་འབྲས་བུ་གཅིག་པ་དེ་ཉིད་དོ། །དེ་དང་ལྡན་པ་ནི་རབ་ཏུ་བཅུག་པའོ། །རྣམ་པ་དང་ལྡན་པ་ཉིད་དུ་ཇི་ལྟར་མི་འཐད་ཅེ་ན། །མ་འདྲེས་པ་ལ་སྟེ། གཞན་ལས་ལྡོག་པ་ལ་ནི་རྣམ་པ་མེད་པའི་ཕྱིར་ཏེ། རང་བཞིན་ཅན་མ་ཡིན་པའི་ཕྱིར་རོ། །དེ་ལས་གཞན་དང་ཞེས་བྱ་བ་ནི་ངེས་པ་ཁོ་ནང་རྣམ་པར་དང་ལྡན་པའོ། །བློ་དང་འབྲེལ་བ་ཡིན་ན་འགྱུར་གྱི་གཞན་དུ་ནི་མ་ཡིན་ནོ། །འདིས་ནི་རེ་ཞིག་བློའི་རྣམ་པ་གདོན་མི་ཟ་བར་ཁས་བླང་བར་བྱ་བ་ཉིད་དུ་བསྟན་པ་ཡིན་ནོ། །འདི་ལྟར་
ཡིན་པ་ཅིའི་ཕྱིར་ཞེ་ན། །འདི་ལྟར་ཞེས་བྱ་བའོ། །གལ་ཏེ་དེ་ལྟར་ཇི་སྲིད་བློ་ཐོག་མ་མེད་པའི་བག་ཆགས་དང་འབྲེལ་བར་ཁས་ལེན་ན་བློ་དེར་སྣང་བའི་རྒྱུ་ནི་ཅི་ཉིད་ཡིན་པར་ཁས་བླང་བར་བྱའོ་སྙམ་ན་འདི་ལ་བ་ལ་ངོ་སྙམ་པའི་ཡོད་པ་མ་ཡིན་ནོ་ཞེས་བྱ་བ་ནི་གཞལ་བྱ་སྣང་བ་མ་ཡིན་པའོ། །སྤྱི་མི་སྣང་མོད་དེ་དེ་ལྟ་ན་ཡང་དེ་ཡུལ་དུ་ཇི་ལྟར་མི་འགྱུར་ཞེ་ན། གཞལ་བྱའི་རྣམ་པར་ཞེས་བྱ་བའོ། །དེ་དང་ནི་བག་ཆགས་དང་ངོ༌། །དེ་ཉིད་ལ་མི་སླུ་བར་ཞེས་བྱ་བ་ནི་བག་ཆགས་གཉིད་ལ་མི་སླུ་བར་རོ། །དེའི་འབྲས་བུ་མེད་པ་ལས་ལྡོག་པ་ཡོངས་སུ་གཅོག་མོད། །ཅི་སྐྱོན་སྙམ་ན། །དེའི་འབྲས་བུ་ཅན་ཉིད་དེ་ཡང་ཞེས་བྱ་བ་སྟེ། ལྡོག་པ་ཡང་ངོ༌། །ཡང་ན་ཕྱི་རོལ་གྱི་རང་བཞིན་གྱི་ལྡོག་པ་ཉིད་ཡིན་ནོ། །འདིས་ནི་ལྡོག་པ་ཡོངས་སུ་གཅོད་པ་ན་ཕྱི་རོལ་གྱི་རང་བཞིན་ཡོངས་སུ་གཅད་པར་བསྟན་པ་ཡིན་ནོ། །དེ་ཞེས་བྱ་བ་ནི་སྒྲུབ་པའི་རང་བཞིན་ནམ། ལྡོག་པའི་རང་བཞིན་གྱི་ཕྱི་རོལ་གྱི་རང་བཞིན་ནོ། །གལ་ཏེ་ཕྱི་རོལ་གྱི་མཐར་ཐུག་པ་ཡིན་ན་དེའི་ཚེ་ཕྱི་རོལ་ལ་རེག་པར་ཅི་སྟེ་མི་འགྱུར་སྙམ་ན། །བརྒྱུད་པས་ཞེས་གསུངས་སོ། །དེ་དང་ཐ་མི་དང་པའི་ཞེས་བྱ་བ་ནི་རྣམ་པར་རྟོག་པའི་གཟུགས་བརྙན་གྱི་རང་བཞིན་ནོ། །གཏན་ཚིགས་གཉིས་པ་ནི་གཞན་ལས་ལྡོག་པ་དག་ལ་ཞེས་བྱ་བའོ། །འདི་གཉིས་གསལ་བར་བྱེད་པ་ནི་ཕྱི་རོལ་ལ་ཞེས་བྱ་བ་ལ་སོགས་པའོ། །དེ་ཞེས་བྱ་བ་ནི་རྣམ་པར་རྟོག་པའི་གཟུང་བའོ། །དེ་ལས་གཞན་ཞེས་བྱ་བ་ནི། །ཐ་དད་པར་སྣང་བ་ལས་གཞན་ནོ། །འགལ་བ་ཅི་ཡོད་ཅེས་བྱ་བ་ནི་ཁ་དོག་དབང་དབྱིངས་སུ་སྣང་བ་དང་ལྡན་པ་རྣམ་པར་རྟོག་པ་ལ་སྣང་བ་གལ་ཏེ་དངོས་པོ་ཡིན་མོད། དེའི་ཚེ་ཅི་འགལ་ཞེས་བྱ་བའི་དོན་ཏོ། འདི་ལ་བརྗོད་པ་ནི་གང་གི་ཕྱིར་ཞེས་བྱ་བའོ། །རྣམ་པར་རྟོགས་པའི་གཟུགས་བརྙན་ཕྱི་རོལ་གྱི་དངོས་པོ་མ་ཡིན་མོད། །བློའི་མཚན་ཉིད་ནི་དངོས་པོ་ཡིན་པས་དེ་ཉིད་སྒྲ་དག་གི་བརྗོད་པར་བྱ་བར་འགྱུར་རོ་ཞེས་བརྗོད་པ་ནི་དེ་ལྟ་ཡིན་མོད་ཅེས་བྱ་བའོ། །སྒྲའི་དོན་གཞན་སེལ་བ་མ་གཏོགས་པས་གཞན་དག་བརྗོད་པ་ནི་འོ་ན་ནི་གཞན་སེལ་བ་ཡང་ཞེས་བྱ་བའོ། །དེ་ཡིན་ན་ཞེས་བྱ་བ་ནི་བློའི་རྣ་པ་ཡིན་ནའོ། །དེ་ཞེས་བྱ་བ་ནི་བློའི་རྣམ་པར་སྒྲ་ལས་རྟོགས་པ་ནའོ། །མི་འགྱུར་མོད་ཀྱི་ཅི་སྐྱོན་སྙམ་ན་གཞན་སེལ་བ་ནི་ཞེས་བྱ་བའོ། །གཞན་སེལ་བ་ནི་དོན་གྱི་ཆ་ཉིད་དོ་ཞེས་བྱ་བར་ཡང་ཇི་
ལྟར་ཤེས་སྙམ་ན་སྒྲས་ཞེས་བྱ་བའོ། །འོན་ཏེ་བློའི་རྣམ་པ་ཉིད་ནི་དོན་ལ་ཡང་ཡོད་དེ་དེས་ན་དེ་ལ་དོན་གྱི་ཆ་ཉིད་ཀྱང་མཉམས་པར་ཡོད་དོ་ཞེ་ན། །རྣམ་པ་དེ་ཡང་ཞེས་བྱ་བའོ། །དེའང་ཞེས་བྱ་བ་ནི་བློའི་རྣམ་པའི་མཚན་ཉིད་དོ། །བློ་ཉིད་བཞིན་ནོ་ཞེས་བྱ་བ་ནི་མཐོང་བ་བཞིན་ནོ། །དཔེར་ན་མཐོང་བ་རྗེས་སུ་འགྲོ་བ་མེད་པ་དེ་བཞིན་དུ་བློའི་རྣམ་པ་ཡང་ཡིན་ནོ། །འོན་ཏེ་འདི་རྗེས་སུ་འགྲོ་བ་མེད་པའི་མཐོང་བས་བསྐྱེད་པ་དེ་དེ་ལྟ་ན་ཡང་རྗེས་སུ་འགྲོ་བར་འགྱུར་བ་ཡིན་ནོ་སྙམ་ན། །རྗེས་སུ་འགྲོ་བ་ཅན་མ་ཡིན་པའོ་ཞེས་གསུངས་སོ། །གཟུགས་བརྙན་ཞེས་བྱ་བ་ནི་བློའི་རྣམ་པའོ། །དངོས་པོ་ནི་ཞེས་བྱ་བ་ནི་ཕྱི་རོལ་ལོ། །སྤྱི་རྟོགས་པ་མེད་པ་ཉིད་གསལ་བར་བྱེད་པའི་དངོས་པོ་ལ་བརྟེན་པའི་ཞེས་བྱ་བའོ། །དེ་ནི་ཞེས་བྱ་བ་ནི་རྟོགས་པའི་དངོས་པོ་ཆའི་རང་བཞིན་དུ་གྱུར་བའི་གཞན་སེལ་བ་མི་རྟོགས་ལ། །གཞན་སེལ་བའི་དངོས་པོ་ཆའི་རང་བཞིན་དུ་ཡང་ཁྱོད་ཀྱིས་བརྗོད་པ་ཡིན་ནོ་ཞེ་ན། ལན་ནི་འདི་ལ་ཞེས་བྱ་བའོ། །བློའི་རྣམ་པ་ལ་དངོས་པོའོ་སྙམ་དུ་སྒྲོ་འདོགས་པར་ཇི་ལྟར་འགྱུར་ཞེ་ན། །དེ་དང་གཅིག་ཏུ་ཞེས་གསུངས་སོ། །དངོས་པོ་དང་བློའི་རྣམ་པ་གཅིག་ཏུ་ཞེན་ནས་སོ། །དེ་ཡང་ཞེས་བྱ་བ་ནི་བློའི་རང་བཞིན་ནོ། །དེའི་ཞེས་བྱ་བ་ནི་ཐམས་ཅད་ལ་རྟོགས་པའི་ཕྱིར་དང་དངོས་པོ་དང་ལྷན་ཅིག་ཏུ་བྱས་པའི་ཕྱིར་རོ། །འོ་ན་ནི་གཞན་སེལ་བའི་ཡུལ་ཅན་དུའང་འཐད་པ་མ་ཡིན་ཏེ། ལོག་པར་སྣང་བའི་ཕྱིར་རོ་ཞེ་ན། །གཞན་སེལ་བ་ནི་བདེན་པའི་ཕྱིར་རོ་ཞེས་གསུངས་སོ། །ཇི་ལྟར་བདེན་སྙམ་ན་དངོས་པོ་རྣམ་པ་ལྟར་ཞེས་གསུངས་ཏེ། དཔེར་ན་དངོས་པོའི་རྣམ་པར་བྱ་བ་ཡིན་པ་ལ་གདོན་པ་ཡོད་པ་དེ་བཞིན་དུ་གཞན་སེལ་བ་དེ་ལ་ནི་ཡོད་པ་མ་ཡིན་ནོ། །འདི་ཉིད་གསལ་བར་བྱེད་པ་ནི་འདི་ནི་ཞེས་བྱ་བ་སྟེ། འདིས་ནི་གནོད་པའི་རྣམ་པ་བརྗོད་པ་ཡིན་ནོ། །གང་ལ་གནོད་པ་བྱེད་པ་ཡོད་པ་ནི་དེ་མ་ཡིན་ནོ། །གལ་ཏེ་གནོད་བྱེད་ཡོད་པ་དང་མེད་པ་དག་གིས་མ་རྟོགས་པ་དང༌། རྟོགས་པར་གཞག་པ་ནི་མི་འཐད་དེ་སྣང་བ་ཡོད་པ་དང་མེད་པ་དག་ཁོ་ནས་རྣམ་པར་གཞག་པར་རིགས་པའི་ཕྱིར་རོ་སྙམ་ན་དེའི་ཕྱིར་རོ་ཞེས་བྱ་བའོ། །ཅིག་ཤོས་ཞེས་བྱ་བ་ནི་དངོས་པོའི་རྣམ་པར་རྟོག་པའོ། །འགྲོ་བ་ཡིན་ནོ་ཞེས་བྱ་བ་རྟོགས་པ་ཡིན་ཏེ་ངེས་པ་ཡིན་ནོ་ཞེས་བྱ་བའི་དོན་ཏོ། །གཞན་སེལ་བ་དེ་
ལ་སྐྱེས་བུ་འཇུག་པར་བྱེད་པ་ཡང་ཡིན་ནོ། །དེའི་ཕྱིར་རྒྱུ་རྣམ་པ་འདི་གཉིས་ཀྱི་ཕྱིར་ན་མཉན་པ་ནི་གཞན་སེལ་བར་བྱེད་པར་བྱེད་པ་ཡིན་ནོ། །ཕྱི་རོལ་དེའི་ཐ་སྙད་ཀྱི་ཡུལ་དང་རྒྱུ་དེའི་དངོས་པོ་ཉིད་དུ་རྣམ་པར་འཇོག་པ་སྟེ་གནས་པའོ། །གལ་ཏེ་ཤེས་པ་དེ་ལས་ལྷག་པར་སྒྲེ་བཏགས་པ་ལ་ལྷག་པར་ཞེན་པ་ཞེས་བརྗོད་པ་ཡིན་གྱི་དེ་ལ་མ་རྟོགས་ཀྱང་འཇུག་པའི་རྒྱུ་ཉིད་ལ་ནི་མ་ཡིན་ནོ་ཞེས་བྱ་བའི་དོན་དུ་རྩོད་པ་བརྗོད་པ་ནི་དེ་ལ་ཞེས་བྱ་བ་ལ་སོགས་པའོ། །ཤེས་པ་གཞན་ཡིན་མོད་ཅི་སྐྱོན་སྙམ་ན། གལ་ཏེ་ཞེས་གསུངས་སོ། །དེས་ཞེས་བྱ་བ་ནི་ལྷག་པར་ཞེ་ན་པའི་རང་བཞིན་གྱིས་རྣམ་པར་རྟོག་པས་སོ། །རིགས་པ་ཅན་ལ་སོགས་པའི་ལུགས་ཀྱི་དོགས་པ་བསུ་བ་ནི་གཞན་དུ་ཞེས་བྱ་བའོ། །གང་གི་ཚེ་སྨིག་རྒྱུ་ལ་ཆུར་སྒྲོ་བཏགས་པ་དེ་ཉིད་ཀྱི་ཚེ་སྒྲོ་འདོགས་པར་བྱེད་པའི་ཤེས་པ་དེ་ཉིད་ཀྱིས་གཞན་ན་གནས་པའི་ཆུ་འཛིན་པ་ཡིན་ནོ་ཞེས་བྱ་བ་ནི་དེ་དག་གི་རྣམ་པར་གཞག་པ་ཡིན་ནོ། །གྲུབ་པའི་མཐའ་སྨྲ་བ་འདྲི་བ་ན་ཅི་དེ་ཞེས་བྱ་བ་སྟེ་སྒྲོ་བཏགས་པ་དེའོ། །གཞན་གྱི་ལན་ནི་དེའོ་ཞེ་ན་ཞེས་བྱ་བའོ། །དེ་ནི་གཞན་ན་ཡོད་པ་ཉིད་དོ་ཞེས་བྱ་བའི་དོན་ཏོ། །འདི་ལ་བརྗོད་པ་ནི་ལྷག་པར་ཞེས་བྱ་བའོ། །གཞན་ན་ཡོད་པའི་ཆུ་ཉིད་དེས་གཟུང་བའི་ཕྱིར་སྒྲོ་བཏགས་པ་ཡིན་ནོ། །འོན་ཏེ་མེད་དོ་ཞེས་ན་ཞེས་བྱ་བ་ནི་གཞན་ནའོ། །གང་ལ་ཞེས་བྱ་བ་ནི་སྨིག་རྒྱུ་ལ་སོགས་པའོ། །དེ་ཞེས་བྱ་བ་ནི་ཆུ་ལ་སོགས་པའོ། །དེ་ཡང་ནི་སྨིག་རྒྱུ་ལ་སོགས་པ་ཡང་ངོ༌། །དེའི་ཚེ་ཞེས་བྱ་བ་ནི་ནི་ག་ལྟར་ན་ཡང་ངོ༌། །འདིའི་ལན་ནི་དེ་ལ་དེ་རྟོགས་པ་སྟེ་ཞེས་བྱ་བའོ། །འདི་ཉིད་ཀྱི་དོན་བརྗོད་པ་ནི་དེ་དང་ཞེས་བྱ་བའོ། །དོན་དེ་ལྟར་འགྱུར་མོད་ཅི་སྐྱོན་སྙམ་ན། དེའི་ཚེ་ཡང་ཞེས་བྱ་བའོ། །འོན་ཏེ་ཞེས་བྱ་བ་ནི་དོགས་པ་སྟེ་ཆུ་ལ་སོགས་པ་མེད་པ་ཉིད་ལའོ། །མེད་པ་ཉིད་ཅེས་གྲུབ་པའི་མཐའ་དང་ལྡན་པས་དྲིས་པ་ན་གཞན་གྱི་ལན་ནི་དེའི་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་འགོག་པའོ། །ཆུ་ལ་སོགས་པ་མེད་པ་ཞེས་བྱ་བ་ནི་སྨིག་རྒྱུ་བ་དག་ལ་རྟོགས་པའི་ཆུ་ནི་གཞན་གྱི་ཡུལ་མ་ཡིན་པའི་ཕྱིར་ཇི་ལྟར་གཞན་གྱིས་མེད་པར་རྟོགས། །བདག་ཉིད་ཀྱིས་རྟོགས་པའི་ཆུ་ནི་གཞན་གྱིས་ཡུལ་དུ་བྱེད་པ་མ་ཡིན་ཏེ། དེའི་ཤེས་པའི་རང་བཞིན་ཡིན་པས་ན་ཐུན་མོངས་མ་ཡིན་པའི་ཕྱིར་རོ་ཞེས་དགོངས་པའོ། །དེ་ལྟར་ཞེས་བྱ་བ་ནི་ཆུ་མ་ཡིན་པ་ལ་ཡང་ཆུའི་རྣམ་པར་རོ། །དེ་ནི་
ཞེས་བྱ་བ་ནི་སྣང་བཞིན་པའི་ཆུའོ། །རང་རི་རྣམས་པར་རྟོག་པ་ཡིན་ཡང༌། ཕྱི་རོལ་གྱི་ཐོབ་པར་བྱ་བའི་ཐ་སྙན་བྱེད་པའི་རྒྱུའི་ཕྱིར་ན། ཐོབ་པར་བྱ་བ་མ་ཡིན་པ་རང་གི་རྣམས་པའི་ཐ་སྙད་མི་བྱེད་པ་ཡིན་ནོ་ཞེས་བྱ་བའི་དོན་ཏོ། །འདིའི་མིང་ནི་འདི་ཡིན་ཏེ་ཞེས་བྱ་བ་ནི་འདི་ཉིད་ཀྱི་དོན་ནི་འདི་ལས་ནི་དུས་གཞན་དུ་ཡང་འདི་ཞེས་བྱ་བའོ། །རང་གི་མཚན་ཉིད་ནི་མ་ཡིན་ནོ་ཞེས་བྱ་བ་ནི་ཡུལ་དང་དུས་གཞན་ན་མེད་པའི་ཕྱིར་རོ་ཞེས་དགོངས་པའོ། །བཟློག་པ་ནི་ཞེས་བྱ་བ་ནི་གོམས་པའམ། རྟོག་པ་སྔོན་དུ་གཏོང་བ་ཅན་ཡིན་པས་སོ། །རྟོག་པ་པོ་གཉི་ག་ཡང་མདོར་བསྡུས་ནས་སྟོན་པ་ནི་འདི་ལྟར་ཞེས་བྱ་བའོ། །འདིའི་མིང་འདི་ཞེས་བྱ་བ་ནི་བརྡ་ཉིད་ཀྱི་དོན་ཏོ། །དེ་ལྟར་རེ་ཞིག་གང་ཞིག་དངོས་པོ་ཁོ་ནར་བརྡ་འཛིན་པ་བརྗོད་པ་ཡིན་ནོ། །དེ་ནི་ཞིག་རང་ཉིད་ཁོ་ན་ཐ་སྙད་ལས་བརྡ་རྟོགས་པ་དེ་བརྗོད་པ་ནི་དེ་བཞིན་དུ་ཞེས་བྱ་བའོ། །དེ་ལ་ན་ཡང་རྟོགས་པ་ལྡན་པ་དག་རྟོག་པར་འགྱུར་རོ་ཞེས་བལྟ་པར་བྱའོ། །འགའ་ཞིག་གིས་འདི་འོན་ཅིག་ཅེས་བརྗོད་པ་ལས་སོ། །སྒྲ་འདི་ལས་ཞེས་བྱ་བ་ནི་རྣམ་པ་འདི་ལྟ་བུའི་སྒྲ་ལས་སོ། །ཡང་ན་ཞེས་བྱ་བ་ལ་སོགས་པས་ནི་དེ་ཕྱིར་བརྡའི་དུས་ན་ཡང་ཞེས་བྱ་བའི་རྣམ་འགྲེལ་ཉིད་རྣམ་པ་གཞན་དུ་འཆད་པའོ། །སྔར་ཞེས་བྱ་བ་ནི་བརྡའི་དུས་ནའོ། །རང་གིས་རྟོགས་པའི་འབྲས་བུ་ཅན་ཞེས་བྱ་བ་འདིའི་དོན་བརྗོད་པ་ནི། གཟུགས་དེའི་འབྲས་བུ་ཡང་ཞེས་བྱ་བའོ། །ལྡོག་པ་ནི་ཐ་དད་པ་ཁོ་ནའོ་ཞེས་བྱ་རྒྱལ་བ་འགའ་ཞིག་དགོངས་པར་འགྱུར་བས་ན་དེ་ཉེ་བར་བཀོད་ནས་སུན་འབྱིན་པ་ནི་ལྡོག་པ་དེ་ནི་ཞེས་བྱ་བའོ། །བཀར་ནས་ཞེས་བྱ་བ་ནི་གསལ་བ་ལས་སོ། །ལྡོག་པ་ཡན་རྟོག་པས་བཀར་ན། ད་དེ་དང་གཅིག་ཏུ་ཐ་སྙད་བྱེད་པའི་ཕྱིར་རོ། །དེ་ལྟར་གྱུར་ན་ཞེས་བྱ་བ་འདི་ཉིད་ཀྱི་དོན་ནི་སྒྲུབ་པའི་ཚུལ་དུ་ཞེས་བྱ་བ་ལ་སོགས་པའོ། །ཇི་སྲིད་དུ་རིགས་མཐུན་པའི་གསལ་བ་མཐའ་དག་ལ་སྒྲ་མཐོང་བ་དེ་སྲིད་དུ་སྒྲ་ཉིད་དུ་མི་འགྱུར་རོ་ཞེས་བྱ་བའི་དོན་ཏོ། །གལ་ཏེ་གསལ་བ་རྣམས་ལ་བརྡ་བྱེད་པ་ཡིན་ན་དེའི་ཚེ་ཉེས་པ་འདིར་འགྱུར་བ་ཞིག་ན་ཅིས་ཀྱང་བརྡ་ནི་སྤྱི་ལ་ཡིན་ནོ་ཞེ་ན། སྤྱི་ལ་ཡང་ཞེས་བྱ་བའོ། །ཅི་རིགས་མི་མཐུན་པའི་གསལ་བ་དག་ལ་མེད་པ་དང་བཅས་པ་རྟོགས་པར་བྱ་བའི་དོན་དུ་སྒྲ་གཞན་དུ་མ་མཐོང་བ་ལ་ལྟོས་པ་ཡིན་ནོ་ཞེས་བྱ་བ་ནི་རྩོད་པའི་དོན་ཏོ། །འོ་ན་ནི་ཞེས་བྱ་བ་ནི་ལན་
ནོ། །འདི་ཉིད་གསལ་བར་བྱེད་པ་ནི་གསལ་བ་ཉིད་ཅེས་བྱ་བའོ། །དེ་ལས་གཞན་ལས་ཞེས་བྱ་བ་ནི་རིགས་མི་མཐུན་པ་མེད་པ་དང་ལྡན་པའོ། །གལ་ཏེ་གསལ་བ་རྟོགས་པ་མེད་པ་ཉིད་དེ་བ་ལང་ཙམ་ཞིག་རྟོགས་པའི་ཕྱིར་རོ། །དེས་ན་གསལ་བ་ཉིད་རྟོག་པར་འགྱུར་གྱི། ཅི་སྟེ་བརྗོད་སྙམ་དུ་བསམས་ནས་སྨྲས་པ་ནི་གསལ་ཉིད་ནི་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །ཅི་ཉིས་རིམ་གྱིས་ཞེས་དྲིས་པ་ན་གཞན་ལན་འདེབས་པ་ནི། རྟོག་པ་ཉིད་དོ་ཞེས་བྱ་བའོ། །ནང་གི་ཁྱད་པར་ཞེས་བྱ་བ་ནི་ཐུང་དུ་དང་རིང་པོ་ལ་སོགས་པའི་རང་བཞིན་གྱི་ཁྱད་པར་རྟོག་པ་ནི་མི་སྲིད་པའོ། །ད་ཡང་ཞེས་བྱ་བ་ནི་ཁྲོ་བོ་ལ་སོགས་པ་ཁྱད་པར་གྱི་རང་བཞིན་ནོ། །གསལ་བ་རྣམས་ཞེས་བྱ་བ་ནི་རིགས་མཐུན་པ་དང་མི་མཐུན་པ་ལས་ལྡོག་པ་རྣམས་སོ། །སྤྱིས་ཞེས་བྱ་བ་ནི་བ་ལང་ཉིད་ཀྱིས་སོ། །ཁྱད་པར་གྱི་རང་བཞིན་དེ་གདོན་མི་ཟ་བར་རྟོགས་པ་ཉིད་ཡིན་ནམ་ཞེས་བྱ་བའི་དོན་འདི་ལ་ཚད་མ་མེད་དེ། ངེས་ན་ཇི་ལྟར་གདོན་མི་ཟ་བར་ཁྱད་པར་འགའ་ཞིག་ཡོད་ཅེས་བྱ་བའི་དོན་ཏོ། །དེ་ལྟར་ན་འདི་ནི་སྤྱི་རྟོགས་པར་ཁས་བླངས་ནས་བརྗོད་པ་ཡིན་ནོ། །དེ་ཡང་ཡོད་པ་མ་ཡིན་ན་ཞེས་བརྗོད་པ་ནི་ཅི་ཡང་ཞེས་བྱའོ། །བློ་ཉིད་དེ་དེ་ཡུལ་གྱི་མ་ཡིན་ནོ། །གལ་ཏེ་ཇི་ལྟར་གཞན་ལས་ལྡོག་པ་ལས་འཇུག་པ་ཞེས་བརྗོད་པ་དེ་བཞིན་དུ། ཁོ་ནོ་ཅག་ཀྱང་གསལ་བ་ཉིད་དམ་སྤྱི་ཉིད་ལ་འཇུག་གོ་ཞེས་བརྗོད་དོ། །སྟོང་པའི་རང་བཞིན་གྱི་ལྡོག་པ་ལ་ནི་སུ་ཡང་འཇུག་པ་མ་ཡིན་ཏེ། དངོས་པོ་ཁོ་ན་འཇུག་པར་མཐོང་བའི་ཕྱིར་རོ་ཞེས་ དགོས་པ ་ལ་བརྗོད་པ་ནི་གལ་ཏེ་ཞེས་བྱ་བའོ། །སླུ་བར་གྱུར་ན་ཞེས་བྱ་བ་ནི་གཞན་གྱིས་སྨྲས་པའོ། །སླུ་བར་གྱུར་ན་ཇི་ལྟར་སྤྱི་འམ་གསལ་བར་སྒྲའི་དོན་མ་ཡིན་པ་དེ་བཞིན་དུ་གཞན་སེལ་བ་ཡང་ངོ་ཞེས་བསམས་པའོ། །འདི་ལ་བརྗོད་པ་ནིག་ཞན་མཐོང་བ་ཞེས་བྱ་བའོ། །དོན་འདི་ཡིན་ཏེ་གཞན་སེལ་བ་ནི་སླུ་བ་མེད་པ་ཉིད་དོ། །འདི་ལྟར་བུམ་པ་ཁྱེར་ལ་ཤོག་ཅེས་བྱ་བའི་ངག་འདིའི་དོན་ནི་བུམ་པ་མ་ཡིན་པ་ཁྱེར་ལ་མ་འོང་ཞེས་བྱ་བ་ཡིན་ནོ། །བཙུགས་པའི་སྐྱེས་བུ་ཡང་བུམ་པ་མ་ཡིན་པར་མཐོང་ཡང་དེ་མི་ལེན་ཏེ་དེས་ན་སྒྲའི་དོན་གང་ཡིན་པ་དེ་ལ་ནི་སླུ་བ་མེད་དོ། །བུམ་པ་ཉིད་ནས་འོང་བའི་སྒྲའི་དོན་ཉིད་མ་ཡིན་ཏེ། དེས་ན་བུམ་པ་མ་མཐོང་བ་གལ་ཏེ་ཁྱེར་ནས་འོང་བ་མེད་པ་དེ་ལྟ་
ན་ཡང་སྒྲའི་དོན་མ་ཡིན་པའི་ཕྱིར་སླུ་བ་མེད་དོ་ཞེས་བྱ་བའོ། །དེ་ཉིད་བརྗོད་པ་ནི་བུམ་པ་ལས་གཞན་མ་ཐོང་ཡང་དེ་ལས་གཞན་མི་ལེན་པའི་ཕྱིར་ཏེ། བུམ་པ་ལས་གཞན་མི་ལེན་པའི་ཕྱིར་རོ། །སླུ་བ་ཡོད་པ་མ་ཡིན་ནོ་ཞེས་སྦྱར་རོ། །འདི་ཉིད་གསལ་བར་བྱེད་པ་ནི་བུམ་པ་མ་ཡིན་པའི་རང་བཞིན་དེ་ནིའོ། །གཞན་ཞེས་པ་ནི་བུམ་པ་མ་ཡིན་པ་ལས་གཞན་དེ་བུམ་པའི་རང་བཞིན་ནོ། །དེ་ལྟར་ན་རེ་ཞིག་རྟོགས་པ་གང་ཞིག་གཞན་གྱི་བརྡ་འཛིན་དུ་བཅུག་པ་དེ་ལ་ལྟོས་ནས་རྣམ་འགྲེལ་སྦྱར་བ་ཡིན་ནོ། །ད་ནི་གང་ཞིག་བདག་ཉིད་ཐ་སྙད་ལ་བརྡ་རྟོགས་པ་དེ་ལ་ལྟོས་ནས་སྦྱོར་བར་བྱེད་པ་ནི་ཡང་ན་ཞེས་བྱ་བའོ། །བྱེ་བྲག་ཏུ་ཞེས་བྱ་བ་ནི་རྣམ་པར་དབྱེ་བར་རོ། །དངོས་པོ་འདི་འོན་ཅིག་ཅེས་བྱ་བའི་དག་འདིའི་བྱེད་པ་ནི་ལེན་པ་མ་ཡིན་ཏེ། དངོས་པོ་ཉིད་ལ་ནི་མ་ཡིན་ནོ། །མེད་པ་ནི་བླང་བར་མི་ནུས་སོ། །དེས་ན་ཁྱེར་ཏེ་འོང་བ་ལ། བྱེད་པ་འཇུག་པའི་ཕྱིར་ན་ཡོད་པ་ཉིད་ལ་ཡང་བྱེད་པ་འཇུག་པ་ཡིན་ནོ་ཞེས་བྱ་བ་ནི་རྩོད་བའི་དོན་ཏོ། །གལ་ཏེ་གདོན་མི་ཟ་བར་བྱེད་ཁྱེར་ཏེ་འོན་བར་འགྱུར་ན་ནི་དེའི་ཚེ་ཡོད་པ་ཉིད་ལ་བྱེད་པ་འཇུག་པར་འགྱུར་བ་ཞིག་ན། འོན་ཀྱང་གདོན་མི་ཟ་བ་ཁྱེར་ཏེ་འོང་བ་ནི་མ་ཡིན་ཏེ་ཞེས་བྱ་བ་ནི་ལན་གྱི་དོན་ཏོ། །འོ་ན་ཡོད་པ་ཉིད་དུ་གང་ལ་རྟོགས་ཤེས་དེ་ནི་ཞེས་བྱ་བ་སྟེ་སྒྲས་ནི་མ་ཡིན་ནོ་ཞེས་བྱ་བའི་དོན་ཏོ། དཔེར་ན་བྱིས་པ་མངོན་པར་འདོད་པའི་དངོས་པོ་སློང་བ་དེ་ལ་འདི་བྱིས་པ་འདིས་བླང་བ་དེ་ན་གོར་མ་ཆག་ པ་དངོས་པོ་ཡོད་དགོས ་སོ་ཞེས་བྱ་བའི་དོན་གྱིས་གོ་བར་འགྱུར་རམ་ཅི་དེ་བཞིན་དུ་གཞན་དག་ལ་ཡང་དོན་གྱིས་གོ་བ་ཡོད་པ་མ་ཡིན་ནོ། །གཞན་དུ་ནི་མ་ཡིན་ནོ་ཞེས་བྱ་བ་ནི་མི་སྲིད་ན་ནི་ལེན་པ་ཡིན་ནོ། །གཞན་དག་ནི་ཞེས་བྱ་བ་ནི་ལྷ་དབང་ལ་སོགས་པའོ། །རྗེས་སུ་འགྲོ་བ་དང་ལྡོག་པ་གཅིག་ཏུ་གཙོ་བོ་ཡིན་ལ། སྒྲུབ་པ་ནི་ཕལ་པ་ཉིད་དུ་ཁས་བླངས་པ་ཡིན་ནོ་ཞེས་བྱ་བའི་དོན་ཏོ། །འདི་ལ་ལན་དེ་ནི་མི་བདེན་ཏེ་ཞེས་བྱ་བའོ། །འདི་ཡང་ཁས་བླངས་ནས་བརྗོད་པར་ཟད་ཀྱི་འདི་ནི་ཡོད་པ་མ་ཡིན་ནོ་ཞེས་བརྗོད་པ་ནི་ཞེས་བྱ་བའོ། །ཅིའི་ཕྱིར་ཞེ་ན་གསལ་བ་ཅིག་ཅེས་གསུངས་སོ། །ཡང་ན་ལ་ལ་ཁོ་ནར་སྒས་བསྟན་པ་དེ་ཐོབ་པ་དེ་ལ་ལྟོས་ཏེ་མཐོང་བའི་ཕྱིར་རོ། །འདི་ཉིད་འཆད་པ་ནི་ཞེས་བྱ་བ་ནི་ཞེས་བྱ་བའོ། །འདིའི་མི་འདི་ཡིན་ནོ་ཞེས་བརྗོད་པ་འདི་ལས་ནི་འདིར་
ཐ་དད་དུ་བྱ་བ་ཡིན་ནོ་ཞེས་བྱ་བ་འདི་ཙམ་ཞིག་ཡིན་ཏེ་ཞེས་བྱ་བར་རོ། །གཞན་དུ་ཞེས་བྱ་བ་ནི་དངོས་པོ་མཐོང་ནའོ། །ཇི་ལྟར་མེའི་ཁྱད་པར་ལ་ཐེ་ཚོམ་ཟ་ཞེས་བྱ་བ་ནི་སྤྱི་མཐོང་བའི་ཕྱིར་དང༌། ཁྱད་པར་མ་མཐོང་བའི་ཕྱིར་དང༌། ཁྱད་པར་དྲན་པའི་ཕྱིར་ཐེ་ཚོམ་དུ་འགྱུར་རོ་ཞེས་བྱ་བའི་དོན་ཏོ། །ལན་ནི་རྟོགས་པ་ཙམ་གྱིས་ཞེས་བྱ་བའོ། །འདི་ཉིད་སྟོན་པ་ནི་རེ་ཞིག་ཅེས་བྱ་བ་ཡིན་ནོ། །གང་དུ་ཞེས་བྱ་བ་ནི་རྩོད་པའི་གཞི་ནི་འདི་ཡིན་ཏེ་ཅི་མེ་ཡོད་དམ་འོན་ཏེ་མེད་ཅེས་ཐེ་ཚོམ་ཟའོ་ཞེས་ཅི་སྟེ་བརྗོད་དེ། གང་གི་ཕྱིར་འདི་ལ་མེ་ཡོད་དོ་ཞེས་ངེས་པར་རྟོགས་པའི་ཕྱིར་རོ་ཞེས་བྱ་བ་ཡིན་ནོ། །འདི་ལ་ལན་ནི་མ་ཡིན་ནོ་ཞེས་བྱ་བ་ནི་འདི་ལ་ལན་ནི་མ་ཡིན་ཏེ་ཞེས་བྱ་བའོ། །དེ་ལ་ནི་རེག་པའི་ཁྱད་པར་ལའོ། །ཇི་ལྟར་རྟོགས་ཞེས་བྱ་བ་ནི་འདྲི་བའོ། །དྲོ་བ་ཙམ་ཞིག་ཅེས་བྱ་བ་ནི་ལན་ནོ། །ཁྱད་པར་གྱི་རིམ་པ་ཉིད་ཡོད་པའི་ཕྱིར་རོ་ཞེས་བྱ་བ་ནི་ཁྱད་པར་རིམ་པ་ལ་མ་གཏོགས་པ་དྲོ་བའི་སྤྱི་ནི་ཡོད་པ་མ་ཡིན་ནོ། །དགོངས་པ་འདི་ཉིད་གསལ་བར་བྱེད་པ་ནི་ཁྱད་པར་རིམ་པ་ལ་སོགས་པའི་དབྱེ་བ་ལའོ། །གཅིག་ཉིད་ནི་ཞེས་བྱ་བ་ནི་ཡུལ་གཅིག་པའོ། །རེས་འགའ་ནི་འདི་ལྟ་བུ་ཞེས་བྱ་བ་རྩ་ལས་བྱུང་བའམ་རེས་འགའ་ནི་འདི་ལྟ་བུ་ཞེས་བྱ་བ་ནི་ལོ་མ་ལས་འབྱུང་བ་སྟེ། དེ་ལྟར་ཡུལ་དང་གཞན་ལ་བློ་སྐྱེ་བའི་ཕྱིར་གཅིག་པ་ཉིད་དུ་མི་འགྱུར་རོ། །གཅིག་ནི་ཞེས་བྱ་བ་ནི་རྩྭ་ལས་འབྱུང་བའམ། འོ་མ་ལས་འབྱུང་བའོ། །དེ་འཐད་པ་ཡིན་ནོ། །བྱ་བ་ནི་གཞན་སེལ་བའི་ཡུལ་ཅན་དེའོ། །ལྡན་པ་སྣང་བའི་ཕྱིར་རྫས་འབྲེལ་པའི་རྟོག་པ་དབང་པོའི་རྣམ་པ་ཤེས་པ་ལ་ཡོད་པར་འགྱུར་རོ་ཞེས་བྱ་བར་བལྟའོ། །གཞན་རྟོགས་པའི་རྒྱུས་མདུན་ན་གནས་པ་དེ་ལ་སྐྱེས་བུ་རྣམ་པ་རྟོག་པ་མི་བྱེད་ཀྱང་དངོས་པོ་གཉིས་པོ་དེའི་ངོ་བོར་སྣང་བ་ནི་མེད་པའི་ཕྱིར་རོ། །དེ་ཉིད་ཅེས་བྱ་བ་ནི་དེ་ཙམ་འབའ་ཞིག་སྣང་བ་ཉིད་དོ། །ལྡན་རྟོག་པ་ཡང་ཞེས་བརྗོད་པ་ནི་གཉི་གའོ། །ལས་ལས་སྐྱེས་པའི་ལྡན་པ་ནི་ཤ་གཞན་གཉིད་ཁོ་ནའིའོ། །གང་ཡང་རུང་བའི་ལས་ལས་སྐྱེས་པ་ནི་གངས་ཅན་དང་མི་ལ་སོགས་པའིའོ། །ལྡན་པ་ལས་སྐྱེས་པ་ཞེས་བྱ་བ་ནི་ནམ་མཁའ་དང་འབྲས་བུའི་ལྡན་པ་སྐྱེ་བའོ། །འདི་ལ་གཞན་གྱིས་བརྗོད་པ་ནི། དངོས་པོ་གཉིས་པོ་དེ་ཉིད་ནི་ལྡན་པར་གྱུར་པ་ཡིན་ནོ་ཞེས་རྟོགས་པ་ཡང་མེད་པར་གྱུར་ཏེ་ལྡན་པ་མེད་པའི་ཕྱིར་རོ། །དེས་
ན་སྟེ་དེ་ལྟ་བུར་གྱུར་པའི་རྟོགས་པའི་ཡིད་པའི་ཕྱིར་ལྡན་པ་གཞན་ཡིན་ནོ་ཞེས་བསམས་པའོ། །སྔ་མ་དང་ལྷན་ཅིག་ཏུ་རྟོགས་པ་མེད་པའི་ཕྱིར་ལྡན་པར་གྱུར་པ་རྟོགས་པ་ནི་མ་ཡིན་ནོ་ཞེས་བྱར་རོ། །གང་ཞིག་མི་ལྡན་པར་གྱུར་པ་དེ་ནི་ལྡན་པར་གྱུར་པ་འདི་ཡིན་ལ། དེ་བཞིན་དུ་འདི་ན་སླར་ཡང་བྲལ་བར་འགྱུར་ཏེ། སོ་སོར་འགྱུར་བ་དང་འདི་གཉིས་ཀྱི་དང་ནས་གཅིག་གིས་བདག་ནི་འབྲས་བུ་བྱེད་མཁན་ཡིན་ནོ་ཞེས་དེ་ལྟར་རྟོགས་པ་གསུམ་སྲིད་པ་ན་ལྡན་མེད་རྟོགས་པར་འདོད་པ་ཡིན་ནོ། །གལ་ཏེ་རྟོགས་པ་དེ་ལྟ་བུ་མེད་ན་ནི་དེའི་ཚེ་ལྡན་པར་རྟོགས་པ་དོན་མེད་པ་ཁོ་ནའོ། །འོ་ན་འབྲས་བུ་དང་བཅས་པར་ཇི་ལྟར་འགྱུར་སྙམ་ན། འདི་ནི་གཅིག་འགྱུར་ཞེས་བྱ་བའོ། །ལྡན་པའི་དངོས་པོ་འདི་ནི་འབའ་ཞིག་ཀྱང་འགྱུར་བ་ཡིན་ནོ་ཞེས་བྱ་བའི་དོན་ཏོ། །མངོན་སུམ་ནི་དེ་ལྟར་འཇུག་པ་མ་ཡིན་ཏེ། འབྱུང་བ་དང་བྱུང་ཟིན་པ་དང་དག་ལ་དེ་འཇུག་པ་མི་འཐད་པའི་ཕྱིར་རོ། །དེས་ན་མངོན་སུམ་ལ་ནི་ལྡན་པ་སྣང་བ་མ་ཡིན་ནོ། །གལ་ཏེ་དེ་ལྟར་ལྡན་པ་མི་སྣང་བའི་ཕྱིར་རྫས་འབྲེལ་པའི་རྟོགས་པ་མ་ཡིན་མོད། སྒྲ་སྦྱོར་བར་ནི་འགྱུར་བ་ཡིན་ཏེ་དེས་ན་དབན་པོའི་ཤེས་པ་རྣམས་པར་རྟོག་པ་མེད་པ་མ་ཡིན་ཏེ་དེས་དང་པོའི་རྣམ་པར་རྟོག་པ་མ་ཡིན་ནོ་ཞེ་ན། སྒ་སྦྱོར་བར་བྱེད་པ་ཡང་ཞེས་གསུངས་སོ། །དེ་ལ་ཞེས་བྱ་བ་ནི་མངོན་སུམ་ལ་སྣང་བའི་དངོས་པོ་ལའོ། །དོགས་པ་ནི་བརྡའི་དུས་ན་ཞེས་བྱ་བའོ། །འདི་ལ་རྗོད་པ་ནི་དེ་དང་ཞེས་བྱ་བ་སྟེ། བརྡའི་དུས་ན་ཡོད་པ་དང་ངོ༌། །རེ་ཞིག་བརྡ་འཆད་པ་ནི་འདི་ལ་བ་ལང་ངོ་ཞེས་བྱ་བའོ། །འདི་ནི་མངོན་སུམ་ལ་སྣག་བའོ། །གལ་ཏེ་འདི་བ་ལང་གི་སྒྲ་མ་ཡིན་ན། འོ་ན་ཇི་ལྟར་ན་འདི་འདི་ཞེས་བྱ་བ་དང་བ་ལང་གི་སྒྲ་དང༌། གཞི་མཐུན་པར་འགྱུར་སྙམ་ན། དེ་དང་འབྲེལ་པ་ནི་བ་ལང་གི་སྒྲ་དང་འབྲེལ་པའོ། །གལ་ཏེ་འདི་ལ་བ་ལང་གི་སྒའི་ཞེས་རྣམ་པ་དེ་ལྟར་ན་བརྡ་མི་བྱེད་ཀྱི། འོན་ཀྱང་འདི་ནི་བ་ལང་ངོ་ཞེས་བྱ་བ་ཡིན་ནོ་སྙམ་ན། དེ་ལ་ཚིག་གི་ཞེས་གསུངས་ཏེ། བ་ལང་གི་སྒྲ་ཞེས་བྱ་བ་འདིའོ། །ཕྱོགས་གཅིག་ནི་བ་ལང་ཞེས་བྱ་བ་ཡིན་ཏེ་དེ་སྦྱར་བས་སོ། །ཚིག་གི་ཕྱོགས་གཅིག་གི་རྣམས་པ་བརྗོད་པ་ནི་བ་ལང་ངོ་ཞེས་བྱ་བའོ། །བརྡ་བཤད་ནས་དྲན་པ་འཆད་པ་ནི་བ་ལང་དེ་ནི་ཞེས་བྱ་བའོ། །གལ་ཏེ་འདས་པ་དང་འབྲེལ་པ་གཟུང་པ་ན་འདས་པ་
འཛིན་གྱི་འབྲེལ་པ་མེད་པར་ནི་མ་ཡིན་ན་དེ་ཅི་ལྟར་ཐམས་ཅད་པ་བརྗོད་པར་བརྗོད་སྙམ་ན་ཞེས་གསུངས་སོ། །དྲན་པར་བྱ་བ་དང་ཡོངས་སུ་མཐོང་བཞིན་བ་ཉིད་ལྷན་ཅིག་ཉིད་དུའོ། །དེ་དང་ཞེས་བྱ་བ་ནི་དྲན་པར་བྱ་བ་མི་བདེན་པ་དང་ངོ༌། །དེ་ཉིད་ཅེས་བྱ་བ་ནི་སྔོན་མཐོང་བ་ཉིད་དོ། །དེའི་དོན་བྱ་བ་གང་ཡིན་པ་དེ་བྱེད་བའི་ཕྱིར་རོ། །དོན་བྱ་བ་དོན་བྱ་བ་ཞེས་བྱ་བ་དེ་ཡང་དྲན་པ་ཉིད་ཡིན་ཏེ། དེ་ནི་ད་ལྟ་མངོན་སུམ་གྱིས་གཟུང་བ་མེད་པའི་ཕྱིར་རོ། །དེ་ཉིད་འདི་ཡིན་ནོ་ཞེས་བྱ་བ་ལ་ཡོད་པའི་དེའི་སྒྲས་བརྗོད་པར་བྱ་བ་ཉིད་ཀྱང་དྲན་པ་ཉིད་དོ། །དེས་ན་མངོན་སུམ་གྱི་ཡུལ་མ་ཡིན་ནོ་ཞེས་དགོངས་པའོ། །གཞན་ཡང་དེ་ཉིད་ཀྱིས་དོན་བྱ་ དགོས་སོ་ཞེས་བྱ་བའི་ངེས་པ ་ཡང་མེད་དེ་གཞན་གྱིས་ཀྱང་བྱེད་བའི་ཕྱིར་རོ། །དེས་ན་དོན་བྱ་བ་དེ་བྱེད་པའི་ཕྱིར་དངོས་པོ་འདི་དེ་ཉིད་ཡིན་ནོ་ཞེས་ཀྱང་འགྲུབ་པ་མ་ཡིན་ནོ་ཞེས་སྟོན་པ་ནི་དེ་ཉིད་ཀྱིས་ཞེས་བྱ་བའོ། །འདི་ནི་ཐ་སྙད་ཙམ་དུ་ཞེས་བྱ་བ་ནི། དེ་ཉིད་འདི་ཡིན་ནོ་ཞེས་བྱ་བ་ལ་སོགས་པའོ། །གལ་ཏེ་གཅིག་མེད་པར་ནི་དོན་ཉིད་དུ་མི་འགྱུར་རོ་ཞེ་ན། དེའི་དོན་ཉིད་ནི་ཞེས་གསུངས་སོ། །མཚམས་སྦྱོར་བར་བྱེད་པ་ལས། བླངས་པ་ལ་ཡོན་ཏན་བརྗོད་པ་ནི། མཚམས་སྦྱོར་བ་པོ་གཅིག་ཡིན་ཞེ་ན་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །ད་ནི་བདག་གི་ཁས་བླངས་ཀྱང་སྔ་མ་དང་ཕྱི་མ་དག་གཅིག་ཏུ་འཛིན་པ་མེད་དོ་ཞེས་སྟོན་པ་ནི་གལ་ཏེ་མངོན་སུམ་ཞེས་བྱ་བའོ། །དེ་ཙམ་གྱི་ཞེས་བྱ་བ་ནི་བདག་ལ་བརྟེན་པ་ཙམ་གྱི་སོས། །དེ་ནི་མངོན་སུམ་མོ། །དེ་ནི་ཞེས་བྱ་བ་ནི་མངོན་སུམ་གྱིས་ཤེས་པའོ། །འོ་ན་དབང་པོ་ཉིད་སྔ་མ་དང་ཕྱི་མ་དག་ལ་འཇུག་པར་འགྱུར་ཏེ། དེས་ན་དེ་ལ་བརྟེན་པ་ཡང་འཇུག་པ་ཡིན་ནོ་སྙམ་ན་དབང་པོ་ཡང་ཞེས་བྱ་བའོ། །དབང་པོ་སྔ་མ་དང་ཕྱི་མ་ལ་མི་འཇུག་མོད། དེའི་རྗེ་སུ་འབྲེལ་པ་ནི་འཇིག་གོག་སྙམ་པ་ནི་དེའི་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །དེའི་ཞེས་བྱ་བ་དབང་པོའིའོ། །དེ་ཉིད་ཅེས་བརྗོད་པ་ནི་སྔོན་གྱི་ཞེས་བྱ་བའོ། །སྔོན་གྱི་དངོས་པོ་ལ་ཞུགས་པའི་ཤེས་པ་གང་ཡིན་པ་དེའི་རྗེས་སུ་འབྲངས་པ་དེའི་མེད་པ་ནི་སྔ་མ་ལ་འཇུག་པ་མ་ཡིན་ནོ་ཞེས་འབྲེལ་ཏོ། །ཅིའི་ཕྱིར་ཞེ་ན། དེ་ལས་གཞན་པའི་ཞེས་གསུངས་ཏེ། མིག་ལ་སོགས་པ་ལས་ཐ་དད་པའི་ཤེས་པ་མངོན་སུམ་ཞུགས་པའི་རྗེས་སུ་འབྲངས་པ་ནི་དབང་པོ་དེའི་རྗེས་སུ་འབྲངས་པ་ཡིན་ནོ་ཞེས་བྱ་བ་འདི་ནི་བ་ཆོལ་ཡིན་ནོ། །དེ་ཉིད་བསྡུས་ཏེ་
སྟོན་པ་ནི་གཅིག་ཉིད་དུ་བྱ་བའོ། །མངོན་སུམ་ལ་གཅིག་ཉིད་དུ་རྟོགས་པར་འགྱུར་བ་གང་ཡིན་པ་དེ་ནི་དབང་པོ་ལས་སྐྱེས་པ་ཡིན་ནོ་ཞེས་བྱ་བའི་རྩོད་པ་འགོག་པ་ནི་མ་ཡིན་ཏེ་ཞེས་བྱ་བའོ། །མངོན་སུམ་ལ་གཅིག་ཉིད་དུ་རྟོགས་པ་གང་ཡིན་པ་དང༌། གཞན་གང་ཡིན་པ་སྟེ། གཉིས་པོ་དེ་ནི་ཁྱད་པར་མེད་དེ། གཉིས་ཀ་ཡང་གཅིག་ཏུ་རྟོགས་པའི་རང་བཞིན་ཡིན་པའི་ཕྱིར་རོ། །མངོན་སུམ་ལ་གཅིག་ཉིད་དུ་རྟོགས་པ་ཡིན་པ་དེ་ནི་གསལ་བ་ཡིན་ལ། གཞན་ནི་མི་གསལ་བ་ཡིན་ཏེ། དེས་ཇི་ལྟར་ཁྱད་པར་མེད་ཅེས་བརྩད་པ་ན་གྲུབ་པའི་མཐའ་གསུངས་པ་ནི་གསལ་ཉིད་དང་ཞེས་བྱ་བའོ། །དེ་ལྟར་བྱུང་བ་ནི་གསལ་བའི་རང་བཞིན་དང་གཅིག་ཏུ་འགྱུར་མོད། སྔར་མཐོང་བ་དེ་ལྟ་བུ་དང་གཅིག་པར་ཇི་ལྟར་འགྱུར་དེ་ནི་མི་གསལ་བའི་ཕྱིར་རོ། །གལ་ཏེ་སྔོན་མཐོང་བ་འདི་དང་གཅིག་པར་མངོན་སུམ་གྱིས་ཁོང་དུ་ཆུད་པར་མི་འགྱུར་མོད། དེ་ལྟར་མཐོང་བ་འདི་གོ་སྔོན་མཐོང་བ་དེ་དང་ཅིག་ཅར་མངོན་སུམ་གྱིས་ཅི་སྟེ་མི་རྟོགས་ཞེ་ན། ཞེས་བྱ་བའོ་རྩོད་བ་འགོག་པ་ནི་མ་ཡིན་ཏེ་ཞེས་བྱ་བ་ནི་མཚུངས་པ་ཉིད་གཟུང་འཇིག་པ་ནི་གཉི་ག་ཞེས་བྱ་བའོ། །གལ་ཏེ་དྲན་པ་མེད་པར་མཐོང་བ་འབྱུང་མོད། དེ་ལྟ་ན་ཡང་དྲན་པ་དབང་པོའི་ལྷན་ཅིག་བྱེད་པར་ནི་འགྱུར་བ་ཡིན་ནོ་ཞེ་ན་གང་ཞིག་གང་གི་ཞེས་བྱ་བའོ། །འདིར་དཔེར་ན་ས་ལ་སོགས་ཞེས་བྱ་བའོ། །དྲན་པ་དབང་པོའི་ལྷན་ཅིག་བྱེད་པ་མ་ཡིན་གྱིའོ། །དེ་ཞེས་བྱ་བ་ནི་དབང་པོའི་རྣམ་པར་ཤེས་པའོ། །གཞན་དུན་ཞེས་བྱ་བ་ནི་རྣམ་པར་རྟོག་པ་ཐ་མི་དད་པས་རྟོག་པ་དང་བཅས་པ་ཉིད་ཡིན་ནའོ། །མཐོང་བ་དེ་ཡོད་ན་ཡང་མེ་དཔར་འགྱུར་ལམ་ཐོང་བ་དེ་མེད་ན་ཡང་ཡོད་པའི་རྣམ་པར་རྟོག་པ་གང་ཡིན་པ་དེ་དང་སྟེ་དེ་ལྟ་བུའི་རྣམ་པར་ཏོག་པ་དང་མཐོང་བ་དེ་གཅིག་ཉིད་དུ་ཇི་ལྟར་འགྱུར་ཏེ། བཤད་ཟིན་པའི་མཚན་ཉིད་ཅན་འགལ་བའི་ཆོས་དང་ལྔ་པར་བརྗོད་པའི་རྣམ་པར་རྟོག་པ་ཅན་དེ་ནིའོ། །གལ་ཏེ་ཤེས་པ་དེ་ཉིད་མཐོང་བ་དེ་ཡོད་ཀྱང་འབྱུང་བ་དང་མི་འབྱུང་བ་ཡང་ཡིན་ན་དེའི་ཚེ་འགལ་བའི་ཆོས་དང་ལྡན་པར་བརྗོད་པ་མཛེས་པ་ཞིག་ན། འོན་ཀྱང་གང་ཞིག་འགའ་ཞིག་པ་དེ་ནི་གཞན་ཁོ་ན་ཡིན་ལ། དེ་དང་ལྷན་ཅིག་པ་གང་ཡིན་པ་དེ་ཡང་གཞན་ཡིན་ཏེ། དེས་ན་འགལ་བའི་ཆོས་དང་ལྡན་པས་ཐ་དད་པར་ཇི་ལྟར་འགྲུབ་སྙམ་དུ་བསམས་པའོ། །འདི་ལ་བརྗོད་པ་ནི་དེ་ལྟ་ཡིན་
ན་ནི་ཞེས་བྱ་བའོ། །ཤེས་པ་དེ་ཉིད་འདི་ཡིན་ནོ་ཞེས་བྱ་བར་ངོ་ཤེས་པ་ཡོད་ཀྱང༌། འདིར་ཐ་དད་པར་ཁས་བླངས་པའི་ཕྱིར་གཞན་དུ་ཡང་ངོ༌། །ཤེས་པ་ལས་གཅིག་པ་ཉིད་དུ་མི་འགྲུབ་པོ་ཞེས་དགོངས་པའོ། །ཧ་ཅང་ཐལ་བར་ཡང་ཞེས་བྱས་བ་ནི་སྔོན་པོ་དང་སེར་པོ་དག་ཀྱང་གཅིག་པ་ཉིད་དུ་ཐལ་བར་འགྱུར་ཏེ། དེ་ཡང་སྔོན་པོ་འབའ་ཞིག་བ་ལས་ཚོགས་པ་ཐ་དད་པའི་ཕྱིར་རོ་ཞེས་སྔར་བཤད་ཟིན་ཏོ། །དེ་ནི་ཞེས་བྱ་བ་ནི་མཐོང་བའོ། །གཞན་གྱི་ཚེ་ཡང་ཞེས་བྱ་བ་ནི་རྣམ་པར་རྟོག་པ་མེད་པར་རོ། །ནམ་ཡང་ཞེས་བྱ་བ་ནི་ཕུན་པོ་ལྔའི་མཚན་ཉིད་ཀྱི་ལུས་ནི་ཤེས་པའི་རྒྱུ་ཡིན་པའི་ཕྱིར་རོ། །ཤེས་པ་དེ་གཉིས་ཞེས་བྱ་བ་ནི་མིག་དང་རྣམ་བའི་ཤེས་པའོ། །གཞན་དུ་ཡང་ཞེས་བྱ་བ་ནི་བ་ལང་མཐོང་བའི་དུས་སུ་བ་ལང་དུ་རྣམ་པར་རྟོག་པ་ནི་ཡང་ངོ༌། །གནས་སྐབས་དེ་ན་ཞེས་བྱ་བ་ནི་བརྡར་རྣམ་པར་རྟོག་པའི་གནས་སྐབས་ནའོ། །ཐ་སྙད་ལས་ཞེས་བྱ་བ་ནི་བ་ལང་ལ་འཇུག་པ་དང་ལྡོག་པའི་མཚན་ཉིད་ལས་སོ། །འདིར་ཞེས་བྱ་བ་ནི་རྣམ་པར་ཏོག་པ་བསྒྲུབ་པར་བྱ་བ་འདིར་རོ། །འདྲ་ཞེས་བྱ་བ་ནི་བ་ལང་གི་རྣམ་པར་རྟོག་པ་བདེ་བའི་འབྲས་བུ་ཡིན་པས་ཇི་ལྟར་མི་འཛིན་ཏེ། བ་ལང་གི་རྣམ་པར་རྟོག་པ་དེ་ཡང་ཡོད་པ་ཁོ་ནའོ་ཞེས་བྱ་བར་བསམ་པའོ། །སྒྲ་སྦྱོར་བར་བྱེད་པ་ཞེས་བྱ་བ་ནི་བ་ལང་གི་རྣམ་པར་རྟོག་པའོ། །རྟོགས་པར་འགྱུར་བ་ཉིད་དོ་ཞེས་བྱ་བའི་དོན་ཏོ། །སྦྱོར་བ་ནི་འདིར་ལྟར་ཡིན་ཏེ་གང་ཞིག་གང་དུ་ཐ་སྙད་བྱེད་པ་དེ་ཐམས་ཅད་ནི་དེའི་རྣམ་པར་ཏོག་པ་སྔོ་དུ་འགྲོ་བ་ཅན་ཡིན་ཏེ། དཔེར་ན་བ་ལང་གི་རྣམ་པར་རྟོག་པའི་དེ་མ་ཐག་པ་བཞིན་ནོ། །རྣམ་པར་རྟོག་པ་གཞན་གྱིས་དེ་མ་ཐག་པ་འདི་ཡང་ཐ་སྙད་ཡིན་ནོ་ཞེས་བྱ་བའོ། །འོན་ཏེ་ཞེས་བྱ་བ་ལ་སོགས་པས་ནི་གཞན་ཉིད་ཀྱིས་སྒྲུབ་པའི་མཐའ་གྲ་བའི་དོགས་པ་བསུ་ནས་ལན་འདབས་པ་ནི་མ་ཡིན་ཏེ་ཞེས་བྱ་བའོ། །འདིར་གྲུབ་པའི་མཐའ་སྨྲ་བས་བརྗོད་པ་ནི་མ་ཡིན་ཏེ་ཞེས་བྱ་བའོ་།དེའི་རྗེས་སུ་བྱ་བ་ནི་མེ་རྗེས་སུ་དཔོང་པའི་ཚེའོ། །རྗེས་སུ་དཔག་པ་ཉིད་སྟོན་པ་ནི་རིག་པ་སྟེ་དྲོ་བའི་རྣམ་ཤེས་དང༌། གཞན་གྱི་ཐ་སྙད་དེ་མི་བདེ་བ་ལ་སོགས་པས་སོ། །འདི་ཉིད་བརྗོད་པ་ནི་ལྐོག་ཏུ་གྱུར་པའི་མེ་བདག་ཉིད་ནི་གྲང་བ་ཟློག་པ་ན་སྟེ། བདེ་བ་ལ་སོགས་པའི་ཐ་སྙད་དེ་ལས་སམ། རང་གི་རིག་པའི་རྣམ་པར་ཤེས་པ་ལས་རྟོགས་པ་ཞེས་དེ་ལྟར་
གྲུབ་པའི་མཐའ་སྨྲ་བས་བརྗོད་པ་ལ་གཞན་གྱིས་དེ་ཡང་འཐད་པར་དཀའ་ཞེས་སྨྲས་སོ། །ཐེ་ཚོམ་གྱི་རྣམ་པ་བརྗོད་པ་ནི་རེས་འགའ་མེ་མེད་ཀྱང་ཞེས་བྱ་བའོ། །དུ་བའི་རང་བཞིན་ལས་མེ་རྟོགས་པ་གང་ཡིན་པ་དེ་དེའི་དུས་ཕྱིས་ཀྱི་རིག་པའི་རྣམ་པར་ཤེས་པའམ་གྲང་བ་བཟློག་པའི་ཐ་སྙད་གང་ཡིན་པ་དེས་སོ། །དེ་རྟོགས་ན་སྟེ་མེ་དེ་རྟོགས་པར་ཁས་ལེན་ན། རེག་པའི་རྣམ་པར་ཤེས་པའི་མཚན་ཉིད་དམ། གཞན་གྱི་ཐ་སྙན་གྱི་རྗེས་སུ་དཔག་པའི་མཚན་ཉིད་དེ་ལའོ། །འདི་ལྟར་གང་དང་གང་ལ་རེག་པའི་རྣམ་པར་ཤེས་པའམ་གྲང་བ་སེལ་བའི་ཐ་སྙད་ཡོད་པ་དེ་ན་མེད་ཡོད་པ་སྔོན་ཉམས་སུ་མྱོང་བ་བཞིན་ནོ། །འདི་ན་ཡང་དེ་བཞིན་ནོ་ཞེས་བྱ་བ་ནི་རྗེས་སུ་དཔག་པ་ཡིན་ནོ། །རྗེས་སུ་དཔག་པ་དེ་ལ་ཡང་མི་འཁྲུལ་པ་ཡང་རྗེ་སུ་དཔག་པ་གཞན་གྱིས་ཡིན་ནོ་ཞེས་བྱ་བ་འདི་གང་ལས་ཤེ་ན། རྗེས་སུ་དཔག་པ་ཉིད་དུ་ཞེས་བྱ་བའོ། །གནོད་པར་བྱེད་པག་ཞན་ཡང་བརྗོད་པ་ནི་རིག་པས་ནི་ཞེས་བྱ་བ་སྟེ། དྲོ་བའི་རིག་པས་སོ། །གཟུགས་ཞེས་བྱ་བ་ནི་མདོག་གསལ་བའོ། །རེག་པའི་ཤེས་པ་ནི་གཟུགས་ཙམ་གྱི་སྒྲུབ་བྱེད་ཡིན་གྱི། །གཟུགས་ཀྱི་ཁྱད་པར་སྒྲུབ་ན་ནི་མ་ངེས་པ་ཡིན་ནོ་ཞེས་དགོངས་པའོ། །དུང་སེར་པོ་ནི་ཤེས་པའི་ཡུལ་གསེར་མདོག་དུར་གང་ཡིན་པ་དེ་ལ་འོང་བའི་ཕྱིར་རོ། །འདི་ནི་རབ་ཏུ་གྲགས་པའི་དུང་དང་གསེར་མདོག་གི་དུང་ལ་རེ་གའི་རྣམ་པར་ཤེས་པ་མཚུངས་པ་ཡིན་ཏེ། གཟུགས་ཁྱད་པར་དཀར་པོའམ་སེར་པོ་ནི་སྒྲུབ་པར་མི་ནུས་སོ་ཞེས་བསྟན་པ་ཡིན་ནོ། །གལ་ཏེ་རེག་པའི་རྣམས་པར་ཤེས་པ་འཁྲུལ་ན་འོ་ན་གཞན་གྱིས་མེ་འདི་བའི་ཐ་སྙད་ལས་རོགས་སོ་སྙམ་ན། གང་དུ་ཞེས་གསུངས་སོ། །བློ་སྔོན་དུ་བཏང་ནས་བྱས་པ་ཞེས་བྱ་བ་ནི་རྣམ་པ་གཞན་དུ་ཡང་ཡོད་པའོ། །དཔེར་འོལ་མ་དེའི་ཕུང་པོ་གྲང་བ་བཟློག་པའི་དོན་སྤྲེའུ་རྣམས་ཀྱིས་བསྟེན་པར་བྱ་བ་ཡིན་དེ་ཅི་མེ་འདེ་བའི་ཐ་སྙད་མཐོང་བ་ལས་རྗེས་སུ་དཔག་པར་བྱ་བ་ཡིན་ནམ། ཅི་ཞེས་བྱ་བར་དགོངས་པའོ། །འདི་ལ་གྲུབ་པའི་མཐའ་སྨྲ་བས་གསུངས་པ་ནི། དེ་ཡང་མི་བདེན་ཏེ་ཞེས་བྱ་བའོ། །དེ་ཡང་ཞེས་བྱ་བ་ནི་རྗེས་སུ་དཔག་པའོ། །རྣམ་པར་རོག་པའི་སྒྲུབ་བྱེད་ནི་དེ་ལྟར་དེ་དུ་བ་དང་འབྲེལ་པ་མ་ཡིན་ནོ། །དེ་མི་ཞེས་བྱ་བ་ནི་ལྐོག་ཏུ་གྱུར་པའོ། །རྒྱང་རིང་བ་ལ་སོགས་པ་ཞེས་སོགས་པའི་སྒྲས་ནི་ལྐོག་ཏུ་གྱུར་པ་ཉིད་གཟུང་ངོ༌། །དེས་ན་གཞན་རྣམ་པར་རྟོག་པའི་
དུས་ན་ནི་རྣམ་པར་རྟོག་པ་རང་རིག་པའི་མངོན་སུམ་གྱི་ཡུལ་ཡིན་པའི་ཕྱིར་རྗེས་སུ་དཔག་པ་མི་འཐད་དོ་ཞེས་དགོངས་པའོ། །གལ་ཏེ་ཞེས་པ་ལ་དབང་པོ་ལས་འདས་པ་ཡོད་པ་ཉིད་དེ། དེ་ལྟ་མ་ཡིན་ན་གཞན་གྱིས་ཅིའི་ཕྱིར་མ་དམིགས་དེས་ན་རྣམ་པར་རོག་པ་ཡོད་ཀྱང་རེས་འགའ་དམིགས་པར་མི་འགྱུར་ཞེ་ན། ཁྲ་བོ་ཉིད་ཀྱང་ཞེས་མཚོས་ཏེ་དབང་པོ་ལས་འདས་པ་ཉིད་ཀྱང་ངོ༌། །ཁྱི་མཐོང་བ་ནི་གཡུང་བའོ། །དེ་ལྟར་རྟོགས་པར་བྱ་བ་ནི་གྲང་བའི་རང་བཞིན་དུ་རྟོགས་པའོ། །གཞན་དུ་འགྱུར་བ་ཉིད་བརྗོད་པ་ནི་འདི་ལྟར་ཞེས་བྱ་བ་བའོ། །སྐྱེ་སྦུ་གོམས་པ་མེད་པའི་ཐ་སྙད་ན། དཔྱོད་སོགས་ཏེ་རྣམ་པར་རྟོག་པ་དང༌། ཐེ་ཚོམ་ལ་སོགས་པ་མེད་པའི་ཕྱིར་ཐ་སྙད་སྲིད་པ་མ་ཡིན་ནོ། །དེ་ཡོད་ན་ཞེས་བྱ་བ་ནི་གོམས་པ་དང་ལྡན་པ་ཉིད་ཡོད་ན་ནི་རྣམ་པར་དཔྱོད་པ་ལ་སོགས་པ་མེད་ཀྱང་ཐ་སྙད་དེ་འགྱུར་བ་ཡིན་ནོ། །རྣམ་པ་གཞན་དུ་ཡང་ཞེས་བྱ་བ་ནི་སྔ་མ་དང་ཕྱི་མ་དཔྱོད་པ་མེད་པར་ཡང་ངོ༌། །གཞན་དུ་ནི་མ་ཡིན་ནོ་ཞེས་བྱ་བ་ནི་ཁོ་པོ་ཅག་གི་བརྗོད་པ་གང་ཡིན་པ་དེ་ནི་གཞན་དུ་མ་ཡིན་ཏེ་མི་བརྫུན་ཏོ་ཞེས་བྱ་བའི་དོན་ཏོ། །དེའི་ཕྱིར་རྣ་པར་རྟོག་པ་མེད་ཀྱང་གོམས་པ་ལས་སྲོག་ཆགས་རྣམས་ཀྱི་ཐ་སྙད་འཇུག་པ་ཡིན་ནོ། འོ་ན་མ་གོམས་པའི་གནས་སྐབས་ན་རྗེས་སུ་དཔག་པས་རང་གི་རྒྱུད་ཀྱི་ཐ་སྙད་རྟོགས་པར་འགྱུར་རོ་ཞེ་ན། མཐོང་བ་དེ་ཉིད་ལ་བརྟེན་ཏེ་དམིགས་པ་ཁོ་ན་ཡིན་ནོ། །དེས་ན་མངོན་སུམ་གྱི་སྒྲུབ་པའི་ཕྱིར་རོ། །གོམས་པའི་གནས་སྐབས་སམ། མ་གོམས་པའི་གནས་སྐབས་སུ་ཐ་སྙད་ཀྱི་རྗེས་སུ་དཔག་པ་མ་ཡིན་ནོ། །དཔྱོད་སོགས་ཞེས་བྱ་བ་ནི། རྣམ་པར་རྟོག་པ་ལ་སོགས་པའོ། །རྣམ་པ་གཞན་དུ་འང་ཞེས་བྱ་བ་ནི་དཔྱོད་པ་ལ་སོགས་པ་མེད་པར་ཡང་ངོ༌། །དཔེ་དང་དོན་དག་མཚུངས་པ་ཉིད་སྟོན་པ་ནི་དེ་ལ་ཡང་ཞེས་བྱ་བའོ། །འབྲེལ་པ་མེད་པར་ནི་མི་སླུ་བ་ཉིད་མི་སྲིད་དོ་ཞེས་ཐ་སྙད་ཙམ་དུ་འབྲེལ་པ་ཉེ་བར་བསྟན་པའི་ཕྱིར་བརྗོད་པ་ནི་འདི་ལྟར་ཞེས་བྱ་བའོ། །གཞི་མཐུན་པ་སྟེ་ཡུལ་མཚུངས་པ་དག་ལ་ཡོད་པ་དེ་ལ་དེ་སྐད་ཅེས་བརྗོད་དོ། །དེའི་ཞེས་བྱ་བ་ནི་པ་ལ་ང་གི་མཚན་ཉིད་ཀྱིའོ། །རྟོགས་པ་འདི་ཉིད་ཡིན་ནོ་བརྗོད་པ་ནི་བ་ལང་གི་སྒྲ་ནི་ཞེས་བྱ་བའོ། །དེ་ལྟར་བུར་གྱུར་པའི་ཡུལ་ཞེས་བྱ་བ་ནི་མངོན་སུམ་གྱི་ཡུལ་ལའོ། །འདི་ཡང་ཐ་སྙད་ཀྱི་བརྗོད་པ་ཡིན་ཏེ། དེ་ལྟར་མ་ཡིན་ན་བརྗོད་པར་འདོད་པ་ཙམ་ལས་བྱུང་
བའི་སྒྲ་རྣམས་གང་ལ་མི་སྲིད་པས་ཡིན། དེ་མཐོང་བ་ན་ཞེས་བྱ་བ་ནི་ཤིང་མཐོང་བ་ནའོ། །ཅི་དེ་ལྟར་རྟོགས་པ་མཐོང་ངམ་ཞེ་ན། བདག་གིས་ཞེས་བྱ་བའོ། །མཐོང་བ་ལ་ནི་མཐོང་བཞིན་པའོ། །དེ་ཉིད་བརྗོད་པ་ནི་དེ་ནི་འདི་ཞེས་བྱ་བའོ། །དེ་ཞེས་བྱ་བ་སྣང་བ་ཐ་དད་པ་ཐ་དད་པར་བྱེད་པ་སྟེ། ཐ་དད་པའི་རང་བཞིན་མ་ཡིན་ནའོ། །དངོས་པོ་འགའ་ཡང་ཐ་དད་པར་མི་འགྱུར་རོ། །འོ་ན་འདིའོ་ཞེས་སྣང་བ་ནི་དོན་བྱ་བ་བྱེད་པའི་དངོས་པོའི་འཛིན་པ་ཡིན་ཏེ། དེས་ན་མངོན་སུམ་དུ་འགྱུར་རོ་ཞེ་ན་འདིའོ་ཞེས་བྱ་བར་སྣང་བ་ཡང་ཞེས་བྱ་བའོ། །འདི་ནི་དེའོ་ཞེས་བྱ་བ་ནི། ཤེས་པ་འདི་ལ་འདིའོ་ཞེས་བྱ་བར་སྣང་བ་ཡང་མདུན་ན་གནས་པ་ཐམས་ཅད་ཀྱི་ཐུན་མོང་མ་ཡིན་པའི་རང་བཞིན་གང་ཡིན་པ་ལྷག་པར་ཞེན་པ་ཡིན་ཏེ། དེས་ན་མངོན་སུམ་དུ་ཇི་ལྟར་འགྱུར་ཏེ། ཐུན་མོང་བའི་དངོས་པོ་མེད་པས་ན་དངོས་པོ་ལ་རེག་པའི་ཉིད་མེད་པའི་ཕྱིར་རོ། །འོན་ཏེ་གང་གི་ཚེ་མདུན་ན་གནས་པའི་དངོས་པོ་གཅིག་ལ་ལྷག་པར་ཞེན་པར་བྱེད་པ་དེའི་ཚེ་ཇི་ལྟར་འགྱུར་ཞེ་ན། ཐུན་མོང་བ་ཉིད་དང་བྲལ་ན་ནི་ཞེས་གསུངས་སོ། །རྣམ་པ་གཞན་གྱིས་གོ་ནས་རྣམ་པར་རྟོག་པ་མེད་པ་ཉིད་དུ་སྒྲུབ་པས་བརྗོད་པ་ནི་གལ་ཏེ་ཞེས་བྱ་བའོ། །ལྐོག་ཏུ་གྱུར་པའི་དོན་ལ་འཇུག་ཅིང་ཞེས་བྱ་བ་ནི། མངོན་སུམ་དུ་གྱུར་པ་ལ་སྒྲ་མཁོ་བ་མེད་པའི་ཕྱིར་རོ། །དེ་ལ་ཞེས་བྱ་བ་ནི་སྒྲའི་ཡུལ་ལའོ། །སྒྲ་དང་རྟགས་དང་རྣམ་པར་རྟོག་པ་རྣམས་ནི་ཡུལ་གཅིག་པའི་ཕྱིར་རོ། །འོན་ཏེ་ལྐོག་ཏུ་གྱུར་པའི་ཡུལ་ཅན་ཡིན་པའི་ཕྱིར་དམིགས་པ་མེད་པ་ཇི་ལྟར་འགྱུར་ཞེ་ན། ལྐོག་ཏུ་གྱུར་པ་ལ་འཇུག་ཀྱང་རང་བཞིན་དངོས་སུ་མེད་པ་ཁོ་ནའོ་སྙམ་ན། རང་གི་ངོ་བོ་ལ་རེག་ན་ནི་ཞེས་གསུངས་སོ། །ཁྱད་པར་མེད་པའི་ཕྱིར་ཞེས་བྱ་བ་ནི་དྲན་པ་དང་མངོན་སུམ་གཉི་ག་ལ་ལྐོག་ཏུ་གྱུར་པ་ལ་འཇུག་པའི་ཕྱིར་རོ། །འོན་ཏེ་སྒྲ་ཡང་རང་གི་མཚན་ཉིད་ཁོ་ན་ལ་འཇུག་པ་ཡིན་ལ། དེ་དང་ཡུལ་མཚུངས་པ་དབང་པོའི་རྣམ་པར་ཤེས་པ་ཡང་དེ་ཉིད་ལ་འཇུག་པར་འགྱུར་བ་ཡིན་པ་དེས་ན་ཐལ་བ་འདིར་ཇི་ལྟར་འགྱུར་སྙམ་ན། སྒྲའི་ཤེས་པ་ནི་ཞེས་བྱ་བའོ། །རྣམ་འགྲེལ་འདི་ཉིད་ཀྱིས་བཤད་པ་གཉིས་གསུངས་པ་ནི་ཅི་སྟེ་ཞེས་བྱ་བ་ནི་ཅི་སྟེ་ཐུན་མོང་ཡིན་ཡང༌། རྣམ་པར་རྟོག་པ་དང་བཅས་པ་ཡིན་ན་ནི། གང་དུ་མངོན་སུམ་ལ་འདོད་པའི་རྗེས་སུ་བྱེད་པ་
མེད་པ་དེ་དམིགས་པ་དང་བཅས་པ་ཡིན་ནོ་ཞེས་དོགས་པ་ནི་འོན་ཏེ་ཞེས་བྱ་བའོ། །ལན་ནི་གལ་ཏེ་ཞེས་བྱ་བའོ། །དེའི་ཚེ་ཞེས་བྱ་བ་ནི་དོན་གྱི་རྗེས་སུ་བྱེད་པ་མངོན་སུམ་གྱི་མཚན་ཉིད་ཡིན་ནའོ། །དེ་ལྟ་ན་ཡང་ཇི་ལྟར་རྣམ་པར་རྟོག་པ་མེད་པ་ཡིན་ཞེ་ན། སྒྲའི་རྣམ་པ་ཉིད་ནི་ཞེས་བྱ་བའོ། །དེ་ལྟ་ཡིན་ན་ཞེས་བྱ་བ་ནི། མངོན་སུམ་རྟོག་པ་དང་བཅས་པ་ཡིན་པར་གྱུར་ནའོ། །དེ་ལྟ་མ་ཡིན་ན་ཞེས་བྱ་བ་ནི། གལ་ཏེ་རྣམ་པར་རྟོག་པ་དང་བཅས་པར་མ་གྱུར་ནའོ། །ངེས་སོ་ཞེས་ནས་འཇིག་རྟེན་ཞེས་འབྲེལ་ཏོ། །ངེས་པའི་རྣམ་པར་བརྗོད་པ་ནི་འདི་ནི་ཞེས་བྱ་བའོ། །ཚོགས་པས་ཞེས་བྱ་བ་ནི་བག་ཆགས་དང་དབང་པོ་ཚོགས་པ་ལས་སོ། །ཤེས་པ་ནི་སྐྱེ་བར་འགྱུར་པ་ཞེས་བྱ་བ་ནི་རྣམ་པར་རྟོག་པ་དང་བཅས་པའི་མངོན་སུམ་སྐྱེ་བར་འགྱུར་པའོ། །ཚད་མ་ཉིད་སྟོན་པ་འདི་ལྟར་ཞེས་བྱ་བའོ། །ཐ་དད་པ་ནི་ཞེས་བྱ་བ་ནི་རྣམ་པར་རྟོག་པ་དང་དོན་གྱི་རྗེས་སུ་བྱེད་པའི་ཤེས་པའོ། །རྒྱུ་ཐ་དད་པ་ཉིད་སྟོན་པ་ནི་སྒྲ་དང་ཞེས་བྱ་བའོ། །ཅི་སྟེ་ཤེས་པ་གཉིས་གལ་ཏེ་གཅིག་ཏུ་མ་གྱུར་ན་ཐ་སྙད་ཉིད་མེད་པར་ནི་འགྱུར་རོ་ཞེ་ན་ཐ་སྙད་ནི་ཞེས་གསུངས་སོ། །འོ་ན་ཇི་ལྟར་ཐ་སྙད་བྱེད་སྙམ་ན། ཚོགས་པ་ཙམ་གྱིས་ཞེས་གསུངས་སོ། །རྣམ་པར་རྟོག་པ་མེད་པར་ཡང་ཐ་སྙད་སྟོན་པ་ནི་གཞན་ཞེས་བྱ་བའོ། །དེའི་ཚེ་ཡང་མཐོང་བཞིན་པ་ལ་ཞེན་པ་ཡོད་པ་ཡིན་ནོ་ཞེས་རྣམ་པར་རྟོག་པ་གཞན་ཞེས་བྱ་བའོ། །དེ་ལྟར་ན་རེ་ཞིག་འཇུག་པའི་ཡུལ་དེ་ལ་རྣམ་པར་རྟོག་པ་མེད་ཀྱང་ཐ་སྙད་ཡོད་པར་བསྟན་ནས། ད་ནི་རྣམ་པར་རྟོག་པ་ཡོད་ཀྱང་ཐ་སྙད་མེད་དོ་ཞེས་གསུངས་པ་ནི་སྒྲ་སྦྱོར་བར་བྱ་བའོ། །དོན་བྱ་བ་སྦྱོར་བའི་རང་བཞིན་ཉིད་དབང་པོའི་རྣམ་པར་ཤེས་པ་འགྱུར་རོ་སྙམ་ན། དོན་བྱ་བ་ཡང་ཞེས་བྱ་བའོ། །རྗེས་སུ་དཔག་པ་མེད་པར་ཐལ་བ་ཞེས་བྱ་བས་ནི། འདས་པ་དང་མ་འོངས་པ་དག་ལ་ཡང་མངོན་སུམ་འཇུག་པས་ན་དེ་ཉིད་ཀྱིས་གྲུབ་པའི་ཕྱིར་རོ། །བཤད་པ་ནི་གཞན་དུ་ཡང་བལྟ་བར་བྱའོ་ཞེས་བྱ་བ་ནི། དེ་བཞིན་དུ་ཞེས་བྱ་བའོ། །དཔེར་ན་དེ་ཉིད་ཡིན་ནོ་ཞེས་བྱ་བ་ནི་དེས་དེ་ཞེས་བྱ་བའི་ཆ་མེད་པ་ཡོད་ཀྱང་འབྱུང་བ་དབང་པོ་ལས་སྐྱེས་པ་ཡིན་པ་དེ་བཞིན་དུ་བློ་གཞན་ཡང་དབང་པོ་ལས་སྐྱེས་པར་འགྱུར་རོ་ཞེས་བྱ་བའི་དཔེའི་དོན་ཏོ། །ཡང་ཇི་ལྟར་ན་འདིའོ་ཞེས་བྱ་བ་ལ་སོགས་པའི་རྣམ་པར་འཇུག་པ་མདུན་ན་གནས་པའི་དངོས་པོ་ངེས་པ་ཉིད་
མི་འཐད་སྙམ་ན་འདི་ལ་ཞེས་སྨོས་སོ། །ངེས་པར་མ་བྱས་པ་ཞེས་བྱ་བ་ནི་རྣམ་པར་རྟོག་པས་མ་བཟུང་བའོ། །གཟུགས་ཞེས་བྱ་བ་ནི་གཟུགས་སོ་ཞེས་བྱ་བའི་རྣམ་པ་ཅན་གྱི་རྣམ་པར་རྟོག་པས་སོ། །དེ་ལ་ཞེས་བྱ་བ་ནི་གཟུགས་ཀྱི་བློ་ལའོ། །ཅི་སྟེ་ཉམས་སུ་མྱོང་བ་ཉིད་མེད་ཅེས་བྱ་བ་ནི་གཟུགས་ཀྱི་བློ་ལའོ། །རིག་པ་ཉམས་སུ་མྱོང་བ་མེད་ཀྱང་ཁྱེད་ཀྱི་འདོད་པ་དོན་གྱིས་གོ་བ་ལ་སོགས་པས་ངོ་བོའི་ཐ་སྙད་སྲིད་པ་ཡིན་ན། རྣམ་པར་རྟོག་པ་མེད་པར་གྱུར་པས་གསལ་བའི་རྣམ་པར་ཉམས་སུ་མྱོང་བའི་རང་བཞིན་ལ་ཐ་སྙད་མི་སྲིད་པར་ཇི་ལྟར་འགྱུར་ཞེས་འབྲེལ་ཏོ། །དེ་ལྟར་བློ་ཉམས་སུ་མྱོང་བ་མེད་པར་ཁས་བླངས་ནས་བརྗོད་པ་ཡིན་ནོ། །དེ་ནི་གཟུགས་ཀྱི་བློ་ལ་ཡང་ཉམས་སུ་མྱོང་བ་ཡོད་པ་ཉིད་དོ་ཞེས་བསྒྲུབ་པ་བརྗོད་པ་ནི་དེ་ཞེས་བྱ་བའོ། །དེའི་ཚེ་ཞེས་བྱ་བ་ནི་གཟུགས་མཐོང་དུས་ནའོ། །བདག་གི་གཟུགས་མཐོང་བའི་ཞེས་བྱ་བའི་རྣམ་པ་ཅན་རྣམས་པར་རྟོག་པ་དང་བཅས་པའི་མངོན་སུམ་དེའོ། །གཟུགས་མཐོང་བ་ཉིད་ཡིན་ནམ་ཞེས་བྱ་བ་ནི་གཟུགས་མཐོང་བའི་རང་བཞིན་ནོ། །བརྟག་པར་བྱ་བ་བདག་ཉིད་ཅེས་བྱ་བ་ནི་བདག་གིས་གཟུགས་མཐོང་བ་ཞེས་བྱ་བའི་རྣམ་པར་བརྟག་པར་བྱ་བ་བདག་ཉིད་རྟོག་པ་ནི། དེའི་ཚེ་རྣམ་པར་རྟོག་པ་གཉིས་ཞེས་བྱ་བ་གཟུགས་ཀྱི་རྣམ་པར་རྟོག་པ་དང༌། རང་གི་ངོ་བོའི་རྣམ་པར་རྟོག་པའོ། །ཅི་སྟེ་དང་པོ་གཟུགས་རྣམ་པར་རྟོག་པ་ཡིན་ལ། ཕྱིས་ནི་བདག་ཉིད་རྣམ་པར་རྟོག་པ་ཡིན། གཅིག་ལ་ཞེས་གསུངས་སོ། །དུས་གཅིག་ཏུ་རྣམ་པར་རྟོག་པ་འབྱུང་པ་ཁོ་ནའོ་ཞེ་ན། མཐོང་བ་ཡང་ཞེས་སྨོས་སོ། །དེ་ཉིད་ཅེས་བྱ་བ་ནི་གཟུགས་ཀྱི་བློའོ། །གཟུགས་ལ་སོགས་པ་ཉམས་སུ་མྱོང་བའི་བདག་ཉིད་ཅན་དང་རང་གི་ངོ་བོ་མྱོང་བའི་བདག་ཉིད་ཅན་ནོ། །དེའི་ཚེ་རིམ་པ་ཡང་རིམ་པ་མ་ཡིན་པ་ཞེས་བྱ་བ་ནི་བློ་ལྟ་ཡིན་པའི་ཕྱིར། དུས་གཅིག་ཏུ་གཉི་ག་ཡང་འགྱུར། །དོགས་པ་ན་རིམ་པ་མ་ཡིན་པ་ཉིད་ཡིན་པར་འགྱུར་རོ། །གཞན་དག་བསམ་པ་མི་རྟོགས་པས་སྨྲ་བས་ནི། དེ་ཡང་ཞེས་བྱ་བ་སྟེ་རིམ་པ་མེད་པའོ། །འདི་ལ་བརྗོད་པ་ནི་ཐུག་པ་མེད་པར་ཞེས་བྱ་བའོ། །གལ་ཏེ་བློ་གཅིག་ཅེས་བྱ་བ་ལ་སོགས་པ་ཡང་བཟླས་པར་བྱ་བ་ཡིན་པའི་ཕྱིར་རོ། །གང་གིས་རིམ་མ་ཡིན་པར་འགྱུར་རོ་ཞེས་བརྗོད་པ་ནི། གཅིག་ལ་རིམ་པ་ཇི་ལྟར་མི་རིང་ཞེ་ན། གཟུགས་ལ་ཞེས་བྱ་བའོ། །འོན་ཏེ་གཅིག་ལ་མངོན་པར་ཞེ་ན་པ་ན་གཞན་ལ་
མངོན་པར་ཞེན་པར་མི་འགྱུར་མོད་དེ་ལྟ་བས་ན་ཡང་བློ་གཅིག་ཉིད་ཁོ་ན་རེས་འགའ་ནི་དེ་ལ་མངོན་པར་ཞེན་པར་བྱེད་ལ། རེས་འགའ་གཞན་ཡིན་ནོ་ཞེ་ན་མངོན་པར་ཞེན་པ་མ་ཡིན་པའི་ཞེས་བྱ་བའོ། །དེ་ལ་ཡང་ཞེས་བྱ་བ་ནི་མངོན་པར་ཞེན་པར་བྱེད་པ་ལའོ། །རྣམ་པར་ཏོག་པ་གཉིས་པ་ལ་རྣམ་འགྲེལ་ཉིད་འགོད་པ་ནི་དེས་ནི་ཞེས་བྱ་བའོ། །དུས་མཚུངས་པའི་རྣམ་པར་ཤེས་པ་ཉམས་སུ་མྱོང་བ་ལ། གཟུགས་ཀྱི་རྣམ་ཤེས་ཉམས་སུ་མྱོང་བ་དང༌། འདི་ནི་གཟུགས་ཀྱི་རྣམ་ཤེས་མྱོང་བའོ་ཞེས་བྱ་བ་དེ་ལྟ་བུའི་རྣམ་པ་ཅན་ཡོད་པ་ན་གཅིག་པར་རྟོག་པ་གཉིས་སུ་ཐལ་ལོ། །རྣམ་པར་རྟོག་པ་གཉིས་སུ་འགྱུར་མོད་སྙམ་ན་ཉམས་སུ་མྱོང་བའི་གནོད་པ་བཞག་ནས་སུན་འབྱིན་པ་གཞན་ཉིད་བརྗོད་པ་ནི་དེས་ན་དེ་ལ་ཡང་ཞེས་བྱ་བ་ནི་འདི་ནི་གཟུགས་ཀྱི་རྣམ་པར་ཤེས་པའོ་ཞེས་བྱ་བ་ལ་སོགས་པ་དེ་ལྟ་བུའི་རྣམ་པ་ཅན་ལའོ། །གཞན་ལ་དུ་ཞེས་བྱ་བ་ནི་འདི་ནི་གཟུགས་ཀྱི་རྣམ་པར་ཤེས་པའོ་ཞེས་བྱ་བ་ལ་སོགས་པའི་རྣམ་པར་རྟོག་པ་ཅན་དུའོ། །གཞན་ཕྱིས་འབྱུང་བ་ཉིད་བརྗོད་པ་ནི། མངོན་སུམ་མམ་ཞེས་བྱ་བའོ། །དེའི་ཚེ་ཡང་ཞེས་བྱ་བ་ནི་བློ་ཕྱིས་མ་སྐྱེས་པའི་ཚེ་ཡང་ངོ༌། །རིག་པ་ནི་ཞེས་བྱ་བ་ནི་གཟུགས་རིག་པའོ། །འདི་ནི་གྲངས་ཅན་གྱི་ལུགས་ཡིན་ཏེ་དེ་དག་གི་ནི་རིག་པ་རྟག་པ་ཉིད་དུ་ཁས་བླངས་པའི་ཕྱིར་རོ། །འདི་ལ་བརྗོད་པ་ནི་འོ་ན་ཞེས་བྱ་བའོ། །གཟུགས་འཛིན་པའི་རང་བཞིན་གྱི་རིག་པ་བློ་ཕྱི་མས་མི་གཟུང་བའི་འོན་ཀྱང་རིག་པ་ཙམ་ཞིག་མཐུན་པར་འགྱུར་རོ་ཞེས་དགོངས་པའོ། །གལ་ཏེ་གཟུགས་ཉམས་སུ་མྱོང་བར་བགྱི་བས་མ་བཟུང་མོད། དེ་ལྟ་ན་ཡང་གཟུགས་ཀྱི་བློ་ནི་གཟུང་བར་འགྱུར་རོ་ཞེ་ན་བློ་གཞན་ཡང་ཞེས་གསུངས་ཏེ། གང་གིས་གཟུགས་འཛིན་པའི་རང་བཞིན་མ་བཟུང་བར་བློ་གཟུང་བར་འགྱུར་བ་གཟུགས་འཛི་པ་ལས་གཟུགས་ཀྱིས་བློ་གཞན་ཡང་ཡོད་པ་ནི་མ་ཡིན་ནོ་ཞེས་བྱ་བའི་དོན་ཏོ། །ཅི་སྟེ་བློའི་རང་བཞིན་རྟོགས་པ་སེམས་པ་ཡོད་པའི་མཚན་ཉིད་ཅན་ཡིན་པས་ཕྱིར་མ་འཛིན་པའི་དུས་ན་ཡང་ཡོད་པ་ཡིན་ནོ་ཞེས་བལྟ་བར་བྱའོ། །ལན་བརྗོད་པ་ནི་འོ་ན་ན་ནི་ཞེས་བྱ་བའོ། །དེའི་ཚེ་ནི་ཕྱི་མ་འཛི་པའི་དུས་ནའོ། །གང་དུ་ཉེ་བར་མཁོ་བ་ཡིན་ཞེས་བྱ་བ་ནི་རྟོག་པའི་རང་བཞིན་གཟུང་ཡང་གཟུགས་འཛིན་པ་མ་བཟུང་བའི་ཕྱིར་རོ། །གང་ཡང་ཉེ་བར་མཁོ་བ་མེད་དོ། །གཟུགས་འཛིན་པའི་རང་
བཞིན་མ་བཟུང་མོད། ཅི་སྐྱོན་སྙམ་ན་དེས་ན་ཞེས་སྨོས་སོ། །འདི་ཡིན་ནོ་ཞེས་ད་ལྟར་བར་བསྟན་པ་མི་འཐད་དེ་གཟུང་བཞིན་པ་ཉིད་ལ་དེ་ལྟར་བསྙད་པའི་ཕྱིར་རོ། །གཟུགས་འཛིན་པ་དེ་ནི་འདས་པའི་རང་བཞིན་ཁོ་ནར་མངོན་སུམ་གྱིས་འཛིན་པ་དེས་ན་བྱུང་བར་གྱུར་ཏོ་ཞེས་བྱ་བར་འགྱུར་རོ་ཞེ་ན་དེ་ལྟར་ནི་ཞེས་གསུངས་སོ། །འོན་ཏེ་ཞེས་བྱ་བ་ནི་གཞན་གྱིའོ། །དེ་ལྟ་ན་ཡང་འདས་པ་ཉིད་ཀྱིས་ནི་བྱུང་བར་གྱུར་རོ་ཞེས་བྱ་བར་འགྱུར་ལ། ད་ལྟར་བ་ཉིད་ཀྱིས་ནི་མངོན་སུམ་གྱིས་གཟུང་བ་ཉིད་དུ་འགྱུར་བ་ཡིན་ནོ་ཞེས་བྱ་བ་ནི་གཞན་གྱིས་བསམས་པའོ། །ལན་ནི་དེ་ལྟར་ཡིན་ན་ཞེས་བྱ་བའོ། །བློ་ཕྱི་མའི་དུས་ན་ཅི་ལྟར་གཟུགས་འཛིན་པ་གཉི་གའི་རང་བཞིན་ཡིན་པ་དེ་བཞིན་དུ་སྔར་ཡང་ཡིན་ཏེ་དེས་ན་འདས་པ་ཉིད་ཀྱང་སྔར་ཡོད་དོ་ཞེས་བྱ་བ་འདི་ལྟར་ཞེས་བྱ་བའོ། །ཀུན་གྱི་ཚེ་འདས་པ་ཡིན་གྱི་རྒྱུས་གཟུགས་འཛིན་པ་དེ་ནི་ཀུན་ཚེ་སྟེ། དུས་ཐ་དད་དུ་ད་ལྟར་བ་མ་ཡིན་ནོ། །དེ་ལྟར་ཡིན་དང་གཟུགས་འཛིན་པ་ཡོད་དོ་ཞེས་བྱ་བ་མ་འཐད་པར་འགྱུར་ཏེ། འདས་པ་ནི་ད་ལྟར་བ་ཉིད་དུ་བསྟན་པ་མི་འཐད་པའི་ཕྱིར་རོ། །འོན་ཏེ་སྔར་གཟུགས་འཛིན་པ་ད་ལྟར་བྱུང་བ་ཡིན་ལ་ཞེས་རིག་པར་བྱའོ། །གཅིག་ཅེས་བྱ་བར་མི་འགྱུར་རོ་ཞེས་བྱ་བ་ནི་ད་ལྟར་དང་འདས་པ་དག་ཕན་ཆུན་སྤངས་ཏེ་འགལ་པའི་ཕྱིར་རོ། །འོན་ཏེ་འདས་པ་དང་དེ་ལྟར་གཅིག་ཡིན་ན་གཉི་ག་ཡང་ད་ལྟར་བ་དང་འདས་པ་ཉིད་དུ་འཛིན་པར་འགྱུར་རོ། །རིམ་གྱིས་གཉི་ག་ཡང་ཡིན་ཞེས་རིམ་གྱིས་འཛིན་ན་ཞེས་སྨོས་སོ། །ཇི་ལྟར་མངོན་སུམ་གྱིས་གཟུང་བའི་དངོས་པོ་དེ་ཁོ་ན་ལྟར་རྣམ་པར་འཇོག་པ་ཡིན་ཏེ། དེ་ལྟ་མ་ཡིན་ནམ་འདྲེས་པ་ཉིད་དུ་མི་འགྱུར་རོ། །མངོན་སུམ་གྱིས་སྔོན་པོའི་རང་བཞིན་དུ་གཟུང་བ་ཡང་སྔོན་པོ་མ་ཡིན་པར་ཐལ་བའི་ཕྱིར་རོ། །དེ་བཞིན་དུ་གལ་ཏེ་མངོན་སུམ་ལ་རིམ་པར་སྣང་ན་འདི་རིམ་པ་ཅན་ཁོ་ནར་འགྱུར་ཏེ། རིམ་གྱིས་གཟུང་བ་ནི་རིམ་པ་མེད་པར་མི་འཐད་དོ། །རིམ་པ་ཅན་ཡང་ཇི་ལྟར་གཅིག་ཏུ་འགྱུར། གཅིག་ལ་རིམ་པ་ཅི་ལྟར་མི་འཐད་སྙམ་ན་གཅིག་སྤངས་ནས་ཞེས་བྱ་བའོ། །གལ་ཏེ་ངེས་པ་ལ་རིམ་གྱིས་འཛིན་པ་མི་སྲིད་ན་འོ་ན་དྲན་པར་འགྱུར་རོ་ཞེ་ན་དྲན་པ་ཡང་ཞེས་བྱ་བའོ། །གཟུགས་འཛིན་པའི་རྟོག་པ་གང་ཡིན་པ་སྟེ། མངོན་སུམ་གྱི་རང་བཞིན་ནམ་དྲན་པའི་རང་བཞིན་ནམ། རྗེས་སུ་དཔག་པའི་རང་
བཞིན་ཡིན་ཡང་རུང་སྟེ་མེད་པ་ཁོ་ནར་ཐལ་ལོ། །རྣམ་འགྲེལ་གྱི་ཕྱེད་དང་པོ་བཤད་ནས་ཕྱག་ཕྱི་མ་འཆད་པ་ནི་གལ་ཏེ་ཞེས་བྱ་བའོ། །མྱོང་བ་འདིའི་རང་གི་ངོ་བོས་རྟོགས་པ་མེད་མོད། ཆད་པ་ཅི་ཡོད་སྙམ་ན་དེ་ལྟ་ན་འདི་སུའི་ཞེས་བྱ་བའོ། །གཞན་གྱི་རྟོག་ལ་རྗེས་སུ་དཔག་པའི་རང་བཞིན་གང་ཡིན་པ་དེ་དང་རང་གི་རང་བཞིན་འཛིན་པ་འདྲ་བ་ཉིད་དུ་འགྱུར་ཏེ། འདི་ནི་རང་གི་བློ་ཡིན་ནོ་ཞེས་རྟོག་པར་མི་འགྱུར་རོ། །གཞན་གྱི་རྟོག་པ་གང་ཡིན་པ་དང་བདག་གི་བློ་གང་ཡིན་པ་ཉིད་གང་ཡང་འདས་པ་དྲན་པ་རང་བཞིན་དུ་ཁྱད་པར་མེད་པའི་ཕྱིར་རོ། །འདི་ཇི་ལྟར་ཤེས་པར་བྱ་བ་ཡིན་ཞེས་བྱ་བ་ནི། འདིའི་དོན་ཅི་ཡིན་ཞེས་བྱ་བའི་དོན་ཏོ། །འདོད་པ་ཉིད་དོ་ཞེས་བྱ་བ་ནི་རང་རིག་པ་མེད་པར་སྨྲ་བར་རིག་པ་ཅན་ལ་སོགས་པ་ནི་ཇི་ལྟར་གཞན་གྱི་བློ་བློ་གཞན་གྱིས་ཡོངས་སུ་གཅོད་པ་དེ་བཞིན་དུ། རང་གི་བློ་ཡང་ཡོངས་སུ་གཅོད་པར་འདོད་པ་ཉིད་དོ། །དེས་ན་ཇི་ལྟར་དེ་ལ་འདི་ཐལ་ཅང་ཐལ་བར་འགྱུར། རྣམ་པར་རྟོག་པ་གཉིས་པ་གསལ་བའི་དོན་དུ་སྨྲས་པ་ནི་འོན་ཏེ་ཞེས་བྱ་བའོ། །གཞན་གྱི་བློ་གང་ཡིན་པ་དེ་ཡོངས་སུ་གཅོད་པ་དང༌། རང་གི་བློ་ཡོངས་སུ་མཚུངས་པ་ཉིད་ཡིན་ན། དེ་ལ་གཞན་གྱིས་སྨྲས་པ་ཉིད་དེ་ནི་མ་ཡིན་ཏེ་ཞེས་བྱ་བའོ། །གཞན་གྱི་བློ་ཡོངས་སུ་གཅོད་པ་མེད་པའི་ཕྱིར་རོ་ཞེས་བྱ་བ་ནི་གཞན་གྱི་བློ་ཡོངས་སུ་གཅོད་པ་དང་རང་གི་བློ་ཡོངས་སུ་གཅོད་པ་ནི་མཚུངས་པ་ཉིད་མེད་པའི་ཕྱིར་རོ་ཞེས་བྱ་བའི་དོན་ཏོ། །དེ་ཉིད་གསལ་བར་བྱེད་པ་ནི་གཞན་གྱི་བློ་ནི་ཞེས་བྱ་བའོ། །ཇི་ལྟར་ཡོངས་སུ་གཅོད་ཅེས་པ་ནི་རང་གི་བློའོ། །དེ་ལྟ་མ་ཡིན་ན་ཞེས་བྱ་བ་ནི། གལ་ཏེ་མངོན་སུམ་བྱས་པ་ཡང་འདས་པ་ཉིད་དུ་འགྱུར་བའིའོ། །དེ་ཡང་ནི་རྗེས་སུ་དཔག་པའོ། །མཚུངས་པ་ཉིད་དུ་ཞེས་བྱ་བ་ནི་གཞན་གྱི་བློ་ཡོངས་སུ་གཅོད་པ་དང༌། དང་གི་བློ་ཡོངས་སུ་གཅོད་པའོ། །གཞལ་བའི་ཚད་མས་ཞེས་བྱ་བ་ནི། དོན་གྱིས་གོ་བ་ལ་སོགས་པའོ། །ཡང་ཇི་ལྟར་ན་རྗེས་སུ་དཔག་པ་ཉིད་དུ་ཁྱད་པར་མེད་ན་གཞན་གྱི་བློ་བཞིན་དུ་རང་གི་བློ་ཡང་གཞན་འབྲེལ་བ་ཉིད་མི་རྟོག་སྙམ་པ་གཞན་དུ་ཞེས་བྱ་བའོ། །གཞན་ནི་ཞེས་བྱ་བ་ནི་རང་གི་བློའི་རང་བཞིན་ནོ། །རྣམ་པ་གཞན་དུ་ཞེས་བྱ་བས་ནི་གཞན་གྱི་བློའི་རང་བཞིན་ཉིད་དུའོ། །མངོན་སུ་བྱེད་པའི་རང་བཞིན་དུ་འཛིན་པ་ཡིན་ན་ནི་རྗེས་སུ་དཔག་པའི་དྲན་པ་ལ། རང་གི་བློའི་རང་བཞིན་དུ་ངེས་པ་འདི་སྲིད་པར་འགྱུར་རོ། །ཇི་ལྟར་
སྲིད་སྙམ་ན་འཛིན་པ་སྔ་མའི་རྗེས་འཇུག་ཕྱིར་ཏེ་རྗེས་སུ་འཇུག་པའི་ཕྱིར་རོ། །གལ་ཏེ་མངོན་སུམ་གྱིས་དེའི་རང་བཞིན་ནམ་ཡང་མ་རྟོགས་ན་དེའི་ཚེ་ཇི་ལྟར་རྗེས་སུ་དཔག་པས་ཀྱང་རྟོགས་པར་འགྱུར་ཞེས་བསམས་པའོ། །དེ་བཞིན་དུ་ཞེས་བྱ་བ་ནི་གཞན་དང་འབྲེལ་པ་ཉིད་དུ་མངོན་སུམ་མེད་པའི་ཕྱིར་རོ། །རང་གི་ཕྱོགས་ལ་སྐྱོན་སྤོངས་པ་ནི་རང་རིག་པ་ཉིད་ཡིན་ན་ཞེས་བྱ་བའོ། །དེ་དང་གཞན་གྱིས་བྱས་པ་ཞེས་བྱ་བ་ནི་རང་རིག་པ་མ་ཡིན་པས་བྱས་པའོ། །དེ་ལྟ་མ་ཡིན་ན་ནི་ཞེས་པ་རང་གི་ལུས་དང་འབྲེལ་པ་ཉིད་དུ་རྗེས་སུ་དཔག་ན་ནི་གཞན་ཡིན་ནོ་ཞེས་བྱ་བ་རང་གི་བློའོ། །འདི་ལ་ལན་ནི་བདག་གི་ཞེས་བྱ་བ་ལ་སོགས་པའོ། །འབྱུང་བར་གྱུར་པའི་རྣམ་འགྲེལ་གྱི་དོན་བརྗོད་པ་ནི། འོན་ཏེ་ཞེས་བྱ་བའོ། །རྩོད་པ་འདི་ལ་རེ་ཞིག་རང་ཉིད་ཀྱི་སྐྱོན་བརྗོད་པ་ནི། གཟུགས་ལ་སོགས་པ་ཞེས་བྱ་བའོ། །དེའི་རང་བཞིན་གྱི་བློ་ཞེས་བྱ་བ་ནི་གཟུགས་ཀྱི་རྣམ་པ་ཅན་གྱི་བློ་འཛིན་པ་ཉིད་གཟུགས་འཛིན་པ་ཡིན་གྱི། གཟུགས་འཛིན་པ་གཞན་ནི་ཡོད་པ་མ་ཡིན་ནོ། གཟུགས་ཀྱི་བློ་ལ་ཡང་དེ་ལྟར་འཛིན་པ་ཡིན་ནོ་ཞེ་ན། བློ་ནི་དེ་ལྟར་འཛིན་པ་མ་ཡིན་ཏེ། ཅིའི་ཕྱིར་ཞེ་ན། གཟུགས་ཀྱི་བློའི་བློ་དུས་ཕྱི་མ་འབྱུང་བ་དག་ཡིན་པ་དེ་འཛིན་པ་མེད་པའི་ཕྱིར་ཏེ། བློ་གཞན་ཁས་མ་བླངས་པའི་ཕྱིར་རོ། །དཔེར་ན་གཟུགས་ཀྱི་རྣམ་པ་ཅན་གྱི་ཤེས་པ་རིག་པ་ཉིད་གཟུགས་རིག་པ་ཡིན་པ་དེ་བཞིན་དུ་གལ་ཏེ་གཟུགས་ཀྱི་བློའི་རྣམ་པ་ཅན་རིག་པ་སྲིད་ན་ནི། དེའི་ཚེ་རིག་པ་ཞིག་ན་འོན་ཀྱང་བློའི་རྣམ་པ་ཅན་གྱི་ཤེས་པ་རིག་པ་ནི་སྲིད་པ་མ་ཡིན་ཏེ་ཐ་དད་པ་མི་སྲིད་པའི་ཕྱིར་དང༌། རང་རིག་པ་ནི་ཁས་མ་བླངས་པའི་ཕྱིར་རོ། །བློའི་བློ་ཡང་ཞེས་བྱ་བ་ནི། གཟུགས་ཀྱི་བློའི་བློ་གང་ཡིན་པ་དེ་ཡང་འཛིན་པ་དེ་དེའི་འཛིན་པར་བྱེད་པ་ཡང་གཞན་ཡིན་ན་ཞེས་བྱ་བའི་དོན་ཏོ། །དེ་ལྟར་འགྱུར་ན་ནི་ཞེས་བྱ་བ་ནི་ཐུག་པ་མེད་པར་འགྱུར་པའོ། །ཐམས་ཅད་མ་བཟུང་བ་ཉིད་དུ་བ་ནི་གཅིག་མ་གྲུབ་ན་ཐམས་ཅད་མི་འགྲུབ་པོ་ཞེས་དགོངས་པའོ། །གཟུགས་ཀྱི་བློའི་བློ་གང་ཡིན་པ་དེ་མ་བཟུང་བ་ཉིད་པ་ཡིན་ན་སྟེ། འཛིན་བྱེད་ཀྱི་བློ་ཕྱི་མ་མེད་ནའོ། །དེ་ཞུགས་པ་ཞེས་བྱ་བ་ནི་གཟུགས་ཀྱི་བློའི་བློ་ལ་ཞུགས་པའི་གཟུང་བ་གཟུགས་ཀྱི་བློའི་མཚན་ཉིད་དོ། །དེ་ལྟ་མིན་ན་གཟུགས་ཀྱི་བློ་མ་རྟོགས་ན་གཟུགས་ཀྱི་བློའི་བློ་གང་ཡིན་པ་དེ་མ་
བཟུང་བ་ཉིད་ཡིན་ན་སྟེ། འཛིན་བྱེད་ཀྱི་བློ་ཕྱི་མ་མེད་ནའོ། །དེ་ཞུགས་པ་ཞེས་བྱ་བ་ནི་གཟུགས་ཀྱི་བློའི་མཚན་ཉིད་དོ། །དེ་ལྟ་མིན་ན་གཟུགས་ཀྱི་བློ་མ་རྟོགས་ན། གཟུགས་ཀྱི་བློ་མ་ཞུགས་པའི་གཟུགས་ཀྱང་མི་རྟོགས་སོ་ཞེས་བྱ་བའི་དོན་ཏོ། །ད་ནི་རྣམ་འགྲེལ་ལ་བརྗོད་པའི་གནོད་བྱེད་བརྗོད་པ་ནི་བློའི་བློས་ཞེས་བྱ་བའོ། །ཅི་སྟེ་བློ་དང་པོའི་ཞེས་བྱ་བ་ནི་གཟུགས་ཀྱི་བློ་གཅིག་ཏུ་དེའི་དེ་མ་ཐག་ཏུ་ནི་བློའི། །དེ་བཞིན་དུ་ཡང་གཟུགས་ཀྱི་བློ་དེ་ནས་ཡང་དེའི་བློའི་བློ་ཡིན་ན་ཞེས་བྱ་བའི་དོན་ཏོ། །འཆད་པར་འགྱུར་རོ་ཞེས་བྱ་བ་ནི། རྒྱུན་མི་འཆད་པར་སྣང་མི་འགྱུར། །ཞེས་བྱ་བ་དེར་རོ། །གཅིག་ཏུ་ནི་རིགས་གཅིག་པར་རོ། །མངོན་སུམ་དུ་གཅིག་ཉིད་ཅེས་བྱ་བ་ནི་མངོན་སུམ་གྱི་ངོ་བོར་གཅིག་པ་ཉིད་གང་ཡིན་པ་དེ་དང་ལྡན་པར་རྟོགས་པར་མི་འགྱུར་རོ། །རིགས་གཅིག་པའི་བློ་མངོན་སུམ་གྱི་རང་བཞིན་གཅིག་ཏུ་མི་འགྱུར་རོ་ཞེས་བྱ་བའི་དོན་ཏོ། །ཅིའི་ཕྱིར་ཞེས་རྣམ་པར་ཆད་པར་ཞེས་བྱ་བ་སྟེ། བློ་དེ་ལ་རིགས་མཐུན་པའི་རིགས་བློ་སྔ་མ་དང༌། ཕྱི་མ་རྣམས་རྣམ་པར་ཆད་པར་སྣང་བ་ཡིན་གྱི། རྒྱུན་མི་འཆད་པའི་ངོ་བོར་ནི་མ་ཡིན་ནོ། །གཅིག་སྣང་བ་ན་གཉིས་པ་སྣང་བ་མེད་པར་ཐལ་བའི་ཕྱིར་རོ། །དེ་ལྟར་ཡིན་དང་གང་གི་ཚེ་བློ་སྔ་མ་གཅིག་སྣང་བ་དེའི་རྗེས་ཐོགས་ལ་བློ་གཞན་སྣང་བ་དེའི་ཚེ་བློ་སྔ་མ་མི་སྣང་བའི་ཕྱིར་དེ་ལ་ལྟོས་ནས་བློའི་བློ་དྲན་པར་འགྱུར་རོ་ཞེས་སྔར་བརྗོད་ཟིན་ཏོ། །ཀྱང་སྒྲ་ནི་དེ་ལྟར་ན་ཡང་ཞེས་བྱ་བའི་དོན་ལ་ཡིན་ཏེ་དེ་ལྟ་ན་ཡང་འགལ་བ་མེད་དོ་ཞེས་བྱ་བའི་དོན་ཏོ། །ཤེས་པ་གང་གིས་བརྡར་བྱ་མི་ནུས་པ་དེ་ལ་དེ་སྐད་ཅེས་བྱའོ། །རྣམ་པར་རྟོག་པ་མེད་པའི་འཛིན་པ་གང་ཡིན་པའི་གཟུང་པ་དེ་ལ་དེ་སྐད་ཅེས་བྱའོ། །དེ་ལྟར་བུར་གྱུར་པའི་གཟུང་བར་བྱ་བ་རང་གི་ངོ་བོ་འཛིན་པ་གང་ལ་ཡོད་པ་ཞེས་དེ་ལ་ཡང་འབྲུ་མང་པོས་བསྡུ་པའོ། །གཞན་དང་ཡང་ཞེས་བྱ་བ་ནི་ལྷན་ཅིག་པའི་དོན་གྱི་གསུམ་པ་ཡིན་ལ། རང་གི་ངོ་བོ་ཉིད་ཀྱིས་ཞེས་བྱ་བ་ནི་བྱེད་པ་པོའི་གསུམ་པའོ། །དེ་བཞིན་དུ་ཡིན་པར་པས་བླངས་ན་ནི། དེའི་ཚི་གཟུགས་ལ་སོགས་པ་ཡང་བྱེད་པ་པོ་འཛིན་བྱེད་གཞན་གྱིས་སྒྲའི་ཆོས་གཞན་དང་ལྷན་ཅིག་སྦྱོར་བར་ནུས་པ་མ་ཡིན་ནོ། །ཅིའི་ཕྱིར་ཞེ་ན། རང་གི་ངོ་བོས་ཞེས་བྱ་བ་ལ་སོགས་པའོ། །འོ་ན་སྣང་བ་མ་ཡིན་པའི་ཕྱིར་རོ་ཞེ་ན། རང་གི་ངོ་བོས་སྣང་བ་མ་ཡིན་པ་ཞེས་གསུངས་སོ། །མི་
སྣང་བ་ལ་ནི་རང་གི་ངོ་བོ་རྟོགས་པ་ཉིད་མེད་པར་དེ་སྦྱོར་བར་ཅི་ལྟར་འགྱུར། དེ་དང་དོན་གཅིག་ན་ཞེས་བྱ་བ་ནི་སྒྲ་དེ་དང་དོན་གཅིག་པ་དེ་རྟོགས་པ་གང་ལ་ཡོད་པ་དེ་ལ་དེ་སྐད་ཅེས་བྱ་བའོ། །དེའི་དོན་ཞེས་བྱ་བ་ནི་སྤྱོད་པ་པའིའོ། །དེ་ལྟ་ཡིན་ན་ནི་འདི་བ་ལང་ངོ་སྙམ་པའི་རྣམ་པ་དང༌། །བཅས་པ་སྒྲའི་རྣམ་པ་དང༌། འདྲེས་པའི་ཤེས་པ་ནི་ཁྱད་པར་ཏེ་རང་གི་མཚན་ཉིད་འཛིན་པ་མ་ཡིན་ནོ། །ཁྱད་པར་སྔར་དང་སྦྱོར་བ་མེད་པའི་ཕྱིར་རོ། །རྒྱུ་ཐ་དད་པ་ཉིད་སྟོན་པ་ནི་འདི་ལྟར་ཞེས་བྱ་བ་ཡིན་ནོ། །བརྡའི་དུས་དེ་བརྡ་པའི་ཚེ་ཉམས་སུ་མྱོང་བའི་སྒྲ་གང་ཡིན་པ་དེས་གོམས་པ་ཞེས་བྱ་བའི་བག་ཆགས་གཞན་པ་གང་ཡིན་པ་དེའི་སྟོབས་ཉིད་ལ་སྟེ། པདྨའི་དབང་གིས་སྐྱེ་བའང་ཡིན་ནོ། །ཉིད་ཀྱི་སྒྲའི་རྣམ་པར་གཅད་པར་བྱ་བ་བརྗོད་པ་ནི་མིག་ལ་སོགས་པ་ཞེས་བྱ་བའོ། །སྤྱིའི་རྣམ་པ་གཉིས་ཀྱང་ཞེས་བྱ་བ་ནི་མི་འདྲ་བ་རྣམས་ལ་ཡང་བ་ལང་ཞེས་ནང་གི་པའི་མཚན་ཉིད་དོ། །དེ་མིག་ལ་སོགས་པ་ལས་མི་འབྱུང་བ་ཅིའི་ཕྱིར་ཞེ་ན། བཤད་པ་མིག་ལ་སོགས་པ་ཡོད་ཀྱང་ཞེས་བྱ་བའོ། །དེ་དང་རྗེ་སུ་མཐུན་པའི་བག་ཆགས་གང་ཡིན་པ་དེ་དང་བྲལ་བའི་སེམས་གང་ལ་ཡོད་པའི་སྐྱེས་བུ་ལ་སྒྲ་དང་སྤྱིའི་རྣམ་པ་དེ་མེད་པའི་ཕྱིར་རོ། །མིག་ལ་སོགས་པའི་རྒྱུ་རྗེས་སུ་འབྲེལ་པ་ལ་སྣང་བས་དོན་གང་ཡིན་པ་དེ་དང་ལྷན་ཅིག་འདི་བ་ལང་ཞེས་བྱ་བའི་རྣམ་པ་འདིས་ཞིག་མཐུན་པའོ། །དེ་དང་ཞེས་བྱ་བ་ནི་མངོན་སུམ་གྱི་གཟུང་བ་དང་ངོ༌། །དེ་འཛིན་པའི་ཤེས་པ་མངོན་སུམ་གྱི་མཚན་ཉིད་དང༌། མིག་ལ་སོགས་པའི་རྒྱུན་གཅིག་ལ་རག་ལས་པའི་ཤེས་པ་གང་ཡིན་པ་དེ་འདིའོ་སྙམ་པས་དེས་གཟུང་བ་མ་ཡིན་པར་མངོན་སུམ་ལ་སྣང་བའི་གེག་ལ་སོགས་པར་མི་འགྱུར་ཏེ། གཞན་གྱི་གཟུང་བ་དེ་དང་ཡང་གཞི་མཐུན་པ་ཅན་ཉིད་སྲིད་པའི་ཕྱིར་རོ། །ད་ནི་གཞི་མཐུན་པ་ཉིད་མི་སྲིད་དོ་ཞེས་བརྗོད་པ་ནི། རྣམ་པ་གཉིས་ཞེས་བྱ་བ་སྟེ་གསལ་བ་དང་མི་གསལ་པའི་རྣམས་པ་གཉིས་ཉམས་སུ་མྱོང་བ་དེ་ལས་མ་གཏོགས་པའིའོ། །ཁྱད་པར་མེད་པ་ཉིད་བསྟན་པའི་དོན་དུ་གཞན་གྱི་བརྗོད་པ་ནི་རང་བཞིན་གཉིས་ཞེས་བྱ་བའོ། །འདི་ལྟར་ཞེས་བྱ་བ་ལ་སོགས་པས་ནི་དོན་དམ་པར་གཞི་མཐུན་པ་མེད་པ་ཉིད་དུ་སྟོན་པར་བྱེད་དོ། །ཤེས་པ་འདི་གཉིས་པོ་འབའ་ཞིག་ཅེས་བྱ་བ་ལ། དེ་ཞེས་བྱ་བ་ནི་ཤེས་པ་གཅིག་ཡིན་ལ་འདི་ཞེས་བྱ་བ་ནི་ཤེས་པ་
གཉིས་པ་ཡིན་ནོ། །གཉིས་སུ་སྣང་བ་གཞན་ལ་ཞེས་བྱ་བ་ནི་བུམ་པ་དང་སྣམ་བུ་ལ་སོགས་པའོ། །བག་ཆགས་ཞེས་བྱ་བ་ནི་ལན་ནོ། །བག་ཆགས་སད་པ་ཡང་གཞན་ལ་ཅི་སྟེ་མེད་སྙམ་ན་དོན་བྱ་བའི་ཞེས་གསུངས་སོ། །ཤེས་པ་གཉིས་ཞེས་བྱ་བ་ནི་གཞན་སྨྲ་བའོ། །ལན་ནི་བག་ཆགས་ཞེས་བྱ་བའོ། །རྣམ་པར་རྟོག་པ་དང་བཅས་པ་དང༌། ལྷན་གྱི་སྐྱེན་རྒྱུ་གཅིག་མངོན་སུམ་གང་ལ་ཡོད་པ་དེའི་དངོས་པོ་ཉིད་དོ། །རྟོགས་པ་མེད་པར་མེད་པ་ནི་ཁྱད་པར་གང་གིས་རྟོགས་པར་འགྱུར་ཞེས་བྱ་བ་འདི་ལ་གཞན་གྱི་ལན་གྱི་དོགས་པ་བསུ་བ་ནི་ཅི་སྟེ་ཞེས་བྱ་བའོ། །བདག་ཉིད་ཐམས་ཅད་དམ་རྣམ་པ་འགའ་ཡང་སྐྱི་ལས་ཁྱད་པར་ཐ་དད་པ་མེད་པ་གང་ཡིན་པ་དེའི་ཕྱིར་གལ་ཏེ་ཁྱད་པར་རྣམ་པ་རྟོག་པ་དང་བཅས་པའི་ཤེས་པའི་རིགས་པ་ཡིན་ན། དེའི་ཚེ་ཤེས་པ་ཀུན་གཅིག་ཏུ་འགྲོ་བར་འགྱུར་ཏེ། ཤེས་པ་ཐམས་ཅད་སྤྱི་དང་ཁྱད་པར་གྱི་རྣམ་པ་ཅན་དུ་རྟོགས་པར་འགྱུར་རོ་ཞེས་དགོངས་པའོ། །དེ་དང་ཐ་མི་དད་པའི་ཕྱིར་རོ་ཞེས་བྱ་བ་ནི་སྤྱི་ལས་ཐ་མི་དད་པའི་ཕྱིར་རོ། །ཁྱད་པར་དང་བཅས་པའི་སྤྱི་སྒྲའི་ཤེས་པ་ལ་མི་སྣང་བ་ཡིན་ནོ་ཞེ་ན་འདི་ལ་བརྗོད་པ་ནི་དེ་ཉིད་ཅེས་བྱའོ། །ཁྱད་པར་དེ་དང་ལྷན་ཅིག་རྗེ་སུ་ཞུགས་པ་མ་ཡིན་ཏེ་འདྲེས་པ་མ་ཡིན་པ་ནིའོ། །ཕྱིས་ནི་མངོན་སུམ་གྱི་འཛིན་པའི་དུས་ནའོ། །འདི་ལ་པ་བརྗོད་པ་ནི་འདི་ཉིད་ཅེས་བྱ་བ་སྟེ། སྔར་འབའ་ཞིག་རྟོགས་པ་གང་ཡིན་པའོ། །དེའི་ཚེ་ནི་འདྲེས་པར་གྱུར་པའི་དུས་ནའོ། །སྔར་འབའ་ཞིག་རྟོགས་པ་དེ་རྗེས་སུ་འཇུག་པ་ནི་མ་ཡིན་ནོ། །དེ་ཕྱིས་རྗེས་སུ་འཇུག་པར་མི་འགྱུར་བ་ཅིའི་ཕྱིར་ཞེ་ན། དེ་ནི་ཞེས་གསུངས་སོ། །ཁྱད་པར་དང་མི་འདྲི་བའི་རང་བཞིན་གང་གི་རང་གི་ཤེས་པ་སྒྲ་ལས་བྱུང་བ་ལ་སྤྱི་སྣང་བར་འགྱུར་བའི་རང་བཞིན་དེ་ཉིད་ཀྱི་སྤྱི་དེ་དེ་ཁོ་ན་སྟེ། རང་བཞིན་ཡིན་ནོ། །དཔེར་ན་ཨུཏྤལ་སྔོན་པོའི་རང་བཞིན་གང་གི་རང་གི་ཤེས་པ་ལ་སྣང་བ་དེ་ཉིད་དེའི་དེ་ཁོ་ན་ཡིན་ཏེ། སེར་པོའི་རང་བཞིན་གྱིས་ནི་མ་ཡིན་པ་བཞིན་ནོ། །ཁྱད་པར་དང་མ་འདྲེས་པ་འབའ་ཞིག་པའི་རང་བཞིན་དེ་མངོན་སུམ་གྱི་དུས་ན་མེད་ན་ནི་སྤྱི་ཉིད་པར་འགྱུར་ཏེ། སྔོན་པོ་མེད་ན་ཨུཏྤལ་བཞིན་ནོ། །འདི་ཉིད་སྟོན་པ་ནི། གལ་ཏེ་སྤྱི་དེ་སྒྲ་ལས་བྱུང་བ་ཤེས་པས་མཐོང་བའི་རང་བཞིན་དེང༌། མངོན་སུམ་
ལ་སྣང་ན་དེའི་ཚེ་ཇི་ལྟར་རྗེས་སུ་འཇུག་པར་རྟོགས་ཏེ། འབའ་ཞིག་སྣང་བའི་ཕྱིར་མ་རྟོགས་པ་ཁོ་ནའོ། །གལ་ཏེ་སྔར་མཐོང་བའི་རང་བཞིན་འབའ་ཞིག་པ་དེར་སྣང་བ་མ་ཡིན་གྱི། འོན་ཏེ་འདྲེས་པ་ཉིད་དུ་སྣང་བ་ཡིན་པ་དེའི་ཚེ་ཡང༌། ཇི་ལྟར་རྗེས་སུ་འཇུག་པ་རྟོགས་ཏེ་སྔར་མཐོང་བའི་རང་བཞིན་ཏེ། ཞིག་པས་ནི། འདྲེན་པ་གཞན་ཁོ་ན་ཞིག་སྣང་བའི་ཕྱིར་རོ། །གལ་ཏེ་སྣང་བ་མེད་ན་དེ་ནི་གཅིག་མ་ཡིན་ལ་དུ་མ་ཡང་མ་ཡིན་ཏེ། གཅིག་དང་དུ་མ་ཉིད་ལ་དུ་མ་ཡང་མ་ཡིན་ཏེ། གཅིག་དང་དུ་མ་ཉིད་ནི་སྣང་བ་ལ་སེམས་པའི་ཕྱིར་རོ། །སྤྱི་ཡང་མངོན་སུམ་གྱི་དུས་ན་སྣང་བ་མ་ཡིན་ཏེ། དེས་ན་ཇི་ལྟར་འགྱུར་ཞེས་དགོང་པའོ། །དེས་ན་རྒྱུ་མིག་ལ་སོགས་པ་མེད་པས་སྐྲ་ལས་བྱུང་བའི་ཤེས་པ་ལ་གཅིག་ཏུ་སྣང་བ་མེད་པའི་ཁྱད་པར་ཡང་དུ་མ་ཉིད་ཡིན་ནོ། །འོན་ཏེ་ཁྱད་པར་ཁོང་དུ་ཆུད་པར་ཁས་ལེན་ཏེ། མིག་ལ་སོགས་པས་ཁྱད་པར་སྐྱེས་པ་ག་ལ་ཡོད་པའི་རིག་པ་སྟེ་རིག་དེ་ལས་སོ། །རྟོག་པ་དང་བཅས་པ་དང༌། རྟོག་པ་མེད་པ་དག་གི་རྒྱུ་གཅིག་ཁོ་ན་ཡིན་ཏེ། དེས་ན་དེ་དང་རྒྱུ་མཚུངས་བ་ན་གཞན་དག་ཀྱང་རྣམ་པར་རྟོག་པ་དང་བཅས་པར་འོས་པ་ཁོ་ནའོ་སྙམ་ན། རྣམ་པར་རྟོག་པ་དང་བཅས་པའི་ཞེས་གསུངས་སོ། །ཕན་ཚུན་སྤངས་ཏེ་གནས་པའི་ངོ་བོ་གང་དག་ཡིན་པའི་ཚོགས་པ་དེ་དག་གི་སྟོབས་ཀྱིས་བསྐྱེད་པའི་དབང་པོའི་རྣམ་པར་ཤེས་པ་ཉིད་ཀྱི་ངོ་བོ་འགྱུར་པའི་རྟོགས་བ་གང་ཡིན་པ་དེ་གཉིས་ལ་དེ་སྐད་ཅེས་བརྗོད་དོ། །རང་གི་ངོ་བོ་སྟེ་རང་བཞིན་གྱི་ཚོགས་པ་གང་ཡིན་པ་དེ་ལས་འབྱུང་བ་སྐྱེས་པ་དེ་ལ་བརྟེན་པ་ལ་དེ་སྐད་ཅེས་བྱ་བའོ། །གཅིག་ནི་རང་བཞིན་དང་ཞེས་བྱ་བའི་དོན་ཏོ། །ཚོགས་པ་ཐ་དད་པ་བརྗོད་པ་ནི་སྦྱོར་བ་ནི་ཞེས་བྱ་བའི་དོན་ཏོ། །དེ་ལ་ནི་ཞེས་བྱ་བ་ནི་དབང་པོ་རྣམ་པར་ཤེས་པ་ལའོ། །རྒྱུ་མེད་པ་ཉིད་བརྗོད་པ་ནི། །རྒྱུ་མེད་པ་ཞེས་བྱ་བའོ། །ཕྱིར་རོལ་སྒྲ་དང་སྤྱི་ལ་སོགས་པ་དང་འབྲེལ་པར་ཁས་བླང་ནས་རྣམ་པར་རྟོག་པ་མེད་པ་ཉིད་སྒྲུབ་པ་དོན་དུ་བརྗོད་པ་ནི་དེ་ཡང་མི་བདེན་ཏེ་ཞེས་བྱ་བའོ། །གང་ཞིག་དང་འབྲེལ་པ་དེ་ནི་དེར་སྣང་བ་ཁོ་ན་ཡིན་ན། དེས་ན་ཅི་སྟེ་ཚད་མའི་ཡུལ་དུ་
འགྱུར་བ་མ་ཡན་སྙམ་ན། དེ་ལྟ་ཡིན་ན་ཞེས་གསུངས་སོ། །འོན་ཏེ་ཞེས་བྱ་བ་ནི་དོགས་པ་བསུ་བའོ། །ཕྱོགས་འདི་ལ་ཡང་རེ་ཞིག་སྒྲ་དང་འདྲེས་པ་ནི་མེད་དོ་ཞེས་བརྗོད་པ་ནི། །དེ་ཡང་མི་བདེན་ཏེ་སྒྲ་མི་འཛིན་པ་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་སྣམ་བུ་ལ་སོགས་པ་ལ་སྒྲ་ཡོད་ནའོ། །ཐེ་ཚོམ་ཟ་བར་མཐོང་བ་ཉིད་དུ་སྒྲུབ་པ་ནི་དོན་ཏེ་ཞེས་བྱ་བ་སྟེ། སྣམ་བུའི་མཚན་ཉིད་ཀྱི་དོན་ཏེ་མངོན་སུམ་གྱིས་གྲུབ་ཀྱང་རྗོད་པར་བྱེད་པའི་བྱེ་བྲག་སྣམ་བུ་ལ་སོགས་པའི་སྒྲ་མི་དྲན་པའི་ཕྱིར་རོ། །གལ་ཏེ་སྣམ་བུ་ལ་སོགས་པ་ལ་མེད་པའི་ཕྱིར་སྒྲ་ལ་སོགས་པ་མངོན་སུམ་ལ་མི་སྣང་མོད་མཚུངས་བའི་རྣམ་པར་ཉིད་ནི་འགྱུར་རོ་སྙམ་པ་ནི་མཚུངས་པའི་རྣམ་པ་ཉིད་དུ་ན་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །གང་གི་ཚེ་དང་པོ་ཁོ་ནར་བ་ལང་མཐོང་བ་དེའི་ཚེ་མཚུངས་པའི་རྣམ་པ་ཉིད་དུ་ངེས་པ་ཡང་མེད་དོ་ཞེས་བྱ་བར་བསམས་པའོ། །འདི་བ་ལང་ངོ་སྙམ་པ་ལ་སོགས་པའི་ཤེས་པ་རྣམ་པར་རྟོག་པ་དང་བཅས་པ་ནི་སྐྱེད་པར་བྱེད་པ་ཡིན་ནོ་ཞེས་འབྲེལ་ཏེ་མ་ལྟོས་པར་ནི་ཞེས་བྱ་བ་ནི་བརྡ་དྲན་པ་ལ་ཞེས་འབྲེལ་ཏོ། ལྷན་ཅིག་བྱེད་པ་གཞན་དག་ཀྱང་བསྟན་པའི་ཕྱིར་བརྗོད་པ་ནི་གང་གི་ཚེ་ཞིས་བྱ་བའོ། །རྒྱུ་དེས་ན་བརྡ་མ་བཟུང་བ་དང་སྔོན་མཐོང་བ་དང་བྲལ་བ་ལ་ནི་འདི་བ་ལང་ངོ་སྙམ་པའི་ཤེས་པ་མི་འགྱུར་བ་ཉིད་དེ། བརྡ་འཛིན་པ་དང་སྔོན་མཐོང་བ་ལྷན་ཅིག་བྱེད་པ་མེད་པའི་ཕྱིར་རོ། །དེ་དང་ཞེས་བྱ་བ་ནི་སྔོན་མཐོང་བ་དང་ངོ༌། །རེ་ཞིག་སྔར་ཉམས་སུ་མྱོང་བ་ཡོད་པ་ཡིན་ནོ་ཞེས་བསྒྲུབས་ནས་དྲན་པ་ཡང་ཡོད་དོ་ཞེས་སྟོན་པ་ནི་སོ་སོར་བའི་ཞེས་བྱ་བའོ། །སྔོན་གྱི་སེམས་སུ་མྱོང་བ་དང་དྲན་པ་དག་སྲིད་པར་བརྗོད་ནས་ཕྱོགས་ཀྱི་ཆོས་ཉིད་ཡོད་པར་སྒྲུབ་པའི་དོན་དུ། ད་ལྟར་བའི་རྟགས་མཐོང་བ་སྟོན་པ་ནི་སོ་སོར་ངེས་པའི་ཞེས་བྱ་བའོ། །མཐོང་བ་ཁོ་ནར་སད་བྱེད་དུ་འགྱུར་རོ་སྙམ་ན། སོ་སོར་ངེས་པའི་ཞེས་གསུངས་སོ། །རྒྱུ་དེས་མངོན་སུམ་གྱིས་གཟུང་བའི་དོན་དེ་མཐོང་བ་ནའོ། །དེ་དྲན་པ་ན་ཞེས་བྱ་བ་ནི་རྗོད་པར་བྱེད་པ་དྲན་པའི་བྱ་པ་ལའོ། །འོན་ཏེ་ཞེས་བྱ་བ་ལ་སོགས་པ་ནི་གཞན་གྱིའོ། །འགའ་ཞིག་མངོན་སུམ་གྱི་ཁྱབ་ པ་གདོན་མི་ཟ་བར་རྟོགས་དགོས ་ཏེ། དེ་ལྟ་མ་ཡིན་ན་རྗེས་སུ་དཔག་པ་ཐུག་པ་མེད་པར་འགྱུར་བའི་ཕྱིར་རོ་ཞེས་བསམས་པའོ། །ཆ་ཤས་ཞེས་བྱ་བ་ནི་ལན་ནོ། །ཆ་ཤས་རྣམ་པ་ཉིད་ཇི་ལྟར་ཅི་ཡིན་ཞེ་ན། ཆ་
ཤས་རྣམས་ཀྱི་མཚུངས་པ་ཡང་ཞེས་བྱ་བ་ནི་དེ་འདྲ་བའི་ཞེས་བྱ་བའོ། །ཡན་ལག་ཆ་ཤས་ཀྱི་བྱེ་བྲག་རྣམས་སོ། །ཇི་ལྟར་ཞེ་ན་ཇི་སྲིད་དུ་ཞེས་བྱ་བའོ། །དབང་པོའི་བྱེད་པས་སྦྱོར་བ་ནི་ཞེས་བྱ་ནི་བ་ལང་ཞེས་བྱ་བ་དེ་ལྟ་བུ་ལ་སོགས་པ་སྟེ། དེ་ནི་མངོན་སུམ་ཁོ་ནའོ། །དེ་ལྟ་ཡིན་ན་ཞེས་བྱ་བ་ནི་ལན་ནོ། །ཕྱོགས་འདི་ན་ནི་མེའོ་ཞེས་བྱ་བའི་རྣམ་པ་འདིས་ས་ཕྱོགས་དང་མེ་སྦྱོར་བར་བྱེད་པ་གང་ཡིན་པ་དེ་ནི་དབང་པོའི་བྱེད་པ་དང་བྲལ་ན་འགྱུར་བ་མ་ཡིན་ནོ། །གལ་ཏེ་དབང་པོའི་བྱེད་པ་དང་མ་བྲལ་བར་མངོན་སུམ་གྱིས་སྦྱོར་བ་ཡིན་ན་རྗེས་སུ་དཔག་པ་ཇི་ལྟར་མངོན་སུམ་ཉིད་མི་འགྱུར་ཏེ། འགྱུར་བ་ཉིད་དོ་ཞེས་བྱ་བའི་ཐ་ཚིག་གོ །སྦྱོར་བ་ནི་ཞེས་བྱ་བ་ནི་ཕྱོགས་དང་མེ་སྦྱོར་བ་ནའོ། །ཕྱོགས་ཙམ་ལ་ནི་ཞེས་བྱ་བ་ནི་ཕྱོགས་ཙམ་གྱི་ཡུལ་ལ་མངོན་སུམ་སྐྱེ་བ་ཡིན་ལ། ཕྱོགས་དང་མེ་སྦྱོར་བ་ནི་རྗེས་སུ་དཔག་པ་ལས་ཡིན་ནོ། །ཡང་ཇི་ལྟར་མེ་སྦྱོར་བ་ཉིད་མངོན་སུམ་མ་ཡིན་ཞེ་ན། མེ་ལ་ཞེས་གསུངས་ཏེ། གང་གི་ཕྱིར་མེའི་ཡུལ་ལ་དབང་པོའི་ཤེས་པ་མེད་པ་དེའི་ཕྱིར། ཇི་ལྟར་སྦྱོར་བ་མངོན་སུམ་དུ་འགྱུར། གལ་ཏེ་མངོན་སུམ་གྱིས་མེ་མ་བཟུང་བ་དེ་ལྟ་ན་ཡང་དེ་སྦྱོར་བ་ནི་མངོན་སུམ་དུ་འགྱུར་རོ་ཞེ་ན། གང་གི་ཕྱིར་མ་བཟུང་བ་ནི་སྦྱོར་བ་མ་ཡིན་ནོ། །རྗེས་སུ་དཔག་པ་ཁོ་ན་ལས་ཞེས་བྱ་བ་ནི། མངོན་སུམ་ལས་མ་ཡིན་པའོ། །མངོན་སུམ་གྱིས་མ་བཟུང་བ་ཞེས་བྱ་བ་ནི་མེ་ལ་སོགས་པའོ། །དེ་དང་ཞེས་བྱ་བ་ནི་ས་ཕྱོགས་དང་མེ་རྟོགས་པ་ནི་མེ་ལ་སོགས་པ་སྟེ་མངོན་སུམ་གྱིས་སོ། །དེ་དང་པས་ནི་ཕྱོགས་དང་ལྡན་པར་རྟོགས་སོ་ཞེས་བྱ་བ་ནི་རང་གི་ཚིག་དང་འགལ་བ་ཡིན་ནོ། །གང་ལ་རྟོགས་པ་ཙམ་ཉིད་པ་དེ་ལ་རྟོགས་པའི་ཁྱད་པར་ཇི་ལྟར་ཡོད་ཅེས་བྱ་བའི་ཐ་ཚིག་གོ །དེ་ལྟར་ན་རེ་ཞིག་གྲུབ་པའི་མཐའ་པས་མངོན་སུམ་གྱིས་ནི་སྦྱོར་བ་མི་སྲིད་དོ་ཞེས་བསྟན་པ་ན། གཞན་དག་རྗེས་སུ་དཔག་པས་མི་སྲིད་དོ་ཞེས་བརྗོད་པ་ནི། རྗེས་སུ་དཔག་པའི་ཞེས་བྱ་བ་ལ་སོགས་པའོ། །རི་ལ་སོགས་པའི་ཕྱོགས་ལ་ནི་རྗེས་སུ་དཔག་པ་འཇུག་པ་མ་ཡིན་ནོ། །གལ་ཏོ་ཕྱོགས་སུ་དཔག་པས་མ་རྟོགས་ཀྱང་མེད་དང་སྦྱོར་རོ་སྙམ་ན་མ་བཟུང་བ་ནི་ཞེས་སྨྲས་སོ། །འོ་ན་ཕྱོགས་ཀྱང་རྗེས་སུ་དཔག་པས་རྟོགས་སོ་སྙམ་ན། མངོན་སུམ་དོན་ནི་ཞེས་བྱ་བའོ། །ས་ཕྱོགས་རྗེས་སུ་དཔག་པར་བྱ་བར་
ཁས་ལེན་ན་ནི་མངོན་སུམ་ཉིད་དུ་མི་འགྱུར་རོ། །འོན་ཏེ་ཚད་མའི་རྣམ་པར་གཞག་པ་ཚོལ་བའི་ཕྱིར་ན་མངོན་སུམ་གྱི་ཡུལ་གང་ཡིན་པ་དེ་ཉིད་རྗེས་སུ་དཔག་པར་བྱ་བ་ཡིན་ནོ་སྙམ་ན་ཚད་མའི་རྣམ་པར་གཞག་པ་ཉམས་པར་ནི་མི་འདོད་དོ་ཞེས་གསུངས་སོ། །འདི་ལ་གྲུབ་པའི་མཐའ་བས་བརྗོད་པ་ནི་དོན་དམ་དུ་ནི་ཞེས་བྱ་བའོ། །འོ་ན་ཕྱོགས་དང་མེ་ཇི་ལྟར་སྙམ་ན། རྣམ་པ་དེ་ལྟའི་ཞེས་བྱ་བའོ། །གཉི་གའི་ཞེས་བྱ་བ་ནི་མངོན་སུམ་དང་རྟགས་ངེས་པའིའོ། །མངོན་སུམ་ནི་རིལ་སོགས་པ་ཙམ་འཛིན་པ་ཡིན་ལ་རྗེས་སུ་དཔག་པ་ནི་རྟགས་ཉིད་དེ་རྗེས་སུ་དཔག་པའི་རྒྱུ་ཡིན་པའི་ཕྱིར་དང་ཤེས་པར་བྱེད་པའི་རྒྱུའི་སྐབས་ཡིན་པའི་ཕྱིར་རོ། །ངེས་པ་ཡང་ཤུགས་ཀྱིས་འཐོབ་སྟེ། དེས་མངོན་སུམ་དང་རྟགས་ངེས་པའི་རྗེས་སུ་བྱུང་བ་ཞེས་བྱ་བའི་དོན་ཏོ། །རྣམ་པར་རྟོག་པ་རྣམ་པར་བརྗོད་པ་ནི། འདི་ནི་འདི་ལའོ་ཞེས་བྱ་བའོ། །དེ་ཡང་ཞེས་བྱ་བ་ནི་རྣམ་པར་རྟོག་པའོ། །འདིའི་རྒྱུ་མཚན་བརྗོད་པའི་དོན་དུ་ཕྱོགས་སྔ་མ་འགོད་པ་བརྗོད་པ་ནི་རྗེས་སུ་དཔག་པ་ཡང་ཇི་ལྟར་སྦྱོར་བར་བྱེད་པའི་རང་བཞིན་དུ་སྐྱེ་བ་ཡིན་ཞེས་བྱ་བའོ། །ལན་བརྗོད་པ་ནི་མངོན་སུམ་གྱིས་དེ་ལྟར་གཟུང་བའི་ཕྱིར་རོ་ཞེས་བྱ་བ་སྟེ། ཆད་པ་ལ་སོགས་པ་གཞན་དུ་གཉི་གའི་རང་བཞིན་མཐོང་བའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་དབང་པོའི་རྣམ་པར་ཤེས་པ་དྲན་པ་ལས་ཀྱང་འགྱུར་བ་ནི། དེའི་ཚེ་དུས་གཞན་དུ་ཞེས་བྱ་བ་དོན་མེད་པའི་དུས་སུ་ཡང་དབང་པོའི་བློ་འབྱུང་བར་འགྱུར་རོ། །འོན་ཏེ་དུས་གཞན་དུ་ནི་དྲན་པ་ཡང་མེད་པ་ཁོ་ན་ཡིན་པ་དེས་ན་ཇི་ལྟར་དབང་པོའི་རྣམ་པར་ཤེས་པ་སྐྱེ་སྟེ། རྒྱུ་མེད་པར་ཕྱིར་རོ་ཞེ་ན། འབའ་ཞིག་ལ་ཞེས་གསུངས་སོ། །དེའི་ཚེ་སྲིད་པའི་ཕྱིར་རོ་ཞེས་བྱ་བ་ནི་དོན་མེད་པའི་དུས་ནའོ། །གང་གི་ཕྱིར་དབང་པོའི་རྣམ་པར་ཤེས་པའི་རྒྱུར་གྱུར་པ་དྲན་པའི་མཚན་ཉིད་ཀྱི་རྣམ་པར་རྟོག་པ་ཅན་གཞན་སྲིད་པའི་ཕྱིར་ཞེས་བྱ་བ་ལ་སོགས་པར་བསྡེབས་སོ། །དེ་ཁོ་ན་དེ་ལྟར་ཞེས་བྱ་བ་ནི་རྣམ་པར་རྟོག་པ་མེད་པའི་ཤེས་པའི་རྒྱུ་ཉིད་དུའོ། །གཉིས་ཞེས་པ་ནི་རྣམ་པར་རྟོག་པ་དང་བཅས་པ་དང་རྟོག་པ་མེད་པའོ། །གཞན་དུ་ནི་མ་ཡིན་ནོ་ཞེས་བྱ་བ་ནི་དྲན་པ་དང་བྲལ་བས་སོ། །དེ་ལྟར་ཞེས་བྱ་བ་ནི་ལྷན་ཅིག་པ་ཉིད་དུའོ། །མངོན་སུམ་སྐྱེད་པ་ན་དྲན་པ་དབང་པོ་ལ་ལྷན་ཅིག་པ་ཉིད་དུ་མཐོང་བ་ཁོ་ནའོ་ཞེ་ན་དྲན་པས་ནི་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་
གྱིའོ། །མིག་ལ་སོགས་པའི་ཤེས་པ་དྲན་པ་ངེས་པའི་རང་བཞིན་དུ་བྱེད་པ་ཡིན་ནོ་ཞེས་སྦྱར་རོ། །ལན་ནི་དེ་ཡང་ཞེས་བྱ་བའོ། །རང་བཞིན་དེ་ཞེས་བྱ་བ་ནི་མངོན་སུམ་གྱིས་གཟུང་བའི་རང་བཞིན་ལྷག་ཆད་མེད་པར་རོ། །ཐ་དད་མེད་ཕྱིར་ཞེས་བྱ་བ་ནི་མངོན་སུམ་སྔ་མའི་ཡུལ་དེའོ། །དེ་དངོས་མེད་ན་ཞེས་བྱ་བ་ནི་ངེས་པའོ། །འོན་ཏེ་དེ་ལ་ཞེས་བྱ་བ་ནི་ངེས་པ་ལའོ། །དེ་ཞེས་བྱ་བ་དེས་པའི་ཤེས་པའོ། །དབང་པོའི་ཤེས་པ་ལས་རང་བཞིན་གཞན་དུའོ། །དེ་ཉིད་ལ་ཞེས་བྱ་བ་ནི་མངོན་སུམ་གྱི་མཐོང་བ་ཉིད་ལ་འཇུག་པའོ། །འདིའི་ཞེས་བྱ་བ་ནི་རྣམ་པ་འདིས་འཇུག་པའི་རྣམ་རྟོག་མེད་པ་ཉིད་དུ་འགྱུར་ཏེ། ཡིད་ཀྱི་མངོན་སུམ་ཉིད་དུ་འགྱུར་རོ་ཞེས་བྱ་བ་ནི་ཐ་དད་དོ། །དོན་བྱ་དང་སོགས་པའི་སྒྲས་ནི་རིགས་ལ་སོགས་པ་དང་འབྲེལ་བ་གནག་ཡིན་པ་དང༌། དེ་ཉིད་ཀྱི་སྔ་མ་དང་ཕྱི་མར་ཏེ་གཉིས་པོ་དེར་མི་རྟོགས་པའི་ཕྱིར་རོ། །གལ་ཏེ་དོན་དང་འབྲེལ་བ་ལ་སོགས་པ་རྣམ་པར་རྟོག་པར་མི་བྱེད་མོད། དེ་ལྟ་ན་ཡང་འདི་ནི་རྣམ་པར་རྟོག་པ་ཉིད་ཡིན་ནོ་ཞེ་ན། རྣམ་པར་རྟོག་པར་མི་བྱེད་པ་ཉིད་ནི་ཞེས་སྨོས་སོ། །དེ་ནི་ཞེས་བྱ་བ་ནི་གསལ་བའི་རྣམ་པ་ཅན་མངོན་སུམ་གྱི་ཡུལ་ནི་དེ་ལྟར་ཞེས་བྱ་བ་རྣམ་པ་གསལ་བ་ཉིད་དུའོ། །དེ་མེད་ན་ཞེས་བྱ་བ་ནི་དྲན་པ་མེད་ནའོ། །དེའི་རང་བཞིན་དུ་ཤེས་པ་ཞེས་བྱ་བ་ནི། དེའི་རྣམ་པ་གསལ་བར་འཛིན་པའི་ཤེས་པའོ། །ཡོད་ཀྱང་ཞེས་བྱ་བ་ནི་ཡོད་པ་མིན་ཡང་འདིའོ་ཞེས་བྱ་བར་སྣང་བ་དེས་ནི་ཁྱད་པར་གཞན་ཡོད་པ་མ་ཡིན་པའི་ཕྱིར་ཞེས་བྱ་བ་ནི། ཐ་དད་པར་རྟོགས་པའི་ཁྱད་པར་གཞན་རྟོགས་པ་མེད་པའི་ཕྱིར་རོ། །འཇུག་པ་ལ་ཞེས་བྱ་བ་ནི་དོགས་པ་བསུ་བ་སྟེ། འདི་ཞེས་བྱ་བར་སྣང་བ་ཞེས་འབྲེལ་ཏོ། །ལན་ནི་དེ་མེད་ཀྱང་ཞེས་བྱ་བ་སྟེ་ཞེས་བྱ་བ་ནི་སྣང་བ་མེད་ཀྱང་ངོ༌། །འབྲེལ་པ་གྲུབ་པ་སྟེ་སྒྲ་དང་འདྲེས་པ་ངེས་པར་བྱ་བའི་དོན་དུའོ། །དེ་ཞེས་བྱ་བ་ནི་མངོན་སུམ་གྱི་ཡུལ་གྱི་དོན་ཏོ། །དེ་ལྟར་ཞེས་བྱ་བ་ནི་སྒྲ་དང་འདྲེས་པ་ཉིད་དུ་མ་གྲུབ་ན། དེའི་ཚེ་མངོན་གྱི་ཡུལ་གྱི་དོན་དེ་རྟོགས་པ་ལ་དྲན་པ་མི་མཁོ་བར་འགྱུར་རོ། །འཇུག་པ་ལ་མཁོ་བ་ཡིན་ནོ་ཞེས་སྨྲས་ཟིན་ཏོ་ཞེ་ན་དང་པོའི་ཞེས་སྨོས་སོ། །འཇུག་པར་བྱེད་པ་ཡང་ཞེས་བྱ་བ་ནི། འཇུག་པ་ལ་ཡང་བྱེད་པ་ཡོད་བ་མ་ཡིན་ནོ་
ཞེས་བྱ་བའི་དོན་ཏོ། །གལ་ཏེ་རྣམ་པར་རྟོག་པས་ དགོས་པ ་མེད་ན་དེའི་ཚེ་འདི་ཅིའི་དོན་དུ་འཇུག་ཅེ་ན། འདི་ནི་ཞེས་གསུངས་སོ། །དེས་ཞེས་བྱ་བ་ནི་མིག་ལ་སོགས་པའི་བློས་སོ། །སྤྱི་གཟུང་བ་ན་ཡང་བ་ལང་ཇི་བུ་ཞིག་ཅེས་ཁྱད་པར་འཛིན་པ་ལ་ལྟོས་པར་རྟོགས་པ་ནི་འཇིག་རྟེན་ན་མཐོང་བ་ཡིན་ནོ། །དེ་ལ་ནི་དབང་པོའི་རྣམ་པར་ཤེས་པ་ལའོ། །མདུན་གནས་པའི་གཟུགས་ཙམ་ལ་མི་འཇུག་བར་རྟོགས་ཏེ་ཤེས་པ་ཡིན་ནོ། །མདུན་ན་གནས་པ་ཙམ་ལ་མི་འཇུག་པ་མཐོང་གི་གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེ་ལྟ་ཡིན་མོད་དེ་ལྟ་ན་ཡང་བྱེད་པ་གཞན་ལ་འཇུག་གོ་སྙམ་ན། གཞན་དུ་ཞེས་གསུངས་སོ་།དྲན་པའི་འོག་རོལ་གྱི་དུས་སུའམ་དྲན་པ་ལས་སྔར་མངོན་སུམ་སྐྱེས་ཀྱང་རུང་སྟེ། རྣམ་པར་རྟོག་པ་མ་ཡིན་པ་ཉིད་དོ། །ཅིའི་ཕྱིར་ཞེ་ན། ཡུལ་ཞེས་གསུངས་ཏེ། རྣམ་པར་རྟོག་པ་དང་བཅས་པ་དང༌། རྟོག་པ་མེད་པའི་ཡུལ་གང་ཡིན་པ་དེ་ཐ་དད་པ་ཉིད་ཀྱི་ཕྱིར་རོ། །གལ་ཏེ་མིག་ལ་སོགས་པ་ལ་བརྟེན་ནས་སྐྱེས་པ་གང་ཡིན་པ་དེ་ཁོ་ན་མངོན་སུམ་ཡིན་ན། འོ་ན་ནི་དེའི་ཚེ་ཡིད་ལ་སོགས་པ་མངོན་སུམ་དུ་མི་འགྱུར་ཏེ། མིག་ལ་སོགས་པ་ལ་མི་བརྟེན་པའི་ཕྱིར་རོ་སྙམ་ན། གང་ཞིག་ཅེས་གསུངས་སོ། །གཞན་ལས་ཞེས་བྱ་བ་ནི་གོམས་པ་ལ་སོགས་པ་ལའོ། །ཡང་ན་ཞེས་བྱ་བ་ལ་སོགས་པའོ། །ཡིད་ལ་སོགས་པ་ཡང་མངོན་སུམ་གྱི་སྒྲས་བརྗོད་པར་བྱ་བ་ཉིད་དུ་བྱེ་བྲག་ཏུ་བཤད་པ་གཞན་གྱི་སྒོ་ནས་སྟོན་ཏོ། །ཅིའི་ཕྱིར་དབང་པོའི་སྒོ་ནས་བསྙད་པར་མི་འཐད་སྙམ་ན། དབང་པོའམ་ཞེས་སྨྲས་སོ། །ཟླ་བ་གཉིས་ལ་སོགས་པའི་ཤེས་པ་ཡང་དབང་པོ་ལས་སྐྱེས་པས་ན། མངོན་སུམ་དུ་ཐལ་བར་འགྱུར་རོ་ཞེས་བྱ་བའི་དོན་ཏོ། །གལ་ཏེ་ཡུལ་གྱི་རང་བཞིན་འཛིན་པ་ཐམས་ཅད་ཀྱང་མངོན་སུམ་མ་ཡིན་ཏེ། དེས་ན་དེས་ཀྱང་ཇི་ལྟར་བསྙད་སྙམ་ན། ཡུལ་གྱི་ཞེས་སྨྲས་སོ། །གལ་ཏེ་དབང་པོ་ལ་བརྟེན་པ་ཉིད་མངོན་སུམ་ཉིད་ལས་འཁྲུལ་པ་ཡིན་མོད། དེ་ལྟ་ན་ཡང་དེས་ཐ་སྙད་བྱེད་པར་འགྱུར་རོ་ཞེ་ན། འཁྲུལ་བ་མེད་པའི་རྒྱུ་མཚན་ཞེས་སྨོས་སོ། །འདི་ལ་ནི་འཁྲུལ་པ་ཡོད་པ་དེས་ན་ཐ་སྙད་དུ་བྱ་བ་མ་ཡིན་ནོ་ཞེས་བྱ་བའི་དོན་ཏོ། །གྲུབ་པའི་མཐའ་བརྗོད་པ་ནི་ཡུལ་གྱི་ཞེས་བྱ་བའོ། །གཞན་གྱི་དོགས་པ་བསུ་བ་ནི་དེ་
ནི་ཞེས་བྱ་བའོ་།ཡུལ་ནི་རྣམ་པར་འཇོག་པར་ནུས་པའི་རྒྱུ་ཡིན་ན་ཟླ་བ་གཅིག་ནི་དེ་ལྟ་མ་ཡིན་ཏེ། དེས་ན་ཡུལ་དུ་ཇི་ལྟར་འགྱུར། །འགྲུབ་པའི་མཐའ་བརྗོད་པ་ནི་འོ་ན་ནི་ཞེས་བྱ་བའོ། །དེ་ནི་ཞེས་བྱ་བ་ནི་ཟླ་བ་གཉིས་སུ་ཤེས་པ་སྐྱེད་པར་བྱེད་དོ། །ཉམས་ཀྱང་ཅི་སྟེ་དབང་པོ་མ་ཡིན་སྙམ་ན། དབང་པོ་ནི་ཞེས་བྱ་བའོ། །དེ་ལྟར་རེ་ཞིག་དབང་པོ་སྐྱེད་པ་དང་ཡུལ་གྱིས་བསྐྱེད་པ་ཐམས་ཅད་མངོན་སུམ་ཡིན་པར་གྲུབ་པའི་མཐའ་མཚུངས་པས་བྱས་ན་གཞན་དག་གི་ཕྱོགས་སྔ་མ་འགོད་པ་ནི་དེ་ལྟ་ན་ནི་འོ་ན་ཞེས་བྱ་བའོ། །རྒྱུ་ཉིད་དུ་ཞེས་བྱ་བ་ནི་མངོན་སུམ་གྱི་ཤེས་པའི་རྒྱུ་ཉིད་དུ་མཚུངས་པ་ཡིན་ན་དེ་ཁོ་ནར་མིག་ལ་སོགས་པས་ཐ་སྙད་བྱེད་ཀྱི་ཡུལ་གྱི་ནི་མ་ཡིན་ནོ་ཞེ་ན། རྟོག་པ་མངོན་དུ་ཞེས་སྨོས་སོ། །སྦྱར་བར་བྱ་བ་ཡང་དེའི་ཆོས་ཞེས་བྱ་བ་ནི། སྦྱར་བར་བྱ་བ་ནི་གོ་བར་བྱེད་པ་ཉིད་དེའི་ཆོས་ཏེ། ཁྱད་པར་བྱ་བ་ཡིན་ནོ། །གོ་བར་བྱེད་པ་ཉིད་སྟོན་པ་ནི་གང་དབང་པོ་ལ་བརྟེན་པ་དེ་ཞེས་བྱ་བའོ། །གལ་ཏེ་དབང་པོ་ལ་བརྟེན་པ་ཉིད་ཡིན་ཞིང༌། མངོན་སུམ་ཉིད་དུ་མི་འགྱུར་ཏེ། ཟླ་བ་གཉིས་ལ་སོགས་བའི་ཤེས་པ་བཞིན་ནོ། །དེས་ན་ཇི་ལྟར་གོ་བར་བྱེད་པ་ཡིན་སྙམ་ན། ཉམས་པས་ཞེས་གསུངས་ཏེ་དབང་པོས་སོ། །འཁྲུལ་པ་ཞེས་བྱ་བ་ནི་ཡུལ་གྱིས་བསྐྱེད་ཀྱང་མངོན་སུམ་མ་ཡིན་པའི་མཚན་ཉིད་དོ། དེ་ནི་ཞེས་བྱ་བ་ནི་ཟླ་བ་གཉིས་ཀྱི་ཤེས་པ་སྐྱེད་པར་བྱེད་པ་སྟེ་ཟླ་བ་གཅིག་པའོ། །ལན་བརྗོད་པ་ནི་དེ་ནི་ཞེས་བྱ་བའོ། །དེ་ནི་ཞེས་བྱ་བ་ནི་ཟླ་བ་གཅིག་པའོ། །དེའི་ཚེ་དབང་པོ་མ་ཉམས་པའི་མངོན་སུམ་ཟླ་བ་གཅིག་པོ་ཇི་ལྟར་འགྱུར། དབང་པོ་ཡང་དེ་བཞིན་དུ་འགྱུར་རོ་ཞེ་ན། དབང་པོ་ཉིད་ནི་ཞེས་སྨོས་སོ། །དེར་ཡང་ཞེས་བྱ་བ་ནི་ནས་མ་ཡིན་པའི་མྱུ་གུར་ཡང་ངོ༌། །འོན་ཏེ་ཞེས་བྱ་བ་ནི་དོགས་པའོ། །ཟླ་བ་གཉིས་ཀྱི་ཤེས་པ་ལ་ནི་ཡུལ་གྱི་རང་བཞིན་འཛིན་པ་ཡོད་པ་མ་ཡིན་ནོ་ཞེས་བསམས་པའོ། །ཡུལ་འཛིན་པའི་ཕྱིར་རོ་ཞེས་བྱ་བ་ནི་མིང་དང་མཚན་མའི་རང་བཞིན་གྱི་ཡུལ་གྱི་རང་གི་ངོ་བོ་ཉིད་འཛིན་པའི་ཕྱིར་རོ་ཞེས་བཤད་པ་ཡིན་ནོ་ཞེས་བྱ་བ་ནི་སློབ་དཔོན་ཆོས་ཀྱི་གྲགས་པས་སོ། །མ་ངེས་པའི་ཕྱིར་ཏེ་ཞེས་བྱ་བ་ནི་དོན་གྱི་མཐུ་ལས་སྐྱེས་པ་ཡང་དེའི་རྣམ་པའི་རྗེས་སུ་མི་བྱེད་པའི་ཕྱིར་རོ། །དེ་ཉིད་བརྗོད་ན་ཟླ་བ་གཉིས་ཀྱི་ཤེས་པའོ། །རིགས་
པ་འདིས་ཞེས་བྱ་བ་ནི་དོན་གྱི་མཐུ་ལས་སྐྱེས་པའི་མཚན་ཉིད་ཀྱིས་སོ། །དེ་ནི་དོན་གྱི་མཐུ་ལས་སྐྱེས་པ་མ་ཡིན་པའི་ཕྱིར་རོ། །འོ་ན་སློབ་དཔོན་གྱི་གཞུང་ཇི་ལྟར་གཞུང་གཟུགས་སྙམ་ན་དེའི་ཕྱིར་ཞེས་གསུངས་སོ། །འདིར་ཞེས་བྱ་བ་ནི་དོན་གྱི་མཐུ་ལས་ན། ཡང་དག་སྐྱེ་བ་ཡིན་ཕྱིར་རོ། །ཞེས་བྱ་བ་ནི་འདིར་རོ་ཇི་ལྟར་ན་དབང་པོ་ལ་དོན་གྱི་ཐ་སྙད་དུ་བརྗོད་ཅེ་ན། བཤད་པ་དོན་དུ་མངོན་པར་ཞེན་པའི་ཕྱིར་རོ། །གང་གི་ཕྱིར་དབང་པོ་ལ་དོན་དུ་མངོན་པར་ཞེན་པ་ཡིན། དོན་གྱི་ཡུལ་ཅན་ཡིན་པའི་ཕྱིར། དེ་སྐད་བརྗོད་པ་ཡིན་ནོ་ཞེས་བྱ་བའི་དོན་ཏོ། །དབང་པོའི་རྣམ་པར་ཤེས་པ་དེ་ནི་གཟུགས་འཛིན་པར་སོ་སོར་ངེས་པར་བྱེད་པའི་མིག་གི་སྟོབས་ཀྱིས་ཀྱེ་བ་ན་སྔོན་པོ་ལ་སོགས་པའི་རང་བཞིན་ཁོ་ནའི་རྗེས་སུ་བྱེད་པར་འགྱུར་གྱི་སྒྲའི་རྣམ་པར་ནི་མ་ཡིན་ནོ། །དེ་ལྟ་ན་ཡང་སྒྲའི་རྣམ་པ་དང་བྲལ་བའི་ཕྱིར་རོ། །རྣམ་པར་རྟོག་པ་མེད་པ་ཡིན་ནོ་ཞེས་བྱ་བའི་དོན་དུ་འོན་ཏེ་གཞན་གྱི་སྟོབས་ཀྱིས་གཟུགས་ཀྱི་ངོ་བོ་རྗེས་སུ་བྱེད་པའི་ཤེས་པ་ནི་སྒྲའི་རྣམ་པ་ཅན་དུའང་འགྱུར་ཏེ། གཟུགས་ཉིད་སྒྲའི་བདག་ཉིད་ཅན་བསུ་ནས་གང་གིས་དེ་སྣང་བ་ན་དེ་དག་ཀྱང་སྣང་བར་འགྱུར་བ་དོན་ལ་སྒྲའི་ཡོད་པའམ་དེའི་བདག་ཉིད་ནི་མ་ཡིན་ནོ་ཞེས་གསུངས་ཏེ། །དེ་ལྟར་བཤད་པར་བྱ་བ་ཡིན་ནོ། །ཁྱབ་པར་བྱེད་པའི་ཞེས་བྱ་བ་ནི་གོ་བར་བྱེད་པའི་རང་བཞིན་ནོ། །ལོག་པའི་ཕྱིས་ཞེས་བྱ་བ་ནི་ཡུལ་ལ་བརྟེན་པ་ཞེས་བྱ་བའི་ཐ་སྙད་འདི་ལ་གོ་བར་བྱེད་པ་ཉིད་སྔོག་པ་ཡོད་པ་ཡིན་ཏེ་དེས་ནའོ། །དེའི་བདག་ཉིད་བརྗོད་པ་ནི་རྟོག་པ་སྔོན་དུ་ཞེས་བྱ་བའོ། །དེ་ཉིད་ཅེས་བྱ་བ་ནི་སྦྱར་བ་ཉིད་དོ་།བདེན་པ་དེ་གང་ཡིན་ཞེ་ན་སྐྱེས་བུ་ཞེས་སྨོས་སོ། །སྐྱེས་བུ་ཚད་མ་ཡིན་པ་ཉིད་དུ་ངེས་པར་མི་ནུས་པའི་ཕྱིར་རོ་ཞེས་བྱ་བའི་དོན་ཏོ། །རྟགས་ཉིད་ཡིན་པ་ལ་ཁྱབ་བྱར་བརྗོད་པ་ཞེས་བྱ་བ་ནི་དོན་དམ་པར་ནི་མ་ཡིན་ནོ། །ཅིའི་ཕྱིར་ཞེ་ན། གང་གིས་ཞེས་གསུངས་སོ། །རྣམ་པར་རྟོག་པ་དང་བཅས་པའི་ཡུལ་ནི་སྔ་མ་དང༌། ཕྱི་མར་གྱུར་པ་ཡིན་ལ་དེ་ཡང་དེ་ཁོ་ནར་རྣམ་པ་དེ་ལྟར་ཡོད་པ་མ་ཡིན་ཏེ། དངོས་པོའི་ཚོགས་ནི་སྐད་ཅིག་མར་འཇུག་པའི་ཕྱིར་རོ། །དེས་ན་ཡུལ་མེད་པའི་ཕྱིར་ན། ཡུལ་ལ་སྟོན་པ་ཞེས་བྱ་བའི་ཐ་སྙད་དུ་ཇི་ལྟར་འགྱུར་སྙམ་ན། རྣམ་པར་རྟོག་པ་དང་བཅས་པའི་མངོན་སུམ་གྱི་ཞེས་སྨོས་སོ། །འཇིག་རྟེན་ན་དེ་ལྟར་
ན་གྲགས་པ་མེད་དོ་ཞེ་ན་འདི་ནི་ཞེས་གསུངས་སོ། །དེ་ཉིད་གཞུང་འཛུགས་པ་ནི་འདི་ལྟར་ཞེས་བྱ་བའོ། །གལ་ཏེ་འཇིག་རྟེན་ན་དེ་ལྟར་རྟོགས་མོད། དེ་ལྟ་ན་ཡང་ཚད་མ་ཡིན་ནོ་ཞེ་ན། གནོད་པ་མེད་པའི་ཞེས་གསུངས་སོ། །མངོན་དུ་བྱེད་པའི་རྣམ་པས་འཇུག་པ་ཉིད་ཤེས་པ་ཡིན་པ་དེས་ན། ཇི་ལྟར་རྗེས་སུ་དཔག་པ་ཡིན་སྙམ་ན། མངོན་དུ་བྱེད་པ་ནི་ཞེས་གསུངས་སོ། །སྔ་མ་དང་ཕྱི་མ་དང་སྔོམ་པའི་རང་བཞིན་གྱི་ངོ་ཤེས་པ་ནི་མངོན་དུ་བྱེད་པ་མ་ཡིན་ནོ། །མངོན་དུ་བྱེད་པའི་དེ་ཉིད་ལ་ཡུལ་ལ་བརྟེན་པ་ཞེས་ཤིག་དབང་པོ་ལ་བརྟེན་པའི་ཐ་སྙད་ཀྱིས་ཅི་བྱ་སྙམ་ན་དེ་ན་ཞེས་གསུངས་སོ། །དེ་ལྟར་ཐ་སྙད་བྱ་བ་ལ་ནི་ཞེས་བྱ་བ་ནི་ཡུལ་ལ་བརྟེན་པ་ཞེས་བྱ་བ་འདིས་བརྗོད་པའི་བྱ་བའི་ཡུལ་ལའོ། །ཡུལ་བརྟེན་པ་ཟླ་བ་གཅིག་གིས་ཤེས་པ་ཡང་མངོན་སུམ་དུ་ཐལ་བའི་ཕྱིར་རོ། །དེ་ལྟ་ན་ཡུལ་ལ་བརྟེན་ནོ་ཞེ་ན། མངོན་སུམ་ཁོ་ནར་བརྗོད་ལ་རག་མོད། ཉེས་པ་ཅི་ཡོད་སྙམ་ན་མངོན་སུམ་ལ་ཡང་ཞེས་བྱ་བའོ། །ཟླ་བ་གཉིས་པའི་ཤེས་པ་ནི་ཚད་མ་ཉིད་མ་ཡིན་ན་མངོན་དུ་ལྟ་ག་ལ་ཞེས་བསམས་པའོ། །གལ་ཏེ་དབང་པོ་ལ་བརྟེན་པས་ཀྱང་མངོན་དུ་བྱེད་པ་ཙམ་དུ་མཚོན་གྱི་མངོན་སུམ་ཉིད་དུ་ནི་མ་ཡིན་ནོ། །དེས་ན་དབང་པོ་ལ་བརྟེན་པ་ཉིད་ཉེ་བར་མཁོ་བ་ཇི་ལྟར་ཡིན་སྙམ་ན། མངོན་དུ་བྱེད་པ་ལས་ཞེས་གསུངས་སོ། །མངོན་དུ་བྱེད་པ་ཉིད་མཚོན་པ་ན་མཉམ་པའི་དབང་པོ་ལ་བརྟེན་པ་ཉིད་ཀྱིས་མངོན་སུམ་ཉིད་དུ་མཚོན་པ་ཡིན་ནོ་ཞེས་བྱ་བའི་དོན་ཏེ། འདི་སྐད་ཅེས་ཞེས་བྱ་བ་ནི་སློབ་དཔོན་ཕྱོགས་ཀྱི་གླང་པོས་སོ། །དེ་དང་འགལ་པའི་ཕྱིར་ཞེས་བྱ་བ་ནི་རྟོག་པ་མེད་པ་དང་འགལ་པའི་ཕྱིར་རོ། །དེ་ཁོ་ན་ལྟར་ཞེས་བྱ་བ་ཕན་ཚུན་སྤང་པའི་རང་བཞིན་ཉིད་དུའོ། །སྤྱི་འཛིན་པ་རྣམ་པར་རྟོག་པ་དང་བཅས་པ་ཉིད་རང་དབང་དུ་བསྒྲུབ་པའི་དོན་དུ་རྣམ་པར་རྟོག་པར་བྱེད་པ་ནི་ཚོགས་ལས་ཞེས་བྱ་བའོ། །དེ་ལས་ཐ་དད་པར་ཞེས་བྱ་བས་ནི། སྤྱིའི་རྟེན་གྱིས་གསལ་བ་ལས་མ་གཏོགས་པར་ཚོགས་པ་གཞན་སྣང་བ་མེད་པའི་ཕྱིར་རོ། །འདིས་ནི་མི་དམིགས་པ་ཉེ་བར་བཀོད་དོ། །གཞན་ཞེས་བྱ་བ་ནི་གསལ་པ་རྣམས་ལས་ཐ་དད་པའི་ཚོགས་པའི་སྤི་ཞེས་བྱ་བའི་མིང་ཅན་ནོ། །གལ་ཏེ་སྣང་བར་འདོད་དུ་ཟིན་ཀྱང་གཞན་ཏེ་སྣང་བ་མེད་དེ་ཚོགས་པ་ནི་
མ་ཡིན་ཏེ། རང་དབང་དུ་རྟོགས་པ་ནི་ཚོགས་པ་ཉིད་དུ་མི་འཐད་པའི་ཕྱིར་ཏེ། དེ་ནི་འབྲེལ་བ་ཅན་གྱི་རང་བཞིན་ཡིན་པའི་ཕྱིར་རོ། །དེ་ཡིན་བ་ཉིད་ན་ཡང་ཞེས་བྱ་བ་ནི་རང་དབང་དུ་སྣང་བ་ཡང་གལ་ཏེ་གསལ་བ་ལ་ལྟོས་ཏེ་སྤྱིའི་རང་བཞིན་ཡིན་པ་དེའི་ཚེ་ཡང་དེ་དག་ཉིད་ཅེས་བྱ་བ་སྤྱིའི་རྟེན་དུ་གྱུར་པའི་གསལ་བ་རྣམས་ཉིད་དོ། །རྣམ་པར་རྟོག་པ་གཉིས་པ་དགོངས་པ་ནི་འོན་ཏེ་ཞེས་བྱ་བའོ། །དེ་ཡང་ཞེས་བྱ་བ་ནི་ལན་ཏེ། རང་བཞིན་གཞན་བརྟགས་དེ་ཡང་ངོ་།རྟོག་པའི་ཡུལ་གྱི་ཚོགས་པ་ཉིད་མངོན་སུམ་གྱི་ཡུལ་ཡིན་ནོ་ཞེ་ན་བརྟགས་པའི་ཞེས་སྨོས་སོ། །གཞན་ལས་ཞེས་པ་ལ་ལྟོས་ཏེ། རྒྱུར་གྱུར་པའི་ནུས་པ་མ་སྐྱེས་པའི་རྡུལ་གང་ཡིན་པ་དེ་དག་ལ་དེ་སྐད་ཅེས་བྱ་བའོ། །ཕྲ་མོ་མ་ཡིན་པ་རགས་པ་ནི་དེ་མཐོང་བ་དག་ལ་དེ་སྐད་ཅེས་བྱའོ། །དེས་ན་ཞེས་བྱ་བ་ནི་དེས་ན་གཞན་ཡོད་པ་ནའོ་།ཐམས་ཅད་ཀྱིས་བསྐྱེད་མོད། །དེས་ཅིར་འགྱུར་སྙམ་ན་ཤེས་པ་དེ་ནི་ཞེས་གསུངས་སོ། །ཚུན་ཞེས་བྱ་བ་ནི་དོགས་པའོ། །གྲུབ་པའི་མཐའ་ནི་སྒྲ་ལ་སོགས་པས་ཞེས་བྱ་བའོ་།རང་གི་རྒྱུ་ལ་སོགས་པ་གང་ཡིན་པ་རང་གི་རྣམ་པ་གཏོད་པའི་ནུས་པ་མེད་པ་དེའི་ཕྱིར་ཏེ། དེ་ལས་མི་སྣང་བ་ཡིན་ནའོ། །འོ་ན་ཞེས་བྱ་བ་ལ་སོགས་པས་ནི་འཁྲུལ་པ་ཉིད་དུ་བསྒྲུབས་པ་མངོན་སུམ་ཉིད་དང་འགལ། གཞན་རྟོག་པ་དང་བཅས་པ་ཉིད་དུ་ཡང་སྒྲུབ་པ་ནི་ལྷག་པར་ཞེས་བྱ་བའོ། །འོན་ཏེ་དེར་ཞེས་བྱ་བ་ནི་མངོན་སུམ་ལའོ། །རྟོག་པ་ལ་ལྟོས་ཏེ་སྣང་བ་ཤར་བ་མེད་པ་གང་ཡིན་པ་དེ་དག་ལ་དེ་སྐད་ཅེས་བརྗོད་དོ། །དེ་ལྟར་གྱུར་ན་རྣམ་པར་རྟོག་པ་དང་བཅས་པ་ནི་མངོན་སུམ་ལ་བརྗོད་པ་མ་ཡིན་ནོ། །འཛིན་པ་ཡིས་ནི་ཞེས་བྱ་བ་ནི་མངོན་སུམ་གྱིས་སོ། །དེ་ཞེས་བྱ་བ་རྣམ་པར་རྟོག་པའི་རང་བཞིན་ཉིད་སེལ་ཏེ་འདིར་རོ། །ཅིའི་ཕྱིར་ཞེ་ན། མངོན་སུམ་ནི་མངོན་དུ་བྱེད་པའི་རང་བཞིན་ཡིན་པའི་ཕྱིར་རོ། །མངོན་དུ་བྱེད་པ་ཉིད་ལྷག་པར་ཞེན་པར་འགྱུར་རོ་ཞེ་ན། མངོན་དུ་བྱེད་པ་ཉིད་ནི་ཞེས་གསུངས་སོ། །དེ་ཉིད་དུ་ནི་ཞེས་བྱ་བ་ནི་ལྷག་པར་ཞེ་ན་བ་ཉིད་དུའོ། །དེ་ལས་བཟློག་པ་ནི་མངོན་དུ་བྱེད་པ་ལས་བཟློག་པར་འགྱུར་རོ། །བཤད་ཅེས་བྱ་བ་ནི་སློབ་དཔོན་དབྱིག་གཉེན་གྱིས་སོ། །འདི་དག་ནི་ཞེས་བྱ་བ་ནི་རྣམ་པར་ཤེས་པའི་ཚོགས་ལྔ་པའོ། །རྫས་ཀྱི་རང་གི་མཚན་ཉིད་ཅེས་བྱ་བ་ནི་རྡུལ་ཕྲ་རབ་ཀྱི་རང་གི་མཚན་ཉིད་དོ། །འདི་ནི་ཞེས་བྱ་བ་ནི་སྐྱེ་མཆེད་
ཀྱི་རང་གི་མཚན་ཉིད་ཅེས་བྱ་བ་ལ་སོགས་པའོ། །གཏན་ཚིགས་དེའི་ཕྱིར་ན་ཡུལ་ཅན་ཉིད་ཡིན་པར་འགལ་བ་མེད་དོ། །ད་ནི་རྣམ་པར་རྟོག་པ་དང་བཅས་པར་འགྱུར་རོ་ཞེན། གང་ཡང་ཞེས་གསུངས་སོ། །འོ་ན་གང་ཞིག་རྣམ་པར་གཅོད་པའི་དོན་དུ་རྟོག་པ་དང་བྲལ་བ་ཉིད་བརྗོད་པ་རྣམ་པར་རྟོག་པ་དང་བཅས་པར་བརྗོད་པ་གང་ཡིན་ཞེ་ན། གཞན་ལ་གྲགས་པ་ལ་བརྟེན་ནས་ཞེས་སྨོས་སོ། །གཞན་ལ་རིགས་པ་ཅན་ལ་སོགས་པ་ལའོ། །རྗེས་སུ་དྲན་པའི་རྣམ་པར་རྟོག་པ་ཞེས་བྱ་བ་འདི་སྔར་མཐོང་བའོ་ཞེས་བྱ་བ་ལྟ་བུའི་རྣམ་པ་ཅན་མ་འདི་ནི་སྔོན་པོ་སྙམ་པ་ལ་སོགས་པའི་རང་བཞིན་ཅན་གྱིས་སོ། །དེ་ཞེས་བྱ་བ་ནི་དེ་ལྟ་བུར་གྱུར་པའི་རྟོག་པ་ཉིད་དོ། །བཟློག་པར་དཀའོ་ཞེས་བྱ་བ་ནི་རྣམ་པར་རྟོག་པ་དང་བཅས་པ་ཉིད་དོ། །གཅིག་གི་ཚེ་ཁོ་ནར་ཞེས་བྱ་བ་གཅིག་ཉིད་ཀྱིས་དུ་མ་མཐོང་དོ་སྙམ་ན། ཤེས་པ་ཞེས་གསུངས་སོ། །དེ་ལྟར་ན་ངེ་ཞིག་གཅིག་གི་ཚེ་རྡུལ་ཕྲ་རབ་དུ་མ་འཛིན་པ་མེད་པའི་ཕྱིར་རྣམ་པར་རྟོག་པ་ཉིད་དུ་བ་སྒྲུབས་ནས་རྣམ་པར་མི་རྟོག་པ་ཉིད་གྲུབ་པའི་དོན་དུ་རྡུལ་ཕྲ་རབ་རྣམས་ལ་ཡན་ལག་ཅན་གྱི་རྫས་གཅིག་ཉིད་ཁོ་ན་དེས་དོགས་སོ་ཞེས་སྔོན་པ་ནི་ཡང་ན་ནི་ཞེས་བྱ་བའོ། འདི་ལ་བརྗོད་པ་ནི་དངོས་པོ་དུ་མ་ཤེས་པ་གཅིག་གིས་མི་འཛིན་པ་ག་ལས་ཡིན་ཞིང༌། དེའི་ཡན་ལག་གཅིག་པ་ཡང་ག་ལས་ཡིན། ཅིག་ཅར་འཛིན་པའི་ཕྱིར་ཡན་ལག་ཅན་ཉིད་ཡིན་ཏེ། དེ་ལྟ་མ་ཡིན་ན་ཡིད་གཅིག་ཡིན་པའི་ཕྱིར། དུ་མ་ལ་བྱེད་པ་ཇི་ལྟར་ལྟར་འཇུག་སྙམ་ན། ཏིལ་ཞེས་གསུངས་སོ། །ཡིད་ལ་བྱེད་པ་ཞེས་བྱ་བ་ནི། །སྔར་གྱི་ཡིད་ལ་བྱེད་པ་ཙམ་ཉིད་ལ་ཡིད་ཉིད་དུ་གྲགས་ཀྱི། ཡིད་གཞན་ནི་ཡོད་པ་མ་ཡིན་ནོ། །དེ་ཡང་རྣམ་པར་ཤེས་པ་དུ་མ་བསྐྱེད་པ་ཉིད་བཟློག་པར་མི་ནུས་ཏེ། གཅིག་གིས་ཀྱང་ཤེས་པ་དུ་མ་བསྐྱེད་པ་ལ་འགལ་བ་མེད་པའི་ཕྱིར་རོ། །མགྱོགས་པ་ནི་ཞེས་བྱ་བ་ཅིག་ཅར་འཛིན་པ་སྣང་བ་བསྐྱེད་པ་ནི་མེད་པའི་ཕྱིར་རོ། །ཅིའི་ཕྱིར་མེད་ཅེ་ན་བཤད་ཟིན་པའི་ཕྱིར་རོ་ཞེས་གསུངས་སོ། །གནོད་བྱེད་གཞན་ངག་ཀྱང་བརྗོད་པ་ནི་མགྱོགས་པའི་ཕྱིར་ཞེས་བྱ་བའོ། །འོན་ཏེ་གཅིག་ལ་རིམ་པ་མཐོང་བས་ཐམས་ཅད་ལ་རྟོགས་པ་ཡིན་ནོ་ཞེས་དོགས་པ་བསུ་ནས་བརྗོད་པ་ནི། །དེ་ལྟར་ན་ནི་ཞེས་བྱ་བའོ། །གཅིག་ལ་ཟླ་བ་གཉིས་ཀྱི་ཤེས་པ་འཁྲུལ་པའི་ཕྱིར་ཐམས་ཅད་
འཁྲུལ་པ་ཁོ་ནར་ཐལ་ལོ་ཞེས་བྱ་བ་ལ་སོགས་པའི་ནི་ཧ་ཅང་ཐལ་བའོ། །དེ་ལྟར་ཞེས་བྱ་བ་ནི། །མགྱོགས་པ་ལས་རིམ་མ་ཡིན་པར་གཟུང་བར་རློམ་པ་ཉིད་དུའོ། །འདི་ལ་ཡང་ཞེས་སྐབས་སུ་བབ་པའི་ཏིལ་དང་འབྲས་ལ་སོགས་པ་ལའོ། །དེ་ཞེས་བྱ་བ་ནི་མགྱོགས་པའོ། །ཅིག་ཅར་ཞེས་བྱ་བ་ནི་དོགས་པའོ། །དེ་ཉིད་ཀྱང་ཞེས་བྱ་བ་ནི་ལན་ནོ། །འདི་ནི་ཅིག་ཅར་འཛིན་པར་རློམ་པ་ཡིན་གྱི་ཅིག་ཅར་འཛིན་པ་མ་ཡིན་ནོ་ཞེས་བྱ་བ་འདིའོ། །དེ་མ་གྲུབ་པ་ཞེས་བྱ་བ་ནི་འཛིན་པ་མྱུར་བར་མ་གྲུབ་པའོ། །གལ་ཏེ་བློ་རིམ་པ་དང་ལྡན་པ་དང༌། སྐད་ཅིག་མ་ཡིན་པ་དེ་ལྟ་ན་ཡང་དོན་ནི་རིམ་གྱིས་སྣང་པ་ཡིན་ཏེ། དོན་ནི་སྐད་ཅིག་མ་ཡིན་པའི་ཕྱིར་རོ། །ངེས་ན་ཐམས་ཅད་ལ་ཅིག་ཅར་འཛིན་པར་རློམ་པ་ཇི་ལྟར་ཡིན་སྙམ་ན། གསལ་བྱ་སྣང་བ་ནི་ཞེས་གསུངས་སོ། །གལ་ཏེ་དོན་སྐད་ཅིག་མ་ཡིན་པ་དེ་ལྟ་ན་ཡང་དུས་ཇི་སྲིད་བློ་གནས་པ་དེ་སྲིད་ཁོ་ནར་དེ་ལྟར་སྣང་བ་ཡིན་ནོ་ཞེས་བྱ་བའི་དོན་ཏོ། །དེ་ཁོ་ན་ལྟར་ནི་ཅིག་ཅར་ཁོ་ནའོ། །གལ་ཏེ་ཤེས་པ་ཅིག་ཅར་ཁོ་ན་སྐྱེ་ན། འོ་ན་དེའི་ཚེ་ཐམས་ཅད་དུ་ཅིག་ཅང་ཁོ་ན་སྣང་བར་འགྱུར་རོ་ཞེ་ན། གང་དུ་ཞེས་གསུངས་སོ། །ཤེས་པ་རྣམས་ཅིག་ཅར་ཁོ་ན་སྐྱེའོ་ཞེས་བྱ་བ་ཇི་ལྟར་ཤེས་ཤིན་རིམ་གྱིས་འཛིན་པ་ཁས་ལེན་ན་རྣམ་པར་རྟོག་པ་མེད་པའི་སྣང་བ་མི་སྲིད་པ་ཁོ་ནར་འགྱུར་ཏེ་སྔ་མ་འཛིན་པ་ནི་ཕྱི་མ་འཛིན་པའི་དུས་ན་རྣམ་པར་རྟོག་པ་དང་བཅས་པ་ཁོ་ནར་འགྱུར་རོ་ཞེས་བྱ་བའི་དོན་ཏོ། །ཐམས་ཅད་རྣམ་པར་རྟོག་པ་དང་བཅས་པ་ཡིན་མོད། ཁོ་བོ་ཅག་གི་འདོད་པ་ཁོ་ན་ཡིན་ནོ་ཞེ་ན་བཤད་པ་རྟོག་མེད་ཉིད་དུ་འགྱུར་ན། དོན་གསལ་བའི་འཛིན་པ་མི་སྲིད་པར་འགྱུར་ཏེ། ཐམས་ཅད་མི་གསལ་བར་སྣང་བ་ཉིད་དུ་འཛིན་པར་འགྱུར་རོ་ཞེས་བྱ་བའི་དོན་ཏོ། །ཡང་ཇི་ལྟར་ན་དྲན་པར་རྟོགས་པ་ལ་གསལ་བར་སྣང་བ་ཉིད་མི་འཐད་ཅེ་ན། སྔོན་པོ་མཐོང་བའི་དངོས་པོ་སྒྲོ་བཏགས་པ་གང་ཡིན་པ་གསལ་བར་སྣང་བ་ཇི་ལྟར་འགྱུར་ཏེ། སྒྲོ་བཏགས་པ་གསལ་བར་སྣང་བ་དང་འགལ་བའི་ཕྱིར་རོ། །གཞན་གྱིས་སྨྲས་པ་ཤིན་ཏུ་གོམས་པར་གྱུར་པ་ལས་སྒྲོ་བཏགས་པ་ཡང་གསལ་བར་སྣང་བར་འགྱུར་རོ་སྙམ་ནི། །འདི་ལ་བརྗོད་པ་ནི་སྒྲོ་བཏགས་པ་གསལ་བར་སྣང་མེད་ནི་རྟོག་པ་མེད་པ་ཁོ་ན་འགྱུར་ཏེ། གསལ་བར་སྣང་བ་ནི་
རྟོག་པ་དང་བཅས་པར་མི་འཐད་པའི་ཕྱིར་རོ། །དེ་བཞིན་ཉིད་ཅེས་བྱ་བ་ནི་གསལ་བར་སྣང་བ་ཉིད་ལ་ཡིན་ནོ། །གལ་ཏེ་དེ་ལྟར་ནི་རིམ་གྱིས་སྐྱེ་བ་ཡིན་ཡང་རྣམ་བ་གསལ་བའི་ཕྱིར། རྟོག་པ་མེད་པ་ཉིད་དུ་འགྱུར་མོད། །རིམ་གྱིས་སྐྱེ་བ་འགག་པ་ནི་མི་འགྲུབ་པོ་ཞེ་ན། དེ་ལྟ་ཡིན་དང་ཞེས་གསུངས་སོ། །སྔོན་གྱི་རང་བཞིན་འཛིན་པ་མེད་པའི་ཕྱིར་ཞེས་བྱ་བ་ནི། །སྔོན་གྱི་རང་བཞིན་དུ་འཛིན་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །ཕྱེ་མ་ལེབ་ཁྲ་བོ་ལ་སོགས་པ་ཉིད་དོ་མཚར་བ་ཡང་མཚན་སྐྱེ་བ་ཡིན་ལ་དེ་བས་ཆོས་སོ། །ཁྲོ་བོ་ཞེས་བྱ་བ་ནི་བཅོས་མ་མ་ཡིན་པའི་ཕྱེ་མ་ལེབ་ཁྲ་བོའི་བདག་ཉིད་དོ། །རྣམ་པར་དབྱེ་བ་དང་ལྡན་པ་ནི་སོ་སོར་བྱེད་པ་དང་ལྡན་པའོ་།དེ་ལ་ཡང་ཞེས་བྱ་བ་ནི་བཅོས་བུ་མ་ཡིན་པའི་ཕྱིར་མ་ལེབ་ཁྲ་བོ་ལ་སོགས་པ་ལ་ཡང་ངོ་དེ་ལ་ནི་རིན་པོ་ཆེའི་ཕུང་པོ་ལའོ། །ཐམས་ཅད་ལ་ཞེས་བྱ་བ་ནི་བཅོས་མ་མ་ཡིན་པའི་ཕྱེ་མ་ལེབ་ཁྲ་བོ་ལ་སོགས་པ་ལ་ཡང་ངོ། །དེའི་ཚེ་ན་ནི་བཅད་པ་དང་ཕུག་བ་ལ་སོགས་པའི་དུས་ན་ཕྱེ་མ་ལེབ་ཁྲ་བོ་ལ་སོགས་པ་ལ་ཡན་ལག་ཅན་གྱི་རྫས་ཞིག་མ་ཡིན་པ་ན་ཞེ་ན། ལན་ནི་འདི་སྔ་ཀུན་ལ་ཞེས་བྱ་བ་སྟེ། རིན་པོ་ཆེའི་ཕུང་པོ་ཡང་མ་འབྱར་བའི་དུས་ན་རྫས་ཞིག་ཡིན་ཏེ། དེས་ན་དེར་ཡང་གཅིག་ཉིད་ཡིན་པར་འགྱུར་རོ། །དེ་ལྟར་ཞེས་བྱ་བ་ནི་མ་འདྲེས་པའོ། །དེ་ལ་ནི་ཞེས་བྱ་བ་ནི་བཅོས་མ་མ་ཡིན་པའི་ཕྱེ་མ་ལེབ་ཁྲ་བོ་ལ་སོགས་པའོ། །དེའི་རེག་པ་རང་བཞིན་གཅིག་ཡིན་པའི་ཕྱིར་ཞེས་བྱ་བ་ནི་སྔོན་པོའི་རེག་པ་ཅི་འདྲ་བ་སོར་རེག་བདེ་ཡང་དེ་འདྲ་བ་ཡིན་ནོ། །སྔོན་པོ་ལ་སོགས་པའི་རྣམ་པར་དབྱེ་བ་བཞིན་གྱི་ཁྱད་པར་རོ། །རྣམ་པར་དབྱེ་བ་མེད་པར་ཁྱད་པར་མེད་པའི་རེག་པ་སོགས་པ་གང་ཡིན་པ་དེ་དང་ལྷན་ཅིག་རྒྱུ་བ་ནིའོ། །གཅིག་མ་ཞེས་བྱ་བ་ནི་བཅོས་མ་མ་ཡིན་ཕྱེ་མ་ལེབ་ཁྲ་བོ་ལའོ། །གཞན་ལ་ཞེས་བྱ་བ་ནི་བཅོས་མ་ལའོ། །དེ་ལ་གཅིག་ཏུ་མངོན་པར་ཞེན་པ་ཉིད་སྐྱབས་སུ་གྱུར་པ་ཡིན་ན་ཞེས་བྱ་བ་ནི། གལ་ཏེ་དེ་ལ་གཅག་ཏུ་མངོན་པར་ཞེན་པ་ཡོད་ན། དེས་ན་དེ་ལ་ཡན་ལག་གཅིག་ཉིད་ཡོད་པ་ཡིན་ནོ་ཞེས་རྣམ་པ་དེ་ལྟ་བུའི་རང་བཞིན་དུའོ། །དེ་ནི་ཞེས་བྱ་བ་ནི་གཅིག་ཏུ་མངོན་པར་ཞེས་པ་མཚན་ཉིད་ཀྱི་སྐབས་སོ། །དེས་ན་ཇི་ལྟར་དེར་ཡན་ལག་ཅག་མེད་ཀྱང་གཅིག་ཏུ་མངོན་པར་ཞེན་པ་དེ་བཞིན་དུ་བཅོས་མ་མ་ཡིན་པ་
རྣམས་ལ་ཡང་འགྱུར་རོ་ཞེས་དགོངས་པའོ། །གལ་ཏེ་ཡན་ལག་ཅག་གཅིག་མེད་ན། དེའི་ཚེ་གཅིག་དྲངས་ན་ཐམས་ཅད་འོངས་པ་ཇི་ལྟར་འགྱུར་ཞེ་ན། གཅིག་དྲངས་པ་ཞེས་གསུངས་སོ། །དེར་ཡང་ཞེས་བྱ་བ་ནི་ཁ་ལོང་དང་ལྕགས་དག་ལའོ། །བཅོས་མའི་དངོས་པོ་རྣམས་ལ་ཡོད་པའི་ཡོན་ཏན་སྔོན་པོ་ལ་སོགས་པ་གང་ཡིན་པ་དེ་གང་གི་དམིགས་པ་ནི་རིམ་གྱིས་ཁོ་ནར་འགྱུར་བ་ཡིན་ལ། དེ་ལས་གཞན་བཅོས་མ་མ་ཡིན་རྣམས་ལ་ནིའོ། །བློ་གཅིག་ནི་ཞེས་བྱ་བ་བཅོས་བུའི་ཡུལ་ཅན་ནོ། །གཞན་ནི་ཞེས་བྱ་བ་ནི་བཅོས་བུ་མ་ཡིན་པའི་ཡུལ་ཅན་ནོ། །གཅིག་དང་དུ་མའི་རྣམ་པར་དབྱེ་བ་ཞེས་བྱ་བ་ནི་བཅོས་བུ་མ་ཡིན་པའི་སྣ་ཚོགས་ཀྱང་གཅིག་ཁོ་ན་ཡིན་ལ། བཅོམ་བུའི་ནི་དུ་མ་ཡིན་ནོ་ཞེས་བྱ་བ་དེ་ལྟ་བུའི་རྣམ་པའོ། །དེའི་ངོ་བོར་རྣམ་པར་འཇོག་པ་ལ་ཞེས་བྱ་བ་ནི། གཅིག་དང་དུ་མའི་རང་བཞིན་དུ་རྣམ་པར་འཇོག་པ་ལའོ། །དེ་ལྟར་ཞེས་བྱ་བ་གཅིག་དང་དུ་མའི་དང་བཞིན་རྣམ་པར་འཇོག་པ་ལ་རྩོམ་པ་གེགས་མེད་པ་སྟེ། གེགས་དང་བྲལ་བའི་རྩོམ་པ་གང་ལ་ཡོད་པའི་བློ་དེ་དག་ཀྱང་སྟེ། གཅིག་དང་དུ་མ་སྣང་བ་དང་ལྡན་པ་དག་ཀྱང་ངོ༌། །གཅིག་ཏུ་མངོན་པར་ཞེན་པ་ལ་སོགས་པ་ཆོས་མཐུན་པ་ཙམ་དེ་ཉིད་ཀྱིས་རྒྱུ་མཚན་དེས་ཉེ་བར་བཏགས་པའི་ཚད་མ་གང་ལ་ཡོད་ཀྱི་བློ་གཞན་དེས་སོ། །བྱེད་ན་དེའི་ཚེ་ཞེས་ཁོང་ནས་ཕྱུང་ལ། ཆོས་མཐུན་པ་འདི་ཞེས་བྱ་བ་ལ་སོགས་པ་སྦྱར་རོ། །འདི་ཉིད་ཚིག་ལེ་འུར་བྱས་པ་གཉིས་ཀྱིས་སྡུད་པ་ནི་དེའི་ཕྱིར་ཞེས་བྱ་བའོ། །དོན་རང་བཞིན་སྣ་ཚོགས་པ་དང་འབྲེལ་པ་གྲུབ་པའི་བློ་དེ་དག་ནི་སྣང་བ་གཞན་དག་ལས་ནི་ཞེས་བྱ་བ་མངོན་བར་སྣང་བའི་ཁྱད་པར་གཅིག་ལས་སྣང་བ་གཞན་སོར་བོའི་རང་བཞིན་ཅན་དོན་མེད་ཅེས་བྱ་བར་བརྗོད་པ་སྟེ། སྣང་བ་གང་ལ་དོན་སྣ་ཚོགས་པ་ཡོད་པ་དེ་ནི་མེད་དོ་དུ་མ་ཡོད་པའོ། །དེའི་དངོས་པོ་ནི་དོན་མེད་དེ་དོན་ཐ་དད་པ་ཅན་ཞེས་བྱ་བའི་དོན་ཏོ། །འོན་ཏེ་གཅིག་ཏུ་མངོན་བར་ཞེན་པ་ཡོད་པའི་ཕྱིར་ན་དེ་འདྲ་བའི་བློ་ཡོད་པ་དག་ལ་ཡང༌། གཅིག་ཉིད་ཡིན་ནོ་ཞེ་ན། གལ་ཏེ་ཞེས་བྱ་བའོ། །དེ་ཞེས་བྱ་བ་ནི་ཆོས་མཚུངས་པ་ཙམ་མོ། །འགར་ཡང་མིན་ཞེས་བྱ་བ་ནི། གཅིག་ལ་ཆོས་མཐུན་པ་ཙམ་གྱིས་མི་འགྲུབ་བ་ན་ཐམས་ཅད་ལ་མི་འགྲུབ་སྟེ། ཆོས་མཚུངས་པ་ཙམ་ནི་ཐུན་མོང་ཡིན་པའི་ཕྱིར་རོ། །འགལ་
ཟླ་དང་སྟེ་མི་མཐུན་པའི་ཕྱོགས་དང་ལྡན་པ་ཞེས་བྱ་བ་འབྲེལ་པ་དེ་འཛིན་པས་སོ། །སྟོབས་མཚུངས་པའམ་མི་མཚུངས་པ་ཞིག་སེལ་གྲང་ན། དང་པོ་ལ་བརྗོད་བ་ནི་སྟོབས་མཚུངས་པ་ཉིད་ཡིན་ན་ཞེས་བྱ་བའོ། །གཉིས་པ་ལ་བརྗོད་པ་ནི་སྟོབས་མི་མཚུངས་ན་ཡང་ཞེས་གསུངས་སོ། །སེལ་བར་བྱེད་པ་གང་ཡིན་བ་ད་ལྟོས་ཏེ། སྟོབས་མི་མཚུངས་པ་ཉིད་ཡིན་ན་ཡང་ཇི་ལྟར་ཚད་མ་ཡིན་ཏེ། དེས་ཚད་མ་ནི་སེལ་བ་མི་སྲིད་དོ་ཞེས་དགོངས་པའོ། །འོན་ཏེ་ཞེས་བྱ་བ་ནི་དོགས་པ་བསུ་བའོ། །ལན་ནི་གང་ཞིག་ཅེས་བྱ་བའོ། །དེས་ན་ཞེས་བྱ་བ་ནི་དོན་མེད་ན་མི་འབྱུང་བས་ནའོ། །དེ་ཉིད་ནི་རྗེས་སུ་དཔག་པའོ། །གཞལ་བྱའོ་ཞེས་བྱ་བ་ནི་ཐ་དད་པའིའོ། །རྒྱུ་ཉེས་པས་གཞལ་བྱ་གཞན་ལ་བློ་རྣམ་པ་གཞན་དུ་ཡང་སྐྱེའོ་ཞེས་བྱ་བ་འདི་ནི་རིགས་པ་ཁོ་ན་ཡིན་ན། ཤེས་པ་ཡོངས་སུ་གསལ་བའི་ངོ་བོ་ཉིད་ལ་ནི། །རྒྱུའི་རྐྱེན་སྐྱོབ་བརྒྱ་ཕྲག་གིས་ཀྱང་བློ་རྣམ་པ་གཞན་དུ་ཇི་ལྟར་འཐད་དེ། མི་འཐད་པ་ཁོ་ནའོ། །རིམ་པ་དང་ལྡན་པའི་སྣང་བའི་རང་གི་ངོ་བོ་བཅོས་མའི་ཕྱེ་མ་ལེབ་ཁྲོ་བོ་ལ་སོགས་པ་དག་ལ་ནི། །རིམ་པ་མེད་པར་འགྱུར་རོ་ཞེས་མི་རིགས་སོ། །ཅིའི་ཕྱིར་ཞེ་ན། རང་བཞིན་གཅིག་ལ་ནི་ཞེས་བྱ་བའོ། །དེ་ལྟར་ཞེས་བྱ་བ་ནི་དུ་མ་ཉིད་དུའོ། །གལ་ཏེ་སྣང་བ་འདི་རང་བཞིན་དུ་མ་ཉིད་ཡིན་པ་དེ་ལྟ་ན་ཡང་གཅིག་ཅེས་བྱ་བ་ཁྱེད་གཅིག་ཉིད་མངོན་པར་འདོད་པ་ནི་དུ་མ་ཉིད་དུ་སྣང་བ་ཡིན་ནོ་ཞེས་བྱ་བ་ནི་གཞན་གྱི་རྩོད་པའོ། །འགོག་པ་ནི་མ་ཡིན་ཏེ་ཞེས་བྱ་བའོ། །གལ་ཏེ་རིམ་མ་ཡིན་པ་ནི་སྣང་ན་དེའི་ཚེ་རང་གི་ངོ་བོ་ཉིད་མ་ཡིན་ནོ་ཞེས་དགོངས་པའོ། །དེ་ལ་ཞེས་བྱ་བ་ནི་བཅོས་མའི་ཕྱེ་མ་ལེབ་ཁྲ་བོ་ལ་སོགས་པས་སོ། །རིམ་པ་ཡང་སྣང་བའམ་མ་ཡིན། གལ་ཏེ་རེ་ཞིག་མི་སྣང་པ་འཁྲུལ་པ་ཡིན་ན། དེའི་ཚད་དངོས་པོ་ཐམས་ཅད་ལ་གཉིད་ལོག་པའི་གནས་སྐབས་ན་འཁྲུལ་པར་འགྱུར་བ་བཟློག་པ་མེད་དོ། །ཕྱོགས་དང་པོ་ལ་བརྗོད་པ་ནི་དེ་ལྟར་དེ་ཉིད་ཅེས་བྱ་བ་སྟེ་རིམ་པའི་རང་བཞིན་ཉིད་དུའོ། །རྣམ་པ་གཞན་དུ་ཡང་རྣམ་པར་བརྟག་པར་བྱས་ནས་སུམ་འབྱིན་པ་ནི་གལ་ཏེ་གཞན་སྣང་ཞེས་བྱ་བའོ། །གལ་ཏེ་ཚུལ་གཞན་གང་ཡིན་སྣང་ཉིད་བརྗོད་པར་འདོད་པའི་ཚུལ་ལ་འཁྲུལ་བར་བརྗོད་ན། དེའི་ཚེ་བརྗོད་པར་འདོད་པ་དེའི་རང་གི་ངོ་བོ་སྣང་བར་ཇི་ལྟར་
འགྱུར། རང་གི་ངོ་བོ་མི་སྣང་ན་ཡང་བ་དེ་མེད་པས་ཇི་ལྟར་འཁྲུལ། །འཆད་པ་ནི་གལ་ཏེ་ཞེས་བྱ་བའོ། །དེའི་ནི་བརྗོད་པར་འདོད་པའིའོ། །འོན་ཏེ་བརྗོད་པར་འདོད་པའི་སྣང་བ་ཡོད་པ་ཉིད་དོ། །འོན་ཀྱང་མ་དམིགས་པ་ཡིན་ནོ་སྙམ་ན། གལ་ཏེ་མི་སྣང་ན་ཡང་ཞེས་བྱ་བའོ། །འཁྲུལ་བ་ཡང་བརྗོད་པར་བྱ་བ་སྟེ་བློ་གཞན་སྣང་བ་ལ་ཡང་བློ་ཐམས་ཅད་ཡོད་པའི་ཕྱིར་རོ། །དེ་ཞེས་བྱ་བ་ནི་བརྗོད་པར་འདོད་པའི་ཚུལ་གྱི་ཡུལ་ཅན་ནོ། །དེ་ཞེས་བྱ་བ་ནི་རིམ་པ་ཡིན་པའོ། །གཞན་དུ་སྣང་བའི་ཕྱིར་ཞེས་བྱ་བ་ནི་རིམ་མ་ཡིན་པའི་ཡུལ་དག་ལ་རིམ་པའི་རང་བཞིན་དུ་སྣང་བའི་ཕྱིར་རོ། །རིམ་པའི་བློ་ཉིད་འཁྲུལ་པར་འགྱུར་རོ་ཞེས་བྱ་བར་བསམས་པའོ། །འོན་ཏ་ཏི་ལ་ལ་སོགས་པ་ཡང་རིམ་པ་ཡིན་པར་མི་འགྱུར་ན། འདི་ལ་བརྗོད་པ་ནི་འོ་ན་ནི་ཞེས་བྱ་བའོ། །གལ་ཏེ་རིམ་མ་ཡིན་པ་ཞེས་བྱ་བ་དངོས་པོ་ཉིད་ཡིན་ན། དེའི་ཚེ་བློའི་རང་བཞིན་ཡང་རིམ་ཡིན་པར་འགྱུར་བ་མ་ཡིན་གྱི། འོན་ཀྱང་རིམ་པ་དང་ལྡན་པ་ཁོ་ནར་འགྱུར་ཏེ། རིམ་མ་ཡིན་པ་ནི་འགར་ཡང་མི་སྲིད་པའི་ཕྱིར་རོ། །དེ་ལྟན་ཡུལ་ཡང་རིམ་པ་དང་བཅས་པ་ཡིན་ལ་བློ་ཡང་དེ་བཞིན་དུ་ཡིན་པས་ན་འཁྲུལ་པར་མི་འགྱུར་རོ། །གལ་ཏེ་དངོས་པོའི་རང་གི་ངོ་བོའི་བློ་གང་ཡིན་པ་དེ་ལ། བློ་གཞན་འཛིན་པར་བྱེད་པ་ཡིན་ན་སྟེ། དངོས་པོ་འཛིན་པར་བྱེད་པའི་བློ་ནི་རིམ་ཅན་གྱི་རང་བཞིན་ལ་རིམ་མ་ཡིན་པར་འཛིན་པར་བྱེད་པའི་བློ་གཞན་འབྱུང་བ་ཡིན་ནོ་ཞེས་བྱ་བའི་དོན་ཏོ། །བློ་གཞན་དེ་ཡང་རིམ་ཅན་གྱི་དངོས་པོར་བློ་འཛིན་པར་བྱེད་པ་ཡིན་ན་སྟེ། རིམ་པར་འཛིན་པར་བྱེད་པའི་ངོ་བོ་དེ་ཡང་ཇི་ལྟར་རིམ་པ་མ་ཡིན་པར་སྣང་བར་འཐད་བར་འགྱུར། འདི་ནི་མ་འཁྲུལ་བའི་ཕྱོགས་བརྗོད་པ་ཡིན་ལ། འཁྲུལ་བའི་ཕྱོགས་ལ་ནི་གནོད་བྱེད་མདུན་དུ་འཆད་པར་འགྱུར་རོ། །ཡང་ན་གལ་ཏེ་དངོས་པོའི་ཡུལ་ཅན་གྱི་བློ་ལས་དེ་བཞིན་དུ་བློ་གཞན་སྐྱེ་བ་ཡིན་ན། དེའི་ཚེ་རིམ་འཛིན་པའི་རང་བཞིན་ནི་ཞེས་བྱ་བ་རིམ་པ་དང་ལྡན་པའི་དངོས་པོ་འཛིན་པར་བྱེད་པའི་རང་བཞིན་ནི་རིམ་མ་ཡིན་པར་སྣང་བར་མི་འཐད་དེ། བློ་གཞན་ཉིད་རིམ་མ་ཡིན་པར་སྣང་མོད་དངོས་པོའི་ཡུལ་ཅན་རིམ་པ་དང་ལྡན་པའི་བློ་གོ་ཇི་ལྟར་རིམ་མ་ཡིན་པར་སྣང་བར་འགྱུར། །དེས་ན་དངོས་པོ་རྣམས་ཀྱི་རིམ་པ་མེད་པར་འགྱུར་ཏེ། དེའི་བློའི་རིམ་པ་དང་བཅས་པ་ཁོ་
ནར་སྣང་བའི་ཕྱིར་ཏེ། བློའི་སྣང་བ་ཇི་ལྟ་བ་བཞིན་ཡུལ་རྣམ་པར་འཇོག་པའི་ཕྱིར་རོ། །འདི་ཉིད་རྣམ་པར་འགྲེལ་པ་ནི་གལ་ཏེ་ཞེས་བྱ་བའོ། །དེ་འཛིན་པའི་ཞེས་བྱ་བ་ནི་ནོར་བུ་དང་མུ་ཏིག་ལ་སོགས་པར་འཛིན་པར་བྱེད་པའོ། །གལ་ཏེ་བློ་རིམ་མ་ཡིན་པར་སྣང་ན་དངོས་པོ་ཡང་དེ་བཞིན་དུ་སྣང་བར་འགྱུར་རོ་ཞེ་ན། བློ་འཛིན་པར་བྱེད་པ་ཡང་ཞེས་བྱ་བའོ། །བློའི་བློ་གང་ཞིག་གཞལ་བྱ་ལ་རྣམ་པ་ཐམས་ཅད་དུ་མི་འཇུག་པ་དེའི་སྣང་བའི་དབང་གིས་ཇི་ལྟར་གཞལ་བྱ་དེའི་རང་བཞིན་དུ་ཐ་སྙད་བྱེད་ཅེས་བསམས་བའོ། །རིམ་མ་ཡིན་པར་ཞེས་བྱ་བ་ལ་སོགས་པ་ནི། །བཤད་པ་དང་པོ་གནོད་བྱེད་གཞན་བརྗོད་པའོ། །གལ་ཏེ་དངོས་པོའི་བློ་རིམ་ཅན་ཁོ་ན་ཡིན་ན། དེའི་ཚེ་དེ་བློའི་བློ་ལ་ཡང་རིམ་མ་ཡིན་པར་སྣང་བའི་ཕྱིར་མི་འཐད་དོ་ཞེས་བྱ་བའི་དོན་ཏོ། །གལ་ཏེ་འཁྲུལ་པས་རིམ་མ་ཡིན་པ་དེ་བློའི་བློ་ལ་སྣང་བ་ཡིན་ནོ་ཞེ་ན། དེའི་ཚེ་སྔར་བཤད་པ་དེ་ཉིད་དེ། འཁྲུལ་མེད་ཡིན་པར་ཐལ་ཏེ་རང་གི་ངོ་བོར་འཛིན་པའི་ཕྱིར་རོ། །ཇི་ལྟར་བློའི་བློས་རིམ་མིན་པར་འཛིན་པ་དེ་བཞིན་དུ་དངོས་པོའི་བློ་དེའི་གཞལ་བྱ་འཛིན་པ་དེ་དེ་ལྟར་དེ་རིམ་མ་ཡིན་པའི་རང་བཞིན་དུ་ཡིན་པ་གང་གིས་བཟློག །གཞལ་བྱ་ཡང་རིམ་མ་ཡིན་པ་ཁོ་ནར་འཛིན་པར་འགྱུར་རོ་ཞེས་དགོངས་པའོ། །ཚིག་ལེའུར་བྱས་པ་བཤད་པའི་ཕྱིར། རེ་ཞིག་སྔར་བཤད་ཟིན་པ་ཉིད་བརྗོད་པ་ནི། གལ་ཏེ་ཞེས་བྱ་བའོ། །དེ་ལྟར་ཞེས་བྱ་བ་ནི་རིམ་རང་བཞིན་དུའོ། །གཅིག་གིས་ནི་བློའི་བློས་སོ། །དངོས་པོའི་ཡུལ་ཅན་གྱི་བློའི་རང་བཞིན་དུ་མི་འཛིན་པར་ཐལ་ལོ། །འོན་ཏེ་དངོས་པོའི་ཡུལ་ཅན་གྱི་བློ་ནི་རང་བཞིན་དུ་མི་འཛིན་པར་ཐལ་ལོ། །འོན་ཏེ་དངོས་པོའི་ཡུལ་ཅན་གྱི་བློ་ནི་རང་བཞིན་གཅིག་ཉིད་དུ་བློའི་བློས་རྟོགས་པ་དེས་ན། དུ་མ་འཛིན་པར་ཇི་ལྟར་ཐལ་སྙམ་ན། སྔ་མ་དང་ཞེས་གསུངས་སོ། །དངོས་པོའི་ཡུལ་ཅན་སྔ་མ་དང་ཕྱི་མའི་འཛིན་པ་དག་ལ་ནི། །གཅིག་ཉིད་ཡོད་པ་མ་ཡིན་ནོ། །ཅིའི་ཕྱིར་ཞེ་ན། གཅིག་ཉིད་དུ་རྟོགས་པ་མེད་པའི་ཕྱིར་རོ། །རང་གི་ངོ་བོས་གཅིག་ཉིད་མ་ཡིན་མོད། དེ་ལྟ་ན་ཡང་བློ་ཕྱི་མས་གཅིག་ཉིད་རྟོག་པ་ཡིན་ནོ་ཞེས་བྱ་བའི་རྩོད་བ་ལ་ལན་བརྗོད་པ་ནི། རིམ་པ་དང་ལྡན་པ་དེ་ཡང་ཞེས་བྱ་བ་སྟེ་བློ་ཕྱི་མའོ། །གཅིག་ཏུ་ཞེས་བྱ་བ་ནི་འཛིན་པ་སྔ་མ་དང་ཕྱི་མ་རྣམས་སོ། །གལ་ཏེ་རིམ་པ་དང་ལྡན་པ་ཡིན་ན་དེ་ལྟན་ཡང་སྔ་མ་དང་ཕྱི་མའི་འཛིན་པ་
ཐམས་ཅད་དེ་ལྟར་སྣང་བ་དེས་ན། གཅིག་ཉིད་དུ་རྟོགས་པར་འགྱུར་བ་ཡིན་ནོ་ཞེ་ན། འཛིན་པར་བྱེད་པ་རིམ་པ་དང་ལྡན་པ་བློ་ཕྱི་མའི་མཚམས་ཉིད་གང་ཡིན་པ་དེའི་དུས་ལས་འདའ་བ་མ་ཡིན་ནོ། །འཛིན་པ་ཐམས་ཅད་ཀྱང་མཚན་ཉིད་ཐ་དད་པ་ཡིན་ཏེ། དེས་ན་གཅིག་ཉིད་གང་གིས་རྟོགས་པ་ཞེས་དགོངས་པའོ། །འདི་ནི་ཞེས་དབྱེ་བ་ནི་བློ་ཕྱི་མའོ། །རིམ་མེད་པ་ཉིད་དོ་ཞེས་བྱ་བ་ནི། །དེ་ནི་བློ་གཅིག་སྒྲིབ་པ་དེ་ལ་ཞེས་བྱ་བའོ། །དབང་པོས་སོང་ནས་དོན་གཟུང་བར་བྱ་བ་ནི་མ་ཡིན་ཏ། །འོན་ཀྱང་འདུག་བཞིན་དུའོ། །དེའི་ཚེ་བསྒྲིབས་པ་ལ་ཡང་འགྱུར་ཏེ། བསྒྲིབས་པ་དང་མི་བསྒྲིབས་པ་དག་ལ་དབང་པོ་མི་འགྲོ་བར་ཁྱད་པར་མེད་པའི་ཕྱིར་རོ། །གཞན་རང་གི་ཕྱོགས་ལ་སྒྲིབ་པ་འཐད་པར་སྟོན་པ་ནི། །ཕྲད་ནས་ཞེས་བྱ་གསུངས་སོ། །དབང་པོ་ནི་སྒྲིབ་པ་ལ་ཐོགས་པའི་ཕྱིར་ཕྱིར་ན། སྒྲིབ་པ་ལས་བརྒྱལ་ནས་འགྲོ་བར་མི་ནུས་པའི་ཕྱིར་རོ། །གལ་ཏེ་དབང་པོ་མ་སོང་བ་བཞིན་དུ་འཛིན་ན་ནི། དེའི་ཚེ་ཇི་ལྟར་ཉེ་བར་འཛིན་པ་བཞིན་དུ་ཆོད་པ་ཡང་འཛིན་པར་འགྱུར་ཏེ། ཁྱད་པར་མེད་པའི་ཕྱིར་རོ་ཞེས་བྱ་བའི་དོན་ཏོ། །རང་གི་ཕྱོགས་ལ་ཉེས་པ་མེད་པར་བརྗོད་པ་ནི། །ཤིན་ཏུ་ཐག་རིང་པོར་ཡང་འགྲོ་བ་མེད་པའི་ཕྱིར། ཉམས་པ་འཐད་པ་ཡིན་ནོ་ཞེས་འབྲེལ་ཏོ། །འདི་ཐམས་ཅད་སུན་འབྱིན་པ་ནི། དེ་ནི་མ་ཡིན་ཏེ་ཞེས་བྱ་བའོ། །རུང་བ་ལ་ལྟོས་པའི་ཕྱིར་སྒྲིབ་པ་ཡོད་ན་ཉམས་པར་འཐད་དོ་ཞེས་སྦྱར་རོ། །དཔེ་ཉིད་འཆད་པ་ནི་ཁབ་ལོང་ནི་ཞེས་བྱ་བའོ། །ཐམས་ཅད་ཅེས་བྱ་བ་ནི་དཔག་ཚད་དང་རྐྱང་གྲགས་ན་གནས་པ་རྣམས་ཀྱང་ངོ༌། །འོན་ཏེ་དེ་ལ་ཡང་ཞེས་བྱ་བ་ནི་ཁབ་ལོང་ལ་ཡང་ངོ༌། །ལྕགས་དང་ཁབ་ལོང་རེག་པ་ཡོད་པའོ། །ཅི་སྟེ་མ་མཐོང་སྙམ་ན་ཕྲ་བའི་ཕྱིར་ཞེས་བྱ་བའོ། །གྲུབ་པའི་མཐའ་བརྗོད་པ་ནི་འདི་སྐད་ཅེས་བྱ་བའོ། །མིག་གི་འོད་ཟེར་མེད་པ་ཉིད་དོ། །གཞན་གྱིས་ཞེས་བྱ་བ་ནི་སངས་རྒྱས་པས་སོ། །དེ་ཉིད་ཅེས་བྱ་བ་ནི་མིག་གི་འོད་ཟེར་གྱིས་རེག་པ་ཉིད་དོ།། འདི་ཞེས་བྱ་བ་ནི་མིག་ཕྲད་ནས་འཛིན་པའི་མཚན་ཉིད་དོ།།ཤིན་ཏུ་ཡང་ཞེས་བྱ་བ་ནི། ཤིན་ཏུ་ཡང་ཆད་པ་གཞན་གྱིས་ཞེས་བྱ་བ་དང༌། ཤིན་ཏུ་ཡང་ཚོགས་ཆེན་པོར་བརྟགས་བ་ཞེས་བྱ་བ་དང༌། ཤིན་ཏུ་ཡང་བཞད་གད་ཉིད་དུ་འགྱུར་རོ་ཞེས་གསུམ་ཀ་ལ་འབྲེལ་ཏེ། །ཡང་དག་རིག་པ་ནི་དམ་
བཅས་པའི་དོན་སྒྲུབ་པའི་ཆེད་དུ་འཇུག་པ་མ་ཡིན་ཏེ། དམ་བཅས་བའི་དོན་སྒྲུབ་པར་བྱེད་པ་མ་ཡིན་ནོ་ཞེས་བྱ་བའི་ཐ་ཚིག་གོ །འདྲེན་པར་མཐོང་བ་ནི་སྐམ་བ་དང་ལྕགས་སྒོམ་ལ་སོགས་པ་ལའོ། །སྔགས་ཀྱི་བདེན་པ་ལ་འགྱུར་མོད་ཉེས་བ་ཅི་ཡོད་སྙམ་ན། དེས་འགུགས་པ་སྟེ་སྔགས་ཀྱི་འབྲས་བུ་ལ་སོགས་པ་འགུགས་པ་ལ་ཡང་སྔགས་དང་རེག་པར་ཐལ་བས་ན་འདྲེན་པ་ལ་ཐལ་ཆེས་པར་འགྱུར་རོ། །དེར་ཡང་ཞེས་བྱ་བ་ནི་སྔགས་ཀྱིས་དྲངས་བ་ལ་ཡང་ངོ༌། །སྔགས་དང་རེག་པར་གྱུར་པ་ཁོ་ནའོ་ཞེ་ན། འདི་ལ་ལན་བཏབ་པ་ནི་སྒྲ་ནི་ཞེས་བྱ་བའོ། །ཡོན་ཏན་ཡིན་པའི་ཕྱིར་རོ་ཞེས་བྱ་བ་ནི། ནམ་མཁའི་ཡོན་ཏན་ཡིན་པའི་ཕྱིར་རོ། །རེག་པ་ནི་ཁྱེད་ཀྱི་ལྟར་ན་ལྡན་པའི་མཚན་ཉིད་ཀྱི་ཡོན་ཏན་གྱི་ངོ་བོ་ཡིན་ན། དེ་གོ་ཡོན་ཏན་སྒྲ་ལ་ཇི་ལྟར་འགྱུར་ཏེ། ཡོན་ཏན་ནི་ཡོན་ཏན་མེད་པ་ཡིན་པའི་ཕྱིར་རོ་ཞེས་དགོངས་པའོ། །འདི་ཉིད་ཅེས་བྱ་བ་ནི་བསྒྲུབ་པར་བྱ་བ་མཚན་ཉིད་ཀྱི་ཆོས་སྦྱོར་ན་སྟེ། ཁས་ལེན་ན་དེའི་ཚེ་འགར་ཡང་མ་ངེས་པར་ཡོད་པར་མི་འགྱུར་རོ། །ཡིན་ན་དེའི་ཚེ་ཅིའི་ཕྱིར། དཔག་ཚད་ལ་སོགས་པར་ཤིན་ཏུ་ཐག་རིང་པོ་ན་གནས་པ་མི་མཐོང་ངོ༌། །དེ་ལ་ནི་བར་ན་འགའ་ཡང་མེད་པའི་ཕྱིར་ན་ཐོགས་པར་བྱེད་པ་མེད་པ་ཁོ་ནའོ། །དེས་ན་མཐོང་ན་བཟློག་པར་དཀའོ་ཞེས་དགོངས་པའོ། །འདིར་གཞན་གྱིས་སྨྲས་པ་ནི། །མར་མེའི་འོད་བཞིན་དུ་ཞེས་བྱ་བ་སྟེ། མར་མེའི་འོད་མ་ཆོད་པ་རེག་པར་བྱེད་པ་བཞིན་དུ་མིག་གི་འོད་ཁོ་ན་དུས་སུ་མ་ཁྱབ་ན། རྣམ་པར་གནས་པ་མ་ཡིན་ནོ། །འོ་ན་སྔ་མ་དང་ཕྱི་མའི་རང་བཞིན་གྱི་བློ་ཐམས་ཅད་དེ་ལ་སྣང་བའི་ཕྱིར་ན། གཅིག་ཉིད་དུ་རྟོགས་པ་འཐད་པ་ཡིན་ནོ་ཞེས་བྱ་བ་ནི་གཞན་གྱི་བསམས་པའོ། །ལན་ནི་དེ་ལྟ་ཡིན་ན་བློ་ཕྱི་མ་གཅིག་གིས་བློ་སྔ་མའི་རང་བཞིན་དེ་ཡང་དུ་མ་ཉིད་ཀྱིས་ན་ཅི་ཉིད་དུ་ཞེས་བྱ་བ་ནི། བློའི་རང་བཞིན་དུའོ། །རང་གི་གཞུང་ཉིད་སྟོན་པ་ནི་རིགས་མི་མཐུན་རྣམས་ཞེས་བྱ་བ་ལ་སོགས་པའོ། །རིགས་མི་མཐུན་པའི་རྣལ་མ་རྣམས་ཀྱི་ལྡན་པ་གང་ཡིན་པ་ངེས་བསྐྱེད་པའོ། །དེ་ནི་ཞེས་བྱ་བ་ནི་རིང་མོའི་ཡུལ་ཅན་ནོ། །ལན་ནི་དེ་ཚེ་ཡང་ཞེས་བྱ་བ་སྟེ། འཁྲུལ་པའི་ཚེ་ཡང་ངོ༌། །འོན་ཏེ་བདེན་པ་མ་ཡིན་པ་འཁྲུལ་པའི་ཤེས་པ་ལ་སྣང་བ་ནི་དུམ་ཡང་འཛིན་པར་འགྱུར་བ་ཡིན་ནོ་ཞེ་ན། བདེན་མིན་ཞེས་
གསུངས་སོ། །རང་བཞིན་དེ་ནི་ཞེས་བྱ་བ་ན། རི་མོའི་ཡུལ་ཅན་གྱི་བློ་དེ་ལ་སྣང་བ་གང་ཡིན་པའི་རིམ་མོའོ། །དེ་ཇི་ལྟར་ཞེས་བྱ་བ་ནི་མ་ཡིན་པ་སྟེ། མི་བདེན་པ་རང་བཞིན་ནི་བདེན་པའི་བདག་ཉིད་དུ་འགྱུར་བར་འཐད་པ་མ་ཡིན་ནོ། །མི་བདེན་པ་ཡང་ཕ་རོལ་པོ་རང་ཉིད་ཀྱིས་ཁས་བླངས་པ་ཡིན་ཏེ་རྣམ་པ་དང་བཅས་པའི་ཤེས་པར་ཁས་མི་ལེན་པའི་ཕྱིར་རོ། །གལ་ཏེ་བློ་གཅིག་ཁོ་ན་ལ་རང་བཞིན་འགའ་ཞིག་ནི་བདེན་ལ། རང་བཞིན་འགའ་ཞིག་ནི་མི་བདེན་པ་ཡིན་ནོ་སྙམ་ན། གཅིག་ཉིད་ཡོན་ན་ཞེས་བྱ་བའོ། །བདེན་པ་དང་མི་བདེན་པའི་མཚན་ཉིད་ཀྱི་རྣམ་པར་དབྱེ་བ་འདི་ནི་བདེན་པ་མ་ཡིན་ཏེ་བློ་གཅིག་ཉིད་ཡིན་པའི་ཕྱིར་རོ། །གཅིག་ལ་ནི་དང་བཞིན་འགའ་ཞིག་བདེན་པ་དང་མི་བདེན་པ་ཡང་མི་འཐད་དེ། ཕན་ཚུན་འགལ་བའི་ཆོས་གནས་པས་གཅིག་ཉིད་དུ་མ་འཐད་པའི་ཕྱིར་རོ། །དེ་ཉིད་ཀྱི་ཕྱིར་ཡང་ན་གཅིག་མ་ཡིན་ཏེ་བློ་དུ་མར་ཐལ་ལོ། །བརྒྱ་ལ་ཁྱེད་ཀྱི་ཐ་སྙད་འདི་མི་བདེན་པར་འགྱུར་ཏེ་བློ་གཅིག་མིན་པའི་ཕྱིར་རོ། །འོན་ཏེ་བདེན་པ་དང་མི་བདེན་པའི་ཡུལ་ཅན་གྱི་ཏ་སྙད་ནི་བདེན་པ་ཡིན་ན། དེའི་ཚེ་དུ་མ་ཉིད་དུ་ཐལ་བར་འགྱུར་རོ་ཞེས་དགོངས་པའོ། །དེའི་ངོ་བོར་ན་ཅིག་ཅར་འཛིན་པ་མི་སྲིད་པའི་ཕྱིར་རོ། །འདི་ལ་ལ་སོགས་པའི་ཕྱིར་རོལ་དེའི་རང་བཞིན་མ་ཡིན་ན་སྟེ། གལ་ཏེ་བློའི་རང་བཞིན་ཁོ་ན་ཡིན་ན་ཞེས་བྱ་བའི་དོན་ཏོ། །དེའི་ཚེ་བློའི་རང་བཞིན་གྱི་སྔོན་པོ་དང་སེར་པོ་ལ་སོགས་པ་དེ་ལ། །ཅིག་ཅར་འཛིན་པའི་མཚན་ཉིད་དེ་ལྟར་རྟོགས་པ་འདི་རིགས་པ་མ་ཡིན་ནོ། །བློའི་རང་བཞིན་དེ་ཡང་དུ་མ་ཉིད་ཀྱིས་ན་ཅིག་ཅར་འཛིན་པ་མི་སྲིད་པའི་ཕྱིར་རོ། །འདི་ལ་གཞན་གྱིས་བརྗོད་པ་ནི་ཅི་སྟེ་ཞེས་བྱ་བའོ། །ཡིད་འགྲོ་བ་ལ་སོགས་པའི་མཚན་ཉིད་ཅེས་བྱ་བ་ལ། ཡིད་ཀྱི་སྒྲས་ནི་རློམ་པར་བྱེད་ཤེས་པར་བྱེད་ཅེས་བྱ་བའི་བཤད་པས་མིག་ལ་སོགས་པ་ཉིད་ལ་བརྗོད་དོ། །ཡང་ན་མིག་ལ་སོགས་པ་མཐོང་བས་ན་ནང་གི་བྱེད་པ་ཡིན་འཛིན་པ་ཡང་ཉེ་བར་མཚོན་བ་ཡིན་ནོ། །ངེས་ན་འབད་པ་ཆེན་པོ་ཡོད་དོ། །ཅིག་ཅར་འཛིན་པ་ནི་སྲིད་དོ་ཞེས་བྱ་བའོ་དོན་དུ་མའོ། །ལན་ནི་གལ་ཏེ་ཞེས་བྱ་བའོ། །ཚིག་དུམ་བུ་སྔ་མ་གཉིས་པོ་དེ་ཉིད་རིམ་པ་ཇི་ལྟར་བ་བཞིན་དུ་འཆད་པ་ནི་གལ་ཏེ་ཞེས་བྱ་བའོ། །སངས་རྒྱས་པས་མཛོད་ནས་མིག་དང་སྣང་བ་དང་ཡིད་དེ་ལུང་ལས་འབྱུང་
བའི་དབང་པོ་དག་ནི་མ་ཕྲད་པའི་ཡུལ་ཅན་མ་ཡིན་ནོ་ཞེས་ཇི་སྐད་བརྗོད་པ་བཞིན་ནོ། །དེའི་ཚེ་ཞེས་བྱ་བ་དེ་ལྟར་ཁས་ལེན་པ་ན་བསྒྲིབས་ཏེ། ཡོད་པ་ལས་དང་གཞན་དུ་ནི་ཞེས་བྱ་བ་ནི་སྒྲིབ་པ་མེད་པས་སོ། །འདི་ཉིད་བསྒྲུབས་པའི་དོན་དུ་ཟེར་བ་དག་ཀྱང་རེག་པར་བྱེད་པ་ཡིན་ནོ་ཞེ་ན། ལན་ནི་དེ་ལྟ་ན་འོ་ན་ཞེས་བྱ་བའོ། །འོ་ན་ནི་མར་མེ་དང་ཆོས་མཐུན་པས་ཤིན་ཏུ་ཉེ་བར་འཛིན་པར་ཐལ་ལོ། །འདི་ཉིད་གཞུང་འཛུགས་པ་ནི་མར་མེའི་འོད་ནི་ཞེས་བྱ་བའོ། །དེ་ཉིད་ཅེས་བྱ་བ་ནི་ཆོས་གཞན་ནོ། །རེག་པ་ཉིད་དུ་འཛིན་པའི་རྒྱུའོ། །གལ་ཏེ་མིག་ལ་སོགས་པ་ལས་འོད་ཟེར་ཡོད་ལ། དེ་དག་ཀྱང་ཕྱིས་འཕྲོས་ནས་ལྡན་པར་འགྱུར་བ་ཡིན་ན། དེའི་ཚེ་མུན་པ་ཡང་འཛིན་པར་ཐལ་ལོ། །ཤིན་ཏུ་ཐག་རིང་བ་ལ་མགྱོགས་པ་མི་སྲིད་པའི་ཕྱིར་རོ། །ཞེས་སུན་འབྱིན་པ་བརྗོད་པ་གང་ཡིན་པ་དེ་ལ་གཞན་དག་ལན་བརྗོད་པ་ནི་འོ་ན་ཞེས་བྱ་བའོ། །འབད་པས་བརྟག་པ་ཞེས་བྱ་བ་ནི་རེ་ཞིག་ནུས་པའི་ཁྱད་པར་དང་ལྡན་པའི་ཡིད་ཁས་བླང་བར་བྱ་བ་ཡིན་ལ། དེ་ལས་ནི་མིག་ལ་སོགས་པ་རྣམས་ཀྱི་མྱུར་བ་དེ་ལས་ནི་ཅིག་ཅར་ཤེས་པ་མི་སྐྱེ་བ་ཡིན་ཞིང༌། དེ་ལས་ནི་ཅིག་ཅར་སྣང་བ་འཁྲུལ་བ་ཡིན་ནོ་ཞེས་བྱ་བའོ། །དེ་ལྟར་ན་རེ་ཞིག་ཡིད་ཁས་བླངས་ནས་སུན་འབྱིན་པ་བརྗོད་པ་ཡིན་ནོ། །ད་ནི་ཡིད་ཉིད་མེད་དོ་ཞེས་བརྗོད་པ་ནི། །དེ་ལྟ་བུའི་ཞེས་བྱ་བ་སྟེ། རྟོགས་པ་དང་རྡུལ་ཕྲ་རབ་ཀྱི་ཚད་ཙམ་མོ་ཞེས་བྱ་བ་ལ་སོགས་པའི་རང་བཞིན་ནོ། །འོ་ན་ཡིད་ཇི་འདྲ་བ་ཞིག་སྙམ་ན། །རྣམ་པར་ཤེས་པའི་ཞེས་བྱ་བའོ། །ཡིད་དེའི་དོན་བྱེད་པའོ། །གལ་ཏེ་རྣམ་པར་ཤེས་པ་ཅིག་ཅར་མི་སྐྱེད་པ་ལས་ཡིད་དཔག་པ་མ་ཡིན་ནམ། དེས་ན་ཇི་ལྟར་སྤོང་ཞེ་ན། དེ་ཞེས་གསུངས་ཏེ་རྣམ་པར་ཤེས་པ་སྔ་མའི་མཚན་ཉིད་ཀྱི་ཡིད་དེའོ། །དེའི་ཕྱིར་ཞེས་བྱ་བ་ནི་རྣམ་པར་ཤེས་པ་ཅིག་ཅར་མི་སྐྱེ་བའི་མཚན་ཉིད་ཀྱི་ཕྱིར་རོ། །རྣམ་པ་གཞན་དུ་ཡང་ཞེས་བྱ་བ་ནི། ཡིད་བྱེད་གཉིས་ལས་རྣམ་པར་ཤེས་པ་ཅིག་ཅར་མི་སྐྱེ་བ་གྲུབ་པའི་ཕྱིར་རོ། །ཇི་ལྟར་སྐམ་པས་དོན་དེ་འཛིན་པར་མཐོང་བ་དེ་ལྟར་རྣམ་པར་ཤེས་པས་མ་ཡིན་ནོ། །རིམ་ལ་ཡོད་པའི་རྣམ་པ་དུ་མ་གང་ཡིན་པ་དེ་དག་འཛིན་པ་ཅིག་ཅར་སྐྱེས་པས་ནི། མ་འཁྲུལ་པ་ཉིད་དོ་ཞེས་གནས་སོ། །དེ་ལ་ཞེས་བྱ་བ་ནི་རིམ་པའི་རྣམ་པ་དུ་མ་དག་ལའོ། །དེ་ལ་གཟུགས་ཀྱི་ཡོན་
ཏན་ཞེས་བྱ་བ་ནི་ལྡན་པ་ལའོ། །གཟུགས་ཀྱི་མཚན་ཉིད་ཀྱི་ཡོན་ཏན་ནི་འདུ་བ་མ་ཡིན་ཏེ། ཡོན་ཏན་ནི་ཡོན་ཏན་མེད་པའི་ཕྱིར་རོ། །གལ་ཏེ་འགྱུར་ན་ཉེས་པ་ཅིར་འགྱུར་ཞེ་ན། དེ་ལྟར་འགྱུར་ན་ཞེས་གསུངས་ཏེ་ཡོན་ཏན་དུ་ནའོ། །ཡོན་ཏན་དང་ལྡན་པ་འདུ་བ་ཅན་གྱི་རྒྱུ་ནི་རྫས་ཡིན་ནོ་ཞེས་བྱ་བའི་རྫས་ཀྱི་ཡོན་ཏན་ནི་ཡིན་པའི་ཕྱིར་ན། །ནམ་མཁའ་བཞིན་དུ་རྫས་ཉིད་དུ་ཐལ་པར་འགྱུར་རོ། །ལྡན་པ་ཡོན་ཏན་དང་ལྡན་པ་ཡིན་ན་ཉེས་པ་གཞན་ཡང་བརྗོད་པ་ནི། དེ་ལྟ་ན་ཡང་ཞེས་པ་སྟེ། ལྡན་པ་རྫས་ཡིན་ནའོ། །འདི་གཉིས་ནི་ཞེས་བྱ་བ་ནི་མེ་རྟོག་རྒྱས་པའི་ནགས་ཞེས་བྱ་བའི་བློ་དང༌། རི་མོ་དང་ལྡན་པ་ཡིན་ནོ་ཞེས་བྱ་བའི་བློ་གཉིས་སོ། །མི་མཚུངས་པ་ཉིད་གཞུང་འཛུགས་པ་ནི་མང་པོའི་གྲངས་ཉིད་ཀྱིས་བྱ་བའོ། །གྲངས་ལས་ཐ་དད་པའི་ནགས་ནི་ཁས་མི་ལེན་པའི་ཕྱིར་ན། ནགས་ཀྱི་བརྗོད་པར་བྱ་བ་ནི་གྲངས་མང་པོ་ཉིད་ཡིན་ནོ། །གང་ལ་ཞེས་བྱ་བ་ནི་ཤིང་རྣམས་ལའོ། །དེས་ན་ཞེས་བྱ་བ་ནི་མང་པོའི་གྲངས་ཀྱི་མཚན་ཉིད་དང༌། མེ་ཏོག་རྒྱས་པ་དག་ཤིང་རྣམས་ལ་འདུ་བའི་ཕྱིར་རོ། །འདིར་ཡང་རང་བཞིན་དུ་འགྱུར་རོ་སྙམ་ན་སྣ་ཚོགས་པ་ནི་འདིར་ཞེས་བྱ་བའོ། །དེ་ལྟར་འགྱུར་ཞེས་བྱ་བ་ནི། དོན་གཅིག་ལ་འདུ་བའི་སྟོབས་ཀྱིས་ཉེ་བར་བཏགས་པར་འགྱུར་བའོ། །རེ་ཞིག་མེ་ལ་མེ་ཉིད་དུ་གཟུང་བ་ནི། ཕྱིས་བྲམ་ཟེའི་ཁྱེའུ་ལ་ཡོད་པའི་ཆོས་མཐུན་པར་རྣོ་བ་གཉི་ག་ཡིན་པ་གཟུང་པ་དེས། མེའི་བག་ཆགས་མེར་རྟོག་པ་བསྐྱེད་པའི་ནུས་པ་སད་པར་འགྱུར་བའི་སྐྱེས་བུ་གང་ཡིན་པ་དེ་ནི་དེའི་དྲན་པས་བྲམ་ཟེའི་ཁྱེའུ་ལ་ཡང་མེར་སྒྲོ་འདོགས་པར་བྱེད་དོ། །གཅིག་གཟུང་བའི་དུས་སུ་ཞེས་བྱ་བ་ནི། སྔོན་པོ་ལ་སོགས་པ་དག་ལས་གང་ཡང་རུང་བ་ཞིག་གཟུང་བ་གང་ཡིན་པ་དེའི་དུས་སུའོ། །བཟུང་བཞིན་པ་ལ་ཞེས་བྱ་བ་ནི་གང་ཡང་རུང་བ་མདུན་ན་གནས་པ་ལའོ། །རྣམ་འགྲེལ་ཕྱིས་འཆད་པར་འགྱུར་པས་རེ་ཞིག་རང་ཉིད་ཀྱིས་བརྗོད་པ་ནི། །དེ་ལ་ནི་ཞེས་བྲམ་ཟེའི་ཁྱེའུ་དག་ལའོ། །འོན་ཏེ་ཉེ་བས་སོ་ཞེས་བྱ་བ་ལ། ཉེ་བར་ནི་ལྷག་པར་ཉེ་བ་སྟེ། གང་ལ་སྔོན་པོ་ཡོད་པ་དེ་ཉིད་ལས་སེར་པོ་ཉེ་བར་གནས་པ་སྟེ། དེ་ལྟར་ཉེ་བར་སྒྲོ་འདོགས་པར་འགྱུར་བ་ཡིན་ན་ལན་ནི་ཉེ་བར་གནས་པའི་འཛིན་པ་དེ་ནི་ཞེས་བྱ་བ་སྟེ། དང་པོ་གཅིག་ལ་མཐོང་བ་ཕྱིས་གཞན་མཐོང་བ་ན་གཟུང་བ་མ་ཡིན་ནོ། །ཡུལ་
དེར་ཞེས་བྱ་བ་ནི་སྔོན་པོའི་ཡུལ་དུ་སེར་པོ་གཟུང་བའི་ཕྱིར་སྒྲོ་འདོགས་པ་ཡིན་ནོ་ཞེས་འབྲེལ་ཏེ་ལན་ནི་ཡུལ་དེར་ཞེས་བྱ་བའོ། །དེ་ཉིད་ཅེས་བྱ་བ་ནི་སྒྲོ་བཏགས་པའོ། །འོན་ཏེ་ཞེས་བྱ་བ་ལ་སྔར་མཐོང་བའི་སྔོན་པོ་ལ་སོགས་པ་དྲན་པར་བྱ་བ་ནི། སེར་པོ་འཛིན་པའི་དུས་ན་གཟུང་བར་བྱ་བ་ཉིད་དུ་སྣང་བ་ཡིན་ནོ། །ཅིའི་ཕྱིར་ཞེ་ན་སྔ་མ་དང་ཕྱི་མ་ཐ་དད་པར་མ་བཟུང་བའི་ཕྱིར་རོ་ཞེ་ན། འདི་ལ་བརྗོད་པ་ནི་ཇི་ལྟར་ཞེས་བྱ་བའོ། །གཞན་ལ་ཞེས་བྱ་བ་ནི་དྲན་པར་བྱ་བ་ལའོ། །གཞན་དུ་ཞེས་བྱ་བ་ནི་བཟུང་བཞིན་པ་ཉིད་དུའོ། །འོན་ཏེ་དྲན་པར་བྱ་བ་ནི་རང་བཞིན་དུ་མི་སྣང་བ་ཁོ་ནའོ་ཞེ་ན། དེ་ནི་ཞེས་བྱ་བའོ། །འཛིན་པ་ཡིན་མོད་དེ་ལས་ཅིར་འགྱུར་སྙམ་ན་དེས་ན་ཞེས་བྱ་བའོ། །གཟུང་བར་བྱ་བ་ཉིད་དུ་སྣང་ན་རྣམ་པར་རྟོག་པའི་རང་བཞིན་ཉིད་ཀྱི་བསྲེ་བ་མ་ཡིན་མོད། དུ་མ་འཛིན་པའི་རང་བཞིན་ཉིད་ནི་བསྲེ་བ་ཡིན་པར་འགྱུར་རོ་ཞེས་བརྗོད་པ་ནི། འོན་ཏེ་ཞེས་བྱ་བའོ། །ལན་ནི་དེ་ལྟ་ཡིན་ན་ཞེས་བྱ་བ་ལ་སོགས་པའོ། །འོན་ཏེ་དུ་མ་གཅིག་གིས་འཛིན་པར་ཇི་ལྟར་འགྱུར་སྙམ་ན། མིག་གི་ཞེས་བྱ་བ་སྟེ་སྔོན་པོ་དང་སེར་པོ་ཐམས་ཅད་ཀྱི་རྟོགས་པ་གང་ཡིན་པ་དེའི་རྟོགས་པའི་ཕྱིར་ཏེ་མཐོང་པའི་ཕྱིར་རོ། དེ་ལྟར་འགྱུར་མོད་སྙམ་དུ་དོགས་ན་འདོད་པ་ནི་མ་ཡིན་ནོ་ཞེས་གོང་འོག་བསྣོལ་ཏེ་བལྟ་བར་བྱའོ། །མ་འབྲེལ་བ་ནི་འབྲེལ་བ་མེད་པ་སྟེ། དེའི་རྟོགས་པ་གང་ཡིན་པ་ཉིད་དྲི་མ་ཡིན་ནོ། །དེས་ཉེ་བར་མཚོན་པའི་སྐྱེས་བུ་བླུན་པོ་གསང་ཡིན་པ་དེ་དག་གིས་བརྟགས་པས་ནི་ཆོག་གོ་ཞེས་བྱ་བ་ཡིན་ནོ། །སྔོན་པོར་རྣམ་པར་རྟོག་པའི་དུས་ན། སེར་པོའི་རྣམ་པར་རྟོག་པ་ཡང་ཡོད་པ་ཡིན་ནོ་ཞེ་ན། རྣམ་པར་རྟོག་པ་དུ་མ་ནི་ཞེས་གསུངས་སོ། །གཞན་དག་ཚོགས་པའི་རྣམ་པར་རྟོག་པ་བསམས་ནས་སྨྲ་བ་ནི་སྣ་ཚོགས་པ་ཞེས་བྱ་བའོ། །གཅིག་ལ་ཡང་ཞེས་བྱ་བ་ནི་སྔོན་པོ་ལ་ཡང་ངོ༌། །དེས་ན་གང་གི་ཚེ་རེ་ཞིག་གཅིག་ཉིད་རྣམ་པར་རྟོག་པ་དེའི་ཚེ་གཞན་མཐོང་བ་ནི་རྣམ་པར་རྟོག་པ་མེད་པ་ཁོ་ནའོ་ཞེས་དགོངས་པའོ། །དེ་ལྟན་ཡང་ཞེས་བྱ་བ་ནི་ཅིག་ཅར་ཤེས་པ་མི་སྐྱེ་བ་བཟློག་པ་ནའོ། །འདི་སྐད་ཅེས་བྱ་བ་ནི་འཆད་བཞིན་པའོ། །སྟོན་པ་ཡང་སྟེ་ཞེས་བྱ་བ་ནི་གཞན་ནོ། །ཁྱེད་ཀྱིས་ཞེས་བྱ་བ་ནི་སངས་རྒྱས་པས་སོ། །རྣམ་དབྱེ་ཞེས་བྱ་བ་ནི་བློ་ནི་སྣ་ཚོགས་པའི་རྣམ་བ་ཅན་ཡིན་ཡང་གཅིག་ཁོ་ན་ཡིན་ལ་ཕྱི་རོལ་ནི་དུ་མར་འགྱུར་རོ་ཞེས་བྱ་
པ་དེ་ལྟ་བུ་ལ་སོགས་པའི་རང་བཞིན་ནོ། །སླར་ལ་བློ་ཉིད་ལ་ལྷག་པར་ཐ་དད་པར་འགྱུར་རོ་ཞེས་སྟོན་པ་ནི་གང་ལ་ཞེས་བྱ་བའོ། །དེའི་ཚེ་བློ་གནས་པའི་ངོ་བོ་ལ་སྣ་ཚོགས་པ་ཉིད་དུ་ཅི་སྟེ་འགྱུར་བ་འགྱུར་བ་ཁོ་ནའོ་ཞེས་བྱ་བའི་དོན་ཏོ། །འདི་སྐད་ཅེས་བྱ་བ་ནི་འཆད་བཞིན་པའོ། །ཇི་ལྟ་ཇི་ལྟ་ཞེས་བྱ་བ་ནི་གཅིག་ཉིད་དམ་དུ་མ་ཉིད་དུའོ། །རྣམ་པར་འབྲེལ་ཞེས་བྱ་བ་ནི་སྟོང་པར་འགྱུར་པའོ། །དངོས་སྟོབས་ནི་ཚད་མའི་སྟོབས་ཀྱིས་སོ། །ཇི་ལྟར་ན་གཅིག་གམ་དུ་མ་ཉིད་དུ་མི་འཐད་སྙམ་ན། འདི་ལྟར་ཞེས་གསུངས་སོ། །བློ་གཅིག་ལ་སྣ་ཚོགས་ཏེ་དུ་མ་རེ་ཞིག་ཇི་ལྟར་འགྱུར། གཅིག་ལ་དུ་མ་ཉིད་མི་འགྱུར་བ་ཁོ་ནའོ་ཞེས་བྱ་བའི་དོན་ཏོ། །འོ་ན་དུ་མ་ལ་འགྱུར་རོ་སྙམ་ན་བློ་དེ་ལ་ཡང་ཞེས་སྨོས་ཏེ། བློ་དུ་མ་ལ་ཡང་སྣ་ཚོགས་པ་ཉིད་མི་འགྱུར་རོ། །བློའི་རྟུལ་ཕྲ་རབ་རྣམས་ཕན་ཚུན་ཚུལ་ལུགས་མི་ཤེས་པའི་ཕྱིར་ན། སྣ་ཚོགས་སུ་སྣང་བ་མེད་པར་ཐལ་ལོ། །འོ་ན་སྣ་ཚོགས་སུ་སྣང་བ་འདི་ཇི་ལྟར་ཡིན་ཞེ་ན། གལ་ཏེ་དོན་རྣམས་ཞེས་གསུངས་སོ། །འདིར་ཞེས་བྱ་བ་ནི་གཅིག་དང་དུ་མ་དང་བྲལ་ཡང་སྣང་བ་ཞེས་པ་ལྟར་རོ། །རེ་ཞིག་སྣ་ཚོགས་སུ་སྣང་བ་ནི་ཉམས་སུ་མྱོང་བ་ཁོ་ནའོ། །འདི་ནི་སྣ་ཚོགས་པར་སྣང་བ་མ་ཡིན་ནོ་ཞེས་ནི་བརྗོད་པར་ནུས་པ་མ་ཡིན་ཏེ། གལ་ཏེ་འདི་གཅིག་དང་དུ་མ་ཉིད་དུ་མི་འཐད་པ་དེའི་ཚེ། གཅིག་དང་དུ་མ་ཉིད་དེ་མེད་མོད། ཁོ་བོ་ཅག་ལ་ནི་ཆད་པ་ཅི་ཡང་མེད་དོ། །སྣ་ཚོགས་སུ་སྣང་བ་ནི་གཅིག་དང་དུ་མ་དང་བྲལ་བ་ཡང་མེད་དོ་ཞེས་བརྗོད་པར་བྱ་བ་མ་ཡིན་ཏེ། དེ་ལྟ་མ་ཡིན་པ་གཞན་གྱིས་གཅིག་དང་དུ་མ་མེད་པ་ཉིད་དུ་འགྲུབ། །དེའི་ཡན་ལག་ཅན་གྱི་སུན་འབྱིན་པ་འཇུག་པ་ནི་བློ་སྣ་ཚོགས་སུ་སྣང་བའི་བདག་ཉིད་གཅིག་དང་དུ་མ་དང་བྲལ་བར་ཁས་བླངས་ཀྱང་ཉེས་པ་ཡང་མེད་དོ་ཞེས་བྱ་བ་ནི་གཞུང་གི་ཚོགས་ཀྱི་དོན་ཏོ། དེ་ལ་ཡང་ཞེས་བྱ་བ་ནི་བློ་བླ་ཡང་ངོ༌། །གལ་ཏེ་རྣམ་པ་སྣ་ཚོགས་པ་ལ་སྟོན་པ་ཡིན་པ་དེ་ལྟ་ན་ཡང་དེ་ལས་ཐ་དད་པའི་བློ་ནི་གཅིག་ཏུ་འགྱུར་རོ་ཞེས་དོགས་ན་དངོས་པོའི་མཚན་ཉིད་ནི་ཞེས་བྱ་བའི་རྣམ་པ་ལས་ཐ་དད་པའི་བློ་ནི་དམིགས་པས་གནོད་པའི་ཕྱིར་རོ་ཞེས་བྱ་བའོ། །དངོས་ཡང་ཞེས་བྱ་བ་ནི་བློའི་མཚན་ཉིད་ཅན་ན་ཆད་པ་ཅི་ཡོད་ཅེས་བྱ་བ་ནི་ཆད་པ་འགའ་ཡང་མེད་པའོ། །འདིར་ནི་འདིས་ནི་ཡན་ལག་ཅན་འགོག་པའི་སྐབས་
ཡིན་ལ་ཡན་ལག་ཅན་དེ་སེལ་བ་ན་ཡང་གལ་ཏེ་བློ་ཡང་དུ་མ་ཉིད་དུ་ཁས་ལེན་ན། དེའི་ཚེ་དེ་ལ་ཆད་པ་ཅི་ཞིག་ཡོད། གདོན་མི་ཟ་བར་བློ་གཅིག་གི་ཕྱོགས་ཁས་བླངས་ནས་ཡན་ལག་ཅན་བསླད་བར་བྱ་བ་ནི་མ་ཡིན་ཏེ། བསྟན་བཅོས་གནས་ནས་རྩོད་པ་མ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །སུན་འབྱིན་པ་གཞན་ཡང་བརྗོད་པ་ནི་རྡུལ་ཕྲ་རབ་དུ་མའི་རྟོགས་པ་གང་ཡིན་པ་དེ་མེད་པར་ཐལ་བར་འགྱུར་རོ། །བློའི་རྡུལ་ཕྲ་རབ་དེ་དག་ནི་དུ་མར་རྟོགས་པར་བཟོད་པ་མ་ཡིན་ཏེ། ཕན་ཚུན་ཚུལ་ལུགས་མི་ཤེས་པའི་ཕྱིར་རོ། །འོ་ན་གཞན་འགའ་ཞིག་གིས་དུ་མ་ཉིད་རྟོགས་པ་ཡིན་ནོ་ཞེ་ན། རྟོག་པ་བོ་གཞན་ཡང་ཞེས་བྱ་བའོ། །འདི་ཉིད་གཞུང་འཛུགས་པ་ནི་རང་རིག་པ་ཞེས་བྱ་བའོ། །མཐོང་བ་ཉིད་ཀྱི་ཕྱིར་རོ་ཞེས་བྱ་བ་ནི་སྣ་ཚོགས་སུ་སྣང་བའོ། །འདི་ལ་གཞན་བརྗོད་པ་ནི་འོ་ན་ནི་ཞེས་བྱ་བའོ། །འདི་ཡང་ཞེས་བྱ་བ་ནི་རང་རིག་པ་མེད་པ་རིག་པ་མི་སྲིད་དོ་ཞེས་བྱ་བ་ཡང་ངོ༌། །གཞན་ཡང་རང་རིག་པ་ཡིན་ན་ནི་ཤེས་པ་གཞན་རིག་པ་ལ་ དགོས་པ ་ཉིད་ཡོད་པ་མ་ཡིན་ནོ། །དེས་ན་གཞན་རིག་པས་རིག་བྱ་གལ་ཏེ་རྡུལ་ཕྲ་རབ་རྣམས་རང་རིག་པ་ཉིད་ཀྱིས་ཕན་ཚུན་ཚུལ་ལུགས་མི་ཤེས་པ་ཡིན། རྟོག་པ་པོ་གཞན་ཡང་མེད་པ་ཡིན་པ་དེས་ན། གང་གིས་མང་པོ་ཉིད་རྟོགས་པ་ཡིན་ཞེས་གཞན་དག་སྨྲ་བ་ནི་འོ་ན་ཞེས་བྱ་བའོ། །འགའ་ཡང་མ་ཡིན་ནོ་ཞེས་བྱ་བ་ནི་གྲུབ་པའི་མཐའོ། །དེ་ལ་ཐ་དད་པ་ནི་རྡུལ་ཕྲ་རབ་ལས་ཐ་དད་པའོ། །འདིས་ནི་དུ་མའི་ཕྱོགས་ལ་ཡང་དུ་མ་ཉིད་དུ་སྣང་བ་མི་འཐད་དོ་ཞེས་བསྒྲུབས་པ་ཡིན་ནོ། །གཉི་གའི་ཡང་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །དུ་མ་ཉིད་ལ་སྣ་ཚོགས་པ་མེད་པ་འདི་ཤིན་ཏུ་གསལ་ཏེ་ཤིན་ཏུ་ཡང་གསལ་ལོ། །གང་གི་ཕྱིར་དེ་ལྟར་གཅིག་ཉིད་དམ། །དུ་མ་ཉིད་དུ་དངོས་པོ་འཐད་པ་མ་ཡིན་པའི་གཏན་ཚིགས་དེའི་ཕྱིར་ན། །བཅོམ་ལྡན་འདས་ཀྱིས་རྣམ་པར་ཤེས་པ་ནི་ཞེས་བྱ་བ་ལ་སོགས་པ་གསུངས་སོ། །ཅི་སྟེ་ཞེས་བྱ་བ་ནི་དོགས་པ་བསུ་བའོ། །སྒྱུ་མ་དང་ཞེས་བྱ་བ་ནི་གྲུབ་པའི་མཐའོ། །དཔེར་ན་སྒྱུར་མ་ལ་སོགས་པ་རྣམས་མེད་ཀྱང་སྣང་བ་དེ་བཞིན་དུ། །བུམ་པའམ་སྣམ་བུ་ལ་སོགས་པ་ཡང་ཡིན་ནོ་ཞེས་དགོངས་པའོ། །གཞན་གྱིས་དེ་དག་ཀྱང་ཞེས་སྨྲས་ཏེ། སྒྱུ་མ་ལ་སོགས་པ་དག་ཀྱང་ངོ༌། །ལན་ནི་དོན་བྱ་བ་
ཞེས་བྱ་བའོ། །གལ་ཏེ་སྣང་བ་ཉིད་ལ་ཡོད་པར་བརྗོད་པ་མ་ཡིན་ནམ་དེས་ན་དོན་བྱེད་པས་ཅི་ཞིག་བྱ་ཞེ་ན། སྣང་བ་བསམ་གྱིས་ཞེས་བྱ་བའོ། །དེ་ལ་ཡང་ཞེས་བྱ་བ་ནི། དོན་བྱེད་པ་གཞན་ལ་ཡང་ངོ༌། །དེ་ཉིད་ཅེས་བྱ་བ་ནི་སྣང་བའི་རང་བཞིན་ཉིད་དེ་དོན་བྱེད་པ་ཡིན་ནའོ། །འདི་ལ་ལན་སྣང་བ་ཐམས་ཅད་ཅེས་བྱ་བའོ། །འགའ་ཞིག་ནི་བཟློག་པས་ཡིན་ཞེས་བྱ་བ་ནི། །ཐ་དད་པ་ལས་བཟློག་པ་སྟེ། ཐ་མི་དད་པ་ཉིད་དོན་བྱ་བ་ཡིན་ནོ་ཞེས་བྱ་བའི་དོན་ཏོ། །དེ་ལ་བུམ་པ་དང་སྣམ་བུ་ལ་སོགས་པའི་དོན་བྱ་བ་ཆུ་འཛིན་པ་ལ་སོགས་པས་ནི་ཐ་དད་པ་ཁོ་ན་ཡིན་ལ། བདེ་བ་ལ་སོགས་པའི་དོན་བྱེད་པ་ནི་ཐ་དད་པ་མེད་པ་ཁོ་ན་ཡིན་ཏེ། དེ་དག་གི་ཡོད་པ་ནི་ཉམས་སུ་མྱོང་བ་ཙམ་གྱི་རྣམ་པར་འཇོག་པའི་ཕྱིར་རོ། །འདི་ཉིད་འཆད་པ་ནི་སྣང་བ་ཙམ་ཉིད་ཀྱིས་ནི་ཞེས་བྱ་བའོ། །གང་ཞིག་དོན་བྱེད་པ་ཉིད་དུ་ཞེས་བྱ་བ་ནི། ཐ་མི་དད་པའི་ཕྱོགས་ལའོ། །ཐ་དད་པའི་ཕྱོགས་ལ་ནི་དོན་བྱེད་པ་སྒྲུབ་པ་ཉིད་དུའོ། །དོན་བྱེད་པའི་རང་བཞིན་ཡིན་ནོ་ཞེས་བྱ་བ་ནི། །ཐ་མི་དད་པའི་ཕྱོགས་ལ་དོན་བྱེད་པ་ཉིད་རང་གི་ངོ་བོ་ཡིན་ལ། ཐ་དད་པའི་ཕྱོགས་ལ་ནི་དོན་བྱེད་པའི་རང་གི་ངོ་བོས་སོ། །གལ་ཏེ་འདི་དོན་བྱེད་པའི་རང་བཞིན་ཡིན་མོད། །དེ་ལྟ་བུ་མེད་པ་ཉིད་དོ་ཞེ་ན། དོན་བྱེད་པའི་རང་བཞིན་ནི་ཞེས་བྱ་བའོ། །འགའ་ཞིག་ཅེས་བྱ་བ་ནི་བུམ་པ་ལ་སོགས་པའམ་བདེ་བ་ལ་སོགས་པའོ། །གང་གི་ཕྱིར་དེ་ལྟ་ཡིན་པའི་རྒྱུ་དེས་ན། དོན་བྱེད་པ་ནི་སྣང་བ་ལས་ཐ་དད་པ་ཡོད་པར་སྨྲ་བའི་སྡེ་བ་རྣམས་ཀྱིས་ཁས་བླངས་པ་ཡིན་ནོ། །གལ་ཏེ་འགའ་ཞིག་གི་དོན་བྱེད་པ་ནི། སྣང་བ་ལས་ཐ་དད་པ་ཁོ་ནར་ཡོད་པ་མ་ཡིན་ནམ་དེས་ཐམས་ཅད་མེད་པར་ཇི་ལྟར་འགྱུར་སྙམ་ན། སྔོན་པོ་ལ་སོགས་པའི་རང་བཞིན་ལས་ཞེས་བྱ་བ་སྟེ། སྔོན་པོ་ལ་སོགས་པས་སྣང་བའི་རང་བཞིན་ལས་སོ། །གཞན་ཡོད་པར་སྒྲུབ་པའི་དོན་དུ་དོན་བྱེད་པ་སྟོན་པ་ནི་གང་ཞིག་ཅེས་བྱ་བའོ། །འདི་ནི་འདི་ནི་ཞེས་བྱ་བའི། །དོན་རྣམས་སྐྱེས་བུ་ལ་སོགས་པ་ལས་ཐ་དད་པ་ནི་མ་ཡིན་ཏེ། བདག་མེད་པར་ཐལ་བའི་ཕྱིར་རོ། །གཞན་གྱིས་གདུང་བ་ཞེས་སྨྲས་སོ། །ལན་ནི་མ་ཡིན་ཏེ་ཞེས་བྱ་བའོ། །དེ་ཉིད་བརྗོད་བ་ནི་གོམས་པའི་ཞེས་བྱ་བའོ། །ཐམས་ཅད་ཅེས་བྱ་བ་ནི་གདུང་བ་
བཟློག་པ་དང་ཚིམ་པའོ། །ལྡོག་པ་བརྗོད་པ་ནི་གོམས་པ་མེད་ན་ནི་ཞེས་བྱ་བའོ། །གལ་ཏེ་དེ་ལྟ་ན་ཞེས་བྱ་བ་ནི་གོམས་པའི་སྟོབས་ཀྱིས་ཐམས་ཅད་སྐྱེ་བ་ནའོ། །ཡང་ཇི་ལྟར་ན་མ་རིག་པའི་སྟོབས་ཀྱིས་སྐྱེས་པ་ཉིད་མེད་པ་ཉིད་ཡིན་པར་འགྱུར་རོ་ཞེ་ན། དེ་ལྟ་བུ་ཞེས་བྱ་བ་སྟེ་གོམས་པའི་སྟོབས་ཀྱིས་སྐྱེས་པའོ། །གལ་ཏེ་དེ་ལྟར་རྣམ་པར་བརྟགས་པར་བྱ་བ་དེ་ལྟར་ན་ཡང་སྣང་བ་ཡོད་པ་མ་ཡིན་ན། དེས་ན་མེད་པར་ཇི་ལྟར་འགྱུར་ཞེ་ན། སྣང་བཙམ་ཞེས་བྱ་བའོ། །དོན་ལ་ནི་ཞེས་བྱ་བ་ནི་ཤེས་བྱ་བ་ནི་ཤེས་པ་ལ་ཡང་ཞེས་བྱ་བར་བླའོ། །དེ་བདག་ཉིད་གཅིག་ལ་བཀག་པ་ཉིད་ཀྱི་ཕྱིར་དང་ཞེས་བྱ་བ་ལ་སོགས་པ་འཆད་པ་ནི་ཅི་སྟེ་རགས་པར་སྣང་བ་ནི་ཞེས་བྱ་བའོ། དེ་དག་ནི་མང་པོ་ཁོ་ན་ཡིན་གྱི་རགས་པ་ནི་མ་ཡིན་ནོ། །ཅིའི་ཕྱིར་ཞེ་ན། ཅིའི་ཕྱིར་ཞེ་ན། རགས་པ་ཉིད་ཅེས་བྱ་བའོ། །དེ་དག་ལས་ཞེས་བྱ་བ་ནི་རྡུལ་ཕྲ་རབ་མང་པོ་རྣམས་ལས་སོ། །རྣ་པ་གཞན་གྱིས་ཀྱང་རགས་པ་ཉིད་སུན་འབྱིན་པའི་དོན་དུ་བརྗོད་པ་ནི། རགས་པའི་ཐ་སྙད་ནི་ཞེས་བྱ་བའོ། །ལིང་ལིང་པོ་གཅིག་ཅེས་བྱ་བ་ནི། བར་ཆད་དང་བྲལ་བའི་སེམས་གཅིག་གི་ཕན་ཚུན་ཐ་དད་པར་སྣང་བ་གང་ཡིན་པ་དེ་ལ་ནིའོ། །འོན་ཏེ་བར་མི་སྣང་བ་དེས་ན་རགས་པ་ཉིད་སྣང་བ་ཡིན་ནོ་ཞེ་ན། འོ་ན་ནི་ཞེས་བྱ་བའོ། །ཕན་ཚུན་རང་བཞིན་གྱིས་སྤངས་ནས་གནས་པ་དེ་དག་ནི་གདོན་མི་ཟ་བར་བར་སྣང་བ་དང་བཅས་པར་ཁས་བླངས་ དགོས་སོ། །དེ་ལྟ་ན་མ་ཡིན་ན་ཕན་ཚུན་དབེན་པ ་ཉིད་དུ་མི་འཐད་པའི་ཕྱིར་རོ། །དེའི་ཕྱིར་གལ་ཏེ་བར་ཆད་དང་བཅས་པའི་རང་བཞིན་ཉིད་ཀྱིས་སྣང་བ་མིན་ན་ནི་དེ་ལྟ་ན་རང་གི་ངོ་བོས་སྣང་བར་འགྱུར་གྱི་གཞན་དུ་ནི་མ་ཡིན་ནོ། །བརྒྱ་ལ་ཕྱིའི་དོན་དུ་སྨྲ་བ་དག་ཡན་ལག་དང་ཡན་ལག་ཅན་ཡང་སུན་ཕྱུང་བ་ན་འདི་སྐད་བརྗོད་པར་འགྱུར་ཞེས་ཡོངས་སུ་བརྟག་པའི་མཐའ་བཟུང་ནས་ཉེ་བར་འགོད་པ་ནི་ཅི་སྟེ་ཞེས་བྱ་བ་སྟེ། རྡུལ་ཕྲ་རབ་རྣམས་ངེས་ཏེ་ཞིག་པ་ན་རྡུལ་ཕྲ་རབ་དེ་དག་ལྡན་པ་ལས་སོ། །དེ་ཞེས་བྱ་བ་ནི་དེའི་ཚེ། ཡན་ལག་ཅན་གྱི་དུས་ནའོ། །རྡུལ་ཕྲ་རབ་བམ་ཡན་ལག་ནི་ཞེས་འདིའི་སྒྲས་བརྗོད་པའམ། །འདིའི་སྒྲས་ཀྱང་རུང་སྟེ། འདི་དག་ལ་དོན་ནི་ཐ་དད་པ་མ་ཡིན་ནོ་ཞེས་བྱ་བའོ། །འདི་ལྟར་འགྱུར་མོད་ཅི་སྐྱོན་ཞེ་ན། དེས་ན་ཞེས་གསུངས་སོ། །ལྡན་པ་དང་ཞེས་བྱ་བ་ནི། རང་གི་ལྡན་པ་དང་ངོ་ཞེས་བྱ་བའི་ཚུལ་འདིས་སྣལ་
མལ་སོགས་པའི་འདུ་བ་ཅན་གྱི་རྒྱུ་ཉིད་དུ་ཁྱས་བླངས་པ་གང་ཡིན་པ་དེ་མི་འགྱུར་རོ། །གལ་ཏེ་དེའི་ཚེ་རྡུལ་ཕྲ་རབ་རྣམས་མེད་མོད། དེ་ལྟ་ཡང་འདུ་བ་ཅན་གྱི་རྒྱུར་འགྱུར་རོ་ཞེ་ན། འབྲེལ་བ་ནི་ཞེས་གསུངས་སོ། །ཡན་ལག་ཅན་གྱི་འདུ་བ་ནི་འབྲེལ་བ་དང་བཅས་པའི་རྒྱུ་རྣམས་ལ་འདུ་བ་ཅན་གྱི་རྒྱུ་ཞེས་བརྗོད་པ་ཡིན་ལ་འདུ་བ་འབྲེལ་བ་ཡང་གཉིས་ལ་གནས་པར་འགྱུར་བ་ཡིན་ནོ། །ཡན་ལག་ཅན་གྱི་དུས་ན་ནི་རྡུལ་ཕྲ་རབ་སྲིད་པ་མ་ཡིན་ལ། རྡུལ་ཕྲ་རབ་ཀྱི་དུས་ན་ཡང་ཡན་ལག་ཅན་སྲིད་པ་མ་ཡིན་ནོ། །དེས་ན་གང་གིས་འདུ་བ་ཅན་གྱི་རྒྱུ་ཉིད་དུ་འགྱུར་བ་རྒྱུད་དང་འབྲས་བུ་དག་འདུ་བར་ཇི་ལྟར་འགྱུར་ཞེས་བྱ་བའི་དོན་ཏོ། །སུན་འབྱིན་པ་གཞན་ཡང་བརྗོད་པ་ནི་འདི་ལའོ། །བདུན་པའི་དོན་ནི་རྡུལ་ཕྲ་རབ་ཀྱི་མཚན་ཉིད་དོ། །དེ་ཞེས་བྱ་བ་ནི་ཡན་ལག་ཅན་ནོ། །སོགས་པའི་སྒྲས་ནི་ལོགས་ལ་སོགས་པ་ཡང་གཟུང་བར་ཐལ་ལོ། །ཕ་རོལ་གྱ་ཆ་ཡང་མཐོང་མོད་ཅི་སྐྱོན་སྙམ་ན། ཕ་རོལ་གྱི་ཆ་གཟུང་ན་ཞེས་བྱ་བའོ། །ཕ་རོལ་ཡང་ཞེས་བྱ་བ་ནི་གཟུང་བའི་ཕ་རོལ་གྱི་སྒྲའི་ཆས་པར་དུ་ཆོས་པའི་བུམ་པ་ཡང་མཐོང་པར་འགྱུར་རོ། །དེ་ལྟ་ཡིན་དང་ཆོད་པའི་དེ་ཡང་ཡན་ལག་ཅན་ཡིན་པའི་གཏན་ཚིགས་ཀྱི་ཕྱིར། །ཕ་རོལ་གྱི་ཆ་མཐོང་བར་འགྱུར་རོ། །དེས་ན་སྐྱེས་བུ་ཐབས་དོན་ཐམས་ཅད་མཐོང་བར་འགྱུར་རོ། །མེད་པའི་ཕྱིར་རོ་ཞེས་བྱ་བ་ནི་ཆ་མེད་པ་ཉིད་ཀྱིས་ཕ་རོལ་གྱིས་ཆ་མི་སྲིད་པའི་ཕྱིར་རོ། །ལན་ནི་གཞན་གྱིས་ཞེས་བྱ་བའོ། །དེ་སྐད་དྲིས་པ་ལ་གཞན་གྱི་ལན་བརྗོད་པ་ནི་དེ་ཞེས་བྱ་བ་སྟེ་གཞན་གྱིས་མཐོང་བ་ནི་ཕ་རོལ་གྱི་ཆ་ནི་གཞན་ཉིད་དོ་ཞེ་ན། འདི་ལ་བརྗོད་པ་ནི་འོ་ན་ཅི་ཞེས་བྱ་བའོ། །འདི་ཞེས་བྱ་བ་ནི་སྔ་མ་དང་ཕྱི་མའི་ཆ་དང་ལྡན་པའོ། །དེ་ལྟར་གལ་ཏེ་ཐ་དད་པར་ཁས་ལེན་ན། དེའི་ཚེ་སྐབས་ཀྱིས་སྨྲ་བ་ཉམས་སོ་ཞེས་བརྗོད་པ་ལ། གཞན་དག་ཐ་མི་དད་པར་ཁས་བླངས་ནས་བརྗོད་པ་ནི་དེ་ནི་ཞེས་བྱ་བའོ། །གལ་ཏེ་ཕ་རོལ་གྱི་ཆ་དང་ཚུ་རོལ་གྱི་ཆ་དང་གཞན་མ་ཡིན་པ་དེ་ལྟན་ཆུ་རོལ་གྱི་འཛིན་པའི་དུས་ན། ཕ་རོལ་གྱི་ཆ་ནི་མི་འཛིན་པ་ཉིད་དེ་འོན་ཀྱང་རྣམ་གྲངས་ཀྱིས་འཛིན་པ་ཡིན་ནོ་ཞེས་བྱ་བའི་དོན་ཏོ། །ལན་ནི་མ་ཡིན་ཏེ་ཞེས་བྱ་བའོ། །གཞན་འདི་ཉིད་ཡིན་ནོ་ཞེས་འདིའི་མཐོང་བ་འདི་ཉིད་ཀྱིས་ཕྱིས་མཐོང་བ་ཉིད་ཡིན་ནོ་ཞེས་རྟོགས་པར་ཡང་མི་ནུས་སོ། །གཞན་དུ་མཐོང་བ་
ཉིད་སྟོན་པ་ནི་མཐོང་བ་དང་ཞེས་བྱ་བའོ། །གང་བདག་གིས་མཐོང་བ་དེ་ཉིད་ལ་རེག་གོ་ཞེས་རྟོགས་པའི་ཕྱིར་རོ་ཞེས་བྱ་བའི་དོན་ཏོ། །མ་ཡིན་ཏེ་ཞེས་བྱ་བ་ནི་འགོག་པའོ། །སྔ་མ་དང་ཕྱི་མ་བལྟས་པ་དང་རེག་པ་དག་གཅིག་པ་ལ་ཚད་མ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །ཅི་སྟེ་ཡང་བཤད་ཟིན་པའི་ཚུལ་གྱིས་གཅིག་ཉིད་དུ་རྟོགས་པ་ཡོད་དོ་ཞེ་ན། ཕན་ཚུན་བུ་ཞེས་གསུངས་སོ། །མཐོང་བ་ནི་རེག་པའི་རང་བཞིན་ཡོངས་སུ་སྤངས་པ་དང་རེག་པ་ནི་མཐོང་བའི་རང་བཞིན་ཡོངས་སུ་སྤངས་པ་དང་རེག་བ་ནི་མཐོང་བའི་རང་བཞིན་སྤངས་ནས་རྟོགས་པ་ཡིན་ཏེ། དེས་ན་འདི་གཉིས་གཅིག་ཏུ་ཇི་ལྟར་འགྱུར་ཞེས་བྱ་བའོ། །དོགས་པ་བསུ་བ་ནི་མཐོང་བ་དང་རེག་པ་དག་གི་ཕན་ཚུན་གྱི་རྣམ་པར་དབྱེ་བ་ནི་འཛིན་པ་སྟེ། ཤེས་པས་བྱས་པ་ཡིན་ནོ་ཞེ་ན། ལན་ནི་འོ་ན་ནི་ཞེས་བྱ་བའོ། །ཐམས་ཅད་རྣམ་པར་དབྱེ་བ་ནི་འཛིན་པས་བྱས་པ་ཡིན་གྱི། གཟུང་བར་བྱ་བ་ནི་གཅིག་ཁོ་ནའོ་ཞེས་བརྗོད་པར་བྱ་བར་འགྱུར་རོ་ཞེས་བྱ་བའི་དོན་ཏོ། །སུན་འབྱིན་པ་གཞན་བརྗོད་པ་ནི་དེ་ཡང་ཞེས་བྱ་བ་སྟེ་ཡན་ལག་ཅན་ཡང་ངོ༌། །དེ་ལས་ཐ་དད་པའི་སྣང་བ་ལས་ཐ་དད་པར་རོ། །འོ་ན་ཅི་ཞིག་ལུས་ཤེ་ན་སྣང་བ་ཙམ་ཞེས་བྱ་བའོ། །འདིར་རྩོད་པ་ནི་གལ་ཏེ་ཞེས་བྱ་བའོ། །ཅི་གལ་ཏེ་ཤེས་པའི་རིག་པ་ནི་པ་དེ་ལྟ་ན་ཡང་གཞན་ཡང་རིག་པར་འགྱུར་ཏེ་དེས་ཐ་དད་པར་སྣང་བ་ཅི་ལྟར་མི་འཐད་སྙམ་ན་རང་རིག་པ་ཡིན་ན་ནི་ཞེས་བྱ་བ་སྟེ་རང་རིག་པ་ཡིན་པར་འགྱུར་ན་ནི་གཞན་རིག་པ་མ་ཡིན་ཏེ། རང་དང་གཞན་རིག་པ་དག་ནི་ཕན་ཚུན་སྤངས་པས་འགལ་བའི་ཕྱིར་རོ། དེས་ཞེས་བྱ་བ་ནི་ཕན་ཚུན་རིག་པས་ནའོ། །རྩོད་པ་དེ་ལ་ཡང་རྩོད་པ་ཞེས་པ་ནི་ལྷག་མའོ། །སོ་སོར་ཞེས་བྱ་བ་ནི་སྔོན་པོས་སེར་པོ་སེར་པོས་ཀྱང་སྔོན་པོ་ཞེས་རྟོགས་པར་ཁས་བླངས་པ་ནའོ། །ཇི་ལྟར་རྒྱུད་གཞན་གྱིས་རིག་པ་ན་འདི་གཉིས་ཡིན་ནོ་ཞེས་མི་རྟོགས་པ་སྟེ་དེ་ཁོ་ན་བཞིན་ཚད་མ་ཞེས་བྱ་བ་རྟོགས་པར་ཡང་འགྱུར་རོ། །འདི་ལྟར་སྔོན་པོས་ནི་སེར་པོ་ཉིད་རིག་གི་རང་གི་བདག་ཉིད་མ་ཡིན་ལ། སེར་པོས་ཀྱང་སྔོན་པོ་འབའ་ཞིག་རིག་གི་རང་གི་རང་བཞིན་ནི་མ་ཡིན་ནོ། །དེ་ལྟ་ན་ཡང་འདི་ནི་གཉིས་ཡིན་ནོ་ཞེས་ཇི་ལྟར་རྟོགས། རྒྱུད་གཅིག་ལ་གནས་པའི་ཤེས་པས་སྔོན་པོ་ཉམས་སུ་མྱོང་ལ་གཞན་གྱིས་ནི་སེར་པོ་རྟོགས་པ་ནི་འདི་གཉིས་
ཡིན་ནོ་ཞེས་བྱ་བ་ནི། རྟོགས་པར་སྲིད་པ་མ་ཡིན་ནོ། །དེ་བཞིན་དུ་བྱེད་པ་པོས་རང་རིག་པ་མ་ཡིན་པར་འགྱུར་ན། བདག་གིས་སྔོན་པོ་འདི་ཡོངས་སུ་བཅད་དེ་རིག་གོ་ཞེས་རྟོགས་པར་མི་འགྱུར་རོ། །གང་གི་ཚེ་སྔོན་པོས་སེར་པོ་རིག་པ་དེའི་ཚེ་འམ། སེར་པོས་སྔོན་པོ་རིག་པ་དེའི་ཚེ་ནི་བདག་ཉིད་རྟོགས་པ་མ་ཡིན་ཏེ། དེས་ན་ཅི་ལྟར་གཞན་གྱི་རྒྱུད་ལ་ཡོད་པའི་ཤེས་པས་སྔོ་པོ་རྟོགས་པས་ན། འདི་བདག་གིས་རིགས་པ་ཡིན་ནོ་ཞེས་མི་འགྱུར་པ་དེ་བཞིན་དུ། རང་ཉིད་རྟོགས་པ་ལ་ཡང་མི་འགྱུར་ཏེ་བདག་ཉིད་རྟོགས་པ་མེད་པའི་ཕྱིར་རོ། །ཚིག་ལེའུར་བྱས་པ་རྣམ་པར་དགྲོལ་བའི་དོན་དུ་རེ་ཞིག་ཕྱོགས་གཞན་བཤད་པ་ནི་གལ་ཏེ་དེ་དག་ཅེས་བྱ་བའོ། །འོན་ཏེ་གང་ཡིས་རང་གི་རང་བཞིན་རིག་བ་དེ་ཉིད་ཀྱིས་གཞན་ཡང་ཡིན་ནོ། །དེས་ན་གཉིས་སོ་ཇི་ལྟར་ཐལ་ཞེ་ན་རང་གི་ངོ་བོར་རིག་ནི་ཞེས་བྱ་བའོ། །འཇུ་པ་མ་ཡིན་པ་ནི་བདག་གིར་མི་བྱེད་པ་སྟེ། འདི་བདག་ཉིད་ལ་སྟོན་པ་ནི་མ་ཡིན་ནོ་ཞེས་བྱ་བའི་དོན་ཏོ། །རང་དང་གཞན་རིག་པ་དག་ནི་ཕན་ཚུན་ཉིད་ཀྱིས་འགལ་བའི་ཕྱིར་རོ། །ད་ནི་ཚིག་ལེའུར་བྱས་པའི་དོན་བརྗོད་པ་ནི་འདོན་ཏེ་ཞེས་བྱ་བའོ། །རང་རིག་པ་མ་ཡིན་ན་ནི་བྱེད་པ་པོ་མི་སྣང་བའི་ཕྱོགས་གང་གི་ཕྱིར་རང་རིག་པ་དང་གཞན་རིག་པ་ཙམ་མ་ཡང་མི་འཐད་པ་དེའི་ཕྱིར་ནའོ། །དེ་ལྟ་ཡིན་དང་ཞེས་བྱ་བ་ནི། རང་རིག་པ་ཁས་ལེན་པ་ནའོ། །ཕན་ཚུན་ཐ་དད་པའི་ཕྱིར་རྒྱུད་གཞན་རྟོགས་པ་བཞིན་དུ་གཉི་ག་ཡང་རྟོགས་པར་མི་འགྱུར་རོ། །འདིར་ཞེས་བྱ་བ་ནི་སྣ་ཚོགས་སུ་སྣང་བ་མེད་པ་ཉིད་དུ་ཐལ་བའོ། །རང་རིག་པ་དང་གཞན་རིག་པ་ཁས་བླངས་པ་ལ་བདག་ཀྱང་སྔ་མའི་ཚུལ་ལས་མ་འདས་ཏེ། དེས་ན་བདག་དེ་ཡང་རང་རིག་པའམ་གཞན་རིག་པར་འགྱུར་ཞེས་པའི་བརྒལ་ཞིང་བརྟགས་པ་འདི་ཉིད་ལས་འཕར་བ་མ་ཡིན་ནོ། །གཞན་ཡང་ཞེས་བྱ་བ་ནི། །རང་གི་རང་བཞིན་དུ་མ་ཟད་པའོ། །འདི་ལ་ལན་ནི་རང་བཞིན་དེ་ཉིད་དམ་ཞེས་བྱ་བ་སྟེ། བརྗོད་པར་འདོ་པ་འགའ་ཞིག་དངོས་པོ་དེའི་རང་བཞིན་གྱིས་སོ། །གཞན་གྱིས་ཞེས་བྱ་བ་ནི་སྐབས་སུ་བབ་པ་དེ་ལས་ཐ་དད་པའི་རང་བཞིན་གྱིས་
སོ། །དང་པོ་སེལ་བ་ནི་རང་ཞེས་བྱ་བའོ། །དེ་ཉིད་གསལ་བར་བྱེད་པ་ནི་རང་གི་རང་བཞིན་ཞེས་བྱ་བའོ། །རྣམ་པར་རྟོག་པ་གཉིས་པ་ལ་ཡང་བརྗོད་པ་གཞན་གྱི་སྒོ་ནས་ཞེས་བྱ་བའོ། །རང་ལ་མངོན་དུ་ཕྱོགས་པའི་རང་བཞིན་གང་ཡིན་པ་དེ་ལས་གཞན་པ་ཁོ་ནར་འགྱུར་བ་གཞན་ལ་མངོན་དུ་ཕྱོགས་པའི་རང་བཞིན་གྱིས་གཞན་རིག་ན་ཞེས་བྱ་བའི་དོན་ཏོ། །དེས་ཞེས་བྱ་བ་ནི་གཞན་ལ་མངོན་དུ་ཕྱོགས་པའི་རང་བཞིན་གྱིས་སོ། །གང་གི་ཕྱིར་རང་ལ་ཕྱོགས་པའི་རང་བཞིན་གྱིས་ནི་རང་གི་རང་བཞིན་ཁོ་ན་རིག་ཅིང༌། གཞན་ལ་ཕྱོགས་པས་ཀྱང་རང་བཞིན་གཞན་ཁོ་ན་རིག་པ་དེས་ནའོ། །གང་ལ་ཡོད་པ་ཞེས་བྱ་བའི་བདག་གོ །ལན་ནི་འདི་ནི་ཞེས་བྱ་བ་སྟེ་མངོན་དུ་ཕྱོགས་པའོ། །དེ་ཉིད་དོ་ཞེས་བྱ་བ་ནི་ དགོས་པ ་སྟེ་བདག་ཉིད་དོ། །རང་ལ་མངོན་དུ་ཕྱོགས་པ་དང༌། གཞན་ལ་མངོན་དུ་ཕྱོགས་པའི་རང་བཞིན་དག་ལ་འདི་ནི་གཉིས་ཡིན་ནོ་ཞེས་རྟོགས་པ་དང་ལྡན་པ་ནི་ཞེས་འབྲེལ་ཏོ། །རང་དང་གཞན་ལ་མངོན་དུ་ཕྱོགས་པའི་རང་བཞིན་ཕན་ཚུན་འགལ་བ་དེ་དག་ནི་རང་ལ་མངོན་པར་ཕྱོགས་པའམ། གཞན་ལ་མངོན་དུ་ཕྱོགས་པ་གཅིག་གིས་རིག་པར་མི་འཐད་དེ། དེས་ན་མངོན་དུ་ཕྱོགས་ པ་གཞན་གཉིས་ཁས་བླང་བར་བྱ་དགོས ་པར་འགྱུར་རོ། །དེ་བཞིན་དུ་དེ་རིག་པའི་དོན་དུ་གཞན་ཡིན་པས་ན་ཐུག་པ་མེད་དོ། །གང་གི་ཕྱིར་དེ་གཞན་རིག་པ་ལ་ཉེས་པ་ཡོད་པ་དེས་ན། རང་རིག་པའི་རང་བཞིན་གསུམ་ཞེས་བྱ་བ་ནི། རང་དང་གཞན་ལ་མངོན་དུ་མ་ཕྱོགས་པ་གཉིས་བདག་དང་གསུམ་མོ། །དེའི་ཕྱིར་གསུམ་པོ་དེ་རྣམས་ཕན་ཚུན་ལ་ལུགས་མ་ཤེས་པའི་ཕྱིར་ན། དེ་གསུམ་རིག་པར་བྱ་བའི་དོན་དུའོ། །གལ་ཏེ་རྣམས་པ་རྣམས་མི་བདེན་པ་དེ་ལྟ་ན་ཡང་ཤེས་པ་ནི་ཡོད་པ་ཁོ་ན་མ་ཡིན་རྣམ་དེས་ན་སྟོང་པར་ཇི་ལྟར་འགྱུར་སྙམ་ན། འདི་ལྟར་གསུངས་སོ། །དེའི་ཡང་ཞེས་བྱ་བ་ནི་ཤེས་པའི་ཡང་ངོ༌། །གཉི་ག་ཡང་ཞེས་བྱ་བ་ནི་རྣམ་པར་དང་ཤེས་པའོ། །དེ་ལྟར་ནི་སྤང་པར་བྱ་བའོ། །གཉིས་ཀ་ཡང་ཞེས་བྱ་བ་ནི་ དགོས་པ ་བསུ་བ་སྟེ། རྣམ་པར་དང་ཤེས་པའོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །དེ་ཉིད་དྲན་པར་བྱེད་པ་ནི་རང་
རིག་པ་ཞེས་བྱ་བའོ། །རང་རིག་པ་ནི་མེད་དེ་སྣ་ཚོགས་པ་མ་ཡིན་པར་ཐལ་བའི་ཕྱིར་རོ། །གཞན་རིག་པ་ཡང་མ་ཡིན་ཏེ། རང་ཉིད་རིག་པ་ནི་གཞན་རིག་པར་འཇུག་པ་མ་ཡིན་ནོ་ཞེས་བརྗོད་འཛིན་ཟིན་པའི་ཕྱིར་རོ། །རེ་ཞིག་དབུ་མ་པའི་ཕྱོགས་ལ་བརྗོད་པ་ནི། གཟུགས་དང་ཞེས་བྱ་བའོ། །དངོས་པོ་རྣམས་ཀྱི་རྣམ་པར་གཞག་པ་གང་ཡིན་པའི་དངོས་པོ་རྣམས་ཐ་དད་གནས་པ་འདིར་ཞེས་འབྲེལ་ཏེ། །རྣམ་པར་ཤེས་པར་བྱེད་པས་ན། རྣམ་པར་ཤེས་པ་ཞེས་བྱ་བ་སྟེ། གཟུང་བ་དང་འཛིན་པའི་རྣམ་པ་གང་དག་ཡིན་པ་དེ་དག་ལ་ཕྱིར་རོལ་དུ་གྱུར་པའི་རྣམ་པར་ཤེས་པར་བྱེད་པའི་མཚན་ཉིད་ཀྱི་རྣམ་པར་ཤེས་པ་ནི་ཡོད་པ་མ་ཡིན་ནོ། །དེ་ལྟར་རྣལ་འབྱོར་སྤྱོད་པ་མངོན་པར་འདོད་པའི་སྟོང་པ་ཉིད་བརྗོད་ནས་ཕྱིའི་དོན་དུ་སྨྲ་བས་འདོད་པའི་སྟོང་པ་ཉིད་བརྗོད་པ་ནི། ཕུང་པོ་ལ་སོགས་པ་ཞེས་བྱ་བའོ། །དེ་ལས་གཞན་དག་ཀྱང་ཞེས་བྱ་བ་རྣམ་པར་ཤེས་པར་སྨྲ་བའི་བསྟན་པའོ། །ཆོས་ཐམས་ཅད་སོང་བ་ཉིད་དོན་དམ་པ་ཁོ་ན་བཅོམ་ལྡན་འདས་ཀྱིས་བསྟན་པར་རིགས་སོ་ཞེས་བྱ་བར་བསམས་སོ། །ཇི་ལྟ་བའི་རྐྱེན་ཞེས་བྱ་བ་ནི་བདག་ཉིད་ཇི་ལྟ་བའི་རྐྱེན་གྱི་ལྟོས་པ་སྟེ་ལྟོས་པར་བྱེད་པ་གང་ཡིན་པ་དེས་ན། དེ་ཉིད་དེ་ནི་རིག་པ་མ་ཡིན། །ཞེས་བྱ་བ་ནི་རང་བཞིན་དེ་ཉིད་མ་རིག་པ་སྟེ། དེ་ཁོ་ན་མ་ཡིན་པའི་རྣམ་པ་ཉིད་ཀྱིས་མ་ཤེས་པ་ཡིན་ནོ་ཞེས་བྱ་བའི་དོན་ཏོ། །དེ་ལ་ནི་ཞེས་བྱ་བ་ནི་ཚུ་རོལ་མཐོང་བ་རྣམས་ཀྱི་དེའོ། །ཁོ་ན་ཉིད་ཀྱི་དོན་གང་དག་གིས་བཏང་སྙོམས་ཉིད་དུ་མཛད་པའི་བཅོམ་ལྡན་འདས་དེས་སོ། །འཇིག་རྟེན་ཐུགས་ཞེས་བྱ་བ་ནི་འཇིག་རྟེན་གྱི་ངོར་རོ། །འདི་ཉིད་ཤད་པའི་དོན་དུ་སྔར་བཤད་པའི་རྩོད་པ་ཉིད་དྲན་པར་བྱེད་པ་ནི་གལ་ཏེ་ཞེས་བྱ་བའོ། །ཕྱི་རོལ་གྱི་ཞེས་བྱ་བ་ནི་ཆོས་ཐམས་ཅད་སྟོང་པ་ཉིད་ལས་ཕྱི་རོལ་དུ་གྱུར་པའི་དོན་རྣམ་པར་ཤེས་པ་ལ་སོགས་པ་གང་ཡིན་པ་དེས་སྟོན་པ་མཛད་པའོ། །དོན་རྗེས་སུ་བརྗོད་པས་ཞེས་བྱ་བའི་ཕྱིར་རོལ་གྱི་དོན་རྗེས་སུ་བརྗོད་པས་རྟོག་པ་ལ་སོགས་པའི་རང་བཞིན་ཅན་གྱི་བདག་འགག་པ་གང་ཡིན་པ་དེ་བརྗོད་པར་འདོད་པའི་ཕྱིར་ཏེ། འཇིག་རྟེན་ན་གྲུབ་པའི་ཕྱི་རོལ་གྱི་དོན་གང་ཡིན་པ་དེ་ལ་ནི་བདག་མེད་དོ་ཞེས་བྱ་བའོ། །རྗེས་སུ་བརྗོད་པ་ཡང་མི་འཐད་དེ་ཕྱིའི་དོན་དེ་
སྣང་བ་མེད་པའི་ཕྱིར་རོ་ཞེས་བརྩད་པ་ལ་མ་ཡིན་ནོ་ཞེས་གསུངས་སོ། །གང་གིས་འཇིག་རྟེན་གྱི་བསམ་པས་ཀྱང་བཅོམ་ལྡན་འདས་རྗེས་སུ་བརྗོད་པར་མཛད་པར་འཇིག་རྟེན་ཉིད་ལ་ཕྱིའི་དོན་བྱེད་བཞིན་དུ་དེར་མངོན་པར་ཞེན་པའི་བློ་ཇི་ལྟར་སྐྱེ་བར་འགྱུར་ཞེ་ན། འཇིག་རྟེན་གྱི་ཞེས་བྱ་བའོ། །འདིར་ཡང་གཞན་གྱི་བློས་གཞན་སྟོན་པར་མཛད་པ་ཉིད་དུ་མི་རིགས་པའི་ཕྱིར། བཅོམ་ལྡན་འདས་ལ་ཡང་འཇིག་རྟེན་གྱི་བློ་མངའ་བ་ཡིན་ནོ་ཞེས་གཞན་གྱིས་རྟོགས་པ་ཡིན་ནོ། །དེ་ཉིད་རྗོད་པ་ནི་གལ་ཏེ་ཞེས་བྱ་བའོ། །འཇིག་རྟེན་གྱི་བློ་ནི་བཅོམ་ལྡན་འདས་ལ་མི་མངའ་ལ། གཞན་གྱི་བློས་སྟོན་པར་མཛད་པ་ཡང་མི་སྲིད་དོ་ཞེས་དགོངས་ནས་གསུངས་པ་ནི་མ་ཡིན་ཏེ་ཞེས་བྱ་བའོ། །སྔོན་གྱི་ཤུགས་ནི་སྔོན་གྱི་འདུ་བྱེད་པའོ། །འོ་ན་འཇིག་རྟེན་ཐུགས་ནི་ཞེས་བྱ་བ་འདིའི་དོན་ཅིག་ཡིན་ཞེ་ན། དེས་ན་ཞེས་བྱ་བའོ། །འཇིག་རྟེན་གཞུག་པའི་དོན་དུ་ཞེས་བྱ་བ་ནི། ཇི་ལྟར་ན་ཆོས་ཐམས་ཅད་སྟོང་བ་ལ་འཇིག་རྟེན་འཇུག་པར་འགྱུར་ཞེས་བྱ་བ་དེའི་དོན་དུའོ། །བཅོམ་ལྡན་འདས་ནི་འཇིག་རྟེན་གྱི་དེ་ཁོ་ནར་དུ་མར་སྟོན་པ་ཡིན་ནོ་ཞེས་བྱ་བའི་དོན་ཏོ། །འདྲི་བ་ཉིད་བརྗོད་པ་ནི་རྣམ་པར་དབྱེ་བར་ནུས་པའི་ཞེས་བྱ་བའོ། །སྣ་ཚོགས་ཀྱི་ཤེས་པ་ལ་སྔོན་པོ་ལ་སོགས་པར་སྣང་བ་གང་ཡིན་པ་དེ་ནི་ཤེས་པའི་ཁྱད་པར་ཤེས་པའི་བདག་ཉིད་དུ་གྱུར་པ་ཡིན་གྱི་གཞན་ལ་སྟོན་པ་གཞན་དང་བཅས་པ་དེ་ལྟ་བུ་ནི་མ་ཡིན་ཏེ། གཞན་སྟོན་པ་མེད་པ་འབའ་ཞིག་པར་གྱུར་པ་ནི་མཐོང་བར་ནུས་པ་མ་ཡིན་ནོ། །སྔོན་པོ་ལ་སོགས་པ་སེར་པོ་ལ་སོགས་པ་དང་ལྷན་ཅིག་པར་དམིགས་བ་གང་ཡིན་པ་དེ་ནི་འབའ་ཞིག་བལྟ་པར་ནུས་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་སེར་པོ་ལ་སོགས་པ་བཀབ་ཀྱང་སྔོན་པོ་ལ་སོགས་པ་མཐོང་བ་མ་ཡིན་ནམ། དེས་ན་ཇི་ལྟར་འབའ་ཞིག་མི་མཐོང་ངོ་ཞེས་བརྗོད་སྙམ་ན། སྔོན་པོ་ལ་སོགས་པ་རྣམས་ལ་ནི་རྣམ་དབྱེ་སྟེ་སོ་སོར་འབྱེད་པ་ནི་དོན་ལ་འཇུག་པར་འགྱུར་རོ། །ཤེས་པའི་ཁྱད་པར་ཞེས་བྱ་བའི་དོན་ཏོ། །སྣ་ཚོགས་པའི་ཤེས་པའི་བདག་ཉིད་དུ་གྱུར་པའི་སྔོན་པོ་ལ་སོགས་པ་གང་ཡིན་པ་ནི་ཞེས་བྱ་བའོ། །གཞན་སྟོན་མེད་ཅེས་བྱ་བ་འདིའི་དོན་ནི། །ཡན་འགར་རུ་ཞེས་བྱ་བའོ། །གཞན་སྟོན་མེད་ཅེས་བྱ་བ་འདིའི་དོན་ནི། ཡན་འགར་དུ་ཞེས་བྱ་བའོ། །དེ་ལ་ནི་ཞེས་བྱ་བ་ལ་སོགས་པ་བཤད་པའི་དོན་
དུ་ཕྱོགས་སྣ་མ་འགོད་པ་ནི་གལ་ཏེ་ཞེས་བྱ་བའོ། །གཟུགས་ལ་སོགས་པ་དང་ལྷན་ཅིག་ཏུ་འགྱུར་རོ་ཞེ་ན་གལ་ཏེ་ཞེས་བྱ་བ་ནི་ལན་ནོ། །འོན་ཏེ་ཞེས་བྱ་བ་ནི་དོགས་པ་བསུ་པའོ། །སྒྲའི་སྣང་བ་དང་འབྲལ་བ་གཟུགས་ལ་སོགས་པའི་སྣང་བ་ནི་སྒྲའི་སྣང་བ་དང་ལྷན་ཅིག་ཉིད་དུ་མི་འགྱུར་རོ་ཞེས་བྱ་བའི་དོན་ཏོ། །ལན་ནི་དེ་ཡང་མ་ཡིན་ཏེ་ཞེས་བྱ་བའོ། །ཤེས་པ་ཞེས་བྱ་བ་ནི་སྒྲ་དང་གཟུགས་ལ་སོགས་པར་སྣང་བའི་ཤེས་པ་རྣམས་པར་བྱེད་པ་ནི་མ་ཡིན་ནོ། །ཅིའི་ཕྱིར་ཞེ་ན་དེའི་ཚེ་ཞེས་བྱ་བ་སྟེ། སྒྲར་སྣང་བ་མེད་པའི་དུས་ནི་སྔར་གྱི་སྣང་བ་ཞེས་བྱ་བ་སྒྲ་དང་ལྷན་ཅིག་པ་མེད་པའི་ཕྱིར་རོ། །གལ་ཏེ་སྣང་བ་སྔ་མ་ཉིད་འབའ་ཞིག་པར་འགྱུར་ན། དེའི་ཚེ་རྣམ་པར་འབྱེད་པ་འགྱུར་ན། དེ་ལྟར་ནི་མ་ཡིན་ནོ་ཞེས་དགོངས་པའོ། །སྒྲ་ནི་སྒྲའི་སྣང་བའོ། །དེས་ན་ཐད་ཅད་པ་ཡིན་ནོ་ཞེས་བྱ་བ་ནི་སྒར་སྣང་བ་ནི་གཟུགས་ལ་སོགས་པར་སྣང་བ་ལས་ཐ་དད་པར་འགྱུར་རོ། །དེ་ནི་ཞེས་བྱ་བ་ནི་སྒྲའོ། །གལ་ཏེ་སྒྲར་སྣང་བ་ཡིན་པ་དེ་ལྟ་ན་ཡང་འདི་ཅི་ཇི་ལྟར་ཤེས་པ་ཡིན་སྙམ་ན། དོན་ནི་རིག་པ་མ་ཡིན་པའི་ཕྱིར་རོ་ཞེས་བྱ་བའོ། །སྒྲ་དང་ལྷན་ཅིག་ཏུ་སྣང་བ་སྔར་གྱི་ཤེས་པའི་རྣམ་པ་ཉིད་ལས་སོ། །ཡན་འགར་བ་ནི་སྒྲ་དང་བྲལ་བའོ་ཞེས་རྣམ་པ་དེ་ལྟར་རྣམ་པར་འབྱེད་པའོ། །དེས་ན་ཇི་ལྟར་གཉིས་སུ་མེད་པ་ཡིན་ཏེ། སྔ་མ་དང་ཕྱི་མའི་ཤེས་པའི་སྣང་བ་དག་ཐ་དད་པར་ཁྱེད་ཉིད་ཀྱིས་ཁས་བླངས་པའི་ཕྱིར་རོ་ཞེས་བསམས་པའོ། །ཁྱེད་ཀྱི་ལྟ་བ་ཉིད་ཀྱིས་སྔ་མ་དང་ཕྱི་མའི་ཤེས་པ་དག་དབང་ཐ་དད་པར་ཁས་བླངས་ནས་གྲུབ་པའི་མཐའ་འདི་ཁོ་བོ་ཅག་གིས་བརྗོད་པར་ཟད་ཀྱི། དོན་དམ་པར་ནི་འཆད་པར་འགྱུར་བ་ཉིད་གྲུབ་པའི་མཐའ་གྱུར་རོ་ཞེས་སྟོན་པས་བརྗོད་པ་ནི་ཡང་མ་ཡིན་ཏེ་ཞེས་བྱ་བའོ། །འདི་མྱོང་བར་གྱུར་རོ་ཞེས་བྱ་བ་ཇི་ལྟར་མི་འགྱུར་ཞེ་ན། རང་རིག་པའི་ཞེས་གསུངས་སོ། །འགས་པ་ནི་ཐམས་ཅད་ཀྱི་ཚེ་ལྐོག་ཏུ་གྱུར་པ་ཁོ་ན་ཡིན་ཏེ། དེ་ནི་རང་རིག་པས་དམིགས་པ་མ་ཡིན་ནོ། །འོན་ཏེ་དྲན་པས་ལྐོག་དུ་གྱུར་པ་ཤེས་པར་བྱེད་དོ་ཞེ་ན་ཞེས་འབྲེལ་ཏོ། །ང་ལས་དྲན་པ་འདི་སྐྱེས་སོ་ཞེས་བྱ་བ་འདི་ནི་ཉམས་སུ་མྱོང་བ་ཁོ་ནས་རྟོགས་པ་ཡིན་ནོ་ཞེ་ན། ཉམས་སུ་མྱོང་བའི་ཞེས་སྨོས་སོ། །གང་ཞིག་ཉམས་
སུ་མྱོང་བའི་དུས་ན་ཡོད་པ་དེ་ཉིད་དེས་རྟོགས་པར་བྱ་བ་ཡིན་ལ། དྲན་པ་ནི་ཉམས་སུ་མྱོང་བའི་དུས་ན་ཡོད་པ་མ་ཡིན་ན། དེས་ན་དེ་དེས་ཇི་ལྟར་རྟོགས། གལ་ཏེ་བདག་ནི་ཉམས་སུ་མྱོང་བ་ལས་སྐྱེས་སོ་ཞེས་དྲན་པ་ཉིད་ཀྱིས་ཤེས་སོ་ཞེ་ན། དྲན་པ་འདི་ནི་ཞེས་བྱ་བའོ། །དེས་ནི་ཞེས་བྱ་བ་ནི་དྲན་པས་སོ། །གལ་ཏེ་ཉམས་སུ་མྱོང་བ་ཤེས་པ་ཡིན་ན། དེའི་ཚེ་བདག་ཉམས་སུ་མྱོང་བ་ལས་སྐྱེས་སོ་ཞེས་ཀྱང་ཤེས་པར་འགྱུར་བ་ཞིག་ན། ཉམས་སུ་མྱོང་བ་རིག་པ་མེད་དོ། །དེ་ཉམས་སུ་མྱོང་བ་ཉམས་སུ་མྱོང་བ་ཉིད་དོ་སྙམ་ན། ཉམས་སུ་མྱོང་བ་ཡིན་ཉང་ཞེས་གསུངས་སོ། །ཉམས་སུ་མྱོང་བ་དྲན་པས་མྱོང་བ་ཡིན་ན་ཡང་ཉམས་སུ་མྱོང་བ་ཁོ་ནར་འགྱུར་གྱི་དྲན་པ་ནི་མ་ཡིན་ནོ། །གང་གི་ཕྱིར་དེ་ལྟར་སྔ་མ་དང་ཕྱི་མར་འཛིན་པ་མི་འཐད་པ་དེའི་ཕྱིར་ཞེས་བྱ་བའོ། །དེ་ཉིད་ཀྱི་ཚེ་ཞེས་བྱ་བ་ནི། དུས་གང་གི་སེར་པོ་ལ་སོགས་པ་དང་བཅས་པའི་སྔོན་པོ་དམིགས་པའི་ཚེའོ། །གཅིག་གིས་བྱ་བ་ནི་འབའ་ཞིག་པའོ། །མཐོང་བ་གང་ཡིན་པ་ཞེས་བྱ་བ་ནི་སྔོན་པོ་འབའ་ཞིག་པའོ། །འདི་ལ་ལན་ནི་འོན་ནི་ཞེས་བྱ་བའོ། །རང་ཉིད་ཀྱིས་རྣམ་པར་དཔྱོད་པར་ཁས་བླངས་པའི་ཕྱིར་རོ། །རང་རིག་པ་ལ་ཞེས་བྱ་ནི་དེ་ནི་རང་ཉིད་ཁོ་ན་རིག་པའི་ཕྱིར་རོ། །གང་ཞིག་གཞན་གྱིས་ཀྱང་དམིགས་པ་དེ་ནི་ཕྱི་རོལ་ཉིད་དུ་ཐ་སྙད་བྱེད་པ་ཡིན་གྱི། གཞན་ནི་མ་ཡིན་ནོ་ཞེས་བྱ་བར་བསམས་པའོ། །སེམས་ཀྱི་ཞེས་བྱ་བ་ནི་སེམས་ཀྱི་རྣ་པ་ཁོ་ན་གཅིག་ཏུ་འགྱུར་གྱི་དོན་གྱིས་ནི་མ་ཡིན་ནོ་ཞེས་བྱ་བའི་དོན་ཏོ། །ཡང་ཇི་ལྟར་ན་དོན་གྱི་ཡང་མི་འགྱུར་ཞེ་ན་ཞེས་པ་མ་གཏོགས་པར་ཞེས་བྱ་བ་ཞེས་གསུངས་སོ། །གཟུང་བར་འདོད་པ་གང་ཡིན་པ་འཛིན་པར་འདོད་པ་གང་ཡིན་པ་དང༌། དེ་བཞིན་དུ་སྔོན་པོ་དང་སེར་པོ་ལ་སོགས་པའི་རྣམས་པ་གང་ལ་ཡོད་པའི་བློ་སྣ་ཚོགས་པའི་དེ་ལ་དེ་སྐད་ཅེས་བྱ་བའོ། །དེ་ལྟར་ནི་རེ་ཞིག་དུ་མ་ཉིད་དུ་ཁས་བླངས་ནས་རྣམ་པར་དབྱེ་བར་མི་ནུས་པའི་རང་བཞིན་གྱིས་གཅིག་ཉིད་དུ་བཤད་པ་ཡིན་ནོ། །དེ་ནི་དུ་མ་ཉིད་མེད་དོ་ཞེས་བརྗོད་པ་ནི་ཡང་ན་ཞེས་བྱ་བའོ། །སྣ་ཚོགས་མ་ཡིན་པ་ལ་ཞེས་བྱ་བ་ནི་རིག་པའི་རང་བཞིན་གཅིག་ལས་སོ། །ཕན་ཚུན་ཐ་དད་པར་གནས་པ་གང་ཡི་པ་དེ་ནི་མེད་པའི་ཕྱིར་རོ། །རང་རིག་པ་ནི་གདོན་མི་ཟ་བར་རང་བཞིན་གཅིག་ཏུ་ཁས་བླང་བར་
བྱ་བ་ཡིན་ཏེ། དེ་ལྟ་མ་ཡིན་ན་རྟུལ་ཕྲ་རབ་ཀྱི་མཐར་ཐུག་པའི་ཐ་དད་པ་ནི་རང་རང་གི་རང་བཞིན་ལ་མི་གནས་པའི་ཕྱིར་མི་སྣང་བ་ཁོ་ནར་འགྱུར་རོ། །སྣང་བྱང་ཡོད་དེ་དེས་ན་སྣང་བ་མེད་པའི་ཕྱིར་རིག་པ་རང་བཞིན་གཅིག་ཉིད་དོ། །རིག་པ་རང་བཞིན་གཅིག་ཡིན་པ་དེ་ལས་ཀྱང་ཇི་ལྟར་དུ་མ་ཉིད་རྣམ་པར་གནས་པར་འགྱུར་ཏེ། ཕྱིར་ལ་གཅིག་ཉིད་གནས་པར་འཐད་པ་ཡིན་ནོ། །དེས་ནི་རང་གི་ངོ་བོ་ཁོ་ནར་རིག་པར་འགྱུར་ལ། རིག་པ་གཅིག་གི་རང་བཞིན་ཡང་གཅིག་ཁོ་ནར་འཐད་པ་ཡིན་ནོ་ཞེས་དགོངས་པའོ། །དངོས་པོ་དང་དངོས་པོ་མེད་པ་དག་གིས་ཞེས་བྱ་བ་ནི་གཉིས་མེད་པའི་དངོས་པོ་དང་གཞན་གཉིས་ནི་དངོས་པོ་མེད་པ་སྟེ། དེ་དག་གིས་སོ། །གང་གི་ཕྱིར་ཐ་དད་པ་མེད་པའི་དེའི་ཕྱིར་ཐ་དད་པའི་དངོས་པོ་མེད་པ་ལས་ཐ་མི་དད་པ་གཉིས་སུ་མེད་པའི་གཞན་དུ་རྣམ་པར་གནས་པར་མི་འགྱུར་རོ། །གལ་ཏེ་ཐ་དད་པའི་དངོས་པོ་གཉིས་དངོས་པོ་མེད་པར་མ་རྟོགས་པ་ནི་དེའི་ཚེ་ཉིད་དངོས་པོ་མེད་པར་མ་རྟོགས་པས་ནི། གཉིས་མེད་པར་མངོན་པར་འདོད་པ་ཐ་དད་པ་ཉིད་ག་ལས་ཡིན་ཏེ་མ་ཡིན་པ་ཁོ་ནའོ། །དེ་ལྟར་རྟོགས་པར་འགྱུར་མོད། ཉེས་པ་ཅི་ཡོད་པ་སྙམ་ན་ཡང་དེ་ལྟ་ན་ཡང་ཞེས་བྱ་བའོ། །དངོས་པོ་མེད་པ་གཉིས་དང་དངོས་གཉིས་མེད་པ་ཡང་ངོ༌། །བུམ་པ་གཉིས་འདི་ལ་ཀ་བ་མེད་དོ་ཞེས་བྱ་བའི་དགག་པ་ནི་མེད་ཉིད་དངོས་པོ་མེད་པ་མ་ཡིན་ཏེ། ཀ་བ་འགོག་པ་མིན་ཞེས་བྱ་བར་ལྟའོ། །གལ་ཏེ་དེ་ལས་ཀ་བའི་མེད་པ་ཡོད་ན་ནི་དེའི་ཚེ་ཀ་བ་ཡང་འགོག་པར་འགྱུར་རོ། །དེས་ན་འདི་ཡང་ཐ་དད་པ་མེད་དེ་ཞེས་ཐ་དད་པའི་མེད་པ་རྟོགས་པར་བྱ་སྟེ། དེ་ལྟ་མ་ཡིན་ན་དེ་དགག་པ་མི་འཐད་པའི་ཕྱིར་རོ། །དེ་ལྟ་ཡིན་དང་གཉིད་མེད་དང་གཉིས་ཀྱི་དངོས་ཡོད་པ་དང་མེད་པ་གང་ཡིན་པ་དེ་དག་གི་ཐ་དད་པའི་རིག་པ་སྟེ་རོག་པ་འོངས་སོ། །ཅི་འདྲ་བ་ཞིག་ཅེ་ན་མེད་པ་ཅན་ཏེ་གོད་མི་ཟ་བ་འགྱུར་པའོ། །ཐ་དད་པ་མེད་ན་མི་འབྱུང་བ་ཅན་ཞེས་བྱ་བ་ནི་དངོས་པོ་ཐ་དད་པ་མེད་ན་མི་འབྱུང་བ་ཅན་ནོ། །འོན་ཏེ་གཉིས་དགག་པ་མི་བྱེད་དོ་ཞེ་ན། དགག་པ་མ་རྟོགས་ན་ནི་ཞེས་གསུངས་། ཅུང་ཟད་ཀྱང་ཞེས་བྱ་བ་ནི་གཉིས་སམ་གཉིས་མེད་པའོ། །གཉིས་པ་གཞན་ཡང་བརྗོད་པ་ནི་གཞན་ཞེས་བྱ་བའོ། །གཞན་ནི་འགའ་ཡང་རྟོགས་པར་བྱེད་
པ་མ་ཡིན་ཏེ། འོན་ཀྱང་རྣམ་པ་འདིས་བདག་ཉིད་ཁོ་ན་རྟོགས་པར་བྱེད་དོ་ཞེས་བྱ་བའི་དོན་ཏོ། །དེ་ལྟར་ན་ནི་ཞེས་བྱ་བ་ནི་སུན་བྱི་པའོ། །གང་གི་ཚེ་རྨོངས་པ་སྲིད་པ་དེའི་ཚེ་གཉིས་མེད་པ་ནི་མ་རྨོངས་པའི་རང་བཞིན་ཡིན་ནོ། །རྨོངས་པ་དང་མ་རྨོངས་པ་དག་ཀྱང་ཕན་ཚུན་ཐ་དད་པ་དེས་ན་ཇི་ལྟར་གཉིས་མེད་པ་ཡིན། རྨོངས་པ་མེད་ན་ནི་བདག་ཉིད་རྟོགས་པར་བྱེད་པ་ཉེས་བར་མཁོ་བ་མ་ཡིན་ནོ། །དེ་ཉིད་བརྗོད་པ་ནི་རྨོངས་པ་གསལ་བས་ན་ཞེས་བྱ་བའོ། །གཞན་ནི་མ་རྨོངས་པའོ། །ཉེས་པ་གཞན་ཡང་བརྗོད་པ་ནི་སྔ་མ་དང་ཞེས་བྱ་བའོ། །དང་པོ་ནི་རྨོངས་པས་བཟློག་པར་བྱ་བ་ཡིན་ལ། དུས་ཕྱིས་ནི་མ་རྨོངས་པས་འཇུག་པར་བྱ་བ་ཡིན་ནོ་ཞེས་སྔ་མ་དང་ཕྱི་མ་དག་ནི་ཇི་ལྟར་རྟོགས་པ་ཐ་དད་པ་ཞེས་བྱ་བ་འདི་ནི་རྣམ་པར་ཐམས་ཅད་དུ་མ་མཐོང་ངོ་ཞེས་དེ་ལྟར་གཉིས་མེད་པར་སྨྲ་བ་གང་གིས་བསྒྲུབས་པར་འགྱུར་བ་དེ་ལ་རྟོགས་པ་འདི་མ་འབྲེལ་པར་འགྱུར་རོ་ཞེས་འབྲེལ་ཏོ། །ཡང་ཇི་ལྟར་ན་ཐ་དད་པ་མཐོང་བ་མ་ཡིན་སྙམ་ན་རེ་ཞིག་ཅེས་བྱའོ། །སྔ་མ་དང་ཕྱི་མ་ནི་འདས་པ་དང་མ་འོངས་པའོ། །དེའི་ཚེ་ཞེས་ཁོང་ནས་ཕྱུང་ལ། ད་ལྟར་བ་ཉིད་དུ་འགྱུར་རོ་ཞེས་བྱ་བར་སྦྱར་རོ། །གཉིས་པ་བཞིན་ནོ་ཞེས་བྱ་བ་ནི་ད་ལྟར་བ་བཞིན་ནོ། །གལ་ཏེ་འདས་པའི་ཕྱིར་ན། དེ་སྣང་དུ་ཟིན་ཀྱང་ད་ལྟར་བ་ཇི་ལྟར་འགྱུར་ཞེ་ན་དེའི་ཞེས་བྱ་བའོ། །འོན་ཏེ་མི་སྟང་ངོ་ཞེས་བྱ་བ་ནི་རྣལ་འབྱོར་བའི་མངོན་སུམ་ལ་སྣང་བ་ནི་འདས་པར་མངོན་པར་འདོད་པའི་ཡང་འདས་པ་ཉིད་མ་ཡིན་ན་ཞེས་བྱ་བའི་དོན་ཏོ། །དེའི་ཚེ་ཇི་ལྟར་འདད་པ་ལ་སོགས་པ་རིག་པ་དམིགས་པ་ཡིན་ཞེས་བལྟའོ། །དེ་ནི་གནས་སྐབས་ནི་རྣལ་འབྱོར་བའི་གནས་སྐབས་སོ། །གང་དུ་ཞེས་བྱ་བ་ནི་གཉིས་སུ་མེད་པར་སྨྲ་བར་རོ། །གཞན་དག་སྣང་བ་ཉིད་དུ་སྟོན་པ་ནི། རྨི་ལམ་བདེན་པ་ཞེས་བྱ་བའོ། །སྐྱེ་བ་འདི་ཉིད་དུའོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །དེ་ལྟར་ཐ་སྙད་བྱེད་པའི་ཕྱིར་རོ་ཞེས་བདག་གིས་འདས་པ་རྟོགས་སོ་ཞེས་ཐ་སྙད་བྱེད་པའི་ཕྱིར་རོ། །དམིགས་པའི་གནས་སྐབས་ནི་དེ་དག་གིས་ཀྱང་དེ་ད་ལྟར་བ་ཁོ་ནར་དམིགས་པ་ཡིན་ནོ་ཞེས་དགོངས་པའོ། །དེ་སྣ་ཞེས་བྱ་བ་ནི་མ་རྟོགས་པས་ནའོ། །དེ་ལས་ཞེས་བྱ་བ་ནི་འདས་པ་དང་མ་འོངས་པ་ལས་སོ། །ཁྱད་པར་མ་རྟོགས་པར་
ནི་ཁྱད་པར་ཅན་རྟོགས་པ་མ་ཡིན་ནོ། །འདས་པ་དང་མ་འོངས་པ་ཡང་ཐ་དད་པའི་ཁྱད་པར་ཡིན་ནོ་ཞེས་དགོངས་པའོ། །འོན་ཇི་ལྟར་འཇིག་རྟེན་འདས་པ་རྟོགས་པ་ཡོད་སྙམ་ན་འདས་པ་ནི་ཞེས་བྱ་བའོ། །དྲན་པ་དེ་ཉིད་ཀྱིས་འདས་པ་རྟོགས་པར་འགྱུར་རོ་ཞེས་གསུངས་ཏེ། དྲན་པ་ཡང་ངོ༌། །འོན་ཏེ་རྗེས་སུ་དཔག་པས་མ་འོངས་པ་ལས་ད་ལྟར་བ་ཐ་དད་པར་འགྱུར་རོ་ཞེས་བལྟའོ། །རྗེས་སུ་དཔག་པ་ཉིད་ག་ལས་སྐྱེ་སྙམ་ན་བརྟན་པ་ལ་སོགས་པའམ་ཞེས་སྨྲས་སོ། །གང་གི་ཚེ་དངོས་པོ་བརྟེན་པ་མཐོང་བ་དེའི་ཚེ་འདི་ནི་ཡུན་རིང་པོར་གནས་པར་འགྱུར་རོ་ཞེས་ཤེས་པ་ཡིན་ནོ། །སོགས་པ་སྨོས་པ་ནི་སྙིང་མི་མཐོང་བས་ན་འདི་ནི་རིང་པོ་མི་གནས་སོ་སྙམ་དུ་ཤེས་པར་འགྱུར་རོ། །དེ་བཞིན་དུ་རྒྱུ་མཐོང་བ་ལས་ཀྱང་འབྲས་བུ་རྟོགས་པར་འགྱུར་རོ་དུས་ཕྱིས་འབྲས་བུ་འབྱུང་བར་འགྱུར་རོ་ཞེས་བྱ་བར་རོ། །དེ་ལྟ་ན་ཡང་ཐ་དད་པར་རྟོགས་པར་ནུས་པ་ཡིན་ནོ་ཞེས་བྱ་བར་བསམས་པའོ། །འབྱུང་བར་འགྱུར་བའི་དོན་དེ་དང་འབྲེལ་པར་རིག་པའི་རྒྱུ་ལས་འབྱུང་བར་འགྱུར་བའི་དོན་རྗེས་སུ་དཔོག་པར་འགྱུར་བ་ཡིན་ནོ། །གལ་ཏེ་འདི་ཀྱང་འབྲེལ་པ་རྟོགས་པ་པ་ཡོད་དོ་ཞེ་ན། རྒྱུད་དང་བརྟན་པ་ཉིད་དག་ལ་ནི་འབྱུང་བར་འགྱུར་བའི་དོན་དང་འབྲེལ་པར་མངོན་སུམ་གྱིས་རིག་པ་མེད་པ་ཉིད་དོ། །གལ་ཏེ་གཉིས་མེད་པར་སྨྲ་བའི་ལྟར་འབྲེལ་པ་ཞེས་བྱ་བ་མེད་པ་མ་ཡིན་ནམ་དེ་ནི་གཉིས་ལ་བརྟེན་པའི་ཕྱིར་རོ། །དེས་ན་འབྲེལ་པ་ཡོད་ན་རྗེས་སུ་དཔོག་གོ་ཞེས་ཅིའི་ཕྱིར་བརྗོད་སྙམ་ན། འབྲེལ་པ་ལས་ཞེས་གསུངས་སོ། །འདིས་ནི་གཞན་གྱི་ཁས་བླངས་ཀ་ཁོ་ནས་དེ་སྐད་བརྗོད་པ་ཡིན་ནོ་ཞེས་བཤད་པ་ཡིན་ནོ། །ཧ་ཅང་ཐལ་བ་ཉིད་ནི་བུམ་པ་ལས་ཀྱང་སྣམ་བུ་དཔོག་པར་ཐལ་ལོ། །འདི་ལ་གཞན་གྱི་བརྗོད་པ་ནི་མ་མཐོང་བ་ཞེས་བྱ་བའོ། །གལ་ཏེ་ཞེས་བྱ་བ་ནི་གྲུབ་པའི་མཐའི་པའིའོ། །གལ་ཏེ་རྗེས་སུ་དཔག་པས་མཐོང་བ་ཉིད་དུ་བརྗོད་ན་ནི་དེའི་ཚེ་རྗེས་སུ་དཔག་པ་དེ་ཉིད་སེམས་པས་ན་ཇི་ལྟར་ན་རྗེས་སུ་དཔག་པ་དེས་མཐོང་བ་ཞེས་བརྗོད། འོ་ན་མངོན་སུམ་གྱིས་མཐོང་བ་ཉིད་ཡིན་ནོ་ཞེ་ན་རྗེས་སུ་འཇུག་གོ །དེ་ནི་ཞེས་བྱ་བ་ནི་རྗེས་སུ་དཔག་པའོ། །གལ་ཏེ་རྗེས་སུ་དཔག་ལ་ལྐོག་ཏུ་གྱུར་པའི་ཡུལ་ཅན་ཡིན་མོད། དེ་ལྟ་ན་ཡང་མངོན་སུམ་གྱིས་ཇི་ལྟར་མི་རྟོགས་ཤེ་ན། ལྐོག་ཏུ་གྱུར་པ་ལ་ཡང་ཞེས་
གསུངས་སོ། །ལྐོག་ཏུ་གྱུར་པའི་ཡུལ་ཅན་གྱི་རང་བཞིན་གྱིས་ཇི་ལྟར་རྗེས་སུ་དཔག་པ་བདག་གིར་བྱེད་དེ་ཇི་ལྟར་མངོན་སུམ་གྱིས་རྟོགས་པའི་མཚན་ཉིད་ཡིན། ཡང་ཇི་ལྟར་ན་ལྐོག་ཏུ་གྱུར་པའི་ཡུལ་ཅན་རྗེས་སུ་དཔག་པའི་མངོན་སུམ་གྱིས་མི་རྟོགས་ཤེ་ན། ལྐོག་ཏུ་གྱུར་པ་ཞེས་གསུངས་སོ། །ཡུལ་དུ་མི་བྱེད་པས་ནི་ཞེས་བྱ་བ་མངོན་སུམ་གྱིས་སོ། །ཡུལ་དེའི་ཁྱད་པར་ཅན་ནི་ཞེས་བྱ་བ་ནི་ལྐོག་ཏུ་གྱུར་པའི་ཡུལ་གྱི་ཁྱད་པར་ཅན་ནོ། །དེའི་ཡུལ་ཅན་གྱི་རྗེས་སུ་དཔག་པ་མངོན་སུམ་གྱིས་མི་རྟོགས་མོད། རྗེས་སུ་དཔག་པ་ཙམ་ནི་རྟོགས་སོ་ཞེ་ན། འོན་ཏེ་ཞེས་གསུངས་སོ། །གལ་ཏེ་རྗེས་སུ་དཔག་པ་མི་རྟོགས་ན་འོན་ཅི་ཞིག་ཉམས་སུ་མྱོང་སྙམ་ན་རང་གི་ངོ་བོ་ཞེས་གསུངས་སོ། །དེ་ལྟར་ཞེས་བྱ་བ་ནི་རང་གི་ངོ་བོར་རིག་པར་རོ། །འོ་ན་ཏེ་དེ་ཁོ་ན་ལྟར་ཐ་སྙད་བྱེད་པ་ཡིན་ནོ་ཞེས་བྱ་བ་ནི་རྗེས་སུ་དཔག་པ་མཐོང་བའི་མཚན་ཉིད་ཀྱིའོ། །དེ་ལྟ་ཡིན་ནོ་ཞེས་བྱ་བ་གྲུབ་པའི་མཐའོ།། དོགས་པ་ནི་ཐ་དད་པར་ཞེས་བྱ་བའོ། །གྲུབ་པའི་མཐའ་ནི་མཐོང་བ་ཞེས་བྱ་བའོ། །ཐ་དད་པར་ཞེན་པར་ནི་མི་རུང་བ་ཡིན་པའི་ཕྱིར་ན། སྤང་བ་ཁོ་ནར་རིགས་སོ་ཞེས་བྱ་བར་ དགོས་པའོ། །དེ་ལྟའོ་ཞེས་བྱ་བ་ནི་ཐ་དད་པར་མངོན་པར་ཞེན་པ ་མཐོང་བ་ནི། སྤང་པའི་མུ་ནུས་སོ་ཞེས་བྱ་བ་འདིའོ། །ཐ་དད་པ་ཡོད་དོ་ཞེས་བྱ་བ་དེ་ལྟ་བུའོ། །མཚན་ཉིད་ཅན་གྱིས་ཉེས་བར་བསྟེན་པ་གང་ཡིན་པ་དེ་བརྩོན་པའོ། །དེད་ཀྱི་ཐ་མི་དད་པ་ལ་མངོན་པར་ཞེན་པ་ཡང་མཐོང་བ་ཉིད་ཀྱིས་སྤང་བར་མི་ནུས་པའི་ཕྱིར་ཞེས་བྱ་བའི་དོན་ཏོ། །ཁྱེད་ཀྱི་ཡང་ཞེས་བྱ་བ་ནི་ཐ་མི་དད་པར་སྨྲ་བའོ། །དོན་མེད་པ་ཉིད་དོ་ཞེས་བྱ་བ་ནི་ཐ་དད་པ་ལ་མངོན་པར་ཞེན་པ་ནི་མཐོང་བའི་ཕྱིར་ན་དོར་བ་མི་ནུས་ལ་གཉིས་སུ་མེད་པར་བསྟན་པ་འདི་ཡང་ཐ་དད་པར་མངོན་པར་ཞེན་པ་ཀུན་དུ་རྨོངས་པའི་མཚན་ཉིད་སྤང་བའི་དོན་དུ་བསྟན་པ་ཡིན་ནོ་ཞེ་ན། འདི་འགོག་པ་ནི་མ་ཡིན་ཏེ་ཞེས་བྱ་བའོ། །དེ་ལྟ་བུ་བརྗོད་པའི་དོན་དུ་ཞེས་བྱ་བ་ནི་ཐ་དད་པར་མངོན་པར་ཞེན་པ་འདི་ནི་མ་མཐོང་བ་ཁོ་ན་སྟེ། གསལ་བ་ནི་མ་ཡིན་ནོ་ཞེས་དེ་ལྟར་བསྟན་པའི་དོན་དུ་ཉེས་བར་བསྟན་པ་ཡིན་ནོ་ཞེས་བྱ་བ་ནི་། གལ་ཏེ་རེ་ཞིག་མ་མཐོང་ཡང་ཐ་དད་པར་མངོན་པར་ཞེན་པ་དེ་ནི་ཡོད་པ་མ་ཡིན་ནམ། དེས་ན་ཇི་ལྟར་སྤང་ཞེ་ན། དེ་ལྟ་ཡིན་དང་ཞེས་བྱ་བའོ། །མ་
མཐོང་བ་ནི་མེད་པའི་ཕྱིར་ན་མ་མཐོང་བའི་ཐ་དད་པར་ཞེན་པ་ཡང་ཇི་ལྟར་བདེན་ཞེས་བསམས་པའོ། །ཡང་ཇི་ལྟར་ན་ཐ་དད་པ་མཐོང་བ་མེད་སྙམ་ན་འདི་ལྟར་ཞེས་བྱ་བའོ། ཐ་དད་པ་བརྟེན་པ་སྟེ། རྟོགས་པ་ཡོད་པ་མ་ཡིན་པ་ན་དེ་སྐད་ཅེས་བྱ་བའོ། །གལ་ཏེ་ལྟར་བའི་སྣང་བས་ཐ་དད་པ་མི་རྟོགས་ན། དེ་ལྟར་ན་འོ་ན་འདས་པ་དང་མ་འོངས་པ་དག་གིས་རྟོགས་པར་འགྱུར་རོ་ཞེ་ན། སྔ་མ་ཕྱི་མའི་ཞེས་བྱ་བའོ། །སོ་སོར་ཞེས་བྱ་བ་ནི་རེ་རེས་ཐ་དད་པར་མི་འཛིན་ཏོ། །རེ་རེས་ཐ་དད་པར་མི་འཛིན་ཡང་འདུས་ལས་ཞེས་བྱ་བ་སྣ་ཚོགས་ནས་དེ་ལྟར་ཞེས་བྱ་བ་ཐ་དད་པར་འཛིན་པར་འགྱུར་རོ། །དཔེར་ན་བུ་རམ་དང་དོད་གྲ་དག་རེ་རེས་བྱ་བར་མི་ནུས་པའི་འབྲས་བུ་དེ་ཚོགས་ནས་བྱེད་པ་དེ་བཞིན་ནོ་ཞེས་བྱ་བ་ནི་དཔེའི་དོན་ཏོ། །གྲུབ་པའི་མཐའ་ནི་དེར་ནི་ཞེས་བྱ་བའོ། །འབྲས་བུ་གཅིག་པ་ནི་བུར་མ་དང་དོང་གྲ་དག་གི་ཕྱིར་ཏེ། རྒྱུ་དེས་ན་དུས་ནས་ཏེ་ལོག་ན་བྱེད་པ་ཡིན་ནོ། །འདིར་ཡང་ཐ་དད་པར་འཛིན་པའི་མཚན་ཉིད་ཀི་འབྲས་བུ་གཅིག་ཡོད་པའི་ཕྱིར་ན་ལོག་ནས་བྱེད་པར་འགྱུར་རོ་ཞེ་ན། འདིར་ནི་ཞེས་གསུངས་སོ། །དེ་ལས་ཐ་དད་པར་རང་བཞིན་ནི་གཟུང་བ་མེད་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་དྲན་པའི་མཚན་ཉིད་ཀྱི་འབྲས་བུ་ཐ་དད་པ་ཡོད་པ་མ་ཡིན་ནམ། དེས་ན་ལོག་ནས་བྱེད་པ་ཉིད་མི་འགལ་ལོ་ཞེས་བརྗོད་པ་ནི་དེ་ལས་གཞན་པའི་ཞེས་བྱ་བའོ། །སྔ་མ་དང་ཕྱི་མའི་མྱོང་བ་དག་ལས་བྱུང་བ་གང་ཡིན་པ་སྟེ། དེས་ན་དེ་ལས་ལོག་ནས་བྱེད་པར་འགྱུར་རོ་ཞེས་བྱ་བར་བསམས་པའོ། །ལན་ནི་ཐ་དད་པར་ནི་ཞེས་བྱ་བའོ། །གལ་ཏེ་ཉམས་སུ་མྱོང་བ་དེ་ལྟ་ཡང་དྲན་པ་ནི་ཡོད་དོ་སྙམ་ན་ཉམས་མྱོང་མེད་པར་ཞེས་གསུངས་སོ། །གཞན་ཡང་གལ་ཏེ་དྲན་པ་ཁོ་ན་ཉམས་སུ་མྱོང་བ་མེད་ཀྱང་སྔ་མ་དང་ཕྱི་མའི་སེམས་དག་ཐ་དད་པར་འཛིན་པར་བྱེད་པ་ཡིན་ན་དེའི་ཚེ་དྲན་པ་འདི་ནི་ཉམས་སུ་མྱོང་བ་ཁོ་ན་ཡིན་ཏེ་དེས་ན་དྲན་པ་དེ་དང་དུས་མཚུངས་པ་ཉིད་ཀྱིས་སེམས་སྔ་མ་དང་ཕྱི་མ་ཉིད་ནི་རིག་པ་ཡིན་ན་དེ་ཡང་གཉིས་མེད་ཐོབ་པར་འགྱུར་རོ། །དེར་ནི་འབྲས་བུ་གཅིག་པའི་ཞེས་བྱ་བ་ལ་སོགས་པ་ཞེས་བྱ་བ་ལ་སོགས་པ་གཞེས་བྱ་བའོ། །དེས་ཞེས་བྱ་བ་ན་བུ་རམ་དང་དོང་གྲ་དག་གིས་བཟློག་པར་བྱ་བའི་ནད་གང་ཡིན་པ་དེ་ཟློག་པར་བྱེད་པའོ། །སྔ་མ་དང་ཕྱི་མར་རྟོགས་པ་
འབྲས་བུ་ཡིན་ནོ་ཞེ་ན། རྟོགས་པ་ནི་ཞེས་གསུངས་སོ། །དེ་དག་གི་ཞེས་བྱ་བ་ནི་སེམས་སྔ་ཕྱི་དག་གིའོ། །དེ་ཡང་ཞེས་བྱ་བ་ནི་རྟོགས་པའོ། །ཐ་དད་པ་ན་ཞེས་བྱ་བ་ནི་སྔ་མ་དང་ཕྱི་མའི་སེམས་ཀྱི་རང་བཞིན་ལྟར་ཐ་དད་པ་ཉིད་ཡིན་ནའོ། །གཞན་གྱིས་སྨྲས་པ་ནི་སྔ་མ་དང་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་འགོག་པའོ། །དེས་ན་དྲན་པ་ཡང་ཞེས་བྱ་བ་ནི་གཉིས་འཛིན་པའོ། །འོ་ན་སློབ་དཔོན་གྱིས་ཇི་ལྟར་དེ་སྐད་བཤད་ཅེས་ཞེས་བྱ་བར་བལྟའོ། །གཟུགས་དང་རེག་པའི་རྣམ་པར་ཤེས་པ་ཐ་དད་ཀྱང་མ་གྲུབ་པའི་ཕྱིར་རོ་ཞེས་བྱ་བའོ། །འདི་ལ་བརྗོད་པ་ནི་ཐ་དད་པར་འཛིན་པ་ཞེས་བྱ་བའོ། །དེ་ལྟ་བུའི་ཞེས་བྱ་བ་ནི་ཐ་དད་པའིའོ། །འོན་ཏེ་སྔ་མ་དང་ཕྱི་མའི་སེམས་དག་གིས་ཐ་དད་པ་མི་འཛིན་པ་དེ་ལྟ་ན་ཡང་དྲན་པས་འཛིན་པ་ཡིན་ནོ་སྙམ་ན། །གང་གིས་གསུངས་སོ། །གལ་ཏེ་དྲན་པས་སེམས་སྔ་མ་དང་ཕྱི་མ་དག་རང་རིག་གོ་དེ་ཁོ་ནས་དངོས་སུ་བྱེད་དོ་སྙམ་ན་དུས་མཚུངས་པ་ཞེས་བྱ་བའོ། །འདོད་པ་ཡིན་གྱི་ཞེས་བྱ་བ་ནི་ཁྱེད་འདོད་པ་ཡིན་གྱི། ཉམས་མྱོང་ནི་ཐ་དད་པའི་འཛིན་བྱེད་མིན་ནོ་ཞེས་འབྲེལ་ཏོ། །དེའི་ཕྱིར་ན་ཐ་དད་པར་རིག་པ་འདི་ནི་ཀུན་རྫོབ་ཡིན་པར་འགྱུར་རོ། །ཀུན་རྫོབ་ཉིད་བསྒྲུབ་པ་ནི་འདི་ལྟར་ཞེས་བྱ་བའོ། །ཁོ་བོ་ཅག་གིས་གཅིག་ཏུ་འདོད་པ་གང་ཡིན་པ་དེ་ནི་སྣ་ཚོགས་ཏེ། དུ་མར་རྟོགས་པ་སྟེ་ཤེས་པར་འགྱུར་རོ། །རྣམ་པ་གང་གིས་ཤེ་ན། མངོན་སུམ་ནི་དེ་ལྟར་འཇུག་པ་ཡང་མ་ཡིན་ཏེ། དེའི་ཕྱིར་ཞེས་བྱ་བ་ལ་སོགས་པའོ། །འོན་ཏེ་རེ་ཞིག་སྣང་བ་ནི་ཡོད་པ་ཡིན་ཏེ་དེས་ན་དེ་ཙམ་ཁོ་ནས་ཐ་དད་པ་རྟོགས་པར་འགྱུར་རོ་ཞེ་ན་སྣང་པ་ཙམ་གྱིས་ཞེས་བྱ་བའོ། །སྣ་ཚོགས་དང་སྣ་ཚོགས་མིན་ཉིད་ནི་ཐ་དད་པ་དང་ཐ་མི་དད་པར་རྟོགས་པའོ། །གང་གི་ཕྱིར་སྣང་བ་ཙམ་གྱིས་ཐ་དད་པ་དང་ཐ་མི་དད་པ་ཞེས་མི་རྟོགས་པ་དེས་ནའོ། །དྲན་པ་གོམས་པ་ལས་གསལ་བར་འགྱུར་བའི་མངོན་སུམ་གང་ཡིན་པ་དེས་སོ། །གང་ཞིག་ཅེས་བྱ་བ་ནི་ཐ་དད་པ་འཛིན་པའོ། །གོམས་མ་ཀྱང་ཞེས་བྱ་བ་ནི་མི་གསལ་བའི་མངོན་སུམ་སྣང་བའི་རང་བཞིན་གང་ཡིན་པ་དེ་ཉིད་གོམས་པ་ལས་གསལ་བར་སྣང་བ་ཉིད་ཀྱིས་ལྷག་པར་འགྱུར་བ་ཡིན་ན། མི་གསལ་བའི་མངོན་སུམ་གྱིས་ཐ་དད་པ་གཟུང་བ་ཡང་མ་ཡིན་ནོ། །དེས་ན་གོམས་པ་ལས་སྐྱེས་པས་འཛིན་པར་འགྱུར། དེར་ཡང་ཞེས་
བྱ་བ་ནི་གསལ་བའི་མངོན་སུམ་ལ་ཡང་རྣམ་དབྱེ་དེས་ཞེས་བྱ་བ་ནི་ཐ་དད་པ་དང་ཐ་མི་དད་པའི་རྣམ་པར་དབྱེ་བའོ། །དྲན་པ་དེ་ལས་ནི་དྲན་པ་དང་ཉམས་སུ་མྱོང་བ་དག་ཡན་འགར་བར་མྱོང་བ་སྟེ། ཐ་དད་པར་འཛིན་ནོ་ཞེས་བྱ་བའི་དོན་ཏོ། །གལ་ཏེ་དེ་སྐད་བརྗོད་ན་དེའི་ཚེ་ཡང་དུ་མའི་རང་བཞིན་དེ་ཡང་ཁྱེད་ཀྱི་འདོད་པས་དྲན་པ་དང་ཉམས་སུ་མྱོང་བ་དག་གི་ཡིན་པས་དེ་ལ་ཡང་རྣམ་དབེན་ཏེ་རྣམ་པར་དབྱེ་བ་ཡོད་པ་མ་ཡིན་གྱི་འོན་ཀྱང་དྲན་པ་ལ་སྣང་བའི་དྲན་པ་དང་ཉམས་སུ་མྱོང་བ་དག་ཀྱང་གཅིག་ཁོ་ནའོ་ཞེས་བྱ་བའི་དོན་ཏོ། །ཅིའི་ཕྱིར་ཐ་མི་དད་ཅེ་ན་རང་ངམ་ཞེས་བྱ་བའོ། །དེ་ཉིད་དུ་ཞེས་བྱ་བ་ནི་དོན་དམ་པར་རོ། །གལ་ཏེ་ཡང་རྣམ་པར་གཅད་པར་བྱ་བ་མི་ནུས་པ་དེ་ལྟ་ན་ཡང་ཐ་དད་པར་འགྱུར་རོ་སྙམ་ན། གང་ཞིག་ལོགས་སུ་བཅད་ནས་སྐྱོ་བར་མི་ནུས་ཤིང༌། གཞན་དུ་ཞེས་བྱ་བ་འབའ་ཞིག་བལྟ་བར་ཡང་མི་ནུས་པ་ཐ་དད་ན་ཡང་ཅི་ཞིག་བྱར་ཡོད། ཅིའི་ཕྱིར་ཞེ་ན། བླང་དང་དོར་ཉིད་བྱར་མེད་ཕྱིར་རོ། །དེ་ནི་འགའ་ཞིག་སྤང་བའམ། བླང་བར་ནུས་པ་སྲིད་དོ། །དེ་དང་ཞེས་བྱ་བ་ནི་ཉམས་སུ་མྱོང་བ་དང་ངོ༌། །དེ་ཐ་དད་པར་སྨྲ་བའི་ལུགས་ལ་ཡང་ཇི་ལྟར་དྲན་པ་གཞན་ཉིད་ཡིན་ཞེ་ན། ཐམས་ཅད་རྒྱུ་དང་ཞེས་བྱ་བ་སྟེ། རྒྱུ་སྐྱེད་བྱེད་དང་རང་གི་ངོ་བོའི་དབྱེ་བ་སྟེ། རྒྱུའི་དབྱེ་བ་དང་བཅས་པའི་རང་གི་ངོ་བོའི་དབྱེ་བ་ལས་སོ་ཞེས་བྱ་བའི་དོན་ཏོ། །དེ་ཞིག་རྒྱུའི་དབྱེ་བ་ཉིད་བརྗོད་པ་ནི་དེ་ལ་ཞེས་བྱ་བའོ། །དབང་པོའི་ཤེས་པ་ནི་དེ་ལྟར་ཞེས་བྱ་བ་བག་ཆགས་ཙམ་ལས་སྐྱེ་བ་མ་ཡིན་ནོ། །རང་གི་ངོ་བོའི་དབྱེ་བ་བརྗོད་པ་ནི་དྲན་པ་ནི་ཞེས་བྱ་བའོ། །འདི་དག་ནི་ཞེས་བྱ་བ་ནི་དྲན་པ་དང་མྱོང་བ་དག་གོ །ཀ་བ་ལ་སོགས་པ་ལྟར་ཞེས་བྱ་བ་ནི་ཇི་ལྟར་ཁྱེད་ཀྱི་ལྟར་ན། ཀ་བ་ལ་སོགས་པ་ཐ་དད་པ་དེ་བཞིན་དུ་ཞེས་སོ། །རྒྱུ་དང་ལྡན་པ་ཉིད་རིག་པ་གང་ཡིན་པ་དེ་ལ་དེ་སྐད་ཅེས་བྱ་བ་དེ་མེད་པའོ། །དེ་མི་འཛིན་ཕྱིར་ཞེས་བྱ་བ་ནི་རྒྱུ་དེ་མི་འཛིན་པའི་ཕྱིར་གལ་ཏེ་མངོན་སུམ་གྱི་རྒྱུ་མི་འཛིན་པའོ། །དེ་ལྟ་ན་ཡང་རྗེས་སུ་དཔག་པས་འཛིན་ཏོ་སྙམ་ན། རྗེས་སུ་དཔག་པ་ཡང་ཞེས་བྱ་བའོ། །དྲན་པ་ཙམ་དུ་ཟད་ཀྱི་འཛིན་པ་ནི་མ་ཡིན་གྱི་དེའི་རང་བཞིན་མེད་པའི་ཕྱིར་རོ། །འོན་ཏེ་གང་གི་ཚེ་རྒྱུར་མངོན་པར་འདོད་པ་འཛིན་པ་དེ་ཉིད་དུ་འཛིན་མོད་སྙམ་ན་གང་གི་ཚེ་དེ་ཞེས་གསུངས་སོ། །དེ་ནི་རྒྱུ་མངོན་པར་འདོད་པའོ། །འོ་ན་འབྲས་བུ་
འཛིན་པར་འགྱུར་རོ་ཞེ་ན། འབྲས་བུ་འཛིན་པའི་དུས་ན་ཡང་ཞེས་གསུངས་སོ། །འོ་ན་དྲན་པ་ཉིད་ཀྱིས་དེ་རྒྱུ་ཉིད་དུ་རྟོགས་སོ་ཞེ་ན། ཉམས་སུ་མ་མྱོང་བ་ལ་ཞེས་གསུངས་སོ། །རྒྱུ་ནི་མངོན་སུམ་གྱིས་མྱོང་བ་ཁོ་ན་ཡིན་ཏེ། དེས་ན་དྲན་པ་འབྱུང་ངོ་སྙམ་ན་རྒྱུ་ཉིད་དུ་ཞེས་གསུངས་སོ། །དེ་ཞེས་བྱ་བ་ནི་འདས་ཟིན་པའི་རྒྱུ་ཡང་ངོ༌། །གལ་ཏེ་དུས་མཚུངས་པར་མངོན་སུམ་གྱི་རྒྱུ་དང་འབྲས་བུ་ཉིད་དུ་ཉམས་སུ་མྱོང་བ་དེ་ལྟ་ཡིན་ན་ནི་སྔ་མའི་རང་བཞིན་ཞེས་བྱ་བ་ལ་སོགས་པར་སྦྱར་རོ། །འོན་ཏེ་ཞེས་བྱ་བ་ནི་ དགོས་པའོ། །ཇི་ལྟར་མངོན་སུམ་མེད་པར་རྗེས་སུ་དཔག་པ ་འཇུག་སྟེ། གལ་ཏེ་སྔ་མའི་རང་བཞིན་ཉིད་ལ་ཡང་མངོན་སུམ་གྱི་སྤྱོད་ཡུལ་དུ་འགྱུར་ན། དེའི་ཚེ་རྗེས་སུ་དཔག་པས་ཀྱང་རྟོགས་པར་འགྱུར་བ་ཞིག་ན། འདི་ཡང་ཡོད་པ་མ་ཡིན་ནོ་ཞེས་སྟོན་པ་ནི། མངོན་སུམ་གྱིས་ནི་ཞེས་བྱ་བའོ། །སྔར་ཞེས་བྱ་བ་ནི་རྒྱུ་འཛིན་པའི་དུས་ནའོ། །སྔ་མ་ཉིད་དུ་ཞེས་བྱ་བ་ནི་རྒྱུའི་རང་བཞིན་སྔ་མར་གྱུར་བ་ཉིད་དོ། །སྔར་གྱི་མངོན་སུམ་དེས་སྔ་མ་ཉིད་མ་འཛིན་པ་ཅིའི་ཕྱིར་ཞེ་ན། མངོན་སུམ་ཐམས་ཅད་ནི་ཞེས་བྱ་བའོ། །འཛིན་པ་ཕྱི་མ་ལ་ལྟོས་ནས་ཞེས་བྱ་བ་ནི། འབྲས་བུ་འཛིན་པ་ལ་ལྟོས་ནས་སོ། །དེས་ནི་ཞེས་བྱ་བ་ནི་མངོན་སུམ་སྔ་མས་སོ། །ཅིའི་ཕྱིར་མི་འཛིན་ཞེ་ན་རང་བདག་ཉིད་ལ་གནས་ཕྱིར་ཞེས་གསུངས་ཏེ་གཞན་གྱི་ཚུལ་ལུགས་མི་ཤེས་པའི་ཕྱིར་རོ་ཞེས་དགོངས་པའོ། །རང་བདག་ཉིད་ཀྱི་དུས་གང་ཡོད་པའི་དངོས་པོ་དེའི་རང་གི་ངོ་བོ་འཛིན་པའི་མངོན་སུམ་གྱིས་སོ། །མངོན་སུམ་ཕྱི་མ་ལའང་དེ་བཞིན་ནོ་ཞེས་བྱ་བར་རང་གི་འབྲས་བུའི་རང་གི་ངོ་བོ་འཛིན་པའོ། །རང་གི་དུས་ཀྱིས་རང་ངོ་བོ་ཡོངས་སུ་གཅོད་པ་སྔ་མ་ལ་ལྟོས་པའི་བདག་ཉིད་ཇི་ལྟར་འཛིན་པར་འགྱུར་ཞེས་རྗེས་སུ་འཇུག་གོ །དེ་ལ་ཞེས་བྱ་བ་ནི་སྔ་མ་དང་ཕྱི་མ་ལའོ། །དྲན་པས་ཀྱང་ཞེས་བྱ་བ་ནི་རྗེས་སུ་དཔག་པའི་རང་བཞིན་གྱིས་སོ། །རིག་པ་མ་ཡིན་པ་ཞེས་བྱ་བ་ནི་མངོན་སུམ་གྱིས་སྤྱོད་ཡུལ་དུ་མ་བྱས་པ་ལའོ། །རྣམ་པར་རྟོག་པ་ཉིས་པ་སྤང་བའི་དོན་དུ་བརྗོད་པ་ནི་འོན་ཏེ་ཞེས་བྱ་བའོ། །དྲན་པ་ཙམ་ཡིན་གྱི་དེ་ཚད་མ་ནི་མ་ཡིན་ནོ་ཞེ་ན། གང་གིས་ཞེས་བྱ་བ་སྔ་མ་དང་ཕྱི་མ་ལ་ལྟོས་པ་རིག་པ་གང་གིས་འབྲས་བུ་རིག་པར་འགྱུར་བ་དྲན་པ་ཙམ་དེ་ལས་སྔ་མ་དང་ཕྱི་མ་ལ་ལྟོས་པའི་རིག་པར་ཇི་ལྟར་འགྱུར། གཅིག་ཉིད་དུ་ཞེས་བྱ་བ་སྔ་མ་དང་ཕྱི་
མའི་ཞེས་པ་དག་གཅིག་ཉིད་དུ་གཟུང་བའོ། །ངས་འབའ་ཞིག་མཐོང་བ་གང་ཡིན་བ་དེ་ཉིད་ཚོགས་པ་འདི་ཡིན་ནོ་ཞེའམ་བདག་ཉིད་ཚོགས་པར་མཐོང་བ་གང་ཡིན་པ་དེ་ཉིད་འབའ་ཞིག་པ་འདི་ཡིན་ནོ་ཞེས་སྔ་མ་དང་ཕྱི་མ་དག་གཅིག་ཉིད་དུ་དོ་ཤེས་པ་ཉིད་ལྷག་པར་ཞེན་པ་ཉིད་དེ། དེས་ནི་རྣམ་པར་འབྱེད་པ་སྟེ། སྔོན་པོའི་རྣམ་པ་ལོགས་སུ་བྱེད་པ་ཡིན་ནོ། །དེས་ན་གཉིས་སུ་མེད་པར་ཇི་ལྟར་འགྱུར་ཞེས་བསམས་པའོ། །འདི་གྲུབ་པའི་མཐའ་པས་བརྗོད་པ་ནི་དེ་ཉིད་ཡིན་ནོ་ཞེས་བྱ་བའོ། །དེ་ཉིད་ཅེས་བྱ་བ་ནི་དྲན་པའི་རང་བཞིན་ཡིན་ལ་འདི་ཞེས་བྱ་བ་ནི་ཉམས་སུ་མྱོང་བའི་རང་བཞིན་ཡིན་ཏེ་སྐལ་ལྡན་ཆེན་པོ་བཤད་པ་མཛད་པའི་བཞེད་པས་ནི། དེ་ཉིད་ཀྱིས་མངོན་སུམ་ཡིན་པའི་ཕྱིར་རོ། །དྲན་པ་དང་འདིའོ་ཞེས་འཛིན་པ་དག་མཐོང་བ་ཡིན་ནོ། །དྲན་པ་ཡང་ཚད་མ་མ་ཡིན་ཏེ། དེས་སྔ་མ་དང་ད་ལྟར་བ་གཅིག་ཏུ་ཇི་ལྟར་འཛིན་ཞེས་ དགོས་པའོ། །འོ་ན་ཞེས་བྱ་བ་ནི་དོགས་པ ་བསུ་བའོ། །ཇི་ལྟར་ཤིང་རྟ་དང་ཤིང་རྟས་བསྐྱོད་པའི་སྐྱེས་བུ་དེ་གཉིས་ཐ་དད་པར་རྟོགས་པ་ཇི་ལྟ་བ་བཞིན་ནོ་ཞེས་བྱ་བ་ནི་དཔེའི་དོན་ཏོ། །འདི་ལ་བརྗོད་པ་ནི་གལ་ཏེ་ཞེས་བྱ་བའོ། །དེ་ལྟ་བུ་ཁོ་ནར་ཞེས་བྱ་བ་ནི་ཐ་དད་པ་ཁོ་ནར་རོ། །རྣམ་པར་དཔྱད་པ་ཉིད་བརྗོད་པ་ཉིད་རང་པ་དང་ཞེས་བྱ་བའོ། །དེ་ལྟ་ཡིན་ན་ཞེས་བྱ་བ་ནི་གཅིག་ཏུ་རྟོགས་ནའོ། །དེ་ཉིད་དུ་ཞེས་བྱ་བ་ནི་དྲན་པ་དང་མངོན་སུམ་གྱི་རྣམ་པ་ཅན་ཉིད་དུའོ། །དྲན་པའམ་མངོན་སུམ་གཅིག་ཁོ་ནར་འགྱུར་རོ་ཞེས་བྱ་བའི་དོན་ཏོ། །དེ་ལྟར་འགྱུར་མོད་ཅི་སྐྱོན་སྙམ་ན། དེ་ལྟ་ཡིན་ན་ཞེས་གསུངས་སོ། །དྲན་པའི་རྣམ་པས་ཞེས་བྱ་བ་ནི་དྲན་པར་བྱས་སོ། །མ་རྟོགས་པ་ནི་ཉམས་སུ་མ་མྱོང་བའོ། །སྔ་མ་ཉིད་ཀྱང་མངོན་དུ་བྱེད་པའི་རྣམ་པ་ཁོ་ནས་རྟོགས་སོ་ཞེ་ན། མངོན་སུམ་དུ་ཞེས་གསུངས་སོ། །དོན་རྣམས་ཀྱིས་གཞན་དེ་སྔོན་པོའམ་སེར་པོ་ལ་སོགས་པའི་རང་བཞིན་ཐ་དད་པ་ཉིད་དམ་ཅིག་ཤོས་གཞན་མ་ཡིན་པ་ནའོ། །རྟོགས་པ་ལ་ལྟོས་ཏེ་གྲུབ་པ་མ་ཡིན་པའི་ཐ་དད་པའོ། །གྲུབ་པའི་མཐའ་པས་བརྗོད་པ་ནི་འདི་ནི་ཞེས་བྱ་བ་སྟེ། ཐ་དད་པའི་ཐ་སྙད་མེད་པར་འགྱུར་རོ་ཞེས་བརྗོད་པ་གང་ཡིན་པའོ། །གཞན་གྱིས་མི་མཚུངས་ཏེ་ཞེས་སྨྲས་སོ། །དེ་དོན་དུ་གཉེར་བ་ཞེས་བྱ་བ་ནི་ཐོབ་པར་བྱ་བ་དོན་དུ་གཉེར་བའོ། །འདི་ཞེས་བྱ་བ་ནི་འཇུག་པའོ། །དེ་ཞེས་བྱ་བ་ནི་ཐོབ་པར་བྱ་བའོ། །ཤེས་ན་ཞེས་བྱ་བ་
ནི་མངོན་དུ་བྱེད་པའི་ཤེས་པས་ཉམས་སུ་མྱོང་བ་ནའོ། །འཇུག་པས་ཀྱང་དེའི་ཡུལ་ཅན་མངོན་དུ་བྱེད་པའི་ཤེས་པ་སྐྱེད་པ་ཉིད་ཐོབ་པ་ཡིན་གྱི་གཞན་ནི་མ་ཡིན་ནོ། །གལ་ཏེ་དང་པོ་སྐྱེས་ན་དེའི་ཚེ་ཅིའི་དོན་དུ་འཇུག་པར་བྱེད། མོ་གཤམ་གྱི་བུ་ལ་ཞེས་བྱ་བ་མངོན་དུ་མ་བྱས་པར་ཁྱད་པར་མེད་པའི་ཕྱིར་རོ། །མོ་གཤམ་གྱི་བུ་དེ་དེ་མེད་པའི་ཕྱིར་དང་ཐོབ་པར་བྱ་བ་འདི་ནི་ཡོད་པའི་ཕྱིར་རོ། །འདི་ཁོ་ན་ལ་འཇུག་གི་མོ་གཤམ་གྱི་བུ་ལ་ནི་མ་ཡིན་པ་ལ་བརྗོད་པ་ནི་དེ་ཉིད་ཅེས་བྱ་བའོ། །མངོན་དུ་བྱེད་པའི་ཤེས་པ་མེད་ན་ཐོབ་པར་བྱ་བ་ནི་ཡོད་ལ་མོ་གཤམ་གྱི་བུ་ཉིད་མེད་དོ་ཞེས་བྱ་བ་འདི་ཉིད་ཇི་ལྟར་ཤེས་དེ་ལྟར་ན་མཐོང་བ་ལ་སོགས་པ་ལས་ཡོད་པ་ཡིན་ནོ་ཞེས་ཤེས་པ་ཡིན་ནོ་ཞེ་ན། རེག་པ་ལ་སོགས་པ་ཞེས་གསུངས་སོ། །རིག་པ་མེད་པ་ནི་རིག་པ་ཡོད་པ་མ་ཡིན་པའོ། །རིག་ཅེ་ན་ཞེས་བྱ་བ་ནི་མངོན་དུ་བྱས་ཤེ་ནའོ། །འདི་ལ་བརྗོད་པ་ནི་འོ་ན་ཞེས་བྱ་བའོ། །འཇུག་པའི་འབྲས་བུ་མངོན་དུ་བྱེད་པ་ནི་ཡོད་ཟིན་པའི་ཕྱིར་རོ་ཞེས་དགོངས་པའོ། །དེའི་ཕྱིར་ཁྱད་པར་ལ་ཐ་དད་པ་རིག་པ་ཡིན་ནོ་ཞེ་ན། དེའི་ཚེ་ཁྱད་པར་མ་རྟོགས་པའི་ཕྱིར། ཇི་ལྟར་ཁྱད་པར་ལས་འཇུག་པར་འགྱུར། གལ་ཏེ་སྤྱི་ཁྱད་པར་ལས་ཐ་མི་དད་པ་ཡིན་ན། སྤྱི་དེ་མངོན་དུ་བྱས་པ་ན་ཁྱད་པར་ཡང་མངོན་སུམ་དུ་བྱས་པས་ནི་ཅིའི་དོན་དུ་འཇུག །སྤྱི་ཐ་དད་པ་དང་ཐ་མི་དད་པ་ཁས་ལེན་ན་ནི་ཇི་ལྟར་དེ་རང་བཞིན་གང་གིས་སྤྱི་ཐ་དད་པའི་རང་བཞིན་དེས་ནི་རྟོགས་སུ་ཟིན་ཀྱང་ཁྱད་པར་མ་རྟོགས་པའི་ཕྱིར་ན། ཁྱད་པར་ཐ་མི་དད་པ་དེ་ལ་མི་འཇུག་པ་ཁོ་ནའོ། །ཇི་ལྟར་དེ་རང་བཞིན་གང་གིས་སྤྱི་ཐ་མི་དད་པའི་རང་བཞིན་དེས་ནི་སྤྱི་རྟོགས་པ་ན། ཁྱད་པར་ཡང་རྟོགས་པའི་ཕྱིར་ཐོབ་ཟིན་པས་དེས་ཞུགས་པ་ལ་དོན་ཅི་ཡོད། ཅི་མངོན་སུམ་ལས་འཇུག་པ་མཐོང་ངམ་འོན་ཏེ་རྗེས་སུ་དཔག་པ་ལས་ཕྱོགས་དང་པོ་ལ་རེ་ཞིག་བརྗོད་པ་ནི། རང་དོན་རིག་ཕྱིར་ཞེས་གསུངས་ཏེ། རང་གི་ཡུལ་གྱི་རང་བཞིན་ཙམ་ཞིག་མཐོང་བའི་ཕྱིར་རོ། །འོན་ཏེ་འཇུག་པའི་ཡང་རང་གི་ཡུལ་གྱི་རང་བཞིན་ཉིད་མིན་ན་དེས་ན་དེ་ཡང་མངོན་སུམ་གྱིས་རིག་པ་ཡིན་ནོ་སྙམ་ན། འཇུག་པ་སྔ་ཕྱིའི་ཞེས་གསུངས་སོ། །དེ་ལ་ཞེས་བྱ་བ་ནི་སྔ་མ་དང་ཕྱི་མའི་རང་བཞིན་ལའོ། །དེའི་ཕྱིར་ཕྱིའི་དོན་ལ་ཡང་རྣམ་པ་ཐམས་ཅད་དུ་ཡང་འཇུག་པའི་འཐད་པ་
ཡིན་པའི་ཕྱིར་ན། ཕ་རོལ་པོས་བདག་ཅག་ལ་གཉིས་པ་ལ་ཡང་ཇི་ལྟར་འཇུག་བ་སྲིད་ཅེས་བྱ་བ་དེ་ལྟ་བུའི་རྣམ་པར་རྩོད་པ་གང་ཡིན་དེ་གསལ་བ་ཡིན་ནོ། །འདི་ཇི་ལྟར་གསལ་སྙམ་ན་དོན་འདི་ནི་ཞེས་བྱ་བ་སྟེ། འདི་ནི་གཞན་ཡིན་ལ་བདག་ནི་གཞན་མ་ཡིན་ནོ་ཞེས་བྱ་བའི་དོན་འདི་ནི་བདག་དང་གཞན་ལ་ཡང་མ་གྲུབ་པའི་ཕྱིར་རོ། །དོན་འདི་རང་བཞིན་ལ་གྲུབ་པ་མ་ཡིན་ནོ་ཞེས་བྱ་བ་འདི་ཉིད་གང་ལས་གྲུབ་སྙམ་ན་འདི་ལྟར་སྐྱེ་བ་གྲུབ་པ་ནི་རང་རིག་པ་ཉིད་ཡིན་གྱི་ཞེས་གསུངས་སོ། །འདྲི་བར་བྱེད་པ་བདག་དང་འཆད་པར་བྱེད་པ་གཞན་འདི་ཞེས་དེ་ལྟར་རྣམ་པ་འདིས་རྒོལ་བ་གཉིག་ཡང་རང་གི་རྣ་པར་ཉེ་བར་བསྒྱུར་བའི་ཤེས་པ་རིག་བ་ཉིད་དཔེར་ན་རྨི་ལམ་གྱིས་རྟོགས་པ་རྒོལ་བ་དང་ཕྱིར་རྒོལ་བའི་རྣམ་བ་ཡིན་གྱི་རྟོགས་པས་ཉེ་བར་བསྒྱུར་བ་རིག་པ་ཙམ་ཡིན་བ་བཞིན་ཏེ་དོན་དམ་པར་ནི་རྣམ་པར་དབྱེ་བ་ཡོད་པ་མ་ཡིན་ནོ། །སྨྱོན་པའི་རྟོགས་པས་ཡང་མགྱོགས་འགྲོ་ལ་སོགས་པའི་རྣམ་པ་ཅན་གྱི་རྟོགས་པ་རིག་བ་ཙམ་ཡིན་གྱི། མགྱོགས་འགྲོ་ལ་སོགས་པའི་རྣམ་པ་རྣམ་པར་དབྱེ་བ་ནི་ཡོད་པ་མ་ཡིན་པ་བཞིན་ནོ། །འོ་ན་ནི་ཞེས་བྱ་བ་ལ་སོགས་པས་དོགས་པ་བསུ་ནས་བརྗོད་པ་ནི་འདི་ཞེས་བྱ་བ་ལ་སོགས་པའོ། །གཞན་གྱིས་ཞེས་བྱ་བ་ནི་ཕྱིར་རྒོལ་བས་སོ། །འདི་ལ་བརྗོད་པ་ནི་ཅི་ཞེས་བྱ་བའོ། །ཇི་ལྟར་བྱེད་པ་མ་མཐོང་སྙམ་ན་ཇི་ལྟར་ཞེས་བྱ་བའོ། །འོ་ན་ཇི་ལྟར་ཞེས་བྱ་བ་ནི་དགོངས་པའོ། །གྲུབ་པའི་མཐའ་ནི་ཁྱེད་ཀྱིས་ཞེས་བྱ་བའོ། །གལ་ཏེ་དུ་བ་ལ་སོགས་པ་མེ་ལ་སོགས་པ་ལ་ཡོད་པར་མངོན་སུམ་གྱིས་དམིགས་པ་ཉིད་མ་ཡིན་ནམ་སྙམ་ན། རྒྱུ་དང་འབྲས་བུའི་ཞེས་གསུངས་སོ། །དོན་ནི་འདི་ཡིན་ཏེ་རེ་ཞིག་རིག་པ་བདག་ཉིད་ནི་ལྡོག་པ་ཉམས་སུ་མྱོང་བ་མ་ཡིན་ཏེ། ལྡོག་པའི་དུས་ན་རང་ཉིད་མེད་པའི་ཕྱིར་རོ། །རིག་པ་གཞན་གྱིས་བྱང་སྤྱོད་ཡུལ་དུ་མི་འགྱུར་བ་ཉིད་དུའོ། །དེས་ཀྱང་དེ་མེད་པར་ཇི་ལྟར་འཛིན་ཞེས་བྱ་བའོ། །ཅེ་སྟེ་རེས་འགའ་བ་ཉིད་དུ་ཡང་ཡོད་པ་ཁྱོད་ཀྱིས་རྟོགས་སམ་ཞེས་འབྲེལ་ཏོ། །འོ་ན་སློབ་དཔོན་གྱིས་དེ་ཇི་ལྟར་བཤད་སྙམ་ན། ཐ་དད་པར་སྨྲ་བ་ལ་ཞེས་གསུངས་སོ། །འདིར་སྣ་ཚོགས་གཉིས་མེད་འདི་ནི་ཚིག་རེ་རེ་ལ་ཡང་ལོག་པར་རྟོགས་པ་བརྒྱ་ཕྲག་དུ་མ་དང་འབྲེལ་བ་ཡིན་མོད་ཀྱི། གཞུང་མངས་ཀྱིས་འཇིགས་པས་ན་བདག་ཅག་གིས་མ་བཀོད་དོ། །དེའི་ཕྱེད་ལ་སོགས་པར་ཞེས་བྱ་བ་ནི།
སྔར་མཐོང་བ་གང་ཡིན་པ་དེའི་ཕྱེད་དམ་ཅུང་ཟད་མ་རྫོགས་པར་ཞེས་བྱ་བའི་དོན་ཏོ། །སེམས་མིན་ཞེས་བྱ་བའི་ཕྱི་རོལ་བའོ། །གལ་ཏེ་དངོས་པོ་ཇི་ལྟ་ཇི་ལྟར་མཐོང་བ་དེ་དེ་ལྟ་བུ་ཁོ་ནར་སྐྱེས་པ་ཡིན་ན། དེའི་ཚེ་ལྐོག་ཏུ་གྱུར་པ་ཉིད་དང་གཞན་གྱིས་བལྟ་བར་བྱ་བ་ཉིད་དུ་ཡང་མ་མཐོང་བ་དེས་ན་རྟོག་པ་ཉིད་དམ། གཞན་གྱིས་བལྟ་བར་བྱ་བ་ཉིད་དུ་མ་སྐྱེས་པར་འགྱུར་རོ། །སྐྱེས་པ་ཡང་མ་ཡིན་ཏེ། དེ་ལྟ་མ་ཡིན་ན་ཕྱི་རོལ་ཉིད་ཉམས་པར་འགྱུར་རོ་སྙམ་དུ་དགོངས་པའོ། །ཕྱོགས་ཉིད་ལ་གནོད་པར་བྱེད་པ་གཞན་བརྗོད་པ་ནི། རྒྱུ་གཞན་གྱིས་ནི་ཞེས་བྱ་བའོ། །ཡང་ཇི་ལྟར་ན་ལྐོག་ཏུ་གྱུར་པ་ཉིད་དང་གཞན་གྱིས་བལྟ་བར་བྱ་བ་དངོས་པོ་མ་སྐྱེས་ཤེ་ན་དངོས་པོ་ནི་ཞེས་བྱ་བ་གསུངས་སོ། །ཚིག་ལེའུར་བྱས་པ་གཉིས་འགྲེལ་པ་ནི། རྒྱུ་གཞན་ལས་ཞེས་བྱ་བའོ། །འཛིན་པའི་རྣམ་པ་དང་འདྲ་བར་ཞེས་བྱ་བ་ནི་ཤེས་པ་བཞིན་དུའོ། །དོན་ཁོ་ནའོ་ཞེས་བྱ་བ་ནི་ཤེས་པ་མ་ཡིན་པའོ། །རེ་ཞིག་བདེ་བ་ལ་སོགས་པ་ནི་དམིགས་པར་བྱ་བའི་རང་བཞིན་ཡིན་ཡང་རྣམ་པར་ཤེས་པའི་རང་བཞིན་ནི་མ་ཡིན་ནོ་ཞེས་བརྗོད་པ་ནི་ནེ་པ་ལས་ཞེས་བྱ་བའོ། །གལ་ཏེ་དེ་ཡང་དོན་གྱི་རང་བཞིན་ཡིན་ན་དེའི་ཚེ་སྔོན་པོ་ལ་སོགས་པ་བཞིན་གཞན་གྱིས་ཅི་སྟེ་དམིགས་ཤེ་ན། ནང་གི་ཞེས་སྨོས་ཏེ་ནང་ཡིན་པའི་ཕྱིར་གཞན་གྱིས་དམིགས་པ་མ་ཡིན་ནོ་ཞེས་བསམས་པའོ། །གཞན་དག་ཤེས་པ་གྲུབ་པར་བྱ་བའི་དོན་དུ་ཚད་མ་ཉེ་བར་འགོད་པ་ནི་གང་གིས་ཞེས་བྱ་བའོ། །འདི་ལ་བརྗོད་པ་ནི་དེ་ཡང་མིན་ཞེས་བྱ་བའོ། །གང་གི་ཚེ་ཤེས་པ་ཞེས་བྱ་བ་མེད་པ་དེའི་ཚེ། དམིགས་པར་བྱ་བ་རང་ཉིད་རིག་པ་ཡིན་པར་འགྱུར་རོ། །དེས་ན་ཤེས་པ་ཡོད་པ་ཉིད་སྒྲུབ་པར་བྱེད་པར་ཇི་ལྟར་འགྱུར་གཞན་དག་ཤེས་པ་ཡོད་པར་བསྒྲུབ་བའི་ཕྱིར་སྨྲ་བ་ནི་དམིགས་པར་བྱ་བ་ཉིད་དམིགས་པ་ཞེས་བྱ་བ་ལ། དམིགས་པ་པོ་ནི་བདག་ཡིན་ལ་དམིགས་པར་བྱེད་པ་ཞེས་བྱ་བ་ནི་དམིགས་པའི་བྱ་བ་སྟེ། ཤེས་པ་ཞེས་བྱ་བའི་དོན་ཏོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་ཤེས་པ་ཞེས་བྱ་བ་ཡོད་པ་མ་ཡིན་ན། དེའི་ཚེ་འདི་གང་གིས་དམིགས་ཞེས་བརྒལ་ཞིང་བརྟག་པ་ན་གལ་ཏེ་དོན་གྱིས་གོ་བ་མི་འཇུག་ན་དེའི་ཚེ་ལན་ཉིད་མེད་པར་འགྱུར་རོ་ཞེས་བྱ་བ་ཡིན་ལ། གལ་ཏེ་གཞན་གྱིས་དམིགས་པར་བྱ་བ་གང་
ཡིན་པ་དེ་གཏན་ཚིགས་ཡིན་ན་དེའི་ཚི་གང་གིས་དམིགས་པར་བྱེད་དེ། མ་གྲུབ་པ་ནི་གཏན་ཚིགས་སུ་མི་རུང་བའི་ཕྱིར་རོ། །གལ་ཏེ་གཞན་གྱིས་དམིགས་པར་བྱ་བ་དེ་ཡང་གཞན་གྱིས་ཏེ། གཞན་གྱིས་དམིགས་པར་བྱ་བའི་མཚན་ཉིད་གཞན་དག་གིས་དམིགས་པ་ཡིན་ན། དེ་ལྟ་ཡིན་ན་རེ་ཞིག་གཞན་གྱིས་དམིགས་པར་བྱ་བ་ཉིད་ནི་ཤེས་པའི་རྟགས་ཡིན་ལ། གཞན་གྱིས་དམིགས་པར་བྱ་བ་ཉིད་དེ་ཡང་དམིགས་པ་ཡིན་ཏེ། དེས་ན་དེ་ལ་ཡང་གཞན་གྱིས་དམིགས་པར་བྱ་བ་ཉིད་ཡོད་དེ་དེས་ན་དེ་ལ་དེ་རྗེས་སུ་དཔོག་པ་ཡིན་ནོ་ཞེ་ན། འདི་ལ་བཤད་པ་ནི་དེ་ལྟ་ན་ནི་ཞེས་བྱ་བའོ། །གཏན་ཚིགས་དེ་ཡང་གཞན་གྱིས་དམིགས་པར་བྱ་བ་ཡིན་ལ་དེ་ཡང་གཞན་གྱིས་ཡིན་ན་ཐུག་པ་མེད་དོ། །རྣམ་པར་རྟོག་པ་གཉིས་པ་ལ་བརྗོད་པ་ནི་རང་ཉིད་ཀྱིས་ནི་ཞེས་བྱ་བའོ། །གཟུང་བ་ལ་ཡང་རང་ཉིད་དམིགས་པར་ཐལ་ལོ། །ཇི་ལྟར་འཛིན་པར་བྱེད་པ་རང་ཉིད་ཀྱིས་དམིགས་པར་བྱ་བའི་རང་བཞིན་ཡིན་པ་དེ་བཞིན་དུ་གཟུང་བར་བྱ་བ་ཡང་ཡིན་པར་ཐལ་ལོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བས་དོགས་པ་བསུ་ནས་བརྗོད་པ་ནི་གལ་ཏེ་གཞན་ལ་ཞེས་བྱ་བའོ། །གཞན་ལ་ལྟོས་པ་གང་ཡིན་པ་དེ་གཞན་མེད་པར་གཞན་ལ་ལྟོས་པ་ཉིད་དུ་ཇི་ལྟར་འགྱུར་ཏེ། གཞན་ལ་ལྟོས་པ་མ་ཡིན་པ་ཁོ་ན་ཞེས་པའི་དོན་ཏོ། །དེས་ན་གལ་ཏེ་གཞན་ལ་ལྟོས་པར་རིག་ན་དེའི་ཚེ་གཞན་ཡང་ཡང་རིག་པར་འགྱུར་རོ། །འོན་ཏེ་གཞན་ཐེ་ཚོམ་གྱི་ཡུལ་ཡིན་པ་དེ་ལས་གཞན་ལ་ལྟོས་པ་ཉིད་རྟོགས་པ་ཡིན་ནོ་ཞེ་ན། ཐེ་ཚོམ་ཟ་ན་ཞེས་གསུངས་སོ། །གལ་ཏེ་གཞན་ལ་ལྟོས་པ་ཉིད་ཐེ་ཚོམ་ཟ་བ་དེ་ལྟ་ན་ཡང་ཤེས་པ་ཡོད་པ་ལ་གཞན་ལ་ལྟོས་པ་ཉིད་གཏན་ཚིགས་སུ་འགྱུར་རོ་སྙམ་ན་གཏན་ཚིགས་གཞན་ལ་ལྟོས་པ་ཉིད་མ་ངེས་པས་ན། ངེས་པར་བྱེད་པ་ཞེས་བྱ་བ་ཤེས་པ་ཡོད་པར་ངེས་པར་བྱེད་པའོ། །བུམ་པ་ལ་སོགས་པ་ལ་རང་བཞིན་གཉིས་ཡོད་དེ་བདག་ལ་ལྟོས་པའི་རིག་བྱ་ཉིད་དོ་ཞེས་ཁས་བླངས་ནས་གཞན་དག་བརྗོད་པ་ནི། འོན་ཏེ་བདག་ལྟོས་ཞེས་བྱ་བའོ། །འདི་བརྗོད་པ་ནི་དེ་ཙམ་གྱིས་ནི་ཞེས་བྱ་བའོ། །གལ་ཏེ་བུམ་པ་དང་སྣམ་བུ་དང་ལུས་ལ་སོགས་པ་ནི་ཐམས་ཅད་བདག་རིག་པ་ཡིན་ན། དེའི་ཚེ་ཇི་ལྟར་ང་ནི་ཞེས་བྱ་བ་ལ་སོགས་པར་སྦྱར་རོ། །གལ་ཏེ་གཞི་མཐུན་དབང་གིས་ན། །ཞེས་བྱ་བ་འདི་འཇིག་རྟེན་གྱིས་བརྗོད་པ་སྟེ། དཔེར་ན་རྒྱལ་པོའི་བཀའ་དྲིན་
གྱིས། །ཞེས་བྱ་བ་བཞིན་ནོ། །བདག་ནི་དཀར་ཤམ་བདག་ནི་སྔོ་བསངས་ཞེས་བྱ་བ་ལ་སོགས་པའོ། །གཞན་ཡང་བརྗོད་པ་ནི་གལ་ཏེ་གང་ལ་གཞི་མཐུན་པ་ཡོད་པ་དེར་གདོན་མི་ཟ་བར་གཅིག་འགྱུར་ནའོ། །དེ་མེད་པས་ཞེས་བྱ་བ་ནི་གཅིག་ཉིད་མེད་པས་སོ། །དུ་མར་ཞེས་བྱ་བ་གཞི་མཐུན་པ་མེད་པར་རོ། །དེའི་ཚེ་གཞི་མཐུན་པ་གཅིག་ཉིད་དང༌། དེ་མེད་པ་དུ་མའི་སྒྲུབ་པར་བྱེད་པར་འགྱུར་རོ། །དེ་ལྟར་མ་གྱུར་ན་སྟེ་ཇི་སྐད་བརྗོད་པ་ཁས་མི་ལེན་ན། གྲུབ་བྱ་མ་ཡིན་ཞེས་བྱ་བ་ནི་གཞི་མཐུན་པ་ལས་གཅིག་ཉིད་མ་ཡིན་ལ། གཞི་མཐུན་བ་མེད་བ་ལས་བཟློག་པ་དུ་མ་ཉིད་ཀྱང་མ་ཡིན་ནོ། །འོ་ན་ཏེ་གཞི་མཐུན་པ་མེད་པ་ལས་དུ་མ་ཉིད་ཡོད་པ་ཡིན་ནོ་ཞེས་བརྒྱ་ལ་བརྗོད་པར་འོངས་པས་དེ་ལ་བརྗོད་པ་ནི་དེ་བཞིན་དུ་ཞེས་བྱ་བས་དཔེ་ཡིན་ཏེ། དེ་ལྟ་བུ་ཡང་ཞེས་བྱ་བའི་དོན་ཏོ། །གལ་ཏེ་ཐ་དད་པ་མེད་པར་མཐོང་བ་གཅིག་གིས་སྒྲ་གཅན་གྱི་མགོ་ཞེས་བྱ་བ་དེ་བཞིན་མཐུན་མ་ཡིན་པས་རབ་ཏུ་བསྒྲུབས་པའི་དུ་མ་ཉིད་ལ་གནོད་ན། དེའི་ཚེ་འདིར་ཡང་ཞེས་བྱ་བ་བུམ་པ་དང་སྣམ་བུ་དང་ལུས་ལ་སོགས་པ་ལ་ཡང་ཐ་དད་པར་ལྟ་བར་སྒྲོ་བཏགས་པ་ལ་གནོད་པར་བྱེད་པ་དང་རིག་པ་ཡོད་པ་ཡིན་ནོ། །དེ་ལས་ལོག་པར་ཞེས་བྱ་བས་ཐ་མི་དད་པར་དམིགས་པས་སོ། །སྔོན་པོ་དང་ལུས་དང་བདེ་བ་ལ་སོགས་པ་དང༌། རིག་པ་ནི་ཐ་དད་པ་དང་ལྡན་པ་ཞེས་བྱ་བ་ཐ་དད་པ་དང་བཅས་པ་ཉིད་མ་ཡིན་ནོ། །གང་གིས་ཞེས་བྱ་བ་ནི་གཞི་མཐུན་པ་མཐོང་བ་མེད་པས་སོ། །རིག་པའི་དོན་ནི་སྐྱེས་སོ་ཞེས་བྱ་བ་རྣམ་བ་འདིས་གཞི་མཐུན་པ་མཐོང་བ་མེད་དམ། ཅི་སྟེ་ཡོད་པ་ཁོ་ནའོ་ཞེས་བྱ་བའི་དོན་ཏོ། །རྗེས་འགྲོ་ཞེས་བྱ་པ་ནི་ལུས་སྔོན་པོ་དང་སེར་པོ་ལ་སོགས་པ་རིག་པར་རྗེས་སུ་འགྲོ་བའོ། །སྔོན་པོ་ལ་སོགས་པ་ནི་དེ་དག་ལས་བཟློག་པ་ཡིན་ནོ། །གལ་ཏེ་དོན་དམ་པར་ཐ་དད་པ་མེད་ན། རྗེས་སུ་འགྲོ་བ་དང་ལྡོག་པར་རྟོགས་པ་ཡང་ཇི་ལྟར་ཞེ་ན། རྗེས་འགྲོ་ལྡོག་པར་རིག་པ་ནི། །ཞེས་གསུངས་སོ། །རྗེས་སུ་འགྲོ་བ་དག་ལྡོག་པ་པ་ཉིད་སྒྲུབ་པར་བྱེད་པ་ནི་གཟུགས་ལ་སོགས་པ་ནི་ཞེས་བྱ་བའོ། །གཞན་ན་ཡང་ཞེས་བྱ་བ་ནི་ཡུལ་དང་དུས་གཞན་ན་ལུས་མེད་པར་ཡང་གཟུགས་ལ་སོགས་པ་ཡོད་པ་ཉིད་དོ། །འདིས་ནི་ལུས་ལྡོག་པ་དང་སྔོན་པོ་ལ་སོགས་པ་ནི་རྗེས་སུ་འགྲོ་བར་སྟོན་ཏོ། །བདག་ཁོ་ནས་སྔོན་པོ་དང་སེར་པོ་མཐོང་ངོ་
ཞེས་ལྷག་པར་ཞེན་པ་ལས་ནི་རྗེས་སུ་འགྲོ་བ་དང་སྔོན་པོ་ལ་སོགས་པ་ནི་ལྡོག་པ་ཡིན་ནོ་ཞེས་ཀྱང་རྟོགས་པར་བྱ་བའོ། །ཡུལ་དང་དུས་དང་རང་བཞིན་རྣམས་འབྲེལ་པ་སྟེ། དེ་དག་ལ་ངེས་པའི་ཕྱིར་རོ། །གལ་ཏེ་རྗེས་སུ་འགོ་པ་དང་ལྡོག་པ་དག་ཀྱང་དོན་དམ་པར་རིག་པ་ཡིན་ན་དེའི་ཚེ་རང་ཉིད་གཉིས་སུ་མེད་པར་མ་ཡིན་ནོ་ཞེས་རྟོགས་པར་འགྱུར་རོ་ཞེ་ན་རྗེས་སུ་ཞེས་གསུངས་སོ། །རྗེས་འགྲོ་དང་ཞེས་བྱ་བ་ནི་ཐ་མི་དད་པ་ཉིད་ཀྱང་ངོ༌། །ཡང་ཇི་ལྟར་ན་མངོན་སུམ་གྱིས་ཐ་དད་པ་མེད་པ་ཉིད་འཛིན་སྙམ་ན། རང་བཞིན་ཉིད་ནི་ཞེས་གསུངས་ཏེ། གང་གི་ཕྱིར་རང་བཞིན་ཉིད་རིག་པ་ཡིན་པ་དེའི་ཕྱིར་ན་ཐ་མི་དད་པ་རིག་པ་ཡིན་ན་ཞེས་བྱ་བའི་དོན་ཏོ། །རིག་མེད་ཅེས་བྱ་བ་ནི་མ་རྟོགས་པ་ལའོ། །གལ་ཏེ་མ་རྟོགས་པ་ལ་རྟོགས་སོ་ཞེས་རློམ་པར་ཇི་ལྟར་འགྱུར་ཞེ་ན། འགའ་ཞིག་ཅེས་བྱ་བའོ། །འདི་ལ་ཡང་ཞེས་བྱ་བ་ནི་ཐ་དད་པ་མཐོང་བར་མངོན་པར་རློམ་པ་ལ་ཡང་ཕྱིན་ཅི་ལོག་ཏུ་ཐ་དད་བར་སྒྲོ་འདོགས་པའི་རྒྱུ་མཚན་ཡོད་པ་ཉིད་དོ་ཞེས་དགོངས་པའོ་སྙམ་དུ་མངོན་པར་ཞེན་པའི་རྒྱུ་མཚན་ནི་འདུ་བྱེད་ཟད་པ་ཡིན་ནོ་ཞེས་བྱ་བའི་རྩོད་པ་ལ་བརྗོད་པ་ནི་མ་ཡིན་ཏེ་ཞེས་བྱ་བའོ། །དངོས་པོ་དེ་སྔར་ནི་མཐོང་བ་མེད་པ་ཁོ་ནའོ། །གང་གིས་འདུ་བྱེད་ཟད་པ་མཐོང་བར་མངོན་བར་རློམ་པའི་རྒྱུ་མཚན་དུ་འགྱུར་བ་འདུ་བྱེད་དེའི་ཡུལ་ན་དུ་ཅི་ལྟར་འགྱུར། དེ་ཉིད་བརྗོད་པ་ནི་འདུ་བྱེད་པ་ནི་ཞེས་བྱ་བའོ། །འོ་ན་དེའི་ཡུལ་ཅན་གྱི་འདུ་བྱེད་ཀྱང་ཡོད་དོ་ཞེ་ན། སྐྱེས་པ་ཞེས་བྱ་བའོ། །འཇིག་པའི་རྒྱུ་མི་འཐད་པ་ནི་བསྟན་ཟིན་པའི་ཕྱིར་རོ། །ཕྱིན་ཅི་ལོག་ཏུ་སྒྲོ་འདོགས་པའི་ཞེས་བྱ་བ་ནི་མ་མཐོང་ཡང་མཐོང་བར་མངོན་བར་རློམ་པའིའོ། །ག་ལྟེར་རྗེས་སུ་འགྲོ་བ་དང་ལྡོག་པ་དག་དོན་དམ་པ་ཉིད་ཡིན་པར་འགྱུར་ན། དེའི་ཚེ་གང་གིས་འདུ་བྱེད་ཟད་པ་རྒྱུ་མཚན་དུ་མ་གྱུར་པ་ཇི་ལྟར་ན་འདི་གཉིས་མངོན་པར་རློམ་པ་ཙམ་ཡིན་སྙམ་ན། མངོན་པར་རློམ་པ་ལས་ཞེས་གསུངས་སོ། །རྣམ་པར་དབེན་པར་གཟུང་ཡང་ཞེས་སྔོན་པོ་དང་སེར་པོ་ཚོགས་པ་གང་ཡིན་པ་དང་སོ་སོ་བ་གང་ཡིན་པ་དེ་གཉིས་སོ་སོར་གཟུང་ཡང་ངོ༌། །དེ་མེད་པར་ཞེས་བྱ་བ་ནི་ཡན་ལག་ཅན་མཐོང་བ་མེད་ནའོ། །ཐ་དད་པའི་ཞེས་བྱ་བ་ནི་རྣམ་པར་དབྱེ་བར་གནས་པའིའོ། །དེའི་ཕྱིར་ཏེ་བཤད་པའི་ཚུལ་དུ་ཡན་ལག་ཅན་མེད་པའི་ཕྱིར་རོ། །དེ་ཁོ་ན་ལྟར་ཞེས་བྱ་བ་ནི་ཤེས་པ་གཅིག་ཉིད་ཀྱིས་སོ། །དོན་དམ་པར་ན་འཛིན་པ་ཞེས་
བྱ་བ་འགའ་ཡང་མེད་མོད་ཀྱི། དོན་ཀྱང་བློ་དེའི་རྣམ་པར་སྐྱེ་བ་ཉིད་དེ་འཛིན་པ་ཡིན་ནོ། །འོན་ཏེ་དངོས་པོ་གཅིག་ཁོ་ནས་བློ་སྐྱེད་པར་བྱེད་ཀྱི་དུ་མས་ནི་མ་ཡིན་ཏེ་དེས་ན་གཅིག་གི་འཛིན་བྱེད་ཡིན་གྱི་དུ་མ་ནི་མ་ཡིན་ནོ་སྙམ་ན། དུ་མ་གཅིག་གི་ཞེས་གསུངས་སོ། །རང་གི་ལུགས་ལ་ལྟོས་པའི་དཔེ་བསྟན་ནས་གཞན་གྱི་ལུགས་ལ་ལྟོས་པ་ཡང་བརྗོད་པ་ནི་བདག་དང་ཞེས་བྱ་བ་ལ་སོགས་པའོ། །གལ་ཏེ་རྡུལ་ཕྲ་རབ་མང་པོ་དག་ཀྱང་རྣམ་པར་ཤེས་པ་གཅིག་སྐྱེས་པ་ཡིན་ན། དེའི་ཚེ་ཅི་འགལ་བ་འགའ་ཡང་ཡོད་པ་མ་ཡིན་ནོ། །ཤེས་པ་སྐྱེད་པ་འདིར་རྡུལ་ཕྲ་རབ་ཆེན་པོ་ཉིད་ཀྱིས་ནི་ཁྱད་པར་དུ་འགྱུར་བ་མ་ཡིན་གྱི། འོན་ཀྱང་ཁྱད་པར་དེ་ནི་ནུས་པ་ཕུལ་དུ་བྱུང་བ་ཡིན་ནོ། །གལ་ཏེ་ཆེན་པོ་ཉིད་ཁྱད་པར་མ་ཡིན་ན། དེའི་ཆེན་པོ་མ་ཡིན་པར་ཁྱད་པར་མེད་པའི་ཕྱིར་རོ། །རྡུལ་ཕྲ་རབ་གཅིག་པུ་ཡང་འཛིན་པར་འགྱུར་རོ་ཞེ་ན། ནུས་པ་མེད་ཕྱིར་ཞེས་གསུངས་སོ། །རྡུལ་ཕྲ་རབ་གཅིག་ནི་རྣམ་པར་ཤེས་པ་བསྐྱེད་པ་ལ་ནུས་པ་མེད་པའི་ཕྱིར་རྒྱུར་མི་འགྱུར་རོ། །ཆེན་པོ་མིན་ཕྱིར་ཞེས་བྱ་བ་ནི་ཆེན་པོ་མ་ཡིན་པའི་རྒྱུས་ན། འབའ་ཞིག་པའི་གནས་སྐབས་ན་རྒྱུར་མི་འདོད་པ་ནི་མ་ཡིན་ན། གང་གིས་ཕྲ་བའི་ཕྱིར་ཚོགས་པའི་གནས་སྐབས་ན་ཡང་སྐྱེད་བྱེད་མ་ཡིན་པར་འགྱུར། རང་གི་ཚིག་ལེའུར་བྱས་པ་ཉིད་བཤད་པའི་དོན་དུ་འཇུག་པར་བྱེད་པ་ནི་གལ་ཏེ་ཞེས་བྱ་བའོ། །དེ་ནི་ཞེས་བྱ་བ་ནི་རང་གི་ངོ་བོས་རྗེས་སུ་བྱེད་པའི་བློ་སྐྱེད་པའི་མཚན་ཉིད་ཀྱི་བལྟར་རུང་བ་ཉིད་དོ། །སྒྲ་ལ་སོགས་པ་ལ་མཐོང་བའི་ཕྱིར་རོ་ཞེས་བྱ་བ་ནི་འདི་ཉིད་འཆད་པ་ནི་དཔེར་ན་ཞེས་བྱ་བའོ། །དེ་བཞིན་དུ་ཞེས་བྱ་བ་ནི་མ་འདྲེས་པ་དག་ཁོ་ན་སོམས་ཤིག་གི་དབྱིབས་སྣང་བར་འགྱུར་བའི་ཕྱིར་འགལ་བ་མེད་དོ། །ཕྲ་མོ་སྟེ་ཕྲ་མོ་ཚོགས་པའི་གནས་སྐབས་སུ་དེ་ཡང་ཞེས་བྱ་བ་དེ་ལྟར་ཡང་ཇི་ལྟར་བསྐྱེད་འདི་ལ་བརྗོད་པ་ནི་ཡན་འགར་བ་རྣམས་ཞེས་བྱ་བའོ། །སྒྲ་ཉིད་བཞིན་ནོ་ཞེས་བྱ་བ་ནི་དཔེར་ན་སྒྲ་ཉིད་ཕྲ་མོ་ཉིད་ཡིན་ཡང་རྒྱུའི་དངོས་པོ་ཡིན་ཏེ་ནུས་པ་ཡོད་པའི་ཕྱིར་རོ། །དེ་བཞིན་དུ་རྡུལ་ཕྲ་རབ་དག་ལ་ཡང་ནུས་པ་ཡོད་པའི་ཕྱིར་རོ། །གཞན་ཡང་གལ་ཏེ་རགས་པ་ཉིད་རྒྱུའི་དངོས་པོའི་རྒྱུ་མཚན་ཡིན་ན་དེའི་ཚེ་མིག་ལ་སོགས་པ་མི་འགྱུར་ཏེ། དབང་པོ་རྣམས་འབའ་ཞིག་པའི་གནས་སྐབས་
ལས་ཚོགས་པའི་གནས་སྐབས་སུ་རགས་པ་ཉིད་འགའ་ཞིག་སྐྱེས་པ་ན་ཡོད་པ་མ་ཡིན་ནོ་ཞེས་བསྟན་པའི་དོན་དུ་བརྗོད་པ་ནི་ཚོགས་པའི་ཞེས་བྱ་བའོ། །ཉེས་པ་གཞན་ཡང་བརྗོད་པ་ནི་མཚུངས་པ་ཉིད་ཡིན་ན་ཞེས་བྱ་བའོ། །མཚུངས་པ་ཉིད་ནི་ནུས་པ་ཐག་རིང་པོའི་ཡུལ་དང་ཐག་ཉེ་མོའི་ཡུལ་དག་ཏུ་རྟོགས་པ་པོ་ལ་འདྲ་བ་ཉིད་ཡིན་ན། འདི་ལ་བརྗོད་པ་ནི་ཡུལ་ཞེས་བྱ་བ་སྟེ། ཡུལ་ཐག་རིང་བ་ཉིད་ཀྱིས་ན་ལྷན་ཅིག་བྱེད་པའི་རྣམ་པར་དབྱེ་བ་ཡིན་ལ་དེ་ལས་ནི་འགའ་ཞིག་ཏུ་སྐྱེ་ཞིང་འགའ་ཞིག་ཏུ་ནི་མི་སྐྱེ་བ་ཡིན་ནོ། །རྣམ་པར་དབྱེ་བ་ག་ལས་འགྱུར། །ཞེས་བྱ་བ་ནི་ཡུལ་ཐག་རིང་བས་ནི་མི་སྐྱེད་ལ། ཐག་ཉེ་བས་ནི་སྐྱེ་བའོ་ཞེས་བྱ་བ་དེ་ལྟའི་མཚན་ཉིད་ཅན་ནོ། །འདི་ལ་བརྗོད་པ་ནི་ཚོགས་པ་གཞན་ཞེས་བྱ་བའོ། །ཐག་ཉེ་བ་ནི་ཚོགས་པ་གཞན་རྗེས་སུ་ཞུགས་པའི་ཕྱིར་རྡུལ་ཕྲ་རབ་རྣམས་མིག་ལ་སོགས་པའི་ལྷན་ཅིག་བྱེད་པར་འགྱུར་པ་ཡིན་ལ་ཐག་རིང་ན་ནི་མི་འགྱུར་པ་ཡིན་ཏེ། ཚོགས་པ་གཞན་རྗེས་སུ་ཞུགས་པ་མེད་པའི་ཕྱིར་རོ། །རྩོད་པ་དང་འགལ་བ་ནི་འབྲས་བུ་མཐོང་བ་ཉིད་ལས་རྡུལ་ཕྲ་རབ་དེ་རྣམས་བལྟར་རུང་བ་མ་ཡིན་ཡང་ནུས་པ་རྗེས་སུ་དཔག་པ་ཡིན་ནོ་ཞེས་བྱ་བའི་ལན་རྟོགས་པར་བླ་བའི་ཕྱིར་མ་བརྗོད་དོ། །གཟུགས་ཀྱི་སྐྱེ་མཆེད་དུ་མཚུངས་པས་ཞེས་བྱ་བ་ནི་སྔོན་པོའི་རྣམ་པ་ཙམ་རུའོ། །དེ་བརྗོད་པ་ནི་འདི་ལྟར་ཞེས་བྱ་བའོ། །གཞན་དུ་ཞེས་བྱ་བ་ནི་ཕྱི་རོལ་དུ་དོན་ཡོད་པ་མ་ཡིན་ལ། དེ་ལ་ཡན་ལག་ཅན་ནི་མེད་པ་དེས་ན་གདོན་མི་ཟ་བར་སྔོན་པོའི་རྣམ་པ་ཉིད་སྣང་བ་ན། རྡུལ་ཕྲ་རབ་རྣམས་ཁོ་ན་ཡིན་པར་འཐད་པ་ཡིན་ནོ་ཞེས་བྱ་བར་བསམས་པའོ། །མི་འཛིན་པ་ཉིད་དོ་ཞེས་བྱ་བ་ནི་རང་གི་ཡན་ལག་རྣམས་དང་ལྷན་ཅིག་མི་འཛིན་པ་ཉིད་ཀྱིས་འབའ་ཞིག་འཛིན་ནོ་སྙམ་པའོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །དེ་ཉིད་དང་ཞེས་བྱ་བ་ནི་ཁྱད་པར་དུ་གྱུར་བ་དང་ངོ༌། །ཆ་ནི་ཡན་ལག་ཏུ་གྱུར་པའོ། །དེ་དང་བ་ལང་གཟུང་པའི་ཕྱིར་ཡན་ལག་རྫོགས་པར་མི་འཛིན་པར་ཐལ་ལོ། །ཐམས་ཅད་བྱ་བ་ནི་ཡན་ལག་མཐའ་དག་གོ །ཁྱད་པར་ཉིད་གཞན་དག་གིས་ཁྱད་པར་ཙམ་ཉིད་དུ་རྟོགས་པའི་ཕྱིར་དང་ཁྱད་པར་ཉིད་གཞན་གྱི་ཚེ་སྐྱེས་བུ་དེ་ཉིད་ཀྱི་ཁྱད་པར་ཅན་ཉིད་དུ་རྟོགས་པའི་ཕྱིར་རོ། །དངོས་པོའི་རང་བཞིན་ནི་རྣམ་
པར་མི་གནས་པ་ཉིད་དུ་འཐད་པ་མ་ཡིན་ཏེ། དོན་རྣམས་སྐྱེས་བུ་སོ་སོ་ལ་ཐ་དད་ན་བདག་མེད་པར་ཐལ་བའི་ཕྱིར་རོ་ཞེས་བྱ་བ་ནི་དུས་གཅིག་ཏུ་རྣམ་པར་རྟོག་པ་གཉིས་མི་འཐད་པའི་ཕྱིར་རོ། །གལ་ཏེ་ཁྱད་པར་དང་ཁྱད་པར་ཅན་ཉིད་དངོས་པོ་ནི་རྣམ་པར་རྟོག་པ་མེད་པའི་མངོན་སུམ་གྱིས་གཟུང་བ་མ་ཡིན་ནམ། དེས་ན་ཁྱད་པར་དུ་མ་དུས་གཅིག་ཁོ་ནར་འཛིན་པར་འཐད་དོ་སྙམ་ན་རྣམ་པར་རྟོག་པ་མེད་པ་ནི་ཞེས་བྱ་བའོ། །བ་ལང་ཞེས་བྱ་བ་ནི་བ་ལང་ཉིད་དང་ལྡན་པར་འདོད་པའི་དངོས་པོ་གང་ཡིན་པའོ། །དེ་ནི་བ་ལང་ཉིད་དང་མི་ལྡན་པར་རང་ཉིད་ཀྱིས་བ་ལང་མ་ཡིན་པ་ཡང་མ་ཡིན་ཏེ། བ་ལང་ཉིད་དང་ལྡན་པའི་ཕྱིར་བ་ལང་ཡིན་ནོ། །དེ་བཞིན་དུ་གཞན་ལ་ཡང་སྦྱར་རོ། །ཐ་དད་པར་བྱེད་པ་ཞེས་བྱ་བ་ནི་ཁྱད་པར་དུ་བྱེད་པའོ། །ཕྱིས་ནི་ཞེས་བྱ་བ་ནི་བློ་གཅིག་འོག་ཏུའོ། །འདི་དག་གི་ཞེས་བྱ་བ་ནི་བ་ལང་ཉིད་དང་དཀར་པོ་ཉིད་ལ་སོགས་པ་རྣམས་ཀྱིའོ། །ཐ་དད་པར་སྦྱོར་བ་ཞེས་བྱ་བ་ནི་བ་ལང་ཉིད་ནི་འདིའི་ཚོགས་ཡིན་ལ་འདིའི་ནི་མ་ཡིན་ནོ། །འདི་ནི་དཀར་པོ་འདི་ནི་ནག་པོ་ཡིན་ནོ་ཞེས་དེ་ལྟར་རྣམ་པར་ཕྱེ་ནས་སྦྱོར་བ་མི་སྲིད་པར་འགྱུར་རོ། །དེ་ཉིད་གསལ་བར་བྱེད་པ་ནི་འདི་ལྟར་ཞེས་བྱ་བའོ། །ཐ་དད་པར་སྦྱར་བ་ན་ཞེས་བྱ་བ་ཡུལ་ཐ་དད་པས་ཐ་དད་པའི་དངོས་པོ་ལའོ། །གཅིག་གི་ཡིན་ནོ་ཞེས་བྱ་བ་ནི་ཐམས་ཅད་གཟུང་བའི་རྗེས་ལ་དེ་ཡང་འཛིན་པའི་ཕྱིར་རོ་ཞེས་དགོངས་པའོ། །དུ་མ་ནི་ཁྱད་པར་དང་ཁྱད་པར་ཅན་ནོ། །ཐ་དད་པའི་ཕྱོགས་སུན་འབྱིན་པ་བརྗོད་ཟིན་པའི་ཕྱིར་ན། ཐ་མི་དད་པའི་ཕྱོགས་ལ་བརྗོད་པ་ནི་ཐ་དད་པ་འགའ་ཡང་མེད་པའི་ཕྱིར་རོ་ཞེས་བྱ་བའོ། །ཁྱད་པར་གཅིག་དེའི་བདག་ཉིད་ཡིན་པས་ཐམས་ཅད་གཅིག་ཡིན་པའི་ཕྱིར་རོ་ཞེས་དགོངས་པའོ། །དུ་མ་ཉིད་ཡིན་པའི་ཕྱིར་ཞེས་བྱ་བ་ནི་སྙིང་སྟོབས་རྡུལ་དང་མུན་པས་ཐ་དད་པ་ཡིན་པའི་ཕྱིར་རོ། །དེ་ཙམ་ལྔའི་ཞེས་བྱ་བ་ནི་གཟུངས་ལ་སོགས་པ་ཡུལ་རྣམས་ཀྱིའོ། །འདིས་ནི་སྒྲ་ལ་སོགས་པ་ལྔའི་བདག་ཉིད་ཅན་དུ་བསྟན་ཏོ། །ཡང་ན་བུམ་པ་ལ་སོགས་པའི་དངོས་པོ་ཡོན་ཏན་གསུམ་གྱི་བདག་ཉིད་ཅན་ཡིན་ནོ། །གལ་ཏེ་དེ་ཙམ་རྣམས་སམ་ཡོན་ཏན་གསུམ་མ་བཟུང་ཡང་སྒྲ་ཙམ་གཅིག་པུ་ཁོ་ནར་འཛིན་པ་ཡིན་ཏེ། དེས་ན་དུ་མ་འཛིན་པར་ཇི་ལྟར་ཐལ་སྙམ་ན་དེ་མ་བཟུང་བར་ནི་
ཞེས་གསུངས་སོ། །དེ་ཙམ་རྣམས་སམ་ཡོན་ཏན་གསུམ་མ་བཟུང་བར་ནའོ། །གལ་ཏེ་དེ་ཙམ་ལ་སོགས་པ་རྣམས་ལས་སྒྲ་ལ་སོགས་པ་འབྲས་བུ་གཞན་གཅིག་ཉིད་སྐྱེ་བ་མ་ཡིན་ནམ། །དེས་ན་དེ་གཟུང་བར་ཇི་ལྟར་འགྱུར་སྙམ་ན། འབྲས་བུ་གཞན་ཞེས་བྱ་བའོ། །དེ་ཉིད་ལས་ཞེས་བྱ་བ་ནི་དེའི་རང་གི་ངོ་བོ་ལས་སོ། །འདིར་ཡང་བརྒྱ་ལ་གཙོ་བོ་དང་ཕལ་པའི་དངོས་པོ་དུ་མ་འཛིན་པར་སྒྲར་འོངས་པས་དེ་ལས་བརྗོད་པ་ནི། ལྷག་མ་ནི་ཞེས་བྱ་བའོ་སྔ་མ་བཞིན་ཞེས་བྱ་བ་ནི། ཅིག་ཅར་ཡན་ལག་རྫོགས་འཛིན་མིན། །ཞེས་བྱ་བ་ལ་སོགས་པས་བརྗོད་ཟིན་པའོ། །བསགས་པ་དང་ནི་ཚོགས་པ་ཡིན། །དེ་སྤྱི་དེ་ལ་དབང་པོའི་བློ། །ཞེས་བྱ་བ་ལ་སོགས་པས་གཞན་གྱི་རྟོག་པ་དང་བཅས་པ་ཉིད་དུ་བསྒྲུབ་པ་དེ་བཟློག་ནས། མཇུག་སྡུད་བརྗོད་པ་ནི་དེའི་ཕྱིར་ཞེས་བྱ་བའོ། །གལ་ཏེ་ཞེས་བྱ་བ་ནི་དོགས་པ་བསུ་བའོ། །གལ་ཏེ་མངོན་སུམ་གྱིས་ཆོས་ཅན་མི་འཛིན་མོད་ཉེས་པ་ཅི་ཡོད་སྙམ་ན་ཆོས་ཅན་མངོན་སུམ་གྱིས་ཞེས་བྱ་བའོ། །ཆོས་ཅན་གྲུབ་པ་མེ་ལ་སོགས་པ་སྒྲུབ་པའི་རྗེས་སུ་དཔག་པ་འཇུག་པར་འགྱུར་གྱི། དེ་ལྟ་མ་ཡིན་ན་རྟགས་ཐམས་ཅད་རྟེན་མ་གྲུབ་པའི་ཉེས་པས་ཟིན་པར་འགྱུར་རོ་ཞེས་བསམས་པའོ། །གལ་ཏེ་མངོན་སུམ་གྱིས་ཆོས་ཅན་འཛིན་པར་མི་ནུས་ན། འོ་ན་རྗེས་སུ་དཔག་པས་འཛིན་ལ་རག་གོ་སྙམ་ན། ཆོས་ཅན་ཡང་ཞེས་བྱ་བའོ། །འོ་ན་མངོན་སུམ་གྱིས་ཆོས་ཅན་འཛིན་ནོ་ཅོག་གི་སྐྱོན་སྙམ་ན། ཆོས་ཅན་གཟུང་བ་ནི་ཞེས་སྨྲས་སོ། །འདི་ལ་རེ་ཞིག་ཆོས་ཀྱི་གྲགས་པའི་ཞལ་སྔ་ནས་ཀྱིས་མདོ་བཤད་པའི་དོན་དུ་རེ་ཞིག་སློབ་དཔོན་ཆེན་པོ་ཕྱོགས་ཀྱི་གླང་པོའི་ཞལ་སྔ་ནས་ཀྱིས་མདོ་འཆད་པ་ནི། ཆོས་ཅན་དུ་མའི་ཞེས་བྱ་བའོ། །འོན་ཀྱང་རང་ཉིད་ཀྱིས་ཞེས་བྱ་བ་ནི་བུམ་པ་ལ་སོགས་པ་རང་གི་རང་བཞིན་ཐུན་མོང་མ་ཡིན་པ་གང་ཡིན་པའི་རང་བཞིན་དེ་ཉིད་ཀྱིས་བུམ་པ་ལ་སོགས་པ་རིག་པར་བྱ་བ་དང་བྱེད་པ་པོས་ཞེས་བྱ་བ་ཐུན་མོང་མ་ཡིན་པ་རང་ཉིད་ཀྱིས་ཤེས་པས་རིག་པར་བྱ་བ་ཡིན་ནོ། །གཟུགས་ལ་སོགས་པ་དེ་དག་གཞི་གཅིག་པ་ཉིད་དུ་སྟེ། ཆོས་ཅན་དེ་ལ་བརྟེན་པ་ཉིད་དུ་ནི། མངོན་སུམ་གྱིས་རྟོགས་པ་མེད་པའི་ཕྱིར་ཏེ་རིག་པ་མེད་པའི་ཕྱིར་རོ། །གཞན་པའི་གཞི་ནི་འཛིན་པའི་སྤྱོད་ཡུལ་དུ་འགྱུར་བ་མེད་དོ་ཞེས་འབྲེལ་ཏོ། །དེ་ལ་བརྟེན་པ་ནི་གཞི་
གཞན་ལ་བརྟེན་པའི་གཟུགས་ལ་སོགས་པ་ནི་འཛིན་པའི་སྤྱོད་ཡུལ་དུ་གྱུར་པ་མེད་དོ་ཞེས་བྱ་བར་སྦྱར་རོ། །གཅིག་པ་ཉིད་དུ་ཞེས་བྱ་བ་ནི་མཐོང་བ་དང་རེག་པ་དག་གོ །འོ་ན་ཇི་ལྟར་བདག་གིས་མཐོང་བར་གྱུར་པ་ཉིད་ལ་རེག་གོ་ཞེས་རྟོགས་པ་སྐྱེ་ཞེ་ན་གཟུགས་དང་ཞེས་གསུངས་སོ། །དེ་ཉིད་སྟོན་པ་ནི་འདི་ལྟར་ཞེས་བྱ་བའོ། །མིག་ནི་གཟུགས་ཙམ་ཉིད་རིག་པར་བྱ་བའི་ཕྱིར་ཞེས་བྱ་བ་གཟུགས་ཙམ་རྟོགས་པ་ནི་མཚན་ཉིད་ཀྱི་དོན་དུ་འཇུག་པ་ཡིན་ལ་གཞན་ནི་ཞེས་བྱ་བ་རེག་པའི་དབང་པོ་ལས་སྐྱེས་པ་ནི། རེག་པ་ཙམ་ཉིད་རིག་པའི་ཕྱིར་རོ། །རིག་པ་འཇུག་པ་ཡིན་ནོ་ཞེས་མཐོང་ངོ༌། །རེ་ཞིག་འདི་ལས་གཅིག་གིས་ཀྱང་བལྟ་བར་བྱ་བ་དང་རེག་པར་བྱ་བའི་ཐུན་མོང་པའི་དངོས་པོ་ཡོངས་སུ་འབད་པ་ནི་མེད་དོ། །འོ་ན་ཤེས་པ་གཞན་གྱིས་གཅོད་པར་འགྱུར་རོ་ཞེ་ན། དེ་དག་ཕན་ཚུན་ཞེས་གསུངས་སོ། །གཟུགས་དང་རེག་པ་དེ་དག་གོ །མཐོང་བ་ཡིན་ནོ་ཞེས་བྱ་བ་ནི་གཟུགས་དང་རེག་པ་བདག་སྟེ་གཅིག་ཉིད་དུའོ། །བདག་གིས་མཐོང་བ་དེ་ཉིད་ལ་རེག་གོ་ཞེས་རྟོགས་པར་རིག་པའི་ཕྱིར་རོ། །རེག་པ་ནི་གཟུགས་ལ་མི་འཇུག་པའི་ཕྱིར་རོ་ཞེས་བྱ་བ་ནི། སྔར་མཐོང་བ་ནི་གཟུགས་ལ་རེག་པ་ཉིད་དུ་འཇུག་པ་སྟེ། མངོན་པར་ཞེས་པ་མེད་པའི་ཕྱིར་རོ། །འདི་ཉིད་ལྡོག་པའི་སྒོ་ནས་བརྗོད་པ་ནི་གལ་ཏེ་ཞེས་བྱ་བའོ། །མཐོང་བའི་དཀར་པོ་གང་ཡིན་པ་དེ་ཉིད་རེག་པས་དྲི་མ་ཅན་དུ་བྱེད་པ་དང༌། དེ་ཉིད་ཡིན་ནོ་ཞེས་ལག་པར་གཟུང་བར་ཡང་དམིགས་པ་མ་ཡིན་ནམ། ཇི་ལྟར་དོན་གཅིག་ཏུ་མངོན་པར་ཞེན་པ་མེད་སྙམ་ན། མུན་ཁུང་ན་གནས་པ་གང་གི་ཚེ་དངོས་པོ་དེ་ལ་རེག་པ་དེའི་ཚེ་ཤེས་པས་གང་གིས་རེག་པ་ཡུལ་དུ་གྱུར་པའི་ཤེས་པ་དེས་གཟུགས་རྟོགས་པ་མེད་དོ་ཞེ་ན། དེའི་ཚེ་མངོན་སུམ་ཉིད་ཐ་དད་རྟོགས་པའི་ཕྱིར་རྗེས་སུ་དཔག་པའི་ཐ་དད་པའི་སྒྲུབ་བྱེད་མ་ཡིན་ནོ། ཕན་ཚུན་འཛིན་པར་བྱེད་པའི་ཞེས་བྱ་བ་ནི་གཟུགས་དང་རེག་པ་འཛིན་པར་བྱེད་པའིའོ། །མངོན་སུམ་དག་ཅེས་བྱ་བ་ནི་གཟུགས་དང་རེག་པ་འཛིན་པ་དག་གོ །འཇུག་པ་མེད་པ་ནི་ཞེས་བྱ་བ་ནི། ཕན་ཚུན་ཏེ་གཟུགས་འཛིན་པར་བྱེད་པ་རེག་པའི་རྣམ་པས་སྟོང་ལ་རེག་པ་འཛིན་པ་ཡང་གཟུགས་ཀྱི་རྣམ་པས་སྟོང་པ་ན། མངོན་སུམ་གྱིས་ཐ་དད་པ་ཡོངས་སུ་གཅོད་པར་འགྱུར་ལ་མངོན་སུམ་གྱིས་ཐ་དད་པ་ཡོངས་སུ་བཅད་པས་ནའོ། །འོ་ན་
ཀྱང་ཡིད་ཀྱིས་རྟོགས་པ་ཚད་མར་འགྱུར་བར་ཇི་ལྟར་འོས་སྙན་ན་དབང་པོ་ལས་སྐྱེས་པ་ཉིད་ཅེས་སྨྲས་སོ། །དབང་པོ་ལས་བྱུང་ཁོ་ན་ཚད་མ་ཡིན་ནོ་ཞེས་སངས་རྒྱས་པ་མངོན་པར་འདོད་པའི་དོན་འདི་ལ་ཚད་མ་འཇུག་པ་ནི་འགའ་ཡང་མེད་དོ། །དེས་ན་དབང་པོ་ལས་སྐྱེས་པ་ཁོ་ན་ཚད་མ་ཡིན་ནོ་ཞེས་འདིས་ཚད་མ་མ་ཡིན་པར་ཇི་ལྟར་བརྗོད་གལ་ཏེ་ཡིད་ཚད་མ་ཡིན་པ་ལ་རྒྱུ་མཚན་འགའ་ཞིག་བརྗོད་པར་བྱ་བ་མ་ཡིན་ནམ། དེ་ལྟ་མ་ཡིན་ན་ཐམས་ཅད་ཚད་མར་ཐལ་བའི་ཕྱིར་རོ་ཞེས་དོགས་པ་བསུ་ནས་བརྗོད་པ་ནི་དངོས་པོ་ལས་ཞེས་བྱ་བའོ། །གལ་ཏེ་དབང་པོ་ལས་བྱུང་བ་དང་དབང་པོ་ལས་བྱུང་བ་ཉིད་ཀྱིས་ཚད་མ་ཡིན་ན། ཡིད་ལས་སྐྱེས་པ་ཡང་ཡིད་ལས་སྐྱེས་པ་ཉིད་ཀྱིས་ཚད་མ་ཡིན་ནོ་ཞེས་ཀྱང་བརྗོད་པར་ནུས་སོ། །དེ་ཉིད་ཀྱི་བརྗོད་པ་ནི་ཞེས་བྱ་བའོ། །ཡིད་ནི་ཡིད་ཁོ་ན་སྟེ། དེ་ལས་སྐྱེས་པའི་ཕྱིར་རོ་ཞེ་ན་འདི་ལ་བརྗོད་པ་ནི་དེ་ནི་ཞེས་བྱ་བའོ། །རྗེས་སུ་དཔག་པར་ནི་མི་འཁྲུལ་པར་ཚུ་རོལ་མཐོང་བས་མ་རྟོགས་ཏེ། མི་འཁྲུལ་བ་ནི་རྗེས་སུ་དཔག་པ་ཁོ་ན་ལས་རྟོགས་པ་ཡིན་ནོ་ཞེས་བྱ་བའི་དོན་ཏོ། །དེ་ཉིད་བསྟན་པའི་ཕྱིར་བརྗོད་པ་ནི་དེ་ལ་ཞེས་བྱ་བའོ། །སྔར་མཐོང་བ་ཉིད་ཅེས་བྱ་བ་ནི་བརྒལ་ཞིང་བརྟག་པའི་རྣམ་པའོ། །ཁྱོད་ཀྱིས་ནི་རིག་པ་པས་སོ། །དེའི་ཚེ་ཇི་སྐད་བརྗོད་པར་བལྟའོ། །གཞན་གྱིས་དེ་ལྟ་བུ་ཉིད་དུ་རྟོགས་པའི་ཕྱིར་རོ་ཞེས་སྨྲས་སོ། །གཅིག་ཉིད་དུ་རྟོགས་པའི་ཕྱིར་རོ་ཞེས་བྱ་བའི་དོན་ཏོ། །ལན་དུ་འདི་ནི་མ་ཡིན་ཏེ་ཞེས་བྱ་བའོ། །དེ་ཉིད་དེས་ན་དྲི་བ་འདིར་རེག་པ་པའི་ལན་ཡིན་ནོ། །ལན་གྱི་རྣམ་པ་བརྗོད་པ་ནི་གང་གིས་ཞེས་བྱ་བའོ། །དེ་ཡིན་པར་ཞེས་བྱ་བ་ནི་མཐོང་བ་གང་ཡིན་པ་དེ་ཉིད་རེག་པ་ཡིན་པར་རོ་ཞེས་རྣམ་པ་འདི་གཞན་རྗེས་སུ་དཔག་པ་སྟོན་པ་དེ་ཉིད་དོ། །རྗེས་སུ་དཔག་པ་དེ་ཉིད་ཁས་ལེན་པས་བརྗོད་པ་ནི་འོ་ན་ཞེས་བྱ་བའོ། །གཟུགས་ནི་ཉམས་པར་བྱེད་པ་ཡིན་ཏེ་དེས་ན་གཟུགས་ཉིད་རེག་པ་ཡིན་ནོ་ཞེས་བསམས་པའོ། །ལན་ནི་རེག་པ་ཉིད་ན་ཞེས་བྱ་བའོ། །རེག་པ་ནི་ཞེས་བྱ་བ་ལ་དཀར་པོ་ཅིག་ཤོས་སྔོན་པོ་དག་ལ་མཚུངས་པའི་རང་བཞིན་ཡིན་ཏེ། དེས་ན་རེག་པས་འདི་དཀར་པོ་ཡིན་ནོ་ཞེས་ཅི་ལྟར་རྟོགས་ཏེ་སྔོན་པོ་ལ་ཡང་ཡོད་པའི་ཕྱིར་རོ། །མཚུངས་པ་ནི་རེག་བྱའོ། །མི་མཚུངས་པ་ནི་དཀར་
པོའོ། །ཅི་སྟེ་རྟོགས་སོ་ཞེས་བྱ་བ་ནི་རེག་པའི་དུས་ན་གཟུགས་ལ་སོགས་པ་ཡང་རྟོགས་སོ་ཞེ་ན་ལན་ནི་དེ་ལ་ཞེས་བྱ་བའོ། །རྣམ་པར་དཔྱད་པ་ཉིད་བརྗོད་པ་ནི་ཅི་ཞེས་བྱ་བའོ། །གཟུགས་ལ་སོགས་པ་ཐ་དད་པ་ན་ཞེས་བྱ་བར་ཐ་དད་པར་ཁས་ལེན་ནའོ། །རང་གིས་ཞེས་བྱ་བ་ཐུན་མོང་མ་ཡིན་པའི་ཤེས་པའི་རང་བཞིན་གྱིས་རིག་པར་བྱ་བ་ཡིན་པའི་ཕྱིར་དེ་སྐད་ཅེས་བརྗོད་དོ། །དེ་ཉིད་ཀྱི་ཕྱིར་ཞེས་བྱ་བ་ནི་ཐུན་མོང་མ་ཡིན་པ་ཉིད་ཀྱི་ཕྱིར་རོ། །འོན་ཏེ་གལ་ཏེ་འདི་བརྗོད་པར་བྱ་བ་ཡིན་མོད་དེ་ལྟར་ན་ཡང་དེ་ལྟར་ཅི་སྟེ་མི་རྟོགས་སྙམ་ན། བསྟན་པར་བྱ་བ་མ་ཡིན་པ་ནི་ཞེས་སྨོས་ཏེ། ཧ་ཅང་ཐལ་པའི་ཕྱིར་རོ་ཞེས་བསམས་པའོ། །དེའི་ཕྱིར་ན་དེ་ལྟར་རྟོགས་པ་ཉིད་ལས་སོ། །ཤེས་པ་དེ་ཡིས་ནི་ཞེས་བྱ་བ་ནི་ངོ་ཤེས་པའི་ཤེས་པས་དེ་ལྟ་མ་ཡིན་ན་ཞེས་བྱ་བ་གལ་ཏེ་དོན་དེ་སྣང་ནའོ། །སྒྲ་ལས་རྟོགས་པའི་དུས་ན་དོན་གྱི་སྣང་བ་འགྱུར་བ་ཡིན་མོད་ཀྱི། དངོས་པོ་དང་དངོས་པོ་མེད་པ་ཐུན་མོང་དུ་སྣང་བ་འབའ་ཞིག་ཏུ་ཟད་དོ། །དེས་ན་ཐེ་ཚོམ་ཟ་བ་ཡིན་ནོ་ཞེས་བྱ་བ་ནི་སྣང་བ་ལ་ཡང་ཐེ་ཚོམ་ཟ་བར་འགྱུར་བ་ཡིན་ནོ་ཞེ་ན། འདི་ལ་བརྗོད་པ་ནི་མངོན་སུམ་ལ་ཡང་ཞེས་བྱ་བའོ། །འདི་གཞན་གྱིས་དེ་ལ་ཞེས་སྨྲས་ཏེ་མངོན་སུམ་ལའོ། །དེ་ལྟར་ནི་ཐེ་ཚོམ་དུའོ། །འདིར་ཡང་ཞེས་བྱ་བ་ནི་སྒྲ་ལས་བྱུང་བའི་རྟོགས་པ་ལའོ། །གཞན་གྱི་ཁྱད་པར་མེད་པའི་ཕྱིར་རོ་ཞེས་སྨྲས་ཏེ། དངོས་པོ་དངོས་མེད་དག་གི་རང་རྣམ་པ་གང་ཡིན་པ་དེ་སྒྲ་ལས་བྱུང་བའི་མི་སྣང་བ་དེས་ན་ཐེ་ཚོམ་ཟ་བ་ཡིན་ནོ་ཞེ་ན་ལན་དུ་དེ་ལྟ་ན་ནི་ཞེས་བྱ་བའོ། །ཉེས་པ་གཞན་ཡང་བརྗོད་པ་ན་གལ་ཏེ་ཞེས་བྱ་བའོ།། གལ་ཏེ་སྒྲ་རང་གི་ངོ་བོ་རྟོགས་པ་ཡིན་ན་དེའི་ཚེ་དེ་མཐོང་བ་ཞེས་བྱ་བ་མངོན་སུམ་མོ། །འོན་ཏེ་སྒྲ་ལས་དོན་སྤྱིའི་རྣམ་པར་རྟོགས་ཀྱི། ཡོད་པའམ་མེད་པ་ཞེས་ཁྱད་པར་དེ་ནི་རྟོགས་པ་མ་ཡིན་ནོ་སྙམ་ན་འདིར་བརྗོད་པ་ནི་དེ་ལྟ་ན་ནི་ཞེས་བྱ་བའོ། །དེ་ཡང་ཞེས་བྱ་བ་ནི་དགོངས་པ་སྟེ། དུང་དཀར་པོ་ལ་སེར་པོ་ཤེས་པ་དེ་ཡང་ངོ༌། །ལན་ནི་མ་ཡིན་ཏེ་ཞེས་པ་སྟེ། དུས་ཕྱིས་བྱུང་བ་དཀར་པོར་རྟོགས། །ཤེས་པས་གནོད་པ་ཡིན་ནོ་ཞེས་དགོངས་པའོ། །གཞན་གྱི་བ་ལང་ཞེས་སྨྲས་སོ། །འགོག་པ་ནི་མ་ཡིན་ཏེ་ཞེས་པའོ། །གནོད་པ་ཉིད་སྟོན་པ་བ་ལང་ཞེས་བྱ་བའོ། །དེ་ནི་ཡོད་པ་ཉིད་དོ། །གལ་ཏེ་ཡོད་ན་ཞེས་བྱ་
བ་ནི་བ་ལང་ངོ༌། །དེའི་ཚེ་དེ་ཁྱེར་ཤོག་ཅེས་བྱ་བ་སྨྲ་བ་པོའི་བསམ་པ་ཡིན་ནོ་ཞེས་བྱ་བའི་དོན་འདི་ལ་ལན་ནི་དེའི་ཞེས་བྱ་བའོ། །གལ་ཏེ་རྣམ་པ་འདིས་སྒྲ་ལས་བྱུང་བའི་ཤེས་པ་ཚད་མ་ཡིན་མོད། དོན་གོ་ཅི་ལྟར་མི་འཛིན་སྙམ་ན། ཆད་མའང་མ་ཡིན་པས་ནི་ཞེས་གསུངས་སོ། །གལ་ཏེ་སྒྲ་ལས་བྱུང་པའི་རྟོགས་པས་དངོས་པོ་མི་འཛིན་ན་དེའི་ཚེ་ཁྱེར་ནས་འོངས་པ་ལ་སོགས་པ་ལ་མི་འཁྲུལ་སྙམ་ན་ལན་ནི་འཁྲུལ་པ་ཞེས་བྱ་བ་སྟེ། སྐྱེས་བུ་འགའ་ཡང་ཁྱེར་ཏེ་འོད་བ་མ་བྱས་པའི་ཕྱིར་རོ། །རྣམ་པར་རྟོག་པ་དང་པོ་ལ་བརྗོད་པ་ནི་བྱེད་པ་པོ་ཡིན་ན་ཞེས་བྱ་བའོ། །གལ་ཏེ་འབྲས་བུའི་བྱེད་པ་པོ་མ་ཡིན་ན་ནི། དེའི་ཚེ་ཐོབ་པ་ཉིད་དུ་མི་འགྱུར་རོ་ཞེ་ན། ཐོབ་པ་ནི་ཞེས་བྱ་བའོ། །བྱེད་པ་པོས་དབང་པོ་བྱས་པ་ནའོ། །རྣམ་པར་རྟོག་པ་གཉིས་པ་སེལ་བ་ནི། ཤེས་པར་བྱེད་པ་ཉིད་ནི་ཞེས་བྱ་བའོ། །འབྱུང་བར་འགྱུར་བའི་བྱ་བའི་རང་གི་ངོ་བོ་གང་ཡིན་པ་དེ་མེད་པས་སོ། །འོན་ཏེ་དེའི་ངོ་བོ་ཡོད་པ་ཉིད་དེ་དེས་ནི་འཛིན་པ་ཡིན་ནོ་སྙམ་ན་རང་གི་ངོ་བོ་ཡོད་ན་ནི་ཞེས་གསུངས་སོ། །དེ་ལྟར་ན་ཐུན་མོང་མ་ཡིན་པའི་རང་གི་ངོ་བོ་འཛིན་པའི་མངོན་སུམ་གྱིས་མ་རྟོགས་པའི་ཕྱིར་དང༌། རྗེས་སུ་དཔག་པས་རྟོགས་ན་ཡང་ཐུག་པ་མེད་པར་འགྱུར་བའི་ཕྱིར། ཆོས་ཅན་རྟོགས་པ་ཉིད་དུ་མི་འགྱུར་རོ་ཞེས་བྱ་པའི་བསམ་པས་རྩོད་པ་སྔ་མ་ཉིད་རྗེས་སུ་བརྗོད་པ་གསུངས་པ་ནི་འོ་ན་ཆོས་ཅན་གྱི་ཞེས་བྱ་བའོ། །གལ་ཏེ་གང་གིས་བརྟགས་པ་ཞེས་བརྗོད་པ་ཆོས་ལ་སོགས་པའི་ཐ་སྙད་དོན་དམ་པ་པའི་ཉིད་དུ་ཅིའི་ཕྱིར་ཁས་མི་ལེན་སྙམ་ན། འདི་ལྟར་ཞེས་བྱ་བའོ། །དེ་དག་ཀྱང་ཞེས་བྱ་བ་ནི་ཁ་དོག་ལ་སོགས་པའོ། །དེ་ལས་ཞེས་བྱ་བ་ནི་བུམ་པ་ལས་སོ། །དམིགས་ཀྱིས་བསལ་ཏེ་བཏགས་པ་ཉིད་བརྗོད་པ་ནི་གལ་ཏེ་ཞེས་བྱ་བའོ། །དེ་ལྟར་ཐལ་བ་བརྗོད་ནས་བཟློག་བ་བརྗོད་པ་ནི། དབྱིབས་ལ་སོགས་པ་ཞེས་བྱ་བའོ། །དེ་དག་ནི་སྔོན་པོ་དང་དབྱིབས་དག་གོ །འོ་ན་ཇི་ལྟར་དོན་དམ་པར་འགྱུར་སྙན་ན་གལ་ཏེ་ཞེས་བྱ་བའོ། །ཡན་ལག་ཅན་གྱི་དོན་གཅིག་ལ་སྔོན་པོ་དང་དབྱིབས་དག་འདུ་བ་གང་ཡིན་པ་དེ་ནི། ཐ་དད་པ་མ་ཡིན་པར་སྣང་བའི་རྒྱུ་ཡིན་པའི་ཕྱིར་རོ། །འདིར་གྲུབ་པའི་མཐའ་ལས་གསུངས་པ་ནི་གཟུགས་དང་ཞེས་བྱ་བའོ། །དབང་པོས་ཐ་དད་པའི་གཟུང་བ་ཉིད་ཀྱིས་དོན་གཅིག་ལ་
འདུ་བ་ཡིན་ཡང་ཐ་དད་པར་སྣང་བ་ཡིན་ནོ་ཞེས་སྟོན་པས་གཞན་དག་སྨྲ་བ་ནི་དེ་ལ་ནི་ཞེས་བྱ་བའོ། །ལན་ནི་གལ་ཏེ་ཞེས་བྱ་བའོ། །དོན་གཅིག་ལ་འདུ་བ་བསྒྱུར་ནས་ཐ་མི་དད་པར་སྣང་བའི་རྒྱུ་མཚན་གཞན་བརྗོད་པ་ནི་ཡུལ་གཅིག་པའི་ཕྱིར་ཞེས་བྱ་བའོ། །འདི་ལ་བརྗོད་པ་ནི་གཟུགས་དང་ཞེས་བྱ་བའོ། །དེ་བཞིན་དུ་ཞེས་བྱ་བ་ནི་ཇི་ལྟར་སྔོན་པོ་ལས་དབྱིབས་ཀྱི་ཐ་དད་པར་རྣམ་པར་གཞག་པ་དེ་བཞིན་དུ་བ་ལང་ཉིད་ལ་སོགས་པ་ལས་ཁྲོ་བོ་ལ་སོགས་པར་ཐ་དད་པར་གདགས་པར་བྱ་བ་ཡིན་ནོ། །གལ་ཏེ་བ་ལང་ཉིད་དང་ཁྲ་བོ་དག་གཅིག་ཉིད་ཡིན་ན་ནི་དེའི་ཚེ་ཁྲ་བོ་མ་ཡིན་པའི་སེར་སྐྱ་གང་ཡིན་པ་དེ་བ་ལང་ཉིད་མ་ཡིན་པར་འགྱུར་རོ། །དེ་བཞིན་དུ་ཁྲ་བོ་དང་ཁུ་ཡུལ་སོགས་པ་ཐ་མི་དད་ན། དེའི་ཚེ་ཁྲ་བོ་མ་ཡིན་པའི་སེར་སྐྱེ་ལ་ཁུ་ཡུ་ལ་སོགས་པར་མི་འགྱུར་རོ། །ད་ནི་སྟོན་པའི་ཐ་དད་པ་ཉིད་སྟོན་པ་ནི་དེ་ལ་ཞེས་བྱ་བའོ། །གལ་ཏེ་ཐ་དད་པ་ཞེས་བྱ་བ་ལ་བ་ལང་ཉིད་ཁྲ་བོ་ལ་སོགས་པ་དག་ལས་གཞན་དུ་གྱུར་པའམ། ཐ་དད་པའམ་ཐ་མི་དད་པའམ། ཡང་མེད་ན་ནི་དེའི་ཁྲ་བོ་ལ་སོགས་པ་བ་ལང་ཉིད་དེ་དང༌། ཐ་མི་དད་པ་རྣམས་ཐ་དད་པར་མི་འགྱུར་ཏེ། གལ་ཏེ་དེ་ལྟར་མངོན་སུམ་ལ་ཆོས་དང་ཆོས་ཅན་ཐ་དད་པར་སྣང་ན་དེའི་ཚེ་མངོན་སུམ་གྱིས་རྟོགས་པའི་ཕྱིར་རྗེས་སུ་དཔག་པས་ཅི་ཞིག་བྱ། དེས་ན་རྗེས་སུ་དཔག་པས་རྟོགས་པའི་ཕྱིར། །འདི་ནི་གཞན་མངོན་སུམ་མ་ཡིན་པ་ཁོ་ནའོ་སྙམ་ནས་གཞན་སྨྲ་བ་ནི་གལ་ཏེ་སྣང་བ་ཞེས་བྱ་བའོ། །འདི་ལ་བརྗོད་པ་ནི་འདི་ནི་ཞེས་བྱ་བའོ། །དེར་ཡང་གལ་ཏེ་མེ་མངོན་སུམ་ལ་སྣང་བ་རྗེས་སུ་དཔག་པས་ཅི་ཞིག་ཅེས་བྱ་པ་ཡིན་ནོ། །གཅིག་ཏུ་མངོན་སུམ་གྱིས་རབ་ཏུ་གྲུབ་པའི་མེ་ཉིད་ཡུལ་དང་དུས་གཞན་རྗེས་སུ་དཔོག་གོ་ཞེས་གཞན་གྱིས་བརྗོད་པ་ལ་འདིར་ཡང་ཞེས་གསུངས་ཏེ། ཆོས་དང་ཆོས་ཅན་ཐ་དད་པར་རྗེས་སུ་དཔོག་པ་ལ་ཡང་ངོ༌། །དེ་ལྟར་འགྱུར་རོ་ཞེས་བྱ་བ་ནི་ཡུལ་གཞན་དང་དུས་གཞན་དུ་རབ་ཏུ་གྲུབ་པའི་མངོན་སུམ་པའི་ཆོས་དང་ཆོས་ཅན་ཐ་དད་པར་རྗེས་སུ་དཔོག་པར་འགྱུར་རོ། །འདིར་ཞེས་བྱ་བ་ནི་ཆོས་དང་ཆོས་ཅན་ཐ་དད་པ་ལའོ། །རྗེས་སུ་དཔག་པ་གཞན་ལ་དཔེ་གྲུབ་ན། །རྗེས་སུ་དཔག་པ་གཞན་དེ་ཡང་དཔེ་གཞན་བླང་ དགོས་པ ་རྗེས་སུ་དཔག་པ་དེ་ལ་ཡང་གཞན་
ཡིན་པའི་ཕྱིར། འདིར་ནི་ལོང་བ་བརྒྱུད་པ་ཡིན་ནོ། །དེ་བཞིན་ནོ་ཞེས་བྱ་བ་ནི་རྗེས་སུ་འགྲོ་བ་དང་ལྡོག་པ་ཡིན་ནོ་ཞེས་བྱ་བའོ། །འོ་ན་ཐ་དད་པར་ཇི་ལྟར་ཞེས་དྲིས་པ་ལ་བརྗོད་པ་ནི་ཅིག་ཅར་ཞེས་བྱ་བའོ། །གལ་ཏེ་བུམ་པ་དང་སྣམ་བུ་དག་རྗེས་སུ་འགྲོ་བ་དང་ལྡོག་པར་ཁས་མི་ལེན་ན། དེའི་ཚེ་ཅིག་ཅར་ཡོད་པའི་སྣ་ཚོགས་སུ་སྣང་བ་ནི་གཅིག་ཉིད་དུ་འགྱུར་ཏེ་ལྷན་ཅིག་སྣང་བའི་ཕྱིར་རོ། །དེས་ན་རྗེས་སུ་འགྲོ་བ་དང་ལྡོག་པ་དག་ནི་གདོན་མི་ཟ་བར་ཁས་བླང་ དགོས་སོ་ཞེས་བརྗོད་པ ་ནི། འོན་ཏེ་ཞེས་བྱ་བའོ། །དེ་ལྟ་ན་ནི་ཞེས་བྱ་བའོ། །མ་འདྲེས་པར་ཞེས་བྱ་བ་ནི་སོ་སོར་རོ། །ཐ་དད་གནས་པ་ནི་ཐ་དད་པ་རྟོགས་པའོ། །དབྱིབས་དང་མདོག་དག་ལ་ནི་སོ་སོར་སྣང་བ་དེ་མེད་པ་ཉིད་དོ། །དེ་བས་ན་བུམ་པ་དང་སྣམ་བུ་དག་དང་མདོག་དབྱིབས་དག་ནི་མཚུངས་པ་མ་ཡིན་ཏེ། དེས་ན་བུམ་པ་དང་སྣམ་བུ་དེར་དེ་གཉིས་ནི་ཐ་དད་པ་མ་ཡིན་ནོ། །ད་ནི་བ་ལང་དང་པ་ལང་ཉིད་གཉིས་གོ་རིམས་ཅི་ལྟ་བར་ལྡོག་པ་དང་རྗེས་སུ་འགྲོ་བ་དག་ལས་ཐ་དད་པར་མི་འཐད་པ་ཉིད་དེ་དེ་མ་གྲུབ་པའི་ཕྱིར་རོ་ཞེས་སྟོན་པ་ནི་བ་ལང་ཉིད་ལ་སོགས་པའི་ཞེས་བྱ་བའོ། །དེ་ནི་སྤྱི་ཡི་རྗེས་སུ་འགྲོ། །མི་འགྲོ་བ་ལས་ཞེས་བྱ་བ་ནི་བ་ལང་ལ་སོགས་པ་ལས་སོ། །འོ་ན་རྗེས་སུ་འགྲོ་བ་ཉིད་དུ་ཐ་སྙད་ཅི་ལྟར་བྱེད་སྙམ་ན། གཅིག་ཏུ་ཞེས་གསུངས་སོ། །དེ་དག་ཉིད་ཅེས་བྱ་བ་ནི་བ་ལང་ལ་སོགས་པ་རྣམས་སོ། །དེ་ལྟར་ན་ཞེས་བྱ་བ་ནི་དོགས་པའོ། །མ་ཡིན་ཏེ་ཞེས་བྱ་བ་ནི་འགོག་པའོ། །མཐོང་བ་མི་འཐད་པ་ཉིད་མ་ཡིན་ཏེ། འོན་ཀྱང་འཐད་པ་ཉིད་དེ་མ་མཐོང་བ་ཡང་འཐད་པ་མ་ཡིན་ནོ། །ཅིའི་ཕྱིར་སྙམ་ན་མཐོང་བ་དང་ཞེས་བྱ་བའི། །དེ་བཞིན་དུ་ཞེས་བྱ་བ་ནི་གཅིག་ཏུ་ཞེ་ན་པ་བཞིན་དུའོ། །ཐ་དད་པ་མེད་པ་ཡང་ཞེས་བྱ་བ་ནི་སྤྱིའོ། །འདི་ནི་གནས་པ་མ་ཡིན་ནོ་ཞེས་བྱ་བ་ནི་ཚོགས་པ་མ་ཡིན་པའོ། །དེ་ནི་ཞེས་བྱ་བ་ནི་གཅིག་ཏུ་འཛིན་པའོ། །གཞན་ཡང་གལ་ཏེ་དེ་གཅིག་ཉིད་དུ་མཐོང་བར་འགྱུར་ན་དེའི་ཚེ་གཅིག་ཏུ་གནས་པ་ལས་གཅིག་ཏུ་གྱུར་པ་ཡིན་ནོ་ཞེས་བརྗོད་པ་ནི། གཅིག་ཏུ་འཛིན་པ་འདི་ནི་ཞེས་བྱ་བའོ། །དམིགས་པའི་ཐ་དད་ནས་གཅིག་ཏུ་མངོན་པར་ཞེན་པར་སྐྱེ་བ་ཡིན་ན། མངོན་སུམ་གྱི་བདག་ཉིད་ཅན་གྱི་དམིགས་པ་དེ་ཡང་རིམ་པ་དང་ལྡན་པ་ཡིན་གྱི་གཅིག་ཉིད་ནི་མ་ཡིན་ནོ། །འོན་ཏེ་དམིགས་པ་
དེ་ཉིད་སྐད་ཅིག་ཐ་དད་པ་ཅན་གྱི་དངོས་པོའི་ཡུལ་ལ་སྐྱེ་བ་ན་གཅིག་ཏུ་མངོན་པར་ཞེན་པ་ཡང་ཡུལ་དེ་ཉིད་སྐྱེད་པར་བྱེད་པ་ཡིན་ཏེ། དེས་ན་གཅིག་ཏུ་ཞེན་པ་ནི་གཅིག་གི་ཡུལ་ཡང་ཡིན་པའི་ཕྱིར། ཇི་ལྟར་ན་གཅིག་ཉིད་ལ་མ་མཐོང་ཞེས་བརྗོད་སྙམ་ན། སྐད་ཅིག་རེ་རེ་ནི་ཞེས་གསུངས་སོ། །སྐད་དང་སྐད་ཅིག་ལ་སོ་སོར་རིག་པ་གང་ཡིན་པ་སྟེ། ཁྱད་པར་ཅན་གྱི་རིག་པ་ངེས་པའི་བདག་ཉིད་ཅན་གང་ཡིན་པ་དེ་མེད་པའི་ཕྱིར་རོ། །དེ་ཉིད་ཅེས་བྱ་བ་ནི་བརྟགས་པ་ཉིད་དོ། །རེས་འགའ་ནི་མ་ཡིན་ནོ་ཞེས་བྱ་བ་ནི་དོན་རེས་འགའ་བ་ཉིད་མ་ཡིན་ནོ། །འདིས་ནི་རྒྱུ་ཐ་དད་པར་བརྗོད་དོ་རང་གི་ངོ་བོ་ཐ་དད་པར་བརྗོད་པ་ནི་མངོན་སུམ་གྱི་རྣམ་པ་ནི་ཞེས་བྱ་བའོ། །གཉིས་པོ་འདི་ཉིད་ཉེ་བར་བསྡུས་ནས་སྟོན་པ་ནི་དེས་ན་ཞེས་བྱ་བའོ། །ཤེས་པ་ཉིད་ཐ་དད་པར་བསྟན་པ་ན་དེའི་ཡུལ་དག་ཀྱང་ཐ་དད་པར་བསྟན་པར་འགྱུར་རོ་ཞེས་དགོངས་པའོ། །དཀར་པོ་ནི་དབང་པོས་དབྱིབས་ལས་ཐ་དད་པར་ཡང་འཛིན་པ་མ་ཡིན་ནོ་ཞེས་འབྲེལ་ཏོ། །སྒྲས་ནི་དཀར་པོ་དབྱིབས་ལས་ཐ་དད་པར་འཛིན་ཏོ། །དེ་བཞིན་དུ་ཆོས་ཅན་ལ་སོགས་པ་དང༌། སོགས་པའི་སྒྲས་ནི་ཆོས་ཉིད་དུ་སྒྲས་འཛིན་པ་ཡིན་ནོ། །དེ་བཞིན་དུ་མི་གསལ་བ་དང་སོགས་པའི་སྒྲས་རྗེས་སུ་སོང་བ་ཉིད་སྒྲས་འཛིན་པ་ཡིན་ནོ། །ཕྱིར་ཏེ་གཏན་ཚིགས་དེའི་ཕྱིར་ན་སྟེ། དབང་པོའི་ཤེས་པ་དང་སྒྲའི་ཤེས་པ་དག་བཤད་ཟིན་པའི་ཚུལ་གྱིས་འགལ་བའི་ཆོས་གནས་པ་ལས་ཐ་དད་པའི་ཕྱིར་ན་དབང་པོའི་བློར་ནི་བརྗོད་དུ་མེད་པའི་རང་བཞིན་ཉིད་རྟོགས་པ་ཡིན་ནོ། །དེའི་ཕྱིར་དོན་གཅིག་ཉིད་ཡིན་ན་སྟེ། ཡུལ་གཅིག་ཉིད་ཡིན་ན་ཤེས་པ་གཉིས་རང་བཞིན་ཐ་དད་པར་མི་འཐད་དོ། །རྟེན་ཐ་དད་པ་ལས་ཞེས་བྱ་བ་ནི་རྒྱུ་ཐ་དད་པ་ལས་སོ། །རྟེན་ཐ་དད་པ་ལས་ཤེས་པའི་རྣམ་པ་ཐ་དད་པ་ཉིད་སྟོན་པ་ནི་འདི་ལྟར་ཞེས་བྱ་བའོ། །དེ་བཞིན་དུ་སྐྱེས་བུ་རབ་རིབ་ཅན་དག་གསལ་བ་ལ་གཞན་དུ་མི་གསལ་བར་མཐོང་བ་དེ་བཞིན་དུའོ། །འདིར་ཡང་ཞེས་བྱ་བ་ནི་སྒྲ་དང་དབང་པོའི་ཤེས་པ་དག་ལའོ། །ད་ནི་གཞན་དག་དང་ཕ་རོལ་གྱི་ཉེ་བར་བཀོད་པའི་དཔེ་དང་མཚུངས་པར་སྒྲུབ་པར་བྱེད་པ་སུན་འབྱིན་པ་བརྗོད་པ་ནི། སེར་པོ་ལ་སོགས་པར་སྣང་ཞེས་བྱ་བའོ། །ཅི་འགའ་ཞིག་ནུས་པའི་ཁྱད་པར་སྨྲས་སམ་སྙམ་ན། གང་གིས་ཞེས་བྱ་བའོ། །ཡང་ཇི་
ལྟར་ན་ནུས་པའི་ཁྱད་པར་གསལ་སྙམ་ན། རྣམ་པ་གཞན་དུ་ཞེས་གསུངས་སོ། །ཆོས་དང་ཆོས་ཅན་དག་ཐ་དད་པ་པར་རམ་གཞན་དུ་མི་གསལ་བ་ཉིད་ལ་སོགས་པར་སྒྲ་ལས་བྱུང་བའི་རྟོགས་པས་མངོན་སུམ་གྱིས་རྟོགས་པ་ལ་ལྟོས་ནས་རྣམ་པ་གཞན་དུ་རྟོགས་པར་ཁས་ལེན་པ་ལ་ནི་འཁྲུལ་པ་ཉིད་བཟློག་ཏུ་མེད་པར་འགྱུར་རོ། །འདི་ཞེས་བྱ་བ་ནི་སྒྲའི་ཤེས་པའོ། །དེ་ཉིད་ཅེས་བྱ་བ་ནི་བདེ་བ་དང་སྡུག་བསྔལ་གྱི་མཚན་ཉིད་དོ། །འདི་ལ་བརྗོད་པ་ནི་དོན་བྱ་བ་འདི་ནི་ཞེས་བྱ་བའོ། །དོན་གཅིག་ཉིད་ལ་ནི་ཡུལ་གཅིག་ཉིད་ལའོ། །ཤེས་པ་དེ་ལ་ཞེས་པ་ནི་སྔོན་པོའི་ཡུལ་ཅན་གྱི་རྣམ་པར་ཤེས་པ་ལའོ། །འོན་ཏེ་གཞན་ཁོ་ན་སྣང་བ་ཡིན་ནོ་སྙམ་ན། མེད་པའོ་ཞེས་གསུངས་སོ། །གལ་ཏེ་འདི་ནི་དེ་ཉིད་གཞན་དུ་སྣང་བ་ཡིན་ནོ་སྙམ་ན། གཞན་སྣང་བ་ན་ཞེས་གསུངས་སོ། །གཞན་འབྲེལ་པར་སྟོན་པ་ནི་ཅི་སྟེ་ཞེས་བྱ་བའོ། །འདི་ལ་བརྗོད་པ་ནི་དེ་ལྟ་ན་ནི་ཞེས་བྱ་བའོ། །གཅིག་ཉིད་འགལ་བར་འགྱུར་རོ་ཞེས་བྱ་བ་ནི་ཁྱེད་ཀྱིས་ནི་སྔོན་པོའི་ཡུལ་ཅན་གྱི་དབང་པོའི་ཤེས་པ་དང༌། སྒྲ་ལས་བྱུང་བའི་ཤེས་པ་གཉིས་དོན་གཅིག་པར་དམ་བཅས་སོ། །མིག་ཀྱང་སྒྲའི་ཤེས་པའི་ལུགས་ཡིན་ན་དེ་འགལ་བ་ཡིན་ནོ། །དེ་ཉིད་སྟོན་པ་ནི་མིག་ཀྱང་ཞེས་བྱ་བའོ། །མིག་ཡུལ་ཡིན་ན་ནི་བློ་རྣམས་དོན་གཅིག་ཉིད་ཡིན་ཡང་ཞེས་བྱ་བ་འདིར་རྟེན་ཐ་དད་པས་ཞེས་བྱ་བ་ཉམས་པར་འགྱུར་རོ། །ཇི་ལྟར་ཞེ་ན། ཡུལ་ཉིད་ཅེས་གསུངས་སོ། །ཡུལ་ཉིད་ཡིན་ན་ནི་རྟེན་གྱི་དངོས་པོ་ཡིན་པར་ཡང་བརྗོད་པ་མི་འཐད་དེ། སྔོན་པོ་ལ་སོགས་པ་བཞིན་ནོ། །དེས་ཁྱེད་ཀྱིས་ཡུལ་གྱི་དངོས་པོ་ཉིད་དུ་བརྗོད་པར་བྱ་བ་དེས་ན་ངག་གི་ཞེས་བྱ་བ་ལ་སོགས་པར་སྦྱོར་རོ། །གལ་ཏེ་སྣ་ཚོགས་པས་ཞེས་ནི་མི་བརྗོད་ཀྱི་དོན་ཀྱང་སྒྲ་རྟེན་ཡིན་པའི་ཕྱིར་རོ་ཞེས་སོ། །དེ་ན་ཡིན་དང་དོན་གཅིག་ཡིན་ཡང་སྒྲས་བསྐྱེད་པའི་ཕྱིར་རྣམ་པ་ཡིན་ནོ་ཞེས་བྱ་བའི་དོན་ཏོ། །འོ་ན་སྒྲ་ལས་བྱུང་བའི་ཤེས་པ་ནི་ཡུལ་དུ་འགྱུར་ཏེ། སྐྱེད་བྱེད་ཡིན་པའི་སྔོན་པོ་ལ་སོགས་པ་བཞིན་ནོ་ཞེས་དོགས་པ་བསུ་ནས། བརྗོད་པ་ནི་རྟོགས་པའི་སྒྲ་ལས་ཞེས་བྱ་བ་ཉན་པའི་ཤེས་པ་རྟོགས་པ་ལས་སོ། །དེས་ཅིར་འགྱུར་སྙམ་ན་འདི་ནི་ཞེས་བྱ་བ་སྟེ་སྒྲའོ། །རྟོགས་ཟིན་པ་སྟོན་ན་དོན་མེད་པའི་ཕྱིར་རོ་ཞེས་བྱ་བའོ། །
གལ་ཏེ་སྔོན་པོའི་སྒྲ་དང་དོན་དང་སྒྲའི་ཤེས་པ་མཚན་ཉིད་ཀྱིས་མཐུན་པའི་རྣམ་པ་ཅན་ཡིན་པ་དེ་ལྟ་ན་ཡང་སྐྱེད་བྱེད་ཡང་ཡིན་པའི་ཕྱིར་དང་སྒྲ་ལས་རྟོགས་པ་ཡིན་པའི་ཕྱིར། འདིའི་ཡུལ་ནི་དོན་ཉིད་ཡིན་གྱི་སྐྱེད་པར་བྱེད་པ་ཡིན་ཡང་སྒྲ་ནི་མ་ཡིན་ཏེ། དེ་ནི་རྟོགས་ཟིན་པའི་ཕྱིར་ཞེས་བྱ་བ་ནི་གཞན་གྱི་བསམ་པའོ་འདི་ལ་བརྗོད་པ་ན་ནི་དེ་ལྟ་ན་ནི་ཞེས་བྱ་བའོ། །དེ་ལས་ཞེས་བྱ་བས་ནི་སྒྲ་ལས་བྱུང་བའི་ཤེས་པ་ལས་སོ། །འབྲེལ་བ་མེད་ཉིད་བརྗོད་པ་ནི་དེ་ནི་ཞེས་བྱ་བའོ། །གཞན་ལས་ཞེས་བྱ་བ་ནི་རང་གི་ངོ་བོ་མ་ཡིན་པ་རྣམ་པར་ཤེས་པ་ལས་སོ། །དེ་ལས་ཞེས་བྱ་བ་ནི་སྒྲར་སྣང་བའི་ཤེས་པ་ལའོ། །དེ་ལས་རྣམ་པ་གཞན་ཞེས་བྱ་བ་ནི། སྒྲའི་ཤེས་པ་ལས་སོ། །ཤེས་པ་ཐམས་ཅད་ནི་རང་གི་རང་བཞིན་མངོན་དུ་བྱེད་པའི་ཕྱིར་རོ། །དེ་ནི་ཞེས་བྱ་བ་ནི་བ་ལང་ལ་སོགས་པའོ། །གལ་ཏེ་དེ་ལྟར་རྗེས་སུ་དཔག་པ་ཉིད་ཀྱི་ཡུལ་ཡིན་ནོ་ཞེས་བརྗོད་པ་ནི། དེ་རྗེས་སུ་དཔག་པའི་ཡུལ་དུ་བརྗོད་པར་འགྱུར་རོ་སྙམ་དུ་བསམས་ནས་གཞན་བརྗོད་པ་ནི་འོ་ན་ཞེས་བྱ་བའོ། །མ་ཡིན་ནོ་ཞེས་བྱ་བ་ནི་འགོག་པའོ། །འོ་ན་རྗེས་སུ་དཔག་པ་ལས་མི་སྣང་བ་ལ་ཇི་ལྟར་འཇུག་ཅེས་བྱ་བ་ནི་གཞན་གྱིའོ། །འདི་ལ་བརྗོད་པ་ནི་ཐམས་ཅད་དུ་ཞེས་བྱ་བ་སྟེ། མངོན་སུམ་དང་རྗེས་སུ་དཔག་པ་ལས་ཡང་ངོ༌། །དེ་ཉིད་ཅེས་བྱ་བའི་སྒྲའི་ཡུལ་ཀུན་རྫོབ་པ་ཉིད་དོ། །གལ་ཏེ་དེ་ཉིད་ཀྱིས་དོན་དམ་པར་འགྱུར་རོ་སྙམ་ན་གལ་ཏེ་ཞེས་བྱ་བའོ། །དེའི་རང་བཞིན་ཞེས་བྱ་བ་ནི་དབང་པོའི་རྣམ་པར་ཤེས་པའི་རང་བཞིན་གྱི་ཡུལ་གྱིའོ། །དེ་ལས་ནི་སྒྲ་ལས་རྟོགས་པའི་ཡུལ་ལའོ། །འདི་བརྗོད་པ་ནི་གལ་ཏེ་ཞེས་བྱ་བའོ། །དེའི་ཚེ་གཞན་གྱིས་ཀྱང་གསལ་བའི་རང་བཞིན་གྱིས་མཚོན་པའི་དོན་རྟོགས་པར་འགྱུར་ཞེ་ན། གསལ་བའི་རང་བཞིན་འཛིན་པས་ཞེས་བྱ་བའོ། །གལ་ཏེ་གསལ་བའི་རང་བཞིན་གྱིས་ཤེས་པ་ཡིན་ན། དེའི་ཚེ་གསལ་བའི་དངོས་པོ་རྟོགས་པར་འགྱུར་རོ། །དེས་ན་སྒྲ་ལས་བྱུང་བའི་ཤེས་པས་ཀྱང་གསལ་བར་སྣང་བ་འཛིན་པར་འགྱུར་རོ་ཞེས་བསམས་པའོ། །དབང་པོའི་ཤེས་པ་དང་སྒྲའི་ཤེས་པ་གང་ཡིན་པ་དེ་གཉིས་ཀྱི་རྣམ་པ་གང་ཡིན་པ་དེ་གསལ་བ་དང་མི་གསལ་བ་དག་གིས་ཐ་དད་ཀྱང་ངོ་ཤེས་པ་ལས་གཅིག་ཉིད་དུ་མི་གསལ་ལོ་ཞེ་ན། ལན་ནི་དེ་ཡང་ངོ་ཞེས་
བྱ་བའོ། །གནོད་པར་བྱེད་པ་ཉིད་སྟོན་པ་ནི། རྟོགས་པ་ཐ་དད་པ་ཞེས་བྱ་བའོ། །ཇི་ལྟར་ཡོད་སྙམ་ན་དྲན་པར་བྱ་བའི་ཞེས་བྱ་བའོ། །དེ་ལྟར་ན་ཡང་རྣམ་པ་ཐ་དད་པར་ཇི་ལྟར་འགྱུར་སྙམ་ན། དྲན་པ་དེ་ནི་ཞེས་གསུངས་སོ། །ངོ་ཤེས་པའི་མཚན་ཉིད་དེ་ནིའོ། །མཐོང་བ་ནི་ཞེས་བྱ་བ་ནི་མངོན་སུམ་ནི་ད་ལྟར་བའི་དངོས་པོ་ལ་ཡིན་ནོ། །དེས་ན་ངོ་ཤེས་པ་དང་མཐོང་བ་གཉིས་འདས་པ་དང་ད་ལྟར་བའི་ཡུལ་ཅན་ཡིན་པའི་ཕྱིར་རྣམ་པ་ཐ་དད་པ་ཁོ་ནའོ། །དེའི་ཕྱིར་དེ་ཉིད་ཡུལ་གཅིག་པའི་གནོད་བྱེད་ཡིན་ནོ་ཞེས་དགོངས་པའོ། །བསྟན་ཟིན་ཏེ་ཞེས་བྱ་བ་ནི། དབང་ཚོགས་འབྲས་བཅས་ཉིད་ཕྱིར་རོ། །ཞེས་བྱ་བ་དེར་འོ་ན་ཇི་ལྟར་ངོ་ཤེས་པ་དེ་སྐྱེད་སྙམ་ན་མཐོང་བ་ལས་ནི་ཞེས་བྱ་བའོ། །སུན་ཕྱུང་བའི་རྣམ་པ་བརྗོད་པ་ནི་བརྗོད་པ་དང་ཞེས་བྱ་བའོ། །གཏན་ཚིགས་མ་གྲུབ་པ་ཉིད་དུ་ཡང་བརྗོད་པ་ནི་རྗེས་སུ་འགྲོ་བ་ནི་ཞེས་བྱ་བའོ། །ཅི་ལྟར་ན་མངོན་པའི་ང་རྒྱལ་ཙམ་ཡིན་སྙམ་ན། མཐོང་བ་ཇི་ལྟ་བཞིན་ཞེས་བྱ་བའོ།། སྤྱི་ནི་མཐོང་བ་མ་ཡིན་ནོ་ཞེས་དགོངས་པའོ། །གཞན་ཡང་མཐོང་བ་ལ་སྒྲའི་རྣམ་པར་ཤེས་པས་མ་རེག་ན་སྟེ་མ་རྟོགས་ན་ཡང་ངོ༌། །འབྲེལ་པ་མ་རྟོགས་པར་འབྲེལ་པ་རྟོགས་པ་མི་འཐད་པའི་ཕྱིར་རོ། །གང་གི་ཕྱིར་དེ་ལྟ་མིན་པ་དེས་མཐོང་བ་ཉིད་མ་རྟོགས་པའི་ཕྱིར་དེ་ལ་ཅི་ཡོད་དོ་ཞེས་ཇི་ལྟར་རྟོགས་བུམ་པ་ལ་སོགས་པ་མ་རྟོགས་པ་ནི་དེ་ལ་ཆུ་ཡོད་དོ་ཞེས་རྟོགས་པར་སྲིད་དོ། །ཐ་དད་པའམ་ཐ་མི་དད་པའི་རྣམ་པ་སྟེ་རྗེས་སུ་སོང་བའི་སྤྱི་གང་ཡིན་པ་འཛིན་པ་དེར་ནུས་པ་དེའི་ལམ་དུ་གནས་པའི་མཐོང་བ་ནི་མ་ཡིན་ནོ། །རྣམ་པ་གཞན་མི་སྲིད་པའི་ཕྱིར་ཞེས་བྱ་བ་ནི་སྤྱི་གཞན་རྗེས་སུ་སོང་བ་མི་སྲིད་པའི་ཕྱིར། རང་ཉིད་ཀྱིས་གོམས་པ་བག་ཆགས་དང་རྗེས་སུ་མཐུན་པའི་འདུ་བྱེད་སྔར་གྱི་གསལ་བ་མཐོང་བས་གཞག་པའི་འདུ་བྱེད་གང་ཡིན་པའི་ས་བོན་སད་པས་ནུས་པ་གསལ་བར་དེ་ལྟར་རྟོགས་པ་དེར་ཞུགས་པའོ། །རིགས་ལ་སོགས་པའི་རྟོགས་པ་གང་ཡིན་པ་དེ་མེད་པའི་ལམ་དུ་ཞུགས་པ་གང་ཡིན་པ་དེ་ན་རྗེས་སུ་མང་བའི་མཚན་ཉིད་ཀྱིས་རྟོགས་པ་དེའི་དབང་གིས་ཡིན་ནོ། །ཡིད་ཀྱི་མངོན་སུམ་བཤད་པའི་ཕྱིར། ཕྱོགས་ཀྱི་གླང་པོའི་ཞལ་སྔ་ནས་ཀྱིས་མདོ་རེ་ཞིག་འཆད་པ་ནི། ཡིད་ཀྱང་དོན་དང་ཆགས་ལ་སོགས། །ཞེས་བྱ་བའོ། །དོན་དང་ཆགས་པ་ལ་སོགས་པའི་རང་བཞིན་གང་ཡིན་པ་དེ་དག་རིག་པའོ། །འདིས་ནི་ཡིད་ཀྱི་
མངོན་སུམ་དང་རང་རིག་པ་ཡང་བརྗོད་པ་ཡིན་ནོ། །མདོ་འདི་ཉིད་ཀྱིས་འབྲེལ་པའི་གཞུང་ནི་དོན་དང་ཞེས་བྱ་བ་ལ་སོགས་པའོ། །མངོན་སུམ་གྱི་གཏན་ཚིགས་ནི་ཉམས་སུ་མྱོང་བའི་རྣམ་པར་ཞེས་བྱ་བའོ། །འོན་ཏེ་མིག་ལ་སོགས་པའི་རྣམ་པར་ཤེས་པ་ཉིད་ཡིད་ཀྱང་ཡིན་ནོ་སྙམ་ན། སྨྲས་པ་མིག་ལ་སོགས་པས་སྐྱེད་པ་གང་ཡིན་པ་དེ་ནི་དབང་པོའི་ཤེས་པ་ཉིད་ཡིན་ནོ། །འོན་ཏེ་དེ་ལས་ཞེས་བྱ་བ་མིག་གི་རྣམ་པར་ཤེས་པ་ལ་སོགས་པ་ལས་སྐྱེད་པ་ཡིད་ཡིན་ནའོ། །འདིས་ཞེས་བྱ་བས་ནི་ཡིད་ཀྱིས་སོ། །ཁས་བླངས་ནས་ཀྱང་བརྗོད་པ་ནི་དྲན་པར་བྱ་བ་མ་ཡིན་པར་ཞེས་བྱ་བའོ། །བརྒྱ་ལ་གྲུབ་པའི་མཐའ་པས་རྟོགས་པ་ལས་ངོ་ཤེས་པ་གཏན་ཚིགས་སུ་སྨྲ་བར་འགྱུར་བས་དེ་ལ་བརྗོད་པ་ནི་ངོ་ཤེས་པ་ནི་ཞེས་བྱ་བའོ། །མ་མཐོང་བ་ཞེས་བྱ་བ་གལ་ཏེ་མིག་ལ་སོགས་པའི་ཤེས་པས་མ་མཐོང་བ་གང་ཡིན་པ་དེ་ཉིད་ཡིད་ཀྱིས་འཛིན་ནའོ། །གཞན་གྱིས་ཞེས་བྱ་བ་ནི་མ་ལོང་བས་སོ། །དོན་ཐམས་ཅད་འཛིན་པར་ཐལ་བ་ནི་ཐམས་ཅད་མཁྱེན་པར་འགྱུར་རོ་ཞེས་བྱ་བར་ཐལ་བའོ། །རང་བཞིན་དེ་ཉིད་ཅེས་བྱ་བ་ནི་ཤེས་པ་སྔ་མས་ཡོངས་སུ་བཅད་པའོ། །སྔར་ཡོངས་སུ་བཅད་པ་གང་ཡིན་པ་དེ་ཉིད་ཤེས་པ་ཕྱི་མས་བྱ་ དགོས་པ ་དེས་ན། དེས་ཅི་ཞིག་བྱ་འདི་ལ་གྲུབ་པའི་མཐའ་པས་བརྗོད་པ་ནི། ཡོངས་སུ་མ་བཅད་པ་ལ་ཞེས་བྱ་བའོ། །གཞན་གྱིས་རང་གི་ངོ་བོར་སྣང་བ་ཉིད་དོ་ཞེས་སྨྲས་སོ། །འདི་ལ་གྲུབ་པའི་མཐའ་སྨྲ་བས་བརྗོད་པ་རང་གི་ངོ་བོར་སྣང་བ་དེ་གཞན་ལ་ཡང་ཞེས་བྱ་བ་ཡོངས་སུ་བཅད་པ་ཡང་ངོ༌། །འདི་ལ་གཞན་གྱིས་བརྗོད་པ་ནི་དེ་ལྟར་ན་ཞེས་བྱ་བའོ། །ཤེས་པ་སྔ་མ་ལ་སྣང་བ་གང་ཡིན་པ་དེ་ཉིད་ཤེས་པ་ཕྱི་མ་ལ་ཡང་ཡིན་ནོ་ཞེས་སྨྲས་པས་རྟག་པ་ཉིད་དུ་ཁས་བླངས་པར་འགྱུར་རོ་ཞེས་བསམས་པའོ། །འདི་ལ་གྲུབ་པའི་མཐའ་པས་ད་ལྟར་ཞེས་གསུངས་སོ། །འདི་འགོག་པ་ནི་མ་ཡིན་ནོ་ཞེས་བྱ་བའོ། །དེ་ཉིད་ཀྱིས་ཞེས་བྱ་བ་ནི་ཤེས་པ་སྔ་མས་སོ། །ཤེས་པ་གཞན་གྱིས་རྟག་པ་ཉིད་འཛིན་པར་འགྱུར་རོ་ཞེ་ན། འདི་འགོག་པ་ནི་མ་ཡིན་ཏེ་ཞེས་བྱ་བའོ། །རྟག་པ་གང་ལ་ཡིད་ཆེས་པ་སྟེ་རྟོགས་པ་ཡོད་པ་མ་ཡིན་ཏེ་དེའི་དངོས་པོ་དེའི་ཕྱིར་རོ། །ཤེས་པ་གཞན་གྱིས་ནི་རྟོགས་པར་མི་ནུས་སོ་ཞེས་བསམས་པའོ། །འདི་ཉིད་སྟོན་པ་ནི་དེའི་ཕྱིར་ཞེས་བྱ་བ་སྟེ་རྟག་པ་
ཉིད་དུ་འཛིན་པ་གཞན་དུ་མི་སྲིད་པའི་ཕྱིར་རོ། །དེ་ཉིད་ཀྱིས་ཞེས་བྱ་བ་ནི་སྔ་མས་སོ། །ཇི་ལྟར་དོན་མེད་སྙམ་ན་དེའི་རང་བཞིན་དུ་ཞེས་གསུངས་ཏེ། འཛིན་པར་བྱེད་པ་གཞན་གྱིས་ཀྱང་སྔར་གཟུང་བའི་རང་བཞིན་ཉིད་དུ་རྟོགས་པའི་ཕྱིར་རོ་ཞེས་བྱ་བའི་དོན་ཏོ། །དེའི་རྣམ་པ་འཛིན་པ་ཞེས་བྱ་བ་ནི་རྣམ་པ་གཅིག་མངོན་དུ་བྱེད་པའོ། །དེའི་དུས་འཛིན་པར་ཞེས་བྱ་བ་ནི་སྔོན་གྱི་དུས་འཛིན་པ་ཉིད་དུའོ། །གཞན་དག་ནི་ཞེས་བྱ་བ་ནི་ཡིད་ཚད་མར་བྱེད་པའོ། །གལ་ཏེ་ཡིད་ཀྱི་ཞེས་བྱ་བ་ནི་གལ་ཏེ་ཡིད་ཀྱི་དངོས་པོ་གཟུང་བ་མེད་ན་དེའི་ཚེ་ཡིད་ཀྱི་རྣམ་པར་ཤེས་པས་དྲན་པར་མི་འགྱུར་རོ། །གལ་ཏེ་དབང་པོའི་རྣམ་པར་ཤེས་པས་གཟུང་བ་ཡིད་ཀྱིས་དྲན་པར་བྱེད་དོ་སྙམ་ན། འདིར་འགས་ཞེས་སྨྲས་ཏེ། བུས་བུ་གང་འགའ་ཞིག་གིས་མྱོང་བའི་དངོས་པོ་ནི། དེ་ལས་གཞན་འགའ་ཞིག་ནི་དྲན་པ་ནི་ནམ་ཡང་མེད་དོ། །དེའི་ཕྱིར་ཡིད་ཀྱི་རྣམ་པར་ཤེས་པས་དྲན་པའི་ཕྱིར་དངོས་པོ་མངོན་དུ་བྱེད་པའི་ཡོན་ཏན་ནི་ཡོད་པ་ཉིད་དོ་སྙམ་ན། འདི་ལ་གཞན་གྱི་སུན་འབྱིན་པ་བརྗོད་པ་ནི་གལ་ཏེ་ཞེས་བྱ་བའོ། །དེའི་རྣམ་པར་རྟོག་པ་དང་བཅས་པའི་ཡིད་ཀྱིས་ཀྱང་རྣམ་པར་རྟོག་པ་མེད་པའི་ཡིད་ཀྱིས་གཟུང་བ་དངོས་པོ་དྲན་པར་མི་འགྱུར་ཏེ། རྟག་པར་རྟོག་པ་དང་བཅས་པ་དང༌། རྟོག་པ་མེད་པ་དེ་དག་ཀྱང་ཐ་དད་པའི་ཕྱིར་རོ། །གལ་ཏེ་གཉི་ག་གང་ཡང་གང་ཡིན་པའི་ཕྱིར་གཅིག་གིས་གཟུང་བ་གཞན་གྱིས་དྲན་པར་འགྱུར་རོ་ཞེ་ན། ཤེས་པ་ཡིན་པའི་ཕྱིར་ཡང་ཞེས་གསུངས་ཏེ། དབང་པོའི་ཤེས་པས་གཟུང་བ་ཡང་ཡིད་ཀྱི་དྲན་པར་འགྱུར་ཏེ་གཉི་ག་ཡང་ཤེས་པ་ཡིན་པའི་ཕྱིར་རོ། །དེས་ན་དྲན་པའི་སྟོབས་ཀྱིས་ཡིད་ཡོངས་སུ་རྟོགས་པ་ནི་མི་འཐད་པ་ཁོ་ནའོ། །འཛིན་པ་ལ་ཞེས་བྱ་བ་ནི། འདི་ཞེས་བྱ་བར་ལྷག་པར་ཞེན་པ་སྟེ་དེ་ལ་ནི་སྔར་གྱི་གོམས་པའི་བྱེད་པ་འཇུག་པ་ཡིན་ནོ། །དེས་ན་འདི་མིག་ལས་བྱུང་བ་ཇི་ལྟར་ཡིན་ཞེས་དགོངས་པའོ། །འདི་ཉིད་མཇུག་བསྡུས་ཏེ་བསྟན་པ་ནི་དེ་ན་འདི་ལ་ཞེས་བྱ་བའོ། །འདི་ལ་ནི་འཛིན་པ་ལའོ། །ཅི་སྟེ་ཞེས་བྱ་བ་ནི་དགོངས་པའོ། །དོན་མེད་པ་མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །མོས་པ་ནི་ལྷག་པར་འཛིན་པའོ། །དེ་ཉིད་བརྗོད་པ་ནི་འདི་ཞེས་བྱ་བའོ། །ཤིན་ཏུ་གོམས་པ་ལས་རྣམ་པར་རྟོག་པ་མེད་པ་ཁོ་ནར་རོ། །གཞན་རྣམ་པར་རྟོག་པར་
ན་སྟེ་དེའི་ཡུལ་ཅན་གྱི་རྣམ་པར་རྟོག་པ་མེད་པར་ཡང་ངོ༌། །ཉེ་བར་གནས་པ་ལ་ནི་ད་ལྟར་གྱི་དུས་ན་ཡོད་པ་ལའོ། །རྣམ་པ་གཉིས་ཞེས་བྱ་བ་ནི། དབང་པོའི་ཤེས་པ་རྒྱུན་གྱིས་འཇུག་པ་དང༌། རྣམ་པ་གཅིག་གི་དབང་པོའི་ཤེས་པའི་མཚན་ཉིད་ཀྱིས་ཡིན་ལ། གཞན་ནི་ཡིད་ཀྱི་རྣམ་པར་ཤེས་པའི་མཚན་ཉིད་དོ། །འདི་ལ་གྲུབ་པའི་མཐའ་ལས་བརྗོད་པ་ནི་འདི་ཞེས་བྱ་བའོ། །དཔེར་ན་རབ་རིབ་ཅན་ཉིད་ཀྱིས་རང་རང་གི་རྣམ་པ་ཐ་དད་པ་ཁོ་ནར་ཉམས་སུ་མྱོང་མོད་ཀྱི། དེ་ལྟ་ན་ཡང་གཅིག་ཉིད་དུ་ལྷག་པར་ཞེན་པ་དེ་བཞིན་དུ་འདིར་ཡང་ཕན་ཚུན་མཚན་ཉིད་མི་མཐུན་པའི་རྣམ་པ་དབང་པོའི་ཤེས་པ་དང་ཡིད་ཀྱི་ཤེས་པ་ལ་བརྟེན་པ་གཉིས་ཉམས་སུ་མྱོང་མོད་ཀྱི། འོན་ཀྱང་འཁྲུལ་པས་གཅིག་ཏུ་ལྷག་པར་ཞན་པ་ཡིན་ནོ་ཞེས་བྱ་བའོ། །བདེ་བ་ལ་སོགས་པ་ཁོ་ན་ཡིན་པར་ཞི་བ་བཟང་པོ་ལ་སོགས་པས་བརྗོད་པ་གསལ་བའི་དོན་དུ་འགོད་པར་བྱེད་པ་ནི་འོ་ན་ཞེས་བྱ་བའོ། །འདིའོ་ཞེས་བྱ་བ་ལ་སོགས་པ་རྟོགས་པ་བཞིན་དུ་བདེ་བ་ལ་སོགས་པ་ཡང་གོམས་པའི་རྗེས་སུ་འབྲང་བ་འཇུག་པའི་ཕྱིར་རོ་ཞེས་བསམས་པའོ། །འདི་ལ་གཞན་གྱི་ཚིག་གི་ཚུལ་ཉིད་ཀྱིས་ལན་གདབ་པའི་ཕྱིར་བརྗོད་པ་ནི་དེས་ན་ཞེས་བྱ་བ་སྟེ། བདེ་བ་ལ་སོགས་པ་ཡིན་པས་ནའོ། །གཞན་གྱིས་བདེན་དེ་ཞེས་སྨྲས་སོ། །གཞན་ཉིད་ཀྱིས་གྲུབ་པའི་མཐའ་པས་གཞུང་དང་འགལ་བ་བརྗོད་པའི་དོགས་པ་བསུ་བ་ནི། དབང་པོ་ལས་འབྱུང་བའི་ཞེས་བྱ་བའོ། །ཕ་རོལ་པོ་ཡང་བདེ་བ་ལ་སོགས་པ་དབང་པོ་ལས་བྱུང་བའི་གཞུང་ཡིན་པར་བསམས་ནས་སྨྲ་བ་ནི་འདིར་ཡང་ཞེས་བྱ་བའོ། །འདིར་ཡང་བདེ་བ་ལ་སོགས་པ་དབང་པོ་ལས་བྱུང་བ་ཡིན་ཡང༌། མིག་ལ་སོགས་པའི་རྣམ་པར་ཤེས་པ་བཞིན་དུ་རང་རིག་པའི་རང་བཞིན་མི་འགལ་ཏེ། དེས་ན་དབང་པོ་ལ་མི་ལྟོས་པའི་ཕྱིར་ཞེས་བྱ་བའི་ཚིག་ཐོས་པ་ལས་གཞན་དག་འགལ་བར་སེམས་པ་ཡལ་བར་དོར་ནས་དེ་ཉིད་ལ་དྲི་བ་ནི། འོ་ན་ནི་ཆོས་ཀྱི་གྲགས་པ་འདི་གྲགས་པ་མ་ཡིན་པའི་ཕྱིར་རོ་ཞེས་བྱ་བའོ། །ཕ་རོལ་པོའི་འགལ་བ་སྣང་བའི་དོན་དུ་ངག་འདི་འཆད་པ་ནི། དབང་པོ་པ་ཉིད་བདེ་བ་དང་བདེ་བ་མ་ཡིན་པ་ཞེས་བྱ་བར་བདེ་བ་ལ་སོགས་པའི་སྒྲས་ནི་ཞེས་བྱ་བ་སྟེ། དབང་པོ་པས་ནི་དབང་པོར་གཟུང་བར་བྱ་བ་བདེ་བ་ལ་
སོགས་པའི་རྒྱུ་སྟེ། བདེ་བ་ལ་སོགས་པ་བསྐྱེད་པར་སྣང་བ་ཡང་བརྗོད་པ་ཡིན་ནོ། །དེ་སྐད་ཅེས་བྱ་བ་ནི་དབང་པོ་པ་ཉིད་དུའོ། །དེ་ལྟ་ན་ཡང་བདེ་བ་ལ་སོགས་པ་ནི་ཡིད་ཁོ་ན་ཡིན་པས་གཞུང་དང་འགལ་བ་ཅི་ཡང་མེད་དོ་ཞེས་གཞན་གྱིས་བསྟན་པ་ལ་གྲུབ་པའི་མཐའ་པ་འདྲི་བ་ནི་གལ་ཏེ་ཞེས་བྱ་བའོ། །གཞུང་འདིར་ནི་དབང་པོའི་རྣམ་པར་ཤེས་པ་དམིགས་པ་མེད་པ་བསྒྲུབ་པའི་དོན་དུ་གོམས་པའི་དབང་གིས་དེ་རྣམ་པར་མ་ངེས་པ་ཉིད་དུ་སྟོན་པར་འདོད་པ་ཡང་ཡིན་ནོ། །ཡང་གང་གི་ཚེ་བདེ་བ་ལ་སོགས་པའི་རྣམ་པར་ཤེས་པ་ཡིད་ཁོ་ན་ཡིན་ལ། དེ་ཉིད་དབང་པོའི་རྣམ་པར་ཤེས་པ་ཡང་ཡིན་ན་དོན་ངེས་པའི་རྣམ་པ་ཅན་ཡིན་པའི་ཕྱིར། དམིགས་པ་དང་བཅས་པ་ཁོ་ནར་འགྱུར་རོ། །དེ་ལྟ་ན་ཡང་སྐབས་ཀྱི་དོན་མ་བསྒྲུབ་པའི་ཕྱིར། ཁྱེད་ཀྱིས་བཤད་པ་ལྟར་ན་གཞུང་འདི་དོན་མེད་པ་ཁོ་ནར་འགྱུར་རོ་ཞེས་བྱ་བར་བསམས་པའོ། །འདིར་ཕ་རོལ་པོས་མ་ཡིན་ཏེ་ཞེས་སྨྲས་སོ། །དེར་ཡིད་ཀྱིས་འབའ་ཞིག་གོམས་པའི་དབང་གིས་རྣམ་པ་གཞན་དང་གཞན་སྐྱེ་བ་ཞེས་བྱ་བར་འདོད་པ་ནི་མ་ཡིན་གྱི། འོན་ཀྱང་ཉེ་བར་མཚོན་པར་བྱེད་པ་ཡིན་པའི་ཕྱིར། དབང་པོའི་རྣམ་པར་ཤེས་པ་ཡང་གོམས་པའི་དབང་གིས་ཉེ་བར་སྐྱེས་པ་གསལ་བ་ལ་སོགས་པ་རྣམ་པ་མང་པོས་འདོད་པ་ཁོ་ནའོ། །དེས་ན་དེ་ཡང་དམིགས་པ་མེད་པ་ཉིད་དུ་བསྟན་པ་ཁོ་ནའོ་ཞེས་བྱ་བར་བསམས་པའོ། །གལ་ཏེ་གོམས་པའི་ལྷན་ཅིག་བྱེད་པ་ཅན་གྱི་མིག་ལ་སོགས་པ་ཉིད་རྣམ་པར་ཤེས་པའི་སྐྱེད་པར་བྱེད་པ་ཡིན་ནོ་ཞེས་བྱ་བ་འཐད་ན། འོ་ན་བདེ་བ་ལ་སོགས་པ་ཡང་དབང་པོ་པ་ཉིད་དུ་འགྱུར་ཏེ་དེ་དག་ཀྱང་གོམས་པ་ལྷན་ཅིག་བྱེད་པ་ཅན་གྱི་མིག་ལ་སོགས་པས་སྐྱེད་པ་ཉིད་དུ་ཉམས་སུ་མྱོང་བའི་ཕྱིར་རོ། །མན་ངག་དག་དང་བྲལ་བར་རྗོད་པར་བྱེད་པ་མ་ཡིན་པའི་གཞུང་འཆད་པར་བྱེད་པ་གང་གི་དོན་དུ་འདི་རྩོམ་པར་བྱེད་པ་དེས་ན་སྒྲས་བསྟན་པ་ཡིན་ནོ་ཞེས་བྱ་བ་ལྷུར་ལེན་པས་ཆོག་གོ་ཞེས་བསམས་ནས་གྲུབ་པའི་མཐའ་པས་བརྗོད་པ་ནི། དབང་པོའི་ཤེས་པ་ཡང་ཞེས་བྱ་བའོ། །འདི་ལྟ་ཡིན་དང་བདེ་བ་ལ་སོགས་པ་ནི་མ་ཡིན་ནོ་ཞེས་དགོངས་པའོ། །འོ་ན་བདེ་བ་ལ་སོགས་པ་ལྟར་འདི་ཞེས་བྱ་བ་ལ་སོགས་པའི་རྣམ་པ་ཅན་གྱི་ཤེས་པ་ཡང་གོམས་པའི་ལྷན་ཅིག་བྱེད་པ་ཅན་མིག་ལ་སོགས་པའི་རྒྱུ་ལས་སྐྱེད་
པ་ན། དབང་པོ་ལས་བྱུང་བ་ཉིད་དུ་འགྱུར་གྱི་ཡིད་ནི་མ་ཡིན་ནོ་ཞེས་བསམས་ནས་བརྗོད་པ་ནི་དེ་ལྟ་ན་འོ་ན་ཞེས་བྱ་བའོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །འདི་ཞེས་བྱ་བར་རྟོགས་པ་ལ་ནི་གོམས་པ་ཉིད་ཀྱི་ནུས་པ་ཡོད་ཀྱི་དབང་པོ་ནི་མ་ཡིན་ནོ། །དེ་ལྟ་མ་ཡིན་ན་གོམས་པ་དང་བཅས་པ་ལ་ཇི་ལྟར་མིག་ལ་སོགས་པའི་བྱེད་པའི་རྫས་ཁོ་ནར་བདེ་བ་ལ་སོགས་པའི་རྣམ་པ་ཅན་གྱི། རྣམ་པར་ཤེས་པ་སྐྱེ་བ་དེ་བཞིན་དུ་འདིར་ཡང་འགྱུར་ན། དེ་ལྟར་ཡང་མ་ཡིན་ཏེ། དབང་པོའི་བྱེད་པ་ནི་དེ་མ་ཐག་ཏུ་དབང་པོའི་རྣམ་པར་ཤེས་པ་སྐྱེས་པ་ན་ཕྱིས་འདི་ཞེས་བྱ་བ་ལ་སོགས་པར་རྟགས་ཉམས་སུ་མྱོང་བའི་ཕྱིར་རོ། །དེས་ན་འདི་ནི་ཡིད་ཉིད་ཡིན་གྱི་དབང་པོ་ལས་སྐྱེས་པ་ནི་མ་ཡིན་ཏེ། དེ་ཡོད་པ་དང་མེད་པའི་རྗེས་སུ་མི་བྱེད་པའི་ཕྱིར་རོ། །དེ་བཞིན་ཉིད་དུ་ཞེས་བྱ་བ་ནི་ཡིད་ཀྱི་བྱེད་པ་ཡིན་པ་ཉིད་དུའོ། །དེ་ཞེས་བྱ་བའི་ཡིད་ཀྱི་རྟོགས་པ་ལྐོག་ཏུ་གྱུར་པ་ལ་ཇི་ལྟར་མི་འཇུག་ཅེས་སྦྱར་རོ། །ད་ནི་ཞེས་བྱ་བ་ནི་དེ་ཞེས་བྱ་བའི་རྣམ་པ་ཅན་གྱི་ཤེས་པའོ། །དེའི་རྗེས་སུ་འགྲོ་བའི་ཞེས་བྱ་བ་ནི་དེས་བསྐྱེད་པའིའོ། །འདི་ལ་གཞན་གྱིས་སྨྲས་པ་ནི་དེ་ཉིད་ཀྱིས་ཞེས་བྱ་བ་སྟེ། སྐད་ཅིག་གཉིས་པས་སོ། །ལན་ནི་མིག་གི་ཞེས་བྱ་བའོ། །དབང་པོའི་རྣམ་པར་ཤེས་པ་ཁོ་ནས་འཛིན་ནོ་ཞེས་ཇི་ལྟར་ཤེས་སྙམ་ན། དེ་ལྟར་ཡང་ཞེས་གསུངས་སོ། །དབང་པོའི་རྣམ་པར་ཤེས་པས་མཐོང་བ་ཡིན་ནོ། །ཇི་ལྟར་རྐྱེན་ཡིན་ཞེས་པ་ནི་ཡིད་ཀྱིའོ། །དབང་པོའི་ཤེས་པ་སྔ་མ་ཉིད་མཚུངས་པ་དེ་མ་ཐག་པའི་རྐྱེན་ཡིན་ནོ་ཞེ་ན་རང་གི་ཞེས་སྨྲས་སོ། །དུས་སྔ་མ་ཉིད་བསྒྲུབ་པ་ནི་ཡུལ་ནི་ཞེས་བྱ་བ་སྟེ། རྒྱུ་མ་ཡིན་པ་ནི་ཡུལ་དུ་མི་འགྱུར་རོ། །གལ་ཏེ་དེ་ལྟ་ན་ཡང་རང་གི་ཤེས་པ་དང་དུས་མཚུངས་པར་འགྱུར་རོ་སྙམ་ན། རྒྱུ་ཡང་ཞེས་གསུངས་སོ། །སྔར་ནི་འབྲས་བུ་ལས་སོ། །མེད་པ་ནི་རྒྱུ་སྟེ་དེར་འགྱུར་རོ། །རྒྱུ་སྔར་མེད་པ་ཡང་ནུས་པ་མེད་དོ། །འོན་ཏེ་འབྲས་བུའི་དུས་སུ་ཡང་འབྲས་བུ་ཡོད་པ་ཉིད་མ་ཡིན་ཏེ། དེས་ན་ནུས་སོ་སྙམ་ན་གལ་ཏེ་ཞེས་བྱ་བའོ། །གལ་ཏེ་སྣང་བ་དོན་གྱི་ངོ་བོ་ཡིན་ན་དེའི་སྔོན་པོ་ལ་སོགས་པ་ལྔར་ཞེས་སྦྱར་རོ། །དེ་ཉིད་ཅེས་བྱ་བ་སྣང་བ་ཉིད་དོ། །སྔར་ཡང་ཞེས་བྱ་བ་ནི་ཤེས་པའི་སྔོན་རོལ་དུའོ། །གལ་ཏེ་ཤེས་པ་མེད་པར་ཡང་སྣང་བ་ན་ནི་དེའི་ཚེ་ཤེས་པ་དོན་མེད་དོ་
ཞེས་སྦྱར་རོ། །འདི་ལ་བརྗོད་པ་ནི་འདི་ནི་ཁྱེད་ཉིད་ཀྱིས་ཞེས་བྱ་བའོ། །དེའི་ངོ་བོ་ཉིད་ནི་སྣང་བའི་ངོ་བོ་ཉིད་དོ། །འདི་ག་ལས་ཤེ་ན་དེ་ཉིད་ཡོད་པ་ལ་ཞེས་བྱ་བའོ། །སྣང་བའི་ངོ་བོ་ཞེས་བྱ་བའི་ཚིག་གིས་ནི་སྣང་བ་ཡོད་པ་ཡིན་ནོ་ཞེས་བསྟན་པ་ཡིན་ལ་ཕྱིས་དེ་ཡང་མེད་དོ་ཞེས་བསྟན་པ་ཡིན་ན། ཆོས་ཅན་གཅིག་ལ་སྣང་བ་དང་མི་སྣང་བ་ཕན་ཚུན་འགལ་བ་དག་གནས་པས་ཇི་ལྟར་འགྱུར་བ་མཐོང་གི་ཞེས་བྱ་བ་སྣང་བ་དམིགས་པའོ། །ཤེས་པ་ཡོད་ན་ཞེས་བརྗོད་པ་ནི། བྱེད་པ་པོ་ཉིད་དུ་ཞེས་བརྗོད་པ་ཡིན་ན། དེ་ཡང་མི་འཐད་དོ་ཞེས་སྟོན་པ་ནི། ཅི་ད་ནི་ཞེས་བྱ་བའོ། །བྱེད་པ་པོ་ཉིད་དུ་འགྱུར་མོད་དེ་ལས་ཅིར་འགྱུར་ཞེ་ན། བྱེད་པ་པོ་ཉིད་ཀྱང་ཞེས་བྱ་བའོ། །དུས་མཉམ་ཡང་བྱེད་པ་པོ་ཉིད་ཅི་སྟེ་མ་ཡིན་ཞེ་ན། མེད་པ་ཞེས་བྱ་བ་ལ་སོགས་པའོ། །དུས་མཉམ་པ་ཉིད་དུ་ཞེས་བྱ་བ་ནི་དོགས་པ་བསུ་བའོ། །དེ་ལྟ་ན་ནི་འོ་ན་དེ་ཉིད་ཀྱི་ཚེ་སྣང་བ་མིག་གི་ཐད་ནས་སྐྱེས་པ་ཡིན་ཏེ། རྒྱུ་དེས་ན་སྔར་གནས་པའི་དོན་གྱི་ངོ་བོ་མ་ཡིན་ནོ། །གང་གནས་པ་ཉིད་ན་གང་འཇིག་པར་འགྱུར་ཞེས་འབྲེལ་ཏོ། །ཡོད་ན་ཕྱིས་འབྱུང་ཞེས་བྱ་བ་ནི་མེ་ལོང་ལ་སོགས་པ་ལ་སྐྱེ་བ་དེ་བཞིན་དུ་ཁོ་བོའི་སྣང་བ་ཡང་ཕྱིས་སྐྱེ་བ་ན། དོན་ལས་ཐ་དད་པ་ཉིད་དུ་འགྱུར་རོ་ཞེ་ན། འདི་ལ་བརྗོད་པ་ནི་གལ་ཏེ་ཡུལ་ཐ་དད་པའི་ཕྱིར་ཞེས་བྱ་བའོ། །དེར་ཡང་ཕྱིས་སྐྱེས་པས་ནི་ཐ་དད་པ་མ་ཡིན་གྱི། འོན་ཀྱང་ཡུལ་ཐ་དད་པ་ཡིན་ནོ་ཞེས་བསམས་པའོ། །གཞན་ཡང་གདོང་དང་གཟུགས་བརྙན་ཐ་དད་དོ་ཞེས་བྱ་བའོ། །འདི་ལའང་ཚད་མ་ཡོད་དོ་ཞེས། །ཞེས་བརྒྱ་ལ་སངས་རྒྱས་པས་བརྗོད་པར་བྱ་བར་འགྱུར་བ་དེ་ལ་བརྗོད་པ་ནི་དོན་ལས་སྣང་བ་ཐ་དད་པ་གང་ཡིན་པ་དེའི་སྒྲུབ་པར་བྱེད་པ་ནི་མཐོང་བ་མེད་དོ། །ད་ལྟར་འབྱུང་འགྱུར་བ་ཞེས་བྱ་བ་ནི་ད་ལྟར་སྐྱེ་བར་འགྱུར་རོ། །དེ་བཞིན་སྔོ་སོགས་ཀྱང་འགྱུར་ཏེ་སྐྱེ་བར་འགྱུར་རོ། །སྔོན་པོ་ལ་སོགས་པ་ཡང་སྣང་བ་དང་གྲུབ་པ་དང་བདེ་བ་གཉིས་མཚུངས་པའི་ཕྱིར་རོ། །སྔོན་རོལ་དུ་ནི་ཤེས་པའི་སྔོན་རོལ་དུའོ། །དེ་བཞིན་དུ་ནི་སྟེ་དོན་བཞིན་དུ་སྣང་བར་སྔ་རོལ་ཉིད་དུ་འབྱུང་བར་འགྱུར་ཏེ། དོན་དང་སྣང་བ་དེའི་བདག་ཉིད་དུ་ཡིན་པའི་ཕྱིར་རོ། །དེ་ལྟར་འགྱུར་མོད་སྙམ་ན་དེ་ལྟར་དེ་ནི་ཞེས་སྨྲས་སོ། །འོན་ཏེ་སྣང་བ་ནི་དོན་ལས་གཞན་ཉིད་ཡིན་ནོ་ཞེས་བྱ་བའི་ཕྱོགས་གཉིས་པ་ལ་བདག་
ཅག་གི་འདོད་པ་ཉིད་གཞན་གྱིས་ཀྱང་ཁས་བླངས་པ་ཡིན་ནོ་ཞེས་མཇུག་སྡུད་པར་སྟོན་པ་ནི་དེའི་ཕྱིར་ཞེས་བྱ་བའོ། །རྗེས་སུ་མཐུན་པའི་དཔེ་བརྗོད་པ་ནི། ཕ་གཟུགས་འཛིན་པ་ཇི་བཞིན་ནོ། །ཞེས་བྱ་བའོ། །སྔར་བཀོད་པའི་མདོ་ཉིད་ཀྱིས་རང་རིག་པ་ལ་ལྟོས། འགྲེལ་པའི་གཞུང་ཕྱོགས་ཀྱི་གླང་པོའི་ཞལ་སྔ་ནས་ཀྱིས་མཛད་པ་འགོད་པ་ནི་བདེ་བ་ལ་སོགས་པ་ཞེས་བྱ་བའོ། །རྣམ་པར་རྟོག་པའི་རང་གི་ངོ་བོ་ཡང་ཡིན་པ་དེ་མངོན་སུམ་མ་ཡིན་པ་ཉིད་དུ་འགྱུར་ཏེ་རྣམ་པར་ཤེས་པ་ནི་ལྐོག་ཏུ་གྱུར་པ་ཡིན་ནོ་ཞེས་བྱ་བ་བྲམ་ཟེའི་གཞུང་གང་ཡིན་པ་དེར་ཐལ་བར་འགྱུར་རོ། །འོ་ན་ཅིའི་དོན་དུ་བདེ་བ་ལ་སོགས་པ་སྨོས་པ་མཛད་དེ། ཤེས་པ་ཙམ་གྱིས་ཞེས་ཅི་སྟེ་མ་གསུངས་ཤེ་ན། བདེ་བ་ལ་སོགས་པ་སྨོས་པ་ནི་ཞེས་བྱ་བའོ། །དེའི་ནི་ཞེས་བྱ་བ་རྣམ་པར་རྟོག་པའོ། །འགལ་བའི་ཆོས་གནས་པས་ཐ་དད་པར་འགྱུར་རོ་ཞེས་བསམས་པའོ། །དེ་ལས་མ་རྟོགས་པ་ནི་ཞེས་བྱ་བ་ནི་བདེ་བ་ལ་སོགས་པའི་རང་གི་ངོ་བོ་ལ་མ་རྟོགས་པའོ། །དེའི་ཚེ་ཡང་ཞེས་བྱ་བ་ནི་དངོས་སུ་བྱེད་པའི་དུས་ནའོ། །སྔ་མ་དང་ཕྱི་མའི་དངོས་པོ་དང་མངོན་པར་བརྗོད་པ་དེ་དག་གི་སྒོ་ནས་སྦྱོར་བ་དེའི་སྐབས་ཅི་ཞིག་ཡོད། དེ་ལ་བྱིས་པ་བརྡ་ལ་བློ་མ་བྱང་བ་ལ་སོགས་པ་ནི་མངོན་པར་བརྗོད་པ་དང་མི་སྦྱོར་ཡང་ནུ་མ་ལ་སོགས་པ་ལ་དེ་ཉིད་འདི་ཡིན་ནོ་ཞེས་སྔ་མ་དང་ཕྱི་མ་མཚམས་སྦྱོར་བ་ཁོ་ནའོ། །བརྡ་ལ་བྱང་བ་ནི་བརྗོད་པ་ཡང་སྦྱོར་བར་བྱེད་དོ། །དེས་ན་གཉི་ག་ཡང་གཟུང་བ་ཡིན་ནོ། །དེའི་ཚེ་ཞེས་བྱ་བ་དུས་ཕྱིས་རིག་པ་དང་བདེ་བ་ལ་སོགས་པ་དེ་མེད་པའི་ཕྱིར་ཏེ། གང་གིས་གང་ཞིག་སྦྱོར་ཞེས་བྱ་བའི་དོན་ཏོ། །དུས་ཕྱིས་ནི་དེ་དག་ལ་སྔ་མ་ཉིད་དུ་གཟུང་བར་བྱ་བ་ཡིན་ནོ། །དེ་ལྟ་ཡིན་དང་གཞན་གྱིས་ཞེས་བྱ་བ་ནི་ཤེས་པ་གཞན་གྱིས་སོ། །རྣམ་པ་གཞན་དུ་ཞེས་བྱ་བ་ནི་མི་གསལ་བ་ཉིད་དུའོ། །དེ་ནི་ཞེས་བྱ་བ་ནི་བདེ་བའོ། །དེའི་ཚེ་དྲན་པའི་རང་བཞིན་བདེ་བའི་རིག་པ་ཉིད་མ་ཡིན་ཏེ། སྔར་ཞུགས་པའི་རང་བཞིན་དུ་རྟོགས་པའི་ཕྱིར་རོ། །གཞན་གྱིས་བདེ་བ་རིག་པའི་དུས་བཞིན་ནོ། །གལ་ཏེ་བདེ་བ་དེ་ནི་དྲན་པའི་དུས་ཁོ་ནར་སྐྱེ་བ་མ་ཡིན་ནམ། དུས་ན་སྔར་ཞུགས་པའི་རང་བཞིན་དུ་དྲན་པས་ཡུལ་དུ་ཅི་ལྟར་བྱེད་སྙམ་ན། དེའི་ཚེ་ཉིད་ནི་ཞེས་བྱ་བ་སྟེ། དྲན་པའི་དུས་ཉིད་ནའོ། །གལ་ཏེ་བརྗོད་པ་དང་འབྲེལ་
པའི་རྟོག་པ་ཉིད་ཡིན་ནོ་ཞེ་ན། བཤད་པ་བདེ་བ་བརྗོད་པར་བྱ་བ་ཉིད་ཡོད་པ་མ་ཡིན་ནོ། །དེས་ན་བདེ་བ་དེ་ལས་ཐ་དད་ན་སྟེ་སྒྲས་དབེན་བ་ཡིན་ན་ཇི་ལྟར་བརྗོད་པ་དང་འབྲེལ་བ་སྲིད། འོན་ཏེ་སྒྲ་ཡང་དུས་ཀྱང་མཚུངས་པར་གསལ་བ་ཉིད་ཡིན་ནོ་ཞེ་ན། དུས་གཅིག་རིག་པ་ཙམ་གྱིས་ན་ཞེས་བྱ་པའོ། །ཡིད་ཀྱང་ཞེས་བྱ་བ་ནི་སྣང་བཞིན་པའོ། །ཇི་ལྟར་ན་གཟུགས་ལ་སོགས་པ་ཅན་མ་ཡིན་ཞེ་ན། རང་བདག་ཉིད་ལ་ཞེས་བྱ་བའོ། །དེ་ལྟ་ཡིན་མོད་དེས་ཅིར་འགྱུར་ཞེ་ན། སྐྱེ་བ་དེ་ཚེ་ཞེས་བྱ་བའོ། །འདི་ནི་ཞེས་བྱ་བ་ནི་ཡོད་དོ། །དེ་ཡིས་ཞེས་བྱ་བ་ནི་ཡིད་ཀྱིས་དོན་གཟུང་བ་མེད་པའི་ཕྱིར་དོན་ལ་རྣམ་པར་རྟོག་པ་དང་བཅས་པ་མ་ཡིན། དེ་མ་བཟུང་བ་ཡང་རྣམ་པར་རྟོག་ན། ཧ་ཅང་ཐལ་བར་འགྱུར་བའི་ཕྱིར་རོ། །ངོ་བོ་ཉིད་ལ་ཡང་མི་རྟོག་ཕྱིར། ངོ་བོ་ཉིད་ལ་ཡང་རྣམ་པར་རྟོག་པ་དང་བཅས་པ་མ་ཡིན་ནོ་ཞེས་འབྲེལ་ཏོ། །འདིར་ཞེས་བྱ་བ་ནི་དོན་དུ་སྒྲོ་འདོགས་པ་ལའོ། །སྒྲོ་འདོགས་པ་ཡང་དོན་འཛིན་པ་ཞིག་ཡིན་ན། གཉི་ག་ལྟར་ན་ཡང་སྔར་བཤད་པའི་ཉེས་པར་འགྱུར་རོ་ཞེས་བསམས་པའོ། །འཛིན་པ་དང་སྒྲོ་འདོགས་པ་དེ་གཉིས་ཡོད་པའི་ཕྱིར་ཞེས་བྱ་བའི་རྩོད་པ་ལ་བརྗོད་པ་ནི་གལ་ཏེ་ཞེས་བྱ་བའོ། །འཛིན་པ་དང་སྒྲོ་འདོགས་པ་དག་ཕན་ཚུན་ཐ་དད་པའམ་ཐ་མི་དད་པར་འགྱུར། དེ་ལ་གཅིག་པ་ནི་འཛིན་པ་དང་སྒྲོ་འདོགས་པ་གཉིས་ཡོད་དོ་ཞེས་བྱ་བ་འདི་བདེན་པ་མ་ཡིན་ཏེ། སྒྲོ་འདོགས་པ་འབའ་ཞིག་ལ་འཛིན་པ་འབའ་ཞིག་ཡོད་པར་འགྱུར་རོ་ཞེས་བྱ་བའི་དོན་ཏོ། །དེ་ལྟར་འགྱུར་མོད་ཅི་སྐྱོན་སྙམ་ན། དེ་ལ་ཞེས་གསུངས་སོ། །འོན་ཏེ་ཞེས་ཕྱོགས་གཉིས་པ་ལ་བརྗོད་པའོ། །རྣམ་རྟོག་བཅས་པའི་རིག་པའི་ཞེས་བྱ་བ་ནི་སྒྲོ་འདོགས་པའོ། །རྟོག་མེད་ཅེས་བྱ་བ་ནི་འཛིན་པའོ། །དེ་ལ་ནི་གཉི་ག་ལྟར་ཡང་ཉེས་པ་སྨྲས་ཟིན་ཏོ། །འོ་ན་མེད་པར་རྟོག་པ་མེད་དོ་སྙམ་པའི་དོགས་པ་བསུ་ནས་རང་གི་ཕྱོགས་ལ་རྣམ་པར་རྟོག་པ་རྣམ་པར་གནས་པ་བརྗོད་པ་ནི། དེའི་ཕྱིར་ཞེས་བྱ་བའོ། །བརྟགས་པས་ཞེས་ཚད་མས་འཐད་པའོ། །གཞན་དག་འདི་ཡང་སུན་འབྱིན་པ་སྨྲ་བ་ནི་དེ་ལ་ཞེས་བྱ་བའོ། །གྲུབ་པའི་མཐའ་ཡས་པས་འཛིན་པ་མེད་པར་ནི་ཞེས་སྨོས་ཏེ། དོན་མ་བཟུང་བ་སྐྱེས་བུ་འཇུག་པར་བྱེད་པ་གང་ཡིན་པ་དེ་ཉིད་ང་རྒྱལ་ཡིན་ནོ་ཞེས་བྱ་
བའི་དོན་ཏོ། །གཞན་གྱིས་བརྗོད་པ་ནི་གལ་ཏེ་མ་བཟུང་བའི་དོན་ལ་ཤེས་པ་དེ་འཇུག་པར་བྱེད་པ་ཡིན་ན། དེའི་ཚེ་ཡུལ་ཐམས་ཅད་ལ་ཅི་ལྟར་འཇུག་པར་བྱེད་པ་མ་ཡིན་ཏེ། ཁྱད་པར་མད་པའི་ཕྱིར་རོ་ཞེ་ན་འདི་ལ་བརྗོད་པ་ནི་གལ་ཏེ་ཞེས་བྱ་བའོ། །ཅིའི་ཕྱིར་ཞེ་ན་ཞེས་བྱ་བ་ནི་ཅིའི་དོན་དུ་འཇུག་པ་སྟེ། མངོན་དུ་བྱེད་པའི་ཤེས་པ་ཉིད་དེའི་ཡུལ་ཅན་ཡིན་པར་འགྱུར་པས་དེ་ལ་ཐོག་པ་གཞན་ནི་མེད་དོ། །ཤེས་པ་དེ་ཡང་སྔར་ཉིད་སྐྱེས་ཟིན་པས་ནི་ཅི་དོན་དུ་འཇུག་པ་ཡིན་དེས་ན་གཟུང་བ་ལ་འཇུག་པ་མི་འཐད་པའི་ཕྱིར་ན། མ་བཟུང་བ་ཉིད་ལ་འཇུག་པ་ཡིན་ནོ་ཞེས་སྨྲས་སོ། །འདི་ལ་གཞན་གྱིས་ཞེས་སྨྲས་སོ། །ལན་ནི་འདིར་ཞེས་བྱ་བའོ། །རྣམ་པར་རྟོག་པ་མེད་པའི་མཚན་ཉིད་བརྗོད་པ་ནི་གང་ལ་ཞེས་བྱ་བའོ། །མངོན་སུམ་གྱི་མཚན་ཉིད་བརྗོད་པ་ནི་མངོན་དུ་ཞེས་བྱ་བའོ། །དེ་ལྟར་ན་འཇིག་རྟེན་གྱི་རྟོགས་པས་རྣམ་པར་གནས་པ་འདི་འདྲ་བ་ཡིན་གྱི། དོན་དམ་པར་མ་ཡིན་ནོ་ཞེས་བརྗོད་པ་པ་ནི་དོན་དམ་དུ་ན་ཞེས་བྱ་བའོ། །གཞན་ཡང་ཞེས་བྱ་བ་ལ་སོགས་པས་ནི། རྣམ་པ་གཞན་དུ་ཡང་རྣམ་པར་རྟོག་པ་དང་བཅས་པ་དང༌། རྟོག་པ་མེད་པའི་མཚན་ཉིད་བརྗོད་པ་ཡིན་ནོ། །འདི་ཐམས་ཅད་ཀྱང་ཐ་སྙད་ཀྱིས་བརྗོད་པ་ཡིན་ཏེ་དེ་ལྟར་མ་ཡིན་ན། ཐམས་ཅད་བག་ཆགས་ཀྱི་སྟོབས་ལས་འབྱུང་བ་ཡིན་པའི་ཕྱིར་རོ་ཞེས་དགོངས་པའོ། །བཤད་ཟིན་པའི་མཚན་ཉིད་ཁོ་ནས་བདེ་བ་ལ་སོགས་པ་རྣམ་པར་རྟོག་པས་མེད་པར་འགྱུར་རོ་ཞེས་བརྗོད་པ་ནི། བདེ་སོགས་ཞེས་བྱ་བའོ། །དེ་དག་ཅེས་བྱ་བ་ནི་བདེ་བ་ལ་སོགས་པ་རྣམས་ཀྱིའོ། །ལས་དང་བྱེད་པའི་ཞེས་བྱ་བ་ནི་གང་གི་ཆེ་བརྗོད་པ་དང་འདྲེས་པའི་དོན་འཛིན་པ་དེའི་ཚེ་བརྗོད་པ་ནི་བྱེད་པར་འགྱུར་ལ་གང་གི་ཚེ་བརྗོད་པ་ཉིད་དོན་དང་འབྲེལ་བར་རྟོགས་པ་དེའི་ཚེ་ནི་ལས་སུ་འགྱུར་བ་ཡིན་ནོ། །འདི་ལ་ཞེས་བྱ་བ་ནི་བདེ་བ་ལ་སོགས་པའོ། །རང་བཞིན་ཞེས་བྱ་བ་ནི་དོན་གྱི་རང་བཞིན་འཛིན་པ་དང་བདེ་བ་ལ་སོགས་པའི་རང་བཞིན་འཛིན་པའོ། །རང་རིག་པ་དང་ཞེས་བྱ་བ་ནི་བདེ་བ་ལ་སོགས་པ་འདི་ཡིད་ཀྱི་ཞེས་བྱ་བ་ནི། འདི་ནི་བདེ་བ་ལ་སོགས་པ་ཞེས་བྱ་བ་དེ་ལྟ་བུའི་རྣམ་པ་ཅན་ནོ། །འདི་ལ་བརྗོད་པ་ནི་འགྱུར་བ་ཉིད་དེ་ཞེས་བྱ་བའོ། །དེ་ལྟ་ན་འོ་ན་རྣམ་པ་གཉིས་སུ་ཐ་སྙད་ཅི་སྟེ་མི་འགྱུར་
ཞེ་ན། རབ་རིབ་ཅན་གཉིས་ཀྱིས་ཞེས་བྱ་བའོ། །དེ་ལ་ཡང་ཞེས་བྱ་བ་ནི་རབ་རིབ་ཅན་གཉིས་ཀྱིས་ཟླ་བ་གཉིས་སུ་མཐོང་བ་ལ་ཡང་ངོ༌། །དེ་ལྟར་ཞེས་བྱ་བ་ནི་གཉིས་ཀྱིས་ཐ་སྙད་དུའོ། །འདི་ལ་བརྗོད་པ་ལ་ནི་དེ་ལྟར་ཞེས་བྱ་བའོ། །དེ་གཅིག་ཉིད་དུ་རྗེས་དཔོག་གི །ཞེས་བྱ་བ་ནི་དེ་ཉིད་དུ་རྗེས་སུ་དཔོག་པས་རྗེས་སུ་དཔག་པས་ན་གཅིག་ཉིད་ཀྱི་ཐ་སྙད་དུ་འགྱུར་རོ་ཞེས་འབྲེལ་ཏོ། །དེ་ལ་གཅིག་ཉིད་དུ་མངོན་པར་རློམ་པ་ཉིད་ཇི་ལྟར་ཞེ་ན། གཉིས་པ་ཞེས་གསུངས་སོ། །རབ་རིབ་ཅན་གཅིག་གིས་ཟླ་བ་གཉིས་དམིགས་པ་གང་ཡིན་པ་དེ་ཉིད་རབ་རིབ་ཅན་གཉིས་པས་མ་མཐོང་བ་དེས་ན། གཅིག་ཉིད་དུ་མངོན་པར་རློམ་པ་ཡིན་ནོ། །འོ་ན་འདིར་ཞེས་བྱ་བ་ནི་བདེ་བ་ལ་སོགས་པ་དང་དེའི་ཡིད་དག་ལའོ། །འདི་ལ་གྲུབ་པའི་མཐའ་པས་བརྗོད་པ་ནི་གལ་ཏེ་ཞེས་བྱ་བའོ། །ཡིད་ཀྱང་རང་རིག་པ་ཙམ་ཡིན་ལ་བདེ་བ་ལ་སོགས་པས་མ་ཡིན་པས་གཞན་གྱི་ཚུལ་མི་ཤེས་པ་དེས་ན་གཉིས་གང་གིས་རིག་སྐྱེས་བུ་ཞེས་བྱ་བ་ནི་བདག་གོ །ཡིད་དང་རང་རིག་པ་དེ་དག་གིས་ཀྱང་ངོ༌། །འོན་ཏེ་ཞེས་བྱ་བ་ནི་དོགས་པའོ། །འདི་ལ་བརྗོད་པ་ནི་རང་གིས་ཞེས་བྱ་བའོ། །དེར་ཡང་ནི་གཟུགས་དང་རོ་ལ་སོགས་པ་ཡང་ངོ༌། །ཐལ་བའི་ཕྱིར་རོ་ཞེས་བྱ་བ་ནི། གལ་ཏེ་གཞན་གྱིས་རིག་པ་ཡིན་ན། དེའི་ཚེ་གཞན་གྱི་མྱོང་བ་གཞན་གྱིས་མྱོང་བར་འགྱུར་རོ་ཞེས་བྱ་བར་ཐལ་ལོ། །འདི་ནི་ཞེས་བྱ་བ་ནི་ཡོད་པ་དང་རང་རིག་པ་ལ་སོགས་པའོ། །ཡང་ཇི་ལྟར་དབང་པོའི་རྟོགས་པ་ལ་སོགས་པའི་རྣམ་པར་དབྱེ་བ་དོན་དམ་པ་མ་ཡིན་སྙམ་ན། དབང་པོའི་ཞེས་བྱ་བ་གསུངས་སོ། །དབང་པོ་སྐྱེས་པའི་ཤེས་པ་ནི་དབང་པོའི་ཤེས་པ་ཞེས་བརྗོད་པར་བྱ་བ་ཡིན་ལ་དབང་པོའི་བྱེད་པ་ཡང་ཤེས་པ་དང་དུས་མཚུངས་པར་ཉམས་སུ་མྱོང་བ་ཡིན་ཏེ། དེས་ན་ཇི་ལྟར་རྒྱུ་ཉིད་ཡིན་སྔ་མ་ཉིད་དུ་འདོད་ཆགས་མེད་པ་ནི་ཡོད་པ་ཙམ་དུ་ཡང་མ་གྲུབ་ན། འདི་རྒྱུ་ཉིད་དམ་གཞན་དུ་ལྟ་ག་ལ་འགྲུབ་ཅེས་བྱ་བར་བསམས་པའོ། །གཟུགས་ལ་སོགས་པ་བཞིན་ནོ་ཞེས་བྱ་བ་ནི་དཔེའི་ཐབས་གཟུགས་ལ་སོགས་པ་ཡང་ཤེས་པའི་རྒྱུ་ཉིད་མ་ཡིན་ཏེ། དུས་མཚུངས་པར་མྱོང་བའི་ཕྱིར་རོ་ཞེས་བསྟན་པ་ཡིན་ནོ། །འདི་ལ་གཞན་དག་གིས་འོན་ཏེ་ཞེས་སྨྲས་སོ། །གྲུབ་པའི་མཐའ་བས་དེ་བཞིན་དུ་ཞེས་
བྱ་བའོ། །འདི་ནི་བདེ་བ་ལ་ཞེས་བྱ་བའི་རྣམ་པ་ཅན་གྱི་ཡིད་དང་བདེ་བ་ལ་སོགས་པ་རང་རིག་པ་དེ་དག་དང་དེ་བཞིན་དུ་བུམ་པའོ་ཞེས་བྱ་བའོ། །རྣམ་པ་ཅན་གྱི་ཡིད་དང་བདེ་བ་ལ་སོགས་པའི་རིག་པ་དང་ཡུལ་ཅན་གྱི་དབང་པོ་སྟེ། དེ་དག་ཐ་དད་དོ། །ཐ་སྙད་པའི་ཐ་སྙད་མེད་ཀྱང་ཞེས་བྱ་བའི་གྲུབ་པའི་མཐའ་པའིའོ། །ཁྱད་པར་གྱི་རང་བཞིན་ལ་ནི་ཞེས་བྱ་བ་ནི། ཐུན་མོང་མ་ཡིན་པའི་རང་བཞིན་ལའོ། །རིག་པ་མ་ཡིན་ཞེས་བྱ་བ་ནི་བུམ་པ་ལ་སོགས་པ་ལྟར་བེམས་པོའི་བདག་ཉིད་དོ། །གྲུབ་པའི་མཐའ་པས་དོགས་པ་བསུ་བ་ནི་གལ་ཏེ་ཞེས་བྱ་བའོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །འོ་ན་ཇི་ལྟར་རིག་སྙམ་ན། གཞན་གྱི་གཞན་གྱིས་ཞེས་སྨྲས་སོ། །ཡང་ཇི་ལྟར་ན་རྣམ་པར་ཤེས་པ་ལས་ཐ་མི་དད་པ་ཉིད་དུ་རྟོགས་སྙམ་ན། རྣམ་པར་ཤེས་པའི་རང་བཞིན་ལྟ་བུར་ཞེས་གཏན་ཚིགས་ཀྱི་སྒོ་ནས་ཁྱད་པར་བྱེད་དོ། །བདེ་བ་ལ་སོགས་པ་རྣམ་པར་ཤེས་པ་ལས་ཐ་དད་པའི་མངོན་སུམ་མམ་རྗེས་སུ་དཔག་པས་གྲུབ་པར་བྱེད། དེ་ལ་རེ་ཞིག་རིམ་པ་བཞིན་སེལ་བ་ནི་ཁྱེད་ཀྱིས་ཞེས་བྱ་བའོ། །ཕྱེད་དང་པོ་འཆད་པ་ནི་བདེ་བ་ལ་སོགས་པ་ཞེས་བྱ་བའོ། །ཕྱེད་ཕྱི་མ་འཆད་པ་ནི་རྗེས་སུ་དཔག་པ་ཡང་ཞེས་བྱ་བའོ། །རྒྱུ་ཐ་དད་པ་ཞེས་བྱ་བ་ལ། རྒྱུ་ཐ་དད་པ་ཉིད་འབྲས་བུ་ཐ་དད་པའི་རྟགས་ཡིན་པའི་ཕྱིར་རོ། །འོ་ན་བདེ་བ་ལ་སོགས་པ་དང་རྣམ་པར་ཤེས་པ་དག་ནི་འབྲས་བུ་ཐ་དད་པ་ཉིད་ལས་རྒྱུ་ཐ་དད་པར་རྗེས་སུ་དཔག་པ་ན། ཐ་དད་པར་འགྲུབ་པོ་སྙམ་ན། འབྲས་བུ་ཐ་དད་པ་ནི་ཞེས་བྱ་བའོ། །འདིར་ཡང་འབྲས་བུ་ཐ་དད་པར་ཁས་བླངས་ནས་བརྗོད་པར་ཟད་དོ། །དེ་ན་ཉིད་མེད་ཅེས་བརྗོད་པ་ནི་བདེ་བ་ལ་སོགས་པ་དང་ཞེས་བྱ་བའོ། །ད་ནི་རྣམ་འགྲེལ་གྱི་དོན་ཉིད་བརྗོད་པ་ནི། ཐ་མི་དད་པའི་རྒྱུ་ཅན་དང་ཞེས་བྱ་བའོ། །རྣམ་འགྲེལ་འདི་ཉིད་སླར་རྣམ་པ་གཞན་དུ་འཆད་པ་ནི་ཡང་ཞེས་བྱ་བའོ། །གཞན་གྱི་བརྗོད་པ་ནི་མིག་དང་ཞེས་བྱ་བའོ། །འདི་ལ་བརྗོད་པ་ནི་དེས་ན་ཞེས་བྱ་བའོ། །དེ་ལྟ་ཡིན་དང་ཞེས་བྱ་བ་ནི་སྐྱེ་བ་ཡིན་དང་ངོ༌། །དེ་ནི་བདེ་བ་ལ་སོགས་པའོ། །ཤེས་པ་མ་ཡིན་ཏེ་ཞེས་བྱ་བ་ནི་ཅི་སྟེ་མ་ཤེས་ཞེས་བྱ་བ་སྟེ། འདི་ནི་རྣམ་པར་ཤེས་པས་དམིགས་པར་བྱ་བ་ཉིད་དོ་ཞེས་བྱ་བའི་དོན་ཏོ། །དེའི་ཚེ་ན་བདེ་བ་མེད་པ་ཉིད་ནི་དེས་ན་མ་དམིགས་པ་ཡིན་ནོ་
ཞེས་བཟློག་པ་ནི་མ་ཡིན་ཏེ་ཞེས་གསུངས་སོ། །འདི་ནི་བདེ་བའོ། །ཁྱེད་ཀྱི་ཞེས་བྱ་བ་སངས་བའི་ཕྱོགས་ལ་ཡང་ངོ༌། །དེ་ལྟར་ཞེས་བྱ་བ་ནི་ཐམས་ཅད་ཀྱི་ཚེ་ན་བདེ་བའི་རང་བཞིན་གྱི་རྣམ་པར་ཤེས་པའོ། །རྣམ་པ་གཞན་དུ་ཞེས་བྱ་བ་ནི་བཏང་སྙོམས་ཀྱི་རྣམ་པར་རོ། །ཡང་ན་ཞེས་བྱ་བ་སོགས་པས་བརྗོད་པ་བཤད་པ་གཉིས་པ་རྣམ་འགྲེལ་གྱི་དོན་སྦྱོར་བ་ནི་རྒྱུ་ཡོད་ན་ཞེས་བྱ་བའོ། །མི་ཤེས་པར་ཞེས་བྱ་བ་ནི་གང་ལ་འཛིན་པར་བྱེད་པའི་རྣམ་པར་ཤེས་པ་ཡོད་པ་མ་ཡིན་ཏེ། དེ་ལ་དེ་སྐད་བརྗོད་པ་ཡིན་ནོ། །བཤད་པ་འདི་ལ་ནི་རྣམ་འགྲེལ་གཞན་དུ་འཇུག་པར་བྱེད་པ་ནི། འོན་ཏེ་ཞེས་བྱ་བའོ། །དེའི་ཚེ་ཞེས་བྱ་བ་ནི། བདེ་བ་མཚོར་བའི་དུས་ནའོ། །བདེ་བ་མེད་པ་ནི་ཤེས་པ་མ་ཡིན་ཏེ། འཛིན་པའི་རྣམ་པར་ཤེས་པ་དང་ལྡན་པ་མ་ཡིན་ཏེ། རྣམ་པར་ཤེས་པའི་རྒྱུ་གང་ཡིན་པ་དེ་ཉིད་བདེ་བ་ལ་སོགས་པའི་རྒྱུ་ཡིན་ནོ། །དེའམ་ཞེས་བྱ་བ་ནི་རྣམ་པར་ཤེས་བའི་རྒྱུའོ། །དེ་མ་ཡིན་པ་ནི་ཆོས་ལ་སོགས་པའོ། །དེ་ཉིད་ཅེས་བྱ་བ་ནི་རྣམ་པར་ཤེས་པའི་རྒྱུ་ནི་བདེ་བ་ལ་སོགས་པའི་རྒྱུ་ཡིན་པའོ། །ཆོས་ལ་སོགས་པའི་རྒྱུ་ཉིད་ཡིན་པ་སྟོན་པ་ནི། བདེ་བ་ནི་ཞེས་བྱ་བའོ། །དེ་ལ་ནི་འདོད་པ་དང་མི་འདོད་པ་ཆོས་དང་ཆོས་མ་ཡིན་པ་ལའོ། །ལྡོག་པ་མེད་པར་ཞེས་བྱ་བ་ནི་འབྲས་བུ་ལྡོག་པ་མེད་པར་རོ། །དེས་ན་བདེ་བ་ལ་སོགས་པ་ཙམ་ལ་ནི་ཆོས་ལ་སོགས་པ་ནུས་པ་མ་ཡིན་ནོ། །འོ་ན་གང་ལ་ནུས་སྙམ་ན། འདོད་པ་ཞེས་བྱ་བ་བསྒྲུབས་པ་ལ་སྟེ་རྒྱུ་ལའོ། །དེ་ཉིད་འཆད་པ་ནི་ཆོས་ལ་སོགས་པ་ནི་ཞེས་བྱ་བའོ། །དེའི་སྒྲུབ་པར་བྱེད་པ་ནི་བདེ་བ་ལ་སོགས་པའི་སྒྲུབ་པར་བྱེད་པའོ། །དེས་ན་ཞེས་བྱ་བ་ནི་རྒྱུ་མཐའ་དག་ཚོགས་ཀྱང་འབྲས་བུ་ལྡོག་པས་ནའོ། །དེ་ལས་ཞེས་བྱ་བ་ནི་མྱ་ངན་ལ་སོགས་པའི་ཚོགས་པ་ལས་སོ། །སྡུག་བསྔལ་སྐྱེས་པ་ན་རྒྱུ་མེད་ཉིད་ཀྱིས་བདེ་པ་མ་སྐྱེས་པ་ཡིན་ནོ་ཞེས་བསམས་པའོ། །གཞན་ལས་ནི་ཆོས་མ་ཡིན་པ་ལས་སོ། །དེས་ཞེས་བྱ་བ་ཆོས་སམ་ཆོས་མ་ཡིན་པས་སོ། །ཐ་དད་དུ་ཞེས་བྱ་བ་ནི་བདེ་བའམ་སྡུག་བསྔལ་ལོ། །ཁྱོད་ལ་ནི་རིགས་པ་ཅན་ལའོ། །དེ་ཉིད་བརྗོད་པ་ནི་བདེ་བ་ལ་སོགས་པས་ཞེས་བྱ་བའོ། །དེ་ནི་བདེ་བའོ་རྐང་པ་ཉིད་ལས་ཞེས་བྱ་བ་ནི་བདེ་བ་དང་སྡུག་བསྔལ་དང་བྲལ་བ་བཏང་སྙོམས་
པའི་འབའ་ཞིག་ལས་སོ། །དེ་ཙམ་གྱི་རྒྱུ་ཐ་དད་པ་ཡོད་པས་ནི། གཅིག་ངེས་པར་ཐ་དད་པར་མི་འགྲུབ་བོ། །དེ་ཉིད་ཅེས་པ་ནི་རྣམ་པར་ཤེས་པའོ། །ཁྱད་པར་ཅན་ནི་བདེ་བའི་རང་བཞིན་ནོ། །ཆོས་མ་ཡིན་པ་ལ་སོགས་པ་ཕན་འདོགས་པ་ན་ལྷག་པ་གང་ཡིན་པ་དེས་ན་རྣམ་པར་ཤེས་པའི་རྒྱུའི་མཚན་ཉིད་ཀྱིས་ཚོགས་པ་དེ་ཉིད་ཁྱད་པར་དུ་བྱེད་པའི་ཕྱིར་རོ། །འདི་ལ་བརྗོད་པ་ནི་ཚོགས་པ་དེ་ཉིད་ཀྱིས་ཞེས་བྱ་བ་སྟེ། རྣམ་པར་ཤེས་པའི་ཚོགས་པ་དེ་ཉིད་ཀྱིའོ། །སྐྱུ་རུ་རའི་ས་བོན་ཞེས་བྱ་བ་ནི་བྱེད་པ་པོའི་ཚིག་གི་རང་བཞིན་ནོ། །དེ་ལས་ཞེས་བྱ་བ་ནི་སྐྱ་རུ་རའི་རང་བཞིན་ལས་སོ། །ཁྱད་པར་གཞན་ཞེས་བྱ་བ་ནི་མངར་བ་ལ་སོགས་པའོ། །འོན་ཏེ་ཞེས་དོགས་པ་བསུ་ནས་འགོག་པ་ནི་མ་ཡིན་ནོ་ཞེས་བྱ་བ་འདིར་ཡང་གི་སྒྲའི་དོན་འགོག་པ་ཡིན་ཏེ་གལ་ཏེ་ཐ་དད་པ་ཡང་སྐྱེད་དོ་ཞེས་བརྗོད་པ་དེའི་ཚེ། ཤུགས་ཀྱིས་ཐ་མི་དད་པ་ཡང་སྐྱེད་པར་བྱེད་དོ་ཞེས་བརྗོད་པར་འགྱུར་རོ། །དེ་ལྟ་ན་ཡང་བདེ་བ་ལ་སོགས་པ་རྣམས་རྣམ་པར་ཤེས་པ་ལས་མཐའ་གཅིག་ཁོ་ནར་ཐ་དད་པར་བསྟན་པར་མི་འགྱུར་རོ། །དེ་ཉིད་སྟོན་པར་བྱེད་པ་ནི་གལ་ཏེ་ཞེས་བྱ་བའོ། །གཞན་ཡང་གལ་ཏེ་ཆོས་ལ་སོགས་པ་ཙམ་གྱིས་ལྷག་པའི་ཕྱིར། བདེ་བ་བེམས་པོར་སྐྱེད་ན་དེའི་ཚེ་ཤེས་རབ་ལ་སོགས་པ་ཡང་དེ་ལྟར་ཐལ་བར་འགྱུར་ཏེ། ཆོས་ལ་སོགས་པ་ཉིད་ལས་སྐྱེས་པའི་ཕྱིར་རོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །དེ་དག་ཀྱང་ཞེས་བྱ་བ་ནི་ཤེས་རབ་ལ་སོགས་པ་རྣམས་སོ། །དེ་དག་གི་ཞེས་བྱ་བ་ནི་བདེ་བ་ལ་སོགས་པ་རྣམས་ཀྱིའོ། །འདོད་པ་ལ་སོགས་པ་སྒྲུབ་པར་བྱེད་པ་གང་ཡིན་པ་དེ་ཉེ་བ་ཉིད་དོ། །འདི་ལ་བརྗོད་པ་ནི་དེ་ལྟ་ན་ཞེས་བྱ་བ་སྟེ། དེའི་རྒྱུའི་ཆོས་ལ་སོགས་པ་ལས་སྐྱེ་བར་ཁས་བླངས་པའི་ཕྱིར་རོ། །བདེ་བ་ལ་སོགས་པའི་རྒྱུ་ཆོས་ལ་སོགས་པ་གང་ཡིན་པའི་རྒྱུ་དེ་རྒྱུད་ཤེས་རབ་ལ་སོགས་པ་གང་ལ་ཡོད་པ་དེ་ལ་དེ་སྐད་ཅེས་བྱ་བའོ། །འོ་ན་ཆོས་ལ་སོགས་པའི་རྒྱུ་ཅན་དེ་གང་ཡིན་ཞེ་ན། ཤེས་རབ་ཡོད་པར་གྱུར་པ་ལས་བདེ་བ་སྐྱེ་བ་གང་ཡིན་པ་དེ་ནི་ཆོས་ལ་སོགས་པའི་རྒྱུ་ཅན་ཡིན་ནོ། །ཆོས་ལ་ལྟོས་ཏེ་གཞན་གང་ཡིན་པ་དེ་ལས་མི་འགྱུར་རོ། །མང་པོ་དག་ཤེས་རབ་ལ་སོགས་པ་གོམས་པར་བྱེད་ཀྱང༌། གོམས་པ་ལས་ཐམས་ཅད་ལ་ཤེས་རབ་ལ་སོགས་
བ་བསྒྲུབ་པ་ནི་མ་ཡིན་ཏེ། དེས་ན་ཆོས་ལ་སོགས་པ་ཁོ་ན་རྒྱུ་ཡིན་ནོ། །བླུན་པོའི་ཕྱིར་ཞེས་བྱ་བ་ནི་སྐྱེས་བུ་གང་ལ་གོམས་པ་ཡོད་ཀྱང་ཤེས་རབ་ལ་སོགས་པ་མི་འབྱུང་བ་དེ་ནི་ཤིན་ཏུ་ཡང་བླུན་པ་ཡིན་ཏེ། དེས་ནི་དེ་ལ་ཤེས་རབ་ལ་སོགས་པ་མེད་པ་ཡིན་ནོ་ཞེས་བྱ་བའི་དོན་ཏོ། །འབྲས་བུ་མེད་པ་ནི་གོམས་པའི་ཞེས་བྱ་བར་བལྟའོ། །སྐྱེས་བུའི་བྱེ་བྲག་གི་རྒྱུད་ཀྱི་ཁྱད་པར་གང་ཡིན་པ་དེ་ལས་བདེ་བ་ལ་སོགས་པ་འབྱུང་བ་ཡིན་གྱི། ཆོས་ལས་ནི་མ་ཡིན་ཏེ། ཤེས་རབ་ལ་སོགས་པ་བཞིན་ནོ། །ངོ་བོ་ཉིད་ཀྱིས་ཞན་པ་མ་ཡིན་པ་ནི་འཁོར་བའི་ཕོངས་བའི་རྒྱུ་ཐམས་ཅད་ཡོད་ཀྱང་སྟེ། འཁོར་བའི་ཡུལ་ལ་སྡུག་བསྔལ་དུ་མི་བརྩི་བ་གང་ཡིན་པ་དེ་ལ་ཞེས་བྱ་བའི་དོན་ཏོ། །ངོ་བོ་ཉིད་ཀྱི་ཁྱད་པར་གྱིས་མ་ཡིན་གྱི། ཆོས་ལ་ནི་མ་ཡིན་ནོ། །ཆོས་ལས་བདེ་བ་ཅི་སྟེ་མི་འབྱུང་སྙམ་ན། དམ་པ་མ་ཡིན་པ་ཞེས་སྨོས་ཏེ་ཆོས་མ་ཡིན་པ་བྱེད་པ་ལའོ། །བདེ་བ་དེ་ཚེ་སྔ་མའི་ཆོས་ཀྱིས་བྱས་པ་ཡིན་ནོ་ཞེས་ཀྱང་བརྗོད་པར་བྱ་བ་མ་ཡིན་ཏེ། དེ་དང་ལྷན་ཅིག་པའི་ཆོས་ཉིད་ལས་བདེ་བ་ལ་སོགས་པ་ཡིན་ནོ་ཞེས་བལྟ་བར་བྱ་བའོ། །དེ་ལྟ་ན་འོན་ཆོས་ལ་ནུས་པ་མེད་དོ་ཞེས་བྱ་བ་ནི་གལ་ཏེ་གོམས་པ་ལ་སོགས་པ་མེད་པར་ཆོས་ཀྱི་བདེ་བ་ལ་སོགས་པ་སྐྱེད་པར་བྱེད་ན། ནུས་པར་འགྱུར་བ་ཞིག་ན་དེ་ལྟ་ན་ཡང་མ་ཡིན་ནོ་ཞེས་དགོངས་པའོ། །གོམས་པ་སྔོན་དུ་འགྲོ་བ་ཅན་ཡིན་པའི་ཕྱིར་ཡང་ཞེས་བྱ་བ་ནི་སུན་འབྱིན་པ་ཅན་ཡིན་ནོ། །གང་ལ་རྒྱུ་རྣམ་པར་ཤེས་པ་ཡོད་པ་དེ་ལས་ཏེ་ཤེས་པ་ལས་སྐྱེས་པ་ཤེས་པའི་རྒྱུ་ནི་དུས་བྱས་པ་ཡིན་ནོ་ཞེས་བརྗོད་པའི་ཕྱིར་རོ། །བདག་གིས་མཐོང་བ་གང་ཡིན་པ་དེ་འདི་ཡིན་ནོ་ཞེས་དེའི་རང་བཞིན་དུ་ཤེས་པ་ནི་སྔོན་གྱི་འདུ་བྱེད་པ་ལས་བྱུང་བ་ཡིན་ན། སྔོན་གྱི་འདུ་བྱེད་པ་ལས་སྐྱེས་པ་འདི་བདེ་བ་ལ་སོགས་པ་ལ་ཡོད་དམ་ཅིག་བདེ་བ་ལ་སོགས་པ་ནི། སྔོན་གྱི་འདུ་བྱེད་པ་ལས་འབྱུང་བ་མ་ཡིན་པ་ཁོ་ནའོ་ཞེས་བསམས་པའོ། །འདི་ཞེས་བྱ་བ་ནི་སྔོན་གྱི་འདུ་བྱེད་པའོ། །ཡིད་ཀྱི་རྣམ་པར་ཤེས་པ་ཉིད་ཅེས་བྱ་བ་ནི་དབང་པོ་ལས་སྐྱེས་པ་རྣམས་ཀྱི་ཞེས་བྱ་བ་ནི། དབང་པོ་ལས་སྐྱེས་པར་འདོད་པ་རྣམས་ཀྱིའོ། །དེ་ཉིད་ལས་ཞེས་བྱ་བ་ནི་གོམས་པ་ཉིད་ལས་སོ། །དེ་འཛིན་པ་ཞེས་བྱ་བ་ནི་བདེ་བ་ལ་སོགས་
པ་དེ་འཛིན་པའོ། །ཕྱེད་སྔ་མ་རྣམ་པར་འགྲེལ་པ་ནི་གཞན་དང་གཞན་ཞེས་བྱ་བའོ། །འོ་ན་གང་གི་ཚེ་གོམས་པར་འགྱུར་སྙམ་ན་གལ་ཏེ་ཞེས་བྱ་བའོ། །དོན་འདི་ནི་དོན་འདི་ལ་ཡོད་པ་ཡིན་ནོ་ཞེས་བརྗོད་པ་ནི་དོན་ནི་ཞེས་བྱ་བའོ། །གཅིག་ལ་ཞེས་བྱ་བ་ནི་གཞན་གྱིའོ། །དོན་ཀྱང་གཅིག་ཉིད་དུ་ཡིན་པས་དེ་ལ་ཡང་ཡང་ནས་ཡང་གི་དོན་ཅི་ཡིན་ནོ་ཞེས་བྱ་བའི་དོགས་པ་བསུ་ནས་སྨྲས་པ་ནི་དོན་ནི་ཞེས་བྱ་བའོ། །ཡུལ་ཞེས་བྱ་བ་དོན་གཅིག་པར་ག་ལས་རྟོགས་པར་ཤེས་པ་ཕན་ཚུན་ཐ་དད་པ་རྣམས་ལ་རང་བཞིན་གཅིག་རྟོགས་པ་མེད་པའི་ཕྱིར། ཡུལ་གཅིག་པར་ཇི་ལྟར་འགྲུབ་ཅེས་བྱ་བའི་དོན་ཏོ། །གལ་ཏེ་ངོ་ཤེས་པས་གཅིག་ཉིད་དུ་རྟོགས་སོ་ཞེ་ན། བདེ་སོགས་ལ་འདི་ཞེས་གསུངས་སོ། །དེ་གཅིག་པའི་ཕྱིར་ནི་ཡུལ་གཅིག་པའི་ཕྱིར་རོ། །ངོ་ཤེས་པ་ནི་ཞེས་བྱ་བ་ནི་གྲུབ་པའི་མཐའ་པའོ། །དམིགས་པ་རྣམས་ཀྱང་ཐ་དད་པས་ན་དེ་ལ་ངོ་ཤེས་པ་ལྟར་འབྱུང་བ་ཞེས་དགོངས་པའོ། །དེ་ལྟ་ན་ཡང་ཡུལ་འདི་ནི་གཅིག་ཁོ་ན་ཡིན་ཏེ། དེས་ན་དེ་ལ་ངོ་ཤེས་པ་འཐད་པ་ཁོ་ནའོ་སྙམ་ན་ཤེས་པ་ཐ་དད་པ་ལ་ནི་ཞེས་བྱ་བའོ། །གལ་ཏེ་ཐ་དད་པ་ལ་དོ་ཤེས་པར་འགྱུར་བ་མ་ཡིན་ན། དེའི་ཚེ་ཤེས་པ་ལ་ངོ་ཤེས་པ་ཇི་ལྟར་འགྱུར་བར་འགྱུར། འདི་ལ་གཞན་གྱིས་བརྗོད་པ་ནི། དེ་ལ་དོན་དམ་པར་ན་ཞེས་བྱ་བའོ། །འོ་ན་དེ་ལས་ཅི་ཡིན་ཞེ་ན་ཞེས་སྨོས་སོ། །དེ་ཞེས་བྱ་བ་ཤེས་པ་གཅིག་པུའོ། །འོན་ཏེ་ཤེས་གཞན་གྱིས་རིག་པར་བྱ་བ་ཡིན་ནོ་ཞེས་བྱ་བའི་ཕྱོགས་པའམ་འོན་ཏེ་ཤེས་པ་ནི་དོན་གྱིས་གོ་བས་རིག་པར་བྱ་བ་ཡིན་ནོ་ཞེས་བྱ་བའི་ཕྱོགས་ལ་ཡིན། གལ་ཏེ་རང་རིག་པ་ལ་བརྟེན་ནས་བརྗོད་ན་ནི། དེའི་ཚེ་ཇི་ལྟར་ངོ་ཤེས་པ་དོན་གཅིག་པ་ཉིད་ཀྱིས་དེ་གཅིག་པ་ཉིད་དུ་ལྷག་པར་ཞེན་པ་འགྱུར། ཡོངས་སུ་གསལ་བར་ཐ་དད་པར་མཐོང་བ་རང་རིག་པའི་ཤེས་པ་ལ་དེ་ཉིད་ཀྱི་ཚེ་ན་སྟེ། དེ་ཡོད་པའི་དུས་ཉིད་དུ་གཅིག་ཏུ་འཁྲུལ་པར་འགྱུར་བ་ནི་མ་ཡིན་ནོ། །རང་རིག་པའི་ཞེས་བྱ་བ་ནི་འཆད་པའོ། །དེས་བྱས་བ་ཞེས་བྱ་བ་ནི་ཡུལ་གཅིག་པ་ཉིད་ཀྱིས་བྱས་པའོ། །ཕྱོགས་གཉིས་པ་ལ་བརྗོད་པ་ནི། ཤེས་པ་གཞན་གྱིས་ཞེས་བྱ་བའོ། །ཐ་མ་ལ་བརྗོད་པ་ནི་དོན་གྱིས་ཞེས་བྱ་བའོ། །དེས་ན་ཞེས་བྱ་བ་ནི་དོན་ཐ་དད་མ་ཡིན་པའི་ཕྱིར་རོ། །འདི་ལ་
གཞན་གྱིས་བརྗོད་པ་ནི་འོན་ཏེ་ཞེས་བྱ་བའོ། །རིག་པ་ཙམ་ཉིད་ནི་ཞེས་བྱ་བ་ནི་གསལ་བ་ཙམ་གྱིས་ནི་རིག་པ་སྟེ། ཤེས་པ་ཙམ་དུ་འཛིན་པར་བྱེད་པ་ཡིན་ནོ་ཞེ་ན། འདི་ལ་གྲུབ་པའི་མཐའ་པས་བརྗོད་པ་ནི། དོན་གཅིག་ཉིད་ནི་ཤེས་པ་དུ་མས་གཟུང་བར་བྱ་བ་མ་ཡིན་ཏེ། དེའི་ཤེས་པ་གཅིག་ཏུ་བརྟག་པར་བྱ་བ་ཡིན་ནོ། །མཚམས་སྦྱོར་ཅན་ཞེས་བྱ་བ་ནི། དོན་སྔ་མ་ཕྱི་མ་དག་གཅིག་ཏུ་རྟོགས་པ་དང་ལྡན་པའོ། །དྲན་པ་ཡོད་ཕྱིར་ཏེ་ཞེས་བྱ་བ་ནི། སྔོན་མཐོང་བའི་དོན་གྱིས་དྲན་པ་ཡོད་པ་ཡིན་ནོ། །དྲན་པ་ནི་སྔ་མ་ཉིད་དུ་རྟོགས་པ་ཙམ་ཡིན་ལ་མཚམས་སྦྱོར་བ་སྔ་ཕྱི་གཅིག་ཏུ་བྱེད་པ་སྟེ། འདིའི་ནུས་པ་ནི་དེ་གཉིས་ལ་ཡོད་པ་ཡིན་ནོ་ཞེ་ན་འདི་ཞེས་བྱ་བ་ནི། རྟོགས་པའི་རང་བཞིན་གྱིས་བདག་གིའོ། །ཟློས་པ་ནི་སྐྱོར་བའོ། །ཐ་དད་པ་དང་ཐ་མི་དད་པ་ཞེས་བྱ་བ་ལ་ཤེས་པ་ལས་ཐ་དད་པ་དང་ཐ་མི་དད་པའི་ཕྱོགས་ལའོ། །ཤེས་པ་དང་དབྱེ་བ་མེད་པས་ཞེས་བྱ་བ་ནི། བདག་ནི་ཤེས་པའི་རང་བཞིན་ཡིན་པའི་ཕྱིར་ཤེས་པ་ཐ་དད་ན་དེ་ཡང་ཐ་དད་པ་ཁོ་ནའོ། །དེས་ན་ཇི་ལྟར་དེས་དོན་གཅིག་ཏུ་རྟོགས་པར་ནུས། །དེ་ལྟར་ཤེས་པ་གཅིག་ཏུ་བརྟག་པར་བྱ་བ་ཡིན་ནོ། །འདི་ཉིད་བརྗོད་པ་ནི་ཤེས་པ་ཐ་དད་ན་ཞེས་བྱ་བའོ། །དེ་དང་ཐ་མི་དད་པ་ཞེས་བྱ་བ་ནི་ཞེས་བྱ་བ་བདག་ཉིད་དུ་གྱུར་པའི་བདག་གོ །དེས་ནི་ཞེས་བྱ་བ་ནི་ཤེས་པ་ལས་ཐ་དད་པའི་རང་བཞིན་གྱིས་སོ། །བདག་གཅིག་ཉིད་དུ་འགྱུར་རོ། །དེས་ན་ཟློས་པ་མ་ཡིན་ནོ་ཞེས་བྱ་བ་ནི་བསྐྱར་ནས་བརྟག་པ་མ་ཡིན་ཏེ་ཚད་མ་མ་ཡིན་པའི་ཕྱིར་རོ། །འོན་ཏེ་ཞེས་བྱ་བ་ལ་སོགས་པས་ནི་རིག་པ་ཅན་གྱི་ཕྱོགས་ལའོ། །དེའི་ཚེ་བདག་སྟེ་ཤེས་པས་རྟོགས་པར་བྱེད་པ་ཡིན་ལ། ཤེས་པ་དེ་ཡང་ཐ་དད་པ་ཡིན་ཏེ། དེས་ན་ཤེས་པ་དེས་བདག་ཐ་མི་དད་པར་ཇི་ལྟར་འཛིན། ཡང་ན་བདག་དེ་ནི་བྱེད་པར་འགྱུར་བའི་ཤེས་པས་ཕྱི་རོལ་རྟོགས་པ་ཡིན་ལ་ཤེས་པ་དེ་ཡང་ཐ་དད་པ་ཡིན་ཏེ། དེས་ན་ཇི་ལྟར་ཤེས་བ་བྱེད་པར་འགྱུར་བདེ་ཕྱི་རོལ་ཐ་དད་པར་འཛིན་ཏོ། །མི་འཛིན་པ་ཁོ་ནའོ་དེའི་ཕྱིར་ཤེས་པ་ཐ་དད་པ་ཡིན་ན་གཅིག་ཉིད་འཛིན་པ་མི་འཐད་དོ། །ཇི་ལྟར་རོ་ཞེས་བྱ་བ་ནི་དོན་དང་གཅིག་པ་ཉིད་ཀྱིས་གཅིག་པར་སྒྲོ་འདོགས་པའོ། །དུ་མ་ཉིད་མ་འགྲིགས་པའི་ཤེས་པ་གང་ཡིན་པ་དེའོ། །ཅིའི་ཕྱིར་རྟོགས་དངོས་མིན་ཏེ་རྟོགས་
དངོས་ཉིད་དུ་འགྱུར་རོ་ཞེས་བྱ་བའི་དོན་ཏོ། །རྟོགས་པའི་རང་བཞིན་དེ་པ་ནི། ཤེས་རབ་ལ་སོགས་པ་བཞིན་ནོ་ཞེས་བྱ་བའི་དོན་ཏོ། །རྟོགས་པའི་རང་བཞིན་གྱིས་བཟུང་སྟེ། རྟོགས་པའི་འགྲོ་བ་ལ་སོགས་པ་རྟོགས་པའི་རང་བཞིན་གང་ཡིན་པ་དེར་མ་དམིགས་པའི་ཕྱིར་རོ། །འཕེལ་འགྱུར་ཞེས་བྱ་བ་ནི་འབིགས་པར་འགྱུར་བའོ། །འབྲས་བུ་དེ་བཞིན་ཉིད་ཅེས་བྱ་བ་ནི་གོམས་པ་གང་གིས་མྱོང་བའི་འབྲས་བུ་ཡོད་པ་དེ་ནི་དེ་བཞིན་དུ་འགྱུར་རོ། །དེ་ལྟར་ཞེས་བྱ་བ་ནི་ནང་གིས་མྱོང་བའི་རང་བཞིན་ཉིད་དུའོ། །རིག་པ་སྟེ་ཚད་མ་བརྟེན་པའི་དགའ་བ་གང་ལ་ཡོད་པ་དེ་ལ་དེ་སྐད་ཅེས་བརྗོད་དོ། །དེ་ལྟ་བུར་གྱུར་པ་ཉིད་ཅེས་བྱ་བ་ནི། རང་རིག་པའི་རང་བཞིན་ཉིད་དོ། །འོ་ན་ཞེས་བྱ་བ་ལ་སོགས་པ་འགོག་པ་མ་ཡིན་ཏེ་ཞེས་བྱ་བའོ། །དེ་ལྟ་བུ་ཡིན་པའི་ཕྱིར་ཞེས་བྱ་བ་ནི། སྔར་གྱི་མྱོང་བ་གོམས་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །འདི་ལྟར་ཇི་སྤངས་པའི་ཡིན་ཞེ་ན་རྟོགས་པ་དང་ཞེས་བྱ་བ་གསུངས་སོ། །བདེ་ལ་སོགས་ཀྱང་དེ་ལྟར་དེ་སྒོམ་པ་འཕེལ་བ་ལས་སྐྱེས་པ་ཅན་ཡིན་ཏེ་གཏན་ཚིགས་དེས་ན་རང་རིག་ཅེས་མ་ཡིན་ཏེ་ཡིན་པ་ཉིད་དོ། །གཟུགས་ལ་སོགས་པ་རྣམས་ཀྱང་རྣམ་པར་ཤེས་པའི་རང་བཞིན་དུ་ཅིའི་ཕྱིར་མི་འགྱུར་སྙམ་ན། གཟུགས་ལ་སོགས་པ་ཞེས་གསུངས་སོ། །ནང་གི་རང་བཞིན་ཉིད་དུ་གོམས་པ་སྲིད་པ་མ་ཡིན་ནོ། །འདི་ཉིད་གཞན་གྱི་ལུགས་ཀྱི་སྒོ་ནས་སྟོན་པས་བརྗོད་པ་དེ་ནི་རེ་ཞིག་ཅེས་བྱ་བའོ། །རྟོག་པའི་རང་བཞིན་མ་ཡིན་པར། །ཞེས་བྱ་བ་ནི་ཤེས་རབ་ལ་སོགས་པ་ལ་རང་རིག་པའི་རང་བཞིན་མ་ཡིན་པ་མེད་པར་རོ། །གང་དག་ཅེས་བྱ་བ་ནི་རིག་པ་ཅན་ལ་སོགས་པའོ། །དེ་ཞེས་བྱ་བ་ནི་བློའོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་རྟོགས་པའི་རང་བཞིན་མ་ཡིན་ནའོ་ན་གཞན་ཉིད་དུ་འགྱུར་མོད་ཅི་སྐྱོན་སྙམ་ན། འཛིན་པར་བྱེད་པ་ཉིད་དུ་ནི། །ཞེས་བྱ་བའོ། །འདི་ཞེས་བྱ་བའོ། །འཛིན་པའི་བློའོ། །མངོན་སུམ་ལ་གཞན་ལ་ཞེས་བྱ་བ་ནི། བདག་དང་འདུ་བ་ཅན་ཡིད་ཀྱི་མངོན་སུམ་ལའོ། །དེ་ལ་སྟེ་མངོན་སུམ་གཞན་དེ་ལ་གནས་པ་གང་ཡིན་པའི་འཛིན་པའི་རང་བཞིན་ཉིད་དེ་ལྟར་རོ། །དེ་ལྟར་ཡང་ཞེས་བྱ་བ་ནི་བློ་འཛིན་པར་བྱེད་པའི་ཡིད་ཀྱི་མངོན་སུམ་ལའོ། །དེ་ལྟ་མ་ཡིན་ན་ནི་དེ་ལ་ལྟོས་པའི་འཛིན་པར་བྱེད་པ་ཉིད་མི་སྣང་བར་ཐལ་བར་འགྱུར་བའི་ཕྱིར་རོ། །སྐད་
ཅིག་གཉིས་པ་ལས་བྱུང་བའི་ཡིད་ཀྱི་མངོན་སུམ་དེ་ལ་ཡང་དོན་དེ་སྣང་བ་ཁོ་ནའོ་ཞེ་ན། ཞིག་པ་ཞེས་གསུངས་སོ། །སྐད་ཅིག་མ་ཡིན་པའི་ཕྱིར་ན་སྐད་ཅིག་གཉིས་པ་ལ་དེ་མི་སྲིད་དོ་ཞེས་དགོངས་པའོ། །དོན་མེད་པའི་བློ་འབའ་ཞིག་སྣང་སྙམ་ན་བློ་འབའ་ཞིག་ཅེས་གསུངས་ཏེ། རང་གི་ཡུལ་དང་བྲལ་བའོ། །འཛིན་པའམ་ཞེས་བྱ་བ་ནི། རིག་པ་པའི་འདོད་པ་ཤེས་བྱེད་ཉིད་དུ་སྟེ། ཤེས་པར་བྱེད་པ་ཡིན་པའི་ཕྱིར་རོ། །འཛིན་པར་བྱེད་པ་པོར་ཞེས་བྱ་བ་ནི། ཁོ་བོ་ཅག་གི་འདོད་པས་བྱེད་པ་པོའི་རང་བཞིན་དུ་སྟེ། བྱེད་པ་པོ་ཐ་དད་པ་མེད་པའི་ཕྱིར་རོ། །བདག་ལ་སོགས་པ་ཡང་ཞེས་བྱ་བ་ནི། དོན་མི་སྣང་ན་འཛིན་པར་བྱེད་པ་ཉིད་དུ་སྣང་བར་མི་འགྱུར་རོ། །དེའི་ཕྱིར་རེ་རེ་ལ་ཡང་གཉིས་གཉིས་སུ་སྣང་བར་འགྱུར་རོ་ཞེས་བྱ་བའི་ཉེས་པར་འགྱུར་རོ། །དེས་ན་རྩོད་པ་འདི་ལ་བདག་དང་འདྲ་བ་ཉིད་དམ། དེའི་བདག་ཉིད་དུ་ཞེས་བྱ་བ་བེམས་པོའི་རང་བཞིན་དུ་སྒྲོ་འདོགས་པ་འདི་ནི་ཐོག་མ་མེད། པའི་དུས་ཅན་ཉིད་ཡིན་གྱི། བློ་དེ་བདག་དང་འདུ་བ་ཅན་ནམ། བེམས་པོའི་རང་བཞིན་མ་ཡིན་ཏེ། དོན་མི་སྣང་བར་ཐལ་བའི་ཕྱིར་རོ་ཞེས་བྱ་བ་གདོན་མི་ཟ་བར་ལན་ཡིན་ནོ། །དེ་ལྟར་ན་རེ་ཞིག་བྲམ་ཟེ་དང་རིག་པ་པ་དག་གིས་རང་ཉིད་ཀྱིས་རྣམ་པར་བཞག་ནས་དོན་གྱི་ཕྱོགས་ལ་ཉེས་པ་བརྗོད་པ་ནི། དེ་ལྟ་ཡིན་དང་ཞེས་བྱ་བའོ། །ཤེས་རབ་ལ་སོགས་པའམ་ཞེས་བྱ་བའམ་གྱི་སྒྲས་ནི་བཞིན་སྒྲ་སྟོན་ཏེ། ཤེས་རབ་ལ་སོགས་བཞིན་དུ་ཞེས་བྱ་བའི་དོན་ཏོ། །གཞན་དག་ཅེས་བྱ་བ་ནི་བྲམ་ཟེ་དང་རིག་པ་ཅན་ལ་སོགས་པའོ། །འདི་ལ་བརྗོད་པ་ནི་གལ་ཏེ་ཞེས་བྱ་བའོ། །འདི་ལྟ་བུར་གྱུར་པ་ཞེས་བྱ་བ་བེམས་པོའི་རང་བཞིན་མ་ཡིན་པ་དང་དོན་ཡང་གསལ་བར་བྱེད་པའི་བློ་གསལ་བ་དེ་ཡོད་པ་ཡིན་ནོ་ཞེས་བྱ་བར་རིགས་སོ། །རྒྱུ་དེས་ན་རྟོགས་པ་ཤེས་པ་དང་འདྲེས་པ་སྟེ། དོན་གཅིག་ལ་འདུ་བའི་མཚན་ཉིད་ཀྱིས་འབྲེལ་བ་ལ་སོགས་པའི་ངོ་བོ་སྣང་བ་ཡིན་གྱི། རང་ཉིད་རྟོགས་པའི་ངོ་བོ་ཡིན་པས་ནི་མ་ཡིན་ནོ་ཞེས་སོ། །ཐོག་མ་མེད་པའི་གོམས་པའི་བག་ཆགས་གང་ཡིན་པ་དེ་ཡོད་པ་ལས་བདེ་བ་ལ་སོགས་པ་འདི་ནི་དེ་ལྟར་རྟོགས་པའི་རང་བཞིན་ཡིན་ཞེས་པས་ན་དེ་ལས་ཚུལ་གཞན་གང་ཡིན་པ་དེ་བདེ་བ་ལ་སོགས་པ་བདག་ལ་འདུ་བ་ཅན་ནི་དོན་གཅིག་ལ་འདུ་བ་ཅན་གྱི་ཤེས་
པས་རྟོགས་པ་ཡིན་ཞེས་བྱ་བ་དེ་ལྟ་བུ་ལ་སོགས་པའི་རྣམ་པར་རྟོག་པ་ནི། འཇིག་རྟེན་གྱིས་བྱེད་པ་མ་ཡིན་ནོ། །ལུགས་གཞན་གྱི་རྣམ་པ་བརྗོད་པ་ནི། འདི་ནི་འདི་དང་འདི་ལྟ་བུ་ཞེས་བྱ་བའོ། །ཉེས་པ་གཞན་ཡང་བརྗོད་པའི་དོན་དུ་གསུངས་པ་ནི། དོན་གཅིག་ལ་བྱ་བའོ། །སའི་ཞེས་བྱ་བ་ལ་སོགས་པས་གཞན་གྱི་དོན་གཅིག་ལ་འདུ་བའི་སྒྲུབ་པར་བྱེད་པ་བསྟན་པ་ན་བརྗོད་པ་ནི། དེ་ལྟ་ན་འོ་ན་ཞེས་བྱ་བའོ། །འདི་ལ་གཞན་གྱི་བདག་ནི་ཞེས་སྨྲས་སོ། །ཇི་ལྟར་དེ་རག་ལས་ཞེས་བྱ་བ་ནི། གཞན་ལ་འདུ་བ་མ་ཡིན་པ་ཉིད་དོ། །གཞན་ལ་རག་ལས་པ་ཞེས་བྱ་བ་ནི་གཞན་ལ་འདུ་བ་ཡིན་པར་རྟོགས་པའོ། །མི་རྟག་ཅེས་བྱ་བ་ནི་གཏན་ཚིགས་སོ། །རྟག་པས་ཞེས་བྱ་བ་ནི་རང་དབང་གི་རྟགས་ཡིན་ལ་དེ་ཡང་མི་རྟེན་པའི་ཡིན་ནོ། །གཅིག་ཀྱང་ཞེས་བྱ་བ་ནི་ཡོན་ཏན་ཉིད་དམ་རྟེན་ཉིད་དོ། །དེ་ནི་ཡོན་ཏན་ཉིད་དོ། །ཅིའི་ཕྱིར་ཡོན་ཏན་ཉིད་མ་ཡིན་སྙམ་ན། གཞན་ལ་བརྟེན་པ་མ་གྲུབ་པའི་ཕྱིར་རོ་ཞེས་སྨོས་སོ། །རྫས་ལ་བརྟེན་པ་ཡོན་ཏན་མ་ཡིན་པ་ཞེས་བྱ་བ་ལ་སོགས་པའི་ཡོན་ཏན་ཡིད་ཀྱི་རྒྱུ་མཚན་ཡིན་ན། འདིར་རྫས་ལ་བརྟེན་པ་ཉིད་ནི་གྲུབ་པ་མེད་དོ། །དེའི་ཕྱིར་ཡོན་ཏན་དུ་འགྱུར་བ་ཡིན་ལ་དེ་ལྟ་ན་ཡང་ཕན་ཚུན་བསྟེན་པའི་ཉེས་པར་འགྱུར་རོ་ཞེས་དགོངས་པའོ།། བདེ་བ་ལ་སོགས་པ་ནི་རང་དབང་ཉིད་མ་ཡིན་ཏེ་ཞེས་འབྲེལ་ཏོ། །བཟློག་པའི་ཕྱིར་ཞེས་བྱ་བ་ནི་རྟག་པ་ལས་བཟློག་པ་མི་རྟག་པ་ཡིན་པའི་ཕྱིར་རོ། །ཚིག་ལེའུར་བྱས་པའི་དོན་འགྲེལ་པའི་དོན་དུ་ལྷག་པ་ཡང་བརྗོད་པ་ནི་གལ་ཏེ་ཞེས་བྱ་བའོ། །དེ་ཇི་ལྟར་ཞེས་བྱ་བ་ནི་མེད་པ་དེའོ། །གལ་ཏེ་རག་ལས་པའི་ཆོས་ཉིད་ལ་དེའི་ཚེ་ཡོད་པ་ཉིད་ཡིན་པར་འཐད་ཀྱི་མེད་པ་འདི་ཇི་ལྟར་འགྱུར་ཇི་ལྟར་རེ་ཞིག་རྣམ་པར་ཤེས་པའི་རང་བཞིན་དུ་བསྒྲུབ་པ་ཡིན་ནོ། །རང་རིག་པའི་རང་བཞིན་ཉིད་དུ་ཡང་ཉིད་ཀྱིས་བསྒྲུབ་པོ། །དེ་ལྟ་ན་ཡང་སློབ་དཔོན་གྱི་སྒོ་ནས་ཀྱང་བསྒྲུབ་པའི་དོན་དུ་བརྗོད་པ་ན། བདེ་བ་ལ་སོགས་པ་ཞེས་བྱ་བའོ། །མྱོང་ན་ཕན་འདོགས་པར་བྱེད་པ་ཉིད་དུ་འགྱུར་རོ་ཞེ་ན། འོན་ཏེ་གཞན་གྱིས་ཞེས་བྱ་བ་ནི་དབང་པོ་ལས་སྐྱེས་པ་མ་ཡིན་པས་སོ། །དོན་གང་ནི་གཟུགས་ལ་སོགས་པའོ། །གལ་ཏེ་གཟུགས་ལ་སོགས་པ་ཡང་མི་བཞུགས་པས་དེ་ལ་བློ་སྦྱོར་བ་མ་ཡིན་ནམ་བདེ་བ་ལ་སོགས་པ་ལ་ཡང་མིག་འཇུག་
པ་ཁོ་ན་སྟེ་དེས་ན་དེར་ཡང་དེ་སྦྱོར་བར་བྱེད་པ་ཡིན་ནོ་ཞེ་ན་བདག་གི་མིག་ཅེས་བྱ་བའོ། །འོན་ཏེ་བདེ་བ་ལ་མི་བཞུགས་ཀྱང་དེའི་ཡུལ་ལ་རྣམ་པར་ཤེས་པ་བསྐྱེད་པར་འགྱུར་ཞེས་གཞན་གྱིས་བསྟན་པ་ནི་འོན་ཏེ་ཞེས་བྱ་བ་ནི། བདེ་བ་འཛིན་པའི་རྣམ་པར་ཤེས་པ་ནི་གཟུགས་ཉིད་རྣམ་པར་ཞུགས་པའི་མིག་གིས་འཇུག་པ་སྟེ་བསྐྱེད་པར་འགྱུར་ནའོ། །འདི་ལ་གྲུབ་པའི་མཐའ་པས་བརྗོད་པ་ནི་དེ་ལྟ་ཡིན་ན་ཞེས་བྱ་བའོ། །གལ་ཏེ་གཅིག་ཞུགས་པའི་མིག་གིས་ཡུལ་གཞན་གྱི་རྣམ་པར་ཤེས་པ་བསྐྱེད་ན། དེའི་ཚེ་བུམ་པ་ལ་སོགས་པ་ལ་གཅིག་ལ་ཞུགས་པའི་མིག་གིས་ཁམས་གསུམ་པ་ཐམས་ཅད་ཀྱི་ཡུལ་ཅན་གྱི་རྣམ་པར་ཤེས་པ་སྐྱེད་པར་འགྱུར་རོ། །དེ་བཞིན་དུ་དུ་བ་ལ་སོགས་པ་གཞན་ལ་ཞུགས་པའི་མིག་གིས་ལྐོག་ཏུ་གྱུར་པའི་ཡུལ་གྱི་ཤེས་པ་སྐྱེད་པའི་ཕྱིར་ནི། །རྗེས་སུ་དཔག་པ་ཡང་མིག་ལས་འབྱུང་བར་འགྱུར་རོ་ཞེས་བྱ་བ་ནི་ཧ་ཅང་ཐལ་བའོ། །འཛིན་པར་བྱེད་པའི་རྣམ་པར་ཤེས་པ་ནི་བདེ་བ་ལ་སོགས་པ་རྣམས་འཛིན་པར་བྱེད་པའི་རྣམ་པའོ། །རྒྱུ་དེས་ན་དབང་པོའི་རྣམ་པར་ཤེས་པ་དེ་ཉིད་ཀྱིས་བདེ་བ་ལ་སོགས་པ་འཛིན་པ་ཡིན་པར་བརྗོད་དོ་ཞེ་ན། འདི་ལ་བརྗོད་པ་ནི་འོ་ན་ཞེས་བྱ་བའོ། །རྣམ་པར་བརྟག་པར་ཞེས་བྱ་བ་ནི་རྣམ་པར་རྟོག་པའི་ཡུལ་གྱི་རྣམ་པའོ། །དུས་མཚུངས་པའི་ཞེས་བྱ་བ་ནི། དབང་པོའི་རྣམ་པར་ཤེས་པ་དང་དུས་མཚུངས་པའིའོ། །དེ་ལ་ཡང་འཛིན་པའི་རྣམ་པ་གཞན་མ་དམིགས་པའི་ཕྱིར་རོ། །དེ་བཞིན་དུ་རྗེས་སུ་དཔག་པར་བྱ་བ་མེ་ལ་སོགས་པ་ཡང་འཛིན་པར་བྱེད་པ་གཞན་མ་དམིགས་ཏེ། དེས་ན་དེར་ཡང་དབང་པོའི་རྣམ་པར་ཤེས་པ་ཉིད་ཀྱིས་གཟུང་བར་ཐལ་ལོ་ཞེས་བརྗོད་ཟིན་ཏོ། །གཞན་གྱིས་འོན་ཏེ་ཞེས་སྨྲས་ཏེ། རྗེས་སུ་དཔག་པར་བྱ་བའི་མཚན་ཉིད་ཀྱིས་གཟུང་བའི་རྣམ་པ་ལས་དེ་དེ་ལྟ་བུའི་ཞེས་བྱ་བ་རྗེས་སུ་དཔག་པའི་རང་བཞིན་གྱིས་ཡོངས་སུ་རྟོགས་པའོ། །དེ་བཞིན་དུ་རྣམ་པར་བརྟག་པར་བྱ་བའི་སྒྲ་ལ་སོགས་པ་དབང་པོ་དང་དུས་མཚུངས་པ་ལ་བྱུང་བ་ལ་ཡང་གཟུང་བའི་རྣམ་པ་མཐོང་བ་ལས་འཛིན་པར་བྱེད་པའི་རྣམ་པར་བརྟག་པ་གཞན་རྟོག་པའོ། །འདི་མཚུངས་སོ་ཞེས་བྱ་བ་ནི་རྗེས་སུ་དཔག་པར་བྱ་བ་དང་རྣམ་པར་བརྟག་པར་བྱ་བའོ། །ཕ་རོལ་པོ་ཉིད་སངས་རྒྱས་པའི་དོགས་པ་བསུ་བ་ནི། བདེ་བ་ལ་སོགས་པ་ཡང་ཞེས་བྱ་བའོ། །གལ་ཏེ་རྗེས་སུ་དཔག་
པར་བྱ་བ་ལ་སོགས་པ་ལ་གཟུང་བའི་རྣམ་པར་མཐོང་བ་ལས་འཛིན་པར་བྱེད་པ་གཞན་རྟོག་ན་དེའི་ཚེ་བདེ་བ་ལ་སོགས་པ་ཡང་གཟུང་བའི་རྣམ་པ་མཐོང་བའི་ཕྱིར་ན། དབང་པོའི་རྣམ་པར་རྣམ་པ་ལས་གཞན་པར་བྱེད་པ་ཅི་སྟེ་མི་རྟག་ཅེས་དོགས་པ་བསུ་ནས་འགོག་པ་ནི་མ་ཡིན་ཏེ་ཞེས་བྱ་བའོ། །གལ་ཏ་གཟུང་བ་ཉིད་དུ་མྱོང་ན་དེ་ལ་འཛིན་པར་བྱེད་པ་གཞན་བརྟག་པར་བྱ་བ་ཡིན་ཏེ། །དཔེར་ན་རྗེས་སུ་དཔག་པར་བྱ་བ་ལ་སོགས་པ་བཞིན་ནོ། །བདེ་བ་ལ་སོགས་པ་ནི་གཟུང་བ་ཉིད་དུ་ཉམས་སུ་མྱོང་བ་མ་ཡིན་ན་ཇི་ལྟར་འཛིན་པར་བྱེད་པ་གཞན་བརྟག་པར་བྱ་བ་ཡིན་ཞེས་བྱ་བའི་ཐ་ཚིག་གོ ། གཟུང་བར་བྱ་བ་ཉིད་དུ་མྱོང་བ་མེད་པའི་ཕྱིར་རོ་ཞེས་ཕ་རོལ་པོས་བརྗོད་པ་གང་ཡིན་པ་དེ་འགོག་པ་ནི་དོན་གཅིག་ལ་ཞེས་བྱ་བའོ། །འཛིན་པར་བྱེད་པ་གཞན་གྱིས་བྱ་བ་ནི་ཤེས་པ་གཞན་གྱིས་སོ། །དེས་ན་འདིར་ཡང་གཟུང་བ་ཉིད་མཐོང་བ་ལས་འཛིན་པར་བྱེད་པར་གཞན་རྟོགས་ཤིག་ཅེས་དགོངས་པའོ། །གཅིག་ཏུ་འདྲེས་པ་ཉིད་དུ་ཞེས་བྱ་བ་ནི། ཤེས་པ་དང་བདག་དང་བདེ་བ་ལ་སོགས་པ་དྲན་པ་ཉིད་དུ་སྣང་སྟེ། དེས་ན་བདེ་བ་ལ་སོགས་པ་གཟུང་བ་ཉིད་མ་ཡིན་ནོ་ཞེ་ན། དེ་ལ་བརྗོད་པ་ནི་འོ་ན་ཞེས་བྱ་བའོ། །དེ་བདག་གམ་ཞེས་བྱ་བ་ནི། བདག་ཀྱང་ཡིན་ལ་དེ་ཡང་ཡིན་པས་ན་བདག་སྟེ་ཞེས་བྱ་བ་ལ་སོགས་པའི་དོན་ཏོ། །གལ་ཏེ་མྱོང་བ་བདེ་བའི་རྣམ་པར་ཁས་བླངས་པ་ན། མྱོང་བ་མྱོང་བ་མ་ཡིན་པའི་བདེ་བ་གཞན་ནི་ཡོད་པ་ཁོ་ནའོ། །ཤེས་པ་བུམ་པའི་རྣམ་པ་ཡིན་ན་བུམ་པ་ཐ་དད་པ་མེད་དོ་ཞེས་ནི་བརྗོད་པར་མི་ནུས་སོ་ཞེས་གཞན་སྨྲ་བ་ནི། མྱོང་བ་ནི་ཞེས་བྱ་བ་ཁོ་ནའོ། །གཞན་ཡང་ནི་བེམས་པོའོ། །ཤིང་ལས་བྱ་བ་ནི་ཆོས་མཐུན་པའི་དཔེའོ། །དཔེར་ན་ཤིང་ལ་གོང་བུའི་རྣམ་པར་རྟོག་པ་ནི། གོང་བུའི་རྣམ་པ་ཅན་གྱི་ཤིང་གཞན་གོང་བུའི་རྣམ་པ་ཅན་དུ་སྒྲོ་བཏགས་པ་མ་ཡིན་པ་དེ་བཞིན་དུ། བདེ་བ་ལ་སོགས་པ་རིག་པ་ཡང་བདེ་བ་གཞན་གྱིས་སྒྲོ་བཏགས་པའི་བདེ་བའི་རྣམ་པར་རྟོག་པ་མ་ཡིན་ནོ་ཞེས་བྱ་བའི་དོན་ཏོ། །འོན་ཏེ་གཞན་གྱིས་ཞེས་བྱ་བའི་རྣམ་པར་རྟོག་པ་གཉིས་པ་སུན་འབྱིན་པའི་དོན་དུ་གཉེར་བར་འགོག་པ་ནི་འོན་ཏེ་བདག་དང་ཞེས་བྱ་བའོ། །བདག་དང་ཡིད་དེ་དབང་པོ་གང་ཡིན་པ་དེ་གཉིས་འབྲེལ་པ་ནི་ལྡན་པ་སྟེ་དེ་ཙམ་ལས་སོ། །འདི་ལ་བརྗོད་པ་ནི་དེ་
ལྟ་ཡིན་ན་ཞེས་བྱ་བའོ། །དེ་མྱོང་བ་ཞེས་བྱ་བ་ནི་བདེ་བ་མྱོང་བའོ། །རྣམ་འཆད་མེད་པ་ནི་བར་མ་ཆད་པའོ། །འོན་ཏེ་རྣམ་པར་འཆད་པར་ནི་མི་སྣང་བ་ཉིད་དོ། །རྣམ་པར་ཆད་པ་ཁོ་ནར་སྣང་བའི་ཕྱིར་རོ་ཞེས་དོགས་པ་ནི་བདེ་བ་ལ་སོགས་པ་འཛིན་པ་ནི་ཞེས་སྨོས་སོ། །གཟུགས་ལ་སོགས་པ་འཛིན་པ་ནི་དབང་པོ་ལས་སྐྱེས་པ་དང་ངོ༌། །གལ་ཏེ་བདེ་བ་ལ་སོགས་པ་འཛིན་པ་རིམ་ཅན་ཉིད་ལྷན་ཅིག་དམིགས་པ་མ་ཡིན་ནམ་ཞེས་དོགས་ན་དེ་ལ་ཞེས་བྱ་བའོ། །རྣམ་པར་མ་ཆད་པར་རྟོགས་པ་ཞེས་བྱ་བ་འདི་ཉིད་མ་ཆད་པ་རྟོགས་པ་ཁོ་ན་སྟེ། འོན་ཀྱང་བདེ་བ་ལ་སོགས་པའམ་གཟུགས་ལ་སོགས་པའི་བར་རྟོགས་པ་མེད་པ་ཡིན་ནོ་ཞེ་ན། འདི་ལ་བརྗོད་པ་ནི་མྱུར་བ་དེ་ནི་ཞེས་བྱ་བའོ། །བདེ་བ་མི་འཛིན་པ་ནི་གཟུགས་འཛིན་པ་ལས་གཞན་མ་ཡིན་ཏེ། གཟུགས་འཛིན་པ་བདེ་བ་མི་འཛིན་པ་ཡིན་ནོ། །དེ་བཞིན་དུ་གཟུགས་མི་འཛིན་པ་ཡང་བདེ་བ་འཛིན་པ་ལས་གཞན་མ་ཡིན་ཏེ། བདེ་བ་འཛིན་པ་ཉིད་དུ་གཟུགས་མི་འཛིན་པ་ཡིན་ནོ་ཞེས་བྱ་བའི་དོན་ཏོ། །འགྱུར་རོ་ཞེས་བྱ་བའི་ཐལ་བ་དོན་མི་འཐད་པར་འགྱུར་བ་གཟུགས་ལ་སོགས་པ་ཞེས་བྱ་བ་འདིར་འགྱུར་རོ། །བཟློག་པ་ལ་ཡང་ཞེས་བྱ་བ་ནི། གཟུགས་ལ་སོགས་པ་མི་འཛིན་པ་རྒྱུན་མི་འཆད་པར་འགྱུར་རོ་ཞེས་བྱ་བའི་ཐལ་བ་འདིའི་དོན་ཡང་འདི་ཡིན་ཏེ། བདེ་བ་ལ་སོགས་པར་རྒྱུན་མི་འཆད་པར་འཛིན་པར་འགྱུར་རོ་ཞེས་བྱ་བ་ཡིན་ན། དེ་ནི་ཡིན་པར་ཉིད་དོ་ཞེས་བྱ་བའོ། །ཕ་རོལ་པོ་ཉིད་དུ་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །དེ་ནི་དེའི་དབེན་པས་ན་ཞེས་བྱ་བ་ནི་དེ་ནི་བརྗོད་པར་འདོད་པས་དེས་དབེན་པའི་ཕྱིར་མེད་པ་ཉིད་དུ་རིག་པ་ཡིན་ནོ། །དེས་ན་དེ་ནི་དེ་མེད་པ་ཡིན་ནོ། །དེས་དེ་དབེན་པར་འཛིན་པ་མི་འགྱུར་བ་ཉིད་དུ་མ་ཡིན་ནོ། །དེས་ན་གཟུགས་ལ་སོགས་པར་འཛིན་པ་དེ་རྣམ་པར་མ་ཆོད་པར་ཡོད་པས་སོ། །གལ་ཏེ་གཟུགས་ལ་སོགས་པ་དམིགས་པས་ན། བདེ་བ་ལ་སོགས་པ་ཡང་དམིགས་པར་འགྱུར་མོད། ཅི་སྐྱོན་ཞེ་ན་གཞན་ཞེས་བྱ་བའོ། །བདེ་བ་ལ་སོགས་པ་གཞན་དམིགས་པ་ན། གཞན་གཟུགས་ལ་སོགས་པ་དེས་དབེན་པར་རོ། །གཞན་གྱི་བརྗོད་པ་གཟུགས་ལ་སོགས་པ་འཛིན་པ་ན། བདེ་བ་ལ་སོགས་པ་དེས་དབེན་པར་འཛིན་པ་ཉིད་དོ། །དེའི་རང་བཞིན་ཞེས་བྱ་བ་ནི་བདེ་བའི་རང་བཞིན་ནོ། །དེས་
ཞེས་བྱ་བ་ནི་གཟུགས་ལ་སོགས་པ་འཛིན་པར་རོ། །མ་ཞུགས་པའི་ཕྱིར་རོ་ཞེས་བྱ་བ་ནི་མ་ཆུད་པའི་ཕྱིར་རོ། །འདི་ལ་བརྗོད་པ་ནི་མ་ཡིན་ཏེ་ཞེས་བྱ་བའོ། །ཕན་ཚུན་དང་རྗེས་སུ་མ་ཞུགས་པ་ཉིད་འཛིན་མོད། དེ་ལྟ་ན་ཡང་བདེ་བ་དང་གཟུགས་ལ་སོགས་པ་འཛིན་པ་དག་རིམ་ཅན་ཉིད་མི་འགྲུབ་པོ། །གལ་ཏེ་དུས་མཉམ་པར་ཕན་ཚུན་རང་བཞིན་རྗེས་སུ་མ་ཞུགས་པའི་འཛིན་པ་གཉིས་རིག་པ་ཡིན་ན། དེའི་ཚེ་དུས་གཅིག་པ་ཉིད་དུ་འགྱུར་བ་ཡིན་ནོ། །འདིར་དཔེར་ན་ཡན་ལག་དང་ཞེས་བྱ་བའོ། །བར་དང་བཅས་པ་སྟེ་བར་ཆད་དང་ལྷན་ཅིག་གནས་པ་ལ་དེ་སྐད་ཅེས་བྱ་བའོ། །བར་དང་བཅས་པའི་སྐྲ་དང་དུ་མ་དེ་དག་འཛིན་པའི་དུས་ན། བར་ན་གནས་པའི་བར་ཆོད་མ་བཟུང་ཡང་སྐྲའི་རང་བཞིན་གཟུང་བ་ཉིད་ཡིན་ནོ། །དེས་ན་དེ་ལ་སྟེ་བར་དང་བཅས་པའི་སྐྲ་འཛིན་པའི་དུས་སུ་སྐྲའི་རང་བཞིན་པར་མེད་པར་འཛིན་པས་དེའི་བར་ཞེས་བྱ་བ་སྐྲ་དེ་དེ་རྣམས་ཀྱི་བར་ཆད་འཛིན་པ་གང་ཡིན་པ་དེ་ལ་གནོད་པ་བཞིན་དུ་བར་མི་འཛིན་པས་སྐྲ་འཛིན་པ་ལ་གནོད་པ་ནི་མ་ཡིན་ནོ། །དེ་བཞིན་དུ་ཡང་བདེ་བ་ལ་སོགས་པ་དང་གཟུགས་ཀྱི་བར་ཆོད་གང་ཡིན་པ་དེ་མི་འཛིན་པ་ནི། འཛིན་པའི་གནོད་བྱེད་མ་ཡིན་ནོ། །དེ་ལ་ཞེས་བྱ་བ་ནི་བར་དང་བཅས་པའི་སྐྲ་དུ་མ་འཛིན་པའི་དུས་ནའོ། །པར་ཆད་དེ་སྐྲའི་བར་མི་འཛིན་པ་ནི་ཡོད་པ་མ་ཡིན་པ་ཉིད་དེ། དེས་ན་དེ་འཛིན་པའི་གནོད་བྱེད་དུ་ཇི་ལྟར་འགྱུར། །དེ་ནི་གནོད་བྱེད་དུ་ཡང་མི་འགྱུར་རོ་ཞེས་བརྗོད་པ་ནི། མེད་པ་གནོད་པར་བྱ་བ་མིན། །ཞེས་བྱ་བའོ། །དེ་ལྟར་ན་རེ་ཞིག་འདི་རིགས་པས་མི་འཐད་པ་ཡིན་ནོ། །སངས་རྒྱས་པས་འདོད་པ་ཡང་མ་ཡིན་ནོ་ཞེས་བརྗོད་པ་ནི་འདོད་མིན་ཞེས་བྱ་བའོ། །འོ་ན་ཇི་ལྟར་གནོད་པར་བྱ་བར་འགྱུར་སྙམ་ན། འཇིག་རྟེན་འདོད་པར་ཟད་ཅེས་བྱ་བའོ། །བར་ཆད་དེ་སྐྲ་རྣམས་ཀྱི་ནང་ན་གནས་པའི་སྣང་བ་ལ་སོགས་པ་འཛིན་པ་ཉིད་སྐྲ་མི་འཛིན་པའི་རང་བཞིན་ཅིའི་ཕྱིར་མ་ཡིན་ཞེས་དྲིས་པས་ན། འདི་ནི་ཞེས་གསུངས་སོ། །བར་ཆད་ཅེས་བྱ་བ་ནི་སྣང་བ་ལ་སོགས་པའོ། །བར་ཆད་འཛིན་པ་མ་སྐྱེས་པ་ན་གནོད་པར་བྱ་བ་ཡང་མ་ཡིན་གྱི་ཞེས་འབྲེལ་ཏོ། །འོན་ཏེ་བདེ་བ་དང་གཟུགས་ལ་སོགས་པ་འཛིན་པའི་དུས་ན་ཡང་བར་དང་བར་དུ་བདེ་བ་ལ་སོགས་པའམ། གཟུགས་ལ་སོགས་པ་འཛིན་པའི་འམ། མ་སྐྱེས་
པ་ཁོ་ན་སྟེ་དེས་ན་གནོད་པར་བྱ་བ་མ་ཡིན་ལ། གནོད་པར་བྱེད་པ་ཡང་མ་ཡིན་ནོ་ཞེ་ན། དེར་ནི་ཞེས་གསུངས་སོ། །མི་འཛིན་པ་ཞེས་བྱ་བ་ནི། བདེ་བ་འཛིན་པ་ཉིད་གཟུགས་མི་འཛིན་པ་ཡིན་ལ། གཟུགས་འཛིན་པ་ཡང་བདེ་བ་མི་འཛིན་པ་ཉིད་ཡིན་ནོ། །དེས་ན་རིམ་གྱིས་འཛིན་པ་ན། གཟུགས་དང་བདེ་བ་ལ་སོགས་པ་དག་མི་འཛིན་པ་ཉིད་དུ་ཐལ་ལོ། །དེ་ལྟ་ཡིན་དང་རིམ་གྱིས་སྣང་ཞེས་སྦྱར་རོ། །མི་འཛིན་པ་ནི་ཡོད་པ་ཁོ་ན་སྟེ་ཞེས་བྱ་བ་ནི་བདེ་བ་འཛིན་པ་ཉིད་གཟུགས་མི་འཛིན་པ་ཡིན་ནོ། །འོ་ན་ཇི་ལྟར་མི་དམིགས་སྙམ་པའི་དོགས་པ་བསུ་ནས། ཕ་རོལ་པོ་ཉིད་ཀྱིས་སྨྲས་པ་ནི་དེ་ལས་ཞེས་བྱ་བ་སྟེ། གཟུགས་མི་འཛིན་པའི་བདག་ཉིད་བདེ་བ་འཛིན་པ་ལའོ། །འཛིན་པ་ལ་འཛིན་པ་གཞན་མེད་དོ་ཞེས་གདོན་མི་ཟ་བར་ལས་བླང་ དགོས་སོ། །གཞན་གྱིས་ཀྱང་འཛིན་པ ་པོ་ལ་འཛིན་པ་པོ་གཞན་ཡོད་པར་འདོད་པ་ཉིད་དུ་ཁས་བླང་བ་ཡིན་ནོ། །དེ་ལྟ་མིན་ན་ཞེས་བྱ་བ་གལ་ཏེ་འཛིན་པ་ལ་ཡང་འཛིན་པ་གཞན་སྟོན་ན་དེའི་ཚེ་ཐུག་པ་མེད་པར་ཐལ་བའི་ཕྱིར་ན་མ་འབྲེལ་པ་ཉིད་དོ། །གལ་ཏེ་དབང་པོའམ་གཞན་དག་ལ་སེམས་པ་ལས་འཛིན་པར་བྱེད་པ་གསལ་བ་ཡིན་གྱི། འཛིན་པ་པོ་ལས་མ་ཡིན་ནོ་ཞེས་ཕ་རོལ་པོས་སངས་རྒྱས་པའི་ཕྱོགས་རྗེས་སུ་བརྗོད་པར་བྱས་པའོ། །འདི་ལ་བརྗོད་པ་ནི་སྐྱོན་གཞན་ཞེས་བྱ་བའོ། །འདི་ཉིད་ཀྱིས་ཞེས་བྱ་བ་ནི་འཛིན་པ་རང་གསལ་བར་ཁས་བླངས་ན་འཛིན་པ་པོ་གཞན་ཁས་ལེན་པའིའོ། །དེ་ནི་འཛིན་པ་པོ་གསལ་བར་བྱེད་པ་ཞེས་བྱ་བ་ནི་གྲུབ་པའི་མཐའོ། །དེ་ལྟར་རེ་ཞིག་གཅིག་པར་བར་དུ་མི་འཛིན་པ་ཉིད་གཞན་གང་ཡང་རུང་བར་འཛིན་པའི་རང་བཞིན་ནི་ཡོད་པ་ཁོ་ནའོ་ཞེས་བསྟན་པས་གནོད་པར་བྱེད་པ་ཉིད་དུ་སྟོན་པ་ནི། ཕན་ཚུན་ཞེས་བྱ་བའོ། །དེས་ན་སྐྲའི་བར་ན་གནས་པའི་སྣང་བ་ལ་སོགས་པ་འཛིན་པ་ལྟར་རོ། །བདེ་བ་འཛིན་པའི་གནོད་བྱེད་དུ་རྣམ་པར་གཞག་པའོ། །སྣང་བ་ལ་སོགས་པའི་སྐྲའི་བར་གང་ཡིན་པ་རིག་པ་དེ་ཇི་ལྟར་ཐམས་ཅད་ཀྱི་ཚེ་གནོད་བྱེད་ཡིན་པ་དེ་བཞིན་དུ་བདེ་བ་ཡང་ཅི་སྟེ་མི་གནོད། གལ་ཏེ་རེ་ཞིག་དུས་གཅིག་གི་ཚེ་ནི་གནོད་པ་ཡོད་པ་ཁོ་ནའོ་ཞེ་ན། དེ་ཚེ་ཞེས་བྱ་བ་སྟེ། ཡིད་འཕྲོག་པའི་གཟུགས་བཱ་ཞིག་འཛིན་པའི་ཚེའོ། །དེར་ན་དེར་ཡོད་པ་མ་ཡིན་པའི་བདེ་བ་ཉིད་འཛིན་པ་གནོད་པར་བྱ་བ་ཡིན་ནམ་ཅི་ཞེས་
བསམས་པའོ། །ཡུལ་ཉེ་བ་ན་ནི་གང་གི་ཚེ་རྣམ་པར་ཤེས་པ་མི་སྐྱེ་བ་དེའི་ཚེ་འཛིན་པ་གནོད་པ་ཉིད་དུ་ཐ་སྙད་དུ་བྱ་སྟེ། སྒྲའི་བར་ནི་སྣང་བ་འཛིན་པ་བཞིན་ནོ་འདིར་ནི་དེ་ཏ་མ་ཡིན་ནོ་ཞེས་དགོངས་པའོ། །བདེ་བ་ལ་སོགས་པ་འཛིན་པ་ལ་ཡང་ཐམས་ཅད་ཀྱི་ཚེ་གནོད་པར་འགྱུར་རོ་ཞེས་འབྲེལ་ཏོ། །གཞན་ཡང་དེ་ནི་སྐྲ་འཛིན་པ་ཉིད་མ་ཡིན་ཏེ། དེས་ན་དཔེར་ན་སྒྲ་འཛིན་པས་བར་ཆད་མི་འཛིན་ལ་གནོད་པ་དེ་བཞིན་དུ་བར་ཆད་མ་བཟུང༌། གཟུང་བས་སྐྲ་འཛིན་པ་ལ་གནོད་པ་མ་ཡིན་ནོ་ཞེས་འདི་དཔེར་ཇི་ལྟར་བྱེད་ཅེས་སྟོན་པ་ན་དོན་དམ་པར་ནི་ཞེས་བྱ་བའོ། །དེ་ཚེ་བདེ་བ་ལ་སོགས་པ་ཞེས་བྱ་བ་འཆད་པ་ནི་གང་གི་ཞེས་བྱ་བའོ། །སྐྱེས་པ་ཞེས་བྱ་བ་ལ་བདེ་བ་སྐྱེས་པ་མ་བཟུང་བ་ཉིད་འབའ་ཞིག་ཅེས་བྱ་བ་ཤེས་པ་ཙམ་དུ་སྟེ། དེའི་ཡུལ་ཅན་མ་སྐྱེས་སོ་ཞེས་རྣམ་པར་འཛིན་པ་ནི་མ་ཡིན་ནོ། །གལ་ཏེ་བདེ་བ་སྐྱེས་པ་ཉིད་མེད་ཀྱི་འོན་ཀྱང་མི་དམིགས་པའི་ཕྱིར་མ་སྐྱེས་སོ་ཞེས་ཐ་སྙད་མེད་པ་ཡིན་ནོ་ཞེས་སྟོན་པ་ནི། མ་དམིགས་པའི་ཕྱིར་ཞེས་བྱའོ། །འདི་ལ་བརྗོད་པ་ནི་དེ་ནི་ཞེས་བྱ་བའོ། །བུམ་པ་ལ་སོགས་པ་མ་སྐྱེས་པར་འདོད་པའི་དུས་ན་ཡང་སྐྱེས་པར་འདོད་པའི་དུས་ན་ཡང་སྐྱེས་པ་ཁོ་ན་སྟེ། འོན་ཀྱང་དེ་མ་དམིགས་པ་ཙམ་དུ་ཟད་དོ་ཞེས་བརྗོད་པར་ནུས་པའི་ཕྱིར་རོ་ཞེ་ན། དེ་བཞིན་དུ་མ་དམིགས་པ་ཡང་འཛིན་པར་འགྱུར་ཏེ། འགར་ཡང་མེད་པ་བསྒྲུབ་པར་མི་ནུས་པའི་ཕྱིར་རོ། །དེའི་ཚེ་ཞེས་བྱ་བ་ནི་བདེ་བ་ལ་སོགས་པ་སྐྱེ་བའི་དུས་ནའོ། །རིགས་པ་ཁྱེད་ཀྱི་གཞུང་ལྟར་ན་སྒྲའི་བར་འཛིན་པས་ཟིལ་གྱིས་ནོན་པ་ལྟར་འགྱུར་རོ། །དོན་དང་བདེ་བ་ལ་སོགས་པ་འཛིན་པ་ཡིན་ན་ནི། དེའི་རིམ་མ་ཡིན་པར་འཛིན་པ་རིགས་པ་ཞིག་ནའོ། །དེ་ལྟ་ན་དེ་ལྟར་འགྱུར་རོ་ཞེ་ན་དེ་ལྟ་ཡང་ཞེས་བྱ་བ་སྟེ། མིག་ལ་སོགས་པ་བློ་གཅིག་ཉིད་ཀྱིས་གཉིས་འཛིན་པ་འདི་ནི་ཁྱེད་ཀྱིས་ཁས་བླངས་པ་ཡང་མ་ཡིན་ནོ་ཞེས་སྟོན་པ་ནི་བདེ་བ་ལ་སོགས་པ་ནི་ཞེས་བྱ་བའོ། །དེ་ལྟར་ཡང་ཞེས་བྱ་བ་ནི་དབང་པོའི་བློ་ཉིད་ཀྱིས་གཉིས་འཛིན་པར་འགྱུར་རོ། །བདེ་བ་ལ་སོགས་པ་དབང་པོའི་བློའི་རྒྱུར་ངེས་པར་མི་འཛིན་ཡང་ཅིའི་ཕྱིར་ཞེ་ན། དབང་པོའི་བློ་ནི་ཞེས་བྱ་བ་ལ་སོགས་པར་སྦྱར་རོ། །འདི་ཉིད་གསལ་བར་བྱེད་པ་ནི་གང་ཞིག་ཅེས་བྱ་བའོ། །དེ་ནི་སྔོན་པོ་ལའོ། །དེ་ནི་སྔོན་པོའི་ནུས་པ་མེད་པ་
ཁོ་ནའོ་སྙམ་ན། དེ་ལྟ་མོད་ཀྱི་ཞེས་བྱ་བའོ། །བདེ་བའི་ནུས་པའང་དེ་བཞིན་དུ་འགྱུར་རོ་སྙམ་ན་བདེ་བ་ནི་ཞེས་སྨོས་སོ། །དེ་ལྟར་ཞེས་བྱ་བ་ནི་གཟུགས་མེད་ཀྱང་ཤེས་པ་སྐྱེད་པར་བྱེད་པ་ཉིད་དུའོ། །ཁས་བླངས་ན་ཡང་ཞེས་བྱ་བ་ནི་བདེ་བའི་པ་རྣམ་པ་ཅན་གྱི་ཤེས་པ་སྐྱེད་པ་ལ་བདེ་བའི་ནུས་པ་ཁས་བླངས་ན་ཡང་ངོ༌། །གཉིས་ཀྱི་ནི་གཟུགས་དང་བདེ་བའོ། །བདེ་བ་འབའ་ཞིག་འཛིན་མོད་ཅི་སྐྱོན་སྙམ་ན། དེ་ཞེས་བྱ་བ་བདེ་བ་དེ་མྱོང་བར་ནི་མི་རིགས་སོ། །གང་གི་ཚེ་ཞེ་ན་བདེ་བ་དེའི་རྒྱུར་གྱུར་པའི་དོན་ཤེས་པས་གཟུགས་ལ་སོགས་པས་གསུང་བར་རོ། །བདེ་བ་ལ་སོགས་པས་ཀྱང་ཅིའི་ཕྱིར་མི་སྐྱེ་ཞེ་ན། རྣམ་པར་ཤེས་པའི་སྔོན་རོལ་དུ་ནི་ཞེས་གསུངས་སོ། །གཟུགས་ལ་སོགས་པ་ལྟར་ཞེས་བྱ་བ་ནི་ཆོས་མི་མཐུན་པའི་དཔེའོ། །བདེ་བ་ནི་སྔར་ཇི་ལྟར་མེད་སྙམ་ན། དེ་ནི་ཞེས་གསུངས་ཏེ། བདེ་བ་དེ་ནིའོ། །དུས་མཚུངས་པར་འབྱུང་བའི་བདེ་བ་ནི་ཤེས་པའི་ལྷན་ཅིག་འབྱུང་བའི་རྒྱུ་ཉིད་དུ་བྱེ་བྲག་ཏུ་སྨྲ་བས་འདོད་པ་ཡིན་ནོ། །བདེ་བ་ལ་སོགས་པ་དང་ཤེས་པ་དག་རིག་བྱེད་ཀྱི་དངོས་པོར་ནི་མ་ཡིན་ནོ། །ད་ནི་རིག་བྱེད་ཀྱི་དངོས་པོ་ཉིད་གསལ་བའི་དོན་དུ་བརྗོད་པ་ནི། རིག་པའི་རང་བཞིན་མིན་པ་ནི། །ཞེས་བྱ་བའོ། །གལ་ཏེ་རྣམ་པར་ཤེས་པ་ནི་རང་གི་རྒྱུ་ཉིད་ལས་བདེ་བ་ལ་མངོན་དུ་ཕྱོགས་པ་ཡིན་ཏེ། དེས་ན་རྣམ་པར་ཤེས་པ་འདི་དུས་མཚུངས་པ་ཡིན་ཡང་བདེ་བ་རིག་པའི་རང་བཞིན་གྱིས་མངོན་དུ་ཕྱོགས་པའི་ཕྱིར་བདེ་བར་འཛིན་པར་བྱེད་པ་ཡིན་ནོ་སྙམ་པའི་དོགས་པ་བསུ་ནས་བརྗོད་པ་ནི། བདེ་བ་ལ་ནི་མངོན་དུ་ཕྱོགས་ཏེ་ཞེས་བྱ་བའོ། །གཟུགས་བཞིན་དུ་བདེ་བ་ལ་ཡང་དབང་པོའི་བྱེད་པ་ཡོད་དེ། དེས་ན་དབང་པོའི་རྣམ་པར་ཤེས་པ་བདེ་བའི་ཡུལ་ན་དུ་ཡང་འགྱུར་རོ་སྙམ་ན་དེ་ལ་ཞེས་བྱ་བའོ། །བདེ་བ་རྣམ་པར་ཤེས་པ་བསྐྱེད་པ་ལ་སོ་སོར་ནུས་པ་ཡིན་ནོ། །གལ་ཏེ་རིག་པ་ཉིད་མ་ཡིན་ནམ། དེ་ཇི་ལྟར་མི་འཐད་སྙམ་ན། རིག་པར་བྱ་བ་ཉིད་ཀྱང་ཞེས་བྱ་བའོ། །འདི་ནི་ཤིན་ཏུ་མི་འཐད་པ་ཉིད་ལྷུར་བྱེད་པ་ལྷག་པར་བརྗོད་པ་ཚིག་སྟེ། དེ་ལ་རིག་པ་ནི་ཡོད་པ་མ་ཡིན་ནོ། །འགའ་ཞིག་འདོད་པ་མིན་ཞེས་བརྗོད་པ་ནི་གང་ཡིན་པ་དེ་དང་དེ་ལྟར་གསལ་བར་བྱེད་པ་ནི་ན་ཆུང་ཞེས་སལ་བར་བྱེད་པ་ནི་ན་ཆུང་ཞེས་བ་ནི་ན་ཆུང་སྒེག་མོ་རྟོགས་པའི་དུས་ནའོ། །མཐོང་དང་ཞེས་བརྗོད་པ་གང་
ཡིན་པ་དེའི་བཤད་པ་ནི། དེ་ལྟར་མི་དམིགས་པ་ཡང་མ་ཡིན་ནོ་ཞེས་བྱ་བའོ། །ལྷན་ཅིག་པ་ཞེས་བྱ་བ་ནི་གཟུགས་དང་ལྷན་ཅིག་པའི་བདེ་བའོ། །ཟླ་བ་གཉིས་པ་ཡང་ནུས་པར་འགྱུར་རོ། །དེས་ན་དེ་ཡང་མེད་པར་བྱར་མི་ནུས་སོ། །རྗེས་སུ་འགྲོ་བ་དང་ལྡོག་པ་ནི་འདོད་པ་ཡང་མ་ཡིན་ནོ་ཞེས་རྗེས་སུ་འཇུག་གོ །ཅིའི་ཕྱིར་མི་འདོད་སྙམ་ན་མིག་ལས་ཞེས་བྱ་བའོ། །དེ་ལས་ཞེས་བྱ་བ་བདེ་བ་ལ་སོགས་པ་ལས་སྐྱོ་བར་རོ། །འབའ་ཞིག་ནི་བདེ་བར་རོ། །འོ་ན་ཅི་ལྟར་ཞེ་ན། རྒྱུ་འགའ་ཞིག་ཅེས་གསུངས་སོ། །ལྷན་ཅིག་གཟུང་བ་ན་ཞེས་བྱ་བ་ནི། གཟུགས་ལ་སོགས་པ་དང་བདེ་བ་ལྷན་ཅིག་འཛིན་པའི་དུས་སུའོ། །འདི་ལ་བརྗོད་པ་ནི་འོ་ན་ནི་ཞེས་བྱ་བའོ། །གལ་ཏེ་ལྷན་ཅིག་ཏུ་གཟུང་བ་དག་ལ་རྒྱུར་རྟོགས་ན་དེའི་ཚེ་རེས་འགའ་སྔོན་པོ་དང་སེར་པོ་དག་ལྷན་ཅིག་ཏུ་རྟོགས་པ་ན། དེ་དག་ཀྱང་རྒྱུ་ཉིད་དུ་རྟོགས་པར་འགྱུར་རོ། །འདི་ནི་ཞེས་བྱ་བ་ནི་ལྷན་ཅིག་རྟོགས་པ་རྒྱུ་ཉིད་ཡིན་པ་ནི་འཐད་པ་མ་ཡིན་ནོ། །དེའི་ཚེ་ཕྱི་རོལ་མི་མཐོང་བར་འགྱུར་རོ་ཞེས་བྱ་བ་ནི། ཕྱི་རོལ་མཐོང་བར་མི་འགྱུར་བའོ། །བདེ་བ་མྱོང་བ་ནི་དེ་མེད་ན་མི་འབྱུང་བ་ཡིན་པའི་ཕྱིར་རོ་ཞེས་བྱ་བ་ནི་ཕྱི་རོལ་མཐོང་བ་མེད་ན་མི་འབྱུང་བ་ཡིན་པའི་ཕྱིར་རོ། །འཛིན་པའི་ཚོགས་པ་མེད་པ་ཉིད་བསྟན་པའི་དོན་དུ་བརྗོད་པ་ནི་དབང་པོ་དང་ཞེས་བྱ་བའོ། །དེས་ན་ཞེས་བྱ་བ་ལ་བདེ་བ་ལ་སོགས་པའི་ཤེས་པ་སྐྱེད་པར་བྱེད་པའི་ཡིད་གཉིས་པ་མེད་པས་ནའོ། །དེ་ལས་ཞེས་པ་གཟུགས་ལ་སོགས་པ་ལས་སྐྱེས་པའོ། །གཞན་དག་གྲུབ་པ་ལ་སྒྲུབ་པ་ཉིད་སྟོན་པ་ནི་འོན་ཏེ་ཞེས་བྱ་བའོ། །གྲང་བའི་དུས་ན་གང་ཚེ་དྲོ་བའི་དུས་ན་རེག་པ་ཉེ་བ་དེའི་ཚེ་གྲང་བ་དང་ཞེས་བྱ་བ་ལ་སོགས་པ་སྦྱར་རོ། །རྟག་ཏུ་ཞེས་བྱ་བ་ནི་བདེ་བ་དང་སྡུག་བསྔལ་སྐྱེད་པར་བྱེད་པའི་དོན་དག་ཉེ་བར་གནས་པ་ན། རྟག་ཏུ་བདེ་བ་དང་སྡུག་བསྔལ་དག་མྱོང་བར་འགྱུར་རོ་ཞེས་བྱ་བའི་དོན་ཏོ། །བདེ་བ་དང་སྡུག་བསྔལ་གཉིས་རྟག་ཏུ་འགྱུར་བ་ཁོ་ནའོ་ཞེ་ན། གཡུལ་དེ་འཐབ་མོ་སྤྲོད་པའི་རེས་སེམས་འཕྲོགས་པ་སྟེ། ཡིད་བསྡུས་པ་གང་ཡིན་པ་དེ་རྗེའི་ལ་གང་ཡིན་པ་སྟེ། རིམ་གྲོ་ཡོ་བྱད་ཉེ་བར་སྤྱད་པ་པ་དེའི་གཞན་གྱི་དབང་དུ་གྱུར་པའི་བདག་ཉིད་འབྲས་བུ་དང་བཅས་པར་བྱ་བར་འདོད་པ་ནི་མཚོན་གྱིས་རེག་པར་ཞེས་བྱ་བ་བརྡེགས་པའི་སྡུག་བསྔལ་རིག་པ་མ་ཡིན་ནོ། །གལ་ཏེ་དེ་ལ་མཚོན་
བརྡེགས་པས་སྡུག་བསྔལ་ཉིད་མ་སྐྱེས་པ་དེས་ན་ཇི་ལྟར་རིག་པར་འགྱུར་སྙམ་ན་བཤད་པ་སྡུག་བསྔལ་རྒྱུ་མཚོན་གྱིས་བརྡེགས་པ་ཡོད་པ་ན་གདོན་མི་ཟ་བར་སྡུག་བསྔལ་དེ་སྐྱེ་བ་ཡང་ཡིན་ནོ། །དེས་ན་ཞེས་བྱ་བ་ནི་སྡུག་བསྔལ་སྐྱེས་པས་ནའོ། །གཞན་གྱིས་ནི་བདེ་བས་སོ། །གཞན་ནི་སྡུག་བསྔལ་ལོ། །ཆེན་པོ་ཉིད་ལ་སོགས་པས་ཞེས་བྱ་བ་ནི་བདེ་བ་ཆེ་བས་སོ། །ལ་ལར་ཡང་ཞེས་བྱ་བ་ནི་བདེ་བ་ཉིད་ལའོ། །གོམས་པ་ཉིད་འདུ་བྱེད་པ་ཡིན་ལ་བདེ་བ་ལ་སོགས་པ་ཡང་དེ་ལས་སྐྱེས་པ་ཡིན་མོད། ཉེས་པ་ཅི་ཡོད་སྙམ་ན། བསྒོམས་པའི་སྟོབས་ལས་ཞེས་གསུངས་སོ། །ཤེས་པ་གང་ཞིག་བདེ་བ་ལ་སོགས་ལ་སྐྱེ་བ་དེ་ཉིད་བསྒོམས་པའི་སྟོབས་ལས་འགྱུར་བ་ཡིན་གྱི། བདེ་བ་ལ་སོགས་པ་ནི་མ་ཡིན་ནོ། །བདེ་བ་ལ་སོགས་པ་དེ་དག་ནི་གཟུགས་ལ་སོགས་པའི་མཚན་ཉིད་ནང་གི་བེམས་པོའི་དོན་གྱི་སྟོབས་ཀྱིས་བསྐྱེད་པ་ཡིན་ན། དེའི་ཚེ་གོམས་པ་རྒྱུར་མི་འགྱུར་རོ་ཞེས་བྱ་བ་ནི་གྲུབ་པའི་མཐའི་དོགས་པའོ། །དེ་ལྟ་ཞེས་བྱ་བ་ནི་དངོས་པོའི་སྟོབས་ལས་སྐྱེ་བའི་ཤེས་པ་ལ་གོམས་པ་ལས་སྐྱེས་པ་ཁས་ལེན་ནའོ། །དངོས་པོའི་སྟོབས་ལས་འབྱུང་བའི་ཤེས་པ་གོམས་པ་མེད་པར་ཡང་འབྱུང་བ་སྟོན་པ་ནི། སྔར་མ་བསམས་པའམ་ཞེས་བྱ་བའོ་ཞེས་པ་འབའ་ཞིག་གོམས་པར་རོ། །འོན་ཏེ་དོན་དང་ཞེས་བྱ་བ་ནི་ཤེས་པ་དོན་དང་ལྷན་ཅིག་གོམས་པའི་ཕྱིར་གོམས་པས་སྐྱེས་པའི་ཤེས་པ་ཡང་དོན་མེད་པར་མི་འབྱུང་ངོ་ཞེ་ན། འདི་ལ་བརྗོད་པ་ནི་དེ་ལྟ་ཡིན་ན་ཞེས་བྱ་བའོ། །རྣམ་པར་ཤེས་ལས་ཕྱིར་བར་ནི་རང་བཞིན་ཐ་དད་པར་རོ། །གཞན་དག་ནི་རིགས་པ་པའོ། །འོན་ཏེ་དེ་ཉིད་ཅེས་བྱ་བ་ནི་འགལ་བའི་ཉེ་བར་ལེན་པའི་རྒྱུ་མ་ཡིན་པ་ཉིད་དོ། །གང་གི་ཕྱིར་བདེ་བ་ལ་སོགས་པ་འགལ་བ་རྣམས་ལ་ཡང་ཤེས་པ་རྒྱུན་མཐོང་བ་ཡིན་ནོ། །རྣམ་པར་ཤེས་པ་མ་ཡིན་པའི་ཞེས་བྱ་བ་ནི། རིགས་པ་ཅན་ལ་སོགས་པའི་ལུགས་ལ་བདེ་བ་ལ་སོགས་པ་བེམས་པོའི་རང་བཞིན་གྱིའོ། །བདག་པོ་དེ་ནི་འབྲས་བུ་འགལ་བ་ལ་ཡང་ཡོད་པ་ཉིད་དོ། །དེའི་ཕྱིར་ཞེས་བྱ་བ་ལ་སོགས་པའི་རྣམ་འགྲེལ་ཉེ་བར་འགོད་པ་ཙམ་ཞིག་བྱས་པ་ནི་དོན་འདི་འཕེལ་བས་རྣམ་འགྲེལ་འདི་འཇུག་པ་ཡིན་ནོ་ཞེས་བསྟན་པའི་དོན་དུ་
ཡིན་ནོ། །སྔར་བཤད་པའི་གནོད་བྱེད་ཉིད་རེ་ཞིག་རང་ཉིད་དྲན་པར་བྱེད་པ་ནི་གལ་ཏེ་ཞེས་བྱ་བའོ། །ཁྱེད་ཀྱི་ལྟར་ན་ཡང་ཞེས་བྱ་བ་ནི། སངས་རྒྱས་པའི་ལྟར་ནའོ། །བག་ཆགས་སད་པ་ཉིད་ཅི་འདྲ་བ་ཞིག་མེད་སྙམ་ན། །གཟུགས་ལ་སོགས་པའི་ཞེས་བྱ་བ་སྟེ། དཔེར་ན་གཟུགས་ལ་སོགས་པའི་རྣམ་པར་རྟོག་པ་སད་པའི་རྒྱུན་རེས་འགའ་ཞིག་ཡིན་པ་དེ་བཞིན་ནོ་ཞེས་བྱ་བའི་དོན་ཏོ། །འགའ་ཞིག་གི་ཞེས་བྱ་བ་ནི་བདེ་བའམ་སྡུག་བསྔལ་གྱིའོ། །དེ་ལ་ནི་རིགས་པ་ལའོ། །གལ་ཏེ་བག་ཆགས་རྒྱུ་ཡིན་མོད་དེ་ལྟ་ན་ཡང་དེའི་འབྲས་བུ་རྟོགས་པ་ཉིད་ཇི་ལྟར་ཡིན་ཞེ་ན། བག་ཆགས་སྟོབས་ལས་ཞེས་གསུངས་སོ། །བག་ཆགས་ནི་དྲན་པ་དང་ངོ་ཤེས་པའི་རྒྱུ་ཉིད་ཡིན་པར་རྟོགས་ཏེ། །དེས་ན་བག་ཆགས་ནི་ཤེས་པ་ཉིད་ཀྱི་རྒྱུ་ཡིན་གྱི། ཤེས་པ་མ་ཡིན་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལ་དྲན་པ་ནི་སྔ་མ་ཉིད་དྲན་པ་ཙམ་ཡིན་ལ་ངོ་ཤེས་པ་ནི་སྔོན་མཐོང་བ་དང་ད་ལྟར་མཐོང་བཞིན་པ་གཅིག་ཉིད་དུ་སྒྲོ་འདོགས་པའོ་ཞེས་བྱ་བ་ནི་ཁྱད་པར་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་བྲམ་ཟེའི་ལུགས་སོ། །དེ་ལ་ཡང་ཞེས་བྱ་བ་ནི་དྲན་པ་ལ་སོགས་པ་ལ་ཡང་ངོ༌། །རྣམ་པར་ཤེས་པ་ཡང་སྣང་བ་ཉིད་དེ། དེས་ན་དེ་ཡང་རིག་པའི་རང་བཞིན་ཉིད་ཡིན་ནོ་སྙམ་ན། དེར་ཡང་ཞེས་བྱ་བའོ། །འདི་ལ་གྲུབ་པའི་མཐའ་བས་གསུངས་པ་ནི་གལ་ཏེ་ཞེས་བྱ་བའོ། །དེར་ནི་ཞེས་བྱ་བ་ནི་དྲན་པ་ལ་ཡང་ངོ༌། །དེའི་ཚེ་དོན་དེའི་དྲན་པ་ནི་མངོན་སུམ་བཞིན་དུ་འཛིན་པ་ཉིད་དུ་འགྱུར་རོ། །དྲན་པ་ལ་སོགས་པ་ཡང་མངོན་སུམ་ཉིད་དུ་ཐལ་བར་འགྱུར་རོ་ཞེས་དགོངས་པའོ། །སྣང་བ་དེས་ནི་ཞེས་བྱ་བ་ནི་སྐབས་ཀྱི་དྲན་པའོ། །འདི་ཞེས་བྱ་བ་དྲན་པ་དང་མངོན་སུམ་གཉིས་ཁྱད་པར་མེད་པའི་ཉེས་པའོ། །ལྐོག་ཉིད་དུ་མངོན་སུམ་མ་དམིགས་མོད། དེ་ལྟ་ན་ཡང་དྲན་པ་ལ་ནི་སྣང་བ་ཁོ་ནའོ་སྙམ་ན་མངོན་སུམ་གྱིས་ནི་ཞེས་སྨོས་སོ། །གཞན་དུ་ཞེས་བྱ་བ་ནི་མངོན་སུམ་གྱིས་མཐོང་བའི་དོན་ལ་དྲན་པ་མི་འཇུག་གི །འོན་ཀྱང་མཐོང་བ་ཉིད་འཇུག་པ་ཡིན་ན། དེའི་ཚེ་སྔ་ན་མེད་པའི་རང་བཞིན་འཛིན་པར་འགྱུར་ལ། དེ་ལྟ་ན་ཡང་དེ་དྲན་པར་ཇི་ལྟར་འགྱུར། དྲན་པར་འགྱུར་བ་ཡང་ཡིན་ཏེ་དེས་ན་མངོན་སུམ་གྱིས་གཟུང་བའི་དོན་ཉིད་དྲན་པ་ཡིན་
ནོ་ཞེས་བརྗོད་པར་བྱ་བའོ། །ལྐོག་ཏུ་གྱུར་པ་ནི་མངོན་སུམ་གྱིས་གཟུང་བ་ཡང་མ་ཡིན་ནོ། །དེས་ན་དེ་དྲན་པ་ལ་སྣང་བར་ཇི་ལྟར་འགྱུར་ཞེས་བསམས་པའོ། །དོགས་པ་ནི་འོན་ཏེ་ཞེས་བྱ་བའོ། །གྲུབ་པའི་མཐའ་པ་རྣམ་པར་རྟོག་པར་མཛད་པ་ནི། ལྐོག་ཉིད་ཅེས་བྱ་བའོ། །གལ་ཏེ་ལྐོག་ཉིད་དོན་གྱི་ངོ་བོ་ཡིན་ན་དེའི་ཚེ་མངོན་སུམ་ལ་སྣང་བར་འགྱུར་ཏེ། མངོན་སུམ་ནི་དོན་གྱི་རང་བཞིན་མངོན་སུམ་བྱེད་པ་ཡིན་པའི་ཕྱིར་རོ། །ནུས་པ་ངེས་པའི་ཕྱིར་ཞེས་བྱ་བ་ནི་དངོས་པོ་རྣམས་ནུས་པ་སྣ་ཚོགས་པ་ཅན་ཡིན་པའི་ཕྱིར་རོ། །དངོས་པོའི་རང་བཞིན་ཡང་འགའ་ཞིག་མངོན་སུམ་ལ་སྣང་བ་མ་ཡིན་ཏེ། འོན་ཀྱང་གཞན་དུ་ཡིན་ནོ་ཞེས་བྱ་བའི་དོན་འདི་ལ་དཔེའི་སྒོ་ནས་བརྗོད་པ་ནི་དཔེ་ནི་ཞེས་བྱ་བའོ། །རང་བཞིན་གཞན་གྱིས་ཞེས་བྱ་བ་ནི་བུམ་པ་ལ་སོགས་པའི་རང་གི་ངོ་བོས་སྣམ་བུ་ལ་སོགས་པའི་དངོས་པོ་མེད་པའི་རང་བཞིན་གང་ཡིན་པ་དེ་ནི་དངོས་པོ་མེད་པའི་ཚད་མའི་ཡུལ་ཡིན་ནོ་ཞེ་ན། དེ་ཡང་ཞེས་བྱ་བ་ནི་ལན་ནོ། །དངོས་པོ་ཡིན་ན་ནི་ཞེས་བྱ་བ་ནི་དངོས་པོའི་རང་བཞིན་ཡིན་ནའོ། །དེ་ལས་ནི་དངོས་པོ་ལས་སོ། །དེ་ནི་དངོས་པོ་མེད་པའི་ཐ་དད་ན་དངོས་པོའི་སྟེ། དོན་དངོས་པོ་དང་དངོས་པོ་མེད་པའི་རང་བཞིན་གཉི་གར་ཇི་ལྟར་འགྱུར་ཏེ། དངོས་པོ་མེད་པ་ནི་དེ་ལས་ཐ་དད་པའི་ཕྱིར་རོ། །གལ་ཏེ་དངོས་པོ་དང་དངོས་པོ་མེད་པའི་ཆོས་གཉིས་ཐ་དད་པ་དེ་ལྟ་ན་ཡང་དངོས་པོ་གཅིག་ཡིན་ལ་འགལ་བ་ཅི་ཡོད་སྙམ་ན། དངོས་པོ་ཐ་དད་པའི་ཞེས་གསུངས་སོ། །དངོས་པོ་དག་ནི་ཞེས་བྱ་བ་ནི་དོན་དག་གོ །ཡང་ཇི་ལྟར་ན་དངོས་པོ་དག་ཁོ་ན་ཐ་དད་ཀྱི་དངོས་པོ་མེད་པ་དག་ནི་མ་ཡིན་ཏེ་ཞེ་ན། གོ་རིམས་བཞིན་གཏན་ཚིགས་གཉིས་བརྗོད་པ་ནི། དངོས་པོ་དག་ཅེས་བྱ་བ་སྟེ། བུམ་པ་དང་སྣམ་བུ་དག་གོ །དངོས་པོ་མེད་པ་ལས་ཞེས་བྱ་བ་ནི། གཅིག་ལ་གཅིག་མེད་པ་ལས་སོ། །དངོས་པོ་དང་དངོས་པོ་མེད་པ་དག་ཀྱང་དེ་བཞིན་དུ་ཐ་དད་པར་འགྱུར་རོ་སྙམ་ན། དངོས་པོ་དང་ཞེས་བྱ་བའོ། །དངོས་པོ་མེད་པ་ཡང་གཞན་ནི་གཅིག་ལ་གཅིག་མེད་པ་དག་གོ །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་དངོས་པོ་དང་དངོས་པོ་མེད་པ་དག་ལ་ཡང་དངོས་པོ་མེད་པ་ཡོད་ན། དེའི་ཚེ་ངག་ཐ་དད་པར་བྱ་བ་ལ་ཡང་གཅིག་ལ་གཅིག་མེད་པའི་མཚན་ཉིད་ཀྱི་དངོས་པོ་མེད་པ་གཞན་དག་ལ་དེ་ལ་ཡང་གཞན་
ཡིན་པའི་ཕྱིར་ཐུག་པ་མེད་པར་འགྱུར་རོ་ཞེ་ན་འདི་ལ་བརྗོད་པ་ནི། གལ་ཏེ་དངོས་པོ་མེད་པ་དངོས་པོ་ལས་གཞན་མ་ཡིན་ན། དེའི་ཚེ་དངོས་པོ་དང་དངོས་པོ་མེད་པ་དག་གཞན་ཏེ་ཐ་དད་པར་འཛིན་པ་ཇི་ལྟར་ཡིན། མངོན་སུམ་དང་དངོས་པོ་མེད་པའི་མཚན་ཉིད་དེ་འཛིན་པར་བྱེད་པའི་ཚད་མ་གཉིས་ཐ་དད་པའི་ཕྱིར་དངོས་པོ་དང་དངོས་པོ་མེད་པ་དག་ཐ་དད་པ་ཡིན་ནོ་ཞེ་ན། ཐ་དད་མེད་པར་ཞེས་སྨོས་ཏེ། ཐ་མི་དད་པ་འཛིན་པ་ནི་མེད་དེ། ཐམས་ཅད་དུ་ཐ་དད་པ་ཁོ་ནར་འགྱུར་རོ་ཞེས་བྱ་བའོ། །ཕྱེད་ཕྱི་མ་འཆད་པ་ནི་གལ་ཏེ་ཞེས་བྱ་བའོ། །གཞན་གྱིས་ཞེས་བྱ་བ་ནི་རྣ་བའི་ཤེས་པ་ལ་སོགས་པའོ། །དེས་ན་ཇི་ལྟར་དེར་བྱེད་པ་པོ་རྣམས་ཐ་དད་པར་གཟུང་ཡང་ཐ་མི་དད་པར་གཟུང་བར་རྟོགས་པ་དེ་བཞིན་དུ་འདིར་ཡང་ཚད་མ་གཉིས་ཀྱི་དངོས་པོ་དང་དངོས་པོ་མེད་པ་དག་ཐ་དད་པར་རྟོགས་ཀྱང་ཐ་མི་དད་པར་ཡང་རྟོགས་པར་ནུས་པ་ཡིན་ནོ་ཞེས་རྩོད་པ་བརྗོད་པ་ནི་འདི་ནི་ཞེས་བྱ་བའོ། །འདིར་ཡང་ཞེས་བྱ་བ་ནི་དངོས་པོ་དང་དངོས་པོ་མེད་པ་དག་ལའོ། །དངོས་པོ་མེད་པ་ལས་ཐ་དད་པར་རྟོགས་པ་དེ་གང་ཡིན་པ་དེ་ཡང་ཐོགས་པ་མེད་པའི་བག་ཆགས་ཉིད་ལས་འགྱུར་ཏེ། དེས་ན་དངོས་པོ་ལས་དོན་གཞན་དངོས་པོ་མེད་པ་བརྟགས་པས་ཅི་ཞིག་བྱ་དངོས་པོ་མེད་པའི་བློའི་རྒྱུ་མཚན་དུ་དངོས་པོ་མེད་པ་རྟོགས་པ་ཡིན་ན་བློ་དེ་ནི་གཞན་དུ་ཡང་མ་འཐད་པས་ད་ནི་དངོས་པོ་མེད་པས་ཅི་ཞིག་བྱ། གལ་ཏེ་དངོས་པོ་མེད་པ་ཞེས་བྱ་བའི་ཚད་མ་ཡོད་པའི་ཕྱིར་གདོན་མི་ཟ་བར་དེའི་གཞལ་བྱ་ཡོད་ དགོས་སོ་ཞེས་བརྗོད་པ ་ནི། དངོས་པོ་མེད་པ་ཞེས་བྱ་བའོ། །གལ་ཏེ་དངོས་པོ་མེད་པའི་ཚད་མ་དང༌། གཞལ་ཡང་མི་སྲིད་པ་ཡིན། འོ་ན་དངོས་པོ་རྣམས་ཕན་ཚུན་ལྡོག་པ་ཉིད་དུ་འགྱུར། གང་ལ་གང་གིས་དངོས་པོ་མེད་པ་དང་མི་མཐུན་པ་མི་འགྱུར་ཏེ། བུམ་པ་ལ་བུམ་པའི་རང་བཞིན་ནོ་ཞེ་ན། འདི་ལ་བརྗོད་པ་ནི་དེ་དང་མི་འདྲ་ཉིད་ཀྱིས་ཞེས་བྱ་བའོ། །གལ་ཏེ་མི་འདྲ་བ་ཉིད་ཡོད་པ་ལ་ཚད་མ་ཅི་ཡོད་སྙམ་ན། མི་འདྲ་བ་ཡང་ཞེས་བྱ་བའོ། །དེའི་དུས་ཕྱིས་འབྱུང་བ་དེའི་སྟོབས་ལས་བྱུང་བའི་ཕྱིར་རོ་ཞེས་གཏན་ཚིགས་ཀྱི་དངོས་པོས་ཁྱད་པར་བྱས་པའོ། །གལ་ཏེ་དངོས་པོ་མེད་པའི་ཚད་མ་དེས་དངོས་པོ་མེད་པར་རྟོགས་སོ་སྙམ་པ་མཐོང་བ་མ་ཡིན་ནམ།
དེས་ན་དངོས་པོ་མེད་པའི་ཚད་མ་མེད་པར་ཇི་ལྟར་འགྱུར་སྙམ་ན། དངོས་པོ་མེད་པའི་ཚད་མས་བདག་གི་བྱ་བའོ། །སོ་སོ་རང་གི་ཞེས་བྱ་བ་ནི་དཔྱོད་པ་པ་ཉིད་ཀྱིས་སོ་སོར་ངེས་པའིའོ། །མཚུངས་པས་ན་དོན་གཅིག་པར་རོ། །འདི་ཉིད་དངོས་པོ་མེད་པའི་ཚད་མར་འགྱུར་རོ་སྙམ་ན། མི་དམིགས་པ་དེ་ཡང་ཞེས་གསུངས་སོ། །ཇི་ལྟར་མངོན་སུམ་གྱིས་མ་བཟུང་བ་དངོས་པོ་མེད་པའི་ཆ་འཛིན་པ་དངོས་པོ་མེད་པ་ཚད་མ་གཞན་ཡིན་པ་དེ་བཞིན་དུ་མངོན་སུམ་གྱིས་མ་བཟུང་བའི་ལྐོག་ཉིད་འཛིན་པའི་ཕྱིར་དྲན་པ་ཡང་ཚད་མ་གཞན་དུ་འགྱུར་རོ། །འོན་ཏེ་མིའི་ལྐོག་ཏུ་གྱུར་པ་ཉིད་རྟོགས་པར་གྱུར་པ་དེའི་ཚེ་དེའི་རྗེས་སུ་དཔག་པས་རྟོགས་པ་ཡིན་ཏེ། མངོན་སུམ་ལ་རྗེས་སུ་དཔག་པ་མི་འཇུག་པའི་ཕྱིར་རོ། །དེས་ལྐོག་ཉིད་རིག་པ་ལ་ དགོས་པ ་ཡོད་པ་ཉིད་དོ་ཞེ་ན་རྗེས་དཔག་ཅེས་བྱ་བའོ། །ལྐོག་ཏུ་གྱུར་པ་ཉིད་གཟུང་བ་ལས་ནི་རྗེས་སུ་དཔག་པ་འཇུག་པ་མ་ཡིན་ནོ་ཞེས་བྱ་བའི་དོན་ཏོ། །ཕྱེད་ཕྱི་མ་བཤད་པའི་ཕྱིར་རྩོད་པ་བྱེད་པ་ནི་འདི་སྙམ་ན་ཞེས་བྱ་བའོ། །དེས་ན་འདི་ཞེས་བྱ་བ་ནི་རྗེས་སུ་དཔག་པ་འཇུག་པའི་མཚན་ཉིད་འདིའོ། །སྐྱེ་བཞིན་པའི་རྗེས་སུ་དཔག་པས་མེ་འཛིན་པ་སྟེ། ངེས་པར་བྱ་བ་ལ་དེའི་ཞེས་བྱ་བ་ནི་རྗེས་སུ་དཔག་པའི་སྔར་དེ་སྔོན་རོལ་དུ་ལྐོག་ཏུ་གྱུར་པ་ཉིད་དུ་ངེས་པར་འཛིན་པ་ནི་སུ་ཡང་མེད་དོ། །ཡང་ཇི་ལྟར་ན་ཐམས་ཅད་ཀྱི་ཚེ་ དགོས་པ ་ལྟོས་པར་བྱ་བ་ཉིད་དུ་འགྱུར་ཞེ་ན། སྦྱོར་བར་བྱེད་པའི་ཞེས་གསུངས་སོ། །དེས་ན་གལ་ཏེ་རྗེས་སུ་དཔག་པ་སྐྱེ་བ་ན། རེས་འགའ་ལྐོག་ཏུ་གྱུར་པ་ངེས་པ་ཉིད་ལ་ལྟོས་པ་དེའི་ནི། དེ་སྦྱོར་བར་བྱེད་པ་ཉིད་མ་ཡིན་པར་འགྱུར་རོ་ཞེས་དགོངས་པའོ། །རྒྱུའི་མཚན་ཉིད་ནི་དེ་ཙམ་རྗེས་སུ་འགྲོ་བ་དང་དེ་ལྡོག་པ་ཉིད་ཙམ་དུ་ཟད་པའི་ཕྱིར་རོ། །དྲན་པ་ནི་རྗེས་སུ་དཔག་པས་བྱ་བ་ཉིད་དུ་ངེས་པ་ཡིན་ནོ་ཞེ་ན། རྗེས་སུ་དཔག་པས་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི། གལ་ཏེ་རྗེས་སུ་དཔག་པར་བྱ་བ་ཉིད་དྲན་པའི་སྤྱོད་ཡུལ་དུ་འགྱུར་ནའོ། །དྲན་པས་ནི་ཞེས་བྱ་བ་ནི་དོགས་པ་བསུ་བའོ། །འོ་ན་ཞེས་བྱ་བ་ནི་གྲུབ་པའི་མཐའོ། །གལ་ཏེ་དྲན་པས་དེའི་ཚེ་ཡོད་པ་ཡང་དུ་མ་རྟོགས་ན་དེའི་ཚེ་དེ་ལྐོག་ཏུ་གྱུར་པ་ཉིད་དུ་རྟོགས་པར་བྱ་བ་དེ་གང་ཞིག་ཡིན་ཞེས་བྱ་བའི་དོན་ཏོ། །སྔོན་མཐོང་བ་པོ་ཞེས་བྱ་
བ་ནི་དཔེ་ལ་མཐོང་བའི་མེ་ཉིད་ལྐོག་ཏུ་གྱུར་པ་ཡིན་པར་དྲན་པས་རྟོགས་པ་ཡིན་ནོ་ཞེ་ན། འདི་བརྗོད་པ་ནི་འོ་ན་ཞེས་བྱ་བའོ། །དེའི་དུས་ཀྱི་མཐར་ཐུག་པ་ཞེས་བྱ་བ་ནི་སྔོན་གྱི་དུས་ཀྱི་མཐར་ཐུག་པ་ཉིད་དོ། །གཞན་ནི་མ་ཡིན་པས་ན་ཞེས་བྱ་བ་ནི་རྗེས་སུ་དཔག་པའི་དུས་ན་ཡོད་པའི་ལྐོག་ཏུ་གྱུར་པ་ཉིད་ནི་དྲན་པས་རྟོགས་པ་ཉིད་ནི་མ་ཡིན་ནོ། །དེ་ལྟར་ན་ཡང་དྲན་པས་བྱ་བ་ཅི་ཡོད་དེ། རྗེས་སུ་དཔག་པར་བྱ་བའི་ལྐོག་ཏུ་གྱུར་པ་ཉིད་ནི་མ་རྟོགས་པའི་ཕྱིར་རོ་ཞེས་དགོངས་པའོ། །དྲན་པས་ཞེས་བྱ་བ་ནི་དོགས་པ་བསུ་བའོ། །འདི་ལ་བརྗོད་པ་དྲན་པས་འཇུག་གོ་ཞེས་བྱ་བའོ། །དཔྱོད་པའི་རྣམ་པ་ཉིད་བརྗོད་པ་ནི་ཅི་ཞེས་བྱ་བའོ། །གལ་ཏེ་ཐོབ་མི་ནུས་མོང་དེ་ལྟ་ན་ཡང་འཇུག་གོ་སྙམ་ན་རྟོགས་ལྡན་ཞེས་བྱ་བའོ། །གཞན་དུ་ཞེས་བྱ་བ་ནི་ཐོབ་བྱའི་དོན་མེད་ནའོ། །རྣམ་པར་རྟོག་པ་གཉིས་པ་ལ་བརྗོད་པ་ནི། ད་ལྟ་བའི་དུས་ལ་ནི་ཞེས་བྱ་བའོ། །རྒྱུ་དེས་ན་དྲན་པ་ཇི་ལྟར་ཚད་མ་ཡིན། བཤད་པའི་དོན་ཉིད་གསལ་བར་བྱེད་པ་ནི་སྔར་གྱི་ཞེས་བྱ་བའོ། །དེ་ནི་ཞེས་བྱ་བ་ནི་སྔར་གྱི་དུས་ཀྱི་དོན་ཏོ། །ལྐོག་ཏུ་གྱུར་པ་ཉིད་མངོན་སུམ་གྱིས་འཛིན་པ་ཉིད་སྟོན་པ་ནི་མངོན་སུམ་གྱིས་ནི་ཞེས་བྱ་བའོ། །དུས་ཀྱི་ཞེས་བྱ་བ་ད་ལྟར་བྱུང་བའི་དུས་ཀྱིའོ། །དེའི་རྣམ་པ་ཉིད་ནི་ཞེས་བྱ་བ་ནི་ལྐོག་ཏུ་གྱུར་པའི་དངོས་པོའི་རྣམ་པ་ཉིད་ནིའོ། །འདི་ནི་འདི་ཡིན་ཏེ་ལྐོག་ཏུ་གྱུར་པ་ཞེས་བྱ་བ་རྣམ་པ་ཐམས་ཅད་དུ་གཟུང་བར་མི་ནུས་སོ་ཞེས་དེ་སྐད་དུ་ནི་མི་བརྗོད་ཀྱི། འོན་ཀྱང་དྲན་པས་ལྐོག་ཏུ་གྱུར་པ་ཉིད་རྟོགས་སོ་ཞེས་གང་བརྗོད་པ་དེ་ནི་མ་འབྲེལ་ཏེ། དྲན་པས་ནི་རང་གི་རྣམ་པ་ཙམ་ཞིག་རྟོགས་པའི་ཕྱིར་རོ་ཞེས་བྱ་བ་ཡིན་ནོ། །དེ་ལྟ་བུར་གྱུར་པའི་ཞེས་བྱ་བ་ནི། མི་གསལ་བའི་རྣམ་པ་ཅན་ནོ། །ལན་ནི་དོན་མོས་པ་མེད་ཅེས་བྱ་བ་སྟེ། གལ་ཏེ་དོན་ཡིན་ན་དོན་དུ་མོས་པ་ཡང་ཡོད་པར་འགྱུར་ན་ཡོད་པ་ཡང་མ་ཡིན་ཏེ། དེས་ན་དོན་མ་ཡིན་ནོ་ཞེས་བྱ་བའི་དོན་ཏོ། །དྲན་པའི་རྣམ་པ་ནི་མི་གསལ་བའི་རྣམ་པ་ཡིན་ལ་དེ་ལ་ནི་མོས་པ་དེ་ཡོད་པ་མ་ཡིན་ནོ། །གལ་ཏེ་བདག་གི་མཐོང་བ་གང་ཡིན་པ་དེ་ཉིད་དྲན་པས་ཡུལ་དུ་བྱས་སོ་ཞེས་འཇིག་རྟེན་པ་རྣམས་ལས་ལྷག་པར་ཞེན་པ་ཡོད་པ་ཉིད་མ་ཡིན་ནམ། དེས་ན་ཇི་ལྟར་དོན་དུ་མོས་པ་མེད་སྙམ་ན་འདི་ལྟར་ཞེས་གསུངས་སོ། །རྣམ་པར་དཔྱོད་པ་ཅན་དག་ནི་འདི་ལྟར་རྟོགས་ཀྱི་དོན་ཉིད་དུ་ལྷག་པར་མོས་
བ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ཡན་ཆད་ནི་དྲན་པ་རང་གི་རྣམ་པ་ཙམ་མངོན་དུ་བྱེད་པ་ཉིད་དུ་རིམ་པ་བཞིན་བསྒྲུབས་ནས་དེ་ནི་དཔེའི་སྟོབས་ཉིད་ཀྱིས་བདེ་བ་ལ་སོགས་པ་ཡང་རང་རིག་པའི་རང་བཞིན་དུ་བསྒྲུབ་པས་རྣམ་འགྲེལ་གྱི་བཤད་པ་རྩོམ་པ་ནི། དེའི་ཕྱིར་ཞེས་བྱ་བའོ། །མྱོང་བའི་འདུ་བྱེད་ལས་ཞེས་བྱ་བ་ནི་སྔར་ཞུགས་པའི་མངོན་སུམ་བྱས་པའི་འདུ་བྱེད་ལས་སོ། །དེ་དག་ཀྱང་ཞེས་བྱ་བ་ནི་བདེ་བ་སོགས་པའོ། །གོམས་པའི་འདུ་བྱེད་ལས་བྱུང་བ་སྟེ་ཉེ་བར་གནས་པའི་ནང་གི་རེག་བྱ་ལ་སོགས་པའི་ཁྱད་པར་གང་ཡིན་པ་དེའི་བདག་ཉིད་དུ་གྱུར་པའོ། །འོ་ན་ཞེས་བྱ་བ་ལ་སོགས་པའི་འདྲེ་བ་ལ་བརྗོད་པ་ནི། དེའི་སྒོ་ནས་ཞེས་བྱ་བའོ། །རེག་པ་དང་ལྷན་ཅིག་འབྲེལ་པ་ལས་བྱུང་བའི་བདེ་བའི་རྣམ་པ་མྱོང་བ་གང་ཡིན་པ་དེ་ལས་སེམས་ཀྱི་རྒྱུད་ལས་སྐྱེས་པར་གྱུར་པའི་འདུ་བྱེད་དེ་ནི་དེ་དང་འདྲ་བའི་རང་བཞིན་དེ་མཐོང་བའི་ལས་སད་པར་འགྱུར་རོ། །འཆད་པ་ནི་མ་ཁྱུད་པའི་ཞེས་བྱ་བའོ།། འདི་ཉིད་ཅེས་བྱ་བ་ནི་རང་རིག་པའི་རང་བཞིན་ཉིད་དོ། །དེ་ལྟ་མ་ཡིན་ཏེ་ཞེས་བྱ་བ་ནི་གལ་ཏེ་རང་གི་རྣམ་པ་མྱོང་བ་ཙམ་གྱིས་དོན་རིག་གོ་ཞེས་བྱ་བར་མི་འགྱུར་གྱི། འོན་ཀྱང་དོན་དམ་ཉིད་དུ་དོན་རིག་པ་མ་ཡིན་ན། དེའི་ཚེ་ཤེས་པ་དེས་གཞན་རིག་གོ་ཞེས་དོན་དང་ཤེས་པ་དག་འབྲེལ་པར་མི་འགྱུར་རོ། །རང་གི་རྒྱུ་ལས་ནི་ཞེས་བྱ་བ་ནི་རང་གི་ངོ་བོ་རིག་པ་ནི་རྒྱུ་ལས་སྐྱེས་པའི་ཕྱིར་རོ་ཞེས་བྱ་བའི་དོན་ཏོ། །དེ་ནི་ཐ་དད་ཕྱིར་ཞེས་བྱ་བ་ནི། གཞན་དེ་རང་གི་ངོ་བོ་ལས་ཐ་མི་དད་པའི་ཕྱིར་རོ། །ཕྱི་རོལ་ཐ་དད་པའི་རང་བཞིན་ནི་གཞན་ཤེས་པའི་ངོ་བོ་ཡིན་པར་མི་འཐད་དོ། །དེ་ལས་ཏེ་ཤེས་པ་ལས་གཞན་གསལ་བར་ཇི་ལྟར་འགྱུར། །གལ་ཏེ་བུམ་པ་སྣང་བ་ལས་ཐ་དད་པ་ཉིད་ངེས་གསལ་བ་མ་ཡིན་ནམ་སྙམ་ན། སྒྲོན་མ་ལས་ནི་ཞེས་བྱ་བ་ནི། གལ་ཏེ་དེ་བཞིན་དུ་རྣམ་པར་ཤེས་པ་ལས་ཀྱང་གསལ་བའི་རང་བཞིན་གྱིས་དོན་སྐྱེ་བ་མ་ཡིན་ནམ། དེས་རྣམ་པར་ཤེས་པས་གསལ་བ་ཡིན་ནོ་ཞེ་ན། གསལ་བའི་ཞེས་གསུངས་སོ། །ཤེས་པ་ལ་གསལ་བའི་རང་བཞིན་གྱིས་དོན་ཇི་ལྟར་མི་སྐྱེ་སྙམ་ན། འབྲས་ཉིད་ཅེས་གསུངས་སོ། །དོན་ཤེས་པའི་འབྲས་བུ་ཉིད་དུ་ཁས་ལེན་ན་རྒྱུར་གྱུར་པའི་ཤེས་པ་དེས་དོན་ཇི་ལྟར་རྟོགས་པར་འགྱུར་ཏེ། མི་འགྱུར་བ་ཁོ་ནའོ་དེ་ལྟ་མ་ཡིན་ན་ཞེས་བྱ་བའོ། །གལ་ཏེ་སྐྱེས་
པ་ལས་སྐྱེས་པ་གང་ཡིན་པ་དེ་ཤེས་པས་རིག་པ་ཡིན་ནའོ། །དེས་ནི་རྟོགས་པས་སོ། །རང་བཞིན་ཞེས་བྱ་བ་ནི་ཤེས་པའི་རང་བཞིན་ནོ། །དེ་ནི་ཞེས་བྱ་བ་ནི་དོན་ཉིད་ཀྱི་ཐ་དད་ནས་ཀྱང་སྔོན་དུ་ཕྱོགས་པར་སྐྱེས་པ་ཡིན་ནོ་ཞེ་ན། འདི་ལ་བརྗོད་པ་ནི་མིག་ལས་སོ། །ཀྱང་ཞེས་བྱ་བ་སྟེ་ཤེས་པ་དེ་ནི་མིག་གི་ཐ་དད་ནས་ཀྱང་མངོན་དུ་ཕྱོགས་པར་སྐྱེས་པ་ཡིན་ཏེ། དེས་ན་ཤེས་པ་དེ་ནི་ཇི་ལྟར་མིག་དེ་རིག་པ་མ་ཡིན་ན། མིག་གི་ཐ་དད་ནས་ཀྱང་ཤེས་པ་དོན་ཉིད་ལ་ཕྱོགས་པར་སྐྱེས་པ་ཡིན་གྱི། མིག་ལ་ཕྱོགས་པར་ནི་མ་ཡིན་ནོ། །དེས་ན་དོན་ཉིད་རིག་པ་ཡིན་ནོ་ཞེ་ན་འདི་ལ་བརྗོད་པ་ནི་ཤེས་པ་ནི་དོན་ལ་ཞེས་བྱ་བའོ། །ཤེས་པ་འདི་ལ་དོན་ལ་མངོན་དུ་ཕྱོགས་པ་ཉིད་ཡོད་དོ་ཞེས་ཇི་ལྟར་རྟོགས། འོ་ན་དོན་ལ་ཕྱོགས་པ་ཉིད་ཇི་ལྟར་རྟོགས་པར་འགྱུར་སྙམ་ན། གལ་ཏེ་ཞེས་བྱ་བ་གསུངས་སོ། །མངོན་དུ་ཕྱོགས་པ་ཉིད་མེད་པར་རོ། །དེ་དང་ནི་མངོན་དུ་ཕྱོགས་པ་དང་ངོ༌།། དེ་ལས་གཞན་ཞེས་བྱ་བ་ནི་ལྷན་ཅིག་སྣང་བ་ལས་སོ། །ལྷན་ཅིག་སྣང་བ་ཙམ་ཁོ་ན་ཡོད་པ་ཡིན་ནོ་ཞེས་དགོངས་པའོ། །རྒྱུ་དེས་ན་ལྷན་ཅིག་སྣང་བའི་དོན་དེའོ། །ངེས་པར་ཅིག་ཅར་ཏེ་དུས་གཅིག་ཏུ་སྔོན་པོ་ལ་སོགས་པ་དང་བདེ་བ་གཉིས་འཛིན་པ་གང་ཡིན་པ་དེ་མི་རིགས་སོ། །བདེ་བ་ལ་སོགས་པ་ཞེས་བྱ་བ་ནི། བདེ་བ་ལ་སོགས་པའི་རང་བཞིན་སྒྲ་ལ་སོགས་པའོ། །ཆེན་པོ་ཞེས་བྱ་བ་ནི་བློའི་དེ་ཙམ་ཞེས་བྱ་བ་ནི་ཡུལ་ལོ། །བློའི་དབང་པོ་ལྔ་ཞེས་བྱ་བ་ནི་ཉན་པ་དང་པགས་པ་དང་མིག་དང་ལྕེ་དང་སྣ་ཞེས་བྱ་བའོ། །ལས་ཀྱི་དབང་པོ་ལྔ་ནི་རྐུབ་དང་མདོམས་དང་ལག་པ་དང་རྐང་པ་དང་དག་ཅེས་བྱ་བའོ། །གལ་ཏེ་དེ་ལྟ་ན་ཡང་འདི་ཐམས་ཅད་བདེ་བ་དང་སྡུག་བསྔལ་དང་གཏི་མུག་གི་རང་བཞིན་ཅན་གཙོ་བོ་ཡོངས་སུ་གྱུར་པ་ཡིན་ནོ་ཞེས་བྱ་བ་འདི་ཙམ་ཞིག་གྲུབ་མོད། སྒྲ་ལ་སོགས་པ་བདེ་བ་ལ་སོགས་པའི་རང་བཞིན་ཅན་དུ་གོ་ཇི་ལྟར་ཞེ་ན། རྣམ་པར་འགྱུར་བ་ཡང་ཞེས་བྱ་བའོ། །བདེ་བ་ལ་སོགས་པ་ནི་བདེ་བ་ལ་སོགས་པའི་རང་བཞིན་ཅན་གྱི་གཙོ་བོ་གང་ཡིན་པ་དེའི་རང་བཞིན་ཁོ་ན་ཡིན་ནོ་ཞེས་བྱ་བ་འདི་ག་ལས་ཡིན། གཙོ་བོ་དེའི་རང་བཞིན་གྱིས་རྗེས་སུ་འགྲོ་བ་མཐོང་བའི་ཕྱིར་རོ། །འདི་ཞེས་བྱ་བ་ནི། གྲུབ་པའི་མཐའ་པས་སྨྲ་བའིའོ། །གང་ཞིག་གང་
ལས་སྐྱེས་པ་དེ་ནི་དེའི་རང་བཞིན་གྱིས་རྗེས་སུ་བྱེད་པ་ཡིན་ནོ་ཞེས་བྱ་བ་འདི་ནི་མ་ངེས་པ་ཡིན། གལ་ཏེ་ཕྲ་མོ་བསག་པ་མི་དམིགས་པ་རླུང་ཉིད་དམ། སྒྲའི་རྡུལ་ཡོད་པ་ཡིན་ལ་དེ་དག་གི་ཡོངས་སུ་གྱུར་པ་ནི་སྒྲའི་རང་བཞིན་དུ་གྱུར་པ་མ་ཡིན་ནམ། དེས་ན་མ་ངེས་པར་ཇི་ལྟར་འགྱུར་སྙམ་ན། གལ་ཏེ་ཡང་ཞེས་གསུངས་སོ། །དེ་གྲུབ་པ་མ་ཡིན་ཏེ་འདི་ཚད་མ་མཐོང་བ་མ་ཡིན་ནོ། །འདི་ཡང་ཞེས་བྱ་བ་ནི་རྡོ་བ་དང༌། དབྱིག་པའི་སྦྱོར་བ་ལས་སྐྱེས་པའི་སྒྲ་ལའོ། །དེའི་རང་བཞིན་གྱི་ཞེས་བྱ་བ་ནི། འཇིམ་པ་ལ་སོགས་པའི་རང་བཞིན་ཅན་ནོ། །གང་གི་ཕྱིར་དེ་ལྟ་ན་ཡང་དཔེ་འགའ་ཞིག་ཉེ་བར་བསྟན་ནས་སྒྲུབ་པ་ནུས་པའི་གཏན་ཚིགས་དེས་ནའོ། །ཕྱོགས་གཞན་ཡང་བརྗོད་པ་ནི་བཟློག་པ་འགྲུབ་བོ་ཞེས་བྱ་བ་སྟེ། རིགས་མཐུན་པ་ཁོ་ན་ལས་སྐྱེས་པ་ཡིན་ནོ་ཞེས་བྱ་བ་འདི་ལས་བཟློག་པ་འགྲུབ་པོ། །འདི་ག་ལས་ཤེ་ན། ལྷན་ཅིག་པ་མ་ཡིན་པ་ཞེས་གསུངས་སོ། །འོན་ཀྱང་རིགས་མཐུན་པ་ཡང་རིགས་མི་མཐུན་པ་དང༌། ལྷན་ཅིག་པ་ཉིད་རྒྱུར་མཐོང་ངོ༌། །དེས་ན་གང་འབྲས་བུ་ཡིན་པ་དེ་ནི་རིགས་མཐུན་པ་དང་རིགས་མི་མཐུན་པས་སྐྱེས་པ་ཡིན་ཏེ། དཔེར་ན་བུམ་པ་ལ་སོགས་པ་བཞིན་ནོ། །སྒྲ་ལ་སོགས་པ་ཡང་འབྲས་བུ་ཡིན་ནོ། །དེས་ན་རིགས་མཐུན་པ་ཉིད་དུ་མི་འགྲུབ་པོ་ཞེས་བསམས་པའོ། །འོན་ཏེ་ཞེས་བྱ་བ་ནི་དགོངས་པའོ། །འདི་ལ་བརྗོད་པ་ནི་འདི་ལ་བཤད་ཟིན་ཏེ་ཞེས་བྱ་བའོ། །བཤད་ཟིན་པ་ཉིད་དྲན་པར་བྱེད་པ་ནི་ལྷན་ཅིག་པ་ཞེས་བྱ་བའོ། །གཟུང་བ་ཉིད་ལ་སོགས་པའི་སྒྲས་དངོས་པོ་ཉིད་ལ་སོགས་པ་རྗེས་སུ་འགྲོ་བའི་ཕྱིར་རོ། །འོན་ཏེ་ཡང་ཞེས་བྱ་བ་ནི་དངོས་པོ་ཉིད་ལ་སོགས་པ་ཡང་ངོ༌། །དེ་ཡང་བདེ་བ་ལ་སོགས་པའི་བདག་ཉིད་ཅན་ཇི་ལར་ཡིན་ཞེ་ན། དངོས་པོ་ཉིད་ལ་སོགས་པ་ཞེས་གསུངས་སོ། །བདེ་བ་ལ་སོགས་པ་བུམ་པའི་བདག་ཉིད་ཅན་ཡིན་པའི་ཕྱིར་རོ་ཞེས་བྱ་བ་ནི་ད་ལྟ་བུམ་པ་ལ་སོགས་པའི་བདག་ཉིད་ཅན་དུ་མཐོང་སྟེ། བུམ་པ་ལ་སོགས་པའི་བདག་ཉིད་དེ་རྗེས་སུ་མཐོང་བའི་ཕྱིར། གཙོ་བོ་ཡང་བུམ་པ་ལ་སོགས་པའི་བདག་ཉིད་ཁོ་ནར་འགྱུར་རོ། །འོན་ཏེ་ཞེས་བྱ་བ་ནི་གཞན་གྱིའོ། །དེའི་གཙོ་བོའི་འདི་ལ་བརྗོད་པ་ནི་གལ་ཏེ་ཞེས་བྱ་བའོ། །རྣམ་པར་འགྱུར་བའི་ཚོགས་ནི་བུམ་པ་ལ་སོགས་པའི་རང་བཞིན་ནོ། །མངོན་པར་གསལ་བ་དང་མི་གསལ་བ་ཙམ་
རྣམ་པར་འགྱུར་བའི་དངོས་པོ་ཡིན་ནོ། །དེ་ཉིད་གསལ་བར་བྱེད་པ་ནི་མངོན་པར་གསལ་བ་ནི་ཞེས་བྱ་བའོ། །གསལ་བ་འདི་ཅི་ཞིག་ཅེས་དྲིས་པ་ལ་ནི་མངོན་པར་མི་གསལ་བ་ཡང་འཕངས་པ་ཡིན་ཏེ། དེ་ནི་གསལ་བ་མེད་པའི་རང་བཞིན་ཅན་ཡིན་པའི་ཕྱིར་ཞེས་བསམས་ནས་གཉི་ག་ལ་ཡང་གཞན་ལན་འདེབས་པ་ནི། མཐོང་བའི་བདག་ཉིད་ནི་གསལ་བ་ཞེས་བརྗོད་ལ། མཐོང་བའི་བདག་ཉིད་མེད་པ་ནི་དེ་མེད་པའོ། །དོན་དེ་ཉིད་བརྗོད་པ་ནི་མི་དམིགས་པ་ནི་ཞེས་བྱ་བའོ། །ཚད་མས་གྲུབ་པའི་བུམ་པ་ལ་སོགས་པའི་རང་གི་ངོ་བོ་ནི་གཙོ་བོ་ལ་མ་དམིགས་སོ་ཞེས་བྱ་བར་ནུས་ཀྱི་རང་གི་ངོ་བོ་ཚད་མས་མ་གྲུབ་ན་མེད་པ་ཁོ་ནར་འགྱུར་རོ། །མེད་པར་ཁོ་ནར་འགྱུར་མོད་ཅི་ཆད་སྙམ་ན། དེས་ན་ཞེས་གསུངས་སོ། །དེ་ལྟར་ཞེས་བྱ་བ་ནི་ཇི་ལྟར་ད་ལྟར་ཡོད་པ་དེ་ཁོ་ན་ལྟར་གལ་ཏེ་གཙོ་བོའི་གནས་སྐབས་སུ་ཡང་ཡོད་ན་དེའི་ཚེ་གཙོ་བོ་རྒྱུར་བརྟགས་པས་ཅི་ཞིག་བྱ། དེ་དག་གི་ཞེས་བྱ་བ་བུམ་པ་ལ་སོགས་པ་རྣམས་ཀྱིའོ། །ཐ་དད་པར་ཞེས་བྱ་བ་ནི་སྒྲའི་རང་བཞིན་ལས་སོ། །གལ་ཏེ་བུམ་པ་ལ་སོགས་པ་དང་བདེ་བ་ལ་སོགས་པ་དག་རྣམ་པ་ཐ་དད་པར་འཛིན་མོད། དེ་ལྟ་ན་ཡང་གཅིག་ཉིད་དུ་མི་འགྱུར་སྙམ་ན། ཐ་དད་པར་སྣང་བ་ཅན་གྱི་ཞེས་བྱ་བའོ། །དཔེ་ཉིད་རྣམ་པར་འགྲེལ་པ་ནི་སྔོན་པོ་ལ་སོགས་པར་ཞེས་བྱ་པའོ། །འོན་ཏེ་དེ་ལ་ཡང་བསྒོམས་པས་ཁྱད་པར་དུ་འགྱུར་བ་ཡོད་དོ་ཞེས་ན་དེ་ལྟ་ཡིན་ནོ་ཞེས་བྱ་བ་སྟེ། སྔོན་པོ་ལ་སོགས་པའི་རྣམ་པ་ཡང་བསྒོམས་པས་ཁྱད་པར་སྲིད་པ་ཡིན་ན་ནིའོ། །གོམས་པའི་རྗེས་སུ་འགྲོ་བ་ཅན་གོམས་པའི་འབྲས་བུའི་དེ་ཁོ་ན་མ་ཡིན་པ་ནི་དངོས་པོ་སྟེ། འདོད་ལྡན་མའི་རྣམ་པ་བཞིན་ནོ། །དེ་ནི་ཞེས་བྱ་བ་ནི་ཕྱི་རོལ་མ་ཡིན་པར་ངེས་པའི་སྣང་བའི་རང་བཞིན་ནོ། །མ་ཡིན་ཏེ་ཞེས་བྱ་བ་ནི་ལན་ནོ། །འཁྲུལ་བའི་རྒྱུ་ནི་རབ་རིབ་ལ་སོགས་པ་ཡོད་དུ་ཆད་པ་ཁོ་ན་ཡིན་ཏེ། དེ་དག་མ་མཐོང་བའི་ཕྱིར་དང་ཕྱི་རོལ་མ་ཡིན་པར་སྣང་བ་ལ་ཡོད་པར་བྱེད་པ་མེད་པའི་ཡང་ཕྱིར་རོ། །དེ་བཞིན་དུ་བློ་ཡང་ཞེས་བྱ་བ་གཙོ་བོ་ཡོངས་སུ་གྱུར་པའི་རང་བཞིན་ཡིན་ནོ། །བདག་གི་ཞེས་བྱ་བ་ནི་སྐྱེས་བུས་སོ། །འདིས་ནི་ཕྱི་རོལ་ཉིད་དུ་རྟོགས་པར་འགྱུར་རོ་ཞེས་གང་བརྗོད་པ་དེ་སྤངས་ནས་ད་ནི་བདེ་བ་ལ་སོགས་པ་ཁྱད་པར་གྱི་རིམ་པ་ཅན་དུ་མི་འགྱུར་རོ་ཞེས་གང་བརྗོད་པ་དེ་སོང་བ་ནི་བསྒོམས་པའི་ཞེས་བྱ་བའོ། །
དེའི་བདག་ཉིད་ཅན་གྱི་ཞེས་བྱ་བ་ནི་བློའི་རང་བཞིན་དུ་གྱུར་པའིའོ། །བསྒོམས་པའི་བློ་ཁྱད་པར་འགྱུར་བ་ཉིད་ཕ་རོལ་པོ་སྟོན་པ་ནི། བསྒོམས་པའི་ཞེས་བྱ་བ་ནི་ཞེས་པའོ། །ཡང་ཇི་ལྟར་ན་འདི་གཉིས་ཀྱིས་བསྒོམས་པས་འཇུག་སྙམ་ན་ང་རྒྱལ་དེ་ཡང་ཞེས་བྱ་བའོ། །ངའོ་སྙམ་པའི་རྣམ་པ་ཅན་གྱི་ང་རྒྱལ་ནི་བློ་ཡང་ཡིན་ནོ། །སྙིང་སྟོབས་ལས་བྱུང་བའི་ང་རྒྱལ་ཞེས་བྱ་བ་ནི། ང་རྒྱལ་ཡོན་ཏན་གསུམ་གྱི་བདག་ཉིད་སྙིང་སྟོབས་ཤེས་ཆེ་བའི་ཕྱིར་སྙིང་སྟོབས་ལས་བྱུང་བ་ཞེས་བརྗོད་དོ། །དེས་ན་གང་གི་ཚེ་བློ་སྙིང་སྟོབས་ལས་བྱུང་བའི་ང་རྒྱལ་ལ་རག་ལས་པ་དེའི་ཚེ། བདེ་བའི་བདག་ཉིད་འཐོབ་པར་འགྱུར་བ་ཡིན་ནོ། །དེ་བཞིན་དུ་མུན་པ་ལས་བྱུང་བའི་ང་རྒྱལ་ལས་རག་ལས་པ་དེའི་ཚེ་སྡུག་བསྔལ་གྱི་རང་བཞིན་འཐོབ་པར་འགྱུར་ལ། རྡུལ་ལས་བྱུང་བའི་ང་རྒྱལ་ལ་རག་ལས་པའི་ཚེ་ནི་གཏི་མུག་གི་རང་བཞིན་ཉིད་འཐོབ་པར་འགྱུར་བ་ཡིན་ན། དེ་ལྟར་ཞེས་བྱ་བ་ནི་བདེ་བ་ལ་སོགས་པའི་རང་བཞིན་དུའོ། །འདི་ལ་བརྗོད་པ་ནི་གལ་ཏེ་ཞེས་བྱ་བའོ། །སྒྲ་ལ་སོགས་པ་ཡང་གཙོ་བོ་ཡོངས་སུ་གྱུར་པའི་རང་བཞིན་ཉིད་ཡིན་ཏེ། དེ་དག་ཀྱང་བདེ་བ་ལ་སོགས་པའི་རང་བཞིན་ཡིན་པའི་ཕྱིར་རོ་ཞེ་ན་ཕྱི་རོལ་ཞེས་གསུངས་སོ། །དེའི་རང་བཞིན་རྗེས་སུ་འགྲོ་བར་མཐོང་བའི་ཕྱིར་ན། སྒྲ་ལ་སོགས་པ་རྣམས་གཙོ་བོ་ཡོངས་སུ་གྱུར་བའི་རང་བཞིན་ཉིད་ཡིན་ནོ་སྙམ་ན། འདི་དག་དེའི་རང་བཞིན་གྱིས་ཞེས་གསུངས་སོ། །གང་གི་ཚེ་བློ་ལ་ཡང་བདེ་བ་ལ་སོགས་པའི་རང་བཞིན་ཉིད་ཡོད་པ་དེའི་ཚེ་སྒྲ་ལ་སོགས་པ་རྣམས་ལ་བདེ་བ་ལ་སོགས་པའི་རང་བཞིན་རྗེས་སུ་འགྲོ་བར་ཚད་མས་གྲུབ་པ་མ་ཡིན་ནོ། །བདེ་བ་ལ་སོགས་པ་འདི་དག་རེས་འགའ་བློའི་རང་བཞིན་ཡིན་པར་འགྱུར་རོ་ཞེས་བྱ་བའི་དོན་ཏོ། །དེའི་ཚེ་འབྲས་བུ་རྒྱུའི་རྗེས་སུ་འགྲོ་བ་ཞེས་བྱ་བ་ནི་འབྲས་བུ་ནི་རྒྱུའི་རང་བཞིན་གྱི་རྗེས་སུ་བྱེད་པར་འགྱུར་བ་ཡིན་ནོ། །དེ་ལྟར་བྱས་པས་དེ་ལྟ་བུའི་རྒྱུས་ཞེས་བྱ་བ་སྒྲ་ལ་སོགས་པ་བདེ་བ་ལ་སོགས་པའི་རང་བཞིན་གཙོ་བོའི་མཚན་ཉིད་ཀྱི་རྒྱུས་སྐྱེད་པ་ཡིན་པར་འཇིག་རྟེན་གྱིས་ཤེས་པར་འགྱུར་རོ། །གཙོ་བོ་ཡོངས་སུ་གྱུར་པ་ཡིན་པའི་གཏན་ཚིགས་ཉིད་ཀྱིས་བདེ་བ་ལ་སོགས་པ་རྗེས་སུ་འགྲོ་བ་དེ་ལྟར་ངེས་སོ་ཞེ་ན་འདི་ནི་ཞེས་བྱ་བ་སྒྲ་ལ་སོགས་པའོ། །དེ་ཉིད་ཡིན་པར་ངེས་ཞེས་བྱ་
པ་ནི་གཙོ་བོ་ཡོངས་སུ་གྱུར་པ་ཉིད་དུ་ངེས་པ་ནི་གཙོ་བོ་ཡོངས་སུ་གྱུར་པ་ཉིད་དུ་ངེས་ནའོ། །བདེ་བ་ལ་སོགས་པ་རྗེས་སུ་འགྲོ་བར་ངེས་པར་བྱ་བ་ཡིན་ནོ། །དེ་ལྟར་ན་རེ་ཞིག་གཙོ་བོ་ཡོངས་སུ་གྱུར་པའི་རང་བཞིན་ཉིད་དུ་མ་གྲུབ་བོ་ཞེས་བསྟན་ནས། ད་ནི་སྒྲ་ལ་སོགས་པ་ལ་གཙོ་བོའི་ཡོངས་སུ་གྱུར་པ་ཉིད་དུ་ཁས་བླངས་ནས་བདེ་བ་ལ་སོགས་པའི་རང་བཞིན་ཡིན་པ་འགོག་པ་ནི་གཞན་ཡང་ཞེས་བྱ་བའོ། །དེ་ནི་དུ་བའོ་མཚུངས་སོ་ཞེས་བྱ་བ་ནི་སྒྲ་ལ་སོགས་པ་ཡང་བདེ་བ་ལ་སོགས་པའི་རང་བཞིན་ཉིད་ནི་མངོན་སུམ་གྱིས་གནོད་པ་ཁོ་ནའོ། །བདེ་བ་ལ་སོགས་པའི་རང་བཞིན་ཅན་གྱི་བློ་ནི་བདེ་བ་མ་ཡིན་པ་ལ་སོགས་པའི་རང་བཞིན་སྒྲ་ལ་སོགས་པ་དེ་དག་གི་འཛིན་བྱེད་མ་ཡིན་པར་འགྱུར་རོ། །དེ་ནི་སྐྱེས་བུའོ། །བཟློག་པའི་ཞེས་བྱ་བ་ནི་གཙོ་བོའི་བདག་ཉིད་ཡིན་པའི་ཕྱིར་རོ། །དེས་རིགས་མི་མཐུན་པས་ན་སྐྱེས་བུ་དང་སྒྲ་ལ་སོགས་པ་གཟུང་བ་དང་འཛིན་པའི་དངོས་པོར་མི་འགྱུར་རོ། །དེ་ནི་སྐྱེས་བུའོ། །གལ་ཏེ་འཛིན་པར་བྱེད་པ་ཁོ་ན་ཟ་བ་ཡིན་ན། དེའི་ཚེ་འཛིན་པར་བྱེད་པ་མེད་ན། འོན་ཀྱང་ཟ་བ་ནི་གཞན་ཁོ་ན་ཡིན་ནོ་ཞེས་དོགས་པ་བསུ་ནས་བརྗོད་པ་ནི། ཉམས་སུ་མྱོང་བར་བྱེད་པ་ལས་ཞེས་གསུངས་སོ། །ཅིའི་ཕྱིར་ཞེས་དྲིས་པ་ན། ཁོང་ནས་དབྱུང་བ་དང་བཅས་པའི་རྩ་བ་དགོད་པ་ནི་བློ་དང་ཞེས་བྱ་བའོ། །འདི་ཉིད་འཆད་པ་ནི་གང་གི་ཕྱིར་ཞེས་བྱ་བའོ། །གཞན་དུ་མ་ཡིན་ནོ་ཞེས་བྱ་བ་ནི་རྒྱུ་དང་འབྲས་བུ་ལས་རྣམ་པ་གཞན་གྱིས་ནི་གཟུང་བ་ཉིད་དུ་འགྱུར་བ་མ་ཡིན་ནོ། །དེས་ན་ཞེས་བྱ་བ་ནི་རྒྱུ་དང་འབྲས་བུ་དང་གཟུང་བ་དང་འཛིན་པའི་དངོས་པོ་ཕན་ཚུན་འཁྲུལ་པ་མེད་པས་ནའོ། །རྒྱུ་དང་འབྲས་བུ་ཉིད་དུ་ཞེས་བྱ་བ་ནི། བློ་ནི་འབྲས་བུ་ཉིད་དང་རྒྱུ་ལས་སོགས་པ་ནི་རྒྱུ་ཉིད་དུའོ། །གལ་ཏེ་ཡང་སྤྲོས་པ་ནས་ངེས་ཀྱི་བར་དུ་བློ་གཅིག་ཡིན་ནོ་ཞེས་འདོད་པ་དེ་ལྟ་ན་ཡང་སྒྲ་ལ་སོགས་པ་རྣམས་ཀྱི་བློ་ལ་གནས་སྐབས་ཀྱིས་ཁྱད་པར་བྱེད་པ་ཁོ་ནའོ། །སྐྱེས་བུ་ཡང་ཞེས་བྱ་བ་ནི་སྐྱེས་བུའི་ཡུལ་ཡང་ངོ༌། །དེ་ཡང་ཞེས་བྱ་བ་ནི་སྐྱེས་བུའོ། །དེ་དག་གི་སྒྲ་ལ་སོགས་པའིའོ། །དེ་ལྟར་ཡང་མ་ཡིན་ཞེས་བྱ་བ་ནི་སྐྱེས་བུ་འབྲས་བུ་མ་ཡིན་པའོ། །དེས་གཟུང་བ་ཉིད་ཀྱིས་རྒྱུ་དང་འབྲས་བུའི་དངོས་པོའི་སྒྲིབ་པ་ལ་མ་ངེས་པ་ཉིད་དོ། །སྔར་གྱི་ཕྱོགས་ལ་མ་ངེས་པ་ཉིད་
བརྗོད་ནས་ད་ནི་རྒྱུ་དང་འབྲས་བུའི་དངོས་པོ་མ་གྲུབ་པའི་ཕྱིར། ཇི་ལྟར་དེ་རྒྱུ་དང་འབྲས་བུའི་དངོས་པོ་གྲུབ་ཅེས་བརྗོད་པ་ནི། མ་གྲུབ་པ་ཉིད་ཀྱི་ཕྱིར་རོ་ཞེས་བྱ་བའོ། །སྔར་ནི་རྒྱུ་དང་འབྲས་བུ་ཡིན་ནོ་ཞེས་སྟོན་པ་ཡིན་ན། ད་ནི་ས་དགག་པ་ཁོང་ནས་ཕྱུང་ལ་རྒྱུ་དང་འབྲས་མིན་ཞེས་བརྗོད་པ་ཡིན་ནོ། །སྐྱེས་བུ་དང་སྒྲ་ལ་སོགས་པའི་རང་བཞིན་གྱིས་བདེ་བའོ། །གཞན་གྱི་དོན་ནི་ཞེས་སྨྲས་སོ། །འདི་ཉིད་རྗེས་སུ་བརྗོད་ནས་གྲུབ་པའི་མཐའ་གསུངས་པ་ནི། འོ་ན་ནི་ཞེས་བྱ་བའོ། །དེ་ལྟ་ཡིན་ན་ཅི་སྐྱོན་ཞེས་བརྗོད་པ་ནི་དེ་ལྟ་ཡིན་དང་ཞེས་བྱ་བའོ། །སྐྱེས་བུ་དང་སྒྲ་ལ་སོགས་པ་ཡང་གཟུང་བ་དང་འཛིན་པའི་དངོས་པོ་ཡོད་པའི་ཕྱིར་རོ། །ཡང་ན་འདོད་པར་མི་འགྱུར་མོད། གཟུང་བ་དང་འཛིན་པའི་གཏན་ཚིགས་སྐྱེས་བུ་དེ་ཉིད་ཀྱིས་མ་ངེས་པ་ཉིད་དུ་འགྱུར་རོ། །དགག་པ་ཁོང་ནས་བཏོན་ནས་བཤད་པ་གཞན་ཡང་གསུངས་པ་ནི། ཡང་ན་ཞེས་བྱ་བའོ། །འོན་ཏེ་གཟུང་བ་དང་འཛིན་པ་མེད་པ་ཉིད་ཅིའི་ཕྱིར་ཞེ་ན། ཡོད་ནའང་ཞེས་གསུངས་ཏེ། གཟུང་བ་དང་འཛིན་པ་ཡོད་ན་ཡང་ངོ༌། །གཟུང་བ་དང་འཛིན་པ་དེ་ན་བུམ་པ་དང་སྣམ་བུ་ལ་སོགས་པ་གཞན་ལའང་འགྱུར། བེམས་པོའི་རང་བཞིན་ཅན་གྱི་བློ་འཛིན་པར་བྱེད་པ་ཉིད་ཡིན་ནོ། །མེ་ལོང་ལ་སོགས་པ་ཡང་འཛིན་པར་འགྱུར་རོ་ཞེས་དགོངས་པའོ། །ཅིའི་ཕྱིར་ཞེས་བྱ་བ་ནི། ཡང་ཅིའི་ཕྱིར་མྱོང་བར་བྱ་བ་ཡིན་པ་ཙམ་གྱིས་སེམས་པ་ཅན་ཉིད་ཡིན་ཞེས་བྱ་བའི་དོན་ཏོ། །ནང་ཉིད་དུ་མྱོང་བའི་ཕྱིར་ནང་ཉིད་དོ། །ནང་ཉིད་དུ་མྱོང་བ་གང་ཡིན་པ་དེ་ནི་འཁྲུལ་པ་ཁོ་ནའོ་ཞེ་ན། ཕྱི་རོལ་ཉིད་ལ་ཞེས་གསུངས་སོ། །འདི་ཉིད་གཞུང་འཛུགས་པ་ནི་དངོས་གང་ཞེས་བྱ་བའོ། །ཕྱི་རོལ་གྱི་ཞེས་བྱ་བ་ནི་ཕྱི་རོལ་བདེ་བ་ལ་སོགས་པའི་རང་བཞིན་གྱི་རྗེས་སུ་བྱེད་པར་རོ། །གལ་ཏེ་ཕྱི་རོལ་གྱི་བདེ་བ་ལ་སོགས་པར་ཡོད་པ་ཡིན་ཏེ། འོན་ཀྱང་མྱོང་བ་དེའི་རང་བཞིན་གྱི་རྗེས་སུ་བྱེད་པ་མ་ཡིན་པར་ཟད་དོ་ཞེ་ན། མྱོང་བ་ཡང་གཞན་ལ་ཞེས་གསུངས་སོ། །མྱོང་བའི་ཕྱི་རོལ་གྱི་རྗེས་མི་བྱེད་ལ། ཕྱི་རོལ་གྱི་དངོས་པོ་གཞན་ནོ་ཞེས་བྱ་བར་མི་འཐད་དོ། །འཐད་པ་གཞན་ཡང་བརྗོད་པ་ནི་དེ་ལྟར་ཞེས་བྱ་བའོ། །འོན་ཏེ་བདེ་བ་ལ་སོགས་པ་རིག་པ་ནི་རང་རིག་པའི་རང་བཞིན་དུ་འཇུག་པ་མ་ཡིན་ནོ་ཞེ་ན། བདེ་བ་ལ་སོགས་པ་གཞན་གྱིས་ཞེས་གསུངས་སོ། །འོ་ན་གཟུགས་ལ་
སོགས་པ་ཡང་གཞན་གྱིས་རིག་པ་མ་ཡིན་ནོ་ཞེས་གཟུགས་ལ་སོགས་པས་ནི་ཞེས་བྱ་བའོ། །དེའི་ནང་དུ་ཆུད་པ་ཞེས་བྱ་བ་ནི་བདེ་བའི་རྣམ་པ་ཅན་གྱིས་རྟོགས་པའི་ནང་དུ་ཆུད་པའོ། །བུམ་པ་ལ་སོགས་པ་བཞིན་ནོ་ཞེས་བྱ་བ་ནི། དཔེར་ན་བུམ་པའི་རྣམ་པ་ཅན་གྱི་ཤེས་པ་ཡིན་ཡང་ཕྱི་རོལ་གྱི་བུམ་པ་ཡང་ཡོད་པ་ཉིད་ཡིན་པ་དེ་བཞིན་དུ་བདེ་བའི་རྣམ་པས་བདེ་བ་རྟོགས་ན། ཕྱི་རོལ་གནས་པ་བཟློག་དུ་མེད་པ་ཁོ་ནའོ་ཞེས་དགོངས་པའོ། །འདི་ལ་བརྗོད་པ་ནི་དེ་ནི་མི་རིགས་ཏེ་ཞེས་བྱ་བའོ། །དེ་ལ་ཞེས་བྱ་བ་ནི་ཤེས་པ་ལ་གནས་པ་བུམ་པའི་རྣམ་པ་ལ་ནི་གོམས་པའི་བྱེད་པ་མ་རྟོགས་ཏེ། ངེས་ན་གཞན་བུམ་པ་ཉེ་བར་གནས་པས་བསྐྱེད་པའི་ཕྱིར། ཕྱི་རོལ་གྱི་བུམ་པ་ཡང་ཡོད་པ་ཉིད་དོ། །གལ་ཏེ་བདེ་བ་རྣམ་པ་ལ་ཡང་གོམས་པའི་བྱེད་པ་རྟོགས་པ་མེད་པ་མ་ཡིན་ནམ། དེས་གཞན་ཉེ་བར་གནས་པ་ལས་འགྱུར་བ་ཡིན་ནོ་སྙམ་ན། བདེ་བ་ལ་སོགས་པའི་ཞེས་གསུངས་སོ། །དེའི་རང་བཞིན་དུ་མ་གྱུར་པ་ཞེས་བྱ་བ་བདེ་བ་ལ་སོགས་པའི་རང་བཞིན་དུ་མ་གྱུར་པའི་མྱོང་བ་སྟེ། སྐྱེས་བུས་རིག་པའོ། །འདི་ལ་བཤད་པ་ཞེས་བྱ་བ་ལ་སོགས་པས་གཞན་གྱི་རྩོད་པ་རྗེས་སུ་བརྗོད་པ་སྨྲས་པ་ཡིན་ནོ། །དེའི་རྣམ་པ་ཅན་མ་ཡིན་པ་ཞེས་བྱ་བ་ནི། བདེ་བ་ལ་སོགས་པའི་རང་བཞིན་མ་ཡིན་པའོ། །དེས་ཞེས་བྱ་བ་དེ་རྣམ་པ་ཅན་མ་ཡིན་པས་ནའོ། །དེ་ཞེས་བྱ་བ་ནི་སྐྱེས་བུའོ། །དེའི་རྣམ་པ་ཅན་མ་ཡིན་པའི་ཕྱིར་རོ་ཞེས་བྱ་བ་ནི། བདེ་བ་ལ་སོགས་པའི་རང་བཞིན་མ་ཡིན་པའི་ཕྱིར་རོ། །འོ་ན་ཇི་ལྟར་བདེ་བ་ལ་སོགས་པ་རིག་པ་ཡིན་སྙམ་ན། དེའི་ཞེས་བྱ་བ་སྨྲས་སོ། །བློའི་ནང་དུ་ཞུགས་པ་ཞེས་བྱ་བ་ནི། བློ་ལ་གཟུགས་བརྙན་དུ་ཤར་བའོ། །དེ་དང་ཞེས་བྱ་བ་ནི། བློའི་ནང་དུ་གཏོགས་པའི་བདེ་བ་ལྷན་ཅིག་འདུ་བ་སྟེ་འབྲེལ་བའོ། །འབྲེལ་པ་ཡང་བློ་གང་ལ་བདེ་བ་ལ་སོགས་པ་དེའི་གཟུགས་བརྙན་ཤར་བ་དེ་ཉིད་ལས་སྐྱེས་བུའི་གཟུགས་བརྙན་འཆར་བ་ཞེས་བྱ་བ་ཡིན་ནོ། །གལ་ཏེ་བློ་དང་མྱོང་བ་ཕན་ཚུན་ཐ་དད་པ་ཁོ་ན་ཡིན་ན་དེའི་ཚེ་ཐ་དད་པར་ཇི་ལྟར་མ་རྟོགས་ཤེ་ན། དེས་ཞེས་སྨྲས་སོ། །འདུ་བས་འབྲེལ་བའི་ཕྱིར་ཞེས་བྱ་བ་ནི་བློ་གཅིག་ལ་སྐྱེས་བུ་དང་བདེ་བ་ལ་སོགས་པའི་གཟུགས་བརྙན་འཕོས་པ་ཉིད་འདུ་
བའི་སྒྲས་བརྗོད་པ་ནི། དེ་ལྟར་རྩོད་པ་རྗེས་སུ་བརྗོད་ནས་གྲུབ་པའི་མཐའ་བརྗོད་པ་ནི། མངོན་སུམ་ཞེས་བྱ་བའོ། །བློ་ཞེས་བྱ་བ་འདི་ཅི་ཞིག་ཅེས་དྲིས་པ་ན། གྲངས་ཅན་གྱི་ལྷག་པར་ཞེས་པ་ཞེས་བརྗོད་པའོ། །རིག་པ་དེ་གང་ཡིན་ཅེས་དྲིས་པ་ལ་བརྗོད་པ་ནི་ཉམས་སུ་མྱོང་བའོ་ཞེས་བྱ་བའོ། །འདི་ལ་གྲུབ་པའི་མཐའ་སྨྲ་བས་བརྗོད་པ་ནི། ཐ་དད་པ་ལ་ཞེས་བྱ་བའོ། །དེ་སྐད་ཅེས་བྱ་བ་ནི་ཐ་དད་པར་རོ། །ཕ་རོལ་པོ་རྣམ་གྲངས་ཉིད་ཡིན་པ་སེལ་བ་ནི་ཡུལ་གྱིས་ཞེས་བྱ་བའོ། །འདི་ལ་གྲུབ་པའི་མཐའ་བས་བརྗོད་པ་ནི་རྣམ་པ་མེད་པའི་ཞེས་བྱ་བའོ། །རིག་པ་ཞེས་བྱ་བ་ནི་སྐྱེས་བུའོ། །སྐྱེས་བུ་ཁས་ལེན་པའི་རྒྱུ་ནི་ཚད་མ་ཡིན་ཏེ། དེ་མེད་པའི་ཕྱིར་ན་ཁས་ལེན་པའི་རྒྱུ་མེད་པ་ཡིན་ན། མངོན་སུམ་མེད་ཀྱང་རྗེས་སུ་དཔག་པ་རིག་པའི་སྒྲུབ་བྱེད་དུ་འགྱུར་རོ་ཞེ་ན། མངོན་སུམ་ཞེས་གསུངས་ཏེ། རྗེས་སུ་དཔག་པ་ནི་མངོན་སུམ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །དེས་ན་ཞེས་བྱ་བ་ནི་ཚད་མེད་པས་ནའོ། །མྱོང་བ་གཞན་ཞེས་བྱ་བ་ནི་བདེ་བ་དང་སྡུག་བསྔལ་དག་ལས་ཐ་དད་པའོ། །སངས་རྒྱས་པ་ཁྱེད་བདེ་བ་དང་སྡུག་བསྔལ་དག་ལས་ངེས་པར་གྲོལ་བ་མེད་པ་ཉིད་དུ་ཇི་ལྟར་ཐལ་བར་འགྱུར། གལ་ཏེ་མྱོང་བ་ཡོད་ན་ནི་དེའི་ཚེ་བདེ་བ་དང་སྡུག་བསྔལ་དག་ལས་གྲོལ་བའི་ཐར་པ་འཐད་པར་འགྱུར་གྱི། གང་གི་ཚེ་རིག་པ་ཞེས་བྱ་བ་མེད་པ་དེའི་ཚེ་ཇི་ལྟར་ཐར་ཏེ། བདེ་བ་དང་སྡུག་བསྔལ་དག་ཡོད་པའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་སངས་རྒྱས་པ་བདེ་བ་དང་སྡུག་བསྔལ་ཡོངས་སུ་འདོར་བར་འདོད་དོ་ཞེ་ན། རང་བཞིན་ཞེས་སྨོས་སོ། །རྣམ་པར་ཤེས་པའི་རང་བཞིན་བདེ་བ་དང་སྡུག་བསྔལ་དོར་ན་ཆོས་མེད་པ་ཞེས་བྱ་བ་རྣམ་པར་ཤེས་པའི་རྒྱུན་འཇིག་པ་ཉིད་དུ་འགྱུར་ཏེ། རང་བཞིན་གཞན་མེད་པའི་ཕྱིར་རོ། །རང་བཞིན་ཡོངས་སུ་འདོར་བར་ཁས་བླངས་ནས་ཉེས་པ་བརྗོད་པ་ནི་མ་ཡིན་ནོ། །རང་བཞིན་ནི་དོར་བར་ཡང་མི་ནུས་སོ་ཞེས་བརྗོད་བ་ནི་རང་གི་ཞེས་བྱ་བའོ། །རང་གི་ཕྱོགས་ལ་འཐད་པ་བརྗོད་པ་ནི་བདེ་བ་ལ་སོགས་པ་ཞེས་བྱ་བའོ། །ད་ལྟའི་གནས་སྐབས་ནི་མ་གྲོལ་བའི་གནས་སྐབས་ནའོ། །དེ་ལྟ་ན་ཡང་སྤང་བར་ནུས་པ་ཉིད་དེ། རང་བཞིན་དང་སྐྱེས་བུའི་ཁྱད་པར་ཤེས་པ་ལས་ཐར་པ་ཡིན་ནོ་ཞེས་བརྗོད་པའི་ཕྱིར་རོ། །ཐ་དད་པར་ཞེས་བྱ་
བ་ནི་མྱོང་བ་ལས་ཐ་དད་པར་ལྷག་པར་ངེས་པ་གང་ཡིན་པ་དེའི་སྤྱོད་ཡུལ་དུ་བྱས་པའོ་ཞེས་འདི་ལ་གྲུབ་པའི་མཐའ་བརྗོད་པ་ནི། གལ་ཏེ་ཞེས་བྱ་བའོ། །གལ་ཏེ་བདེ་བ་ལ་སོགས་པ་དང་མྱོང་བ་དག་ཐ་མི་དད་ན་དེའི་ཚེ་འདོད་པའི་ཐར་པ་མི་འགྲུབ་པ་ཁོ་ནར་འགྱུར་རོ་ཞེ་ན། བདག་གི་འདོད་པ་ཞེས་གསུངས་སོ། །དོན་ཞེས་བྱ་བ་ནི་རང་བཞིན་དང་སྐྱེས་བུ་དག་ཐ་དད་པའོ། །འོན་ཏེ་རྒྱུ་དག་ནི་བདག་ཅག་གི་འདོད་པ་སྒྲུབ་པར་བྱེད་པ་ཡིན་ཏེ། དེས་ན་གལ་ཏེ་ཐ་དད་པ་མ་ཡིན་ན་ནི། རྒྱུ་རྣམས་ཐ་དད་པ་ཉིད་སྐྱེད་པར་མི་བྱེད་དོ་ཞེས་ན་རྒྱུན་རྣམས་ཡིན་ཞེས་གནས་སོ། །དོན་འདི་ལ་ཞེས་བྱ་བ་ནི་བདེ་བ་དང་སྡུག་བསྔལ་ལ་སོགས་པ་དང་བྲལ་བའི་མྱོང་བ་ཙམ་ལའོ། །གཞན་དག་ཚད་མ་ཉིད་སྟོན་པ་ནི་ད་ལྟ་ཉིད་ན་ཞེས་བྱ་བའོ། །ཆ་ཞེས་བྱ་བ་ནི་བདེ་སྡུག་གི་ཆ་སྟེ། དེ་ཡོད་པར་མཐོང་བའི་ཕྱིར་ན་རིག་པ་ཙམ་ཞིག་གནས་པར་འགྱུར་བ་ཡིན་ནོ་ཞེས་ཁོང་ནས་དབྱུང་ངོ༌། །འདི་ལ་བརྗོད་པ་ནི་ད་ལྟར་བར་ནི་ཞེས་བྱ་བའོ། །དེ་ལྟར་ཐར་པའི་གནས་སྐབས་སུ་ཡང་རིག་པ་གཞན་ཉིད་སྐྱེ་བར་འགྱུར་གྱི་ཐ་དད་པ་ནི་མ་ཡིན་ནོ་ཞེས་དགོངས་པའོ། །བར་དུ་ཞེས་བྱ་བ་ནི་རིག་པ་དང་སྒྲ་ལ་སོགས་པའི་བར་དུའོ། །གཞན་ཞེས་བྱ་བ་ནི་བློའི་རང་བཞིན་ནོ། །གལ་ཏེ་དོན་ཐ་དད་པ་མེད་པར་ཐ་དད་པར་ཇི་ལྟར་འགྱུར་ཞེས་བྱ་བ་འདི་ལ་ལན་ཅི་ཡོད་སྙམ་པའོ། །འདི་ཉིད་བརྗོད་པ་ནི་དེ་ལྟ་མ་ཡིན་ན་ཞེས་བྱ་བའོ། །འོན་ཏེ་གཅིག་དང་དུ་མ་ཉིད་མེད་མོད། དངོས་པོའི་རྣམ་པར་གཞག་པ་མཐའ་དག་གི་ཇི་ལྟར་འཇིག་པར་འགྱུར་སྙམ་ན། གཅིག་དང་དུ་མ་ལས་ཞེས་གསུངས་སོ། །འདི་ཞེས་བྱ་བ་ཐ་དད་པ་མེད་པར་མྱོང་བ་གཅིག་ཉིད་ཀྱིས་སྒྲུབ་བྱེད་མ་ཡིན་ན། ཐ་དད་པའི་གྲུབ་པར་བྱེད་པ་ཡང་མི་འགྲུབ་པོ། །གཅིག་མ་གྲུབ་ན་ཞེས་བྱ་བ་ཐ་མི་དད་པར་མ་གྲུབ་ན། གཉིས་ཀ་ཡང་ཞེས་བྱ་བ་ཐ་དད་པ་དང་ཐ་མི་དད་པའོ། །གང་དག་ལས་ཆེན་པོ་ཡོད་པ་དེ་དག་ཐམས་ཅད་ལ་ཁྱད་པར་བྱེད་པ་གནས་སྐབས་ཀྱི་ཁྱད་པར་འཛིན་པར་བྱེད་པ་རྣམ་པར་རྟོག་པ་དང་བཅས་པ་རྣམས་སོ། །ཅི་སྟེ་མི་འདོད་ཅེས་བྱ་བ་ནི་ཐ་དད་པར་འདོད་པར་བྱ་བ་ཁོ་ནའོ་ཞེས་བྱ་བའི་དོན་ཏོ། །དེས་ན་ཐ་དད་པ་མེད་པར་རིག་པ་ནི་གཅིག་ཡིན་ནོ་ཞེས་ཐ་དད་པ་མེད་པར་རིག་པ་ཉིད་གཅིག་སྒྲུབ་པ་ལ་སེམས་ཐ་དད་པ་སེམས་ཀྱི་འཁོར་དུ་གྱུར་པ་གང་ཡིན་པ་དེ་དག་གིས་མ་ངེས་སོ། །བློ་དང་
མྱོང་བ་དག་ཀྱང་རེས་འགའ་དེ་ལྟར་ཐ་དད་པར་མཐོང་ངོ༌། །དེས་ཐ་དད་པར་མ་རྟོགས་ཀྱང་ཐ་དད་པར་འགྱུར་རོ་ཞེ་ན། བློ་དང་མྱོང་བ་དག་ནི་དེ་ལྟ་མ་ཡིན་ཏེ་ཞེས་གསུངས་སོ། །འོ་ན་སེམས་ལས་བྱུང་བ་རྣམས་ལ་ཡང་ཐ་དད་པར་མི་འཛིན་པ་མེད་པ་ཉིད་དོ་ཞེ་ན། སེམས་ལས་བྱུང་བ་དག་ནི་ཞེས་གསུངས་སོ། །མཚན་མར་འཛིན་པ་ལ་སོགས་པ་ཞེས་བྱ་བ་ནི། མཚན་མར་འཛིན་པ་གང་ཡིན་པ་འདུ་ཤེས་ཀྱི་རྣམ་པར་ཤེས་པ་ཉིད་ཡིན་པར་དམིགས་ཀྱི། རྣམ་པར་མི་རྟོག་པ་ནི་མ་ཡིན་ནོ། །དེས་ན་ཇི་ལྟར་དེ་ལ་མཚན་མར་འཛིན་པ་ལ་སོགས་པ་རྣམ་པར་གཞག་སྙམ་ན། མ་ཡིན་ཏེ་ཞེས་གསུངས་སོ། །དེ་ལ་ཡང་ཞེས་བྱ་བ་ནི་རྣམ་པར་རྟོག་པ་མེད་པ་ལ་ཡང་ངོ༌། །ཇི་ལྟར་སྙམ་ན་དེས་ན་ཞེས་གསུངས་སོ། །སྔར་ཞེས་བྱ་བ་ནི་ཚད་མ་གྲུབ་པའི་ལེའུར་རོ། །དོན་གྱི་མཐུ་ལས་བྱུང་བའི་ཕྱིར། །རྣལ་འབྱོར་པའི་ཤེས་པ་དེ་ལྟར་གྱི་དོན་ཡུལ་ཅན་ནིའོ། །མེད་པ་རི་བོང་གི་རྭ་ལ་སོགས་པ་དེའི་ཡུལ་ཅན་ནོ། །འདི་ལ་བརྗོད་པ་ནི་མེད་པའི་ཞེས་བྱ་བའོ། །དེ་ལྟ་བུ་གསལ་བའི་རང་བཞིན་ཅན་གྱི་འབྲས་བུ་གང་ཡིན་དེ་ལ་ནུས་པའོ། །གང་དུ་གཞན་ན་མེད་པའི་ཡུལ་བསྒོམས་པ་གང་ཡིན་པ་དེ་ཡང་འབྲས་བུའི་རང་བཞིན་གྱིས་འབྲས་བུ་ལ་ནུས་པ་ཡིན་ནོ་ཞེས་སྦྱར་རོ། །འོན་ཏེ་གང་ཞིག་དོན་གྱི་མཐུ་ལས་མི་སྐྱེ་བ་དེ་རྣམ་པར་རྟོག་པ་དང་བཅས་པ་ཁོ་ནའོ་ཞེ་ན་ཡང་དག་པ་མ་ཡིན་པའི་ཞེས་བྱ་བའོ། །དེ་ལྟར་ཞེས་བྱ་བ་ནི་ལྐོག་ཏུ་གྱུར་པའི་ཡུལ་ཅན་ཉིད་དུའོ། །གལ་ཏེ་བསླད་པའི་དབང་གིས་རྣམ་པར་རྟོག་པ་ཡང་འགལ་ཏེ་གསལ་བའི་རྣམ་པ་ཅན་དུ་གྱུར་ན། དེའི་ཚེ་ཉམས་པ་ཅི་ཡོད་སྙམ་ན། རྣམ་པར་རྟོག་པ་ནི་རྨི་ལམ་ན་ཡང་ཞེས་གསུངས་སོ། །འོན་ཏེ་རྨི་ལམ་དུ་མི་གསལ་བའི་རྣམ་པ་ཅན་གྱི་རྣམ་པར་རྟོག་པར་མི་འགྱུར་བ་ཁོ་ནའོ་ཞེ་ན། ཉམས་སུ་མྱོང་བ་དྲན་པ་ཡི། །ཞེས་གསུངས་སོ། །མེད་པའི་དངོས་པོ་ནི་དང་གི་ངོ་བོ་ཉིད་མེད་པ་དེས་ན། དེ་འཛིན་པ་ལ་ཤེས་པ་ལ་ཅི་ཞིག་སྣང་བར་འགྱུར། འོ་ན་ཁྱེད་ཀྱི་ལུགས་ཀྱི་རྣལ་འབྱོར་པ་འདས་པ་ལ་སོགས་པ་རིག་པར་ཇི་ལྟར་འགྱུར་སྙམ་ན། རྣལ་འབྱོར་པའི་ཞེས་གསུངས་སོ། །འོན་ཏེ་ཟད་པ་ལ་སོགས་པ་ནི་ཡོད་པ་ཉིད་ཡིན་ཏེ། དེས་ན་དེ་དག་འཛིན་པ་ཡིན་ནོ་ཞེ་ན། མི་གཙང་བ་ལ་སོགས་པ་
ནི་ཞེས་བྱ་བའོ། །འོན་ཏེ་ཞེས་བྱ་བ་ནི་དགོངས་པའོ། །བསྒོམས་པ་ཙམ་གྱིས་ཞེས་གསུངས་སོ། །རིགས་པའི་མཚན་ཉིད་སེམས་དེ་ལས་བྱུང་བ་དེའི་རང་བཞིན་གྱི་ཤེས་པའོ། །ཚད་མ་ཡིན་ལ་དེ་དང་ལྡན་པ་ནི་རྣལ་འབྱོར་པའི་ཡིན་ནོ་ཞེས་བྱ་བ་ནི་ཤེས་པ་དེ་དང་ལྡན་པའོ། །ཞི་གནས་ཏེ་ཞི་བར་གནས་པའི་ཏིང་ངེ་འཛིན་དང་ལྷག་མཐོང་སྟེ་ཤེས་རབ་དེ་གཉིས་དང་ལྡན་པས་གཟུགས་གང་ཡིན་པ་དེ་ཉིད་འབྲེལ་པ་སྟེ། མཚུངས་པར་འཇུག་པའི་ལམ་དེའོ། །གལ་ཏེ་འབྱོལ་ཡང་ཟད་པར་ཆུ་ལ་སོགས་པ་སྣང་བ་ཁོ་ན་མ་ཡིན་ནམ་ཞེ་ན། དེ་ལ་གལ་ཏེ་ཞེས་གསུངས་སོ། །འདི་དག་ཅེས་བྱ་བར་ཟད་པར་ས་ལ་སོགས་པའོ། །དེ་ཙམ་གྱིས་ཞེས་བྱ་བ་ནི་སྣང་བ་ཙམ་གྱིས་སོ། །གལ་ཏེ་སྣང་ངོ་ཞེ་ན། དེ་ཙམ་གྱིས་དེ་ཁོ་ནར་འགྱུར་རོ་སྙམ་ན། སྣང་བ་ཙམ་གྱིས་ཞེས་སྨྲས་སོ། །གལ་ཏེ་བརྟག་བཟོད་པ་མ་ཡིན་མོད། དེ་ལྟ་ན་ཡང་རེ་ཞིག་དེ་བསྒོམས་པས་ནི་གསལ་བར་བྱེད་པ་ཡིན་ལ། བསྒོམས་པས་གསལ་བར་བྱས་པ་ནི་དེ་ཁོ་ན་མ་ཡིན་པའི་རང་བཞིན་དུ་འཐད་པ་ཡང་མ་ཡིན་ནོ་སྙམ་ན། རྟོག་པ་ཙམ་ལས་ཞེས་བྱ་བའོ། །འོ་ན་བསྒོམས་པ་ནི་དེ་ཁོ་ན་རྟོགས་པའི་རྒྱུ་ཉིད་མ་ཡིན་པར་འགྱུར་ཏེ། དེས་ན་སྐད་ཅིག་མ་ཉིད་ལ་སོགས་པ་གསལ་བར་བྱས་པ་ཡང་དེ་ཁོ་ན་མ་ཡིན་པར་འགྱུར་རོ་ཞེ་ན། ཚད་མའི་ཞེས་གསུངས་སོ། །དེ་ལྟར་ཡིན་ནོ་ཞེས་བྱ་བ་ནི་དེ་ཁོ་ན་སོགས་པའི་རྒྱུའོ། །དངོས་པོའི་སྒོ་ནས་རྟོགས་པར་འཐད་ན་ནི་དེ་ཁོ་ན་ངེས་པར་ཏེ། གཏན་ལ་ཕེབས་པར་འདོད་པའི་ཡིན་ནོ། །གལ་ཏེ་མེད་པ་ནི་སུས་ཀྱང་བསྒོམ་པ་ཉིད་དུ་བྱེད་པ་མ་ཡིན་ཏེ། དེས་ན་དེ་གསལ་བ་ཉིད་དུ་ཇི་ལྟར་འགྱུར་ཞེ་ན། ཡོད་པ་འབའ་ཞིག་ནི་ཞེས་བྱ་བའོ། །གཞན་ཡང་ཞེས་བྱ་བ་ནི་མེད་པ་ཡང་ངོ༌། །གསལ་བ་དང་མི་རྟོག་པའི་བློའི་འབྲས་བུ་གང་ལ་ཡོད་པ་དེ་ལ་དེ་སྐད་ཅེས་བྱ་བའོ། །གཞན་དུ་འགྱུར་བར་ཞེས་བྱ་བ་ནི་མི་གསལ་བའི་ཤེས་པའི་རྒྱུར་རོ། །སླུ་བ་མེད་པ་ཅན་གང་ཡིན་པ་དེའི་ཡུལ་ཅན་ཉིད་མངོན་སུམ་ཡིན་ནོ་ཞེས་འབྲེལ་ཏེ། ཡུལ་དེ་གང་ཡིན་ཞེ་ན། སྔར་སྤྱད་ཅེས་སྦྱར་རོ། །འདོད་པ་ལ་སོགས་པའི་ཡུལ་ཅན་ནི་ཞེས་བྱ་བ་ནི། འདོད་པ་ལ་སོགས་པའི་ཡུལ་གྱི་རྒྱུ་མཚན་གང་ལ་ཡོད་པ་དེ་ནི་ཚད་མ་མ་ཡིན་ནོ། །དེ་ནི་ཞེས་བྱ་བ་ནི་འདོད་པ་ལ་སོགས་པའི་ཡུལ་ཅན་ནོ། །དེ་དག་གི་
ཤེས་པ་ནི་བསྒོམས་པའི་སྟོབས་ལས་སྐྱེས་པ་ཉིད་མ་ཡིན་སྙམ་ན། དེ་དག་ལ་ཡང་ཞེས་སྨྲས་ཏེ། མུ་སྟེགས་པ་རྣམས་ལ་ཡང་ངོ༌། །གལ་ཏེ་དེ་དག་གིས་རང་གི་ལུགས་ཀྱི་བརྟགས་པ་དེ་དག་མ་བསྒོམས་པ་ཉིད་ཡིན་ནོ། །དེའི་ཚེ་འཇིག་རྟེན་གྱི་ཐུན་མོང་བའི་དོན་ཉིད་རྗེས་སུ་མ་བརྗོད་པར་འགྱུར་རོ། །དེ་ལྟར་ན་འཇིག་རྟེན་དང་ཐུན་མོང་བའི་དོན་གང་ཡིན་པ་དེ་འགའ་ཞིག་ཁོ་ན་ལ་ཡོད་པ་ཡིན་གྱི་གཞན་ལ་ནི་མ་ཡིན་ནོ་ཞེས་བྱ་བའི་ངེས་པ་གང་ཡིན་པ་དེ་ཅི་རིགས་པ་ལས་འདའ་བར་གནས་པ་མ་ཡིན་ནམ་སྟེ། འདས་པ་ཉིད་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེ་དག་གི་དོན་དེ་བསྒོམས་པ་ལས་གྱུར་པ་མ་ཡིན་གྱི་འོན་ཀྱང་འཇིག་རྟེན་དང་ཐུན་མོང་ཁོ་ན་ཡིན་ན་དེའི་ཚེ་ཐམས་ཅད་ཀྱིས་ཅིའི་ཕྱིར་མ་དམིགས་ཞེས་བསམས་པའོ། །དེ་དག་གིས་ཞེས་བྱ་བ་ནི་རྣལ་འབྱོར་རྣམས་ཀྱིས་སོ། །དེའི་ཚིག་ལ་ནི་རྣལ་འབྱོར་པའི་ཚིག་ལའོ། །གཞན་ཞེས་བྱ་བ་ནི་དབང་ཕྱུག་ལ་སོགས་པའི་ཚིག་ལའོ། །འདི་ལ་བྲམ་ཟེར་བརྗོད་པ་ནི་གལ་ཏེ་ཞེས་བྱ་བའོ། །དེ་ཞེས་བྱ་བ་ནི་སྐྱེས་བུའི་ཚད་མས་སོ། །ཡུལ་མཚུངས་ལ་ཞེས་བྱ་བ་ནི་ཡུལ་གང་ལ་དབང་པོ་ལས་འདས་པའི་ཡུལ་ཅན་གྱི་ཚད་མ་འཇུག་པ་དེ་ཉིད་ལ་གལ་ཏེ་སྐྱེས་བུའི་ཚད་མ་ཡང་འཇུག་པ་ཡིན་ན། གནོད་པར་བྱ་བ་དང་གནོད་པར་བྱེད་པའི་དངོས་པོར་འགྱུར་བ་ཞིག་ན་དེ་ལྟར་ཡང་མ་ཡིན་ནོ། །འདི་ལ་གྲུབ་པའི་མཐའ་པས་བརྗོད་པ་ནི། རྣལ་འབྱོར་པའི་ཤེས་པས་ཀྱང་ཞེས་གསུངས་སོ། །ཤིན་ཏུ་དབང་པོ་ལས་འདས་པའི་ཡུལ་ཅན་དེའི་ཚིག་གི་རྒྱུ་གང་ཡིན་པའི་རྣམ་པར་ཤེས་པའི་རང་བཞིན་དེ་ཤེས་པ་དེ་ལ་གནོད་པ་ཉིད་དུ་དེ་བཞིན་གཤེགས་པའི་གསུང་གིས་བསྟན་པ་ཡིན་ནོ་ཞེས་འབྲེལ་ཏོ། །ཇི་ལྟར་ཞེས་དབང་པོ་ལས་འདས་པའི་ཡུལ་ཅན་གྱི་ཚད་མ་དེ་དག་གི །དེ་བཞིན་གཤེགས་པའི་གསུང་དག་དང་འགལ་བ་རྣམ་པར་གནས་པའི་ཕྱིར་རོ། །འདི་ནི་བཟློག་པ་ལ་ཡང་མཚུངས་སོ་ཞེས་བྱ་བ་ནི་ཇི་ལྟར་དེ་བཞིན་གཤེགས་པའི་གསུང་གི་དབང་པོ་ལས་འདས་པའི་ཡུལ་ཅན་གྱི་ཚད་མ་དེ་དག་གནོད་པ་དེ་བཞིན་དུ་དེ་དག་གིས་དེ་བཞིན་གཤེགས་པའི་གསུང་ལ་གནོད་པར་འགྱུར་རོ་ཞེས་བསམས་པའོ། །ལན་ནི་དེ་ལྟ་མ་ཡིན་ཏེ་ཞེས་བྱ་བའོ། །དེའི་ཚིག་ལས་ཞེས་བྱ་བ་ནི་རིག་པར་བྱེད་པའི་ཚིག་ལས་སོ། །ཡང་ཇི་ལྟར་ན་དབང་པོ་ལས་འདས་པའི་དོན་བརྗོད་པའི་ཚིག་ལ་མི་
འཇུག་སྙམ་ན། དབང་པོ་ལས་འདས་པའི་དོན་དང་ཕན་ཚུན་འགལ་བ་ཡང་མུ་སྟེགས་པ་ཐམས་ཅད་ཀྱི་ཚིག་ལ་ཡོད་པ་ཡིན་ཏེ། ཕྱུགས་རྣམས་མཆོད་སྦྱིན་དོན་དུ་ནི། །རང་བྱུང་རང་ཉིད་ཁོ་ན་སྤྲུལ། །ཞེས་བྱ་བ་དང༌། སྲོག་ཆགས་འགའ་ལའང་འཚེ་མི་བྱེད། །མི་འཚེ་བ་ནི་ཆོས་ཀྱི་མཆོག །ཅེས་བྱ་བ་བཞོན་པ་གང་གི་ཕྱིར་དེ་ལྟ་ཡིན་པ་དེས་ན། དེ་ལ་འགའ་ཡང་འཇུག་པར་མི་འགྱུར་རོ། །ཅིག་ཤོས་བདག་ཅག་ལ་སོགས་པ་ལྟ་བུ་རྣམས་ཀྱིས་གཅད་པར་ཏེ། ངེས་པར་ནུས་པ་དོན་གང་ཡིན་པ་དེ་ལ་དེ་སྐད་ཅེས་བརྗོད་དོ། །མི་སྲིད་པའི་ཕྱིར་ཞེས་བྱ་བ་ནི། གལ་ཏེ་གཞན་གྱིས་ཡོངས་སུ་གཅད་པར་ནུས་པའི་དབང་པོ་ལས་འདས་པའི་དོན་སྲིད་ན་དེའི་ཚེ་དེ་ལྟ་བུ་ཉིད་སྟོན་པར་འགྱུར་བ་ཞིག་ན། འོན་ཀྱང་འདི་དེ་ལྟར་མི་སྲིད་པ་དེས་ཇི་ལྟར་སྟོན་ཞེས་བྱ་བའི་དོན་ཏོ། །རང་བཞིན་གྱིས་གྲུབ་པའི་རྣལ་འབྱོར་པའམ། རིག་བྱེད་ནི་དབང་པོ་ལས་འདས་པའི་དོན་དེའི་སྟོན་བྱེད་ཡིན་པས་ན། དབང་པོ་ལས་འདས་པའི་དངོས་པོ་ངེས་པ་ཡིན་ནོ་ཞེ་ན། དེའི་ཚེ་འདིར་དེ་དང་ནི། གདོས་པོ་ལ་ཚད་མ་ག་ལ་ཡོད་དེ། དེ་ནི་དེས་དོན་དེ་འདྲ་བ་ཁོ་ན་ཡིན་ནོ་ཞེས་མི་ཤེས་སོ་ཞེས་བྱ་བའི་དོན་ཏོ། །དེ་དོན་གཉེར་རྣམས་ཀྱིས་ཞེས་བྱ་བ་ནི། དབང་པོ་ལས་འདས་པ་དོན་དུ་གཉེར་བ་རྣམས་ཀྱིའོ། །དེས་ན་གཅད་པར་མི་ནུས་པ་ཁོ་ན་ཉེ་བར་སྟོན་པ་ཡིན་ནོ་ཞེ་ན། དེ་ནི་མི་རིགས་སོ། །འདི་ལྟར་འཁོར་པའི་སྡུག་བསྔལ་དང་བྲལ་བའི་དོན་དུ་གཉེར་བ་རྣམས་ཀྱིས་ནི། རེ་ཞིག་སྡུག་བསྔལ་དང་བྲལ་བའི་རྒྱུ་བཙལ་བར་བྱ་བ་ཡིན་ཏེ། དེ་རྣམས་ཀྱིས་སྡུག་བསྔལ་ཆད་པ་ནི་གཙོ་བོ་མ་ཡིན་པ་མ་ཡིན་ནོ། །དེས་ན་གཅད་པར་ནུས་པ་ཡིན་ཡང་གལ་ཏེ་སྡུག་བསྔལ་དང་བྲལ་བའི་ཐབས་ཉེ་བར་སྟོན་ན། དེའི་ཚེ་གང་གིས་གཅད་པར་མི་ནུས་པ་ཁོ་ན་ཉེ་བར་སྟོན་པ་ཅི་དེ་དག་གིས་བླང་བྱར་མི་འགྱུར་རམ་ཞེས་བྱ་བའི་དོན་ཏོ། །བདག་དང་བདག་གིར་འཛིན་པ་དང་ལྡན་པས་བདེ་བ་དང་ཡང་འབྲེལ་པ་ཡིན་ཏེ། དེས་བདག་དང་བདག་གིར་འཛིན་པ་དང་བྲལ་ན་བདེ་བ་རྣམས་དང་ཡང་འབྲལ་བར་འགྱུར་རོ་ཞེ་ན། སྡུག་བསྔལ་མེད་པ་བདེ་པའི་མཆོག །ཅེས་གསུངས་སོ། །བདག་དང་བདག་གིར་འཛིན་པས་རབ་ཏུ་སྦྱར་བས་ཅི་བྱ་སྟེ། སྡུག་བསྔལ་མེད་པ་དེ་ནི་ཡོད་པ་ཁོ་ན་ཡིན་པ་དེས་ན་འདི་བླང་བར་བྱ་བ་ཡིན་ནོ། །འདི་ཉིད་གཞུང་འཛུགས་པ་ནི་
གལ་ཏེ་ཞེས་བྱ་བའོ། །གལ་ཏེ་རྟག་ཏུ་སྟེ་དུས་ཐམས་ཅད་དུ་སྡུག་བསྔལ་ལས་བཟློག་པ་རིག་པ་ཡོད་ན། དེའི་ཚེ་སྡུག་བསྔལ་ལས་བཟློག་པ་དེ་ལས་གཞན་བླང་བྱ་གང་ཞིག་ཡོད་དེ། སྡུག་བསྔལ་ལས་བཟློག་པ་དེ་ཉིད་བླང་བྱ་རིག་པ་དང་འབྲེལ་པ་ཡིན་ནོ་ཞེས་བྱ་བའི་དོན་ཏེ། སྡུག་བསྔལ་ལས་བཟློག་པའི་རང་བཞིན་རིག་པ་ཉིད་ཐར་པ་ཡིན་ནོ་ཞེས་བྱ་བ་མི་བཟོད་པས་གཞན་གྱིས་བརྗོད་པ་ནི་མར་མེ་ཞེས་བྱ་བའོ། །འགོག་པ་ནི་འདི་ནི་ཞེས་བྱ་བའོ། །ཚད་ཅན་མིན་པ་ཉིད་ཉེ་བར་བསྟན་པའི་དོན་དུ་བརྗོད་པ་ནི་འདི་ལྟར་ཞེས་བྱ་བའོ། །གལ་ཏེ་དེ་ལྟ་ན་ཡང་རྣམ་པར་ཤེས་པ་ནི་ཁྱི་རྡུལ་དང་འདྲ་བའི་ཕྱིར་ན། བསྒོམས་པས་བཅད་པར་ནུས་པ་མ་ཡིན་ནམ་སྙམ་ན། དེའི་གནས་སྐབས་ཞེས་གསུངས་ཏེ། མྱ་ངན་ལས་འདས་པའི་གནས་སྐབས་རྟོགས་པའི་རྣལ་འབྱོར་པ་དེའོ། །རྣམ་འབྱེད་ལས་ཞེས་བྱ་བ་ནི་མར་མེ་ལྟར་ཞི་བ་འདི་ནི་མཆོག་ཡིན་ལ་རྣམ་པར་ཤེས་པ་ནི་བཟང་པོ་མ་ཡིན་ནོ་ཞེས་རྣམ་པར་འབྱེད་པ་ལས་རྒྱབ་ཀྱིས་ཕྱོགས་པར་འགྱུར་ཏེ། རྣམ་པར་འབྱེད་པ་དེ་འདྲ་བ་ནི་མེད་དོ་ཞེས་བྱ་བའི་དོན་ཏོ། །འདི་ལ་གཞན་གྱིས་བརྗོད་པ་ནི་གལ་ཏེ་སྐྱོ་བ་ལས་ཏེ། སྐྱོ་བ་སྐྱེད་པར་བྱེད་པའི་རྣམ་པར་ཤེས་པའི་ཕུང་པོ་ལ་རྒྱབ་ཀྱིས་ཕྱོགས་ན། དེའི་ཚེ་འདི་ལ་འགལ་བ་ཅི་ཞིག་ཡོད་སྙམ་ན། འདི་ལ་བརྗོད་པ་ནི་མཉམ་པ་ཉིད་ནི་ཞེས་བྱ་བའོ། །ཁས་བླངས་ནས་ཀྱང་བརྗོད་པ་ནི། ཡང་ན་རྒྱབ་ཀྱིས་ཕྱོགས་པར་འགྱུར་མོད། དེ་ལྟ་ན་ཡང་གལ་ཏེ་རྣམ་པར་ཤེས་པའི་ཕུང་པོ་ལ་ཉེ་བར་འཚེ་བ་ཅུང་ཟད་མཐོང་ན། དེའི་རྣམ་པར་ཤེས་པ་དེ་ཡང་འདོར་བར་འགྱུར་བ་ཞིག་ན། རྣམ་པར་ཤེས་པ་དེ་ལ་ནི་གནོད་པར་བྱེད་པ་འགའ་ཡང་ཡོད་པ་མ་ཡིན་ན། དེ་ཇི་ལྟར་རྣམ་པ་དེ་ལྟ་བུ་ངེས་པར་ཞི་བར་འདོད་པར་འགྱུར། འོན་ཏེ་བཀྲེས་པ་ལ་སོགས་པ་གནོད་པར་བྱེད་པ་ཡོད་དོ་སྙམ་ན་ཏིང་འཛིན་ཞེས་བྱ་བའོ། །དེ་ལྟར་ནི་ཏིང་འཛིན་ལ་སོགས་པའོ། །གཞན་ཡང་བསྒོམས་པའི་སྟོབས་ཉིད་ལས་དཔའ་བ་ལ་སོགས་པ་ཡང་ཡོད་པ་ཡིན་ཏེ། དེས་ན་དེ་ལ་མཚོན་གྱིས་བརྡེགས་ཀྱང་དཔའ་བརྟན་ཅན་བཞིན་དུ་གནོད་པར་བྱེད་པ་མ་ཡིན་གྱི། ཕྱིར་ལ་དགའ་བ་ཁོ་ན་བྱེད་པ་ཡིན་ནོ། །གལ་ཏེ་ཉི་མ་རེ་རེ་ཞིང་ཟས་ལ་སོགས་པ་ཚོལ་བས་རེས་འགའ་སྐྱོ་བ་སྐྱེ་ཡང་སྲིད་དེ། དེས་ན་སེམས་ཉིད་འགོག་པར་བྱེད་དོ་སྙམ་ན། བརྟན་པ་ཞེས་གསུངས་
སོ། །ཟས་ཚོལ་བ་ནི་ལུས་རྒྱས་པའི་དོན་དུ་ཡིན་ནོ། །ལུས་རྒྱས་པ་ནི་དེ་ལས་བརྟན་པ་ཙམ་དུ་འགྱུར་བ་ཡིན་ཏེ། དེས་ན་ཟས་ལ་སོགས་པ་ཚོལ་བ་མ་ཡིན་ནོ། །གྱི་ནའི་ཞེས་བྱ་བ་ནི་ཟས་ངན་དོན་ལ་སོགས་པས་སོ། །དེ་ལྟ་ཡིན་དང་ཁ་ཟས་མེད་ཀྱང་ཡོངས་སུ་རྒྱས་པའི་མཚན་ཉིད་ཅན་ཡིན་པའི་ཕྱིར་དེའི་དོན་ནི་ཡོད་པར་སྲིད་དོ། །གལ་ཏེ་དོན་ཐམས་ཅད་བསྒོམས་པར་མི་ནུས་པའི་ཕྱིར་ན། དེ་ལ་ཐམས་ཅད་མཁྱེན་པ་ཉིད་ཇི་ལྟར་སྲིད་སྙམ་ན་སྐྱེ་བ་ཞེས་གསུངས་སོ། །དེས་ན་ནི་སྐྱོ་བ་གཞན་སོགས་རིགས་ནའོ། །འདི་ཉིད་གསལ་བར་བྱེད་པ་ནི་རྒྱུ་དང་ཞེས་བྱ་བའོ། །གལ་ཏེ་བསྒོམས་པ་ལས་བྱུང་བའི་ཤེས་པ་ནི་མུ་སྟེགས་པ་རྣམས་ལ་ཡང་བཤད་དོ་ཞེས་སྨྲས་ཟིན་པ་མ་ཡིན་ནམ་ཞེ་ན། དེ་ནི་ངེད་ཅག་ཅེས་བྱ་བའོ། །དངོས་པོ་རྣམས་ཀྱི་བདག་མེད་པ་ལ་སོགས་པ་རྟོགས་པ་ནི། རྣམ་པ་ཐམས་ཅད་བརྟན་ཞིང་འཁྲུལ་པ་ལ་མེད་པར་རྟོགས་པ་ནི་སྐྱོབ་པ་ཡིན་ནོ། །མུ་སྟེགས་པ་རྣམས་ཀྱི་ཡང་དེ་ལྟར་འགྱུར་བ་དེས་ན་ཡང་ཁྱད་པར་ཅི་ཞིག་ཡོད་སྙམ་ན། ཆགས་ལ་ཞེས་གསུངས་སོ། །དེ་ལྟར་ཞེས་བྱ་བ་ནི་སྐྱོབ་པ་ཇི་ལྟ་བར་རོ། །བཅོམ་ལྡན་འདས་ལ་དེ་འདྲ་བའི་མཁྱེན་པ་མངའོ་ཞེས་ཇི་ལྟར་ཤེས་སྙམ་ན། དེ་ལྟར་འགྱུར་བའི་ཞེས་བྱ་བ་སྟེ། ཚད་མས་དེ་ལྟར་འགྱུར་བའི་དོན་གསུངས་པའི་ཚིག་ལས་དེ་བྱེད་དེ། དེ་ཚིག་བྱེད་པ་པོ་མཁྱེན་པ་དང་ལྡན་པར་རྟོགས་སོ། །གལ་ཏེ་ཚིག་ཚད་མས་མི་སླུ་བ་དང་ཕན་པར་མཐོང་བ་དེ་ལྟ་ན་ཡང་མཁྱེན་པ་དེ་ལྟ་བུ་ཉིད་དུ་ཇི་ལྟར་འགྱུར་སྙམ་ན། ཤེས་པ་ཞེས་བྱ་བའོ། །ཚིག་གིས་སྤྲོས་པ་གང་ཡིན་པ་དེ་ནི་རང་རྟོགས་ཏེ། རང་གི་རྣམ་པར་བོད་པའི་རྗེས་སུ་འབྲངས་པས་ཡིན་གྱི་མངོན་དུ་མཐོང་བས་ནི་མ་ཡིན་ནོ་ཞེ་ན། འདི་ལ་བརྗོད་པ་ནི་རང་གི་རྟོག་པའི་རྗེས་སུ་འབྲང་བ་ཙམ་གྱིས་མ་ཡིན་གྱི། འོན་ཀྱང་བསྒོམ་པའི་ཤེས་པ་ཡང་དེ་ལ་མངའ་བ་ཡིན་ནོ། །ཡོད་པའི་དོན་ལ་ཚད་མས་འཐད་པའི་དོན་ལ་མ་གུས་པ་ནི་མ་ཡིན་ནོ། །དེས་ན་འཐད་པའི་དོན་དེ་བསྒོམ་པ་ཡང་ཡོད་པ་ཡིན་ནོ། །དེས་ན་ནི་བསྒོམས་པས་ནའོ། །དེ་ནི་ཞེས་བྱ་བ་ནི་དོན་ཐམས་ཅད་ཤེས་པའོ། །འདི་ལ་བརྗོད་པ་ནི་དེ་དག་འབད་པ་ཞེས་བྱ་བ་སྟེ། ཉན་ཐོས་ལ་སོགས་པ་དེ་དག་གོ །དེ་དག་གིས་ཐམས་ཅད་རིག་པ་ནི་འབད་པ་མ་བཅུག་གོ །དེ་གྲུབ་པར་གྱུར་པ་ན་ཞེས་བྱ་བ་ནི་འདོད་ཆགས་ལ་སོགས་པ་ཟད་པ་དེ་ཡོངས་སུ་
རྫོགས་པ་ནའོ། །གོང་དུ་ཞེས་བྱ་བ་ནི་ཐམས་ཅད་རིག་བ་བསྒྲུབ་པའི་ཡུལ་ལའོ། །ཡང་ཅི་དེ་དག་འབད་བ་མི་བྱེད་སྙམ་ན། ངལ་སོའི་བདེ་བ་ཐོབ་འདོད་པས་ཏེ། ངལ་སོས་པའི་མཚན་ཉིད་ཀྱི་བདེ་བ་གང་ཡིན་པ་སྟེ་ཐོབ་པར་འདོད་པས་སོ། །འོ་ན་ཇི་ལྟར་ཐམས་ཅད་ཀྱིས་ཀྱང་ཐམས་ཅད་མཁྱེན་པ་ཁོ་ན་ཐོབ་པར་བྱ་བ་ཡིན་ཞེས་རབ་ཏུ་སྨྲ་བ་ཡིན་སྙམ་ན། ཀུན་མཁྱེན་ཞེས་བྱ་བའོ། །བདག་ལ་ཞེས་བྱ་བ་ནི་རྣམ་པར་ཤེས་པའི་མཚན་ཉིད་ལའོ། །གལ་ཏེ་རྟོག་པ་མངོན་དུ་བྱས་པའི་རྣལ་འབྱོར་པ་དེ་དེ་ལས་ལྷག་པ་ཞེས་བྱ་བ་ཉོན་མོངས་པ་མེད་པའི་རྣམ་པར་ཤེས་པའི་རྒྱུད་ལས་ལྷག་པར་འདོད་ནའོ། །དེའི་ཚེ་འདི་ཉིད་ཉོན་མོངས་པ་མེད་པའི་རྣམ་པར་ཤེས་པའི་རྒྱུན་དེ་ལ་ཡང་གུས་པ་མེད་པ་སྟེ་དེ་ཆད་པའི་ཕྱིར་མི་འཛིན་པར་བྲལ་བར་འདོད་པ་ཇི་ལྟར་ཡིན་ཏེ་མ་ཡིན་ནོ། །དོན་འདི་ཡིན་ཏེ། རེ་ཞིག་གལ་ཏེ་དེས་མངོན་པར་འདོད་པར་བྱ་བ་གཞན་འགའ་ཞིག་ཡོད་ན་དེའི་ཚེ་དུས་སུ་མར་གོམས་པས་བསྐྱེད་པའི་གསལ་བ་དང་ལྡན་པ་ཉོན་མོངས་པ་མེད་པའི་རྣམ་པར་ཤེས་པའི་རྒྱུན་ནི་རྟག་པ་དང་ལྡན་པ་དེས་གཅིག་གཅད་པར་མི་འཐད་དེ། དེ་ཉིད་ལ་ཡོན་ཏན་གཞན་ལྷག་པར་བསྒྲུབ་པར་བྱ་བ་ཡིན་གྱི། དེ་ཆད་པ་ཉིད་དུ་གོ་ཅི་སྟེ་འདོད་དེ། རྟོག་པ་དང་མི་ཉན་པ་ཉིད་དུ་འགྱུར་བའི་ཕྱིར་རོ་ཞེས་བྱ་བ་ཡིན་ནོ། །འདི་ལ་བྲམ་ཟེ་དག་ཐར་པའི་གནས་སྐབས་ན་བདེ་བ་གཅིག་ཀྱང་མེད་པའི་ཕྱིར་ཐར་པ་ཉེ་བར་མཁོ་བ་མེད་དེ་ཞེས་སྟོན་པ་ནི། འདོད་ཆགས་དང་བྲལ་ལ་བུད་མེད་དང་ཞེས་བྱ་བ་ལ་སོགས་པའོ། །འདི་ལ་བརྗོད་པ་ནི་དེ་ནི་འདི་ལྟར་ཞེས་བྱ་བའོ། །འདི་ཀུན་ཞེས་བྱ་བ་ནི། ཆང་འཐུང་བ་ལ་སོགས་པའོ། །ཐར་པ་མེད་པ་ལ་ཞེས་བྱ་བ་ནི་བྲམ་ཟེ་རྣམས་ལའོ། །མ་ལ་སོགས་པའི་འདོམས་དང་འབྲེལ་པའི་བདེ་བ་ཡང་སོག་པོ་པར་ཚིག་མ་ཡིན་པ་ལ་མེད་དེ། དེས་ན་དེ་ཡང་བྲམ་ཟེ་དོན་དུ་གཉེར་བར་བྱ་བ་ཉིད་དུ་འགྱུར་རོ། །དེ་ཉིད་ཅེས་བྱ་བ་ནི། བདག་ཅག་ཀྱང་ཁྱད་པར་དུ་འཕགས་པའི་བདེ་བ་ཉིད་འདོད་པ་ཡིན་ན་བུད་མེད་འཁྱུད་པ་ལ་སོགས་པ་ནི་ཞི་བའི་བདེ་བ་ལ་ཁྱད་པར་དུ་འཕགས་པ་མ་ཡིན་ནོ། །དེས་ན་དེ་མེད་ཀྱང་གནོད་པ་འགའ་ཡང་མེད་དོ། །དེ་ལ་ཐམས་ཅད་མཁྱེན་པ་སྲིད་པར་བསྟན་པའི་ཕྱིར། ཐབས་སྟོན་པར་བྱེད་པ་ནི་ཐབས་ནི་ཞེས་བྱ་བའོ། །དེ་ཤེས་པ་ཡང་ཇི་ལྟ་བུ་ཡིན་ཞེས་བྱ་བ་དེ་ལ་བརྗོད་པ་ནི་ཐམས་ཅད་
རིག་པ་ཞེས་བྱ་བའོ། །དེ་བདག་ཅག་གིས་ཤེས་པ་ནི་མ་ཡིན་གྱི། དེ་ནི་རང་ཉིད་རྟོགས་པ་ཡིན་ཏེ། དེའི་རང་བཞིན་བསྟན་པ་ལ་སོགས་པ་རྗེས་སུ་བསྒྲུབས་པ་རྣམ་པ་དེ་འདྲ་བའི་དངོས་པོ་འཐོབ་པའི་ཕྱིར་རོ། །རྩོད་པ་གསུམ་པ་སྤང་བའི་དོན་དུ་བརྗོད་པ་ནི་ཐམས་ཅད་མཁྱེན་པ་ཡིན་ན་ཞེས་བྱ་བའོ། །གཞན་འདོད་ཆགས་དང་བྲལ་བའི་རྒྱུད་རིག་པའི་དུས་ན། དེས་འདོད་ཆགས་དང་བྲལ་བ་ཉིད་ཀྱང་རིག་པར་བྱ་བ་ཡིན་ནོ། །དེ་ལྟ་ཡིན་ན་འདོད་ཆགས་དང་བྲལ་བར་རིག་པ་དེ་ལ། འདོད་ཆགས་དང་བཅས་པའི་རྒྱུད་ཀྱིས་ཟིན་པའི་ཆགས་པ་ཅན་ཉིད་ཀྱང་རིག་པར་བྱ་བར་འགྱུར་རོ། །དེ་ལྟར་ཡིན་དང༌། རྣལ་འབྱོར་བ་དེ་ལ་གཉི་ག་ཡང་ཡོད་དོ་ཞེས་བྱ་བའོ། །ཤིན་ཏུ་འགྲིགས་པར་དཀའོ། །འདོད་ཆགས་དང་འདོད་ཆགས་མེད་པ་དག་དུས་གཅིག་ཏུ་མི་སྲིད་པའི་ཕྱིར་རོ། །གཉི་ག་ཡང་ཞེས་བྱ་བ་ནི་འདོད་ཆགས་དང་ཆགས་བྲལ་བསྐལ་པ་གཉི་ག་ཡང་དེའི་ཚེ་ཉིད་ཡོད་པ་ཡིན་ཞེ་ན། འདི་འགོག་པ་ནི་གཅིག་ཀྱང་ཞེས་བྱ་བའོ། །གཞན་གྱི་ཆགས་པ་དང་བྲལ་བ་གཅིག་གིས་ཀྱང་ཐམས་ཅད་མཁྱེན་པའི་རྒྱུད་གང་ཡིན་པ་ཟིལ་གྱིས་མནན་པ་དེ་མེད་ན། ཐམས་ཅད་མཁྱེན་པ་དེ། འདོད་ཆགས་ཅན་དུ་ཇི་ལྟར་འདོད། །འོ་ན་ཇི་ལྟར་གཞན་གྱིས་ཆགས་པ་སོགས་རིག་སྙམ་ན། བཏང་སྙོམས་པར་ནི་ཞེས་བྱ་བའོ། །ཇི་ལྟར་ཞེས་བྱ་བ་ནི་འདོད་ཆགས་ཅན་དུའོ། །དེ་ནི་ཞེས་བྱ་བ་ནི་རྣལ་འབྱོར་པའི་སྟེ། གཞན་གྱིས་འདོད་ཆགས་ལ་སོགས་པ་རིག་པར་ཇི་ལྟར་རྣམ་པར་གཞག་རང་གི་ངོ་བོར་འགྱུར་པའི་འདོད་ཆགས་རིག་ན་ནི་བདག་ཉིད་ཀྱི་འདོད་ཆགས་སུ་གྱུར་ན་དེ་ནི་བདག་ཉིད་ཀྱི་ཡང་མ་ཡིན་ནོ། །དེས་རང་གི་ངོ་བོར་གྱུར་པའི་འདོད་ཆགས་རིག་པ་ནི་མ་ཡིན་ནོ། །འོ་ན་ཇི་ལྟར་གཞན་གྱི་འདོད་ཆགས་སུ་འགྱུར་སྙམ་ན་དེ་ཉིད་ཅེས་སྨོས་ཏེ། རང་ཉིད་ཀྱིས་རིག་བཞིན་པའོ། །འདི་ལྟར་ཞེས་བྱ་བ་ལ་སོགས་པས་ནི་སུན་འབྱིན་པ་གཉི་ག་ཡང་མདོར་བསྡུས་ནས་སྟོན་ཏེ། དེ་ཉིད་དུ་ཞེས་བྱ་བ་ནི་རང་གི་ངོ་བོར་རོ། །ལུས་དག་རྣམ་པར་འགྱུར་བ་ཉིད་དུ་ཅི་སྟེ་མི་འགྱུར་སྙམ་ན། གང་གི་ཕྱིར་འདོད་ཆགས་ལ་སོགས་པའི་བག་ཆགས་ནི་གཞན་གྱི་རྒྱུད་ལ་གནས་པ་ཡིན་པ་དེས་ལུས་དང་ངག་རྣམ་པར་འགྱུར་བ་མ་ཡིན་ནོ། །རྒྱུད་གང་ལ་འདོད་ཆགས་ལ་སོགས་
པའི་བག་ཆགས་ཡང་པ་དེ་ཉིད་ལ་ལུས་དང་ངག་དང་རྣམ་པར་འགྱུར་བར་བྱེད་པ་ཡིན་ནོ། །གཉི་ག་ཡང་ནི་ཞེས་བྱ་བ་ནི་ལུས་དང་ངག་གི་རྣམ་པར་འགྱུར་བ་དག་གོ །གོམས་པའི་འདུ་བྱེད་གང་ཡིན་པ་དེ་ཉིད་བག་ཆགས་ཡིན་ནོ། །དེ་ལ་ཞེས་བྱ་བ་དེ་ལྟར་གནས་པ་ན་སྟེ། གོམས་པའི་འདུ་བྱེད་ཡོད་ན་རྣལ་འབྱོར་པ་དེ་ལ་བག་ཆགས་མེད་པར་ཇི་ལྟར་འགྱུར། འོན་ཏེ་བསྒོམ་པ་ཡོད་པ་དེ་ལྟར་ན་ཡང་བག་ཆགས་མེད་པ་ཁོ་ན་ཡིན་ཏེ། འདི་གཉིས་ཐ་དད་པའི་ཕྱིར་རོ་སྙམ་དུ་དོགས་པ་བསུ་ནས་བརྗོད་པ་ནི་གོམས་པ་དང་ཞེས་བྱ་བའོ། །འདོད་ཆགས་ལ་སོགས་པའི་གོ་བར་བྱེད་པ་བ་སྦུ་ལྡང་བ་ལ་སོགས་པ་གང་ཡིན་པ་དེའི་ཁྱད་པར་མཐར་ཕྱིན་པར་རྟོགས་པ་ན། གཞན་གྱི་སེམས་འདོད་ཆགས་ལ་སོགས་པ་གང་ཡིན་པ་དེའི་ཁྱད་པར་སྣང་བར་འགྱུར་བ་ཡིན་ནོ། །གང་གིས་ཉེས་པ་འདིར་འགྱུར་བ་དེ་ལ་འདོད་ཆགས་ལ་སོགས་པ་ཉིད་ནི་སྣང་བ་མ་ཡིན་ནོ་ཞེས་དགོངས་པའོ། །དེ་ལ་ནི་ཞེས་བྱ་བ་ནི་འདོད་ཆགས་ལ་སོགས་པ་གོ་བར་བྱ་བ་ནི་རྟགས་ཀྱི་ཁྱད་པར་གང་ཡིན་པ་དེ་ཉེ་བར་འཚེ་བ་ལ་སྟེ། ཉེ་བར་མཚོན་པའི་རྒྱུ་མཚན་དུ་སྒོམ་པའི་བྱེད་པ་འཇུག་པ་ཡིན་གྱི་དེ་ལ་ཞེས་བྱ་བ་རྟགས་ཀྱི་ཁྱད་པར་བསྒྲུབ་པའི་དུས་ན་གོ་བར་བྱ་བའི་དོན་གྱི་བསྒོམ་པ་གང་ཡིན་པ་དེའི་བྱེད་པ་ནི་ཡོད་པ་མ་ཡིན་ནོ། །ཡང་ན་གོ་བར་བྱ་བ་བསྒོམ་པ་ནི་ཡོད་ཀྱང་བདག་ཉིད་ཀྱང་འབྲེལ་པར་ནི་སྒོམ་པར་བྱེད་པ་འཇུག་པ་མ་ཡིན་ཏེ་རྒྱུ་དེས་ནའོ། །དེ་ལ་ཞེས་བྱ་བ་ནི་འདོད་ཆགས་ལ་སོགས་པ་ལའོ། །འདིའི་སྟེ་རྣལ་འབྱོར་པའི་ལས་ལས་སྐྱེས་པའི་དབང་པོས་མི་གཙང་བ་ལ་སོགས་པ་རིག་ན། མི་གཙང་སོགས་བཅས་འགྱུར་ཏེ་གོམས་པའི་སྟོབས་ལས་འབྱུང་བའི་དབང་པོ་གཞན་དག་གི་རིག་པ་ནི། མི་གཙང་བ་ལ་སོགས་པ་དང་བཅས་པར་འགྱུར་བ་ཡིན་ནོ་དེ་ནི་ཞེས་བྱ་བ་རྨི་ལམ་མོ། །མི་སླུ་བ་ཉིད་བསྟན་པའི་ཕྱིར་བརྗོད་པ་ནི་གང་ཚེ་ཞེས་བྱ་བའོ། །དེའི་ཚེ་ཞེས་བྱ་བ་ནི་དུས་དེ་རྨི་ལམ་དེ་ལྟར་རྨིས་པའི་དུས་ནའོ། །དེའི་སྒྲ་གཉིས་པ་ནི་གང་གི་ཚེ་སྒྲ་ལ་ལྟོས་ཏེ་སྦྱར་བར་བྱའོ། །ཁྱེད་ལ་ཡང་ནི་བྲམ་ཟེ་ལ་ཡང་ངོ༌། །བསྟན་བཅོས་ནི་ཚད་དང་བཅས་པའི་ཕྱིར་ན། སྐད་ཅིག་གཅིག་ཁོ་ན་ལ་དེའི་དོན་སྣང་བར་རུང་གི་རྣལ་འབྱོར་པས་རིག་པར་བྱ་བ་གང་ཡིན་པ་དེ་ནི་ཐོག་མ་དང་ཐ་མ་མེད་པ་ཡིན་ན། དེ་སྐད་ཅིག་གཅིག་
གིས་རིག་པར་ཇི་ལྟར་འགྱུར་ཞེ་ན། འདི་ལ་བརྗོད་པ་ནི་ཚད་དང་ཞེས་བྱ་བའོ། །བསྟན་བཅོས་ཚད་དང་ལྡན་པ་ཞེས་བྱ་བ་དེ་ཙམ་གྱིས་ནི། དེའི་དོན་མཐའ་དག་སྣང་བ་ཞེས་བྱ་བ་ནི་མ་ཡིན་གྱི། འོན་ཀྱང་གོམས་པ་ལས་ཡིན་ནོ། །གོམས་པ་ནི་དོན་ཐམས་ཅད་རིག་པ་ལ་ཡང་སྲིད་པ་ཡིན་ནོ་ཞེས་དགོངས་པའོ། །འདི་ལ་གཞན་གྱིས་བརྗོད་པ་ནི་བསྟན་བཅོས་ཀྱི་ཞེས་བྱ་བའོ། །དོན་འདི་ཡིན་ཏེ་སྔར་ཉམས་སུ་མྱོང་བ་ལ་སྣང་བ་གང་ཡིན་པ་དེ་ཉིད་ཕྱིས་དྲན་པ་ལ་སྣང་བ་ཡིན་གྱི། །སྔ་ན་མེད་པ་ནི་སྣང་བ་མ་ཡིན་ནོ། །ཉམས་མྱོང་ལས་ནི་དྲན་པ་འབྱུང༌། །ཞེས་བྱ་བ་ལུགས་ཡིན་པའི་ཕྱིར་རོ། །དེས་ན་མ་འོངས་པ་ལ་སོགས་པས་རིག་པ་ནི་རྣམ་པ་ཐམས་ཅད་དུ་མི་སྲིད་དོ་ཞེས་བྱ་བ་ཡིན་ནོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །གཞན་ཡང་ཞེས་བྱ་བ་ནི་སྣང་བ་ཡང་ངོ༌། །གལ་ཏེ་དངོས་པོ་རྣམས་ལ་ཡང་འབྲེལ་པ་ཡོད་པ་ཉིད་མ་ཡིན་ནམ། དེས་གཅིག་འགའ་ཞིག་སྣང་བ་ན་སྔ་ན་མེད་པ་ཡང་སྣང་བར་འགྱུར་རོ་ཞེས་དོགས་པ་བསུ་ནས་ཕ་རོལ་པོ་ཉིད་ཀྱིས་སྨྲས་པ་ནི། ཐོག་མ་དང་ཐ་མ་མེད་པའི་ཞེས་བྱ་བའོ། །འདི་ལ་བརྗོད་པ་ནི་ཐམས་ཅད་མཚུངས་ཞེས་བྱ་བའོ། །འདི་ཉིད་གཞུང་འཛུགས་པ་ནི་འདི་ལྟར་ཞེས་བྱ་བའོ། །དོན་རྣམས་ལ་ཞེས་བྱ་བ་ནི་བསྟན་བཅོས་ཀྱིས་བརྗོད་པར་བྱ་བའི་དོན་རྣམས་ལའོ། །ཐ་སྙད་ལ་ཡང་ཞེས་བྱ་བ་ཐ་སྙད་དུ་བྱས་པས་ཐ་སྙད་དེ། འཇིག་རྟེན་གསུམ་ན་ཡོད་པའི་དོན་གྱི་ཚོགས་མཐའ་དག་གོ །དེ་ལ་ཡང་རྒྱུ་དང་འབྲས་བུའི་འབྲེལ་པ་དེ་ནི། ཇི་ལྟར་ཡོད་པ་མ་ཡིན་ཏེ་ཡོད་པ་ཁོ་ནའོ། །འདིའི་ནི་འཇིམ་པ་ལ་སོགས་པའིའོ། །འདི་ཡིན་ཏེ་ཞེས་བྱ་བ་ནི་བུམ་པ་ལ་སོགས་པའོ། །སྔ་མ་ཞེས་བྱ་བ་ནི་རྒྱུའོ། །སྐྱེ་བ་སྔ་མ་ལ་སོགས་པ་རིག་པར་གྱུར་པ་ན་ཡང་ཕན་ཚུན་འབྲེལ་པའི་དངོས་པོ་གང་ཡིན་པ་དེ་རྣམ་པ་ཐམས་ཅད་ཀྱི་རིག་པ་ཡིན་ལ། སྐྱེ་བ་སྔ་མ་ཤེས་པ་ལས་བསྐལ་བ་ཡང་རིག་པ་ཡིན་ནོ།། དེ་ལྟ་ན་བསྐལ་བ་ནས་བསྐལ་པ་གཞན་སྐྱེ་བ་ན། རྒྱུ་དང་འབྲས་བུའི་དངོས་པོར་རིག་པ་སྲིད་པ་ཡིན་ནོ། །དེས་ན་འགྲོ་བ་ཀུན་གྱིས་དེ་ཉིད་དེ་རང་བཞིན་རིག་ལ། རང་བཞིན་དེའི་ནང་གི་ཁྱད་པར་བདེ་བ་དང་སྡུག་བསྔལ་ལ་སོགས་པའི་སྒྲུབ་བྱེད་དུ་རྣམ་པར་གནས་པ་རིག་པ་ཡིན་ནོ། །དེས་ན་
ཐམས་ཅད་རིག་པ་སྲིད་པ་ཉིད་དོ། །དེ་ཉིད་མཇུག་སྡུད་པ་ནི། དེ་ལྟར་དེ་བཤད་ཟིན་པའི་ཚུལ་གྱིས་དོན་ཐམས་ཅད་རིག་པ་བསྟན་པ་ཡིན་ནོ། །ཅི་ཞིག་བྱས་ནས་ཤེ་ན། ལུགས་ཀུན་ཏེ་བྲམ་ཟེ་ལ་སོགས་པའི་འདོད་པ་སྤངས་ནས་སོ། །སངས་རྒྱས་པ་འདིར་གཞུང་གང་ཡིན་པ་དེའི་རྗེས་སུ་འབྲངས་ཏེ། མཆོག་སྟེ་དམ་པར་གྱུར་པ་དེ་ཉེ་བར་མཁོ་བའི་ཐམས་ཅད་མཁྱེན་པ་གང་ཡིན་པ་དེ་ཡང་གཞན་དག་གིས་བདེ་བླག་ཏུ་རྟོགས་པར་བྱའོ། །མཐའ་དག་མཁྱེན་པ་སྒྲུབ་པ་ན། ཉེ་བར་མཁོ་བ་རིག་པ་ཡང་བདེ་བླག་ཏུ་འགྲུབ་པ་ཡིན་ནོ་ཞེས་དགོངས་པའོ། །རྣམ་འགྲེལ་ལ་འཇུག་པར་བྱ་བའི་དོན་དུ་གལ་ཏེ་ཞེས་བརྗོད་དོ། །གཞན་དུ་ན་ཞེས་བྱ་བ་ནི་དོན་དངོས་སུ་གསལ་བ་མེད་པ་ནི། གལ་ཏེ་མི་གསལ་བའི་རྣམ་པས་རྗེས་སུ་བྱེད་པ་ཡང་མེད་ན་ནི། དོན་དེ་ལ་ཚད་མ་ཉིད་དུ་མི་འགྱུར་རོ་ཞེས་དོགས་པ་བསུ་ནས་ཕ་རོལ་པོ་ཉིད་ཀྱིས་བརྗོད་པ་ནི། འོ་ན་ཞེས་བྱ་བ་སྟེ། རང་གི་ངོ་བོ་ལ་ཡང་རྣམ་པ་མི་གསལ་བ་ཉིད་འདོད་པར་བྱའོ་ཞེ་ན། འདི་འགོག་པ་ནི་མ་ཡིན་ཏེ་ཞེས་བྱ་བའོ། །དོན་ལ་ནི་དེ་ལྟ་མ་ཡིན་ནོ་ཞེས་བྱ་བ་ནི་ཇི་ལྟར་རྣམ་པར་རྟོག་པའི་རྣམ་པར་ཤེས་པ་ལ་རྣམ་པར་སྣང་བ་དེ་ལྟར་དོན་ནི་མ་ཡིན་ནོ། །གང་གི་ཕྱིར་དེ་ལྟར་ཡིན་པ་དེས་ན། རྣམ་པ་གསལ་བ་རང་གི་ངོ་བོར་གྱུར་པ་ནི། རང་རིག་པས་རིག་པའི་ཕྱིར། རང་གི་ངོ་བོ་ལ་རྣམ་པར་མི་རྟོག་པ་ཡིན་ལ་དོན་ལ་ནི་རྣམ་པར་མི་གསལ་བའི་ཕྱིར། རྣམ་པར་རྟོག་པ་དང་བཅས་པ་ཡིན་ནོ། །དེ་ལྟར་དེ་རྣམ་པ་འདིས་ན་དྲན་པ་ཞེས་གྲགས་པའི་རྣམ་པར་ཤེས་པ་གང་ཡིན་པ་དེ་ནི་དོན་དྲན་པ་ཡིན་ལ། རང་གི་ངོ་བོ་ལ་ནི་མངོན་སུམ་ཡིན་ནོ། །འདི་ལ་གཞན་གྱིས་རང་གི་ངོ་བོ་ལ་ཞེས་གསུངས་སོ། །ལན་ནི་རང་གི་ངོ་བོ་ནི་ཞེས་བྱ་བ་སྟེ། རང་གི་ངོ་བོ་ཁོ་ནས་རིག་པར་བྱ་བ་ཡིན་པའི་ཕྱིར་རོ། །གཞན་གྱིས་དོན་ནི་མྱོང་བ་གཞན་གྱིས་རིག་པའི་ཕྱིར་རོ། །གལ་ཏེ་དེ་ལྟ་ཡིན་མོད། དེ་ལྟ་ན་རང་གི་ངོ་བོ་ལ་ནི་མ་འཁྲུལ་པ་ཡིན་ལ། དོན་ལ་ནི་འཁྲུལ་པ་ཡིན་ནོ་ཞེས་བྱ་བའི་རྣམ་པར་དབྱེ་བར་ཇི་ལྟར་འགྱུར་ཞེ་ན། དེའི་ཕྱིར་དེས་བྱ་བ་མྱོང་བ་གཞན་གྱིས་སོ། །རྣམ་པ་གཞན་དུ་ཞེས་བྱ་བ་ནི་མི་གསལ་བའི་རྣམ་པར་རོ། །འོན་ཏེ་རང་གི་ངོ་བོ་ལ་འཁྲུལ་པ་མ་ཡིན་མོད། རྟོག་པ་གོ་ཅི་སྟེ་མ་ཡིན་ཞེས་དོགས་པ་བསུ་ནས་འཁྲུལ་པ་ཉིད་བཟློག་པ་ཉིད་ཀྱིས་རྟོག་པ་ཡང་བཟློག་པར་འགྲུབ་བཞིན་དུ་
ཁས་བླངས་ཀྱང་བརྗོད་པ་ནི། རང་གི་ངོ་བོ་ལ་ནི་ཞེས་བྱ་བའོ། །དེ་ནི་རང་གི་ངོ་བོའི། །གང་ཞིག་སྔར་ཡོད་པ་དང་རིག་པ་དེ་ཉིད་དྲན་པར་འགྱུར་བ་ཡིན་ནོ། །རང་གི་ངོ་ནི་དེ་ལྟར་མ་ཡིན་ནོ་ཞེས་དགོངས་པའོ། །འོན་ཏེ་རང་གི་ངོ་བོ་ཡང་སྔར་ཡོད་པ་ཁོ་ན་ཡིན་ནོ་སྙམ་ན་གལ་ཏེ་ཞེས་སྨོས་སོ། །དེ་ཉིད་ཀྱི་སྔ་མས་སོ། །འདོད་ཅེས་བྱ་བ་ནི་མངོན་སུམ་ཉིད་དུའོ། །དོན་ལ་ནི་མངོན་སུམ་ཉིད་དུ་འདོད་པ་མ་ཡིན་ཏེ། དེ་ལ་ནི་རྣམ་པར་རྟོག་པའི་རྒྱུའི་ཕྱིར་རོ། །བཤད་དོ་ཞེས་བྱ་བ་ནི་སློབ་དཔོན་ཕྱོགས་ཀྱི་གླང་པོས་སོ། །འོན་ཏེ་གང་གི་ཚེ་གཞན་གྱིས་རང་གི་ངོ་བོ་འཛིན་པ་དེའི་ཚེ་དེས་སྒྲ་དང་འདྲེས་པ་ཉིད་དུ་འཛིན་པའི་ཕྱིར། རྣམ་པར་རྟོག་པ་དང་བཅས་པར་འགྱུར་རོ་སྙམ་ན་དེ་ཉིད་ཀྱིས་ཞེས་སྨོས་ཏེ། རང་གི་ངོ་བོ་ཉིད་ཀྱིས་སོ། །དེ་ཞེས་བྱ་བ་རང་གི་ངོ་བོའོ། །གཞན་གྱིས་གཟུང་བ་ནི་དེ་མངོན་དུ་བྱེད་པར་མི་འགྱུར་རོ་ཞེས་བྱ་བར་བསམས་པའོ། །གཞན་གྱི་ཡང་ཞེས་བྱ་བ་ནི་རྣམ་པར་མི་རྟོག་པའིའོ། །སྤྱི་མ་ཡིན་ལ་ཞེས་བྱ་བ་ནི་གཞན་གྱིས་བསམས་པའོ། །མངོན་པར་ཞེན་པའི་ཡུལ་ནི་གཅིག་ཏུ་མངོན་པར་ཞེན་པའོ། །དེ་མ་ཡིན་པ་ནི་རང་གི་ལུས་ཀྱིས་སོ། །གལ་ཏེ་རང་གི་ངོ་བོ་སྒྲའི་དོན་མ་ཡིན་མོད། དེ་ལྟ་ན་ཡང་དེ་འཛིན་པ་རྣམ་པར་རྟོག་པར་ཇི་ལྟར་མི་འགྱུར་ཞེ་ན། རྟོག་པའི་སྒྲའི་དོན་ཞེས་སྨོས་སོ། །དེའི་ཕྱིར་ཞེས་བྱ་བ་ནི་སྒྲའི་དོན་འཛིན་པ་མེད་པའི་ཕྱིར་རོ། །བཏང་བའི་ཕྱིར་ཞེས་བྱ་བ་ནི། གང་གི་ཚེ་རྟོག་པའི་ཤེས་པ་ལ་སྣང་བའི་དངོས་པོ་གང་ཡིན་པ་དེའི་རང་བཞིན་དོར་པའི་ཕྱིར་གཞན་ཐོབ་པའི་དེའི་ཚེ་སྔར་མི་གསལ་བར་འགྱུར་མོད། རང་གི་ངོ་བོ་འདོར་བ་མེད་པ་ཁོ་ན་ཡིན་པ་དེས་ན། རང་གི་ངོ་བོ་ཡང་མི་གསལ་བར་འགྱུར་ཞེས་བྱ་བའི་དོན་ཏོ། །རང་རིག་པ་མེད་མོད་ཅི་སྐྱོན་སྙམ་ན། དེ་ལྟ་དེ་ལྟ་ན་ནི་ཞེས་བྱ་བའོ། །དེ་ལ་ཡང་ཞེས་བྱ་བ་ནི་དོན་གྱི་རང་བཞིན་ལ་ཡང་ངོ༌། །དེ་ཡང་ཞེས་བྱ་བ་ནི་དོན་གྱིས་གོ་བ་གཞན་ཡང་ངོ༌། །དེ་ལྟ་ཡིན་པས་ཞེས་བྱ་བ་ནི། དོན་གྱིས་གོ་བས་ཤེས་པར་བྱ་བ་ཡིན་པས་སོ། །གཞན་ཡང་དོན་མྱོང་བ་གྲུབ་པ་ན། ཕྱིས་དོན་གྱིས་གོ་བས་བསྒྲུབ་པའམ། འོན་ཏེ་མ་གྲུབ་པ་ན་དང་པོ་ལ་བརྗོད་པ་ནི་གལ་ཏེ་ཞེས་བྱ་བའོ། །གལ་ཏེ་དོན་གྲུབ་ན་དོན་གྱིས་གོ་བ་གྲུབ་པ་ཡིན་གྱི་དོན་མྱོང་བ་གྲུབ་པ་ནི་མ་ཡིན་ཏེ་དེ་ནི་གྲུབ་པར་བྱ་བ་
ཡིན་པའི་ཕྱིར་རོ་ཞེས་དོགས་དོན་གྲུབ་པ་དེ་གང་ཡིན་ཞེས་བྱ་བའོ། །གལ་ཏེ་སྐྱེ་བ་ཉིད་དོན་གྲུབ་པ་ཡིན་ན། དེའི་ཚེ་དོན་ཐམས་ཅད་སྐྱེ་བ་ཡིན་པའི་ཕྱིར་ཐམས་ཅད་འགྲུབ་པར་འགྱུར་རོ། །དེ་ལྟ་ན་ཡང་དོན་གྱིས་གོ་བས་ཐམས་ཅད་ཤེས་པས་འགྲུབ་པར་འགྱུར་རོ། །འོན་ཏེ་དོན་ཤེས་པ་འགྲུབ་པ་ཡིན་ན། དེའི་ཚེ་དོན་འདིར་འགྱུར་ཏེ་ཞེས་བྱ་བའོ། །འདི་ལ་བརྗོད་པ་མིག་གི་བྱེད་པ་ཡོད་ན་ཞེས་བྱ་བའོ། །འདི་ཞེས་བྱ་བ་ནི་སྣང་བའོ། །ད་ནི་གྲངས་ཅན་གྱི་ལུགས་འགོད་པ་ནི་རྣ་བ་ཞེས་བྱ་བའོ། །རྣ་བ་ལ་སོགས་པའི་འཇུག་པ་ཞེས་བྱ་བ་ནི་རྣ་བ་ལ་སོགས་པ་རྣམས་ཀྱི་ཡུལ་ལ་མངོན་དུ་ཕྱོགས་པའི་ཁྱད་པར་ཡང་རྣ་བ་ལ་སོགས་པའི་འཇུག་པ་ཞེས་བརྗོད་དེ། དེ་ལྟ་བུའི་རྣ་བ་ལ་སོགས་པའི་འཇུག་པའི་ཤེས་པའི་མཚན་ཉིད་ཀྱི་རྣ་བ་ལ་སོགས་པའི་འཇུག་པ་ཤེས་སོ་ཞེས་བྱ་བའི་དོན་ཏོ། །འདིར་ཡང་མ་གྲུབ་ན་དབང་པོ་རྣམས་ཀྱིས་དེ་ལ་མངོན་པར་ཕྱོགས་པ་ཡང་མི་གྲུབ་པོ་ཞེས་བྱ་བ་ཡལ་བར་དོར་ནས་གཞན་བརྗོད་པ་ནི། རྣ་བ་ལ་སོགས་པའི་འཇུག་པ་ནི་མངོན་སུམ་ཡིན་ཏེ། རྒྱུ་དེས་ན་རྣ་བ་ལ་སོགས་པའི་འཇུག་པ་དེ་ནི་ཤེས་ན་ཤེས་པ་གོ་གང་ལས་ཤེས་པ་ཡིན། མངོན་དུ་ཕྱོགས་པའི་མཚན་ཉིད་ཀྱི་རྣ་བ་ལ་སོགས་པའི་འཇུག་པ་ནི། གང་དུ་ཡང་ཤེས་པ་དང་འབྲེལ་པར་མི་གྲུབ་པོ་ཞེས་པ་ནི་ཐམས་ཅད་ཀྱི་ཚེ་ལྐོག་ཏུ་གྱུར་པའི་ཕྱིར་རོ། །དེས་ན་དེ་ལ་ཤེས་པ་གང་ལ་འགྲུབ་ཅེས་དགོངས་པའོ། །གཞན་གྱིས་དེ་ལྟ་མ་ཡིན་ན་ཞེས་བརྗོད་དེ། གལ་ཏེ་རྣ་བ་ལ་སོགས་པའི་འཇུག་པ་ལ་ཤེས་པ་ཤེས་པར་བྱ་བ་མ་ཡིན་ན། དེའི་ཚེ་རྣ་བ་ལ་སོགས་པའི་འཇུག་པས་ཅི་བྱ་ཞེ་ན། འདི་ལ་བརྗོད་པ་ནི་ཅི་ཞེས་བྱ་བའོ། །གཞན་དུ་ཞེས་བྱ་བ་ནི་གལ་ཏེ་ དགོས་པ ་མེད་པ་མི་འབྱུང་ན། ཁྱེད་ཀྱི་ དགོས་པ ་མེད་པར་དངོས་པོ་འབྱུང་བར་མི་འགྱུར་བ་ཞིག་ན། འབྱུང་བ་ཡང་ཡིན་ཏེ། དེས་ན་གལ་ཏེ་རྣ་བ་མངོན་དུ་ཕྱོགས་པར་འགྱུར་མོད། དེ་ལྟ་ན་ཡང་ཤེས་པ་ལ་ཡང་ཅི་ཞིག་འོངས། གལ་ཏེ་ཞེས་བྱ་བ་ལ་སོགས་པ་ནི་གཞན་གྱིའོ། །ལན་ནི་གལ་ཏེ་ཞེས་བྱ་བའོ། །དེ་ལྟ་ན་ཡང་ཞེས་བྱ་བ་ནི་ཤེས་པ་སྐྱེས་ཀྱང་ངོ༌། །དེ་ཞེས་བྱ་བ་ནི་ཤེས་པ་སྐྱེ་བའོ། །འོན་ཏེ་རྨི་ལམ་གྱི་ཤེས་པ་སླུ་བ་དང་བཅས་པ་དེ་ཇི་ལྟར་མངོན་སུམ་དུ་འགྱུར་སྙམ་དུ་དོགས་པ་བསུ་ནས་མི་སླུ་བ་ཡང་
ཞེས་སྨྲས་སོ། །འདི་ནི་མེད་དེ་ཞེས་བྱ་བ་ལ་སོགས་པས་ནི་རྣམ་འགྲེལ་འདིས་སློབ་དཔོན་ཕྱོགས་ཀྱི་གླང་པོའི་གཞུང་འཕངས་པ་ཡིན་ནོ་ཞེས་བསྟན་ཏོ། །དེ་བཤད་པ་ཞེས་བྱ་བ་ནི་རྣམ་པ་བཞི་ཉིད་བརྗོད་པའི་རྟེན་ཏ་དབང་པོ་ལ་སོགས་པ་རྣམས་རབ་རིབ་ལ་སོགས་པས་བསླད་པ་དེ་ལས་བྱུང་བ་གང་ཡིན་པ་དེ་ཐམས་ཅད་ནི་རྟོག་པ་མེད་པ་གཅིག་ཡིན་ནོ། །དོན་གཞན་རེག་པ་སྒྲོ་འདོགས་པ་དེའི་ཕྱིར་དང༌། དེའི་ངོ་བོར་ཞེས་བྱ་བ་ཡན་ལག་ཅན་གྱི་རྣམ་པར་རྟོག་པས་འཇུག་པའི་ཕྱིར་རོ། །སློབ་དཔོན་ཕྱོགས་ཀྱི་གླང་པོའི་གཞུང་འདི་འཆད་པ་ནི་འོད་ཟེར་ཞེས་བྱ་བའོ། །ཤེས་པ་སྔ་མ་སྔ་མས་བརྟགས་པའི་ཡན་ལག་ཅན་གྱི་རྫས་ཀྱང་བརྟགས་པ་སྟེ། སྒྲོ་བཏགས་པའི་ཕྱིར་རོ། །གལ་ཏེ་ཡང་རྟོག་པའི་མཚན་ཉིད་ཐ་མི་དད་པ་དེ་ལྟ་ན་ཡང་མཚན་ཉིད་གཅིག་དང་ལྡན་པའི་དཔེར་བརྗོད་པ་སྣ་ཚོགས་པ་སྟོན་པ་ཡིན་ནོ་སྙམ་ན། དུ་མ་ཙམ་ཞེས་སྨྲས་སོ། །ཧ་ཅང་ཐལ་བ་ནི་རྟོག་པ་ཐམས་ཅད་སྟོན་པར་ཐལ་བའོ། །དགོས་པ་ཞེས་བྱ་བ་ནི་དཔེར་བརྗོད་པ་དུ་མའིའོ། །ཚིག་དང་པོ་ཞེས་བྱ་བ་ནི་དབང་པོ་དང་དོན་ཕྲད་པ་ལས་བྱུང་བ་ཞེས་བྱ་བ་འདིས་སོ། །དེ་ནི་ཞེས་བྱ་བ་ནི་ཟབ་གཉིས་ཀྱི་ཤེས་པའོ། །སྒྲུབ་བྱེད་ཡིན་ཕྱིར་ཞེས་བྱ་བ་ནི་དཔེ་ཡིན་པའི་ཕྱིར་རོ། །ཡང་ཇི་ལྟར་ན་དཔེ་གྲུབ་ དགོས་སྙམ་ན། མ་གྲུབ་པས་ནི་ཞེས་གསུངས་སོ། །འདིར་ཞེས་བྱ་བ་ནི་དབང་པོ་ལས་སྐྱེས་པ ་ཉིད་ལའོ། །གལ་ཏེ་དབང་པོ་ལས་སྐྱེས་པ་ཉིད་ལ་གཞན་གྱི་འཁྲུལ་པའི་རྒྱུ་ཡོད་ན་དེའི་ཚེ་འཁྲུལ་པ་དེ་བཟློག །བསྒྲུབ་པར་བྱ་བ་འགྱུར་བ་ཞིག་ན། ཡོད་པ་ཡང་མ་ཡིན་ནོ། །དེས་ན་ཅི་ཞིག་སྒྲུབ་ཏུ་ཡོད་ཅེས་བྱ་བའི་ཐ་ཚིག་གོ །འོན་ཏེ་ཆུ་ནི་སྒྲོ་འདོགས་པ་ཉིད་ཡིན་པས་དེ་ཇི་ལྟར་རྣམ་རྟོག་ཡིན་ཞེ་ན། ཆུ་ནི་ཞེས་སྨོས་སོ། །ཡོད་པའི་ཕྱིར་ཞེས་བྱ་བ་ནི་སྔར་ཡོད་པའི་ཕྱིར་རོ། །བཟློག་པ་ཉིད་སྟོན་པ་ནི་སྒྲོ་བཏགས་པ་ནི་ཞེས་བྱ་བའོ། །གཉི་གར་ནི་ཡན་ལག་ཅན་དང་ཆུ་ལའོ། །གཉི་ག་ནི་སྒྲོ་འདོགས་པ་དང་རྣམ་པར་རྟོག་པའོ། །དེར་ཞེས་བྱ་བ་ནི་སྒྲོ་འདོགས་པ་དང་རྣམ་པར་རྟོག་པ་དེར་རོ། །དེ་དག་ཉིད་ཅེས་བྱ་བ་ནི་སྒྲོ་འདོགས་པ་དང་རྣམ་པར་རྟོག་པ་དག་གོ །དེས་ཞེས་བྱ་བ་ནི་ཉེ་བར་གནས་པའི་རང་བཞིན་གྱིས་སོ། །རྗེས་སུ་དཔག་པ་ཉིད་བརྗོད་པ་ནི་ཇི་ལྟར་ཞེས་བྱ་བ་ལ་
སོགས་པའོ། །དེ་ལ་ཞེས་བྱ་བ་ནི་ཉམས་སུ་མྱོང་བ་དྲན་པ་ལའོ། །ལྟོས་པའི་རྗེས་སུ་འབྲང་བ་སྟེ་རག་ལས་པའོ། །མངོན་སུམ་ལས་ཉམས་པར་འགྱུར་ཏེ་མངོན་སུམ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རྗེས་སུ་དཔག་པས་ནི་འབྲེལ་པ་འཛིན་པ་ལ་ལྟོས་པར་བྱ་བ་ཡིན་གྱི། བརྡལ་ནི་མ་ཡིན་ནམ་དེས་ན་བརྡ་ལ་ལྟོས་སོ། །ཅི་སྟེ་བརྗོད་སྙམ་ན། རྗེས་སུ་དཔག་པའི་ཞེས་བྱ་བའོ། །དེར་ནི་མངོན་སུམ་དུའོ། །གལ་ཏེ་རྗེས་སུ་དཔག་པ་ནི་ཉམས་སུ་མྱོང་བ་དྲན་པ་ལ་ལྟོས་པས་མངོན་སུམ་མ་ཡིན་གྱི། ཡན་ལག་ཅན་གྱི་རྣམ་པར་རྟོག་པ་གོ་ཇི་ལྟར་ཉམས་སུ་མྱོང་བ་དྲན་པ་ལ་ལྟོས་ཏེ། འགར་ཡང་ཡན་ལག་ཅན་མཐོང་བ་མེད་པའི་ཕྱིར་རོ། །དེས་ན་ཉམས་སུ་མྱོང་བ་དྲན་པ་ལ་ལྟོས་པའི་གཏན་ཚིགས་མ་གྲུབ་ན། མངོན་སུམ་མ་ཡིན་པར་སྒྲུབ་པའི་ནུས་པ་ཡོད་པ་མ་ཡིན་ནོ་སྙམ་ན་དེ་བཞིན་དུ་ཞེས་གསུངས་སོ། །རྟོགས་པའི་གཟུགས་ལ་སོགས་པ་ལ་ལྟོས་པར་མ་གྱུར་པ་རོ་ལ་སོགས་པ་དག་གོ །གལ་ཏེ་རྟོགས་པ་འདིས་དཀར་པོ་དང་རྩུབ་མོ་དག་གཅིག་ཉིད་དུ་རྟོགས་པ་མ་ཡིན་ནམ། དེས་ན་ཡན་ལག་ཅན་ཐ་དད་པར་ཇི་ལྟར་འགྲུབ་སྙམ་དུ་དོགས་པ་བསུ་ནས་ཕ་རོལ་པོ་ཉིད་ཀྱིས་སྨྲས་པ་ནི་འདི་ལྟར་ཞེས་བྱ་བའོ། །འདི་ལ་གྲུབ་པའི་མཐའ་བས་བརྗོད་པ་ནི་གལ་ཏེ་ཞེས་བྱ་བའོ། །དེ་དག་ཅེས་བྱ་བ་ནི་ཁ་དོག་དང་རེག་པ་དག་གོ །ཉེ་བར་བརྟགས་པར་འགྱུར་མོད་ཅི་སྐྱོན་སྙམ་ན་འདི་ལ་ཞེས་བྱ་བ་གསུངས་སོ། །འོན་ཏེ་ཉེ་བར་བརྟགས་པ་རྟོགས་པ་ཡོད་པ་ནའོ་སྙམ་ན་ཉེ་བར་བརྟགས་པ་ཡོད་ཀྱང་ཞེས་བྱ་བའོ། །དེ་ལྟ་མ་ཡིན་ནོ་ཞེས་བྱ་བ་ནི་རྣམ་པ་གཞན་གྱི་སྒོ་ནས་ཉེ་བར་བརྟགས་པ་གང་ཡིན་པ་དེས་ཀྱང་ངོ༌། །རྣམ་པ་དེ་ཉིད་སྟོན་པ་ནི་ཡུལ་ཞེས་བྱ་བའོ། །དེ་འགྱུར་ན་འགྱུར་བ་ཉིད་བརྗོད་པ་ནི་རེག་པ་མཉེས་པར་འགྱུར་བ་ན་ཞེས་བྱ་བའོ། །གཞན་ཉིད་ཅེས་བྱ་བ་ནི་ཡན་ལག་ཅན་གྱི་མཚན་ཉིད་དོ། །དེ་དག་ཅེས་བྱ་བ་ནི་གཟུགས་ལ་སོགས་ པ་རྣམས་ཡན་ལག་ཅན་དེ་ལས་ཐ་དད་པར་རོ། །ཅི་སྟེ་ཞེས་བྱ་བ་སྟེ་དགོས ་པའོ། །ཡན་ལག་ཅན་ནི་ཞེས་བྱ་བ་ནི་ལན་ནོ། །དེ་གསུམ་ཞེས་བྱ་བ་ནི་གཟུགས་དང་རེག་བྱ་དང་ཡན་ལག་ཅན་ནོ། །འདུ་བའི་འབྲེལ་པའི་སྟོབས་ཀྱིས་མ་འགྱེས་པ་ཡིན་ནོ་ཞེས་གཞན་གྱི་དོགས་པ་བསུ་ནས་དེ་ཡང་ཞེས་གསུངས་སོ། །འདུ་བ་ཡང་བྱ་བར་འགྱུར་རོ། །མ་འགྱེས་པ་ཞེས་བྱ་བ་འདི་ཉིད་འདུ་བའི་རང་བཞིན་
ཡིན་ནོ་སྙམ་ན་འདི་ཉིད་དང་པོ་ཞེས་གསུངས་ཏེ་གང་གི་ཡན་ལག་ཅན་མེད་ཀྱང་མི་འགྱེས་པ་གཟུགས་ལ་སོགས་པ་རྣམས་ཀྱི་རང་བཞིན་ཡང་འདི་ཉིད་ཡིན་ནོ། །གཟུགས་ལ་སོགས་པ་འདི་ལ་ནི་རང་བཞིན་ཡིན་པར་ཡང་སྲིད་དེ་སྐྱེ་བ་ཡོད་པའི་ཕྱིར་རོ། །འདུ་བ་ལ་ནི་ཐམས་ཅད་མི་སྲིད་པ་ཁོ་ནའོ་ཞེས་བསྟན་པའི་དོན་དུ་བརྗོད་པ་ནི། རང་གི་རྒྱུ་ལས་ཞེས་བྱ་བའོ། །འདི་ཐམས་ཅད་རིམ་གྱིས་རྣམ་པར་འགྲེལ་པ་ནི། གལ་ཏེ་ཞེས་བྱ་བའོ། །དེ་ནི་ཞེས་བྱ་བ་ནི་མི་འགྱེས་པའི་མཚན་ཉིད་དོ། །འཕྲོད་པ་འདུ་བའི་རྟེན་གཟུགས་ལ་སོགས་པ་གང་ཡིན་པ་དེའོ། །རང་གི་རྒྱུ་གང་ཡིན་པ་དེའི་རང་བཞིན་ནི་འདི་ཡིན་ཏེ། གང་ཞིག་གང་གིས་གཟུགས་ལ་སོགས་པ་དེས་བསྐྱེད་པ་བསྟན་ནས་འདུ་བ་མི་འགྱེས་པར་འགྱུར་བའོ་ཞེ་ན་འདི་བརྗོད་པ་ནི་དེ་ལྟར་ཞེས་བྱ་བའོ། །བརྒྱུད་པ་ཉིད་སྟོན་པ་ནི་གང་གིས་བྱ་བའོ། །དེ་དག་ཅེས་བྱ་བ་ནི་གཟུགས་ལ་སོགས་པ་དེའི་རྒྱུ་ཉིད་གཟུགས་ལ་སོགས་པ་དེ་དག་མི་འགྱེས་པའི་རྒྱུ་ཡིན་ནོ་ཞེས་བྱ་བའི་ཕྱོགས་འདི་ལ་མཆོག་ཅི་ཡོད་ན་གང་གི་དོན་འདུ་བ་ལ་སོགས་པ་བརྗོད་པའི་རང་བཞིན་ཅན་བརྒྱུད་པ་འདོད། དེ་ལས་ལྷག་པ་ནི་གཟུགས་ལ་སོགས་པ་ལས་ཐ་དད་པའོ། །དེ་ཞེས་བྱ་བ་རྟོག་པ་བ་དང་པོ་ཟེར་བ་ཉིད་བཟློག་པའི་དོན་དུའོ། །དེ་སྨོས་སོ་ཞེས་བྱ་བ་རབ་རིབ་བབས་ཞེས་སྨོས་སོ། །དེ་ལྟ་མ་ཡིན་ཞེས་བྱ་བ་གལ་ཏེ་རབ་རིབ་ལས་བྱུང་བ་རྟོགས་པ་མེད་པ་མ་ཡིན་ནོ། །འདི་ཡང་ནི་རབ་རིབ་ལས་བྱུང་བའོ། །འདི་ལ་གཞན་གྱི་བརྗོད་པ་ནི་གལ་ཏེ་ཞེས་བྱ་བའོ། །གལ་ཏེ་རབ་རིབ་ལས་བྱུང་བའི་ཤེས་པ་རྟོག་པ་དང་བཅས་པ་ཉིད་ན། དེའི་ཚེ་མངོན་སུམ་དུ་འགྱུར་ཏེ། རྟོག་པ་དང་བྲལ་བའི་ཕྱིར་རོ། །སློབ་དཔོན་ཕྱོགས་ཀྱི་གླང་པོས་མངོན་སུམ་ནི་རྟོག་པ་དང་བྲལ་བའི་ཞེས་འདི་ཙམ་ཞིག་མངོན་སུམ་གྱི་མཚན་ཉིད་དུ་བརྗོད་པའི་ཕྱིར་རོ་ཞེ་ན་འདི་ལ་བརྗོད་པ་ནི་རྟོག་པ་དང་བྲལ་ལོ་ཅོག་ནི་ཞེས་བྱ་བའོ། །བརྟགས་ཏེ་ཞེས་བྱ་བ་ནི་རྣམ་པར་དཔྱད་ནས་སོ། །དེ་དང་བྲལ་བ་ལས་ནི་དམིགས་ཀྱིས་བསལ་བ་དང་བྲལ་བའི་ཡུལ་ལའོ། །འདི་ལ་ཞེས་བྱ་བ་ནི་སྤྱིར་བརྗོད་པ་ལ་ཁྱད་པར་བརྗོད་པས་གནོད་པར་བྱེད་པ་ཡིན་ནོ་ཞེས་བྱ་བའི་དོན་འདི་ལ་ཚད་མ་ཅི་ཡོད་སྙམ་ནའོ། །མི་མཐུན་པའི་ཕྱོགས་ལ་མཐོང་བ་ཙམ་གྱིས་གཏན་ཚིགས་རྟོག་པ་དང་
གལ་བ་ཙམ་ལས། གང་རྟོག་པ་དང་བྲལ་བ་དེ་ཐམས་ཅད་ནི་མངོན་སུམ་ཡིན་ནོ་ཞེས་བྱ་བ་དེ་ལྟ་བུའི་རྣམ་པ་ཅན་ལྷག་མ་དང་ལྡན་པ་དེ་མ་ངེས་པའི་རྗེས་སུ་དཔག་པ་གང་གི་ཚེ་འཇུག་པར་བྱེད་ཧ་ཅང་ཐལ་བར་འགྱུར་བའི་རྗེས་སུ་དཔག་པ་དེ་ལ་ཁྱད་པར་ཞེས་བྱ་བ་མ་འཁྲུལ་བར་གྱུར་པའི་རྟོག་པ་མེད་པ་གང་ཡིན་པ་དེ་ནི་མངོན་སུམ་ཡིན་ནོ་ཞེས་དེ་ལྟར་མཚན་ཉིད་བྱས་པ་ན་གསལ་བའི་ཁྱད་པར་དེ་ཉིད་གནོད་པར་བྱེད་པ་ཡིན་ནོ། །རྒྱུ་དེས་ན་དེ་ལས་གཞན་ཉིད་ལ་ཞེས་བྱ་བ་ཁྱད་པར་གྱི་རྣམ་པར་གཅད་པ་ལས། གཞན་པའི་དོན་ལ་རྗེས་སུ་དཔག་པ་སྔ་མ་དེ་ནི་འཇུག་པ་ཉིད་དེ་རབ་ཏུ་འཇུག་པ་ཁོ་ནའོ། །གལ་ཏེ་དེ་ལྟར་སྤྱི་དང་ཁྱད་པར་གྱི་དོན་དག་གནོད་པར་བྱ་བ་དང་གནོད་པར་བྱེད་པའི་དངོས་པོར་འགྱུར་མོད། ཚིག་དག་ལ་གོ་ཇི་ལྟར་ཞེ་ན། དོན་དེ་ཞེས་སྨོས་སོ། །དེ་ཉིད་ཅེས་བྱ་བ་ནི་དོན་གྱི་གང་ཡིན་པ་ཉིད་དོ། །སྤྱིར་མཐོང་བའི་རྗེས་སུ་དཔག་པ་ལས་ཞེས་བྱ་བ་ནི་གང་རྟོག་པ་དང་བྲལ་བ་ཙམ་ལས་སོ། །དེའི་ཞེས་བྱ་བ་ནི་ཁྱད་པར་གྱི་རྗེས་སུ་དཔག་པའི་དོན་ཏོ། །རེ་ཞིག་དང་པོ་ནི། སྤྱིར་བསྟན་ པ་ཉིད་བྱས་ལ་ཕྱིས་ནི་ཁྱད་པར་བྱ་དགོས ་པའི་ཕྱིར་འདི་ནི་གླང་པོའི་ཁྲུས་དང་འདྲ་བར་འགྱུར་རོ་ཞེ་ན། འདི་ལ་བརྗོད་པ་ནི་མ་ཡིན་ཏེ་ཞེས་བྱ་བའོ། །རྟོག་པ་དང་བྲལ་པ་སྨོས་པ་དེ་མ་ཐག་པ་ཁོ་ནར་རབ་རིབ་བཅས་ཞེས་སྨོས་པས་ཐོབ་པར་བྱ་བ་མ་འཁྲུལ་པར་དོན་ཐོབ་པར་བྱ་བའི་ཕྱིར་ཡིན་ནོ་ཞེ་ན། འདི་བརྗོད་པ་ནི་མ་ཡིན་ཏེ་ཞེས་བྱ་བའོ། །གལ་ཏེ་དེའི་དེ་མ་ཐག་ཁོ་ནར་བསྟན་པའི་མི་འཁྲུལ་པ་སྨོས་པ་རྟོག་པ་དང་བྲལ་བ་སྨོས་པ་དང་ལྷན་ཅིག་མ་འབྲེལ་ན། དེའི་ཚེ་དེ་ལྷན་ཅིག་ཏུ་སྨོས་པས་ཀྱང་ཅི་བྱ་འབྲེལ་བ་ཡོད་དོ་ཞེ་ན་ནི། ཕྱིས་སྨོས་ཀྱང་མཚུངས་སོ་ཞེས་བྱ་བའི་དོན་ཏོ། །དོན་དུ་ཞེས་བྱ་བ་ནི་དོན་གྱི་སྒོ་ནས་མི་མཚུངས་པ་མ་འབྲེལ་བ་རྣམས་ལ་ནི་དེ་མ་ཐག་པ་ཉིད་དུ་རྒྱུར་འགྱུར་བ་མ་ཡིན་ནོ། །དེ་ན་དེ་མ་ཐག་ཏུ་བསྟན་ཀྱང་འབྲེལ་པ་ལ་ལྟོས་ དགོས་ལ། འབྲེལ་པ ་དེ་ནི་མེད་པ་ལ་ཡང་འགྱུར་བའི་ཕྱིར་ཁྱད་པར་མེད་དོ། །རྣམ་པ་འདི་ནི་གནོད་བྱེད་ཀྱི་དངོས་པོ་དང་ཇི་སྙེད་པ་དེ་མཐའ་དག་ནི་གལ་ཏེ་ཚད་མའི་ཡུལ་ཡིན་ན། དེའི་ཚེ་བསྟན་པས་ཀྱང་འགྱུར་བ་ཡིན་གྱི། དངོས་སུ་བསྟན་པ་འབའ་ཞིག་གིས་ནི་ཡིན་པར་མ་ཟད་དོ་ཞེས་བྱ་བར་བསྟན་ཏོ། །གལ་ཏེ་དུས་གཞན་དུ་མ་
འཁྲུལ་པ་སྨོས་པར་བྱ་བ་ཡིན་ན། དེའི་ཚེ་འདི་ཉིད་དུ་ཅིའི་ཕྱིར་མི་བྱེད་ཅེས་བྱ་བ་ནི་ཕ་རོལ་པོའི་བསམ་པའོ། །འདི་བརྗོད་པ་ནི་བདེན་ཏེ་ཞེས་བྱ་བའོ། །བདེན་ལུགས་ཉིད་སྟོན་པ་ནི་མངོན་སུམ་ནི་ཞེས་བྱ་བའོ། །དེ་ཡང་ནི་མངོན་དུ་བྱེད་པའོ། །ཇི་ལྟར་མ་འཁྲུལ་པ་སྨོས་པས་རྟོག་པའི་ཤེས་པ་མ་བཟློག་པ་དེ་བཞིན་དུ་བསྒྲུབ་བྱ་ཡང༌། མི་འགྲུབ་པོ་ཞེས་བརྗོད་པ་ནི་དོན་དུ་ཞེས་བྱ་བའོ། །འོ་ན་ཅིའི་ཕྱིར་རྟོག་པ་དང་བྲལ་བ་སྨོས་པ་གཞག་ནས་མ་འཁྲུལ་པ་དེ་ཉིད་ཅི་སྟེ་མ་སྨོས་སྙམ་ན། ཕ་རོལ་དག་ནི་ཞེས་གསུངས་སོ། །དེའི་དབང་དུ་ནི་ཕ་རོལ་པོའི་དབང་དུའོ། །འདི་གཉིས་ནི་རྟོག་པ་དང་བྲལ་བ་དང་མ་འཁྲུལ་པའོ། །བཤད་དོ་ཞེས་བྱ་བ་ནི། སློབ་དཔོན་ཕྱོགས་ཀྱི་གླང་པོས་སོ། །ཡང་ན་ཞེས་བྱ་བ་ལ་སོགས་པ་ནི་སྤྱི་དང་ཁྱད་པར་དག་རྣམ་པ་གཞན་གྱི་སྒོ་ནས་གནོད་བྱ་གནོད་བྱེད་དུ་བསྟན་ཏོ། །སྐྱེས་བུ་གང་གིས་གནོད་བྱེད་མཐོང་བ་མེད་པ་དེ་ལ་དེ་སྐད་ཅེས་བྱ་བའོ། །གནོད་པར་བྱེད་པ་རབ་རིབ་བཅས། །ཞེས་སྨོས་པ་མཐོང་བ་ལས་སོ། །གལ་ཏེ་མི་འཆེ་བ་ནི་ཆོས་ཀྱི་མཆོག་ཅེས་བྱ་བ་དང༌། ཕྱུགས་རྣམས་མཆོད་སྤྱིན་དོན་དུ་སྤྲུལ། །ཞེས་བྱ་བ་འདིར་ཡང་དང་པོར་སྤྱིར་རྟོགས་པ་ཡིན་ལ། ཕྱིས་ནི་ཁྱད་པར་དུ་ངེས་པ་ཡིན་ནོ་ཞེས་གནོད་བྱ་གནོད་བྱེད་ཀྱི་དངོས་པོར་འགྱུར་རོ་ཞེ་ན་སྐྱེས་བུས་མ་བྱས་པའི་ཞེས་བྱ་བས་སོ། །སྔར་གྱི་བ་ཞེས་བྱ་བ་ནི་རྟོག་པ་དང་བྲལ་ལོ་ཅོག་ནི་མངོན་སུམ་ཡིན་ནོ་ཞེས་བྱ་བ་འདིའོ། །བློ་ཕྱི་མས་ཞེས་བྱ་བ་ནི་རབ་རིབ་བཅས་ཞེས་བྱ་བ་ལས་སྐྱེས་པས་སོ། །རིག་བྱེད་ལས་ཀྱང་དེ་བཞིན་དུ་འགྱུར་རོ་སྙམ་ན། རིག་བྱེད་པ་ནི་ཞེས་གསུངས་སོ། །དེ་ལྟར་ན་ནི་ཞེས་བྱ་བ་ནི་གལ་ཏེ་རིག་བྱེད་ལས་ཀྱང་བློ་འཁྲུལ་བ་སྐྱེ་ན་དེའི་ཚེ་ཚད་མ་མ་ཡིན་པར་འགྱུར་རོ། །ཐམས་ཅད་ཅེས་བྱ་བ་རིག་བྱེད་ཀུན་ལྟ་བས་འཁྲུལ་པའི་བློ་སྐྱེད་བྱེད་དུ་ཐལ་བའི་ཕྱིར་རོ། །བློ་གང་ཞིག་གང་གནོད་པ་དེ་ནི་ཚད་མ་མ་ཡིན་གྱི། གནོད་པ་མེད་ན་ནི་བློ་ཚད་མར་འགྱུར་རོ་ཞེ་ན། འགོག་པ་ནི་མ་ཡིན་ཏེ་ཞེས་བྱ་བའོ། །རྟོག་པར་བྱེད་པའི་སྐྱེས་བུ་ལ་རིག་བྱེད་ཀྱི་དོན་དེ་ཉིད་རྣམ་པ་གཞན་དུ་འགྱུར་བ་ཡིན་ནོ་ཞེས་བྱ་བ་ནི་མཐོང་བ་ཡིན་ནོ། །དེ་ལྟ་བུ་ནི་ཞེས་བྱ་བ་ནི་གནོད་བྱེད་འབྱུང་བའོ། །རིག་བྱེད་སྨྲ་བས་ཀྱང་ཚད་མ་ནི་བརྟན་པར་ཁས་བླངས་པ་ཡིན་ན་ཞེས་
བརྗོད་པ་ནི་དེ་ལྟར་ཡིན་དང་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི། གལ་ཏེ་ཚད་མ་དང་འགལ་བའི་དོན་དོར་བར་བྱ་བ་མ་ཡིན་ན་དེའི་ཚེའོ། །རབ་རིབ་བཅས་ཞེས་བྱ་བ་འདི་ནི་རྟོག་པ་དང་ཕྲལ་བ་ལས་སྨོས་པའི་བཟློག་པའི་ཞེས་བྱ་བ་ནི་མཐུན་པའི་དཔེ་ཡིན་ནོ། །དེ་ལྟ་བུའི་ཆོས་ཞེས་བྱ་བ་ནི། སང་བསྐྱེད་པར་བྱེད་པའི་ཆོས་ཅན་ནོ། །གཡོ་བ་མེད་པ་སྟེ། མི་འགྱུར་བར་གནས་པའི་མིག་གཉིས་ཀྱི་དབུས་ན་གནས་པའི་ཟླ་བ་ཟུར་གཉིས་སུ་མིག་གཉི་གས་རིམ་གྱིས་དམིགས་པ་ན། དུས་ཆ་ཕྲ་བའི་ཕྱིར་ན་དུས་གཅིག་བཞིན་དུ་མཚོན་པ་ཡིན་ནོ། །དེས་ན་ཟུར་གཉིས་སུ་དམིགས་པ་གཅིག་ཁོ་ན་ལས་གཉིས་ཉིད་དུ་སྒྲོ་བཏགས་པ་ཡིན་ནོ་ཞེས་བྱ་བའོ། །དེའི་ཞེས་བྱ་བ་ནི་དབང་པོའི་རྣམ་པར་རིག་པའོ། །དེ་ལྟ་བུའམ་ཞེས་བྱ་བ་ནི་རྣམ་པར་རིག་པ་དེ་ལྟ་བུའོ། །གཞན་དུ་གྱུར་པ་ནི་ཉེ་བར་གནོད་པའོ། །ཇི་ལྟར་གཞུང་འདི་འགལ་སྙམ་ན། ཟླ་བ་གཉིས་སུ་སྣང་བ་ཞེས་བྱ་བ་སྨོས་ཏེ། ཟླ་བ་གཉིས་སུ་སྣང་བའི་རྒྱུ་ཡིན་ནོ་ཞེས་དབང་པོ་རྒྱུ་ཡིན་པར་བརྗོད་པར་མི་ནུས་ཏེ་མི་འཐད་དོ། །ཡིད་ཡིན་ཡང་དབང་པོ་ཟླ་བ་གཉིས་སུ་སྣང་བའི་བརྒྱུད་པའི་རྒྱུ་ཉིད་ལའོ། །བརྒྱུད་པའི་རྒྱུ་ཡིན་ཡང་འགལ་བར་ཇི་ལྟར་མི་འགྱུར་སྙམ་ན་དངོས་སུ་ཞེས་སྨོས་སོ། །དེའི་རྣམ་པ་ཅན་ནི་ཞེས་བྱ་བ་ནི་དོན་གྱི་རྣམ་པ་ཅན་དུའོ། །རྣམ་པ་གཞན་གྱིས་ཞེས་བ་ནི་དེའི་རྣམ་པ་ཅན་མ་ཡིན་པར་རོ། །གང་ལས་ཞེས་བྱས་པ་ནི་དོན་ལས་སོ། །མི་སྲིད་པའི་ཕྱིར་རོ་ཞེས་བྱ་བ་ནི། དེའི་རྣམ་པ་ཅན་དུའོ། །མི་སྲིད་པ་ཉིད་བརྗོད་པ་ནི་རྡུལ་ཕྲ་རབ་རྣམས་ཞེས་བྱ་བ་ཡིན་ནོ། །ཤེས་པ་གནས་པ་རིལ་པོ་གཅིག་གི་རྣམ་པ་རགས་པ་ཉིད་དེ་ནི། རྡུལ་ཕྲ་རབ་རྣམས་ལ་མེད་པའི་ཕྱིར་རོ། །བུམ་པ་ལ་སོགས་པ་གཟུང་བར་བྱ་བ་ནི། དང་པོ་ནི་རྡུལ་ཕྲ་རབ་ཕན་ཚུན་དབེན་པ་དག་སྣང་བ་ཡིན་ནོ། །ཚིག་ལེའུར་བྱས་པ་འདི་ཉིད་བཤད་པའི་དོན་དུ་གསུངས་པ་ནི་གཞན་དག་ན་རེ་ཞེས་བྱ་བའོ། །དེའི་ཡང་ཞེས་བྱ་བ་ནི། རྣམ་པར་རྟོག་པ་ནི་རྣམ་པར་ཤེས་པའིའོ། །རྡུལ་ཕྲ་རབ་དག་ཀྱང་དེ་བཞིན་དུ་རྣམ་པར་རྟོག་པའི་རྣམ་པར་ཤེས་པའི་ཡུལ་མ་ཡིན་ནོ། །གཞན་དུ་གྱུར་པ་ཞེས་བྱ་བ་ནི། ཉེ་བར་གནོད་པའོ། །ཟླ་བ་གཉིས་ཀྱི་ཡིད་ཀྱིས་ཤེས་པའོ། །དེས་ན་གལ་ཏེ་བུམ་པ་ལ་སོགས་པར་རྣམ་པར་
རྟོག་པའི་ཡིད་ལ་ལྟོས་ནས་བརྒྱུད་པའི་རྒྱུ་ཡང་ཡུལ་ཉིད་ཡིན་ན། དེའི་ཚེ་མིག་ལ་སོགས་པ་ཡང་ཟླ་བ་གཉིས་ལ་སོགས་པའི་ཤེས་པ་ལ་ལྟོས་ནས་ཡུལ་ཉིད་དུ་འགྱུར་རོ་ཞེས་དེ་ལྟར་ཊཱི་ཀཱ་བྱེད་པ་གཞན་གྱིས་སློབ་དཔོན་ཕྱོགས་ཀྱི་གླང་པོའི་གཞུང་བཤད་དོ། །དེ་ལ་སློབ་དཔོན་གྱིས་ཉེས་པ་འདི་ཡོད་དོ་ཞེས་སྟོན་པ་ནི། འདི་ལ་བརྗོད་པ་ཞེས་བྱ་བའོ། །རང་ཉིད་ཀྱིས་ཀྱང་ཉེས་པ་གཞན་བརྗོད་པ་ནི། ཡིད་ཉིད་ཡིན་ན་ཞེས་བྱ་བ་སྟེ། ཟླ་བ་གཉིས་ཀྱི་ཤེས་པ་ཡིད་ཡིན་ནའོ། །ཡུལ་མེད་པའི་ཕྱིར་རོ་ཞེས་བྱ་བ་ནི། འདི་ནི་རྣམ་པ་གཞན་ཁོ་ནས་ཡུལ་མེད་པར་འགྲུབ་བོ་ཞེས་དགོངས་པའོ། །འདི་ལ་ཞེས་བྱ་བ་ནི་དང་པོ་ནི་རྡུལ་ཕན་ཚུན་དབེན་པ་སྣང་བ་ཡིན་ལ་ལི་ལ་སོགས་པ་རྣམ་པ་ཅན་གྱི་རྣམ་པར་རྟོག་པ་ནི་ཕྱིས་འབྱུང་བ་ཡིན་ནོ་ཞེས་བྱ་བ་འདི་ལ་ཚད་མ་ཅུང་ཟད་ཀྱང་མེད་དོ། །ཕན་ཚུན་དབེན་པའི་རྡུལ་དུ་སྣང་བ་ནི་རྣམ་པ་ཐམས་ཅད་དུ་ཉེ་བར་མཚོན་པ་མེད་པའི་ཕྱིར་རོ།། དེ་ལྟར་བྱས་ན་སློབ་དཔོན་ཕྱོགས་ཀྱི་གླང་པོས། དེར་མི་སྣང་ཕྱིར་ཞེས་བྱ་བ་ལ་སོགས་པའི་ལན་ནི་རིག་པ་ཁོ་ནའོ། །ཡིད་ཉིད་ཅེས་ཧ་ཅང་ཐལ་བར་བརྩད་པ་ནི་རིགས་པ་མ་ཡིན་ནོ། །དེ་ཉིད་ཕྱིར་ཞེས་བྱ་བ་ནི། རིགས་པའི་རྒྱུ་ཉིད་ཀྱི་ཕྱིར་བརྗོད་པ་ནིའོ། །ཡིད་ཉིད་དུ་གཞུང་འཛུགས་པ་ནི་དང་པོ་ནི་ཞེས་བྱ་བའོ། །རང་གི་རྣམ་པ་ནི་རྡུལ་ཕྲ་རབ་ཀྱི་རྣམ་པ་ནི་ཤེས་པའོ། །ཕྱིས་དོན་གྱི་རྣམ་པ་ཞེས་བྱ་བ་ནི། ལིངས་པོ་གཅིག་གིས་རྣམ་པར་སྣང་བར་ཡིད་ལ་སྣང་བ་ཡིན་ནོ། །དེས་ན་ཀ་བ་ལ་སོགས་པའི་ཡུལ་ཅན་ལིངས་གཅིག་ཏུ་སྣང་བའི་ཤེས་པ་ཉིད་དུ་ཐལ་བར་འགྱུར་རོ། །ཅི་སྟེ་འདི་ལ་ཚད་མ་མེད་དོ་ཞེས་བྱ་བ་ཀ་བ་ལ་སོགས་པའི་ཡུལ་གྱི་ཤེས་པའི་གཞལ་བྱ་བཤད་ཟིན་པའི་མཚན་ཉིད་ཅན་ཡིན་པ་ལ་ཚད་མ་མེད་དོ། །རྡུལ་ཕྲ་རབ་ཀྱི་རྣམ་པ་ཅན་གྱི་ཤེས་པ་ནི་རྣམ་པ་ཐམས་ཅད་དུ་ཉེ་བར་མཚོན་པ་མེད་པའི་ཕྱིར་རོ་ཞེ་ན། འདི་ལ་གྲུབ་པའི་མཐའ་པས་བརྗོད་པ་ནི་དེ་ལྟ་ན་ནི་ཞེས་བྱ་བའོ། །དེ་ལ་ཡང་དང་པོ་ནི་ཟླ་བ་གཅིག་གི་རྣམ་པ་ཅན་གྱི་ཤེས་པ་སྐྱེས་སོ་ཞེས་བྱ་བ་འདིར་ཚད་མ་མེད་པ་མ་ཡིན་ནོ་ཞེས་བྱ་བའི་དོན་ཏོ། །དབང་པོ་ལ་བརྟེན་པ་ཡང་ཞེས་བྱ་བ་ནི་དང་པོར་སྐྱེས་པ་ཟླ་བ་གཅིག་གི་རྣམ་པ་ཅན་ནོ། །དངོས་སུའོ་ཞེས་བྱ་བ་ནི་གང་ཞིག་དབང་པོ་རྣམ་པར་འགྱུར་ན། དངོས་སུ་རྣམ་པར་འགྱུར་བ་དེ་ནི་དབང་པོ་
ལ་བརྟེན་པ་ཡིན་ན། ཟླ་བ་གཉིས་ཀྱི་ཤེས་པ་ནི་བརྒྱུད་ནས་རྣམ་པར་འགྱུར་བ་ཡིན་ཏེ། དེས་ན་དེ་ནི་དབང་པོ་ལ་བརྟེན་པ་མ་ཡིན་ནོ་སྙམ་ན། འདི་འགོག་པ་ནི་མ་ཡིན་ཏེ་ཞེས་བྱ་བའོ། །གཞན་ལ་ཞེས་བྱ་བ་ཟླ་བ་གཅིག་གི་རྣམ་པ་ཅན་གྱི་ཤེས་པ་ལ་རྣམ་པར་འགྱུར་བ་གང་ཡིན་པ་དེ་མཐོང་བ་མེད་པའི་ཕྱིར་རོ། །གལ་ཏེ་དཔེ་ཙམ་གྱིས་བསྒྲུབ་བྱ་འགྲུབ་ན། དེའི་ཚེ་དབང་པོ་ལ་རྟེན་ཉིད་དུ་འདོད་པ་ཟླ་བ་གཅིག་གི་རྣམ་པ་ཅན་གྱི་ཤེས་པ་དེ་ཡང་ཡིད་ཉིད་ཡིན་པར་ཐལ་ཏེ། དེས་ན་དབང་པོ་ལས་སྐྱེས་པའི་རྣམ་པར་འགྱུར་བ་གཞན་ལ་བརྟེན་པར་བྱ་བ་ལ། དེ་ཡང་རྣམ་པར་འགྱུར་བའི་ཕྱིར་ཡིད་ཡིན་པས་ཐུགས་པ་མེད་དོ། །འདི་ཉིད་ཅས་བྱ་བ་ནི་ཟླ་བ་གཉིས་ཀྱི་རྣམ་པ་ཅན་ཉིད་དབང་པོ་ལས་སྐྱེས་པ་ཡིན་ནོ། །ཟླ་བ་གཉིས་ལ་སོགས་པའི་ཤེས་པ་ཡང་ལྡོག་གོ་སྙམ་ན། ཟླ་བ་གཉིས་ལ་སོགས་པའི་ཞེས་གསུངས་སོ། །མིག་རབ་རིབ་ཅན་གྱིས་བསྒྲིབས་ཏེ་རང་བཞིན་གཞན་དུ་རྣམ་པར་འགྱུར་བ་དང་ལྡན་པར་གྱུར་པ་ན་ཡང་ནག་པོ་ལ་སོགས་པའི་རང་བཞིན་ཡོད་པ་ཁོ་ནའོ། །དེ་ལྟ་ན་ཡང་རབ་རིབ་ཡོད་དམ་མེད་ཀྱང་ཡོད་པའི་ཐག་པ་ནག་པོ་ཉིད་ཇི་ལྟར་ལྡོག །དཔེ་སྒྲུབ་ཀྱི་ཤེས་པ་ལས་ལྡོག་པ་མ་གྲུབ་པས་འདི་སྒྲུབ་བྱེད་དོ། །དཔེ་ཅི་ལྟར་འགྱུར། བསྒྲུབ་བྱས་སྟོང་པའི་ཕྱིར་རོ་ཞེས་དགོངས་པའོ། །དེ་ཡང་མི་རིགས་ཏེ་ཞེས་བྱ་བ་ལ་དེའི་དོན་ནི་དབང་པོའི་བསླད་པ་ལོག་ཀྱང་ཡོད་པ་ཉིད་དུ་འགྱུར་རོ་ཞེས་བྱ་བ་འདི་ཡིན་ལ། ཡིད་ཉིད་དུ་མངོན་པར་འདོད་པའི་འཁྲུལ་པ་ཡང་དེ་ལྟར་འགྱུར་བ་ནི་མ་ཡིན་ནོ། །འདི་ཉིད་སྟོན་པ་ནི་ཡིད་ཀྱི་ཆུར་ཞེས་བྱ་བའོ། །དེ་བཞིན་གཞན་གྱིས་བརྒྱུད་པ་ནི་བརྗོད་པ་དག་གི་འགའ་ཚེ་འཇོག་པ་གང་ཡིན་པ་དེ་ཡང་མི་རིགས་སོ་ཞེས་སྟོན་པ་ནི་ཆུར་འཁྲུལ་པ་ནི་ཞེས་བྱ་བ་ནི། མཐོང་པ་ཉིད་སྟོན་པ་ནི་ཚད་མས་ཞེས་བྱ་བའོ། །དེ་ལྟར་ཞེས་བྱ་བ་ནི། ཆུར་འཁྲུལ་མཐོང་བ་དྲན་པ་ལྟོས་མི་འགྱུར། །ཞེས་བྱ་བ་དེ་ཡང་མ་འབྲེལ་ལོ་ཞེས་སྟོན་པ་ནི་སྤྲུལ་དུ་ཞེས་བྱ་བ་ནི། ཡོངས་སུ་གསལ་བར་སྣང་མི་འགྱུར། །ཞེས་བརྗོད་པ་ཡང་རིག་པ་དང་འབྲེལ་བ་མ་ཡིན་ནོ་ཞེས་བརྗོད་པ་ནི། ཡོངས་སུ་གསལ་བར་ཞེས་བྱ་བའོ། །དབང་སྐྱེས་གང་ཡིན་ཞེས་བྱ་བ་ལ་སོགས་པ་ལང་མ་འབྲེལ་བ་ཡིན་ནོ་ཞེས་བརྗོད་པ་ནི། དེ་ཡང་ན་ཡོད་པ་དང་ཞེས་བྱ་བའོ། །ནག་པོ་ལ་སོགས་པར་སྣང་བ་ཉིད་ཀྱང་ངོ༌། །ཡིད་ཀྱང་ཞེས་བྱ་བ་ནི་
ཡོངས་སུ་གསལ་བར་སྣང་བ་ཉིད་དུ་འགྱུར་རོ་ཞེས་འབྲེལ་ཏོ། །མ་ཡིན་ཏེ་ཞེས་བྱ་བ་ནི་ལན་ནོ། །དེ་ཞེས་བྱ་བ་ནི་ཡིད་ཀྱི་ཡོངས་སུ་གསལ་བའོ། །དེ་ལྟ་ཡིན་དང་ཞེས་བྱ་བ་ནི་རྣམ་པར་རྟོག་པ་མེད་པ་ཉིད་ཡིན་ནའོ། །གཞན་དག་ཡིད་ཡིན་པའི་ཕྱིར་རྣམ་པར་རྟོག་པ་དང་བཅས་པ་དང་འདོད་པ་ཡིན་ནོ་ཞེས་བྱ་བ་འདི་ཇི་ལྟར་ཤེས་སྙམ་ན། འདི་ལྟར་ཞེས་གསུངས་སོ། །གང་གི་ཕྱིར་སློབ་དཔོན་གྱིས་འདི་འདིར་བསྒྲུབ་པར་བྱ་བ་ཡིན་པ་དེས་ན། ཕ་རོལ་པོ་དག་གི་འདི་ལས་བཟློག་པ་ཉིད་དུ་འདོད་པ་ཡིན་ནོ། །དེ་ལྟ་ཡིན་ན་འདི་བསྒྲུབ་པར་བྱ་བ་ཉིད་དུ་མི་འགྱུར་རོ་ཞེས་དགོངས་པའོ། །འཁྲུལ་པ་ཐམས་ཅད་རྣམ་པར་རྟོག་པ་དང་བཅས་པ་ཡིན་ནོ་ཞེས་གཞན་གྱི་མངོན་པར་འདོད་པ་ནི་དེའི་ཚེ་ཞེས་བྱ་བ་འཁྲུལ་པ་རྣམ་པ་གཉིས་སུ་གྱུར་པ་ན་གསལ་བར་འགྱུར་རོ། །དེ་མེད་པའི་ཕྱིར་ཞེས་བྱ་བ་ནི། བསྒོམ་པ་མེད་པའི་ཕྱིར་རོ། །དེ་ལ་ཡང་ཞེས་བྱ་བ་ནི་ཟླ་བ་གཉིས་སུ་འཁྲུལ་པ་ལ་ཡང་ངོ༌། །བརྗོད་པ་དང་བྲལ་བ་ཡིན་ཏེ་ཞེས་བྱ་བ་ནི་ཐམས་ཅད་ལ་བར་དུ་གཅོད་པའི་གོམས་པ་ཡོད་པ་ཡིན་ནོ་ཞེས་བརྗོད་པར་ནུས་པའི་ཕྱིར་རོ། །གལ་ཏེ་གོམས་པས་སྐྱེད་པ་སྒྲུབ་པ་ལ་སོགས་པ་འཁྲུལ་པ་ཡང་རྣམ་པར་རྟོག་པ་མེད་པ་ཡིན་ལ། ནག་པོ་ལ་སོགས་པར་སྣང་བ་ཡང་དབང་པོ་ལས་བྱུང་བ་ཡིན་ན། དེའི་ཚེ་འོ་ན་གང་ཞིག་དཔེར་འགྱུར། སྤྲུལ་དུ་འཁྲུལ་པའི་ཡིད་རྣམ་པར་རྟོག་པ་དང་བཅས་པ་དང་ཆུ་ལ་སོགས་པ་འཁྲུལ་པ་གང་ཡིན་ཞེ་ན། འདི་ལ་བརྗོད་པ་ནི་ཕན་འདོགས་པར་བྱེད་པ་དང༌།གནོད་པར་བྱེད་པར་སྣང་པ་ནི་རྣམ་པར་རྟོག་པའི་རང་བཞིན་དེས་ཀྱང་འཁྲུལ་པ་ཡིན་ནོ་ཞེས་འབྲེལ་ཏོ། །གཞན་དག་ལ་ཡང་ཞེས་བྱ་བ་ནི། ཡོངས་སུ་གསལ་བར་སྣང་མི་འགྱུར། །ཞེས་བྱ་བ་ལ་སོགས་པ་ལའོ། །སློབ་དཔོན་གྱིས་མངོན་སུམ་ལྟར་སྣང་བ་རྣམ་པ་གཉིས་ཉིད་བསྟན་ཏོ་ཞེས་བྱ་བར་ཇི་ལྟར་ཤེས་སྙམ་ནའོ་ཞེས་བྱ་བས་ཞེས་གསུངས་སོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་རྣམ་པ་གཉིས་སུ་མི་བཞེད་ནས་ཞེས་སོགས་ཤིག་ཏུ་གཅོད་པར་སྟོན་པ་ནི། མི་མཁས་པ་བརྗོད་པའི་རྒྱུར་འགྱུར་རོ། །འཁྲུལ་པའི་ཤེས་པས་འཁྲུལ་པ་ཉིད་ནི་ཡིད་ཀྱི་འཁྲུལ་པ་སྟེ། མི་གསལ་བའི་རྣམ་པའི་ཡུལ་ཅན་ཡིན་ནོ་ཞེས་བརྗོད་པའི་ཕྱིར་ཟླ་བ་གཉིས་ཀྱི་ཤེས་པ་ནི། ཡིད་གཉིས་ཡིན་པར་
བཞེད་པ་ཡིན་ནོ་ཞེ་ན། འདི་ལ་བརྗོད་པ་ནི་དེ་ནི་ཞེས་བྱ་བའོ། །གང་གི་ཞེས་བྱ་བ་ནི་རིག་པ་ཅན་གྱིའོ། །ཡང་ཇི་ལྟར་ན་དེའི་ལུགས་དང་སྦྱར་ན། འཁྲུལ་པ་ཉིད་ཡིན་པར་གནས་ཤེ་ན་དབང་པོ་དང་ཞེས་གསུངས་སོ། །དབང་པོ་དང་ཕྲད་པ་ལས་བྱུང་བའི་ཤེས་པ་གང་ཡིན་པ་དེ་ལ་ནི། རེ་ཞིག་འཁྲུལ་པ་ཉིད་མི་སྲིད་དེ་དེས་ན་ལྷག་པར་གྱུར་པས་ཞེས་བྱ་བ་ལ་སོགས་པར་སྦྱར་རོ། །སྒྲ་ལ་སོགས་པའི་ཡུལ་ཅན་གྱི་འཁྲུལ་པ་གང་ཡིན་པའོ། །དབང་པོ་དང་དོན་ལས་སྐྱེས་པའི་ཤེས་པ་གང་ཡིན་པ་དེ་ལ་ནི་བརྗོད་པ་ཐ་མ་ཉིད་དང༌། སྐོམ་པ་སྨོས་པས་འཁྲུལ་པ་ལ་སོགས་པ་སྲིད་པ་མ་ཡིན་ནོ་ཞེས་སློབ་དཔོན་ཕྱོགས་ཀྱི་གླང་པོས་བརྗོད་པ་ཡིན་ནོ། །དེས་ན་འཁྲུལ་པ་ནི་དོན་སྨོས་པ་ཉིད་ཀྱིས་གསལ་བ་ཡིན་ནོ། །དེས་ན་དོན་སྨོས་པ་ཉིད་དེ་གསལ་བའི་ཕྱིར་འཁྲུལ་པ་ནི་ཡིད་ཀྱི་ཡུལ་ཅན་ཁོ་ནར་རྣམ་པར་གནས་སོ་ཞེས་དགོངས་པའོ། །ངོ་བོ་བརྗོད་པ་ལྷུར་བྱེད་པ་ཉིད་སྟོན་པ་ནི། དབང་པོ་དང་ཞེས་བྱ་བའོ། །རང་བཞིན་ནི་གང་ཡིན་གཞན་ལ་མི་སྲིད་པ་དང་དེ་ལ་ནེ། དེ་ཡང་ཡོད་པ་དེ་ལ་བརྗོད་དོ། །ཞེན་པའི་རང་བཞིན་ཉིད་ནི་དབང་པོ་ལས་སྐྱེས་པ་འགའ་ཡང་མི་སྲིད་པ་ཡིན་ཏེ། རྣམ་པར་རྟོག་པ་མེད་པ་ཡང་དབང་པོ་ལས་སྐྱེས་པ་ཡིན་པའི་ཕྱིར་རོ། །གཞན་མངོན་སུམ་མ་ཡིན་པར་འདོད་པ་ལ་ཡང་ཡོད་པ་ཡིན་ཏེ། དེས་ན་དེ་ནི་བརྗོད་པར་བྱ་བ་མ་ཡིན་ནོ་ཞེས་བརྗོད་པ་ནི་མ་ཡིན་ཏེ་ཞེས་བྱ་བའོ། །དེའི་ཕྱིར་ཞེས་བྱ་བ་ནི་བརྗོད་པར་མི་འཐད་པའི་ཕྱིར་རོ། །དེ་ནི་མངོན་སུམ་ཡིན་གྱི་ཞེས་བྱ་བ་ནི་དེ་ཁོ་ན་མངོན་སུམ་ཡིན་པའོ། །གཞན་ནི་ཞེས་བྱ་བ་ནི་ཞེན་པའི་བདག་ཉིད་ནི་མངོན་སུམ་མ་ཡིན་ནོ་ཞེས་རྣམ་པ་དེ་ལྟར་རྣམ་པར་གཅད་པར་བྱ་བ་ཉིད་དུ་འཐད་དོ། །ཅུང་ཟད་ནི་ཞེས་བྱ་བ་ནི་ཞེན་པའི་བདག་ཉད་ཅེས་བྱ་བ་འདིའོ། །ཅུང་ཟད་ནི་ཞེས་བྱ་བ་ནི་མ་འཁྲུལ་པ་ཞེས་བྱ་བ་ལ་སོགས་པའོ། །གཉི་ག་ཡང་སྟོན་པ་ནི་དེས་ན་ཞེས་བྱ་བའོ། །ངོ་བོ་བརྗོད་པ་ལ་ཡང་མ་འཁྲུལ་པ་ཉིད་བརྗོད་པར་རིགས་སོ། །ཅིའི་ཕྱིར་ཞེ་ན། དེ་ལྟ་ན་ཞེས་སྨོས་སོ། །བརྗོད་དུ་མེད་པ་ནི་ཡུལ་ཅན་ཉིད་དུ་བསྟན་པས་ནི་ དགོས་པ ་ཅི་ཡང་མེད་དོ། །འོན་ཏེ་ དགོས་པ ་མེད་པས་དེ་ལྟ་ན་ཡང་ངོ་བོ་ཙམ་བརྗོད་པ་ཡིན་ནོ་སྙམ་ན་རང་གི་ངོ་བོ་བརྗོད་ན་ཞེས་གསུངས་སོ། །བདག་ལ་སོགས་པ་ཡང་ཕྲད་པ་ཡང་ཐུན་མོང་མ་ཡིན་པ་ཁོ་ན་སྟེ། དེས་ན་དེ་ཡང་
བརྗོད་པར་བྱའོ་ཞེན་བདག་ལ་སོགས་པ་ཐུན་མོང་བ་ནི་ཞེས་བྱ་བ་སྟེ། རྗེས་སུ་དཔག་པ་ཡང་བདག་ལ་སོགས་པ་ཕྲད་པ་ལས་སྐྱེས་པ་ཡིན་པའི་ཕྱིར་རོ། །དེ་ལྟ་ན་འོ་ན་ཞེས་བྱ་བ་ནི་གལ་ཏེ་མངོན་སུམ་ཉིད་ཀྱིས་ཐུན་མོང་མ་ཡིན་པ་གང་ཡིན་པ་དེ་ཉིད་བརྗོད་པར་བྱ་བ་ཡིན་ན་དེའི་ཚེ། དེ་ལྟར་རིགས་པའི་མཚན་ཉིད་སུན་བཏོན་ནས། བྲམ་ཟེའི་ཡང་སུན་འབྱིན་པ་ནི་ཞེས་བྱ་བའོ། །འདི་ལ་སུན་འབྱིན་པ་གཞན་ཡང་བརྗོད་པའི་དོན་དུ་རྣམ་པར་རྟོག་པ་གཉིས་བྱེད་པ་ནི། འདི་ལྟར་ཞེས་བྱ་བའོ། །དོན་གཞན་བསྒྲུབ་པའི་དོན་དུ་ངོ་བོ་བརྗོད་པ་ཡིན་ཞེས་བྱ་བ་ནི་རྣམ་པར་རྟོག་པ་གཉིས་པའོ། །དང་པོ་ལ་བརྗོད་པ་ནི་དེ་ལ་ཞེས་བྱ་བའོ། །དེའི་ཚེ་ཡོད་པ་དང་ཕྲད་པའི་ཤེས་པ་ནི་མངོན་སུམ་ཡིན་ནོ་ཞེས་བྱ་བ་ཉིད་བརྗོད་པར་བྱ་བར་འགྱུར་གྱི། གཞན་ནི་མ་ཁོ་བ་མེད་དོ། །ཕྲད་པ་ཡང་གཟུང་བ་འཛིན་པའི་མཚན་ཉིད་ཡིན་ནོ། །དེ་ལྟ་ཡིན་དང་དོན་གང་ཞིག་རྣམ་པར་གནས་པ་སྟེ་བརྗོད་པ་ནི་ཡོད་པའི་ཞེས་བྱ་བའོ། །ཡང་ན་དབང་པོ་ལས་སྐྱེས་པའི་ཤེས་པ་གནོད་པ་མེད་པ་ནི་མངོན་སུམ་ཡིན་ནོ་ཞེས་བྱ་བ་ཉིད་བརྗོད་པར་བྱ་བར་འགྱུར་རོ། །ཡོད་པ་དང་ཕྲད་ན་སྐྱེས་བུའི་དབང་པོ་ཉིད་ཀྱི་བློ་སྐྱེ་བ་གང་ཡིན་པ་དེ་མངོན་སུམ་ཡིན་ནོ་ཞེས་དེ་སྐད་ནི་བརྗོད་པར་མི་བྱ་བའོ། །རྣམ་པར་རྟོག་པ་གཉིས་པ་འགོད་པ་ནི་ཅི་སྟེ་ཞེས་བྱ་བའོ། །རྒྱུ་དེས་ན་རང་གི་ལུགས་ཀྱི་མཚན་ཉིད་ཀྱིས་གཞན་སངས་རྒྱས་པ་ལ་སོགས་པའི་མཚན་ཉིད་རྣམས་གསལ་བར་བྱ་བ་ཡིན་ནོ། །ཡང་ཅིའི་དོན་དུ་སངས་རྒྱས་པ་ལ་སོགས་པའི་མཚན་ཉིད་གསལ་བར་བྱ་ཞེ་ན། སངས་རྒྱས་པའི་ཞེས་བྱ་བའོ། །འོན་ཏེ་གལ་ཏེ་སངས་རྒྱས་པའི་མཚན་ཉིད་བདག་ཅག་གི་མཚན་ཉིད་ཀྱིས་གསལ་བར་མི་ནུས་པ་དེ་ལྟ་ན་ཡང་ཕྱི་རོལ་གྱི་དོན་སྒྲུབ་པར་བྱེད་པ་ཡིན་ནོ་སྙམ་ན། བཤད་བརྡེག་འཆོས་པས་ནི་རྔ་མོ་འཛིན་པ་སྟེ། འཕྲོག་པར་མི་ནུས་སོ། །རྔ་མོ་ནི་སྟེང་དུ་ཞོན་ནས་དབྲོག་པར་བྱ་བ་ཡིན་ནོ། །དེས་གལ་ཏེ་འདིར་ཡང་མཚན་ཉིད་ཀྱིས་རྨོངས་པར་འགྱུར་ན་དེའི་ཚེ་ཕྱི་རོལ་གྱི་དོན་སྒྲུབ་པར་ཡང་འགྱུར་བ་ཞིག་ན་གང་གི་ཚེ་ཁྱེད་མཚན་ཉིད་ཀྱི་འོག་ཏུ་བསྒྱུར་བ་དེའི་ཚེ་ཕྱི་རོལ་གྱི་དོན་ཇི་ལྟར་སྒྲུབ་པར་བྱེད། གལ་ཏེ་དེ་ལྟ་ན་ཞེས་བྱ་བ་ནི། གྲུབ་པའི་མཐའ་སྨྲ་བའིའོ། །དོན་དམ་པར་མི་འགྲུབ་པ་ཉིད་དོ་ཞེས་བྱ་བ་ནི་ཆོས་མ་ངེས་པའོ། །
གཞན་དུ་ཞེས་བྱ་བ་ནི་གང་གི་ཚེ་དཔྱོད་པས་ཆོས་འཁྲུལ་པ་སྲེག་པ་དེའི་ཚེའོ། །ལུགས་གཞན་ལ་ཞེས་བྱ་བ་ནི་སངས་རྒྱས་པ་ལ་སོགས་པའི་ལུགས་ལ་ཆོས་ཀྱི་མིང་ཡང་མིད་པར་འགྱུར་རོ། །དེས་ན་འཇིག་རྟེན་གྱི་གྲགས་པ་རྗེས་སུ་བརྗོད་པ་ཡིན་ནོ་ཞེས་མི་བྱ་སྟེ། ཆོས་ཉིད་ཀྱང་འཇིག་རྟེན་ལས་གྲུབ་པར་ཐལ་ཕྱིར་རོ། །དེས་ན་ཚད་མས་གྲུབ་པ་ཉིད་རྗེས་སུ་བརྗོད་པར་བྱ་བ་ཡིན་ནོ། །དེ་ཉིད་བརྗོད་པ་ནི་དེའི་ཕྱིར་ཞེས་བྱ་བའོ། །དེ་བཞིན་དུ་ཞེས་བྱ་བ་ནི། ཇི་ལྟར་རྗེས་སུ་བརྗོད་པ་ཚད་མས་གྲུབ་པར་བྱེད་པ་དེ་ལ་ཐུག་པ་མེད་པའི་ཉེས་པ་ཡང་མེད་པ་དེ་བཞིན་དུ་མཚན་ཉིད་ཀྱང་བྱ་བ་ཡིན་ནོ། །འདི་ཡང་ཞེས་བྱ་བ་ནི་ཚད་མ་ཆོས་ཀྱི་རྒྱུ་མཚན་ཡིན་པ་ཉིད་དོ། །སྔར་ཞེས་བྱ་བ་ནི་ཚད་མ་གྲུབ་པའི་ལེའུར་རོ། །དེ་ལྟར་བྲམ་ཟེའི་མཚན་ཉིད་ཀྱང་བསལ་བ་ནས། སློབ་དཔོན་དབྱིག་གཉེན་གྱིས་མཛད་པའི་མཚན་ཉིད་གཞུང་གཟུགས་པའི་དོན་དུ་བརྗོད་པ་ནི། དོན་དེ་ལས་ཞེས་བྱ་བའོ། །དེ་ནི་ཞེས་བྱ་བ་ནི་ཟླ་བ་གཉིས་ཀྱི་ཤེས་པའོ། །དེ་ཉིད་ལས་ཞེས་བྱ་བ་ནི་སྣང་བཞིན་ཟླ་བ་གཉིས་ཀྱི་མཚན་ཉིད་ལས་སོ། །གཞན་ལས་ཞེས་བྱ་བ་ནི་ཟླ་བ་གཅིག་ལས་སོ། །སློབ་དཔོན་ནི་ཕྱོགས་ཀྱི་གླང་པོས་སོ། །གང་ཞིག་སྣང་བའི་རྣམ་པར་རིག་པ་དེ་ནི་དེ་ལས་སྐྱེ་བ་མ་ཡིན་ནོ། །ཅི་ལྟར་ཞེ་ན་ལྔ་པོ་ཞེས་བྱ་བ་དབང་པོ་ལྔའི་རྣམ་པར་ཤེས་པའོ། །བསགས་པ་སྟེ་རགས་པ་ལ་དམིགས་པ་གང་ཡིན་པ་སྟེ། དེ་ལྟར་གྱུར་པ་ཡིན་ནོ། །དེ་ནི་རགས་པ་ལས་སྐྱེ་བ་མ་ཡིན་ཏེ། རྡུལ་ཕྲ་རབ་རྣམས་ལས་སྐྱེ་པའི་ཕྱིར་རོ། །འདི་འཆད་པ་ནི་དམིགས་པའི་ཞེས་བྱ་བའོ། །འོན་ཏེ་གལ་ཏེ་ཤེས་པ་རྡུལ་ཕྲ་རབ་ཀྱི་རྣམ་པ་ཅན་མ་ཡིན་མོད། དེ་ལྟ་ན་ཡང་དེ་ལས་སྐྱེས་པ་ཙམ་གྱིས་དེའི་ལུས་ཅན་དུ་འགྱུར་རོ་སྙམ་ན། རྒྱུ་ཡིན་པའི་ཕྱིར་རོ་ཞེས་བྱ་བའོ། །དེ་དག་ཀྱང་ཞེས་བྱ་བ་ནི་མིག་ལ་སོགས་པའི་རྡུལ་ཕྲ་རབ་དག་གོ །འདི་སློབ་དཔོན་གྱིས་ཇི་ལྟར་གསུངས་ཞེས་བྱ་བ་ནི་ཕྱོགས་སྔ་མའོ། །འདི་ལ་གྲུབ་པའི་མཐའ་བས་བརྗོད་པ་ནི། འདི་ནི་ཞེས་བྱ་བའོ། །རྩོད་པ་སྒྲུབ་པ་ནི་སློབ་དཔོན་དབྱིག་གཉེན་གྱིས་མཛད་པ་སྟེ། དེ་ནི་ཚིག་ནིའོ། །རྣམ་པར་དཔྱོད་པ་སྟོན་པ་ནི་དོན་དེ་ལས་ཞེས་བྱ་བའོ། །གལ་ཏེ་རེ་ཞིག་སྣང་བཞིན་པའི་དོན་ལས་སྐྱེ་བའི་ཤེས་པ་གང་ཡིན་པ་སྟེ། མངོན་སུམ་ཡིན་ན་དེའི་ཚེ་འདི་མ་གྲུབ་པ་ཡིན་ནོ། །སྣང་བཞིན་པའི་དོན་ལས་ནི་ཤེས་པ་སྐྱེ་བ་མ་ཡིན་ཏེ་སྣང་བཞིན་
པའི་རང་གི་རྣམ་པ་ཡིན་པའི་ཕྱིར་རོ། །འོན་ཏེ་རང་གི་རྣམ་པ་ལས་ཀྱང་མངོན་སུམ་སྐྱེ་ན་འོ་ན་ནི་ཟླ་བ་གཉིས་པ་ཡང་རང་གི་རྣམ་པ་ལས་སྐྱེ་བའི་ཕྱིར་མ་ངེས་པ་ཡིན་ནོ། །སུན་འབྱིན་པ་གཞན་ནི་ཕྱེད་ཕྱི་མས་སོ། །དེ་ཉིད་རྣམ་པར་འགྲེལ་པ་ནི་རྡུལ་ཕྲ་རབ་དག་ཉིད་ཅེས་བྱ་བའོ། །རྡུལ་ཕྲ་རབ་དག་ཉིད་སྐྱེད་པར་བྱེད་པ་ཡིན་ནོ། །གལ་ཏེ་རྣམ་པ་གཞན་དུ་གྱུར་པ་དེ་དག་སྐྱེད་བྱེད་ཙམ་གྱིས་དམིགས་པ་ཉིད་ཡིན་ན། དེའི་ཚེ་མིག་ལ་སོགས་པའི་རྡུལ་ཕྲ་རབ་རྣམས་ཀྱང་འགྱུར་རོ། །ད་ནི་ཕྱེད་སྔ་མ་རྣམ་པར་འགྲེལ་པ་ནི་ཅི་སྟེ་ཞེས་བྱ་བའོ། །མ་ངེས་པ་ཡང་ཡིན་ནོ་ཞེས་བྱ་བ་འདི་ཉིད་བཤད་པའི་ཕྱིར་དོགས་པ་བསུ་བ་ནི་ཅི་སྟེ་ཞེས་བྱ་བའོ། །ཚོགས་པར་སྣང་བའི་དངོས་པོ་ནི་ཕྱི་རོལ་གྱི་དོན་མ་ཡིན་པ་ནི་དེས་ན་དེ་ཅི་ལྟར་དེས་སྐྱེད་པ་ཡིན། ཡིན་དུ་ཆུག་པ་དེ་ལྟ་ན་ཡང་འཁྲུལ་པའི་ཤེས་པས་མ་ངེས་པ་ཉིད་དོ། །དེ་ཡང་ཕྱི་རོལ་དེས་སྐྱེད་པ་ནི་ཡོད་ལ། དེའི་ཕྱི་རོལ་དམིགས་པ་ནི་མ་ཡིན་ནོ། །རང་སྐྱེ་བ་ལས་སྔར་གྱི་དོན་གྱི་ཡོད་པ་ནི་ཤེས་པས་འཛིན་པ་མ་ཡིན་ནོ། །འོན་ཏེ་ཤེས་པ་གཞན་གྱིས་སྔར་ཡོད་པ་འཛིན་ན་དེའི་ཚེ་ཤེས་པ་དེ་ཡང་མཚན་མངོན་སུམ་ཡིན་པར་བརྗོད་པར་བྱ་བ་ཡིན་ལ། མངོན་སུམ་ཡང་དོན་གྱིས་བསྐྱེད་པ་ཁོ་ན་ཡིན་ནོ། །དེས་ན་ཤེས་པ་གཞན་དེ་ཡང་ཇི་སྲིད་དོན་གྱིས་བསྐྱེད་པ་ཉིད་དུ་མ་གྲུབ་པ་དེ་སྲིད་ནི་མངོན་སུམ་ཉིད་མ་ཡིན་ལ། དོན་གྱིས་བསྐྱེད་པ་ཉིད་ཀྱང་དོན་གྱི་སྔར་ཡོད་པ་མ་བཟུང་བར་མི་སྲིད་དོ། །དེས་ན་ཤེས་པ་དེ་ནི་གང་ཡིན་པ་དེ་ཡང་གཞན་གྱིས་ཡོད་པར་ཤེས་པར་བྱ་བ་ཡིན་ཏེ། དེས་ན་ཐུག་པ་མེད་དོ། །རྗེས་སུ་དཔག་པས་དོན་གྱི་སྔར་ཡོད་པ་ཤེས་པ་ཁས་ལེན་ན། རྗེས་སུ་དཔག་པ་དེ་ཡང་མངོན་སུམ་ཉིད་ལས་ཡིན་ནོ། །དེ་ལྟ་ན་ཡང་རྗེས་སུ་དཔག་པ་ཡིན། མངོན་སུམ་གྱི་རྒྱུ་ཅན་ཡིན་ལ། མངོན་སུམ་ཡང་རྗེས་སུ་དཔག་པའི་རྒྱུ་ཅན་ཡིན་ནོ། །དེ་ལྟར་ཕན་ཚུན་རྒྱུ་ཡིན་ན། དང་པོ་གང་ཞིག་འབྱུང་བར་འགྱུར་ཏེ། གང་ཡང་མ་ཡིན་ནོ། །འོན་ཏེ་མངོན་སུམ་དང་རྗེས་སུ་དཔག་པ་དག་དུས་མཚུངས་པ་ཁོ་ན་ཡིན་ཏེ། དེས་ན་ཕན་ཚུན་བརྟེན་པར་མི་འགྱུར་རོ་སྙམ་ན། མངོན་སུམ་དང་ནི་ཞེས་གསུངས་སོ། །གྲངས་ཅན་གྱི་མཚན་ཉིད་ཀྱང་སུན་འབྱིན་པ་ནི་རྣ་བ་ལ་སོགས་པའི་ཞེས་བྱ་བ་ཡིན་ནོ། །སུན་འབྱིན་པ་གཞན་ནི། རྣ་བ་ལ་སོགས་འཇུག་པ་ནི། །ཤེས་པ་མེད་པར་མཚོན་མ་ཡིན། །ཞེས་
བྱ་བའོ། །རེ་ཞིག་ཕྱེད་ཕྱི་མ་འཆད་པ་ནི། འཇུག་པར་འདོད་པས་ཞེས་བྱ་བའོ། །རྣ་བ་ལ་སོགས་པའི་འཇུག་པ་མ་ཤེས་པར་མཚན་ཉིད་མ་ཡིན་ནོ་ཞེས་བྱ་བ་གང་ལས་ཤེ་ན། མ་རྟོགས་པར་ཅི་ལྟར་ཞེས་བྱ་བའོ། །མཚན་ཉིད་ནི་འཇུག་པར་བྱེད་པ་ཡིན་པར་བརྗོད་པར་བྱས་པ་ཡིན་ནོ་ཞེས་དགོངས་པའོ། །འོ་ན་ནི་ཞེས་བྱ་བ་ནི་མངོན་སུམ་གང་གིས་རྣ་བ་ལ་སོགས་པའི་འཇུག་པ་ཉེ་བར་མཚོན་པར་བྱ་བ་ཡིན་ཏེ་དེའིའོ། །དེས་ན་དེ་ལ་ཕ་རོལ་པོས་འདི་ལྟར་ལན་གདབ་པར་བྱ་བ་ཡིན་ནོ་ཞེས་སྟོན་པ་ནི་དེ་ཡང་ཞེས་བྱ་བ་སྟེ། རྣ་བ་ལ་སོགས་པ་ནི་འཇུག་པ་འཛིན་པར་བྱེད་པའི་མངོན་སུམ་ཡང་ངོ༌། །ཕྱེད་སྔ་མ་འཆད་པ་ནི་འཁྲུལ་པའི་ཤེས་པ་ལ་ཡང་རྣ་བ་ལ་སོགས་པའི་འཇུག་པ་ཡོད་པ་དེས་ན་ཇི་ལྟར་དེ་མངོན་སུམ་གྱི་མཚན་ཉིད་ཡིན། འོན་ཏེ་རྣ་བ་ལ་སོགས་པ་འཇུག་པ་གང་ཞིག་དོན་ལ་འཇུག་པ་སྟེ། མཚན་ཉིད་ཡིན་ལ་འཁྲུལ་པའི་ཤེས་པ་ལ་ནི་དོན་ལ་འཇུག་པ་མེད་པའི་ཕྱིར་སྐྱོན་མེད་དོ་ཞེ་ན། འདི་ལ་བརྗོད་པ་ནི་དོན་ལ་ཞེས་བྱ་བའོ། །ཅི་སྟེ་དོན་དེའི་ངོ་བོ་གང་ཡིན་པ་དེ་རིག་པ་ཉིད་མཚན་མ་ཡིན་ན་འདི་ལ་ཡང་བརྗོད་པ་ནི་དེ་ལྟ་ན་ཞེས་བྱ་བའོ། །དེ་ལྟར་མངོན་སུམ་ལྟར་སྣང་བ་རྫོགས་པར་བྱས་ནས་ཚད་མ་དང་འབྲས་བུ་རྣམ་པར་གཞག་པར་བྱ་བའི་ཕྱིར་དྲི་བ་ནི་ཡང་ཞེས་བྱ་བའོ། །ལན་ནི་གཞལ་བྱ་ཞེས་བྱ་བའོ། །ལན་ནི་གཞལ་བྱ་ཞེས་བྱ་བའོ། །གལ་ཏེ་ཁྱོད་ཀྱི་ལྟ་བ་ལ་དེ་ནི་ཤེས་པ་ཉིད་ཡིན་གྱི་གཞན་ནི་འགའ་ཡང་མ་ཡིན་ནོ། །ཤེས་པ་དེ་ལ་ཡང་འབྲས་བུ་ཡིན་པར་བརྗོད་པ་དེའི་ཕྱིར་ཚད་མ་གང་ཡིན། ཚད་མ་ནི་འབྲས་བུ་ལས་ཐ་དད་པ་ཡིན་པར་འཐད་པ་ཡིན་ན། ཤེས་པའི་མཚན་ཉིད་ཀྱི་འབྲས་བུ་ལས་ཐ་དད་པ་ནི་འགའ་ཡང་ཡོད་པ་མ་ཡིན་ནོ། །དེས་ན་ཚད་མ་ཉིད་མེད་པར་འགྱུར་རོ་ཞེ་ན་རྩོད་པ་འདི་ལ་གཞན་དག་གིས་བརྗོད་པ་ནི། ཁ་ཅིག་ན་རེ་ཞེས་བྱ་བའོ། །དབང་པོ་དང་དོན་དག་གི་ཕྲད་པ་དང་ལྟ་བའི་ཤེས་པ་དང་ཁྱད་པར་གྱི་ཤེས་པ་ནི་ཚད་མ་ཡིན་ནོ་ཞེས་སོ། །ཤེས་པའི་བདག་ཏུ་གྱུར་པ་རྟོགས་པའི་སྒྲུབ་བྱེད་ཀྱང་དབང་པོ་ལ་སོགས་པ་བསྐྱེད་པའི་རྒྱུད་ཉིད་ཡིན་ནོ། །རྣམ་པར་གཞག་པར་བྱ་བ་འདོད་པའི་དོན་གང་ཡིན་པ་དེ་བཞིན་དུའོ། །མ་ཡིན་ན་ནི་རྣམ་པར་མ་བཞག་པ་བཞིན་དུ་རྣམ་པར་གཞག་པར་འོས་པ་ཡང་རྣམ་པར་མི་གཞག་པར་འགྱུར་རོ། །ཉམས་སུ་མྱོང་བ་དེ་ལ་ནི། རྣམ་པར་བཞག་པ་དང་རྣམ་པར་མ་
བཞག་པའི་དོན་དག་ལ་ཡོད་པ་ཙམ་ལས་མ་རྟོགས་པ་ཁྱད་པར་མེད་པའི་ཕྱིར་རོ། །འདི་ཉིད་གཞུང་འཛུགས་པ་ནི་འདི་ལྟར་ཞེས་བྱ་བའོ། །གལ་ཏེ་ཁྱོད་ཀྱིས་ཞེས་བྱ་བ་ནི་གཞན་གྱིས་སྨྲས་པའོ། །འདི་ནི་བདག་གི་རང་གི་ངོ་བོ་ལས་ཞེས་བྱ་བ་ནི། སྔོན་པོ་ལ་སོགས་པ་གཅོད་པར་བྱེད་པའི་ལས་སོ། །གྲུབ་པའི་མཐའ་ནི་གལ་ཏེ་ཞེས་བྱ་བའོ། །ངག་ནི་བདག་གི་དེའི་བདག་ཉིད་དུ་གྱུར་པ་ཡིན་ཡང་ཞེས་བྱ་བ་ནི། སྔོན་པོ་ཡོངས་སུ་གཅོད་པའི་རང་བཞིན་དུ་ནི་ཡིན་ཡང་གལ་ཏེ་བདག་ཉིད་ཀྱིས་རང་བཞིན་མི་ཤེས་ན། དེའི་ཚེ་དེའི་ཁྱད་པར་ཅན་གྱི་དོན་དེ་ཡང་ངས་མ་ཤེས་པ་ཁོ་ནར་འགྱུར་ཏེ། རྒྱུ་དེས་ན་སྐྱེས་བུ་ནི་འཇལ་བྱེད་མ་ཡིན་ནོ། །དེ་ཉིད་གསལ་བས་བྱེད་པ་ནི་སྐྱེས་བུའི་ཞེས་བྱའོ། །འཇིག་རྟེན་དེ་ཡང་དོན་དེའི་རྟོགས་པར་བྱེད་པ་པོའི་བདག་མི་ཤེས་ཇི་ལྟར་ལོངས་སྤྱོད་པ་ཤེས་པ་དེ་ལྟར་ཞེས་བྱ་བ་ནི། བདེ་བ་དང་སྔོན་པོ་ལ་སོགས་པ་རྟོགས་པ་བར་རོ། །གལ་ཏེ་བློ་ལོངས་སྤྱོད་པ་ཡིན་མོད། དེ་ལྟ་ན་རྣམ་པ་ཇི་ལྟར་ཚད་མ་ཡིན་ན། བདེ་བ་ལ་སོགས་པ་ཞེས་གསུངས་སོ། །བློས་ཞེན་པར་བྱ་བའི་དོན་སྐྱེས་བུས་སེམས་པར་བྱེད་པ་དེས་ན། རིག་པ་གཞན་གྱིས་ཅི་བྱ་ཞེས་ཇི་ལྟར་བརྗོད་སྙམ་ན། འདི་ལ་བརྗོད་པ་ནི་བློ་དེ་གང་ཡིན་ཞིང་ཞེས་བྱ་བའོ། །འདི་ལ་གཞན་གྱིས་ལན་གསུམ་བཏབ་པ་ནི་ཞེས་བྱ་བའོ། །གྲུབ་པའི་མཐའ་བ་སུན་འབྱིན་པ་ནི་སྐྱེས་བུས་ཞེས་བྱ་བའོ། །ལས་ཉིད་དུ་འདོད་པ་ཞེན་པའི་བྱེད་པོ་ནི་སྐྱེས་བུ་ཉིད་ཡིན་པ་དེས་ན་བློས་ཅི་བྱ་རྟོགས་པ་པོས་སྒྲུབ་ཅེས་རྗེས་སུ་འཇུག་གོ །འདི་ལ་བརྗོད་པ་ནི་རྟོགས་པ་དང་ཞེས་བྱ་བའོ། །ཁྱད་པར་མེད་པ་ཉིད་བརྗོད་པ་ནི། དེའི་རྣམ་པ་ཞེས་བྱ་བའོ། །ཕ་རོལ་པོ་ཁྱད་པར་སྟོན་པ་ནི་དེའི་ཚེ་ཞེས་བྱ་བའོ། །མངོན་དུ་ཞེན་པ་ནི་རྟོགས་པའི་མཚན་ཉིད་ཡིན་པ་དེ་སྟེ། །སྐྱེས་བུའི་བྱེད་པ་ཡིན་ནོ་ཞེས་བྱ་བ་ནི། ཕ་རོལ་པོའི་བསམ་པའོ། །གལ་ཏེ་བློའི་རྣམ་པ་ཅན་ཡིན་མོད། དེ་ལྟ་ན་ཡང་མ་ཡིན་ཏེ། སྐྱེས་བུ་ཇི་ལྟར་རྟོགས་བྱེད་ཡིན་ཏེ་མ་ཡིན་པ་ཁོ་ནའོ། །འོན་ཏེ་བློའི་རང་བཞིན་མངོན་དུ་བྱེད་པའི་ཕྱིར། རིག་པར་བྱེད་པར་བརྗོད་ན། དེའི་ཚེ་དེ་ལྟར་ཞེས་བྱ་བ་ནི་བློའི་རང་བཞིན་ལྟར་མངོན་དུ་དོན་ཉིད་ཅེས་མི་བྱེད་པ་འཆད་པ་ནི་གལ་ཏེ་ཞེས་བྱ་བའོ། །ཡུན་རིང་པོ་མ་ཡིན་པའི་དོན་གྱི་རྣམ་པར་རྟོགས་སོ། །དོན་ནི་འདི་ཡིན་ཏེ། གལ་ཏེ་བློ་མེད་ན་དེའི་
དོན་གྱི་རྣམ་པ་མ་བསྟབས་པའི་ཕྱིར་ན་ཉེ་བར་གནས་པ་ཉིད་དུ་མ་རྟོགས་པར་འགྱུར་རོ་ཞེ་ན། འདི་ལ་བརྗོད་པ་ནི་བདག་ཁྱབ་པར་ཞེས་བྱ་བའོ། །གལ་ཏེ་བློས་དོན་གྱི་རྣམ་པ་སྟོབས་ན་དེའི་ཚེ་ཡུལ་ཐག་རིང་པོ་ཞེས་བྱ་བར་རྟོགས་པར་ཡང་མི་འགྱུར་ཏེ། དོན་གྱི་རྣམ་པ་མཐའ་དག་ནི་བློས་བསྟབས་པ་ཡིན་པའི་ཕྱིར་རོ། །གལ་ཏེ་བློ་དེའི་རྣམ་པ་ཅན་ཁས་ལེན་ན། དེའི་ཚེ་དེ་ལས་ཐ་དད་པའི་དོན་ཡོད་དོ་ཞེས་བྱ་བར་ཡང་མི་འགྱུར་རོ། །བློ་ཁོ་ན་ལས་ཞེས་བྱ་བ་ནི། །ཞེས་བྱ་བ་ནི་རང་བཞིན་ལས་ནི་བློ་སྐྱེ་ལ་དེ་ལས་ནི། དངོས་སམ་བརྒྱུད་པས་ཐམས་ཅད་སྐྱེ་བ་ཡིན་ནོ། །བདེ་བ་ན་དེ་ཁོ་ན་ལས་དེའི་རྣམ་པ་ཅན་གྱི་དོན་རྣམས་སྐྱེ་བ་ཡིན་གྱི་དོན་ལས་ནི་དེའི་རྣམ་པ་ཅན་གྱི་སྐྱེ་བ་མ་ཡིན་ནོ་ཞེས་བྱ་བ་ནི། ཁྱེད་ཀྱི་གྲུབ་པའི་མཐའ་ཡིན་ནོ་ཞེས་བྱ་བ་ནི་གྲུབ་པའི་མཐའ་ཡིན། དེ་ཇི་ལྟར་ཕྱིན་ཅི་ལོག་ཏུ་ཁས་ལེན། རང་གི་བཞིན་ལྟར་ཞེས་བྱ་བ་ནི་གཞན་གྱིའོ། །གང་དུ་དོན་རྣམས་འཕྲོས་པ་དེ་ནི་བློ་ཡིན་ཏེ་དེ་ལྟར་དེས་བློ་ནི་ཇི་ལྟར་དོན་མེད་པ་ནི་གཞན་ནི་སྟེ་དོན་རྣམས་ནི་ཡུལ་རུང་བ་མ་ཡིན་པ་ཉིད་མ་ཡིན་ནོ། །གལ་ཏེ་ཐབས་གཞན་དུ་འཕོས་པ་ཁོ་ན་རྟོགས་པར་བྱ་བ་ཡིན་ནོ། །དེའི་ཚེ་མེ་ལོང་ལ་ཡང་ཞེས་བྱ་བ་སྦྱར་རོ། །དེ་ཡང་ནི་མེ་ལོང་ཡང་ངོ༌། །འགྲོ་བ་ལྡོང་བར་འགྱུར་རོ། །ལྡོངས་པ་མ་ཡིན་ཏེ། དེས་ན་བློ་ནི་གདོན་མི་ཟ་བ་ཁོ་ནར་ཤེས་གཞན་གདོན་མི་ཟ་བ་ཁོ་ནར་ཤེས་པར་བྱ་བ་ཡིན་ནོ། །ཇི་ལྟར་བློ་གཞན་དུ་མ་འཕོས་པ་ཁོ་ན་རྟོགས་པ་དེ་བཞིན་དུ་དོན་ཡང་རྟོགས་མོད། བློས་ཅི་བྱ་དེས་ན་ཉེས་པ་སོ་ན་འདུག་གོ་ཞེས་དགོངས་པའོ། །ཡང་བློ་དོན་མེད་པ་ཉིད་དུ་སྟོན་པ་ནི་བདག་ཅེས་བྱ་བའོ། །ཕ་རོལ་པོ་ དགོས་པ ་ཉིད་ཡོད་དོ་ཞེས་སྟོན་པ་ནི། དེ་དག་གིས་ཞེས་བྱ་བ་སྟེ་བྱེད་པ་རྣམས་ཀྱིས་སོ། །འདི་ལ་བརྗོད་པ་ནི་མ་ཡིན་ནོ་ཞེས་བྱ་བའོ། །བདག་ནི་མངོན་པར་གསལ་བ་འཛིན་པར་བྱེད་པ་མ་ཡིན་ཞིང་བདག་གིར་བྱེད་པ་མ་ཡིན་ཏེ། མངོན་པར་གསལ་བར་མི་འགྱུར་རོ་ཞེས་བྱ་བའི་དོན་ཏོ། །བྱེད་པ་མེད་པ་ཉིད་ཅེས་བྱ་བ་ནི་ཇི་ལྟར་དོན་མི་འཛིན་པའི་དུས་ན་མངོན་པར་གསལ་བ་མ་ཡིན་པ་དེ་བཞིན་དུ་འཛིན་པའི་དུས་སུ་ཡང་མ་ཡིན་ཏེ། དེ་ནི་རང་བཞིན་གཅིག་ཡིན་པའི་ཕྱིར་རོ་ཞེས་བྱའི་དོན་ཏོ། །མེ་ལོང་བཞིན་དུ་ཞེས་བྱ་བ་ནི་ཕ་རོལ་པོའོ། །བདག་ཀྱང་དོན་གྱི་རྣམ་པ་ཅན་ཡིན་མོད་ཀྱི་འོན་ཀྱང་ཇི་ལྟར་མེ་ལོང་ལ་དེའི་
རྣམ་པ་འབྱུང་ཡང་རྣམ་པར་འགྱུར་བ་ཅུང་ཟད་ཀྱང་བྱེད་པ་མེད་པ་དེ་བཞིན་དུ་སྐྱེས་བུ་ཡང་ཡིན་ནོ་ཞེ་ན་འདི་འགོག་པ་མ་ཡིན་ཏེ་ཞེས་བྱ་བའོ། །བདག་ལ་བརྟེན་ནས་དེའི་རྣམ་པ་ཅན་གྱི་བློ་སྐྱེ་བ་ཞེས་བྱ་བ་ནི་མེད་པ་ཁོ་ནའོ། །དེ་ལྟ་མ་ཡིན་ཏེ་གལ་ཏེ་མེ་ལོང་ལ་བརྟེན་ནས་དེའི་རྣམ་པ་ཅན་གྱི་བློ་སྐྱེ་བ་མ་ཡིན་ན། དེའི་ཚེ་འཕོས་པའི་དོན་ཅི་ཡིན་དེའི་རྣམ་པ་ཅན་གྱི་བློ་སྐྱེ་བའི་སྒོ་ནས་རྣམ་པར་འགྱུར་བ་ཉིད་འཕོས་པའི་དོན་ཡིན་གྱི་གཞན་ནི་མེད་དོ་ཞེས་དགོངས་པའོ། །བདག་ལ་བརྟན་ནས་དེའི་རྣམ་པ་ཅན་གྱི་བློ་སྐྱེ་བ་ནི་མེད་པ་ཁོ་ན་སྟེ་དེས་ན་རྣམ་པར་འགྱུར་བ་ཉིད་དེར་འཕོས་བའི་དོན་དུ་བརྗོད་པར་བྱ་བ་ཡིན་ན། འདིར་ཡང་ཞེས་བྱ་བ་ནི་ཕ་རོལ་པོའིའོ། །དེ་ལ་ཡང་རྣམ་པར་འགྱུར་བ་ཅི་ཡང་མེད་ལ། དེ་བཞིན་དུ་སྐྱེས་བུ་ལ་རྣམ་པར་འགྱུར་བ་མེད་ཅེས་བྱ་བའི་དོན་ཏོ། །འདི་ལ་བརྗོད་པ་ནི་འོ་ན་ཞེས་བྱ་བའོ། །གལ་ཏེ་སྣམ་བུ་ལ་སོགས་པའི་བདག་ཉིད་འཁྲུལ་པ་ཡིན་ན། ཇི་ལྟར་གཙོ་བོ་དང་སྐྱེས་བུའི་བདག་ཉིད་ཀྱང་འཁྲུལ་པར་འགྱུར་ཞེ་ན། འདི་ཡང་ཞེས་བྱ་བའོ། །རྣམ་གཞན་དུ་ཞེས་བྱ་བ་ནི། གནས་སྐབས་གཞན་གྱི་གྲངས་ཅན་གྱི་སྐབས་ཀྱིས་སོ། །འདི་བསྟན་པར་བྱ་བ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རྣ་བ་ལ་སོགས་པ་ཞེས་བྱ་བ་ནི། དེས་ན་དེ་ཐ་དབབ་ལས་སྔོན་པོ་དང་སེར་པོ་ལ་སོགས་པ་རྣམ་པར་གནས་པར་འགྱུར་ཞེས་བྱ་བ་ནི་ཕ་རོལ་གྱི་བསམ་པའོ། །དབང་པོ་ལ་སོགས་པ་ཐ་དད་པ་ཞེས་བྱ་བ་ནི་རྣ་བ་ལ་སོགས་པ་འཇུག་པའི་མཚན་ཉིད་དོ། །དེ་ནི་ཞེས་བྱ་བ་ནི་དབང་པོ་ལ་སོགས་པའི་ཐ་དད་པ་ནིའོ། །དེ་ཞེས་བྱ་བ་དག་གོ ། རྣམ་པ་དང་བཅས་པར་ཞེས་བྱ་བ་ནི་གལ་ཏེ་དབང་པོ་ལ་སོགས་པས་བདག་སྐྱེས་པ་ཡིན་ན། དེའི་ཚེ་འབྲས་བུ་རྒྱུ་དང་རྗེས་སུ་མཐུན་པར་བྱེད་པ་སྐྱེ་བར་འདོད་པའི་ཕྱིར་བདག་ཀྱང་རྣམ་པ་ངང་བཅས་པར་ཐལ་ལོ། །འོན་ཏེ་རྣམ་པ་འགའ་ཞིག་ལྟར་དབང་ལ་སོགས་སྐྱེ་ཡང་བདག་རྣམ་པར་ཉིད་དུ་འདོད་ན། དེ་ལྟ་ན་ཡང་རྣམ་པ་མེད་ན། དོན་སོ་སོར་ངེས་པ་རྣམ་པར་འཇོག་པ་བྱེད་པ་མ་ཡིན་པའི་མཚན་ཉིད་ཀྱི་སྐྱོན་དེ་ཉིད་དུ་འགྱུར་རོ། །དེ་ལྟ་ན་ཡང་གཞན་རིག་པ་མེད་པས་ན། རང་གི་བདག་ཉིད་ཁོ་ན་རིག་པར་ཐལ་ཏེ། རིག་པར་བྱེད་པ་ཉིད་དུ་ཁས་བླངས་པའི་ཕྱིར་རོ། །རྣམ་པར་རྟོག་པ་གཉིས་པའི་དབང་
དུ་བྱས་ནས་བརྗོད་པ་ནི་འོན་ཏེ་ཞེས་བྱ་བའོ། །དབང་པོ་ལ་སོགས་པའི་མཚན་ཉིད་ཀྱི་དོན་མ་ཤེས་པ་ན་དབང་པོ་ལ་སོགས་པ་ངེས་པའི་ཤེས་པའི་བྱེད་པ་ཡིན་པར་ཇི་ལྟར་འགྱུར། །ངེས་པ་ཉིད་ལས་དབང་པོ་ལ་སོགས་པ་ཡང་ཤེས་སོ་ཞེ་ན། དབང་པོ་ལ་སོགས་པ་ཤེས་པར་བྱེད་པ་ལས། བདག་གི་སྔོན་པོ་དང་སེར་པོ་ལ་སོགས་པ་ལ་ངེས་པ་ཉིད་ཤེས་པར་བྱ་བ་ཡིན་ལ། སྔོན་པོ་དང་སེར་པོ་ལ་སོགས་པ་ལ་ངེས་པ་ཤེས་ན། ཡང་ཤེས་པར་བྱེད་པ་དབང་པོ་དབང་པོ་སོགས་པ་ཤེས་པར་བྱ་བ་ཡིན་པའི་ཕྱིར་ཕན་ཚུན་བརྟེན་པ་ཉིད་དོ། །ཇི་ལྟར་དབང་པོ་སོགས་པ་ཤེས་པར་བྱེད་པས་དོན་ཤེས་པར་བྱ་བདེ་བཞིན་དུ་དབང་པོ་ལ་སོགས་པ་དེ་ཤེས་པར་བྱ་བ་ལ་སོགས་པར་སྦྱར་རོ། །སྣང་བ་ཡང་སྒྲ་ལ་སོགས་པ་རྟོགས་པའི་དུས་ན། ཇི་ལྟར་ཤེས་པར་བྱེད་པ་ཡིན་ཏེ། དེའི་ཚེ་མེད་པའི་ཕྱིར་རོ། །ཡང་ན་གང་དུ་སྣང་བ་ལ་སོགས་པ་ཡོད་པ་དེར་མིག་ལ་སོགས་པ་དོན་མེད་པར་འགྱུར་རོ། །ཐམས་ཅད་དུ་སྣང་བ་ཤེས་པར་བྱེད་པ་ཡང་མ་ཡིན་ནོ་ཞེས་བྱ་བ་འདི་ལན་འདེབས་པ་ནི། དེ་དག་ཉིད་ཅེས་བྱ་བ་སྟེ། རྣ་བ་ལ་སོགས་པ་དག་ཉིད་དོ། །འདི་ཞེས་བྱ་བ་ནི་བདག་གོ །འདི་ནི་ཞེས་བྱ་བ་ལ་སོགས་པ་ནི་ངེས་པའི་རྣམ་པ་ཡིན་ནོ། །རྣམ་པ་ལས་སྒྲུབ་པར་བྱེད་པ་གཞན་ཡིན་ན། སྔོན་པོ་དང་སེར་པོ་ལ་སོགས་པའི་ལས་དང་འབྲེལ་པ་མི་འགྲུབ་བའོ། །དེ་ཉིད་སྒྲུབ་པའི་དོན་དུ་བརྗོད་པ་ནི། གལ་ཏེ་ཞེས་བྱ་བའོ། །ཅི་སྟེ་གཞན་འགའ་ཞིག་ཅེས་བྱ་བའི་དོན་དང་ཤེས་པ་ལས་ཐ་དད་པའི་རང་བཞིན་ཉིད་མངོན་དུ་བྱེད་པ་ཡིན་ནོ་ཞེས་བྱ་བའོ། །དེ་ལྟར་རྣམ་པར་རྟོག་པ་གསུམ་ལས་དང་པོ་ལ་བརྗོད་པ་ནི་གལ་ཏེ་ཞེས་བྱ་བའོ། །རྣམ་པར་ཤེས་པ་ཉིད་མངོན་དུ་བྱེད་པར་གྲངས་པར་ཡིན་ཏེ། དེས་ན་མངོན་དུ་བྱེད་པ་དེ་དོན་གྱི་ཡིན་པ་ཇི་ལྟར་འགྱུར་ཏེ། མི་འགྱུར་བ་ཁོ་ནའོ། །གཉིས་པ་ཉེ་བར་བཀོད་ནས་སུན་འབྱིན་པ་ནི་འོན་ཏེ་ཞེས་བྱའོ། །དོན་དེ་ཞེས་བྱ་བ་ནི་ཤེས་པ་མངོན་དུ་བྱས་པ་ན་གཞན་མངོན་དུ་བྱས་པར་ནི་མི་འགྱུར་རོ། །གསུམ་པ་ལ་བརྗོད་པ་ནི་གཞན་ལ་ཞེས་བྱ་བའོ། །དེ་ཉིད་རིམ་གྱིས་བཤད་པའི་ཕྱིར། རྣམ་པར་རྟོག་པ་དང་པོ་ལ་རེ་ཞིག་སུན་འབྱིན་པ་གཞན་བརྗོད་པ་ནི། འདི་ལྟར་ཞེས་བྱ་བའོ། །རྣམ་པར་རྟོག་པ་གཉིས་པའི་སུན་འབྱིན་པ་ཁ་སྐོང་དང་བཅས་ཏེ། བརྗོད་པ་
ནི་འོན་ཏེ་ཞེས་བྱ་བའོ། །འདི་ཞེས་བྱ་བ་ནི་མངོན་དུ་བྱེད་པའོ། །དོན་ལྟ་བའི་སྐྱེས་བུ་མཐོང་བའི་རྒྱུ་དེས་ན། དོན་མཐོང་ངོ་ཞེས་བརྗོད་དོ་ཞེ་ན། འདི་ལ་བརྗོད་ན་ཅིས་མཐོང་ཞེས་བྱ་བའོ། །འདིར་གཞན་གྱི་ལན་ནི་རང་གི་ངོ་བོས་སོ་ཞེས་བྱ་བ་སྟེ། དོན་གྱི་རང་གི་ངོ་བོ་གང་ཡིན་པ་དེས་དོན་མཐོང་ངོ་ཞེ་ན། འདི་ལ་བརྗོད་པ་ནི་འོན་ནི་ཞེས་བྱ་བའོ། །རང་གི་ངོ་བོ་ནི་གདོན་མི་ཟ་བར་རིག་པའི་རང་བཞིན་དུ་མཐོང་ངོ་ཞེས་རེ་ཞིག་ཁས་བླང་བར་བྱ་སྟེ། དེ་ལྟར་མ་ཡིན་ཏེ་རང་གི་ངོ་བོ་མྱོང་བ་མེད་ན་ཐམས་ཅད་མི་རིག་པར་ཐལ་བའི་ཕྱིར་རོ། །དེ་བཞིན་དུ་དོན་ཀྱང་དོན་གྱི་རང་བཞིན་དུ་མཐོང་བ་ཡིན་ནོ། །ཐ་དད་པ་མེད་པ་ཉིད་བསྟན་པའི་ཕྱིར་བརྗོད་པ་ནི། དོན་གྱི་རྣམ་པ་ཞེས་བྱ་བའོ། །གལ་ཏེ་དོན་གྱི་རྣམ་པ་ཉམས་སུ་མྱོང་བ་ན་དོན་རྟོགས་པ་མ་ཡིན་གྱི། འོན་ཀྱང་བདེ་བའི་རྣམ་པ་ལ་སོགས་པའི་རྣམ་པ་ཉམས་སུ་མྱོང་བ་ཡིན་ནོ་སྙམ་ན། བདེ་བ་ལ་སོགས་པའི་ཞེས་གསུངས་སོ། །དེའི་ཁྱད་པར་ལས་ཞེས་བྱ་བ་ནི་བདེ་བ་ལ་སོགས་པའི་རྣམ་པའི་ཁྱད་པར་ལས་སོ། །བདེ་བ་ཉིད་འབའ་ཞིག་ཅེས་བྱ་བ་ནི། དོན་ནི་བདེ་བའི་རྒྱུར་ཉམས་སུ་མྱོང་བར་ནུས་པ་མ་ཡིན་ནོ། །གང་གི་ཕྱིར་དོན་ལ་བདེ་བ་མྱོང་བ་དེས་ན་བདེ་བའི་རྒྱུ་ཉིད་དུ་ཉམས་སུ་མྱོང་བ་ཡིན་ནོ་སྙམ་ན། སྔོན་པོ་ལ་ཞེས་གསུངས་སོ། །མཚུངས་པར་ཞེས་བྱ་བ་ནི་མི་མཐུན་པ་ཉིད་དུའོ། །གལ་ཏེ་ཚད་མའི་འབྲས་བུ་དེ་རང་གི་ངོ་བོ་ཉིད་ཡིན་ནོ། །དེའི་ཚེ་དེ་ལ་རིག་བྱར་མེད་པ་ཡིན་ཏེ། བདག་ཉིད་ལ་ནི་བྱེད་པ་མི་འཐད་པའི་ཕྱིར་རོ་ཞེས་བྱ་བ་ནི་ཕ་རོལ་པོའོ། །གྲུབ་པའི་མཐའ་ནི་འདི་ལ་ཞེས་བྱ་བའོ། །གལ་ཏེ་ཤེས་པ་ལ་བྱེད་པ་ཞེས་བྱ་བ་ཡོད་པ་མ་ཡིན་ནོ། །དེའི་ཚེ་སྐྱེས་བུ་ཇི་ལྟར་འཇུག་པ་ཡིན་ཞེ་ན། སྐྱེས་བུའི་ཞེས་གསུངས་སོ། །དོན་གྱི་རིག་པ་ནི་དོན་རིག་པ་ཡིན་ན་དོན་ལ་བྱེད་པ་ཡང་མེད་པའི་ཕྱིར་ཇི་ལྟར་དོན་རིག་པ་འབྲས་བུ་ཡིན་ཞེས་བརྗོད་སྙམ་ན། འདི་ལ་བརྗོད་པ་ནི་འབྲས་བུ་ཞེས་བྱའོ། །གལ་ཏེ་སྔོན་པོ་མྱོང་བ་ནི་སྔོན་པོའི་རང་བཞིན་ཡིན་པ་དེའི་ཚེ་སྔོན་པོའི་ཤེས་པ་སེར་བ་ལ་མ་འཕོ་བར་འགྱུར་རོ། །ཅིའི་ཕྱིར་གཞན་གྱིས་ཞེས་སྨོས་སོ། །རྒྱུ་དེས་ན་ཤེས་པ་དེ་སྔོན་པོ་ལས་ཐ་དད་པར་གཞག་པ་ཡིན་ནོ། །དེ་ཡང་ཞེས་བྱ་བ་ནི་ཐ་དད་པ་དང་བྱེད་པ་དང་བཅས་པར་རྣམ་པར་
འཇུག་པའི་རིགས་པ་ཡང་ངོ༌། །དེང་དེ་མ་ཡིན་པ་སྔོན་པོ་མ་ཡིན་པའི་རྣམ་པ་ཅན་ནོ། །རྗེས་སུ་འགྲོ་བ་དང་ལྡོག་པ་ཉིད་ཇི་ལྟར་འགྲུབ་སྙམ་ན། ཐོག་མེད་ཅེས་གསུངས་སོ། །རྗེས་སུ་འགྲོ་བ་དང་ལྡོག་པ་དེ་དག་མངོན་སུམ་སྔོན་དུ་འགྲོ་བ་ཅན་ནི་མ་ཡིན་ནོ། །རིགས་མི་མཐུན་པའི་ཤེས་པ་སྔ་མ་གང་ཡིན་པ་དེའི་ཉམས་སུ་མྱོང་བ་གང་ཡིན་པ་དེས་གཞག་པའི་བག་ཆགས་གང་ཡིན་པ་དེ་ནི་ལྡོག་པ་སྟེ། ཐ་དད་པ་དང་བྱེད་པའི་རྟོགས་པའི་ས་བོན་ཡིན་ནོ། །བག་ཆགས་དེ་ཡང་འབའ་ཞིག་པ་སྟེ། མངོན་སུམ་དང་བྲལ་བ་ཡིན་ན། །དེས་ན་ལོར་བ་བརྒྱུད་པ་ཡིན་ནོ། །དེས་ནི་དོན་གྱིས་སོ། །དེ་ལ་ནི་ཤེས་པ་ལའོ། །དེ་ཞེས་བྱ་བ་ནི་པུ་ལའོ། །དེའི་རྣམ་པ་ནི་ཕའི་རྣམ་པའོ། །འདི་ལ་ནི་ཤེས་པ་ལའོ། །རེ་ཞིག་དེའི་རྣམ་པ་ཅན་གྱི་དངོས་པོ་ལས་དེའི་རྣམ་པ་ཅན་དུ་གྱུར་པ་ནི་དམིགས་པ་ཉིད་དོ། །དེ་ལ་ཡང་གལ་ཏེ་མཐོང་བ་ལ་ཞེས་བྱ་བ་འདོད་ཆགས་ལ་སོགས་པ་མཐོང་བ་ལ། རྒྱུ་བག་ཆགས་ནུས་པ་ཡོད་ན་དེའི་ཚེ་ཉམས་སུ་མྱོང་བ་སྔ་མ་སྔ་མ་ལས་དེའི་རྣམ་པ་ཉིད་ཡིན་ནོ། །གཅིག་ཉིད་ལ་ཡོད་པ་ཡིན་ཞེས་བྱ་བ་ནི་ཐུན་མོང་མ་ཡིན་པ་ཁོ་ནའོ། །དོན་ནི་གནས་པར་གྱུར་ན་སྟེ་ཕྱི་རོལ་ཡོད་ན་ནི་ཐམས་ཅད་ལ་ཐུན་མོང་དུ་སྐྱེ་བར་འགྱུར་ཏེ། ཀུན་གྱིས་དམིགས་པར་འགྱུར་རོ་ཞེས་བྱ་བའི་ཐ་ཚིག་གོ །སྐྱོན་བརྒལ་བའི་ཕྱིར་རེ་ཞིག་དམ་འཆའ་བར་བྱེད་པ་ནི་དོན་སོ་སོར་ཞེས་བྱ་བའོ། །འདི་ལྟ་བུ་ཁོ་ནར་ཞེས་བྱ་བ་ནི་རྣམ་པའི་སྟོབས་ཉིད་ཀྱིས་སོ། །དེ་ཉིད་ཀྱི་ཞེས་བྱ་བ་ནི་འདི་ནི་འདིའི་ངེས་པའི་ཤེས་པ་ཡིན་ནོ་ཞེས་བྱ་བའི་ཐ་སྙད་དོ། །དེ་ལ་ནི་ཞེས་བྱ་བ་སོ་སོར་ངེས་པའི་དོན་རྣམ་པར་གནས་པ་ལའོ། །བྱ་བསྒྲུབ་པར་བྱེད་པ་ཙམ་ནི་ཁྱད་པར་དུ་འཕགས་པ་ཡིན་ནོ། །དེ་ནི་རྒྱུ་ཐམས་ཅད་ལ་ཡོད་པའི་ཕྱིར་རོ། །ངེས་པས་ན་བྱ་བ་སྒྲུབ་པར་བྱེད་པ་དེ་ནི་ཡོད་ཀྱང་དེ་ལ་ཞེས་བྱེད་པ་པོ་དེ་རྣམས་ཀྱི་ནང་ནས་གང་ཞིག་བྱ་བ་ལ་ཆོད་པ་མེད་པ་དེ་ཉིད་སྒྲུབ་པར་བྱེད་པ་དམ་པ་སྟེ་བྱེད་པ་ཡིན་ནོ། །མ་ཐོབ་ན་ཞེས་བྱ་བ་ནི་མི་ལྡན་ན་དེའི་ཚེ་དེའི་རྣམ་པ་ཅན་གྱི་ཞེས་བྱ་བ་ཡུལ་ཐག་རིང་བ་ལ་སོགས་པར་གནས་པའི་དོན་རྣམ་པར་མི་གནས་སོ། །དེ་དང་བར་མཆོད་པ་ཞེས་བྱ་བ་ནི་རྣམ་པ་དང་བར་མཆོད་པར་འགྱུར་བའོ་ཞེས་བྱ་བ་དོན་ཡོངས་སུ་གཅོད་པར་བྱ་བ་ཡིན་ནོ། །ཤེས་པ་དེའི་རྣམ་པའི་ཁྱད་
པར་གང་ཡིན་པ་དེ་ལས་མྱོང་བའི་ཡུལ་ཡིན་ནོ་ཞེས་ཤེས་པར་བྱ་བ་ཡིན་ནོ། །རྒྱུ་དེའི་ཕྱིར་ན་མ་ཉམས་པ་དེ་ནི་རྣམ་པས་ཆོད་པ་ཡིན་ནོ། །གལ་ཏེ་རྣམ་པ་ངེས་པས་གྲུབ་ན་ནི་དེའི་ཚེ་དོན་དེ་ཉིད་དོན་རྣམ་པར་འཛེག་པ་ཡིན་ཏེ། རྣམ་པ་ངེས་པ་གྲུབ་བ་ལས་དོན་གནས་པ་གཞན་མེད་པའི་ཕྱིར་རོ། །དེ་ལས་གཞན་ཉམས་པ་མེད་པ་ནི་དོན་རྣམ་པར་གནས་པ་ལས་རྒྱུ་མ་ཡིན་ནོ། །གལ་ཏེ་དེ་ལྟ་ན་ཡང་ཉམས་པ་མེད་པ་ཚད་མར་འགྱུར་རོ་སྙམ་ན། དོན་གནས་པ་གྲུབ་ཟིན་པ་ལ་ཉམས་པ་མེད་པས་ཅི་ཞིག་རྒྱས་པར་བྱེད། གྲུབ་པ་ཉེ་བར་འཇོག་པ་ནི། རྣམ་པར་གནས་པ་ལ་མ་ཁོ་བ་མ་ཡིན་ནོ་ཞེས་བྱ་བའི་དོན་ཏོ། །དེ་གྲུབ་ན་ཞེས་བྱ་བ་ནི་རྣམ་པར་ངེས་པ་གྲུབ་ནའོ། །ད་ནི་སློབ་དཔོན་ཆོས་མཆོག་གི་ལུགས་སུན་ཕྱུང་བའི་དོན་དུ་ཉེ་བར་འགོད་པ་ནི། དེའི་རྣམ་པ་ཡང་ཞེས་བྱ་བའོ། །དེའི་ཚེ་ཞེས་བྱ་བ་གོམས་པའི་དུས་ནའོ། །དེས་ན་ཡོད་པ་མ་ཡིན་པའི་ཕྱིར་ཚད་མར་ཇི་ལྟར་འགྱུར་ཞེས་བྱ་བའི་དོན་ཏོ། །དེ་ཡང་ནི་རྗེས་སུ་དཔག་པ་ཡང་ངོ༌། །དེ་བཞིན་དུ་ཐུན་མོང་མ་ཡིན་པ་ཡང་གཞན་ནི་མ་ཡིན་ནོ་ཞེས་འབྲེལ་ཏོ། །ཡང་ཇི་ལྟར་ན་རྣམ་པ་ལས་གཞན་ཐུན་མོང་མ་ཡིན་པར་མི་འགྱུར་སྙམ་དུ་དོགས་པ་བསུ་ནས་ཀུན་གྱི་ཞེས་གསུངས་སོ། །ཤེས་པ་ཀུན་གྱིའོ། གལ་ཏེ་སྔོན་པོ་དེ་སེར་པོ་དང་དེ་གཉིས་མ་ཡིན་པའི་ཡུལ་ལ་ཡང་དབང་པོ་དེ་ཉིད་མ་ཡིན་ནམ་དེ་དབང་པོ་རྣམས་ཐ་དད་པ་ནི་འགའ་ཡང་ཉེ་བར་མཚོན་པ་མེད་དོ། །དེས་ན་དབང་པོ་གཞན་དང་གཞན་འབྱུང་བ་མ་ཡིན་ནམ་ཞེས་བརྗོད་ཅེས་དོགས་པ་བསུ་ནས་པ་རོལ་པོ་ཉིད་བརྗོད་པ་ནི་དེ་ལ་ཞེས་བྱ་བ་སྟེ། སྔོན་པོ་དང་སེར་པོ་དང་དེ་གཉི་ག་ཡང་མ་ཡིན་པ་ལ་མངོན་པར་ཕྱོགས་པའོ། །ཁྱད་པར་ཞེས་བྱ་བ་ནི་སྔོན་པོ་དང་སེར་པོ་ལ་སོགས་པའི་ཡུལ་མངོན་པར་ཕྱོགས་པ་ཞེས་བྱ་བ་འདི་ནི་སྔོན་པོ་དང་སེར་པོ་ལ་སོགས་པ་དེ་དག་གི་རྣམ་པ་གང་ཡིན་པ་དེ་ཐ་དད་པ་མེད་པར་རོ། །དེ་ཐ་དད་པ་ཡིན་ཡང་ཞེས་བྱ་བ་ནི་མངོན་སུམ་དུ་ཕྱོགས་པ་ཐ་དད་པ་ཡིན་ཡང་ངོ༌། །རྣམ་པ་དང་བྲལ་བ་ཞེས་བྱ་བ་ནི་དོན་གྱི་རྣམ་པ་དང་བྲལ་བ་འདི་དབང་པོའོ། །གལ་ཏེ་སྔོན་པོ་དང་སེར་པོ་ལ་སོགས་པའི་ཁྱད་པར་རྟོགས་པ་ཡོད་པ་ཉིད། དེས་ན་མངོན་དུ་ཕྱོགས་པའི་ཁྱད་པར་རྟོགས་པར་འགྱུར་རོ་ཞེས་
གལ་ཏེ་ཡོད་ན་ཞེས་བྱ་བ་སྟེ། སྔོན་པོ་དང་སེར་བོ་ལ་སོགས་པའི་ཁྱད་པར་ཡོད་ནའོ། །དེ་ལས་བཟློག་བར་ཞེས་བྱ་བ་ནི་ཁ་དོག་དང་དབྱིབས་ཀྱི་བདག་ཉིད་ལས་བཟློག་པར་རོ། །སྣང་བཞིན་པའི་སྔོན་པོ་དང་སེར་པོ་ལ་སོགས་པ་ཉིད་ཤེས་པའི་རང་བཞིན་ཡིན་པ་མི་བཟོད་པས་ཕ་རོལ་པོ་འདྲི་བ་ནི། འོ་ན་ཞེས་བྱ་བའོ། །གལ་ཏེ་བདེ་བ་དང་སྔོན་པོ་ལ་སོགས་པ་ལས་མ་གཏོགས་པ་ཤེས་པ་མ་དམིགས་ན། ལྐོག་ཏུ་གྱུར་པ་ཉིད་དུ་འགྱུར་ལ་དེ་སྟེ་བལྟར་རུང་བ་ཡིན་ན་ནི་མེད་པ་ཁོ་ནར་འགྱུར་རོ་ཞེས་བྱ་བའོ། །ལྐོག་གྱུར་མིན་ཞེས་བྱ་བ་ནི་གསལ་བཞིན་ཉིད་དོ། །གལ་ཏེ་དེ་ལ་ཤེས་པ་ཡིན་ནོ་ཞེས་བརྗོད་ན། དེའི་ཚེ་ལྐོག་ཏུ་གྱུར་པ་ཉིད་ཅེས་བྱ་བའི་མིང་ཅན་གསལ་བཞིན་པ་ཉིད་ཤེས་པ་ཡིན་ནོ། །ཤེས་པ་གཞན་གྱིས་ཅི་བྱ། ཡང་ཇི་ལྟར་ན་ལྐོག་ཏུ་གྱུར་པ་ཤེས་པ་ཡིན་ཞེ་ན། དོན་གནས་ན་ནི་ཞེས་བྱ་བའོ། །འདི་ཞེས་བྱ་བ་ནི་གསལ་བཞིན་པའོ། །མེད་པ་ཡང་ཞེས་བྱ་བ་ནི་ཤེས་པ་མེད་པ་ཡང་ངོ༌། །གལ་ཏེ་དེ་ལྟ་ན་སྔོན་པོ་ལ་སོགས་པ་ལས་གསལ་བཞིན་པའི་ཤེས་པ་ནི་གཞན་ཡིན་ནོ་ཞེ་ན། ཉམས་སུ་མྱོང་བ་ཞེས་གསུངས་སོ། །དེ་ནི་ཞེས་བྱ་བ་ལྐོག་ཏུ་མ་གྱུར་པའོ། །འོ་ན་གསལ་བཞིན་པ་ནི་ཤེས་པ་ཡིན་པའི་ཕྱིར་དོན་ཞེས་བྱ་བ་མེད་པར་འགྱུར་རོ། །དེའི་ཞེས་གསུངས་ཏེ། ལྐོག་ཏུ་མ་གྱུར་པའིའོ། །མེ་ལོང་གི་བཞིན་གྱི་གཟུགས་བརྙན་གང་ཡིན་པ་དེ་ལ་བཞིན་ཉིད་ཇི་ལྟ་བ་དེ་བཞིན་དུ་ལྐོག་ཏུ་གྱུར་པ་ལས་སྔོན་པོ་ཡང་དེ་ཡིན་ནོ། །དེ་ནི་ཞེས་བྱ་བ་ནི་གསལ་བཞིན་པའི་སྔོན་པོ་ལ་སོགས་པའོ། །གལ་ཏེ་རྣམ་པ་དེ་ནི་བེམས་པོའི་རང་བཞིན་དུ་རྟོགས་སོ་ཞེས་བརྗོད་པ་མ་ཡིན་ནམ་སྙམ་ན་འདི་ལ་བརྗོད་པ་ནི་རང་ཉིད་ཅེས་བྱ་བའོ། །གལ་ཏེ་ལྐོག་ཏུ་མ་གྱུར་པ་ཉིད་དོན་ལས་ཡིན་མོད། དེ་ལྟ་ན་ཡང་དོན་གྱིས་བསྐྱེད་པ་ལྐོག་ཏུ་གྱུར་པ་ནི་དོན་གྱི་རང་བཞིན་ཉིད་དུ་འཐད་ཀྱི། ཤེས་པའི་རང་བཞིན་ནི་མ་ཡིན་ནོ་སྙམ་ན། གལ་ཏེ་ཞེས་གསུངས་སོ། །གལ་ཏེ་རྣམ་པ་འདི་བག་ཆགས་ཀྱི་སྟོབས་ལས་སྐྱེས་སུ་ཆུག་མོད། དེ་ལྟ་ན་ཡང་འདི་ནི་དོན་ཁོ་ན་ཡིན་ནོ་ཞེ་ན། དོན་ནི་ཞེས་གསུངས་སོ། །དེ་ཞེས་བྱ་བ་དོན་མེད་པར་ཐལ་བའི་ཕྱིར་རོ། །བག་ཆགས་ཀྱི་ཁྱད་པར་གང་གིས་སད་པར་མཐོང་བའི་རྣམ་པ་དོན་གྱིས་སྟོང་པར་མི་འགྱུར་
བ་དེ་ལ་ཡོད་པ་ཡིན་ནོ། །འདི་ལས་ནི་རྣམ་པའོ། །བག་ཆགས་དེ་ཉིད་ལས་སོ། །རྣམ་པ་ཉིད་ཅེས་བྱ་བ་ནི། སད་པར་མཐོང་བའི་རྣམ་པའོ། །གཞན་དུ་ཞེས་བྱ་བ་ནི། རྨི་ལམ་དུ་སྣང་བའི་རྣམ་པ་ནི་དོན་མེད་པ་ཉིད་དུ་རྟོགས་པའོ། །ལན་ནི་འདིར་ཡང་ཞེས་བྱ་བ་སྟེ། སད་པ་མཐོང་བ་ལ་ཡང་ངོ༌། །འོ་ན་དེའི་རིགས་ཅན་ཡིན་པའི་ཕྱིར་སད་པས་མཐོང་བའི་རྣམ་པ་ཡང་དོན་དང་བྲལ་བ་ཉིད་དོ་ཞེ་ན། བག་ཆགས་ཀྱི་ཞེས་གསུངས་སོ། །ལྐོག་ཏུ་མ་གྱུར་པའི་ཞེས་བྱ་བ་ནི་བློའི་མ་ཡིན་པའོ། །དེ་ནི་ཞེས་བྱ་བ་ནི་བློའོ། །དེ་ལྟར་ཞེས་བྱ་བ་དོན་གྱི་རྣམ་པ་ལྟ་བུར་རོ། །དཔེ་ཉིད་འཆད་པ་ནི་མེ་ལོང་ལ་ཞེས་བྱ་བའོ། །འདི་ལྟར་སྣང་ངོ་ཞེས་བྱ་བ་ནི་དོན་གྱི་རྣམ་པ་ཉིད་དུའོ། །ཁྱེད་ལ་ཡང་ནི་སངས་རྒྱས་པ་ལ་ཡང་ངོ༌། །ཚད་མ་ཅི་ཡོད་ཅེས་བྱ་བ་ནི་བློ་དོན་གྱི་རྣམ་པ་ཅན་དུ་སྒྲུབ་པར་བྱེད་པ་ཅི་ཡོད་ཅེ་ན། འདི་ལ་བརྗོད་པ་ནི་ཐ་མི་དད་པར་ཞེས་བྱ་བའོ། །དེ་ནི་ཞེས་བྱ་བ་ཐ་མི་དད་པར་དམིགས་པའོ། །དོན་ཐོབ་པའི་ཕྱིར་ཤེས་པ་དོན་གྱི་རྣམ་པ་ཅན་ཡིན་པའི་གནོད་བྱེད་ཡིན་ནོ་ཞེས་འདི་འགོག་པ་ནི་མ་ཡིན་ནོ་ཞེ་ན། ལྷག་མ་ཞེས་བྱ་བ་ནི་དབང་པོ་རྣམས་ལས་ལྷག་མར་གྱུར་པའོ། །རྣམ་པ་ལས་འདས་ཏེ་ཞེས་བྱ་བ་ནི་རྣམ་པ་ལ་མི་ལྟོས་པར་ཞེས་བྱ་བའི་དོན་ཏོ། །དེ་དག་ཀྱང་ཞེས་བྱ་བ་ནི་ལྟ་བ་ལ་སོགས་པ་རྣམས་ཀྱང་ངོ༌། །དེ་བཞིན་ཏེ་ཞེས་བྱ་བ་ནི་ཁྱད་པར་གྱི་བློ་བཞིན་ནོ། །དེ་དག་ཀྱང་ཞེས་བྱ་བ་ནི་ཁྱད་པར་ལ་སོགས་པའི་ཤེས་པ་ཡང་ངོ༌། །ཁྱད་པར་ཅན་ལ་བརྟེན་པའི་རང་བཞིན་ཉིད་ཁྱད་པར་ཡིན་མོད། དེ་ལྟ་ན་ཡང་ཁྱད་པར་ཅན་མ་རྟོགས་པར་ཇི་ལྟར་མི་འཛིན་སྙམ་ན། དེའི་རང་བཞིན་ལ་ཞེས་གསུངས་སོ། །ཁྱད་པར་ཅན་ལ་བརྟེན་པའི་རང་བཞིན་གང་ཡིན་པ་དེ་མ་བཟུང་བར་ཁྱད་པར་འཛིན་པར་ཅིར་འགྱུར། ཁྱད་པར་མ་བཟུང་བར་ནི་དེ་ལ་བརྟེན་པ་ཉིད་འཛིན་པ་མི་སྲིད་ལ་ཁྱད་པར་ཅན་གྱི་བློས་མི་འཛིན་ནོ་ཞེས་དགས་པའོ། །དེའི་རྣམ་པ་ཞེས་བྱ་བ་ཁྱད་པར་ཅན་ལ་བརྟེན་པའི་རང་བཞིན་འཛིན་ན་ཡང་ངོ༌། །དེ་ཉིད་ཀྱི་ཚེ་ཞེས་བྱ་བ་ནི་ཁྱད་པར་གྱི་བློའི་དུས་ཉིད་དུའོ། །དེ་འཛིན་པར་བྱེད་པ་ཞེས་བྱ་བ་ནི། ཁྱད་པར་འཛིན་པར་བྱེད་པའི་བློ་གང་ཡིན་པ་དེས་བསྐྱེད་པའི་འཛིན་པར་བྱེད་པ་གང་ཡིན་
པ་དེའི་གཟུང་བར་བྱ་བ་མ་ཡིན་ནོ། །དེའི་དུས་སུ་ཡང་ཞེས་བྱ་བ་ནི་ཁྱད་པར་འཛིན་པའི་དུས་སུ་ཡང་ངོ༌། །དེ་འཛིན་པ་ཞེས་བྱ་བ་ནི་ཁྱད་པར་འཛིན་པ་དོན་མེད་དོ། །སྔ་མ་བཞིན་དུ་ཞེས་བྱ་བ་ནི། སྒྲུབ་པར་བྱེད་ཉིད་མེད་པར་ཐལ། །ཞེས་བྱ་བའོ། །དོན་གཅིག་ལ་ཟློས་པ་སྟེ་རྗེས་སུ་འཇུག་པ་གང་ཡིན་པ་དེའི་བྱེ་བྲག་གི་ཤེས་པ་རྣམས་ཀྱི་རིམ་པར་འགྱུར་བ་ཡིན་ནོ་ཞེ་ན། དེའི་འགོག་པ་ནི་མ་ཡིན་ཏེ་ཞེས་བྱ་བའོ། །ཁས་བླངས་ཀྱང་བརྗོད་པ་ནི། རིམ་གྱིས་འགྱུར་བ་ཡིན་མོད། དེ་ལྟ་ན་ཡང་ཤེས་བ་སྔ་ནས་ཕྱི་མའི་སྐྱེ་བ་ཉིད་བྱེད་ཀྱི་རྟོགས་པ་ནི་མ་ཡིན་ནོ། །ཅིའི་ཕྱིར་ཞེ་ན། ཤེས་པ་སྔ་མ་དང་ཕྱི་མ་ཁྱད་པར་མེད་པའི་ཕྱིར་རོ། །གལ་ཏེ་དཀར་པོ་ལ་སོགས་པ་དང་ལྡན་པར་འགྱུར་བའི་བུམ་པ་དང་འབྲེལ་པ་ཡིན་ན། དེ་ལྟ་ན་ཡང་དཀར་པོ་དེ་འཛིན་པ་ཞེས་བྱ་བ་ག་ལས་དེ་ལྟ་མ་ཡིན་ཞེས་བྱ་བ་ནི་ག་ལས་ཏེ་དབང་པོ་དང་ལྡན་པར་གྱུར་བའི་དོན་དང་འབྲེལ་པ་ཡོད་པ་ཙམ་གྱིས་གཞན་འཛིན་པར་བརྗོད་ན། དེའི་ཚེ་དུ་བ་དབང་པོ་དང་སྦྱོར་བ་ན་དུ་བ་དང་འབྲེལ་པར་བྱུང་བའི་མེ་ཡང་རྟོགས་པར་འགྱུར་རོ། །འདུ་བའི་འབྲེལ་པ་ལས་ཞེས་བྱ་བ་ནི། འབྱོར་པའི་འདུ་བ་ལས་ཡིན་གྱི། འབྱོར་པའི་སྦྱོར་བ་ལས་ནི་མ་ཡིན་ནོ་ཞེས་བྱ་བའོ། །དོན་གཅིག་ལ་འདུ་བ་ཞེས་བྱ་བ་ནི་རྣམ་པ་གཅིག་ལ་རེག་པ་ཡང་འདུས་ཏེ། དེས་ན་ཇི་ལྟར་འབྱོར་པའི་འདུ་བའི་འབྲེལ་པ་ལས་གཟུགས་རྟོགས་པར་འགྱུར་རོ། །གསལ་བ་ཉིད་བརྗོད་པར་ནི་ཇི་ལྟར་ཞེས་བྱ་བའོ། །འདི་ལ་ཡང་ཡུལ་གཅིག་པ་ཡོད་དེ་ཞེས་དགོངས་པའོ། །མིག་གི་གཟུང་བ་མ་ཡིན་པའི་ཕྱིར་རོ། །རེག་པ་ལ་སོགས་པ་མི་རྟོགས་སོ་ཞེས་བྱ་བ་ནི་གཞན་གྱིའོ། །ལན་ནི་དོན་ཞེས་བྱ་བའོ། །དེ་ཉིད་ནི་མིག་གི་གཟུང་བ་ཉིད་དོ། །དེ་དང་སྦྱོར་བ་ན་ཞེས་བྱ་བ་ནི་ཕྱིའི་དང་ངོ༌། །ཆོས་ཀྱང་ཞེས་བྱ་བ་ནི་ཡུལ་ཐག་རིང་པོ་ན་གནས་པའི་ཆོས་ཅན་གྱིའོ། །ཁ་དོག་ཀྱང་གསལ་བར་སྣང་བར་འགྱུར་རོ་ཞེས་འབྲེལ་ཏོ། །དབྱིབས་ཙམ་ནི་སྣང་བར་འགྱུར་བ་མ་ཡིན་ནོ་ཞེས་བྱ་བར་བལྟའོ། །བྱེད་པའི་ཞེས་བྱ་བ་ནི་དབང་པོའོ། །མི་འཛིན་པ་ཉིད་དོ་ཞེས་བྱ་བ་ནི་དབྱིབས་ཙམ་ཡང་འཛིན་པར་མི་འགྱུར་རོ། །དེ་ལྟ་བུར་གྱུར་པར་ཞེས་བྱ་བ་ནི་ལ་ལར་ནི་འགྱུར་ལ་ལར་ནི་མ་ཡིན་
པའོ་ཞེས་བྱ་བར་རོ། །ལན་མ་ཡིན་ཏེ་ཞེས་བྱ་བ་སྟེ། མདོག་དབྱིབས་དག་ལས་ཐ་དད་པ་མེད་པའི་ཕྱིར་ན། དབྱིབས་རྟོགས་པ་ན་ཁ་དོག་ཀྱང་རྟོགས་པར་འགྱུར་རོ་ཞེས་བྱ་བ་དགོངས་པའོ། །ཁ་དོག་མི་དམིགས་སོ་ཞེས་བྱ་བ་ནི་མུན་པའི་མདོག་ནི་ནག་པོ་འདི་ཡིན་ན་མུན་པ་འདི་ནི་དངོས་པོར་འགྱུར་བ་མ་ཡིན་ནོ་ཞེས་བསམས་པའོ། །རྟོགས་པའི་ཕྱིར་རོ་ཞེས་བྱ་བ་ནི་མུན་པར་རོ། །དེས་ན་མུན་པ་ནི་དངོས་པོ་མ་ཡིན་པ་ཉིད་དེ་སྣང་བ་ལ་དེ་མེད་པའི་ཕྱིར་རོ། །དེས་ན་ཇི་ལྟར་དེ་སྣང་བ་ལ་མེད་ཀྱང་དམིགས་པ་དེ་བཞིན་དུ་གཞན་དུ་ཡང་ཡིན་ནོ་ཞེ་ན། འགོག་པ་ནི་མ་ཡིན་ཏེ་ཞེས་བྱ་བའོ། །དེ་ནི་ཞེས་བྱ་བ་ནི་སྣང་བ་ལ་མུན་པར་རྟོགས་པ་ནིའོ། །ཧ་ཅང་ཐལ་བ་ཉིད་བརྗོད་པ་ནི་ཕྱིའི་དོན་མེད་པར་ཐལ་བའི་ཕྱིར་རོ་ཞེས་བྱ་བའོ། །གལ་ཏེ་བྱེད་པ་པོའི་བདག་ཉིད་ཅན་ནི་བྱ་བ་ཉིད་མི་འགྱུར་བའི་མ་ཡིན་ནམ། དེས་ན་ཇི་ལྟར་བྱེད་པ་པོའི་བདག་ཉིད་དུ་འགལ་བ་མ་ཡིན་སྙམ་ན། བྱེད་པ་ནི་ཞེས་གསུངས་སོ། །ཐ་མི་དད་པ་ཉིད་བརྗོད་པ་ནི་ཕྱར་བ་དང་ཞེས་བྱ་བའོ། །དེ་ཉིད་ཅེས་བྱ་བ་ནི་དེ་ལྟ་ཉིད་དོ། །དེ་ཞེས་བྱ་བ་ནི་སྐྱེས་པ་ཉིད་དོ། །གཅིག་དང་དུ་མར་རྟོགས་པ་ཉིད་བརྗོད་པ་ནི་རེ་ཞིག་ཅེས་བྱ་བའོ། །དེ་ལ་ཞེས་བྱ་བ་ནི་དེ་ལྟར་རྣམ་པར་གནས་པ་ནའོ། །དེ་ལས་ཞེས་བྱ་བ་ནི་ལྷས་བྱིན་ལས་སོ། །སྐབས་སུ་བབ་པ་ལ་བྱ་བ་དང་བྱེད་པའི་རྟོག་པ་བཤད་པ་ནི་དེ་བཞིན་དུ་ཞེས་བྱ་བའོ། །དེ་ལས་ཀྱང་ཞེས་བྱ་བ་ནི་འབྲས་བུ་ལས་ཀྱང་ཚད་མར་ཐ་དད་པ་ཡིན་ནོ། །འབྲས་བུ་ཉིད་ནི་ཚད་མར་འགྱུར་རོ། །ཅིའི་ཕྱིར་ཞེ་ན། བྱེད་པ་དང་བཅས་པ་ལྟ་བུར་རྟོགས་ཏེ་ལྷག་པར་ཞེན་པའི་ཕྱིར་རོ། །རྣམ་པར་ཤེས་པ་སྨྲ་བ་ལ་འཇུག་པའི་དོན་དུ་སློབ་དཔོན་ཕྱོགས་ཀྱི་གླང་པོའི་མདོ་ཉེ་བར་དགོད་པ་ནི། ཡང་ན་ཞེས་བྱ་བའོ། །གཉིས་སུ་སྣང་བའི་ཞེས་བྱ་བ་ནི། གཟུང་བ་དང་འཛིན་པ་བཞིན་དུ་སྣང་བ་ཡིན་ནོ། །གང་གི་ཕྱིར་འཇིག་རྟེན་པ་དོན་དུ་གཉེར་བ་དེའི་ཕྱིར། དོན་རིག་པ་འབྲས་བུ་ཡིན་ནོ་ཞེ་ན། འདི་ལ་རེ་ཞིག་རང་ཉིད་ལན་འདེབས་པ་ནི་འདིར་ཞེས་བྱ་བའོ། །གལ་ཏེ་མཐོང་བ་ཁོ་ན་ལ་ནི་དོན་དུ་གཉེར་བ་ཡིན་ཏེ། ཐོས་པ་ལ་ཡང་དོན་དུ་གཉེར་བ་མཐོང་བའི་ཕྱིར་རོ་ཞེན་ཐོས་པ་ཡང་ཞེས་བྱ་བའོ། །སོ་སོར་རིག་ཅེས་བྱ་བ་ཉིད་རྣམ་པར་འགྲེལ་པ་ནི་གལ་ཏེ་སོ་སོར་ཞེས་བྱ་བའོ། །རྐང་པ་དང་པོ་ཉིད་འཆད་པ་ནི་གལ་ཏེ་
ཞེས་བྱ་བའོ། །རྐང་པ་དང་པོ་འཆད་པར་བཞེད་པས་གྲུབ་པའི་མཐའ་པས་གསུངས་པ་ནི། རབ་རིབ་ཅན་ཞེས་བྱ་བའོ། །དེར་ནི་ཉམས་སུ་མྱོང་བར་བྱ་བ་འགའ་ཡང་ཡོད་པ་མ་ཡིན་ནོ། །དེ་ལ་ཇི་ལྟར་ཉམས་སུ་མྱོང་བ་བཞིན་པ་མེད་ཀྱང་འདི་ནི་ཉམས་སུ་མྱོང་བར་བྱའོ་ཞེས་བྱ་བར་འགྱུར་བ་དེ་བཞིན་དུའོ། །བདེན་པའི་བུམ་པ་ལ་སོགས་པར་འདོད་པ་ལ་ཡང་ཉམས་སུ་མྱོང་བར་བྱ་བ་མེད་བཞིན་དུ་དེ་ལྟར་འགྱུར་བ་ཡིན་ནོ་ཞེས་དགོངས་པའོ། །གལ་ཏེ་ཉམས་སུ་མྱོང་བ་ཁ་ཅིག་ནི་དོན་ལ་བརྟེན་པ་ཉིད་དུ་མཐོང་ངོ་ཞེ་ན། འདི་ལ་ལན་ནི་དེ་ཉིད་ཅེས་པའོ། །ཉམས་སུ་མྱོང་བ་ནི་མཐོང་བ་ཡིན་ནོ། །འོན་ཀྱང་ཉམས་སུ་མྱོང་བ་འདི་ཕྱི་རོལ་གྱི་དོན་གྱི་ཡིན་ནོ་ཞེས་དོན་དང་ལྷན་ཅིག་འབྲེལ་པར་ནི་མཐོང་བ་མེད་དོ། །འོན་ཏེ་ཞེས་བྱ་བའོ། །དེའི་མྱོང་བ་ཡིན་ནོ་ཞེ་ན། གལ་ཏེ་ཞེས་བྱ་བའོ། །དེ་ལས་ནི་མིག་ལས་སོ། །གལ་ཏེ་ངེད་ཀྱི་འདོད་པ་ལ་ནི་དོན་རིག་པ་མེད་ཀྱི་འོན་ཀྱང་དེའི་རྣམ་པ་ཅན་གྱི་ཤེས་པ་མཐོང་བ་ལས་དེའི་རྣམ་པ་ཅན་གྱི་དོན་རྗེས་སུ་དཔག་པ་ཡིན་ནོ་སྙམ་ན། ཇི་ལྟར་ཞེས་གསུངས་སོ། །དེ་ཡང་ནི་མིག་གོ །དེ་ཉིད་ནི་མིག་ཉིད་དོ། །དེའི་ཡུལ་དུ་ནི་མེ་ལོང་གི་ཡུལ་དུའོ། །དེས་ན་ཁ་དོག་གི་བདག་ཉིད་ཀྱི་དབྱིབས་གང་ཡིན་པ་དེ་དང་གལ་ཏེ་རྡུལ་ཕྲ་རབ་ལ་ལྡན་པ་ཡིན་ན། དེའི་རིགས་པ་ཉིད་དུ་ཐལ་བར་འགྱུར་ཏེ། ཁ་དོག་གི་རིགས་པ་ཉིད་དུ་སྣང་བའི་ཕྱིར་རོ། །འདིར་སློབ་དཔོན་ཆོས་མཆོག་གི་ལུགས་དགོད་པར་བྱེད་པ་ནི། ཅི་སྟེ་ཞེས་བྱ་བའོ། །དེ་ཞེས་བྱ་བ་ནི་རགས་པ་ཉིད་ཀྱི་ཆོས་སོ། །འདི་ལ་ལན་ནི་གལ་ཏེ་ཞེས་བྱ་བའོ། །འདི་གཞན་འགོག་པ་ནི་མ་ཡིན་ཏེ་ཞེས་བྱ་བའོ། །བར་ནི་ཡུལ་མ་ཡིན་ཏེ་དེས་ན་དེ་མི་འཛིན་གྱིས་ནི་འཁྲུལ་པ་ཉིད་ཀྱང་མ་ཡིན་ཏེ། བུམ་པ་གཟུང་བ་ན་སྣམ་བུ་ལ་སོགས་པ་མ་བཟུང་བས་ཀྱང་འཁྲུལ་པ་ཉིད་དུ་ཐལ་བའི་ཕྱིར་རོ་ཞེས་བྱ་བའི་དོན་ཏོ། །འདི་གྲུབ་པའི་མཐའ་པས་བརྗོད་པ་ནི་གལ་ཏེ་ཞེས་བྱ་བའོ། །གལ་ཏེ་བར་ཡུལ་ཉིད་མ་ཡིན་ན། དེའི་ཚེ་ཤེས་པ་ཙམ་ལ་ཡང་ནུས་པ་མེད་པའི་ཕྱིར་དེ་མེད་པ་ཉིད་དུ་འགྱུར་རོ་ཞེས་བྱ་བ་ནི། བར་དངོས་པོ་མེད་པའི་ཕྱིར་རོ། །ཕ་རོལ་པོ་འདི་འགོག་པ་ནི་བར་མེད་པ་ཞེས་བྱ་བའོ། །མི་འཐད་པ་ཉིད་སྟོན་པ་ནི། དངོས་པོ་ཆ་ཤས་དང་ཞེས་བྱ་བའོ། །མངོན་སུམ་གྱིས་གསལ་བའི་ཕྱིར་ཞེས་བྱ་བ་ནི། རགས་པ་
ཉིད་མངོན་སུམ་གྱིས་དམིགས་པའི་ཕྱིར་རོ། །གཞན་ཡང་མངོན་སུམ་གྱིས་ནི་རེ་ཞིག་རྡུལ་ཕྲ་རབ་གང་དུ་དམིགས་པ་མེད་ལ། །རྗེས་སུ་དཔག་པ་ཡང་དེ་སྔོན་དུ་འགྲོ་བ་ཅན་དུ་འགྱུར་བ་ཡིན་ན། །དེས་ན་ཇི་ལྟར་མངོན་སུམ་མེད་པར་རྗེས་སུ་དཔག་པ་རྡུལ་ཕྲ་རབ་ཀྱི་སྒྲུབ་བྱེད་དུ་འགྱུར། ཇི་ལྟར་རགས་པ་བུམ་པ་ལ་སོགས་པ་ཕྲ་མོ་ཚོགས་པའི་ཕྱིར་རོ། །གཞན་ཡང་མངོན་སྐར་ཁུང་གི་ལམ་ནས་ཞུགས་པའི་རྡུལ་ཡང་རགས་པ་ཉིད་ཀྱི་ཕྲ་མོ་བསགས་པའི་རང་བཞིན་ཡིན་ལ། དེའི་མཐའ་ཐུག་པ་གང་ཡིན་པ་དེ་ཡང་རྡུལ་ཕྲ་རབ་ཡིན་ནོ་ཞེས་བྱ་བ་ནི་གཞན་གྱིས་བསམས་པའོ། །འདི་ལ་ལན་ནི་འདི་ཞེས་བྱ་བའོ། །ཡོངས་སུ་མཐོང་བའི་ཕྲ་མོ་ཅི་ཙམ་དེ་སྲིད་ཙམ་ཞིག་བརྟག་པར་བྱ་བ་ཡིན་པ། དེ་ལྟ་ན་རྡུལ་ཕྲ་རབ་མི་འགྲུབ་པོ་ཞེས་དགོངས་པའོ། །གཞན་ཡང་ཞེས་བྱ་བ་ལ་སོགས་པས་ཀྱང་འཁྲུལ་པ་ཉིད་བརྗོད་པ་ཡིན་ནོ། །འོན་ཀྱང་འདི་ལ་ཉེས་པ་ལྷག་པར་བརྗོད་པར་བྱ་བ་ཡིན་ནོ་ཞེས་སྡུད་པས་གཞན་ཡང་ཞེས་སྨོས་པར་ཟད་དོ། །དོན་དང་མྱོང་བ་རྣམས་ཀྱང་ཞེས་བྱ་བ་ལ། བུམ་པ་ལ་སོགས་པ་རིགས་མཐུན་པའི་དོན་ཡང་ཕན་ཚུན་རིགས་པར་འགྱུར་ལ་དེ་བཞིན་དུ་རྒྱུད་ཐ་དད་པ་ལ་ཡོད་པའི་སྔོན་པོའི་ཡུལ་ཅན་གྱི་མྱོང་བ་རྣམས་ཀྱང་ངོ༌། །དེ་ཉིད་གསལ་བར་བྱེད་པ་ནི་རྒྱུད་གཞན་གྱི་ཞེས་བྱ་བའོ། །དེ་ལྟ་མ་ཡིན་ཞེས་བྱ་བ་ནི་གལ་ཏེ་རྣམ་པ་དེ་དེ་མ་ཐག་ཉིད་ལས་སྐྱེས་པ་ཡིན་ལ་དེའི་ཚེའོ། །དེ་ཞེས་བྱ་བ་ནི་དེ་མ་ཐག་པའོ། །རྩོད་པ་འདི་ལ་གཞན་དག་གི་ལན་སུན་དབྱུང་བའི་ཕྱིར་འགེད་པ་ནི་གཞན་དག་ཅེས་བྱ་བའོ། །དེ་ལྟ་བུ་ཉིད་དུ་ཤེས་པ་ཡང་ཡིན་ནོ་ཞེས་བྱ་བ་ནི། འཇིག་རྟེན་ན་ཡང་དེ་ལྟར་རྟོགས་པ་ཡིན་ནོ་ཞེས་བྱ་བའི་དོན་ཏོ། །དེ་ཉིད་སྟོན་པ་ནི་འདི་ལྟར་ཞེས་བྱ་བའོ། །ཇི་ལྟར་ཕྱིའི་དོན་དུ་སྨྲ་བའི་ལྟར་ན་སྔོན་པོའི་རྣམ་པ་མྱོང་བ་ཉིད་སྔོན་པོ་མྱོང་བ་ཡིན་པ་བཞིན་དུ་སྔོན་པོའི་རྣམ་པ་དྲན་པ་ཡིན་གྱི་གཞན་ནི་མ་ཡིན་ནོ་ཞེས་དགོངས་པའོ། །དྲན་པ་འདི་ལས་དངོས་སུ་དོན་མཐོང་བ་ནི་མེད་དོ། །དེ་ལྟར་གཞན་གྱི་ལན་སུན་དབྱུང་ནས་རང་ཉིད་ཀྱི་བརྗོད་པ་ཞེས་བྱ་བའོ། །འདི་ལྟར་དང་པོ་ནི་སྔོན་ཉམས་སུ་མྱོང་བར་འགྱུར་ལ་ཕྱིས་སྔོན་པོ་གོམས་པའི་མཐའ་ཐུག་པ་ན། སྔོན་པོ་
དངོས་སུ་སྣང་བར་འགྱུར་བའོ། །སྔོན་པོར་སྣང་བའི་ཤེས་པ་དེའི་ཡུལ་ནི་དང་པོར་སྐྱེས་བའི་སྔོན་པོ་ཉམས་སུ་མྱོང་བ་ཡིན་པར་འགྱུར་རོ། །དེ་འདྲ་བའི་ཞེས་བྱ་བ་ནི་སྔོན་པོ་རྣམ་པ་གསལ་བ་ཅན་ནོ། །བར་དུ་བྱུང་བ་མེད་པའི་ཕྱིར་རོ་ཞེས་བྱ་བ་ནི་དེའི་དེ་མ་ཐག་པ་ཉིད་ནི་དེ་ཙམ་ཡིན་ཏེ། འཇིག་རྟེན་ན་རིགས་མཐུན་པར་མཆོད་བ་ཉིད་ལ་བར་མེད་པ་ཞེས་རྟོགས་པ་ཡིན་ནོ། །དཔེར་ན་ཆེ་གེ་མོའི་ཁྱིམ་དང་བར་མཆོད་པ་ནི་བདེ་བྱེད་ཀྱི་ཁྱིམ་ཡིན་ནོ། །དེ་འདྲ་བའི་ཞེས་བྱ་བ་ནི། དེར་ནི་ཁྱིམ་གཞན་གྱིས་བར་མ་ཆོད་པས་ན་བར་མེད་པ་ཞེས་བརྗོད་ཀྱི། སྐྱེ་ཤི་ལ་སོགས་པས་བར་མ་ཆོད་པ་ནི་མ་ཡིན་ནོ། །གལ་ཏེ་དེ་ལྟར་བར་མེད་པར་འགྱུར་མོད། ཆོད་མགོ་སྐྱེད་བྱེད་ཇི་ལྟར་མིན་སྙམ་ན། འདི་ལ་ལན་ཞེས་བྱ་བའོ། །ཡང་ཇི་ལྟར་འདི་ལ་ལན་བཏབ་པ་སྙམ་ན་བར་དུ་ཞེས་གསུངས་སོ། །རྣམ་པར་རྟོག་པ་རྣམས་གང་ཞིག་གོམས་པ་ལས་དེ་མ་ཐག་ཏུ་གསལ་བའི་རྣམ་པ་ཅན་སྐྱེད་པར་བྱེད་པ་དེ་ཡུལ་དུ་འགྱུར་རོ། །གང་གི་ཕྱིར་དེ་ལྟར་རྣམ་པར་འཁྲུལ་པའི་རྒྱུ་དེས་ནའོ། །གལ་ཏེ་དོན་མེད་ན་འོ་ན་རྣམ་པ་འདི་ཇི་ལྟར་སྐྱེ་ཞེ་ན་རིགས་གང་ཞེས་བྱ་བ་ལ་སོགས་པའོ། །གལ་ཏེ་དོན་གནས་པ་ནི་ངེས་པ་ལས་ཡིན་ན། དེའི་ཚེ་ཞེས་ཁོང་ནས་ཕྱུང་ལ་འདི་ལ་བརྗོད་པ་ནི། ཞེས་འཆད་པར་འགྱུར་བ་དང་འབྲེལ་ཏོ། ཇི་ལྟར་ངེས་པ་ལས་དོན་རྣམ་པར་གནས་ཤེ་ན། ངེས་པ་ནི་ཞེས་བྱ་བའོ། །དེ་མ་ཐག་པའི་རྐྱེན་ལས་ཞེས་བྱ་བ་ནི་འདི་ཡུལ་དམ་ཐག་པའི་རྐྱེན་ལས་བྱུང་བ་ཡིན་ནོ་ཞེས་ངེས་པ་ནི་མེད་དོ། །གལ་ཏེ་དོན་ངེས་པ་ཡིན་མོད། དེ་ལྟ་ན་ཡང་ཇི་ལྟར་ངེས་པ་ལས་དོན་རྣམ་པར་གནས་ཤེ་ན། དོན་ཉམས་སུ་མྱོང་བ་ཞེས་གསུངས་སོ། །མངོན་སུམ་དེ་ལས་གཞན་པའི་རྣམ་པར་རྟོག་པ་དེ་བས་ཞན་པའི་དོན་དེ་མཐོང་ངོ་ཞེས་བྱ་བ་འདི་ནི་གཟུ་ལུམས་ཡིན་ནོ། །དེ་དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་དོན་ཉམས་སུ་མྱོང་བ་ནི་མ་ཡིན་གྱི། འོན་ཀྱང་རང་གི་ངོ་བོ་མྱོང་བ་ཁོ་ན་ཡིན་ན། དེའི་ཚེ་ངེས་པ་དེ་ལྟ་བུ་ཉིད་དེ་རང་གི་ངོ་བོ་མྱོང་བར་ངེས་པར་འགྱུར་རོ་ཞེ་ན། འདི་འགོག་པ་ནི་དེ་ནི་དེ་ལྟ་མ་ཡིན་ཏེ་ཞེས་བྱ་བའོ། །གལ་ཏེ་གོམས་པ་དེ་ཡང་མྱོང་བ་ཉིད་ལས་འགྱུར་བ་ཡིན་ཏེ། དེས་ན་འགའ་ཞིག་གི་ཚེ་གདོན་མི་ཟ་བར་དོན་ཉམས་སུ་མྱོང་བར་འགྱུར་དགོས་སོ། །དེས་ན་འདི་ཕྱིན་ཅི་ལོག་ཏུ་ཇི་ལྟར་ངེས་ཤེ་ན། འདི་ལ་བརྗོད་
པ་ནི་འདི་ཡང་ཞེས་བྱ་བའོ། །ཕྱིན་ཅི་ལོག་ཏུ་ངེས་པ་ནི་མཐོང་བ་ཡང་ཡིན་ཏེ། བདག་ལ་སོགས་པར་ངེས་པ་བཞིན་ནོ། །གལ་ཏེ་བལྟ་བའི་ཤེས་བར་འབྱེད་པར་མི་བྱེད་ན། དེའི་ཚེ་ངེས་པ་ཡང་རང་ཉིད་ནུས་པ་མེད་པར་ཇི་ལྟར་བྱེད། ཇི་ལྟར་ཟླ་བ་གཉིས་ཀྱི་ཤེས་པ་ཡོད་ན་སྐྱེ་བའི་ངེས་པ་མ་ཡིན་པ་དེ་རྣམ་པར་འབྱང་བར་མི་བྱེད་པ་བཞིན་ནོ། །རྒྱུ་མ་ཡིན་པའི་ཕྱིར་ཞེས་བྱ་བ་ནི་རྒྱུ་མེད་ཅན་ཡིན་པའི་ཕྱིར་རོ། །གང་གི་ཚེ་སོ་སོར་ངེས་པར་ཉམས་སུ་མྱོང་བ་ཉིད་མ་གྲུབ་པ་དེའི་གོམས་པ་ཡང་ཇི་ལྟར་འགྲུབ་ཅེས་བྱ་བའི་དོན་ཏོ། །འདྲི་བའི་དོན་གང་ཞིག་ཡིན་ཞེས་བྱ་བ་ནི་འདྲི་བ་འདི་མི་འཐད་དོ་ཞེས་བྱ་བའི་དོན་ཏོ། །མི་འཐད་པ་དེ་ཉིད་སྟོན་པ་ནི་འདི་ལྟར་ཞེས་བྱ་བའོ། །སླར་བཟློག་པ་རྣམ་པར་བརྗོད་པ་ནི་དོན་ལ་ཞེས་བྱ་བའོ། །གཞན་གྱིས་རྣམ་པ་འདི་ལྟ་བུའི་འདྲི་བ་ནི་ཞེས་སྨྲས་སོ། །ཅིའི་ཕྱིར་འདྲི་བ་ནི་རྩེད་མོ་ཡིན་ཞེས་དྲིས་པ་ལ་གཞན་གྱིས་མཐར་ཐུག་པ་ཞེས་སྨྲས་སོ། །གལ་ཏེ་ཞེས་བྱ་བ་ནི་གྲུབ་པའི་མཐའ་སྨྲ་བའིའོ། །དེའི་མྱོང་བ་དེ་བདག་ཉིད་དེ་ཞེས་བྱ་བ་བཤད་པ་ཡིན་ནོ། །ད་རྐང་པ་གཉིས་པ་འཆད་པ་ནི་འདིས་ཞེས་བྱ་བའོ། །འོ་ན་ཇི་ལྟར་ཞེས་བྱ་བ་ནི་དྲི་བའོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །འོ་ན་ཇི་ལྟར་མངོན་སུམ་གྱིས་རིག་པར་བྱ་བ་ཉིད་ཡིན་སྙམ་དུ་དོགས་པ་བསུ་ནས་ཕྱེད་ཕྱི་མ་འཆད་པ་ནི། མངོན་སུམ་རིག་བྱར་དེ་ཡི་ནི། །ཞེས་བྱ་བའོ། །དྲུག་པའི་དོན་ཡོད་ན་ཐ་མི་དད་པ་ཇི་ལྟར་འགྱུར་སྙམ་ན། དྲུག་པའི་ཞེས་བྱ་བའོ། །འདི་ནི་ཞེས་བྱ་བ་ནི་དྲུག་པའི་དོན་ནོ། །ཡང་ན་ཞེས་བྱ་བ་ལ་སོགས་པས་ནི་རྣམ་པ་གཞན་འགྲེལ་པ་རྣམས་གཞན་དུ་འཆད་དོ་ཞེས་བྱ་བ་ནི། སྔོན་པོ་ལ་སོགས་པའི་རྣམ་པའོ། །ཉམས་སུ་མྱོང་བར་ཞེས་བྱ་བ་ནི་ཉམས་སུ་མྱོང་བར་བྱ་བར་རོ། །དེའི་ངོ་བོ་ནི་ཞེས་བྱ་བ་རང་གི་རང་བཞིན་དུ་གྱུར་པ་ཉམས་སུ་མྱོང་བའི་ངོ་བོ་ནིའོ། །དེ་ལྟར་ཡིན་ན་ཞེས་བྱ་བ་ནི། གཞན་ལ་ཡང་རང་བཞིན་དུ་གྱུར་པའི་ཉམས་སུ་མྱོང་བའི་ངོ་བོ་ཡོད་ན་དེའི་གཞན་ཉིད་དུ་མི་འགྱུར་རོ། །འདིས་ནི་དེའི་མྱོང་བ་དེ་ཞེས་བྱ་བ་ཉམས་སུ་མྱོང་བཞིན་པ་ནི། བདག་ཉིད་ཡིན་ལ་དེ་ཡང་ཤེས་པ་གཞན་འགའ་ཞིག་གིས་ནི་མ་ཡིན་ནོ་ཞེས་བྱ་བ་དེ་ལྟར་བཤད་པ་ཡིན་ནོ། །ལྷག་མ་ནི་སྔ་མ་བཞིན་ནོ། །འདི་ཉིད་ཡང་རྣམ་པ་གཞན་དུ་སྦྱོར་
བ་ནི་ཡང་ན་ཞེས་བྱ་བའོ། །ཤེས་པ་ལྐོག་ཏུ་གྱུར་པ་གང་ཡིན་པ་དེ་ཉིད་ཀྱིས་ཉམས་སུ་མྱོང་བ་གང་ཡིན་པ་ཉིད་ཡིན་པར་འགྱུར་རོ་ཞེ་ན། འདི་ལ་བརྗོད་པ་ནི་གལ་ཏེ་ཞེས་བྱ་བའོ། །དོན་དེའི་བདག་ཉིད་དེ་ནི་མྱོང་བ་སྟེ། མངོན་དུ་བྱེད་པ་ཡིན་པར་འགུར་རོ། །གཞན་ལ་ཞེས་བྱ་བ་ནི་གཞན་ཞེས་བྱ་བའི་དོན་ཏོ། །དོན་གྱི་བདག་ཉིད་ཁོ་ནར་རང་གི་བཞིན་མངོན་དུ་བྱེད་པ་ཡིན་མོད། ཅི་སྐྱོན་སྙམ་ན་དེ་ཞེས་སྨོས་ཏེ། ཉམས་སུ་མྱོང་བ་དེ་གཞན་ཞེས་བྱ་བ་དོན་འགའ་ཞིག་གིས་ནི་མ་ཡིན་ནོ། །འདི་ག་ལས་ཤེ་ན་བཤད་པ་གལ་ཏེ་དོན་གྱི་བདག་ཉིད་ཉམས་སུ་མྱོང་བར་གྱུར་པ་ཡིན་ན། དེའི་ཚེ་གཞན་ལ་ཡང་ཞེས་བྱ་བ་སྐྱེས་བུ་གཞན་ལ་ལྟོས་ནས་ཀྱང་དེ་ཁོ་ན་ལྟར་ཉམས་སུ་མྱོང་བའི་རང་བཞིན་དུ་འགྱུར་ཏེ། དོན་ནི་ཐུན་མོང་མ་ཡིན་པའི་ཕྱིར་རོ། །དེས་ན་སྐྱེས་བུ་ཐམས་ཅད་དེ་མཐོང་བ་སྟེ་དེ་ཉམས་སུ་མྱོང་བར་འགྱུར་རོ། །འགྱུར་བ་ཁོ་ནའོ་ཞེ་ན་བརྗོད་བ་གཞན་ལ་ནི་ཞེས་བྱ་བའོ། །སྐྱེས་བུ་གཞན་ལ་ལྟོས་ནས་ནི། དེ་ལྟར་ཞེས་བྱ་བ་ཉམས་སུ་མྱོང་བའི་རང་བཞིན་ཡང་མ་ཡིན་ནོ། །ཡང་ན་ཞེས་བྱ་བ་ལ་སོགས་པའི་འདྲི་བ་ལ། རྣམ་འགྲེལ་གྱིས་ལན་བཏབ་པ་ནི་བདག་ཉིད་ཅེས་བྱ་བའོ། །འདི་ཉིད་གསལ་བར་བྱེད་པ་ནི་སེམས་ཉིད་ཅེས་བྱ་བའོ། །བདག་ཉིད་གཞན་མེད་པའི་ཕྱིར་ན་སེམས་ཀྱི་རྒྱུན་ཉིད་བདག་ཡིན་ནོ། །གལ་ཏེ་གཞན་འགའ་ཞིག་ཡོད་ན་དེ་ལས་ཕྱི་རོལ་དུ་འགྱུར་བ་ཞིག་གང་གི་ཚེ་གཞན་ཞེས་བྱ་བ་མེད་པ་དེའི་ཚེ། སྔོན་པོའི་རྣམ་པ་འདི་ཕྱི་རོལ་དུ་གྱུར་པ་ག་ལ་ཡིན། ཇི་སྲིད་ལུས་ཀྱི་རྣམ་པ་ལས་སྔོན་པོའི་རྣམ་པ་ཕྱི་རོལ་དུ་གྱུར་པར་བརྗོད་པ་དེ་སྲིད་དུ་ལུས་ཀྱི་རྣམ་པ་ཉིད་དུ་སྔོན་པོའི་རྣམ་པ་ལས་ཕྱི་རོལ་དུ་གྱུར་པ་ཞེས་ཅི་སྟེ་མི་བརྗོད། དེས་ན་གང་ཞིག་ག་ལས་ཕྱི་རོལ་གྱི་ཡུལ་ཅན་གྱི་ཡིན་ཞེས་བསམས་པའོ། །ཁྱེད་ཀྱིས་ཀྱང་ཞེས་བྱ་བ་ནི་རེག་བྱེད་ཀྱི་མཐའ་ལས་ཀྱང་ངོ༌། །དེ་ལས་ཐ་དད་པ་ནི་བདག་ལས་ཐ་དད་པའོ། །དེ་ནི་ཞེས་བྱ་བ་ནི་བདག་ཏུ་སྨྲ་བའོ། །ཁྱོད་ནི་རྣམ་པར་ཤེས་པར་སྨྲ་བ་ཡིན་ན། དེ་ཇི་ལྟར་འདི་འབྲེལ་ལ་ཡིན་ཞེས་བྱ་བ་ནི་ཕ་རོལ་པོའི་བསམ་པའོ། །འདི་ལ་བརྗོད་པ་ནི་མ་ཡིན་ཏེ་ཞེས་བྱ་བའོ། །སྣ་ཚོགས་པའི་རྣམ་པ་མྱོང་བའི་རྒྱུའི་ཕྱིར་མེད་པར་མི་འཐད་དོ། །ཁྱེད་ཀྱི་ལྟར་ན་ནི་བདག་
རྣམ་པ་མེད་པ་ཡིན། སྣ་ཚོགས་ཀྱི་རྣམ་པ་ནི་མང་པོ་ཁོ་ན་ཡིན་ནོ། །དེས་ན་ངེད་ཀྱི་འདོད་པ་དང་ཇི་ལྟར་མཚུངས། མ་རིག་པའི་དབང་གིས་བསྐྱེད་པའི་ཕྱིར་ན་སྣ་ཚོགས་ཀྱི་རྣམ་པ་ནི་མེད་པ་ཡིན་ནོ་ཞེས་བྱ་བ་ནི་གཞན་གྱིའོ། །འདི་ལ་བརྗོད་པ་ནི་དེ་ནི་མྱོང་བ་ཁོ་ནའོ་ཞེས་བྱ་བའོ། །མ་རིག་པ་ཡང་ཉམས་སུ་མྱོང་བར་བྱ་བ་ཡིན་པའི་མྱོང་བ་ཁོ་ནའོ། །དེས་ན་དེའི་དབང་གིས་སྐྱེས་པའི་སྣ་ཚོགས་ཀྱི་རྣམ་པ་མེད་པར་ཇི་ལྟར་འགྱུར། དེ་ལྟར་ན་རེ་ཞིག་བདག་ཏུ་སྨྲ་བ་ནི་རིགས་པས་འཐད་པ་མ་ཡིན་པར་བསྟན་པ་ཡིན་ནོ། །ད་ནི་དེ་ལ་འབྲས་བུ་ཅུང་ཟད་ཀྱང་ཡོད་པ་མ་ཡིན་ནོ་ཞེས་བརྗེད་པ་ནི། བདག་ཏུ་སྨྲ་བའི་ཞེས་བྱ་བའོ། །བདག་མེད་པ་ཡང་ཉེ་བར་མི་མཁོ་བའོ་སྙམ་ན། འདོད་ཆགས་ཞེས་སྨོས་སོ། །རང་གི་ངོ་བོ་གསལ་བར་བྱེད་པའི་ཕྱིར། རང་ཉིད་དེ་ལྟར་ཞེས་བྱ་བ་རང་གི་ངོ་བོ་གསལ་བར་བྱེད་པའི་རང་བཞིན་འགྱུར་བ་ཡིན་ནོ། །གལ་ཏེ་གང་གིས་དེ་སྐད་བརྗོད་པ་སྔོན་པོ་ལས་གཞན་པའི་ཉམས་སུ་མྱོང་བ་མེད་པར་ཇི་ལྟར་འགྲུབ་སྙམ་ན་འབའ་ཞིག་ཅེས་སྨོས་སོ། །རྣམ་པ་དང་བྲལ་བའོ། །གལ་ཏེ་འདི་ཐ་དད་པ་ཡིན་ཡང་ཐ་དད་པ་ཉིད་དུ་ངེས་པ་ཡིན་ནོ་སྙམ་ན། གང་ཞིག་ཅེས་གསུངས་སོ། །གལ་ཏེ་ཐ་དད་པ་མེད་ན། སྔོན་པོའི་མྱོང་བ་ཞེས་ཐ་དད་པའི་ཐ་སྙད་དུ་ཇི་ལྟར་འགྱུར་ཞེ་ན། ལྡོག་པ་ཞེས་སྨོས་ཏེ། ལྡོག་པའི་ཐ་སྙད་དོ། །དེའི་ཕྱིར་ཞེས་བྱ་བ་ནི། ལྡོག་པའི་ཐ་སྙད་ལས་སོ། །དེ་ལྟར་མིན་ཞེས་བྱ་བ་ནི་ལྡོག་པ་ཉིད་དུ་འགྱུར་བ་མ་ཡིན་ནོ། །སྔར་ཞེས་བྱ་བ་ནི་མཆི་གུའི་ལུས་ཞེས་བྱ་བ་བཞིན་ནོ་ཞེས་བྱ་བ་དེར་རོ། །རྣམ་འགྲེལ་ལ་འཇུག་པར་བྱེད་པ་ནི་ཇི་ལྟར་ཞེས་བྱ་བའོ། །ཡང་ཇི་ལྟར་ན་སྒྲོན་མ་ལ་སོགས་པས་གསལ་བར་བྱ་བ་རང་ཉིད་གསལ་བ་མ་ཡིན་ཞེ་ན། བདག་ཉིད་ལ་ནི་ཞེས་གསུངས་སོ། །བཟློག་པ་ལ་ཡང་ཞེས་བྱ་བ་ནི་རང་གསལ་བ་ལ་ཡང་ངོ༌། །གལ་ཏེ་དེ་ཡང་གསལ་བྱེད་གཞན་མེད་ན། ཇི་ལྟར་སྒྲོན་མ་གསལ་བར་འགྱུར་སྙམ་ན། གལ་ཏེ་ཞེས་བྱ་བའོ། །བརྒལ་ཞིང་བརྟག་པ་མ་ཡིན་པ་དེ་ལྟ་བུ་ཉིད་དུ་མཐོང་བའི་ཕྱིར་རོ་ཞེས་དོགས་པའོ། །བུམ་པ་ཡང་ཞེས་བྱ་བ་ལ་སོགས་པས་ནི་གཞན་གྱིས་གསལ་བར་བྱེད་པ་ཞེས་བྱ་བ་ནི་མེད་དོ་ཞེས་སྟོན་པ་ཡིན་ནོ། །དེ་ལས་ནི་སྒྲོན་མའོ། །རང་གསལ་བའི་དཔེ་
སྒྲོན་མ་ཉིད་འགོག་པས་ཕ་རོལ་པོ་སྨྲ་བ་ནི་ཅི་སྟེ་ཞེས་བྱ་བའོ། །སྒྲོན་མ་ལ་སོགས་པ་ལས་གསལ་བའི་རང་བཞིན་དུ་སྐྱེས་པ་དེའི་གསལ་བར་བྱེད་པ་མིག་ལ་སོགས་པ་ཉིད་ཡིན་ནོ། །མི་གསལ་བའི་ཕྱི་རོལ་ཡང་མིག་དང་སྒྲོན་མ་ལ་སོགས་པ་ལས་གསལ་བའི་རང་བཞིན་དུ་སྐྱེ་བའི་ཕྱིར་སྒྲོན་མས་གསལ་བར་བྱེད་དོ་ཞེས་བརྗོད་པ་ཇི་ལྟ་བ་བཞིན་དུ་མིག་ལས་ཀྱང་ཤེས་པ་གསལ་པའི་རང་བཞིན་ཉིད་སྐྱེ་བ་ཡིན་ནོ་ཞེས་འདོད་བར་བྱའི། དོན་དམ་པར་ནི་གཞན་གྱིས་གསལ་བ་འགའ་ཡང་ཡོད་པ་མ་ཡིན་ནོ་ཞེས་དགོངས་པའོ། །ཇི་ལྟར་སྲིད་པ་ཞེས་བྱ་བ་ནི་སྲིད་པ་ལས་མ་འདས་པ་སྟེ་དེ་ལྟར་རོ། །གལ་ཏེ་འགའ་ཞིག་ལ་ཞེས་བྱ་བ་སྒྲོན་མ་ལ་ནི་གསལ་བྱེད་གཅིག་ཡིན་ལ། གཞན་དག་ལ་ཞེས་བྱ་བ་བུམ་པ་ལ་ནི་གཉིས་ཡིན་ལ་གཞན་པ་དག་ལ་ནི་ཤེས་པར་བྱ་བ་ཤེས་པ་ལ་ནི་ཡང་ནའོ། །དེའི་ཞེས་བྱ་བ་རང་ཉིད་གསལ་བའོ། །འོན་ཏེ་རང་བཞིན་དང་ཡང་འགལ་བར་འགྱུར་ན་དེའི་ཚེ་འདི་ནི་ཐམས་ཅད་སྙམ་པར་དེ་འཇིགས་པར་བྱེད་པར་འགྱུར་རོ། །གལ་ཏེ་འགལ་བ་མེད་ན་འོ་ན་རལ་གྲིའི་སོ་ཡང་བདག་ཉིད་ཀྱིས་གཅོད་པར་འགྱུར་རོ་ཞེ་ན། །ཆད་པ་ནི་ཞེས་སྨོས་སོ། །འདི་ཉིད་ཡིན་ནོ་ཞེས་བྱ་བ་ནི་དེ་ཉིད་ཀྱིས་བསྐྱེད་པ་མ་ཡིན་ནོ་ཞེས་བྱ་བ་དེ་ལྟ་བུའི་རང་བཞིན་ནོ། །དེའི་ཚེ་འཐད་པར་འགྱུར་གྱི་ཞེས་བྱ་བ་རང་ཉིད་གསལ་བ་སུན་འབྱིན་པའོ། །གཞན་དུ་ནི་མ་ཡིན་ནོ་ཞེས་བྱ་བ་ནི་རང་གི་རྒྱུ་ལས་རང་གསལ་བའི་རང་བཞིན་དུ་སྐྱེས་ནའོ། །དོན་དེ་མ་ཐག་གསལ་བ་ནི་དེས་དོན་གཞན་གསལ་ལོ་ཞེས་བྱ་བའི་བརྗོད་པར་མི་འགྱུར་རོ། །གལ་ཏེ་དོན་གསལ་ཞེ་ན་ནི་དོན་དེ་ཡང་ཤེས་པ་དེ་ལྟ་བུ་ཉིད་དུའོ་ཞེས་བྱ་བའི་དོན་ཏོ། །གཞན་གྱིས་ནི་ཤེས་པས་སོ། །དེའི་ཚེ་ནི་ཞེས་བྱ་བ་གཉི་ག་གསལ་བའི་དུས་ནའོ། །གསལ་བྱ་བ་དང་ཞེས་བྱ་བ་ནི། གསལ་བྱ་ཉིད་དུ་འདོད་པའི་དོན། །གསལ་བྱེད་ཅེས་བྱ་བ་ནི་གསལ་བྱེད་དུ་འདོད་པ་ནི་ཤེས་པ་དག་གསལ་བ་ཉིད་དུ་ཁྱད་པར་འགའ་ཡང་ཡོད་པ་མ་ཡིན་ནོ། །དེའི་བྱེད་པ་ལས་ཞེས་བྱ་བ་ནི་ཤེས་པའི་བྱེད་པ་ལས་སོ། །དེ་ལས་ནི་དོན་ལ་རིམ་གྱིས་རྟོགས་པ་རྟོགས་པ་ཉིད་ཁྱད་པར་ཡོད་པའོ། །ཕ་རོལ་པོ་འདི་ཉིད་གསལ་བར་བྱེད་པ་ནི་འདི་ལྟར་ཞེས་བ་བའོ། །དེའི་ནི་བུམ་པའོ། །རྒྱུ་དེས་ན་བུམ་པ་
དང་སྒྲོན་མ་དེ་གཉིས་དེ་ཉིད་དེ་གསལ་བྱ་དང་གསལ་བྱེད་ཉིད་ཡིན་ན་འདི་ལ་བརྗོད་པ་ནི་དེ་ལྟར་ཞེས་བྱ་བ་སྟེ། གསལ་བའི་རང་བཞིན་ཉིད་དུ་སྐྱེས་པར་ཅི་སྟེང་མི་འདོད་ན། དེ་ཁོ་ན་ལྟར་སྐྱེ་བར་རིགས་སོ། །དེས་ན་དེ་ལ་གསལ་བྱ་གསལ་བྱེད་ཉེད་ཅི་ཞིག་ཡོད། ཁྱད་པར་ཞེས་བྱ་བ་ནི་སྒྲོན་མས་བྱས་པའོ། །འོན་ཏེ་རང་ཉིད་ཅེས་བྱ་བ་དེ་ཉིད་འགྲེལ་པ་ནི་ཐ་སྙད་ཅེས་བྱ་བའོ། །འདི་ལ་བརྗོད་པ་ནི་ཉམས་སུ་ཞེས་བྱ་བའོ། །དེ་ལྟར་ཞེས་བྱ་བ་ནི་ཤེས་པ་ལྟར་རོ། །རྣམ་པ་ཐམས་ཅད་དུ་ཞེས་བྱ་བ་ནི་ཐམས་ཅད་ཀྱི་ཚེ་རིག་པར་རོ། །དེས་ན་རིག་པར་བྱ་བ་ནི་ལྐོག་ཏུ་གྱུར་པ་ཡང་འཐད་པ་ཡང་འཐད་པ་ཡིན་ནོ། །གལ་ཏེ་ཤེས་པ་བཞིན་དུ་ཕྱི་རོལ་ཡང་ཐམས་ཅད་ཀྱི་ཚེ་རིག་པ་ཉིད་ཡིན་ན་ནི་དེའི་ཚེ་ཤེས་པ་དང༌། ཤེས་བྱ་དག་ཁྱད་པར་འགའ་ཡང་མེད་པར་འགྱུར་རོ། །དེས་ན་ཕྱི་རོལ་གྱི་དངོས་པོ་རིག་པར་བྱ་བ་མ་ཡིན་པ་ཡང་སྤོང་བ་ཁོ་ནའོ་ཞེ་ན། འདི་ལ་བརྗོད་པ་ནི་དེ་ནི་མི་འཐད་དེ་ཞེས་བྱ་བའོ། །རིག་བྱ་མིན་ལ་ཞེས་བྱ་བ་ནི་རིག་པར་བྱ་བ་མ་ཡིན་པ་ཉིད་རྟོགས་སོ་ཞེ་ན། བརྗོད་པ་རིག་པར་བྱ་བ་ཉིད་མེད་ན་རིག་པ་ཉིད་དུ་ཇི་ལྟར་འགྱུར། གལ་ཏེ་མངོན་སུམ་གཅིག་གིས་མ་རྟོགས་པ་རྗེས་སུ་དཔོགས་པས་རྟོགས་ཞེས་བྱ་བ་འདི་འཆད་པ་ཅི་ཡོད་སྙམ་ན་དེ་ཡང་ཞེས་གསུངས་སོ། །དོན་གཞན་མེད་དོ་ཞེས་བྱ་བ་ཁོ་བོ་ཅག་གི་ཕྱོགས་ཡིན་གྱི་དོན་དེ་ལ་མངོན་སུམ་གྱིས་རྟོགས་པར་བྱས་པ་ཉིད་འབའ་ཞིག་ཡོད་དོ་ཞེས་བྱ་བ་ནི་ཕྱོགས་མ་ཡིན་ཏེ། དེ་ལྟར་ཡིན་དང་རྟོགས་བཞིན་པ་ལས་དོན་གཞན་ནི་མེད་དོ་ཞེས་བྱ་བ་འདི་ལ་ཆད་པ་ཅི་ཡོད། ཡང་ན་མངོན་སུམ་གྱིས་རྟོགས་པར་བྱ་བ་ཉིད་འབའ་ཞིག་ཡོད་དོ་ཞེས་བྱ་བའི་ཕྱོགས་ལ་ཡང་ཉེས་པ་མེད་དོ་ཞེས་སྟོན་པ་ནི། རྗེས་སུ་དཔག་པ་ལས་ཞེས་བྱ་བའོ། །དེ་ལྟ་མ་ཡིན་པ་ཞེས་བྱ་བ་ནི། རང་ཉིད་ཀྱིས་ཕྱིས་མཐོང་བའོ། །དེ་ལས་ནི་གཟུང་བ་ལས་སོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །རྟོགས་པའི་ཕྱིར་ཞེས་བྱ་བ་ནི་གཟུང་བའི་རྣམ་པ་ལ་ཐ་དད་པའི་དོན་མ་རྟོགས་པའི་ཕྱིར་རོ། །མ་རྟོགས་ཀྱང་ཡོད་དོ་ཞེ་ན། མ་རྟོགས་པ་ཞེས་གསུངས་སོ། །མ་རྟོགས་པ་ཉིད་མ་གྲུབ་སྟེ་རྗེས་སུ་དཔག་པས་རྟོགས་པའི་ཕྱིར་རོ་ཞེ་ན་འདི་ལ་བརྗོད་པ་ནི་འོ་ན་ཞེས་བྱ་བའོ། །མངོན་དུ་བྱེད་པ་མ་
ཡིན་པ་ཁོ་ནར་རྗེས་སུ་དཔག་པས་རྟོགས་པ་དེས་ན། མངོན་སུམ་དུ་ཇི་ལྟར་འགྱུར་ཞེ་ན། འདི་ལ་སྨྲས་པ་ནི་དེ་ཞེས་བྱ་བའོ། །མངོན་དུ་བྱེད་པས་ནི་མ་ཡིན་ནོ་ཞེས་བརྗོད་པ་ན་མངོན་དུ་བྱེད་པ་ཉིད་བཀག་པ་ཡིན་ལ་རྟོགས་སོ་ཞེས་བརྗོད་པ་ན་ནི་དེ་ཉིད་བསྒྲུབས་པ་ཡིན་ཏེ། དེ་ལྟ་མ་ཡིན་པ་རྟོགས་པ་མེད་པའི་ཕྱིར་རོ། །སྒྲུབ་པ་དང་དགག་པ་འདི་ཡང་གཅིག་ཉིད་འཐད་པ་མ་ཡིན་ནོ། །ཇི་ལྟར་མི་འཐད་སྙམ་ན་དོན་ཅི་ཡིན་ཞེས་བྱ་བ་སྨོས་ཏེ། ཅི་ཡང་མ་ཡིན་པའོ། །རང་གི་ངོ་བོར་མ་རྟོགས་པ་ལ་ནི་རྗེས་སུ་དཔག་པས་རྟོགས་པ་མེད་པའི་ཕྱིར་གཟུང་བ་ལས་ཐ་དད་པའི་ཕྱི་རོལ་གྱི་དོན་ཅི་ལྟར་ཁས་ལེན་ཞེས་བྱ་བའི་དོན་ཏོ། །འདི་ཞེས་བྱ་བ་ནི་སྔོན་པོ་ལ་སོགས་པའོ། །དེའི་ཚེ་མྱོང་བའི་རྒྱུ་ལས་སྔོན་པོའི་རང་བཞིན་གྱི་དངོས་པོ་ནི་སེར་པོ་ལ་ལྟོས་ཏོ། རང་བཞིན་ཐ་དད་པར་ཅི་ལྟར་འགྱུར་ཏེ། མྱོང་བའི་དབང་གིས་སྔོན་པོ་དང་སེར་པོ་དག་ཐ་དད་པར་ཇི་ལྟར་འགྱུར་ཞེས་བྱ་བའི་དོན་ཏོ། །ཡང་ཇི་ལྟར་ཐ་དད་པར་མི་འཐད་སྙམ་ན། རྟོགས་པའི་ཞེས་གསུངས་སོ། །དེས་ན་རྟོགས་པའི་དབྱེ་བས་ཐ་དད་པར་འགྱུར་ དགོས་སོ། །ཤེས་པ ་གཞན་ཐ་དད་པར་ནི་ཚད་མས་འཐད་པ་མ་ཡིན་ནོ། །དེ་དང་འབྲེལ་པས་ནི་ཤེས་པའི་བདག་ཉིད་ཡིན་པས་ན། དེ་ཉིད་ན་ཞེས་པས་ཐ་དད་ན་དོན་ཐ་དད་པའོ། །འདི་ལ་བརྗོད་པ་ནི་ཤེས་པ་ལས་དོན་གཞན་ཡོད་པར་ག་ལ་འགྱུར། འདི་ཉིད་གསལ་བར་བྱེད་པ་ནི་དེ་དང་ཞེས་བྱ་བ་སྟེ། ཤེས་པ་དང་ལྷན་ཅིག་གཅིག་ཏུ་གྱུར་པའི་དོན་ནི། ཤེས་པ་དེ་ལས་གཞན་པར་ག་ལ་འགྱུར་ཏེ། འདི་ལ་ཚད་མ་མེད་དེ་ཞེས་བྱ་བའི་དོན་ཏོ། །རྗེས་སུ་འགྲོ་བ་དང་ལྡོག་པ་དག་ལས་ཤེས་པ་དང་དོན་ཐ་དད་པར་སོ་སོར་རྟོགས་སོ་ཞེ་ན། འདི་ལ་བརྗོད་པ་ནི་མ་ཡིན་ཏེ་ཞེས་བྱ་བའོ། །རྗེས་སུ་འགྲོ་བ་དང་ལྡོག་པ་དག་རྗེས་སུ་དཔག་པས་རྟོགས་སོ་ཞེ་ན་འདི་འགོག་པ་ནི་མིན་ཞེས་བྱ་བའོ། །རྗེས་སུ་དཔག་པ་ནི་མངོན་སུམ་སྔོན་དུ་འགྲོ་བ་ཅན་ཉིད་ཡིན་ན། དེ་ལ་མངོན་སུམ་ཞུགས་པ་ཡང་མ་ཡིན་ཏེ། དེས་ན་ཇི་ལྟར་རྗེས་སུ་དཔག་པར་འགྱུར། དེས་ན་མངོན་སུམ་དེ་མེད་ན་རྗེས་སུ་དཔག་པ་མེད་པས་ན་ལོང་བ་བརྒྱུད་པ་ལས་འབའ་ཞིག་ཏུ་འགྱུར་གྱི། དངོས་པོ་གྲུབ་ པ་ནི་མ་ཡིན་ནོ། །གལ་ཏེ་ཞེས་བྱ་བ་ནི་དགོས ་པའོ། །ཁྱབ་པར་བྱེད་པའི་དོན་མེད་པར་
ཁྱབ་པར་བྱ་བའི་ཤེས་པ་ཡོད་པར་ཇི་ལྟར་འདི་ལ་བརྗོད་པ་ནི་མ་རྟོགས་པའོ་ཞེས་བྱ་བའོ། །དེ་ཚེ་ཞེས་བྱ་བ་དོན་གྲུབ་པའི་དུས་སུའོ། །གལ་ཏེ་དེའི་དུས་བར་མ་རྟོགས་ན་འོ་ན་སྔར་ཁྱབ་པར་བྱེད་པ་ཉིད་དུ་ཇི་ལྟར་རྟོགས་ཡུལ་དང་དུས་རང་བཞིན་ཁྱབ་པའི་ཕྱིར། ཁྱབ་པར་བྱེད་པ་ཉིད་དུ་འགྱུར་བ་ཡིན་ནོ། །གལ་ཏེ་དེའི་དུས་མ་རྟོགས་ན་དེའི་ཚེ་ཇི་ལྟར་ཁྱེད་ཁྱབ་པར་བྱེད་པ་ཉིད་དུ་འགྱུར། ད་ལྟ་ན་དོན་ཡོད་དོ་ཞེས་བྱ་བའི་རྟོགས་པ་གང་ཡིན་པ་དེ་སྔར་སྐྱེས་ན། དེ་ལས་ཁྱབ་པར་བྱེད་པ་ཉིད་དུ་ཇི་ལྟར་རྟོགས་དེས་ན་སྔར་ཡང་རྟོགས་པ་ཙམ་ཁོ་ན་ཡིན་གྱི། དོན་རྟོགས་པ་ནི་མ་ཡིན་ནོ། །དེ་ལྟར་ན་ཡང་དེའི་དོན་གྱིས་ཁྱབ་པར་ཇི་ལྟར་འགྱུར། འདི་ལ་གཞན་གྱིས་གལ་ཏེ་ཞེས་སྨྲས་སོ། །ཇི་ལྟར་དུ་བ་མེ་མེད་ན་མི་འབྱུང་བ་དེ་བཞིན་དུ་མེའི་རྣམ་པ་ཅན་གྱི་རྟོགས་པ་ཡང་མེ་མེད་པར་ཡང་མི་འདོད་དོ། མེའི་འབྲས་བུ་ཡིན་པའི་ཕྱིར་རོ། །དེས་ན་དེ་ཇི་ལྟར་རྟོགས་པ་ཙམ་ཡིན། ཤེས་པའི་རྣམ་པ་ཉིད་ཡིན་ན་ནི། དུ་བ་ཡང་མེའི་འབྲས་བུར་མི་འགྲུབ་སྟེ། ཤེས་པ་བསྐྱེད་པའི་ཕྱིར་རོ་ཞེས་བྱ་བ་ནི་གཞན་གྱི་བསམ་པའོ། །བརྗོད་དེ་ཞེས་བྱ་བ་ནི་བྲམ་ཟེས་སོ། །འདི་ལྟར་ཞེས་བྱ་བ་ནི་ངོ་ཤེས་པའི་སྟོབས་ཀྱིས་རྣམ་པར་རིག་པ་ཙམ་བཟློག་པ་ཉིད་སྟོན་པའོ། །གལ་ཏེ་དོན་མྱོང་བའི་ནང་དུ་འདུས་ན། དེའི་ཚེ་ངོ་ཤེས་པའི་ཡུལ་གང་ཡིན་ངོ་ཤེས་པ་ལ་ཡུལ་ཡོད་པ་ལ་ཡང་ཡིན་ཏེ། ཐམས་ཅད་དུ་ན་ཕྱི་རོལ་དམིགས། །ཞེས་བསྒྲུབས་པའི་ཕྱིར་རོ། །དེས་ན་དོན་ནི་མྱོང་བའི་ནང་དུ་འདུས་པ་མ་ཡིན་ཏེ། འོན་ཀྱང་ཕྱི་རོལ་ཁོ་ན་ཡིན་ནོ། །དེ་ཉིད་བརྗོད་པ་ནི་གལ་ཏེ་མྱོང་བ་མིན་ཞེས་བྱ་བ་ནི་བར་ན་ཡོད་པ་ཞེས་བྱ་བའི་སྔར་གྱི་མཐོང་བ་དང་ཕྱིས་ཀྱི་མཐོང་བ་གཉིས་ཀྱི་དབུས་ན་ཡོད་པའི་མ་རྟོགས་པ་གང་ཡིན་པ་མེད་པར་རོ། །འདི་ལ་བརྗོད་པ་ནི་སྔ་མ་དང་ཞེས་བྱ་བའོ། །འོན་ཏེ་ཞེས་བྱ་བས་དོགས་པ་བསུ་ནས་སྤྱི་ཉིད་ཅེས་གསུངས་ཏེ། ཐམས་ཅད་དུ་ངོ་ཤེས་ཤེས་བྱ་སྤྱིའི་ཡུལ་ཅན་ཉིད་ཡིན་མོད། དེས་ན་སྤྱི་ཉིད་གཅིག་ཏུ་འགྱུར་གྱི་གསལ་བ་ནི་མ་ཡིན་ནོ། །སྤྱི་གཅིག་ཉིད་དུ་འདོད་པ་ཁོ་ནའོ་ཞེ་ན། སྤྱི་ཡང་ཞེས་བྱ་བའོ། །གལ་ཏེ་བར་གྱི་རང་བཞིན་ཡང་ངོ་ཤེས་པ་དེས་དམིགས་པ་ཡིན་གྱི། སྔ་ཕྱིའི་རང་བཞིན་ཙམ་ནི་མ་ཡིན་ནོ་ཞེ་ན། ངོ་ཤེས་དེ་ཉིད་ནི་ཞེས་གསུངས་སོ། །འོན་ཏེ་ངོ་ཤེས་
པར་དམིགས་པ་ཉིད་དུ་ནི་མཐོང་བ་ཁོ་ནའོ་སྙམ་ན། མཐོང་ན་ནི་ཞེས་བྱ་བའོ། །གལ་ཏེ་རང་བཞིན་སྔ་མ་ལྐོག་ཏུ་གྱུར་པ་ཡིན་ན། དེ་ཇི་ལྟར་ཤེས་པ་ཡིན་སྙམ་ན། འདི་ལ་བརྗོད་པ་ནི་གནས་སྐབས་ཞེས་བྱ་བའོ། །གལ་ཏེ་ཉམས་ན་ཞེས་བྱ་བ་ནི་འདས་པ་ལ་མངོན་སུམ་ཉིད་མེད་པར་རྣམ་པར་ཤེས་པ་ཉིད་ལས་ཉམས་པར་འགྱུར་ན། དེའི་ཚེ་འདས་པའི་དོན་ཡང་ད་ལྟར་གྱི་དུས་སུ་དོན་ཉིད་ལས་ཉམས་པར་འགྱུར་རོ། །དེ་ནི་ཞེས་བྱ་བ་ནི་བར་ན་ཡོད་པ་ནིའོ། །དོན་བྱེད་པ་མེད་པ་ཞེས་བྱ་བ་ནི་ད་ལྟར་གྱི་དུས་ན་དོན་བྱེད་པ་མེད་པའི་དོན་འདས་པ་ཇི་ལྟར་དོན་ཉིད་ཡིན་ཏེ། དོན་ན་དོན་བྱེད་པ་ཉིད་ལས་ཡིན་ནོ། །དོན་བྱ་བ་བྱེད་པ་ཡང་ད་ལྟར་བ་ཡིན་གྱི་འདས་པ་ནི་མ་ཡིན་ནོ། །ད་ལྟར་ཡང་དོན་བྱ་བ་བྱེད་དོ་ཞེ་ན། མྱོང་བ་མེད་པ་ནི་ཞེས་བྱ་བའོ། །རྒྱུ་དེས་ན་བར་གྱི་དུས་ན་ཡོད་པ་དེ་དང་ངམ། འདས་པ་དང་ལྷན་ཅིག་ད་ལྟར་བྱུང་བ་ཉིད་གཅིག་པ་ཉིད་མེད་དོ། །འོ་ན་རྗེས་སུ་དཔག་པས་གཅིག་ཏུ་འགྱུར་རོ་ཞེ་ན་རྗེས་སུ་དཔག་པའི་ཞེས་བྱ་བའོ། །ཕ་རོལ་ཉིད་སངས་རྒྱས་པའི་དོགས་པ་བསུ་བ་ནི། བག་ཆགས་ཞེས་བྱ་བའོ། །སྔོན་པོ་དང་སེར་པོ་ལ་སོགས་པའི་དབྱེ་བ་མཐའ་ཡས་པ་བག་ཆགས་གང་ལ་ཡོད་པ་དེ་ལ་དེ་སྐད་བརྗོད་དེ། དེའི་རྣམ་པ་ཅན་གྱི་ཤེས་པ་གང་ཡིན་པ་དེའི་སྐྱེད་པར་བྱེད་པ་ཡིན་ན། དེའི་ཚེ་བག་ཆགས་དེ་དང་ཕྱི་རོལ་གྱི་དོན་ཐ་དད་པ་ཅི་ཡོད་པ་དེ་མེད་པ་ཁོ་ནའོ། །དེ་ནི་བག་ཆགས་སོ། །དོན་ནི་ལུས་ཅན་ཡིན་ལ། རྣམ་པར་ཤེས་པ་ནི་རྣམ་པར་ཤེས་པའི་བདག་ཉིད་ཡིན་པའི་ཕྱིར་ལུས་ཅན་ཉིད་མ་ཡིན་ནོ། །རྟག་ཏུ་ཉེ་བར་འཚེ་བར་བྱེད་པ་ཞེས་བྱ་བ་ནི། ཐོགས་པ་ལ་སོགས་པའི་མཚན་ཉིད་ཀྱི་ཉེ་བར་འཚོ་བར་བྱེད་པའོ། །ཤེས་པའི་རྣམ་པ་ནི་རྟག་ཏུ་ཉེ་བར་འཚོ་བར་བྱེད་པ་མ་ཡིན་ཏེ། སྣང་བའི་དུས་ཁོ་ན་དེ་ཉིད་འཚོ་བའི་རྒྱུ་ཡིན་པའི་ཕྱིར་རོ། །སྣང་བའི་ཞེས་བྱ་བ་ནི་ཤེས་པའི་རྣམ་པའོ། །ཕྱི་རོལ་ཁྱད་པར་མེད་ཀྱང་བསྒོམས་པའི་ཁྱད་པར་གྱིས་ཤེས་པ་གསལ་བ་ལ་སོགས་པའི་ཁྱད་པར་དུ་གྱུར་པའི་རྒྱུའི་ཕྱིར། ཤེས་པའི་རྣམ་པ་ཉིད་སྣང་བ་ཡིན་གྱི་དོན་ནི་མ་ཡིན་ནོ། །མ་ཡིན་ཏེ་ཞེས་བྱ་བ་ནི་འདིས་འགོག་པའོ། །ཉེ་བ་མ་ཡིན་ཡང་ཞེས་བྱ་བ་ནི་ཡུལ་དང་དུས་དེ་ན་ཉེ་བར་མི་གནས་པ་ཡང་མཐོང་བར་ཁས་བླངས་པའི་ཕྱིར་རོ། །
འདི་ཉིད་སྟོན་པ་ནི་འདི་ལྟར་ཞེས་བྱ་བའོ། །དྲན་པ་བརྗོད་པ་ནི་དྲན་པ་ཉམས་པ་སྟེ་འོད་བྱེད་པ་རྣམས་ཀྱིའོ། །མེད་པར་རིག་པ་ནི་གཞོན་ནུ་མ་ལེན་པ་རྣམས་ཀྱིའོ། །མེད་པར་སྣང་བ་ནི་རིགས་པ་ཅན་ལ་སོགས་པ་རྣམས་ཀྱིའོ། །ཐམས་ཅད་ཐམས་ཅད་ལ་ཡང་འདོད། །ཅེས་བྱ་བ་ནི་གྲངས་ཅན་པ་རྣམས་ཀྱིའོ། །སྐྱོན་མཚུངས་པ་ཉིད་དོ་ཞེས་བྱ་བ་ནི་ཐམས་ཅད་སྣང་བར་ཐལ་བའི་མཚན་ཉིད་དོ། །ངོ་ཤེས་སྔར་ནི་དུས་མ་མཐོང་བ་ཡོད་པ་ཡིན་ཏེ། དེས་ན་དྲན་པས་ཉམས་པ་ན་ཟླ་བ་གཉིས་མཐོང་བའི་དུས་ན་དངོས་གཞན་ཡང་དུ་མ་ཅིའི་ཕྱིར་མ་མཐོང༌། འོན་ཏེ་བག་ཆགས་ལ་བརྟེན་ནས་འགའ་ཞིག་ཁོ་ན་དམིགས་ཀྱི་ཐམས་ཅད་ནི་མ་ཡིན་ནོ་ཞེས་བརྗོད་ན་དེ་ལ་བརྗོད་པ་ནི་བག་ཆགས་ཀྱི་སྟོབས་ནི་རྣམ་པར་ཤེས་པ་སྨྲ་བ་ལ་ཡང་མཚུངས་ཏེ། དེས་ན་རྣམ་པར་ཤེས་པ་ནི་སྔར་ཞེས་བྱ་བའོ། །ཕྱིན་ཅི་ལོག་ཏུ་སྣང་བའི་ཕྱོགས་ལ་ཡང་མཚུངས་པར་སྟོན་པ་ནི་ཕྱིན་ཅི་ལོག་ཏུ་ཞེས་བྱ་བའོ། །དེ་ལྟར་ན་རེ་ཞིག་སློབ་དཔོན་ཆོས་མཆོག་ལ་སོགས་པས་འདོད་པའི་བག་ཆགས་ཀྱི་ཕྱོགས་ལ་ཡང་ཕ་རོལ་པོས་བརྗོད་པས་ཉེས་པ་བསལ་ནས་རང་གི་འདོད་པ་བརྗོད་པ་ནི་དེ་མ་ཐག་པའི་ཞེས་བྱ་བའོ། །ཤེས་པ་སྔ་མའི་བདག་ཉིད་དུ་གྱུར་པའི་སྣང་བ་ཐམས་ཅད་རང་གི་རང་བཞིན་ལ་གསལ་བའི་ཕྱིར་ན་གསལ་ཞིང་གཡོ་བའི་རང་བཞིན་དེ་ཉིད་བག་ཆགས་ཡིན་ནོ། །གཞན་དུས་ཕྱིས་འབྱུང་བ་ཅན་དེ་ལྟའི་བདག་ཅེས་བྱ་བ་གསལ་བར་སྣང་བའི་རང་བཞིན་གྱིས་མྱོང་བ་ནི། སྐྱེད་བྱེད་མེད་པར་བག་ཆགས་དེ་ག་ལས་ཡིན། བག་ཆགས་དེ་ནི་དེའི་རྣམ་པ་ཅན་གྱི་རྣམ་པར་ཤེས་པ་ཕྱི་མ་སྐྱེད་པར་བྱེད་པ་ཉིད་དོ་ཞེས་བྱ་བའི་དོན་ཏོ། །འོ་ན་རང་རྣམ་པར་ཤེས་པ་ཐམས་ཅད་ཅིག་ཅར་འཇུག་པར་འགྱུར་རོ་ཞེ་ན་སད་བྱེད་ཅེས་སྨོས་སོ། མངོན་པར་འདོད་པ་དང་གཞན་དུ་སྟེ། མི་འདོད་པར་སྣང་བར་ཤེས་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་ལས་ནཾ་རྣམ་པར་ཤེས་པ་སྔ་མ་ལས་སོ། །འདིར་དཔེ་ནི་སད་པའི་ཞེས་བྱ་བའོ། །དུས་གཞན་དུ་ཞེས་བྱ་བ་ནི་གཟོད་ནས་ཕ་རོལ་པོ་སྨྲ་བ་ནི་ཆོས་པ་ལས་ཞེས་བྱ་བའོ། །དེ་ཉིད་ནི་སྔར་མཐོང་བ་ཉིད་དོ། །དེ་མ་ཐག་པའི་རྐྱེན་གྱིས་ནི་རྨི་ལམ་ལ་སོགས་པ་སྔ་ན་མེད་པར་སྐྱེད་པ་མ་ཡིན་པ་དེས་ན། ཇི་ལྟར་དཔེ་ཡིན་སྙམ་ན། འདི་ལ་
བརྗོད་པ་ནི་མ་ཡིན་ཏེ་ཞེས་བྱ་བའོ། །དེའི་རྣམ་པར་རྟོག་པ་གཞན་ཉིད་སྐྱེ་བ་ཞེས་བྱ་བ་འདི་ཉིད་དོན་ཡིན་གྱི། ཤེས་པའམ་དོན་འདས་ཟིན་པ་དེ་ཉིད་སྣང་བ་ནི་མ་ཡིན་ནོ། །དེ་ནི་འདས་པ་ཉིད་ད་ལྟར་སྣང་བའི་མི་འཐད་པའི་ཕྱིར་རོ། །དེ་ཉིད་ཀྱིས་ནི་ཉམས་སུ་མྱོང་བའིའོ། །འདི་ཁོ་ན་ལྟར་དམིགས་པ་ཞེས་བྱ་བ་ནི་རྨི་ལམ་དུ་མཐོང་བ་དང་སད་པར་མཐོང་བའི་ཤེས་པ་དག་གོ །གལ་ཏེ་བག་ཆགས་ཡོད་དོ་ཞེས་བྱ་བ་ཙམ་ལ་ཚད་མ་ཡོད་མོད། །རྣམ་པར་ཤེས་པ་སྔ་མའི་བྱེ་བྲག་ཡིན་པ་ལ་ནི་ཚད་མ་མེད་དེ་དེ་ནི་འདས་པའི་མངོན་སུམ་མེད་པའི་ཕྱིར་རོ་ཞེ་ན། ཐོག་མ་མེད་པའི་ཞེས་གསུངས་སོ། །འདི་ཉིད་གསལ་བར་བྱེད་པ་ནི་ཇི་ལྟར་ཞེས་བྱ་བའོ། །ཕྱི་རོལ་ནི་བུམ་པ་ལ་སོགས་པའོ། །ཕྱི་རོལ་ནི་དེའི་རྒྱུ་མཚན་ནི་བག་ཆགས་ཀྱི་རྒྱུ་མཚན་ནོ། །རྒྱུ་མཚན་ཉིད་བརྗོད་པ་ནི་རྒྱུ་མཚན་ཞེས་པའི་བྱེ་བྲག་སྟེ་ཞེས་བྱ་བ་སྟེ། བག་ཆགས་དེ་ཡིན་ནོ། །ཤེས་པའི་བྱེ་བྲག་སྟེ་ཞེས་བྱ་སྟེ། དེའི་ཞེས་གསུངས་ཏེ། ཤེས་པ་དེའི་དབྱེ་བའང་བག་ཆགས་ཀྱི་བྱེ་བྲག་དེ་ལས་ཡིན་ནོ། །དེའི་ནི་དོན་གྱིའོ། །དེ་ཞེས་བྱ་བ་ནི་དོན་གྱི་དབྱེ་བ་རྒྱུ་མཚན་མེད་པའོ། །འོ་ན་དོན་གྱིས་གཡོ་བའི་རྒྱུ་ཤེས་པའི་དབྱེ་བ་ཡིན་མོང་སྙམ་ན། ཤེས་པའི་དབྱེ་བ་ལས་ཞེས་བྱ་བའོ། །མ་འབྲེལ་བ་ཉིད་དོ་ཞེས་བྱ་བ་ནི་རང་གི་བདག་ཉིད་ལ་བྱེད་པ་འགལ་བའི་ཕྱིར་རོ། །གལ་ཏེ་དོན་གྱི་དབྱེ་བ་དེ་རང་ཁོ་ནའི་རྒྱུ་མཚན་ཡིན་ན། དེའི་ཚེ་ཉེས་པ་འདིར་འགྱུར་བ་ཞིག་ན། དེ་ལྟར་ནི་འདོད་པ་མ་ཡིན་གྱི་འོན་ཀྱང་དོན་གྱི་དབྱེ་བ་གཞན་ཡིན་ནོ་ཞེ་ན། འོན་ཏེ་ཞེས་བྱ་བའོ། །མི་སྣང་བའི་བག་ཆགས་ཐ་དད་པར་བྱེད་པ་ལ་ཡང་ཉེས་པ་ནི་དེ་ལ་ཞེས་བྱ་བ་སྟེ། མི་སྣང་བ་ལ་ཡོད་དོ། །གཟུང་བ་ཐ་དད་པར་ནི་སྐྱེད་པར་མི་འགྱུར་རོ། །དྲན་པ་ཙམ་ཉིད་ཀྱི་གཟུང་བའི་རྣམ་པར་བསྐྱེད་པར་ནི་མ་མཐོང་ངོ༌། །དེའི་ཞེས་བྱ་བ་རང་གི་རྣམ་པ་ཅན་གྱི་ཤེས་པ་སྐྱེད་པར་བྱེད་པ་སྔོན་གྱི་རྣམ་པར་ཤེས་པ་དེ་ཇི་ལྟར་ཐ་དད་པར་བྱེད་པ་མ་ཡིན། ལྕགས་སྒྲོག་གིས་བཅིངས་པའི་བདག་ཉིད་མེད་ཀྱང་དེ་ལྟ་བུའི་ཚུལ་དུ་ཞེས་བྱ་བ་འཁོར་བའི་ཚུལ་དུ་འགྲོ་བའི་རྒྱུ་ཡིན་པ་དེ་བཞིན་དུ་བག་ཆགས་ཀྱི་དབྱེ་བས་ཀྱང་ཡིན་ནོ་ཞེས་སྦྱར་རོ། །དེར་ཡང་ནི་འདོད་པ་ལ་སོགས་པའོ། །གལ་ཏེ་དེར་ཕྱི་རོལ་ཉིད་དམིགས་པ་ཡིན་ན། དེའི་འདོད་པ་ཅན་གྱི་
འདོད་ལྡན་མ་གོམས་པས་མངོན་དུ་བྱས་པ་ཅི་སྟེ་མི་འཐོབ་སྙམ་ན། དེའི་ཚེ་དེ་ཉིད་ན་ཞེས་བྱ་བ་སྟེ། དུས་དེའི་ཚེ་ཡུལ་དེར་རོ། །དེ་ནི་ཡུལ་དང་དུས་གཞན་དུ་མེད་པ་ཡིན་པའི་ཕྱིར། དེའི་ཚེ་དང་དེར་མ་ཐོབ་མོང༌། མེད་པའི་ཕྱིར་མ་ཐོབ་པ་ནི་མ་ཡིན་ནོ་ཞེས་དགོངས་པའོ། །ཡུལ་ལ་སོགས་པ་ཡིས། གཞན་ཉིད་ཡིན་པར་ཇི་ལྟར་འགྱུར། །ཞེས་བྱ་བ་ནི་གང་ཞིག་ཇི་ལྟར་སྣང་བ་དེ་ནི། དེ་ཁོ་ན་ཁས་བླང་བར་བྱ་བ་སྟེ། དེས་ན་ཡུལ་དང་དུས་འདི་པ་ཉིད་དུ་རྟོགས་པའི་ཕྱིར། དེ་ནི་ཡུལ་དང་དུས་འདི་པ་ཉིད་དོ། །དེ་ལྟ་མ་ཡིན་ན་སྔོན་པོའི་རྣམ་པ་ལ་ཡང་སེར་པོའི་རྣམ་པ་ཉིད་སྔོན་པོའི་རྣམ་པ་ཉིད་དུ་སྣང་བའི་ཕྱིར་དངོས་པོ་འགའ་ཡང་རྣམ་པར་གནས་པ་མེད་པར་འགྱུར་རོ། །རྣམ་པ་གཞན་ལ་ཞེས་བྱ་བ་ནི་སྔོན་པོའི་རྣམ་པར་སྣང་བ་སེར་པོའི་རྣམ་པ་ཉིད་ཡིན་པ་ལ་ཚད་མ་མེད་པ་དེས་ན་སྔོན་པོ་རྣམས་སེར་པོའི་རྣམ་པ་མ་ཡིན་ནོ་ཞེས་ལན་འདེབས་པ་ནི། ཡུལ་དང་དུས་འདི་བར་སྣང་བ་ནི། ཡུལ་དང་དུས་གཞན་མ་ཡིན་པའི་ཕྱིར་གསུངས་སོ། །འདི་ལ་ཕ་རོལ་པོས་རྣམ་པ་ལ་ནི་ཞེས་སྨྲས་སོ། །གནོད་པ་མེད་པས་རྣམ་པ་ནི་ཡོད་པ་ཉིད་དོ་ཞེས་བྱ་བའི་དོན་ཏོ། །དེ་ལ་ནི་ཡུལ་དང་དུས་དང་ལྡན་པའོ། །དེ་ལ་ཡང་ནི་ཡུལ་དང་དུས་དང་ལྡན་པ་ལ་ཡང་ངོ༌། །ཡུལ་དང་བརྟེན་པའི་དོན་དེ་གཉིས་ལས་མ་གཏོགས་པ་འགྲེལ་པ་གཞན་ནི་འགའ་ཡང་མཐོང་བ་མེད་དོ། །ཡུལ་དང་བརྟེན་པ་དེ་གཉིས་དམིགས་ན་ཤེས་པ་དམིགས་པ་མེད་པར་ཇི་ལྟར་འགྱུར། གལ་ཏེ་དེར་ནི་ཡུལ་དང་དེ་ལ་བརྟེན་པ་དག་གིས་འགྲེལ་བ་སྣང་བ་མེད་དེ་དེས་ན་དམིགས་པ་ཉིད་བཟློག་པར་དཀའོ་ཞེ་ན་འབྲེལ་པ་ནི་ཞེས་སྨྲས་སོ། །འདི་ལ་ལན་ནི་གལ་ཏེ་ཞེས་བྱ་བའོ། །བབ་ཅོལ་ཉིད་སྟོན་པ་ནི་གལ་ཏེ་ཞེས་བྱ་བའོ། །ཐམས་ཅད་འགྱུར་བའི་ཕྱིར་ཞེས་བྱ་བ་ནི། ཇི་ལྟར་ཟླ་བ་གཉིས་པ་ལ་སོགས་པ་ལོག་པར་སྣང་བ་དེ་བཞིན་དུ་བདེན་པའི་ཀ་བ་ལ་སོགས་པའི་ཡུལ་ཅན་གྱི་ཤེས་པ་ཐམས་ཅད་འགྱུར་བའི་ཕྱིར་རོ། །གཞན་དུ་ཞེས་བྱ་བ་ནི་བདེན་པའི་ཡུལ་ཅན་ཉིད་དུ་བསྟན་པས་སོ། །གནོད་པར་བྱེད་པའི་ཤེས་པ་ཞེས་བྱ་བ་བདེན་པའི་ཀ་བ་ལ་སོགས་པའི་ཡུལ་ཅན་ལ་གནོད་བྱེད་མེད་པའི་ཕྱིར་ལོག་པར་སྣང་བ་ཉིད་མ་ཡིན་ནོ་ཞེ་ན། འདི་ལ་
བརྗོད་པ་ནི་གནོད་པར་བྱེད་པའི་ཞེས་བྱ་བའོ། །གནོད་བྱེད་ཀྱི་ཤེས་པ་མེད་པ་ཡང་ཅང་མེད་ན་མ་ཡིན་གྱི། འོན་ཀྱང་ཤེས་པ་གཞན་བདེན་པའི་ཀ་བ་རྗེས་སུ་འཛིན་པ་ཉིད་ཡིན་ནོ། །ཐམས་ཅད་ལོག་པར་སྣང་བ་ཁོ་ན་ཡིན་ན་ནི། གནོད་མེད་པར་ཡང་ལོག་པར་སྣང་བ་ཁོ་ནའོ། །དེ་ལྟ་ན་ཡང་དེ་ངེད་ལས་དོན་རྣམ་པར་གནས་པར་ཇི་ལྟར་འགྱུར། དེའི་ཕྱིར་གནོད་བྱེད་མེད་པ་སྟེ། གནོད་པར་བྱེད་པ་མེད་པ་ཉིད་ནི་བདེན་པ་མེད་པ་ཡིན་ཏེ། གནོད་པར་བྱེད་པ་ལ་སོགས་པར་སྣང་བ་ཡིན་པའི་ཕྱིར་རོ། །གང་དུ་དུས་གཞན་དུ་ཞེས་བྱ་བ་ནི། འདས་པ་ཉིད་ད་ལྟར་བ་ཉིད་དུ་སྣང་བ་ཡིན་ནོ་ཞེས་བྱ་བ་འདི་ལ་རེ་ཞིག་དང་པོ་ཉིད་སྣང་བ་ནི་མ་ཡིན་ཏེ། དེ་ནི་འདས་པ་ཉིད་ཀྱིས་མེད་པའི་ཕྱིར་རོ། །དེས་ན་དེར་དེ་འདྲ་བའི་སྣང་བ་བསྐྱེད་པ་ལ་བག་ཆགས་ཀྱི་བྱེད་པ་རྟོགས་ཀྱི་དོན་གྱིས་ནི་མ་ཡིན་ནོ། །གསོན་པོར་གར་བྱེད་པ་གཞན་དུ་སྣང་བ་ཞེས་དེ་ཤི་བ་ཡང་དེ་ལྟར་འགྱུར་བ་ནི་མ་ཡིན་ནོ། །མ་ཡིན་པ་ཉིད་སྟོན་པ་ནི། མ་སྐྱེས་པ་ནི་ཞེས་བྱ་བའོ། །འོ་ན་ལྷན་ཅིག་པ་གཉིས་པོ་ཉིད་བསྒོ་བར་བྱེད་པར་འགྱུར་རོ་ཞེ་ན། ཕན་ཚུན་ཞེས་གསུངས་སོ། །རྒྱུ་དང་འབྲས་བུའི་དངོས་པོ་ཉིད་སྐད་ཅིག་མ་རྣམས་མི་འཐད་དོ་སྙམ་ན། དེ་ནི་ཞེས་གསུངས་སོ། །བཟློག་པ་སྒྲུབ་པར་བྱེད་པ་ཞེས་བྱ་བ་ནི་བསྒོ་བྱེད་མེད་པར་བསྒྲུབ་པ་ལ་འདི་བསྟན་ན་འགལ་བ་ཡིན་ནོ། །དེས་ན་དྲན་པའི་ཤེས་པ་ན། གཟུང་བའི་རྣམ་པ་དང་བྲལ་བ་འཛིན་པར་བྱེད་པའི་ཁྱད་པར་གཞན་ནི་ཡོད་པ་མ་ཡིན་ནོ། །འོན་ཀྱང་གཟུང་བ་དང་འཛིན་པའི་རྣམ་པ་གཉིས་ནི་ཐ་མི་དད་པ་ཁོ་ནའོ། །དྲན་པ་དེ་ལ་ཡང་དོན་ཡོད་པ་མ་ཡིན་ནོ། །དེས་ན་དེའི་སྐྱེད་པར་བྱེད་པ་ནི་བག་ཆགས་ཁོ་ན་ཡིན་གྱི། དོན་ནི་མ་ཡིན་ནོ་ཞེས་གྲུབ་པའོ། །ཡང་ཇི་ལྟར་ན་འདི་རྒྱུ་དང་འབྲས་བུ་ཁོ་ན་ཡིན་ཞེ་ན། འཇིག་པ་སྔ་མས་ཞེས་གསུངས་སོ། །རྟག་པ་ལ་ཡང་དེ་ཁོ་ན་ལྟར་བསྒོ་བར་བྱ་བའི་དངོས་པོར་འགྱུར་རོ་སྙམ་ན། བརྟེན་པའི་ཞེས་གསུངས་སོ། །འདི་ག་ལས་ཤེ་ན། རྟག་པ་ཞེས་སྨོས་ཏེ། གང་གི་ཕྱིར་རྟག་པ་ལ་རྒྱུ་དང་འབྲས་བུའི་དངོས་པོ་ཡོད་པ་མ་ཡིན་པ་དེས་ན་དེའི་ཁྱད་པར་ཅན་བསྒོ་བར་བྱ་བ་དང་བསྒོ་བར་བྱེད་པའི་དངོས་པོ་ཇི་ལྟར་འགྱུར། འོན་ཏེ་ཡང་བརྟེན་པ་མི་སྐྱེ་བ་དེ་ལྟ་ན་ནི་ཡང་སྐྱེ་བའི་བག་ཆགས་དང་འབྲེལ་པའི་ཕྱིར་བསྒོས་པར་
འགྱུར་རོ་ཞེ་ན། བརྟན་པར་གནས་པ་སྔ་མ་ལས། །ཞེས་གསུངས་སོ། །ཅིའི་ཕྱིར་ཞེ་ན། སྔ་མ་བཞིན་དུ་གནས་པ་དེ་ལ་ནི་བག་ཆགས་སུ་འགྱུར་བ་མ་ཡིན་ཏེ། ཁྱད་པར་མེད་པའི་ཕྱིར་རོ། །སྐད་ཅིག་མའི་ཕྱོགས་ལ་ཡང་ཇི་ལྟར་བག་ཆགས་སུ་འགྱུར་སྙམ་ན། སྔ་མ་འདྲ་དང་ཞེས་གསུངས་ཏེ། ཤེས་པའི་སྐད་ཅིག་ཡིན་པ་དང་འདྲ་བ་དང༌། ཐ་དད་པ་ཡང་ཡིན་པ་དེས་ན་འདི་ཤེས་པ་སྔ་མའི་བག་ཆགས་སུ་འགྱུར་བ་ཡིན་ནོ། །གལ་ཏེ་སྐད་ཅིག་ཉིད་ལ་འདྲ་བ་ཇི་ལྟར་ཞེ་ན། སྐད་ཅིག་མ་ཡང་ཞེས་བྱ་བའོ། །གལ་ཏེ་སྐད་ཅིག་མ་ཡིན་ན། སྐྱེས་མ་ཐག་ཏུ་འཇིག་པའི་ཕྱིར་རོ། །གང་གིས་བག་ཆགས་བསྒོ་བར་བྱ་བ་དང་བསྒོ་བར་བྱེད་པ་ཉིད་འགྱུར་ལ། འབྲས་བུ་རྩོམ་པ་ཉིད་དུ་ཇི་ལྟར་འགྱུར་ཞེ་ན། རྣམ་ཤེས་ཞེས་གསུངས་སོ། །གལ་ཏེ་དེ་ཉིད་དྲིས་པ་མ་ཡིན་ནམ་ཇི་ལྟར་དེ་ལན་ཡིན་སྙམ་ན། རྗེས་འགྲོ་མེད་པར་ཞེས་གསུངས་སོ། །དེའི་ཚེ་སྔར་ཡོད་པའི་ཞེས་བྱ་བ་ནི། དུས་སྔར་ཡོད་པའི་ཁྱད་པར་མི་འགལ་ཡང་ཕྱི་མའི་བློ་ལ་མེད་དོ་ཞེ་ན། དེའི་ཚེ་ཇི་ལྟར་འདྲ་ཞེས་བྱ་བར་བལྟའོ། །འདི་འགོག་པ་ནི་མ་ཡིན་ཞེས་བྱ་བའོ། །གལ་ཏེ་རྗེས་སུ་མཐུན་པའི་ཕྱིར་ཤེས་པ་སྔ་མ་བག་ཆགས་ཡིན་ན་དེའི་ཚེ། གང་གི་ཚེ་བ་ལང་གི་བློའི་རྗེས་ཐོགས་སུ་གླང་པོའི་བློར་གྱུར་པ་དེའི་ཚེ་མི་མཐུན་ཕྱིར་ན་ཞེས་བྱ་བ་རྗེས་སུ་མཐུན་པ་མེད་པའི་ཕྱིར། བ་ལང་གི་བློ་གླང་པོའི་བློའི་བག་ཆགས་སུ་མི་འགྱུར་རོ་ཞེ་ན། འདི་ལ་བརྗོད་པ་ནི། གཞན་བ་ལང་གི་བློས་བར་དུ་ཆོད་ན་ཡང་སྔར་གྱི་གླང་པོའི་བློ་ནི་ཕྱིས་ཀྱི་གླང་པོའི་བློ་བརྟེན་པའི་ཕྱིར་རོ། །འོན་ཏེ་གླང་པོའི་བློ་ནི་ཤིན་ཏུ་ཡང་ཆོད་པའི་ཕྱིར་ན། དེ་བག་ཆགས་སུ་ཇི་ལྟར་འགྱུར་སྙམ་ན། བརྟན་པ་སྒྲུབ་བྱེད་ཅེས་སྨོས་སོ། །འོ་ན་གླང་པོའི་བློ་དེ་ལས་སྐྱེས་སྙམ་ན་གླང་པོའི་ཤེས་པས་ཞེས་གསུངས་སོ། །འོ་ན་བར་དུ་བ་ལང་གི་བློ་གང་ལས་སྐྱེས་སྙམ་ན། བར་དུ་ཞེས་གསུངས་སོ། །དེ་ལྟར་རེ་ཞིག་རང་ཉིད་འདོད་པའི་བག་ཆགས་རྣམ་པར་བཞག་ནས། སློབ་དཔོན་ཆོས་མཆོག་ལ་སོགས་པས་འདོད་པའི་བག་ཆགས་རྣམས་ནི། རྣམ་པར་ཤེས་པ་སྔ་མའི་བདག་ཉིད་དུ་གྱུར་པ་ཡིན་པའི་ཕྱིར། རྣམ་པར་ཤེས་པ་སྔ་མ་ཞིག་ན་བག་ཆགས་མཐའ་དག་འཇིག་པར་འགྱུར་རོ་ཞེས་བརྗོད་པའི་སྐྱོན་ཡོད་པ་ནི་ཞིག་
པ་གཅིག་ནི་ཞེས་བྱ་བའོ། །གལ་ཏེ་གཅིག་ཞིག་པ་ན་དེའི་ནུས་པ་རྣམས་ཀྱང་འཇིག་ན་ནི། དེའི་ཚེ་རྒྱ་སྐྱེགས་ཀྱི་ཁུ་བར་སྤངས་པའི་མེ་ཏོག་ཞིག་པ་ན། འབྲས་བུ་དམར་པོ་ག་ལས་སྐྱེས། །འོན་ཏེ་ས་བོན་དང་མྱུ་གུ་ལ་སོགས་པ་ལས་འབྲས་བུ་དམར་པོ་སྐྱེའི་མེ་ཏོག་ལས་ནི་མ་ཡིན་ནོ་ཞེ་ན། ས་བོན་ཞེས་གསུངས་སོ། །འབྲས་བུ་དམར་པོ་དང་མི་མཐུན་པ་ལས་དམར་པོ་ཇི་ལྟར་སྐྱེ་ཞེས་འབྲེལ་ཏོ། །འོན་ཏེ་ས་བོན་ལ་སོགས་པ་དེ་ཡང་མེ་ཏོག་དམར་པོ་དེས་བསྐྱེད་པ་ན། རིམ་གྱིས་འབྲས་བུའི་བྱེད་པ་པོ་ཡིན་ནོ་སྙམ་ན། འདི་ན་ཞེས་གསུངས་སོ། །རྒྱུ་དེའི་ཕྱིར་བག་ཆགས་འདི་དག་ཐམས་ཅད་ལས་རྣམ་པ་ཐམས་ཅད་དང་ལྡན་པའི་ཤེས་པ་སྐྱེས་པ་ནི་སྐད་ཅིག་གཅིག་ཉིད་ཀྱིས་འཇིག་པར་འགྱུར་བ་མི་རིགས་པས་སོ། །གལ་ཏེ་ནུས་པ་རྣམས་ཀྱི་རྟེན་ཞིག་ན། གདོན་མི་ཟ་བར་ནུས་པ་འཇིག་པའི་ཕྱིར། རྣམ་པར་ཤེས་པ་ཅི་ཞིག་པ་ན། ནུས་ པ་རྣམས་ཀྱང་འཇིག་པར་འགྱུར་དགོས ་སོ། །དེ་ལྟ་ན་ཡང་རྣམ་པར་ཤེས་པ་ཐམས་ཅད་ཀྱང་ཞིག་པ་ཡིན་ནོ་སྙམ་ན་དེ་སྟོན་ཞེས་སྨོས་སོ། །འོ་ན་ནུས་པ་རྟག་པར་ཐལ་ལོ་ཞེ་ན་ནུས་པ་ཐ་དད་ཅེས་གསུངས་ཏེ། ཤེས་པ་ལས་ཐ་མི་དད་པ་དེའི་ཕྱིར་རོ། །འོན་ཏེ་རྣམ་པར་ཤེས་པའི་རྒྱུ་བཞིན་དུ་བག་ཆགས་ཀྱི་རྒྱུན་ཡང་སྲིད་པའི་ཕྱིར། བག་ཆགས་དང་ཤེས་པ་གཉི་ག་ལས་རྣམ་པར་ཤེས་པ་དུ་མ་དུས་གཅིག་ཉིད་བསྐྱེད་པར་བྱ་བ་ཡིན་ནོ་ཞེ་ན། འདི་ལ་བརྗོད་པ་ནི་བག་ཆགས་ལྡན་པ་རྣམས་ཞེས་གསུངས་སོ། །བག་ཆགས་ཀྱི་རྒྱུན་མི་འདོད་པ་ཡིན་ཏེ། གང་གི་ཕྱིར་བག་ཆགས་ནི་ནུས་པ་ཡིན་ཏེ། ནུས་པ་ཡང་ས་བོན་ལ་སོགས་པ་བཞིན་དུ་རྒྱུན་དུ་འབྱུང་བ་མ་ཡིན་ནོ། །ད་ནི་བག་ཆགས་ལས་ནི་ཤེས་པ་ཤེས་པ་ལས་ཀྱང་བག་ཆགས་ཡིན་པས་ཕན་ཚུན་བརྟེན་པའི་རྐྱེན་དུ་འགྱུར་རོ་ཞེས་གཞན་གྱིས་བརྗོད་པ་ཡོད་པ་ནི། བག་ཆགས་ལས་ནི་མངོན་པར་འདོད་པའི་ཤེས་པ་སྐྱེ་ཞིང༌། ཤེས་པ་གཞན་དེ་དག་ལས་ཀྱང་བག་ཆགས་ཡིན་གྱི། ཤེས་པ་དང་བག་ཆགས་དེ་དང་མཚུངས་པ་ཉིད་དུ་སྟེ། དུས་ཉིད་དུ་ནི་ནམ་ཡང་ཕན་ཚུན་བྱེད་པ་མ་ཡིན་ནོ། །གལ་ཏེ་རྣམ་པར་ཤེས་པ་མཚུངས་པར་སྐྱེད་པར་བྱེད་པའི་བག་ཆགས་ཡིན་ན། དེའི་ཚེ་གང་གི་ཚེ་སེར་པོའི་ཤེས་པ་ལས་སྔོན་པོའི་ཤེས་པ་སྐྱེ་བ་དེའི་ཚེ། སེར་པོའི་ཤེས་པ་བག་ཆགས་སུ་མི་
འགྱུར་ཏེ་མི་འདྲ་བའི་ཕྱིར་རོ་ཞེ་ན། འདི་ལ་བརྗོད་པ་ནི་ནུས་པའི་བདག་ཉིད་ཅན་གྱི་རྒྱུ་ཞེས་བྱ་བའོ། །འདིས་ནི་གང་གིས་སྔོན་པོའི་ཤེས་པ་སྐྱེད་པར་བྱེད་པ་སེར་པོའི་ཤེས་པ་ཉིད་ལ་སྔོན་པོའི་རྣམ་པར་ཤེས་པ་སྐྱེད་པར་བྱེད་པའི་ནུས་པ་དེ་འདྲ་བ་གཞན་ཉིད་ཡོད་པ་ཡིན་ནོ་ཞེས་བསྟན་པ་ཡིན་ནོ། །མཇུག་སྡུད་པ་ནི་དེ་ཕྱིར་ལྡོག་པར་ཞེས་བྱ་བའོ། །དངོས་ནི་བག་ཆགས་འདི་ཡོད་པ་མ་ཡིན་ནོ། །དེ་ལས་ཀྱང་ནི་ཞེས་བྱ་བ་བག་ཆགས་ལས་ཀྱང་འབྲས་བུ་གཞན་ཅིའི་ཕྱིར་མི་སྲིད་དེ་སྲིད་པ་ཁོ་ནའོ། །གང་དག་ཅེས་བྱ་བ་ལ་སོགས་པ་ནི། བྲམ་ཟེའི་ལུགས་ལས་སུན་འབྱིན་པ་བརྗོད་པ་ནི། བྲམ་ཟེ་དེའི་ལུགས་ལ་ནི། བདག་ལ་སོགས་པ་འགའ་ཡང་བག་ཆགས་འཛིན་པར་བྱེད་པ་མ་ཡིན་ཏེ། བདག་ནི་རྟག་པས་ན་སྔར་བཞིན་དུ་ཕྱིས་ཀྱང་འཛིན་བྱེད་དུ་མི་འགྱུར་བའི་ཕྱིར་རོ། །བག་ཆགས་སུ་ཡང་དེ་འདོད་མིན། །ཞེས་བྱ་བ་ནི། རྟེན་མེད་པ་ན་བརྟེན་པར་འགྱུར་བའི་བག་ཆགས་ཀྱང་མི་འཐད་དོ་ཞེས་བྱ་བའི་དོན་ཏོ། །ངེད་ཀྱི་ཕྱོགས་ལ་ནི་འཐད་པ་ཉིད་དོ་ཞེས་སྟོན་པ་ནི་མེ་ཏོག་ཅེས་བྱ་བའོ། །དེའི་རང་བཞིན་ཞེས་བྱ་བ་ནི་རྒྱ་སྐྱེགས་ལ་སོགས་པའི་རང་བཞིན་ནི་འབྲས་བུ་མ་དུ་ལུང་ག་ལ་སོགས་པའི་རང་བཞིན་ནི་འབྲས་བུ་ཡིན་པའི་ཕྱིར་རོ། །རྣམ་པར་དབྱེ་བ་ཞེས་བྱ་བ་ནི་སྔོན་པོ་དང་སེར་པོ་ལ་སོགས་པའི་རྣམ་པར་དབྱེ་བ་ཅན་ནོ། །ཕྱི་རོལ་དོན་མེད་ཅེས་བྱ་བ་ཕྱིའི་ཡུལ་དང་བྲལ་བའོ། །མཇུག་སྡུད་པ་ནི་དེའི་ཕྱིར་ཞེས་བྱ་བའོ། །ཚད་མ་ཡིན་ནོ་ཞེས་བྱ་བ་ནི་ཕྱོགས་ཀྱི་གླང་པོའི་ཞལ་སྔ་ནས་གསུངས་པ་ཡིན་ནོ། །གལ་ཏེ་ཞེས་བྱ་བ་ལ་སོགས་པའི་ཕྱོགས་སྔ་མ་འགོག་པ་ནི་མ་ཡིན་ཏེ་ཞེས་བྱ་བའོ། །དོན་ཞེས་བྱ་བ་ནི་ཤེས་པ་ཐམས་ཅད་ནི་ཞེས་བྱ་བ་ལ་སོགས་པའི་དོན་མ་ཤེས་པའི་ཕྱིར་རོ། །འོ་ན་དོན་དེ་གང་ཞིག་ཡིན་ཞེ་ན། ཚད་མས་ཞེས་གསུངས་སོ། །ཚད་མས་ཞེས་བྱ་བ་གཏན་ཚིགས་ཤེས་པ་ཡིན་པའི་ཕྱིར་རོ་ཞེས་བྱ་བ་ལ་སོགས་ཕྱོགས་ཞེས་བྱ་བ་ནི་མ་ཡིན་ཏེ་ཞེས་བྱ་བའོ། །དཔེ་ཞེས་བྱ་བ་རྨི་ལམ་གྱི་ཤེས་པ་དམིགས་པ་མེད་པ་ཉིད་ནི། རང་ཉིད་གྲུབ་པའི་རྒྱུའི་ཕྱིར་རོ། །ཤེས་པ་ཐམས་ཅད་ཅེས་བྱ་བ་ལ་སོགས་པ་རིགས་པ་ལྡན་ནོ། །འདི་ནི་ཞེས་བྱ་བ་ནི་ཤེས་པ་ཐམས་ཅད་ནི་དམིགས་པ་མེད་པ་ཡིན་ཏེ་ཞེས་བྱ་བ་འདིའོ། །ཇི་ལྟར་ཁྱབ་པ་གྲུབ་ཅེས་བྱ་བ་གང་དང་གང་ཤེས་
པ་ཡིན་པ་དེ་ཐམས་ཅད་དམིགས་པ་མེད་པ་ཡིན་ནོ་ཞེས་ཅི་ལྟར་གྲུབ་སྙམ་ན། རིགས་གང་ཞེས་བྱ་བའོ། །འདི་ནི་རྨི་ལམ་གྱི་ཤེས་པ་གོམས་པ་ཙམ་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་མཐོང་བའི་ཕྱིར། ཤེས་པ་ཐམས་ཅད་ཀྱང་དེ་ལྟ་བུ་ཉིད་ཡིན་ནོ་ཞེས་བྱ་བ་ཁྱབ་པ་གྲུབ་པོ་ཞེས་དོགས་སོ། །དེ་ལྟ་མ་ཡིན་ན་ཞེས་བྱ་བ་ནི། གལ་ཏེ་དེའི་རིགས་ཅན་ཉིད་ཡིན་ཡང་དེས་བསྐྱེད་བ་ཉིད་མ་ཡིན་ནོ། །གལ་ཏེ་རྗེས་སུ་འགྲོ་བ་དང་ལྡོག་པ་དག་ལས་རྒྱུ་དང་འབྲས་བུའི་དངོས་པོ་ཉིད་དུ་མི་འགྱུར་བ་མ་ཡིན་ནམ། དེས་རྨི་ལམ་གྱི་ཤེས་པ་གོམས་པའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་མཐོང་ཡང་གོམས་པར་བསྐྱེད་པ་ཉིད་ནི་མ་ཡིན་ནོ། །དེས་ན་རིགས་གང་ཞེས་བྱ་བ་ལ་སོགས་པའི་རིགས་པ་འཇུག་པར་ཇི་ལྟར་འགྱུར་སྙམ་ན། རྒྱུ་དང་ཞེས་གསུངས་སོ། །རྨི་ལམ་གྱི་ཤེས་པ་ནི་རེ་ཞིག་བག་ཆགས་ཀྱིས་བསྐྱེད་པ་ཡིན་ལ། གཞན་ཡང་དེ་དང་འདྲ་བ་ཡིན་ནོ་ཞེས་སྟོན་པ་ནི། གུས་པར་གོམས་པར་བྱས་པ་འདི་དང་ལྡན་པ་སད་པའི་ཚེ། མཐོང་བ་གང་ཡིན་པ་དེས་མཐོང་བ་དེ་ཉིད་ནི་རྨི་ལམ་དུ་ཡང་མཐོང་སྟེ། རྒྱུ་དེས་ན་སད་པའི་ཤེས་པ་གཞན་ཡང་དེ་ལྟ་ཉིད་ཅེས་བྱ་བ་གོམས་པས་བསྐྱེད་པ་ཉིད་དོ། །གཞན་ཚེ་ཞེས་བྱ་བ་ནི། རྨི་ལམ་གྱི་དེ་མ་ཐག་ཏུའོ། །དེའམ་ཞེས་བྱ་བ་ནི་རྨི་ལམ་མཐོང་བའམ་ལན་པའི་སྐྱེས་བུས་སོ། །དེ་ཉིད་ཀྱི་ཚེ་ཞེས་བྱ་བ་ནི་རྨི་ལམ་མཐོང་བའི་དུས་ཉིད་ནའོ། །གཞན་གྱིས་ཞེས་བྱ་བ་ནི་ཡུལ་དང་དུས་དེ་ན་ཉེ་བར་གནས་པའི་སད་པ་རྣམས་ཀྱིས་སོ། །རྒྱུ་དེའི་ཕྱིར་ན་རྨི་ལམ་གྱི་ཤེས་པ་དེ་ནི་དམིགས་པ་མེད་པ་ཡིན་གྱི། ཤེས་པ་ཉིད་ཡིན་པའི་ཕྱིར་ནི་མ་ཡིན་ནོ། །དེས་ན་ཇི་ལྟར་ཁྱབ་པ་འགྲུབ་ཅེས་བསམས་པའོ། །སད་པའི་གནོད་བྱེད་ཀྱི་ཤེས་པ་གང་ཡིན་པ་དེས་ནི། རྨི་ལམ་གྱི་ཤེས་པ་དེའི་དམིགས་པ་བཟློག་པར་བྱས་པས་ནའོ། །འོན་ཏེ་རྨི་ལམ་གྱི་ཤེས་པ་བཞིན་དུ་སད་པའི་ཤེས་པ་ལ་ཡང་གནོད་པར་བྱེད་པ་ཡོད་ལ་དེས་ན། སད་པའི་ཤེས་པ་ཡང་དམིགས་པ་མེད་པ་ཉིད་ཡིན་ནོ་ཞེས་དོགས་པ་བསུ་ནས་ཕ་རོལ་པོའི་ལན་ཉིད་སྨྲ་བ་ནི། རྨི་ལམ་གྱི་ཞེས་བྱ་བའོ། །རྨི་ལམ་གྱི་ཤེས་པ་དེ་ཇི་ལྟར་དཔེ་ཡིན་ཏེ། རིགས་མི་མཐུན་པའི་ཕྱིར་རོ་ཞེ་ན། འདི་ལ་རྣམ་པར་རྟོག་པ་གཉིས་ཏེ། གནོད་པར་བྱེད་པ་སད་པའི་ཤེས་པས་
རྨི་ལམ་གྱི་ཤེས་པའི་ཡུལ་དབྲོག་པར་བྱ་བའམ། ཡུལ་མེད་པར་ཤེས་པར་བྱ་བ་མ་ཡིན། དེ་ལ་རྣམ་པར་རྟོག་པ་དང་པོ་ལ་བརྗོད་པ་ནི་གནོད་བྱེད་ཅེས་བྱ་བའོ། །འོ་ན་ཇི་ལྟར་ཞེས་དྲིས་པ་ལ་བརྗོད་པ་ནི་ཤེས་པར་བྱ་བ་ཉིད་དོ་ཞེས་གསུངས་སོ། །འདི་ལ་ནི་རྨི་ལམ་གྱི་ཤེས་པ་ལའོ། །གཞན་གྱིས་ནི་སད་པའི་ཤེས་པས་སོ། །གལ་ཏེ་འགལ་ཟླ་མེད་པར་སྒྲུབ་པར་བྱེད་པ་འགལ་བ་དམིགས་པ་ཡང་ཡོད་པ་མ་ཡིན་ནམ། དེས་ན་ཇི་ལྟར་མི་དམིགས་པ་ཁོ་ན་མེད་པ་སྒྲུབ་པར་བྱེད་པ་ཡིན་ཞེས་བརྗོད་སྙམ་ན། འགལ་བ་ཡང་ཞེས་གསུངས་སོ། །རྨི་ལམ་ཤེས་པ་ལ་སྣང་བའི་གཞལ་བྱ་ལས་གཞལ་བྱ་གཞན་དམིགས་པ་ཉིད་སད་པ་ཉིད་ཤེས་པ་གནོད་བྱེད་ཡིན་ནོ། །དེ་ནི་ཞེས་བྱ་བ་ནི་སད་པའི་ཤེས་པས་དམིགས་པའི་གཞལ་བྱ་ལས་གཞལ་བྱ་གཞན་དམིགས་པ་ཉིད་ནི་རྨི་ལམ་གྱི་ཤེས་པ་ལ་ཡང་ཡོད་པ་ཡིན་ཏེ། དེས་ན་རྨི་ལམ་གྱི་ཤེས་པ་ཉིད་སད་པའི་ཤེས་པ་གནོད་པར་བྱེད་པ་ཅི་ལྟར་མ་ཡིན་དེ་ནི་སད་པའི་ཤེས་པ་ལ་ཡང་ཐམས་ཅད་ཡོད་པ་ཡིན་ནོ་ཞེས་འདོན་པར་ནི་བུམ་པ་དང་སྣམ་བུའི་ཡུལ་ཅན་སད་པའི་ཤེས་པ་དག་ཁོ་ན་ཕན་ཚུན་ལྟོས་ནས་གཞལ་བྱ་དམིགས་པ་ཡིན་པའི་ཕན་ཚུན་གནོད་བྱེད་དུ་འགྱུར་རོ་ཞེས་བྱ་བ་ཡིན་ནོ། །བུམ་པ་ལ་སོགས་པ་གཅིག་དམིགས་ནས་བུམ་པ་ལ་སོགས་པ་གཞན་དམིགས་པའི་དུས་ན། ངས་དམིགས་པའི་བུམ་པ་ལ་སོགས་པ་ནི་མ་ཡིན་ནོ་ཞེས་དེ་ལྟར་སད་པའི་ཤེས་པ་ལ་མི་འགྱུར་བ་དེས་ན། ཇི་ལྟར་བུམ་པའི་ཤེས་པ་གཞན་གྱི་གནོད་པར་ཇི་ལྟར་འགྱུར། རྨི་ལམ་གྱི་ཤེས་པས་དམིགས་པ་ནི། སད་པའི་ཤེས་པ་དུས་ནས་བདག་གིས་མཐོང་བ་དེ་ནི་བརྫུན་ཡིན་ནོ་ཞེས་ལྷག་པར་ཞེན་ཏེ་དེས་ན་རྨི་ལམ་གྱི་ཤེས་པས་དམིགས་པ་སད་པའི་ཤེས་པས་གནོད་དོ་ཞེས་རིགས་ཀྱི་བཟློག་པ་ནི་མ་ཡིན་ནོ་ཞེས་བྱ་བ་ནི། གཞན་གྱི་བསམ་པའོ། །འདི་ལ་བརྗོད་པ་ནི་འདི་ནི་ཞེས་བྱ་བའོ། །རིག་པའི་འབྲས་བུ་ནི་འདི་ནི་དེ་ལྟར་ཡིན་ནོ་ཞེས་བྱ་བ་ཡིན་ནོ། །རིག་པ་མེད་པའི་འབྲས་བུ་ནི་འདི་ནི་དེ་ལྟར་མ་ཡིན་ནོ་ཞེས་བྱ་བ་ཡིན་ནོ། །དེ་ལས་ཅིར་འགྱུར་སྙམ་ན། དེ་ན་ཞེས་གསུངས་སོ། །གལ་ཏེ་རིག་པ་མ་སྐྱེས་ན་དེའི་འབྲས་བུ་ཉིད་མི་འཐད་དོ། །དེ་ན་འབྲས་
བུ་ཉིད་མཐོང་བ་ལས་རིག་པ་རྗེས་སུ་དཔོག་གོ་ཞེས་སྟོན་པ་ནི་རིག་པ་མེད་པར་ཞེས་བྱ་བའོ། །འདི་ལ་བརྗོད་པ་རང་རིག་པས་སྔོན་པོའི་རྣམ་པར་རིག་པའི་ཕྱིར་རོ། །དེ་ཉིད་ལ་ཞེས་བྱ་བ་རང་གི་རང་བཞིན་ཉིད་ལ་འདི་བལྟའོ། །འདི་ནི་དེ་ལྟ་མ་ཡིན་ནོ་ཞེས་བྱ་བར་རྟོགས་པར་འགྱུར་གྱི་དོན་ལ་ནི་མ་ཡིན་ཏེ། དེས་ན་ཇི་ལྟར་འབྲས་བུ་རང་གི་ངོ་བོ་ལ་གནས་ཏེ་དེ་བཞིན་དུ་མངོན་སུམ་དུ་རིག་པ་ཡང་རང་གི་རིག་པ་ཙམ་ཡིན་གྱི། དོན་རིག་པ་ནི་མ་ཡིན་ནོ། །དེའི་དེ་མ་ཐག་ཏུ་བྱུང་བའོ། །འབྲས་བུ་འདི་ནི་དེ་ལྟ་མ་ཡིན་ནོ་ཞེས་བྱ་བ་ནི་དེ་ལྟ་བུའི་རྣམ་པ་ཅན་རྣམ་པར་རྟོག་པའི་ཤེས་པ་སྐྱེས་པ་ན། དོན་དེའི་གོ་བྱེད་དུ་འགྱུར་གྱི་གཞན་དུ་ཞེས་བྱ་བ་ནི། གལ་ཏེ་དོན་རིག་གོ་མ་ཤེས་ན། དེའི་གོ་བྱེད་པ་མ་ཡིན་ནོ། །དེ་ནི་སད་པའི་ཤེས་པའི་དོན་ཏོ། །གཞན་ནི་སྐྱེས་བུ་གཞན་གྱིས་སོ། །ལན་ནི་རྨི་ལམ་དུ་ཡང་ཞེས་བྱ་བའོ། །དེ་ཡོད་པའི་ཕྱིར་ཞེས་བྱ་བ་ནི་གཉིད་ལོག་པའི་ཤེས་པའོ། །སེམས་འདི་ནི་གཉིད་ཀྱིས་མ་ཉམས་པར་བྱས་པ་ཡིན་ནོ་ཞེས་དེ་ལྟར་རྟོགས་པ་མ་ཡིན་ནོ། །འདི་ལ་བརྗོད་པ་ནི་ཐམས་ཅད་ནི་ཞེས་བྱ་བའོ། །ཁྱེད་ཀྱི་བརྗོད་པ་ནི་རྣམ་པར་དབྱེ་བ་གང་ཡིན་པ་རྨི་ལམ་གྱི་ཤེས་པ་ལ་ནི་སད་པའི་ཤེས་པས་གནོད་པར་བྱེད་པ་ཉིད་ཡིན་ལ་རྨི་ལམ་གྱི་ཤེས་པ་ཤེས་པ་ནི་སད་པའི་ཤེས་པའོ། །གནོད་བྱེད་མ་ཡིན་ནོ་ཞེས་བྱ་བ་དེ་ལྟ་བུའི་རང་བཞིན་འདི་གང་གིས་ཀྱང་མ་ཡིན་ནོ། །འོན་ཏེ་སད་པ་དག་ལ་ནི་ཡིད་ཆེས་པ་མཐོང་སྟེ། དེས་ན་སད་པའི་ཤེས་པ་ཉིད་གནོད་པར་བྱེད་པ་ཡིན་ནོ་ཞེ་ན། རྨི་ལམ་དུ་ཡང་ཞེས་གསུངས་སོ། །དེ་ལྟར་ཞེས་བྱ་བ་ནི་ཡིད་ཆེས་པ་མཐོང་བའོ། །མི་བདེན་པ་ཡིན་ནོ་ཞེས་རྨི་ལམ་དུ་ཡང་ཡིད་ཆེས་པ་མ་མཐོང་ངམ་ཅི་དེས་ན་རྨི་ལམ་ཡང་བདེན་པ་ཉིད་དུ་འགྱུར་རོ། །དེ་ཉིད་ཀྱི་ཕྱིར་ཞེས་བྱ་བ་ནི་རེས་འགའ་ནི་བདེན་པ་ཞེས་བྱ་བར་རེས་འགའ་ནི་ལོག་པ་མ་ཡིན་ནོ་ཞེས་ཡིད་ཆེས་པ་མཐོང་བའི་ཕྱིར་རོ། །འདི་ལ་བརྗོད་པ་ནི་འདི་ཡང་ཞེས་བྱ་བ་སྟེ་སད་པ་ཡང་ངོ༌། །དེར་ཞེས་བྱ་བ་ནི་སད་པའི་གནས་སྐབས་སུའོ། །འདི་ལ་ལན་ནི་འདི་ནི་ཞེས་བྱ་བའོ། །དེར་ཡང་ནི་སད་པའི་གནས་སྐབས་སུ་ཡང་ཡིད་དུ་འོང་བ་ལ་སོགས་པ་མཐོང་བ་མོད་ལ་འཇིག་པར་འགྱུར་རོ། །ཉི་མ་གང་ལ་ཡིད་དུ་འོང་བ་མཐོང་བ་རྒྱུན་མི་འཆད་པར་ཏེ། ཡུན་རིང་པོར་མཐོང་བ་དེ་ལྟ་བུའི་ཉི་མ་ནི་
རྨི་ལམ་ན་ཡང་ཡང་ངོ༌། །ཕྱོགས་དང་དཔེ་མ་གྲུབ་པ་ནི་གང་གི་ཚེ་རྨི་ལམ་དང་རྨི་ལམ་མ་ཡིན་པ་དག་རྣམ་པར་གྲུབ་པ་དེའི་ཚེ་སད་པའི་ཤེས་པ་ནི་ཕྱོགས་ཡིན་ལ་རྨི་ལམ་གྱི་ཤེས་པ་ནི་དཔེ་ཡིན་ནོ་ཞེས་གྲུབ་པ་ཞིག་ན་གང་གི་ཚེ་ཐ་དད་པ་སྒྲུབ་པར་བྱེད་པའི་ཤེས་པ་ཚད་མ་ཡིན་པ་དེའི་ཚེ་ཕྱོགས་དང་དཔེ་དག་ཇི་ལྟར་འགྲུབ་ཕྱོགས་དང་དཔེ་མ་གྲུབ་མོད་གཏན་ཚིགས་ཤེས་པ་ཉིད་ལ་སྐྱོན་ཅི་ཡོད་སྙམ་ན། དམིགས་པ་མེད་པ་ཉིད་ཅེས་སྨྲས་སོ། །དེ་ནི་ཞེས་བྱ་བ་རྨི་ལམ་མ་ཡིན་པའི་ཤེས་པ་འདོད་པར་བསྒྲུབ་པའི་ཤེས་པའོ། །གལ་ཏེ་ཚད་མ་ཡིན་ན། དམིགས་པ་དང་བཅས་པར་འགྱུར་བ་དེས་ན། ཤེས་པ་ཉིད་ཀྱི་གཏན་ཚིགས་མ་ངེས་པར་འགྱུར་རོ་ཞེ་ན། ཚད་མ་ཐམས་ཅད་ཅེས་སྨོས་སོ། །འོ་ན་ཇི་ལྟར་དམིགས་པ་མེད་པ་ཉིད་ཡིན་ན་ཚད་མ་ཡིན་ཞེ་ན་དམིགས་པ་མེད་པས་ཀྱང་ཞེས་བྱ་བའོ། །འདི་ཉིད་གསལ་བར་བྱེད་པ་གལ་ཏེ་ཞེས་བྱ་བའོ། །གལ་ཏེ་རྨི་ལམ་དང་གཞན་པའི་ཤེས་པ་དག་གིས་ཐ་དད་པའི་དམིགས་པ་དང་བཅས་པ་མ་ཡིན་པས་བྱས་པ་ཡིན་ནོ། །དེ་ལྟ་མ་ཡིན་ན་ཐ་དད་པ་ཅི་བྱས་སྙམ་ན། དེ་གཉིས་ཞེས་གསུངས་སོ། །སངས་རྒྱས་པས་ཐ་མི་དད་པར་སྒྲུབ་པར་བྱེད་དོ། །དེའི་ཚེ་གཞན་སངས་རྒྱས་པ་ལ་ཉེས་པ་ཅི་ཡོད། ཆོས་ཅན་ཡིན་ཞེས་བྱ་བ་ནི་བསྒྲུབ་པར་བྱ་བ་ཚད་མ་ཉིད་ཀྱིའོ། །དེ་ཇི་ལྟར་ཞེས་བྱ་བ་ནི་བརྒལ་ཞིང་བརྟག་པའི་རྣམ་པའོ། །དེ་སྐད་བརྒལ་ཞིང་བརྟགས་པ་ན། །བྲམ་ཞེས་ཇི་ལྟར་བརྗོད་པར་བྱ། །གལ་ཏེ་རིག་བྱེད་ཚད་མ་མ་ཡིན་ན། དེའི་ཚེ་རིག་བྱེད་འཇིག་རྟེན་པའི་ཚིག་དང་འདྲ་བའི་ཕྱིར་ཇི་ལྟར་རིག་བྱེད་དེ་ཆོས་ཅན་ཡིན་པར་འགྱུར། འོན་ཏེ་དང་པོ་ཁོ་ནར་ཚད་མ་ཉིད་རབ་ཏུ་བསྒྲུབ་པོ། །ཚད་མས་བསྒྲུབས་པ་ན་ཡང་ཐ་དད་པར་ཆོས་ཅན་འགྲུབ་པོ་ཞེ་ན། འདི་ལ་བརྗོད་པ་ནི་དེ་ལྟ་ན་ཞེས་བྱ་བའོ། །འདི་ཞེས་བྱ་བ་ནི་བརྗོད་ཟིན་པའི་མཚན་ཉིད་དོ། །གལ་ཏེ་ཞེས་བྱ་བ་ནི་ དགོས་པའོ། །འགོག་པ ་ནི་མ་ཡིན་ཏེ་ཞེས་བྱ་བའོ། །གཞན་དག་ཀྱང་ཞེས་བྱ་བ་ནི་འཇིག་རྟེན་པའི་ཚིག་ཀྱང་ངོ༌། །དེ་ན་དེ་འདྲའི་ཐ་དད་པས་ཀྱང་ཅི་ཞིག་བྱ། གང་གིས་འཇིག་རྟེན་པ་ལས་ཐ་དད་པར་གྲུབ་པ་དེ་ཉིད་ཐ་དད་པར་བརྗོད་པར་བྱ་བ་ཡིན་ན། འདི་ནི་བརྗོད་པར་ནུས་པ་ཡང་མ་ཡིན་ནོ་ཞེས་
དགོངས་པའོ། །ཤེས་པ་ནི་རེ་ཞིག་ཅེས་བྱ་བ་ནི་སད་པའི་གནས་སྐབས་སུ་མངོན་པར་འདོད་པའི་རྨི་ལམ་དུ་རབ་ཏུ་གྲུབ་པ་ནི། སད་པའི་གནས་སྐབས་ན་ཡོད་པའི་ཤེས་པ་འདི་ལས་ཅི་ཐ་དད་པ་ཡིན་ནམ་འོན་ཏེ་ཐ་མི་དད་པ་ཡིན་ཞེས་རྟོགས་པ་ན། དམ་པར་ཏེ་མཆོག་ཏུ་ཇི་ལྟར་འགྱུར་བ་དེ་ལྟར་བ་ལྟའོ་ཞེས་བྱ་བ་ཡང་མཚུངས་སོ་ཞེས་སྔ་མ་དང་འབྲེལ་ཏོ། །གཞན་དག་ཅེས་བྱ་བ་ནི་སད་པའི་ཤེས་པའོ། །ཐ་དད་པ་ལ་ཞེས་བྱ་བ་ནི་རྨི་ལམ་དང་རྨི་ལམ་མ་ཡིན་པ་དག་དམིགས་པ་མེད་པ་དང༌། དམིགས་པ་དང་བཅས་པ་དག་གི་ཁྱད་པར་ཡོད་པའོ། །ཐ་དད་འཛིན་པ་ཞེས་བྱ་བ་ནི་རྨི་ལམ་མ་ཡིན་པ་རྨི་ལམ་ལས་ཐ་དད་པར་ཆོས་ཅན་ཉིད་དུ་འཛིན་པའོ། །ད་ལྟ་ཞེས་བྱ་བ་ནི་བསྒྲུབ་པར་བྱ་བ་དམིགས་པ་མེད་པར་གྲུབ་པའི་དུས་ནའོ། །དེ་ལྟ་ཡིན་དང་ཞེས་བྱ་བ་ནི་ཁྱེད་ཀྱི་ཡང་རིག་བྱེད་ཚད་མ་དང་ཚད་མ་མ་ཡིན་པ་ཐུན་མོང་ཆོས་ཅན་ཉིད་དུ་རྟོགས་པར་སྔར་གྱུར་པ་གང་ཡིན་པ་དེ་ཚད་མར་གྲུབ་པའི་དུས་ཀྱི་ཚེ་ན། ཚད་མ་མ་ཡིན་པར་འགྱུར་རོ། །དེ་བཞིན་དུ་ཆོས་ཅན་རྟོགས་པ་ཚད་མ་མ་ཡིན་པའི་ཕྱིར། དེའི་སྒོ་ཅན་ཚད་མའི་སྒྲུབ་བྱེད་ཉིད་ཀྱང་མ་ཡིན་པར་འགྱུར་རོ། །རིག་བྱེད་ཚད་མར་མི་འགྲུབ་པར་ནི་མ་ཟད་དེ། བྲམ་ཟེའི་གཞུང་དང་སྦྱར་ན། རི་ལ་སོགས་པ་ལ་མེ་ལ་སོགས་པ་ལ་ཡང་སྒྲུབ་པར་མི་ནུས་པར་འགྱུར་རོ་ཞེས་སྟོན་པ་ནི། དེས་ན་ཞེས་བྱ་བའོ། །དེར་ཡང་དང་པོར་ནི་མེ་མེད་པ་ནི་ཐུན་མོང་བའི་ཆོས་ཅན་རྟོགས་པས་སོ། །མེ་གྲུབ་པའི་དུས་ནི་སྔར་ཡོད་པའི་ཐུན་མོང་དུ་རྟོགས་པ་ཚད་མ་མ་ཡིན་པ་ཉིད་དོ། །དེ་སྒོ་ནས་མེ་རྟོགས་པ་ཡང་ཚད་མ་མ་ཡིན་པའི་ཕྱིར་བསྒྲུབ་བྱ་དང་སྒྲུབ་བྱེད་ཀྱི་དངོས་པོ་ཆད་པར་འགྱུར་རོ། །དེའི་འཛིན་པ་ཞེས་བྱ་བ་ནི་རིག་བྱེད་ཚད་མ་དང་ཚད་མ་མ་ཡིན་པར་ཐུན་མོང་དུ་འཛིན་པའོ། །དུས་ཕྱིས་ཚད་མར་གྲུབ་ཀྱང་ཚད་མ་མ་ཡིན་པར་མི་འགྱུར་ཏེ། ཐུན་མོང་བ་དེ་ཉིད་ལ་ལྷག་པར་བསྒྲུབ་པའི་ཕྱིར་རོ། །འོ་ན་གང་གི་ཚེ་ཚད་མ་ཡིན་པར་འགྱུར་ཞེ་ན། གལ་ཏེ་ཞེས་བྱ་བའོ། །འདི་ལ་བརྗོད་པ་ནི་དེ་ཡང་ཞེས་བྱ་བའོ། །གང་གི་ཚེ་ཆོས་ཅན་རིག་བྱེད་དེ་ཉིད་ཀྱི་རང་བཞིན་དང་ཚད་མར་ཡང་གྲུབ་པར་བྱེད་པ་དེའི་ཚེ་རིག་བྱེད་དེ་ལ་ཚད་མ་གང་ཡིན་པ་དེ་དང་བྲལ་བར་ཆད་མར་སྒྲུབ་པའི་ཤེས་པས་འཛིན་ཀྱང་
ཇི་ལྟར་ན་སྔར་གྱི་ཐུན་མོང་བར་རྟོགས་པ་ཚད་མ་གྱུར། རིག་བྱེད་ཚད་མ་ཡིན་པ་དེ་ལས་ཞེས་བྱ་བ་ཐུན་མོང་བ་ལས་བཟློག་པ་ཐུན་མོང་མ་ཡིན་པ་དེར་འཛིན་པ་ན། དེ་ལས་བཟློག་པ་ཞེས་བྱ་བ་བཟུང་བ་བཞིན་དུ་ཐུན་མོང་མ་ཡིན་པ་ལས་བཟློག་པའི་གཞལ་བྱ་གང་ཡིན་པ་ཐུན་མོང་བ་ཞེས་བྱ་བ་དེ་བསལ་ན། ཇི་ལྟར་སྔར་གྱི་ཐུན་མོང་བར་འཛིན་པ་ཚད་མ་མ་ཡིན་པར་མི་འགྱུར། རང་གི་ངོ་བོས་ནི་ལྷག་པར་འགྱུར་བ་ཡང་མ་ཡིན་ནོ། །གལ་ཏེ་ཚད་མ་ལྷག་མ་གྲུབ་ན། ཤིན་ཏུ་ཡང་ཐུན་མོང་བར་འཛིན་པར་ཚད་མ་མ་ཡིན་པར་བྱེད་པར་འགྱུར་རོ་ཞེས་སྟོན་པ་ནི། རང་གི་ངོ་བོས་ནི་ཞེས་བྱ་བའོ། །ཕ་རོལ་པོ་རང་གི་ངོ་བོ་ལ་ཡང་ལྷག་པ་ཉིད་དུ་གཞུང་འཛུགས་པ་ནི་མ་བཟུང་བ་ན་ཞེས་བྱ་བའོ། །རིག་བྱེད་ཀྱི་ཚད་མར་དེའི་རང་གི་ངོ་བོ་ཁོ་ན་ཡིན་མོད་ཀྱི། འོན་ཀྱང་ཐུན་མོང་བར་ཆོས་ཅན་རྟོགས་པས་མ་བཟུང་བ་དེས་ན། ལྷག་པར་བརྗོད་པ་ཡིན་ནོ་ཞེས་བྱ་བའི་དོན་ཏོ། །འདི་ལ་བརྗོད་པ་ནི་མ་བཟུང་ཞེས་བྱ་བའོ། །རིག་བྱེད་ཀྱི་རང་བཞིན་གྱི་ཚད་མས་ཆོས་ཅན་རྟོགས་པས་མ་བཟུང་ན་དེའི་ཚད་མར་ཇི་ལྟར་འགྱུར། གལ་ཏེ་རང་བཞིན་ཐམས་ཅད་གཟུང་བས་ནི་ཚད་མ་མ་ཡིན་ཏེ། འོན་ཀྱང་ཐུན་མོང་བར་རྟོགས་པས་རང་བཞིན་འགའ་ཞིག་གཟུང་བ་ཡིན་ནོ། །དེའི་ཚད་མ་ནི་དེ་ཙམ་གྱིས་ཡིན་ཞེ་ན། འདི་འགོག་པ་ནི་མ་ཡིན་ཏེ་ཞེས་བྱ་བའོ། །རང་གི་ཚེ་དེས་རང་བཞིན་འཛིན་པ་དེའི་ཚེ་རང་བཞིན་མཐའ་དག་གཟུང་བར་འགྱུར་རོ་ཞེས་བྱ་བའི་དོན་ཏོ། །དེ་ལྟ་མ་ཡིན་ནོ་ཞེས་བྱ་བ་ནི་ཆོས་གཅིག་འཛིན་པ་ན་ཆོས་མཐའ་དག་འཛིན་པར་ཐལ་བ་མ་ཡིན་ཏེ། ཆོས་རྣམས་ཕན་ཚུན་དང་ཆོས་ཅན་ལས་ཀྱང་ཐ་དད་པའི་ཕྱིར་རོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །ཐུག་པ་མེད་པ་ཉིད་བརྗོད་པ་ནི། གང་ཚེ་ཞེས་བྱ་བའོ། །གང་ཚེ་ཚད་མ་ཉིད་ལ་སོགས་པའི་ཆོས་རིག་བྱེད་ལས་ཐ་དད་ན་དེའི་ཚེ་རིག་བྱེད་དང་ཆོས་ཅན་དེའི་སྦྱོར་བ་སྟེ། འབྲེལ་པ་གཞན་དུ་འགྱུར་རོ། །དེ་བཞིན་དུ་སྦྱོར་བ་ཡང་གཞན་དུ་འགྱུར་ལ། སྦྱོར་བ་གཉིས་པ་དང་སྦྱོར་བ་ཡང་གཞན་ཡིན་པའི་ཕྱིར་ན། ཆོས་ཀྱི་བསླད་པ་མཐའ་མེད་པར་འགྱུར། དེ་གཉིས་ཉིད་ཀྱི་ཞེས་བྱ་བ་ནི་ཚད་མ་དང་རིག་བྱེད་གཉིས་ཀྱིའོ། །དེའི་ཚེ་ཇི་ལྟར་ལྡན་པ་ཐ་དད་པར་མ་ཡིན་པ་དེ་བཞིན་དུ་ཚད་མ་ཉིད་
ཀྱང་ཐ་མི་དད་པར་འགྱུར་ཏེ། ཁྱད་པར་མེད་པའི་ཕྱིར་རོ། །དེ་ལྟར་བྱས་པས་ཇི་ལྟར་ཁྱོད་ཚད་མ་ཐ་མི་དད་པར་འདོད་པ་མི་འགལ་བ་དེ་བཞིན་དུ་ངེད་ཀྱི་ཆོས་ཐ་མི་དད་པ་ཡང་འདོད་པར་བྱ་བའོ། །གལ་ཏེ་ཐ་མི་དད་པའི་ཕྱོགས་ལ་ཡང་སྔར་གྱི་ཐུན་མོང་དུ་འཛིན་པའི་ཤེས་པ་ཚད་མར་མི་འགྱུར་ཏེ། དེས་ན་རྗེས་སུ་དཔག་པ་མཐའ་ཡས་དག་འཆད་པ་ནི་སོ་ན་འདུག་གོ་ཞེ་ན། སྒྲོ་འདོགས་ཀྱིས་ནི་ཞེས་གསུངས་སོ། །དཔྱད་པས་ཞེས་བྱ་བ་ནི་རྣམ་པ་གཅིག་ཏུ་འཛིན་པའི་དབང་གིས་ཐ་དད་པ་མེད་པ་སྟེ། ཐུན་མོང་བ་ཉིད་དུ་རྟོགས་པའི་ཕྱིར་ཏེ། ཇི་ལྟར་ཚད་མ་ཡིན། ཅི་ལྟར་འཛིན་པ་ཡིན་ཞེ་ན། མེ་ལ་སོགས་པའི་ཁྱད་པར་གྱིས་ཁྱད་པར་ཅན་དུ་གྱུར་པའི་རི་ལ་སོགས་པ་གཞན་ལས་ཐ་དད་པར་གཟུང་བ་ཡང་ཐ་མི་དད་པར་ལྷག་པར་ཞེན་པའི་སྒྲོ་འདོགས་ཀྱི་ངོ་བོ་ལས་སོ། །འདིས་ནི་གལ་ཏེ་མངོན་སུམ་ལ་ཐུན་མོང་མ་ཡིན་པའི་དངོས་པོ་སྣང་བ་དེ་ལྟ་ན་ཡང་ཆ་གང་ལ་དེ་འཇུག་པར་བྱེད་པ་ཡིན་པའི་ཆ་དེ་ཉིད་ལ་ཚད་མ་ཡིན་ཏེ། དེས་ན་དངོས་པོ་གཅིག་ཀྱང་གལ་ཏེ་ཁྱད་པར་གཞན་ལ་མངོན་སུམ་གྱིས་འཇུག་པར་ནུས་པ་ཉིད་དུ་མ་བྱས་པ་དེ་ཡང་ཆ་འགའ་ཞིག་ལ་མངོན་སུམ་གྱིས་འཇུག་ཏུ་རུང་བར་བྱས་པའི་ཕྱིར་ཚད་མ་ཁོ་ན་ཡིན་ནོ་ཞེས་བསྟན་པ་ཡིན་ནོ། །ང་ལ་ཡང་འདི་ལྟར་ཞེས་བྱ་བ་ནི་རྨི་ལམ་མ་ཡིན་པ་དག་ཐ་དད་པར་མངོན་པར་རློམ་པར་རོ། །བྲམ་ཟེ་ལ་སོགས་པ་གཞན་དག་ཀྱང་ཤེས་པ་ཐམས་ཅད་ནི་དམིགས་པ་དང་བཅས་པ་ཡིན་ཏེ། ཤེས་པ་ཉིད་ཡིན་པའི་ཕྱིར་རྨི་ལམ་ལ་སོགས་པ་ལ་གནོད་པར་བྱེད་པ་སད་པའི་ཤེས་པ་བཞིན་ནོ་ཞེས་ཅི་སྟེ་སྒྲུབ་པར་བྱེད་དེ། སྒྲུབ་པར་བྱེད་པ་ཁོ་ནའོ་ཞེ་ན། རྨི་ལམ་ཤེས་པ་ལས་ཤེས་པ་གཞན་ཤེས་པར་འབྲེལ་ཏོ། །ཕ་རོལ་ཞེས་བྱ་བ་ནི་མཆོག་ཏུ་གྱུར་པ་སྟེ། བདེན་པ་ཉིད་དུ་མངོན་པར་འདོད་པ་སད་པའི་ཤེས་པ་ནི་དམིགས་པ་མེད་པའི་ཕྱིར། འདི་ལྟར་ལམ་གྱི་སྒྲུབ་བྱེད་ཡིན་ཏེ། འདི་འགལ་བ་སྤྱི་མི་འཁྲུལ་བ་ཅི་ལྟར་ཡིན་ཞེས་དྲིས་ནས་དེ་ལྟར་ན་ཡང་དམིགས་པ་མེད་པ་ཉིད་དུ་གྲུབ་པོ་ཞེས་སྦྱོར་བར་བྱའོ། །གནོད་པར་བྱེད་པའི་ཆད་མས་ངེས་པ་ཡང་ཡིན་ལ་དམིགས་པ་མེད་པ་ཉིད་དང༌། ལྷན་ཅིག་འབྲེལ་པ་གང་ཡིན་པ་སྟེ། དེའི་ཕྱིར་རོ་དེ་ཉིད་ཅེས་བྱ་བ་ནི་ངེད་འདོད་པའོ། །དམིགས་པ་མེད་པ་ཉིད་ནི་དེ་ཉིད་ལ་
བརྗོད་དེ། གང་ཞིག་གཅིག་ལ་ཡང་མ་ངེས་པའོ། །ཁྱེད་ཀྱིས་འགལ་བ་མི་འཁྲུལ་པ་ཅན་ཉེ་བར་བཀོད་པ་དེ་ཉིད་བསྒྲུབས་ཏེ། དེས་ན་བདག་ཅག་གི་འདོད་པ་ཉིད་བསྒྲུབས་པ་ཡིན་ནོ། །འདི་ལ་ཡང་འགྲེལ་པ་ཁས་བླངས་ནས་བརྗོད་པར་ཟད་ཀྱི། དམིགས་པ་དང་བཅས་པ་དང་ཤེས་པ་ཉིད་འགྲེལ་པ་ཡང་མེད་དོ་ཞེས་སྟོན་པ་ནི། དམིགས་པ་དང་བཅས་པ་ཉིད་ཅེས་བྱ་བ་ལའོ། །དམིགས་པ་མེད་པ་ལ་ཡང་ཇི་ལྟར་འབྲེལ་པ་ཡོད་སྙམ་ན། གཉིས་ཀ་ཡང་ཞེས་བྱ་བ་སྟེ་སད་པ་དང་རྨི་ལམ་གྱི་ཤེས་པ་གཉིས་ཀ་ཡང་ངོ༌། །གཞན་པ་ཞེས་བྱ་བ་ནི་ཕྱི་རོལ་གྱི་དོན་ཏོ། །དེ་བཞིན་དུ་སད་པའི་ཤེས་པ་ལ་ཡང་རང་གི་ངོ་བོ་རིག་པ་ཙམ་ཞིག་ཏུ་མཐོང་ངོ༌། །གལ་ཏེ་རྨི་ལམ་གྱི་སྣང་བ་ནི། གཞན་གྱིས་མ་དམིགས་པའི་ཕྱིར་རོ། །རང་གི་རང་བཞིན་ཙམ་རིག་པར་འཐད་ཀྱི་སད་པའི་ཤེས་པ་ལ་ཇི་ལྟར་ཏེ་གཞན་གྱིས་ཀྱང་དམིགས་པའི་ཕྱིར་རོ་སྙམ་ནས་སད་པར་སྣང་བའི་རིག་པ་ཡང་ཞེས་བྱ་བའོ། །དེ་ལ་ཡང་ཞེས་བྱ་བ་ནི་རྨི་ལམ་ལ་ཡང་ངོ༌། །དམིགས་པ་ཡོད་པ་ཉིད་དོ་ཞེས་བྱ་བ་ནི་ཡུལ་དང་དུས་རྣམས་གཞན་དུ་གྱུར་པའི་བདག་ཉིད་ཅན་ཡོད་པའོ། །འདི་ལ་ལན་ནི་ཅིའི་ཕྱིར་ཞེས་བྱ་བའོ། །གལ་ཏེ་ཞེས་བྱ་བ་ནི་གཞན་གྱིའོ། །གལ་ཏེ་དོན་བྱེད་པ་མེད་ན་དེ་ཡོད་པ་ཇི་ལྟར་ཡིན་ཞེས་དོགས་པ་བསུ་ནས། ཕ་རོལ་པོ་ཉིད་བརྗོད་པ་ནི་གཅིག་མེད་པས་ཞེས་སྨྲས་སོ། །དོན་བྱེད་པ་མེད་པས་རྟོགས་བཞིན་པ་མེད་པར་མི་འགྱུར་རོ་ཞེས་བྱ་བའོ། །ཕ་རོལ་པོ་ཉིད་སངས་རྒྱས་པའི་དོགས་པ་བསུ་བ་ནི། ཐམས་ཅད་ཀྱི་ཚེ་དུ་བ་མེད་པར་མེ་མ་ཡིན་པ་ཉིད་དོ་སྙམ་ན་འདི་ལ་ཕ་རོལ་པོ་ལན་འདེབས་པ་ནི་དེ་ལྟ་ན་འོ་ན་ཞེས་བྱ་བའོ། །ཇི་ལྟར་རྒྱ་སྐྱེགས་ཀྱི་ཤིང་གི་ཚོགས་དུ་མའི་མཚན་ཉིད་དོན་བྱ་བ་བྱེད་པ་མ་ཡིན་ཡང་རང་གི་ངོ་བོས་ཡོད་པ་དེ་བཞིན་དུ་རྨི་ལམ་གྱིས་མཐོང་བ་དེ་འདྲ་བའི་དོན་བྱ་བ་མི་བྱེད་ཀྱང་རང་གི་ངོ་བོས་ནི་ཡོད་པ་ཉིད་དོ་ཞེ་ན། འདི་ལ་གྲུབ་པའི་མཐའ་པས་གསུངས་པ་ནི། ཀེང་ཤུ་ཀའི་ཕུང་པོས་གཞན་གྱི་དོན་བྱ་བ་མི་བྱེད་ཀྱང་རང་གི་དོན་བྱ་བ་ནི་བྱེད་པ་ཉིད་དོ། །རྨི་ལམ་དུ་མཐོང་བ་ནི་དེ་ལྟ་མ་ཡིན་ཏེ་དེས་ན་དེ་བདེན་པར་ཇི་ལྟར་འགྱུར་ཞེས་བྱ་བའི་དོན་ཏོ། །རྨི་ལམ་དུ་དམིགས་པ་ཡང་རང་གི་དོན་བྱ་བ་བྱེད་དོ་ཞེ་ན་རྨི་ལམ་དུ་ཟོས་པས་ནི་
ཞེས་གསུངས་སོ། །གལ་ཏེ་གཟུགས་ཉིད་ཟོས་ཀྱི་རེག་བྱ་ནི་མ་ཡིན་ནོ། །འགྲངས་པར་བྱེད་པ་ཡང་རེག་བྱ་ཡིན་ཏེ་དེས་ན་རེག་བྱ་མེད་པའི་ཕྱིར་རྨི་ལམ་དུ་ཟོས་པས་འགྲངས་པ་མ་ཡིན་ན་འདི་ལས་བརྗོད་པ་ནི་མ་ཡིན་ཏེ་ཞེས་བྱ་བའོ། །གཞན་གྱིས་དྲིས་པ་ལ་བརྗོད་པ་ནི། བག་ཆགས་ཞེས་བྱ་བ་སྟེ། གཉིས་པོ་འདི་ནི་དོན་ཡིན་པར་འགལ་ལོ། །དོན་ནི་བག་ཆགས་ཀྱི་སྟོབས་ལས་བྱུང་བ་མི་འཐད་དོ། །ཐུན་མོང་མ་ཡིན་པའི་ཕྱིར་ཡང་རང་ཉིད་ཀྱི་རྟོགས་པར་མི་འཐད་དོ། །སངས་རྒྱས་པ་ཁྱེད་ཀྱི་ཡང་ཇི་སྲིད་རྨི་ལམ་དུ་དམིགས་པ་དེ་ཐམས་ཅད་རྣམ་པར་ཤེས་པ་ཡིན་ནོ་ཞེས་བྱ་བ་འདི་ཇི་ལྟར་མིང་ཙམ་བྱས་པ་མ་ཡིན་ཞེ་ན། ལན་ནི་མ་ཡིན་ཏེ་ཞེས་བྱ་བའོ། །འཐད་པར་དགའ་བ་ཉིད་བརྗོད་པ་ནི་དེའི་རང་བཞིན་ཞེས་བྱ་བ་སྟེ་བློའིའོ། །རྒྱུ་དེས་ན་དོན་མ་ཞུགས་ན་སྟེ། རང་གི་རང་བཞིན་མ་ཡིན་ན་རིག་པ་མ་ཡིན་ནོ། །ཉེས་པ་འདི་ཐམས་ཅད་ནི་བློའི་རང་བཞིན་རིག་པ་ལས་དོན་ཡོད་པར་རྟོགས་པ་ལས་བལྟ་བར་བྱ་བ་ཡིན་ནོ། །བློ་ལ་གསལ་བ་མེད་པའི་ཕྱོགས་ལ་ནི་རྣམ་པ་དུ་མར་སུན་ཕྱུང་ཟིན་པའི་ཆ་ཡལ་བར་དོར་པ་ཡིན་ནོ་ཞེས་བྱ་བ་ནི། རབ་རིབ་ཅན་གཉིས་ཀྱིས་རང་གི་རྣམ་པ་ཙམ་རིག་པ་ཡིན་ཡང་ངས་མཐོང་བའི་ཟླ་བ་གཉིས་པོ་གང་ཡིན་པ་དེ་ཉིད་འདིས་ཀྱང་རིག་གོ་ཞེས་འཁྲུལ་པ་ནི་ཇི་ལྟ་བ་བཞིན་དུ་ཀ་བ་ལ་སོགས་པ་ཡང་ཡིན་ནོ་ཞེས་དགོངས་པའོ། །དགོས་པ་ནི་དེ་གཉིས་ཡང་ཞེས་བྱ་བ་སྟེ། རབ་རིབ་ཅན་གྱིས་ཟླ་བ་གཉིས་མཐོང་བར་ཡང་ངོ༌། །གཞན་ཡང་ཡིན་ནོ་ཞེས་བྱ་བ་ནི་འཁྲུལ་པའི་ཤེས་པའི་ཡུལ་ལོ། །ལན་ནི་དེ་ནི་མི་རིགས་ཏེ་ཞེས་བྱ་བའོ། །གཞན་གྱི་རིག་པ་ལ་ལྟོས་ཏེ་ཐུན་མོང་བའི་དོན་ཉིད་ནི་མངོན་སུམ་གྱིས་རྟོགས་པ་མ་ཡིན་ཏེ་གཞན་གྱི་རིག་པ་ལ་དེ་མི་འཇུག་པའི་ཕྱིར་རོ། །འདི་ནི་གཞན་གྱི་རིག་པའི་ཡུལ་ཡིན་ནོ་ཞེས་ཁྱད་པར་ཅན་དུ་རྟོགས་པ་མི་འཐད་པའི་ཕྱིར་རོ། །འོན་ཏེ་མངོན་སུམ་གྱིས་གཞན་གྱི་རིག་པ་ཡང་རྟོགས་སོ་སྙམ་ན། དེ་ལྟར་མ་ཡིན་ན་ཞེས་གསུངས་སོ། །དེ་ཉིད་ནི་ཞེས་བྱ་བ་ནི་འདྲ་བ་ཉིད་དོ། །གཞན་གྱིས་དེ་འདྲ་བ་ཉིད་རྟོགས་སོ་ཞེས་ཇི་ལྟར་ཤེས་ཞེས་དོགས་པ་བསུ་བ་ཕ་རོལ་ཉིད་འཇིག་རྟེན་གྱིས་རྟོགས། སྒྲུབ་བྱེད་ཉིད་དུ་འགོད་པ་ནི་ཇི་ལྟར་ཞེས་བྱ་བའོ། །འགོག་པ་ནི་མ་ཡིན་པ་ཞེས་བྱ་བའོ། །དོགས་པ་བསུ་བ་ནི་དེར་ཡང་
ཞེས་བྱ་བ་སྟེ་རྨི་ལམ་དུ་ཡང་ངོ༌། །ཡོད་པ་ཉིད་དོ་ཞེས་བྱ་བ་ནི་རྟོགས་པའོ། །རྨི་ལམ་དུ་ཡང་དེ་ལྟར་རྟོག་པ་ཡོད་དོ་ཞེས་ཇི་ལྟར་ཤེས་ཤེ་ན། རང་བཞིན་ཉིད་དོ་ཞེས་བྱ་བ་སྟེ། སད་པར་མཐོང་བའི་རང་བཞི་ནེ་ཉིད་དོ། །དེས་ན་ཇི་ལྟར་འདིར་དེ་འདྲ་བའི་རྟོགས་པར་འགྱུར་བ་དེ་བཞིན་དུ་དེར་ཡང་འགྱུར་བ་གང་གིས་ཟློག་པར་བྱེད། དེ་དང་མཚུངས་པའི་ཕྱིར་ཞེས་བྱ་བ་འདི་སད་པའི་ཡུལ་དང་ཐུན་མོང་མ་ཡིན་པའི་ཕྱིར་རོ། །དེ་ཡང་ཞེས་བྱ་བ་ནི་རྨི་ལམ་དུ་དམིགས་པའོ། །འགོག་པ་ནི་མ་ཡིན་ནོ་ཞེས་བྱ་བའོ། །དེ་འདྲ་བ་ཞེས་བྱ་བ་ནི་སྐྱེས་བུ་གཞན་གྱི་རྣམ་པར་རོ། །དེ་ན་ནི་རྨི་ལམ་ནའོ། །ཇི་ལྟར་ལམ་གྱི་གནས་སྐབས་ན་གཞན་མེད་ཀྱང་སྐྱེས་བུ་གཞན་གྱི་རྣམ་པར་སྣང་བ་དེ་བཞིན་དུ་སད་པའི་གནས་སྐབས་སུ་ཡང་ཡིན་ཏེ། དེས་ན་རྨི་ལམ་དང་རྨི་ལམ་མ་ཡིན་པར་གཉི་གར་ཡང་རང་གི་ངོ་བོ་ཙམ་ཞིག་སྣང་བ་ཡིན་གྱི། དོན་དམ་པར་ནི་མཚུངས་པ་ཞེས་བྱ་བར་ཡོད་པ་མ་ཡིན་ནོ། །འཆོལ་བ་ཞེས་བྱ་བ་ནི་རྣམ་པར་དམིགས་པ་སྟེ། རྟ་ལ་སོགས་པ་ཡང་མིའི་རང་བཞིན་དུ་ཡང་ཡོངས་སུ་འགྱུར་བའོ། །དེས་ན་རྨི་ལམ་དུ་མཐོང་བ་དང་སད་པར་མཐོང་བ་རྣམས་ཇི་ལྟར་མཚུངས་ཤེ་ན། ལན་ནི་དེ་ནི་མ་ཡིན་ཏེ་ཞེས་བྱ་བའོ། །གཞན་ཡང་ཡིན་ཏེ་སྔོན་པོ་ལ་སོགས་པར་སྣང་བ་ཉིད་འཆོལ་བ་ཡིན་ནོ་ཞེས་བྱ་བའི་དོན་ཏོ། །འཆོལ་བ་གཞན་དུ་ཡིན་དུ་ཟིན་པ་དེ་ལྟར་ན་ཡང་དེ་གོམས་པའི་སྟོབས་ལས་བྱུང་བ་ཡིན་ཏེ། རྒྱུ་དེས་ན་རྨི་ལམ་དང་རྨི་ལམ་མ་ཡིན་པ་དག་འདི་ཇི་ལྟར་ཐ་དད་པར་གནས་པར་འགྱུར། འདི་ལ་བརྗོད་པ་ནི་འབད་པ་མེད་པར་ཞེས་བྱ་བའོ། །འཆོལ་བ་ཉིད་ཀྱང་ངེས་པར་གཟུང་མི་ནུས་སོ་ཞེས་སྟོན་པ་ནི། འདི་ནི་འཆོལ་ལོ་ཞེས་བྱ་བའོ། །དེ་ནི་ཞེས་བྱ་བ་ནི་སད་པར་གནས་སྐབས་སུ་འཆོལ་བར་མཐོང་བའོ། །དེ་ལ་ཡང་ཞེས་བྱ་བ་ནི་འཆི་ལྟས་མ་ཡིན་པ་གཉིས་པའོ། །དེ་ལ་ཡང་ཞེས་བྱ་བ་ནི་རང་གཞན་ལ་ཡང་ངོ༌། །འདི་ནི་ཞེས་བྱ་བ་རྣམ་པར་རྟོག་པ་སྟེ་རང་གི་རང་བཞིན་ལ་མངོན་སུམ་ཡིན་པའི་ཕྱིར་རོ། །དེས་ན་དེ་ཡང་རང་གི་ངོ་བོ་ཙམ་གྱིས་མཐར་ཐུག་པར་འགྱུར་བའི་ཕྱིར་དེས་ཀྱང་ཐ་དད་པ་རྣམ་པར་གནས་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ལན་ཞེས་བྱ་བ་ནི་གང་གི་ཤེས་པ་ཐམས་ཅད་ནི་བག་ཆགས་ཀྱིས་བསྐྱེད་པ་ཡིན་ནོ་ཞེས་
བརྗོད་པ་བག་ཆགས་དང་ཡང་ཤེས་པ་འབྲེལ་པ་ཅི་ལྟར་འཛིན་ཞེས་བསམས་པའོ། །འདི་ལ་བརྗོད་པ་ནི་དོན་དམ་པར་ཞེས་བྱ་བའོ། །འོ་ན་ཇི་ལྟར་བག་ཆགས་མེད་པར་རྣམ་པར་ཤེས་པ་ཙམ་དུ་འགྲུབ་སྙམ་ན། བག་ཆགས་ཀྱིས་ཞེས་བྱ་བའོ། །ད་ནི་རེ་ཞིག་ཡོད་པ་ཡིན་ལ་དེས་བསྐྱེད་པའི་ཕྱིར་སད་པའི་སྣང་བའི་རྣམ་པར་ཤེས་པའི་རང་བཞིན་ཡིན་ནོ་ཞེས་བྱ་བའི་ཕྱོགས་འདི་ལ་གཞན་གྱིས་བརྗོད་པ་ནི་གལ་ཏེ་ཞེས་བྱ་བའོ། །འདི་ལ་ལན་ནི་རྨི་ལམ་གྱི་ཞེས་བྱ་བའོ། །ཕ་རོལ་པོ་ལན་འདེབས་པ་ནི་ལངས་པ་ལ་ནི་ཞེས་བྱ་བའོ། །ལངས་པའི་སྐྱེས་པ་ལ་བག་ཆགས་ལས་བྱུང་བ་ཉིད་དུ་རྟོགས་པར་འགྱུར་གྱི་སད་པའི་གནས་སྐབས་ན་ནི། བག་ཆགས་ལས་བྱུང་བར་རྟོགས་པ་མ་ཡིན་ནོ་ཞེ་ན། འདི་འགོག་པ་ནི་འདི་སྤང་བས་ནི་ཞེས་བྱ་བའོ། །དེ་ཉིད་བརྗོད་པ་ནི་འདི་ལྟར་ཞེས་བྱ་བའོ། །རྨི་ལམ་དུ་ཡང་རྨི་ལམ་གཞན་མཐོང་ལ་དེར་ཡང་སད་པར་མཐོང་བའི་ཕྱིར་ཁྱད་པར་ཅི་ཡོད། སད་པ་གཞན་གྱིས་ཞེས་བྱ་བ་ནི། སད་པར་མངོན་པར་འདོད་པའི་ཤེས་པས་སོ། །རྨི་ལམ་གྱི་སད་པའི་གནས་སྐབས་གང་ཡིན་པ་དེ་ཡང་ངོ༌། །འདི་ནི་ཞེས་བྱ་བ་ནི་སད་པའི་གནས་སྐབས་སོ། །འདི་ལ་བརྗོད་པ་ནི་གལ་ཏེ་ཞེས་བྱ་བའོ། །དེའི་མཚན་ཉིད་ཡིན་པ་ཉིད་ཀྱིས་ཞེས་བྱ་བ་ནི་དུ་བ་ནི་མཚུངས་པས་སོ། །འདིས་ནི་བདག་ཉིད་ཐམས་ཅད་ཀྱིས་མཚུངས་པ་མ་ཡིན་ཡང༌། གལ་ཏེ་ཉེ་བར་མཁོ་བའི་ཆས་མཚུངས་སོ་ཞེ་ན། རྨི་ལམ་དང་སད་པའི་གནས་སྐབས་གཉིས་ཐ་མི་དད་པ་ཡིན་ནོ་ཞེས་བསྟན་པ་ཡིན་ནོ། །དེས་ན་ཆོད་པའི་བག་ཆགས་ཉིད་སད་པར་སྣང་བའི་རྒྱུ་ཡིན་པའི་ཕྱིར། མ་མཐོང་བ་ཙམ་གྱིས་དགག་པ་མ་ཡིན་ནོ། །འཆི་བའི་མཚན་ཉིད་ཀྱིས་གཉིས་གང་ཡིན་པ་དེ་ལྡོག་པའི་ཚེ་ན། སྐྱེ་བ་ཉིད་རྨི་ལམ་དང་འདྲ་བས་རྨི་ལམ་སྟེ། དེ་ལྟར་ཅིའི་ཕྱིར་མི་རྟོགས་ཏེ་རྟོགས་པ་ཁོ་ནའོ། །འཆི་བའི་མཚན་ཉིད་ཀྱིས་ལོག་པ་ཡིན་མོད། དེ་ལས་ཅིས་འགྲུབ་སྙམ་ན། དེ་ལྟར་ཞེས་བྱ་བ་ནི་རྨི་ལམ་བཞིན་དུའོ། །གཉིད་ལོག་པ་སད་པ་ལས་ཉིན་ལ་སྣ་ཚོགས་པ་མཐོང་བ་ཅིས་ནི་མ་ཡིན། སྔར་གྱི་འགྱུར་ན། མཐོང་བ་གང་ཡིན་པ་དེ་ནི་ཕྱིས་དོན་མཐོང་བའི་རྒྱུ་ཡིན་ནོ། །དེས་ན་རྨི་ལམ་དང་རྨི་ལམ་མ་ཡིན་པ་དག་མཚུངས་སོ། །སྔ་ན་མེད་པའི་ཡང་སད་པའི་གནས་སྐབས་ན་མཐོང་ངོ་
ཞེས་བྱ་བའོ། །དེ་ལྟ་ཡིན་པ་ཞེས་བྱ་བ་ནི་སྔ་ན་མེད་པ་མཐོང་བའོ། །རྨི་ལམ་དུ་འགྲོ་བ་དང་འོང་བ་མཐང་ལ་འགྲོ་བ་དང་འོང་བ་དེ་ལ་ཡང་སྔ་ན་མེད་པའི་དོན་དམིགས་པ་ཡོད་པ་དེ་བཞིན་དུ་སད་པའི་རྨི་ལམ་དུ་ཡང་འགྲོ་བ་དང་འོང་བ་སྔ་ན་མེད་པའི་དམིགས་པར་བྱེད་པ་ཅི་མི་འདོད། མཚུངས་པར་བསྒྲུབས་ནས་གནོད་བྱེད་གཞན་ཡང་གནོད་པ་ནི། སྐད་ཅིག་མ་ཞེས་བྱ་བའོ། །གྲུབ་པའི་མཐའ་ནི་དེ་ཞེས་བྱ་བའོ། །བདག་ཉིད་ཀྱིས་བདག་འཁོར་བ་ཉིད་དུ་དམིགས་པ་དེས་ན། ཇི་ལྟར་གཉིད་ལོག་པ་ཡིན། གལ་ཏེ་གཉིད་རྩོམ་པ་ན། བདག་ཉིད་འཁོར་བ་ཉིད་དུ་མ་དམིགས་ཏེ། དེས་ན་གཉིད་ལོག་པ་ཁོ་ནའོ། །དང་པོ་གཉིད་ལོག་ཅེས་སྨོས་སོ། །ཉེ་བར་སྦྱོར་བ་མ་ཡིན་པ་ནི་རྨི་ལམ་མི་མཐོང་བའི་ཕྱིར་རོ། །རྨི་ལམ་དུ་མཐོང་བ་མི་བདེན་པར་བརྗོད་པར་བྱ་བ་ཡིན་ནོ། །དང་པོའི་དུས་ན་ནི་རྨི་ལམ་མཐོང་བ་ཡོད་པ་མ་ཡིན་ནོ། །གང་གི་ཚེ་རྨི་ལམ་མཐོང་བ་དེའི་ཚེ་ནི་བདག་ཉིད་གསལ་བར་མཐོང་བ་ན་ཇི་ལྟར་གཉིད་ཀྱིས་ལོག་པ་ཉིད་ལོག་པ་ཉིད་དུ་རྟོགས་པར་བྱེད། དེ་ཉིད་ཅེས་བྱ་བ་ནི་དང་པོའི་གཉིད་ལོག་པ་གང་ཡིན་པ་དེ་ཉིད་རྨི་ལམ་དུ་མཐོང་བའི་རྣམ་པ་དེའི་རྒྱུ་ཡིན་པ་དེ་དེས་ཉམས་པར་བྱས་པའི་ཕྱིར་མི་བདེན་པ་ཡིན་ནོ་ཞེས་དགོངས་པའོ། །ལན་ནི་མ་ཡིན་ཏེ་ཞེས་བྱ་བ་ནི་དང་པོ་གཉིད་ལོག་པ་ཁྱད་པར་མེད་ཀྱང་རྨི་ལམ་ཁྱད་པར་ཅན་དུ་མཐོང་བའི་ཕྱིར་དང་པོ་གཉིད་རྩོམ་པ་ནི་རྨི་ལམ་གྱི་མཐོང་བའི་རྒྱུ་མ་ཡིན་ཏེ། གཉིད་རྩོམ་པ་ནི་དེ་མེད་ན་རྨི་ལམ་གྱི་མཐོང་བ་མེད་པའི་ཕྱིར་རོ། །གཉིད་རྩོམ་པ་ནི་རྒྱུ་ཉིད་དོ་ཞེ་ན་རྒྱུ་མཚན་ཙམ་ཞེས་གསུངས་སོ། །དེས་ན་གཉིད་རྩོམ་པ་ནི་རྨི་ལམ་གྱི་ཁྱད་པར་གྱི་རྒྱུ་མ་ཡིན་པའི་ཕྱིར་དེས་བསྐྱེད་པས་མི་བདེན་པ་ཉིད་དུ་བརྗོད་པར་མི་ནུས་སོ། །སུན་འབྱིན་པར་གཞན་བརྗོད་པ་ནི། འདི་ཡང་ཞེས་བྱ་བ་སྟེ། སད་པར་མངོན་པར་འདོད་པ་ཡང་ངོ༌། །གཞན་གྱིས་སད་ན་ཞེས་སྨྲས་ཏེ། སད་ནས་དཔའ་སྣང་བ་ཡིན་པ་དེས་ན་ཇི་ལྟར་མཚུངས་སྙམ་ན། འགོག་པ་ནི་མ་ཡིན་ཏེ་ཞེས་བྱ་བའོ། །དེ་ལྟར་ཞེས་བྱ་བ་སད་དོ་ཞེས་རྟོགས་པའོ། །མཇུག་སྡུད་པ་ནི་དེའི་ཕྱིར་ཞེས་བྱ་བའོ། །དེ་ཞེས་བྱ་བ་ནི་བྲམ་ཟེའོ། །ཇི་ལྟར་སྙམ་ན་བརྗོད་པ་དེའི་ཁྱད་པར་ཞེས་གསུངས་སོ། །ཕྱིན་ཅི་
ལོག་ཏུ་ཞེས་བྱ་བ་ནི་དམིགས་པ་མེད་པ་ལས་ཕྱིན་ཅི་ལོག་ཏུ་དམིགས་པ་དང་བཅས་པ་ཉིད་དུ་གྲུབ་པའོ་མ་ཡིན་ཏེ་ཞེས་བྱ་བ་ནི་འགོག་པའོ། །ཇི་ལྟར་ཀ་བ་ལ་སོགས་པའི་ཡུལ་ཅན་སད་པའི་ཤེས་པ་ལ་སོགས་པར་སྣང་བ་མེད་པ་དེ་བཞིན་དུ་རྨི་ལམ་གྱི་ཤེས་པ་ལ་ཡང་ལོག་པར་སྣང་བ་མེད་པར་ཐལ་ལོ། །དེ་ལྟར་གྱུར་མོད་སྙམ་ན། དེ་ལྟ་ན་ཡང་ཞེས་གསུངས་ཏེ། ལོག་པར་སྣང་བ་མེད་ན་ཡང་ངོ༌། །དམིགས་པ་དང་བཅས་པ་ཉིད་ལ་གནོད་པར་བྱེད་པའི་ཤེས་པ་མངོན་སུམ་གྱིས་མི་དམིགས་པ་ནི། ཤེས་པ་ཉིད་ལ་སོགས་པའི་གཏན་ཚིགས་ཀྱིས་གཞན་དུ་བྱ་བར་ནུས་པ་མ་ཡིན་ཏེ། གང་གི་ཕྱིར་རྗེས་སུ་དཔག་པ་ནི་མངོན་སུམ་གྱིས་གནོད་བྱེད་དུ་འགྱུར་བ་མ་ཡིན་ནོ། །མི་དམིགས་པ་ཞེས་བྱ་བ་ནི་དམིགས་པ་དང་བཅས་པ་ཉིད་དམིགས་པའི་རང་བཞིན་ནོ། །འདི་ཉིད་ལ་དཔེ་བརྗོད་པ་ནི་གལ་ཏེ་ཞེས་བྱ་བའོ། །བཟློག་པ་ལ་ནི་མེ་མེད་པ་ལའོ། །དེ་ཅི་རྗེས་སུ་དཔག་པ་ཚད་མ་ཡིན་ནམ། དེ་བཞིན་དུ་ཤེས་པ་ཉིད་ལ་སོགས་པ་ལས་ཚད་མ་མ་ཡིན་ནོ། །ཅི་ཟླ་བ་གཉིས་ཀྱི་ཡུལ་ཅན་དེ་མངོན་སུམ་དུ་འགྱུར་རམ་ཞེ་ན། འགོག་པ་ནི་མ་ཡིན་ཏེ་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་སྔར་གཅིག་ཏུ་མ་མཐོང་ནའོ། །གལ་ཏེ་སྔ་རྗེས་སུ་དཔག་པ་མེད་ན་མངོན་སུམ་ཡང་མེད་པར་འགྱུར་བའི་ཕྱིར་མཚུངས་སོ་ཞེ་ན་མངོན་སུན་ནི་ཞེས་བྱ་བའོ། །གལ་ཏེ་མངོན་སུམ་རྗེས་སུ་དཔག་པ་སྔོན་དུ་འགྲོ་བ་ཅན་ཡིན་ན། དེའི་ཚེ་མངོན་སུམ་གྱི་ཡུལ་དེ་ཡང་རྗེས་སུ་དཔག་པ་ཉིད་གནོད་བྱེད་དུ་འགྱུར་རོ། །དེ་ལྟར་འགྱུར་ཉིད་ཅི་འགལ་ཞེ་ན། དེ་ལྟ་ན་ཡང་ཞེས་གསུངས་སོ། །དེ་ལས་ཞེས་བྱ་བ་ནི་མངོན་སུམ་ལས་སོ། །སྣང་བའི་རང་བཞིན་དོན་བྱེད་པ་དང་ལྷན་ཅིག་འབྲེལ་པ་རྗེས་སུ་དཔག་པས་གཟུང་ན་སྟེ། ཁྱད་པར་ཅན་གྱི་ཆོས་ཅན་གྱི་མཐར་ཐུག་པའི་འགྲེལ་པ་དྲན་པ་ན། མངོན་སུམ་འཇུག་པར་བྱེད་པ་ཡིན་ནོ། །གྲུབ་པའི་མཐའ་པས་གལ་ཏེ་དེ་ལྟ་ན་ཞེས་སྨོས་སོ། །འོ་ན་ཁྱེད་ཀྱི་ལྟ་བ་ལ་ཚད་མ་མ་ཡིན་པ་ཁོ་ནར་ཐལ་ལོ་ཞེ་ན། འདི་བཤད་ཟིན་ཏེ་ཞེས་བྱ་བའོ། །འདི་ནི་འདོད་པ་ཁོ་ན་སྟེ། མི་འདོད་པ་ནི་མ་ཡིན་ནོ་ཞེས་དགོངས་པའོ། །དེ་ཡང་ཞེས་བྱ་བ་ནི་ཐ་དད་པའི་ཡུལ་གྱི་ཚད་མ་ཡང་ངོ༌། །གལ་ཏེ་ཇི་ལྟར་མངོན་སུམ་རང་གི་ཡུལ་ལ་རྗེས་སུ་དཔག་པ་མེད་པར་འགྱུར་བ་དེ་བཞིན་དུ་རྗེས་
སུ་དཔག་པ་ཡང་མངོན་སུམ་མེད་པ་ཁོ་ན་རང་གི་ཡུལ་ལ་འཇུག་པར་འགྱུར་རོ་ཞེས་བརྗོད་པ་ནི་རྗེས་སུ་དཔག་པ་ཡང་གནོད། གང་ཞིག་གང་གི་ཡུལ་ཡིན་པ་དེ་ཉིད་ལ་དེའི་གནོད་པར་བྱ་བ་དང་གནོད་པར་བྱེད་པའི་དངོས་པོ་བསམ་པར་བྱ་བ་ཡིན་གྱི་གཞན་དུ་ནི་མ་ཡིན་ནོ་ཞེས་བསམས་ནས་སྨྲ་བ་ནི་ཇི་ལྟར་ཞེས་བྱ་བའི་གྲུབ་པའི་མཐའ་པས་འཇུག་པར་ཞེས་གསུངས་སོ། །གལ་ཏེ་མངོན་སུམ་ནི་འཛིན་པ་ཉིད་ཀྱི་ཚད་མར་འཐད་པ་མ་ཡིན་ནམ་སྙམ་ན། འཛིན་པར་བྱེད་པ་ཡིན་ན་ནི་ཞེས་གསུངས་སོ། །དེ་ཉིད་གཞུང་འཛུགས་པ་ནི་འདི་ལྟར་ཞེས་བྱ་བའོ། །དེ་ནི་ཞེས་བྱ་བ་ནི་ཐོབ་པར་བྱ་བ་མ་འོངས་པའོ། །རང་གི་ངོ་བོས་ཐོབ་པའི་དོན་ལ་ཇི་ལྟར་འཇུག་གལ་ཏེ་དངོས་པོའི་རང་གི་ངོ་བོས་ཐོབ་ཀྱང་དོན་བྱ་བ་མ་ཐོབ་པའི་ཕྱིར། དེ་དོན་དུ་གཉེར་བས་འཇུག་གོ་ཞེ་ན་འོ་ན་ཞེས་གསུངས་སོ། །སྐྱེས་བུ་གང་ལ་དོན་བྱ་བ་གསལ་བར་ཏེ་འདྲ་བ་དེ་ཡང་དོན་བྱ་བ་ཐོབ་པའི་དོན་དུ་འཇུག་གོ་ཞེ་ན་ཐོབ་པོ་ཞེས་གསུངས་སོ། །དེ་ལ་ཞེས་བྱ་བ་ཐོབ་པར་བྱ་བ་མི་གསལ་བ་ལའོ། །དེ་ལ་ཡང་ཞེས་བྱ་བ་ནི་ཐ་དད་པའི་དོན་ལའོ། །དེ་ནི་ཞེས་བྱ་བ་ནི་རྗེས་སུ་དཔག་པའོ། །དེ་ལ་ཞེས་བྱ་བ་ནི་ལོང་བ་བརྒྱུད་པ་ལས་བྱུང་བའི་རྗེས་སུ་དཔག་པ་ལའོ། །ཕ་རོལ་པོ་ཉིད་སངས་རྒྱས་པའི་དོགས་པ་བསུ་བ་ནི། ཟླ་བ་ནི་གཉིས་ཀྱི་ཡུལ་ཅན་གྱི་ཤེས་པ་མངོན་སུམ་མ་ཡིན་པའི་ཕྱིར་གཞན་གྱི་གནོད་པ་ཡིན་ནོ་སྙམ་ན། ཕ་རོལ་པོ་འདྲི་བ་ཅིའི་ཕྱིར་ཞེས་བྱ་བའོ། །འདི་ལ་སངས་རྒྱས་པའི་ལན་ནི་གནོད་པའི་ཕྱིར་ཞེས་བྱ་བའོ། །འདི་ལ་གཞན་གྱིས་ཕན་ཚུན་ཞེས་སྨྲས་སོ། །སངས་རྒྱས་པའི་དོགས་པ་བསུ་བ་ནི། ཟླ་བ་ནི་གཉིས་ཀྱི་ཡུལ་ཅན་གྱི་ཤེས་པའོ། །ཕན་ཚུན་ལྟོས་ནས་གཉིས་ཀ་ལ་ཡང་གནོད་པར་བྱ་བ་དང་གནོད་པར་བྱེད་པ་ཡང་འགྱུར་ཞེས་བསམས་པའོ། །འདི་གྲུབ་པའི་མཐའ་འགོག་པ་ནི་མ་ཡིན་ཏེ་ཞེས་བྱ་བའོ། །གཅིག་ནི་ཞེས་བྱ་བ་ནི་དུས་ཕྱིས་བྱུང་བ་ཟླ་བ་གཅིག་གི་ཡུལ་ཅན་ནོ། །འདི་ནི་གདོན་མི་ཟ་བར་ཁས་བླང་བར་བྱ་སྟེ། དེ་ལྟར་མ་ཡིན་ན་མངོན་སུམ་གཞན་གྱི་གནོད་པས་སྐབས་ཉམས་པར་འགྱུར་རོ། །དེ་ལྟ་ཡིན་མོད་དེ་ལྟ་ན་ཡང་ཟླ་བ་གཅིག་གི་ཡུལ་ཅན་གྱི་ཟླ་བ་གཉིས་ཀྱི་ཤེས་པ་གནོད་དོ་ཞེས་སྟོན་པ་ནི། དེ་ལྟ་ན་ནི་ཞེས་བྱ་བའོ། །ཟླ་བ་
གཉིས་ཀྱི་ཤེས་པ་ལ་ཐོབ་པར་བྱ་བ་མེད་དོ་ཞེས་ཟླ་བ་གཅིག་གི་ཡུལ་ཅན་གྱི་ཤེས་པས་ཤེས་པ་ཡིན་ལ་དེ་ཡང་རྗེས་སུ་དཔག་པའི་ཡུལ་ཡིན་ནོ། །དེས་ན་དེ་ལ་གནོད་ན་རྗེས་སུ་དཔག་པ་ཉིད་ལ་གནོད་པ་མ་ཡིན་ནོ་ཞེས་བསམས་པའོ། །ལན་བརྗོད་པ་ནི་རང་གི་ངོ་བོ་ལ་ཞེས་བྱ་བའོ། །དེ་ལ་ཡང་ཞེས་བྱ་བ་ནི་བསྒྲུབ་པར་བྱ་བ་རང་གི་ངོ་བོ་ལ་དམིགས་པ་ཉིད་ལའོ། །དེ་ནི་ཞེས་བྱ་བ་ནི་མངོན་སུམ་དང་དེས་བསླང་བའི་རྗེས་སུ་དཔག་པ་ཐ་མི་དད་པ་དམིགས་པའི་བསྒྲུབ་པར་བྱ་བ་ནིའོ། །དེ་ལ་ཞེས་བྱ་བ་ནི་དམིགས་པ་ཐ་དད་པར་སྒྲུབ་པ་ལའོ། །རྩ་ན་མེད་པའི་ཕྱིར་རོ་ཞེས་བྱ་བ་ནི་འདི་ནི་རྗེས་སུ་དཔག་པ་ཡིན་ལ། དེ་ཡང་འགའ་ཞིག་ཏུ་མངོན་སུམ་གྱིས་མ་དམིགས་པ་ཐ་དད་པ་གཞན་དུ་མ་དམིགས་པ་དེས་ན་འདི་ནི་རྩ་བ་མེད་པ་ཁོ་ནའོ། །གལ་ཏེ་མི་སོགས་གནོད་བྱེད་ཀྱི་བློ་བཞིན་ཞེས་བྱ་བའི་དཔེ་ཡང་མི་འཐད་དོ་ཞེས་སྟོན་པ་ནི། རྨི་ལམ་ལ་སོགས་པ་ཞེས་བྱ་བའོ། །རྨི་ལམ་ལ་སོགས་པ་དམིགས་པ་དང་བཅས་པ་གང་ཡིན་པ་དེ་ལ་གནོད་པར་བྱེད་པ་སད་པའི་བློ་གང་ཡིན་པ་དེ་ནི་དམིགས་པ་མེད་པ་ཡིན་ནོ། །དམིགས་པ་མེད་པ་ཉིད་གང་ཡིན་པ་ཤེས་པ་གཞན་སད་པའི་རྣམ་པར་ཤེས་པར་གྱུར་པ་དེ་ལ་གནས་པ་དེ་ནི་ཤེས་པ་ཡིན་པའི་ཕྱིར་ཞེས་བྱ་བའི་གཏན་ཚིགས་གང་ཡིན་པ་དེས་བསྐྱེད་པའི་བློ་འདིས་སོ། །དེ་ནི་ཞེས་བྱ་བ་ནི་ཤེས་པ་གཞན་ལ་གནས་པའི་དམིགས་པ་མེད་པ་ཉིད་དོ། །དེས་ན་རྗེས་སུ་དཔོག་པའི་བློའི་དཔེ་ཉིད་ཀྱི་རྗེས་སུ་དཔག་པའི་བློ་ལ་དེ་ལས་གཞན་པ་སད་པའི་ཤེས་པ་ཡང་བསྒྲུབ་པར་བྱ་བ་ཐ་དད་པ་གང་ཡིན་པ་དེའི་ཡུལ་ཅན་ཉིད་ཡིན་ཏེ། དེས་ན་ལན་གྱི་ཚད་མ་མེད་པར་ཇི་ལྟར་འགྱུར་ཞེ་ན། འདི་ལ་བརྗོད་པ་ནི་གལ་ཏེ་ཞེས་བྱ་བའོ། །དེ་ཡང་ཞེས་བྱ་བ་སད་པའི་བློའོ། །དེ་ལྟར་ཞེས་བྱ་བ་ཐ་དད་པའི་དམིགས་པ་ཅན་དུའོ། །འདི་ཞེས་བྱ་བ་ནི་དམིགས་པ་བསྒྲུབ་པའི་རྗེས་སུ་དཔག་པའི་བློའོ། །དེ་ལས་བཟློག་པའི་ཞེས་བྱ་བ་ནི་དེ་ལས་གཞན་སད་པའི་བློ་གང་ཡིན་པ་དེའོ། །འདི་ནི་ཁས་བླངས་ནས་བརྗོད་པར་ཟད་ཀྱི། རྗེས་སུ་དཔག་པའི་བློ་དམིགས་པ་མེད་པར་སྒྲུབ་པར་བྱེད་པ་འདི་ནི་ཐ་དད་པར་ཞེས་བྱ་བ་གཞན་ལ་གནས་པའི་དམིགས་པ་མེད་པ་ཉིད་སྒྲུབ་པར་བྱེད་པ་ཡང་མ་ཡིན་ནོ། །ཐ་དད་སྒྲུབ་པ་ཉིད་སྟོན་པ་ནི་ཐ་དད་པ་ཞེས་བྱ་བའོ། །གཞན་ལས་ཅིག་ཤོས་ལ་དམིགས་
པ་ཞེས་བྱ་བ་ནི་རང་གི་ངོ་བོ་ལ་དམིགས་པ་ཞེས་བྱ་བའི་དོན་ཏོ། །རྗེས་སུ་དཔག་པའི་བློ་དེ་ནི་མི་འཁྲུལ་པར་ཏེ། མི་སླུ་བར་བྱེད་པའོ། །གལ་ཏེ་མི་སླུ་བ་འདི་ཡང་ནམ་གྱི་ཚེ་འགྱུར་སྙམ་ན། མི་འཁྲུལ་པ་དེ་ཡང་ཞེས་བྱ་བ་སྟེ། རང་གི་རང་བཞིན་གྱི་དམིགས་པའི་ཡུལ་ཅན་དེ་ལ་ཡང་རང་གི་ངོ་བོ་ཉམས་སུ་མྱོང་བར་མངོན་པར་ཞེན་པ་ལྷག་པར་ཞེན་པ་དེ་ལ་དེ་སྐད་ཅེས་བརྗོད་དོ། །རྣམ་པར་རྟོག་པའི་མི་སླུ་བ་དེ་ནི་དེ་ཁོ་ན་ཡིན་གྱི་གཞན་ནི་མེད་དོ། །རྣམ་པར་རྟོག་པ་གང་གི་ཕྱིར་དེ་ལྟ་ཡིན་པ་དེས་ན་རྗེས་སུ་དཔག་པའི་བློ་དེ་ནི་དེའི་བདག་ཉིད་ཀྱི་དམིགས་པ་མེད་པ་ཉིད་རྟོགས་པར་བྱེད་པ་ཡིན་ནོ་ཞེས་འབྲེལ་ཏོ། །དམིགས་པ་རྣམ་པ་ཉིད་དགག་པ་དང་སྒྲུབ་པའི་སྒོ་ནས་བརྗོད་པ་ནི། ད་ལྟར་ཤེས་པ་གཞན་ལ་གནས་པའི་དམིགས་པ་ཉིད་དེ་ནི་ང་ལ་འདིར་སྣང་བ་ནི་མ་ཡིན་ནོ། །འོན་ཀྱང་བདག་ནི་རང་གི་རྣམ་པའི་མཐར་ཐུག་པ་ཡིན་ནོ་ཞེས་བྱ་བར་རོ། །འདི་ཞེས་བྱ་བ་ནི་དམིགས་པ་མེད་པར་སྒྲུབ་པའི་བློ་སྟེ། འདི་ཉིད་དམིགས་པ་དང་བཅས་པར་མ་གྲུབ་པའི་ཕྱིར་རོ་ཞེས་བྱ་བའི་དོན་ཏོ། །ད་ནི་གལ་ཏེ་དེའི་རང་བཞིན་ཞེས་བྱ་བས་རྣམ་འགྲེལ་ལ་འཇུག་པར་བྱེད་དོ། །དེའི་རང་བཞིན་ནི་ཤེས་པ་གཞན་ལ་གནས་པའི་དམིགས་པ་མེད་པ་ཉིད་དོ། །འདི་ལ་ལན་ནི་དེ་ལ་ཞེས་བྱ་བའོ། །འོ་ན་ཇི་ལྟར་རིག་པར་བྱེད་པའི་རྣམ་པར་རྟོག་པ་སྙམ་ན། སྐྲ་སོགས་ཞེས་གསུངས་སོ། །འོན་ཏེ་སྐྲ་ཤད་ལ་སོགས་པ་རིག་པར་བྱ་བའི་དངོས་པོ་མ་ཡིན་པ་ཉིད་དུ་ཅི་ལྟར་འགྲུབ་ཅེ་ན། སྐྲ་ཤད་ལ་ཞེས་གསུངས་སོ། །འདི་ལས་ཀྱང་ཞེས་བྱ་བ་ནི་འཆད་བཞིན་པའི་རིགས་ལས་སོ་གང་ཡིན་པར་ཞེས་བྱ་བ་ནི་གང་གི་ཕྱིར་གྱི་དོན་ཏོ། །དེས་ནི་ཞེས་བྱ་བ་ནི་སྐྲ་ཤད་ཀྱི་ཤེས་པ་ལ་སོགས་པའི་དཔེས་སོ། །གཞན་ཞེས་བྱ་བ་ནི་གཞན་ལ་ཡང་ཞུགས་པ་ནི་ཐོབ་པར་མངོན་པར་རློམ་པའི་མཚན་ཉིད་ཅན་ནོ། །གལ་ཏེ་རང་བཞིན་འགའ་ཞིག་ཐུན་མོང་ཡིན་པའི་ཕྱིར་ན་དམིགས་པ་དང་བཅས་པ་ཉིད་ཀྱང་འགྲུབ་པར་འགྱུར་རོ་ཞེ་ན་དམིགས་པ་དང་བཅས་པ་ཉིད་ནི་ཞེས་གསུངས་སོ། །དེ་ལྟ་མ་ཡིན་ན་ཞེས་བྱ་བ་ནི་ཐོབ་པར་བྱ་བའི་རང་བཞིན་སྣང་ནའོ། །ཐོབ་པར་བྱ་བ་དེ་སྣང་བའི་ཕྱིར་རོ། །དེ་ཡང་ཞེས་བྱ་བ་ནི་ཡང་སྣང་བ་དེ་ཡང་སྣང་བ་ཡིན་ནའོ། །ཐུག་པ་མེད་དོ་ཞེས་བྱ་བ་ནི་ཁྱོད་ཀྱིས་ཡང་འདི་སྐད་
ཅེས་ཡང་སྣང་བའི་དོན་དུ་འཇུག་གོ་ཞེས་བརྗོད་པར་བྱ་བ་དེ་ལ་ཡང་ལན་འདི་ཉིད་ཡིན་པས་ཐུག་པ་མེད་དོ། །ཉེས་པ་གཞན་ཡང་བརྒལ་བའི་དོན་དུ་གཞན་ལ་འདྲི་བ་ནི་ཡང་ཞེས་བྱ་བའོ། །དེའི་དོན་དུ་ཞེས་བྱ་བ་ནི་བདེན་པའི་དོན་དམ་འཛིན་པའི་དོན་དུའོ། །དེ་ཡང་ཞེས་བྱ་བ་ནི་བདེ་བ་དང་འཛིན་པ་ཡང་ངོ༌། །དེ་ལས་ནི་རྟོགས་པ་ཉིད་ལས་སོ། །རྟོགས་པ་གཞན་ཞེས་བྱ་བ་འཇུག་པའི་མཚན་ཉིད་དོ། །འོན་ཏེ་རྒྱུ་མེད་པར་འབྱུང་བ་ན། ཐམས་ཅད་དུ་ཐམས་ཅད་ཀྱི་ཚེ་འབྱུང་བར་འགྱུར་རོ་སྙམ་ན། ཇི་ལྟར་མཐོང་བ་ཞེས་གསུངས་སོ། །སྔར་ནི་ཐོབ་པར་བྱ་བ་ཐ་དད་པར་མ་རྟོགས་པའི་ཕྱིར་དང༌། ཕྱིས་ཞུགས་པའི་རྗེས་ཐོགས་སུ་ཡང་ཐོབ་པར་བྱ་བ་ཐ་དད་པ་ཚད་མ་མེད་པའི་ཕྱིར་ཇི་ལྟར་ཐ་དད་པར་རྟོགས། འདིས་ནི་ཞས་བྱ་བ་ཉིད་རྣམ་པར་འགྲེལ་པ་ནི་སྔ་མ་དང་ཞེས་བྱ་བའོ། །དོན་བྱ་བ་ཐ་དད་པ་ཚད་མས་མི་འཐད་པའི་ཕྱིར་རོ། །རང་གི་ངོ་བོ་ཉིད་ཅེས་བྱ་བ་སྣང་བའི་རང་བཞིན་ཉིད་དོན་བྱེད་པ་ཡིན་ནོ་ཞེས་བརྗོད་པར་བྱའོ། །སྣང་བཞིན་པའི་ངོ་བོ་དོན་བྱ་བ་དེ་ནི་རྨི་ལམ་ལ་ཡང་ཡོད་པ་དེས་ན། རྨི་ལམ་དང་གཞན་དག་མཚུངས་སོ། །དེ་ལྟ་བུ་ཉིད་ཅེས་བྱ་བ་ནི་གཟུང་བ་དང་འཛིན་པ་ཉིད་དོ། །དེ་ཡང་ཞེས་བྱ་བ་ནི་རྣམ་པར་རྟོག་པ་ཡང་ངོ༌། །རྣམ་པར་གནས་པ་ནི་མ་ཡིན་ནོ་ཞེས་བྱ་བ་ནི་གཟུང་བ་དང་འཛིན་པའོ། །དེ་ཉིད་ཅེས་བྱ་བ་ནི་དོན་ཉིད་དོ། །ཇི་ལྟར་ཕ་རོལ་ཡིན་པར་བརྗོད་ཅེས་བྱ་བ་ནི་ཤེས་པའི་ནང་དུ་འདུས་པ་ལས་གཞན་པའི་རིག་པ་མི་འཐད་པའི་ཕྱིར་དང༌། རིག་པར་བྱ་བ་མ་ཡིན་པ་ཡང་ཤེས་པ་ལས་ཕྱི་རོལ་དུ་གྱུར་པ་ཉིད་ཀྱིས་རྟོགས་པར་མི་འཐད་པའི་ཕྱིར་རོ། །འོན་ཏེ་རིག་པ་མ་ཡིན་པའི་དུས་ཉིད་ན་སྔོན་པོ་གཞན་གྱིས་རྟོགས་པ་དེས་ཕྱི་རོལ་ཡིན་ནོ་ཞེས་བརྗོད་དོ་ཞེ་ན། གཞན་གྱིས་མྱོང་བ་མིན་ན་དེས་ཞེས་གསུངས་སོ། །སྐྱེས་བུ་གཞན་གྱིས་སྔོན་པོ་མྱོང་ན་ཇི་ལྟར་ཕྱི་རོལ་དུ་གྱུར་པ་ཉིད་ཀྱིས་རྟོགས་པར་ཡང་གལ་ཏེ་སྔོན་པོ་མྱོང་ན་དེ་ཞེས་བྱ་བ་ལ་སོགས་པ་བརྗོད་པར་བྱ་བ་མ་ཡིན་པའི་ཕྱིར་རོ། །འོན་ཏེ་དེར་ཡང་སྐྱེས་བུ་གཞན་གྱིས་རིག་པ་ཡིན་ནོ་ཞེ་ན། དེ་ལ་བརྗོད་པ་གཞན་གྱིས་ཞེས་བྱ་བའོ། །སུན་འབྱིན་པ་གཞན་བརྗོད་པ་ནི་འདི་ནི་ཞེས་བྱ་བ་སྟེ། སྐྱེས་བུ་གཞན་གྱིས་མྱོང་བ་གང་ཡིན་པ་བདག་གིས་ཅི་ལྟར་ངེས་པ་ཡིན། དེ་འབྲས་ཞེས་བྱ་བ་
སྔོན་པོ་ལ་སོགས་པ་མཐོང་བའི་འབྲས་བུ་དགའ་བ་ལ་སོགས་པ་གང་ཡིན་པ་དེ་ལས་ངེས་པ་ཡིན་ནོ་ཞེ་ན་དེ་མིན་ཏེ་ཞེས་འགོག་པར་བྱེད་དོ། །ཇི་ལར་འབྲས་བུ་རབ་ཏུ་མ་གྲུབ་ཅེ་ན། རྒྱུ་དང་འབྲས་བུའི་དངོས་པོ་ཁས་བླང་སྣས་ཀྱང་སུན་འབྱིན་པ་གཞན་བརྗོད་པ་ནི། རྗེས་སུ་དཔག་ཅེས་བྱ་བའོ། །རྗེས་སུ་དཔག་པ་ནི་སྤྱིའི་ཡུལ་ཅན་གྱི་ཡིན་གྱི། རང་གི་མཚན་ཉིད་ཀྱི་ཡུལ་ཅན་ནི་མ་ཡིན་ནོ། །དེས་ན་དགའ་བ་ལ་སོགས་པ་མཐོང་བ་ལ་གང་ཡིན་པ་དེ་རྣམ་པ་འདི་ལྟ་བུའི་དངོས་པོ་མཐོང་བ་སྔོན་དུ་སོང་བ་ཅན་ཡིན་ནོ་ཞེས་གྲུབ་མོད། བདག་གི་མཐོང་བའི་དངོས་པོ་མཐོང་བ་སྔོན་དུ་འགྲོ་བ་ཅན་ཞེས་བྱ་བ་ནི་མ་ཡིན་ནོ། །དེ་གཅིག་ཉིད་བྱ་བ་ནི་ཇི་ལྟར་སྣང་བཞིན་པའི་སྔོན་པོ་ལ་སོགས་པ་དེ་གཟིག་ཉིད་ཡིན་པ་དེ་བཞིན་དུ་སྤུ་ལྡང་བ་ལ་སོགས་པའི་འབྲས་བུ་མཐོང་བ་དེ་ཉིད་ལས་རང་གི་བདེ་བ་དང་གཞན་གྱི་བདེ་བ་དག་ཀྱང་གཅིག་ཉིད་དུ་གྲུབ་པར་ཐལ་ལོ། །གལ་ཏེ་གཞན་དེའི་བདེ་བར་གཞན་ཁོ་ན་ཡིན་ནོ་ཞེས་བརྗོད་ན། དེའི་ཚེ་གཞན་དེའི་གཟུང་བ་སྔོན་པོ་ལ་སོགས་པ་ཡང་གཞན་དུ་འགྱུར་རོ། །བདེ་བ་ལ་སོགས་པ་ཡུལ་ཐ་དད་པས་གཅིག་ཉིད་དུ་བསྒྲུབ་པར་མི་ནུས་སོ། །ཞེ་ན། དེ་ཉིད་དུ་ན་ཞེས་གསུངས་སོ། །ཡུལ་ཐ་དད་པ་ཉིད་མ་གྲུབ་པོ་ཞེས་བྱ་བའི་དོན་ཏོ། །བདེ་བ་དེ་ཉིད་ལས་ཞེས་བྱ་བ་ནི་བདག་ལ་གནས་པའི་བདེ་བ་ལ་སོགས་པ་ཉིད་ལ་གཞན་དག་ཅེས་བྱ་བ་གཞན་གྱི་ལུས་ལ་གནས་པའི་སྤུ་ལྡང་བ་ལ་སོགས་པར་འགྱུར་རོ་ཞེས་བརྗོད་མོད་གལ་ཏེ་བདག་དང་གཞན་གྱི་ལུས་ལ་གནས་པའི་སྤུ་ལྡང་བ་ལ་སོགས་པ་གཅིག་མ་ཡིན་ལ། དེ་ཙམ་གྱིས་ནི་བདེ་བ་ལ་སོགས་པ་ཡང་གཞན་ཉིད་དུ་གྲུབ་པོ་ཞེ་ན། བརྗོད་པ་གཞན་ལ་ཞེས་བྱ་བ་སྟེ། སྤུ་ལྡང་བ་ལ་སོགས་པ་གཞན་དུ་གྱུར་པ་ཡང་སྔོན་པོ་ལ་སོགས་པ་གཟུང་བར་བྱ་བ་ཡང་གཞན་ཡིན་ནོ་ཞེས་ཅིའི་ཕྱིར་མི་འདོད། སུན་འབྱིན་པ་གཞན་ཡང་བརྗོད་པ་ནི། གལ་ཏེ་སྤུ་ལྡང་བ་ལ་སོགས་པ་ཡང་བདག་ཅག་གི་རིག་པའི་ནང་དུ་འདུས་པ་ཁོ་ན་ཡིན་ཏེ། དེ་ལྟ་མ་ཡིན་ན་དེ་དག་ཀྱང་སྣང་བར་མི་འཐད་པའི་ཕྱིར་ཞེས་བྱ་བ་ཡིན་པ། དེའི་ཚེ་བདག་ཅག་གི་རིག་པའི་ནང་དུ་འདུས་པ་དེ་དག་ལས་སྐྱེས་བུ་གཞན་གྱིས་ཚིམ་པ་ལ་སོགས་པར་སྣང་བ་གང་ཡིན་པ་དེར་རྟོགས་པར་ཇི་ལྟར་གསལ་ཏེ། ཇི་ལྟར་
དེས་བདག་གི་རིག་པར་འདུས་པའི་སྤུ་ལྡང་བ་ལ་སོགས་པ་ནི་གཞན་གྱི་བདེ་བ་ལ་སོགས་པ་དཔག་པར་མི་འོས་སོ། །དེ་ནི་ཞེས་བྱ་བ་ནི་གཞན་ཏེ། རྒྱུ་དེས་ན་རང་དང་གཞན་གྱི་བདེ་བ་གཉིས་གཅིག་ཉིད་མ་ཡིན་ཏེ། གཞན་གྱི་བདེ་བ་ཡོད་པའི་ཕྱིར་དང༌། ཁོ་བོ་ཅག་ནི་བདེ་བ་ཅན་ནི་མེད་པའི་ཕྱིར་རོ་ཞེ་ན། །འདི་ལ་བརྗོད་པ་ནི་ཁོ་བོའི་གཟུང་བར་ཞེས་བྱ་བའོ། །དེའི་ཕྱིར་ཇི་ལྟར་དེའི་གཟུང་བ་དང་བདག་ཅག་གི་གཟུང་བ་ཐ་དད་པ་མེད་པ་ཉིད་ཡིན་ན། སྤུ་ལྡང་བ་ལ་སོགས་པར་གྱུར་པ་དེ་བཞིན་དུ་བདེ་བ་ཡང་ཐ་དད་པ་མེད་པ་ཡིན་ན། སྤུ་ལྡང་བ་ལ་སོགས་པར་འགྱུར་བ་ཡིན་ནོ་ཞེས་ཁྱེད་ཀྱི་ཁས་བླངས་ དགོས་སོ། །གལ་ཏེ་ཞེས་བྱ་བ་ནི་དོགས་པ ་བསུ་བའོ། །དེར་ཡང་ཞེས་བྱ་བ་ནི་བདེ་བ་ལའོ། །འདི་ལ་བརྗོད་པ་ནི་བདེ་བ་ངོ་བོ་ཉིད་ཀྱིས་དབྱེར་མེད་པའོ། །གཟུང་བར་བྱ་བ་དེ་ལ་ཡང་ཐ་དད་པ་མེད་པར་ཡང་འགྱུར་རོ། །དེ་ལྟ་ན་ཡང་བཟུང་བ་འདི་ལྐོག་ཏུ་གྱུར་པར་མི་འགྱུར་རོ། །གཞན་གྱི་ལན་ནི་ཚད་མ་གཞན་གྱིས་ཞེས་བྱ་བའོ། །འདི་ལ་བརྗོད་པ་ནི་གལ་ཏེ་ཞེས་བྱ་བ་སྟེ། ཐུན་མོང་ཉིད་དུ་སྣང་བའི་མཚན་ཉིད་ཅན་གྱི་མངོན་སུམ་ལས་སོ། །དེ་ཡང་ཞེས་བྱ་བ་ནི་ཚིག་ཀྱང་ངོ༌། །གང་ཡིན་པ་ཞེས་བྱ་བ་ནི་དོན་གྱི་ཐུན་མོང་བ་ཉིད་དོ། །ཕན་ཚུན་ལྷན་ཅིག་པ་ཉིད་ཀྱི་ཚིག་གིས་མངོན་སུམ་དག་ཚད་མ་ཡིན་ནོ་སྙམ་ན། རབ་རིབ་ཅན་གཉིས་ཞེས་གསུངས་སོ། །དེ་ཉིད་ཡིན་ཞེས་བྱ་བ་ནི་ནུས་པའོ། །མེད་པ་ཉིད་དོ། །རྟོགས་པའི་རང་བཞིན་ཞེས་བྱ་བ་ནི་ཤེས་པའི་རང་བཞིན་ཏེ། རྣམ་པར་རིག་པ་ཙམ་གྱི་རང་བཞིན་ཡིན་གྱི་རྟོགས་པར་བྱེད་པའི་རང་བཞིན་ནི་མ་ཡིན་ནོ། །དེས་ན་ཞེས་བྱ་བ་ནི་ཕྱི་རོལ་མེད་པའི་ཕྱིར་རོ། །དེ་ཉིད་ལ་ཞེས་བྱ་བ་ནི་བློ་ཉིད་ལའོ། །སྔོན་པོ་ལ་སོགས་པ་རང་གི་ངོ་བོ་ཉིད་ཀྱིས་འཛིན་པར་བྱེད་པ་ཅན་གང་ཡིན་པ་དེ་ལ་སྟེ། གསལ་བའི་བདག་ཉིད་ལའོ། །དཔེ་འགའ་ཡང་མེད་དོ་ཞེས་བྱ་བའི་དོན་ཏོ། །བཟློག་པ་མེད་པ་ལ་ཞེས་བྱ་བ་ནི་གསལ་བ་ལས་ཐ་དད་པ་མེད་པ་ལའོ། །དཔེ་དེ་གང་ཡིན་ཞེ་ན། རི་བོང་གི་ཞེས་བྱ་བའོ། །མངོན་སུམ་གྱིས་གྲུབ་པ་ཞེས་བྱ་བ་ནི་རྟོགས་པ་པོ་གསལ་བ་ལ་ལྟོས་ནས་གསལ་བ་དང་དངོས་པོ་དག་ཐ་མི་དད་པར་དམིགས་པ་ནི་མངོན་སུམ་ཉིད་ཚད་མ་ཡིན་ནོ་ཞེས་བྱ་བའི་དོན་ཏོ། །རང་གི་ཆ་ཞེས་བྱ་བ་ལ་སོགས་པ་ནི་ཕ་རོལ་པོའི་གཞུང་
ངོ། །འདིའི་དོན་ནི་འདི་ཡིན་ཏེ། སངས་རྒྱས་པ་ལ་དམིགས་པ་མེད་པར་བསྒྲུབ་པ་ན་རང་གི་ངོ་བོའམ། ཕྱི་རོལ་གྱི་རང་བཞིན་གྱིས་དམིགས་པ་མེད་པ་སྒྲུབ་པ་དེ་ལ་རང་གི་ངོ་བོས་དམིགས་པ་མེད་པ་ནི། བདག་ཅག་ཀྱང་འདོད་པ་ཉིད་དོ། །དེས་ན་དག་པ་ཉིད་ཅེས་བྱ་བ་ཁྱད་པར་དང་བྲལ་བ་ཕྱོགས་སུ་འགྱུར་རོ། །དེ་ཡང་མངོན་སུམ་གྱིས་གསལ་བ་ཡིན་ནོ། །གལ་ཏེ་སྐྱོན་ཅན་གྱི་ཤེས་པས་གཟུང་བའི་དོན་ནི་དག་པར་རིགས་པ་ཡིན་གྱི། གང་གི་ཚེ་སྐྱོན་ཅན་གྱི་ཤེས་པ་གཟུང་བ་ཉིད་འགའ་ཡང་མི་སྲིད་པ་དེའི་ཅི་ཞིག་དགག་པར་བྱ་ཞེས་སྟོན་པ་ནི་སྐྱོན་ཅན་ཤེས་པས་ཞེས་བྱ་བའོ། །འདི་ལ་ལན་གཟུང་མེད་ཅེས་བྱ་བའོ། །མ་བཟུང་བའི་ཕ་རོལ་གྱི་དོན་ལ་གཟུང་བར་འཛིན་པ་སྟེ། གཟུང་བར་མངོན་པར་རློམ་པ་གང་ཡིན་པ་དེ་འགོག་པ་ལ་མི་འཐད་པ་ཅི་ཡོད་དེ། དེས་ན་སྐྱོན་ཅན་གྱི་ཤེས་པས་གཟུང་བ་ལ་གདོན་མི་ཟ་བར་ལྟོས་པ་ཅི་ཡོད། གལ་ཏེ་གཟུང་བ་ཉིད་གནོད་པར་འགྱུར་གྱི། མ་བཟུང་བ་ནི་མ་ཡིན་ན། དེའི་ཚེ་སངས་རྒྱས་པའི་རང་གི་ཕྱོགས་གང་ཡིན་པ་དེ་མི་འགྲུབ་པ་སྟེ། གཟུང་བ་གནོད་པ་དང་མི་ལྡན་པས་གཟུང་བ་ཉིད་གནོད་པར་འགྱུར་ན། དམིགས་པ་མེད་པ་ཉིད་གནོད་པའི་ཕྱིར་རོ། །མ་བཟུང་བ་དམིགས་པ་དང་བཅས་པ་ཉིད་དོ་ཞེས་ཁྱེད་ཅག་ཡོད་པ་ཉིད་དུ་ཇི་ལྟར་བརྗོད། མ་བཟུང་བ་ནི་འགག་པ་ཉིད་བཤད་ཀྱི་ཡོད་པ་ནི་མ་ཡིན་ནོ། །གཞན་གྱིས་བརྗོད་པའི་ཉེས་པ་གཞན་ཡང་འགོད་པ་ནི་ཁྱད་པར་ཞེས་བྱ་བའོ། །ཤེས་པ་ནི་ཁྱད་པར་ཅན་ནོ། །དམིགས་པ་མེད་པ་ཉིད་ནི་ཁྱད་པར་དུ་བྱེད་པ་ཡིན་ཏེ། རི་དང་མེ་བཞིན་ནོ། །དེ་ལ་ཁྱད་པར་དང་ཁྱད་པར་ཅན་དག་ཐ་དད་པར་མ་བཟུང་བའི་ཕྱིར་ནི་གཉི་ག་རབ་ཏུ་མ་གྲུབ་པར་བརྗོད་པར་བྱ་བ་ཡིན་ནོ། །ཡང་ན་གང་ཡང་རུང་བ་སངས་རྒྱས་པ་ཁྱད་པར་དང་ཁྱད་པར་ཅག་དག་རབ་ཏུ་མ་གྲུབ་པ་མ་ཡིན་ཏེ། ཐ་དད་པར་མ་གྲུབ་པའི་ཕྱིར་རོ་ཞེས་འདི་ལ་བརྗོད་པ་ནི་ཞེས་བྱ་བའོ། །འབྲས་མེད་པར་ཞེས་བྱ་བ་ནི། བསྒྲུབ་པར་བྱ་བ་དང་སྒྲུབ་པར་བྱེད་པ་ལ་སོགས་པའི་བྱ་བ་བྱེད་པའོ། །བྲམ་ཟེས་རང་གི་ཚིག་གིས་གནོད་པའི་ཉེས་པ་ཡང་བརྗོད་དོ། །འདི་ལྟར་གང་གིས་གཞན་དག་དམིགས་པ་མེད་པ་ཉིད་དུ་རྟོགས་པར་བྱ་བ་དེའི་ཚེ་རྒོལ་བའི་ཚིག་དེ་ལས་ཕྱིར་
རྒོལ་བ་ལས་སྐྱེས་པའི་ཤེས་པ་གང་ཡིན་པ་དེ་དམིགས་པ་དང་བཅས་པའོ་ཞེས་ཁས་བླངས་ནས་རྒོལ་བའི་ཚིག་བརྗོད་པ་ཡིན་ལ། རྒོལ་བ་རང་ཉིད་ལས་དམིགས་པ་མེད་པ་ཉིད་ཀྱིས་ཡུལ་ཅན་གྱི་ཤེས་པ་སྐྱེས་པ་གང་ཡིན་པ་དེ་ཡང་དམིགས་པ་དང་བཅས་པ་ཁོ་ན་ཡིན་ཏེ། དེ་ལྟ་མ་ཡིན་གྱི་གཞན་རྟོགས་པར་བྱེད་པ་མི་འཐད་པའི་ཕྱིར་རོ་ཞེས་བྱ་བའོ། །ཉེས་པ་འདི་ཡང་བརྗོད་པ་ནི། འཆད་པ་པོ་བསྟན་པ་པོའི་ཞེས་བྱ་བ་སྟེ། སངས་རྒྱས་པ་དང་མུ་སྟེགས་པ་དག་གིའོ། །ཤེས་པ་དེ་དམིགས་པ་མེད་པ་ཉིད་ཀྱིས་རང་གི་ཚིག་དང་འགལ་བ་མེད་དོ། །གལ་ཏེ་དམིགས་པ་དང་བཅས་པར་ཁས་བླངས་ནས་དམིགས་པ་མེད་པ་ཉིད་སྒྲུབ་ན། དེའི་ཚེ་དག་རང་གི་ཚིག་གིས་གནོད་པར་འགྱུར་བ་ཞིག་ན། འོན་ཀྱང་དེ་ལྟར་ན་མི་བྱེད་དོ་ཞེས་བྱ་བའི་དོན་ཏོ། །དེའི་ཕྱིར་རྣམ་པར་དཔྱོད་པ་ལས་སྔར་བཟློག་པའི་དབྱེ་བས་བརྟགས་པ་ཁྱད་པར་ཅན་དག་གི་རབ་ཏུ་དབྱེ་བ་ཡོད་པ་ཉིད་ཡིན་པའི་རྒྱུ་དེས་ན། སད་པའི་ཤེས་པ་དམིགས་པ་མེད་དོ་ཞེས་བྱ་བ་དམ་བཅས་པའི་དོན་ནི་བརྟགས་ན་མཛེས་པ་ཁོ་ནའོ། །ཁྱད་པར་དང་ཁྱད་པར་ཅན་གྱི་དབྱེ་བ་སྲེད་ན་ངེས་པར་བརྟགས་པ་འདི་འཐད་པའི་ཕྱིར་རོ། །གཞན་ཡང་ཞེས་བྱ་བ་ལ་སོགས་པས་ནི་ཕ་རོལ་པོས་བརྗོད་པའི་ཉེས་པ་གཞན་ཡང་ཡོད་པར་བྱེད་དོ། །རྒྱུ་དེས་ན་དམིགས་པ་མེད་པ་ཉིད་འདི་ལ་བཟློག་པ་ཞེས་བྱ་བ་དངོས་པོ་མེད་པའི་རང་བཞིན་ལ་སོགས་པའི་སྒྲས་དངོས་པོའི་རང་བཞིན་ཉིད་དོར་རོ། །འདྲི་བ་ཞེས་བྱ་བ་ནི་དམིགས་པ་མེད་པ་ཉིད་དངོས་པོའི་རང་བཞིན་ནི་འོན་ཏེ་དངོས་པོ་མེད་པའི་རང་བཞིན་ཞེས་བྱ་བ་ལ་སོགས་པ་འཐད་པ་མ་ཡིན་ནོ། །སུན་འབྱིན་པ་དེ་ཉིད་སྟོན་པ་ནི། གལ་ཏེ་དམིགས་པ་མེད་པ་ཉིད་དངོས་པོ་མེད་པ་ཡིན་ན། དེའི་ཚེ་ཇི་ལྟར་ཁྱེད་ཅག་ལ་དམིགས་པ་མེད་པ་ཉིད་དུ་རྟོགས་པར་བྱེད་པའམ། རང་གི་བློས་ཀྱང་དམིགས་པ་མེད་པ་ཉིད་ཇི་ལྟར་རྟོགས་ཏེ། མེད་པ་ནི་རྟོགས་པར་མི་འཐད་པའི་ཕྱིར་མ་རྟོགས་པའི་དོན་ཀྱང་གཞན་ལ་བསྟན་པར་མི་ནུས་པའི་ཕྱིར་རོ། །འོན་ཏེ་དམིགས་པ་མེད་པ་ཉིད་དངོས་པོ་མ་ཡིན་པ་དེ་ལྟ་ན་ཡང་བརྟགས་ནས་སྒྲུབ་པར་བྱེད་པ་ཡིན་ནོ་ཞེས་བྱ་བར་སངས་རྒྱས་པ་དོགས་པ་བསུ་ནས་ཕ་རོལ་པོ་སུན་འབྱིན་པ་བརྗོད་པ་ནི་དམིགས་པ་མེད་པ་
ཉིད་མེད་ལ། རྟོགས་པ་ཅི་འདྲ་ཞིག་སྟེ། ཅུང་ཟད་ཀྱང་མི་སྲིད་དོ། །འོན་ཏེ་དམིགས་པ་ཉིད་རྟོགས་ན་དེའི་ཚེ་དངོས་པོར་ཐལ་བར་འགྱུར་རོ། །དེ་ལྟ་ན་ཡང་དམིགས་པ་མེད་པའི་མཚན་ཉིད་ཀྱི་དངོས་པོ་ལ་དམིགས་པ་རྗེས་སུ་དཔག་པའི་ཤེས་པས་འཁྲུལ་པ་ཡིན་ནོ་ཞེས་བསམས་པ་ཡིན་ནོ། །གལ་ཏེ་དངོས་པོ་མེད་པ་རྣམ་པར་བརྟག་པར་བྱ་བ་མི་ནུས་ན། དེའི་ཚེ་ཞིག་ནས་མེད་པ་ལ་སོགས་པ་ལ་ཇི་ལྟར་རྣམ་པར་རྟོག་པས་འདོད་ཅེས་སངས་རྒྱས་པའི་དོགས་པ་བསུ་ནས་བརྗོད་པ་ནི། དེ་ཡང་ཞེས་བྱ་བ་སྟེ། དངོས་པོ་མེད་པ་ཡང་ངོ༌། །ཇི་ལྟར་ན་འདི་ཐམས་ཅད་འཐད་པ་མ་ཡིན་ཞེ་ན། འདི་ནི་བཤད་ཟིན་ཏེ་ཞེས་གསུངས་སོ། །སོ་སོ་བ་ལྟ་བུ་ཞེས་བྱ་བ་ནི་ཆོས་ཅན་ཤེས་པ་ལས་ཐ་དད་པ་ལྟ་བུར་ཏེ་དཔེར་ན་ཤིང་མ་ཡིན་པ་ལས་ལྡོག་པ་ཉིད་བཞིན་ནོ། །དེ་ལྟ་བུའི་ཞེས་བྱ་བ་དམིགས་པ་མེད་པའི་རང་གི་ངོ་བོ་ཤེས་པར་བྱ་བའི་ཕྱིར་རྣམ་པར་འཇོག་པ་ཡིན་གྱི། དམིགས་པ་མེད་པ་ཉིད་དངོས་པོ་ཐ་དད་པར་ནི་ཡོད་པ་མ་ཡིན་ནོ། །དངོས་པོ་མེད་པ་ལ་ཞེས་བྱ་བ་ནི་དམིགས་པ་མེད་པ་ཉིད་ལའོ། །ལན་ནི་དེ་ཉིད་ཀྱི་ཕྱིར་ཏེ་ཞེས་བྱ་བ་སྟེ། དངོས་པོ་མེད་པ་ཉིད་ཀྱི་ཕྱིར་རོ། །དེ་ལྟ་མ་ཡིན་ན་ཞེས་བྱ་བ་ནི་དངོས་པོ་ཉིད་ཡིན་ནའོ། །དེ་ལྟ་ཞེས་བྱ་བ་རྟོགས་པ་ཉིད་ཡིན་ན། དངོས་པོ་མེད་པར་ཐལ་བར་འགྱུར་རོ། །དེ་ཉིད་གཞུང་འཛུགས་པ་ནི་མེད་པ་ལ་རྟོག་པ་འཇུག་པར་འགྱུར་རོ། །དངོས་པོ་མེད་པ་དེ་ནི་དངོས་པོར་ཡོད་པ་མ་ཡིན་ནོ། །དེའི་ཕྱིར་རྟོག་པ་ནི་དངོས་པོ་མེད་པ་ཁོ་ན་ལ་འཇུག་པ་ཡིན་ནོ། །དེ་ལྟ་ཡིན་དང་དམིགས་པ་མེད་པ་ཉིད་ཐ་དད་པར་ནི་དངོས་པོ་མ་ཡིན་པར་གྲུབ་བོ། །ཅི་སྟེ་ཞེས་བྱ་བ་ནི་དོགས་པའོ། །ལས་ཀྱི་ཕྱོགས་ལ་ནི་ཤེས་པར་བྱ་བས་ན་ཤེས་པ་ཡིན་ལ། དེ་ནི་དམིགས་པ་མེད་པ་ཉིད་དང་ཁོ་བོ་ཅག་འདོད་པ་ཁོ་ནའོ། །གང་གིས་དེ་དམིགས་པ་མེད་པ་ཉིད་དུ་བསྒྲུབ་པར་བྱ་བ་རྟོགས་པར་བྱ་བ་བུམ་པ་ལ་སོགས་པས་ནི་གཞན་རྟོགས་པ་འགའ་ཡང་མེད་དོ། །དེ་ཉིད་བརྗོད་པ་ནི་ལས་ནི་ཞེས་བྱ་བ་སྟེ། རྟོགས་པ་ཅུང་ཟད་ཀྱང་ཡོད་པ་མ་ཡིན་ནོ་ཞེས་བལྟ་བར་བྱ་བའོ། །ལས་སུ་བཤད་པར་བྱ་བ་ནི་ཕྱོགས་འདི་ནི་བཤད་པ་ཙམ་གྱིས་དོན་དུ་རྣམ་པར་བརྟག་པར་བྱས་པར་ཟད་ཀྱི་སུན་འབྱིན་པ་ནི་བརྗོད་པ་ཟིན་ཏོ། །དེ་བཞིན་དུ་བྱེད་པ་པོ་ལ་སོགས་པ་ཡང་ངོ་
ཞེས་བྱ་བ་ནི་རྟོགས་པར་བྱ་བ་ནི་ལས་མེད་པ་རྨི་འགྱུར་རོ། །དེ་མེད་པ་ནི་ཕྱི་རོལ་གྱི་དོན་མེད་པའོ། །འདི་འགོག་པ་ནི་དེ་ནི་མ་ཡིན་ཏེ་ཞེས་བྱ་བའོ། །བྱེད་པ་པོ་དང་བྱེད་པའི་ཕྱོགས་དག་ལ་ཡང་ཉེས་པ་སྤོང་བ་ནི་བདག་ཉིད་རྟོགས་པར་བྱེད་དོ། །འདིས་བདག་ཉིད་རྟོགས་པར་བྱེད་དོ་ཞེས་བྱ་བ་འདི་ལ་འགལ་བ་ཅི་ཡོད་དེ། ཕྱིའི་དོན་འཕེན་པ་མེད་པའི་ཕྱིར་རོ། །གལ་ཏེ་འདི་ཞེས་བྱ་བ་སྔོན་པོ་ལ་སོགས་པའོ། །སྔོན་པོ་ལ་སོགས་པ་དེ་རང་གི་ངོ་བོས་ཏེ། གསལ་བའི་རང་བཞིན་ཉིད་ཀྱིས་དམིགས་པ་ཡིན་ནོ་ཞེ་ན། འདི་ལ་བརྗོད་པ་ནི་ད་ནི་ཞེས་བྱ་བའོ། །གལ་ཏེ་སྔོན་པོ་ལ་སོགས་པ་རང་གི་ངོ་བོས་དམིགས་པ་ཡིན་ན་དེའི་ཚེ་སངས་རྒྱས་པ་ལ་སྒྲུབ་པ་ཡིན་ནོ། །གལ་ཏེ་སྔོན་པོ་ལ་སོགས་པ་ནི་ཁྱབ་པ་དང་རྟག་པའི་བདག་གིས་དམིགས་པར་བྱ་བ་ཉིད་དུ་མ་རྟོགས་པ་མ་ཡིན་ནམ། རྟོགས་པའི་རྣམ་པར་བརྗོད་པ་ནི་ངས་སྔོན་པོ་རྟོགས་སོ་ཞེས་བྱ་བའོ། །འདི་སུན་འབྱིན་པ་ནི་དེ་ནི་ཞེས་བྱ་བའོ། །ངའོ་ཞེས་བྱ་བ་དེ་ལྟ་བུའི་རྣམ་པ་ཅན་གྱི་ཤེས་པ་ནི་ལུས་དབང་པོ་དག་གི་རང་བཞིན་རིག་པ་ཡིན་གྱི། བདག་ཐ་དད་པ་ནི་རིག་པ་མ་ཡིན་ནོ། །ངའོ་སྙམ་པའི་རྣམ་པ་ཅན་གྱི་ཤེས་པས་ལུས་ལ་སོགས་པ་རིགས་པ་ཡིན་ནོ་ཞེས་ཅི་ལྟར་ཤེས་ཤེ་ན། ངར་འཛིན་པར་ནི་ཞེས་བྱ་བ་ལ་སོགས་པས་སོ། །སྐུལ་བར་བྱེད་པའི་བདག་གཞན་ཐ་དད་པ་ནི་རིག་པ་སྟེ་རྟོགས་པ་མེད་དོ། ཅིའི་ཕྱིར་ཞེ་ན། དབང་པོ་ལ་སོགས་པ་འདི་དག་རང་གི་རྒྱུ་ལས་རང་གི་རང་བཞིན་སྐྱེ་བ་ལ་སྐུལ་བར་བྱེད་པ་གཞན་ནི་དམིགས་པ་མེད་དོ། །དེས་ན་བདག་ཐ་དད་པར་ཇི་ལྟར་འགྲུབ་པར་འགྱུར། དེ་དག་གི་ཞེས་བྱ་བ་ནི་དབང་པོ་ལ་སོགས་པ་དག་གོ །གལ་ཏེ་བདེ་བ་དང་དབང་པོའི་རྣམ་པ་ཅན་གྱི་བློའི་ཐང་ནས་སྔོན་པོ་ལ་སོགས་པའི་རྣམ་པ་དང་ལྡན་པའི་བློ་གཞན་སྐྱེ། དེའི་ཚེ་ལས་དང་བྱེད་པ་པོ་གང་ལས་ཡིན། ལས་སུ་བཤད་པའི་ཕྱོགས་ལས་ནི་རྟོགས་པ་ཡོད་པ་མ་ཡིན་ནོ་ཞེས་བརྗོད་པ་དེ་ཉིད་གསལ་བར་བྱེད་པ་ནི། གཟུགས་ལ་སོགས་པ་ཞེས་བྱ་བའོ། །འདི་འགོག་པ་ནི་དེ་ནི་ཡེ་ནས་མ་ཡིན་ཏེ་ཞེས་བྱ་བའོ། །དམིགས་པ་མེད་པར་མི་འདོད་ཀྱི་འོན་ཀྱང་གཟུགས་ལ་སོགས་པའི་རྟོགས་པ་ནི་དམིགས་པ་དང་བཅས་པ་ཉིད་དུ་འདོད་པ་ཡིན་ནོ། །ཇི་ལྟར་ཞེ་ན། གང་གི་ཕྱིར་
སྔོན་པོ་ལ་སོགས་པ་ནི་རྟོག་པ་མེད་པའི་རང་བཞིན་ལས་ལྡོག་པས་ན་རང་གི་ཆ་ལ་དམིགས་པ་ཡིན་ནོ། །འོ་ན་རྣམ་པ་གང་གིས་དམིགས་པ་མེད་པ་ཉིད་སྒྲུབ་སྙམ་ན། ཐ་དད་པའི་ཞེས་གསུངས་སོ། །དམིགས་པ་ཐ་དད་པས་དམིགས་པ་མེད་པ་ཉིད་ཡིན་གྱི། རང་གི་རང་བཞིན་རྣམ་པར་ཤེས་པའི་བདག་ཉིད་ཀྱིས་ནི་དམིགས་པ་དང་བཅས་པ་ཉིད་དོ་ཞེས་བསྟན་ཟིན་ཏོ། །མེད་པའི་སྒྲས་བསྒྲུབ་བྱ་མི་སྟོན་པའི་སྒྲ་དག་ཅེས་བྱ་བ་ནི་སྦྱོར་བས་ཟིན་པ་བསྒྲུབ་བྱ་དང་སྒྲུབ་བྱེད་རྗོད་པར་བྱེད་པ་མེད་པའི་སྒྲ་དང༌། ཤེས་པའི་སྒྲ་དག་བྱེད་པ་པོ་ཉིད་དམ། བྱེད་པ་ཉིད་ཡིན་ན་བསྒྲུབ་པར་བྱ་བ་འགའ་ཞིག་ཡོད་པར་འགྱུར་གྱི། སྒྲ་དེ་དག་དམིགས་པ་མེད་པ་ཉིད་ཡིན་ན་ནི། ཕྱོགས་མེད་པ་ཉིད་དུ་འགྱུར་རོ། །དམིགས་པའི་ཕྱིར་དང་ཤེས་པའི་སྒྲས་ཀྱང་སྒྲུབ་བྱེད་མི་སྟོན་པའི་ཕྱིར་རོ་ཞེ་ན། འདི་ལ་གྲུབ་པའི་མཐའ་ཨ་བརྗོད་པ་ནི་དེ་ཡང་ཤིན་ཏུ་ལེགས་པར་ཞེས་བྱ་བའོ། །སྒྲ་བླ་ལྷག་མ་ཙམ་ཞེས་བྱ་བ་ནི་འདི་ནི་དོན་མེད་པའི་སྒྲ་ཙམ་འབའ་ཞིག་ཏུ་ཟད་ཀྱི་སུན་འབྱིན་པ་ནི་ཅུང་ཟད་ཀྱང་མ་ཡིན་ནོ་ཞེས་བྱ་བའི་དོན་ཏོ། །དོན་ནི་སྒྲའི་དམིགས་པ་མ་ཡིན་གྱི་འོན་ཀྱང་ལྡོག་པ་ཙམ་ཡིན་ནོ། །དེས་ཕྱོགས་ཉིད་མི་འགལ་ཏེ་སྒྲས་བསྟན་པར་བྱ་བ་ཡོད་པའི་ཕྱིར་རོ། །དེ་ནི་སྒྲུབ་པར་བྱེད་པའི་ཡུལ་ཞེས་བྱ་བ་ནི། སྒྲ་གང་ལས་ཡུལ་སྒྲུབ་པར་བྱེད་པ་ཡོད་པ་དེ་ལ་དེ་སྐད་ཅེས་བྱ་བའི་སྟེ། སྒྲའི་ཡུལ་ནི་སྒྲུབ་པར་བྱེད་པ་ཡིན་གྱི་ཕྱོགས་ནི་མ་ཡིན་ནོ། །ཡང་ཕྱོགས་དེ་ནིའོ། །ཕྱོགས་དེ་ནི་སྒྲུབ་པར་བྱེད་པའི་ཡུལ་ཡིན་གྱི་སྒྲའི་མ་ཡིན་ནོ་ཞེས་བྱ་བའོ། །དེ་ལྟར་ན་རེ་ཞིག་སྒྲ་ཡང་རྟོགས་པ་ཉིད་དུ་ཁས་བླངས་པས་ན་བརྗོད་པ་ཡིན་ནོ། །ད་ནི་དེ་ཉིད་མེད་དོ་ཞེས་སྟོན་པ་ནི་རྟོགས་པ་ཞེས་བྱ་བའོ། །དེ་ལྟ་མ་ཡིན་ན་སྒྲ་ལས་ཞེས་བྱ་བ་ནི་སྒྲ་ཐམས་ཅད་བཤད་པས་དོན་གཞན་དུ་བྱེད་པའི་ཕྱིར་རོ། །གལ་ཏེ་པྲ་ཏ་ཡ་ཞེས་བྱ་བ་སྤྱིའི་སྒྲ་ཡིན་པའི་ཕྱིར། ཇི་ལྟར་ཤེས་པའི་མཚན་ཉིད་ཀྱི་ཁྱད་པར་རྟོགས་ཤེ་ན། ཅིའི་ཞེས་གསུངས་སོ། །བྱེད་པ་པོ་ལ་སོགས་པའི་རྟོགས་པའི་ཕྱི་རོལ་དེའི་རྒྱུ་ཅན་ཡིན་ནའང་ངོ༌། །དེས་ན་བྱེད་པ་པོ་ལ་སོགས་པའི་རྟོགས་པ་ཕྱི་རོལ་གྱི་རྒྱུ་ཅན་མ་ཡིན་པས་ན། ཇི་ལྟར་རང་གི་ཚིག་གིས་གནོད། །འོན་ཏེ་རང་གི་རང་བཞིན་ལ་ནི་ཇི་ལྟར་ལས་
ལ་སོགས་པ་ཡོད། དེས་ན་གདོན་མི་ཟ་བར་ཕྱི་རོལ་ཁས་བླང་བར་བྱ་བའོ། །དེ་བས་ན་གནོད་པ་ཁོ་ནའོ་ཞེས་བརྗོད་པ་ནི། དཔེར་ན་བདག་ཅག་གི་ཉིད་ལས་དང་ཡིན་པ་དེ་བཞིན་ཐ་དད་པ་མེད་པའི་ཤེས་པ་ལ་ཡང་འགྱུར་རོ་ཞེས་དགོངས་པའོ། །རྟོགས་པའི་སྒྲའི་དོན་བྱེད་པ་པོ་དང་བྱེད་པ་གཉིས་ནི་ཕྱི་རོལ་ཞེས་བྱ་བ་ཕྱིའི་ལས་ཀྱི་རྒྱུ་མཚན་ཅན་མ་ཡིན་ནོ་ཞེས་བྱ་བའི་དོན་ཏོ། །ངེད་ཅེས་བྱ་བ་བདག་ཅག་གི་འཛིན་པར་བྱེད་པའི་དངོས་པོ་གྲུབ་སྟེ། གང་གི་ཕྱིར་འཛིན་པར་བྱེད་པ་ནི་དངོས་པོ་གཞན་ཁོ་ན་ཡིན་པའི་ཕྱིར་རོ། །དེ་ལ་ཡིད་དང་ཕྱི་རོལ་ཡང་གཟུང་བར་འགྱུར་རོ་ཞེས་བསམས་པའོ། །རྟོགས་པ་ལ་ལྟོས་པར་ཞེས་བྱ་བ་ནི་བཤད་པ་ལ་མ་ལྟོས་པར་རོ། །འོ་ན་ཇི་ལྟར་དངོས་པོ་འགྲུབ་སྙམ་ན་རྣམ་པར་དཔྱོད་པའི་ཞེས་གསུངས་སོ། །རིག་པ་ལས་འཇིག་རྟེན་གཞན་དུ་ཁས་བླངས་ནས་བརྗོད་པར་ཟད་ཀྱི་དེ་ནི་མ་ཡིན་ནོ་ཞེས་བརྗོད་པ་ནི། རིག་པ་ལས་ནི་ཞེས་བྱ་བའོ། །རིག་པ་ལས་མ་གཏོགས་པའི་འཇིག་རྟེན་མ་གྲུབ་ན། དེ་ཇི་ལྟར་མ་གྲུབ་པའི་འཇིག་རྟེན་དེས་དོན་གྲུབ། འོན་ཏེ་རིག་པ་ཉིད་འཇིག་རྟེན་ཡིན་པ་དེས་ན་དོན་འགྲུབ་པར་འགྱུར་རོ་སྙམ་ན་རིག་པ་ཞེས་གསུངས་སོ། །ཡང་ན་འཇིག་རྟེན་རིག་པ་ལས་གཞན་ཡིན་ནོ། །དེ་ལྟ་ཡང་འཇིག་རྟེན་དེས་ཀྱང་རིག་པ་ཉིད་ཀྱི་སྒོ་ནས་དོན་རྣམ་པར་གཞག་པར་བྱ་བ་ཡིན་ན། རིག་པ་ཡང་དམིགས་པ་མེད་པ་དེས་ན། ཇི་ལྟར་དོན་འགྲུབ་ཅེས་སྟོན་པ་ནི་གལ་ཏེ་ཞེས་བྱ་བའོ། །གང་ཡང་ཞེས་བྱ་བ་ལ་སོགས་པ་ཡང༌། ཤེས་པ་ཕྱོགས་སུ་བྱེད་པ་ན། དམིགས་པ་དང་བཅས་པའམ་དམིགས་པ་མེད་པ་ཞིག་བྱེད་པ་དེ་ལ་དམིགས་པ་དང་བཅས་པ་དེ་ཁས་བླངས་ནས་གལ་ཏེ་ཕྱོགས་སུ་བྱེད་ན་ནི། དེའི་ཚེ་དམིགས་པ་མེད་པར་སྨྲ་བ་ཁྱེད་ཀྱིས་ཁས་བླངས་པ་ལ་གནོད་པར་འགྱུར་ལ། ཆོས་ཅན་གྱི་ཁྱད་པར་མ་གྲུབ་པར་ཡང་འགྱུར་རོ། །དམིགས་པ་དང་བཅས་པ་ཉིད་ནི་ཆོས་ཅན་གྱི་ཁྱད་པར་ཡིན་ལ། དེ་ཡང་ཁྱེད་ཅག་སངས་རྒྱས་པ་ལ་གྲུབ་པ་མེད་དོ། །ལྷ་མིན་པ་ཞེས་བྱ་བ་དམིགས་པ་མེད་པའི་ཤེས་པ་ཕྱོགས་སུ་བྱེད་པ་ནི་ཁྱད་པར་དམིགས་པ་མེད་པ་ཉིད་ངེས་ལ་རབ་ཏུ་མ་གྲུབ་པོ། །དངོས་པོ་གཞན་རྟོགས་པར་བྱེད་པ་དམིགས་པར་བྱེད་པའི་རྟོགས་པ་གང་ཡིན་པ་དེའི་ཁྱད་པར་ཅན་དམིགས་པ་དང་བཅས་པ་ཉིད་
ཀྱིས་ཁྱད་པར་དུ་བྱ་བ་ནི། ཕྱོགས་ནི་ཁྱེད་ལ་མ་གྲུབ་པ་གཞན་དུ་གྱུར་བ་ཞེས་བྱ་བ་ཇི་སྐད་བརྗོད་པ་ལས་བཟློག་པ་ནི་དེད་པའོ། །དེ་བཞིན་དུ་ཞེས་བྱ་བ་ནི་སུན་འབྱིན་པ་གཞན་སྟོན་པའི་བདག་གི་ཆོས་སུ་གྱུར་པའི་ཤེས་པ་ཕྱོགས་སུ་བྱེད་དམ་རང་རྒྱུད་པ་གལ་ཏེ་བདག་གི་ཆོས་ཡིན་ན་དེའི་ཚེ་མ་གྲུབ་སྟེ། སངས་རྒྱས་པའི་ལྟ་བ་ལ་བདག་ཉིད་མེད་པའི་ཕྱིར་རོ། །དེ་སྟེ་རང་རྒྱུད་པ་ཡིན་ནོ། །དེའི་ཚེ་བདག་ཅག་ལ་མ་གྲུབ་སྟེ། ཤེས་པ་རང་རྒྱུད་པ་ནི་ངེད་ཀྱིས་ཁས་བླངས་པའི་ཕྱིར་རོ། །འོན་ཏེ་ཁྱད་པར་རྣམ་པར་མ་དཔྱད་པའི་རྟོགས་པ་ཙམ་གཏན་ཚིགས་སུ་བྱེད་དོ་ཞེ་ན། བརྗོད་པ་ནི་རྟོགས་པ་ཙམ་ནི་ཞེས་བྱ་བའོ། །ཚིག་ལེའུར་བྱས་པ་གཉིས་པོ་འདི་ཉིད་རིམ་པ་ཇི་ལྟ་བ་བཞིན་འཆད་པ་ནི་འདི་ལྟར་ཞེས་བྱ་བའོ། །འདི་འགོག་པ་ནི་དེ་ནི་རྣམ་པ་ཅི་ཞིག་ལྟར་ཞེས་བྱ་བའོ། །རྩོད་པའི་གཞིར་གྱུར་པ་དམིགས་པ་མེད་པའོ། །དེའི་ཚེ་སྒྲུབ་པར་བྱེད་པ་ཤེས་པ་ཉིད་ཉེ་བར་འགོད་པས་ཅི་ཞིག་སྒྲུབ་པ་སྟེ། དོན་མེད་པའི་ཕྱིར་ཅི་ཡང་སྒྲུབ་པ་མ་ཡིན་ནོ། །དེ་ཞེས་བྱ་བ་དམིགས་པ་ཐ་དད་པ་མེད་པ་དེ་མ་གྲུབ་པའི་སྒོ་ནས་ཁྱད་པར་ཅན་རྟོགས་པ་མ་གྲུབ་པས་གང་ཡིན་པ་དེ་བརྗོད་པའི་དོན་དུ་ཁྱེད་ཀྱིས་བརྗོད་པ་གང་ཡིན་པ་དམིགས་པ་མེད་པའི་མཚན་ཉིད་ཀྱི་ཆོས་དེ་ཉིད་ནི་ཁྱེད་དང་ལྷན་ཅིག་རྩོད་པའི་གཞིར་གྱུར་པ་བདག་ཅག་གི་བསྒྲུབ་པར་བྱ་བ་ཡིན་ནོ། །དམིགས་པ་ཐ་དད་པ་མེད་པ་དེས་ནའོ། །དཔེ་ལ་དོན་ནི་གྲུབ་ན་ཞེས་བྱ་བ་ནི་འཇིག་པའོ། །ཕྱོགས་ཀྱི་སྒྲ་ནི་ཁྱད་པར་གྲུབ་པ་ཉིད་དུ་མི་འཐད་དོ། །སྒྲ་ལམ་གྲུབ་པའི་མི་རྟག་པ་ཉིད་བསྒྲུབ་པར་བྱ་བ་ཡིན་པའི་ཕྱིར་རོ། །འོན་ཏེ་དཔེར་ན་འཇིག་པ་མ་གྲུབ་ན་དེའི་ཚེ་གཏན་ཚིགས་སྐྱོན་ཅན་དུ་གྱུར་གྱི་ཕྱོགས་ནི་མ་ཡིན་ནོ། །དམ་པ་ཉིད་དམ་ཞེས་བྱ་བ་ནི་དཔེ་ལ་བསྒྲུབ་བྱ་མེད་པར་ཁྱབ་པ་འཛིན་པ་མི་རུང་བའི་ཕྱིར་ཏེ། ཐུན་མོང་མ་ཡིན་པའི་མ་ངེས་པ་བཞིན་ནོ། །འགལ་བ་ནི་གང་གི་ཚེ་དཔེ་ལ་མེད་ཅིང་མི་མཐུན་པའི་ཕྱོགས་བསྒྲུབ་པར་བྱ་བ་ལ་བཟློག་པས་ཁྱབ་པར་ཡང་མཐོང་བ་དེའི་ཚེ་འགལ་བར་འགྱུར་བ་ཡིན་ནོ། །དེ་ཉིད་ཀྱི་ཕྱིར་ཞེས་བྱ་བ་ནི་ཕྱོགས་ལ་མ་གྲུབ་པ་ཉིད་ཀྱི་ཕྱིར་རོ། །སྒྲ་དོན་ཞེས་བྱ་བ་ནི་ཇི་ལྟར་གཞན་སྤྱི་སྨྲ་བ་རྣམ་རིག་ཙམ་གྱི་རང་བཞིན་གྱིས་ཆོས་ཅན་ཉིད་དུ་ངེས་པ་རྟོགས་
པ་དེ་ལྟའང་སྟེ། རྣམ་པ་དེས་ཀྱང་ཁྱེད་སངས་རྒྱས་པ་ལ་གྲུབ་པ་མེད་དོ། །རྒོལ་བ་སངས་རྒྱས་པ་དེས་ནི་ཕན་རོལ་གྱི་རྒོལ་བས་ཆོས་ཅན་ལ་སོགས་པ་རྣམ་པར་རྟོག་པ་ཡིན་ན་ནི་ཕྱིར་བཟློག་པར་མི་ནུས་སོ་ཞེས་བྱ་བའོ། །ཁྱད་པར་དམིགས་པ་མེད་པ་ཉིད་རབ་ཏུ་མ་གྲུབ་པར་འགྱུར་ཏེ། གང་གི་ཕྱིར་དཔེ་མ་གྲུབ་པ་ཉིད་ཡིན་པས་སོ། །ཅི་སྟེ་ཞེས་བྱ་བ་ལ་སོགས་པས་སངས་རྒྱས་པའི་དོགས་པ་བསུ་ནས། ཕ་རོལ་པོ་ཉིད་བརྗོད་པ་ནི་གལ་ཏེ་ཞེས་བྱ་བའོ། །འོན་ཏེ་བློ་ལ་ཞེས་བྱ་བ་ལ་སོགས་པས་སངས་རྒྱས་པའི་དོགས་པ་བསུ་ནས་དེ་ཉིད་ཀྱི་ལན་འདེབས་པ་ནི། རང་གི་ཞེས་བྱ་བ་སྟེ། རང་གི་རྣམ་པ་ལ་དམིགས་པས་སངས་རྒྱས་པ་ལ་ཁས་བླངས་པའི་ཕྱིར་རོ། །དེ་མེད་པར་ནི་ཞེས་བྱ་བ་རང་གི་རྣམ་པ་མེད་པར་ནི་འགལ་བ་ཡིན་ནོ། །གཟུང་བ་མེད་པར་གཟུང་བའི་རྣམ་པ་མེད་པའོ། །དེ་ནི་ཁྱེད་སངས་རྒྱས་པ་འདོད་པ་མ་ཡིན་ནོ། །དེ་ལ་ཞེས་བྱ་བ་ནི་དེ་ལྟར་གྱུར་དང་ངོ༌། །གཟུང་བདག་ཉིད་ཅེས་བྱ་བ་ནི། གཟུང་བའི་རྣམ་པ་དམིགས་པར་འགྱུར་བ་ཡིན་ནོ། །དེས་ན་གང་གི་རྣམ་པ་ཅན་གྱི་ཤེས་པ་དེ་ལ་དམིགས་པ་བཟློག་པར་འགྱུར། དེ་ལ་སངས་རྒྱས་པ་སུན་འབྱིན་པ་ནི་ཅི་སྟེ་ཞེས་བྱ་བའོ། །ཕྱིའི་དམིགས་པ་མེད་པར་སྒྲུབ་ན་ཡང་གལ་ཏེ་ཕྱི་རོལ་ལོ་ཞེས་བྱ་བའི་རྣམ་པ་འདིས་འཛིན་པ་མེད་ན། དེའི་ཚེ་ཀ་བ་ལ་སོགས་པ་ལ་ཕྱི་རོལ་ལོ་སྙམ་པའི་བློ་དེ་མེད་པར་འགྱུར་ཏེ། ཕྱི་རོལ་ལོ་སྙམ་པའི་ཐུན་མོང་མ་ཡིན་པ་ཡུལ་དུ་བྱ་བར་མི་ནུས་པ་མ་ཡིན་ནོ། །ཕྱི་རོལ་ལོ་སྙམ་པའི་བློར་འགྱུར་བ་ཡང་ཡིན་ཏེ་དེས་ན་ཕྱི་རོལ་ཡོད་པ་ཁོ་ནའོ། །ཁོ་ན་གཞི་མཐུན་པ་ཉིད་ཀྱིས་ཕྱི་རོལ་གྱི་བུམ་པ་ཞེས་བྱ་བ་རྟོགས་པར་མི་འགྱུར་རོ་སྙམ་ན་དེ་དང་ཞེས་བྱ་བའོ། །ཡང་དོགས་པ་བསུ་བ་ནི་འོན་ཏེ་ཞེས་བྱ་བའོ། །དེའི་ཚེ་ཀ་བ་རིག་པ་མཐོང་བའི་ཕྱིར་ན། དེ་དང་ཞེས་བྱ་བ་མཐོང་བ་དང་འགལ་བར་ཐལ་ལོ། །ཟླ་བ་གཉིས་ལ་སོགས་པ་ཡང་ཁ་དོག་མཐོང་བ་མཚུངས་པ་ཞེས་བྱ་བའོ། །དེས་ན་ཇི་ལྟར་དེ་ལྟ་བུའི་དངོས་པོ་གཉིས་མཐོང་ཡང་དངོས་པོ་དེ་ལྟ་མ་ཡིན་པ་དེ་བཞིན་དུ་ཀ་བ་ལ་སོགས་པ་ཡིན་ནོ་ཞེས་བསམས་པའོ། །དེ་ལྟར་སངས་རྒྱས་པའི་དོགས་པ་བསུ་ནས་སུན་འབྱིན་པ་ནི་དབང་པོ་ཞེས་བྱ་བའོ། །དེར་ནི་ཟླ་བ་
གཉིས་ཀྱི་ཤེས་པ་ལའོ། །ཡང་ཇི་ལྟར་ན་དབང་པོ་དང་མ་ཕྲད་པའི་དོན་དབང་པོའི་བློས་གཟུང་ངོ་ཞེས་བྱ་བར་ཤེས་སྙམ་ན། འདི་ནི་ཞེས་བྱ་བའོ། །ཟླ་བ་གཅིག་ལས་བཟློག་པ་ཟླ་བ་གཉིས་ལས་དམིགས་པ་མེད་པ་ཉིད་དོ། །ཕ་རོལ་པོ་འདི་ཉིད་སྟོན་པ་ནིའོ། །འབྲེལ་བ་ཡོད་པས་ནི་ཡོད་པ་འཛིན་པར་འཇོག་ལ་འབྲེལ་པ་མེད་པས་ནི་མེད་པ་འཛིན་པར་འཇོག་བ་ཡིན་གྱི། ཐམས་ཅད་དུ་ཡང་དོན་རིག་པ་ནི་ཡོད་པ་ཉིད་དོ། །ཤེས་པ་མི་དམིགས་པ་མེད་པར་སྨྲ་བ་ཁྱེད་ལ་ནི་དབང་པོ་རྣམས་མེད་པས་ན་འཛིན་པ་མེད་པས་དམིགས་པའི་རྒྱུ་མེད་པར་འགྱུར་རོ། །དེས་ན་དམིགས་པ་འགའ་ཡང་མ་མཐོང་བས་དགག་པ་ཉིད་མི་འཐད་དོ། །ཁྱེད་ཀྱིས་བརྗོད་པའི་སུན་འབྱིན་པ་ཡིན་ཏེ། བདག་ཅག་ལ་སུན་འབྱིན་པ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་མ་ཡིན་ཏེ་ཞེས་བྱ་བ་ནི་སྐབས་ལ་སོགས་པ་ཁས་མི་ལེན་ནའི་སྒྲ་ལས་ཞེས་བྱ་བ་ནི་དམིགས་པ་མེད་པའི་སྒྲ་ལས་སོ། །དོན་འདི་ཞེས་བྱ་བ་ནི་རང་གི་ཆ་ལུགས་དམིགས་པའི་མཚན་ཉིད་ཀྱི་དོན་ཏོ། །རྗེས་སུ་མཐུན་པའི་དཔེ་བརྗོད་པ་ནི་གལ་ཏེ་ཞེས་བྱ་བ་ལ་སོགས་པའོ། །དེ་ལ་ཡང་ཞེས་བྱ་བ་ནི་རབ་རིབ་ཅན་གྱིས་སྐྲ་ཤད་ཀྱི་ཤེས་པ་ལ་ཡང་སྣང་བཞིན་པའི་སྐྲ་ཤད་ལ་སོགས་པ་ཉིད་དམིགས་པ་ཡིན་པར་འགྱུར་རོ། །གལ་ཏེ་སྐྲ་ཤད་ཀྱི་ཤེས་པ་ལ་འཇིག་རྟེན་པ་མ་ཡིན་པའི་དོན་སྣང་བ་མ་ཡིན་ནམ། དེས་ན་དེ་ནི་དམིགས་པ་དང་བཅས་པ་ཡིན་ནོ་སྙམ་ན། ཐམས་ཅད་ལ་ཞེས་གསུངས་ཏེ། ཀ་བ་ལ་སོགས་པའི་ཤེས་པ་ལ་ཡང་ངོ༌། །འགའ་ལ་ཡང་ཞེས་བྱ་བ་ནི་རིབ་རིབ་ཅན་ཤེས་པ་ལ་ཡང་ངོ༌། །ཅི་སྟེ་ཞེས་བྱ་བ་ནི་དོགས་པ་བསུ་བའོ། །ཟླ་བ་གཅིག་གི་ཤེས་པ་གོ་ཇི་ལྟར་དམིགས་པ་མེད་པར་འགྱུར་ཞེ་ན། འདི་ལ་བརྗོད་པ་ནི་དེ་ཡང་ཞེས་བྱ་བའོ། །གནོད་པར་བྱ་བའི་ཕྱིར་ཟླ་བ་གཉིས་ཀྱི་ཤེས་པ་དམིགས་པ་མེད་པ་ཡིན་ནོ་ཞེ་ན་ལན་ནི་དེ་ལ་ཡང་ཞེས་བྱ་བ་སྟེ། ཟླ་བ་གཅིག་གི་ཤེས་པ་ལ་ཡང་ངོ༌། །བེམས་པོ་ནི་གསལ་བར་མི་འཐད་པའི་ཕྱིར་རོ། །འོན་ཏེ་ཞེས་བྱ་བ་ནི་དོགས་པ་བསུ་བའོ། །དེ་ལྟ་ཡིན་པ་དེས་ན་འོད་ཟེར་གྱིས་གདུངས་པ་ཉིད་དེའི་དམིགས་པ་ཡིན་ནོ་ཞེས་བྱ་བར་བསམས་པའོ། །འདི་ལ་བརྗོད་པ་ནི་རོལ་སོགས་པ་ཞེས་བྱ་བའོ། །དེ་ལ་ཞེས་བྱ་བ་ནི་བདེན་པའི་
ཆུ་ལའོ། །གཉིས་ཀ་ཞེས་བྱ་བ་ནི་བདེན་པ་དང་མི་བདེན་པའི་ཡུལ་ཅན་ནོ། །དེ་ལྟ་མ་ཡིན་པར་ཞེས་བྱ་བ་ནི་དམིགས་པ་དང་བཅས་པར་རོ། །གལ་ཏེ་སྣང་བཞིན་པས་དམིགས་པ་དང་བཅས་པར་ཡིན་ན་དེའི་ཚེ་དགོན་དུང་འོད་ཟེར་གྱིས་གདུངས་པ་མེད་པར་ཆུའི་ཤེས་པ་མི་འགྱུར་རོ། །དེས་ན་དེ་ནི་འདིའི་དམིགས་པ་ཡིན་ནོ་ཞེས་བྱ་བ་འདི་བརྗོད་ཀ་མེད་དེ། འོད་ཟེར་གྱིས་གདུངས་པའི་དགོན་དུང་བ་དེ་ནི་མི་སྣང་བའི་ཕྱིར་རོ། །ཡིན་པར་འགྱུར་ཏེ་ཞེས་བྱ་བ་ནི་དམིགས་པ་ཞེས་བྱ་བར་འབྲེལ་ཏོ། །བདེ་བའི་ཆུའི་ཡུལ་ཅན་གྱི་ཤེས་པ་ཉིད་དམིགས་པ་དང་བཅས་པར་འགྱུར་རོ་ཞེས་བསམས་པའོ། །འདི་ལ་བརྗོད་པ་ནི་མངོན་སུམ་དང་ཞེས་བྱ་བའོ། །སུན་འབྱིན་པ་གཞན་ཡང་བརྗོད་པ་ནི་འཇིག་རྟེན་གྲགས་བརྟེན་ཞེས་བྱ་བའོ། །ཅིའི་ཕྱིར་ཞེ་ན་ཐམས་ཅད་ཅེས་སྨོས་སོ། །སྨིག་རྒྱུ་བ་ལ་ཆུར་མཐོང་བ་དེས་ཐག་རིང་རབ་ཏུ་ཆུ་ཐོབ་པར་བརྒྱ་ལ་སྲིད་པར་གྱུར་ན་ཡང་དེའང་དམིགས་པ་དང་བཅས་པར་འགྱུར་རོ། །ཕ་རོལ་པོའི་འདི་སྤོང་བ་ནི་དེ་ལ་ནི་ཀུན་གྱི་ཚེ་ཐོབ་པར་ངེས་པ་ཡིན་ནོ་ཞེ་ན། འདི་ལ་བརྗོད་པ་ནི་ཐམས་ཅད་ལ་ཞེས་བྱ་བ་སྟེ། ཤེས་པ་ཐམས་ཅད་ལ་ཡང་ཀུན་གྱི་ཚེ་མཐོང་བ་ཐོབ་པ་ནི་མེད་དེ་མཐོང་བ་ནི་ཞིག་བའི་ཕྱིར་རོ། །གཞན་གྱིས་སྨྲས་པ་ནི་མཐོང་བ་མ་ཞིག་ན་ཐོབ་པར་འགྱུར་བ་ཉིད་དོ་ཞེས་བྱ་བའོ། །ལན་ནི་དེ་ནི་ཇི་ལྟར་མི་འཇིགས་འགྱུར་ཏེ། སྐད་ཅིག་མ་ཉིད་དུ་སྒྲུབ་པའི་ཕྱིར་རོ། །ངོ་ཤེས་པས་གཅིག་ཉིད་སྒྲུབ་པར་བྱེད་དོ་ཞེ་ན། ངོ་ཤེས་པ་ནི་ཞེས་སྨོས་སོ། །འགའ་ཞིག་ཏུ་སངས་རྒྱས་པས་དམིགས་པ་དང་བཅས་པས་མཐོང་བ་དེས་ན། ཇི་ལྟར་འགོག་པ་སྙམ་ན། ལྷག་མ་ནི་བཤད་པ་ཡིན་ཞེས་བྱ་བ་སྨོས་སོ། །ནིའི་སྒྲ་ནི་རིག་པ་གཞན་དུ་ཡིན་ཏེ། གང་གི་ཕྱིར་མི་མཐུན་པའི་ཕྱོགས་མ་ཤེས་པ་དེའི་ཕྱིར་ཇི་ལྟར་བསྒྲུབ་པར་བྱ་བ་ཡིན་ཞེས་བྱ་བའི་དོན་ཏོ། །སངས་རྒྱས་པས་འདོད་པའི་དམིགས་པ་མེད་པ་ཉིད་ཇི་ལྟར་བསྒྲུབ་པར་བྱ་བ་ཡིན་ཏེ། ཕྱི་རོལ་གྱི་དངོས་པོ་སྟེ་ཕྱིའི་ཡུལ་ཉིད་དུའང་དུ་མ་མ་གྲུབ་པའི་ཕྱིར་རོ། །ཇི་ལྟར་ཁྱད་པར་མ་གྲུབ་ན་གཞན་རྟོགས་པར་བྱ་བ་མི་ནུས་པའི་ཕྱིར་ཕྱོགས་མི་འགྲུབ་པ་དེ་བཞིན་དུ་ཁྱད་པར་དམིགས་པ་མེད་པ་ཉིད་ཀྱིས་ཁྱད་པར་དམིགས་པ་ཕྱི་རོལ་གྱི་ཞེས་བྱ་བ་གང་ཡིན་ཏེ། མ་གྲུབ་ན་ཡང་མི་
འགྲུབ་པར་མི་འགྱུར་རོ། །གལ་ཏེ་ཕྱི་རོལ་གྱིས་ཞེས་བྱ་བའི་ཁྱད་པར་མ་གྲུབ་མོད། དེ་ལྟ་ན་ཡང་རེ་ཞིག་སྤྱིའི་དོན་མི་གྲུབ་པོ་སྙམ་ན། ཚིག་དོན་ཞེས་གསུངས་སོ། །དེ་ནི་ཞེས་བྱ་བ་དག་གི་དོན་ནི་དེ་ཞེས་བྱ་བ་ཚིག་གི་དོན་སྔོན་དུ་འགྲོ་བ་ཅན་ཡིན་པའི་ཕྱིར་རོ། །འོན་ཏེ། དེ་དག་ནི་དོན་བསྒྲུབ་པར་བྱ་བ་ཉིད་མ་ཡིན་ནོ་སྙམ་ན། ཕྱོགས་ཀྱང་ནི་ཞེས་གསུངས་སོ། །འོ་ན་ཇི་ལྟར་ན་འགལ་བ་མི་འཁྲུལ་པ་ཅན་ཞེས་བྱ་བ་གཏན་ཚིགས་ཀྱི་སྐྱོན་དུ་འགྱུར་བ་སྙམ་ན། འགལ་བའི་ཞེས་གསུངས་སོ། །གལ་ཏེ་ཞེས་བྱ་བ་ནི་དོགས་པའོ། །ཡུལ་གཞན་ལ་སོགས་པར་མཐོང་བ་ལས་འཁྲུལ་པ་མེད་པའི་ཕྱིར་དགག་པར་མི་འཐད་དོ་ཞེས་དོགས་པའོ། །གལ་ཏེ་འཁྲུལ་པ་མེད་པར་དེ་ལྟར་ན་ཡང་འགའ་ཞིག་གིས་གཞན་དུ་བརྟགས་པས་འགོག་གོ་སྙམ་ན། ཡུལ་སོགས་ཞེས་གསུངས་སོ། །དེར་ཞེས་བྱ་བ་ནི་ཡུལ་གཞན་དུའོ། །འདི་ཞེས་བྱ་བ་ནི་ཡུལ་གཞན་དུ་མཐོང་བའོ། །རེ་ཞིག་འཁྲུལ་པ་དེ་ནི་ཚད་མས་བཟློག་པ་ཡིན་ནོ། །གང་ཞིག་ཐམས་ཅད་དུ་ཐམས་ཅད་ཀྱི་ཚེ་འཁྲུལ་པ་གང་ཡིན་བ་དེ་བདག་ཅག་གིས་བཟློག་པར་བྱ་བ་ལ་ཇི་ལྟར་མི་བཟོད་དེ། གལ་ཏེ་དེ་ཞེས་བྱ་བ་ནི་ཡུལ་ལ་སོགས་པ་གཞན་དུ་འཁྲུལ་པ་གང་ཡིན་པའོ། །གནོད་པར་བྱེད་པ་ཞེས་བྱ་བ་ནི་མེད་བ་ཉིད་དོ། །དེས་ན་འགའ་ཡང་འཁྲུལ་པར་མི་འགྱུར་རོ་ཞེས་སྟོན་པ་ནི། འདི་ལྟར་ཞེས་བྱ་བའོ། །དེ་གཅོད་དམ་ཞེས་བྱ་བ་ནི་གནོད་བྱའི་ཤེས་པའི་རང་བཞིན་ཉིད་དམ། གཟུང་ཞེས་བྱ་བ་གནོད་བྱའི་ཤེས་པའི་གཟུང་བྱ་འཇིག་པར་བྱེད་པའམ། གཟུང་བ་མེད་པ་ཞེས་པ་གནོད་བྱའི་ཤེས་པའི་གཟུང་བྱ་མེད་པར་བྱེད་པ་ཡིན་ཏེ། ཕྱོགས་གསུམ་པ་འདི་ནི་ལས་གཞན་ནི་ཡོད་པ་མ་ཡིན་ནོ། །དེ་སྐྱེས་པའམ་མ་སྐྱེས་པ་ཞེས་བྱ་བ་ནི། གནོད་བྱའི་ཤེས་པ་དང་དེའི་དམིགས་པའོ། །རང་གི་རྒྱུད་ལས་སྐྱེས་པས་གནོད་པར་བྱ་བ་སྟོན་མོད་ལ་གནོད་བྱེད་ལས་ནི་མེད་དོ་ཞེས་བྱ་བ་ནི་འདི་ནི་བྱུང་རྒྱལ་ཡིན་ཏེ། གཅིག་ཉིད་ལ་གཅིག་གི་ཚེ་ཡོད་པ་ཉིད་དང་མེད་པ་ཉིད་མི་འཐད་པའི་ཕྱིར་རོ། །འདི་ཐམས་ཅད་ཀྱིས་ཀྱང་ཧ་ཅང་ཐལ་བ་བརྗོད་ནས་གནོད་པར་བྱེད་པ་གཞན་བརྗོད་པ་ནི། དོན་དེ་ནི་རང་བཞིན་ཞེས་བྱ་
བ་རང་བཞིན་གྱིས་དངོས་པོ་དེ་མ་སྐྱེས་པ་དེའིའོ། །དེས་ན་དེ་ཉིད་རང་བཞིན་གྱིས་དམར་བའི་ཀེང་ཤུ་ཀ་བཞིན་ནོ། །དེའི་ངོ་བོས་ཀྱང་ཞེས་བྱ་བ་ནི་མ་སྐྱེས་པའི་རང་བཞིན་གྱིས་སོ། །གལ་ཏེ་མ་སྐྱེས་པ་དེའི་རང་བཞིན་གྱིས་ཕྱིས་འཇུག་པ་ཡིན་ན། དེའི་ཚེ་ཞིག་པ་ལས་སྔར་རང་བཞིན་གང་གིས་མ་སྐྱེས་པ་དེའི་རང་བཞིན་དུ་འགྱུར་རོ། །འོན་ཏེ་སྔར་དེའི་རང་བཞིན་ཅན་ཡིན་པ་དེ་ཉིད་ན་དེའི་ཚེ་དེའི་ངོ་བོར་ཞེས་སྦྱར་རོ། །འོན་ཏེ་རང་བཞིན་དེ་ནི་སྔ་མ་ཁོ་ནར་སྐྱེས་པ་དེས་ན་ཕྱིས་ནི་འཇིག་པ་ཡིན་ནོ་སྙམ་ན་བརྗོད་པ། གང་དེ་རང་བཞིན་དེ་སྔ་མ་ཁོ་ནར་ཡིན་ནོ། །དེའི་ཚེ་ཕྱིས་དེའི་རང་བཞིན་མེད་པས་ན་རང་ཉིད་མེད་པར་འཇིག་པར་བྱེད་པས་ཅི་བྱ། ཕྱིས་འཇིག་པ་ཡིན་ནོ་ཞེས་བྱ་བའི་སྐབས་ཀྱིས་སྔར་འཇིག་པ་ཡང་འདོད་པ་ཡིན་པས་རྣམ་པར་རྟོག་པ་དེ་ལ་བརྗོད་པ་ནི། འདི་ནི་ཞེས་བྱ་བ་སྟེ། རང་བཞིན་འཇིག་པ་ནི་སྔ་མ་ཁོ་ན་ཡིན་གྱི་ཕྱིས་ནི་མ་ཡིན་ནོ་ཞེ་ན། འདི་ལ་བརྗོད་པ་ནི་དངོས་པོ་དེ་ནི་རང་གི་རྒྱུ་ཉིད་ལས་རང་བཞིན་དེ་ལྟ་བུར་བྱུང་བར་འགྱུར་བ་ཡིན་ཏེ། དེ་ལྟ་ཡང་འཇིག་པར་བྱེད་པས་གཞན་ཅི་བྱར་ཡོད། ཉེས་པ་འདི་ནི་གནོད་བྱའི་ཤེས་བྱའི་ཡུལ་འཇིག་པ་ལ་ཡང་མཚུངས་སོ། །དེ་ཉིད་སྟོན་པ་ནི་འདི་ལྟར་ཞེས་བྱ་པའོ། །ཇི་ལྟར་མ་སྐྱེས་པ་དེ་ལྟར་ནི་འཇིག་ པ་མ་ཡིན་ཏེ། དོན་མེད་དགོས ་པའི་ཕྱིར་རོ། །ཇི་ལྟར་སྐྱེས་པ་དེ་ལྟར་ཡང་མ་ཡིན་ཏེ་མི་ནུས་པའི་ཕྱིར་རོ། །དེས་ན་འཇིག་པའི་མཚན་ཉིད་འདི་ཚད་མ་རྟོགས་པའི་ཕྱིར། སེམས་དང་ལྡན་པ་རྟོགས་པ་དང་བཅས་པ་དག་རྟོག་པ་ཙམ་དུ་ཡང་ཇི་ལྟར་འགྱུར། རྣམ་པར་རྟོག་པ་གསུམ་པ་འགོད་པ་ནི་འོན་ཏེ་ཞེས་བྱ་བའོ། །དངོས་དེ་ཞེས་བྱ་བ་ནི་གནོད་བྱའི་ནི་ཤེས་པའི་དམིགས་པའོ། །དེ་ལྟ་ཡིན་མོད་ཀྱི་ཅི་ཉེས་སྙམ་ན་དེའི་ཚེ་ཞེས་བྱ་བ་ནི་སྟེ། མ་མཐོང་བའི་དུས་ན་དོན་གྱི་དངོས་པོ་མ་གྲུབ་པར་གྱུར་ན། དེའི་མེད་པ་ནི་འདི་ཡིན་ནོ་ཞེས་དངོས་པོ་མེད་པ་ཁྱད་པར་དང་བཅས་པར་མི་འགྱུར་རོ། །ཁྱབ་པར་མ་གྲུབ་མོད། རེ་ཞིག་དངོས་པོ་མེད་པ་ནི་རྟོགས་པ་ཁོ་ནའོ་ཞེ་ན། ཁྱད་པར་ཞེས་བྱ་བ་དོན་རབ་ཏུ་མ་གྲུབ་ན་ཁྱེད་ལ་རྟོགས་ནུས་ཏེ། དངོས་པོ་མེད་པ་ཤེས་པའི་ནུས་པ་ཇི་ལྟར་ཡོད། དངོས་པོ་མེད་པ་ནི་དངོས་པོ་མ་རྟོགས་པས་རྟོགས་ནུས་པ་མ་ཡིན་ནོ། །འོན་ཏེ་ཁྱད་པར་གྱིས་དངོས་པོ་གཞན་དུ་གྲུབ་པ་ཉིད་དགག་པའི་གནས་
འདིར་ནི་རྗེས་སུ་བརྗོད་པ་ཙམ་ཞིག་བྱེད་པ་ཡིན་ནོ། །དེས་ན་ཁྱད་པར་གཞན་དུ་གྲུབ་པའི་ཕྱིར། དངོས་པོ་མེད་པ་ཁྱད་པར་དང་བཅས་པ་ཁོ་ནར་རྟོགས་སོ་སྙམ་ན། འདི་ལ་བརྗོད་པ་ནི་ཁྱད་པར་དེ་ནི་གཞན་དེར་དངོས་པོའི་རང་བཞིན་དེ་ཉིད་དུ་ཁོ་ནར་རྟོགས་ཏེ། དེས་ན་དེ་ནི་དངོས་པོ་མེད་པའི་ཁྱད་པར་ཉིད་དུ་མ་དམིགས་ཏེ། དངོས་པོ་མེད་པ་ཁྱད་པར་དུ་བྱ་བ་མ་དམིགས་པའི་ཕྱིར་རོ། །དེ་ཉིད་ཅེས་ནི་གཞན་དུ་དམིགས་པ་ཉིད་དོ། །དེ་ལྟ་བུ་ཉིད་ཅེས་བྱ་བ་ནི་རང་བཞིན་གང་དུ་དེ་སྔར་རྟོགས་པའི་རང་བཞིན་དེ་ཉིད་དུ་གལ་ཏེ་དགག་པའི་དུས་ན་ཡང་རྟོགས་ན་དེའི་ཚེ་དོན་དེའི་དགག་པ་ལ་དོན་ཅི་ཡོད། གལ་ཏེ་ཞེས་བྱ་བ་ནི་དོགས་པའོ། །དེར་ནི་ཞེས་བྱ་བ་དགག་པའི་གནས་པའོ། །དྲན་པ་ཞེས་བྱ་བ་ནི་ལན་ནོ། །གལ་ཏེ་དྲན་པས་རང་བཞིན་འཛིན་ན། དེའི་རང་བཞིན་ཡོད་པ་ཡིན་པའི་ཕྱིར་ཇི་ལྟར་དགག་པ་དེ་སྟེ་མི་འཛིན་ན་དེའི་ཚེ་དོན་དངོས་པོ་མེད་པའི་ཁྱད་པར་དུ་མི་འགྱུར་རོ། །སྣང་བར་འགྱུར་བ་ཞེས་བྱ་བ་ནི་ལྷག་པར་ཞེན་པར་འགྱུར་རོ། །འབྱུང་བར་འགྱུར་བ་དང་ལྷན་ཅིག་གཅིག་ཉིད་དུ་སྒྲོ་བཏགས་ནས་དེ་ལ་དེའི་བར་དུ་སྟེ། དེའི་དབུས་སུ་གནོད་པར་བྱེད་པའི་ཤེས་རབ་མངོན་པར་འདོད་པ་ཞུགས་པར་གྱུར་ན། གནོད་པར་བྱེད་པ་ཉིད་དུ་རྣམ་པར་གཞག་པ་བྱེད་དོ། །འདི་ཉིད་བརྗོད་པ་ནི་དོན་འདི་འཆད་པ་མེད་པ་ཁོ་ནར་གྱུར་པ་ལས་ཆད་པ་ཡང་ཡིན་ཏེ། དེས་ན་འདི་ནི་གནོད་བྱེད་ཡིན་ནོ། །རྒྱུ་དེའི་ཕྱིར་ན་ཆད་པའི་རྒྱུ་ནི་གནོད་པར་བྱེད་པའི་ཤེས་པ་ཡིན་ནོ། །རྒྱུ་དེས་ན་བར་དུ་ཞུགས་པ་དེ་ནི་གནོད་བྱེད་ཡིན་ནོ། །དམིགས་པའི་དངོས་པོ་ཉིད་སྦྱོར་བར་བྱེད་པ་ནི་འདི་ལྟར་ཞེས་བྱ་བའོ། །ལྐོག་ཏུ་གྱུར་པ་བུམ་པ་ལ་སོགས་པའི་དོན་ལ་འབྱུང་བར་འགྱུར་བ་ཉིད་དུ་སྒྲོ་བཏགས་པ་ནས་སོ། །དེའི་རྣམ་པ་ཅན་ཞེས་བྱ་བ་ནི། བུམ་པའི་རྣམ་པ་ཅན་དུ་ཤེས་པ་སྐྱེས་སོ། །དེ་ཞེས་བུམ་པ་དེ་ལ་ནི་དམིགས་པ་ཉིད་དུ་འཇོག་པ་ཡིན་ནོ། །གལ་ཏེ་གསལ་བཞིན་པའི་དོན་འདི་མེད་པར་འགྱུར་ན། རབ་ཏུ་གསལ་བའི་རྣམ་པར་ཤེས་པ་འབའ་ཞིག་ནི་ཡོངས་སུ་འཁྱམ་པར་འགྱུར་ཏེ། བརྟན་པ་མ་ཡིན་པར་འགྱུར་རོ། །ཡོངས་སུ་འཁྱམ་པའི་རྣམ་པ་ཉིད་བརྗོད་པ་ནི་ཅི་འདིར་ཞེས་བྱ་བའོ། །དོན་གྱི་རང་བཞིན་ཡོངས་སུ་མཐོང་བ་ན་ནི་བརྟན་པར་
འགྱུར་ཏེ། དཔེར་ན་སྐྱེས་བུ་འཁྱམ་པོ་སྒྲམ་དུ་ཕྱིན་ནས་བརྟན་པར་འགྱུར་བ་བཞིན་ནོ། །རྒྱུ་དེས་ན་བུམ་པ་ལ་སོགས་པ་དེ་ནི་དམིགས་པ་ཡིན་ནོ་ཞེས་རྣམ་པར་གཞག་པ་ཡིན་ནོ། །འཁྱམ་པ་ཉིད་ཡོངས་སུ་གཏོད་པ་གང་ཡིན་པ་དེའི་རྒྱུ་མཚན་གྱིས་དོན་གྱི་དམིགས་པ་ཉིད་དུ་རྣམ་པར་འཇོག་གོ །འདི་ལ་གཞན་གྱིས་གལ་ཏེ་ཞེས་སྨྲས་ཏེ། དེ་ལྟར་ཐ་སྙད་བྱེད་པའི་དེ་ཁོ་ན་ཉིད་ཅི་སྟེ་མ་ཡིན་སྙམ་ན། མ་ཡིན་ཞེས་གསུངས་ཏེ་བཤད་ཟིན་པའི་མཚན་ཉིད་ཅན་གྱི་དོན་འདི་ནི་མངོན་སུམ་དང༌། རྗེས་དཔག་དག་གིས་མ་རྟོགས་པའི་རྒྱུ་ཡིན་ན། དངོས་པོ་ཉིད་མ་ཡིན་ནོ། །ཅིའི་ཕྱིར་ཞེ་ན་ཞེས་བྱ་བ་ནི་གཞན་གྱིས་དྲི་བའོ། །དེ་ལ་ཞེས་བྱ་བ་ལྐོག་ཏུ་གྱུར་པའི་དམིགས་པའོ། །དངོས་པོ་དུ་བ་ལ་སོགས་པ་མེ་དང་འབྲེལ་པ་འགྲུབ་ཅིང་དངོས་པོ་དེ་ལས་ནའོ། །དེའི་ཕྱིར་ཞེས་བྱ་བ་རྗེས་སུ་དཔག་པ་དངོས་པོ་གོ་བར་བྱེད་པའི་ཕྱིར་རོ། །དེ་ལས་ཞེས་བྱ་བ་ནི་མངོན་སུམ་དང་བཅས་པ་ཉིད་ལས་སོ། །དེ་ལས་ཞེས་བྱ་བ་ནི་རྗེས་སུ་དཔག་པ་ལས་སོ། །དངོས་པོ་ཞེས་བྱ་བ་ནི་ཕྱིའི་དོན་ཏོ། །མངོན་སུམ་དང་རྗེས་སུ་དཔག་པའི་ཚད་མས་ཕྱིའི་དངོས་པོའི་རང་བཞིན་ཡོངས་སུ་མ་ཤེས་པའི་རྒྱུས་ན་ཁས་བླངས་འབའ་ཞིག་ཡིན་ནོ། །སྔར་གསུངས་སོ། །རྣམ་པར་རྟོག་པ་སྔ་མ་དང་སྔ་མ་ཡོད་པའི་ཕྱིར་རོ་ཞེས་བྱ་བའི་དོན་ཏོ། །རྟོག་པ་དེ་ཞེས་བྱ་བ་རྟོག་པ་སྔ་མ་སྔ་མའི་རྗེས་སུ་འབྲངས་ནས་ཁྱད་པར་ཕྱི་རོལ་དམིགས་པ་མེད་པ་དང༌། ཁྱད་པར་ཅན་ཤེས་པ་དེ་གཉིས་ཀྱི་དངོས་པོ་ནི་དེ་ཉིད་ནི་སྔར་ངས་བསྟན་ཅིང་ཁྱེད་ཀྱིས་ཀྱང་རྟོག་པ་ཇི་ལྟར་ཞེ་ན། དངོས་པོ་དེའི་རང་བཞིན་བརྟགས་པ་སྟེ། རྣམ་པར་རྟོག་པ་གང་ཡིན་པ་དེ་མ་བྱས་པ་ཡིན་ནོ། །ཡང་ཕྱིས་རྣམ་པར་དཔྱད་ཅིང་བརྟགས་ན་ཇི་ལྟར་ན། ཕྱི་རོལ་དེ་རྣམ་པ་དེས་ན་གལ་ཏེ་རིག་པའི་མཚན་ཉིད་ཀྱིས་རྣམ་པར་དཔྱད་ནས་ཕྱི་རོལ་དེ་མེད་པ་ཉིད་དོ། །ཕྱི་རོལ་མེད་པ་འདིར་སྐྱོན་ཅི་ཡོད་དེ་མེད་པ་ཁོ་ནའོ། །འདི་ལ་གཞན་གྱིས་གལ་ཏེ་ཞེས་སྨྲས་སོ། །སྔ་ཕྱི་ཤེས་པ་བདག་ཅག་ཅེས་བྱ་བ་ནི་སྔ་ཕྱིའི་དོན་ཡོད་ཅེས་རྟོག་པ་དང་ཕྱི་རོལ་མེད་ཅེས་ཕྱིས་རྟོགས་པ་སྟེ། ཤེས་པ་དེ་དག་ཕན་ཚུན་གནོད་བྱ་གནོད་བྱེད་ཡིན་ཞེ་ན། འདི་ལ་བརྗོད་པ་ནི་རང་ཉིད་རྟོགས་ན་ཞེས་
བྱ་བའོ། །རང་ཉིད་ཁོ་ན་ནས་དང་པོ་ཕྱི་རོལ་ཡོད་དོ་ཞེས་རྟོགས་ལ། ཕྱི་ནས་དེ་མེད་དོ་ཞེས་རྟོགས་པ་འདི་ལ་སྐྱོན་ཅི་ཡོད། སྐྱེས་བུ་འགའ་ཞིག་བདག་ཉིད་ལ་གཟིགས་ནས་བརྒལ་ཞིང་བརྟག་པ་བྱེད་པ་ནི་མ་མཐོང་ངོ༌། །གང་གིས་སྔར་ཕྱི་རོལ་ཡོད་པ་ཉིད་དོ་ཞེས་རྟོགས་པ་དེའི་འཁྲུལ་པ་ཉིད་ག་ལས་ཡིན་ཞེས་ཕ་རོལ་པོས་དེ་སྐད་བརྗོད་པ་ན། བཤད་པ་བདག་ལ་ཞེས་བྱ་བའོ། །གཞན་ཡང་ཕྱི་རོལ་རྟོགས་པ་འདི་ནི་རེ་ཞིག་འཁྲུལ་པ་ཡིན་ལ། དེ་འཁྲུལ་པ་ཉིད་དུ་ངེས་པ་ན་ང་ལ་འཁྲུལ་པ་འདི་འདྲ་བ་ག་ལས་འབྱུང་ཞེས་རྒྱུའི་རྩད་བཅད་པས་ཅི་བྱ། རྣམ་པར་བརྟགས་པ་འདི་ནི་དངུལ་མ་ཡིན་ནོ་ཞེས་བྱ་བའོ། །རྒོལ་ཞིང་རྟོག་པའི་རྣམ་པར་བརྗོད་པ་ནི། ཇི་ལྟར་ངས་ཞེས་བྱ་བའོ། །དེའི་ཁྱད་པར་ནི་དངུལ་གྱི་ཁྱད་པར་ཅན་ནོ། །ཁྱད་པར་དངུལ་རབ་ཏུ་མ་གྲུབ་ན་ཡང་དངུལ་དེའི་ཁྱད་པར་ཅན་ཇི་ལྟར་ཤེས་པ་ཡིན་ཞེས་སོ། །ཇི་ལྟར་རང་ཉིད་དེ་ལྟར་མི་འགྱུར་བ་དེ་བཞིན་དུ་གཞན་ལ་གྲུབ་ན་དེ་ཁོ་ན་ལྟར་ཡིན་ནོ། །གལ་ཏེ་ཞེས་བྱ་བ་ནི་གཞན་གྱི་ལན་ནོ། །དེ་ནི་མེད་དོ་ཞེས་བྱ་བའོ། །རྒྱུ་ཡོད་པས་ན་འཁྲུལ་པ་མིན། །ཞེས་བྱ་བ་ནི་རྒྱུ་ཡོད་པ་ནི་ཞེས་བྱ་བ་ཙམ་གྱིས་ནི་འཁྲུལ་པ་མ་ཡིན་ནོ། །གང་གི་ཕྱིར་དོན་དམ་པ་པ་ལ་ཡང་རྒྱུ་ཡོད་པ་ཉིད་ཡིན་ནོ། དོན་དམ་པ་ནི་རྒྱུ་ལས་བྱུང་ཡང་འཁྲུལ་པ་ནི་མ་ཡིན་ནོ། །དེས་ན་གལ་ཏེ་རྒྱུ་དང་བཅས་པའི་ཕྱིར་འཁྲུལ་པ་ཡིན་ན། དེའི་ཚེ་བྲམ་ཟེ་ཁྱེད་ཀྱི་འདོད་པ་ནི། དོན་དམ་པ་ནི་མཚན་ཉིད་ཀྱང་ཉམས་པར་འགྱུར་ཏེ། རྒྱུ་དང་བཅས་པ་ཉིད་ཀྱིས་འཁྲུལ་པར་ཐལ་བའི་ཕྱིར་རོ། །དེ་ལྟར་ཞེས་བྱ་བ་མ་འཁྲུལ་པ་ཉིད་དུ་རྟོགས་པའི་ཕྱིར། འདི་འཁྲུལ་པ་ཡིན་ནོ་ཞེ་ན་བརྗོད་པ་འཁྲུལ་པ་ཉིད་དུ་རྟོགས་པའི་ཕྱིར་འདི་འཁྲུལ་པ་ཡིན་ནོ་ཞེས་འཁྲུལ་པ་ལ་ཡང་མཚུངས་སོ། །འཁྲུལ་པ་ནི་ཞེས་བྱ་བ་ལ་ནི་དོགས་པ་བསུ་བའོ། །གལ་ཏེ་ཕྱིའི་ཡུལ་ཅན་མ་འཁྲུལ་པར་འགྱུར་ན། དེའི་ཚེ་འདི་ཕྱི་རོལ་ལ་འཁྲུལ་པ་ཡིན་ནོ་ཞེས་འགྱུར་རོ་ཞེས་བྱ་བ་ནི་གཞན་གྱི་བསམ་པའོ། །གཞན་གྱིས་སྨྲས་པ། མ་འཁྲུལ་པ་ཞེས་ཡོད་མོད་འོན་ཀྱང་དེ་ཅི་ལྟར་རྟོགས་པར་བྱ། ཇི་ལྟར་རྟོགས་པར་མི་ནུས་སྙམ་དུ་དོགས་པ་བསུ་ནས་ཕ་རོལ་པོ་ཉིད་མི་རྟོགས་པའི་རྒྱུ་མཚན་སྨྲ་བ་ནི། འཁྲུལ་པ་ནི་ཞེས་བྱ་བའོ། །ཕྱི་རོལ་གྱི་ཡུལ་
ཅན་མ་འཁྲུལ་པ་མེད་པས་མ་འཁྲུལ་པ་ཡང་རྟོགས་པར་མི་ནུས་སོ་ཞེས་བསམས་པའོ། །འདི་ལ་བརྗོད་པ་ནི་གཞན་ལ་ཡང་ཞེས་བྱ་བའོ། །མཚུངས་པ་ཉིད་བསྒྲུབ་པ་ནི་མ་འཁྲུལ་བ་ཡང་ཞེས་བྱ་བའོ། །དེ་ཉིད་དེ་ལྟར་ཞེས་བྱ་བ་ནི་བསྒྲུབ་པའི་ཚུལ་དུ་ཁས་ལེན་པའོ། །དེ་ལ་ནི་ཕྱི་རོལ་ལའོ།། གལ་ཏེ་རྒྱུ་བཅས་ཕྱིར་འཁྲུལ་ན། །ཁྱེད་ཀྱི་འདོད་པ་ལས་ཉམས་འགྱུར། །ཞེས་བྱ་བ་འདི་ལ་ཕ་རོལ་གྱིས་ལན་བརྗོད་པ་ནི་འོན་ཏེ་ཞེས་བྱ་བའོ། །དེ་ལྟ་ན་ནི་འོ་ན་ཞེས་བྱ་བ་ནི་ལན་ནོ། །ཁྱད་པར་དང་བཅས་པ་ཉིད་བརྗོད་པ་ནི། འཁྲུལ་པའི་རྒྱུ་ནི་ཡོད་པ་ལ། །ཞེས་བྱ་བའོ། །འཁྲུལ་པའི་རང་བཞིན་ཉིད་ཤེས་པར་འགྱུར་ན། འཁྲུལ་པའི་རྒྱུ་རྒྱུ་དེས་ན་ཡང་འཁྲུལ་པར་ཤེས་པར་བྱ་བ་ཡིན་ཏེ། དེས་ན་ཕན་ཚུན་བརྟེན་པ་ཉིད་གཅིག་ལ་ཡང་གནས་པ་མེད་པས་ན། གནས་པ་མེད་དོ་ཞེས་བརྗོད་དོ། །གནས་པ་མེད་དོ་རྒྱུ་མེད་པར་ཇི་ལྟར་འཁྲུལ་སྙམ་ན། རང་གི་ངོ་བོ་ཞེས་གསུངས་སོ། །ད་ནི་རང་གི་ངོ་བོ་དེ་ཞེས་རྒྱུ་འདྲི་བའོ། །འདིས་ཞེས་བྱ་བ་ནི་གྲུབ་པའི་མཐའོ། །འདི་ལ་ཕ་རོལ་གྱིས་འཁྲུལ་པའི་ཞེས་སྨྲས་སོ། །ཕྱི་རོལ་ཡོད་དོ་ཞེས་འཁྲུལ་པ་གང་ཡིན་པ་དེ་རང་གི་ངོ་བོས་རྟོགས་པ་ཕྱི་རོལ་མེད་དོ་སྙམ་དུ་རྟོགས་པ་དེ་ཡང་འཁྲུལ་པ་མ་ཡིན་ནོ་ཞེས་ག་ལས་ངེས། དེ་ཡང་འཁྲུལ་པར་འགྱུར་རོ་ཞེས་བསམས་པའོ། །འདི་ལ་ལན་ནི་གལ་ཏེ་ཞེས་བྱ་བའོ། །ཕྱི་རོལ་ཡོད་དོ་ཞེས་རྟོགས་པ་འདི་འཁྲུལ་པར་རྟོགས་པར་འདོད་པ་དེ་ལྟར་ཕྱི་རོལ་མེད་དོ་སྙམ་པའི་རྟོགས་པ་དེ་ཡང་འཁྲུལ་པ་ཉིད་དུ་རྟོགས་ནས། དེའི་ཚེ་འཁྲུལ་པ་ཡིན་མོད། ཅི་ཞིག་སྐྱོན་ཡོད་པ་ཉིད་དེ། འདི་ལྟར་གལ་ཏེ་ཕྱི་རོལ་མེད་དོ་སྙམ་པའི་རྟོགས་པ་འཁྲུལ་པར་འགྱུར་ན། དེའི་ཚེ་ཕྱི་རོལ་ཡོད་དོ་ཞེས་བྱ་བའི་རྟོགས་པ་སྔ་མ་མ་འཁྲུལ་བར་འགྱུར་རོ་ཞེ་ན་འདི་ལ་ལན་ནི་དེ་ཡང་ཞེས་བྱ་བའོ། །དང་པོ་དངུལ་དུ་རྟོགས་པ་ལ་དངུལ་དུ་རྟོགས་པ་དེ་ལོག་པ་ན་ཉ་ཕྱིས་སུ་རྟོགས་པར་འགྱུར་རོ། །གལ་ཏེ་ལྡོག་པའི་རྒྱུ་གཞན་ཡོད་ན་ཉ་ཕྱིས་སུ་རྟོགས་པ་དེ་ཡང་ལྡོག་པ་དེའི་ཚེ་དངུལ་དུ་འཛིན་པའི་རྟོགས་པ་དེ་སླར་བདེན་པར་ཇི་ལྟར་འགྱུར། གཉི་ག་དག་ཀྱང་མེད་དོ་ཞེས། །རྟོགས་པས་ཡང་མཐོང་མེད་དམ་ཅི། །དངུལ་དང་ཉ་ཕྱིས་གཉི་ག་ཡང་དེ་ན་མེད་དོ་ཞེས་བྱ་བ་ནི་མཐོང་བ་ཁོ་ནའོ། །གཞན་གྱིས་གལ་ཏེ་
ཞེས་སྨྲས་སོ། །བདེན་པ་དེ་ལ་བསྟན་པ་ཡོད་པའི་ཕྱིར་གཞན་མེད་པ་ལ་བཟློག་པ་འཁྲུལ་པར་འགྱུར་བ་ཡིན་ནོ། །འདི་ཉིད་གཞུང་འཛུགས་པ་ནི་གནོད་བྱེད་ཅེས་བྱ་བའོ། །གལ་ཏེ་དམིགས་པ་དང་བཅས་པ་དེ་ལས་བཟློག་པ་བདེན་པ་ཉིད་བྱེད་པའི་གནོད་པར་བྱེད་པ་མེད་པ་ཉིད་ཡིན་ན་དེའི་ཚེ་བཟློག་པར་དམིགས་པ་དང་བཅས་པ་ཉིད་མེད་པའི་ངོ་བོར་གང་གིས་རྟོགས་པར་བྱེད་ཅེ་ན། གྲུབ་པའི་མཐའ་ལས་འདི་ལ་ཞེས་གསུངས་སོ། །གལ་ཏེ་བཟློག་པ་རིག་གམ་དེ་ལྟར་མ་ཡིན་ཡང་རུང་སྟེ། དེ་ལྟ་ན་ཡང་དངོས་པོ་མེད་པ་ངེས་པར་ཇི་ལྟར་འགྱུར། བུམ་པའི་ཤེས་པ་ཡོད་པ་ན་གང་གི་ཚེ་སྣམ་བུའི་ཤེས་པ་སྐྱེས་པ་དེའི་ཚེ་ཡང་བུམ་པ་མེད་པར་ངེས་པར་འགྱུར་རོ། །འོན་ཏེ་མེད་པར་ངེས་པ་མི་དམིགས་པས་བྱས་པ་ཡིན་ན་འོ་ན་གནོད་པར་བྱེད་པ་གཞན་གྱིས་ཅི་བྱ། ཕ་རོལ་གྱིས་སྨྲས་པ་ནི་བཟློག་པ་དམིགས་པ་གང་ཡིན་པ་དེ་ཉིད་དམིགས་པ་མི་གྲུབ་པ་ཡིན་ནོ་ཞེ་ན། དེ་ལྟ་ན་འོ་ན་རང་རིག་པ་ཙམ་དུ་འགྱུར་ཏེ། རྒྱུ་དེའི་ཕྱིར་ན་ཕྱི་རོལ་རིག་པ་མེད་པར་འགྱུར་རོ། །དེ་ནི་ཞེས་བྱ་བ་ནི་དམིགས་པའོ། །འདི་ལ་ཡང་ཞེས་བྱ་བ་ནི་དམིགས་པས་བཅས་པ་ལ་ཡང་ངོ༌། །དེ་ལྟ་མ་ཡིན་ན་ཞེས་བྱ་བ་ནི་ལྡན་པའི་དོན་བསྒྲུབ་པར་ཡིན་ན་དམིགས་པ་མེད་པ་བསྒྲུབ་བྱར་མི་འགྱུར་རོ། །གང་གིས་ཞེས་བྱ་བ་ནི་སངས་རྒྱས་པས་སོ། །ཇི་ལྟར་དེ་ཉིད་ཅེས་བྱ་བ་ནི་ལྡན་པའི་དོན་ཉིད་དོ། །གལ་ཏེ་སངས་རྒྱས་པ་ལྡན་པའི་དོན་བསྒྲུབ་བྱར་མི་འདོད་མོད། དེ་ལྟ་ཡང་རིག་པ་དེ་ཉིད་བསྒྲུབ་བྱར་འགྱུར་རོ་ཞེ་ན། འདོད་པ་ཞེས་བྱ་བའོ། །དེ་ལྟ་བུ་ཞེས་བྱ་བ་ནི་ལྡན་པའི་མེད་དེའོ། །དེ་ལྟར་རེ་ཞིག་ལྡན་པའི་དོན་མེད་པ་ཉིད་བསྒྲུབ་པར་བྱ་བ་ཡིན་ཞེས་ཁས་བླངས་ནས་བརྗོད་པ་ནི། དངོས་པོ་མེད་པ་དང་ཞེས་བྱ་བ་སྟེ། དམིགས་པའི་དངོས་པོ་མེད་པ་དང་ལྡན་པར་རོ། །གལ་ཏེ་དོན་དམ་པའི་དོན་བསྒྲུབ་པར་བྱ་བ་མ་ཡིན་ནམ། དངོས་པོ་མེད་པ་དང་ལྡན་པ་ནི་དོན་དམ་པ་མ་ཡིན་ཏེ། ཁྱད་ཀྱི་ལྟ་བ་ལ་དོན་དམ་པའི་དངོས་པོ་མེད་པའི་ཕྱིར་རོ། །དེས་ན་ཇི་ལྟར་དངོས་པོ་མེད་པ་དང་ལྡན་པ་བསྒྲུབ་བྱ་ཡིན་ནམ་སྙམ་ན་དོན་དམ་པར་ཞེས་བྱ་བའོ། །དོན་དམ་པའི་ལྡན་པའི་དོན་ཉིད་བསྒྲུབ་པར་བྱ་བ་ཡིན་ནོ་ཞེས་བྱ་བའི་དོན་འདི་ལ་ནི་ཚད་ཅི་ཡང་མེད་དོ། །གལ་ཏེ་རྟོག་པ་ལ་ཡང་
གདོན་མི་ཟ་བར་རྒྱུ་མཚན་ཅུང་ཟད་ཅིག་བརྗོད་པར་བྱ་བ་མ་ཡིན་ནམ་སྙམ་ན། རང་བཞིན་དུ་ཞེས་ཏེ་གལ་ཏེ་ཀུན་རྫོབ་དངོས་པོ་ཡིན་ན་དེའི་ཚེ་དེ་ཉིད་དེ་དངོས་པོ་ཉིད་དོ། །མིང་གཞན་གྱིས་ཞེས་བྱ་བ་ནི་བདེན་པར་མངོན་པར་ཞེན་པའོ། །སྒྲ་བཤད་པ་གསུམ་པ་ནི་དེ་ཁོ་ན་ལ་ཞེས་བྱ་བའོ། །སྣང་བའི་རང་བཞིན་ཞེས་བྱ་བ་ནི་ལྷག་པར་ཞེན་པར་བྱ་བའི་རང་བཞིན་ནོ། །དེ་ཙམ་གྱིས་ཞེས་བྱ་བའི་ཚིག་ཙམ་གྱིས་སོ། །དེ་ལ་ཇི་ལྟར་བདེན་པ་ཞེས་བརྗོད་སྙམ་ན་འཁྲུལ་པ་ལ་ཞེས་བྱ་བའོ། །དམིགས་པ་ཅན་ལ་སོགས་པ་མེད་ན་ཇི་ལྟར་འདིར་འདྲའི་འཁྲུལ་པ་ཡིན། དོགས་པ་བསུ་བ་ནི་ཡོད་དོ་ཞེ་ན་ཞེས་བྱ་བའོ། །ལན་ནི་ཟླ་བ་ལ་སོགས་པ་ཡོད་པ་ཡང་ཅི་ལྟར་འཁྲུལ་པ་ཉིད་ཡིན། དོགས་པ་ནི་གལ་ཏེ་ཞེས་བྱ་བ་སྟེ། ཟླ་བ་ཡོད་ཀྱང་དེ་ཉིད་མ་ཡིན་པར་སྣང་བས་འཁྲུལ་བ་ཡིན་ནོ་སྙམ་ན། འདི་ལ་བརྗོད་པ་ནི་དེ་མིན་ཞེས་བྱ་བ་སྟེ། དེ་ཉིད་མ་ཡིན་པར་སྣང་ན་ཇི་ལྟར་ཀུན་རྫོབ་མ་ཡིན་ཏེ། ཀུན་རྫོབ་ཉིད་དོ་ཞེས་བྱ་བའི་དོན་ཏོ། །གལ་ཏེ་དེ་ཉིད་མ་ཡིན་མེད་བདེན་པ་གོ་ཅི་ལྟར་ཡིན། ཀུན་རྫོབ་ཀྱང་ཡིན་ལ་བདེན་པ་ཡང་ཡིན་ནོ་ཞེས་བྱ་བར་ནི་འཐད་པ་མ་ཡིན་ནོ་ཞེས་འདི་ལ་བརྗོད་པ་ནི། བདེན་པར་སྣང་བ་ཞེས་བྱ་བ་སྟེ། བདེན་པ་ཉིད་དུ་ལྷག་པར་ཞེན་པའོ། །མི་བདེན་པ་ཡང་བདེན་པར་མངོན་པར་ཞེན་པར་ནི་འགྱུར་བ་ཁོ་ན་སྟེ། དེས་ན་དོན་དམ་པར་ན་ཀུན་རྫོབ་ཉིད་ཡིན་པས་གང་ཡིན་པ་དེ་ནི་ལྷག་པར་ཞེན་པ་ལ་ལྟོས་ན་བདེན་པ་ཡིན་པའི་ཕྱིར་ཉེས་པ་ཅི་ཡོད་དོ། །དེས་ན་ཕ་རོལ་པོ་དག་གིས་ཀུན་རྫོབ་ཀྱི་བདེན་པ་ཞེས་བྱ་བའི་བརྗོད་པ་འདི་སླུ་བའི་ཚིག་ཡིན་ཞེས་བརྗོད་པ་གང་ཡིན་པ་དེ་ལ་འབྲེལ་ཏོ་ཞེས་སྟོན་པ་ནི་དེས་ན་ཞེས་བྱ་བའོ། །ཇི་ལྟར་ཁ་ཆུ་ལ་མཆུའི་སྦྲང་རྩི་ཞེས་བརྗོད་པ་སླུ་བའི་ཚིག་མ་ཡིན་པ་དེ་བཞིན་དུ་ཀུན་རྫོབ་ཀྱི་བདེན་པ་ཞེས་བྱ་བའམ། བདེན་པར་སྣང་བ་ཞེས་བྱ་བ་སླུ་བའི་ཚིག་ཏུ་ཇི་ལྟར་འགྱུར། སླུ་ཚིག་མ་ཡིན་པ་དེ་ཉིད་གཞུང་འཛུགས་པ་ནི་དོན་གང་ཞིག་བདེན་པ་མ་ཡིན་པར་འགྱུར་བ་ན། བདེན་པར་སྣང་བ་ཉིད་མི་འཐད་པའི་དོན་དེའི་བདེན་པ་མ་ཡིན་པ་ཉིད་བརྗོད་པ་ནི། དེའི་ཚེ་སླུ་བ་ཅི་ཞིག་ཡོད་དེ་ཅི་ཡང་མེད་དོ། །ཅིའི་ཕྱིར་གཞན་སངས་རྒྱས་པའི་བསམ་པ་གང་ཡིན་པ་དེ་མ་ཤེས་པའི་རྒྱུས་ན། བདག་སྟོད་པ་བརྗོད་པར་འདོད་པས་ཀུན་རྫོབ་ཀྱི་བདེན་པ་ཞེས་བྱ་
བ་ལ་སོགས་པ་འདི་ནི་སངས་རྒྱས་པ་རྣམས་ཀྱི་འདྲིད་ཚིག་ཡིན་ནོ་ཞེས་བྱ་བ་ལ་སོགས་པའི་སྨྲ་བ་འབའ་ཞིག་པོ་དེ་ལས་འདྲིད་པ་གཞན་ནི་ཡོད་པ་མ་ཡིན་ཏེ། བརྗོད་པ་འདི་ནི་ད་བརྗོད་པ་ཆེན་པོ་ཡིན་ནོ་ཞེས་དགོངས་པའོ། །གལ་ཏེ་དམིགས་པའི་དངོས་པོ་ཐ་དད་པ་མེད་དོ་ཞེས་པ་མ་ཡིན་བར་དགག་པ་སྒྲུབ་པར་བྱེད་དམ་མེད་པར་དགག་པ་སྒྲུབ་ཀྱང་རུང་སྟེ། དེའི་ཚེ་གྲུབ་པ་ལ་སྒྲུབ་པ་ཉིད་དེ། བུམ་པ་ལ་སོགས་པ་ནི་གཞལ་བྱའི་རང་བཞིན་ཉིད་དུ་ཤེས་པ་ལས་ཐ་དད་པར་མེད་པ་ཁོ་ནའོ། །བུམ་པ་ལ་སོགས་དེ་ཡང་ཤེས་པར་དམིགས་པ་ཡིན་བའི་ཕྱིར་ངེད་ཀྱི་མི་འདོད་པ་ཅི་ཞིག་ཡོད། གལ་ཏེ་ཤིན་ཏུ་ཐ་དད་པས་དམིགས་པ་མིད་པར་བརྗོད་ན་ཡང་དེའི་ཚེ་ཁྱེད་ཀྱི་ལྔར་གྱི་ཕྱོགས་དེ་ལྟར་བརྟགས་པ་དང་འགལ་ལོ། །ཁྱོད་ཀྱིས་ད་ལ་ཤིན་ཏུ་ཐ་དད་པས་དམིགས་པ་མེད་པར་བསྒྲུབ་པོ་ཞེས་ད་ལྟར་བརྟགས་པ་དེ་དང་སྔར་གྱི་ཕྱོགས་འགལ་བར་འགྱུར་རོ་ཞེས་བྱ་བའི་ཐ་ཚིག་གོ་ཞེས་བྱ། དངོས་རྩོམ་ཞེས་གསུངས་སྟེ། དངོས་པོའི་རྣམ་པ་གང་ཡིན་པར་ཐ་དད་པས་སངས་རྒྱས་པ་བློ་དམིགས་པ་མེད་པར་འདོད་པ་ཉིད་ཡིན་ནོ། །དེ་ནི་ཤིན་ཏུ་ཐ་དད་པ་དམིགས་པ་མེད་པ་ཉིད་སྒྲུབ་བར་བྱེད་པ་ཡིན་ལ་དངོས་པ་ལ་ཡང་ཤིན་ཏུ་ཐ་དད་པ་ཉིད་ཡོད་པ་མ་ཡིན་ཏེ། གཞལ་བྱ་ཉིད་ལ་སོགས་པས་ཐ་མི་དད་པའི་ཕྱིར་རོ། །དེས་ན་དངོས་པོ་ལས་ཐ་དད་པ་འགའ་ཞིག་གིས་དམིགས་པ་མེད་པ་ཉིད་དུ་བསྒྲུབ་པར་བྱ་བ་ཡིན་ན། དེ་ནི་ཁྱེད་སངས་རྒྱས་པ་འདོད་པ་ཡིན་པས་འགལ་བ་ཡིན་ནོ། །འོན་ཏེ་འཛིན་པ་ལས་གཟུང་པ་ཐ་དད་པ་མེད་པས་བསྒྲུབ་བར་བྱ་བ་ཡིན་ན། དེ་ལ་བརྗོད་པ་ནི་ནུས་པའི་ཞེས་བྱ་བའོ། །གཅིག་ཉིད་ལ་བྱེད་པ་པོའི་ནུས་པ་དང༌། ལས་ཀྱི་ནུས་པ་གསལ་བ་ཡིན་ནོ། །འོན་ཏེ་སངས་རྒྱས་པ་ཐམས་ཅད་ཟད་པས་བརྒྱ་ལ་འདི་སྐད་ཅེས་སྨྲ་བར་འགྱུར་དུ་འོང་ངོ་ཞེས་བསམས་ནས་བརྗོད་པ་ནི། གལ་ཏེ་ཞེས་བྱ་བའོ། །དེ་ནི་ཞེས་བྱ་བ་ནི་ཤེས་པ་ཐམས་ཅད་དམིགས་པ་མེད་དོ་སྙམ་ནའི་བློའོ། །ཡང་དག་པའི་ཤེས་པ་འདི་སྐྱེས་པའི་སྒྲུབ་པར་བྱེད་པའི་ཤེས་པ་ཐམས་ཅད་དམིགས་པ་མེད་དེ་ཞེས་གྲུབ་བོ་སྙམ་དུ་དོགས་པ་བསུ་ནས་བརྗོད་པ་ནི་ཁྱེད་ནི་ཞེས་བྱ་བའོ། །སྒྲུབ་པར་བྱེད་པ་ཤེས་པ་ཉིད་ཀྱི་ཕྱིར་ཞེས་བྱ་བ་ལས་སྐྱེས་བའི་བློ་ཤེས་པ་
ཐམས་ཅད་ནི་དམིགས་པ་མེད་པ་ཡིན་ནོ་སྙམ་པའི་ནག་པོ་ལ་སོགས་པའི་ཤེས་པ་མདུན་ན་གནས་པའི་རྣམ་པ་ཅན་གྱི་ཆོས་སུ་གྱུར་པའི་དམིགས་པ་མེད་པ་ཉིད་འཛིན་ནམ་མི་འཛིན། གལ་ཏེ་འཛིན་པ་དེའི་ཚེ་སྒྲུབ་པར་བྱེད་བའི་བློ་དེ་ཉིད་ཀྱིས་མ་ངེས་ཏེ་ཤེས་པ་ཡང་ཡིན་ལ་དམིགས་པ་མེད་པ་ཡིན་ནམ་མ་ཡིན་ཏེ། དཔེར་ན་རྗེས་སུ་དཔག་པའི་ཤེས་པ་དེ་ཉིད་བཞིན་ནོ། །འོན་ཏེ་མི་འཛིན་དེའི་ཚེ་རྗེས་སུ་དཔག་པའི་ཤེས་པ་འདི་ནི་སྨིག་རྒྱུ་ལ་ཆུའི་བློ་བཞིན་དུ་རང་གི་ཆ་ལ་འཛིན་པ་ཡིན་ནོ། །དེས་ན་གཟུང་བ་དང་འཛིན་པའི་བློ་དེ་གཉིས་ཡུལ་ཐ་དད་པའི་ཕྱིར་ན་ག་པ་ལ་ལ་སོགས་པའི་ཤེས་པ་བུམ་པ་ལ་སོགས་པ་འཛིན་པར་བྱེད་པའི་དམིགས་པ་མེད་པ་ཉིད་ཀྱིས་འགལ་ཟླར་གྱུར་པ་དེ་བཟློག་པ་མེད་པའི་རྒྱུའི་ཕྱིར་ན། ནག་པ་ལ་སོགས་པའི་ཤེས་པ་རྣམས་ངོ་བོ་ཉིད་ཀྱིས་དམིགས་པ་དང་བཅས་པར་འགྱུར་བ་ཡོད་པ་དེ་གང་གིས་ཟློག་པར་བྱེད་དེ་འགས་ཀྱང་མ་ཡིན་ནོ། །གལ་ཏེ་ཞེས་བྱ་བ་ནི་སངས་རྒྱས་པའི་དོགས་བསུ་བའོ། །སྒྲ་གང་ལ་རིག་པའི་དམིགས་པ་ཡོད་པ་དེས་འགོག་ན་དེའི་ཚེ་གྲུབ་པ་ལ་སྒྲུབ་པ་ཡིན་ནོ། །འོན་ཏེ་རྟོགས་པའི་སྒྲ་ལ་བློ་བསྐྱེད་པའི་ནུས་པ་ཡོད་བ་དམིགས་པ་དང་བཅས་པའི་སྒྲའི་བརྗོད་པར་བྱ་བར་གྱུར་པས་འགོག་ན་དེའི་ཚེ་སངས་རྒྱས་པའི་ཁྱེད་ཀྱི་བསྒྲུབ་བྱ་མི་འགྲུབ་པོ། །རྟོགས་པར་བྱེད་པ་མེད་པར་ནི་སྒྲུབ་པར་བྱེད་པ་སྦྱོར་བ་མེད་དོ། །ཁྱེད་ཀྱིས་བློ་སྐྱེད་པར་བྱེད་པ་ཉིད་ཀྱིས་བཀག་པས་ནི་རྟོགས་པར་བྱེད་པ་ཉིད་ཀྱིས་བཀག་པས་དེ་ཇི་ལྟར་བསྒྲུབ་བྱ་འགྲུབ། སུན་འབྱིན་པ་གཞན་ཡང་བརྗོད་པ་ནི་བརྗོད་པར་ཞེས་བྱ་བ་སྟེ། སྒྲའི་རྗོད་པར་བྱེད་པ་ནི་འབྲེལ་པ་མེད་པར་མི་འགྱུར་རོ། །འབྲེལ་པ་མེད་པ་ཡང་ཐ་དད་པར་མི་འགྱུར་ཏེ་འབྲེལ་པ་ནི་གཉིས་ལ་གནས་པའི་ཕྱིར་རོ། །ཐ་དད་པ་དེ་ཡང་དག་ལ་བརྟེན་པའི་ཐ་དད་པར་རྟོགས་པར་བྱེད་པའི་བློ་མེད་པ་མ་ཡིན་ནོ། །དམིགས་པ་མེད་པར་སྨྲ་བ་ཁྱེད་ཀྱི་ལྟར་ན་ནི། དེ་འདྲ་བའི་བློ་ཡོད་པ་མ་ཡིན་ཏེ་དེས་ན་རྒྱུ་མེད་པའི་དག་སྦྱོར་པ་ཉིད་ཀྱང་མི་འཐད་དོ། །གཞན་ཡང་རྟོགས་པ་པོ་རྣམས་ཀྱིས་ཞེས་བྱ་བ་དབང་པོ་དང༌། ཉན་པ་པོ་རྣམས་ཀྱིས་ཆ་ཤེས་དང་བཅས་པ་དག་སོ་སོར་མ་བཟུང་བ་དེ་བཞིན་དུ་དག་གི་བརྗོད་པར་བྱ་བ་ཕྱོགས་ལ་སོགས་པ་སོ་སོར་མ་བཟུང་བ་དང༌། དེ་བཞིན་དུ་རྩོད་པ་
གང་དག་ཡིན་པའི་རྒོལ་བ་དང་ཕྱིར་རྒོལ་བ་དེ་དག་སོ་སོར་མ་བཟུང་བར་ནི་སྒྲུབ་པར་བྱེད་པ་སྦྱོར་བར་མི་འགྱུར་རོ། །གལ་ཏེ་དེ་དག་ཅེས་བྱ་བ་སྔར་བརྗོད་པ་དེ་དག་ཀུན་ཁས་བླངས་ནས་དམིགས་པ་མེད་བར་སྨྲ་བ་དག་སྒྲུབ་པར་བྱེད་ན་སྦྱོར་བར་འདོད་ན། དེའི་ཚེ་ཁྱེད་ཀྱི་དམ་བཅའ་བ་དམིགས་པ་མེད་པ་ཉིད་སྔར་གྱི་དམིགས་པ་དང་བཅས་པ་ཉིད་དུ་ཁས་བླངས་པས་གནོད་དོ་ཞེ་ན། གྲུབ་པའི་མཐའ་པ་ཞེས་བྱ་བ་ནི། ཐམས་ཅད་ནི་ཅེས་གསུངས་སོ། །དེའི་ཚེ་ཡོད་ཀྱང་ཞེས་བྱ་བ་ནི་གཞལ་བྱ་ཉིད་ལ་སོགས་པའི་ཆོས་དང་ལྡན་པ་ཡང་ངོ༌། །གཞལ་བྱ་ལས་ཞེས་བྱ་བ་ནི། བུམ་པ་ལ་སོགས་པ་ལའོ། །དེ་ཞེས་བྱ་བ་ནི་གཞལ་བྱ་ཉིད་དོ། །རིག་པ་དང་དེ་ལས་གཞན་པའི་སྔོན་པོ་ལ་སོགས་པ་དེ་དག་གལ་ཏེ་གཞལ་བྱ་ཉིད་ཀྱིས་རང་བཞིན་གྱིས་ཐ་དད་པ་མེད་པ་ཡིན་ན། དེའི་ཚེ་མྱོང་པ་ལས་སྔོན་པོ་ལ་སོགས་པ་དེ་གཞན་མ་ཡིན་གྱི་འོན་ཀྱང་སྔོན་པོ་ལ་སོགས་པ་དེ་ནི་ཤེས་པ་ཉིད་དུ་འགྱུར་རོ། །ཇི་ལྟར་གྲུབ་པ་ལ་སྒྲུབ་པར་མི་འགྱུར་སྙམ་ན། རྟོགས་མེད་ཡིན་ན་ཐ་དད་པར་འགྱུར་གྱི་རྟོགས་པ་ཉིད་ནི་མ་ཡིན་ནོ། །དེས་ན་དམིགས་པ་མེད་ན་ཞེས་བྱ་བ་ནི་ཤིན་ཏུ་ཐ་དད་པ་དེས་དམིགས་པ་མེད་ནའོ། །གལ་ཏེ་དེ་ལྟ་ན་ཡང་སྔོན་པོ་དང་སེར་པོ་ལ་སོགས་པའི་རང་བཞིན་གྱིས་ཐ་དད་པ་ཡོད་པ་ཉིད་མ་ཡིན་ནམ་ཞེ་ན། ཤེས་པའི་རྣམ་པ་ཞེས་གསུངས་སོ། །གཟུང་བའི་ཞེས་བྱ་བ་ནི་གཟུང་བའི་རྣམ་པ་ལ་སོགས་པའོ། །གལ་ཏེ་སྔོན་པོ་ལ་སོགས་པ་ཡང་ཤེས་པ་ཡིན་དུ་ཆུག་མོད། དེ་ལྟ་ན་ཡང་དེ་ནི་སྔོན་པོ་ལ་སོགས་པ་ཉིད་དུ་འགྱུར་རོ། །དེས་ན་དམིགས་པ་མེད་པར་ཇི་ལྟར་འགྲུབ་སྙམ་ན། གཉིས་ཀ་ཞེ་སྨོས་ཏེ། སྔོན་པོ་དང་སེར་པོ་གཉིས་ཀའོ། །དཔེ་གསུངས་པ་ནི་བདེ་བ་དང་སྡུག་བསྔལ་གཉི་ག་རྟོགས་པ་ཡིན་ན་དམིགས་པ་དང་བཅས་པ་ཉིད་དེ་ཡོད་པ་མ་ཡིན་ནོ། །དེ་བཞིན་དུ་སྔོན་པོ་ལ་དང་ཤེས་པ་གཉི་ག་རྟོགས་པ་ཡིན་ན་དམིགས་པ་ཉིད་དེར་མི་འགྱུར་རོ། །རྟོགས་པ་ལས་ཐ་དད་པ་མེད་པ་ལས་གཟུང་བ་དང་འཛིན་པའི་དབྱེ་པ་དང༌། དཀར་པོ་དང་སྔོན་པོ་ལ་སོགས་པའི་དབྱེ་བར་ཡང་ཇི་ལྟར་འགྱུར་ཞེ་ན། འདི་ལ་བརྗོད་པ་དངོས་པོ་གང་ཞིག་ཏ་མི་དད་པ་མེད་མིན་ཏེ། ཐ་དད་པ་སྣང་ཚོགས་པ་ཉིད་ཡོད་པ་ཡིན་ནོ། །བསམས་
པ་ནི་འདི་ཡིན་ཏེ། དངོས་ཐ་དད་པ་མེད་པའི་ཕྱིར་ན་དངོས་པོ་དང་ཤེས་པ་དག་ཐ་དད་པ་མེད་དོ་ཞེས་བརྗོད་པ་ཡིན་གྱི། སྔོན་པོ་དང་སེར་པོ་ལ་སོགས་པའི་རང་བཞིན་གྱིས་ནི་ཐ་དད་པ་ཡོད་པ་ཁོ་ནའོ། །དེས་ན་གཟུང་བ་ཉིད་ལ་སོགས་པའི་དབྱེ་པ་ཡང་འདི་ཉིད་ལ་ངེས་པ་ཡིན་ནོ་ཞེས་བྱ་བ་ཡིན་ནོ། །འདི་ཉིད་གསལ་བར་བྱེད་པ་ནི་དཔེར་ན་ཞེས་བྱ་བ་ལ་སོགས་པའོ། །གཟུང་བ་དང་ཅིག་ཤོས་འཛིན་པའི་བདག་ཉིད་དེ་བཞིན་རིག་པ་ནི་ཡོད་པ་མ་ཡིན་ནོ། །དེ་ཁོ་ན་ཉིད་ཐ་དད་པ་ཞེས་བྱ་བ་ནི་རང་བཞིན་ཐ་དད་པའོ། །མ་རུང་བའི་བདག་ཉིད་བྲམ་ཟེ་ལ་སོགས་པ་རྣམས་ཀྱིས་སོ། །སྔར་གྱི་ཕྱོགས་ལས་ཞེས་བྱ་བ་དམིགས་པ་མེད་པའི་ཕྱོགས་ལ་སོ། །དེ་བཞིན་ཐམས་ཅད་སྐྱེ་པ་ནི་ཞེས་བྱ་བ་ནི་དམིགས་པ་མེད་པའོ། །ཕྱོགས་འདི་གཉི་ལ་སྒྲུབ་པར་བྱེད་པའི་ཁྱད་པར་ནི་འགའ་ཡང་ཡོད་པ་མ་ཡིན་ནོ། །དེས་ན་ཇི་ལྟར་ཆོས་བསྒྲུབ་པར་བྱ་བ་མ་ཡིན། དེ་ནི་ཞེས་བྱ་བ་ནི་དམིགས་མེད་པ་ཉིད་དོ། །གལ་ཏེ་རྟོགས་པའི་སྒྲ་འདི་ཉིད་ཅེས་བྱ་བ་ལ་སོགས་པ་ལ་བརྗོད་པ་ནི་རྟོག་འི་སྒྲ་ཞེས་བྱ་བའོ། །ཕ་རོལ་གྱི་འཁྲུལ་བ་ནི་དམིགས་པ་དང་བཅའ་པ་ཉིད་སྒྲུབ་པར་བྱེད་བཤེས་པ་ཉིད་བཟློག་པ་ཡིན་ཏེ། དཔེར་ན་དུ་བས་མེ་མ་ཡིན་པ་ལས་གཞན་ལྡོག་པ་བསྒྲུབ་པ་བཞིན་ནོ། །དེ་ལྟ་མ་ཡིན་ན་ཞེས་བྱ་བའོ། །དོན་འདི་རྒོལ་བས་རྟོགས་པར་མ་གྱུར་ནའོ། །དེ་དམིགས་པ་མེད་པའི་བློ་ཡང་ཞེས་བྱ་བ་ནི་ཤེས་པ་ཐམས་ཅད་ནི་དམིགས་པ་མེད་པ་ཉིད་དོ་སྙམ་པའི་རྗེས་སུ་དཔག་པའི་བློ་གང་ཡིན་པ་ཡང་ངོ༌། །དོགས་པ་བསུ་ནས་རྗེས་སུ་དཔག་པའི་བློ་དམིགས་པ་དང་བས་པ་ཉིད་མེད་དོ་ཞེས་བྱ་དེ་ནི་ཇི་ལྟར་མི་སླུ་བ་ཡིན་ན་ཞེ་ན། འདི་ལ་བརྗོད་པ་དམིགས་པ་དམིགས་པའི་རྒྱུའི་ཕྱིར་རོ། །འདི་གཉིས་གཞན་ལ་དྲི་བའི་སོགས་ནས་བསྒྲུབ་པ་ནི་བུམ་པ་མེད་དོ་ཞེས་བྱ་བ་ལ་སོགས་པའི་བློའོ། །གལ་ཏེ་སྣང་བ་མ་དམིགས་པས་དོན་དེ་མ་དམིགས་པས་དེའི་ཚེ་ནི་སླུ་བ་འདི་འགྱུར་པ་ཡིན་ནོ་ཞེ་ན། ཞེས་གཞན་གྱིས་ལན་བཏབ་པ་ན་དེ་ལྟ་ན་ནི་ཞེས་གསུངས་སོས། །དེ་ཁོ་ན་ཉིད་ངེས་པ་ཞེས་བྱ་བ་ནི་དམིགས་པ་མེད་དོ་ཞེས་བྱ་བ་གང་ཡིན་པ་དེའི་རྒྱུ་མཚན་ཡིན་ནོ། །ཕྱིས་དམིགས་པ་མ་དམིགས་པའི་ཕྱི་རྣ་མི་སླུ་པ་ཡིན་ནོ་། །དམིགས་པ་གཞན་སེལ་བ་ནི་སྟེ་
དངོས་པོ་མེད་པ་མི་དམིགས་པ་མེད་པ་ཉིད་དེའི་རྟོགས་པར་བྱེད་པ་ཡིན་ནོ། །བརྗོད་པ་འབྲེལ་བ་མེད་པ་མིན། །ཞེས་བྱ་བ་ལ་སོགས་པ་བརྗོད་པ་ནི་དེ་བས་ན་ཞེས་བྱ་བའོ། །དོན་རྣམས་ཀྱི་འབྲེལ་བ་ཡོད་པ་ཉིད་ལ་བརྟགས་བའི་ཐ་དད་པ་ཡང་ཡོད་དོ་ཞེས་འབྲེལ་ཏོ། །ཐ་དད་པར་འཛིན་པ་བློ་གང་ཡིན་པ་དེའི་ཡུལ་ཡང་བརྗོད་དུ་ཡོད་པ་ཉིད་དོ། །དེ་ལ་ཡང་ཞེས་བྱ་བ་ནི་རྒོལ་དབང་ཕྱིར་རྒོལ་པ་ཐ་དད་པར་འཛིན་པའོ། །སྔར་ཞེས་བྱ་བ་ནི་གཉིས་སུ་མེད་པར་སྟོན་པར་བྱེད་པའི་རྣམ་འགྲེལ་བཤད་པའི་སྐབས་སུའོ། །དེ་མེད་པར་ཞེས་བྱ་བ་ནི་ཐ་དད་བ་མེད་པར་སྒྲུབ་པ་ལའོ། །རང་གི་སྣང་བ་ཉིད་ཅེས་བྱ་བ་ནི་བུམ་པ་ལ་སོགས་པ་ལའོ། །ཇི་ལྟར་གནོད་ཅེ་ན་དེ་ཡང་ཞེ་སྨྲས་ཏེ། རང་གི་སྣང་བ་ཉིད་དུ་རྟོགས་པར་བྱའི་བུམ་པ་ལ་བོ་པ་ཡང་ངོ༌། །གལ་ཏེ་དོགས་པར་བྱེད་པ་རྣམས་ཀྱིས་རེ་ཞིག་དེ་ཉིད་རྟོགས་པ་མ་ཡིན་ནམ། དེ་ཇི་ལྟར་དེའི་ཚིག་ལས་ཀྱང་ཡིད་ཆེས་པ་མེད་པར་ཇི་ལྟར་འགྱུར་སྙམ་ན་རྟོགས་པར་བྱེད་པ་རྣམས་ཞེས་བྱ་བའོ། །ཕྱོགས་གཅིག་ཏུ་ལྷུང་བས་ཞེས་བྱ་བ་ནི་དམིགས་པ་མེད་པའི་ཕྱོགས་ལྷུང་བས་སོ་།ཕན་ཚུན་འགལ་བ་ཞེས་བྱ་བ་ནི། དམིགས་པ་དང་བཅས་པ་དང༌། དམིགས་པ་མེད་པ་ཉིད་དེ། ཕན་ཚུན་འགལ་བའི་དམིགས་པ་དང་བཅས་པའི་རྟོགས་པ་ཅན་ནོ། །དེ་དང་འགལ་ཞེས་བྱ་བ་ཚད་མས་གྲུབ་པས་དེ་དང་འགལ་བ་སྔར་གྱི་ཁས་བླངས་པ་གང་ཡིན་པ་སེལ་ཏོ་ཞེས་བྱ་བ་ཐ་དད་པའི་བློའོ། །ཕྱིན་ཅི་ལོག་ཏུ་སོང་བ་ཞེས་བྱ་བ་དེ་ལྟ་མ་ཡིན་པར་འགྱུར་བའོ། །ཅི་སྟེ་འགལ་བར་བྱ་བ་མ་ཡིན་ཞེ་ན། གལ་ཏེ་ཞེས་སྨོས་སོ། །རྣམ་པ་ཅི་ཞིག་ལྟར་ཁས་བླངས་པའི་ཐ་དད་པས་ཚད་མས་ཡོངས་སུ་དག་པའི་ཐ་མི་དད་པ་ལ་གནོད་ཀྱི་ཚད་མའི་སྟོབས་ཀྱི་ཤུགས་ལས་འོངས་པའི་ཐ་མི་དད་པ་འདིས་ནི་སྔ་མ་ཐ་དད་པ་ལ་གནོད་པ་མ་ཡིན་ནོ་ཞེས་བྱ་བའི་མི་འཐད་པ་འདི་པས་བསྟོད་ནས་ཇི་ལྟར་བརྗོད། གང་ལ་ཞེས་བྱ་བ་ལ་སོགས་པ་ནི་ཐམས་ཅད་ཀྱི་མཇུག་སྡུད་པའོ། །སློབ་དཔོན་དང་བདང་ཉིད་ཆོས་དང་ཆོས་མ་ཡིན་པ་རྟོགས་པ་གྲུབ་པ་མེད་ན་ཚེས་ལ་སོག་པ་ཉེ་བར་སྟོན་པ་མི་འཐད་དོ། །དེ་སྒྲུབ་པ་ཕྱིར་ན་ཞེས་བྱ་བ་ནི་ཉེ་བར་བསྟན་པ་དེས་རྗེས་སུ་བསྒྲུབ་པའི་ཕྱིར་རོ། །དེ་ལྟར་རེ་ཞིག་ཉེ་བར་བསྟན་པ་གཞན་དུ་མི་
འཐད་པ་ཐ་དད་པ་ཁམས་བླངས་པར་བསྒྲུབ་པས་ནས། དངོས་པོ་ཉིད་དུ་བསྒྲུབ་པའི་དོན་བརྗོད་པ་ནི། གསལ་པར་ངེས་ཞེས་བྱ་བའོ། །དེ་མེད་པར་བསྒྲུབ་པ་ནི་ལུང་དང་འགལ་བར་འགྱུར་པ་ཡིན། ཕྱོགས་ལ་ཞེས་བྱ་བ་ནི་དམིགས་པ་མེད་པ་ཉིད་ལའོ། །ཐམས་ཅད་མེད་པའམ་ཞེས་བྱ་བ་ནི་དམིགས་པ་ཉིད་ཀྱང་མེད་པར་འགྱུར་རོ། །སྒྲུབ་པར་བྱེད་པའི་བློ་ཕྱིན་ཅི་ལོག་ཡིན་ན་ནི། དེས་བསྒྲུབ་པར་བྱ་བ་དམིགས་པ་མེད་པ་ཉིད་ཀྱང་མེད་པར་འགྱུར་རོ། །ཅི་འདོད་པར་མ་ཚང་ལ་སོགས། །ཞེས་བྱ་བ་ནི་གལ་ཏེ་སྒྲུབ་པར་བྱེད་པ་བརྗོད། དེའི་ཚེ་བདེན་པར་བྱ་བའི་མ་ཚང་པ་མ་ཡིན་པ་དང༌། ལྷག་མ་ཡང་མ་ཡིན་པར་སྒྲུབ་པར་བྱེད་པར་འགྱུར་བ་ཞིག་ན་གང་གི་ཚེ་སྒྲུབ་པར་བྱེད་པའི་བློ་བརྫུན་པ་ཡིན་པ་དེའི་ཚེ་ཇི་ལྟར་སྦྱར་བྱ་ལ་རག་པར་འགྱུར་བར་རོ། །དེ་དག་ཅེས་བྱ་བ་ནི་ཤེས་པ་ཐམས་ཅད་ནི་དམིགས་པ་མེད་དོ་ཞེས་བྱ་བ་སྒྲུབ་པར་བྱེད་པའི་བློས་བསྐྱེད་པའི་ཤེས་པ་རྣམས་སོ། །མ་ངེས་པ་ནི་ཤེས་པ་ཉིད་ཀྱི་གཏན་ཚིགས་སོ། །ཤེས་པའང་ཡིན་ལ་དམིགས་པ་མེད་པ་ཡང་མ་ཡིན་ཏེ། དཔེར་ན་སྒྲུབ་པར་བྱེད་པ་སྐྱེད་པའི་ཤེས་པ་བཞིན་ནོ་ཞེས་བྱ་བར་རོ། །སངས་རྒྱས་པའི་དོགས་པ་བསུན་བ་ནི་དེ་ལས་གཞན་པ་ཞེས་བྱ་བ་ནི། སྒྲུབ་པར་བྱེད་པ་ཤེས་བྱ་ལས་སྐྱེས་པ་ལས་གཞན་དམ་བཅས་པ་ཡིན་ནོ་ཞེ་ན། ཕྱི་རོལ་པ་སུན་འབྱིན་པ་ནི་དེ་ལས་གཞན་པའི་ཞེས་བྱ་བ་སྒྲུབ་པར་བྱེད་པའི་ཤེས་བྱ་ལས་གཞན་ནོ་ཞེས་བྱ་བའི་རྟོགས་པ་གང་ཡིན་པ་དེ་ནི་བརྫུན་པ་ཡིན་ཏེ། སྒྲུབ་པར་བྱེད་པ་ལས་སྐྱེས་པའི་ཤེས་པ་ཁོ་ན་བདེན་པའི་ཕྱིར་དང༌། གཞན་ནི་ཐམས་ཅད་མི་བདེན་པའི་ཕྱིར་རོ། །ཡང་ཇི་ལྟར་ན་གཞན་སྙམ་པའི་ཤེས་པ་བརྫུན་ནོ་ཞེ་ན། ཕྱོགས་སོགས་ཞེས་གསུངས་སོ། །གང་གིས་དེ་བཞིན་ནོ་སྙམ་པའི་ཤེས་པ་ལ་ནི་ཕྱོགས་ལོག་པ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་ཞེ་ན་ཕྱོགས་པའི་ནང་དུ་མ་འདུས་ན་མ་ཡིན་པའི་ཕྱིར་ཕྱོགས་ལ་སོགས་པའི་ནང་དུ་འདུས་པའི་ཕྱི་རོ་ཞེས་བྱ་བའི་དོན་ཏོ། །འདི་ལྟར་སྒྲུབ་པར་བྱེད་པས་བསྐྱེད་པའི་བློ་ཁོ་ན་ལ་ཕྱོགས་ཉིད་མེད་ཀྱི་། དེ་ལས་གཞན་པའི་རྟོགས་པ་ཐམས་ཅད་ལ་ནི་ཕྱོགས་ཉིད་ཡོད་པ་ཡིན་ནོ། །དེ་ལྟ་ཡིན་དང་སྒྲུབ་པར་བྱེད་པའི་ཤེས་པ་ལ་འདི་
དག་གཞན་ཡིན་ནོ་སྙམ་པའི་ཤེས་པ་གང་ཡིན་པ་དེ་ཡང་ཕྱོགས་ཉིད་ཡིན་ཏེ། སྒྲུབ་པར་བྱེད་པས་སྐྱེད་པའི་བློ་ལས་གཞན་ཡིན་པའི་ཕྱིར་རོ། །གཞན་སྙམ་པའི་ཤེས་པའི་བརྫུན་པ་ཉིད་ཡིན་མོད། ཉེས་བ་ཅི་ཡོད་སྙམ་ན། དེ་ནི་ལོག་པར་ཞེས་གསུངས་སོ། །སྒྲུབ་པར་བྱེད་པའི་ཤེས་པ་ལས་གཞན་པའི་ཤེས་པ་གང་ཡིན་པ་དེ་དག་དམིགས་པ་མེད་པ་ཉིད་དུ་བསྒྲུབ་པར་བྱ་བ་ཡིན་ན། གང་གི་ཚེ་གཞན་ཞེས་བྱ་བའི་ཤེས་པ་འཁྲུལ་བ་ཡིན་བ་དེའི་ཚེ་ཤེས་པ་དེས་ཡུལ་དུ་བྱས་པའི་གཞལ་བྱ་མེད་པའི་ཕྱིར་ན་གང་ཞིག་ཕྱོགས་ཉིད་ཡིན། དེ་ཉིད་བརྗོད་པ་ནི། དེ་ཚེ་ཞེས་བྱ་བའོ། །གལ་ཏེ་སྒྲུབ་པར་བྱེད་པའི་ཤེས་པ་དང་གཞན་ནོ་སྙམ་པའི་ཤེས་པ་ལས་གཞན་ཕྱོགས་སུ་བྱེད་དོ་སྙམ་ན། ཇི་སྲིད་ཅི་སྲིད་ཅེས་སྨྲས་སོ། །སྒྲུབ་པར་བྱེད་པའི་ཤེས་པ་དང༌། གཞན་སྙམ་པའི་ཤེས་པ་ལས་ཀྱང་གཞན་གང་ཡིན་པ་དེ་དག་ཕྱོགས་ཡིན་ནོ་ཞེས་བྱ་བ་གང་གི་ཚེ་དམ་བཅས་པ་དེའི་ཚེ་ཕྱི་མ་གཞན་སྙམ་པའི་ཤེས་པ་ཕྱི་མ་ལོག་པ་ཡིན་པའི་ཕྱིར་དག་པོ་ལ་གནང་ངོ༌། །སུན་འབྱིན་པ་གཞན་ཡང་བརྗོད་པ་ནི། རྗེས་སུ་དཔག་པས་ཞེས་བྱ་བའོ། །འགལ་པ་མི་འཁྲུལ་བ་ཉིད་སྟོན་པན་ཕྱི་རོལ་ཞེས་བྱ་བའོ། །འདི་ནི་རྗེས་སུ་དཔག་པ་ཡིན་པའི་ཕྱིར་རྗེས་སུ་དཔག་པས་གསལ་པ་ཡང་ཡིན་མོད། དེ་ཡང་ཞེས་བྱ་བ་རྨི་ལམ་ལ་སོགས་པ་ལ་གནོད་པའི་བློ་ཡང་ལོད་པ་ཡིན་ནོ་ཞེས་གསུངས་རྒྱས་པ་སྨྲ་ན། དེའི་ཚེ་རྨི་ལམ་ལ་སོགས་པའི་ཤེས་པ་གནོད་པ་མ་ཡིན་ཏེ། དེ་ལ་གནོད་པར་བྱེད་པ་ཤེས་པ་ལོག་པ་ཡིན་བའི་ཕྱི་རོ། །རྨི་ལམ་ལ་སོགས་པ་མེད་པ་ཡིན་ན། ཡང་ད་ནི་ཁྱེད་སངས་རྒྱས་པའི་སྒྲུབ་པར་བྱེད་པ་གང་ཡིན་པ་དེ་ཐམས་ཅད་ནི་དམིགས་པ་མེད་པ་ཡིན་ནོ་ཞེས་བྱ་བ་ལ། དཔེར་ན་རྨི་ལམ་ལ་སོགས་པ་བཞིན་ནོ་ཞེས་ཆོས་མཐུན་པའི་དཔེ་མེད་པར་འགྱུར་རོ། །གནོད་པར་བྱེད་པ་གཞན་བརྗོད་པ་ནི་རྣམ་ཤེས་ཞེས་བྱ་བའོ། །དེ་ཉིད་ཀྱིས་ཞེས་བྱ་བ་ནི་རྣམ་པར་ཤེས་པ་ཡོད་པ་ཡིན་དང༌། ཐ་དད་པ་དང་སྐད་ཅིག་མ་ཉིད་ཀྱིས་ཤེས་པ་ཉིད་ཅེས་བྱ་བའི་གཏན་ཚིགས་མ་ངེས་པར་འགྱུར་རོ། །རྣམ་པར་ཤེས་པ་ཉིད་ལ་འགོག་པའི་བློ་རྣམས་ལོག་པ་གང་ཡིན་པ་དེ་རྟོགས་པར་ཁས་ལེན་ན་ཕྱོགས་ལ་
གནོད་པར་ཐལ་ལོ། །ལྟ་ཡིན་དང་ཞེས་བྱ་བ་ནི་དེ་ཁོ་ན་ཉིད་འགའ་ཡང་མེད་ནའོ། །དེ་ཕྱིར་ཞེས་བྱ་བ་ནི་བཅིངས་པ་དང་ཐར་བ་མེད་པའི་ཕྱིར། ཐར་པའི་འབད་པ་ལ་བསྒོམ་པ་ལ་སོགས་པ་གང་ཡིན་པ་དེ་འབྲས་བུ་མེད་པར་ཁས་ལེན་ནོ་ཞེ་ན། ད་ནི་གྲུབ་པའི་མཐའ་སྨྲ་བས་དེ་ནི་ཞེས་གསུངས་སོ། །འདོད་ཆགས་ཀྱི་སྒྲས་ནི་མི་འདོད་པ་གཟུང་ངོ༌། །དེ་ནི་ཞེས་བྱ་བ་ནི་འཁོར་བའོ། །དངོས་པོ་གང་ལ་སྐྱེས་བུ་གང་གིས་དེ་ཉིད་ཀྱི་བློ་ཡོད་པ་དེ་ནི་དེ་ལ་འཇུག་གོ །ཇི་ལྟར་འཇིག་རྟེན་ལ་འཇུག་པ་དེ་བཞིན་དུ་བཅོམ་ལྡན་འདས་ཀྱང་གླང་པོའི་གཟིགས་ཚུལ་དུ་མཛད་ནས་དངོས་པོ་དེ་དང་དེ་ཉེ་བར་སྟོན་པ་ཡིན་ནམ་ཅི་སྟེ་སྟོན་པ་ཁོ་ནའོ། །དེར་ཞེས་བྱ་བ་བཅོམ་ལྡན་འདས་ཀྱིས་ཉེ་བར་བསྟན་པའི་དངོས་པོ་ལའོ། །དེས་དེའི་བསམ་པས་ཞེས་བྱ་བ་འཁོར་བའི་སྐྱེ་བོའོ་བསམ་པས་གསུངས་པའི་མདོ་སྡེ་དག་གིས་སོ། །འཇིག་རྟེན་ཀུན་གྱི་གྲགས་པས་ཀྱང༌། །ཞེས་གང་བརྗོད་པ་དེ་ལ་བརྗོད་པ་ནི། དེ་ལ་ནི་དེ་ཉིད་མ་རིག་པ་ལ་ནི་དམིགས་བ་ཐམས་ཅད་དང་བྲལ་བ་མ་བསྟན་ཏོ། །དེ་ལ་ནི་དེ་ཉིད་མ་རིག་པ་ལའོ། །དམིགས་པ་ཐམས་ཅད་མེད་ཀྱང་ངོ༌། །སྐྱོན་མེད་པ་ཉིད་སྟོན་ན་ནི་དེའི་ཞེས་བྱ་བ་ནི་དམིགས་པ་མེད་པའི་སྒྲུབ་བྱེད་ཀྱི་རྗེས་སུ་དཔག་པ་ཉིད་དམིགས་པ་མེད་པས་དམིགས་པ་མེད་པའི་རྗེས་སུ་དཔག་པ་དེ་ལས་དམིགས་པ་མེད་པ་ཉིད་དེ་མ་འགྲུབ་པོ་ཞེ་ན། འདི་ལ་བརྗོད་པ་ནི་སླུ་མེད་ཅེས་བྱ་བའོ། །དམིགས་པ་ཡོད་པ་ཉིད་ནི་བསྒྲུབ་པར་ཡང་བ་ཡིན་ན། དེས་ན་སྒྲུབ་པར་བྱེད་པས་བསྐྱེད་པའི་ཤེས་པ་དེ་ནི་ཆོས་མཐུན་པ་ཅན་དཔེ་ཞེས་བྱ་བ་མཐུན་པའི་ཕྱོགས་ཡིན་པའི་ཕྱིར་རོ། །དེ་ལྟར་ཡིན་དང་དེ་ལས་གཞན་པའི་དམ་བཅའ་བ་ལོག་པ་ཉིད་ཡིན་པར་འདོད་པ་ཁོ་ནའོ། །དེ་སྣ་ལོག་པ་ཞེས་བྱ་བ་ནི་གཞན་གྱིས་ཤེས་པའི་ལོག་པ་སྔོན་དུ་འགྲོ་པ་ཅན་གྱི་སྐྱོན་གྱིས་སོ། །ཇི་ལྟར་ན་ཐུག་པ་མེད་པར་མི་འགྱུར་སྙམ་ན། དེ་ལས་གཞན་པ་ཞེས་གསུངས་སོ། །མི་སླུ་བའི་ཤེས་པ་ཡང་དམིགས་པ་མེད་པ་ཇི་ལྟར་ཡིན་སྙམ་ན། སླུ་བ་མེད་པ་ཞེས་གསུངས་སོ། གལ་ཏེ་རྨི་ལམ་ལ་སོགས་པ་ལ་གནོད་པའི་བློ་དམིགས་པ་དང་བཅས་པ་ཉིད་ཡིན་ན། རྨི་ལམ་ལ་སོགས་པ་དང་དམིགས་པ་མེད་པར་བསྒྲུབ་པའི་སྐབས་ཀྱི་མཐུན་ཕྱོགས་ཉིད་དུ་འགྱུར་པ་གལ་ཏེ་གནོད་པའི་བློ་
དམིགས་པ་དང་བཅས་པ་ཡིན་ན་དེའི་ཚེ་དེ་ཉིད་ཀྱིས་མ་ངེས་སོ་སྙམ་ན་རྨི་སོགས་ཞེས་གསུངས་སོ། །རྨི་ལམ་ལ་སོགས་པ་ལ་གནོད་པར་བྱེད་པའི་བློ་བདེན་བ་ནི་རྨི་ལམ་ལ་སོགས་པར་མི་དམིགས་པས་བསྒྲུབས་པ་ཡིན་གྱི་གནོད་བྱེད་ཀྱི་དམིགས་པ་དང་བཅས་བ་ནི་མ་ཡིན་ནོ། །དེས་བསྐྱེད་པ་ཞེས་བྱ་བ་ནི་རྨི་ལམ་ལ་སོགས་ལ་གནོད་པའི་བློས་བསྐྱེད་པའོ། །རྣམ་ཤེས་ཡོད་པ་དང་ཐ་མི་དད་པ་དང་ཞེས་བྱ་བ་ལ་སོགས་པ་ལ་བརྗོད་བ་ནི་སྐད་ཅིག་ཅེས་བྱ་བའོ། །ཤེས་པ་སྐད་ཅིག་ཡིན་གྱི་ཕྱི་རོལ་ནི་མ་ཡིན་ནོ། །རྒྱུ་དེས་ཕྱི་རོ་དང་བཅས་པའི་དམིགས་པ་དང་བཅས་པ་ཉིད་མ་གྲུབ་པོ། །ཕྱི་རོལ་གྱི་དམིགས་པ་མ་གྲུབ་པོ་ཞེས་དགོངས་པའོ། །གལ་ཏེ་ཁྱོད་ཀྱིས་དམིགས་པ་མེད་པ་ཉིད་ཀྱང་མི་འགྲུབ་པ་ཁོ་ན་སྟེ། སྐད་ཅིག་མའི་བློ་ནི་རྣམ་པར་ཤེས་པ་ལ་དམིགས་པའི་ཕྱིར་རོ་ཞེ་ན། གཞན་གྱི་ཕྱོགས་ཡིན་ནོ་ཤེས་གསུངས་ཏེ། དམིགས་པ་གཞན་གྱིས་ནི་དམིགས་དང་བཅས་པ་རྨི་འགྱུར་རོ་ཞེས་བྱ་བ་ནི་བདག་ཅིག་གི་ཕྱོགས་ཡིན་ནོ། གལ་ཏེ་དང་གི་ངོ་བོས་དམིགས་པ་དང་བཅས་པར་འགྱུར་ན། དེའི་ཚེ་འགྱུར་ལ་རགས་ཏེ། རང་གི་རང་བཞིན་ནི་དམིགས་པར་འདོད་པའི་ཕྱིར་རོ། །དེ་ལྟ་བུས་ཞེས་བྱ་བ་ནི་བདག་ཆག་གི་ཕྱོགས་ཡིན་ནོ། །རྣམ་པར་ཤེས་པའི་དབང་ཉིད་དུ་གྱུར་པས་དམིགས་པ་དང་བཅས་པ་ཉིད་དེའི་ཕྱིར་དམིགས་པ་དང་བཅས་པས་ནི་མ་ཡིན་ནོ། །དམིགས་པ་ཐ་དད་པར་ཞེས་བྱ་བ་ནི་འཛིན་པར་བྱེད་པ་ལས་གཞན་ནོ། །དེ་ནི་ཕྱི་རོལ་ཡིན་ནམ་ཤེས་པ་ཡིན་ཡང་རུང་སྟེ། ཁྱད་ཅི་ཡོང་ཅེས་བྱ་བ་ནི་གཞན་གྱིས་བསམས་པའོ། །འདི་ལ་བརྗོད་པ་ནི་སྐད་ཅིག་ཉིད་ཀྱི་ཞེས་བྱ་བའོ། །དེ་རེ་ཞིག་རྗེས་སུ་དམིགས་པ་ནི་ཤེས་པ་གཞན་ན་མ་ཁྱི་རོལ་གྱིས་ནི་དམིགས་པ་དང་བཅས་པ་མ་ཡིན་ཏེ། དེ་ནི་རང་དམིགས་པ་རྣམ་པ་དུ་མའི་སྒོ་ནས་གཞན་སེལ་བ་དང་བཅས་པར་བསམས་ཟིན་པའི་ཕྱིར་རོ། །གལ་ཏེ་རྗེས་སུ་དཔག་པར་མི་སླུ་བར་བྱེད་པ་ཡིན་ནམ། ཅི་ལྟར་དམིགས་པ་མེད་སྙམ་ན། སླུ་བ་མེད་པ་ཞེས་གསུངས་སོ། །ཡང་ཇི་ལྟར་དེ་མངོན་སུམ་ཉིད་ཡིན་སྙམ་ན་དངོས་སུ་བྱས་ན་ཞེས་གསུངས་སོ། །རིག་པ་དེའི་བདག་ཏུ་གྱུར་པའི་སྐད་ཅིག་མ་ཉིད་གང་ཡིན་པ་དེ་ནི་གང་དེའི་བདག་ཏུ་གྱུར་པའི་རིག་པ་དེ་ལས་
གཞན་པའི་རིག་པས་གཟུང་བར་ནུས་པ་མ་ཡིན་ནོ། །ཅི་སྟེ་ཞེས་དོགས་པ་བསུ་ནས། དེའི་རང་བཞིན་གསུངས་སོས། །དེའི་རང་བཞིན་རིག་པར་བྱེད་པ་མ་ཡིན་པ་གཞན་གྱིས་ཀྱང་དེ་རིག་པར་འགྱུར་རོ་སྙམ་ན། རིག་པ་མེད་པར་ཞེས་གསུངས་སོ། །དོན་གསལ་བ་གཞན་དུ་མི་འཐད་པས་རིག་བར་བྱེད་པ་ཐ་དད་པ་ཁས་ལེན་པ་ཡིན་ལ། གསལ་བ་ཡང་རང་ལས་འགྱུར་པ་ཉིད་དེ་ལྟར་ན་མཐོང་བ་ནི་རང་ནི་ཁོ་ན་གསལ་བར་ཁས་ལེན་པ་དེ་བཞིན་དུ་གསལ་བར་བྱེད་པ་ཐ་དད་པས་ཅི་ཞིག་བྱ་ཞེས་དགོངས་པའོ། །འོན་ཏྲེ་རང་བཞིན་ཅན་གྱི་མཚན་ཉིད་བདག་སྔོན་པོ་ལ་སོགས་པ་མྱོང་མོང་བར་བྱེད་པ་ནི་ལྟ་བ་པོ་ཡིན་ནོ་ཞེ་ན། དེའི་ཚེ་བདག་དེའི་མཐོང་བྱེད་ག་ལས་འདོད། དེ་ལྟ་མ་ཡིན་ན་ཐུག་པ་མེད་པར་ཐལ་བའི་ཕྱིར། རང་རིག་པ་ཡིན་ཞེ་ན། དེ་ལྟར་ཞེས་སྨོས་ཏེ། རང་ཉིད་རིག་པར་བྱེད་པ་ནིའོ། །སྔོན་པོ་ལ་སོགས་པ་ཡང་རང་རིག་བར་བྱ་བའི་དོན་ཏོ། །གཉིས་ཀའི་རང་བཞིན་ཞེས་བྱ་བ་ནི་རྫས་དང་རང་རིག་པའི་རང་བཞིན་ནོ། །རིག་བྱ་རིག་བྱེད་གང་ཡིན་བདེ་ནི་གཅིག་ཡིན་ཏེ། དེས་ན་རྟོགས་པའི་རང་བཞིན་དང་རྫས་ཀྱི་རང་བཞིན་གཉིས་སུ་གཅིག་ཏུ་འཐད་པ་ཡིན་ནོ། །དེས་ན་བདག་དང་སྔོན་པོ་ཡང་རིག་བྱ་རིག་བྱེད་ཀྱི་རང་བཞིན་ཉིད་ཀྱིས་གཅིག་ཏུ་འགྱུར་རོ། །གལ་ཏེ་སྔོན་པོ་དང་སྔོན་པོར་རིག་པར་བྱེད་པ་དང་གི་ཡུལ་ཐ་དད་པ་ཉིད་ཀྱིས་གཅིག་ཏུ་རྨི་འཐད་དོ་ཞེས་བརྗོད་པ་ནི། ཡུལ་ཐ་དད་པར་ཞེས་བྱ་བའོ། །གལ་ཏེ་ཡུལ་འཐད་དད་པས་གཅིག་མ་ཡིན་ན་དེའི་ཚེ་བདག་ཀྱང་རིག་པར་བྱེད་པ་དག་ཀྱང་རང་བཞིན་ཐ་དད་པས་ན་ཇི་ལྟར་གཅིག་ཡིན། དེ་ལྟ་ཞེས་བྱ་བ་ནི་གལ་ཏེ་ཡུལ་ཐ་དད་པས་རང་བཞིན་ཐ་དད་པར་བྱེད་པ་ཡིན་པ་རྒྱུར་ནའོ། །དེའི་སེ་ཁྱབ་བྱེད་ན་མཁའ་ལ་སོག་པར་རང་བཞིན་ཡིན་པར་བྱེད་པར་འགྱུར་རོ། །དེ་ལྟ་ཡིན་དག་བཅིང་ནས་པ་དང་གྲོལ་པ་ལ་སོགས་པ་རྣམས་གཞང་ཏུ་མ་ཡིན་ཞེས་བྱ་བ་ལོག་པར་བརྗོད་པ་ནི་བཅིང་སྒྲོལ་ཞེས་བྱ་བའོ། །འོན་ཐར་པ་ལ་འབད་བ་མི་བྱའོ་སྙམ་ན། གལ་ཏེ་ཕྱི་རོལ་ལ་སོགས་པ་རྣམ་པར་དབྱེ་བ་ནི་རེ་ཞིག་ཁྱོད་དོ་སྙམ་ན། ཕྱི་སོགས་ཞེ་གསུངས་སོ། །རྣམ་པར་རྟོགས་པ་མེད་པའི་དབང་གིས་ཐ་སྙད་འདིར་འགྱུར་པ་མ་ཡིན་ནོ་ཞེས་བྱ་བར་བསམས་པའོ། །འདིར་ཞེས་བྱ་བ་ནི་ཤེས་པ་ཡོད་པ་ཉིད་
ལའོ། །མི་འཐད་ཅེས་བྱ་བ་ནི་རིགས་པར་ལྡན་ཞེས་བྱ་བའོ། །གལ་ཏེ་རྣམ་པ་གཞན་མེད་པས་རྣམ་པར་རྟོག་པ་ཙམ་མར་ཁས་ལེན་ན་ཐར་པ་ལགས་ཞེས་གསུངས་སོ། །དེ་བཞིན་དུ་ཚད་མ་ཡིན་པར་ཡང་ཁས་བླངས་ དགོས་ཏེ། ཚད་མས་སྒྲུབ་པར་བྱེད་པ ་མེད་པའི་ཕྱིར་རོ་ཞེས་བྱ་བའི་དོན་ཏོ། །བག་ཆགས་དང་འབྲེལ་པར་འགྱུར་བའི་རང་བཞིན་གང་ལ་ཡོད་པའི་སྣང་བ་གང་ཡིན་པའོ། །མི་མངོན་པའི་ཞེས་བྱ་བ་ནི་རྣམ་པར་མ་དཔྱད་པའི་རང་བཞིན་ནོ། །འདི་ཡང་ཞེས་བྱ་བ་ནི་མི་སླུ་བ་དོན་དམ་པ་མ་ཡིན་པ་ཉིད་དོ། །དེ་དག་ལས་བཟློག་པ་ཞེས་བྱ་བ་ནི་ཉེ་བ་དང་ཆོས་བསྟན་པ་དག་ལས་སོ། །འདི་དག་གྲུབ་པའི་ཞེས་བྱ་བ་ནི་གཞན་གྱིའོ། །འདི་ལ་བརྗོད་པ་ནི་འདི་ནི་ཞེས་བྱ་བའོ། །གལ་ཏེ་ཐམས་ཅད་ཀྱང་ལོག་པ་ཉིད་ཡིན་པའི་ཕྱིར་སངས་རྒྱས་པའི་ལྟ་བ་བཞིན་དུ་མུ་སྟེགས་པ་ལ་སོགས་པ་ཡང་ཅི་སྟེ་དད་པ་ལ་སོགས་པ་མི་བྱ་སྙམ་ན། སངས་རྒྱས་ཞེས་གསུངས་སོ། །ཅིའི་ཕྱིར་གནོད་པར་བྱེད་པ་མེད་སྙམ་ན། དེ་ལྟར་ཞེས་གསུངས་སོ། །གལ་ཏེ་བག་ཆགས་ཡོད་པ་དེ་ལྟར་ན་ཡང་གནོད་པར་འགྱུར་རོ་ཞེ་ན། གནོད་བྱེད་བསྐྱེད་པའི་རྒྱུ་ནི་བག་ཆགས་དེ་ཉིད་ཡིན་ནོ། །དེ་ལྟ་མ་ཡིན་ན་ཡང་གེགས་བྱེད་པ་ཡང་དག་པའི་ཤེས་པ་མེད་ན་འཁྲུལ་པར་ཇི་ལྟར་ཤེས་ཇི་ལྟར་རྩོད་པ་དང་ཕས་ཀྱི་རྒོལ་བ་རྟོགས་པར་བྱེད་པ་མི་འཐད་སྙམ་ན། གལ་ཏེ་དེ་ལ་ཞེས་གསུངས་སོ། །ཕ་རོལ་པོ་ལའོ། །ཅི་སྟེ་བག་ཆགས་སད་པ་མངོན་དུ་གྱུར་པ་མ་ཡིན་ན་དེའི་ཚེ་ཚིག་བརྒྱས་ཀྱང་རྟོགས་པ་མ་ཡིན་ནོ་ཞེ་ན། འདི་ལ་བརྗོད་པ་ནི་དེ་ནི་མི་བདེན་ཏེ་ཞེས་བྱ་བའོ། །དེ་ཡིས་ཞེས་བྱ་བ་ནི་རྣམ་པ་དེས་སོ། །བློའི་ཞེས་བྱ་བ་ནི་སད་པའི་བློའོ། །དེ་ཡིན་ན་ཞེས་བྱ་བ་ནི་བརྫུན་པ་ཉིད་ཡིན་ནའོ། །རྣམ་གཞག་ཅེས་བྱ་བ་ནི་འགའ་ཞིག་ནི་བདེན་ལ་འགའ་ཞིག་ནི་བརྫུན་ཞེས་བྱ་བར་མི་འགྱུར་ཏེ། ཐམས་ཅད་བརྫུན་པ་ཁོ་ནར་འགྱུར་རོ། །ཁྱེད་སངས་རྒྱས་པ་ལ་སད་པ་དང་རྨི་ལམ་གྱི་རྣམ་ཤེས་དག་གི་དབྱེ་བ་ཡང་གང་གིས་བྱས། ཇི་ལྟར་གནོད་བྱེད་ཤེས་པ་ལ་ཞེས་བྱ་བར་ནི་ཇི་ལྟར་རྨི་ལམ་ལ་སོགས་པའི་ཤེས་པ་ལ་སེལ་བྱེད་དམིགས་པ་དེ་བཞིན་དུ་སད་པའི་ཤེས་པ་ལ་ནི་འགའ་ཡང་མ་དམིགས་སོ་ཞེས་བྱ་བའོ། །ཇི་ལྟར་འདི་སྤངས་པ་ཡིན་ཞེ་ན།
རྟོགས་པའམ་ཞེས་གསུངས་སོ། །དེ་ཁོ་ན་ལྟར་ཞེས་བྱ་བ་ནི་དེ་ལྟ་བུར་གྱུར་པའི་བག་ཆགས་སད་པ་ན། གཞན་དོན་དུ་གཉེར་བར་འགྱུར་བ་ངེས་པར་རྟོགས་ནས་དེའི་བག་ཆགས་སད་པའི་དོན་དུ་ཚིག་འཇུག་གོ །དེས་ན། གལ་ཏེ་བློ་ནི་མི་བདེན་ན། །ཞེས་བྱ་བ་ལ་སོགས་པ་འདྲི་བ་ལ། དེ་ལྟ་བུའི་བག་ཆགས་སད་པ་མེད་པའི་ཕྱིར་རོ་ཞེས་བྱ་བ་ལན་ཡིན་ནོ་ཞེས་བྱ་བའི་དོན་ཏོ། །འདི་ཉིད་ལ་འོ་ན་ཞེས་དྲི་བའོ། །འདི་ལ་བརྗོད་པ་ནི་བག་ཆགས་ཞེས་བྱ་བའོ། །མི་བདེན་པའི་དོན་ནི་དམིགས་པ་མེད་པའོ། །ཇི་ལྟར་སླུ་བར་འགྱུར་སྙམ་ན། ཕྱིན་ཅི་ལོག་ཅེས་གསུངས་སོ། །འདི་ཙམ་དུ་ཞེས་བྱ་བ་ནི་བག་ཆགས་དང་འབྲེལ་པ་ཞེས་བྱ་བ་ཙམ་དུ་བྱ་བའོ། །གལ་ཏེ་རྨི་ལམ་ལ་སོགས་པའི་ཤེས་པ་ནི་གནོད་བྱེད་ཀྱི་ཤེས་པའི་སྟོབས་ཀྱིས་མི་བདེན་པའི་དོན་ཉིད་མ་ཡིན་ནམ་སད་པའི་ཤེས་པ་ལ་ནི་གནོད་པར་བྱེད་པ་མ་ཡིན་ཏེ་ངེས་ན་མི་བདེན་པའོ། །དོན་དུ་ཇི་ལྟར་འགྱུར་སྙམ་ན། གང་གིས་ཞེས་གསུངས་སོ། །དེ་མེད་པས་ནི་གནོད་བྱེད་མེད་པས་སོ། །འདིར་གཞན་གྱིས་གལ་ཏེ་ཞེས་སྨྲས་སོ། །འདི་ནི་ཞེས་བྱ་བ་སད་པའི་ཤེས་པའོ། །གཞན་ནི་རྨི་ལམ་གྱི་ཤེས་པའོ། །ཇི་ལྟར་འདི་འཐད་སྙམ་ན་གཅིག་ལ་ཞེས་སྨྲས་སོ། །རང་གིས་དེར་མི་སླུ་བ་ཉིད་དུ་འགྱུར་བ་ཞེས་བྱ་བ་ནི་ལྷག་མའོ། །ལན་ནི་དེ་ནི་ཞེས་བྱ་བའོ། །ཤེས་པ་ཐམས་ཅད་བག་ཆགས་དག་འབྲེལ་པ་ཡིན་ཡང་ངོ༌། །ཇི་ལྟར་སྔོན་པོ་ལོག་པའི་དབྱེ་བ་དང་མྱུར་བ་དང་ཡུན་རིང་པོར་འཇིག་པར་འགྱུར་བ་དེ་བཞིན་དུ་མི་སླུ་བ་ལ་སོགས་པར་ཅིས་མི་འགྱུར་ཏེ་འགྱུར་བ་ཁོ་ནའོ། །གལ་ཏེ་བག་ཆགས་དང་འབྲེལ་པར་ཁྱད་པར་མེད་པའི་ཕྱིར་སྔོན་པོ་ལ་སོགས་པའི་དབྱེ་བ་ཡང་མི་འཐད་དོ་སྙམ་ན། རྣམ་འགས་ཞེས་གསུངས་སོ། །དེ་བལྟའོ་ཞེ་ན། མི་ཉིད་དུ་ནི་ཞེས་བྱ་བའོ། །གཞན་ཡང་བྲམ་ཟེ་ཁྱེད་ཀྱི་ལྟར་ན་ཤེས་པ་ཐམས་ཅད་ནི་དམིགས་པ་དང་བཅས་པ་ཡིན་ནོ། །དེས་ན་ཇི་ལྟར་དོན་དང་འབྲེལ་པ་ཉིད་དུ་མཚུངས་ན་ཡང་ཤེས་པ་ཀུན་མི་སླུ་བ་ཅན་མ་ཡིན་པ་དེ་བཞིན་དུ་འགའ་ཞིག་ནི་མི་སླུ་བ་ཡིན་ལ། གཞན་ནི་དེ་ལྟ་མ་ཡིན་པ་འདི་ནི་བཟློག་པ་དམིགས་པ་མེད་པ་ཉིད་དུ་མཚུངས་པ་ཉིད་ལ་ཡང་གློ་བུར་དུ་མི་སྲིད་པ་ཇི་སྟེ་སྲིད་པ་ཁོ་ནའོ། །འདིར་ཕ་རོལ་གྱིས་སྨྲས་པ་དོན་ལ་དམིགས་
པའི་རིམ་པ་རྣམས་ལ་ནི་བག་ཆགས་དང་འབྲེལ་པ་སྲིད་པ་མ་ཡིན་ཏེ། གང་གི་ཕྱིར་རིག་པ་ཐམས་ཅད་ནི་དོན་དུ་ལྷག་པར་ཞེན་པ་ཉིད་དུ་མཐོང་བ་ཡིན་ཞེ་ན། འདི་གསུངས་པ་ནི་དེ་ནི་མ་ཡིན་ཏེ་ཞེས་བྱ་བའོ། །ཤེས་པ་འགའ་ཞིག་ལ་གནོད་པར་བྱེད་པའི་ཤེས་པ་ཡུལ་མེད་པར་འཛིན་པ་ཇི་ལྟར་ཏེ་མི་འགྲུབ་པ་ཁོ་ན་ཞེས་བྱ་བའི་དོན་འདི་ལ་གཞན་གྱིས་འཇིག་རྟེན་ཞེས་བྱ་བ་ལ་སོགས་པ་སྨོས་སོ། །དེ་ལྷའི་ཞེས་བྱ་བ་རྣམ་པ་དེས་ཡང་དོན་ཡོད་པ་མ་ཡིན་ཏེ། དེས་ན་མི་སླུ་བ་དང་བཅས་པ་མ་ཡིན་ནོ། །སྔོན་མཐོང་བའི་རྗེས་སུ་འབྲང་བའི་ཕྱིར་འགྱུར་བ་ཡིན་ནོ་ཞེ་ན། དེའི་ཚེ་ཇི་ལྟར་བག་ཆགས་རྒྱུ་མ་ཡིན་པ་སྟེ་བག་ཆགས་ཉིད་རྒྱུ་ཡིན་ནོ་ཞེས་བྱ་བའི་དོན་ཏོ། །དཔེ་ལ་སྦྱར་ནས་དོན་ལ་ཡང་སྦྱོར་བར་བྱེད་པ་ནི་རིག་པ་འདི་ནི་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་ཐམས་ཅད་ཀྱིས་ངེས་པ་ཀུན་རྫོབ་ཀྱི་བདག་ཉིད་ཚད་མས་མི་བྱེད་ན་དེའི་ཚེའོ། །གལ་ཏེ་ཕྱིན་ཅི་ལོག་ཏུ་སྣང་བ་དང་ལྡན་པ་ལས་འདི་ལྟར་སྣང་བ་ཡིན་ནོ་ཞེས་ངེས་པ་ཡང་འཇིག་རྟེན་པ་རྣམས་ལ་ཡོད་པ་མ་ཡིན་ནམ། དེས་ན་དེ་ཡང་ཚད་མར་འགྱུར་རོ་སྙམ་ན། འདིར་ཞེས་གསུངས་སོ། །གལ་ཏེ་ཕྱིན་ཅི་ལོག་ལ་སོགས་པར་རིག་པ་ཡིན་ན་དེའི་ཚེ་རིག་པ་དེ་རིག་པ་སྔ་མ་དེ་ལས་བྱུང་བར་ཁས་བླངས་ཏེ། ཐག་པ་ལ་སྦྲུལ་གྱི་བློ་བཞིན་ནོ། །རིག་པ་འགའ་ཞིག་རིག་པ་སྔ་མའི་རྒྱུ་ཅན་ཡིན་མོད་སྙམ་ན། དེས་ན་ཞེས་གསུངས་སོ། །དེ་ལྟ་ཉིད་ཅེས་བྱ་བ་ནི་རིག་པ་སྔ་མའི་རྒྱུ་ཅན་དུའོ། །གཞན་གྱིས་གཞན་ལ་ཞེས་སྨྲས་ཏེ་འདས་པའི་ཤེས་པ་ལའོ། །འདི་ལ་བརྗོད་པ་ནི་ཀུན་ལ་ཞེས་བྱ་བའོ། །གལ་ཏེ་དོན་ཡིན་ནོ་སྙམ་པའི་ངེས་པ་ནི་ཡོད་པ་ཡིན་ལ་ངེས་པ་དེའི་ཕྱིར་ན། དེ་ལྟ་མིན་ན་ཞེས་བྱ་བ་དོན་ཐོབ་པར་བྱ་བ་མ་ཡིན་ནོ་ཞེས་བྱ་བ་དེ་ལྟར་བརྟག་པར་བྱ་བ་མ་ཡིན་ནོ་སྙམ་ན། དེ་ནི་མི་འཐད་དེ་ཕྱིའི་དོན་ཡིན་ནོ་སྙམ་པས་ངེས་པ་དེ་འཇིག་རྟེན་མིན་པ་དངོས་པོ་སོགས་པའི་སྒྲས་ཕྱིན་ཅི་ལོག་ཏུ་སྣང་བ་ལ་སོགས་པ་ལ་ཡང་མི་འགྱུར་རམ་ཅི་སྟེ་ཡོད་པ་ཉིད་དོ། །དེས་ན་དེར་ཡང་དེ་ལྟར་ངེས་པ་ལས་དོན་ཐོབ་པ་ཡོད་པར་འགྱུར་རོ། །དེས་ན་ཚད་མས་བསྒྲུབ་པ་དོན་མོད་དོ་སྙམ་པའི་ངེས་པ་ལས་ནི་གང་དུ་ཡང་དོན་
ཐོབ་པ་ཡོད་པ་མ་ཡིན་ནོ་ཞེས་བྱ་བར་དགོངས་པའོ། །གལ་ཏེ་དོན་མེད་པར་ངེས་པ་ཡང་འཁྲུལ་བ་ཉིད་མ་ཡིན་ནམ། དེ་ལས་ཀྱང་དོན་མེད་པའི་ཐ་སྙད་དུ་ཇི་ལྟར་འགྱུར་སྙམ་ན། དོན་ལ་ཞེས་གསུངས་སོ། །དེའི་ཞེས་བྱ་བ་ནི་དོན་ལ་ཡང་འཇུག་པས་མ་ངེས་པ་ཉིད་མ་ཡིན་ནོ། །དོན་མོད་སྙམ་པའི་ངེས་པ་ནི་དོན་ལ་མ་ཞུགས་པའི་ཕྱིར་གང་གིས་དེར་ཡང་དོན་མོད་དོ་སྙམ་པའི་ངེས་པ་འཇུག་པར་འགྱུར་བ་དོན་ནི་འགའ་ཡང་སྲིད་པ་མ་ཡིན་ནོ། །བག་ཆགས་ཀྱང་གཞི་ཅན་ཉིད་དུ་ཡོངས་སུ་ཤེས་པ་ཉིད་དོན་དུ་སྣང་བའི་གནོད་བྱེད་ཡིན་ཏེ། རྒྱུ་དེས་ན་སད་པའི་ཤེས་པ་ལ་ནི་གཉེན་པོ་མི་སྲིད་པ་ཡོངས་སུ་མ་ཡིན་གྱི། འོན་ཀྱང་བག་ཆགས་ཀྱི་རྒྱུ་ཅན་དུ་ངེས་པ་ཞེས་བྱ་བ་གནོད་པར་བྱེད་པ་ཡོད་པ་ཁོ་ནའོ། །དེ་ཉིད་སྟོན་པ་ནི་ཤེས་པ་སྔོན་མཐོང་ཞེས་བྱ་བའོ། །སད་པའི་ཀ་སོགས་ཞེས་བྱ་བ་ནི་གཞན་གྱིས་སངས་རྒྱས་པའི་ལུགས་ཉེ་བར་བཀོད་པའོ། །དེའི་གནས་སྐབས་ནི་རྣལ་འབྱོར་པའི་གནས་སྐབས་སོ། །གནོད་པ་འདི་ནི་ཞེས་བྱ་བ་ནི་སད་པའི་ཀ་བ་ལ་སོགས་པ་གནོད་པའོ། །དེ་ལྟར་སངས་རྒྱས་པའི་དོགས་པ་བསུ་ནས་གཞན་གྱི་སུན་འབྱིན་པ་བརྗོད་པ་གང་ཡིན་པ་དེ་ཉིད་སྟོན་པ་ནི། དེས་ནི་ཞེས་བྱ་བ་སྟེ་སངས་རྒྱས་པ་དེས་ནའོ། །རེ་ཞིག་སྐྱེ་བ་འདི་ལ་ནི་སད་པའི་ཤེས་པ་ལ་གནོད་པར་བྱེད་པའི་ཤེས་པ་ཞེས་བྱ་བ་ལྷག་མའོ་ཞེས་བྱ་བ་གཞན་གྱིས་བརྗོད་པ་གང་ཡིན་པ་དེ་སྤང་བ་ཡིན་ནོ་ཞེས་སྔ་མ་དང་འབྲེལ་ཏོ། །ཇི་ལྟར་བསལ་སྙམ་དུ་དོགས་ན་འདི་ལྟར་ཞེས་བྱ་བ་ལ་སོགས་པར་སྦྱར་རོ། །ཁྱེད་ཀྱིས་ཞེས་བྱ་བ་སངས་རྒྱས་པས་གཉེན་པའོ། །འདི་འདྲ་བའི་བློ་ཅན་གང་ཡིན་པ་དེ་དག་ཀྱང་གལ་ཏེ་རྣལ་འབྱོར་པ་ཡིན་ན། དེའི་ཚེ་མྱ་ངན་ལས་འདས་པས་བསླད་པ་ཡང་ཅི་སྟེ་རྣལ་འབྱོར་བ་མ་ཡིན་འདི་འདྲ་ལ་ཞེས་བྱ་བ་ནི་དམིགས་པ་མེད་པ་ཉིད་ལའོ། །ཁྱེད་ཀྱི་ལ་ནི་ཞེས་བྱ་བ་ནི་དམིགས་པ་དང་བཅས་པར་བསྒྲུབ་པ་རྣམས་ལའོ། །དེས་ན་ཞེས་བྱ་བ་ལ་སོགས་པ་ནི་གནོད་པར་བྱ་བ་ཉིད་དུ་བསྒྲུབ་པའོ། །གང་ཡང་བློ་ཡིན་པ་དེ་ནི་གནོད་པར་བྱ་བ་ཡིན་ཏེ། དཔེར་ན་སྨིག་རྒྱུ་ལ་སོགས་པའི་བློ་བཞིན་ནོ། །ཀ་ལ་སོགས་པའི་བློ་རྣམ་པ་དེ་འདི་དབང་བློ་ཡིན་ནོ་ཞེས་སྦྱོར་བ་བལྟ་བར་བྱའོ། །འདོད་པ་ཉིད་ཅེས་བྱ་བ་ནི་གལ་ཏེ་གཉེན་པོ་དང་
བཅས་པ་རྣམས་སྒྲུབ་ན་དེའི་ཚེ་ནི་འདོད་པ་ཉིད་དེ་སྨིག་རྒྱུའི་བློ་ལ་སོགས་པ་རྣམས་ཀྱིས་གཉེན་པོ་དང་བཅས་པ་ཡིན་པའི་ཕྱིར་རོ། །ཀ་བ་ལ་སོགས་པའི་བློ་རྣམ་པ་དེའི་བདག་ཉིད་ཀྱིས་དེ་སྨིག་རྒྱུ་ལ་སོགས་པ་རང་བཞིན་གྱིས་གནོད་པར་བྱེད་པ་ཡིན་ན་ནི་འདོད་པ་ཉིད་དོ། །གཟུང་བ་ཞེས་བྱ་བ་བུམ་པ་ལ་སོགས་པའི་མཚན་ཉིད་གཟུང་བས་ཀྱང་གནོད་པར་བྱ་བ་ཉིད་དུ་འདོད་པ་ཡིན་ནོ། །འདི་ལ་བརྗོད་པ་འདི་ནི་ཞེས་བྱ་བའོ། །དེ་ལྟར་ནི་གནོད་བྱེད་གནས་པ་མ་ཡིན་ཏེ། གང་གི་ཕྱིར་རྩ་བ་གཅོད་པར་བྱེད་པ་གནོད་བྱེད་དུ་བརྗོད་པར་འདོད་ཀྱི་སྨིག་རྒྱུའི་ཤེས་པ་ལ་སོགས་པ་གཞན་ལ་ནི་མ་ཡིན་ནོ། །དེའི་ཕྱིར་ཅི་ལྟར་རུང་བར་ཞེས་བྱ་བ་སྨིག་རྒྱུ་ལ་སོགས་པའི་ཤེས་པས་ཀྱང་ཀ་བ་ལ་སོགས་པའི་ཤེས་པ་རྣམས་གཉེན་པོ་དང་བཅས་པར་བརྗོད་པ་འདི་ནི་རང་གིས་མི་ཤེས་པའི་གསལ་འདེབས་པ་ཡིན་ནོ། །གལ་ཏེ་གང་དང་བློ་ཡིན་པར་དེ་གནོད་པར་བྱ་བ་ཡིན། དེའི་ཚེ་གནོད་པར་བྱེད་པའི་ཤེས་པ་ཉིད་གནོད་བྱ་ཡིན་ནམ་མ་ཡིན། གལ་ཏེ་ཡིན་ན་ཇི་ལྟར་དེས་གཞན་གནོད་དེ་མ་ཡིན་ན་དེའི་ཚེ་གནོད་བྱེད་དེ་སམ་ངེས་ཏེ། བློ་ཡང་ཡིན་ལ་གནོད་བྱ་ཡང་མ་ཡིན་ཏེ་དཔེར་ན་གནོད་བྱེད་ཀྱི་བློ་བཞིན་ནོ་ཞེས་བྱ་བར་འགྱུར་རོ། །འོན་ཏེ་གནོད་བྱེད་ལས་གཞན་པའི་བློ་གནོད་པར་བྱ་བ་ཡིན་ནོ་ཞེས་འདོད་ན་དེའི་ཚེ་ལས་གཞན་པའང་སྔ་མ་བཞིན་ཏེ། ཐུག་པ་མེད་པ་ལ་སོགས་པའི་ཉེས་པ་འགལ་བ་སུན་དབྱུང་ངོ༌། །སངས་རྒྱས་པ་ལ་སོགས་པའི་ཤེས་པ་ལས་གཞན་པའི་ཤེས་པ་རྣམས་གཞན་ཉིད་དུ་སྒྲུབ་པར་བྱེད་པའི་ཤེས་པ་ཡང་བརྫུན་པ་ཉིད་དུ་འགྱུར་ཏེ། འདི་ནི་འདོད་པ་ཡང་མ་ཡིན་ནོ་ཞེ་ན། འདི་ལ་བརྗོད་པ་ནི་འདིར་ཡང་ཞེས་བྱ་བའོ། །རྨི་ལམ་ལ་སོགས་པ་ན་ཡོད་པ་ལོག་པའི་བློ་ལ་ལྟོས་ནས་གཉེན་པོ་ཉིད་དུ་འགྱུར་ཏེ། ཕྱིན་ཅི་ལོག་ཏུ་ཁྱད་པར་མེད་པའི་ཕྱིར་རོ་ཞེ་ན། འདི་ལ་བརྗོད་པ་ནི་སྔ་མ་ཉིད་དུ་ཞེས་བྱ་བ་ལ་སོགས་པའོ། །ལོག་པ་ཉིད་ཡིན་ཡང་བག་ཆགས་ཆེ་ཆུང་ཡོད་པ་ལས་བློ་ཐམས་ཅད་ཁྱད་པར་གྱི་རིམ་པའི་དངོས་པོ་ཡིན་ལ། དེ་ལས་གནོད་བྱ་གནོད་བྱེད་ཀྱི་དམིགས་པ་ཡིན་ནོ། །ཇི་ལྟར་ཅིའི་དངོས་པོ་དང་འབྲེལ་པའི་དབང་གིས་བློ་ཐམས་ཅད་ཕྱིན་ཅི་ལོག་པ་ཡིན་ཡང་གནོད་བྱ་གནོད་བྱེད་ཀྱི་དངོས་པོ་ཡིན་པ་བཞིན་ནོ། །
རྣལ་འབྱོར་པ་ཉིད་དང་འདོད་ཆགས་ལ་སོགས་པ་ཟད་པ་དག་གི་མཚན་མ་གང་ཡིན་པ་དེ་དང་ལྡན་པའི་བློའོ། །འདོད་ཆགས་པ་ལ་སོགས་པ་ཟད་པ་དང་རྣལ་འབྱོར་པ་གཉིད་ལོག་པའི་མཚན་མ་མཁྱེན་པ་སྟེ། རྟོགས་པའི་ཁྱད་པར་ཅི་སྟེ་བཅོམ་ལྡན་འདས་ལ་འདོད་པ་དེ་མ་ཐག་བཀག་པའི་ཕྱིར་གཏན་ཚིགས་འགལ་བ་ཉིད་ཡིན་ནོ། །ཇི་ལྟར་རྨི་ལམ་ཀ་བ་ལ་སོགས་པའི་ཤེས་པས་གཉེན་པོ་དང་བཅས་པ་ལས་ལོག་པ་ཉིད་ཡིན་པ་དེ་བཞིན་དུ་ཀ་བ་ལ་སོགས་པའི་ཤེས་པ་ལོག་པ་ཡིན་ནོ། །ཀ་བའི་ཤེས་པའི་གཉེན་པོ་ཡང་དེ་བཞིན་གཤེགས་པའི་ཐུགས་ཡིན་ཏེ། དེས་ན་དེ་ཡང་ལོག་པར་ཐལ་ལོ་ཞེས་བྱ་བའི་དོན་ཏོ། །དེ་ནི་གཏན་ཚིགས་མ་ལུས་པའི་ནུས་པ་སྟེ་མཐུ་གང་ཡིན་པ་འགོག་པ་མིན་ཏེ། འོན་ཀྱང་དེ་འདྲ་བ་དེ་ནི་གཏན་ཚིགས་ཐམས་ཅད་ལ་འགལ་བ་ཡིན་པར་འགྱུར་རོ། །ཁྱད་པར་གྱི་གཉེན་པོ་དང་བཅས་པ་ཉིད་ནི་མ་ཡིན་ནོ་ཞེས་བྱ་བ་ནི། ལོག་པའི་ཤེས་པའི་མཚན་ཉིད་ཀྱི་ཁྱད་པར་གྱི་གཉེན་པོ་ཉིད་ནི་སངས་རྒྱས་པ་སྒྲུབ་པར་བྱེད་པ་མ་ཡིན་ནོ། །དེ་བཞིན་དུ་ཞེས་བྱ་བ་ལ་སོགས་པ་ནི་ཡང་གཏན་ཚིགས་ཉིད་དུ་མི་འགྱུར་རོ་ཞེས་སྟོན་པའོ། །ནམ་ཀ་བའི་ཡོན་ཏན་ཉིད་ཀྱང་བསྟན་བཅོས་ཁས་བླངས་པའི་ཕྱིར་བསྒྲུབ་པར་བྱ་བ་ཁོ་ནའོ། །དེས་གནོད་པའི་ཕྱིར་གཏན་ཚིགས་འགལ་བ་ཁོ་ནར་འགྱུར་རོ་སྙམ་ན། བསྟན་བཅོས་ཞེས་གསུངས་སོ། །རྗེས་སུ་དཔག་པས་གནོད་པ་སྟོན་པ་ནི་གལ་ཏེ་ཞེས་བྱ་བའོ། །བཟློག་པའི་སྒྲུབ་བྱེད་བརྗོད་པ་ནི་རྩོད་པའི་གཞིར་གྱུར་པའི་ཞེས་བྱ་བའོ། །མཐོང་བ་ཙམ་ཞེས་བྱ་བ་མཐུན་པའི་ཕྱོགས་ལ་མཐོང་བ་ཙམ་གྱིས་སྒྲུབ་པར་བྱེད་པ་གང་ལ་ཡོད་པ་དེ་ལ་དེ་སྐད་ཅེས་བརྗོད་དོ། །དཔེ་ཡང་མི་འགྲིག་པར་བྱེད་པའི་དོན་དམ་པར་ཞེས་བྱ་བའོ། །འོན་ཏེ་ཀུན་རྫོབ་ཏུ་རྨི་ལམ་གནོད་པར་བྱེད་པའི་བློ་གནོད་བྱ་མ་ཡིན་པར་བརྗོད་ན། དེའི་ཚེ་ཀ་བ་ལ་སོགས་པའི་བློ་ཡང་ཀུན་རྫོབ་ཏུ་གནོད་བྱ་མ་ཡིན་པ་ཉིད་དེ། དེ་ལ་འཆད་པ་ཅི་ཡང་མེད་དོ། །བློས་ཞེས་བྱ་བ་ནི་རྨི་ལམ་མཐོང་བའི་བློས་སོ། །རྨི་ལམ་ལ་སོགས་བཞིན་ཞེས་བྱ་བ་ནི་ཇི་ལྟར་རྨི་ལམ་གྱི་ཀ་བ་ལ་སོགས་པའི་ཤེས་པ་མི་གནོད་པ་དེ་བཞིན་དུ་རྨི་ལམ་གྱི་གནོད་པ་བྱེད་པའི་བློས་ཀྱང་རྨི་ལམ་གནོད་པར་མི་འགྱུར་ཏེ། མི་བདེན་པར་
ཁྱད་པར་མེད་པའི་ཕྱིར་རོ་ཞེ་ན། འདི་ལ་བརྗོད་པ་ནི་ཆེ་ཆུང་ཞེས་བྱ་བའོ། །བདེན་པའི་ཕྱིར་ཞེས་བྱ་བ་ནི་དམིགས་པ་དང་བཅས་པའི་ཕྱིར་རོ། །འོ་ན་ཇི་ལྟར་གནོད་སྙམ་ན། དེའི་གཞལ་བྱ་ཞེས་གསུངས་སོ། །དེ་ཞེས་བྱ་བ་ནི་དེའི་གཞལ་བྱ་མ་དམིགས་སོ། །དེ་ནི་ཞེས་བྱ་བ་ཕྱིན་ཅི་ལོག་དམིགས་པའི་རང་བཞིན་ནོ། གང་གི་ཚེ་རིགས་པ་ལ་ཞེས་བྱ་བ་ནི་རྨི་ལམ་གྱི་བློ་ལའོ། །དེ་ལས་བཟློག་ཅེས་བྱ་བ་ནི་རྨི་ལམ་གྱི་ཤེས་པའི་དམིགས་པ་ལས་བཟློག་པའོ། །གཞན་ལ་ཞེས་བྱ་བ་ནི་རྨི་ལམ་གྱི་བློ་ལའོ། །སྒྲུབ་བྱེད་ཤེས་པ་ཉེས་ཞེས་བྱ་བ་ནི་གཏན་ཚིགས་ཀྱི་དོན་ཏེ་དོགས་པ་བསྒྲུབ་པ་ན་གལ་ཏེ་སད་པའི་བློ་རྣམས་ཀྱང་རྨི་ལམ་གྱི་བློ་དང་མཚུངས་པ་དེའི་ཚེ་ངེད་ལ་གནོད་བྱ་གནོད་བྱེད་ཀྱི་དངོས་པོས་ཅི་ཞིག་དོགས་ཏེ། འདིར་དྲན་བྱ་ཞེས་བྱ་བ་ནི་གནོད་བྱེད་ཉིད་བསྒྲུབ་པའི་གཏན་ཚིགས་བློ་ཉིད་ལ་དྲན་པར་བྱ་བ་ཡིན་ཏེ། སྔར་གྱི་སྒྲུབ་པར་བྱེད་པ་ཤེས་པ་ཉིད་དེའི་རྒྱན་དེ་ལ་ཡང་ད་ལྟར་མདོར་བསྡུས་ཏེ་བརྗོད་པ་ཡིན་ནོ་ཞེས་བྱ་བའི་དོན་ཏོ། །ཕྱེད་སྔ་མ་འཆད་པ་ནི་རྟོགས་པར་བྱེད་པའི་ཞེས་བྱ་བ་ལ་སོགས་པའོ། །དམ་བཅས་པའི་དོན་གྱི་ཕྱོགས་གཅིག་ཡིན་པའི་རྒྱུས་ན། གཏན་ཚིགས་ཤེས་པ་ཉིད་ཐ་དད་པ་བརྗོད་པར་མི་ནུས་པའི་ཕྱིར་རོ། །འདི་ལྟར་ཤེས་པ་ཉིད་ནི་ཆོས་ཅན་ཡིན་ལ་གཏན་ཚིགས་ཀྱང་དེ་ཉིད་ཡིན་ནོ། །གལ་ཏེ་ཞེས་སངས་རྒྱས་པ་དང་བྲམ་ཟེ་རྟག་ལའོ། །དེ་ལ་ཞེས་བྱ་བའོ། །འོན་ཏེ་འདྲ་བ་དང་ཤེས་པ་མ་ཡིན་པ་དག་ལས་ལྡོག་པ་ནི་རྟོགས་པ་ཐམས་ཅད་ལ་ཡོད་པས་དེ་ཉིད་སྤྱིར་འགྱུར་རོ་སྙམ་ན། འདྲ་དང་ཞེས་གསུངས་སོ། །གཉིས་ཀ་ལ་ནི་སངས་རྒྱས་པ་དང་བྲམ་ཟེ་རྟག་ལའོ། །འདི་ལ་བརྗོད་པ་ནི་འདི་ནི་ཞེས་བྱ་བའོ། །དངོས་པོར་ནི་ཞེས་བྱ་བ་ནི་དོན་དམ་པར་རོ། །རྟོགས་པ་ཞེས་བྱ་བ་ནི་སྤྱི་འདིའི་དོན་ཅི་ཡིན་ཞེ་ན། དོན་བརྗོད་པ་ནི་ཉམས་སུ་མྱོང་བ་སྟེ་ཞེས་བྱ་བའི་ཤེས་པ་ཆོས་ཅན་ཡིན། དེ་བཞིན་དུ་རང་རྒྱུད་དམ་བདག་གི་ཆོས་ཞིག་ཡིན་ཞེས་བྱ་བ་ལ་སོགས་པ་བརྗོད་པ་གང་ཡིན་པ་དེ་དྲན་པར་བྱེད་པ་ནི། ཁྱད་པར་ཅན་ནི་ཞེས་བྱ་བའོ། །འགལ་བ་ཉིད་ནི་དམིགས་པ་དང་བཅས་པ་ཉིད་ཀྱིས་ཁྱབ་པའི་ཕྱིར་རོ། །དཔེ་རྨི་ལམ་བསྒྲུབ་བྱས་སྟོང་པ་ཉིད་ནི་ཐམས་ཅད་ཀྱང་དམིགས་པ་དང་བཅས་པ་ཡིན་པའི་ཕྱིར་རོ། །ཇི་ལྟར་རང་
རིག་པ་ཉིད་འབྲས་བུ་ཡིན་ཞེ་ན། རྣམ་པར་ཤེས་པར་ཞེས་བྱ་བ་ལ་སོགས་པའོ། །འདིར་ཕྱིའི་དོན་སྨྲ་བས་བརྗོད་པའོ། །འབད་པ་འདི་ལ་ཞེས་བྱ་བ་ནི་དམིགས་པ་མེད་པར་བསྒྲུབ་པའི་མཚན་ཉིད་ལས་སོ། །ཇི་ལྟར་ཞེས་བྱ་བ་ནི་དམིགས་པ་དང་བཅས་པར་རོ། །དམིགས་པ་མེད་པ་ཉིད་དུ་བསྒྲུབས་པས་འཇིག་རྟེན་གྱི་ཐ་སྙད་ཉིད་གཞན་དུ་བྱེད་པ་ཡིན་ནོ་ཞེ་ན། དམིགས་པ་ཞེས་བྱ་བའོ། །གལ་ཏེ་ཐ་སྙད་དེ་ལྟར་མི་འགྱུར་མོད། དེ་ལྟ་ན་ཡང་དམིགས་པ་མེད་པ་ཉིད་དུ་བསྒྲུབས་པ་ལ་འབྲས་བུ་གཞན་ཉིད་ཡོད་དོ་ཞེ་ན། ཐ་སྙད་ལས་ཞེས་སྨྲས་སོ། །དེའི་ཚེ་ཐ་སྙད་ཅི་ལྟར་ཞེས་བྱ་བའི་རིག་བྱེད་སྐྱེས་བུས་བྱས་པ་ཉིད་དུ་ཡིན་པ་དེ་ལྟར་དེ་སྐྱེས་བུས་བྱས་པ་ཉིད་དུ་འགྱུར་མོད། རིག་བྱེད་སྐྱེས་བུས་མ་བྱས་པ་ཉིད་དུ་བསྒྲུབ་པའི་འཐད་པའི་ལམ་འབྲས་བུ་ཅི་ཡོད་དེ་ཅི་ཡང་ཡོད་པ་མ་ཡིན་ནོ། །འོན་ཏེ་གལ་ཏེ་སྐྱེས་བུས་མ་བྱས་པ་མ་ཡིན་ན། དེའི་ཚེ་མཆོད་སྦྱིན་ལ་སོགས་པའི་ཐ་སྙད་མེད་པར་འགྱུར་རོ་ཞེ་ན། གང་གིས་ཞེས་གསུངས་སོ། །དེས་ན་ཞེས་བྱ་བ་ནི་སྐྱེས་བུས་བྱས་པ་མེད་ནའོ། །དེ་ཉིད་ཅེས་བྱ་བ་ནི་མཆོད་སྦྱིན་ལ་སོགས་པ་ལའོ། །རྣམ་པར་དཔྱད་པ་ཞེས་བྱ་བ་ནི། སྐྱེས་བུས་མ་བྱས་པ་ཉིད་དུ་ངེས་པས་སོ། །གཞན་དུ་ཡང་ཞེས་བྱ་བ་ནི་ཤེས་པ་ཙམ་ཞེས་བྱ་བ་འདི་ལའོ། །ལན་འདི་ནི་གཞན་སངས་རྒྱས་པ་ལ་སངས་རྒྱས་པ་ལ་ཡང་མཚུངས་སོ། །དེ་ཉིད་བརྗོད་པ་ནི་སྐྱེས་བུས་མ་བྱས་པ་ཞེས་བྱ་བའོ། །གཞན་ཡང་ཞེས་བྱ་བ་ལ་སོགས་པས་ནི་ དགོས་པ ་ཉིད་བརྗོད་དོ། །དེ་ཡང་ཞེས་བྱ་བ་ནི་འདོད་ཆགས་ལ་སོགས་པའི་ཉེས་པ་ཟད་པའོ། །དེ་ཉིད་དཔྱོད་པ་ཉིད་ནི་ཕྱི་རོལ་གྱི་ཞེས་བྱ་བའོ། །རྣམ་པར་དཔྱད་པའི་དོན་དུ་རེ་ཞིག་གཞན་གྱི་ཕྱོགས་བརྗོད་པ་ནི་གལ་ཏེ་ཞེས་བྱ་བའོ། །དེའི་རྣམ་པ་ཅན་ཞེས་བྱ་བ་ནི་ཕྱི་རོལ་སྔོན་པོ་ལ་སོགས་པ་ལྟ་བུའི་རྣམ་པ་གང་ལ་ཡོད་པ་དེ་ནི་དེའི་རྣམ་པ་ཅན་ནོ། །ཡང་དེ་ཉིད་ཅེས་བྱ་བ་ནི་སྔོན་པོ་ལ་སོགས་པའི་དོན་ཏོ། །དེའི་ཚེ་རྣམ་པ་མེད་པ་དེ་ཉིད་ཐམས་ཅད་མཐོང་བ་ཡིན་མོད། རྣམ་པ་འགའ་ཞིག་བརྟགས་པས་ དགོས་པ ་ཅི་ཡོད། དེ་ངེས་པར་རྟོག་པའི་རྣམ་པ་ཞེས་བྱ་བ་འདི་ཉིད་ཀྱི་དོན་ནི་མཐོང་བའི་རྣམ་པ་ཞེས་བྱ་བའོ། །སྔོན་པོ་ལ་སོགས་པའི་རྣམ་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེས་ན་མངོན་པ་ཐམས་
ཅད་ནི་རྣམ་པ་མེད་པ་ཁོ་ནའོ་ཞེས་བྱ་བར་གྲུབ་བོ་ཞེ་ན། འདི་ལ་བརྗོད་པ་ནི་དེའི་ཚེ་ཞེས་བྱ་བའོ། །གཉིས་ཀ་ཡང་ཞེས་བྱ་བ་ནི་ཤེས་པ་དང་དོན་ཏོ། །འདི་ལ་བརྗོད་པ་ནི་དེ་ལྟ་ན་ཞེས་བྱ་བའོ། །ཕན་ཚུན་ཞེས་བྱ་བ་ནི་ཇི་ལྟར་ཤེས་བས་དོན་འཛིན་པ་དེ་བཞིན་དུ་དོན་གྱིས་ཀྱང་ཤེས་པ་འཛིན་པར་འགྱུར་རོ། །དེ་ཉིད་ཅེས་བྱ་བ་ནི་སྔོན་པོ་ལ་སོགས་པའི་རྣམ་པའོ། །བློ་མེད་པར་ཞེས་བྱ་བ་ནི་དཔྱོད་པ་བས་འདོད་པའི་བློ་མེད་པར་རོ། །དེས་ན་ཇི་ལྟར་རྣམ་པ་གཞན་དུ་མི་འཐད་པས་སྔོན་པོ་ལ་སོགས་པ་ཕ་རོལ་དུ་ཁས་ལེན་པ་དེ་བཞིན་དུ་གསལ་བ་གཞན་དུ་མི་འཐད་པས་མདོ་སྡེ་པས་བློ་ཡང་ཁས་བླང་བར་བྱའོ་ཞེས་དགོངས་པའོ། །འོན་ཏེ་བློ་མེད་བར་ལྐོག་ཏུ་མ་གྱུར་པ་ཉིད་དོ་སྙམ་ན། དེ་ལྟ་ཡིན་ན་ཕྱི་རོལ་གཞན་རྟོགས་པར་བྱ་བ་མ་ཡིན་ཏེ། གང་གི་ཕྱིར་ཕྱི་རོལ་མེད་པར་དེའི་རྣམ་པ་ཅན་གྱི་བློ་ཡང་མཐོང་བ་ཡིན་ཏེ། གཞན་དུ་མི་འཐད་པ་ནི་ཁས་བླང་བར་བྱའོ། །དེས་ན་དོན་གཞན་ཅི་ཞིག་བྱ། གཞན་ནི་མ་ཡིན་ནོ་ཞེས་བྱ་བ་འདི་སྣང་བ་ལས་ཕྱི་རོལ་དུ་གྱུར་པ་ཉིད་དེ་སྔོན་པོ་རྣམས་སྣང་བ་མེད་དོ། །སྔོན་པོ་སྣང་བ་ལས་ཐ་དད་པར་རྣམ་པར་གནས་པ་ལ་ནི་ཚད་མ་ཅི་ཡང་མེད་དེ། དེས་ན་ཞེས་བྱ་བ་ཚད་མ་མེད་པས་ན་སྣང་བ་ལས་ཐ་དད་པའི་སྔོན་པོ་ཁས་བླང་བར་མི་བྱའོ། །འོན་ཏེ་ཞེས་བྱ་བ་ནི་ དགོས་པའོ། །དེ་ནི་ཞེས་བྱ་བ་ནི་སྔོན་པོ་ལ་སོགས་པའོ། །འདི་ལ་བརྗོད་པ ་ཤེས་པ་ཐ་དད་པ་ཡོད་པ་ཡིན། སྔོན་པོ་ལ་སོགས་པ་དེ་སྣང་བར་མི་འགྱུར་ཏེ། ཤེས་པ་སྔོན་པོ་ལ་སོགས་པ་གསལ་བར་མི་འགྱུར་རོ་ཞེས་བྱ་བའི་དོན་ཏོ། །འདི་ག་ལས་ཤེ་ན། དེས་ནི་ཞེས་བྱ་བའོ། །གལ་ཏེ་ཤེས་པ་ཐ་དད་པ་ཡིན་ན། ལྡོན་པོ་ལྐོག་ཏུ་མ་གྱུར་པར་མི་འགྱུར་ཏེ། རང་གི་ངོ་བོས་ལྐོག་ཏུ་མ་གྱུར་པ་གང་ཡིན་པ་དེ་ལས་ལྐོག་ཏུ་མ་གྱུར་བ་ཉིད་གཞན་ནི་ཡོད་པ་མ་ཡིན་ཏེ། རང་གི་ངོ་བོས་ལྐོག་ཏུ་མ་གྱུར་པ་ཉིད་ལྐོག་ཏུ་མ་གྱུར་པ་ཡིན་ནོ་ཞེས་ཤེས་པ་ཐ་དད་པ་ལྐོག་ཏུ་མ་གྱུར་པར་ནི་ལྡོན་པོའི་རང་བཞིན་ལྐོག་ཏུ་མ་གྱུར་པ་ནི་མ་ཡིན་ནོ། །གལ་ཏེ་མིག་ལ་སོགས་པའི་སྔོན་དང་ཕྱིས་ཀྱང་དོན་ཡོད་པ་མ་ཡིན་ནམ། དེས་ན་ཇི་ལྟར་མིག་ལ་སོགས་པས་སྐྱེད་པ་ཡིན་ཞེ་ན། དོན་གྱི་ཞེས་གསུངས་སོ། །འོན་ཏེ་ཞེས་བྱ་བ་ནི་ཕ་རོལ་གྱིའོ། །འདི་ལ་གྲུབ་པའི་མཐའ་བས་བརྗོད་པ་ནི།
བློ་དང་ཞེས་བྱ་བའོ། །མིག་ལ་སོགས་པའི་སྔོན་རོལ་དུ་ཡོད་པར་ཅིའི་ཕྱིར་མི་རྟག་ཅེས་འབྲེལ་ཏོ། །དེ་བཞིན་ཉིད་དོ་ཞེས་བྱ་བ་ནི་མིག་ལ་སོགས་པའི་སྔར་ཡང་འཛིན་པའི་རྣམ་བ་ཡོད་པ་ཞེས་བྱ་བའོ། །འགལ་བ་ཉིད་སྟོན་པ་ནི་རྟོགས་པ་ཞེས་བྱ་བའོ། །གཟུང་བའི་རྣམ་པ་ལ་ཡང་དེ་བཞིན་དུ་འགལ་བར་འགྱུར་རོ་སྙམ་ན། ཐ་དད་པའི་དོན་ནོ་ཞེས་སོ། །འདི་ལ་བརྗོད་པ་ནི་ཐ་དད་དོ་ཞེས་ཚད་མ་གང་གིས་རྟོགས། གལ་ཏེ་ལྐོག་ཏུ་མ་གྱུར་པ་ལས་ཕྱི་རོལ་དུ་འགྱུར་བའི་དོན་གྲུབ་ན། དེའི་ཚེ་མིག་ལ་སོགས་པ་ལས་དོན་སྔར་ཡོད་པར་ཡང་འགྱུར་བ་ཞིག་འོན་ཀྱང་ཕྱི་རོལ་དུ་གྱུར་པ་ཉིད་མ་གྲུབ་པོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་ཞེས་བྱ་བ་ནི་ཕྱིའི་དངོས་པོ་ངེས་པ་མེད་པ་ཉིད་ཀྱི་ཕྱིར་རོ། །འདིར་ཕ་རོལ་པོ་ཉིད་སངས་རྒྱས་པའི་ཕྱོགས་ཀྱི་དོགས་པ་བསུ་བ་ནི། གསལ་བའི་མིང་ཅན་ལྐོག་ཏུ་མ་གྱུར་པ་ཉིད་ཀྱང་ཅིའི་ཕྱིར་དེ་ལྟར་ཞེས་བྱ་བ་སྔར་ཡོད་པར་ཐེ་ཚོམ་མི་ཟ་ཞེས་བྱ་བའོ། །འདི་ལ་ཉེས་པ་དེ་ཉིད་བརྗོད་པ་ནི། ལྐོག་ཏུ་མ་གྱུར་པར་ཞེས་བྱ་བའོ། །གལ་ཏེ་སྔར་ངལ་ལྐོག་ཏུ་མ་གྱུར་པ་ཉིད་ཡོད་ན་དེའི་ཚེ་ཡང་དངོས་པོ་ལྐོག་ཏུ་མ་གྱུར་པ་ཉིད་དུ་ཐལ་ལོ། །མིག་ལ་སོགས་པའི་སྔ་རོལ་དུ་དངོས་པོ་ལྐོག་ཏུ་མ་གྱུར་པ་ཉིད་དུ་ནི་སྲིད་པ་ཡང་མ་ཡིན་ནོ། །དེས་ན་ལྐོག་ཏུ་མ་གྱུར་པ་ནི་ཡོད་པ་མ་ཡིན་ནོ་ཞེ་ན། འདི་འགོག་པ་ནི་མ་ཡིན་ཏེ་ཞེས་བྱ་བའོ། །ལྐོག་ཏུ་མ་གྱུར་པ་སྔར་མེད་དོ་ཞེས་བརྗོད་པ་གང་ཡིན་པ་དེ་ནི་མ་འབྲེལ་ཏེ། སྐྱེས་བུ་གཞན་ལ་དོན་དེ་ལྐོག་ཏུ་མ་གྱུར་པར་འགྱུར་གྱི་ང་ལ་ནི་ལྐོག་ཏུ་གྱུར་པ་ཡིན་ནོ་ཞེས་རྟོགས་པར་འགྱུར་རོ། །རྣམ་པ་ཐམས་ཅད་དུ་ལྐོག་ཏུ་མ་གྱུར་པ་ཉིད་མེད་པར་ནི་རྟོགས་པར་མི་ནུས་སོ་ཞེས་བྱ་བའི་དོན་ཏོ། །དཔེ་ཉིད་འཆད་པར་ནི་གལ་ཏེ་ཞེས་བྱ་བའོ། །དེ་དང་ཐ་དད་ཕྱིར་ཞེས་བྱ་བ་ནི་ལྐོག་ཏུ་མ་གྱུར་པ་ལས་དོན་ཐ་དད་པ་མེད་པའི་ཕྱིར་རོ། །དེ་མེད་པས་ནི་ལྐོག་ཏུ་གྱུར་པ་མེད་པས་དོན་དེ་མེད་པར་འགྱུར་རོ། །དོན་དང་ལྐོག་ཏུ་མ་གྱུར་པ་དག་ཐ་མི་དད་པ་ཉིད་དུ་མ་ངེས་སོ་ཞེ་ནའོ། །དེ་ལས་ཐ་དད་པའི་ཞེས་བྱ་བ་ནི་མེའི་རང་བཞིན་ལས་ཐ་དད་པའོ། །དེ་ལས་ཞེས་བྱ་བ་དང་རང་བཞིན་ལས་ཐ་དད་པར་མི་མཐོང་བའི་ཕྱིར་ཐ་དད་པར་མ་གྲུབ་བོ་ཞེ་ན། འདི་ལ་བརྗོད་པ་ནི་ཐམས་ཅད་ཅེས་བྱ་བ་སྟེ། ལྐོག་ཏུ་གྱུར་པ་ལས་ཐ་དད་པར་ཡང་
དོན་མ་མཐོང་བའི་ཕྱིར་ཐ་དད་པ་མི་འགྲུབ་པོ་ཞེས་བྱ་བའི་དོན་ཏོ། །དེ་ལྟར་ན་རེ་ཞིག་མངོན་སུམ་གྱིས་ལྐོག་ཏུ་མ་གྱུར་པ་ལས་ཐ་དད་པ་རྟོགས་པར་མི་ནུས་སོ་ཞེས་བསྟན་ནས་རྗེས་སུ་དཔག་པས་མི་རྟོགས་སོ་གསུངས་པ་ནི་རྗེས་སུ་ཞེས་བྱ་བའོ། །འདི་ལ་ཞེས་བྱ་བ་ནི་རྗེས་སུ་དཔག་པ་ལའོ། །དེ་ལྟ་བུའི་ཞེས་བྱ་བ་ལྐོག་ཏུ་མ་གྱུར་པའི་རང་བཞིན་ཉིད་དོ། །དེ་དང་ཞེས་བྱ་བ་ལྐོག་ཏུ་མ་གྱུར་པ་དང་ཐ་མི་དད་པའི་ཕྱིར་རོ་ཞེས་བྱ་བ་ནི། སྔར་རྟོགས་པ་ལས་ལྷག་པར་རྟོགས་པ་མེད་པའི་ཕྱིར་རོ། །གལ་ཏེ་ལྷག་པར་མ་བརྟགས་པ་ནི། ཇི་ལྟར་ཚང་མ་ཡིན་ཏེ་གཟུང་བ་ཟིན་པ་འཛིན་པའི་ཕྱིར་རོ་ཞེ་ན་འདི་ལ་ནི་དེ་ལྟར་ཞེས་བྱ་བ་སྟེ། འཆད་པར་འགྱུར་བའི་ཚུལ་དུའོ། །དེའི་ཞེས་བྱ་བ་སྔར་རྟོགས་པའི་རང་བཞིན་ཉིད་དུའོ། །དེ་ཡང་ཞེས་བྱ་བ་ནི་སྔར་གྱི་མཐོང་བའོ། །ལྷག་པར་བརྟགས་པ་ནི་དུ་བ་འདི་ནི་ཐམས་ཅད་དུ་མེ་མེད་པར་མི་འབྱུང་ངོ་ཞེས་བྱ་བའི་རྣམ་པ་ཅན་ནོ། །མཐོང་བ་དོན་དུ་གཉེར་བའི་སྐྱེས་བུ་ལ་འདི་ནི་མེ་ཡོད་དོ་ཞེས་སྟོན་པར་མི་འགྱུར་རོ། །གཞན་དུ་མ་ཡིན་ནོ་ཞེས་བྱ་བ་ནི་སྣང་བ་ཉིད་དུ་མ་རྟོགས་པར་ནི་དོན་གཉེར་བ་མ་ཡིན་ནོ། །སྔར་མཐོང་བའི་ཆུ་སྨིག་རྒྱུའི་ཡུལ་ལ་སྒྲོ་འདོགས་པ་བཞིན་ནོ། །གང་ལ་སྔར་གྱི་མེ་སྒྲོ་འདོགས་པར་བྱ་བ་ལ་གནས་པའི་མེ་དེ་ནི་ལྐོག་ཏུ་གྱུར་པ་ཡིན་ནོ་ཞེས་འདི་འགོག་པ་ནི་མ་ཡིན་ཏེ་ཞེས་བྱ་བའོ། །རི་ལ་ཡོད་པའི་མེ་དེ་མ་རྟོགས་པའི་ཕྱིར་དེ་ཡོད་ཅེས་ཅི་ལྟར་རྟོགས། དེ་ཉིད་ཅེས་བྱ་བ་ནི་སྒྲོ་བཏགས་པར་བྱ་བའི་མེ་རང་བཞིན་ཉིད་དོ། །རང་གི་ངོ་བོས་རྟོགས་པ་གོ་ལྐོག་ཏུ་གྱུར་པ་ཇི་ལྟར་འཐད་སྙམ་ན། གཞན་གྱིས་ཞེས་སྨྲས་སོ། །གང་གི་ཚེ་གཞན་གྱི་རྟོགས་པ་དེའི་ཚེ། དེས་རང་གི་ངོ་བོ་ཁོ་ན་རྟོགས་ཏེ། དེས་ན་མེ་འདི་ན་སྐྱེས་བུ་གཞན་ལ་ལྐོག་ཏུ་གྱུར་པ་ཉིད་ཡིན་ནོ། །དེས་རང་གི་ངོ་བོ་མ་རྟོགས་པའི་ཕྱིར། མ་རྟོགས་ཏེ་ཇི་ལྟར་ཡོད་པ་ཡིན་ན་ཞེས་གང་བརྗོད་པ་དེ་ནི་མ་འབྲེལ་ཏེ། གཞན་གྱི་རང་གི་ངོ་བོར་རྟོགས་པ་ཡོད་པའི་ཕྱིར་རོ་ཞེ་ན། འདི་ལ་བརྗོད་པ་ནི་དེ་ཉིད་ཅེས་བྱ་བའོ། །གང་གི་ཚེ་གཞན་གྱིས་རྟོགས་པ་དེའི་ཚེ་མེ་ལྐོག་ཏུ་མ་གྱུར་པ་ཁོ་ན་ཡིན་ལ་དེ་ཙམ་གྱིས་དེའི་ལྐོག་ཏུ་མ་གྱུར་པ་ཉིད་ལ་འཁྲུལ་པ་མེད་པ་ཉིད་ཡིན་ནོ་ཞེས་བྱ་བའི་དོན་ཏོ། །གཞན་གྱིས་ཞེས་བྱ་བ་ལ་སོགས་
པ་ནི་སུན་འབྱིན་པ་གཞན་ཡིན་ནོ། །ལོག་པ་ཉིད་སྟོན་པ་ནི་དེ་ཕྱིར་ཞེས་བྱ་བ་སྟེ་བུམ་པ་ལ་སོགས་པའོ། །ཇི་ལྟར་འགྱུར་ཞེས་བྱ་བ་ནི་ཤེས་པ་ལས་ཐ་དད་པའི་དོན་གཞན་ཡོད་པར་རྟོགས་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་དོགས་པའོ། །ལན་ནི་མིག་ཅེས་བྱ་བའོ། །སྐྲ་ལ་སོགས་པར་སྣང་བཞིན་ནོ་ཞེས་བྱ་བ་ནི་ཇི་ལྟར་དོན་མེད་ཀྱང་མིག་ཙམ་ལས་འཁྲུལ་པར་འདོད་པའི་ཤེས་པ་རྣམས་ལ་སྐྲ་ལ་སོགས་པར་སྣང་བ་དེ་བཞིན་དུ་ཀ་བ་ལ་སོགས་པ་ཡང་ཡིན་ནོ། །གྲུབ་པའི་མཐའ་པས་ཉམས་སོ་ཞེས་བྱ་བ་ག་ལས་ཞེས་དྲིས་པ་ན་ཕ་རོལ་གྱི་སྒྲ་ཞེས་སྨྲས་སོ། །འདི་ལ་ལན་དུ་སྔོན་པོ་ལ་སོགས་པར་སྣང་བ་ལས་མ་འཁྲུལ་བར་འདོད་པའི་ཤེས་པ་རྣམས་ཡང་མིག་ལ་སོགས་པ་ཉམས་པ་བརྟག་པར་བྱའོ་ཞེས་བྱ་བའོ། །སྔོན་པོ་ལ་སོགས་པ་རང་བཞིན་གཅིག་ཏུའོ། །འདི་ཉིད་གསལ་འདེབས་པ་ནི་ཇི་ལྟར་ཞེས་བྱ་བའོ། །ཇི་ལྟར་མིག་བསྒྱུར་ན་སྐྲ་ལ་སོགས་པ་དེ་བཞིན་དུ་སྔོན་པོ་ལ་སོགས་པར་འགྱུར་རམ་ཅི་གལ་ཏེ་མིག་གི་རྣམ་པར་ཤེས་པ་ལས་ཕྱི་རོལ་དུ་འདོད་ན་སྔོན་པོ་ལ་སོགས་པ་ཅི་སྟེ་མི་འདོད་དོ། །སྔོན་པོ་ལ་སོགས་པ་དང་མིག་ལ་ཕྱི་རོལ་གྱི་ཁྱད་པར་ཅི་ཡོད། འདི་ཉིད་གཞུང་འཛུགས་པ་ནི་ཇི་ལྟར་ཞེས་བྱ་བའོ། །མིག་དེ་ལས་གཞན་སྔོན་པོ་ལ་སོགས་པ་རྒྱུ་ཡིན་ནོ། །ཤེས་པ་ཞེས་བྱ་བ་མྱོང་བ་ངེས་པ་སྟེ། ཡུལ་ངེས་པ་དང་རྣམ་པ་ངེས་ཏེ། མྱོང་བ་དེས་པ་དེའི་ཕྱིར་ཕྱིའི་དོན་འགྲུབ་པོ་ཞེ་ན། འབྲས་བུ་ལྡོག་པ་སྟེ། འབྲས་བུ་ལྡོག་པ་དེའི་ཚེ་གྲུབ་པའི་དོན་དུ་མིག་ཉིད་བརྟག་པ་བླའོ། །གལ་ཏེ་མིག་ལ་སོགས་པ་ཡང་རྣམ་པར་ཤེས་པར་སྨྲ་བ་རྣམས་ཀྱི་འདོད་པ་མ་ཡིན་ནམ། དེས་ན་དེ་ཡང་ཇི་ལྟར་རྟོགས་སྙམ་ན། དེ་ཡང་ཞེས་གསུངས་སོ། །འོ་ན་རྣམ་པར་ཤེས་པར་སྨྲ་བ་རྣམས་ཅི་ཞིག་འདོད་སྙམ་ན། དེ་མ་ཐག་པའི་ཞེས་གསུངས་སོ། །དེ་ཞེས་བྱ་བ་ནི་ལུས་བེམས་པོའོ། །དེར་ཞེས་བྱ་བ་ལུས་སུ་སྣང་བ་ཡོད་ན་སྔོན་པོ་ལ་སོགས་པར་སྣང་བ་ཡིན་ནོ་ཞེ་ན། ད་ལྟ་ན་ཡང་ཞེས་བྱ་བའོ། །ལུས་སུ་སྣང་བ་དང་ཞེས་བྱ་བ་ལ་སོགས་བ་ནི་སུན་འབྱིན་པ་གཞན་ཡིན་ནོ། །གལ་ཏེ་ཕྱིའི་དོན་མེད་ན་དེ་མ་ཐག་པའི་རྐྱེན་གྱི་ཁྱད་པར་ཙམ་ལས་ཇི་ལྟར་ཡུལ་ལ་སོགས་པ་ངེས་པར་འགྱུར་སྙམ་ན། འདི་ལྟར་ཞེས་གསུངས་སོ། །སད་
བྱེད་ངེས་པ་ཡིན་པའི་ཕྱིར་གྱི་དམིགས་པ་ངེས་པ་ལས་ནི་མ་ཡིན་ནོ། །ཡང་སད་པར་བྱེད་པ་དེ་ཡོད་པ་མ་ཡིན་ཡང་རྣམ་པར་རྟོག་པ་རྣམས་ངེས་པར་མཐོང་བ་དེ་བཞིན་དུ་དམིགས་པའམ་སད་པར་བྱེད་པ་མེད་པ་བཞིན་དུ་སྔོན་པོ་ལ་སོགས་པར་སྣང་བ་ངེས་པ་དང་འབྲེལ་པར་འགྱུར་བ་ཡིན་ནོ། །དེ་དག་ལ་ཞེས་བྱ་བ་ནི་འདོད་ཆགས་ལ་སོགས་པ་ལའོ། །འཁྲུལ་པའི་ཕྱིར་ཞེས་བྱ་བ་ནི་དམིགས་པ་མེད་ཀྱང་འབྱུང་བའི་ཕྱིར་རོ། །གལ་ཏེ་དམིགས་པ་མེད་པ་དེ་ལྟར་ན་ཡང་རེ་ཞིག་སད་པར་བྱེད་པ་ནི་ཁས་བླང་བར་བྱ་བ་ཡིན་ལ། དེ་ཡང་ཕྱི་རོལ་ཉིད་ཡིན་པའི་ཕྱིར་ཕྱི་རོལ་ན་ངེས་པར་སྣང་བ་སྐྱེ་བར་ཇི་ལྟར་འགྱུར་ཞེ་ན། ཕྱི་རོལ་ཉིད་ནི་ཞེས་གསུངས་སོ། །འདིའི་དཔེ་ནི་དཔེར་ན་ཞེས་བྱ་བའོ། །ཐམས་ཅད་མཐོང་བའི་ཕྱིར་དང་ཞེས་བྱ་བ་ནི་སྐྱེ་བ་གཞན་དུ་ཐམས་ཅད་མཐོང་བའི་ཕྱིར་ཐམས་ཅད་རྨི་ལམ་གྱི་གནས་སྐབས་སུ་སྣང་བར་འགྱུར་རོ། །དེའི་ཚེ་ཞེས་བྱ་བ་ནི་རྨི་ལམ་གྱི་དུས་སུ་ནི་སྐྱེ་བ་གཞན་དུ་མཐོང་བ་མེད་པའི་ཕྱིར་རོ། །དེར་རམ་ཞེས་བྱ་བ་ཡུལ་ལོ། །དེའི་ཚེ་ཞེས་བྱ་བ་ནི་དུས་དེའི་ཚེའོ། །སྔོན་གྱི་དོན་ཉིད་ལས་ངེས་པ་ཡིན་པར་རྟོག་ན། ད་ནི་རེ་ཞིག་སྣང་བ་དོན་གྱིས་སྟོང་པར་འགྱུར་བ་ཡིན་ཏེ། དེས་ན་གང་གིས་སྔར་གྱི་སྣང་བ་ཉིད་ལས་ངེས་པ་འདིར་མི་འགྱུར་བ་སྣང་བས་ཅི་ཞིག་བྱ་དེར་ནི་ཡུལ་དུའོ། །འོན་ཏེ་སྔར་སྣང་བ་ཉིད་ད་ལྟར་འདིར་ཡང་སྣང་བ་ཡིན་ནོ་སྙམ་ན། སྣང་བ་ནི་ཞེས་བྱ་བའོ། །ཅི་སྟེ་དེར་ཞེས་བྱ་བ་ནི་ཕྱིའི་དོན་དུ་སྨྲ་བ་ལའོ། །གྲུབ་པའི་མཐའ་སྨྲ་བས་དེར་ལྡན་ནོ་ཞེས་བྱ་བ་ག་ལས་ཞེས་དྲིས་པ་ལ། གཞན་ལན་འདེབས་པ་ནི་མི་སླུ་བའི་ཞེས་བྱ་བའོ། །མི་སླུ་བ་ཡང་ཞེས་བྱ་བ་ནི་ལན་ནི་མི་སླུ་བའི་མཚན་ཉིད་ཀྱི་སྣང་བ་གང་ཡིན་པ་དེ་ཉིད་བརྒྱུད་པར་རིགས་ཀྱི་དོན་ནི་མི་འགྲུབ་པོ། །ཡང་ཅིའི་ཕྱིར་རྗེས་སུ་མི་འཇུག་སྙམ་ན། དེའི་གནས་སྐབས་དེ་འདྲ་བས་སོ། །འོན་ཏེ་དོན་བྱ་བ་སད་པའི་གནས་སྐབས་ན་དམིགས་པ་མེད་ན། ཇི་ལྟར་དོན་མེད་སྙམ་ན། དོན་བྱེད་པ་ལ་ཞེས་གསུངས་སོ། །དེས་ན་སྔོན་པོ་དང་རྟོགས་པའི་རྣམ་པ་གཉིས་ལས་གཞན་དོན་རིག་པ་གང་ཡིན་པ་དེ་མེད་པའི་ཕྱིར་རོ། །འོ་ན་གང་འབྲས་བུ་ཡིན་སྙམ་ན། རྣམ་པ་གཉིས་ཞེས་གསུངས་སོ། །འདོད་པའམ་མི་འདོད་པ་དེའི་དངོས་པོར་མ་གྲུབ་པ་གང་
ཡིན་པ་དེ་ལ་དེ་སྐད་ཅེས་བྱ་བའོ། །རྣམ་པར་རིག་པ་དེ་ནི་འདོད་པ་དང་མི་འདོད་པ་དེ་ལྟར་མྱོང་བ་ཡིན་ནོ། །འོ་ན་རྣམ་པར་ཤེས་པ་སྨྲ་བ་ལ་ཡང་དོན་རིག་པ་ཉིད་འབྲས་བུ་ཡིན་གྱི། རང་རིག་པ་ནི་མ་ཡིན་ནོ་སྙམ་ན། དོན་རིག་པ་འབྲས་བུ་སྨྲས་པ་ན། རང་རིག་པའི་ཁོ་ན་བརྗོད་པ་ཡིན་ནོ་ཞེས་སྟོན་པ་ནི། དེའི་ཚེ་བཟུང་བའི་ཞེས་བྱ་བའོ། །དེ་ཉིད་ཅེས་བྱ་བ་ནི་བཟུང་བའི་རྣམ་པ་ཉིད་དོ། །མི་འདོད་པ་ཅན་གྱི་ཤེས་པས་ཀྱང་འདོད་པའི་དོན་གྱི་རིག་པ་ལ་འདོད་པའི་རྣམ་པ་ཙམ་གྱི་ཤེས་པས་ཀྱང་མི་འདོད་པ་ནི་དོན་རིག་ན། དེའི་ཚེ་དངོས་ཀྱི་འཇུག་པས་དོན་རིག་པར་འགྱུར་བ་ཡིན་ནོ། །དེ་ལྟ་མ་ཡིན་ན་ནི་ཞེས་བྱ་བ་གང་གི་ཚེ་འདོད་པའི་རྣམ་པར་རིག་པ་ལས་མི་འདོད་པའི་དོན་རྣམ་པར་འཇོག་པ་ལས་བཟློག་པ་ཡིན་པ་དེའི་ཚེ་ནི་ཉེ་བར་བཏགས་ནས་རིག་པ་ཡིན་ནོ། །གལ་ཏེ་དོན་རང་གི་ངོ་བོས་རིག་པ་ཡིན་ན་དེའི་ཚེ་ཤེས་པའི་འདོད་པ་དང་མི་འདོད་པའི་རྣམ་པ་ལ་མི་སྣང་ན་ལྟོས་པ་ཁོ་ནར་འདོད་པ་དང་མི་འདོད་པར་རིག་པར་འགྱུར་རོ་ཞེས་བྱ་བའི་དོན་ཏོ། །དེ་ཉིད་ཅེས་བྱ་བ་ནི་རང་གི་ངོ་བོ་ཉིད་དོ། །རྟེན་པར་རང་གི་རིག་པ་ཁས་ལན་ན་ནི། ཕྱིའི་དོན་ཉིད་རྟེན་མེད་པར་ཅི་སྟེ་ཁས་མི་ལེན་གལ་ཏེ་ཕྱི་རོལ་མེད་ན་གང་ཞིག་རིག་ཅེས་དྲིས་པ་ན། གལ་ཏེ་རྟེན་པས་རང་གི་ངོ་བོ་རིག་པ་ཡིན་ནོ་ཞེས་བྱ་བ་ལན་མ་ཡིན་དེའི་ཚེ་ཕ་རོལ་གྱིས་ཀྱང་ཇི་ལྟར་མེད་པའི་རང་རིག་བ་ཁས་ལེན་པ་དེ་བཞིན་དུ་མེད་པའི་ཕྱི་རོལ་རིག་པ་ཉིད་ཁས་བླང་བར་བྱའོ་ཞེས་བརྗོད་པར་ནུས་པ་ཁོ་ནའོ། །དེ་ཉིད་ཅེས་བྱ་བ་ནི་རང་རིག་པ་ཉིད་དོ། །མ་རིག་པ་ཉིད་བརྗོད་པ་ནི་རིག་པ་ཞེས་བྱ་བའོ། །འོན་ཏེ་དོན་གཅིག་མང་པོས་རིག་པ་མ་ཡིན་ན། དེ་ཇི་ལྟར་རྣམ་པ་དུ་མར་ཐལ་སྙམ་ན། རྟོགས་པར་བྱེད་པས་གསུངས་སོ། །ཕྱི་རོལ་དུ་ལྟ་བ་རིག་པ་ཅན་དང་མདོ་སྡེ་པ་ལ་སོགས་པ་འདོད་པ་ཡིན་ནོ། །རང་བཞིན་དུ་མ་ཞེས་བྱ་བ་ནི་བདེ་བ་དང་སྡུག་བསྔལ་ལ་སོགས་པར་མེད་པའོ། །དོན་ཐ་དད་པར་ཁས་བླངས་ཀྱང་གཅིག་ལ་གཉིས་ཀྱིས་ཉམས་སུ་མྱོང་བར་མི་འགྱུར་རོ། །འོ་ན་ཇི་ལྟར་སྐྱེས་བུ་གཉིས་ཀྱིས་དོན་གཅིག་ལ་མྱོང་བར་འགྱུར་སྙམ་ན། གལ་ཏེ་རྣམ་པ་གཞན་ཡང་ཞེས་བྱ་བའོ། །དེ་ཉིད་དུ་ཞེས་བྱ་བ་ནི། སྐྱེས་བུ་གཅིག་ལ་སྣང་བའི་བདེ་བའི་རྣམ་པར་སྡུག་བསྔལ་ལ་སོགས་པའི་རྣམ་
པ་ཡང་ཞུགས་པར་སྣང་བ་ཡིན་ན་ནི། དེའི་ཚེ་དོན་གཅིག་ལ་གཉིས་ཀྱང་མྱོང་བར་འགྱུར་བ་ཡིན་ནོ། །གང་གི་ཚེ་གཅིག་གི་བདེ་བའི་རྣམ་པ་གང་ཡིན་པ་དེ་གཞན་ལས་སྣང་བ་མ་ཡིན་པ་དེའི་ཚེ་ནི་ཇི་ལྟར་དོན་གཅིག་ལ་གཉིས་ཀྱིས་མྱོང་བར་འགྲུབ་པར་འགྱུར་ན་ཡང་དོན་ཐ་དད་པར་ཁས་ལེན་ན། རང་དང་གཞན་ལ་སྣང་བའི་རྣམ་པ་གཉིས་པོ་དག་སྐྱེས་བུ་གཅིག་ཉིད་ཀྱིས་ཉམས་སུ་མི་མྱོང་བར་མི་འགྱུར་ཏེ། འོན་ཀྱང་མྱོང་བ་ཁོ་ནར་འགྱུར་རོ། །འགྱུར་བ་ཡང་མ་ཡིན་ཏེ། གཅིག་གི་རྣམ་པ་གཅིག་ཁོ་ནར་རྟོགས་པའི་ཕྱིར་རོ། །ཡང་ཇི་ལྟར་ན་རེ་རེའི་མཐའ་ཐུག་པར་མྱོང་བར་མི་འགྱུར་སྙམ་ན། ཐམས་ཅད་ཅེས་གསུངས་སོ། །རྣམ་པ་གཅིག་མཐོང་བ་ནི་ཟླ་བ་གཉིས་མཐོང་བའི་འདོད་པ་ཡིན་ཏེ། དཔེར་ན་ཟླ་བ་གཅིག་ཁོ་ན་ལ་རབ་རིབ་ཀྱིས་བསླད་པས་ཟླ་བ་གཉིས་ཀྱི་རྣམ་པར་རྟོག་པ་དེ་བཞིན་དུ་དངོས་པོ་གཉིས་ཀའི་རྣམ་པ་ཅན་ལ་མཐོང་བའི་དབང་གིས་རྣམ་པ་གཅིག་ཏུ་རྟོགས་པ་ཡིན་ནོ། །དེས་ན་རབ་རིབ་ཀྱི་འདོད་པ་ནི་མཐོང་བ་ཡིན་ལ། ཟླ་བ་གཉིས་མཐོང་བའི་འདོད་པ་རྣམ་པ་གཅིག་ཏུ་མཐོང་བ་ཡིན། དོན་གྱི་དབང་གིས་ཞེས་བྱ་བ་དོན་ལ་རག་ལས་པ་ལས་རྟོགས་པ་མ་ཡིན་ཏེ་ཟླ་བ་གཉིས་བཞིན་ནོ། །དེ་འདྲ་བ་ཁས་ལེན་གྱི་འདི་ལྟར་ཅི་སྟེ་ཁས་མི་ལེན་ཞེས་སྟོན་པ་ནི། མ་མཐོང་བ་གཉིས་ཀྱིས་ཞེས་བྱ་བའོ། །བཏུད་པའི་ཡུལ་ན་གནས་པའི་དོན་རྣམ་ པ་དུ་མར་འགྱུར་བ་རྟོགས་པས་སྒྲིབ་པར་ཇི་ལྟར་ནུས་པར་བརྗོད་དགོས ་སོ། །དེ་ཉིད་ཅེས་བྱ་བ་ནི་གོམས་པའི་དབང་ཉིད་དོ། །སློབ་དཔོན་གྱིས་ཞེས་བྱ་བ་ནི་ཕྱོགས་ཀྱི་གླང་པོས་སོ། །དེས་ཞེས་བྱ་བ་ནི་དོན་གྱི་རྣམ་པ་སྣང་བས་སོ། །སྡུ་གུ་ལ་སོགས་པ་ཞེས་བྱ་བ་ནི་བདེ་བ་ལ་སོགས་པར་རོ་ཞེས་བྱ་བའི་བར་དུ་ཞེས་བྱ་བ་འདིས་ནི་འདིའི་མཐའ་ཐུག་པ་ནི་སློབ་དཔོན་གྱིས་གཞུང་ཡིན་ནོ་ཞེས་བསྟན་པ་ཡིན་ནོ། །དེ་དང་རྗེས་སུ་མཐུན་པར་ཞེས་བྱ་བ་ནི་འཛིན་བའི་རྣམ་པ་དང་རྗེས་སུ་མཐུན་པའོ། །གལ་ཏེ་སྣང་བ་མ་ཡིན་མོད་དེ་ལྟ་ན་ཡང་མངོན་སུམ་གྱིས་རིག་པ་ཁོ་ནའོ་སྙམ་ན། གང་གི་ཕྱིར་ཞེས་བྱ་བའོ། །རེ་ཞིག་རྗེས་སུ་དཔག་པས་ནི་ལྐོག་ཏུ་གྱུར་པར་རིག་པ་ཡིན་ལ། དེའི་དོན་རིག་པ་ནི་འབྲས་བུར་འགྱུར་རོ་སྙམ་ན། མངོན་སུམ་གྱི་འབྲས་བུ་ཞེས་གསུངས་སོ། །དེའི་ཞེས་བྱ་བ་རིག་པའིའོ། །
བློ་ལ་གནས་དོན་ཞེས་བྱ་བ་ནི་རྣམ་པའོ། །དེའི་ཞེས་བྱ་བ་ནི་རྣམ་པའིའོ། །ཕ་རོལ་པོ་ཉིད་སངས་རྒྱས་པའི་དོགས་པ་བསུ་བ་ནི་དེ་དང་འདྲ་བའི་ཕྱིར་རོ་ཞེ་ན་ཞེས་བྱ་བའོ། །དེ་འདྲའོ་ཞེས་བྱ་བ་ནི་ཕ་རོལ་གྱིའོ། །དོན་རིག་པས་བག་ཆགས་ཁྱད་པར་ཅན་སྟོན་པ་ནི་བག་ཆགས་ནི་ཞེས་བྱ་བའོ། །དོན་གྱི་ནུས་པ་ནི་རྣམ་པའོ། །ཡུལ་གཞན་དུ་མཐོང་བ་ཞེས་བྱ་བ་ནི་ཕ་རོལ་པོ་ཉིད་སངས་རྒྱས་པའི་དོགས་པ་བསུ་ནས་ལན་འདེབས་པ་ནི་གལ་ཏེ་ཞེས་བྱ་བའོ། །དུས་གང་གི་ཚེ་ཡུལ་གཞན་ན་དངོས་པོ་ཡོད་པ་དེར་སྣང་བ་ཡིན་གྱི། དོན་དང་བྲལ་བའི་དུས་སུ་ནི་མ་ཡིན་ནོ་ཞེས་བྱ་བ་ནི་གཞན་གྱིས་བསམས་པའོ། །འདི་ལ་བརྩད་པ་ནི་གལ་ཏེ་ཞེས་བྱ་བའོ། །སྣང་བའི་ཐབས་ཅི་ཡོད་གདོན་མི་ཟ་བར་འགའ་ཞིག་ན་ཡོད་དོ་ཞེས་སྣང་བ་ལས་ཀྱང་ཇི་ལྟར་རྟོགས་སྙམ་ན། དོན་མེད་ན་ཞེས་བྱ་བའོ། །དེ་ལྟ་ན་འོ་ན་ནམ་ཡང་མ་མཐོང་བ་གང་ཡིན་པ་དེ་ཇི་ལྟར་སྣང༌། ཡོད་པ་ཙམ་གྱིས་སྣང་ན་ནི་ཡོད་པ་ཐམས་ཅད་སྣང་བར་ཐལ་བའི་ཕྱིར་གདོན་མི་ཟ་བར་ཡུལ་དང་དུས་གཞན་དུ་མཐོང་བ་ཉིད་སྣང་བར་ཁས་བླངས་ དགོས་ཏེ། དེས་མ་ཐོབ་བ་ནི་སྣང་བར་འཐད་པ ་མ་ཡིན་ནོ་ཞེས་བྱ་བའི་དོན་ཏོ། །རབ་རིབ་དེ་ཉིད་ཡུལ་དང་དུས་གཞན་དུ་གནས་པའི་དོན་མཐོང་བའི་རྒྱུ་ཇི་ལྟར་ཡིན། འདི་ཉིད་ཀྱིས་ཞེས་བྱ་བ་སྨིག་རྒྱུ་ལ་ཆུར་མཐོང་བ་ཉིད་ཀྱིས་ཡུལ་དང་དུས་གཞན་ན་གནས་པའི་དོན་གཞན་དུ་མཐོང་བར་མི་འགྱུར་རོ་ཞེས་བྱ་བའི་དོན་འཁྲུལ་པ་ཡིན་ནོ། །འདི་ལ་གཞན་གྱིས་བརྗོད་པ་ནི། དོན་དམ་པར་མཐོང་བ་ནི་སྣང་བ་མེད་དོ་ཞེས་བྱ་བ་འདི་ནི་སྨིག་རྒྱུ་ལ་ཆུར་ཤེས་པ་ཉིད་ཀྱིས་འཁྲུལ་ཏེ། དེས་ན་དེ་སྐད་བརྗོད་པ་ནི་ང་ལ་ཡང་མཚུངས་སོ། །དེ་ཉིད་ཅེས་བྱ་བ་ནི་སྨིག་རྒྱུ་ལ་ཆུར་ཤེས་པ་དེ་ལ་སྣང་བའོ། །དོན་མེད་པའི་ཕྱིར་ཏེ་ཞེས་བྱ་བ་ནི་དངོས་པོ་དོན་བྱེད་པ་ཡིན་ན། དེ་ལ་ནི་དོན་བྱ་བ་འགའ་ཡང་དམིགས་པ་མ་ཡིན་པས་ཇི་ལྟར་དོན་ཡིན་ནོ་ཞེས་བྱ་བའོ། །ཐམས་ཅད་ཅེས་བྱ་བ་ནི་ཀ་བ་ལ་སོགས་པ་ཡང་ངོ༌། །འོན་ཏེ་ཀ་བ་ལ་སོགས་པ་ལ་ནི་དོན་བྱ་བ་ཐོབ་ཀྱི་སྨིག་རྒྱུ་ལ་ཆུར་ཤེས་པ་ལ་སོགས་པར་ནི་མ་ཡིན་ཏེ། དེས་ན་ཁྱད་ཡོད་པ་ཁོ་ནའོ། །དེའི་ཕྱིར་གཅིག་འཇིག་རྟེན་པ་མ་ཡིན་ན། ཐམས་ཅད་འཇིག་རྟེན་པ་མ་ཡིན་པར་ཇི་ལྟར་འགྱུར་སྙམ་ན།
མཐོང་བ་ལས་ཞེས་སྨོས་སོ། །དོན་བྱ་བ་ཡང་སྣང་བའི་རང་བཞིན་ཁོ་ན་ཡང་ཡིན་གྱི། དེ་ཡང་འཇིག་རྟེན་པ་མ་ཡིན་པ་ཡིན་ན་ཀ་བ་ལ་སོགས་པ་ཡང་དེའི་དབང་གིས་འཇིག་རྟེན་པ་ཉིད་དུ་ཇི་ལྟར་རྣམ་པར་གནས། ཐོབ་པའི་ཞེས་བྱ་བ་ནི། ཀ་བ་ལ་སོགས་པ་ལ་ཐོབ་པའི་ཁྱད་པར་ཡོད་དོ་ཞེ་ན། འདི་ལ་བརྗོད་པ་ནི་དེ་ཡང་ཞེས་བྱ་བའོ། །ཐོབ་པའི་རང་བཞིན་ཡང་ངོ༌། །འོན་ཏེ་ཀ་བ་ལ་སོགས་པ་ནི་གཞན་གྱིས་མཐོང་བ་ཟླ་བ་གཉིས་ལ་སོགས་པ་ནི་མ་ཡིན་པ་དེས་ན་ཁྱད་པར་ཡོད་པ་ཁོ་ནའོ་སྙམ་ན། གཞན་གྱིས་ཞེས་སྨོས་སོ། །ཀ་བ་ལ་སོགས་པ་ནི་གཞན་གྱིས་མཐོང་བ་མ་ཡིན་ཏེ་རང་གི་ངོ་བོ་ཁོ་ན་མཐོང་བའི་ཕྱིར་རོ་ཞེས་སྔར་བསྟན་ཟིན་ཏོ། །ཐོབ་པའི་སུན་འབྱིན་པ་གཞན་ཡང་བརྗོད་པ་ནི་ཇི་ལྟར་ཞེས་བྱ་བའོ། །དད་པའི་དུས་ན་དང་པོའི་ཤེས་པ་ནི་ཀ་བ་ལ་སོགས་པའི་ཤེས་པའོ། །དེ་ཞེས་བྱ་བ་ཀ་བའོ། །འགའ་ཞིག་ཅེས་བྱ་བ་ནི་ཀ་བ་ལ་སོགས་པ་ཐོབ་པའི་ཤེས་པའོ། །དེ་ལྟའི་དངོས་ཡིན་ལ་ཞེས་བྱ་བ་ནི་ཐོབ་པའི་རང་བཞིན་ཡིན་པ་ལའོ། །ཐམས་ཅད་མཚུངས་པ་ལ་ཉིད་དོ་ཞེས་བྱ་བ་ནི། ཇི་ལྟར་ཀ་བ་ལ་སོགས་པའི་ཤེས་པ་རང་ཉིད་ཀོ་ན་ཐོབ་པའི་རང་བཞིན་ཡིན་པ་དེ་བཞིན་དུ་ཀ་བ་ལ་སོགས་པ་དང་ཟླ་བ་གཉིས་ཀ་ཡང་མི་བདེན་པར་འགྱུར་རོ། །ཤེས་ཏེ་ཞེས་བྱ་བ་ནི་ཀ་བ་ལ་སོགས་པའི་ཤེས་པའོ། །དེའི་ཤེས་པ་ཡང་ཞེས་བྱ་བ་ནི་རྒྱུ་དག་པར་འཛིན་པའི་ཤེས་པ་ཡང་ངོ༌། །རྒྱུ་དེས་ན་ཀ་བ་ལ་སོགས་པའི་ཤེས་པ་དེ་དག་ཀྱང་དེ་ལྟར་ཞེས་བྱ་བ་བག་ཆགས་ལས་བྱུང་བ་ཞེས་བྱ་བར་བརྟག་པར་བྱའོ། །ཁྱོད་ལ་ཡང་ཉེས་པ་འདི་ཡོད་དོ་ཞེ་ན། ཐོག་མ་མེད་པའི་ཞེས་གསུངས་སོ། །དེ་ལྟར་རྣམ་པར་ཤེས་པར་སྨྲ་བ་རྣམ་པར་གནས་པ་ན། དེ་ལ་ཉེ་བ་ལྟ་བུར་གང་ཅི་སྣང་བ་དེ་བསམས་པའི་དོན་དུ་ཕྱོགས་སྔ་མ་འགོད་པ་ནི་གལ་ཏེ་ཞེས་བྱ་བའོ། །ཐ་དད་པ་ཡིན་ན་གང་གིས་འཛིན་ཞེས་བྱ་བ་ནི་རང་གི་ངོ་བོ་ལས་གཞན་རིག་པ་མེད་པའི་ཕྱིར་རོ། །གལ་ཏེ་དེ་ནི་ཞེས་བྱ་བ་ནི་འབྲེལ་པའོ། །དེའི་ཞེན་པའི་དབང་གིས་ཞེས་བྱ་བ་ནི་དོན་དམ་པ་ནི་འབྲེལ་པར་འཛིན་པ་མདོ་སྡེ་ཞེས་བྱ་བ་འདི་བདག་ཅག་འདོད་པ་ཁོ་ནའོ། །ཐ་སྙད་དུ་ནི་སྔོན་ཉམས་སུ་མྱོང་བ་ཡང་དྲན་པ་འདི་སྐྱེས་སོ་ཞེས་ལྷག་པར་ཞེན་པ་ལས་རྒྱུ་དང་
འབྲས་བུ་རྣམ་པར་གནས་པ་ཡིན་ན་ཞེས་བྱ་བའི་དོན་ཏོ། །འདིར་བདག་གིས་མ་སྔོན་མཐོང་བར་འགྱུར་རོ། །འདི་ཉིད་ནི་དྲན་ནོ་ཞེས་བྱ་བའི་དོན་རྟོགས་པར་ཡོད་པ་ཡིན་ལ། དེ་ལ་གནོད་པར་བྱེད་པ་ཡང་ཡོད་པ་མ་ཡིན་ནོ། །ཕྱི་རོལ་གང་ལ་རྣམ་པར་ཤེས་པའི་འབྲས་བུ་ཡོད་པ་དེ་ལ་དེ་སྐད་ཅེས་བྱ་བའོ། །རྣམ་བར་ཤེས་པ་ནི་སྔར་མཐོང་བའི་ཕྱིར་རྣམ་པར་ཤེས་པའི་འབྲས་བུ་ཅན་དུ་འཐད་པ་ཡིན་ནོ། །དེ་འབྲས་ཞེས་བྱ་བ་ནི་ཕྱི་རོལ་གྱི་འབྲས་བུ་ཉིད་དུ་འདོད་པ་ནི་གཞན་དུ་ཞེས་བྱ་བ་ཕྱི་རོལ་མེད་པར་སྐྱེ་བའི་ཕྱིར་རོ། །སྦྲང་བུའི་ཚོགས་ལ་དུ་བའི་བློ་དང་སྨིག་རྒྱུ་ལ་ནི་ཆུའི་བློ་བཞིན་ནོ། །ཕྱི་རོལ་གྱི་འབྲས་བུའི་ཕྱོགས་ལ་ནི་དུ་བ་དང་ཆུ་མེད་པར་ཡང་དུ་བ་དང་ཆུའི་བློར་འགྱུར་བའི་ཕྱིར་འཁྲུལ་པར་འགྱུར་རོ། །ཕྱི་རོལ་ཞེས་མིང་ཙམ་བྱས་པར་འགྱུར་ཏེ། ཕྱི་རོལ་ནི་བག་ཆགས་ཀྱི་སྟོབས་ལས་འགྱུར་བ་མ་ཡིན་ནོ། །མིང་ཙམ་དེ་ཡང་འཇིག་རྟེན་པ་ཉིད་ཀྱིས་བྱས་པ་ཡིན་པས་སོ། །ཇི་ལྟར་རྨི་ལམ་མཐོང་བ་རྣམས་ཡུལ་ཕྱོགས་གཅིག་ཉིད་ལ་སྣང་བ་སྣ་ཚོགས་པར་འགྱུར་ཏེ། དེར་ཕན་ཚུན་གཅིག་ལ་མཐོང་བ་ནི་ཡོད་པ་མ་ཡིན་ཏེ། རང་རང་གི་སྣང་བ་ཙམ་རིག་པའི་ཕྱིར་རོ། །དེ་ལྟ་ན་ཡང་བདག་ཅག་གིས་མཐོང་བའི་རྨི་ལམ་དེ་ནི་འདིས་ཀྱང་ཡིན་ནོ། །གཅིག་ཏུ་ལྷག་པར་ཞེན་པ་ཡང་ཡོད་པ་ཡིན་ནོ། །དེ་བཞིན་དུ་སད་པའི་གནས་སྐབས་ཀྱང་ཡིན་པ་ཉིད་དོ། །བག་ཆགས་དང་འབྲེལ་པའི་རྨོངས་པའི་སེམས་ཀྱིས་གཡོ་བ་སྟེ། རྣམ་པར་གྱུར་པ་ཡིན་གྱི་གཙོ་བོ་ལ་སོགས་པ་འབའ་ཞིག་ཡོད་པ་ནི་མ་ཡིན་ནོ། །དེ་ལྟར་མིན་ན་སྟེ། གལ་ཏེ་བག་ཆགས་བྱེད་པ་པོ་མ་ཡིན་ན། དེའི་ཚེ་འདི་ལྟ་བུའི་འགྲོ་བའི་བྱེད་པ་པོ་གང་ཡིན་པ་དེ་ཇི་ལྟར་རྟོགས་པ་མངོན་དུ་བྱེད་པ་ཡིན་ཏེ། འོན་ཀྱང་རྟོགས་པ་དང་མི་ལྡན་པ་ཁོ་ནར་འགྱུར་རོ། །རྟོགས་པ་དང་ལྡན་པའི་རྣམ་པ་ཇི་ལྟར་འདི་འདྲ་བ་བྱེད་པར་མི་འགྱུར་རོ། །འོན་ཏེ་དབང་ཕྱུག་འདི་ནི་ཉེ་བར་བསྟན་པ་ཉིད་བྱེད་པ་ཡིན་གྱི། ཅི་ཐོད་ཐོད་བྱེད་པ་ནི་མ་ཡིན་ནོ་སྙམ་ན། འདི་ནི་རང་དོན་སྐྱེ་བ་ལ་ཞེས་བྱ་བའོ། །གང་ལ་སོགས་པའི་དོན་སྐྱེ་བ་དེ་ལ་ཉེ་བར་བསྟན་པར་བྱེད་པའོ། །གཞན་དུ་ཞེས་བྱ་བ་ནི་ཇི་སྲིད་ཅིག་རུང་རུང་མ་བྱས་པ་དེ་སྲིད་དུ་ལོགས་པར་བྱ་བ་མི་ནུས་སོ། །འདི་ལ་བརྗོད་པ་ནི་འདི་ཞེས་བྱ་བའོ། །ཕྱིའི་དོན་དུ་སྨྲ་བ་དེའི་བསམ་པ་མཐར་ཐུག་པར་བསྐྱལ་བའི་དོན་དུ་འདི་བརྩམས་པ་
ཡིན་ནོ། །ཡང་ཅིའི་ཕྱིར་འདི་བསྒྲུབ་པར་མི་ནུས་སྙམ་ན་ཤིན་ཏུ་ཞེས་བྱ་བའོ། །རྣམ་པར་དབྱེར་མེད་ཀྱང་ཞེས་བྱ་བ་ནི་གཟུང་བ་དང་འཛིན་པའི་རང་བཞིན་དང་སྔོན་པོ་དང་སེར་པོ་ལ་སོགས་པའི་རྣམ་པར་ར། །བསྟན་ཟིན་ཏོ་ཞེས་བྱ་བ་ནི་ཤེས་པ་ལ་སྔོ་སོགས་སྣ་ཚོགས་ཞེས་བྱ་བ་དིར་རོ། །འོན་ཀྱང་རྟོགས་པ་ཉིད་དོ་ཞེས་བྱ་བ་ལྷག་པར་ཞེན་པ་ཉིད་དོ། །གཟུང་བ་ལ་སོགས་པ་བསལ་བ་ནི་མ་ཡིན་གྱི་འོན་ཀྱང་དེ་ནི་ལྷག་པར་ཞེན་པ་ཙམ་ཡིན་ནོ་ཞེས་བྱ་བའི་དོན་ཏོ། །དེའི་ཐ་སྙད་ལ་རྒྱུ་མཚན་ཅི་ཡོད་སྙམ་ན། ད་མེད་ཀྱང་ཞེས་གསུངས་སོ། །སྒྲོ་འདོགས་པའི་རྣམ་པ་བརྗོད་པ་ནི་འདི་དེ་ལྟར་ཞེས་བྱ་བའོ། །འོན་ཏེ་ཞེས་བྱ་བ་ནི་དངོས་པོའོ། །དེ་ཡང་སྟེ་གཞན་དེ་ཡང་ངོ༌། །མ་ཡིན་ཏེ་ཞེས་བྱ་བ་ནི་དེ་འགོག་པའོ། །གལ་ཏེ་འབྲས་བུ་མཐོང་བས་རྟོགས་པ་ཡིན་ན། དེའི་ཚེ་རང་དང་གཞན་དག་གིས་མཐོང་བའི་ཀ་བ་ལ་སོགས་པ་དག་ཀྱང་གཅིག་ཉིད་དུ་རྟོགས་པར་མི་འགྱུར་རོ། །ཅིའི་ཕྱིར་ཞེ་ན། དུ་བ་ལ་སོགས་པ་ཞེས་གསུངས་སོ། །འོན་ཏེ་རང་དང་གཞན་གྱིས་མཐོང་བ་དག་ཉིད་སྤུ་ལྡང་བ་ལ་སོགས་པ་ལ་གཅིག་ཏུ་རྟོགས་པ་ཡིན་ན། དེའི་ཚེ་རང་དང་གཞན་དག་གིས་མཐོང་བའི་ཀ་བ་ལ་སོགས་པ་དང༌། ཀ་བ་ལ་སོགས་པའི་ངོ་བོ་ཉིད་མངོན་སུམ་ཡིན་གྱི་གཞན་གྱིས་མཐོང་བར་བྱ་བ་ནི་མངོན་སུམ་མ་ཡིན་པའོ། །གཞན་གྱིས་མཐོང་བཞིན་ཞེས་བྱ་བ་ནི་ལན་ནོ། །དེ་ཉིད་ཀྱི་ཕྱིར་ཞེས་བྱ་བ་ནི་ཚད་མ་མེད་པ་ཉིད་ཀྱི་ཕྱིར་རོ། །གཞན་གྱིས་མཐོང་བ་ལ་ཐེ་ཚོམ་ཟའོ། །ཁྱད་པར་ཅན་སྔོན་པོའི་རང་བཞིན་དུ་མཐོང་བ་ལ་སེར་པོའི་རང་བཞིན་དུ་ཡང་ཐེ་ཚོམ་ཟ་བར་འགྱུར་ན། ཐེ་ཚོམ་ཟ་བ་ཡང་མ་ཡིན་ཏེ། དེས་ན་ཇི་ལྟར་སེར་པོའི་རང་བཞིན་དང་འགལ་བ་སྔོན་པོའི་རང་བཞིན་དུ་དམིགས་པ་ན་སེར་པོའི་རང་བཞིན་ཉིད་སེལ་བར་བྱེད་པ་དེ་བཞིན་དུ་གཞན་གྱིས་དམིགས་པར་བྱ་བ་དང་འགལ་བ་རང་གིས་དམིགས་པར་བྱ་བ་ཉིད་དམིགས་པ་ན་གཞན་གྱིས་དམིགས་པར་བྱ་བ་ཉིད་སེལ་བར་བྱེད་ཀྱི། ཐེ་ཚོམ་ཟ་བ་ནི་མ་ཡིན་ནོ་ཞེས་དགོངས་པའོ། །ཕྱིས་ཞེས་བྱ་བ་ནི་དོགས་བ་བསུ་བའོ། །རྣམ་པར་ཤེས་པ་ལྐོག་ཏུ་གྱུར་པའི་ཡུལ་ཅན་ནི་རྣམ་པ་ཐམས་ཅད་དུ་སྲིད་པ་མ་ཡིན་ནོ་ཞེས་སྟོན་པ་ནི་མ་ཡིན་ཏེ་ཞེས་བྱ་བའོ། །མི་རིགས་པ་ཉིད་སྟོན་པ་ནི་གལ་
ཏེ་ཤེས་པ་དེར་ལྐོག་ཏུ་གྱུར་པར་འདོད་པའི་དམ་པའི་དོན་སྣང་ན། དེའི་ཚེ་འདིར་ལྐོག་ཏུ་གྱུར་བ་ཅི་ཞིག་ཡིན་ཏེ། འོན་ཀྱང་མངོན་སུམ་ཁོ་ནར་འགྱུར་རོ། །འོན་ཏེ་ཡང་སྣང་བ་མེད་པར་ལྐོག་ཏུ་གྱུར་པའི་དོན་ཞེས་བརྗོད་པ་དེའི་ཚེ་ཤེས་པ་དེས་མི་སྣང་བའི་དོན་རྟོགས་སོ་ཞེས་བྱ་བ་འདི་ནི་བདག་གི་ཚུལ་བརྒྱང་བ་ཙམ་ཡིན་ནོ་ཞེས་དཔྱད་པའོ། །མི་སྣང་ན་ནི་མ་རྟོགས་པ་ཁོ་ནའོ་ཞེས་བྱ་བར་དགོངས་པའོ། །སྔར་གོ་ཞེས་བྱ་བ་ནི་རྗེས་སུ་དཔག་པ་སྐྱེ་བའི་དུས་ན། དེ་ལས་རྔ་མ་ཉིད་ཇི་ལྟར་རྟོགས། ཕ་རོལ་པོས་བརྗོད་པ་ནི་དེ་ཉིད་ཅེས་བྱ་བ་འབྱུང་བར་འགྱུར་བའི་དངོས་པོ་རྗེས་སུ་དཔག་པ་ཉིད་དོན་གྱི་དངོས་ཡོད་མིན་པར་ཇི་ལྟར་ཞེ་ན། དེའི་ཚེ་འབྱུང་བར་འགྱུར་བའི་དངོས་པོའི་རྗེས་སུ་དཔག་པ་གང་ཡིན་པ་དེ་མེད་པའི་དུས་ན། འབྱུང་བའི་དངོས་པོ་ཇི་ལྟར་རྟོགས་པར་འགྱུར། དེའི་ཚེ་ནི་འབྱུང་བའི་དངོས་པོ་ཡོད་པ་མ་ཡིན་ནོ། །འོན་ཏེ་འབྱུང་བར་འགྱུར་བ་ལ་རྗེས་སུ་དཔག་པ་ཉིད་མི་འགྱུར་རོ་ཞེ་ན། ཐམས་ཅད་དུ་ནི་ཞེས་སྨོས་སོ། །འདི་རྟོག་པ་ཞེས་བྱ་བ་ནི་གཅིག་ཉིད་དུའོ། །འདིར་ཕ་རོལ་གྱི་ལྐོག་ཏུ་གྱུར་ཞེས་སྨྲས་སོ། །འདི་ལ་ལན་ནི་དེ་ལྟ་ཉིད་དུ་ཞེས་བྱ་བའོ། །མཐོང་ཕྱིར་ཞེས་བྱ་བ་ལ་སོགས་པ་དོགས་པ་བསུ་ནས། དེ་ལྟར་ཞེས་ལན་འདེབས་ཏེ། སྔར་གྱི་དུས་སུ་ཡོད་པ་ཉིད་དོ། འོ་ན་ཇི་ལྟར་དེ་རྗེས་སུ་དཔོག་སྙམ་ན། དེ་བཞིན་དུ་ཞེས་བྱ་བ་སྟེ། བལྟ་བར་བྱ་བ་ཉིད་དུའོ། །ཡོད་ཅེས་ཇི་ལྟར་ཤེས་ཞེས་དྲིས་པ་འདི་ལ་གཞན་གྱིས་ཞེས་ལན་བརྗོད་པ་གང་ཡིན་པ་དེ་ཡང་མི་རུང་ངོ༌། །དེ་ཡང་ཞེས་བྱ་བ་ནི་གཞན་ནོ། །ཕན་ཚུན་བསྟེན་པ་ཉིད་སྟོན་པ་ནི་གཞན་དང་ཐུན་མོང་བའི་ཡོད་པ་ཉིད་འཛིན་པའོ། །འོན་ཏེ་ཉེས་པ་འདི་རྣམ་པར་ཤེས་པར་སྨྲ་བ་ལ་ཡོད་པ་ཉིད་དོ་སྙམ་ན། གཞན་དུའང་ཞེས་བྱ་བའོ། །རྟོགས་པ་འདི་ཞེས་བྱ་བ་ནི་རང་རང་གི་རང་བཞིན་རིག་པ་ཅན་ཞིག་ཡོད་ཀྱི་གཞན་དང་ཐུན་མོང་བར་ཞེན་པ་ནི་འཁྲུལ་པ་ཡིན་ནོ་ཞེས་བྱ་བའོ། །དེ་ཁོ་ན་བཞིན་ཞེས་བྱ་བ་ནི་གཞན་གྱིས་རིག་པར་བྱེད་པ་ཉིད་དུའོ། །བཟློག་པ་ལ་ཡང་ཞེས་བྱེ་བ་ནི་གཞན་གྱིས་རིག་པར་བྱ་བ་མ་ཡིན་ནོ་ཞེས་བྱ་བ་འདི་ལ་ཡང་ངོ༌། །ཕྱོགས་གཉིས་ཞེས་བྱ་བ་ནི་བལྟ་བར་བྱ་བ་དང༌། བྱ་བ་མ་ཡིན་པར་རོ། །གཞན་གྱིས་དེ་ལྟར་ཞེས་བྱ་བ་གླང་པོ་ལ་སོགས་པའི་རང་བཞིན་དུ་འཛིམ་དུམ་ལ་
སོགས་པ་མ་རྟོགས་པ་དེ་ལྟ་ན་ཡང་ངོ༌། །ཕ་རོལ་ཉིད་དོགས་པ་བསུ་བར་བྱེད་པ་ནི་རྗེས་སུ་དཔག་པས་སོ་ཞེས་བྱ་བ་སྟེ། གཞན་གྱིས་མ་རྟོགས་སོ་ཞེས་རྗེས་སུ་དཔག་པས་རྟོགས་པ་མ་ཡིན་ནོ་ཞེས་བྱ་བའོ། །བཟློག་པ་ཞེས་བྱ་བ་ནི་གཞན་གྱིས་རྟོགས་སོ་ཞེས་བྱ་བ་འདི་ལ་ཡང་ངོ༌། །ཡང་སངས་རྒྱས་པའི་དོགས་པ་བསུ་བ་ནི། བཟློག་པ་ལ་ཞེས་བྱ་བ་སྟེ། བདག་གིས་མཐོང་བ་གང་ཡང་ཡིན་པ་དེ་ཉིད་གཞན་གྱི་རིགས་སོ་ཞེས་བྱ་བ་འདི་ལའོ། །ཇི་ལྟར་ཞེས་བྱ་བ་ནི་ཕ་རོལ་པོའིའོ། །ད་ནི་གྲུབ་པའི་མཐའ་འཆའ་བ་ནི་གཅིག་ཉིད་དང་ཞེས་བྱ་བའོ། །གལ་ཏེ་རང་དང་གཞན་གྱིས་མཐོང་བ་ཅིག་མ་ཡིན་ན། ཇི་ལྟར་གཞན་ཡང་སྤུ་ལྡང་བ་ལ་སོགས་པ་དེ་འདྲ་བ་ཉིད་དུ་འགྱུར་སྙམ་ན། འདྲ་བ་རྗེས་སུ་དཔག་པས་ཀྱང་ཞེས་གསུངས་སོ། །མ་མཐོང་བ་ཞེས་བྱ་བ་ནི་གླང་པོ་ལ་སོགས་པ་མ་མཐོང་བ་དང་རྗེས་སུ་མཐུན་པ་བདེ་བླག་ཏུ་གནས་པ་ལ་སོགས་པའོ། །གལ་ཏེ་འདི་ཞེས་བྱ་བ་གླང་པོ་ལ་སོགས་པ་དོན་ཡིན་ལ། དེའི་ཚེ་གཞན་གྱིས་ཀྱང་མཐོང་བར་འགྱུར་རོ། །གཞན་པ་ཕྱིའི་དོན་དུ་སྨྲ་བས་ཁས་བླངས་པ་ཡིན་ཏེ། གཞན་གྱིས་མཐོང་བ་ཡང་མེད་དེ་དེས་ན་འདི་ནི་དོན་མ་ཡིན་ནོ། །དེ་དོན་དུ་གཉེར་བས་ཞེས་བྱ་བ་ནི་ཆེན་པོ་དོན་དུ་གཉེར་བ་ཉིད་ཀྱིས་ཉེ་བ་དང་རྒྱང་རིང་པོ་ན་གནས་པ་དག་ཉེ་བར་འགྲོ་བ་ཐུན་མོང་བར་ཐལ་བར་འགྱུར་རོ་ཞེས་བྱ་བས་དེ་དོན་དུ་མ་ཡིན་ནོ། །གཞན་དུ་ཞེས་བྱ་བ་ནི་གཞན་གྱིས་མ་མཐོང་བ་ཉིད་ཅེས་རྗེས་སུ་དཔོག་པའོ། །ལྟ་བ་དེ་ཞེས་བྱ་བ་ནི་གཞན་གྱིས་ཀྱང་མཐོང་བ་ཡིན་ན་ཞེས་བྱ་བའི་མཚན་ཉིད་ཅན་ནོ། །ཡང་ན་ཞེས་བྱ་བ་ནི་རྣམ་པ་གཞན་གྱིས་རིག་པར་བྱ་བ་ཉིད་འགོག་པའོ། །ཇི་ལྟར་རྗེས་སུ་སྣང་བཞིན་ཞེས་བྱ་བ་ནི་ཇི་ལྟར་ལྷག་པར་ཞེན་པ་བཞིན་ནོ། །དེ་ལྟར་འགྱུར་བའི་ཕྱིར་རོ་ཞེས་བྱ་བ་ནི་གསལ་བའི་ཕྱིར་རོ། །རིགས་པ་ཡིན་ནོ་ཞེས་བྱ་བ་ནི་འབྲས་བུའོ། །ཐོབ་པ་ནི་འཛིན་པ་ལ་ཡང་ཡོད་པ་ཡིན་ནོ་ཞེས་བསམས་ནས་བཤད་པ་ནི་ཡང་ན་ཞེས་བྱ་བའོ། །ལྷག་མ་ནི་ཞེས་བྱ་བ་དོན་གཞན་ནི་ལྷ་དབང་བློ་ལ་སོགས་པ་གཞན་དག་གིས་བཤད་པ་ཉིད་དོ། །གལ་ཏེ་གཟུང་བ་ལ་སོགས་པ་མེད་པ་མ་ཡིན་ན། འོ་ན་དེ་དག་ཅི་འདྲ་བ་ཡིན་ཞེ་ན། གལ་ཏེ་ཞེས་བྱ་བས་ཏེ་འོན་ཀྱང་ངོ༌། །དེ་ནི་བདག་པོ་དེ་ཉིད་ལས་ཞེས་བྱ་བ་རང་བཞིན་ལས་ཞེས་ཉམས་པའོ། །དེ་དག་
ནི་གཟུང་བ་ལ་སོགས་པའོ། །སྣ་ཚོགས་སུ་ཞེས་བྱ་བ་གཟུང་བ་ལ་སོགས་པའི་རང་བཞིན་དུ་ཇི་ལྟར་སྣང༌། གཟུང་བ་ལ་སོགས་པར་གསལ་བ་ཡང་ཕ་རོལ་གྱིས་ཁས་བླངས་པས་བརྗོད་པ་ཡིན་ནོ། །གལ་ཏེ་ཐ་དད་པ་སྣང་ཡང་བདག་གཅིག་ཡིན་ན། དེའི་ཚེ་གཞན་དུ་མངོན་པར་འདོད་པ་ལ་ཡང་དག་པས་ཐ་དད་པ་ཉིད་ཡོད་པ་མ་ཡིན་ནོ། །དེ་ཞེས་བྱ་བ་ནི་ཐ་མི་དད་པའོ། །མི་སྣང་ཡང་ཞེས་བྱ་བ་ནི་གཟུང་བ་ལ་སོགས་པའི་རྣམ་པ་ནི་ཐ་དད་པ་ཁོ་ནར་སྣང་བར་ཇི་ལྟར་དེ་དག་ཐ་མི་དད་ཅེས་བསམ་བའོ། །གལ་ཏེ་ཞེས་བྱ་བ་ནི་སུན་འབྱིན་པ་གཞན་བརྗོད་བའོ། །ཐ་དད་པ་དེ་དག་ཅེས་བྱ་བ་ནི་གཟུང་བ་ལ་སོགས་པའི་རྣམ་པའོ། །གསལ་བ་དང་ཞེས་བྱ་བ་ནི་བདག་དང་ལྷན་ཅིག་ཐ་མི་དད་པའོ། །བརྗོད་ཟིན་པའི་དོན་ཉིད་གསལ་འདེབས་པ་ནི། ཇི་ལྟར་བདག་གསལ་བ་དེ་བཞིན་དུ་རྣམ་པ་ཐམས་ཅད་ཀྱང་གསལ་བར་ཁས་ལེན་ན། བདག་བཞིན་དུ་ཡོད་ཡོད་པ་ཉིད་དུ་འགྱུར་རོ། །རྣམ་པ་རྣམས་ཀྱང་མ་ཡིན་མོད་ཅི་སྐྱོན་སྙམ་ན། བཤད་པ་དེས་ན་མཐའ་དག་ཅེས་བྱ་བའོ། །བདག་གི་རང་བཞིན་དུ་གསལ་བའི་རང་བཞིན་ཡིན་ལ། རྣམ་པ་རྣམས་ཀྱང་གསལ་བའི་རང་བཞིན་དུ་ཡོད་པ་ཡིན་ན་དེ་དག་ཀྱང་བདག་ཏུ་འགྱུར་རོ། །སུན་འབྱིན་པ་གཞན་ཡང་བརྗོད་པ་ནི་འཁྲུལ་བ་ཡང་ཞེས་བྱ་བའོ། །འོན་ཏེ་བདག་ཉིད་ལ་ཞེས་བརྗོད་དོ་སྙམ་ན། འཁྲུལ་པ་བས་བྱ་བ་གཞན་གྱིས་འཁྲུལ་པ་མེད་ན་ནི་ཞེས་བྱ་བ་ལ་སོགས་པ་བརྗོད་ལ། གས་པ་ནི་བཟློག་བྱ་ཉིད་དུ་ཞེས་བྱ་བ་ནི་ཐ་དད་པ་འདི་ནི་ཇི་སྲིད་དུ་མ་གྲུབ་པ་ཉིད་དེ་སྲིད་དུ་བཟློག་བྱ་ཉིད་དུ་མི་འགྲུབ་ལ། བཟློག་བྱ་ཉིད་དུ་གྲུབ་ན་ཡང་འཁྲུལ་པ་ཉིད་དུ་མི་འགྲུབ་པས་ན་ཕན་ཚུན་བསྟེན་པ་ཡིན་ནོ། །དེ་བཞིན་དུ་ཇི་སྲིད་དུ་བཟློག་པར་བྱ་བ་ཉིད་དུ་མ་གྲུབ་པ་དེ་སྲིད་འཁྲུལ་པར་མི་འགྲུབ་ལ། བཟློག་པར་བྱ་བ་ཉིད་ཀྱང་ཇི་སྲིད་དུ་འཁྲུལ་པ་ཉིད་དུ་དེས་ན་བཟློག་པ་ལ་གལ་ཏེ་བཟློག་པའི་དོན་དུ་མི་འཇུག་པ་དེ་སྲིད་མི་འགྲུབ་ལ་ཞུགས་པ་ན་ཡང་བཟློག་པར་བྱ་བ་ཉིད་ཡིན་པའི་ཕྱིར་འཁོར་ལོར་འགྱུར་རོ། །འོ་ན་དུ་མར་སྣང་བ་ཉིད་དོན་དམ་པ་ཡིན་ནོ་ཞེ་ན། མྱོང་བ་མ་ཡིན་པ་ནི་ཞེས་བྱ་བ་གསུངས་སོ། །དེ་ནི་ཞེས་བྱ་བ་ནི་དུ་མ་ནིའོ། །དེའི་ཞེས་བྱ་བ་ནི་གཅིག་གི་ནང་དུ་འདུས་པའི་ཕྱིར་ཐ་དད་པ་ཡང་རྟོགས་པ་ཡིན་ནོ་ཞེ་ན། འདི་ལ་བརྗོད་པ་ནི་དེའི་ནང་དུ་
ཞེས་བྱ་བའོ། །གང་གི་ཕྱིར་སྣ་ཚོགས་ཀྱི་རྣམ་པ་གཅིག་ཅེས་བྱ་བ་ཉིད་ཀྱིས་ངག་ཡོངས་སུ་རྫོགས་པ་ཡིན་ན། །དུ་མ་ནི་མེད་པ་ཉིད་དོ་ཞེས་བྱ་བ་ནི་འདི་ཉིད་དགག་པ་དང་འབྲེལ་གྱིས་ང་མ་ནི་མ་ཡིན་ནོ། །འདི་ན་ནི་མཐའ་དག་གཉིས་མེད་པ་ཁོ་ན་སྟེ། ཐ་དད་པ་ནི་སྣང་བ་མ་ཡིན་ནོ་ཞེས་བརྗོད་པ་མ་ཡིན་ནོ། །དེ་ལ་མ་ཡིན་པ་ཞེས་བྱ་བ་ནི་ཐ་མི་དད་པའི་རང་བཞིན་ནོ། །འདིས་ནི་ཐ་དད་པ་མ་ཡིན་ལ། ཐ་མི་དད་པ་ཡང་མ་ཡིན་ཏེ། གསལ་བ་ཙམ་མི་བདེན་པ་ཡིན་ནོ་ཞེས་བསྟན་ཏོ། །འོན་ཏེ་གོམས་པ་འདི་ནི་བཟློག་པར་མི་ནུས་པའི་ཕྱིར་བདེན་པ་ཁོ་ནའོ་ཞེ་ན། གོམས་པར་བྱེད་པ་ཞེས་གསུངས་སོ། །གལ་ཏེ་ཞེས་བྱ་བའི་རྩོད་པ་ལ་འདོད་པ་ནི་ནང་གི་རྒྱུ་ཙམ་ཞིག་ཅེས་བྱ་བའོ། །ཤེས་པ་ཐམས་ཅད་ཁྱབ་པས་སོ། །རྨི་ལམ་ལ་སོགས་པར་ནི་བག་ཆགས་ལས་མ་གཏོགས་པ་ནང་གི་རྒྱུ་ཡོད་པ་མ་ཡིན་ནོ། །གང་གི་ཞེས་བྱ་བ་གཞན་གྱིའོ། །དེ་དང་ཞེས་བྱ་བ་དང་པོ་མཐོང་བ་དང་མཚུངས་པའི་ཕྱིར་རོ། །དེ་ལྟ་མ་ཡིན་པར་མཐོང་ན་ཞེས་བྱ་བ་ནི་དང་པོ་མཐོང་བ་མེད་པར་འཁྲུལ་པ་ནའོ། །དེའི་ཚེ་འཁྲུལ་པ་ཐམས་ཅད་མཐུན་པ་མཐོང་བ་ལས་ཇི་ལྟར་ཡིན་ཏེ། ཆོས་མཐུན་པ་མཐོང་བ་མེད་ཀྱང་སྲིད་པའི་ཕྱིར་རོ་ཞེ་ན། འདི་འགོག་པ་ནི་མ་ཡིན་ཞེས་བྱ་བའོ། །རང་གི་བདག་ཉིད་ལ་ཞེས་བྱ་བ་ནི་བཞིན་གཅིག་ལའོ། །ཐ་དད་པ་མ་ཡིན་དུ་ཆུག་མོད་ཅེས་བྱ་བ་ནི་ཚད་མ་དང་གཞལ་བྱ་དང་འབྲས་བུ་རྟོགས་པ་པོ་རྣམས་སོ། །ཡང་ཇི་ལྟར་སྔོན་པོ་ལ་སོགས་རིགས་པ་ཡང་བདེ་བ་ལ་སོགས་པ་ལྟར་རྣམ་པར་གཞག་ཅེ་ན། སྔོན་པོའི་རྣམ་པའམ་ཞེས་བྱ་བའོ། །དེ་ཞེས་བྱ་བ་བདེ་བ་ལ་སོགས་པའོ། །འདི་ལ་གྲུབ་པའི་མཐའ་པས་བརྗོད་པ་ནི། བདེ་བ་ལ་སོགས་པ་ལ་ཇི་ལྟར་འཛིན་པ་རྣམས་བདག་ཉིད་དུ་གྱུར་པ་ཡིན། འདི་ལ་གཞན་གྱི་ལན་ནི་རང་ཉིད་ཅེས་བྱ་བའོ། །གྲུབ་པའི་མཐའ་པས་འདྲི་བ་ནི་གསལ་བའི་ཞེས་བྱ་བའོ། །གཞན་ལན་འདེབས་པ་ནི་ལྐོག་ཏུ་ཞེས་བྱ་བའོ། །འདི་ལ་གསུངས་པ་ནི་གལ་ཏེ་དེ་ལྟ་ན་ཞེས་བྱ་བའོ། །གལ་ཏེ་སྔོན་པོ་ལ་སོགས་པ་ནི་གཞན་གྱི་སྟོབས་ཁོ་ནས་ལྐོག་ཏུ་མ་གྱུར་པ་ཡིན་རང་གི་ངོ་བོས་ནི་དེ་དག་ལྐོག་ཏུ་མ་གྱུར་པ་མ་ཡིན་ནོ་ཞེས་སྟོན་པ་ནི་གལ་ཏེ་ཞེས་བྱ་བའོ། །མིག་འཇུག་ཀྱང་སྔོན་པོ་ལྐོག་ཏུ་མ་གྱུར་པར་མི་བྱེད་ལ་མིག་
མ་ཞུགས་ཀྱང་སྔོན་པོ་ལྐོག་ཏུ་མ་གྱུར་པ་སྲིད་པ་ཡིན་ནོ་ཞེས་བྱ་བ་དེ་ཉིད་སྟོན་པ་ནི་འདི་ལྟར་ཞེས་བྱ་བའོ། །གལ་ཏེ་ཡུལ་དེ་མི་སྣང་ན་དེའི་ཚེ་ལྐོག་ཏུ་མ་གྱུར་པ་ཁོ་ནའོ་ཞེས་བརྗོད་པ་ནི། གལ་ཏེ་ཡུལ་དེ་མི་སྣང་ན་དེ་ལྟ་ན་ཡང་ལྐོག་ཏུ་མ་གྱུར་པ་ཁོ་ནའོ་སྙམ་ན་གལ་ཏེ་ཞེས་བྱ་བའོ། །མིག་ལ་སོགས་པ་ལས་བྱུང་བར་མངོན་པར་འདོད་པ་གང་ཡིན་པ་དེའིའོ། །གཞན་དུ་སྣང་བ་བག་ཆགས་ཀྱི་རྒྱུ་ཅན་ཡིན་ན་དེའི་ཚེ་གཞན་དུ་སྣང་བར་འདོད་པའི་སྣང་བ་ལ་ལྟོས་ཏེ། རང་གི་ངོ་བོར་སྣང་བ་གཞན་དུ་གྱུར་པ་ཡིན་ཏེ་ཡང་བག་ཆགས་ཀྱི་རྒྱུ་ཅན་དུ་ཡིན་ནོ་ཞེས་བྱ་བའི་དོན་ཏོ། །སྣང་བ་ཉིད་ལས་ཤེས་སོ་སྙམ་ན་སྣང་བ་ཚད་མ་ཡིན་ཏེ་ཞེས་བྱ་བའོ། །གལ་ཏེ་སྣང་བར་འཁྲུལ་པ་ཡིན་ཏེ་དངོས་པོ་གཞན་དུ་གནས་པ་ལ་རྣམ་པ་གཞན་དུ་འགྱུར་ན། དེའི་ཚེ་བརྟེན་པ་གང་ལས་ཡིན་ཏེ། འགའ་ལས་ཀྱང་མ་ཡིན་ནོ། །རང་གི་ངོ་བོས་སྣང་བར་འདོད་པ་ལས་གཞན་པའི་སྣང་བ་མིག་ལ་སོགས་པ་ཉེས་པའི་རྒྱུས་སྐྱེད་པར་འདོད་པ་སྟེ་དེ་བཞིན་ནོ། །གལ་ཏེ་ཤེས་པ་མེ་ལོང་ལྟར་ཤིན་ཏུ་གསལ་བ་ཡིན་ན། དེའི་ཉེ་བར་གཞག་པ་ཉེ་བར་གནས་པའི་གཟུགས་བརྙན་འཇོག་པའི་ཕྱིར་ན་མིག་ལ་སོགས་པ་སྣང་བར་ཐལ་ན་དེ་ནི་སྣང་བར་མཐོང་བ་ཡང་མེད་དེ་དེས་ན་མེ་ལོང་ལྟར་སྣང་བ་མ་ཡིན་ནོ། །ཐལ་བ་ཉིད་བསྟན་པར་བྱེད་པ་ནི་མེ་ལོང་ལ་ནི་ཞེས་བྱ་བའོ། །ཅི་མེ་ལོང་སྣང་བའི་རྒྱུ་ཡིན་པ་དེ་བཞིན་དུ་མིག་ལ་སོགས་པ་ཡང་ཡིན་ནོ་ཞེས་བརྒྱ་ལམ་སངས་རྒྱས་ཁས་ལེན་པ་དེ་ལ་སྨྲས་པ་ནི་མེ་ལོང་ལ་སོགས་བཞིན་དུ་ཞེས་བྱ་བའོ། །དེར་བཤད་པའི་རྣམ་པ་ཆེན་པོ་མ་ཡིན་པར་མཐོང་བར་འགྱུར་ཏེ། ཆེན་པོ་མ་ཡིན་པ་ཉིད་དུ་སྣང་མོད་ཅི་སྐྱོན་ཞེ་ན། དེས་ན་ཞེས་གསུངས་སོ། །རེ་ཞིག་ཁ་དོག་ནི་ངེས་པར་འགྱུར་རོ་སྙམ་ན་ལིང་ཏོག་ཅེས་སྨོས་སོ། །གང་གི་ཚེ་ལིང་ཏོག་དང་རབ་རིབ་ལ་སོགས་པས་མིག་རྣམ་པ་གཞན་དུ་གྱུར་པ་དེའི་ཚེ་དེར་ཤར་བའི་མདོག་ཀྱང་རྣམ་པ་གཞན་དུ་འགྱུར་བ་ཡིན་ནོ། །དེས་ན་དེའི་སྒོ་ནས་ཡུལ་དེའི་མདོག་ཅན་དུ་ཇི་ལྟར་ངེས་ཞེས་བྱ་བའི་ཐ་ཚིག་གོ །གལ་ཏེ་མིག་གི་འོད་ཟེར་མིག་འབྲས་ནས་འཐོན་ནས་ཆེན་པོ་ལ་སོགས་པའི་གཟུགས་ལ་ཞུགས་པ་ནི་ཆེན་པོ་ལ་སོགས་པ་རང་གི་རང་བཞིན་དུ་འཛིན་པར་བྱེད་པ་ཡིན་ནོ། །
གསལ་བར་བྱེད་པས་ན་སྒྲོན་མ་སྟེ་མིག་གི་སྣང་བའོ། །དེ་དང་འབྲེལ་པ་ལས་གལ་ཏེ་ངོ་བོ་ཁྱད་པར་ཅན་སྐྱེ་ན། དེའི་ཚེ་སྒྲོན་མ་དང་འབྲེལ་པའི་གཟུགས་ཀྱི་རང་བཞིན་རིག་པར་མི་འགྱུར་རོ། །འོན་ཏེ་སྒྲོན་མ་དང་འབྲེལ་པའི་གཟུགས་ལ་སོགས་པ་ལ་ཡང་འཛིན་པར་བྱེད་པ་གཞན་འདོད་ན་དེའང་ཐུག་པ་མེད་དེ། དེ་ཡང་བཤད་ཟིན་པའི་ཉེས་པ་ཡོད་པའི་ཕྱིར་རོ། །འོན་ཏེ་གཟུགས་ཀྱི་རང་བཞིན་རིག་པ་ཡོད་པ་ན་དེའི་ཚེ་འོད་ཟེར་དེ་དག་འཛིན་པར་བྱེད་པ་ཡིན་ཏེ། མ་ཡིན་པ་ཉིད་དོ། །དེས་ན་སྐྱེས་པ་ཙམ་ལས་ཞེས་བརྗོད་པར་བྱ་བ་ཡིན་ནོ། །དེ་ལྟ་ན་ཡང་ཤེས་པ་ཐམས་ཅད་ཀྱི་རྣམ་པ་ཅན་དུ་ཐལ་བར་འགྱུར་རོ། །རྒྱུ་ཉིད་ཀྱི་ཡུལ་ཡིན་ན་ཉེས་སྙམ་ན་རྒྱུ་ཉིད་ཀྱིས་གསུངས་སོ། །དེའི་རྣམ་པ་ཙམ་གྱིས་ཡུལ་ཡིན་ན་ཡང་ཉེས་པ་བརྗོད་པ་ནི་དེའི་རྣམ་པ་ཉིད་ཀྱིས་ཞེས་བྱ་བའོ། །གཉི་ག་ལ་ཞེས་བྱ་བ་ནི་དེའི་སྐྱེད་བྱེད་དང་རྣམ་པར་འཇོག་པར་བྱེད་པ་ལའོ། །མྱོང་བ་ཉིད་དམ་ཞེས་བྱ་བར་རང་རིག་པ་དང༌། དེ་ལྟ་མ་ཡིན་པར་རང་རིག་པ་མ་ཡིན་ན་ཡང་ངོ༌། །རྟོགས་པ་དང་གཞན་པའི་གནས་སྐབས་མི་རུང་བ་ཉིད་བརྗོད་བ་ནི་གལ་ཏེ་ཞེས་བྱ་བའོ། །གྲངས་ཅན་གྱི་ལྟ་བ་ལ་ནི་རྣམ་པ་དང་ལྡན་པ་བློ་ཡིན་ནོ། །དེས་ན་གལ་ཏེ་བློའི་རང་བཞིན་རྟོགས་ན་དེའི་ཚེ་སེམས་ཡོད་པ་གཞན་གྱིས་ཅི་བྱ། དོན་མེད་པའི་ཕྱི་རོལ་ཞེས་བྱ་བ་ནི་བློའི་རང་བཞིན་རྟོགས་པ་ཉིད་ལས་དེ་ན་གནས་གྲུབ་པའི་ཕྱིར་རོ། །འོན་ཏེ་བློའི་རང་བཞིན་མ་རྟོགས་ན། དེའི་ཚེ་ཡང་རྟོགས་པའི་རང་བཞིན་གྱིས་ཡུལ་རྣམ་པར་འཇོག་པར་མི་ནུས་ཏེ་རྣམ་པ་དང་བྲལ་བའི་ཕྱིར་རོ། །འོན་ཏེ་མ་རྟོགས་པའི་བློ་ཉིད་ཀྱིས་ཡུལ་རྣམ་པར་འཇོག་པར་བྱེད་ཅེ་ན་མ་རྟོགས་བ་ནི་ཞེས་བྱ་བ་གསུངས་སོ། །རྟོགས་པ་ཞེས་བྱ་བ་རྣམ་པར་གཞག་པའི་ཡུལ་ཞེས་བྱ་བ་རྒྱུ་མ་ཡིན་ནོ། །བློ་ནི་ཤེས་པར་བྱེད་པ་ཡིན་ན་རང་ཉིད་མ་ཤེས་པར་ཇི་ལྟར་ཡུལ་ཤེས་པར་བྱེད་པར་འགྱུར། གལ་ཏེ་བློའི་རང་བཞིན་རྟོགས་སོ་ཞེ་ན་ནི་དེ་ཉིད་དེའི་རང་བཞིན་རྟོགས་པ་ཡིན་ཏེ། སེམས་པ་ཡོད་པ་གཞན་གྱིས་ཅི་བྱ་བ་སྙམ་དུ་དགོངས་པའོ། །དེ་ལྟ་ན་ཚད་མ་དང་འབྲས་བུ་དག་གཅིག་ཏུ་ཇི་ལྟར་འཐད་སྙམ་ན་བྱ་བ་གཞན་དང་ཞེས་གསུངས་སོ། །དེ་ཉིད་ཅེས་བྱ་བ་ནི་ཤེས་པའི་རྣམ་པའོ། །ད་ནི་གཞན་ཡང་ཞེས་བྱ་བ་ལ་སོགས་པས་བཤད་པར་བྱ་བ་
སློབ་དཔོན་ཕྱོགས་ཀྱི་གླང་པོའི་གཞུང་ཉེ་བར་དགོད་པའོ། །དེ་དང་ཁྱད་པར་མེད་པར་ཞེས་བྱ་བ་ནི་ཡུལ་གྱི་ཤེས་པ་དང་ཁྱད་པར་མེད་པར་རོ། །འདི་ཉིད་འཆད་པ་ནི་ཡུལ་གྱི་ཤེས་པ་ཞེས་བྱ་བའོ། །འོན་ཏེ་དྲན་པས་ཡུལ་དུ་བྱས་པའི་སྣང་བ་འདི་ནི་དོན་ཉིད་ཡིན་ནོ་སྙམ་ན་དོན་དང་སྣང་བ་གཅིག་པ་ཉིད་ཡིན་ནའོ། །དེ་ཉིད་ལ་དེ་ནི་འདི་ལྟ་བུར་གྱུར་པའི་སྣང་བ་ཡིན་ནོ་ཞེས་བྱ་བ་དེ་ལྟ་བུའི་རྣམ་པ་ཅན་གྱི་ངེས་པ་དང༌། དེ་ལྟ་བུའི་རྣམ་པ་ཅན་གྱི་མ་ངེས་པའོ། །ཆ་གཉིས་དང་ཞེས་བྱ་བ་ནི་ཕྲ་མོ་དང་ཕྲ་མོ་མ་ཡིན་པའི་མཚན་ཉིད་དོ། །འདིའི་ལམ་ནི་འདི་ནི་ཕྱིས་ཞེས་བྱ་བའོ། །འོ་ན་ཤེས་པ་ཡོད་པར་ཇི་ལྟར་འགྲུབ་སྙམ་ན་དེ་ལ་ཞེས་གསུངས་སོ། །ཇི་ལྟར་དོན་ཤེས་པ་སྟེ་གསལ་བའི་མཆོག་ཏུ་གྱུར་ན། དོན་གྱིས་གོ་བས་ཤེས་པ་ཡོངས་སུ་རྟོགས་པ་དེ་བཞིན་དུ་དྲན་པ་གཞན་དུ་མི་འཐད་པར་ཏེ། དྲན་པར་དོན་གསལ་བ་གཞན་དུ་མི་འཐད་པས་ཀྱང་དྲན་པ་རྟོགས་པ་ཡིན་ནོ། །ཤེས་པ་རིག་པ་མ་ཡིན་ལ། ཤེས་པ་དེ་ལ་ཚུལ་གཉིས་ཀྱང་ཡོད་ན་ནི་མ་ཡིན་ཏེ། རྣམ་པ་གཉིས་ཀ་མྱོང་བ་མེད་པའི་ཕྱིར་རོ། །འོ་ན་རྗེས་སུ་དཔག་པས་བསྒྲུབ་བོ་སྙམ་ན། གཏན་ཚིགས་ཐེ་ཚོམ་ལ་བརྗོད་ཕྱིར། །ཞེས་གསུངས་སོ། །སུན་འབྱིན་པ་གཞན་ཡང་བརྗོད་པ་ནི་གཏན་ཚིགས་དཔེ་ལ་ཞེས་བྱ་བའོ། །བྲམ་ཟེ་དག་ཅེས་བྱ་བ་བརྗོད་པ་དེ་ནི་མི་རིགས་སོ་ཞེས་འབྲེལ་ཏོ། །སྐྲ་ཤད་ལ་སོགས་པ་ནི་ཤེས་པ་ལའོ། །དུང་དཀར་པོ་ལ་སེར་པོར་ཤེས་པའོ། །དེ་ལ་ཡང་ཁྱེད་ཀྱིས་དམ་བཅས་པ་ཉིད་མངོན་སུམ་གྱི་གནོད་པ་ཡིན་ནོ་ཞེས་སྟོན་པ་ནི་དེ་ལ་ཞེས་བྱ་བའོ། །ངེས་པ་ཞེས་བྱ་བ་ནི་དྲན་པའོ། །ངེས་པའི་རྣམ་པ་ཉིད་བརྗོད་པ་ནི། དེ་དེ་ལྟ་བུར་སྡང་ངོ་ཞེས་བྱ་བའོ། །འོན་ཏེ་ཡུལ་ཤེས་པའི་ཤེས་པ་རང་བཞིན་ཅི་འདྲ་བ་ཞིག་སྙམ་ན་ཡུལ་ཤེས་པ་ལ་ཞེས་སྨྲས་སོ། །རྒྱུ་ཉིད་ཀྱིས་ཞེས་བྱ་བ་ནི་ཡུལ་ཤེས་པའི་ཤེས་པ་རྒྱུ་ཡིན་པས་སོ། །ཉམས་མྱོང་བ་ཡང་དེ་ལྟ་བུར་ཞེས་བྱ་བ་དོན་གྱི་རྣམ་པར་འགྱུར་རོ། །དེ་ཡང་ཞེས་བྱ་བ་ནི་དོན་ཤེས་པའི་ཤེས་པ་དྲན་པའི་མཚན་ཉིད་ལ་སྣང་བའོ། །དེ་ལྟ་བུ་ཉིད་དུ་ཞེས་བྱ་བ་ནི་གསལ་བར་རོ། །དེ་ལྟར་སྣང་ངོ་ཞེས་བྱ་བ་ནི་མི་གསལ་བར་རོ། །གལ་ཏེ་དྲན་པ་ལ་སྣང་བ་འདི་དོན་ཡིན་ན་དེའི་ཚེ་སྐྱེས་བུ་གཞན་གྱིས་ཀྱང་རྟོགས་པར་འགྱུར་རོ། །སུན་འབྱིན་པ་གཞན་ཡང་བརྗོད་པ་ནི་
བདག་ལ་རྟག་ཏུ་ཞེས་བྱ་བའོ། །དེ་ལྟ་ཡིན་དང་ཞེས་བྱ་བ་ནི་བདག་ལ་འབྲེལ་བ་ཉིད་ནའོ། །བདག་ལ་འབྲེལ་བའི་བདེ་བ་ལ་སོགས་པ་ནི་བརྗོད་ཀྱང་གཞན་གྱིས་རྟོགས་པ་མ་ཡིན་ནོ། །དེ་ལྟར་མ་ཡིན་པར་ཡང་ཞེས་བྱ་བ་ནི་མ་བརྗོད་ཀྱང་ངོ༌། །གཞན་ཉིད་དོ་ཞེས་བྱ་བ་ནི་བདག་གི་དྲན་པ་ལས་གཞན་ནོ། །འདི་ནི་གཅིག་གོ་ཞེས་བྱ་བ་ནི་འདིས་རྟོགས་ལ་གང་ཡིན་པ་ཉིད་ངས་རྟོགས་སོ་ཞེས་རྣམ་པ་དེ་ལྟར་རྟོགས་པ་ནི་སྐྱེས་བུ་དེ་གཉིས་ལ་མི་འགྱུར་ཏེ། དོན་དེ་ནི་སོ་སོར་བདག་ཉིད་ཐ་དད་པའི་ཕྱིར་རོ། །ཅིའི་ཕྱིར་མཚམས་སྦྱོར་བར་མི་འགྱུར་སྙམ་ན། སེམས་དེ་གཉིས་ནི་ཞེས་གསུངས་སོ། །འདིར་ཞེས་བྱ་བ་ནི་འཆད་པ་པོ་དང་ཉན་པ་པོའི་སེམས་དག་ལའོ། །གཞན་ལ་གནས་པ་ཡང་ཞེས་བྱ་བ་ནི་གཞན་གྱིས་མ་བརྗོད་ཀྱང་འདྲ་བ་དང་དངོས་པོར་གྱུར་པ་ཡོད་པས་ན། རང་གི་རྟོགས་པའི་རྗེས་སུ་འབྲངས་ནས་རྒྱུན་གཞན་ལ་ཡང་རྟོགས་པར་འགྱུར་རོ། །འདི་ཉིད་འཆད་པ་ནི་གལ་ཏེ་བདག་གིས་ཀྱང་ཞེས་བྱ་བའོ། །མི་བདེན་པ་བརྗོད་པའི་དུས་ན་ཉན་པའི་བློ་དོན་དང་བྲལ་བ་ཡིན་མོད། དེ་ལས་ཅིར་འགྱུར་སྙམ་ན་ཇི་ལྟར་ཞེས་བྱ་བའོ། །མི་བདེན་པ་བརྗོད་པའི་དུས་ན་ནི་སྨྲ་བ་པོའི་སེམས་ལ་དེ་འདྲ་བའི་དོན་སྣང་བ་ཡོད་པ་མ་ཡིན་ནོ། །དེ་ལྟ་ན་ཡང་ཉན་པ་པོས་སྨྲ་བ་པོ་ལ་དེ་འདྲ་བའི་སྣང་བ་ཡོད་དོ་ཞེས་པར་བྱེད་དོ། །རྣམ་པ་གང་གིས་ཤེས་པ་གཉིས་སྔོན་པོ་ཉམས་སུ་མྱོང་བའི་ཆ་གཉིས་ལ་དམིགས་སྙམ་ན། སྔོན་པོར་སྣང་བ་ཞེས་བྱ་བ་ནི་དོན་གྱི་རྣམ་པ་འཆད་དེ་ཆ་གཅིག་གོ །ཤེས་པ་ཞེས་བྱ་བ་ནི་རྟོགས་པའི་བདག་ཉིད་དེ་ཆ་གཉིས་པའོ། །གཞན་དག་གིས་ཞེས་བྱ་བ་ནི་བྲམ་ཟེ་ལ་སོགས་པས་སོ། །ཇི་ལྟར་ཞེས་བྱ་བ་ནི་སྔོན་པོའི་ཤེས་པའོ། །འབའ་ཞིག་པར་ཞེས་བྱ་བ་ནི་དོན་གྱི་རྣམ་པ་དང་བལ་བར་རོ། །དོན་གྱིས་གོ་བས་བརྟགས་པ་དེ་ལྟར་ནི་རྗེས་སུ་འབྲང་བ་སུ་ཡང་མེད་དོ། །དེ་ལྟར་རྗེས་སུ་འབྲང་བ་ལྟ་རེ་ཞིག་གཞག་སྟེ། དོན་གྱིས་གོ་བས་ཡང་མི་སྲིད་དོ་ཞེས་གསུངས་པ་ནི་དོན་གྱིས་གོ་བ་ནི་ཞེས་བྱ་བའོ། །འོན་ཏེ་དོན་གྱིས་གོ་བས་བློ་ཐ་དད་པར་རྗེས་སུ་དཔོག་པ་དེའི་ཉེས་པ་ཅི་ཡོད་སྙམ་ན་དོན་གྱིས་གོ་བས་ཞེས་སྨྲས་སོ། །ཡང་ཇི་ལྟར་དེ་ངེས་པར་བྱ་བ་མ་ཡིན་སྙམ་ན། གང་གི་ཕྱིར་རྟོགས་པར་བྱེད་པར་ནུས་པ་མ་ཡིན་པའི་ཕྱིར་རོ། །དེ་ཉིད་བརྗོད་པ་ནི་གཟུགས་ལ་
སོགས་པར་ཞེས་བྱ་བའོ། །རྐྱེན་ཐ་དད་པས་ཞེས་བྱ་བ་རྟོགས་པ་ཞེས་བྱ་བ་འདི་ལ་ནི། གྷ་ཉའི་རྐྱེན་ཡིན་ལ་བློ་ཞེས་བྱ་བ་ལ་ནི་ཀྚི་ནའི་རྐྱེན་ཡིན་ནོ། །འདི་ཉིད་སྡུད་པ་ནི་ཀྚི་དང་ནི་ཞེས་བྱ་བའོ། །དོན་ཐ་དད་པ་ཡིན་ན་ནི་གྷ་ཉའི་རྐྱེན་གྱི་མཐའ་ཅན་རྟོགས་པ་དེས། ཀྚི་ནའི་རྐྱེན་གྱི་མཐའ་ཅན་གྱི་བློ་འཆད་པ་སྟེ་བློ་ནི་རྟོགས་པའོ་ཞེས་བྱ་བ་དེ་ལྟ་བུའི་རྣམ་པར་ཇི་ལྟར་འགྱུར། འོ་ན་སྔོན་པོའི་བློ་ཞེས་ཐ་དད་པར་ཇི་ལྟར་སྟོན་སྙམ་ན། སྔོན་པོ་ལ་སོགས་པ་དེ་ཉིད་ཅེས་བྱ་བའོ། །དེའི་རྣམ་པ་ཉིད་རྗེས་སུ་རྟོག་པ་ཞེས་བྱ་བ་ནི་སྔོན་པོའི་རྣམ་པ་ཉིད་ཀྱི་རྗེས་སུ་འབྲང་བའོ། །ཕྱི་མའི་ཤེས་པས་ཞེས་བྱ་བ་ནི་སྔོན་པོའི་ཤེས་པའི་དེ་མ་ཐག་ཏུ་བྱུང་བ་འདི་ནི་སྔོན་པོའི་རྣམ་པ་ཡིན་ནོ་ཞེས་བྱ་བའི་རྣམ་པར་རྟོག་པས་སོ། །ཐ་དད་པར་ཞེས་བྱ་བ་ནི་རྟོགས་པའི་བཟོས་སྤྲུས་པས་སོ། །དེ་ལྟར་ན་ཚད་མས་གྲུབ་པར་གྱུར་པ་གང་ཡིན་པ་དེ་ལ་བརྟེན་ནས། གཞན་ཚད་མས་མ་གྲུབ་བ་འགོག་པར་འགྱུར་བ་ཡིན་ནོ། །འདི་ཉིད་སྦྱོར་བར་བྱེད་པ་ནི་གལ་ཏེ་ཞེས་བྱ་བའོ། །འོན་ཏེ་དེ་ནི་ཚད་མས་གྲུབ་བ་ལ་བརྟེན་ནས་བློ་ཉིད་དགག་པར་བྱའོ་སྙམ་ན་དེ་ལ་རེ་ཞིག་ཅེས་བྱའོ། །ཅི་སྟེ་བློར་སྨྲ་བས་ཀྱང་དོན་ཁས་བླང་བར་བྱ་སྟེ། དེ་ལྟ་མ་ཡིན་ན་བློ་ཉིད་རབ་ཏུ་མི་འགྲུབ་པར་འགྱུར་རོ་སྙམ་ན། བློ་དང་ལྡན་པས་ནི་ཞེས་བྱ་བ་སྟེ། རྣམ་པར་ཤེས་པར་སྨྲ་བས་ནིའོ། །གལ་ཏེ་ཇི་ལྟར་བློ་རང་རིག་པས་གྲུབ་པར་ཁས་བླངས་ནས་དོན་ཡོངས་སུ་འདོར་བ་དེ་བཞིན་དུ་དོན་ཡང་རང་རིག་པར་ཁས་བླངས་ནས་བློ་དོར་བར་བྱའོ་སྙམ་ན། འོན་ཏེ་སྔོན་པོ་ལ་སོགས་པའི་རྣམ་པ་ལས་ཐ་དད་པའི་བློ་མེད་དོ་ཞེ་ན་ནི་དེ་ཡོད་པར་ཇི་ལྟར་འགྱུར་སྙམ་ན་འདི་ལ་བརྗོད་པ་ནི་ཇི་ལྟར་སྐད་ཅིག་ཅེས་གསུངས་སོ། །བློ་གཞན་དྲན་པ་དེ་ལྟར་སྔོན་པོ་ལ་སོགས་པའི་རྣམ་པར་རོ། །དེས་ན་ཞེས་བྱ་བ་ནི་བློ་གཞན་གྱིས་སོ། །སྔོན་པོའི་རྣམ་པར་ཤེས་པ་སྔ་མ་དེ་ཉིད་དྲན་པ་ལ་གནས་པར་ཚད་མར་གང་ལས་ངེས་པར་བྱ་ཞེ་ན། འདི་ལ་བརྗོད་པ་ནི་དེ་བཞིན་ཉིད་དུ་ཞེས་བྱ་བའོ། དེ་ལྟར་རྟོགས་ཀྱང་གལ་ཏེ་དེ་ལྟར་ཐ་སྙད་མི་བྱེད་ན་ནི་དེའི་ཚེ་ཐམས་ཅད་འཇིག་པར་འགྱུར་རོ་ཞེས་བྱ་བའི་དོན་ཏོ། །འོ་ན་འདི་ལྟར་དེ་ལ་དོན་གྱི་རྣམ་པ་ཡང་སྣང་བ་ཇི་ལྟར་ཡིན་སྙམ་ན་དེ་ལ་ཤེས་པ་ནི་ཞེས་གསུངས་སོ། །དེ་དང་འབྲེལ་བ་ནི་དོན་དང་འབྲེལ་པའོ། །
རྒྱུ་དེས་ན་ཞེས་བྱ་བ་ཤེས་པའི་ཡུལ་དེའོ། །གཞན་དུ་ཞེས་བྱ་བ་ནི་དོན་མེད་པའོ། །དེ་ལྟར་ནི་དོན་དང་བཅས་པར་རོ། །གལ་ཏེ་དེ་ལྟར་ན་ཡང་དོན་ཐ་དད་པ་ཉིད་དྲན་པར་འགྱུར་མོད་ཤེས་པ་སྔ་མའི་བདག་ཉིད་དུ་གྱུར་པར་གོ་དྲན་སྙམ་ན་དེ་ལ་ཞེས་བྱ་བ་སྟེ། དོན་ལ་རྒྱུ་དེས་ན་དེའི་རྣམ་པ་ཉིད་དུ་རྟོགས་པ་གང་ཡིན་པ་དེ་ཉིད་ལ་སྟོབས་ཞེས་བརྗོད་པ་ཡིན་ལ། དེ་ཡང་འཁྲུལ་ནས་འགྱུར་བ་ཡིན་ནོ། །དེ་ལྟར་ཞེས་བྱ་བ་དོན་གྱི་རྣམ་པ་ཉིད་དུ་རྟོགས་པར་འགྱུར་རོ། །གཉིས་ལ་ཡང་ཞེས་བྱ་བ་སྣང་བ་དང་ཡིད་ལ་བྱེད་པ་ལ་ཡང་ངོ༌། །གང་གི་ཕྱིར་དེ་ལྟ་བུའི་ཉེས་པ་ཡོད་པ་དེས་ན་དེ་ནི་མི་རུང་ངོ༌། །འོན་ཏེ་གཟུགས་མེད་པར་སྣང་བ་གཟུང་བར་མི་ནུས་པས་ན་སྣང་བ་གཟུགས་སུ་འགྱུར་རོ། །རྣམ་པར་ཤེས་པ་ནི་གཞན་དུ་ཡང་འཛིན་པ་ཡིན་ནོ་སྙམ་ན། ཇི་ལྟར་གཟུགས་ཞེས་གསུངས་སོ། །འབྲས་བུ་ཉིད་ཀྱིས་དེ་ལྟར་རྟོགས་ན་ཡང་ཞེས་བྱ་བ་ནི་རྣམ་པར་ཤེས་པ་འབྲས་བུ་ཡིན་པའི་ཕྱིར་དེ་དྲན་ན་རྒྱུ་གཟུགས་ཀྱང་དྲན་པ་ཡིན་ནོ་ཞེས་ཁས་ལེན་ནའོ། །ཡང་ཇི་ལྟར་ན་ངེས་པ་འདིར་མི་འགྱུར་སྙམ་ན་དོན་དེ་ནང་དུ་ཞེས་གསུངས་སོ། །དང་པོ་ཞེས་བྱ་བ་ནི་དོན་འཛིན་པའོ། །གཉི་གའི་རང་བཞིན་མ་ཡིན་ཏེ་ཞེས་བྱ་བ་ནི་འདི་ཉིད་གསལ་བར་བྱེད་པ་ནི་འཛིན་པའི་རྣམ་པ་འབའ་ཞིག་ཅེས་བྱ་བའོ། །གཉིས་པ་ཡང་ཞེས་བྱ་བ་ནི་དོན་གྱིས་ཤེས་པ་ལ་འཛིན་པར་བྱེད་པ་ལ་ཡང་ངོ༌། །ངེས་པར་འཛིན་པའི་སེམས་ཀྱིས་ཞེས་བྱ་བ་དེ་ཉིད་གསལ་བར་བྱེད་པ་ནི་གཉིས་པ་ཞེས་བྱ་བ་སྟེ། ཤེས་པ་གཉིས་པ་ལ་ངེས་པར་འཛིན་པ་དྲན་པའི་མཚན་ཉིད་ཀྱི་སེམས་དེ་དེས་སོ། །དེ་ཡང་ཞེས་བྱ་བ་ནི་གཉིས་པ་ཡང་ངོ༌། །རང་བཞིན་གཅིག་པ་ཉིད་ལ་ཞེས་བྱ་བ་འདི་ཉིད་ཀྱིས་དོན་བརྗོད་པ་ནི་འཛིན་པའི་རྣམ་པར་ཞེས་བྱ་བའོ། །གཉིས་པ་ཞེས་བྱ་བ་ནི་དོན་ཤེས་པ་དྲན་པའོ། །བློ་སྔ་མ་ཞེས་བྱ་བ་ནི་དོན་འཛིན་པའོ། །རྣམ་པར་ཤེས་པ་སྔ་མ་དོན་གྱི་རྣམ་པ་ཅན་དུ་སྦྱོར་བར་བྱེད་དོ་ཞེས་བྱ་བའི་དོན་ཏོ། །འདི་ཉིད་ལྡོག་པའི་སྒོ་ནས་བརྗོད་པ་ནི་གལ་ཏེ་ཞེས་བྱ་བའོ། །གལ་ཏེ་དོན་གྱིས་ཤེས་པ་དོན་རྣམ་པ་ཅན་དུ་མ་གྱུར་ན་དེའི་ཚེ་བློ་སྔ་མ་འབའ་ཞིག་ཀྱང་དམིགས་པར་འགྱུར་རོ། །འཛིན་པ་ལ་ཡང་ཐེ་ཚོམ་ཟ་བ་ཡིན་ཏེ་གཟུང་བ་མ་དྲན་ན་ནི་འཛིན་པར་བྱེད་པ་མ་ཡིན་ནོ། །ཕྱེད་ཕྱི་
མ་འཆད་པ་ནི་འཛིན་ཕྱིར་ཞེས་བྱ་བའོ། །དེ་ཉིད་ཅེས་བྱ་བ་ནི་གཟུང་བའི་བྱ་བ་དང་བྲལ་བ་ཉིད་འཛིན་པར་བྱེད་པ་དེའི་རང་བཞིན་ཡིན་པ་སྟེ། གཟུང་བ་ཉེ་བ་ན་གཞན་ཉིད་དུ་ཞེས་བྱ་བ་གཟུང་བའི་བྱེད་པ་དང་ལྡན་པའི་རང་བཞིན་དུ་ནི་གྱུར་པ་མ་ཡིན་ནོ། །རྒྱུ་དེས་ན་འཛིན་པར་བྱེད་པ་མ་ཡིན་པའི་རང་བཞིན་གཞན་དུ་དྲན་པར་གྱུར་པ་དེ་ནི་དེ་ལྟ་བུར་གྱུར་པ་ཉིད་ཅེས་བྱ་བ་འཛིན་པར་བྱེད་པ་མ་ཡིན་པའི་རང་བཞིན་དུ་དྲན་པར་བྱ་བ་དེ་ཇི་ལྟར་འཛིན་པར་བྱེད་པ་ཡིན། དེ་སྣང་བ་ཉིད་ཅེས་བྱ་བ་ནི་གཟུང་བ་སྣང་བ་ཉིད་དོ། །འདིའི་ཞེས་བྱ་བ་ནི་འཛིན་པར་བྱེད་པའོ། །གཟུགས་ལ་སོགས་པའི་བདག་ཉིད་དང་འཛིན་པར་བྱེད་པ་གཅིག་ཉིད་དོ། །དེ་སྐད་དུ་སློབ་དཔོན་ཕྱོགས་ཀྱི་གླང་པོས་སོ། །དེ་ནི་ཞེས་བྱ་བ་ནི་ཤེས་པ་སྔ་མ་སྔ་མའོ། །ཡུལ་མ་ཡིན་པའི་ཕྱིར་ཞེས་བྱ་བ་ནི་ཡུལ་གྱི་རྣམ་པ་དང་བྲལ་བའི་ཕྱིར་རོ། །འདི་ཉིད་གཞུང་འཛུགས་པ་ནི་གང་གི་ཕྱིར་ཞེས་བྱ་བའོ། །དེ་ལས་ཏེ་ཤེས་པ་དང་པོ་ལས་བྱུང་བའོ། །དེའི་ཞེས་བྱ་བ་ཤེས་པ་སྔ་མའི་དོན་གྱི་རྣམ་པ་དང་རིག་པའི་རྣམ་པ་གང་ཡིན་པའོ། །ཤེས་པའི་ཤེས་པ་དྲན་པའི་མཚན་ཉིད་ཅན་སྐྱེས་པར་གྱུར་པ་ན། དེའི་ཞེས་བྱ་བ་ཤེས་པ་སྔ་མའི་རྣམ་པ་དང་ལྡན་པར་འགྱུར་བ་ཡིན་ཏེ། དཔེར་ན་ཐག་རིང་པོའི་ཤིང་ལས་སྐྱེས་པའི་ཤེས་པ་ཤིང་གི་རྣམ་པ་དང་ལྡན་པར་འགྱུར་བ་ཡིན་ནོ། །དེ་གནས་པ་ཉིད་ཅེས་བྱ་བ་ནི་དོན་གནས་པ་ཉིད་ཤེས་པ་དེའི་རང་བཞིན་ནོ། །བདེ་བ་ལ་སོགས་པའི་རང་བཞིན་དུ་ཤེས་པ་ངེས་པར་རྟོག་པ་ཡིན་ནོ་སྙམ་ན། བདེ་བ་ལ་སོགས་པའི་ཞེས་སྨོས་སོ། །བདེ་བ་ལ་སོགས་པའི་ཞེས་བྱ་བ་ནི་འཆད་པའོ། །ཁྱེད་ལ་ཞེས་བྱ་བ་ནི་རིགས་པ་ཅན་ལ་སོགས་པ་ལའོ། །འོན་ཏེ་བདེ་བ་ལ་སོགས་པ་ཡུལ་ཡིན་ཡང་རྣམ་པར་ཤེས་པ་ནི་དེ་དག་ལས་ཐ་དད་མ་ཡིན་གྱི། འོན་ཀྱང་དེ་དག་ཉིད་ཡིན་ནོ་སྙམ་ན་ཇི་ལྟར་ཞེས་བྱ་བའོ། །གཉིས་ཀ་ཡང་ཞེས་བྱ་བ་ནི་བདེ་བ་ལ་སོགས་པ་དང་སྔོན་པོ་ལ་སོགས་པའོ། །འོན་ཏེ་བདེ་བ་ལ་སོགས་པ་ཁོ་ན་སྔོན་པོ་ལ་སོགས་པའི་འཛིན་པར་བྱེད་པ་ཡིན་ནོ། །དེས་ན་སྔོན་པོ་ལ་སོགས་པ་ལས་ཐ་དད་པར་ཤེས་པ་རྟོག་པ་ཁོ་ནའོ་སྙམ་ན། བདེ་བ་ལ་སོགས་པ་ནི་ཞེས་བྱ་བའོ། །དེ་མེད་ཀྱང་ཞེས་བྱ་བ་ནི་བདེ་བ་ལ་སོགས་པ་མེད་ཀྱང་རང་གི་ངོ་བོའི་ཁྱད་པར་ཞེས་བྱ་བ་གསལ་བའི་རང་བཞིན་གྱིས་བྱས་པ་ཉིད་དོ། །དེ་
མེད་པར་ཏེ་གསལ་བའི་རང་བཞིན་མེད་པར་འཛིན་པར་བྱེད་པ་མེད་པའི་ཕྱིར་རོ། །སྔོན་པོ་ལ་སོགས་པ་ནི་ཞེ་ལྐོག་ཏུ་མ་གྱུར་པ་ཉིད་གསལ་བའི་རང་བཞིན་མེད་པར་སྔོན་པོ་ལ་སོགས་པའི་འཛིན་པར་བྱེད་པ་དམིགས་པ་མེད་ཀྱི་འོན་ཀྱང་སྔོན་པོ་ལ་སོགས་པའི་འཛིན་པའི་བྱེད་པ་ནི་གསལ་བའི་རང་བཞིན་ཁོ་ན་ཡིན་ནོ། །དེ་ཡང་བདག་ཉིད་དུ་གྱུར་པ་མ་ཡིན་ནོ་ཞེས་བརྗོད་པ་ནི་དེའི་ཕྱིར་ཞེས་བྱ་བའོ། །ཕྱི་རོལ་གྱི་ཟླ་བ་ཉིད་ལ་ཟླ་བ་བདག་གཉིས་སུ་མཐོང་བ་ཉིད་ཀྱིས་ཐ་དད་པར་མཐོང་བར་འགྱུར་བ་དེ་བཞིན་དུ་རྣམ་པར་ཤེས་པ་བདག་ཉིད་ལ་ཡང་ཡུལ་གྱི་རྣམ་པ་དང་རྟོགས་པའི་རྣམ་པ་གཉིས་སུ་རྣམ་པར་ཤེས་པ་རང་བཞིན་གཅིག་ཉིད་ལ་མཐོང་བ་ཡིན་ལ། ཡུལ་གྱི་རྣམ་པ་དང་རྟོགས་པའི་བདག་ཉིད་ཀྱང་ཐ་དད་ཁོ་ནར་སྣང་བ་ཡིན་ནོ་ཞེས་འགའ་ཞིག་འཆད་པ་སུན་དབྱུང་བའི་དོན་དུ་ཕྱོགས་སྔ་མ་བརྗོད་པ་ནི་གལ་ཏེ་ཞེས་བྱ་བའོ། །དེའི་ཞེས་བྱ་བ་རྣམ་པར་ཤེས་པའི་བདག་ཉིད་ལ་ནི་ཇི་ལྟར་ཐ་དད་པར་མཐོང་རང་བཞིན་དེ་ཉིད་ནི་གཞན་དུ་འགྱུར་བ་མ་ཡིན། འདི་ཉིད་འཆད་པ་ནི་ཇི་ལྟར་ཞེས་བྱ་བའོ། །དེ་ཉིད་ཀྱིས་ཞེས་བྱ་བ་ནི་ཤེས་པས་སོ། །གཞན་གྱི་ངོ་བོར་ཞེས་བྱ་བ་ནི་རང་བཞིན་ཐ་དད་པར་རོ། །དེ་ཞེས་བྱ་བ་རང་བཞིན་ལ་མ་རྟོགས་པར་ཐལ་བའི་ཕྱིར་རོ། །ཡུལ་གཅིག་ལ་ཡང་ཐ་དད་པར་མཐོང་བར་རིགས་ཏེ་ཞེས་ཕ་རོལ་གྱིས་བརྗོད་པ་གང་ཡིན་པ་དེ་རེ་ཞིག་སུན་འབྱིན་པ་ནི་དེ་ནི་མ་ཡིན་ཏེ་ཞེས་བྱ་བའོ། །འདི་ལྟར་ཞེས་བྱ་བ་ནི་གཞན་གྱི་རང་ཉིད་ཀྱིས་རང་བཞིན་ཅི་འདྲ་བ་དེས་ཀྱང་གཞན་རྟོགས་པར་མི་ནུས་ན། གཞན་གྱིས་ལྟ་བ་གཞན་རྟོགས་པར་ནུས་རེ་སྐད་ན། དེས་ན་ཡུལ་གཅིག་ལ་ཡང་ཐ་དད་པར་མཐོང་བ་ཞེས་བྱ་བ་ནི་སྔར་ཟླ་བ་གཅིག་ཡིན་ནོ། །ལྷག་མ་ནི་ཁས་ལེན་པ་ཉིད་དོ། །འོ་ན་རྣམ་འགྲེལ་འདིའི་དོན་ཅི་སྙམ་ན། དེས་ན་དོན་འདི་ཡིན་ཏེ་ཞེས་བྱ་བའོ། །གལ་ཏེ་ཐ་དད་པ་མི་རྟོགས་ན་ཅི་ཞིག་རྟོགས་ཤེ་ན་གལ་ཏེ་ཞེས་བྱ་བའོ། །རྗེས་སུ་འགྲོ་བ་ཞེས་བྱ་བ་ནི་སྔར་ཟླ་བ་གཅིག་མཐོང་བར་འགྱུར་རོ་ཞེས་བྱ་བའོ། །ཟླ་བ་གཉིས་པ་ནི་དེ་ལྟ་ཁོ་ན་མཐོང་ངོ་ཞེས་བྱ་བ་ནི་ལྡོག་པའོ། །དེས་ན་འདི་གཉིས་ཐ་དད་དོ་ཞེས་བྱ་བ་ནི་རྟོགས་པ་ཡིན་ནོ། །དེ་ལྟ་ན་འོ་ན་ཞེས་དོགས་པ་བསུ་བ་ནས་གྲུབ་པའི་མཐའ་བྱེད་པ་ནི་དེ་ནི་དེ་བཞིན་ཏེ་ཞེས་བྱ་བའོ། །ཐ་དད་པའི་རྒྱུ་ཞེས་བྱ་
པ་ནི་ཐ་དད་པའི་ཐ་སྙད་ཀྱི་རྒྱུའོ། །སྔོན་པོ་དང་སེར་པོ་དག་ནི་གྲུབ་པ་དང་བདེ་བ་ཐ་དད་པའི་ཕྱིར་གཅིག་མ་ཡིན་ནོ་ཞེས་བྱ་བ་འདི་ནི་ཁས་བླངས་པ་ཙམ་ཡིན་ནོ། །གང་གིས་འགལ་བ་ཆོས་གནས་པར་འགྱུར། འདི་ལ་འགལ་བ་གང་ཞིག་ཡོད་སྙམ་ན། འདི་ལ་འགལ་བ་ཡང་ཞེས་བྱ་བའོ། །རྣམ་པ་གཞན་བརྗོད་པ་ནི་ཐ་དད་པར་ནི་ཞེས་བྱ་བ་ལ་སོགས་པའོ། །གལ་ཏེ་ཞེས་བྱ་བ་ནི་ཐ་དད་པ་དང་ཉེ་བར་སྦྱར་བའོ། །གཞན་ལ་ཞེས་བྱ་བ་ནི་སངས་རྒྱས་པ་ལའོ། །ཡང་ཇི་ལྟར་ན་འདི་མིང་ཙམ་ཡིན་སྙམ་ན། གལ་ཏེ་དེ་ལ་ཞེས་བྱ་བའོ། །འོ་ན་ཇི་ལྟར་ཞེས་དོགས་པ་བསུ་བ་ནས་བརྗོད་པ་ནི་དེའི་ཚེ་ཞེས་བྱའོ། །སེར་པོ་དང་མི་འབྲལ་བའི་སྔོན་པོ་གང་ཡིན་པ་དེ་ཉིད་ཁྱེར་ལ་ཤོག་ཅེས་བརྗོད་པ་ནི་སྔོན་པོ་ཙམ་ཞིག་ཁྱེར་ནས་འོངས་པར་མཐོང་གི་སེར་པོ་ནི་མ་ཡིན་ནོ་ཞེས་བརྩད་པ་ལ། ལན་ལྡོག་པ་ནི་བྲལ་བ་མེད་པའི་སྔོན་པོ་ཞེས་བྱ་བའོ། །གལ་ཏེ་དེ་ལྟར་ཡང་སྔོན་པོ་དང་སེར་པོ་ཐ་དད་པའི་ཐ་སྙད་མཐོང་བ་ཇི་ལྟར་བསྒྲུབ་སྙམ་ན། ཐ་དད་པའི་ཐ་སྙད་ནི་ཞེས་བྱ་བའོ། །འོན་ཏེ་ཞེས་ཤེས་པ་གཞན་གྱིས་དོན་མཐོང་བ་ཡིན་ནོ་སྙམ་ན། འདི་ལ་བརྗོད་པ་ནི་དེ་ཞེས་སྨོས་ཏེ་དོན་དེའོ། །དེར་སྔོན་པོའི་རྣམ་པ་ཁོ་ན་དོན་ཡིན་པར་འགྱུར་རོ་སྙམ་ན། དེ་ཞེས་གསུངས་སོ། །སྔོན་པོའི་རྣམ་པ་ཡང་ངོ༌། །གཞན་དུ་ནི་ཞེས་བྱ་བ་ནི་ཀ་བ་དང་བཅས་པར་འདོད་པར་རོ། །རྒྱུར་གྱུར་པ་ཕྱིའི་དངོས་པོ་འགའ་ཞིག་མ་ཚང་བས་གཞན་ཀ་བས་སྟོང་པར་ཀ་བའི་རྣམ་པ་ཅན་གྱི་ཤེས་པ་མི་འབྱུང་བའོ། །གལ་ཏེ་དེ་ལྟ་ན་ཡང་ཞེས་བྱ་བ་ནི་ཁྱད་པར་དང་བྲལ་བ་མཐོང་བའི་ཤེས་པ་དང་གཅིག་ཉིད་ཡིན་པས་ཇི་ལྟར་དོན་བསྒྲུབ་པར་འགྱུར་ཞེ་ན། ཕྱི་རོལ་གྱིས་ཞེས་སྨོས་སོ། །དེ་ལྟ་བུར་གྱུར་བ་ཞེས་བྱ་བ་ནི་རྗེས་སུ་དཔག་པར་བྱ་བའི་དོན་ཏོ། །གཞན་ཞེས་བྱ་བ་ནི་དེ་མ་ཐག་པ་ལས་ཐ་དད་པའོ། །འོ་ན་ཇི་ལྟར་སྔར་གཏན་མཐོང་བ་མེད་པའི་དོན་རྟོགས་པར་བྱེད་སྙམ་ན། རྟེན་གཞན་མེད་པར་ཞེས་སྨོས་སོ། །གཞན་དུ་ནི་མ་ཡིན་ནོ་ཞེས་བྱ་བ་ནི་རྣམ་པ་ཐམས་ཅད་སྔོན་མ་མཐོང་བའི་དོན་ཡོངས་སུ་རྟོགས་པའོ། །དེ་ཉིད་ཀྱིས་ནི་ཞེས་བྱ་བ་ནི་གོང་བུའི་རྣམ་པར་སྣང་བའི་ཤེས་པ་ནི་སྐྱེད་པར་བྱེད་པའི་ཤེས་པ་མཐོང་བ་མ་ཡིན་ཏེ། གོང་བུའི་རྣམ་པ་དེ་ནི་ཤེས་པའི་རྣམ་པ་ཡིན་པའི་ཕྱིར་ཇི་ལྟར་ཕྱི་རོལ་མཐོང་བ་ཡིན་ཏེ། སྐྱེས་བུ་
གཞན་གྱིས་གོང་བུའི་རྣམ་པར་སྣང་བའི་ཤིང་གི་རྣམ་པ་སྐྱེད་པར་བྱེད་པའི་ཤིང་མཐོང་ངོ་ཞེ་ན། འདི་ལ་དཔྱད་ཟིན་ཏེ། དེས་ཀྱང་ཅི་ལྟར་མཐོང་སྟེ། དེ་ཡང་རང་གི་རྣམ་པ་ཙམ་རིག་པའི་ཕྱིར་རོ་ཞེས་བྱ་བ་དེར་རོ། །གལ་ཏེ་ཡང་དེ་ཙམ་གྱིས་རྟོགས་པ་ཡིན་མོད་ཀྱི་དེ་ལྟར་ན་ཡང་ཉེས་པ་གཞན་བརྗོད་པའི་དོན་དུ་ཕ་རོལ་ཉེ་བར་འགོད་པ་ནི་དེ་ཉིད་ཀྱིས་ཞེས་བྱ་བ་ནི། གང་ལ་གོང་བུའི་རྣམ་པ་ཅན་གྱི་ཤིང་དུ་སྣང་བ་བསྐྱེད་པ་དེ་ཉིད་ཀྱིས་ཕྱིས་ཤིང་མཐོང་ངོ་ཞེ་ན། འདི་ལ་བརྗོད་པ་ནི་གལ་ཏེ་ཞེས་བྱ་བའོ། །ཕྱིས་མཐོང་བ་ཡང་རིགས་པ་མ་ཡིན་ནོ་ཞེས་བྱ་བ་ནི་ཆུག་ཀྱང་གི་སྒྲའི་དོན་ཏོ། །ཕྱིས་ཉིད་འགྱུར་མོད་སྔར་གོང་བུའི་རྣམ་པ་ཅན་གྱི་ཤིང་མཐོང་བའི་དུས་སུ་ནི་མ་ཡིན་ནོ། །ཅིའི་ཕྱིར་ཞེ་ན་དམིགས་པ་ཞེས་བྱ་བའོ། །གཞན་ཡང་དུས་ཕྱིས་འབྱུང་བའི་ཤིང་དུ་རྟོགས་པ་དེ་ཡང་ཤེས་པའི་རྣམ་པ་ཉིད་ཡིན་གྱི་དོན་གྱི་ནི་མ་ཡིན་ནོ། །དེས་ན་མ་འདྲེས་པའི་ཡན་ལག་ཅན་གྱི་ཤིང་རྟོགས་པ་དེར་ཡང་ངོ༌། །ངེས་པའི་རྒྱུ་ཞེས་བྱ་བ་ནི་སྔོན་པོ་དང་སེར་པོའི་རྣམ་པའི་རྒྱུའོ། །འོ་ན་ཇི་ལྟར་ཕྱི་རོལ་གྱི་གཞལ་བྱ་ཡང་རྗེས་སུ་དཔག་པར་ནུས་ཤེ་ན། གལ་ཏེ་ཞེས་བྱ་བའོ། །རྟོག་པ་ལ་ནི་ཕྱི་རོལ་གྱི་གཞལ་བྱ་ཁས་ལེན་པ་ཡོད་པ་མ་ཡིན་ནོ་ཞེས་བྱ་བར་དགོངས་སོ། །ཕྱི་རོལ་གྱི་དོན་མེད་པར་གྱུར་ན། རྒྱུ་དང་འབྲས་བུ་ཉིད་ནི་ཤེས་པ་ཡིན་པར་འགྱུར་རོ། །ཤེས་པ་དེ་དག་ལ་ཡང་རིགས་ པ་འདི་ནི་སྔར་འགྱུར་དགོས ་ལ། འདི་ནི་ཕྱིས་ཁོ་ནའོ་ཞེས་བྱ་བ་རྣམ་པ་ཉིད་ཡིན་གྱི་དོན་གྱི་ནི་མ་ཡིན་ནོ། །དེས་ན་མ་འདྲེས་པའི་ཡན་ལག་ཅན་གྱི་ཤིང་རྟོགས་པ་དེར་ཡང་ངོ༌། །ངེས་པའི་རྒྱུ་ཞེས་བྱ་བ་ནི་སྔོན་པོ་དང་སེར་པོའི་རྣམ་པའི་རྒྱུའོ། །འོ་ན་ཇི་ལྟར་ཕྱི་རོལ་གྱི་གཞལ་བྱ་ཡང་རྗེས་སུ་དཔག་པར་ནུས་ཤེ་ན། རྟོག་པ་ལ་ནི་ཕྱི་རོལ་གྱི་གཞལ་བྱ་ཁས་ལེན་པ་ཡོད་པ་མ་ཡིན་ནོ་ཞེས་བྱ་བར་དགོངས་སོ། །ཕྱི་རོལ་གྱི་དོན་མེད་པར་འགྱུར་ན། རྒྱུ་དང་འབྲས་བུ་ཉིད་ནི་ཤེས་པ་མ་ཡིན་པར་འགྱུར་རོ། །ཤེས་པ་དེ་དག་ལ་ཡང་རིགས་ པ་འདི་ནི་སྔར་འགྱུར་དགོས ་ལ། འདི་ནི་ཕྱིས་ཁོ་ནའི་ཞེས་བྱ་བ་རྣམ་པ་དེ་ལྟ་བུའི་མཚན་ཉིད་ཅན་གྱི་ངེས་པ་གང་ཡིན་པ་དེ་མེད་པའི་ཕྱིར། འབྲས་བུ་མེད་ཅིང་རྒྱུ་ཡང་མེད་དོ། །ངེས་པ་མེད་པ་ཉིད་སྟོན་པ་ནི། འདི་ལྟར་ཞེས་
བྱ་བའོ། །དེ་ལས་ནི་སོ་སོར་སྣང་བ་ལས་སོ། །སེར་པོར་སྣང་བ་ལས་མ་གཏོགས་པར་ཞེས་བྱ་བ་ནི། སྔོན་པོར་སྣང་བ་ནི་རྣམ་པར་ཤེས་པ་དང་བྲལ་བའི་སྔོན་པོར་སྣང་བ་ཉིད་སེར་པོར་ཤེས་པ་དེའི་རྒྱུ་ཡིན་པར་འགྱུར་རོ། །ཡང་ཇི་ལྟར་དེ་སེར་པོར་སྣང་བ་དང་བྲལ་སྙམ་ན་སེར་པོ་མེད་པས་ཞེས་བྱ་བའོ། །གལ་ཏེ་དེའི་ཚེ་སེར་པོ་ཡོད་པ་ཡིན་ན་ནི་དེ་དང་ལྷན་ཅིག་པའི་སྔོན་པོའི་ཤེས་པ་ཉིད་སེར་པོའི་ཤེས་པའི་རྒྱུར་འགྱུར་བ་ཡིན་ནོ། །འོ་ན་ཚུལ་འདིས་སྔོན་པོར་སྣང་བ་ཉིད་སེར་པོར་ཤེས་པའི་རྒྱུར་གྱུར་ལ་རག་གོ་སྙམ་ན། དེ་ལ་ཡང་ངེས་པ་ཞེས་གསུངས་སོ། །ཅིའི་ཕྱིར་ངེས་པ་མེད་སྙམ་ན། གང་གི་ཕྱིར་སེར་པོར་སྣང་བའི་རྣམ་པར་ཤེས་པ་དེ་ལས་ཀྱང་སྔོན་པོར་སྣང་བར་འགྱུར་བའི་ཕྱིར་རོ། །ཕྱིའི་དོན་གྱི་ཕྱོགས་ལ་ཡང་ཉེས་པ་འདིར་ཇི་ལྟར་མི་འགྱུར་སྙམ་ན། དེར་ཞེས་བྱ་བ་ནི། སེར་པོའི་ཤེས་པའི་དེ་མ་ཐག་པ་སྔོན་པོའི་ཤེས་པའི་དེ་མ་ཐག་པ་ལའོ། །གལ་ཏེ་དེ་ལྟ་ན་ཡང་སེར་པོ་ལ་སོགས་པའི་མཚུངས་པ་དེ་མ་ཐག་པའི་རྐྱེན་གཅིག་ཁོ་ན་ལས་སྔོན་པོ་དང་སེར་པོའི་རྣམ་པར་ཤེས་པ་འབྱུང་བར་ཇི་ལྟར་འགྱུར་སྙམ་ན། མཚུངས་པ་དེ་མ་ཐག་པའི་ཞེས་སྨོས་སོ། །མྱ་ངན་གྱི་ཡུལ་ལ་གནས་པའི་རྡོ་རྗེའི་དུམ་བུ་ལ་སོགས་པ་ཆུང་དུ་ལས་ཀྱང་ངོ༌། །བཟློག་པར་ནི་མ་ཡིན་ནོ་ཞེས་བྱ་བ་ནི་མྱུ་གུ་ལ་སོགས་པ་སྐྱེ་བ་ནིའོ། །དེ་ལས་ཀྱང་ཞེས་བྱ་བ་ནི་མྱུ་གུར་སྣང་བ་ལའོ། །གང་ལ་དུ་བ་ཡོད་པ་དེ་ན་གདོན་མི་ཟ་བར་གཞན་གྱི་མེར་སྣང་བ་ཡོད་པ་ནི་མ་ཡིན་ནོ་ངེས་པ་མེད་པའི་ཕྱིར་རོ་ཞེས་བྱ་བ་ནི། གང་ན་དུ་བར་སྣང་བ་ཡོད་པ་དེར་གདོན་མི་ཟ་བར་འགྱུར་རང་གི་མེར་སྣང་བ་ཡོད་པར་འགྱུར་རོ་ཞེས་བྱ་བ་ངེས་པ་ཡོད་པ་མ་ཡིན་ཏེ། འབྲེལ་པ་ལ་སོགས་མི་སྲིད་པའི་ཕྱིར་རོ། །ཅིའི་ཕྱིར་བློ་ཉིད་ལ་བརྟེན་ནས་དེ་ལྟར་རྣམ་པར་གཞག་པར་བྱའི་གཞན་དུ་ནི་མ་ཡིན་ཞེ་ན། གང་གི་ཞེན་སྣང་བ་ཉིད་ དགོས་ཀྱི་མི་སྣང་བའི་དོན་ནི་མ་ཡིན་ཏེ། དེས་ན་སྣང་བ་ཉིད་ལ་བརྟེན་ནས་རྣམ་པར་འཇོག་པ ་ནི་རིགས་པ་དང་ལྡན་པ་ཡིན་ནོ། །འོན་ཏེ་གལ་ཏེ་དོན་མེད་ན་དེའི་ཚེ་སྣང་བ་ཉིད་ཡོད་པར་མི་འགྱུར་རོ། །དེས་ན་སྣང་བ་ཁས་བླང་པའི་དོན་དུ་ཡང་གདོན་མི་ཟ་བར་དོན་ཁས་བླངས་བར་བྱའོ། །འདི་ལྟར་ཞེས་
གསུངས་སོ། །སྣང་བ་མེད་པར་ཡང་དོན་འགྱུར་བ་ཉིད་དོ། །དེས་ན་སྣང་བ་དང་བྲལ་བའི་དོན་ཉིད་ཁས་བླང་བར་བྱའོ་སྙམ་ན། སྣང་བ་མེད་ན་ཞེས་གསུངས་སོ། །སྣང་བ་དང་བྲལ་བའི་ཕྱི་རོལ་ནི་ཁས་བླང་བར་མི་ནུས་པ་ཁོ་ནའི་ཞེས་བྱ་བའི་དོན་ཏོ། །ས་བོན་དུ་སྣང་བ་དང་བྲལ་བའི་མྱུ་གུ་འབའ་ཞིག་སྣང་བར་འགྱུར་ན་མྱུ་གུར་སྣང་བ་རྒྱུ་མེད་པ་ཉིད་དུ་འགྱུར་རོ། །མྱུ་གུར་སྣང་བའི་རྒྱུ་མེད་པ་ག་བོན་དུ་སྣང་བ་མེད་ཀྱང་དེ་ཡོད་པའི་ཕྱིར་རོ། །ཕ་རོལ་པོ་ཉིད་སངས་རྒྱས་པའི་དོགས་པ་བསུ་བ་ནི་འོན་ཏེ་ཞེས་བྱ་བའོ། །མྱུ་གུར་སྣང་བ་དེ་ན་སྐྱེས་བུ་གཞན་གྱི་ས་བོན་དུ་སྣང་བ་ཡོད་པས་ནའོ། །འདི་ཕྱི་རོལ་པོ་འགོག་པ་ནི་མ་ཡིན་ཏེ་ཞེས་བྱ་བའོ། །དེ་གདོན་མི་ཟ་བར་གཞན་གྱི་སྣང་བ་ཡོད་དོ་ཞེས་བྱ་བའི་ངེས་པ་གང་ཡིན་པ་མེད་པའི་ཕྱིར་རོ་ཞེ་ན། འདི་ལ་གྲུབ་པའི་མཐའ་བས་དེ་ཡང་མཚུངས་སོ་ཞེས་གསུངས་སོ། །ལན་བཏབ་ཟིན་ཏོ་ཞེས་བྱ་བ་ནི་ཕྱིས་ཉིད་ཡོད་མོད། སྔར་གོ་ཡོད་པར་ཇི་ལྟར་འགྲུབ་ཅེས་བྱ་བ་དེར་རོ། །འབྲས་བུ་གྲུབ་པ་མྱུ་གུ་ལས་མི་སྣང་བ་ཡང་ས་བོན་ཡོད་པར་ཤེས་སོ། །འདི་ལ་ཞེས་བྱ་བ་ནི་སྣང་བ་ས་བོན་ལ་སོགས་པ་ཡང་ཁྱད་པར་འཛིན་པའི་དུས་སུ་མཐོང་བ་ཉིད་ཡིན་ནོ་ཞེ་ན་འདི་འགོག་པ་ནི་འོ་ན་ཞེས་བྱ་བའོ། །གལ་ཏེ་ཕྱི་རོལ་ནི་དོན་དམ་པ་ཁོ་ན་ཡོད་པ་ཡིན་གྱི་སྒྲོ་བཏགས་པ་ཙམ་དུ་ནི་མ་ཡིན་ནོ་སྙམ་ན། རྗེས་སུ་དཔག་པའི་དུས་སུ་སྨོས་སོ། །གཞན་ཞེས་བྱ་བ་ནི་དུ་བ་བསྐྱེད་པ་ལས་སོ། །དོན་ཡང་གཞན་ཉིད་དེ་སྐད་ཅིག་ཡིན་པའི་ཕྱིར་རོ། །གང་གིས་དུ་བ་བསྐྱེད་པ་ཉིད་ནི་དེ་ཚེ་ཡོད་པ་མ་ཡིན་ནོ། །དེ་ཡང་ནི་ཕྱི་ལ་ཡང་ངོ༌། །ཇི་ལྟར་ངས་མཐོང་བའི་ཟླ་བ་གཉིས་པོ་གང་ཡིན་པ་དེ་ཉིད་འདིས་ཀྱང་ཡིན་ནོ་ཞེས་དོན་དམ་པར་ཐ་དད་པར་ཡང་ཐ་སྙད་དུ་འགྱུར་བ་དེ་བཞིན་དུ་བདག་གིས་དུ་བ་ལས་དཔག་པའི་མེར་སྣང་བ་གང་ཡིན་པ་དེ་ཉིད་འདིས་ཀྱང་རྟོགས་སོ་ཞེས་གཞན་ལ་ཡང་ཞེས་བྱ་བ་སྣང་བ་གཅིག་ཉིད་ལ་ཡང་ཐ་སྙད་དུ་འགྱུར་རོ། །ཕྱི་ནས་ཉིད་ནི་ཞེས་བྱ་བ་ནི་རྗེས་སུ་དཔག་པའི་ཉིད་དུའོ། །རྟོགས་པར་ཞེས་བྱ་བ་ནི་ཐམས་ཅད་ཀྱི་ཚེ་རྟོགས་པར་འགྱུར་པའོ། །དེ་ལྟ་ན་ཡང་རྗེས་དཔག་དུས་སུ་སྔར་མ་རྟོགས་པ་ན་དོན་ཐམས་ཅད་ཀྱི་རྣམ་པ་ཐམས་ཅད་དུ་རྟོགས་པར་འགྱུར་རོ། །དེས་ན་རྗེས་སུ་དཔག་པ་
ལས་འགའ་ཞིག་འཇུག་པར་ཇི་ལྟར་འགྱུར་ཏེ། མ་རྟོགས་པར་རང་བཞིན་འགའ་ཡང་མེད་པའི་ཕྱིར་རོ། །སྔར་ཉིད་ཅེས་བྱ་བ་ནི་རྗེས་སུ་དཔག་པའི་དུས་ཉིད་དུའོ། །འོན་ཏེ་མེ་ཉིད་གཞན་གྱི་རང་བཞིན་དུ་རྟོགས་པ་དེས་ན་ཡོད་པ་ཡིན་སྙམ་ན། གཞན་གྱི་ངོ་བོས་ཞེས་གསུངས་སོ། །དེས་ཞེས་བྱ་བ་ནི་ཕ་རོལ་གྱི་སེམས་སོ། །འདིར་གཞན་གྱིས་སྨྲས་པ་ནི་དེ་མ་ཡིན་ཏེ་ཞེས་བྱ་བའོ། །གལ་ཏེ་རྗེས་སུ་དཔག་པའི་དུས་ན་དོན་མེད་ཀྱི་འོན་ཀྱང་འཇུག་པའི་དེ་མ་ཐག་ཡོད་ན་དེའི་ཚེ་ཕྱིས་འཇུག་པའི་དུས་སུ་དོན་དམ་པར་འཆད་པ་སྟེ། སྔར་གྱི་དུས་སུ་གནས་པའི་སྐད་ཅིག་གཞན་གྱིས་མ་བསྐྱེད་པར་ཇི་ལྟར་མིན་ཞེ་ན། འདི་ལ་བརྗོད་པ་ནི་དེ་མེད་པར་ཞེས་བྱའོ། །གང་གི་ཚེ་མེད་པར་གྱུར་པ་དེའི་ཚེ་སྔར་མེད་པའི་མེ་དེ་མེད་པ་ཉིད་རྣམ་པར་ཆད་པར་ཇི་ལྟར་འགྱུར། དེས་ན་ཇི་ལྟར་དངོས་པོ་མེད་པ་རྣམ་པར་ཆད་པ་ཉིད་དུ་འགྱུར་བ་དེ་བཞིན་དུ་དངོས་པོ་ཡང་འགྱུར་བས་སྐྱོན་ཅི་ཡོད་ཅེས་བྱ་བའི་དོན་ཏོ། །གང་གི་ཚེ་རྣམ་པར་ཆད་པར་ཇི་ལྟར་ཡོད་ཅེས་འདོན་པ་དེའི་ཚེ་ནི་འདི་རྩོད་པ་སྨྲ་བའི་ཚིག་ཉིད་དེ། སྔར་ཡོད་པའི་མེ་དེ་མེད་པར་རྣམ་པར་ཆད་པའི་མེ་དེ་ཡོད་པར་ཇི་ལྟར་འགྱུར་ཞེས་བྱ་བའི་དོན་ཏོ། །འདི་ལ་གྲུབ་པའི་མཐའ་པས་བརྗོད་པ་ནི་གལ་ཏེ་ཞེས་བྱ་བའོ། །སྔར་གྱི་མེད་སྣང་བ་དེ་ཁོ་ནས་མེར་སྣང་བ་དེ་བསྐྱེད་ལ། བར་དུ་མི་ཆད་པའི་རྒྱུ་བག་ཆགས་ཡོད་པ་ཡིན་ནོ། །འདི་ལ་ཕ་རོལ་གྱིས་དེ་ལྟ་ཡིན་ཡང་ཞེས་སྨྲས་སོ། །ལན་ནི་དོན་ལ་ཡང་ཞེས་བྱའོ། །ཞུགས་པའི་དེ་མ་ཐག་པའི་མཐོང་བའི་མེ་ནི་རྗེས་སུ་དཔག་པའི་དུས་ན་ཡོད་པའི་མ་མཐོང་བ་དང་གཅིག་ཡིན་པར་རྟོགས་པར་ནུས་པ་མ་ཡིན་ནོ། །དེར་གནས་པ་ཞེས་བྱ་བ་རིགས་མི་མཐུན་པའི་སྣང་བ་དེར་གནས་པ་བཞིན་དུའོ། །འདི་གཉིས་ལ་ཞེས་བྱ་བ་ནི་ཕྱི་རོལ་དང་རྣམ་པར་ཤེས་པར་སྨྲ་བ་དག་ལའོ། །མེར་སྣང་བ་ལ་མེའི་བག་ཆགས་རྟོགས་པ་ཡིན་ནོ་ཞེས་བརྗོད་ནས་དུ་བར་སྣང་བ་ལ་ཡང་བརྗོད་པ་ནི་དུ་བར་ཞེས་བྱ་བའོ། །འདི་ནི་ཞེས་བྱ་བ་ཇི་ལྟར་ཕྱི་རོལ་རྒྱུ་ཉིད་དུ་མི་འཐད་དེ་དེ་ནི་བསྟན་ཟིན་ཏོ། །དེ་ཉིད་ཅེས་བྱ་བ་དུ་བར་སྣང་བ་ཉིད་དུ་བ་ཡིན་ནོ། །དེ་ལྟ་ཡིན་དང་དེ་ཉིད་ཅེས་བྱ་བར་སྔར་བཤད་པ་ཉིད་ཅེས་རྒྱུ་དང་འབྲས་བུ་ཡིན་ནོ། །དེའི་བྱ་བ་དུ་བའི་བག་ཆགས་སད་པའི་རྗེས་སུ་
མཐུན་པ་ཉིད་ཅེས་སོ། །དུ་བ་ཡང་ཞེས་བྱ་བ་ནི་དུ་བ་ཡང་མེར་སྣང་བའི་བག་ཆགས་སད་པ་དང་རྗེས་སུ་མཐུན་པའི་ཕྱིར་རོ། །དུ་བ་རྒྱུ་ཉིད་ཡིན་ན་ཡང་དུ་བ་དེ་ལས་འབྲས་བུ་མེ་ངེས་པར་རྟོགས་པ་ག་ལ་ཡོད་ཅེ་ན། བག་ཆགས་དེ་ཡང་ཞེས་བྱ་བ་ནི་མེར་སྣང་བ་སྐྱེད་པར་བྱེད་པའོ། །ཚད་མ་ཡིན་ནོ་ཞེས་བྱ་བ་ནི་དུ་བར་སྣང་བའོ། །དུ་བ་དེས་ཚོགས་པ་གཅིག་ལ་རག་ལས་པ་ཞེས་བྱ་བ་ནི་དུ་བ་དང་ལྷན་ཅིག་མེར་སྣང་བ་ཚོགས་པ་ཡིན་པ་དེས་ན་འཐོབ་པ་ཡིན་ནོ། །ལྐོག་ཏུ་གྱུར་པ་དང་མ་གྱུར་པ་ནི་གཅིག་ཡིན་ཏེ། དེས་ན་གང་གིས་དུ་བ་བསྐྱེད་པ་དེ་ཉིད་ཐོབ་པ་ཡིན་གྱི་ཚོགས་པ་གཅིག་ལ་རག་ལུས་པ་ནི་མ་ཡིན་ནོ་ཞེས་བསམས་པའོ། །བག་ཆགས་ཀྱི་དབང་ཞེས་བྱ་བ་ནི་ལྷག་པར་ཞེན་པའི་དབང་གིས་སོ། །ཕྱི་རོལ་ལ་མི་སླུ་བ་དང་མཐོང་བ་ནི་ཡོད་པ་མ་ཡིན་ནོ། །རྨི་ལམ་ན་ཡང་སྲིད་པ་མ་ཡིན་ནོ་ཞེས་བྱ་བ་འདི་ནི་འཇིག་རྟེན་གྱི་སྨྲ་ལུགས་ཡིན་ནོ། །འདི་ལྟར་ཞེས་བྱ་བ་ལ་སོགས་པས་ནི་ཐམས་ཅད་དུ་འབྱུང་བར་འགྱུར་བ་ཡུལ་ཅན་ཉིད་ཚད་མ་མ་ཡིན་ལ་དེ་ཡང་ཕྱི་རོལ་ལ་སྲིད་པ་མ་ཡིན་ནོ་ཞེས་བསྟན་པ་ཡིན་ནའོ། །དེ་བཞིན་ཞེས་བྱ་བ་ནི་རྣམ་པ་དེས་སོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་འབྱུང་བར་འགྱུར་བའི་དོན་རྟོགས་པ་མེད་ནའོ། །གལ་ཏེ་འབྱུང་བར་འགྱུར་བ་དང་ད་ལྟར་བདག་གཅིག་ཏུ་ལྷག་པར་སྒྲོ་བཏགས་ནས་ཞུགས་པ་ན་འབྱུང་བར་འགྱུར་བའི་ཡུལ་ཅན་དུ་ཇི་ལྟར་འགྱུར་ཏེ། ད་ལྟར་བ་ཡང་སྒྲོ་བཏགས་པའི་ཕྱིར་རོ་ཞེ་ན། རིག་པ་ནི་ཐོབ་པས་ཞེས་བྱ་བའོ། །ཡིད་མོད་དེས་ཅིང་འགྱུར་སྙམ་ན། དེས་ན་ཞེས་སྨོས་སོ། །བཟློག་པ་ཡིན་པའི་ཕྱིར་ཞེས་བྱ་བ་ནི་ཐོབ་པའི་ཕྱིར་རོ། །ཤས་པའི་དུས་ན་ཡོད་པ་མ་ཡིན་པ་དེས་ན་ཇི་ལྟར་ཤེས་པ་སྐྱེད་པར་བྱེད་པ་ཡིན་ཞེས་བྲམ་ཞེས་སྨྲས་པ་གང་ཡིན་པ་དེ་གསལ་བ་ཡིན་ནོ། །ཇི་ལྟར་གསལ་བ་སྙམ་ན་འབྱུང་བར་འགྱུར་བ་ཞེས་བྱ་བའོ། །མངོན་སུམ་ལ་སོགས་པ་ནི་འབྱུང་བར་འགྱུར་བའི་དོན་ལ་ལྟོས་ནས་ཐ་སྙད་ཀྱི་རྒྱུ་མཚན་མ་ཡིན་ཏེ། ཡོད་པ་དམིགས་པར་བྱེད་པ་ཡིན་པའི་ཕྱིར་རོ་ཞེས་བྱ་བ་དེ་ཡང་སྤངས་པ་ཡིན་ནོ། །འབྱུང་བར་འགྱུར་བའི་མེར་སྣང་བ་དང་ལྷན་ཅིག་ཉིད་དུའོ། །དེའི་ངོ་བོར་ཞེས་བྱ་བ་ནི་མེའི་ངོ་བོར་སྤང་བ་ལའོ། །སྣང་བ་མཚམས་སྦྱོང་ལྡན་ཞེས་བྱ་བ་ནི་རྒྱུད་དུ་
འཇུག་ཅེས་བྱ་བའི་དོན་ཏོ། །དེའི་ཚེ་དེ་རྨི་ལམ་གྱི་བདེན་པ་ཉིད་མ་ཡིན་ཡང་ཞེས་བྱ་བ་ནི་རྨི་ལམ་གྱི་བདེན་པ་ཡིན་ཡང་དེ་འདྲ་བའི་བདེ་བ་རྒྱུན་གྱིས་སྐྱེ་བ་ཡིན་ན། ཁྱོད་ལ་ཆད་པ་ཅི་ཡོད་ཐར་པ་འདོད་པ་དེ་དག་གི་ཆོས་ལ་འཇུག་པ་གང་ཡིན་པ་དེ་ན་འཁོར་བ་དེའི་བཟློག་པ་ཐོབ་པའི་དོན་དུ་ཡིན་ནོ། །ཆོས་ལ་འདོད་པ་ཡང་མངོན་པར་འདོད་པ་འགའ་ཞིག་གིས་འཇུག་པ་ནི་མ་ཡིན་ནོ། །འདིར་གལ་ཏེ་ཞེས་བྱ་བས་དོགས་པ་བསུ་བའོ། །བག་ཆགས་ཀྱང་གང་ཡང་རུང་བས་སྣང་བའི་རྒྱུ་ནི་མ་ཡིན་གྱི་འོན་ཀྱང་རིགས་མཐུན་པ་ཡིན་ནོ། །སྟོན་པ་ནི་དེ་ཡང་ཞེས་བྱ་བར་མེར་སྣང་བའོ། །དེའི་བག་ཆགས་ནི་དུ་བའི་བག་ཆགས་སོ། །སྔར་བྱུང་བ་རང་བཞིན་གང་གིས་ངོ་བོར་སྣང་བས་རབ་ཏུ་སྦྱར་བའི་བག་ཆགས་འདུ་བྱེད་ཅེས་བྱ་བར་གྲགས་པ་དེ་ནི་དེའི་ངོ་བོར་སྣང་བའི་རྒྱུ་ཡིན་གྱི། རང་བཞིན་གཞན་དུ་སྣང་བ་ནི་མ་ཡིན་ནོ། །དེ་ནི་ཞེས་བྱ་བ་དུ་བར་སྣང་བའོ། །བག་ཆགས་གཞན་གྱིས་བསྐྱེད་པར་བྱ་བ་དུ་བར་སྣང་བ་ཞེས་བྱ་བ་གང་ཡིན་པ་དེས་ནི་སྐྱེད་བྱེད་མ་ཡིན་པ་གཞན་མེའི་བག་ཆགས་ཞེས་བྱ་བ་གོ་བར་བྱེད་པ་མ་ཡིན་ནོ། །ཡང་ཅི་ལྟར་ན་དུས་མཚུངས་པ་ཉིད་ཡིན་ཞེ་ན། མ་འོངས་པ་ནི་ཞེས་སྨོས་པས་སོ། །སྐད་ཅིག་འདི་ལ་ཞེས་བྱ་བ་དང་ད་ལྟར་སྐད་ཅིག་ཏུ་གོའམ་ཅི་སྟེ་མ་ཡིན་པ་ཉིད་དུའོ་ཞེས་བྱ་བའི་དོན་ཏོ། །དེ་ཉིད་ཀྱི་ཚེ་ཞེས་བྱ་བ་འདི་ལྟའི་དུས་ཉིད་དུའོ། །གལ་ཏེ་ཞེས་བྱ་བ་ནི་གཞན་གྱིའོ། །འདི་ལ་གྲུབ་པའི་མཐའ་པ་འདྲ་བ་ནི་ཇི་ལྟར་ཚད་མ་ཡིན་ཞེས་བྱ་བའོ། །འདིར་གཞན་གྱིས་དོན་སྟོན་པའི་ཕྱིར་ཞེས་སྨོས་སོ། །ལན་ནི་བསྟན་པས་ཀྱང་ཞེས་བྱ་བའོ། །དེས་ཀྱང་ཞེས་བྱ་བ་ནི་ད་ལྟར་བས་སོ། །འབྱུང་བར་འགྱུར་བ་ཞེས་བྱ་བ་ནི་དོགས་པ་བསུ་པའོ། །འདི་ཡང་ཞེས་བྱ་བ་ནི་ད་ལྟར་བའོ། །རྒྱུ་ད་ལྟར་ཡོད་པའི་སྐད་ཅིག་ལ་འབྲས་བུ་མ་འོངས་པའི་སྐད་ཅིག་ཉེ་བར་བཏགས་པའི་ཕྱིར་རོ། །འདི་ལ་བརྗོད་པ་ནི་གལ་ཏེ་ཞེས་བྱ་བའོ། །དེས་ཞེས་བྱ་བ་བག་ཆགས་ཀྱིས་སོ། །དོན་ལ་ཡང་ཞེས་བྱ་བ་ནི་ཕྱི་རོལ་ལ་ཡང་མཚུངས་ཏེ། ད་ལྟའི་སྐད་ཅིག་ནི་དོན་བྱ་བ་མི་བྱེད་པའི་ཕྱིར་རོ། །དེ་ཡང་ཞེས་བྱ་བ་ནི་ད་ལྟར་བའོ། །བག་ཆགས་ལ་ཡང་ཞེས་བྱ་བ་ནི། བག་ཆགས་ཀྱི་འབྲས་བུ་འབྱུང་བར་འགྱུར་བའི་མེར་སྣང་བའི་དོན་བྱེད་པ་ཡིན་པའི་ཕྱིར་བག་
ཆགས་ལ་ཡང་དེ་བྱེད་པར་བརྗོད་པ་ཡིན་ནོ་ཞེས་བྱ་བའི་དོན་ཏོ། །སློབ་དཔོན་གྱིས་ཞེས་བྱ་བ་ནི་ཕྱོགས་ཀྱི་གླང་པོས་སོ། །གང་གི་ཕྱིར་རྣམ་པར་ཤེས་པར་སྨྲ་བ་ཉིད་རིགས་ཀྱི་ཕྱི་རོལ་དུ་སྨྲ་བ་ནི་རིགས་པ་མ་ཡིན་པའི་ཕྱིར་རོ། །ཕྱིའི་དོན་ཁོ་ན་ལ་ཚུལ་གཉིས་ཡིན་ནོ་ཞེས་བྱ་བ་བ་ཇི་ལྟར་ཞེ་ན། ཐ་དད་པ་དག་ལ་ནི་ཞེས་གསུངས་སོ། །དེ་ཉིད་ཅེས་བྱ་བ་ནི་འཛིན་པར་བྱེད་པའོ། །འདིས་ནི་འཛིན་པའི་རྣམ་པར་རྗེས་སུ་འགྲོ་བ་བརྗོད་དོ། །ད་ནི་གཟུང་བ་ལ་བརྗོད་པ་ནི། སྔོན་པོ་དེ་ཉིད་ཅེས་བྱ་བའོ། །སྔར་སེར་པོ་འཛིན་པའི་དུས་སུ་མཐོང་བའི་འཛིན་པའི་རྣམ་པ་གང་ཡིན་པ་དེ་ཉིད་སྔོན་པོ་འཛིན་པའི་དུས་ན་ཡང་ཡིན་ལ། དེ་བཞིན་དུ་སྡུག་བསྔལ་གྱི་རྣམ་པས་གཟུང་བའི་དངོས་པོ་ལ་སོགས་པ་གང་ཡིན་པ་དེ་ཉིད་བདེ་བའི་རྣམ་པས་འཛིན་པ་ཡིན་ནོ་ཞེས་བྱ་བ་ནི་ཤེས་པ་འདི་ཡང་མངོན་སུམ་ཡིན་ནམ་འོན་ཏེ་རྗེས་སུ་དཔག་པ་ཡིན་ཞེས་རྣམ་པར་རྟོགས་པའོ། །རྣམ་པ་གཞན་ཡང་ཞེས་བྱ་བ་ནི་དགག་པའི་རང་བཞིན་ལས་རྣམ་པ་གཞན་དུ་གསལ་བ་དང༌། མི་གསལ་བ་ལ་སོགས་པའི་རང་བཞིན་དུའོ། །འོན་ཏེ་དག་པའི་རང་བཞིན་གཅིག་ཉིད་རྣམ་པ་སྣ་ཚོགས་པར་འགྱུར་བ་ཡིན་ནོ་ཞེ་ན། ཇི་ལྟར་ཞེས་གསུངས་སོ། །འོན་ཏེ་དོན་ཡང་རྣམ་པ་སྣ་ཚོགས་པ་ཁོ་ནའོ་སྙམ་ན། དོན་ནི་མ་ཡིན་ཏེ་ཞེས་གསུངས་སོ། །དཔེར་ན་ཤེས་པ་ཟླ་བའི་རྣམ་པ་ཉིད་དུ་ཁས་བླངས་པ་ལ། རབ་རིབ་ལ་སོགས་པའི་སྟོབས་ཀྱིས་གཉིས་ཀྱི་རྣམ་པར་ཡང་འགྱུར་བ་བཞིན་ནོ། །གང་གི་ཚེ་དོན་གྱི་རྣམ་པ་ཉིད་མ་ཡིན་པ་དེའི་ཚེ་ནི་རྣམ་པ་གཞན་ཉིད་ལྷག་པར་ཡང་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །དོན་དམ་པར་མར་མེའི་རང་བཞིན་དེ་འདྲ་བར་སྐྱེས་པ་ཡིན་ཏེ། དེས་ན་དེ་ལྟར་མཐོང་བ་ཡིན་གྱི་དེའི་ཤེས་པའི་རྣམ་པ་ནི་མ་ཡིན་ནོ་ཞེ་ན་དེའི་ཚེ་ཞེས་གསུངས་སོ། །ཡང་ན་དེ་ཡང་ཞེས་བྱ་བ་རབ་རིབ་ཀྱིས་མིག་གི་ནུས་པར་བྱས་པ་ཡང་ངོ༌། །དེའི་ཞེས་བྱ་བ་ནི་མིག་གི་ནུས་པའོ། །ནུས་བ་ཉམས་པར་བརྟགས་པའི་རྒྱུ་མཚན་གྱི་འབྲས་བུ་དེ་ཡང་བདེན་པ་མཐོང་བའམ་མི་བདེན་པ་མཐོང་བ་ཡིན་ནོ། །གལ་ཏེ་བདེན་པ་མཐོང་ཞིང་ཉམས་པར་བརྟག་པར་བྱ་བ་ནི་མི་བདེན་པ་མཐོང་བ་ལ་ནི་ཤིན་ཏུ་བརྟག་པར་འགྱུར་རོ། །དེས་ནམ་ཉམས་པ་ཞེས་བྱ་བ་མེད་པར་འགྱུར་
ངོ། །འོན་ཏེ་དེ་འདྲ་བའི་མར་མེའི་ཡོད་པ་ཡིན་ཡང་གཞན་གྱིས་བལྟས་མེད་པ་ཡིན་ལ་དེ་མཐོང་བས་དབང་པོ་ཉམས་པ་ཡིན་ནོ་སྙམ། དེ་ལྟ་ཡིན་ན་ཞེས་གསུངས་སོ། །དེ་ལྟར་ཡང་མ་ཡིན་ཏེ་ཞེས་བྱ་བ་ནི་འདི་གཞན་གྱིས་བལྟར་མེད་པའི་མར་མེ་མཐོང་བ་ཡིན་ཡང་བུམ་པ་ལ་སོགས་པ་གསལ་བར་མི་མཐོང་བ་ཡིན་ཏེ། དེས་ན་འདི་ཡང་དག་པའི་མར་མེའི་མཐོང་བ་ཅན་ཡིན་ནོ། །ཁྱད་པར་མེད་པའི་ཕྱིར་རོ་ཞེས་བྱ་བ་ནི་ཡང་དག་པ་ངང་ཡང་དག་པ་མ་ཡིན་པ་ལའོ། །སྤོང་བ་མཐོང་ཡང་གང་གིས་གཅིག་ནི་ཡང་དག་པ་མཐོང་ལ་གཞན་ནི་ཡང་དག་པ་མ་ཡིན་པ་མཐོང་བར་འགྱུར་བ་ཁྱད་པར་གཞན་གང་ཞིག་ཅེས་བྱ་བའི་དོན་ཏོ། །གལ་ཏེ་ཡོད་པ་ཡིན་ན་འོ་ན་མར་མེ་དེ་ཇི་ལྟར་གཞན་གྱིས་མི་མཐོང་སྙམ་དུ་དོགས་པ་བསུ་ནས་མཐོང་བ་མི་འཐད་པ་ཞེས་སྨོས་སོ། །དེ་ལྟ་ན་ཡང་ཞེས་བྱ་བ་ནི་རབ་རིབ་ལ་སོགས་པས་བསྐྱེད་པ་ཡིན་ཡང་ངོ༌། །གཞན་ནི་ཞེས་བྱ་བ་མར་མེའིའོ། །ཤེས་པ་གཞན་དུ་ཡུལ་སྣང་བར་ཁས་ལེན་པས་ནའོ། །མི་རུང་བ་བརྗོད་པ་ནི་གང་དུ་ཞེས་བྱ་བ་དང༌། གང་དུ་ཡུལ་རང་གི་ངོ་བོས་སྣང་བའི་རྣམ་པར་ཤེས་པ་ལ་སྣང་བ་ཡིན་ན་ཐུབ་པ་མེད་དོ། །འོན་ཏེ་ཤེས་པ་གང་ལ་ཡུལ་སྣང་བ་དེ་ལས་གཞན་ལ་སྣང་བ་མ་ཡིན་ནོ་སྙམ་ན། རང་སྣང་བ་ཞེས་གསུངས་སོ། །འོ་ན་ཏེ་མར་མེའི་དཀྱིལ་འཁོར་གྱི་རང་བཞིན་གྱིས་ཡུལ་དུ་ཤེས་པ་སྣང་བ་ཡིན་ལ། ཤེས་པ་ལ་ཡུལ་སྣང་བ་ཡིན་ནོ་ཞེས་ན། གལ་ཏེ་ཞེས་གསུངས་སོ། །དེ་ལྟ་བུ་ལ་སོགས་པའི་གནོད་པ་བྱེད་པ་ཡོད་པ་དེ་བས་ནའོ། །དེའི་རང་བཞིན་གྱི་ཞེས་བྱ་བ་ནི་ཤེས་པ་དང་འདྲ་བ་ཡུལ་ཡིན་ཡི་སྣང་བ་ཙམ་ནི་མ་ཡིན་ནོ། །གལ་ཏེ་རྨ་བྱའི་མདོངས་ཀྱི་རྣམ་པ་ཅན་མར་མེའི་དཀྱིལ་འཁོར་ལ་ཡང་དེ་ཁོ་ན་བཞིན་དུ་ནུས་པ་བརྟག་པར་བྱ་བ་ཡིན་ནོ་སྙམ་ན། རྨ་བྱའི་ཞེས་བྱ་བའོ། །ཀ་བ་ལ་སོགས་པ་ཡང་ཤེས་པ་ལས་ཐ་དད་པར་ཇི་ལྟར་འགྲུབ་སྙམ་ན། ཀ་བ་ཞེས་སྨོས་སོ། །སོགས་པའི་སྒྲས་ནི་མེ་ལ་སོགས་པའི་འདིར་ཡང་ཞེས་བྱ་བ་ནི་རྨ་བྱའི་མདོངས་ཀྱི་རྣམ་པ་ལའོ། །དེ་དག་ལ་ཞེས་བྱ་བ་ནི་རབ་རིབ་ཀྱིས་བསླད་པ་གཞན་རྣམས་ཡང་འཁྲུལ་པ་ཉིད་མཚུངས་པའི་ཕྱིར་རོ། །འོན་ཏེ་དེ་དག་ན་བདེན་པ་ཁོ་ན་མཐོང་བ་ཡིན་པས་ཇི་ལྟར་དེ་དག་འཁྲུལ་པ་ཡིན་སྙམ་ན། འཁྲུད་པ་ཞེས་བྱ་བའོ། །གཉིས་ཀ་ཡང་ཞེས་བྱ་
བ་ནི་རྨ་བྱའི་མདོངས་ཀྱི་རྣམ་པ་ཉམས་སུ་མྱོང་བའི་སྐྱེས་བུ་གཉིས་གང་ལ་ཡང་ངོ༌། །འཁྲུལ་པ་ཉིད་དུ་འདོད་པའི་སྐྱེས་བུས་དམིགས་པའི་མེ་དེ་ནིའོ། །ས་གཞིའི་ཚིག་པ་མ་མཐོང་བ་ཡང་དོན་ཉིད་ལས་མི་ཉམས་སོ་ཞེས་བྱ་བ་ནི། གཞན་གྱི་ཞེས་ཁོངས་སུ་འདི་འགོག་པ་ནི་མ་ཡིན་ཞེས་བྱ་བའོ། །མེ་ཡང་ཡིན་ལ་སྲེག་པར་བྱེད་པ་ནི་མ་ཡིན་ནོ་ཞེས་དེ་ལྟར་རྟོགས་པ་འགའ་ཡང་མེད་པའི་ཕྱིར་རོ། །དེ་ལྟ་མ་ཡིན་པ་ལ་ཞེས་བྱ་བ་ནི་ཕྱི་རོལ་མ་ཡིན་པ་ལའོ། །དེ་ལྟར་ཞེས་བྱ་བ་ནི་ཕྱི་རོལ་དུའོ། །ཕ་རོལ་གྱི་འཇིག་རྟེན་གྱི་ཐ་སྙད་ཅེས་སྨྲས་སོ། །གལ་ཏེ་འཇིག་རྟེན་གྱི་ཐ་སྙད་ལ་མི་ལྟོས་ན་དེའི་ཚེ་དོན་བྱ་བ་མེད་པས་ཇི་ལྟར་མི་བདེ་བར་འགྱུར་ཞེས་མནོས་པའོ། །དོན་ཉིད་ཀྱང་ཞེས་བ་ནི་མྱོང་བ་ནི་གདོན་མི་ཟ་བར་ཁས་བླང་བར་བྱ་བ་ཡིན་ཏེ། དེ་ལྟར་མ་ཡིན་ན་དོན་ཡང་ཁས་བླང་བར་མི་འཐད་པའི་ཕྱིར་རོ། །མྱོང་བའི་དངོས་པོ་ཁས་ལེན་ན་ཡང་ཐམས་ཅད་རང་རིག་པ་ཉིད་ཡིན་ཏེ་གཞན་མི་འཐད་པའི་ཕྱིར་རོ། །དེ་ལ་ཞེས་བྱ་བ་ནི་མུན་ཁུང་ནའོ། །འདི་ལ་བརྗོད་པ་ནི་ཚོགས་པ་གཅིག་པ་ཞེས་བྱ་བའོ། །དེ་ལྟ་ན་མ་ཡིན་ནོ་ཞེས་བྱ་བ་ནི། མུན་པའི་གནས་སྐབས་ན་བུམ་པ་གནས་པ་མ་ཡིན་ནོ། །དེ་ལྟ་བུ་ཉིད་ཅེས་བྱ་བ་ནི་མར་མེའི་དཀྱིལ་འཁོར་ཚོགས་པ་ཁོ་ན་རྒྱུ་ཡིན་ནོ་སྙམ་ན། འདི་ལ་བརྗོད་པ་ནི་མ་ཡིན་ཏེ་ཞེས་བྱ་བའོ། །སྔོན་པོ་ལ་སོགས་པ་ནི་སེར་པོ་ལ་སོགས་པ་ལྟོས་པ་ཉིད་འཛིན་པ་མ་ཡིན་ཏེ། འབའ་ཞིག་ཀྱང་འཛིན་པའི་ཕྱིར་རོ། །དེ་བཞིན་དུ་དཀྱིལ་འཁོར་ཡང་མར་མེ་མེད་པར་འཛིན་པར་འགྱུར་རོ། །གཞན་གྱིས་དེ་ལྟར་ན་ཞེས་སྨྲས་སོ། །རེ་ཞིག་གང་གི་ཚེ་སྔོན་པོ་དང་སེར་པོ་དག་དུས་གཅིག་ཉིད་དུ་གཟུང་བ་དེའི་ཚེ་གཉིས་ཀའི་བྱེད་པ་བརྟག་པར་བྱ་བ་དེ་བཞིན་དུ་འདིར་ཡང་མར་མེའི་དཀྱིལ་འཁོར་གཉིས་ཀའི་བྱེད་པ་བརྟག་པར་བྱ་བ་ཡིན་ནོ་ཞེ་ན། འདི་ལ་བརྗོད་པ་ནི་མར་མེ་ཙམ་གྱིས་བྱ་བའོ། །དེ་ཉིད་ཅེས་བྱ་བ་ནི་དཀྱིལ་འཁོར་ཉིད་དོ། །དེ་ལྟ་ན་ཡང་ཤེས་པའི་ཚོགས་པ་བསྐྱེད་པས་ནི་དེ་ནི་ཤེས་པ་ཁོ་ནའོ། །མིག་དང་གཟུགས་ཉིད་དུ་མངོན་པར་འདོད་པ་དེ་ལས་མ་གཏོགས་པའི་ཤེས་པ་ནི་མེད་དོ། །དེ་ཉིད་གཞུང་འཛུགས་པ་ནི་འོན་ཀྱང་ཞེས་བྱ་བའོ། །བཟློག་པ་བརྗོད་པ་ནི་འདི་ནི་ཞེས་བྱ་བ་སྟེ། གསལ་བ་དང་
མི་གསལ་བའི་རང་བཞིན་དང་འབྲེལ་པ་ནི་མཐོང་བ་ཡང་ཡིན་ནོ། །འོན་ཏེ་ཕྱི་རོལ་སྣང་ཡང་ཐ་དད་པར་འགྱུར་བས་འདི་ལ་ཅི་བྱར་ཡོད་སྙམ་ན། ངེས་པ་དང་ལྡན་པའི་ཞེས་བྱ་བའོ། །དེའི་རང་བཞིན་ཞེས་བྱ་བ་ཕྱི་རོལ་གྱི་རང་བཞིན་ཐ་དད་པར་ཐལ་བའི་ཕྱིར་རོ། །མཚན་ཉིད་ནི་དེ་ཡིན་པའི་ཕྱིར་རོ། །ཞེས་བྱ་བ་ནི་སྣང་བའི་རང་བཞིན་ཡིན་པའི་ཕྱིར་རོ། །དོན་ཐ་དད་པ་ཉིད་དུ་འགྱུར་མོད་ཅི་ཉེས་སྙམ་ན། དོན་ཐ་དད་པ་ཡིན་ན་ཡང་ཞེས་གསུངས་སོ། །གསལ་དེ་རང་ཉིད་ཀྱི་རང་བཞིན་དུ་ཞེས་བྱ་བ་མི་གསལ་བ་ཡིན་ཞེ་ན། བརྗོད་པ་ཇི་ལྟར་ཞེས་བྱ་བ་སྨོས་ཏེ། དེ་ལྟར་གསལ་བའི་རང་བཞིན་དུ་ཇི་ལྟར་འགྱུར། གསལ་བ་དང་མི་གསལ་བ་དག་ནི་ཐ་དད་པའི་ཕྱིར་རོ། །དེའི་ངོ་བོར་ཞེས་བྱ་བ་ནི་མི་གསལ་བ་ཡང་གསལ་བ་དེའི་ངོ་བོར་རྟོགས་པའི་ཕྱིར་དེ་ཞེས་བྱ་བ་དེའི་རང་བཞིན་དུ་རྟོགས་པ་དེ་གསལ་བ་དང་མི་གསལ་བ་དེ་རང་བཞིན་ཐ་དད་པ་ལས་ཇི་ལྟར་བདེན་པར་འགྱུར་ཏེ། འོན་ཀྱང་འཁྲུལ་པ་ཁོ་ནར་འགྱུར་རོ། །འདི་ཉིད་བརྗོད་པ་ནི་གསལ་བ་དང་མི་གསལ་བ་དག་མེད་པར་རྟོགས་པར་འགྱུར་བ་ཡིན་ནོ། །རྟོགས་པ་ཉིད་ཐ་དད་པར་འགྱུར་ཏེ་དོན་ནི་མ་ཡིན་ནོ། །འོན་ཏེ་རྟོགས་པ་དང་མ་རྟོགས་པ་དག་ལ་ཐ་དད་པ་མེད་དོ་ཞེ་ན། བཤད་པ་གཟུང་བའི་རང་བཞིན་ཐ་མི་དད་པ་ཡིན་ནའོ། །མཐོང་བའི་བྱེ་བྲག་ནི་ཤེས་པའི་བྱེ་བྲག་གོ །ཅི་དོན་གྱི་རང་བཞིན་སྣང་བ་ཡིན་ནམ་འོན་ཏེ་མ་ཡིན་ཞེས་བྱ་བའི་རྣམ་པར་རྟོག་པ་གང་ཡིན་པ་དེ་གཉིས་ལས་མ་འདས་པའི་ཕྱིར་རོ། །དེ་ཞེས་བྱ་བ་སྣང་བ་བཞིན་ནོ། །ཐ་དད་པ་ཞེས་བྱ་བ་ནི་གསལ་བ་དང་མི་གསལ་བའི་རང་བཞིན་ནོ། །དེ་དང་བྲལ་བར་ཞེས་བྱ་བ་ནི་ཡན་ལག་ཕྲ་མོ་དང་བྲལ་བར་ཟིན་པའོ། །གཞན་དུ་ནི་ཞེས་བྱ་བ་དང་བཅས་པར་འཛིན་པ་ན་ནི། གཞན་དུ་ཞེས་བྱ་བ་ཡོངས་སུ་གསལ་བའི་རྣམ་པར་གྱུར་བའོ། །གང་གི་ཚེ་སྔོན་པོ་མེད་པར་གཟུང་བ་དེའི་ཚེ་ཅི་སྔོན་པོ་དེ་མི་གསལ་བ་ཞེས་བྱ་བར་བརྗོད་དམ། དེས་ན་ཡན་ལག་ཕྲ་མོ་གཞན་མ་བཟུང་ཡང་ཡན་ལག་ཅན་དེའི་རང་བཞིན་ནི་འཛིན་པ་ཉིད་དོ། །དེས་ན་གསལ་བ་ཁོ་ནར་འཛིན་པར་འགྱུར་རོ། །དུ་མ་ཉིད་ཡིན་ན་ཞེས་བྱ་བ་ནི་རྡུལ་ཕྲ་རབ་ཀྱི་རང་བཞིན་ཡིན་ནའོ། །ཡན་ལག་ཕྲ་མོ་གཟུང་བ་དེ་དག་ལས་གཞན་པའི་ཡན་ལག་མི་འཛིན་པའི་ཕྱིར་མི་གསལ་བར་འགྱུར་རོ་ཞེས་བྱའོ། །གལ་ཏེ་རང་བཞིན་
ཡིན་ན་དེའི་ཚེ་དེ་ལས་གཞན་པ་མ་ཞུགས་མོད་དེ་ལྟ་ན་ཡང་དེའི་རང་བཞིན་ནི་དེ་ཉིད་དེ། དེ་གསལ་བ་ཡིན་པས་ཇི་ལྟར་མི་གསལ་བ་ཡིན། །སེར་པོ་ལ་སོགས་པ་གཟུང་བ་ན། སྔོན་པོ་བཞིན་དུ་འགྱུར་བ་ནི་མ་ཡིན་ནོ། །འོན་ཏེ་ཕྱི་དོན་དེ་ལས་ཡོངས་སུ་མི་གསལ་བ་ཉིད་དེ་སྐྱེ་བ་ཡིན་ན་འདི་ལ་བརྗོད་པ་ནི་འོ་ན་ནི་ཞེས་པའོ། །ཡོངས་སུ་མི་གསལ་བར་སྣང་བ་དེ་གཞན་གྱིས་མ་མཐོང་ན་ནི་མི་གསལ་བར་རྟོགས་པ་ཉིད་ཡིན་ཏེ་དོན་ནི་མ་ཡིན་ཏེ། དུང་ཡུལ་གནས་པས་མི་ཤེས་ཏེ། རང་བཞིན་ཤེས་པ་ཉིད་ཅེས་བྱ་བའི་ཚུལ་གྱིས་སོ། །འཇིག་རྟེན་གྱི་ཐ་སྙད་ཀྱང་དེ་ཁོ་ན་ལྟར་ཡིན་ནོ་ཞེས་བརྗོད་པ་ནི་འདི་ལྟར་ཞེས་བྱའོ། །ཉེ་བར་བཏགས་པ་ཉིད་བརྗོད་པ་ནི་མི་གསལ་བའི་ཞེས་བྱ་བའོ། །མི་གསལ་བ་དང་ལྡན་པ་མཐོང་བ་གང་ཡིན་པ་དེ་དང་འབྲེལ་པ་ལས་ཏེ། རྒྱུ་དང་འབྲས་བུའི་མཚན་ཉིད་ཀྱི་འབྲེལ་པ་ལས་སོ། །མཐོང་བ་ལ་ཞེས་བྱ་བ་ཤེས་པ་ལ་ནི་གང་གིས་དེ་ཡང་མི་གསལ་བ་ཞེས་བརྗོད་པར་བྱ་བ་མི་གསལ་བའི་མཚན་ཉིད་ཀྱི་འབྲས་བུ་གཞན་ཡོད་པ་མ་ཡིན་ནོ། །འོན་ཏེ་མི་གསལ་བའི་དོན་དང་འབྲེལ་པ་ལས་སོ་ཞེས་བརྗོད་ན། འདི་ལ་བརྗོད་པའི་དོན་ནི་ཞེས་བྱ་བ་སྟེ། དོན་ནི་མཐོང་བ་དེའི་འབྲས་བུ་མ་ཡིན་ནོ། །འོན་ཏེ་ཡང་གལ་ཏེ་མི་གསལ་བའི་དོན་འབྲས་བུ་མ་ཡིན་མོད་དེ་ལྟ་ན་ཡང་རེ་ཞིག་འབྲེལ་པ་ཙམ་ཞིག་ནི་ཡོད་པ་ཡིན་པས་དེ་ཉིད་ལས་མཐོང་བ་འདི་ལ་མི་གསལ་བར་བརྗོད་དོ་སྙམ་ན། གལ་ཏེ་མཐོང་བ་ལ་མི་གསལ་བའོ་ཞེས་དེ་བཞིན་དུ་བརྗོད་པ་ནི་འབྲེལ་པ་ལས་ཡིན་ན། དེའི་ཚེ་མཐོང་བ་དེ་ལ་སྔོན་པོ་ལ་སོགས་པ་ཡང་བརྗོད་པར་བྱའོ། །དེ་སྟེ་བརྗོད་དོ་ཞེ་ན་ངའི་ཞེས་གསུངས་སོ། །དེའི་ཕྱིར་མཐོང་བ་མི་གསལ་བ་ཁོ་ན་ཡིན་གྱི་ཉེ་བར་བརྟགས་པས་ཐ་སྙད་འདིར་འགྱུར་བ་ནི་ཡིན་ནོ། །འོན་ཏེ་བློ་མི་གསལ་བ་ཞེས་བྱ་བའི་ཐ་སྙད་ནི་འཁྲུལ་པ་ཁོ་ན་ཡིན་ནོ་སྙམ་ན། རྒྱུ་མེད་པར་ནི་ཞེས་གསུངས་སོ། །གཞན་དུ་ཞེས་བྱ་བ་ནི་འཁྲུལ་པ་ཉིད་དུའོ། །སྐབས་ཉིད་ཉེ་བར་སྡུད་པ་ནི་དེས་ན་ཞེས་བྱ་བའོ། །བློའི་རང་བཞིན་འདི་ཉིད་ཐ་དད་པས་ནི་མ་ཡིན་ནོ་ཞེས་བྱ་བ་ནི་བློའི་རང་བཞིན་ཉིད་རང་གི་ངོ་བོའི་རྣམ་པ་ཐ་དད་པ་ནི་མ་ཡིན་ནོ། །རྣམ་པ་འདི་ཞེས་བྱ་བ་ནི་མི་གསལ་བའོ། །གོ་དྷ་དང་རི་བོང་གི་ཚུལ་ཞེས་བྱ་
བ་ནི་ཇི་ལྟར་རི་བོང་ལུས་ཆེ་བ་དེ་བཞིན་དུ་གོ་དྷའི་མཇུག་མ་ཡང་ངོ༌། །ཤིན་ཏུ་གསལ་བར་འགྱུར་རོ་ཞེས་བྱ་བ་ནི་རང་གི་སྣ་ལ་སོགས་པར་རོ། །དོན་གཞན་ཡིན་ལ་སྒྲིབ་པ་ཡང་གཞན་ཡིན་ཏེ། དེས་སྐྱེས་ཟིན་པའི་དོན་དེ་དག་གི་སྣང་བ་གཅད་པ་དེས་ན་མཐོང་ངོ་ཞེས་སེམས་རྩོད་པ་འདི་ལ་འཆད་པར་འགྱུར་བའི་བར་ཏི་ཀས་བཏབ་པའི་ལན་གང་ཡིན་པ་དེ་བརྗོད་པ་ནི་དེ་ལྟ་ཡིན་ན་ཞེས་བྱ་བ་ལ་སོགས་པའོ། །དེའི་ཞེས་བྱ་བའི་དོན་གཞན་དེའི་སྣང་བ་གང་ཡིན་པ་དེ་བསྒྲིབས་པའི་ཕྱིར་རོ། །མ་ཡིན་ཏེ་ཞེས་བྱ་བ་ལ་གལ་ཏེ་སྒྲིབ་པ་དེ་ཉེ་བར་གནས་པའི་དོན་གྱིས་རྒྱབ་ཏུ་གནས་པ་ཡིན་ནོ། །དེའི་ཆོ་ག་བ་ལ་སོགས་པ་ཡུལ་ཐ་དད་པར་མཐོང་བར་འགྱུར་རོ། །དེ་ནི་ཞེས་བྱ་བ་ཡུལ་གཅིག་ཏུ་རྟོགས་པ་ནི་འཁྲུལ་བ་ཡིན་ནོ་ཞེ་ན། འདི་ལ་བརྗོད་པ་ནི་དོན་ཞེས་བྱ་སྟེ། དོན་གྱི་དེ་ཁོ་ན་ཉིད་མཐོང་བའི་ལྟ་བ་གང་ལ་ཡོད་པ་རིག་པ་ཅན་ལ་སོགས་པ་རྣམས་ཀྱི་ལྟར་ན་འཁྲུལ་པ་ག་ལ་སྲིད་གཞན་གྱི་ཡུལ་ལ་ཞེས་སྨྲས་ཏེ། དངོས་པོའི་རང་བཞིན་གྱིས་སྣང་བའི་མཚན་ཉིད་ཀྱིས་འཁྲུལ་པ་ནི་སྲིད་པ་མ་ཡིན་ནོ་ཞེས་ཕ་རོལ་པོས་བསམས་པའོ། །ཡུལ་གཅིག་ན་མེད་པའི་དངོས་པོ་ཡང་གལ་ཏེ་དེར་མཐོང་ན་དེའི་ཚེ་དུས་གཅིག་ན་མེད་པའི་དངོས་པོ་ཇི་ལྟར་ཇི་ལྟར་མཐོང་བ་དང་འབྲེལ་པ་མ་ཡིན་ཏེ། མཐོང་བ་ཉིད་དུ་འགྱུར་ཞེས་བྱ་བའི་དོན་ཏོ། །འོན་ཏེ་དུས་དེས་མེད་པ་ཡང་མཐོང་ན་འདི་ལ་བརྗོད་པ་ནི་ཐམས་ཅད་དོན་ཐམས་ཅད་མཐོང་བ་ཞེས་བྱ་བར་འགྱུར་ཏེ། འདས་པ་དང་མ་འོངས་པ་མེད་པ་དག་ཀྱང་མཐོང་བའི་ཕྱིར་རོ། །ཐམས་ཅད་ཐམས་ཅད་མཐོང་བ་ཉིད་ཡིན་པ་དེ་ལྟར་ཡང་མེད་དོ། །འདི་དག་ཅེས་བྱ་བ་ནི་མེད་པ་ཡང་འགའ་ཞིག་མཐོང་གི་ཐམས་ཅད་ནི་མ་ཡིན་ནོ་ཞེས་བྱ་བའོ། །མ་མཐོང་བ་དེ་ཉིད་ལས་ཐམས་ཅད་མཐོང་བ་སྐྱེ་བར་འགྱུར་རོ་ཞེས་གཞན་གྱིས་ཀྱང་གཞུང་གཟུགས་པར་འགྱུར་རོ། །དེས་ན་འགའ་ཡང་སུན་དབྱུང་བའམ་བསྒྲུབ་པར་མི་ནུས་པར་འགྱུར་རོ་ཞེས་བསམས་པའོ་ཞེས་བཤད་པ་ནི་ཞེས་བྱ་བ་ནི་སུན་འབྱིན་པ་འདི་ཉིད་བརྗོད་པ་ནི་ཞེས་བྱ་བའོ། །གཞན་གྱིས་ཏེ་གསལ་བར་མཐོང་བ་གང་ཡིན་པ་དེ་བསྒྲིབས་པའི་ཕྱིར་རོ། །ཐག་རིང་པོ་ནས་དངོས་པོ་གསལ་བ་མ་མཐོང་བ་གང་ཡིན་པ་དང༌། མི་གསལ་བ་གཞན་མཐོང་བ་གང་ཡིན་པ་དེ་ལ་མ་མཐོང་བས་བྱས་པ་
ཉིད་ཇི་ལྟར་འདིར་ཡང་ཞེས་བྱ་བ་དོན་དང་དོན་མ་ཡིན་པ་དང་བྲལ་བ་ཡང་ངོ༌། །ལན་བཏབ་ཟིན་པ་ཉིད་དྲན་པར་བྱེད་པ་ནི་ལོག་པར་བརྗོད་པ་ཡང་ཞེས་བྱ་བའོ། །མེད་པ་ཉིད་ཇི་ལྟར་སྙམ་ན་རྒྱུ་ཞེས་སྨོས་སོ། །འོན་ཏེ་སྐྱེས་པ་བྱེད་པ་ལམ་ཡིན་དུས་མཚུངས་པ་ཉིད་འཛིན་པ་ཡིན་ནོ་སྙམ་ན་འགྲེལ་པ་མེད་པ་ཞེས་གསུངས་སོ། །ཡང་ན་གཟུང་པ་ཉིད་རང་གི་རྒྱུས་སོ་སོར་ངེས་པ་དེ་འདྲ་བར་བསྐྱེད་པ་ཡིན་ཏེ། གང་གི་དེ་ཉིད་ཀྱིས་འཛིན་གྱི་གཞན་གྱིས་མ་ཡིན་པར་འགྱུར་རོ། །ཡང་ན་གཉིས་ཀ་ཡང་ངེས་པར་བསྐྱེད་པ་ཡིན་ཏེ། དེས་ན་ཐམས་ཅད་འཛིན་པར་ཐལ་བ་ཡིན་ནོ། །དེ་དག་ལས་ཞེས་བྱ་བ་ནི་ཡུལ་དང་ཤེས་པ་དག་ལའོ། །དེ་ཙམ་གྱིས་ཞེས་བྱ་བ་ནི་ལྷན་ཅིག་བྱེད་པའི་དངོས་པོ་ཙམ་གྱིས་སོ། །གཟུང་བ་དང་འཛིན་པའི་རྒྱུ་ལས་བྱུང་བ་ཡིན་ན་ཅི་ཞེས་བྱ་བའོ། །ཤེས་པ་གཉིས་ནི་དུས་མཉམ་པར་ཡོད་པ་ཡིན་ནོ་ཞེ་ན་གཉིས་ཞེས་གསུངས་སོ། །དུས་མཉམ་པ་ན་ཡོད་པའི་འཛིན་པའི་བྱེད་པ་གཅིག་པོ་དེ་ནི་དེ་ལས་གཞན་པའི་འཛིན་པར་བྱེད་པ་དང་དུས་མཚུངས་པ་ཡིན་ལ། དེ་བཞིན་དེ་ཡང་གཞན་དང་མིན་པས་ཐུགས་པ་མེད་དོ། །དེའི་ཚེ་ཞེས་བྱ་བ་ནི་ཤེས་པ་འཛིན་པའི་དུས་ནའོ། །གནོད་པར་བྱེད་པ་གཞན་ཡང་བརྗོད་པ་ནི་དང་པོ་ཞེས་བྱ་བའོ། །དེའི་རང་བཞིན་ནི་སྔར་གཟུང་བར་བྱ་བ་མ་ཡིན་པའི་རང་བཞིན་ནོ། །དངོས་པོ་དེ་ནི་སྔར་ཡང་གཟུང་བའི་རང་བཞིན་ཉིད་དོ། །དེས་ན་གཟུང་བ་ནི་སྔར་གྱི་རང་བཞིན་ཉིད་རྟོགས་སོ་སྙམ་ན་འདི་ལ་བརྗོད་པ་ནི་སྔར་ཡང་ཞེས་བྱ་བ་སྟེ། གཟུང་བའི་རང་བཞིན་ནི་སྔར་ཡང་མེད་བའི་ཕྱིར་རོ་ཞེས་བྱ་བའི་དོན་ཏོ། །སྔར་ཡང་གཟུང་བ་ཡིན་མོད་ཅི་སྐྱོན་སྙམ་ན། འདི་འགོག་པ་ནི་མ་ཡིན་ཏེ་ཞེས་བྱ་བའོ། །དེ་ཞེས་བྱ་བ་གཟུང་བའི་རྣམ་པ་དུས་མཉམ་པར་སྣང་བའོ། །དེའི་གཟུང་བའི་རྣམ་པ་དེ་ཞེས་བྱ་བ་ལ་སོགས་པར་སྦྱར་རོ། །ཤེས་པའི་ཚོགས་ལས་སྐྱེས་པའི་ཕྱིར་རོ་ཞེས་དོགས་སོ། །དེ་ལྟ་བུ་ཡང་ཞེས་བྱ་བ་ཤེས་པ་ཚོགས་པ་སྐྱེད་པ་ཡང་དོན་ཡིན་ན་དེའི་ཚེ་འཛིན་པར་བྱེད་པ་ཡང་དོན་ཡིན་པར་འགྱུར་རོ། །གཞན་དུ་གྱུར་བ་ཞེས་བྱ་བ་ནི་སྔར་ཡོད་པ་མ་ཡིན་པའི་ཕྱིར་རོ་ཞེ་ན། འདི་ལ་བརྗོད་པ་ནི་སྔར་ཡོད་པ་ནི་ཞེས་བྱ་བ་སྟེ། སྔར་ཡོད་པ་ནི་གཟུང་བར་ནུས་པ་མ་
ཡིན་ནོ། །རྟོག་གོ་ཞེ་ན་རྟོག་པ་ཡིན་ནོ་ཞེས་གསུངས་སོ། །གཞན་གྱི་ལྟ་བ་ལ་ཞེས་བྱ་བ་ནི་མོད་སྡེ་བའི་ལྟ་བ་ལའོ། །དེའི་རྣམ་པར་ནི་དོན་གྱི་རྣམ་པར་རོ། །གལ་ཏེ་དེ་མེད་ན་ཇི་ལྟར་སྔར་སྙམ་ན་རང་མ་ཞེས་བྱ་བའོ། །གལ་ཏེ་རྗེས་སུ་དཔག་པ་ལས་དོན་རྟོགས་པ་ཡིན་ན་ད་ལྟར་མེད་སྙམ་ན་དོན་དམ་པར་ནི་ཞེས་སྨོས་སོ། །དུས་མཚུངས་པར་འབྱུང་བ་ཉིད་ཀྱི་འཛིན་པར་འགྱུར་རོ་སྙམ་ན། ལྷན་ཅིག་སྐྱེས་པའི་ཞེས་གསུངས་སོ། །དེས་ཕན་བཏགས་པ་མེད་པའི་ཕྱིར་ཞེས་བྱ་བ་ནི། ལྷན་ཅིག་སྐྱེས་པའི་དོན་དེས་ཤེས་པ་ལ་ཕན་བཏགས་པ་མེད་པའི་ཕྱིར་རོ། །དེས་ཞེས་བྱ་བ་ནི། དེའི་རྣམ་པ་ཅན་དུ་སྟེ། སྐྱེས་པའི་ཤེས་པས་སོ། །དེ་ཞེས་བྱ་བར་དུས་མཚུངས་པར་བྱུང་བ་དེ་ལྟར་དེ་དང་པོར་རིག་ན་ཡང་དེའི་དབང་ཙམ་གྱིས་ཞེས་བྱ་བ་བྱེ་བྲག་པ་དེའི་དབང་ཙམ་གྱིས་ཡིན་ནོ། །ཤུགས་ཀྱིས་ཞེས་བྱ་བ་ནི་རྣམ་པ་གཞན་དུ་ན་རིག་པ་མི་ཐད་པས་སོ། །དེའི་རྣམ་པ་ཞེས་བྱ་བ་དོན་གྱི་རང་བཞིན་མཐའ་དག་རང་གིས་བདག་གིར་བྱེད་འཛིན་པར་བྱེད་མངོན་དུ་བྱེད་པའོ། །དེའི་རྣམ་པར་མཐའ་དག་རང་གིས་བདག་གིར་བྱེད་པ་ཡང་དེ་ཡིན་ལ། མྱོང་བ་ཡིན་པ་སྟེ་རྣམ་པ་དེ་ལྟ་བུའི་ཤེས་པས་སོ། །འོ་ན་དོན་འདི་དུས་ཁྱབ་པ་འཛིན་པ་མ་ཡིན་ཏེ། དེའི་ཚེ་དུས་གཅིག་དང་འབྲེལ་པར་འཛིན་པའི་ཕྱིར་དུས་གཅིག་གི་ཚེ་འཛིན་པས་ཇི་ལྟར་རྟག་པ་ཡིན། ཤེས་པ་དེ་ལྟ་མ་ཡིན་པའི་ཕྱིར་རོ་ཞེས་བྱ་བ་ནི་ཤེས་པ་ནི་སྐད་ཅིག་མ་ཉིད་ཀྱིས་སྔ་མ་དང་ཕྱི་མའི་རང་བཞིན་ཉིད་མ་ཡིན་པའི་ཕྱིར་རོ། །གཞན་དུ་འགྱུར་བ་ཡིན་ནོ་ཞེས་བྱ་བ་ནི་སྒྱུ་གནན་ལ་རག་ལས་པའོ། །རྒྱུ་ཉེ་བར་བསྒྲུབས་པས་ཉེ་བར་གནས་པར་བྱས་པའི་མིག་ལ་སོགས་པ་གང་ཡིན་པ་དེ་ལ་དེ་སྐད་ཅེས་བྱ་བའོ། །དེ་རྣམ་པར་མ་ཆད་པས་ཞེས་བྱ་བ་ནི་མིག་ལ་སོགས་པ་རྣམ་པར་མ་ཆད་པས་སོ། །རྣམ་པར་ཆད་ཕ་མེད་པར་ཚད་མ་སྐྱེ་པ་ནི་མ་ཡིན་གྱི་འོན་ཀྱང་རྣམ་པར་ཆད་པ་ཉིད་ལ་ཚད་མ་ཡོད་པ་ཡིན་ནོ་ཞེས་བྱ་བའི་དོན་ཏོ། །སློབ་དཔོན་གྱིས་ཀྱང་ནི་ཕྱོགས་ཀྱི་གླང་པོའི་ཞལ་སྔ་ནས་ཀྱང་ངོ༌། །དེ་བཤད་པ་ཞེས་བྱ་བ་འདི་ནི་ཚང་མ་ཀུན་ལས་བཏུས་པའི་འགྲེལ་བའི་གཞུང་ཡིན་ནོ། །གལ་ཏེ་འདིར་ཡང་ཡུལ་གྱི་རྣམ་བརྗོད་པར་བྱེད་པར་མེད་དོ་སྙམ་ན་དེར་ཡང་ཞེས་གསུངས་སོ། །འདིར་ཡུལ་
གྱི་རྣམ་པར་བསྒྲུབ་པའི་སྐབས་ཡིན་ནོ། །ཇི་ལྟར་ཤེས་ཤེ་ན་རྣམ་པར་ཤེས་པ་ཞེས་གསུངས་སོ། །གལ་ཏེ་རིག་པར་བྱ་བ་དང་རིག་པར་བྱེད་པའི་རྣམ་པ་ཉིད་ཀྱིས་ཚུལ་གཉིས་སུ་འགྱུར་མོད། ཡུལ་གྱི་རྣམ་པས་ན་མ་ཡིན་ནོ་ཞེས་ད་ལྟར་ཉིད་བརྗོད་པ་མ་ཡིན་ན། དེ་ཇི་ལྟར་རྣམ་པར་ཤེས་པ་ཚུལ་གཉིས་པ་ཞེས་བྱ་བའི་སྐབས་ཡིན་པའི་ཕྱིར་རོ་ཞེས་བརྗོད་ཅེ་ན་དེ་ཡང་ཞེས་གསུངས་སོ། །དེས་ན་ཡུལ་གྱི་རྣམ་པ་ཉིད་ཀྱིས་ཚུལ་གཉིས་ཡིན་གཞན་དུ་ནི་མ་ཡིན་ནོ་ཞེས་དགོངས་པའོ། །དེ་བདག་ཉིད་ཀྱིས་ནི་རིག་པའི་བདག་ཉིད་ཀྱིས་སོ། །རྒོལ་བ་ཐམས་ཅད་ཀྱི་ལྟར་ན་ཡང་རིག་པ་ཙམ་ཡིན་ནོ་ཞེས་འདོད་པ་ཡིན་གྱི་རིག་པ་ཉིད་མེད་དོ་ཞེས་ནི་མ་ཡིན་ནོ། །དེས་ན་རང་རིག་པ་འབའ་ཞིག་བསྒྲུབ་པར་རིགས་སོ། །རང་གིས་མྱོང་བ་ཉིད་དམ་ཞེས་བྱ་བ་འདི་ནི་སློབ་དཔོན་ཕྱོགས་ཀྱི་གླང་པོའི་གཞུང་སྟེ། གཞུང་འདིས་སློབ་དཔོན་ཕྱོགས་ཀྱི་གླང་པོར་རང་རིག་པ་བསྒྲུབ་པར་འགྱུར་རོ། །ཕན་ཚུན་ཞེས་བྱ་བ་ནི་དོན་དང་ཤེས་པ་དང་དེའི་ཤེས་པ་ལ་སོགས་པ་ཕན་ཚུན་ཁྱད་པར་ཅན་དུ་དྲན་པ་གང་ཡིན་པ་དེ་འདིར་ཡང་དག་དྲན་གྱི་སྒྲས་བརྗོད་པར་འདོད་པ་ཡིན་ནོ། །སྔོན་པོའི་རྣམ་པ་གསལ་བ་སོ་སོར་ངེས་པ་གང་ཡིན་པ་དེས་ཉེ་བར་བརྒྱུད་པའི་དབང་གིས་སོ། །མཚེ་མ་ལ་སོགས་པ་དང་ལ་ཞེས་བྱ་བ་ནི་སྔ་ཚོགས་བརྩོན་འགྲུས་ལ་སོགས་པ་ལའོ། །དེ་ལ་ནི་གཅིག་མཐོང་བ་ནི་དུས་ཕྱིས་ཀྱི་སྣ་ཚོགས་བརྩོན་འགྲུས་མཐོང་ངམ། ཆགས་ལུས་བྱིན་ཡིན་ཞེས་བྱ་བར་འགྱུར་གྱི། རྣམ་པར་ཕྱེ་ནས་དྲན་པ་ནི་མ་ཡིན་ནོ་དེ་ལ་ཞེས་བྱ་བ་ཡུལ་ཞེས་བྱ་བ་ནི། འཁྲུལ་པ་མེད་པའི་ཕྱིར་ཏེ་ཞེས་བྱ་བ་ནི། ཤེས་པ་ཉམས་སུ་མྱོང་བའི་སྐབས་སུའོ། །ཡུལ་ཡང་ཉམས་སུ་མྱོང་བ་དེས་ན་ཡུལ་ཡང་དྲན་པར་འགྱུར་རོ། །རང་ཉིད་ཤེས་པ་རང་བཞིན་དུ་ཐ་དད་པ་མེད་ཀྱང་ཡུལ་དེ་ཐ་དད་པ་ཉིད་ལས་ཐ་དད་པ་དྲན་པའོ། །དཔེ་ཡང་འཇིག་པར་བྱེད་པ་ནི་མཚེ་མ་དག་ཀྱང་ཞེས་བྱ་བའོ། །འོན་ཏེ་དྲན་པ་ཁྱད་པར་ལྡན་པར་སྐྱེས་པ་དེས་ན་དྲན་པ་མངོན་སུམ་མ་ཡིན་པའི་ཕྱིར་ཞེས་ཇི་ལྟར་བརྗོད་སྙམ་ན་དཔེར་ན་ཞེས་བྱ་བའོ། །ཡུལ་གྱི་དབང་གིས་ཞེས་བྱ་བ་ནི་ཡུལ་གསལ་བའི་དབང་གིས་སོ། །དེ་བཞིན་དུ་དྲན་པར་བྱ་བའི་རྣམ་པ་གཞན་དུ་མི་
འཐད་པར་རྟོགས་པ་ཡིན་ནོ། །དེ་ཡང་རྣམ་པའི་ཁྱད་པར་ཉིད་ལས་ཁྱད་པར་དུ་གྱུར་པ་ཡང་རྟོགས་པ་ཡིན་ནོ། །དེ་ལྟར་བའི་དྲན་པའི་རྟོག་པའི་ཡུལ་གྱི་རྣམ་པ་དེའོ། །དེས་ན་དྲན་པ་ལ་སྣང་བའི་རྣམ་པ་དེ་དང་དེ་དང་ལྟར་བ་ཡིན་ན། ཇི་ལྟར་དྲན་པར་བརྗོད་དེ་ཡུལ་ལ་རྣམ་པ་དེ་མི་སྣང་བའི་ཕྱིར་རོ། །འོན་ཏེ་རྣམ་པ་དེ་ནི་ཡུལ་ཉིད་ཀྱི་ཡིན་ལ་རག་གོ་སྙམ་ན་བརྗོད་པ་དེའི་ཚེ་མྱོང་བའི་སྟེ། ཉམས་སུ་མྱོང་བའི་རྣམ་པ་ཅི་སྟེ་མ་ཡིན། རྣམ་པའི་རང་བཞིན་གྱི་ཤེས་པ་ཡིན་པར་ཁས་ལེན་ན་མྱོང་བའི་ཡང་ཡིན་པས་ཁས་བླངས་ཏེ་ཤེས་པ་ཉིད་དུ་ཁྱད་པར་མེད་པའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་མྱོང་བ་ལས་དྲན་པ་སྐྱེ་བ་མ་ཡིན་ཏེ། འོན་ཀྱང་དོན་ཉིད་ལས་སྐྱེ་བ་ཡིན་ནོ། །དེས་ན་དྲན་པ་རྣམ་པར་དག་ལྡན་པ་ཡིན་ཡང་མྱོང་བ་ནི་རྣམ་པ་དང་ལྡན་པ་ཉིད་མ་ཡིན་ནོ། །དྲན་པ་རྣམ་པའི་ཁྱད་པར་ནི་དོན་དེ་ཉིད་ཀྱིས་བསྟན་པའི་ཕྱིར་སྙམ་ན་དོགས་པ་བསུ་ནས་འདི་ལྟར་ཞེས་སྨོས་སོ། །གལ་ཏེ་དོན་ལས་དྲན་པ་འབྱུང་བའི་ཉམས་སུ་མྱོང་བ་ལས་མ་ཡིན་ན་དེའི་ཚེ་ཁྱད་པར་མེད་བ་རྒྱུ་དེའི་ཕྱིར་ན་དོན་ཀུན་ལ་འབྱུང་བར་འགྱུར་རོ། །འོན་ཏེ་དོན་ཐག་རིང་བ་ལ་སོགས་པ་ཀུན་ལ་དྲན་པ་མི་འབྱུང་ངོ་ཞེ་ན། དངོས་རྣམས་རྣམ་ཞེས་བྱའོ། །གང་གི་ཕྱིར་རྒྱང་རིང་པོ་དང་ཆོད་པ་ལ་ཡང་དྲན་པ་སྐྱེ་བ་ཁོ་ན་ཡིན་ཏེ། དེས་རྒྱང་རིང་པོ་ལ་སོགས་པས་སོ། །དྲན་པ་སྐྱེ་བ་ལ་མི་གནོད་པའི་ཕྱིར་ན་དོན་ཐམས་ཅད་ལ་དྲན་པ་འབྱུང་བར་འགྱུར་ཞེས་བྱ་བར་འགྱུར་རོ། །འོན་ཏེ་དོན་དེ་ཉིད་མྱོང་བ་ལ་བརྟེན་ནས་རྒྱུ་ཡིན་ནོ་ཞེ་ན་མྱོང་བ་དེ་ཉིད་རྒྱུར་འགྱུར་མོད། དེའི་ཕྱིར་མྱོང་བ་ནི་དོན་གྱི་རྒྱུ་མ་ཡིན་གྱི་འོན་ཀྱང་མྱོང་བ་འགའ་ཞིག་ཡིན་ནོ། །འོན་ཏེ་དྲན་པས་རྣམ་པ་དང་ལྡན་པའི་རྣམ་པར་ཤེས་པ་དམིགས་སུ་ཆུག་མོད། དེ་ལྟ་ན་ཡང་དེ་ནི་དེ་ལྟ་བུ་མ་ཡིན་ནོ་སྙམ་ན། གང་ཞིག་མོས་པས་ཞེས་བྱ་བའོ། །དེ་ལས་ཞེས་བྱ་བ་ནི་དཔེ་ལས་སོ། །དེ་ལྟ་བུའི་བདག་ཉིད་ཅན་ལ་ནི་ཞེས་བྱ་བ་ནི་གཟུང་བ་དང་འཛིན་པའི་བདག་ཉིད་ཅན་ལའོ། །འོ་ན་བློ་ནི་རང་གི་བདག་ཉིད་ཀྱིས་རིག་པར་བྱ་བ་ཡིན་པའི་ཕྱིར་གསལ་བར་བྱ་བ་ཡིན་ལ། དོན་ཡང་རིག་པར་བྱེད་པས་གསལ་བར་བྱེད་པ་ཡང་ཡིན་ནོ་སྙམ་ན། འདི་ལ་སྨྲས་པ་ནི་བློ་དམན་གཉིས་ནི་ཞེས་བྱ་བའོ། །དཔེར་ན་དབང་པོ་དོན་
གྱིས་གསལ་བར་བྱེད་པ་ཡིན་ཡང་རང་གི་བདག་ཉིད་རིག་པ་ངེས་པ་མ་ཡིན་པ་དེ་བཞིན་དུ་བློ་ཡང་ཡིན་ཞེས་བྱ་བའི་དོན་དུ་དབང་པོ་ཉེ་བར་བཀོད་དོ། །གལ་ཏེ་ཞེས་བྱ་བ་ལ་སོགས་པས་ནི་ཕ་རོལ་ཉིད་སངས་རྒྱས་པའི་དོགས་པ་བསུ་བའོ། །དེ་ཡང་མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །དེར་ཡང་ནི་བདག་ལའོ། །ཕྱེད་ཕྱི་མ་འཆད་པ་ནི་རྫས་གཞན་དང་ཞེས་བྱ་བའོ། །ཁྱེད་ལན་སངས་རྒྱས་པའི་ཆ་ལ་ནིའོ། །གཞན་གྱིས་རྟོགས་པ་གང་ལ་ཡོད་པ་མ་ཡིན་པ་དེ་ལ་དེ་སྐད་ཅེས་བརྗོད་དོ། །དེ་རྟོགས་ཕྱིར་ཞེས་བྱ་བ་ནི་དོན་གསལ་བའི་ཕྱིར་རོ། །མར་མེ་ལ་སོགས་པ་ནི་དེ་ལྟ་མ་ཡིན་ཏེ་ཞེས་བྱ་བ་ནི་གསལ་བྱེད་གཞན་ལ་ལྟོས་པ་མ་ཡིན་ནོ། །འོན་ཏེ་སྒྲོན་མ་ཡང་དབང་པོ་གསལ་བར་བྱ་བ་ཡིན་ནོ་སྙམ་ན་དབང་པོ་ཡང་ཞེས་གསུངས་སོ། །དེ་ཞེས་བྱ་བ་ནི་སྒྲོན་མ་ལའོ། །བདེ་བ་ལ་སོགས་པ་བདག་གིས་རྟོགས་པ་དེས་ན་ཇི་ལྟར་རིག་པར་བྱེད་པ་གཞན་མེད་སྙམ་ན། བདེ་སྩོགས་ཞེས་གསུངས་སོ། །ཕྱི་རོལ་ཉིད་དུ་ཞེས་བྱ་བ་བུམ་པ་ལ་སོགས་པ་ལྟར་ཕྱི་རོལ་གྱི་ཡུལ་དུ་སྣང་བར་འགྱུར་རོ། །འཕྲོད་པ་འདུ་བས་བསྡུས་པའི་དབང་གིས་བདེ་བ་ལ་སོགས་པ་ཕྱི་རོལ་མ་ཡིན་པ་ཉིད་དུ་སྣང་ངོ་ཞེ་ན། དེའི་ཚེ་དེ་ཉིད་རང་གི་རིག་པ་ཉིད་དུ་འགྱུར་རོ། །སོ་སོར་མ་གྲུབ་པ་དག་ལས་འཕྲོད་པ་འདུ་བ་ཞེས་བརྗོད་པ་ཡིན་ཏེ། བུམ་པ་དང་སྣམ་བུ་དག་བཞིན་ནོ། །གལ་ཏེ་བདག་དང་བདེ་བ་ལ་སོགས་པ་ཡང་སོ་སོ་མ་ཡིན་པ་གྲུབ་ན་དེའི་ཚེ་ཐ་དད་པ་མེད་པའི་ཕྱིར་རང་རིག་པའི་རང་བཞིན་ཉིད་དུ་འགྱུར་ཏེ། བདག་བཞིན་ནོ་ཞེས་བྱ་བའི་དོན་ཏོ། །འདི་ནི་འཕྲོད་པ་འདུ་བ་ཁས་བླངས་ནས་བརྗོད་པར་ཟད་ཀྱི་དེ་ཡང་མེད་དོ་ཞེས་བརྗོད་པ་ནི་འདུ་བ་ཞེས་གསུངས་སོ། །གང་ལའོ་སྙམ་པའི་ཤེས་པ་འཇུག་པ་དེ་ཉིད་འཛིན་པར་བྱེད་པ་ཡིན་ལ་གང་དུ་མི་འཇུག་པ་དེ་ཉིད་ནི་གཟུང་བ་ཡིན་ནོ་ཞེས་བྱ་བ་འདི་གཉི་ག་ཡང་མ་ཡིན་ནོ་ཞེས་བརྗོད་པ་ནི། དེ་ནི་མ་ཡིན་ནོ་ཞེས་བྱ་བའོ། །དེ་ཡོད་ན་ཡང་ཞེས་བྱ་བ་ནི་པའོ་སྙམ་པའི་རྟོག་པ་ཡོད་ཀྱང་ངོ༌། །མ་མཐོང་བ་ནི་རང་རིག་པ་ཉིད་མ་ཡིན་པར་རོ། །དེ་བཞིན་ཞེས་བྱ་བ་ནི་ངའོ་སྙམ་པའི་རྟོག་པ་དང་འབྲེལ་བའོ། །སྔོ་བསངས་ལ་སོགས་པ་ལ་ནི་ངའོ་སྙམ་པའི་རྟོག་པ་མཐོང་གི །གཟུགས་ལ་སོགས་པ་ལ་ནི་མ་ཡིན་ནོ་
སྙམ་ན། སྔོ་བསངས་ལ་སོགས་པ་ཞེས་སྨོས་སོ། །འོ་ན་བདག་གོ་སྙམ་པའི་རྟོག་པ་གཟུགས་ཀྱི་རྒྱུ་མཚན་ཡིན་མོད་སྙམ་ན། གཟུགས་ལ་སོགས་པ་ནི་ཞེས་གསུངས་སོ། །རྟོགས་པ་འདི་ནི་འཛིན་པར་བྱེད་པའི་རྒྱུ་མཚན་ལ། གང་ལ་ང་དཀར་མོ་སྙམ་པར་རྟོགས་པ་ནི་ཉེ་བར་བཏགས་པ་ལས། འགྱུར་བ་ཡིན་ནོ་ཞེས་བརྗོད་པ་ནི་འོན་ཏེ་ཞེས་བྱ་བའོ། །འོ་ན་ཞེས་བྱ་བ་ནི་གྲུབ་པའི་མཐའོ། །ཐ་དད་མེད་པའི་ཕྱིར་ཞེས་བྱ་བ་ནི། དཀར་ཤམ་དང་གཟུགས་གཉིས་ལ་ཐ་དད་མེད་པའི་ཕྱིར་རོ། །ངའོ་སྙམ་པ་ལྡོག་པས་ཞེས་བྱ་བ་མེད་པས་སོ། །དེ་ཉིད་ཅེས་བྱ་བ་ནི་རྔོ་བའོ། །རང་རིག་མིན་ཉིད་ཀྱང་ཞེས་བྱ་བ་ནི་རྩིག་པ་ལ་སོགས་པ་བདག་རིག་པ་ཉིད་མ་ཡིན་ཡང་ངོ༌། །དེས་ན་རང་རིག་པ་མ་ཡིན་པའི་བདག་ཉིད་དུ་ཁྱད་པར་མེད་ཀྱང་ཇི་ལྟར་དེ་གཉིས་ཐ་དད་པ་དེ་བཞིན་དུ་རང་རིག་པ་ཡིན་ཡང་འགྱུར་རོ་ཞེས་བྱ་བའི་དོན་ཏོ། །འོན་ཏེ་མིག་གཉིས་ལ་སོགས་པའི་འཛིན་པར་བྱད་པར་འགྱུར་རོ། །དེས་ན་ཇི་ལྟར་རང་རིག་པར་འགྲུབ་སྙམ་ན། མིག་ནི་ཞེས་བྱ་བ་ལ་སོགས་མིན་ནི་ཞེས་གསུངས་སོ། །དེ་ལྟ་བུ་ཉིད་དུ་ཞེས་བྱ་བ་ནི་རང་རིག་པ་ཉིད་དུའོ། །འབྲེལ་པ་མི་རྟག་ཕྱིར་ཞེས་བྱ་བ་ནི་རྟག་ཏུ་རྩིག་པ་དང་འབྲེལ་པ་ནི་མ་ཡིན་ཏེ། དེ་ན་རེས་འགའ་ཁོ་ན་དམིགས་པའི་ཕྱིར་རོ། །ལུས་ནི་ཐམས་ཅད་ཀྱི་རྗེས་སུ་འབྲེལ་པར་དམིགས་པ་དེས་ངར་འཛིན་པ་དེ་ནི་ལུས་དེ་དང་འབྲེལ་པར་འགྱུར་བ་ཡིན་ནོ། །གཞན་ཡང་གང་གིས་ངར་འཛིན་པ་མེད་པས་རྩིག་པ་རང་རིག་པ་ཉིད་དུ་མི་འགྱུར་བ་ངར་འཛིན་པའི་ཕྱིར་ནི་རང་རིག་པ་མ་ཡིན་པའམ། འགྲུབ་པར་འགྱུར་བ་མ་ཡིན་ཏེ། གཞན་ལ་ལྟོས་པ་མེད་པར་རིག་པ་ཙམ་གྱིས་དེ་ལྟར་རང་རིག་པ་ཉིད་དུ་ཐ་དད་པ་མེད་པའི་ཕྱིར་རོ། །དེ་ནི་ཞེས་བྱ་བ་ནི་རྩིག་པའོ། །དེའི་རྣམ་པ་ཞེས་བྱ་བ་འཛིན་པའི་རྣམ་པར་རིག་པ་མེད་པའི་ཕྱིར་རོ། །མིག་ལ་སོགས་པ་ལས་མ་གཏོགས་པའི་འཛིན་པར་བྱེད་པ་གཞན་ནི་འདིར་ཅུང་ཟད་དམིགས་པ་མ་ཡིན་ནོ། །འོ་ན་མིག་ལ་སོགས་པ་འཛིན་པར་བྱེད་པ་ཡིན་ནོ་སྙམ་ན། དེ་ཀུན་ཞེས་གསུངས་ཏེ། མིག་ལ་སོགས་པའོ། །འོ་ན་བདེ་བ་ལ་སོགས་པ་ཉིད་འཛིན་པར་བྱེད་པ་ཡིན་ནོ་སྙམ་ན། དེ་ལ་ཞེས་གསུངས་སོ། །གཟུགས་ལ་སོགས་པ་དེ་ལ་མ་གཏོགས་པ་
རོ། །ཕ་རོལ་གྱི་འགྱུར་བ་ཉིད་དོ་ཞེས་སྨྲས་ཏེ་ཐ་དད་པར་རོ། །ཅིའི་ཕྱིར་ཞེ་ན། འདོད་པ་དང་འདོད་པ་མ་ཡིན་པ་ཐ་དད་པ་ན། སྡུག་པ་དང་མི་སྡུག་པར་སྣང་གི་རིམ་བཞིན་སྣང་བའི་ཕྱིར་རོ། །མི་སྡུག་བ་ལ་སོགས་པའི་ཞེས་བྱ་བའོ། །དེས་ཞེས་བྱ་བ་ནི་འཛིན་པར་བྱེད་པས་སོ། །འདི་ལ་ཡང་ཐུན་མོང་མ་ཡིན་པའི་ཕྱིར་ཤེས་པ་ཉིད་དུ་ཐལ་བར་འགྱུར་རོ་ཞེས་བྱ་བ་ནི་སུན་འབྱིན་བ་ཡལ་བར་དོར་ནས་གཞན་བརྗོད་པ་ནི་གལ་ཏེ་ཞེས་བྱ་བའོ། །འཇིག་རྟེན་ནི་རིག་པ་སྟེ། དོན་གྱིས་གོ་བས་ཤེས་པ་མ་ཡིན་ནོ། །ཇི་ལྟ་བུ་ཞིག་ཅེ་ན། གཟུགས་ལས་རང་བཞིན་ཐ་དད་དུའོ། །ཅིའི་ཕྱིར་ཞེ་ན། བློ་དེའི་རྣམ་པ་གང་ཡིན་པ་དེ་ནི་གསལ་བའི་ངོ་བོར་མ་རྟོགས་པའི་ཕྱིར་རོ། །གལ་ཏེ་བློའི་རང་བཞིན་ལུས་ཅན་མ་ཡིན་ན། འོ་ན་དེའི་རང་བཞིན་ཅི་འདྲ་བ་ཞིག་ཡིན་སྙམ་ན། དེའི་རང་བཞིན་ནི་ཞེས་གསུངས་སོ། །གལ་ཏེ་རི་བོང་གི་རྭ་ལ་སོགས་པར་འཛིན་པར་བྱེད་པའི་རང་བཞིན་དེ་ལྟར་མ་རྟོགས་པའི་ཕྱིར་འཛིན་པ་མ་ཡིན་ནོ་སྙམ་ན་བརྗོད་པ། བློ་ཡང་རྟོགས་པ་མེད་པ་ཁོ་ནའོ། །དེས་ན་དེའི་ཡང་འཛིན་པར་བྱེད་པ་མ་ཡིན་ཏེ། རི་བོང་གི་རྭ་ཉིད་བཞིན་ནོ། །འོན་ཏེ་ངའི་བློ་ཡོད་དོ་སྙམ་པར་རྟོགས་ན། ངའི་བློ་ཞེས་གསུངས་སོ། །གཟུགས་ལ་སོགས་པ་ལས་གཞན་པའི་རིག་པ་ཡང་ཡོད་པ་པ་མ་ཡིན་ཏེ། འོན་ཀྱང་གཟུགས་ལ་སོགས་པའི་རང་བཞིན་ཉིད་རིག་པ་ཡིན་ནོ་ཞེས་དགོངས་པའོ། །དེ་གཅིག་ཅེས་བྱ་བ་འཛིན་པར་བྱེད་པ་དང༌། གཟུང་བར་བྱ་བ་གཅིག་རྟོགས་པ་མེད་པའི་ཕྱིར་ནའོ། །གཞན་དུ་འགྱུར་ཞེས་བྱ་བ་ནི་གཅིག་མ་རྟོགས་ན་ཡང་གཞན་ཡང་མ་རྟོགས་པར་འགྱུར་རོ། །འདི་ཉིད་འཆད་པ་ནི་གཅིག་རྟོགས་ན་ཞེས་བྱ་བ་ལ་སོགས་པའོ། །ཇི་ལྟར་ན་འདི་ལྟར་གསལ་ཞེ་ན། གཟུགས་ལ་སོགས་པའི་ཞེས་བྱ་བའོ། །གཅིག་རྟོགས་པས་གཞན་ཡང་གདོན་མི་ཟ་བར་རྟོགས་པའི་ཕྱིར་འདིར་ཐལ་བར་ཇི་ལྟར་འགྱུར་ཞེས་ཇི་ལྟར་དགོངས་པའོ། །འཛིན་པར་བྱེད་པ་ཉིད་ཅེས་བྱ་བ་ནི་གཟུང་བ་ནི་མ་ཡིན་པའོ། །གལ་ཏེ་འཛིན་པར་བྱེད་པའི་ཕྱིར་དྲན་པ་དེའི་ཚེ་གཟུང་བ་ཡང་དྲན་པ་ཡོད་པ་ཉིད་དོ་ཞེ་ན། སྤྱི་ལ་ནི་ཞེས་སྨོས་སོ། །གལ་ཏེ་ཞེས་རྟོགས་སོ་ཞེས་ཐ་སྙད་བྱེད་པའི་ཕྱིར་ཇི་ལྟར་རང་རིག་པ་
ཡིན་ནོ་སྟེ། གཞན་གྱིས་རིག་པར་བྱ་བ་ཉིད་དུ་ཞེན་པའི་ཕྱིར་རོ་ཞེ་ན། ངས་ཞེས་གསུངས་སོ། །བློ་དེ་ནི་གཞན་གྱིས་འཛིན་པར་འགྱུར་གྱི། རང་གི་ངོ་བོས་ས་རིག་པ་ནི་མ་ཡིན་ནོ་ཞེས་བྱ་བའི་དོན་ཏོ། །ཡང་ཇི་ལྟར་ན་རིག་པ་སྔ་མ་འགགས་སྙམ་ན། དེ་ནི་ཞེས་གསུངས་ཏེ་བློའོ། །གཟུང་བར་བྱ་བ་མྱོང་བ་སྔ་མའི་རང་བཞིན་ཡང་འགགས་པའི་ཕྱིར་རོ། །གལ་ཏེ་མྱོང་བ་སྔ་མའི་རང་བཞིན་མེད་མོད་དེ་ལྟ་ན་ཡང་དེ་ནི་ཉམས་སུ་མྱོང་བ་ཁོ་ནའོ་སྙམ་ན། རང་གི་མེད་པ་ནི་ཞེས་གསུངས་སོ། །འོ་ན་མྱོང་བ་གཉིས་པ་བདག་གི་རང་བཞིན་རིག་པ་ཡིན་ནོ་སྙམ་ན། རང་གི་རང་བཞིན་ཡང་ཞེས་གསུངས་སོ། །དེ་ནི་ཞེས་བྱ་བའི་རང་གི་ངོ་བོའོ། །འོན་ཏེ་ཤེས་པ་ཡུལ་གྱི་རྣམ་པ་ཉིད་དུ་འགྱུར་རོ་ཞེས་ཁས་ལེན་ན་དེའི་རང་རིག་པ་ཉིད་ཁས་བླང་བར་བྱ་བ་ཡིན་པ་དེས་ན་མངོན་བར་འདོད་པ་གྲུབ་པོ། །འོན་ཏེ་ཡུལ་གྱི་རྣམ་པ་ནི་འདོད་པ་ཁོ་ན་སྟེ། འོན་ཀྱང་དེ་ནི་གཞན་གྱིས་མྱོང་བ་ཡིན་ནོ་སྙམ་ན། ཐུག་བ་མེད་པར་ཞེས་གསུངས་སོ། །བཟློག་པའི་རྣམ་འགྲེལ་གྱིས་བརྗོད་པའི་ཕྱིར། རང་ཉིད་ཐལ་བ་བརྗོད་པ་ནི་གལ་ཏེ་ཞེས་བྱ་བའོ། །བློ་ཡང་སྤྱིའི་དངོས་པོ་ཉིད་དུ་རྟོགས་པ་ཡིན་ནོ་སྙམ་དུ་དོགས་པ་བསུ་ནས་རྣམ་འགྲེལ་ལས་བརྗོད་པའི་བཟློག་པ་ནི། བློ་ནི་ཞེས་སྨོས་སོ། །དྲན་པས་བློ་འཛིན་པ་ན་ཡང་བདག་གི་བ་ཉིད་ཀྱིས་ནང་དུ་སྣང་བར་འགྱུར་རོ། །དེ་ལྟར་ཞེས་བྱ་བ་ནི་ཕྱི་རོལ་དུ་ཕྱོགས་པར་རོ། །འདི་ཡང་ཞེས་བྱ་བ་ནི་བློ་དེ་མ་ངོན་སུམ་གྱིས་འཛིན་པ་ནི་རང་གི་ངོ་བོ་ཐ་དད་པའི་ཕྱིར་རོ། །དེ་ལྟར་ཕྱི་རོལ་དུ་ཕྱོགས་པ་ཡིན་ནོ་ཞེས་ཇི་ལྟར་མི་འདོད་པ་སུན་འབྱིན་པ་གཞན་ཡང་བརྗོད་པ་ནི། ཐ་དད་པའི་ཞེས་བྱ་བའོ། །དེ་ལྟར་ཞེས་བྱ་བ་ནི་འཛིན་པར་བྱེད་པ་དང་ཐ་མི་དད་པར་རོ། །ཡུལ་མཚུངས་ཀྱང་ཞེས་བྱ་བ་ནི་གཟུགས་དང་རོ་ལ་སོགས་པར་རོ། །འོན་ཏེ་གཟུང་བ་དང་འཛིན་པ་འདྲེས་པས་རྣམ་པར་དབྱེ་བ་མ་རྟོགས་པ་ཡིན་ནོ་སྙམ་ན། འདྲེས་པས་ཞེས་བྱ་བའོ། །དཔེར་ན་གོང་བུའི་རྣམ་པ་འཛིན་པ་ཡིན་པ་བཞིན་ནོ། །ཐམས་ཅད་ཅིར་ཡང་མི་རུང་བར་འགྱུར་རོ་ཞེས་བྱ་བ་ནི་ཡུལ་གྱི་རྣམ་པ་ཉམས་སུ་མི་མྱོང་ན། ཡུལ་ཡང་ཉམས་སུ་མྱོང་བ་མ་ཡིན་ནོ་ཞེས་བྱ་བའི་དོན་ཏོ། །རང་གི་ཚིག་ལེ་འུར་བྱས་
པས་རྣམ་འགྲེལ་ལས་འཆད་པ་ནི་གལ་ཏེ་ཞེས་བྱ་བའོ། །དེའི་ངོ་བོར་ཡུལ་རྣམ་པར་རོ། །དེ་ཉིད་ཅེས་བྱ་བ་ནི་དེའི་རྣམ་པ་ཉིད་དོན་མྱོང་བ་ཡིན་ནོ། །དེའི་བྱ་བར་རང་རིག་པའི་རང་བཞིན་མེད་ནའོ། །དོན་ཡང་རིག་པར་མི་འགྱུར་རོ། །འོན་ཏེ་རང་རིག་པ་མེད་ན་ཇི་ལྟར་བློ་ཡིན་ནོ་ཞེ་ན། གཞན་རིག་པས་ཞེས་སྨོས་སོ། །འོན་ཏེ་རིག་པ་བློའི་མཚན་ཉིད་ཡིན་པ་དེས་ན་ཇི་ལྟར་དེ་མེད་པར་དེར་འགྱུར་སྙམ་ན། དོན་གྱི་ཞེས་གསུངས་སོ། །བདག་ཀྱང་ཞེས་བྱ་བ་ནི་གྲངས་ཅན་གྱི་འདོད་པའོ། །དེ་ནི་རང་རིག་པ་ཡིན་གྱི་བློའི་རང་བཞིན་མ་ཡིན་ནོ། །དེས་ན་བདག་ཉིད་རིག་པ་ནི་བློའི་མཚན་ཉིད་མ་ཡིན་ཏེ་འཁྲུལ་བའི་ཕྱིར་རོ། །གཞན་གྱིས་ཞེས་བྱ་བ་ནི་གཞན་དང་འདྲ་བའི་རྣམ་པས་སོ། །དེའི་ཚེ་ཡང་ཞེས་བྱ་བ་ནི་དེའི་རྣམ་པ་ཙམ་ཡིན་ནའོ། །དེ་ཉིད་བརྗོད་པ་ནི་དེའི་རྣམ་པ་ཙམ་གྱི་ཞེས་བྱ་བའོ། །འོན་ཏེ་འདུ་བའི་འགྲེལ་པའམ་གཞན་གྱིས་བདག་རྟག་པའམ་ཁྱབ་པ་ལ་གནས་པ་གང་ཡིན་པ་དེ་ཉིད་བློ་ཡིན་པ་དེས་ན་ཡུལ་གྱི་རྣམ་པ་དེས་ཀྱང་གཞན་ནི་བློ་ཉིད་མ་ཡིན་ཏེ། བདག་ལ་གནས་པ་ཉིད་མེད་པའི་ཕྱིར་རོ་ཞེ་ན། འདི་ལ་བརྗོད་པ་ནི་དེ་ཡང་མི་རུང་སྟེ་ཞེས་བྱ་བའོ། །གང་གི་ཚེ་རྩོལ་བ་གཅིག་ལ་རྩོལ་བ་གཞན་སྐྱེས་པ་དེའི་ཚེ་རྩོལ་བ་གཉིས་ཕན་ཚུན་བློ་ཉིད་དུ་འགྱུར་རོ། །བདག་ལ་གནས་པའང་ཇི་ལྟར་རིག་ཅིང་རྟོགས་ཏེ། བདག་ཉིད་མི་རྟོགས་པའི་ཕྱིར་རོ་ཞེས་དགོངས་པའོ། །ཅི་སྟེ་ཐ་དད་པར་མ་རྟོགས་ན་དེའི་བདག་ཉིད་ཀྱང་བློ་གཉིས་ལས་ཐ་དད་པར་རྟོགས་པར་འགྱུར་ཏེ་དེ་ལྟར་མ་ཡིན་ཏེ། རྟེན་གྱི་ཐ་དད་པར་མི་རྟོགས་ན་བརྟེན་པ་མི་རྟོགས་པའི་ཕྱིར་རོ། །གཏན་ཚིགས་དེས་འདི་གསུམ་ཞེས་བྱ་བ་བློ་གཉིས་དང་བདག་དེ་གསུམ་མོ། །འདི་ཉིད་གསལ་བར་བྱེད་པ་ནི་བདག་མ་རྟོགས་པར་ནི་ཞེས་བྱ་བའོ། །གཟུགས་ལ་སོགས་པ་ཞེས་བྱ་བ་ནི་བུམ་པ་ལ་སོགས་པའོ། །དེས་ན་ཇི་ལྟར་བདག་མ་རྟོགས་ན་དེའི་ཚེ་གཟུགས་ལ་སོགས་པ་ཡང་དེ་ལ་བརྟེན་པ་ཉིད་དུ་རྟོགས་པར་འགྱུར་རོ། །དེ་ལས་ཞེས་བྱ་བ་བློ་ལས་ཐ་དད་པར་རོ། །གང་གི་ཕྱིར་བྱེད་པ་པོ་མེད་པའི་ཕྱིར་བྱ་བ་མི་སྲིད་པ་དེས་ན། གདོན་མི་ཟ་བར་བདག་ཡོད་ དགོས་ལ་བྱེད་པ ་པོ་ཡང་བདག་ཡིན་ནོ་ཞེས་བསམས་པའོ། །མིག་ལ་སོགས་པ་ཞེས་བྱ་བ་ནི་གྲུབ་པའི་མཐའ་བའིའོ། །དེ་
དག་གི་ཞེས་བྱ་བ་ནི་དོགས་པ་སྟེ་དམིགས་པ་རྣམས་ཀྱིའོ། །ལེན་ནི་བྱེད་པ་ཞེས་བྱ་བའོ། །གལ་ཏེ་མིག་ལ་སོགས་པ་ཉིད་བྱེད་པ་པོ་ཡིན་ན་ཇི་ལྟར་བྱེད་པ་ཡིན། དེ་ཉིད་བྱེད་པ་པོ་དང་བྱ་བ་ཡང་འཐད་པ་ནི་མ་ཡིན་ནོ་ཞེ་ན་དེ་དག་ཅེས་བྱ་བའོ། །བྱེད་པ་པོ་བདག་གཞན་མེད་པར་མིག་ལ་སོགས་པ་དེ་དག་བྱེད་པར་མི་འགྱུར་བ་མ་ཡིན་ཏེ། བྱེད་པ་པོ་དང་བྱེད་པའི་དངོས་པོ་ནི་བརྟགས་པ་ཡིན་པའི་ཕྱིར་གཅིག་ཉིད་བྱེད་པ་པོ་དང་བྱེད་པར་ཡང་འགྱུར་བ་ཡིན་ནོ། །དེ་ཉིད་ཀྱི་ཕྱིར་ཞེས་བྱ་བ་ནི་རང་གི་བློ་ནུས་ཀྱི་ནང་དུ་ཆུད་པའི་ཕྱིར་རོ། །གཞན་དུ་ཞེས་བྱ་བ་ནི་ནང་དུ་ཕྱོགས་པར་སྣང་བ་ཉིད་དུའོ། །འདི་ལ་བརྗོད་པ་ནི་འོ་ན་ཞེས་བྱ་བའོ། །སྐབས་ཉེ་བར་སྡུད་པ་ནི་དེས་ན་ཞེས་བྱ་བའོ། །དེ་ལ་ནི་ཞེས་བྱ་བ་གཞན་གྱི་ལན་དེ་ལ་ནིའོ། །དེ་དག་ཀྱང་ཞེས་བྱ་བ་ཕན་ཚུན་འདྲ་བའི་དོན་དེ་དག་ཀྱང་ངོ༌། །འོ་ན་སྔར་དོན་རྣམས་རིག་པར་ཐལ་བར་བརྗོད་ཀྱི་བློར་ཐལ་བ་ནི་མ་ཡིན་ནོ་ཞེས་དོགས་ན་མྱོང་བར་ཐལ་ལོ་ཞེས་བྱ་བ་སྟེ། རང་རིག་པར་ཐལ་ལོ་ཞེས་བརྗོད་བའི་སངས་རྒྱས་པ་གང་ཡིན་པ་དེ་ཉིད་ཀྱིས་འདྲ་བ་དེ་དག་ཉིད་དུ་ཐལ་ལོ་ཞེས་བརྗོད་བ་ཡིན་ནོ། །དེ་ལ་ཞེས་བྱ་བ་སངས་རྒྱས་པས་བློར་ཐལ་བ་བསྒྲུབ་པ་ལ་དེ་ཉིད་ཅེས་བྱ་བ་བློ་ཉིད་ཡིན་པར་འདྲ་བ་ཉིད་ལན་དུ་ཇི་ལྟར་འགྱུར། ཁྱད་པར་མེད་པ་ཉིད་སྟོན་པ་ནི་གང་གི་ཕྱིར་ཞེས་བྱ་བའོ། །དེ་ལས་ཞེས་བྱ་བ་ནི་མྱོང་བ་ལས་ཁྱད་པར་གཞན་བརྗོད་པར་བྱ་བ་ཡིན་ལ། ཁྱད་པར་དེ་ཡང་འདྲ་བ་ལས་ཀྱང་གཞན་ཡིན་པར་བརྗོད་པར་བྱའོ། །དེ་ལྟར་མ་ཡིན་ན་བུམ་པ་ལ་སོགས་བ་མཚུངས་པ་ཡང་རིག་པར་ཐལ་བའི་ཕྱིར་རོ། །ཐལ་བ་འདིར་མི་འགྱུར་ཏེ་འཛིན་པར་བྱེད་པ་མ་ཡིན་པའི་ཕྱིར་རོ་ཞེ་ན། འདི་ལ་བརྗོད་པ་ནི་གལ་ཏེ་ཞེས་བྱ་བའོ། །འཛིན་པར་བྱེད་པ་ཉིད་འགའ་ཞིག་རྣམ་པར་གནས་པ་ཡིན་ན། འཛིན་བར་བྱེད་པ་འདི་ལས་ཟློག་པ་ནི་འཛིན་པར་བྱེད་བམ་ཡིན་པར་གནས་པ་ཞིག་ནི་དེ་ཉིད་ཅེས་བྱ་བ་འཛིན་པར་བྱེད་བ་ཉིད་ནི་གནས་པ་མེད་དོ། །དེར་ཞེས་བྱ་བ་ཚད་མ་ཅན་མ་ཡིན་པ་གཟུགས་ལ་སོགས་པ་ལས་ཐ་དད་པར་རྟོགས་ནའོ། །ཅིའི་དོན་དུ་ཞེས་བྱ་བ་ནི་གལ་ཏེ་འདྲ་བ་བློའི་མཚན་ཉིད་མ་ཡིན་ནའོ། །འདི་ལ་བརྗོད་པ་ནི་དེས་ཞེས་བྱ་བ་སྟེ། ཤེས་པས་བྱས་པའི་མྱོང་བ་གང་ཡིན་པ་དེ་སྔོན་པོ་དང་སེང་བོ་
ལ་སོགས་པའི་ཡུལ་ཅན་དུ་ངེས་བའི་རྒྱུ་ཞེས་བྱ་བ་རྣམ་པར་འཇོག་པར་བྱེད་པ་ཉིད་ཡིན་པ་དེའི་ཕྱིར་འདྲ་བ་དེ་ཚད་མར་འདོད་པ་ཡིན་ནོ། །འདི་ནི་ཞེས་བྱ་བ་རང་རིག་པ་དང་འདྲ་བ་དག་ཐ་མི་དད་པ་ཞེས་བྱ་བ་བདེན་མོད་ཀྱིའོ། །འདིས་ནི་ཞེས་བྱ་བ་ནི་འདྲ་བས་སོ། །གཞན་གྱིས་ནི་ཞེས་བྱ་བ་ནི་ཚུལ་ལུགས་གཞན་གྱིས་སོ། །འོན་ཏེ་རང་གི་ངོ་བོ་རིག་པའི་སྒོ་ཉིད་ནས་ཕྱིའི་དོན་ཅི་སྟེ་རྣམ་པར་མི་གཞག་སྙམ་ན། རེ་ཞིག་ཅེས་སྨོས་སོ། །དེ་ལྟར་མ་ཡིན་པར་ཞེས་བྱ་བ་ནི་འདྲ་བ་མེད་པར་རོ། །གཞན་རིག་ན་ཇི་ལྟར་གཞན་རིག་པར་འགྱུར་ཞེ་ན། འདི་ལྟར་ཞེས་བྱ་བ་ལ་སོགས་པའོ། །གཞན་རིག་པ་ནི་གང་གི་ཚེ་འདི་བདག་གིས་རྟོགས་སོ་ཞེས་བྱ་བའི་ཐ་སྙད་འཇུག་པ་ཡིན་ནོ། །དེའི་ངོ་བོ་ནི་དེ་དང་འདྲ་བའོ། །དཔེར་ན་ཙི་ཏྲ་ཨང་ག་དང་སྣ་ཚོགས་བརྩོན་འགྲུས་ལས་གང་ཡང་རུང་བ་ཞིག་མཐོང་བ་ནི་གཞན་ལ་བདག་གིས་རིག་གོ་ཞེས་བྱ་བར་ཐ་སྙད་བྱེད་པ་དེ་བཞིན་དུ་རང་གི་ངོ་བོར་གྱུར་བའི་སྔོན་པོ་ལ་སོགས་པ་རིག་པ་ན་སྔོན་པོ་ལ་སོགས་པ་ཐ་སྙད་བྱེད་པ་ཡིན་ནོ། །དེའི་མཚན་ཉིད་ཅེས་བྱ་བ་ནི་དེ་དང་འདྲ་བ་གཞན་རིག་པ་ནའོ། །དེ་ལ་ཞེས་བྱ་བ་ཕྱི་རོལ་དོན་ལའོ། །དེ་ལ་ཞེས་བྱ་བ་ནི་རང་གི་ངོ་བོ་སྔོན་པོ་ལས་གཞན་པའི་སྔོན་པོ་དེ་ཞེས་བྱ་བ་གསལ་བཞིན་པའི་སྔོན་པོའོ། །འདི་ཉིད་ཀྱིས་ཞེས་བྱ་བ་ནི་སྔོན་པོ་དང་རིག་པ་གཉིས་ཀྱིས་སོ། །གལ་ཏེ་ཕྱི་དོན་དུ་སྨྲ་བ་ལ་སྔོན་པོ་ཐ་དད་པར་རིག་པ་ཡང་ཇི་ལྟར་སྙམ་ན། སྔོན་པོ་ལ་སོགས་པ་ལྐོག་ཏུ་ཞེས་གསུངས་སོ། །དེའི་ཞེས་བྱ་བ་ནི་རང་གི་རང་བཞིན་དུ་གྱུར་པའི་སྔོན་པོ་ལ་སོགས་པར་རིག་པ་ལས་སོ། །འདྲ་བ་དོན་མེད་པར་བྱ་བའི་ཕྱིར་འདྲི་བ་ནི་གལ་ཏེ་ཞེས་བྱ་བའོ། །གལ་ཏེ་འདྲ་བ་མེད་ཀྱང་རང་རིག་པར་འགྱུར་ན། དེའི་ཚེ་དེ་ལྟར་གྱུར་པ་ཞིག་ན། འོན་ཀྱང་གང་ལ་ཡང་རང་རིག་པ་ཡོད་པ་དེ་ལ་ནི། འདྲ་བ་དེ་རང་ཡོད་པ་དེས་ན་འདྲ་བ་ལས་རིག་པ་ཡིན་ནོ་ཞེས་བརྗོད་པ་དེས་ན་འདྲ་བས་ཅི་བྱ་ཞེས་ཅི་སྟེ་བརྗོད་སྙམ་ན་འདི་ལ་བརྗོད་པ་ནི། དེ་ནི་ཡོད་པ་མ་ཡིན་ནོ་ཞེས་བྱ་བའོ། །འདྲ་བ་མེད་ན་རང་རིག་པ་དེས་དོན་རིག་པར་མི་འགྱུར་རོ། །དེས་ན་འདྲ་བ་ཉིད་ལ་རིག་པར་བརྗོད་བ་ཡིན་ཞེ་ན། འདི་ལ་བརྗོད་པ་ནི་དེ་ཡང་ཞེས་བྱ་བའོ། །འོན་ཤེས་པ་ཉིད་ཀྱིས་ཁྱད་
པར་འཕགས་པ་དེས་ན་དོན་ཉིད་དུ་མི་འགྱུར་རོ་སྙམ་ན་ཤེས་པ་ཉིད་ཀྱིས་ཞེས་གསུངས་སོ། །སྔོན་པོ་མཐའ་དག་ཅེས་བྱ་བ་ནི་ཡུལ་དང་དུས་གཞན་ན་གནས་པའི་སྔོན་པོ་ཡང་རིག་པར་འགྱུར་ཏེ། རྟོགས་པའི་རང་བཞིན་མ་རྟོགས་པའི་རང་བཞིན་གྱིས་མཚུངས་པའི་ཕྱིར་རོ། །འོ་ན་ཇི་ལྟར་རིག་པར་འགྱུར་སྙམ་ན་དེའི་རང་བཞིན་ཞེས་སྨོས་སོ། །འདྲ་བ་དེ་ལས་སྐྱེས་པ་དག་ཁོ་ནས་རིག་པར་བྱེད་པ་ཐ་སྙད་བྱེད་པ་ཡིན་ནོ་ཞེས་བྱ་བ་འདི་ཡང་ཡོད་པ་མ་ཡིན་ཏེ། གཞན་ཡང་མཐོང་བའི་ཕྱིར་རོ། །དེ་ཉིད་བརྗོད་པ་ནི་མཚེ་མ་དག་ཅེས་བྱ་བའོ། །ཤེས་པ་ཕྱི་མ་རྟོགས་པའི་རང་བཞིན་གྱིས་ནི་ཤེས་པ་སྔ་མ་དང་མཚུངས་པ་ཡིན་ཏེ། དེ་ལྟར་ན་ཡང་ཉམས་སུ་མྱོང་བ་ཡང་རིག་བར་ཐལ་ལོ། །ཇི་ལྟར་སྔོན་པོ་ལ་སོགས་པ་ཉེ་བར་འཇོག་པར་བྱེད་པ་ཅན་ཡིན་པ་དེ་བཞིན་དུ་མྱོང་བ་ཡང་ཉེ་བར་འཇོག་པར་བྱེད་པ་ཅན་དུ་བརྟག་པར་བྱ་བ་ཡིན་ནོ། །དེས་ན་ཉམས་སུ་མྱོང་བའི་འདོད་པ་ཉིད་པ་དེས་ན་ཇི་ལྟར་ཐལ་བ་ཡིན་སྙམ་ན། དེ་ཡང་མ་ཡིན་ཏེ་ཞེས་བྱ་བའོ། །དེ་དང་འདྲ་བར་སྔོན་པོ་ལ་སོགས་པ་ལ་ཡང་ཉེ་བར་འཇོག་པར་བྱེད་པ་ཐ་དད་པ་བརྟགས་པ་ནི་རིག་པ་དང་ལྡན་པ་མ་ཡིན་ནོ། །ཉམས་སུ་མྱོང་བ་ཉིད་ཉེ་བར་འཇོག་པར་བྱེད་པར་བརྟགས་པས་ཆོག་མོད། དོན་བརྟགས་པས་ཅི་བྱ་ཞེས་དགོངས་པའོ། །དེ་ལ་ཞེས་བྱ་བ་སྐྲ་ཤད་ལ་སོགས་པར་སྣང་བའོ། །ཐམས་ཅད་དུ་ཞེས་བྱ་བ་ནི་ཀ་བ་ལ་སོགས་པར་སྣང་བ་ལ་ཡང་ངོ༌། །དེ་བཞིན་དུ་ཕྱིའི་དོན་མེད་པར་ཀ་བ་ལ་སོགས་པའི་ཤེས་པ་འདི་སྐྱེས་པ་ཡིན་ཏེ། སྐྲ་ཤད་ལ་སོགས་པར་སྣང་བ་དང་མཚུངས་པའི་ཕྱིར་དང་མི་སླུ་བ་ལ་སོགས་པ་ཡང་སུན་ཕྱུང་བའི་ཕྱིར་རོ། །འོ་ན་འགལ་བ་མི་འཁྲུལ་བ་ཅན་དེ་སོང་སྟེ། སྔར་གྱི་ཀ་བ་ལ་སོགས་པའི་ཤེས་པ་དང་འདྲ་བའི་ཕྱིར་དམིགས་པ་དང་བཅས་པ་ཡིན་ལ་སྐྲ་ཤད་དུ་སྣང་བ་དང་འདྲ་བའི་ཕྱིར་ནི་དམིགས་པ་མེད་པ་ཡིན་པར་འགྱུར་བའི་ཕྱིར་རོ་སྙམ་ན། འགལ་བ་ཞེས་གསུངས་སོ། །འབྲེལ་པ་གཟུང་བ་མེད་པ་ཉིད་ཅིའི་ཕྱིར་ཞེ་ན། དོན་ནི་ཞེས་གསུངས་སོ། །འོ་ན་ཉམས་སུ་མྱོང་བ་ལ་ཡང་ཉེ་བར་འཇོག་པར་བྱེད་པ་ཇི་ལྟར་རྟོག་སྟེ། དེ་ཡང་མ་མཐོང་བའི་ཕྱིར་རོ་སྙམ་ན་མཐོང་བ་སྔ་མ་ནི་ཞེས་གསུངས་སོ། །འོན་ཏེ་དོན་ཡང་སྔར་གྱི་ཀ་བ་ལ་སོགས་པའི་
ཤེས་པས་དམིགས་པ་མ་ཡིན་ནམ། དེས་ན་དེ་ཡང་བརྟག་གོ་ཞེ་ན། དོན་ཞེས་གསུངས་སོ། །རྣམ་པ་གཞན་ཡིན་ན་ཞེས་བྱ་བ་ནི་གང་གི་ཚེ་སྔོན་པོའི་རྣམ་པར་ཤེས་པའི་རྗེས་ཐོགས་སུ་སྔོན་པོའི་རྣམ་པར་ཤེས་པ་སྐྱེས་པ་དེའི་ཚེ་རེ་ཞིག་འདི་འགྱུར་མོད། གང་གི་སེར་པོར་ཤེས་པ་དེ་སྐྱེ་བ་དེའི་ཚེ་ཉེ་བར་འཇོག་པ་གང་ཡིན་ཞེ་ན། འདི་འགོག་པ་ནི་མ་ཡིན་ཏེ་ཞེས་བྱ་བའོ། །འདིས་ནི་འདིར་བར་དུ་ཆོད་པ་ཉིད་ཀྱིས་སྔོན་པོའི་ཤེས་པ་ཉེ་བར་འཇོག་པར་བྱེད་པ་ཡིན་ནོ་ཞེས་བསྟན་ཏོ། །ཇི་ལྟར་འཇིག་རྟེན་དོན་མྱོང་བར་འགྱུར་ཞེས་ངེས་པ་དེ་བཞིན་དུ་ཉམས་སུ་མྱོང་བ་ཉམས་སུ་མྱོང་ངོ་ཞེས་ངེས་པ་དེ་ནི་མ་ཡིན་ནོ། །དེའི་ཕྱིར་འབྲས་བུ་ངེས་པ་མ་མཐོང་བའི་ཕྱིར་མྱོང་བ་ཉམས་སུ་མྱོང་བ་ནི་མ་ཡིན་ནོ། །དེ་ལྟར་ཞེས་བྱ་བ་ནི་མྱོང་བ་ཡང་ངེས་བར་འགྱུར་རོ། །ལ་ལར་ཞེས་བྱ་བ་སྨིག་རྒྱུ་ལ་སོགས་པ་ཉམས་སུ་མྱོང་བ་ལ་ཡང་ཆུ་ལ་སོགས་པའི་རང་བཞིན་དུ་འཁྲུལ་བ་མཐོང་བའི་ཕྱིར་རོ། །དེས་ན་ཤེས་པ་ཉམས་སུ་མྱོང་བ་ཡང་འཁྲུལ་བས་ངེས་པར་མི་འགྱུར་བས་ཇི་ལྟར་ན་ངེས་པ་མེད་པས་མྱོང་བ་མེད་པར་འགྲུབ་ཅེས་བྱ་བའི་དོན་ཏོ། །དེའི་ཕྱིར་ཞེས་བྱ་བ་ནི་སྨིག་རྒྱུ་ལ་སོགས་པའི་དོན་མྱོང་བ་ཡོད་ཀྱང་ངེས་པ་མེད་པ་དང་རྨི་ལམ་ལ་སོགས་པར་དོན་དེ་མེད་ཀྱང་ཡོད་པའི་ཕྱིར་རོ། །དེ་ཁོ་ན་ཞེས་བྱ་བ་དོན་ཉམས་སུ་མྱོང་བར་གནས། འོན་ཏེ་འདི་ནི་ཉམས་སུ་མྱོང་བ་ཡིན་ནོ་ཞེས་བྱ་བར་ཡང་ཇི་ལྟར་རྣམ་པར་གཞག་པར་བྱ་བ་སྟེ། ངེས་པ་མེད་པའི་ཕྱིར་རོ་ཞེ་ན། ཉམས་སུ་མྱོང་བ་ཞེས་གསུངས་སོ་།འོན་ཏེ་ངེས་པ་མེད་པ་ཉིད་ཀྱིས་ཉམས་སུ་མྱོང་བ་ནི་མེད་དོ་ཞེས་ངེས་པར་བྱེད་ན། འདི་ལ་བརྗོད་པ་ནི་རྒྱུ་ཞེས་སྨྲ་བའོ། །མྱོང་བ་མེད་བར་ཞས་བྱ་བ་ནི་མྱོང་བ་སྔ་མའི་མྱོང་བ་གང་ཡིན་པ་དེ་མེད་པར་རོ། །དེ་ལྟར་ན་ཞེས་བྱ་བ་ནི་ངེས་པ་མེད་པས་ནའོ། །མྱོང་བའི་རང་བཞིན་ནི་སྣང་བ་མ་ཡིན་ཏེ། དེས་འདི་ལ་བརྟག་པ་ཅི་ཡོད་སྙམ་ན། དོན་ཡོད་པ་ཙམ་ནི་ཞེས་སྨོས་སོ། །གལ་ཏེ་མཐོང་བ་དེ་ལྷག་པ་ཉིད་དུ་འགྱུར་མོད། དེ་ལྟར་ན་ཡང་གཞན་སྣང་བ་ནི་མ་ཡིན་ནོ་སྙམ་ན། གལ་ཏེ་ཞེས་སྨོས་སོ། །དེ་ནི་ཞེས་བྱ་བ་ནི་རིག་པའི་རང་བཞིན་གསལ་བ་ཞེས་བྱ་བར་གྲགས་པར་དོན་མཐོང་བ་ནིའོ། །དཀར་པོ་ལ་སོས་པ་མངོན་པར་
གསལ་བའི་སྒྲས་ཅི་ཞིག་བརྗོད་པར་བྱ་སྙམ་ན། ཁྱེད་ཀྱིས་ཞེས་སྨོས་ཏེ། བྲམ་ཟེ་དང་རིགས་པ་ཅན་ལ་སོགས་པས་འདོད་པ་ཤེས་པ་ཕྱི་མ་དོན་གྱིས་གོ་བ་ལ་སོགས་པའི་སྒྲས་བྱེད་ཅན་ནོ། །ལས་ཉིད་ལ་རྣམ་པར་བརྟག་པ་བྱས་ནས་སུན་འབྱིན་པ་ནི་གལ་ཏེ་ཞེས་བྱ་བའོ། །གལ་ཏེ་དོན་ཙམ་ལས་ལྷག་པ་ལས་ཡིན་ན་དེ་ཡང་རྟོགས་པ་ཡིན་ནོ། །ལས་དེ་ལ་ཡང་རྟོགས་པ་གཞན་ཡོད་པར་འགྱུར་ལ། རྟོགས་པ་དེས་ཡང་ལས་གཞན་ཡོད་པར་འགྱུར་རོ། །དེ་ལས་རྟོགས་པ་མིན་པའི་ཕྱིར་ཐུག་པ་མེད་དོ། །ཇི་ལྟར་སྒྲོན་མ་ལ་སོགས་པ་ལས་མ་དང་སུ་གསལ་བ་ཡིན་པ་དེ་བཞིན་དུ་དོན་གྱིས་གསལ་བ་ནི་དེ་འདྲ་བ་མ་ཡིན་ནོ། །གལ་ཏེ་ངེ་ཞེས་བྱ་བ་ནི། ཤེས་པའི་རང་བཞིན་གྱིས་གསལ་བའོ། །ཐམས་ཅད་གསལ་བར་ཐལ་བ་ནི་རང་གི་ངོ་བོ་ཙམ་ཡོད་པའི་ཕྱིར་རོ། །རང་གི་ངོ་བོའི་ཁྱད་པར་གསལ་བ་ཡིན་གྱི་རང་གི་ངོ་བོ་ཙམ་ནི་མ་ཡིན་ནོ། །ཁྱད་པར་དེ་ཡང་ཐམས་ཅད་ལ་མེད་པ་དེས་ན་ཐམས་ཅད་གསལ་བ་མ་ཡིན་ནོ་ཞེ་ན། འདི་ལ་བརྗོད་པ་ནི་ཤེས་པ་གཞན་ཞེས་བྱ་བའོ། །དེ་ལྟ་བུ་ཉིད་ཅེས་བྱ་བ་ཤེས་པ་གཞན་ཁོ་ནས་རང་གི་ངོ་བོའི་ཁྱད་པར་གསལ་བར་བྱེད་དོ་ཞེས་བྱ་བའི་དོན་ཏོ། །འདི་ལ་བརྗོད་པ་ནི་འདི་ཞེས་བྱ་བའོ། །རྒྱུ་གང་ཞེས་གསལ་བ་གཉིས་པ་གཞན་ད་མི་རྟོགས་པ་དེའི་ཕྱིར་གསལ་བ་སྔ་མའི་རང་གི་ངོ་བོ་ཉིད་གསལ་བར་ཁས་བླང་བར་བྱའོ། །འོན་ཏེ་གསལ་བ་གཉིས་གཞན་ཁོ་ནས་གསལ་བ་དང་པོའི་རང་གི་ངོ་བོ་གསལ་བར་བྱེད་ན་དེའི་ཚེ་གསལ་བ་དང་པོའི་རང་གི་ངོ་བོ་དེ་ཡང་གཞན་གསལ་བ་ཕ་རོལ་པོ་གཉིས་པས་གསལ་བ་ཡིན་ན། གསལ་བ་གཉིས་པ་གཞན་དེ་ཡང་མི་རྟོགས་པའི་ཕྱིར། དེར་གཞན་ཁས་བླང་ དགོས་པ ་ཐུག་པ་མེད་དོ། །མ་རྟོགས་པ་ཞེས་བྱ་བ་གསལ་བ་མ་ཡིན་པ་ལས་བཟློག་པའི་རང་བཞིན་དུའོ། །དེ་ལྟ་ཡིན་ན་ཞེས་བྱ་བ་གསལ་བ་མ་ཡིན་པ་ལས་བཟློག་པར་རྟོགས་པར་ཁས་ལེན་ནའོ། །འོ་ན་དེ་དག་གིས་ཇི་ལྟར་འདོད་ཅེ་ན། ཁྱེད་ནི་ཞེས་གསུངས་སོ། །ཇི་ལྟར་ཞེས་བྱ་བ་འཇིག་རྟེན་གྱི་ཐ་སྙད་ཙམ་དུ་དོན་རྟོགས་པ་ཡིན་ནོ་ཞེས་བྱ་བའོ། །ཐ་སྙད་ཡིན་གྱི་དང་དམ་པར་ནི་མ་ཡིན་པ་ནི་དེ་ལྟར་ནི་བཤད་ཟིན་ཏོ། །དེས་ན་ཁྱེད་ཀྱི་ལྟ་བ་ལ་དོན་འདེ་མཐོང་ངོ་སྙམ་པ་འདི་ཇ་ལྟར་
ཞེས་ངེད་ཀྱིས་དྲིས་པ་དེ་ནི་རིགས་པ་ཁོ་ནའོ། །གལ་ཏེ་ཁྱེད་ལ་ཡང་དོན་མེད་བའི་ཕྱིར་ན་དོན་འདི་མཐོང་ངོ་ཞེས་ཇི་ལྟར་ངེས་ཤེ་ན། ངེད་ཀྱི་ལྟར་ན་ཞེས་གསུངས་སོ། །འདིའི་ཞེས་བྱ་བ་ཤེས་པའི་དེ་ལྟ་བུར་གྱུར་པ་སྟེ་དོན་དང་འདྲ་བའོ། །འདིས་ནི་བ་རོལ་བོས་འདྲ་བ་ལ་ནི་ལོག་པར་རྟོགས་པ་མ་ཡིན། འོན་ཀྱང་རང་རིག་པ་ལའོ་ཞེས་བསྟན་པ་ཡིན་ནོ། །དེ་ལས་གཞན་གྱིས་ཞེས་བྱ་བ་ནི་དབྱིག་པ་དང་སྐྱེས་བུ་དག་ལས་ཐ་དད་པའི་རིག་པས་སོ། །དེ་ལྟ་བུར་གྱུར་པ་ཞེས་བྱ་བ་ནི་དབུགས་དང་བཅས་པའི་སྐྱེས་བུའོ། །འདི་ཉིད་ལས་གཞན་གྱིས་བསམ་པ་བརྗོད་པས་གསུངས་པ་ནི། རང་རིག་པས་ནི་ཞེས་བྱ་བའོ། །འདི་ལ་བརྗོད་པ་ནི་ཁྱེད་ཀྱི་ཞེས་བྱ་བའོ། །དེ་ལྟ་བུར་གྱུར་པ་ཞེས་བྱ་བ་ནི། ཁྱད་པར་དང་ཁྱད་པར་ཅན་གྱི་རྣམ་པའོ། །དོན་དེ་ལྟ་བུར་གྱུར་པ་ཞེས་བྱ་བ་ནི། ཁྱད་པར་དང་ཁྱད་པར་ཅན་དུ་གྱུར་པའོ། །འོན་ཏེ་དེའི་ཞེས་བྱ་བ་དོན་དང་འདྲ་བའི་རང་བཞིན་ནོ། །གཞན་གྱིས་ཞེས་བྱ་བ་ནི། ཤེས་པ་གཉིས་པས་དོན་དང་འདྲ་བའི་ཤེས་པ་དེའི་རང་བཞིན་དུ་དོན་དང་འདྲ་བའི་མཚུངས་པའི་རྣམ་པ་ཅན་གྱི་ཤེས་པ་དང་རྣམ་པ་མཚུངས་པར་རོ། །འདི་ལ་བརྗོད་པ་ནི་འོ་ན་ཞེས་བྱ་བའོ། །རེ་ཞིག་དང་པོ་ནི་མཐོང་བ་ནི་ཁྱད་པར་མེད་པ་ནི་དོན་ཉིད་རྟོགས་པ་ཡིན་ཏེ། མཐོང་བ་མ་རྟོགས་པའི་ཕྱིར་རོ། །གཞན་གྱིས་ནི་ཤེས་པ་གཉིས་པས་སོ། །ཅི་ལྟར་རྟོགས་ཞེས་བྱ་བ་ནི་གཅིག་འཁྲུལ་བར་ཐལ་བའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་གཅིག་གི་ཚེ་ཉིད་མཐོང་བའི་ཁྱད་བར་ཅན་དང༌། ཁྱད་པར་མེད་པ་རྟོགས་པ་དེའི་ཚེ་ཉེས་པ་འདིར་འགྱུར་བ་ཞིག་ན། འོན་ཀྱང་དང་པོ་ནི་ཁྱད་པར་མེད་པར་རྟོགས་ལ་ཕྱིས་ནི་ཁྱད་པར་ཅན་དུ་ཡིན་ཏེ། དཔེར་ན་དང་བོའི་སྐྱེས་བུའི་དབྱིག་པས་ཁྱད་པར་དུ་མ་བྱས་པར་རྟོགས་ལ། ཕྱིས་ནི་དེས་ཁྱད་པར་དུ་བྱས་འཛིན་བཞིན་ནོ། །དེས་ཉེས་པ་ཅི་ཡོད་དུ་བསམས་ནས་ཕ་རོལ་པོ་བརྗོད་པ་ནི་འོན་ཏེ་ཕྱིས་ཞེས་བྱ་བའོ། །སུན་འབྱིན་པ་ནི་དེ་ཡང་ཞེས་བྱ་བའོ། །ཤེས་པ་དང་པོ་དེ་ནི་ཕྱིས་སེམས་གཞན་གྱིས་དོན་གྱི་རིག་པ་ཡིན་ན། སེམས་དང་པོ་དེ་དོན་གྱི་རྣམ་པ་ཉིད་ཡིན་མོད། གཞལ་བྱ་དོན་གྱི་ཁྱད་པར་ཅན་ཉིད་ནི་མ་ཡིན་ནོ། །མཐོང་བ་དེས་ནི་དོན་ད་རང་གིས་ཁྱད་པར་དུ་བྱས་
པ་ཉིད་དུ་ནི་རིག་པ་མ་ཡིན་ནོ། །དེ་ལྟར་འགྱུར་མོད་ཅི་སྐྱོན་སྙམ་ན། དེ་ལྟ་མིན་པ་ཞེས་གསུངས་སོ། །གཞན་ནི་ཤེས་པ་གཉིས་པའི་དུས་ནའོ། །དེའི་ཚེ་འདིར་བདེན་བ་གང་ཡིན་པ་དེ་འགའ་ཡང་མ་ཡིན་ནོ། །འབའ་ཞིག་དང་འབའ་ཞིག་པ་ཉིད་དུ་གྱུར་བའི་དོན་དང་ཤེས་པ་དག་ནིའོ། །དོན་རྟོགས་པའི་དུས་སུ་ནི། དེའི་ཤེས་པ་རྟོགས་པ་མེད་པའི་ཕྱིར་ལ། ཤེས་པ་རྟོགས་པ་མེད་པའི་དུས་ན་ཡང་དོན་མ་ཡིན་པའི་ཕྱིར་རོ། །དེའི་ཤེས་པའི་དུས་ན་དོན་སྒྲོ་བཏགས་ནས་དེ་ལྟར་རྟོགས་པ་ཡིན་ནོ་ཞེ་ན། དེ་སྒྲོ་འདོགས་ན་ནི་ཞེས་གསུངས་སོ། །དེའི་རྣམ་པ་དེ་ནི་ཤེས་པ་ཙམ་ཉིད་ཡིན་གྱི་དོན་ནི་མ་ཡིན་ཏེ། སྒྲོ་བཏགས་པ་ཙམ་གྱིས་ནི་དོན་དུ་འགྱུར་བ་མི་སྲིད་དོ། །དེ་ལ་ཡང་ཞེས་བྱ་བ་ནི་དོན་ཤེས་པ་ལའོ། །དེར་ཞེས་བྱ་བ་རྣམ་པ་གང་ལ་དོན་དུ་སྒྲོ་བཏགས་པ་དེ་མི་སྲིད་བའི་ཕྱིར་རོ། །དོན་རྟོག་པ་ནི་མཐོང་བ་མ་ཡིན་ནམ་ཞེས་པའོ། །འདི་ཉིད་རྣམ་པར་འགྲེལ་པ་ནི་ཀ་བ་ལ་སོགས་པ་ནི་ཞེས་བྱ་བའོ། ལན་དེ་གང་ཡིན་སྙམ་ན་གལ་ཏེ་ཞེས་བྱ་བའོ། །དཀར་པོ་ལ་སོགས་པའི་མཐོང་བ་ན་འདི་རིག་པ་གང་ཡིན་པ་དེ་གལ་ཏེ་ཁྱེད་ཀྱིས་འདོད་པའི་མངོན་པར་གསལ་བ་ལས། རང་བཞིན་གཞན་ཡིན་ན། དེའི་ཚེ་དཀར་པོ་ལ་སོགས་པ་གསལ་བར་མི་འགྱུར་རོ། །གལ་ཏེ་གང་གིས་འདི་སྐད་བརྗོད་པ་སྣང་བཞིན་པའི་རང་བཞིན་མི་གསལ་བར་སུས་ཁས་བླངས་ཤེ་ན། གཞན་གྱིས་བརྗོད་བའི་ཞེས་སྨོས་ཏེ། སྣང་བཞིན་པའི་རང་བཞིན་ནི་རང་གི་ངོ་བོས་གསལ་བ་མ་ཡིན་ནོ་ཞེས་བྱ་བ་འདིའི་དོན་ཏེ། སྔོན་པོ་ལ་སོགས་པ་གཟུང་བའི་རྣམ་པ་གསལ་བ་གང་ཡིན་པ་འདི་བློའི་ནང་དུ་ཞུགས་པ་བློ་དེ་ལྐོག་ཏུ་གྱུར་པ་ཡིན་ན། སྔོན་པོ་ལ་སོགས་པ་སྣང་ཡང་ལྐོག་ཏུ་འགྱུར་ཏེ། ལྐོག་ཏུ་གྱུར་པའི་རང་བཞིན་གྱི་བློ་ལས་ཐ་མི་དད་པའི་ཕྱིར་རོ། །གང་གི་ཕྱིར་གཞན་གྱིས་བརྗོད་པའི་དོན་འདི་ཡིན་པ་དེས་ནའོ། །སྣང་བཞིན་པའི་སྔོན་པོ་ལ་སོགས་པ་ལྐོག་ཏུ་གྱུར་མོད། ཅི་སྐྱོངས་སྙམ་ན་དེ་ལྟ་ཡིན་དང་ཞེས་སྨོས་སོ། །ཇི་ལྟར་ཡིན་དང་དེ་བཞིན་དུ་ལྐོག་ཏུ་འགྱུར་ཞེ་ན། རྗེས་སུ་དཔག་པ་ལས་ཡང་ཞེས་སྨོས་སོ། གསལ་བར་སྣང་བ་ལྐོག་ཏུ་གྱུར་བ་དེ་ནི་མངོན་སུམ་ལ་ཡང་ཡོད་དེ།
དེས་ན་དོན་ལྐོག་ཏུ་གྱུར་པ་ཁོ་ནར་འགྱུར་རོ། །འོན་ཏེ་རྗེས་སུ་དཔག་པ་ལ་རེ་ཞིག་དོན་རྟོགས་པ་ནི་ཡོད་པ་ཉིད་དོ། །དེ་དང་འདྲ་བར་མངོན་སུམ་ཡང་འགྱུར་རོ། །དེས་ན་ལྐོག་ཏུ་གྱུར་པ་ཡིན་ཡང་ཅི་ཆད་སྙམ་ན། གལ་ཏེ་ཞེས་བྱ་བའོ། །རིག་པ་དེ་ཉིད་བརྗོད་པ་ནི། གལ་ཏེ་རང་གི་ཞེས་བྱ་བའོ། །རང་གི་ཆ་སྟེ་རང་བཞིན་མི་རིག་ན། བློས་རང་གི་དམིགས་པར་བྱ་བའི་དོན་དང༌། བདག་ཉིད་ཀྱང་མི་རིག་པར་འགྱུར་རོ། །དམིགས་པའི་ཁྱད་པར་བརྗོད་པ་ནི། གཟུགས་ལ་སོགས་པའི་ཡུལ་ཅན་ཡིན་ནོ་ཞེས་བྱ་བར་ཏེ། ཡུལ་ཅན་གྱི་བདེ་བ་ཕན་ཚུན་ཐ་དད་པ་ཁོ་ནའོ། །གོམས་པའི་ཁྱད་པར་བརྗོད་པ་ནི། དེ་བཞིན་དུ་ཞེས་བྱ་བ་ལ་སོགས་པའོ། །འོན་ཏེ་ཡུལ་ལ་སོགས་པས་བསྐྱེད་པ་ནི་ཡིན་པ་རྣམ་པར་ཤེས་པའང་མ་ཡིན་པའི་ཕྱིར་འགལ་བ་ཅི་ཡོད་སྙམ་ན། གལ་ཏེ་ཞེས་བྱ་བའོ། །དེ་ལ་ཞེས་བྱ་བ་ནི་ཡུལ་ལའོ། །རྣམ་པར་ཤེས་པའི་ཚོགས་པས་བསྐྱེད་པའི་རྣམ་པར་ཤེས་པ་ཉིད་ཡིན་པའི་ཕྱིར་ཏེ། རྣམ་པར་ཤེས་པ་གཞན་བཞིན་ནོ་ཞེས་བྱ་བའི་དོན་ཏོ། །འདི་དག་ཅེས་བྱ་བ་ནི་རྣམ་པར་ཤེས་པའི་རང་བཞིན་ཅན་གྱི་བདེ་བ་ལ་སོགས་པ་རྣམས་སོ། །གལ་ཏེ་འཛིན་པར་བྱེད་པ་གཞན་དམིགས་པ་མེད་ཀྱང་དེ་དག་ཅི་ལྟར་རང་རིག་པ་ཉིད་ཡིན་སྙམ་ན། འཛིན་པར་བྱེད་པ་རྟོགས་པ་མེད་པ་ན་མངོན་སུམ་དུ་གྱུར་པ་གང་ཡིན་པ་དེ་ཉིད་རང་རིག་པ་ཞེས་བརྗོད་པ་ཡིན་ནོ། །དེ་ལྟར་མངོན་སུམ་དུ་གྱུར་པ་ནི་འདོད་ཆགས་ལ་སོགས་པ་ལ་ཡང་ཡོད་པས་ཇི་ལྟར་རང་རིག་པ་མ་ཡིན་འདི་དག་ཅེས་བྱ་བ་ནི་བདེ་བ་དང་ཆགས་པ་ལ་སོགས་པའོ། །གཞན་གྱི་རྒྱུ་ལ་ཡོད་པའི་ཤེས་པས་ཀྱང་བདེ་བ་ལ་སོགས་པ་གཟུང་བ་ཉིད་དུ་རིག་པར་འགྱུར་ལ། རང་གི་རྒྱུད་ལ་ཡོད་པས་ཀྱང་དེ་བཞིན་དུ་ཡིན་པས་ཁྱད་པར་འགའ་ཡང་མེད་དོ། །འདི་ལ་དཔེ་བརྗོད་པ་ནི་གཞན་གྱི་མེ་ཞེས་བྱ་བའོ། །གཞན་གྱི་ལ་ཅི་དེར་ཞེས་བྱ་བ་སིམ་པར་བྱེད་པ་ཉིད་དུ་འགྱུར་རམ། འོ་ན་ཡིད་དགེ་བ་ལ་གཞན་གྱི་ཙནྡན་ཇི་ལྟར་འགྱུར་ཞེ་ན། དེ་ནི་ཞེས་སྨོས་སོ། །འདིར་རེ་ཞིག་ཡིད་དགེ་བ་མ་ཡིན་པ་ལ་ནི། གཞན་གྱི་ཙནྡན་གྱིས་བདེ་བ་ཉིད་བསྐྱེད་པ་དེས་ན། དེ་ལ་ཚུལ་ཇི་ལྟར་ཞེས་སྨོས་སོ། །འདི་ལ་ཕ་
རོལ་པོའི་ལན་ནི་ཡིད་དགེ་བ་མ་ཡིན་པ་དེ་ལ་ནི། གཞན་གྱིས་ཙནྡན་ལ་བརྟེན་ནས་རང་གི་བདེ་བ་སྐྱེས་པ་ཡིན་ནོ། །དེ་བཞིན་དུ་གཞན་གྱི་བདེ་བ་རིག་པ་ན་གང་གི་ཚེ་བདེ་བ་རིག་པར་འགྱུར་བ་དེའི་ཚེ་ན་བདེ་བ་དེ་བདག་ཉིད་ཁོ་ནའི་སྐྱེས་པ་ཡིན་གྱི། གཞན་གྱི་བདེ་བས་བདེ་བ་ནི་མ་ཡིན་ནོ་ཞེ་ན། འདི་ལ་གྲུབ་པའི་མཐའ་པས་གསུངས་པ་ནི། གང་གི་ཚེ་གཞན་གྱི་བདེ་བ་ཚོར་ཡང་རང་གི་བདེ་བ་མ་སྐྱེས་པ་དེའི་ཚེ་ཡང་གཞན་གྱི་བདེ་བ་རིག་པར་བྱེད་པ་སྐྱེས་བུ་དེའི་ཅི་སྟེ་བར་གནས་པ་མ་ཡིན། དེ་ལྟར་བརྩད་པ་ལ་གཞན་གྱིས་སྨྲས་པ། རང་གི་བདེ་བས་བདེའི་གཞན་གྱི་བདེ་བས་ནི་མ་ཡིན་ཏེ། དེས་ན་གཞན་གྱི་བདེ་བ་རིག་པ་ན་རང་གི་བདེ་བ་སྐྱེ་བ་ཡིན་པས་ན། དེའི་ཚེ་བདེ་བར་འགྱུར་བ་མ་ཡིན་ནོ་ཞེ་ན། འདི་ལ་བརྗོད་པ་ནི་མ་ཡིན་ཞེས་བྱ་བའོ། །རང་གི་བདེ་བ་ཅི་འདྲ་བ་གཞན་གྱི་ཡང་དེ་འདྲ་བ་ཁོ་ན་ཡིན་ཏེ། དེས་ན་དེ་དག་གི་རང་བཞིན་རྣམ་པར་དབྱེར་མེད་དོ། །གཉི་ག་ཡང་ཚིམ་པར་བྱེད་པའི་རང་བཞིན་ཡིན་པའི་ཕྱིར་རོ། །དེས་ན་ཇི་ལྟར་རང་གི་བདེ་བས་བདེ་བ་བཞིན་དུ་གཞན་གྱི་བདེ་བས་ཀྱང་འགྱུར་རོ། །གཞན་གྱི་བདེ་བར་རིང་བའི་ཕྱིར། དེས་བདེ་བ་ཉིད་དུ་མི་འགྱུར་རོ་ཞེ་ན་འདི་ལ་བརྗོད་པ་ནི། དེའི་རང་བཞིན་ཉིད་རིག་ན་ཞེས་བྱ་བ་སྟེ། བདེ་བའི་རང་གི་ངོ་བོ་རིག་ན་རིང་བ་ཉིད་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་གཞན་གྱིས་བདེ་བ་ལས་རྒྱུད་གཞན་ལ་ཤེས་པས་གནས་པའི་ཤེས་བསམ་རག་པ་དེའི་ཕྱིར་བདེ་བར་མི་འགྱུར་རོ། །འདི་ལ་བརྗོད་པ་ནི་འོ་ན་རང་ཉིད་ཀྱིས་བདེ་བ་ལ་རེག་པ་ཡིན་ལ་རེག་པ་ན་ཡང་རང་རིག་པ་ཉིད་དུ་འགྱུར་ཏེ། དེ་ལྟ་མ་ཡིན་ན་རེག་པའི་སྒྲའི་དོན་མི་འཐད་པའི་ཕྱིར་རོ། །འདི་ཉིད་བསྒྲུབ་པ་ནི་རང་གི་བདེ་བ་ནི་བདག་ཉིད་ཐམས་ཅད་དམ་ཕྱོགས་གཅིག་གིས་རེག །རེ་ཞིག་ཕྱོགས་དང་པོ་ལ་བརྗོད་པ་ནི་བདག་ཉིད་ཅེས་བྱ་བའོ། །གཉིས་པ་ལ་གསུངས་པ་ནི། དེ་ལྟ་མ་ཡིན་ན་ཞེས་བྱ་བ་རྗེས་སུ་མ་ཞུགས་ནའོ། །བདེ་བ་རིག་པ་རྣམ་པར་དབྱེར་མེད་པ་དེར་མི་འགྱུར་རོ། །འདིར་དབྱེ་བ་ཅི་ཡོད་ཅེས་དྲིས་པ་ལ་ལན་དེ་ལས་ཞེས་བྱ་བ་སྟེ་བདེ་བ་ལས་སོ། །དེར་ནི་བདེ་བར་རོ། །དེ་ལྟ་བུ་གང་ཡིན་པ་དེ་བདེ་བའི་བློ་སྟེ། བདེ་བ་རིག་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །བློ་དེ་ནི་ཡུལ་ལས་སྐྱེས་པ་ནི་མ་ཡིན་ནོ། །
ཇི་ལྟར་ཞེ་ན་རྗེས་སུ་དཔག་པའི་ཞེས་སྨོས་ཏེ། གཞན་གྱི་བདེ་བ་ནི་མངོན་སུམ་དུ་རྟོགས་པར་མི་ནུས་པའི་ཕྱིར་རོ། །དེའི་རང་བཞིན་དུ་ཞེས་བྱ་བ་བདེ་བར་སྣང་བ་མངོན་སུམ་གང་ཡིན་པ་དང་ངོ༌། །འདིས་ནི་བདེ་བ་ལས་དངོས་སུ་སྐྱེས་པར་བསྟན་ཏོ། །ཡུལ་ལས་དངོས་སུ་སྐྱེས་པ་གང་ཡིན་བདེ་མངོན་སུམ་ཡིན་གྱི་གཞན་ནི་མ་ཡིན་ཏེ། དེ་ལྟ་བུའི་མངོན་སུམ་ལས་བདག་གི་བདེ་བ་རིག་པར་འགྱུར་བ་ཡིན་ནོ། །ཕྱེད་ཕྱི་མ་འཆད་པ་ནི་གཞན་ཞེས་བྱ་བའོ། །ཁས་བླངས་པ་ཞེས་བྱ་བ་ཕ་རོལ་གྱི་ཁས་བླངས་པ་ཉིད་ལས་སོ། །ཇི་ལྟར་མིག་ལ་སོགས་པས་མངོན་སུམ་བསྐྱེད་པ་དེ་བཞིན་དུ་རྟགས་མཐོང་བས་ཀྱང་ཡིན་པའི་ཕྱིར་ན་མིག་ལ་སོགས་པ་དང་རྟགས་མཐོང་བ་ནི་མཚུངས་སོ། །གཉི་གར་ཡང་ཞེས་བྱ་བ་ནི་དེ་ལས་སྐྱེས་པ་དང་དེ་སྣང་བར་ཕྱེད་སྔ་མ་འགྲེལ་པ་ནི་ཁས་བླངས་པས་ནི་ཞེས་བྱ་བ་སྟེ། དེའི་རང་བཞིན་ཉིད་དེས་རྟོགས་པ་ཡིན་ནོ་ཞེས་བྱ་བ་དེ་ལྟ་བུའི་མཚན་ཉིད་ཀྱིས་ནའོ། །འདི་ཉིད་དོ་ཞེས་བྱ་བ་ནི་འཆད་བཞིན་པའོ། །རྟགས་ལས་སྐྱེ་བར་ཞེས་བྱ་བ་ནི་ཡུལ་དུ་གྱུར་པའི་གཞན་གྱི་བདེ་བ་ལས་དངོས་སུ་སྐྱེ་བར་འགོག་པ་ཡིན་ནོ། །འདི་ལ་བརྗོད་པ་ནི་དེ་ལྟ་ན་ནི་ཞེས་བྱ་བའོ། །སྤྱི་ཞེས་བྱ་བ་ནི་བདེ་བ་ཉིད་ཀྱི་ཕྱིར་རོ། །དེའི་ཞེས་བྱ་བ་ཡུལ་གྱི་རྣམ་པས་སྟོང་པ་ཉིད་དོ། །གལ་ཏེ་རྗེས་སུ་དཔག་པ་ཡིན་ན་ཇི་ལྟར་རང་རིག་པ་ཡིན་ཞེ་ན། གལ་ཏེ་ཞེས་བྱ་བ་སྨོས་སོ། །གཞན་གྱི་ཞེས་བྱ་བ་མི་གསལ་བ་ཉིད་དུ་སྣང་བའི་རྣམ་པ་ལའོ། །དེ་ལ་ཞེས་བྱ་བ་ནི་མི་གསལ་བའི་རང་བཞིན་ནོ། །ལན་ནི་མ་ཡིན་ཏེ་ཞེས་བྱ་བའོ། །གལ་ཏེ་ཞེས་བྱ་བ་ནི་གལ་ཏེ་གཞན་གྱིས་མ་རིག་པ་དེ་ལྟ་ན་ཡང་དེ་ནི་དེ་ཉིད་ཀྱི་ཡིན་ནོ་ཞེ་ན། གཞན་གྱིས་ཞེས་གསུངས་སོ། །འོན་ཏེ་ཆོད་པ་དང་མ་ཟད་པ་ལ་སོགས་པས་གཞན་གྱིས་མཚོར་བ་ཡིན་ནོ་ཞེ་ན་དེ་ལ་ཞེས་བྱ་བའོ། །འོན་ཏེ་བར་ཆད་ལ་སོགས་པ་སྲིད་པ་ཁོ་ནའོ་ཞེ་ན། བར་དུ་ཞེས་བྱ་བ་གསུངས་སོ། །དེ་དང་ནི་གཞན་དང་ངོ༌། །དེ་ནི་གཞན་དང་འབྲལ་བའོ། །གལ་ཏེ་རྒྱལ་པོའི་བཀའ་ལུང་གི་དབང་གིས་དེ་སྐད་སྨྲ་ན་སྨྲས་མོད། འོན་ཀྱང་ཐ་སྙད་ནི་གང་དུ་ཡང་དེ་ལྟར་མ་མཐོང་ངོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བ་ནི་ཕ་རོལ་གྱིའོ། །
གལ་ཏེ་གཞན་གྱིས་བདེ་བའི་རང་བཞིན་དེ་ཉིད་རྟོགས་ན་དེའི་ཚེ་དེ་ཡང་བདེ་བར་འགྱུར་རོ་སྙམ་དུ་དོགས་ན། དེ་ལྟ་ན་ཡང་ཞེས་སྨྲས་སོ། །རྗེས་སུ་དཔག་པས་བདེ་བ་སྤྱད་པས་ནི་བདེ་བར་འགྱུར་བ་མ་ཡིན་ནོ་ཞེས་སྦྱར་རོ། །ཤེས་པ་རྣམ་པ་མཚུངས་པ་ཅན་དག་ལ་མངོན་སུམ་དང་རྗེས་སུ་དཔག་པའི་མཚན་ཉིད་ཐ་དད་པ་དེ་དག་ལས་ཡིན། རང་གི་ཞེས་བྱ་བ་ནི་རྣམ་པར་འགྲེལ་པའོ། །དེ་ལྟ་ན་ཡང་ཞེས་བྱ་བ་ནི་འོན་ཀྱང་ཞེས་བྱ་བའི་དོན་ཏོ། །འོ་ན་རང་གི་ངོ་བོ་ཐ་དད་པ་ཉིད་དུ་འགྱུར་རོ་ཞེ་ན། གཉི་གའི་ཞེས་གསུངས་སོ། །མཐོང་ངོ་ཞེ་ན་ཞེས་བྱ་བ་ནི་རྒྱུ་ཐ་དད་པར་རོ། །རང་གི་བརྗོད་པ་ནི་རང་གི་ངོ་བོའོ་ཞེས་བྱ་བའོ། །དེས་ན་ཞེས་བྱ་བ་རང་གི་ངོ་བོ་ཐ་དད་པས་སོ། །སོགས་པའི་སྒྲའི་གསུངས་པ་ནི། དེ་བཞིན་དུ་ཞེས་བྱ་བའོ། །དོན་གཅིག་ལྡན་ཞེས་བྱ་བ་ནི་བཤད་པ་ནི་དོན་གཅིག་ལ་ཞེས་བྱ་བའོ། །དེ་ཉིད་གང་ལ་འདེབས་པ་ནི་འདི་ལྟར་ཞེས་བྱ་བའོ། །དེ་ལྟ་བུ་དང་དེ་ལྟ་བུ་མ་ཡིན་པ་ཞེས་བྱ་བ་འདི་ཉིད་འཆད་པ་ནི། གཞན་གྱི་བདེ་བ་ཉིད་རྟོགས་པ་ན། སྡུག་བསྔལ་ལ་སོགས་པར་འགྱུར་བ་ཡིན་ནོ་ཞེས་སོ། །གང་གི་ཕྱིར་དེ་ལྟ་བུའི་ཉེས་པ་ཡོད་པའི་གཏན་ཚིགས་དེས་ན་མངོན་སུམ་ལས་རྗེས་སུ་དཔག་པ་ཐ་དང་པར་རམ། མ་མཐོང་བ་དེས་མངོན་སུམ་དང་རྗེས་སུ་དཔག་པ་ཐ་དད་པར་མི་རིགས་སོ། །འདི་ཡང་ནི་བདེ་བ་དང་སྡུག་བསྔལ་ལ་སོགས་པའོ། །དེས་ན་ཁྱེད་ཀྱི་འདི་ནི་མི་འདོད་པ་ཐོག་ཏུ་བབ་པ་མ་ཡིན་ནོ་ཞེས་བྱ་བ་ནི་གཞན་གྱི་བསམ་པའོ། །འགྱུར་མོད་ཅེས་བྱ་བ་ནི་གྲུབ་པའི་མཐའོ། །བདེ་བ་ལ་སོགས་པ་ནི་ཡང་མ་མཐོང་བའི་དབང་གིས་ཡིན་ནོ། །འདི་ཁོ་བོ་མི་རྩོད་ཀྱི་འོན་ཀྱང་རང་རིག་པ་དང་རྣམ་པ་དང་བཅས་པ་ཉིད་ཀྱང་མ་མཐོང་བ་ཉིད་ཀྱི་དབང་གིས་འགྲུབ་པར་འགྱུར་རོ། །དེ་ལས་ཏེ་དང་པོ་གསལ་བར་མཐོང་བ་ལས་མངོན་སུམ་ཉིད་དུ་གནས་ཀྱི་དབང་པོ་ལས་སྐྱེས་པ་ཉིད་ཀྱིས་ནི་འཇིག་རྟེན་མངོན་སུམ་ཉིད་དུ་ངེས་པ་མ་ཡིན་ནོ་ཞེས་དགོངས་པའོ། །ཅིའི་ཕྱིར་ཞེ་ན། བདག་གིས་མི་གསལ་བར་རྟོགས་པ་གང་ཡིན་པ་དེ་ནི་མངོན་སུམ་ལས་མ་ཡིན་ནོ་ཞེས་རྟོགས་པའི་ཕྱིར་རོ། །ཕྱེད་ཕྱི་མ་རྣམ་པར་འགྲེལ་པ་ནི་གང་གི་ཕྱིར་ཞེས་བྱ་བའོ། །འདས་མ་ཐག་པ་ཉིད་
ཕ་རོལ་པོ་སྟོན་པ་ནི་འདི་ལྟར་ཞེས་བྱ་བའོ། །གཉིས་ཞེས་བྱ་བ་དང་གསལ་བ་དང་དབང་པོ་མེད་པའི་ཕྱིར་ན་ཡང་དག་པར་འཛིན་པ་དང༌། ཉེ་བར་རིག་པ་གཉིས་པོ་ནི་ཇི་ལྟར་ཡང་ཡོད་པར་མི་འགྱུར་རོ། །དེའི་ཞེས་བྱ་བ་མངོན་སུམ་གྱི་ཡན་ལག་ཉེ་བར་གནས་པ་རིག་པ་ཉིད་རྗེས་སུ་དཔག་པ་ལ་མ་ཚང་བའི་ཕྱིར་ལ་ཡང་མངོན་སུམ་མ་ཡིན་པར་འགྱུར་རོ། །དེ་དག་གི་ཞེས་བྱ་བ་ནི་རིང་པོ་དང་རིང་པོ་མ་ཡིན་པ་མཐོང་བ་དག་གིའོ། །དེའི་ཞེས་བྱ་བ་ནི་རིང་པོ་མཐོང་བ་བྱ་རྒོལ་ལ་སོགས་པའོ། །དེ་ཉིད་དེ་རིང་ན་འདུག་པའི་དངོས་པོ་ཉིད་གསལ་བའི་ཕྱིར་ཐག་རིང་པོ་མ་ཡིན་ནོ་ཞེས་བརྗོད་པར་བྱེད་དེ། གང་གི་ཕྱིར་དབང་པོའི་ནུས་པ་གང་ཡིན་པ་དེ་ལ་ལྟོས་ནས་རིང་པོ་དང་རིང་པོ་མ་ཡིན་པ་རམ་པར་གནས་པའི་ཕྱིར་རོ། །གང་ལ་དབང་པོའི་ཤེས་པ་བསྐྱེད་པའི་ནུས་པ་ཡོད་པ་ཞེས་བྱ་བའོ། །དེ་ཡང་ཞེས་བྱ་བ་རྣམ་པར་ཤེས་པ་ཡང་རྣམ་པ་མེད་པ་ཁོ་ནར་ཟད་མོད། ད་ནི་གྲུབ་པའི་མཐའ་གསུངས་པ་ནི། དེ་ནི་མི་རུང་སྟེ་ཞེས་བྱ་བའོ། །གཞན་དག་ཅེས་བྱ་བ་ནི་རྗེས་སུ་དཔག་པ་ལས་སོ། །དེ་ཡང་ཞེས་བྱ་བ་ནི་རྗེས་སུ་དཔག་པ་ཡང་ངོ༌། །རྗེས་སུ་དཔག་པ་དེ་ཡང་རྟགས་ལས་འཇུག་པ་ཡིན་ནོ། །རྗེས་སུ་དཔག་པར་བྱ་བའི་ཤེས་པ་དང་འབྲེལ་པ་དང་ལྡན་པ་གཞན་ནི་མེད་དེ། དེས་དབང་པོ་ལ་སོགས་པ་ཁོ་ན་རྟགས་ཡིན་ནོ། །གལ་ཏེ་དེ་ནི་དོན་གྱིས་གོ་བས་དཔོག་པར་འདོད་པ་ཡིན་ནོ། །དོན་གྱིས་གོ་བ་དེ་ནི་འབྲེལ་པ་མཐོང་བ་ཉིད་ལས་མ་ཡིན་ནོ། །དེས་ན་ཡིད་ལ་བྱེད་པའི་མཐར་ཐུག་པ་རྣམས་ལས་གཞན་ཁོ་ན་ཞིག་རྟགས་སུ་འགྱུར་རོ་ཞེ་ན། དོན་གྱིས་གོ་བ་ཡང་ཞེས་གསུངས་སོ། །གཞན་དུ་ནི་ཤེས་པ་མེད་པར་རོ། །འོན་ཏེ་ནུས་པའི་རྒྱུ་མཐོང་བ་ལས་འབྲས་བུ་རྗེས་སུ་དཔོག་ན་དེའི་ཚེ་དེ་ཇི་ལྟར་འཁྲུལ་སྙམ་ན། ནུས་པ་ཡོད་ཅེས་སྨོས་སོ། །དབང་པོ་གང་ལ་རྣམ་པར་ཤེས་པའི་མཚན་ཉིད་ཀྱི་འབྲས་བུ་མཐོང་བ་ཡོད་པ་མ་ཡིན་པ་དེ་མཐའི་སྐད་ཅིག་ཉིད་ཐོབ་པར་ཇི་ལྟར་ངེས་དོན་ཀྱང་དེ་བཞིན་དུ་རྟགས་མ་ཡིན་ནོ་ཞེས་འབྲེལ་ཏོ། །གཞན་གྱི་ཚེ་ཞེས་བྱ་བ་ནི་རྣམ་པར་ཤེས་པ་ཕྱི་མའི་དུས་སུའོ། །དེ་ཉིད་ཀྱི་
རི་ཁྲོད་རྗེས་བཤད་པ་ཡིན་ནོ་ཞེས་སྦྱར་རོ། །རྗེས་སུ་དཔག་པ་ལས་ཞེས་བྱ་བ་ནི་གསལ་བའི་དོན་གཞན་དུ་མི་འཐད་པ་ལས་སོ། །གཅིག་གི་ཚེ་ཞེས་བྱ་བ་ནི་གསལ་བ་ཉིད་རྟགས་སུ་ཁས་བླངས་པ་ནའོ། །གཞན་གྱི་ཚེ་ཞེས་བྱ་བ་ནི་གསལ་བར་གྱུར་བ་རྟགས་སུ་ཁས་ལེན་པ་ནའོ། །གསལ་བ་མ་ཤེས་ན་གསལ་བར་གྱུར་པ་མི་ངེས་པའི་ཕྱིར་ཏེ། དབྱིག་པ་མ་རྟོགས་པར་དབྱིག་པ་ཅན་དུ་མི་རྟོགས་པ་བཞིན་ནོ། །འོན་ཏེ་རྗེས་སུ་དཔག་པ་ཉིད་ཀྱིས་གསལ་བ་ཉམས་སུ་མྱོང་བ་དེས་ན་གསལ་བར་འགྱུར་བའི་དོན་ངེས་ལ་དེ་ལས་ཤེས་པ་རྗེས་སུ་དཔོག་པ་ཡིན་ནོ་སྙམ་ན། རྗེས་སུ་དཔག་པས་ཞེས་སྨོས་སོ། །འོན་ཏེ་གསལ་བ་ནི་མངོན་སུམ་ཉིད་ཀྱིས་རྟོགས་པ་དེས་ན། གསལ་བར་གྱུར་བའི་དོན་ངེས་པ་ནི་བློ་རྗེས་སུ་དཔོག་པ་ཡིན་ནོ་ཞེ་ན། དོན་གྱི་ཞེས་གསུངས་ཏེ། དེ་ཉིད་བློ་ཡིན་ནོ་ཞེས་བྱ་བའི་དོན་ཏོ། །འོ་ན་བྱ་བ་ཉིད་དཔག་མོད་བློ་ཇི་ལྟར་ཞེ་ན། བྱ་བ་ཡང་བློ་ཡིན་ནོ་ཞེས་སྨོས་སོ། །གཞན་དུ་མིན་ཞེས་བྱ་བ་ནི་བྱ་བས་བྱས་པའི་ཁྱད་པར་སྤངས་ནས་ནི་ལས་སུ་འགྱུར་བ་མ་ཡིན་ནོ། །ཁྱད་པར་ལས་ཉིད་ཡིན་ནོ་ཞེ་ནའོ། །དེའི་ཚེ་བྱ་བ་ཙམ་རྗེས་སུ་དཔོག་པར་འགྱུར་གྱི། བྱ་བའི་ཁྱད་པར་དུ་འགྱུར་བའི་བློ་ནི་མ་ཡིན་ནོ། །འདི་ནི་བྱ་བ་ཁས་བླངས་ནས་བརྗོད་པ་ཡིན་ནོ། །ད་ནི་བྱ་བ་ཉིད་མེད་དོ་ཞེས་བརྗོད་པ་ནི། དངོས་པོའི་རང་བཞིན་ལས་ཞེས་བྱ་བའོ། །བྱ་བའི་རང་བཞིན་གྱི་མཐོང་བ་ན་སྣང་བཞིན་པ་ལས་གཞན་ནམ། ལྟ་བ་ལས་གཞན་པ་མ་ཡིན་ནོ། །གཟུང་བ་ཉིད་དུ་རིག་པ་ཡིན་ལ། གཟུང་བ་མཐོང་པ་དེ་ལས་ནི་འཛིན་པར་བྱེད་པ་རྗེས་སུ་དཔོག་གོ་སྙམ་ན། འདི་ལ་བརྗོད་པ་ནི་དེ་ནི་མི་རུང་སྟེ་ཞེས་བྱ་བའོ། །བྱེད་པ་ནི་ངས་གཟུང་ངོ་ཞེས་བློས་སོ། །བློའི་བྱེད་པས་ཞེས་རང་བརྗོད་པའི་ཕྱིར་རོ། །དེ་ལས་ཞེས་བྱ་བ་ནི་བྱེད་པ་ལས་སོ། །འོན་ཏེ་བྱ་བའི་མིང་ཅན་འཛིན་པའི་མཚན་ཉིད་ཀྱིས་མཐོང་བ་ཡང་དོན་ལས་གཞན་ཡིན་ན། དེའི་ཚེ་རང་བཞིན་གཉིས་སུ་མཐོང་བར་འགྱུར་ཏེ། མཐོང་བའི་རང་བཞིན་དང་དོན་གྱི་རང་བཞིན་དུའོ། །ཇི་ལྟར་གནས་པ་བཞིན་ཞེས་བྱ་བ་ནི་དོན་དེ་ཇི་ལྟར་གནས་པ་དེ་ལས་མ་འདས་པས་འཛིན་པ་ཙམ་གྱི་བློས་བྱེད་པར་ཟད་ཀྱི་དོན་དེ་ལ་ཁྱད་པར་འགའ་ཞིག་བྱེད་པ་ནི་
མ་ཡིན་ནོ། །འོན་ཏེ་འདི་གཟུང་བཞིན་བ་ཉིད་ཀྱིས་ཁྱད་པར་དུ་འཕགས་པར་འགྱུར་རོ་ཞེས་གཟུང་བ་ཞེས་སྨོས་སོ། །གཞན་དུ་ཞེས་བྱ་བ་ཇི་ལྟར་གནས་པའི་རང་བཞིན་དང་མི་མཐུན་པར་འཛིན་ན་ཡང་ངོ༌། །རང་གི་དུས་ཐམས་ཅད་དང་མ་འབྲེལ་ཡང་སྒྲོན་མ་ལ་སོགས་པ་བུམ་པ་ལ་སོགས་པའི་གསལ་བྱེད་ཡིན་ནོ། །ཇི་ལྟར་བུམ་པ་ལ་སོགས་པ་རྣམས་ཇི་སྲིད་གནས་པའི་དུས་དེ་སྲིད་པ་འབྲེལ་པ་ནི་སྒྲོན་མས་བུམ་པ་གསལ་བར་བྱེད་པ་མ་ཡིན་པ་དེ་བཞིན་དུ་ཤེས་པས་ཀྱང་ཡིན་ནོ་ཞེ་ན། འདི་ལ་བརྗོད་པ་ནི་དེ་ལའང་ཞེས་བྱ་བའོ། །མཚུངས་པ་ཉིད་དུ་སྒྲུབ་པ་ནི་གལ་ཏེ་ཞེས་བྱ་བའོ། །དེས་ཀྱང་ཞེས་བྱ་བ་ནི་སྒྲོན་མས་ཀྱང་ངོ༌། །དེ་ལྟ་བུའི་ཞེས་བྱ་བ་གསལ་བའི་རང་བཞིན་ཉིད་དུ་བྱ་བ་དེའི་ཚེ་དོན་དེ་ཉིད་དེ་ལྟ་བུ་ཞེས་བྱ་བ་གསལ་བའི་རང་བཞིན་དུ་གྱུར་བར་སྐྱེའོ་ཞེས་དེ་ལྟར་བརྗོད་པས་ན། དེ་ལྟར་དོན་ཞེས་བྱ་བར་སྦྱར་ཏེ། སྐད་ཅིག་ཉིད་ལ་ནི་བྱ་བ་དང་བྱེད་པ་དང་ལས་དང་བྱེད་པ་པོའི་དངོས་པོའི་འཐད་པ་མ་ཡིན་ཏེ། དེ་ནི་རྟག་པའི་དོན་ལ་བརྟེན་པའི་ཕྱིར་རོ། །འོ་ན་ཐ་སྙད་འདིར་ཇི་ལྟར་འགྱུར་སྙམ་ན། ངས་ཞེས་གསུངས་སོ། །ཅི་སྐད་དུ་བཤད་པ་ནི་ཞེས་བྱ་བ་ནི་སློབ་དཔོན་གྱིས་ཏེ། སྐྱེད་པར་བྱེད་པ་ཉིད་ཀྱི་ཉེ་བར་སྤྱོད་བའི་ཁྱད་པར་གང་ཡིན་དེའི་དབང་གིས་རྒྱུ་དང་འབྲས་བུའི་དངོས་པོའི་ཆའི་ཁྱད་པར་གང་ཡིན་པ་དེ་ལས་སོ། །འོན་ཏེ་གཟུང་བ་དང་འཛིན་པ་ཞེས་བྱ་བ་ནི་མེད་པ་ཉིད་དུའོ་ཞེས་ཇི་ལྟར་རྟོགས་ཤེ་ན། འདི་ལྟར་ཞེས་གསུངས་སོ། །འོ་ན་བློ་གང་ཡིན་པར་འགྱུར་སྙམ་ན། ཁྱད་པར་ནི་ཞེས་བྱ་བ་སྟེ། ཤེས་པར་འགྱུར་བ་ཉིད་ཀྱི་ཁྱད་པར་ཉིད་ལ་དེ་ལྟར་ཞེས་བྱ་བ་བློ་ཞེས་རབ་ཏུ་བརྗོད་དེ་བློས་ཅི་ཞིག་བྱ་ཞེས་བྱ་བའི་དོན་ཏོ། །འོན་ཏེ་དོན་ཤེས་པར་འགྱུར་ཏེ་ཞེས་ཤེས་པ་ཉིད་དེ། ཤེས་པར་འགྱུར་པ་ཉིད་དུ་ཡོངས་སུ་བཅད་པ་ནི་མ་ཡིན་ནོ་སྙམ་ན། དོན་ཤེས་པར་འགྱུར་རོ་ཞེས་པའི་སྐྱེས་བུ་ནི་དོན་ཏེ་ཤེས་པ་ཡིན་ནོ་ཞེས་རྟོགས་པ་ཡིན་ཏེ། དེས་ན་ཤེས་པ་དོན་ལས་ཐ་དད་པར་མི་འགྱུར་རོ། །འོ་ན་ཇི་ལྟར་ཤེས་པ་དང་བྲལ་བའི་དོན་ཙམ་ཤེས་སྙམ་ན། དོན་ཤེས་ཙམ་དུ་ཞེས་བྱ་བ་སྟེ། དོན་ཤེས་པར་གྱུར་ཏོ་ཞེས་ནི་མ་ཡིན་པར་གྱུར་ན། དོན་དེ་རིག་པ་ཉིད་དུ་འགྱུར་ལ་དེ་ལྟ་ན་ཡང་ཧ་ཅང་
ཐལ་བར་འགྱུར་ཏེ། དོན་ཙམ་ལས་རྗེས་སུ་དཔོག་པ་ན་ཐམས་ཅད་ཀྱི་ཤེས་པ་རྗེས་སུ་དཔོག་པར་ཐལ་བ་ཞེས་བྱ་བ་ལ་སོགས་པའོ། །འོན་ཏེ་དོན་ཤེས་པར་འགྱུར་རོ་ཞེས་བྱ་བ་ལ་སོགས་པའི་རྣམ་པ་འདིས་ནི་དོན་གྱི་རང་བཞིན་དུ་གྱུར་པའི་ཤེས་པ་ཉིད་རྟོགས་སུ་ཆུག་པ་དེ་ལྟ་ན་ཡང་ཐ་དད་པར་འགྱུར་རོ་ཞེ་ན། དེའི་ཞེས་བྱ་བ་ནི་ལས་སོ། །དེས་ན་ཤེས་པ་ཡང་ཐ་མི་དད་པ་ཉིད་ཡིན་ཏེ། ཐ་མི་དད་པ་ཉིད་དུ་རྟོགས་པའི་ཕྱིར་རོ། །དེ་ལྟ་མ་ཡིན་ན་ནི་ཞེས་བྱ་བ་ནི་གལ་ཏེ་མཐོང་བ་མ་མཐོང་བ་ལ་ཡང་མཐོང་ངོ་ཞེས་ཐ་སྙད་བྱེད་ན། དེའི་སྐྱེས་བུ་གཞན་གྱིས་མཐོང་བར་གྱུར་པའི་དོན་ལ་ཡང་མཐོང་བར་གྱུར་པའི་ཐ་སྙད་དུ་བྱེད་པར་འགྱུར་རོ། །དེ་ཉིད་དུ་བརྗོད་པ་ནི་འདི་ནི་ཞེས་བྱ་བའོ། །ཇི་ལྟར་དོན་གྱི་ཁྱད་པར་མཐོང་སྙམ་ན། དེ་ཞེས་སྨོས་ཏེ་དོན་ཏོ། །དོན་མཐོང་བ་ཞེས་པ་ཙམ་གྱིས་དེའི་ཁྱད་པར་ཡང་མཐོང་བར་འགྱུར་རོ། །དེ་ལྟ་མ་ཡིན་ན་རང་གིས་རྟོགས་པའི་དུས་དེ་ཡང་དེའི་ཁྱད་པར་ཅི་ལྟར་རྟོགས་དགོངས་པའོ། །ཁྱད་པར་དེ་ཞེས་བྱ་བ་ནི་ཤེས་པས་བསྐྱེད་པའོ། །དེ་དག་ཀྱང་ཞེས་བྱ་བ་ནི་གཞན་གྱིས་བསྐྱེད་པའི་ཁྱད་པར་དག་ཀྱང་ངོ༌། །དེ་ལྟ་མ་ཡིན་ན་རུང་ཡུལ་གནས་པས་མི་ཤེས་པ་ཞེས་བྱ་བ་ལ་སོགས་པའི་གནོད་པ་སྲིད་པར་འགྱུར་བའི་ཕྱིར་རོ། །དེ་ཡང་ཞེས་བྱ་བ་ནི་ཁྱད་པར་ཡང་ངོ༌། །དེ་ལ་ཡང་ཞེས་བྱ་བ་ནི་ཁྱད་པར་ལ་ཡང་ངོ༌། །གཅིག་ཁོ་ན་ཞེས་བྱ་བ་ནི་སྐྱེས་བུས་མཐོང་བའི་དོན་ལ་ཡང་མཐོང་བར་གྱུར་པ་ཉིད་དེ་ནི་གཅིག་ཁོ་ན་ཡིན་ནོ་ཞེ་ན། ལན་ནི་དེ་ལྟ་མ་ཡིན་ན་ནི་ཞེས་བྱ་བའི། །འདི་ཉིད་གསལ་བར་བྱེད་པ་ནི་གང་གི་ཚེ་ཞེས་བྱ་བའོ། །ཁྱད་པར་མེད་པ་ཉིད་སྟོན་པ་ནི་རང་གིས་ཞེས་བྱ་བའོ། །དེ་ཞེས་བྱ་བ་རང་གིས་མཐོང་བ་དང་འབྲེལ་པ་མ་རྟོགས་ནའོ། །མཐོང་བར་གྱུར་པ་ཉིད་ཅེས་བྱ་བ་ནི་གཞན་གྱིས་མཐོང་བར་འགྱུར་བའོ། །རྣམ་དབྱེ་འདིར་ནི་ཞེས་བྱ་བ་ནི་རང་ངམ་གཞན་གྱིས་ཞེས་བྱ་བའི་མཚན་ཉིད་ཅན་ནོ། །འོན་ཏེ་ངའི་བདེ་བ་མ་ཡིན་ན་དེའི་ཚེ་ཇི་ལྟར་ངའི་སྤུ་ལྡང་བར་གྱུར་སྙམ་ན་འདི་ལྟར་ཞེས་སྨོས་སོ། །སུན་འབྱིན་པ་གཞན་ཡང་བརྗོད་པ་ནི་གང་གི་བདེ་བས་ཞེས་བྱ་བའོ། །དེའི་ཞེས་བྱ་བ་བློའི་རྒྱུའིའོ། །གཟུགས་ལ་སོགས་པ་དོན་རྣམས་ཀྱི་དངོས་
བོ་སྟེ་རང་བཞིན་མཐོང་བ་དེ་ཉིད་ཉེ་བ་ཡིན་ལ། གཞན་དུ་ནི་རིང་པོ་ཡིན་པའི་ཕྱིར་ཅི་འགལ་ཞེས་བསམས་པའོ། །དེ་ཞེས་བྱ་བ་དབང་པོ་མེད་ཀྱང་གཞན་གྱི་བདེ་བ་འཛིན་པའི་རྗེས་སུ་དཔག་པ་ལ་ལྟོས་ནས་གཞན་གྱི་བདེ་བ་གསལ་བར་མཐོང་བའི་ཕྱིར་ན་ཐག་རིང་པོ་ཉིད་དོ། །དེས་ན་དབང་པོའང་ཉེ་བ་ཉིད་ཀྱི་རྒྱུ་མ་ཡིན་ནོ། །སྣམ་བུ་ལ་སོགས་པའི་ཡུལ་ཅན་དབང་པོའི་རྣམ་པར་ཤེས་པ་དང་རྗེས་སུ་དཔག་པ་ལ་སོགས་པའི་ཡིད་ཀྱི་ཤེས་པ་དག་གོ །འོན་ཏེ་རྗེས་སུ་དཔག་པ་དེས་ནི་གཞན་གྱིས་བདེ་བ་མངོན་སུམ་དུ་བྱེད་པ་མ་ཡིན་ནོ། །དེའི་ཚེ་ཡང་གཞན་གྱིས་བདེ་བ་དེའི་རྣམ་པ་གསལ་བ་མེད་པའི་གཞན་གྱི་བདེ་བ་འཛིན་པའི་རྗེས་སུ་དཔག་པ་ལ་གང་ཅུང་ཟད་སྣང་བ་དེ་ནི་རང་ཁོ་ནའི་ཡིན་ལ། དེ་ལྟ་ན་ཡང་རྣམ་པ་དང་བཅས་པ་ཉིད་དོ། །རྣམ་པ་དང་བཅས་པ་ན་ཡང་རང་རིག་པ་ཁོ་ནའོ། །ལྷག་མ་ནི་ཞེས་བྱ་བ་ནི། མ་མཐོང་བ་དང་དོན་གཅིག་ལ་ལྡན་པ་ལ་སོགས་པའོ། །དབང་པོ་དང་ཡུལ་དེ་དག་ཚིག་པ་དེ་ལས་སོ། །དེ་ཞེས་བྱ་བ་རྣལ་འབྱོར་པ་དེ་ལྟར་བདེ་པ་ཉིད་ལ་སོགས་པའོ། །འོ་ན་བདེ་བ་སུའི་ཡིན་སྙམ་ན། བདེ་བ་ལ་སོགས་པ་ཞེས་གསུངས་སོ། །གང་གི་དབང་པོ་དང་ཡུལ་དག་ལས་སྐྱེས་པའི་སྐྱེས་བུ་དེའི་ཡིན་ནོ། །ཅི་སྟེ་མི་སྐྱེད་ཅེས་དྲིས་པའི་དོན་ནི། སྤུ་ལྡང་བ་ལ་སོགས་པའི་ཐུན་མོང་དུ་སྐྱེད་པར་འགྱུར་རོ་ཞེས་བྱ་བའོ། །དེ་ལྟའོ་ཞེ་ན་ཞེས་བྱ་བ་ནི་སྐྱེད་པར་བྱེད་པ་ཡིན་ནོ་ཞེ་ན། ཐུན་མོང་དུ་ཞེས་གསུངས་སོ། །གལ་ཏེ་བུད་མེད་དང་སྐྱེས་པ་གཉིས་ལ་བདེ་བ་སྐྱེས་པ་དེས་ཀྱང་ཐུན་མོང་དུ་སྤུ་ལྡང་བ་ལ་སོགས་པ་བསྐྱེད་ན་དེའི་ཚེ་དེ་དག་གི་དགའ་བ་ཡང་ཐུན་མོང་དུ་འགྱུར་རོ། །གཞན་དུ་ནི་ཞེས་བྱ་བ་ནི་སྐྱེས་བུ་ཙམ་གྱིས་ནི་མ་ཡིན་པའོ། །འོན་ཏེ་དེར་བདེ་བ་དེར་མ་སྐྱེས་ལ་དབང་པོའི་ཕྲང་བ་ཡང་མེད་དོ་སྙམ་ན། ལྡན་པ་ཡང་མ་ཡིན་ཏེ་ཞེས་གསུངས་ཏེ། ཡོད་པ་ཉིད་དོ་ཞེས་བྱ་བའི་དོན་ཏོ། །དེ་ལ་ཞེས་བྱ་བ་ནི་དོགས་པ་བསུ་བ་ནི་དེ་གཉིས་གང་རུང་ལའོ། །དེར་ནི་བདེ་བ་ལའོ། །ཁྱོད་ལ་ནི་སངས་རྒྱས་པ་ལའོ། །རྣལ་འབྱོར་བ་ལ་ཞེས་བྱ་བ་མེ་ལ་སོགས་པ་ཉམས་སུ་མྱོང་བ་མེད་པའི་ཕྱིར་རོ། །དོགས་པ་བསུ་
བ་ནི་གཞན་རྣལ་འབྱོར་པ་མ་ཡིན་པ་དག་ལ་མེ་མྱོང་བ་ན་གདུང་བར་ཇི་ལྟར་འགྱུར་ཞེ་ན་མ་ཡིན་ཏེ་ཞེས་ལན་འདེབས་པ་ལའོ། །དེ་ལྟ་བུ་ཞེས་བྱ་བ་སྡུག་བསྔལ་སྐྱེད་པར་བྱེད་པ་ཉིད་དུའོ། །གཞན་དུ་ཞེས་བྱ་བ་དམིགས་པའི་རང་བཞིན་དུའོ། །དེའི་རིག་པ་ནི་བདེ་བ་ལ་སོགས་པ་རིག་པར་བྱེད་པའོ། །དམིགས་པ་དང་མྱོང་བ་དེ་གཉིས་ལའོ། །དེའི་རྣམ་པ་ཞེས་བྱ་བ་ནི་ཤེས་པ་གནས་པའི་བདེ་བ་ནི་དེའི་རྣམ་པའོ། །དེས་ཞེས་བྱ་བ་ནི་རང་གི་སྡུག་བསྔལ་གྱིས་སོ། །རྣལ་འབྱོར་པ་ནི་དེ་ལྟ་མ་ཡིན་པས་ཞེས་བྱ་བ་ནི་གཞན་གྱི་བདེ་བའམ། དེས་བསྐྱེད་པའི་རྣམ་བས་བདག་ཉིད་དུ་ཟིན་པར་མི་སེམས་པའོ། །དེ་བཞིན་དུ་ནི་སོ་སོ་སྐྱེ་བོ་བཞིན་ནོ། །དེ་ལྟ་མ་ཡིན་ཏེ་ཞེས་བྱ་བ་ནི་རང་རིག་པ་མ་ཡིན་ནའོ། །དེ་དག་ནི་ཞེས་བྱ་བ་ནི་ཤེས་བྱ་བ་ནི་ཤེས་རབ་ལ་སོགས་རྣམས་སོ། །དོན་དེ་ཡང་ཞེས་བྱ་བ་ནི་སྣང་བཞིན་པའོ། །དེ་ལ་ནི་སྣང་བཞིན་པའི་དོན་ལའོ། །དེ་ལྟ་ནི་ཤེས་རབ་ལ་སོགས་པ་ལའོ། །གོམས་པས་ནི་སྣང་བཞིན་པའི་དོན་མངོན་པར་འདུས་བྱས་པ་མ་ཡིན་ནོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་སྣང་བའི་དོན་ལས་ཐ་དད་པ་ཡིན། ཤེས་རབ་གཞན་དེ་ནི་རྣམ་པ་དང་བཅས་པ་མ་ཡིན་ནོ། །ཕ་རོལ་པོ་ཉིད་སངས་རྒྱས་པའི་ཚིག་གི་དོགས་པ་བསུ་བ་ནི་ཤེས་རབ་ལ་སོགས་པ་ཞེས་བྱ་བའོ། །ཕ་རོལ་པོ་ཉིད་སུན་འབྱིན་པ་ནི་དེ་ནི་མ་ཡིན་ཏེ། སྲོག་ཆགས་ཐམས་ཅད་ལ་ཡོད་པའི་ཕྱིར་ན་སྲོག་ཆགས་སོ་སོ་ལ་ཐ་དད་པ་དེ་བཞིན་དུ་དོན་ཡང་ཐ་དད་པར་འགྱུར་ཏེ། རང་བཞིན་མཐོང་བ་ལས་སྐྱེས་པའི་ཕྱིར་རོ། །རྒྱུ་ཐ་དད་པས་འབྲས་བུ་ཡང་ཐ་དད་པ་ནི། རིག་པས་ཐོབ་པ་ཡིན་ནོ་ཞེས་དགོངས་པའོ། །གཟུགས་ལ་སོགས་པ་དེའི་ཁྱད་པར་སྐྱེས་བུ་དུ་མས་ངེས་པའི་དུས་ན། ཤེས་པས་བསྐྱེད་པའི་གཟུགས་ལ་སོགས་པ་ཐམས་ཅད་དམིགས་པར་འགྱུར་རོ། །དེ་ན་སྐྱེས་བུ་དེ་དག་གི་ཤེས་པ་རང་བཞིན་སྣ་ཚོགས་སུ་སྣང་བར་འགྱུར་རོ། །གལ་ཏེ་རང་རང་གི་ཤེས་པས་བསྐྱེད་པ་ནི་དོན་ཁོ་ན་དམིགས་ཀྱི། །གཞན་གྱི་ཤེས་པ་བསྐྱེད་པ་ནི་མ་ཡིན་པ་དེས་ན་རང་བཞིན་དུ་མར་སྣང་བར་ཅི་ལྟར་ཐལ་སྙམ་ན། སོ་སོ་རང་ཉིད་ཅེས་གསུངས་སོ། །འོན་ཏེ་ཤེས་པས་
བསྐྱེད་པའི་གཟུགས་ལ་སོགས་པ་རང་གི་ཁོ་ནས་དམིགས་པར་བྱ་བ་དེ་གལ་ཏེ་རང་གི་རིགས་པར་ཁས་ལེན་ན། དེའི་ཚེ་ཤེས་པ་ཉིད་འགྱུར་བ་ཞིག་ན། འོན་ཀྱང་དེ་ལྟར་ནི་ཁས་ལེན་པ་མ་ཡིན་ནོ། །འོན་ཏེ་ཇི་ལྟར་ཞེ་ན། ཤེས་པས་བསྐྱེད་པའི་དོན་དེ་ཡང་ཤེས་པ་གཞན་གྱིས་དམིགས་པ་ཡིན་ནོ་སྙམ་དུ་བསམས་ནས་ཕ་རོལ་པོ་སྨྲ་བ་ནི། དེ་སྟེ་གཞན་གྱིས་ཞེས་བྱ་བ་སྟེ་ཤེས་པ་གཞན་གྱིས་སོ། །ལན་འདེབས་པ་ནི་དེ་ལྟར་ན་ཞེས་བྱ་བའོ། །དེས་བསྐྱེད་པ་ཉིད་ཀྱིས་ཞེས་བྱ་བ་ནི་ཤེས་པ་དང་བསྐྱེད་པས་སོ། །དེ་ལ་ཡང་ཞེས་བྱ་བ་ནི་ཤེས་པ་དང་པོས་བསྐྱེད་པའི་དོན་ལ་ཡང་ངོ༌། །མཐོང་བའི་ཞེས་བྱ་བ་རི་ལ་གནས་པའི་དུ་བ་མཐོང་བ་ཡིན་ཡང་ངོ༌། །རྟགས་དེ་ཉིད་ལས་ཞེས་བྱ་བ་གཟུགས་ལ་སོགས་པ་ཉིད་ལས་སོ། །དེ་ལྟ་ཡིན་ན་ཞེས་བྱ་བ་ནི་དཔེ་སྨོས་ནའོ། །མཚན་ཉིད་གཞན་ཞེས་བྱ་བ་ནི་རྟོག་པ་དང་བྲལ་བ་ཉིད་ལ་སོགས་པའོ། །འདི་ལ་ཡང་ནི་རྗེས་སུ་དཔག་པ་ལ་ཡང་ངོ༌། །གལ་ཏེ་མཆན་ཉིད་ཐ་དད་པ་ཙམ་གྱིས་མངོན་སུམ་ནི་རྗེས་སུ་དཔག་པ་ལས་གཞན་ཡིན་ན། རྗེས་སུ་དཔག་པ་ཡང་མངོན་སུམ་ལས་གཞན་ཡིན་པར་འགྱུར་ཏེ། དེ་ལ་ཡང་མཚན་ཉིད་ཐ་དད་པ་ཡོད་པའི་ཕྱིར་རོ། །འོན་ཏེ་ཞེས་བྱ་བ་ནི་དོགས་པའོ། །དེ་ལྟར་ཞེས་བྱ་བ་ནི་གྲུབ་པའི་མཐའོ། །འདི་ཉིད་གསལ་བར་བྱེད་པ་ནི། གལ་ཏེ་ཞེས་བྱ་བའོ། །རྟོགས་སོ་ཞེ་ན་ཞེས་བྱ་བ་ནི་མདུན་ན་གནས་པའོ། །དེའི་ཚེ་དེ་ལ་ཡང་ཞེས་བྱ་བ་ལ་སོགས་པར་སྦྱར་རོ། །གཞན་དུ་ཞེས་བྱ་བ་ནི་བདག་ཉིད་མ་རྟོགས་ནའོ། །རང་ཉིད་ཅེས་བྱ་བ་ནི་བློ་མེད་པ་ཁོ་ནའོ། །དེ་དང་འབྲེལ་པ་ཅན་ཞེས་བྱ་བ་ནི་བློ་དང་འབྲེལ་པ་ཅན་ཏེ་གཡོ་འགུལ་ལ་སོགས་པའོ། །གཞན་གྱིས་ཞེས་བྱ་བ་ནི་བདག་ཉིད་ལ་བློ་མ་རྟོགས་པར་རོ། །རྗེས་སུ་དཔོག་གོ་ཞེས་བྱ་བ་ནི་གང་གི་དོན་མཐོང་བ་དེ་ནི་བློ་དང་ལྡན་པ་ཡིན་ཏེ་དཔེར་ན་དེ་བཞིན་ནོ། །གཞན་ཡང་དོན་རྟོགས་པ་ཡིན་ནོ་ཞེས་རྗེས་དཔོག་གོ་ཞེས་བྱ་བའི་དོན་ཏོ། །གྲུབ་པའི་མཐའ་པས་དཔེ་ཉིད་མ་གྲུབ་པོ་ཞེས་བརྗོད་པ་ནི་རང་ཉིད་ཅེས་བྱ་བའོ། །དེ་ལ་ཡང་ཞེས་བྱ་བ་ནི་གང་གིས་མཐོང་བ་ཉིད་རྟོགས་པའོ། །དོན་
གྱིས་རྗེས་སུ་དཔག་པ་གང་ཡིན་པ་ལའོ། །དེ་ཞེས་བྱ་བ་ནི་རང་དང་འབྲེལ་པའི་མཚན་ཉིད་ཀྱིས་མཐོང་བར་གྱུར་པའོ། །འོན་ཏེ་བློ་ནི་བདག་ཉིད་རྟོགས་པ་ཉིད་དེ་འོན་ཀྱང་གཞན་གྱི་ཡིན་ནོ་སྙམ་ན་དེ་ཞེས་བྱ་བ་སྨོས་ཏེ། བློའི་བདག་ཉིད་དོ་ཐུག་པ་མེད་པའི་ཚུལ་བསྟན་པ་ནི་དེ་ལ་ཡང་ཞེས་བྱ་བ་སྟེ་ཤེས་པ་གཞན་ལ་ཡང་ངོ༌། །ཤེས་པ་དེ་ནི་མཐོང་བར་འགྱུར་ལ། ཕྱིས་ན་རྟོགས་པ་མཐོང་བར་འགྱུར་ལ་དེ་ནས་ནི་རྟོགས་པའི་རྟོགས་པ་མཐོང་བ་ཞེས་བྱ་བ་ལ་སོགས་པ་ཐུག་པའི་ཚུལ་ལོ། །དེར་ཡང་ཞེས་བྱ་བ་ནི་ཡིད་ཀྱི་ཤེས་པ་ལའོ། །ལན་བཏབ་ཟིན་ཏོ་ཞེས་བྱ་བ་ནི། རིགས་དོན་མ་ཡིན་དེ་ལྡན་མིན། །ཞེས་བྱ་བ་ལ་སོགས་པས་སོ། །དེ་ནི་ཡིད་ཀྱི་ཤེས་པས་སོ། །སྣང་བར་ཞེས་བྱ་བ་ནི་གཞན་གྱིའོ། །མི་སླུ་བ་གང་ཡིན་པའོ་ཞེས་བྱ་བ་ནི་གཞན་གྱི་ལན་ནོ་མ་ཡིན་ཏེ་ཞེས་བྱ་བ་ནི་འགོག་པའོ། །དེའི་ཞེས་བྱ་བ་ནི་སྣང་བཞིན་པའི་རང་བཞིན་ལའོ། །དེས་ནི་ཞེས་བྱ་བ་སྣང་བཞིན་པའི་རང་བཞིན་གྱིས་སོ། །དེ་ལྟར་ཞེས་བྱ་བ་དོན་བྱ་བ་རྟོགས་པ་ལ་རང་གི་ངོ་བོ་ཙམ་ཞིག་སྣང་བ་ཡིན་ནོ། །རང་རིག་པ་ལས་གཞན་ནི་འདི་འདྲ་བར་འགྱུར་བར་མི་འོས་སོ། །འོན་ཏེ་ཡིད་ཤེས་པ་ལ་སྣང་བ་དེ་ནི་ཤེས་པ་གཞན་གྱིས་ཀྱང་རིག་གོ །གང་ཞིག་དྲན་པ་དེས་རྟོགས་པ་དེ་ཉིད་ནི་སྔར་ཡང་མངོན་སུམ་གྱི་ཡུལ་དུ་བྱས་པ་ཡིན་པ་དེས་ན་ཇི་ལྟར་རང་རིག་པ་ཡིན་ཞེ་ན། འགོག་པ་ནི་མ་ཡིན་ནོ་ཞེས་བྱ་བའོ། །ཡིད་ཀྱི་ཤེས་པ་འདི་ནི་དྲན་པ་ཡིན་ལ་དེ་ཡང་སྔར་གྱི་དུས་ན་ཡོད་པའི་མཐོང་བ་ཉིད་མངོན་པར་ཞེན་པ་ཡིན་ན། སྔ་མའི་རང་བཞིན་ནི་ཡིད་ཀྱི་ཤེས་པ་ལ་སྣང་བ་མ་ཡིན་ནོ། །དེས་ན་འདི་ཉིད་སྔར་ཡང་རྟོགས་པར་ཇི་ལྟར་འགྱུར་འདི་ཡང་ཞེས་བྱ་བ་ད་ལྟར་བའི་རང་བཞིན་ཡང་དྲན་པས་ཡུལ་དུ་བྱེད་དོ་ཞེ་ན། འདི་འགོག་པ་ནི་འོ་ན་ཞེས་བྱ་བའོ། །འོ་ན་ཡིད་ཀྱི་རྣམ་པར་ཤེས་པ་འདི་ཇི་ལྟར་མི་བདེན་པ་ཡིན་ཞེ་ན་གཞལ་བྱ་དང་ཞེས་སྨོས་སོ། །བློ་གཞན་གྱིས་ཞེས་བྱ་བ་འདི་ཉིད་ཀྱི་དོན་བརྗོད་པ་ནི་དོན་གྱིས་གོ་བའམ། གཞན་གྱིས་ཀྱང་རུང་སྟེ་ཞེས་བྱ་བའོ། །ཇི་ལྟར་ཕན་ཚུན་གསལ་བར་མི་འཐད་སྙམ་ན་བློ་དག་ཅེས་སྨོས་སོ། །གསལ་མིན་བདག་ཏུ་ཞེས་བྱ་བ་ནི་གསལ་བར་བྱ་བ་དང་གསལ་བར་བྱེད་པ་ཉིད་དུ་འདོད་པའི་བློ་དག་གོ །གསལ་བར་
བྱེད་པའི་བློ་ཡང་གསལ་བ་མ་ཡིན་ཏེ། རང་རིག་པར་ཁས་མ་བླངས་པའི་ཕྱིར་རོ། །གཞན་གྱིས་ཞེས་བྱ་བ་ནི་མི་གསལ་བའི་སྒྲོན་མའོ། །དེ་དག་ལས་གཞན་ཞེས་བྱ་བ་ནི་གསལ་བའི་ཤེས་པ་ལས་གཞན་པའི་དོན་ཏོ། །དེའང་ནི་ཞེས་བའོ། །འདི་ནི་ཤེས་པའོ་མྱོང་ཡིན་ཞེས་བྱ་བ་ནི་རང་རིག་པ་ཡིན་པའོ། །དེ་ཉིད་བཞིན་དུ་ཞེས་བྱ་བ་ནི་སྒྲོན་མ་ཉིད་བཞིན་དུའོ། །དེ་དང་ཆོས་མཚུངས་ཉིད་ཀྱིས་ན། །ཞེས་བྱ་བ་ནི་ཆོས་མཚུངས་སོ། །འདི་འཛིན་ན་ཞེས་བྱ་བ་ནི་རྣམ་པར་ཤེས་པ་འཛིན་ནའོ། །འདི་ཞེས་བྱ་བ་དོན་རིག་པ་འདི་ཕྱི་རོལ་མ་ཡིན་ན་དེའི་ཚེ་ཇི་ལྟར་མར་མེ་དང་མཚུངས་པ་ཉིད་ཡིན་ཡང་ཕྱི་རོལ་དུ་མི་འགྱུར་བ་དེ་བཞིན་དུ་རང་རིག་པ་ཉིད་དུ་ཇི་ལྟར་མི་འགྱུར། འོ་ན་ཇི་ལྟར་མར་མེ་དཔེ་ཡིན་ཞེ་ན། དེ་ཡང་ཞེས་གསུངས་ཏེ་མར་མེ་ཡང་ངོ༌། །དཔེར་ན་མར་མེ་སྣང་བ་གཞན་གྱིས་གསལ་བ་མ་ཡིན་པ་དེ་བཞིན་དུ་ཤེས་པ་ཡང་ཡིན་པ་དེ་ཙམ་གྱི་དཔེ་ཉིད་དོ། །བློ་ལ་ཞེས་བྱ་བ་ནི་བློའི་བློ་ལའོ། །བློ་ཞེས་བྱ་བ་དོན་གྱི་བློའོ། །བློ་ནི་ཞེས་བྱ་བ་ནི་དོན་གྱི་བློའོ། །དོན་གཞན་ནི་དོན་གྱི་རང་བཞིན་དུ་སྐྱེད་པ་ཤེས་པའི་གསལ་བར་བྱེད་པ་ཡིན་ནོ། །བློ་གཅིག་ཅེས་བྱ་བ་ནི་བློའི་བློའོ། །གཞན་ནི་ཞེས་བྱ་བ་ནི་དོན་གྱི་བློའོ། །འོ་ན་གསལ་བ་མ་ཡིན་པའི་དོན་ཡང་ཇི་ལྟར་གསལ་སྙམ་ན། དོན་དེའི་ངོ་བོས་ཞེས་སྨོས་ཏེ། ཤེས་པའི་ངོ་བོས་སོ། །དེའི་རང་བཞིན་གྱིས་ཤེས་པ་ཉིད་ལས་གསལ་བར་བརྗོད་པར་ཟད་ཀྱི་དོན་དམ་པར་ནི་འདི་གསལ་བ་ཉིད་མ་ཡིན་ནོ། །འོ་ན་ཇི་ལྟར་དེ་གསལ་བ་ཉིད་དུ་ཐ་སྙད་བྱེད་སྙམ་ན་དེ་བཞིན་དུ་ཞེས་སྨོས་སོ། །བུམ་པ་སྔར་ཡང་ཡོད་པ་ཡིན་ལ་ཕྱིས་ཀྱང་ཡོད་པར་འགྱུར་བ་ཡིན་ནོ་ཞེས་བྱ་བ་ནི་རྗེས་སུ་འགྲོ་བའོ། །གསལ་བའི་རང་བཞིན་ནི་སྔར་དང་ཕྱིས་མེད་ཀྱི་འོན་ཀྱང་དེའི་ཚེ་ཡོད་པ་ཡིན་ནོ་ཞེས་བྱ་བ་ནི་ལྡོག་པའོ། །འོན་ཏེ་མཐོང་བ་ཉིད་ཀྱི་ཐ་སྙད་ལས་མིག་མངོན་དུ་ཕྱོགས་སོ་ཞེས་ངེས་སོ་ཞེ་ན། འདི་ལ་བརྗོད་པ་ནི་དེ་ལ་ཡང་ཞེས་བྱ་བ་སྟེ། མིག་མངོན་དུ་ཕྱོགས་པ་ཉིད་ལ་ཡང་ངོ༌། །དེ་ལྟ་བུར་གྱུར་པ་ཞེས་བྱ་བ་ནི་མྱོང་བར་གྱུར་པ་ཉིད་དོ། །འོན་ཏེ་སྔར་བརྗོད་པ་ནི་ཡི་གེའི་ཕྱི་མོ་གང་ཡིན་པ་དེ་ཉིད་དང་ལྷན་ཅིག་དེའི་ཚེའི་ཡི་གེ་ཕྱི་མོ་གཅིག་ཉིད་དུ་འཛིན་པ་ཡིན་པ་དེས་ན་རིང་པོ་ཉིད་རིགས་སོ་ཞེ་ན་འདི་ལ་བརྗོད་པ་ནི། མི་
གནས་བཞི་ཞེས་བྱ་བའོ། །འོན་ཏེ་ཕྱི་མོ་རེ་རེ་འཛིན་པ་ཉིད་འདི་འཛིན་པར་འགྱུར་བ་ཡིན་ནོ་ཞེ་ན། ཕྱི་མོ་ཞེས་གསུངས་ཏེ། ཐུང་དུ་ཡང་རིང་བོ་ཉིད་དུ་འཛིན་པར་ཐལ་བའི་ཕྱིར་རོ། །འོན་ཏེ་ཕྱི་མ་རྣམས་ཀྱི་ཚོགས་རྟོགས་པར་ན་རིང་པོར་རྟོགས་པ་ཡིན་ནོ་སྙམ་ན། ཆོགས་པ་ཞེས་སྨོས་སོ་དེ་ཡང་ཞེས་བྱ་བ་ནི་བསྡོམས་པའོ། །རང་རིག་པ་མེད་པར་ནི་སྔ་མ་དང་ཕྱི་མ་རྟོགས་པ་མ་ཡིན་ནོ་ཞེས་དགོངས་སོ། །རིང་པོ་ཞེས་བྱ་བ་ནི་དགོངས་པའོ། །རྟོགས་མོད་ཀྱི་ཞེས་བྱ་བ་ནི་གྲུབ་པའི་མཐའ་སྟེ། དོན་ཙམ་རྟོགས་སོ་ཞེས་ནི་འདོད་པའི་ཁོ་ནའོ། །འོན་ཀྱང་ཁྱད་པར་ཡོད་དོ་ཞེས་བྱ་བར་སྟོན་པ་ནི་འོན་ཀྱང་ཞེས་བྱ་པའོ། །གང་གིས་ན་སངས་རྒྱས་པའིའོ། །འདི་ལ་བརྗོད་པ་ནི་དེའི་ཞེས་བྱ་བའོ། །བློ་གཅིག་པ་ཉིད་ཀྱང་རིགས་མི་མཐུན་པའི་བློས་པར་མཆོད་པ་ལས་རིག་པར་བྱའོ། །གནས་སྐབས་འདི་གཉིས་ཞེས་བྱ་བ་ནི་རང་དང་གཞན་གྱིས་རིག་པ་ལའོ། །འདི་ལྟར་ཞེས་བྱ་བ་ལ་སོགས་པས་ནི་ཕ་རོལ་པོ་བློ་ཡང་གཞན་གྱིས་རིག་པར་བྱ་བ་ཉིད་དུ་སྒྲུབ་པར་བྱེད་དོ། །ཕྱི་མོ་རྣམས་ནི་མི་གནས་པ་ཉིད་མ་ཡིན་ཏེ། འོན་ཀྱང་གནས་པ་ཁོ་ན་ཡིན་ཏེ། དེའི་ཕྱིར་རིང་པོ་ལ་སོགས་པ་འཛིན་པ་ཡིན་ནོ་ཞེས་བྱ་བའོ། །ཡུལ་ཐ་དད་ན་བློ་ཡང་ཐ་དད་དོ་ཞེས་བྱ་བ་འདི་ལ་གཞན་ཡང་བཟློག་པར་རྟོགས་པ་མེད་པ་ཁོ་ནའོ་ཞེས་སྟོན་པ་ནི་དེ་སྐད་དུ་ཡང་ཞེས་བྱ་བ་སྟེ། གལ་ཏེ་འདིས་ནི་ཕ་རོལ་པོས་བློ་རྟོགས་པ་ཙམ་བརྗོད་ཀྱི་ཐ་དད་པ་ནི་མ་ཡིན་ནོ་ཞེ་ན། ཇི་ལྟར་ཞེས་གསུངས་ཏེ་ཞེས་བྱ་བ་ནི་བློའོ། །རྣམ་འགྲེལ་བཤད་པའི་དོན་དུ་རེ་ཞིག་རང་ཉིད་བརྗོད་པ་ནི་གལ་ཏེ་འདི་ཞེས་བྱ་བའོ། །གཅིག་ཉིད་དོ་ཞེས་བྱ་བར་མི་འགྱུར་རོ་ཞེས་བྱ་བ་ནི་སྔ་མ་ལྡོག་པའི་ཕྱིར་དང་ཕྱི་མ་འཇུག་པའི་ཕྱིར་རོ། །ཕྱེད་ཕྱི་མ་འཆད་པ་ནི་འདི་རིང་པོ་ཞེས་བྱ་བའོ། །དེའི་ཚེ་ནི་ཞེས་བྱ་བ་ཐ་མའི་གནས་སྐབས་ནའོ། །རིམ་པ་མེད་པ་ཞེས་བྱ་བ་ནི་ཆ་ཐམས་ཅད་དེའི་ཚེ་ཉིད་ཉེ་བར་གནས་པའི་ཕྱིར་འཛིན་པ་ཡང་རིམ་པ་མེད་པ་ཁོ་ནའོ། །གལ་ཏེ་ཡུལ་ཡང་གནས་པ་མ་ཡིན་ནམ་དེ་ཇི་ལྟར་ཡུལ་མི་གནས་པའི་ཕྱིར་ཞེས་བརྗོད་པ་ཡིན་སྙམ་ན་མ་འཕེལ་པའི་ཞེས་སྨོས་སོ། །དེ་ལྟ་ཡིན་ནོ་ཞེས་ན་ཞེས་བྱ་བ་ནི་མ་འཕེལ་བ་ཉིད་འཕེལ་བ་གཞན་ཡང་ཁས་བླངས་ དགོས་སོ། །ཡང་འཕེལ་བ་གཞན་དུ་ཡིན་ཏེ་ཁྱད་པར་མེད་པའི་ཕྱིར་རོ། །དེ་ལྟ་ན་ཡང་ཐུག་པ ་མེད་པ་ཡིན་ཏེ་དེ་ཉིད་ཀྱིས་ཞེས་བྱ་བ་
ནི་རྩོལ་བས་སོ། །དེ་ཞེས་བྱ་བ་རང་བཞིན་སྔ་མ་ལས་ཐ་མི་དད་པའི་ཕྱིར་རོ། །གཞན་ནི་རྩོལ་བའོ། །བློ་ཐ་མ་ཞེས་བྱ་བ་ནི་གང་གི་ཕྱིར་ཉམས་སུ་མ་མྱོང་ངན་དྲན་པར་མི་འགྱུར་ལ་བློ་སྔ་མ་རྣམས་ཀྱང་ཉམས་སུ་མྱོང་བ་མ་ཡིན་པ་དེས་ན་དེ་དག་ནི་དྲན་པ་མ་ཡིན་གྱི་འོན་ཀྱང་ཐ་མ་གཅིག་པུ་དྲན་པར་འགྱུར་རོ། །འདི་ཉིད་གསལ་འདེབས་པ་ནི་བློ་སྔ་མ་དག་ནི་ཞེས་བྱ་བ་སྟེ། རིང་པོའི་ཆ་སྔ་མ་འཛིན་པར་བྱེད་པ་དག་གོ །འོན་ཏེ་ཐ་མ་ཉིད་ཀྱིས་རིང་པོ་འཛིན་ལ་དེ་ལ་ཡང་མྱོང་བ་ཡོད་པ་དེས་ན་རིང་པོ་བློ་དྲན་པར་འགྱུར་རོ་ཞེ་ན། ཐ་མ་ཡང་ཞེས་གསུངས་སོ། །དེའི་ཕྱིར་ཞེས་བྱ་བ་ནི་རིང་པོའི་ཆ་སྔ་མ་དང་ཕྱི་མ་འཛིན་པའི་བློ་ཐམས་ཅད་ཉམས་སུ་མ་མྱོང་བའི་ཕྱིར་རོ། །དེ་ནི་གཞན་ལའང་ཞེས་བྱ་བ་ནི་འདིར་ཡང་དེ་སྐད་ཅེས་དཔེར་ན་སྒྲའི་ཆ་འཛིན་པའི་བློ་རྣམས་མྱུར་བར་འཇུག་པའི་རྒྱུ་ལས་སྦྱོར་བར་བྱེད་ཀྱི་བརྗོད་པ་དེ་བཞིན་དུ་ཡི་གེའི་ཆ་འཛིན་པའི་བློའི་བློ་ཡི་གེའི་བློ་མེད་པའི་རང་བཞིན་རྣམས་མྱུར་བར་འཇུག་པའི་ཕྱིར་ན་ཡི་གེ་རྟོག་པ་ཉིད་དུ་འགྱུར་རོ་ཞེས་བརྗོད་པར་ནུས་སོ། །རེ་ཞིག་གནས་པའི་ཕྱོགས་བརྗོད་པ་ནི་ཐུང་དུ་གཉིས་ནི་ཞེས་བྱ་བའོ། །གཅིག་པའི་བློ་ཞེས་བྱ་བ་ནི་འདི་ནི་ཡི་གེའི་བདག་ཉིད་གཅིག་ཡིན་ནོ་ཞེས་བྱ་བ་དེ་ལྟ་བུའི་རྣམ་པ་ཅན་གྱི་བློའོ། །ཕྱི་མོ་རྣམས་ལ་ཞེས་བྱ་བ་ནི་ཡི་གེ་རིང་པོ་ལ་སོགས་པའི་ཆ་ཤས་ཀྱི་རང་བཞིན་རྣམས་ལའོ་ཞེས་བྱ་བ་ནི་ཐུང་དུ་གཉིས་ལ་ཡོད་པའི་རྣམ་པར་འཆད་པ་གང་ཡིན་པ་དེའོ། །དེ་ལྟ་ན་ཡང་ཞེས་བྱ་བ་རྣམ་པར་ཆད་པ་ཡོད་ཀྱང་ངོ༌། །འོན་ཏེ་ཇི་ལྟར་ཐུང་དུ་གཉིས་བརྗོད་པ་ལ་རྣམ་པར་ཆད་པ་ཡོད་པ་དེ་བཞིན་དུ་རིང་པོ་ལ་སོགས་པ་བརྗོད་པ་ལ་ཡང་ཡིན་ནོ་ཞེ་ན། འདིར་ནི་ཞེས་གསུངས་སོ། །འདི་ནི་ཞེས་བྱ་བ་ནི་རྣམ་པར་ཆད་པ་ཉིད་དུ་སྣང་བ་ཞེས་བྱ་བ་འདིའོ། །གལ་ཏེ་མ་མཐོང་པའི་ཕྱིར་བློ་ཅིག་ཅར་མི་སྐྱེད་པར་སྒྲུབ་པར་བྱེད་ན་དེའི་ཚེ་མི་དམིགས་པ་ཚད་མར་ཁས་བླངས་བར་བྱ་བ་ཡིན་ནོ། །དེའི་ཚེ་ཡང་ཡི་གེ་ཆ་རྣམ་པར་ཆད་པར་སྣང་བ་མེད་པ་ཁོ་ན་སྟེ་མ་མཐོང་བའི་ཚད་མ་ནི་རྣམ་པར་མ་ཆད་པ་དེ་ལ་ཡང་ཡོད་པའི་ཕྱིར་རོ། །དེས་མ་མཐོང་བའི་ཚད་མ་མ་ཡིན་པའི་ཕྱིར་རྣམ་པར་ཆད་པ་མེད་པར་ངེས་ནུས་པ་མ་ཡིན་ནོ། །རིང་པོ་ལ་སོགས་པ་བརྗོད་པའི་དུས་སུ་རིགས་པ་ཅན་ལ་སོགས་པས་འདོད་པའི་རྣམ་པར་ཆད་པའི་བློ་སྐྱེ་བ་མེད་པ་གང་ཡིན་མེད་པར་སྒྲུབ་པར་བྱེད་པ་
མ་ཡིན་པའི་མི་དམིགས་པ་གང་ཡིན་པ་དེ་ཉིད་སངས་རྒྱས་པ་འདོད་པའི་ཅིག་ཅར་བ་མེད་པའི་སྒྲུབ་པར་བྱེད་པ་ཡིན་ནམ་ཅི་ཁྱེད་ལ་ནི་སངས་རྒྱས་པ་ལའོ། །གནས་པ་མ་ཡིན་ཞིང་ཞེས་བྱ་བ་ནི་འདི་ཉིད་ཀྱི་དོན་ནི་གོ་སྐབས་མེད་དོ་ཞེས་བྱ་བ་ཡིན་ནོ། །དོན་ལ་སྦྱོར་བ་ན་མིག་ལ་སོགས་པའི་ཞེས་བྱ་བའོ། །ཇི་ལྟར་དུས་གཅིག་བུ་བུམ་པ་གཅིག་གི་ཡུལ་ཅན་གྱི་མིག་གི་རྣམ་པར་ཤེས་པ་གཉིས་མི་འབྱུང་བ་བཞིན་ནོ། །གཟུང་བ་དང་འཛིན་པའི་ཞེས་བྱ་བ་ལ་སྒྲ་འཛིན་པའི་ཤེས་པ་ནི་གཟུང་བ་ཡིན་ལ་དེའི་ཡུལ་ཅན་ནི་འཛིན་པ་ཡིན་ནོ། །དེ་ལྟར་ན་རེ་ཞིག་རྣམ་པར་རྟོག་པ་ལ་གསལ་བར་སྣང་བ་ཉིད་མེད་དོ་ཞེས་བརྗོད་པ་ཡིན་ནོ། །ད་ནི་ཁས་བླངས་ནས་ཀྱང་བརྗོད་པ་ནི། གསལ་བར་སྣང་བ་ཡིན་ན་ཡང་ཞེས་བྱ་བའོ། །གང་གིས་གནོད་ཅེས་གྲུབ་པའི་མཐའ་པས་དྲིས་པ་ན། ཕ་རོལ་པོ་ལན་འདེབས་པ་ནི་བར་དུ་ཆོད་པས་སོ་ཞེས་བྱ་བའོ། །འདི་ལ་ཡང་ཞེས་བྱ་བ་ནི་དེ་སུ་ན་འབྱིན་པ་སྟེ་རིང་པོ་ལ་སོགས་པ་བརྗོད་པའོ། །སྔོན་མྱོང་བར་གྱུར་པ་དང་ལྟར་མྱོང་བཞིན་པ་གཅིག་ཉིད་གང་ཡིན་པ་དེ་ལྟར་འཛིན་པའི་རང་བཞིན་ནོ། །འོན་ཏེ་ད་ལྟར་དྲན་པས་སྤྱོད་ཡུལ་དུ་བྱས་པ་གང་ཡིན་པ་དེ་ཉིད་མངོན་སུམ་གྱིས་ཀྱང་འཛིན་པ་ཡིན་ནོ་སྙམ་ན། དྲན་པའི་ཡུལ་གྱིས་ཞེས་གསུངས་སོ། །ངོ་ཤེས་པ་ནི་མངོན་སུམ་གྱི་རང་བཞིན་ཡིན་པའི་ཕྱིར་རུང་བའི་ཡུལ་ན་གནས་པའི་རང་བཞིན་ཡིན་ན། སྔོན་མཐོང་བའི་རང་བཞིན་ནི་རུང་བའི་ཡུལ་ན་གནས་པ་མ་ཡིན་ཏེ། དེས་ན་རུང་བའི་ཡུལ་ན་གནས་པའི་རང་བཞིན་འཛིན་པའི་ངོ་ཤེས་པས་ནི་དེ་འཛིན་པ་མ་ཡིན་པའི་ཕྱིར་ཅི་ལྟར་སྔ་མ་དང་ཕྱི་མའི་རང་བཞིན་འཛིན་པ་ཡིན་ཞེས་སྟོན་པར་བྱེད་པ་ནི་གལ་ཏེ་དེ་ལྟ་ན་ཞེས་བྱ་བ་ལ་སོགས་པའོ། །དྲན་པ་ཞེས་བྱ་བ་ནི་དེ་ཉིད་འདི་ཡིན་ནོ་ཞེས་བྱ་བ་སྟེ། དེ་ལྟ་བུའི་རྣམ་པ་ཅན་གྱི་དྲན་པ་མེད་པར་རོ། །དེ་ལྟར་ཞེས་བྱ་བ་ནི་གཅིག་ཉིད་དུ་མངོན་སུམ་གྱིས་ཅི་སྟེ་མི་རྟོགས་འདི་ལ་ཕ་རོལ་པོས་བརྗོད་པ་ནི། དེ་དང་ཞེས་བྱ་བ་སྟེ་སྔར་གྱི་ཡུལ་དང་ལྷན་ཅིག་འབྲེལ་པ་གང་ཡིན་པ་དེ་དང་བྲལ་བའི་ཕྱིར་དེ་ལྟར་མི་རྟོགས་སོ་འོ་ན་ཞེས་བྱ་བ་ནི་ལན་ནོ། །གང་གིས་ཞེས་བྱ་བ་ནི་མངོན་སུམ་མམ་རྗེས་སུ་དཔག་པས་སོ། །དེ་ལྟ་མ་ཡིན་ན་ཞེས་བྱ་བ་ནི་རྟོགས་པ་ཙམ་ཚད་མར་ཁས་ལེན་ནའོ། །འོན་ཏེ་སྔར་གྱི་དུས་ལ་
སོགས་པ་དང་འབྲེལ་པ་མ་རྟོགས་མེད་དོ། །རེ་ཞིག་འབྲེལ་པ་ཅན་ནི་རྟོགས་པ་ཡིན་ནོ་སྙམ་ན་གལ་ཏེ་སྔོན་གྱི་ཞེས་བྱ་བའོ། །འོན་ཏེ་ད་ལྟ་ཉིད་དུ་སྐྱེས་པ་ནི་སྔར་ཉིད་ཡོད་པ་མ་ཡིན་པས་ན་ཇི་ལྟར་བརྟག་པར་འགྱུར་ཞེ་ན། གལ་ཏེ་ཞེས་གསུངས་སོ། །ད་ལྟར་བ་དེ་སྔར་མ་སྐྱེས་པ་ཅི་ལྟར་ཡོད་ཅེས་གཞན་གྱིས་དྲིས་པ་ལ་སྔར་ཞིག་པའི་བུམ་པ་ལ་སོགས་པ་ཡང་ཇི་ལྟར་ཡོད་དེ། དེ་ཡང་བརྟག་པ་ཉིད་དུ་མི་འགྱུར་རོ། །ཕ་རོལ་པོ་ཁྱད་པར་སྟོན་པ་ནི་ཁྱད་པར་འདི་ཞེས་གསུངས་ཏེ། འབྱུང་བར་འགྱུར་བ་ནི་དྲན་པ་མ་ཡིན་ནོ་ཞེས་དགོངས་པའོ། །འདི་ལ་གྲུབ་པའི་མཐའ་པས་གསུངས་པ་ནི། སྔར་ཞེས་གསུངས་སོ། །ཕ་རོལ་གྱིས་སྨྲས་པ་ནི་འབྱུང་བ་ཉིད་དུ་ཞེས་བྱ་བའོ། །འདི་ལ་ལན་ནི་འབྱུང་བར་འགྱུར་བ་ཞེས་བྱ་བའོ། །འདིར་ཡང་ཞེས་བྱ་བ་ནི་ཞིག་པ་ལ་ཡང་ངོ༌། །འདི་ལ་བརྗོད་པ་ནི་དབུས་སུ་ཞེས་བྱ་བའོ། །རེ་ཞིག་གང་གི་ཚེ་རྟོགས་པ་དེའི་ཚེ་ཡོད། མེད་པར་ན་ཡོད་དོ་ཞེས་བྱ་བར་གོ་ཇི་ལྟར་འགྱུར་ཏེ་བར་དུ་མ་རྟོགས་པའི་ཕྱིར་རོ། །ཕ་རོལ་པོས་ད་ལྟར་ཞེས་སྨྲས་སོ། །ད་ལྟར་མཐོང་བས་དབུས་སུ་ཡོད་པར་ཇི་ལྟར་ཞེ་ན་སྔར་ཞེས་སྨྲས་སོ། །ལན་ནི་འོ་ན་ཞེས་གསུངས་སོ། །འོ་ན་རྗེས་སུ་དཔག་པས་སྔར་ཡོད་པ་ཉིད་དུ་རྟོགས་སོ་ཞེ་ན། རྗེས་སུ་དཔག་པ་ཡང་ཞེས་སྨྲས་སོ། །བར་མེད་པ་ཞེས་བྱ་བ་ནི་འདི་ནི་སྔར་ཞེས་གནས་པ་ཉིད་མཐོང་བ་ཡིན་གྱི་དངོས་པོ་གཞན་མཐོང་བས་བར་ཆོད་པ་ནི་མ་ཡིན་པ་དེ་ལའོ། །སུན་འབྱིན་པ་ནི་མ་ཡིན་ཏེ་ཞེས་བྱ་བའོ། །དེ་ཉིད་ཅེས་བྱ་བ་ནི་ངའི་མཐོང་བའི་རྒྱུན་མ་ཆད་དོ་ཞེས་བྱ་བའི་དྲན་པ་ཉིད་དོ། །དེ་ཉིད་ཀྱིས་ཞེས་བྱ་བ་ནི་སྔར་གནས་པ་ཉིད་ཀྱིས་ནི་མ་ཡིན་པའོ། །དེ་ལྟ་མ་ཡིན་ཏེ་ཞེས་བྱ་བ་ནི་གལ་ཏེ་དེ་ཉིད་ཀྱིས་བྱེད་ནའོ། །དེ་ཉིད་ཅེས་བྱ་བ་ནི་སྔར་གནས་པ་ཉིད་དོ། །དེ་ཉིད་ཀྱི་ཚེ་ཞེས་བྱ་བ་ནི་སྔར་གནས་པ་ཉིད་དུའོ། །དེ་ཉིད་ལ་ནི་སྔར་གནས་པ་ཉིད་ལའོ། །ཐུག་པ་མེད་པ་ཉིད་སྟོན་པ་ནི་གང་གི་ཕྱིར་ཞེས་བྱ་བའོ། །དེ་ལ་ཡང་ཞེས་བྱ་བ་ནི་དེ་ཉིད་དོན་བྱ་བ་ནི་ཡིན་ནོ་ཞེས་བྱ་བ་དེ་ལ་ཡང་ངོ༌། །བར་བཅད་པའི་ཕྱིར་ཞེས་བྱ་བ་ནི་བློའི་བློས་སོ། །འོན་ཏེ་ཞེས་བྱ་བ་ལ་སོགས་པ་ནི་གཅིག་གི་ཚེ་ཉིད་ཕྱི་མ་ལ་སོགས་པ་འཛིན་པ་དང་འཛིན་པར་ཡང་འགྱུར་བ་
ཡིན་ཏེ། དེས་ན་ཕྱི་མོ་འཛིན་པ་ཐམས་ཅད་དུས་མཚུངས་པ་ཁོ་ནར་དེ་འཛིན་པས་ཉམས་སུ་མྱོང་བའི་ཕྱིར་བློ་ཡུན་རིང་པོ་དྲན་པ་འཐད་པ་ཁོ་ན་ཡིན་ནོ་ཞེས་བྱ་བ་ནི་གཞན་གྱི་ཞེ་རྩིས་སོ། །འདི་ལ་བརྗོད་པ་ནི་དེ་ཡང་མི་འཐད་དེ་བྱ་བའོ། །དོན་དེ་དང་ཤེས་པ་གཉིས་ཀྱིས་མྱོང་བ་གང་ཡིན་པ་དེ་དག་གོ ། ཡང་ཇི་ལྟར་ན་ཤེས་པ་ཅིག་ཅར་འབྱུང་བ་མི་འདོད་སྙམ་ན་ཤེས་པ་ཅིག་ཅར་ཞེས་བྱ་བའོ། །ཕྱེད་ཕྱི་མ་འཆད་པ་ནི་དོན་སྣང་བའི་ཞེས་བྱ་བའོ། །འོ་ན་ཅི་ལྟར་རྟོགས་སྙམ་ན་རང་གིས་ཞེས་གསུངས་སོ། །གཞན་གྱིས་བྱས་པའི་དཔེ་ཉིད་མི་འགྲིག་པར་སྟོན་པ་ནི་གལ་ཏེ་བདེ་བ་ཞེས་བྱ་བའོ། །དེའི་བློ་ཡང་ཞེས་བྱ་བ་ནི་བདེ་བ་ལ་སོགས་པའི་བློ་ཡང་ངོ༌། །ཐ་དད་པར་ཡང་ཅི་སྟེ་མི་འགྱུར་ཞེ་ན། ཐ་དད་པར་སྣང་བ་ཞེས་གསུངས་སོ། །འོ་ན་བདེ་བ་རིགས་པ་ཅི་ལྟར་གཞག་པར་རིགས་ཤེ་ན། བདེ་བ་མྱོང་བ་ཞེས་བྱ་བའོ། །དོན་ལ་ཡང་དེ་ཁོ་ན་ལྟར་རིགས་སོ་ཞེས་སྟོན་པ་ནི་དེ་བཞིན་དུ་ཞེས་བྱ་བ་ནི་ཡང་མྱོང་ངོ་ཞེས་རིགས་སོ། །འདི་ན་ཞེས་བྱ་བ་ནི་སྔོན་པོ་ལ་སོགས་པ་ལའོ། །སྣང་བ་གཟུགས་ལ་སོགས་པ་ལས་ཐ་དད་པ་མེད་པ་ཁོ་ནའོ། །གང་གི་ཚེ་ཞེ་ན་གསལ་ཏེ་ཞེས་བྱ་བའོ། །དོན་ལ་བརྗོད་པ་ནི་རིག་པ་དང་ཞེས་བྱ་བའོ། །དེའི་ཚེ་རིག་པ་དང་སྔོན་པོ་ལ་སོགས་པ་ཐ་དད་པ་དེ་ལྟར་བརྟག་པ་ཡིན་ན། དེ་ལྟ་ཡང་ཞེས་བྱ་བ་རིག་པ་དང་སྔོན་པོ་ལ་སོགས་པ་ཐ་དད་པར་མཚོན་པ་ཡང་མ་ཡིན་ནོ། །འབའ་ཞིག་ནི་གཟུགས་དང་བྲལ་བའོ། །གཟུགས་དང་སྣང་བ་དང་བྲལ་བར་བྱིས་པ་ལ་སོགས་པ་འགའ་ཞིག་གིས་དམིགས་པ་ཡིན་ནོ། །དེ་བཞིན་དུ་རིམ་གྱིས་པ་ལ་ཡང་དོན་དང་དོན་སྣང་བ་ཞེས་བྱ་བ་ལ་སོགས་པར་སྦྱར་རོ། །ཉེས་པ་དེ་ཉིད་སྟོན་པ་ནི་འདི་ལྟར་ཞེས་བྱ་བའོ། །རེ་ཞིག་དང་པོ་ནི་དོན་རིག་པར་འགྱུར་བ་ཡིན་ནོ། །དེ་ནས་ནི་དོན་སྣང་བའི་ཤེས་པ་རིག་གོ །འོན་ཏེ་དོན་རིག་པ་རིག་པའི་དུས་ན་དོན་དུ་སྣང་བ་མི་རིག་པ་སྟེ་དོན་རིག་པ་ཙམ་རིག་པའི་ཕྱིར་རོ་ཞེ་ན། དོན་རིག་པ་ནི་ཞེས་གསུངས་སོ། །དག་པའི་དོན་དུ་སྣང་བ་དང་བྲལ་ལོ། །དེས་ན་དོན་རིག་པ་རིག་ཡིན་ན། ངེས་པར་དུས་སུ་སྣང་བ་རིག་པར་འགྱུར་རོ། །དེས་ན་དོན་གྱི་རྣམ་པ་ལན་གཉིས་སུ་སྣང་བར་འགྱུར་རོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་དོན་དུ་སྣང་བ་མ་རིག་ནའོ། །རྣམ་འགྲེལ་འདི་ནི་མངོན་པར་འདོད་པའི་དོན་བཤད་པའི་དོན་དུ་སུམ་འབྱིན་པར་བྱེད་པས་སྨྲས་པ་
ནི་འདིར་ཞེས་བྱ་བའོ། །དེ་ལ་ཡང་ཞེས་བྱ་བ་ནི་བདེ་བ་ལ་སོགས་པའི་རིག་པ་འཛིན་པ་ལ་ཡང་ངོ༌། །སྐབས་ཉིད་ལ་ཞེས་བྱ་བ་ནི། དྲན་པ་ལས་ཀྱང་བདག་རིག་གྲུབ། །ཅེས་བྱ་བ་འདི་ལའོ། །འཕོ་བར་མི་འགྱུར་བ་ཉིད་སྒྲུབ་པར་བྱེད་པ་ནི་ཕྱི་མ་ཕྱི་མས་ཞེས་བྱ་བའོ། །གེགས་བྱེད་པ་ཞེས་བྱ་བ་ནི་ཤེས་པ་སྔ་མ་ཤེས་པ་ཕྱི་མས་མྱོང་བ་ལའོ། །དེ་ལ་ཞེས་བྱ་བ་ནི་བློ་ཕྱི་མ་ལའོ། །ཕྱིའི་གེགས་བྱེད་པ་མེད་པ་ན་བློ་སྔ་མ་ཕྱི་མས་མྱོང་བར་འགྱུར་རོ། །དོན་གྱིས་གོ་བས་ཞེས་བྱ་བ་ནི་ཉམས་སུ་མྱོང་བར་གྱུར་པའི་དོན་གཞན་དུ་མི་འཐད་པས་སོ། །རྒྱུན་མི་འཆད་པས་ཞེས་བྱ་བ་ནི་པར་ཆད་མེད་པར་རོ། །དེའི་ཚེ་ཡང་སོ་སོར་དོན་ཉམས་སུ་མྱོང་བའི་མཚན་ཉིད་གཞན་རྣམས་ལ་དོན་གྱིས་གོ་བ་ཅི་ཞིག་ཡོད་དེས་ན་བློའི་སྐད་ཅིག་དེ་མཐའ་དག་ཉམས་སུ་མྱོང་བར་འགྱུར་རོ། །དེ་ལྟ་ཡིན་དང་དུས་དེ་སྲིད་བདག་གིས་མཐོང་ངོ་ཞེས་དྲན་པར་ཡང་མི་འགྱུར་རོ། །སུན་འབྱིན་པ་གཞན་ཡང་བརྗོད་པ་ནི་དོན་གྱིས་གོ་འདྲེན་པ་ཞེས་བྱ་བའོ། །གཞན་དུ་ནི་མ་ཡིན་ནོ་ཞེས་བྱ་བ་ནི་ཉམས་སུ་མྱོང་བར་རོ། །དེས་ན་དོན་གྱི་བློ་ཉམས་སུ་མྱོང་བ་མ་གགས་བྱས་པའི་ཕྱིར་བློ་ཉམས་སུ་མི་མྱོང་ཞིང་དྲན་པར་ཡང་མི་འགྱུར་རོ་ཞེས་བྱ་བ་ནི་སྐབས་ཉེ་བར་བསྡུ་བའོ། །ཉི་སྟེ་ཉམས་སུ་མྱོང་བ་ཉམས་སུ་མྱོང་བར་འགྱུར་པས་ཅི་བྱ་སྟེ། དོན་ཡོད་པ་ཙམ་གྱིས་མྱོང་བར་འགྱུར་བ་ཡིན་ནོ་ཞེ་ན། ཡོད་པ་ཙམ་ལས་ཞེས་གསུངས་སོ། །གཞན་གྱིས་སྨྲས་པ། དབང་པོ་དང་འབྲེལ་པ་ལས་དོན་ཉམས་སུ་མྱོང་བར་འགྱུར་གྱི། །མྱོང་བ་ཉམས་སུ་མྱོང་བ་ལས་ནི་མ་ཡིན་ནོ་ཞེ་ན། འདི་ལ་བརྗོད་པ་ནི་དབང་པོ་དང་འབྲེལ་པ་དེ་ཡང་ཚད་མ་གང་ལས་རྟོགས་པར་བྱ། དལ་ཡང་ཞེས་བྱ་བ་འདས་པ་ལ་སོགས་པའི་རྣམ་པར་རྟོག་པ་ལ་ཡང་ངོ༌། །དེས་ཞེས་བྱ་བ་ནི་ཡུལ་དང་དུས་གཞན་གྱི་བདག་ཉིད་ཅན་གྱིས་སོ། །དེ་ཉིད་ཀྱིས་ཞེས་བྱ་བ་དེ་འདྲ་བའི་དོན་གྱིས་ཕྱོགས་པའི་ཕྱིར་ཏེ་ཁྱེར་པའི་ཕྱིར་རོ། །འདི་ཉི་གཞུང་འཛུགས་པ་དབང་པོའི་ཞེས་བྱ་བའོ། །རེས་འགའ་ཞེས་བྱ་བ་ནི་དོན་ཉེ་བའི་གནས་སྐབས་ནའོ། །རེས་འགའ་ནི་ཞེས་བྱ་བ་དོན་མི་ཉེ་བ་ནའོ། །དེ་ལྟ་མ་ཡིན་པར་ཞེས་བྱ་བ་ནི་རྒྱུན་ཆད་པར་རོ། །འདི་ནི་ཁས་བླངས་ནས་བརྗོད་པར་ཟད་ཀྱི་འཐད་ཀྱི་ནི་མ་ཡིན་ཏེ། དོན་ཉེ་བར་མ་ཡིན་པའི་གནས་སྐབས་མེད་པའི་ཕྱིར་རོ། །དོན་གཞན་ལ་ཆགས་པས་ཏེ་འཆལ་པས་ནུས་པ་
ཉམས་ཀྱང་ངོ༌། །གཅིག་ཤེས་ཞེས་བྱ་བ་ནི་ཐོགས་པ་མེད་པའོ། །དེའི་ཕྱིར་བློ་སྔ་མ་ནུས་པ་མེད་པའི་ཕྱིར་ཕྱིས་དོན་གྱི་བློར་མི་འགྱུར་རོ། །འཇུག་པའི་རྣམ་པར་ཤེས་པ་ཐམས་ཅད་དེའི་དབང་པོའི་ཤེས་པ་ལྔ་པོ་གང་ཡིན་པའོ། །འོན་ཏེ་འཇུག་པའི་རྣམ་པར་ཤེས་པ་སྔ་མ་ཡང་རྒྱུ་ཡིན་ལ་ཀུན་གཞིའི་རྣམ་པར་ཤེས་པ་ཡང་ཡིན་པའི་ཕྱིར་ཉེས་པ་ཅི་ཡོད་སྙམ་ན་འཇུག་པའི་ཞེས་གསུངས་སོ། །གལ་ཏེ་ཀུན་གཞིའི་རྣམ་པར་ཤེས་པ་ཉིད་རྒྱུ་ཡིན་ན་ནི་དེའི་ཚེ་དུས་ཕྱིས་ཀྱང་འཇུག་པའི་རྣམ་པར་ཤེས་པ་སྔ་མ་ཉིད་སྐྱེ་བར་འགྱུར་ན་དེ་ལྟ་ཡང་མ་ཡིན་ཏེ། དེས་ན་སྔ་མ་དང་རིགས་མཐུན་ཤིན་ཏུ་གསལ་པ་གཅིག་ཉིད་འབྱུང་བ་ལས་ནི་རིགས་མཐུན་པའི་རྣམ་པར་ཤེས་པ་ལས་སྔ་མ་ཉིད་དེ་མ་ཐག་པའི་རྐྱེན་ཡིན་ནོ། །བདག་ཅག་གིས་ནི་ཀུན་གཞིའི་རྣམ་པར་ཤེས་པ་ཁས་མ་བླངས་ཏེ། ཉེས་བ་འདི་ནི་གང་གིས་ཁས་བླངས་པ་དེ་ཉིད་ལ་འགྱུར་རོ་ཞེས་ཐུགས་ལ་བཞག་ནས་རེ་ཞིག་ཞོག་ཅིག་ཅེས་གསུངས་སོ། །དེ་ཡང་ཞེས་བྱ་བ་ནི་དེ་མ་ཐག་པའི་རྐྱེན་ཏོ། །འགའ་ཡང་མེད་པར་འགྱུར་རོ་ཞེས་བྱ་བ་ནི་ཤེས་པ་ཕྱི་མ་མི་འགྱུར་རོ། །ཆགས་པ་ཞེས་བྱ་བ་ནི་ཀུན་དུ་ཆགས་པ་དང་ལྡན་པའོ། །དེ་ལ་ཡང་ཞེས་བྱ་བ་ནི་ཡིད་ལའོ། །དེ་ཡང་ནི་ཡིད་ཀྱི་དབང་པོའི་ཡང་ངོ༌། །དེ་ཡང་ཞེས་བྱ་བ་ནི་ཅིག་ཅར་མི་སྐྱེ་བའོ། །རྣམ་པར་ཤེས་པ་སྔ་མ་གཞན་ཆགས་པ་གང་ཡིན་པ་དེ་ནུས་པ་ཉམས་པ་ཉིད་ཀྱིས་གྲུབ་པའི་ཕྱིར་ཇི་ལྟར་ཡིད་འགྲུབ། གང་གིས་ཡིད་བརྟག་པར་འགྱུར་པ་ཐམས་ཅད་ཀྱི་ཚེ་རྣམ་པར་ཤེས་པ་ཅིག་ཅར་མི་སྐྱེ་བ་ཉིད་ཀྱང་མ་ཡིན་ནོ་ཞེས་སྟོན་པ་ནི། ལྷན་ཅིག་སྐྱེ་བ་ཡང་ཞེས་བྱ་བའོ། །འཇུག་པ་མཚུངས་པ་ལའང་ཞེས་འང་གི་དོན་བརྗོད་པ་ནི་གཞན་དུ་འང་ཞེས་བྱ་བའོ། །འདི་ཉིད་ཀྱི་དོན་བསྡུས་ཏེ་བསྟན་པ་ནི་ཐམས་ཅད་ཀྱི་ཞེས་བྱ་བའོ། །མར་མེ་དུ་བས་མཐོང་ཞེས་བྱ་བ་ནི་མར་མེ་གང་ལ་འབྲས་བུ་མཐོང་བ་དུ་མ་ཡོད་པ་དེ་ལ་དེ་སྐད་ཅེས་བྱ་བའོ། །འོན་ཏེ་ལྟ་བ་བོ་དུ་མའི་དབང་གིས་སྒྲོན་མས་ཤེས་པ་མ་བསྐྱེད་དོ་ཞེ་ན། ལན་དུ་འདི་ལ་ཡང་ཞེས་བྱ་བ་སྟེ། སྐབས་སུ་བབ་པའི་ཡུལ་ལྔ་ཉེ་བར་གནས་པ་ལ་ཡང་ངོ༌། །ཁྱད་པར་ནི་དེའི་བདག་ཉིད་དུ་མི་འགྱུར་ཏེ། དུས་ཕྱིས་འབྱུང་བའི་ཕྱིར་དད་རྒྱུ་ཐ་དད་པའི་ཕྱིར་རོ། །འོན་ཏེ་ཁྱད་པར་དེ་གཞན་ཁོ་ནའོ་ཞེ་ན། དེའི་ཚེ་ག་ལ་
ཏེ་ཁྱད་པར་དེ་གཞན་ན་ཡིད་རྟག་པ་གཅིག་བུའི་རང་བཞིན་དེའི་ཅི་ཡིན་ཏེ་ཅི་ཡང་མ་ཡིན་ནོ། །འོན་ཏེ་ཁྱད་པར་དེ་ཡིད་དང་འབྲེལ་པ་ཡིན་ནོ་ཞེ་ན། ཡིད་དེ་དང་ཁྱད་པར་དེ་འབྲེལ་ནའང་ཁྱད་པར་འདི་ཡིད་དེའི་ཡིན་པར་འགྱུར་མོད་ཀྱི། རང་བཞིན་གཅིག་ཡིན་པར་མི་འགྱུར་རོ། །དེས་ན་ཁྱད་པར་གཞན་སྐྱེས་ཀྱང་སྔ་མ་བཞིན་དུ་ཡིད་དེ་སྐྱེད་པར་བྱེད་པའམ། སྐྱེད་པར་མི་བྱེད་པ་ཐམས་ཅད་ཀྱི་ཚེ་འགྱུར་རོ། །རྣམ་པར་ཤེས་པ་དེ་ཉིད་ཅེས་བྱ་བ་ནི་ལུས་དང་སྐྱེས་བུ་དག་རྟག་པས་ཁྱད་པར་དུ་འགྱུར་བ་མི་འཐད་པའི་ཕྱིར་རོ་ཞེས་བྱ་བའི་དོན་ཏོ། །འདུ་བྱེད་དེ་གང་ལས་ཕྱིས་སྐྱེ་བ་ཡིན་འདི་ལ་གཞན་གྱིས་བརྗོད་པ་ནི་ཤེས་པ་ལས་སྐྱེས་པ་ཞེས་བྱ་བའོ། །ཁས་ལེན་པས་གལ་ཏེ་ཞེས་བྱ་བའོ། །འོ་ན་བག་ཆགས་ཉིད་བློའི་སྐྱེད་བྱེད་ཡིན་གྱི་བློ་ནི་མ་ཡིན་ནོ་སྙམ་ན། བློ་ལས་ཞེས་གསུངས་སོ། །དེ་ལྟ་བུ་ཉིད་དུ་མཐོང་ངོ་ཞེས་བྱ་བ་ནི་སྣང་བའི་རང་བཞིན་ཤེས་པ་སྐྱེད་པར་བྱེད་པ་ཐམས་ཅད་ནི་གཟུང་བ་ཞེས་བྱ་བ་ནི་འཁོར་བར་མ་མཐོང་ངོ༌། །འོན་ཏེ་ཞེས་བྱ་བ་ནི་གཞན་གྱི་འོ་བསམ་པ་ནི་འདི་མིན་ཏེ། རང་བཞིན་འགས་རྣམ་པར་ཤེས་པ་དེ་བསྐྱེད་པ་ཡིན་ཡང་གཟུང་བར་བྱ་བ་མ་ཡིན་པར་ཡང་འགྱུར་རོ་ཞེས་བྱ་བའོ། །འདི་འགོག་པ་ནི་མ་ཡིན་ཏེ་ཞེས་བྱ་བའོ། །ཤེས་པ་སྔ་མའི་གཟུང་བའི་ནུས་པ་གང་ཡིན་པ་དེ་ཉམས་པར་འགྱུར་གྱི་སྐྱེད་པར་བྱེད་པའི་རང་བཞིན་ནི་ཉམས་པ་མ་ཡིན་ནོ། །དེས་ན་བློ་སྔ་མ་ལས་ཤེས་པ་ཕྱི་མ་སྐྱེད་པར་ཕྱེད་དོའི་ཞེ་ན། འདི་ལ་བརྗོད་པ་ནི་དེ་ནི་མི་རིགས་ཏེ་ཞེས་བྱ་བའོ། །དེ་དངོས་པོར་ངེས་པ་ནི་སྐྱེད་བྱེད་ཀྱི་དངོས་པོར་ངེས་པའོ། །སྐྱེད་པར་བྱེད་པ་དེ་ནི་བློ་ལ་ཡང་ཡོད་པའི་ཕྱིར་རོ། །དེ་ཉིད་ཀྱི་ཞེས་བྱ་བ་ནི་གཟུང་བ་ཉིད་དུའོ། །དེར་ཡང་ཞེས་བྱ་བ་ནི་གཞན་གྱིས་སྨྲས་པ་རིངས་པར་བགྲང་བའི་ཚེ་ཡང་ངོ༌། །མ་ཡིན་ཏེ་ཞེས་བྱ་བ་ནི་འགོག་པའོ། །ད་ནི་རྣམ་པར་རྟོག་པར་བྱེད་དེ་དོན་གྱིས་གོ་བ་འདི་དོན་ནམ་དོན་རིག་པའམ་གཉི་ག་ལས་སྐྱེ་གྲང་ན། རེ་ཞིག་དོན་ལས་ནི་སྐྱེ་བ་མ་ཡིན་ཏེ། དེའི་ཚེ་ནི་དོན་དེ་ལས་རང་དང་གཞན་གྱི་རྒྱུ་ལ་ཡོད་པའི་བློ་ཐམས་ཅད་རྟོགས་པར་འགྱུར་རོ། །དོན་ནི་ཐུན་མོང་ཡིན་པའི་ཕྱིར་རོ་ཞེས་དགོངས་པའོ། །དོན་རྟོགས་པ་ལས་ཀྱང་དོན་གྱི་བློ་རྟོགས་པ་ཙམ་དུ་
འགྱུར་གྱི་འདི་ངའི་དོན་རྟོགས་པ་ཡིན་ནོ་ཞེས་ནི་མ་ཡིན་ནོ། །དེ་ཉིད་ཕྱིར་ན་ཞེས་བྱ་བ་ནི་ཉེས་པ་བཤད་ཟིན་པ་ཉིད་ཀྱི་ཕྱིར་རོ། །འོན་ཏེ་དོན་རིག་པ་ལས་རིག་པ་རྟོགས་པ་ཡིན་ནོ་ཞེ་ན། འདི་ལ་ཚིག་ལེའུར་བྱས་པས་བརྗོད་པའི་ཉེས་པ་གཞན་ཉིད་བརྗོད་པ་ནི་དོན་རིག་པ་དེ་ཉིད་ཅེས་བྱ་བའོ། །འོན་ཏེ་དོན་རིག་པ་ནི་མཐོང་བ་ཉིད་དེ་དེས་ནམ་མཐོང་བའི་རྟོགས་པར་འགྱུར་རོ་ཞེ་ན། དོན་མྱོང་བ་ཡང་ཞེས་བྱ་བའོ། །རྣམ་པར་རྟོག་པ་གསུམ་པ་ལ་བརྗོད་པ་ནི། དེ་ཉིད་ཀྱི་ཕྱིར་ཞེས་བྱ་བའོ། །གཉིས་པ་ནི་དཔོན་དང་རིག་པའོ། །འོན་ཏེ་རིག་པ་གཅིག་པུ་མི་མཐོང་མོད་གཉི་ག་ཅི་སྟེ་མི་མཐོང་ཞེ་ན། གཅིག་མ་མཐོང་ན་ཞེས་གསུངས་སོ། །འོན་ཏེ་ཁྱད་པར་མེད་ཀྱང་རེས་འགའ་འཛིན་ལ་རེས་འགའ་མི་འཛིན་པའི་ཕྱིར་ཉེས་པ་ཅི་ཡོད་སྙམ་ན་གལ་ཏེ་ཡུལ་ལ་ཞེས་གསུངས་སོ། །དེ་ཞེས་བྱ་བ་ནི་འཛིན་པའི་རྣམ་པར་དབྱེ་བའོ། །ཁོ་བོ་ཅག་གིས་ཐལ་བར་སྒྲུབ་པའི་ཡུལ་གཞན་ལ་འཕོ་བར་འགྱུར་བ་ནི་ཁྱེད་ཀྱིས་མ་སྤངས་སོ་ཞེས་དགོངས་པའོ། །ནུས་པ་དུ་མ་དང་གཅིག་པ་དེ་རྣམས་མེད་ཀྱང་དངོས་པོ་རྣམས་ནི་འབྲས་བུ་དུ་མ་དང་གཅིག་ཀྱང་བྱེད་པ་ཡིན་ནོ། །འདི་ཇི་ལྟར་ཞེས་བྱ་བ་ནི་བརྒལ་ཞིང་བརྟག་པའི་རྣམ་པའོ། །དེ་ཞེས་བྱ་བ་ནི་སོ་སོར་ངེས་པའོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་རང་གི་རྒྱུའི་ནུས་པ་ཁས་མི་ལེན་ནའོ། །ཆོག་མོད་ཅེས་བྱ་བ་ནི་གང་ལ་ནུས་པ་སྣ་ཚོགས་མེད་ཀྱང་འགའ་ཞིག་འབྲས་བུ་སྣ་ཚོགས་བྱེད་ལ་ནུས་པ་གཅིག་མེད་ཀྱང་འགའ་ཞིག་ནི་འབྲས་བུ་གཅིག་བྱེད་པ་འདི་ནི་དངོས་པོ་རྣམས་ཀྱི་རང་བཞིན་ཡིན་ནོ་ཞེས་བྱ་བས་སོ། གལ་ཏེ་ནུས་པ་ཐ་དད་པའི་རྟོགས་པ་འདི་མེད་ན་དེའི་ཚེ་འདིའི་ནུས་པ་ཞེས་ཐ་དད་པར་རྟོགས་པ་ཇི་ལྟར་ཞེ་ན། རང་གི་ངོ་བོར་ཞེས་གསུངས་ཏེ། རང་བཞིན་དུ་གྱུར་པའི་ཆོས་གང་ཡིན་པ་དེ་ཐ་དད་པར་སྒྲོ་བཏགས་ནས་འདི་ལྟར་རྟོགས་པ་ཡིན་གྱི་དེ་ཁོ་ན་ཉིད་དུ་ནི་མ་ཡིན་ནོ། །འདི་ཇི་ལྟར་རྟོགས་པར་བྱ་ཞེས་བརྩད་པ་ན་བརྗོད་པ་ནི་ནུས་པ་ལ་ཡང་ཞེས་བྱ་བའོ། །དེ་ཉིད་གཞུང་འཛུགས་པ་ནི་འདི་ལྟར་ཞེས་བྱ་བའོ། །མ་ཡིན་ཞེས་བྱ་བ་ནི་རྩོད་པ་འགོག་པའོ། །དེས་ན་འབྲས་བུ་འགའ་ཞིག་ནི་གཅིག་ལས་འགྱུར་བ་ཡིན་ལ་འབྲས་བུ་འགའ་ཞིག་ནི་ཚོགས་པ་ལས་ཇི་ལྟར་མཐོང་བ་བཞིན་འབྱུང་བ་མ་
ཡིན་ནོ། །དེ་དག་དེའི་ཡིན་ནོ་ཞེས་བྱ་བའི་ཐ་སྙད་མེད་པ་ཉིད་དེ། དེས་ན་དེ་ལས་ཕན་པ་དཔྱད་པས་ཅི་ཞིག་བྱ་སྙམ་ན། གཞན་དུ་ནི་ཞེས་བྱ་བ་སྟེ། དེ་དག་དེའི་ཞེས་འབྲེལ་པ་མེད་ནའོ། །དེ་ལྟར་ཞེས་བྱ་བ་ཐ་དད་པར་མཐོང་བར་ཐལ་བ་ཡིན་ནོ། །དེས་ན་ཇི་ལྟར་ནུས་པ་རྣམས་དེ་དག་དེའི་ཞེས་ཉེ་བར་བསྟན་པའི་དོན་གཅིག་ལས་ཕན་པ་དོན་དུ་གཉེར་བར་བྱེད་པ་དེ་བཞིན་དུ་འབྲས་བུ་དུ་མ་ཡང་གཅིག་ལས་ཕན་པ་ལ་བརྟེན་པར་འགྱུར་ན། ཅི་ཉེས་ཞེས་དགོངས་པའོ། །ཡང་ན་ཞེས་བྱ་བ་ལ་སོགས་པས་ནི་མ་ཡིན་ཞེས་བྱ་བའི་དགག་པ་འགའ་ཞིག་གཅིག་ལས་གཅིག་ཅེས་བྱ་བ་དང་འབྲེལ་ནས་འཆད་པའོ། །ཇི་ལྟར་ཞེས་བྱ་བའི་ནུས་པ་དུ་མ་ལས་ཕན་འདོགས་པའི་སྒོ་ནས་སོ། །དེ་བཞིན་དུ་ཞེས་བྱ་བ་ནི་འབྲས་བུ་དུ་མ་ལས་ཕན་འདོགས་པའི་སྒོ་ནས་སོ། །གཉི་ག་ཞེས་བྱ་བ་ནི་དོན་གྱི་བློ་དང་རང་གི་ཡུལ་ཅན་གྱི་བློའོ། །སྔར་ནི་ཞེས་བྱ་བ་བློ་སྔ་མའི་དུས་ན་སྣང་བ་ཡིན་ལ་ཕྱིས་ནི་ཞེས་བྱ་བ་བློའི་དུས་སུ་ནི་དེའི་བློའོ། །འོན་ཏེ་ཞེས་བྱ་བ་ཉིད་ཕ་རོལ་པོ་གསལ་ཀ་བསྐྱེད་པ་ནི་བློ་ནི་ཞེས་བྱ་བའོ། །འདི་ལ་ལ་ནི་འོ་ན་ཞེས་བྱ་བའོ། །དོན་གྱིས་ཞེས་བྱ་བ་ནི་དོན་གསལ་བའི་དོན་གྱིས་སོ། །གཏན་འགྱུར་ཞེས་བྱ་བ་ནི་རྒྱུན་མི་འཆད་པར་དུ་མ་འཛིན་པའི་རིམ་པ་གང་ཡིན་པ་དེའི་དུས་སུ་ཡང་ངོ༌། །གཞན་གྱི་ཚེ་ཞེས་བྱ་བ་ནི་ཕྱིས་ཀྱང་རྟོགས་པར་མི་འགྱུར་རོ། །དེས་ན་དོན་གྱིས་གོ་བས་དོན་གྱི་རིག་པ་ཡིན་པ་ན། ལན་བརྒྱར་ཞེས་བྱ་བ་དོན་ལ་མང་པོར་སྣང་བར་འགྱུར་རོ། །དེའི་ཚེ་ཡང་གསལ་བ་ལ་སོགས་པ་གང་ལས་དོན་གྱིས་གོ་བར་འགྱུར་བ་རང་གི་བློ་སྟོན་པར་བྱེད་པ་དེའི་ཚེ་ནི་གསལ་བ་ལ་སོགས་པ་མཐོང་བ་འགའ་ཡང་ཡོད་པ་མ་ཡིན་ནོ། །ཅིའི་ཕྱིར་ཞེ་ན། དེའི་ཚེ་ཞེས་བྱ་བ་རང་གི་བློ་སྟོན་པའི་དུས་ན། གསལ་བ་ལ་སོགས་པ་དོན་གྱིས་གོ་བར་བྱེད་པ་གང་ཡིན་པ་དེ་འདས་པའི་ཕྱིར་རོ། །དྲན་པར་གྱུར་པ་ཞེས་བྱ་བ་གསལ་བ་ཞེས་བྱ་བའི་དོན་མཐོང་བ་ལས་སོ། །འདི་ལ་བརྗོད་པ་ནི་དྲན་པ་ཉིད་ཅེས་བྱ་བའོ། །དྲན་པར་གྱུར་པ་ལས་ནི་དྲན་པ་རྟོགས་ཀྱི་མྱོང་བ་མ་ཡིན་ཏེ། དེ་ལྟ་མ་ཡིན་ན་ནི་ནམ་གྱི་ཚེ་ཡང་རྟག་ཏུ་མེད་པར་འགྱུར་རོ། །ཁས་བླངས་ནས་ཀྱང་བརྗོད་པ་ནི་དེར་ཡང་ཞེས་བྱ་བ་སྟེ། བརྟགས་པའི་མྱོང་བ་ལས་ཡང་ངོ༌། །བརྗོད་པ་གཉིས་དང་གཉིས་
སུ་སྣང་བར་དྲན་པ་དང་མྱོང་བར་ཡང་འགྱུར་རོ། །འོན་ཏེ་དྲན་པར་བྱ་བ་ལས་ནི་དྲན་པ་རྟོགས་ལ་དེ་གང་མྱོང་བ་མེད་པར་མི་འཇུག་པ་དེས་ན་མྱོང་བ་རྟོགས་པ་ཡིན་ནོ་ཞེ་ན། དེ་ནི་མ་ཡིན་ཏེ་ཞེས་གསུངས་སོ། །བདག་གིས་ཉམས་སུ་མྱོང་འགྱུར་ཞེས་རྣམ་པ་དེ་ལྟར་དྲན་པ་འཇུག་པ་ན། ངའི་བློ་ཡོད་པར་གྱུར་ཏོ་ཞེས་བྱ་བ་རྣམ་པ་དེ་ལྟར་དོན་གྱིས་གོ་བ་ནི་མི་སྲིད་པ་ཁོ་ནར་ཏེ་དྲན་པ་ཙམ་གྱིས་འཇུག་པའི་ཕྱིར་རོ། །ཕྱིས་ཀྱང་དོན་གྱིས་གོ་བ་མ་ཡིན་ཏེ། དྲན་པ་ཉིད་ནི་ཚད་མ་མ་ཡིན་པས་དོན་གྱིས་གོ་བ་མ་ཡིན་པའི་ཕྱིར་རོ། །དྲན་པ་ལས་གཞན་པའི་དོན་གྱིས་གོ་བ་ཡང་མྱོང་བ་མེད་དེ། དེས་ན་དྲན་པ་ག་ལ་སྲིད་དེ། ཉམས་སུ་མྱོང་བ་དོན་གྱིས་གོ་བསམ་གྲུབ་པའི་ཕྱིར་རོ། །ཁས་བླངས་ནས་ཀྱང་བརྗོད་པ་ནི་གང་གི་ཚེ་ཞེས་བྱ་བའོ། །འོན་ཏེ་མི་གསལ་བའི་རྣམ་པ་གཉིས་ནི་ཡོད་པ་མ་ཡིན་ཏེ། དོན་ལྐོག་ཏུ་གྱུར་པའི་ཕྱིར་རོ། །མི་གསལ་བའི་རྣམ་པ་གཉིས་སུ་རིག་པ་ནི་ཡོད་པ་ཁོ་ནའོ་ཞེ་ན། འདི་ལ་བརྗོད་པ་ནི་དེ་ཡང་ཞེས་བྱ་བ་སྟེ། མི་གསལ་བའི་རྣམ་པ་གཉིས་རིག་པ་དེ་ཡང་ངོ༌། །གང་ཞིག་ཅེས་བྱ་བའི་དོན་ནམ་ཤེས་པ་གང་གི་ཚེ་དོན་གྱིས་གོ་བར་འདོད་པ་དེའི་ཚེ་ཁོ་ན་དེ་དོན་གྱིས་གོ་བ་ཡིན་ནོ། །འདི་ཉིད་གསལ་འདེབས་པ་ནི་གང་གི་ཕྱིར་ཞེས་བྱ་བའོ། །གང་གི་ཐ་མ་ཡིན་སྙམ་ན། གལ་ཏེ་ཡུལ་ཞེས་བྱ་བའོ། །གཞན་གྱིས་ཉམས་སུ་མྱོང་བར་གྱུར་པ་བཞིན་ཞེས་བྱ་བ་ནི། སྐྱེས་བུ་གཞན་གྱིས་མྱོང་བར་འགྱུར་པ་ནི་དོན་ཉམས་སུ་མྱོང་བར་མི་འགྱུར་བ་དེ་དང་འདྲ་བར་རོ། །དོན་གང་གིས་མྱོང་བ་ཉམས་སུ་མྱོང་བར་མ་གྱུར་པར་ནི་དེ་ཉམས་སུ་མྱོང་བར་གྱུར་པ་ཉིད་མི་སྲིད་པའི་ཕྱིར་རོ། །དབང་པོར་གྱུར་པའི་བར་ཡང་ཉམས་སུ་མྱོང་བར་གྱུར་པ་མ་ཡིན་ནོ། །གཞན་གྱིས་མྱོང་བར་གྱུར་པ་བཞིན་དུ་ཞེས་བྱ་བའི་དཔེ་ཉིད་གསལ་བར་བྱེད་པ་ནི་དཔེར་ན་ཞེས་བྱ་བའོ། །གཞན་གྱིས་ཉམས་སུ་མྱོང་བར་འགྱུར་ཡང་གཞན་དེས་ཉམས་སུ་མྱོང་བ་ནི། སྐྱེས་བུ་གཞན་ཉམས་སུ་མྱོང་བ་མེད་པའི་ཕྱིར་སྐྱེས་བུ་ཕ་རོལ་པོས་དོན་ཉམས་སུ་མ་མྱོང་བ་དེ་བཞིན་དུ་གཞན་གྱིས་ཉམས་སུ་མྱོང་བར་གྱུར་པའི་དོན་ལ་ཡང་མྱོང་བ་ཉམས་སུ་མྱོང་བར་མ་གྱུར་
པའི་ཕྱིར་མ་མྱོང་བར་འགྱུར་རོ། །འོན་ཏེ་གསལ་བ་ལ་སོགས་པ་ལས་རང་གིས་ཉམས་སུ་མྱོང་བར་རྟོག་གོ་ཞེ་ན། འདི་ལ་བརྗོད་པ་ནི་དོན་གྱི་རང་བཞིན་དེ་ནི་ཞེས་བྱ་བ་སྟེ། གསལ་བ་ཉིད་ལ་སོགས་པའོ། །ཇི་ལྟར་མྱོང་བ་ཡིན་ཞེས་བྱ་བ་ནི་བདག་དང་འབྲེལ་པར་ཡོངས་སུ་བརྟག་པའོ། །གཞན་གྱིས་ཀྱང་མྱོང་བར་ཅི་སྟེ་མི་རྟག་ཅེས་དགོངས་པའོ། །གཞན་ཉམས་སུ་མྱོང་བ་ན་ཞེས་བྱ་བ་ནི་གང་གི་ཚེ་གཞན་གྱིས་དོན་མྱོང་བ་དེའི་ཚེའོ། །དེ་ཁོ་ནར་ནི་གཞན་གྱིས་མྱོང་བར་གྱུར་པ་ལ་ཇི་ལྟར་བདག་ཉིད་ཀྱི་མངོན་སུམ་ཡིན་པར་རྣམ་པར་འཇོག་མི་ནུས་པ་དེ་བཞིན་དུ་བདག་གིས་མྱོང་བར་གྱུར་པ་ཡང་བདག་གི་གཞན་གྱིའོ་ཞེས་རྣམ་པར་གཞག་པར་མི་ནུས་སོ། །གཞན་རྟོགས་པས་ཞེས་བྱ་བ་ནི་ཉམས་སུ་མྱོང་བ་རྟོགས་པས་སོ། །གཞན་ཞེས་བྱ་བ་ནི་སྣང་བཞིན་པའི་དོན་གྱི་རང་བཞིན་ནོ། །སྔོན་པོ་ལ་སོགས་པའི་དོན་རྟོགས་པ་ནི་བདེན་མོད་ཀྱི། འོན་ཀྱང་རང་ཉིད་ཅེས་བྱ་བ་རང་གི་ངོ་བོ་ཁོ་ནས་རྟོགས་པ་ཡིན་གྱི་ཤེས་པ་ནི་བརྟག་པར་མི་བྱའོ། །དེ་ཡང་བདག་གོ །བྱེད་པ་པོ་ཉིད་དུ་ནི་རྟོགས་པའིའོ། །དེས་ན་རང་རིག་པ་མ་ཡིན་ཏེ་གཞན་རིག་པའང་ཡོད་པའི་ཕྱིར་ཞེས་བྱ་བ་ནི་གཞན་གྱི་བསམ་པའོ། །ཅི་ལྟར་ལུས་ཡིན་སྙམ་ན་གང་གི་ཕྱིར་ཞེས་བྱ་བའོ། །གང་གི་ཚེ་ལུས་ཉིད་རིག་པ་དེའི་ཚེ་ལུས་རང་རིག་པ་མེད་པ་ཁོ་ནའོ། །དེས་ཞེས་བྱ་བ་ནི་བདག་གིས་སོ། །བདག་རང་རིག་པས་ཉམས་སུ་མྱོང་བ་མེད་ཀྱང་བདག་ཉམས་སུ་མྱོང་ངོ་ཞེས་བྱ་བའི་ཐ་སྙད་ཇི་ལྟར་མི་འདོད་གསལ་བ་ཤེས་པས་དོན་གསལ་བའི་ཕྱིར་རོ། །ཇི་ལྟར་ཞེས་བྱ་བ་ནི་མིག་མ་རྟོགས་པའི་ཕྱིར་རོ་ཞེས་བསམས་པའོ། །ལན་ནི་ངའི་ཞེས་བྱ་བའོ། །རང་རིག་པ་མ་ཡིན་ན་ཞེས་བྱ་བ་ནི་རང་རིག་པ་ཁས་མི་ལེན་ནའོ། །དེའི་ཚེ་མཐའ་དག་ཅེས་བྱ་བ་ནི་མཐའ་གསལ་བར་འགྱུར་རོ་ཞེས་ཧ་ཅང་ཐལ་བར་འགྱུར་གདོན་མི་ཟ་བར་འགའ་ཞིག་ལ་འགའ་ཞིག་གི་གསལ་བ་སྐྱེས་པའི་ཕྱིར་རོ། །འོན་ཏེ་གང་གི་གསལ་བ་གང་ལ་སྐྱེས་པ་དེ་ལ་དེ་གསལ་བའི་ཕྱིར་ཧ་ཅང་ཐལ་བ་མ་ཡིན་ནོ་སྙམ་ན། གང་གི་ཞེས་གསུངས་སོ། །འབྲེལ་པ་ཡང་མི་འབྱུང་སྟེ་གསལ་བ་མ་རྟོགས་པའི་ཕྱིར་དེའི་རང་བཞིན་ནོ། །ཚད་མ་རྣམ་འགྲེལ་རྒྱན་གྱི་ཊཱི་ཀཱ་ལས། མངོན་སུམ་གྱི་ལེའུ་སྟེ་གཉིས་པའོ།། །།