དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ།
ཞི་བ་འཚོ།
རྒྱ་གར་སྐད་དུ། ཏཏྟྭ་སཾ་གྲ་ཧ་ཀཱ་རི་ཀཱ། བོད་སྐད་དུ། དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རང་བཞིན་དབང་ལྡན་གཉིས་ཀ་དང༌། །བདག་སོགས་བྱེད་དང་བྲལ་གཡོ་བ། །ལས་དང་དེ་འབྲས་འབྲེལ་པ་དག །རྣམ་པར་གཞག་ལ་སོགས་པའི་རྟེན། །ཡོན་ཏན་རྫས་དར་བྱ་བ་དང༌། །རིགས་དང་འདུ་སོགས་ཁྱད་པར་གྱིས། །སྟོང་དང་སྒྲོ་བཏགས་རྣམ་ཅན་ནི། །སྒྲ་དང་ཤེས་པའི་སྤྱོད་ཡུལ་ཅན། །མཚན་ཉིད་གསལ་དང་ལྡན་པ་ཡི། །ཚད་མ་གཉིས་ཀྱིས་གཏན་ལ་དབབ། །ཆ་ཤས་ཤིན་ཏུ་ཕྲ་བས་ཀྱང༌། །འདྲེས་པ་གཞན་གྱི་བདག་ཉིད་མིན། །མི་འཕོ་ཐོག་མཐའ་མེད་པ་ཅན། །གཟུགས་བརྙན་ལ་སོགས་དག་དང་འདྲ། །སྤྲོས་པ་ཀུན་གྱི་ཚོགས་དང་བྲལ། །གཞན་གྱིས་རྟོགས་པ་མ་ཡིན་དང༌། །རང་དབང་ཐོབ་ལ་མི་བརྟན་པ། །འགྲོ་ལ་ཕན་པ་མཛད་བཞེད་པས། །བསྐལ་པ་གྲངས་མེད་མི་ཉུང་བས། །ཐུགས་རྗེ་ཆེན་པོའི་བདག་གྱུར་པ། །རྟེན་ཅིང་འབྲེལ་པར་འབྱུང་བ་ནི། །གང་གིས་
གསུངས་པ་སྨྲ་བའི་མཆོག །ཀུན་མཁྱེན་དེ་ལ་ཕྱག་འཚལ་ནས། །དེ་ཉིད་རྣམས་ནི་བསྡུ་བར་བྱ། །ནུས་པ་མ་ལུས་དང་ལྡན་པའི། །གཙོ་བོ་ཉིད་ནི་འབའ་ཞིག་ལས། །འབྲས་བུའི་ཁྱད་པར་རབ་སྐྱེ་སྟེ།། དེ་དངོས་ཅན་ཉིད་ཡང་དག་པར། །གལ་ཏེ་རྒྱུ་ཡི་བདག་ཉིད་ལ། །ནུས་པ་འབྲས་བུ་དོན་ཡོད་མིན། །དེ་ནི་བྱ་བར་མི་ནུས་ཏེ། །ངོ་བོ་མེད་ཕྱིར་མཁའ་པད་བཞིན། །མེད་པར་མཚུངས་ན་ཅི་ཡི་ཕྱིར། །སཱ་ལུའི་ས་བོན་ལ་སོགས་པའི། །བྱེ་བྲག་ཕྱིར་ན་ངེས་པ་ཡི། །ཉེར་ལེན་ལེན་བྱེད་གཞན་མ་ཡིན། །སྐྱེ་བའི་ཆོས་ཅན་ཐམས་ཅད་ཀྱང༌། །དངོས་པོ་ཀུན་ལ་སྐྱེ་འགྱུར་ཏེ། །འདི་ཀུན་ལ་ནི་དེ་བདག་ཉིད། །ཁྱད་པར་ཁྱད་པར་མེད་ཕྱིར་རོ། །འདི་ཡི་ནུས་པ་ངེས་པའི་ཕྱིར། །དེ་ལྟ་མིན་ཞེས་ལན་མི་རུང༌། །གང་ཕྱིར་ནུས་པའི་རྒྱུ་དག་གིས། །ནུས་པར་འོས་པའི་འབྲས་ཉིད་བྱེད། །ཁྱད་པར་བྱར་མེད་གང་ཡིན་པ། །དངོས་པོ་མེད་དང་འགྱུར་བ་མེད། །གྱུར་ན་བདག་ཉིད་ཉམས་གྱུར་ཕྱིར། །དེ་དག་གིས་དེ་ཇི་ལྟར་བྱེད། །དེ་ལྟར་འབྲས་ཉིད་མི་རུང་ཕྱིར། །ཅི་ཞིག་བྱེད་པས་རྒྱུ་རུ་འགྱུར། །དེ་ཕྱིར་ས་བོན་ལ་སོགས་པ། །རྒྱུ་ཡི་དངོས་པོར་ཡང་མི་འགྱུར། །གསལ་བ་འདི་ནི་བདེ་སོགས་ཀྱི། །རྫས་
འགྲོའི་བར་ནི་གསལ་བར་སྣང༌། །རབ་ཏུ་གདུང་དང་བཏང་སྙོམས་སོགས། །འབྲས་བུ་འདི་ལ་དམིགས་ཕྱིར་རོ། །དེ་ཕྱིར་དེ་བདག་ཅན་ལས་བྱུང༌། །དེ་རིགས་རྗེས་འགྲོ་མཐོང་ཕྱིར་ཏེ། །བུམ་སོགས་བྱེ་བྲག་བཞིན་གཙོ་བོ། །དེ་ཡང་ཡིན་ཞེས་སེར་སྐྱ་སྨྲ། །འདི་ལ་བློ་བཟང་རྣམས་འཆད་པ། །ཡོད་པ་ལ་ཡང་ཀླན་ཀ་མཚུངས། །དེ་ལ་ཁྱེད་ཀྱི་ལན་གང་ཡིན། །བློ་བཟང་རྣམས་ཀྱི་འང་དེ་དང་འདྲ། །གལ་ཏེ་ཞོ་སོགས་འོ་མ་སོགས། །བདག་ཉིད་ལ་ནི་རྣམ་ཀུན་ཡོད། །རྒྱུ་ལ་སོགས་དང་འདྲ་བདག་ཉིད། །ཡོད་པ་དེ་དག་ཅི་ཞིག་སྐྱེ། །འབྲས་བུ་དེ་རྒྱུས་བསྐྱེད་བྱ་མིན། །ཡོད་ཕྱིར་རྒྱུ་དང་རིག་པ་བཞིན། །དེ་ཕྱིར་མངོན་འདོད་རྒྱུ་མིན་ཏེ། །བསྒྲུབ་བྱ་མེད་ཕྱིར་བདག་མཆོག་བཞིན། །གལ་ཏེ་གསལ་སོགས་མཚན་ཉིད་ཅན། །ཁྱད་པར་གྱུར་པ་འགའ་ཞིག་ལ། །འདི་ནི་རྒྱུ་རྣམས་ཀྱིས་བྱེད་ན། །ཐ་སྙད་དུ་ནི་འགྱུར་བ་མིན། །གལ་ཏེ་སྔ་ན་དེ་ཡོད་ན། །དེ་ལྟར་ཅི་ཡང་ལན་མ་ཐེབས། །འོན་ཏེ་དེ་མེད་དེ་དག་ལས། །མེད་པར་ཇི་ལྟར་སྐྱེ་བར་འགྱུར། །དེ་ཕྱིར་བསྒྲུབ་བྱ་མེད་པས་ན། །ཉེར་ལེན་ཡོངས་སུ་འཛིན་པ་མེད། །ངེས་པ་ལས་ཀྱང་སྐྱེ་བ་མེད། །ནུས་པ་མེད་ཅིང་བྱ་བའང་མེད། །བདག་ཉིད་ཐམས་ཅད་རྫོགས་པའི་ཕྱིར། །འདི་ནི་འབྲས་བུ་ཅི་ཡང་མེད། །དེ་ཕྱིར་རྒྱུ་ཡི་ཐ་སྙད་ཀྱང༌། །འཐད་པ་ཉིད་ནི་མ་ཡིན་ནོ། །སྒྲུབ་བྱེད་ཞུགས་པ་ཐམས་ཅད་ནི། །ཕྱིན་ཅི་ལོག་ནི་བཟློག་པ་དང༌། །ངེས་པ་སྐྱེད་བྱེད་དེ་ལྟ་བུར། །འདི་ནི་རིགས་པས་འཐད་མ་ཡིན། །ཐེ་ཚོམ་དང་ནི་ཕྱིན་ཅི་ལོག །རྟག་ཏུ་གནས་ཕྱིར་བཟློག་ཏུ་མེད། །ངེས་པ་སྐྱེ་བའང་ཡོད་མ་ཡིན། །དེ་ཉིད་ཕྱིར་ན་ཀུན་དོན་མེད། །ཡང་ན་ངེས་པ་མེད་པ་ནི། །སྒྲུབ་བྱེད་ལས་ནི་སྐྱེ་འགྱུར་ན། །ཡང་དག་མ་ཡིན་སྐྱེ་ཞེ་ན། །དེ་ཉིད་ཀྱིས་ན་འདི་དག་ཀུན། །འཁྲུལ་པ་ཅན་གྱུར་མ་ཡིན་ནམ། །གལ་ཏེ་མི་གསལ་དེ་དག་ལས། །གསལ་རྟེན་ཞེ་ན་དེ་གསལ་གང༌། །ངོ་བོ་ཁྱད་པར་སྐྱེ་མིན་ཏེ། །དབྱེར་མེད་ཕྱིར་དང་མ་འབྲེལ་ཕྱིར། །ཡུལ་དེ་རིགས་པ་འང་མ་ཡིན་ལ། །དམིགས་པའི་སྒྲིབ་པ་ཟད་པའང་མིན། །རྟག་པའི་ཕྱིར་དང་དམིགས་པ་ནི། །གཉིས་པ་ཡང་ནི་མི་སྲིད་ཕྱིར། །ཡོན་ཏན་གསུམ་ལྡན་
དབྱེར་མེད་ཀྱང༌། །ཐམས་ཅད་ཀུན་གྱི་བྱེད་པོ་མིན། །གང་འདྲ་མེད་པའང་དེ་དང་འདྲ། །ཐམས་ཅད་བྱེད་པོ་ཀུན་མིན་ན། །ལྟོས་སམ་མ་གྲུབ་པ་ཡི་ཕྱིར། །ཁྱོད་ནི་ནུས་བ་ངེས་པ་མེད། །ཡོད་ན་དེ་ཡི་ངེས་པ་ནི། །ལྟོས་བཅས་རིགས་པ་མ་ཡིན་ནམ། །དེ་མིན་དེ་དག་མ་སྐྱེས་ན། །དེ་ལྟའི་སྒྲ་ནི་མེད་དུ་ཟད། །ཁྱད་པར་ཀུན་གྱིས་དབེན་པ་ཡི། །དངོས་པོའི་ངོ་བོ་ཉམས་པ་མེད། །མིང་ནི་དངོས་པོའི་ངོ་བོ་མིན། །གང་ཕྱིར་བརྗོད་དང་རྣམ་རྟོག་ནི། །རྣམ་པ་སྣ་ཚོགས་དབྱེར་མེད་ལ། །ཇི་ལྟར་གོམས་པ་བཞིན་དུ་འཇུག །སྐྱེ་བའི་དངོས་པོའི་དངོས་དེ་ནི། །མེད་དང་དེ་བཞིན་ཡོད་པ་དང༌། །འབྲེལ་པ་མེད་དེ་རྣམ་རྟོག་བློས། །མེད་དང་སྤྲེལ་བ་ཁོ་ནར་ཟད། །གལ་ཏེ་དངོས་པོའི་ངོ་བོ་འདི། །གཅིག་གི་རྗེས་ལ་མཐོང་བ་དང༌། །སྔར་མེད་ཞེས་པ་དེ་ས་བོན། །སྔར་ཡོད་པ་ལ་འདི་མེད་དོ། །འོ་མ་སོགས་ལ་ཞོ་ལ་སོགས། །ནུས་པའི་ངོ་བོ་འདོད་པ་གང༌། །དེ་ལ་ནུས་གང་གལ་ཏེ་ཞོ། །འོ་མ་བཞིན་དུ་སྣང་བར་འགྱུར། །གལ་ཏེ་གཞན་ཡིན་གཞན་ཡོད་ན། །ཇི་ལྟར་དངོས་ཀུན་གཞན་ཞེས་བྱ། །སྙིང་སྟོབས་ཡོད་པ་སྡུག་བསྔལ་དང༌། །གཏི་མུག་ཡོད་པ་མ་ཡིན་ནོ། །གསལ་བ་སྙིང་སྟོབས་སོགས་རྗེས་འགྲོ། །ངེས་ལ་ཇི་ལྟར་ཡང་མ་གྲུབ། །བདེ་སོགས་ནང་གི་ཡིན་པའི་ཕྱིར། །དེ་ནི་རང་རིག་གསལ་ཕྱིར་རོ། །སྒྲ་སོགས་གཅིག་པུ་ཁོ་ན་ཡང༌། །གོམ་དང་རིག་པའི་བྱེ་བྲག་ལས། །ཆགས་པ་ལ་སོགས་ངེས་པ་ནི། །སྐྱེ་བ་དག་ཏུ་གསལ་བར་སྣང༌། །དངོས་གཅིག་རྗེས་སུ་འབྲངས་ནས་ནི། །རིག་པ་སྣ་ཚོགས་ཐལ་བར་འགྱུར། །གལ་ཏེ་མ་མཐོང་སོགས་དབང་གིས། །དངོས་པོའི་རྗེས་སུ་འབྲང་མི་འགྱུར། །དངོས་པོ་ངོ་བོ་རྣམ་གསུམ་པ། །དེ་ཡི་རིག་པ་རྣམ་གཅིག་ཅན། །དེ་དང་མི་མཐུན་དེ་དག་ནི། །དེ་ལ་ཡང་དག་ཇི་ལྟར་རིགས། །སྐྱེས་བུ་གཅིག་ལ་རྣལ་འབྱོར་པའི། །བདེ་དང་སྐྱོ་དང་བཏང་སྙོམས་སྐྱེའི། །ཕ་རོལ་རྣམས་ཀྱི་སྐྱེས་བུ་ནི། །དེ་ཡི་ངོ་བོར་འདོད་མ་ཡིན། །གསལ་བ་ཡོན་ཏན་གསུམ་ཅན་དུ། །གྲུབ་ཀྱང་གཙོ་བོ་རབ་མ་གྲུབ། །དེ་རྒྱུ་གཅིག་དང་རྟག་ཉིད་མིན། །དེ་ནི་རིགས་གཅིག་དང་ལྡན་མིན། །གསལ་བ་ཐམས་ཅད་ལྕགས་ཀྱི་ནི། །ཐུར་མ་དང་འདྲ་རིམ་པ་དང༌། །འབྲེལ་པའི་ལུས་
ཅན་དག་ཏུ་སྣང༌། །རྟོག་དང་འདྲེས་པའི་བདག་ཉིད་ཅན། །དེ་བཞིན་འཇིམ་པའི་འགྱུར་ལ་སོགས། །ཁྱད་པར་རིགས་གཅིག་ལྡན་མིན་དང༌། །རྒྱུ་གཅིག་མིན་པར་ཡང་འགྲུབ་སྟེ། །འཇིམ་གོང་ལ་སོགས་ཐ་དད་ཕྱིར། །སྐྱེས་བུ་རྣམས་ལ་སེམས་ཡོད་སོགས། །རྗེས་འགྲོ་ན་ཡང་རྒྱུ་གཅིག་ནི། །སྔོན་འགྲོར་མི་འདོད་དངོས་མིན་ཞེས། །གལ་ཏེ་དངོས་སུ་མིན་ཞེ་ན། །འདི་ལ་ནི་ཡང་ཅིས་མི་མཚུངས། །དེ་ཕྱིར་གཙོ་བོའི་རྒྱུ་མེད་ན། །རྒྱུ་དང་འབྲས་བུ་ལ་སོགས་པ། །སྣ་ཚོགས་ཐམས་ཅད་ནུས་པ་ཡི། །ཁྱད་པར་ལས་ནི་རུང་བར་འགྱུར། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་རང་བཞིན་བརྟག་པ་སྟེ་དང་པོའོ།། །།གཞན་དག་སྐྱེ་ལྡན་ཀུན་གྱི་ནི། །རྒྱུ་ནི་དབང་ཕྱུག་ཡིན་ཞེས་ཟེར། །ཤེས་པ་མེད་པའི་བདག་ཉིད་ནི། །རང་གི་འབྲས་བུ་རྩོམ་མི་བྱེད། །རབ་རྩོམ་བྱེད་པའི་ཡན་ལག་གི །དབྱིབས་ཀྱི་ཁྱད་པར་དང་ལྡན་གང༌། །དེ་ནི་བློ་ལྡན་རྒྱུས་བསྐྱེད་བྱ། །བུམ་པ་སོགས་བཞིན་དབང་པོ་ནི། །གཉིས་ཀྱིས་བཟུང་དང་བཟུང་བ་མིན། །རྩོད་པའི་གཞི་དང་འདི་འདྲ་བར། །དེས་ན་བློ་ལྡན་སྔོན་འགྲོ་བར། །ཆོས་མི་མཐུན་བ་རྡུལ་དུ་འདོད། །དེ་བཞིན་ལུས་སོགས་པ་ཡི་རྒྱུ། །ཤེས་པ་ཡོད་པས་བྱིན་བརླབས་ཏེ། །གཟུགས་སོགས་ལྡན་ཕྱིར་རྒྱུ་སྤུན་སོགས། །རང་གི་འབྲས་བུ་བྱེད་མཐོང་བཞིན། །ཆོས་དང་ཆོས་མིན་རྡུལ་ཕྲན་ཀུན། །སེམས་དང་ལྡན་པས་བྱིན་བརླབས་ཏེ། །རང་གི་འབྲས་བུ་བྱེད་སྡོད་དེ། །འཇུག་ཕྱིར་ཚིག་པ་རྒྱུ་སྤུན་བཞིན། །སྐྱེས་བུ་སྐྱེ་བའི་དང་པོ་ཡི། །ཐ་སྙད་གཞན་གྱིས་བསྟན་ལས་འབྱུང༌། །རབ་སད་རྣམས་ཀྱི་ངེས་པའི་ཕྱིར། །བྱིས་པ་ཡི་ནི་ཐ་སྙད་བཞིན། །འབྱུང་བ་ཆེ་སོགས་གསལ་བ་ནི། །སེམས་དང་ལྡན་པས་བྱིན་བརླབས་ན། །འཇིག་རྟེན་ཀུན་གྱི་བདེ་བ་དང༌། །སྡུག་བསྔལ་རྒྱུ་མཚན་ཉིད་དུ་འགྱུར། །ཤེས་པ་མེད་ཉིད་འབྲས་ཉིད་དང༌། །འཇིགས་ཉིད་ལ་སོགས་རྒྱུ་ཡི་ཕྱིར། །སྟེའུ་སོགས་བཞིན་དེ་ཡི་ཕྱིར། །དེ་ནི་ཡོད་པར་གསལ་བར་ཤེས། ཀུན་གྱི་བྱེད་པོ་ཉིད་གྲུབ་པ། །དེ་ནི་སྒྲིབ་མེད་ཀུན་ཤེས་ཉིད། །གྲུབ་སྟེ་འདི་ལྟར་བྱེད་པོས་ནི། །འབྲས་བུའི་ངོ་བོ་སོགས་རིག་བྱེད། །རྩོད་པའི་རྟེན་གྱི་དངོས་པོ་ནི། །འགའ་ལ་མངོན་སུམ་དུ་ནི་གསལ། །དངོས་པོ་ཡོད་སོགས་གཏན་ཚིགས་ཕྱིར། །བདེ་སོགས་ངོ་བོ་བྱེ་བྲག་གི །སྒྲུབ་པ་དང་པོ་དེ་
ལ་ནི། །གཏན་ཚིགས་མ་གྲུབ་གང་གི་ཕྱིར། །བཀོད་པ་སྦྱོར་བ་ཞེས་བྱ་དང༌། །དེ་བཞིན་ཡན་ལག་ཅན་མ་གྲུབ། །བལྟར་རུང་ཉིད་དུ་ཁས་བླངས་པ། །གཉིས་ཀ་མི་དམིགས་པ་ཡི་ཕྱིར། །དེ་ཡི་ཕྱིར་ནི་དཔེ་འདི་ཡང༌། །སྒྲུབ་པ་དང་ལྡན་མ་ཡིན་ནོ། །མིག་དང་རེག་པའི་རྣམ་ཤེས་ནི། །ཐ་དད་སྣང་བ་ཉེ་བར་སྐྱེ། །དེ་དག་དམིགས་པ་གཅིག་ཉིད་མེད། །དྲི་ལ་སོགས་པའི་ས་བོན་བཞིན། །དེ་དག་གིས་ནི་མཐུ་བྱུང་བ། །རྟོག་དང་འབྲེལ་པའི་བདག་ཉིད་ཅན། །ཉིད་མཚམས་སྦྱོར་བའི་ཤེས་པ་ཡིས། །བསྡུས་ལ་ཞེན་པར་བྱེད་པ་ཡིན། །དེ་ཕྱིར་ཆུ་དང་མེ་སོགས་འདི། །དབང་པོ་གཉིས་ཀྱིས་གཟུང་བྱ་མེད། །ཇི་སྐད་བཤད་པའི་ཆོས་ཅན་ནི། །མ་གྲུབ་ཕྱིར་ན་གཞི་མ་གྲུབ། །ལྷ་ཁང་ལ་སོགས་ལ་བཀོད་པ། །ཁྱད་པར་ཅན་ཉིད་ཅི་འདྲ་བ། །བྱེད་པ་པོ་ནི་མི་དམིགས་ན། །གང་མཐོང་བ་ནི་བློ་ལྡན་རྟོགས། །ལུས་དང་རི་སོགས་ཆོས་ཅན་ལ། །གལ་ཏེ་དེ་འདྲ་ཉིད་སྣང་ན། །སྒྲུབ་པ་འདི་ལས་ཇི་ལྟ་བུར། །འདོད་པ་གྲུབ་པ་དེ་རིགས་སོ། །རྗེས་སུ་འགྲོ་དང་ལྡོག་པ་ཡིས། །གང་གི་འབྲས་བུར་གང་ངེས་པ། །དེ་མཐོང་བ་ན་དེ་ངེས་པ། །ཞེས་བྱར་རིགས་པས་གནས་པ་ཡིན། །དབྱིབས་ཀྱི་ཁྱད་པར་དེ་ལྟ་བུ། །ལུས་དང་ཤིང་ལ་སོགས་བའི་དབྱིབས། །ཁྱད་པར་འདི་དག་ལ་མེད་དེ། །དེ་འདྲ་བ་ནི་རབ་བརྗོད་པའི། །སྒྲ་ཙམ་འབའ་ཞིག་ཁོ་ན་ཡིས། །ལྡོག་ན་ཐེ་ཚོམ་ཟ་བར་ནི། །སྒྲུབ་པར་འགྲུབ་སྟེ་གྲོག་མཁར་དག །རྫ་མཁན་གྱིས་ནི་བྱས་པ་བཞིན། །ཆོས་ཀྱི་ཁྱད་པར་རྣམ་རྟོག་ཕྱིར། །འདི་ནི་ལྟག་ཆོད་མ་ཡིན་ནམ། །འབྲས་བུ་ལ་སོགས་སྤྱི་ཉིད་ནི། །སྒྲུབ་པ་ཡིན་པའི་བསྟན་ཅེ་ན། །དེ་དངོས་པོ་མིན་ལས་ལོག་པའི། །འབྲས་བུ་ཙམ་ཞིག་མི་རྟག་ཉིད། །སྒྲུབ་པར་བྱེད་དེ་བདག་ཕྱིར་རོ། །སྒྲུབ་བྱེད་དེ་ལ་དེ་ཚུལ་མེད། །མེ་ལ་འཁྲུལ་པ་མེད་པར་ནི། །དུ་བའི་བདག་ཉིད་སྐྱ་བོ་མཐོང༌། །སྐྱ་བོར་བརྗོད་པ་ཙམ་ཉིད་ཀྱིས།། ཁ་བ་ལས་ཀྱང་དེ་རྟོགས་མེད། །སྤྱིར་འབྲེལ་པ་ལ་གང་གི་ཚེ། །ཁྱད་པར་དག་ལ་བརྟེན་པ་ཡི། །ཀླན་ཀ་དེ་ལ་ཚོལ་བྱེད་ན། །ལྟག་ཆོད་ཡིན་པར་ཡང་དག་བརྗོད། །གལ་ཏེ་ཚུལ་འདིར་མི་བརྟེན་པར། །གཞན་དུ་གོ་སྒྲའི་བརྗོད་པ་ཙམ། །ཉིད་ཀྱིས་རྡོ་རྗེ་ལ་སོགས་ལ། །རྭ་ཅན་ཉིད་ནི་
འགྲུབ་པར་འགྱུར། །གལ་ཏེ་འདི་ལ་འབྲེལ་པ་ནི། །ཚད་མ་ཡིས་ནི་སྒྲུབ་བྱེད་ན། །དེ་ཕྱིར་རིག་པས་གྲུབ་འདི་ལ། །རྩོད་པ་འགའ་ཡང་ཡོད་མ་ཡིན། །འོན་ཀྱང་རྟག་གཅིག་ཀུན་ཤེས་པའི། །བློ་རྟག་པ་ཡི་རྟེན་ཡིན་པར། །འགྲུབ་པར་མི་འགྱུར་ཁྱབ་མེད་ཕྱིར། །བསྒྲུབ་བྱ་མེད་པ་ཉིད་ཕྱིར་རོ། །འདི་ལྟར་ཁང་སྐྱ་ཐེམ་སྐས་དང༌། །ཁང་བཟངས་ཚོང་དུས་ལ་སོགས་པ། །རྣམ་ཤེས་དུ་མ་མི་རྟག་པས། །སྔོན་དུ་འགྲོ་བ་ཅན་དུ་ངེས། །དེ་ཉིད་ཕྱིར་ན་འདོད་པ་ལ། །གནོད་པར་བྱེད་པར་ཡང་འདོད་དེ། །རྣམ་ཤེས་དུ་མ་མི་རྟག་པ། །སྔོན་འགྲོ་ཅན་ཉིད་སྒྲུབ་ཕྱིར་རོ། །རྒྱུ་ནི་བློ་དང་ལྡན་ཙམ་ལ། །ཁྱོད་ཀྱིས་འབྲེལ་པ་བརྗོད་པས་ན། །གཉིས་པ་ལ་ནི་ཁོ་བོ་ཡིས། །རྣམ་པ་གསལ་བ་བརྗོད་པ་ཡིན། །རྟག་རྣམས་རིམ་དང་རིམ་མིན་པ། །འགལ་ཕྱིར་བྱ་བ་བྱེད་མ་ཡིན། །ཡུལ་རྣམས་རིམ་ཅན་ཉིད་ཀྱི་ཕྱིར། །དེ་ཤེས་རྣམས་ལའང་རིམ་པ་ཡོད། །ཤེས་བྱ་རིམ་ཅན་དང་འབྲེལ་ཕྱིར། །དབང་ཕྱུག་ཤེས་པ་རིམ་པས་འབྱུང༌། །ལྷ་སྤྱིན་སོགས་ཀྱི་རྣམ་པར་ཤེས། །འབར་སོགས་སྤྱོད་ཡུལ་ཅན་བཞིན་ནོ། །ཁོ་བོས་བུམ་པ་ལ་སོགས་པ། །རྡུལ་ཕྲན་ཚོགས་ཅན་ཡིན་པར་འདོད། །དེ་ཡི་བྱེད་པོ་རྫ་མཁན་སོགས། །རྡུལ་ཕྲན་ཁོ་ནའི་བྱེད་པོར་འདོད། །དེ་ཕྱིར་ཆོས་མི་མཐུན་པའི་དཔེ། །རྡུལ་ཕྲན་རབ་ཏུ་བསྟན་འདི་ལས། །བསྒྲུབ་བྱ་ཉིད་དུ་མངོན་འདོད་པའི། །ཆོས་འདི་ལོག་པ་མ་ཡིན་ནོ། །གལ་ཏེ་སྤྱིར་ན་བློ་ལྡན་ཞིག །སྔོན་དུ་འགྲོ་བ་ཅན་འདོད་ན། །དེ་ལ་རྩོད་པ་ཡོང་མེད་དོ། །ངོ་བོ་སྣ་ཚོགས་ལས་སྐྱེས་པ། །རྟག་བློ་གཅིག་ཅན་སྔོན་འགྲོ་བར། །བསྒྲུབ་ན་བསྒྲུབ་བྱས་སྟོང་པ་ཉིད། །མང་པོ་རྣམས་ཀྱིས་ཁང་སྐྱ་སོགས། །བྱས་པར་མཐོང་ཕྱིར་འཁྲུལ་པ་ཡིན། །སྐྱོན་འདི་ཉིད་ནི་ཅི་རིགས་པར། །གཏན་ཚིགས་ལྷག་མ་དག་ལ་ཡང༌། །སྤྱར་བར་བྱ་སྟེ་གཞན་ཡང་ནི། །ཅུང་ཟད་ཙམ་ཞིག་རབ་བསྟན་ཏེ། །སྐད་ཅིག་འཇིག་ཕྱིར་རྡུལ་ཕྲན་སོགས། །གདོད་ནས་འཇུག་པར་མ་གྲུབ་པོ། །དེ་ཡང་རིམ་དང་ལྡན་འཇུག་ཕྱིར། །དེ་ཉིད་ཀྱིས་ན་འཁྲུལ་བའང་ཡིན། །ཁོ་བོ་འཇིག་ཚེ་སྐྱེས་བུ་རྣམས། །རྣམ་ཤེས་དྲན་པ་འཇིག་མི་འདོད། །འོད་གསལ་ལྷ་སོགས་སྐྱེ་ཕྱིར་དང༌། །དེ་ཉིད་ནས་ནི་འདིར་སྐྱེ་ཕྱིར། །ཁ་མེད་ལུང་འབོགས་བྱེད་
པ་བོ། །གལ་ཏེ་དང་བས་རྟོགས་འགྱུར་གྱི། །ལུས་འབྲས་ཉིད་ཕྱིར་ཁ་མེད་དེ། །ཆོས་དང་ཆོས་མིན་མེད་ཕྱིར་རོ། །སྒྲུབ་བྱེད་ཀུན་ལ་ཁྱབ་པ་ནི། །རྗེས་སུ་དཔག་དང་འགལ་བའང་ཡིན། །འགལ་བའི་ཆོས་ཀྱི་གཏན་ཚིགས་ནི། །ཁྱབ་པར་རུང་པ་མ་ཡིན་ནོ། །སྐྱེ་བ་མེད་ཕྱིར་དབང་ཕྱུག་ནི། །སྐྱེ་བ་ཅན་གྱི་རྒྱུ་མ་ཡིན། །ནམ་མཁའ་ཡི་ནི་པདྨ་བཞིན། །གཞན་དུ་ཐམས་ཅད་ཅིག་ཅར་འབྱུང༌། །གང་དག་རིམ་གྱིས་འབྱུང་བ་ཡང༌། །དེ་དག་དབང་ཕྱུག་རྒྱུ་ཅན་མིན། །ཇི་སྐད་བཤད་པའི་སྒྲུབ་པ་ལས། །བླུན་པོ་ཡིད་ཆེས་བསྐྱེད་པ་བཞིན། །དེ་དག་ཀྱང་དེ་ལས་བྱུང་ན། །སྒྲུབ་པ་བརྗོད་པ་དོན་མེད་དོ། །རྟག་ཕྱིར་གསོ་བྱེད་མིན་པ་ལ། །དེ་ནི་ལྷན་ཅིག་བྱེད་མ་ཡིན། །གང་དག་ཡོད་ན་འབྱུང་མཐོང་ལ། །མེད་ན་ནམ་ཡང་མ་ཡིན་པ། །དེ་ཡི་རྒྱུ་གཞན་ཉིད་རྟོག་ན། །ཁྱེད་ལ་ཇི་ལྟར་ཐུག་མེད་མིན། །བྱེད་བ་པོ་ཉིད་བཀག་པའི་ཕྱིར། །ཀུན་ཤེས་ཉིད་ཀྱང་གསལ་བར་ནི། །རྟོགས་བྱ་དེ་ཡི་སྟོབས་ཉིད་ཀྱིས། །ཀུན་ཤེས་ཉིད་དུ་འཐད་ཕྱིར་རོ། །ཇི་སྐད་བཤད་པའི་ཉེས་པ་ཡིས། །སྒྲུབ་རྣམས་སུན་ཕྱུང་མ་གྱུར་ཀྱང༌། །འོན་ཀྱང་འཁྲུལ་པ་མཐོང་བའི་ཕྱིར། །བྱེད་པ་པོ་གཅིག་མ་གྲུབ་ན། །ཐམས་ཅད་ཤེས་ཉིད་ཅི་ལ་བརྟེན། །དེ་སྒྲུབ་ཕྱིར་ནི་སྒྲུབ་སྨྲས་པ། །རྒྱལ་དཔོག་པ་རྣམས་ལ་མཛེས་སོ། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་དབང་ཕྱུག་བརྟག་པ་སྟེ་གཉིས་པའོ།། །།དེ་ལྟར་རང་བཞིན་དབང་ཕྱུག་དག །སོ་སོར་རྒྱུ་ཉིད་བཀག་པའི་ཕྱིར། །གཉིས་ཀ་ལྷན་ཅིག་པ་འདི་ཡང༌། །སྐྱེ་བ་ཅན་གྱི་བྱེད་པོ་མིན། །དེ་དག་ལྷན་ཅིག་བྱེད་ཉིད་དུ། །བརྟགས་པ་གང་ཡིན་པ་དེ་ཡང༌། །ཁྱད་པར་སྐྱེད་པར་བྱེད་ཕྱིར་རམ། །དོན་གཅིག་བྱེད་པའི་ཕྱིར་ཡིན་གྲང༌། །རྟོག་པ་དང་པོ་རིགས་མིན་ཏེ། །དེ་དག་འགྱུར་བ་མེད་ཕྱིར་རོ། །གཉིས་པའང་མ་ཡིན་འབྲས་བུ་རྣམས། །ཅིག་ཅར་ཐལ་བར་འགྱུར་ཕྱིར་རོ། །ཅི་སྟེ་གཙོ་བོའི་ངོ་བོ་ནི། །ཚུལ་གསུམ་ཉིད་དུ་རྣམ་པར་གནས། །དེ་ལ་དབང་ཕྱུག་འདི་རྡུལ་དང༌། །ལྡན་ན་འབྱིན་པའི་རྒྱུ་ཡིན་ནོ། །སྙིང་སྟོབས་ཤས་ཆེར་འཇུག་པ་ལ། །གང་ཚེ་རྟེན་པར་བྱེད་པ་ན། །དེ་ཚེ་འཇིག་རྟེན་ཐམས་ཅད་ཀྱི། །གནས་པའི་རྒྱུ་མཚན་ཉིད་དུ་
འགྱུར། །གང་ཚེ་མུན་པའི་ནུས་པ་ནི། །ཤས་ཆེན་པོ་དང་སྦྱོར་བ་ན། །དེ་ཚེ་འདི་ནི་འགྲོ་བ་ཀུན། །འཇིགས་པར་བྱེད་པ་ཡིན་ཞེས་གྲག །དེ་ལྟར་རྡུལ་དང་སྙིང་སྟོབས་སོགས། །དངོས་རྣམས་འདི་ཡི་ལྷན་ཅིག་བྱེད། །རིམ་པ་ཁོ་ནར་འབྱུང་འགྱུར་ཏེ། །དེ་ཕྱིར་འབྲས་བུ་རིམ་མེད་ཡིན། །འདིར་བརྗོད་བྱ་སྟེ་འདི་དག་ནི། །གཅིག་བྱེད་ཚེ་ན་སྲིད་དམ་གཅིག །སྒྲུབ་པའི་མཐུ་སྟེ་ཡོད་དམ་མེད། །གལ་ཏེ་ཡོད་ན་འབྱིན་ཚེ་གཞན། །གཉིས་པ་ཡང་ནི་ཡོད་པར་འགྱུར། །དེ་བཞིན་གཞན་ཞིག་ཡོད་ན་ཡང༌། །གཉིས་པ་གཞན་དུ་ཐལ་པར་འགྱུར། །དེ་ཡི་ངོ་བོ་གཞན་གྱིས་ནི། །གཞན་གྱི་བྱེད་བོ་མ་ཡིན་པས། །འདི་ཡི་རང་བཞིན་འདི་ཉིད་ནི། །དེ་ཡི་བྱེ་བྲག་ག་ལ་ཡོད། །དེ་ཡི་ནུས་བ་དང་བྲལ་ན། །གཞན་ཚེ་དེ་ཡི་སྐྱེད་པ་པོར། །མི་འགྱུར་ནུས་པས་སྟོང་བའི་ཕྱིར། །ནམ་མཁའ་ཡི་ནི་མེ་ཏོག་བཞིན། །ནུས་པ་ཤས་ཆེན་ངོ་བོ་ཡང༌། །གལ་ཏེ་དེ་ཙམ་ཀྱི་རྒྱུ་ན། །རྒྱུ་ཡི་ངོ་བོ་རྟག་ཉིའི་ཕྱིར། །དུས་ཀུན་དུ་ནི་དེ་ཡོད་འགྱུར། །གཞན་དག་གིས་གཞན་མི་འདོད་པ། །དེ་ཕྱིར་གཞན་ལས་ཀྱང་དེ་མིན། །རེས་འགའ་འབྱུང་བ་ཉིད་ཀྱི་ཕྱིར། །དེ་ནི་རང་དབང་ཅན་ཡང་ཡིན། །རང་ལས་བྱུང་ན་རྒྱུ་ཉིད་མིན། །རང་ལ་བྱེད་པ་འགལ་ཕྱིར་རོ། དངོས་པོ་རྣམས་ནི་ལྟོས་པ་ཡིས། །རེས་འགའ་བ་ཉིད་སྲིད་པ་ཡིན། །འདི་ལྟར་རང་གི་བདག་ཉིད་ལ། །རང་དངོས་བྱ་བ་འཇུག་མི་འདོད། །བདག་ཉིད་གྲུབ་པར་གྱུར་པ་ཡང༌། །གནས་སྐབས་འདི་ལ་གྲུབ་ཕྱིར་རོ། །བདག་གི་དེ་ཉིད་མ་གྲུབ་པ། །འགའ་ལ་བྱེད་པ་འགལ་ཉིད་མེད།། ནུས་པ་ཀུན་དང་བྲལ་བའི་ཕྱིར། །ནམ་མཁའི་པདྨ་ལ་སོགས་བཞིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་གཉིས་ཀ་བརྟག་པ་སྟེ་གསུམ་པའོ།། །།རང་བཞིན་སྨྲ་བ་རྣམས་ཀྱིས་ནི། །དངོས་པོ་རྣམས་ཀྱི་སྐྱེ་བ་འདི། །རྒྱུ་ཀུན་ལ་ནི་ལྟོས་མེད་སྨྲ། །དེ་དག་རང་ཡང་རྒྱུར་མི་སྨྲ། །པདྨའི་གེ་སར་ལ་སོགས་པའི། །སྣ་ཚོགས་གང་གིས་བྱེད་འགྱུར་བའམ། །རྨ་བྱའི་མདོངས་ལ་སོགས་པ་ཡིས། །སྣ་ཚོགས་པ་ནི་གང་གིས་སྤྲུལ། །དཔེར་ན་ཚེར་མ་ལ་སོགས་པའི། །རྣོ་སོགས་རྒྱུ་མེད་ཅན་ཉིད་དེ། །རེས་འགའ་འབྱུང་ཕྱིར་དེ་བཞིན་དུ། །སྡུག་བསྔལ་
ལ་སོགས་རྒྱུ་མེད་ཉིད། །རྗེས་སུ་འགྲོ་ལྡོག་ལྡན་པ་ཡི། །མཚོ་སྐྱེས་གེ་སར་ལ་སོགས་པ། །གནས་སྐབས་ཁྱད་པར་ལྡན་པ་ཡི། །ས་བོན་འདམ་དང་ཆུ་སོགས་ཅན། །མངོན་སུམ་མི་དམིགས་པ་དག་གི །རྒྱུ་ནི་ངེས་པ་ཉིད་ཡིན་ན། །གང་ཚེ་འདི་དག་གི་རྒྱུན་ནི། །གཞན་གང་ཡིན་ཞེས་འདྲི་བར་བྱེད། །ཡུལ་དང་དུས་ཀྱི་ངེས་པ་དག །ཇི་ལྟར་དངོས་པོ་རྣམས་ལ་ཡོད། །གལ་ཏེ་འདི་ཡི་དེ་རྒྱུ་མིན། །དེ་དག་ཀུན་དུ་ཀུན་འབྱུང་ཚེ། །གང་དུ་གང་ཚེ་འགའ་ཞིག་ལ། །དེ་ལས་གཞན་པ་སྤངས་ནས་ནི། །ངེས་པ་ཉིད་དུ་འབྱུང་འགྱུར་བ། །དེ་དག་དེ་ལ་ལྟོས་པ་ཡིན། །དེ་ལྟོས་དེ་ལྟར་འབྱུང་བ་ཡིན། །ལྟོས་པ་འབྲས་བུ་ཉིད་དུ་བརྗོད། །མངོན་སུམ་གྱིས་ཀྱང་དེ་ལྟར་འབྱུང༌། །དེས་ན་འདི་ལ་རྒྱུ་དག་འགྲུབ། །ཡང་ན་དེ་ལ་ཞེས་བྱར་སྦྱར། །དེ་ཕྱིར་རང་བཞིན་སྨྲ་བ་འདི། །མངོན་སུམ་གྱིས་ནི་རབ་གནོད་འགྱུར། །མངོན་སུམ་དང་ནི་མི་དམིགས་པས། །རྒྱུ་ཡི་ངོ་བོ་ངེས་ཕྱིར་རོ། །རྒྱུ་ཡོད་པར་ནི་སྒྲུབ་དོན་དུ། །ཆེད་མ་ཡོད་ཉིད་མ་གྱུར་མོད། །དེ་ལྟ་ན་ཡང་ཚད་མེད་པས། །དོན་མེད་ཉིད་དུ་ངེས་བ་མིན། །གང་ཕྱིར་དོན་ནི་ཡོད་པ་ཡི། །ཚད་མ་ཁྱབ་བྱེད་དང་རྒྱུ་མིན། །ཐ་དད་པར་ནི་ཡོད་ཕྱིར་དང༌། །འཁྲུལ་ཕྱིར་དེ་ལས་བྱུང་ཕྱིར་རོ། །དངོས་གང་དེ་ལྟའི་རྣམ་པ་མིན། །དེ་ཉིད་དང་ནི་ལྡོག་པ་ལས། །གཞན་ལྡོག་པར་ནི་ངེས་པ་རུ། །མི་རྟོགས་འབྲེལ་བ་མེད་ཕྱིར་རོ། །ཀུན་གྱིས་མ་མཐོང་ཐེ་ཚོམ་དང༌། །རང་གིས་མ་མཐོང་འཁྲུལ་པ་སྟེ། །འབིགས་བྱེད་རི་ཕུག་དུར་པ་སོགས། །མ་མཐོང་བར་ཡང་ཡོད་ཕྱིར་རོ། །གལ་ཏེ་རྒྱུ་མེད་ཅན་ཉིད་དུ། །བསྒྲུབ་ཕྱིར་གཏན་ཚིགས་མི་སྦྱོར་ན། །ཚད་མ་མེད་པར་མི་འགྲུབ་སྟེ། །དེ་ཡི་ཕྱིར་ན་ཕྱོགས་མི་འགྲུབ། །གལ་ཏེ་དེ་གྲུབ་ཕྱིར་གཏན་ཚིགས། །རབ་ཏུ་སྦྱོར་བ་དེ་ལྟ་ནའང༌། །གྲུབ་པ་དེ་རྒྱུས་བསྐྱེད་ཉིད་ཕྱིར། །ཁྱེད་ཀྱི་ཕྱོགས་ཀྱི་འགྲུབ་མི་འགྱུར། །དེ་ལྟར་ཤེས་བྱེད་གཏན་ཚིགས་དང༌། །དེ་གསལ་བྱེད་པའི་ཡང་དེ་ནི། །གྲུབ་པའི་རྒྱུ་མཚན་ཉིད་གྱུར་པ། །བསྒྲུབ་བྱའི་ཤེས་བྱེད་ཡིན་པར་བཤད། །དེ་ཕྱིར་བྱེད་པོ་འདི་ཉིད་ནི། །ཤེས་པར་བྱེད་པའི་རྒྱུར་འདོད་དོ། །བསྒྲུབ་བྱའི་སྐྱེད་བྱེད་མ་ཡིན་ཕྱིར། །བྱེད་པ་པོར་ནི་མི་བརྗོད་
དོ། །དེ་ཕྱིར་དངོས་པོ་གཞན་དག་ཀྱང༌། །རྒྱུ་བཅས་ངེས་ལས་སྐྱེད་ཕྱིར་རོ། །ཁྱེད་ཀྱི་བསྒྲུབ་བྱའི་དོན་ཡུལ་ཅན། །ཤེས་པ་བཞིན་དུ་སྒྲུབ་འབྱུང་ཕྱིར། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་འགྲོ་བ་རང་བཞིན་དུ་སྨྲ་བ་བརྟག་པ་སྟེ་བཞི་པའོ།། །།སྐྱེ་འཇིག་མེད་པར་ཡང་དག་ལྡན། །སྒྲ་ཡི་རང་བཞིན་ཚངས་པ་མཆོག །གང་དེ་ཡོངས་སུ་གྱུར་པ་ནི། །དངོས་པོའི་གྲོང་ཉིད་རབ་ཤེས་བྱ། །དེ་ལྟར་གང་དག་བརྗོད་པ་ལའང༌། །དེ་ལ་བརྗོད་བྱ་བ་འདི་ནི། །རང་གི་སྒྲ་ཡི་ངོ་བོ་ནི། །བཏང་ནས་སྔོ་སོགས་ཉིད་ཐོབ་བམ། །དེ་ལྟ་མིན་ན་གང་གི་ཚེ། །དང་པོའི་ཕྱོགས་རྟེན་དེ་ཡི་ཚེ། །ཡི་གེ་ཉིད་དང་བྲལ་འགྱུར་ཏེ། །སྔར་ཡོད་དག་ནི་འཇིག་ཕྱིར་རོ། །ཇི་ལྟར་དེ་མ་ཐག་པའི་ཕྱོགས། །དེ་ལ་སྔ་སོགས་མྱོང་བའི་ཚེ། །འོན་པ་ལ་ཡང་གསལ་པོར་ནི། །སྒྲ་ཡི་བདག་ཉིད་མྱོང་བར་འགྱུར། །གང་གིས་གཙོ་བོར་འཇུག་པ་ཡིས། །ཐམས་ཅད་སྒྲ་ཡི་ངོ་བོར་གནས། །སྒྲ་ཡི་ངོ་བོ་མ་བཏང་ན། །ཡོངས་སུ་འགྱུར་བར་བརྗོད་ཕྱིར་རོ། །སྔོན་པོ་ལ་སོགས་གཅིག་ཉིད་དུ། །ཕལ་པ་མིན་པར་རྣམ་གནས་ན། །དེ་རིག་པ་ཡི་དུས་སུ་ནི། །ཇི་ལྟར་འདི་རིག་ཡོད་མ་ཡིན། །འདི་རེག་མེད་ན་སྔོ་སོགས་ཀྱང༌། །རབ་ཏུ་མྱོང་བར་མི་འགྱུར་ཏེ། །གཅིག་བདག་ཉིད་ཕྱིར་ཐ་དད་ཆོས། །ཤིན་ཏུ་ཐ་དད་ཐལ་བར་འགྱུར། །འགལ་བའི་ཆོས་དང་འབྲེལ་པ་ཡི། །དངོས་རྣམས་ཐ་དད་མཚན་ཉིད་ཡིན། །གཞན་དུ་གསལ་བའི་ཐ་དད་ལའང༌། །རྟོག་པ་འདི་ནི་མེད་པར་འགྱུར། །གལ་ཏེ་དངོས་པོ་སོ་སོ་ཡང༌། །སྒྲ་གཅིག་བདག་ཉིད་དབྱེར་མེད་འདོད། །ཐམས་ཅད་ཡུལ་གཅིག་ཉིད་དང་ནི། །རྣམ་པ་གཅིག་ཏུ་རིག་པར་འགྱུར། །འདི་གསལ་སོ་སོ་ཐ་དད་ན། །ཚངས་པ་དུ་མར་ཐལ་འགྱུར་ཏེ། །ཐ་དད་དུ་མ་དངོས་པོའི་བདག །ངོ་བོ་ཉིད་ཕྱིར་གསལ་བྱེད་བཞིན། །སྒྲ་ཡི་རང་བཞིན་རྟག་ཉིད་ན། །དངོས་རྣམས་ཀྱང་ནི་རྟག་ཉིད་དེ། །དེ་དག་ཅིག་ཅར་གྲུབ་པའི་ཕྱིར། །ཡོངས་སུ་གྲུབ་ན་མི་རིགས་སོ། །ངོ་བོ་གཅིག་ནི་མི་གསལ་ཞིང༌། །ངོ་བོ་གཞན་ནི་འབྱུང་འགྱུར་ན། །འཇི་སོགས་བཞིན་དུ་འགྲུབ་འགྱུར་བ། །རིམ་མེད་ལ་ནི་ཡོངས་གྱུར་མེད། །གཞན་ཡང་འབྲས་བུའི་ངོ་བོར་ནི། །འགྲོ་བའི་སྒྲ་ཚངས་རང་
བཞིན་ན། །དེ་ལྟ་ན་ཡང་འགྱུར་མེད་ཕྱིར། །དེ་ལས་རིམ་པར་འབྱུང་བ་མེད། །རང་བཞིན་གཅིག་པོ་དེ་ཉིད་ལས། །གཞན་གཞན་ངོ་བོར་འབྱུང་མིན་ན། །དོན་གྱི་ངོ་བོར་ཡོངས་གྱུར་པར། །དེ་ལ་ཇི་ལྟར་བརྗོད་པར་བྱ། །དེ་ཡི་ངོ་བོ་མིན་ལས་ལྡོག །འཇི་བའི་ངོ་བོ་ཉིད་དམིགས་ཕྱིར། །ཁམ་བུམ་ལ་སོགས་ཁྱད་པར་ལ། །འཇི་བའི་བདག་ཉིད་གཅིག་ཏུ་རྟོག །སྔོ་དང་སེར་སོགས་ཁྱད་པར་ལ། །སྒྲ་བདག་མིན་ལས་ལྡོག་པ་ནི། །དེ་ཉིད་ལ་ནི་མི་དམིགས་ཏེ། །དེ་ཕྱིར་རྟོག་པའང་ས་བོན་མེད། །ཅི་སྟེ་ཚངས་པའི་དེ་ཉིད་འདི། །རྟག་ཏུ་ཆ་མེད་ཉིད་གནས་པ། །མ་རིག་གིས་བསླད་འཇིག་རྟེན་གྱིས། །སྣ་ཚོགས་ཉིད་དུ་མངོན་པར་སེམས། །དེ་ལའང་མ་རིག་པས་འཁྲུལ་བའི། །སྐྱེ་བོ་རྣམས་ཀྱིས་གཟུགས་རྟོགས་འགྱུར། །གང་ཞིག་སྔོ་སོགས་རྣམ་པ་རུ། །བླང་དང་དོར་བའི་རྒྱུ་མཚན་ནི། །དེ་ཡི་ངོ་བོ་ལས་ལྡོག་པའི། །ཚངས་པའི་ངོ་བོར་ཤེས་པ་མེད། །ཇི་ལྟར་སྡང་བའི་སེམས་རྣམས་ཀྱིས། །ཡོད་པ་ཉིད་དུ་ཤེས་མི་འགྱུར། །དེ་ནི་མངོན་སུམ་གྱིས་འགྲུབ་མིན། །ཆ་མེད་སྣང་བ་མེད་ཕྱིར་རོ། །རྟག་ལས་སྐྱེ་བ་རིགས་མིན་པས། །དེ་ལས་འབྲས་བུའི་རྟགས་ཀྱང་མེད། །ཆོས་ཅན་ཡོད་ཉིད་མ་གྲུབ་ཕྱིར། །རང་བཞིན་སྒྲུབ་བྱེད་མ་ཡིན་ནོ། །དེ་དག་ལས་ནི་མ་རྟོགས་པའི། །ཡོད་པར་སྒྲུབ་པའི་རྟགས་མེད་དོ། །ཤེས་བྱ་ཡི་ནི་གོ་རིམས་ལས། །ཤེས་ཀུན་གོ་རིམས་ཅན་དུ་གྲུབ། །གཞན་དུ་ཅིག་ཅར་ཉིད་དུ་ནི། །དེ་འབྲས་རྣམ་ཤེས་ཐལ་བར་འགྱུར། །འདི་ནི་ཤེས་པ་ཙམ་ལ་ཡང༌། །ནུས་པའི་དངོས་མེད་དེ་ལས་གཞན། །ཡིན་ན་འདི་ན་མོ་གཤམ་གྱི། །བུ་དང་མཚུངས་པར་ཐལ་བར་འགྱུར། །རྣམ་དག་ཡེ་ཤེས་རྒྱུ་ཅན་གྱི། །རྣལ་འབྱོར་པས་ཀྱང་ཚངས་པའི་དངོས། །དེ་མི་ཤེས་ཏེ་དེ་ཡི་ཕྱིར། །ཤེས་ལ་བྱ་བ་འབྲེལ་མེད་ཕྱིར། །གཙོ་བོ་ཡོངས་སུ་འགྱུར་བ་དང༌། །ཚངས་པའི་ལྟ་བ་མཚུངས་པའང་མིན། །ཚངས་པའི་མཐོང་བ་གཙོ་བོ་ཡི། །ཡོངས་སུ་འགྱུར་བ་དང་ཡང་མཚུངས། །དེ་ཡི་སུན་འབྱིན་རྗེས་འབྲངས་ནས། །འདི་ལ་སུན་འབྱིན་རྟོགས་པར་བྱ། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་སྒྲའི་ཚངས་པ་བརྟག་པ་སྟེ་ལྔ་པའོ།། །།ཉེས་པར་བཤད་པའི་གྲུབ་མཐའ་
ཡི། །རྗེས་འཇུག་བློ་ཅན་གཞན་དག་ནི། །དབང་ཕྱུག་ཆོས་མཚུངས་སྐྱེས་བུས་ནི། །འཇིག་རྟེན་རྒྱུར་ནི་རྟོགས་པར་བྱེད། །དངོས་པོ་མ་ལུས་འཇིག་ན་ཡང༌། །ཤེས་པ་ནུས་ལྡན་འཇིག་བ་མེད། །བརྒྱ་རྣམས་ཀྱིས་བ་བཞིན་དུ། །དེ་ནི་སྐྱེ་ལྡན་རྒྱུ་རུ་གྲག །དབང་ཕྱུག་བཞིན་དུ་འདི་ལ་ཡང༌། །སུན་འབྱིན་ཐམས་ཅད་བརྗོད་པར་བྱ། །འདི་ཡི་བྱ་བ་འདི་འདྲ་འདི། །ཅི་ཡི་ཕྱིར་ན་བྱེད་པ་ཡིན། །གལ་ཏེ་གཞན་གྱིས་རབ་སྦྱར་ཕྱིར། །འདི་ནི་རང་དབང་ཉིད་འགྱུར་མིན། །འོན་ཏེ་བརྩེ་བས་བྱེད་འགྱུར་ན། །འགྲོ་བ་གཅིག་ཏུ་བདེ་བར་འགྱུར། །ནད་དང་དབུལ་དང་མྱ་ངན་སོགས། །སྡུག་བསྔལ་དུ་མས་གཟིར་བ་ཡི། །སྐྱེ་བ་འབྱིན་པར་བྱེད་པ་དེའི། །རྗེས་སུ་བརྩེ་བ་ཇི་ལྟར་ཤེས། །འབྱིན་པའི་སྔ་ན་སྙིང་རྗེའི་ཡུལ། །མེད་ན་རྗེས་བརྩེ་འཐད་མ་ཡིན། །གང་དང་འབྲེལ་པར་གྱུར་པ་ལས། །འདི་ནི་འབྱིན་པ་པོར་རྟོག་བྱེད། །རྟག་ཏུ་བདེ་དང་ལྡན་རྣམས་ཀྱི། །འཇིག་པ་འདི་ཡིས་བྱེད་མི་འགྱུར།། དེ་ཡིས་མ་མཐོང་ལ་ལྟོས་ན། །རང་དབང་ཉིད་ནི་ཉམས་པར་འགྱུར། །མ་མཐོང་སྡུག་བསྔལ་གྱིས་རྒྱུ་ལ། །ཅི་ཕྱིར་དེ་ནི་ལྟོས་བར་བྱེད། །འདི་ནི་བརྩེ་དང་ལྡན་ཡིན་ན། །དེ་ལ་བཏང་སྙོམས་བྱ་བར་རིགས། །གལ་ཏེ་དེ་འཇུག་རྩེད་མོའི་དོན། །རྩེད་མོ་ལ་ནི་གཙོ་བོ་མིན། །རྩེད་མོའི་ཐབས་ནི་སྣ་ཚོགས་པ། །ལྟོས་པའི་ཕྱིར་ན་གཞོན་ནུ་བཞིན། །རྩེད་མོ་བསྒྲུབ་བྱའི་དགའ་གང་དང༌། །དེ་ཡི་སྒྲུབ་བྱེད་གང་ཡིན་ངེས། །གལ་ཏེ་དེ་བྱེད་ནུས་ལྡན་ན། །དེ་ཀུན་ཅིག་ཅན་བྱེད་པར་འགྱུར། །དང་པོར་དེ་ནུས་ལྡན་མིན་ན། །རིམ་གཞན་དུ་ཡང་ནུས་མེད་འགྱུར། །དངོས་པོ་དབྱེ་བ་མེད་པ་ལ།། ནུས་དང་མི་ནུས་མི་རིགས་སོ། །འོན་ཏེ་རང་བཞིན་ཉིད་ལས་འདི། །འཇུག་པ་ལ་སོགས་ལ་བརྗོད་དེ། །དཔེར་ན་མེ་སོགས་རང་བཞིན་གྱིས། །སྲེག་པ་ལ་སོགས་ལས་ལ་བཞིན། །གལ་ཏེ་དེ་ལྟར་ཡིན་དེ་ལས། །དངོས་པོ་མ་ལུས་ཅིག་ཅར་འབྱུང༌། །དེ་དག་སྐྱེད་པའི་ནུས་བ་དང༌། །ལྡན་པའི་རྒྱུ་ནི་ཉེ་ཕྱིར་རོ། །མེ་ལ་སོགས་པའི་དངོས་རྣམས་ལ། །ངེས་པ་ཉིད་ཀྱི་ནུས་པ་དག །དུས་ཀུན་དུ་ནི་འབྱུང་མིན་ཏེ། །རང་གི་རྒྱུ་སྟོབས་ལས་བྱུང་ཕྱིར། །གཞན་དུ་གལ་ཏེ་ངག་གི་འམ། །ངེས་འདི་ཁས་མི་ལེན་ན་ནི། །འབྲས་བུ་ཐམས་ཅད་ཅིག་ཅར་ནི། །ཡང་དག་འབྱུང་བ་ཉིད་དུ་
འགྱུར། །བ་རྒྱ་བ་ལང་རང་བཞིན་གྱི། །སྣལ་མའི་རྒྱུར་ནི་མི་འདོད་དེ། །གང་ཕྱིར་སྲོག་ཆགས་ཟ་འདོད་ལས། །ཁ་ཆུ་ཡི་ནི་དྲ་བ་བྱེད། །གལ་ཏེ་ཅི་ཞིག་ལྟར་འཇུག་ན། །འདི་ཡི་འབྱུང་ལྡན་ཅི་འདྲ་ཞིག །གང་གི་ཕྱིར་ན་ཉ་བ་ཡང༌། །མ་དཔྱད་ལས་ལ་འཇུག་མི་འགྱུར།། དཔའ་བོའི་བུ་དང་བདག་སྐྱེས་སོགས། །རྣམ་པ་དེ་དག་ཉིད་ཀྱིས་ནི། །བྱེད་པ་པོར་ཡོངས་བརྟགས་པ་ཡང༌། །ཡོངས་སུའང་དེ་དག་སུན་ཕྱུང་འགྱུར། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་སྐྱེས་བུ་བརྟག་པ་སྟེ་དྲུག་པའོ།། །།གཞན་དག་ཀྱང་ནི་འདིར་བདག་ཉིད། །འདོད་ལ་སོགས་པའི་རྟེན་གྱུར་པ། །དེ་བཞིན་རྟག་དང་ཀུན་འཇུག་ཅན། །རང་ཉིད་སེམས་མེད་ངོ་བོར་འདོད། །དགེ་དང་མི་དགེའི་ལས་རྣམས་ཀྱི། །བྱེད་པ་པོ་དང་དེ་འབྲས་ཀྱི། །ཟབ་པོ་ཡིན་སེམས་འབྲེལ་ཕྱིར། །སེམས་ཡིན་རང་བཞིན་ངོ་བོས་མིན། །ཤེས་དང་རྩོམ་སོགས་དང་འབྲེལ་བ། །དེ་ལ་བྱེད་པ་པོ་ཉིད་བརྗོད། །བདེ་དང་སྡུག་བསྔལ་སོགས་རིག་པའི། །འདུ་བ་ལས་ནི་ཟ་བ་པོ། །དེ་ཡི་རིས་མཐུན་ཁྱད་པར་དང༌། །བློ་རྣམས་དང་ནི་ཚོར་བ་ནི། །སྔར་མེད་རྣམས་དང་འབྲེལ་པ་ཡིས། །དེ་ལ་སྐྱེ་བར་མངོན་པར་བརྗོད། །སྔར་བླངས་པ་དང་བྲལ་བ་ནི། །འཆི་བ་ཡིན་ཏེ་འཚོ་བ་ཡང༌།། ཆོས་དང་ཆོས་མིན་འདུས་བྱས་པའི། །ལུས་བབས་ཡིད་དང་འབྲེལ་པའོ། །ལུས་དང་མིག་སོགས་གནོད་པའི་ཕྱིར། །འདི་ལ་འཚེ་བར་རྣམ་པར་བརྟག །འདི་ལྟར་སྐྱེས་བུ་རྟག་པ་ལའང༌། །ཐ་སྙད་འདི་ནི་དྲི་མེད་འདོད། །ང་ཤེས་བྱ་བའི་ནུས་པ་དང༌། །ལུས་ལ་སོགས་ནི་ཐ་དད་པའི། །རིག་བར་བྱེད་པས་རིག་ཡིན་ཏེ། །ཤེས་ཕྱིར་དེ་ལས་གཞན་པ་བཞིན། །འདོད་པ་ལ་སོགས་ཐམས་ཅད་ཀྱང༌། །དེ་དག་འགའ་ཞིག་ལ་བརྟེན་ཉིད། །དངོས་ཉིད་ཡིན་པས་འབྲས་ཉིད་ཕྱིར། །གཟུགས་བཞིན་ཉིད་ཀྱི་སྐྱེས་བུ་དེ། །དངོས་ཉིད་སྨོས་པའི་ཕྱིར་ན་འདི། །འཇིག་ལ་འཁྲུལ་ལྡན་མ་ཡིན་ཏེ། །འཇིག་པ་རྒྱུ་ཅན་ཉིད་ན་ཡང༌། །གང་ཕྱིར་དངོས་ཉིད་མ་ཡིན་ནོ། །གཟུགས་སོགས་ཤེས་པ་ཐམས་ཅད་ཀྱང༌། །གཅིག་དང་དུ་མའི་མཚན་ཉིད་ཅན། །ང་ཤེས་བྱ་བའི་ཤེས་པ་དང༌། །དེ་དག་མཚམས་ནི་སྦྱོར་ཉིད་ཕྱིར། །གར་མཁན་སྨིན་ཁྱུགས་གཡོ་བ་ལ། །མང་པོ་དག་
གིས་ཤེས་བ་བཞིན། །རྣམ་བ་གཞན་དུ་མཚམས་སྦྱོར་བ། །རྒྱུ་མེད་པར་ནི་སྐྱེ་མི་འགྱུར། །བདག་ཅེས་བྱ་བའི་ཚིག་འདི་ནི། །བློ་དང་དབང་སོགས་ཚོགས་པ་ལས། །ཐ་དད་པར་ནི་རྗོད་བྱེད་ཡིན། །རབ་གྲགས་མི་ལས་ཐ་དད་ན། །གང་ཕྱིར་ཚིག་གཅིག་ཉིད་འདོད་ཕྱིར། །གང་ཡང་དེ་ལྟར་ངེས་གྱུར་བ། །ཇི་སྐད་བཤད་པའི་ཆོས་དང་ནི། །དར་འབྲེལ་བུམ་པའི་སྒྲ་བཞིན་ནོ། །གསོན་པ་ཡི་ནི་ལུས་འདི་ནི། །སྲོག་སོགས་དང་ཡང་བྲལ་འགྱུར་ཏེ། །བདག་ཉིད་ཕྱིར་ན་བུམ་པ་བཞིན། །དེ་ཕྱིར་འདི་ལ་བདག་མེད་མེད། །རྣམ་ཤེས་ཕྱི་མ་ཐམས་ཅད་ནི། །སྐྱེས་མ་ཐག་པའི་ཐོག་མ་ཡི། །ཤེས་པའི་རིག་བྱེད་ཀྱིས་རིག་སྟེ། །ཤེས་ཕྱིར་དེ་ཡི་རང་སོ་བཞིན། །ཐག་རིང་ཡུལ་ན་གནས་གྱུར་པའི། །བདག་དང་ལྡན་པ་ཉིད་ཡིན་ཏེ། །ལུས་ཅན་སོགས་ཕྱིར་བདག་ལུས་བཞིན། །དེ་ལྟར་བདག་ནི་ཡོད་དང་རྟག །ཁྱབ་བྱེད་དག་ཏུ་ངེས་ཡིན་ན། །ཆོས་རྣམས་ཐམས་ཅད་བདག་མེད་པ། །ཞེས་བྱར་གནས་པ་མ་ཡིན་ནོ། །དེ་ལྟ་བུ་འདིར་རེ་ཞིག་ནི། །སྒྲུབ་བྱེད་དང་པོ་གྲུབ་པ་སྒྲུབ། །གང་ཕྱིར་ཁྱོད་ཀྱི་ཤེས་པ་ནི། །ཀུན་མཁྱེན་སོགས་ཀྱི་ཤེས་བྱར་འདོད། །གསལ་བྱེད་ལ་ནི་ལྟོས་མེད་པར། །རང་རིག་ངོ་བོར་སྐྱེ་འགྱུར་བ། །དེ་ལྟར་གཞན་གྱི་རྣམ་ཤེས་ཀྱང༌། །དཔེ་ནི་བསྒྲུབ་བྱས་སྟོང་པ་ཡིན། །དེ་ཡི་རྣམ་པར་ཉེར་བསྒྱུར་བའི། །གཞན་གྱིས་རབ་ཏུ་ཤེས་པར་འགྱུར། །དེ་དཔེ་ཉིད་དུ་བརྗོད་ན་ཡང༌། །གཞན་གྱི་སྒོ་ནས་ཐེ་ཚོམ་འགྱུར། །གལ་ཏེ་འདོད་པ་ལ་སོགས་ཀྱི། །འགའ་ཞིག་རྟེན་དུ་རབ་བསྒྲུབ་ན། །གལ་ཏེ་དེ་ལ་རྒྱུ་ཙམ་ཉིད། །རྟེན་དུ་ཡོངས་སུ་རྟོག་ན་ནི། །འདོད་པ་སྒྲུབ་ཡིན་གལ་ཏེ་ཡང༌། །དེ་བཞིན་རྟེན་དུ་ཁྱོད་འདོད་ན། །དེ་ཚེ་འང་རྒྱུ་བས་སྟོང་པ་ཡི། །རྟེན་དུ་རྟོག་པ་དོན་མེད་ཡིན། །རྒྱ་ཤུག་འབྲས་བུ་སོགས་ཀྱི་གཞི། །མཁར་གཞོང་ལ་སོགས་བཅད་པ་ཡིན། །ལྟུང་བའི་བགེགས་དག་བྱེད་ཕྱིར་རམ།། ཁྱད་པར་དག་ནི་སྐྱེད་ཕྱིར་རོ། །འཇིག་པ་དངོས་པོ་མེད་པ་ཡང༌། །འབྲས་བུ་ཉིད་དུ་རིགས་ལྡན་མིན། །དེ་ཕྱིར་གཞན་གྱི་གཏན་ཚིགས་འདིར། །ཁྱད་པར་སྨྲས་པའི་དོན་མེད་དོ། །མ་རིག་པ་ཡིས་བསླད་པ་ལས། །ང་ཡིས་ཞེས་དང་མཚམས་སྦྱར་འདི། །དངོས་པོ་སྐད་ཅིག་མ་དག་
ལ་འང༌། །བྱེད་པོ་གཅིག་ཏུ་ཞེན་པར་འཇུག །ལོག་པའི་རྣམ་པར་རྟོག་འདི་ལས། །དེ་ཉིད་གནས་པའི་རིགས་མ་ཡིན། །ནུས་ལྷག་ཁྱད་པར་ལས་དད་ཀྱང༌། །གཅིག་གི་རྒྱུ་མཚན་བྱེད་པར་འགྱུར། །གཟུགས་དང་སྒྲ་སོགས་སེམས་དག་ནི། །རྗེས་འཁོར་གཅིག་གི་འབྲས་ཉིད་ན། །སྔ་ཕྱི་དག་ནི་འགལ་འགྱུར་ཏེ། །ནུས་པའི་རྒྱུ་ནི་ཉེ་ཕྱིར་རོ། །རྣམ་ཤེས་དེ་མ་ཐག་གཅིག་ལས། །རྣམ་ཤེས་དྲུག་པོ་འབྱུང་བ་ནི། །གསལ་བར་ཅིག་ཅར་རིག་འགྱུར་ཏེ། །དེ་ཕྱིར་འདོད་པའི་སྒྲུབ་བྱེད་ཡིན། །རིམ་པ་ཅན་ལ་རྒྱུ་གཅིག་ཉིད། །མེད་ཅེས་དེ་མ་ཐག་ཏུ་བསྟན། །དེ་ཕྱིར་འདི་ཡི་ཁྱབ་པ་ལ། །རྗེས་དཔག་གིས་གནོན་གསལ་པོར་མཐོང༌། །གར་མཁན་སྨིན་ཁྱུགས་གཡོ་བ་ནི། །དོན་དམ་པར་ནི་གཅིག་ཉིད་མིན། །རྡུལ་ཕྲན་དུ་མའི་ཚོགས་ཉིད་ཕྱིར། །དེ་ལ་གཅིག་ཏུ་རྟོགས་པའི་ཕྱིར། །འབྲས་བུ་གཅིག་ལ་ཉེ་སྦྱོར་ཕྱིར། །སྒྲ་གཅིག་གི་ནི་སྤྱོད་ཡུལ་ཡིན། །བསྒྲུབ་བྱའང་རྣམ་པ་དེ་ལྟ་བུར། །གལ་ཏེ་འདོད་ན་གྲུབ་པ་སྒྲུབ། །བློ་དང་སེམས་ལ་སོགས་པའི་སྒྲ། །ཁོ་བོ་ཅག་གི་རྣམ་གྲངས་དག །ཚིག་གཅིག་ཡིན་ཡང་ཐ་དད་པའི། །རྗོད་པར་བྱེད་པ་ཉིད་མ་ཡིན། །དེ་ཕྱིར་གཏན་ཚིགས་མ་ངེས་པའོ། །དེ་ཡི་ཁྱད་པར་སྨྲས་མིན་ནམ། །དེ་ཉིད་མ་གྲུབ་པར་སྨྲས་ན། །སེམས་རྣམས་གྲངས་སུ་གནས་ཤེས་བྱ། །ང་རྒྱལ་གྱི་ནི་རྟེན་ཉིད་ཀྱིས། །སེམས་ལ་བདག་ཅེས་བརྗོད་པ་ནི། །ཀུན་རྫོབ་ཏུ་ཡིན་དོན་དམ་པར། །འདི་ཡི་ཡུལ་ནི་ཡོད་མ་ཡིན། །མཁའ་དཀྱིལ་པདྨ་སོགས་པདྨ། །བྱེད་པ་པོ་ལ་སོགས་པའི་ཚིག །གཅིག་གི་རྣམ་པར་སྦྱོར་བྱེད་ན། །དེས་ནི་འཁྲུལ་པ་དག་ཀྱང་མཐོང༌། །བརྡ་ཙམ་ལས་ནི་བྱུང་བ་ཡི། །ཚིག་དག་གང་དུ་འང་འབྲེལ་པ་མེད། །བདག་ལ་སོགས་པའི་ཚིག་དག་ལའང༌། །རང་བཞིན་གྱིས་དོན་གསལ་བྱེད་མེད། །གང་ཚེ་བདག་དང་ལྷན་ཅིག་ཏུ།། སྲོག་སོགས་འབྲེལ་པ་འགྲུབ་འགྱུར་བ། །དེ་ཚེ་ཐལ་བ་འདི་རིགས་ཀྱི། །རྣམ་པ་གཞན་དུ་མི་རིགས་སོ། །མོ་གཤམ་བུ་ཡིས་སྟོང་ཉིད་ནི། །གསོན་ལུས་སྲོག་སོགས་དང་བྲལ་བར། །ཐལ་བར་མི་འགྱུར་དེ་བཞིན་དུ། །ཁྱོད་ཀྱི་ཐལ་འགྱུར་འདི་ཉིད་ཡིན། །རེ་ཞིག་འདི་ལ་དེ་བདག་མེད། །
དེ་དག་ཐ་དད་ཁས་ལེན་ཕྱིར། །རྒྱུ་དང་འབྲས་བུ་ཉིད་ཀྱང་མིན། །ཅིག་ཅར་ཐལ་བར་འགྱུར་ཕྱིར་རོ། །དེ་ཡི་ཕྱིར་ན་ཉིད་ལྡོག་པ། །དེ་དང་འབྲེལ་པ་མེད་པ་ཡི། །དབུགས་ཀྱི་འབྱུང་རྔུབ་སོགས་འདི་དག །ཅི་ཕྱིར་ལུས་ལས་ལྡོག་པར་འགྱུར། །དེ་ལྟར་སྒྲུབ་བྱེད་ཐམས་ཅད་ཀྱིས། །བདག་ཡོད་མ་གྲུབ་བ་ཡི་ཕྱིར། །རྟག་དང་ཁྱབ་པ་ཉིད་དག་གི །དཔེ་ནི་བསྒྲུབ་བྱས་སྟོང་བར་བསྟན། །གཞན་དག་གིས་བདག་མངོན་སུམ་གྱིས། །གྲུབ་པ་ཉིད་དུ་ཡོངས་སུ་བརྟགས། །གང་ཕྱིར་འོང་ཞེས་རང་རིག་སྟེ། །ཡུལ་ནི་བདག་ཡིན་པར་འདོད་དོ། །དེ་ནི་མི་རིགས་ང་ཞེས་ལ། །དེ་ཡི་ངོ་བོར་མི་སྣང་ཕྱིར། །གང་ཕྱིར་དེ་ལ་རྟག་བ་དང༌། །ཁྱབ་སོགས་སྣང་བ་ཤེས་པ་མེད། །འདི་ནི་ཁ་དོག་དཀར་སོགས་སུ། །སྣང་བ་གསལ་བར་རིག་འགྱུར་ན། །དེ་ཡི་རང་བཞིན་བདག་མི་འདོད། །དེ་ཕྱིར་དེ་ཡི་ཡུལ་ཅན་འདི། །གལ་ཏེ་སྐྱེས་བུ་ཡང་དག་པར། །མངོན་སུམ་གྱིས་ནི་ཤེས་གྱུར་ན། །དེ་བས་ཅི་ཕྱིར་རྩོད་པ་འདི། །དེ་ཡོད་སོགས་ལ་འཇུག་པར་འགྱུར། །འདི་ལྟར་ངེས་པར་བྱ་བ་འདི། །ངེས་པའི་བདག་ཉིད་དུ་འཇུག་ཅིང༌། །ངེས་པ་དང་ནི་སྒྲོ་འདོགས་བློ། །གནོད་བྱ་གནོད་བྱེད་ཉིད་དུ་གནས། །དེ་ཕྱིར་འདོད་སོགས་ཐམས་ཅད་ནི། །བདག་དང་འདུ་བ་མ་ཡིན་ཉིད།། རིམ་གྱིས་སྐྱེ་པ་ཉིད་ཀྱི་ཕྱིར། །ས་བོན་མྱུ་གུའི་ལྕུག་སོགས་བཞིན། །ཡང་ནི་ནང་གི་བདག་ཉིད་ཀུན། །བདག་མེད་ཉིད་ཀྱིས་ལུས་ཅན་ཏེ། །དངོས་དང་ཡིད་སོགས་གཏན་ཚིགས་ཕྱིར། །དཔེར་ན་ཕྱི་རོལ་བུམ་སོགས་བཞིན། །བདག་བཅས་ཉིད་ན་དེ་རྒྱུ་བཅས། །རྟག་པ་ཉིད་དུ་ཐལ་བར་འགྱུར། །རྟག་རྣམས་ཀྱང་དོན་བྱེད་ནུས་མིན། །དེ་ཕྱིར་ཡོད་ཉིད་ལ་སོགས་སྲིད། །བུམ་སོགས་ལ་མཚུངས་བདག་མེད་པ། །གཞན་དག་གིས་ནི་གསོན་ལུས་ལ། །བཀག་པ་གང་ཡིན་དེ་ཡང་ནི། །ཁོ་བོ་ཅག་གིས་འདིར་བསྒྲུབ་བྱ། །དེ་ལྟར་བདག་ནི་མ་གྲུབ་ནའང༌། །དེ་ལ་རྣམ་གཞག་བྱས་པ་གང༌། །དེ་ཀུན་གནས་མེད་ཉིད་ཡིན་ཏེ། །མོ་གཤམ་ལ་ནི་རྣམ་གཞག་ཡིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་རིགས་པ་ཅན་དང་བྱེ་བྲག་བས་ཀུན་ཏུ་བརྟགས་པའི་སྐྱེས་བུ་བརྟག་པ་སྟེ་བདུན་པའོ།། །།གཞན་དག་བདག་ནི་ལྡོག་པ་དང༌། །རྗེས་འགྲོ་བདག་ཉིད་
ཅན་གྱི་ནི། །སེམས་པའི་ངོ་བོ་ཉིད་དུ་འདོད། །སེམས་པའི་བློ་ཡི་མཚན་ཉིད་ཅན། །དཔེར་ན་སྤྲུལ་འཁྱིལ་གནས་སྐབས་ན། །ལྡོག་ཅིང་དེ་མ་ཐག་ཏུ་ནི། །དྲང་པོའི་གནས་སྐབས་བྱུང་ན་ཡང༌། །སྦྲུལ་ཉིད་དུ་ནི་རྗེས་འཇུག་འགྱུར། །དེ་བཞིན་བདག་ནི་རྟག་ཏུ་ནི།། སེམས་པའི་རང་བཞིན་ཅན་ཡིན་ཡང༌། །ངོ་བོ་མ་ལུས་ལྡོག་པ་དང༌། །ཀུན་གྱི་རྗེས་སུ་འཇུག་པའང་མིན། །འོན་ཀྱང་འདི་ཡི་བདེ་སྡུག་སོགས། །མཚན་ཉིད་གནས་སྐབས་ལྡོག་འགྱུར་ཞིང༌། །དེ་དག་ལྡོག་ཅིང་སྐྱེ་འགྱུར་ཡང༌། །སེམས་ཉིད་རྗེས་སུ་འཇུག་པར་འགྱུར། །གཏན་དུ་འཇིག་ན་བྱས་ཆུད་ཟོས། །མ་བྱས་ཕྲད་པ་དག་དུ་འགྱུར། །དངོས་གཅིག་ཅན་ལའང་སྡུག་བསྔལ་དང༌། །བདེ་སོགས་ལོངས་སྤྱོད་མེད་པར་འགྱུར། །བྱེད་པོ་ཉིད་དང་ཟ་པོ་དག །སྐྱེས་བུའི་གནས་ལ་དེ་མི་བརྟེན། །དེ་ཕྱིར་སྐལ་ལྡན་ཉིད་ཀྱི་ཕྱིར། །བྱེད་པོ་ཉིད་ཀྱི་དེ་འབྲས་ཐོབ། །རྣམ་པ་དེ་ལྟའི་སྐྱེས་བུ་འདི། །ངོ་ཤེས་པ་ནི་ཡོད་པའི་ཕྱིར། །རྟོགས་པར་འགྱུར་ཏེ་འདི་ཉིད་ཀྱིས། །བདག་མེད་པ་ལ་རབ་ཏུ་གནོད། །བདག་རིགས་བྱེད་དོ་ཞེས་བདག་བློས། །ཤེས་པ་པོ་ནི་རྟོགས་བྱད་ན། །གལ་ཏེ་དེ་ནི་འགའ་ཡིན་ནམ། །གཅིག་ཏུ་འཇིག་པའི་ཤེས་པ་ཡིན། །གཅིག་ཏུ་མི་རྟག་ཉིད་དུ་འགྱུར། །གལ་ཏེ་དེ་ཡུལ་བདག་ཡིན་ན། །དེ་ཚེ་མ་ལུས་འཚམ་པར་འགྱུར། །སྐད་ཅིག་མ་ཡི་ཤེས་ཕྱོགས་ལ། །ཐམས་ཅད་ཤིན་ཏུ་འབྲེལ་པར་དཀའ། །འདི་ལྟར་སྔོན་ནི་ང་ཉིད་ཀྱིས། །ཤེས་གྱུར་ད་ལྟར་དུ་ཡང་ནི། །ང་ཉིད་རིག་པར་བྱེད་ཅེས་པའི། །བློ་གང་སྐྱེ་བར་འགྱུར་བ་སྟེ། །འོན་ཏེ་དེ་ཡི་ཡུལ་ཤེས་པའི། །སྐད་ཅིག་མ་ནི་གང་ཡིན་བརྟག །འདས་པ་འམ་ནི་ད་ལྟར་ཅི། །གཉིས་ཀ་འམ་ནི་འོན་ཏེ་རྒྱུན། །དེ་ལ་དང་པོའི་ཤེས་པའི་ཡུལ། །ཤེས་པར་གྱུར་ཞེས་བྱ་བར་རིགས། །ཤེས་པར་བྱེད་ཅེས་དེ་མི་རིགས། །གང་ཕྱིར་ད་ལྟར་དེ་རིག་མེད། །ད་ལྟར་བ་ནི་ཡུལ་ཉིད་ན། །རིགས་པ་འཐད་པར་བྱེད་དོ་ཞེས། །ཤེས་གྱུར་ཞེས་བྱ་བརྫུན་ཡིན་ཏེ། །དེ་ཉིད་ཕྱིར་ན་དེ་ཡི་ནི། །གཉིས་ཀ་བཟུང་བརྟག་དེ་མི་བྱ། །གང་ཕྱིར་གཉིས་ཀ་ཤེས་གྱུར་དང༌། །ད་ལྟར་གཉིས་ཀ་ཤེས་བྱེད་མིན། །རྒྱུན་ཡང་དེ་མཚུངས་བྱ་མིན་ཏེ། །གཉིས་ཀ་ཡང་ནི་མེད་ཕྱིར་རོ། །འདི་ནི་ཤེས་པར་གྱུར་མིན་
ཞིང༌། །ད་ལྟར་ཀྱང་མིན་དངོས་མེད་ཕྱིར། །དེ་ཕྱིར་བཤད་པ་ལས་གཞན་པའི། །སྤྱོད་ཡུལ་གང་ལ་ང་འདི་སྙམ། །འཇུག་ཕྱིར་རྟག་པའི་དངོས་ལྡན་ཕྱིར། །བདག་འདི་འགྲུབ་པར་འགྱུར་བ་ཡིན། །ང་ཞེས་པས་བཟུང་འདས་པ་ཡི། །ཤེས་བྱེད་ད་ལྟར་ཡང་འཇུག་སྟེ། །ང་ཡིས་ཤེས་པས་རྟོགས་བྱའི་ཕྱིར། །ད་ལྟར་རིག་པར་བྱེད་པོ་བཞིན། །ཤེས་བྱེད་དེ་ཡང་ཁར་རྩང་ཡོད། །ཤེས་བྱེད་ཕྱིར་དང་དེ་ཉིད་ཕྱིར། །ཁར་རྩང་ཤེས་པ་པོ་བཞིན་ནོ། །ཤེས་པ་དེ་དག་བསྒྲུབ་བྱ་ཉིད། །རྒྱུད་གཅིག་དང་འབྲེལ་ཤེས་པ་པོའི། །ང་ཤེས་ཤེས་པ་ཉིད་ཀྱི་ཕྱིར། །ཁར་རྩང་དེ་རིང་ཡོད་པ་ཀུན། །དོན་མཚུངས་ཅན་ཡིན་བློ་གཅིག་བཞིན། །དེ་ལྟ་བུ་འདིར་དཔྱད་བྱ་སྟེ། །གལ་ཏེ་སེམས་ནི་རྟག་གཅིག་པུར། །འདོད་པ་དེ་ལྟར་ཡིན་བློ་ཡང༌། །དེ་ཡི་རང་བཞིན་ཉིད་ཐོབ་འགྱུར། །བློ་དག་དང་ནི་སྐྱེས་བུ་ནི། །ངེད་ཀྱི་སེམས་ཀྱི་རང་བཞིན་ཕྱིར། །རྟག་ཉིད་དང་ནི་གཅིག་ཉིད་འདོད།། གལ་ཏེ་ཐ་དད་ཡུལ་རྟེན་ཅན། །དཔེར་ན་མེ་ནི་རང་བཞིན་གྱིས། །རྟག་ཏུ་སྲེག་པར་བྱེད་ལས་ཅན། །བསྲེག་བྱའི་དོན་ཉེ་གྱུར་པ་སྲེག །གཞན་དུ་མིན་གཞན་གྱི་ཚེ་ནའང༌། །དཔེར་ན་གསལ་བའི་མེ་ལོང་དང༌། །ཇི་ལྟར་ཤིང་གི་རྡོ་དང་ནི། །གང་ཞིག་ཁོ་ན་ཉེར་གྱུར་པ། །དེ་ཡི་རྣམ་པར་དེར་ཐོབ་བྱེད། །དེ་བཞིན་རྟག་པའི་སེམས་ཉིད་ཀྱི། །སྐྱེས་བུ་ལུས་ལ་གནས་པ་རྣམས། །དབང་པོས་བླངས་པའི་གཟུགས་ལ་སོགས། །འཛིན་བྱེད་འདི་ནི་ཁོ་བོའི་བློ། །ཉེ་ཕྱིར་ཉེ་པར་འཐོབ་བྱེད་པའི། །བྱེད་པ་འཇིག་ཕྱིར་བློ་འཇིག་ཅན། །ཇི་ལྟར་བསྲེག་བྱ་ཉེ་མེད་ཕྱིར། །མེ་ནི་རྟག་ཏུ་སྲེག་བྱེད་མིན། །དེ་ལ་རྟོགས་པའི་བློ་བདག་ཉིད། །བློ་ནི་ངོ་ཤེས་པར་བྱེད་དེ། །བུམ་པ་གླང་པོ་ལ་སོགས་བློ། །དེ་ཐ་དད་ཕྱིར་འཇིག་རྟེན་འདོད། །ཐ་དད་དོན་རྗེས་འབྲང་རྣམས་ཀྱིས། །བློ་དེ་ཉིད་ཅེས་བརྗོད་མི་བྱ། །དོན་ཐ་དད་ལ་མི་རྟེན་ན། །ངོ་ཤེས་མེད་པ་མ་ཡིན་ནོ། །འོ་ན་གླང་པོ་སོགས་སྟོང་པའི།། ས་ལ་སྒྲོ་འདོགས་བྱེད་པ་ཡི། །ཤེས་པ་གང་དག་རབ་འཇུག་པ། །དེར་ནི་ཐ་དད་ཅི་ལ་བརྟེན། །གལ་ཏེ་ཡུལ་གཞན་སོགས་ཡོད་པའི། །གསལ་བ་རྣམས་ནི་རྒྱུ་མཚན་ཡིན། །གང་ཕྱིར་ཡུལ་དུས་གཞན་གྱི་བདག །ཐམས་ཅད་དུ་ནི་དམིགས་པ་ཡིན། །འོ་ན་ཡུལ་དེ་དང་འབྲེལ་བ། །དེ་ལྟར་
དེ་དག་ལ་མེད་ཉིད། །དེ་ཕྱིར་དེར་ཡང་རང་བཞིན་དེས། །ཅི་ཕྱིར་དེ་ལྟར་སྣང་བར་བྱེད། །ཁྱོད་ཀྱི་གཞུང་གིས་བློ་རྣམས་ནི། །བློ་མིན་ཕྱི་རོལ་དུ་རྗོད་བྱེད། །བརྗོད་པར་འདོད་པའི་ཡུལ་དེར་ཡང༌། །གླང་པོ་རྟ་སོགས་གནས་པ་མེད། །གལ་ཏེ་དོན་ཀུན་རིག་པ་ཡིན།། ངོ་བོར་བློ་ནི་རྟག་གནས་ན། །ཐམས་ཅད་ཚེ་ན་ཀུན་རིག་པར། །དེས་ན་ཅི་ཕྱིར་རིག་མ་ཡིན། །སྒྲ་ཡི་ཁྱད་པར་ཅན་བློ་གང༌། །དེ་ཉིད་རོ་གཟུགས་སོགས་ཡུལ་ཅན། །འདིར་ཡིན་ཕྱིར་རོ་གལ་ཏེ་མིན། །ཐ་དད་རང་གི་ཚིག་གིས་བསྟན། །བསྲེག་བྱའི་དངོས་པོ་མ་ལུས་པ། །མེ་ཡང་རྟག་ཏུ་སྲེག་བྱེད་པའི། །བདག་ཉིད་ཅན་མིན་གཞན་དུ་ན། །མ་ལུས་ཐལ་བར་བྱེད་པར་འགྱུར། །བསྲེག་བྱའི་དོན་ཉིད་ཉེ་བ་ན། །དེ་ནི་དེ་སྲེག་བདག་ཉིད་རིགས། །དེ་ལྟ་ན་ནི་དོན་རྣམས་ཀུན། །ཅིག་ཅར་ཉིད་སྲེག་ཐལ་མི་འགྱུར། །ཨུཏྤལ་སྔོ་སོགས་འབྲེལ་པ་ལས། །མེ་ལོང་དང་ནི་ཤེལ་ལ་སོགས། །དེ་གཟུགས་བརྙན་དུ་འཁྲུལ་བ་སྐྱེད་པའི། །རྒྱུ་ཡིན་སྐད་ཅིག་གིས་འཇིག་ཅན། །གཞན་དུ་ཁྱད་པར་བཅས་པ་དང༌། །ཅིག་ཤོས་གནས་སྐབས་གཅིག་ཉིད་ཕྱིར། །རྟག་ཏུ་དེ་ཡི་རྣམ་པའམ། །དེ་དང་བྲལ་བར་སྣང་བར་འགྱུར། །བརྟན་ཉིད་ཕྱིར་དང་གཏིང་མེད་ཕྱིར། །ལུས་ཅན་ལྷན་ཅིག་མི་གནས་ཕྱིར། །མེ་ལོང་དབུས་ཀྱི་གཟུགས་བརྙན་ནི། །ནམ་ཡང་འཛིན་པར་བྱེད་མ་ཡིན། །ལོགས་གཉིས་གནས་པ་དག་གིས་ཀྱང༌། །ཤེལ་རྡོ་བཞིན་དུ་དཀར་པོ་རུ། །མཐོང་འགྱུར་འདི་ཡི་ཕྱིར་འདིས་ཀྱང༌། །གཟུགས་བརྙན་ཐོབ་པར་འགྱུར་བ་མིན། །གལ་ཏེ་དེ་ཡི་གཟུགས་བརྙན་ཐོབ། །དེ་ལ་དོན་དམ་པར་ཡོད་ན། །ཁྱད་པར་སོ་སོས་ཤེལ་སོགས་ནི། །ཐ་དད་པར་ནི་ཐལ་བར་འགྱུར། །དེ་ཕྱིར་སྣ་ཚོགས་བསམ་མི་ཁྱབ། །ནུས་ཅན་དེ་དག་ལ་འདི་འཁྲུལ། །བློ་ལ་འཁྲུལ་བའི་དངོས་པོ་ཡང༌། །མི་རིགས་ཐ་དད་བྲལ་ཕྱིར་རོ། །མ་རྟོགས་ངོ་བོ་ལས་ལྡོག་པ། །བློ་ཀུན་དག་ལ་མཚུངས་པ་ཡིན། །སྒྲོ་འདོགས་པ་ཡི་གཅིག་ཤེས་ཉིད། །སྣ་ཚོགས་ཉིད་ལའང་འཇུག་པར་འགྱུར། །གནས་སྐབས་རྣམས་ཀྱི་ཐ་དད་ཀྱིས། །ཐ་དད་པས་སྟོང་དེས་གནས་པས། །བརྟན་པའི་རང་བཞིན་ཅན་བདག་ལ། །གང་གཞན་གྱིས་ནི་ཀུན་བརྟགས་འདི། །ཁོ་བོའི་
སྐྱེས་བུས་སྡུག་བསྔལ་སོགས། །གནས་སྐབས་ཐོབ་པར་བྱེད་ན་ཡང༌། །ཤེལ་དང་རྫས་ཡོད་ཉིད་སོགས་ཀྱིས། །ངོ་བོ་འདོད་པར་མི་བྱེད་ཉིད། །གནས་སྐབས་གཞན་ནི་སྐྱེ་འགྱུར་ཚེ། །སྔ་མ་ཤིན་ཏུ་འཇིག་མི་འགྱུར། །ཕྱི་མའི་རྗེས་མཐུན་དོན་དུ་ན། །སྤྱི་བདག་ཉིད་ལ་ཐིམ་པར་འགྱུར། །རང་གི་ངོ་བོས་གནས་སྐབས་དག །ཕན་ཚུན་དུ་ནི་འགལ་བ་ཉིད། །སྤྱི་ཡི་བདག་ནི་ཐམས་ཅད་དུ། །འགལ་མེད་པར་ནི་ཤེས་པར་བྱ། །དེ་ལ་གལ་ཏེ་སྐྱེས་བུ་ལས། །གནས་སྐབས་གཅིག་ཏུ་ཐ་དད་མིན། །དེ་དག་སྐྱེ་འཇིག་ཡོད་པ་ན། །འདི་ལའང་དེ་དག་དེ་བཞིན་འགྱུར། །འགལ་བའི་ཆོས་དང་འབྲེལ་འགྱུར་ན། །གཅིག་ཏུ་ཐ་དད་ཉིད་འགྱུར་ཏེ། །ཇི་ལྟར་ཁྱེད་ཀྱིས་སྐྱེས་བུ་རྣམས། །རང་བདག་སོ་སོར་ངེས་པ་བཞིན། །གལ་ཏེ་ཁྱེད་ཀྱི་གནས་སྐབས་རྣམས། །རང་གི་ངོ་བོས་སྐྱེས་བུ་ལ། །ཞི་ཐིམ་འགྱུར་སོགས་འབྱུང་བའི་ཚེ། །སྡུག་བསྔལ་སོགས་དེའང་མྱོང་བར་འགྱུར། །གཞན་གྱི་ངོ་བོ་འཕོ་འགྱུར་ན། །གཞན་འཕོ་བར་ཡང་མི་འདོད་ཅིང༌། །དེ་ཡི་བདག་ཉིད་འཕོ་འགྱུར་ནའང༌། །དེ་ཕྱིར་བདག་ནི་སྐྱེ་ལྡན་འགྱུར། །གལ་ཏེ་བྱེད་པོ་ཟ་པོ་དག །གནས་སྐབས་ལ་བརྟེན་མ་ཡིན་ན། །དེ་ཕྱིར་སྐབས་ལྡན་དེ་ཉིད་འགྱུར།། བྱེད་པ་སོགས་ཉིད་ཡོད་མི་འགྱུར། །དེ་ཕྱིར་རྟག་སྒྲས་བརྗོད་བྱ་ཉིད། །བདག་ལ་བཟློག་པར་བྱ་བ་མིན། །རང་གི་ངོ་བོའི་འགྱུར་ལྡན་ཕྱིར། །དེ་ནི་ཆང་པར་འགྱུར་བ་ཡིན། །སྦྲུལ་ཡང་སྐད་ཅིག་འཇིག་ཉིད་ཕྱིར། །འཁྱོག་པ་ལ་སོགས་ཐོབ་འགྱུར་གྱི། །རྟེན་དངོས་ཡིན་ན་སྐྱེས་བུ་བཞིན། །གནས་སྐབས་གཞན་དང་འབྲེལ་པ་མེད། །ངའོ་སྙམ་པའི་ཤེས་པ་འདི། །དམིགས་པ་མེད་པ་ཉིད་དུ་ནི། །ཐོག་མེད་སེམས་ཅན་དུ་བལྟ་བའི། །ས་བོན་སྟོབས་ལས་འགར་ཉིད་འཇུག །གང་ཕྱིར་འདུ་བྱེད་འགའ་ཞིག་ཉིད། །དེ་ཡི་རང་གི་ངོ་བོར་ཞེན། །བདག་པོ་ཉིད་ནི་ཐོབ་བྱེད་དེ། །དེ་ཕྱིར་ཀུན་དུ་འཇུག་མི་འགྱུར། །གཞན་དུ་ཁྱེད་ཀྱི་སྐྱེས་བུ་ལའང༌། །བརྒལ་ཞིང་བརྟག་པ་མཚུངས་པ་ཡིན། །དེ་ཕྱིར་ཐ་དད་ནུས་ཡོད་པས། །ཐམས་ཅད་རྩོད་པ་མེད་པར་འགྱུར། །རྟག་པ་དམིགས་པའི་ཕྱོགས་ལ་ནི། །དེ་བས་ངའོ་སྙམ་པ་ཀུན། །ཅིག་ཅར་ཉིད་དུ་སྐྱེ་འགྱུར་ཏེ། །ནུས་
རྒྱུ་རྣམ་པར་གནས་ཕྱིར་རོ། །མི་རྟག་དམིགས་པ་ཉིད་ལ་ཡང༌། །གསལ་བར་སྣང་འགྱུར་དེ་ཡི་ཕྱིར། །གཞན་དག་དམིགས་དོན་ཡོད་པ་རུ། །བརྒལ་ཞིང་བརྟག་པ་དོན་མེད་དོ། །ཤེས་པ་པོ་ལ་ངོ་ཤེས་ནི། །བག་ཆགས་ཀྱིས་ནི་བྱེད་རིགས་ཀྱི། །དེ་མ་ཡིན་ལ་དེ་ཤེས་པའི། །ཤེས་མིན་འདི་ནི་འཁྲུལ་རྒྱུ་མིན། །དེ་ཕྱིར་ང་སྙམ་ཤེས་འཁྲུལ་པ། །མི་འདོད་གནོད་མེད་ཕྱིར་ཞེན། །མ་ཡིན་བཤད་མ་ཐག་པ་ཡི། །རིགས་པས་དེ་ལ་གནོད་མཐོང་ཕྱིར། །དབང་ཕྱུག་སོགས་ལ་དད་རྣམས་ཀྱི། །དེ་རྒྱུ་སོགས་སུ་འཁྲུལ་པ་ནི། །བག་ཆགས་ཙམ་གྱི་ངོ་བོ་ལས། །ཇི་ལྟར་སྣ་ཚོགས་སྐྱེ་བར་འགྱུར། །དེ་ལྟར་གང་ཚེ་ངའོ་སྙམ། །དམིགས་མེད་ཉིད་དུ་གནས་པ་ཡིན། །དེ་ཕྱིར་ང་ཤེས་ཀྱིས་བཟུང་བའི། །ཤེས་བྱེད་འགའ་ཡང་ཡོད་མ་ཡིན། །དེ་ཕྱིར་ཚད་མ་ཐམས་ཅད་ལ། །དཔེ་ནི་འགའ་ཡང་ཡོད་མ་ཡིན། །གཏན་ཚིགས་རྣམས་ཀྱང་གཞི་མ་གྲུབ། །བསྟན་པ་རྣམས་ལ་ཅི་རིགས་སྦྱར། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་དཔྱོད་པ་པས་བརྟགས་པའི་བདག་བརྟག་པ་སྟེ་བརྒྱད་པའོ།། །།གཞན་ནི་ཤེས་པའི་བློ་ཡི་ནི། །རང་དངོས་ཁྱད་པར་ཡིན་པར་སེམས། །དེ་དག་སེམས་ལ་བདག་ཉིད་ཀྱི། །རང་གི་ངོ་བོར་རྟོགས་པར་བྱེད། །གཙོ་བོས་བསྟབས་པའི་འབྲས་བུ་ལ། །དེ་ནི་ལོངས་སྤྱོད་འབའ་ཞིག་བྱེད། །དེ་ལ་བྱེད་པ་ཉིད་ཡོད་མིན། །རང་བཞིན་ཁོ་ན་དེར་འདོད་དོ། །དེ་ལ་འང་གལ་ཏེ་སེམས་གཅིག་འདོད། །གཟུགས་དང་སྒྲ་སེམས་དག་གི །རང་བཞིན་ཐ་དད་དང་ལྡན་པར། །ཤིན་ཏུ་གསལ་བར་ཇི་ལྟར་རིགས། །སེམས་ནི་རང་བཞིན་གཅིག་པ་ཅན། །དུས་ཀུན་དུ་ནི་གནས་པ་ལ། །རྣམ་པ་སྣ་ཚོགས་དོན་རྣམས་ཀྱི། །ལོངས་སྤྱོད་པོར་ནི་ཇི་ལྟར་འཐད། །ལྟ་འདོད་ལ་སོགས་ཐ་དད་རྣམས། །དེ་ཡི་ལོངས་སྤྱོད་རྒྱུ་མཚན་དུ། །འབྱུང་མིན་དེ་ལྟར་འབྱུང་ཡིན་ན། །སྐྱེས་བུ་སྐྱེ་བ་དང་ལྡན་འགྱུར། །གང་ཕྱིར་སེམས་ལས་ཐ་དད་པའི། །ལྟ་འདོད་ལ་སོགས་དེ་མི་འགྱུར། །དེ་ལ་སྐྱེ་དང་འཇིག་ཐོབ་ན། །སྐྱེས་བུ་ལ་ཡང་འདི་བཟློག་ཀ །གལ་ཏེ་དགེ་དང་མི་དགེ་བའི། །ལས་ནི་བདག་གིས་བྱས་ཉིད་མིན། །དེ་ཕྱིར་འདི་ཡི་ལོངས་སྤྱོད་ཀྱི། །ཐ་
དད་པ་ནི་གང་ལས་སྐྱེ། །གལ་ཏེ་འདོད་དང་རྗེས་མཐུན་པ། །རང་བཞིན་གྱིས་རབ་སྟེར་བྱེད་དེ། །དེ་དག་གི་ནི་འབྲེལ་པ་འདི། །ཞ་བོ་ལོང་བ་བཞིན་དུ་གནས། །གལ་ཏེ་དེ་ལྟར་འདོད་པ་ལ། །སྲེད་པ་ཡོད་ཀྱང་ཅི་ཡི་ཕྱིར། །འགྲུབ་པར་མི་བྱེད་རང་བཞིན་ནི། །གཞན་ལ་ཅུང་ཟད་ལྟོས་མི་འགྱུར།། དོན་ལས་ལོངས་སྤྱོད་དུས་སུ་ཡང༌། །གལ་ཏེ་འདི་ལ་འགྱུར་མེད་ན། །འདི་ནི་ཟ་པོ་ཉིད་མིན་ཞིང༌། །རང་བཞིན་ཡང་ནི་ཕན་བྱེད་མིན། །རྣམ་པར་འགྱུར་བ་ཡོད་གྱུར་ན། །རྟག་པ་ཉིད་ནི་ཉམས་པར་འགྱུར། །རྣམ་འགྱུར་རྣམ་པ་གཞན་ཉིད་ན། །གནས་སྐབས་ན་ཡང་དེ་ཇི་ལྟར། །ཡུལ་གྱི་རྣམ་པ་ཅན་བློ་ནི། །ཐོག་མར་རབ་ཏུ་འཇུག་བྱེད་ཅིང༌། །དེ་ཡིས་ངེས་པར་བྱས་པའི་དོན། །སྐྱེས་བུ་ཡིས་ནི་རྟོགས་བར་འགྱུར། །དེ་ལྟར་འདི་ཡི་ཟ་པོ་ཉིད། །གཟུགས་བརྙན་སྐྱེ་བའི་སྒོ་ཅན་ཏེ། །སྐྱེས་བུ་འདི་ཡི་རང་ངོ་བོ། །ནམ་ཡང་འདོར་མེད་མིན་སྙམ་ན། །བརྗོད་པར་བྱ་སྟེ་གཟུགས་བརྙན་ནི། །དེ་ཡི་བདག་ཉིད་དུ་སྐྱེ་འགྱུར། །སྐྱེ་ལྡན་དུ་ཉིད་དུ་འགྱུར་ཞིང༌། །ཐ་དད་ཡིན་ན་ཟ་ཕོ་མེད། །སེམས་ཉིད་བདག་ཉིད་ཅན་གཙོ་བོ། །སྣ་ཚོགས་སྒྲུབ་པའི་ཁྱད་པར་ལ། །ལྟ་འདོད་སོགས་ཀྱི་རྗེས་མཐུན་པར། །ཇི་ལྟར་ཡང་དག་འབྱུང་བར་འགྱུར། །གཙོ་བོས་ཚད་མ་ལ་སོགས་པ། །བྱེད་པ་ཤེས་པ་རྣམ་ཤེས་དང༌། །བཟའ་བར་མི་ཤེས་ཞེས་བྱ་བར། །འདི་ལས་མི་རིགས་གཞན་ཅི་ཡོད། །གཙོ་བོར་བློ་དང་ལྡན་ཉིད་ཕྱིར། །འདི་ལ་ཀུན་འགལ་མེད་ཅེ་ན། །འོ་ན་བློ་ལྡན་ཉིད་ཡིན་ན། །སྐྱེས་བུ་བཞིན་དུ་སེམས་ཉིད་ཐོབ། །བློ་དང་རྣམ་ཞེན་པ་དང་ནི། །དེ་བཞིན་རིག་དང་རིག་བྱེད་དང༌། །སེམས་དང་ཉམས་མྱོང་ཞེས་བྱ་བ། །ཐམས་ཅད་སེམས་ཀྱི་རྗོད་བྱེད་ཡིན། །སྐྱེ་ལྡན་འཇིག་པའི་རྟག་དག་གི །སྒྲ་དྲི་རོ་སོགས་བཞིན་དུ་ནི། །བློ་ནི་སེམས་པ་མེད་པ་ཡི། །བདག་ཉིད་ཅན་དུ་འདོད་ཅེ་ན། །སྒྲུབ་བྱེད་རང་རྒྱུད་ཉིད་འདོད་ན། །གཏན་ཚིགས་འདི་དག་གཉིས་ཀ་ལ། །མ་གྲུབ་ཐལ་འགྱུར་བརྗོད་འདོད་ན། །བཟློག་པ་ལ་ནི་གནོད་པ་མེད། །སེམས་པ་ཉིད་ལའང་བདག་གི་སྒྲར། །ཞེན་ན་འང་ང་ལ་གནོད་པ་མེད། །གལ་ཏེ་རྟག་ཉིད་བསྒྲུབ་དཀའ་སྟེ། །མིག་སོགས་འབྲས་བཅས་ཉིད་ཕྱིར་རོ། །གལ་ཏེ་
སེམས་པ་ཉིད་རྟག་ན། །མིག་དང་དོན་སོགས་འབྲས་མེད་འགྱུར། །གལ་ཏེ་མེ་ནི་རྟག་གྱུར་ན། །བུད་ཤིང་དོན་མེད་འགྱུར་བ་ཡིན། །མལ་ཆ་དང་ནི་སྟན་བཞིན་དུ། །འདུས་པའི་གཏན་ཚིགས་དེ་ཉིད་ཀྱིས། །མིག་ལ་སོགས་པ་རྣམས་ལ་ནི། །གཞན་དོན་ཉིད་གང་རབ་བསྟན་ནས། །གལ་ཏེ་ཁྱད་པར་བྱར་རུང་གི །དེ་ཉིད་དེ་དག་ལ་བསྒྲུབ་ན། །འདོད་སྒྲུབ་གང་ཕྱིར་དེ་དག་ནི། །འཇིག་པའི་ཤེས་ལ་ཕན་བྱེད་འདོད། །འགྱུར་མེད་ཕན་ལ་ཕན་བྱེད་ཉིད། །སྒྲུབ་ན་དཔེ་ནི་བསྒྲུབ་བྱ་ཡི། །སྟོང་པ་ཡིན་ཏེ་དེ་དག་ཀྱང༌། །གཡོ་བ་ཉིད་ལ་ཕན་བྱེད་རིགས། །གལ་ཏེ་ཕྱིར་ནི་གཞན་དོན་དུ། །དེ་དག་ལ་ནི་རབ་བསྒྲུབ་པ། །དེ་ལྟ་ན་ཡང་སྒྲུབ་དོན་མེད། །སེམས་ལ་ཕན་བྱེད་སྒྲུབ་ཕྱིར་རོ། །ཕན་བྱེད་དུ་མ་སྨོས་པའི་ཕྱིར། །ཆོགས་པ་ཉིད་འདིར་བརྗོད་པ་ཡིན། །བྱ་བ་ཡི་ནི་ཡུལ་ཉིད་ན། །གཞན་གྱི་དོན་ནི་སྒྲུབ་བྱེད་མིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་སེར་སྐྱ་པས་ཀུན་དུ་བརྟགས་པའི་བདག་བརྟག་པ་སྟེ་དགུ་པའོ།། །།རྒྱལ་དཔོག་པ་བཞིན་རྒྱལ་བ་པ། །རྫས་དང་རྣམ་གྲངས་ངོ་བོ་ཡིས། །ལྡོག་དང་རྗེས་འགྲོ་བདག་ཉིད་ཅན། །སྐྱེས་བུ་ཤེས་པའི་མཚན་ཉིད་སྨྲ། །དེ་ལའང་རྫས་ནི་རྣམ་གྲངས་དང༌། །གལ་ཏེ་འབྲེལ་དུ་གྱུར་མེད་ན། །དེ་ལ་ཁྱད་བར་མེད་པའི་ཕྱིར། །དེ་ནི་འགྱུར་བ་ཅན་མི་འགྱུར། །ཡུལ་དང་དུས་དང་རང་བཞིན་དག །ཐ་དད་མེད་ཕྱིར་གཅིག་ཏུ་བརྗོད། །གྲངས་དང་མཚན་ཉིད་མིང་དང་དོན། །ཐ་དད་ཕྱིར་ན་ཐ་དད་བརྗོད། །གཟུགས་སོགས་རྣམས་དང་བུམ་བ་ཞེས། །གྲངས་དང་མིང་གི་རྣམ་དབྱེ་དང༌། །འབྲས་བུ་དང་ནི་རྗེས་འཇུག་ལྡོག །མཚན་ཉིད་དང་ནི་དོན་རྣམས་དབྱེ། །རྫས་དང་རྣམ་གྲངས་དག་གི་ཡིན། །དེ་ལྟར་གཅིག་ཏུ་ཁྱད་མེད་ཅན། །རྫས་མིན་རྣམ་གྲངས་ཐ་དད་ཀྱིས། །བདག་ཉིད་ཁྱད་པར་འགྱུར་ཞེ་ན། །ངེས་པར་ཁྱད་པར་ལྡན་པ་ཡི། །རང་བཞིན་དབྱེར་མེད་གཅིག་ཉིད་དེ། །དེ་ལྟ་ཡིན་ན་ཐ་དད་ཉིད། །ཇི་ལྟར་ཡང་ནི་བསྒྲུབ་དཀའ་སྟེ། །རྣམ་གྲངས་སོགས་ཀྱི་དངོས་དག་བཞིན། །དེ་ལྟར་རྫས་དང་རྣམ་གྲངས་དང༌། །དངོས་ཀུན་གཅིག་ཉིད་དུ་གནས་ན། །རྫས་ནི་ལྡོག་དང་ལྡན་གྱུར་ཏེ། །རྣམ་གྲངས་དག་གི་རང་དངོས་བཞིན། །གལ་ཏེ་རྣམ་གྲངས་དེ་ཀུན་ཡང༌། །རྫས་བཞིན་རྗེས་འགྲོའི་བདག་ཉིད་ནི། །ཐོབ་འགྱུར་དེ་
དག་རྫས་དང་ནི། །བདག་ཉིད་གཅིག་ཏུ་གནས་ཕྱིར་རོ། །དེ་ཡི་ཕྱིར་ན་རྣམ་གྲངས་ལས། །ཐ་དད་མེད་ཕྱིར་བདག་སོགས་རྫས། །གནས་པ་ཅུང་ཟད་ཡོད་མིན་ཏེ། །རྣམ་གྲངས་རང་གི་ངོ་བོ་བཞིན། །སྐྱེ་དང་འཇིག་པར་གནས་པ་ཡི། །རྣམ་གྲངས་རྣམས་ཀྱང་ཅུང་ཟད་མེད། །རྫས་ལས་ཐ་དད་མེད་པའི་ཕྱིར། །རྫས་དེ་ངེས་པའི་བདག་ཉིད་བཞིན། །དེ་ཕྱིར་རྗེས་འགྲོ་མེད་གཅིག་པའམ། །ཐམས་ཅད་རྟག་པ་ཉིད་འདོད་ཀྱིས། །གཅིག་བདག་ཉིད་ལས་ལྡོག་པ་དང༌། །རྗེས་འགྲོ་འདི་དག་མེད་པ་ཉིད། །དམིགས་སུ་རུང་བའི་རང་བཞིན་ཅན། །རྣམ་གྲངས་ལ་རྗེས་འགྲོ་བདག་ཉིད། །རྫས་ནི་སོ་སོར་སྣང་བ་མོས། །དེ་ཕྱིར་མཁའ་པད་བཞིན་དུ་མེད། །སྣ་ཚོགས་དོན་བྱེད་རུང་བ་དང༌། །མཚུངས་སོགས་ཤེས་པའི་རྒྱུ་འགྱུར་དག །དེ་ལྟའི་རྣམ་པའི་དོན་གྱིས་བརྡ། །སྒྲ་དང་ཤེས་པའི་སྤྱོད་ཡུལ་དག །སྐྱེ་དང་འཇིག་པའི་ཆོས་ཅན་གྱི། །རྣམ་གྲངས་ཁོ་ན་འབའ་ཞིག་དག །ཡང་དག་ཡོད་འགྱུར་དེ་ཡི་ཕྱིར། །བདག་མེད་གསལ་སྣང་དྲི་མ་མེད། །འོ་ན་ཏེ་རྫས་དང་རྣམ་གྲངས་ཀྱི། །ངོ་བོ་ཡང་དག་འདྲེ་བར་གནས། །དངོས་ཉིད་ཅན་དེ་དབྱེར་མེད་པ། །འདོད་དེ་མི་ཡི་སེང་གེ་བཞིན། །དངོས་ཉིད་ཅན་ཞེས་བསྟན་པ་འདི། །སྣ་ཚོགས་དོན་གྱི་རྒྱུ་མཚན་ཅན། །ཡིན་ཏེ་དངོས་པོའི་སྒྲ་ཡང་ནི། །རང་བཞིན་རྗོད་པར་བྱེད་ཕྱིར་རོ། །མི་ཡི་སེང་གེའང་གཅིག་པུ་ནི། །གཉིས་བདག་ཅན་དུ་འཐད་མིན་ཏེ། །གང་ཕྱིར་རྡུལ་ཕྲན་དུ་མ་ཡི། །འདུས་བདག་ཅན་དེ་དེ་ལྟར་ཤེས། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་ནམ་མཁའི་གོས་ཅན་གྱིས་ཀུན་ཏུ་བརྟགས་པའི་བདག་བརྟག་པ་སྟེ་བཅུ་པའོ།། །།ས་དང་མེ་ཆུ་ལ་སོགས་པར། །དེ་ཤེས་རྟག་པའི་འཇུག་པ་འདི། །དེ་བདག་ཅན་ཉིད་བདག་ཡིན་ཞེས། །གཞན་དག་ཀྱང་ནི་རྗོད་པར་བྱེད། །གཟུང་བའི་མཚན་ཉིད་དང་ལྡན་པའི། །འདི་ནི་ཅུང་ཟད་ཡོད་མིན་ཏེ། །དེ་ཕྱིར་འདི་དག་ཐམས་ཅད་ནི། །རྣམ་ཤེས་འགྱུར་བར་ཡང་དག་གནས། །དེ་དག་གི་ནི་ལྟ་བ་དང༌། །དེ་གཞུང་རྟག་ཉིད་བརྗོད་པའི་ཕྱིར། །ཉེས་པ་ཆུང་ལྡན་རྟག་བརྗོད་ཕྱིར། །དེ་དག་ཉེས་པ་ཆུང་ལྡན་ཏེ། །གཟུགས་སྒྲ་ལ་སོགས་ཤེས་པ་རྣམས། །ཐ་དད་ཉེར་མཚོན་གསལ་བ་ཡིན། །ཤེས་པའི་བདག་ཉིད་
གཅིག་ཉིད་ནི། །གཟུགས་དང་སྒྲ་དང་རོ་སོགས་རྣམས། །ཅིག་ཅར་རྟོག་པར་ཐལ་བར་འགྱུར། །རྟག་ལའང་གནས་སྐབས་གཞན་མེད་དོ། །གཟུགས་སོགས་རྣམས་ཀྱི་རིག་པ་ལས། །ཐ་དད་ཤེས་པ་དམིགས་པ་མེད། །དེ་ནི་སྐད་ཅིག་ཐ་དད་ན། །ཐ་མི་དད་དུ་གནས་པ་ཅི། །ཕྱིན་ཅི་ལོག་དང་མ་ལོག་པའི། །ཤེས་པ་ཐ་དད་ཡོད་མིན་ན། །སྐྱེས་བུ་ཤེས་ཉིད་བདག་ཉིད་ལ། །དེ་ཕྱིར་འཆིང་གྲོལ་ཇི་ལྟར་ཡིན། །རྣལ་འབྱོར་གོམས་པས་རྣལ་འབྱོར་པ། །ཅི་ཞིག་བཟློག་ཅིང་ཅི་ཞིག་སྒྲུབ། །གང་ཕྱིར་དེ་བདག་ཕྱིན་ཅི་ལོག །སྤང་བར་ནུས་པ་མ་ཡིན་ནོ། །དེ་བདག་ཉིད་དུ་རྟག་གནས་ཕྱིར། །དེ་ཉིད་ཤེས་པའང་བསྐྱེད་བྱ་མིན། །དེ་ཕྱིར་ཁྱེད་ཀྱི་རྣལ་འབྱོར་ནི། །གོམས་པ་འདི་ཀུན་འབྲས་མེད་འགྱུར། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་ཨུ་པ་ནི་ཤ་ཀས་བརྟགས་པའི་བདག་བརྟག་པ་སྟེ་བཅུ་གཅིག་པའོ།། །།བདེ་གཤེགས་པར་སེམས་འགའ་ཞིག་ཀྱང༌། །གང་ཟག་ཐ་སྙད་སྒོ་ནས་ནི། །དེ་ཉིད་གཞན་ཡིན་སོགས་བྲལ་བ། །བདག་ཏུ་རབ་ཏུ་རྗོད་པར་བྱེད། །མུ་སྟེགས་ལྟ་བར་ཐལ་འགྱུར་ཕྱིར། །གང་ཟག་ཕུང་པོ་ལས་གཞན་མིན། །དུ་མ་སོགས་འགྱུར་ཕྱིར་དེ་ཉིད། །མ་ཡིན་དེ་ཕྱིར་བརྗོད་མེད་ལེགས། །དེ་དག་ལ་སྨྲ་གང་ཟག་ནི། །དོན་དམ་པར་མེད་དེ་ཉིད་དང༌། །གཞན་ཉིད་སོགས་པར་བརྗོད་མེད་ཕྱིར། །ནམ་མཁའི་པདྨ་ལ་སོགས་བཞིན། །དངོས་པོ་དངོས་པོ་ལས་གཞན་ནམ། །གཞན་མིན་པར་ཡང་མི་འདའ་ཉིད། །དེ་ཕྱིར་བརྗོད་དུ་མེད་པ་གང༌། །དངོས་པོ་མེད་པར་རྟོགས་པ་ལ། །ཐ་དད་ཐ་དད་མེད་རྣམས་རྟོགས། །དངོས་ལ་བརྟེན་པ་ཡིན་པའི་ཕྱིར། །དེ་ཉིད་གཞན་སོགས་བརྗོད་མེད་པ། །རང་བཞིན་མེད་རྣམས་ལ་རིགས་ཀྱི། །དངོས་པོ་ལ་ནི་ཡོད་མིན་ཞེས། །དེ་ལྟ་བུ་ཡིས་བཀག་པ་གང༌། །དེ་ནི་དངོས་པོ་གཞན་བཞིན་དུ། །དེ་ལས་གཞན་དུ་གསལ་བར་བརྗོད། །དེ་ཉིད་མིན་པ་བཀག་པས་ཀྱང༌། །དེ་ཉིད་དུ་ནི་རྗོད་པར་བྱེད། །དེ་ཕྱིར་དངོས་དེ་དངོས་པོ་ནི། །དེ་ཉིད་གཞན་འགའ་མི་བྱེད་ན། །གང་ཟག་ཕུང་པོ་ལས་གཞན་མིན། །ཞེས་པས་འདི་ནི་གཞན་མིན་བརྗོད། །ཕུང་པོ་གང་ཟག་མིན་ཞེས་པས། །དེ་ནི་གཞན་འདི་ཡིན་པར་གསལ། །འགལ་བའི་
ཆོས་དང་འབྲེལ་པ་ནི། །དངོས་པོ་ཐ་དད་པར་བརྗོད་དོ། །ཕུང་པོ་གང་ཟག་དག་ལ་ཡང༌། །དེ་བཞིན་ཅི་ཕྱིར་ཐ་དད་མེད། །འདི་ལྟར་ཚོར་བ་ལ་སོགས་ལས། །གང་ཟག་བརྗོད་དུ་མེད་པར་བརྗོད། །དེ་ལས་གཟུགས་དང་འདུ་ཤེས་སོགས། །དེ་ཉིད་གཞན་ཉིད་དུ་བརྗོད་བྱ། །གཟུགས་ལ་སོགས་པའི་ཕུང་པོ་དག །མི་རྟག་ཉིད་དུ་བརྗོད་བྱར་འདོད། །དེ་ལྟར་གང་ཟག་མིན་ཕྱིར་ཡང༌། །དེ་ལས་གཞན་དུ་གསལ་ཉིད་ཡིན། །དོན་བྱེད་པར་ནི་ནུས་པ་ཡང༌། །ཡོད་པ་ཉིད་ཀྱི་མཚན་ཉིད་དེ། །སྐད་ཅིག་མ་ཉིད་ལ་ངེས་ཡིན། །དེ་ལྡན་བརྗོད་མེད་དངོས་ཉིད་ཡིན། །ལུང་དང་འགལ་བ་དག་ལ་ནི། །བདག་ཉིད་ཆེན་པོས་བརྩོན་པར་བྱས། །མེད་པ་པ་ནི་དགག་པའི་ཕྱིར། །བརྩེ་ལྡན་གསུང་ནི་སྣ་ཚོགས་ཡིན། །ཚོགས་པ་ལ་སོགས་ཐུགས་ཀྱིས་ནི། །ཁུར་ཁྱེར་ལ་སོགས་སྟོན་མཛད་པ། །ཁྱད་པར་སྒོ་ནས་བཀག་པ་ནི། །ལྟ་བ་དེ་ཡོད་རྣམས་ལ་མཛེས། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་གནས་མའི་བུས་བརྟགས་པའི་བདག་བརྟག་པ་སྟེ་བཅུ་གཉིས་པའོ།། །།ཡང་ན་གང་ཕྱིར་སྐད་ཅིག་མ། །འཇིག་པ་རབ་ཏུ་གྲུབ་ཉིད་ཀྱིས། །རང་བཞིན་ལ་སོགས་སུན་ཕྱུང་བས། །གནས་མེད་ཉིད་ལ་འབད་འདི་བྱེད། །བཤད་དང་འཆད་པར་འགྱུར་བ་ཡི། །རིགས་སོགས་ཁྱད་པར་མེད་པ་ནི། །དགག་པའི་དོན་དུ་དེ་ཡི་ཕྱིར། །སྐད་ཅིག་འཇིག་པ་གསལ་བསྒྲུབ་བྱ། །བྱས་དང་མ་བྱས་ཉིད་སྒོ་ནས། །འགའ་ཞིག་ཕུང་པོ་གཉིས་སུ་འདོད། །སྐད་ཅིག་སྐད་ཅིག་མ་ཡིན་པས། །གཞན་གྱིས་དངོས་རྣམས་ལ་འདོད་འདི། །དེ་ལ་བྱས་པའི་དངོས་པོ་གང༌། །དེ་ཀུན་སྐད་ཅིག་མར་འཇིག་ཅན། །ཐམས་ཅད་དག་ནི་འཇིག་པ་ལ། །ལྟོས་མེད་ཉིད་དུ་གནས་ཕྱིར་རོ། །གང་ཞིག་དངོས་གང་ཡིན་པ་ལ། །རྒྱུ་གཞན་ལ་ལྟོས་མེད་ཉིད་དེ། །དེ་ལྟར་རང་རྒྱུད་ལས་སྐྱེ་ཕྱིར། །དེ་ནི་དེ་ལས་ངེས་ཞེས་བྱ། །དཔེར་ན་རང་འབྲས་སྐྱེ་བ་ལ། །གེགས་བྱེད་མེད་པའི་ཚོགས་པ་བཞིན། །སྐྱེ་བ་ཅན་ནི་ཐམས་ཅད་ཀྱང༌། །འཇིག་པ་ལ་ནི་ལྟོས་པ་མེད། །གལ་ཏེ་འདི་ལྟོས་མེད་ཡིན་ནའང༌། །ཡུལ་དང་དུས་གཞན་ལ་འགྱུར་ན། །དེ་དག་ལ་ནི་ལྟོས་ཉིད་ཕྱིར། །ལྟོས་མེད་ཐལ་བ་ཉིད་འགྱུར་ན། །སྐྱེ་བ་
ཅན་ཀུན་འཇིག་པ་ལ། །ཐམས་ཅད་དུ་ནི་ལྟོས་པ་མེད། །འཇིག་པའི་རྒྱུ་རྣམས་རྣམ་ཀུན་དུ། །ད་ལ་ཅུང་ཟད་བྱེད་མེད་ཕྱིར། །འདི་ལྟར་འཇིག་པར་བྱེད་པའི་རྒྱུ། །དངོས་ལ་ཐ་དད་མེད་བ་ཡི། །འཇིག་པའི་བྱེད་པོར་མི་རིགས་ཏེ། །དངོས་པོ་རང་རྒྱུ་ལས་སྐྱེ་ཕྱིར། འདི་ལ་སྒྲིབ་སོགས་ཀྱང་མི་རིག །འཇིག་པ་ཞེས་བྱའི་དངོས་པོ་ཡི། །དངོས་པོའི་འཇིག་བྱེད་ཅེས་བྱ་བརྫུན། །གཞན་ཉིད་ལ་སོགས་རྣམ་རྟོག་དག །དོན་དེ་ལ་ཡང་འཇུག་ཕྱིར་རོ། །དངོས་པོའི་ངོ་བོ་མེད་བདག་ཉིད། །འཇིག་པ་ཞེས་བྱའི་མེད་གཞན་ཅན། །འཇིག་བྱེད་ཅེ་ན་དེ་ལ་ཡང༌། །བྱེད་པ་རིག་པ་ལྡན་མ་ཡིན། །མེད་པ་ཡང་ནི་འབྲས་ཉིད་ན། །མྱུ་གུ་སོགས་བཞིན་དངོས་ཉིད་དུ། །ཐལ་འགྱུར་བསྐྱེད་བྱའི་ངོ་བོ་ནི། །རྒྱུ་ཡི་ནུས་པས་སྐྱེད་ཕྱིར་རོ། །དེ་ལྟར་དངོས་མེད་སྒྲུབ་སྒོ་ནས། །བྱས་ཡིན་མ་ཡིན་དགག་རྟེན་ཕྱིར། །གང་ཡིན་དེ་ལ་ཐ་དད་སོགས། །སླར་ཡང་རྣམ་རྟོག་འཇུག་པར་འགྱུར། །འོན་ཏེ་བྱ་བ་བཀག་པ་འདི། །དངོས་ཉིད་བྱེད་པ་མ་ཡིན་ཉིད། །དེ་ལྟ་ན་ཡང་རྒྱུ་མེད་གྲུབ། །བྱེད་པོ་མིན་ན་རྒྱུ་ཉམས་ཕྱིར། །འོ་ན་དངོས་པོ་ཡོད་དུས་སུ། །འཇིག་པ་འདི་ཡོད་མ་ཡིན་ཉིད། །སྔོན་མིན་ཡུན་རིང་ཕྱིས་ཀྱང་མིན། །དངོས་པོའི་དེ་མ་ཐག་ཏུ་འདི།། དེ་ལྟ་ན་ཡང་དུས་ངེས་ཕྱིར། །འདི་ནི་རྒྱུ་ལྡན་རེགས་པ་ཡིན། །ལྟོས་མེད་པ་ལ་རེས་འགའ་དང༌། །འབྲེལ་པ་སུན་ནི་ཕྱུང་བ་ཡིན། །དངོས་པོའི་དེ་མ་ཐག་ཏུ་ནི། །འབྱུང་བའི་ཕྱིར་དང་མ་བྱུང་ལས། །འབྱུང་ཕྱིར་འདི་ནི་རྒྱུ་ལྡན་རིགས། །དཔེར་ན་སྐད་ཅིག་གཞན་བཞིན་འདོད། །མོ་གཤམ་གྱི་ནི་བུ་བཞིན་དུ། །རྒྱུ་མེད་ཕྱིར་འདི་ཅུང་ཟད་མེད། །ཡང་ན་མཁའ་བཞིན་རྟག་གྱུར་ཏེ། །གང་ཕྱིར་རྣམ་པ་གཞན་མེད་དོ། །མེད་པ་ཡིན་ན་འཇིག་མེད་ཕྱིར། །དངོས་པོ་ཐམས་ཅད་རྟག་པར་འགྱུར། །འདུས་བྱས་ཐམས་ཅད་འཇིག་པ་ཡི། །ཤེས་པའང་རྒྱུ་མཚན་མེད་པ་ཅན། །རྟག་པ་ཉིད་ནའང་འཇིག་པ་མེད། །ལྷན་ཅིག་གནས་འགྱུར་འགལ་མེད་ཕྱིར། །སྐྱེ་བ་མེད་ལའང་འཇིག་བཤད་པ། །རིགས་པའི་རྗེས་འབྲངས་ཉིད་མ་ཡིན། །དེ་ལྟ་བུ་ལ་གཞན་དག་གིས། །ཇི་ལྟ་བུ་ཞིག་འཇིག་པར་རྟོག །སྐད་ཅིག་མར་གནས་ཆོས་རྣམས་ཀྱི། །དངོས་ཉིད་མིན་ནམ་འོན་ཏེ་ན། །
དངོས་པོའི་ངོ་བོ་ལྡོག་གྱུར་པ། །ཞིག་མྱོང་ཅན་ལ་དེ་ལྟར་བརྗོད། །དེ་འདིར་འཇིག་པའི་རང་བཞིན་གང༌། །ཆོས་རྣམས་སྐད་ཅིག་མར་གནས་པའི། །དངོས་མེད་དེ་ལྟར་བརྗོད་དམ་ཅི། །གཞན་ལ་བརྒལ་ཞིང་བརྟག་པ་མཚུངས། །འོན་ཏེ་དངོས་པོའི་རང་ངོ་བོ། །ལྡོག་པ་འཇིག་པའི་མིང་ཡིན་ན། །སྔ་མ་ལ་ནི་རྟག་བྱེད་པ། །འགལ་བ་ཅུང་ཟད་མེད་པ་ཉིད། །སྐད་ཅིག་མར་གནས་དངོས་གང་ལ། །འཇིག་པ་ཞེས་ནི་རྗོད་བྱེད་ན། །དེ་ནི་རྒྱུ་དང་རྣམ་པར་འདོད། །གཞན་དངོས་མེད་ཕྱིར་རྒྱུ་མེད་ཅན། །དངོས་པོའི་དེ་མ་ཐག་འབྱུང་ཉིད། །དེ་འདྲ་དེ་ལ་ཡོད་མིན་ཏེ། །གཡོ་བ་དངོས་པོའི་རང་ངོ་བོ། །དངོས་དང་ལྷན་ཅིག་སྐྱེ་ཕྱིར་རོ། །དེ་ཕྱིར་འཇིག་པ་ཡོད་པའི་ཕྱིར། །འདུས་བྱས་ཐམས་ཅད་རྟག་པ་མིན། །འཇིག་པ་ཞེས་པའི་བློ་དག་ཀྱང༌། །རྒྱུ་མཚན་མེད་པར་ཐལ་མི་འགྱུར། །ཞིག་པ་ཉིད་ནི་བདག་མེད་ཕྱིར། །དེ་མ་ཐག་འབྱུང་ཡོད་པ་མིན། །མ་བྱུང་བྱུང་བ་ལྡན་པ་ཡང༌། །ནམ་མཁའི་པདྨ་ལ་སོགས་བཞིན། །ཞིག་འགྱུར་ཞེས་བྱ་དེ་ལྟར་འདིར། །དངོས་པོར་མ་གྱུར་ཞེས་བྱ་ཡི། །དོན་འདི་རྟོགས་པར་བྱེད་ཡིན་གྱི། །བསྒྲུབ་པ་འགའ་ཡང་མི་འདོད་དོ། །མི་འགའ་ཞིག་ལ་བོང་བུ་ཞེས། །དེ་ལྟར་མིང་ཙམ་བྱས་པ་ན། །བོང་བུའི་ཆོས་རྣམས་ཐམས་ཅད་ནི། །འདི་ལས་ཐོབ་འགྱུར་མ་ཡིན་ནོ། །ཞིག་པ་ཞེས་བྱའི་དངོས་པོ་ནི། །དངོས་པོ་བཅོམ་པ་ཞེས་བྱ་བ། །སྒྲུབ་པ་ན་ཡང་དངོས་འདི་ལ། །ཅུང་ཟད་ཀྱང་ནི་སྐྱེ་མེད་ཕྱིར། །འདི་ནི་ཇི་ལྟར་ལྡོག་པར་འགྱུར། །འཇིག་པ་དངོས་པོ་ཞིག་བདག་ཉིད། །ཇི་ལྟར་དངོས་པོའི་ངོ་བོ་དང༌། །བྲལ་ཕྱིར་མེད་པ་ཉིད་འདོད་ཀྱི། །དངོས་པོ་ངོ་བོ་མིན་ཕྱིར་མིན། །འདི་ལ་ལྡོག་པའི་དངོས་ཉིད་ཀྱང༌། །སྒྲུབ་པའི་སྒོ་ནས་རྗོད་མི་བྱེད། །དངོས་པོ་ཡི་ནི་རྗེས་འཇུག་པ། །སྐད་ཅིག་ལས་ཕྱིས་འགེགས་པར་བྱེད། །དེ་ཕྱིར་འདི་ཡི་རྣམ་གཞག་གི །ངོ་བོ་སྒྲུབ་པ་ཅུང་ཟད་མེད། །དེ་ཕྱིར་འདི་ལ་རྟག་པ་ཡི། །རྣམ་རྟོག་བྱེད་པ་གནས་མེད་དོ། །ནམ་མཁའ་ལ་སོགས་དངོས་གང་དང༌། །མ་བྱས་པར་ནི་ཡང་དག་འདོད། །དངོས་པོ་འཇུག་པ་ཡོད་མིན་ཏེ། །དེ་དག་ཡོད་ནུས་བྲལ་ཕྱིར་རོ། །སྐད་ཅིག་སྐད་ཅིག་མིན་སོགས་རྟོག །དེ་ཚེ་དེ་ལ་གནས་མེད་དོ། །གང་གིས་དངོས་ཉིད་སྐད་
ཅིག་མའམ། །གལ་ཏེ་རྣམ་པ་གཞན་དུ་འགྱུར། །སྐད་ཅིག་གནས་པའི་རང་བཞིན་གང༌། །དངོས་པོ་སྐད་ཅིག་མ་རུ་བརྗོད། །བརྟེན་པའི་ངོ་བོར་གནས་པ་ཡི། །དངོས་ཉིད་སྐད་ཅིག་པ་མ་ཡིན། །སྐྱེས་མ་ཐག་ཏུ་མི་གནས་པའི། །དངོས་པོའི་ངོ་བོ་གང་ཡིན་པ། །སྐད་ཅིག་ཏུ་བརྗོད་དེ་གང་ལ། །ཡོད་པ་སྐད་ཅིག་མར་འདོད་དོ། །དོན་ལ་ཐ་དད་མེད་ན་ཡང༌། །དེ་འདི་ལ་འདི་ཞེས་གནོད་མེད། །འདོད་པས་སྦྱར་བའི་བརྡ་ཙམ་གྱི། །དངོས་པོ་རྗོད་པར་བྱེད་པ་ཡིན། །བྱུང་མ་ཐག་ཏུ་མི་གནས་པའི། །དངོས་ལ་དེ་ལྟར་བརྗོད་འདོད་པ། །དེ་ལ་སྒྲ་ནི་རྐྱེན་བཅས་པ་འམ། །རྐྱན་མེད་རབ་ཏུ་སྦྱོར་བར་འགྱུར། །གལ་ཏེ་ནམ་མཁའ་དུས་ལ་སོགས། །དེ་དག་ཡོད་འགྱུར་དེ་ལྟར་ན། །དེ་དག་ཀྱང་ནི་བྱས་བཞིན་དུ། །སྐད་ཅིག་འཇིག་འདི་ལས་མི་འདའ། །འདི་ལྟར་གང་ཟག་ཡོད་ཅེས་པས། །དེ་ཀུན་སྐད་ཅིག་འཇིག་ཅན་དེ། །དཔེར་ན་འདུས་བྱས་དངོས་པོ་དག །དེ་ལྟར་དེ་མ་ཐག་གྲུབ་བཞིན། །ནམ་མཁའ་དུས་དང་དབང་ཕྱུག་སོགས། །འདི་ཡང་ཁྱོད་ཀྱི་ཡོད་པར་འདོད། །དེ་དག་སྐད་ཅིག་མ་ཉིད་དང༌། །བྲལ་ན་མེད་པར་ཐལ་བར་འགྱུར། །གང་ཕྱིར་བརྟན་པའི་དངོས་པོ་རྣམས། །རིམ་གྱིས་སམ་ནི་ཅོག་ཅར་དུའང༌། །དོན་གྱི་བྱ་བ་བྱེད་མིན་པ། །དེ་ཕྱིར་དེ་དག་མེད་པར་འདོད། །རྒྱུ་ནི་ཉེ་བ་མེད་པའི་ཕྱིར། །འབྲས་བུ་རྣམས་ནི་སྡོད་པར་བྱེད། །ནུས་པའི་རྒྱུ་ནི་ཡོད་གྱུར་ན། །དེ་དག་སྡོད་པར་གང་གིས་བྱས། །འོན་ཏེའང་རྟག་ལ་རིམ་ཅན་གྱི། །ལྷན་ཅིག་བྱེད་རྣམས་ཡོད་གྱུར་ན། །འདི་ནི་གང་དག་ལ་ནི་ལྟོས། །འབྲས་བུའི་ཚོགས་རིམ་རྟེན་པར་བྱེད། །འདི་ལེགས་འོན་ཀྱང་དེ་ལ་ནི། །ལྷན་ཅིག་བྱེད་དེ་རྣམས་ཡོད་པ། །རུང་བའི་ངོ་བོའི་རྒྱུ་ཉིད་ཕྱིར། །དོན་གཅིག་བྱེད་པས་ཡིན་ནམ་ཅི། །རུང་བའི་ངོ་བོའི་རྒྱུ་ཉིད་ན། །དངོས་དེ་དག་གི་བྱས་འགྱུར་ན། །དེ་ཡང་བྱ་བར་མི་ནུས་ཕྱིར། །དེ་རང་བཞིན་དུ་རྟག་གནས་པ། །འདི་ཡི་རང་བཞིན་བྱས་ན་ཡང༌། །འདི་ཡི་རྟག་པ་ཉམས་པར་འགྱུར། །དེ་ལས་ཁྱད་པར་ཐ་དད་ནི། །འདི་ནི་བྱེད་པོར་ཇི་ལྟར་འགྱུར། །དེ་ཡོད་ན་ནི་འབྲས་བུ་དག །སྐྱེད་པའི་ཕྱིར་དང་དེ་མེད་ན། །མི་སྐྱེད་ཕྱིར་ཏེ་དེ་ལྟར་ན། །དེ་ཉིད་རྒྱུ་ཉིད་རྣམ་པར་གནས། །འོན་ཏེ་དེ་དང་འབྲེལ་
པའི་ཕྱིར། །དེ་ལའང་རྒྱུ་ཉིད་ཡོད་པ་ན། །དེ་དག་ལས་འབྲེལ་གང་ཡིན་འདོད། །ཐ་དད་ཕྱིར་ན་དེ་བདག་མིན། །དེ་ནི་དེ་ལས་འབྱུང་བའང་མིན། །ཅིག་ཅར་པར་དུ་ཐལ་ཕྱིར་རོ། །དེ་ལས་ཀྱང་ནི་འབྲས་བུ་རྣམས། །ཅིག་ཅར་ཉིད་དུ་སྐྱེད་པར་འགྱུར། །དེ་ལའང་གཞན་ལ་ལྟོས་པ་ན། །ཐུག་པ་མེད་པར་ཐལ་བར་འགྱུར། །དེ་ལས་འབྲས་བུ་དུས་གཅིག་ནའང༌། །འབྲེལ་པ་མེད་ཕྱིར་བརྟག་མི་བྱ། །གལ་ཏེ་འབྲེལ་པ་འདུ་བ་ཡིན། །དེ་ལའང་འདིར་ནི་དཔྱང་བྱ་སྟེ། །དེ་ནི་དེ་ལ་འགྱུར་བའམ། །དེ་ལྟ་མ་ཡིན་ཞེས་བྱ་བ། །འདུ་བ་ཅན་དུ་འདོད་དམ་ཅི། །གལ་ཏེ་རྟོག་པ་དང་པོ་འཛིན། །དེ་ལས་བྱུང་བ་དེ་ཉིད་ཐོབ། །དེ་ཡང་དེ་མ་ཐག་གསལ་ཟིན། །གལ་ཏེ་ན་ནི་དེ་ལ་འདི། །ཕན་མི་བྱེད་པར་འདོད་གྱུར་ན། །དངོས་གཞན་ཀུན་ཀྱང་དེ་བཞིན་དུ། །འདུ་བ་ཅན་འགྱུར་ཁྱད་པར་མེད། །ཐ་དད་ཐ་དད་མེད་རྣམ་རྟོག །སོ་སོ་དག་ཏུ་བཀག་པའི་ཕྱིར། །ངོ་བོ་གཉིས་ཅན་ཁྱད་པར་ནི། །དངོས་པོ་དེ་ལ་བསལ་བ་ཡིན། །གང་ཟག་ལ་སོགས་རྟགས་རྣམས་སུ། །ཕུང་པོ་གཉིས་ནི་བསྟན་པའི་ཕྱིར། །ངོ་བོ་གཉིས་ཅན་ཁྱད་པར་མེད། །གཉིས་མེད་བདག་ཉིད་ཅན་ཡང་མེད། །འོན་ཏེ་ལྷན་ཅིག་བྱེད་པ་ཡི། །རྐྱེན་ལས་འཇུག་པ་མི་ལྟོས་པ། །དེ་ལྟ་ན་ཡང་དེ་བྲལ་འདི། །བྱེད་པ་མ་ཡིན་མཐའ་རྒྱུ་བཞིན། །དེ་ཡི་བདག་གི་རང་བཞིན་འདི། །དེ་དག་ཉིད་ནི་ཉེ་བ་ན། །བྱེད་པོ་ཉིད་ཡིན་དེ་ཕྱིར་དེ། །ཡོད་ནའང་ཀུན་ཚེ་འབྲས་བུ་མིན། །དེ་ལྟ་ཡིན་ན་འོན་ཀྱང་ནི། །ཚོགས་པ་ན་དེ་རང་བཞིན་འདོད། །གང་དེ་མཚོགས་ན་འདོད་ན། །དེར་འབྲེལ་རང་བཞིན་ཡོད་ན་ནི། །དེ་དག་ཀྱང་ནི་འདི་གནས་ཕྱིར། །བྲལ་བའི་ངོ་བོའི་གཞན་ཡིན་ན། །གཅིག་པ་ཉིད་ནི་ཉམས་པར་འགྱུར། །དེ་ཕྱིར་དེ་ལྟར་ལྟོས་པས་ཀྱང༌། །འབྲས་བུ་རྣམས་ནི་རིམ་སྐྱེའམ་མིན། །ཅིག་ཅར་མི་འདོད་ཉིད་དང་ནི། །དེ་འབྲས་རིམ་གྱིས་མཐོང་ཕྱིར་རོ། །གལ་ཏེ་འབྲས་བུ་མ་ལུས་རྣམས། །ཅིག་ཅར་བྱས་ནས་ནུས་པ་ཡི། །བདག་ཉིད་དོན་དེ་ལྡོག་འགྱུར་ན། །འདི་ནི་སྐད་ཅིག་འཇིག་ཅན་གྲུབ། །དེ་དངོས་ཅན་ནི་རྗེས་འཇུག་ན། །སླར་ཡང་འབྲས་བུ་སྐྱེ་བར་འགྱུར། །ཅུང་ཟད་མི་བྱེད་ངོ་བོ་ནི། །ཇི་ལྟར་ཡང་ནི་ཉིད་དུ་འདོད། །ནུས་པ་ཀུན་གྱིས་སྟོང་
ཉིད་ཕྱིར། །རྒྱུ་སྐར་ལམ་གྱི་པདྨ་བཞིན། །སྐད་ཅིག་ཡིན་པར་ཐམས་ཅད་མེད། །གང་ཕྱིར་ནུས་པ་དངོས་མཚན་ཉིད། །ནུས་པའི་མཚན་ཉིད་དངོས་ཉིད་འདི། །ཅི་སྟེ་ཁས་ལེན་མི་བྱེད་ན། །གལ་ཏེ་དེ་ལྟར་གཞན་དག་གིས། །དངོས་པོའི་མཚན་ཉིད་གཞན་སྟོན་གྱིས། །གལ་ཏེ་དངོས་པོའི་མཚན་ཉིད་ནི། །ཡོད་ཉིད་དང་འབྲེལ་འདོད་དེ་མིན། །འདུ་སོགས་མ་གྲུབ་ཕྱིར་དང་ནི། །ཇི་ལྟར་གཞན་ནི་གཞན་མཚན་ཉིད། །དོན་བྱེད་དོན་དུ་གཉེར་བྱེད་པ། །གཡེང་བ་མེད་པའི་བློ་ཅན་གྱི། །དོན་ལ་དཔྱོད་སོགས་བྱ་བ་ཀུན། །རིགས་ཀྱི་སྨྱོན་པ་ཉིད་ཀྱིས་མིན། །མྱོས་པར་གྱུར་པས་ཀྱང་མ་ཡིན། །དེ་ལ་གང་དག་འགའ་ཞིག་ལ། །ལ་ལར་དུས་འགར་ཇི་ལྟར་ཡང༌། །ཉེ་བར་མཁོ་གྱུར་དེ་ཉིད་ལ། །ཡོད་ཉིད་རྣམ་གཞག་རིག་པ་ཡིན། །དེ་ཡི་དངོས་ཅན་དོན་ཉིད་ལ། །སྐད་ཅིག་མ་ཉིད་རབ་སྒྲུབ་བྱེད། །ཐམས་ཅད་སྡུད་ཕྱིར་ཁྱད་པར་ནི། །དེ་ཉིད་ལ་ནི་བརྗོད་པར་བྱ། །མོ་གཤམ་གྱི་ནི་བུ་ལྟ་བུའི། །ནུས་པ་མ་ལུས་སྟོང་པ་གང༌། །ཐམས་ཅད་མཁྱེན་པའི་ཐུགས་ཀྱི་ཡང༌། །ནམ་ཡང་རྒྱུ་ཉིད་མ་ཡིན་པ། །དེ་ལ་མཁས་པས་ཡོད་ཉིད་ཀྱི། །རྣམ་གཞག་འདི་ནི་ཡོད་མི་བྱ། །རྒྱུ་མེད་ཕྱིར་རོ་འབྲས་བུ་དང༌། །ངོ་བོ་འབྲས་སོགས་མ་མཐོང་ཕྱིར། །དེ་ལ་སྐད་ཅིག་མ་ཉིད་དུ། །བསྒྲུབས་པས་དོན་ནི་ཅུང་ཟད་མེད། །དེ་ལ་བརྒལ་ཞིང་བརྟག་པ་ཡང༌། །བྱེད་པའང་འབྲས་བུ་མེད་པ་ཡིན། །འོན་ཏེ་ནམ་མཁའི་པདྨ་སོགས། །རང་གིས་ཤེས་པའི་རྒྱུར་གྱུར་ཕྱིར། །དོན་གྱི་བྱ་བ་བྱེད་ནུས་ཀྱང༌། །དེ་དག་དངོས་པོར་ཡོད་མ་ཡིན། །ནམ་མཁའི་ཆུ་སྐྱེས་པད་སོགས་ལ། །དེར་རྟོགས་བག་ཆགས་ཙམ་ལས་ནི། །འབྱུང་བ་དམིགས་པ་མེད་ཉིད་ནི། །ཤེས་པ་འདི་ནི་རབ་ཏུ་བྱེད། །མེད་པ་རྒྱུ་ཉིད་ཡིན་ན་ནི། །རྒྱུན་མི་འཆད་པར་འབྱུང་བར་འགྱུར། །རྟག་ཏུ་ཁྱད་པར་མེད་ཉིད་ཕྱིར། །དངོས་མེད་ལྟོས་པ་ཅི་ཡང་མེད། །སྐད་ཅིག་པ་ཡི་དངོས་རྣམས་ཀྱང༌། །ཇི་ལྟར་དོན་བྱེད་པ་ཉིད་ཡོད། །ཐོག་མའི་ལྷན་ཅིག་བྱེད་རྣམས་ནི། །ཕན་ཚུན་ཁྱད་པར་བྱེད་མིན་ཏེ། །སྐྱེས་ན་བདག་ཀུན་གྲུབ་ཕྱིར་དང༌། །མ་སྐྱེས་རང་བཞིན་མེད་ཕྱིར་རོ། །ཁྱད་པར་མེད་ལས་ཁྱད་པར་ནི། །འབྱུང་ན་འབྲས་བུ་ཅིས་
མི་འབྱུང༌། །གཞན་ལ་ཁྱད་པར་ཅན་དེ་མིན། །བརྒལ་ཞིང་བརྟག་པ་མཚུངས་ཕྱིར་རོ། །ཁྱེད་ལ་ལྷན་ཅིག་བྱེད་པའི་ཚོགས། །ཐུག་པ་མེད་པར་ཡང་འགྱུར་རོ། །དེ་ལྟར་གང་ཕྱིར་དེ་དག་ནི། །རིམ་དང་ཅིག་ཅར་དོན་བྱ་མེད། །མི་འགྱུར་དེ་ཕྱིར་དེ་དག་ནི། །སྐད་ཅིག་མ་ཉིད་རྟེན་དོན་མེད། །དེ་ལྟར་ལྷན་ཅིག་བྱེད་བྱས་པས། །གང་ཚེ་ལ་ལར་ཁྱད་མེད་ན། །དེ་ཚེ་དེ་ཕྱིར་དུས་ཀུན་དུ། །རྒྱུན་ཡང་ཁྱད་པར་མེད་པ་ཉིད། །དེ་ཚེ་དེ་ཕྱིར་རྒྱུན་ལ་ཡང༌། །གལ་ཏེ་འཇིག་པ་རྒྱུ་མེད་ནི། །འདི་ནི་ཐོག་མ་ཉིད་དུ་འགྱུར། །གལ་ཏེ་ཐོག་མ་འདི་མེད་ན། །མཐའ་ཡང་དེ་ནི་ཇི་ལྟར་འགྱུར། །གལ་ཏེ་དངོས་པོ་འཇིག་པ་ལ། །རང་གི་རྒྱུ་ལས་རྒྱུ་གཞན་ནི། །མི་འདོད་ན་ནི་དེ་དག་ལ། །འགའ་ཞིག་ཏུ་ནི་ཇི་ལྟར་ལགས། །སྨྲས་པ་ཐོག་མའི་གནས་སྐབས་རྣམས། །ཕན་ཚུན་ཕན་པ་བྱེད་ཉིད་ན། །དེ་དག་དོན་ཅིག་བྱེད་ཉིད་ཀྱིས། །ལྷན་ཅིག་བྱེད་རྣམས་སུ་འགྱུར་ཏེ། །ཕན་ཚུན་ཕན་བྱེད་མིན་ན་ཡང༌། །འདི་དག་ཁྱད་པར་ཡོད་གང་ཕྱིར། །རང་གི་ཉེར་ལེན་སྟོབས་ལས་བྱུང༌། །སྐྱེ་བྱེད་ཚོགས་པའི་ཐ་དད་ཡིན། །དེ་ལས་བརྩམས་ནས་གང་སྐྱེས་པའི། །ཁྱད་པར་དེ་དག་དེས་བྱས་པའོ། །དེ་ལ་དགོངས་པ་དེ་དག་ནི། །དངོས་དེའི་རང་བཞིན་ཅན་ཡིན་ཕྱིར། །དངོས་རྣམས་སྐད་ཅིག་སོ་སོར་ནི། །ནུས་པ་ངེས་པ་བསམ་མི་ཁྱབ། །འབྱུང་བ་བརྟག་པར་བྱ་མིན་ཏེ། །མེ་ལ་སྲེག་པར་བྱེད་ཉིད་བཞིན། །རྒྱུན་ཆད་ངོ་བོ་གང་ཡིན་པའི། །འཇིག་པ་རྒྱུ་དང་ལྡན་པ་མིན། །དེ་ནི་མཐར་ཡང་འབྱུང་ཡོད་མིན། །དེ་ལྟར་སྐྱེ་བ་བཀག་པ་ཡིན། །གྱོ་མོ་ལ་སོགས་མི་འདྲ་བའི། །སྐྱེ་བ་རྒྱུ་དང་བཅས་པ་སྟེ། །དེ་ཡང་ཐོག་མར་སྐྱེས་མིན་ཉིད། །དེ་ཚེ་རྒྱུ་ནི་མེད་ཕྱིར་རོ། །དངོས་པོ་སྐད་ཅིག་མ་རྣམས་ནི། །རྣམ་གཉིས་ཁ་ཅིག་འགྲིབ་པའི་རྒྱུ། །གྲང་བ་སོགས་ཀྱིས་མེ་སོགས་བཞིན། །གཞན་དག་དེ་ལྟ་མིན་པ་ཡི། །ཐོག་མར་སྨྲས་པ་རྒྱུ་འབྲས་བུ། །ཡིན་ནའང་དེ་ཉིད་མ་མཐོང་བའི། །འཇིག་རྟེན་པ་ཡིས་འགལ་བ་ནི། །རྣམ་པ་དུ་མར་མངོན་པར་ཞེན། །དངོས་པོ་རྣམས་ལ་གནོད་བྱ་དང༌། །གནོད་བྱེད་དངོས་པོ་དོན་དམ་པར། །ཡོད་མིན་དེ་ཉིད་ཕྱིར་ན་ཡང༌། །འགལ་བ་རྟོགས་པ་ཞེས་བཤད་དོ། །འོ་ན་དབང་པོ་བྱ་བ་ནི། །ཡོད་ན་མི་གཡོ་གནོད་མེད་ཅན། །དེ་ཉིད་འདི་ཡིན་
ཞེས་བྱ་བའི། །ངོ་ཤེས་པ་ནི་ཉེ་བར་སྐྱེ། །དེ་ཕྱིར་སྐད་ཅིག་གིས་འཇིག་པར། །བསྒྲུབ་ཕྱིར་བཀོད་པའི་གཏན་ཚིགས་ནི། །ཀུན་ལ་མངོན་སུམ་གྱིས་གནོད་འདི། །བཟློག་དཀའ་བར་ནི་ཐལ་བར་འགྱུར། །ངོ་ཤེས་པར་ནི་གྱུར་ན་ནི། །མངོན་སུམ་ཡིན་པར་མི་འཐད་དེ། །གང་ཕྱིར་དེ་ནི་རྣམ་རྟོག་བཅས། །དངོས་པོའི་ངོ་བོ་བསྟན་བྱ་མིན། །ངོ་ཤེས་པ་ནི་འཁྲུལ་པ་སྟེ། །མངོན་སུམ་མཚན་ཉིད་དེ་ལས་གཞན། །ཐ་དད་མིན་པའི་ཞེན་པ་ཡིས། །ཐ་དད་དངོས་ལའང་འཇུག་ཕྱིར་རོ། །མངོན་སུམ་དེ་ལས་གཞན་པ་ཡིན། །གལ་ཏེ་འདི་ནི་སྔར་རྟོགས་པའི། །རྣམ་པའི་སྤྱོད་ཡུལ་ཅན་འགྱུར་ན། །འདི་ནི་སྔར་ཉིད་སྐྱེ་འགྱུར་ཏེ། །དེ་དོན་ཅན་ཕྱིར་སྔོན་བློ་བཞིན། །དེ་ལྟར་མ་ཡིན་དེས་ན་འདི། །དོན་དེ་འཛིན་བྱེད་འདོད་མིན་ཏེ། །དེ་ཤེས་དུས་སུ་མི་སྐྱེ་ཕྱིར། །ཡུལ་གཞན་གྱི་ནི་བློ་བཞིན་ནོ། །ཐ་དད་མིན་པའི་ཞེན་པ་ཡིས། །ཐ་དད་དངོས་ལ་འང་འཇུག་ཕྱིར་རོ། །སྒོང་གི་འཁྲུལ་པའི་ཤེས་པ་བཞིན། །འདི་ནི་འཁྲུལ་པར་གནས་པ་ཡིན། །བྱ་བ་བསྒྲུབ་པའི་དོན་ལ་ཡང༌། །འཇུག་པའི་ཕྱིར་དྲན་སོགས་བཞིན་ཏེ། །བྱེད་པའི་དོན་ནི་རྣམ་ཉམས་ཕྱིར། །འདི་ནི་ཚད་མར་རིགས་མ་ཡིན། །ད་ལྟར་དུས་སུ་ཡོད་པ་ཉིད། །སྔ་མའི་བློ་ཡིས་ཤེས་པ་ཉིད། །དེ་ཕྱིར་དྲན་པ་ལ་མེད་གང༌། །ཁྱད་པར་འདི་ལ་ཡོད་མིན་ཏེ། །གང་ཕྱིར་སྔར་ནི་ཤེས་ཙམ་ལ། །དེ་ཡིན་ཞེས་བྱས་དྲན་པ་སྐྱེ། །དེ་ཉིད་འདི་ཞེས་བྱ་བ་ཡི། །ངོ་ཤེས་པར་ནི་ཁྱད་པར་ཅན། །ཐེ་ཚོམ་ཕྱིན་ཅི་ལོག་གང་དང༌། །དེ་དག་སྤངས་ནས་ངོ་ཤེས་པ། །ཚད་མ་ཉིད་ནི་ཐོབ་པར་བྱེད། །ཤེས་པར་གྱུར་ལ་མེད་ཕྱིར་རོ། །ཅིག་ཤོས་ཀྱིས་ནི་རྟོགས་དོན་ཡོད། །མངོན་སུམ་གྱིས་ནི་བཅད་པ་ལ། །ཅིག་ཤོས་སྐྱེ་བ་སྲིད་པ་མིན། །ཚང་མ་གཙོ་བོ་བརྟན་པ་ཡིས། །ངེས་པར་བཟུང་བའི་དོན་ཉིད་ལ། །ཅིག་ཤོས་སྟོབས་ཆུང་དག་གིས་ཕྱིར། །བཟློག་པར་སུ་ཞིག་ཞེན་པར་བྱེད། །འོ་ན་ད་ལྟ་ཡོད་དེ་ཉིད། །གང་ཚེ་ཁྱོད་ཀྱིས་ཐ་དད་འདོད། །དེ་ཚེ་སྔར་ཡོད་དངོས་པོ་ལས། །ཐ་དད་ཁྱོད་ཉིད་ཀྱིས་བསྟན་ཏོ། །ཡོད་པ་གཞན་ཉིད་མ་ཡིན་ནའང༌། །ཇི་ལྟར་སྔར་བློས་ཤེས་པ་མིན། །དེ་ཤེས་མིན་ན་དངོས་པོ་ཉིད། །མ་དམིགས་བར་ནི་ཐལ་བར་འགྱུར། །རྗེས་དཔག་ལ་སོགས་
ཀྱི་སྤྱོད་ཡུལ། །མངོན་སུམ་གྱིས་ནི་གནོད་པ་ན། །རྗེས་དཔག་ལ་སོགས་ཚད་མ་མེད། །གནོད་ཕྱིར་རབ་རིབ་ཅན་སོགས་བཞིན། །དོན་ལ་མི་སླུ་བ་ཉིད་དུ། །མཚུངས་ན་འདི་ཅིས་གཙོ་བོ་ཡིན། །དེ་ཡོད་མིན་ན་རྗེས་དཔག་སོགས། །ཚད་མར་འགྱུར་པ་མ་ཡིན་ཉིད། །འོ་ན་གཏན་ཚིགས་ཐམས་ཅད་ཀྱི། །ཐམས་ཅད་ཉེ་བསུས་ཁྱབ་པ་ལ། །རྗེས་སུ་དཔག་པ་འདིས་གནོད་ཅིང༌། །དམ་བཅའི་དོན་ལ་གནོད་པ་ཡང༌། །བརྗོད་འདོད་ཉི་ཟླ་སོགས་པ་ཡི། །ཡུལ་ཅན་ཤེས་པ་གང་ཡིན་གཞན། །དེ་དུས་དང་འབྲེལ་ཉི་སོགས་ཀྱི། །ཡུལ་ཅན་དུ་ནི་འཇུག་བྱེད་དེ། །ས་ལས་བྱུང་ཡུལ་ཅན་མིན་པ། །དེ་ཤེས་ཉིད་དུ་བརྗོད་པའི་ཕྱིར། །དཔེར་ན་དང་པོའི་ཤེས་པ་ནི། །རང་དུས་ཉི་སོགས་ཡུལ་ཅན་བཞིན། །གཟུགས་ཉིད་སོགས་པ་རྟེན་ཀུན་དང༌། །དེ་དག་གི་ནི་རྟེན་གང་དང༌། །དེ་རྣམས་གང་ལ་ཡང་དག་རྟེན། །འགའ་ཞིག་དེ་ཡི་ཡུལ་གང་ཡིན། །འགའ་ཞིག་དེ་ལྟར་སྐྱེ་འགྱུར་བ། །དེ་དག་སྐྱེས་མ་ཐག་ཏུ་ནི། །འཇིག་ལ་རྟེན་པ་ཉིད་མིན་ཏེ། །གཞལ་བྱ་ཉིད་དང་བརྗོད་བྱ་ཉིད། །གཏན་ཚིགས་ཕྱིར་ནི་མཁའ་པད་བཞིན། །རྣམ་པར་རྩོད་པའི་ཡུལ་གྱུར་པའི། །ཤེས་པ་རིམ་གྱིས་འབྱུང་གང་དག །དེ་རྣམས་ཐམས་ཅད་ཡུལ་གཅིག་ཅན། །ཡིན་ནོ་ཞེས་ནི་བརྗོད་བྱ་སྟེ། །གནོད་མེད་རྟེན་གཅིག་ཅན་ཉིད་ན། །བརྗོད་པ་མཐུན་བར་སྦྱོར་བའི་ཕྱིར། །དཔེར་ན་ད་ལྟའི་སྐད་ཅིག་མ། །གཅིག་ལ་དུ་མའི་བློ་རྣམས་བཞིན། །རེ་ཞིག་གཏན་ཚིགས་དང་པོ་ལ། །དཔེར་ན་བསྒྲུབ་བྱས་སྟོང་པ་སྟེ། །ཡུལ་ཉིད་རྒྱུད་ཉིད་ཡིན་པའི་ཕྱིར། །ཤེས་པའི་རང་གི་དུས་ཅན་མིན།། གང་ཚེ་ཉི་མ་སོགས་པའི་སྒྲ། །འདོད་པ་ཙམ་གྱིས་འབྱུང་དག་རྣམས། །མར་མེ་སོགས་ལ་སྦྱར་བྱ་བ། །དེ་ཤེལ་དག་གིས་འཁྲུལ་པ་ཉིད། །རིགས་སོགས་རང་བཞིན་མེད་པའི་ཕྱིར། །སྐད་ཅིག་གིས་འདོད་ཅན་འདོད་མིན། །དེ་མེད་པར་ནི་བསྒྲུབ་པའི་ཕྱིར། །སྒྲུབ་བྱེད་བསྟན་པ་དོན་མེད་ཡིན། །སྒྲ་མཚུངས་པ་ཡིས་བརྗོད་བྱ་ཉིད། །མར་མེ་ལ་སོགས་ཤེས་པ་ལའང༌། །འཇུག་པ་དེ་ཕྱིར་དེ་ཡིས་ནི། །གཏན་ཚིགས་འདི་ནི་འཁྲུལ་བར་འགྱུར། །དེ་དག་ལ་ནི་གཞི་མཐུན་ཉིད། །གནོད་འགྱུར་དུ་ནི་རྟོག་ཅེ་ན། །བརྗོད་པར་འདོད་པའང་གནོད་པ་འདི། །གསལ་བར་ཅི་ཡི་ཕྱིར་མ་མཐོང༌། །རྩོད་
པའི་གནས་སུ་གྱུར་པ་ཡི། །བློ་རྣམས་དོན་ཞིག་ཡུལ་ཅན་མིན། །རིམ་གྱིས་འབྱུང་བ་ཉིད་ཀྱི་ཕྱིར། །གློག་དང་མར་མེ་སོགས་བློ་བཞིན། །དོན་གཅིག་ལས་བྱུང་ཤེས་རྣམས་ལ། །རིམ་གྱིས་འབྱུང་བ་འགལ་བ་ཡིན། །གཞན་གྱིས་ཐ་དད་བྱ་མིན་པ། །དེ་ལ་ལྟོས་པ་འགལ་ཕྱིར་རོ། །གཏན་ཚིགས་དེ་རྣམས་ཐམས་ཅད་ལ། །ལྡོག་པ་ཐེ་ཚོམ་ཟ་ཉིད་དེ། །མི་མཐུན་ཕྱོགས་ལ་ཞུགས་པ་ལ། །གནོད་བྱེད་བསྟན་པ་མེད་ཕྱིར་རོ། །དེ་ཁོ་ན་ཉིད་བསྡུས་པའི་རབ་ཏུ་བྱེད་བ་ལས་བརྟན་པའི་དངོས་པོ་བརྟག་པ་སྟེ་བཅུ་གསུམ་པའོ།། །། དངོས་པོ་ཐམས་ཅད་སྐད་ཅིག་མའི། །མི་རྟག་ཉིད་དང་འབྲེལ་དེའི་ཕྱིར། །ལས་དང་དེ་ཡི་འབྲེལ་པ་དང༌། །རྒྱུ་དང་འབྲས་སོགས་ཇི་ལྟར་འགྲུབ། །དགེ་རྣམས་དག་ལ་སྐད་ཅིག་གང༌། །བྱེད་པོ་ཉིད་དུ་བརྟག་བྱེད་པ། །འདི་ནི་འབྲས་བུ་བྱུང་དུས་སུ། །རྗེས་སུ་འཇུག་པ་ཉིད་མ་ཡིན། །འབྲས་བུ་འབྱུང་ཚེ་སྐད་ཅིག་གང༌། །ལོངས་སྤྱོད་པོར་ནི་བརྗོད་བྱ་བ། །དེ་ནི་ལས་བྱས་ཉིད་མིན་ཏེ། །དེ་ནི་སྔར་མི་སྲིད་ཕྱིར་རོ། །ལས་དང་དེ་ཡི་འབྲས་བུ་དག །བྱེད་པོ་གཅིག་གིས་མ་བཟུང་ཕྱིར། །བྱས་པ་ཆུད་ཟོས་མ་ཕྲད་གང༌། །ཐལ་བར་འགྱུར་བ་ཤིན་ཏུ་འགལ། །བདག་མེད་སྒྲ་ཡི་ཕྱོགས་ལ་ཡང༌། །བདག་མེད་ཕྱིར་ནི་འབྲས་མེད་པའམ། །བདག་ལས་གཞན་གྱིར་བྱ་བར་ནི། །སྔར་ཉིད་དུ་ནི་རྟོགས་བྱེད་པ། །དེ་ཕྱིར་རྟོག་ལྡན་འབྲེལ་འདོད་པ། །དགེ་བ་དང་ནི་མི་དགེ་བའི། །བྱ་བ་རྩོམ་ལ་མི་འཇུག་ཉིད། །འབྲས་བུ་རིང་དུ་གནས་པ་ཡིན། །དངོས་པོ་འབྲས་བུ་བྱེད་ནུས་པ། །མ་འོངས་མ་ཡིན་འདས་པའང་མིན། །ད་ལྟར་བ་ཡང་དེ་སྙེད་ཀྱི། །དུས་སུ་གནས་པ་མ་ཡིན་ནོ། །དངོས་པོ་བདག་ཉིད་མ་ཐོབ་པ། །གཞན་གྱི་ཡན་ལག་ཕྱིར་ནུས་མིན། །འགགས་པ་མ་ཡིན་དེ་ཡི་ནི། །འབྲས་བུ་མེད་ནུས་གནས་པའང་མིན། །སྐད་ཅིག་སྔ་མ་གཞན་ཞིག་པའང༌། །རྗེས་འགྲོ་མེད་པར་རྟེན་བྱེད་ན། །ཕྱིས་བྱུང་སྐྱེ་བར་འཐད་མིན་ཏེ། །རྒྱུ་མཚན་མེད་པ་ཉིད་ཕྱིར་རོ། །འཇིག་དང་སྐྱེ་བ་དུས་མཚུངས་ནའང༌། །རྒྱུ་འབྲས་དག་ནི་ཡོད་པ་མིན། །ཕན་ཚུན་ལྟོས་པ་མེད་
ཕྱིར་ཏེ། །དེ་ཡི་བྱ་བ་མ་བཟུང་ཕྱིར། །བུམ་པའི་གཟུགས་ནི་ཞིག་པ་ན། །དྲི་ལ་སོགས་པ་འང་སྐྱེས་པ་ནི། །ཇི་ལྟར་ད་འབྲས་མི་འདོད་ལྟར། །གཟུགས་གཞན་རྣམས་ཀྱང་དེ་བཞིན་ཏེ། །དེ་ཕྱིར་འབྲས་བུ་འབྱུང་བ་ལས། །སྔོན་དུ་གང་གི་བྱ་བ་མཐོང༌། །དེ་ཉིད་དེ་ཡི་རྒྱུ་ཡིན་གྱི། །དེ་མ་ཐག་པ་ཙམ་ནི་མིན། །གལ་ཏེ་འདི་ནི་མདོར་བསྡུས་ན། །རྒྱུ་ཞིག་པ་ལས་འབྲས་འབྱུང་ན། །ཞིག་པ་བརྗོད་དུ་མེད་པའི་ཕྱིར། །འདི་ནི་རྒྱུ་མེད་ཉིད་དུ་འགྱུར། །མ་ཞིག་པ་ལས་དེ་འབྱུང་ན། །སྐད་ཅིག་དུ་མར་གནས་པའི་ཕྱིར། །དེ་ཚེ་དངོས་རྣམས་སྐད་ཅིག་ཉིད། །ཇི་ལྟར་ཉམས་པར་འགྱུར་བ་མིན། །སྐད་ཅིག་གནས་པའི་ངང་ཚུལ་ཅན། །བུམ་སོགས་མིག་གིས་མཐོང་མིན་ཏེ། །གང་ཕྱིར་ཞིག་པ་རྟོགས་པ་ཡིན། །ཡུན་རིང་འདས་པའི་དངོས་པོ་བཞིན། །དངོས་རྣམས་རང་བཞིན་མི་དམིགས་ཕྱིར། །རྒྱུ་དང་འབྲས་བུའི་དངོས་པོར་ཡང༌། །མངོན་སུམ་དང་ནི་མི་དམིགས་པས། །མགུ་བར་འགྱུར་བ་མ་ཡིན་ནོ། །འདི་མཐོང་བ་ལས་འདི་མཐོང་ལ། །འདི་ཡང་མཐོང་ན་མ་མཐོང་བར། །རིམ་ལྡན་འགྱུར་བའི་མཚམས་སྦྱོར་བ། །བྱེད་པོར་རྣམ་པར་གནས་པ་གང༌། །སྐད་ཅིག་གིས་འཇིག་དངོས་རྣམས་ལ། །ངོ་ཤེས་པ་ཡང་འབྲེལ་པར་དཀའ།། སྐྱེས་བུ་གཞན་གྱིས་མཐོང་བའི་དོན། །གཞན་གྱིས་ངོ་ཤེས་འགྱུར་བ་མིན། །སྒྲ་ལ་སོགས་པ་ཐ་དད་ལ། །ཤེས་པ་པོ་ཞིག་ཡོད་པའི་ཕྱིར། །འདྲ་བ་ལས་ནི་ངོ་ཤེས་འགྱུར། །གཉིས་ཐ་དད་ན་རྒྱུ་མེད་ཅན། །གལ་ཏེ་མཚམས་སྦྱོར་བྱེད་པའི་རྒྱུ། །དོན་ཞིག་ཡོད་པ་མ་ཡིན་ན། །གཟུགས་མཐོང་བ་ན་རོ་སོགས་ལ། །མངོན་འདོད་སོགས་དེ་ཇི་ལྟར་འགྱུར། །སྲིད་པའི་བཙོན་རར་ཆགས་སོགས་ཀྱིས། །འཆིང་བས་བཅིངས་པའི་སྐད་ཅིག་གཞན། །མ་བཅིངས་གཞན་ནི་གྲོལ་འགྱུར་བ། །ཞས་བྱ་འདི་ཡང་རྟོགས་མ་ཡིན། །བཅིངས་པ་གྲོལ་བ་ནམ་ཡང་ནི། །མི་སྲིད་གཅིག་ཏུ་འཇུག་ཕྱིར་རོ། །དེ་ཕྱིར་ཐར་པ་དོན་གཉེར་རྣམས། །ངལ་བ་དོན་ནི་མེད་པར་འགྱུར། །འཆིང་བ་སོགས་ཀྱིས་བཅིངས་གྱུར་པ། །གྲོལ་བ་ཐོབ་པར་བྱེད་པ་མཐོང༌། །མ་བཅིངས་གྲོལ་བ་ཐོབ་བྱེད་པ། །ཞེས་བྱ་འདི་འདྲ་མཐོང་བས་གནོད། །བཅིངས་དང་གྲོལ་བ་འདི་དག་ནི། །གཞི་
གཅིག་དེ་བཞིན་གནས་པའི་ཕྱིར། །འཇིག་རྟེན་པ་ཡི་དེ་དག་བཞིན། །དེ་བཞིན་ཐམས་ཅད་མཛེས་པར་གནས། །རྣམ་པ་ད་དག་ཉིད་ཀྱིས་ནི། །དངོས་རྣམས་སྐད་ཅིག་གིས་འཇིག་ལ། །གཞི་གཅིག་པ་ནི་མེད་པའི་ཕྱིར། །དྲན་པ་ལ་སོགས་མི་སྲིད་དོ། །འདི་ལ་མངོན་པར་བརྗོད་པར་བྱ། །བདག་མེད་རྣམས་ལ་རྒྱུ་འབྲས་ཉིད། །གནས་པ་ཡིན་ན་འདི་དག་ཀུན། །གནོད་པ་མེད་པར་གྲུབ་པ་ཉིད། །ཇི་ལྟར་མྱུ་གུ་ལ་སོགས་ལ། །རྗེས་འགྲོ་ཅན་གྱི་བདག་མེད་ལ། །ས་བོན་སོགས་ཀྱི་ནུས་ངེས་པ། །དེ་བཞིན་ནང་གི་བདག་ཉིད་གནས། །དངོས་སུ་འམ་ནི་བརྒྱུད་པ་ཡིས། །འགའ་ལ་ཁ་ཅིག་ནུས་བཅས་ཡིན། །དེ་ཕྱིར་ལས་འབྲས་སོགས་རྣམས་ཀྱི། །འབྲེལ་པ་ཉིད་ནི་འཐད་མ་ཡིན། །བྱེད་པོ་ཉིད་སོགས་རྣམ་གཞག་སྟེ། །རྒྱུ་གཅིག་ཉིད་དུ་བརྗོད་འདོད་པས། །རྟོག་པས་སྒྲོ་བཏགས་ཉིད་འདོད་ཀྱི། །ཡང་དག་གནས་པའི་ཡང་དག་མིན། །རྗེས་འགྲོ་མེད་ན་རྒྱུ་འབྲས་ཉིད། །ཁྱད་པར་ཅན་དེ་མི་འཐད་དེ། །རྒྱུད་གཞན་ལས་ནི་བྱུང་རྣམས་དང༌། །གང་ཞིག་རྒྱུ་འབྲས་མི་འཐད་བཞིན། །འོ་ན་ས་བོན་མྱུ་གུ་སོགས། །རྒྱུ་འབྲས་ངེས་པ་ཉིད་མཐོང་སྟེ། །དེ་ལ་རྗེས་འགྲོའི་བདག་ཉིད་ཅན། །ཆ་ཤས་ཕྲ་མོ་ཡོད་མ་ཡིན། །ས་བོན་མྱུ་གུ་སོགས་པ་ལ། །ཞིང་སོགས་ཁྱད་པར་མེད་ཡིན་ན། །ཐ་དད་མི་རིགས་གཅིག་བདག་ཕྱིར། །ཐ་དད་རྗེས་འགྲོ་མེད་པ་གྲུབ། །དེ་ཕྱིར་ལས་འབྲས་སོགས་རྣམས་གྱི། །ཡོད་དང་མེད་པ་སྒྲུབ་དོན་དུ། །རྒྱུ་འབྲས་གྲུབ་དང་མ་གྲུབ་ཕྱིར། །གཞན་གྱིས་རབ་ཏུ་འབད་པར་བྱ། །དེ་ལ་བརྗོད་བྱ་སྐད་ཅིག་མ། །གཉིས་པ་ལ་ནི་འབྲས་སྐྱེ་ཞིང༌། །དང་པོར་རྒྱུ་ནི་སྐྱེས་གྱུར་པ། །དེ་ནི་དེ་ཚེ་ཞིག་པའང་མིན། །དེ་ནི་སྐད་ཅིག་པ་ཉིད་ཕྱིར། །འབྲས་བུའི་སྐད་ཅིག་དུས་གནས་ཕྱིར། །གནས་ནའང་དོན་མེད་གང་གི་ཕྱིར། །དེ་ལ་འབྲས་བུ་དེ་འགྲུབ་ཡིན། །སླར་སྐྱེས་སླར་ཡང་དེ་ཡིས་ནི། །བསྐྱེད་པར་ནུས་མིན་སྐྱེ་བ་ནི། །མ་བྱུང་བ་ལས་བྱུང་དངོས་ཕྱིར། །གཞན་དུ་ན་ནི་གནས་པ་མིན། །དེ་ཕྱིར་མ་ཞིག་པ་ཡི་རྒྱུ། །སྐད་ཅིག་དང་པོར་བྱུང་བ་ལས། །དེ་ཡིས་སྐད་ཅིག་མ་ཉིད་ཕྱིར། །ཅིག་ཅར་ཐལ་པ་ཡོང་མ་ཡིན། །སྐད་ཅིག་གསུམ་ལ་སོགས་པ་ལ། །དཔེར་ན་རྣམ་པར་སྨིན་པའི་རྒྱུ། །ཞིག་ལས་
འབྲས་བུ་བརྗོད་པ་བཞིན། །གལ་ཏེ་དང་པོར་དེ་འབྱུང་ན། །ཅིག་ཅར་དུ་ཡང་ཐལ་འགྱུར་ཏེ། །ལྷན་ཅིག་འབྱུང་རྒྱུ་བཞིན་དེ་ཡང༌། །རིགས་པས་འཐད་མིན་གང་གི་ཕྱིར། །མེད་པས་སྔར་ནི་ནུས་མེད་ཕྱིར། །ནུས་པའི་ཚེ་ན་འབྲས་འབྱུང་ཕྱིར། །རྒྱུ་འབྲས་དག་ནི་ཅིག་ཅར་ཉིད། །འགལ་བར་གསལ་བ་ཉིད་ཡིན་ཏེ། །སྐམ་པས་བཟུང་བ་བཞིན་དུ་ནི། །རྒྱུ་འདིས་རང་གི་འབྲས་བུ་འདིས། །བཟུང་ནས་སྐྱེད་པར་བྱེད་པ་མིན། །གང་ཕྱིར་ཅིག་ཅར་བ་རུ་འགྱུར། །འདོད་ལྡན་བུད་མེད་ལ་བཞིན་དུ། །འབྲས་བུ་རང་བཞིན་ལ་བརྟན་པར། །འཁྱུད་ནས་སྐྱེ་བ་མ་ཡིན་ན། །གང་གིས་དེ་དག་ཅི་དགར་འགྱུར། །ཅིག་ཅར་བ་ཉིད་འགལ་བ་ཡིན། །གང་ཕྱིར་རྒྱུ་དེ་རང་ཉིད་ཀྱིས། །འབྲས་བུ་སོས་བསྡོམས་བཞིན་བཟུང་བ། །སྐྱེས་བ་ཡིན་ན་ཅིག་ཅར་བར། །འགྱུར་ན་དེ་ནི་དེ་ལྟར་མིན། །འབྲས་བུའང་རང་བཞིན་དེ་ལ་ནི། །འདོད་ལྡན་སྡུག་བསྔལ་འཁྱུད་བཞིན་པས། །སྐྱེ་བ་ཡིན་ན་ཅིག་ཅར་བར། །འགྱུར་ན་དེ་ཡང་དེ་ལྟར་མིན། །རང་གི་རྒྱུ་ལས་འབྱུང་བ་ནི། །སྐད་ཅིག་དང་པོར་གང་བྱུང་བ། །སྐད་ཅིག་གཉིས་པར་ཉེ་བ་ཡི། །དེ་མ་ཐག་ཏུ་གང་བྱུང་མིན། །བྱ་བ་མེད་པའི་དངོས་ལ་ཡང༌། །དེ་ནི་དེ་ཡི་སྐྱེད་བྱེད་ཡིན། །འདོད་པ་ཙམ་ལས་བྱུང་བ་ཡི། །བརྡ་ནི་རྗེས་སུ་སྒྲུབ་བྱེད་ཡིན། །སྐྱེ་བ་ལས་ནི་དུས་གཞན་པའི། །བྱ་བས་འདིར་ནི་ཅི་ཞིག་དགོས། །གང་ཕྱིར་ཡོད་ལས་འབྲས་བྱུང་བས། །ཡོད་པ་ཉིད་ནི་དེའི་བྱའོ། །དེ་མ་ཐག་པར་གང་ངེས་པ། །དེ་ཉིད་ལྟོས་པ་ཡིན་ཞེས་བརྗོད། །རྟག་ཏུ་འབྲས་བུ་འབྱུང་བ་དང༌། །ལྡན་པའི་རྒྱུ་ཡི་བྱ་བའོ། །དེ་ཡོད་པ་ན་འབྱུང་བ་ཙམ། །བྱ་བ་ཞེས་ཀྱང་ཀུན་ཏུ་བརྟགས། །དེ་དང་ལྡན་པས་རྒྱུ་ཉིད་དེ། །དེ་ཕྱིར་དེ་ལྡན་དེ་ཉིད་མཆོག །གང་ཕྱིར་ས་བོན་མྱུ་གུ་སོགས། །ཡོད་ན་ཡོད་པར་མཐོང་ཉིད་ཀྱི། །བྱ་བ་དངོས་པོ་ཡོད་པ་ལས། །ཅུང་ཟད་ཀྱང་ནི་མཐོང་མ་ཡིན། །ནུས་པ་མ་མཐོང་བཞིན་དུ་ཡང༌། །རྒྱུ་ཉིད་དུ་ནི་རྟོག་བྱེད་ན། །འདི་དང་བྱེ་བྲག་ཅི་ཡོད་ན། །གཞན་ཡང་ཅི་ཕྱིར་རྒྱུར་མི་འདོད། །ཇི་ལྟར་གཞན་ནི་མེད་ན་ཡང༌། །བྱ་བ་འབྲས་བུ་རྒྱུར་འདོད་བཞིན། །གཞན་ཡང་ཅི་ཕྱིར་རྒྱུ་མ་ཡིན། །ཡང་ན་དངོས་བཅས་མཐོང་བར་ནི། །འདོད་ནའང་འདི་ནི་ཁོ་བོ་ཅག །མཐོང་བར་འདོད་ཡིན་རྒྱུ་མེད་ན། །དེ་ལ་དངོས་པོ་ཡོད་པ་ཡང༌། །ཅི་ཡི་ཕྱིར་ན་ཁས་ལེན་བྱེད། །ཇི་ལྟར་སྐྱེ་བ་ཅན་བློ་ཉིད། །ཚད་མ་ཉིད་དུ་ངེས་སྨྲ་བ། །དེ་བཞིན་དངོས་པོ་ཐམས་ཅད་ལ།
དེ་རྒྱུ་ཉིད་དུ་ཅིས་མི་འདོད། །ཇི་ལྟར་བློ་ནི་སྐད་ཅིག་ལ། །དེ་བཞིན་སྐྱེ་བ་ཅན་གཞན་ཡང༌། །བསྒྲུབས་པ་དེ་ཕྱིར་འགྲོ་བ་འདི། །དེ་བཞིན་ཁོ་ན་བྱ་བྲལ་བའོ། །རྒྱུན་གྱིས་འཇུག་པའི་དྲི་ལ་སོགས། །ཕན་ཚུན་རྒྱུར་འདོད་ཁོ་ན་སྟེ། །དེ་རྒྱུ་ཉིད་དུ་ཐལ་འགྱུར་ཏེ། །འདི་ལ་གནོད་པ་ཅན་མིན་ནོ། །གང་ཡང་རུང་བའི་རྒྱུ་རྣམས་ཀྱི། །གཞན་གྱི་དེ་མ་ཐག་འབྱུང་བའང༌། །དེ་བཞིན་ངེས་པ་ལ་འདོད་པས། །བརྟན་པར་འདོད་ལ་སྐྱོན་འདི་ཡང༌། །གང་ཞིག་གང་ལ་བྱ་བ་དང༌། །བཅས་ཏེ་དེ་ཡི་རྒྱུར་འདོད་ནའང༌། །གང་ལ་ཡང་དག་ངེས་གང་ཡིན། །དེ་རྒྱུ་ཡིན་པར་འདོད་པ་ནི། །མངོན་སུམ་དང་ནི་མི་དམིགས་པས། །ཡོད་ན་ཡོད་པར་གྲུབ་འདི་དག །གལ་ཏེ་རྣམ་བཅས་རྣམ་ཤེས་ཀྱིས། །དངོས་རྣམས་རིག་པར་ཁྱོད་འདོད་དམ། །འོན་ཏེ་རྣམ་མེད་པས་དངོས་རྣམས། །རྣམ་པར་རིག་པར་ཁྱེད་འདོད་པ། །སྐད་ཅིག་གིས་འཇིག་ཕྱོགས་ལའང་དེ། །མཚུངས་པར་ཉེ་བར་མཚོན་པར་བྱ། །སྔ་མའི་རང་གི་རྒྱུ་རྣམས་དང༌། །གཟུགས་སོགས་རིག་པའི་རང་བཞིན་གྱི། །རྣམ་པར་ཤེས་པ་ཐམས་ཅད་ཉིད། །དུས་མཉམ་ཉིད་དུ་སྐྱེ་བ་ཡིན། །གལ་ཏེ་རྣམ་ཤེས་རྣམ་པ་དང༌། །བཅས་ན་སེམས་ནི་སྣ་ཚོགས་འགྱུར། །རྣམ་པས་མཚན་མ་ཉིད་མིན་ནའང༌། །ཉེ་བ་ན་གནས་རྒྱུ་མེད་པའོ། །ཞེ་ན་དེའི་ལན་འདིར་ཅུང་ཟད། །ཁྱེད་ཀྱིས་ཀྱང་ནི་སྨྲ་བར་གྱིས། །འདི་ལ་ཁྱེད་ཅག་ལན་གང་ཡིན། །དེ་ནི་ཁོ་བོ་ཅག་གིར་འགྱུར། །གལ་ཏེ་རྒྱུ་ནི་འབྲས་བུ་དག །སྐྱེད་པར་མི་འདོད་དེ་ལྟ་ན། །བྱས་འཇིག་འགྱུར་ན་འདི་མིན་ཏེ། །རྒྱུན་གྱིས་རྒྱུ་ཉིད་འགྱུར་བ་ཡིན། །གལ་ཏེ་རྒྱུ་ནི་མེད་པར་ཡང༌། །ལ་ལར་འབྲས་བུ་འབྱུང་འགྱུར་ན། །མ་བྱས་པ་ཐོབ་པར་འགྱུར་ན། །དེ་མིན་ནུས་པ་དེས་ཕྱིར་རོ། །སྐད་ཅིག་གིས་འཇིག་རྣམ་རྟོག་གིས། །བྱས་པ་འཇིག་ཚོགས་ཕས་རྒོལ་བ། །དེས་ནི་མི་འདོད་པ་ཉིད་དུ། །གྱུར་པ་ཅུང་ཟད་ཡོད་མ་ཡིན། །མི་འཇིགས་ཡོད་པར་ལྟ་བ་རྣམས། །རྒྱུན་ལ་གཅིག་པར་མངོན་སེམས་པས། །སྐད་ཅིག་གིས་ཕྱེའི་རྣམ་རྟོག་གིས། །ཇི་ལྟར་ཡང་ནི་འཇུག་མི་འགྱུར། །སྐད་ཅིག་རེ་རེ་རྣམ་འཇིག་པའི། །དེ་ཁོ་ན་ཉིད་རྣམ་རྟོག་ཤིང༌། །རྒྱུ་ཡི་ངེས་པར་རིག་ནས་ནི། །དགེ་བའི་ལས་ནི་རྩོམ་པར་འགྱུར། །འབྲས་བུ་
འབྲས་བུ་ཅན་ཉིད་དག །ངེས་པའི་ཁྱད་པར་ཅན་ཉིད་ཀྱི། །སེམས་གང་ཡིན་པའི་དྲན་པ་སོགས། །ཀུན་ལའང་གནོད་པ་མེད་པ་ཡིན། །དེ་ལ་རྒྱུ་འབྲས་འགྱུར་བ་ཡི། །མ་རིག་ལ་སོགས་པས་བཅིངས་འདོད། །དེ་དང་བྲལ་ཞིང་དྲི་མེད་པའི། །བློ་ཉིད་ཐར་པ་ཡིན་པར་འདོད། །ཐམས་ཅད་སྐད་ཅིག་པ་ཉིད་ཀྱི། །བཅིངས་དང་གྲོལ་བ་རབ་གྲགས་པ། །གཞི་གཅིག་པ་ཉིད་ཡིན་པར་ནི། །འཇིག་རྟེན་པ་ལའང་གྲུབ་པ་མིན། །བདག་ལ་བྱེ་བྲག་ཐམས་ཅད་དུ། །མེད་ཕྱིར་བྱེད་པོ་ཟབ་པ་པོ། །བཅིངས་སོགས་འདི་འདྲ་ལ་གནོད་ཀྱི། །གཞན་དུ་མི་རྟག་པ་ཉིད་དོ། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་ལས་དང་འབྲས་བུའི་འབྲེལ་པ་བརྟག་པ་སྟེ་བཅུ་བཞི་པའོ།། །།རྫས་ལ་སོགས་པའི་དོན་དྲུག་ནི། །དམ་པའི་དོན་དུ་ཡོད་པའི་ཕྱིར། །རིག་སོགས་དངོས་མེད་ཉིད་དུ་ནི། །སྔར་བསྟན་རིགས་པ་མ་ཡིན་ཞེས། །རྐང་མིག་པ་དང་གཟེགས་ཟན་པ། །ལུང་ཙམ་པ་ནི་སྨྲ་བྱེད་པའི། །རྫས་ལ་སོགས་པ་དགག་པ་འདི། །མདོར་བསྡུས་པ་ནི་བརྗོད་པར་བྱ། །ས་ལ་སོགས་པས་ཕྱེ་བ་ཡི། །རྫས་དགུ་ཐ་དད་པར་འདོད་པའི། །ས་ལ་སོགས་པ་གྲངས་བཞི་ནི། །རྟག་དང་མི་རྟག་གིས་རྣམ་གཉིས། །རེ་ཞིག་ས་སོགས་བདག་ཉིད་ཀྱིས། །གང་འདོད་པ་ཡི་རྡུལ་ཕྲན་རྣམས། །དེ་རྣམས་རྟག་པའོ་དེ་ལ་སོགས། །རྩོལ་བ་གང་ཡིན་དེ་འཇིག་འདོད། །དེ་ལ་རྡུལ་ཕྲན་རྣམས་རྟག་པ། །ཡིན་པར་རིག་པ་མ་ཡིན་ཏེ། །དངོས་པོ་མ་ལུས་པ་ཡི་ཡུལ། །སྐད་ཅིག་གིས་འཇིག་བསྒྲུབ་ཕྱིར་རོ། །རྟག་ཏུ་གོང་བུ་མ་ལུས་པ། །ཅིག་ཅར་སྐྱེ་བ་ཁོ་ནར་འགྱུར། །དེ་རྣམས་ཕྲད་པ་ལ་སོགས་པ། །ལྟོས་མིན་བྱེ་བྲག་མེད་ཕྱིར་རོ། །རྡུལ་ཕྲན་སྐྱེད་པ་པོར་འདོད་པ། །ཡོད་པ་ཆོས་སུ་རྟོགས་མིན་ཏེ། །དོན་ཡོད་ལ་དམིགས་ཚད་མ་ཡི། །ཡུལ་འགྱུར་མ་ཡིན་ཞེ་ན་ནི། །གང་གིས་ཐགས་མཁན་སོགས་མཐོང་བས། །རྡུལ་ཕྲན་རྒྱུ་ནི་མི་འགྲུབ་མིན། །གང་ཕྱིར་སྣམ་བུ་སོགས་ཐམས་ཅད། །རྡུལ་ཕྲན་བདག་ཉིད་ཁོ་ནའོ། །ཡོད་འཛིན་ཚད་མ་མེད་ཙམ་གྱིས། །མེད་པ་གྲུབ་པ་མ་ཡིན་ཏེ། །གང་ཕྱིར་ཚད་མ་ལོག་པ་ནི། །དོན་མེད་ཡིན་པའི་ངེས་ལ་མེད། །དེ་རྣམས་
རྩོམ་པའི་ཆ་ཤས་ཅན། །ཡོན་ཏན་ཆ་ཤས་ཐམས་ཅད་ལྡན། །མཐོང་བ་མིན་བ་ཉིད་ཀྱིས་ན། །དེས་ན་ཚད་མ་ཅན་གྲུབ་མིན། །ཤེལ་གོང་ཉེ་བར་བསྒྱུར་བ་ཡི། །བསྒྱུར་བ་སྣང་བ་མ་ཡིན་ནམ། །ཆུ་སྐྱར་སོགས་བའང་དེ་གཟུགས་སུ། །འཛིན་པ་ཉིད་དུའང་མཐོང་མིན་ནམ། །རལ་གའི་ནང་གི་སྐྱེས་བུ་ལ། །དེ་ཡི་གཟུགས་སོགས་མི་ཤེས་ཀྱང༌། །སྐྱེས་བུར་ཤེས་པ་མཐོང་བ་དང༌། །གོས་དམར་བློ་ཡང་ཡོད་མ་ཡིན། །གཟུགས་སོགས་ཨུཏྤལ་ལ་སོགས་ལས། །གཅིག་ཏུ་ཐ་དད་པ་ཡིན་ཏེ། །དེས་ན་དེ་ནི་ནག་བའི་ལས། །རྟ་བཞིན་རྣམ་པར་གཅོད་ཕྱིར་རོ། །ས་ལ་སོགས་དང་གཟུགས་དྲི་སོགས། །ཤིན་ཏུ་ཐ་དད་འགྱུར་པ་སྟེ། །གཅིག་དང་སྔ་མའི་ཚིག་དབྱེ་བས། །ཟླ་བ་སྐར་མའི་ཐ་དད་བཞིན། །བྱེད་པ་ནུས་སོགས་ཐ་དད་པར། །སྣལ་མ་སྣམ་བུ་ཐ་དད་བཞིན། །འགལ་བའི་ཆོས་དག་སྦྱོར་བས་ན། །ཀ་བ་བུམ་པའི་དངོས་བཞིན་ནོ། །གོང་བུའི་དོན་ཡོད་མ་ཡིན་ན། །ཤིང་སོགས་མཐོང་བ་ཉིད་མི་འགྱུར། །དེ་ཡི་ངོ་བོ་ལས་གཞན་པ། །གཞན་གྱི་བདག་ཉིད་མཐོང་མིན་ཏེ། །གཞན་གྱི་རྣམ་པ་རིག་པའི་བློ། །མི་རིགས་ཤིན་ཏུ་ཐལ་འགྱུར་ཕྱིར། །དེ་བཞིན་དཀར་པོ་ལ་སོགས་པར། །རིག་པ་ཡིས་ཀྱང་སྲིད་པར་འགྱུར། །དེ་ཕྱིར་དུང་ལ་སེར་སོགས་ཀྱི། །བློ་བཞིན་བློ་འདི་འཁྲུལ་པ་ཡིན། །རལ་ག་ནང་ཆུད་སྐྱེས་པ་ཡི། །ཤེས་པ་དེ་རྗེས་དཔག་པ་སྟེ། །དེ་ཡི་གཏན་ཚིགས་སུ་གྱུར་ལ། །རལ་ག་ཉིད་ནི་མཐོང་ཕྱིར་རོ། །སྐ་དང་གུར་ཀུམ་སོགས་རྣམ་པས། །གོས་ཀྱི་གཟུགས་ནི་གཞན་ཐོབ་ཅིང༌། །གོས་རྣམས་སྐད་ཅིག་པ་ཉིད་པས། །སྔ་མའི་གཟུགས་ནི་ཞིག་པ་ཡིན། །སླར་ཡང་ཆུ་སོགས་ལྟོས་བཅས་ལས། །གཟུགས་དེ་ཉིད་ལས་དཀར་པོ་ཡི། །གཟུགས་གཞན་དུ་ཡང་འབྱུང་བར་འགྱུར། །ལྕགས་སོགས་སྔོན་པོ་སོགས་བཞིན་དུ། །གནས་སྐབས་དེ་ཉིད་ཀྱི་གཟུགས་ལ། །རང་དངོས་རྗེས་སུ་འཇུག་ཕྱིར་རོ། །དྲུག་པའི་ཚིག་ལ་སོགས་དབྱེ་བ། །འདོད་པ་ཙམ་གྱིས་འབྱུང་བ་སྟེ། །དེ་ཕྱིར་དངོས་རྣམས་དེ་ཉིད་ཀྱི། །ངོ་བོར་རྣམ་གནས་རེག་མ་ཡིན། །འདི་ལྟར་དྲུག་པོ་ལས་གཞན་པའི། །ཡོད་ཉིད་ཐ་དད་
ཉིད་མི་འདོད། །དེ་རྣམས་སྡེ་ཚན་གཅིག་ཉིད་དོ། གཞན་ཡང་ཁས་བླངས་པ་མིན་ནོ། །ཡོད་པ་ཤེས་པའི་ཚད་མ་ཡིན། །ཡུལ་དུ་དེ་ཉིད་འདོད་པས་ན། །དྲུག་པོའི་ཡོད་ཉིད་ཡིན་ཞེ་ན། །ཁྱེད་ལ་དྲུག་ལས་གཞན་ཐལ་འགྱུར། །དེ་དྲུག་ཆོས་ཅན་དུ་བརྗོད་དེ། །ཆོས་ནི་དེ་དག་ལས་གཞན་པར། །འདོད་པ་ཉིད་ཡིན་ཞེ་ན་ཡང༌། །དེ་དང་དེ་ཡི་འབྲེལ་འདོད་གང༌། །རྫས་སོགས་ངེས་ཕྱིར་ཕྲད་པ་ཡང༌། །མི་རིགས་གཞན་ཡང་འདུ་བ་ཡང༌། །འབྲེལ་པ་གཞན་ནི་ཁྱོད་འདོད་མིན། །འབྲེལ་པ་མི་འཐད་དེ་རྣམས་ཀྱི། །ཆོས་སུ་ཇི་ལྟར་འགྱུར་བ་ཡིན། །དེ་ལས་བྱུང་ཙམ་གྱིས་ཤེ་ན། །གཞན་ཡང་དེ་དང་འདྲ་གྱུར་ལ། །དེ་ཡང་ཡོད་པ་ཉིད་ཡིན་ན། །ཐ་དད་པ་ཅན་གྱིས་དབྱེ་བ། །ཐོབ་འགྱུར་དེ་ལའང་གཞན་ཡིན་པས། །མཐའ་མེད་པར་ནི་ཐལ་བར་འགྱུར། །ཆོས་གཞན་ལ་ནི་འཇུག་པ་ཡིས། །དེར་ནི་ཆོས་ཅན་ཉིད་ཐོབ་ན། །དེ་ཉིད་ཀྱི་ཕྱིར་རྫས་སོགས་ཉིད། །ཆོས་ཅན་ཉིད་དུ་འདོད་མི་འགྱུར། །གལ་ཏེ་སྔ་རོལ་སྣལ་མ་ལས། །སྣམ་བུ་ཐ་དད་སྒྲུབ་བྱེད་ན། །སྒྲུབ་པར་བྱེད་པ་དོན་མེད་ཉིད། །དེ་བཞིན་བཟློག་པར་དཀའ་བ་ཡིན། །སྣལ་མ་དེ་རྣམས་གནས་སྐབས་ཀྱི། །བྱེ་བྲག་གཞན་ནི་ཐོབ་པ་ན། །ཁྱད་པར་ཅན་དོན་བྱེད་ནུས་པ། །སྔ་མ་ལས་གཞན་མཚན་ཉིད་ཀྱི། །བྱ་བ་གཅིག་ཉིད་ལ་མཁོ་ལ། །སོ་སོར་ཤེས་པ་པོ་བསྟན་ན། །མངས་དང་ནུས་མེད་འབྲས་མེད་པའི། །སྐྱོན་རྣམས་བསལ་བར་འདོད་པ་ཡི། །ཐ་སྙད་འདོགས་པ་པོ་རྣམས་ཀྱིས། །གང་དག་མ་ལུས་པ་རྣམས་ལ། །ཐ་སྙད་ཉུང་བའི་བསམ་པ་ཡི། །ཚིག་གཅིག་གིས་ནི་བརྗོད་པ་ཡིན། །བྱེད་པོ་ནུས་པ་ཐ་དད་ལ། །ཡོངས་སུ་གྱུར་སོགས་ཆོས་ལྡན་ཕྱིར། །དེ་རྣམས་དུས་གཅིག་ཉིད་དུ་ནི། །སྣམ་བུ་ཉིད་དུ་འགྲུབ་པ་མིན། །རྡུལ་ཕྲན་རྣམས་ནི་ཕན་ཚུན་དུ། །བསྟངས་པས་སྐྱེ་བ་ཉིད་ཡིན་ན། །དེ་རྣམས་དབང་པོའི་སྤྱོད་ཡུལ་ཉིད། །མིན་པས་དབང་པོ་ལས་འདས་མིན། །རྡུལ་ཕྲན་སྔོ་སོགས་རྣམ་པའི་དངོས། །ངོ་བོ་ཉིད་ཡིན་བརྟགས་པ་མིན། །སྔོན་པོ་སོགས་སུ་སྣང་བ་ཡང༌། །མིག་སོགས་ཤེས་པས་རིག་པ་ཡིན། །གལ་ཏེ་འང་དེ་རྣམས་ཤར་ཉིད་དང༌། །
གཞན་ཉིད་དུ་འབྱེད་མཚན་ཉིད་མིན། །དེ་ལྟའང་སྦྱར་བའི་བཏུང་བ་བཞིན། །གནས་ལ་མངོན་སུམ་གྱིས་གནོད་མིན། །དངོས་པོ་འདི་རྣམས་ཐམས་ཅད་ཉིད། །ཀུན་ལས་ལོག་པའི་རང་བཞིན་དུ། །མཐོང་བ་ཡིན་ཡང་རང་བཞིན་དུ། །རྣམ་པ་ཐམས་ཅད་ངེས་པ་མིན། །བརྟགས་མིན་དབང་རྟེན་རྟོགས་བྱ་བ་ཡང༌། །ཆ་ཤས་དོན་མེད་རང་མཚན་ཉིད། །གང་ལས་ཐ་དད་ངེས་པ་ལ། །རྒྱུ་ཡོད་ན་ནི་དེ་འབྱུང་འགྱུར། །ཇི་ལྟར་མར་མེ་འབར་བའི་རྒྱུན། །འདྲ་བར་འབྱུང་ལ་གཅིག་པར་འཁྲུལ། །དེ་བཞིན་ཕྲ་བ་དུ་མ་རྣམས། །རྒྱུན་མི་འཆད་རྣམས་བློས་གཅིག་རྟོགས། །དབྱེ་བ་མི་རྟོགས་དེ་རྣམས་ལ། །མངོན་སུམ་དུ་འདོད་མིན་ཞེ་ན། །མར་མེ་སོགས་དེ་ཇི་ལྟར་མཐོང༌། །དེ་བཞིན་ཆ་ཤས་ཅན་ཅིས་འདོད། །འདི་རྣམས་རྡུལ་དུ་མ་ངེས་ན། །སྔོན་པོ་ལ་སོགས་རྣམ་པའོ་ཞེས། །དེ་ལྟ་བུར་ཡང་རྟོགས་བྱ་བར། །འདི་ནི་ཇི་ལྟར་འགྱུར་བ་ཡིན། །གང་ཕྱིར་དེ་ལའང་རྒྱུ་མེད་དེ། །ཤེས་པ་དེ་ནི་ཡུལ་མེད་མིན། །གོང་བུ་ཡུལ་གཅིག་མ་ཡིན་ཏེ། །གཅིག་དང་གོང་བུ་ཉིད་འགལ་ཕྱིར། །གོང་བུ་གཅིག་དངོས་ཉིད་ཡིན་ན། །སྦྲང་མའི་རྐང་པ་གཡོགས་ཙམ་གྱིས། །དེ་དག་ཐམས་ཅད་གཡོགས་པར་ནི། །འགྱུར་ཏེ་དབྱེ་བ་མེད་ཕྱིར་རོ། །ཆ་གཅིག་ཏུ་ནི་དམར་བ་ཡང༌། །ཐམས་ཅད་ལ་འགྱུར་དམར་པོ་བཞིན། །འགལ་བའི་ཆོས་དག་སྦྱོར་བ་ཡང༌། །སྣ་ཚོགས་ཉིད་དུ་ཐལ་བར་འགྱུར། །གཅིག་གི་དངོས་ཉིད་མ་ཡིན་ན། །ཐམས་ཅད་སྒྲ་འདིར་ཅི་ཞིག་བྱ། །དེ་ཡང་དུ་མའི་ཡུལ་ཡིན་ན། །ཡན་ལག་ཅན་ནི་དུ་མ་ཡིན། །གོས་དང་ལུས་དང་རི་སོགས་གང། །འཇིག་རྟེན་ལ་གྲུབ་མ་ཡིན་ནམ། །དེ་ཉིད་ཡན་ལག་ཅན་ཉིད་དུ། །ཁྱེད་ཅག་གིས་ནི་སྨྲས་པ་ཡིན། །གོས་དམར་ཀུན་དུ་ཐམས་ཅད་དང༌། །ལྷག་མེད་དེ་བཞིན་མ་ལུས་པ། །དེ་ལ་ཐམས་ཅད་རབ་སྦྱོར་བ། །འདོད་པ་ཙམ་གྱིས་འབྱུང་བ་ཡིན། །དེ་འདྲ་མངོན་པར་འདོད་པ་ནི། །ཁོ་བོ་ཅག་ཀྱང་སྨྲ་བ་སྟེ། །གོས་ཀུན་དམར་བོར་འགྱུར་སོགས་པར། །སྨྲ་ལ་བར་དུ་གཅོད་པ་མེད། །བརྟགས་ནས་དེ་བརྗོད་ཡིན་ཞེ་ན། །ཚིག་གཞན་དུ་ནི་ཐལ་འགྱུར་ཞིང༌། །གཙོ་བོ་ཕལ་པར་འདོད་དག་གི །ཐ་དད་བློ་ཡང་ཡོད་མ་ཡིན། །སྦྱོར་བ་ཀུན་ལ་ཁྱབ་བྱེད་པ། །འཇུག་པ་ཉིད་
ནི་མ་ཡིན་ཕྱིར། །ཐམས་ཅད་དམར་པོར་ཐལ་བ་མིན། །ཐམས་ཅད་གཡོགས་པར་འདོད་པའང་མིན། །རྫས་ནི་ཆ་ཤས་མེད་མིན་ནམ། །ཅི་ཕྱིར་མ་ཁྱབ་པར་རྣམ་གནས། །རང་དངོས་དེ་ལྟར་གནས་ན་ནི། །དེ་ཉིད་ཀྱི་ཕྱིར་ཐ་དད་གྲུབ། །ཡུལ་མང་ལ་གནས་པ་དེས་ན། །གནས་གཅིག་བྱེད་པ་ཉིད་མ་ཡིན། །དེ་ཕྱིར་སྣམ་བུ་ལ་སོགས་པ། །དུ་མའི་ངོ་བོ་ཉིད་དུ་གྲུབ། །དེ་ཉིད་དོན་ནི་མི་ཤེས་པའི། །འཇིག་རྟེན་གོང་བུ་གཅིག་སྙམ་སེམས། །རྣམ་རྟོག་དེ་ལ་ལྟོས་ནས་ནི། །ཕྲ་རབ་རྡུལ་ཞེས་འདིར་བརྗོད་པའམ། །རྒྱུ་མཚན་རྣམ་རྟོག་མིན་པར་ཡང༌། །བརྡ་ཡི་རྗེས་འགྲོ་ལྡན་པ་ཡི། །དབུལ་ལའང་ཕྱུག་པོ་ཞེས་བརྗོད་ཡིན། །འདི་ནི་དེ་འདྲའི་མིང་དུ་གནས། །སྣལ་མ་དང་ནི་ལག་པ་སོགས། །ཆ་ཤས་ཅན་གཅིག་རྗེས་འཇུག་མིན། །དཔེར་ན་དུ་མ་ཉིད་གྲུབ་པའི། །རེ་ལྡེ་སྣམ་བུ་རྩིག་སོགས་བཞིན། །གལ་ཏེའང་མངོན་པར་འདོད་པའི་རྫས། །གཅིག་ཕྱིར་ཡན་ལག་དུ་མ་ལ། །རྟེན་མིན་རྡུལ་བཞིན་འཇུག་པར་ནི། །མི་རིགས་གནོད་ཅན་ཚད་མའོ། །གཅིག་འཇུག་གནས་དེའང་ཆ་ཤས་ཀྱི། །རྟེན་གཞན་ལ་ནི་འཇུག་པ་ནི། །དངོས་དེ་ཉིད་ཀྱིས་སམ་གཞན་གྱིས། །རྣམ་པ་གཞན་ཡོད་མིན་པས་སོ། །དེ་ལ་འདི་ནི་དེ་ཉིད་ཀྱིས།། གཞན་ལ་འཇུག་པར་བརྟག་མིན་ཏེ། །དེ་དབང་བྱས་པ་ཉིད་ཀྱིས་ནི། །གཞན་དུ་དེར་འཇུག་ཡོད་མ་ཡིན། །དཔེར་ན་ཁུ་འཇོ་བའི་མ་མ། །གཞན་གྱི་དབང་བྱའི་རྟེན་འགྱུར་མིན། །དེ་བཞིན་གཅིག་གིས་དབང་བྱས་པའི། །རྫས་ནི་གཞན་གྱི་རྟེན་བྱེད་མིན། །གང་ཕྱིར་དེ་འབྲེལ་རང་བཞིན་ནོ། །དེ་མིན་ཡུལ་ལའང་འཇུག་པས་ན། །དེ་ནི་ཡུལ་གཅིག་ཉིད་ཐོབ་བམ། །གཅིག་བདག་ཉིད་འགྱུར་དབྱེར་མེད་ཕྱིར། །གཞན་ཉིད་བདག་ཉིད་ཀྱིས་འཇུག་ན། །རང་བཞིན་ཐ་དད་པ་ཡི་དངོས། །ཐ་དད་བདག་ཉིད་ཉིད་ཡིན་པས། །གཅིག་ནི་དུ་མར་གནས་འགྲུབ་མིན། །དེ་དེ་རྣམས་ལ་འདུ་བ་ཡི། །བདག་ཉིད་ཀྱིས་འཇུག་ཡིན་ཞེ་ན། །སྐྱོ་བ་ཉིད་ཀྱིས་འདི་འགྲོ་བ། །དེ་ཡང་རྣམ་པར་དཔྱད་བྱ་ཡིན། །གཞན་ཡང་བདག་ཉིད་ཐམས་ཅད་ཀྱིས། །འཇུག་ན་དུ་མ་ཉིད་ཐོབ་འགྱུར། །ཕྱོགས་གཅིག་གིས་ན་ཐ་མེད་འགྱུར། །དེ་གཅིག་མིན་པའམ་གང་དུ་མིན།།
རང་རྒྱུད་པའང་ཐལ་འགྱུར་བའི། །བསྒྲུབ་པས་གང་ཞིག་འཇུག་པ་ན། །དེ་ནི་རང་ཉིད་ཀྱིས་མཐོང་བ། །ཡིན་ན་འབྲེལ་པར་འགྱུར་བ་ཡིན། །མ་ལུས་པས་སམ་ཕྱོགས་གཅིག་གིས། །འཇུག་པ་གང་དུའང་མ་ཤེས་ཉིད། །གང་གི་ཡོད་པ་མིན་ཕྱིར་རྫས། །མེད་པའང་གཞན་དུ་འགྱུར་བའོ། །དེ་ནི་ལ་ལར་མཐོང་བ་ན། །རྫས་ལ་སོགས་པ་གསལ་བ་བཞིན། །དེ་བཞིན་དེར་ནི་མ་མཐོང་ན། །ཐ་དད་པར་རྒོལ་མི་རིགས་སོ། །དེ་དག་ཙམ་གྱིས་འཇུག་པ་ཉིད། །མེད་པར་བརྗོད་འགྱུར་ཞེ་ནའང་དེ། །མི་རིགས་འདི་ན་འདི་ཞེས་པའི། །བློ་ཡིས་མངོན་སུམ་གྱིས་གྲུབ་པའི། །དེ་ནི་མངོན་སུམ་འདོད་མིན་ན། །གནོད་པ་ཅན་འགའ་བརྗོད་པའི་རིགས། །གཞན་དུ་གཟུགས་སོགས་ཤེས་པ་ཡང༌། །མངོན་སུམ་མིན་པ་ཉིད་དུ་འགྱུར། །འདི་ལ་འཇུག་པ་དེ་མེད་པར། །དབྱེར་མེད་ཚུལ་གྱིས་སྔར་བསྟན་ཟིན། །འདི་ལ་ཞེས་པའི་ཤེས་པ་མེད། །དེ་ཡི་ངོ་བོ་མི་སྣང་ཕྱིར། །མ་ལུས་པ་དང་ཕྱོགས་གཅིག་པའི། །སྒྲ་དང་དོན་འདི་བཤད་མཛད་པའི། །ཆ་ཤས་མེད་འདིའི་འཇུག་པ་ཅི། །དེ་ནི་དེ་ལས་གཞན་དུའམ། །ཇི་ལྟར་སྣོད་ལ་སོགས་བཞག་པའི། །དཔལ་འབྲས་ལ་སོགས་ཇི་བཞིན་པའམ། །སྟན་ནི་དུམ་ལ་འཇུག་པའི། །ནག་པ་སོགས་མཐོང་ལྟ་བུ་ཡིན། །བུམ་པ་མར་མེ་ལ་སོགས་བཞིན། །འཇིག་པ་ལ་སོགས་གཏན་ཚིགས་ཀྱིས། །སྒྲ་རྣམས་འགའ་ཞིག་ལ་བརྟེན་ཡིན། །དེ་ནི་ནམ་མཁར་འགྱུར་བ་ཡིན། །ཉི་སོགས་བྱ་བའི་རྫས་རྣམས་ལས། །ཐ་དད་པ་ཡི་རྒྱུ་མཚན་ནི། །གཞན་ན་གཞན་མིན་སོགས་ཤེས་པ། །ཇི་ལྟར་བུམ་སོགས་ཤེས་བཞིན་ནོ། །སྒྲ་དཀར་གཉེར་མ་ལུས་རྩུབ་སོགས། །གྱུར་ལ་སོགས་པའི་ཤེས་ཕྱིར་འདིར། །གང་ལས་མཚན་ཉིད་མི་འདྲ་རྒྱུ། །དེ་ནི་དུས་ཞེས་བྱ་བར་འདོད། །ཤར་དང་གཞན་སོགས་བློ་རྣམས་ལས། །ཕྱོགས་ཉིད་རྗེས་སུ་དཔོག་པ་ཡིན། །ཤེས་པ་རིམ་གྱིས་སྐྱེ་བ་ལས། །ཡིད་ཀྱང་རྗེས་སུ་དཔག་པར་འདོད། །གཟུགས་ལ་སོགས་པའི་ཤེས་པ་ནི། །རིམ་གྱིས་སྐྱེ་ཕྱིར་གཟུགས་སོགས་ལས། །གཞན་པའི་རྒྱུ་ལ་ལྟོས་པ་སྟེ། །དཔར་ན་ཤིང་རྟ་སོགས་བཞིན་ནོ། །ཟིན་སོགས་འབྱུང་བ་ཆེན་པོ་རྣམས། །
རྒྱུ་ཉིད་ཡིན་པར་ཁས་ལེན་ན། །སྒྲ་རྣམས་དེ་རྣམས་ལ་བརྟེན་པར། །འགྲུབ་ཕྱིར་སྔ་མ་སྒྲུབ་བྱེད་མིན། །ཁ་ཅིག་རྟག་པར་ཁྱབ་བྱད་པ། །འདུ་བ་ཉིད་དུ་འགྲུབ་མིན་ཏེ། །འདི་རྣམས་རྗེས་འགྲོ་མ་ཚང་ཕྱིར། །དེ་བཞིན་རིམ་མིན་སོགས་ཐོབ་འགྱུར། །གཞན་དང་གཞན་མིན་སོགས་ཤེས་པའི། །རྒྱུ་ནི་བརྡ་ཡི་བྱེ་བྲག་ལས། །བྱུང་བའི་ཡིད་ལ་བྱེད་པ་དག །ཡིན་ཕྱིར་དུས་དང་ཕྱོགས་དེ་དག །ཆ་ཤས་མེད་གཅིག་དངོས་ཡིན་ཕྱིར། །གཞན་དང་གཞན་སོགས་སྲིད་པ་མིན། །དེ་སྔར་སྨྲས་གཏན་ཚིགས་སུ། །འདོད་པ་རྣམ་པར་།མིག་ལ་སོགས་པ་ལ་གཞན་པ། །དྲུག་པོ་དེ་མ་ཐག་འབྱུང་བའི། །ཤེས་པ་གང་ཡིན་དེ་ཡིད་དུ། །ཁོ་བོ་ཅག་ཀྱང་འདོད་པ་ཡིན། །ཡིན་ཉིད་རྟག་ན་ཤེས་པ་རྣམས། །ཅིག་ཅར་བ་ཉིད་ཐོབ་པར་འགྱུར། །དེས་འདིར་སྔར་སྨྲས་གཏན་ཚིགས་སུ། །འདོད་པ་རྣམ་པར་ཉམས་བྱས་འགྱུར། །སངས་རྒྱས་པ་དང་ཕྱི་རོལ་པས། །བརྟན་པའི་ཡིད་འགྲུབ་མི་འགྲུབ་པ། །གཞན་གྱིས་མདོར་སྨྲ་ཨཱ་བཅས་དང༌། །གཞན་དུ་ཡང་ནི་བཟླས་ནས་སོ། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་རྫས་ཀྱི་ཚིག་གི་དོན་བརྟག་པ་སྟེ་བཅོ་ལྔ་པའོ།། །། རྫས་རྣམས་བཀག་པ་དེ་ལས་ནི། །དེ་བཞིན་རྟེན་པར་འདོད་པ་ཡི། །ཡོན་ཏན་ལ་སོགས་ཀུན་ལ་ཉིད། །མེད་པར་འགྱུར་བ་ཁོ་ནའོ། །འབྲེལ་པ་ཅན་རྣམས་བཀག་པ་ན། །འདུ་བའང་གང་ལ་གང་ཞིག་ཡིན། །དེ་ལྟ་ན་ཡང་བྱེ་བྲག་ཏུ། །དགག་པ་འདི་ནི་བརྗོད་པར་བྱ། །སྔོན་པོ་ལ་སོགས་རགས་པའི་རྫས། །གལ་ཏེ་གཅིག་པ་ཉིད་འདོད་ན། །བུ་གའི་སྣང་བས་དེ་གསལ་བཞིན། །གསལ་བ་ཅི་ཕྱིར་སྣང་བ་མིན། །ཡངས་པའི་ཕྱོགས་ན་གནས་པ་ཡི། །སྔོན་པོ་ལ་སོགས་མཐོང་བ་ཡང༌། །གསལ་འགྱུར་མིན་པ་དེ་ཡི་ཚེ། །དེ་ལས་དེ་དེ་ཐ་དད་འགྱུར། །དེ་མིན་གཞན་ལ་བློ་ལོག་ཅིང༌། །གླང་པོ་སོགས་ལས་ཐ་དད་པའི། །གྲངས་ནི་སྣང་བར་ཁྱེད་འདོད་དེ། །ཤེས་ལས་སྣང་བ་ཡོད་ཉིད་མིན། །འདོད་པས་རབ་ཏུ་སྦྱར་བ་ཡི། །བརྡ་ནི་ཡིད་བྱེད་རྗེས་འགྲོ་བ། །བུམ་སོགས་གཅིག་སོགས་རྣམ་ཤེས་འདི། །ཤེས་པ་སོགས་བཞིན་
འཇུག་པ་སྟེ། །དེ་རྣམས་རྫས་ཉིད་མིན་པའི་ཕྱིར། །རྣམ་འབྱེད་རྫས་ནི་གང་ཞིག་ཡིད། །མ་འཁྲུལ་པ་ཡི་དེ་ཉིད་ཀྱིས། །ཤེས་དེ་བརྗོད་པར་རིགས་མིན་ཉིད། །དེ་ནི་རྫས་དང་འབྲེལ་པ་ལས། །གཅིག་ཉིད་ཡིན་དང་དོན་གཅིག་ལ། །འདུ་ཕྱིར་ཡོན་ཏན་ལ་སོགས་ལ། །རྣམ་ཤེས་གཅིག་ཏུ་འདོད་ཅེ་ན། །དེ་ལྟར་གཅིག་པའི་ཤེས་པ་ཉིད། །ཡིན་ཡང་གཉིས་སོགས་བློ་གང་ཡིན། །ཚིག་གི་དོན་དྲུག་སོགས་གང་ལ། །དེ་རྣམས་ལ་ལྟོས་རྒྱུ་གང་ཡིན། །དོན་གཅིག་ལ་ནི་འདུ་སོགས་ཀྱི། །ཤེས་པ་འདི་ནི་མེད་པར་འགྱུར། །དེས་ན་འདི་ནི་འཁྲུལ་འགྱུར་ཏེ། །མི་ལ་མེ་ཡི་བློ་བཞིན་ནོ། །གླང་པོ་ལ་སོགས་ཤེས་དེ་ལས། །གཞན་པ་ལས་བྱུང་དམག་གི་བློ། །མཚན་ཉིད་མི་འདྲ་ལས་སྒྲུབ་པ། །སྣམ་བུ་སྔོ་སོགས་བློ་བཞིན་ནོ། །འདོད་པས་སྦྱར་བའི་བརྡ་དང་ནི། །ཡིད་ལ་བྱེད་སོགས་ཐབས་ཡིན་ན། །བློ་དེ་འདོད་ཡིན་དེ་ཉིད་ཀྱིས། །བློ་ལ་སོགས་པའང་གྲངས་སུ་འགྱུར། །གལ་ཏེ་བློ་ལ་ལྟོས་པ་ལས། །གྲངས་འགྲུབ་པར་ནི་སྨྲ་བ་ཡང༌། །བརྡ་ལ་འཇུག་པ་ཙམ་གྱིས་ནི། །བློ་དེ་ཅི་ཡི་ཕྱིར་མི་འདོད། །ཆེ་དང་རིང་སོགས་དབྱེ་བ་ཡིས། །བོང་ཚོད་གང་ཞིག་རྗོད་བྱེད་པའི། །དོན་དེའང་དེ་བཞིན་མིན་དངོས་ཀྱི། །དབྱེ་བ་ཉིད་ལས་ཅིས་མི་འདོད། །ཁང་བཟངས་ཕྲེང་ནི་རིང་པོ་དང༌། །ཆེན་པོར་ཇི་ལྟར་སྣང་བ་ཡིན། །དེ་ལ་འདི་འདྲའི་བོང་ཚོད་ཀྱི། །ངོ་བོར་རྟོག་པ་མ་ཡིན་ནོ། །དོན་གཅིག་ལ་ནི་འདུ་བ་ཡིས། །དེ་ལྟར་བསྟན་པ་ཡིན་ཞེ་ན། །གང་ཕྱིར་ཕན་ཚུན་ཐ་དད་པ། །སོ་སོ་བར་བརྗོད་དེའི་ཡན་ལག །དང་བྲལ་གཞན་ལས་གཞན་དེ་བཞིན། །གང་དང་ཕྲད་དང་དབྱེ་བ་ཡང༌། །གཞན་ལ་རྫས་སུ་ངེས་བ་དག །ཕྲད་སོགས་བློ་དག་གི་ནི་རྒྱུད། །བརྟག་པ་དེ་དག་དོན་མེད་ཉིད། །ཕྲད་པ་ཡོད་པ་མ་ཡིན་ན། །ས་བོན་ཆུ་དང་ཞིང་ལ་སོགས། །རྟག་ཏུ་འབྲས་བུ་འབྱིན་པར་ནི། །ཐལ་འགྱུར་བྱེ་བྲག་མེད་ཕྱིར་རོ། །ཞིང་དང་ས་བོན་ཆུ་སོགས་རྣམས། །ལྟོས་དང་བཅས་པར་ཤེས་བྱས་ཏེ། །རང་འབྲས་རྟག་ཏུ་མི་འབྱིན་ཕྱིར། །འབྱིན་པ་འཁོར་ལོའི་ཆུ་བཞིན་ནོ། །དེ་རྣམས་གང་ལ་ལྟོས་གྱུར་པའི། །དངོས་པོ་ཕྲད་པ་ཡིན་པར་འགྱུར། །དེ་ནི་བྱེ་བྲག་དངོས་གྱུར་ཕྱིར།།
ཐ་དད་ཉིད་ཅེས་ཤེས་བྱ་སྟེ། །ཕྲད་པར་འདོད་པ་གང་དག་དང༌། །ཕྲད་ལ་ལོངས་སྤྱོད་པ་ཞེས་བརྗོད། །དེ་ལས་གཞན་པ་ཡོངས་སྤངས་ནས། །དེ་ཉིད་ལོངས་སྤྱོད་པ་འདིའོ། །དངོས་འདི་བར་ཆད་མེད་པའམ། །འདི་ནི་བར་ཆད་དང་བཅས་ཞེས། །འདི་འདྲའི་བློ་ཡི་དབྱེ་བ་དག །འདི་དག་མེད་གང་ལས་འདིར་རིག །གང་འདིར་བར་ཆད་བཅས་བློ་ལ། །བར་ཆད་མེད་པའི་བློ་ངེས་དང༌། །བར་ཆད་མེད་ལའང་གང་གཞན་པ། །འདི་གཉིས་ལོག་པའི་ཤེས་པ་སྟེ། །ལོག་པའི་ཤེས་པ་ཐམས་ཅད་ཉིད། །དོན་གྱི་གཙོ་བོའི་རྗེས་འཇུག་ལ། །གཙོ་བོར་འདིར་ནི་བརྗོད་བྱ་བ། །བརྗོད་པས་དེ་དག་ཀྱང་འགྲུབ་འགྱུར། །གདུབ་འཁོར་ཅན་ཞེས་བློ་འདི་ཡང༌། །རྒྱུ་གང་གིས་སྐྱེ་མི་ལ་ནི། །གདུབ་འཁོར་ཡོད་པའི་ཕྱིར་ཞེ་ན། །དེ་ནི་རྟག་ཏུ་ཐལ་བར་འགྱུར། །གཞན་དུ་མཐོང་བ་ཡོད་པ་ལ། །གཞན་དུ་དགག་པ་ཉིད་རིགས་ཀྱི། །ཕྲད་པ་གང་དུའང་མ་མཐོང་བ། །དེ་གོ་ཇི་ལྟར་དགག་ཏུ་རུང༌། །ནག་པ་གདུབ་འཁོར་མེད་དེ་བཞིན། །དེ་ཕྱིར་དངོས་རྣམས་ཡོད་ཉིད་ཡིན། །དགག་དང་སྒྲུབ་སོགས་གང་ཡིན་པའི། །རྣམ་པར་དབྱེ་བའི་གནས་ཡིན་ཞེས། །སྨྲ་ལ་སྐད་ཅིག་པ་ཉིད་ཀྱིས། །ཆུ་སོགས་བྱེ་བྲག་མེད་པ་སྟེ། །བར་ཆད་མེད་པ་སོགས་ཡོད་ཀྱང༌། །གནས་སྐབས་གཞན་ལ་ལྟོས་བཅས་ཡིན། །གལ་ཏེ་རྒྱུ་ལ་སོགས་དེ་རྣམས། །ཕྲད་པ་ཙམ་ལ་ལྟོས་བཅས་ན། །ཕྲད་པ་ཐག་ཉིད་འབྲས་འབྱུང་འགྱུར། །དེ་མིན་མཐར་ཡང་འབྱུང་མི་འགྱུར། །བར་ཆད་མེད་པར་འབྱུང་བ་ལས། །གནས་སྐབས་བྱེ་བྲག་ཐོབ་པ་ལའང༌། གང་དག་འདི་ལོངས་སྤྱོད་མཐོང་བའང༌། །དངོས་དེ་དག་ཀྱང་དེ་བཞིན་འགྲུབ། །བར་དུ་ཆོད་ཀྱང་གཞན་ཉིད་པར། །སྐྱེ་བའི་རྒྱུ་ལས་བར་ཆད་དང༌། །བཅས་དང་བར་ཆད་མེད་ཤེས་པ། །ལོག་པའི་ཤེས་པ་ཐམས་ཅད་ཀྱང༌། །ཆོས་མཐུན་ལ་ལྟོས་མིན་པར་ཡང༌། །འཁྲུལ་རྒྱུ་ནང་ལ་ཡོད་འགའ་ཞིག །གཞན་དུ་འགྱུར་བའི་སེམས་ལ་ནི། །ཟླ་བ་གཉིས་སོགས་བློ་བཞིན་ནོ། །བར་ཆད་མེད་སོགས་ལས་བྱུང་བ། །གཙོ་བོ་འདིར་ནི་ཡོད་ན་ཡང༌། །གནས་སྐབས་བྱེ་བྲག་ལས་སྐྱེས་པ། །གདུབ་འཁོར་ཅན་ཞེས་བ་བློ་འདི། །ནག་པ་དང་ནི་གདུབ་འཁོར་བཞིན། །ཕྲད་པ་དང་
ནི་འདྲ་བ་ཡི། །གནས་སྐབས་ཁྱད་པར་ཅན་ལས་སོ། །དེ་འདྲར་མཐོང་བཞིན་གཞན་དུ་མིན། །ཕྲད་པ་ཉིད་དུ་མཐོང་མིན་ལས། །ནག་པ་གདུབ་འཁོར་མེད་སོགས་པའི། །ཕ་རོལ་པོ་ཡི་འདོད་པ་ལས། །ཕྲད་པའི་དངོས་པོའི་བློ་སྐྱེ་མིན། །ཕྲད་པའི་བློ་ནི་གང་ཡིན་ལས། །ཁང་བཟངས་སོགས་ལ་ཕྲད་བློ་འབྱུང༌། །ཡང་ན་དངོས་པོ་དུ་མ་ཉིད། །ཡོད་ལ་སྣལ་མ་མང་པོ་ལ། །སོགས་པའི་ཡུལ་ཅན་བློ་བཞིན་དུ། །ཐ་དད་པར་ནི་སྐྱེ་བར་འགྱུར། །བྱ་བ་ཡང་ནི་ཅི་རིགས་པར། །ཚད་མ་གཉིས་ཀྱི་བརྗོད་བྱ་སྟེ། །གཅིག་ནི་དུ་མ་ལ་འཇུག་པའང༌། །མི་རིགས་གནོད་པ་ཅན་ཡིན་ནོ། །ཕ་རོལ་ཕ་རོལ་མིན་བརྗོད་སོགས། །རྟོག་པའི་རྒྱུ་མཚན་གང་ཡིན་པ། །ཕ་རོལ་ཉིད་དང་ཕ་རོལ་མིན། །ཉིད་ཡིན་ཕྱོགས་དུས་དེ་རྒྱུ་མིན། །དཔེར་ན་སྔོན་པོ་སོགས་དངོས་རྣམས། །རིམ་གྱིས་འབྱུང་དང་གནས་པ་ལས། །གཞན་མའི་རྒྱུ་མཚན་གྱིས་དབེན་པའང༌། །ད་ལྟར་བསྟན་ཅིང་གཞན་དེ་བཞིན། །གྲངས་དང་ཕྲད་པ་ལ་སོགས་ཀུན། །རྫས་ལས་ཐ་དད་མིན་པ་མིན། །དེ་ནི་རྣམ་དཔྱོད་བྱེད་ཉིད་ཀྱིས། །དབྱིག་པ་སོགས་བཞིན་འདོད་ཅེ་ན། །དེ་རྣམས་ཀུན་རྫོབ་ཏུ་ཡོད་པར། །སྨྲ་བས་འདོད་པ་སྒྲུབ་བྱེད་ཡིན། །གང་ཕྱིར་ཀུན་རྫོབ་ཏུ་ཡོད་པར། །དེ་ཉིད་གཞན་ཉིད་ཀྱིས་བརྗོད་མིན། །འོན་ཏེ་བརྗོད་བྱ་ཉིད་མིན་པའི། །ཚོགས་ལ་སོགས་པ་འགོག་བྱེད་པ། །གང་ཕྱིར་ངེས་པའི་ཆོས་ཉིད་དེ། །གཟུགས་སྒྲ་དྲི་རོ་སོགས་བཞིན་དུ། །དེ་ནི་དེ་ཁོ་ན་ཉིད་དུ། །དངོས་མེད་ནམ་མཁའི་པདྨ་བཞིན། །ཆོས་ངེས་པ་ཉིད་མི་འགྲུབ་སྟེ། །དེ་རྣམས་རྟོག་པས་སྒྲོ་བཏགས་པའོ། །གང་ཕྱིར་ནམ་མཁའི་པད་སོགས་ཀྱིས། །དེ་སྐད་སྨྲས་ཉིད་མ་ངེས་པའོ། །ཐ་དད་མིན་དང་ཐ་དད་པའང༌། །དངོས་པོ་ཉིད་ལ་རྣམ་པར་གནས། །གྲངས་སོགས་རྫས་ལས་ཐ་དད་པ། །དེ་ལྟར་བསྒྲུབ་བྱ་ཡིན་ཞེ་ན། །གཞི་ཉིད་མ་གྲུབ་པ་ཡི་ཕྱིར། །གྲངས་སོགས་རྣམས་ནི་མི་འགྲུབ་པོ། །བསྡུས་པ་སོགས་ལས་ཐ་དད་པའི། །རྫས་ཉིད་དེ་ལྟར་བརྗོད་བྱ་བ། །རང་དངོས་ཉིད་ལས་ཐ་དད་པ། །རྣམ་པར་ཉམས་པར་སྒྲུབ་པར་འགྱུར། །བྱས་པའི་ཤུགས་ནི་རྣམ་གསུམ་དུ། །བསྟན་ཏེ་ཤུགས་སུ་བརྗོད་པ་དང༌།
གོམས་པ་བརྗོད་དང་གནས་འཇིག་པ། །འདི་དག་མ་ལུས་མི་འཐད་དེ། །དངོས་རྣམས་སྐད་ཅིག་པ་ཡིན་ཕྱིར། །བྱས་པ་གང་ཡང་ཡོད་མིན་ན། །བྱས་པའི་ཤུགས་ཀྱི་བཀའ་ཅན་ལ། །གང་གི་རྒྱུ་ནི་རྒྱུར་འགྱུར་ཡིན། །གོམས་པ་བརྗོད་པར་བྱས་པའི་ཤུགས། །སེམས་ཀྱི་བག་ཆགས་བདག་ཉིད་རིགས། །བདག་གི་ཡོན་ཏན་ཉིད་དེ་ནི། །མི་རིགས་དེ་ནི་གསལ་ཕྱིར་རོ། །གནས་སུ་འཇོག་བྱེད་དངོས་ཉིད་དུ། །མི་རིགས་སྐད་ཅིག་གིས་འཇིག་ཕྱིར། །གནས་དོན་འབྱུང་བ་ཉིད་གྱུར་ལས། །དེ་ཡི་ངོ་བོ་ཉིད་དུ་གནས། །རང་གི་རྒྱུ་ཉིད་ལས་བྱུང་བ། །སྐད་ཅིག་གཅིག་ནི་གནས་པ་རྣམས། །སྔ་མ་སྔ་མའི་ནུས་མཐུ་ལས། །རྒྱུན་གྱིས་རྗེས་སུ་འཇུག་པ་ཡིན། །དེ་ནི་གཞན་དུ་འབྱུང་མིན་པ། །དེ་ཕྱིར་འདི་ཡི་འཇོག་བྱེད་གང༌། །འདི་ཡི་མཐོང་བའི་རྒྱུ་ཉིད་མིན། །གཞན་ཡང་བྱས་པའི་ཤུགས་སུ་འགྱུར། །གོས་སོགས་སྐྱེ་བ་འདི་ཉིད་ལ། །འཇོག་བྱེད་ཡོན་ཏན་དུ་འདོད་ན། །དེ་བཞིན་བྱས་ཤུགས་ཡོན་ཏན་ཡང༌། །ཐམས་ཅད་དུ་ཡང་ཡོད་མི་འགྱུར། །ཡིད་དང་བདག་ཏུ་སྦྱོར་བ་དག །གོང་དུ་རྒྱས་པར་བཀག་པའི་ཕྱིར། །མ་མཐོང་བ་ལ་ཕ་རོལ་པོས། །སྨྲས་པ་མཚན་ཉིད་ལྡན་མི་རིགས། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་ཡོན་ཏན་གྱི་ཚིག་གི་དོན་བརྟག་པ་སྟེ་བཅུ་དྲུག་པའོ།། །།དངོས་རྣམས་སྐད་ཅིག་གཅིག་གི་ལ། །རྡེག་པ་ལ་སོགས་ལས་ཡོད་མིན། །སྐྱེ་བའི་ཡུལ་དུ་ཞེན་པ་ཉིད། །དེ་ལས་གཞན་ཐོབ་ཡོད་མ་ཡིན། །སྐྱེ་བའི་ལས་ནི་གཞན་པའི་དུས། །ལས་ཀྱི་དུས་ཤེས་ཕ་རོལ་སྨྲ། །ཤིན་ཏུ་མྱུར་བར་ཞིག་འདོད་པ། །མར་མེ་ལ་སོགས་དངོས་ལ་ཡང༌། །རྒྱབ་མ་མདུན་པའི་ཡུལ་དག་ལས། །ཕྲལ་དང་ཕྲད་པའི་འབྱུང་དག་ལ། །འགྲོ་བ་ཅན་ནམ་གཞན་ཀུན་ཡང༌། །ལས་ཀྱི་གཞིར་ནི་རབ་བརྟགས་ལས། །གར་སྐྱེས་ནམ་དུའང་སྐད་ཅིག་ཀྱང༌། །གནས་མིན་གཡོ་བའི་བདག་ཉིད་དོ། །དེ་ནི་རྡུལ་ཕྲན་ཙམ་གྱིས་ཀྱང༌། །ཡུལ་དུ་འཕོ་བ་ཡོད་མ་ཡིན། །རྟག་པའི་དངོས་པོ་ཐམས་ཅད་ནི། །འགྲོ་ལ་སོགས་བར་ཤིན་ཏུ་ཡང༌། །བསྒྲུབ་དཀའ་གནས་སྐབས་ཐམས་ཅད་དུ། །འདི་ལ་བྱེ་བྲག་མེད་ཉིད་དོ། །གལ་ཏེ་
འགྲོ་བོ་སོགས་དངོས་དེའི། །དངོས་ཡིན་རྟག་ཏུ་འགྲོ་སོགས་འགྱུར། །སྐད་ཅིག་གཅིག་ཀྱང་མི་གཡོ་བར། །གཅིག་ཏུ་གནས་པ་མ་ཡིན་ནོ། །གང་དུ་འགྲོ་སོགས་མེད་པ་ཡང༌། །འདིས་ནི་རྟག་ཏུ་ཐོབ་འགྱུར་ན། །སྔ་མའི་ངོ་བོ་མི་འདོར་ཕྱིར། །འགྲོ་སོགས་རྩོམ་པའི་དུས་བཞིན་ནོ། །འོན་ཏེ་འགྲོ་མིན་སོགས་དངོས་པོའི། །དངོས་ཡིན་རྟག་ཏུ་འགྲོ་མི་འགྱུར། །སྐད་ཅིག་གཅིག་ཀྱང་འགུལ་བར་ནི། །འགྱུར་བ་ཉིད་ནི་མ་ཡིན་ནོ། །གང་ཕྱིར་འགྲོ་སོགས་ཡིན་ན་ཡང༌། །མི་གཡོའི་བདག་ཉིད་ཕྱིར་ཡིན་ཏེ། །སྔ་མའི་ངོ་བོ་མི་འདོར་ཕྱིར། །གཡོ་མིན་ངོ་བོའི་དུས་བཞིན་ནོ། །གལ་ཏེ་འགྲོ་མིན་དུས་གཅིག་ཚེ་འང༌། །གཞན་དུ་ཡང་ནི་འགྱུར་ཡིན་ན། །ཕན་ཚུན་འགལ་བའི་བདག་ཉིད་དང༌། །འདྲེས་བས་ཐ་དད་ཉིད་དུ་འགྱུར། །དེ་དག་ཤིན་ཏུ་ཐ་དད་པའི། །བདག་ཉིད་དུ་ནི་ངེས་པ་སྟེ། །འགལ་བའི་ཆོས་དག་འདྲེ་བའི་ཕྱིར། །གཡོ་དང་མི་གཡོའི་དངོས་བཞིན་ནོ། །མཐོང་བ་ཉིད་དུ་མངོན་འདོད་པའི། །ལས་ནི་དངོས་པོ་ལས་གཞན་མིན། །འདི་ནི་མཐོང་བ་ཉིད་ཀྱང་མིན། །རིགས་པའི་རྗེས་འབྲངས་ཡོད་མ་ཡིན། །མི་བརྟན་ཉིད་དང་བརྟན་ཉིད་དང༌། །དེ་ལྟའི་འགྲོ་སོགས་རྣམས་ཡོད་མིན། །ཐོབ་དང་གཞན་པའི་ཡུལ་དག་ལས། །བྱེད་དང་ཕྲད་པའི་རིགས་མ་ཡིན། །རྒྱུན་མི་འཆད་པར་སྐྱེ་བ་ཡིན། །འདྲ་བ་དང་གཞན་དངོས་རྣམས་ཀྱི། །ཡུལ་གཞན་ཉེ་བར་ཐོབ་པ་ལ། །འགྲོ་བར་འཁྲུལ་ཡིན་སྒྲོན་མ་ཡིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་ལས་ཀྱི་ཚིག་གི་དོན་བརྟག་པ་སྟེ་བཅུ་བདུན་པའོ།། །།རྫས་ལ་སོགས་པ་བཀག་པ་ནི། །རིགས་རྣམས་ཀྱང་ནི་གསལ་བ་ཡིན། །དེ་དག་ཐམས་ཅད་ཚིག་གི་དོན། །གསུམ་ལ་གནས་པར་ཀུན་དུ་བརྟགས། །དེ་ལ་རིགས་འདི་རྣམ་གཉིས་སུ། །ཕ་རོལ་པོས་ནི་ཁས་བླངས་པ། །མ་ལུས་པ་ལ་རྗེས་འཇུག་པས། །ཡོད་པར་བརྗོད་པ་སྤྱི་ཉིད་དང༌། །བྱེ་བྲག་ཡོད་པར་མངོན་བརྗོད་པའི། །རྫས་ལ་སོགས་པའི་སྤྱི་ཉིད་དེ། །རང་གནས་རྣམས་སུ་རྗེས་འཇུག་པའི། །སེམས་ཀྱི་རྒྱུར་གྱུར་དངོས་ལས་སོ། །རིགས་མི་མཐུན་པ་ཐམས་ཅད་དང༌། །རང་གི་གནས་ཀྱི་བྱེ་བྲག་
ལས། །ལོག་པའི་བློ་ཡི་རྒྱུ་ཉིད་དེ། །དེ་རྣམས་དེ་ལྟར་གནས་པ་ཉིད། །བྱེ་བྲག་ཉིད་ནི་ཁ་ཅིག་གི །ལོག་པ་ཉིད་ཀྱི་རྒྱུ་རྣམས་ཏེ། །རྟག་པའི་རྫས་སུ་གང་གནས་རྣམས། །བྱེ་བྲག་ཅེས་ནི་བརྗོད་པ་ཡིན། །གང་གི་སྟོབས་ཀྱིས་རྡུལ་ཕྲན་ལས། །སོགས་ལས་རྣལ་འབྱོར་པའི་བློ་འབྱུང༌། །འདི་ནི་དེ་དང་མཚན་ཉིད་ནི། །མི་འདྲ་བར་ནི་སོ་སོར་གནས། །ཡོད་ཉིད་བ་ལང་ཉིད་སོགས་རིགས། །མངོན་སུམ་གྱིས་ཀྱང་རབ་གྲུབ་སྟེ། །དབང་པོའི་བྱ་བ་ཡོད་པ་ལ། །ཡོད་སོགས་ཤེས་པ་འབྱུང་ཕྱིར་རོ། །རྗེས་སུ་དཔག་པའི་སྟོབས་ཀྱིས་ཀྱང༌། །འདི་དག་ཡོད་པར་ཤེས་བྱ་སྟེ། །ཤེས་པའི་བྱེ་བྲག་གང་ཞིག་གིས། །རྒྱུ་མཚན་གཞན་ལས་བྱུང་བའོ། །བ་ལང་གླང་པོ་སོགས་རྣམས་ལ། །གླང་སོགས་སྒྲ་དང་ཤེས་བྱེ་བྲག །བརྡ་དང་དབྱིབས་དང་རིལ་པོ་སོགས། །ཐ་དད་དོན་གྱི་རྒྱུ་མཚན་ནོ། །བ་ལང་ལ་སོགས་ཡུལ་ཉིད་ལའང༌། །དེ་ཡི་སྒྲ་བློ་ཡོད་པ་ལས། །གཞན་ཕྱིར་དཔེར་ན་དེ་ཉིད་ལའང༌། །ལྕགས་ཀྱུ་བེའུ་བཅས་བློ་སྒྲ་བཞིན། །རི་བོང་རྭ་སོགས་རྣམ་ཤེས་ཀྱིས། །བྱེ་བྲག་ལ་ནི་རྣམ་འཕྲུལ་ཕྱིར། །དེ་ཡི་ངོ་བོ་བརྗོད་རྣམས་ཀྱང༌། །ཆོས་མི་མཐུན་པར་ལྟ་བར་བྱེད། །པ་ལང་སོགས་རྗེས་འཇུག་ཤེས་པའང༌། །རིལ་པོ་ལས་གཞན་པར་སྐྱེ་སྟེ། །བྱེ་བྲག་ལྡན་ཕྱིར་སྔོན་པོ་ལས། །སོགས་པའི་ཤེས་པ་ལྟ་བུའོ། །བ་ལང་ཉིད་ནི་བ་ལང་ལས། །དོན་གཞན་ཐ་དད་བློ་ཡུལ་ཕྱིར། །དེ་བཞིན་གཟུགས་དང་རེག་སོགས་བཞིན། །བརྗོད་པ་ནག་པའི་རྟ་བཞིན་ནོ། །དེ་ཀུན་སྙིང་པོ་མེད་པ་སྟེ། །གཞུང་ལུགས་ཙམ་དུ་སྨྲ་བ་རྣམས། །འདི་ལས་ཤེས་བྱེད་ཚད་མ་ནི། །ཅུང་ཟད་ཙམ་ཡང་མ་མཐོང་ངོ༌། །དབང་པོའི་བྱ་བ་ཡོད་པ་ཡི། །རྗེས་བྱུང་ཡོད་སོགས་ཤེས་པ་ནི། །འགྲུབ་པ་མིན་ཏེ་དེ་རྣམས་ནི། །བརྡལ་འཇུག་པ་ཉིད་ཕྱིར་རོ། །དཔེར་ན་སྣ་ཚོགས་པ་ཡི་ནད། །བསལ་ན་སྐྱུ་རུ་ར་ཤིང་སོགས། །རེ་རེ་འམ་ནི་སྦྱར་བའང་རུང༌། །ནུས་པ་སྣ་ཚོགས་ཉིད་དུའང་རིགས། །དེ་རྣམས་ལ་ནི་སྤྱི་ཞེས་པའི། །ནུས་ལྡན་ཅུང་ཟད་ཡོད་མ་ཡིན། །ཡུན་རིང་མྱུར་བའི་དབྱེ་བ་ཡིས། །ནད་རྣམས་ཞི་བར་ཐར་ཕྱིར་རོ། །ཞིང་སོགས་དབྱེ་བས་འགའ་ཞིག་ལའང༌།།
གཅིག་གི་ངོ་བོ་ལ་རྟག་པའི། །ཁྱད་བར་ཅན་སྤྱི་ཡོད་སྤྱི་ཡི། །སྐྱུ་རུ་རའི་ཤིང་སོགས་དེ་ཡོད། །དེ་ལྟར་ཤིན་ཏུ་ཐ་དད་ཀྱང༌། །ཁ་ཅིག་ནུས་པ་ངེས་པ་ཡིས། །མཚུངས་པར་བསྲེ་བ་ལ་སོགས་པའི། །རྒྱུ་ཉིད་ཐོབ་ཀྱི་གཞན་དུ་མིན། །བྱ་བ་ཙམ་ལ་མཁོ་བ་ཡི། །བརྗོད་པར་འདོད་པའི་སྒྲ་དེ་ཡང༌། །བརྡ་རུ་བྱས་པ་དེ་ལའམ། །ཡང་ན་ཅི་འདོད་གཞན་ཡང་ངོ༌། །དག་ལ་དང་བཞོ་སོགས་ངོ་བོ་ཡི། །བྱ་བའི་དབྱེ་བ་ལ་མཁོ་བ། །བ་ལང་སོགས་སྒྲའི་བརྡ་རུ་ནི། །ཐ་སྙད་འདོགས་པ་བོ་རྣམས་བྱེད། །དེ་བརྡ་ཡིན་པར་བྱེད་པ་ལ། །ཡོད་པ་ལ་སོགས་པ་འདི་ནི། །སྐྱེ་བར་ཡང་ནི་ཤེས་བྱ་ཡི། །དབང་པོའི་བྱ་བའི་རྗེས་ཐོགས་མིན། །རྟོག་མེད་རྣམ་པའི་ཤེས་པ་ཉིད། །དང་པོ་ཉིད་དུ་སྐྱེ་འགྱུར་ཞིང༌། །དེ་ནས་བརྡ་རྣམས་ཡིད་བྱེད་ལ། །དེ་ལས་དེ་དྲན་དེ་རྣམས་ལས། །གཞན་དུ་སོན་བའི་སེམས་ལ་ནི། །དང་པོའི་གཏན་ཚིགས་ཀྱང་འབྲས་མེད། །ཕྱོགས་དེ་ཕྱི་རོལ་ལ་མིན་ཏེ། །བསྒྲུབ་བྱས་སྟོང་པར་སྟོན་པ་ཡིན། །དངོས་སུ་དེ་ཡི་རྒྱུ་མིན་ཏེ། །ཕྱི་ཡི་ལྕགས་ཀྱུ་བེའུ་སོགས་བཞིན། །རང་གི་མཚན་ཉིད་འདི་ལ་ནི། །བརྗོད་དང་རྣམ་རྟོག་འཇུག་ཡོད་མིན། །གང་གིས་རང་གི་མཚན་ཉིད་ནི། །ངག་ཀུན་སྤྱོད་ཡུལ་ལས་འདས་དངོས། །ནང་ཙམ་ལ་ནི་བརྟེན་ནས་འདི། །ཀུན་རྫོབ་ཉིད་དུ་དམིགས་བྱེད་དེ། །ལྕགས་ཀྱུ་ལ་སོགས་ཕྱི་དངོས་པོར། །ངེས་པས་འཇུག་པར་འགྱུར་བ་ཡིན། །ལས་དང་ཡོན་ཏན་ཐ་སྙད་དག །མེད་པ་རྒྱུར་ནི་གང་སྨྲས་པ། །མེད་པའི་ཤེས་པས་བྱེ་བྲག་ནི། །དེ་ཡང་མི་རིགས་ནུས་བ་ཡིས། །རྒྱུ་ཉིད་ལས་ནི་དངོས་པོ་ཉིད། །གཞན་ཡང་ཡོད་སོགས་བྱེ་བྲག་དག །མེད་ལས་མེད་པའི་ཤེས་པ་ཐོབ། །རིལ་ལས་ཐ་དད་བློ་ཡིན་པས། །ཤེས་པ་དེ་དག་རྣམས་དང་ནི། །མཚན་ཉིད་མི་འདྲ་བ་མི་འགྲུབ། །དེས་ནི་གཏན་ཚིགས་མི་འགྲུབ་འགྱུར། །གང་ཕྱིར་རྗེས་འཇུག་ལྡན་ཤེས་པས། །སྒྲ་དང་གསལ་བར་སྣང་བཅས་ལ། །མདོག་དབྱིབས་ཡི་གེའི་རྣམ་པ་ཡིས། །སྟོང་པ་རིགས་ཡིན་ཞེས་སྨྲས་བྱེད། །སྤྱི་ཡང་སྔོན་པོ་ལ་སོགས་པའི། །དངོས་ཉིད་ཡིན་ན་ཡོན་ཏན་
དང། །འདི་ལ་དབྱེ་བ་ཅི་ཞིག་ཡོད། །སྔོན་པོ་སོགས་ལ་གཅིག་ཉིད་ནི། །རྗེས་འཇུག་པར་ཡང་སྣང་བ་ཡིན། །སྣང་བཞིན་ཡིན་ཡང་འདི་ཡི་ནི། །དབྱེ་བ་ཤེས་འགྱུར་མིན་ཞེ་ན། །དེ་ཡི་སྟོབས་ཀྱིས་དེ་དག་ནི། །སྒྲ་བློ་ཇི་བཞིན་གསལ་འཇུག་འགྱུར། །སྤྱི་ཡི་ཤེས་པ་ཕ་རོལ་པོ། །ངེས་པའི་བདག་ཉིད་ངེས་འདོད་པ། །ངེས་པ་མེད་པར་མི་རིགས་ཏེ། །མི་འཛིན་པ་ཉིད་ཐོབ་པར་འགྱུར། །རྒྱུ་མཚན་གཞན་ཉིད་ལས་འགྲུབ་ཀྱང༌། །རྗེས་འཇུག་གཅིག་པུ་མི་བརྟེན་ལས། །ཐ་དད་སྤྱི་ནི་མི་འགྲུབ་སྟེ། །རིམ་གྱིས་འབྱུང་བ་ཉིད་ཕྱིར་རོ། །ཚིག་གི་དོན་སྒྲ་དྲུག་པོ་ཡིས། །བདག་ཉིད་རྒྱུ་གཞན་ལ་ལྟོས་པ། །གང་ཡང་ཡོད་པ་སོགས་རྗེས་འཇུག །ཡོད་པ་ཤེས་པའི་ཤེས་པའོ། །ཆོས་ཅན་རྒྱུ་མཚན་ཡིན་ཞེ་ན། །དེ་ལའང་ཡོད་པའི་བློ་ཡོད་པས། །ཆོས་གཞན་དེ་ཡི་རྒྱུ་ཉིད་དེ། །ཐུག་མེད་ཆོས་ཅན་ཉིད་ཀྱང་ཐོབ། །དེ་ཕྱིར་འདི་རྣམས་ཀྱིས་གཏན་ཚིགས། །འདི་ནི་འཁྲུལ་པར་མཐོང་བ་སྟེ། །ཉེ་བར་སྦྱོར་བ་ཐམས་ཅད་ལ། །ཁྱབ་པར་འདི་ནི་སྒྲུབ་པ་མིན། །དེ་ཡི་འོག་ཏུ་ཉེར་བསྟན་པ། །འདི་ཉིད་ཀྱིས་ནི་གསལ་བ་ཡིན། །ཐུན་མོང་དུ་སྒྲུབ་དེ་ལ་ནི། །འདོད་པ་འགྲུབ་པ་སོགས་པར་མཚུངས། །འཚེད་པ་པོ་ལ་སོགས་པ་ཡང༌། །རྗེས་འཇུག་ཅན་གཅིག་མིན་ན་ཡང༌། །ཤེས་པ་བྱེ་བྲག་ཅན་སྐྱེ་ཞིང༌། །མེད་ལ་མེད་པའི་བློ་ཡང་ངོ༌། །འདོད་པས་སྦྱར་བའི་ངོ་བོ་དང༌། །ཞིག་དང་མ་སྐྱེས་པ་རྣམས་ལ། །ཇི་སྐད་བསྟན་པ་དེ་ཀུན་གྱིས། །གཏན་ཚིགས་མ་ངེས་པ་ཉིད་དོ། །འཚེད་པ་པོ་སོགས་བློ་རྣམས་ཀྱིས། །རྒྱུ་མཚན་ཅུང་ཟད་ཡོད་མ་ཡིན། །ལས་ཡོད་ཅེ་ན་དེ་བཞིན་དུ། །གསལ་བ་སོ་སོས་ཕྱེ་མིན་ནམ། །ཕྱེ་ལ་རྗེས་འཇུག་ཅན་གྱི་བློ། །རྗེས་འཇུག་ཡོད་པར་རིགས་མ་ཡིན། །དེ་ཕྱིར་གཅིག་ཏུ་འདོད་པའི་ཕྱིར། །གསལ་བ་ཀུན་རྗེས་འཇུག་ལྡན་འགྱུར། །རྗེས་འཇུག་གིས་ཕོངས་ལས་ལ་ནི། །གལ་ཏེ་རྒྱུར་རྟོག་དེ་ལྟར་ན། །གསལ་བ་རྣམས་ནི་དེ་ཉིད་ལ། །ཅི་ཕྱིར་རྒྱུ་ཉིད་དུ་ནི་འདོད། །ལས་རྣམས་དང་ནི་བྲལ་བ་དེར། །འཚེད་པོ་སོགས་བློ་མེད་གྱུར་ཏེ། །རིགས་བཞི་ལས་ནི་དུས་ཀུན་དུ། །གནས་པར་ཕ་རོལ་པོ་འདོད་མིན། །འདས་དང་མ་འོངས་ལས་ནི་དེའི། །རྒྱུ་མཚན་ཅན་དུ་བྱས་ཤེ་
ན། །འཚེད་པ་པོ་སོགས་བློ་སྒྲ་ཡི། །རྒྱུ་དེ་མ་ཡིན་མེད་པས་སོ། །གལ་ཏེ་ལས་ཉིད་ཀྱི་རིགས་དང༌། །འབྲེལ་པའི་ལས་དང་སྦྱོར་བའི་བློ། །དེ་ནི་ཞིག་པའི་ལས་ལ་ཡང༌། །ངེས་པའི་རྒྱུ་ནི་མཚོན་ཕྱིར་རོ། །འདས་བའི་ལས་ནི་དེ་ཡི་ཚེ། །མཚོན་དུ་ཟིན་ཡང་ཡོད་པ་དང༌། །གཟུང་བྱ་མིན་ཏེ་རིགས་ཀྱི་ནི། །རང་རྟེན་ལྡོག་པ་ངེས་པས་སོ། །དབྱིག་པ་གདུབ་འཁོར་སོགས་རིགས་རྣམས། །ལན་ཅིག་དམིགས་ལ་དེ་དང་ནི། །བྲལ་ཡང་དབྱིག་པ་ལ་སོགས་བློ། །དེ་རྣམས་ལ་ནི་འཇུག་པ་མིན། །འོན་ཏེའང་འཚེད་པ་པོ་ལ་སོགས། །རིགས་གཞན་དུ་ནི་སྨྲ་བྱེད་ན། །སྐྱེས་མ་ཐག་ལའང་དེ་སྦྱོར་བས། །འཚེད་པ་པོ་སོགས་བློ་རུ་འགྱུར། །དེ་ཚེ་ཡོད་སོགས་བློ་བཞིན་དུ། །འདུ་བ་ཅན་རྣམས་མེད་ཅེ་ན། །ཕྱིས་ཀྱང་དེ་ལ་དེ་བཞིན་དུ། །འགྱུར་ཏེ་བྱེ་བྲག་མེད་ཕྱིར་རོ། །དེ་དང་འབྲེལ་བའི་རང་བཞིན་ནོ། །ཡོན་ཏན་ལྡན་མིན་དེ་དག་ལ། །འདུ་བ་འདི་ནི་དེ་ལྟར་ན། །ཕྱིས་དེའི་བདག་ཉིད་ཇི་ལྟར་འགྱུར། །གལ་ཏེ་གསལ་བ་མི་རྟག་པས། །ཁྱད་པར་ཅན་གྱུར་དེ་ལྟ་ནའང༌། །རིགས་ཀྱི་ཡོན་ཏན་མི་ལྡན་པའི། །ངོ་བོ་ནམ་ཡང་འདོད་མི་འགྱུར། །འཚེད་པ་ལ་སོགས་བྱ་བ་ལས། །གཙོ་བོ་སྒྲུབ་པར་འདོད་པ་ཡིས། །འཚེད་པ་པོ་སོགས་ཞེས་པ་དེའི། །གཙོ་བོའི་འཚེད་པོ་གཞན་ཡོད་མིན། །གཙོ་བོ་ཞེས་བྱ་འདི་ཅི་ཞིག །རྗེས་འཇུག་མིན་ཕྱིར་ནུས་པ་མིན། །རྫས་དང་ལས་དང་ཡོན་ཏན་སོགས། །བདག་ཉིད་ཉིད་དུ་དེ་རྟག་མིན། །དེ་དང་རིགས་མི་འདྲ་བ་ལས། །ལོག་པའི་ངོ་བོར་ངེས་པ་ཙམ། །བརྡ་ཡི་བྱེ་བྲག་ལ་ལྟོས་པ། །མེ་ལ་སོགས་པའི་བློ་ཡིན་ནོ། །བརྡ་ཉིད་ཇི་ལྟ་བ་ཉིད་དེ། །དེ་ཕྱིར་གཅིག་ཉིད་རྗེས་འཇུག་པ། །མེད་ཀྱང་སྒྲ་དང་བློ་ཉིད་ཀྱི། །དབྱེ་བ་ཡིས་ནི་འཇུག་པ་ཡིན། །དེ་ལྟ་ན་ཡང་མེད་རྣམས་ལ། །མེད་པའི་བློ་དང་སྒྲ་དག་ཀྱང༌། །རྗེས་འཇུག་འགལ་མིན་དེ་དག་གི །དོན་མེད་བརྡ་རྗེས་འཇུག་ཕྱིར་རོ། །བུམ་པ་སྔ་ན་མེད་འདིའོ་ཞེས། །དེ་ཕྱིར་དངོས་པོའི་བྱེ་བྲག་ཅན། །ཉིད་ཀྱི་མིག་བློར་ཤེས་བྱ་སྟེ། །བྱེ་བྲག་ལ་བརྟེན་སྤྱི་དབང་གིས། །དེ་ནི་ཀུན་དུ་རྗེས་འཇུག་ཉིད། །ཅེ་ན་དེ་ལྟ་མིན་མཚན་ཉིད། །མིན་འདྲ་དེ་མིན་ལ་བརྟེན་ཕྱིར། །བུམ་པ་ཞེས་
བྱ་ལ་སོགས་བློ། །དེ་རྣམས་རྗེས་འཇུག་པར་རིགས་ཀྱི། །མེད་པའོ་མེད་བའོ་སྙམ་བློ་འདི། །མཚན་ཉིད་མི་འདྲའི་ཕྱིར་ཡིན་ནོ། །ཡོད་པའི་དབང་གིས་བ་ལང་དང༌། །རྟ་ཡི་བློ་བྱར་འདོད་མིན་གྱི། །ཐམས་ཅད་སྤྱི་ནི་ཡིན་བསྒྲུབ་ཕྱིར། །གཅིག་ཉིད་གཞན་དུ་བརྟག་པའོ། །གང་རྣམས་དམག་སོགས་བློ་རྣམས་ཀྱི། །རྒྱུར་ནི་གྲགས་ལ་སོགས་འདོད་པའི། །རྗེས་མཐུན་པར་འདོད་མིན་ཞེ་ན། །གལ་ཏེ་དེ་ལྟར་ཡིན་ན་ནི། །འདོད་པས་སྦྱར་བའི་བརྡ་དབྱེ་བ། །ཡིད་ལ་བྱེད་པས་རྗེས་འཇུག་པའི། །བློ་དབྱེ་བ་ནི་ཅིས་མི་འདོད། །བྱེ་བྲག་ཤེས་ན་བརྡར་བྱེད་པའི། །འདོད་པ་དེ་ལས་བྱུང་བ་ཡིན། །དེ་བྱས་པ་ལས་དེ་ཐོས་པའང༌། །ཡིད་བྱེད་དེ་ལས་དེ་བློ་འདི། །རྗེས་སུ་འགྲོ་ལྡོག་དག་གིས་ནི། །དེ་ཉིད་ཀྱི་ནི་བློ་འདི་ཡི། །རྒྱུ་ཡི་ངེས་པའི་ངེས་པ་གྲུབ། །གཞན་འདོད་ཐུག་པ་མེད་པར་འགྱུར། །རྗེས་སུ་མཐུན་པ་དང་འདྲ་བར། །འགྱུར་ན་དོན་གཞན་དུ་རྟོག་ན། །མཚན་ཉིད་མི་འདྲ་ཅན་བློ་རྣམས། །འདི་ཉིད་ལ་བརྟེན་པ་ནི་མཆོག །འདི་ལ་ནུས་པ་ངེས་པར་ནི། །ལྡོག་པ་རྗེས་སུ་འགྲོ་ལྡོག་གི །ནུས་པ་ཤེས་པ་རྣམས་ལ་ནི། །རྟོག་ན་དེ་ཡང་མཆོག་ཡིན་ནོ། །སྤྱི་རྣམས་ལ་ཡང་རྗེས་འགྲོ་བར། །བྱེད་པ་དག་ནི་ཡོད་མིན་ཏེ། །རྟག་རྣམས་རྟག་ཏུ་ཡོད་བའི་ཕྱིར། །ལྡོག་པ་ཉིད་ནི་མི་སྲིད་དོ། །རྫས་སོགས་མིན་པའི་བློ་རྣམས་ནི། །ཡོན་ཏན་ཉིད་སོགས་རིགས་པ་མིན། །དུ་མ་རྣམས་ནི་འདུ་བ་ཡང༌། །གྲངས་ལ་སོགས་པའང་ཡོད་འགྱུར་ཏེ། །དེ་རྣམས་ལ་ཡང་སྤྱི་བཞིན་དུ། །སྤྱི་ཞེས་བྱ་བའི་བློ་རུ་འགྱུར། །བུམ་པ་ཉིད་སོགས་པའི་སྤྱི་ཡང༌། །བུམ་སོགས་ཉིད་ལ་འཇུག་གྱུར་གྱི། །མེད་རྣམས་ལ་འདི་འཇུག་མིན་ཕྱིར། །དེ་རྣམས་བློ་ནི་ཇི་ལྟ་བུར། །རྟེན་གཞན་ལ་བརྟེན་ཕྱིར་གཞན་དུ། །བློ་དང་སྒྲ་དང་རིགས་མིན་ཏེ། །གླང་པོ་སོགས་བཞིན་རྟ་སོགས་ལའོ། །འདིར་ནི་དོན་གཅིག་ལ་བརྟེན་མིན། །དྲོ་དང་གྲང་དང་ལྕི་བ་ཡང༌། །དོན་གཅིག་ལ་བརྟེན་བློར་འགྱུར་གྱི། །འདི་ལ་འདི་ཡང་དོན་མེད་ཉིད། །མེད་པ་གང་དུའང་གནས་པ་མིན། །བྱེ་བྲག་བྱེ་བྲག་ཅན་ཉིད་ཀྱི། །འབྲེལ་པ་འདི་ལ་ཡོད་ཅེ་ན། །འདི་ལ་འབྲེལ་པ་གཞན་ཡོད་པར། །རྟོག་པར་བྱེད་པ་མ་ཡིན་ནམ། །དེ་དག་སྦྱོར་བ་ལ་བརྟེན་ནས།།
བྱེ་བྲག་བྱེ་བྲག་ཅན་རྟོག་ན། །དེ་མེད་རྒྱུ་མཚན་མེད་པ་ཉིད། །དེ་ནི་གྲུབ་པ་མ་ཡིན་ནོ། །བུམ་པའི་སྔ་ན་མེད་པ་ཞེས། །བྱ་བ་ལ་སོགས་ཚིག་འདི་ཡང༌། །རྟོག་པ་ཅན་གྱིས་སྤྲུལ་པ་སྟེ། །བརྟགས་པའི་དཔའ་བོ་ཉིད་སོགས་བཞིན། །བྱེ་བྲག་བྱེ་བྲག་ཅན་ཉིད་འདི། །གང་ཡིན་དངོས་པོ་ལ་བརྟེན་ཏེ། །འབྲེལ་པ་གཞན་ཞིག་ཡོད་པར་ནི། །དེ་ལ་ངེས་པར་བརྟག་པར་བྱ། །དེ་ལ་མེད་པ་མེད་པ་ཞེས། །འདིར་ནི་ཤེས་པ་ཙམ་བརྗོད་པ། །བྱེ་བྲག་ལ་གནས་སྤྱི་ཡིན་ཏེ། །རང་གི་རྟེན་རྣམས་ལ་གནས་པའོ། །དེ་རྣམས་རྗེས་འཇུག་འདོད་མིན་གྱི། །གལ་ཏེ་གཞན་ཡོད་འདོད་མིན་ན། །ཚིག་གི་དོན་ལས་ཐ་དད་པས། །མེད་པའི་བློ་ནི་སྐྱེ་བ་ཡིན། །འདོད་པས་སྦྱར་བའི་གཟུགས་སོགས་པའི། །དོན་ལ་རིགས་ནི་ཡོད་མིན་ཏེ། །གསལ་བ་མེད་པ་ཉིད་ཀྱི་ཕྱིར། །དེ་ནི་འཁྲུལ་པ་ཉིད་དུ་བསྟན། །འདས་པ་དང་ནི་མ་བྱུང་བའི། །རྟག་པའི་སྤྱི་ཡི་ཡུལ་ཅན་གྱིས། །ཤེས་ཡོད་ཅེ་ན་འདི་ནི་བྱིན། །འབའ་ཞིག་མི་འཛིན་མ་ཡིན་ནམ། །འབའ་ཞིག་དམིགས་པ་ཡིན་ན་ནི། །གསལ་བ་རྣམས་ཀྱིར་འདིར་མི་འགྱུར། །སྤྱི་ཡི་གསལ་བྱེད་དེ་མིན་ཏེ། །གངས་ཅན་འབིགས་བྱེད་ཉིད་བཞིན་ནོ། །འདི་ནི་དེ་རྣམས་བསྐྱེད་པ་ལ། །གཞན་དབང་ཡིན་པས་འབྲེལ་པ་མེད། །རྟག་ཕྱིར་གཅིག་པུ་འཛིན་པའི་ཕྱིར། །ཤེས་པ་གཞན་དབང་ཉིད་ཀྱང་མིན། །རང་རྟེན་དབང་པོར་སྦྱོར་བ་ལས། །སོགས་ལ་ལྟོས་པ་མེད་ཕྱིར་རོ། །ཡོད་པ་རྟག་ཏུ་དམིགས་ཉིད་དམ། །ཡང་ན་ནམ་ཡང་མ་ཡིན་ཏེ། །རང་གི་བདག་ཉིད་ཤེས་བསྐྱེད་པར།། རུང་བའམ་ཡང་ན་མི་རུང་ཉིད། །གལ་ཏེ་ལན་ཅིག་དེ་ལྟའི་དངོས། །ཡིན་ན་རྟག་ཏུ་དེ་ཉིད་འགྱུར། །དེ་ནི་རུང་བ་འམ་མི་རུང་བའི། །ངོ་བོར་རང་བཞིན་གྱིས་གང་གནས། །དེ་རྣམས་རྟག་ཕྱིར་གཡོ་མིན་ཏེ། །འཇུག་པར་འགྱུར་བ་གང་ཞིག་ཡིན། །བ་ལང་ཉིད་ནི་བ་ལང་ལས། །དོན་གཞན་ཐ་དང་བློ་ཡུལ་ཕྱིར། །དེ་ནི་གཟུགས་དང་རེག་སོགས་བཞིན། །བརྗོད་པ་ནག་པའི་རྟ་བཞིན་ནོ། །ཞེས་འདིར་འཁྲུལ་པ་སྨྲ་བ་སྟེ། །འཚེད་པ་པོ་ཉིད་སོགས་དེ་བཞིན། །འདི་ཡི་ཚུལ་གྱིས་གཞན་ལ་ཡང༌། །དམན་པའི་གཏན་ཚིགས་སུན་ཀུན་སྟོན། །གཞན་ཡང་སྤྱི་ནི་དུ་མ་ལ། །འཇུག་
པ་ཉིད་དུ་གང་སྨྲས་པ། །དེ་ལ་འཇུག་པར་འདོད་འདི་ཅི། །གནས་པ་འམ་འོན་ཏེ་གསལ་བ་ཉིད། །རེ་ཞིག་རང་དངོས་མི་ཉམས་པ། །འདི་གནས་པ་ཡི་དངོས་ཡིན་ན། །རྟེན་ནི་དེ་བྱེད་ནུས་མིན་ན། །གང་གིས་འཇོག་པ་པོ་ཉིད་འགྱུར། །དེ་ནི་བ་དྷི་རང་སོགས་བཞིན། །འགྲོ་བའི་བགེགས་ཀྱང་ཡོད་མིན་ཏེ། །བྱ་བ་མེད་པ་ཉིད་ཀྱིས་ན། །དེ་ཕྱིར་གཞིར་ནི་བརྟག་པ་མིན། །དེ་ནི་འདུ་བར་གནས་ཤེ་ན། །དེ་ལྟར་རྣམ་པར་དཔྱད་མིན་ཏེ། །དེས་ན་ཐ་དད་མི་གྲུབ་རྣམས། །རྟེན་དང་རྟེན་ཅན་བདག་ཉིད་འདོད། །འབྲས་སོགས་རྣམས་ཀྱི་འགྲོ་བ་ལ། །གེགས་བྱེད་པས་ནི་གཞིར་གྱུར་ན། །འགྲོ་བ་སྨིན་པའི་སྤྱི་རྣམས་ལ། །རང་གི་ཤེས་པ་སྐྱེད་རུང་ཉིད། །ཡིན་ན་གསལ་བའི་རྒྱུ་ཅི་ཡིན། །གལ་ཏེ་ནུས་མེད་འདི་ནུས་དང༌། །ལྡན་པར་གསལ་བྱེད་ཀྱིས་བྱེད་ན། །འབྱུང་བ་མི་བརྟན་འགྱུར་ཉིད་དེ། །མར་མེ་གསལ་བྱ་བུམ་སོགས་བཞིན། །བུམ་སོགས་རིགས་ཀྱི་བྱེ་བྲག་ཀྱང༌། །རང་གནས་རྣམས་ཉིད་ལ་ཡིན་ན། །ཐམས་ཅད་ལ་གནས་རྟེན་དུ་ཡང༌། །འགྱུར་ཏེ་དམ་པའི་རིགས་བཞིན་ནོ། །དེ་ལ་ཡུལ་གཞན་ཉིད་དུ་ཡང༌། །དངོས་པོ་འབྱུང་བ་དེ་ལ་ནི། །དེ་རྣམས་ཇི་ལྟར་མཐོང་བའམ། །གནས་པའི་རྟེན་ཡིན་མི་ཤེས་སོ། །དེ་དང་ལྷན་ཅིག་སྐྱེ་བ་མིན། །དེ་རྣམས་རྟག་ཕྱིར་དེ་ལ་སྔར། །གནས་མིན་ཁྱབ་པ་མིན་པས་སོ། །གཞན་ནས་འོངས་མིན་བྱས་མེད་ཕྱིར། །རང་གནས་དབང་པོར་སྦྱོར་ལ་སོགས། །དེ་ནི་གཅིག་པ་འཛིན་པ་ན། །ཐམས་ཅད་དུ་ཡང་དམིགས་འགྱུར་ཏེ། །དེ་ཡི་རང་དངོས་མི་འདོར་ཕྱིར། །རྟོགས་ལས་ཐ་དད་མིན་ཞེ་ན། །དེ་ཡང་འཛིན་པར་བྱེད་འགྱུར་བའམ། །དེ་བཞིན་དེ་ཉིད་མི་འཛིན་པར། །འགྱུར་བའམ་ཐ་དད་ཉིད་དུ་འགྱུར། །ཕ་རོལ་པོས་བཏགས་རིགས་དག་ལ། །ཤིང་སོགས་ཤེས་པ་འདི་མི་འབྱུང༌། །རིམ་ཉིད་དང་རྗེས་འཇུག་སོགས་ཕྱིར། །དཔེར་ན་འཚེད་པོ་སོགས་བློ་བཞིན། །རྟག་པ་སྐྱེད་པ་པོ་མིན་པ། །གནོད་པ་ཅན་དུ་ཤེས་བྱ་ཞིང༌། །གོང་དུ་ཕྲད་པ་སུན་དབྱུང་བར། །བརྟན་པའང་གནོད་པ་ཅན་ཡིན་ནོ། །དེ་ལྟར་རིགས་འདི་ཐ་དད་པ། །གཅིག་ཏུ་གསལ་བ་བྱས་པ་ཡིན། །རྒྱལ་དཔོག་སོགས་པས་སྨྲས་པ་ཡང༌། །ཡོད་སྨྲ་རྟག་པར་བརྟགས་པར་འགྱུར། །གང་ཡང་བྱེ་བྲག་ཅེས་བྱ་བ།།
མཐར་དབྱུང་བར་བརྟགས་དེ་དག་ནི། །རྟག་པའི་རྫས་ནི་བསལ་བ་ཡི། །དེ་ཡང་མི་སྲིད་མཚན་ཉིད་ཡིན། །རྡུལ་ཕྲན་མཁའ་དང་ཕྱོགས་སོགས་རྣམས། །གལ་ཏེ་མ་འདྲེས་པར་གནས་ན། །དེ་ཕྱིར་རང་གི་ངོ་བོས་ཏེ། །མཚན་ཉིད་མི་འདྲ་ཉེ་བར་མཚོན།། གལ་ཏེའང་དེ་རྣམས་བདག་ཉིད་གཞན། །འདྲེས་པར་གྱུར་པ་ཡིན་ན་ཡང༌། །གཞན་ཡོད་ན་ཡང་མི་འདྲ་བའི། །མཚན་ཉིད་མ་འཁྲུལ་མཚོན་མིན་ན། །ཇི་ལྟར་བྱེ་བྲག་འདི་རྣམས་ཀྱི། །མཚན་ཉིད་མི་འདྲ་མཚོན་པ་ཡིན། །རང་ཉིད་ཁོ་ན་ཡིན་ཞེ་ན། །རྡུལ་ཕྲན་སོགས་ལ་ཅི་མི་འདོད། །ཇི་ལྟར་ཁྱི་ཤ་ལ་སོགས་པ། །རང་ཉིད་ཁོ་ནས་མི་གཙང་གནས། །དེ་དང་འབྲེལ་པས་གཞན་རྣམས་ཀྱང༌། །དེ་བཞིན་གལ་ཏེ་འདིར་འདོད་ན། །ཇི་ལྟར་མར་མེ་བུམ་སོགས་འདི། །གསལ་བྱེད་ཡིན་བཞིན་འདི་ཡང་ནི། །དེ་གསལ་བྱེད་པའི་བདག་ཉིད་དུ། །ངེས་པར་གནས་བཞིན་འདི་དེ་བཞིན། །མི་གཙང་དངོས་འདི་ཀུན་རྫོབ་པ། །ཡིན་གྱི་དེ་ཉིད་དོན་མིན་ན། །དེ་ཉིད་ཀྱང་ནི་གཞན་དུའང་སྟེ། །འདི་ནི་ཇི་ལྟར་འགྱུར་བ་ཡིན། །འོན་ཏེ་འགྱུར་བ་ཉིད་ཡིན་ཡང༌། །རང་གི་ཤ་སོགས་དབང་གིས་འདི། །རྟག་པ་སྐྱེ་བ་མེད་པའི་ཕྱིར། །མི་གཙང་དངོས་པོ་འཐོབ་པ་མིན། །སྒྲོན་མ་ལ་སོགས་པ་ཡི་མཐུས། །སྐད་ཅིག་པ་ཡི་དོན་བུམ་པ། །རྒྱན་ལ་སོགས་པའི་ཤེས་པ་རྣམས། །སྐྱེད་བྱེད་དངོས་པོ་ཐོབ་འགྱུར་གྱི། །རྩོད་པའི་གནས་གྱུར་བྱེ་བྲག་གི །སྟོབས་ཀྱིས་མཚན་ཉིད་མི་འདྲའི་བློ། །དེ་རྣམས་དག་ནི་འབྱུང་མིན་ཏེ། །རིམ་གྱིས་འབྱུང་ཕྱིར་བདེ་སོགས་བཞིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་སྤྱི་དང་བྱེ་བྲག་གི་ཚིག་གི་དོན་བརྟག་པ་སྟེ་བཅོ་བརྒྱད་པའོ།། །།སྣལ་མ་འདི་རྣམས་ལ་སྣམ་བུ། །སྨྱིག་ཚལ་འདི་རྣམས་ལ་རེ་ལྡེ། །ཞེས་སོགས་འདི་ཡི་བློ་འབྱུང་བས། །འདུ་བ་རྟོགས་པར་བྱ་བ་ཡིན།། དེ་མེད་བློ་འདིའི་རྒྱུ་མཚན་དུ། །འགྱུར་བ་ཡང་ནི་ཅི་ཞིག་ཡིན། །རྒྱུ་མཚན་གཞན་ནི་མེད་པ་ན། །བྱེ་བྲག་བློ་ནི་མཐོང་མ་ཡིན། །བྱེ་བྲག་འདི་ཡི་བློ་ལས་ཀྱང༌། །སྦྱོར་བ་བཞིན་དུ་ཐ་དད་མིན། །འབྱུང་བ་བཞིན་དུ་ཐམས་ཅད་ལ། །འདི་ནི་གཅིག་པ་ཉིད་ཅེས་བྱ། །རྟག་པ་དེ་ཉིད་
འབྱུང་བ་བཞིན། །རྒྱུ་མཚན་མི་དམིགས་པ་ཡང་ནི། །འདི་ལ་རྒྱུ་ནི་ཅུང་ཟད་ཀྱང༌། །ཚད་མས་ཉེ་བར་དམིགས་པ་མིན། །དེ་ལྟར་དེ་ཡི་ཤེས་པ་ཡང༌། །རང་གི་གྲུབ་མཐའི་རྗེས་འབྲངས་ནས། །ཕ་རོལ་པོ་རྣམས་འཇུག་བྱེད་ཀྱི། །འཇིག་རྟེན་པ་ལའང་དེ་མ་མཐོང༌། །རྟེན་དང་བརྟེན་པར་གྱུར་བ་དག །སྣ་ཚོགས་པ་ཉིད་མཚན་ཉིད་འགྱུར། །ཀུཎྜི་སོགས་གནས་དཔལ་འབྲས་བཞིན། །འདི་ལ་འདི་ཞེས་པ་བློ་ཡི། །དེ་བཞིན་གང་གི་དེ་རྣམས་ལ། །འདི་ལ་དེ་ཡི་བློ་འབྱུང་བ། །སྣལ་མ་སྣམ་བུ་སོགས་རྣམས་ལ། །སྣ་ཚོགས་ཉིད་མཚོན་ཡོད་མ་ཡིན། །དངོས་པོ་རྣམས་ལ་རང་འདོད་ཀྱི། །སྦྱོར་བས་འདི་འོ་ཞེས་རྟོགས་པ། །འདི་ནི་རྒྱུ་ལ་མངོན་སྦྱོར་བ། །ཕ་རོལ་པོ་སྨྲ་དེ་མི་འཐད། །ཤིང་ལས་ཡལ་ག་འགྲོ་མིན་ལ། །བྲག་ཅེས་འཇིག་རྟེན་པ་བློ་འབྱུང༌། །མི་འགྲོར་བརྗོད་ལས་ལྷག་ཡན་ལག །བར་མཚམས་མེད་པར་མཐོང་བའི་ཕྱིར། །དེ་དག་ལ་ཡང་འདི་ཡི་བློ། །འཇིག་རྟེན་དང་འགལ་སྨྲས་པ་ཡིན། །བུམ་པའི་གཟུགས་དང་སྒྲ་ལ་སོགས། །དེ་ཡི་བདག་ཉིད་དུ་ཤེས་བྱ། །གཟུགས་དང་བུམ་སོགས་གནས་སྐབས་ཀུན། །སྒྲ་ཡི་བརྗོད་པ་ཉིད་ཡིན་ཏེ། །དེ་ཡི་བྱེ་བྲག་བརྗོད་པའི་ཕྱིར། །དེ་རྣམས་དེ་བཞིན་འཇུག་པ་ཡིན། །དེ་ལ་བརྟེན་པའི་བློ་འདི་རྣམས། །དེ་རྣམས་རྣམ་པས་འཇུག་པ་སྟེ། །འདུ་བས་མ་ཡིན་ཐ་དད་པ། །ཀུན་ཀྱང་མཐོང་བ་མིན་ཕྱིར་རོ། །གལ་ཏེ་དངོས་པོ་ཐམས་ཅད་ལ། །དངོས་པོ་གཅིག་གྱུར་ཡོད་གྱུར་ན། །འཇིམ་གོང་སོགས་ལའང་སྣམ་བུ་ལ། །སོགས་པའི་ཤེས་པའང་ཐལ་བར་འགྱུར། །གླང་པོ་སོགས་ལ་འང་བ་ལང་ཉིད། །ལ་སོགས་ཡོད་པར་ཐལ་འགྱུར་ཏེ། །དེས་ན་བ་ལང་སོགས་གཟུགས་ཉིད། །འདི་འགྱུར་བ་ལང་ཁྲ་བོ་བཞིན། །སྣལ་མ་རྣམས་ལ་སྣམ་བུ་དེས། །ཡོད་པར་འདུ་བ་ལས་ཤེས་ན། །འཇིམ་གོང་རྣམས་ལ་དེ་བཞིན་དུ། །དེ་ཡོད་ཅེས་པར་ཅིས་མི་ཤེས།། འཇིམ་གོང་ལ་དེ་བརྟེན་པ་མིན། །ཞེ་ན་འདུ་བས་སྣལ་མ་ཡང༌། །བརྟེན་པར་འདོད་པ་མ་ཡིན་ནམ། །འཇིམ་གོང་ལ་དེ་ཅི་ཕྱིར་མིན། །འདུ་བས་སྣལ་མ་ལ་སྣམ་བུ། །ཞེས་བྱར་སྒྲུབ་པར་བྱེད་ན་དེ། །འཇིམ་གོང་རྣམས་ལ་བུམ་པ་ཡི། །བློ་དེ་རྒྱུ་མཚན་མེད་པར་འགྱུར། །དེ་ལྟར་
གླང་པོ་སོགས་གང་ལ། །འདུ་བས་གླང་པོ་ཉིད་སོགས་ཡིན། །དེ་ཉིད་རང་གནས་ལ་རིགས་ཀྱི། །དབྱེ་བས་བ་ལང་ཉིད་སོགས་འགྱུར། །དེ་ནི་གཅིག་ཉིད་དུ་ཡོད་ཀྱི། །རྟེན་དང་བརྟེན་པར་དབྱེ་བ་ཡིས། །རྫས་རྣམས་ལ་ནི་དེ་རིགས་ཉིད། །ལས་རྣམས་ལ་ཡང་ལས་ཉིད་དེ། །འདུ་ལས་བྱུང་འདི་ལས་ཞེས་པའི། །ཤེས་པ་རྗེས་འགྲོར་བསྟན་པའི་ཕྱིར། །ཐམས་ཅད་ལ་ཡང་འདུ་བ་ཉིད། །གཅིག་པུ་ཁོ་ན་ཡིན་ཞེས་བྱ། །རྫས་ཉིད་ལ་སོགས་རྒྱུ་མཚན་རྣམས། །ཐ་དད་པར་ནི་བསྟན་པའི་ཕྱིར། །རྫས་སོགས་རིགས་ཀྱི་བློ་རྣམས་ཀྱི། །ངེས་པ་ཉིད་དུ་ངེས་པ་ཡིན། །རྟེན་དང་བརྟེན་པའི་ངེས་པ་ཡིས། །དཔེར་ན་སྣོད་དང་ཞོ་དག་ཀྱང༌། །འབྲེལ་པ་གཅིག་ཏུའང་སྣང་བ་ཡིན། །དེ་བཞིན་འདི་ལའང་ངེས་པར་འདོད། །འདུ་བ་གཅིག་པུ་ཡིན་ན་ཡང༌། །གསལ་བྱ་གསལ་བྱེད་ནུས་པ་ཡང༌། །དབྱེ་བས་རྫས་སོགས་རིགས་རྣམས་ལ། །དེ་ནི་འགལ་བ་མིན་ཞེ་ན། །གཅིག་ཉིད་རྟེན་དང་བརྟེན་པར་ནི། །ངེས་པར་བསྒྲུབ་དཀའ་མ་ཡིན་ནམ། །འདུ་བ་ལས་ནི་རྫས་ཉིད་དུ། །རྫས་རྣམས་ཁོ་ན་འདོད་པ་ཡི། །འདུ་བ་དེ་ནི་ཡོན་ཏན་ལ། །སོགས་ལའང་ཡོད་པར་ཇི་ལྟར་འགྱུར། །ཡོན་ཏན་རྫས་སོགས་དེ་དག་གི །འབྲེལ་པ་འདི་ནི་གཅིག་ཉིད་དམ། །གཞན་དུ་འདི་ནི་ཡོན་ཏན་དང༌། །རིགས་སོགས་ཐ་དད་ཉིད་དུ་འགྱུར། །གསལ་བ་སོ་སོའི་སྦྱོར་དབྱེ་བས། །སྦྱོར་བ་ཇི་བཞིན་ཐ་དད་འགྱུར། །རྫས་ཉིད་ལ་སོགས་རྒྱུ་རྣམས་དང༌། །ཐ་དད་པར་ནི་མི་རིགས་ཏེ། །རྒྱུ་མཚན་ཡོད་ན་བློ་ཡིན་ལ། །དེ་ཕྱིར་དེ་ཡི་ངེས་པའང་མིན། །དེར་བརྟེན་པ་ཉིད་སོགས་པ་ཉིད། །འདུ་བ་ལས་ཡིན་དེ་ཉིད་ལ། །ངེས་པ་ཅན་དུ་རིགས་མ་ཡིན། །གསལ་བྱ་གསལ་བྱེད་ནུས་པ་ཡི། །དབྱེ་བའི་འདུ་བ་ལས་ཡིན་པའང༌། །གཞན་མིན་པ་དེ་རྟག་པ་རྣམས། །སྐྱེད་པར་བྱེད་པ་རིགས་པ་མིན། །མར་མེ་ལ་སོགས་ཡོད་པ་ལས། །སྐྱེས་པའི་བུམ་སོགས་འདི་རྣམས་ཀྱིས།། ཤེས་པ་ཇི་ལྟར་སྐྱེད་རུང་བ། །དེ་བཞིན་རིགས་ལ་སོགས་པ་མིན། །ཀུཎྜི་དང་ཞོ་ཕྲད་པ་ཡི། །གཅིག་ཏུ་གོང་དུ་བསལ་བ་ཡིན། །དེ་ཡི་ཕྱིར་ཡང་ངེས་པ་འདི། །མི་རིགས་ཤིན་ཏུ་ཐལ་འགྱུར་ཕྱིར། །འདི་ནི་རྟག་པ་ཉིད་ཡིན་ན། །བུམ་སོགས་ཀུན་ཀྱང་རྟག་འགྱུར་ཏེ། །འདུ་བའི་དབང་གིས་
དེ་རྣམས་ཀྱི། །རང་རྟེན་ལ་རྟག་གནས་ཕྱིར་རོ། །རང་གི་རྩོམ་བྱེད་བྱེ་བའམ། །ཡང་ན་དེ་ཞིག་པ་ལས་སམ། །ཕྲད་པ་སོགས་ལས་བྱ་བ་ཡང༌། །དེ་རྣམས་ཞིག་པ་ཡིན་ཞེ་ན། །དེ་ལྟ་མིན་ཏེ་དེ་རྣམས་ཀྱང༌། །རང་རྟེན་ལ་རྟག་འདུར་འདོད་བའམ། །དེ་རྣམས་རྣམ་པར་འཇིག་འགྱུར་ན།། འདི་ལ་ངེས་པར་འཇིག་པར་འགྱུར། །འབྲེལ་པ་ཅན་ནི་འཇུག་མིན་ན། །འབྲེལ་པ་ཡོད་པར་བསྒྲུབ་པར་འདོགས། །ཕྲད་པ་མེད་ནའང་སྦྱོར་བ་ནི། །རྣམ་པར་གནས་པ་མ་ཡིན་ཏེ། །དཔེར་ན་སྦྱོར་བ་ཡོད་གྱུར་ན། །ཕྲད་པ་རྣམ་པར་གནས་པ་བཞིན། །དེ་བཞིན་འདུ་བ་ཡོད་ཐ་ན། །འདུ་བ་ཅན་རྣམས་གནས་པ་ཡིན། །འབྲེལ་པ་ཅན་གཅིག་ཞིག་ན་ཡང༌། །འབྲེལ་པ་ཅན་གཞན་ཡོད་པ་ལས། །འདུ་བ་རྣམ་པར་གནས་ཡིན་གྱི། །སྦྱོར་མིན་ཐ་དད་ཕྱིར་ཞེ་ན། །གལ་ཏེ་དེ་ལྟར་བུམ་པ་སོགས། །འདུ་བ་ཅན་རྣམས་ཞིག་ན་ཡང༌། །དེ་རྣམས་གནས་པའི་བདག་ཉིད་གང༌།། དེ་ནི་རྟོག་པ་དེ་དང་ནི། །དེ་ཕྱིར་འབྲེལ་པ་ཅན་གཞན་ལ། །བརྟེན་པས་རྣམ་པར་གནས་པའམ། །འོན་ཏེ་ཕྲད་པའམ་བྱེ་བ་ནི། །འདུ་བ་བཞིན་དུ་གཞན་ཉིད་ཡིན། །དེ་ལ་བརྟེན་པའི་མཚན་ཉིད་ཀྱི། །འདུ་བ་ཀུན་དུ་གནས་ཡིན་ན། །སྔ་མ་བཞིན་དུ་བུམ་པ་སོགས། །དེ་རྣམས་གནས་པ་ཉིད་ཐོབ་འགྱུར། །དེ་རྣམས་དེ་ལྟར་གནས་པ་མིན། །དེ་རྣམས་བརྟེན་པའི་བདག་ཉིད་ཀྱི། །འདུ་བ་ཇི་ལྟར་གནས་པར་འགྱུར། །མིང་ཙམ་ཡིན་ནའང་དེ་བཞིན་ནོ། །དེ་ཕྱིར་སྣང་ལ་ཡོད་ནའང༌། །དེ་རྣམས་གྱེན་ལ་གནས་མིན་ཏེ། །ཕྱིས་བཞིན་འདི་ནི་དེ་རྣམས་ལ། །དེ་བཞིན་དངོས་སུ་གནས་མ་ཡིན། །འོན་ཏེ་གཞན་ཉིད་ཕྲད་པའམ། །བྱེ་བ་དུ་མ་བཞིན་ཡིན་ན། །འབྲེལ་པ་ཅན་གཞན་ཡོད་པ་ལ། །འདུ་བ་རྣམ་པར་གནས་འགྱུར་ན། །དེ་ལྟར་ཕྲད་པ་ལ་སོགས་བཞིན། །འདི་ནི་མི་འགྱུར་མ་ཡིན་ནམ། །དེ་ལ་སོགས་པ་འདི་ཡོད་པ། །དུ་མའང་འབྲེལ་པ་མེད་པ་ཡིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་འདུ་བའི་ཚིག་གི་དོན་བརྟག་པ་སྟེ་བཅུ་དགུ་པའོ།། །།གལ་ཏེ་དམ་པའི་དོན་དུ་ན། །བྱེ་བྲག་ཅུང་ཟད་ཡོད་མིན་ན། །དབྱིབས་བཅས་དཀར་གཡོ་ཡོད་བདག་ཉིད། །བ་ལང་འདི་ལ་སོགས་བློས་སྒྲ། །འདི་དག་རྒྱུ་མེད་འདོད་
མིན་ན། །འདི་དག་ཡོད་པའི་ཡུལ་གང་ཡིན། །ཀུན་ལ་བྱེ་བྲག་མེད་པར་ནི། །དེ་དག་འཇུག་མི་སྲིད་ཕྱིར་རོ། །སྨྲས་པ་བློ་སྒྲ་འདི་དག་ལ། །ཡུལ་ནི་གང་ཡང་ཡོད་མིན་ཏེ། །ནང་ཙམ་ལ་ནི་ངེས་གནས་པའི། །ས་བོན་འདི་རྣམས་རྒྱུ་མཚན་ཡིན། །སྒྲ་རྣམས་གང་དང་གང་དག་གིས། །ཡུལ་དུ་གང་དང་གང་བརྗོད་པ། །དེ་དེ་ཀུན་དུ་སྦྱོར་བ་ནི། །དངོས་སུ་མེད་དེ་ཆོས་ཉིད་ཡིན། །གང་ཕྱིར་རང་གི་མཚན་ཉིད་དང༌། །རིགས་དང་དེ་འབྲེལ་རིགས་ལྡན་དང༌། །བློ་ཡི་རྣམ་པའི་སྒྲ་དོན་དུ། །དེ་ཁོ་ན་ཉིད་དུ་མི་འཐད། །དེ་ལ་རེ་ཞིག་སྒྲ་རྣམས་ཀྱི། །རང་གི་མཚན་ཉིད་རྗོད་བྱེད་མིན། །བརྡ་དང་ཐ་སྙད་ཐོབ་པ་ཡི། །དུས་སུ་ཁྱབ་དང་བྲལ་ཕྱིར་རོ། །ཡུལ་དུས་བྱ་བ་ནུས་པ་དང༌། །སྣང་བ་ལ་སོགས་དབྱེ་བ་ལས། །གཅིག་ལ་གཅིག་དངོས་དེ་རྣམས་ཀྱི། །གསལ་བའི་བདག་ཉིད་རྗེས་འཇུག་མིན། །དེ་ཕྱིར་བརྡ་ལ་མཐོང་བའི་དོན། །ཐ་སྙད་ལ་ནི་མཐོང་བ་ཡིན། །བརྡ་ཡི་དུས་སུ་མ་བཟུང་བ། །རྟོགས་པ་མ་ཡིན་སྒྲ་གཞན་བཞིན། །གངས་ཅན་ལ་སོགས་གང་ཡིན་པ། །ཡུལ་དུས་ཚོགས་ཀྱིས་མི་དབྱེ་བར། །འདོད་པ་རྡུལ་ཕྲན་དབྱེ་བ་ཡིས། །སྐད་ཅིག་པ་ཉིད་དུ་བསྒྲུབས་ཟིན། །རང་གི་མཚན་ཉིད་འདི་དག་ཀུན། །བརྡར་བྱ་བར་ནི་ནུས་མིན་ཏེ། །སྐྱེ་མེད་དངོས་སུ་བརྡར་བྱ་བ། །མི་རིགས་རྟ་ཡི་རྭ་བཞིན་ནོ། །སྐྱེས་པའི་དུས་སུ་བཟུང་བ་ཡང༌། །གང་ཚེ་ཚིག་དེ་རྗེས་དྲན་ནས། །བྱ་བྱེད་དེ་ལ་བརྡ་མེད་དེ། །འདས་ནས་ཡུན་རིང་ལོན་ཕྱིར་རོ། །གང་ཡང་སྐྱེས་པའི་སྐད་ཅིག་དེའི། །སྟོབས་ཀྱིས་ཡིན་ན་ཕྱི་མའི་ཚེ། །དེ་ལ་བརྡ་འཇུག་ཡོད་མ་ཡིན། །འདྲ་བ་ཉིད་ཀྱང་བརྟགས་པ་ཡིན། །དྲོ་བ་ལ་སོགས་པར་སྣང་བློ། །དེ་ལ་དབང་པོའི་ཤེས་པ་ནི། །རྣམ་པར་གསལ་བར་རིག་པ་བཞིན། །དྲོ་བ་སོགས་ལས་བྱུང་རྣམས་ཀྱི། །དོན་གང་ཡིན་པ་དེས་བསྐྱེད་བློའི། །དོན་དེ་སྣང་བ་མིན་པའི་ཕྱིར། །སྒྲ་དེའི་ཡུལ་དུ་མི་རིགས་ཏེ། །གཟུགས་ཀྱི་སྒྲ་ཡི་རོ་བཞིན་ནོ། །རྣམ་པ་དེ་དག་ཉིད་ཀྱིས་ནི། །གསལ་བ་དང་ནི་རྣམ་པ་དག །གང་གིས་རང་གི་མཚན་ཉིད་དུ། །ཕ་རོལ་པོས་བཏགས་དག་ཀྱང་གསལ། །རྫས་ལ་སོགས་དང་ཕྲད་པ་དག །དགག་པ་གོང་དུ་བསྟན་པའི་ཕྱིར། །དེ་དག་སྒྲ་ཡི་
དོན་ཉིད་དུ། །དེ་ཉིད་དོན་དུ་གནས་མི་རིགས། །རིགས་དང་དེ་བཞིན་འབྲེལ་པ་དག །གོང་དུ་རྒྱས་པར་བཀག་པའི་ཕྱིར། །དེ་འོག་སྒྲ་དོན་རྣམ་གསུམ་པོ། །གཞན་ཡང་བརྟག་པར་བྱ་བ་མིན། །དེ་ལ་གསལ་བ་རྣམ་པ་དང༌། །རིགས་ཀྱི་སྒྲ་དོན་གང་སྨྲས་པ། །གང་དེ་ཀུན་ཀྱང་དངོས་མེད་པར། །མཚུངས་ཕྱིར་དེ་རྣམས་ཡོང་མ་ཡིན། །བློ་རུ་གནས་པའི་བློའི་རྣམ་པ། །དོན་དང་བློ་གཞན་ལ་འཇུག་མིན། །མངོན་འདོད་དོན་ཡང་བྱེད་མིན་ཏེ། །དེ་ཉིད་དོན་དུ་བརྗོད་བྱ་མིན། །གཞན་དག་སྒྲ་ཡི་དོན་གཞན་དུ། །དོན་ཡོད་ཅན་སོགས་པར་སྨྲ་བ། །དེ་རྣམས་ཀྱང་ནི་གསལ་བ་ཉིད། །ཡིན་ཡང་དེ་ལྟའང་བརྗོད་བྱ་སྟེ། །སྒྲ་རྣམས་གཞན་བཅད་དོན་ཡོད་ཅན། །ཞེས་བྱར་བརྗོད་བྱའི་མཚན་ཉིད་དོ། །བ་ལང་སོགས་ལའང་སྔར་མ་མཐོང༌། །ལྷ་དང་མཐོ་རིས་ལ་མཚུངས་ཟེར། །སྡུད་དང་རྣམ་གྲངས་པ་མེད་པའི། །བསྡུས་པ་འང་བརྗོད་པར་བྱ་བ་འམ། །ཡོད་པ་མིན་པ་དང་འདྲ་བའང༌། །སྒྲ་ཡི་དོན་དུ་འགའ་འདོད་བའམ། །ཡོད་མིན་བྱེ་བྲག་ཡོད་གང་དག །སྒྲ་ཡི་རྒྱུ་མཚན་ཡིན་པའམ། །བརྗོད་པ་ཉིད་ལས་འོངས་པའི་སྒྲ། །བརྗོད་བྱ་ཉིད་ནི་ཐོབ་པ་ནི། །དེ་འདིའི་ཞེས་བྱར་མངོན་འབྲེལ་ཕྱིར། །གང་ཚེ་སྒྲ་ལ་དོན་གྱིས་ནི། །གཅིག་གི་ངོ་བོར་བྱས་གྱུར་ཏེ། །མངོན་པར་བརྗོད་པ་སྒྲ་རུ་འདོད། །གང་ཡང་རུང་དོན་བློ་ཡི་ཡུལ། །ཕྱི་ཡི་དངོས་པོའི་རྒྱུ་མཚན་གྱིས། །ཕྱི་ཡི་དངོས་པོ་ཞེས་འཛིན་ཏེ། །སྒྲ་ཡི་དོན་དུ་ཁ་ཅིག་འདོད། །དཔེར་ན་བྱིས་པ་རྣམས་དང་ནི། །དུད་འགྲོ་རྣམས་ཀྱང་གོམས་པ་ལས། །སོ་སོར་སྣང་བ་རྒྱུ་ཡིན་ཏེ། །དེ་ལ་དོན་ཡོད་ཅེས་བརྗོད་འདི། །རང་གི་མཚན་ཉིད་འདོད་དམ་ཅི། །འོན་ཏེ་རིགས་དང་འབྲེལ་དང་ལྡན། །བློ་ཉིད་ཀྱི་ནི་གཟུགས་བརྙན་ན། །དོན་གཅིག་ལ་ཡང་སྔར་བསྟན་པའི། །སྐྱོན་དེ་རྣམས་དང་ལྡན་པ་ཡི། །རྟོགས་པར་བྱ་བའི་དབྱེ་བ་ཡིས། །ཐ་སྙད་དུ་ནི་རྣམ་རྟོག་བྱེད། །བ་ལང་ཉིད་སྒྲའི་དབྱེ་བས་དོན། །ཡོད་ཙམ་རྟོགས་དེ་ཡིན་ཞེ་ན། །རྭ་དང་དབྱིབས་དང་སྔོ་ལ་སོགས། །བྱེ་བྲག་མི་རྟོགས་དེ་འདོད་ན། །དེ་དང་ལྡན་འདོད་བྱེ་བྲག་རྣམས། །བརྗོད་པར་གྱུར་པ་ཡིན་ན་ནི། །དེར་འབྱུང་སྐྱོན་དག་ཡོད་མིན་ནམ། །ཡོད་
དོན་ཅན་གཞན་མཐོང་མིན་ནོ། །བསྡུས་པར་བརྗོད་པ་ཡིན་ན་ཡང༌། །དཀའ་ཐུབ་བྱ་བ་རིགས་སོགས་རྣམས། །མ་ལུས་མངོན་པར་བརྗོད་པའི་ཕྱིར། །རིགས་ཀྱི་དབྱེ་བར་གསལ་བརྗོད་ཡིན། །ངེས་པར་མ་བཟུང་གཟུགས་རྣམས་ཀྱི། །རྫས་སོགས་རྣམས་སུ་གང་འདོད་དང༌། །གང་ཞིག་འབྲེལ་པ་ཡོད་པ་ཡི། །སྤྱི་དང་སླར་ཡང་གསལ་བ་ཡིན། །བྱེ་བྲག་རིགས་སོགས་ངོ་བོ་ཡི། །སྒྲ་ཡི་དོན་ནི་མི་འཐད་ཕྱིར། །དོན་དང་གཅིག་པར་བྱ་བ་ཡི། །ངོ་བོའི་སྒྲ་འདི་མི་རིགས་ཏེ། །བློ་གནས་བརྗོད་པ་འདི་ཉིད་ནི། །ཕྱི་རོལ་དག་ལས་ཐ་དད་ཕྱིར། །དེ་ཕྱིར་བློ་ལ་ཕྱོགས་གཞན་ལས། །འདི་ལ་བྱེ་བྲག་ཅི་ཞིག་ཡོད། །བློ་ཡི་རྣམ་པའི་སྒྲ་དོན་ཡང༌། །གོང་དུ་གསལ་བ་ཉིད་ཀྱིས་ན། །ཤེས་ལ་ཐ་དད་མིན་པ་ཡི། །ཁྱབ་བྱེད་ཉིད་ནི་མེད་པས་སོ། །སོ་སོར་སྣང་བའི་སྒྲ་དོན་ཡང༌། །གལ་ཏེ་ཕྱི་དོན་ཡུལ་ཡིན་ན། །གང་ཕྱིར་གཅིག་བདག་མིན་ཕྱི་ཡི། །ཇི་ལྟར་སྣ་ཚོགས་སོ་སོར་སྣང༌། །འོན་ཏེ་བག་ཆགས་ཙམ་དངོས་ཕྱིར། །དེ་ནི་ཡུལ་མེད་ཡིན་ན་ཡང༌། །ཕྱི་དོན་རྣམས་ལ་ཤེས་པ་ཡང༌། །ཇི་ལྟར་འཇུག་པར་འགྱུར་བ་ཡིན། །གལ་ཏེ་ཕྱི་དོན་དུ་ངེས་པས། །རང་དངོས་ལ་དེ་རྣམས་སུ་འདོད། །དེ་ལྟར་འཁྲུལ་པས་འཇུག་པའི་ཕྱིར། །སྒྲ་དོན་དེ་ཁོ་ན་ཉིད་མིན། །ཐམས་ཅད་ཉིད་ལ་ཐལ་འགྱུར་ཕྱིར། །ས་བོན་མེད་པའང་མི་རིགས་སོ། །འདི་རྣམས་ཕན་ཚུན་ཐ་དད་པ། །ས་བོན་ཞེ་ན་ཕྱོགས་བདག་ཉིད། །གལ་ཏེའང་འདི་རྣམས་ཐམས་ཅད་ཉིད། །སྐད་ཅིག་པ་ན་རྗེས་འགྲོ་མེད། །གཞན་ན་ཤེས་པ་རིམ་གྱིས་མིན། །འདི་ཉིད་ཀྱིས་ནི་བརྗོད་འདོད་པའང༌། །སྒྲ་ལས་རྟོགས་པ་བསལ་པ་སྟེ། །འདི་ལྟར་སྒྲ་མེད་མེད་འདི་ལ། །གང་ཞིག་བརྗོད་འདི་གང་ཞིག་ཐོབ། །ཕྱི་ཡི་དོན་ལ་སྒྲ་འཇུག་པ། །ཇི་ལྟར་སྒྲ་མིན་པས་བརྗོད་འགྱུར། །མིང་སོགས་དེ་རྣམས་ཀྱིས་བརྗོད་ཡིན། །བརྗོད་འདོད་རྗེས་དཔོག་རྣམ་དང༌། །འདྲེས་པ་ཕྱི་ཡི་དངོས་པོར་ནི། །ཞེན་པས་འདི་ལ་འཇུག་ཅེ་ན། །དེ་ཉིད་ཁོ་བོ་འདོད་པའང་ཡིན། །གཞན་སེལ་བ་ནི་བྱེད་པའི་སྒྲ། །ཁྱེད་ཀྱི་ཕྱོགས་བརྗོད་མ་ཡིན་ནམ། །དགག་པ་ཙམ་ཡིན་སྣང་འདི་ལ། །གོ་བར་བྱེད་པ་མ་ཡིན་གྱི། །འོན་
ཀྱང་བ་ལང་བ་མིན་པ། །གླང་པོ་ཤིང་སོགས་སྒྲུབ་པ་ཡང༌། །ཡང་དག་ངོ་བོར་ངེས་པ་ཡིས། །སྒྲ་ཅན་བློ་ནི་འཇུག་པ་ཡིན། །གལ་ཏེ་བ་ལང་ཞེས་བྱའི་སྒྲ། །གཞན་གསལ་དོན་ནི་བྱེད་པ་སྟེ། །བ་ལང་གསལ་བའི་སྒྲ་ཕྱི་མ། །སྐྱེད་བྱེད་སྒྲ་ནི་བཙལ་དགོས་སོ། །ཤེས་པ་སྒྲ་འབྲས་མ་ཡིན་ནམ། །གཅིག་ལ་འབྲས་བུ་གཉིས་ཉིད་དེ། །དགག་དང་སྒྲུབ་པའི་ཤེས་པ་དག །ཇི་ལྟར་གཅིག་གི་འབྲས་བུ་ཡིན། །བ་ལང་སྒྲ་ནི་ཐོས་པ་ན། །སྔོན་དུ་བ་ལང་མིན་ཞེས་འགྱུར། །གང་གིས་བ་ལང་མིན་དགག་ཕྱིར། །བ་ལང་ཞེས་བྱའི་སྒྲ་ལ་འཇུག །བ་ལང་མིན་ལས་ལྡོག་པའི་སྤྱི། །གང་ཕྱིར་བརྗོད་བྱར་ཡོངས་བརྟགས་པས། །དེ་ཡིས་བ་ལང་ཉིད་དངོས་ཉིད། །གཞན་སེལ་སྒྲ་ཡིས་གསལ་བར་བསྟན། །གང་གིས་མེད་པ་ཐམས་ཅད་ནི། །གཞན་པའི་དངོས་པོ་བདག་ཉིད་གནས། །དེ་ལས་རྟ་སོགས་ལས་ལྡོག་པའི། །བདག་ཉིད་མེད་པ་གང་ཡིན་པ། །རེ་ཞིག་ཐུན་མོང་མིན་བྱེ་བྲག །རྟོག་མིན་ཡིན་ཕྱིར་མི་འདོད་ན། །ཁྲ་བོ་སོགས་ལའང་སྤྱི་མིན་པར། །ཐལ་བར་འགྱུར་ཕྱིར་དེ་བཞིན་ནོ། །དེ་ཕྱིར་དངོས་ཀུན་གང་ཡིན་པ། །སོ་སོར་ཡོངས་སུ་རྫོགས་པ་ནི། །བ་ལང་བློ་དེའི་རྒྱུར་འགྱུར་ཏེ། །བ་ལང་ཉིད་ལས་གཞན་ཡོད་མིན། །དགག་པ་ཙམ་གྱི་ངོ་བོ་ཡང༌། །སྒྲ་ཡི་དོན་དུ་རྟོག་བྱེད་ན། །སྟོང་ཉིད་གཞན་གྱི་རྣམ་པ་ཅན། །མེད་པའི་སྒྲ་ཡི་བརྗོད་བྱར་འགྱུར། །དེ་ལའང་རྟ་སོགས་བློ་རྣམས་ཀྱི། །བདག་ཉིད་ཆ་ཤས་འཛིན་པར་འགྱུར། །དེར་ནི་གཞན་སེལ་བརྗོད་བྱ་ཉིད། །བརྫུན་པ་ཉིད་དུ་ཁས་ལེན་པའོ། ངོ་བོ་སྤྱི་རུ་འགྱུར་ཡིན་ན། །སྒྲ་དོན་དག་ལ་མི་ལྟོས་པར། །སེལ་བར་བརྟག་པ་བརྫུན་པ་མིན། །བློ་དེའང་དངོས་པོའི་ངོ་བོ་སྟེ། །སྒྲའི་དོན་རྣམས་ལ་སྐྱེ་བས་ན། །བརྗོད་བྱ་དངོས་པོ་ཉིད་དུ་བརྟག །བློ་ནི་སེལ་བ་མིན་པ་ཅན། །ཡོད་པ་མིན་པ་ཕྱི་དོན་ལ། །སོ་སོར་སྣང་བའི་ཚིག་དོན་བཞིན། །དེ་བཞིན་ཚིག་དོན་ཡང་འགྱུར་ན། །ཅི་ཕྱིར་སེལ་བར་རྟོག་པར་བྱེད། །བློ་གཞན་པ་ལ་རྣམ་གཅོད་པས། །བློར་རྟོགས་པ་ནི་མ་ཡིན་ཏེ། །རང་གི་ངོ་བོར་གྲུབ་ཙམ་ལས། །གཞན་པའི་ཆ་ནི་འཛིན་དེ་མིན། །གལ་ཏེ་གཞན་སེལ་བརྗོད་བྱ་ན།།
ཐ་དད་སྤྱི་ཡི་ཚིག་རྣམས་ཀྱང༌། །ཐམས་ཅད་རྣམ་གྲངས་པ་རུ་གྱུར། །འདྲེས་དང་གཅིག་ཉིད་སྣ་ཚོགས་ཉིད། །རྣམ་རྟོག་དང་བྲལ་བདག་ཉིད་ཅན། །དངོས་པོ་མིན་ཕྱིར་སེལ་རྣམས་ཀྱི། །དབྱེ་བ་ཡོད་ན་མིན་པ་ཉིད། །གལ་ཏེ་དབྱེ་བ་མེད་པའི་ཕྱིར། །ཐུན་མོང་མིན་དངོས་ཆ་ཤས་བཞིན། །དངོས་མིན་སྣ་ཚོགས་མིན་ཉིད་ཕྱིར། །རྣམ་གྲངས་པ་ལས་ཐར་པ་ཡིན། །གསལ་བར་བྱ་བའི་བྱེ་བྲག་གིས། །གལ་ཏེ་ཐ་དད་པར་འདོད་ན། །འདི་ནི་རང་ལས་བྱེ་བྲག་མིན། །གཞན་ལས་ཀྱང་ནི་བརྟགས་པ་ཡིན། །འདྲེས་ཅན་རྟེན་ཐ་དད་པ་ཡི། །ངོ་བོས་ཕྱི་རོལ་གནས་པ་ཡི། །གསལ་བྱ་གང་ཡིན་དེ་འབྱེད་པ། །དེ་ནི་ཆེར་ཡང་རྟོག་པ་ཡིན། །དེ་བཞིན་རྟེན་ནི་ཐ་དད་པས། །འདི་ཡང་ཐ་དད་རིགས་མ་ཡིན། །འབྲེལ་བ་ཅན་ནི་ཐ་དད་པས། །དངོས་པོ་ཐ་དད་འདོད་མ་ཡིན། །འོན་ཀྱང་དངོས་དང་མ་འདྲེས་པ། །གང་ཡིན་གཞན་ལས་ལྡོག་པ་མིན། །བྱེ་བྲག་ཆ་ནི་མ་ཐོབ་པར། །ཅི་ཡི་ཕྱིར་ན་ངེས་པ་མིན། །འདྲ་བ་ཉིད་དུ་མ་གྲུབ་པ། །སེལ་བའི་ལུས་ཀྱི་བདག་ཉིད་དུ། །ཤེས་པར་ལུས་ཀྱང་ནུས་མིན་ཏེ། །བ་ལང་སོགས་སུ་དབྱེར་མེད་ཕྱིར། །རྟ་སོགས་གསལ་བྱ་མེད་པར་ཡང༌། །ཆོས་གཅིག་རྗེས་འཇུག་དང་བྲལ་བ། །ངེས་པར་བྱ་བར་མི་ནུས་པ། །དེས་ན་སེལ་བ་མི་གྲུབ་པོ། །རྗེས་སུ་འཇུག་པ་དང་བྲལ་ན། །སྒྲ་དང་རྟགས་དག་འཇུག་མ་ཡིན། །དེ་དག་མེད་ན་སེལ་བའང་མིན། །ཐུན་མོང་མིན་པའང་རྗེས་འཇུག་མིན། །སེལ་བ་ཡང་ནི་མ་གྲུབ་ན། །ལྷན་ཅིག་སྤྱོད་པ་གང་ན་གསུངས། །དེ་ལ་མ་མཐོང་བ་དེ་དག །ཚད་མ་ཉིད་དུ་འགྱུར་མ་ཡིན། །མ་མཐོང་བ་ཙམ་གྱིས་དེ་དག །རྟོགས་པར་བྱེད་པར་འགྱུར་བ་མིན། །ཐམས་ཅད་ཉིད་ལ་མ་མཐོང་ཕྱིར། །རྟོགས་བྱར་བྱེ་བྲག་འགྱུར་མ་ཡིན། །འོན་ཏེ་འདྲ་བ་ཉིད་མེད་ཀྱང༌། །སེལ་བར་རྟོག་པ་ཡིན་ན་ནི། །འདི་ནི་བ་ལང་རྟ་དག་ལ། །སེལ་བར་ཅི་ཕྱིར་རྟོག་མི་བྱེད། །ཁྲ་བོ་ལས་ནི་གཞན་ཉིད་དུ། །སེར་སྐྱ་དང་ནི་རྟ་དག་མཚུངས། །སྤྱི་ནི་གཞན་མིན་འདོད་ཅེ་ན། །བ་མིན་གང་ལ་སེལ་བ་འཇུག །བ་མིན་སེལ་བའང་དབང་པོ་ཡིས། །དང་པོར་ངེས་པ་མ་ཡིན་ན། །གཞན་ལ་སྒྲ་ནི་འཇུག་
མིན་ན། །ཅི་ཞིག་མཐོང་ནས་དེ་སྦྱོར་བྱེད། །སྔར་བསྟན་པ་ཡི་རྣམ་པ་ཡིས། །འདི་ལ་རྗེས་དཔག་ཀྱང་ཡོད་མིན། །འདི་དང་དེ་ནི་འབྲེལ་པ་དག །ཉམས་མྱོང་བར་ཡང་རིགས་པ་དག །བ་ལང་མིན་སྒྲ་བརྗོད་བྱ་བ། །ཉིད་དུ་ཇི་ལྟར་གོ་བར་བྱ། །གང་ལ་བ་ལང་སྒྲས་འབྲེལ་བ། །ཉམས་མྱོང་ཚེ་ན་མཐོང་བ་མིན། །བ་ལང་རིལ་པོ་གཅིག་ཉིད་ལས། །གང་གཞན་ཡིན་པ་དེ་ཐམས་ཅད། །དེ་བཞིན་གསལ་བ་ཞེས་བྱར་བརྗོད། །སྤྱི་ཡི་བརྗོད་བྱར་མི་འགྱུར་རོ། །གྲུབ་ཀྱང་གསལ་བྱ་བླང་མིན་པ། །བ་ལང་དགག་བདག་ཉིད་ཀྱང་དེ། །དགག་པའི་ཚིག་གིས་གང་འགེགས་པའི། །བ་ལང་དེ་ཉིད་འདིར་སྨྲ་དགོས། །བ་ལང་མིན་ལས་ལོག་པ་དག་དེ། །ཞེ་ན་གཅིག་ལ་གཅིག་བརྟེན་འགྱུར། །བ་ལང་གྲུབ་པས་སེལ་འདོད་ཡིན། །ཞེ་ན་སེལ་བར་རྟོག་པ་བརྫུན། །བ་ལང་མ་གྲུབ་བ་ལང་མིན། །དེ་མེད་བ་ལང་ག་ལ་ཡོད། །རྟེན་དང་བརྟེན་པར་གནས་ལ་སོགས། །འབྲེལ་བའང་མེད་པ་དག་ལ་མིན། །ཐུན་མོང་མིན་པ་དངོས་པོ་ནི། །སེལ་བ་ཡིས་ནི་གོ་བྱ་མིན། །དངོས་པོ་དང་ནི་དངོས་མེད་ལ། །འབྲེལ་པ་ཇི་ལྟར་བརྟག་བྱ་མིན། །རང་གི་ངོ་བོ་མེད་ཙམ་གྱིས། །ཅུང་ཟད་བྱེ་བྲག་བྱེད་འགྱུར་མིན། །རང་བློ་གང་གིས་བྱེ་བྲག་ཏུ། །གསལ་བར་བྱ་སྟེ་བྱེ་བྲག་སྟེ། །རྟ་སོགས་སྒྲ་རྣམས་ལས་བྱུང་བའི། །སེལ་བ་རྟོག་བྱེད་མ་ཡིན་ནོ། །འདིར་ནི་བྱེ་བྲག་ཏུ་བྱའི་བློ། །བྱེ་བྲག་མ་གཏོགས་ལ་མི་འདོད། །གཞན་གྱི་དངོས་ལས་གཞན་འདྲ་བ། །བྱེད་མིན་ཤེས་པའི་བྱེ་བྲག་གི །གཞན་འདྲ་བ་ཡི་ཤེས་པ་དེ། །ཇི་ལྟར་བྱེ་བྲག་ཏུ་བརྗོད་པ། །འོན་ཏེ་བྱེ་བྲག་ཏུ་བྱ་བའང༌། །གཞན་ལ་བྱེ་བྲག་ཏུ་རྟོག་ན། །དེ་ལྟ་ཡིན་ན་གང་ཅུང་ཟད། །ཐམས་ཅད་བྱེ་བྲག་ཏུ་ཐལ་འགྱུར། །མེད་པ་གོ་བྱའི་ངོ་བོ་ཡིས། །དངོས་སུ་བྱེ་བྲག་བྱ་བ་མེད། །དེ་ཕྱིར་སེལ་བས་བྱེ་བྲག་ཏུ། །བྱས་དངོས་ཁྱེད་ལ་བརྗོད་བྱ་མིན། །གལ་ཏེ་སེལ་བ་མ་གཏོགས་པར། །སྒྲ་དང་རྟགས་དག་འཇུག་རིགས་ན། །དེ་བཞིན་ཤེས་པ་པོའི་བློ་ཡང༌། །དངོས་པོ་ལ་ནི་དམིགས་པར་འགྱུར། །ཐུན་མོང་མ་ཡིན་དངོས་པོ་ལ། །བློ་ནི་རྣམ་གནས་མ་ཡིན་ཏེ། །རྣམ་རྟོག་མེད་པ་ཉིད་ཀྱི་ཕྱིར། །དེ་ནི་གོ་བྱར་རིགས་མ་ཡིན། །སྒྲ་ཡི་གོ་བྱའང་བྱེ་བྲག་ཏུ། །
བྱ་བ་ཡིན་ཞེས་བསྒྲུབ་པར་དཀའ། །དེས་ནི་སྒྲ་དང་བློ་དག་ནི། །ཡུལ་ནི་སྤྱི་ཡིན་པར་འདོད་བྱ། །གང་ཚེ་བསལ་བ་རྣམས་སྒྲ་ཡིས། །བརྗོད་བྱ་མིན་ཕྱིར་བསལ་བྱ་མིན། །དེ་ཚེ་སྤྱི་ནི་གསལ་བྱ་དེ། །དེ་ན་དངོས་ཉིད་སེལ་བ་ཡང༌། །མེད་པ་རྣམས་ནི་བསལ་བྱ་མིན། །མེད་པ་དོར་ལས་མེད་ཡིན་ན། །སེལ་བ་གཞན་ལས་སེལ་བ་ནི། །བསལ་ཕྱིར་སྤྱི་ནི་དངོས་པོ་ཡིན། །གལ་ཏེ་མེད་པ་གང་ཡིན་པ། །མེད་པ་དེ་དང་མི་འདྲ་ན། །དངོས་པོ་ཉིད་འགྱུར་མིན་ཞེ་ན། །བ་ལང་བ་ལང་མིན་ཐལ་འགྱུར། །གལ་ཏེ་འང་སྒྲ་གཞན་རྣམས་ལ་ཡང༌། །དངོས་སུ་གསལ་བྱ་ཉིད་འགྱུར་ན། །ཡོད་སྒྲ་མེད་པར་བརྗོད་པ་ལས། །ཐ་དད་བསལ་བྱར་འདོད་པ་མིན། །དེ་ལ་མེད་པ་དངོས་ཉིད་དུ། །འགྱུར་ཕྱིར་ངལ་བ་ཆེན་པོར་འགྱུར། །དེ་མ་གྲུབ་ན་ཡོད་མི་འགྲུབ། །གྲུབ་ནའང་རབ་ཏུ་འགྲུབ་པར་འགྱུར། བག་ཆགས་དབྱེ་བས་ཕྱེ་བ་ཡིས། །ཡོད་པའི་དངོས་དང་སེལ་རྣམས་སུ། །རྟོག་པའི་རིགས་པ་མ་ཡིན་ཏེ། །དངོས་མེད་ཉིད་ལ་བག་ཆགས་མེད། །ཁྱེད་ཀྱི་སྒྲ་ཡི་དབྱེ་བ་ཡང༌། །དེ་ཡི་རྒྱུ་མཚན་མ་མཐོང་སྟེ། །ཐུན་མོང་མིན་སྒྲ་རྗོད་བྱེད་ཉིད། །མ་ཡིན་སྔར་མ་མཐོང་ཕྱིར་རོ། །དེ་ལ་སྒྲ་གཞན་སེལ་བ་ལ། །སྤྱིར་ནི་ཀུན་དུ་རྟོག་བྱེད་ན། །དེ་བཞིན་དངོས་མེད་ངོ་བོའི་ཕྱིར། །སྒྲ་ཡི་དབྱེ་བ་བརྟག་པ་མིན། །ཚིག་རྣམས་ཇི་ལྟ་དེ་བཞིན་དུ། །བརྗོད་བྱ་རྗོད་བྱེད་དག་ཀྱང་ངོ༌། །གསལ་བྱའི་དབྱེ་བ་ཐ་དད་པ། །ཡོད་པར་སྟོན་པ་འང་མ་ཡིན་ཞིང༌། །སེལ་བ་གོ་བྱ་གོ་བྱེད་དུ། །ཁྱེད་ཀྱི་ཕྱོགས་ལ་མི་འགྱུར་ཏེ། །དངོས་པོ་མིན་ཕྱིར་ནམ་མཁའ་ཡི། །མེ་ཏོག་རི་བོང་རྭ་བཞིན་ནོ། །གལ་ཏེ་ཆར་དང་སྤྲིན་མེད་པར། །མཐོང་བས་མ་ངེས་པར་སྨྲ་ན། །ཁོ་བོའི་ཕྱོགས་ལ་དངོས་ཡོད་ཉིད། །ཁྱེད་ཕྱོགས་གལ་ཏེའང་ག་ལ་ཡོད། །འགའ་ཞིག་སྒྲ་ཡི་དོན་སྒྲུབ་པའི། །ངོ་བོར་ཁས་ལེན་མི་བྱེད་པ། །དེ་ལ་ལྡོག་པའང་གྲུབ་མིན་ཏེ། །དེ་ནི་དེ་སྔོན་འགྲོ་ཕྱིར་རོ། །གལ་ཏེ་ཡང་ནི་སེལ་བ་ཙམ། །བརྗོད་བྱ་ཉིད་དུ་ཁས་ལེན་ནི། །སྨྲ་བ་རྣམས་ལ་ཨུཏྤལ་སྔོ། །སོགས་སྒྲས་སོགས་པའི་དོན་དུ་འགྱུར། །བྱེ་བྲག་བྱེད་དང་བྱེ་བྲག་དག །གཞི་མཐུན་པ་དག་མི་འགྲུབ་སྟེ། །སྔོན་པོ་ཉིད་མིན་ཞིག་
པ་ན། །ཨུཏྤལ་མིན་པ་ཞིག་པ་མིན། །ཅིག་ཤོས་ཀྱང་མིན་དེ་ཡི་ཕྱིར། །བརྗོད་བྱ་ལ་ནི་ལྟོས་མིན་པའི། །སྒྲ་དག་བྱེ་བྲག་བྱ་བ་དང༌། །བྱེ་བྲག་བྱེད་པར་འགྱུར་བའང་མིན། །སེལ་བ་དག་ནི་གཞི་མཐུན་ལས། །མ་ཡིན་ཐ་དད་ཡིན་ཕྱིར་རོ། །དོན་དེ་ལས་འདོད་མིན་ཞེ་ན། །བརྟེན་པ་དེ་དག་ཇི་ལྟ་བུར། །ཐུན་མོང་མིན་པའི་དངོས་པོ་ནི། །གོ་བྱ་མིན་གཞན་ཁྱེད་ལ་མེད། །གོ་བྱ་མིན་པའི་དོན་གཅིག་ཉིད། །གང་དུ་སྒྲ་དག་སྦྱོར་བར་བྱེད། །འོན་ཏེའང་གཞན་སེལ་ལྡན་དངོས་པོ། །བརྗོད་བྱ་ཡིན་པར་སྨྲ་བ་ན། །དེ་ལའང་གཞན་དབང་ཡིན་པའི་ཕྱིར། །སྒྲ་ཡིས་ཁྱབ་པ་རྙེད་པར་དཀའ། །རྟགས་དང་གྲངས་སོགས་འབྲེལ་པ་ནི། །སེལ་བ་ལ་ནི་ཡོད་མ་ཡིན། །གསལ་བའང་བརྡར་བྱ་མ་ཡིན་ཕྱིར། །དེའི་སྒོ་ནས་ཀྱང་དེ་ཡོད་མིན། །ཨཀྵ་ཏ་ཡང་གཞན་ལས་ནི། །ལོག་པར་ཀུན་ཏུ་ཤེས་པ་མེད། །མ་ཡིན་པར་ནི་དགག་བྱ་བའི། །ངོ་བོ་དེ་ལ་ཡོད་མ་ཡིན།། མིན་པ་མིན་ཞེས་སྨྲ་བ་ཡང༌། །དགག་པ་ཡང་ནི་འགེགས་པ་སྟེ། །འཚོད་བྱེད་ཅེས་པ་མི་དགག་པའང༌། །རང་དངོས་ཉིད་ཀྱིས་གནས་པ་ཡིན། །བསྒྲུབ་བྱ་ཉིད་དུ་ཤེས་པ་དང༌། །དེ་བཞིན་བྱུང་གྱུར་སོགས་མཐོང་བའང༌། །སེལ་བ་གྲུབ་འདིར་ཡིན་པའི་ཕྱིར། །རྒྱུ་མཚན་མེད་པར་ཐལ་བར་འགྱུར། །སྒྲུབ་པ་ལ་སོགས་དོན་སོགས་ཀྱང༌། །གཞན་སེལ་བ་ལ་མཐོང་མིན་པ། །དགག་པ་ལ་ཡང་དགག་ཡོད་ན། །སེལ་བ་ཅི་འདྲར་འགྱུར་བ་ཡིན། །དང་ལ་སོགས་པའང་དགག་པ་དང༌། །སྦྱོར་བ་མེད་ཕྱིར་སེལ་བ་ཡིན། །ངག་དོན་ལས་གཞན་སེལ་བ་ཡང༌། །སྨྲ་བར་ནུས་པ་མ་ཡིན་ནོ། །གཞན་སེལ་མིན་བ་སྒྲ་ལ་སོགས། །བརྗོད་བྱར་མཐོང་བ་མ་ཡིན་ནོ། །གཞལ་བྱ་ཤེས་བྱ་སོགས་ལས་ནི། །བསལ་བྱ་ཉིད་ནི་གང་ལ་ཡིན། །བསལ་བར་བྱ་འདི་བརྟག་འདི་ཡང༌། །དངོས་པོ་ཉིད་བརྟག་ཡིན་ན་བཟང༌། །ཤེས་པའི་རྣམ་པ་བཀག་པས་ཀྱང༌། །ནང་གི་དོན་ནི་བརྗོད་བྱ་མིན། །སེལ་བའང་མིན་ཕྱིར་དེ་རྣམས་ལ། །སེལ་བ་ཡང་མི་གྲུབ་པ་མིན། །དེ་ལྟར་སྒྲ་རྣམས་ལ་སོགས་ནི། །བསལ་བྱ་ལ་ནི་མཐོང་མིན་ནོ། །ཐམས་ཅད་སྒྲ་ནི་དོན་གང་གིས། །རྣམ་པར་གཅད་བྱར་རྟོག་པར་བྱེད། །ཐམས་ཅད་མིན་པར་ཅུང་ཟད་ཀྱང༌། །
མེད་པས་གང་ཞིག་བསལ་བྱར་འགྱུར། །གཅིག་སོགས་ཐམས་ཅད་མིན་ཞེ་ན། །རང་དོན་སེལ་བར་ཐལ་བར་འགྱུར། །ཆ་ཤས་རྣམས་ནི་བཀག་ཕྱིར་ཡང༌། །ལོགས་སུ་ཆ་ཤས་ཅན་མིན་འདོད། །དེ་བཞིན་བསྡུས་པའི་སྒྲ་དེ་རྣམས། །བསྡུས་པ་ཅན་ནི་རྣམ་བསལ་བས། །གཞན་རྣམས་ཀུན་ཀྱང་མི་འདོད་པས། །དོན་མེད་པ་ཅན་ཐོབ་པར་འགྱུར། །གཉིས་སོགས་སྒྲ་འདིར་འདོད་ན་ཡང༌། །ཡང་དག་བསྡུས་པའི་སྤྱོད་ཡུལ་ཅན། །གཅིག་ལ་སོགས་པ་བཀག་པ་ན། །དེ་ལྟའི་རྣམ་པ་དེར་མི་འགྱུར། །བ་ལང་མིན་མིན་སེལ་བ་གང༌། །བ་ལང་སྒྲ་ཡི་དོན་དུ་བརྗོད། །དེ་ཅི་ཡོད་པའམ་ཡང་ན་མེད། །ཡོད་ནའང་བའམ་བ་ཡིན་མིན། །བ་ལང་ཞེ་ན་མིང་རྩོད་མིན། །དོན་དུ་བསྒྲུབ་པའི་མཚན་ཉིད་ཡིན། །གོ་བྱའི་བརྗོད་བྱའི་ཨ་གོ་ཉིད། །ཡིན་ན་སྒྲའི་དོན་ཤིན་ཏུ་མཚན། །མེད་ལ་འདི་ཡང་མི་རིགས་ཏེ། །དོན་ལ་སྦྱོར་བ་སོགས་མེད་ཕྱིར། །བ་ལང་སྒྲ་ལས་སུ་ཞིག་ཀྱང༌། །མེད་པར་གོ་བ་མ་ཡིན་ནོ། །བ་ལང་སྒྲ་དོན་བ་མིན་པ། །མིན་ན་ཅི་ཕྱིར་སེལ་བར་འདོད། །གང་གིས་བ་ལང་བ་མིན་པ། །བཞེད་ཅིང་གང་གིས་གསལ་བྱར་བྱེད། །བ་ལང་སྒྲ་ནི་བ་མིན་པའི། །གང་འདིའི་སེལ་དོན་དུ་སྨྲ་ན། །དེ་ཅི་བ་ལང་ལས་གཞན་པའམ། །གཞན་པ་མིན་པར་ཁས་ལེན་བྱེད། །ཐ་དད་ནའང་འདིར་རྟེན་པར་ནི། །འགྱུར་བའམ་ཡང་ན་མི་རྟེན་འགྱུར། །རྟེན་པ་ཡིན་ན་ཡོན་ཏན་ཉིད། །ཐོབ་ཀྱི་རྫས་ཀྱི་ཚིག་ཡིན་ནོ། །དེ་ཕྱིར་བ་ལང་ཞེས་བྱའི་སྒྲས། །ཡོན་ཏན་ཙམ་ཞིག་རྗོད་བྱེད་བས། །བ་ལང་འགྲོ་དང་འདུག་ཅེས་པའི། །གཞི་མཐུན་པ་ཉིད་དུ་མི་འགྱུར། །གང་གིས་བ་མིན་དགག་འདི་ལ། །བ་ལང་ཞེས་བྱའི་སྒྲ་རྗོད་བྱེད། །འོན་ཏེ་འདི་ནི་ཐ་དད་པར། །མིན་ལས་གཞན་སེལ་པར་ཁྱེད་འདོད། །དེ་ཕྱིར་འདིས་ནི་བ་ལང་ཉིད། །ཐོབ་ཕྱིར་ལྷག་པ་ཅི་ཞིག་སྨྲས། །དངོས་པོ་རེ་རེའི་སེལ་བ་འདི། །གཅིག་པའམ་ཡང་ན་དུ་མར་འགྱུར། །གཅིག་པ་བ་ལང་མང་ཡོད་ན། །འདི་ནི་བ་ལང་ཉིད་དུ་འགྱུར། །དུ་མ་ཉིད་ནའང་གོང་དུ་བཞིན། །མཐའ་ཡས་པར་ནི་ཐལ་བར་འགྱུར། །དེས་ན་བྱེ་བྲག་བཞིན་དུ་འདི། །བརྗོད་བྱ་ཉིད་དུ་རིགས་པ་མིན། །གཞན་སེལ་
བའམ་བརྗོད་བྱའམ་ཅི། །བརྗོད་བྱ་མིན་པར་འདོད་པ་ཡིན། །བརྗོད་བྱའང་བསྒྲུབ་པའི་ངོ་བོས་སམ། །ཡང་ན་གཞན་ནི་འགེགས་བ་ཡིན། །སྒྲུབ་པའི་བདག་ཉིད་བརྗོད་བྱ་ན། །གཅིག་ཏུ་ལྟ་བ་བཏང་བ་ཡིན། །ཐམས་ཅད་དུ་ཡང་གཞན་སེལ་འདི། །སྒྲ་ཡི་དོན་ཅེས་སྨྲ་བ་ན། །གཞན་སེལ་མིན་པ་འཇིག་པ་ཡིས། །གལ་ཏེ་གཞན་སེལ་བརྗོད་བྱ་ན། །དེ་ལ་དེ་བཞིན་དུ་འདོད་པས། །ཐུག་པ་མེད་པར་ཁྱེད་ལ་འགྱུར། །འོན་ཏེ་གཞན་སེལ་བ་འདི་ཉིད། །བརྗོད་བྱ་མིན་པར་ཁྱེད་འདོད་ན། །དེས་ན་ཁྱེད་ཀྱི་གཞན་སེལ་བྱེད། །སྒྲ་ཡི་ཚིག་ལ་གནོད་བྱེད་ཡིན། །གཞན་ཡང་གཅིག་ཉིད་རྟག་པ་ཉིད། །སོ་སོ་ལ་ནི་འདུ་བ་ཉིད། །དངོས་མེད་པར་བརྗོད་སེལ་རྣམས་ལ། །སྨྲ་བ་སྣལ་མེད་སྣམ་བུ་བཞིན། །དེ་ཕྱིར་སྒྲ་གང་ཁོ་ན་ལ། །དགག་སྦྱོར་དེ་ལ་གཞན་ལས་ནི། །ལྡོག་པའི་ཆ་ནི་འབའ་ཞིག་འགྱུར། །རང་ཉིད་གཞན་དུ་གོ་བྱེད་ཡིན། །གཞན་སེལ་ཡོངས་སུ་མ་ཤེས་ཕྱིར། །དེ་དག་དེ་ལྟའི་ལྟ་ངན་འཆང༌། །ངན་པའི་བདག་ཉིད་རང་ཉིད་འཇོམས། །གཞན་རྣམས་ཀྱང་ནི་འཇིགས་པར་བྱེད། །འདི་ལྟར་སེལ་བ་རྣམ་གཉིས་ཏེ། །མ་ཡིན་དགག་དང་མེད་པའོ། །མ་ཡིན་དགག་པའང་རྣམ་གཉིས་ཏེ། །བློ་དང་དོན་གྱི་དབྱེ་བས་སོ། །གཅིག་ཏུ་སྲེ་བར་བྱེད་པ་ཡིན། །གཏན་ཚིགས་སྔར་སྨྲས་གང་ཡིན་རྣམས། །འཇིགས་མེད་ལ་སོགས་དོན་མཚུངས་པ། །རང་བཞིན་གྱིས་གཞན་ལས་ཐ་དད། །དེར་རྟེན་ཤེས་པའི་སྣང་བ་གང༌། །དོན་གྱི་གཟུགས་བརྙན་རྟོག་པ་ཅན། །དོན་གྱི་བདག་ཉིད་མིན་པ་ལ། །དོན་ཞེས་བྱ་བར་ངེས་པ་ཡིན། །སྣང་བ་གཞན་ལས་ཐ་དད་ཕྱིར། །གཞན་ལས་ལོག་པའི་དངོས་པོ་ནི། །ཐོབ་པའི་རྒྱུ་ལས་མ་འདྲེས་པ། །དངོས་པོའི་སྒོ་ནས་འོངས་པ་སྟེ། །རིགས་མི་མཐུན་བ་ལས་ལྡོག་པ། །དེ་འབྲས་གང་ཡིན་རང་མཚན་ཉིད། །དེ་ལ་དེ་ཡི་བདག་ཉིད་དུ། །ངེས་ཕྱིར་འདི་ནི་འཁྲུལ་པ་ཡིན། །དེ་ལ་འདི་ནི་གཞན་སེལ་ཞེས། །མིང་དུ་བསྟན་པ་རྒྱུར་བཅས་པའོ། །གཞན་དང་མ་འདྲེས་པར་ཡོད་པས། །རང་གི་མཚན་ཉིད་ཀྱང་དེའི་རྒྱུ། །བ་ལང་འདི་ལ་བ་མིན་མེད། །མེད་པར་དགག་པ་ཉིད་ཡིན་ཞེས། །གཞན་སེལ་བ་འདི་རབ་གསལ་བ། །ཁོ་ནར་ཤེས་པར་བྱ་བ་ཡིན། །དེ་ལ་འདི་ནི་དང་པོ་ཡིན། །སེལ་
བར་སྒྲ་ལས་རྟོགས་པ་སྟེ། །སྒྲ་ལས་ཡང་དག་བྱུང་བའི་བློ། །ཕྱི་ཡི་དོན་དུ་ཞེན་པའོ། །དེ་ཡི་ངོ་བོ་གཟུགས་བརྙན་གྱི། །སྒོ་ནི་སྒྲ་ལས་སྐྱེས་པ་སྟེ། །བརྗོད་བྱ་རྗོད་བྱེད་དངོས་འདི་ནི། །རྒྱུ་འབྲས་བདག་ཉིད་ཅན་གྲུབ་པའོ། །དངོས་ཀྱི་རྣམ་པ་གཅིག་ཉིད་ལ། །དེ་ལྟར་རབ་ཏུ་བསྒྲུབས་པ་ཡི། །ཤུགས་ཀྱིས་མེད་པར་དགག་པ་ཡང༌། །རབ་ཏུ་རྟོགས་པར་འགྱུར་བ་ཡིན། །དེ་ཡི་བདག་ཉིད་གཞན་བདག་ཉིད། །མིན་ཞིང་འབྲེལ་ཡོད་དངོས་རྣམས་ནི། །ལྡོག་པའི་དངོས་པོ་རྟོགས་པ་ཡང༌། །དོན་གྱིས་གོ་འགྱུར་དེ་ཡི་ཕྱིར། །དེ་ཉིད་ཀྱིས་ན་སྒྲ་འདི་ཡང༌། །རང་གི་དོན་དུ་བརྟགས་པ་ཡིན། །སྒྲ་འདི་རྣམས་ཀྱིས་དངོས་སུ་མིན། །སེལ་བ་རྣམ་པ་གཉིས་བརྟན་ན། །དོན་གཞན་རྣམ་པར་གཅོད་པར་ནི། །བྱེད་པ་སྒྲར་ནི་བརྗོད་པ་ཡིན། །རང་དོན་མངོན་པར་རྗོད་བྱེད་པ། །ཞེས་བྱ་དེ་ནི་འགལ་བ་ཡིན། །ཕྱི་ཡི་དོན་དུ་ཞེན་པ་ཡིས། །འཇུག་པ་གང་ལས་རྣམ་རྟོག་གི། གཟུགས་བརྙན་འདི་ནི་སྐྱེད་བྱེད་པ། །དེ་ཡིས་བརྗོད་ཅེས་བསྟན་པ་ཡིན། །རང་གི་མཚན་ཉིད་ཀྱི་བདག་ཉིད། །དབྱེར་མེད་པ་ལ་འདི་རེག་མིན། །དེ་ཙམ་ཆ་ལ་སོགས་པ་ལས། །གཞན་ནི་བརྗོད་པར་བྱ་བ་མིན། །གཟུགས་བརྙན་དེ་ནི་རྟོགས་པ་ཡི། །ཤུགས་ཀྱིས་གཞན་དང་མ་འདྲེས་པ། །འདི་ནི་རྟོགས་འགྱུར་གང་གི་ཕྱིར། །འདི་གཞན་བདག་ནི་མིན་ཕྱིར་རོ། །ཉིན་མོའི་བཟའ་བའི་ཚིག་སོགས་བཞིན། །འདི་ཡི་འབྲས་བུའང་གཉིས་ཡིན་ཏེ། །དངོས་སུ་བ་དང་ཤུགས་ཀྱིས་ཏེ། །གང་ཕྱིར་རྗེས་འགྲོ་ལྡོག་པར་ལྡན། །དེ་ཕྱིར་སྒྲ་ནི་དངོས་པོ་རྣམས། །རང་དོན་རྗོད་པར་བྱེད་པ་དང། །གཞན་ལས་ཀྱང་ནི་ལྡོག་པ་ཡང༌། །གཉིས་ཀ་གཙོ་བོར་བྱེད་མ་ཡིན། །སོ་སོར་སྣང་བའང་དེ་འདྲ་བ། །སྤྱི་དེ་བ་ལང་ཉིད་དུ་འདོད། །བ་ལང་ཁྲ་བོ་སོགས་ཀུན་ལ། །མཚུངས་པ་ཉིད་དུ་ངེས་ཕྱིར་རོ། །དངོས་པོའི་སྙམ་པའི་ཞེན་པ་ལས། །དེ་ལ་དངོས་པོ་ཞེས་ཀྱང་བརྗོད། །ཤེས་པ་དེ་ནི་གློ་བུར་དུ། །རང་ས་བོན་ལས་འཁྲུལ་པ་སྐྱེ། །དེ་ཡི་རྣམ་པ་དེ་ཉིད་ཀྱི། །སྒྲ་ཡི་དོན་ཁས་ལེན་པར་བརྗོད། །སྤྱི་ཡི་དངོས་པོ་ངོ་བོར་ཡང༌། །དེ་ལྟར་འཁྲུལ་པས་ངེས་པ་ཡིན། །སྤྱི་ཡི་དངོས་པོ་དངོས་ཉིད་དུ། །དམ་པའི་དོན་དུ་རིགས་མ་ཡིན། །བློ་ལས་ཐ་དད་མིན་ངོ་བོ། །ཇི་ལྟར་དོན་
གཞན་ལས་འོངས་ཡིན། །གལ་ཏེའང་ཐ་དད་མིན་པ་འདི། །བློ་ཡི་རྣམ་པའི་ངོ་བོ་ཡིན། །དེ་ལྟར་ཕྱི་ཡི་དངོས་ཉིད་དུ། །འཁྲུལ་པས་དེ་ནི་ངེས་བ་ཡིན། །དེ་ནི་དོན་མིན་མི་ལྟོས་ཉིད། །དེ་ནི་བརྒྱུད་པས་འོངས་པ་ཡིན། །དེས་ན་བདག་ཉིད་དངོས་པོ་ཉིད། །ཡོད་ཉིད་མིན་པར་བསྟན་པ་ཡིན། །གཟུགས་བརྙན་བདག་ཉིད་ཅན་སེལ་བ། །ཚིག་ལས་ཀྱང་ནི་སྐྱེས་པ་སྟེ། །སོ་སོར་སྣང་བརྗོད་གློ་བུར་བཞིན། །ཁོ་བོ་ཅག་ལ་ཚིག་དོན་འདི། །རང་གི་ངོ་བོར་གྲུབ་ཙམ་ལས། །གཞན་གྱི་ཆ་ནི་དེ་འཛིན་ཡིན། །བློ་གཞན་རྣམ་པར་གཅོད་བྱེད་པ། །དེས་ན་བློ་ནི་ཤེས་བྱས་ཏེ། །ཇི་ལྟར་ཡོད་པ་མིན་པ་ཉིད། །དམ་པའི་དོན་དུ་ཐ་དད་མིན། །ཐ་དད་མིན་པའང་དེ་བཞིན་ཞེས། །གང་གིས་རྣམ་གྲངས་ཉིད་དུ་འགྱུར། །ཐ་དད་མིན་པའང་གཅིག་དངོས་ཉིད། །དངོས་མེད་ལ་དེ་ག་ལ་ཡོད། །དོན་གཅིག་ཉིད་དུ་རྗོད་བྱེད་པས། །རྣམ་གྲངས་པ་ནི་ཐོབ་པར་འགྱུར། །མེད་པའི་ངོ་བོའང་གཅིག་ཉིད་དུ། །རྟོག་པས་སྤྲུལ་བ་ཇི་བཞིན་དུ། །ཐ་དད་པའང་དེ་བཞིན་ནོ། །དེ་ལས་རྣམ་གྲངས་ག་ལ་ཡིན། །རྗོད་བྱེད་ལ་ནི་དངོས་སུ་བའི། །རྣམ་གྲངས་གཉིས་མིན་པའང་མེད། །བརྗོད་བྱའང་དེ་རྣམས་ལ་མེད་པར། །རྣམ་པ་དུ་མར་བསྟན་པ་ཡིན། །འོན་ཀྱང་དུ་མའང་བྱ་བ་གཅིག །གལ་ཏེ་བྱེད་པར་མཐོང་བ་ན། །དེ་ལ་ཆོས་གཅིག་ཏུ་སྒྲོ་བཏགས། །སྣ་གཅིག་ཀྱང་ནི་འཇུག་པ་ཡིན། །དཔེར་ན་མིག་སོགས་འགའ་ཞིག་ཏུ། །གཟུགས་ཀྱི་རྣམ་ཤེས་གཅིག་འབྲས་བྱེད། །གཅིག་པའི་དངོས་ཉིད་མེད་ན་ཡང༌། །འགའ་དག་ཚ་སོགས་སྒྲ་གཅིག་བྱེད། །བུམ་སོགས་ཆུ་སོགས་འཛིན་ལ་སོགས། །བྱ་བ་གང་ཡིན་བྱེད་པ་ན། །ཡུལ་དེའི་ཤེས་པ་གང་ཡིན་པ། །གལ་ཏེའང་ཐ་དད་བ་དེ་གཉིས། །གཅིག་ཏུ་སྲེ་བར་བྱེད་པ་ཡི། །ཆུ་ཉིད་ཡིན་ཕྱིར་གཅིག་ཅེས་བརྗོད། །ཤེས་པ་བཞིན་དུའང་དེ་ཡི་རྒྱུ། །ཡིན་ཕྱིར་དོན་ལ་དབྱེ་བ་མེད། །དེ་ལ་སྤྱི་ཡི་ཚིག་གིས་ནི། །བུམ་པ་ལ་སོགས་བརྗོད་པའི་སྒྲ། །རིགས་མི་འདྲ་བ་རྣམས་གཅོད་པ། །གཟུགས་བརྙན་གཅིག་གི་རྒྱུ་རྣམས་སོ། །དེ་བཞིན་གཅིག་ཉིད་དོན་དུ་མའི། །བྱེད་ཕྱིར་དུ་མ་ཞེས་བརྗོད་དེ། །དེ་འབྲས་མིན་པ་ལས་ལྡོག་པས། །མང་པོ་ཉིད་དུ་ཡོངས་བརྟག་པའོ། །དཔེར་ན་ཐོགས་
པ་དང་བཅས་གཟུགས། །བསྟན་དུ་ཡོད་པ་ཡིན་ན་ཡང༌། །དཔེར་ན་སྒྲ་ནི་བརྩལ་མ་ཐག །འབྱུང་བའི་ཤེས་དང་མཉན་བྱ་ཡིན། །དེ་རྒྱུ་མིན་པའི་དབྱེ་བ་ཡིས། །ཁ་ཅིག་ལ་སྒྲ་འཇུག་པ་ཡིན། །དཔེར་ན་བརྩལ་ལས་འབྱུང་སྒྲ་དང༌། །དཔེར་ན་སྦྲང་མའི་སྦྲང་རྩི་ཡང༌། །དེ་འབྲས་རྒྱུ་དང་བྲལ་བ་ལས། །ཁ་ཅིག་ལ་འདིར་སྒྲ་ཞེས་བརྗོད། །མཉན་བྱ་མིན་དཔེར་གཟུགས་བཞིན་དང༌། །མ་བརྩལ་བར་འབྱུང་གློག་བཞིན་ནོ། །དེ་ལྟ་བུ་སོགས་དབྱེ་བ་ཡིས། །ཐ་དད་དོན་གྱི་རྒྱུ་མཚན་ནི། །ལྡོག་པ་རྣམས་ལས་བརྟག་བྱ་སྟེ། །དེ་བཞིན་དེ་ལ་བརྟེན་པའི་སྒྲ། །དེ་བཞིན་བརྡ་ཉིད་དེ་ཡི་ཕྱིར། །མ་འདྲེས་དོན་དུ་བརྗོད་བྱ་ཡིན། །སྒྲ་རྣམས་ཐ་དད་པར་འཇུག་ལ། །ང་ལ་རྣམ་གྲངས་འགྱུར་མ་ཡིན། །མང་དང་ཉུང་བའི་ཡུལ་རྣམས་ཀྱི། །བརྡ་དེ་ཡི་ནི་རྗེས་འབྲངས་ནས། །སྤྱི་དང་བྱེ་བྲག་གིས་བརྗོད་བྱ། །དེ་རྣམས་ལ་ཡང་འགལ་བ་མེད། །དོན་དེ་རྣམས་ཀྱི་ལྡོག་པ་རྣམས། །རྣམ་རྟོག་བཟོ་ཡིས་སྤྲུལ་པ་སྟེ། །རྟེན་དང་བསལ་བྱའི་དབྱེ་བ་ཡིས། །ཕྱེ་བ་དོན་དམ་པར་ཡོད་མིན། །ཕྱི་ཡི་དངོས་ཉིད་དེ་རྣམས་ནི། །བརྟགས་པ་ཡིན་གྱི་དངོས་སུ་མིན། །དབྱེ་དང་དབྱེ་མིན་དངོས་པོ་ལ། །དེ་ཁོ་ན་ཉིད་ཀྱིས་གནས་མིན། །རང་ས་བོན་གྱི་དུ་མ་ལས། །བྲལ་བའི་དངོས་པོའི་བརྡ་རྣམས་ཀྱིས། །ནུས་པའི་རྣམ་རྟོག་གིས་དབྱེ་བ། །དེ་ཡི་ངོ་བོར་ངེས་པ་ཡིན། །རང་གི་མཚན་ཉིད་བདག་ཉིད་དོན། །གཅིག་གི་བདག་ཉིད་དུ་མིན་ཞིང༌། །དུམ་བུར་བྱེད་པའང་མ་ཡིན་གྱི། །འདི་ནི་རྣམ་རྟོག་འཁྲུལ་པའོ། །ཆོས་གཅིག་རྗེས་འགྲོ་མེད་པར་ཡང༌། །བསལ་བྱ་དང་ནི་སེལ་བའི་ཡུལ། །མཚན་ཉིད་མི་འདྲར་རྟོགས་མིན་པ། །དབྱེ་བ་མེད་པར་བསྲེ་བས་སོ། །གཅིག་ཏུ་བསྲེ་བ་ཤེས་པ་ནི། །རང་བཞིན་གྱིས་ཀྱང་ཐ་དད་པའང༌། །ཁ་ཅིག་ལ་ནི་སྦྱོར་བ་ཡིན། །གཞན་པ་མིན་ཞེས་བསྒྲུབས་པ་ཡིན། །དེ་མིན་ངོ་བོ་ལས་བཟློག་པའི། །དངོས་པོ་ཙམ་གྱི་རང་མཚན་ཉིད། །གང་ཡིན་དེས་ནི་བྱས་པ་ཡི། །རྗེས་སུ་འགྲོ་བ་འགལ་བ་མེད། །གང་ན་འདུ་བ་མིན་པ་ལས། །ལྡོག་པའི་རང་གི་མཚན་ཉིད་ཡོད། །དེ་ན་མེ་མེད་ལས་ལྡོག་པ། །རང་གི་མཚན་ཉིད་ཡོད་པའོ། །དཔེར་ན་ཚང་བང་བཞིན་འདི་ལ། །དུ་བ་མིན་ལས་ལོག་ཡོད་
པ། །དེ་ཕྱིར་མེ་མིན་ལས་ལྡོག་པ། །འདི་ནི་ཡོད་པར་རང་མཚན་ཉིད། །མི་ཡི་རྭ་སོགས་མེད་པ་ལས། །ལྡོག་པ་གང་ཡིན་རང་མཚན་ཉིད། །དེ་ཀུན་བསྟན་པ་ལས་ཀྱང་ལྡོག །བློ་དང་མར་མེ་ལྟ་བུའོ། །དེ་བཞིན་སྒྲ་སོགས་རང་མཚན་ཉིད། །མེད་པའི་ངོ་བོ་འདི་ཡང་མིན། །དེ་ལྟར་དབྱེ་བས་མ་བསྟན་པ། །དེ་ལྟར་རྗེས་འགྲོར་འགྱུར་གཉིས་ཡིན། །དབྱེ་བ་བརྗོད་འདོད་མིན་པ་ཡང༌། །དེ་ཉིད་ཅེས་ནི་ཡོངས་སུ་བསྒྲགས། །སྤྱི་ཡི་མཚན་ཉིད་ཉིད་ཀྱི་ནི། །གཞན་མིན་མིན་འདོད་ཕྱིར་ཡང་ངོ༌། །ཁྲ་མོའི་བུ་ལས་ཐ་དད་པར། །སེར་སྐྱའི་བུ་དང་རྟར་མཚུངས་ན། །མྱུར་འགྲོ་ཡོངས་སུ་དོར་ནས་ནི། །བ་ལང་ཉིད་ལ་ཅི་ཕྱིར་འཇུག །དེ་གསལ་བྱེད་པར་ནུས་བདག་ཉིད། །གལ་ཏེ་དེ་ཉིད་ཡིན་འདོད་ན། །བསེ་བར་མཚུངས་པ་ཡིན་ན་ཡང༌། །ནུས་པ་དེ་ནི་རྟ་ཡི་མིན། །དེ་ལྟ་བུ་ཡི་བསྲེས་པ་ཡང༌། །དངོས་པོ་གང་ལ་ཡོད་གྱུར་པ། །དེ་ལ་བ་ལང་རིགས་མེད་ཀྱང༌། །བ་ལང་མིན་པ་སེལ་བ་འཇུག །བ་ལང་མིན་ལས་ལྡོག་དངོས་གང༌། །དེ་ནི་དབང་པོས་ངེས་པར་བྱེད། །གཟུགས་བརྙན་དུ་ནི་ངེས་པ་སྟེ། །རང་རིག་པས་ནི་རྟོགས་པའང་ཡིན། །འདི་མཐོང་བས་ནི་འཇིག་རྟེན་པ། །དེ་ལ་སྒྲ་ནི་སྦྱོར་བར་བྱེད། །འབྲེལ་པ་ཉམས་སུ་མྱོང་བར་ལའང༌། །དེས་ན་འདི་གསལ་བྱེད་པར་རིགས། །དེ་ལྟ་བུ་ཡི་བསྲེ་བ་ཡང༌། །དངོས་པོ་གང་ལ་མེད་གྱུར་པས། །བ་ལང་མན་སྒྲ་བརྗོད་བྱ་ཉིད། །དེ་ནི་གསལ་བར་རྟོགས་བྱེད་ཡིན། །སོ་སོའི་བསྲེ་བ་ཤེས་པ་ཡི། །བ་ལང་བ་ལང་མིན་པའང་འགྲུབ། །གཅིག་པུར་གྲུབ་པའི་སྒྲ་ཉིད་ནི། །ཇི་ལྟར་འདོད་བཞིན་དེ་སྦྱོར་བྱེད། །དངོས་པོའི་དབྱེ་བ་རིག་པ་ནི། །གཞན་འཛིན་པ་ལ་ལྟོས་མིན་པར། །དེ་ཕྱིར་གཅིག་ལ་གཅིག་བསྟན་པའི། །སྐྱོན་ནི་འདི་ལ་གནས་མེད་དོ། །ཕྱི་ཡི་དེ་ཉིད་མ་ཤེས་པའང༌། །རང་བཞིན་ཉིད་ལ་རྨོངས་ཕྱིར་འདི། །རང་རྣམ་པ་ལ་ཕྱིའི་ངོ་བོར། །སྒྲ་དང་བློ་ནི་ངེས་པར་བྱེད། །སྒྲས་ནི་དེ་ཙམ་དུ་བྱེད་ཀྱི། །དོན་ལ་སྒྲ་ནི་རེག་པའང་མིན། །བྱེ་བྲག་ཅན་གྱི་དོན་ནི་འགའ། །སེལ་བས་བརྗོད་པར་བྱ་བ་མིན། །དོན་གཞན་ལས་ནི་ལྡོག་པ་ལ། །བྱེ་བྲག་ཅན་ནི་ཡིན་ཞེས་ཀྱང༌། །མཚན་ཉིད་མཛད་པས་གང་གསུངས་པ། །དེ་ལ་བརྗོད་འདོད་དོན་འདི་ཡིན། །
གཞན་ལ་གཞན་པའི་དངོས་གང་ཡིན། །རྒྱུ་ཡིས་སམ་ནི་བྱེད་པ་ཡིས། །བྱེ་བྲག་ཅན་དེ་ཐ་དད་པས། །རིགས་དང་མ་འདྲེས་པར་འདྲེས་པར། །ཤིང་སོགས་སྒྲ་དེས་བརྗོད་པ་ཡིས། །ཤེས་པ་དེ་ནི་སྐྱེས་བ་ལས། །རིགས་ལ་སོགས་པ་དེ་འགོག་བྱེད། །གང་ཞིག་བློ་ལ་རྣམ་གནས་པ། །དེ་རྣམས་འདིར་བརྗོད་སྐྱེད་བྱེད་ཕྱིར། །ལྡོག་པ་ཡི་ནི་བྱེ་བྲག་ཅན། །དེ་རྣམས་འདས་མ་ཐག་བསྟན་པའོ། །དོན་གཞན་ལས་ནི་ལྡོག་པ་ཡིས། །དངོས་པོ་དེ་ཡི་ཆ་འགའ་ནི། །རྟོག་པ་ཡིན་ཞེས་གང་གསུངས་པ། །དེ་ནི་གཟུགས་བརྙན་ཉིད་ཡིན་ཏེ། །དོན་གཞན་ལས་ནི་ལྡོག་པ་ཡི། །དངོས་པོ་མཐོང་བ་ལ་བརྟེན་ནས། །འོངས་པ་དེ་ལ་སྒྲོ་བཏགས་ནས། །དེ་ཡི་ཆ་ཞེས་བསྟན་པ་ཡིན། །རྒྱུ་ཡི་དོན་དང་བྱེད་པའི་དོན། །དེས་ན་སྔར་བཞིན་བདག་ཉིད་ཀྱང༌། །གལ་ཏེ་དངོས་རིགས་མི་འདྲ་ལས། །ལྡོག་དང་དེ་དང་དེ་བཞིན་དུ། །བ་ལང་མིན་ལས་ལྡོག་གཞན་ཉིད། །དེ་ཡང་བདག་ཉིད་ལ་ཡོད་དེའོ། །ལྡོག་པར་བརྗོད་པའང་མེད་པ་ཉིད། །འབའ་ཞིག་ལས་ནི་ལྡོག་མིན་ཏེ། །དེ་ནི་བྱེ་བྲག་དངོས་ལས་ཀྱང༌། །ཡིན་ཕྱིར་དངོས་པོའི་བློ་མི་ཉམས། །དབྱེ་བར་བྱེ་བྲག་བྱེད་འདི་ཡང༌། །རྣམ་པར་རྟོག་པས་སྤྲུལ་པ་སྟེ། །དེ་ཕྱིར་ཆོས་འདི་ཉེར་འཛིན་པས། །བྱེ་བྲག་ལྡན་ཞིང་གཞག་པ་ཡིན། །དེས་ན་དེ་ནི་དབྱིག་སོགས་བཞིན། །བྱེ་བྲག་བྱེད་བར་སྐྱེ་བ་སྟེ། །སོ་སོར་སྡང་བའི་སྒྲ་ཡི་དོན། །དེ་ཉིད་སེམས་པ་པོས་བསྟན་ནོ། །མཐོང་དང་རྣམ་རྟོག་དབྱེ་མི་ཤེས། །འཇིག་རྟེན་ཕྱིའོ་སྙམ་དུ་སེམས། །དེ་ཕྱིར་འདི་ནི་ཞེན་པ་ལས། གསལ་བ་རྣམས་ནི་བརྗོད་བྱར་བྱེད། །དེ་ཉིད་དོན་དུ་སྒྲ་རྣམས་ཀྱི། །བརྗོད་བྱ་མིན་པར་བསྒྲུབས་ཟིན་ཏོ། །འདིས་སྒྲའི་བརྗོད་བྱ་ཡིན་པའི་ཕྱིར། །གསལ་བ་རྣམས་ཀྱང་བསལ་བྱ་ཉིད། །སྤྱི་ནི་སེལ་བ་མ་ཡིན་ཏེ། །སེལ་བ་ཉིད་ཀྱང་དངོས་པོ་མིན། །མེད་ལ་མེད་ཉིད་བསལ་ཀྱང་ཞེས། །དེ་ལྟར་བྱེད་མིན་འདི་དངོས་ཕྱིར། །དངོས་ནི་དེ་བདག་མིན་པའི་ཕྱིར། །དེ་ནི་བསལ་བྱ་ཉིད་འདོད་གང༌། །གང་ཞིག་དེ་ཡི་བདག་ཉིད་མིན། །དེ་ནི་དེ་ཡི་བསལ་བྱར་བརྗོད། །ཡོད་པ་མེད་པའི་དངོས་ཡིན་པས། །དེ་ཡི་སེལ་དངོས་ཡོད་མ་ཡིན། །རང་བཞིན་དབང་ཕྱུག་སོགས་རྣམས་ཀྱི། །དངོས་རྣམས་བསྐྱེད་བྱ་མིན་སྨྲ་བ།།
རང་བཞིན་དབང་ཕྱུག་སོགས་བསྐྱེད་བྱར། །དངོས་པོ་གྲུབ་པ་མ་ཡིན་ནོ། །དེ་ཕྱིར་མེད་པའང་དངོས་པོ་ཉིད། །མིན་ཕྱིར་ངལ་བ་གལ་ཡིན། །དེ་གྲུབ་ན་ཡང་ཡོད་བ་ཡོད། །དེས་ཀྱང་མེད་པ་གྲུབ་པ་ཡིན། །བ་ལང་མིན་ལས་ལྡོག་པ་ཡི། །བ་ལང་མཚན་ཉིད་མི་འདྲར་འདོད། །དེ་ཕྱིར་དངོས་ཉིད་བ་ལང་འདི། །ང་ལ་ བ་མིན་ཐལ་འགྱུར་མིན། །དངོས་མེད་ཡུལ་ལའང་སེམས་ཙམ་གྱིས། །སྤྲུལ་པའི་རྣམ་རྟོག 
་སྣ་ཚོགས་པའི། །དབྱེ་བས་སྦྱར་བ་རྣམས་ལ་བཞིན། །བག་ཆགས་ཡོད་པ་ཉིད་ཡིན་ནོ། །དེས་ནའང་བག་ཆགས་དབྱེ་བ་ཡིས། །ཕྱེ་བའམ་ཡོད་པའི་དངོས་ཉིད་དུའང༌། །རྟོག་པར་བྱེད་ཅིང་སེལ་བ་རྣམས། །རྟོགས་པས་སྦྱར་བ་རྣམས་བཞིན་ནོ། །དོན་གཞན་སེལ་བའི་བརྗོད་བྱ་འདི། །ཇི་འདྲ་བ་ནི་བསྟན་ཟིན་ཅིང༌། །སྒྲ་གཞན་གྱི་ནི་སེལ་བ་ཡང༌། །དེ་འདྲ་ཉིད་དུ་རྟོག་བྱ་མིན། །དངོས་པོ་ཉིད་དུ་ངེས་པའི་ཕྱིར། །སེལ་བ་དག་ནི་དངོས་ཉིད་མིན། །ཀུན་རྫོབ་ལམ་དུ་རབ་འགྲུབ་ཕྱིར། །དེ་ཉིད་དོན་དུ་འདོད་བསྒྲུབ་ཡིན། །དམ་པའི་དོན་དུ་བརྗོད་བྱ་དང༌། །རྗོད་བྱེད་ཅུང་ཟད་ཀྱང་ཡོད་མིན། །སྐད་ཅིག་གིས་འཇིག་དངོས་རྣམས་ལ། །ཁྱབ་པར་བྱེད་པ་སྦྱོར་བ་མིན། །དེ་ལ་གོ་བྱ་གོ་བྱེད་ཉིད། །དེ་ཉིད་དོན་ལ་བརྟེན་ནས་ནི། །སེལ་བ་དག་གི་དངོས་ཉིད་མིན། །ཀུན་རྫོབ་པ་ནི་འགེགས་ཤེ་ན། །དེ་ལྟ་ན་ཡང་འཁྲུལ་པ་ཉིད། །བཟློག་པར་དཀའ་བ་ཐལ་བར་འགྱུར། །རྟོགས་པས་སྦྱར་བའི་དོན་དང་ནི། །དེ་རྗོད་བྱེད་པའི་སྒྲ་དག་ཀྱང༌། །དེ་རྣམས་ལ་སྤྱི་བརྗོད་བྱ་དང༌། །དེ་ཡི་རྗོད་བྱེད་ཡོད་མ་ཡིན། །སྒྲ་ཡི་རང་གི་མཚན་ཉིད་ནི། །སྐད་ཅིག་གིས་འཇིག་རྗོད་བྱེད་མིན། །དེ་ཕྱིར་དེ་གཉིས་གཟུགས་བརྙན་རྫོགས། །ཀུན་རྫོབ་པར་ནི་འདོད་པར་བྱ། །གསལ་བར་དགའ་བ་གནས་པ་ཡིན། །བསྒྲུབ་པའི་ངོ་བོ་སྒྲ་ཡི་དོན། །གང་གིས་ཁས་ལེན་པར་མི་བྱེད། །གང་ཚེ་སྒྲ་ལས་ཤེས་པ་ནི། །སྐྱེས་པའི་དོན་དུ་ཞེན་པ་སྟེ། །སྒྲ་རྣམས་རང་བརྗོད་བྱེད་པ་ཡི། །ཤུགས་ཀྱིས་གཞན་ལས་ལྡོག་པ་ཡིན། །དེ་སྔོན་འགྲོ་བ་ཅན་གྱི་ནི། །ལྡོག་པ་འདི་ཡང་རིགས་པ་ཡིན། །སྒྲུབ་པ་ཡོད་མིན་གང་གསུངས་པ། །སྤྱི་ལ་སོགས་པ་མེད་ཕྱིར་ཏེ། །སྒྲ་རྣམས་དང་ནི་རྣམ་རྟོག་རྣམས། །དངོས་སུ་ཡུལ་མེད་ཉིད་ཕྱིར་རོ། །ཨུཏྤལ་སྔོན་པོ་སོགས་སྒྲ་ལས། །གཅིག་ཉིད་ཀུན་དུ་སྣང་བ་སྟེ། །
སྔོ་མིན་ཨུཏྤལ་མིན་སོགས་ལས། །ལྡོག་པ་ཡི་ནི་གཟུགས་བརྙན་ནོ། །གཞན་སེལ་བ་དང་ལྡན་དངོས་པོ། །བརྗོད་བྱར་ཁོ་བོ་ཅག་འདོད་དེ། །གཞན་ལས་ལྡོག་པའི་དངོས་པོ་ལས། །གཞན་པའི་ལྡོག་པའི་ང་ལ་མེད། །དེ་ཕྱིར་རིགས་ལ་སོགས་བཞིན་པའི།། གཞན་དབང་སྐྱོན་དང་འབྲེལ་པ་མེད། །བློ་གྲོས་བཟང་པོས་གསུངས་པ་ནི། །སྒྲ་དོན་ལོག་པ་མིན་པས་ནི། །བྱེ་བྲག་བྱེད་དང་བྱེ་བྲག་ཏུ། །བྱ་བ་བཞིན་མཐུན་པ་ཉིད་དེ། །དེ་ཕྱིར་སེལ་བ་སྒྲ་ཡི་དོན། །རྣམ་པར་གནས་པ་འགལ་བ་མེད། །སྔོན་པོའི་སྒྲ་སོགས་འབའ་ཞིག་ཀྱང༌། །གཟུགས་བརྙན་བྱེ་བྲག་ཅན་ཡིན་ཏེ། །ཁུ་བྱུག་ཨུཏྤལ་བུང་བ་སོགས། །ཡིད་གཉིས་བཅས་བཞིན་འཇུག་པ་སྟེ། །པི་ཀ་སྟང་ཟིལ་སོགས་སེལ་བས། །བྱེ་བྲག་ཅན་གྱི་ཡུལ་ལ་ཡང༌། །དེ་ནི་ཨུཏྤལ་ཡི་སྒྲས། །རྣམ་པར་གཞག་པར་ངེས་པ་དང༌། །གནས་གཞི་མཐུན་པ་ལ་སོགས་པ། །དེ་ལྟར་འདིར་ནི་བསྒྲུབས་པས་ན། །རྣམ་གཞག་དེ་ཀུན་ཕ་རོལ་པོའི། །ཕྱོགས་ལ་བསྒྲུབ་པར་དཀའ་བ་ཡིན། །འདི་ལྟར་སྒྲ་གཅིག་གིས་རང་གིས། །མཚན་ཉིད་ཐམས་ཅད་དུ་བསྟན་ལ། །དེ་སྐད་བསྟན་པ་དེ་ལ་ཡང༌། །ཅི་ཕྱིར་བྱེ་བྲག་གཞན་བློ་མེད། །གང་གི་དོན་དུ་ཕྱི་མའི་སྒྲ། །སྦྱོར་བྱེད་དངོས་པོ་དེ་ལ་ནི། །ཐམས་ཅད་དུ་བརྗོད་མིན་ཞེ་ན། །དེ་ནི་དུ་མར་ཐལ་བར་འགྱུར། །སྔོན་པོའི་རིགས་སམ་ཡོན་ཏན་ནམ། །སྔོན་པོའི་སྒྲ་ཡིས་རྟོགས་ཤེ་ན། །གཞན་ལ་ཨུཏྤལ་ཡི་རིགས། །ཨུཏྤལ་སྒྲ་ཡིས་ངེས་པ་ཡིན། །དེ་ལྟར་དེ་དག་དབྱེ་བ་ཡིས། །བ་ཀུལ་ཨུཏྤལ་སྒྲ་བཞིན་དུ། །གཞི་མཐུན་པ་ལ་སོགས་པ་རྣམས། །ཤིན་ཏུ་འཐད་པ་མ་ཡིན་ནོ། །ཡོན་ཏན་དེ་རིགས་དང་འབྲེལ་པའི། །རྫས་ནི་སྔོན་པོའི་སྒྲ་རྟོགས་པ། །ཡིན་ནོ་ཞེ་ན་དེ་ལྟ་ན། །ཨུཏྤལའི་སྒྲ་དོན་མེད་འགྱུར། །དེ་དག་གང་ཁོ་ན་དང་འབྲེལ། །དེ་ཉིད་ཨུཏྤལ་རིགས་ལྡན་ན། །སྔོན་པོའི་སྒྲ་ཉིད་ཀྱིས་དེ་བསྟན། །ཨུཏྤ་ལའི་སྒྲ་དོན་མེད་འགྱུར། །ཡོན་ཏན་དེའི་རིགས་འབྲེལ་ལས་གཞན། །ཨུཏྤལ་རིགས་ལྡན་ཡིན་ཞེ་ན། །ཨུཏྤལ་དང་སྔོན་པོའི་སྒྲ། །གནས་གཞི་ཐ་དད་པར་འགྱུར་རོ། །འོན་ཏེ་ཨུཏྤལ་ཉིད་དང༌། །འབྲེལ་པའི་ངོ་བོ་ཉིད་དང་ནི། །ཡོན་ཏན་དེའི་རིགས་དང་འབྲེལ་རྫས། །སྔོན་པོའི་སྒྲ་ཡིས་མི་
སྟོན་ནའོ། །ཨུཏྤལ་དང་འབྲེལ་ངོ་བོ་ཉིད། །དེ་བདག་མིན་པར་འགྱུར་ན་ཡང༌། །གང་ཞིག་ཨུཏྤལ་ཉིད་འབྲེལ་བ། །དེ་གཉིས་དང་འབྲེལ་ཁོ་ན་སྟེ། །སྔོན་པོའི་སྒྲ་ཡིས་དེ་བརྗོད་པའི། །སྒྲ་ཡི་ཤེས་པའི་ཡུལ་དུ་ནི། །བདག་ཉིད་ཀུན་དེ་ཆ་ཤས་མིན། །ཨུཏྤལ་སྒྲ་དེ་དོན་མེད་ཡིན། །ཆ་ཤས་ལས་ནི་གྲོལ་བ་ལ། །ཟད་དང་ཆ་ཤས་རྣམ་རྟོག་མེད། །དག་དོན་ཡོངས་སུ་མ་ཤེས་ཕྱིར། །འདིར་ནི་འདི་དག་བརྗོད་འདོད་ཡིན། །དང་པོའི་སྒྲ་ཉིད་ཁོ་ན་ཡིས། །དེ་ནི་ཐམས་ཅད་དུ་གསལ་བྱས། །བདག་ཉིད་ཅི་ཡང་མ་དོར་བར། །ཇི་འདྲ་དེ་འདྲར་དེ་བསྟན་ཏེ། །རྣམ་གྲངས་དེ་དག་ཉིད་ཀྱིས་ནི། །དེ་ལ་སྒྲ་གཞན་དག་གིས་ཡང༌། །བརྗོད་པ་འབྲས་བུ་ཡོད་མིན་ལ། །བརྗོད་ན་འབྲས་བུ་ཉིད་དུ་ངེས། །ཁོ་བོ་ཅག་ནི་སྒྲ་རྣམས་ཀྱིས། །ཕྱིའི་དོན་རྟོགས་བྱར་མི་འདོད་དེ། །སྒྲ་དང་རྣམ་ཤེས་དག་གི་ཡང༌། །ཡུལ་ནི་ཕྱི་ཡི་དོན་མིན་ནོ། །གང་ཕྱིར་དེ་དག་ཐམས་ཅད་ཀྱི། །བདག་ཉིད་ཡུལ་བྱེད་ལས་གཞན་པའི། །སྒྲ་དང་ཤེས་པ་གཞན་དེར་ནི། །རྣམ་གྲངས་པ་ཉིད་ཐོབ་པར་འགྱུར། །སྒྲ་ལས་རྣམ་རྟོག་གཟུགས་བརྙན་ཉིད། །རིམ་གྱིས་སྐྱེད་པར་བྱེད་པ་ཡིན། །གཅིག་ཉིད་དེ་ལྟར་སྣང་བ་ལ། །ཕྱི་ཡི་ཉིད་དུའང་འཁྲུལ་ཕྱིར་རོ། །གཟུགས་བརྙན་ལ་ནི་བརྟེན་ནས་སུ། །གཞི་མཐུན་པ་ཉིད་སོགས་ཡིན་གྱི། །དམ་པའི་དོན་དུ་སྒྲ་འདི་ནི། །ཡུལ་དང་བྲལ་བར་འདོད་པ་ཡིན། །རྟགས་དང་གྲངས་སོགས་སྦྱོར་བ་འདི། །གསལ་བ་རྣམས་ལའང་ཡོད་མ་ཡིན། །འདོད་པས་སྦྱར་བའི་བརྡ་དག་གིས། །སྤྲུལ་པ་ཡིན་གྱི་དངོས་ལ་མིན། །མོ་དང་ཕོ་དང་མ་ནིང་གི །རྟགས་གསུམ་དངོས་པོ་ལ་ཡོད་མིན། །དེ་ལ་སེམས་དེ་ཐམས་ཅད་ཀྱི། །སྣ་ཚོགས་པར་སྣང་ཉིད་དུ་འགྱུར། །བརྗོད་འདོད་རྗེས་འཇུག་ཉིད་དེ་རྣམས། །དེ་ཡི་དབང་གིས་གཅིག་དངོས་ནི། །གཅིག་དངོས་ཉིད་དུའང་དངོས་སུ་མིན། །གལ་ཏེ་གནས་བ་དང་སྐྱེ་དང༌། །འཇིག་ལ་བརྟེན་ནས་རྟགས་རྣམས་ནི། །གནས་པ་ཡིན་ན་རྟགས་གསུམ་ཉིད། །དབྱེར་མེད་པར་ནི་ཐལ་འགྱུར་ཞིང༌། །ཡོད་པ་མིན་ལའང་མེད་པ་དང༌། །རང་བཞིན་མེད་དང་གསོབ་ཉིད་ཅེས། །གང་སྨྲ་དེ་ལ་གནས་པ་སོགས། །འབྲེལ་པར་ཅི་ཕྱིར་རྟོག་པར་བྱེད། །དངོས་འདི་རྣམས་ཀྱི་སྐྱེ་བ་ནི། །རབ་ཏུ་འབྱུང་ཡིན་འཇིག་པ་ནི། །
ཉམས་པ་ཉིད་དེ་གནས་པ་ནི། །རང་དངོས་གྲུབ་པར་བརྗོད་བྱ་སྟེ། །དེ་ལ་སྐྱེ་བ་འཇིག་མིན་པ། །དེ་ལ་ཅི་ཡི་བྱེད་པར་བརྗོད། །གནས་ལ་འདྲེས་པ་ཡོད་མིན་ན། །དེ་ལ་སྐྱེ་བར་ཇི་ལྟར་བརྗོད། །འཇིགས་ལ་གཉིས་ཡོད་བརྗོད་མིན་ན། །འཇིགས་པའི་དངོས་དང་ཉམས་པ་དང༌། །ཞིག་པའི་ངོ་བོ་ཞེས་བྱ་བ། །དེ་ལ་ཇི་ལྟར་སྟོན་པར་བྱེད། །གནས་དང་གནས་ལ་རང་བཞིན་དུའང༌། །རྒྱུ་གང་གིས་ན་སྨྲ་བར་བྱེད། །འོ་ན་ཏེ་འདི་རྣམས་དབྱེར་མེད་དངོས། །ཁོ་ན་ཡིན་ན་རྟགས་གཅིག་འགྱུར། །གལ་ཏེ་དེ་རྣམས་བ་ལང་ཉིད། །སོགས་བཞིན་མ་གཏོགས་སོགས་འདོད་ན། །སྤྱི་བསལ་བས་ནི་དེ་འདྲ་བ། །དེ་རྣམས་བསལ་བ་ཁོ་ན་ཡིན། །རིགས་དང་ཡོད་དང་ཕྱི་ཞེས་པའང༌། །དེ་རྣམས་ལ་དེ་ཅི་ཕྱིར་སྦྱོར། །སྤྱི་རྣམས་ལ་ཡང་གཞན་པ་ཡི། །སྤྱི་ནི་རིགས་པ་མ་ཡིན་ནོ། །མེད་དང་རང་བཞིན་མེད་པ་དང༌། །གསོབ་ཅེས་བྱ་སོགས་ཇི་ལྟར་ཡིན། །དེས་ན་དེ་རྣམས་རྟགས་གནས་པའི། །གནས་པའི་བརྡར་ནི་བྱས་པ་ཡིན། །གྲངས་ལ་སོགས་པའི་བརྡ་ཅན་ཉིད། །བརྗོད་པར་འདོད་པ་བརྟགས་པ་ཡིན། །ཐ་དད་ཐ་དད་མིན་དབེན་ཡང༌། །བཙུན་མོའི་རྣམས་དང་ནགས་ཚོགས་བཞིན། །བསལ་བ་དག་ནི་རིགས་དག་ལ། །བཙུན་མོ་ལ་སོགས་སྦྱོར་ཞེ་ན། །གསལ་བའི་ཆ་ཤས་རྣམས་ལ་ཡང༌། །གྲངས་བླངས་ནས་ནི་འཇུག་པ་ཡིན། །གསལ་བ་མང་པོའི་གྲངས་ཉིད་ཀྱིས། །བྱེ་བྲག་བྱས་ལ་ནགས་སྒྲས་བརྗོད། །ཡང་ན་རིགས་ལ་གསལ་བ་ནི། །མང་པོ་ཡོད་ལ་བརྟེན་ནས་སོ། །རྣམ་པ་དེས་ནི་ཐམས་ཅད་ཀྱི། །གཅིག་གི་ཚིག་ཉམས་འགྱུར་མིན་ནམ། །གཞན་ལ་བརྗོད་འདོད་མིན་ཞེ་ན། །འདི་ལ་དེ་ཉིད་རྒྱུ་མཚན་ཡིན། །རིགས་ལའང་གྲགས་ཡོད་མ་ཡིན་ལ། །ཡོད་ནའང་ཇི་ལྟར་བྱེ་བྲག་ལས། །གལ་ཏེ་འབྲེལ་པ་དང་འབྲེལ་པའམ། །ཡང་ན་དངོས་སུ་འབྲེལ་པ་ཞེས། །གལ་ཏེ་དེ་ལྟར་སྨྲ་བ་ན། །རྩ་ཐུང་གཅིག་ཀྱང་ནགས་འགྱུར་ཏེ། །མང་པོ་ལ་ནི་སྨྲས་པ་ཡིས། །འབྲེལ་པ་འདི་ལའང་ཡོད་ཕྱིར་རོ། །གསལ་བ་དུ་མ་ལ་བརྟེན་གང༌། །དེ་ཉིད་གཅིག་ལའང་གནས་པ་ཡིན། །དེ་ཡི་རྒྱུ་མཚན་མཚུངས་པའི་ཕྱིར། །དེ་ལའང་ནགས་ཀྱི་བློ་འབྱུང་འགྱུར། །གང་གི་ཕྱིར་ན་དེ་ལྟ་བུའི། །རྗེས་སུ་འགྲོ་
དང་ལྡོག་པ་དག །བརྗོད་འདོད་དེ་ལས་འདི་ངེས་ཀྱི། །དོན་ལས་མིན་ཏེ་དེ་འཁྲུལ་ཕྱིར། །ལས་དང་དུས་སོགས་དང་འབྲེལ་པའམ། །གོང་དུ་གསལ་བ་ཁོ་ན་སྟེ། །དེ་ཕྱིར་དེ་ནི་བརྡ་ཅན་ཡིན། །གསལ་བ་འབྱུང་བ་མ་ཡིན་ནོ། །གསལ་བའི་ངོ་བོར་ཞེན་པ་ཡིས། །གལ་ཏེ་སེལ་བར་སྨྲ་བྱེད་ན། །དེ་ཕྱིར་རྟགས་སོགས་དང་འབྲེལ་པའི། །གསལ་བའི་སྒོ་ནས་འདི་ཡོད་དེ། །མངོན་འདོད་པ་ལ་བློ་འཇུག་ཕྱིར། །སྒྲ་སྦྱོར་པར་ནི་བྱེད་པ་ཡིན། །དེ་ཡི་ཤུགས་ཀྱིས་མངོན་འདོད་པ། །མིན་ལས་ལྡོག་ཉིད་གྲུབ་པ་ཡིན། །ཐམས་ཅད་ཉིད་ཀྱང་འདོད་མིན་ཏེ། །སྒྲ་ཡི་དོན་ནི་ངེས་མེད་འགྱུར། །དེ་ཕྱིར་འཚེད་པ་སོགས་སྒྲ་རྣམས། །མཆོག་ཏུ་གསལ་བར་ལྡོག་པ་ཡིན། །འདི་ལྟར་འཚེད་སོགས་བརྗོད་པ་རྣམས། །བྱེད་པ་མེད་པར་འདུག་པ་མིན། །ཟ་བའམ་གསལ་བར་བྱེད་ཅེས་པའམ། །གཞན་ལས་ལྡོག་པ་གོ་བ་སྟེ། །མ་ཡིན་པར་དགག་བདག་ཉིད་ཀྱི། །གསལ་བྱར་གང་དང་གང་འདོད་དེས། །འཚེད་བྱེད་ཅེས་པ་མི་དགག་པའང༌། །རང་དངོས་ཉིད་ཀྱིས་གནས་པ་ཡིན། །དེ་ལྟ་བུ་ཡི་ངག་དེ་དག །ཕན་ཚུན་གནོད་བ་བྱེད་པ་ཡིན། །འདི་ནི་གཞན་གྱི་དངོས་དགག་པས། །རང་གི་ངོ་བོས་གནས་པ་ཡིན། །དེ་ལས་གཞན་དུ་ངེས་བཟུང་བ། །སྨྲས་ལ་དོན་ནི་མེད་པར་འགྱུར། །ནམ་མཁའི་ཨུཏྤལ་སོགས་རྣམས་ཀྱི། །གྲུབ་པ་གང་ནའང་ཡོད་མིན་ན། །དངོས་མེད་པར་བརྗོད་སེལ་བ་ཉིད། །གྲུབ་པ་ཉིད་ནི་ཇི་ལྟ་བུ། །དངོས་བཅས་འདི་ཉིད་དངོས་པོ་ཞེས། །ངེས་པར་སྣང་བ་ཡིན་ཞེ་ན། །དེ་ལས་ཅིར་འགྱུར་དངོས་པོ་དང༌། །འདི་ནི་ཆོས་མཚུངས་པར་རྟོགས་འགྱུར། །དེ་ཕྱིར་བསྒྲུབ་པ་ཉིད་ཤེས་དང༌། །དེ་བཞིན་བྱུང་གྱུར་སོགས་ངོ་བོ། །དངོས་པོ་རྣམས་སུ་ཆོས་མཚུངས་ཕྱིར། །དེ་ནི་རྒྱུ་མཚན་དུ་ཐལ་འགྱུར། །སྒྲུབ་པ་ལ་སོགས་དོན་སོགས་ཀྱང༌། །ཡོད་མིན་མིན་སོགས་དགག་བྱེད་པའོ། །སྒྲ་ཡི་ཤུགས་ཀྱིས་མངོན་འདོད་པའི། །མིན་པ་གང་དེ་ཉིད་མིན་ནམ། །དགག་པ་ལ་ཡང་དགག་ལྡན་པའི། །སེལ་བ་དེ་འདྲ་འགྱུར་བ་ཡིན། །ཅི་འདྲ་ཡང་དག་རྟོགས་པ་ལ། །དགག་པ་བཞི་པ་ཡོད་པ་ཡིན། །དོན་གང་ཡིན་པ་འབའ་ཞིག་ལ། །དགག་པ་ཉིད་སྦྱོར་སྒྲུབ་པ་ཡིན། །དགག་པ་གསུམ་པས་
དེ་དང་ནི། །བྲལ་བ་སྟོན་པར་བྱེད་པ་ཡིན། །དེ་ཡང་དགག་ཕྱིར་ཕྱི་མ་ནི། །ཕྱི་མས་གང་ཡིན་སྦྱར་བྱ་སྟེ། །དེ་ལ་བརྗོད་འདོད་པ་དེས་ནི། །རྟོགས་བྱེད་གཞན་ནི་སེལ་བ་ཡིན། །འདི་ནི་མི་འཚེད་མི་སྨྲ་ན། །འཚེད་བྱེད་ཉིད་དུ་གོ་བར་བྱེད། །གསུམ་པས་བྱེད་པ་མེད་སོགས་པར། །སྦྱོར་བ་གོ་བར་བྱེད་པ་ཡིན། །བཞི་པས་དེ་ནི་དབེན་པ་ཡི། །འཚེད་བྱེད་དེ་ནི་ངེས་བྱེད་དེ། །དེས་ན་འདིར་ནི་སྒྲུབ་པ་ཡི། །ཚིག་གིས་སེལ་བར་མཚུངས་པ་ཡིན། །བསྡུ་བ་ལ་སོགས་དོན་གང་ཡིན། །འགའ་ལ་དྲོ་སོགས་སྒྲར་འདོད་ན། །དེ་ལས་གཞན་པའི་རྣམ་གྲངས་པ། །དེ་ཡིས་སེལ་བར་འགྱུར་བ་ཡིན། །གཞན་སེལ་བ་ཡི་དག་དོན་ཡང༌། །རྟོགས་བླ་ཉིད་དེ་འདི་ལྟར་འདི། །དངོས་པོ་ཉིད་དང་ལྷན་ཅིག་པའི། །ངག་དོན་འགའ་ཞིག་བརྗོད་བྱ་སྟེ། །དེ་རྣམས་རང་རིགས་མི་འདྲ་གང༌། །དེ་རྣམས་བསལ་བྱར་ཤིན་ཏུ་གསལ། །དེ་རྣམས་ཉིད་ཀྱི་ངག་དོན་ཡང༌། །དེ་རྣམས་ལ་གཞན་ལ་འདི་མེད། །ནག་པ་བ་ལང་ཁྱེར་ཤོག་སོགས། །ངག་གི་དོན་ནི་རྟོགས་པ་ཡིས། །བྱེད་པ་པོ་གཞན་ལ་སོགས་རྣམས། །དོན་གྱིས་སེལ་བར་གོ་བར་བྱེད། །གཞན་སེལ་མིན་པའི་སྒྲ་སོགས་ཀྱིས། །སྒྲུབ་པ་ངེས་པ་མ་ཡིན་ཏེ། །ཕ་རོལ་མངོན་འདོད་རིགས་ལ་སོགས། །གོང་དུ་གསལ་བ་ཡིན་ཕྱིར་རོ། །འོན་ཀྱང་སྒྲ་ནི་གང་ཞིག་ལས། །སྒྲུབ་པའི་རྣམ་རྟོག་ངེས་སྐྱེས་ལ། །ཕྱིས་ནི་སེལ་བའི་སྒྲ་དོན་གྱི། །དགག་པའི་བློ་ནི་སྐྱེ་བར་འགྱུར། །དེ་འདྲ་དེ་ནི་དངོས་པོ་དང༌། །འབྲེལ་པ་འཇིག་པ་མི་སླུ་སྟེ། །སྒྲ་དང་ཤེས་པ་ཐམས་ཅད་ནི། །ཡང་དག་དོན་ལ་ངེས་པ་མིན། །གཞལ་བྱ་ཤེས་པའི་སྒྲ་ལ་སོགས། །གསལ་བྱ་ཅི་ཕྱིར་མེད་པ་ཡིན། །འདི་འབའ་ཞིག་གི་སྐབས་མིན་པར། །རྟོགས་དང་ལྡན་རྣམས་སྦྱོར་བྱེད་མིན། །འོན་ཏེ་མ་ངེས་ཕྱིན་ཅི་ལོག །ཡོད་པ་སྲིད་པ་འགའ་ཞིག་ལ། །ཁ་ཅིག་ལ་ནི་དེ་བཟློག་ཅིང། །ཐེ་ཚོམ་ཕྱིན་ཅི་ལོག་མེད་པའི། །ཤེས་པ་བསྐྱེད་པར་བྱ་བའི་ཕྱིར། །བློ་གྲོས་ལྡན་རྣམས་དེ་སྦྱོར་བྱེད། །དེ་ཉིད་ཀྱིས་ན་དེ་རྣམས་ཀྱིས། །སྦྱར་བས་འབྲས་བཅས་ཉམས་མྱོང་བྱེད། །དེ་ལ་བེམས་པོའི་བློ་ཅན་རྣམས། །གང་ཡིན་ཡིད་གཉིས་གནས་སུ་འདོད། །དེས་ན་དེ་ཉིད་དོར་
བྱ་སྟེ། །གཞན་དུ་སྨྲས་པ་དོན་མེད་ཡིན། །འདི་ལ་ཡིད་གཉིས་ཅུང་ཟད་ཀྱང༌། །མེད་ན་ཅི་ཕྱིར་འདྲི་བར་བྱེད། །དེ་མིན་འདུ་བྱེད་སྒྲར་བརྗོད་ཉིད། །ཐ་མལ་གནས་བློས་ཇི་ལྟར་འགྱུར། །གཟུགས་དང་མིག་ལ་སོགས་པ་ཡི། །ཤེས་པའི་ཤེས་བྱར་གང་བསྟན་པ། །དེས་ནི་ཁ་ཅིག་གིས་སྒྲོ་བཏགས། །གང་ཡིན་དེ་ནི་དགག་པ་ཡིན། །སྔོ་སོགས་གཟུགས་རྣམས་མིག་འདི་ལ། །བརྟེན་པ་ཁོ་ནར་རིག་མིན་གྱི། །འོན་ཀྱང་རྣ་བ་ལ་བརྟེན་པ། །རྟག་པ་གཅིག་བུའི་སེམས་ཀྱང་ངོ༌། །ཆོས་རྣམས་སྐད་ཅིག་སོགས་ངོ་བོར། །ཤེས་བྱའམ་ཅི་ཞེས་རྣམ་འཕྲུལ་དང༌། །ཆོས་དེ་ཐམས་ཅད་མཁྱེན་པ་ཡི། །ཤེས་པའི་ཤེས་པ་མིན་ནམ་ཅི། །མེད་པ་ཤེས་པ་སྐྱེད་བྱེད་མིན། །མེད་པའང་ཤེས་བྱ་ཡིན་ནམ་ཅི། །དེ་ལ་སོགས་པ་འཁྲུལ་པར་འགྱུར། །ཤེས་བྱ་དེ་ཡི་ཚིག་བརྗོད་བྱ། །དེ་ལ་དེ་འདྲའི་ཤེས་བྱ་ཉིད། །སྐད་ཅིག་ལ་སོགས་སྒྲུབ་ཕྱིར་ཡོད། །འདི་ཡིས་ཤེས་བྱའི་དངོས་པོ་ཡང༌། །ཡང་དག་རིག་པར་འཇོག་ཕྱིར་རོ། །དེ་ལྟའི་ངག་གཞན་རྣམས་ཉིད་ལ། །གཞལ་བྱ་ཤེས་བྱའི་ཚིག་སོགས་ཀྱིས། །རྟོགས་པ་ཡི་ནི་རྒྱུ་མཚན་ཉིད། །དུས་གཞན་དུ་ཡང་མཐོང་བ་ཡིན། །འབའ་ཞིག་དག་གི་དམིགས་པ་ལ། །རྟོག་པའི་ངོ་བོ་གང་སྐྱེས་པ། །དེ་ནི་ངག་གི་རྗེས་འཇུག་པས། །བྱེ་བྲག་དོན་ལ་འཁྲུལ་པ་ཡིན། །བུམ་སོགས་ལ་ཡང་སྒྲ་རྣམས་ལས། །དེ་ལྟའི་རྣམ་པ་དེ་ཡོད་ན། །དེ་ཕྱིར་བུམ་སོགས་སྒྲ་རྣམས་དང༌། །ཤེས་བྱའི་སྒྲ་སོགས་མཚུངས་པར་འགྱུར། །གསལ་བར་བྱ་བར་བརྟག་འདི་ཡང༌། །དངོས་པོ་ཉིད་རྟོག་ཅེས་སྨྲས་པ། །ངེས་པ་ཡི་ནི་གཞན་འདོར་ཕྱིར། །དེ་ཉིད་ཉམས་པར་འགྱུར་བ་ཡིན། །བརྗོད་འདོད་གང་ཡིན་དེ་ཉིད་ལ། །དངོས་པོ་ཉིད་དུ་རྟོགས་འདོད་ན། །དེ་ཕྱིར་བརྗོད་འདོད་མི་འདོར་འགྱུར། །ཀུན་ནི་བརྗོད་འདོད་མ་ཡིན་ནེ། །རང་ཉིད་རིག་ཕྱིར་ཤེས་པ་ཡིན། །རྣམ་པར་དགག་པར་ནུས་མ་ཡིན། །དམིགས་པ་མེད་ཀྱང་སྒྲོ་འདོགས་པའི། །རྣམ་པ་དུ་མར་རིག་པ་ཡིན། །ཤེས་པའི་བདག་ཉིད་རྟོག་འགའ་ཡང༌། །སོ་སོའི་ཡུལ་ལ་ངེས་པ་ཡི། །རང་བཞིན་གང་ཡིན་དེ་ཉིད་ཀྱང༌། །ཁྱེད་ཀྱིས་ངེས་པར་ཁས་བླངས་དགོས། །ཁོ་བོ་ཅག་སྨྲའི་རྣམ་པ་དང༌། །གཟུགས་བརྙན་དང་
དེའི་སྣང་བ་དང༌། །གསལ་དང་སོ་སོར་སྣང་བ་ཡང༌། །རྣམ་པའི་མིང་གི་བྱེ་བྲག་ཡིན། །ངེས་གཟུང་ལ་སོགས་སྒྲ་རྣམས་ལ། །ངེས་མིན་ལ་སོགས་བསལ་བྱ་བ། །རྣམ་པ་གཞན་གྱི་མཚན་ཉིད་ནི། །ཤིན་ཏུ་གསལ་བར་ཡོད་པ་ཡི། །ཐམས་ཅད་ཀྱི་ནི་སྒྲ་ལ་ཡང༌།། ཐ་སྙད་བཟུང་བ་ཡོད་པ་སྟེ། །དོན་དེ་བསལ་བ་འདི་ལ་ནི། །གཞན་སེལ་བ་བརྗོད་འདོད་པ་ཡིན། །ཐམས་ཅད་ཆོས་རྣམས་བདག་མེད་དང༌། །ཐམས་ཅད་མིན་རྣམས་འགྲོ་བ་དག །མ་ལུས་པར་གོ་བྱེད་དེ་ལ། །ཆ་ཤས་ཅུང་ཟད་བསལ་བྱ་ཡིན། །ཕྱི་ཡི་བུམ་སོགས་ལས་འབའ་ཞིག །ཁོ་ན་བདག་མེད་འདོད་པ་དང༌། །ཁ་ཅིག་འགྲོ་བ་ཉིད་དུ་ནི། །འཁྲུལ་པས་དེ་ནི་བཟློག་པའི་ཕྱིར། །ཆ་ཤས་ཐམས་ཅད་འགག་པ་ནི། །དེར་ནི་བརྗོད་འདོད་ཉིད་མིན་ཏེ། །དེ་ཕྱིར་རང་དོན་སེལ་བར་ནི། །ཐལ་བར་མི་ཤེས་པས་སྨྲས་ཡིན། །སེལ་བ་དངོས་སུ་ཡོད་མེད་མིན། །རྟེན་པ་མ་ཡིན་མི་རྟེན་མིན། །གཅིག་མིན་དུ་མ་མ་ཡིན་ཏེ། །དེ་ལ་ཇི་ལྟར་ངེས་པ་བཞིན། །དེ་ཁོ་ན་ཉིད་དུ་མི་འདོད། །མེད་པ་དེ་མེད་པ་ཡང་མིན། །དངོས་པོ་ཉིད་དུ་ཞེན་ཕྱིར་རོ། །ཐ་དད་ཐ་དད་མིན་སོགས་ཀུན། །དངོས་པོ་ལ་ཡོད་ལ་བརྟེན་པ། །སྒྲ་དོན་དངོས་པོ་མེད་པ་སྟེ། །དེ་ཕྱིར་དེ་དག་གཞི་མེད་ཡིན། །སྒྲ་ནི་དངོས་སུ་དོན་གཞན་ལས། །ལྡོག་པར་བྱེད་པ་མ་ཡིན་ཏེ། །རང་དོན་རྗོད་པར་བྱེད་པ་ཡི། །ཤུགས་ཀྱིས་དེ་ཉིད་གོ་བ་ཡིན། །དེ་བདག་མ་ཡིན་གཞན་བདག་མིན། །ཞེས་ནི་རྒྱས་པར་བསྟན་པ་ཡིན། །གཞན་པོའི་ཕྱོགས་ཀྱིས་མ་ཤེས་པ། །དེ་ཕྱིར་དེ་ལྟར་སྨྲ་བ་ཡིན། །གང་གིས་བ་ལང་མ་ཡིན་པར། །ཞེན་ཅིང་གང་གིས་བསལ་བྱར་བྱེད། །དེ་ལྟར་སྒྲ་ཡིས་གཙོ་བོར་ནི། །དེ་ནི་བསལ་བྱ་མ་ཡིན་ཏེ། །ཇི་ལྟ་བུ་ཡི་སྒྲ་ཡི་ནི། །བརྗོད་བྱ་ཉིད་ཡིན་འདྲི་བར་བྱེད། །སེལ་བ་དེ་ཡིས་ཡིན་ནམ་ཅི། །འོན་ཏེ་བུམ་པ་སོགས་ཀྱི་ཡིན། །སྒྲ་དོན་སེལ་བ་ཡིན་ནམ་ཅི། །སྒྲུབ་པ་ཡིན་ཞེས་ངེས་རྟོག་ལ། །སེལ་བ་ཡིན་ཞེས་བརྗོད་པ་ཡིན། །གང་ཡིན་དེ་ཉིད་རྟོགས་པར་བྱེད། །སྒྲ་དོན་གཟུགས་བརྙན་ཡིན་པར་ནི། །དངོས་སུ་བྱེད་པའི་བློ་ཡིན་ལ། །རིགས་སོགས་སྒྲུབ་པ་ཉམས་པར་ནི། །ཤུགས་ཀྱིས་ཁོང་དུ་ཆུད་པ་ཡིན། །བུམ་པ་ཤིང་སོགས་སྒྲ་རྣམས་ཀྱང༌། །
བརྗོད་པ་ཡིས་ནི་གཟུགས་བརྙན་ཉིད། །བསྐྱེད་པའི་ཕྱིར་ན་དངོས་སུ་སྟེ། །ཤུགས་ཀྱིས་གཞན་ནི་འདོར་བ་ཡིན། །དེ་ཕྱིར་བསྒྲུབ་པ་ལས་འབྱུང་སྐྱོན། །མཐའ་མེད་ཐལ་འགྱུར་འདི་ལ་མིན། །བརྗོད་བྱ་མིན་ཕྱོགས་ཁོ་བོ་ཅག །ཁས་མི་ལེན་ཕྱིར་སྐྱོན་འདི་མེད། །གཅིག་ཉིད་རྟགས་ཉིད་སོགས་རྟག་པ། །ཡིན་གྱི་དེ་ཁོ་ན་ཉིད་མིན། །འདི་ལ་བཞད་གད་བྱེད་པ་ནི། །མཁས་པ་ཆེན་པོར་མཚོན་བྱེད་ཡིན། །ངེས་པར་བཟུང་བའི་ཤུགས་ཀྱིས་ནི། །གཞན་སེལ་བར་ཡང་གོ་བ་ཡིན། །གཞན་དུ་རང་བདག་ཉིད་རྟོགས་པར། །གང་ལ་ངེས་བཟུང་དོན་མེད་ཡིན། །དེ་ལྟར་གང་ཡང་ཕྱི་མའི་ཡང༌། །གཞན་ལས་ལྡོག་པ་ཡོད་མིན་ཏེ། །དེས་ན་མོ་གཤམ་བུ་སོགས་གང༌། །གང་ལ་སེལ་བ་རྗོད་པར་བྱེད། །མེད་པ་རྣམས་ནི་དངོས་མེད་ཕྱིར། །སྒྲ་རྣམས་རིགས་སོགས་རྗོད་བྱེད་པར། །དོགས་པར་མི་བྱེད་དེ་རྣམས་ནི། །ཆ་མེད་མཆོན་བྱེད་གྲུབ་ཕྱིར་རོ། དོན་གྱིས་སྟོང་སོགས་རྟོག་པ་ལས། །སད་པའི་བག་ཆགས་ཙམ་གྱིས་སྤྲུལ། །གཟུགས་བརྙན་གང་ཚེ་སྣང་བ་ནི། །སྒྲ་དེ་རྣམས་ཀྱིས་སྟོན་པ་ཡིན། །སྒྲ་དེ་རྣམས་ནི་དེ་ཙམ་དུ། །དངོས་སུ་གསལ་བྱེད་གང་ཐེ་ཚོམ། །བརྡ་ལ་ལྟོས་པ་དང་བཅས་ཕྱིར། །བརྟགས་པའི་དོན་རྗོད་བྱེད་བཞིན་ནོ། །སྒྲ་དེ་རྣམས་ནི་ཕ་རོལ་བོས། །ཁས་བླངས་བྱེ་བྲག་སོགས་བསྒྲུབས་པར། །སྟོན་པར་བྱེད་པ་མ་ཡིན་ཏེ། །དེ་ཕྱིར་དེ་བཞིན་ཞེས་རྟོག་མིན། །བྱེ་བྲག་ལ་སོགས་འདི་ལ་བརྡ། །མེད་དང་འབྲས་མེད་ཉིད་དུའང་སྔར། །སྒྲུབ་པའི་ཕྱིར་ན་གཏན་ཚིགས་ཏེ། །ལྡོག་ལ་ཐེ་ཚོམ་ཟ་བ་མིན། །འོན་ཏེ་སེལ་བའི་ཕྱོགས་ལ་ཡང༌། །བརྡ་ནི་ཇི་ལྟར་ཡོད་མ་ཡིན། །དེ་ཡི་འབྲས་བཅས་ཇི་ལྟ་བུར། །སྨྲ་བ་པོ་དང་ཉན་པ་པོ། །གཉིས་ལ་ཕན་ཚུན་ཤེས་པ་དེ། །རིགས་པས་གྲུབ་པ་མ་ཡིན་ཞིང༌། །བརྡ་ཡི་དུས་སུ་གང་མཐོང་དེས། །ཐ་སྙད་དུས་སུ་མཐོང་ཕྱིར་རོ། །རང་རང་གི་ནི་སྣང་བ་ནི། །རིག་པ་ལ་ཡང་འཇུག་པ་སྟེ། །གང་ཕྱིར་འདི་ནི་ཕྱི་དོན་དུ། །ཞེན་པ་གཉིས་ཀའང་མཚུངས་པ་ཡིན། །དཔེར་ན་རབ་རིབ་ཀྱིས་ཉམས་པའི། །མིག་ཅན་ཟླ་བ་གཉིས་ཞེས་སྨྲ། །རང་དང་མཚུངས་པའང་དེ་བཞིན་དུ། །སྒྲ་ཀུན་ལས་བྱུང་ཐ་སྙད་འདོད། །འདི་ལ་དེ་ཡི་ཁྱབ་
བྱེད་དུ། །འདོད་པ་ཞེན་པ་པ་ཡིན་ཏེ། །རྒྱུ་ཡིས་སྤྲུལ་པ་ཤེས་པ་ནི། །དེ་རྣམས་འཁྲུལ་པའི་སྣང་བ་ཡིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་སྒྲའི་དོན་བརྟག་པ་སྟེ་ཉིད་ཤུ་པའོ།། །།མངོན་སུམ་དང་ནི་རྗེས་དཔག་ལ། །བྱེ་བྲག་ཅན་དུ་སྒྲུབ་པའི་ཕྱིར། །ཕ་རོལ་པོས་སྨྲས་དེ་མི་འགྲུབ། །དེ་ནི་མཚན་ཉིད་འདི་དག་ལྡན། །མངོན་སུམ་རྟོག་པ་དང་བྲལ་ཞིང༌། །མ་འཁྲུལ་པའོ་རྟོག་པ་ནི། །བརྗོད་པ་དང་ལྡན་ཤེས་པ་སྟེ། །ཐ་སྙད་རྒྱུ་སོགས་བདག་ཉིད་ནི། །མ་ཡིན་སྒྲ་དོན་འདྲེར་རུང་བ། །ཤིང་ཞེས་བྱ་སོགས་ཚུལ་གྱིས་ནི། །གང་ཞིག་སྒྲ་དང་མ་འདྲེས་ཀྱང༌། །དེ་ནི་བརྗོད་པ་ཉིད་དུ་འགྱུར། །འདས་དུས་སྲིད་པར་མིང་དོན་ལ། །གོམས་པའི་བག་ཆགས་རྗེས་འཇུག་ཕྱིར། །སྐྱེས་མ་ཐག་པ་གང་འབྲེལ་པས། །འདི་ལྟར་བྱ་ཞེས་སྒྲིན་པོར་འགྱུར། །སེམས་ཀྱིས་དཔྱོད་སོགས་དུས་སུ་ཡང༌། །དེ་ནི་རྣམ་པར་གསལ་བར་རྟོགས། །སྒྲ་ཡིས་རྗེས་རྟོགས་དེ་ཉིད་ལ། །བསྙོན་པར་ནུས་པ་མ་ཡིན་ནོ། །དེ་ཡང་ངེས་པ་མེད་པ་ཡི། །དེས་ཀྱང་མངོན་པར་ཞེན་པ་ལས། །འཁྲུལ་པའི་སྒྲ་དང་དོན་དུ་གནས། །དེ་དང་འདྲ་ཡང་མི་སྲིད་དོ། །རིགས་ལ་སོགས་དང་འབྱོར་འོས་ལ། །རྟོག་པ་ཡང་ན་གཞན་གྱིས་ཤེས། །རིགས་ལ་སོགས་པ་དེ་གསལ་ཕྱིར། །མི་སྣང་བས་ནི་མི་འཐད་དོ། །རིགས་ལ་སོགས་རྣམས་མི་སྣང་བས། །དེ་དང་འབྲེལ་པ་མི་སྣང་ཕྱིར། །ཆུ་དང་འོ་མ་སོགས་འདྲ་ན། །དོན་ལ་སྦྱོར་བ་ཇི་ལྟར་འགྲུབ། །བླང་དང་དོར་བའི་ཡུལ་དག་ནི། །བསྟན་པའི་ཕྱིར་ན་གཉིས་གསུངས་ཏེ། །བདག་དང་གཞན་ལ་འདི་འགྲུབ་པའི། །རྟོག་པ་རྣམ་གཉིས་གསུངས་པ་ཡིན། །མིང་ལ་སོགས་དང་སྦྱོར་བྱེད་འདིའི། །རང་གི་རྒྱུ་མཚན་དེ་མ་ཐག །གང་གིས་འཕགས་པར་གནས་གྱུར་པ། །དེས་ན་གནས་སྐབས་མིན་བརྗོད་མིན། །མིང་དང་རིགས་སོགས་རྣམས་ཀྱི་འམ།། ཡང་ན་འདི་ལ་དེ་སྦྱོར་བས། །བརྗོད་པ་དང་ལྡན་ཤེས་པ་དེ། །རྟོག་པར་བརྗོད་ཅེས་གསུངས་པ་ཡིན། །ཡང་ན་བརྗོད་པ་འབའ་ཞིག་ཉིད། །བསྟན་པས་རང་གི་འདོད་པ་གྲུབ། །ཐམས་ཅད་དུ་ཡང་མིང་དང་དོན། །སྦྱོར་བས་སྦྱོར་བ་ཞེས་གསུངས་སོ། །དེས་ནི་བྱེད་པའི་བྱེད་ཚིག་ཉིད། །
འབྲས་བུ་དང་བཅས་ཤེས་པར་བྱ། །མིང་དང་རིགས་ལ་སོགས་རྣམས་ཀྱི། །དེ་ཡི་ཤེས་བྱའི་དོན་དུ་གནས། །འདོད་རྒྱལ་སྒྲ་ཡི་བརྗོད་བྱ་བའི། །འདི་ཡི་མ་ཁྱབ་པར་ཤེས་བྱ། །སོ་སོའི་སྒྲར་ནི་རབ་ཏུ་འགྲུབ། །འོ་ན་བརྗོད་བྱ་གཞན་གསལ་ཕྱིར། །རིགས་སྒྲ་འབའ་ཞིག་ཡིན་པ་འམ། །བརྗོད་འདོད་གཞན་དབང་གྱུར་བའི་ཕྱིར། །འདོད་རྒྱལ་སྒྲ་ཉིད་མ་ཡིན་ནམ། །འཇིག་རྟེན་རྗེས་འབྲང་འདི་ཡོད་པར། །རིགས་པ་མཁྱེན་པས་གསུངས་པ་ཡིན། །འདི་ཉིད་ཙམ་གྱི་སྒྲ་ཡིས་ནི། །འདིར་ནི་ཐ་སྙད་ལམ་དུ་ཞུགས། །རིགས་སོགས་དེ་ཡང་འཇིག་རྟེན་བཞིན། །འདིར་ནི་ཐ་སྙད་ཡོད་མ་ཡིན། །དེ་དག་འདི་ལས་རྟོགས་བྱའི་ཕྱིར། །གཞན་དུ་འདི་སྐད་གསུངས་པ་ཡིན། །གང་ཞིག་རྟོགས་པ་ལ་བརྟེན་ནས། །གང་དག་རིགས་སོགས་སྦྱོར་བས་ཀྱང༌། །དེས་ཀྱང་བརྗོད་པ་དང་ལྡན་པའི། །རྟོག་པ་ངེས་པར་ཁས་བླངས་འགྱུར། །གཞན་དུ་དངོས་པོ་གཉིས་དག་གི །སྦྱོར་བ་ཡོད་པར་མི་འགྱུར་ཏེ། །རང་དབང་དུ་ནི་ཡོངས་གཅོད་པས། །རྟོག་པ་ཉིད་དུ་བརྟགས་པ་མིན། །དེ་ལྟར་ན་ཡང་སྣ་ཚོགས་པ། །འདི་ཀུན་ཐ་སྙད་མེད་པར་འགྱུར། །རིགས་སོགས་ཚུལ་ལ་བརྟེན་ནས་ནི། །འདི་ནི་ཐ་སྙད་ཉིད་དུ་འདོད། །རིགས་ལ་སོགས་དང་སྦྱོར་པའི་སྒྲ། །སྦྱོར་བ་ལ་ནི་མ་འཁྲུལ་པའོ། །དེ་སྐད་བསྟན་པའི་ཚིག་དེ་རྣམས། །འབྲས་བུ་དང་བཅས་ཚིག་ཏུ་འགྱུར། །དེ་ཕྱིར་རྒོལ་བ་པ་རྣམས་ཀྱིས། །གྲུབ་མཐའ་ཡང་དག་གནས་ཀུན་གྱིས། །རྩོད་པ་མེད་པར་རྟོགས་འདིའོ། །ཁོ་བོས་དཔྱད་དེ་བསྒྲུབས་པ་ཡིན། །མིང་དང་རིགས་སོགས་བརྗོད་པ་ཡིས། །ཀུན་དུ་བརྟགས་པ་དེ་དག་ཀུན། །དེ་ནི་དེ་བཞིན་བདག་གཞན་གྱིས། །འདི་ནི་འདི་ལྟར་ཁས་བླངས་པའོ། །དེ་རྣམས་དང་ནི་བདག་ཉིད་ཀྱི། །ཁྱད་པར་འདི་ཉིད་ཀྱི་ཙམ་ཞེས། །དེས་གསུངས་གཞན་དུ་འདི་ལ་སོགས། །ཚིག་ནི་དེ་བརྗོད་གསུངས་པ་ཡིན། །དང་བཞིན་རིགས་པའི་སྒོ་ཡིག་ཞུང༌། །ལམ་འདི་ཉིད་ཀྱིས་བཤད་བྱ་སྟེ། །ཤེས་པ་ཞེས་བྱར་འབྲེལ་པའི་ཕྱིར། །དེར་ནི་རྟོགས་པ་ཞེས་ཀྱང་གསུངས། །ཡང་ན་གཞན་སེལ་བྱས་པའི་སྒྲ། །ལྡོག་པས་ཐ་དད་བྱས་པ་ཡིན། །འདིར་ནི་རིགས་ལ་སོགས་པ་རྣམས། །རྣམ་པར་བཅད་
པ་འདི་མཛད་དོ། །དེ་ལྟའི་ཤེས་པའི་ངོ་བོ་ཉིད། །འདི་ལ་གང་ཚེ་རྟོགས་བར་འདོད། །དེ་ཡི་བདག་ཉིད་དགག་པ་ཡི། །མངོན་སུམ་ཉིད་དུ་ཉེ་བར་བརྗོད། །དེ་ཚེ་ཤིང་ལ་སོགས་པའི་སྒྲས། །བརྗོད་བྱ་ཤིང་སོགས་སྒྲ་དེ་ཡིས། །རྟོག་པ་དང་བྲལ་ལ་གནོད་མིན། །གཞན་དུ་གཟུགས་སྒྲ་ལ་སོགས་པ། །རྟོག་པ་དང་བཅས་ཉིད་དུ་འགྱུར། །གལ་ཏེ་མངོན་སུམ་ཞེས་བྱའི་སྒྲ། །མངོན་སུམ་རྟོག་པ་དང་བྲལ་བར། །ཤིན་ཏུ་གསལ་བར་ཤེས་བྱ་སྟེ། །སེམས་ནི་གཞན་དུ་ཀུན་ཞེན་ཀྱང༌། །དབང་རྟེན་སྔོན་བོར་རྟོགས་ཕྱིར་རོ། །རྣམ་པར་རྟོག་པ་འདི་ཉིད་ནི། །དོན་དེ་རྟོགས་པར་བྱེད་པ་ཡིན། །འདས་པ་ལ་སོགས་མིང་བཏང་ནས། །དེ་ཡི་མིང་གིས་སྦྱོར་བྱེད་འཐོབ། །དེ་ཚེ་མིང་དང་དོན་འདྲེས་པས། །རྣམ་རྟོག་ལ་ཡོད་གཞན་དུ་མིན། །སྣང་བ་སོ་སོར་མ་དམིགས་པས། །ཅིག་ཅར་གཉིས་སྣང་བར་མི་འདོད། །རྟོག་བཅས་ཡིད་ཀྱི་རྣམ་ཤེས་དང། །ལྷན་ཅིག་འབྱུང་བར་ཤེས་བྱས་ཏེ། །དེ་ཕྱིར་དབང་པོའི་ཤེས་པ་འདི། །རྟོག་པ་མེད་བར་གསལ་བ་ཡིན། །རྣམ་རྟོག་རིམ་གྱིས་སྐྱེ་བ་ཉིད། །ཡིན་ཡང་མགལ་མེའི་འཁོར་ལོ་བཞིན། །མྱུར་བར་འཇུག་ལ་ཅིག་ཅར་བར། །མངོན་པར་སེམས་བ་ཡིན་ཞེ་ན། །མ་ཡིན་དེ་ཚེ་མངོན་གྱུར་པའི། །དངོས་པོ་མིན་དང་རྗེས་འབྲེལ་པར། །ལྡན་པའི་རྣམ་རྟོག་སྣང་བ་ཞེས། །འདི་ནི་ཅུང་ཟད་བསྟན་པ་མེད། །འཁྲུལ་པའི་མངོན་པའི་ང་རྒྱལ་དེའང༌། །དོན་གྱི་ཤེས་པ་དེ་ཉིད་དང༌། །རྒྱུན་མི་འཆད་པར་ལྷན་ཅིག་པ། །དེ་ཡི་ཕྱིར་ན་གསལ་བ་ཡིན། །གར་མཁན་ལ་ལྟའི་གནས་སྐབས་སོགས། །མ་ལུས་པར་ནི་ཅིག་ཅར་མཐོང༌། །མང་པོ་རྣམས་ཀྱིས་བར་བཅད་ཀྱང༌། །མྱུར་དུ་འཇུག་པས་དེ་འཁྲུལ་པའི། །ལྕུག་མའི་སྒྲ་ལ་སོགས་རྣམས་ཀྱིས། །བློ་ནི་ཤིན་ཏུ་མྱུར་འབྱུང་བའི། །འདི་ལའང་ཅིག་ཅར་འབྱུང་བ་ཡི། །ང་རྒྱལ་ཅི་ཕྱིར་འབྱུང་མི་འགྱུར།། ཡིད་ཀྱི་རྟོག་པ་འབའ་ཞིག་ལའང༌། །རིམ་དུ་ངེས་པར་བས་བྱེད་མིན། །བློ་རྣམས་ཀུན་ཀྱང་མྱུར་འབྱུང་ཞིང༌། །རིམ་དུ་གནས་པ་མིན་པར་མཚུངས། །དེ་ཕྱིར་ཡུལ་རྣམས་ཐམས་ཅད་ལ། །རིམ་གྱིས་འཛིན་པར་མི་འགྱུར་གྱི། །སྒྲ་ལ་སོགས་པའི་བློ་བཞིན་དུ། །ཅིག་ཅར་འཛིན་པར་
སྣང་བར་འགྱུར། །མགལ་མེ་ལ་ཡང་འཁྲུལ་པ་ཡིས། །ཅིག་ཅར་འཁོར་ལོར་སྣང་བར་འབྱུང༌། །གསལ་བར་སོ་སོར་སྣང་བའི་ཕྱིར། །མཐོང་བས་མཚམས་སྦྱོར་མ་ཡིན་ནོ། །འདི་ལྟར་མཚམས་རྣམས་སྦྱོར་བ་ནི། །དྲན་པར་བྱེད་བས་སྦྱོར་ཡིན་གྱི། །མཐོང་བས་མིན་ཏེ་འདས་པ་ཡི། །ཡུལ་དང་འཛིན་པ་མིན་ཕྱིར་རོ། །འདི་ཡི་ཡུལ་དུ་གང་གྱུར་པ། །དེ་ནི་ཞིག་པར་གསལ་མ་ཡིན། །དེ་ཕྱིར་འཁོར་ལོར་སྣང་བ་འདི། །གསལ་བ་མིན་པར་འགྱུར་བའི་ཕྱིར། །གཞན་ཡང་དངོས་པོ་གང་ཞིག་གིས། །གང་གི་ངོ་བོར་གཞག་པའི་རྒྱུ། །མེད་ཕྱིར་དེ་ནི་དེ་ཉིད་དུ། །བློ་ལྡན་རྣམས་ཀྱིས་གཞག་མི་བྱ། །དུང་དཀར་པོ་ལ་བ་ལང་གི །རང་བཞིན་ལྐོག་ཤལ་མེད་སོགས་བཞིན། །བྱེ་བྲག་ཅན་དང་བྱེ་བྲག་གི །དོན་མཛད་པ་ཡང་མེད་པ་ཡིན། །འདི་ལ་རྟོག་པ་དང་བཅས་པའི། །དངོས་པོར་གཞག་པའི་རྒྱུ་མཚན་མེད། །བ་ཁྲ་བོ་སོགས་མི་མཐུན་ཕྱོགས། །གཞན་དུ་ཧ་ཅང་ཐལ་ཆོས་འགྱུར། །རིགས་ལ་སོགས་པ་བཀག་པ་ཡིས། །གཏན་ཚིགས་མ་གྲུབ་པ་ཉིད་ཡིན། །དབྱེ་བས་ཡོངས་སུ་མ་བཅད་ཕྱིར། །དེ་བཞིན་བྱེ་བྲག་རྣམས་ཀྱང་མེད། །སྒྲ་ཡི་རང་གི་མཚན་ཉིད་གང༌། །མིང་དང་རྗོད་བྱེད་མིན་པ་ཉིད། །བརྗོད་བྱ་རང་གི་མཚན་ཉིད་དང༌། །རྗོད་བྱེད་ཉིད་ཀྱང་སུན་བཏོན་ཏེ། །དེ་ཕྱིར་བརྗོད་བྱ་རྗོད་བྱེད་དུ། །འདོད་པ་དེ་ནི་སྒྲོ་བཏགས་ཡིན། །སྒྲོ་བཏགས་དང་བྲལ་དོན་ཉིད་དུ། །མངོན་སུམ་ཉིད་ནི་ཤེས་པར་བྱ། །རང་གི་མཚན་ཉིད་ཡོད་གྱུར་ལ། །མོད་ལ་དེ་ནི་མེད་གྱུར་ན། །དེ་ཡང་ལྡོག་པར་འགྱུར་བ་ནི། །དངོས་པོ་བར་བཅད་སོགས་ཕྱིར་རོ། །སྔོན་པོ་ལ་སོགས་བདག་ཉིད་ལ། །བརྡ་སྦྱོར་མི་ནུས་གཞན་རྟེན་མིན། །དེས་ན་དེ་དག་རང་རིག་ནི། །བརྗོད་དང་རྗེས་འབྲེལ་ཅན་མ་ཡིན། །དེ་ནི་གཟུང་བྱའི་བྱེ་བྲག་ལས། །མིང་སོགས་སྦྱོར་བ་མ་ཡིན་ཡང༌། །འོན་ཀྱང་གཏན་ཚིགས་མ་གྲུབ་པ། །གང་གིས་རྗེས་སུ་འཇུག་པ་མིན། །གལ་ཏེ་དོན་གཞན་རྣམ་བཅད་པའི། །ཚུལ་གྱིས་འཛིན་པ་མ་ཡིན་ན། །དོན་ཙམ་འཛིན་པར་འགྱུར་བ་འམ། །འཛིན་པར་མི་འགྱུར་བུམ་པ་བཞིན། །གལ་ཏེ་བུམ་གཞན་རྣམ་བཅད་པའི། །ཚུལ་གྱིས་འཛིན་པ་མ་ཡིན་ན། །བུམ་པ་ཙམ་ཞིག་འཛིན་འགྱུར་རམ། །འཛིན་
པར་མི་འགྱུར་བུམ་ཉིད་བཞིན། །གཟུང་བྱ་གཞན་ནི་རྣམ་བཅད་པའི། །ཚུལ་གྱིས་འཛིན་པ་ཡིན་སྙམ་ན། །ཤིང་ངོ་ཞེས་བྱ་སོགས་བློ་བཞིན། །རྟོག་དང་བཅས་པའི་རྣམ་ཤེས་འགྱུར། །སྤྱི་དང་འབྲེལ་པ་མ་ཡིན་ན། །བྱེ་བྲག་གང་ན་ཡང་ཡོད་མིན་ཏེ། །འཛིན་ཚེ་དེ་ལ་མ་རེག་པས། །དངོས་པོ་མེད་ཕྱིར་གཟུང་བྱ་མིན། །དེ་ཕྱིར་ནམ་མཁའི་མེ་ཏོག་བཞིན། །དངོས་མེད་འདི་ནའང་གཟུང་བ་མིན། །བྱེ་བྲག་དག་དང་མ་འབྲེལ་པའི། །བྱེ་བྲག་ཅན་ནི་མི་སྲིད་པས། །བྱེ་བྲག་ཅན་གྱི་ཡུལ་གྱི་བློ། །རྟོགས་པ་མིན་ཞེས་གྱ་ཚོམ་སྨྲ། །མཐུན་དངོས་མི་མཐུན་དངོས་དག་ལས། །ལྡོག་པའི་དོན་ནི་འཛིན་པར་འདོད། །བྱེ་བྲག་ཅན་གྱི་ཡུལ་གྱི་བློ། །བྱེ་བྲག་དག་དང་འབྲེལ་མིན་ན། །ཐ་དད་དེ་ཡང་བྱེ་བྲག་ཅན། །ཞེས་བརྗོད་བྱེ་བྲག་འབྲེལ་པས་མིན། །ཐ་དད་ཅེས་བྱའང་དེ་སྒྲ་དང༌། །འབྲེལ་པ་མེད་པར་ཤེས་བྱ་སྟེ། །རང་བཞིན་ལས་གཞན་དངོས་དག་ནི། །མ་ལུས་པ་ལས་ལྡོག་པ་ཅན། །བཟུང་བར་གྱུར་པ་དེ་ཉིད་ལ། །དེ་ལྟའི་རྣམ་རྟོག་སྐྱེ་བར་འགྱུར། །བྱེ་བྲག་ཏུ་ནི་མ་བཟུང་ལ། །སྤྱི་ཞེས་ཕ་རོལ་པོ་འདོད་པ། །རྟོག་པ་དང་བཅས་ཤེས་པ་ལ། །འཛིན་ན་དེར་ཡང་དེ་དང་མཚུངས། །བྱེ་བྲག་དག་ལས་བྱེ་བྲག་ཅན། །དེ་ལ་སྤྱི་རུ་ཤེས་བྱ་ན། །དེ་ནི་འཛིན་པ་ཡིན་པའི་ཕྱིར། །རྟོག་དང་བཅས་པའི་རྣམ་ཤེས་འགྱུར། །བྱེ་བྲག་མེད་པ་འཛིན་སྙམ་ན། །ལྡོག་པ་ལས་ནི་སྤྱི་ཞེས་བརྗོད། །དེས་ནི་སྤྱི་ནི་བྱེ་བྲག་ལས། །བྱེ་བྲག་ཅན་ཉིད་དུ་མི་འཐད། །མཐུན་དང་མི་མཐུན་ངོ་བོ་ཡིས། །འདི་དག་ཤེས་བྱ་ཡིན་འདོད་ལ། །སྤྱི་དང་བྱེ་བྲག་ཏུ་གནས་པར། །བདག་ཉིད་ཀྱིས་ནི་རབ་ཏུ་བརྟགས། །གལ་ཏེ་མཐུན་དང་མི་མཐུན་པའི། །དངོས་ནི་ཐ་དད་པར་འདོད་ན། །བྱེ་བྲག་དག་ལས་བྱེ་བྲག་ཅན། །ཉིད་ནི་སྤྱི་དང་འདྲ་བར་འགྱུར། །འོན་ཏེ་འདི་ནི་མི་འབྱེད་ན། །འདི་ལྟར་མ་འདྲེས་པར་གནས་ན། །ཕན་ཚུན་སྤངས་ཏེ་གནས་པ་ཡིས། །འགྲོ་བ་གཞན་ནི་ཡོད་མ་ཡིན། །བྱེ་བྲག་བདག་ཉིད་ལས་ལྡོག་པར། །དབྱེ་བས་མཚན་ཉིད་གཞན་ཡོད་མིན། །དེ་ཡི་ངོ་བོ་མ་བཟུང་ན། །དེ་ལ་འཛིན་པར་ཇི་ལྟར་བརྗོད། །དེ་ཡི་དངོས་ལ་རེག་ནའང་འདི། །ཐ་དང་གཞན་ལས་ལྡོག་པ་ཡི། །འཛིན་
པ་ཞེས་བྱའི་རྣམ་ཤེས་འདི། །འདི་ལ་རྟོགས་དང་བཅས་པར་འགྱུར། །སྤྱི་ནི་དངོས་པོ་མེད་པས་ན། །གང་གིས་བྱེ་བྲག་ཅན་རྟོགས་འགྱུར། །དེ་ཕྱིར་ཁྱོད་ལ་དེ་ཡང་ན། །རྟོགས་བཅས་ཤེས་པའི་གཟུང་བྱར་འགྱུར། །མིང་གིས་བྱེ་བྲག་ཅན་ཡིན་ན། །དེ་ཅི་དེ་ཡི་བདག་ཉིད་དམ། །གལ་ཏེ་མིན་ནའང་བྱེ་བྲག་ཅན། །དེ་ཕྱིར་འདི་ལ་ཅིས་མི་འདོད། །དེ་ཡི་བདག་ཉིད་མིན་པ་འདི། །དངོས་པོའི་བྱེ་བྲག་ཅན་ཡང་ཡིན། །དངོས་མེད་སྤྱི་དེ་ཁྱོད་ལ་ནི། །ཇི་ལྟར་བྱེ་བྲག་ཅན་ཉིད་མིན། །དེ་ཕྱིར་རང་གི་མཚན་ཉིད་ལ། །ཤེས་པ་ཅུང་ཟད་སྐྱེ་བར་འགྱུར། །ལྡོག་པའི་དངོས་པོའི་ཡུལ་ཅན་ནི། །དེ་ཀུན་རྟག་མེད་ཡིན་པར་འགྱུར། །དམིགས་པ་ཙམ་གྱིས་ཤེས་པ་ནི། །རྟོག་པ་མེད་པ་ཡོད་པ་ཡིན། །བྱིས་པ་ལྐུགས་སོགས་མཚུངས་ཤེས་པ། །བྱེ་བྲག་མ་ཡིན་སྤྱི་ཡང་མིན། །དག་པའི་དངོས་ལ་དམིགས་དུས་སུ། །སྐྱེ་བར་ཉམས་སུ་མྱོང་བར་འགྱུར། །དེ་དག་གི་ནི་གཞིར་གྱུར་པའི། །གསལ་བ་ཉིད་ནི་རྟོག་པར་འགྱུར། །དེ་ལས་གཞན་དུའང་རིགས་ལ་སོགས། །དངོས་པོའི་ཆོས་ནི་ཇི་ལྟ་བར། །ངེས་པར་བྱེད་པའི་བློ་གང་ཡིན། །དེ་ཡང་མངོན་སུམ་ཉིད་དུ་འདོད། །ཡང་དང་ཡང་དུ་རྣམ་རྟོག་པའང༌། །ཇི་སྲིད་འཛིན་པར་གྱུར་པ་རྣམས། །དེ་དང་འབྲེལ་པའི་རྗེས་འབྲངས་ནས། །ཐམས་ཅད་མངོན་སུམ་ཉིད་དུ་འདོད། །སྣང་བ་ལས་ནི་ཁྱིམ་ཕུགས་སུ། །ཞུགས་པའི་མོད་ལ་དོན་མཐོང་མིན། །བྱས་ཀྱང་དབང་པོས་མི་རྟོགས་སམ། །ཇི་ལྟར་སྣང་བའི་མོད་ཉིད་ལ། །དང་པོར་རང་གི་ངོ་བོར་ཤེས། །ཕྱི་ནས་རིགས་ལ་སོགས་ཆོས་ཀྱིས། །དེ་ལ་ངེས་པར་རྟོགས་པར་བྱེད། །གལ་ཏེ་དམིགས་ནས་མིག་བཙུམས་ཏེ། །འགའ་ཞིག་རྣམ་པར་རྟོག་འབྱུང་བ། །འབྲེལ་པའི་རྗེས་འབྲངས་དེ་མིན་པས། །དེ་ནི་མངོན་སུམ་ཉིད་དུ་འདོད། །ཟེར་བ་མི་རིགས་གལ་ཏེ་ཡང༌། །ཤེས་པ་རང་གི་མཚན་ཉིད་ལ། །ཞུགས་པ་རིགས་སོགས་པར་འཛིན་ཀྱང༌། །བརྗོད་པ་དེ་ནི་ཞུགས་པ་ལ། །དེ་ལྟའང་རང་གི་མཚན་ཉིད་འདི། །བརྗོད་བྱ་མིན་པར་གོང་དུ་བསྒྲུབས། །དེ་ལ་དམིགས་པའི་ཤེས་པ་ཡང༌། །རྟོག་པ་མེད་པ་ཉིད་དུ་ངེས། །རིགས་ཙམ་འཛིན་པར་འགྱུར་ན་ཡང༌། །བྱེ་བྲག་
གཅིག་ཏུ་ཐ་དད་པ། །ཉིད་དུ་ཕ་རོལ་པོ་དེ་ཡང༌། །འདོད་པ་ཡིན་པར་ཇི་སྐད་སྨྲས། །གང་ཚེ་བྱེ་བྲག་ཅན་དག་ལས། །བྱེ་བྲག་གཅིག་ཏུ་ཐ་དད་པ། །རང་དང་རྗེས་མཐུན་རང་བཞིན་བློ། །བྱེ་བྲག་ཅན་ལས་ཇི་ལྟར་སྐྱེ། །རང་དང་སྤྱི་ཡི་བདག་ཉིད་ཅན། །ཤེས་པ་གཅིག་གིས་རིགས་མི་འཐད། །རྟོགས་བཅས་གཞན་དུ་གྱུར་ནས་ནི། །སྔ་མ་རིགས་ནི་གཞན་དུ་འགྱུར། །གལ་ཏེ་རིགས་སོགས་རྟོགས་པ་ཅན། །གཅིག་ཏུ་ཐ་དད་མ་ཡིན་ན། །བཅད་པའི་དོན་ལ་འཛིན་པའི་ཕྱིར། །ཕྱི་མ་དྲན་བའི་བློ་དང་མཚུངས། །སྤྱི་ཡི་དངོས་པོ་དུ་མ་ཡིས། །མི་གསལ་བ་ནི་རྟོགས་ཤེ་ན། །དེ་དང་མཚུངས་མིན་ངེས་པ་ལ། །ཕྱི་མ་ཕྱི་མ་ངེས་པ་ཡིན། །སྒྲོ་འདོགས་རྣམ་པར་གཅོད་པ་ཡི། །ཇི་ལྟར་ཡུལ་ལ་རྗེས་དཔག་ལ། །དེ་བཞིན་ངེས་པ་པ་ཡིས་ཀྱང༌། །ཡུལ་ལ་སྒྲོ་འདོགས་རྣམས་གཅོད་ཡིན། །སྒྲོ་འདོགས་རྣམ་པར་བཅད་པ་ཡི། ཡུལ་ཅན་ཉིད་ཀྱིས་ཚད་མ་ཡིན། །རྗེས་སུ་དཔག་པ་ཚད་མ་ཡིན། །ཡིད་ལ་དྲན་པ་མངོན་སུམ་གྱི། །རྗེས་སོགས་སྒྲོ་འདོགས་སེལ་བས་ཡིན། །རྟགས་ལས་བྱུང་བའི་ཤེས་པ་ནི། །ཚད་མར་འདོད་དེ་ཁྱེད་ལ་མེད། །དེ་ཉིད་དང་ནི་གཞན་བདག་ཉིད། །རིགས་ལ་སོགས་པ་ཡོད་མིན་ན། །རྟོག་པ་དང་བཅས་ཤེས་པ་གང༌། །མངོན་སུམ་ཉིད་དུ་འགྱུར་བ་མིན། །རྗེས་འགྲོ་མེད་པའི་ཐ་དད་ལས། །ཐ་དད་པར་ནི་སྣང་བ་མིན། །དེ་ཉིད་དང་ནི་གཞན་པ་དག །ཕན་ཚུན་སྤངས་ཏེ་གནས་པ་ཡང༌། །རྟོག་པ་མེད་པའི་ཤེས་པ་ཡང༌། །རྟོགས་བཅས་ཤེས་པའི་ནུས་པར་ལྡན། །ཐ་སྙད་མ་ལུས་ཡན་ལག་ནི། །དེ་ཡི་སྒོ་ནས་འབྱུང་བ་ཡིན། །རྟོག་མེད་རྟོག་བཅས་སྐྱེད་ནུས་མིན། །ཡུལ་ཐ་དད་ཕྱིར་རྟོག་མེད་ཕྱིར། །གཟུགས་སོགས་རྣམ་པར་ཤེས་པ་བཞིན། །མིག་སོགས་རྣམ་ཤེས་བཞིན་ཞེ་ན། །དེ་དག་དང་ཡང་རྟོག་བཅས་དག །འདིར་ནི་ལྷན་ཅིག་འགལ་བ་མིན། །དོན་དེ་ཉིད་ལ་ངེས་འབྱེད་ཕྱིར། །ཡུལ་ནི་ཐ་དད་པ་ཡང་མིན། །དངོས་སུ་ན་ནི་དམིགས་མེད་ལ། །རྟོག་པ་ཡང་དག་འཇུག་པ་ཡིན། །དེ་ལ་ཡུལ་ཉིད་ཡོད་མིན་ན། །གང་གིས་ཐ་དད་ཡོད་པ་ཡིན། །གཟུགས་སྒྲ་ལ་སོགས་བློ་རྣམས་ཀྱི། །རྒྱུ་ནི་
གཞན་དང་གཞན་ཡོད་པས། །དེ་ཕྱིར་གོང་དུ་སྨྲས་པའི་དཔེ། །བསྒྲུབ་བྱས་སྟོང་པས་འདི་མི་འགྲུབ། །མེ་དང་དུ་བ་སོགས་བློ་རྣམས། །འབྲས་བུ་རྒྱུ་ཡི་ངོ་བོ་ཡིས། །འཁྲུལ་པ་ཁོ་ན་ཡིན་པས་ཡང༌། །འདི་ལ་གསལ་བར་མཚོན་པར་བྱ། །མ་འཁྲུལ་པ་ཞེས་སྨོས་པས་ནི། །སྒྲ་ཤད་འཛིངས་སོགས་ཤེས་པ་རྣམས། །འཁྲུལ་ཕྱིར་ཚད་མར་མི་འདོད་དེ། །དེ་རྣམས་བསལ་ཕྱིར་འདི་བྱས་སོ། །ཁ་ཅིག་ཡིད་ཀྱི་འདོད་པ་ཡང༌། །དེ་མིན་དབང་པོ་ཡོད་ན་ནི། །ཡོད་ལ་དབང་པོ་མེད་མིན་ཡང༌། །ཉམས་པར་གྱུར་པ་འགྱུར་བ་ཡིས། །བསྒྱུར་བ་ཡང་ནི་དམིགས་པ་ཡིན། །སྦྲུལ་ལ་སོགས་པ་འཁྲུལ་པ་བཞིན། །ཡིད་ཀྱི་འཁྲུལ་པ་ལྡོག་འགྱུར་ཞིང༌། །གསལ་བར་མི་སྣང་པར་ཡང་འགྱུར། །དེ་ཡོད་པ་ལས་ཡོད་པ་ནི། །དངོས་སུམ་གྲུབ་འཁྲུལ་པ་ཡིན། །དྲན་པའི་བློ་ནི་རྗེས་འཇུག་པས། །ཡིད་ནི་བརྒྱུད་པ་མ་ཡིན་ཏེ། །དེ་ཡི་འགྱུར་བས་བསྒྱུར་བ་ཉིད། །འདི་ལའང་བརྒྱུད་པས་སྐྱེ་བར་ནི། །མངའ་ཡི་ཤུགས་སོགས་ལས་དག་ལ། །འཇིག་རྟེན་ན་ཡང་གསལ་བར་སྣང༌། །ཡིད་ཀྱིས་འཁྲུལ་པ་ཐམས་ཅད་ནི། །རྣམ་པར་དཔྱད་པས་ལྡོག་འགྱུར་ན། །དངོས་པོ་སྤྱི་ཡི་བློ་རྣམས་ཀྱི། །འདི་ལ་འཁྲུལ་པ་ཉིད་ཡིན་ནོ། །དངོས་པོའི་རང་གི་མཚན་ཉིད་ལ། །ངོ་བོ་ཉིད་ཀྱིས་དེ་འཇུག་མིན། །དེ་བཞིན་དེ་ཡི་ལྡོག་པ་ཡང༌། །ཟླ་བ་གཉིས་ལ་སོགས་དང་མཚུངས། །ཡོད་པ་ལྡོག་པ་མ་ཡིན་ཏེ། །སྤྱི་ཡི་བློ་དང་མཚུངས་ཤེ་ན། །དབང་ཕྱུག་ལ་སོགས་འཁྲུལ་པ་རྣམས། །དེ་ཡི་གཞུང་ལ་ཞེ་ན་རྣམས་ཀྱིས། །རིགས་པ་བྱེ་བ་སྙེད་ཐོས་ཀྱང༌། །ཡོད་འདོད་མི་ལྡོག་སླར་ལ་ཡང༌། །དེ་དག་རིགས་པ་མ་ཡིན་ཞེས། །སྐྱེ་བ་དེ་དག་རང་ཉིད་སྨྲ། །དེ་ཡོད་པ་ལས་ཡོད་པ་ཉིད། །དངོས་སུ་མ་གྲུབ་ཅེས་པ་དེ། །མི་འགྲུབ་མ་འཁྲུལ་རྣམས་བློ་ལ། །བརྒྱུད་པ་གྲུབ་པ་མ་ཡིན་ཏེ། །དེ་ནི་ཤིན་ཏུ་མེད་ཅེས་བྱ། །སེམས་ནི་གཞན་དུ་ཞེ་ན་གྱུར་ཀྱང༌། །ཟླ་བ་གཉིས་སོགས་སྣང་བ་ཡིན། །རྒྱུན་མི་འཆད་པ་མེད་པའི་ཕྱིར། །བརྒྱུད་པ་ལས་སྐྱེ་མ་ཡིན་ནོ། །དངོས་པོ་མ་གྲུབ་བློ་རྣམས་ནི། །སོ་སོར་སྡུད་པ་ཡོད་པའི་ཕྱིར། །ལྡོག་བར་གྱུར་པ་ཡོད་པ་ཉིད། །རང་འདོད་དབང་ཕྱུག་གཞུང་
ཡང་ལྡོག །དུང་ལ་སེར་སོགས་བློ་རྣམས་ཀྱང༌། །དོན་བྱེད་སོགས་ལ་མི་སླུ་བས། །གཞན་དག་ཚད་མ་ཡིན་པར་འདོད། །དེ་ཡང་དོན་བྱེད་ནུས་མིན་ཏེ། །གཞན་དུ་ཧ་ཅང་ཐལ་འགྱུར་ཕྱིར། །སྐྲ་བཤད་འཛིངས་སོགས་པར་མི་མཐོང༌། །སླུ་བའི་ཤེས་པའང་མཐོང་བར་འགྱུར། །དེ་ཕྱིར་དེ་ཡང་ཚད་མ་ཉིད། །ཡིན་པར་བཟློག་པར་དཀའ་བར་འགྱུར། །ཁ་དོག་ལས་ནི་ཐ་དད་པའི། །དབྱིབས་ནི་འཐད་པ་མ་ཡིན་ནོ། །ཁ་དོག་དུ་ནི་སྣང་བ་ཅན། །མི་སླུ་བར་ནི་མཐོང་བ་ཡིན། །རྣམ་པ་ལ་ནི་མ་ལྟོས་བར། །གལ་ཏེ་ཚད་མར་རྟོག་བྱེད་ན། །དོན་བྱེད་པ་ལ་མི་སླུ་བས། །དེ་ཡི་ངོ་བོ་དོན་ལ་ངེས། །དེ་སྐད་ཅེས་སོགས་སྨྲ་བ་ཀུན། །ཇི་ལྟར་འགལ་བར་འགྱུར་མ་ཡིན། །བག་ཆགས་སྨིན་པའི་རྒྱུས་བསླང་བ། །དེ་ཕྱིར་མི་སླུ་མ་ཡིན་ནོ། །ཡིད་དང་དབང་པོའི་ཤེས་པ་ནི། །རྟོག་པ་མེད་པར་སྒྲུབ་པ་ལ། །བདེ་སོགས་རིགས་པ་གང་ཡིན་པ། །རྟོག་པ་མེད་པར་སྒྲུབ་བྱེད་ཡིན། །གཞན་རིག་བྱེད་པའང་མ་ཡིན་པ། །རང་རིག་ཇི་ལྟར་ཡིན་པར་དཔྱོད། །དོན་གཅིག་ལ་རྟེན་རྣམ་ཤེས་ནི། །དེ་དག་རིག་པར་འགྱུར་ཞེ་ན། །སྤྱི་ཡི་དངོས་པོ་ལ་དམིགས་པ། །རྒྱུན་མི་འཆད་པར་འཇུག་པ་ན། །དེ་ཚེ་རྒྱུན་མི་འཆད་པར་ཡང༌། །བདེ་སོགས་ཅི་ཕྱིར་རིག་པ་ཡིན། །གལ་ཏེ་ཡིད་ཀྱིས་དེ་རིག་པ། །ཉིད་དུ་འདོད་ནའང་དེ་མིན་ཏེ། །རིམ་གྱིས་སྐྱེ་བར་བྱེད་སྨྲ་བས། །དུས་དེར་དེ་ནི་ཡོད་མ་ཡིན། །ཅིག་ཅར་སྐྱེ་བར་མི་འདོད་ཀྱི། །གནས་པ་དེ་ལྟ་མིན་ཞེ་ན། །སྐད་ཅིག་གིས་འཇིག་པར་བསྒྲུབས་པས། །དེ་ལ་གནས་པ་ཞེས་བྱ་མེད།། མྱུར་བར་འཇུག་པ་ཅིག་ཅར་བར། །འཁྲུལ་པ་ཞེ་ན་དེ་ལའང་བསལ། །དྲན་པའི་ཤེས་པའི་སྤྱོད་ཡུལ་ནི། །གསལ་བར་སྣང་བར་མི་འགྱུར་རོ། །བདེ་དང་བདེ་མིན་སོགས་ངོ་བོ། །དེ་ལའང་གལ་ཏེ་འཁྲུལ་པར་ནི། །རྟོག་ན་བདེ་སོགས་དེ་ཙམ་དུ། །ཡོད་པའི་མཚན་ཉིད་ཅན་དུ་འགྱུར། གང་ཚེ་རྣལ་འབྱོར་པས་གཞན་གྱི། །བདེ་ལ་སོགས་པ་རིག་པ་ན། །དེས་ཀྱང་དེ་བཞིན་མངོན་སུམ་དུ། །ཉམས་སུ་མྱོང་བར་མཚུངས་པར་འགྱུར། །རང་ཉིད་ཀྱིས་ཀྱང་སྡུག་བསྔལ་ལའང༌། །ཡོད་ཉིད་ཉམས་མྱོང་ཁྱེད་མི་འདོད། །འོན་ཀྱང་གཞན་གྱི་རྒྱུད་དེ་ཡི། །ཡུལ་ལ་ཤེས་པ་
དེ་ཡང་ཡོད། །གཞན་གྱིས་སྡུག་བསྔལ་རྗེས་དཔོག་པའང༌། །དེ་ནི་མཚུངས་ཏེ་འོན་ཀྱང་དེ། །གཞན་གྱི་སྡུག་བསྔལ་སོགས་ཡུལ་ཞེས། །སྨྲ་བ་སྤྱོད་ཡུལ་མ་ཡིན་ནོ། །བདེ་དང་སྡུག་བསྔལ་ལ་སོགས་པ། །བདེ་བ་ཉིད་ཅེས་གོ་འགྱུར་གྱི། །ཤེས་པ་ཉིད་ཅེས་གོ་མི་འགྱུར། །དེ་ནི་ཤས་མིན་བུམ་སོགས་བཞིན། །གལ་ཏེ་འདི་བརྡ་གཞན་ཡིན་ན། །ཤེས་པ་ཞེས་བྱའི་བློ་དེ་ཡང༌། །སེམས་ལ་ཡོད་ཕྱིར་དེ་ཡི་མིན། །ཁྱེད་ལ་དེ་ཡང་ཤེས་མི་འགྱུར། །གསལ་བར་སྣང་བ་དངོས་ཡིན་ཕྱིར། །དེ་ནི་དེ་ལྟར་འགྱུར་བ་མིན། །བདེ་དང་སྡུག་བསྔལ་བར་མཚུངས་པར། །འདི་དག་ཐམས་ཅད་ཅིས་མ་གྱུར། །ཡང་དག་དོན་བསྒོམ་ལས་བྱུང་བ། །རྟོག་དང་འཁྲུལ་པ་རྣམ་སྤངས་པ། །བཤད་པ་རྣལ་འབྱོར་པས་ཤེས་པ། །དྲི་མེད་བསྒྲུབ་པར་ནུས་པ་ཡི། །ཡུལ་རྟོགས་པའམ་རང་རིག་པ། །འདི་ནི་ཚད་མའི་འབྲས་བུར་འདོད། །ཚད་མ་ཉིད་ནི་འདྲ་བའམ། །རེག་ཏུ་རུང་བ་ཉིད་ཀྱང་ངོ༌། །སེང་ལྡེང་བཅད་པར་གྱུར་པ་ཡིས། །པ་ལ་ཤ་ནི་མི་འཆད་ལྟར། །འཇིག་རྟེན་ན་ཡང་སྟ་རེ་དང༌། །གཅད་བྱ་གཅིག་འདོད་མིན་ཞེ་ན། །དེ་མིན་རྣམ་བཞག་ལ་བརྟེན་ནས། །བསྒྲུབ་བྱ་སྒྲུབ་བྱེད་ཡང་དག་གནས། །རྣམ་པ་མེད་པའི་ཤེས་པ་ལ། །རྣམ་གཞག་དེ་ནི་མི་རིགས་སོ། །དེ་ཕྱིར་ཐ་དད་པར་རྟོག་ན། །གཞུ་ལ་སོགས་བཞིན་ཡོད་པ་ཡིན། །བསྐྱེད་བྱ་སྐྱེད་བྱེད་ཉིད་ཀྱི་ནི། །རྣམ་པར་གཞག་པ་འདི་མི་འདོད། །ཤིང་སོགས་སྟ་གྲིས་བཅད་པ་ན། །ཕྱེ་བའི་མཚམས་སུ་ཞུགས་པ་ལ། །ཆད་པ་ཞེས་ནི་བརྗོད་པ་ཡིན། །དེས་ན་དེ་ཉིད་གཅིག་ཉིད་ལྡོག །རྣམ་པར་བཞག་པར་གྱུར་པ་ཉིད། །བསྐྱོད་བྱ་སྐྱེ་བྱེད་ཉིད་དུ་ནི། །གཞན་དུ་ཡང་ནི་རྣམ་བརྟགས་ཀྱང༌། །རྣམ་བཞག་དེ་ནི་འགལ་བ་མིན། །བྱེད་པ་ཞུགས་པའི་དེ་མ་ཐག །ཆད་པ་འབྲས་བུ་ཉིད་མིན་པར། །ཤེས་པ་ཚད་མ་མ་ཡིན་ཏེ། །འབྲས་བུ་གཞན་དུ་འདོད་པ་ཡིན། །རང་རིག་འབྲས་བུ་ཉིད་ཅེ་ན། །དེ་ནི་བཀག་ཕྱིར་མི་རིགས་ཏེ། །ཡུལ་གྱི་རྣམ་པ་ཚད་མ་ནི། །དོན་ནི་ཐ་དད་འགྱུར་ཞེ་ན། །ཐམས་ཅད་མ་རིག་པར་འགྱུར་བས། །དགག་པར་ནུས་པ་མ་ཡིན་ནོ། །ཐ་དད་དོན་ཡང་འདིར་ཡོད་མིན། །རང་རིག་པ་ཡང་དོན་རིག་འདོད། །
རང་ལས་ཐ་དད་བྱ་བ་བྱེད། །བྱེད་པ་ཡིན་ཕྱིར་ཆད་མ་སྟེ། །སྟེའུ་ལ་སོགས་བཞིན་ཞེ་ན། །འབྲས་བུ་མེད་པའང་འབྲས་བུ་གཞན་ཕྱིར། །སྨྲས་པའི་རིགས་པས་སྟེའུ་སོགས་ལ། །འབྲས་བུ་གཞན་ཡང་ཡོད་མ་ཡིན། །བྱེད་པ་པོ་ཉིད་ཁོ་བོ་ལ། །མ་གྲུབ་བརྟགས་པས་སྐྱེད་བྱེད་ཡིན། །འཇོག་པ་པོ་ཉིད་བརྟགས་པ་ཡིན། །འགལ་བ་ཅི་ཡང་ཡོད་མིན་པས། །དེས་ན་གཏན་ཚིགས་མ་ངེས་པའོ། །འགལ་བར་བསྟན་པ་མ་ཡིན་ཕྱིར། །རྣམ་པ་གཟུང་བ་དང་མཐུན་མིན། །དེ་ཕྱིར་རིགས་གཞན་ཉིད་ཡིན་པས། །གཟུགས་དང་རོ་སོགས་བཞིན་ཤེས་པ། །དེ་ཉིད་རིགས་པ་མིན་ཞེ་ན། །གཟུང་བར་འཛིན་པ་རྣམས་སྤངས་ཤིང༌། །འདི་ཡང་གཞན་པར་རྣམས་བསལ་བར། །ཐམས་ཅད་རིགས་པའི་རྗེས་འབྲངས་ནས། །ཁོ་བོ་ཅག་ཀྱང་སྨྲ་བ་ཡིན། །བདག་ཉིད་ཐམས་ཅད་ཀྱི་འདྲ་ན། །ཤེས་པ་ཤེས་མེད་ཉིད་དུ་འགྱུར། །ཆ་འགས་འདྲ་བ་ཡིན་ན་ནི། །ཀུན་ཀྱང་ཐམས་ཅད་རིག་བྱེད་འགྱུར། །འོན་ཀྱང་ཕྱི་ཡི་དོན་ཡོད་པར། །སྨྲ་ལ་འདྲ་བ་ཡོད་པར་ནི། །ངེས་པ་ཁོ་ནར་ཁས་ལེན་པར། །བྱ་ཕྱིར་དེ་ནི་བསྟན་པ་ཡིན། །ཤེས་པ་རྣམས་བཅས་ཕྱོགས་ལ་ཡང༌། །སེམས་ནི་གཟུང་བ་ལས་གཞན་ཡང༌། །དེ་ཡི་གཟུགས་བརྙན་ངོ་བོ་ཡིས། །ཕལ་པ་ཡང་ནི་རིག་ཏུ་རུང༌། །དེ་ཡང་རྣམ་པ་ཡོད་མིན་པས། །ཕྱི་རོལ་རིག་པའི་སྣོད་མ་ཡིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་མངོན་སུམ་གྱི་མཚན་ཉིད་བརྟག་པ་སྟེ་ཉི་ཤུ་རྩ་གཅིག་པའོ།། །།རང་དང་གཞན་དོན་དབྱེ་བ་ཡིས། །རྗེས་དཔག་རྣམ་པ་གཉིས་སུ་འདོད། །རང་དོན་ཚུལ་གསུམ་པའི་རྟགས་ལས། །དཔག་བྱའི་དོན་ནི་ཤེས་པ་ཡིས། །ཚུལ་གསུམ་པ་ཡི་རྟགས་བརྗོད་པ། །གཞན་གྱི་དོན་དུའང་བསྟན་པ་ཡིན། །ཚུལ་རེའམ་གཉིས་གཉིས་དོན་ལྡན་པ། །དེ་ཕྱིར་རྟགས་ལྟར་སྣང་བར་འདོད། །གཞན་དུ་མི་འཐད་པ་ཉིད་ནི། །གཏན་ཚིགས་གཤའ་མར་མ་མཐོང་མིན། །ཡན་ལག་གསུམ་ཡང་ཡོད་མིན་པ། །དེ་ཕྱིར་མཚན་ཉིད་གསུམ་དམན་པའི། །གཞན་དུ་མི་འཐད་པ་ཉིད་ནི། །གང་འདི་གཏན་ཚིགས་ཡིན་པར་འདོད། །འདི་ནི་མཚན་ཉིད་གཅིག་པའི་དོན། །མཚན་
ཉིད་བཞི་པའང་མ་ཡིན་ནོ། །དཔེར་ན་བུ་གསུམ་ཡོད་པ་ལའང༌། །དེ་ཡི་བུ་གཅིག་གཅེས་པའི་ཕྱིར། །བུ་གཅིག་པ་ཞེས་འཇིག་རྟེན་སྨྲ། །དེ་བཞིན་འདིར་ཡང་བལྟ་བར་བྱ། །མེད་ན་མི་འབྱུང་འབྲེལ་བའི་ཕྱིར། །ནམ་ཡང་ཚུལ་གསུམ་ལ་ཡོད་མིན། །གཞན་དུ་མི་སྲིད་པ་ཡི་ཆར། །གཅིག་ནི་གཏན་ཚིགས་ལ་ཡོད་དམིགས། །གཞན་དུ་མི་འཐད་པ་ཉིད་ནི། །གང་ཡིན་དེ་ཉིད་གཏན་ཚིགས་ཏེ། །དཔེ་གཉིས་ཡོད་དམ་མེད་ཀྱང་རུང༌། །དེ་ཡི་རྒྱུ་ཉིད་མ་ཡིན་ནོ། །གང་ན་གཞན་དུ་མི་འཐད་ཡོད། །དེར་ནི་གསུམ་གྱིས་ཅི་ཞིག་བྱ། །སྔོ་བསངས་ཡིན་ཏེ་ཕ་དེའི་བུ། །ཡིན་ཕྱིར་ཅིག་ཤོས་སྣང་བ་བཞིན། །འདིར་ནི་ཚུལ་གསུམ་པ་ཡིན་ཡང༌། །ངེས་པའི་ཕྱིར་ནི་འཇུག་པ་མིན། །དེ་ཡི་དཔེ་གཉིས་མ་གཏོགས་པ། །མཚན་ཉིད་གཅིག་གི་གཏན་ཚིགས་སོ། །དངོས་པོའམ་དངོས་མེད་ཡོད་བདག་ཉིད། །ཇི་ལྟར་ཡང་ནི་དམིགས་ཕྱིར་རོ། །ཟླ་བ་ཉིད་ཅེས་བརྗོད་པའི་ཕྱིར། །རི་བོང་གིས་མཚན་ཟླ་མིན་མིན། །འདི་ནི་མཚན་ཉིད་གཉིས་པའོ། །གཏན་ཚིགས་གཞན་ཡང་བརྗོད་བྱ་སྟེ། །མཆུ་སྦྲང་བབས་པའི་རེག་པ་ལས། །བྱུང་བ་དམིགས་པར་འགྱུར་བ་ནི། །མཆུ་སྦྲང་བཅས་པས་ཚོར་བ་འདི། །བྱས་པ་ཡིན་ཞེས་ངེས་པར་ཤེས། །གཟུགས་འཛིན་པ་ཡི་བྱ་བ་ལ།། མིག་ནི་ནུས་དང་ཤིན་ཏུ་ལྡན། །དེ་ལ་བྱ་བ་བྱེད་ཕྱིར་དང༌། །དེ་ནི་མཐོང་བའི་ཕྱིར་ཡང་ངོ༌། །གཞན་ཡང་བདག་དང་བུམ་པ་སོགས། །ཇི་ལྟར་ཡང་ནི་མེད་བདག་ཉིད། །ཇི་ལྟར་ཡང་ནི་མ་དམིགས་ཕྱིར། །བོང་བུ་དང་འབྲེལ་རྭ་བཞིན་ནོ། །རི་བོང་རྭ་ལ་སོགས་པ་ཡང༌། །ཇི་ལྟར་ཡང་ནི་ཡོད་བདག་ཉིད། །ཇི་ལྟར་ཡང་ནི་དམིགས་ཕྱིར་ཏེ། །དཔེར་ན་བདག་དང་བུ་སོགས་བཞིན། །ཁྱེད་ཀྱི་ཕ་ཡང་ཁྱིམ་འདི་ན། །ཡོད་དོ་ཞེས་ནི་ཤེས་བྱ་སྟེ། །ཁྱེད་ཀྱི་ཕ་ཡི་སྐད་ཉིད་ནི། །ཁྱིམ་འདི་ན་ནི་གྲག་ཕྱིར་རོ། །སྒྲ་དང་མར་མེ་སོགས་དངོས་ལ། །གཞན་དུ་མི་འཐད་པ་ཉིད་དོ། །ཕྱོགས་ཀྱི་ཆོས་དངོས་མེད་ན་ཡང༌། །རྟོགས་ཕར་བྱེད་པ་ཉིད་དུའང་མཐོང༌། །དེས་ན་མཚན་ཉིད་གཅིག་པ་ཡི། །གཏན་ཚིགས་རྟོགས་བྱེད་གཙོ་བོ་ཡིན། །དོན་མེད་ཕྱོགས་ཆོས་སོགས་གཞན་གྱི། །བརྟག་པས་ཁྱེད་ལ་ཅི་ཞིག་བྱ། །མཚན་ཉིད་འདི་ལྡན་གཏན་ཚིགས་དེ། །དེ་ཅི་སྤྱི་ཡིས་རྟོགས་བྱའམ། །ཤེས་པར་འདོད་
པའི་བྱེ་བྲག་གི །ཆོས་གཞན་ཡིན་ནམ་འོན་ཏེ་དཔེ། །དེར་ནི་སྤྱི་ཡིས་རྟོགས་ཤེ་ན། །བསྒྲུབ་པར་བྱ་བའི་ཆོས་ཅན་ལ། །གཏན་ཚིགས་ཡོད་པར་བསྟན་པ་ན། །བརྗོད་འདོད་འགྲུབ་པ་མིན་པ་སྟེ། །དཔེར་ན་མིག་གིས་གཟུང་བྱ་ནི། །མི་རྟག་པ་ལ་འཁྲུལ་པ་ཉིད། །སྤྱི་ཡིས་གོ་བར་བྱེད་དེ་ཡང༌། །སྒྲ་ཡང་དེ་ནི་སྒྲུབ་བྱེད་མིན། །དེ་ལ་ཆོས་ཅན་ཡོད་གྱུར་པར། །ཤེས་བྱ་ཞེ་ན་དེ་ལྟ་ན། །ཚུལ་གསུམ་པོ་ནི་ཁྱེད་ཅག་གི །གཞུང་ལུགས་ལ་ཡང་འབྱུང་བར་འགྱུར། །གཞན་དུ་མི་འཐད་པ་ཉིད་ནི། །ལོག་དང་རྗེས་འགྲོ་དག་ཏུ་རྟོགས། །དེ་ནི་ཆོས་ཅན་ལ་ཡོད་ཕྱིར། །ཕྱོགས་ཀྱི་ཆོས་ལ་བརྟེན་པ་ཡི། །གཟུང་བྱའི་ཆོས་ལ་དེ་ཡི་ཆོས། །ཁྱབ་པའི་གཏན་ཚིགས་འདི་ལྟར་ནའོ། །འདི་འདྲའི་མདོར་བསྡུས་མཚན་ཉིད་ནི། །སློབ་དཔོན་གྱིས་ཀྱང་རྒྱས་པར་བསྟན། །འོན་ཏེ་གཏན་ཚིགས་མཚན་ཉིད་འདི། །ཆོས་ཅན་ཉིད་ལ་ཤེས་བྱ་ན།། གང་གིས་ཚད་མར་དེ་གྲུབ་ཀྱང༌། །དེ་ལས་བསྒྲུབ་བྱའང་ངེས་པར་གྲུབ། །བསྒྲུབ་བྱ་རྟོགས་པར་མ་གྱུར་ན། །གཏན་ཚིགས་ལ་ཡང་ངེས་པ་མེད། །གཞན་ལས་བསྒྲུབ་བྱ་གྲུབ་ན་ནི། །དེས་ན་གཏན་ཚིགས་ལས་ངེས་པས། །ཕན་ཚུན་རྟེན་པའི་སྐྱོན་ཡང་སྟེ། །གཉིས་ལས་ཅིག་ཤོས་མ་གྲུབ་བས། །གཞན་པའང་ངེས་པ་མ་ཡིན་ནོ། །དཔེ་ཡི་ཡིན་ན་དེ་གྲུབ་ཀྱང༌། །བསྒྲུབ་བྱའི་ཆོས་ཅན་བློར་མི་འགྱུར། །དེ་ཡིས་ཐམས་ཅད་བསྡུས་པ་ལ། །ཁྱབ་པར་ངེས་པ་མ་ཡིན་ནོ། །གང་ཡང་ཇི་ལྟར་ཡང་དམིགས་ཕྱིར། །ཞེས་བྱའི་གཏན་ཚིགས་འདིར་སྨྲས་པ། །ཕྱི་ལ་ཡུལ་ཉིད་མེད་པ་སྟེ། །ཐེ་ཚོམ་ཅན་ཕྱིར་འབྲས་བུ་མེད། །དངོས་པོའི་དེ་ཡི་བདག་ཉིད་ཉིད། །ཐམས་ཅད་ལ་ནི་རྣམ་ངེས་ཉིད། །ཇི་ལྟར་ཡང་ནི་བསྒྲུབ་བྱར་དེ། །གང་གིས་འདི་སྐད་རྗོད་པར་བྱེད། །འགྱུར་བའི་བདག་ཉིད་སོགས་དབྱེ་བས། །དངོས་ཀུན་གཅིག་པར་སྨྲ་བ་ཡང༌། །ཅི་ནས་ཀྱང་ནི་ཡོད་པ་ཡི། །བདག་ཉིད་ཉིད་དུ་སྟོན་པར་བྱེད། །གང་ཞིག་དངོས་པོར་གནས་པ་ཀུན། །རང་བཞིན་མེད་ཉིད་ལ་བརྟེན་པ། །དེ་ཡང་དེ་ཁོ་ན་ཉིད་དུ། །ཞེས་སོགས་བྱེ་བྲག་ལ་བརྟན་པའོ། །གཞན་དུ་ཡང་ནི་ཇི་ལྟར་ཡང༌། །དམིགས་པ་ཉིད་ནི་མི་འགྲུབ་བོ། །ཐ་སྙད་ཉིད་དུ་བསྒྲུབ་བྱ་ལ། །
དཔེ་ནི་གྲུབ་པར་གྱུར་པ་མིན། །ཟླ་བ་ཉིད་ཅེས་བརྗོད་པ་ན། །མཐུན་པའི་ཕྱོགས་ལའང་རྗེས་འཇུག་སྟེ། །ལ་ལར་མི་འམ་གཞན་ཡང་སྟེ། །ག་པུར་དངུལ་སྐྱ་སོགས་པ་ལའོ། །ཟླ་བ་ཉིད་སྒྲུབ་གཏན་ཚིགས་ལ། །ཐུན་མོང་མིན་པ་ཉིད་གསུངས་པ། །གྲགས་པ་ལས་ནི་ཐ་དད་པ། །དངོས་པོའི་ངོ་བོ་ལ་བརྟེན་པའོ། །མཆུ་སྦྲང་བཅས་པས་བྱས་པ་ཉིད། །ཁྱད་པར་མཐོང་བ་མ་ཡིན་ཏེ། །མཆུ་སྦྲང་བཅས་པའི་རེག་པ་ལས། །བྱུང་བ་དམིགས་པར་གྱུར་པ་ཡང༌། །དེ་ཡི་བཅས་པ་ཞེས་བྱ་བ། །གཏན་ཚིགས་ཁྱད་པར་ངེས་པ་དགོས། །གཞན་དུ་འཁྲུལ་པ་ཉིད་ཡིན་པ། །བཟློག་པར་དཀའ་བར་ཐལ་བར་འགྱུར། །འབྲས་བུ་ཉིད་ཀྱི་ཐ་སྙད་ནི། །བརྗོད་པ་ཡིན་པས་བསྒྲུབ་བྱ་ན། །གལ་ཏེ་གོང་དུ་གྲུབ་པའི་དཔེས། །བསྒྲུབ་པ་ཡིན་ན་ཚུལ་གསུམ་འགྱུར། །ཆོས་ཅན་མིག་གི་ངོ་བོ་ལ། །ཡོད་པ་རེ་ཞིག་དེས་མིག་ཉིད། །མ་གྲུབ་སོགས་པར་ཐལ་འགྱུར་བས། །དེ་ནི་བསྒྲུབ་པར་མི་རིགས་སོ། །འོན་ཀྱང་གཟུགས་ནི་ཡོད་གྱུར་ཀྱང༌། །མིག་གི་རྣམ་ཤེས་མི་འབྱུང་བ། །དེ་ཉིད་ཙམ་གྱིས་ནམ་དུ་ཡང༌། །དེ་རྣམས་རྟོགས་བྱེད་མ་ཡིན་གྱི། །རང་གི་རྒྱུ་ཡིས་ངེས་པ་ལས། །སྐྱེ་བ་མྱུ་གུ་སོགས་པའང་ཡོད། །དེ་ནི་དཔེ་ཡང་དེ་བཞིན་དུ། །མཚན་ཉིད་གསུམ་པར་ཤིན་ཏུ་གསལ། །བུམ་པ་ལ་སོགས་ཇི་ལྟར་ཡང༌། །མེད་པའི་བདག་ཉིད་དུ་བསྒྲུབ་པ། །རང་བཞིན་གཏན་ཚིགས་འབྲས་མེད་པའམ། །ཤིན་ཏུ་མ་གྲུབ་པར་ཡང་མཐོང༌། །འདི་ལའང་ཆོས་མི་མཐུན་པའི་དཔེ། །གསལ་བར་ཡོད་པ་མིན་ན་ནི། །དེ་རྣམས་ཉིད་ཀྱི་ངོ་བོ་ནི། །མི་མཐུན་ཕྱོགས་ཉིད་དུ་འགྱུར་རོ། །མེ་བདག་ཉིད་ལ་ཇི་ལྟར་ཡང༌། །མེད་པའི་བདག་ཉིད་དུ་བསྒྲུབ་པའང༌། །འདོད་པ་གྲུབ་པའམ་མ་གྲུབ་པའི། །དེ་བཞིན་མི་མཐུན་ཕྱོགས་སུའང་འགྱུར། །ཕ་ཡི་སྐད་ཐོས་གང་ཡིན་པའང༌། །ཁྱིམ་ན་ཕ་ཡོད་པར་གྲུབ་ལ། །ཕ་དང་འབྲེལ་པ་ཉིད་ཡིན་ན། །གཏན་ཚིགས་མཚན་ཉིད་གསུམ་པར་གསལ། །ལ་ལར་ཕ་དང་འབྲེལ་པའི་སྐད། །སྔར་ནི་ཉེ་བར་དམིགས་པ་ནི། །སྔར་ཆད་ཉམས་སུ་མ་མྱོང་ན། །གཏན་ཚིགས་མ་གྲུབ་པར་བཟློག་དཀའ། །གང་དུ་སྔ་ན་ཆད་དམིགས་པའམ། །གང་དུ་དེ་ན་དམིགས་པ་ལ། །རྗེས་སུ་འགྲོ་དང་ལྡོག་
པ་དག །དེར་ནི་རྣམས་པ་གསལ་བར་མཐོང༌། །ཤེས་པའི་བྱེད་པའི་སྒྲ་ཡི་དོན། །ཇི་ལྟར་ཡང་ནི་ཕྱི་རོལ་མིན། །གཞན་ཡོད་མ་ཡིན་དངོས་མིན་ཕྱིར། །བརྗོད་པར་འདོད་པ་འདི་ཉིད་ནི། །གོ་བྱེད་ཡིན་པར་དེ་བསྒྲུབ་ན། །མཚན་ཉིད་གསུམ་པར་ཤིན་ཏུ་གསལ། །བརྗོད་འདོད་མངོན་དུ་མ་གྱུར་པ། །ཡིན་ན་སྒྲ་ནི་སྦྱོར་མི་བྱེད། །མར་མེ་ཉིད་ནི་སྔོ་སོགས་ལ། །རྟགས་ཉིད་ལས་ནི་ཤེས་བྱེད་མིན། །ཤེས་པ་སྐྱེད་པར་རུང་བ་ནི། །བྱུང་བ་ཡིན་ཕྱིར་དེ་སྐད་བརྗོད། །ཤེས་བྱེད་རྟགས་ཀྱི་དངོས་ཡིན་ན། །ཕྱོགས་ཀྱི་ཆོས་ལ་སོགས་པ་སོམས། །གཞན་དུ་མི་སོགས་དེ་ལྟ་བུར། །ཅི་ཡི་ཕྱིར་ན་རྩོད་མི་བྱེད། །གཞན་དུ་མི་འཐད་པ་ཉིད་དུ། །མིག་གིས་བཟུང་བ་ཅིས་མི་བསྒྲུབ། །ཕྱོགས་ཀྱི་ཆོས་དང་བྲལ་བས་ན། །དེ་ཕྱིར་མཚན་ཉིད་གཅིག་པ་དམན། །ཚུལ་གཅིག་པ་གང་སྨྲས་པ་ནི། །ཚུལ་གཉིས་པ་ཉིད་མཚོན་པར་བྱེད། །ཚུལ་གཉིས་པ་རྣམས་སྨྲས་པ་ཡིས། །ཕྱོགས་ཀྱི་ཆོས་ལས་ཚུལ་གསུམ་པའོ། །གཞན་དུ་མི་འཐད་པ་ཉིད་ཀྱིས། །འཕངས་ཕྱིར་ཞེ་ན་དེ་མིན་ཏེ། །གཞན་དུའང་སྒྲ་ལ་སོགས་པ་ལ། །མིག་གིས་གཟུང་བྱ་འདི་ཉིད་འདོད། །དེའི་བུ་ཡིན་ཕྱིར་སོགས་གཏན་ཚིགས། །མི་མཐུན་ཕྱོགས་དང་འགལ་མིན་ཕྱིར། །ལྡོག་པ་ཐེ་ཚོམ་ཟ་བ་དེས། །ཚུལ་གསུམ་པོ་ནི་ཡོད་མ་ཡིན། །དེ་ནི་བུ་ཡི་བུ་ཡིན་ཡང༌། །ལས་དང་ཁ་ཟས་སོགས་རྣམས་ཀྱི། །རྒྱུ་ཡི་དབྱེ་བས་ཐམས་ཅད་དུའང༌། །དངོས་པོ་གཞན་དུ་འགྱུར་བ་ཡིན། །འདི་ནི་འབྲས་བུའམ་རང་བཞིན་ནམ། །སྣང་བ་མི་དམིགས་ཉིད་ཀྱང་མིན། །དེ་ལས་ཐ་དད་པ་མིན་ན། །འཁྲུལ་པ་མེད་པ་ཉིད་དུ་འགྱུར། །གལ་ཏེ་མ་འཁྲུལ་པ་ཉིད་ནི། །གཞན་པ་རྣམས་ལའང་མཐོང་བ་སྟེ། །དཔེར་ན་ཀུ་མུ་ད་ལ་སོགས། །ཁ་བྱེ་རྒྱ་མཚོ་འཕེལ་བ་ལ། །ཟླ་བ་འཆར་བ་རྟགས་ཡིན་ཞིང༌། །གདུང་བྱེད་ཡོད་པར་མཐོང་བ་ལས། །ཆ་གཞན་དག་ན་གྲིབ་མ་ནི། །ཡོད་པར་རབ་ཏུ་ཤེས་པ་ཡིན། །མུན་པར་མགལ་དུམ་ཚིག་མཐོང་བས། །རིང་ནས་དུ་བ་དཔོགས་པར་བྱེད། །སྨིན་དྲུག་ཤར་བ་ལས་ཀྱང་ན། །སྣར་མ་ཉེ་བ་ཡིན་པར་རྟོག །འདི་ལ་གཏན་ཚིགས་ཆོས་དེ་ནི། །དེ་ལྟ་བུར་ནི་རྟོགས་པ་ཡིན། །གང་ལས་བྱུང་བ་དེ་རྣམས་དང༌། །
དུས་གཅིག་པ་གཞན་དེ་ཀུན་རྟོགས། །དེ་ལྟ་བུ་ཡི་དབྱེ་བ་འདི། །འབྲས་བུ་ལས་ནི་རྒྱུ་གྲུབ་པའོ། །འབྲེལ་པ་ཉིད་ནི་མི་འཐད་ན། །ཐམས་ཅད་ཀུན་ཀྱང་རྟོགས་བྱེད་འགྱུར། །སྨིན་དྲུག་འཆར་བའི་རྒྱུར་གྱུར་པ། །རླུང་གི་ཁྱད་པར་གང་ཡིན་པའི། །ཚོགས་པ་ཡིན་པ་དེ་དག་ནི། །སྣར་མ་ཉེ་བའི་རྒྱུ་ཡིན་ནོ། །རྒྱུ་ཡི་ཆོས་ནི་ཤེས་པ་ལས། །དེ་ཕྱིར་དེ་ནི་ཤེས་པར་འདོད། །རང་དབང་དུ་ནི་དེ་ཤེས་པ། །འདི་གཞན་སུ་ཡང་ཡོད་མ་ཡིན། །གཟུགས་བརྙན་དུ་བརྗོད་རྟགས་ལས་ནི། །རྗེས་སུ་དཔག་པ་འཇུག་པ་ཡིན། །གང་ཞིག་ལུས་ཀྱི་ཡུལ་ལྡན་མིན། །གཞན་ལས་འབྲས་བུའི་རྟགས་སྐྱེ་མིན། །དངོས་མེད་གཟུགས་བརྙན་དང་ལྷན་ཅིག །གཉིས་ནི་གཅིག་ན་ཡོད་མིན་ན། །དམ་པའི་དོན་དུ་དེ་ཉིད་ནི། །ཇི་ལྟར་དེ་འབྲེལ་ལྡན་ཞེ་ན། །གཞན་དུ་ལུས་དང་གཟུགས་བརྙན་དག །དངོས་པོར་ཡོང་པ་མ་ཡིན་ནོ། །དེར་སྣང་བ་ཡི་རྣམ་ཤེས་ནི།། གང་གིས་དངོས་པོ་མེད་པར་འགྱུར། །དེ་ཉིད་འདིར་ནི་རྟགས་ཉིད་དེ། །དེ་ཉིད་འབྲས་བུ་ཡིན་པར་འདོད། །དེ་ལྟའི་བདག་པོའི་རྐྱེན་ལུས་གང༌། །དམིགས་པ་མེད་ལ་འཇུག་པ་ཡིན། །གཞན་དོན་ལ་ནི་དམ་བཅས་སོགས། །ཚོགས་གཞན་དག་ཀྱང་བརྗོད་པ་ནི། །སྒྲུབ་པའི་ཡན་ལག་གྱུར་མིན་ཕྱིར། །དམ་བཅས་པ་ནི་མཁོ་བ་མིན། །འབྲེལ་པ་མེད་པའི་ཕྱིར་དངོས་སུ། །དོན་དང་ལྡན་པར་རྟོགས་བྱེད་མིན། །མཚོན་པར་བྱེད་ནུས་མ་ཡིན་ཕྱིར། །བརྒྱུད་པས་ཀྱང་ནི་རིགས་མ་ཡིན། །བསྒྲུབ་བྱ་སྒྲུབ་བྱེད་ཆོས་དག་གི །ཡུལ་ལ་གཙོ་བོ་མ་ཡིན་ཕྱིར། །དེ་ནི་དཔེ་ཡི་ཚིག་བཞིན་དུ། །གལ་ཏེ་སྒྲུབ་བྱེད་ཡན་ལག་ཏུ། །འདོད་ན་ཁས་ལེན་སོགས་ཚིག་གིས། །གཞན་དུ་འཁྲུལ་པ་མ་ཡིན་ནོ། །ཡུལ་ནི་ཉེ་བར་སྟོན་བྱེད་ན། །འདིར་ཡང་འདི་ནི་འབྲས་བུ་མེད། །ཕྱོགས་ལ་སྦྱོར་མེད་ཇི་ལྟར་ན། །མཐུན་པའི་ཕྱོགས་སུ་གཞག་ཅེ་ན། །ཚུལ་གསུམ་པོ་ནི་མེད་ན་ཡང༌། །ཕྱོགས་འདྲེན་པ་ཡི་རྒྱུ་མཚན་ཡིན། །ཕྱོགས་ལ་སོགས་པ་བརྟགས་པ་སྟེ། །ཕྱོགས་བརྗོད་པ་ནི་ཡོད་མ་ཡིན། །བསྟན་བཅོས་ཀྱི་ནི་རབ་དབྱེ་བས། །དེ་ལྟར་ཐ་སྙད་འདོགས་པ་ཡིན། །ཡང་ན་དེ་ཡང་གནས་སྐབས་ཀྱི། །དོན་ལ་བརྟེན་ནས་འགལ་
བ་མེད། །གཞན་ཡང་སྒྲུབ་པར་བྱེད་པ་ན། །ཚིག་གི་ཆ་ཡིས་སྨྲ་མི་བྱ། །ཤེས་པར་འདོད་པའི་བྱེ་བྲག་ལ། །བརྟེན་ནས་ཕྱོགས་ཀྱི་ཆོས་ཉིད་དེ། །དེ་ནི་མཐུན་ཕྱོགས་དང་འདྲ་ཕྱིར། །མི་མཐུན་ཕྱོགས་ལའང་དེ་མེད་པས། །དམ་བཅས་བརྗོད་པ་མ་ཡིན་ཞིང༌།། རྒྱུ་ནི་བརྗོད་པ་མ་ཡིན་པས། །ཉེ་བར་སྦྱར་བར་བརྗོད་པར་བྱ། །ཡོད་པར་གྲུབ་པ་མ་ཡིན་ཏེ། །སྔོན་དུ་དངོས་པོ་ཙམ་བརྗོད་ཅིང༌། །ཕྱི་ནས་ཁྱབ་པ་བསྟན་པར་བྱ། །རྗོད་འདོད་དོན་ནི་གྲུབ་པས་ན། །འདྲ་བ་ལ་ནི་འབྲས་བུ་མེད། །ཚུལ་གསུམ་པ་ཡི་རྟགས་བསྟན་པའི། །ཤུགས་ཉིད་ཀྱིས་ནི་གྲུབ་པས་ན། །ཕྱིན་ཅི་ལོག་ནི་དགོས་མེད་པས། །མཇུག་སྡུད་བཞི་དོན་མེད་པའོ། །འབྲེལ་མེད་ཉིད་ཀྱི་ཚིག་གིས་ནི། །དོན་གཅིག་པར་ནི་རྟོག་བྱེད་པར། །འབྲེལ་བ་དེ་གྲུབ་བྱ་བའི་ཕྱིར། །མཇུག་སྡུད་ལོགས་སུ་བརྗོད་བྱ་མིན། །རྗེས་སུ་དཔག་པ་རྣམ་གཉིས་པ། །ཁ་ཅིག་གཞན་དུ་སྨྲ་བར་བྱེད། །ཁྱད་པར་དུ་ནི་མཐོང་བ་དང༌། །སྤྱིར་མཐོང་བ་ཡི་དབྱེ་བས་སོ། །འབྲེལ་པ་མངོན་སུམ་མཐོང་བ་ནི། །གང་དག་ཡིན་ཉིད་ཁྱད་པར་ཏེ། །བ་ལང་ལྕི་བས་དེ་ཡི་ཕྱོགས། །ཁྱད་པར་ལ་སོགས་བློར་བྱས་པའོ། །ཕྱོགས་དེ་ན་ཡོད་དེ་ཉིད་ནི། །སྔོན་ནས་དུས་གཞན་ཚེ་ན་ཡང༌། །དེ་སྔོན་ཡང་དང་ཡང་ཤེས་པས། །མེ་གང་ཡིན་པ་དེར་ཤེས་འགྱུར། །ཡོད་ལ་ཐེ་ཚོམ་ཟབ་ལ། །ཡོད་པར་རྟོགས་ཕྱིར་ཚང་མ་སྟེ། །དེ་ཡང་ཁྱད་པར་མཐོང་བ་ཞེས། །རི་བོ་འབིགས་བྱེད་ལ་གནས་སྨྲ། །མེ་དང་དུ་བ་གཞན་ཉིད་དེ། །སྤྱི་ཉིད་ཀྱི་ནི་བློ་བུར་འདོད། །སྤྱིར་མཐོང་བ་ལ་གཅིག་ཏུ་ནི། །འདིའོ་ཞེས་སོགས་སྨྲ་བ་ནི། །དེ་འདིར་སྐད་ཅིག་གིས་འཇིག་པས། །ཁྱབ་པ་ཉིད་དུ་བསྟན་པའི་ཕྱིར། །དེ་ཉིད་ཀྱིས་ན་སྔར་བསྟན་ཉིད། །རྗེས་སུ་དཔག་པར་འགྱུར་མ་ཡིན། །གལ་ཏེ་རྒྱུན་ལག་གཅིག་ཉིད་དུ། །བཏགས་པར་འདོད་པ་ཡིན་ཞེ་ན། །དེ་ནི་གང་ན་འང་ཡོད་མིན་ཏེ། །དངོས་པོ་ཉིད་ཀི་དངོས་མིན་ཕྱིར། །ཡུལ་མེད་ཚད་མ་མ་ཡིན་པར། །ཁྱེད་ཅག་རྗེས་སུ་སེམས་པ་ཡིན། །རྣམ་པར་བརྟགས་པའི་དོན་ཉིད་འདི། །ཡུལ་མེད་པར་ནི་གསལ་བར་འགྱུར། །གསལ་བའི་ངོ་བོ་ཞིག་ན་ཡང༌། །དེ་དག་རིགས་ཉིད་དུ་གནས་
ན། །གལ་ཏེ་སྐད་ཅིག་གིས་འཇིག་པ། །མིན་ན་དེ་ཡང་རྟག་ཉིད་འབྱུང༌། །འབྲེལ་པ་མངོན་སུམ་མཐོང་བར་འགྱུར། །གང་ཡིན་པ་ཉིད་ཁྱད་པར་ཞེས། །ངེས་པ་འདི་ཡང་ཁྱེད་ཅག་ནི། །རྒྱུ་གང་གིས་ནི་སྨྲ་བར་བྱེད། །ལན་ཅིག་རྗེས་དཔག་གིས་མཐོང་བ། །དེ་ཉིད་ལ་ནི་རྗེས་དཔོག་པ། །གང་ཕྱིར་སྔ་མ་ཤེས་ལས་ཁྱོད། །མེད་པས་ཚད་མར་མི་འདོད་དོ། །རྟོགས་པའི་དོན་ལ་རྟོགས་བྱེད་ཕྱིར། །གལ་ཏེ་འདི་ནི་དྲན་པ་བཞིན། །ཚད་མ་ཡིན་ན་སྔ་མས་ཀྱང༌། །དེ་དང་མཚུངས་པར་ཅིས་མ་མཐོང༌། །བར་དུ་ཐེ་ཚོམ་སྐྱེས་པས་ནི། །བཟློག་ཕྱིར་དེ་ནི་ལྷག་བ་ཡིན། །ཞེ་ན་དེ་དག་འདིར་ཡང་ནི། །ཅི་ཞིག་གིས་ནི་མཚུངས་མ་ཡིན། །དེ་ཕྱིར་ཅི་འདི་ཡོད་དམ་མེད། །ཅེས་བྱས་ཐེ་ཚོམ་བཟློག་བྱས་པས། །ཐེ་ཚོམ་མེད་པ་ཉིད་ནི་ཞེས། །སྤྱི་ནི་དེ་ལྟར་མཐོང་བ་ཡིན། །ཁ་ཅིག་རྗེས་སུ་དཔག་པ་ནི། །ཚད་མ་མ་ཡིན་ཞེས་བྱ་བ། །བརྗོད་འདོད་ཆིག་གིས་རིག་བྱེད་པར། །འདོད་པའི་ལོག་པར་ལྟ་བའོ། །རང་དོན་རྗེས་དཔག་མི་རིགས་ཏེ། །ཚུལ་གསུམ་པའི་རྟགས་སྔོན་འགྲོའི་ཕྱིར། །འདོད་པ་ལ་གནོད་སྐྱེད་བྱེད་པ། །ལོག་པའི་ཤེས་པ་བཞིན་སྨྲ་གྲག །རྗེས་སུ་དཔག་པའང་དངོས་པོར་མེད། །རྗེས་སུ་དཔོག་པའི་རྒྱུ་ཡང་མེད། །ཚུལ་གཉིས་པ་ཡི་རྟགས་བཞིན་དུ། །ཚུལ་གསུམ་མེད་པས་རྗེས་དཔག་མེད། །རྗེས་སུ་དཔག་པ་དང་འགལ་བའི། །འགལ་བ་རྣམས་ནི་བསྒྲུབ་པ་ན། །འོན་ཀྱང་འགལ་བ་མི་འཁྲུལ་བས། །ཐམས་ཅད་ལ་ནི་འབྱུང་བ་ཡིན། །ཡུལ་དང་དུས་དང་གནས་སྐབས་ཀྱི། །དབྱེ་བས་ནུས་པ་ཐ་དད་པའི། །དངོས་པོ་རྣམས་ཀྱི་རྗེས་དཔག་གིས། །འགྲུབ་པ་ཤིན་ཏུ་རྙེད་པར་དཀའ། །དངོས་པོ་རྣམས་ནི་དེ་དང་ནི། །དོན་བྱེད་པར་ནི་ནུས་པ་ལ། །ཁྱད་པར་ཅན་གྱི་རྗེས་འབྲེལ་པས། །དེ་ཡི་ནུས་པའི་བར་དུ་གཅོད། །རྗེས་དཔག་ལ་ནི་མཁས་རྣམས་ཀྱིས། །འབད་པས་རྗེས་དང་གདོན་ལ་ཡང༌། །ཤིན་ཏུ་འབད་པ་གཞན་དག་གིས། །གཞན་དུ་ཡང་ནི་སྒྲུབ་པར་བྱེད། །གཞན་དོན་རྗེས་དཔག་སྨྲ་བ་པོ། །ལ་ལྟོས་པས་ནི་ཚད་མ་མིན། །རྗེས་སུ་བརྗོད་ཕྱིར་དེས་ན་འདི། །རང་ཉིད་ཀྱིས་དོན་རྟོགས་མ་ཡིན། །ཐོས་པ་པོ་ལ་ལྟོས་
པའི་ཕྱིར། །དེ་ན་རང་དོན་ཉིད་དུ་འཐད། །ཐོས་དང་མཐོང་འདི་རིགས་པ་ལ། །གང་གཙོ་འདི་ཡི་ཁྱད་པར་ཅི། །གཞན་དོན་རྗེས་སུ་དཔག་པ་ཉིད། །ཚིག་དེ་ཐོས་པ་མ་ལྟོས་མིན། །ཉན་པའི་རྒྱུད་ཀྱི་རྣམ་ཤེས་ཀྱི། །རྒྱུ་ཉིད་ཡིན་ཕྱིར་ཤེས་བྱེད་ཕྱིར། །དབང་པོ་ཇི་ལྟ་བ་བཞིན་ནོ། །དངོས་སུ་དཔག་བྱ་གསལ་བྱེད་མིན། །དེ་ཕྱིར་འདི་མེད་མི་འབྱུང་བའོ། །འབྲེལ་པ་ཅན་གྱི་ཤེས་བ་བཞིན། །འོན་ཏེ་གཞན་དོན་ཉིད་གཞན་ལས། །ལོག་པ་ལ་བརྟེན་ཕྱིར་ཞེ་ན། །རང་དོན་ལ་ཡང་དེ་ཡོད་ཕྱིར། །གཞན་གྱི་དོན་དུ་ཐལ་བར་འགྱུར། །ཚུལ་གསུམ་པར་བརྟགས་སྔོན་འགྲོ་ཉིད། །ངེས་པར་མི་སླུའི་མཚན་ཉིད་ཅན། །མཚན་ཉིད་དེ་ལྡན་ཚད་མ་ཉིད། །དེ་ཕྱིར་དེ་ནི་ཅི་ཕྱིར་དག །ཕྱོགས་སྔ་མ་ལ་ལྟོས་ནས་ནི། །འདོད་པ་ལ་གནོད་སྐྱེད་བྱེད་པ། །ལོ་པའི་ཤེས་པ་དང་མཚུངས་པའི། །ཤེས་པར་སྨྲས་ཀྱང་དངོས་པོ་མིན། །མི་སླུ་བར་ནི་ངེས་པ་ཡི། །དངོས་པོ་ལ་ཡོད་ཤེས་པ་དེ། །སྨྲ་བ་པོ་འདོད་གཞན་མིན་པ། །དེ་ཕྱིར་དེ་ཉིད་ཚད་མར་འདོད། །དེ་ཕྱིར་གཏན་ཚིག་འགལ་བ་ཉིད། །དཔེ་ལའང་བསྒྲུབ་བྱ་ཉིད་མེད་པའི། །རྣམ་པ་དེ་དག་ཉིད་ཀྱིས་ནི། །གཏན་ཚིགས་གཉིས་པ་མ་གྲུབ་པའོ། །གང་དེ་དེ་ཡི་བདག་ཉིད་དང༌། །དེ་ལས་བྱུང་བའི་འབྲེལ་པར་ངེས། །དེ་བཞིན་སྒྲུབ་བ་སྒྲུབ་བྱེད་པ། །ཡིན་པར་རིགས་པ་གསུངས་པ་བསྟན། །འདི་ལྟར་སྒྲུབ་པའི་རྗེས་དཔག་ལ། །འགལ་བ་ལ་སོགས་ཡོད་མ་ཡིན། །རང་བཞིན་གཏན་ཚིགས་དག་མེད་པར། །དེ་ནི་གང་ནའང་སྲིད་མ་ཡིན། །ཕན་ཚུན་འགལ་བའི་ཆོས་དག་ཀྱང༌། །དངོས་པོ་གཅིག་པ་མི་རིགས་ཏེ། །དེ་ནི་འགལ་བ་མི་འཁྲུལ་པ། །ཅན་དུ་གྱུར་པ་མ་ཡིན་ནོ། །མཚན་ཉིད་ལ་ནི་གོམས་རྣམས་ཀྱི། །རྟགས་ནི་ཡང་དག་རྣམས་ངེས་པའི། །རྗེས་སུ་དཔག་པ་ལ་འཇུག་གི །གཞན་ནི་རྗེས་དཔག་ཡིན་པར་བརྗོད། །ཡུལ་དང་དུས་དང་གནས་སྐབས་ཀྱིས། །དབྱེ་བ་པ་ཐ་དད་པ་ལ། །དངོས་པོ་རྣམས་ནི་རྗེས་དཔག་གིས། །དེ་སྒྲུབ་ཤིན་ཏུ་རྙེད་དཀའ་མིན། །རྗེས་དཔག་ལ་ནི་མཁས་རྣམས་ཀྱིས། །འབད་པས་རྗེས་སུ་དཔག་དོན་ལ། །ཤིན་ཏུ་འབད་པ་གཞན་གྱིས་ཀྱང༌། །གཞན་དུ་བསྒྲུབ་པར་ནུས་མ་ཡིན། །རང་བཞིན་
དག་ནི་འབྲས་བུ་དག །རང་བཞིན་དང་ནི་རྒྱུ་མིན་ལས། །རང་བཞིན་དང་ནི་འབྲས་ཡོད་མིན། །ཐ་དད་པ་དང་རྒྱུ་མིན་འགྱུར། །དེ་དག་མེད་པའི་རྗེས་དཔག་མེད། །ཚུལ་གསུམ་པ་ཡི་རྟགས་ཀྱི་ཚིག །ནུས་པའི་མཚོན་བྱེད་ཉིད་ཡིན་པས། །གཞན་དོན་རྗེས་དཔག་གང་ཡིན་ཉིད།། ཉན་པ་ལ་ལྟོས་ནས་དེ་གསུངས། །རྗེས་དཔག་ཉིད་ལ་བརྟེན་ནས་ནི། །བརྡར་བཏགས་ཅན་ཉིད་པ་ལ་པའོ། །ནུས་པ་མཚོན་བྱེད་ཉིད་ཡིན་པ། །དེས་ན་ཧ་ཅང་ཐལ་འགྱུར་མིན། །རྗེས་དཔག་ཚད་མ་མ་ཡིན་ཞེས། །ཁྱེད་ཀྱིས་སྨྲས་པ་འབྲས་མེད་དེ། །ཚིག་གང་གིས་ཀྱང་བརྗོད་འདོད་པ། །སྟོན་པར་ནུས་པ་མ་ཡིན་ནོ། །འཇིག་རྟེན་པ་ཡི་རྟགས་འདོད་ཀྱི། །གཞན་ནི་བརྟགས་ནུས་མིན་ཞེ་ན། །འཇིག་རྟེན་འབྲས་སྩོགས་གཏན་ཚིགས་ལ། །སྩོགས་པས་རྟོགས་པ་མ་ཡིན་པ། །གཞན་གྱིས་དེ་ཉིད་བསྟན་པར་ནི། །རིགས་པ་གསུང་པས་ཀྱང་སྤྱོད་མིན། །འཇིག་རྟེན་པ་དེ་ཁས་བླངས་པ། །ཁྱེད་ལ་འདོར་བར་འགྱུར་རམ་ཅི། །ཚད་མ་མིན་པ་དེ་ཡིན་ནོ། །གཞན་གྱིས་ཅི་ཞིག་རྟོགས་པར་བྱེད། །ཚད་མ་མིན་ལའང་འདིར་བྱས་པ། །ཅི་འདྲ་བ་ལས་ཡིད་ཆེས་འགྱུར། །རྗེས་དཔག་ཚད་མ་མ་ཡིན་ཏེ། །སྨྲ་བ་པོ་ཡི་ཚིག་ཉིད་ནི། །སྟོན་བྱེད་བདག་ཉིད་མ་ཡིན་པ། །དེས་ནི་དེ་བཞིན་འགྱུར་ཞེ་ན། །མི་ཤེས་དོན་སྟོན་མ་ཡིན་ཕྱིར། །དེ་ནི་ཚད་མ་མི་འདོད་པ། །དེ་མིན་ནུས་པ་མཚོན་བྱེད་པས། །ཁྱེད་ཀྱི་དང་ནི་མཚུངས་མ་ཡིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་རྗེས་སུ་དཔག་པ་བརྟག་པ་སྟེ་ཉི་ཤུ་རྩ་གཉིས་པའོ།། །། སྒྲ་ལས་བྱུང་དང་ཉེར་འཇལ་སོགས། །ཚད་མ་གཞན་ཡོད་མ་ཡིན་ནམ། །ཚད་མ་གཉིས་པོ་ཁོ་ན་ཡི། །མཚན་ཉིད་ཅི་ཕྱིར་སྟོན་པར་བྱེད། །སྨྲས་པ་གཉིས་པོ་ལས་གཞན་པའི། །ཚད་མ་འཐད་པ་མ་ཡིན་ཏེ། །ཚད་མའི་མཚན་ཉིད་མི་ལྡན་པའམ། །ལྡན་ནའང་འདི་ཡི་ཁོང་གཏོགས་ཕྱིར། །གཞན་ནི་སྒྲ་ལས་བྱུང་བ་ཡི། །ཤེས་པས་དོན་རྟོགས་སྒྲ་ལས་བྱུང༌། །དེ་ཡང་བྱེད་པས་མ་བྱས་པའམ། །ཡང་ན་ཡིད་ཆེས་ཚིག་ཡིན་ཟེར། །འདི་ནི་ལྐོག་ཏུ་གྱུར་པ་ཡི། །ཡུལ་ཅན་ཡིན་ཕྱིར་མངོན་སུམ་མིན། །རྗེས་དཔག་ཏུ་ཡང་མི་འཐད་དེ། །དེ་ཡི་མཚན་ཉིད་བྲལ་ཕྱིར་
རོ། །ཆོས་ཀྱི་བྱེ་བྲག་ལྡན་ཆོས་ཅན། །དེ་ནི་རྟགས་ཅན་དུ་རབ་ངེས། །ཇི་སྲིད་དེ་ཡུལ་མ་གྱུར་པ། །དེ་སྲིད་རྗེས་སུ་དཔག་པ་མིན། །འདི་ལ་ཆོས་ཅན་དུ་རྟོག་གང༌། །དེ་ཉིད་དཔག་བྱ་ཡིན་ན་ནི། །དེ་ཉིད་ངེས་པར་མ་གྱུར་པས། །དེ་ཡི་ཆོས་ནི་ངེས་མི་འགྱུར། །གལ་ཏེ་སྔ་རོལ་ཕྱོགས་ཆོས་ཉིད། །ངེས་ན་དེ་ཡི་འོག་རོལ་ཏུ། །ཕྱོགས་ཆོས་སོགས་ཀྱི་ཤེས་བྱ་གང༌། །གང་གིས་རྗེས་དཔག་ཉིད་དུ་འགྱུར། །གཞལ་བྱའི་དོན་ལ་ངེས་རྟོགས་པའོ། །རྗེས་སུ་འགྲོ་བ་སྒྲ་ལ་མེད། །ཡོད་པ་ཡིས་ནི་ཐམས་ཅད་ཀྱི། །རྗེས་སུ་འཇུག་པ་རྟོགས་པར་བྱ། །གང་ན་དུ་བ་ཡོད་དེ་ན། །མེ་མེད་རྗེས་འགྲོ་མེད་པར་གསལ། །དེ་བཞིན་གང་ན་སྒྲ་ཡོད་པ། །དེ་ན་ཡོད་པར་ངེས་མིན་ཏེ། །དེ་ལྟར་ས་ཕྱོགས་དེ་ན་མེད། །དེ་ཡི་དུས་ནའང་མེད་ཤེས་བྱ། །རྟག་ཅིང་ཁྱབ་ཕྱིར་ཡོད་ཅེ་ན། །སྒྲ་རྣམས་ཐམས་ཅད་དེར་མཚུངས་པ། །དེས་ན་ཀུན་དུ་མཐོང་བའི་ཕྱིར། །ལྡོག་པའང་གྲུབ་པར་མི་འགྱུར་ཏེ། །སྒྲ་རྣམས་ཀུན་གྱི་མ་ལུས་པའི། །དོན་རྣམས་བརྟགས་པར་ཐལ་བར་འགྱུར། །དེ་ཕྱིར་སྒྲ་ལས་བྱུང་བ་ལ། །དེ་འདྲའི་ཡུལ་ནི་མེད་པའི་ཕྱིར། །ཚུལ་གསུམ་པོ་ཉིད་དང་བྲལ་བས། །རྗེས་དཔག་མ་ཡིན་མངོན་སུམ་བཞིན། །མེ་ལ་སྤྱིན་སྲེག་སྩོགས་ཚིག་གིས། །མི་གཡོའི་ཤེས་པ་སྐྱེ་བ་ལས། །དེ་ནི་ཚད་མ་ཉིད་ཡིན་པའང༌། །འདི་ནི་བཟློག་པར་ནུས་པ་མིན། །དེ་ལ་བྱེད་པོས་མ་བྱས་པའོ། །ཚིག་དང་དོན་དག་ཀྱང་མེད་པ། །དེ་ཕྱིར་མི་སྲིད་པར་བསྟན་པ། །སྒྲ་ལས་བྱུང་བའི་མཚན་ཉིད་གཅིག །ནུས་དང་ནུས་མིན་ངོ་བོ་ཡིས། །ཐམས་ཅད་དུ་ཡང་རྗེས་འཇུག་ཕྱིར། །རྟག་ཏུ་རྣམ་ཤེས་དེ་འབྱུང་བའམ། །ནམ་ཡང་འབྱུང་བར་མི་འགྱུར་རོ། །དེ་ལྟར་བརྫུན་པ་ཉིད་ཀྱི་རྒྱུ། །ཞེ་སྡང་གཏི་མུག་སོགས་ཉེས་པ། །དེ་བཞིན་བདེན་པ་ཉིད་ཀྱི་རྒྱུ། །ཤེས་རབ་སྙིང་རྗེ་སོགས་ཤེས་བྱ། །དེ་ཡི་རྟེན་ཉིད་མེད་པ་ལ། །དེ་དག་ཀྱང་ནི་སྲིད་པ་མིན། །དེ་ཕྱིར་དོན་མེད་ཉིད་འགྱུར་བའམ། །སྒྲ་ན་སྐྱེས་བུ་རྟེན་འཐོབ་པ། །དོན་རྟོགས་ཤེའམ་མིན་ན་སྟེ། །འདི་ནི་བསྟན་པའི་ལས་ཡིན་ནོ། །དངོས་སུ་དོན་མཐོང་བར་འདོད་པ། །སྐྱེས་བུའི་རང་འདོད་ཀྱིས་ཡིན་གྱི། །ཡང་དག་དོན་གསལ་ནུས་པ་ནི། །རང་བཞིན་ཉིད་ཀྱིས་ཡོད་ཅེ་
ན། །རང་བཞིན་ཐ་དད་པ་དེ་ཅན། །བརྡར་ཤེས་པ་ཉིད་མ་ཡིན་ཡང༌། །དེ་ལས་དོན་རྟོགས་འགྱུར་བ་ཡིན། །རང་བཞིན་གྱིས་གསལ་མར་མེ་ནི། །བརྡ་ལ་ལྟོས་པ་མ་ཡིན་ནོ། །བརྡ་ཉིད་གཞན་དུ་འགྱུར་བ་ན། །དོན་ཀྱང་གཞན་འགྱུར་སྒྲ་ལས་མིན། །བརྡ་ཡོད་གྱུར་ཀྱང་སྒྲོན་མས་ནི། །དྲི་རོལ་སོགས་གསལ་བྱེད་མིན། །རྣམ་པར་རིག་པར་བྱ་བ་ནི། །དེ་ཡི་ནུས་པས་ནུས་མིན་པ། །དེ་ལས་མི་གཡོ་གང་མ་འགྱུར། །དེ་ཡང་བརྡ་ཅན་ལ་རིགས་ཏེ། །སྐྱེས་བུའི་ཚིག་དང་དབྱེར་མེད་དོ། །རིགས་པ་ཤེས་པས་དེ་དག་གི །དབྱེ་བ་གང་ཡང་རྟོགས་མི་འགྱུར། །རིག་བྱེད་འདོན་པ་རིགས་པའོ། །ལམ་ལས་མི་གཡོ་འདི་མི་རྟོགས། །ཡིད་ཆེས་པ་ཉིད་མི་འདོད་པས། །སྒྲ་ལས་བྱུང་བ་གཉིས་པ་ཡང༌། །མི་བཟོད་འདོད་ན་དེ་ཉིད་དོ། །ཞེས་བྱའི་རྣམ་པར་ངེས་པ་མེད། །གང་གི་ཚིག་ལས་མི་སླུ་བར། །ལན་གྲངས་དུ་མར་མཐོང་བ་ཡི། །ཡིད་ཆེས་གྱུར་པ་དེ་ཡི་ཚིག །ལྐོག་རྟོགས་ཕྱིར་ནི་གཟུང་ཞེ་ན། །སྔ་རོལ་དག་ཏུ་མི་སླུ་བའང༌། །དུས་ཉིད་ཚེ་ན་ཡིད་ཆེས་མིན། །དུས་གཅིག་ཉིད་ནི་མི་སླུ་སྟེ། །ཐམས་ཅད་དུ་ནི་ངེས་པ་མིན། །ཚིག་དང་ཕྱི་མའི་དངོས་དག་ལས། །འབྲེལ་པ་ཡང་ནི་ཅི་ཡོད་ན། །གང་གིས་དེ་རྟོགས་གྱུར་པ་ལས། །འདི་ནི་ཚད་མ་ཉིད་དུ་འགྱུར། །དབང་པོ་ཐ་དད་སོགས་འཛིན་པས། །འཁྲུལ་ཕྱིར་བདག་ཉིད་གཅིག་མིན་ཞིང༌། །དེ་ལས་འབྱུང་མིན་མ་འཁྲུལ་པ། །གཞན་ནི་ཡོད་པ་མ་ཡིན་ནོ། །མ་ལུས་པ་ཡི་ཚིག་དག་ལས། །རྗེས་སུ་བསམ་པ་རྗེས་དཔག་སྟེ། །མངོན་སུམ་མི་དམིགས་པ་དག་ལས། །དེའི་རྒྱུ་དེ་ཡང་ངེས་པ་ཡིན། །འཁྲུལ་པའམ་བསམ་པ་གཞན་པ་ལ། །ཚིག་གཞན་བར་ནི་མཐོང་བ་སྟེ། །དེ་ཕྱིར་བསམ་པ་ཇི་ལྟ་བར། །དེ་ནི་འཇུག་པ་མ་ཡིན་ནོ། །འཁྲུལ་དང་མ་འཁྲུལ་སྦྱོར་བ་རྣམས། །མཚན་ཉིད་ཁྱད་པར་ཅན་དུ་གསལ། །མཁས་དང་སྐབས་ལ་སོགས་པ་ཡི། །དེས་བྱས་ཚིག་གིས་ནུས་པའོ། །མཚན་ཉིད་ཁྱད་པར་ཅན་གྱུར་པའི། །རྒྱུ་ལས་དེ་ཡི་བྱེ་བྲག་སྟེ། །གང་ཞིག་ཤེས་པ་མ་ཡིན་པའི། །ངེས་པ་འདི་ཡིན་རྟགས་ཀྱི་མིན། །ཡོད་གཉིས་ལྡན་པའི་དུ་བའི་དངོས། །དུས་གཅིག་ཚེ་ན་གཞན་གྱུར་པས། །ངེས་པའི་དུས་སུའང་དུ་བ་ནི། །
མེ་ཡི་རྟགས་སུ་མི་འགྱུར་རོ། །བསམ་པ་དེ་རྣམས་གཅིག་པུ་ནི། །རྗེས་དཔོག་ཡིན་པར་འགལ་བ་མེད། །ངེས་པར་ཡོད་པ་ཉིད་ཀྱི་ཕྱིར། །སྲོག་ཆགས་བཅས་སོགས་བསྒྲུབ་པ་ཡི། །བསམ་བ་རྟོགས་པར་བྱ་བ་ལ། །ཚུལ་གསུམ་པོ་ཉིད་རྣམས་གསལ་ཉིད། །མེ་ནི་ཆོས་ཅན་བསྒྲུབ་བྱ་ནི། །འབྲས་བུ་ཚིག་གང་ལས་རྟོགས་ཏེ། །མེ་འདི་ཤིང་གི་བསམ་པ་དང༌། །ལྡན་པ་ཡིན་པར་ཤེས་བྱས་ཏེ། །ཤིང་གི་སྒྲ་ལས་རབ་སྦྱོར་ཕྱིར། །དཔེར་ན་སྔོན་དུས་བདག་བཞིན་ནོ། །དེ་ཕྱིར་ཕྱི་ལས་ཕ་རོལ་པོ། །ཚུལ་གསུམ་སོགས་གསལ་སྒྲ་རྣམས་ལ། །དེ་ལ་ཁོ་བོ་འང་ཚད་མ་ཉིད། །ཡིན་པ་ཉིད་དུའང་འདོད་མ་ཡིན། །གང་དུ་དེ་རྣམས་མངོན་འདོད་དེ། །ཚུལ་གསུམ་པ་ཉིད་ཡིན་པར་གསལ། །གང་ཕྱིར་བསམ་པ་བསྒྲུབ་པ་ལས། །མཚན་ཉིད་ཁྱད་པར་ཅན་དུ་བསྟན། །དེ་ལྟ་ཡིན་ན་སྒྲ་ཉིད་ནི། །ཚུལ་གསུམ་པོ་ཉིད་དང་ལྡན་པས། །དེ་འདྲའི་ཡུལ་ན་ཡོད་པའི་ཕྱིར། །དུ་བ་སོགས་བཞིན་རྗེས་དཔག་ཡིན། །སྒྲ་ལས་བྱུང་བ་རྣམ་པར་དཔྱད་པའོ།། །།གང་གིས་བ་མེན་ཅི་འདྲ་ཞེས། །གྲོང་པ་དག་གིས་དྲིས་པ་ན། །བ་ལང་ཅི་འདྲ་དེ་འདྲ་ཞེས། །འབྲོག་པས་སྨྲས་པ་ལྟ་བུའོ། །ཉེ་བར་འཇལ་བར་གྲགས་ལྡན་པ། །དེ་ལ་སླར་ཡང་རི་ཁྲོད་པས། །བྱས་པའི་ལུང་ལས་དེ་ཉིད་ཀྱིས། །ནང་དུ་འདུས་པར་གཞན་སྨྲས་པ། །བ་ལང་མཐོང་ནས་འཕྲོག་གནས་པའི། །བ་མེན་གང་ཚེ་མཐོང་བ་ན། །མགྲིན་པ་ཟླུམ་པའི་རྣམ་པ་ལ། །ཡན་ལག་པ་ལ་ཆར་འདྲ་བར་སྣང༌། །དེ་ཚེ་བ་མིན་དུ་ཤེས་པ། །གཟུགས་ཙམ་ཁོང་དུ་ཆུད་པ་ནི། །མངོན་སུམ་ཉིད་ཡིན་གང་ཡང་གཞན། །བྱེ་བྲག་གིས་ནི་རྟོགས་བྱ་སྟེ། །བ་ལང་དང་འདྲའི་གཟུགས་ཅན་འདི། །དེ་ཕྱིར་འདི་འདྲ་འདི་ཕྱུགས་ཞེས། །དབང་པོའི་བྱེད་པ་ཡོད་པ་ལས། །སྐྱེས་ཕྱིར་མངོན་སུམ་ཉིད་དུ་འདོད། །དེར་ནི་གལ་ཏེ་བ་ལང་ཉིད། །དྲན་པའི་ཤེས་པ་སྐྱེས་པ་དེ། །བ་མེན་ཉེ་བ་ན་གནས་ཕྱིར། །དབང་པོའི་ཡུལ་དུ་འགྱུར་བ་ཡིན། །སྤྱི་བཞིན་དུ་ནི་འདྲ་བ་ཉིད། །རེ་རེ་ལ་ཡང་ཚང་བ་ཡིན། །མ་མཐོང་ན་ཡང་འདྲ་བ་ཡིན། །དེ་ཕྱིར་དེ་ནི་དམིགས་པ་སྟེ། །འདྲ་བར་འང་དངོས་པོ་ཡིན་པ་ལ། །གནོད་པར་ནུས་
པ་མ་ཡིན་ནོ། །དེ་ནི་རིགས་པ་གཞན་ན་ཡང༌། །ཡན་ལག་མང་པོས་འདྲ་བས་འབྲེལ། །གནས་སྐབས་དེ་ཉིད་ཚེ་ན་ཡང༌། །དེས་ན་དེ་ཡི་ཕྱུགས་ཉིད་དུ། །མཚུངས་པའི་རྣམ་ཤེས་གང་སྐྱེས་པ། །དེ་ཡི་དཔེ་ནི་བ་ལང་གཟུགས། །དེ་ཕྱིར་བྱེ་བྲག་ཅན་ཉིད་དུ། །འདྲ་བས་གང་ཞིག་དྲན་པ་དེ། །འདྲ་བ་ཉིད་ལ་དེ་བརྟེན་ནས། །ཉེ་བར་འཇལ་བས་གཞལ་བྱར་འགྱུར། །མངོན་སུམ་གྱིས་ནི་རྟོགས་པ་དང༌། །འདྲ་བའི་བ་ལང་དྲན་པ་ན། །ཉེ་བར་འཇལ་བའི་ཚད་མ་ལས། །ཁྱད་པར་ཅན་གཞན་གྲུབ་པ་སྟེ། །ཇི་ལྟར་ས་ཕྱོགས་མངོན་སུམ་གྱུར། །མེ་ཉིད་ཀྱང་ནི་དྲན་བཞིན་པའི། །ཁྱད་པར་ཅན་གྱི་ཡུལ་ཉིད་ཀྱིས། །རྗེས་དཔག་ཚད་མ་མ་ཡིན་མིན། །རྣམ་ཤེས་དེ་ནི་མངོན་སུམ་ཉིད། །ཡིན་པར་རིགས་པ་མ་ཡིན་ཏེ། །དོན་དང་དབང་པོར་མངོན་འབྲེལ་པའི། །བྱ་བ་དེ་ཚེ་མེད་ཕྱིར་རོ། །ཚུལ་གསུམ་པོ་ཉིད་མི་འཐད་པས། །རྗེས་དཔག་ཉིད་ནི་དེ་ལ་མེད། །འདིར་ནི་ཕྱོགས་ཆོས་ལ་སོགས་པ། །མེད་པར་ཇི་ལྟར་བརྟག་པར་བྱ། །གཞལ་བྱ་ཡི་ནི་འདྲ་བ་ཉིད། །ཆོས་ཀྱི་སྔ་རོལ་གཟུང་བ་མིན། །བ་མེན་གཟུང་བར་གྱུར་པ་ནི། །བ་ལང་རྗེས་དཔོག་མ་ཡིན་ཏེ། །དམ་བཅའི་དོན་དང་ཡུལ་གཅིག་ཕྱིར། །བ་ལང་ལ་ཡོད་རྟགས་ཉིད་མིན། །འབྲེལ་པ་མེད་ཕྱིར་བ་མེན་ཡང༌། །བ་ལང་ལ་རྟགས་རིགས་པ་མིན། །ཤེས་པ་དེ་ནི་མ་རྟོགས་པའི། །དོན་གསལ་བྱེད་ཕྱིར་ཚད་མ་སྟེ། །བ་མེན་མཐོང་བའི་སྔ་རོལ་ཏུ། །དེ་འདྲ་མ་བཟུང་ཕྱིར་ནའོ། །གཞལ་བྱ་དངོས་པོ་མེད་པས་ན། །འདི་ནི་ཚད་མར་མངོན་འདོད་མིན། །ཡན་ལག་མང་པོ་ཐུན་མོང་བས། །འབྲེལ་པའི་འདྲ་བ་ཡོད་ཅེ་ན། །སྤྱི་རྣམས་བསལ་བས་དེ་དག་ལ། །མང་དང་དེ་འབྲེལ་ག་ལ་ཡོད། །དེ་ཉིད་སྒྲུབ་པར་བྱེད་པ་ཡི། །ཚད་མ་ཡང་ནི་ཡོད་པ་སྟེ། །སྤྱི་ཡང་དངོས་པོ་ཉིད་ཡིན་ཞིང༌། །མངོན་སུམ་གྱིས་ནི་གཟུང་བྱ་ཡང༌། །དངོས་མེད་ལས་གཞན་གཞལ་བྱ་ཡི། །ཐུན་མོང་མིན་པའི་དངོས་པོ་བཞིན། །དངོས་པོ་མེད་པའི་ཕྱོགས་བཞག་ནས། །སྤྱི་ཡི་དོན་ནི་རབ་བརྗོད་པ། །གྲུབ་མིན་དང་པོའི་བསྒྲུབ་བྱ་ཡང༌། །དམ་བཅའི་དོན་དུ་ཡུལ་གཅིག་ཉིད། །དེར་ནི་འདི་ལྟར་རིག་འགྱུར་ཏེ། །བ་ལང་གཟུགས་ཀྱི་ཡན་ལག་དང༌། །བ་མིན་
ཡན་ལག་ཁ་ཅིག་ནི། །མཚུངས་པའི་རྒྱུ་ལས་ཤེས་པ་ཡིན། །དེར་ནི་བ་མེན་མཐོང་བ་ན། །སྔ་ན་ཆད་ལན་ཅིག་མིན་པར་ཡང༌། །བ་ལང་གཟུགས་ཀྱི་ཡན་ལག་དག །མཐོང་ཕྱིར་འདི་ཡི་དྲན་པ་བྱུང༌། །དེ་ཉིད་ཕྱིར་རྟ་ལ་སོགས་པ། །དེ་དག་འདྲ་ལ་བ་མེན་ནི། །མཐོང་བའི་ཚེ་ན་བ་ལང་བློ། །ཅི་ཕྱིར་མི་འཇུག་ཁྱད་པར་ཅི། །གཞན་དུ་སྔར་ཤེས་དོན་གསལ་ཕྱིར། །འདི་ནི་ཚད་མ་མ་ཡིན་མིན། །ཚད་མ་གཞན་ནི་མེད་པ་ན། །གང་ལས་དེ་ལྟར་འགྱུར་བ་ཡིན། །འདྲ་བའི་དངོས་དེའང་བ་ལང་གི །སྤྱི་བཞིན་ཡོད་པ་ཡིན་ན་ནི། །ཡོངས་སུ་འབྲེལ་བར་མ་མཐོང་ཡང༌། །མདུན་ན་འདུག་པ་མཐོང་བ་ཉིད། །དེ་ལྟའང་དྲན་བའི་ངོ་བོ་ཉིད། །ཇི་ལྟར་གསལ་བར་བྱ་བ་མིན། །བ་ལང་ངོ་བོར་འདྲ་བ་དེ། །ཡོད་པ་ཙམ་དུ་ཤེས་པ་ནི། །བ་མེན་དང་ཡང་འདྲའོ་ཞེས། །དེ་ལྟར་རྣམ་པར་ངེས་པ་མིན། །ཉེ་བར་འཇལ་བའང་དེ་ལྟ་བུར། །ངེས་པར་དྲན་ལ་མཚན་ཉིད་གཞན། །གལ་ཏེ་མིད་ནི་འདི་ཉིད་ཀྱིས། །དེ་ཡི་སྔོན་དུ་བཟུང་བ་མིན། །གང་འདིའི་བདག་ཉིད་སྔོན་བརྗོད་པ། །རང་གི་ངོ་བོ་བཟུང་བ་ཡང༌། །དངོས་པོ་ཡི་མིང་དངོས་མིན་ཏེ། །གང་ཕྱིར་དེ་མིན་འཛིན་པ་ན། །རང་གི་དེ་ཉིད་ཡོངས་ཤེས་ཀྱང༌། །ཡོངས་སུ་ཤེས་པ་ཉིད་མི་འགྱུར། །དེ་ཙམ་གྱི་ནི་ཆ་ཡིས་ནི། །ཚད་མ་ཉིད་དུ་རྣམ་འཇོག་ལ། །ཚད་མ་རྣམས་ནི་འདི་ཙམ་ཞིག །བྱ་མིན་གཞན་ལས་ཐལ་འགྱུར་ཕྱིར། །ཤིང་གི་ཕྲེང་སོགས་མཐོང་བ་ན། །རྩ་འཐུང་གཅིག་ཉིད་མཐོང་ལ་མིན། །གཉིས་པའི་ཡལ་ག་ཅན་ཤེས་པས། །དང་པོའི་ཡལ་ག་ཅན་ངེས་པ། །ཚད་མ་གཞན་དུ་འགྱུར་བ་ཡིན། །འདྲ་བ་ལྟོས་ལ་མི་སོགས་ཕྱིར། །ཉེ་བར་འཇལ་བ་རྣམས་ལ་ཡང༌། །གཟུང་བར་འཛིན་པ་ཉིད་དུ་མཚུངས། །བ་མེན་ཉེ་བར་དམིགས་པ་ན། །རྟ་ལ་སོགས་པ་དེ་དང་ནི། །མི་འདྲའི་ཤེས་པ་འབྱུང་འགྱུར་གང༌། །དེ་ནི་གཞན་པའི་ཚད་མ་ནི། །དངོས་པོ་ལ་ཡང་དམིགས་པའི་ཕྱིར། །དངོས་པོ་མེད་པའི་ཁོང་གཏོགས་མིན། །ཕན་ཚུན་མེད་པ་ཉིད་དུ་ནི། །འདྲ་བ་ཉིད་ཀྱི་བློ་ལའང་མཚུངས། །འདྲ་བ་ཉིད་ཀྱིས་དབེན་པར་ནི། །ཇི་ལྟར་དེ་ལ་ཤེས་པ་བཞིན། །ཡན་ལག་ཐམས་ཅད་མཚུངས་པ་དང༌། །བྲལ་བ་ཡིན་པར་ཤེས་པར་བྱ། །ཡན་ལག་དུ་མ་ཐུན་མོང་བས། །འབྲེལ་པར་རང་
གི་ཤེས་པ་ནི། །ཡན་ལག་ཐམས་ཅད་ཐུན་མོང་དུ། །འབྲེལ་པ་དེ་ཉིད་ཐལ་བར་འགྱུར། །ཤིན་ཏུ་བརྟན་པའི་ངག་ཐོས་ནས། །འདྲ་བའི་དོན་དུ་དམིགས་པ་ན། །མིང་དང་འབྲེལ་པ་རྣམ་རྟོག་པས། །ཉེ་བར་འཇལ་བར་ཁ་དོག་འདོད། །དེར་ནི་ཤིན་ཏུ་བསྟན་པའི་ངག །མཉན་པ་ལ་ནི་སྐྱེས་པ་ཉིད། །གལ་ཏེ་ཉེ་བར་འཇལ་བ་ན། །མཁོ་བ་མཚུངས་དོན་འཛིན་པ་ན། །ཁྱད་པར་ཅན་གྱི་ཡུལ་ཉིད་ཀྱིས། །འབྲེལ་བ་རྟོགས་པར་འགྱུར་བ་ཡིན། །གང་ཕྱིར་ལུང་ལས་འབྲེལ་བ་དེ། །སྤྱི་ཡི་ཡུལ་ནི་རིག་པ་སྟེ། །ཁྱད་པར་ཅན་གྱི་ཡུལ་ནི་དེར། །ཉེར་འཇལ་བརྟན་ནས་རྣམ་རྟོག་འགྱུར། །གལ་ཏེ་འདི་ལ་མིང་དང་ནི། །འབྲེལ་པ་རྟོགས་པར་གྱུར་པ་ན། །དེ་ལས་གཞན་པའི་དོན་རྟོགས་པར། །མི་རིགས་ཤིན་ཏུ་ཐལ་འགྱུར་ཕྱིར། །སྣ་ཚོགས་ལག་རྒྱན་ཅན་འགའ་ཡི། །མིང་ནི་བཟུང་བར་གྱུར་པ་ན། །ཕྱི་མའི་དུས་སུ་སྒྲ་དེ་ལས། །མཛེས་པའི་ཅོད་པན་ཅན་རྟོགས་འགྱུར། །དེ་ཕྱིར་སྔ་མ་དེ་ཉིད་འདིའི། །ཕྱི་ཡི་རྣམ་རྟོག་གཟུགས་བརྙན་འདི། །བློ་ནི་སྤྱི་ཡི་མིང་ཅན་ནོ། །བ་མེན་ཉེ་བར་དམིགས་ན་ཡང༌། །དེ་ཉིད་ལ་ཡང་འདི་ལྟར་འགྱུར། །མཐོང་དང་རྟོག་པའི་རྣམ་དབྱེ་བ། །མི་ཤེས་ཕྱིའོ་སྙམ་དུ་སེམས། །དེ་ལྟར་ཡང་ནི་ཤེས་བྱས་ཏེ། །སྒྲ་དང་རྣམ་པར་རྟོག་པའི་ཡུལ། །རང་གི་མཚན་ཉིད་ཡིན་པ་ནི། །རྒྱས་པར་བསལ་བ་ཉིད་ཡིན་ནོ། །དེ་ནི་དེ་རྣམས་ཡུལ་ཡིན་དུ། །ཟིན་ཀྱང་ཉེར་འཇལ་རྗེས་དཔག་ཉིད། །ཚུལ་གསུམ་པོ་ཡི་རྟགས་ཉིད་ལས། །སྐྱེས་པ་འདི་ལྟར་ཤེས་བྱ་སྟེ། །གང་ཞིག་བ་ལང་འདྲ་བར་ནི། །ཐོས་པའི་ཡུལ་གྱི་བ་མིན་ཏེ། །བརྡ་འཛིན་པ་ཡི་གནས་སྐབས་ཀྱི། །བ་མེན་བློ་གནས་ལྟ་བུའོ། །གལ་ཏེ་བློ་ལ་གནས་པ་ཡང༌། །དུས་དེར་ཡོད་པ་མ་ཡིན་ན། །འདི་ནི་བ་ལང་དང་འདྲ་ཞེས། །བརྡ་ཡི་ཅི་ལས་འབྲེལ་པ་ཡིན། །འབྲེལ་པ་ཅན་ལས་ཐ་དད་པའི། །འབྲེལ་པ་གཞན་ཡོད་མིན་པར་བསྒྲུབས། །སྔོན་དུ་བརྡ་ལ་རྣ་བ་ཡི། །རྣམ་ཤེས་ཀྱིས་ནི་སྒྲ་བཟུང་ལ། །མིག་གི་མདུན་ན་གནས་པ་ཡི། །བ་མིན་བཟུང་བར་གྱུར་པ་ན། །མངར་བ་དང་ནི་དྲི་ཞིམ་སོགས། །སོ་སོར་བཟུང་བ་ཀུན་སྦྱོར་བ། །རྣམ་ཤེས་སོ་སོ་བ་དག་ནི། །སྦྱར་འདི་ཚད་མར་
རིགས་པ་མིན། །མིང་དང་སྦྱོར་བ་ཡང་དག་རིགས། །དྲན་པ་ཉིད་ནི་བསལ་བ་མིན། །ཐབས་མཐའ་ཡས་པ་ལས་བྱུང་བའང༌། །མིང་འབྲེལ་ཡང་དག་རིགས་པ་རྣམས། །ཆོས་མཐུན་ཉིད་ལ་མི་ལྟོས་ཀྱང༌། །མི་བདག་ཉིད་ལས་འབྱུང་འགྱུར་ཏེ། །ཉི་མའི་འོད་ཟེར་གྱིས་གདུངས་པ། །རྣམ་པར་སལ་བའི་གདུགས་དཀར་ཅན། །དེ་རྣམས་ནང་ན་མི་བདག་ཅེས། །སྨྲས་པའི་ཉེར་བསྟན་བྱེ་བྲག་གིས། །དུས་ཕྱིས་དེ་ནི་མཐོང་བ་ན། །མི་དེ་འདིའོ་སྙམ་བློ་དེ། །ཁྱེད་ལ་ཚད་མ་གཞན་ཐོས་འགྱུར། །ཆོས་མཐུན་ལ་སོགས་ལྟོས་མེད་ཕྱིར། །རྗེས་དཔག་སྟོབས་ཀྱིས་ཚད་མ་གཞན། །ཡོད་པ་ཉིད་དུ་གཞན་སྒྲུབ་བྱེད། །མངོན་སུམ་རྗེས་དཔག་ལས་གཞན་པ། །གཉིས་བཅས་ཚད་མ་གཞན་ཡིན་ཏེ། །ཚད་མ་ཡིན་ཕྱིར་རྗེས་དཔག་བཞིན། །རྗེས་སུ་དཔག་པའང་དེ་དེ་བཞིན། །གཏན་ཚིགས་ལ་གནོད་མ་བསྟན་ཕྱིར། །དེ་རྣམས་འབྲེལ་པ་མེད་པ་ཡིན། །དེ་ལྟར་དེ་བཞིན་ཡིན་ན་ནི། །ཚད་མ་བཞི་པོའང་ཁྱེད་ཀྱིས་བསལ། །ཁྱེད་ཀྱིས་དེར་སྨྲས་ལན་གང་ཡིན། །དེ་ཉིད་འདིར་ནི་ལན་དུ་འགྱུར། །ཉེ་བར་འཇལ་བ་རྣམ་པར་དཔྱད་པའོ།། །།ཚད་མ་དྲུག་ཏུ་ཤེས་བྱས་ཏེ། །གང་དུ་དོན་གཞན་དུ་འགྱུར་ཡིན། །མ་མཐོང་བ་ལ་རྟོག་པ་གཞན། །དེ་ནི་དོན་གྱིས་གོ་བར་བསྟན། །དེ་ལ་བསྲེག་པར་མངོན་སུམ་རིག །མེ་ལ་བསྲེག་པའི་ནུས་ཡོད་དང༌། །ཉི་མ་འགྲོ་བར་རྗེས་དཔག་ལས། །དེ་ཡི་ནུས་པ་ལ་སྦྱོར་བས། །དངོས་པོ་རྣམས་ཀྱི་ནུས་པ་ནི། །འབྲས་ལས་དོན་གྱི་གོས་སྒྱུར་བྱེད། །འབྲེལ་པ་བཟུང་བ་མེད་པར་ནི། །སྔར་མེད་དེ་ཡང་རྟོགས་པར་བྱེད། །འདི་རྣམས་སྔར་འབྲས་འབྲེལ་པའང་མིན། །ད་ལྟར་གཞན་འཛིན་པ་ཡང་མིན། །གང་ལས་ཕྱོགས་ཆོས་རྗེས་འགྲོར་འགྱུར། །རྣ་བ་ལ་སོགས་ནུས་ཕྱོགས་ལའང༌། །གཏན་ཚིགས་ཇི་སྙེད་རབ་སྦྱོར་བ། །དེ་ཀུན་ཆོས་ཅན་མ་གྲུབ་པས། །གཞི་མ་གྲུབ་པར་ཐལ་བར་འགྱུར། །ལྷ་སྤྱིན་ཚོན་པོ་ཉིན་པར་ནི། །མི་ཟ་ཞེས་སོགས་ཚིག་ཐོས་པ། །མཚན་མོ་ཟ་བར་ཤེས་པ་ནི། །ཐོས་ལས་དོན་གྱིས་གོ་བར་བཤད། །མཚན་མོ་ལ་སོགས་ཚིག་རྣམས་དོན། །ཉིན་མོའི་ཚིག་གིས་རྟོགས་པ་མིན། །ཉིན་མོ་ལ་སོགས་ཚིག་གི་དོན།།
ཟབ་མོའི་བཟའ་ལ་འདྲེ་བ་མིན། །གང་གིས་ཚིག་དེ་དེ་སྒྲུབ་པར། །བྱེད་པར་འགྱུར་གྱི་གཞན་པ་མིན། །དོན་གཞན་ལ་ནི་འཇུག་ཕྱིར་ཡང༌། །གཉིས་པའི་དོན་ལ་རྟོགས་པ་མིན། །དེ་ཡི་ཕྱིར་ནི་ཚིག་གཞན་གྱིས། །བློ་ལ་བརྟེན་པར་འདི་ཞེས་བྱ། །དེས་ན་གོ་བྱེད་མིན་པར་ཡང༌། །ཚིག་གང་ཡིན་དེ་ཤེས་བྱ་སྟེ། །མངོན་སུམ་ཚོགས་པར་གང་འགྱུར་བའི། །ཚད་མར་དེ་ནི་བརྗོད་བྱ་ན། །ཚིག་ཏུ་མ་སྨྲས་པ་ཉིད་ནི། །རེ་ཞིག་མངོན་སུམ་པར་མི་འདོད། །འདི་ནི་དེ་དང་ལྷན་ཅིག་པར། །ནམ་ཡང་མ་མཐོང་རྗེས་དཔག་མིན། །གལ་ཏེ་འབྲེལ་པ་མ་མཐོང་ཡང༌། །རྟགས་ཉིད་དུ་ནི་འདོད་པ་ན། །དེ་ནི་བརྗོད་པ་ཙམ་གྱིས་ཀྱང༌། །ཚིག་རྣམས་ཐམས་ཅད་རྟོགས་པར་འགྱུར། །འབྲེལ་པ་མེད་པར་གཞན་དག་ལ། །དེ་ལ་བྱེ་བྲག་མེད་པ་ཡིན། །བ་མེན་གྱིས་མཚོན་པ་ལང་གང༌། །ཤེས་པས་གཟུང་བ་ནུས་པ་ཉིད། །ཉེ་བར་འཇལ་སྟོབས་ལས་བྱུང་བའི། །ནུས་པ་ཉིད་ཀྱིས་རྟོགས་པར་བྱེད། །བརྗོད་པ་སྨྲ་པོའི་ནུས་པ་ལས། །གཞན་དུ་འགྲུབ་པར་མི་འགྱུར་ཏེ། །དོན་གྱིས་གོ་བར་རྟོགས་པར་འགྱུར། །དེ་ལས་གཞན་པ་འགྲོ་བ་མིན། །སླར་ཡང་དོན་གྱིས་གོ་བ་གཞན། །ཉིད་ཀྱིས་སྒྲ་ནི་རྟག་ཉིད་ངེས། །གང་ཕྱིར་རྟག་པ་མིན་ན་བརྡ། །ཐ་སྙད་ལ་ནི་རྗེས་འཇུག་མིན། །ཚད་མས་ངེས་པའི་དངོས་མེད་པས། །ནག་པའི་ཁྱིམ་ན་མེད་པ་ཡི། །བྱེ་བྲག་ལས་ནི་ཕྱི་རོལ་ན། །ཡོད་པར་འགྲུབ་ཅེས་གང་སྨྲས་པ། །དངོས་མེད་དེ་ལས་བྱུང་བ་གཞན། །དོན་གྱིས་གོ་བ་ཞེས་བཤད་དོ། །ཕྱོགས་ཆོས་ལ་སོགས་ཡན་ལག་ནི། །མིན་ཕྱིར་རྗེས་དཔག་ལས་གཞན་འདི། །ཕྱི་ཡུལ་བྱེ་བྲག་ཅན་དོན་ནམ། །དེ་ཡི་བྱེ་བྲག་ཅན་གྱི་ཡུལ། །གཞལ་བྱ་ཡིན་ན་གང་ཁྱིམ་ན། །མེད་འདི་ཇི་ལྟར་ཕྱོགས་ཆོས་ཡིན། །སྲོག་བཅས་ཁྱིམ་ན་མེད་པ་ནི། །ཕྱོགས་ཀྱི་ཆོས་སུ་འདིར་རྟོགས་ན། །རྒྱབ་ན་དེ་ཡོད་པར་རིག་པའི། །བློ་ནི་སྐྱེ་བ་མ་ཡིན་ནོ། །ཡོད་པ་ཉིད་དང་བྲལ་བ་ཡི། །གང་ཞིག་ཁྱིམ་ན་མེད་པ་ཙམ། །ཤི་བ་ལ་ཡང་དེ་མཐོང་ཕྱིར། །ཕྱི་རོལ་གནས་པར་སྒྲུབ་བྱེད་མིན། །དེ་ལ་ནུས་བཅས་དང་བྲལ་བའི། །ནུས་པ་གང་ན་སྲིད་མིན་པ། །ནུས་བཅས་མངོན་སུམ་ཉིད་ཡིན་ན། །དོན་གྱིས་གོ་བས་རྟོགས་བྱ་
གང༌། །སྲེག་པ་ལ་སོགས་རྒྱུ་གང་ཡིན། །མི་ལ་སོགས་པ་མ་ནོར་བར། །ཐེ་ཚོམ་མེད་པར་མཐོང་བ་ནི། །དེ་ལ་བུམ་པ་གཞན་ཅིར་འགྱུར། །ཐ་དད་ཡིན་ན་འབྲས་བུ་ལ། །དེ་ནི་དགོས་བ་ཡིན་པའི་ཕྱིར། །དངོས་པོ་བྱེད་པ་མིན་ཉིད་འགྱུར། །དགོས་པ་ཡིན་ན་ཐ་དད་འགྱུར། །དོན་བྱེད་ནུས་པའི་ངོ་བོ་ནི། །ནུས་པ་རང་གི་མཚན་ཉིད་དེ། །དེ་འདྲའི་བདག་ཉིད་དུ་སྣང་བ། །མངོན་སུམ་གྱིས་ནི་ངེས་པ་ཡིན། །མཚན་ཉིད་གཞན་དུ་གྲུབ་པ་ཉིད། །ཚད་མ་ཅུང་ཟད་ཀྱང་ཡོད་མིན། །དེས་རྟོགས་ན་ཡང་དོན་མེད་དེ། །ངོ་བོས་དེ་འབྲས་གྲུབ་ཕྱིར་རོ། །ནུས་པའི་མཚན་ཉིད་གཞན་བྲལ་བས། །དོན་གྱིས་གོ་བ་རྟོགས་ཤེ་ན། །མ་ཡིན་གཞན་དུ་འབྲེལ་འབྱུང་ཕྱིར། །དངོས་པོ་ལས་དེ་འབྱུང་བ་ཡིན། །ཆུ་ལ་སོགས་པ་ལས་ལྡོག་པ། །སྲེག་པ་ལ་སོགས་ནུས་བཅས་མེད། །མངོན་སུམ་གྱུར་བཞིན་དེ་ལས་གཞན། །ནུས་པ་དགོས་པ་ཅི་ཞིག་ཡོད། །ནུས་དེ་གཅིག་ཏུ་ཐ་དད་མིན། །གཉིས་ཀའི་བདག་ཉིད་ཅན་ཞེ་ན། །མ་ཡིན་འགལ་ཕྱིར་གཞན་མིན་ན། །གང་ཕྱིར་དེ་ཡང་མངོན་སུམ་བྱུར། །མངོན་སུམ་ཉིད་གནས་འདི་རྣམས་ནི། །རྗེས་སུ་དཔག་བྱ་ཉིད་བསལ་བ། །ཉམས་མིན་གང་གིས་འདི་ལ་ནི། །ཡུལ་ན་རྗེས་དཔག་ཏུ་མི་འདོད། །སྣང་བ་ལ་སོགས་དངོས་པོ་གང༌། །མངོན་སུམ་གྱི་ནི་ཡུལ་མིན་པ། །དེ་རྣམས་ནུས་པའི་མཚན་ཉིད་དུ། །ཡོང་ཉིད་རྟགས་ཀྱིས་རྟོགས་པར་བྱེད། །རྒྱུ་མཚན་ལ་ནི་ལྟོས་བཅས་པའི། །སྒྲ་ལ་སོགས་པ་རིགས་པ་པོ། །རྒྱུ་གཞན་དག་ནི་ཡོད་གྱུར་ཀྱང༌། །མི་འབྱུང་མྱུ་གུ་ལ་སོགས་བཞིན། །ཉི་མ་ཉེ་བར་ལེན་པ་ཡི། །ཡུལ་ལས་ཡུལ་གཞན་དག་ཏུ་ཡང༌། །རྒྱུན་མི་འཆད་འགྲོ་ཡུལ་གཞན་ཐོབ། །འབར་བ་སོགས་བཞིན་ཤེས་པར་བྱ། །བརྟན་བདག་ཉིད་དུ་དབྱེར་མེད་ཕྱིར། །གཞན་པར་འདི་ནི་མི་རིགས་ཏེ། །དེ་ནི་ཡུལ་གཞན་ཕྱིན་པ་ལས། །གཞན་པའི་ནུས་པ་བསལ་བ་ཡིན། །ཚོལ་ཉིན་མོ་མི་ཟ་བའང༌། །དོན་དེ་ལ་ནི་ངེས་པ་མིན། །ཞེ་སྡང་གཏི་མུག་སོགས་འབྲེལ་མི། །གཞན་དུ་ཡང་ནི་སྨྲ་བར་བྱེད། །དོན་དུ་གཏོགས་ལ་མི་ལྟོས་པ། །འདིས་ནི་གལ་ཏེ་ཚིག་གཞན་ཡང༌། །དོན་དང་བཅས་པ་འདྲེན་བྱེད་ན།།
ཚིག་གཞན་དག་ཀྱང་འདྲེན་པར་འགྱུར། །ཇི་ལྟར་ཉེ་བར་འགྲོ་བ་ཡི། །ངོ་བོར་དེར་ནི་རྟོགས་པ་ཡི། །ཚད་མ་གཞན་ཉིད་གང་ཡིན་དེས། །དོན་རྟོགས་འགྱུར་བ་བརྗོད་འདོད་ན། །མཚན་མོའི་བཟའ་བ་དང་འབྲེལ་བ། །བརྗོད་འདོད་མིར་ནི་ཤེས་པར་བྱ། །ཉིན་མོའི་བཟའ་བ་དང་བྲལ་བ། །ཚོ་ཕྱིར་དེ་ལ་གཞན་བཞིན་ནོ། །ཟ་བ་ཡིན་དང་ཚོ་བ་ཉིད། །རྗེས་སུ་འགྲོ་དང་ལྡོག་པ་ཡི། །འབྲེལ་པ་ངེས་པ་དེ་ཡི་ནི། །དངོས་པོ་ལས་ནི་དངོས་པོ་རྟོགས། །འབྲེལ་པ་ཐམས་ཅད་ཀྱིས་སྟོང་པའི། །ཚིག་ལས་ཇི་ལྟར་རྟོགས་འགྱུར་ཏེ། །གཅིག་ལས་གཞན་ཀུན་རྟོགས་མིན་གྱི། །གཞན་དུ་ཡང་ནི་འགྱུར་བ་ཡིན། །དེ་ཕྱིར་འབྲེལ་པ་མེད་པ་དང༌། །ཡོད་ཀྱང་ངེས་པར་མ་བཟུང་བ། །ཚིག་འདི་རྟོགས་བཞིན་པ་ནའང༌། །ཚད་མ་ཅན་དུ་འགྱུར་མ་ཡིན། །འབྲེལ་པ་ཚད་མ་ཉིད་གནས་པ། །གལ་ཏེ་རྒྱལ་པོའི་བཀའ་ཡིན་ནམ། །མངོན་སུམ་འབྲེལ་པ་མེད་བཞིན་དུ། །ཇི་ལྟར་ཚད་མ་ཉིད་དུ་འགྱུར། །འབྲེལ་པས་རྟོགས་བྱེད་ཉིད་ཡིན་ན། །ཅི་ཕྱིར་གཞན་ཡང་རྟོགས་བྱེད་མིན། །འབྲེལ་པས་སྟོང་བ་ཉིད་དུ་ནི། །བྱེ་བྲག་ཅི་ཡང་མེད་པར་འདོད། །མངོན་སུམ་ལ་ཡང་འབྲེལ་པ་ཉིད། །ཚད་མ་ཉིད་དུ་རྣམ་པར་གནས། །མི་སླུ་བ་ནི་ཚད་མ་ཉིད། །དོན་དེ་ལས་ནི་བདག་ཉིད་ཐོབ། །དེ་རྒྱུ་མིན་པའམ་རྒྱུ་མིན་པ། །དེ་ཡང་ངེས་པར་མི་སླུ་བར། །རིགས་པ་མིན་ཏེ་མ་ལུས་པ། །མི་སླུ་བར་འགྱུར་གཞན་དུ་མིན། །གཉིས་པའི་ཚིག་ནི་སྣང་བ་ཡི། །བསམ་བའི་རྗེས་སུ་དཔོག་པ་སྟེ། །རྗེས་སུ་འགྲོ་བའི་ཚིག་འདི་ལས། །ལྡོག་པར་གོ་བར་འདོད་པ་ཡིན། །ཉེ་བར་འཇལ་བ་ཚད་མ་ཉིད། །ཡིན་པ་རྒྱས་པར་བསལ་བས་ན། །དེས་བསྐྱེད་དོན་གྱིས་གོ་བ་ཡིས། །ཚད་མ་ཉིད་ཀྱང་བསལ་བ་ཡིན། །བ་ལང་ཉེ་བར་དམིགས་པ་ཉིད། །ཉེ་བར་འཇལ་བའི་ཚད་མར་འདོད། །དེ་ཡོད་པ་ལ་དམིགས་པ་ཡང། །རང་ཉིད་ཉེས་པ་སྐྱེད་བྱེད་པ། །འདོད་ཕྱིར་དོན་གང་རྟོགས་པ་ལ། །ལྟོས་པའི་ནུས་པ་གང་ཞིག་ཡིན། །གཞན་མིན་པ་ཉིད་མ་ཡིན་ཡང༌། །ལག་པ་བསྐྱོད་སོགས་ལས་བཞིན་དུ། །སྒྲ་རྣམས་ཀྱིས་ནི་དོན་རྟོགས་པར། །འགལ་བར་འགྱུར་བ་མ་ཡིན་ནོ། །ཇི་
ལྟར་འདྲ་བའི་ཆོས་དག་ནི། །བསྲེས་པ་རྒྱུར་གྱུར་པ་ཡི་ཕྱིར། །དེ་ཕྱིར་སྒྲ་རྣམས་གོ་བྱེད་པ། །ཉིད་དུ་འགལ་བ་མ་ཡིན་ནོ། །མངོན་སུམ་རྫས་ལ་བརྟེན་པར་ནི། །མཐོང་བའི་བྱ་བ་གང་ཡིན་པ། །དེ་རྣམས་ཡི་གེ་ཇི་བཞིན་དུ། །སྔར་མཐོང་ངོ་ཤེས་རྟག་པར་འདོད། །གསལ་བར་བྱེད་པ་མེད་ཕྱིར་ཡང༌། །འདི་ནི་ཡོད་ཀྱང་མི་དམིགས་ཉིད། །ཁྱེད་ཀྱི་སྐྱེད་བྱེད་གང་ཡིན་ཡིད། །དེ་ཉིད་ཁོ་བོ་གསལ་བྱེད་ཡིན། །དེ་མིན་ནུས་པ་ཐོགས་མེད་པ། །ཡིན་ན་ཡིན་ན་ཤེས་པ་དེ་རྟག་འབྱུང༌། །དེ་དང་ལྡན་པ་མ་ཡིན་ན། །དེ་ནི་ནམ་ཡང་འབྱུང་མི་འགྱུར། །དེ་ཕྱིར་དེ་རྣམས་གསལ་བྱེད་པའི། །རྒྱུས་བསྐྱེད་པ་ཉིད་མི་རིགས་སོ། །སྔར་མཐོང་ངོ་ཤེས་པ་རྟག་ཉིད། །གོང་དུ་བསལ་བ་ཉིད་ཡིན་ནོ། །ནག་པ་ཁྱིམ་ན་མེད་པ་ལས། །ཕྱི་རོལ་ཡོད་པ་མི་རིགས་ཏེ། །གང་ཕྱིར་ཤི་བར་དོགས་པ་ལས། །གཞན་དུ་ན་ནི་འཐད་པ་ཡིན། །གསོན་ལ་ཁྱིམ་ན་མེད་པ་ནི། །ཕྱི་རོལ་ཡོད་པར་རབ་བསྒྲུབས་པའི། །དོན་གྱིས་གོ་བ་འདིར་སྨྲ་བ། །དེ་མིན་དེར་ཡང་མ་ངེས་ཕྱིར། །ཚུ་རོལ་མཐོང་བས་ནག་པ་ནི། །ཁྱིམ་དུ་མ་མཐོང་ཚད་མ་མིན། །དེ་ནི་སྲོག་བཅས་དང་འབྲེལ་བ། །ཇི་ལྟར་རྗེས་སུ་འཇུག་པ་ཡིན། །ཇི་སྟ་སྐད་ལ་སོགས་པ་སྟེ། །སྲོག་དང་བཅས་པར་ངེས་ཡིན་ན། །ཁྱིམ་ན་མེད་པས་མེད་པར་ཡང༌། །ངེས་འདི་ཚད་མ་ཉིད་ཡིན་ན། །དེ་ལྟའང་ཁྱིམ་ན་མེད་པ་ཉིད། །བལྟར་རུང་མ་མཐོང་བར་ངེས་པའང༌། །དེ་ཕྱིར་དེར་ནི་ཕྱི་རོལ་ན། །ཡོད་པར་བརྟགས་ཉིད་ལས་ངེས་ཡིན། །ཁྱིམ་དུ་གང་ཞིག་མ་ཕྲད་པ། །འདི་ནི་ཕྱི་རོལ་ན་ཡོད་ངེས། །ཁྱིམ་གྱི་དང་ར་ཁྱིམ་སྒོ་ནས། །ཡོད་པ་མཐོང་བའི་མི་བཞིན་ནོ། །འདིར་ནི་ཁྱིམ་གྱི་ཁོང་གཏོགས་པ། །མི་མཐུན་ཕྱོགས་ནའང་ཡོད་པའི་ཕྱིར། །དེ་ཕྱིར་དོན་གྱིས་གོ་བ་འདི། །རྗེས་དཔག་ལས་ནི་མི་ཕྱེད་དོ། །དོན་གྱིས་གོ་བ་རྣམ་པར་དཔྱད་པའོ།། །།དངོས་པོ་གང་ཞིག་ངོ་བོ་ལ། །ཚད་མ་ལྔ་པོ་མ་བསྐྱེད་པའི། །དངོས་ཡོད་རྟོགས་ཕྱིར་དེ་ལ་ནི། །དངོས་པོ་མེད་པའི་ཚད་མ་ཉིད། །མངོན་སུམ་ལ་སོགས་མི་བསྐྱེད་པའམ། །དངོས་པོ་མེད་པའི་ཚད་མར་འདོད། །བདག་ཉིད་ཡོངས་སུ་མ་གྱུར་
པའམ། །དངོས་གཞན་རྣམ་པར་རིག་པའམ། །ཚད་མ་མེད་པའི་དངོས་པོ་རྣམས། །དངོས་པོ་མེད་པར་རྟོགས་པར་བྱེད། །སྔ་ན་མེད་པ་ལ་སོགས་པ། །འདི་ནི་རྣམ་པ་བཞི་རུ་དབྱེ། །ཞོ་སོགས་འོ་མ་ལ་མེད་གང༌། །དེ་ནི་སྔ་ན་མེད་པར་བརྗོད། །ཞོ་ལ་འོ་མ་མེད་པ་ཉིད། །ཞིག་ནས་མེད་པའི་མཚན་ཉིད་དོ། །རྟ་སོགས་བ་ལང་ལ་མེད་གང༌། །གཅིག་ལ་ཅིག་མེད་པར་བརྗོད་དེ། །དེ་ལས་གཞན་དངོས་མེད་ཅིང་དེའི། །བདག་ཉིད་གཞན་ལ་མེད་པས་སོ། །མགོ་ཡི་ཆ་ནི་དམའ་མོ་ལ། །འབྲེལ་དང་སྲ་སོགས་ངོ་བོ་ཡི། །རི་བོང་རྭ་དག་མེད་གྱུར་པ། །འདི་ནི་ཤིན་ཏུ་མེད་པར་འདོད། །གལ་ཏེ་སྔ་མ་མེད་པ་སོགས། །དབྱེ་བས་དངོས་མེད་ཡོད་མིན་ན། །རྒྱུ་ལ་སོགས་པ་རྣམས་དབྱེ་བའི། །ཐ་སྙད་འདི་ཡང་མེད་པར་འགྱུར། །དེ་དངོས་མིན་ན་དབྱེར་མེད་པ། །དེས་ན་འདི་ནི་དངོས་པོ་ཉིད། །འབྲས་བུ་ལ་སོགས་དངོས་མེད་གང༌། །རྒྱུ་སོགས་དངོས་མེད་ཡིན་བདག་འདོད། །གང་འདི་རྗེས་འཇུག་མི་འཇུག་གི །བློ་ཡི་བཟུང་བ་གང་དེའི་ཕྱིར། །བ་ལང་སོགས་བཞིན་དངོས་པོ་ཉིད། །གཞལ་བྱའི་ཕྱིར་ཡང་ཤེས་པར་བྱ། །དངོས་མེད་སྒྲ་ཡི་བརྗོད་བྱ་ཉིད། །ཡིན་ཕྱིར་མངོན་སུམ་སོགས་ལས་གཞན། །གཞལ་བྱ་དངོས་པོ་མེད་པ་བཞིན། །ཚད་མ་རྣམས་ཀྱང་དངོས་མེད་པའོ། །དངོས་པོ་མེད་པའང་ཚད་མ་ཡིན། །རང་དང་རྗེས་མཐུན་དཔག་བྱ་སྟེ། །གཞལ་བྱ་ཡིན་ཕྱིར་དངོས་པོ་བཞིན། །དེ་ཕྱིར་དངོས་བདག་ཉིད་ལས་གཞན། །དེ་འདིར་རྟག་པའི་བདག་ཉིད་ཀྱི། །ཡོངས་སུ་གྱུར་པ་བསལ་བས་ན། །དེ་ལས་བཟློག་པའི་དངོས་ཡོད་པ། །རེས་འགའ་བ་ནི་མི་རིགས་སོ། །གལ་ཏེ་དེ་ཡོངས་དོར་ཙམ་གྱིས། བདག་ཉིད་དུ་ནི་འདི་སེམས་ན། །རྟག་ཏུ་དངོས་པོ་མེད་ཉིད་དུ། །འདི་ནི་རྒྱུན་མི་འཆད་ཅེས་བྱ། །ཡོངས་སུ་མ་གྱུར་འདི་ཡོད་ནའང༌། །དེ་ལྟ་ན་ཡང་འཁྲུལ་པ་ཉིད། །གཉིད་དང་བརྒྱལ་སོགས་གནས་སྐབས་སུ། །དོན་ཡོད་ན་ཡང་དོན་འབྱུང་ཕྱིར། །གལ་ཏེ་རྐྱེན་གཞན་ཡོད་པ་ལ། །དེས་དབེན་བ་ཡི་གཞན་མཐོང་ཕྱིར། །བུམ་པ་ཤེས་པ་ལ་སོགས་པའི། །ངོ་བོས་དེ་ནི་ཡིན་འདོད་ན། །གཉིས་པའི་ཕྱོགས་སུ་བསྟན་པ་ཡིན། །འདི་ལ་བྱེ་བྲག་ཅི་ཡོད་
ན། །གང་འདི་ཁྱོད་ཀྱི་རྣམ་གྲངས་ཀྱིས། །ཕྱོགས་གཉིས་དག་ཏུ་བཤད་པ་ཡིན། །དངོས་གཞན་སྒྲུབ་པའི་ཤེས་པ་ལ། །འཇུག་པ་ཐམས་ཅད་མེད་པ་ཉིད། །དངོས་མེད་གཉིས་པ་ལ་བརྟེན་ནས། །མ་མཐོང་བ་ཡང་གོ་བར་འགྱུར། །རྒྱུ་གཞན་ཉེ་བར་གྱུར་པ་ན། རུང་བར་མཚུངས་པའི་ངོ་བོ་དེ། །དེས་དབེན་གཞན་ནི་མ་ཤེས་པ། །དེ་ནི་མེད་ཅེས་བྱ་ཞེ་ན། །བལྟ་ནུས་དངོས་པོ་སྣང་བ་ནི། །མེད་ཉིད་མངོན་སུམ་ཉིད་ཀྱིས་ཏེ། །དེ་ལྟར་ཡང་དག་བསྟན་པ་ནི། །འཁྲུལ་པ་ཅན་གཞན་རྣམས་ཀྱི་མིན། །གང་བློ་མངོན་སུམ་མི་འདོད་པ། །དངོས་གཞན་རྣམ་པར་རིག་པ་ནི། །སྐྱེ་བར་ཇི་ལྟར་ཤེས་པར་བྱེད། །གལ་ཏེ་དོན་གྱིས་གོ་བ་ལས། །ཡིན་ན་དེ་ཡང་ཤེས་བདག་ཉིད། །ཡིན་པས་དེ་ཡང་ག་ལ་གོ །དོན་གྱིས་གོ་བ་གཞན་དགོས་ན། །ཐུག་པ་མེད་པར་ཐལ་བར་འགྱུར། །དངོས་མེད་ཚད་མ་དངོས་ཡིན་ན། །གཞལ་བྱ་དངོས་མེད་ཀྱང་དེ་བཞིན། །དངོས་མེད་མངོན་སུམ་ནང་འདུས་པ། །དེ་བཞིན་ཁྱོད་ལ་ཇི་ལྟར་མིན། །འབྲས་བུ་ལ་སོགས་དངོས་མེད་པ། །གང་ཡིན་རྒྱུ་སོགས་དངོས་མེད་པའོ། །དེར་ཡང་གཞན་གྱིས་དབེན་བདག་ཉིད། །མངོན་སུམ་གྱིས་ནི་རྟོགས་པར་བྱེད། །རང་དངོས་གཞན་གྱིས་དངོས་བདག་ནི། །རྟག་ཏུ་ཡོད་དང་མེད་བདག་ཉིད། །དངོས་པོའི་ངོ་བོ་ཅུང་ཟད་ནི། །རེས་འགའ་འགའ་ཞིག་གིས་རྟོགས་འགྱུར། །མངོན་སུམ་ལ་སོགས་འཇུག་པས་ཀྱང༌། །གང་ཚེ་དངོས་པོའི་ཆ་འཛིན་པ། །བྱ་བ་དེ་ནི་མི་སྐྱེད་པ། །དངོས་པོ་མེད་པའི་ཆ་འཛིན་འདོད། །དངོས་པོ་རྣམས་ཀྱི་རང་དངོས་ཉིད།། གཞན་ལས་ལོག་པ་མ་ཡིན་ནམ། །དེས་ནི་དེ་བདག་ཉིད་ཡོད་པའི། །བདག་ཉིད་འདིས་ནི་མངོན་སུམ་མོ། །ཡོད་པ་དོན་བྱེད་ནུས་པ་སྟེ། །གཞན་ནི་མེད་པར་བསྟན་པ་ཡིན། །དེ་དག་གཅིག་ཏུ་ཉམས་གྱུར་པར། །རིགས་པ་མ་ཡིན་འགལ་ཕྱིར་རོ། །གལ་ཏེ་རང་སྒྲུབ་པར་ནུས་པ། །གཞན་སྒྲུབ་མི་ནུས་མ་ཡིན་ནམ། །དེ་ཉིད་ཀྱི་ཕྱིར་གཉིས་དངོས་ཉིད། །དངོས་པོ་གཅིག་ལ་ཡོད་མ་ཡིན། །གལ་ཏེ་ནུས་མེད་གཞན་ཉིད་ལས། །གཞན་དུའང་འདོད་པ་དེ་ལྟ་ན། །དངོས་པོ་གཉིས་ནི་འཐོབ་འགྱུར་ན། །གཅིག་ནི་གཉིས་ཀྱི་དངོས་ཉིད་མིན། །དངོས་པོ་མེད་པའང་དངོས་པོ་
ཉིད། །ཡིན་པར་གོང་དུ་ཁས་བླངས་པ། །དེ་ཉིད་སླར་ཡང་ངོ་བོ་ཉིད། །མེད་ཅེས་ཅི་ཕྱིར་སྨྲ་བར་བྱེད། །ངོ་བོ་མེད་ཕྱིར་ཤེས་པ་ཡི། །ངོ་བོ་ཉམས་པས་ཚད་མ་ཉིད། །མི་རིགས་དེ་ནི་གཞལ་བྱ་ཉིད། །ཡང་དག་རིག་པའི་རང་བཞིན་ནོ། །དེ་རྒྱུ་ཡིན་ཕྱིར་ཚད་མ་སྟེ། །མིག་སོགས་བཞིན་ཞེས་བྱ་ཞེ་ན། །ངོ་བོ་མེད་པ་རྒྱུ་ཉིད་དོ། །འགྱུར་བ་ནམ་ཡང་མི་སྲིད་དོ། །ཤེས་པའི་ངོ་བོས་ཤེས་པ་ན། །དེ་དངོས་མེད་པར་ཇི་ལྟར་ཤེས། །དེ་ཡི་ཡུལ་དངོས་ཚད་མ་ཉིད། །ལས་ཡིན་ཐུག་མེད་མ་ཡིན་ནམ། །དངོས་པོ་དངོས་མེད་ལས་ཚད་མ། །ཚད་མ་དངོས་མེད་ལས་དངོས་པོ། །གལ་ཏེ་མེད་པ་གོ་བྱེད་ཉིད། །ཡིན་ན་ཕན་ཚུན་གནས་པར་འགྱུར། །དེ་ཡི་གཅིག་མཐོང་གང་ཡིན་པ། །དེ་ནི་གཞན་མཐོང་ཡིན་པར་བརྗོད། །རང་གི་ངོ་བོས་བེམས་པོ་ཉིད། །མིན་ཕྱིར་དེ་ཡང་རང་དབང་འགྲུབ། །བློ་ནི་བློ་གཞན་ལས་གྲུབ་པ། །བློ་གཞན་གྱིས་ནི་རྟགས་ལས་ཏེ། །ཡང་ན་གཞན་དུ་མི་འཐད་པའམ། །ཐམས་ཅད་དུ་ཡང་མི་འབྱུང་བའོ། །བརྒལ་ཞིང་བརྟག་པ་གསུམ་པོ་འདི། །རེ་རེ་ཞིང་ཡང་ཡོད་སྲིད་ན། །ཐུག་པ་མེད་པ་དུ་མ་ཡི། །ཁྱོད་ཀྱི་འདི་ལ་ཁྱབ་པར་འགྱུར། །རུང་བའི་ངོ་བོར་མཚུངས་པའི་ཕྱིར། །གཅིག་ཉིད་ཉེ་བར་དམིགས་པ་ལས། །རུང་བ་ཉིད་གཞན་མེད་པར་ནི། །ངེས་པར་ཡང་དག་རྟོགས་པར་བྱེད། །མཁའ་ལ་ཟླ་བ་མེད་ཤེས་པར། །གཅིག་པོ་གང་ལས་རིག་པ་ཡིན། །སྒྲ་ཀུན་གྱིས་ནི་དབེན་པར་ཡང༌། །གང་དུ་ཇི་ལྟར་ངེས་པར་བྱེད། །སྣང་བ་དང་ནི་མུན་པ་ཡི། །ཕུང་པོ་དག་ལས་སྒྲུབ་པ་པོ། །དེ་ཉིད་ཤེས་མཁའོ་སྙམ་སེམས་ཏེ། །གང་ཕྱིར་གནས་མེད་བ་ལྟར་ཡང་མེད། །སྒྲ་ཀུན་གྱིས་ནི་དབེན་པར་ཡང༌། །འབྲས་བུ་མ་མཐོང་བ་ལས་ཤེས། །དེ་ལྟར་ཤེས་པ་གཞན་དག་གི །ཉམས་སུ་མྱོང་ལས་དེ་ཡང་འགྲུབ། །འདི་ཡི་དངོས་མེད་ཚད་མ་ནི། །དངོས་པོའི་དངོས་པོ་དེ་གནས་པ། །དངོས་མེད་སྒྲ་ཡིས་བརྗོད་བྱ་ཉིད། །ནང་དུ་འདུས་བྱས་གནོད་པ་མེད། །དངོས་པོ་མེད་པའི་ཚད་མ་ནི། །རང་དང་རྗེས་མཐུན་པས་དཔོག་ན། །དེ་འདིར་འགྲུབ་པ་ལས་བསྒྲུབ་ཉིད། །དེ་འདྲར་རྗེས་མཐུན་ཡོད་ཕྱིར་རོ། །དངོས་པོ་མེད་པ་རྣམ་པར་དཔྱད་པའོ།། །།
དེ་ཡོད་པར་དེར་འདི་འབྱུང་ལ། །མེ་དཔར་ཡང་ནི་མི་འབྱུང་བ། །དེ་ཕྱིར་དེ་ལས་འབྱུང་བ་དེ། །འདི་ནི་རིགས་པ་ཞེས་བརྗོད་དེ། །འདི་ཡོད་པས་ནི་འདི་འབྱུང་གི །འདི་མེད་པར་ནི་འདི་མི་འབྱུང༌། །འདི་ནི་ཚད་མ་གཞན་ཉིད་ཅེས། །ཐུབ་པ་ཙར་ཀ་སྨྲ་སྟེ། །གང་ཕྱིར་འདི་དཔེ་མ་དམིགས་ཕྱིར། །འདི་ནི་རྗེས་དཔག་མ་ཡིན་ནོ། །དམིགས་པ་གང་གིས་དོན་གང་ཞིག །རྟོགས་པ་དེ་དངོས་མེད་པ་ལས། །མེད་པ་ཉིད་དུ་རྟོགས་པ་སྟེ། །མི་དམིགས་པ་ཞེས་བྱ་བར་འདོད། །དཔེ་ལ་ལྟོས་པ་མེད་པའི་ཕྱིར། །འདི་ཡང་ཚད་མ་གཞན་ཡིན་ནོ། །དཔེ་ཡང་མེད་པ་ཉིད་དུ་ནི། །འདི་ཉིད་ཀྱིས་ནི་རབ་ཏུ་གྲུབ། །རྒྱུ་འབྲས་ཉིད་དང་དངོས་མེད་དང༌། །རྟོགས་པ་དང་ནི་འབྲེལ་མེད་ཀྱི། །སྒྲུབ་དང་བསྒྲུབ་བྱ་གང་ཡིན་པ། །དེ་དང་འདི་ལ་འདི་དབྱེར་མེད། །དེ་ཡོད་འབྱུང་བ་མ་གཏོགས་པར། །རྒྱུ་དང་འབྲས་བུ་ཉིད་གཞན་མེད། །སྣང་བ་མི་དམིགས་མ་གཏོགས་པར། །མེད་པ་གཞན་ཉིད་རྟོགས་པ་མིན། །དངོས་པོ་དེ་ཡི་ཐ་སྙད་དུ། །རུང་བ་ཉིད་དུ་རབ་སྒྲུབ་བྱེད། །བརྡ་ཡིས་དངོས་སུ་རྟོགས་པ་ཡིས། །དོན་ཡོད་ངེས་པར་མཐོང་བའོ། །ཚོགས་པར་རྣམ་པར་གནས་པ་ཡི། །རྒྱུ་ནི་ཚོགས་པ་ཅན་ཉིད་དེ། །སྟོང་ཡོད་འབྲས་བུའི་རྟགས་ལས་ནི། །བརྒྱ་སོགས་ཡོད་པའི་ཤེས་པ་སྐྱེ། །ཞེས་གྲགས་པ་དང་དེ་བཞིན་དུ། །མཐངས་ཀྱིས་ཚོར་བ་ལ་སོགས་པ། །འདི་འདྲའི་འཁྲུལ་བཅས་དུ་མ་དག །ཚང་མར་མི་སྦྱར་ཐལ་འགྱུར་ཕྱིར། །གལ་ཏེ་འདི་ནི་གནས་མིན་པ། །ཉིད་ལ་ཉམ་ཐག་ལས་བྱེད་ནའང༌། །མངོན་སུམ་དང་ནི་ལྐོག་གྱུར་ཏེ། །དོན་ནི་རྣམ་པ་གཉིས་སུ་གནས། །གཉིས་ཀ་གཉིས་ཀ་མིན་བདག་ཉིད། །དོན་གཞན་རིགས་པ་མིན་པ་ཉིད། །གཅིག་ལ་བྱ་དང་བྱ་མིན་པར། །ཤེས་ན་གཅིག་ཉིད་ཉམས་པ་ཡིན། །དངོས་སུ་རྣམ་ཤེས་སྐྱེད་བྱེད་ལ། །མངོན་སུམ་དོན་དུ་བརྗོད་པར་བྱ། །ཇི་སྐད་བསྟན་པ་ལས་བཟློག་པ། །ལྐོག་ཏུ་གྱུར་ཅེས་བྱ་བར་བརྗོད། །རེ་ཞིག་སྒྲ་འབྱུང་ཉེར་འཇལ་སོགས། །འདི་ནི་དང་པོའི་དོན་ཡུལ་མིན། །མངོན་སུམ་ཁོང་གཏོགས་ཐོབ་པའམ། །འབྲས་མེད་ཉིད་དེ་དྲན་པ་བཞིན། །ལྐོག་ཏུ་གྱུར་
པའི་ཡུལ་དེ་ཡང༌། །དེ་རྣམས་ཡུལ་དུ་ཇི་ལྟར་འགྱུར། །གལ་ཏེ་དངོས་གྱུར་ལྐོག་གྱུར་འདི། །མིན་ཏེ་མངོན་སུམ་དངོས་པོ་བཞིན། །གཞན་ལ་རྣམ་པར་བརྟེན་ན་ཡང༌། །འདི་ནི་དེ་རྟོགས་ཇི་ལྟར་ཡིན། །གཞན་དང་འབྲེལ་པའམ་མ་འབྲེལ་པའམ། །ཐ་དད་སྣང་བའམ་དེ་བཞིན་མིན། །མ་འབྲེལ་པ་ལས་དེ་འབྱུང་ན། །ངེས་པ་མེད་པར་ཐལ་བར་འགྱུར། །གལ་ཏེ་ཐ་དད་སྣང་འགྱུར་ན། །ཁྱབ་པ་འབྲེལ་པར་མི་འགྱུར་རོ། །གང་ཞིག་ལྐོག་ཏུ་གྱུར་པའི་དོན། །འབྲེལ་པའི་དོན་ལ་བརྟེན་པ་དང༌། །ཐ་དད་དེ་གཞན་མི་བརྟེན་ཏེ། །རྗེས་དཔག་ཡིན་པར་བསལ་ཞེས་བྱ། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་ཚད་མ་གཞན་བརྟག་པ་སྟེ་ཉི་ཤུ་རྩ་གསུམ་པའོ།། །།གལ་ཏེ་ནོར་བུ་གཟི་ལྟ་བུར། །དངོས་པོ་དུ་མའི་བདག་ཉིད་ཅན། །རང་བཞིན་དེ་ལྟར་ཡིན་པའམ། །ཡོད་ལ་སོགས་པ་འགལ་ཅི་ཡོད། །དངོས་པོ་དངོས་གཞན་མཚུངས་པ་ཡིན། །ནམ་མཁའ་མེ་ཏོག་ཁྱད་པར་མེད། །གལ་ཏེ་མཚུངས་མིན་ཉིད་བྲལ་ན། །དེ་དག་ཐམས་ཅད་གྲུབ་པ་མིན། །གང་ཕྱིར་ཐམས་ཅད་མཚུངས་མིན་ཕྱིར། །མངོན་པར་འདོད་པའི་དངོས་པོ་ལ། །དངོས་པོ་གཞན་དུ་ངེས་པ་ནི། །དངོས་པོ་ཉིད་ནི་མེད་པར་འགྱུར།། དངོས་པོ་ལས་ནི་ལྡོག་པ་ན། །མེད་པ་ཉིད་ནི་སྤངས་ནས་ནི། །གཞན་དུ་འགྲོ་ཡོད་ཅི་ཞིག་མཚོན། །རྒྱུ་སྐར་ལམ་གྱི་མཚོ་སྐྱེས་ཕྱིར། །དེ་ཕྱིར་དངོས་དེར་འདོད་པ་ནི། །ནམ་མཁའི་མེ་ཏོག་དང་མཚུངས་མིན། །ནམ་མཁའི་མེ་ཏོག་མཚུངས་མིན་པར། །འདོད་ན་དེ་ཕྱིར་དངོས་དེ་ནི། །དེ་དང་མཚུངས་པའི་དངོས་པོ་ཉིད། །སྤྱི་ཞེས་བྱ་བར་འདོད་པར་གྱིས། །རྣམ་པ་གཞན་དུ་བློ་དེ་ནི། །གཏོར་ཟས་སོ་བརྟག་ལ་འཇུག་མིང༌། །དངོས་པོ་རྣམས་སུ་ངེས་ནས་སོ། །འཇུག་པ་དེ་ནི་གང་གིས་བྱས། །གལ་ཏེ་འདྲ་བས་ངེས་འདི་ནི། །དེ་ཉིད་སྤྱིར་ནི་བདག་ཅན་འདོད། །རང་བཞིན་རྗེས་འགྲོ་ནུས་པ་ནི། །དེ་ཉིད་ཀྱིས་ནི་བཤད་པ་ཡིན། །དེ་ཕྱིར་ཤིན་ཏུ་ཐ་དད་བློ། །འབའ་ཞིག་ཉིད་དུ་གྲུབ་པ་མིན། །གང་ཕྱིར་དངོས་པོས་ངོ་བོ་ཀུན། །ཕན་ཚུན་དུ་ནི་ཐ་དད་མིན། །དངོས་པོའི་མཐར་ནི་བྱས་པ་ལས། །གལ་ཏེ་འདྲ་མིན་དང་བྲལ་བའི། །དངོས་
པོ་དེ་ནི་ཐ་དད་མིན། །དེ་དབྱེ་མེད་ཕྱིར་དེ་བདག་བཞིན། །དེ་ལས་ཐ་དད་རང་ངོ་བོ། །མི་འདྲ་བར་ནི་མངོན་པར་བརྗོད། །འདྲ་བ་མིན་ཡང་ཐ་དད་མིན། །དེ་ནི་ཕན་ཚུན་འགལ་བ་ཡིན། །དེ་ཕྱིར་དོན་རྣམས་ཐ་དད་ཉིད། །ཇི་ལྟར་ཡང་ནི་འདོད་པ་ན། །མི་འདྲ་བར་ནི་འདོད་པར་གྱིས། །དེ་ནས་ཁྱད་པར་བདག་ཉིད་ཀྱང༌། །དེ་ཉིད་ཀྱིས་ན་དངོས་གཅིག་དང༌། །རྣམ་པ་དུ་མར་འདོད་པ་ཡིན། །དེ་དག་རྗེས་འཇུག་ལྡོག་པ་ཡིན། །བློ་ཡི་གཟུང་བྱ་ཉིད་དུ་གནས། །ཐོག་མར་གང་དག་རྗེས་འཇུག་ཕྱིར། །སྤྱི་ཞེས་བྱ་བར་གྲགས་པ་ཡིན། །དེ་ལས་གཞན་ནི་ལོག་པའི་ཕྱིར། །ཁྱད་པར་ཡང་ནི་བརྗོད་པ་ཡིན། །སྤྱི་དང་ཁྱད་པར་དག་གི་ནི། །ཕན་ཚུན་རང་བཞིན་ཉིད་ལ་ནི། །འདྲེ་བར་གྱུར་པས་དེ་ཉིད་དུ། །རྣམ་པ་གཉིས་འདི་རིགས་མ་ཡིན། །ཕན་ཚུན་རང་བཞིན་མེད་པ་ཉིད། །སྣ་ཚོགས་ཉིད་དུ་རྗེས་སུ་འཇུག །དེ་ལྟ་བུ་ཡི་ངོ་བོ་ཡང༌། །རྣམ་པ་གཉིས་ནི་རིགས་མ་ཡིན། །གལ་ཏེ་གཅིག་དངོས་འདི་ཡོད་ནའང༌། །ཆོས་ཀྱི་དབྱེ་བ་རབ་འགྲུབ་ཕྱིར། །གལ་ཏེ་ཐ་དད་གནས་འགལ་མིན། །དཔེར་ན་བྱེད་པའི་ནུས་པ་བཞིན། །མཐོང་བ་ལ་ཡང་རིགས་མིན་མེད། །གང་ཕྱིར་སྤྱི་དང་ཁྱད་པར་ལ། །གཅིག་པུ་ཉིད་དང་ཐ་དད་དང༌། །འཇིག་རྟེན་ཐ་སྙད་རྗེས་འཇུག་མཐོང༌། །གཅིག་པུ་ངོ་བོ་ཉིད་ཡོད་ན། །ཐ་དད་ཆོས་གྲུབ་མ་ཡིན་ནས། །གང་ཕྱིར་མ་བརྟགས་དབྱེ་བ་ནི། །སྣ་ཚོགས་ཉིད་དུ་མངོན་པར་བརྗོད། །ནུས་པ་སྣ་ཚོགས་བདག་ཉིད་ནི། །བརྗོད་པར་འདོད་པ་ཙམ་གྱིས་སྤྲུལ། །དངོས་པོ་གཅིག་པུའི་བདག་ཉིད་ནི། །དེ་ལ་ཐ་དད་རིགས་པ་མིན། །གང་དེ་ཉིད་དངོས་ཅེས་བརྗོད་པ། །དེ་ཉིད་གཅིག་ཅེས་བཤད་པ་ཡིན། །དེ་དངོས་མི་འགྱུར་སླར་ཡང་དེ། །སྣ་ཚོགས་བདག་ཉིད་ཅེས་བྱའོ། །དེ་དངོས་དང་ནི་དེ་དངོས་མིན། །ཕན་ཚུན་དུ་ནི་འགལ་བའི་ཕྱིར། །དངོས་པོ་གཅིག་པུ་ཉིད་དུ་ནི། །ཇི་ལྟར་ཡང་ནི་རིགས་མ་ཡིན། །སྒྲུབ་པ་དང་ནི་དགག་པ་ནི། །ཕན་ཚུན་དུ་ནི་འགལ་བ་ཡིན། །གང་གིས་མ་འཁྲུལ་སེམས་ཀྱིས་ནི། །གཅིག་ཏུ་བྱ་བ་ནུས་པ་ཡིན། །རིགས་མཐུན་པ་དང་རིགས་མི་མཐུན། །དུ་མ་ལས་ལྡོག་དངོས་པོ་ལ། །དེ་དང་དེ་ལས་ལྡོག་
པ་ན། །ཆོས་ཀྱི་ཐ་དད་རབ་ཏུ་བརྟགས། །དེ་ཕྱིར་གཅིག་ལའང་དུ་མ་ཡིན། །ངོ་བོ་ཉིད་བརྟགས་རིགས་པ་མིན། །དངོས་པོ་གཅིག་ལ་རྣམ་པ་གཉིས། །ཡང་དག་པར་ནི་ཡོད་མ་ཡིན། །གང་ཡང་མི་ཡི་སེང་གེ་སོགས། །རྣམ་པ་གཉིས་སུ་ཉེར་བཤད་དེ། །དེ་དག་ལ་ཡང་རྣམ་པ་གཉིས། །ཡང་དག་པར་ནི་ཡོད་མ་ཡིན། །དེ་ནི་རྡུལ་ཕྲན་དུ་མའི་ཚོགས། །ངོ་བོ་གཟུགས་གཅིག་ལྡན་མ་ཡིན། །སྣ་ཚོགས་གང་ཡང་དེ་གཅིག་མིན། །སྣ་ཚོགས་རིགས་ཀྱི་རིན་ཆེན་བཞིན། །གཅིག་ཉིད་ན་ནི་རྣམ་གཉིས་པས། །སྣ་ཚོགས་རྣམ་པར་སྣང་མི་འགྱུར། །སྤྲང་མའི་རྐང་པ་ཙམ་གྱིས་ཀྱང༌། །བསྒྲིབས་ཏེ་མ་བསྒྲིབས་པ་ལ་ནི། །མི་ཡི་སེང་གེའི་ཆ་རྗེས་འབྲང༌། །ངོ་ཤེས་པ་ཡི་རྒྱུ་དག་ནི། །དེ་ཡང་རྡུལ་ཕྲན་རང་བཞིན་ཏེ། །ཁྱད་པར་ཅན་གྱི་རྐྱེན་འབྱུང་བཞིན། །དེ་ཉིད་ཀྱིས་ནི་རྣམ་པ་ཡིས། །སྣ་ཚོགས་རིན་ཆེན་ལ་སོགས་བཤད། །དུ་མའི་བདག་ཉིད་སྣ་ཚོགས་ཏེ། །གཅིག་པུ་ཉིད་དང་འགལ་བ་ཡིན། །དོན་བྱེད་པར་ནི་ནུས་པ་ཉིད། །དངོས་པོ་ཉིད་དུ་བས་བར་བརྗོད། །གལ་ཏེ་རྗེས་འགྲོ་ཉིད་དེ་ནི། །ཐམས་ཅད་ཀུན་གྱི་བྱ་བྱེད་འགྱུར། །དངོས་པོ་གཅིག་པུ་ཉིད་དང་ནི། །སྐྱེད་པར་ནུས་པ་དང་སྦྱོར་བ།། དེ་ཡང་གཞན་ཡང་ཁྱད་མེད་ཡོད། །ཇི་ལྟ་བུར་ནི་སྐྱེད་བྱེད་མིན། །སྔོ་སོགས་ཁོ་ན་དངོས་པོ་ཉིད། །གལ་ཏེ་རྗེས་འགྲོར་འདོད་ན་ནི། །དཀར་པོ་སེར་པོ་ལ་སོགས་ཀྱང༌། །སྔོན་པོའི་འབྲས་བུ་སྐྱེད་བྱེད་འགྱུར། །གཉིས་པའི་བདག་ཉིད་དང་བྲལ་བ། །གཅིག་པུ་ཉིད་ནི་དེ་ལས་སྐྱེས།། དེ་ཕྱིར་ཁྱེད་ཀྱིས་སྣ་ཚོགས་ཀུན། །གཅིག་ལ་དུ་མའི་རྣམ་པ་མེད། །གཟེགས་ཟན་འདོད་པའི་ཡོད་པ་བཞིན། །གལ་ཏེ་དེ་ཉིད་མིན། །གཅིག་ནི་དུ་མའི་ངོ་བོ་ཉིད། །དེ་ལྟར་འགྱུར་མིན་ཐ་དད་ཕྱིར། །འགལ་བའི་ཆོས་དང་འདྲེ་བ་ཡང༌། །དངོས་པོའི་ཐ་དད་མཚན་ཉིད་དེ། །སྔོན་པོ་སེར་པོའི་ཐ་དད་ནི། །འདོད་པ་ཇི་ལྟར་ཡང་མི་འགྱུར། །རྗེས་འགྲོ་རྣམ་པ་གཞན་དངོས་ཕྱིར། །དེ་ཡང་སྤྱི་དང་ཁྱད་པར་ལ། །དེ་དག་གསལ་པོར་ཐ་དད་དུ། །ཡོད་པ་དེ་ནི་ཇི་ལྟར་མེད། །ཇི་བཞིན་ཁ་དོག་ཁྲ་བོ་ལ། །ཇི་ལྟར་འདོད་པའི་ཁ་དོག་འཛིན། །སྣ་ཚོགས་ཉིད་ཕྱིར་དངོས་
དེ་བཞིན། །ཐ་དད་མི་དད་པར་ངེས། །གང་ཚེ་དངོས་པོ་ཁྲ་བོ་ནི། །ཅིག་ཅར་དུ་ནི་རྟོག་པར་བྱེད། །དེ་ཚེ་གཞན་དང་གཞན་མིན་སོགས། །དབྱེ་བ་ཐམས་ཅད་རབ་ཐིམ་ཉིད། །དངོས་པོ་དུ་མའི་ངོ་བོ་ལ། །བརྗོད་པར་འདོད་པ་ངོ་བོར་འདོད། །རིམ་དང་ཅིག་ཅར་འཇུག་པ་ཡིས། །ཚིག་རྣམས་རྣམ་པ་གཞན་ཡོད་མིན། །དེ་མ་ཐག་ཏུ་འགག་པའི་ཕྱིར། །གཅིག་ནི་སྣ་ཚོགས་ཉིད་མ་ཡིན། །དུ་མའི་ངོ་བོ་སྣ་ཚོགས་ཏེ། །གཅིག་ཉིད་ལྷན་ཅིག་གནས་པ་མིན། །ཇི་སྲིད་རྣམ་པ་དེ་དག་ནི། །དངོས་པོ་དེ་ལ་ཡང་དག་ཡོད། །དེ་སྲིད་ཁོ་ནར་སྐྱེད་པ་སྟེ། །དེ་སྲིད་དངོས་པོར་གཅིག་ཉིད་ནི། །དངོས་པོ་གཅིག་ལས་གཞན་ཉིད་དུ། །དེ་ཡི་བདག་ཉིད་དང་བྲལ་འགྱུར། །ནམ་མཁའི་མེ་ཏོག་དང་འདྲ་མིན། །དེ་ཡང་དོན་བྱེད་ནུས་པ་མིན། །གཅིག་པུའི་ནུས་པའི་རང་བཞིན་ཏེ། །དངོས་པོ་གཞན་ལ་འཇུག་མ་ཡིན། །འབྲས་བུ་དམིགས་པར་སྣང་བ་ཡི། །ཐ་དད་ལ་སོགས་བཤད་པའི་ཕྱིར། །དངོས་དེའི་བདག་ཉིད་མིན་པ་ཡང༌། །དེ་དང་མ་འདྲེས་པས་ནི་རིགས། །དངོས་མེད་ཉིད་ནི་ཁྱད་མེད་མིན། །དངོས་པོའི་མཚན་ཉིད་ཡོད་པའི་ཕྱིར། །དེ་ཡང་དོན་བྱེད་ནུས་པ་རུ། །དེ་ལྟར་དངོས་པོ་ཞེས་སུ་བརྟག །ནུས་པ་མེད་པ་ལ་ལྡོག་པ། །འདྲ་བ་ཉིད་དུ་བརྟགས་པ་ཡིན། །དེས་ནི་ཤིན་ཏུ་ཐ་དད་པ། །མཚུངས་པ་ཉིད་དུ་ཡོད་པར་བརྟགས། །དང་པོ་དངོས་གཞན་དང་མཚུངས་པ། །ནམ་མཁའི་མེ་ཏོག་དེ་ཁྱད་ཡོད། །མཐུན་དང་གཞན་དང་དངོས་པོ་ལས། །གང་གི་བདག་ཉིད་དངོས་དེ་ནི། །གལ་ཏེ་ལྡོག་ན་མཐུན་པའི་རིགས། །དེ་ཉིད་ཀྱིས་མཚུངས་མ་ཡིན་ནམ། །དེ་ཚེ་མཐུན་པའི་རིགས་རྣམས་ཀྱིས། །མཚུངས་པ་ཉིད་དུ་ཤེས་པར་འགྱུར། །དེ་ཡི་བདག་ཉིད་ཁྱད་མེད་ཕྱིར། །དེ་བཞིན་དུ་ཡང་དེ་ཤེས་མིན། །གང་ཕྱིར་རིགས་མཐུན་པ་ཡི་མིང༌། །གང་གིས་འདི་ནི་འགྱུར་བ་ཡིན། །དེ་དང་མཐུན་པའི་བདག་ཉིད་ཀྱང༌། །དེ་དང་རང་བཞིན་ཐ་དད་འགྱུར། །རང་བཞིན་དེ་ཉིད་ཀྱིས་ནི་དེ། །མཐུན་པ་ཞེས་བྱར་རྟོགས་པ་ཡིན། །གཅིག་ཏུ་རྟོགས་པའི་ཤེས་པ་ལ། །རྒྱུ་ཉིད་གཞན་ནི་ཐ་དད་ཕྱིར། །གང་ཕྱིར་གཅིག་པུ་རྟོགས་པ་ལ། །རྒྱུ་ནི་འགའ་ཞིག་ཁོ་ན་སྟེ། །ནུས་པ་རང་བཞིན་ངེས་ཐ་དད། །དབང་པོ་བདུད་རྩི་ལ་
སོགས་བཞིན། །གལ་ཏེ་སྔོ་སོགས་ལས་མིན་ནི། །ལྡོག་པའི་ངོ་བོའི་རྟེན་ཉིད་འདོད། །སྔོན་པོ་ལ་སོགས་ཤེས་པ་ནི། །དེ་ནི་ཇི་ལྟར་སྐྱེད་ཡིན་ནམ། །སྔོ་སོགས་ཤེས་སྐྱེད་སྔོན་པོ་ལས། །ཇི་ལྟར་ཐ་དད་ལྡན་པ་ཡི། །རྣ་བས་དེ་ནི་མི་སྐྱེད་དེ། །དེ་བཞིན་མིག་ཀྱང་འདོད་པར་གྱིས། །སྐྱེད་བྱེད་ལས་ནི་ལྡོག་པ་ཡི། །གང་གཞན་སྐྱེད་བྱེད་དངོས་པོར་འགྱུར། །དེ་ཕྱིར་དངོས་པོ་རྣམས་ལ་ནི། །རྗེས་འགྲོ་ཡང་ནི་ངེས་པ་ཡིན། །རྣམ་པ་གཞན་དུ་ཁྱད་མེད་ཕྱིར། །རྣ་བ་ལ་སོགས་ཐ་དད་ཀྱང༌། །དེ་ཡི་སྐྱེད་བྱེད་ཅིས་མི་འདོད། །མིག་གཟུགས་ལ་སོགས་ཁྱད་པར་བཞིན། །སྐྱེད་བྱེད་ལ་སོགས་ལས་ལྡོག་པ། །མིག་སོགས་པ་ནི་གྲུབ་པ་མིན། །གང་ཕྱིར་ཁྱད་མེད་དེ་དག་ནི། །བདག་ཉིད་ཀྱང་ནི་སྐྱེད་བྱེད་འདོད། །དངོས་པོ་རྣམས་ཀྱི་རང་བཞིན་ལས། །ལྡོག་པ་ཉིད་ནི་དམིགས་མི་འགྱུར། །རང་བཞིན་ལས་ནི་ལྡོག་པ་ན། །རང་བཞིན་མེད་པར་ཐལ་བར་འགྱུར། །སྐྱེད་བྱེད་གཞན་ལས་དེ་དག་ནི། །ལྡོག་པ་ཉིད་དུ་བརྗོད་པ་ན། །དེས་བསྐྱེད་ངོ་བོ་ཉིད་མ་ཡིན། །དེ་ཡང་ཁོ་བོ་ཅག་ཉིད་འདོད། །དེ་ཡི་སྐྱེད་བྱེད་དེ་ཡང་ནི། །རང་བཞིན་ཉིད་དུ་བརྗོད་པ་ཡིན། །དེ་ཀུན་དེ་ལས་ངེས་པར་ནི། །རང་གི་རྒྱུ་ལས་ཡང་དག་འབྱུང༌། །གཅིག་པུའི་བདག་ཉིད་རྗེས་འགྲོའི་ཕྱིར། །གལ་ཏེ་དེ་དག་སྐྱེད་བྱེད་ཡིན། །བདག་ཉིད་གཅིག་ལའང་དེ་ཡོད་ཡིན། །ལྷན་ཅིག་བྱེད་པ་གཞན་ཅི་ཞིག །ཁྱད་པར་གཞན་ནི་མེད་པའི་ཕྱིར། །གལ་ཏེ་གཅིག་པུ་སྐྱེད་བྱེད་ཕྱིར། །དེ་ཐ་དད་ཕྱིར་ནུས་མིན་ནམ། །ཐ་མི་དད་ཡིན་མ་ཚང་ཅི། །ཇི་ལྟར་རྗེས་འགྲོ་ཁྱད་མེད་ཀྱང༌། །ཐམས་ཅད་ཐམས་ཅད་བྱེད་པ་མིན། །སྣ་ཚོགས་ཉིད་ལ་ཁྱད་མེད་ཀྱང༌། །དེ་ལྟ་ཉིད་དུ་ངེས་པར་འགྱུར། །ཐ་དད་འགའ་ཞིག་ཀྱང་སྐྱེད་བྱེད། །རང་བཞིན་གྱིས་ནི་ངེས་པར་འགྱུར། །རྗེས་འགྲོ་ཉིད་ནི་གཅིག་ཅིག་ལ། །སྐྱེད་བྱེད་སྐྱེད་བྱེད་མིན་ཅི་ཞིག །གལ་ཏེ་དེར་ཡང་ཁྱད་ཡོད་ན། །ཡོད་ཆུ་དེ་ཅི་དངོས་དེ་ཉིད། །དེ་ཐ་དད་ཕྱིར་མི་སྐྱེད་པ། །རྗེས་འགྲོ་ལས་གཞན་མ་ཡིན་ནམ། །དེ་ཉིད་ཡང་དག་པ་ཡི་དོན། །གང་ཞེས་དོན་བྱེད་ནུས་པ་ཡིན། །དེ་ལ་རྗེས་འགྲོ་ཅན་མ་ཡིན། །རྗེས་འགྲོ་གང་དེས་འབྲས་སྐྱེད་མིན། །བདག་ཉིད་གང་ཞིག་མངོན་འདོད་པས། །སྐྱེས་བུ་དེ་ནི་རབ་འཇུག་འགྱུར།།
དེ་ལ་གནས་པ་ཉིད་སྤྱོད་པས། །ཐ་དད་ཐ་མི་དད་མི་རྟོགས། །གཞན་དུ་བདག་ཉིད་ཐ་དད་ལ། །ལོག་པ་ཉིད་དུ་མཚུངས་ཉིད་དུ། །ཡོད་ཉིད་དངོས་པོའི་རྗེས་འགྲོ་ན། །རབ་འཇུག་ལ་སོགས་ཐལ་བར་འགྱུར། །བྲམ་ཟེ་གཅེར་བུ་ཟེར་སྐྱ་པས། །རྟོགས་པས་དཔྱད་པ་ཉིད་དུ་ནི། །སྣ་ཚོགས་སུ་ནི་བརྗོད་པ་ན། །ཅི་ཞེས་ཕུལ་དུ་བྱུང་བ་སྨྲས། །གསེར་གྱི་ཕོར་བུ་ཆག་པ་ཡིས། །གང་ཚེ་གསེར་གྱི་གདུ་བུར་བྱས། །དེ་ཚེ་སྔ་འདོད་མྱ་ངན་སྐྱེད། །ཕྱི་མ་འདོད་པས་དགའ་བའང་སྐྱེད། །གསེར་འདོད་པ་ནི་བཏང་སྙོམས་སོ། །དེ་ཕྱིར་མངོན་སུམ་བདག་ཉིད་ཅན། །སྐྱེ་དང་འཇིག་དང་གནས་མེད་ན། །བློ་གྲོས་གསུམ་དུ་འགྱུར་མ་ཡིན། །འཇིག་པ་མེད་ན་མྱ་ངན་མེད། །སྐྱེ་བ་མེད་ན་རྒ་བ་མེད། །གནས་པ་མེད་ན་བཏང་སྙོམས་མེད། །དེས་ནི་སྤྱི་ནི་རྟག་པ་ཉིད། །དེ་ལྟར་དེ་ཡང་རིགས་པ་མིན། །རྟེན་ནི་མི་མཚུངས་ཉིད་ཀྱི་ཕྱིར། །གང་ཕྱིར་སྐྱེ་དང་གནས་དང་འཇིག །དོན་གཅིག་ལ་ནི་བརྟེན་པ་མིན། །ཕན་ཚུན་འགལ་བ་རྣམས་ལ་ནི། །དུས་ནི་མཚུངས་པ་ཐོབ་པར་འགྱུར། །འདི་ནི་སྐད་ཅིག་འཇིག་པ་ཉིད། །ཡོད་ན་ཐམས་ཅད་འཁྲུལ་མ་ཡིན། །གསེར་ཕོར་གྱི་ནི་དངོས་པོ་ཡང༌། །གསེར་གྱི་བདག་ཉིད་རང་བཞིན་ལས། །རྗེས་འགྲོ་མེད་པར་འཇིག་པ་ཡིས། །འགའ་ཞིག་ལ་ནི་མྱ་ངན་སྐྱེད། །རྣམ་ཀུན་སྔོན་ནི་མེད་ངོ་བོའི། །དེ་ཡི་བདག་ཉིད་གདུ་བུ་ནི། །འབྱུང་བ་ན་ནི་དགའ་བ་བསྐྱེད། །གང་ན་ཡང་ནི་བརྟན་པ་མེད། །གསེར་གྱི་བདག་ཉིད་དངོས་པོ་དག །གང་ཚེ་མཐོང་བ་བློ་གྲོས་རྨོངས། །འདྲ་བ་གཞན་ནི་འབྱུང་བ་ན། །དེ་ཚེ་བརྟན་པ་ཉིད་དུ་སེམས། །གསེར་ནི་བརྟན་པའི་ངོ་བོ་ཉིད། །དེ་ཡི་ངོ་བོ་གདུ་བུ་ཡང༌། །སྔ་ཕྱི་ལ་སོགས་གནས་སྐབས་ལ། །མཐོང་འགྱུར་གཞན་གྱི་དུ་མ་ཉིད། །དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ་ལས་འགྱུར་བར་སྨྲ་བ་བརྟག་པ་སྟེ་ཉི་ཤུ་རྩ་བཞི་པའོ།། །།གསེར་གྱི་རྗེས་འགྲོ་མཚུངས་པ་ཡི། །དུས་གཉིས་རྗེས་འགྲོ་མ་ཡིན་ནོ། །གནས་སྐབས་ཐ་དད་ལྡན་དངོས་པོ། །འགའ་ཞིག་སངས་རྒྱས་པ་ཡང་འདོད། །གནས་སྐབས་ཐ་དད་ཡོད་ན་ཡང༌། །ཇི་ལྟར་ཁ་དོག་མ་སྤངས་གསེར། །དུས་གསུམ་
དུ་ནི་དེ་བཞིན་དངོས། །འདི་ནི་རྫས་མ་སྤངས་པ་མིན། །འདས་དང་མ་འོངས་པའི་ཤེས་པ། །གཞན་དུ་ཡུལ་མེད་པར་ནི་འགྱུར། །གཉིས་ལ་བརྟེན་པའི་རྣམ་ཤེས་ནི། །སྐྱོབ་པས་ཇི་ལྟར་གསུངས་པ་ཡིན། །འདས་པའི་ལས་ཀྱང་ཡོད་མིན་ན། །ཇི་ལྟར་འབྲས་བུ་སྟེར་བར་འདོད། །འདས་དང་མ་འོངས་ཤེས་དབྱེ་བ། །རྣལ་འབྱོར་པ་ལ་ཇི་ལྟར་འགྲུབ། །དེ་ཕྱིར་འདས་དང་མ་འོངས་པའི། །ཡུལ་ནི་རྫས་སུ་མེད་པ་མིན། །དུས་ཀྱིས་བསྡུས་པའི་གཟུགས་ལ་སོགས། །དངོས་པོ་ལ་སོགས་ད་ལྟར་བཞིན། །གང་ལས་དུས་ཐ་དད་རྗེས་འགྲོ། །དེ་ལྟར་འདི་ནི་བསམ་མི་བྱ། །གང་ཕྱིར་བྱེད་པས་རྣམ་ཕྱེ་བ། །འདིར་ནི་དུས་རྣམས་རྟག་པར་འགྱུར། །བྱེད་པ་ལ་ནི་གང་གནས་པ། །དེ་ནི་དེ་ལྟ་བ་རུ་བརྗོད། །བྱེད་པ་ཞིག་ལ་འདས་པ་སྟེ། །དེ་མ་ཐོབ་པ་མ་འོངས་པ། །བྱེད་པ་འབྲས་བུ་འདྲེན་པ་སྟེ། །ཆོས་རྣམས་ཀྱི་ནི་སྐྱེད་བྱེད་མིན། །འདས་པ་འདྲེན་པ་ཡོད་མིན་ཏེ། །དེ་ལ་བྱེད་པ་ཡོད་མ་ཡིན། །དེ་དག་ཆོས་ལ་བྱེད་པ་འདི། །གཞན་ཉིད་དམ་ནི་དེ་ཉིད་དུ། །ཁས་ལོང་གང་ཕྱིར་གཞན་འགྲོ་བའི། །དངོས་པོ་ཉིད་དུ་ཡོད་མ་ཡིན། །གཞན་ཉིད་དུ་ནི་གནས་པ་ན། །སྔ་ཕྱི་ལ་ཡང་རང་བཞིན་མེད། །རྒྱུ་ཉིད་འདུས་བྱས་ཉིད་སོགས་བཞིན། །བྱེད་པ་ཡང་ནི་རྟོགས་པར་གྱིས། །རང་བཞིན་རྟག་ཏུ་གནས་པའི་ཕྱིར། །གཞན་དུ་རྟག་པ་ཉིད་དུ་འགྱུར། །གང་ཕྱིར་གཟུགས་ལས་ཐ་དད་པའི། །རྟག་པའི་མཚན་ཉིད་ཡོད་པ་མིན། །རིམ་དང་རིམ་མིན་འགལ་བའི་ཕྱིར། །རྟག་པ་ཡི་ནི་རྒྱུ་ཉིད་ནི། །སྔར་སུན་ཕྱུང་སྟེ་འདུས་བྱས་ནི། །རྟག་པ་ལ་ནི་གསལ་བརྟེན་མིན། །ཕུང་པོ་ལ་སོགས་ཐ་དད་པའི། །བྱེད་པ་རུ་ནི་རྗོད་བྱེད་པ། །རང་གི་གྲུབ་མཐའ་དང་འགལ་བ། །བཟློག་པར་དཀའ་བར་ཐལ་བར་འགྱུར། །གཞན་ཉིད་མིན་ཡང་བྱེད་པ་ནི། །ཆོས་དང་ཐ་མི་དད་པའི་ཕྱིར། །ཆོས་ཀྱི་རང་གི་ངོ་བོ་བཞིན། །དུས་ཀུན་ཏུ་ནི་ཐལ་བར་འགྱུར། །དེས་ན་དུས་ཀྱི་རྣམ་དབྱེ་འདི། །དེ་ཡི་དབང་གིས་རྟག་མི་འགྱུར། །དེ་ཡི་རྣམ་པར་དབྱེ་བ་ཡིན། །ཞིག་དང་ཐོབ་དང་མ་ཐོབ་མེད། །བྱེད་དང་ཐ་མི་དད་པའི་ཕྱིར། །ཆོས་ནི་བྱེད་པ་བཞིན་དུ་འགྱུར། །སྔོན་
དང་ཕྱི་མ་རྣམ་གཅོད་ཅིང༌། །དབུས་ཙམ་དུ་ནི་ཡོད་པ་ཅན། །རྒྱུན་དུ་བྱེད་པ་ཡོད་པ་མིན། །ཆོས་ནི་རྟག་ཏུའང་ཡོད་པར་བརྗོད། །ཆོས་ལས་གཞན་ནི་བྱེད་པ་མིན། །ལྷ་ཡི་སྤྱོད་པ་བསལ་བ་ཡིན། །བྱེད་པ་གཞན་ནི་ལྟོས་བཅས་ན། །གལ་ཏེ་དེར་ཡང་དུས་གནས་པ། །མཚུངས་པར་རྗེས་སུ་རྩོད་པ་ནི། །ཀུན་དུ་འགྲོ་བ་མ་ཡིན་ནམ། །རང་གི་ངོ་བོ་ཐ་མི་དད། །གལ་ཏེ་ཁྱད་པར་མཐོང་ན་ཡང༌། །ཐོགས་དང་བཅས་པ་ཉིད་བཞིན་དུ། །དེ་ནི་རང་བཞིན་ལ་ཕན་མིན། །དངོས་པོ་རྗེས་སུ་འགྲོ་བ་ལས། །ཐོགས་དང་བཅས་པ་ཉིད་སོགས་ནི། །འགའ་ཞིག་རེས་འགའ་བར་འདོད་མིན། །དངོས་པོ་ཉིད་དུ་བརྗོད་ཕྱིར་རོ། །གཞན་གྱི་བྱེ་བྲག་འགུགས་པ་མིན། །དངོས་པོ་ཉིད་དུ་དེ་ལྟར་བརྗོད། །གཟུགས་ཀྱིས་དེ་ཞེས་སྒྲ་ཡིས་ནི། །འོན་ཀྱང་སེམས་ཀྱི་བག་ཆགས་སོ། །བྱེད་པ་རྒྱུན་ལ་སོགས་པ་བཞིན། །དེ་ཉིད་གཞན་ཉིད་རྣམ་པ་ཡིས། །འོན་ཏེ་བརྗོད་དུ་མེད་པར་བརྗོད། །བྱེད་པ་རྒྱུན་ལ་སོགས་པ་བཞིན། །དེ་ལྟར་ཀུན་རྫོབ་མ་ཡིན་ནམ། །དེས་ན་རྟག་པ་ཉིད་ཀྱིས་ནི། །རྒྱུ་བཞིན་དུ་ནི་འབྲས་བུ་ལའང༌། །དེ་ནི་གང་དུའང་དགོས་པ་མིན། །གང་ཕྱིར་དངོས་ཉིད་དོན་བྱེད་ནུས། །དེ་དང་འདི་ནི་ཉེ་བ་སྟེ། །ངོ་བོ་ཉིད་དུ་ཡོད་མ་ཡིན། །དེ་ཡིས་བྱས་པའི་དུས་གསུམ་གྱི། །རྣམ་གཞག་དེ་ཉིད་དུ་མི་འཐད། །བྱེད་པ་ཞེས་བྱའི་འབྲས་འགུགས་པའི། །ནུས་གསང་སྒྲ་ཡི་སྤྱོད་ཡུལ་མིན། །ནུས་པ་ཁོ་ནའི་དངོས་ཉིད་ཕྱིར། །ཐ་སྙད་དུ་དེ་ཇི་ལྟར་ཡོད། །གང་འདི་དངོས་པོ་སྣང་བ་ནི། །བཙོ་དང་སྲེག་སོགས་འབྲས་བུར་བྱེད། །འདས་དང་མ་འོངས་པར་གནས་པ། །དེ་ཉིད་ཁས་ལེན་བྱེད་དམ་ཅི། །གལ་ཏེ་ཉིད་ཅེས་བྱ་བ་དེ། །དེ་ཉིད་གཅིག་པུའི་བདག་ཉིད་ཡོད། །བྱེད་དང་བྱེད་པའི་ངོ་བོ་ནི། །ཞིག་པ་ཞེས་བྱ་ཇི་ལྟར་ཡིན། །དངོས་པོ་གཅིག་པུ་འདི་ཉིད་ལ། །ཁྱད་པར་མེད་ན་ཕན་ཚུན་དུ། །འགལ་བའི་རྣམ་པ་དེ་དག་ཏུ། །ཇི་ལྟ་བུར་ན་རིག་པ་ཡིན། །གནས་སྐབས་གཅིག་ནི་ཡོངས་བཏང་ནས། །གནས་སྐབས་གཞན་ནི་ཡོངས་འཛིན་ཕྱིར། །དེ་ནི་ཁྱད་མེད་མ་ཡིན་ཏེ། །ཁྱད་པར་མེད་ཅེས་བཏགས་པ་ཡིན། །དངོས་པོ་གནས་སྐབས་ཐ་དད་
ཅིང༌། །མ་ཡིན་བྱེད་པོ་མི་འཐོབ་ཕྱིར། །དེ་དག་ཉིད་ནི་ཡོད་པའི་ཕྱིར། །འབྲས་བུ་ཡོད་པར་དམིགས་བར་འགྱུར། །དུས་རྣམས་སུ་ནི་དངོས་དེ་དག །ཐ་མི་དད་པ་ཇི་ལྟར་འགྱུར། །མ་བྱུང་བ་ནི་བྱུང་བ་དག །འཇིག་འགྱུར་དེ་བདག་ཉིད་ཅི་ལྟར། གནས་སྐབས་སུ་ཡང་དབུས་མ་ལ། །རང་བཞིན་གྱིས་ནི་བྱེད་པོ་ཉིད། །དེ་ཕྱིར་དེ་ཉིད་རང་ངོ་བོ། །དེ་ཉིད་གནས་སྐབས་གཞན་དག་ལའང༌། །དེ་ཡི་བྱེད་པ་ཞིག་པ་དང༌། །དེ་ཡི་དེ་དག་ཇི་ལྟར་འདོད། །གཞན་གྱི་ངོ་བོས་བྱེད་པ་ན། །བྱེད་པ་ཉིད་ནི་ཐོབ་པའང་མེད། །འདས་དང་མ་འོངས་པར་གནས་པའི། །མེ་སོགས་གལ་ཏེ་གཞན་ཡིན་ན། །དེ་ཕྱིར་འདྲེས་སོགས་སྐྱོན་དེ་ནི། །ཕྱོགས་འདི་ལ་ནི་གཞི་མེད་པ། །ད་ལྟར་མ་བྱུང་དེ་ཉིད་ནི། །འབྲས་བུ་སྐྱེར་རུང་འབྱུང་བ་ནི། །འབྱུང་བ་དེ་ནི་གནས་པ་མིན། །འདི་རྗེས་འགྲོ་མེད་བདག་ཉིད་གྲུབ། །གང་ཕྱིར་དོན་བྱེད་ནུས་པ་ནི། །དེ་ཉིད་ཡང་དག་དངོས་པོ་སྟེ། །དེ་དག་ལ་ནི་དེ་ཡང་མེད། །གང་ཡོད་དེ་ལས་འབྲས་མི་འབྱུང༌། །མ་བྱུང་བ་ནི་བྱུང་བའི་ཕྱིར། །འདས་པ་ཡང་ནི་དངོས་པོ་འདི། །གཞན་བཞིན་ད་ལྟར་བ་བསལ་ཐོབ། །རེས་འགའ་ལ་ནི་ཉིད་ཀྱིས་ཀྱང༌། །རྒྱུ་མེད་གཞན་ལ་མི་ལྟོས་ཕྱིར། །རྟག་ཏུ་ཡོད་པའང་མེད་པར་འགྱུར། །རྒྱུ་ནི་ངེས་པར་ཡོད་པ་ཅན། །དོན་ནི་ད་ལྟར་རབ་ཏུ་བརྗོད། །སོ་སོར་བརྟགས་པའི་འགོག་པ་ལས། །མཚན་ཉིད་མི་འདོད་གཞན་དག་འདོད། །གཟུགས་ལ་སོགས་པའི་འདུས་བྱས་ཉིད། །སྐྱེ་དང་གནས་སོགས་འབྲེལ་བའི་ཕྱིར། །དེ་ལ་སྐྱེ་བའི་ཁྱད་པར་གང༌། །བསྐྱེད་པས་སྐྱེད་བྱེད་བརྗོད་པ་ཡིན།། འདི་ཞེས་བྱ་བ་ཡོད་པའི་དངོས། །མ་སྐྱེས་དེ་ཉིད་གཞན་ཉིད་ཡིན། །དེ་ལས་གཞན་མིན་ཁྱད་པར་ནི། །རེ་ཞིག་བྱེད་པར་ནུས་མ་ཡིན། །ཡིད་ཕྱིར་སྔར་ཡང་གྲུབ་པའི་ཕྱིར། །གྲུབ་པ་ཡིས་ནི་དུས་ཕྱིས་བཞིན། །འདི་ནི་ཁྱད་པར་གཞན་ཉིད་མིན། །ཐ་དད་ཕྱིར་དང་མ་འབྲེལ་ཕྱིར། །དེ་ནི་སྔ་མ་མེད་པའི་ཕྱིར། །ཡོད་པའི་འབྲས་བུར་བ་ལ་པར་འགྱུར། །རྣམ་པ་གཞན་དང་གནས་ངང་འཇིག །གཞན་ཉིད་དེ་ཉིད་བརྟགས་པ་དང༌། །རྒས་སོགས་ཡུལ་གྱི་སྐྱོན་རྣམས་ནི། །དེ་དག་ཁོ་ནར་ཡོངས་སུ་སྦྱར། །ནུས་པ་ངེས་པའི་བདག་ཉིད་ཀྱིས། །འདི་དག་རང་གི་འབྲས་བུ་
སོགས། །རིགས་ལ་སོགས་པའང་དེའི་ངོ་བོར། །སྔ་ཕྱི་ལ་ཡང་ཡོད་པ་མིན། །ནུས་པའི་ངོ་བོ་ཡོད་པའི་ཕྱིར། །རང་དང་མཐུན་པའི་བྱ་བ་ནི། །དེ་ཚེ་ཅི་ཕྱིར་རྩོད་པ་མིན། །དེ་རྩོམ་དཔག་མེད་དུས་ནི་ཐོབ། །འོན་ཀྱང་འདས་དང་མ་འོངས་དངོས། །སྐད་ཅིག་མའམ་མིན་པ་ནི། །དེ་དག་སླར་ཡང་ཐོག་མ་ནས། །དེས་ནི་དཔག་མེད་དུས་ཐོབ་འགྱུར། །དེ་སྐྱེས་པ་ཡི་སྐད་ཅིག་གང༌། །དེས་ནི་དེ་ལྟ་བ་རུ་བརྗོད། །སྐྱེས་ནས་འཇིག་པ་གང་ཡིན་པ། །དེ་ནི་འདས་པ་འབྱུང་མ་འོངས། །འོན་ཏེ་དེ་དག་སྐད་ཅིག་མིན། །ཁྱེད་ཀྱི་གྲུབ་མཐའ་དང་འགལ་འགྱུར། །འདུས་བྱས་ཐམས་ཅད་སྐད་ཅིག་མར། །གྲུབ་མཐའ་ལས་ནི་རབ་ཏུ་བཤད། །རིག་པས་གནས་ཀྱང་ཡོད་ན་ནི། །ངེས་པར་སྐད་ཅིག་མར་འཇིག་ཡིན། །ད་ལྟར་བ་བཞིན་འདིར་ཡང་ནི། །འབྲེལ་པ་སྔར་ནི་བསྒྲུབས་པ་ཡིན། །འདི་དག་འདིས་ནི་མ་འོངས་པ། །དོན་བྱེད་ནུས་པ་ཡིན་ནམ་མིན། །དོན་བྱེད་ནུས་པ་ཡོད་པ་ན། །ད་ལྟར་བ་ནི་དེ་གཞན་བཞིན། །ད་ལྟར་བ་ནི་མ་ཡིན་ན། །ནུས་པ་ཐམས་ཅད་དང་བྲལ་ཕྱིར། །ནམ་མཁའི་པདྨ་ལ་སོགས་བཞིན། །འཇིག་དང་མི་སྐྱེད་ཐལ་བར་འགྱུར། །བརྒལ་ཞིང་བརྟག་པ་མཚུངས་པར་བྱས། །མ་ངེས་པར་ནི་བརྟག་པ་ལས། །དེ་དག་ཀྱང་ནི་རྒྱུ་མཚན་མིན། །དོན་བྱེད་ནུས་པར་ངེས་པ་ནི། །དངོས་པོ་རྣམས་ཀྱི་རྐྱེན་ལས་སོ། །རྒྱུ་མེད་ཉིད་ཀྱིས་མཚུངས་པ་ནི། །ཐམས་ཅད་ཐམས་ཅད་ལ་དངོས་ཡིན། །ངེས་པར་དོན་བྱེད་ནུས་པ་ཡི། །སྐྱེ་བ་རྐྱེན་གྱིས་ངེས་པར་འབྱུང༌། །ད་ལྟར་བ་ཡི་དངོས་པོ་ཡི། །མཚན་ཉིད་ཡོད་པས་གཞན་ཡོད་མིན། །འདས་དང་མ་འོངས་པ་དག་ལ། །དེ་ཉིད་ཁྱེད་ལ་མ་ཉམས་ཡོད། །དེ་ཕྱིར་ད་ལྟ་བ་ཉིད་ནི། །དེ་དག་ལས་ནི་ཅིས་མི་འབྱུང༌། །དེས་ན་མཐོ་རིས་ཐར་བ་ཡི། །འབྲེལ་པའི་བརྩོན་པ་འདི་དོན་མེད། །འབད་པས་འབྲས་བུ་བསྒྲུབས་པ་ནི། །དེ་ནི་ཅུང་ཟད་དམིགས་སུ་མེད། །འོན་ཏེ་དོན་བྱེད་ནུས་པ་ཡང༌། །མེད་པར་དེ་དག་ལ་ཁས་ལེན། །དེ་ལྟར་ཡིན་ན་དེ་ཡི་ཕྱིར། །གཏན་ཚིགས་རྣམས་ནི་དངོས་མེད་ཆོས། །མ་གྲུབ་ཕྱིར་ན་གྲུབ་རྟེན་མིན། །ད་ལྟར་ཉིད་ནི་གྲུབ་པས་ན། །འགལ་ཡིན་ཆོས་ཅན་ལ་གནོད་
ཕྱིར། །བྱུང་ནས་གཟུགས་ནི་གང་སོང་བ། །དེར་ནི་འདས་པ་རབ་ཏུ་བཤད། །རྐྱེན་དང་ལྡན་པ་ཡོད་པས་ན། །གང་བྱུང་དེ་ནི་མ་འོངས་པ། །ཡོད་པ་ད་ལྟར་བ་ཉིད་དུ། །འགྱུར་བ་ཞེས་བྱར་བསྒྲུབས་པ་ཡིན། །གང་ཕྱིར་ཡོད་པ་མཚན་ཉིད་ནི། །ད་ལྟ་བ་ཡི་མཚན་ཉིད་ཡིན། །འདས་ལ་སོགས་པ་གཟུགས་སོགས་ཉིད། །དེ་བཞིན་འབྱུང་བའི་ཁོངས་ཆུད་དེ། །སྒྲོ་བཏགས་གནས་སྐབས་འདི་ལ་ནི། །བཤད་པ་ཡིན་ཏེ་ཡང་དག་མིན། །གཉིས་ལ་བརྟེན་པའི་ཤེས་པ་ནི། །གང་གསུངས་དེ་ཉིད་གཟིགས་པ་ཡི། །ཡུལ་དང་བཅས་པས་སེམས་དགོངས་ནས། །དེ་ནི་བརྟན་པར་བཞེད་པ་ཡིན། །རྟག་པའི་དབང་ཕྱུག་སོགས་ཀྱི་བློ། །གང་ཕྱིར་དམིགས་པ་མེད་པ་ཡིན། །སྒྲ་དང་མིང་ལ་སོགས་པའི་ཆོས། །དེ་ཡི་རྣམ་པ་དང་བྲལ་ཕྱིར། །རྟོག་པའི་རྗེས་འགྲོ་ཙམ་གྱིས་ནི། །རྣམ་ཤེས་ཞེས་བྱར་བཤད་པ་ཡིན། །དེ་འདིར་བེམས་པོ་ངོ་བོ་ཉིད། །རབ་གསལ་ནས་ནི་ཡོངས་བརྟགས་ཡིན། །འདས་པ་རྣམ་སྨིན་རྒྱུ་འབྲས་ནི། །སྟེར་བ་ཁས་ལེན་མ་ཡིན་ཏེ། །དེ་ཡི་བག་ཆགས་ལྡན་ཤེས་པའི། །རྒྱུ་ལས་འབྲས་བུ་འདོད་པ་ཡིན། །དེ་ཉིད་ཀྱང་ནི་བག་ཆགས་ཀྱི། །སེམས་ཀྱི་རྒྱུ་ལ་བརྟེན་ནས་ནི། །ལས་དེ་ཡོད་ཅེས་ཉེར་བཏགས་ཏེ། །བརྟེན་པས་དངོས་པོ་མི་འཇིགས་བཞིན། །ཆད་པའི་ལྟ་བ་སྤངས་བྱའི་ཕྱིར། །དེ་ལྟར་བསྟན་བཅོས་ལས་བཤད་ཡིན། །རྣམ་པ་གཞན་དུ་སྟོང་ཉིད་མདོར། །གསུངས་པ་དེ་ནི་ཇི་ལྟར་འདོད། །དངོས་སམ་བརྒྱུད་པའི་སྒོ་ནས་ནི། །རྒྱུ་འམ་འབྲས་བུ་ཉིད་གྱུར་པ། །ད་ལྟ་བ་ཡི་ངོ་བོ་གང༌། །དེ་ནི་རྣལ་འབྱོར་བ་དག་ཤེས། །རྣམ་རྟོག་རྗེས་འགྲོའི་བདག་ཉིད་ཀྱི། །དད་པ་འཇིག་རྟེན་པའི་ཡེ་ཤེས། །དེ་ཉིད་དུ་ནི་ཡུལ་མེད་ཀྱང༌། །སླར་ཡང་རྗེས་སུ་ཤེས་པ་ཡིན། །དེས་ན་རྒྱུ་དང་འབྲས་བུ་ནི། །འདས་དང་མ་འོངས་པ་ཡི་རྒྱུན། །དེ་ལ་རྟེན་ནས་རབ་འཇུག་འགྱུར། །འདས་དང་མ་འོངས་བསྟན་པའོ། །རྟོག་པའི་དྲ་བ་མ་ལུས་པ། །སྤངས་པའི་ཡེ་ཤེས་རྒྱུན་ལྡན་པའི། །དེ་བཞིན་གཤེགས་པའི་བསྟན་པ་ནི། །ལྷུན་གྱིས་གྲུབ་པར་འཇུག་པ་ཡིན། །དེ་ཁོ་ན་ཉིད་བསྡུས་པའི་རབ་ཏུ་བྱེད་པ་ལས་དུས་གསུམ་བརྟག་པ་སྟེ་ཉི་ཤུ་རྩ་ལྔ་པའོ།། །།
གལ་ཏེ་དངོས་པོའི་རྗེས་འགྲོ་བ། །འདིར་ནི་ཅུང་ཟད་ཡོད་མ་ཡིན། །དེ་ཚེ་འཇིག་རྟེན་ཕ་རོལ་པ། །མེད་ཕྱིར་འཇིག་རྟེན་ཕ་རོལ་མེད། །ལུས་དང་བློ་དང་དབང་པོ་སོགས། །སོ་སོར་སྐད་ཅིག་འཇིག་པའི་ཕྱིར། །འཇིག་རྟེན་ཕ་རོལ་པ་རིགས་མིན། །གཞན་ནི་ཁས་ལེན་མ་བྱས་པས། །དེ་ཡི་འབྱུང་བའི་ཁྱད་པར་ལས། །དེ་ལྟར་དེ་དག་ལས་ཤེས་ཉིད། །ཇི་ལྟར་རྒྱུ་དང་ནུས་སོགས་བཞིན། །སྐྱེ་བའི་གསལ་བར་བྱེད་པའོ། །དེ་ཡང་ས་ལ་སོགས་པ་ཡི། །ཁྱད་པར་རྣམས་ལ་འཇུག་པ་སྟེ། །ལུས་དང་དབང་པོ་སོགས་ཀྱི་མིང༌། །གཞན་ནི་དེ་ཉིད་དུ་ཡོད་མིན། །རྩོད་པའི་གཞིར་གྱུར་སེམས་དག་ནི། །ཐ་དད་ལུས་ལ་གནས་པའི་ཕྱིར། །རྒྱུ་འབྲས་ཉིད་ནི་ཡོད་པ་མིན། །བ་ལང་རྟ་ཡི་ཤེས་པ་བཞིན། །བརྗོད་པར་འདོད་པའི་ཤེས་པ་ཡིས། །བློ་རྣམས་སྐྱེད་པར་འདོད་པ་མིན། །ཤེས་པ་ཉིད་ཕྱིར་རྒྱུད་གཞན་དང༌། །འབྲེལ་པའི་བློ་རྣམས་ལྟ་བུའོ། །ཆགས་པ་དང་བཅས་འཆི་ཀའི་སེམས། །སེམས་གཞན་དང་ནི་འབྲེལ་བྱེད་མིན། །འཆི་བའི་སེམས་ཀྱི་ངོ་བོའི་ཕྱིར། །ཉོན་མོངས་བྲལ་བ་དེ་ཇི་བཞིན། །དེ་ཕྱིར་སྲོག་རྩོལ་སོགས་བྱིན་རླབས། །ལུས་ཉིད་ལས་ནི་ཤེས་པ་ནི། །སྐྱེ་བར་འགྱུར་བ་རིགས་སོ་ཞེས། །ཟླ་བ་ཅན་དང་རྟ་མཆོག་ཟེར། །ནུར་ནུར་པོ་སོགས་ཤེས་ཡོད་ལ། །རིགས་པ་མེད་པར་སྨྲ་བ་ཡིན། །དབང་པོ་དག་ནི་མ་སྐྱེས་ཕྱིར། །དེ་ལ་རྟོགས་བྱའི་དོན་ནི་མེད། །དོན་རྟོགས་པ་ལས་གཞན་ཉིད་དུ། །ངོ་བོའི་ཤེས་པ་རིགས་པ་མིན། །དེ་ཚེ་ནུས་པའི་ངོ་བོ་ཡིས། །བློ་ཞེས་བྱ་བའང་ཡོད་པ་མིན། །ནུས་པ་རྣམས་ནི་རྟེན་མེད་པར། །གནས་པར་འཐད་པ་མ་ཡིན་ཏེ། །ཤེས་པའི་རྟེན་གྱི་བདག་ཉིད་ནི། །ཡོད་ན་ལུས་ཉིད་དེ་ཡི་རྟེན། །མཐར་ནི་ལུས་ནི་ལྡོག་པ་ན། །ཤེས་པའི་འཇུག་པ་ཅི་ལ་བརྟེན། །དེ་ཡི་དེ་མ་ཐག་བྱུང་བའི། །གལ་ཏེ་ལུས་གཞན་ལ་བརྟེན་ན།། ལུས་གཞན་མཐོང་བ་མེད་པས་ནི། །དེ་ནི་ཡོད་པར་ཇི་ལྟར་ཤེས། །གླང་པོ་རྟ་སོགས་སེམས་བཞིན་དུ། །ཐ་དད་ལུས་ལ་འཇུག་པས་ན། །ཤེས་པ་དེ་ནི་རྒྱུན་གཅིག་པུ། །འབྲེལ་པ་རུ་ནི་ཇི་ལྟར་འགྱུར། །དེ་ཕྱིར་ཤེས་པའི་རྟེན་གཅིག་ནི། །ཐོག་མཐའ་མེད་པའི་སྐྱེས་བུ་འགའ།།
འཁོར་བ་ཕར་ནི་འདོད་པར་གྱིས། །ཡང་ན་མེད་པ་ཉིད་ཁས་ལོང༌། །དེ་ལ་འཇིག་རྟེན་ཕ་རོལ་ནི། །ཉེ་བར་ལེན་དང་བླང་བྱ་རུ། །འགྱུར་བའི་ཤེས་རྒྱུན་ལ་སོགས་ལས། །འགའ་ཞིག་གཞན་ནི་ཡོད་མ་ཡིན། །དེ་ཡི་ཐོག་མཐའ་མེད་པ་ཡི། །སྔོན་དང་ཕྱི་མ་ད་ལྟར་གྱི། །འགའ་ཞིག་ངེས་པའི་བར་མཚམས་ཀྱི། །གནས་སྐབས་ཉིད་དུ་ཡོངས་སུ་བཤད། །མཐོང་བའི་བདེ་བ་ཙམ་ཞེན་པས། །ཇི་ལྟར་དེ་ཙམ་བརྟག་པ་ཡིན། །འཇིག་རྟེན་ཕ་རོལ་ཡུལ་གཞན་སོགས། །དེ་ལྟར་དེ་ནི་ཁོ་བོ་སྨྲ། །གལ་ཏེ་དེ་དང་ཐ་དད་པའི། །འཇིག་རྟེན་ཕ་རོལ་བཀག་ཡིན་ན། །དེ་ཚེ་བསྒྲུབ་པ་དོན་མེད་དེ། །དེ་མེད་ཉིད་ལ་རྩོད་མེད་ཕྱིར། །རྒྱུན་ནི་དངོས་མེད་མ་ཡིན་ཕྱིར། །གནས་སྐབས་གཞན་ནི་ཡོད་པ་མིན། །དེ་ལ་གནས་པའི་འཇིག་རྟེན་ནི། །ཕ་རོལ་ཇི་ལྟར་དེ་ཉིད་ཀྱིས། །དེ་ལྟར་མ་ཡིན་རྒྱུན་གྱི་སྒྲས། །སྐད་ཅིག་རྒྱུན་ཅན་དེ་དག་ནི། །ཟོར་ཡང་ཕྱིར་ན་ནགས་ཆོགས་བཞིན། །མ་ལུས་པས་ནི་རབ་བསྟན་ཏེ། །གཅིག་པུ་ཉིད་དུ་བརྟགས་པ་ནི། །དེ་ཉིད་གཞན་ཉིད་སོགས་བརྗོད་མེད། །ནམ་མཁའི་མེ་ཏོག་ཕྲེང་བ་བཞིན། །རང་བཞིན་མེད་པ་ཉིད་དུ་འདོད། །དེ་ཡང་ཐོག་མཐའ་མེད་པ་ནི། །ཇི་ལྟར་ཡང་དག་བསྒྲུབ་པར་འགྱུར། །གལ་ཏེ་ཐོག་མར་འདོད་པའི་སེམས། །དེ་ནི་རྒྱུ་མེད་འགྱུར་བའམ། །ཡང་ན་བརྟག་པའི་རྒྱུ་ལས་བྱུང༌། །དེ་ཡང་རང་བཞིན་ཉིད་ཀྱིས་རྟག །འབྱུང་བ་ཙམ་ལས་བྱུང་བའམ། །ཡང་ན་གཞན་ཤེས་ཙམ་ལས་བྱུང༌། །མ་ལ་སོགས་པ་ཐོག་མའི་སེམས། །དེ་ལ་རྒྱུ་མེད་རེས་འགའ་བར། རིགས་མིན་གཞན་དུ་དེ་ཡི་ནི། །ཡོད་ཉིད་རྟག་ཏུ་སྣང་བར་འགྱུར། །རྟག་པའི་ཡིད་དུས་ཕྱོགས་དང་ནི། །དབང་ཕྱུག་བདག་སོགས་ཀྱིས་བྱས་མིན། །དེ་ཉིད་ཀྱིས་ན་རྟག་ཡོད་མིན། །ཐལ་འགྱུར་ཕྱིར་རོ་དེ་མེད་ཕྱིར། །རྣམ་ཤེས་གཅིག་པུ་རྟག་པ་ཡི། །རང་བཞིན་ཞེས་སྨྲ་གཟུ་ལུམས་ཡིན། །གཟུགས་དང་སྒྲ་སོགས་ཀྱི་སེམས་དག །གསལ་བར་ཐ་དད་སྣང་བའི་ཕྱིར། །ས་དང་ཆུ་དང་མེ་སོགས་པའི། །འབྱུང་བ་ལས་ནི་སྐྱེས་པ་དང༌། །གསལ་བ་མིན་པའི་སེམས་རྣམས་ནི། །ཅིག་ཅར་འབྱུང་བར་ཐལ་བར་འགྱུར། །འབྱུང་བ་བཞི་པོ་དེ་ཡང་ནི། །གཞན་གྱིས་
བསྟན་པའི་ངོ་བོར་འདོད། །ལྷན་ཅིག་བྱེད་པའི་ལྟོས་ལ་ཡང༌། །འོན་ཏེ་འདི་ཉིད་སྐད་ཅིག་མར། །གཞན་དག་གིས་ཀྱང་བརྗོད་ན་ནི། །དེ་ལྟར་ཡིན་ན་དེ་དག་གི །ཇི་ལྟར་གྲུབ་མཐའ་ལ་མི་གཏོད། །དེ་ནི་ངེས་པར་གནོད་གྱུར་ཀྱང༌། །རིགས་པ་ཡིན་ཞེས་ཁས་ལེན་བྱེད། །སྔར་བཤད་རིགས་པས་སྐད་ཅིག་མར། །ཐམས་ཅད་ཉིད་དུ་རིགས་པ་ཡིན། །རང་གི་ཕྱོགས་ལ་ལྟོས་མེད་ཅིང༌། །གལ་ཏེ་རིགས་པའི་རྗེས་ཆགས་ན། །འབྱུང་བ་ཉིད་ནི་ཡོད་མིན་པའི། །རིགས་པའི་མཆོག་འདི་འདོད་པར་གྱིས། །དེ་དག་ཡན་ལག་ཅན་དངོས་མེད།། རྡུལ་ཕྲན་དངོས་ཉིད་ཀྱང་རིགས་མིན། །རྡུལ་ཕྲན་རྣམས་ནི་མེད་པའི་ཕྱིར། །དེ་ལྟར་དེ་ནི་འཆད་པར་འགྱུར། །བག་ཆགས་ཡོངས་སུ་སྨིན་པས་ན། །ཕྱི་རོལ་མེད་པའི་ངོ་བོ་ནི། །རྣམ་ཤེས་ལ་ནི་སོ་སོར་སྣང༌། །རྨི་ལམ་སོགས་མཚུངས་གཞན་དུ་མིན། །རྣམ་ཤེས་ཉིད་ཀྱི་སྣང་བ་ལ། །བརྟེན་ནས་རབ་ཏུ་བརྟགས་པ་ཡིན། །གལ་ཏེ་འབྱུང་བ་བཞི་པོ་ནི། །རྨི་ལམ་སྒྱུ་མ་དང་འདྲ་སྟེ། །དེ་ཚེ་དེ་ལས་གཞན་མེད་ཕྱིར། །རྒྱུ་ཉིད་དུ་ནི་མི་འཐད་དོ། །སྔར་གྱུར་འབྱུང་བ་ངེས་གནས་པ། །ཤེས་པས་གཞན་ནི་སྐྱེད་བྱེད་ཡིན། །གལ་ཏེ་རྒྱུད་གཞན་གྱི་རྣམ་ཤེས། །དེ་ཡི་རྒྱུར་ནི་འདོད་པ་ན། །དེ་ཅི་ཉེ་བར་ལེན་ཡིན་ནམ། །ཡང་ན་ལྷན་ཅིག་བྱེད་པའམ། །གལ་ཏེ་ཉེ་བར་ལེན་འདོད་ན། །བུ་ཚའི་ཤེས་པའི་རྒྱུན་ལ་ནི། །ཕ་མ་འདུས་སོགས་འདུས་བྱས་ལ། །ཁྱད་པར་རྗེས་འགྲོར་འགྱུར་བ་ཡིན། །གང་ཕྱིར་ཉེར་ལེན་ཉེར་བླང་བའི། །ཆོས་འདི་ཉིད་ནི་རྣམ་གནས་པ། །རྗེས་སུ་འགྲོ་དང་ལྡོག་པས་ན། །རང་གི་རྒྱུ་ལས་ངེས་པ་ཡིན། །རང་གི་ཉེར་ལེན་སྟོབས་བྱུང་ན། །རྒྱུད་གཞན་པ་ཡི་རྣམ་ཤེས་ནི། །ལྷན་ཅིག་བྱེད་ཉིད་དུ་བརྟག་ལ། །གང་ཡང་འགལ་བ་སླར་ཡང་མེད། །དེ་ཕྱིར་ཐོག་མའི་རྣམ་ཤེས་ནི། །རང་གི་ཉེར་ལེན་སྟོབས་ལས་བྱུང༌། །རྣམ་ཤེས་ཉིད་སོགས་གཏན་ཚིགས་ཀྱིས། །ད་ལྟར་མ་ཡིན་རྣམ་ཤེས་བཞིན། །རྒྱུ་གཞན་པ་ནི་སྤངས་པའི་ཕྱིར། །རྒྱུ་ཉིད་མེད་པར་གནས་པ་ལ། །རྣམ་པ་གཞན་དུ་ངེས་པའི་ཆོས། །འདི་ནི་དེ་ཡི་ཐལ་འགྱུར་མིན། །ཤི་ཀའི་སྐད་ཅིག་རྣམ་
ཤེས་ནི། །རང་གི་ཉེར་བླང་སྐྱེད་ནུས་ཏེ། །ཆགས་པས་བྱས་པའི་འབྲེལ་པ་ཉིད། །སྔོན་གྱི་རྣམ་པར་ཤེས་པ་བཞིན། །གང་གི་ངོ་བོས་རྣམ་ཤེས་ནི། །སྐྱེད་པར་བྱེད་པ་ཡོད་ངེས་ཡིན། །སྔ་ཕྱིར་དེ་ནི་མ་ཉམས་སུ། །ཟིན་ཀྱང་ཅི་ཕྱིར་རྒྱུ་མ་ཡིན། །ཕ་རོལ་ཕྱོགས་ཀྱི་རྣམ་ཤེས་ནི། །ལུས་སྐྱེས་ཁོ་ན་ཡིན་པས་ན། །བསྒྲུབ་པར་བྱ་བའི་ཆོས་ལྡན་པ། །དཔེ་ནི་དེ་དག་ཇི་ལྟར་འགྲུབ། །ལུས་ནི་རྣམ་ཤེས་རྒྱུ་ཉིད་དུ། །སྔར་ནི་བཀག་བྱས་མ་ཡིན་ནམ། །སེམས་རྣམས་ཅིག་ཅར་ཐོབ་ཕྱིར་དང༌། །ཐ་དད་པ་ལ་མེད་པའི་ཕྱིར། །འདོད་ན་སྡུག་པ་ཡིད་བྱེད་སོགས། །དྲན་དང་ཆགས་སོགས་རྣམ་ཤེས་ནི། །འབྱུང་བ་ཉིད་དུ་རྣམ་པར་ངེས། །དེ་ནི་དགག་པར་མི་ནུས་སོ། །གོམས་པའི་ཁྱད་པར་སྔར་ཡོད་པ། །འཕེལ་དང་འགྲིབ་པ་དག་ལས་ནི། །བློ་རྣམས་འགྲིབ་དང་ཕུལ་དུ་བྱུང༌། །བློ་ལ་སྣང་བར་གྱུར་པ་ཡིན། །དོན་གཞན་ལ་ཆགས་མི་མཐུན་སེམས། །དོན་གཞན་འཛིན་པ་མེད་ཕྱིར་རོ། །ཤེས་པ་ཤེས་པའི་རྒྱུ་ཉིད་ལ། །རྩོད་པ་ཉིད་དུ་འགྱུར་བ་མིན། །དེ་ཉིད་ཕྱིར་ལུས་ཐ་དད་ལ། །བརྟེན་པ་ཉིད་དུ་འགྲུབ་མི་འགྱུར། །སེམས་ནི་ལྟུང་བའི་ཆོས་ཅན་མིན། །ལུས་ཅན་རྣམས་ལ་ཇི་ལྟར་རྟེན། །འབབ་པ་ལ་ནི་གེགས་བྱེད་ཕྱིར། །ཆུ་ལ་སོགས་པའི་རྟེན་དུ་འགྱུར། །འགྲོ་བ་མེད་པའི་སེམས་རྣམས་ལ། །རྟེན་དག་གིས་ནི་ཅི་ཞིག་དགོས། །གལ་ཏེ་དག་གིས་བདག་ཉིད་གནས། །བརྟེན་པར་འདིར་ནི་རྟོག་ན་སེམས། །ལུས་ནི་བདག་ཉིད་མི་རིགས་ཕྱིར། །ཁྱེད་ཀྱི་དེ་ཡང་འཐད་པར་མིན། །ཇི་ལྟར་དེ་ཡི་བདག་ཉིད་ལུས། །གཞན་དག་གིས་ནི་གསལ་བར་རྟོགས། །དེ་ལྟར་འདོད་ཆགས་ཞེ་སྡང་ལས། །སོགས་པའི་སེམས་ཀྱང་ཅིས་མི་རྟོགས། །སེམས་ནི་བདག་ཉིད་ཀྱིས་རིག་སྟེ། །ལུས་ནི་གཞན་དག་གིས་ཀྱང་རིག །འདི་ལྟར་གང་དག་དེ་ཐ་དད། །རྒྱུ་གསེར་དང་ནི་ཟློས་གར་བཞིན། །གཉིས་སུ་མེད་པའི་ཕྱོགས་ལ་ནི། །གཏན་ཚིགས་འདི་ནི་འཁྲུལ་མ་ཡིན། །རང་རང་གི་ནི་སང་བ་ནི། །རིག་ཕྱིར་རབ་རིབ་ལ་སོགས་བཞིན། །སེམས་ནི་སྐྱེས་མ་ཐག་འཇིག་པ། །བར་ཆད་མེད་པར་མཚོན་གྱུར་ཏེ། །ལུས་ནི་དེ་ཡི་དངོས་ཡིན་ན། །
སྐད་ཅིག་ཉིད་དུ་ཅིས་མི་འདོད། །དེ་ལ་བརྟེན་ནས་འབྱུང་བ་དང༌། །དེ་ནི་མ་འཁྲུལ་པ་ཡི་ཕྱིར། །གལ་ཏེ་དེ་ལ་བརྟེན་འདོད་ན། །དེ་ལྟར་ན་ཡང་འཁྲུལ་ཉིད་ཡིན། །སྔར་གནས་པ་ཡི་ཤེས་པ་ཡང༌། །སྐད་ཅིག་སོ་སོར་འཇིག་ལུས་ལ། །བསྟན་ནས་རྒྱུན་མི་འཆད་པར་ནི། །ཉིང་མཚམས་སྦྱོར་བ་ཁོ་ནར་བྱེད། །གལ་ཏེ་རྒྱུན་གཅིག་ངོ་བོ་ཡིས། །དེར་ནི་ཐ་དད་ཉིད་མིན་ན། །གཞན་དུ་ཡང་ནི་རྒྱུན་གཅིག་ཏུ། །ཡོད་ཉིད་ཐ་དད་མི་འགྱུར་མོད། །ཟག་པ་ཟད་པའི་རྣམ་ཤེས་ནི། །ཉིང་མཚམས་སྦྱོར་མེད་ཅི་ལ་ཤེས། །གལ་ཏེ་གཞན་གྲུབ་མཐའ་ཡིས་ནི། །ཆ་ཡིན་ཚད་མར་མ་བཟུང་ཕྱིར། །འདིར་ནི་བློ་བཟངས་འགལ་གང་དག །རྒྱལ་བ་མི་གནས་མྱ་ངན་འདས། །ཐེག་པ་གཉིས་ནི་དེའི་ཐོག་པར། །འདུས་པར་ཡང་ནི་རབ་ཏུ་བཤད། །ཕྱིར་རྒོལ་འདོད་པའི་གྲུབ་མཐའ་ལ། །ཁྱོད་ནི་རྟེན་ཡང་བསྒྲུབ་བྱ་ཡི། །ཆེས་དང་ལྡན་པའི་དཔེ་འདི་ནི། །དེ་དག་ལ་ནི་གྲུབ་པ་མིན། །གནོད་པ་ཅན་ཡང་མ་བརྗོད་ཕྱིར། །ལྡོག་པ་ལ་ཡང་ཐེ་ཚོམ་ཟ། །རིགས་མི་མཐུན་ལ་ཡོད་དོགས་ཕྱིར། །ནུར་ནུར་སོགས་ལ་རྣམ་ཤེས་ནི། །ཡོད་ཅེས་བྱ་བ་གཟུ་ལུམས་མིན། །དབང་པོ་མ་སྐྱེས་པ་ཉིད་ལ། །དེར་མི་ཤེས་བ་ཅི་ཕྱིར་མེད། །རྣམ་ཤེས་ཀུན་ནི་དབང་པོ་དང༌། །དོན་གྱིས་སྟོབས་ལས་བྱུང་ཞེས་པ། །དེ་ནི་མི་རིགས་གང་ཕྱིར་དེ། །གཞན་དུ་རྨི་ལམ་སོགས་སུའང་རིག །དོན་རྟོགས་པ་ལས་གཞན་དངོས་ཀྱང༌། །འདི་ལ་ངེས་པར་བྱས་པ་ཡིན། །དེས་ན་རྒྱལ་བ་ལ་སོགས་ལ། །འདི་ནི་ཡོད་པར་འཐད་པ་ཡིན། །དེ་ཚེ་ནུས་པའི་ངོ་བོ་ཡིས། །བློ་ནི་གནས་པར་འགྱུར་བ་མིན། །དེ་ཚེ་རང་དོན་ཁོ་ན་ཡིས། །བློ་རྣམས་ཡོད་པར་འདོད་པ་ཡིན། །གཉིད་དང་བརྒྱལ་སོགས་གནས་སྐབས་སུ། །སེམས་མེད་ཁྱེད་ཀྱིས་ཅི་ལ་ངེས། །གལ་ཏེ་རིགས་བ་མེད་པའི་ཕྱིར། །དེ་ཡང་གང་ལས་རྟོགས་པ་ཡིན། །གལ་ཏེ་ཁྱོད་ནི་དེ་དག་ལ། །འདི་ལྟར་ངེས་པར་འཇུག་འགྱུར་ཏེ། །སེམས་ནི་རིག་པ་མིན་ཞེས་མིན། །དེ་ལྟར་ཡིན་ན་སེམས་ལྡན་གྲུབ། །གལ་ཏེ་བརྒྱ་ལ་རྣམ་ཤེས་དེ། །གནས་སྐབས་དེ་དག་ལ་ཡོད་ན། །སད་པ་ལ་སོགས་
དྲན་པ་ནི། །དེ་ཡི་རྣམ་པ་ཅི་མི་འགྱུར། །དེ་ནི་གྲུབ་པའི་རྒྱུ་མིན་ནོ། །ཤིན་ཏུ་གསལ་སོགས་མེད་པའི་ཕྱིར། །དྲན་པ་རབ་ཏུ་མི་འབྱུང་སྟེ། །སྐྱེས་མ་ཐག་སོགས་སེམས་བཞིན་ནོ། །གལ་ཏེ་དེ་ལྟར་ཡིད་འདི་ལ། །ཡོད་ཉིད་དེ་དག་ལ་ཅི་ངེས། །སྔར་བསྟན་གཏན་ཚིགས་ཉིད་ཀྱིས་ནི། །ངེས་བར་འགྱུར་བར་གོ་བར་གྱིས། །གཉིད་དང་བརྒྱལ་སོགས་གནས་སྐབས་ལ། །གལ་ཏེ་སེམས་མེད་པར་འདོད་ན། །འཆིར་འགྱུར་དེ་ནི་ཡང་སྐྱེས་ན། །འཆི་བ་མེད་པ་ཁོ་ནར་འགྱུར། །མིག་ལ་སོགས་ལ་ལྟོས་མེད་ཕྱིར། །རང་དགའ་ཡིད་ཀྱི་བློ་ཡིན་ཏེ། །རང་གི་ཉེར་ལེན་སྟོབས་ཉིད་ཀྱིས། །རྨི་ལམ་སོགས་ལྟར་འབྱུང་བར་འགྱུར། །འདི་ལྟར་རྣམ་པར་རྟོག་རྣམས་ནི། །དབང་པོ་དང་དོན་ལྟོས་པ་མིན། །དེ་ཡི་བྱ་བ་མེད་ན་ཡང༌། །ནམ་མཁའི་ཨུཏྤལ་ཡོད་ཕྱིར། །དེ་དག་ཡོད་ཕྱིར་སྔོ་སོགས་པའི། །རྣམ་པར་རྟོག་པ་གང་བྱུང་གྱུར།། དེ་ནི་དོན་མེད་སྣང་བ་དང༌། །མཚུངས་པ་ཁོ་ནར་ངེས་པར་འགྱུར། །རྣམ་པར་རྟོག་པ་རྣམས་ལ་ནི། །སྒྲ་དོན་སོ་སོར་སྣང་བས་ན། །དངོས་པོའི་ངོ་བོར་མི་སྣང་སྟེ། །དེ་ལྟར་ཐམས་ཅད་རྒྱས་བསྟན་ཟིན། །གསང་ནང་ལ་སོགས་གནས་སྐབས་སུ། །ལུས་ནི་རྣམ་པར་འགྱུར་ན་ཡང༌།། ཡིད་ཀྱི་བློ་ནི་མི་འགྱུར་ཏེ། །དེ་ཕྱིར་དེ་ལ་འདི་བརྟེན་མིན། །རབ་རིབ་ལ་སོགས་ཕྲ་མོ་ཡིས། །མིག་ནི་རྣམ་པར་འགྱུར་བ་ན། །མིག་ལ་སོགས་ལ་བརྟེན་པའི་བློ། །རྣམ་པར་འགྱུར་བ་ཉིད་དུ་སྐྱེས། །དེ་ཕྱིར་ལུས་ནི་འཇིག་ན་ཡང༌། །ཡིད་ཀྱི་བློ་ནི་འདིར་བརྟེན་མིན། །རང་གི་ཉེ་བར་ལེན་སྟོབས་ཀྱིས། །འབྱུང་འགྱུར་འགལ་བ་མེད་པ་ཅན། །གང་ཕྱིར་ཡིད་བློ་འབའ་ཞིག་ཀྱང༌། །འགལ་བ་མེད་པ་དེ་ལྟར་ཡིན། །དེ་ཕྱིར་ལུས་གཞན་ཡོད་གྲུབ་ཕྱིར། །ཁོ་བོ་ཅག་གིས་འབད་མི་དགོས། །དེ་ནི་དགག་པར་ནུས་མིན་ཏེ། །མ་མཐོང་ན་ཡང་ཐེ་ཚོམ་ཕྱིར། །མིག་མི་གསལ་བས་དུ་བ་ནི། །ཕྲ་སོགས་མི་མཐོང་བཞིན་དེ་འགྱུར། །ཐ་དད་ལུས་ལ་བརྟེན་ན་ཡང༌། །དེ་ཡི་ཁྱད་པར་རྗེས་བྱེད་ཕྱིར། །རྒྱུན་གཅིག་ཏུ་ནི་འབྲེལ་པ་ཡིན། །ཤེས་པ་སྔ་མའི་རྒྱུན་བཞིན་ནོ། །སྐྱེས་མ་ཐག་པ་དག་ལ་ཡང༌། །འོན་ཀྱང་ནུ་མ་འཐུངས་སོགས་ལ། །མངོན་པར་འདོད་པ་
འབྱུང་བ་དང༌། །ཉེ་བར་གནོད་ལས་སྐྱོ་བར་འགྱུར། །དུ་དང་ནུ་མ་འཐུངས་སོགས་པའི། །འབྲས་བུས་དེ་ནི་རྟོགས་པར་འགྱུར། །དེ་ཡང་ཐམས་ཅད་རྟོག་པར་ཉིད། །དེ་དང་མིང་ནི་རྗེས་འབྲེལ་ཅན། །མིང་གི་ངོ་བོ་གོམས་པ་ནི། །སྐྱེ་བ་འདི་ལ་ཡོད་པ་མིན། དེ་དག་ལ་གཞན་སྲིད་མེད་ན། །དེ་ནི་ཆད་པར་ཐལ་བར་འགྱུར། །དེས་ནི་མི་ཉམས་མྱོང་གོམས་པས། །དེ་ནི་བག་ཆགས་སྟོབས་ལས་བྱུང༌། །དེ་དག་རྣམ་རྟོག་དངོས་ཉིད་ཀྱིས། །ད་ལྟར་བ་ཡི་རྣམ་རྟོག་བཞིན། །གང་ཕྱིར་མི་ཉམས་མྱོང་གོམས་པའོ། །བག་ཆགས་ཡོངས་སུ་སྨིན་པ་ལས། །རྟོག་སྐྱེས་དེ་དག་ལ་འཇུག་ཕྱིར། །དེ་ཕྱིར་སྲིད་གཞན་རབ་ཏུ་གྲུབ། །མིང་ནི་གོམས་པའི་སྟོབས་ཉིད་དེ། །གལ་ཏེ་དེ་དག་ལ་དེ་འབྱུང༌། །དེས་ན་ཅི་ཕྱིར་ངག་གསལ་དང༌། །དྲན་པའང་སྨྲ་མཁས་བཞིན་མ་བྱུང༌། །གསལ་བ་ཉེ་བར་ཉམས་པ་དང༌། །ཡོངས་སྨིན་འཁྲུག་པ་ཉིད་ཀྱིས་ན། །དེ་དག་ལ་འདི་མི་འབྱུང་སྟེ། །འདུས་པའི་ནད་ཀྱི་གནས་སྐབས་བཞིན། །བདག་ཉིད་ཆེན་པོ་གང་དག་ལ། །ཅུང་ཟད་ཀྱང་ནི་ཉམས་པ་མེད། །དེ་དག་གི་གང་གསལ་ཐོས་ཤིང༌། །དྲན་པ་གསལ་པོ་དེ་ཡང་ཡོད། །འདོད་ཆགས་ཞེ་སྡང་སོགས་འདི་དག །གསལ་བར་གོམས་པའི་སྦྱོར་ལས་བྱུང༌། །རྗེས་འགྲོ་དང་ནི་ལྡོག་པ་ལས། །བྱུང་འགྱུར་ཡོངས་སུ་ངེས་པ་ཡིན། །གང་དག་ཐོག་མར་བྱུང་གྱུར་ན། །དེ་དག་འདིར་གོམས་དང་བྲལ་ཡིན། །གལ་ཏེ་སྲིད་པ་གཞན་མེད་ན། །དེ་དག་སྐྱེ་བའི་རྒྱུ་ནི་གང༌། །ཉེ་བར་གནས་པ་དམིགས་པ་ལས། །དེ་དག་སྐྱེ་འགྱུར་མི་འཐད་དེ། །སོ་སོར་རྟོག་པ་ཡོད་པ་ན། །དེ་ཡོད་ན་ཡང་དེ་མི་འབྱུང༌། །སོ་སོར་རྟོག་པ་ལྡོག་པ་ན། །དེ་དག་སྟོབས་འཕེལ་སྣང་བའི་ཕྱིར། །ཕྱིན་ཅི་ལོག་ཏུ་ངེས་འཕེལ་བས། །ཞིག་དང་མ་སྐྱེས་པ་ཡི་ཡུལ། །གཙང་དང་བདག་དང་བརྟན་སོགས་སུ། །ཉེར་བརྟག་བུད་མེད་སོགས་བདག་ལ། །འདོད་ཆགས་ལ་སོགས་འབྱུང་འགྱུར་ཏེ། །ཡུལ་ཡང་དེ་ཡི་ངོ་བོ་མིན། །དེ་ཕྱིར་རིགས་མཐུན་གོམས་ནུས་ལས། །དམིགས་པ་མེད་པ་ཉིད་དུ་ནི། །ཚེ་འདིའི་འདོད་ཆགས་སོགས་འབྱུང་སྟེ། །ཆགས་སོགས་ཉིད་ཕྱིར་ཕྱི་མ་བཞིན། །སོ་སོར་རྟོག་པ་དང་བྲལ་ཞིང༌། །ཡུལ་
ནི་ཉེ་བར་གནས་པ་ན། །ཚུལ་བཞིན་མ་ཡིན་ཡིད་བྱེད་པའི། །དབང་གྱུར་སྟོབས་ནི་ཇི་ལྟར་བར། །བདེ་དང་སྡུག་བསྔལ་སོགས་འབྱུང་སྟེ། །དེ་ལ་རིགས་དང་མཐུན་པ་ཡི། །བག་ཆགས་ཡོངས་སུ་སྨིན་གྱུར་པ། །ཆགས་སྡང་ལ་སོགས་ཉོན་མོངས་འབྱུང༌། །དེས་ན་དངོས་སུ་ཡུལ་རྣམས་ནི། །ཆགས་སྡང་ལ་སོགས་རྒྱུ་མ་ཡིན། །ཀུན་ལ་དེ་ཡི་ཤེས་པ་བཞིན། །དེ་ལ་ཉོན་མོངས་ཅིག་ཅར་འགྱུར། །གཞན་སྤྱོད་པ་ལ་དམིགས་པའམ། །གཞན་གྱིས་སྨྲས་པའི་སྟོབས་ཀྱིས་ནི། །དེ་དག་ལ་ནི་ཆགས་སྐྱེ་མིན། །འཁྲུལ་པ་རུ་ནི་དམིགས་པའི་ཕྱིར། །སྤྱོད་པ་མ་མཐོང་མ་ཐོས་པས། །ཕག་ངང་རི་དྭགས་ལ་སོགས་ནི། །རིགས་མཚུངས་འགྲོ་བ་ལ་སྦྱོར་བ། །བྱ་བ་སྣ་ཚོགས་གྲུབ་པར་འགྱུར། །ཤེས་རབ་ཚུལ་ཁྲིམས་བཟོད་སོགས་ནི། །འཁོར་བར་མི་འཇུག་པ་ཡི་ཆོས། །རང་བཞིན་གྱིས་འབྱུང་མི་འགྱུར་ཏེ། །དེ་ཉིད་ཀྱིས་ན་སྨྱོན་སོགས་བཞིན། །བད་ཀན་ལ་སོགས་ནུས་པ་ཡིས། །དེ་དག་ཀྱང་ནི་འབྱུང་བ་མིན། །སྔ་མ་བཞིན་དུ་འཁྲུལ་པ་ནི། །ཐམས་ཅད་དུ་ནི་དམིགས་པའི་ཕྱིར། །དེ་ཕྱིར་ཐོག་མར་བྱུང་དེ་དག །གང་ཞིག་གོམས་པ་སྔོན་སོང་བར། །དེ་ཉིད་སྲིད་པ་གཞན་གྲུབ་པས། །དེས་ན་མེད་ཉིད་ལོག་པ་ཉིད། །འདིར་ནི་གོམས་པ་སྔོན་སོང་ནས། །སྒྲུབ་པར་བྱེད་ན་མཐོང་འདོད་གནོད། །སྲིད་པ་གཞན་ནི་སྔོན་སོང་ཉིད། །སྒྲུབ་བྱས་སྟོང་པའི་དཔེ་ཡིན་ཏེ། །ཁྱད་པར་མེད་པས་བསྒྲུབ་བྱས་ན། །གཏན་ཚིགས་འདི་ནི་འགལ་བ་ཉིད། །དེ་བཞིན་སྲིད་ལ་གཞན་གོམས་པའི། །རྒྱུད་ཉིད་ཡོངས་སུ་གྱུར་པའི་ཕྱིར། །སྤྱི་ཙམ་ཉིད་ཀྱིས་བསྒྲུབ་བྱ་ནི། །གཏན་ཚིགས་ཀྱང་ནི་འགལ་བ་མིན། །གང་ཕྱིར་དེས་ན་འགལ་མེད་པས། །གང་གིས་དེ་ནི་ལྡོག་པར་འགྱུར། །དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ་ལས་འཇིག་རྟེན་རྒྱང་པན་པའི་བརྟག་པ་སྟེ་ཉི་ཤུ་རྩ་དྲུག་པའོ།། །།གལ་ཏེ་ཤེས་པ་ལས་གཞན་པར། །འབྱུང་བ་བཞི་པོ་ཡོད་པ་མིན། །གསལ་བར་སྣང་བར་གྱུར་པ་ཡི། །རྣམ་བཅད་འདི་ནི་ཅི་ཞིག་ཡིན། །འདི་ལྟར་སྣང་བ་དེ་ཉིད་ཀྱང༌། །མེད་པ་ཉིད་དུ་ཁས་ལེན་ན། །སེམས་ནི་ཡོད་པ་ཉིད་དུ་ཡང༌། །ཁྱོད་ལ་ཚད་མ་ཅི་ཞིག་ཡོད། །ཕྱི་རོལ་དོན་དུ་སྣང་བ་འདིའི། །བདག་
ཉིད་ཇི་ལྟར་སྣང་བ་ཡིན། །འོན་ཏེ་རྡུལ་ཕྲན་རང་བཞིན་ནམ། །ཡང་ན་ཡན་ལག་ཅན་མཚན་ཉིད། །རེ་ཞིག་ཕྲ་རབ་རྣམས་ཀྱིས་ནི། །རྣམ་པ་སོ་སོར་རིག་པ་མིན། །ཕྲ་རབ་ཆ་མེད་དུ་མ་དང༌། །ལུས་ཅན་ཤེས་ལ་མི་སྣང་ཕྱིར། །ཆ་ཤས་དབྱེ་བ་དང་བྲལ་བར། །རྡུལ་ཕྲན་རྣམས་ནི་སྣང་བར་འགྱུར། །རང་གི་རྣམ་པ་མི་སྣང་ཕྱིར། །གཞན་དུ་དེ་དང་མངོན་སུམ་མིན། །ལྷན་ཅིག་ཏུ་ནི་སྐྱེས་པ་ཡང༌། །དེ་དག་རང་བཞིན་དུ་ནི་སྣང༌། །གནས་སྐབས་དེ་དག་ལ་འདི་ཉིད། །ཆ་མེད་ངོ་བོ་ཉིད་མི་སྤོང༌། །གལ་ཏེ་འགྲིབ་པའི་མཐར་ཐུག་པའི། །རང་བཞིན་དེ་ལྟར་ཡོད་ན་ནི། །ཚོར་བ་ལ་སོགས་ལྟ་བུར་ནི། །དེ་དག་ལུས་མེད་ཅིས་མི་འགྱུར། །སྐད་ཅིག་མཚུངས་པ་གཞན་སྐྱེའི་ཕྱིར། །རྟག་པ་ཉིད་དུ་འཁྲུལ་པ་གཞན། །གལ་ཏེ་རིགས་མཐུན་པར་མེད་པར། །འཛིན་ན་རིགས་པ་འཁྲུལ་པ་ཡིན། །མངོན་སུམ་རང་གི་བྱ་བ་ཡི། །སྟོབས་ཉིད་ཀྱིས་ནི་ཤེས་པ་བསྲེ། །གལ་ཏེ་སྐྱེད་བྱེད་མ་ཡིན་པར། །དེ་ཅི་མངོན་སུམ་སྤྱོད་ཡུལ་ཡིན། །དངོས་པོ་རྣམས་ནི་སྐད་ཅིག་མར། །རྗེས་སུ་དཔག་པས་ངེས་པ་ཡིན། །སེར་པོ་དཀར་པོ་ལ་སོགས་ནི། །རྡུལ་ཕྲན་ཡིན་པར་ཅི་ལས་ཤེས། །ཕྱི་རོལ་མིག་གིས་གཟུང་བྱ་ནི། །རགས་ཕྱིར་རིལ་སོགས་བཞིན་དུ། །ཕྲ་སོགས་སྔོན་སོང་དེ་ལ་ཡང༌། །རྗེས་དཔག་འདི་ཉིད་ཡོད་ཅེ་ན། །རགས་པ་ཉིད་ནི་དངོས་ཆོས་སུ། །ཆོས་ཅན་གཉིས་ལ་གྲུབ་པ་མིན། །རགས་པ་ཡན་ལག་ཅན་ནི་མེད། །རྡུལ་ཕྲན་ཡང་ནི་དེ་ལྟ་མིན། །འོན་ཏེ་ཡུལ་ནི་རྒྱ་ཆེ་བར། །གནས་པའི་གཟུགས་ནི་དེ་བཞིན་འབྱུང༌། །དེ་ལྟ་ཡིན་ན་འཁྲུལ་ཤེས་ལ། །སྣང་བའི་གཟུགས་ཀྱིས་ཐེ་ཚོམ་ཟ། །གལ་ཏེ་དེ་བརྫུན་དེ་ལྟར་མིན། །བྱེ་བྲག་རབ་ཏུ་བསྒྲུབ་པར་གྱིས། །དེ་དང་འདི་དང་ཁྱད་པར་ཅི། །གལ་ཏེ་དོན་བྱེད་མི་སླུ་བ། །དོན་བྱེད་སྣང་བའི་རྣམ་ཤེས་ནི། །མི་སླུ་བར་ནི་བརྗོད་པ་ཡིན། །རྒྱུ་ཡི་ནུས་པ་ངེས་པ་ཡི། །གཞན་དུ་ཐམས་ཅད་འབྱུང་པར་འགྱུར། །གང་ཚེ་མཚུངས་དངོས་གཟུང་བྱ་ཞིང༌། །མཚུངས་མིན་ཉིད་ནི་གཟུང་བྱ་མིན། །རྡུལ་ཕྲན་ངོ་བོ་གཉིས་ཉིད་ཕྱིར། །དེ་ཚེ་ཅི་ཕྱིར་མི་འཐད་པ། །གང་ཚེ་སྤྱི་དང་ཁྱད་པར་གྱི། །བདག་ཉིད་དངོས་པོ་ཐམས་ཅད་
ཀྱིས། །མཚུངས་དང་མི་མཚུངས་དངོས་ཉིད་ཀྱིས། །རྡུལ་ཕྲན་ངོ་བོ་གཉིས་སུ་བརྗོད། །དེ་ལ་མཚུངས་པའི་ངོ་བོ་གང༌། །དེ་ནི་མིག་གི་ཤེས་པའི་ཡུལ། །དེས་ན་རྣམ་གཅིག་ཤེས་པ་ནི། །རྡུལ་ཕྲན་རྣམས་ལ་འཐད་པ་ཉིད། །མཚུངས་པ་མིན་པའི་ངོ་བོ་གང༌། །དེ་ནི་རྣལ་འབྱོར་མངོན་སུམ་ཡུལ། །དེ་ལྟར་བློ་དམན་འགའ་ཞིག་ནི། །འཁྲུལ་པ་རུ་ནི་བརྟགས་བ་ཡིན། །དངོས་པོ་གཅིག་ལ་ངོ་བོ་གཉིས། །ཇི་ལྟར་ཤེས་བྱ་རིགས་པ་ཡིས། །དེ་དག་དངོས་ཉིད་ཐོབ་པའམ། །ཕན་ཚུན་ངོ་བོ་མེད་པའི་ཕྱིར། །ཕན་ཚུན་བདག་ཉིད་ཡིན་ན་ཡང༌། །ངོ་བོ་གཉིས་ཏེ་འགལ་བར་འགྱུར། །ཁྱད་པར་ཡང་ནི་མིག་སོགས་པའི། །དབང་པོ་རྣམས་ཀྱིས་དམིགས་པ་ཡིན། །ཕན་ཚུན་འགལ་བའི་བདག་ཉིད་ཀྱི། །ངོ་བོ་ཇི་ལྟར་གཅིག་ཏུ་འགྱུར། །རིག་ཕྱིར་དངོས་པོ་གཅིག་པུ་ལ། །འགལ་བ་དག་ནི་མི་སྲིད་མིན། །གཅིག་ནི་རྣམ་པ་གཅིག་འགྱུར་བར། །དེ་ཤེས་དབང་ཕྱུག་བཀའ་ནི་མིན། །གང་ཞིག་ཇི་ལྟར་དམིགས་འགྱུར་བར། །དེ་ནི་དེ་ལྟར་ཁས་བླངས་གིས། །དེ་མིན་མེད་ཀྱང་རིག་པའི་ཕྱིར། །དུང་ལ་སེར་སོགས་ངོ་བོ་བཞིན། །འགལ་བའི་ངོ་བོ་དང་འདྲེས་ལས། །ཐ་དད་མཚན་ཉིད་གཞན་ནི་མེད། །ཚད་མས་གྲུབ་པར་མ་གྱུར་ཀྱང། །རྡུལ་ཕྲན་རྣམས་ལ་ཐེ་ཚོམ་ཟ། །འདི་དག་ལ་ནི་མེད་པ་ཡི། །རྟོག་ལྡན་ངེས་པ་ཇི་ལྟར་སྐྱེ། །ཡང་དག་འབྱར་དང་བསྐོར་བའམ། །བར་མེད་རྣམ་པར་གནས་ཀྱང་རུང༌། །དབུས་ནས་རྡུལ་ཕྲན་རྡུལ་གཅིག་ལ། །བལྟས་པའི་རང་བཞིན་གང་ཡིན་པ། །རྡུལ་ཕྲན་གཞན་ལ་ལྟས་པ་ཡང༌། །དེ་ཉིད་གལ་ཏེ་ཡིན་རྟོག་ན། །དེ་ལྟ་ཡིན་ན་ས་འཛིན་སོགས། །རྒྱས་པར་འགྱུར་བ་རིགས་པ་མིན། །རྡུལ་ཕྲན་གཞན་ལ་ལྟ་བའི་དངོས། །གལ་ཏེ་གཞན་དུ་འདོད་ན་ནི། །རྡུལ་ཕྲན་གཅིག་པུ་ཆ་ཤས་ནི། །མེད་པ་རུ་ནི་ཇི་ལྟར་འགྱུར། །ཆ་ཤས་དབྱེ་བ་མེད་པ་གང༌། །རྡུལ་ཕྲན་དུ་ནི་ཇི་ལྟར་འགྱུར། །རྡུལ་ཕྲན་དུ་ནི་གཞན་དག་འདོད། །དེ་ཉིད་ལ་ནི་རྣམ་དཔྱད་བྱས། །དེ་ཕྱིར་ཐུག་མེད་སྲིད་པ་མིན། །གང་ཚེ་དེ་དག་དངོས་རྣམས་ཀྱི། །རྡུལ་ཕྲན་ཉིད་དུ་ཁས་ལེན་བྱེད། །དེ་ཚེ་དེ་དག་དམ་བཅའ་ནི། །གདོན་མི་ཟ་བར་ཉམས་པར་འགྱུར། །
གཏན་ཚིགས་གཞི་མ་གྲུབ་པ་མིན། །གཞན་གྱི་ཁས་ལེན་སྦྱོར་སོགས་པའི། །སྟོབས་ཀྱིས་གཅིག་ཉིད་སེལ་བ་ཡིན། །དེ་ལྟར་ཕྱོགས་རྣམས་ཐམས་ཅད་ལ། །བདག་ཉིད་གཅིག་པུ་དེ་མི་རིགས། །གཅིག་ནི་མ་གྲུབ་པ་ཡི་ཕྱིར། །དུ་མའི་རང་བཞིན་ཡང་མི་སྲིད། །དེ་ཕྱིར་རྡུལ་ཕྲན་ངེས་པར་ནི། །མེད་པར་ངེས་པར་སྐྱེ་རུང་ཡིན། །གཅིག་དང་དུ་མའི་རང་བཞིན་གྱིས། །སྟོང་ཕྱིར་ནམ་མཁའི་པདྨ་བཞིན། །རྡུལ་ཕྲན་མི་རིགས་པ་ཡི་ཕྱིར། །ཡན་ལག་ཅན་ཡང་ཡོད་པ་མིན། །གང་ཕྱིར་དེ་ནི་རྡུལ་ཕྲན་གྱིས། །རྩོམ་པར་གཞན་དག་གིས་ཁས་བླངས། །སྣང་བ་མེད་དང་སྣང་དང་བཅས། །གཞན་གྱི་སྣང་བ་ཁོ་ན་ཡི། །རྣམ་པར་ཤེས་པས་ཕྱི་རོལ་དོན། །རྣམ་པ་གང་གིས་ཀྱང་མི་ཤེས། །རྣམ་ཤེས་བེམས་པོའི་རང་བཞིན་ལས། །བཟློག་པར་རབ་ཏུ་སྐྱེ་བ་སྟེ། །བེམས་མིན་རང་བཞིན་གང་ཡིན་པ། །དེ་འདིའི་བདག་ཉིད་ཤེས་པ་ཡིན། །གཅིག་པ་ཆ་མེད་རང་བཞིན་ལས། །གསུམ་གྱི་རང་བཞིན་མི་འཐད་ཕྱིར། །འདི་ཡི་རང་གིས་རིག་པ་ནི། །བྱ་དང་བྱེད་པའི་ངོ་བོར་སྨིན། །དེ་ཕྱིར་འདི་ནི་ཤེས་པ་ཡི། །རང་བཞིན་ཡིན་པས་བདག་ཤེས་རུང༌། །དོན་གྱི་ངོ་བོ་གཞན་པ་ནི། །དེ་ཡིས་ཇི་ལྟར་ཤེས་པར་འགྱུར། །དེ་ཡི་རང་བཞིན་གཞན་ལ་མེད། །གང་གིས་དེ་ཤེས་གཞན་ཡང་ཤེས། །དངོས་པོ་རྣམས་ནི་དོན་དམ་པར། །ཐ་དད་ཉིད་དུ་གནས་ཕྱིར་རོ། །ཤེས་པའི་ངོ་བོར་སྐྱེས་པས་ན། །ཤེས་པ་ཤེས་པར་རིགས་པ་ཡིན། །དོན་ནི་ཤེས་དངོས་མ་སྐྱེས་པས། །དེས་ནི་ཇི་ལྟར་ཤེས་པར་འགྱུར།། ཤེས་པ་རྣམས་བཅས་ཕྱོགས་ལ་ནི། །དངོས་སུ་དེ་ཉིད་ཐ་དད་ཀྱང༌། །དེ་དང་གཟུགས་བརྙན་འདྲ་བས་ན། །གདགས་པ་ཙམ་གྱིས་ཚོར་བར་རུང༌། །དོན་གྱིས་རྣམ་པར་བསྒྱུར་ལྡན་པའི། །རྣམ་ཤེས་སུ་ཞིག་མི་འདོད་པ། །དེ་ལ་ཕྱི་རོལ་རིག་པ་ཡི། །རྣམ་པ་འདི་ཡང་ཡོད་མ་ཡིན།། བརྒྱ་ལ་གླང་པོ་ཤིང་ལ་སོགས། །ཇི་ལྟར་རལ་གྲིའི་མེ་སོགས་ཀྱིས། །དེ་ཡི་ངོ་བོ་མ་ཡིན་ཡང༌། །བཅད་སྲེག་སོགས་བྱེད་འདི་དེ་བཞིན། །གང་ཕྱིར་དེ་དང་འདི་མཚུངས་མིན། །དེ་དག་འདིར་བསྐྱེད་པ་ཡི་རྒྱུ། །ཡིན་པས་དེ་ལྟའི་ངོ་བོར་གྲུབ། །ཤེས་པ་དེ་འདྲར་སྐྱེད་བྱེད་མིན། །གང་ཚེ་
གཟུང་བྱའི་ཡོངས་གཅོད་ནི། །ཤེས་པའི་ངོ་བོར་སྲིད་པ་ཡིན། །དེ་ཡི་ཡོངས་གཅོད་ངོ་བོ་ཉིད། །ཤེས་པ་ལ་ནི་འཐད་པ་ཡིན། །གཞན་དུ་ན་ནི་ཡོངས་གཅོད་པའི། །ངོ་བོར་ཤེས་པ་ཞེས་བྱ་བར། །གསལ་བར་བརྗོད་བྱ་ཉིད་ཡིན་ནོ། །འདི་ལྟར་དོན་རིགས་མ་བསྟན་ཏོ། །ཡོངས་གཅོད་དེ་ནི་གང་གིས་ཤེས། །བརྒལ་ཞིང་བརྟག་པའི་གཞི་མ་ཡིན། །དེ་ཡི་བདག་ཉིད་ཡོངས་གཅོད་དེ། །བདེ་སོགས་བདེ་བ་ཉིད་སོགས་བཞིན། །རང་གི་ངོ་བོར་རིག་པའི་ཕྱིར། །ཤེས་བྱེད་གཞན་ལ་ལྟོས་པ་མིན། །འདི་ལ་མ་རྟོགས་པ་ཡོད་མིན། །རང་རིགས་པ་ཡི་དོན་འདི་ཡིན། །གལ་ཏེ་དོན་རྟོགས་བྱ་བ་བྱེད། །ཤེས་པ་ཉིད་དུ་མི་རྟོགས་པས། །དེས་ན་གསལ་བྱེད་ཉིད་ཡིན་པས། །རྟོགས་ཕྱིར་གཞན་ལ་ལྟོས་པ་ཡིན། །དེ་དོན་བདག་ཉིད་ཉམས་མྱོང་ན། །དེ་འདྲའང་གསལ་བ་ཉིད་དུ་ཡོད། །འདི་ལ་བདག་ཉིད་ཉམས་མྱོང་མེད། །དེ་ཕྱིར་བདག་ཉིད་གསལ་བྱེད་མིན། །མིག་སོགས་རྣམས་ནི་གཟུགས་སོགས་ལ། །གསལ་བར་བྱེད་པ་ཉིད་ཡིན་པས། །ཇི་ལྟར་རྣམ་བཞག་སྣང་གྱུར་བ། །དེ་ལྟར་འདིར་ཡང་འགྱུར་བ་ཡིན། །ཕྱི་རོལ་དོན་ལ་གསལ་བྱེད་ཡིན། །ནུས་པ་མེད་ཕྱིར་བདག་གསལ་མིན། །དངོས་པོ་རྣམས་ཀྱི་ནུས་པ་ནི། །བརྒལ་ཞིང་བརྟག་པ་མ་ཡིན་ནོ། །དོན་ལ་རྣམ་པར་རིག་པ་ནི། །ཤེས་ཉིད་བརྗོད་པ་མ་ཡིན་ནམ། །དེ་ནི་དེ་བདག་ཉིད་འགྱུར་ན། །བྱ་བ་གཞན་ནི་ཅི་ཞིག་འགྱུར། །དོན་གྱི་ཉམས་མྱོང་ངོ་བོ་ནི། །གལ་ཏེ་དེ་ཡང་ཤེས་བདག་ཉིད། །དེ་ཚེ་དོན་ཉམས་མྱོང་བདག་ཉིད། །ཤེས་ལ་རིགས་སོ་དེ་ཡོད་མིན། །ཁས་ལེན་དོན་ཡོད་སྤངས་པར་ནི། །ཐལ་འགྱུར་ཕྱིར་ཏེ་རང་ཉིད་ལས། །ཉམས་མྱོང་བདག་ཉིད་སྐྱེ་ན་ཡང༌། །དོན་རིག་རབ་ཏུ་གྲུབ་པ་མིན། །ཇི་ལྟར་རྣམ་བཅས་ཤེས་པ་ཡི། །ཕྱོགས་ལ་དོན་གྱི་གཟུགས་བརྙན་ནི། །ཕ་རོལ་པོ་ལ་དེར་ཉེ་བའི། །རྒྱུ་མཚན་ཡོད་པ་མ་ཡིན་ནོ།། རང་བཞིན་བེམས་པོའི་དངོས་ཉིད་ཕྱིར། །གལ་ཏེ་འདི་བདག་ཉམས་མྱོང་མིན། །ཤེས་པ་རིག་པ་མེད་པ་ན། །དེ་ཚེ་དོན་གྱི་ཉམས་མྱོང་འཇིག །དོན་གྱི་ཉམས་མྱོང་ཞེས་བྱ་བར། །ཤེས་པ་ཁོ་ནར་བརྗོད་པ་ཡིན། །དེ་ནི་མ་གྲུབ་དངོས་ཉིད་ནི། །དེ་ནི་རབ་གྲུབ་གཞན་ཅིར་འགྱུར། །ཤེས་
པ་གཞན་གྱིས་ཉམས་མྱོང་ན། །དོན་དེ་རང་གིས་མྱོང་མ་གྲུབ། །གྲུབ་པ་མ་གྲུབ་པ་ཡི་ཕྱིར། །གང་གི་ཚེ་ན་གྲུབ་པར་འགྱུར། །གལ་ཏེ་དེ་ཡི་ཤེས་སྐྱེ་ན། །རང་བདག་རིག་པར་མ་གྱུར་པར། །གཞན་གྱིས་རིག་པ་གྲུབ་སྨྲ་ན། །དེ་ལྟར་དེ་ནི་ལེགས་སྨྲས་ཡིན། །དེ་ལ་ཉམས་མྱོང་མ་གྲུབ་ན། །སྔ་མ་ལ་ཡང་མ་གྲུབ་ཉིད། །དེ་ལ་གཞན་རིག་སྐྱེ་བ་ན། །ཐུག་པ་མེད་པར་ཐལ་བར་འགྱུར། །སྤྱོད་ཡུལ་གཞན་ལ་འཕོ་བ་ན། །དེ་ལྟར་འགྱུར་མིན་དེ་ཡང་སྣང༌། །སྤྱོད་ཡུལ་གཞན་དུ་འཕོ་བ་ན། །ཐ་མ་གང་ཡིན་དེ་རང་ངམ། །གཞན་ལས་གྲུབ་པ་མ་ཡིན་ཏེ། །དེ་མ་གྲུབ་པས་ཀུན་གྲུབ་མིན། །དེས་ན་འགྲོ་བ་མ་ལུས་པ། །དམུས་ལོང་ཉིད་དུ་ཐལ་བར་འགྱུར། །ཐ་མ་རང་གིས་གྲུབ་པ་ན། །གཞན་དག་ལ་ཡང་དེ་ངེས་ཡོད། །ཤེས་ཕྱིར་གཞན་དུ་ཁྱེད་ཅག་ལ། །དེ་དག་ཤེས་མེད་བུམ་སོགས་བཞིན། །མིག་ནི་གཟུགས་ལ་རྣམ་ཤེས་ནི། །སྐྱེ་བྱེད་ཕྱིར་ནི་གསལ་བྱེད་མིན། །དེ་ནི་རིག་ཕྱིར་མ་ཡིན་ཏེ། །དེས་ན་ཤེས་དང་འདི་ཅིས་མཚུངས། །གང་ཞིག་རིག་པ་ཉིད་འགྱུར་ན། །གང་ཞིག་རིག་པར་ངེས་པ་ཡིན། །དེ་ལས་དེ་ནི་ཐ་དད་མིན། །དེ་ལས་དེ་ཡང་དབྱེར་མེད་འགྱུར། །ཇི་ལྟར་སྔོན་པོ་བློ་བདག་ཉིད། །ཇི་ལྟར་ཟླ་བ་གཉིས་པ་ཡང༌། །སྔོན་པོའི་རྣམ་པ་ཤེས་པ་འདི། །སྔོན་པོའི་བློས་ཀྱང་རིག་པ་ཡིན། །གལ་ཏེ་ཐ་མི་དད་ཡིན་ན། །ཤེས་པའི་བདག་ཉིད་གཞན་བདག་མིན། །ཤེས་བྱ་སྔོན་པོའི་བློ་རིག་ནི། །དེས་སྔོ་རྣམ་པ་ཇི་ལྟར་རིག །རིག་པ་འདི་དག་ཐམས་ཅད་ནི། །དོན་གཞན་སྤྱོད་ཡུལ་ཅན་མ་ཡིན། །རིག་པའི་རང་བཞིན་ཉིད་ཀྱིས་རིག །རང་གི་བདག་ཉིད་རིག་པ་བཞིན། །གཙོ་བོར་དོན་ནི་འཛིན་བྱེད་མིན། །རང་གི་རང་བཞིན་ལ་གནས་ཕྱིར། །དོན་གྱི་རྣམ་པས་བསྒྱུར་ལྡན་དང༌། །བྲལ་ཞིང་བརྟགས་པས་དོན་འཛིན་མིན། །དག་པའི་ཤེས་དང་འདྲ་བ་ནི། །དོན་གྱི་རྣམ་པ་དང་བྲལ་བ། །ཤེས་པ་གང་སུ་འགའ་ཞིག་འདོད། །དེ་དག་ལ་ནི་སྒྲུབ་པ་ཡིན། །འདྲ་བ་དང་བཅས་རྣམ་ཤེས་ནི། །ཕྱི་རོལ་དོན་རིགས་འགྱུར་ཟད་མོད། །དེ་ཡང་ཐམས་ཅད་དུ་མེད་ཕྱིར། །དོན་རིགས་གནས་པ་རིགས་པ་མིན། །ཤེལ་ལས་ཐ་མི་དད་པའི་ཕྱིར། །རྣམ་པ་དུ་མ་
ཉིད་མི་འགྱུར། །དེས་ན་དེ་ཡི་སྟོབས་ཀྱིས་ནི། །དོན་རིགས་གནས་པ་ཡོད་པ་མིན། །རྣམ་པ་དང་ཐ་དད་པའི་ཕྱིར། །ཤེས་པའང་གཅིག་ཉིད་དུ་མི་འགྱུར། །གཞན་དུ་འདི་ལས་གཅིག་ཉིད་དུ། །ཇི་ལྟར་ཡོངས་སུ་བརྟགས་པར་འགྱུར། །ཀུན་ནས་བདག་ཉིད་དང་མཚུངས་ན། །ཤེས་པ་མི་ཤེས་སོགས་ཉིད་འགྱུར། །ཆ་འགའ་ཞིག་ནི་མཚུངས་པ་ན། །ཐམས་ཅད་ཐམས་ཅད་རིག་པར་འགྱུར། །གཞན་གྱི་རྣམ་པའི་ཤེས་པ་ཡང༌། །གལ་ཏེ་དོན་རིག་ཡིན་པ་ན། །ཀུན་ཀྱང་ཀུན་གྱིས་ཤེས་པར་འགྱུར། །ངེས་པར་བྱེད་པའི་རྒྱུ་ཡང་མེད། །ཇི་ལྟར་ཁྱེད་ཅག་གིས་ཤེས་པ། །དེ་ཉིད་ཀྱིས་ན་རྣམ་མེད་ནི། །ཡང་དག་མ་ཡིན་རྣམ་པར་རིག །གལ་ཏེ་ཡང་དག་དོན་དེ་བཞིན། །སེམས་དང་སེམས་ལས་བྱུང་བ་ཡི། །རང་བཞིན་ཐུན་མོང་མ་ཡིན་འདི། །དེས་ན་གཞན་དག་གཙོ་བོར་ནི། །རིག་པ་དེ་ནི་གང་གིས་མིན། །ཚོགས་པ་གཅིག་ལ་རག་ལས་ཉིད། །རྒྱུ་དང་འབྲས་བུ་ཉིད་སོགས་སམ། །ཡང་དག་བརྟེན་ནས་ཞེས་བྱ་བར། །ཡང་དག་རིག་པར་ཉེར་བརྟགས་འགྱུར། །གཟུགས་མེད་པ་ཡི་དངོས་པོ་ནི། །ཚོགས་པ་གཅིག་ལ་རག་ལས་མིན། །འདི་ཡི་རིག་པ་ཕལ་པ་ཡང༌། །ཤིན་ཏུ་མེད་པ་ཁོ་ནའང་མིན། །འོན་ཀྱང་ཡང་དག་མིན་རྣམ་པ། །འཁྲུལ་པས་རེག་ཅེས་བྱ་བར་བརྗོད། །དེ་ཉིད་ཀྱིས་རིག་མ་ཡིན་ཏེ། །དེས་ན་ཡུལ་མེད་པ་དེ་ཡིན། །གལ་ཏེ་དེར་ཡང་རྣམ་ཤེས་ནི། །འཁྲུལ་པས་དེ་ལྟར་སྣང་འགྱུར་ན། །རིག་པར་བྱེད་པར་བརྗོད་པས་ན། །དེ་ནི་ཡུལ་མེད་གསལ་བར་འགྱུར། །རྣམ་པ་དང་བཅས་རྣམ་མེད་པ། །དེ་ནི་གཞན་མེད་རིགས་མ་ཡིན། །དེས་ན་སངས་རྒྱས་རྣམ་ཤེས་ལ། །ཁོ་བོ་ཅག་ནི་རྟག་འཇུག་བྱེད། །དེ་དང་འདྲ་བ་ཉིད་འབྱུང་བས། །གཞན་གྱི་འདོད་ཆགས་སོགས་རིག་ནས། །སྒྲིབ་པ་ཡོད་པ་འཐོབ་འགྱུར་ཏེ། །དམིགས་པ་ཅན་གྱི་གཞུང་ལུགས་ལ། །དཔག་བསམ་ཤིང་དང་འདྲ་བར་ནི། །ཀུན་རྟོག་རླུང་གིས་མི་བསྐྱོད་ཀྱང༌། །ཐུབ་པས་འཇིག་རྟེན་ཐམས་ཅད་ཀྱི། །དོན་གྱི་ཕུན་སུམ་ཚོགས་པ་མཛད། །རྒྱལ་བ་ཐམས་ཅད་མཁྱེན་པ་ནི། །དེས་ན་གཟིགས་པ་མེད་པར་བསྟན། །ལྷུན་གྱིས་གྲུབ་པ་ཐམས་ཅད་ཀྱི། །མ་ལུས་ཀུན་མཁྱེན་དོན་བསྒྲུབ་ཕྱིར།
དཀར་སོགས་ངོ་བོ་བློ་མིན་ན། །དེ་ནི་རེ་ཞིག་ཇི་ལྟར་འགྱུར། །བློ་ནི་དཀར་སོགས་དངོས་ཉིད་ན། །ཕྱི་དོན་ཚད་མ་གང་གིས་གྲུབ། །སྔོ་སོགས་སོ་སོར་སྣང་བ་ནི། །མི་སླུ་ཉིད་ཀྱིས་ཤེས་པ་ཡི། །རྣམ་པ་ཉིད་ཀྱི་རིགས་མཐུན་ལས། །སྐྱེ་བར་བསྒྲུབ་ན་ཤེས་པ་བཞིན། །ཕྱི་རོལ་དོན་ནི་ཐོབ་བྱེད་དམ། །གལ་ཏེ་དེ་ཡི་ནུས་པ་ནི། །མི་སླུ་བ་ཉིད་དུ་འདོད་ན། །ཕྱི་དོན་སྨྱོན་ལ་དེ་གྲུབ་མིན། །གལ་ཏེ་དོན་བྱེད་པར་སྣང་བའི། །ཤེས་པ་ལ་ནི་རྒྱུ་ཉིད་དུ། །མི་སླུ་བ་ཉིད་དུ་འདོད་ན། །དེ་ལྟར་མིག་མེད་ལ་དེ་སྲིད། །ཇི་ལྟར་ཕྱི་རོལ་ཆུ་སོགས་ལ། །ནུས་པ་ཉིད་དུ་ངེས་འདོད་ན། །ཤེས་བདག་ཉིད་ལ་ཡང་དེ་བཞིན། །དེས་ན་ལྡོག་ཉིད་ཐེ་ཚོམ་ཟ། །རྗེས་སུ་དཔག་ལ་སྣང་བ་ཡིས། །གསལ་བར་མ་ངེས་ཐུན་མོང་འདི། །མེ་སོགས་གསལ་བའི་གཟུགས་དང་ནི། །འདི་ནི་མཚུངས་པ་མ་ཡིན་ནོ། །གལ་ཏེ་ཡུལ་གྱི་རྣམ་བཅད་སྣང། །ནང་གི་ཉམས་མྱོང་ལས་ཐ་དད། །གཞལ་བྱ་ཉིད་སོགས་གཏན་ཚིགས་ཀྱིས། །རྒྱུ་གཞན་ལ་གནས་སེམས་གཞན་ནོ། །འདིར་ཡང་འཁྲུལ་པ་ཉིད་ཡིན་ཏེ། །སེམས་དེ་རང་གི་ངོ་བོ་དང༌། །དེ་བཞིན་མིག་ནད་ལས་བྱུང་བའི། །ཟླ་བ་གཉིས་ལ་སོགས་ཀྱིས་འཁྲུལ། །གལ་ཏེ་ཕྱི་དོན་རྣམ་གཞན་དུ། །འདི་ནི་རིག་པ་ཡིན་བརྗོད་ན། །སྣང་བར་འགྱུར་བའི་རྣམ་པ་ནི། །དེ་ནི་དོན་དེ་བདག་ཉིད་མིན། །དེ་ནི་དེ་ལྟར་སྣང་འགྱུར་བས། །རྣམ་པར་ཤེས་པས་རྟོག་མི་འགྱུར། །གལ་ཏེ་སྣང་འགྱུར་མི་རིགས་ན། །དེ་རིག་རྣམ་པ་གཞན་ཡང་རིག །དེ་ནི་ཕན་ཚུན་འགལ་ཉིད་ན། །ཇི་ལྟར་འཐད་པ་ཞེས་བྱར་འགྱུར། །དེ་ཉིད་ཀྱི་ཕྱིར་སེམས་རྣམས་ལ། །རང་རིག་ཉིད་ནི་བསྒྲུབ་དཀའ་ཉིད། །བདག་ཉིད་འགྱུར་བའི་སྣང་བ་ནི། །དེ་ཚེ་རིག་པར་སྣང་བའི་ཕྱིར། །དེ་ཕྱིར་དོན་ཉིད་རྟོགས་བྱེད་དང༌། །ཡོད་པ་རྣམ་གཞན་རྟོག་པས་ན། །བློ་འདི་ཉིད་ནི་འཁྲུལ་པ་ཡིན། །དེས་ན་བདག་ཉིད་རིག་པ་ཡིན། །འོན་ཏེ་འཛིན་པའི་ངོ་བོ་གང༌། །དེ་ནི་དེ་གཟུང་ལས་ཐ་དད། །དེ་རིག་ན་དེ་མི་རིག་ཕྱིར། །ཇི་ལྟར་རོ་སོགས་འཛིན་པ་ལྟར། །གཟུང་བའང་དེ་འཛིན་པས་དེ་བཞིན། །གང་གིས་དེ་ནི་རྟོགས་པ་ན། །ངེས་པར་རྟོགས་པར་མི་འགྱུར་
ཏེ། །རོ་འཛིན་པ་ལ་སོགས་པ་བཞིན། །ཐ་དད་རོ་སོགས་བཞིན་དུ་བསྒྲུབ། །ཡང་ན་དངོས་གཅིག་མི་ཤེས་ཕྱིར། །རྒྱུད་གཞན་ལ་གནས་བློ་བཞིན་ནོ། །ཤེས་པ་རང་ཆ་འཛིན་བྱེད་མིན། །ཤེས་ལས་སྐྱེས་འགྱུར་རང་ནུས་བཞིན། །བཟུང་བ་ལ་དགག་པ་དེ་བཞིན། །གང་གིས་བག་ཆགས་གཉིས་བྲལ་ཡིན། །ནག་པའི་ཤེས་པས་དེ་བྱུང་བའི། །ཤེས་པའི་གཟུང་བྱ་རྟོགས་བྱེད་མིན། །ཤེས་པ་ཉིད་ཕྱིར་ཇི་བཞིན་དུ། །དེ་ནི་གཞན་པའི་ལུས་བྱུང་བ། །སོ་སོ་མ་ཡིན་རིག་ཕྱིར་དང༌། །དེ་ཉིད་སྔར་ནི་བསྟན་པའི་ཕྱིར། །ངོ་བོ་གཅིག་པུ་མི་ཤེས་པའི།། བར་དུ་གཏན་ཚིགས་མ་གྲུབ་ཉིད། །དེ་ནི་ཕྱི་རོལ་ཕྱོགས་དང་འབྲེལ། །ཞེས་བྱ་འདིས་ནི་བཟུང་བ་ཡིན། །རྣམ་པ་གཞན་དག་རིག་འགྱུར་ཏེ། །འཛིན་པར་ཉམས་མྱོང་མེད་པར་བརྗོད། །དེ་ཚེ་བདག་གི་དོན་ཅིར་ཡང༌། །འཛིན་པས་བྱས་པ་དྲན་པ་མེད། །གཟུང་བའི་ངོ་བོ་དང་བྲལ་བ། །འཛིན་པ་སྐྱེས་པར་དྲན་པར་འགྱུར། །དེ་ཕྱིར་ཐ་མི་དད་ཡིན་ན། །གཟུང་བ་ལ་ཡང་དྲན་པར་འགྱུར། །འཛིན་པ་དྲན་པ་ཡོད་པ་ན། །དེར་ནི་དེ་ཉིད་འཛིན་པར་འགྱུར། །རྗེས་སུ་འགྲོ་དང་ལྡོག་པ་ཡི། །དེ་ལྟར་དེ་དག་ཐ་དད་གྲུབ། །དེ་ལྟར་གཏན་ཚིགས་དེ་དག་ནི། །བསྒྲུབ་བྱའི་ཆོས་ཅན་ལ་ནི་གྲུབ། །དམིགས་པ་རབ་ཏུ་མ་གྲུབ་ན། །དོན་མཐོང་རབ་ཏུ་མི་འགྲུབ་བོ། །དེ་ཕྱིར་འཛིན་པ་རིག་མེད་པར། །གཟུང་བ་རིག་པར་འགྱུར་བ་མིན། །མིག་ནད་ཅན་གྱིས་མཐོང་བ་ཡི། །སེར་སོགས་དེ་བཞིན་གསལ་པོར་སྣང༌། །འཛིན་པའི་ཆ་ལ་རེག་བྱ་མིན། །དེ་བཞིན་དུ་ནི་གཞན་ཡང་ནི། །ཁྱད་པར་མཚོན་པ་མེད་པ་ཡི། །གཟུང་བའི་ངོ་བོ་ལ་དེའང་དྲན། །ཐམས་ཅད་ལས་ལྡོག་ངོ་བོ་ལ། །དེ་མྱོང་གོམས་སོགས་མེད་པའི་ཕྱིར། །གཞན་དུ་ཅིར་ཡང་དེ་ལྟ་བུ། །འཛིན་ཅེས་དྲན་པར་མི་འགྱུར་རོ། །དག་ཅིང་ཤེལ་དང་འདྲ་བར་ནི། །དྲན་པ་ཡོད་པའང་མ་ཡིན་ནོ། །དུང་ལ་སེར་སོགས་རྣམ་ཤེས་ཀྱིས། །གཏན་ཚིགས་ཕྱི་མ་གཉིས་པོ་ཡང༌། །གསལ་པོར་མ་ངེས་ཉིད་ཡིན་ཏེ། །སྒྲུབ་པ་གཞན་ལ་འང་ཕྱོགས་འདིས་ཡིན། །དེས་ན་རྩོད་པའི་གཞིར་གྱུར་
ཡིན། །ཤེས་པ་ཉིད་ཕྱིར་གཉིས་སུ་མེད། །རིག་བྱ་རིག་པར་བྱེད་བོ་དག །བྲལ་ཞིང་གཟུགས་བརྙན་ལྟ་བུ་ཡི། །གཟུགས་བརྙན་ལ་ཡང་ཤེས་པ་ནི། །དམིགས་པ་དང་ལྡན་འདོད་མིན་ནམ། །མིག་གི་སྣང་བ་ལྡོག་པ་ན། །རང་གདོང་དེ་བཞིན་མཐོང་ཕྱིར་རོ། །མངོན་པར་ཕྱོགས་དེ་སྣང་ཕྱིར་དང༌། །ཚད་ཡུལ་བྱེ་བྲག་སོགས་མཐོང་ཕྱིར། །རང་གི་གདོང་སོགས་དེ་བཞིན་དུ། །མི་མཐོང་དངོས་པོ་གཞན་བཞིན་ནོ། །རྣམ་ཤེས་ཉིད་དང་གསལ་བ་ཉིད། །དེ་ཡང་ཕྱི་རོལ་ལ་བརྟེན་མིན། །རྣམ་མེད་ལ་སོགས་མི་རུང་བས། །དེས་ན་འདི་ཡི་ཁྱབ་པ་དེས། །དེ་མ་ཐག་པའི་ཤེས་ནུས་ལ། །བཟུང་བའི་ཆ་ནི་ཡུལ་དངོས་གནས། །དེ་ཉིད་མིན་པར་ཁོ་བོ་འདོད། །དེས་ན་དེ་ནི་མ་བསྒྲུབས་སོ། །རྣམ་རིག་ཙམ་ཉིད་བསྒྲུབ་པ་ནི། །བློ་ལྡན་རྣམས་ཀྱིས་དྲི་མེད་མཛད། །ཁོ་བོ་ཅག་གིས་དེ་ཕྱོགས་ནི། །དོན་དམ་ངེས་པར་བསྐྱེད་པར་བྱས། །དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ་ལས་ཕྱི་རོལ་གྱི་དོན་བརྟག་པ་སྟེ་ཉི་ཤུ་རྩ་བདུན་པའོ།། །།ཡང་འདིར་གཞན་དག་མི་ཤེས་པའི། །དྲི་མས་གོས་པའི་བློ་ཅན་རྣམས། །སེམས་ཙམ་ཚུལ་འདི་མི་རིགས་ཏེ། །ཐོས་པས་གནོད་པའི་ཕྱིར་ཞེས་སྨྲས། །དེ་ནི་ཀུན་ལ་ཚད་མ་རུ། །སྐྱེས་བུས་མ་བྱས་པར་ནི་གནས། །གང་ཕྱིར་སྐྱེས་བུས་བྱས་ཚིག་གིས། །ལོག་པ་ཉིད་དུ་རྟོག་པར་འགྱུར། །ཉེས་པ་ཡོད་དམ་མེད་པར་ནི། །སྐྱེས་བུའི་ངག་ལ་ཐེ་ཚོམ་ཟ། །བྱེད་པོ་མེད་ཕྱིར་ཐོས་པོ་ལ། །སྐྱོན་ཡོད་ཐེ་ཚོམ་ཡོད་པས་མིན། །བྱེད་པོ་རེ་ཞིག་མ་མཐོང་ན། །གང་ཚེ་ཡོད་ཅེས་འདོད་པ་ཡིན། །སྔོན་མ་མཐོང་དང་འབྲེལ་པ་ནི། །མི་ཤེས་རྒྱུ་ཡིས་ད་ལྟར་སྨོད། །རྗེས་སུ་དཔག་པ་དང་བྲལ་ཡང༌། །དེ་ནི་ཡོད་པར་བརྟགས་པ་ཡིན། །བྱས་དང་མ་བྱས་པའི་ལུང་ནི། །ཁོ་བོ་ཅག་ལ་དེ་གྲུབ་མིན།། རང་ཉིད་ཚད་མ་ཡིན་པའི་ཕྱིར། །བྱས་པས་འདི་ནི་རྟོགས་བྱེད་མིན། །དྲང་སྲོང་ཡིད་སོགས་ཚིག་ཀྱང་ནི། །དེ་ཉིད་ཀྱིས་ནི་བདེན་པར་འགྱུར། །མ་འབྲེལ་ཞེ་སྡང་དང་བཅས་པ། །བདེན་པར་སྨྲ་བར་ཇི་ལྟར་འགྱུར། །དེ་ཕྱིར་བྱེད་པོ་སྒྲུབ་པའི་ལུང༌། །གཞན་བྱས་བདག་ཅག་ལ་གྲུབ་མིན། །
གལ་ཏེ་རིག་བྱེད་བྱེད་པོ་དང༌། །འདྲ་བ་དང་ལྟར་ཅུང་ཟད་སྣང༌། །དེ་ཕྱིར་ཉེ་བར་འཇལ་བ་དེས། །བྱེད་པོ་ལ་ཡང་ཉེར་འཇལ་འགྱུར། །གལ་ཏེ་བྱེད་པོ་མེད་ཅུང་ཟད། །གཞལ་བྱས་གྲུབ་བར་མི་འགྱུར་ན། །དེས་ན་ངེས་བར་བྱེད་པོ་ནི། །དོན་གྱིས་གོ་བའི་གཞལ་བྱར་འགྱུར། །དེ་མེད་ཀྱང་ནི་རིག་བྱེད་ལ། །མི་འཐད་ཅུང་ཟད་གང་ཡང་མེད། །དེ་ཡོད་ན་ནི་ཚད་མ་སོགས། །མང་པོ་གྲུབ་པར་མི་འགྱུར་རོ། །དེར་ནི་ལྔ་བོར་མ་ངེས་ཕྱིར། །དངོས་མེད་ཉིད་ཀྱིས་རྟོགས་པར་འགྱུར། །དེས་ན་དེ་ཡོད་རྙེད་དཀའ་སྟེ། །དངོས་མེད་ཚད་མས་གནོད་པའི་ཕྱིར། །ཚད་མ་མ་ཡིན་ཉིད་ལྡོག་ཕྱིར། །རིག་བྱེད་སྐྱེས་བུས་མ་བྱས་ཉིད། །གང་འདོད་དེ་ཡང་དངོས་མིན་པས། །སྒྲུབ་པ་རྣམས་ཀྱི་བསྒྲུབ་བྱ་མིན། །རྟོག་གེ་རྣམས་ཀྱིས་གང་སྨྲས་ཞེས། །སྐྱེས་བུས་བྱས་པ་ཉིད་སྒྲུབ་པ། །དེ་ནི་སྤང་བར་བྱས་པ་མིན། །རིག་བྱེད་སྐྱེས་བུས་མ་བྱས་གྲུབ། །དངོས་པོའི་ངོ་བོར་ཕྱོགས་གང་དག །གཙོ་བོ་དང་ནི་རྡུལ་ཕྲན་བཞིན། །དེ་དག་གང་རུང་མ་གྲུབ་ན། །ཅིག་ཤོས་རང་ཉིད་ཀྱིས་མི་གྲུབ། །གཙོ་བོ་ཡི་ནི་རྒྱུ་ཉིད་ཀྱི། །སྒྲུབ་པ་ཡང་ནི་སྤང་བྱས་ཀྱང༌། །གཏན་ཚིགས་གཞན་མ་རྣམས་ཀྱིས་ནི། །རྡུལ་ཕྲན་ཀྱིས་བྱས་འགྲོ་བསྒྲུབ་བྱ། །དངོས་པོའི་ཕྱོགས་ནི་བསྒྲུབ་དོན་དུ། །སྒྲུབ་པ་གང་ཞིག་བརྗོད་པ་མིན། །དེ་ནི་གཞན་དག་སྤང་བྱས་ན། །མེད་བ་རང་ཉིད་ཀྱིས་ནི་གྲུབ། །སྔ་ཕྱི་ཡི་ནི་མཐའ་དག་ལ། །གཞན་གྱིས་སྒྲུབ་པ་གང་བརྗོད་ཡིན། །དེ་ནི་སྤང་བར་བྱས་ནས་ནི། །རིག་བྱེད་སྨྲ་བའི་བྱ་བ་རྫོགས། །རྟག་ཉིད་དངོས་པོའི་ངོ་བོ་གང༌། །དེ་ནི་མ་བསྒྲུབས་ན་ཡང་ནི། །སྔ་མའི་ཕྱོགས་གཉིས་སུན་བཏོན་ཏེ། །རང་ཉིད་ཀྱིས་ཏེ་གྲུབ་པར་འགྱུར། །ཐོག་མའི་རིག་བྱེད་ཀྱིས་མཐའ་གང༌། །སྐྱེས་བུས་བྱས་པའི་མཚན་ཉིད་ཅན། །ཕྱི་མཐའ་འཇིག་པའི་ངོ་བོ་ཡང༌། །དེ་དག་མེད་པ་རྟག་པ་ཉིད། །ཐོག་མར་རིག་བྱེད་གང་བྱས་མིན། །ཕྱིས་ཀྱང་འཇིག་པར་མི་འགྱུར་བ། །དེ་ཉིད་དེ་ཡི་རྟག་པ་ཉིད། །གལ་ཏེ་ཤེས་བྱ་དེར་ཡང་འདོད། །མ་བྱས་ཉིད་དང་འཇིག་མེད་ཀྱིས། །རྟག་པ་ཉིད་དུ་འདོད་པ་ཡིན། །དེ་དག་དངོས་མེད་བདག་ཉིད་ཀྱིས། །རང་གི་སྒྲུབ་པ་ལ་ལྟོས་མིན། །རིག་བྱེད་ངག་དོན་
ལོག་པ་ཉིད། །རྗེས་སུ་དཔག་པས་གང་བརྗོད་པ། །དེ་ཡི་རིག་བྱེད་སྒྲུབ་ཤེས་པའི། །སྟོབས་ཀྱི་ཕྱོགས་ནི་ལྡོག་བར་འགྱུར། །དེ་ནི་མངོན་སུམ་མཚུངས་ཉིད་ཕྱིར། །རིག་བྱེད་ལས་བྱུང་སྟོབས་ཆེན་ཅན། །དེས་ན་རྗེས་སུ་དཔག་པས་ནི། །ཇི་ལྟར་ཡང་ནི་གནོད་ནུས་མིན། །མངོན་སུམ་ཕྱོགས་ལ་དགོས་པས་ན། །གང་ཕྱིར་བསྟན་བཅོས་ཉིད་གནས་ཡིན། །དེ་ནི་ཤིན་ཏུ་སྟོབས་ལྡན་ཕྱིར། །རྗེས་སུ་དཔག་པ་ལ་གནོད་བྱེད། །དཔེ་ལ་ལྟོས་པ་མེད་ཕྱིར་དང༌། །སྐྱོན་མེད་ཕྱིར་ན་ཟོར་ཡང་མིན། །ལུང་ནི་ཚད་མ་ཉིད་ཡིན་ལ། །དེ་དང་རྗེས་དཔག་འདྲ་བ་མིན། །དེས་ན་ལུང་དང་རྗེས་དཔག་པས། །དོན་གང་ལ་ནི་ཐེ་ཚོམ་འགྱུར། །དེ་ལ་སྟོབས་ཆེན་ལུང་གིས་ནི། །དེ་ཉིད་ཀྱིས་ནི་ངེས་པར་བྱོས། །རིག་བྱེད་ཀྱིས་དོན་རྟོགས་བྱེད་ཀྱང༌། །བདག་ལ་ཚད་མ་མིན་དེ་ལྟར། །བདེན་སྨྲས་ཞེ་སྡང་ཙམ་གྱིས་ནི། །བརྗོད་པར་ནུས་པ་མ་ཡིན་ནོ། །མི་འདོད་པ་དང་ཞེ་སྡང་གིས། །ཚད་མ་མིན་པ་ཉིད་མི་འགྱུར། །དགའ་བ་དང་ནི་འདོད་པ་ཡིས། །ཚད་མར་བརྟགས་པར་མི་འགྱུར་རོ། །ཞེ་སྡང་ཅན་ཡང་རིག་བྱེད་ལ། །ཚད་མ་ཡིན་པ་ཉིད་ཀྱི་རྒྱུ། །ཅུང་ཟད་སྨྲ་བར་མི་བྱེད་དེ། །གང་གིས་དེ་དག་བདེན་སྨྲས་འགྱུར། །འཛིན་དང་འདོད་དང་འཆད་པ་ཡིས། །ལས་ལ་རྟག་ཏུ་མངོན་སྦྱོར་བར། །ལོག་པ་ཉིད་རྒྱུ་མི་ཤེས་ན། །རིང་ན་གནས་པས་ཇི་ལྟར་ཤེས། །གང་ཕྱིར་དེས་ནི་ངེས་སྦྱོར་བ། །དེ་དང་འབྲེལ་པའི་དགོས་པ་ཅན། །དེར་གནས་ཡོན་ཏན་སྐྱོན་རྣམས་ནི། །དེ་དག་ཤེས་པའི་དབང་དུ་བྱས། །ཚངས་ལ་གང་དག་སྡང་བ་ནི། །སྡིག་ཅན་རིག་བྱེད་ལས་རིང་གནས། །རིག་བྱེད་སྐྱོན་དང་ཡོན་ཏན་ཚིག །ངོ་ཚ་མེད་པར་ཇི་ལྟར་བརྗོད། །གཞན་ཡང་རྣ་སྐྱེས་ངོ་ཤེས་པས། །སྒྲ་ཡང་རྟག་པ་ཉིད་དང་ནི། །ཁྱབ་པ་ཉིད་དང་འགྲུབ་པས་ན། །བཟློག་ལ་ངེས་པར་སུ་ཞིག་བྱེད། །དེས་ན་དུས་ནི་ཐམས་ཅད་དང༌། །ཡུལ་ཀུན་དུ་ནི་གཅིག་ཉིད་གང༌། །ངོ་ཤེས་པ་ཡི་མངོན་སུམ་གྱིས། །རང་གྲུབ་འདི་ལ་གནོད་ཕན་ཡིན། །འབར་སོགས་སྐད་ཅིག་ཉིད་ཡིན་ཡང༌། །ངོ་ཤེས་ཤེ་ན་དེ་མིན་ཏེ། །ཁོ་བོའི་སྤྱི་ནི་རྟག་ཉིད་པས། །འདི་ཡི་ངོ་བོ་ཤེས་པ་འདི་ཡིན། །ཁྱད་པར་འགའ་ཞིག་གིས་ནི་ཆ། །གང་ལ་བློ་ནི་ཐ་དད་འགྱུར། །
དེ་ལ་ངོ་ཤེས་ཆ་ཡིན་ཏེ། །ཐ་དད་བློ་ཡིས་དེས་པར་འགྱུར། །ཡུལ་དང་དུས་སོགས་ཐ་དད་པའི། །བ་ལང་སྒྲ་གསལ་བློ་རྣམས་ནི། །ཐམས་ཅད་མཚུངས་པའི་ཡུལ་ཅན་ནམ། །སྣ་ཚོགས་དོན་གྱི་ཡུལ་ཅན་མིན། །བ་ལང་ཞེས་བྱ་ལས་སྐྱེས་ཕྱིར། །ད་ལྟར་སྐྱེས་པའི་བློ་བཞིན་ནོ།། སྔ་དེའི་བ་ལང་སྒྲ་བློ་ཡིས། །བ་ལང་སྒྲ་ནི་རབ་བརྟན་ཡིན། །བ་ལང་སྒྲ་ཡི་ཡུལ་ཉིད་ཀྱིས། །ཇི་ལྟར་ཕྱི་དེ་སྐྱེས་པ་བཞིན། །འདི་ཡང་དེ་ནི་ཤེས་ཡིན་ཏེ། །གཏན་ཚིགས་དེ་ཕྱིར་སྔ་བློ་བཞིན། །གཉིས་ཀ་ཡང་ནི་ཡུལ་གཅིག་ཡིན། །ཇི་ལྟར་བློ་ནི་གཅིག་བཞིན་བློ། །ཡུལ་དང་དུས་སོགས་ཐ་དད་པ། །བ་ལང་ཉིད་བློ་མ་ལུས་པས། །བ་ལང་སྒྲ་གཅིག་སྐྱེད་འགྱུར་ཏེ། །བ་ལང་བློ་ཕྱིར་བློ་གཅིག་བཞིན། །སྔ་དེའི་བ་ལང་སྒྲ་བརྗོད་པ། །ཕྱི་དེ་ཡང་ནི་ཡོད་པ་ཡིན། །བ་ལང་སྒྲ་ཡིས་ཤེས་རྟོགས་ཕྱིར། །ཕྱི་དེ་བརྗོད་པའི་སྒྲ་བཞིན་ནོ། །ཕྱི་དེ་བ་ལང་སྒྲ་ཐོས་པ། །བདག་གིས་སྒྲ་དེ་སྔ་དེའང་ཐོས། །སྔར་བསྟན་གཏན་ཚིགས་ཉིད་ཀྱིས་ནི། །ཕྱི་དེ་བརྗོད་པའི་སྒྲ་བཞིན་ནོ། །སྒྲ་ཡང་བརྗོད་པར་བྱ་བ་གང༌། །དེ་བསྟན་ཡུན་ནི་རིང་པོར་ཕན། །འབྲེལ་བ་ཉམས་མྱོང་ལ་ལྟོས་པས། །ཤེས་བྱ་ལ་ཤེས་འཇུག་ཕྱིར་རོ། །དེ་འདྲ་གང་ཡིན་བརྟན་པར་མཐོང༌། །དུ་བའི་སྤྱི་ཡི་ཆ་བཞིན་ནོ། །འབྲེལ་པའི་ཤེས་པ་ལ་ལྟོས་པ། །མི་བརྟན་པ་ནི་རྟོགས་བྱེད་མིན། །དེ་ཚེ་རྒྱུ་མཚན་ཉིད་ཡིན་ཕྱིར། །མར་མེ་གློག་གི་གསལ་བ་བཞིན། །སྒྲ་ཡི་མི་རྟག་ཉིད་ཕྱོགས་ལས། །རྗེས་སུ་དཔག་པས་གཏན་གྲུབ་པས། །དེ་ཀུན་གྱིས་ནི་འགལ་བར་འགྱུར། །བུམ་སོགས་གཅིག་ཉིད་ཐོབ་གྱུར་ན། །རིགས་རྟེན་འདོད་པས་གྲུབ་པ་སྒྲུབ། །གསལ་བ་རྣམས་ལ་གཅིག་ཉིད་དུ། །ཕྱོགས་འདི་ཡིས་ནི་བྱེད་པ་ན། །དེ་ཚེ་མཐོང་བ་དང་འགལ་ཉིད། །ཚད་མ་ཀུན་གྱིས་བརྗོད་པར་བྱ། །བཅོས་མའི་འབྲེལ་པ་ཉིད་ཡིན་ན། །དེ་ཡི་སྦྱོར་བ་མེད་པའི་ཕྱིར། །གསལ་བ་དེ་གཅིག་ལ་གནས་པས། །འབྲེལ་པ་ཐམས་ཅད་ཁྱབ་འགྱུར་མིན། །ས་ལས་བྱུང་དང་ཡོད་རྫས་སོགས། །མཇུག་མ་ཉིད་སོགས་འཇོལ་བའི་ཕྱིར། །སྦྱོར་བ་མང་དུ་བྱེད་པས་ན། །བ་ལང་ཉིད་ངེས་འགྱུར་བ་མིན། །དེ་ཕྱིར་སྒྲ་ནི་བཅོས་མ་མིན། །རེས་འགའ་ཡང་ནི་འཇིག་མི་འགྱུར། །རྟག་པ་དང་ནི་རྟེན་འབྲེལ་ཕྱིར། །ནམ་མཁའ་རྡུལ་ཕྲན་ལྟ་བུའོ། །
སྤྱི་རྣམས་དུ་མ་མངོན་ཕྱོགས་པའི། །ཡུལ་ཅན་ལན་ཅིག་ཐོས་པས་ན། །རང་དོན་བརྗོད་ཉིད་དམིགས་དགར་བས། །སྒྲ་ཡིས་རྟོགས་པར་མི་འགྱུར་རོ། །མང་དུ་ཐོས་པས་དེ་ཉིད་ནི། །སྲོག་ཆགས་ཉིད་ལ་སོགས་པ་དང༌། །གར་སོགས་འགྲོ་བ་ལ་སོགས་དག །ལྐོག་ཤལ་མཇུག་མ་ཉིད་སོགས་ཀྱང༌། །ཁྲ་བོ་སོགས་དང་ཁུ་ཡུ་སོགས། །གསལ་བའང་རང་གི་རྒྱུ་སྤངས་ནས། །དམིགས་དགར་བ་ལ་ཉིད་བརྗོད་ཉིད། །ཡུན་རིང་ནས་ནི་རྟོགས་པར་འགྱུར། །དུས་དེ་ཙམ་དུ་བསྟན་པ་འདི། །ཕྱོགས་ནི་སུ་ཞིག་རྗོད་པར་བྱེད། །སླར་ཡང་རྒྱུ་མཚན་འདི་ཡིས་ནི། །འདི་ལ་འཛིན་པ་མི་སྲིད་ཉིད། །ཇི་ལྟར་བུམ་སོགས་རྙིངས་པའམ། །མཚོན་སོགས་ཀྱིས་ནི་བཅག་པ་ཡིས། །འཇིག་པར་འགྱུར་བ་རྟོགས་པ་ཡིན། །དེ་བཞིན་སྒྲ་ལས་རྒྱུ་ཡོད་མིན། །ཡུལ་དང་དུས་དང་སྦྱོར་བྱེད་རྣམས། །ཐ་དད་པས་ཀྱང་དབྱེ་ལྡན་མིན། །ག་སོགས་ཡི་གེ་གང་གིས་ནི། །དེ་ལ་ངོ་ཤེས་གསལ་བར་ཡོད། །མྱུར་བ་ལ་སོགས་དབྱེ་བས་ཀྱང༌། །ག་གསལ་གཞན་ལས་རྣམ་བཅད་པར། །ག་ཡི་གསལ་གཞན་གསལ་པོ་རུ། །རྫོགས་པར་འགྱུར་བ་རྟོགས་པ་ཡིན། །ཤིན་ཏུ་དམིགས་བཀར་ཡི་གེ་ག །ག་ཉིད་རྟེན་ནི་ཡོད་པ་མིན། །ག་གཞན་བློ་ཡིས་མ་རྟོགས་ཕྱིར། །གཞན་གྱིས་བརྟགས་པའི་གཉིད་བཞིན། །ཡི་གེ་ཉིད་སྦྱོར་འདི་བསྒྲུབ་བྱ། །ཡི་གེ་ཁ་སོགས་ཉིད་བཞིན་ནོ། །ལྡོག་པ་ཡང་ནི་མ་མཐོང་ཕྱིར། །འདིར་ནི་མཐོང་བ་ལྡོག་བྱེད་མིན། །ཡི་གེའི་བདག་ཉིད་གཉིས་གྲུབ་ནི། །རྟག་པ་ཉིད་སོགས་རྟོགས་པ་ལ། །ཇི་ལྟར་འདོད་ཡིན་དེ་བཞིན་དུ། །གྲུབ་པ་ཉིད་ལས་ཁས་བླང་གིས། །དེས་ན་ཡི་གེ་གཅིག་ཉིད་དུ། །བློ་ནི་གཅིག་ཉིད་སྐྱེ་བར་འགྱུར། །གསལ་བར་བྱེད་པའི་དབྱེ་བ་ཡིས། །ཁྱད་པར་གྱི་བློ་ཡོད་པར་འགྱུར། །གང་ལ་རྣ་བའི་ཡུལ་གཉིས་ལ། །དེ་ལ་བློ་གཉིས་སྐྱེ་མིན་ནམ། །ཁྱེད་ལ་དབང་པོ་ལས་འདས་ཕྱིར། །ཇི་ལྟར་སྒྲ་ཡིས་ཁྱད་པར་བློ། །སྒྲ་ཙམ་ལེགས་བྱས་རྣ་བ་ཡིས། །གང་ཚེ་སྒྲ་ནི་རྟོགས་པར་འགྱུར། །དེ་དང་ཉེར་བསྲེས་དེ་ཡིས་ནི། །རྟོགས་པ་ཡིན་ཞེས་འགའ་ཞིག་ཟེར། །ཡང་
ན་དེ་དག་འཛིན་པ་མིན། །དེ་ཡི་དབང་གིས་སྒྲ་བློ་སྐྱེ། །ལེགས་པར་བྱས་པའི་རྗེས་བྱེད་ཕྱིར། །དེ་ཡང་ཆེན་པོ་ཉིད་སོགས་རྟོགས། །མངར་བ་ཁ་བའི་ངོ་བོ་དང༌། །དེ་བཞིན་དཀར་བོའང་སེར་པོ་རུ། །མཁྲིས་པའི་གནད་ཀྱིས་སེམས་འཁྲུལ་པས། །དེ་ལྟར་ཡུལ་ནི་འཛིན་པར་བྱེད། །དེ་བཞིན་ཤུགས་ཀྱིས་རྒྱུག་པ་དང༌། །གྲུ་ལ་ཞུགས་ནས་འགྲོ་བ་ཡིས། །འཁྲུལ་པས་རི་ལ་སོགས་པར་ནི། །དེ་དག་འགྲོ་བར་སྣང་བ་འགྱུར། །སྦལ་པའི་ཞག་གིས་མིག་བྱུགས་པས། །འོ་མའང་སྦྲུལ་གྱི་ངོ་བོར་སྣང༌། །གསལ་བ་ཉུང་དང་མང་ཉིད་ཀྱིས། །དེ་བརྟེན་སྤྱི་ཡང་ཆེ་ཆུང་འཛིན། །དེ་དག་རྣམས་ནི་ཇི་བཞིན་དུ། །རྒྱུ་མཚན་འཛིན་པ་མེད་ན་ཡང༌། །གསལ་བྱེད་ལ་གནས་མ་རྟོགས་ནས། །དེ་ལྟར་གསལ་བྱ་ལ་འཁྲུལ་འགྱུར། །ཐུང་སོགས་དབྱེ་བ་རང་བཞིན་གྱིས། །རྟག་པར་སྨྲ་བ་ལ་འགལ་ཡིན། །གང་ཞིག་རྟག་ཏུ་ཡོད་པ་ཡིན། །རང་ཉིད་ཀྱིས་དེ་ཚད་གཅིག་ཅིས། །དེ་ཕྱིར་དེ་ཡི་བརྗོད་པ་ཡི། །ཚད་ཀྱི་དུས་ནི་རྟོགས་པར་གྱིས། །ཚད་གཉིས་སམ་ནི་ཚད་གསུམ་མམ། །རང་ཉིད་ཀྱིས་ནི་ཚད་གཅིག་མིན། །སྒྲ་ཙམ་རྣམས་ཀྱིས་གསལ་བ་ནི། །སྒྲ་ལ་མི་འཐད་པ་ཡིན་ནམ། །སྒྲ་ནི་ལེགས་པར་བྱས་པས་སམ། །དང་པོ་འམ་ནི་གཉིས་དེར་འགྱུར། །དེ་ལ་གལ་ཏེ་སྒྲ་ལེགས་བྱས། །ཐམས་ཅད་ཀྱིས་ནི་རྟོགས་པར་འགྱུར། །ཆ་ཤས་མེད་པའི་ཁྱབ་པ་ལ། །ཕྱོགས་གཅིག་ལེགས་པར་བྱར་མི་འདོད། །བརྟེན་པ་ཡི་ནི་དབྱེ་བས་ཀྱང༌། །ལེགས་པར་བྱ་བ་ངེས་མི་འགྱུར། །གང་ཕྱིར་སྒྲ་ནི་རྟེན་མེད་པ། །ནམ་མཁའི་བདག་ཉིད་ལ་སོགས་བཞིན། །འོན་ཏེ་ནམ་མཁའ་རྟེན་ཡིན་ཏེ། །དེ་ཡང་ཆ་མེད་དངོས་ཡོད་པས། །མ་ལུས་སྒྲ་ནི་རྟོགས་པའི་ཕྱིར། །ཕྱོགས་གཅིག་ལེགས་སྦྱར་མི་འགྱུར་ཏེ། །ཕྱོགས་གཅིག་ལེགས་པར་བྱས་པ་ན། །ཇི་སྲིད་ནམ་མཁའ་ལ་གནས་པ། །མ་ལུས་ངོ་བོ་ཉིད་ཀྱིས་ནི། །ལུས་པ་མེད་པར་རྟོགས་ནུས་མིན། །མཁའ་ཉིད་རྣམ་པར་འདོད་ཕྱོགས་ལ། །ཁྱབ་པ་ཉིད་ཕྱིར་མཚུངས་ཐོབ་འགྱུར། །རིང་དུ་གནས་ཀྱང་སྒྲ་རྣམས་ཀྱི། །ཤེས་པ་འབྱུང་བར་ཐལ་བར་འགྱུར། །སྲོག་ཆགས་ཀུན་གྱི་རྣ་བ་ནི། །གཅིག་ཉིད་དུ་ནི་དེ་ལྟར་
འགྱུར། །དེས་ན་གཅིག་གིས་ཐོས་དུས་སུ། །དེ་དག་ཐམས་ཅད་ཀྱིས་ཐོས་འགྱུར། །དེ་ཡང་ཆ་ཤས་མེད་ཉིད་ཕྱིར། །ཆོས་དང་ཆོས་མིན་ལེགས་བྱས་པ། །གནས་སྐབས་གཉིས་ནི་གྲུབ་པའི་ཕྱིར། །རྣ་བ་ནམ་མཁའི་ཕྱོགས་འགྱུར་མིན། །ལན་ཅིག་རྣ་བ་ལེགས་བྱས་པས། །སྒྲ་ནི་ཐམས་ཅད་རྟོགས་པར་འགྱུར། །བུམ་པའི་ཕྱིར་ནི་མིག་ཕྱེ་བས། །སྣམ་བུ་མི་མཐོང་བར་མི་འགྱུར། །ཡུལ་ཡང་ལེགས་པར་བྱས་པས་ན། །དེ་ཉིད་ཁོ་ནར་ཐལ་བར་འགྱུར། །ཡུལ་མཚུངས་པར་ནི་གནས་པ་ན། །ལེགས་པར་བྱས་ལ་ཁྱད་མེད་ཕྱིར།། བརྟན་པའི་རླུང་ནི་ཡོངས་སྤངས་པས། །འདི་ལ་ལེགས་བྱས་འགྱུར་བ་མིན། །སྒྲིབ་པ་རྣམས་ནི་ཡོངས་སྤངས་ནས། །དེ་ཡི་ཕྱོགས་གཞན་དམིགས་པར་འདོད། །སྒྲ་ནི་གཅིག་ཉིད་ཡིན་པ་ན། །ལེགས་བྱས་མ་བྱས་མི་འགྲུབ་པོ། །གནས་སྐབས་གཅིག་ནི་ཁས་ལེན་ན། །ཀུན་གྱིས་རྟོགས་འགྱུར་ཡང་ན་མིན། །གཉིས་ཀ་ལེགས་པར་བྱས་པ་ན། །སོ་སོར་བསྟན་སྐྱོན་ཀུན་འབྱུང་འགྱུར། །དེས་ན་སྒྲ་ལ་གསལ་བྱེད་ནི། །ཇི་ལྟར་ཡང་ནི་མི་འཐད་དོ། །བཤད་པ་བྱེད་པ་པོ་ཡིས་ནི། །རྣ་བ་ལེགས་བྱས་ཕྱིར་ལན་བརྗོད། །དེ་དབྱེ་ཐོས་པའི་དབྱེ་བ་ལའང༌། །ཐོས་པ་པོ་ལའང་གནས་པ་ཡིན། །ཇི་ལྟར་མིག་ལ་ཕན་བཏགས་པས། །བུམ་སོགས་རྣམས་ལ་མར་མེ་སོགས། །གསལ་འདོད་རྣ་བ་ལེགས་བྱས་ཕྱིར། །སྒྲ་ཙམ་དེ་ལྟར་བྱུང་བ་ཡིན། །ལེགས་བྱས་རྣམ་པ་གང་གིས་ནི། །འདིར་ནི་བརྒལ་ཞིང་བརྟགས་པ་མེད། །སྐྱེ་བ་ལ་ཡང་མཚུངས་ཉིད་པས། །དེར་ཡང་ནུས་པ་དབང་འདས་ཕྱིར། །ནུས་པ་འབྲས་བུས་གཏན་རྗེས་དཔོག །གང་གིས་དེ་ནི་བརྒལ་ཞིང་བརྟག །དེ་ཡོད་དེ་འབྱུང་ཙམ་གྱིས་ནི། །ཚད་མས་དེ་ནི་རྟོགས་པར་འགྱུར། །དེས་ན་དབང་འདས་ནུས་པ་ཡིན། །དེ་དག་དབང་འདས་ནུས་པ་ནི། །དབང་པོ་ལ་ནི་སྐྱེད་བྱེད་པས། །མངོན་གསལ་རྒྱུ་རུ་ཁོ་བོ་འདོད། །གང་དག་མ་ཕྲད་པར་སྐྱེ་བ། །སྒྲ་འདི་རྣ་བས་འཛིན་པར་བྱེད། །རིང་དང་བར་དུ་ཆོད་སོགས་ལ། །དེ་དག་ལ་ཕྲ་མཚུངས་ཉིད་ཡིན། །དེ་ལ་རིང་དང་ཉེར་གནས་པའི། །བཟུང་དང་མ་བཟུང་མཚུངས་པར་འགྱུར། །
རིམ་གྱིས་ཀྱང་ནི་མི་འགྱུར་ཏེ། །མྱུར་དང་དལ་སོགས་ཀྱང་མི་འབྱུང༌། །དེ་ཕྱིར་གཙང་སྦྲ་ཅན་མཐོང་བའང༌། །བལྟ་བ་ཡང་ནི་བལྟ་བར་གྱིས། །འབད་རྩོལ་གྱིས་ནི་བསྐུལ་བའི་རླུང༌། །ལྟེ་བ་ལས་བྱུང་རྒྱུ་ཞིང་འགྲོ། །རྐན་ལ་སོགས་པར་ལྡན་པ་དང༌། །རྣམ་པར་དབྱེ་བ་རྗེས་སུ་བྱེད། །ཤུགས་ཉིད་ལྡན་ཕྱིར་དེ་ཡང་ནི། །ཇི་སྲིད་ཤུགས་ཡོད་བར་དུ་གནས། །དེ་ཡི་རང་གི་ཡན་ལག་ནི། །བརྟན་པའི་རླུང་དང་ལྷན་ཅིག་ཏུ། །འགྲོ་ཞིང་ལྡན་དང་རྣམ་དབྱེ་བ། །ངེས་པ་སྐྱེད་པར་འགྱུར་བ་ཡིན། །རྣ་བའི་ནམ་མཁར་ཕྱིན་འགྱུར་ན། །རྣ་བའི་ནུས་པ་སྐྱེད་བྱེད་ཡིན། །དེ་ཡོད་པས་ན་སྒྲ་རྟོགས་ཕྱིར། །ལེགས་བྱས་མ་མཐོང་ན་ཡང་ལེགས། །སྐྱེ་བའི་ནུས་པ་བཞིན་དེ་ཡང༌། །བདག་ལ་ཅི་ཡང་ལྷག་པ་མེད། །སྒྲ་ཡི་བྱེ་བྲག་གཟུང་བའི་ཕྱིར། །དེའི་ཁྱད་པར་ཡང་དེ་བཞིན་འགྱུར། །རྩིག་པ་ལ་སོགས་རླུང་གི་ནི། །གེགས་སུ་རབ་ཏུ་འཐད་པ་ཡིན། །དེ་ནི་དྲག་པོར་འཇུག་པ་ཡིན། །རྣ་བའི་ཕྱོགས་ཀྱིས་གེགས་བྱེད་རིགས། །དེ་ནི་རིམ་པས་འཇུག་ཉིད་ཕྱིར། །འཇིག་པ་དང་ནི་ཤུགས་བཅས་ཡོད། །ལེགས་བྱས་རིམ་པས་གསལ་པོ་ཉིད། །མི་གསལ་སོགས་པའི་རྒྱུ་མཚན་རིགས། །ཁོ་བོས་ངེས་པར་རྣ་བ་ནི། །ནམ་མཁའ་ཁས་ལེན་མི་བྱེད་དོ། །ནམ་མཁར་ཆ་ཤས་མེད་མིན་ཏེ། །རྒྱལ་བ་གྲངས་ཅན་གྱིས་བཀག་ཕྱིར། །དེ་ན་ནམ་མཁའི་ཕྱོགས་གཅིག་གམ། །ཡང་ན་དངོས་པོ་གཞན་དུ་འགྱུར། །སོ་སོའི་མི་ལ་གནས་རྣ་བ། །འབྲས་བུའི་དོན་གོས་ཁོ་བོས་རྟོགས། །གལ་ཏེ་ཁྱབ་པ་གཅིག་ཉིད་ནི། །དེ་ལྟ་ན་ཡང་རྟེན་གང་ལ། །སྒྲ་ཙམ་གྱིས་ལེགས་བྱས་དེ་ཡོད། །དེས་ནི་སྒྲ་རྣམས་རྟོགས་པར་བྱེད། །འོན་ཀྱང་དབང་པོ་ལེགས་བྱ་བ། །དེ་ཡང་རྟེན་གྱི་ཕྱོགས་ཀྱིས་འབྱུང༌། །དེས་ན་རྣ་བ་ལེགས་བྱས་ན། །རྣ་བས་སྒྲ་ནི་ཐོས་འགྱུར་མིན། །སྒྲ་ཙམ་རྣ་ཕྱོགས་མ་ཕྱིན་པས། །རྣ་བའི་དབང་པོ་ལེགས་བྱས་མིན། །དེས་ན་རྟེན་གྱི་དབྱེ་བ་ཡིས། །ལེགས་པར་བྱེད་པ་ངེས་པར་གནས། །འོ་ན་རྟེན་ནི་གཅིག་ལ་ནི། །དབང་པོ་ལེགས་པར་བྱ་བ་ཐོབ། །ལུས་ཀུན་ལ་ནི་རྟོགས་བྱེད་པ། །དབང་པོ་གཅིག་ཏུ་སྒྲ་ལ་འགྱུར། །སྐྱེས་བུའི་ལུས་ཀྱི་ཕྱོགས་རྣམས་ལ། །རྣམ་པར་ཤེས་པས་སྐྱེད་འདོད་ཡིན།།
དེས་ན་གཙོ་བོ་ཐ་དད་པས། །རྣ་བའི་ལེགས་བྱས་ཐ་དད་འགྱུར། །བདག་ནི་ཕྱོགས་རྣམས་དང་བྲལ་ཡང༌། །མ་ལུས་པར་ནི་རྟོགས་བྱེད་པ། །ལུས་ཉིད་ལ་གནས་འཛིན་པས་ན། །ཁོ་བོས་དེ་སྨྲས་འགལ་བ་མེད། །དེ་ཉིད་ཀྱི་ན་རྒྱུ་ཡིས་ནི། །འོན་བ་ཉིད་སོགས་གནས་པ་ཡིན། །ཆོས་དང་ཆོས་མིན་དབང་བྱས་པ། །དེ་ཉིད་གཞན་ལོངས་སྤྱད་བྱ་ཡིན། །ཇི་ལྟར་དབང་དང་བྲལ་བ་རྣ། །ཡུལ་དེར་གནས་པར་གྱུར་ན་ཡང༌། །ལོངས་སྤྱོད་མི་རྙེད་དེ་བཞིན་དུ། །གཞན་གྱིས་ཐོས་ཀྱང་འོན་པས་མིན། །རྣ་བ་སྒྲ་དང་རྟེན་དག་ནི། །རང་ཉིད་ཀྱིས་ནི་ཡན་ལག་བྲལ། །ཕྱོགས་གཅིག་ལ་ནི་གནས་པ་མིན། །དེ་ལྟ་ན་ཡང་དེ་སྐྱོན་མེད། །གསལ་བར་བྱེད་པའི་རླུང་རྣམས་ལ། །ཐ་དད་ཡན་ལག་ཕྱོགས་ཉིད་དང༌། །རིགས་ཀྱི་ཐ་དད་པ་ཡོད་པས། །དེ་ཉིད་ཀྱིས་ནི་ལེགས་པར་གནས། །གཞན་གྱི་དོན་དུ་རླུང་བསྐུལ་བས། །ཇི་ལྟར་ཁྱེད་ལ་གཞན་བྱེད་མིན། །དེ་བཞིན་ཡིད་བཞིན་ལེགས་བྱས་པའི། །ནུས་པ་གཞན་ནི་ལེགས་བྱེད་མིན། །རྐན་སོགས་སྦྱོར་བ་གཞན་དག་གིས། །ཇི་ལྟར་ཡི་གེ་གཞན་བྱེད་མིན། །དེ་ཉིད་སྒྲ་ཙམ་གཞན་བསྐུལ་བས། །སྒྲ་ཙམ་གཞན་ནི་བྱེད་པ་མིན། །དེ་ཕྱིར་སྐྱེ་དང་གསལ་དག་ནི། །འབད་རྩོལ་བརྗོད་པར་འདོད་པ་ལ། །ཀུན་ལ་ནུས་པའི་བྱེ་བྲག་ནི། །འབྲས་བུའི་དོན་གོས་མཚུངས་པར་ངེས། །ཡང་ན་རིག་བྱེད་རྗེས་འབྲངས་པས། །ཕྱོགས་ནི་རྣ་བ་ཉིད་ངེས་བྱ། །ནམ་མཁའི་བདག་ཉིད་རྣ་བ་རུ། །བརྗོད་པར་རིག་བྱེད་གང་ནའང་མེད། །ཕྱོགས་ནི་རྣ་བ་ཡིན་ནོ་ཞེས། །དེ་ནི་རབ་ཏུ་ཐིམ་སྐབས་བརྗོད། །དེ་ཡང་རང་བཞིན་འགྲོ་ཉིད་ཀྱི། །ཚིག་གིས་མིག་ལ་སོགས་པ་བཞིན། །ཇི་ལྟར་འདི་མིག་གཟི་བརྗིད་ཀྱི། །རང་བཞིན་དུ་ངེས་ཉི་མ་ལ། །འགྲོ་བར་འགྱུར་ཞེས་བརྗོད་པ་ཡིན། །དེ་བཞིན་རྣ་བ་ཕྱོགས་བདག་ཉིད། །ཕྱོགས་ནི་ཀུན་འགྲོ་གཅིག་པུ་ཉིད། །ནམ་མཁའ་ཇི་སྲིད་དུ་གནས་པ། །རྣ་བའི་བུ་གས་ཡོངས་བཅད་པ། །རྣ་བ་ཡིན་ནོ་མཁའ་ཕྱོགས་བཞིན། །ནམ་མཁའ་ཆ་ཉིད་བརྟགས་པ་ལ། །ཇི་སྲིད་ཅུང་ཟད་རིགས་པ་ཡིན། །ཕྱོགས་ཀྱི་ཆ་ལའང་དེ་མཚུངས་ཏེ། །ལུང་གིས་ཁྱབ་པར་འགྱུར་བ་ཡིན། །
དེས་ན་བསོད་ནམས་བསོད་ནམས་མིན། །དབང་བྱས་རྣ་བུག་གིས་ཡོངས་བཅད། །ཕྱོགས་རྫས་ཆ་ཡི་རྣ་གང་ཡིན། །དེ་ནི་ལེགས་པར་བྱ་བར་འགྱུར། །ཡུལ་ཡང་ལེགས་པར་བྱེད་པ་ན། །དེས་ན་གཅིག་ལ་ལེགས་བྱས་ཡིན། །མི་ཡི་ནུས་པ་ཐ་དད་ཕྱིར། །ཐམས་ཅད་ཀྱིས་ནི་རྟོགས་འགྱུར་མིན། །ཇི་ལྟར་སྐྱེ་བར་གྱུར་པ་འདི། །ཕྱོགས་དང་ཡུལ་ལ་སོགས་པ་ཡི། །དབྱེ་བས་ཀུན་ལ་ཡོད་ན་ཡང༌། །ཐམས་ཅད་ཀྱིས་ནི་རྟོགས་བྱ་མིན། །དེ་བཞིན་གང་དང་ཉེར་གནས་པ། །སྒྲ་ཙམ་གྱིས་ནི་ལེགས་བྱས་གང༌། །དེ་དག་ཉིད་ཀྱིས་སྒྲ་ཐོས་འགྱུར། །རིང་ན་གནས་པར་ཅིས་མི་འགྱུར། །སྒྲ་ཡི་སྐྱེ་བ་བཀག་པའི་ཕྱིར། །གཞན་དུ་མི་འཐད་པ་ཡིན་ན། །སྒྲ་ཙམ་རྣམས་ཀྱི་ཁྱད་པར་ལས། །ལེགས་པར་བྱ་བ་ངེས་སྐྱེད་འགྱུར། །འདིར་ནི་དེ་ཡོད་དེ་འབྱུང་ཉིད། །ནུས་པ་ཡོད་ཉིད་རྟོགས་བྱེད་པ། །རྣ་བའི་ནུས་པ་བཞིན་དུ་འདོད། །དེ་རུ་བློ་ནི་ཡང་དག་བསྡུས། །གཉིས་ཀ་ལེགས་པར་བྱས་ཕྱོགས་ལས། །ཉེས་པ་གཉིས་ཆར་བརྫུན་པ་ཡིན། །གང་གིས་གང་རུང་མ་ཚང་ན། །ཐམས་ཅད་ཀྱིས་ཀུན་རྟོགས་མི་འགྱུར། །ཇི་ལྟར་ཉིད་གཅིག་ཆུ་སོགས་ལ། །དབྱེར་མེད་དེ་ཡང་དུ་མ་ཡི། །བདག་ཉིད་དུ་ནི་སྣང་བར་འགྱུར། །སྒྲ་ཡང་དེ་བཞིན་ཤེས་པར་བྱ། །གསལ་བྱེད་སྒྲ་ཙམ་གྲགས་པ་ལས། །དེ་ཡི་ཡུལ་ནི་ངེས་གཟུང་འགྱུར། །བར་མཚམས་མེད་པའི་ནམ་མཁའ་ལས། །ཁྱབ་ནུས་སྒྲ་ཙམ་ལ་ནི་མེད། །དེས་ན་མ་བཅད་པའི་ངོ་བོས། །དེ་ནི་ཐམས་ཅད་དུ་རྟོགས་མིན། །སྒྲ་ཙམ་ཡུལ་གྱི་ཐ་སྙད་ཉིད། །ཐོས་པ་དེར་ནི་རྗེས་སུ་བྱེད། །བར་མཚམས་མ་ཁྱབ་པ་ཉིད་ཀྱིས། །རྣམ་གཅོད་ཀྱང་ནི་ངེས་པར་འགྱུར། །དེ་དག་ཉུང་ལ་ཡུལ་གཅིག་པས། །སྒྲ་ཡང་མ་ཁྱབ་པ་རུ་ངེས། །འགྲོ་དང་ཤུགས་ཉིད་བཅས་པ་ཡིས། །དེ་དག་གང་དང་གང་ལས་འབྱུང༌། །ཉན་པོ་དེ་དང་དེ་ལས་ནི། །སྒྲ་ནི་འབྱུང་བ་བཞིན་དུ་སེམས། །གཟུགས་བརྙན་རེ་རེ་ཐ་དད་པ། །སོ་སོའི་སྣོད་དུ་ཅིག་ཅར་དུ། །སྣང་བ་རྒྱུ་མཚན་གང་གིས་ནི། །འཛིན་པར་འགྱུར་ཞེས་བརྗོད་པ་ན། །འདིར་སྨྲས་གང་ཚེ་རེ་ཞིག་ནི། །ཆུ་ལ་ཡིད་འོང་གཡོ་བ་ཡི། །མིག་གི་སྣང་བ་གང་བྱུང་བ། །དེ་ནི་ལྡོག་
པར་གྱུར་པ་ན། །ཉི་མ་རྣམ་པ་དུ་མ་ནི། །ཅི་སྟེ་སྣོད་དུ་ཐ་དད་གཟུགས། །རང་གནས་ལ་གནས་འཛིན་གྱུར་ན། །དེ་ཚེ་དུ་མ་ག་ལས་བྱུང༌། །སོར་མོས་ཅུང་ཟད་མིན་ན་མིག་གིས། །ཇི་ལྟར་གཅིག་ནི་དུ་མ་རུ། །སྣང་འགྱུར་མི་འཇུག་ཐ་དད་པ། །ཁོ་བོས་སྒྲ་ཡང་དེ་བཞིན་ནོ། །གཞན་དག་འདི་ལ་རྒོལ་བ་ན། །གཟུགས་བརྙན་འཆར་བར་འདོད་པ་ཅན། །གལ་ཏེ་དེ་ཉིད་རྟོགས་གྱུར་ན། །ཅི་ཕྱིར་སྟེང་དུ་སྣང་མི་འགྱུར། །ཁྲོན་པ་ལ་སོགས་གཏིང་དུ་ནི། །གཟུགས་བརྙན་མེད་ན་ཇི་ལྟར་སྣང༌། །ཤར་བལྟས་མེ་ལོང་ལ་བལྟས་ན། །ནུབ་ཏུ་བལྟས་པར་ཇི་ལྟར་འགྱུར། །ཆུ་ལ་ཉིད་མ་སྣང་བ་ནི། །མིག་གཅིག་སྟེང་དང་འོག་གི་ནི། །ཕྱོགས་གཉིས་སུ་ནི་རྟགས་འཇུག་འགྱུར། །རྟེན་ནི་ཡོན་པོར་གནས་ཉིད་ཕྱིར། །དེ་ལ་སྟེང་ཕྱོགས་གསལ་བ་ཡི། །བདག་གིས་ཉི་མ་མཐོང་བར་འགྱུར། །བརྒྱུད་ནས་བཀོད་པར་གྱུར་པས་ན། །འོག་ན་གནས་པ་མཐོང་བར་འགྱུར། །དེ་ནི་གཅིག་ཉིད་ཕྱིར་སྟེང་ན། །གནས་པ་འོག་ཏུ་སྣང་བར་འགྱུར། །དེས་ན་འོག་ནི་ཁོ་ན་རུ། །བར་མཚམས་བཅད་པར་ཉི་མ་སྣང༌། །དེ་བཞིན་ཤར་དུ་སོང་འཇུག་པས། །ནུབ་ཕྱོགས་སོང་འཇུག་ལ་བཀོད་པ། །གདོད་མཐོང་བ་ན་འཁྲུལ་པ་ཡིས། །ནུབ་ཕྱོགས་ལྟ་བར་རྟོགས་པ་ཡིན། །དུ་མའི་ཡུལ་རྣམས་ལ་གནས་པ། །གཟུགས་བརྙན་ཡོད་པ་ཡིན་ན་ཡང༌། །མཚུངས་པའི་བློས་ནི་རྟོགས་ཉིད་ཕྱིར། །དུ་མ་ཉིད་དུ་ཡོད་པ་མིན། །ཡུལ་གྱི་དབྱེ་བས་ཐ་དད་ཉིད། །དེ་ནི་རྗེས་སུ་དཔག་ལས་བྱུང༌། །དེ་འདི་ཡིན་ཞེས་ཤེས་པ་ནི། །མངོན་སུམ་ཡིན་ངེས་གནོད་པར་འགྱུར། །ཇི་ལྟར་རིམ་གྱིས་སྐྱེས་བུ་ནི། །ཐ་དད་ཡུལ་དུ་འགྲོ་བ་ཡང༌། །ལྷ་སྤྱིན་ཐ་དད་མི་འགྱུར་ཏེ། །དེ་ལྟར་སྒྲ་ཡང་ཐ་དད་མིན། །གཅིག་པུ་ཉིད་དུ་རྟོགས་འགྱུར་བས། །ཇི་ལྟར་ཡང་ཡང་མཐོང་འགྱུར་བ། །དེ་ནི་དུས་དབྱེས་ཕྱེ་མི་འགྱུར། །དེ་བཞིན་སྒྲ་ཡང་ཡུལ་གྱིས་མིན། །གལ་ཏེ་རིམ་གྱིས་འགལ་མེད་ན། །ཁྱབ་པ་ཉིད་དུའང་ལྟ་བར་གྱིས། །མཐོང་བ་གྲུབ་ཕྱིར་ཆོས་གང་ཡིན། །རྣམ་པ་ཀུན་གྱིས་དེ་ཁས་ལོང༌། །ཇི་ལྟར་ཁུང་ཡང་བསྐོས་པས། །ཤིན་ཏུ་མ་བྱས་པ་ཡིན་ཡང༌། །
ནམ་མཁའི་ལ་ནི་ཆེ་བློ་ཉིད། །དོག་པ་ལ་ནི་བློ་ཆུང་འགྱུར། །དེས་འདིར་གཞན་གྱི་ཁྱད་པར་གྱིས། །སྒྲ་འཇུག་དེ་ལྟར་བློ་འཁྲུལ་ཡིན། །སྒྲ་ལ་གནས་པའི་རགས་ཉིད་དང༌། །ཕྲ་བ་ཉིད་ནི་མཚོན་འགྱུར་མིན། །བློ་ཡི་གསལ་དང་མི་གསལ་ཉིད། །ཆེ་ཆུང་ཉིད་དུ་བརྟགས་པ་ཡིན། །བུམ་སོགས་ལ་ཡང་བརྟག་པར་ནི། །འོད་ཆེན་པོས་ནི་གསལ་བྱས་ནས། །དེ་ཡང་གསལ་པོ་ཁོ་ནར་འགྱུར། །འོད་ཆུང་གསལ་བྱས་མིན་གསལ་འགྱུར། །དེ་བཞིན་རིང་སོགས་ཐམས་ཅད་ནི། །སྒྲ་ལ་ཆོས་རྣམས་གནས་ཡིན་ཞེས། །དོན་དང་འབྲེལ་པར་མ་མཐོང་ན། །སྒྲ་ནི་རྗོད་པར་བྱེད་འགྱུར་མིན། །དེ་ལྟ་ཡིན་ན་སྔར་མེད་པའི། །ཀུན་གྱིས་རང་དོན་རྟོགས་པར་འགྱུར། །མི་རྟག་ཡིན་ན་འདི་ལ་ནི། །འབྲེལ་པ་མཐོང་བར་འཐད་པ་མིན། །གལ་ཏེ་འབྲེལ་ཤེས་གྲུབ་པ་ན། །ངེས་པར་དུས་གཞན་ལ་གནས་མིན། །གཞན་ལ་འབྲེལ་པར་རྟོགས་པ་ན། །གཞན་ལ་རྗོད་པར་བྱེད་འགྱུར་མིན། །བ་ལང་སྒྲ་ལ་འབྲེལ་ཤེས་ན། །རྟ་ཡི་སྒྲ་ནི་རྗོད་བྱེད་མིན། །འོན་ཏེ་གཞན་ཡང་རང་བཞིན་གྱིས། །ཅུང་ཟད་ཁོ་ན་རྟོགས་བྱེད་ན། །དེ་ལ་རྒྱུ་མཚན་མེད་པས་ན། །དེ་གང་ཡིན་ཞེས་ངེས་མི་འགྱུར། །གང་ཕྱིར་ཉན་པ་པོ་རྣམས་ལ། །དེ་ལྟ་བུ་ཡི་ཐ་སྙད་ཀྱི། །ཤེས་པ་ཞེས་བྱར་འཐད་པར་འགྱུར། །དེ་ལྟར་བརྗོད་པ་པོ་རིགས་མིན། །མི་ཤེས་པ་ཡིས་ཐོག་མར་ནི། །སྒྲ་ནི་གང་ཞིག་བརྗོད་པར་འདོད། །གལ་ཏེ་ཤེས་པར་གྱུར་ན་ཀོ། །ངེས་པར་དེ་སྔར་ཤེས་པ་མིན། །མངོན་སུམ་ཡན་ལག་ཉིད་ཀྱི་ཕྱིར། །འོད་ནི་སྔར་ཡང་གསལ་བར་བྱེད། །འདྲ་བ་ཉིད་ནི་མ་རྟོགས་ཕྱིར། །དེ་ཡི་སྒྲོ་ནས་རྗོད་བྱེད་མིན། །གང་གཅིག་དང་ནི་འདྲ་བ་ཡིས། །གཞན་ནི་རྗོད་པར་བྱེད་པར་བརྟགས། །འབྲེལ་པ་ཉིད་དུ་མ་མཐོང་ན། །གང་ཚེ་ཐམས་ཅད་མཚུངས་ཉིད་ཡིན། །གལ་ཏེ་སྔར་མཐོང་དོན་ལྡན་ན། །དེ་ནི་དེ་ཙམ་ག་ལས་ཁོམ། །ལན་འགར་དམིགས་པར་མ་གྲུབ་ན། །དོན་དང་ལྡན་པར་རྟོགས་མི་འགྱུར། །སྒྲ་གཞན་རྟོགས་པར་མ་བྱས་ལ། །དུས་དེར་དེ་ནི་དོན་མེད་མིན། །སྒྲ་གཞན་ཐོས་ལ་དེ་ཉིད་ནི། །དོན་དང་ལྡན་འགྱུར་ངོ་མཚར་ཆེ། །རེ་ཞིག་སྒྲ་ནི་མ་བརྗོད་ན། །འབྲེལ་པར་བྱར་
ནི་མི་འདོད་དོ། །བརྗོད་མ་ཐག་ཏུ་འཇིག་པ་ལ། །འབྲེལ་པ་ཡིས་ནི་དགོས་པ་མེད། །དེས་ན་འབྲེལ་མེད་འཇིག་ཉིད་ཀྱིས། །སྔ་མ་རེ་ཞིག་དོན་མེད་ཡིན། །ཕྱི་མ་འབྲེལ་པར་མ་བྱས་པར། །དོན་དང་ལྡན་པར་ཇི་ལྟར་ཤེས། །སྒྲ་བརྗོད་དང་ནི་འབྲེལ་བྱེད་དང༌། །འཇིག་རྟེན་ཐ་སྙད་བྱ་བ་རྣམས། །རིམ་པའི་རང་བཞིན་ཉིད་ཡིན་པས། །སུ་ཞིག་ལ་ལ་ཅིག་ཅར་བྱེད། །ཡུལ་དུས་སོགས་ཐ་དད་སྐྱེས་བུས། །སྒྲ་གཞན་སྔར་ནི་མ་ཐོས་པས། །སྒྲ་གཅིག་ལ་ཡང་བཅོས་མ་ཡིན། །འབྲེལ་པ་གྲུབ་པ་མ་ཡིན་ནོ། །འདི་ལ་འབྲེལ་པ་བརྗོད་ན་ཡང༌།། སུན་དབྱུང་དེ་ཉིད་ཁོ་ནར་འཇུག །ཞིག་དང་མེད་དང་ད་ལྟ་ལ། །བརྗོད་པ་སྲིད་པ་མ་ཡིན་ན། །སྨྲ་པོས་དོན་ལྡན་སྒྲ་གང་ཞིག །ཉན་པ་པོ་ལས་རྗོད་པར་བྱེད། །དེ་ནི་བརྗོད་པར་ནུས་པ་མིན། །བརྗོད་པ་དེ་ནི་དོན་ལྡན་མིན། །འདྲ་བ་ཉིད་ནི་རྗོད་བྱེད་ན། །ཉན་པ་པོ་ལ་དེ་རུ་ནི། །དོན་ལྡན་འདྲ་བའི་སྒྲ་འཐད་མིན། །དོན་དང་ལྡན་པར་འཛིན་མེད་ཕྱིར། །རང་ཉིད་ཀྱིས་དེ་དོན་ལྡན་མིན། །སྨྲ་པོ་ཉན་པའི་དུས་སུ་ཡང༌། །དེ་ཉིད་དུ་ནི་ཐལ་བར་འགྱུར། །དེ་ཕྱིར་སྒྲ་དོན་མི་འབྲེལ་བ། །རྟག་པ་ཉིད་དུ་ཁས་ལེན་གྱིས། །བརྡ་ལས་བྱུང་བར་རིགས་མིན་ཏེ། །རྣམ་པ་ཀུན་གྱིས་དེ་མེད་ཕྱིར། །བརྗོད་བྱ་རྗོད་བྱེད་ཕན་ཚུན་དུ། །བདག་ཉིད་ཀྱིས་ནི་ནུས་ཡོད་མིན། །གལ་ཏེ་མིག་གིས་བརྡ་བཞིན་དུ། །བརྡ་ཡིས་སྐྱེས་བུ་རྟོགས་འགྱུར་ན། །མི་རེ་རེ་ལ་བརྡ་རེའམ། །ཡང་ན་བཟླས་ནས་བརྗོད་པ་ཡིན། །འགྲོ་བ་ཡིན་ནི་ཐོག་མ་རུ། །འགའ་ཡིས་ཅིག་ཅར་བྱས་ཡིན་གྲང༌། །རེ་རེ་འབྲེལ་པ་ཐ་དད་དམ། །ཡང་ན་གཅིག་པུ་ཁོ་ནར་འགྱུར། །གཅིག་ཉིད་ཡིན་ན་བྱས་མི་འགྱུར། །ཐ་དད་ཡིན་ན་བློ་ཐ་དད། །སྨྲ་ཉན་བློ་ནི་ཐ་དད་ཕྱིར། །ཐ་སྙད་འགྲུབ་པར་མི་འགྱུར་རོ། །སྨྲ་པོའི་བློ་ལ་འབྲེལ་པ་གཞན། །དེ་བཞིན་གཞན་ནི་ཉན་པ་ལ། །ཉན་པ་པོ་ལ་འབྲེལ་བྱེད་ན། །རྗོད་པ་པོ་ཡིས་གང་རྟོགས་འགྱུར། །དེ་ཡིས་སྡང་ནི་མཐོང་བ་གང༌། །དེ་ནི་ཉན་བ་ལ་མིད་མིན། །གསར་དུ་གང་ཞིག་བྱེད་པ་ན། །དེ་ཡང་སྟོན་བྱེད་མཐོང་བ་མིན། །བུམ་སོགས་ལ་མཚུངས་ཉིད་ཅེ་ན། །དེ་མིན་ཕྱིར་ནི་རབ་གྲུབ་ཕྱིར། །གལ་ཏེ་ནུས་པ་རྟོགས།
པས་ནི། །གསལ་བར་བྱེད་པར་མི་ནུས་སོ། །གང་ཞིག་བྱེད་པ་དེ་ལ་ཡང༌། །ནུས་པ་འབྲས་བུ་ལ་ཡོད་ཡིན། །དེ་ལྟ་བུ་ཡང་རྣམ་པ་ཡིས། །ཆུ་མཆུ་ལ་སོགས་ནུས་གྲུབ་ཡིན། །དེ་ལ་ཐོག་མ་ཉིད་ཡོད་མིན། །ཁྱེད་ལ་འབྲེལ་པ་ཐོག་མར་བཅས། །གསལ་ཏེ་དེ་ལ་ཡང་སྤྱི་ནི། །རྟག་པར་ཁས་ལེན་བྱེད་པ་ན། །དེ་ལྟ་ན་ཡང་བདག་འདོད་གྲུབ། །རྣམ་པ་གཉིས་ནི་མི་སྲིད་དོ། །ནུས་པ་ཉིད་ནི་འབྲེལ་པ་སྟེ། །དེ་ལ་དབྱེ་བ་སྣང་མི་འགྱུར། །དེ་ཡང་འབྲས་བུས་རྗེས་དཔག་ཡིན། །དེ་ཡི་དབྱེ་བ་རྗེས་བྱེད་འགྱུར། །གཞན་དུ་མི་འཐད་པ་ཡིས་ནི། །ནུས་པ་ཡོད་པར་བརྟགས་པ་ཡིན། །གཅིག་གིས་དོན་ནི་གྲུབ་པ་ན། །མང་པོར་བརྟགས་པ་འདོད་པ་མིན། །འབྲེལ་པ་བརྗོད་པའི་དུས་སུ་ཡང༌། །བ་ལང་སྒྲ་སོགས་བརྗོད་པ་ན། །འགའ་ཞིག་འབྲེལ་པའི་བློ་ཡིས་ནི། །དོན་རྟོགས་དེ་བཞིན་གཞན་གྱིས་མིན། །དེ་ལ་འབྲེལ་པ་མེད་པས་ན། །ཀུན་གྱིས་དོན་ནི་ངེས་མི་འགྱུར། །གལ་ཏེ་ཡོད་ན་ཀུན་གྱིས་རྟོགས། །དེ་མིན་འགའ་སོགས་མ་བཟུང་ཕྱིར། །ཤེས་བྱེད་ཉིད་ཀྱིས་འབྲེལ་པ་ན། །རང་བདག་ཉིད་ཅེས་རྟོགས་པ་ཡིན། །དེས་ན་འདི་ནི་ཡོད་ན་ཡང༌། །མ་བཟུང་བར་ནི་གསལ་བྱེད་མིན། །ལ་ཡར་དོན་ནི་ཡོད་ན་ཡང༌། །མ་བཟུང་བ་ནི་མཐོང་བ་ཡིན། །ཤིན་ཏུ་མེད་པ་ཡང་ཡོད་ཉིད་དུ། །འགའ་ཞིག་ལ་ཡང་མི་འཐད་དོ། །དངོས་པོ་གཅིག་ལ་ཡོད་མེད་དག །འགལ་བ་གཉིས་ནི་མི་འགྱུར་རོ། །ཤེས་དང་མི་ཤེས་ཉིད་དག་ལའང༌། །འགལ་ཉིད་མཚུངས་བ་མ་ཡིན་ནམ། །ཤེས་པ་སྐྱེས་བུའི་རྟེན་ཡིན་པས། །དེ་དབྱེས་དེ་དབྱེ་འགལ་བ་མིན། །སྐྱེས་བུ་གཞན་ལ་གནས་པ་ནི། །ཤེས་པ་དེ་ཡིས་གནོད་འགྱུར་མིན། །ལོང་དང་མ་ལོང་ཉེར་གནས་པའི། །དཀར་པོ་ལོང་བས་མི་མཐོང་སྟེ། །ཅིག་ཤོས་ཀྱིས་ནི་མཐོང་བར་འགྱུར། །དེ་དག་ལ་དེ་ཡོད་མེད་མིན། །མི་ཡི་ནུས་དང་མི་ནུས་པའི། །དབྱེ་བས་དེར་ནི་འགལ་བར་འགྱུར། །འབྲེལ་པ་མ་རྟོགས་ལས་རྒྱུ་གཞན། །འདིར་ཤེས་པ་ལ་ཡོད་པ་མིན། །དེ་བཞིན་དབང་པོ་དང་མཚུངས་པ། །ཐ་སྙད་ལ་ནི་དམིགས་པ་ནི། །གང་དག་ལ་ཡོད་དེ་དག་དེས། །དོན་རྟོགས་གཞན་མིན་ལོང་བ་བཞིན། །མི་ཤེས་པ་ནི་ཐམས་ཅད་ལ། །སྔ་མ་
སྔ་མའི་གྲགས་པ་ཡིས། །འབྲེལ་པ་གྲུབ་ཅེས་དེ་བཞིན་དུ། །འབྲེལ་པ་ཐོག་མ་མེད་པ་ཡིན། །ཟློས་ནས་བརྗོད་པར་འཇུག་པ་ནི། །མི་རིགས་ཐ་སྙད་ཡོད་ཕྱིར་རོ། །འབྱིན་བའི་དང་པོར་བྱར་མེད་དེ། །དེ་འདྲའི་དུས་ནི་འདོད་པ་མིན། །འགྲོ་བ་ཐམས་ཅད་རེས་འགལ་ཡང༌། །མི་འདྲ་བར་ནི་འདོད་པ་མིན། །རབ་ཏུ་ཐིམ་པ་ཆེན་པོ་ཞེས། །དོན་དམ་པར་ནི་རྟོགས་འགྱུར་མིན། །མཚན་མོ་རབ་ཐིམ་ཞེས་བྱ་ཡིན། །ལས་ཀུན་ཐིམ་བ་ཉིད་ཀྱི་ཕྱིར། །ཉིན་མོ་འབྱིན་པ་ཞེས་བྱ་སྟེ། །ལས་རྣམས་ཀུན་ནི་འཇུག་པ་ཡིན། །ཡང་ན་ཡུལ་ཞིག་རིགས་རྒྱུད་ནི། །ཆད་པའི་ངོ་བོར་རབ་ཐིམ་ཡིན། །ཐམས་ཅད་ཆད་བའི་བདག་ཉིད་ཀྱི། །ཐིམ་པའི་ཚད་མ་བདག་མེད་དེ། །དྲན་པ་མ་ཉམས་པ་འགའ་ཞིག །འབྱིན་དང་བསྡུ་བའི་བྱེད་པོ་ནི། །དབང་ཕྱུག་ལ་སོགས་བརྟན་རིགས་མིན། །ཡང་ན་འབྲེལ་པ་རྟོགས་པར་བྱེད། །གོ་རིམས་མི་རྟག་པ་ཉིད་ཀྱིས། །རྗོད་བྱེད་མི་རྟག་འགྱུར་མིན་ནམ། །ཚིག་ནི་རྗོད་བྱེད་འདོད་པ་སྟེ། །རིམ་པ་ལ་ནི་རག་ལས་བློ། །ཀུན་འགྲོ་ཉིད་ཕྱིར་ཁྱེད་ལ་ནི། །རང་ཉིད་ཀྱིས་ཡིན་རིམ་ལྡན་མིན། །མི་རྟག་སྒྲ་ཙམ་གྱིས་འབྲས་ཕྱིར། །དེས་ན་རིམ་པ་འཇིག་པ་ཡིན། །དེ་ཡི་བརྗོད་འདོད་དབང་གིས་ནི། །སྐྱེས་བུ་ལ་དེ་རག་ལས་འགྱུར། །དེས་ན་ཡི་གེ་རྟག་པ་ཉིད། །ཁྱེད་ལ་འབྲས་བུ་མེད་པར་འགྱུར། །རིམ་པ་མེད་པའི་ཡི་གེ་ནི། །སྟོན་པར་བྱེད་པར་ཤེས་འགྱུར་མིན། །ཁྱེད་ལ་རིམ་པ་ཚིག་ཉིད་དེ། །དེ་ཕྱིར་དེ་ལྟར་ཐལ་བར་འགྱུར། །གང་དག་རིམ་པ་དང་བྲལ་ཚིག །ཡི་གེ་དང་བྲལ་ཚིག་ཡིན་ཏེ། །དེ་དག་ལ་ནི་སྒྲ་རྟག་ཉིད། །རྟོགས་པ་དེ་ནི་དོན་དང་ལྡན། །རེ་ཞིག་གོ་རིམས་ཉིད་ཚིག་ཏུ། །བདག་ཅག་ལ་ནི་ཐལ་འགྱུར་མིན། །གང་གིས་དངོས་པོ་གཞན་རྟེན་པ། །དེ་ནི་གསལ་བྱེད་མཐོང་འགྱུར་མིན། །དེ་དག་ལ་ནི་ཆོས་ཙམ་འདི། །དངོས་པོ་གཞན་དུ་མི་འདོད་དོ། །དེས་ནི་འདི་ལྟར་རྟོགས་པ་ན། །ཡི་གེ་རྣམས་ནི་གོ་བྱེད་འགྱུར། །རིམ་པ་འབྲས་བུ་ཉིད་མིན་ཏེ། །སྔར་གྲུབ་ཡོངས་སུ་འཛིན་པའི་ཕྱིར། །སྨྲ་པོ་འགའ་ཞིག་རང་དབང་གིས། །རིམ་པ་ཤེས་པར་འགྱུར་མིན་ཏེ། །ཇི་ལྟར་གཞན་
དག་གིས་བརྗོད་པ། །དེ་ལྟར་འདིར་ནི་བརྗོད་པར་འདོད། །གཞན་ཡང་དེ་ལྟར་ངེས་ན་ཡང༌། །འབྲེལ་པ་བཞིན་འདི་ཐོག་མ་མེད། །དེས་ན་བརྩེར་གནས་བརྟེན་མིན་ཡང༌། །ཐ་སྙད་དུ་ནི་དེ་རྟེན་ཡིན། །སྐྱེས་བུ་རྣམས་ཀྱི་རང་དབང་ཉིད། །ཁོ་བོས་འབད་པས་བཀག་པ་ཡིན། །འོ་ན་ཡི་གེ་རྣམས་ཀྱིས་ནི། །བརྩེར་གནས་བརྟན་མིན་དེ་ལྟར་གྲུབ། །ཡི་གེ་རྟག་པ་ཡོད་མིན་ན། །ཐ་སྙད་ལས་ནི་རིམ་པར་བྱུང༌། །རྡུལ་ཕྲན་རྟག་པར་ཡོད་ན་ནི། །ཇི་ལྟར་བུམ་སོགས་གསལ་བཀོད་ཡིན། །དེ་མེད་རྩ་བ་མེད་པ་ཡི། །བཀོད་པའི་ངེས་པར་བཟུང་བ་ཡིན། །གཞན་གྱིས་བརྗོད་པས་དགག་གིས་བརྗོད། །བརྗོད་འདོད་དེ་འདྲ་ངེས་པར་འགྱུར། །དེ་ལྟ་ན་ཡང་བརྟན་ཉིད་འགྱུར། །ཆད་མ་གཞན་གྱི་ཁྱེད་ལ་མེད། །ཇི་ལྟར་རིགས་ཀྱི་བུམ་སོགས་ཀྱི། །ཐ་སྙད་ཉེ་བར་མཚོན་པ་ཡིན། །དེ་བཞིན་གོ་རིམས་ལ་སོགས་པའི། །ཐ་སྙད་རིགས་ཀྱི་སྒོ་ནས་གྲུབ། །རེ་ཞིག་རྐན་ལ་སོགས་པའི་རིགས། །སྐྱེས་བུ་ཐམས་ཅད་ལ་གནས་འགྱུར། །སྨྲ་པོ་དེ་དག་རྣམས་ཀྱིས་ནི། །སྒྲ་ཙམ་མཚོན་ནས་སྐུལ་བར་བྱེད། །ཇི་སྲིད་ཡིག་ཡོད་སྒྲ་ཙམ་གྱིས། །རིགས་ཐ་དད་པ་སྒྲ་ལ་ནི། །མངོན་པར་གསལ་བའི་རྒྱུར་འཇུག་པའམ། །ཡང་ན་གསལ་བ་དེ་ལྡན་ཡིན། །དེ་ལ་རྐན་སོགས་ལྡན་པ་དང༌། །རྣམ་དབྱེའི་རིམ་པ་སྔོན་འགྲོ་ཅན། །སྒྲ་ཙམ་རྣམས་ལ་གོ་རིམས་འགྱུར། །རིགས་ཀྱི་གཉིས་ཀའི་རྟགས་ཉིད་ཀྱང༌། །ཇི་ལྟར་བསྐོར་བ་སོགས་རྣམས་ཀྱིས། །དབྱེ་རིགས་སོགས་ཀྱིས་མཚོན་བྱས་པ། །རིམ་པའི་རྗེས་དྲན་འགྱུར་དེ་ལྟར། །རྐན་སོགས་སྒྲ་ཙམ་ཡིག་རྟེན་ཡིན། །ཕྲ་བ་ཉིད་ཕྱིར་གསལ་རྣམས་ལ། །རིགས་ཀྱི་ས་ཆོས་ནི་ངེས་བཟུང་ཡིན། །དེ་ཡི་དབང་གིས་ཡིག་རྣམས་ལ། །ཁྱབ་ཉིད་ཡིན་ཡང་རིམ་པས་འཛིན། །དེ་ལྟར་སྒྲ་ཙམ་གྱིས་ཡོན་ཏན། །ཐམས་ཅད་རྟག་ཉིད་དུ་གནས་པ། །ཡི་གེའི་རྗེས་སུ་བྱེད་པས་ན། །དོན་གྱིས་དབྱེ་བ་རྟོགས་པར་འགྱུར། །ཡི་གེ་རྣམས་ཀྱི་གོ་རིམས་དང༌། །ཐུང་དང་རིང་དང་ཆེས་རིང་དང༌། །སྒྲ་ཙམ་ཁྱད་པར་ཅན་དུས་ཀྱི། །རྣམ་དབྱེར་དེ་དག་ཤེས་པར་འགྱུར། །དུས་ནི་ཅི་ཡིན་ཁྱབ་ཅིང་རྟག །རབ་ཏུ་དབྱེ་བའང་
རྟོགས་པར་འགྱུར། །དངོས་པོ་ཀུན་ལ་ཡི་གེ་བཞིན། །ལ་ལས་འགའ་ཞིག་གིས་གསལ་བྱས། །ཡི་གེ་རྣམས་ལ་གསལ་འགྱུར་ན། །དེ་ནི་དོན་རྟོགས་ཡན་ལག་འགྱུར། །གཞན་དུ་ཡང་ནི་ཡོད་པའི་ཕྱིར། །དེ་ཡི་རང་བཞེན་རྟག་ཉིད་ཡིན། །དེ་ཕྱིར་འགའ་ཞིག་འཇིག་དེ་འདྲ། །ཚིག་གི་ཆོས་ནི་ཡོད་པ་མིན། །དེས་ན་ཡི་གེ་རྟག་སྨྲ་ལ། །ཚིག་རྟག་ཉིད་དུ་གྲུབ་པ་ཡིན། །གཞན་གྱི་ཆོས་ཀྱང་ཡན་ལག་ཉིད། །རྟ་ཡི་ཤུགས་སོགས་བཞིན་དུ་བརྗོད། །སྒྲ་ཀུན་རྟག་པ་ཉིད་ལ་ནི། །དོན་གྱིས་གོ་བ་ཚད་མ་ཡིན། །སྒྲ་ནི་མི་རྟག་ཉིད་སྒྲུབ་ན། །རང་གི་ཚིག་ལ་སོགས་དང་འགལ། །བསྒྲུབ་པར་བྱ་བའི་དོན་རྟོགས་ཕྱིར། །དམ་བཅའ་ཐམས་ཅད་བརྗོད་པ་ཡིན། །མི་རྟག་ན་དེ་རང་གི་དོན། །སྨྲ་ནུས་མིན་ཞེས་དཔྱད་ཟིན་ཏོ། །དེས་ན་དོན་རྟོགས་པས་གྲུབ་ཕྱིར། །རྟག་ཉིད་ཅེས་བྱས་གནོད་པར་འགྱུར། །དོན་གྱིས་རྗོད་བྱེད་ནུས་པར་ནི། །ཁས་བླངས་བྱས་ནས་བསྒྲུབ་པ་ན། །སྔར་ནི་ཁས་བླངས་བྱས་པས་ཀྱང༌། །གཞན་གྱིས་འཇིག་ཉིད་ལ་གནོད་འགྱུར། །བསྟན་བཅོས་སོ་སོ་ལ་བརྟེན་པའི། །དོན་རྟོགས་མེད་པ་རྣམས་ཀྱིས་ནི། །འཇིག་པ་ཉིད་དུ་སྨྲ་ཀུན་ལ། །ལུང་གིས་ཀྱང་ནི་གནོད་པར་འགྱུར། །སྔར་བཤད་པ་ཡི་ཕྱོགས་ཀྱིས་ནི། །འཇིག་རྟེན་ཀུན་ལ་གྲགས་པས་བརྗོད། །སྔར་བཤད་གཏན་ཚིགས་ཁོ་ན་ཡིས། །རྗེས་དཔག་དང་ཡང་འགལ་བར་འགྱུར། །རྣ་བ་ལས་སྐྱེས་ངོ་ཤེས་པས། །སྒྲ་ནི་རྟག་བར་ངེས་བྱས་ཕྱིར། །མངོན་སུམ་གྱིས་ཀྱང་འགལ་བ་ཉིད། །སྔ་མ་ཁོ་ནར་བསྟན་ཟིན་ཏོ། །འཇིག་པ་ཉིད་དུ་བསྒྲུབ་པ་ཡིས། །སྒྲ་དེ་གང་ཡིན་ཞེས་བརྗོད་དགོས། །ཡོན་ཏན་གསུམ་མམ་དེ་གང་ཟག །ངོ་བོའམ་ཡང་ན་མཁའི་ཡོན་ཏན། །འོན་ཏོ་ཡིག་གཞན་སྒྲ་བདག་ཉིད། །ཡང་ན་བརྗོད་མིན་རླུང་ངོ་བོ། །ཚིག་ངག་བདག་ཉིད་གསལ་བའམ། །ཡང་ན་འདྲ་ཉིད་གཞན་སེལ་ཡིན། །དེ་རྣམས་མི་རྟག་ཉིད་ཡོད་མོད། །ཁོ་བོའི་དེ་རྟག་ཉིད་མི་འདོད། །མ་གྲུབ་ཁྱད་པར་ཉིད་དང་ནི། །གཞི་མ་གྲུབ་པའི་གཏན་ཚིགས་འགྱུར། །འོན་ཏེ་བདག་འདོད་ཕྱོགས་ཁྱོད་འདོད། །རང་ཉིད་ཀྱིས་ནི་དེ་གཉིས་འགྱུར། །འོན་
ཏེ་སྒྲ་ཙམ་མི་རྟག་བརྗོད། །དེ་ཡིན་སྒྲ་ཡིན་ཁྱེད་ཅག་ལ། །མི་རྟག་ཡིན་བས་ཀུན་གྱིས་ནི། །དེ་ཡང་རྟག་པར་འདོད་དང་འགལ། །གལ་ཏེ་ཤིན་ཏུ་འཇིག་ཉིད་དུ། །མི་རྟག་ཉིད་དུ་བརྗོད་པ་ནི། །དེ་ཡིས་ཁྱད་པར་མ་གྲུབ་པའི། །ཕྱོགས་འགྱུར་ཁོ་བོ་ལ་ནི་ཡིན། །གལ་ཏེ་ཅི་ཞིག་ལྟར་འདོད་པས། །རྟག་པ་ཉིད་ནི་བརྗོད་པ་ན། །མངོན་པར་མི་གསལ་གནས་སྐབས་ལས། །དེ་ནི་མངོན་གསལ་བདག་ཉིད་འདོད། །དབང་པོ་འབའ་ཞིག་གིས་བཟུང་ཉིད། །གཏན་ཚིགས་སུ་ནི་འདིར་རྟོག་ན། །བསྒྲུབ་བར་བྱས་པའི་རིགས་ཀྱིས་ནི། །ད་ལྟར་འཁྲུལ་པར་རྟོགས་པར་འགྱུར། །ཕྱོགས་ཀྱི་ཆོས་ཉིད་མ་གྲུབ་ན། །ཇི་ལྟར་ཕྱིར་རྒོལ་བ་ལ་ནི། །གཏན་ཚིགས་བརྗོད་པར་མི་འཐད་དེ། །དེ་བཞིན་རྗེས་འགྲོ་ལྡོག་པ་ཡང༌། །གལ་ཏེ་དེར་བསྒྲུབ་སྨྲ་བ་ལ། །རིགས་གྲུབ་མ་གྱུར་དེ་ལྟ་ནའང༌། །ཇི་སྲིད་དེ་ནི་བརྩལ་མ་བྱས། །དེ་སྲིད་གཏན་ཚིགས་ཉིད་འགྱུར་མིན། །དབང་པོ་ལས་བྱུང་ཉིད་སོགས་ལའང༌། །དངོས་པོ་ཇི་ལྟར་ཡིན་དཔྱད་བྱ། །བསལ་ལས་གཞན་པའམ་གཞན་ཉིད་མིན། །ཐ་དད་ཐ་མི་དད་གསལ་དཔྱད། དེ་ལ་ཐུན་མོང་མིང་མ་གྲུབ། །མཐུན་ཕྱོགས་བསྒྲུབ་པར་བྱ་དང་བྲལ། །སྨྲ་བ་པོ་ལ་ལྟོས་ནས་ནི། །རྣམ་པར་བརྟགས་པའི་རྗེས་འབྲངས་བརྗོད། །བརྩལ་མ་ཐག་བྱུང་ཤེས་པ་ནི། །བྱས་དང་མི་རྟག་སྒྲུབ་པ་གང༌། །སྐད་ཅིག་མ་ནི་ལྡོག་པ་ཡིས། །སོ་སོར་བརྟག་དང་མ་བརྟགས་པའི། །འགོག་དང་ནམ་མཁའ་དང་གསུམ་པོས། །དེ་ནི་མ་ངེས་པ་ཉིད་ཡིན། །བློ་ནི་སྔོན་སོང་འཇིག་པ་ལ། །སོ་སོར་བརྟགས་པའི་འགོག་པའི་བློ། །བློ་ནི་སྔོན་དུ་མ་སོང་བའི། །འགོག་པ་སོ་སོར་མ་བརྟགས་ཡིན། །འཇིག་ཉིད་ཕྱིར་ན་དེ་དག་གཉིས། །མ་བྱས་པར་ཡང་མཐོང་བ་ཡིན། །རང་བཞིན་གྱིས་གྲུབ་འཇིགས་པ་ཡིས། །རྒྱུ་མེད་ཅེས་ནི་དེ་དག་སྨྲ། །མེ་དང་འབྲེལ་པས་ཤིང་ལས་ནི། །སོལ་བའི་རྒྱུན་ནི་འབྱུང་བར་འགྱུར། །རང་བཞིན་ལས་འབྱུང་འཇིག་པ་ནི། །སྐྱེས་མ་ཐག་པ་ཙམ་དུ་གནས། །ཕྲ་ཞིང་འདྲ་བའི་རྒྱུན་འཇུག་ཕྱིར། །ཉེ་བར་མཚོན་པར་མི་འགྱུར་རོ། །གང་ཚེ་མི་མཐུན་པ་ཡི་རྒྱུས། །འདྲ་བའི་རྒྱུན་ལ་བསྣུན་པ་ན། །མི་མཐུན་པ་ཡི་
འབྲས་བུ་ཡིས། །དེ་ཚེ་རགས་པར་མངོན་གསལ་འགྱུར། །དེས་ན་རྒྱུ་ལས་མི་མཐུན་རྒྱུན། །གང་ཕྱིར་སྐྱེ་བར་འགྱུར་བ་ཡིན། །དེ་ཉིད་ཀྱིས་ནི་མ་བྱས་ནའང༌། །འཇིག་པ་ངེས་པར་གསལ་བར་འགྱུར། །དེ་ནི་ཐོ་བས་བསྣུན་སོགས་པའི། །བརྩལ་མ་ཐག་ཏུ་འབྱུང་བ་ཡིན། །གང་ཕྱིར་མ་བྱས་པར་ནི་སྣང༌། །དེས་ན་གཏན་ཚིགས་འཁྲུལ་པ་ཡིན། །ནམ་མཁའ་ཡང་ནི་རྟག་ཡིན་ན། །གང་ཚེ་ས་དང་ཆུས་གང་བ། །ས་བརྐོས་ཆུ་ནི་འཆུ་སོགས་ཀྱིས། །དེ་བསལ་ནས་ནི་གསལ་བར་འགྱུར། །དེ་ཚེ་བརྩལ་མ་ཐག་བྱུང་ཞེས། །དེ་ལ་ཡང་ནི་སྣང་བར་འགྱུར། །དེ་ཕྱིར་དེར་ཤེས་གང་བརྗོད་པ། །གཏན་ཚིགས་མ་ངེས་པ་ཉིད་ཡིན། །འདིར་མཐུན་ཕྱོགས་ཀྱང་བརྟགས་བྱ་སྟེ། །ཐོས་པའི་དོན་ནི་བསྒྲུབ་བྱ་མེད། །གསལ་བའི་མཚན་ཉིད་ཕྱོགས་ཡིན་ཡང༌། །རིགས་དང་གཞན་ཉིད་གཞན་མིན་དཔྱད། །གཞན་ཡིན་ཆོས་ཅན་བདག་མ་གྲུབ། །དེ་ཉིད་ཆོས་ཅན་གཞན་མ་གྲུབ། །ཁྱད་པར་མེད་ན་མི་རྟག་དང༌། །རྟག་དངོས་དེ་དག་ལ་མི་འགྲུབ། །འདི་ལ་རིགས་ཞེས་ཁ་ཅིག་བརྟག །ཅིག་ཤོས་འཇག་པ་རུ་ནི་འདོད། འདྲེས་པའི་ངོ་བོ་གཅིག་ཡིན་ཞེས། །དངོས་པོ་སྔར་ནི་བསྟན་ཟིན་ཏོ།། དེ་ལྟར་མི་རྟག་ལ་དཔྱད་བྱ། །འཇིགས་པ་བདག་ཅག་བསྒྲུབ་བྱས་སྟོང༌། །གཞན་ཡིན་ཁྱེད་ཅག་བསྒྲུབ་བྱས་སྟོང༌། །དེ་ནི་སུན་དབྱུང་ཚིག་གི་ཕྱོགས། །གལ་ཏེ་ཚིག་དང་དོན་འབྲེལ་ན། །རྟག་པ་ཉིད་དུ་བསྒྲུབ་བྱས་ཀྱང༌། །ངག་གི་དོན་ལ་རིག་བྱེད་ནི། །ཚད་མ་ཉིད་དུ་གྲུབ་མི་འགྱུར། །སྐྱེས་བུ་རྣམས་ལ་བརྡ་ཡིས་ནི། །ཡོན་ཏན་འཕེལ་ལ་སོགས་པ་བཞིན། །རྒྱུ་མེད་ཀྱང་ནི་མཆོད་སྤྱིན་པས། །མེད་པའི་དོན་ནི་ཡོངས་བརྟགས་ཡིན། །གཞན་ཡང་ཚོགས་པ་ཅན་ཕྱིར་ཏེ། །སྐྱེས་བུ་ལས་བྱུང་གཏམ་བཞིན་ནོ། །འདིར་ནི་ཡིད་ཆེས་སྐྱེས་བུ་མེད། །དེས་ན་རིག་བྱེད་ཚད་མ་མིན། །འབྲེལ་པ་བྱར་མི་འདོད་པ་ཡིས། །རིགས་ལས་ངག་ཀྱང་རྟག་པར་བརྗོད། །གང་གིས་མཐོང་དོན་ཐ་སྙད་ཕྱིར། །བརྡ་ལས་བྱུང་བའི་ཤེས་པ་ནི། །འཕེལ་སོགས་ལས་ནི་སྲིད་པ་ཡིན། །རིག་བྱེད་ལ་ནི་མི་འཐད་དོ། །མཐོ་རིས་མཆོད་སྤྱིན་སོགས་འབྲེལ་
བ། །དབང་པོ་ལས་འདས་སུ་ཡིས་མཐོང༌། །དེ་ཡང་དོན་བྱེད་མ་ཡིན་ཏེ། །དེ་ཡི་དོན་ཤེས་འབྱུང་བའི་ཕྱིར། །ཚོགས་པ་ཅན་གྱི་སྒྲུབ་པ་ལ། །འདི་འདྲའི་མི་མཐུན་བསྒྲུབ་བརྗོད་བྱ། །རིག་བྱེད་འདོན་པ་ཐམས་ཅད་ནི། །བླ་མའི་འདོན་པ་སྔོན་སོང་ཡིན། །རིག་བྱེད་འདོན་པ་བརྗོད་ཉིད་ཕྱིར། །དེ་ལྟར་འདོན་པ་ཇི་བཞིན་ནོ། །བྷ་ར་ཏ་ཡང་དེ་ལྟར་འགྱུར། །བྱེད་པོར་དྲན་པས་གནོད་པར་འགྱུར། །རིག་བྱེད་པོ་ནི་དྲན་མེད་དེ། །གང་དེ་དོན་གཞན་བརྗོད་རྒྱུ་མཚན། །འདས་དང་མ་འོངས་དུས་དག་ནི། །རིག་བྱེད་བྱེད་པོ་དང་བྲལ་བ། །དུས་ཉིད་ཕྱིར་ན་འདི་ལྟར་དེ། །དེ་ལྟར་སྣང་བའི་དུས་བཞིན་ནོ། །རིག་བྱེད་ལ་ནི་ཚངས་ལ་སོགས། །བྱེད་པོ་མིན་པར་རྟོགས་པར་གྱིས། །སྐྱེས་བུ་ཉིད་སོགས་གཏན་ཚིགས་ཀྱིས། །དཔེར་ན་ཐ་མལ་མི་བཞིན་ནོ། །དེས་ན་རིག་བྱེད་ཀྱི་ནི་ཚིག །བརྫུན་མིན་པར་ནི་ཤེས་པར་གྱིས། །རང་དོན་སྨྲ་པོ་མ་ལྟོས་ཕྱིར། །ཚིག་དོན་ལ་ནི་ཚིག་བློ་བཞིན། །དེ་བྱས་ཤེས་པ་ཡང་དག་ཡིན། །རྟག་པའི་ངག་ལས་བྱུང་ཉིད་ཕྱིར། །དེ་ཡང་དག་གིས་བློ་བཞིན་རྟག །རྟག་པ་ཉིད་དུ་གྱུར་པས་སོ། །བསྐུལ་བ་ལས་ནི་བྱུང་བའི་བློ། །ཚད་མ་ཡིན་ཏེ་སྐྱོན་བྲལ་བའི། །རྒྱུ་རྣམས་ཀྱིས་ནི་བསྐྱེད་བྱས་ཕྱིར། །རྟག་ཡིད་ཆེས་སོགས་དབང་བློ་བཞིན། །དེ་བཞིན་ཡིད་མི་ཆེས་སྨྲས་པའི། །ངག་གིས་སྐྱེས་ཕྱིར་ཡུལ་དུས་སོགས། །དབྱེ་སོགས་ལ་ནི་གནོད་མེད་ཕྱིར། །ཡིད་ཆེས་དག་བྱུང་ཤེས་པ་བཞིན། །རིག་བྱེད་ཚད་མར་གནས་པས་ན། །སློབ་དཔོན་སློབ་མའི་བརྒྱུད་པ་ཡི། །ཐོག་མ་མེད་ནས་བརྟགས་པ་ཡང༌།། སྐྱོན་མེད་ཉིད་དུ་འགྱུར་བ་ཡིན། །དེས་ན་འཇིག་རྟེན་ཀུན་མིག་གཅིག །རིག་བྱེད་འདྲ་བ་སྣང་བ་ལ། །གཞན་དག་འུག་པ་བཞིན་དུ་ནི། །མ་མཐོང་ཆོས་མིན་ལས་སྐྱེས་ལོ། །གཉིས་སྐྱེས་ལས་ནི་དེ་ཀུན་ནི། །ལོག་པ་ང་རྒྱལ་གྱིས་སྤྲོས་ཡིན། །འདིར་ནི་སྲིན་བུའི་ཡིག་འདྲར་ཡང༌། །དེ་དག་ལེགས་བཤད་ཅུང་ཟད་མེད། །བྱེད་པོ་མེད་པ་ཡིན་ན་ཡང༌། །དེ་ནི་བདེན་དོན་འགྲོ་བ་ཡིན། །དེ་རྒྱུ་ཡོན་ཏན་བྲལ་བའི་ཕྱིར། །སྐྱོན་མེད་པ་ཡིས་བརྫུན་དོན་བཞིན། །སྐྱེས་བུ་ཡིས་ནི་བྱས་པ་ལ། །ཡོན་ཏན་ཡོད་ཅེས་དོགས་པར་འགྱུར་།རིག་བྱེད་བྱེད་པོ་མེད་པའི་
ཕྱིར། །བདག་ལ་ཡོན་ཏན་ཡོད་དོགས་མེད། །དེས་ན་བདེན་དང་ལོག་དོན་ཉིད། །རྒྱུ་རྣམས་མི་ལ་རྟེན་པའི་ཕྱིར། །ཤེས་རབ་སྙིང་བརྩེ་མེད་ལ་སོགས། །མེད་ཕྱིར་དེ་གཉིས་ཡོད་པ་མིན། །དེས་ན་དོན་མེད་འཐོབ་འགྱུར་ཏེ། །ཁུར་བ་དྲུག་སོགས་ངག་བཞིན་ནོ། །གལ་ཏེ་བྱ་བ་བྱེད་དང་ལྡན། །དོན་རྣམས་རྟོགས་པར་འགྱུར་ཞེ་ན། །དེ་ནི་རང་བཞིན་གྱིས་དོན་དང༌། །ལྡན་པ་མིན་ཡང་ཁྱེད་ལ་ནི། །རྟོགས་པ་དེར་འགྱུར་སྐྱེས་བུ་ཡི། །བཤད་པས་ལྷ་མིའི་བཤད་སོགས་བཞིན། །སྐྱོན་མེད་ན་ཡང་བདེན་པའི་དོན། །གྲུབ་མིན་གཞན་ཡང་ཡོད་པའི་ཕྱིར། །གང་ཕྱིར་དོན་མེད་ཅེས་བྱ་བ། །ཕུང་པོ་གཞན་ཡང་ཡོད་པ་མིན། །འོན་ཏེ་རིག་བྱེད་རང་ཉིད་ཀྱིས། །མི་རྣམས་ལ་ལྟོས་མེད་པ་ཅན། །བདེན་དོན་རྣམ་ཤེས་སྐྱེད་ནུས་ཡིན། །དེས་ན་འདི་ཡི་བདེན་དོན་འདོད། །དེ་ལྟར་ན་ནི་བར་མེད་པར། །ཤེས་པ་དེ་ནི་བརྟག་འབྱུང་འགྱུར། །རྒྱུ་ནི་རྟག་ཏུ་གནས་ཉིད་ཕྱིར། །དཔེར་ན་མངོན་འདོད་སྐད་ཅིག་ལ། །ཡང་ན་རྣམ་ཤེས་གཅིག་པུ་ལ། །དེ་སྐྱེས་མ་ལུས་འབྱུང་བར་འགྱུར། །རྒྱུ་ནི་ནུས་པ་ཅན་ཡོད་ཕྱིར། །རིག་བྱེད་འདི་ནི་མི་རྟག་འགྱུར། །ནུས་པ་སླར་ཡང་བློ་འབྱུང་འགྱུར། །འོན་ཏེ་ལྷན་ཅིག་བྱེད་པ་ནི། །བཤད་སོགས་ལ་ནི་ལྟོས་པ་ན། །དེ་དག་ལ་ནི་རིམ་ཡོད་པས། །རྣམ་ཤེས་དེ་ཡང་རིམ་ལྡན་འདོད། །དེ་ལྟ་མིན་ཞེས་ནུས་དེ་ལ། །ལྟོས་པ་ཅི་འདྲ་བ་འབྱུང་འགྱུར། །གལ་ཏེ་དེ་ལྡན་དེ་ནུས་ན། །ཁྱེད་ལ་རྟག་སྟེ་འདི་གང་གིས། །གལ་ཏེ་སྔར་ནི་ནུས་མེད་པའང༌།། དེས་དག་གིས་ནི་ནུས་ལྡན་བྱས། །ཁྱེད་ལ་སྐྱེས་བུས་བྱས་ཐལ་འགྱུར། །ཤེས་པའི་ཡན་ལག་སྐྱེས་རྟེན་ཕྱིར། །ཇི་སྲིད་སྐྱེས་བུ་རྣམས་ཀྱིས་ཏེ། །མར་མེ་འགྱུར་བས་གསལ་བྱས་མིན། །དེ་སྲིད་རིག་བྱེད་དུ་གནས་པས། །ཁྱེད་ལ་ཤེས་པ་སྐྱེད་བྱེད་མིན། །གང་ཕྱིར་ཤེས་པ་དེ་ཡི་རྒྱུ། །སྐྱེས་བུའི་ཤེས་པ་ལས་འབྱུང་འགྱུར། །དེས་ན་སྐྱེས་བུས་མ་བྱས་ཉིད། །ཡང་དག་དོན་ཤེས་རྒྱུན་མི་རྟག །སྐྱེས་བུས་མ་བྱས་པ་ཉིད་དེ། །རིག་བྱེད་ལ་ཡོད་ཀྱང་དོན་མེད། །འདི་ཡི་འདོད་པའི་འབྲས་བུ་གང༌། །དེ་ཤེས་སྐྱེས་བུ་ལ་བརྟེན་འབྱུང༌། །གལ་ཏེ་རྟག་ཏུ་
ནུས་ན་འདིར། །ཅི་སྟེ་གཞན་ལ་ལྟོས་པ་ཡིན། །དེས་ན་ཁྱེད་ལ་ནུས་རྒྱུ་གཅིག །ཡོད་ཀྱང་ཤེས་པ་ཉིད་འབྱུང་འགྱུར། །འདིར་ནི་རང་དགར་སྐྱེས་བུ་རྣམས། །རིག་བྱེད་ཇི་གར་འཆད་བྱེད་ན། །དེ་དག་རྣམས་ནི་དགག་པ་རུ། །སུ་ཞིག་གིས་ནི་ནུས་པ་ཡིན། །དེས་ན་གཏི་མུག་ང་རྒྱལ་སོགས། །སྐྱོན་གྱིས་འདི་དག་བསླད་པ་ཡིན། །ཐོས་པ་ཕྱིན་ཅི་ལོག་བཤད་པ། །བྱེད་ཅེས་དགོས་པར་འགྱུར་བ་ཡིན། །དེ་དག་དབང་པོ་ལས་འདས་པ། །མཐོང་བའི་མི་གཅིག་ཀྱང་འདོད་མིན། །བསྐུལ་བ་མ་ལྟོས་མཐོ་རིས་དང༌། །མཆོད་སྤྱིན་སོགས་འབྲེལ་ཤེས་ཉིད་མེད། །གང་ཕྱིར་དབང་པོ་ལས་འདས་དོན། །ཁྱེད་ཀྱིས་དངོས་སུ་མཐོང་འདོད་མིན། །རྟག་པའི་ཚིག་གིས་གང་མཐོང་བ། །དེ་ནི་མཐོང་བར་འགྱུར་བ་ཡིན། །གང་གིས་རིག་བྱེད་མི་ལ་ནི། །མ་ལྟོས་རང་ཉིད་དོན་བརྗོད་མིན། །ལོང་བ་འཁར་བ་ཐོགས་པ་ལྟར། །སྐྱེས་བུའི་བཤད་པ་ལ་ལྟོས་ཡིན། །དེ་ནི་དེ་ཡིས་དྲངས་གྱུར་ན། །ལམ་ལོག་པར་ནི་ལྟུང་བར་འགྱུར། །དེས་ན་རིག་བྱེད་སྣང་བཞིན་དུ། །མིག་གཅིག་འགྱུར་བ་འཐད་པ་མིན། །རང་དགར་ཤེས་པ་སྐྱེད་ན་ཡང༌། །ཚད་མ་ཉིད་དུ་གསལ་བ་རུ། །འདི་ཉིད་ལ་ནི་མི་སྲིད་དེ། །སྐྱེས་བུ་ལ་ནི་ལྟོས་ཕྱིར་རོ། །ཇི་བཞིན་དོན་རྟོགས་རྒྱུ་ཉིད་དེ། །ཚད་མ་ཉིད་དུ་བརྟགས་པ་ཡིན། །སྐྱེས་བུའི་བཤད་པ་ལ་ལྟོས་པས། །འདི་ལ་ཚད་མས་བརྟགས་ལེགས་མིན། །རིག་བྱེད་ཚད་མར་མི་གནས་པས། །སློབ་དཔོན་སློབ་མའི་བརྒྱུད་པ་འདི། །ཐོག་མ་མེད་པར་བརྟག་བྱ་བའང༌། །སྐྱོན་མེད་ཉིད་དུ་རིགས་པ་མིན། །གང་ཕྱིར་དེ་ན་གཅིག་ཀྱང་ནི། །དབང་པོ་ལས་འདས་མཐོང་འདོད་མིན། །དེ་ཕྱིར་ཐོག་མ་མེད་པ་ཡི། །དམུས་ལོང་བརྒྱུད་པ་བསྟན་པ་ཡིན། །ལོང་བས་ལོང་བ་ཁྲིད་པ་ན། །ཡང་དག་ལམ་ནི་ངེས་རྟོགས་མིན། །དེ་ལྟ་མིན་པས་འདི་ལ་ནི། །ཐོག་མེད་བརྟགས་པ་འབྲས་མེད་ཡིན། །ཡིད་དང་རྒྱས་པ་ལ་སོགས་ཀྱང༌། །གཞན་ལས་རིག་བྱེད་དེ་ཉིད་ཤེས། །དེ་དག་གིས་དོན་འདི་བཀོད་མིན། །ཞེས་པ་འདི་ལ་ཚད་མའང་མེད། །བདེན་དོན་རྟག་པའི་འབྲེལ་ཅན་གྱིས། །ཚད་མ་ཉིད་ནི་ཡིན་ཡང་བླ། །དབང་པོ་ལས་འདས་སྤྱོར་བ་དེ།།
འདིར་ནི་འགའ་ཡིས་ངེས་པ་མིན། །གང་ཕྱིར་དོན་དེ་དབང་འདས་པ། །དེར་གནས་སྦྱོར་དེའང་དབང་པོ་འདས། །ཁྱེད་ལ་མི་ཀུན་དེ་དག་གིས། །རང་གིས་དབང་པོ་འདས་མི་མཐོང༌། །ཐོས་པ་དེ་ཡི་བདག་གི་ནི། །དོན་འབྲེལ་འདི་ཡིན་ཞེས་བརྗོད་མིན། །སྐྱེས་བུས་བརྟགས་པས་དོན་འབྲེལ་ཉིད། །སྐྱེས་བུས་བྱས་པས་ཐ་དད་མིན། །དེ་ཕྱིར་ཇི་ལྟར་མིས་བྱས་པ། །ཕྱིན་ཅི་ལོག་པ་ཉིད་དུ་དོགས། །མི་རྣམས་ཀྱིས་ནི་ཉེར་བཏགས་ལའང༌། །དེ་བཞིན་དགོས་དེར་ཅིས་མི་འགྱུར། །རིག་བྱེད་ཚད་མར་གནས་ན་ཡང༌། །སློབ་དཔོན་སློབ་མའི་བརྒྱུད་པ་ནི། །ཐོག་མ་མེད་པར་བརྟགས་པ་དེ། །དམུས་ལོང་བརྒྱུད་པ་འདྲ་བར་འགྱུར། །མེ་ལ་སྤྱིན་སྲེག་སོགས་ཚིག་གིས། །ཐེ་ཚོམ་སོགས་མེད་མཐོ་རིས་ལ། །མངོན་སུམ་གྱི་ནི་བློ་བཞིན་དུ། །མི་གཡོ་བློ་སྐྱེས་མ་ཡིན་ནམ། །རིག་བྱེད་ཀྱིས་དེ་བྱེད་པ་ན། །ཇི་ལྟར་ཚད་མ་ཉིད་དམིགས་ཡིན། །གང་ཕྱིར་ཚིག་དེས་དོན་དེ་ནི། །འགའ་ཞིག་ཐེ་ཚོམ་ཟ་རྟོགས་ཡིན། །ཕྱིན་ཅི་ལོག་གང་གཞན་བཞིན་དུ། །ཐེ་ཚོམ་སྐྱེས་ཕྱིར་དེ་བཞིན་མིན། །རྟོགས་པ་དང་ལྡན་འགའ་ཞིག་གིས། །དེ་ལ་བྱེ་བྲག་མཐོང་བ་མེད། །དབང་པོ་ལས་འདས་དོན་ལ་ནི། །ཡོད་མེད་ངེས་པ་རིགས་པ་མིན། །གལ་ཏེ་རིག་བྱེད་དག་ངེས་ན། །གཞན་ལས་གཞན་འདྲ་ཅི་སྟེ་མིན། །དད་པས་དབང་མེད་བློ་ཅན་ནི། །གཙང་སྦྲ་ཅན་རྣམས་མི་གཡོ་བའི། །བློ་ཉིད་སྐྱེ་བར་འགྱུར་བ་ཡིན། །གཞན་ལ་གཞན་དག་ལ་དེ་མཚུངས། །འདི་ལྟར་བདེ་གཤེགས་པ་སོགས་ལ། །མཆོད་སྤྱིན་སྲོག་བཅད་དང་ལྡན་པས། །ངན་སོང་སྡུག་བསྔལ་འབྱུང་འགྱུར་པའི། །བློ་ནི་མི་གཡོ་སྐྱེ་བར་འགྱུར། །བློ་འདི་ལ་ནི་འབའ་ཞིག་ཀྱང༌། །གནོད་པ་ད་ལྟར་སྣང་འགྱུར་མིན། །གལ་ཏེ་ལ་ལར་རེས་འགའ་དོགས། །རིག་བྱེད་ངག་ལའང་དེ་དང་མཚུངས། །གལ་ཏེ་མི་འདོད་རག་ལས་པ། །བརྡ་ནི་མི་རྟོགས་རེག་བྱིད་འདིས། །རང་གི་དོན་ནི་གསལ་བྱེད་ནི། །དེ་ཚེ་ཚད་མ་ཉིད་རིགས་ཡིན། །དེ་ཚེ་གཏི་མུག་ང་རྒྱལ་སོགས། །སྐྱོན་གྱིས་བསླད་པའི་བློ་རྣམས་ཀྱིས། །གཞན་དུ་བཤད་པར་བྱས་ན་ཡང༌། །རང་གི་དོན་ནི་འདོར་མི་བྱེད། །གང་ཕྱིར་དེ་ཡི་ཡུལ་ཅན་ཉིད། །
བློ་ནི་མྱུར་དུ་སྐྱེད་པར་བྱེད། །སྐྱེས་བུ་རྣམས་ཀྱིས་འདོད་པ་ཡི། །འདི་ནི་དོན་གཞན་གསལ་བྱེད་མིན། །མི་འདོད་ལ་ནི་ལྟོས་པ་ན། །སྐྱེས་བུས་བྱས་དང་བྱེ་བྲག་མེད། །དེ་ལ་རག་ལས་གསལ་བ་ཡིན། །དེ་ཡང་བྱིན་ཅི་ལོག་པར་འབྱུང༌། །གཞན་ཡང་སྐྱེས་བུས་མ་བྱས་ལ། །ཇི་ལྟར་རང་བཞིན་གྱིས་བདེན་དོན། །འདོད་ཡིན་དེ་བཞིན་བརྫུན་ཉིད་ནི། །ཅི་སྟེ་དོགས་པར་བྱེད་པ་མིན། །བདག་ཉིད་ཀྱིས་བདེན་དོན་རྟོགས་པའི། །རྒྱུ་ཉིད་ཡིན་པས་འདི་བདེན་ན། །དེ་ལྟར་བདག་ཉིད་ཀྱིས་ལོག་པར། །རྟོགས་པའི་རྒྱུར་ཡང་དོགས་པར་འགྱུར། །གཞན་ཡང་རིག་བྱེད་ཚད་མ་ནི། །གང་ཚེ་ཁྱེད་ལ་གལ་ཆེ་ན། །དེ་ཚེ་སྐྱོན་མེད་བྱེད་པོ་སོགས། །ངེས་པར་བསྒྲུབ་ལ་འབད་པར་གྱིས། །སྐྱོན་མེད་པ་ཡི་བྱེད་པ་པོས། །འདི་བྱས་སྐྱོན་མེད་གསལ་བྱས་ཀྱིས། །གསལ་བར་བྱས་ན་འཇིག་རྟེན་འདིར། །ཡང་དག་དོན་ཤེས་སྒྲུབ་བྱེད་ཡིན། །ཤེས་རབ་སྙིང་རྗེ་སོགས་ལྡན་པའི། །སྐྱེས་བུས་བྱས་པའི་ཚིག་དམ་པ། །དེ་ལྟར་ལེགས་པར་ངེས་བྱས་ན། །ཇི་བཞིན་དོན་ཤེས་རྒྱུ་རུ་འགྱུར། །མིས་ནི་མ་བྱས་པ་ཙམ་གྱིས། །ཇི་བཞིན་དོན་ཤེས་རྒྱུ་མིན་ཏེ། །ནགས་ཀྱི་མེ་ལ་སོགས་པ་ནི། །ལོག་པའི་ཤེས་པའི་རྒྱུར་ཡང་མཐོང༌། །མེ་ཡི་སྣང་བ་ཡོད་པ་ན། །མཚོ་སྐྱེས་སྔོན་པོའང་དམར་སྣང་འགྱུར། །གལ་ཏེ་མེ་སོགས་བྱས་ཉིད་ཀྱིས། །དེ་ཡི་རྒྱུ་རུ་འཐད་འགྱུར་ན། །དོན་རྣམས་ཀྱིས་ནི་བྱས་ཉིད་ཀྱིས། །ལོག་པའི་ཤེས་པའི་རྒྱུ་མཚན་ནམ། །དེ་ལྟར་དུ་བ་མེ་ལ་ནི། །ཇི་བཞིན་གསལ་བར་བྱེད་འགྱུར་མིན། །དེ་ལྟར་རིག་བྱེད་མ་བྱས་པ། །དེ་ཁོ་ན་ཉིད་ཤེས་པ་ཡི། །རྒྱུ་མཚན་གནས་པ་མ་ཡིན་པས། །དེ་ཕྱིར་འདི་བརྟགས་དོན་མེད་ཡིན། །དེས་ན་སྐྱེས་བུས་མ་བྱས་ཉིད། །གསལ་དང་རྟག་ཉིད་གྱིས་གྲུབ་པ། །སྒྲ་དོན་འབྲེལ་པ་བརྟག་པ་ཡང༌། །དོན་མེད་ཉིད་དུ་བརྗོད་པ་ཡིན། །དེ་ནི་ཡོད་པ་ན་ཡང་འདི། །ཇི་བཞིན་ཤེས་དོན་རྒྱུ་ཉིད་དུ། །མི་འདོད་པར་ནི་འདས་མ་ཐག །རྒྱས་པ་རུ་ནི་བཤད་ཟིན་ཏོ། །དེས་ན་དེ་ཉིད་རབ་སྤོང་ལ། །ཁོ་བོ་ལ་ནི་ཆེར་མོས་མེད། །གནས་སྐབས་ཉེ་བར་མཁོ་མིན་ལ། །སུ་ཞིག་གེགས་ནི་བྱེད་པ་ཡིན། །ཐོས་པ་དེ་
ལ་ཇི་བཞིན་དོན། །ཤེས་པའི་རྒྱུ་ཉིད་འཐད་པ་ཡིན། །སྐྱེས་བུས་མ་བྱས་ཡིན་ན་ཡང༌། །དེ་ནི་མ་གྲུབ་ཅེས་བ་སྒྲུབས་ཟིན། །ཕྲ་བའི་བློ་ཡི་མིག་ཅན་གྱི། །བློ་རྣམས་ལམ་གང་ལ་དཔྱོད་པའི། །དེ་ཡིས་བདག་གིས་བརླབས་ནས་ནི། །འདིར་ནི་ཅུང་ཟད་བསྡུས་ནས་བརྗོད། །ཚད་མ་རྣམས་ནི་ལོག་ན་ཡང༌། །གཞལ་བྱ་ལྡོག་པར་མི་འགྱུར་རོ། །གང་ཕྱིར་ཁྱབ་དང་བྱེད་རྒྱུ་ཉིད། །དེ་དག་ལ་ནི་དེར་ཡོད་མིན། །དེས་ན་ཐོས་པའི་བྱེད་པོ་ནི། །ཚད་མ་ལྔ་པོས་མ་རྟོགས་ཀྱང༌། །བྱེད་པོ་མི་ཤེས་རབ་སོགས་བཞིན། །དངོས་མེད་ཉིད་ཀྱིས་རྟོགས་མི་འགྱུར། །འོན་ཏེ་དོན་བཅས་ཉིད་ཀྱིས་སམ། །རྣམ་པར་དབྱེ་དོན་ཉིད་ཀྱིས་ཀྱང༌། །དེ་རྣམས་ཀྱི་ནི་བྱེད་པོ་དཔོག །ཅི་སྟེ་ཐོས་པའང་དེ་བཞིན་མིན། །སེམས་ཅན་ཀུན་གྱིས་མ་རྟོགས་ཉིད། །ཐེ་ཚོམ་ཟ་མིན་དེ་རེས་འགའ། །སུ་ཞིག་ཚད་མ་འགའ་ཡིས་ཀྱང༌། །རྟོག་པ་ཡིན་ཡང་ཐེ་ཚོམ་འགྱུར། །སྲིད་གསུམ་ནང་ན་གནས་པ་ཡི། །སྲོག་ཆགས་ཐམས་ཅད་གསལ་པོ་རུ། །རྣམ་པ་ཀུན་གྱིས་ཡོངས་ཤེས་གང༌། །དེས་ནི་ངེས་པར་བྱེད་འདི་ནུས། །རང་ཉིད་ཀྱིས་ནི་མ་རྟོགས་ཉིད། །འཁྲུལ་པ་ཡིན་ཞེས་འདི་ལྟ་བུར། །སྐྱེས་བུ་གཞན་གྱིས་ཀུན་རྟོག་གང༌། །དེ་མེད་པར་ནི་ངེས་པ་ཡིན། །རིག་བྱེད་ལ་གདོན་པར་བྱེད་ན། །བྱེད་པོ་ཡིན་ཞེས་མངོན་སུམ་རྟོག །དེ་དག་གསལ་བྱེད་རིགས་ཡིན་ཏེ། །རྟག་ལ་གསལ་བ་མི་སྲིད་ཕྱིར། །དམིགས་པར་གྱུར་པའི་རང་ངོ་བོ། །དེ་ཡི་བྱ་བས་ཡང་དག་བྱུང༌། །དེ་དག་སྔར་ཡང་ཡོད་པ་ན། །དམིགས་པ་ཡོད་པར་ཐལ་བར་འགྱུར། །རིག་བྱེད་དེ་ཡི་འབྲས་བུ་ནི། །ཐ་སྙད་སོགས་སུ་རུང་བར་ངེས། །དེ་ཡི་བྱ་བས་འདི་ཡོད་ཕྱིར། །ས་བོན་ལས་ནི་མྱུག་སོགས་བཞིན། །གསལ་བྱེད་ཡི་གེའི་དངོས་ཡོད་ཕྱིར། །ཟློས་གར་གྱི་ནི་གཏམ་སོགས་བཞིན། །སྐྱེས་བུས་བྱས་ཉིད་རིག་བྱེད་ལ། །རྗེས་སུ་དཔག་པས་ཀྱང་རྟོགས་འགྱུར། །གཞན་དུ་རིམ་དངོས་ཉིད་མིན་ཏེ། །རྟག་ཉིད་ཕྱིར་དང་ཁྱབ་བྱེད་ཕྱིར། །གསལ་བས་བྱས་པའི་རིམ་ཡོད་མིན། །རྟག་ལས་གསལ་བ་མི་འཐད་ཕྱིར། །ལུང་དང་ཉེ་བར་འཇལ་བ་དག །དོན་གྱིས་གོ་ལ་ཚད་ཉིད་
དེ། །དགག་པར་བྱས་ཡིན་དེ་ན་ཡང༌། །འདི་དག་ཉེར་དགོད་རིགས་བ་མིན། །ཚད་མ་ཉིད་མིན་ལྡོག་པའི་ཕྱིར། །རིགས་བྱེད་སྐྱེས་བུས་མ་བྱས་ཉིད། །གང་འདོད་དེ་ཡང་དངོས་ཉིད་ཕྱིར། །སྒྲུབ་པ་རྣམས་ཀྱིས་བསྒྲུབ་བྱ་མིན། །དེ་དག་གིས་ཐོས་རང་དབང་ཡིན། །སྐྱེས་བུའི་བྱ་བ་མི་ལྟོས་ཕྱིར། །དེ་ཡང་དངོས་པོ་ལ་ཡོད་ཆོས། །ཡང་ན་དངོས་བདག་ཉིད་དེ་བཞིན། །དངོས་པོའི་ཕྱོགས་ནི་གྲུབ་དོན་དུ། །སྒྲུབ་པ་གང་ཡང་བརྗོད་པ་ཡིན། །ཁྱེད་ལ་དེ་ནི་གསལ་བྱས་ཀྱང༌། །རང་ཉིད་དངོས་མེད་གྲུབ་འགྱུར་མིན། །དེ་ཡོད་སྒྲུབ་པ་གསལ་བྱས་ནས། །དེ་ཡོད་ངེས་པར་མི་འགྱུར་རོ། །དེ་ཡོད་པ་ནི་ལྡོག་པ་ནི། །དེ་ཙམ་གྱིས་ནི་ངེས་ཡོད་མིན། །ཚད་མ་རྣམས་ནི་ལོག་ན་ཡང༌། །དོན་མེད་པར་ནི་མི་འགྲུབ་བོ། །དེས་ན་གཉིས་ཀ་ལ་ཕྱོགས་ནི། །མི་འགྲུབ་པ་དེ་ཙམ་དུ་འགྱུར། །ལུས་ཅན་མིན་ཕྱིར་སྒྲ་རྟག་མིན། །བདེ་སོགས་རྣམས་ཀྱིས་འཁྲུལ་ཕྱིར་རོ། །དེ་ལྟར་བརྗོད་ཀྱང་ཇི་བཞིན་སྒྲ། །འཇིག་ཉིད་རབ་ཏུ་མི་འགྲུབ་བོ། །དེས་ན་སྔ་ཕྱི་མཐའ་དག་ལ། །གཞན་གྱིས་སྒྲུབ་པ་གང་བརྗོད་ཡིན། །དེ་ནི་གསལ་བར་བྱས་ན་ཡང༌། །རིག་བྱེད་སྒྲ་དེའི་དོན་རྟོགས་མིན། །མ་བྱས་དང་ནི་མི་འཇིགས་པས། །གལ་ཏེ་རྟག་ཉིད་འདོད་པ་ན། །བཀག་པ་ཙམ་གྱི་དངོས་དག་གིས། །ནུས་མེད་ལ་ཡང་དེ་མཚུངས་ཡིན། །དེས་ན་ནམ་མཁའི་མེ་ཏོག་བཞིན། །དེས་ན་ཇི་ལྟར་མཁའི་བད་མ། །རྟག་པ་ཉིད་ནི་དངོས་མིན་ཏེ། །དེ་བཞིན་རིག་བྱེད་ལ་ཡང་ནི། །དེས་ན་ཚད་མ་ཉིད་གྲུབ་མིན། །བྱས་པ་ཉིད་དང་འཇིག་ཉིད་ནི། །དགག་པར་ཡང་ནི་མི་གྲུབ་བོ། །སྒྲུབ་པར་བྱེད་པ་སུན་བྱུང་བས། །དེས་ན་རྟག་ཉིད་སྨྲ་མི་འགྲུབ། །གལ་ཏེ་མ་ཡིན་དགག་བདག་ཉིད། །དེ་དག་གིས་ནི་རྟག་ཉིད་འདོད། །དེ་དག་དངོས་པོའི་བདག་ཉིད་ཀྱིས། །རང་གིས་གྲུབ་པ་ལ་ལྟོས་ཡིན། །ཕྱོགས་སྔ་མ་གཉིས་སུན་ཕྱུང་བས།། དངོས་པོའི་ངོ་བོར་རྟག་ཉིད་གང༌། །དེ་ནི་བསྒྲུབ་པར་མ་བྱས་ན། །བདག་ཉིད་ཀྱིས་ཏེ་བསྒྲུབ་འགྱུར་མིན། །ཚུལ་གསུམ་ངོ་བོ་ངེས་པ་ནི། །སྒྲུབ་པ་གང་ཞིག་རབ་གསལ་བྱས། །ཁྱོད་ཀྱི་ཕས་ཀྱང་ནམ་དུ་ཡང༌། །དེ་ནི་དགག་པར་མི་ནུས་སོ། །རིག་བྱེད་ལས་ནི་སྐྱེས་བུ་ནི། །མི་
འཇིག་པར་ནི་གང་བཤད་པ། །དེ་ལ་རྗེས་སུ་དཔག་པས་གནོད། །གསལ་བར་བདག་མེད་བསྟན་ཟིན་ཏོ། །དེར་ནི་རིགས་སོགས་གཞན་སྨྲས་པའང༌། །ཚད་མར་གནོད་བྱར་བསྒྲུབ་བྱས་ཟིན། །རྗེས་སུ་དཔག་པས་དེ་ཡང་ནི། །འབྲེལ་པ་ངེས་ཅན་སྔར་བཤད་ཟིན། །དངོས་པོའི་རྗེས་འབྲེལ་པའི་དེ་ལ། །སྒྲ་ཙམ་སྙིང་པོ་མེད་པས་སམ། །ཡང་ན་དེ་ལས་བྱུང་བློ་ཡིས། །རྨོངས་པ་སུ་ཞིག་གནོད་སྙམ་སེམས། །སྐྱེས་བུའི་ངག་ལས་ཤེས་པ་ཡང༌། །དབང་པོ་ལས་འདས་འཇུག་པ་ཡིན། །དེ་ཡང་མངོན་སུམ་དང་མཚུངས་ཉིད། །ཅི་ཕྱིར་ཁྱེད་ཅག་མངོན་འདོད་མིན། །འབྲེལ་བ་མ་མཐོང་བ་ཡི་ཕྱིར། །དཔེ་ལམ་ལྟོས་སྐྱོན་མེད་པའང༌། །དེ་ལ་ཡང་ཡོང་ཁོ་ན་ཡིན། །སྐྱེས་བུ་ལ་བརྟན་ཕྱིར་འདི་ལ། །གནོད་པ་ཡོད་པར་དོགས་ཤེ་ན། །དེ་ལྟར་རིག་བྱེད་དག་ལ་ཡང༌། །དོགས་པ་དེ་ཡང་ལྡོག་མི་འགྱུར། །དེ་ནི་ལོག་རྟོག་རྒྱུ་ཉིད་ཀྱི། །རང་བཞིན་དུ་ནི་འགྱུར་བ་ཡིན། །མི་བྱས་སྒྲ་ཡི་དོན་རྟོགས་ཀྱང༌། །དེ་ནི་བདག་ལ་ཚད་མ་མིན། །ཞེས་བྱ་དེ་ལྟར་ཞེ་སྡང་གིས། །མཁས་པས་བྱེད་པ་ནུས་མ་ཡིན། །དེས་ན་དབང་འདས་ལས་སྒྲ་ཀུན། །སྟོབས་དང་སྟོབས་མིན་མཚུངས་ཡིན་ན། །གཅིག་ཉིད་ལ་ནི་རྗེས་ཆགས་འདི། །རྒྱུ་མཚན་གང་གིས་སྦྱོར་བར་བྱེད། །འདས་མ་ཐག་བརྗོད་རིགས་པ་ནི། །རིག་བྱེད་ཚད་མ་མིན་པའི་རྒྱུ། །ཤེས་རབ་ཅན་རྣམས་ཀྱིས་གསུངས་པས། །དེས་ན་དེ་དག་བདེན་སྨྲར་འགྱུར། །ལོག་པར་རྗེས་ཆགས་ལས་སྐྱེས་པའི། །རིག་བྱེད་བསམ་པས་རྨོངས་བྱས་པས། །རིག་བྱེད་ལོག་པ་ཉིད་ཀྱི་རྒྱུ། །མི་ཤེས་ཅུང་ཟད་ངོ་མཚར་མེད། །སོག་པོ་པར་སིག་སོགས་རྣམས་ལ། །མ་ནི་པག་མར་ལེགས་སོགས་པའི། །དེ་སྤྱོད་རྟག་ཏུ་ལྷུར་ལེན་པ། །དེའི་སྐྱོན་ཅུང་ཟད་མཐོང་བ་མེད། །ངོ་ཤེས་མངོན་སུམ་ཡིན་པར་ནི། །སྔར་ནི་བཀག་པ་ཁོ་ན་ཡིན། །འཁྲུལ་པའི་ཕྱིར་དང་རྟོགས་བཅས་ཕྱིར། །དེ་ཡིས་རྟག་ཉིད་ངེས་འགྱུར་མིན། །དེ་ནི་ནེ་ཙོའི་སྨྲ་བ་ཡིན། །རི་སྐེགས་ཚིག་ཏུ་འདི་སྣང་ཕྱིར། །སྒྲ་ཡི་ཤེས་པ་མང་དུ་ནི། །ལྡོག་པར་འགྱུར་བའི་ངོ་བོ་ཡིན། །དེ་ནི་གསལ་བྱེད་དབྱེ་ཞེ་ན། །གསལ་བ་སྤོང་བ་འཆད་པར་
འགྱུར། །རིག་པ་འདི་ཉིད་ཀྱིས་ཁྱེད་ལ། །ཐམས་ཅད་འདིར་ནི་གཅིག་ཉིད་འགྱུར། །ངེས་ན་ཁྱེད་ལ་གསལ་བྱེད་དང༌། །གསལ་བར་བྱ་བ་ཅུང་ཟད་མེད། །རྣམ་དབྱེ་དང་བྲལ་ཅིག་ལ་ནི། །དབྱེ་བར་བརྟགས་པ་འགལ་བ་ཡིན། །སྒྲ་འདི་དག་ནི་སྐྱེས་བུས་བྱས། །འདི་དག་སྐྱེས་བུས་མ་བྱས་ཞེས། །དེ་ཡི་རྣམ་པར་གཞག་པ་ཡང༌། །ངོ་ཤེས་རྗེས་འབྲང་བྱེད་གྲུབ་མིན། །གསལ་བྱེད་རིམ་པ་གནས་པའི་ཕྱིར། །འགལ་ཞིག་རིམ་པ་ཉིད་དུ་གནས། །རིམ་པ་ངེས་པར་སྦྱོར་བ་ཅན། །དེ་དག་སྐྱེས་བུས་མ་བྱས་འདོད། །རྐན་སོགས་གསལ་བྱེད་རིམ་བ་ནི། །སྐྱེས་བུས་བྱས་ཆོས་འདི་མིན་ནམ། །དེ་ནི་འདོད་ལ་རག་ལས་ཕྱིར། །ཕྱིན་ཅི་ལོག་ཏུ་རྟོགས་པར་འགྱུར། །མེ་ཉིད་ལ་སོགས་སྤྱི་ཉིད་ནི། །རྒྱས་པ་རུ་ནི་གསལ་བྱས་ཟིན། །དེས་ན་དེར་ནི་ངོ་ཤེས་པའི། །སྤྱི་ཉིད་རྟག་པར་ཁོ་བོས་འདོད། །སྐད་ཅིག་རེ་རེར་འཇིགས་འགྱུར་བས། །ཡི་གེ་རྣམས་ལ་ཁྱད་མེད་ཕྱིར། །ངོ་ཤེས་སྤྱི་ཡིས་གང་ཉིད་ནི། །དེ་བཞིན་དུ་ནི་ཡིན་ཟད་མོད། །མྱུར་དང་དལ་སོགས་ཆ་གང་ལ། །ཐ་དད་བློ་ནི་འབྱུང་བར་འགྱུར། །དེ་ལ་ངོ་ཤེས་པའི་ཤེས་པ། །ཐ་དད་བློས་ནི་ངེས་བྱས་མིན། །སྒྲ་གཅིག་ཉིད་ནི་གྲུབ་དོན་དུ། །གཏན་ཚིགས་རྣམས་ནི་སྨྲས་པ་ལ། །མི་མཐུན་ཕྱོགས་ལ་འགལ་མེད་ཕྱིར། །སོ་སོར་འབྲེལ་གྲུབ་མི་འགྱུར་རོ། །དུ་མའི་སྤྱི་ཡི་ཆ་ཡང་ནི། །བདག་ལ་བརྟན་པར་གྲུབ་པ་མིན། །དེ་མིན་ངོ་བོ་ལས་ལྡོག་པ། །དངོས་པོ་ཙམ་ནི་བསྒྲུབས་པ་ཡིན། །གང་སོགས་གཅིག་ཉིད་ཐོབ་གྱུར་ན། །རིགས་རྟེན་འདོད་པས་གྲུབ་པ་སྒྲུབ། །དེ་མིན་ངོ་བོ་ཡོངས་ལྡོག་པས། །དབྱེར་མེད་ཉིད་དུ་བརྟགས་པ་ཡིན། །གསལ་བ་གཅིག་ཏུ་ཉིད་འགྱུར་ན། །ཚད་མ་ཀུན་གྱིས་གནོད་པར་འགྱུར། །དབང་པོ་ལས་བྱུང་སོགས་རྣམས་ཀྱིས། །སོ་སོར་སྦྱོར་ཡིག་དབྱེ་ངེས་ཕྱིར། །ཡིད་འོང་ཡིད་མི་འོད་སོགས་ཀྱི། །དབྱེ་གང་མངོན་སུམ་གྱིས་རྟོགས་འགྱུར། །བློ་རྣམས་རིམ་པར་འབྱུང་བའི་ཕྱིར། །ཐ་དད་འགྲུབ་འགྱུར་མྱུར་སོགས་བཞིན། །ཡུལ་དང་དུས་སོགས་ཐ་དད་པའི། །བ་ལང་སྒྲ་གསལ་བློ་རྣམས་ཀྱི། །དོན་གཅིག་པ་མིན་ཐ་དད་པར། །སྣང་ཕྱིར་གཟུགས་རོ་
སོགས་བློ་བཞིན། །དྲུག་སྣང་ལ་སོགས་དབྱེ་སྣང་བར། །མངོན་སུམ་གྱིས་ནི་ངེས་པར་འགྱུར། །གསལ་བྱེད་ཀྱི་ཆོས་འདི་མིན་ཏེ། །ཞེས་བྱ་དེང་ནི་བརྗོད་པར་འགྱུར། །སྔ་དེ་ཕྱི་རེའི་ཞག་ལ་ནི། །བ་ལང་སྒྲ་ཞེས་ཀུན་འདི་དག །དོན་གཅིག་པ་མིན་རིམ་འབྱུང་ཕྱིར། །སྒྲ་དང་དྲི་སོགས་པའི་བློ་བཞིན། །དེ་ལྟ་མིན་ན་བློ་ཀུན་ནི། །དམིགས་བ་གཅིག་ཏུ་འགྱུར་བ་ཡིན། །ནུས་ལྡན་རྒྱུ་ནི་ཉེར་གནས་ཕྱིར། །རིམ་གྱིས་འབྱུང་བའང་འགལ་བ་ཡིན། །དངོས་པོ་རྣམས་ནི་ཐ་དད་ཀྱང༌། །རང་བཞིན་ཉིད་ཀྱིས་གཅིག་རྟོགས་པའི། །ནུས་པ་ངེས་པར་ཡོད་མིན་ཏེ། །སྔར་ནི་རབ་ཏུ་བསྟན་ཟིན་ཏོ། །གཅིག་ཏུ་རྟོགས་པ་དེ་ལས་ནི། །སྒྲ་ནི་གཅིག་ཏུ་ངེས་བྱེད་པ། །འཇིག་རྟེན་བས་ནི་སྒྲ་གཅིག་ལ། །སྦྱོར་བ་མང་པོ་སྙམ་དུ་སེམས། །གསལ་བ་དུ་མ་ལ་གནས་ཕྱིར། །འབྲེལ་པ་འཐད་པར་འགྱུར་བ་ཡིན། །དེ་ཕྱིར་གསལ་བ་རྣམས་ལ་ནི། །འཇིག་རྟེན་ཐམས་ཅད་པ་ཉིད་འགྱུར། །སྒྲ་དོན་ལྷན་ཅིག་དོན་དམ་པར། །འབྲེལ་པ་ཡོད་མིན་དེ་ལས་ནི། །མ་སྐྱེས་ཕྱིར་དང་ཐ་དད་ཕྱིར། །དེས་ན་འཁྲུལ་པས་ཉེ་བར་བརྟགས། །ཁྱབ་མིན་སྲིད་ཕྱིར་སྒྲ་དོན་གྱི། །གནས་བ་ཀུན་ནི་བསླད་པ་ཡིན།། འདི་ལྟར་དེ་ནི་རྒྱས་པ་རུ། །སྔར་ནི་བསྟན་པར་བྱས་ཟིན་ཏོ། །བ་ལང་ཉིད་ནི་རྟག་པ་དང༌། །འབྲེལ་པར་བརྟགས་པའང་སྤངས་པ་ཡིན། །རྡུལ་ཕྲན་མཁའ་སོགས་ཀྱང་སྤངས་ནས། །དེས་ན་གཏན་ཚིགས་ཀྱི་དཔེ་མིན། །ངོ་བོ་གཅིག་ཉིད་འཁྲུལ་པ་ཡི། །ཤེས་པ་རྣམས་ཀྱིས་ངེས་བྱས་ཕྱིར། །དམིགས་བཀར་བ་ལང་ཉིད་བརྗོད་ཉིད། །ཡུན་རིང་ནས་ནི་རྟོགས་བར་འགྱུར། །ཡང་དག་སྐད་ཅིག་མ་ཉིད་ཕྱིར། །དེ་ཙམ་དུས་འདི་བརྟེན་མིན་ཡང༌། །ཤེས་བྱ་དེ་ཡི་བརྟེན་པ་ནི། །ཕྱིས་ནི་ཇི་ལྟར་ཡང་འདོད་ཡིན། །བུམ་སོགས་ལ་ཡང་ཅུང་ཟད་ནི། །འཇིག་པའི་རྒྱུ་ནི་ཡོད་པ་མིན། །ཞེས་བྱ་འདི་ལ་བསྟན་ཟིན་ཏོ། །དེ་ཅི་སྒྲ་ལ་འབྱུང་འགྱུར་ཡིན། །ངོ་ཤེས་པ་ནི་བསླད་པ་རུ། །སྔར་ནི་རབ་ཏུ་བསྟན་ཟིན་པས། །ཡུལ་དུས་སྦྱོར་བ་པོ་རྣམས་ཀྱི། །དབྱེ་བས་ཡི་གེའང་དབྱེ་བར་འགྱུར། །དྲུག་ལྡན་དྲང་སྲོང་ས་འཛིན་དང༌། །ལྔ་
པ་ལ་སོགས་རབ་དབྱེ་བས། །ག་ཡི་གསལ་བ་གཞན་གསལ་བར། །མངོན་སུམ་གྱིས་ནི་རྟོགས་པར་འགྱུར། །གསལ་བར་བྱེད་པའི་དབྱེ་བ་ཡིས། །དབྱེ་བའི་གནས་བ་འདི་རིགས་མིན། །རྟག་པ་ལ་ནི་གསལ་ཡོད་མིན། །ཞེས་བྱའོ་གནས་འཆད་བར་འགྱུར། །ག་ལས་ཐ་དད་པ་ཡི་སྤྱི། །ཡང་དག་པར་ག་ཉིད་འདོད་མིན། །དེ་ཡི་ཕྱིར་ནི་སྦྱོར་བ་ལ། །གྲུབ་པ་ལ་སྒྲུབ་བཟློག་པར་དཀའ། །གཞན་སེལ་བདག་ཉིད་ཅན་ལ་ཡང༌། །ག་ཉིད་ལ་ནི་རྟེན་ཡོད་མིན། །རྣམ་པ་འདི་ཉིད་ཀྱིས་ཞེ་ན། །དེ་མིན་རྟེན་མི་འགྲུབ་ཐོབ་འགྱུར། །ཡི་གེ་ག་མིན་ལས་ལྡོག་པས། །ག་ཡིག་རྣམ་པ་ཉིད་དུ་འགྱུར། །ཆོས་ཅན་གང་ལ་ཆོས་ཡིན་ནོ། །ཡང་དག་པར་ནི་རྗེས་དཔག་ཀུན། །གཉིས་ཀ་ལ་གྲུབ་ལ་ལྟོས་ཡིན། །དཔེ་སོགས་རང་ཉིད་ལ་ལྟོས་པ། །དེས་དཔེའི་ཆོས་ཅན་མ་གྲུབ་འགྱུར། །ཁྱེད་ཀྱི་འབད་པ་འདི་ཀུན་གྱིས། །ག་ཡིག་གཅིག་ཉིད་བསྒྲུབ་དོན་དུ། །དེ་ལ་ཁྱེད་ལ་མངོན་སུམ་གྱིས། །གནོད་བ་བཟློག་པར་དཀའ་བའང་སྨྲས། །སྔ་དེ་ཕྱི་དེ་ལ་སོགས་པའི། །ཡི་གེ་ག་ཞེས་འདི་དག་ནི། །རིམ་གྱིས་འབྱུང་བས་དོན་གཅིག་མིན། །གཟུགས་དང་རོ་སོགས་བློ་བཞིན་ནོ། །དེས་ན་ཡི་གེ་གཅིག་བརྟན་པར། །གནས་པ་གཉིས་ཀ་ལ་མི་འགྲུབ། །དེའི་ཕྱིར་ཉེར་བཏགས་ཉིད་འདི་ལ། །རྟག་པ་ཉིད་ནི་བརྟགས་པ་ཡིན། །སྒྲ་ནི་དམིགས་པའི་དུས་སུ་ནི། །རྣ་བ་ལེགས་པར་བྱས་པ་དང༌། །སྣ་བུག་མཐའ་ལ་གནས་གྱུར་པའི། །རླུང་རྣམས་རྟོགས་པར་འགྱུར་བ་མིན། །སྒྲ་ཙམ་ལེགས་བྱས་རྣ་བ་ཡིས། །གང་ཚེ་སྒྲ་ནི་རྟོགས་པར་འགྱུར། །དེ་དང་ཉེར་བསྲེས་དེ་ཡིས་ནི། །རྟོགས་ལ་མངོན་སུམ་གྱིས་གནོད་འགྱུར། །མངར་བ་ལ་སོགས་ལ་འཇུག་པ། །ཁ་དང་སེར་པོའི་ངོ་བོ་ཡིས། །ཇི་ལྟར་ཤེས་པ་ཡུལ་མེད་པ། །དེ་བཞིན་སྒྲ་ཡང་ཤེས་པར་འགྱུར། །མྱུར་དང་དལ་སོགས་ངོ་བོ་ཡིས། །གཞན་པའི་སྒྲ་ནི་སྣང་མི་འགྱུར། །དེ་མིན་ངོ་བོ་དེ་དངོས་ཉིད། །ཤེས་ཕྱིར་ཇི་ལྟར་ཡུལ་མེད་མིན། །དེ་ལྟར་མིན་ན་དོན་དེ་ཉིད། །རྟོགས་པར་བྱེད་པ་དེ་འགལ་འདོད། །རྣམ་པ་གཞན་ནི་རིག་པ་ན། །དོན་དེ་ཉིད་ནི་ཇི་ལྟར་རིག །རྣམ་པ་མེད་པའི་ཤེས་
པ་ལ། །ཁྱེད་ལ་ཕྱིའི་དོན་རྣམས་དེ་ངེས། །དེ་ཡི་བདག་ཉིད་ཕྱི་རོལ་མིན། །དེ་བཞིན་དུ་དེ་ཇི་བཞིན་རིག །ཤེས་པ་རྣམ་བཅས་ཕྱོགས་ལ་ཡང༌། །ཕྱི་རོལ་རྣམ་པ་རྗེས་མཐུན་པར། །ཤེས་པ་ལ་ནི་སྣང་གྱུར་པས། །དོན་རྟོགས་ཞེས་ནི་བརྗོད་པ་ཡིན། །འདིར་ནི་ཕྱི་རོལ་རྗེས་མཐུན་བར། །ཤེས་པ་འཇུག་བར་མི་འགྱུར་ཏེ། །དེས་ན་ཡུལ་མེད་པ་ཡི་སེམས། །ཐམས་ཅད་འཁྲུལ་བ་ཡིན་ཞེས་གདགས། །རྟག་པ་ལ་ནི་ཁྱད་པར་དུ། །གསལ་བྱེད་ཡོད་པ་རིག་པ་མིན། །དེ་ཡི་ལེགས་བྱས་རྗེས་མཐུན་བས། །དེས་སྒྲ་ལ་བློ་ཐ་དད་མིན། །བུམ་པ་ལ་སོགས་གཟུང་དོན་དུ། །ཇི་ལྟར་མིག་ལ་མར་མེ་ཡི། །ནུས་པ་སྐྱེད་བྱེད་དེ་བཞིན་དུ། །སྒྲ་དམིགས་ཕྱིར་ནི་སྒྲ་ཙམ་གྱིས། །རྣ་བ་ལ་ནི་ནུས་པ་བསྐྱེད། །སྒྲ་ནི་རྟག་ཏུ་དམིགས་རུང་བར། །རང་བཞིན་གྱིས་ནི་གནས་ཤེ་ན། །རྣ་བ་ལེགས་པར་མ་བྱས་ཀྱང། །དེ་ནི་ཅི་ཡི་ཕྱིར་མི་དམིགས། །དེ་ཕྱིར་ལེགས་བྱས་རྣ་བ་ནི། །ཡོད་པའི་དུས་བཞིན་དེ་ཡང་ནི། །རུང་བའི་རྒྱུ་ནི་ཡོད་པས་ན། །དམིགས་པ་ཁོ་ན་ཡོད་པར་འགྱུར། །གལ་ཏེ་དེ་དམིགས་རུང་མིན་ན། །ཕྱོགས་ཀྱང་དེ་ནི་ཇི་ལྟར་འགྱུར། །འགྱུར་ན་རུང་བ་ཉིད་ལྡན་པའི།། སྒྲ་གཞན་སྐྱེ་བར་འགྱུར་བ་ཡིན། །ཡང་ན་ཕྱིས་ཀྱང་ཤེས་པ་ནི། །དེ་ཡི་སྟོབས་ལས་བྱུང་བ་མིན། །ལེགས་བྱས་རྣ་བ་ལ་སོགས་ལས། །དེ་ནི་སྐྱེ་བར་བརྗོད་པ་ཡིན། །དེ་ལྟར་སྒྲ་ནི་ཤེས་བྱ་རུ། །མི་འགྱུར་ཉེ་བར་མཁོ་མིན་ཕྱིར། །རོ་སོགས་ལས་ནི་དེ་ལ་ནི། །ཁྱད་པར་ཅུང་ཟད་ཀྱང་ཡོད་མིན། །ལེགས་བྱས་རྣ་བ་ལ་སོགས་ལས། །སྒྲ་ལ་ལྟོས་མེད་དེ་དག་གིས། །ཤེས་པ་འདི་ནི་སྒྲ་རྟོགས་པའི། །རང་བཞིན་ཞེས་བྱ་བསྐྱེད་པ་ཡིན། །དོན་ཤེས་ཤེས་བྱའི་ངོ་བོ་འདི། །དེ་ལྟ་ན་ཡང་སྒྲ་འཇུག་འགྱུར། །ཁྱེད་ལ་དེ་ཡི་རྣམ་ཤེས་ཀྱང༌། །ཞེས་བྱ་རྗེས་སུ་འཇུག་པར་འགྱུར། །དེ་ལྟ་མིན་ན་རྣམ་ཤེས་ནི། །རྗེས་འཇུག་མ་ཡིན་དེ་ཤེས་བྱ། །སྒྲ་དེ་རྗེས་སུ་འཇུག་འགྱུར་ཞེས། །ཁྱེད་ལ་དེ་ལྟར་འགལ་བར་འགྱུར། །ཤེས་དང་ཤེས་བྱའི་རང་བཞིན་ནི། །དེ་དག་ལུ་གུ་རྒྱུད་བཞིན་འབྲེལ། །གཅིག་ཡོད་པ་ན་གཉིས་པའི་ནི། །ཐོབ་འགྱུར་མ་འཁྲུལ་པ་
ཡི་ཕྱིར། །ལེགས་བྱས་རྣ་བས་བསྐྱེད་པ་ཡི། །ཤེས་དང་འབྲེལ་ཉིད་ཡིན་ན་ནི། །རྣ་བ་ལེགས་པར་མ་བྱས་ཀྱང༌། །གསལ་བར་ཤེས་པ་འཕེལ་བར་འགྱུར། །གལ་ཏེ་དེ་ཡི་ཤེས་བྱ་ཡི། །བདག་ཉིད་སྒྲ་ནི་མིན་ཞེ་ན། །དེ་ལྟ་ན་ནི་རྣ་བའི་ཤེས། །དེ་རྟོག་རང་བཞིན་འགྱུར་མིན་ཏེ། །དེ་དག་ཉིད་མིན་རོ་སོགས་བཞིན། །ཤེས་པ་ལ་ནི་སྒྲ་དང་ནི། །འབྲེལ་པ་གང་ཡོད་གང་གིས་ན། །དེ་ནི་སྒྲ་བློའི་ངོ་བོར་འདོད། །དེ་དག་ཉིད་ནི་དབྱེ་ལྡན་མིན། །དེ་ནི་དེ་ལས་བྱུང་མིན་ཏེ། །སྒྲ་ནི་སྐྱེད་བྱེད་ཉིད་མིན་ཕྱིར། །དེ་ལས་བྱུང་བའི་ངེས་པའི་ཕྱིར། །དེ་ནི་གཏན་དུ་འབྱུང་བར་འགྱུར། །དེ་ལྟ་ན་དེའི་ཡུལ་ཅན་ཤེས། །རྟག་ཏུ་འབྱུང་བའམ་ཡང་ན་མིན། །དེ་ལྟར་ངེས་པར་གནས་པས་ན། །རྣ་བ་ལེགས་བྱས་རྟགས་དོན་མེད། །རེས་འགལ་ལེགས་པར་བྱས་པ་ནི། །ཡོད་པ་ཉིད་ན་རེས་འགལ་ཡང༌། །ཤེས་པ་འབྱུང་འགྱུར་ཞེས་བྱ་བ། །ལེགས་བྱས་བརྟགས་པ་མཛེས་པ་ཡིན། །ལེགས་བྱས་ནུས་པའི་མཚན་ཉིད་ཅན། །ཤེས་འབྲས་ངེས་པར་བྱས་ཤེ་ན། །ཤེས་པ་དེ་ཡང་རྟག་ཡོད་པའམ། །ཡང་ན་རྟག་ཏུ་མེད་པར་འགྱུར། །རྣམ་པར་ཤེས་པ་རེས་འགའ་བ། །དེ་ཡི་ལེགས་བྱས་ཇི་ལྟར་སྟོན། །རྣ་བ་ལེགས་པར་བྱས་ཕྱིར་ལན། །དེ་ཕྱིར་དེ་ནི་ལེགས་སྨྲས་མིན། །གལ་ཏེ་ཐ་མི་དད་པ་ཡི། །ནུས་བ་རྣ་བ་ལ་བྱེད་ན། །དེ་ཚེ་ནམ་མཁའ་ཕྱོགས་ལ་ནི། །རྟག་ཉིད་ཉམས་འགྱུར་བསྐྱེད་པའི་ཕྱིར། །དངོས་དང་ཐ་མི་དད་ཉིད་ཕྱིར། །ལེགས་པར་བྱས་བའང་རྟག་ཉིད་ཡིན། །དངོས་པོ་བཞིན་དུ་དེ་ཡིས་ནི། །དེ་བསྐྱེད་རྣམ་ཤེས་རྟག་ཏུ་ན། །ཐ་དད་ན་ནི་དེའི་ཞེ་ན། །འབྲེལ་པ་འཐད་པར་མི་འགྱུར་རོ། །ནུས་པ་ལས་ཞེས་འབྱུང་བའི་ཕྱིར། །རྣ་བའི་ཤེས་པ་ཉིད་ཀྱང་མེད། །ཐ་དད་ཐ་མི་དད་གྲོལ་བའི། །ཕྱོགས་ནི་སྤངས་པར་བྱས་ཟིན་ཏོ། །དེས་ན་རྣ་བ་ལེགས་བྱས་ཕྱིར། །ལན་ནི་བློ་དམན་བརྗོད་པ་ཡིན། །དེ་ཉིད་ཀྱིས་ནི་ཡུལ་དང་ནི། །གཉིས་ཀ་ལེགས་པར་བྱས་པ་བཀག །དེ་ཕྱིར་རྟག་ལ་གསལ་བ་ནི། །ཐམས་ཅད་དུ་ཡང་རྟེན་མེད་ཡིན། །དེས་ན་གསལ་བ་ལ་བརྟེན་ནས། །རིང་ཐུང་རིམ་པ་སོགས་རྣམས་ནི། །འགའ་ཞིག་གང་དག་སྣང་གྱུར་པ། །
དེ་དག་ཀུན་ཀྱང་རྟེན་མེད་འགྱུར། །མ་ཕྲད་ཙམ་དུ་མཚུངས་ན་ཡང༌། །ཐམས་ཅད་གཟུང་ཉིད་མི་འགྱུར་ཏེ། །ནུས་པ་ངེས་པར་གནས་པའི་ཕྱིར། །ཁབ་ལེན་གྱིས་ནི་ལྕགས་ལ་བཞིན། །གལ་ཏེ་ཁབ་ལེན་འོད་ཕྲད་པས། །དེ་ཡང་དྲངས་པར་གྱུར་ཅེ་ན། །འོ་ན་འོད་འདི་མ་མཐོང་བས། །ཇི་ལྟར་ཡོད་པར་རྟོགས་པར་འགྱུར། །ཅི་ཕྱིར་འོད་དེ་ཤིང་སོགས་དང༌། །ཕྲད་ཀྱང་འདྲེན་པར་བྱེད་པ་མིན། །དེ་ནུས་ངེས་ཉིད་ཕྱིར་ཞེ་ན། །མ་ཕྲད་པ་ལའང་དེ་མཚུངས་ཡིན། །སྦྱོར་བའི་དེ་མ་ཐག་ཏུ་ནི། །རིང་དང་བར་མར་ཉེར་གནས་པས། །རིམ་པ་མེད་པས་རྟོགས་པར་འགྱུར། །ཐམས་ཅད་ལ་དེར་ཤེས་སྐྱེད་ཕྱིར། །རིང་དང་ཉེ་སོགས་དབྱེ་བ་ཡིས། །གཟུགས་ནི་གསལ་དང་མི་གསལ་བར། །ཇི་ལྟར་སྣང་འགྱུར་དེ་བཞིན་དུ། །སྒྲ་ཡང་མྱུར་དང་དལ་སོགས་འགྱུར། །ཐ་དད་སྣང་བའི་བློ་རྣམས་ནི། །དམིགས་པ་གཅིག་པར་ཇི་ལྟར་འགྱུར། །ཞེ་ན་ཕྱི་རོལ་དོན་སྨྲ་ལ། །གཟུགས་བློ་ལ་དེ་བརྒལ་བརྟག་མཚུངས། །ཕྲད་ནས་འཛིན་པའི་ཕྱོགས་ལ་ཡང༌། །རྣ་བའི་ནང་དུ་སྒྲའི་སྒྲ་བཞིན། །འབྲུག་སྒྲ་ལ་སོགས་ཤེས་པ་ནི། །ཐ་དད་པར་ནི་འགྱུར་བ་མིན། །དེས་ན་སྐྱེད་བྱེད་ཕྱིར་ཤེས་པ། །ཐ་དད་མིན་ཏེ་ཡིད་བཞིན་ནོ། །གཞན་དུ་རེས་བྱས་ལ་སོགས་བཞིན། །རྣ་དང་མ་ཕྲད་བྱེད་འགྱུར་མིན། །ཡིད་ཀྱང་ཕྲད་པར་བྱེད་པ་ཡན། །གང་བརྗོད་སྐད་ཅིག་ཙམ་གྱིས་ནི། །ཤིན་ཏུ་རིང་བའི་དོན་ལ་ནི། །དེ་དག་གི་སེམས་འཇུག་མི་འཐད། །ཕྱི་རོལ་དབང་པོ་ཉིད་ཕྱིར་སོགས། །ཕྲད་ནས་འཛིན་བྱེད་ཉིད་སྒྲུབ་གང༌། །བསྒྲུབ་བྱའི་ཆོས་མི་མཐུན་པ་ལ། །འགལ་བ་མེད་ཕྱིར་དེ་འཁྲུལ་ཡིན། །ལྡན་པ་དང་ནི་རྣམ་དབྱེ་བ། །ཐ་དད་པ་ཅན་སྔར་སྤངས་ཟིན། །དེ་ཉིད་ཀྱིས་ནི་ཁྱད་མེད་ཕྱིར། །འདི་ལ་རྟོགས་པ་མི་འཐད་དོ། །དེ་ཕྱིར་ཤུགས་མེད་པས་དེ་ནི། །ཇི་སྲིད་ཤུགས་ནི་གནས་པ་མིན། །རྣ་བའི་ནམ་མཁར་ཕྱིན་པ་ཡིས། །དེ་ནི་རྣ་ནུས་བྱེད་ཅེ་ན། །ཅི་ཕྱིར་ལྕག་གིས་བསྣུན་པ་བཞིན། །སྒྲ་རིགས་པ་ན་དེ་ཤེས་མིན། །གང་ཚེ་སྒྲའི་ཤེས་པས་དེ་ཡི། །རིག་པ་སོ་སོར་བཀག་ཅེ་ན། །ལྕགས་གིས་བསྣུན་དང་རླུང་གཞན་བར། །དེ་ཚེ་རིགས་པས་
བརྗོད་རིགས་མིན། །རིམ་གྱིས་འབྱུང་ཡང་མགྱོགས་པ་ན། །ཅིག་ཅར་དུ་ནི་འཁྲུལ་ཞེ་ན། །ཅུང་ཟད་མིན་རྣམ་པ་ཀུན་དུའང༌། །རླུང་འདི་མ་དམིགས་པ་ཡི་ཕྱིར། །འོན་ཀྱང་དབང་པོ་ལས་འདས་རླུང༌། །གཟེགས་ཟན་སོགས་བཞིན་ཁྱེད་ཅག་ཀྱང༌། །བརྗོད་ན་བཤད་པ་ལས་དེ་ཡིས། །རེག་བྱ་ཐོབ་འགྱུར་ཅི་ཕྱིར་བྱས། །ཡང་ན་རླུང་ནི་དབང་འདས་བླ། །དེ་དང་དེ་སྦྱོར་ཐོབ་འགྱུར་ལ། །དྲོ་དང་གང་དང་གཉིས་ཀ་ཡིས། །རེག་བྱ་རིག་འགྱུར་གཞན་གྱི་བཞིན། །འོན་ཀྱང་རྣ་མཆོག་ལ་དེ་དང༌། །མི་ལྡན་པས་ན་རྟོགས་མི་འདོད། །རྣ་བའི་ནམ་མཁར་མ་ཕྱིན་ཅེས། །དེ་ནི་ཇི་ལྟར་རྟོགས་པར་འགྱུར། །དེ་ཕྱིར་གཙང་སྦྲ་ཅན་མཐོང་བའི། །བརྟགས་པ་རྒྱུ་མཚན་མེད་ཡིན་ཏེ། །མཁས་པ་རྣམས་ནི་ཚིམ་བྱེད་མིན། །ནམ་མཁའ་ཆ་མེད་རྣ་གང་བརྗོད། །དེ་ལ་སྐྱོན་ནི་སྔར་བསྟན་གང༌། །དེ་དག་ཆ་མེད་ཕྱོགས་རྣ་བར། །འདོད་པ་ཉིད་ལའང་མཚུངས་རྟོགས་བྱ། །ནམ་མཁའ་གཅིག་པུ་ཁྱབ་ཕྱོགས་ལའང༌། །ལེགས་བྱས་ལ་བརྟེན་དང་གཞན་གྱི། །རྣམ་པར་དབྱེ་བ་འཐད་པ་མིན། །གང་ཕྱིར་ནམ་མཁའ་དེ་གཅིག་ཡིན། །མཁའ་གཅིག་བདག་ཉིད་རྣ་བ་ནི། །རྣ་མཆོག་ལེགས་པར་མ་བྱས་མེད། །དེ་ཕྱིར་རྟེན་གྱི་དབྱེ་བ་ཡིས། །ལེགས་པར་བྱས་པ་ངེས་མི་གནས། །དེ་བས་ན་རྟེན་གཅིག་ལ་ནི། །དབང་པོ་ལེགས་པར་བྱས་ཐོབ་ན། །དབང་པོ་གཅིག་པུར་སྨྲ་བ་ལ། །ལུས་ཅན་ཀུན་གྱིས་རྟོགས་བྱེད་འགྱུར། །སྐྱེས་བུ་ལུས་ཀྱི་ཕྱོགས་རྣམས་ལ། །རྣམ་པར་ཤེས་པ་སྐྱེད་འདོད་ཀྱི། །འོན་ཀྱང་ཁྱེད་ལ་མཁའ་གཅིག་ཕྱིར། །གཙོ་བོ་ཐ་དད་པར་འགྱུར་མིན། །དེ་ཕྱིར་དབང་ཕྱོགས་དང་བྲལ་ཡང༌། །མ་ལུས་པར་ནི་རྟོགས་བྱེད་པ། །ལུས་ཉིད་ལ་གནས་འཛིན་པས་ན། །དེ་ལྟར་སྨྲས་ཀྱང་འགལ་བ་ཡིན། །དེ་གཉིས་ན་ནི་རྒྱུ་ཡིས་ནི། །འོན་པ་ཉིད་སོགས་ལྟ་བུར་རྟོགས། །གཟུགས་ནི་མེ་ལོང་ལ་མངོན་ལྟ། །གཟུགས་བརྙན་དེ་ལྟར་མ་ཡིན་ནོ། །ཆུ་སོགས་ནང་དུ་ཞུགས་པ་འདི། །གཟུགས་ནི་རིང་དུ་གནས་པ་ཡིན། །རྟེན་གྱི་རྗེས་སུ་བྱེད་པ་ཡིས། །གཟུགས་བརྙན་ཆེ་ཆུང་དབྱེ་བ་དང༌། །ལྡན་གྱི་གཟུགས་ནི་མ་ཡིན་ཏེ། །དེས་ན་གཏན་ཚིགས་མ་གྲུབ་མིན། །
མི་མཐུན་པར་ནི་སྣང་བ་ཡང༌། །དོན་ཤེས་པར་ནི་འགྱུར་བ་ན། །གཟུགས་དང་སྒྲ་སོགས་སེམས་ཐམས་ཅད། །དོན་ཀུན་གྱི་ནི་ཡུལ་ཅན་འགྱུར། །སོར་མོས་ཅུང་ཟད་མནན་མིག་ལ། །གཅིག་ཀྱང་དུ་མར་སྣང་བ་གང༌། །དེ་ཡང་དེ་ལྟར་འཁྲུལ་པ་སྟེ། །ཡུལ་མེད་ཉིད་དུ་འདོད་པ་ཡིན། །འདིར་ནི་གཟུགས་བརྙན་འབྱུང་བ་ནི། །སྔར་ནི་གསལ་བར་བྱས་ཉིད་ཡིན། །གཅིག་ལ་ལྷན་ཅིག་གཉིས་མི་རུང༌། །ལུས་ཅན་ཐོགས་པ་དང་བཅས་ཕྱིར། །ཡུལ་རྣམས་དུ་མ་ལ་གནས་པར། །གཟུགས་བརྙན་ཡོད་པ་ཡིན་ན་ཡང༌། །ཆེ་ཆུང་སོགས་རིགས་དབྱེ་བ་ཡིས། །གཅིག་ཉིད་ཡོད་པ་མ་ཡིན་ནོ། །སྐྱེས་བུ་རྣམས་ལ་ངེས་པ་ཡང༌། །གང་ལ་འདི་ལྟར་འཇུག་པར་འགྱུར། །བདག་གི་སྟེང་ན་ཉི་གནས་ཞེས། །དེ་ནི་ངེས་པར་འཁྲུལ་པ་ཡིན། །གང་ཕྱིར་སྲོག་ཆགས་ཐམས་ཅད་ནི། །ཅིག་ཅར་དུ་ནི་ཉི་གཅིག་ཉིད། །མཐོང་བར་འགྱུར་བ་ཡིན་པས་དེ། །གཉིས་པ་ནམ་ཡང་མ་ཡིན་ནོ། །དེས་ན་ཉི་མའི་དཀྱིལ་འཁོར་ནི། །གཉིས་པ་ནམ་ཡང་ཡོད་མ་ཡིན། །སྣང་བ་མི་དམིགས་པ་ཡི་ཕྱིར། །དེས་ན་ཉི་མ་གཅིག་ཏུ་ངེས། །དེ་ལྟར་སྒྲ་ནི་གཅིག་ཉིད་དུ། །ཇི་ལྟར་ཡང་ནི་ངེས་པ་མིན།། རིམ་གྱིས་སམ་ནི་ཅིག་ཅར་ཡང༌། །དེ་ནི་དུ་མ་ཉིད་མཚོན་ཕྱིར། །གང་ཚེ་རྗོད་པར་བྱེད་མང་པོ། །ག་སོགས་ཡི་གེ་ཅིག་ཅར་དུ། །སྦྱོར་བར་བྱེད་པ་དེ་ཡི་ཚེ། །དབྱེ་བར་གསལ་བར་དམིགས་པར་འགྱུར། །རིམ་གྱིས་ཀྱང་ནི་སྦྱོར་བ་ལ། །དབྱེ་བ་མངོན་སུམ་འབའ་ཞིག་གིས།། རྟོགས་འགྱུར་མ་ཡིན་འོན་ཀྱང་ནི། །རྟགས་ལས་ཀྱང་བློའི་རིམ་སྣང་ཕྱིར། །སྒྲ་ཙམ་གསལ་བྱེད་རག་ལས་པ། །འདི་ཡི་དམིགས་བར་ཟད་འགྱུར་མོད། །འོན་ཀྱང་ཇི་ལྟར་དངོས་བ་ནས་པ། །འདི་ནི་འཛིན་པར་འགྱུར་བ་ཡིན། །དེ་ལྟ་མིན་ན་དེ་འཛིན་འདི། །དེ་དངོས་མི་སྣང་ལ་ངེས་འགྱུར། །ནམ་མཁའི་ཆ་ནི་མ་ལུས་པ། །སྒྲས་ནི་ཁྱབ་ཅིང་གསལ་འགྱུར་མིན། །དེས་ན་སྒྲ་ཙམ་ཡུལ་ཐ་དད། །ཐོས་པ་དེ་ཅིས་རྗེས་སུ་བྱེད། །རང་བདག་ཉིད་ནི་གསལ་བ་རུ། །གསལ་བར་འགྱུར་ཏེ་བུམ་སོགས་བཞིན། །འདི་དག་ཁྱེད་གཞུང་ཁས་བླངས་
ན། །རྒྱུ་མཚན་མེད་པར་བརྗོད་པ་ཡིན། །གསལ་བ་མེད་ཕྱིར་གསལ་བྱེད་རྣམས། །ནུས་པ་མེད་ཕྱིར་བསྒྲུབས་ཟིན་ཏོ། །དེ་འདི་ཡིན་ཞེས་བཤད་པ་ནི། །མངོན་སུམ་ཡིན་པར་བསལ་ཟིན་ཏོ། །དེའི་ཕྱིར་ཡུལ་དབྱེས་ཐ་དད་ཉིད། །ཤེས་བྱ་དེ་ནི་གནོད་མེད་ཡིན། །འགའ་ཞིག་ཡུལ་ནི་ཐ་དད་པར། །རིམ་གྱིས་འགྲོ་བར་བྱེད་པ་སྟེ། །སྐད་ཅིག་འཇིག་ཕྱིར་ཐ་དད་འགྱུར། །དེ་མིན་འགྲོ་བ་དང་ལྡན་མིན། །སྔ་མའི་ཡུལ་དང་མ་བྲལ་བའི། །རང་བཞིན་རྗེས་སུ་འཇུག་པའི་ཕྱིར། །བརྟན་པས་དེ་ནི་ཡུལ་གཞན་དུ། །ཕྱིན་པས་རིག་པ་མ་ཡིན་ནོ། །ནམ་མཁའ་ལ་ནི་མངོན་གསལ་ན། །རིགས་མིན་ནུས་པ་མེད་ཕྱིར་དང༌། །དབང་འདས་ཕྱིར་རོ་ས་ཁུང་ལ། །སྣང་བ་དེ་ནི་དེ་ལྟར་སྣང༌། །གཞན་ཡང་སྒྲ་ནི་ནམ་མཁའ་ལའང༌། །མངོན་པར་གསལ་བ་ཐ་དད་མིན། །བློ་ནི་གསལ་ཡིན་དེ་ཡང་ནི། །རྟག་འབྱུང་རྒྱུར་ནི་ཉེར་གནས་ཕྱིར། །གང་ཚེ་སྒྲ་ལ་གསལ་བྱེད་པ། །ཇི་ལྟར་ཡང་ནི་རིགས་པ་མིན། །དེ་ཚེ་གཞན་གྱི་ཁྱད་པར་ཅན། །སྒྲ་བློ་ལ་ནི་འཁྲུལ་པ་མེད། །དེ་ཕྱིར་རི་སོགས་ཐམས་ཅད་ནི། །སྒྲ་ཆོས་མིན་ཞེས་གནས་པར་འགྱུར། །གང་ཕྱིར་སྒྲ་ཙམ་གསལ་བྱེད་ཉིད། །ཡོད་ན་དེར་འགྱུར་དེ་ཡང་བསྩལ།། ཤིན་ཏུ་ཐ་དད་ཅན་དེ་དག །མཚུངས་པར་གཅིག་ཏུ་རྟོགས་པ་ལ། །ནུས་པ་ཅན་ཡིན་སྒྲ་དང་དེའི། །དོན་ཅེས་མང་དུ་སྔར་དཔྱད་ཟིན། །དེས་ན་དོན་དང་འབྲེལ་མཐོང་བས། །ཀུན་རྫོབ་ཏུ་ནི་སྒྲ་རྗོད་བྱེད། །འགྱུར་ཞིང་ཡང་དག་པ་རུ་ནི། །རྗོད་བྱེད་དེ་མིན་ཞེས་བསྒྲུབས་ཟིན། །སྒྲ་ལས་བྱུང་བའི་ཤེས་དེ་དག །ལོག་པར་སྣང་བར་འགྱུར་བ་ཡིན། །རིགས་དང་རང་གི་མཚན་ཉིད་སོགས། །བརྗོད་བྱ་རྗོད་བྱེད་མི་གནས་ཕྱིར། །དེས་འཁྲུལ་ཐ་སྙད་འདོན་པ་པོ། །ཡང་དག་པར་ནི་བ་ལང་སྒྲ། །ཐ་དད་ཡིན་ཡང་མཚུངས་བློ་ཅན། །གཅིག་ཉིད་ཡིན་པ་སྙམ་དུ་ཟིན།། དེས་ན་མང་དུ་མ་འབྲེལ་བར། །རྗོད་པར་བྱེད་པ་བྲམ་ཟེ་ཡིས། །སྒྲ་ཡི་ཁྱད་པར་མདུན་བྱས་པས། །གང་སྨྲས་དེ་ཀུན་གཞི་མེད་ཡིན། །འདི་ལྟར་ལག་བརྡ་ལ་སོགས་པ། །གཅིག་ཉིད་མིན་ཏེ་མྱུར་བུལ་སོགས། །དབྱེ་བས་ཐ་དད་བློ་ཡོད་ཕྱིར། །དེ་ཡི་གསལ་བའང་བསྩལ་
བྱས་ཟིན། །དེ་ལ་སྤྱི་གཅིག་རྗེས་འགྲོ་བ། །ཉེ་བར་མཚོན་པར་མི་འགྱུར་རོ། །བརྡ་ནི་དགག་པ་ལ་སོགས་པའི། །ཤེས་པའི་ཡན་ལག་ཏུ་དེ་འགྱུར། །སྒྲ་རྣམས་དངོས་སུ་ཕྱི་རོལ་གྱི། །དོན་རྟོགས་མིན་ཏེ་འབྲེལ་མེད་ཕྱིར། །དེས་ན་བརྗོད་པར་འདོད་པ་ནི། །འདི་དག་གིས་ནི་བསྟན་པར་གསུངས། །དེ་ཡི་འབྲས་བུ་ཉིད་དུ་ནི། །འདི་དག་མངོན་སུམ་མི་དམིགས་པས། །དེས་པ་ཡིན་ཕྱིར་དེས་ན་འདིར། །རྒྱུ་འབྲས་ཉིད་དུ་གསལ་བར་འགྱུར། །བརྡ་ཡི་རྒྱུ་དང་འབྲས་ངོ་བོ། །གང་གིས་ངེས་པར་བྱས་པ་ནི། །དེ་ཡིས་བརྗོད་འདོད་སྒྲ་དག་གིས། །རྟོགས་པར་འགྱུར་ཏེ་ལག་བསྐྱོད་བཞིན། །བརྗོད་འདོད་ལ་གནས་དོན་དང་ནི། །སྒྲ་རྣམས་ལ་ནི་རྒྱུ་འབྲས་ཀྱི། །བདག་ཉིད་ཅན་གྱི་འབྲེལ་པ་དེ། །བརྡ་ཡོད་ན་ནི་སྐྱེ་བར་འགྱུར། །དེ་རྣམས་ཀྱིས་ནི་འབྲེལ་པ་ནི། །དེས་ན་བརྡ་ལས་བྱུང་ཞེས་བརྗོད།། དེ་ཡིས་གསལ་བར་བྱེད་པ་འདི། །བརྡ་ཡིས་བརྗོད་ཅེས་དངོས་སུ་མིན། །རྒྱུ་དང་འབྲས་བུར་འགྱུར་བ་ཡི། །དངོས་པོ་ལས་ནི་དེ་གཞན་མིན། །དེ་དག་ཉིད་ནི་དེ་ལྟར་བཤད། །རྒྱུ་འབྲས་ཉིད་ཀྱི་འབྲེལ་པ་ཡིན། །དེ་དག་ཀྱང་ནི་རེ་རེ་ཡིས། །བདག་ཅག་ཉིད་དུ་རྨོངས་པས་རྟོགས། །དེས་ན་བརྡ་ཡི་ཐ་དད་ཀྱི། །དུས་ཀྱི་ཁྱད་པར་འདོད་པ་ཡིན། །ཡང་དག་པར་ནི་གཅིག་པུ་ཉིད། །འབྲེལ་པ་འདིར་ནི་ཡོད་རིགས་མིན། །ཐ་དད་དོན་རྣམས་མ་འདྲེས་ཕྱིར། །འབྲེལ་མེད་ཐ་མི་དད་ལ་ཡང༌། །གཞན་གྱི་གཞུང་ལུགས་མ་ཤེས་པས། །མི་རེ་རེ་ལ་བརྡ་རེ་འམ། །ཡང་ན་བཟླས་ནས་བརྗོད་པ་ཡིན། །ཞེས་བྱ་ལ་སོགས་གཞན་གྱིས་སྨྲས། །མིས་བྱས་ཉིད་ཕྱིར་དེ་དག་ལ། །བརྡ་འབྲེལ་ཡང་དག་པར་ཡོད་མིན། །དེ་ནི་དེ་ཡིས་གསལ་བྱས་ཕྱིར། །ཞས་བྱ་འབྲེལ་པ་ཉིད་དུ་འགྱུར། །འདིར་ནི་བཟླས་ནས་བརྗོད་པ་སྟེ། །གཞན་གྱིས་སོ་སོར་རྟོགས་པ་མིན། །དབང་ཕྱུག་ལ་སོགས་བཀག་ཉིད་ཕྱིར། །འབྱིན་པའི་ཐོག་མར་དེས་བྱས་མིན། །རེ་རེ་ལ་ནི་འབྲེལ་པ་གང༌། །དེ་ནི་ཐ་དད་སྐད་ཅིག་གིས། །འཇིག་ཕྱིར་མཚུངས་པའི་རྟོགས་པ་ནི། །ཐ་དད་པ་ལའང་འགལ་བ་མིན། །དེ་ཡི་ཡུལ་ཅན་
བློ་རྣམས་ནི། །རིམ་གྱིས་ཀྱང་ནི་སྐྱེ་འགྱུར་བ། །དེ་ལའང་རིམ་པ་གསལ་བར་སྨྲས། །གཞན་དུ་དེ་དག་རིམ་མེད་འགྱུར། །མང་པོ་རྣམས་ལ་ཅིག་ཅར་དུ། །བརྡ་བྱེད་པར་ནི་ཡོད་པ་ན། །བརྡ་ནི་ཐ་དད་པར་འདོད་མིན། །སྔོ་སོགས་སྐད་ཅིག་མ་བཞིན་ནོ། །སྨྲ་བ་པོ་ཡི་བློ་མི་གནས། །དེ་ཉིད་གཞན་ལོངས་སྤྱད་བྱ་ཡིན། །ཁྱད་པར་མེད་ཕྱིར་མི་འཐད་དོ། །སྔ་མའི་དངོས་ནི་མ་སྤངས་ཤིང༌། །ཁྱད་པར་མ་བྱུང་བ་ཡོད་ན་འང༌། །ཁྱེད་ཀྱི་གཞན་གྱི་རྣ་བ་ནི། །ལོངས་མི་སྤྱོད་པར་ཇི་ལྟར་འགྱུར། །རྟག་ཉིད་ཕྱིར་དང་ལྟོས་མེད་ཕྱིར། །ཆོས་དང་ཆོས་མིན་དབང་བྱས་པ། །གཏན་དུ་ནམ་མཁའ་རྣ་བ་ནི། །ཐམས་ཅད་ལོངས་སྤྱོད་མིན་པར་ཐལ། །ནམ་མཁའ་ལ་ནི་ནམ་དུ་ཡང༌། །ཆོས་མིན་ཆོས་ཀྱིས་ཕན་མི་འདོགས། །རྟག་པ་ཉིད་ཕྱིར་བྱ་བ་མིན། །འདི་ལ་དབང་བྱས་འདི་ཅི་ཞིག །སྔགས་དང་སྨན་སོགས་ནུས་པ་ཡིན། །ཡང་ལོངས་སྤྱད་བྱར་ཇི་ལྟར་འགྱུར། །རྟག་པ་ཉིད་ཕྱིར་དེ་དག་ལས། །དེ་ནི་ཁྱད་པར་ཐོབ་འགྱུར་མིན། །གལ་ཏེ་རྟེན་མིན་རྟག་ཡིན་ན། །སྐད་ཅིག་མི་རྟག་ཡིན་ཞེ་ན། །དེ་ཚེ་བདག་ལ་བོགས་མེད་པས། །འོན་པ་ལ་སོགས་མི་འཐད་དོ། །དེ་ལ་བོགས་ནི་ཡོད་བློ་སྟེ། །ནམ་མཁའ་ལ་ནི་དེ་ཡོད་མིན། །རྟེན་དང་འབྲེལ་པ་ཡོད་མིན་ཏེ། །རྟག་ཉིད་ཡིན་པས་ལྟོས་མེད་ཕྱིར། །དེས་ན་དེ་ཡི་སྒོ་ནས་ཀྱང༌། །འདིར་ནི་འོན་པ་སོགས་མི་འཐད། །ནམ་མཁའ་ཆ་ཤས་མེད་ཡིན་ལ། །རྟག་པ་ཉིད་ཀྱིས་འདི་མཚུངས་ཡིན། །ཡུལ་དེར་གནས་པར་འགྱུར་ཡང་ནི། །གལ་ཏེ་དེ་ཡང་སྐད་ཅིག་མ། །ཉིད་མིན་ན་ནི་དབང་ལས་ནི། །བཏོན་པར་རིགས་པ་མ་ཡིན་ནོ། །དེ་ལ་ཕྱིས་ཀྱང་ཕུལ་བྱུང་ནི། །ཅི་ཞིག་སྐྱེ་བར་འགྱུར་བ་ཡིན། །གང་གིས་དབང་ལས་བཏོན་པ་ནི། །དེས་སླར་ལོངས་སྤྱོད་ཐོབ་འགྱུར་མིན། །གང་ཚེ་རྣ་བ་དང་སྒྲ་ནི། །ལེགས་བྱས་དེ་ལྟར་འཐད་མིན་ཏེ། །ཐ་དད་ཐ་མི་དད་རྟོགས་པས། །ལེགས་པར་བྱ་བ་མི་འཐད་ཕྱིར། །ལེགས་པར་བྱས་པ་ཐ་དད་ན། །རྣ་བ་སྒྲ་ལེགས་བྱས་མི་འགྱུར། །དེ་དག་དང་ནི་ལེགས་བྱས་ལ། །འབྲེལ་པ་ཅུང་ཟད་ཀྱང་ཡོད་མིན། །ཐ་དད་བ་ལ་འབྲེལ་པ་ནི། །རྒྱུ་འབྲས་ཉིད་དུ་འགྱུར་བ་ཡིན། །དེ་ཡོད་
ན་ནི་འདི་རྟག་ཏུ། །འབྱུང་འགྱུར་རྒྱུ་རྟག་གནས་པའི་ཕྱིར། །ཐ་མི་དད་པའི་ཕྱོགས་ལ་ཡང༌། །དེ་འདྲར་འདི་ཡང་རྟག་པར་འགྱུར། །དེ་ཡང་བྱ་བར་འདོད་པ་མིན། །དེ་ལས་ཤེས་པ་རྟག་ཐལ་འགྱུར། །དེ་ཕྱིར་རླུང་ལ་སོགས་པ་ལ། །ནུས་པ་ངེས་པ་འཐད་མིན་ཏེ། །བྱ་བ་ཡི་ནི་ཡུལ་མེད་པས། །ནུས་པ་དང་ནི་མི་ལྡན་ཕྱིར། །དེས་ན་མངོན་གསལ་སྦྱོར་མེད་པས། །བཟུང་བ་སྐྱེད་པར་མི་འཁྲུལ་པ། །སྒྲ་ཡི་ཤེས་པ་འདི་འབྲས་འགྱུར། །བུམ་སོགས་གསལ་བའི་བློ་བཞིན་ནོ། །དེ་ཕྱིར་རྩོལ་དང་བརྗོད་འདོད་པས། །སྐྱེད་དང་མངོན་པར་གསལ་བ་ནི། །ནུས་པའི་བྱེ་བྲག་ཐམས་ཅད་དུ། །འབྲས་བུའི་དོན་གྱིས་མཚུངས་ངེས་འགྱུར། །ནམ་མཁའི་ཆ་ཉིད་སུན་དབྱུང་བར། །རིག་པ་འགའ་ཞིག་ཇི་སྙེད་པ། །ཕྱོགས་ཆ་ལ་ཡང་མ་ལུས་པར། །དེ་ནི་མཁས་པས་ཤེས་པར་བྱ། །ཡུལ་ཡང་ལེགས་པར་བྱེད་པ་ན། །དེ་ཡིས་གཅིག་ལ་ལེགས་བྱས་མིན། །སྤངས་ཉིད་ཕྱིར་དང་ནུས་ངེས་ཕྱིར། །དེས་ན་ཡུལ་ལེགས་བྱས་པ་མིན། །ཤེས་པ་སྐྱེད་རུང་ཉིད་མིན་ན། །ཀུན་གྱིས་སྒྲ་འདི་ཐམས་ཅད་དུ། །ནམ་ཡང་རྟོགས་པར་མི་འགྱུར་ཏེ། །དེ་ཤེས་པ་ལ་མི་མཁོའི་ཕྱིར། །ཤེས་པ་སྐྱེད་པར་ནུས་ཡིན་ན། །ཤེས་རྒྱུ་ཉིད་དུ་གནས་པའི་ཕྱིར། །ཀུན་གྱིས་སྒྲ་འདི་ཡུལ་ཀུན་དང༌། །དུས་ཀུན་དུ་ནི་རྟོགས་པར་འགྱུར། །དེ་ནི་ནུས་སམ་མི་ནུས་པ། །རང་བཞིན་གྱིས་གཅིག་བདག་ཉིད་གནས། །འགལ་བ་འམ་ནི་ལྷན་ཅིག་བྱེད། །སུ་ཞིག་གིས་དོན་འཇིག་བྱེད་ནུས། །འགའ་ཞིག་ལ་ནི་ཤེས་སྐྱེད་པར། །རུང་བ་ཉིད་དུ་འདི་འགྱུར་ཏེ། །དེ་ཕྱིར་སྐྱེད་པར་འགྱུར་བ་ན། །འདི་ནི་ཀུན་གྱིས་རྟོགས་འགྱུར་མིན། །འོན་ཀྱང་ངག་ལ་ཉེར་གནས་པ། །སྒྲ་ཙམ་གྱིས་གང་ལེགས་བྱས་འགྱུར། །དེ་རྣམས་ཉིད་ཀྱིས་སྒྲ་ཐོས་ལ། །རིང་ན་གནས་པས་ཇི་ལྟར་མིན། །ཉེ་བར་གནས་པའང་ལེགས་བྱས་ནི། །རྒྱུ་རུ་ཡོངས་སུ་བརྟག་པ་ཡིན། །རིང་དུ་གནས་ན་འང་དེ་དག་ལ། །ལེགས་པར་བྱས་ལའང་མཚུངས་པ་ཡིན། །གལ་ཏེ་སྒྲ་ཙམ་རྣམས་ལ་ནི། །ཁྱད་པར་ལེགས་བྱས་སྐྱེས་རྟོགས་ན། །དེ་ཚེ་སྒྲ་ནི་སྐྱེད་པ་རུ། །སུས་
ཀྱང་སྤོང་བར་བྱེད་ནུས་མིན། །སྒྲ་ལས་ཁྱད་པར་ཅན་ལེགས་བྱས། །དེ་ཐ་མི་དད་ཅན་ཡིན་ཏེ། །སྒྲ་ཤེས་བྱ་ཉིད་མི་འགྱུར་ཕྱིར། །དེས་ན་སྒྲ་ཡང་སྐྱེ་བར་འགྱུར། །ལན་ཅིག་སྒྲ་ནི་ལེགས་བྱས་ནས། །བདག་ནི་དེ་ནི་ནམ་དུ་ཡང༌། །སྤོང་བར་བྱེད་མིན་མི་རྟག་པར། །ཐལ་འགྱུར་ཕྱིར་ཏེ་རྟག་དམིགས་འགྱུར། །གཉིས་ཀ་ལེགས་བྱས་ཕྱོགས་ལ་ཡང༌། །ཉེས་པ་གཉིས་ཚིག་བདེན་པ་ཡིན། །གང་ཕྱིར་གང་རུང་མ་ཚང་མེད། །སྔ་མའི་རང་བ་ཞིན་རྗེས་འཇུག་ཕྱིར། །འདི་ལྟར་སྔར་ནི་གསལ་བྱེད་ཀྱིས། །རྣ་བའི་ཡི་གེ་ལེགས་བྱས་གང༌། །དེ་དག་འཇིག་མིན་འཕོ་ཐོབ་ཕྱིར། །དེས་ན་ཀུན་གྱིས་ཀུན་ཐོས་འགྱུར། །སྐྱེས་བུ་འགའ་ལ་ཐོས་རུང་བར། །རྣ་བ་ཡིག་ལེགས་བྱས་ཤེ་ན། །དེ་ཚེ་ཡིག་གཞན་རྟོགས་པ་པོས། །རྣ་བ་ལས་བྱུང་ཤེས་འགྱུར་མིན། །དེ་རིག་མི་ཡི་རྣམ་ཤེས་ནི། །རུང་བར་ལེགས་པར་བྱས་ཤེ་ན། །དེ་དག་ཉིད་ཀྱི་རྗེས་འཇུག་ན། །དེ་དག་ཀྱང་ནི་ཐོས་པར་འགྱུར། །ལྡོག་ན་ཁྱེད་ལ་ཡིག་རྣ་བ། །འདི་དག་གཞན་ཐོབ་ཅིས་མི་འགྱུར། །དེས་ན་དེ་དག་རྣམས་ལ་ནི། །རྟག་པ་ཉིད་འདོད་རྒྱུ་མཚན་མེད། །གང་ཕྱིར་གཟུགས་བརྙན་བློ་ཀུན་ནི། །དམིགས་པ་མེད་པར་གནས་པས་ན། །ཆུ་ལ་སོགས་པར་ཉི་མ་འོད། །གཅིག་ནི་དུ་མར་སྣང་བ་མིན། །ཅི་ཕྱིར་ཁྱེད་ཀྱི་ཕྱོགས་ལ་ཡང༌། །བློ་རྣམས་རྣམ་པ་མེད་པར་གནས། །ཕྱི་རོལ་དོན་ནི་རྣམ་པ་དང༌། །ལྡན་པ་ཞེས་ནི་ཁས་བླངས་ཡིན། །གཟུགས་བརྙན་དེ་ཡང་ཆུ་ཡི་ནི། །ནང་དུ་སྣང་བར་འགྱུར་བ་ཡིན། །ནམ་མཁའི་དཀྱིལ་ན་སྣང་བ་ཡི། །ཉི་མ་དེ་ལྟར་གནས་མིན་ན། །དེ་ནི་ཅི་ཕྱིར་དེ་ལྟར་སྣང༌། །འཁྲུལ་པས་ཤེ་ན་དེ་ཉིད་ཀྱིས། །དེ་ནི་གསལ་བར་དམིགས་མེད་དེ། །དེ་ཡི་ངོ་བོའི་དོན་མེད་ཕྱིར། །དེ་ཉིད་གཞན་དུ་རྟོག་ཅེ་ན། །འདི་ནི་ལེགས་པར་སྨྲས་པ་ཡིན། །འོན་ཀྱང་དེ་ཉིད་གཞན་ཡིན་ན། །དེས་ན་ཀུན་གྱིས་ཀུན་རིག་འགྱུར། །གལ་ཏེ་ཇི་ལྟར་གནས་སྣང་ན། །དེ་ནི་རྟོགས་པར་འགྱུར་བ་ཡིན། །རྣམ་པ་གཞན་དུ་དམིགས་པ་ན། །དེ་ནི་མཐོང་བར་ཇི་ལྟར་འགྱུར། །གང་ཕྱིར་རྣམ་བཅས་ཤེས་ལ་ཡང༌། །དེ་ཤེས་དོན་དང་མཐུན་པ་ཡི། །རྣམ་པ་ཡོད་པར་སྣང་བ་
དང༌། །ཤེས་པ་དེ་ནི་འཛིན་པར་རིགས། །བརྒྱུད་ནས་བཀོད་པར་འགྱུར་པས་ན། །འོག་ན་གནས་པ་རྟོགས་སུ་ཆུད། །གཅིག་ཉིད་ཡིན་པས་སྟེང་གནས་པ། །ཅི་སྟེ་འོག་ན་གནས་སྙམ་སེམས། །གལ་ཏེ་ཇི་ལྟར་ཉི་མ་གནས། །དེ་ལྟར་དེ་ནི་སྣང་འགྱུར་ན། །དེ་རྟོགས་པར་ནི་བརྟག་བྱ་ཡིན། །གཞན་དུ་མིན་ཞེས་བསྟན་ཟིན་ཏོ། །ཤར་དུ་སོང་འཇུག་པ་ཡིས་ནི། །ནུབ་ཕྱོགས་སོང་འཇུག་ལ་བཀོད་པས། །གདོང་མཐོང་བ་ན་འཁྲུལ་པ་ཡིན། །ནུབ་ཕྱོགས་ལྟ་བར་རྟོགས་པ་མིན། །གཟུགས་བརྙན་ཡུལ་ཅན་རྣམ་པར་ཤེས། །དེ་ནི་རང་བཞིན་དམིགས་མིན་ཏེ། །དེ་དང་མི་མཐུན་སྣང་བའི་ཕྱིར། །རོ་དང་སྒྲ་སོགས་སེམས་བཞིན་ནོ། །གང་ཕྱིར་མེ་ལོང་ཆུང་དུ་ལ། །གདོང་ནི་ཆུང་ངུར་སྣང་བར་འགྱུར། །ཤིང་སོགས་ཐུར་དུ་བལྟས་ནས་ནི། །ཆུ་གང་ཞུགས་པ་འབྲེལ་གཞན་མིན། །ཉན་པ་པོ་ཡང་གཞན་མ་ཡིན། །ངོ་བོ་གཅིག་ཏུ་ངེས་པ་ནི། །གཉིས་ཀ་ལ་ཡང་རྗེས་འཇུག་ཕྱིར། །སྨྲ་པ་པོ་ཡི་སྔར་མེད་པའི། །འབྲེལ་པ་ཉན་པོས་ཇི་ལྟར་རྟོགས། །དེ་ཡིས་སྔོན་དུ་གང་དམིགས་པ། །དེ་ཉིད་དེ་ཡིས་བྱས་པ་ཡིན། །གང་ཕྱིར་རྣམ་པ་གཅིག་རྟོགས་པའི། །བློ་ནི་དེ་ལ་འཇུག་པ་མིན། །དེ་ཕྱིར་སྒྲ་སོགས་ཐ་དད་ཀྱང༌། །གཅིག་པུ་ཉིད་དུ་དེ་ངེས་ཡིན། །བུམ་པ་སོགས་ཀྱི་སྤྱི་ཡང་ནི། །སྔར་ཉིད་གསལ་བར་བྱས་ཟིན་ཏོ། །འབྱུང་པོའི་མགུལ་ཆིངས་ལྟ་བུ་ནི། །སྤྱི་འགའ་ཞིག་ནི་སྣང་མི་འགྱུར། །འདི་ལ་སྤྱི་ཡིས་ཆུ་འཛིན་སོགས། །ནུས་པ་གྲུབ་པ་མ་ཡིན་ནོ། །གལ་ཏེ་སྤྱི་དང་དབྱེར་མེད་ན། །དེ་དག་ཀྱང་ནི་རྟག་ཉིད་འགྱུར། །ཐ་དད་འབྲེལ་མེད་སྐྱོན་ཡིན་ཏེ། །དེ་ལས་བྱུང་ན་མི་རྟག་འགྱུར། །དེ་ཕྱིར་སྤྱི་ལས་ཆུ་འཛིན་སོགས། །ནུས་པ་ཡོད་པར་རིགས་པ་མིན། །བུམ་སོགས་ལ་ནུས་ཐ་དད་ནའང༌། །ཉེས་པ་འདི་དག་ཉེས་པར་འགྱུར། །ཆུ་འཛིན་ལ་སོགས་དེའི་འབྲས་བུ། །རྟག་པ་ཁོ་ནར་ཐལ་བར་འགྱུར། །ནུས་པ་ཉིད་ནི་འབྲེལ་ཡིན་པས། །འདི་ཐ་དད་མི་འདོད་ཅེ་ན། །ནུས་ལས་དབྱེ་བ་མེད་པའི་ཕྱིར། །སྒྲ་དང་དོན་དག་གཅིག་ཉིད་འགྱུར། །ཐ་དད་ན་ཡང་དེ་ལ་ནི། །དེ་དག་དང་
འབྲེལ་འགའ་ཡང་མེད། །དེ་ལས་བྱུང་ན་དེ་ཉིད་མིན། །དངོས་ལས་གཞན་དུ་འགྲོ་ས་མེད། །གང་ཕྱིར་འབྲེལ་པ་ཅི་འདྲ་བ། །དེ་འདྲ་ཡོད་པར་གསལ་བྱས་པས། །དེ་ཕྱིར་འབྲེལ་པ་བརྗོད་དུས་སུ། །བ་ལང་སོགས་སྒྲ་བརྗོད་པ་ན། །འགའ་ཞིག་གིས་ནི་འབྲེལ་པའི་བློ། །དོན་རྟོགས་གཞན་གྱིས་དེ་བཞིན་མིན། །དངོས་ཀྱི་འབྲེལ་པ་ཡོད་པ་ན། །ཀུན་གྱི་དོན་ནི་རྟོགས་པར་འགྱུར། །རྟག་པའི་ནུས་པ་ཁོ་ན་ཡི། །འབྲེལ་པ་རུ་ནི་ཁྱེད་ཀྱིས་འདོད། །དེ་ཡང་ཚད་མེད་ལ་ངེས་པར། །དོན་རྟོགས་སྐྱེད་དམ་ཡང་ན་ནི། །ངེས་པར་ཆེད་མེད་པ་སྐྱེད་ན། །ཅི་ཕྱིར་ཀུན་གྱིས་དོན་མ་རྟོགས། །ཚད་བཅས་སྐྱེད་ནའང་རྒྱུ་མཚན་ཅི། །ངོ་བོ་ཉིད་ཀྱིས་དེ་ལྟ་བུར། །རང་བཞིན་ཞེ་ན་བརྡ་བཟུང་བའི། །སྔོན་དུའམ་དེ་ནི་བརྗོད་ན་ཡང༌། །རྟོགས་པ་པོ་ནི་གཅིག་ཉིད་ལ། །ཅི་ཕྱིར་རྣམ་ཤེས་འཇུག་པ་མིན། །དེ་ཤེས་སྐྱེད་པའི་ངེས་པ་ཅན། །དེ་ནི་ནུས་པ་གནས་ཕྱིར་རོ། །འོན་ཏེ་ནུས་པ་རྟོགས་བྱས་ཉིད། །དེ་ལ་སྐྱེད་པར་ངེས་བརྟགས་ན། །རྟོགས་པར་བྱས་དང་མ་བྱས་དང༌། །ཐ་དད་ཅེ་ན་རྟག་ཉིད་ཉམས། །གཅིག་ཉིད་ན་ནི་རྒྱུ་མཚན་ཅིས། །རྣམ་པར་དབྱེ་བ་འདི་བརྗོད་ཡིན། །གཞན་ཡང་ཐབས་གང་ཞིག་གིས་ནི། །ནུས་པ་ཤེས་པར་འདོད་པ་ཡིན། །དོན་གྱིས་གོ་བས་ཤེས་ཤེ་ན། །གང་ཕྱིར་རིགས་པ་འདི་ལྟར་གནས། །མངོན་སུམ་གྱི་ནི་སྒྲ་དང་ནི། །རྒན་རབས་བརྗོད་བྱ་མཐོང་བ་ཡིན། །ཉན་པ་པོ་ལ་རྟོགས་པ་ཉིད། །བྱ་བས་རྗེས་སུ་དཔག་ནས་ཤེས། །དེ་ལ་བརྟན་པའི་ནུས་པ་ནི། །གཞན་དུ་མི་འཐད་པ་ཡིས་རྟོགས། །དོན་གྱིས་གོ་བས་རྟོགས་འགྱུར་ཏེ། །ཚད་མ་གསུམ་ཅན་འབྲེལ་པའོ། །གཞན་དུ་འཐད་པ་ཁོ་ནའི་ཕྱིར། །ནུས་པ་རྟོགས་པར་མི་ནུས་ཏེ། །གང་ཕྱིར་བརྡ་ལས་བྱུང་སྒྲ་ཡིས། །དོན་རྟོགས་འཁྲུལ་པ་མེད་པ་ཡིན། །ནུས་པ་རྟག་ཉིད་ཕྱོགས་ལ་ནི། །བརྡ་སོགས་ཅུང་ཟད་ལ་ལྟོས་མེད། །དེས་ན་སྒྲ་དོན་གྱིས་རྟོགས་པ། །རྟག་ཏུ་འབྱུང་བར་འགྱུར་བ་ཡིན། །བརྡ་ནི་གཞན་མའི་ངོ་བོ་ཡིས། །ཀ་ལི་མ་རི་སོགས་སྒྲ་བཞིན། །སྒྲ་ལ་ངེས་པའི་ནུས་ཡོད་ཕྱིར། །དོན་གཞན་རྟོགས་པར་མི་འགྱུར་ཏེ། །གལ་ཏེ་སྣ་ཚོགས་དོན་གསལ་
ཕྱིར། །ནུས་པ་གཅིག་ཏུ་འདོད་པ་ན། །ཐ་དད་ཅེ་ན་སྒྲ་གཅིག་གིས། །ཅིག་ཅར་སྣ་ཚོགས་དོན་རིག་འགྱུར། །དོན་ནི་གསལ་བར་བྱེད་ནུས་པ། །རྟག་པ་ཁོ་ནར་གནས་པའི་ཕྱིར། །དེ་རྒྱུ་དོན་ལ་རྟོགས་པ་ཡང༌། །ཐམས་ཅད་ལ་ནི་གཏན་དུ་འགྱུར། །དེ་ལ་བརྡ་ལ་ལྟོས་པ་ཅན། །ནུས་པར་བརྟགས་པ་ཡིན་ཞེ་ན། །དེ་ནི་ཕན་འདོགས་ལ་ལྟོས་མིན། །མི་གཡོ་བས་དེ་ཕན་གདགས་མེད། །དོན་ནི་གསལ་བར་བྱེད་པའི་རྒྱུ། །བརྡ་ནི་མི་ལ་བརྟེན་པའི་ཕྱིར། །མིས་མ་བྱས་པའི་ནུས་པ་ཡང༌། །ལོག་པ་ཉིད་ནི་སྲིད་པ་ཡིན། །སྣ་ཚོགས་དོན་ནི་གསལ་བྱེད་པའི། །ནུས་པ་སྒྲ་གཅིག་ལ་ཡོད་ན། །མེ་ལ་སྤྱིན་སྲེག་ལ་སོགས་དོན། །ཐམས་ཅད་ཀུན་ལ་ཉེར་མཁོ་མིན། །དེ་འདོད་ཕྱིན་ཅི་ལོག་དོན་ནི། །གསལ་བར་བྱེད་པའང་སྲིད་པའི་ཕྱིར། །དེས་ན་སྒྲ་དོན་འབྲེལ་བརྟག་པར། །བརྟགས་པ་དོན་མེད་ཅན་ཡིན་ནོ། །བརྡ་ཡང་ལྟོས་པར་བྱེད་པ་ན། །བརྟགས་པར་ནུས་པའི་མཚན་ཉིད་ཅན། །རྒྱུ་མཚན་མེད་པའི་འབྲེལ་པ་འདི། །ཅི་ཕྱིར་ཡོངས་སུ་གསོ་བ་ཡིན། །གྲུབ་པ་ཉེར་གཞག་པ་ལ་ནི། །བརྡ་ནི་མ་རྟོགས་པར་བྱ་གཞན། །དོན་རྟོགས་པ་རུ་བྱེད་པ་ནི། །དེ་ལ་ཅུང་ཟད་ཀྱང་སྣང་མིན། །འདི་ལྟར་བརྡ་ནི་མེད་པ་ན། །ཐ་སྙད་འདི་ནི་མཐོང་མ་ཡིན། །དེ་ལས་འབྲེལ་པ་གྲུབ་ཅེ་ན། །བརྒྱུད་པ་འདི་ནི་དོན་མེད་འགྱུར། །སྐྱེས་བུ་འདོད་ཙམ་ལས་བྱུང་བའི། །བརྡ་ནི་འབའ་ཞིག་ལས་ཀྱང་ནི། །ཐ་སྙད་ཀྱང་ནི་རིགས་ཡིན་ཏེ། །དེས་ན་འབྲེལ་པ་མི་འགྲུབ་པོ།། གཞན་དུ་ཡང་ནི་འཐད་པར་ནི། །ཐ་སྙད་ལ་ནི་དོགས་པར་འགྱུར། །དབང་པོ་ལས་འདས་འབྲེལ་པ་ནི། །མི་རྣམས་ཀྱིས་ནི་རྟོགས་མ་ཡིན། །ཐམས་ཅད་ཀྱིས་ནི་མི་ཤེས་པས། །སྔ་མ་སྔ་མ་མ་གྲགས་ཕྱིར། །འབྲེལ་པ་མ་གྲུབ་ཅེས་བྱ་བས། །དེ་ལྟར་དེ་ཅིས་ཡོངས་སུ་བརྟགས། །དེས་ན་བ་ལང་རྟ་སོགས་ཀྱིས། །སྒྲ་ནི་རྟག་པའི་འབྲེལ་ལྡན་མིན། །བརྡ་ལ་ལྟོས་བཅས་ཉིད་ཀྱི་ཕྱིར། །ག་བི་ལ་སོགས་སྒྲ་བཞིན་ནོ། །རུང་བའི་བ་ལང་སྒྲ་ཡོད་ན། །དེ་ནུས་མིན་སྐྱེས་ཀྱིས་བཙུད་བྱས། །ག་བི་སོགས་ལས་བ་ལང་བློ། །རྩ་བའི་སྒྲ་རྗེས་
འབྲངས་ཤེ་ན། །དེ་མིན་ཉ་པ་སོགས་རྣམས་ཀྱིས། །ལེགས་པར་སྦྱར་བ་མི་རྟོགས་ཕྱིར། །རྩ་བ་སྒྲ་ཡིས་རྗེས་འབྲངས་པའི། །ཇི་ལྟར་དོར་གྱི་བློ་འབྱུང་འགྱུར། །དེ་ལྟར་སྒྲ་དོན་གྱིས་འབྲེལ་པ། །རྟག་པར་ཁས་བླངས་པར་མ་བྱས། །དེ་ནི་བརྡ་ལས་བྱུང་རིགས་ཡིན། རྣམ་པ་ཀུན་དུ་དེ་སྲིད་ཕྱིར། །ཡང་ན་ཡུལ་ཞིག་རིགས་རྒྱུད་ནི། །ཆད་པའི་ངོ་བོ་ཐིམ་པ་ཡིན། །སངས་རྒྱས་པས་འདོད་འདོད་མེད་གང༌། །ཚངས་ལ་སོགས་ལའང་ཡོད་པར་དོགས། །དེ་ཡོད་ན་ནི་རིག་བྱེད་ལ། །འཇིག་རྩའི་བློ་ནི་སྲིད་པ་ཡིན། །ལོག་པའི་གཏི་མུག་རྒྱགས་སོགས་པས། །ཕྱིན་ཅི་ལོག་རྟོག་གཞན་ཡང་སྲིད། །དེ་དང་འདྲ་བར་འགྱུར་བ་ཡིན། །རིག་བྱེད་གཞན་ཉིད་དུ་ནི་འགྱུར། །ཇི་སྲིད་གནོད་པ་ཅན་མ་བསྟན། །དེ་སྲིད་དེ་ནི་དོགས་པར་འགྱུར། །གཞན་དུ་བྱེད་པའི་འདོད་ཡོད་ཀྱང༌། །སྒྲ་ནི་འཇུག་པར་མི་འགྱུར་ན། །དེ་བཞིན་གལ་ཏེ་མི་རྣམས་ལ། །གཞན་དུ་བྱེད་འདོད་མི་སྐྱེ་ན། །དེ་ཚེ་རིག་བྱེད་འདི་གཞུང་དང༌། །དོན་ནི་གཞན་བདག་ཉིད་མི་རྟོགས། །གཞན་དུ་བྱེད་པའི་དོན་འཇུག་ན། །དོགས་པ་ལྡོག་པར་མི་འགྱུར་རོ། །སྐྱེས་བུ་ཐམས་ཅད་དག་གིས་ནི། །སྔར་གྲུབ་རིམ་པ་བཟུང་བ་ཡིན། །ཚིག་ངག་ཡི་གེའི་རིམ་པ་ཡིས། །རང་དབང་གིས་ཀྱང་བྱེད་པར་འགྱུར། །གཞན་དུ་ཁྱེད་ལ་རིག་བྱེད་བཞིན། །གཞུང་འགའ་བྱས་པར་མི་འགྱུར་རོ། །དེས་ན་དེ་བཞིན་དོན་མེད་པའི། །གཞུང་ཙམ་ལ་ཡང་བྱས་མེད་འགྱུར། །ཇི་ལྟར་གཞན་དག་གིས་བརྗོད་པ། །དེས་ན་དེ་ནི་བརྗོད་འདོད་ཅེས། །དེས་ནི་ངེས་པ་མ་ཡིན་ཏེ། །དེས་ན་འབྲེལ་བཞིན་ཐོག་མེད་ཡིན། །གཞན་གྱིས་བརྗོད་པ་བདག་གིས་བརྗོད། །བརྗོད་པར་འདོད་པ་དེ་འདྲར་འགྱུར། །མཚུངས་པའི་རྟོགས་པའི་འཁྲུལ་པ་ཡིས། །ལས་ཀྱི་བྱེ་བྲག་ཇི་བཞིན་ནོ། །དབྱངས་ལ་སོགས་པ་མི་མཐུན་ཕྱིར། །གཞན་གྱིས་བརྗོད་པ་བརྗོད་བྱ་མིན། །ཡི་གེའི་བདག་ཉིད་དུ་སྣང་ཕྱིར། །གསལ་བྱར་བྱེད་པའི་ཆོས་འདི་མིན། །དེས་ན་མི་རེ་ཡིག་ཐ་དད། །སྣང་བ་ཡིན་ཏེ་བུམ་སོགས་བཞིན། །དེ་ཕྱིར་ཐ་དད་གསལ་བས་ན། །དེ་ཡི་མཚན་མ་ཅི་སྟེ་དགག །རིགས་ཀྱིས་
བུམ་པ་ལ་སོགས་ལ། །ཐ་སྙད་ཉེ་བར་མཚོན་པ་ནི། །དེ་མེད་པས་ན་སྔར་བཀག་ཡིན། །གསལ་བ་དང་དེ་མི་ལྡན་ཕྱིར། །དེ་ཕྱིར་རྐན་ལ་སོགས་པའི་རིགས། །སྐྱེས་བུ་ཐམས་ཅད་ལ་གནས་མིན། །དེས་ན་སྨྲ་པོ་དེ་རྣམས་ཀྱིས། །སྒྲ་ཙམ་ཉེར་མཚོན་བསྐུལ་བ་མིན། །དེ་ཕྱིར་ཇི་སྲིད་ཡིག་ཡོད་པ། །སྒྲ་ཙམ་གྱི་རིགས་ཐ་དད་ནི། །སྒྲ་སྔོན་གསལ་བའི་རྒྱུར་འཇུག་པའམ། །ཡང་ན་གསལ་བ་དེ་ལྡན་མིན། །དེས་ན་རྐན་སོགས་ལྡན་པ་དང༌། །རྣམ་དབྱེའི་རིམ་པ་སྔོན་འགྲོ་ཅན། །ཁྱེད་ལ་སྒྲ་ཙམ་གོ་རིམས་དང༌། །རིགས་ཀྱིས་གཉིས་ཀའི་རྟག་ཉིད་མེད། །ཇི་ལྟར་སྐོར་བ་སོགས་རྣམས་ཀྱི། །ཆ་རིགས་སོགས་ཀྱིས་མཚོན་བྱས་མིན། །རིམ་པའི་རྗེས་འཇུག་འགྱུར་དེ་ལྟར། །རྐན་སོགས་སྒྲ་ཙམ་ཡིག་རྟེན་མིན། །ཕྲ་བ་ཉིད་ཕྱིར་གསལ་རྣམས་ལ། །རིགས་ཀྱི་ཆོས་ནི་ངེས་བཟུང་དང༌། །ཡང་དེའི་དབང་གིས་དོན་རྣམས་ལ། །ཁྱབ་ཉིད་ཡིན་ཡང་རིམ་མི་འཛིན། །དེས་ན་སྒྲ་ཙམ་གྱི་ཡོན་ཏན། །ཐམས་ཅད་རྟག་ཉིད་དུ་གནས་པ། །ཡི་གེའི་རྗེས་སུ་བྱེད་པ་ན། །དོན་གྱིས་དབྱེ་བ་རྟོགས་མ་ཡིན། །གཞན་ཡང་ཇི་སྲིད་ཡིག་ཡོད་པ། །སྒྲ་ཙམ་རིགས་ཐ་དད་སྒྲ་ལ། །མངོན་པར་གསལ་བའི་རྒྱུར་འཇུག་པའམ། །ཡང་ན་གསལ་བ་དེ་ལྡན་ན། །དེས་ན་གསལ་བྱེད་ཡོད་པའི་ཕྱིར། །སྒྲ་ནི་རྟག་ཏུ་དམིགས་པར་འགྱུར། །དེས་ན་ཁྱོད་ལ་གསལ་རིམ་གྱིས། །བདག་ཉིད་ཡི་གེའི་རིམ་རིགས་མིན། །གསལ་བ་དང་འབྲེལ་ངོ་བོ་རུ། །རིགས་རྣམས་གནས་པར་གྱུར་པ་ན། །གསལ་བ་རྣམས་ལའང་རྟག་པ་ཉིད། །བཟློག་པར་དཀའ་བར་ཐལ་བར་འགྱུར། །རིགས་དང་འབྲེལ་པའི་ངོ་བོ་རུ། །གསལ་བ་རྣམས་ཀྱང་གནས་ཡིན་ན། །རིགས་ལའང་མི་རྟག་ཉིད་དུ་ནི། །ཁྱེད་མི་འདོད་ཀྱང་ཐལ་བར་འགྱུར། །མངོན་པར་གསལ་བར་མི་འཐད་པར། །སྔར་ནི་བསྟན་པར་བྱས་ཟིན་པས། །དེ་ལྟར་རྟོགས་པར་བྱེད་པ་ནི། །ཁྱེད་ཀྱི་ཡི་གེའི་རྟོགས་བྱེད་མིན། །དུས་གཅིག་ཁྱབ་ཅིང་རྟག་པ་ཡང༌། །སྔར་ནི་བ་ཀག་པ་ཁོ་ན་ཡིན། །དངོས་པོ་ཀུན་ལ་ཡི་གེ་བཞིན། །འགའ་ཞིག་གིས་གསལ་བྱས་མ་ཡིན། །ཡི་གེ་རྣམས་ནི་གསལ་བྱས་ན། །འདི་ནི་རྟོགས་
པའི་ཡན་ལག་མིན། །གཞན་ལས་ཁྱད་པར་མེད་ཕྱིར་དང༌། །གཞན་དུ་མེད་ཕྱིར་དེ་རྟག་མིན། །དེས་ན་ཡི་གེའི་གོ་རིམས་དང༌། །ཐུང་དང་རིང་དང་ཆེས་རིང་དང༌། །དེ་དག་དུས་ཀྱི་རྣམ་དབྱེ་བས། །སྒྲ་ཙམ་ཁྱད་བར་ཅན་དུས་ཀྱི། །རྣམ་དབྱེ་དེ་དག་རིགས་མ་ཡིན། །དེ་ཕྱིར་ཁྱེད་ལ་རྟག་པ་ཡི། །དེ་འདྲའི་ཚིག་གི་ཆོས་ཡོད་མིན། །དེས་ན་ཡི་གེ་མི་རྟག་པར། །སྨྲ་ལ་ཚིག་ནི་མི་རྟག་གྲུབ། །གལ་ཏེ་གསལ་བྱེད་རྐྱེན་རྣམས་ཀྱིས། །འདིར་ནི་གསལ་བར་རིགས་འགྱུར་ན། །གཞན་གྱི་ཆོས་ཀྱང་ཡན་ལག་ཉིད། །རྟ་ཡི་ཤུགས་སོགས་བཞིན་དུ་འགྱུར། །སྒྲ་ཀུན་རྟག་པ་ཉིད་ལ་ནི། །དོན་གྱིས་གོ་བ་སུན་ཕྱུང་ཟིན། །མི་རྟག་ཀྱང་ནི་དོན་རྟོགས་པའི། །རྒྱུ་ཉིད་དུ་ནི་བསྒྲུབ་པར་བྱས། །གང་ཞིག་གང་གིས་བརྗོད་འདོད་ལས། །འབྱུང་བར་བརྗོད་འདོད་གཞན་པ་ལས། །ཡི་གེ་སྐྱེ་བར་འགྱུར་བ་ནི། །དེ་ཡི་རྗེས་ཐོགས་ལ་དེ་ཐོས། །སྔ་མའི་ཡི་གེ་རྟོགས་བྱུང་བའི། །ཡང་དག་རིག་པ་མྱུར་ཐོས་མིན། །མྱུར་དུ་ཐོས་པ་མ་ཡིན་པ། །དེ་ནི་དེ་དྲན་ལ་ལྟོས་ནས། །ཕྱི་ནས་རང་ཉིད་དྲན་པར་བྱེད། །དེ་དག་སྐྱེ་དང་འཛིན་པ་ཡི། །ཤེས་པ་དག་ལ་བརྟེན་ནས་ནི། །སྐྱེས་བུས་བྱས་པའི་ཡིག་གོ་རིམས། །འདི་ནི་སྐྱེད་དང་རྒྱུ་ཉིད་ཡིན། །དེ་ཕྱིར་ཚིག་རྣམས་སོ་སོ་ལ། །ཡིག་རྣམས་ཐ་དད་ཅེས་ནི་གསལ། །འདུལ་བསྙོན་ལྕུག་མ་ཤིང་ཏ་ལ། །ཞེས་སོགས་རིམ་པའི་བྱེ་བྲག་ཕྱིར། །དེ་དག་དེ་འདྲའི་རིམ་པ་ཡིས། །དོན་ཐ་དད་པ་སྟོན་བྱེད་ཡིན། །དེ་ཉིད་ཕྱིར་ན་གསལ་བ་ཡི། །དེ་ནི་དོན་རྟོགས་ཆེད་དུ་ནི། །སྒྲ་པ་རྣམས་ཀྱིས་ཡོངས་སུ་བརྟགས། །ཡི་གེ་ཁོ་ནས་རྟོགས་ནུས་པས། །དེར་ནི་བརྟགས་པ་དོན་མེད་ཡིན། །སྣང་བ་མ་མཐོང་བ་ཡི་ཕྱིར། །འདི་ནི་མེད་པར་ངེས་པར་འགྱུར། །འདི་ནི་མི་སྣང་བ་ཡིན་ན། །རྟགས་བཞིན་ཤེས་པར་བྱེད་པར་འགྱུར། །ཡོད་པ་ཙམ་གྱིས་དེ་ཤེས་ལ། །རྒྱུ་ཡི་ངོ་བོར་གནས་པའི་ཕྱིར། །དེ་ནི་ཤེས་བྱེད་འདོད་ཅེ་ན། །མི་བཞིན་རྟག་ཏུ་ཤེས་བྱེད་འགྱུར། །དེ་བཞིན་བརྡ་ནི་མ་གཏོགས་དང༌། །ཡི་གེ་རྣམས་ནི་མ་ཐོས་ཀྱང༌། །དེ་ལས་བྱུང་བའི་དོན་ཤེས་ནི། །འབྱུང་འགྱུར་ནུས་རྒྱུ་ཉེར་གནས་ཕྱིར། །འདི་ལྟར་འདི་ནི་རྟག་ཡོད་པ། །འདི་ལ་ལྟོས་པ་ཅུང་ཟད་མེད། །
སྒྲ་ཙམ་བརྡ་ཡིག་རྣམས་ཀྱིས་ཀྱང༌། །དེ་གསལ་མ་ཡིན་མ་མཐོང་ཕྱིར། །ཤེས་པ་གསལ་བ་ཡིན་ཞེས་བཤད། །དེ་ཡི་ཤེས་པ་རིག་མ་ཡིན། །དེས་ན་གསལ་བར་བྱེད་འདི་ལ། །བརྟག་པ་ཉིད་ཀྱང་དོན་མེད་འགྱུར། །སྒྲ་ཙམ་གྱིས་ནི་ལེགས་བྱས་ཅན། །ཡོངས་སུ་སྨིན་པ་སྐྱེད་པ་ན། །མཐའ་མའི་སྒྲ་དང་ལྷན་ཅིག་ཏུ། །སྒྲ་ནི་བློ་ལ་སྣང་བར་འགྱུར། །དེ་ལྟར་དེ་ཡང་དེ་ཡིས་འདིར། །རྒྱུ་མཚན་མེད་པར་བརྟགས་པ་ཡིན། །དེ་ལ་ཡང་ནི་སྒྲ་གཞན་ལ། །སྣང་བར་འགྱུར་བར་མཚོན་མ་ཡིན། །གང་དག་གིས་ཀྱང་གསལ་བ་ལ། །རིམ་གྱིས་འབྱུང་བ་སྒྲ་ཙམ་གྱིས། །སྐྱེ་བ་ཉིད་དང་གསལ་བ་ཉིད། །སེམས་པ་དེ་དག་ལ་རིམ་འགལ། །ཆ་ཤས་མེད་ལ་རིམ་གྱིས་ནི། །སྐྱེ་བ་དང་གསལ་འཐད་པ་ཡིན། །ངོ་བོ་གཅིག་ལས་ཕྱི་མེད་ཕྱིར། །དེ་དག་རྟག་ཏུ་འགྱུར་བ་ཡིན། །ཆ་ཤས་བཅས་པ་ཉིད་ཡིན་པས། །ཇི་ལྟར་ཡིག་རེས་དོན་སྟོན་མིན། །གསལ་ཆའང་ཅིས་ན་དེ་ལྟར་མིན། །མ་མཐོང་གསལ་ཆ་ཅི་ཕྱིར་བརྟགས། །གལ་ཏེ་སྒྲ་གཅིག་གིས་ལྷན་ཅིག །སྐྱེད་དང་གསལ་བར་བྱས་ཤེ་ན། །ཤིན་ཏུ་གསལ་གྲུབ་པ་ཡི་ཕྱིར། །ཡི་གེ་གཞན་ནི་སྦྱོར་བ་ཡིན། །གང་ཕྱིར་འདོགས་དཀའ་འདི་ཡི་ནི། །རང་བཞིན་དེ་ནི་དེ་ལྟར་བྱས། །མཚུངས་པའི་དུས་ལྡན་ཡིག་གཞན་གྱིས། །སླར་ཡང་མངོན་པར་གསལ་བར་བྱེད། །དེ་ཉིད་དམ་ནི་གཞན་གཅིག་གིས། །ཅི་ཕྱིར་བཟླས་ནས་ཡང་དང་ཡང༌། །གསལ་བ་བཟློག་པར་མི་བྱེད་དེ། །དེ་ལ་ཁྱེད་མེད་ཕྱིར་མིན་ནམ། །ཡུལ་དང་དབང་པོ་ལེགས་བྱས་པའི། །ངོ་བོ་གསལ་བ་འདི་ལ་ཡང༌། །ཡི་གེ་བཞིན་དུ་དགག་བྱ་སྟེ། །དེ་སྣང་སེམས་ནི་ཡོད་ན་ཡང༌། །དེ་ཡི་ཕྱིར་ན་མངོན་སུམ་གྱི། །རིམ་གྱིས་རྟོགས་ལ་ཕྱི་ནས་གང༌། །མ་ལུས་ཡི་གེ་རྣམ་ཤེས་པ། །དེ་ཡི་དོན་ཤེས་རྒྱུ་ཅན་ཡིན། །ཐ་མའི་ཡི་གེ་རྣམས་རྟོགས་ནས། །ལེགས་བྱས་ཐམས་ཅད་ཀྱིས་བྱས་པས། །ཡི་གེ་རྣམས་ལ་ཅིག་ཅར་དུ། །དྲན་པ་ཐམས་ཅད་སྐྱེ་བར་འགྱུར། །རིམ་གྱིས་ཤེས་པ་ཡོད་ན་ཡང༌། །སྨྲ་བ་པོ་ནི་ཐམས་ཅད་ཀྱིས། །དོན་རྣམས་ཐམས་ཅད་དག་ལ་ནི། །དེ་ནི་ཡིད་བསྡུས་ཤེས་པར་འདོད། །རིམ་པར་སྣང་བ་དེ་ཉིད་ནི། །ཁས་
ལེན་བྱེད་པ་མིན་ཞེ་ན། །བརྒྱ་ལ་སོགས་པའི་ངོ་བོ་ནི། །དེ་བསྡུས་ཤེས་པ་སྐྱེ་མི་འགྱུར། །གལ་ཏེ་དེས་ན་ཡིག་རིམ་པ། །རྣ་བ་ཡིད་ཀྱི་སྔར་ཤེས་པ། །སྐྱེ་འགྱུར་ཡང་ན་ཕྱི་ནས་ནི། །ཅིག་ཅར་དྲན་ཤེས་འབྱུང་བར་འགྱུར། །དེས་ན་ཡི་གེ་དེར་གནས་མིན། །རིང་ན་གནས་པ་རྟོགས་པའི་ཕྱིར། །དེས་ན་སྒྲ་ལས་དོན་གྱི་བློ། །འཇིག་རྟེན་པ་རྣམས་ཀྱིས་མཆོད་འགྱུར། །རྣམ་པ་དང་བཅས་ཤེས་པ་ནི། །ཐམས་ཅད་དེ་ནི་རིགས་པ་ཡིན། །དེ་ལྟ་མིན་ན་འཇིག་འགྱུར་བ། །དྲན་པ་ལ་ནི་ཇི་ལྟར་སྣང༌། །འོན་ཏེ་ཡི་གེ་མི་སྣང་བའི། །གསལ་བ་ཅན་སྔར་རྟོགས་འགྱུར་བ། །གནས་པ་ཁོ་ན་དྲན་ཞེ་ན། །དེ་མིན་གསལ་སྣང་ཐལ་འགྱུར་ཕྱིར། །གནས་པ་སྔར་ནི་བསལ་ཟིན་ཏེ། །དེ་ནི་གནས་ནའང་ཡི་གེ་ཡི། །ཉམས་མྱོང་ཤེས་པའི་དུས་ཉིད་དུ། །དྲན་པ་སྐྱེས་གྱུར་རྒྱུ་གཅིག་ཕྱིར། །བ་ལང་ཞེས་བྱའི་བློ་གཅིག་ཉིད། །ཁོ་བོ་ཅག་གིས་བཀག་བྱས་མིན། །དེ་འཛིན་དོན་གཅིག་ཉིད་དག་གིས། །སྒྲ་ལ་བློ་གཅིག་འགྱུར་བ་ཡིན། །བ་ལང་སྒྲ་ལ་དེ་ཡོད་ཀྱང༌། །མྱུར་ཕྱིར་བར་མཚམས་ཆུང་བའི་ཕྱིར། །ལྷ་སྤྱིན་ལ་སོགས་སྒྲ་ལ་ནི། །དབྱེ་བ་གསལ་བར་རྟོགས་པར་འགྱུར། །ཡི་གེ་ལས་བྱུང་དོན་བློ་དེ། །དེ་ཤེས་པ་ཡི་རྗེས་ལས་སྐྱེས། །དེ་འདྲ་དེ་ནི་དེ་ལས་བྱུང༌། །དུ་བ་སོགས་ལས་མེ་བློ་བཞིན། །ཡིག་ལས་ཐ་དད་སྒྲ་སྣང་བ། །ཤེས་པ་རྗེས་ཐོགས་འབྱུང་བ་ཅན། །དོན་གྱི་བློ་ནི་རིག་པ་མིན། །དེས་ན་སྒྲ་བཞིན་རྗོད་བྱེད་མེད། །འབྲས་བུའི་ཐ་སྙད་ཀྱི་ཡན་ལག །རྗེས་སུ་འགྲོ་དང་ལྡོག་པ་དག །ཐམས་ཅད་དུ་ནི་ངེས་བྱས་པ། །དེས་ན་ཁྱབ་པ་འདིར་ངེས་ཡིན། །ཡི་གེ་མི་རྟག་ཉིད་ལ་ནི། །རྗོད་བྱེད་ཉིད་དུ་བསྒྲུབས་ཟིན་ཏོ། །རྟག་པའི་སྒྲུབ་པ་ངོ་ཤེས་དང༌། །རྗེས་དཔག་དག་ཀྱང་བསལ་ཟིན་ཏོ། །མི་ཤེས་པས་རང་ཚིག་སོགས་དང༌། །འགལ་བར་རྩོད་པར་བྱས་པ་ཡིན། །གང་ཕྱིར་རྟག་པའི་ཕྱོགས་ལ་ནི། །ཁྱེད་ལ་དེ་ཀུན་འགྲུབ་པར་འགྱུར། །རྟག་པའི་ངག་ནི་ཡོད་པ་ན། །གསལ་བྱེད་རིགས་མིན་དཔྱད་ཟིན་ཏེ། །གོ་རིམས་ལ་སོགས་མི་ལྡན་དང༌། །རྟག་ཏུ་མ་དམིགས་པ་ཡི་ཕྱིར། །ཆོས་ཅན་ཐ་དད་མ་བརྟགས་པར། །གཞི་མ་གྲུབ་པར་གང་བརྗོད་དེ། །རྗེས་དཔག་མཚན་ཉིད་མི་ཤེས་
ཕྱིར། །གང་ཕྱིར་སྣང་འགྱུར་ཆོས་ཅན་ཡིན། །ཉ་བ་ལ་སོགས་རྣམས་ལ་ཡང༌། །མ་དཔྱད་རབ་ཏུ་གྲུབ་དོན་གང༌། །ཤེས་པ་ལ་ནི་གང་སྣང་བ། །དེ་ཙམ་ཆོས་ཅན་ཉིད་དུ་བཤད། །དེ་ཉིད་ལ་ནི་རྩོད་པ་འདི། །སྨྲ་པོ་རྣམས་ལ་འཇུག་པ་ཡིན། །འདོད་པས་བཀོད་པའི་བྱེ་བྲག་ལ། །རྩོད་པ་སུ་ལའང་ཡོད་མ་ཡིན། །དེས་ན་ཁྱད་པར་མེད་བསྟན་པ། །ཁྱད་པར་དུ་ནི་རྣམ་རྟོག་པ། །རྗེས་སུ་དཔག་པ་ཐམས་ཅད་ཀྱི། །འཇུག་པ་ཁོ་ན་ལ་གནོད་འགྱུར། །བསྐུལ་པ་ལས་ནི་སྐྱེས་པའི་བློ། །ཚད་མ་ཡིན་ཏེ་སྐྱོན་བྲལ་བའི། །རྒྱུ་རྣམས་ཀྱིས་ནི་སྐྱེད་ཉིད་ཕྱིར། །ཞེས་བྱ་སོགས་ཀྱང་རྣམ་དཔྱད་བྱ། །དག་ཅིང་རྟག་པའི་དོན་འབྲེལ་པའི། །བསྐུལ་བའི་ལས་ནི་སྐྱེས་པའི་བློ། །ཕྱོགས་ཡིན་ཞེ་ན་གཞན་བརྟེན་ནས། །གཞི་མ་གྲུབ་པར་ཐལ་བར་འགྱུར། །དེ་ཡི་གནས་སྐབས་རྟག་པ་ཉིད། །དེ་ལས་གཞན་པ་མི་རྟག་ཡིན། །དེ་ཡི་གནས་སྐབས་ཉིད་ལོག་ན། །ཅི་ཞིག་གནས་པར་འདོད་པ་ཡིན། །དབང་པོ་འབའ་ཞིག་གིས་བཟུང་ཉིད། །གཏན་ཚིགས་སུ་ནི་འདིར་རྟོག་ན། །སྔར་གནོད་བྱས་པའི་རིགས་ཀྱིས་ནི། །འཁྲུལ་པར་རྟོག་པ་མ་ཡིན་ནོ། །རང་གི་སྣང་བའི་དབང་ཤེས་ལ། །རྒྱུ་ཡིན་དབང་པོས་བཟུང་བར་འདོད། །རྟག་པ་རྒྱུ་ཉིད་མ་ཡིན་པར། །དིར་ནི་རབ་ཏུ་བསྒྲུབས་ཟིན་ཏོ། །དེ་འདྲའི་དོན་ལ་རྒྱུ་ཉིད་ནི། །ཐམས་ཅད་ལ་ཡང་གྲུབ་པ་ཡིན། །དེ་ལྟ་མིན་ན་དུ་སོགས་ལའང༌། །ཀུན་ལ་རྣམ་པར་བརྟག་འདི་མཚུངས། །ཁོ་བོ་ཅག་ལ་ཀུན་རྫོབ་པའི། །སོ་སོར་བརྟགས་འགོག་ལ་སོགས་པ། །བརྩལ་མ་ཐག་འབྱུང་ཤེས་འབྲས་བུ། །རྩོམ་བྱེད་ཉིད་དུའང་གྲུབ་པ་མིན། །འགོག་པ་དག་ནི་འཇིག་བདག་ཉིད། །འདོད་མིན་གང་ཕྱིར་ཟག་བཅས་པས། །སོ་སོར་བརྟགས་པས་འགོག་པ་གང༌། །བྲལ་བ་འང་སོ་སོ་སོ་སོ་ཡིན། །སྐྱེ་བ་གཏན་དུ་གེགས་བྱེད་པ། །འགོག་གཞན་སོ་སོར་བརྟགས་མིན་པས། །དེ་ཕྱིར་གྲུབ་མཐའ་མི་ཤེས་པ། །ལོག་པའི་ང་རྒྱལ་གྱིས་ནི་བསླད། །རང་བཞིན་མེད་ཕྱིར་འགོག་དང་མཁས། །བརྩལ་མ་ཐག་ལས་བྱུང་བ་མིན། །གྱོ་མོ་སྣང་བའི་ཚོགས་སོགས་ནི། །དེ་ལྟར་ཤེས་པའི་རྒྱུ་མཚན་ཡིན། །དོན་གཅིག་རང་
གི་རང་བཞིན་ལ། །ངོ་བོ་གཉིས་ཉིད་གསལ་བར་བྱས། །དེ་ཕྱིར་རིགས་ཞེས་བྱ་བའི་སྒྲ། །རྟག་པ་བུམ་འདི་ལ་གྲུབ་མིན། །དེ་ཡི་གནས་སྐབས་ཉིད་སྤོང་ཙམ། །མི་རྟག་བསྒྲུབ་བྱ་ཉིད་དུ་ནི། །འདོད་པ་ཡིན་ཏེ་མར་མེ་སོགས། །དེ་ལ་དཔེ་ནི་གསལ་བ་ནི། །འབར་སོགས་སྐད་ཅིག་རེ་རེར་ཡང༌། །འཇིག་ཉིད་མ་གྲུབ་མ་ཡིན་ནམ། །དེར་ནི་ཆ་ཤས་ཕྲ་མོ་ནི། །ཡུལ་གཞན་དུ་ནི་སོང་བ་ཡིན། །སྡོང་བུ་ཕྱོགས་ལ་མང་དུ་ནི། །འབར་བ་བསྡུས་ནས་གནས་པ་ཡིན། །དེ་ལ་ཇི་སྲིད་གྱེན་སོང་བ། །དེ་སྲིད་འབར་བ་ཞེས་རྟོགས་ཡིན། །དེ་ཡང་འདས་ནས་གང་སོང་བ། །དེ་ནི་འོད་ཀྱི་བདག་ཉིད་ཡིན། །དེ་རྗེས་ལ་ནི་གང་སོང་བ། །དེ་ནི་ཕྲ་ཕྱིར་ངེས་བཟུང་མིན། །ཡན་ལག་ཕྱི་མས་ལམ་བཀག་པས། །ནང་མ་འགྲོ་བར་མི་འགྱུར་རོ། །ཇི་ལྟར་ཕྱི་མས་གོ་ཕྱེ་བ། །ནང་མ་དེ་ལྟ་དེ་ལྟར་འགྲོ། །དེས་ན་འགྲོ་བ་ཡིན་ཡང་ངེས། །རྩྭ་སོགས་སྲེག་པར་མི་བྱེད་དོ། །ཞེ་ན་དེ་ནི་བརྟགས་པ་ཙམ། །ཚད་མ་མ་སྨྲས་པ་ཡི་ཕྱིར། །གཞན་ཡང་ནུས་མ་ཉམས་དེ་དག །རྩྭ་དང་རས་བལ་སོགས་ཕྲད་ན། །སྲེག་པར་བྱེད་པར་ཐལ་འགྱུར་འདི། །སྔ་མ་བཞིན་དུ་ལྡོག་མི་འགྱུར། །གཞན་དུ་ནུས་དང་མི་ནུས་པའི། །གང་ཚེ་རང་བཞིན་དབྱེ་ཡོད་ན། །དེ་ཚེ་རྟག་དངོས་དེ་དག་ལ། །དེ་ནི་ཇི་ལྟར་ཡོད་པར་འགྱུར། །འབྲེལ་པ་ལ་ཡང་རྟག་པ་ཉིད། །སྔར་ནི་བཀག་པ་བྱས་པ་ཡིན། །དེས་ནི་འབྲེལ་བྱར་མི་འདོད་པའི། །རིགས་པས་ངག་རྟག་རིགས་མ་ཡིན། །ཇི་ལྟ་བུ་ཡི་ངག་ལ་ནི། །རྟག་པ་ཉིད་དུ་ཁས་བླངས་བྱས། །ཡི་གེ་ཙམ་གྱིས་བདག་ཉིད་དམ། །ཡིག་རིམ་ཡང་ན་ཐ་དད་ཡིན། །རིམ་མེད་ཡི་གེ་རྣམས་ལ་ནི། །བརྗོད་པ་ཉིད་མེད་དེ་ཡིས་ནི། །དེ་དག་དེ་འདྲའི་ངག་མ་ཡིན། །དེ་དག་ལ་ནི་རིམ་པའང་མེད། །ཁྱབ་པའི་ཕྱིར་དང་རྟག་ཉིད་ཕྱིར། །དེ་དག་ལ་ནི་ཡུལ་དུས་རིམ། །མེ་ཏོག་འབྲས་བུ་སོགས་དབྱེ་བཞིན། །ཡིག་བྲིས་བཞིན་དུ་འཐད་མ་ཡིན། །དེ་དག་རང་བཞིན་རིམ་ཡོད་པ། །མཚོ་རོ་ཞེས་བྱ་ཉིད་སྲིད་ན། །ཕྱི་ནས་རོ་མཚོ་སོགས་མི་འགྱུར། །བརྟན་པའི་རིམ་པ་དང་འགལ་ཕྱིར། །གང་ཕྱིར་ཡི་གེ་རྣམ་རྟག་པར། །བརྗོད་པར་བྱས་པ་དེ་ཡི་
ཕྱིར། །རིམ་གཞན་གནས་པའི་རོ་མཚོ་སོགས། །རིམ་བ་གཞན་ལ་སྐྱེ་མི་འགྱུར། །དེ་ལྟར་མིན་ཁྱོད་ཀྱིས་སྨྲས་པའི། །ངོ་ཤེས་པ་ནི་རྟག་པ་དང༌། །གཅིག་ཉིད་སྒྲུབ་པར་བྱེད་པ་པོ། །འཁྲུལ་བ་ཅན་དུ་འགྱུར་བ་ཡིན། །ཐ་དད་པ་ལའང་འཇུག་པའི་ཕྱིར། །གསལ་བའི་རིམ་བའང་ངག་མིན་ཏེ། །རྟག་པའི་བཀག་པ་བསལ་བྱས་ཕྱིར། །ངག་ནི་འཐད་པ་མ་ཡིན་བས། །དེ་ཕྱིར་རྟག་པ་ཉིད་མི་རིགས། །ཇི་ལྟར་འཕེལ་བ་ལ་སོགས་སྒྲ། །འདོད་པས་བཀོད་པའི་དོན་ཅན་རྣམས། །མཐོ་རིས་མཆོད་སྤྱིན་ལ་སོགས་སྒྲ། །དེ་བཞིན་དུ་ཡང་བསྲིངས་པ་ཡིན། །རང་ཉིད་ཀྱིས་བྱས་གཏམ་ངོ་བོའི། །ཟློས་གར་གཏམ་རྒྱུད་ལ་སོགས་པ། །རྟག་པའི་སྒྲ་དང་དོན་འབྲེལ་པ། །བརྗོད་འདོད་ཡང་དག་པར་ཡོད་མིན། །དེ་ལའང་ནུས་རྟག་ཉིད་ཡོད་དེ། །ངེས་སྦྱོར་མི་རྟག་ཉིད་ཡིན་པས། །དེར་གནས་མི་རྟག་ཉིད་ཀྱི་ཕྱིར། །ནུས་ལ་འཁྲུལ་འཇུག་འགྱུར་ཞེ་ན། །དེ་ལ་སུན་དབྱུང་ཕྱི་རོལ་དོན། །མེད་པ་ཉིད་ནི་མ་ཡིན་ནམ། །དོན་གང་ལ་ནི་ནུས་པར་བརྟགས། །རྣམ་རྟོག་གཟུགས་བརྙན་ལ་ཞེ་ན། །དེ་བཞིན་རིག་བྱེད་ལ་ཡང་མཚུངས། །དབང་པོ་ལས་འདས་དོན་འབྲེལ་པའི། །ནུས་པ་སུ་ཞིག་གིས་རྟོགས་འགྱུར། །དེ་ཕྱིར་རིག་བྱེད་ལ་ངེས་སྦྱོར། །མི་ལ་རག་ལས་པའང་རིགས་མིན། །རྒན་པོ་ལ་ཡང་དེ་རྟོགས་མིན། །དེ་དག་མི་ཤེས་རང་བཞིན་གནས། །སྐྱེས་བུ་ལ་བརྟེན་བཤད་པ་ལས། །རྟོགས་པ་དེ་ནི་སྲིད་པ་ཡིན། །བྱས་པའི་ལུང་ལ་བརྒལ་བརྟགས་པ། །འདི་ནི་མཚུངས་པ་མ་ཡིན་ནམ། །དེར་མིན་དེ་ནི་དད་པས་སམ། །དོན་ལ་ཐེ་ཚོམ་ཟ་བས་འཇུག །མངོན་སུམ་དང་ནི་རྗེས་དཔག་པས། །ཡུལ་ནི་རྣམ་པར་བརྟགས་ཡོད་པས། །རིག་བྱེད་སྒྲ་ནི་དེ་ལྟ་མིན། །གང་ཕྱིར་དེ་ནི་རང་ལས་ཤེས། །བྱས་པའི་དོན་ཅན་གཏམ་གྱི་ཆོས། །མ་མཐོང་ངོ་བོ་ཐོས་ལས་མཚུངས། །དེ་ལྟར་རིག་བྱེད་མ་འབྲེལ་པ། །གཞན་དག་གིས་འདིར་སྨྲས་པ་ཡིན། །སྒྲ་དོན་ཐོག་མེད་སྤང་བྱས་ནས། །འབྲེལ་པ་ཐོབ་མེད་རྒྱུ་མཚན་ཉིད། །གཞན་ཡོད་མ་ཡིན་དེས་ན་འདི། །རིག་བྱེད་ལ་ནི་འབྲེལ་སོགས་མེད། །ཐབས་དང་བྲལ་བ་ཉིད་ཀྱིས་ན། །འབྲེལ་པ་བྱར་མེད་རྗེས་སུ་དཔག་
བཤད་པ་བྱར་མེད་རྗེས་དཔག་ནི། །མཐོང་བ་ཉིད་ཀྱིས་འགལ་བར་འགྱུར། །རྒན་པོ་རྣམས་ཀྱི་རྟོགས་པ་ནི། །ཡང་དང་ཡང་དུ་སྣང་འགྱུར་བ། །ཐབས་ཡིན་ཞེས་པར་རྟོགས་བརྟེན་ནས། །དེ་ཉམས་པ་ནི་མི་འགྲུབ་ཅི། །གལ་ཏེ་རིག་བྱེད་དོན་ལ་ངེས། །རྒན་པོ་རྣམས་ལས་མི་སླུ་བར། །གྲུབ་པར་གྱུར་ན་དེ་དག་ཀུན། །དེ་ལྟར་འགྱུར་གྱི་གཞན་དུ་ཉམས། །ཐམས་ཅད་བསྡུས་པའི་ཁྱབ་པ་ནི། །གྲུབ་ཕྱིར་འདུས་པ་ཅན་ཉིད་ཀྱི། །རྟགས་ལ་མི་མཐུན་སྒྲུབ་པ་ནི། །ཅུང་ཟད་སྲིད་པ་མ་ཡིན་ནོ། །དོན་བཅས་རྣམ་དབྱེའི་དོན་ཅན་གྱི། །ཁྱད་པར་རིམ་པ་དང་ལྡན་པ། །ཚིག་དང་ངག་གི་ཚོགས་ཞེས་བྱ། །ཡི་གེ་ཁོ་ན་དེ་ལྟར་བཤད། །དོན་བཅས་རྣམ་དབྱེའི་དོན་ཅན་གྱི། །ཁྱད་པར་རིམ་དང་ལྡན་ཉིད་ནི། །སྐྱེས་བུས་མ་བྱས་ལ་བཀག་ཟིན། །དེས་ན་ཁྱབ་པ་གནོད་མེད་ཡིན། །རིག་བྱེད་འདོན་པ་བརྗོད་ཉིད་ལ། །དེ་ལྟར་ཁྱབ་པ་ངེས་པ་མེད། །དེས་ན་སྒྲུབ་པ་འདི་ལ་ནི། །ལྡོག་ལ་ཐེ་ཚོམ་བསལ་བར་ཡོད། །དེ་ལྟར་རིམ་པ་བྱེད་པ་ཡི། །མི་ནི་ནུས་མེད་ངེས་བྱས་ན། །འདིར་ནི་ཁྱབ་པ་འདི་འགྲུབ་སྟེ། །དེ་ནི་ངེས་པར་མི་ནུས་སོ། །མ་ལུས་མི་ཡི་ཆོས་རྣམས་ནི། །མངོན་སུམ་དུ་ནི་བྱས་ཡིན་ན། །ངེས་པ་ཁོ་ན་སྐྱེ་བ་ཡིན། །འདི་ནི་ཐམས་ཅད་ཁྱེད་ལ་དད། །རིག་བྱེད་སྐྱེས་བུས་བྱས་ཉིད་དུ། །ཡོད་པར་གསལ་བ་སྲིད་པ་ཡིན། །འདོད་པས་ལོག་པར་གཡེམ་པ་དང༌། སྲོག་ཆགས་འཚེ་དང་བརྫུན་བཤད་པ། །བརྗོད་དཀའ་ཉིད་དང་ཐུང་བརྗོད་ཉིད། །འབྲེལ་མེད་ཉིད་དང་མི་སྙན་སོགས། །རིག་བྱེད་ཆོས་རྣམས་ཚད་སྨྲ་པའི། །ཚིག་ལ་ཡང་ནི་ཡོད་པར་སྣང༌། །དུག་སེལ་ནུས་པ་ལ་སོགས་པ། །བདེན་པ་ཅུང་ཟད་གང་སྣང་བ། །དེ་ནི་མཁའ་ལྡིང་བྱ་སོགས་སྣང༌། །གཞན་ཡང་རྣམ་པ་འདི་ཡིས་ནི། །སྐྱེས་བུས་བྱས་པ་ཅུང་ཟད་མེད། །གང་ཕྱིར་བདེ་གཤེགས་ཀྱིས་གསུངས་པའི། །གསུང་ལ་འང་དེ་ལྟར་རྗེས་དཔག་ནུས། །དེ་ཡིས་མངོན་གསལ་བྱས་དངོས་ཕྱིར། །དེས་བྱས་པ་ཞེས་བརྗོད་པར་བྱ། །བྱེད་པ་དྲན་པ་དེ་ལ་ཡང༌། །དེ་ནི་དོན་བརྗོད་རྒྱུ་མཚན་ཉིད། །དེ་ལྟར་གཞན་མི་འདོད་ཅེ་ན། །རིགས་པ་མཚུངས་ཕྱིར་ཅེས་མི་འདོད། །དེ་ལྟར་གཞན་མི་འདོད་པར་ཟད། །རིགས་པས་དེ་བཞིན་དོགས་པ་ཡིན། །ཐམས་
ཅད་དུ་ནི་སྐྱེས་བུ་རྣམས། །ཕལ་ཆེར་བརྫུན་ནི་སྨྲ་བ་ཡིན། །ཇི་ལྟར་ད་ལྟར་ཡིད་མི་ཆེས། །དེ་བཞིན་འདས་པའི་དོན་བསྟན་ལ། །དེ་ལྟར་དེ་ཡི་ཁྱེད་སྨྲས་པའི། །རིགས་པར་གཞུང་ལུགས་འགའ་ལ་ཡང༌། །བྱེད་པོ་ཅུང་ཟད་གྲུབ་མིན་ཏེ། །རང་ཉིད་བྱས་པར་བརྗོད་ན་ཡང༌། །དེས་ན་སྐྱེས་བུས་མ་བྱས་ལ། །བདེན་པར་རེ་བ་འདི་དོར་ཅིག །གང་ཕྱིར་རིག་བྱེད་དོན་འགལ་བའི། །དོན་ནི་དེ་དག་ལས་བསྟན་ཡིན། །གཞན་ཡང་ཐོག་མེད་གྲུབ་ན་ཡང༌། །དེས་ཀྱང་མིས་མ་བྱས་མི་འགྲུབ། །དེ་ལས་མ་བྱས་པར་འགྲུབ་ན། །ལུང་གཞན་རྣམས་ཀྱང་མ་བྱས་འགྱུར། །འདི་ལྟར་པར་སིག་ལ་སོགས་པའི། །ཐ་སྙད་རྣམས་ནི་གཞན་བརྟེན་པའི། །ཆད་པར་སྨྲ་བའི་གྲུབ་མཐའ་ཡང༌། །གཞན་གྱིས་འདུས་བྱས་པ་ལས་བྱུང༌། །དེ་འདྲའི་མ་བྱས་ཉིད་གྲུབ་ཀྱང༌། །ཡོད་ལན་ན་ཏན་ཅི་ཞིག་ཡོད། །ཁྱེད་ཀྱི་འབད་པ་མ་ལུས་ནི། །ཡང་དག་དོན་གྲུབ་རྒྱུར་བཅས་ཡིན། །དུས་ཉིད་སྐྱེས་བུ་ཉིད་སོགས་ལ། །སྔར་བཞིན་ལྡོག་ལ་ཐེ་ཚོམ་ཟ། །སྐྱེས་བུ་རྣམས་ལ་བྱེད་པ་ཡི། །ནུས་པ་མེད་པར་མ་བསྒྲུབས་ཕྱིར། །གསལ་བ་བཀག་པར་བྱས་ཉིད་ཕྱིར། །སྨྲ་པོ་བྱེད་པོར་ཤེས་པར་གྱིས། །དེ་ཕྱིར་སྦྱོར་བ་གཉིས་པོ་ཡང༌། །དཔེ་ནི་བསྒྲུབ་བྱས་སྟོང་པར་སྨྲས། །མིས་བསྟན་པ་ལ་ལྟོས་ཕྱིར་དང༌། །བྱས་པ་ཉིད་དུ་བསྒྲུབ་བྱས་ཕྱིར། །རང་དོན་སྨྲ་པོ་མ་ལྟོས་ཉིད། །ཆོས་ཅན་དཔེ་དག་ལ་ནི་མེད། །ངག་ལ་རྟག་ཉིད་སྤངས་པས་ན། །ཆོས་ཅན་དང་ནི་དཔེ་དག་ལའང༌། །རྟག་པའི་ངག་ལས་བྱུང་ཉིད་ནི། །གསལ་བར་མ་གྲུབ་པར་རྟོགས་མིན། །འདི་ལྟར་བསྐུལ་བ་སྐྱེས་བུ་ཡིས། །མ་བྱས་ཉིད་དུ་མ་ངེས་པས། །གཏན་ཚིགས་ཕྱི་མ་རྣམས་ལ་ཡང༌། །ཐེ་ཚོམ་ཟ་བར་གྲུབ་སྐྱོན་འགྱུར། །སྐད་ཅིག་མས་འཇིག་གསལ་བསྒྲུབས་པས། །རེ་ཞིག་ཐོས་པ་བརྟག་པ་ཡིས། །རང་གི་ངོ་བོ་ལ་གནོད་པར། །དེས་ན་བློ་ནི་གང་ལས་འགྱུར། །ཐོས་པ་ལས་ཀྱང་སྐྱེས་བུ་ནི། །འཇིག་པར་མི་འགྱུར་ཞེས་བཤད་པ། །སྔར་ནི་དེ་ལ་གནོད་བསྟན་པས། །དེ་ནི་མ་གྲུབ་པར་གསལ་ཡིན། །ལག་མཐིལ་སྒྱུ་རུ་ར་བཞིན་དུ། །ཡུལ་དང་དུས་དང་སྐྱེས་བུ་བཞིན། །གང་གིས་མངོན་
སུམ་དུ་ནི་གྱུར། །དེས་དེར་གནོད་མེད་འདི་ངེས་འགྱུར། །མི་ཡིས་མི་ཤེས་དོན་ངོ་བོ། །དེས་ན་མུན་པའི་དངོས་གནས་པའི། །རིག་བྱེད་ལ་ནི་དམན་རྣམས་ཆགས། །རང་གི་དཔྱོད་ལ་པར་སིག་བཞིན། །དེ་ཡི་དོན་ནི་མི་ཤེས་པའང༌། །སྡིག་པའི་རྒྱུ་མཐུན་དང་ལྡན་ཕྱིར། །སྲོག་ཆགས་འཚེ་སོགས་སྡིག་པ་ལ། །དེ་བཞིན་འདི་དག་འཇུག་པར་འགྱུར། །དེ་ཕྱིར་ཆོས་ལ་བརྟེན་ནས་ནི། །བསྐུལ་པ་ཚད་མ་ཉིད་མ་གྲུབ། །སྒྲ་དེ་དག་ལ་བདག་གཞན་གྱིས། །དེ་དོན་ངེས་པར་རྟོགས་མི་འགྱུར། །ཡེ་ཤེས་སྣང་བས་ནང་གི་ནི། །མུན་པའི་ཚོགས་ནི་འཇོམས་བྱེད་ལ། །ཐོས་དོན་རྣམ་དབེན་སྟོན་བྱེད་པ། །ཚད་མས་གྲུབ་པ་འདོད་པར་གྱིས། །དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ་ལས་ཐོས་པ་བརྟག་པ་སྟེ་ཉིད་ཤུ་རྩ་བརྒྱད་པའོ།། །།རིག་བྱེད་སྐྱེས་བུས་བྱས་ཉིད་དུ། །དེ་ལྟར་བསྒྲུབ་པར་བྱས་པས་ན། །འབད་མི་དགོས་པར་དེ་དག་ལ། །རང་ལས་ཚད་མ་ཉིད་ཀྱང་བཙལ། །རང་ལས་ཚད་མ་ཐམས་ཅད་ཀྱི། །ཚད་མ་ཉིད་ནི་གཟུང་བར་གྱིས། །དེ་ལྟ་བུའི་ངག་དེ་ལ་ནི། །ཁྱེད་ཀྱི་དོན་ནི་ཇི་ལྟར་འདོད། །དེ་དག་ལ་ནི་རང་བཞིན་གྱིས། །གཞལ་བྱ་རྟོགས་སོགས་ནུས་གནས་ཡིན། །རང་ལ་མེད་པའི་ནུས་པ་ནི། །གཞན་གྱིས་བྱེད་པར་ནུས་མ་ཡིན། །ལྟོས་པ་མེད་ཉིད་གཅིག་ཁོ་ན། །ཚད་མ་ཉིད་ཀྱི་རྒྱུ་མཚན་ཉིད། །ལྟོས་པ་དང་བཅས་ཉིད་རྟེན་ན། །དེ་ནི་འཇིག་པ་ཁོ་ནར་འགྱུར། །རིགས་པ་སྨྲ་བསུ་ཞིག་ནི། །རྩབ་ལ་གནོད་ཕྱོགས་ངེས་མེད། །གང་གིས་ངག་གི་རང་ཚིག་གིས། །དེ་གྲུབ་ཐབས་ཀྱང་འཇིག་པར་བྱེད། །ལྟོས་པ་དང་བཅས་ཚད་ཉིད་ནི། །ལ་ལར་ཡང་ནི་གཞན་བྱས་མིན། །གཏན་ཚིགས་ཐུག་པ་མེད་པ་ཡིས། །བསྒྲུབ་བྱས་སུ་ཞིག་སྒྲུབ་པར་བྱེད། །དེ་ལྟའི་དོན་ནི་འདོད་ཅེ་ན། །དངོས་པོ་ཐམས་ཅད་དག་ལ་ནི། །ནུས་པ་ཐ་མི་དད་པ་ཅན། །སྔར་བསྒྲུབས་བྱས་ཟིན་མ་ཡིན་ནམ། །གང་ཕྱིར་འདོད་འབྲས་ནུས་པ་ཅན། །རང་བཞིན་ནུས་པ་མེད་ཅེས་བརྗོད། །དེ་དག་དངོས་བདག་གཉིད་མིན་ན། །དངོས་དེ་བྱེད་པ་པོར་མི་འགྱུར། །རང་རྒྱུའི་སྟོབས་ལས་བྱུང་བ་ཅན། །དེ་ཡང་མི་རྟག་དེ་འདྲ་བའི། །ནུས་པ་ཚད་མ་དག་ལ་ནི། །རང་བཞིན་གྱིས་ནི་ཡོད་པ་རུ། །
ཁྱེད་ཅག་ཇི་ལྟར་འདོད་པ་ཡིན། །ནུས་པ་རང་བཞིན་ཅན་ཡིན་ན། །རྟག་པ་འམ་ནི་རྒྱུ་མེད་འགྱུར། །དེ་བདག་ཉིད་ཕྱིར་ཚད་མ་ཡང༌། །རྟག་པ་ཉིད་དང་རྒྱུ་མེད་ཡིན། །རྒྱུ་མེད་གཞན་ལ་མི་ལྟོས་ཕྱིར། །རྟག་ཏུ་ཡོད་པའམ་མེད་པར་འགྱུར། །དེས་ན་དེར་རག་ལས་འབྲས་བུ། །རེས་འགའ་བ་ནི་རིགས་པ་མིན། །ཚད་མ་རྣམས་ཀྱི་རང་བཞིན་དང༌། །འབྲས་བུ་ཉིད་ནི་རེས་འགའ་བར། །སྣང་རུང་དེས་ན་ནུས་པ་ཡིས། །རང་བཞིན་ཅན་ཁྱེད་ལ་མི་རིགས། །ཚད་མ་རྣམས་ཀྱི་རང་དངོས་ནི། །གསལ་བྱེད་ཀྱིས་གསལ་སྣང་བས་ན། །སྐྱོན་གཞན་ལ་ནི་ལྟོས་ནས་ནི། །དེ་འབྲས་རྩོམ་པར་བྱེད་ཅེ་ན། །རྟག་དངོས་ལ་ནི་གསལ་བ་དང༌། །རྒྱུ་གཞན་ལ་ནི་ལྟོས་པ་སྤངས། །དེ་ཕྱིར་དེ་ཡི་ངོ་བོ་དང༌། །འབྲས་བུ་རྟག་ཏུ་དམིགས་པར་འགྱུར། །དངོས་ལ་ནུས་པ་ཐ་དད་དང༌། །གཉིས་བདག་ཉིད་ནའང་དེ་ལྟ་ནའང༌། །རྟག་པའི་ནུས་དང་འབྲེལ་པ་ཅན། །དེ་ཤེས་རྟག་ཏུ་འབྱུང་བར་འགྱུར། །དེ་ལྟ་མིན་ན་རྟག་མི་འགྱུར། །དངོས་གཅིག་རྗེས་འགྲོ་མེད་པའི་ཕྱིར། །གང་ཕྱིར་དེ་ཤེས་དང་ནུས་པ། །རེས་འགའ་འབྲེལ་ཞིང་གཞན་དུ་མིན། །རང་གི་རྒྱུ་ལས་སྐྱེ་འགྱུར་བ། །ཚད་མ་རྣམས་ཀྱི་ནུས་པ་ནི། །རང་གི་རྒྱུ་ལས་སྐྱེས་འགྱུར་ཏེ། །ཕྱིས་རྐྱེན་གཞན་བྱས་མིན་ཞེ་ན། །འདིར་ནི་བདག་ཅག་ལ་རྩོལ་མེད། །གང་ཕྱིར་རང་རྒྱུད་ལས་སྐྱེས་པའི། །ཆ་ཤས་མེད་པའི་དངོས་པོ་ཡི། །ནུས་པ་ཕྱི་ནས་སུ་ཞིག་རྟོགས། །གཞན་གྱིས་ཕྱིས་ཀྱི་དུས་སུ་ནི། །ངོ་བོ་གང་ཞིག་བྱས་པ་ནི། །དེ་ནི་དངོས་གཞན་ཉིད་ཡིན་པས། །དེ་ནི་བདག་ཉིད་དུ་བརྗོད་མིན། །གང་ཕྱིར་འགལ་བའི་ཆོས་འདྲེ་བ། །དངོས་པོའི་ཐ་དད་ཉིད་དུ་བཤད། །དེ་གྲུབ་ན་དེ་མི་འགྲུབ་ཕྱིར། །ནུས་པ་ལ་ཡང་དེ་ཡོད་ཡིན། །དངོས་ཀུན་སྐད་ཅིག་འཇིག་པ་རུ། །བསྒྲུབ་པར་བྱས་པ་དེ་དག་གིས། །ནུས་པ་འགའ་ཞིག་རྐྱེན་གཞན་གྱིས། །སྐྱེད་པར་བྱེད་པར་མི་ནུས་སོ། །གང་ཕྱིར་དེ་དག་གིས་གནས་པ། །དུས་གཞན་དུ་ནི་ཡོད་མིན་ཏེ། །གང་གི་དུས་ན་རྐྱེན་གཞན་གྱིས། །འབྲས་བུ་འགའ་ཞིག་ལ་ནུས་ཐོབ། །འདི་ནི་བློ་བཟངས་སངས་རྒྱས་པ། །དེ་དག་ཇི་ལྟར་བརྗོད་པ་ཡིན། །ཤེས་པ་འགའ་
ལ་ནུས་གནས་ཀྱང༌། །དེ་ནི་རང་ལས་རྟོགས་ནུས་མིན། །ཇི་ལྟར་གནས་པའི་ཤེས་བྱ་ཡི། །དངོས་པོ་རྟོགས་དང་ཐོབ་ནུས་ཉིད། །ཉམས་མྱོང་བདག་ཉིད་གཅིག་པུ་ཡིས། །སུ་ཞིག་ངེས་པར་བྱེད་པར་ནུས། །གང་ཕྱིར་ཚད་མ་མ་ཡིན་ཡང༌། །སྐྲ་ཤད་ལ་སོགས་ཤེས་པ་ནི། །རྣམ་པ་གསལ་བ་སྣང་བ་ཡི། །ཉམས་མྱོང་བདག་ཉིད་དེ་ཡོད་ཡིན། །དེས་ན་ངེས་པར་བྱ་ཉིད་ཕྱིར། །དོན་བྱེད་ཤེས་པའམ་གཞན་ལྟོས་མིན། །དེ་བྱེད་ཕྱིར་ནི་མ་ཡིན་ཏེ། །དུག་ལ་སོགས་པ་ལ་བཞིན་ནོ། །ཇི་ལྟར་དུག་དང་མྱོས་འགྱུར་སོགས། །དེ་ལས་མཚུངས་གཞན་སྣང་ཕྱིར་དང༌། །རྗེས་ཐོགས་ལ་ནི་འབྲས་མེད་ཕྱིར། །དེའི་བདག་ཉིད་ངེས་གཞན་ལྟོས་ཡིན། །བརྒྱལ་དང་དུབ་དང་འཆོལ་སོགས་པའི། །དེ་ཡི་འབྲས་བུ་ངེས་བསྐྱེད་ན། །དེའི་བདག་ཉིད་དུ་རྟོགས་འགྱུར་ཏེ། །ད་ལྟར་ཤེས་ལ་དེ་ནུས་དེས། །གཞན་ཡང་ཚད་མའི་ནུས་མཚན་ཉིད། །རྩོད་པ་མེད་པ་ཉིད་དུ་འདོད། །ཚད་མ་གཞན་གྱིས་ངེས་བྱས་ཞེས། །དེ་ལྟར་ཁྱེད་ཀྱིས་སྨྲས་པ་ཡིན། །དངོས་པོ་རྣམས་ཀྱི་ནུས་པ་རྣམས། །འབྲས་བུའི་དོན་གྱིས་སྒྲུབ་པར་བྱེད། །དེས་ན་དོན་གྱིས་གོ་བས་གྲུབ། །གཞན་ལས་མི་འགྲུབ་ཇི་ལྟར་ཡིན། །རང་གི་རྒྱུ་ལས་ཚད་ཉིད་ནི། །ཆ་ཤས་མེད་པར་གྲུབ་ཡིན་ན། །དེ་ལྟར་ཡིན་དང་རྩོད་མེད་དེ། །དེས་བསྐྱེད་གཞན་ལ་ལྟོས་པའི་ཕྱིར། །རང་གི་ངོ་བོ་གྲུབ་དོན་དུ། །ཚད་མ་གཞན་ལ་ལྟོས་པ་མིན། །དེ་ཡི་ངོ་བོ་ངེས་དོན་དུ། །རྟོགས་པོ་དེ་ལ་ལྟོས་པ་ཡིན། །གཞན་ཡང་ཚད་མ་ཉིད་མིན་ཡང༌། །དེ་ལྟར་རང་ཉིད་ལས་ཐལ་འགྱུར། །རང་ལས་ཚད་མ་མིན་མེད་ན། །གཞན་ལས་ཀྱང་ནི་སྲིད་མ་ཡིན། །ལྟོས་པ་མེད་པ་གཅིག་ཁོ་ན། །ཚད་མིན་ཉིད་ཀྱི་རྒྱུ་མཚན་ཡིན། །དེ་ལྟ་བུ་སོགས་འདིར་ཡང་ནི། །མ་ལུས་བརྗོད་པར་ནུས་མ་ཡིན། །སླུ་བར་བྱེད་པའི་ནུས་པ་ནི། །ཇེ་ལྟར་གཞན་ལས་ངེས་པ་ཡི། །དེ་ལྟར་མི་སླུའི་ནུས་པ་ཉིད། །དེས་ན་རྣམ་ཀུན་གྱི་གཉིས་མཚུངས། །བཟློག་པ་དེ་ལས་ཚད་ཉེད་ལ། །ཕུལ་དུ་བྱུང་བ་ཅི་ཞིག་སྣང༌། །གང་གིས་རང་ལས་དེ་ཉིད་དང༌། །གཞན་ལས་ཚད་མ་མིན་པ་འདོད། །འོན་ཏེ་རང་ལས་ཚད་མ་ཀུན། །ཚད་མ་ཉིད་དུ་བརྗོད་
པའི་ཕྱིར། །སྐྱེས་ནས་རང་གི་འབྲས་བུ་ལ། །རང་ཉིད་ཀྱིས་ནི་འཇུག་འགྱུར་མིན། །བདག་ཉིད་ཐོབ་ཕྱིར་དངོས་པོ་རྣམས། །རྒྱུ་ལ་ལྟོས་ཕྱིར་བྱེད་པ་ནི། །བདག་ཉིད་ཐོབ་ནས་རང་འབྲས་ལ། །རང་ཉིད་ཀྱིས་ནི་འཇུག་པར་འགྱུར། །དེས་ན་སྐྱེ་ཙམ་ཤེས་པ་ལ། །རང་གི་རྒྱུ་ལ་ལྟོས་ཡོད་ཕྱིར། །དེ་དག་རང་གི་ཡོན་ཏན་ལ། །ངེས་པ་བསྐྱེད་ཕྱིར་ལྟོས་པ་མིན། །གང་ཕྱིར་སྐྱེད་ལ་རང་དབང་ཅན། །ཚད་མ་ཉིད་དང་དོན་ངེས་ལ། །རང་གི་རྒྱུ་ལ་མ་ལྟོས་པར། །དེ་དག་འགྱུར་བུམ་ལ་སོགས་བཞིན། །འཇིམ་གོང་འཁོར་ལོ་དབྱུག་སོགས་ལ། །བུམ་པ་སྐྱེད་ཕྱིར་ལྟོས་པ་ཡིན། །འདི་ཡི་ཆུ་འཆུ་བ་ལ་ནི། །དེ་དག་ལ་ནི་ལྟོས་པ་མེད། །དེ་ལྟར་རང་ལས་ཚད་མ་ཉིད། །ཐ་མར་གདོན་མི་ཟ་དེ་ཡིན། །གཞན་ལ་རག་ལས་ཚད་ཉིད་ནི། །ཐུག་པ་མེད་པར་ཐལ་བར་འགྱུར། །རྩ་བ་ཡི་ནི་ཚད་མ་ཉིད། །ཚད་མ་གཞན་གྱིས་གྲུབ་བྱས་ན། །དེ་དང་དེར་ནི་དེར་འདོད་པས། །མཐར་ཐུག་གནས་རྙེད་མི་འགྱུར་རོ། །ཇི་ལྟར་དང་པོའི་ཤེས་པ་དེ། །དོན་བྱེད་མི་སླུའི་ཤེས་ལ་ལྟོས། །དེ་ལྟར་མི་སླུའི་ཤེས་པ་ཡང༌། །མི་སླུ་གཞན་ལ་ལྟོས་པ་ཡིན། །གལ་ཏེ་འགའ་ཞིག་རང་ཉིད་ལས། །ཚད་མ་ཉིད་དུ་འདོད་པ་ན། །དང་པོ་དེ་ལྟར་འགྱུར་བ་ལ། །རྒྱུ་མཚན་གང་གིས་སྡང་བར་བྱེད། །གལ་ཏེ་དེ་ལྟར་ཡོན་ཏན་ལ། །རག་ལས་མངོན་སུམ་ཚད་མ་ཉིད། །ཚད་མ་མེད་ན་ཡོན་ཏན་ཡང༌། །ནམ་ཡང་ཡོད་པ་མ་ཡིན་ནོ། །དེས་ན་ཡོན་ཏན་ཡོངས་གཅོད་ཕྱིར། །ཚད་མ་གཞན་ནི་འདོད་པ་ན། །དེ་ལའང་གཞན་གྱིས་ཡོངས་བཅད་པའི། །ཡོན་ཏན་རག་ལས་ཚད་མ་ཉིད། །དང་པོའི་བཞིན་ནོ་དེས་ན་ཡང༌། །སྔར་བཞིན་ཐུག་བ་མེད་པར་འགྱུར། །ད་དང་དེ་དེ་ལྟར་འདོད་ན། །མཐར་ཐུག་རྙེད་པར་མི་འགྱུར་རོ། །འོ་ན་ཏེ་ཡོན་ཏན་གྱིས་ཤེས་པ། །ཡོན་འཛིན་རག་ལས་ཚད་མ་ཉིད། །མི་འདོད་དང་པོའི་དོན་ཤེས་ཀྱང༌། །ཡོན་ཏན་ཚད་མ་ལ་མི་ལྟོས། །དེས་ན་རིང་དུ་དཔྱད་བྱས་ཀྱང༌། །འགལ་བ་རང་ལ་ཚད་ཉིད་ནི། །གདོན་མི་ཟ་བར་ཁས་ལེན་ན། །དེ་བས་ཐོག་མར་གནས་པ་མཆོག །དོན་བྱེད་པ་དང་ཡོན་ཏན་ཤེས། །གང་གིས་ཁྱད་པར་ཅན་དུ་འདོད། །གང་གི་
སྟོབས་ཀྱིས་དང་པོ་ནི། །དེ་དག་ལ་ནི་རག་ལས་འགྱུར། །དེ་ཕྱིར་རག་ལས་ཚད་མ་ཉིད། །ཀུན་ལ་སྤྱིར་བསྟན་པ་ཅན་གནས། །གནོད་དང་རྒྱུ་སྐྱོན་བཅས་ཉིད་ཀྱིས། །ཤེས་པ་དག་གིས་དེ་བསལ་ཡིན། །དེ་ནི་གཞན་ལ་རག་ལས་ཀྱང༌། །ཐུག་པ་མེད་པར་མི་འགྱུར་རེ། །དེ་ཡི་ཚད་མ་ལ་རག་ལས། །དེ་ཡང་རང་ལ་གནས་པ་ཡིན། །གང་ཕྱིར་ཚད་མ་ཚད་གཞན་གྱིས། །ཇི་ལྟར་སྒྲུབ་པར་མི་བྱེད་པ། །དེ་ལྟར་ཚད་མིན་ཉིད་ཀྱིས་ནི། །ཚད་མིན་གཞན་ལས་གྲུབ་པ་མིན། །རིགས་མཐུན་ལ་རྟེན་ཉིད་ཀྱིས་ནི། །གནས་པ་འཐད་པ་མ་ཡིན་ཏེ། །རིགས་མི་མཐུན་ནི་རྒྱུ་གཞན་ཕྱིར། །རྩ་བ་བརྟན་པར་གནས་པ་ཡིན། །རེ་ཞིག་གནོད་པའི་ཤེས་པ་ནི། །དོན་གཞན་ཉིད་དུ་ངེས་གཟུང་ཡིན། །དེ་ནི་ལྟོས་མེད་ཚད་ཉིད་ཕྱིར། །སྔ་མ་ཤེས་པས་སེལ་བར་བྱེད། །དེ་ལ་ཡང་ནི་གནོད་པ་བརྩལ། །སླར་ཡང་ལྟོས་པར་འགྱུར་བ་ཡིན། །ལ་ལར་སྔ་མར་དོགས་སྐྱེ་ན། །དེ་ཡང་འབད་པ་ཉུང་དུས་ལྡོག །གལ་ཏེ་འདི་ལ་གནོད་པ་གཞན། །ཚོལ་བས་སྐྱེ་བར་འགྱུར་བ་ན། །དེས་ན་དབུས་མར་གནོད་གྱུར་པས། །སྔ་མ་ཁོ་ན་ཚད་མ་ཡིན། །འོན་ཏེ་རྗེས་མཐུན་འབད་པ་ཡིས། །ཡང་དག་ཚོལ་བར་བྱེད་པ་ན། །རྩ་བ་མེད་ཕྱིར་གནོད་ཅན་ལ། །གནོད་པའི་ཤེས་པས་གནོད་མི་འགྱུར། །དེས་ན་དམིགས་གསལ་མེད་པའི་ཕྱིར། །སྟོབས་བཅས་དེ་ཡི་དང་པོ་ནི། །གནོད་འགྱུར་དེ་ཡིས་དེ་ཉིད་ཀྱི། །ཚད་མ་ཉིད་ནི་བསལ་བ་ཡིན། །དེ་ལྟར་རྟོག་ལྡན་ཤེས་པ་ནི། །གསུམ་པོ་སྤོང་བར་མི་བྱེད་དོ། །དེས་ཀྱང་གནོད་པ་མ་སྐྱེས་ན། །གནོད་པ་སླར་ཡང་དོགས་མི་བྱ། །གང་ཞིག་རྨོངས་པས་མ་སྐྱེས་པའང༌། །གནོད་པ་ཅན་དུ་ཉེ་བར་རྟོག །ཐེ་ཚོམ་བདག་ཉིད་ཅན་དེ་ནི། །ཐ་སྙད་ཐམས་ཅད་ཉམས་པར་འགྱུར། །འདི་ལྟར་ནོར་ལྷའི་བུ་ཡིས་ནི། །ཐེ་ཚོམ་བདག་ཉིད་ལ་སྨད་ཡིན། །ཀུན་ཏའི་བུ་སྐྱེས་ཐེ་ཚོམ་ཅན། །འཇིག་རྟེན་འདི་དང་ཕྱི་མ་མེད། །ལ་ལར་གང་དུ་ཇི་སྙེད་པའི། །མིག་གསལ་རྣམས་ནི་སྲིད་པ་ཡིན། །དེ་བདག་ཉིད་ལ་དེ་སྙེད་ནི། །བརྩལ་ཡང་མ་སྐྱེས་པས་དེར་མེད། །འཇལ་བྱེད་དོན་དུ་གཉེར་རྣམས་
ཀྱིས། །སླར་ཡང་དངོས་པོ་དེ་དག་ནི། །རེས་འགའ་འདི་ལྟར་སྲིད་པ་ཡང༌། །ཉེ་བར་བརྟགས་ཤིང་གནས་མི་བྱ། །གང་ལ་ཡུལ་དུས་མིའི་གནས་སྐབས། །དབྱེ་བ་ཐ་དད་ཀྱིས་གྲུབ་གང༌། །གནོད་ཅན་དོན་དུ་གཉེར་བ་ནི། །དེ་དག་ལ་ནི་ལྟོས་པ་ཡིན། །ཡུལ་ཐག་རིང་ན་གནས་པའི་ཕྱིར། །ཡང་དག་པར་ནི་མ་མཐོང་བས། །ལ་ལར་གཞན་དུ་དོགས་འགྱུར་བ། །དེར་ནི་ཉེ་བར་ཕྱིན་པ་ཙམ། །གནོད་པའི་མཐའ་སྟེ་དུས་དང་ནི། །མི་དང་གནས་སྐབས་གཞན་དག་ལ། །དེ་ལ་ལྟོས་པ་ཡོད་མིན་ཏེ། །སྨིག་རྒྱུ་ལ་སོགས་བློ་བཞིན་ནོ། །དེ་ལྟར་དམག་དང་བཅས་དུས་སུ། །བ་ལང་རྟ་སོགས་ཐེ་ཚོམ་མམ། །འཁྲུལ་པ་གང་ཡིན་དེའི་ངེས་པ། །གསལ་བར་གྱུར་པ་མཐའ་ཅན་ཡིན། །དེ་བཞིན་ཟླ་གཉིས་ཕྱོགས་ལ་འཁྲུལ། །རིག་བྱེད་ཡི་གེ་དབྱངས་སོགས་ལའང༌། །སྐྱེས་བུ་གཞན་ལ་དྲིས་པ་ན། །རྣམ་པ་གཞན་དུ་ངེས་འཛིན་སྐྱེ། །ཆགས་དང་ཞེ་སྡང་རྒྱགས་དང་བསྙོ། །བཀྲེས་སྐོམ་སོགས་ཀྱིས་དབང་ཉམས་པས། །ཤེས་བྱའི་དོན་ལ་ལོག་ཤེས་སྐྱེ། །དེ་མེད་ཡང་དག་ཤེས་པ་སྐྱེ། །བུ་ལོན་ལ་སོགས་ཐ་སྙད་ལའང༌། །གཉིས་ཀ་རྩོད་པར་བྱེད་པ་ན། །གཅིག་ནི་བུ་ལོན་ཆགས་པའི་ཚིག །སྔར་གྱི་བུ་ལོན་དེད་ཚིག་གཉིས། །ཐུག་པ་མེད་པའི་འཇིགས་པ་ཡིས། །ངག་ལྷག་ཆད་རྒྱར་འབྲི་མི་བྱེད། །དེས་ན་གཙོ་བོའི་ཐད་དུ་ནི། །འདུན་ས་བ་སོགས་ཀྱིས་ངེས་བརྗོད། །དེ་ལྟར་ཤེས་པ་གསུམ་ཁོ་ན། །ཐམས་ཅད་ཀྱི་ནི་དབང་བྱས་འདོད། །དེ་འདོད་ཕྱིར་ནི་ལྷ་རྣམས་ལའང༌། །བདེན་པ་གཉིས་གསུམ་ཡོད་པར་བརྗོད། །དེས་ན་རང་ལ་ཚད་ཉིད་ན། །གཉིས་ཀ་ལ་ཡང་ཐུག་མེད་མེད། །ཚད་མ་ཉིད་དང་ཚད་མིན་ཉིད། །དེས་ན་ཇི་ལྟར་རིགས་པར་གནས། །རྟག་པའམ་ཡིད་ཆེས་པས་སྨྲས་པ། །དག་གང་ངེས་པར་བཟུང་བ་ཡིན། །སྨྲ་བ་བོ་དང་ཉན་པ་ཡིས། །དེ་ནི་ཅུང་ཟད་སྐྱོན་བཅས་སུ། །མི་བྱེད་དེ་ལ་རིག་པ་ཡིས། །བླ་མ་གང་དག་ཡིན་པ་འམ། །རྟག་ཏུ་གནོད་པར་བྱེད་པ་པོས། །དེ་འདྲར་སྐྱོ་བར་ནུས་པའམ། །འཇིག་མེད་དེ་ནི་འཛིན་པར་བྱེད། །དེས་ན་ཡོན་ཏན་གྱིས་བཀག་པའི། །སྐྱོན་གྱིས་ངག་སུན་འབྱིན་མི་
བྱེད། །ཡང་ན་བྱེད་པོ་མེད་ཕྱིར་ཏེ། །སྐྱོན་ནི་རྟེན་མེད་མི་འགྱུར་རོ། །དེར་ཡིད་ཆེས་སྨྲས་ལ་སྐྱོན་མེད། །ཡོན་ཏན་བདག་ཉིད་གཉིས་སུ་སྣང༌། །ཡོན་ཏན་གྱིས་ཀྱང་ཚད་མ་ཉིད། །ཇི་ལྟར་གྲུབ་མིན་དེ་ལྟར་བསྟན། །དེས་ན་ཡོན་ཏན་ལྡན་པའི་ཕྱིར། །དེས་བསྩལ་སྨྲ་པོ་ལ་སྐྱོན་མེད། །སྐྱོན་མེད་པས་ནི་ཉེར་མཚོན་པས། །དག་ནི་རང་ལས་ཚད་མ་ཡིན། །ཡིད་ཆེས་དག་ལས་སྐྱོན་མེད་པར། །ཡོན་ཏན་དག་གིས་རྟོགས་ཤེ་ན། །ཡོན་ཏན་ལྡན་ཉིད་རྗེས་འགྲོ་ལ། །དེ་ཉིད་ཐུག་པ་མེད་པར་འགྱུར། །དེ་ནི་སྐྱོན་མེད་ཤེས་འགྱུར་བས། །ཡོན་ཏན་གྱི་ཤེས་དེ་ཡི་ཚེ། །ལྟོས་པར་བྱེད་པ་མ་ཡིན་ཏེ། །དེ་ལ་ཡོན་ཏན་ཕན་འདོགས་མིན། །ཡོད་པ་ཙམ་གྱིས་དེ་ཀུན་གྱི། །སྐྱོན་རྣམས་ལྡོག་པར་བྱེད་ནུས་ཡིན། །དེ་དག་ཡོད་ན་མིའི་སྐྱོན་གྱི། །ཡུལ་ཅན་ཤེས་པ་སྐྱེ་མི་འགྱུར། །མི་ཤེས་ཉིད་ཕྱིར་སྐྱོན་རྣམས་ཀྱིས། །ཚད་མ་ཉིད་ནི་བསལ་བ་ཡིན། །མ་བསལ་བས་ནི་གྲུབ་པ་ཡིན། །དེས་ན་འདི་ཡང་རང་ལ་གནས། །ཉེས་པ་ཡོད་དམ་མེད་པ་ནི། །སྐྱེས་བུའི་ངག་ལ་ཐེ་ཚོམ་ཟ། །བྱེད་པོ་མེད་ཕྱིར་ཐོས་པ། །སྐྱོན་ཡོད་ཐེ་ཚོམ་བདག་ལ་མེད། །རིག་བྱེད་ལ་ཡང་ཚད་མ་ཉིད། །མ་ལྟོས་ཉིད་ཕྱིར་གང་བརྗོད་པ། །ཡིད་ཆེས་མ་སྨྲས་པ་ལ་ཡང༌། །དེ་ནི་རང་ལས་ཤིན་ཏུ་གྲུབ། །རིག་བྱེད་དོན་ལ་ཚད་གཞན་གྱིས། །དུས་ཀུན་དུ་ནི་མ་འབྲེལ་གང༌། །དེ་ཉིད་ཀྱིས་ནི་ཚད་མ་ཉིད། །གཞན་དུ་རྗེས་སུ་ཟློས་ཉིད་ཡིན། །གཞན་ལ་ཡང་ནི་ཚད་ཉིད་ལ། །འབྲེལ་པ་རྒྱུ་ཉིད་མ་ཡིན་ཏེ། །དོན་མཚུངས་རྣམས་ལ་རྟོགས་པ་ཡིས། །མཚུངས་པའི་དོན་གཅིག་ལ་རྟོགས་པས། །གཅིག་ཉིད་ཚད་མ་ཉིད་དུ་འགྱུར། །གང་ལ་ཡང་ནི་ཡོངས་གཅོད་པ། །ཚད་མ་ཕྱི་མས་སླར་ཡང་འགྱུར། །དེར་ཡང་ངེས་པར་སྔ་མ་ཡིས། །དོན་དེ་གསལ་བར་ངེས་བཟུང་མིན། །ལན་ཅིག་སྐྱེས་ནས་འཇིག་པ་ནི། །དོན་ལ་ཚད་མིན་ཉིད་འགྱུར་མིན། །མིག་ལ་སོགས་དང་འབྲེལ་མེད་པ། །རྣ་བློའང་ཚད་མར་འགྱུར་བ་མིན། །འདི་ལ་རྣ་བའི་ཤེས་གཞན་དང༌། །འབྲེལ་ཕྱིར་ཚད་ཉིད་འགྱུར་ཞེ་ན། །རིག་བྱེད་ལ་ཡང་དེ་སྐྱེད་པའི། །རྣམ་ཤེས་
གཞན་དང་འབྲེལ་པ་གྲུབ། །སྒྲུབ་པ་གཞན་ལས་སྐྱེས་པ་ནི། །བློ་ནི་གཉིས་ལའང་ཡང་ཡོད་མིན། །དེས་ན་རྒྱུ་གཞན་གྱིས་བྱས་པའི། །ཤེས་པ་མི་སླུ་འདོད་མིན་ཏེ། །ཇི་ལྟར་དབང་པོ་གཅིག་དག་ལས། །རྣམ་ཤེས་གཞན་གྱིས་འབྲེལ་པ་ནི། །མངོན་སུམ་གྱི་རྒྱུར་བརྟགས་པ་ཡིན། །དེ་བཞིན་རིག་བྱེད་ལ་བརྟག་གིས། །ངག་ནི་གཅིག་པུ་ཁོ་ན་ཡིས། །ཡུལ་དང་དུས་དང་མི་སོགས་ལ། །དོན་གྱི་མི་སླུ་རྙེད་པ་ནི། །རྒྱུ་གཞན་བརྩལ་བར་མི་བྱའོ། །དེ་ཕྱིར་བརྟན་པར་གང་སྐྱེས་པའི། །རྣམ་པར་ཤེས་པ་ཡུལ་གཞན་སོགས། །རྣམ་ཤེས་རྣམས་ཀྱི་སླུ་མེད་ཅན། །དེ་ནི་ཚད་མར་ཐེ་ཚོམ་མེད། །སྒྲ་རྣམས་ལ་ནི་ཚད་མ་ཉིད། །རྗེས་སུ་དཔག་པས་བསྒྲུབ་མི་བྱ། །མངོན་སུམ་ལ་ཡང་ངེས་བསྒྲུབ་ཡས། །ཚད་མར་མི་འགྱུར་ཁྱད་མེད་ཕྱིར། །ཚད་མ་རྣམས་ཀྱིས་ཚད་མ་ཉིད། །གཞན་མ་གང་གིས་བསྒྲུབ་པར་བྱས། །དེ་ཡང་གཞན་གྱིས་བསྒྲུབས་པའི་ཕྱིར། །ཐུག་པ་མེད་པར་ཐལ་བར་འགྱུར། །འོན་ཏེ་སྒྲུབ་པར་བྱེད་པ་ལ། །གཞན་གྱིས་མ་བསྒྲུབས་ཚད་འདོད་ན། །དེས་ན་བསྒྲུབ་བྱ་ལ་ཡང་དེ། །མ་བསྒྲུབས་པ་ཡང་དེ་བཞིན་འགྱུར། །མངོན་སུམ་ལ་སོགས་ཚད་མ་རུ། །དེ་ལྟར་གཟུང་བྱས་མ་ཡིན་ནམ། །དེ་ལྟར་གཟུང་བར་མ་བྱས་པས། །ཐ་སྙད་རིགས་པ་མ་ཡིན་ནོ། །ངེས་པར་འཛིན་པའི་སྔོན་རོལ་དུ། །ཚད་མར་རང་ཉིད་ནི་གནས་ན། །དེ་ནི་ལྟོས་མེད་རང་གི་དོན། །འཇལ་བར་བྱེད་དེ་རང་གིས་དེས། །ཇི་ལྟར་རྟོགས་པར་མ་བྱས་ཉིད། །མིག་སོགས་དབང་པོ་རྣམས་ཀྱིས་ནི། །ཡུལ་ཀུན་འཛིན་པར་བྱེད་པ་ཡིན། །དེ་བཞིན་ཚད་མ་རྣམས་ཀྱིས་ཀྱང༌། །དེས་ན་ཚད་མ་ཉིད་དེ་ལ། །རིགས་པར་འགྱུར་ཉིད་མཁོ་བ་མིན། །བློ་ནི་མ་རྟོགས་འདི་ལས་ཀྱང༌། །ཡུལ་གྱི་ཉམས་མྱོང་དམིགས་པར་འགྱུར། །རང་གི་དོན་ལ་ཚད་མིན་པ། །ཚད་མ་བཞིན་དུ་རང་ལས་གྲུབ། །དེ་ཡི་ལོག་ཉིད་ཚད་མ་གཞན། །མེད་ན་གཟུང་བར་མི་འགྱུར་རོ། །གང་ཕྱིར་དོན་ནི་ལོག་ཉིད་དུ། །སྔ་མ་འཛིན་མིན་དེ་ཉིད་བཞིན། །དེ་ཡང་དོན་གཞན་ངོ་བོ་བློ། །ཡང་ན་རྒྱུ་ནི་སྐྱོན་བཅས་པ། །དེ་ཙམ་གྱིས་ཀྱང་ལོག་ཉིད་ནི། །འཛིན་འགྱུར་གཞན་རྒྱུ་ཅན་
མ་ཡིན། །སྐྱེ་བའི་གནས་སྐབས་ཁོ་ན་ལ། །འདི་ནི་ཚད་མ་ཉིད་དུ་ངེས། །དེས་ན་གང་དུའང་ལོག་ཉིད་ནི། །གཞན་དག་གིས་ནི་རྟོགས་འགྱུར་ན། །དེའང་དེ་གཉིས་བརྗོད་བྱ་སྟེ། །ཆོས་མཐུན་ཙམ་གྱིས་བརྗོད་མི་བྱ། །ཚད་མ་མ་ཡིན་ཆོས་མཐུན་ཙམ། །གང་ཅུང་ཟད་ཙམ་ལ་བརྟེན་ནས། །མི་མཁས་པ་ཡིས་ཚད་མ་ཀུན། །ལོག་པ་ཉིད་དུ་སྒྲུབ་པར་བྱེད། །དེ་དག་བདག་ཉིད་ལ་གནོད་ཕྱིར། །དེ་འདྲའི་སྒྲུབ་པ་རྟོགས་པར་བྱེད། །གཞན་ལ་ཡང་ནི་དེ་འདྲ་ཡིས། །གཟུགས་བརྙན་སྐྱེ་བར་འགྱུར་བ་ཡི། །དེ་ཡིས་བཀག་པར་བྱས་པའི་ཕྱིར། །འོག་པ་ཉིད་དུ་བསྒྲུབས་པས་ན། །བསྐུལ་ལ་གནོད་པ་བྱེད་མི་ནུས། །རང་ཉིད་ཚད་མ་ཡིན་ཕྱིར་རོ། །འདི་ལ་བརྗོད་པར་བྱ་བ་མིན། །གང་དག་སྐྱེས་ནས་གནས་འདོད་པས། །དེ་དག་རེ་ཞིག་གནས་སྐབས་དེའི། །རྒྱུ་མཚན་དང་བཅས་ཡིན་དུ་ཆུག །བདག་ཉིད་ཐོབ་ཕྱིར་བུམ་སོགས་ནི། །རྒྱུ་ལ་ལྟོས་པར་བྱེད་པ་ཡིན། །བདག་ཉིད་ཐོབ་ནས་རང་འབྲས་ལ། །རང་ཉིད་ཀྱིས་ནི་འཇུག་པར་འགྱུར། །སྐྱེས་མ་ཐག་ཏུ་མི་གནས་པ། །ཤེས་པ་གང་ཞིག་ཁྱེད་ཀྱང་འདོད། །བདག་ཉིད་ཐོབ་ནས་ཕྱིས་མེད་ལ། །དེ་ལ་བྱ་བ་ཅི་འདྲ་ཡོད། །གང་ཕྱིར་རྒྱུ་རྣམས་ཀྱི་བྱ་བ། །སྐྱེ་བ་ལས་ནི་གཞན་དུ་མཐོང༌། །ཚད་མ་ལ་ཡང་དེ་བཞིན་དུ། །མི་འགྱུར་ཕྱིར་ན་སྐྱེ་བར་བརྗོད། །སྐད་ཅིག་ཀྱང་ནི་དེ་གནས་མིན། །ཚད་མའི་བདག་ཉིད་ཀྱང་སྐྱེ་མིན། །གང་གིས་དོན་བཟུང་རྗེས་ལ་ནི། །བྱ་བ་བྱེད་འགྱུར་དབང་སོགས་བཞིན། །འོན་ཏེ་སྐད་ཅིག་མིན་ཤེས་ལ། །ཡང་ན་བརྟག་པར་ཁས་ལེན་ན། །ཁས་བླངས་པ་དང་འདི་འགལ་ཕྱིར། །འདི་ལྟར་རིགས་པས་ཀྱང་གནོད་ཡིན། །གང་ཕྱིར་དངོས་ཀུན་ཁྱབ་པ་ནི། །སྐད་ཅིག་འཇིག་པར་བསྒྲུབས་པ་ཡིན། །རྟག་པ་བསྐྱེད་བྱ་མ་ཡིན་པས། །རྒྱུ་ལ་ལྟོས་པ་གང་ཞིག་ཡིན། །དེས་ན་བརྗོད་པར་ནུས་ཡིན་ཏེ། །ཕྱི་ནས་ཚད་མ་རང་འབྲས་ལ། །རང་ཉིད་ཀྱིས་འཇུག་མ་ཡིན་ཏེ། །དངོས་མེད་ཕྱིར་ན་མཁའ་བད་བཞི། །སྐད་ཅིག་མ་ཡིན་ཤེས་པ་དེ། །ཡིན་ཆུག་རང་གི་ཚད་མ་ཉིད། །ངེས་ཕྱིར་རང་ཉིད་འཇུག་ཅེ་ན། །ཐེ་ཚོམ་ལ་སོགས་ཅི་ཕྱི་ཕྱིར་འགྱུར། །གང་ཕྱིར་ཚད་མ་ཉིད་ངེས་པ། །དེ་ཙམ་ལས་ནི་བྱུང་བ་
ཡིན། །དེ་ནི་སྐྱེས་པར་གྱུར་པ་ན། །ཐེ་ཚོམ་ཕྱིན་ལོག་རྟེན་མེད་འགྱུར། །ངེས་པ་དང་ནི་སྒྲོ་འདོགས་ཡིད། །གནོད་བྱ་གནོད་བྱེད་ངོ་བོའི་ཕྱིར། །འདི་ནི་སྒྲོ་འདོགས་དབེན་པ་ལ། །འཇུག་ཅེས་བྱ་བར་ཤེས་པར་བྱ། །དེས་ཀྱང་བསྐུལ་པ་ལས་བྱུང་བློ། །ཚད་མ་ཉིད་སྒྲུབ་དོན་དུ་ནི། །སྐྱོན་བྲལ་རྒྱུ་ལས་བྱུང་བའི་ཕྱིར། །རིགས་པ་དེ་ནི་དོན་མེད་འགྱུར། །རང་ལས་ཚད་མ་ཉིད་གྲུབ་ཀྱང༌། །དེ་ནི་གནོད་པ་སེལ་བ་ཅན། །གལ་ཏེ་འདོད་ན་དེ་ལ་ནི། །མ་ཡིན་ཐེ་ཚོམ་མི་སྲིད་ཕྱིར། །ཇི་སྲིད་ངེས་པ་མ་སྐྱེས་པ། །དེ་སྲིད་ཁོ་ན་ཐེ་ཚོམ་ཡོད། །དེ་ལ་ངེས་པ་སྐྱེས་གྱུར་ན། །ཚད་མ་མིན་བློ་ག་ལས་འགྱུར། །གང་གིས་དེ་ནི་ལྡོག་དོན་དུ། །འབད་པ་དོན་དང་བཅས་པར་འགྱུར། །མཐོ་ཡོར་དེ་བདག་ཉིད་ངེས་པས། །གཞན་ཉིད་སྙམ་དུ་སེམས་པ་མེད། །གང་ཕྱིར་དངོས་པོ་གང་ལ་ནི། །ངོ་བོ་གང་ལས་ངེས་སྐྱེས་ན། །དེ་ལས་བཟློག་པའི་དགོས་པ་ནི། །རང་ཉིད་ཀྱིས་ནི་ལྡོག་པར་འགྱུར། །ཇི་ལྟར་དུ་སོགས་རྟགས་དག་གི །མེ་སོགས་ཡོད་པར་ངེས་པ་ན། །དེ་མེད་ཐེ་ཚོམ་རྣམས་གཅོད་པ། །དེ་ཉིད་ཀྱིས་ནི་འཐད་མ་ཡིན། །ཚད་མ་མ་ཡིན་རྣམ་གཅོད་ཀྱང༌། །རང་ཉིད་ཀྱིས་ནི་འདོད་པར་གྱིས། །དེ་ཕྱིར་ཚད་མ་མ་ཡིན་ཉིད། །ལྡོག་ཕྱིར་སྒྲུབ་པ་རིགས་མ་ཡིན། །གལ་ཏེ་དེར་ནི་ཚད་མིན་གཉིས། །དོགས་པ་འཇུག་པར་འགྱུར་བ་ན། །འཁྲུལ་པས་དེ་ཡི་ཡུལ་བྱས་པས། །ཚད་མ་ཉིད་དུ་ངེས་མི་འགྱུར། །གང་ཞིག་ཕྱིན་ཅི་ལོག་ཐེ་ཚོམ། །ཤེས་པ་རྣམས་ཀྱིས་ཡུལ་དུ་བྱས། །མཐོ་ཡོར་བཞིན་དུ་དེ་ལ་ནི། །དེ་ཚེ་དེ་དངོས་ངེས་པ་མེད། །ཇི་ལྟར་གཏོར་ཟན་དུ་བ་དང༌། །རྒྱུ་ལས་བྱུང་སྐྱོན་སོགས་ཤེས་པས། །ཡུལ་དང་མེ་དང་ཚད་མིན་སོགས། །གཞན་ལས་ངེས་པར་འགྱུར་བ་ཡིན། །གང་གིས་ཕྱིན་ཅི་ལོག་ཐེ་ཚོམ། །ཡུལ་ཉིད་དུ་རྟོགས་དེ་བཞིན་ནོ། །ཚད་མ་ཉིད་ལ་དེ་ལ་ནི། །གཞན་ལ་ངེས་པར་རྟོགས་པར་གྱིས། །ཁྱེད་ཅག་གི་ཕྱོགས་འདི་ཡིན་ཏེ། །གང་དག་ལ་ནི་དགག་ཐོས་པ། །དེ་ཉིད་ལ་ནི་རྣམས་གཅོད་དུ། །གཞན་དུ་རང་གི་བདག་ཉིད་རྟོགས། །བསྐུལ་བ་ལས་བྱུང་བ་ཡི་བློ། །ཚད་མ་ཡིན་ཞེས་དེ་ལ་ཡང༌། །དགག་པའི་སྦྱོར་བ་ཡོད་མིན་ཏེ། །དེས་ན་ཚད་མིན་
ལྡོག་མི་འགྱུར། །གཞན་ཡང་གལ་ཏེ་ཚད་ཀུན་ལ། །ཚད་མ་ཉིད་ནི་ངས་གྱུར་ན། །དེ་ཉིད་ཀྱིས་ན་སྨྲ་པོ་ལ། །དེ་ཚེ་འདོད་པ་ཐ་དད་ཅིང༌། །གང་ཞིག་འགའ་ཞིག་རང་ཉིད་ཀྱིས། །ངེས་པར་གསལ་བར་སྨྲས་པ་ཡིན། །ཅུང་ཟད་རང་ལས་ཅུང་ཟད་གཞན། །གཞན་དག་གིས་ངེས་མེད་པར་འདོད། །གང་གིས་འཁྲུལ་པ་ལས་བྱུང་རྩོད། །དེ་ཡང་ངེས་པས་གནོད་པར་འགྱུར། །དེས་ན་དེ་ཉིད་ངེས་བྱས་ལ། །རྩོད་པ་པོ་རྣམས་རྩོད་མི་བྱ། །ཚད་མ་རྣམས་ལ་རང་ལས་ནི། །ཚད་མ་ཉིད་དུ་ངེས་པས་ན། །སླུ་བའི་དོན་ནི་ཅུང་ཟད་མེད། །ངེས་པར་བྱས་པས་འཇུག་ཕྱིར་རོ། །ཚད་མ་མིན་ལ་ཚད་ཉིད་ཀྱི། །བློ་ཡིས་འཇུག་ན་སླུ་བར་འགྱུར། །རང་ལས་ཚད་མ་ཉིད་རྟོག་པས། །ཕྱིན་ཅི་ལོག་བ་ཅུང་ཟད་མེད། །ཚད་མ་མ་ཡིན་ལས་འཇུག་ན། །སླུ་བར་ཐོབ་འགྱུར་མ་ཡིན་ནམ། །ངེས་པ་དེ་ལས་གཞན་ན་ནི། །གནོད་པ་ཤེས་པ་ལས་འདོད་ཡིན། །ཚད་མ་ཉིད་ཀྱིས་འཇུག་པས་ན། །སླུ་བ་ཐོབ་པར་མི་འགྱུར་རོ། །ཁོ་བོ་ཅག་གིས་འདི་ཉིད་ལས། །རང་ལ་དེ་བདག་ཉིད་ངེས་བརྗོད། །དེ་མིན་དགོངས་པ་མ་ཤེས་ཕྱིར། །འདིར་ནི་འདི་བརྗོད་འདོད་མ་ཡིན། །ཚད་མ་ཐམས་ཅད་རག་ལས་ཡིན། །ཚད་མ་ཡིན་ན་ངེས་ཡིན་ན། །གང་ལས་རང་གི་ཚད་ཉིད་ཀྱིས། །ངེས་པ་མེད་པར་འགྱུར་བ་ན། །ཤུགས་ཀྱིས་ངེས་པར་དེ་ལ་ནི། །ཚད་མ་ཉིད་ངེས་པར་རྟོགས་འགྱུར། །དོན་གཞན་རྒྱུ་སྐྱོན་བཅས་པ་ཡི། །ཤེས་པ་ལ་ནི་མ་ལྟོས་ཕྱིར། །དེ་ཡི་ཚད་མིན་ཉིད་ངེས་ཕྱིར། །ཚད་མ་ལ་ནི་ཚད་མ་ཉིད། །ཕྱིན་ཅི་ལོག་པར་རིགས་པ་མིན། །སླུ་བ་དེ་ལས་འགའ་ཞིག་ཀྱང༌། །འཇུག་པར་མི་འགྱུར་དེ་རྟོགས་ཕྱིར། །སྐྱེ་བ་ལས་ནི་གཞན་པ་ཡི། །བྱ་བ་ལ་ནི་དུས་མེད་ཡིན། །བུམ་སོགས་སྐད་ཅིག་མིན་ཉིད་ཕྱིར། །དེས་ན་དཔེ་ནི་མ་གྲུབ་བོ། །དེ་དག་རྣམས་ནི་དུས་ཕྱི་མར། །རྫ་མཁན་སོགས་ལ་མ་ལྟོས་པས། །རང་གི་ཉེར་ལེན་སོགས་ལྟོས་ཕྱིར། །རང་ལས་འཇུག་པ་ཡོད་པ་མིན། །གཞན་ལས་ཚད་མ་གནས་པ་ན། །ཐུག་པ་མེད་པར་མི་འགྱུར་ཏེ། །གང་ཕྱིར་དོན་མེད་ཤེས་པ་ནི། །རང་ལས་ཚད་མ་ཉིད་དུ་ངེས། །སྔ་མའི་ཤེས་ལ་འདི་ལ་ནི། །ཕུལ་དུ་བྱུང་བ་ཅི་ཞིག་
ཡོད། །གང་གིས་སྔར་ཤེས་བཞིན་དེ་ཡང༌། །གཞན་ལས་ཁས་མི་ལེན་ཅེ་ན། །སྨྲ་བའི་དངོས་པོའི་མི་སླུ་བས། །ཚད་མ་ཉིད་དུ་བརྗོད་པ་ཡིན། །དེ་ཡང་དོན་བྱེད་པར་སྣང་བའི། །ཤེས་ལས་གཞན་མཚན་ཉིད་ཅན་མིན། །དོན་བྱེད་པར་ཡང་སྣང་བ་ཡི། །ཤེས་པ་གསལ་བ་རིགས་པ་ཡིན། །དེ་ཙམ་ལས་ནི་བྱུང་བ་ཡི། །བསྲེ་བའི་ཤེས་པས་ངེས་པར་འགྱུར། །དེས་ན་དེ་ཡི་ཚད་མ་ཉིད། །རང་ལས་ངེས་པར་བྱས་པའི་ཕྱིར། །ཕྱིས་ཀྱི་དོན་བྱེད་ཐོབ་པ་ཡི། །ཤེས་པ་ལ་ནི་ལྟོས་པ་མིན། །འབྲས་བུ་སྣང་བའི་ཤེས་པ་ནི། །ཚད་མའི་ངོ་བོ་ངེས་བྱས་པ། །རྒྱུ་འདིས་དང་པོའི་ཤེས་པ་ཡང༌། །ཚད་མ་ཉིད་དུ་ངེས་པ་ཡིན། །དང་པོའི་དངོས་མེད་ཡུལ་ཅན་ན། །དངོས་པོ་མི་སླུའི་མཚན་ཉིད་ཅན། །གཉིས་པ་འཇུག་པར་མི་འགྱུར་ཏེ། །དེ་ཡི་རྒྱུ་ནི་མི་སྲིད་ཕྱིར། །ཨ་ཤོ་ཀ་ཡི་མེ་ཏོག་ཚོགས། །མེ་ཡི་ངོ་བོར་ངེས་བྱས་ཀྱང། །སྲེག་དང་བཙོ་བར་སྣང་བ་ཅན། །ཤེས་པ་ནམ་ཡང་སྐྱེ་མི་འགྱུར། །སྐྱེས་ན་མེ་ལ་རིགས་མཐུན་པར། །དེ་ནི་ཐལ་བར་མི་འགྱུར་ཏེ། །མེ་ནི་བྱ་བ་བཙོ་སྲེག་གི །རྒྱུ་ཙམ་མཚན་ཉིད་ཅན་ཡིན་ཕྱིར། །དེས་ན་དོན་བྱེད་སྣང་བ་ཡི། །ཤེས་པ་ཇི་སྲིད་མི་སྐྱེ་བར། །དེ་སྲིད་འཁྲུལ་པའི་རྒྱུ་ཡིས་ནི། །དང་པོ་ཚད་མིན་དོགས་པ་སྐྱེ། །རྗེས་ཐོགས་འབྲས་བུ་མ་མཐོང་དང༌། །འདྲ་བ་ཉིད་ནི་དམིགས་པ་ནི། །བློ་ཡི་མི་གསལ་ཉིད་ལ་སོགས། །འདིར་ནི་འཁྲུལ་པའི་རྒྱུ་ཡིན་ནོ། །འབྲས་བུ་སྣང་བའི་ཤེས་པ་ནི། །སྐྱེས་པར་གྱུར་ན་དེ་ཡོད་མིན། །དངོས་སུ་དངོས་པོ་དང་འབྲེལ་པའི། །འབྲས་བུ་སོ་སོར་རིག་པའི་ཕྱིར། །འཁྲུལ་མེད་ཡུལ་ནི་རྟོགས་པའི་ཕྱིར། །མི་མཐུན་པར་ནི་རྟོགས་པར་འགྱུར། །དེ་ཡི་འབྲས་བུ་མ་མྱོང་ཡང༌། །དང་པོའི་ཤེས་ལ་གོམས་ཅན་འཇུག །མི་མཐུན་འཇུག་པ་མེད་ན་ཡང༌། །རིགས་མི་མཐུན་དོགས་རྟོགས་པ་ཡིས།། འབྲས་བུ་སྣང་བའི་ཤེས་པ་ནི། །མེད་ན་ཚད་མ་ངེས་མི་འགྱུར། །དེ་ལ་ཚད་མ་ཉིད་ཡོད་ཀྱང༌། །ངེས་པར་བྱེད་པར་ནུས་པ་མིན། །ཕྱིས་དོན་བྱེད་ཤེས་འགའ་ཞིག་གིས། །དེ་ནི་རྟོགས་པར་འགྱུར་བ་ཡིན། །དེས་ན་དང་པོའི་ཤེས་པ་ནི། །དེ་ནི་མི་སླུ་བ་ལ་ལྟོས། །མི་སླུ་བ་
ཡང་མི་སླུ་བ། །དེ་བཞིན་བཙལ་བར་མི་བྱ་སྟེ། །འཁྲུལ་པའི་རྒྱུ་ནི་མེད་པའི་ཕྱིར། །རང་ལས་དེ་ནི་ཚད་མ་ཡིན། །དང་པོའི་རང་ལས་ཚད་དངོས་ལ། །ཞེ་སྡང་འཁྲུལ་པ་སྲིད་པའི་ཕྱིར། །རྣམ་པར་ཤེས་པ་དེ་ལ་ནི། །ཚད་ཉིད་ངེས་བྱས་མ་ཡིན་ནམ། །འདོད་པའི་དོན་ནི་མ་རྟོགས་ཕྱིར།། དེ་ལས་རྟོག་ལྡན་ཇི་ལྟར་འཇུག །སྨྲས་པ་རྟོག་པ་དང་ལྡན་དེ། །ཐེ་ཚོམ་ལས་ནི་འཇུག་པ་ཡིན། །དེ་ལྟ་ཡིན་ཡང་དེ་ལ་ནི། །རྟོག་ལྡན་ངོ་བོ་ཉམས་མི་འགྱུར། །གང་གིས་ཚད་མ་ལ་ཐེ་ཚོམ། །ཡོད་ཀྱང་ཐེ་ཚོམ་གྱིས་འཇུག་ན། །དེ་ཡང་ཚད་མ་ཉིད་ངེས་པའི། །ཐབས་ཉིད་དུ་ནི་ངེས་པ་ནི། །ཐེ་ཚོམ་གྱིས་ནི་འཇུག་པ་ན། །གལ་ཏེ་བདག་གིས་དོན་ཐོབ་འགྱུར། །དེ་ལྟ་ཡིན་ན་ཤེས་དེ་ཡི། །ཚད་མ་ཉིད་དུ་ངེས་པར་འགྱུར། །གཞན་དུ་མིན་ཏེ་འདི་ལྟར་ཡང༌། །འདི་ནི་རྩོད་པ་རིགས་བཅས་མིན། །ཅི་ཕྱིར་ཐབས་ལ་འཇུག་ཅེ་ན། །གང་ཕྱིར་གཞན་དུ་ངེས་པ་མེད། །ཐབས་མེད་ན་ནི་འགའ་ཞིག་གིས། །ཐབས་ལས་བྱུང་བ་རྟོགས་མི་འགྱུར། །དེ་ལྟར་ཐེ་ཚོམ་གྱིས་འཇུག་ཀྱང༌། །རྟོག་པ་དང་མི་ལྡན་ཉིད་མིན། །དོན་བྱེད་སྣང་བའི་ཤེས་པ་ནི། །རྨི་ལམ་ན་ཡང་ཡོང་མིན་ནམ། །དེ་ནི་ཚད་མ་ཉིད་མིན་ཏེ། །དེ་རྒྱུ་དང་པོ་ཅིས་ཚད་མིན། །དེ་མིན་འཁྲུལ་བཅས་གནས་སྐབས་ཀུན། །དེ་ནི་ཕྱི་རོལ་རྒྱུ་མཚན་ཡིན། །ཕྱི་རོལ་དངོས་པོའི་མི་སླུ་བ། །གནས་སྐབས་དེ་དག་ལ་ཡོད་མིན། །རང་རིགས་ངོ་བོ་སེམས་དང་ནི། །སེམས་བྱུང་མི་མཐུན་མཚན་ཉིད་ཡོད། །དེ་ཡིས་གནས་སྐབས་གཉིས་བྱེ་བྲག །གསལ་བར་རྟོགས་པར་འགྱུར་བ་ཡིན། །བརྒྱ་ལ་དེ་ཡིས་ཚད་མ་ཉིད། །གཞན་ནས་ངེས་པར་བྱེད་ཡིན་ན། །གཞལ་བྱ་ཉིད་ཐལ་འགྱུར་ཞེ་ན། །དེ་ནི་འགལ་མེད་མ་ཡིན་ནམ། །དེ་ནི་གཟུང་བྱའི་དངོས་ལྟོས་ནས། །ཚད་མ་ཉིད་དུ་དེ་ནི་བརྗོད། །གཞན་ལས་དེ་ནི་རྟོགས་པའི་ཕྱིར། །གཞལ་བྱ་ཉིད་དུ་རྣམ་པར་གནས། །ལྟོས་པ་དབྱེ་བས་དེ་ལྟར་ཡིན། །རྒྱུ་དང་འབྲས་བུ་ཉིད་སོགས་ཡིན། །ཚད་མ་ཉིད་དང་གཞལ་བྱ་ཉིད། །རྣམ་པར་གཞག་པ་འགལ་བ་མིན། །དེ་ལྟར་དོན་བྱེད་ཤེས་པ་ལས། །ཚད་མ་ཉིད་དུ་ངེས་པས་ན། །ཐུག་མེད་མ་ཡིན་གཞན་ལ་ནི། །འདོད་པ་ལྡོག་ཕྱིར་ཞེས་བྱར་གནས། །རྣམ་པར་ཤེས་པ་
སྐྱེད་པ་ནའང༌། །ཇི་སྲིད་རྒྱུ་ཡི་དག་པ་ཉིད། །ཚད་མ་གཞན་གྱིས་མ་རྟོགས་ན། །དེ་སྲིད་དོན་ནི་ངེས་གཟུང་མིན། །འདིར་ཡང་བློ་བཟངས་སྨྲ་བ་སྟེ། །ཐུག་མེད་མ་ཡིན་གང་གིས་ན། །ལྟོས་མེད་མི་སླུའི་ཤེས་པ་ལས། །དག་པ་དེ་ནི་རྟོགས་པར་འགྱུར། །འབྲས་བུ་མི་སླུ་བ་མཐོང་བས། །ཡུལ་ནི་ཉེ་བར་གནས་ངེས་ན། །རྒྱུ་རྣམས་ཀྱིས་ནི་དག་པ་ཉིད། །འབད་མི་དགོས་པར་རྟོགས་པར་འགྱུར། །བསྐལ་པ་ཡི་ནི་ཡུལ་ལ་ཡང༌། །དེ་ལ་བྱུང་བློ་ཚད་མ་ཡིན། །དེས་སྐྱེད་ཉིད་ཕྱིར་དཔེར་ན་ནི། །ཉེར་གནས་སྤྱོད་ཡུལ་ཅན་དེ་བཞིན། །ཇི་ལྟར་མདུན་གནས་དུང་ལ་ནི། །དཀར་པོ་བསྒྲུབ་པའི་བྱེད་ཐོབ་ནས། །མིག་སེར་གྱིས་བཏབ་དབང་པོ་ལས། །བྱུང་པའི་རྣམ་ཤེས་མིན་པར་རྟོགས། །དེ་ལ་རྒྱུ་ཡི་དག་པ་ནི། །རྟོགས་པར་འགྱུར་ན་དེའི་དུས་སུ། །གསེར་ལས་བྱས་པའི་དུང་ལ་ནི། །སེར་པོའི་རྣམ་པའི་བློ་འབྱུང་གང༌། །རྣམ་པར་དག་པའི་རྒྱུས་བསྐྱེད་ཕྱིར། །དེ་ནི་ཚད་མ་ཉིད་དུ་ངེས། །དོན་གྱི་བྱེད་པ་རྫོགས་གྱུར་པའི། །དུང་ལ་དཀར་པོའི་བློ་བཞིན་ནོ། །བཀྲེས་སོགས་ཀྱིས་ནི་ཉེན་སོགས་པའི། །ཚིག་གིས་འདིར་ནི་སྨྲས་མིན་ན། །དེས་ན་བཤད་པ་བྱེད་པ་པོ། །རྨོངས་པས་ཐུག་མེད་འདིར་རྩོད་བྱས། །སྐྱོན་བྱས་རྒྱུ་ཡིས་བསྐྱེད་བྱས་པའི། །དོགས་པས་དང་པོ་ཚད་ཉིད་དུ། །རྟོགས་པར་མི་འགྱུར་དེ་བཞིན་པའི། །ཤེས་པ་ཁྱད་པར་ཅན་དུ་འདོད། །དེ་ལྟར་དོན་བྱེད་ཤེས་པ་ཡིས། །རྒྱུ་ཡི་དག་པ་ངེས་བྱས་ནས། །དོན་བྱེད་མ་བྱས་པའི་ཡུལ་ལ། །འཇུག་པའི་སྐྱོན་མི་བརྗོད་རིགས་ཡིན། །གལ་ཏེ་རང་ལས་ཚད་མ་ཉིད། །ཀུན་ལ་སྤྱིར་བསྟན་ཅན་དུ་གནས། །གནོད་དང་རྒྱུ་སྐྱོན་བཅས་ཉིད་ཀྱི། །ཤེས་བདག་གིས་དེ་བསལ་ཡིན། །གནོད་དང་རྒྱུ་སྐྱོན་བཅས་པ་ཡི། །ཤེས་པ་མེད་ཕྱིར་ཚད་མ་ཉིད། །ཐོབ་འགྱུར་དེ་ནི་གཞན་ལས་ནི། །ཚད་མ་ཉིད་ངེས་དེ་ལྟར་འགྱུར། །འདི་ལྟར་དེ་མེད་པ་འདི་ནི། །ཁྱེད་ཕྱོགས་དངོས་མེད་ཅེས་བྱ་བའི། །ཚད་མ་གཞན་ཡིན་བདག་གཞུང་ལ། །མི་དམིགས་ཞེས་བྱའི་རྗེས་དཔག་ཡིན། །རིགས་པ་འདི་ཉིད་ཁོ་ན་ཡིན། །ཚད་མིན་པ་ཡང་རང་ལས་ཡིན། །གང་ཕྱིར་དེར་ཡང་འདི་འདྲ་བའི། །རིགས་པ་འདི་ནི་བརྗོད་པར་ནུས། །དེ་ཕྱིར་རང་ལས་
ཚད་མིན་ཉིད། །ཀུན་ལ་སྤྱིར་བསྟན་ཅན་དུ་གནས། །གནོད་དང་རྒྱུ་སྐྱོན་བཅས་ཉིད་ཀྱི། །ཤེས་པ་མེད་ཕྱིར་དེ་བསྩལ་ཡིན། །དེ་ལྟར་རྟོགས་པའི་བདག་ཉིད་ཀྱི། །བློ་ནི་ཚད་མ་ཉིད་ཐོབ་འགྱུར། །ཇི་ལྟར་དོན་ཤེས་རྒྱུ་ལས་བྱུང༌། །ཡོན་ཏན་ཤེས་བ་དག་གིས་སེལ། །ཚད་མིན་གཞན་ལ་རག་ལས་ན། །ཐུག་པ་མེད་པ་ཁོ་ནར་འགྱུར། །དེ་ནི་ཚད་མ་ལ་རག་ལས། །དེ་ཡང་རང་ལས་གནས་པ་མིན། །འདི་ལྟར་གནོད་པ་མེད་པའི་ཕྱིར། །ཚད་མ་ཉིད་དུ་ཁྱེད་ཀྱིས་སྨྲས། །དེ་བཞིན་དངོས་མེད་ལ་ཡང་ནི། །དངོས་མེད་ཅེས་བྱ་ཚད་གཞན་འདོད། །དེ་ཡང་གནོད་པ་མེད་པའི་ཕྱིར། །ཚད་མ་ཉིད་དུ་འདོད་པ་ཡིན། །དེ་དང་དེ་དེ་ལྟར་འདོད་ན། །དེས་ན་མཐར་ཐུག་རྙེད་མི་འགྱུར། །དེས་ན་གནོད་ཅན་ཤེས་པ་ལ། །ལྟོས་མེད་ཚད་མ་ཉིད་མི་འགྲུབ། །དེ་ཕྱིར་སྔ་མའི་ཤེས་པ་ནི། །འདི་ཡིས་བསལ་བར་མི་འགྱུར་རོ། །འོན་ཏེ་གནོད་མེད་མ་ལྟོས་པར། །གང་ཞིག་ཚད་མ་ཉིད་འདོད་ན། །དང་པོ་དེ་ལྟར་འགྱུར་བ་ལ། །རྒྱུ་མཚན་གང་གིས་སྡང་བ་ཡིན། །མ་ལྟོས་ཚད་མ་ཉིད་ཡིན་ཕྱིར། །གནོད་པ་ཅན་གྱི་ཤེས་པ་འདི། །གལ་ཏེ་གནོད་ཅན་ཤེས་པ་འདིས། །སྔ་མའི་ཤེས་པ་སེལ་བྱེད་ན། །དེ་ལས་གང་གིས་དོགས་པར་འགྱུར། །ལྟོས་མེད་ཚད་མ་ཉིད་ཡིན་ཏེ། །འདི་ནི་གནོད་པ་ཅན་དོགས་འགྱུར། །གང་ཕྱིར་དེ་འགལ་ངེས་བྱས་ན། །དོགས་པ་སྐྱེ་བར་མི་འགྱུར་རོ། །རང་ལས་ཚད་མ་ཉིད་ཕྱོགས་ལའང༌། །རང་ཉིད་ཀྱིས་ནི་ངེས་པ་སྐྱེ། །གནོད་པ་ཡོད་པར་སྒྲུབ་པ་ཡིས། །འབད་པ་ཅི་ཕྱིར་བྱེད་པ་ཡིན། །འདི་ལྟར་རང་ཉིད་གང་ལ་ཡང༌། །ཚད་མ་ཉིད་དུ་ངེས་པ་མད། །འབད་པ་མེད་པར་ཤུགས་ཀྱིས་ནི། །དེ་ལ་གནོད་པ་མེད་པ་ཡིན། །དེས་ན་རྟོགས་བྱེད་ཤེས་པ་གསུམ། །ཅི་ཕྱིར་འདི་ནི་བརྗོད་པ་ཡིན། །དེ་ལས་དེ་ནི་ངེས་བྱས་པས། །གཅིག་གི་ཡང་ནི་གོ་སྐབས་མེད། །གལ་ཏེ་མ་དམིགས་པ་ལ་ཡང༌། །ཐེ་ཚོམ་གྱིས་ནི་དོགས་སྐྱེ་ན། །གང་ཕྱིར་གནོད་པ་མེད་པ་དང༌། །མེད་ན་མི་འབྱུང་མི་དམིགས་ཡིན། །དེ་ལྟར་ཡིན་ན་ཤེས་གསུམ་ལ། །ཅི་ཕྱིར་ཁྱོད་ནི་མགུ་བར་བྱེད། །གནོད་པ་མ་མཐོང་ན་ཡང་ནི། །འདིར་ནི་སྔ་མ་བཞིན་གནོད་དོགས། །ཇི་སྲིད་འབྲས་བུའི་མི་སླུ་མེད། །
དེ་སྲིད་གནོད་པའི་དོགས་པ་ནི། །གང་ཕྱིར་ལྡོག་པར་མི་འགྱུར་ཏེ། །དེ་ཕྱིར་ཤེས་གསུམ་ངེས་དོན་མེད། །དེས་ན་གནོད་མ་སྐྱེས་པས་ཀྱང༌། །སླར་ཡང་གནོད་པར་དོགས་པ་ཡིན། །གང་ཕྱིར་དངོས་པོའི་དེ་ཉིད་ནི། །ནམ་ཡང་ཚིག་དོར་གྱིས་གནས་མིན། །ཇི་སྲིད་འཚོ་ཡི་བར་དུ་ནི། །དུང་ལ་སེར་པོར་སྣང་ཤེས་པ། །གནོད་པའི་ཤེས་པ་དང་བྲལ་ཞིང༌། །ཇི་སྲིད་འཚོ་ཡི་བར་དུ་སྐྱེས། །གང་ཕྱིར་ཚད་མར་སྐྱེ་མི་འགྱུར། །རྣམ་པར་དག་པའི་རྒྱུ་མེད་ཕྱིར། །ཡང་ན་རྒྱུ་མཚན་གཞན་གྱིས་ནི། །གནོད་པ་ཅན་དུ་མི་སྐྱེ་སྟེ། །དེས་ན་དོགས་པ་ལྡོག་མི་འགྱུར། །དེས་ན་རྒྱུ་མཚན་དང་བཅས་པ། །དོགས་པ་འདི་ཡིན་རྨོངས་པས་མིན། །དག་པ་མི་སླུ་མཐོང་བས་ན། །བློ་བཟང་དོགས་པ་མེད་པར་འགྱུར། །དེ་ནི་ཐ་སྙད་ཐམས་ཅད་ལ། །ཐེ་ཚོམ་བདག་ཉིད་སྐྱེ་མི་འགྱུར། །ངག་དང་མི་སླུ་བ་མཐོང་བས། །དེ་བློ་ཐེ་ཚོམ་མེད་པ་ཡིན། །འདིར་ཡང་རྨོངས་པ་འགའ་ཞིག་གང། །སླར་ཡང་དོགས་པར་བྱེད་པ་ན། །དེ་ལ་བརྟེན་ནས་ཁྱབ་འཇུག་གིས། །ཐེ་ཚོམ་བདག་ཉིད་ལ་སྨང་བྱས། །ཡུལ་དུས་མི་ཡི་གནས་སྐབས་ཀྱི། །དབྱེ་བ་ལ་ནི་ལྟོས་ནས་སུ། །ཚད་མ་ཉིད་ངེས་རྟོགས་ན་ཡང༌། །གསལ་བར་གཞན་ལས་ཚད་ཉིད་ངེས། །འདི་ལྟར་ཡུལ་དང་དུས་སོགས་ལའང༌། །ཚད་མ་གཞན་ལས་གནོད་པ་ནི། །མེད་པར་ངེས་ཕྱིར་སྔ་མ་ཡི། །ཤེས་ལ་ཚད་མ་ཉིད་ནི་ངེས། །བུ་ལོ་ན་ལ་སོགས་ཐ་སྙད་ནི། །ངག་གསུམ་སྦྱོར་ལྡན་གང་དེ་ནི། །དེ་འདྲའི་ཚིག་དོར་བདག་ཉིད་ཅན། །ཚད་མའི་སྐབས་སུ་བརྗོད་བྱ་མིན། །གང་ཕྱིར་བུ་ལོན་དེ་དང་ཆགས།། དེ་ནི་གསལ་པོར་དྲན་དྲན་ནས། །དངོས་པོ་དེ་ལ་ཤིན་ཏུ་ནི། །དཔྱད་པར་བྱ་བ་འདོད་པ་མིན། །དངོས་པོའི་གནས་པའི་ཚད་མ་ནི། །གཞག་བྱ་ཚིག་དོར་གྱིས་མ་ཡིན། །དེས་ན་སྐབས་དང་མི་མཐུན་པའི། །ཐ་སྙད་འདི་ནི་དཔེར་བྱས་ཡིན། །ལྷ་རྣམས་ཀྱི་ཡང་བདེན་པ་གསུམ། །དེས་པར་བྱེད་པའི་རྒྱུ་མ་ཡིན། །དང་པོས་ངེས་པ་མེད་པས་ན། །གཞན་ལས་ཀྱང་ནི་དེ་འགྱུར་མིན། །གང་ཕྱིར་དེ་ཉིད་ཁོ་ན་ཡི། །ཕྱི་མའི་ཚིག་གཉིས་ཀྱང་ཡིན་ཏེ། །དེས་ན་དང་པོས་ངེས་མེད་ན། །དེ་ལས་གཞན་ན་ཁྱད་ཅི་ཡོད། །དེ་ཕྱིར་སྔར་བཤད་རིགས་པ་ཡིས། །ཁྱེད་ཀྱི་ཕྱོགས་ལ་ཐུག་མེད་
འགྱུར། །ཚད་མ་དང་ནི་ཚད་མིན་ཉིད། །དེས་ན་ཇི་ལྟར་རིགས་པར་གནས། །ཁོ་བོ་ཅག་གིས་རྟོགས་པའི་ངག །སྔར་ནི་རྒྱས་པར་གསལ་བར་བྱས། །ཁྱེད་ཀྱིས་འདོད་པས་ཡིད་ཆེས་བའི། །གང་ཟག་མ་ལུས་སྐྱོན་བྲལ་མེད། །སྒྲིབ་པའི་ཕུང་པོ་མ་སྤངས་པ། །ཇི་ལྟར་ཡིད་ཆེས་གང་ཟག་འགྱུར། །གང་ཕྱིར་དེ་ལ་སྐྱོན་ཡོད་ཕྱིར། །རྣམ་པ་གཞན་དུ་ཚིག་སྲིད་ཡིན། །ཡིད་ཆེས་སྐྱེས་ཀྱང་དེ་ཡི་ནི། །ཡོན་ཏན་ཚོགས་དེ་སུས་རྟོགས་ནུས། །གང་ལ་ཡིད་ཆེས་པས་སྨྲས་པའི། །ངག་ནི་ངེས་པར་བཟུང་བ་ཡིན། །དེ་ཡི་ཡོན་ཏན་ཕུན་ཚོགས་ནི། །གང་གིས་དབང་འདས་མཐོང་བས་མཐོང༌། །དེ་ལ་ཡང་ནི་ཡིད་ཆེས་པས། །སྨྲས་པའི་ཚིག་གིས་དོགས་པ་མེད། །དེ་ནི་གང་ལའང་མི་ལྟོས་པར། །རང་ཉིད་ཀྱིས་ནི་དོན་རྟོགས་འགྱུར། །གཞན་ནི་ཡིད་ཆེས་ཕྱིར་མི་ཤེས། །དེ་ལས་དོན་རྟོགས་མ་ཡིན་ནོ། །རང་ལས་ཚད་མ་ཉིད་སྨྲ་བས། །རང་ཉིད་ཀྱིས་ནི་ངེས་སྐྱེའི་ཕྱིར། །འཇིགས་པ་སྲིད་པ་མི་རུང་བས། །ཅི་ཕྱིར་སྐྱོན་ནི་སེལ་བར་བྱེད། །ཡོན་ཏན་གྱིས་བསྩལ་སྐྱོན་རྣམས་ཀྱིས། །ངག་སུན་འབྱིན་བྱེད་མ་ཡིན་བདེན། །འོན་ཀྱང་ཡོན་ཏན་མ་ངེས་པར། །དེ་ངེས་བྱེད་ནུས་མ་ཡིན་ནོ། །ངག་ལ་མ་བྱས་པ་ཉིད་ནི། །སྔར་ཉིད་བཀག་པར་བྱས་ཟིན་ཏེ། །དེས་ན་བྱེད་པོ་མེད་ན་སྐྱོན། །དེ་དག་རྟེན་མེད་མི་འགྱུར་མིན། །ཡོན་ཏན་རྣམས་ཀྱི་ཚད་མ་ཉིད། །ཇི་ལྟར་རིགས་པ་དེ་ལྟར་བཤད། །ཡོན་ཏན་རྣམས་ནི་མ་ཤེས་པར། །སྐྱོན་མེད་པར་ནི་མཚོན་མི་འགྱུར། །སྐྱོན་མེད་པར་མཚོན་དག་དེ་ནི། །རང་ལས་ཚད་མ་ཉིད་རིགས་མིན། །ཡོངས་སུ་མ་ཤེས་པ་ཡི་ཕྱིར། །སྐྱོན་མེད་ཉེ་བར་མཚོན་མ་ཡིན། །གང་ཕྱིར་དབྱུག་པ་མ་ཤེས་པར། །སྐྱེས་བུ་དབྱུག་པ་ཅན་མཚོན་མིན། །དེས་མཚོན་རང་ལས་ཚད་མ་ནི། །ཞེས་བྱ་དེ་ནི་ཕན་ཚུན་འགལ། །དངོས་མེད་ཚད་མས་སྐྱོན་མེད་ནི། །ཚད་མ་ཉིད་ངེས་བདག་ཉིད་ཅན། །ངག་གི་མཚན་ཉིད་རིགས་ཡིན་ཏེ། །དེས་ན་གཞན་ལས་ཚད་མར་གནས། །དེ་དག་ཡོད་ན་མིའི་སྐྱོན་གྱི། །ཡུལ་ཅན་ཤེས་སྐྱེ་མི་འགྱུར་མིན། །ཡོན་ཏན་རྣམས་ནི་མ་ཤེས་པར། །སྐྱོན་མེད་ངེས་པར་ཇི་ལྟར་འདོད། །ཞེ་སྡང་གཏི་མུག་བརྩེ་མེད་སྐྱོན། །བརྩེ་དང་
ཤེས་རབ་སོགས་ཀྱིས་གནོད། །བརྩེ་སོགས་ངེས་པར་མ་བྱས་པར། །དེ་དག་མེད་པར་ཇི་ལྟར་འདོད། །ཡོན་ཏན་ཤེས་འགྱུར་ཉིད་ཀྱིས་ནི། །དེ་ཚེ་བྱ་བཅས་འཇུག་མིན་ན། །སྐྱོན་མེད་ལ་ནི་ཡོད་པ་ཙམ། །ཕན་འདོགས་བྱེད་པར་ཤེས་པར་བྱ། །གལ་ཏེ་དེ་ལྟར་ཐེ་ཚོམ་དང༌། །དེ་བཞིན་ཕྱིན་ལོག་བློ་མེད་འགྱུར། །ཡིད་ཆེས་འདོད་པ་ཡོད་པ་ན། །སྐྱོན་རྣམས་ཡོད་དམ་མེད་པར་འགྱུར། །དེས་ན་འདིར་ནི་འགའ་ཞིག་ལ། །ཐེ་ཚོམ་ཕྱིན་ཅི་ལོག་ཡོད་ན། །ཇི་སྲིད་ཡོན་ཏན་ཚོགས་རྟེན་ཤེས། །དེ་ནི་རྟོགས་པར་མ་བྱས་དང༌། །འོན་ཏེ་སྐྱོན་མེད་མ་ཤེས་ན། །ཇི་ལྟར་རང་ལས་ཚད་ཉིད་མེད། །དེ་བཞིན་སྨྲ་པོ་དེ་ལ་ནི། །ལོག་པའི་བློ་ནི་སྐྱེ་མི་འགྱུར། །སྐྱོན་མེད་པར་ནི་མ་ཤེས་ཕྱིར། །ཚད་མ་གཉིས་པོ་མེད་པ་རུ། །ཇི་ལྟར་རྟོགས་པར་འགྱུར་བ་ཡིན། །གང་གིས་ཚད་མ་ཉིད་ངེས་འགྱུར། །འོན་ཏེ་ཚད་མིན་གཉིས་མེད་པར། །མ་རྟོགས་ན་ཡང་རང་ཉིད་ཀྱིས། །ཚད་མ་ཉིད་ནི་རྟོགས་པས་ན། །སྔར་བཞིན་ལོག་པའི་བློ་མི་འབྱུང༌། །དེའི་ཚིག་ཚད་མ་ཡིན་ནམ་ཅི། །ཡང་ན་ཚད་མ་མིན་ཏེ་ཡིན། །ཚད་མ་ཉིད་དུ་ངེས་པའི་ཕྱིར། །ཀུན་ལ་ཚད་མ་ཉིད་དུ་འགྱུར། །སྐྱོན་མེད་དང་ནི་ཚད་མིན་མེད། །ཡོན་ཏན་ཡོང་དང་གསུམ་ལ་ནའང༌། །དེས་ན་ངེས་པར་རྟོགས་པ་ནི། །གདོན་མི་ཟ་བར་ཁས་བླང་དགོས། །དེ་ཡང་ཚད་མ་ཡིན་ནམ་མིན། །དེ་ལྟར་དེ་ཡང་བརྟག་པར་བྱ། །ཇི་བཞིན་དོན་ནི་ངེས་པ་ཡིས། །ཡན་ལག་ཚད་མིན་ཇི་ལྟར་འགྱུར། །ཚད་མ་ཡིན་ན་གཞན་ལས་ནི། །དེ་ཡིས་ཚད་མ་ཉིད་ངེས་ཐོབ། །རྟོག་པ་དེ་ཡི་ཚད་མ་ཉིད། །ཇི་ལྟར་རྟོགས་པར་འགྱུར་བ་ཡིན། །གནོད་ཤེས་མེད་པའི་ཕྱིར་ཞེ་ན། །དེ་ཡང་ཚད་མ་ཡིན་ནམ་ཅི། །འོན་ཏེ་མིན་ཞེས་སླར་ཡང་འདིར། །སྐྱོན་ནི་ཐམས་ཅད་ཀྱང་འཇུག་འགྱུར། །ཚད་མ་ཡིན་ན་གཞན་ལས་ནི། །དེ་ནི་ཚད་མ་ཉིད་དུ་འགྱུར། །ཇི་བཞིན་དོན་ཤེས་རྒྱུ་ཉིད་དུ། །ཚད་མ་ཡིན་པ་གང་ལས་འགྱུར། །འདི་ལ་ཡང་ནི་ཚད་མ་ཉིད། །གང་གིས་རྟོགས་ཞེས་དཔྱད་པར་བྱ། །གནོད་ཅན་ཤེས་མེད་ཕྱིར་ཞེ་ན། །དེས་ན་ཐུག་པ་མེད་ཐལ་འགྱུར། །དེ་ཕྱིར་ཡོན་ཏན་གྱིས་སྐྱོན་རྣམས། །མེད་པར་ངེས་ཏེ་མེད་པས་ན། །ཚད་མིན་གཉིས་ནི་མེད་པ་
ཡིས། །དེས་ན་སྤྱིར་བསྟན་མ་བསལ་ཡིན། །ཐམས་ཅད་ལ་ནི་དེ་བཞིན་དུ། །ཚད་མ་ཉིད་དུ་ངེས་ཤེ་ན། །འདིར་ཡང་སྔར་བསྟན་སྐྱོན་ཚོགས་དང༌། །ཐུག་པ་མེད་པར་ཐལ་བར་འགྱུར། །སྐྱོན་མེད་ཚད་མིན་མེད་པ་ཉིད། །སྐྱོན་མེད་ཚད་མིན་མེད་ཉིད་ཅེས། །དེ་ནི་དགག་པ་འབའ་ཞིག་གི །ངོ་བོ་གལ་ཏེ་རྟོགས་བྱེད་ན། །དེ་ནི་འགྲུབ་པར་མི་འགྱུར་ཏེ། །དངོས་མེད་ཕྱིར་རོ་དམིགས་པ་ཡིས། །དེ་གྲུབ་རིགས་མིན་དངོས་མེད་ཕྱིར། །ཐུག་པ་མེད་པའི་སྐྱོན་ཡོད་པས། །མ་དམིགས་པས་ཀྱང་དེ་རིག་མིན། །སྐྱོན་དང་ཚད་མིན་གཉིས་མེད་པར། །མ་དམིགས་པ་ཡིས་རྟོགས་བྱེད་ན། །མ་དམིགས་པ་ལ་མེད་པ་ཉིད། །གཞན་གྱིས་རྟོགས་པས་ཐུག་མེད་འགྱུར། །དེ་ཡང་མ་ཡིན་དགག་བདག་ཉིད། །དེ་ཡིས་བདེན་པ་གཞན་མཐོང་ཕྱིར། །སྐྱོན་མེད་ཡོངས་སུ་ཤེས་པ་ནི། །ཡོན་ཏན་ཤེས་པའི་བདག་ཉིད་འགྱུར། །ཚད་མིན་གཉིས་པོ་མེད་པ་ཡི། །ཤེས་པ་དེ་འདྲ་དཔེན་པ་ནི། །བརྗོད་འདོད་ཚད་མའི་ཤེས་པ་ཡི། །རང་བཞིན་དུ་ཡང་ཐལ་བར་འགྱུར། །ཡང་ན་རང་གི་རྒྱུ་ཀྱིས་ནི། །ཚད་མིན་གཉིས་མེད་ཤེས་གྲུབ་ན། །ཁྱེད་ལ་ལྷག་པའི་ཚད་ཉིད་ཀྱིས། །ངེས་པ་གནག་ལས་གྱུར་པ་ཡིན། །གཞན་དུ་མི་འཐད་པས་ཤེ་ན། །དོན་གྱིས་གོ་བར་འགྱུར་མིན་ནམ། །རྗེས་སུ་དཔག་པའམ་གཞན་ལས་ཀྱང༌། །དེས་ན་གཞན་ལས་ངེས་པར་འགྱུར། །ཁྱེད་ལ་རིགས་པ་འདི་ཉིད་ཀྱིས། །ཚད་མ་མ་ཡིན་པ་ཡང་ནི། །རང་ལས་ཐལ་བར་འགྱུར་བ་རུ། །གང་ཡང་རུང་བ་བསལ་བརྗོད་ནུས། །དེས་ན་སྐྱོན་ཕྱིས་ཡོན་ཏན་ནོ། །མེད་པ་འགྱུར་ཏེ་དེ་མེད་པས། །ཚད་མ་མ་ཡིན་དངོས་ཉིད་ནི། །དེས་ན་སྤྱིར་བསྟན་བསལ་བ་མིན། །གང་ཕྱིར་སྤྱིར་བསྟན་ངོ་བོ་འདི། །བརྗོད་པར་འདོད་པ་ཙམ་གྱིས་སྦྲུལ། །ཚད་མ་བཞིན་དུ་ཚད་མིན་ལའང༌། །གསལ་བར་བརྗོད་པར་ནུས་པ་ཡིན། །གང་ཕྱིར་རྟོག་པའི་བདག་ཉིད་ཀྱིས། །བློ་ནི་ཚད་མ་ཉིད་ཐོབ་འགྱུར། །ཇི་ལྟར་དོན་ཤེས་རྒྱུ་ལས་བྱུང༌། །ཡོན་ཏན་ཤེས་པ་དག་གིས་བསལ། །མི་ཤེས་ཉིད་ཕྱིར་ཡོན་ཏན་གྱིས། །ཚད་མིན་ཉིད་ནི་བསྩལ་བ་མིན། །མ་བསྩལ་བར་ནི་གྲུབ་མིན་ཏེ། །དེ་ནི་རང་ལས་གནས་པ་ཡིན། །ཉེས་པ་ཡོད་དམ་མེད་པར་ནི། །སྐྱེས་བུའི་དག་ལ་
ཐེ་ཚོམ་ཟ། །བྱེད་པོ་གྲུབ་ཕྱིར་རིག་བྱེད་ལའང༌། །བདག་ལ་སྐྱོན་གྱི་དོགས་མེད་མིན། །དེས་ན་མ་ལྟོས་ཉིད་ཀྱི་ཕྱིར། །རིག་བྱེད་ཚད་མར་གང་བརྗོད་པ། །དེ་གྲུབ་མིན་ཏེ་གང་གིས་ནི། །དེ་ཡང་བྱེད་པ་མ་ལྟོས་ཡིན། །གལ་ཏེ་ཐེ་ཚོམ་སྐྱེ་བའི་ཕྱིར། །མི་སླུ་བ་ཡི་ཤེས་པའམ། །རྒྱུ་ཡི་དག་པ་མ་ངེས་ན། །དེ་ཚེ་རིག་བྱེད་ཚད་མ་མིན། །གཞན་ལས་ཡང་ནི་ཚད་ཉིད་ལ། །དེ་ལྟར་གྱུར་པ་འབྲེལ་པ་ཉིད། །གང་ཕྱིར་རྒྱུ་རུ་བརྟགས་པ་དེས། །དེ་རྒྱུ་མཚོན་དུ་ངེས་པ་སྐྱེ། །དེ་ཡི་ཚད་ཉིད་ཡོང་པ་ནི། །དེ་ཡིས་ངེས་པར་བྱས་པ་ཡིན། །སྔ་ན་མེད་པའི་ཚད་མ་ཉིད། །དེ་ལ་འདི་ཡིས་བསྐྱེད་བྱས་མིན། །ལན་ཅིག་སྐྱེས་ནས་འཇིག་པ་ཡི། །དོན་ནི་ཚད་མ་ཉིད་དུ་འགྱུར། །ངེས་མ་བྱས་ཀྱང་དེ་ཡོད་ཉིད། །སྔར་བཤད་རིམ་པས་ངེས་པར་འགྱུར། །གལ་ཏེ་རྒྱུ་ཡི་དག་པ་ཉིད། །ཤེས་ན་དེ་ལ་ངེས་པར་འགྱུར། །ཡང་ན་བཙོ་སྲེག་ལ་སོགས་པའི། །མཚན་ཉིད་དོན་བྱེད་ཐོབ་པ་ཡིས། །གལ་ཏེ་འབྲས་འབྱུང་ལ་མ་ལྟོས། །གོམས་བཅས་འཇུག་པ་ཡོད་ན་ངེས། །ཐབས་ཐམས་ཅད་དང་བྲལ་བ་ན། །ཚད་མ་ཉིད་ནི་ངེས་འགྱུར་མིན། །དེས་ན་ཚད་མ་ཉིད་དེ་ནི། །ཡོད་ཀྱང་ངེས་པར་མ་བྱས་ན། །མེད་པ་དང་ནི་འདྲ་བ་ཡིན། །ཡོད་ཅེས་བྱ་བར་བརྗོད་མི་བྱ། །རྣ་བའི་བློ་ལའང་གསལ་བ་རུ། །མིག་སོགས་བློ་དང་འབྲེལ་པ་ཡོད། །གང་ཕྱིར་ཚོགས་གཅིག་རག་ལས་ནས། །གཟུགས་དང་སྒྲ་སོགས་ཞུགས་པར་འགྱུར། །ཕན་ཚུན་ཐ་མི་དད་རྒྱུན་གྱིས། །གཅིག་ལ་གཅིག་ནི་རྒྱུ་རུ་འགྱུར། །དེ་ལྟ་ཡིན་ན་དེ་དག་ལས། །དེས་ན་འབྲེལ་པ་གསལ་བར་ཡོད། །དེ་ཡི་སྒོ་ནས་དེ་བློ་ཡང༌། །དུ་བས་བུང་ཤིང་འགྱུར་བ་བཞིན། །དེའི་ཕྱིར་བློ་ནི་ཚད་མར་འགྱུར། །དེ་ལས་གཞན་བློ་དང་འབྲེལ་ཕྱིར། །འདི་ནི་བསྒྲུབ་གཞན་ལས་སྐྱེས་པའི། །བློ་ནི་ངེས་པར་བྱས་པ་ཡིན། །དེས་ན་རྒྱུ་གཞན་གྱིས་བྱས་པའི། །ཤེས་པའི་མི་སླུ་འདོད་པ་ཡིན། །དེ་ལྟར་དབང་པོ་དུ་མ་ལ། །རག་ལས་ཤེས་པ་དང་འབྲེལ་པ། །མངོན་སུམ་གྱི་རྒྱུར་བརྟགས་པ་ཡིན། །རིག་བྱེད་ལ་དེ་མི་སྣང་ངོ༌། །འདི་ལྟར་ཆུ་ལ་དང་པོའི་ཤེས། །མིག་ལས་བྱུང་བ་སྐྱེ་བར་
འགྱུར། །འཐུང་དང་རེག་སོགས་སྣང་བ་ཅན། །ལྕེ་དང་ལུང་རྟེན་ཤེས་པ་བཞིན། །ངག་ནི་གཅིག་པུ་ཁོ་ན་ཡིས། །ཡུལ་དང་དུས་དང་མིག་སོགས་ལ། །དོན་གྱི་མི་སླུ་རྙེད་མིན་ཏེ། །ཀུན་ལ་ཐེ་ཚོམ་འབྱུང་བའི་ཕྱིར། །ངེས་པའི་ཡན་ལག་དང་བྲལ་བ། །སྒྲ་རྣམས་དགོད་པ་ཙམ་དུ་ནི། །མེའི་སྤྱིན་སྲེག་གིས་མཐོ་རིས་འགྱུར། །དེ་ལྟར་མཚུངས་པར་ཐོས་པ་ཡིན། །བྲམ་ཟེ་རྣམས་ལ་མཐོ་རིས་སོགས། །འདོད་པ་ཐ་དད་དུ་ནི་སྣང༌། །དེ་ཕྱིར་འདིར་ནི་མི་རྣམས་ལ། །དོན་གྱི་མི་སླུ་འཐོབ་པ་ཡིན། །བསྐུལ་བ་ལས་བྱུང་ཤེས་པ་ལ། །བརྟན་པ་ཉིད་ནི་སྔར་བསལ་ཟིན། །དེ་འཛིན་གཞན་དང་མཚུངས་པའི་ཕྱིར། །དེ་ནི་དངོས་ལ་ཐེ་ཚོམ་ཟ། །ཐམས་ཅད་མ་མཐོང་བྲམ་ཟེ་ཡིས། །བསྐུལ་བ་ལས་ནི་འབྱུང་བའི་བློ། །ཀུན་ལ་མི་སླུ་ཅན་ཡིན་པར། །དེ་ནི་གང་ལས་ངེས་པར་བྱས། །མངོན་སུམ་ཚད་མ་ཉིད་དུ་ཡང༌། །རྗེས་སུ་དཔག་པས་ངེས་པར་བཤད། །དག་པའི་རྒྱུ་ཡིས་བསྐྱེད་པའི་ཕྱིར། །དེ་ནི་ཚད་ཡིན་དེ་གཞན་མིན། །ཐམས་ཅད་ལ་ནི་དེ་ཉིད་འདི། །ཚད་མ་གཞན་གྱིས་བསྒྲུབ་བྱ་མིན། །དེ་ཕྱིར་དོན་བྱེད་ཤེས་པ་ལ། །འཁྲུལ་པ་མེད་པར་སྒྲུབ་ཟིན་ཏོ། །བདག་ཉིད་འབྲས་བརྟགས་མིང་ཅན་ནི། །མ་འཁྲུལ་པར་ནི་ངེས་པ་ཡི། །རྗེས་སུ་དཔག་པ་སྐྱེས་པས་ཀྱང༌། །འཁྲུལ་པ་ཅུང་ཟད་ཡོད་པ་མིན། །ལ་ལར་སྣ་ཚོགས་འཁྲུལ་པ་ཡི། །རྒྱུ་མཚན་སྟོབས་ཀྱིས་འབྱུང་བ་ཅན། །འཁྲུལ་པ་གཞན་གྱིས་སྤོང་འགྱུར་ཏེ། །གང་ཕྱིར་དེ་ལ་ངེས་པ་མེད། །མི་གསལ་གསལ་བ་ཉིད་ཡིན་པས། །གསལ་བ་དོན་གྲུབ་མི་འགྱུར་ཏེ། །གཞན་གྱི་མངོན་སུམ་བཞིན་དེས་ན། །ཤེས་པ་རིག་པར་འདོད་པར་གྱིས། །རང་ཉིད་བེམས་པོའི་དངོས་ཡིན་ཕྱིར། །མིག་སོགས་དབང་པོ་རྣམས་ཀྱིས་ནི། །ཡུལ་རྣམས་འཛིན་པ་མ་ཡིན་ཏེ། །དེ་དག་ཤེས་པའི་རྒྱུ་ཉིད་ཡིན། །དེས་ན་ཚད་མ་ཉིད་འདི་ལ། །རིག་པར་བྱེད་པར་ཉེར་མཁོ་ཡིན། །གང་ཕྱིར་རིག་པར་མ་བྱས་འདིས། །ཡུལ་གྱི་རྣམ་པ་ཉམས་མྱོང་མིན། །རང་རིག་པས་ནི་གཟུང་བྱས་ཀྱང༌། །འདི་ནི་འདི་ལྟར་འགྱུར་བ་ཡིན། །འཁྲུལ་པའི་རྒྱུ་ནི་ཡོད་པའི་ཕྱིར། །དེ་དངོས་ཉིད་ཀྱང་ངེས་མེད་འགྱུར། །དེ་ཚེ་དོན་གྱི་དེ་དངོས་ཀྱང༌། །འདི་ཉིད་ཀྱིས་ནི་
ངེས་འགྱུར་མིན། །འདྲ་བ་ཉིད་སོགས་དམིགས་པ་ཡིས། །དེ་ལས་གཞན་སྒྲོ་བཏགས་སྲིད་ཕྱིར། །གོམས་པ་ལས་བྱུང་ཤེས་པ་ནི། །ཇི་ལྟར་རང་ལས་ཚད་མར་རྟོགས། །དེ་བཞིན་ལོག་ཤེས་འགའ་ཞིག་ནི། །རང་ལས་ཚད་མིན་ཉིད་དུ་གནས། །གནོད་དང་རྒྱུ་སྐྱོན་བཅས་ཤེས་པའམ། །ཐུག་པ་མེད་པར་བཤད་པ་ཡིན། །དེས་ན་ཐེ་ཚོམ་གྱིས་ལོག་ཉིད། །འཛིན་པར་ནུས་པ་མ་ཡིན་ནོ། །སྐྱེ་བའི་གནས་སྐབས་ཁོན་ནི། །འདི་ནི་ཚད་མ་ཉིད་དུ་ངེས། །འདི་ནི་ཚད་མ་ཉིད་དུ་ནི། །རང་རིག་པ་ཡིས་ངེས་མིན་ཏེ། །མི་འདོད་པ་དང་རྟོག་མེད་ཕྱིར། །ཤེས་པ་གཞན་གྱིས་ཀྱང་མིན་ཏེ། །དུས་དེར་ཉེ་བར་མི་གནས་ཕྱིར། །དེ་ཡང་མི་གསལ་དངོས་ཕྱིར་རམ། །ཐུག་མེད་ཐལ་བར་འགྱུར་ཕྱིར་ཡང༌། །རིག་བྱེད་ལ་ཡང་གནོད་ཅན་གྱི། །ཚད་མ་རྗེས་དཔག་མེད་ཉིད་བསྟན། །དེར་བཤད་བདག་སོགས་གསལ་བྱས་བས། །དེས་ན་ཚད་མར་མི་འཐད་དོ། །སྐྱེས་བུས་བྱས་ཉིད་གྲུབ་ཟིན་པས། །རྒྱུ་མཚན་སྐྱོན་དང་བཅས་པར་དོགས། །མེ་བཞིན་རང་ལས་ནུས་པ་ནི། །ལོག་པའི་ཤེས་པ་ལ་ཡོད་འགྱུར། །དེ་ནི་བསྐུལ་བྱུང་ཤེས་པ་ཡི། །རྒྱུ་མཚན་སྐྱོན་དང་བཅས་པར་དོགས། །སྐྱོན་མཐོང་བ་ལ་སྐྱོན་དོགས་པ། །བྱེ་བྲག་ཡོད་པར་མི་འགྱུར་རོ། །དེ་ཕྱིར་རིག་བྱེད་ལ་ཡང་ནི། །རང་ལས་ཚད་མ་ཉིད་རིགས་མིན། །དེས་ན་ངེས་པར་སྐྱོན་མེད་པས། །བྱས་དང་བཤད་བ་ཉིད་འདོད་ཀྱི། །ཇི་ལྟ་ཇི་ལྟར་སྨྲ་བ་པོ། །གང་ཕྱིར་ཆགས་སྡང་ལ་སོགས་ལྡན། །དེ་ལྟ་དེ་ལྟར་རང་འདོན་པ། །ཤིན་ཏུ་སྲུང་བྱེད་མ་ཡིན་ནམ། །གང་ལས་གང་ཞིག་སྟོབས་ཆུང་བ། །གང་ལས་འདོད་པ་སྔར་བསླབས་ཡིན། །སུ་ཡིས་དབྱངས་ནི་ཉམས་བྱས་ཏེ། །མཚམས་མིན་མཚམས་བཅད་གང་གིས་བྱས། །དེ་ལྟར་གང་ཞིག་བརྩོན་འགྲུས་ལྡན། །སྐྱོན་ནི་ཚོལ་བར་བྱེད་པ་ཡིན། །དེ་ནི་མཛེས་བཅས་རིག་བྱེད་ནི། །སྐྱོན་མེད་ཇི་ལྟར་འདོད་མི་བྱེད། །གཞན་གྱིས་རིག་བྱེད་ཉམས་བྱས་ནས། །བློ་གཙང་རིག་བྱེད་འདོན་སྐྱེས་བུས། །ཡལ་བར་དོར་ནས་གནས་བྱེད་ཅིང༌། །དེ་དག་གནོད་པར་མི་བྱེད་ན། །དེ་ཚེ་དུས་མང་བཏང་སྙོམས་ཀྱིས། །རིག་བྱེད་ཉམས་པར་གྱུར་ནས་ནི། །གཟུགས་བརྙན་དང་ནི་འདྲ་གྱུར་ནས། །
རིག་བྱེད་གཞན་ཉིད་དུ་ནི་འགྱུར། །འདོད་ཆགས་ཞེ་སྡང་རྣམས་བྲལ་བས། །རིག་བྱེད་ཉམས་པས་སེལ་བྱེད་པ། །རྟག་ཏུ་རིག་བྱེད་བསྲུངས་བ་ཡིས། །རང་གི་ངོ་བོར་འདོར་མི་བྱེད། །འགྲོ་བ་ཐམས་ཅད་ནང་དུ་ཡང༌། །འདི་འདྲ་མ་ཡིན་པར་འདོད་མིན། །དོན་དམ་རབ་ཐིམ་ཆེན་པོ་ནི།། ཤེས་པར་འགྱུར་བ་མིན་ཞེ་ན། །དེ་ལྟར་དེ་མིན་གང་གི་ཕྱིར། །དེ་ལྟས་འདོན་པ་མཚུངས་ཉིད་འགྱུར། །དབང་པོ་ལས་འདས་མཐོང་མེད་ན། །དེ་དོན་དེ་ཉིད་ཀྱིས་རྟོགས་མེད། །སྐྱེས་བུ་ཐམས་ཅད་དག་དང་ནི། །དེ་བཞིན་ཡུལ་དུས་མ་ལུས་པ། །ལག་མཐིལ་སྐྱུ་རུ་ར་བཞིན་གསལ། །ནང་གི་སེམས་ལ་དངོས་སུ་སྣང༌། །དེ་ནི་འདོད་པའང་མཚུངས་ཉིད་དུ། །རྟོགས་པར་ནུས་ཏེ་གཞན་དུ་ན། །ཡུལ་དུས་མི་ཡི་གནས་སྐབས་ཀྱི། །དབྱེ་བས་ཕྱིན་ལོག་བློ་ཅིས་འགྱུར། །རྟག་ཏུ་འགྲོ་བ་འདི་འདྲ་ཡིན། །འདི་ཡང་ཁྱེད་ལ་ཚད་མ་མེད། །མ་མཐོང་ཙམ་གྱིས་འཇིག་པ་ཡང༌། །བྱེད་པ་ཉིད་དུ་རིགས་པ་མིན། །རང་ལས་ཚད་མ་ཉིད་ཕྱོགས་ལ། །རིག་བྱེད་རང་གི་དོན་ལ་ནི། །རང་ལས་ངེས་པར་བྱེད་དེས་ན། །རང་དངོས་ལ་རྨོངས་སོགས་མི་སྲིད། །དེ་ནི་མི་ཤེས་དང་ཐེ་ཚོམ། །ཕྱིན་ཅི་ལོག་མེད་གོ་འཕང་གནས། །གཉིས་སྐྱེས་ཕྲུ་གུ་འགའ་ཞིག་ཀྱང༌། །བཤད་པ་ལ་ལྟོས་མི་འགྱུར་རོ། །དེ་བཞིན་མི་ཤེས་རྩ་བ་ནི། །འདི་ལ་འཇིག་པ་མི་སྲིད་དོ། །རྡོ་རྗེ་བས་ལྷག་རྟག་པ་ལ། །འཇིག་པ་ཅི་འདྲ་བ་ཞིག་ཡོད། །མངོན་གསལ་གཞན་ཉིད་ཡིན་ཞེ་ན། །དེ་ནི་རྟག་པ་སྤངས་མིན་ནམ། །དེ་ཕྱིར་འདི་ལ་བསྲུང་བ་ནི། །བྲམ་ཟེ་རྣམས་ནི་དོན་མེད་བྱེད། །དེས་ན་དབང་འདས་དོན་མཐོང་བ། །ནང་གི་མུན་པའི་ཚོགས་འཇོམས་པ། །རིག་བྱེད་དོན་གྱིས་དབྱེ་ཤེས་དང༌། །བྱེད་པ་པོ་ཡང་ཁས་བླང་གྱིས། །དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ་ལས། རང་ལས་ཚད་མ་བརྟག་པ་སྟེ་ཉེ་ཤུ་རྩ་དགུ་པའོ།། །། དེ་ལྟར་ཚད་མ་ཐམས་ཅད་ནི། །རང་ལས་ཚད་མ་ཉིད་མི་གནས། །དབང་པོ་ལས་འདས་དོན་རིག་པའི། །སྐྱེས་བུ་གྲུབ་ཕྱིར་འབད་མི་དགོས། །གང་ཕྱིར་སྐྱེས་བུ་ལས་ཀྱང་ནི། །རིག་བྱེད་ཚད་མ་ཉིད་དུ་གནས། །དེ་ནི་དབང་འདས་ཤེས་ཉིད་ནི། །དེ་ལས་དེ་ནི་ཚད་ཉིད་གྱུར། །གཞན་དུ་མི་
ཤེས་ཐེ་ཚོམ་དག །ཕྱིན་ཅི་ལོག་དང་རྗེས་འབྲེལ་ཅན། །སྐྱེས་བུ་བྱེད་པོ་ཡིན་ན་འདི། །གཞན་བཞིན་ཚད་མར་མི་འགྱུར་རོ། །མཐོ་རིས་མཆོད་སྤྱིན་སོགས་འབྲེལ་བ། །ཤེས་ནས་གང་གིས་དེ་བཤད་ཡིན། །གསལ་བར་དབང་འདས་ཤེས་པ་ཅན། །གཞན་གྱིས་དེ་ཡང་ཁས་བླང་དགོས། །འདིར་ནི་ཆོས་ཤེས་ཉིད་དགག་པ། །འབའ་ཞིག་ཉེ་བར་མཁོ་བ་ཡིན། །གཞན་ནི་ཐམས་ཅད་ཤེས་ན་ཡང༌། །སྐྱེས་བུ་གང་གིས་གནོད་པར་འགྱུར། །ཐམས་ཅད་ཀྱིས་སྒྲ་ཐམས་ཅད་དུ། །གནས་སྐབས་ལ་ལྟོས་འདོད་པ་ཡིན། །དེས་ན་སྐབས་ཀྱིས་ཐམས་ཅད་མཁྱེན། །མེད་ན་ཁོ་བོ་ཅི་ཞིག་ཉམས། །དོན་ལ་མི་སྲིད་པའི་འབྲས་བུ། །ཅུང་ཟད་སྒྲ་ལའང་བརྟགས་པ་ཡིན། །དེར་གང་ཐམས་ཅད་སྒྲར་རྟོག་ན། །མིང་ཙམ་ཀུན་མཁྱེན་དེ་ཡིན་བླ། །འོན་ཏེ་སྐབས་ཀྱི་ཅུང་ཟད་ནི། །ཏིལ་མར་ཆུ་དང་མར་སོགས་གང༌། །ཐམས་ཅད་དེས་ནི་ཀུན་མཁྱེན་ན། །དེ་ལྟར་ཡིན་ཆུག་དགག་མི་བྱ། །ཡང་ན་དངོས་མེད་དངོས་རང་བཞིན། །འགྲོ་ཀུན་བརྗོད་པར་བྱས་པ་གང༌། །དེ་མདོར་བསྡུས་པས་ཀུན་མཁྱེན་པའི། །སྐྱེས་བུ་སུ་ཞིག་གིས་ནི་བཀག །དེ་ལྟར་ཤེས་བྱ་གཞལ་བྱ་ཉིད། །མདོར་བསྡུས་ནས་ཀྱང་ཐམས་ཅད་ཉིད། །བརྟེན་ནས་གལ་ཏེ་ཀུན་མཁྱེན་ན། །དེ་སྤོང་སུ་ཞིག་ནུས་པ་ཡིན། །ཇི་སྙེད་དངོས་པོ་གང་དག་གིས། །ཐམས་ཅད་ཉིད་དུ་ངེས་བཟུང་ཡིན། །དེ་ཤེས་པས་ཀྱང་ཀུན་མཁྱེན་ན། །དེ་གཞུང་ཤེས་ཀུན་ཀུན་མཁྱེན་འགྱུར། །དེ་བཞིན་ཚད་མ་དྲུག་གིས་གང༌། །གཞལ་བྱ་དྲུག་ནི་རྟོགས་པར་བྱེད། །དེ་ཡང་མདོར་བསྡུས་པར་ཀུན་མཁྱེན། །འགའ་ནི་སུ་ཞིག་འདོད་པ་མིན། །ཁྱད་པར་གྱིས་ནི་དོན་ཐམས་ཅད། །ཡོངས་སུ་མངོན་སུམ་གྱིས་མཐོང་བ། །གང་ཞིག་རྟོགས་པར་བྱེད་པ་དེ། །རྟོག་དེ་དོན་མེད་ལོག་པ་ཡིན། །ལུས་ནི་གཅིག་པུ་ཁོ་ན་ཡིན། །རྡུལ་ཕྲན་ཇི་སྙེད་ཡོད་རྣམས་སམ། །སྐྲ་དང་བ་སྤུ་གང་དག་ཡོད། །དེ་དག་ཤེས་པར་སུས་ནུས་འོས། །མ་ལུས་ཡན་ལག་དང་གསལ་བའི། །རྒྱས་པར་ཤེས་པ་སྒྲུབ་བྱེད་ན། །བྱ་རོག་སོ་ནི་རྟོག་པ་བཞིན། །བྱས་ཀྱང་དོན་མེད་པ་རུ་འགྱུར། །ཇི་ལྟར་མིག་གིས་དངོས་པོ་ནི། །ཀུན་གྱིས་རྟོགས་པ་
འབྲས་མེད་ཡིན། །ཐམས་ཅད་མངོན་སུམ་གྱིས་མཐོང་ཉིད། །དམ་བཅའ་དེ་བཞིན་འབྲས་མེད་འགྱུར། །རང་ཆོས་ཆོས་མིན་ཙམ་ཤེས་པ། །སྒྲུབ་དང་དགག་བྱེད་ཡོད་པ་ན། །དེས་བསྟན་ལུང་ནི་བླང་བྱ་དང༌། །དོར་བྱ་ཉིད་ནི་རབ་བསྒྲུབ་ཕྱིར། །དེ་ལ་འགྲོ་ཀུན་པྲ་བ་ཡི། །དབྱེ་བ་མཁྱེན་པ་ཉིད་སྒྲུབ་ན། །གཞུང་རྩོད་དག་ལ་རྩོད་པ་ཡིན། །གནས་མིན་འཇིག་རྟེན་ཉོན་མོངས་འགྱུར། །འཇལ་བར་བྱེད་པོ་ཀུན་འབྲེལ་པའི། །མངོན་སུམ་སོགས་ནི་དགག་བྱས་ཕྱིར། །སྡིག་པ་དང་ནི་བསོད་ནམས་དག །ལུང་ཉིད་འབའ་ཞིག་གིས་རྟོགས་འགྱུར། །དཔྱོད་པ་པ་རྣམས་ཀྱི་ཕྱོགས་ནི། །དེ་ཙམ་ཉིད་ཀྱིས་གྲུབ་ནའང་སླར། །ཀུན་མཁྱེན་སྤོང་བའི་འབད་པ་གང༌། །དེ་ནི་ཤི་བ་གསོད་པར་ཟད། །རྩ་བ་མེད་པ་ཉིད་ཀྱི་ཕྱིར། །ཆོས་ཉིད་ཤེས་པ་ཉམས་འགྱུར་ན། །ཀུན་མཁྱེན་སྐྱེས་བུར་གང་སྨྲས་པ། །དེ་ནི་ཕུབ་མ་རྡུང་བྱེད་འདྲ། །དངོས་སུ་མངོན་སུམ་གྱིས་མཐོང་ཕྱིར། །གང་ལ་མི་གཙང་ཁུ་བ་སོགས། །རང་རིག་པར་ནི་ཐལ་བར་འགྱུར། །དེ་ནི་སུ་ཞིག་སྒྲུབ་པར་བྱེད། །སངས་རྒྱས་པ་སོགས་དག་གི་ནི། །རིག་བྱེད་ཉེ་རིག་བྱེད་ཡན་ལག །ཉིང་ལག་སོགས་དོན་རྟོགས་སྣང་མིན། །དེ་ལ་ཀུན་མཁྱེན་ཇི་ལྟར་ཡོད། །གལ་ཏེ་རང་གཞུང་མ་བསྟན་ཀྱང༌། །རང་ཉིད་ཀྱིས་དོན་ཤེས་འདོད་ན། །རང་གིས་སྙན་ངག་རྩོམ་པ་ཡིན། །སྙན་ངག་མཁས་ཀུན་ཀུན་མཁྱེན་འགྱུར། །འགལ་བའི་དོན་ནི་སྟོན་བྱེད་ཅན། །ཀུན་མཁྱེན་མང་པོ་ཡོད་པ་ན། །ཀུན་གྱི་རྒྱུ་མཚན་མཚུངས་པ་ཡིས། །གཅིག་པུར་སུ་ཞིག་ངེས་པར་འགྱུར། །གལ་ཏེ་བདེ་གཤེགས་ཀུན་མཁྱེན་ན། །སེར་སྐྱ་མིན་ཞེས་ཚད་མ་ཅི། །འོན་ཏེ་གཉིས་ཀའང་ཀུན་མཁྱེན་ན། །དེ་གཞུང་མི་མཐུན་ཇི་ལྟར་འགྱུར། །རྒྱལ་བ་སངས་རྒྱས་སོགས་སེམས་ཅན། །བདེན་པར་སྨྲ་བ་ཐམས་ཅད་ཀྱི། །རྩི་སོགས་ཕྱོགས་རེ་ཤེས་པ་ལ།། ཁྱད་པར་ངེས་པར་གཟུང་དུ་མེད། །རང་ཕྱོགས་དགའ་བ་ཙམ་གྱིས་ནི། །གཏན་ཚིགས་གང་གིས་གཅིག་ལ་ནི། །ཀུན་མཁྱེན་ཉིད་ནི་སྒྲུབ་བྱེད་པ། །དེ་ནི་གཞན་ལའང་ཡོད་པ་མིན། །རྒྱལ་བ་ཀུན་མཁྱེན་བསྒྲུབ་པ་ལ། །ཤཱཀྱའི་སློབ་མ་ཁྲོས་ནས་ནི། །སུན་དབྱུང་གང་དག་བསྟན་པ་
སྟེ། །དེ་དག་རྒྱལ་བ་པ་ཡིས་སྦྱོར། །དེ་ལ་དེ་རྣམས་ཀྱིས་སྒྲུབ་དང༌། །སུན་དབྱུང་ཐ་དད་མི་གནས་པ། །གཟུགས་བརྙན་འབྱུང་བས་ཟིན་པ་ཡིས། །ཇི་ལྟར་ངེས་པར་བྱེད་པར་འགྱུར། །དེ་ལྟར་ཀུན་མཁྱེན་འདྲ་བ་དག །ཕན་ཚུན་འཇོམས་པར་བྱེད་པ་ན། །ཀུན་མཁྱེན་ཀུན་གྱི་ཅུང་ཟད་ལྷག །རིག་བྱེད་སྨྲ་བ་པོས་འཇོམས་བྱེད། །ཇི་ལྟར་ནེའུ་ལེའི་སོ་རྩེ་ཡིས། །རེག་པའི་སྨན་ནི་འགའ་ཞིག་གང༌། །རྩེད་མོའི་ཕྱིར་ནི་སྦྱར་བྱས་ཀྱང༌། །སྦྲུལ་གདུག་ཐམས་ཅད་སེལ་བར་བྱེད། །དེ་བཞིན་རིག་བྱེད་སྨྲ་བའི་ཁར། །རིག་བྱེད་འཇིག་རྟེན་རིགས་པ་འགའ། །གནས་པས་ངག་ཀྱང་ཤཱཀྱ་ཡི། །སློབ་སོགས་སྦྲུལ་གདུག་ཤེས་པ་སེལ། །གང་ལ་ཤེས་བྱ་གཞལ་བྱ་ཉིད། །དངོས་ཉིད་ཡོད་ཉིད་སོགས་མཚན་ཅན། །གཏན་ཚིགས་འཇོམས་བྱེད་ནུས་ཡོད་ན། །དེ་ནི་སུ་ཞིག་སྒྲུབ་པར་བྱེད། །ཚད་མ་གཅིག་གིས་ཀུན་མཁྱེན་ནི། །གང་གིས་ཡོད་པར་བརྟགས་པ་ནི། །དེ་ནི་ངེས་པར་མིག་གིས་ནི། །རོ་སོགས་ཐམས་ཅད་རྟོགས་པར་འགྱུར། །ཇི་ལྟའི་རིགས་ཅན་ཚད་མ་ཡིན། །ཇི་ལྟར་རིགས་པའི་དོན་སྣང་བ། །ད་ལྟར་འཇིག་རྟེན་ན་ནི་མཐོང༌། །དེ་བཞིན་དུས་གཞན་ན་ཡང་འགྱུར། །ཤེས་རབ་ཡིད་གཞུངས་སྟོབས་རྣམས་ཀྱིས། །ཅུང་ཟད་ཅུང་ཟད་ཁྱད་པར་གྱིས། །ཕུལ་བྱུང་ཅན་མི་གང་དག་མཐོང༌། །དེ་དག་དབང་འདས་མཐོང་བས་མིན། །སྐྱེས་བུ་ཤེས་རབ་ཅན་ཡང་ནི། །ཕྲ་པའི་དོན་མཐོང་ནུས་ཡིན་ཡང༌། །རང་རིག་མཐུན་པ་མ་སྤངས་པས། །སྐྱེས་བུ་གཞན་ལས་ཕུལ་བྱུང་འགྱུར། །རྣ་བས་རྟོགས་བྱའི་སྒྲ་རྣམས་ལ། །རིང་དང་ཕྲ་སོགས་དམིགས་པ་ཡིས། །སྐྱེས་བུ་ཕུལ་བྱུང་མཐོང་བ་ཡིན། །གཟུགས་སོགས་དམིགས་པ་མ་ཡིན་ནོ། །ཕུལ་བྱུང་མིག་ནི་ཐོབ་པས་ཀྱང༌། །རིང་ལ་གནས་པར་གྱུར་པ་ཡི། །ཕྲ་བའི་གཟུགས་སོགས་གསལ་བར་བྱེད། །སྒྲ་རྟོགས་ཐོས་པར་མི་འགྱུར་རོ། །དེ་ལྟར་བསྟན་བཅོས་སྤྱོད་པ་ལ། །ཕུལ་བྱུང་ཆེན་པོ་སྣང་བར་འགྱུར། །བསྟན་བཅོས་གཞན་གྱི་ཤེས་པ་ནི། །དེ་ཙམ་གྱིས་ནི་དམིགས་མི་འགྱུར། །བྱཱ་ཀ་ར་ཎའི་སྒྲ་ཤེས་པས། །ལེགས་སྦྱར་མ་སྦྱར་སྒྲ་དག་ལ། །བློ་ནི་ཕུལ་དུ་བྱུང་གྱུར་ཀྱང༌། །རྒྱུ་སྐར་ཚེས་གྲངས་
གཟའ་ཤེས་མིན། །སྐར་དཔྱད་ཤེས་པ་ཉི་ཟླ་ཡི། །གཟའ་འཛིན་སོགས་ལ་མཁས་གྱུར་ཀྱང༌། །བྷ་ཝ་དེ་སོགས་སྒྲ་རྣམས་ཀྱི། །ལེགས་པར་སྦྱར་ཉིད་ཤེས་འགྱུར་མིན། །རིག་བྱེད་དེ་ལྟར་བྱུང་བརྗོད་སོགས། །ཤེས་པ་ཕུལ་བྱུང་ལྡན་ན་ཡང༌། །མཐོ་རིས་ལྷ་མོ་སྔར་མེད་ན། །དངོས་སུ་བྱེད་པར་ནུས་པ་མིན། །ཁྲུ་བཅུའི་བར་དུ་ནམ་མཁའ་ལ། །གང་ཞིག་མཆོངས་ནས་འགྲོ་བྱེད་གང༌། །དེ་ནི་བརྒྱར་ནི་གོམས་བྱས་ཀྱང༌། །དཔག་ཚད་ཙམ་མཆོངས་འགྲོ་ནུས་མེད། །དེའི་ཕྱིར་ཕུལ་དུ་བྱུང་ཤེས་པ། །ཤིན་ཏུ་གོམས་པར་གྱུར་པས་ཀྱང༌། །ཅུང་ཟད་ཁོ་ན་ལྷག་པ་རུ། །ཤེས་ནུས་དབང་འདས་ཤེས་པ་མིན། །ཁང་དམིག་གཅིག་ལ་གནས་པ་ཡི། །མངོན་སུམ་གང་ཞིག་འཇུག་པར་འགྱུར། །དེ་ཉིད་དུ་ནི་དེ་མཐོང་ནུས། །ཁང་དམིག་གཞན་ལ་མ་ཡིན་ནོ། །དོན་ནི་གང་ཞིག་ཐག་རིང་གནས། །ཡུན་རིང་རྒྱ་མཚོ་རྣམས་དང་ནི། །གླིང་དང་འཇིག་རྟེན་བར་བཅད་གང༌། །འདིར་གནས་དེ་དག་སུ་ཡིས་མཐོང༌། །ན་ལའི་རྒྱལ་དང་དུས་འདབ་རྒྱལ། །རྟ་མཆོག་ཆོ་ལོའི་དོར་ཤེས་སྔོན། །ཤིང་རྟ་ཞོན་ནས་འགྲོ་བ་ན། །དུས་ཀྱི་འདབ་མས་ཚིག་འདི་སྨྲས། །ཀུན་གྱིས་ཐམས་ཅད་མི་ཤེས་ཏེ། །སྐྱེས་བུ་གཅིག་འགའ་ཞིག་ཀྱང་ནི། །མཐར་ཐུག་ཤེས་པ་ཡོད་པ་མིན། །མ་འོངས་པ་ལ་མངོན་སུམ་གྱིས། །ནུས་པ་ཅུང་ཟད་ཀྱང་མ་མཐོང༌། །རྟགས་སོགས་རྣམས་ནི་མེད་པས་ནི། །རྗེས་དཔག་ལ་སོགས་སྐྱེས་མི་འགྱུར། །དེ་ཕྱིར་དབང་འདས་དོན་རྣམས་ལ། །དངོས་སུ་ལྟ་བ་པོ་ཡོད་མིན། །གང་ཞིག་རྟག་པའི་ཚིག་གིས་ནི། །མཐོང་བར་བྱེད་པ་དེས་མཐོང་འགྱུར། །དེ་ལྟར་མི་བཟོད་གང་ཞིག་ནི། །སྐྱེས་བུས་བྱས་པའི་གཞུང་གཞན་ལས། །དབང་འདས་དོན་གྱི་ཤེས་པ་ནི། །སངས་རྒྱས་སོགས་ལ་མངའ་སྙམ་ན། །དེ་ཡང་དེ་ཉིད་དང་མཚུངས་ཕྱིར། །དེའི་ངག་ཚད་མ་མ་ཡིན་ཞིང༌། །སྐྱེས་བུ་ལ་ཡང་བརྗོད་བྱ་སྟེ། །སྔར་བཤད་གཏན་ཚིགས་རྣམས་ཀྱིས་སོ། །བྱེད་པོ་བཅོས་མའི་ངག་ལ་ནི། །ཁྱེད་ཀྱིས་ཐོག་མེད་ཉིད་གང་བརྗོད། །ཚད་མིན་གཉིས་ཀྱི་རྟེན་གྱུར་པས། །དེ་ནི་ཚད་ཉིད་སྒྲུབ་བྱེད་མིན། །གཞན་ལྟོས་ཉིད་ཀྱིས་ཟས་གཙང་གི །སྲས་ཀྱི་ངག་རྣམས་ཚད་མ་མིན། །རང་ཉིད་ཀྱིས་ཆོས་མ་མཐོང་
བས། །ཟས་གཙང་སྲས་མིན་ཡང་དེ་བཞིན། །དེ་འདྲའི་གང་ཟག་རྣམས་ལ་ནི། །ཐོག་མ་མེད་ཉིད་རྟོག་ན་ཡང༌། །ཚད་མིན་གོ་འཕང་གནས་ཉིད་ཕྱིར། །དེ་ལས་ཁྱད་པར་ཅན་མི་འགྱུར། །དེས་ན་དཔྱོད་པ་པ་འདྲར་འགྱུར། །སངས་རྒྱས་སོགས་ལ་ཐོག་མེད་པའི། །སྤྱི་གང་རྗོད་པར་བྱེད་པ་ན། །དེ་ནི་ཁྱད་པར་མི་ཤས་ཕྱིར། །དེ་དག་ལ་མཚུངས་འགྱུར་བ་མིན། །དེ་ལྟར་ཡིན་ན་ཐོག་མེད་ཅན། །ཚད་ཉིད་དང་ནི་ཚད་མིན་འགྱུར། །ཚད་མ་དང་ནི་དེའི་སྣང་བ། །ཡོན་ཏན་སྐྱོན་གང་ཐོག་མ་མེད། །ཐོག་མ་མེད་པ་ཉིད་ཙམ་གྱིས། །དེ་ཀུན་མཚུངས་པར་མི་འགྱུར་རོ། །ཇི་ལྟར་ཐོག་མཐའ་མེད་པའི་གསེར། །ཐ་སྙད་ཡན་ལག་གནས་པ་ཡིན། །དེ་བཞིན་སྒྱུ་མའི་གསེར་ཡིན་ཡང༌། །ཁྱེད་ལ་དེ་དག་ཅིས་མཚུངས་མིན། །སངས་རྒྱས་སོགས་ལ་ཀུན་མཁྱེན་དང༌། །རིག་བྱེད་ལ་བརྟག་ཉིད་ཡོད་གང༌། །གང་དག་གིས་ནི་མཚུངས་བརྗོད་པ། །ད་ནི་དེ་དག་ལ་ཁྱད་བརྗོད། །མིག་སོགས་རྣམས་ཀྱིས་ཀུན་མཁྱེན་ནི། །ད་ལྟར་རེ་ཤིག་མཐོང་མི་འགྱུར། །ཕྱོགས་གཅིག་རྟགས་ཏེ་ཡོད་མཐོང་མིན། །གང་གིས་ན་ནི་རྗེས་སུ་དཔོག །ལུང་གིས་སྒྲུབ་པ་འགའ་ཞིག་ཀྱང༌། །རྟག་པའི་ཀུན་མཁྱེན་རྟོགས་བྱེད་མིན། །བཅོས་མ་ཡིན་ཞིང་བརྫུན་པ་ཡིས། །དེ་ནི་ཇི་ལྟར་རྟོགས་པར་འགྱུར། །འོན་ཏེ་དེ་ཡི་ཚིག་ཉིད་ཀྱིས། །གཞན་གྱིས་ཀུན་མཁྱེན་རྟོགས་འགྱུར་ན། །དེ་དག་ཕན་ཚུན་རྟེན་ཡིན་པས། །ཇི་ལྟར་གྲུབ་པར་རིགས་པ་ཡིན། །ཀུན་མཁྱེན་གྱིས་བསྟན་ཉིད་ཀྱིས་ངག །བདེན་ཡིན་དེ་ཡིས་བདེ་ཡོད་ཉིད། །གྲུབ་པའི་རྩ་བ་གཞན་མེད་པས། །དེ་གཉིས་ཇི་ལྟར་གྲུབ་པར་འགྱུར། །ཀུན་མཁྱེན་མ་ཡིན་པས་བསྟན་པའི། །རྩ་བ་དང་བྲལ་ཚིག་གིས་ནི། །ཀུན་མཁྱེན་རྟོགས་པར་བྱེད་པ་ན། །རང་གི་ཚིག་གིས་ཅིས་བྱེད་མིན། །ཀུན་མཁྱེན་གཅིག་ནི་བསྒྲུབ་པའི་ཕྱིར། །ཀུན་མཁྱེན་མང་པོ་བརྟགས་དངོས་པོ། །གང་ཞིག་གཅིག་ནི་ཀུན་མཁྱེན་མིན། །དེ་ནི་ཀུན་མཁྱེན་བརྟགས་པ་ཡིན། །དེ་ཚེ་རྟོགས་བྱེད་རྣམས་ཀྱིས་ཀྱང༌། །དེ་ཤེས་ཤེས་བྱ་ཤེས་སྟོང་པས། །ཀུན་མཁྱེན་འདི་ཡིས་ཞེས་དེ་ལྟར། །ཤེས་པར་ནུས་པ་མ་ཡིན་ནོ། །གང་གིས་ཐམས་ཅད་མཁྱེན་པ་ནི། །རྟོགས་པར་
མ་གྱུར་པ་དེ་ལ། །དེའི་ངག་ཚད་མ་ཉིད་མ་ཡིན། །རྩ་བ་མི་ཤེས་གཞན་དག་བཞིན། །སློབ་མ་ཀུན་གྱིས་ཀྱང་རྟོགས་པའི། །དོན་རྣམས་མི་སླུར་བྱེད་ན་ཡང༌། །ཐམས་ཅད་མཁྱེན་པར་མི་འགྱུར་རོ། །འཇིག་རྟེན་གཞན་ཤེས་དོན་སྟོང་ཕྱིར། །སྐྱེས་བུ་ཀུན་ཤེས་ཤེས་བྱ་ལ། །མི་སླུ་སྲིད་པ་མ་ཡིན་ཏེ། །དུས་གསུམ་འཇིག་རྟེན་གསུམ་གནས་པའི། །མི་རྣམས་དང་ནི་ཕྲད་པ་མེད། །ཅུང་ཟད་ཤེས་པ་པོས་ཀྱང་ནི། །མི་འགའ་ཞིག་ནི་འཁྲུལ་བྱེད་མིན། །གང་གིས་མོས་པར་འཁྲུལ་གྱིས་ནི། །ཀུན་མཁྱེན་ཡིན་པར་འཛིན་པར་བྱེད། །ཟོས་དང་བསམ་པ་ཚང་བ་དང༌། །ཡོད་པའི་རྫས་ནི་ཤེས་ནུས་པའི། །ཆོས་སོགས་ཤེས་དང་བྲལ་བ་ཅན། །འགའ་ཞིག་གཞན་གྱིས་ཤེས་རྣམས་ཀྱིས། །དེ་ལྟར་སྒྱུ་མ་མིག་འཕྲུལ་སོགས། །མཁས་འགའ་ཞིག་གིས་རྨོངས་པ་ནི། །འཁྲུལ་པ་སྐྱེད་པར་ནུས་ཡིན་ཏེ། །གང་གིས་དེ་དག་ཀུན་མཁྱེན་སྣང༌། །དེ་ལྟར་བྱུང་བརྗོད་གནའི་རབས་ལས། །གང་ཡང་ཚངས་སོགས་ཀུན་མཁྱེན་ཡིན། །གང་ལ་ཤེས་པ་ཐོགས་མེད་དང༌། །ཆགས་བྲལ་ཡིན་པར་སྟོན་པ་ཡིན། །སྔགས་ཀྱི་གབ་པའི་ཚིག་བཞིན་དུ། །དེ་ཡང་ཕལ་པ་ཉིད་དུ་བརྗོད། །ཡང་ན་སྐབས་ཀྱི་ཆོས་སོགས་པའི། །ཤེས་པ་ཐོགས་པ་མེད་པར་བརྗོད། །ཆོས་ནོར་འདོད་དང་ཐར་པ་ལས། །སྐབས་ལ་བབ་པའི་བཞི་པོ་ལའང༌། །དེ་ཡི་ཤེས་པ་ཐོགས་མེད་གང༌། །དེ་ནི་དོན་ཀུན་ཡུལ་ཅན་མིན། །གང་ཕྱིར་ཐོགས་པ་མེད་ཙམ་གྱིས། །དོན་ཀུན་སྤྱོད་ཡུལ་བརྗོད་མི་འགྱུར། །རང་དོན་ལ་ཐོགས་མེད་པས་ཀྱང༌། །དེ་ནི་ཐོགས་མེད་འགྱུར་བ་ཡིན། །ཇི་སྲིད་ཆོས་སོགས་སྤྱོད་ཡུལ་ཅན། །དེ་ཡང་འབྲས་བཅས་ཤེས་པ་ཡིན། །ཤིང་ལ་སོགས་པ་ཐམས་ཅད་ནི། །ཤེས་ཀྱང་ཅུང་ཟད་དགོས་པ་མེད། །ཇི་སྙེད་ཐབས་དང་བཅས་ཤེས་པ། །གལ་ཏེ་དེ་ནི་ཐོགས་མེད་ན། །དེ་ཡིས་འདི་ལ་ཐོགས་མེད་པའི། །ཤེས་པའི་ཐ་སྙད་རྙེད་འགྱུར་བའི། །བདག་ཁོ་ན་ཡི་རྣམ་ཤེས་ནི། །བསམ་གཏན་གོམས་པས་འཇུག་པ་གང༌། །ད་ཉིད་ལ་ཐོགས་མེད་ཡིན་ན། །དེ་ཡི་ཤེས་པ་ཐོགས་མེད་བརྗོད། །ཡེ་ཤེས་ཆགས་བྲལ་དབང་ཕྱུག་ནི། །མི་ཟད་བཅུ་དང་ལྡན་པ་ཅན། །བདེ་བྱེད་ཅེས་ནི་གང་གྲགས་པ།།
དེ་ཡང་བདག་བསམ་པ་ཡིས་ཤེས། །རྣམ་པར་དག་པའི་མཐའ་མཐོང་གང༌། །དེ་ཉིད་ཤེས་པ་དེ་ཡིན་ནོ། །དེ་ཡི་རྒྱུ་མཚན་མ་དག་པས། །གང་བྱུང་དེ་ནི་མི་ཤེས་བརྗོད། །འོན་ཀྱང་རིག་ལུས་ཉིད་ཀྱི་ཕྱིར། །ཚངས་པ་ཁྱབ་འཇུག་དབང་ཕྱུག་རྣམས། །ཀུན་ཤེས་ངོ་བོར་རིག་བྱེད་ལས། །ཀུན་མཁྱེན་མི་ནུས་ག་ལ་ཡོད། །གང་ན་གནས་པའི་ལྷ་མཆོག་གསུམ། །གང་ན་མི་ནི་སངས་རྒྱས་སོགས། །གང་གིས་མཚུངས་པ་དེ་དག་ཀྱང༌། །ཀུན་མཁྱེན་ཞེས་བྱ་རྨོངས་པས་མཐོང༌། །རིག་བྱེད་རྟག་པའི་ལུང་ལས་ནི། །ཚངས་པ་ལ་སོགས་གསུམ་བསྟན་ཡིན། །དེ་རྟག་ཉིད་ཕྱིར་རིག་བྱེད་ཀྱི། །རྟག་པ་ཉིད་ནི་ཉམས་མི་འགྱུར། །དེ་དག་རྟག་པའི་ཡོན་ཏན་དང༌། །རྟག་ཏུ་ལས་དང་ལྡན་པ་ཅན། །རྟག་པའི་རིག་བྱེད་བརྗོད་བྱ་ཉིད། །སྲིད་ཕྱིར་དེ་དག་འགལ་པ་ཡིན། །མི་རྟག་པ་ཡི་སངས་རྒྱས་སོགས། །རྟག་པའི་ལུང་ལས་རྟོགས་མི་འགྱུར། །ལུང་ནི་རྟག་ཉིད་དུ་འདོད་ན། །ཀུན་མཁྱེན་བརྟགས་པ་དོན་མེད་ཡིན། །དེ་ལ་ཀུན་མཁྱེན་ཤེས་བྱེད་པས། །རིག་བྱེད་པས་རྟོགས་དེ་མཆོག་ཡིན། །རིག་བྱེད་ཀྱིས་རྟོགས་ཀུན་མཁྱེན་གྱིས། །བར་ཆོད་ཆོས་ནི་རྟོགས་པ་བས། །བར་དུ་མ་བསྒྲིབས་ཆོས་སོགས་ཀྱི། །ཤེས་པ་ཁོ་ན་ཁྱད་བཅས་ཀྱི། །དེ་ལྟར་ལུང་གིས་རྟོགས་བྱ་ཉིད། །ཀུན་མཁྱེན་ལ་ནི་ཡོད་པ་མིན། །གལ་ཏེ་ཀུན་མཁྱེན་འདྲ་གང་ཞིག །ད་ལྟར་སྣང་བར་འགྱུར་བ་ན། །དེ་ཚེ་ཉེ་བར་འཇལ་སྟོབས་ཀྱིས། །ཀུན་མཁྱེན་ཡོད་པར་རྟོགས་པར་འགྱུར། །མི་རྣམས་ཀུན་མཁྱེན་མི་མཐོང་ནས། །དེ་ལྟར་ཀུན་མཁྱེན་ཡོད་མ་གྱུར། །དེ་དང་འདྲ་བའི་ཉེར་འཇལ་བས། །ལྷག་མ་ཀུན་མཁྱེན་མིན་པར་ངེས། །ཆོས་དང་ཆོས་མིན་སོགས་ཡུལ་ཅན། །སངས་རྒྱས་ལ་སོགས་ཀྱིས་བསྟན་པ། །གལ་ཏེ་ཀུན་མཁྱེན་མེད་པ་ན། །གཞན་དུ་མི་འཐད་པར་འགྱུར་རོ། །ཀུན་མཁྱེན་སྟོན་པར་བྱེད་པ་ཅན། མངོན་སུམ་སོགས་ནི་བཀག་ན་ཡང༌། །དོན་གྱིས་གོ་བས་ཀུན་མཁྱེན་ནི། །འདི་ལྟར་རྟོགས་པར་འགྱུར་བ་ཡིན། །ཡང་ན་སྤྱིར་མཐོང་བ་ཅན་གྱི། །འདིར་ནི་སྒྲུབ་པ་འཇུག་བ་རུ། །ཀུན་མཁྱེན་ལ་ནི་བརྗོད་པ་རུ། །གཞན་དུ་ཤེས་སྔོན་སོང་མཐོང་ཕྱིར། །ཉེར་བསྟན་འགའ་ཞིག་གང་ཡིན་
ཏེ། །བརྗོད་པ་ཤེས་པ་སྔོན་སོང་ཉིད། །ཨ་རུ་ར་སོགས་ནུས་རྣམས་ཀྱི། །ཉེར་བསྟན་དེ་ལྟའི་རྣམས་ཅན་བཞིན། །ཆོས་དང་ཆོས་མིན་ཉེར་བསྟན་འདི། །དེས་བྱས་བསྟན་པ་ཡང་ཡིན་ཏེ། །དེ་ཡི་ཤེས་པ་སྔོན་སོང་ཉིད། །དེ་ཕྱིར་དེ་ལ་རྗེས་དཔོག་འགྱུར། །གཞན་དུ་ཡང་ནི་འབད་ཉིད་ཕྱིར། །ཆོས་ཀྱི་གོ་བས་རྟོགས་མི་ནུས། །དེ་ཉིད་ཕྱིར་ན་རྗེས་དཔག་ཀྱང༌། །དེ་ནི་ལེགས་པར་གནས་པ་ཡིན། །རིག་བྱེད་རྟོགས་ཤིང་ཐོས་ཕྱིར་དང༌། །རྨོངས་ནས་རྨི་ལམ་སོགས་མཐོང་ཕྱིར། །གང་ཕྱིར་ཡིད་སོགས་ཀྱིས་བསྟན་པ། །གཞན་དུ་འཐད་པར་འགྱུར་བ་ཡིན། །རིག་བྱེད་མི་ཤེས་གང་ཞིག་ནི། །དེ་དག་རིག་བྱེད་ལས་བྱུང་མིན། །དེས་ན་རྨོངས་བ་འབའ་ཞིག་གིས། །དེ་དག་གིས་ནི་བསྟན་པར་བྱས། །ཡང་ན་སློབ་མ་རྨོངས་དོན་དུ། །དེ་ལ་མི་བརྟེན་པའི་རྨོངས་པས། །ངན་པར་སྟོན་པར་བྱེད་རྣམས་ཀྱི། །ཉེར་བསྟེན་འཇིག་རྟེན་ན་འཇུག་འགྱུར། །གལ་ཏེ་དེ་ནི་རིག་བྱེད་ཀྱི། །རྩ་ཅན་ཡིན་ན་ཡིད་སོགས་བཞིན། །རིག་བྱེད་སྨྲ་པོ་ཁོ་ན་ལ། །དེ་དག་དེ་ལྟར་སྟོན་པར་འགྱུར། །གང་ཕྱིར་དམངས་རིགས་རྨོངས་པ་ལ། །དེ་རྣམས་ཀྱིས་ནི་ཉེར་བསྟན་བྱས། །དེས་ན་སྐྱོན་བརྗོད་ཀུན་རྫོབ་པར། །སྒྱུ་ལས་བཞིན་དུ་དེ་ཤེས་བྱས། །གསུམ་རིག་ཡིད་ལ་སོགས་རྣམས་གང༌། །ཚད་མ་ཉིད་དུ་གྲུབ་པར་ངེས། །གསུམ་རིག་པས་བསྟེན་བསྟན་བཅོས་ཅན། །དེ་དག་རིག་བྱེད་བྱུང་ཚིག་ལྟར། །རིག་བྱེད་ངག་རྣམས་མ་མཐོང་བའམ། །ཚད་མ་རྣམས་ལ་མ་བརྟེན་ཅིང༌། །དེ་བཞིན་བསྟན་བཅོས་རྩོམ་པའམ། །སྟོན་པར་འཐད་བ་མ་ཡིན་ནོ། །མི་སྡུག་ཞིག་ཅིག་ཀུན་མཁྱེན་སྲིད། །ཡང་ན་ལ་ལར་ཀུན་མཁྱེན་ཉིད། །ཡོད་ཀྱང་སྒྲུབ་གང་རབ་སྦྱར་བྱས། །དེ་ནི་དམ་བཅའ་མ་ཚང་ཉིད། །སྒྲུབ་པར་འདོད་པའི་དོན་གང་ཡིན། །དེ་ནི་འདི་ཡིས་མངོན་བརྗོད་མིན། །གང་བརྗོད་དེ་ནི་གྲུབ་ན་ཡང༌། །དགོས་པ་ཅུང་ཟད་ཡོད་མ་ཡིན། །གང་གི་ལུང་ནི་བདེན་ཉིད་དུ། །གྲུབ་ཕྱིར་ཀུན་མཁྱེན་ཉིད་བརྗོད་ཡིན། །དེ་ནི་ཐམས་ཅད་མཁྱེན་པ་ཡི། །སྤྱི་སྒྲུབ་ཙམ་གྱིས་མི་རྙེད་དོ། །ཇི་སྲིད་སངས་རྒྱས་ཀུན་མཁྱེན་མིན། །དེ་སྲིད་དེ་ཚིག་ལོག་པ་ཡིན། །གང་ཡང་རུང་བ་ཀུན་མཁྱེན་ཉིད། །གྲུབ་ཀྱང་དེ་བདེན་གང་ལ་འགྱུར། །གང་
ཕྱིར་ཀུན་མཁྱེན་གཞན་གྲུབ་ན། །གཞན་གྱིས་ཚིག་ནི་བདེན་ཉིད་མེད། །གཞི་མཐུན་པ་ཡིས་དེ་དག་ནི། །ཡན་ལག་ཡན་ལག་ཅན་ཉིད་འགྱུར། །འཇིག་རྟེན་ན་ནི་ཐམས་ཅད་གང༌། །དེ་འགའ་ཞིག་གི་མངོན་སུམ་ཡིན། །གཞལ་བྱ་ཤེས་བྱ་དངོས་ཉིད་ཕྱིར། །ཞོ་ཡི་གཟུགས་དང་རོ་སོགས་བཞིན། །ཤེས་བྱེད་འདིར་ནི་མ་བསྟན་པས། །ཕྱོགས་ནི་མ་ཚད་ཉིད་དུ་འགྱུར། །གང་ཞིག་ཀུན་མཁྱེན་འདོད་པ་ཡིན། །འདི་ལྟར་དེ་ནི་བསྟན་བྱས་མིན། །གལ་ཏེ་སངས་རྒྱས་ལས་གཞན་པ། །འགའ་ཞིག་ཀུན་མཁྱེན་ཉིད་འགྱུར་ན། །སངས་རྒྱས་ཀྱི་གསུང་ཚད་མ་རུ། །དེ་ཡི་ཤེས་པས་ཅི་ཞིག་དགོས། །ས་བཅུ་ལ་བཞུགས་པ་ཡང་ནི། །འདོད་ཆགས་སོགས་ཀུན་ཟད་བ་ན། །དག་ཅིང་ཤེལ་དང་མཚུངས་པ་ཡི། །ཡེ་ཤེས་ཀྱིས་ཀུན་མཁྱེན་པ་ཡིན། །བསམ་གཏན་ལ་བཞུགས་དོན་ཀུན་གྱི། །ཡུལ་ཅན་སེམས་བརྩེ་གཅིག་འཛིན་པས། །དེ་བཞིན་དོན་རྣམས་ཀྱིས་ཁྱབ་པར། །ཉེ་བར་བསྟན་པར་ནུས་མ་ཡིན། །གང་ཚེ་སྤྱི་བརྗོད་བྱེད་པོ་བཞིན། །སུ་ཞིག་ཅུང་ཟད་སྟོན་བྱེད་ན། །ཕྱོགས་གཅིག་ཤེས་པས་དེ་སྨྲས་ཡིན། །ཀུན་མཁྱེན་གྱིས་གསུང་མི་འགྱུར་རོ། །དེ་ནི་བསམ་གཏན་ལ་བཞུགས་ན། །ཡིད་བཞིན་རིན་ཆེན་བཞིན་བཞུགས་པས། །རྩིག་སོགས་ལས་ཀྱང་བསྟན་བ་རྣམས། །ཇི་ལྟར་བསམས་བཞིན་འབྱུང་བར་འགྱུར། །མི་རྣམས་ཤེས་པར་འདོད་དོན་ཀུན། །དེ་རྣམས་ཀྱིས་ནི་ཤེས་པར་འགྱུར། །ཇི་ལྟར་རིགས་པ་ཕན་པ་རྣམས། །དེ་དག་མྱུར་བར་ཐོབ་པར་འགྱུར། །དེ་ལྟ་བུ་སོགས་བརྗོད་པ་ནི། །དད་དང་ལྡན་ལ་མཛེས་པ་ཡིན། །ཁོ་བོ་རིག་པ་དོན་གཉེར་གང༌། །དད་པའི་རྗེས་སུ་འབྲང་བ་མིན། །རྩིག་སོགས་ལས་བྱུང་ཚིག་རྣམས་ནི། །ཡིད་ཆེས་པས་བསྟན་མི་འགྱུར་རོ། །དེ་དག་སུ་ཡིས་སྨྲས་བྱས་པས། །དེ་དག་ལ་ཡིད་ཆེས་མི་འགྱུར། །སངས་རྒྱས་ཀྱིས་གསུངས་ཡིན་ནམ་ཅི། །བྲམ་ཟེ་སླུ་བར་བྱེད་པ་ཡིས། །རིང་ན་གནས་པས་སྒྲ་བརྙན་བཞིན། །རྩེད་མོ་བྱེད་པར་སྨྲས་སམ་ཅི། །ཡང་ན་གནོད་བྱེད་ཤ་ཟ་སོགས། །མ་མཐོང་བས་ནི་སྨྲས་སམ་ཅི། །དེས་ན་ཤེས་རབ་ང་རྒྱལ་ཅན། །དེ་ལ་ཡིད་ཆེས་མི་བྱའོ། །འདི་
ལྟར་སྐྱེས་བུའི་ཀུན་མཁྱེན་ཉིད། །རང་དབང་ཉིད་ཀྱིས་གཞི་མེད་ཡིན། །སླར་ཡང་འདི་ལྟར་དཔྱད་བྱ་སྟེ། །ཀུན་མཁྱེན་ཇི་ལྟར་འདོད་པ་ཡིན། །རིམ་གྱིས་སམ་ནི་ཅིག་ཅར་རམ། །དངོས་ཀུན་རང་བཞིན་གཅིག་གིས་སམ། །གཙོ་བོ་ཅི་ཞིག་ནམ་ནུས་ལས། །བྱུང་དང་འབྱུང་དང་ད་ལྟར་གྱི། །དངོས་པོ་མཐའ་ཡས་རེ་རེ་ནས། །རིམ་གྱིས་ལོ་ནི་བརྒྱ་ཡིས་ཀྱང༌། །སུ་ཞིག་གིས་ནི་ཤེས་པར་ནུས། །ཅིག་ཅར་གཙང་དང་མི་གཙང་སོགས། །རང་བཞིན་རྣམས་ནི་འགལ་བ་ཅན། །བློ་གཅིག་གིས་རྟོགས་མ་མཐོང་སྟེ། །ཐ་དང་བློ་རྣམས་ལ་ལར་བཅས། །རྣམ་དབྱེ་མ་བྱས་པའི་ངོ་བོས། །དངོས་པོ་ཀུན་ནི་གང་གིས་རྟོགས། །དངོས་པོ་ཀུན་གྱི་རང་མཚན་ཉིད། །དེ་ཡིས་རྟོགས་པར་མི་འགྱུར་རོ། །སྤྱི་ཡི་ངོ་བོ་རྟོགས་བྱེད་པོ། །ཀུན་མཁྱེན་ཡིན་པ་དེས་ཅི་དགོས། །རྣམ་པ་གཞན་ནི་རྟོགས་པ་ཡིས། །དངོས་པོ་རྟོགས་པར་མི་འགྱུར་ཏེ། །རྣམ་པ་གཅིག་བཅས་རྣམ་ཤེས་དེ། །ཡང་དག་མ་ཡིན་ལོག་མ་ཡིན། །ཡང་དག་ཡིན་ན་མཐོང་གནོད་འདི། །ཐམས་ཅད་གཉིས་མེད་ཐལ་བར་འགྱུར། །དེས་ཀྱང་ཀུན་མཁྱེན་སློབ་མ་དང༌། །ཆོས་དང་ཆོས་མིན་དེས་བསྟན་པར། །མི་མཐུན་ཐ་དད་དངོས་ཉིད་ཀྱི། །རང་བཞིན་ངེས་བཟུང་མ་བྱས་ཕྱིར། །གཅིག་རྟོགས་ལོག་ཉིད་ཡིན་པ་ན། །ཀུན་མཁྱེན་འཁྲུལ་པ་ཐོབ་པར་འགྱུར། །དེ་ཚེ་དེ་ཡི་ཚིག་དད་པ། །རིགས་མིན་ཉོན་སོགས་དག་བཞིན་ནོ། །གལ་ཏེ་འཇིག་རྟེན་ལས་འདས་པ། །ཏིང་འཛིན་ལས་བྱུང་ཡེ་ཤེས་ཀྱིས། །རྒྱུ་བཅས་ལས་བཅས་འབྲས་གང་མཁྱེན། །དེ་ནི་ཐམས་ཅད་མཁྱེན་འདོད་ན། །མངོན་སུམ་རྗེས་དཔག་སྒྲ་ལས་བྱུང༌། །དོན་གྱིས་གོ་དང་དངོས་མེད་པའི། །ཚད་མ་འདི་ནི་སྒྲུབ་བྱེད་ན། །མེད་པས་དེ་འདྲ་ཡོད་མ་ཡིན། །རིམ་གྱིས་སམ་ནི་ཅིག་ཅར་གྱིས། །ཇི་ལྟར་འབྲས་མེད་རྗེས་དཔག་ཡིན། །ནུས་པ་ཡང་ནི་ཡོད་མིན་ཏེ། །ཡང་ན་ཐམས་ཅད་ནུས་ལྡན་ཉིད། །ཀུན་གྱིས་ཐམས་ཅད་རྟོག་པ་ན། །ཞིང་ཞེས་ནུས་དང་ལྡན་པ་རྣམས། །ཐབས་དང་བྲལ་བ་ཉིད་ཀྱི་ཕྱིར། །དེ་དག་གས་ནི་ཀུན་ཤེས་མིན། །ཐུན་མོང་མ་ཡིན་ཐབས་རྙེད་པ། །སྐྱེས་ཀུན་མ་ལུས་མཚན་ཉིད་ཅན། །
དེ་ལ་ཀུན་མཁྱེན་གཅིག་འགའ་ཞིག །ཞེས་བྱ་དེ་ནི་ཚད་མེད་ཅན། །གང་ཚེ་འདི་ལྟར་ཀུན་མཁྱེན་ནི། །འགའ་ཞིག་འཐད་པ་མ་ཡིན་ཏེ། །དེ་ཚེ་ཆོས་རྟོགས་པ་ཡི་རྒྱུ། །སྐྱེས་བུས་བྱས་པའི་ཚིག་མ་ཡིན། །དེ་ལྟར་ཐོས་པ་ལ་སོགས་པའི། །དཔྱོད་བ་པ་རྣམས་རང་རང་གིས། །ཐོས་པ་འདོད་པས་འདི་ལྟར་གནས། །རིག་བྱེད་རྣམས་ལ་རྒྱས་པ་རུ། །སྐྱེས་བུས་བྱས་པ་བསྒྲུབས་ཟིན་ཏོ། །དེ་ཕྱིར་དབང་འདས་དོན་རྣམས་ནི། །དངོས་སུ་གཟིགས་པ་ཁོ་ན་ཡིན། །རྟག་པའི་ཚིག་ནི་འགའ་ཞིག་གིས། །མཐོང་མིན་མི་སྲིད་པ་ཡི་ཕྱིར། །རྟག་པའི་ཚིག་གི་ནུས་པ་ནི། །རང་དང་གཞན་ལས་ཀྱང་མེད་དེ། །རང་གི་དོན་ཤེས་སྐྱེད་པ་ལ། །རིམ་དང་ཅིག་ཅར་འགལ་ཕྱིར་རོ། །དེ་ཕྱིར་མཐོ་རིས་མཆོད་སྤྱིན་སོགས། །རང་ཉིད་ཀྱིས་ཤེས་ནས་བསལ་བྱས། །ཁྱེད་ལ་རིག་བྱེད་བྱེད་པོ་ཡང༌། །དེ་འདྲ་དབང་འདས་དོན་མཐོང་ཡོད། །སྐྱེས་བུའི་དོན་གྱིས་གཙོ་མཁྱེན་བའམ། །ཆོས་ཐམས་ཐམས་ཅད་མཁྱེན་པ་ཉིད། །དེ་ནི་ཁས་ལེན་མ་ཡིན་ན། །གཞན་དུ་རིག་བྱེད་ཚད་མི་འགྱུར། །དེས་ན་དོན་གྱིས་གྲུབ་པ་ཡི། །ཁྱོད་ཀྱིས་ཆོས་མཁྱེན་ཁས་བླངས་པས།། ཁྱེད་ཀྱིས་རྒྱས་པར་བྱས་པ་ཡི། །དགག་པ་དེ་ལ་གནོད་པར་འགྱུར། །གཞན་ཡང་སྐྲ་དང་བ་སྤུ་གང༌། །དེ་དག་ཤེས་པ་སུས་ནུས་འོས། །དེ་ནི་རྒྱུ་མེད་ཁོ་ན་རུ། །རྒྱལ་པོའི་བཀག་དང་འདྲ་བར་སྨྲས། །གང་ཕྱིར་འགའ་ཡི་མི་གཡོ་བའི། །དྲི་མེད་ཡེ་ཤེས་མར་མེ་ཡིས། །དངོས་པོ་མ་ལུས་གསལ་བྱེད་པ། །དེ་ལ་གནོད་ཅན་སྨྲས་མ་ཡིན། །མི་སྣང་བ་ཙམ་གྱིས་ཀྱང་ནི། །དེ་མེད་པར་ནི་འབྱུང་མིན་ཏེ། །དངོས་པོ་རྣམས་ཀྱི་དམིགས་པ་ནི། །རྒྱུ་དང་ཁྱབ་བྱེད་མེད་པ་ན། །རྒྱུ་ལྡན་ཁྱབ་པར་བྱ་བདག །འདིར་ནི་ལྡོག་པར་རིགས་པ་ཡིན། །དེ་ལས་བྱུང་དེ་བདག་ཉིད་ཕྱིར། །མེ་དང་ཤིང་ནི་མེད་པ་ན། །དུ་བ་ཨ་མྲ་ལ་སོགས་བཞིན། །དེ་ལྟ་མིན་ན་རྒྱུ་མེད་དང༌། །ཐ་དད་ཉིད་དུ་ཐལ་བར་འགྱུར། །གལ་ཏེ་དོན་རྣམས་མ་ལུས་ལ། །རང་གི་དམིགས་པའི་རྒྱུ་དང་ནི། །ཁྱབ་བྱེད་ཉིད་དུ་ཁྱོད་ཀྱིས་ནི། །ཚད་མ་འགའ་ལས་ངེས་བྱས་ན། །དེ་ཡི་ཚེ་ཁྱེད་
འབད་མེད་པར། །དོན་ཀུན་ཤེས་པར་གྲུབ་པ་ཡིན། །དེས་ན་ཁྱེད་རང་ཀུན་མཁྱེན་པས། །བདག་ཉིད་རང་ལ་ཅི་ཕྱིར་སྡང༌། །དེ་ཉིད་ཀྱི་ཕྱིར་ཁྱེད་ལ་ནི། །ཀུན་མཁྱེན་འདི་ནི་སྣང་མི་འགྱུར། །དེས་སྣང་གྱུར་ན་ཁྱོད་རང་ནི། །འབད་བ་མེད་བར་ཀུན་མཁྱེན་འགྱུར། །གལ་ཏེ་ཁྱོད་ལའང་དོན་ཀུན་གྱི། །ཡུལ་ཅན་ཤེས་པ་ཡོང་པ་ན། །དེ་ཚེ་དོན་ཀུན་ཡུལ་ཅན་གྱི། །ཤེས་པ་ཁྱེད་ལ་སྣང་བར་འགྱུར། །གང་ཁྱོད་དོན་ཀུན་ཡུལ་ཤེས་མེད། །དེ་ལ་དེ་ནི་ཇི་ལྟར་སྣང༌། །དེས་རྒྱུ་ཁྱབ་བྱེད་བདག་ཉིད་ཀྱི། །རང་བཞིན་མི་སྣང་ངོ་བོའི་ཕྱིར། །ཁྱེད་ཀྱིས་མ་མཐོང་ཁྱད་པར་འདི། །ཀུན་མཁྱེན་པ་ནི་མི་གྲུབ་པོ། །མི་མཐོང་རྣམ་གསུམ་ཅན་འདི་ཡང༌། །སྣ་ཚོགས་ངོ་བོར་འཇུག་འགྱུར་ཏེ། །དེ་དང་དེ་འགལ་ལ་སོགས་པ། །མི་རྟོགས་རྟོགས་དབྱེའི་སྦྱོར་སྒོ་ནས། །ཀུན་མཁྱེན་མེད་པར་བསྒྲུབས་པ་ལ། །རྩ་བའི་དབྱེ་བས་ངོ་བོ་ཅན། །མི་དམིགས་འདི་ནི་ནུས་བྲལ་བར།། བསྒྲུབས་ན་གཞན་དགའ་འབད་བྱེད་སེལ། །རྒྱུ་དང་འབྲས་ཉིད་ཁྱབ་བྱ་དང༌། །ཁྱབ་བྱེད་ཉིད་དང་འགལ་བ་ཉིད། །སྣང་ཉིད་ཡིན་ན་གྲུབ་འགྱུར་ཏེ། །གང་ཡང་བདག་ཉིད་ཁྱབ་པ་ཅན། །ཁྱེད་ལ་ཀུན་མཁྱེན་མི་སྣང་བས། །དེས་ན་མི་དམིགས་དེ་དག་རྣམས། །དེ་སྤོང་བར་ནི་བྱེད་ནུས་མིན།། དགག་པའི་ཡན་ལག་གཞན་ཡང་མེད། །གལ་ཏེ་མ་མཐོང་ཙམ་གྱིས་ནི། །ཀུན་མཁྱེན་འགོག་པར་བྱེད་ཡིན་ན། །དེ་ཚེ་ཁྱེད་ཀྱིས་མར་མེ་བསྐོར། །བྱས་ལ་སོགས་ཀྱང་བཀག་པར་འགྱུར། །བུ་ཞེས་བྱ་བའི་འབྲས་མཐོང་ཕྱིར། །དེ་རྒྱུ་ཡོད་པར་རྟོགས་ཤེ་ན། །དེ་མེད་ཀྱང་ནི་འབྲས་བུ་དེ། །འགའ་ཞིག་ལ་སྣང་མ་ཡིན་ནམ། །གལ་ཏེ་གཞན་གྱིས་དམིགས་པས་ན། །དེ་ནི་མེད་པར་རྟོགས་པ་མིན། །ཁྱེད་ལ་གཞན་གྱི་དམིགས་དེ་ནི། །ཡུལ་ཅན་ཇི་ལྟར་གྲུབ་མིན་ནམ། །ཉེར་བསྟན་ཕྱིར་ན་དེ་བཞིན་དུ། །འདི་ལ་ཀུན་མཁྱེན་ལ་ཅིས་མེད། །རང་གིས་སྨྲས་པ་འདི་ཡང་ནི། །འདིར་ནི་ཅི་ཡི་ཕྱིར་མ་མཐོང༌། །སྐྱེས་བུ་རྣམས་ཀྱང་རྟག་ཏུ་ནི། །ཕལ་ཆེར་བརྫུན་ནི་སྨྲ་བ་ཡིན། །ཇི་ལྟར་ད་ལྟར་ཡིད་ཆེས་མེད། །དེ་ལྟར་འདས་དོན་སྨྲས་ལའང་ཡིན། །ཉེར་བསྟན་པའམ་འདིར་ཚད་མ། །ཉིད་མིན་ཡིན་མོད་དེ་ལྟ་ནའང༌། །ཁྱེད་ཀྱིས་ཀུན་མཁྱེན་མ་
དམིགས་ཞེས། །ངེས་པ་འདི་ནི་གང་ལས་སྐྱེས། །སེམས་ཅན་བདག་ཉིད་མ་མཐོང་ན། །དེ་ལྟ་བུ་ཡི་ངེས་འབྱུང་འགྱུར། །དེ་དག་མཐོང་ན་ཁྱོད་དང་ནི། །ཀུན་མཁྱེན་འགྱུར་བར་བསྟན་ཟིན་ཏོ། །དེ་ལྟ་མིན་ན་ཐེ་ཚོམ་ནི། །དམིགས་པ་ལ་ཡང་ཡོད་བཞིན་རིགས། །འགའ་ཞིག་ཀུན་མཁྱེན་ཡིན་པས་ན། །རང་བདག་ཉིད་ཀྱིས་བདག་ཉིད་ནི། །རིག་པར་འགྱུར་གྱི་དོགས་ཡིན་ཏེ། །དེ་ནི་བདག་གསལ་མཐོང་བ་ཡིན། །དེ་ཡང་དེ་ལྟར་དོགས་པ་ན། །ཀུན་གྱིས་མ་མཐོང་ངེས་པ་མེད། །འདི་ལྟར་ཐམས་ཅད་སྒྲ་ཡིས་ནི། །སྲོག་ཆགས་ཐམས་ཅད་འདོད་པ་ཡིན། །དེ་ཡང་ཀུན་ལ་ཕྱི་ནང་མེད། །དེས་ན་མ་མཐོང་ངེས་པ་མེད། །དེ་གཅིག་ཡོངས་སུ་སྤོང་བས་ན། །འདིར་ནི་འབྲེལ་པ་འགའ་ཞིག་ཡོད། །གཞན་གྱིས་ཡོངས་སུ་མི་ཤེས་ཕྱིར། །རང་གི་ཆགས་སོགས་ལྡོག་མི་འགྱུར། །ཚུ་རོལ་མཐོང་བ་འགའ་ཞིག་ཀྱང༌། །རྗེས་སུ་དཔག་པས་རྟོགས་པར་འགྱུར། །རེས་འགའ་ཁོ་ན་འགའ་ཞིག་གི །བློ་རྣམས་ལ་ལར་ཁྱད་བཅས་ཡིན། །འདི་ལྟར་རིག་བྱེད་ལ་སོགས་ལ། །སྐད་ཅིག་ཉིད་སོགས་སྒྲུབ་པ་ནི། །སྔར་ནི་གསལ་བར་བསྟན་ཟིན་ཀྱང༌། །རྨོངས་པ་རྣམས་ཀྱིས་ཉེར་མཚོན་མིན། །དེ་ལྟར་དགོས་པ་འདི་ལ་ནི། །ཚད་མ་མེད་པའང་དེས་མི་འགྱུར། །གང་ལ་གཉིས་སྐྱེས་དགོས་མེད་པར། །ཀུན་མཁྱེན་མེད་ཉིད་དུ་རྟོགས་ཡིན། །རྗེས་སུ་དཔག་པ་མེད་ན་ཡང༌། །དེ་ཡིས་ཀུན་མཁྱེན་མེད་དེས་མིན། །དུ་སོགས་འབྲས་བུ་མི་རྩོལ་བའི། །མེ་སོགས་ཡོད་ཉིད་ལ་བཞིན་ནོ། །རེས་འགའ་དམིགས་པའི་དོན་ལ་ནི། །ཐེ་ཚོམ་རིགས་པ་མ་ཡིན་ནམ། །མཐེ་ཡོར་བཞིན་དུ་འདི་ལྟར་ནི། །དེ་ནི་གཉིས་ཀའི་ཆར་བརྟེན་ཡིན། །གང་ཕྱིར་རེས་འགའ་མཐོ་ཡོར་མིན། །མཐོང་ན་དེ་ལ་བརྟེན་པ་ཡི། །ཐེ་ཚོམ་དེར་ནི་རིགས་པ་ཡིན། །ཀུན་མཁྱེན་དེ་ལྟར་མཐོང་མ་ཡིན། །རྣམ་པ་འདི་ཉིད་ཁོ་ན་ཡིས། །མ་ཡི་མེ་སྐོར་ལ་སོགས་པ། །ཐེ་ཚོམ་མེད་པས་མེད་པ་རུ། །བླ་ལྡན་ཁྱེད་ལ་ཐལ་མིན་ནམ། །དངོས་པོ་རྣམས་ནི་ཡོད་མེད་དུ། །ཚད་མ་ངེས་པར་ལྡོག་པའི་ཕྱིར། །ཁོ་བོས་ཚད་མ་མེད་ན་ཡང༌། །འདིར་ནི་ཐེ་ཚོམ་ཡོད་པར་སྨྲས། །མིག་སོགས་རྣམས་
ནི་ཉམས་པ་ནི། །དངོས་ཡོད་ཀྱང་ནི་ཚད་མི་འཇུག །དེ་རྣམས་མ་ཉམས་པ་ཉིད་ཀྱང༌། །དངོས་པོ་མེད་ཕྱིར་བུམ་སོགས་བཞིན། །དེས་ན་མི་དམིགས་འབའ་ཞིག་ནི། །རྣམ་པ་གཉིས་སུ་སྣང་བའི་ཕྱིར། །དེས་ན་ཚད་མ་མེད་ན་ཡང༌། །ཀུན་མཁྱེན་ཐེ་ཚོམ་འགྱུར་བའི་མཆོག །དེ་ནི་ཡོད་ཀྱང་གཞན་རྟོག་བཞིན། །རྨོངས་པས་དངོས་སུ་མཐོང་མ་ཡིན། །ལྕགས་གོང་དང་ནི་མདག་མ་ཡི། །མེ་བཞིན་འབྲས་བུ་མི་སྐྱེད་དོ། །གཞན་རྟོགས་ལས་བྱུང་ཆགས་པ་བཞིན། །དེ་ཡི་འབྲས་བུ་ལ་ལྟོས་མིན། །འབྲས་བུ་སྣང་ཡང་དེ་དང་ནི། །འདི་ལ་རྗེས་འགྲོ་རྟོགས་པ་མིན། །གང་ཕྱིར་རྨོངས་པའི་བློ་མཐོང་ལ། །རྟག་ཏུ་མཁྱེན་ཀུན་སྣང་མི་འགྱུར། །དེའི་ཕྱིར་རྗེས་སུ་དཔག་པ་དེས། །མེད་པར་འགྲུབ་པར་མི་འགྱུར་རོ། །ཚད་མའི་དངོས་པོའི་རྒྱུ་དང་ནི། །ཁྱབ་བྱེད་ཉིད་ནི་མིན་པར་བཤད། །དེ་ལོག་ན་ནི་དེ་ཡོད་པར། །མཐོང་ཡིན་དེས་ན་ཐེ་ཚོམ་བཤད། །དེ་ཕྱིར་ཀུན་མཁྱེན་ཡོད་པ་རུ། །གནོད་པ་ཅན་གྱི་ཚད་མ་ནི། །ཅུང་ཟད་ཡོད་མིན་འདིའི་སྒྲུབ་བྱེད། །རྒྱས་པར་མངོན་པར་འཆད་པར་འགྱུར། །མ་ལུས་དོན་ནི་ཡོངས་ཤེས་པས། །སྒྲུབ་པ་འབྲས་བུ་མེད་ཡིན་ཡང༌། །བློ་བཟངས་བདེ་གཤེགས་པ་རྣམས་ནི། །སེམས་འདིས་འབད་པར་བྱེད་པ་ཡིན། །མཐོ་རིས་ཐར་པ་ཐོབ་བྱེད་པའི། །རྒྱུ་ནི་དངོས་སུ་ཁྱེད་འབའ་ཞིག །ཡོད་པར་རྟོགས་ཏེ་འོན་ཀྱང་ནི། །ཐམས་ཅད་མཁྱེན་པ་རྟོགས་པར་འགྱུར། །དེས་ཀྱང་གནོད་པ་མེད་པས་ན། །སྒྲུབ་པ་གསལ་བར་ཡོད་པ་ནི། །ཅི་ཕྱིར་ཐམས་ཅད་མཁྱེན་པ་ལ། །རྨོངས་པའི་བློ་ཅན་ལོག་རྟོགས་བྱེད། །འདི་ལ་སྒྲུབ་བྱེད་མེད་ན་ཡང༌། །གནོད་བྱེད་ངེས་པར་མ་བྱས་པར། །ཐེ་ཚོམ་འགྱུར་ཏེ་དེ་དག་ལ། །དེས་འདིའི་རྒྱུ་མཚན་ག་ལས་བྱུང༌། །བསྐུལ་བ་ཁོ་ནས་བྱུང་བ་སོགས། །རྟོགས་པར་ནུས་ཏེ་གཞན་གྱིས་མིན། །གཞན་ནི་མེད་པར་ངེས་པ་ན། །དེ་ལྟར་ངེས་འདི་རིགས་པ་ཡིན། །སྐྱེས་བུའི་དོན་ཀུན་མཁྱེན་པ་ཡི། །དོན་ཀུན་མཁྱེན་པ་རབ་བསྒྲུབ་ཕྱིར། །ཚད་མ་དེ་ལ་སྔར་བསྟན་ཟིན། །ཕྱི་ནས་གཞན་ནི་འཆད་པར་འགྱུར། །དེས་ན་འགྲོ་ཀུན་ཕྲ་བ་ཡི། །དབྱེ་བ་མཁྱེན་པ་ཉིད་སྒྲུབ་ན། །གཞུང་རྩོད་དག་ལ་
བརྩོན་པ་ཡིས། །གནས་མིན་འཇིག་རྟེན་ཉོན་མོངས་མིན། །འཇལ་བར་བྱེད་པ་ཀུན་འབྲེལ་བའི། །མངོན་སུམ་སོགས་ནི་མ་བཀག་ཕྱིར། །སྡིག་པ་དང་ནི་བསོད་ནམས་དག །ལུང་ཙམ་འབའ་ཞིག་གིས་རྟོགས་མིན། །དཔྱོད་བ་པ་རྣམས་ཀྱི་ཕྱོགས་ནི། །དེ་ཙམ་གྱིས་མི་གྲུབ་ཀྱང་བླ། །ཀུན་མཁྱེན་སྤོང་བའི་འབད་པ་གང༌། །དེ་ནི་གཞན་དག་རྨོངས་པས་བྱས། །རྩ་བ་མ་ཆད་བ་ཉིད་ཕྱིར། །ཆོས་ཉིད་མཁྱེན་པ་ཉམས་པ་མིན། །ཀུན་མཁྱེན་སྐྱེས་བུར་གང་གིས་སྨྲས། །དེ་དག་གིས་བློའི་ཁྱད་པར་བསྟན། །ལྕེ་ཡི་དབང་པོ་དང་འབྲེལ་པའི། །ཆང་སོགས་མི་གཙང་རོ་སོགས་རྣམས། །གལ་ཏེ་དེ་དག་དེ་བསྟར་ན། །དེ་ལྟ་ན་དེ་སྨད་བར་འགྱུར། །ཡང་དག་དོན་བསྒོམས་ལས་བྱུང་བ། །ཡིད་ཀྱི་རྣམ་པར་ཤེས་པ་ཡིས། །སྨད་པར་གྱུར་ཀྱང་ཀུན་རྫོབ་ཏུ། །མ་ཕྲད་ཉིད་དང་རིག་པར་འགྱུར། །གང་ཕྱིར་སྐྱོབ་པ་ཡི་ནི་གསུང༌། །རིག་བྱེད་སོགས་ཀྱིས་བསྟན་པའི་དོན། །སྟོན་པར་བྱེད་ཕྱིར་སྣང་མིན་ཏེ། །དེས་ན་དེ་ཉིད་ཀུན་མཁྱེན་དུ། །སྲིད་ཡིན་མུ་སྟེགས་མ་ལུས་དང༌། །ཐུན་མོང་མ་ཡིན་གནས་པ་ན། །ཚད་མས་གནོད་པའི་བདག་སོགས་ནི། །རིག་བྱེད་བརྫུན་པར་བསྟན་པ་ཡིན། །གཞན་གྱིས་ཤེས་མིན་ཞི་བའི་སྒོ། །ལྟ་བ་ངན་པ་འཇིག་བྱེད་པ། །གདུལ་བྱ་རྣམས་ལ་ཕན་པའི་ཕྱིར། །བདག་མེད་དེ་ཡིས་གསལ་བར་གསུངས། །འཁོར་བ་པས་ནི་མ་གོམས་པ། །ཤེས་ན་ཕུང་ཁྲོལ་ཀུན་ལྡོག་མེད། །དེ་གོམས་པ་དང་ལྡན་རྣམས་ལ། །ཡོན་ཏན་རིན་ཆེན་འབྱུང་གནས་མཆོག །དེ་འདྲ་མཆོག་གྱུར་དེ་ཉིད་ནི། །གལ་ཏེ་སྙན་ངག་མཁན་ཤེས་ན། །སྐྱེས་བུའི་དོན་གྱི་གཙོ་ཤེས་པས། །སུ་ཞིག་ཀུན་མཁྱེན་དུ་འདོད་མིན། །བསྟོད་རིས་ལ་སོགས་རྣམས་ལ་ནི། །བདག་མེད་ཡེ་ཤེས་དེ་འདྲ་བ། །ཡོད་མིན་མུ་སྟེགས་ཐམས་ཅད་ནི། །བདག་ཏུ་ལྟ་བ་ལ་འཇུག་ཕྱིར། །འགྱུར་སྨྲ་སྐད་ཅིག་ཉིད་མིན་སོགས། །མངོན་སུམ་སོགས་ཀྱིས་གནོད་པ་ཅན། །རིག་བྲལ་མང་དུ་དེ་དག་གིས། །སྨྲས་ཡིན་དེ་དག་ཀུན་མཁྱེན་ཉིད། །ཁུ་བ་ཚྭ་སོགས་མངོན་སུམ་གྱིས། །དོན་སྒྲུབ་པ་ལའང་འཁྲུལ་པ་གང༌། །དེ་དག་ལ་ནི་དབང་འདས་པའི། །རིགས་པ་གསལ་བ་ཇི་ལྟར་སྲིད། །དེ་ལྟར་ཡིན་ན་ཀུན་མཁྱེན་
ཉིད། །མ་ཡིན་ཉིད་དུ་གསལ་བར་རྟོགས། །ལོག་པའི་ཤེས་པ་དང་འབྲེལ་ཕྱིར། །ཕྱིན་ཅི་ལོག་དོན་གསལ་བྱེད་ཕྱིར། །རྟོགས་པ་པོ་གཞན་མཐོ་ཡོར་ལ། །མི་ཞེས་བྱ་བར་འཁྲུལ་པ་བཞིན། །རྟག་པ་ཐམས་ཅད་རྣམས་ཀྱིས་ནི། །གཏན་ཚིགས་གྲུབ་པ་ཉིད་ཤེས་བྱ། །དངོས་ཀུན་རྣམས་ཀྱི་དེ་ཉིད་ནི། །ཡང་དག་མཁྱེན་པས་ཀུན་མཁྱེན་ཡིན། །དེས་ན་ལྡོག་ན་ཐེ་ཚོམ་ཅན། །གཏན་ཚིགས་ཉིད་དུ་བརྗོད་མི་བྱ། །གལ་ཏེ་དེ་དག་འགྱུར་སྨྲ་སོགས། །ཚིག་ནི་དགོས་པའི་དོན་ཡིན་ན། །དངོས་པོ་རྣམས་ཀྱི་དེ་ཉིད་ཀྱི། །ངོ་བོ་དེ་དག་ཇི་ལྟར་འདོད། །གལ་ཏེ་བདག་མེད་སྐད་ཅིག་སོགས། །དེ་ལྟ་ན་དེ་ཀུན་མཁྱེན་འགྱུར། །དངོས་པོ་མ་ལུས་པ་དེ་ཉིད། །ངོ་བོ་དངོས་སུ་མཐོང་བའི་ཕྱིར། །དེ་དག་མ་ལུས་པ་རྣམས་ནི། །འདོད་པ་གཅིག་ལ་གནས་པའི་ཕྱིར། །ཕན་ཚུན་གལ་བའི་དོན་རྣམས་ནི། །ངེས་པའི་དོན་དུ་སྨྲ་བ་མིན། །བསྟན་པར་བྱ་བའི་ངོ་བོ་ཅན། །དངོས་པོ་ཀུན་ལ་གནས་བ་ནི། །དེ་ཉིད་དངོས་སུ་མ་ཁྱེད་པས་ན། །བདེ་བར་གཤེགས་རྣམས་ཀུན་མཁྱེན་ཡིན། །དེ་དག་དེ་ལྟའི་རྣམས་ཅན་གྱིས། །ཡེ་ཤེས་བདེ་གཤེགས་ཉིད་འགྱུར་ཡོད། །སྔགས་དངོས་ཡེ་ཤེས་ལྡན་པའི་ཕྱིར། །དེ་ཡི་མཚན་ཉིད་དེ་ཙམ་ཡིན། །དེས་ན་སྤྱིས་ཀྱང་ཀུན་མཁྱེན་ནི། །སྲིད་པར་སྒྲུབ་པར་བྱས་པ་ན། །དེ་མཚན་ཉིད་མེད་མི་འབྱུང་ཕྱིར། །བདེ་བར་གཤེགས་པ་ཉིད་ལ་གནས། །གང་ཞིག་འགྲོ་ཀུན་ཇི་བཞིན་དུ། །བདག་མེད་སོགས་དངོས་རིགས་པ་ཡིས། །ཁྱད་པར་མ་བསྟན་པ་ན་ཡང༌། །སུ་ཞིག་ཀུན་མཁྱེན་སྲིད་པ་ཡིན། །བདག་མེད་མངོན་སུམ་དུ་བྱས་ན། །སྐྱོན་འདི་གནས་པ་རྙེད་མི་འགྱུར། །དེ་དང་འགལ་བ་ཉིད་ཀྱི་ཕྱིར། །མར་མེས་མུན་པ་ལྟ་བུའོ། །དངོས་སུ་བྱས་པའི་ཁྱད་བཅས་ཕྱིར། །བག་ཆགས་དང་བཅས་སྐྱོན་མེད་འགྱུར། །དེས་ན་ཐམས་ཅད་མཁྱེན་ཉིད་གྲུབ། །སྒྲིབ་པ་ཐམས་ཅད་ལས་གྲོལ་ཕྱིར། །དེ་ཡང་བད་བར་གཤེགས་ལ་གྲུབ། །ཐོག་མར་བདག་མེད་ཉིད་གསུངས་ཕྱིར། །དེ་ཕྱིར་མུ་སྟེགས་ཐམས་ཅད་ཀྱི། །དེ་བཞིན་གཤེགས་པ་ལྟ་ན་བཞུགས། །ཚད་མ་ཡིས་ནི་མི་སླུ་བའི། །དེ་ཉིད་མཐོང་ལྡན་དེ་དང་ནི། །འགལ་བའི་དོན་ནི་སྟོན་བྱེད་པ། །གཞན་དག་དང་ནི་རྒྱུ་མཚུངས་མིན། །གང་དག་
ཚད་མའི་སྤྱོད་ཡུལ་ལའང༌། །ཚད་མའི་གནོད་དཀྲུགས་ཚིག་བརྗོད་ན། །དེ་དག་དབང་པོ་ལས་འདས་པའི། །ཤེས་པའི་ནུས་ལྡན་རིང་བར་འགྱུར། །འབྲེལ་བ་དང་ནི་རྗེས་མཐུན་ཐབས། །སྐྱེས་བུའི་དོན་ནི་རྗོད་བྱེད་ངག །མཐོང་ལྡན་ཚད་མ་གཉིས་ཀྱིས་ནི། །ཅུང་ཟད་ཀྱང་ནི་གནོད་པ་མེད། །སྲེག་དང་བཅད་དང་བདར་བ་ཡིས། །དྲི་མ་མེད་པའི་གསེར་བཞིན་དུ། །རྟོགས་པར་བྱེད་ན་གང་ཞིག་ནི། །འགྱུར་བར་འཇུག་པ་མ་ཡིན་ནོ། །སྣོ་དང་ནམ་ལུས་མུན་པ་ནི། །སྤངས་པས་རྗེས་མཐུན་འབྱུང་བ་ཅན། །སྡིག་ཅན་རྣམས་ཀྱིས་མ་རྙེད་པ། །དེ་བཞིན་གཤེགས་གསུངས་རིན་ཆེན་ཡིན། །དེས་ན་བདེ་བར་གཤེགས་པ་ཉིད། །བློ་གྲོས་རྒྱས་པས་ཀུན་མཁྱེན་བཤད། །སྐྱེས་བུ་དོན་གཙོ་མཁྱེན་པས་ན། །དེ་ཉིད་སྨན་པ་མཆོག་ཏུ་གསུངས། །དེས་ན་བདེ་གཤེགས་ཀུན་མཁྱེན་ཡིན། །སེར་སྐྱ་མིན་ཞེས་ཚད་མ་ནི། །འདས་མ་ཐག་ཏུ་གསལ་བར་བཤད། །དེ་ནི་རྨོངས་པས་མཚན་བྱས་མིན། །མུ་སྟེགས་ངན་ཁྱུ་མཆོག་སོགས་པས། །འདོད་ལྷ་འཇིག་པར་མཛད་པ་ནི། །ཇི་སྐད་བཤད་པའི་ཁྱད་པར་གྱིས། །ཁྱད་པར་བཅས་ཀྱང་ངེས་པར་འགྱུར། །ཡི་གེ་ཕྱི་མོ་རིག་ཙམ་གྱིས། །ཟོས་པ་ལ་སོགས་བདེ་བ་དང༌། །བསྟན་བཅོས་ཀུན་དོན་དེ་ཉིད་མཁྱེན། །མཚུངས་སྙམ་རྨོངས་པ་སུ་ཞིག་སེམས། །དེས་ན་གཏན་ཚིགས་གྱིས་ཀྱང་ནི། །གཅིག་ལ་ཀུན་མཁྱེན་ཉིད་གྲུབ་ན། །དེ་ཡི་གཏན་ཚིགས་དངོས་མེད་ཕྱིར། །དེ་ནི་གཞན་ལ་ཡོད་མ་ཡིན། །དེས་ན་རྒྱལ་བ་ཀུན་མཁྱེན་དུ། །བསྒྲུབ་ལ་ཤཱཀྱའི་སློབ་མ་ནི། །ཁྲོས་མིན་སུན་དབྱུང་གང་བསྟན་དེ། །ཕྱོགས་གོས་སྦྱོར་ནུས་ཅན་གྱིས་མིན། །བདེ་བར་གཤེགས་པའི་གྲུབ་མཐའ་ལ། །གལ་ཏེ་འབྲེལ་གྲུབ་ཚད་མ་ཡིས། །དེ་ཉིད་གང་ཞིག་བསྟན་བྱས་པ། །དེ་བཞིན་གཞན་འདོད་ལ་གྲུབ་མིན། །དེས་ན་དེ་རྣམས་ཀྱིས་གྲུབ་དང༌། །སུན་དབྱུང་ཐ་དད་གནས་པ་ཅན། །གཟུགས་བརྙན་འབྱུང་བས་མ་བཟུང་བས། །ངེས་པར་བྱེད་པར་ནུས་པ་ཡིན། །རྣམ་པ་ཐམས་ཅད་མཁྱེན་ཉིད་དང༌། །ལྷན་ཅིག་ཤེས་བྱ་ཉིད་སོགས་དག །དངོས་སུའམ་བརྒྱུད་པས་འགལ་བ་ནི། །ཅུང་ཟད་ཙམ་ཡང་ཡོད་མ་ཡིན། །ཤེས་
བྱ་མིན་ཉིད་སོགས་ལྡན་པར། །ཤེས་བྱ་ཉིད་སོགས་གནས་པ་ཡིན། །ཀུན་མཁྱེན་མ་ཡིན་ལས་ལྡོག་པ། །དེ་ཡང་གནས་པར་འདོད་པ་ཡིན། །ཀུན་མཁྱེན་ཉིད་དེ་རྒྱུ་ཆང་བར། །སྔར་འཇུག་འགྱུར་བ་ལ་ལར་ནི། །མ་མཐོང་བ་ནི་གང་གིས་ནི། །ཡོང་སོགས་སྲིད་ན་ཕྱིས་ལྡོག་འགྱུར། །རང་བཞིན་རང་རིག་མེད་པས་ན། །དེ་ནི་སྐྱེ་བར་མི་འགྱུར་ཏེ། །སྔར་འཇུག་ཡོད་ན་འདི་ལྟར་ནི། །ཀུན་མཁྱེན་འདི་ཉིད་གྲུབ་པར་འགྱུར། །འགལ་བ་བསྒྲུབ་པར་མ་བྱས་པར། །གཞན་ནི་ལྡོག་པར་རིགས་མ་ཡིན། །དེ་ལྟ་མིན་ན་གཟུགས་ཡོད་པས། །རོ་ཡང་མེད་པར་རྟོགས་པར་འགྱུར། །དེས་འདིར་སོགས་པའི་སྒྲས་བསྡུས་པ། །ཕན་ཚུན་འགལ་བ་ཉིད་ཀྱི་ཕྱིར། །སྨྲས་པ་ཉིད་ལའང་ལྡོག་པ་ནི། །ངེས་པ་ཡིན་སྙམ་འགའ་སེམས་ན། །རྣམ་རྟོག་ཡོད་པས་སྨྲ་བ་ཡོད། །རྟོག་མེད་ལས་ནི་ཀུན་མཁྱེན་ཡིན། །བརྗོད་རྟོག་བཅས་ཀྱི་ཤེས་དང་བཅས། །དངོས་པོ་རྟོགས་པར་མི་འགྱུར་རོ། །འདིར་ཡང་ཡང་དག་ཀུན་མཁྱེན་ལའང༌། །སྨྲ་བ་ཉིད་ནི་རྟོག་པ་ཡི། །རྗེས་སུ་བྱེད་པ་ཡིན་སྙམ་སེམས། །དེ་དག་གིས་ནི་སྨྲས་ཡོད་ན། །སྐྱོབ་པ་ཀུན་མཁྱེན་འདོད་མིན་ཏེ། །རྟོག་བཅས་ཤེས་པ་འཇུག་ཕྱིར་རོ། །རྟོག་མེད་སྐད་ཅིག་དེ་ལ་ནི། །སྨྲ་བ་ཉིད་ནི་མ་གྲུབ་བོ། །དེ་ལྟ་ཡིན་ནའང་དེ་ལ་ནི། །ཀུན་མཁྱེན་མིན་ཉིད་འཐད་སྨྲས་མིན། །ཐམས་ཅད་མཁྱེན་པ་ལ་ལྟོས་ཕྱིར། །དེ་ནི་མི་སླུ་བ་རུ་འགྱུར། །གང་ཞིག་དྲོ་བ་ཉམས་མྱོང་ནས། །ཕྱིས་ནི་སྨྲ་བར་བྱེད་པ་བཞིན། །དེ་ཕྱིར་དེ་དོན་ཉམས་མྱོང་ལས། །བྱུང་ཕྱིར་དངོས་ལ་མི་སླུ་ཡིན། །དངོས་པོ་མ་ལུས་རྣམ་ཤེས་པའི། །ནུས་པ་སྤོང་བར་བྱེད་ན་ཡང༌། །ཁྱེད་ལ་ལྡོག་བ་ཐེ་ཚོམ་ཉིད། །གནས་སྐབས་དེ་བཞིན་ཐལ་བར་འགྱུར། །སྨྲ་བར་འཇུག་པའི་ནུས་པ་ནི། །གཏན་ཚིགས་ཉིད་དུ་འདོད་ན་ཡང༌། །ལྡོག་ལ་ཐེ་ཚོམ་ཟ་བ་ཡི། །སྐྱོན་ཉིད་རྗེས་སུ་འཇུག་པར་འགྱུར། །འཁོར་ལོ་བསྐོར་བའི་སྦྱོར་བ་བཞིན། །རྟོག་པ་མེད་ཀྱང་སྐྱོབ་པ་ནི། །ཚོགས་ཀྱི་ཤུགས་ཀྱིས་ནུས་པ་ཡིས། །བསྟན་པ་གཞན་དག་འཇུག་པར་འགྱུར། །ད་ལྟར་བློ་བཟང་གང་དག་སྨྲས། །དེ་དག་ལ་ཡང་གྲུབ་འགྱུར་མིན། །འཇིག་རྟེན་བ་ནི་ཞེན་པ་ཅན། །སྨྲ་ཉིད་གང་ཞིག་འདོད་པ་ཡིན། །
དེ་ལ་དེ་འདྲའི་གཏན་ཚིགས་ཏེ། །ལྡོག་ལ་ཐེ་ཚོམ་ཟ་བ་ཡིན། །རིགས་བ་དང་བྲལ་གཞུང་གིས་ནི། །ཇི་ལྟར་འདིར་ནི་མ་གྲུབ་འགྱུར། །སྨྲས་པ་གལ་ཏེ་སྨྲ་ཉིད་ནི། །རང་རྒྱུད་ཀྱིས་སྒྲུབ་འདོད་པ་ན། །དེ་ཚེ་རྟེན་ནི་གྲུབ་པ་མིན། །ཡང་ན་ཐེ་ཚོམ་ཟ་མ་གྲུབ། །དོན་འདིར་ཐེ་ཚོམ་ཟ་བའི་ཕྱིར། །ཐེ་ཚོམ་མ་གྲུབ་པ་ཉིད་གནས། །དེ་ཕྱིར་ཐལ་བར་བསྒྲུབ་པ་ནི། །ཁྱོད་ཀྱིས་དེ་འདྲ་བ་བརྗོད་དགོས། །དེ་ལ་ཡང་ནི་ལུང་ཙམ་གྱིས། །གྲུབ་པའི་ཆོས་ནི་གསལ་བྱེད་ཡིན། །ཡོད་པར་སྒྲུབ་པའི་དོན་དུ་ནི། །ཤེས་བྱེད་གཞན་ནི་ཚོལ་བ་མིན། །གང་ལ་དེ་ལྟར་གཞལ་བྱ་དང༌། །དངོས་པོ་ཡོད་སོགས་མཚན་ཉིད་ཅན། །གཏན་ཚིགས་འཇོམས་པའི་ནུས་མེད་པས། །དེ་ནི་སུ་ཞིག་སྒྲུབ་མི་བྱེད། །དེ་བཞིན་རིག་བྱེད་སྨྲ་བའི་ཁར། །རིག་བྱེད་འཇིག་རྟེན་རིགས་པ་འགའ། །གནས་པས་ཤཱཀྱའི་སློབ་མ་ཡི། །མི་ཟད་སྦྲུལ་དུག་ཤེས་མི་སེལ། །ནུས་ཆུང་བྲམ་ཟེ་རྨོངས་པ་འདིར། །མཐོང་བའི་དུག་གིས་ཟིན་པས་ན། །དབུགས་འབྱིན་པར་ཡང་མི་ནུས་ན། །སྨྲ་བར་བྱེད་པར་ཇི་ལྟར་ནུས། །རིག་བྱེད་སྨྲ་བའི་ཁར་གནས་པའི། །རིགས་པ་བཟང་ཡང་ངན་པ་ཉིད། །སྨད་པའི་རྟེན་ལ་གནས་པའི་ཕྱིར། །མགུལ་རྒྱན་རྐང་པ་ལ་བཏགས་བཞིན། །དེ་ཡིས་མེ་ལ་མ་འཁྲུལ་ཉིད། །དུ་བ་ལ་ཡང་བརྗོད་པ་རུ། །ནུས་པ་མིན་ཏེ་གང་གི་ཕྱིར། །དེ་གཞུང་དུ་བ་གཞན་དུ་གནས། །དངོས་གཅིག་ངོ་བོ་ཉིད་ཀྱི་ཕྱིར། །ཆུ་ལ་ཡང་ནི་འཇུག་པར་འགྱུར། །དེ་ལ་ཡང་ནི་མེ་ཡོད་ན། །ལོག་པ་ཅི་ཡང་བརྟེན་པ་ཡིན། །ཡང་དེ་ཡི་དངོས་འབྲས་བུ་ཡི། །རྣམ་རིག་དེར་ཅིས་དམིགས་འགྱུར་མིན། །མི་མཐུན་མཚན་ཉིད་དངོས་ཡིན་པའམ། །དངོས་དབྱེ་དེ་ཉིད་ཅན་ཡིན་ཆུག །ཀུན་མཁྱེན་ལ་ནི་མ་ལུས་བའི། །དངོས་པོ་དང་འབྲེལ་དེ་ཉིད་ཀྱི། །གོམས་པའི་སྟོབས་ལས་བྱུང་བ་ཅན། །ཡིད་ཆེས་ཚད་མ་གཅིག་ཏུ་བཏགས། །མིག་སོགས་རྣམ་པར་ཤེས་པ་མིན། །དེས་ན་ངེས་པར་མིག་གིས་ནི། །རོ་སོགས་ཐམས་ཅད་རྟོགས་པར་འགྱུར། །ཅི་ཕྱིར་དེ་ལྟར་བརྗོད་པ་ཡིན། །གཟུགས་སོགས་ཉམས་མྱོང་བདག་ཉིད་ཅན། །ཡིད་ཀྱི་ཤེས་པའང་གྲུབ་པ་ཡིན། །གཞན་ལ་ཡང་ནི་རྩོད་མེད་དེ། །དངོས་པོ་ཉིད་ནི་གསལ་བ་རུ། །
གང་ཕྱིར་དེ་ཡི་དངོས་ཉིད་ལ། །གཟུགས་སྒྲ་སོགས་པའི་སྤྱོད་ཡུལ་ཅན། །དྲན་པ་གསལ་བར་བརྗོད་པ་ཡིན། །རྨི་ལམ་ངན་ཡང་ཡིད་ཤེས་ན། །དེ་ཀུན་ཉམས་མྱོང་བདག་ཉིད་ཅན། །དེས་ན་ཐམས་ཅད་མཁྱེན་པ་ལ། །ངེས་བྱེད་དོན་ཅན་ཡིན་རྟོག་ན། །གང་གི་ཕྱིར་ན་མིག་གིས་ནི། །རོ་སོགས་རྟོགས་པར་འགྱུར་བ་ཡིན། །མིག་ལས་བྱུང་ཉིད་དེ་རྟོག་ན། །སྐྱོན་ནི་འདི་ལྟར་འགྱུར་བ་ཡིན། །ཡིད་ལས་བྱུང་བའི་སེམས་ཀྱིས་ནི། །དེ་ནི་རོ་སོགས་མཁྱེན་པ་ཡིན། །གང་ལ་ཡང་ནི་ཕུལ་བྱུང་མཐོང༌། །དེ་ཡང་རང་དོན་མ་སྤངས་ཕྱིར། །རིང་དང་ཕྲ་སོགས་མཐོང་བ་ཡིན། །གཟུགས་ལ་རྣ་བ་འཇུག་པ་མིན། །དེས་ན་དེ་ལྟ་བུ་སོགས་ཚིག །གཞན་གྱིས་རིགས་པ་དང་བྲལ་སྨྲས། །གང་ཕྱིར་དྲང་དོན་མ་སྤངས་པས། །ཡིད་ལ་ཕུལ་བྱུང་འདོད་པ་ཡིན། །ཇི་ལྟར་རིགས་ཅན་ཚད་མ་ཡིས། །ཇི་ལྟར་རིགས་པའི་དོན་སྣང་བར། །ད་ལྟར་འཇིག་རྟེན་ན་ནི་མཐོང༌། །དེ་བཞིན་དུས་གཞན་དག་ལའང་ཡིན། །རྣམ་པར་དག་པའི་ཤེས་ཀུན་ནམ། །དོན་ཀུན་སྤྱོད་ཡུལ་ཅན་ཡིན་ཏེ། །འབྲས་བུ་འགའ་ཞིག་རྒྱུ་ཡིས་ནི། །བྱས་པའི་ཕུལ་བྱུང་ཅུང་ཟད་སྲིད། །མྱ་ངམ་ན་ནི་སྐྱུ་རུའི་ཤིང༌། །འབྲས་བུ་དང་ཆུང་དང་བཅས་མཐོང་བས། །དེ་དག་ཐམས་ཅད་དེ་ཉིད་ཀྱི། །དེ་དངོས་གཞན་དུ་ཡང་འདུག་མིན། །སྦྲུལ་རྣམས་མིག་གིས་ཉན་པ་ཡིན། །དེ་ཡང་དེ་ལྟར་གྲགས་པ་ཡིན། །དེས་ན་སེམས་ཅན་ལས་ནུས་རྣམས། །སྣ་ཚོགས་དོན་བཅས་སྲིད་པ་ཡིན། །གང་ལས་དུས་གསུམ་གནས་པ་ཡི། །དངོས་པོ་ཐམས་ཅད་དེ་བཞིན་དུ། །ནུས་པ་ངས་པ་ཅན་དུ་སྣང༌། །དེས་ནི་དེ་ལྟར་བརྗོད་ན་མཛེས། །ཇི་ལྟའི་རིགས་ཅན་ཚད་མ་ཡིས། །ཇི་ལྟར་རིགས་པའི་དོན་སྣང་ཡང༌། །དེ་ལྟར་འཇིག་རྟེན་ན་ནི་མཐོང༌། །དེ་བཞིན་དུས་གཞན་ན་ཡང་འགྱུར། །ཁྱོད་ནི་སྐྱེ་བོ་ཙམ་ཡིན་པས། །ནུས་ཀུན་ངེས་པར་མ་བྱས་ཕྱིར། །འཇིག་རྟེན་རྣམས་ཀྱིས་ནུས་པ་ནི། །ད་ལྟར་དུས་ནའང་ཤེས་ནུས་མིན། །ནུས་པ་མ་ལུས་ཐམས་ཅད་ནི། །ཤེས་ན་ཁྱོད་རང་ཀུན་མཁྱེན་འགྱུར། །རྣམ་པ་གཞན་དུ་ཡོད་དོགས་པས། །རྗེས་སུ་དཔག་པས་ཀྱང་གྲུབ་མིན། །དབང་འདས་དོན་ཤེས་དང་ལྡན་པས། །སྐྱེས་བུ་རྣམས་ལ་ཤེས་རབ་
སོགས། །ཡོན་ཏན་ལྡན་ཉིད་དམིགས་འགྱུར་ཏེ། །རིགས་ལ་སོགས་པའི་ནུས་ཡོད་ཕྱིར། །ལྟ་བ་ཅན་སོགས་ཞེས་བྱ་བའི། །རིགས་པ་ཡོད་པ་ལེགས་བསྒོམས་གང༌། །ཚེ་འདི་ཉིད་ལ་གཞན་གྱིས་སེམས། །ཡོངས་སུ་ཤེས་པར་བྱེད་པ་དང༌། །ཚེ་འདི་ལ་ནི་མ་མཐོང་དང་།རྗེས་སུ་དཔག་པ་མ་ཐོས་པ། །བྱུང་དང་འབྱུང་འགྱུར་ད་ལྟར་བ། །དེ་ཀུན་ཤེས་འགྱུར་སྨྲ་བྱེད་ཡིན། །སྣ་ཚོགས་སྔགས་དང་ཀླུ་དབང་པོ། །སྲིན་པོ་གནོད་སྤྱིན་ལ་སོགས་མཐུས། །འདིར་ནི་སྐྱེས་བུ་ལ་བབས་ན། །མི་སླུ་བ་ཅན་གསལ་བར་སྨྲ། །འཁྲུལ་པའི་ཡུལ་མཐོང་མེད་བ་ན། །དེ་ལྟ་ན་ཡང་འདིར་གནོད་ཅན། །ཚད་མ་ཅུང་ཟད་ཡོད་པ་མིན། །ཚད་མ་ཅུང་ཟད་མེད་པ་ཡིས། །དེ་ནི་མེད་པར་འགྲུབ་མི་འགྱུར། །སྔར་བཤད་པ་ཡི་རིམ་པ་ཡིས། །རིག་བྱེད་བྱེད་པ་པོ་བསྒྲུབས་པས། །ཁྱེད་ཀྱིས་དབང་འདས་མཐོང་བ་ཡིས། །གདོན་མི་ཟ་བར་ཁས་བླང་དགོས། །དེས་ན་ཤེས་རབ་ཅན་སྐྱེས་བུས། །དོན་ཕྲ་རྣམས་མཐོང་ནུས་པ་ཡིན། །རང་གི་རིགས་ཅན་སྤངས་ནས་ཀྱང༌། །མི་གཞན་ཟིལ་གྱིས་གནོན་པ་ཡིན། །ཇི་ལྟར་འགྲོ་དང་སྦྱོར་སོགས་པའི། །ཁྱད་པར་གྱིས་ནི་སྣ་ཚོགས་པའི། །ནུས་པ་རང་ཡུལ་ཁྱད་ཅན་འགྱུར། །དེ་བཞིན་ཡིད་ཀྱང་འགྱུར་བ་ཡིན། །འདི་ལྟར་བྱ་རྒོད་རྣམས་ཀྱིས་ནི། །གཟུགས་ནི་ཤིན་ཏུ་རིང་ནས་མཐོང༌། །གྲུབ་པའི་མིག་སྨན་སོགས་རྣམས་ཀྱིས། །དེ་བཞིན་བསྒྲིབས་པའི་གཏེར་སོགས་ཀྱང༌། །དེ་ལྟར་འགྲོ་བའི་ཁྱད་པར་གྱིས། །ལྟ་ལ་སོགས་པ་རྣམས་ཀྱིས་ནི། །ཕྲ་དང་བསྒྲིབས་སོགས་མཐོང་ཡིན་ཏེ། །རང་གི་རིག་པ་རྗེས་མཐུན་ཕྱིར། །རྣལ་འབྱོར་གོམས་པའི་ཁྱད་པར་གྱིས། །རྣལ་འབྱོར་རྣམས་ཀྱི་ཡོད་ཤེས་ནི། །དེ་ལྟར་ཕུལ་བྱུང་དངོས་འགྱུར་བས། །འདིར་ནི་གནོད་པ་ཅན་ཡོད་མིན། །གལ་ཏེ་འགྲོ་དང་སྦྱོར་སོགས་ནི། །མེད་པས་ཤེས་ལ་ཁྱད་སྤོང་ན། །དེ་ཚེ་ཁྱེད་ཀྱིས་དེ་རིགས་ཡིན། །རྒྱུ་མེད་པས་ནི་འབྲས་མེད་ཕྱིར། །ཇི་ལྟར་བསྟན་བཅོས་གཞན་ཤེས་པས། །དེ་ཙམ་གྱིས་ནི་ཤེས་འགྱུར་མིན། །དེའི་རྒྱུ་ཕྱི་མ་ཕྱི་མ་ནི། །མེད་པས་ཕུལ་བྱུང་ཡང་དེ་བཞིན། །ཕྱོགས་གཅིག་རྣམ་པར་ཤེས་པས་ན། །ཀུན་མཁྱེན་ཡོད་པར་སྨྲ་བ་ཡིན། །གང་གིས་རིགས་བྱེད་སོགས་ཤེས་པར། །
མཐོ་རིས་སོགས་ནི་མངོན་སུམ་འགྱུར། །འོན་ཀྱང་ཤེས་རབ་བརྩེ་སོགས་ནི། །གོམས་པས་འཕེལ་བར་མཐོང་བའི་ཕྱིར། །དེ་ནི་འཕེལ་བར་འགྱུར་བས་ན། །ཕུལ་བྱུང་གཞན་ཡང་རྟོགས་པར་འགྱུར། །ཡིད་ཀྱི་ཡོན་ཏན་ཉིད་ཀྱིས་ནི། །དེ་དག་རབ་ཀྱི་མཐར་ཐུག་ཡིན། །མི་སྨོད་བཞིན་དེ་ཡང་གོམས་པས། །མ་ལུས་དོན་རྟོགས་ཕྱིར་མཐར་ཐུག །ཆོས་ཀུན་རྟོགས་པའི་ངོ་བོ་ནི། །ཤེས་རབ་མཚན་ཉིད་ཀྱིས་ནི་གནས། །གཅིག་ནི་ཡོངས་སུ་མ་ཤེས་ན། །དེ་ཉིད་རྫོགས་པར་མི་འགྱུར་རོ། །གང་དག་རིགས་མཐུན་སྔ་མ་ཡི། །ས་བོན་ལས་ནི་འབྱུང་འགྱུར་བ། །འདུས་བྱས་འཕེལ་བའི་བྱེ་བྲག་གིས། །དེ་དག་འཕེལ་བའི་ཆོས་ལྡན་པར། །སྲིད་པ་ཡིན་ཏེ་འབྲུ་སོགས་བཞིན། །བརྩེ་བ་དང་ནི་བློ་དག་ཀྱང༌། །ཇི་སྐད་བཤད་པའི་ཆོས་ལྡན་ཡིན། །འཕེལ་བས་ཀུན་མཁྱེན་ཉིད་དུ་འགྱུར། །གང་དག་གཉེན་པོ་ཉེར་གནས་ན། །འགྲིབ་པའི་ཆོས་དང་གང་ལྡན་པ། །དེ་དག་ཤིན་ཏུ་འགྲིབ་པ་སྲིད། །གསེར་གྱི་དྲི་མ་ལ་སོགས་བཞིན། །དེ་ལྟར་ཉོན་མོངས་པ་དང་ནི། །ཤེས་བྱའི་སྒྲིབ་སོགས་འདི་དག་ནི། །ཇི་སྐད་བཤད་པའི་ཆོས་ལྡན་ཡིན། །དེ་མེད་དྲི་མེད་བློ་འབྱུང་འགྱུར། །ཡང་ན་ཇི་སྐད་བཤད་ཆོས་ལྡན། །དེ་དག་ཤིན་ཏུ་རྩ་འབྱིན་ལ། །དྲི་མ་མེད་པའི་ནུས་ཡོད་པའི། །དེ་བཞིན་གཉེན་པོ་སྲིད་པ་ཡིན། །དེ་ཉིད་ལྟ་བའི་གེགས་ཉིད་ཕྱིར། །ལ་ལར་ཤིན་ཏུ་འགྲིབ་པ་ཅན། །ཕྱི་རོལ་ཉིད་ཀྱིས་མུན་པ་བཞིན། །ནང་གི་ཡང་ནི་རྟོགས་པར་འགྱུར། །དེ་ནི་འགྲིབ་པར་འགྱུར་བ་དང་།ཐོགས་མེད་ཡེ་ཤེས་ཆེན་པོ་ནི། །ཤེས་བྱ་ཐམས་ཅད་ཀྱི་ཚོགས་ལ། །རང་དབང་གིས་ནི་འཇུག་པར་འགྱུར། །གང་དག་བརྟན་པའི་རྟེན་གནས་པ། །ཅི་ཞིག་གིས་ནི་ཁྱད་པར་བྱས། །གནོད་ཅན་མེད་ན་དེ་དངོས་ནི། །ཐོབ་ཕྱིར་སླར་འབད་ལྟོས་པ་མིན། །དེ་དག་འདུས་བྱས་འཕེལ་བ་ཡི། །དབྱེ་བས་གསལ་བའི་རབ་ཀྱི་མཐར།། འཇུག་པར་འགྱུར་བ་སྲིད་པ་ཡིན། །གསེར་གྱི་རྣམ་པར་དག་པ་ཡིན། །བློ་དང་བརྩེ་བ་ལ་སོགས་པ། །འདི་དག་ཇི་སྐད་བཤད་ཆོས་ལྡན། །དེ་དག་རབ་ཀྱི་མཐར་ཕྱིན་པ། །འོད་གསལ་ཀུན་མཁྱེན་ཉིད་འབྱུང་འགྱུར། །མཆོངས་དང་ཆུ་ཡི་དྲོ་བ་ཡིས། །འདིར་ནི་འཁྲུལ་པ་ཉིད་ཡོད་
མིན། །མཆོངས་པ་མཆོངས་པའི་རྒྱུས་བྱུང་མིན། །སྟོབས་དང་འབད་པ་ལས་མཆོངས་འབྱུང༌། །ཡང་ན་མཆོངས་པ་ལ་ཡང་ནི། །རང་རྒྱུད་ཏིང་འཛིན་ལས་བྱུང་བའི། །ཁྱད་པར་གྱིས་ནི་རབ་ཀྱི་མཐར། །ཕྱིན་པ་ཉིད་དུ་འདོད་པ་ཡིན། །ཡིད་མགྱོགས་རྫུ་འཕྲུལ་ཞེས་བྱ་བ། །མཆོག་གྱུར་དེ་ལྟར་གྲགས་པ་ཡིན། །གང་ཞིག་དགོས་པ་ཙམ་གྱིས་ནི། །གཙོ་བོ་རིང་དུ་གཤེགས་པར་མཛད། །མ་མཐོང་བ་ཙམ་གྱིས་ཀྱང་ནི། །དེ་མེད་པར་ནི་གྲུབ་པ་མིན། །འདིར་ནི་གཞན་གྱིས་གནོད་པ་ཅན། །ཅུང་ཟད་སྨྲ་བར་ནུས་མ་ཡིན། །དང་བའི་རྒྱལ་པོ་ཕྲུག་གུ་ནི། །ཚང་ནས་བྱུང་བར་མི་ནུས་ཀྱི། །གོམས་པ་ཡི་ནི་ཁྱད་པར་གྱིས། །རྒྱ་མཚོ་ཡི་ནི་ཕ་མཐར་ཕྱིན། །རྟེན་གྱི་ཁྱད་པར་གོམས་པ་ཡིས། །དབྱེ་བས་འདི་ནི་ཇི་བཞིན་འགྲོ། །དེ་ལྟ་དེ་ལྟ་བུ་ལས་ནི། །ཅི་ཕྱིར་ལྷག་པ་ཅན་སྲིད་མིན། །བྱང་ཆུབ་སེམས་དཔའི་གནས་སྐབས་ན། །དེ་འདྲའི་འགྲོ་བ་ཐོབ་པ་མིན། །ཏིང་ངེ་འཛིན་ནི་ཁྱད་པར་ཅན། །ཐོབ་ན་ཐུབ་པས་སྤྱོད་པ་ཅན། །ཁྲུ་བཅུའི་བར་དུ་ནམ་མཁའ་ལ། །གང་ཞིག་མཆོངས་ནས་འགྲོ་བ་ཡིན། །དེ་ལ་རྒྱུ་ལས་དེ་འདྲ་ཡི། །རིང་དུ་འགྲོ་བའི་ནུས་པའང་ཡོད། །ཆུ་ནི་དྲོ་བར་བྱེད་པ་ན། །ཆུ་ནི་ཟད་པར་འགྱུར་བ་ཡིན། །དེས་ན་མི་བརྟན་རྟེན་ཅན་དེ། །གང་ཞིག་གང་དུ་ཁྱད་ཅན་འགྱུར། །ཡིད་ལས་བྱུང་ཡོན་ཏན་རྣམས་ལ། །སེམས་ནི་རྒྱུ་ནི་རྟེན་ཡིན་ཏེ། །དེ་ནི་རྟེན་འབྲེལ་པས་འཇུག་པ། །ནམ་ཡང་ལྡོག་པར་མི་འགྱུར་རོ། །ཇི་སྲིད་ཇི་སྲིད་ཡོན་ཏན་གོམས། །མངོན་དུ་ཕྱོགས་ནས་གནས་པ་ཡིན། །དེ་སྲིད་ཤིན་ཏུ་འོད་གསལ་བ། །དེ་ནི་ཤིན་ཏུ་གནས་པ་ཉིད། །གང་ཕྱིར་དྲི་མ་གློ་བུར་འདོད། །དེ་ཉིད་མཐོང་བའི་བདག་ཉིད་ཅན། །འོད་གསལ་བ་ཡི་སེམས་འདི་ནི། །རང་བཞིན་ཉིད་ཀྱིས་གནས་པ་ཡིན། །གལ་ཏེ་སེམས་ནི་གཞན་གྱིས་ནི། །རྟོག་པའི་བདག་ཉིད་ངེས་སྲིད་ན། །དེ་ཚེ་དམིགས་པ་མ་གྲུབ་ཕྱིར། །དོན་ལ་འཇུག་པ་མི་སྲིད་དོ། །དེ་ཕྱིར་གསལ་བར་བྱེད་པའི་ཕྱིར། །རང་རིག་བདག་ཉིད་སེམས་ལ་ཡོད། །སྒྲོ་བཏགས་མེད་པའི་ངོ་བོ་ཅན། །རང་རིག་པ་འདི་གནས་པ་ཡིན། །དེས་ན་ལམ་བདག་ཉིད་འགྱུར་ན། །འདོད་ཆགས་གཏི་མུག་གི་སྐྱོན་གྱིས། །སེམས་ནི་ཟིལ་གྱིས་
གནོན་པ་མིན། །དེ་ནི་སྔར་ཡང་སྟོབས་ཆུང་ཡིན། །སྐྱོན་ཀུན་འཇིག་རྟེན་བྱེད་པ་ཅན། །ལམ་གྱི་བདག་ཉིད་དུ་འགྱུར་ན། །འབད་པ་མེད་ན་སྤོང་མི་འགྱུར། །ཡོན་ཏན་མཐོང་བས་འབད་པ་མེད། །དེས་ན་དྲི་མེད་མི་གཡོ་བའི། །ཡོན་ཏན་ཚོགས་ཀྱིས་བརྒྱན་བ་ཅན། །སྐྱོན་གྱི་རླུང་གིས་བསྐྱོད་བདག་མིན། །རྒྱལ་བ་ཀུན་མཁྱེན་རྟོགས་པར་འགྱུར། །གཞན་ཡང་གང་དང་གང་བསྒོམས་པ། །བསྒོམས་པ་ཡོངས་སུ་རྫོགས་པ་ན། །དེ་དང་དེ་དག་གསལ་སྣང་འགྱུར། །འདོད་པ་ལ་སོགས་པའི་ཡུལ་བཞིན། །ཆོས་རྣམས་ཀུན་ཡང་དུས་རིང་དུ། །རྣམ་པ་དུ་མས་བསྒོམ་བྱ་མིན། །བདག་ཉིད་ཆེན་པོས་སྟོང་པ་དང༌། །བདག་མེད་སོགས་ཏེ་དངོས་ཉིད་ཅན། །སྟོང་དང་བདག་མེད་སོགས་ངོ་བོ། །ཡང་དག་ཉིད་དུ་བསྒྲུབས་ཟིན་ཏོ། །དེས་ན་ཡང་དག་དོན་བསྒོམས་ལས། །བྱུང་ཕྱིར་ཡིད་དེ་ཚད་མ་ཡིན། །གསལ་བར་སྣང་ཕྱིར་མངོན་སུམ་དང༌། །དངོས་དང་འབྲེལ་ཕྱིར་ཚད་མ་ཡིན། །མིག་སོགས་རྟེན་ལས་བྱུང་བ་ཡི། །སྔོ་སོགས་སོ་སོར་སྣང་བ་བཞིན། །དེས་ན་རྣམ་ཤེས་གཅིག་ལ་ནི། །ཆོས་རྣམས་དག་ནི་ཐམས་ཅད་ཀྱང༌། །ཅིག་ཅར་གསལ་བར་སྣང་སྲིད་པས། །དེ་ལྟ་བུ་ནི་རྟོགས་པར་གྱིས། །འདི་ལྟར་བསྒོམ་བཞིན་པ་ཉིད་ཕྱིར། །བུད་མེད་བུ་དང་ཚོམ་རྐུན་བཞིན། །འདོད་པ་ཙམ་གྱིས་མངོན་ཕྱོགས་པས། །བསྒོམ་པ་རྙེད་པར་དཀའ་བ་ཡིན། །སྒོམ་པའི་རབ་མཐོ་བློ་གཅིག་ལ། །ཆོམ་རྐུན་གསལ་བར་སྣང་བ་ཡིན། །དངོས་པོ་ཡོད་སོགས་གཏན་ཚིགས་ཕྱིར། །བུད་མེད་ལ་སོགས་ལྟ་བུའོ། །གང་ལ་འདི་ལྟར་དངོས་ཉིད་དང༌། །ཡོད་དང་སྐྱེ་སོགས་མཚན་ཉིད་ཅན། །ངེས་བྱེད་གཏན་ཚིགས་ནུས་ཅན་ཡོད། །དེ་ནི་སུ་ཞིག་སྒྲུབ་བྱེད་མིན། །ཤེས་བྱ་མ་ལུས་པ་ཡི་ཚོགས། །ཤེས་པའི་སྐད་ཅིག་གཅིག་ཁྱབ་མཛད། །ལྷ་དང་ལྷ་མིན་གཙུག་ནོར་བུར། །གྱུར་པའི་ཀུན་མཁྱེན་འདི་གྲུབ་འགྱུར། །ཚིག་མ་ལྟོས་པར་འགའ་ཞིག་གིས། །ཆོས་སོགས་དེ་དག་ལྟོས་ཡིན་ཏེ། །བདེན་བདག་ཉིད་ཀྱིས་སྟོང་ཉིད་ཕྱིར། །གསེར་ལ་སོགས་པ་རྣམ་དག་བཞིན། །རིག་བྱེད་སྐྱེས་བུས་བྱས་ཉིད་དུ། །གྲུབ་ཕྱིར་གྲུབ་པ་ལ་སྒྲུབ་མིན། །མི་ཤེས་པ་ཡི་སྟེས་དབང་གིས། །བདེན་
པའི་ཉེར་བསྟན་ཡོད་མ་ཡིན། །ཕྱག་རྒྱ་དཀྱིལ་འཁོར་སྔགས་རྣམས་ཀྱིས། །ཤ་ཟ་མཁའ་འགྲོ་ལས་ཐར་དང༌། །དུག་ལ་སོགས་པ་སེལ་བ་ཡི། །ནུས་པ་དབང་འདས་གང་ཡིན་པ། །ཐུབ་དང་མཁའ་ལྡིང་སོགས་དབང་གིས། །ཐོས་དང་རྗེས་དཔག་མ་ཡིན་པའི། །དྲི་མེད་དངོས་སུ་མི་མཁྱེན་ན། །དེ་དག་ཇི་ལྟར་གསུངས་པ་ཡིན། །རྗེས་སུ་དཔག་པས་ཀྱང་མཁྱེན་མིན། །དེར་ནི་སྔར་མ་མཐོང་བའི་ཕྱིར། །དེ་དང་རྟགས་ཀྱི་འབྲེལ་བ་ཡི། །མཐོང་བ་མི་འཐད་པར་འགྱུར་རོ། །གཞན་ལ་གསན་ནས་གསུངས་མིན་ཏེ། །བརྒལ་ཞིང་བརྟག་པ་མཚུངས་པའི་ཕྱིར། །སྟེས་དབང་མི་སླུའི་ངོ་བོ་ནི། །དེ་འདྲ་གསུངས་པ་མ་ཡིན་ནོ། །དེ་ལྟར་ཆོས་བསྟན་འདི་ལྷུར་མཛད། །རྒྱུ་མཚན་གཞན་དུ་བརྟགས་པ་མིན། །གང་ཕྱིར་དོན་གཞན་འཇུག་བྱེད་ལ། །སྟེས་དབང་དེ་དོགས་སྐྱེ་བར་འགྱུར། །སྐོམ་པས་གདུངས་པའི་བསམ་པ་ཅན། །འབབ་ཆུར་ཉེ་བར་འགྲོ་བ་ན། །ཇི་ལྟར་བྱི་རུ་རྙེད་པ་ལྟར། །དེར་ནི་སྟེས་དབང་ཡོད་པར་རིགས། །གཡེང་བའི་སེམས་ལྡན་རྨོངས་རྣམས་ཀྱིས། །རེས་འགའ་བ་ཡི་རིམ་ཅན་འདི། །ཁྱད་པར་འབྲས་བུ་སྒྲུབ་བྱེད་པ། །དེ་སྨྲ་ནུས་པ་མ་ཡིན་ནོ། །མ་ཐོས་རྗེས་དཔག་མ་བྱས་པའི། །བདེན་པའི་དོན་ནི་ལྷུར་སྨྲ་གང༌། །དེ་ནི་སྔོན་ཤུལ་ཕྱིས་དེའི་དངོས། །ཤེས་ཤིང་དེ་འདྲ་སྟོན་བྱེད་ཡིན། །གཞན་གྱིས་མངོན་སུམ་གྱིས་མཐོང་བའི། །ཆུ་སོགས་སྟོན་པར་བྱེད་པ་བཞིན། །མ་ཐོས་རྗེས་དཔག་མ་བྱས་པའི། །དབྱེན་དོན་དབང་པོ་ལས་འདས་པའོ། །གཞན་གྱིས་མི་རྟོགས་ནུས་ཅན་ཡང༌། །དེས་པ་ཡི་ནི་ཕྱག་རྒྱ་དང༌། །དཀྱིལ་འཁོར་རྟོག་སོགས་མཚན་ཉིད་ཅན། །དེ་ལྷུར་ལེན་ཐུབ་མཆོག་གིས་གསུངས། །དེ་ཕྱིར་ཕུལ་བྱུང་ཤེས་པ་ནི། །ཐབས་ཀྱི་སྟོབས་ལས་བྱུང་རྣམས་ཀྱིས། །གང་ཞིག་དབང་འདས་ཐམས་ཅད་ཉིད། །དེས་ནི་ལྷག་པར་ཤེས་བྱེད་ནུས། །ཁང་ཁྱིམ་གཅིག་ལ་གནས་པ་ཡི། །མངོན་སུམ་གང་ཞིག་ཞུགས་པར་གྱུར། །དེ་ཉིད་དུ་ནི་དེ་མཐོང་ནུས། །ཁང་ཁྱིམ་གཞན་ལ་མ་ཡིན་ནོ། །སེམས་ཅན་ཐམས་ཅད་ལ་གནས་པའི། །ནུས་པའི་ཉམས་མྱོང་ཡོད་པ་ན། །ཁྱེད་ཀྱིས་དེ་ལྟར་ངེས་ཉིད་རིགས། །
གཞན་དུ་རྒྱུ་མཚན་ཅི་ཞིག་ཡོད། །སྐྱེས་བུ་ཉིད་སོགས་གཏན་ཚིགས་ཀྱིས། །ནུས་པ་མེད་པར་ངེས་བྱེད་ན། །བདག་ཉིད་དཔེ་རུ་བྱས་པ་ཡིས། །ཧ་ཅང་ཐལ་བར་འགྱུར་བ་ཡིན། །དེ་ལྟར་ཁྱེད་ཀྱིས་རྨོངས་པ་ཉིད། །ངེས་པར་བྱས་བས་མཁས་པ་ཀུན། །ཁྱོད་ཉིད་དཔེ་རུ་བྱས་པ་ཡིས། །རྨོངས་པའི་བློ་ཅན་ཐལ་བར་འགྱུར། །སྐྱེས་བུ་གཅིག་འགའ་ཞིག་ཀྱང་ནི། །མཐར་ཐུག་ཤེས་པ་ཡོད་པ་མིན། །དེ་ལྟར་འདི་ཡང་དག་ཙམ་ནི། །རྒྱུ་མཚན་མེད་པར་སྨྲས་པ་ཡིན། །ཡང་ན་རང་མཚུངས་སེམས་ཅན་རྣམས། །རྣམ་དག་བློ་ནི་མི་རྨོངས་པའི། །དབང་དུ་བྱས་ནས་དེ་ལྟར་ངག །རྒྱལ་བའི་དུས་འདབ་ཀྱིས་ནི་སྨྲས། །ཐམས་ཅད་མཁྱེན་པ་སྲིད་པ་ཡི། །ཚད་མ་རྒྱས་པར་བསྟན་པ་ཡིན། །གཞན་གྱིས་དེ་ལ་གནོད་པ་ཅན། །སྨྲ་བ་སྔར་ཡང་སྨྲས་ཟིན་ཏོ། །དེ་ཡི་སྲིད་པ་བསྒྲུབ་པ་ནི། །གཞན་ནི་སྨྲ་བར་མ་བྱས་ན། །གནོད་པ་ཅན་བཙལ་བ་ཙམ་གྱིས། །དེ་ནི་སྲིད་པར་རྟོགས་པར་འགྱུར། །འདི་ལྟར་གནོད་པ་ཅན་མཐོང་ན། །སྒྲུབ་བྱེད་རབ་གསལ་མ་བྱས་ཀྱང༌། །ཐེ་ཚོམ་སྐྱེ་བར་འགྱུར་བ་དེས། །དེ་ནི་སྲིད་པར་འགྱུར་བ་ན། །རིག་བྱེད་ཁོ་ན་རང་དབང་གིས། །ཆོས་ནི་མཚོན་ཞེས་ངེས་པ་འདི། །ཁྱེད་ཀྱིས་ངེས་པར་གྲུབ་འགྱུར་མིན། །རྣལ་འབྱོར་པ་རྣམས་མ་འོངས་པའི། །ཤེས་བྱ་ལ་ནི་མངོན་སུམ་གྱིས། །ནུས་པ་ཇི་ལྟར་ཡོད་དེ་ནི། །དུས་གསུམ་བརྟག་པ་ལས་བཤད་ཟིན། །ཡང་ན་རྣལ་འབྱོར་ནུས་བྱུང་བའི། །འདས་དང་མ་འོངས་ལྟར་གསལ་བ། །རྟགས་དང་ལུང་ལ་མ་ལྟོས་པའི། །ཡིད་ནི་རྣལ་འབྱོར་པ་ལ་ཡོད། །རང་བདག་སྣང་བ་རིགས་པའི་ཕྱིར། །དེ་ནི་རང་མཚན་སྤྱོད་ཡུལ་ཅན། །གསལ་བར་སྣང་བ་མི་སླུའི་ཕྱིར། །དེ་ཡང་མངོན་སུམ་འདོད་པ་ཡིན། །དེ་ཕྱིར་དབང་འདས་དོན་རྣམས་ནི། །དངོས་སུ་མཐོང་བ་ཉིད་ཡོད་ཡིན། །རྟག་པའི་ཚིག་ནི་མེད་པའི་ཕྱིར། །དེས་ནི་ཅུང་ཟད་མཐོང་བ་མིན། །བློ་བཟངས་རྣམས་ཀྱིས་ཐུབ་པ་ཡིས། །དབང་འདས་དོན་གྱི་རྣམ་ཤེས་ནི། །སྔར་བཤད་རྗེས་སུ་དཔག་པས་བཤད། །བྱས་པའི་ལུང་གཞན་ལས་མ་ཡིན། །ཚད་མ་ཉིད་ནི་གྲུབ་དོན་དུ། །བྱས་པ་གང་དང་བྱེད་པོ་ལ། །ཐོག་མ་མེད་ཉིད་སྨྲས་པ་མིན། །གང་ཕྱིར་དེ་ཚད་མིན་ལའང་
འཇུག །འདི་ལྟར་མེད་པ་ལ་སོགས་དང༌། །དེ་བཞིན་དེ་ཚིག་རྣམས་དང་ནི། །རིག་བྱེད་དང་ནི་སྨྲ་བོ་རྣམས། །ཐོག་མེད་ཡིན་ཡང་ཚད་མ་མིན། །ཚད་མ་ཉིད་ནི་གྲུབ་དོན་དུ། །མ་བྱས་ངག་དང་སྨྲ་པོ་ལ། །ཐོག་མ་མེད་ཉིད་གང་སྨྲས་དེ། །ཁོ་བོ་ལ་བཞིན་བཀག་པར་འགྱུར། །སྨྲ་པོ་བྱེད་པོ་དང་མཚུངས་ཏེ། །དེ་ལ་ལྟོས་ནས་རིག་བྱེད་རྣམས། །ཚད་མ་ཉིད་འགྱུར་དེས་བྱས་པའི། །བྱས་པས་དོན་ཤེས་སྐྱེད་པའི་ཕྱིར། །དེས་ན་རིག་བྱེད་ངག་རྣམས་ནི། །གཞན་དབང་ཉིད་ཀྱིས་ཚད་མ་མིན། །རང་གིས་ཆོས་ནི་མ་མཐོང་ཕྱིར། །སྨྲ་བོ་རྣམས་ལ་དེ་ཡོད་མིན། །དེ་ཕྱིར་དེ་འདྲའི་སྨྲ་པོ་ལ། །ཐོག་མ་མེད་ཉིད་བརྟགས་པ་ན། །ཚད་མིན་གོ་འཕང་གནས་ཉིད་ཕྱིར། །མེད་པ་སོགས་ལས་ཁྱད་པར་མེད། །དེས་ན་ཁྱད་པར་མ་རྟོགས་ཕྱིར། །ཐམས་ཅད་འདིར་ནི་མཚུངས་པར་འགྱུར། །ཚད་མ་དང་ནི་ཚད་མ་མིན། །དེ་ལྟ་ཡིན་པས་ཐོག་མེད་མིན། །ཡང་ན་ཐུབ་དང་དེའི་གསུང་ལ། །ཁྱད་པར་འདི་ནི་ཡོད་པ་ཡིན། །གཉིས་མེད་ཆོས་ནི་གཟིགས་པ་དང༌། །བརྩེ་བའི་ངོ་བོས་གསུངས་པ་ཡིན། །གང་ལ་མངོན་མཐོའི་འགྲུབ་པ་དང༌། །ངེས་པར་ལེགས་པར་འགྲུབ་པར་འགྱུར། །མཁས་རྣམས་ཀུན་གྱིས་དེ་འདྲ་སྟེ། །ཆོས་ཞེས་བྱ་བར་བཤད་པ་ཡིན། །དེས་གསུངས་སྔགས་དང་རྣལ་འབྱོར་སོགས། །དམ་ཚིག་ཆོ་ག་བཞིན་བྱས་པས། །ཤེས་རབ་ནད་མེད་སྦྱོར་སོགས་ནི། །མཐོང་བའི་ཆོས་ལའང་སྐྱེ་བར་འགྱུར། །མ་ལུས་ཆོས་བདག་གཉིད་མཐོང་བ། །དེ་ཡིས་རབ་གསལ་མཛད་པ་ཡིས། །འཇིག་ཚོགས་ལྟ་ལས་བྱུང་བ་ཡིན། །ཉོན་མོངས་ཚོགས་འདི་ལ་མེད་འགྱུར། །བདག་དང་བདག་གིར་འཛིན་ལྟ་ཅན། །ཡོད་པའི་སྟོབས་ལ་འཇུག་པར་འགྱུར། །བདག་དང་བདག་འཛིན་ང་རྒྱལ་གྱིས། །ཉོན་མོངས་མ་ལུས་འབྱུང་བར་འགྱུར། །ཡོད་པར་ལྟ་བའི་གཉེན་པོ་ནི། །བདག་མེད་ངེས་པར་མཐོང་བ་ཡིན། །གོམས་པས་བདག་ཉིད་འགྱུར་བ་ན། །དེ་ཡོད་པས་ནི་དེ་ཡང་ལྡོག །ཉོན་མོངས་ཕུང་པོ་དེའི་རྩ་ཅན། །རྒྱུ་མེད་པས་ན་མེད་པར་འགྱུར། །དེ་མེད་པས་ན་དེ་རྒྱུ་ནི། །ཁྱེད་ལ་སླར་ཡང་སྐྱེ་མི་འགྱུར། །དེ་ལས་ཤིན་ཏུ་རྣམ་གྲོལ་བ། །ཐར་པ་ཞེས་ནི་བཤད་པ་ཡིན། །དེས་ན་བདག་མེད་ལྟ་བ་ནི། །གཉིས་པ་མེད་པའི་ཞི་སྒོ་ཡིན། །མུ་
སྟེགས་ཐམས་ཅད་རྣམས་ཀྱང་ནི། །ང་རྒྱལ་ངེས་པར་ལོག་པ་ཡིས། །ཐར་པར་འདོད་དེ་བདག་ཡོད་པས། །ང་རྒྱལ་ལྡོག་པར་མི་འགྱུར་ཏེ། །ནུས་པ་ཅན་རྒྱུ་ཡོད་པ་དང༌། །ཡུལ་ནི་སུན་དབྱུང་མ་བྱས་ཕྱིར། །དེ་སུན་དབྱུང་པ་དངོས་མེད་ཀྱི། །གཞན་དུ་ཕྱིན་ཅི་ལོག་ཐལ་འགྱུར། །གལ་ཏེ་བདག་ནི་ཡོད་པ་ན། །བདག་མེད་ཅེས་དེ་ལྟར་རིགས་མིན། །དེ་ཉིད་རིགས་པར་ངེས་པར་ནི། །མྱ་ངན་འདས་འགྱུར་ཁྱེད་ཀྱི་བརྫུན། །དེ་ཕྱིར་མུ་སྟེགས་གཞན་དག་ལ། །མི་དགེ་བཅུ་ནི་སྤངས་པ་ཡིས། །གལ་ཏེ་མངོན་མཐོའི་ཕྱོགས་ཙམ་ནི། །ཤིན་ཏུ་ཆེ་ཆུང་ཐོབ་ཡོད་ནའང༌། །ཐར་པའི་འབྲས་བུ་ཐོབ་པ་ནི། །ཅུང་ཟད་ཡོད་པ་མ་ཡིན་ཏེ། །ཡོད་པར་ལྟ་བ་ལ་འཇུག་པས། །ཉོན་མོངས་རྩ་ནས་མ་བྱུང་ཕྱིར། །སྐྱོབ་པས་སླར་ཡང་དགེ་བ་ཡི། །ལས་ལམ་བཅུ་པོ་གང་གསུངས་པ། །ཡང་དག་ལྟ་དང་ཡོངས་ལྡན་པས། །དེ་དག་ཤིན་ཏུ་སྟོབས་ལྡན་འགྱུར། །ཡོད་པའི་ལྟ་བས་སྒྲིབ་པ་ཅན། །ཕྱིན་ཅི་ལོག་དང་རྗེས་འབྲེལ་ཕྱིར། །དག་མིན་དེས་ན་དེ་དག་ལས། །དག་པའི་འབྲས་བུ་སྐྱེ་མི་འགྱུར། །དེ་ནས་ཐུབ་པའི་མཆོག་གིས་ནི། །རང་ཉིད་ཀྱིས་ཆོས་མ་གཟིགས་པས། །ཆོས་ཀྱི་དེ་ཉིད་གསུངས་ཡིན་ཞེས། །སྨྱོན་པ་མིན་པ་སུ་ཞིག་སྨྲ།། སྐྱོབ་པ་ལ་ནི་ཀུན་མཁྱེན་དང༌། །རིག་བྱེད་ལ་ནི་རྟག་ཉིད་གང༌། །མཁས་པ་མིན་པ་མཚུངས་པར་སྨྲ། །རྟག་པ་ཉིད་ནི་མི་སྲིད་ཕྱིར། །དེ་ཡི་གནོད་པ་ཅན་སྨྲས་ཡིན། །རིམ་དང་ཅིག་ཅར་འགལ་བའི་ཕྱིར། །རྣམ་ཤེས་ལ་སོགས་དེའི་འབྲས་བུ། །ཅིར་ཡང་འཐད་པ་མ་ཡིན་ནོ། །ད་ལྟར་དུས་སུ་ཅི་ཁྱོད་ལ། །ཐམས་ཅད་མཁྱེན་པ་མི་སྣང་ལ། །འོན་ཏེ་ཀུན་ལ་མི་སྣང་ཞེས། །རྒྱས་པར་སུན་ཕྱུང་སྔར་བསྟན་ཟིན། །ཁྱོད་ཀྱིས་མ་དམིགས་འབའ་ཞིག་ཙམ། །འཁྲུལ་པ་དང་ནི་ལྡན་པ་ཡི། །གཞན་ཀུན་གྱི་ནི་མ་དམིགས་པ། །ཐེ་ཚོམ་ཟ་བས་སྒྲུབ་བྱེད་མིན། །དགག་པར་བྱ་བ་ནུས་བཞིན་དུ། །སྔར་ཡང་མེད་བརྟགས་ནུས་ཤེ་ན། །རིགས་མིན་འདས་པའི་དུས་ན་ཡང༌། །དེ་ཡི་དགག་པར་རིགས་མིན་ཕྱིར། །གལ་ཏེ་འདས་དུས་གང་ཡིན་པ། །དེ་ནི་ཀུན་མཁྱེན་གྱིས་སྟོང་ཡིན། །དུས་ཉིད་ཡིན་པའི་ཕྱིར་དཔེར་ན། །དེ་ལྟར་
དུས་རྟོགས་བཞིན་ཞེ་ན། །ལྡོག་ལ་ཐེ་ཚོམ་ཟ་བའི་ཕྱིར། །སྒྲུབ་པ་དེ་ནི་རིགས་ལྡན་མིན། །ད་ལྟར་བ་ཡི་དུས་འདི་ནི། །དེ་ཡིས་སྟོང་པ་ཞེས་བྱས་མིན། །རྒྱུ་ཡི་ཚོགས་པ་མེད་པའི་ཕྱིར། །འདས་པ་ད་ལྟར་དུས་སུ་མེད། །འདས་དུས་དགའ་བྱེད་ལ་སོགས་བཞིན། །གང་གིས་མི་སྲིད་པར་འགྱུར་ཡིན། །ཤེས་རབ་ལ་སོགས་ཆོས་ཅན་དུ། །བྱས་ནས་རྟགས་ནི་བཤད་པ་ཡིན། །རྟགས་ནི་མི་སྣང་མ་གྲུབ་ཡིན། །དེས་ན་ཀུན་མཁྱེན་མེད་མི་འགྲུབ། །ཁོ་བོ་ཅག་གིས་ཀུན་མཁྱེན་ནི། །ལུང་གིས་གྲུབ་པར་ཞུགས་པ་མིན། །སྔར་བཤད་རྟགས་ནི་ཡོད་པས་ན། །ལུང་གིས་གྲུབ་པར་སུ་ཞིག་བརྗོད། །འོན་ཀྱང་རིག་བྱེད་ཚད་མ་རུ། །གལ་ཏེ་ཁྱེད་ཅག་མངོན་འདོད་ན། །དེ་ཅིས་བཅོམ་ལྡན་འདས་ལ་ནི། །རྨོངས་པ་ཀུན་མཁྱེན་ཁས་ལེན་མིན། །མཚན་ཅན་ཞེས་བྱའི་འཕྲོས་གཞན་ལས། །བྲམ་ཟེ་མཁས་པ་རྣམས་ཀྱིས་ནི། །ཐུབ་པ་རྣམས་ཀྱི་མཆོག་གྱུར་པ། །བཅོམ་ལྡན་ཀུན་མཁྱེན་གསལ་བར་འདོད། །གང་ཞིག་གླང་ཆེན་ཐལ་ཀར་ནི། །མཆེ་བ་དྲུག་པའི་བདག་ཉིད་ཅན། །རྨི་ལྟས་བསྟན་ནས་ཉིད་བལྟ་མ་འགྱུར། །བྱང་ཆུབ་སེམས་དཔའི་ཡོན་ཏན་མཚོ། །འཆི་མེད་གོ་འཕང་བརྙེས་པ་དག །ཐུགས་རྗེའི་བདག་ཉིད་གྲགས་པས་ཁྱབ། །དེ་ནི་ཀུན་མཁྱེན་གྱུར་པ་དང༌། །འཇིག་རྟེན་ཀུན་གྱི་ཡབ་ཏུ་གྱུར། །འོན་ཏེ་འཕྲོས་པའི་ཁྱད་པར་འདི། །རིག་བྱེད་ཁོང་གཏོགས་མི་འདོད་ན། །དེས་འདིར་སྡང་བ་སྤངས་ནས་ནི། །ཁྱེད་ལ་རྒྱུ་མཚན་ངེས་འགྱུར་མིན། །དབྱངས་ལ་སོགས་པའི་ཆོ་ག་དག །ཐོས་ལ་ཡོད་པར་རབ་གྲགས་པ། །དེ་ལའང་དེ་དག་བྱ་བར་ནུས། །མི་ཡི་འདོད་ཙམ་གྱིས་འབྱུང་ཕྱིར། །དེ་ལྟར་ལྷུར་ལེན་རྟག་པ་ཡི། །ལུང་རྙེད་ནུས་མིན་མ་ཡིན་ནམ། །གལ་ཏེ་རྟག་ན་གབ་ཚིག་ཉིད། །དེ་ལྷུར་ལེན་ན་མི་རྟག་འགྱུར། །ལུང་ནི་རྟག་ཉིད་དུ་གྲུབ་ན། །དེ་བརྟགས་པ་ནི་དོན་མེད་ཡིན། །གང་ཕྱིར་མི་རྣམས་དེ་ལས་ནི། །ཆོས་ནི་རྟོགས་པར་བྱེད་ཉིད་འགྱུར། །འདི་ནི་རབ་ཏུ་གྲུབ་ན་ཡང༌། །རིག་བྱེད་རྟག་པ་ཉིད་ཡོད་མིན། །གང་གིས་བཙལ་མ་ཐག་འབྱུང་ཤེས། །རིམ་གྱིས་ཤེས་སོགས་དེ་འབྲས་ཡིན། །འོན་ཀྱང་རབ་གྲུབ་དེ་
ལ་ནི། །ཚད་མ་ཉིད་ཁས་ལེན་ཡོད་ན། །རིག་བྱེད་ཉིད་ཕྱིར་འཕྲོས་བཞིན་ཡང༌། །ཁྱེད་ལ་ཚད་མ་ཉིད་དུ་འགྱུར། །ཡང་ན་རིག་བྱེད་མིན་ཉིད་དུ། །ཁྱེད་ཀྱི་རིག་པས་ཤེས་པར་གྱིས། །གཞན་དུ་ཐོས་པས་མ་སྨྲས་ཉིད། །ཁྱེད་ལ་ཐེ་ཚོམ་ཟ་བར་འགྱུར། །རིག་བྱེད་རྟག་པ་ཉིད་དང་དེ། །ལྷུར་ལེན་ཡིན་བླ་དེ་ལ་ནི། །དེ་ལྷུར་ལེན་པ་མི་རྟག་འགྱུར། །གང་ཕྱིར་འཇིག་དོན་དང་འབྲེལ་ཕྱིར། །གལ་ཏེ་དེ་ལྟར་དགང་ལུགས་དང༌། །འབྲུ་དང་གསེར་རལ་ཅན་སོགས་རྣམས། །རྟག་བདག་ཉིད་ཡོད་དེ་ཡིས་ནི། །མི་རྟག་ངོ་བོ་ཇི་ལྟར་བརྗོད། །དེ་ལ་རིག་རྟག་ཡོད་ཅེ་ན། །དེ་ཡང་བསལ་བྱས་མ་ཡིན་ནམ། །དེ་ཙམ་ཚིག་གིས་བརྗོད་པས་ན། །དགང་ལུགས་སོགས་ལ་བློ་འབྱུང་མིན། །དེ་ཡང་བརྗོད་ལ་ཚིག་ལ་ནི། །རྟག་པ་ཉིད་ཅེས་ཉམས་མི་འགྱུར། །ཡང་ན་ཀུན་མཁྱེན་ལ་རིགས་བླ། །དེས་ན་དེ་ལྷུར་ལེན་པས་རྟག །རིག་བྱེད་ངག་རྣམས་རང་དབང་ཕྱིར། །རིག་བྱེད་ལས་དོན་ངེས་མིན་ཏེ། །རྨོངས་སོགས་དབང་བྱས་བདག་ཉིད་དང༌། །གཞན་ལས་ཀྱང་དོན་ངེས་སྐྱེ་མིན། །དེས་ན་མཐོ་རིས་འདོད་མེ་ལ། །སྤྱིན་སྲེག་བྱ་ཞེས་ཐོས་པ་ལ། །རྒྱལ་བ་ཀུན་མཁྱེན་ཞེས་བྱའི་དོན། །འདི་མིན་ཞེས་འདིར་ཚད་མ་ཅི། །མཐོ་རིས་དང་ནི་ཐར་པའི་ལམ། །གསལ་བར་ཉེ་བར་བསྟན་པའི་ཕྱིར། །གཙོ་བོའི་དོན་ནི་ཡོངས་མཁྱེན་ཕྱིར། །ཀུན་མཁྱེན་ཞེས་བྱར་རྟོགས་པར་འགྱུར། །རྒྱ་མཚོ་བྱེ་མའི་གྲངས་སྙེད་ཀྱི། །རྣམ་ཤེས་གང་ལ་ཉེ་བར་མཁོ། །དེས་ན་གཞན་གྱི་དོན་ཤེས་མཁྱེན། །ཁོ་བོ་ཅག་ལ་ཅི་ཞིག་དགོས། །སྔགས་ཀྱིས་གབ་པའི་ཚིག་བཞིན་དུ། །དེ་ཡང་ཕལ་པ་ཉིད་དུ་བརྗོད། །ཅེས་བྱ་འདི་ལྟར་ངེས་པ་འདི། །ཀུན་མཁྱེན་ངེས་པར་གསལ་ནས་འགྲུབ། །སྔར་བཤད་གནོད་པ་རིགས་མིན་པར། །རྒྱས་པར་བསྒྲུབ་པར་བྱས་པས་ན། །ཕལ་ཆེན་ངེས་ལ་ཐེ་ཚོམ་ཟ། །གཙོ་བོའི་དོན་ནི་ཡང་སྲིད་ཕྱིར། །གལ་ཏེ་འདི་ནི་ཆོས་སོགས་ཀྱི། །སྤྱོད་ཡུལ་ཅན་ཤེས་ཐོགས་མེད་ཉིད། །འབྲས་བུ་དང་བཅས་གསལ་བརྗོད་ན། །དེ་ཚེ་སངས་རྒྱས་འགྲོ་ལས་རྒྱལ། །གང་ཕྱིར་མངོན་མཐོ་ཐར་པ་དང༌། །རྒྱུ་བཅས་ལ་ཡང་ཤེས་པ་ནི། །ཐོགས་མེད་དེ་དག་ལ་སྒྲུབ་
ན། །དེས་ན་མ་འདྲེས་ཤེས་གསལ་ཡིན། །བདག་ཁོ་ན་ཡི་རྣམ་ཤེས་ནི། །བསམ་གཏན་གོམས་པས་འཇུག་པ་གང༌། །དེ་ལ་ཡང་ནི་ཐོགས་མེད་ཉིད། །དེ་དག་ལ་སྔར་བསྒྲུབས་ཟིན་ཏོ། །གློ་བུར་དྲི་མ་སྤངས་པ་ཅན། །སེམས་ཙམ་རང་རིག་པའི་ངོ་བོ། །རྣམ་པར་དག་པའི་བདག་མཐོང་གང༌། །དེ་ཉིད་ཁོ་ན་དེ་ཤེས་ཡིན། །རིག་བྱ་རིག་བྱེད་རྣམ་པ་མེད། །བློ་ནི་སྔར་ཉིད་རབ་བསྒྲུབ་བྱས། །བསླད་པ་ཉིད་ཀྱིས་སྟོང་པ་ཅན། །སངས་རྒྱས་རྣམས་ཀྱིས་དེ་གསལ་མཛད། །དེས་ན་བློ་གྲོས་ཆེན་པོ་དག །འཁོར་བ་མི་མཐུན་ཤེས་བཅས་འགྲུབ། །གང་གི་དབང་གིས་བསྟན་པ་རྣམས། །འབྱུང་ཞིང་ད་ལྟར་ཡང་སྣང་འགྱུར། །རང་བཞིན་གྱིས་འོད་གསལ་བའི་སེམས། །གཉིས་ཀའི་རྣམ་པས་རྙོག་མེད་པ། །རྣམ་གཉིས་རྨོངས་མེད་བདག་ཉིད་ཅན། །སུ་ཞིག་རྣམ་གཞན་དུ་བློ་བྱེད། །བདག་མེད་རྣམ་གཉིས་རྟོག་པ་ན། །བུད་མེད་སོགས་ཀུན་རྟོག་འབྱུང་ན། །འདོད་ཆགས་ཞེ་སྡང་རྨོངས་སོགས་དང༌། །འབད་པ་མེད་པས་འཇིག་པར་འགྱུར། །དེ་ཉིད་གསུངས་པས་གསུངས་པ་གང༌། །འདི་དེ་མཆོག་གྱུར་དེ་ཉིད་ནི། །ཕུན་སུམ་ཚོགས་ཀུན་གོ་འཕང་སྟེ། །ཀི་ཤ་པ་སོགས་སྤྱོད་ཡུལ་མིན། །གཞན་དག་གིས་ནི་བདག་བརྟེན་ཞིང༌། །དག་པའི་ཤེལ་འདྲར་ཤེས་དེ་དག །དེ་ཡང་ཕྱིན་ཅི་ལོག་ཡིན་ཏེ། །རྟག་པའི་བདག་ཉིད་བཀག་ཕྱིར་རོ། །བདག་ཏུ་འཛིན་པའི་རྣམ་ཤེས་ནི། །བདག་ལས་གལ་ཏེ་སྐྱེ་འགྱུར་ན། །དེས་ན་ཀུན་བདག་ཉིད་རྣམ་ཤེས། །ཅིག་ཅར་སྐྱེ་བར་ཐལ་བར་འགྱུར། །འོན་ཏེ་དེ་ལ་མི་སྐྱེ་བའམ། །ཡང་ན་རྟག་པར་ཁས་ལེན་ན། །དེ་ཚེ་དེ་ཡུལ་ཅན་མི་འགྱུར། །སྐྱེས་བུ་གཞན་གྱི་སེམས་བཞིན་ནོ། །བཟུང་བའི་མཚན་ཉིད་འགལ་བ་རུ། །རྒྱས་པར་བསྒྲུབ་པར་བྱ་བའི་ཕྱིར། །གང་ཞིག་རྟག་པའི་བདག་མཐོང་བ། །དེ་ཉིད་དེ་ཡི་ཤེས་པ་མིན། །འོན་ཏེ་བདག་ཤེས་ངོ་བོ་རུ། །ཁས་ལེན་བྱེད་ཀྱང་སྣང་བ་དང༌། །བལྟ་བ་དུ་མ་ཉིད་མེད་པས། །དེ་ལྟ་ན་ཡང་དེ་ཉིད་མེད། །གལ་ཏེ་རང་གསལ་དངོས་པོ་ཉིད། །དེ་ཡི་ཤེས་པ་འདོད་པ་ན། །དེ་ཚེ་རང་རིག་ཐོབ་པ་ངང༌། །བློ་ཡང་མངོན་སུམ་དུ་
འགྱུར་རོ། །རིག་བྱེད་དང་ནི་ཚངས་པ་སོགས། །འབྲེལ་པ་ཅུང་ཟད་ཡོད་པ་མིན། །ཐ་དད་ཕྱིར་དང་རྟག་ཉིད་ཀྱིས། །ལྟོས་མེད་ཕྱིར་དེ་ལས་གཞན་བཞིན། །དེས་ན་རིག་བྱེད་ལུས་ཉིད་ནི། །ཚངས་ལ་སོགས་པ་རིག་པ་མིན། །རིག་བྱེད་ཀུན་ཤེས་ངོ་བོ་རུ། །རིགས་མིན་དོན་ངེས་མེད་པའི་ཕྱིར།། རང་དབང་ཉིད་ཀྱིས་ཀྱང་སངས་རྒྱས། །ཀུན་མཁྱེན་བསྒྲུབ་པར་བྱས་པ་ཡིན། །རིག་བྱེད་ལུས་ཅན་ཉིད་ཡིན་ཕྱིར། །ཚངས་པ་སོགས་བཞིན་བརྟགས་བྱས་མིན། །འགྲོ་ལྔའི་བདག་ཉིད་འཁོར་བ་ལས། །ཕྱི་རོལ་གྱུར་པས་མིར་མི་གཏོགས། །ཁོ་བོ་སངས་རྒྱས་རྣམས་ལ་ནི། །དེ་ལྟར་སྤྲུལ་པར་འདོད་པ་མིན། །འོག་མིན་གནས་ནི་མཆོག་གྱུར་པ། །གཙང་མའི་གནས་ཀྱི་སྟེང་གནས་པར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་ནི་འདིར་སངས་རྒྱས། །ཁྱེད་ཀྱིས་རང་དགའ་ཉིད་ཀྱིས་ནི། །མི་ཉིད་དུ་ནི་ཇི་ལྟར་ངེས། །གཞན་གྱི་ལུང་གི་སྒོ་ནས་མིན། །དེ་ནི་དེ་ལྟར་གནས་པས་སོ། །ཁོ་བོས་དེ་དག་དང་འགྲན་པར། །ཀུན་མཁྱེན་དེ་ན་འདོད་པ་མིན། །བདེན་པ་རྣམས་ནི་ནམ་མཁའ་ཡི། །མེ་ཏོག་དང་འདྲར་སུ་ཞིག་རྟོག །ནུས་པ་ཐམས་ཅད་དང་བྲལ་བས། །རྟག་པ་དངོས་མེད་བསྒྲུབས་ཟིན་ཏོ། །དེས་ན་གཞན་གྱིས་འདོད་པ་ཡིས། །ཆུང་མ་གསུམ་ཅན་སོགས་ཡོད་མིན། །གཞན་ཡང་དེ་དག་ལོག་ཤེས་ཡིན། །བདག་ལ་སོགས་པ་མཐོང་བའི་ཕྱིར། །སངས་རྒྱས་ལོག་ཤེས་མི་མངའ་བར། །རྒྱས་པར་སྔར་ནི་བསྒྲུབས་ཟིན་ཏོ། །དེས་ཀྱང་དེ་དང་འགྲན་པ་མིན། །ཤིན་ཏུ་ཆེས་ཁྱད་ཡོད་པའི་ཕྱིར། །རབ་རིབ་ཅན་དང་ལྷན་ཅིག་ཏུ། །ནད་མེད་མིག་ཅན་སུ་ཞིག་འགྲན།། ཡོན་ཏན་ལས་དང་དབང་ཕྱུག་སོགས། །རིག་བྱེད་རྣམས་ཀྱི་རྟག་པ་ཉིད། །སྤངས་པས་ཁོ་བོའི་རྟག་པ་ཡིན། །ལུང་དེ་ཡང་ནི་འདོད་མ་ཡིན། །ཉེ་བར་འཇལ་བས་ཀུན་མཁྱེན་ནི། །ཡོད་པར་གྲུབ་པར་འདོད་མ་ཡིན། །དེ་ཚད་ཉིད་མིན་སྨྲས་པའི་ཕྱིར། །དེ་ལས་ཡོད་པ་མི་གྲུབ་པོ། །ཡོད་པ་རབ་ཏུ་གྲུབ་པ་ན། །དེས་ནི་འདྲ་བ་ཉིད་རྟོགས་འགྱུར། །ཀུན་མཁྱེན་ཡོད་པར་བསྒྲུབ་པ་ཡི། །སྒྲུབ་པ་རྣལ་མ་འདི་ཡིན་ནོ། །དེས་ན་ཉེར་འཇལ་རབ་གྲུབ་པའི། །དགག་པ་དེ་ནི་འབྲས་མེད་ཡིན། །གལ་ཏེ་ཁྱོད་ཀྱིས་མི་ཀུན་ནི། །ཀུན་ལ་མ་ཡིན་པར་མཐོང་ན། །དེས་ན་ཁྱོད་རང་ཀུན་མཁྱེན་འགྱུར། །རིང་
དང་བར་ཆོད་མཐོང་ཕྱིར་དང༌། །རྒྱུད་གཞན་དང་འབྲེལ་ཤེས་པ་ནི་།ནུས་པ་འགའ་ནི་མཐོང་བའི་ཕྱིར། །མདུན་གནས་པ་ཡི་སྐྱེས་བུ་ཡང༌། །ཀུན་མཁྱེན་མ་ཡིན་ཞེས་དེ་ལྟར། །ངེས་པ་ཁྱེད་ལ་ཇི་ལྟར་ཡོད། །ཡོད་ན་དབང་འདས་རིག་པར་འགྱུར། །བདག་ཉིད་ཀུན་མཁྱེན་མ་མཐོང་བས། །མ་ལུས་ཀུན་མཁྱེན་མིན་དེས་ན། །ཧ་ཅང་ཐལ་འགྱུར་ཕྱིར་རྨོངས་སོགས། །ཐམས་ཅད་ལ་ཡང་ངེས་པར་འགྱུར། །གལ་ཏེ་གནོད་པ་མཐོང་བའི་ཕྱིར། །ཆོས་ཀུན་མིན་འདོད་མིན་ཞེ་ན། །སྨྲས་པ་ལ་ཡང་གནོད་དགོས་ལ། །གནོད་མཐོང་ལས་ཐ་དད་འགྱུར་མིན། །རྒྱལ་བས་མཐོ་རིས་ཐར་ལམ་གྱི། །ཁ་ན་མཐོ་མེད་པའི་གསུང༌། །བསྒྲུབས་པ་དེ་ནི་རྨོངས་པ་ཡིས། །བྱམས་སྙམ་རྨོངས་ལས་གཞན་དུ་སེམས། །མཐོང་ཆོས་མངོན་མཐོ་སྣ་ཚོགས་དེ། །དེ་བཞིན་སྐྱོན་རྣམས་ཞི་བའི་མཆོག །དེ་ལས་ཐོབ་པར་འགྱུར་བ་ན། །དེས་ན་གཞན་དག་རྨོངས་པར་བྱེད།། སངས་རྒྱས་རྣམས་ཀྱིས་ཉེར་བསྟན་འདི། །རིག་བྱེད་རྩ་བ་ཅན་མ་ཡིན། །རྙོག་པ་མེད་དེ་གསུངས་ཡིན། །ཐོས་པ་རྙོག་པ་དང་བཅས་སྨྲས། །དེ་དག་དེ་ལྟར་ཉེར་བསྟན་པ། །དེ་འདྲ་རང་དོན་བསྒྲུབ་ཕྱིར་མིན། །དེ་དག་གི་རྩོམ་མ་ལུས་པ། །དེ་འདྲ་གཞན་གྱི་དོན་དུ་ཡིན། །དེ་ཕྱིར་འགྲོ་ལ་ཕན་བྱེད་པ། །དབང་ཐོབ་སྙིང་རྗེའི་བདག་ཉིད་ཅན། །རྒྱུ་མཚན་མེད་པའི་གཉེན་ཡིན་པས། །ཀུན་ལ་གོ་འཕང་དེ་ཉིད་གསུངས། །བརྐམ་ཆགས་འཇིགས་དང་ཞེ་སྡང་དང༌། །སེར་སྣ་ཚོགས་ཀྱིས་དབང་བྱས་པ། །བརྩེ་མེད་བདག་ཉིད་དེ་དག་ལ། །ཉེར་བསྟན་ཕྱོགས་གཅིག་པ་རུ་འགྱུར། །ཐུགས་རྗེ་གཞན་དབང་གྱུར་པ་ན། །དེ་ཉིད་གསལ་བར་གཟིགས་པ་ཅན། །དམིགས་བསལ་ཀུན་ལ་དོགས་མེད་པས། །ཐམས་ཅད་དུ་ནི་སྟོན་པར་མཛད། །ཇི་ལྟ་ཇི་ལྟར་རྨོངས་སོགས་ཀྱི། །སྐྱོན་གྱིས་སྐྱེ་བོ་སྐྱོན་བཅས་འགྱུར། །དེ་ལྟ་དེ་ལྟར་མགོན་རྣམས་ཀྱི། །ཐུགས་བརྩེ་དེ་དག་ལ་ནི་འཇུག །མེ་བསྐོར་བྱས་ན་ཁྱིམ་སོགས་འགྲོ། །འབྲེལ་བ་དེ་དག་གིས་བཞེད་མིན། །ཕན་པ་གདགས་པར་བྱ་བ་སྟེ། །དེས་ན་འདི་ལྟར་ལེགས་སྨྲས་ཡིན། །རིགས་དང་དུལ་དང་ཕུན་ཚོགས་པའི། །བྲམ་ཟེ་བ་ལང་གླང་པོ་ཆེ། །ཁྱི་དང་ཁྱི་འཚེད་པ་དག་ནི། །མཁས་པ་རྣམས་ནི་མཉམ་པར་
བལྟ། །ལན་བརྒྱར་རིགས་ནི་བཀག་བྱས་པས། །རིགས་ཀྱིས་རྒྱགས་པ་ཅི་ཕྱིར་བྱེད། །དེ་ལས་གཞན་ལས་ཁྱད་མེད་པས། །གལ་ཏེ་དེ་བརྟེན་དབང་འགྱུར་སོགས། །ཡོན་ཏན་གཞིར་གྱུར་སྡིག་པ་ནི། །མ་ལུས་པར་ཟད་ནས་འདིར་ནི། །ཁྱད་པར་མེད་པར་དེ་ལྡན་པས། །ཀུན་ཀྱང་གཉིས་སྐྱེས་སུ་འགྱུར་ན། །དེ་ཚེ་ཁྱད་པར་ཅན་གྲུབ་འགྱུར། །གཉིས་སྐྱེས་རྔོན་པ་བྱེད་བཞིན་དུ། །གཞན་དུ་ཁྱད་པར་ཅན་ཉིད་མེད། །སྐྱེས་ནས་ཆོ་ག་ཚོགས་གང་དག །གྲུབ་པའི་བྱ་བ་དེ་ཀུན་རྫོབ། །གང་ཕྱིར་དེ་དག་བཅོས་མ་ལའང༌། །ཡོད་པས་དེ་ལས་གཞན་པའང་བཞིན། །དུས་ནི་རིང་པོ་འདས་པ་དང། །བུད་མེད་སེམས་ཀྱང་གཡོ་བ་ཡི། །བྲམ་ཟེ་ཉིད་ནི་ཡོད་ན་ཡང༌། །ངེས་པར་བྱ་བར་ནུས་མ་ཡིན། །དབང་འདས་དངོས་དོན་ཤེས་པ་ནི། །འགའ་ཞིག་ཁྱོད་ལ་ཡོད་པ་མིན། །དེས་ན་རྣམ་པར་དག་པའི་རིགས། །རིག་བྱེད་པས་ཀྱང་སྨྲས་མི་བྱེད། །དེ་ཕྱིར་ཡིད་སོགས་རྣམས་ཀྱིས་ཀྱང༌། །དེ་དག་བྲམ་ཟེ་མ་གཏོགས་པས། །བྲམ་ཟེ་རྣམས་ལ་ཉེ་བར་བསྟན། །བྱས་མིན་དེ་ངེས་མེད་བའི་ཕྱིར། །ཡིད་ལ་སོགས་པ་རྣམས་ཀྱིས་ནི། །རང་ལ་རྟོགས་པའི་ནུས་མེད་པའམ། །ཡང་ན་རིག་བྱེད་རིགས་བྲལ་ཡིན། །རིག་བྱེད་གདོན་རྨོངས་བྲམ་ཟེ་ནི། །དཔྱོད་བྱེད་ནུས་པ་མ་ཡིན་ཞེས། །གང་ལས་ངེས་པར་བྱས་པ་ཡིན། །དེས་ན་དེ་ཡིས་བྲམ་ཟེ་ལ། །རིག་བྱེད་ལ་སོགས་ཉེར་བསྟན་བྱས། །གནའ་རབས་དང་ནི་ཡིད་ཀྱིས་ནི། །རིག་བྱེད་ཡན་ལག་བཅས་གསོ་དཔྱད། །དཀའ་ཡིས་གྲུབ་པ་བཞི་པོ་ལ། །གཏན་ཚིགས་ཀྱིས་གཞིག་མི་བྱའོ། །དེས་ན་གང་གང་རྨོངས་རྣམས་ལ། །དེ་ཉིད་ཀྱིས་འདི་འཇིག་སྐུར་སྙམ། །གང་ཙམ་གྱིས་ནི་གཞན་དུ་ཡང༌། །བཀའ་ཡིས་གྲུབ་ཉིད་ཅིས་མི་འགྱུར། །བདག་ཉིད་ཆེན་པོ་གང་དག་གིས། །གང་གསུངས་རིགས་ལྡན་དོན་ཉིད་དང༌། །བདག་ལ་དེ་དོན་ནུས་པ་ནི། །གསལ་བར་ངེས་པར་མཛད་པ་ཡིན།། མུ་སྟེགས་ངན་གླང་ཆེས་སྨྱོས་པའི། །དྲེགས་པ་ཉམས་པར་མཛད་པ་ཅན། །སྐྲག་པ་མ་ལུས་མི་མངའ་བ། །འདི་ལྟར་དེ་དག་སེང་སྒྲ་སྒྲོགས། །དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ཡོངས་སུ་བརྟགས་ལ་ང་ཡི་བཀའ། །བླང་
བར་བྱ་ཡི་གུས་ཕྱིར་མིན། །གང་དག་སྡིག་པ་སྤངས་བྱས་པས། །དོན་དམ་པ་ཡི་བྲམ་ཟེ་ནི། །དྲི་མེད་བདག་མེད་གོམས་བྱེད་པའི། །དེ་དག་ཐུབ་པའི་བསྟན་པ་ཡོད། །དེས་ན་བསྟན་པ་འདི་ཉིད་ལ། །དགེ་སློང་རྣམ་བཞི་ཡོངས་གྲགས་ཡིན། །གཞན་གྱིས་བསྟན་པ་དགེ་སྦྱོང་དང༌། །དེ་བཞིན་བྲམ་ཟེ་རྣམས་ཀྱིས་སྟོང༌། །མི་སུ་ཞིག་གཅིག་ཀུན་མཁྱེན་སྲིད། །ཅེས་བྱ་སོགས་ལ་བསྒྲུབས་པ་ནི། །དམ་བཅའ་མ་ཚང་པའི་སྐྱོན་གྱིས། །སྐྱོན་དང་བཅས་པར་མི་འགྱུར་ཏེ། །མ་ལུས་དོན་ནི་ཡོངས་ཤེས་པས། །བསྒྲུབ་པ་འབྲས་མེད་ཡིན་ན་ཡང། །བློ་བཟང་བདེ་གཤེགས་པ་རྣམས་ནི། །འབད་པ་བྱེད་ཅེས་སྔར་བསྒྲུབས་ཟིན། །ཕྱོགས་གཅིག་ཤེས་པས་དེ་སྨྲས་ཡིན། །ཀུན་མཁྱེན་གྱིས་གསུངས་མི་འགྱུར་ཞེས། །འདིར་ཡང་ཐམས་ཅད་ཀྱིས་ཤེས་པ། །རྗེས་འགྲོའི་ཕྱིར་ཡང་སྔར་བསྟན་ཟིན། །ཇི་ལྟར་ཅུང་ཟད་མཐོང་བ་ཡི། །དྲི་སོགས་དོན་རྣམས་ཉམས་མྱོང་ནས། །དེ་དག་སེམས་ལ་སྒྲོ་བཏགས་པས། །ཉམས་མྱོང་ལ་བརྟེན་ཕྱིས་རྗོད་བྱེད། །དེ་ཡི་ཚིག་དེ་དངོས་པོ་དེའི། །ཤེས་པ་ལས་བྱུང་མིན་པ་མིན། །ཀུན་མཁྱེན་གསུང་ཡང་དེ་ལྟར་ཡིན། །རྒྱུ་ཡི་དབྱེ་བས་ཐ་དད་འགྱུར། །དངོས་པོ་མ་ལུས་རྣམ་ཤེས་ནི། །འདིའི་རྒྱུ་ཉིད་དུ་འགྱུར་བ་ཡིན། །ཅུང་ཟད་ཙམ་དོན་རྣམ་ཤེས་ནི། །དེ་ཡི་རྒྱུ་མཚན་གནས་པར་འགྱུར། །རྣམ་པར་རྟོག་པ་མི་སྲིད་པས། །དེ་ཡི་བརྗོད་འདོད་ཅི་འདྲ་ཡིན། །སྒྲིབ་པ་ཐམས་ཅད་སྤངས་པའི་ཕྱིར། །རྣམ་རྟོག་འདི་ལ་འཇུག་མིན་ན། །དེ་མིན་ཉོན་མོངས་བཅས་ཀུན་རྟོག །དེ་ལ་མི་མངའ་སྒྲིབ་ཟད་ཕྱིར། །འགྲོ་ལ་ཕན་པ་རྗེས་མཐུན་པ། །དགེ་བཅས་སུ་ཞིག་སྤོང་བར་བྱེད། །དེས་ཀྱང་རྣམ་རྟོག་དེ་ཉིད་ནི། །དོན་དང་ལྡན་པར་ངེས་མི་འགྱུར། །སྒྱུ་མ་བྱེད་པ་བཞིན་དུ་ནི། །དེ་ཡིས་དམིགས་མེད་དེ་རིག་ཡིན། །ཇི་ལྟར་སྒྱུ་མ་མཁན་འགའ་ཞིག །སྤྱོད་ཡུལ་སྤྲུལ་པར་བྱས་ན་ཡང༌། །སེམས་ཀྱིས་ཡུལ་མེད་ཅན་རིགས་ཏེ། །དེས་ན་འཁྲུལ་པ་སྐྱེ་མི་འགྱུར། །དེ་ལྟ་བུ་སོགས་བརྗོད་པ་ནི། །དད་དང་ལྡན་ལ་མཛེས་མ་ཡིན། །སྐབས་བབ་རྗེས་མཐུན་དོན་ཉིད་དུ། །དེ་ནི་བྲམ་ཟེས་སྨྲས་པ་མིན། །དེ་བཞིན་དོན་
རྣམས་ཀྱིས་ཁྱབ་པར། །ཉེ་བར་བསྟན་པར་ནུས་མ་ཡིན། །དེ་ལྟར་དེ་ཡི་སྐབས་བབ་འདིར། །འདིར་ཡང་བློ་བཟང་གིས་གསུངས་ཡིན། །གལ་ཏེ་དེ་ལ་ཉེར་བསྟན་པའི། །ནུས་མེད་ན་དེ་དེ་ལྟར་འགྱུར། །དེས་ན་ལུང་དུ་མི་འགྱུར་ཞེས། །ཁྱེད་ཅག་གིས་ནི་བརྗོད་དགོས་སོ།། འདིར་ཡང་སྨྲས་དེ་དེ་ལྟར་འགྱུར། །དེ་གསུང་ཁྱོད་ཀྱིས་མཐོང་ངམ་ཅི། །གལ་ཏེ་ཐལ་བར་བསྒྲུབས་པ་ཡིས། །འདོད་པ་མ་ཡིན་པར་བརྗོད་ན། །གལ་ཏེ་སྒྲ་ཉིད་མི་འདོད་པས། །ལུང་ཁས་བླངས་པར་མི་འགྱུར་རོ། །དེ་གསུང་ལུང་ནི་འདོད་པ་ན། །དེ་ལ་སྨྲ་ཉིད་འདོད་པར་གྱིས། །གལ་ཏེ་དེ་འདྲའི་རིགས་པ་ནི། །རིགས་པར་སྨྲ་རྣམས་ལ་གྲུབ་ན། །དེ་ཚེ་ཐལ་བར་བསྒྲུབས་པས་ཆོས། །དང་བ་ཙམ་དུ་གཞན་གྱིས་འདོད། །རིགས་པར་རབ་སྒྲུབ་ཉིད་ཡིན་ན། །རང་རྒྱུད་པ་ཡི་སྒྲུབ་པར་འགྱུར། །དེ་གསུང་བ་ཡི་ལུང་དེ་ནི། །འདི་ལྟར་གཞན་གྱིས་འདོད་པ་ཡིན།། ཚིག་གི་ཤུགས་ཀྱིས་དེ་ལས་ནི། །སྐྱེས་བུ་ཡིད་བཞིན་ནོར་བུ་ལྟར། །རྩིག་སོགས་ལས་ཀྱང་ཆོས་ཀྱི་སྒྲ། །ཇི་ལྟར་འདོད་བཞིན་འབྱུང་བར་འགྱུར། །བདག་པོར་འགྱུར་བ་ཙམ་རྟོགས་པས། །སྟོན་པར་བྱེད་པ་དེ་བརྗོད་ཡིན། །རྣམ་རྟོག་རྗེས་འགྲོ་ཅན་སྨྲ་ཉིད། །དེ་ཕྱིར་ཐལ་འགྱུར་མ་ཤེས་པས། །དེ་ལ་ཐལ་བར་མི་འགྱུར་རོ། །ཁོ་བོ་རིགས་པ་དོན་གཉེར་གང༌། །དད་པའི་རྗེས་སུ་འབྲང་བ་མིན། །ཞེས་བྱ་དེ་ལྟར་སྨྲས་པ་ཡིན། །རྩིག་པ་ལ་སོགས་ལས་བྱུང་བ། །ཡིད་ཆེས་མིན་གསུང་ཇི་ལྟར་ཡིན། །གང་ཕྱིར་དེར་བདག་ཉེར་གནས་པས། །དེ་རྣམས་འཇུག་པར་འགྱུར་བ་ཡིན། །དག་འཁྱལ་དང་ནི་འཚེ་སོགས་པའི། །སྨད་པའི་དོན་དང་རྣམ་པར་བྲལ། །རྩེད་མོའི་ཚུལ་དང་ཤ་ཟ་སོགས། །དེ་རྣམས་ཇི་ལྟར་སྨྲས་པ་ཡིན། །ངག་འཁྱལ་དང་ནི་རྣམས་འཚེ་སོགས། །སྨད་པའི་དོན་གྱི་ཉེར་བསྟན་པ། །རྩེད་མོའི་ཚུལ་དང་ཤ་ཟ་སོགས། །བྱིས་པ་ངག་འཁྱལ་འཚེ་སོགས་པ། །སྨད་པའི་དོན་དང་བཅས་པ་ཡི། །ཉེར་བསྟན་དེ་དག་ཡོད་པ་མིན། །ཚད་མ་གཉིས་ཀྱིས་མི་སླུ་འདོད། །དེའི་ཡུལ་མ་ལུས་གང་ལ་ནི། །ཚད་མ་གཉིས་ཀྱིས་གནོད་པ་ཅན། །ཅུང་ཟད་མཐོང་བར་མི་འགྱུར་ཞིང༌། །གང་ཞིག་
ཤིན་ཏུ་ལྐོག་གྱུར་ལའང༌། །སྔ་ཕྱི་ཡིས་ནི་གནོད་ཅན་མིན། །སྐྱེས་བུ་ཐམས་ཅད་སྙིང་རྗེ་སོགས། །ཡོན་ཏན་སྐྱེ་ལ་འཇུག་བྱེད་ལས། །རྣམ་པ་ཐམས་ཅད་མཆོག་ལྡན་པའི། །དམ་པའི་ཚུལ་ཁྲིམས་སྟོན་བྱེད་ལ། །འདི་དང་ཕྱི་མར་སྐལ་ལྡན་ལ། །མངོན་མཐོང་སྣ་ཚོགས་སྒྲུབ་བྱེད་ཅིང༌། །བག་ལ་ཉལ་ཀུན་ཚོགས་ཀྱི་ནི། །གཉེན་པོའི་ཕྱོགས་ནི་སྟོན་པ་ཅན། །མྱ་ངན་འདས་པ་གྲོང་ཁྱེར་གྱི། །དེ་ཡི་སྒོ་འཕར་འབྱེད་པ་པོ། །གལ་ཏེ་དེ་ལྟར་རྩེད་མོ་འམ། །སྲིན་པོའི་ཚིག་ཏུ་འགྱུར་ཡིན་ན། །དེ་མཚན་ཉིད་ཀུན་ཡོད་པའི་ཕྱིར། །དེ་ཉིད་སངས་རྒྱས་ཡིན་ཟད་མོད། །གང་ཕྱིར་མིང་གཞན་བརྟགས་པ་ཡིས། །དངོས་པོའི་ངོ་བོ་ལྡོག་འགྱུར་མིན། །ཁྱད་པར་ཅན་ལ་དམན་པའི་མིང༌། །བྱེད་ན་ཁྱེད་རང་སྨད་བྱར་འགྱུར། །འདོད་པ་ལོག་པར་གཡེམ་པ་དང༌། །སྲོག་ཆགས་འཚེ་སོགས་མཚན་ཉིད་ཅན། །གོམས་དང་དེ་ཡི་བྱ་བ་ནི། །ཚིག་གང་ཞིག་གིས་གསལ་བར་བྱས། །དེ་ཉིད་སྦྱང་པོ་ཤ་ཟ་སོགས། །སྨྲས་པ་ཞེས་ནི་དོགས་པར་འགྱུར། །དེའི་སྤྱོད་མངོན་པར་ཆགས་རྣམས་ལ། །དེ་འདྲའི་ཚིག་ནི་སྲིད་པ་ཡིན། །འགལ་བཅས་གཙང་མི་གཙང་སོགས་ཀྱི། །རང་བཞིན་རྣམས་ནི་ཅིག་ཅར་དུ། །བློ་གཅིག་གིས་ནི་རྟོགས་པར་མཐོང༌། །དེ་དག་བློ་དང་འགལ་བ་མིན། །ཕན་ཚུན་སྤངས་ཏེ་གནས་པ་ཡི། །མཚན་ཉིད་ཅན་ནམ་ཡང་ན་ནི། །གཅིག་ལ་ལྷན་ཅིག་མི་གནས་པའི། །འགལ་བ་དེ་དག་ལ་ཡོད་མིན། །ཤེས་པ་གཅིག་ལ་སྣང་བ་ཉིད། །དེ་དག་ལ་ནི་འགལ་བ་མིན། །གཙང་དང་མི་གཙང་ལ་སོགས་དང༌། །སྦྲུལ་དང་རྨ་བྱ་ལ་སོགས་ནི། །མིག་ལ་ཅིག་ཅར་སྣང་བའི་ཕྱིར། །བདེ་དང་སྡུག་བསྔལ་སོགས་དབྱེ་བས། །རྒྱུ་མེད་ཉེ་བར་གནས་མེད་པས། །དེ་ཤེས་བྱ་སྟེ་འགལ་བས་མིན། །སྔོ་དང་སེར་དང་དཀར་སོགས་བཞིན། །ཡུལ་དང་རང་བཞིན་དབྱེ་བ་ཡིས། །དངོས་པོའི་དབྱེ་བས་འགལ་བ་ཅན། །གང་ཕྱིར་ཅིག་ཅར་དུ་སྣང་འགྱུར། །ཤེས་བྱའི་དཀྱིལ་འཁོར་མ་ལུས་པ། །ཤེས་པ་སྐད་ཅིག་གཅིག་ཁྱབ་ཅན། །གང་ཕྱིར་ཀུན་མཁྱེན་བསྒྲུབ་བྱ་བ། །དེ་ནི་རིམ་པ་ལ་བརྟེན་ཕྱིར། །གང་
དང་གང་དག་རྟོགས་བཞེད་པ། །དེ་དང་དེ་རིང་ངེས་སྦྱོར་ལས། །དེ་ལ་ནུས་པ་དེ་ལྟར་མངའ། །གང་ཕྱིར་སྒྲིབ་སྤངས་ཅན་དེ་ཡིན། །ཟག་པ་ཟད་པ་སོགས་རྣམས་ཀྱི། །ཡེ་ཤེས་དབང་གྱུར་རྙེད་པ་དེས། །རིམ་གྱིས་སམ་ནི་ཅིག་ཅར་དུ། །རང་གི་བཞེད་པས་མཁྱེན་པར་གྱུར། །ཤེས་པའི་སྐད་ཅིག་བཅུ་དྲུག་གིས། །བདེན་པ་བཞི་ཡི་རང་བཞིན་ཅན། །ཤེས་བྱ་ཀུན་ནི་རིམ་གྱིས་མཁྱེན། །ཡང་ན་ཁོ་བོ་ལ་ཀུན་མཁྱེན། །དེ་ལ་དེ་འདྲའི་ཡེ་ཤེས་ནི། །རིམ་གྱིས་གཙོ་བོ་ལས་བྱུང་འགྱུར། །ཐད་ཅིག་ཙམ་ཡང་སྡོད་མིན་ན། །ལོ་བརྒྱ་སྨོས་ཀྱང་ཅི་དགོས་ཀྱེ། །རྣམ་དབྱེ་མ་བྱས་པའི་ངོ་བོས། །དངོས་པོ་ཀུན་ནི་གང་གིས་རྟོགས། །དངོས་པོ་ཀུན་གྱི་རང་བཞིན་ཉིད། །དེས་ནི་མཁྱེན་པར་འགྱུར་བ་ཡིན། །བདག་བཅས་སྐད་ཅིག་མིན་སོགས་ལས། །གང་ཞིག་ལོག་པར་རང་མཚན་ཉིད། །རྟག་ཏུ་ཉེར་རྟོགས་རྒྱུ་མཚན་ཕྱིར། །དེ་འདིར་སྤྱི་ཞེས་བརྗོད་པ་ཡིན། །དེ་འཛིན་བྱེད་པའི་རྣམ་ཤེས་ནི། །བསྒོམ་པའི་སྟོབས་ལས་བྱུང་བ་གང༌། །རྣལ་འབྱོར་དབང་ཕྱུག་ལ་མངོན་གསལ། །དེ་ནི་རང་མཚན་སྤྱོད་ཡུལ་ཅན། །དེ་ཉིད་གཞན་ཉིད་སོགས་བརྗོད་མེད། །གཞན་དག་གིས་ཀྱང་བརྟགས་པ་ཡི། །སྤྱི་དེ་རྣལ་འབྱོར་ཡེ་ཤེས་དེས། །འཛིན་པར་མཛད་པ་མ་ཡིན་ནོ། །རྣལ་འབྱོར་དབང་ཕྱུག་གི་ཡིད་ནི། །དེ་ནི་རྟོག་བྲལ་མ་འཁྲུལ་ཡིན། །དེ་འཛིན་ན་ནི་རྟོག་བཅས་དང༌། །འཁྲུལ་པ་དང་བཅས་ཐལ་བར་འགྱུར། །གང་གིས་བརྗོད་དུ་མེད་པའི་སྤྱི། །རྣམ་རྟོག་བདག་ཉིད་ཅན་དུ་བཤད། །རྟག་པའི་རྗེས་འགྲོའི་རང་བཞིན་སྤྱི། །དངོས་པོ་མེད་པར་བསྟན་ཟིན་ཏོ། །ཏིང་ངེ་འཛིན་ལས་བྱུང་བ་ཡི། །ཡེ་ཤེས་འཇིག་རྟེན་ལས་འདས་པ། །རྒྱུ་བཅས་འབྲས་བུ་ལས་མཁྱེན་པ། །དེ་ནི་བདག་གིས་ཀུན་མཁྱེན་འདོད། །དེ་ནི་ཡོད་པ་ཉིད་དུ་ནི། །རྗེས་སུ་དཔག་པས་སྔར་བསྒྲུབས་ཟིན། །དེས་ན་དེ་ནི་ཡོད་སྒྲུབ་པའི། །ཚད་མ་ཡོད་པས་དེ་ཡང་ཡོད། །རིམ་གྱིས་སམ་ནི་ཅིག་ཅར་གྱིས། །ཤེས་པའི་འབྲས་བུ་བསྒྲུབས་པ་ཡིན། །དེ་ལ་ཡང་ནི་ནུས་ཡོད་དེ། །གང་ཚེ་ཉེར་བསྟན་མཛད་པ་ཡིན། །ཆོས་ལ་བདག་མེད་ལེགས་བསྒོམས་པས། །གང་གིས་བསྟན་
པ་དྲི་མེད་འདི། །བསྟན་བཅོས་ཀུན་གྱིས་བསྒྲུབས་བྱས་པས། །ཚད་མ་ཀུན་གྱིས་གནོད་བ་མིན། །འཁོར་བ་མི་མཐུན་ཤེས་པ་ཅན། །ཁྱབ་འཇུག་སོགས་ཀྱི་སྤྱོད་ཡུལ་མན། །མཁས་པ་རྣམས་ཀྱིས་གང་ཞིག་ནི། །དད་པས་སྤྱི་བོས་ལེན་པར་བྱེད། །ཉོན་མོངས་མ་ལུས་དགྲ་བོ་ཡི། །ཚོགས་ནི་འཇིག་པར་བྱེད་པ་ཅན། །མངོན་པར་མཐོ་བ་སྣ་ཚོགས་ཀྱི། །རྫོགས་རྒྱུ་མྱ་ངན་འདས་ཐོབ་རྒྱུ། །ཐུན་མོང་མིན་པའི་ཐབས་རྙེད་པ། །སྐྱེས་བུ་མ་ལུས་དང་མི་མཐུན། །གཅིག་པུ་དེ་ཉིད་ཀུན་མཁྱེན་མགོན། །དེ་ནི་ཚད་མ་དང་ལྡན་ཡིན། །གང་ཚེ་འདི་ལྟར་ཀུན་མཁྱེན་ནི། །ཆོས་ལ་སོགས་པ་རྟོགས་པའི་རྒྱུ། །འགའ་ཞིག་འཐད་པར་འགྱུར་བ་ན། །དེ་ཚེ་སྐྱེས་བུས་བྱས་ཚིག་གྲུབ། །རྣམ་པ་མེད་སོགས་དཔྱད་པ་ནི། །ཀུན་མཁྱེན་ལ་ནི་ཉེར་མཁོ་མིན། །ཇི་ལྟར་ཁྱེད་ཀྱི་ཤེས་པ་ནི། །དོན་འགའ་ལ་འཇུག་དེ་བཞིན་གཞན། །དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ་ལས་གཞན་གྱི་དབང་པོ་ལས་འདས་པའི་དོན་མཐོང་བ་ཅན་གྱི་སྐྱེས་བུ་བརྟག་པ་སྟེ་སུམ་ཅུ་པའོ།། །།སློབ་དཔོན་ཞི་བ་འཚོའི་ཞལ་སྔ་ནས་ཀྱིས་མཛད་པ་དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ་རྫོགས་སོ།། །།གུ་གེ་ཡུལ་གྱི་དབེན་ས་རི་བོ་དགེ་གནས་ཕུན་ཚོགས་གླིང་དུ། རྒྱ་གར་གྱི་མཁན་པོ་དཔལ་གུ་ཎཱ་ཀ་ར་ཤྲཱི་བྷ་དྲའི་ཞལ་སྔ་ནས་དང༌། སྒྲ་བསྒྱུར་གྱི་ལོ་ཙཱ་བ་ཆེན་པོ་དཔལ་ལྷ་བཙན་པོ་ཤཱཀྱའི་དགེ་སློང་ལྷ་བླ་མ་བཞི་བ་འོད་ཀྱི་ཞལ་སྔ་ནས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། གྲངས་ཅན་གཅེར་བུ་བྱེ་བྲག་པ་དང་རྒྱང་ཕན་རིག་པ་ཅན་དང་སངས་རྒྱས་དེ་དག་གི་ཕྱོགས་ནི། །ཆུ་ཀླུང་པ་དང་ཙ་ར་ཀ་དང་དུས་སྨྲ་སྤྱོད་པ་བརྡ་སྤྲོད་ཞི་བ་ཚངས་དང་སྣ་ཚོགས་ཚལ། །སྒྲ་ཡི་ཚངས་པ་རིག་བྱེད་མཐའ་དང་བྱེ་བྲག་སྨྲ་དང་མདོ་སྡེ་སེམས་ཙམ་དབུ་མ་དེ་དག་གི །བྱེ་བྲག་ལུང་བཅས་ཤེས་པའི་སྤྱོད་ཡུལ་གང་ཡིན་འདི་ནི་རྟོགས་ནས་འགྲོ་ལ་ཕན་ཕྱིར་བདག་གིས་བསྒྱུར།། །།