ཆོས་མངོན་པ་མཛོད་ཀྱི་བཤད་པའི་རྒྱ་ཆེར་འགྲེལ་པ་དོན་གྱི་དེ་ཁོ་ན་ཉིད་ཅེས་བྱ་བ།
བློ་གྲོས་བརྟན་པ།
རྒྱ་གར་སྐད་དུ། ཨ་བྷི་དྷརྨྨ་ཀ་ཥོ་བྷཱ་ཥྱ་ཊཱི་ཀཱ་ཏ་ཏྭཱརྠ་ནཱ་མ། བོད་སྐད་དུ། ཆོས་མངོན་པ་མཛོད་ཀྱི་བཤད་པའི་རྒྱ་ཆེར་འགྲེལ་པ། དོན་གྱི་དེ་ཁོ་ན་ཉིད་ཅེས་བྱ་བ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གང་ཞིག་ཀུན་ལ་མུན་པ་གཏན་བཅོམ་ཞིང༌། །འཁོར་བའི་འདམ་ལས་འགྲོ་བ་དྲངས་མཛད་པ། །དོན་བཞིན་སྟོན་པ་དེ་ལ་ཕྱག་འཚལ་ནས། །ཆོས་མངོན་མཛོད་ཀྱི་བསྟན་བཅོས་རབ་བཤད་བྱ། །བསྟན་བཅོས་མཛད་པར་བཞེད་པས་རང་གི་སྟོན་པ་ལ་བསྟོད་པ་བརྩམས་པའི་དགོས་པའི་དབང་དུ་བྱས་ནས་གསུངས་པ། དེ་ཡང་བསྟན་བཅོས་དང་སྟོན་པ་ལ་གུས་པར་བསྐྱེད་པས་རང་དང་གཞན་གྱི་དོན་ཕུན་སུམ་ཚོགས་པ་བཤད་པས། བཅོམ་ལྡན་འདས་ཀྱི་ཆེ་བའི་བདག་ཉིད་ཤེས་ཤིང་གུས་པ་བསྐྱེད་པ་དང༌། ཡེ་ཤེས་དང་སྤངས་པ་ཕུན་སུམ་ཚོགས་པ་ལྡན་པས། དེའི་གསུང་མི་བདེན་པའི་གཏན་ཚིགས་དང་བྲལ་ཞིང་དོན་ཕྱིན་ཅི་མ་ལོག་པ་ཉིད་ཀྱིས་འཁོར་བའི་འདམ་དུ་བྱིང་བའི་སེམས་ཅན་རྣམས་དྲངས་ཏེ་འབྲས་བུ་མཐར་
ཐུག་པ་ལ་རབ་ཏུ་སྦྱོར་བའི་ཕྱིར་རོ། །བསྟན་བཅོས་ལ་གུས་པ་བསྐྱེད་པའི་དོན་ནི་དེ་བཞིན་ཏེ། ལྷག་མ་དང་བཅས་པའི་དགོས་པའི་སྙིང་པོ་ཡང་ངོ༌། །གུས་པར་གྱུར་པས་བདེ་བར་གཤེགས་པའི་གསུང་སོ་སོར་རང་གིས་རིག་ཅིང་བསྟན་བཅོས་ཀྱི་བཞེད་པ་དེ་དང་དོན་མཚུངས་པའི་ཕྱིར་དང་དགོས་པ་མཚུངས་པའི་ཕྱིར་གུས་པ་འདིར་མ་བཤད་ཀྱང་གྲུབ་པ་ཉིད་དོ། །མི་བདེན་པའི་གཏན་ཚིགས་ཀྱི་གཞི་ནི་རྗེས་སུ་ཆགས་པ་དང་ཁོང་ཁྲོ་དང་འཇིགས་པ་དག་ཡིན་པར་ཤེས་པར་བྱའོ། །འདི་རྣམས་ཀྱིས་ཡེ་ཤེས་དང་སྤངས་པ་ཕུན་སུམ་ཚོགས་པ་དང་ལྡན་པ་ཉིད་བཤད་པ་ཡིན་ནོ། །གུས་པ་བསྐྱེད་པ་རྣམས་ཀྱང་ཀློག་པ་དང་ཁ་ཏོན་དང་ཉན་པ་དང་སེམས་པ་ལ་སོགས་པའི་བྱ་བ་རྣམས་ལ་འབད་ཅིང་ཞུགས་པས་འཁོར་བའི་འདམ་དུ་བྱིང་བ་དེ་ལས་རྒོལ་བ་ཐོབ་པར་བྱེད་དོ། །འོ་ན་བསྟན་བཅོས་ལ་གུས་པ་བསྐྱེད་པ་ཁོ་ན་འདིའི་དོན་མ་ཡིན་ནམ། འདིར་བཅོམ་ལྡན་འདས་ཀྱི་ཆེ་བའི་བདག་ཉིད་ཤེས་པར་བྱེད་པ་ཅི་ཞེ་ན། འགའ་ཞིག་གང་ཟག་ཚད་མར་བྱེད་པ་ཡོད་པས་དེ་རྣམས་གང་ཟག་ཉིད་ཀྱི་སྒོ་ནས་དེའི་ཚིག་ལ་གུས་པར་བྱེད་ཅིང༌། དོན་ལ་རྟོགས་པ་གང་ཡིན་པ་དེ་རྣམས་ཀྱང་བླ་ན་མེད་པའི་ཡེ་ཤེས་དང་སྤངས་པ་ཕུན་སུམ་ཚོགས་པ་
ཐོས་ནས་དེའི་ཚིག་གུས་པས་ཉན་པ་ནས་ཚིག་དང་རྟགས་དང་དོན་ལ་ཡོངས་སུ་རྟོགས་པའི་བར་བྱེད་དོ། །དེ་ནས་སྟོན་པའི་ཚིག་དང་དོན་དག་ཇི་ལྟར་ཐོས་པ་བཞིན་དུ་ཡེ་ཤེས་དང་སྤངས་པ་ཕུན་སུམ་ཚོགས་པ་དང་ལྡན་པར་ངེས་ཏེ། སྟོན་པ་ལ་གུས་པ་སྐྱེའོ། །དེ་ལ་བསྟན་བཅོས་བྱེད་པར་འདོད་པས་བསྟན་བཅོས་དང་སྟོན་པ་ལ་གུས་པ་བསྐྱེད་པའི་དོན་དུ་བསྟོད་པ་མངོན་པར་བརྗོད་དོ། །འོ་ན་ཆེ་བའི་བདག་ཉིད་ཤེས་པར་བྱེད་པ་ཉིད་འདིར་དགོས་པར་གསུངས་པ་མ་ཡིན་ནམ་ཞེ་ན། ཆེ་བའི་བདག་ཉིད་ཤེས་པར་བྱ་བའི་དོན་དུ་ཡོན་ཏན་བརྗོད་པ་སྔོན་དུ་འགྲོ་བས་དེ་ལ་ཕྱག་འཚལ་བ་རྩོམ་མོ་ཞེས་ཏེ། དེ་ནི་བསྟན་བཅོས་དང་སྟོན་པ་ལ་གུས་པ་སྐྱེས་པའི་རྒྱུ་མཚན་གྱི་ཕྱིར་གསུངས་པ་བདེན་ནོ། །རྣམ་པ་གཞན་དུ་ན་བསྟན་བཅོས་ཀྱི་ཐོག་མར་ཆེ་བའི་བདག་ཉིད་རབ་ཏུ་བསྟན་པས་ཅི་ཞིག་བྱ་སྟེ། ཆེ་བའི་བདག་ཉིད་ཀྱི་ཡོན་ཏན་བརྗོད་པ་ནི་བསྟན་བཅོས་རྩོམ་པ་ལ་བལྟོས་པ་མེད་པར་ཡང་བསྟན་ནུས་པའི་ཕྱིར་བསྟན་བཅོས་བྱེད་པར་འདོད་པས་ཆེ་བའི་བདག་ཉིད་ཤེས་པར་བྱ་བའི་ཕྱིར་བསྟོད་པ་མངོན་པར་བརྗོད་པའི་དོན་དུ་བལྟ་བར་བྱའོ། །ཕན་འདོགས་པས་ན་བསྟན་བཅོས་སོ། །དེའི་ཕྱིར་སྟོན་པའི་ཆེ་བའི་བདག་ཉིད་ལས་བསྟན་བཅོས་ལ་གུས་པ་སྐྱེ་ཞིང་བསྟན་བཅོས་ཀྱི་ནུས་པ་ལས་སྟོན་པའི་ཆེ་བའི་བདག་ཉིད་ངེས་ཏེ་གུས་པ་སྐྱེའོ་ཞེས་སྔར་བཤད་པ་ཉིད་ལེགས་སོ། །དེ་ལྟར་ན་བསྟོད་པ་ལས་བསྟན་བཅོས་ཀྱི་དོན་རྟོགས་པར་འགྱུར་རོ། །ཡང་ན་གཅིག་ནས་གཅིག་ཏུ་བརྒྱུད་དེ་ཆེ་བའི་བདག་ཉིད་ཤེས་པར་བྱེད་པ་ནི་དངོས་ཀྱི་དགོས་པ་ཞེས་བཤད་ཀྱི། གུས་པ་གཅིག་ནས་གཅིག་ཏུ་བརྒྱུད་པ་ནི་དགོས་པ་མ་ཡིན་ནོ། །གཞན་དུ་ན་མྱ་ངན་ལས་འདས་པ་ཐོབ་པ་ཡང་བརྗོད་བྱར་འགྱུར་རོ། །ཡང་ན་དགོས་པ་ནི་བསྟན་བཅོས་རྩོམ་པའི་གེགས་བསལ་བ་དང་དགེ་བའི་རྩ་བ་ཉེ་བར་སོག་པ་ལ་འདོད་དེ་སེམས་ཞི་བ་དང་བསོད་ནམས་ཀྱི་ལས་ཉེ་བར་སོག་པ་ལས་གཞན་པའི་དགོས་པ་མེད་དོ། །གེགས་དང་བྲལ་བས་རྩོམ་པའི་བྱ་བ་ཡོངས་སུ་རྫོགས་པར་འགྱུར་ཞིང་མངོན་པར་མཐོ་བ་དང་ངེས་པར་ལེགས་པ་ལ་སྦྱོར་བ་ནི་ལྟ་སྨོས་ཀྱང་ཅི་དགོས། དེའི་ཕྱིར་སློབ་དཔོན་གྱིས་དེ་བཞིན་གཤེགས་པ་ཡོན་ཏན་ཕུལ་དུ་བྱུང་བ་ཐམས་ཅད་མངའ་ཞིང་སྐྱོན་དང་བྲལ་བ་མཐར་
ཕྱིན་པའི་གནས་ཡིན་པའི་ཕྱིར་བླ་ན་མེད་པའི་བསོད་ནམས་ཀྱི་ཞིང་དང་ལམ་དེ་ལ་ཕྱག་འཚལ་བ་རྩོམ་པར་མཛད་དོ། །ཅི་ལྟར་ན་མིང་གི་ཡོན་ཏན་བརྗོད་པ་སྔོན་དུ་འགྲོ་བའི་ཕྱག་འཚལ་བ་ལ་སྦྱར་བས་ཕུལ་དུ་བྱུང་བའི་འདོད་པའི་འབྲས་བུ་རྣམ་པ་བཞི་དང་བསོད་ནམས་ཀྱི་ཕུང་པོ་ཐོབ་པ་དང་བགེགས་དང་ལོག་པར་འདྲེན་པ་དང་བྲལ་ཏེ་བསྟན་བཅོས་ཡོངས་སུ་རྫོགས་པར་འགྱུར་ཞེ་ན། ཉན་པ་པོ་རྣམས་ཆེ་བའི་བདག་ཉིད་ཐོས་པ་ལས་རབ་ཏུ་དད་པ་མངོན་པར་འཕེལ་ཏེ་འཇུག་ཅིང་དེའི་རྒྱུ་མཚན་གྱིས་བསོད་ནམས་ཀྱི་ཚོགས་ཐོབ་པ་དང་བགེགས་དང་ལོག་འདྲེན་རྣམས་དང་བྲལ་ཏེ་འབད་པ་མེད་པར་ཀློག་པ་དང་ཁ་དོན་དང་མཉན་པ་ལ་སོགས་པའི་བྱ་བའི་ཁྱད་པར་ལ་མཐར་ཕྱིན་པར་འཇུག་པར་འགྱུར་རོ། །ཡང་ན་བསྟན་བཅོས་བྱེད་པ་ཕལ་ཆེར་རྩོམ་པ་ལ་འཇུག་པ་ན་འདོད་པའི་ལྷ་ལ་ཕྱག་བྱས་ནས་འཇུག་པར་བྱེད་དེ། སློབ་དཔོན་འདིས་ཀྱང་མཆོག་ཏུ་ལེགས་པའི་ལམ་དེའི་རྗེས་སུ་འཇུག་པས་བསྟན་བཅོས་མཛད་པར་བཞེད་དེ་ཡོན་ཏན་བརྗོད་པ་སྔོན་དུ་འགྲོ་བས་ཕྱག་འཚལ་བ་བརྩམས་སོ། །ཡང་ཅིའི་དོན་དུ་བསྟན་བཅོས་རྩོམ་པ་ན་འདོད་པའི་ལྷ་ལ་ཕྱག་འཚལ་བར་བྱེད་ཅེ་ན། བཀྲ་ཤིས་པའི་ཆེད་དུ་དམ་པ་རྣམས་ཀྱིས་བྱ་སྟེ། བསྟན་བཅོས་ལ་འཇུག་པ་ན་ཀུན་ཏུ་ཉེ་བར་ཕན་པ་ནི་བཀྲ་ཤིས་ཏེ་ཚེ་དང་ལྡན་ཞིང་སློབ་མ་ཤེས་ཉན་ཅན་དང༌། སྐྱེས་བུ་དཔའ་བོ་རྣམས་སུ་ཡང་འགྱུར་བའོ་ཞེས་གཞན་དག་ཟེར་རོ། །ཆེ་བའི་བདག་ཉིད་ཤེས་པར་བྱེད་པ་ནི་བདག་ཉིད་ཀྱི་སྐྱེ་མཆེད་དུ་གཏོགས་པའི་རབ་ཏུ་དང་བ་བསྟན་པའི་དོན་དང་གཞན་དག་ལ་ཡང་བསྐྱེད་པའི་དོན་ཏེ་འདི་ཡང་བསྟན་བཅོས་ལ་ཉེ་བར་བྱེད་པར་བསམས་པའོ་ཞེས་གཞན་དག་ཟེར་རོ། །བསྟན་བཅོས་ཀྱི་ཐོག་མར་བསྟོད་པ་མངོན་པར་བརྗོད་པའི་ཕྱིར་སློབ་དཔོན་གྱིས་དམ་བཅས་པ་ཉིད་བསྟན་བཅོས་ཞེས་དགོས་ན། དེ་བྱེད་པ་ནི་མུན་པ་མ་སྤང་བའི་ཕྱིར་བསྟན་བཅོས་ལམ་གུས་པ་ཉིད་དུ་འགྱུར་རོ། །བསྟོད་པ་མངོན་པར་བརྗོད་པས་ནི་གཞན་དག་གིས་བསྟན་བཅོས་སོ་སོ་རང་གི་ཡང་དག་པ་ཉིད་ཤེས་པས་བསྟན་བཅོས་འདི་ལ་གུས་པ་སྐྱེས་པར་བྱེད་དོ། །དེ་ལྟ་ན་ཡང་བསྟོད་པ་མངོན་པར་བརྗོད་པ་དོན་མེད་པ་མིན་ཏེ། གཞན་དུ་བསྟན་བཅོས་ཉེ་བར་གྱུར་པ་ཉིད་རྟོགས།
དེའི་དོན་ཉིད་ལས་འདི་ལ་ཡང་དག་པར་འཇུག་ཅིང་དེའི་རྟེན་ཡིན་པས་ཆོས་མངོན་པ་མཛོད་ཅེས་རབ་ཏུ་གྲགས་པ་སྟོན་པར་བྱེད་པ་རྣམས་ཉིད་ལ་ཡང་གུས་པ་བསྐྱེད་པར་བྱ་སྟེ། སྟོན་པར་བྱེད་པ་རབ་ཏུ་གྲགས་པ་རྣམས་ལ་ཡང་ཚིག་ཙམ་གྱིས་སྒྲུབ་པ་ནི་མ་ཡིན་ནོ། །སླར་ཡང་བསྟན་བཅོས་རྩོམ་པའི་དགོས་པ་ཅི་ཞེ་ན། ཆོས་རྣམས་ཀྱི་རང་དང་སྤྱིའི་མཚན་ཉིད་རྟོགས་པ་ནི་དངོས་ཀྱི་དགོས་པ་དང་མྱ་ངན་ལས་འདས་པ་ཐོབ་པ་ཡང་དགོས་པ་ཡིན་པའི་བར་དུའོ། །གང་གི་ཕྱིར་འགྲོ་བ་ལྔ་པོ་རྣམས་སུ་ལས་དང་ཉོན་མོངས་པ་གཉིས་རྒྱུར་གྱུར་པ་ལས་ཡང་སྲིད་འཕེན་པའི་དུས་དང་འཕངས་པའི་ཡང་སྲིད་མངོན་པར་འགྲུབ་པའི་དུས་དག་ཏུ་ལས་དང་ཉོན་མོངས་པ་མ་སྤངས་པ་རྣམས་ཡང་སྲིད་འཕེན་པར་བྱེད་ཅིང་སྐྱེད་པར་བྱེད་དོ། །དེས་སེམས་ཅན་རྣམས་ཇི་སྲིད་ཉོན་མོངས་པར་གྱུར་པ་དེ་སྲིད་དུ་འཁོར་བ་ལས་ཐར་བར་མི་འགྱུར་རོ། །ཆོས་རབ་ཏུ་རྣམ་པར་འབྱེད་པ་མ་གཏོགས་པ་ཉོན་མོངས་པ་རྣམས་སྤོངས་པའི་ཐབས་གཞན་ཡོད་པ་མ་ཡིན་ལ། ཉོན་མོངས་པ་ཐམས་ཅད་ཀྱང་མི་ཤེས་པ་ལ་གནས་པའི་ཕྱིར་ཆོས་ཁོང་དུ་ཆུད་པའི་ཤེས་པ་དང་སྣང་བ་དང་མུན་པ་བཞིན་དུ་མཚན་ཉིད་འགལ་བས་ལྷན་ཅིག་ཏུ་མི་གནས་སོ། །གང་གི་ཕྱིར་ཆོས་རབ་ཏུ་རྣམ་པར་འབྱེད་པ་ལས་ཉོན་མོངས་པ་སྤོང་བར་བྱེད་ཅིང༌། ཉོན་མོངས་པ་སྤངས་པས་ཡང་སྲིད་ཀྱི་ལས་ཉེ་བར་སོག་པར་མི་བྱེད་ལ། ཉེ་བར་བསགས་པ་རྣམས་ཀྱང་ལྷན་ཅིག་བྱེད་པའི་རྒྱུ་དང་བྲལ་བས་འབྲས་བུ་བསྐྱེད་པའི་ནུས་པ་མེད་པར་འགྱུར་རོ། །དེ་ལྟར་ཉོན་མོངས་པ་སྤངས་པས་ད་ལྟར་གྱི་སྐྱེ་བ་ལ་ཡང་སྲིད་དུ་ཉིང་མཚམས་སྦྱོར་བ་འགོག་པས་ཐར་པ་ཐོབ་པོ། །བསྟན་བཅོས་བྱེ་བྲག་ཏུ་བཤད་པ་ལ་སོགས་པ་དང་དགོས་པ་མཚུངས་ན་དེ་རྣམས་ལས་ལྷག་པར་རྩོམ་པ་དགོས་པ་མེད་པ་མ་ཡིན་ནམ་ཞེ་ན། བྱེ་བྲག་ཏུ་བཤད་པ་ལ་སོགས་པ་རྣམས་ལ་རྒྱས་པ་དང་མདོར་བསྡུས་པ་དང་འཁྲུགས་པ་ལ་སོགས་པའི་སྐྱོན་མཐོང་སྟེ་ཡོངས་སུ་མགུ་བས་དགོས་པ་མང་བ་དང་རྒྱ་ཆེར་ཤེས་པ་དང་དགེ་བའི་བློ་ཅན་རྣམས་ལ་ཕན་གདགས་པའི་ཕྱིར་རྒྱས་པ་དང་མདོར་བསྡུས་པ་དང་འཁྲུགས་པ་མ་ཡིན་པའི་ཚིག་དོན་ཉེ་བར་བསྟན་པ་ཆོས་མངོན་པ་དང་ཆེས་ཉེ་བ་ཆོས་མངོན་པའི་མཛོད་ཅེས་
བྱ་བ་བརྩམས་སོ། །དེའི་ཕྱིར་འདི་རྩོམ་པ་དགོས་པ་མེད་པ་མ་ཡིན་ནོ། །བསྟན་བཅོས་བྱེད་པར་འདོད་པས་ཞེས་བྱ་བ་ལ་སློབ་མ་འཆོས་པའི་ཕྱིར་བསྟན་བཅོས་ཏེ། འཆོས་པ་ཡང་བདེ་འགྲོ་དང་ཐར་པའི་རྒྱུ་ལ་སོ་སོར་འགོད་པ་དང་ངན་འགྲོའི་འཇིགས་པ་དང་རྒྱུ་ཡོངས་སུ་སྤོང་བའོ། །ཡང་ན་ཉོན་མོངས་པ་འཆོས་པ་དང་ངན་འགྲོའི་འཇིགས་པ་ལས་སྐྱོབ་པའི་ཕྱིར་བསྟན་བཅོས་ཏེ་ཉོན་མོངས་པ་འཆོས་པ་ནི་ཉོན་མོངས་པ་སྤང་བ་དང་ཉོན་མོངས་པ་སྤང་བ་བདེན་པ་མཐོང་བ་རྣམས་ནི་སོ་སོར་བརྟགས་པ་མ་ཡིན་པ་འགོག་པ་ཐོབ་པས་ངན་སོང་གི་སྐྱེ་བ་དང༌། ངན་འགྲོའི་འཇིགས་པ་ལས་བསྐྱབ་པ་དང་གཉི་ག་ཡང་ལམ་ཉིད་ཡིན་པས་ན་ལམ་ཁོ་ན་བསྟན་བཅོས་ཏེ་ལམ་གྱི་བདག་ཉིད་དེ་བསྟན་བཅོས་སུ་འདོད་དོ། །མིང་གི་ཚོགས་ལ་སོགས་པ་རྣམས་ཀྱིས་ནི་གདུལ་བྱའི་རྒྱུད་ལ་རྣམ་པ་དང་བཅས་རབ་ཏུ་དབྱེ་བ་དང་བཅས་འབྲས་བུ་དང་བཅས་མི་མཐུན་ཕྱོགས་དང་བཅས་པ་ཀུན་ཏུ་ཐོབ་པར་འདོད་པའོ། །ཡང་ན་འདིར་གཞུང་ལ་ཡང་འདྲ་བ་ལས་བཏགས་ཏེ་སྤྱིར་བཏང་བ་ཇི་ལྟ་བ་བཟུང་ནས་དེས་ཚིག་ལེའུར་བྱས་པ་འདི་ཉིད་ལ་བསྟན་བཅོས་སུ་འདོད་པས་ཞེས་བྱ་བ་ནི་མིང་གི་ཚོགས་ལ་སོགས་པ་རྣམས་ལ་འཇུག་པར་འདོད་པ་དང་འགོད་པར་འདོད་པ་ཞེས་བྱ་བའོ། །ཡང་བསྟན་བཅོས་རྣམ་པ་གཉིས་ཏེ་བཤད་བྱའི་ཆོས་མངོན་པ་དང་འཆད་བྱེད་དོ། །ཇི་སྐད་དུ། བདག་གིས་མངོན་པའི་ཆོས་འདི་ཕལ་ཆེར་ནི། །ཁ་ཆེ་བྱེ་བྲག་སྨྲ་བའི་ཚུལ་གྲུབ་བཤད། །ཅེས་པ་ལྟ་བུའོ། །འཆད་བྱེད་ཀྱི་བསྟན་བཅོས་ཀྱང་ཚིག་ལེའུར་བྱས་པའི་བདག་ཉིད། ཟག་བཅས་ཟག་པ་མེད་ཆོས་རྣམས། །ཞེས་བྱ་བ་ལ་སོགས་པ་སྟེ། དེ་ལ་བཤད་བྱའི་ཆོས་མངོན་པ་དང་འགལ་བ་དེའི་ཚེ་བྱེད་པར་འདོད་པ་ནི་བསྟན་པར་འདོད་པ་དང་རྣམ་པར་བཤད་པར་འདོད་པ་ཞེས་བྱ་བའི་ཐ་ཚིག་གོ །དོན་གྱི་དབང་གིས་བསྟན་བཅོས་རྣམ་པ་གཉིས་སུ་བསྟན་ཏོ། །ཡང་ཚིག་ལེའུར་བྱས་པའི་བསྟན་བཅོས་དང་འབྲེལ་པ་དེའི་ཚེ་བྱེད་པར་འདོད་པ་ཞེས་བྱ་བ་ནི་འཇུག་པར་འདོད་པ་དང་རྩོམ་པར་འདོད་ཅེས་བྱ་བའི་ཐ་ཚིག་གོ །རང་གི་སྟོན་པའི་ཞེས་སྟོན་པའི་སྤྱི་བཟུང་ནས་སྟོན་པའི་སྒྲ་དང་རང་གི་ཞེས་གསུངས་པ་ནི་གཞན་གྱི་སྟོན་པ་ཡང་ཡོད་པས་རང་གི་སྟོན་
པ་ཞེས་གསུངས་པ་སྟེ། དེས་ནི་འདི་སྐད་བརྗོད་པར་འགྱུར་ཏེ་སངས་རྒྱས་ནི་བཅོམ་ལྡན་འདས་སོ་ཞེས་ལྷན་ཅིག་པ་ནི་རང་གི་སྟོན་པར་སྐྱབས་སུ་འགྲོ་བར་ཁས་བླངས་པའི་ཕྱིར་ཏེ་ཁས་བླངས་པ་ལ་སྦྱར་བས་བསྟན་པ་རྗེས་སུ་བསྒྲུབ་པའི་ཕྱིར་རོ། །འོ་ན་སློབ་དཔོན་གྱིས་ཐོག་མར་སངས་རྒྱས་ཀྱི་བླ་ན་མེད་པའི་ཡེ་ཤེས་དང་སྤངས་པ་ཕུན་སུམ་ཚོགས་པ་འབད་པས་བསྟན་པས་དེ་ལ་གནས་པར་བསྟན་པ་མ་ཡིན་ནམ་ཞེ་ན། དེའི་གསུང་ལ་གནས་པ་ལས་སྟོན་པར་འགྱུར་གྱི་ཁས་བླངས་པ་ཙམ་གྱིས་མ་ཡིན་ནོ། །གཞན་རང་རང་གི་སྟོན་པ་ཁོ་ན་ལས་ཡོན་ཏན་འབྱུང་བས་རང་གི་ཞེས་ཁྱད་པར་སྨོས་པ་དོན་མེད་པ་ཅན་མ་ཡིན་ནོ། །ཡང་ན་སེམས་ཅན་ཐམས་ཅད་ནི་བྱང་ཆུབ་ཏུ་སེམས་བསྐྱེད་པའི་དུས་ཉིད་ནས་སློབ་མའི་དངོས་པོར་བཟུང་སྟེ་བདག་གིས་འདི་དག་ལམ་གྱི་འབྲས་བུ་ལ་རྗེས་སུ་བསྟན་ཏོ་ཞེས་དེའི་དོན་ཉིད་དུ་འཁོར་བར་ཞུགས་ཤིང་རྫོགས་པར་སངས་རྒྱས་པས་ན་འདི་སེམས་ཅན་རྣམས་ཀྱི་རང་གི་སྟོན་པ་སྟེ་གཞན་ནི་མ་ཡིན་ནོ། །མངོན་པར་བྱང་མ་ཆུབ་པ་ནས་སེམས་ཅན་མ་ལུས་པ་རྗེས་སུ་གཟུང་བའི་ཕྱིར་རང་གི་སྟོན་པ་ཞེས་བཤད་དེ། ཇི་སྐད་དུ། དཔའ་བོ་ཐུགས་རྗེ་རོ་གཅིག་ཅིང༌། །ཡུན་རིང་ཕན་པར་བཞེད་པ་ཅན། །འགྲོ་བ་བཀྲེན་ཞིང་རྨོངས་པ་ཡིས། །རང་གི་མགོན་པོར་ཁྱེད་མ་འཚལ། །ཞེས་གསུངས་པ་ལྟ་བུའོ། །ཡང་ན་རང་གི་ཞེས་པ་བསྟན་བཅོས་དང་འབྲེལ་པ་ན་ཆོས་མངོན་པ་བྱུང་ངོ་ཞེས་པའི་དོན་ཏོ། །བདག་ཉིད་ཆེ་བ་ཤེས་པར་བྱེད་པའི་དོན་དུ་ཞེས་བྱ་བ་ལ་བདག་ཉིད་ཆེན་པོའི་དངོས་པོ་ནི་བདག་ཉིད་ཆེན་པོ་སྟེ་སེམས་ཅན་ཐམས་ཅད་ཀྱི་མཆོག་ཉིད་དང་སེམས་ཅན་ཐམས་ཅད་ཀྱི་སྐྱབས་སུ་འོས་པར་གྱུར་པ་ཉིད་དོ། །ཇི་སྐད་དུ། སེམས་ཅན་གང་དག་རྐང་པ་མང་བའམ་རྐང་པ་གཉིས་པའམ་རྐང་པ་བཞི་པའམ་རྐང་མངས་ཏེ་དེ་དག་གི་ནང་ན་དེ་བཞིན་གཤེགས་པ་མཆོག་ཅེས་བྱ་བ་སྟེ་ཞེས་པ་ལྟ་བུའོ། །ཡེ་ཤེས་དང་སྤངས་པ་ཕུན་སུམ་ཚོགས་པར་བཤད་པས་ནི་སེམས་ཅན་གྱི་མཆོག་ཉིད་ཐམས་ཅད་ཉིད་དུ་བསྟན་ཏེ་དེ་ལས་གཞན་པ་རྣམས་ལ་ནི་བླ་ན་མེད་པའི་ཡེ་ཤེས་དང་སྤངས་པ་མེད་པའི་ཕྱིར་རོ། །འགྲོ་བ་རྣམས་འཁོར་བ་ལས་འདོན་པར་མཛད་པས་ན་སེམས་
ཅན་ཐམས་ཅད་ཀྱི་སྐྱབས་ཀྱི་འོས་སུ་གྱུར་པ་ཉིད་དོ། །ཡང་ན་ཆེ་བའི་བདག་ཉིད་ནི་ཤེས་བྱ་ཐམས་ཅད་ལ་ཆགས་པ་མེད་ཅིང་ཐོགས་པ་མེད་པའི་ཡེ་ཤེས་ཏེ་སེམས་ཅན་ཐམས་ཅད་པའི་གཉེན་པོ་ནི་ཡེ་ཤེས་དང་ཐུགས་རྗེའོ། །ཤེས་བྱ་ཐམས་ཅད་ལ་མུན་པར་གྱུར་པ་སྤངས་པར་བཞེད་པས་ནི་ཤེས་བྱ་ཐམས་ཅད་ལ་མ་ཆགས་མ་ཐོགས་པའི་ཡེ་ཤེས་བསྟན་ཏེ། འཁོར་བའི་འདམ་ལས་འགྲོ་བ་དྲངས་མཛད་པ་ཞེས་པ་འདིས་ནི་ཐུགས་རྗེ་ཆེན་པོ་སྟེ། འཁོར་བའི་སྡུག་བསྔལ་གྱིས་ཡོངས་སུ་གདུངས་པ་རྣམས་ལ་ཐུགས་རྗེ་མཉམ་པའི་ཕྱིར་རོ། །ཡང་ན་བདག་ཉིད་ཆེ་བས་ནི་རང་གི་དོན་ཕུན་སུམ་ཚོགས་པ་དང་གཞན་གྱི་དོན་ཕུན་སུམ་ཚོགས་པ་བསྟན་ཏེ། དེ་ཡང་ཀུན་ལ་མུན་པ་གཏན་བཅོམ་ཞེས་པ་འདིས་རང་གི་དོན་ཕུན་སུམ་ཚོགས་པ་དང༌། འཁོར་བའི་འདམ་ལས་འགྲོ་བ་དྲངས་མཛད་པ། །ཞེས་པ་འདིས་གཞན་གྱི་དོན་ཕུན་སུམ་ཚོགས་པ་བསྟན་ཏོ། །ཡོན་ཏན་བརྗོད་པ་སྔོན་དུ་འགྲོ་བས་དེ་ལ་ཕྱག་འཚལ་བ་རྩོམ་པར་བྱེད་དོ་ཞེས་པ་ལ་མདོར་ན་འདིའི་ཡོན་ཏན་བརྗོད་པ་སྔོན་དུ་འགྲོ་བ་དེ་ཡང་ཚིགས་སུ་བཅད་པའི་ཕྱེད་སྔ་མས་སོ། །རྐང་པ་གསུམ་པས་ནི་ཕྱག་འཚལ་བ་བརྩམས་སོ། །དེ་ལ་ཕྱག་འཚལ་ནས་ཞེས་པ་འདིར་ཡོན་ཏན་བརྗོད་པ་སྔོན་དུ་འགྲོ་བས་ཕྱག་འཚལ་བའོ། །དེ་ལ་ཡོན་ཏན་དུ་བྱེད་པས་ན་ཡོན་ཏན་ཏེ། ལེགས་པ་དོན་དུ་གཉེར་བར་བྱེད་པ་རྣམས་ཀྱིས་གོམས་པར་བྱའོ་ཞེས་པའི་ཐ་ཚིག་གོ །དེ་རྣམས་ནི་རྒྱུ་དང་འབྲས་བུའི་དབྱེ་བ་རྣམ་པ་གཉིས་ཀྱིས་ཏེ། དེ་ལ་རྒྱུ་ནི་བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་སོ། །བསོད་ནམས་ཀྱི་ཚོགས་ནི་ཕ་རོལ་ཏུ་ཕྱིན་པ་གསུམ་སྟེ། སྦྱིན་པ་དང་ཚུལ་ཁྲིམས་དང་བསམ་གཏན་རྣམས་སོ། །དེ་ལྟར་ཡང་གསུངས་པ། གསུམ་པོ་འདི་རྣམས་ནི་བསོད་ནམས་བྱ་བའི་དངོས་པོ་རྣམས་ཏེ། སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང༌། ཚུལ་ཁྲིམས་ལས་བྱུང་བ་དང༌། བསྒོམ་པ་ལས་བྱུང་བ་ཞེས་བྱ་བའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཡེ་ཤེས་ཀྱི་ཚོགས་སོ། །བརྩོན་འགྲུས་དང་བཟོད་པ་ནི་གཉི་གའི་ནང་དུ་གཏོགས་ཏེ་སྦྱིན་པ་ལ་སོགས་པ་རྣམས་ལ་འདི་དག་མི་འཇུག་པ་མི་
སྲིད་པའི་ཕྱིར་རོ། །ཡང་གཞན་དག་ནི་སྦྱིན་པ་དང་ཚུལ་ཁྲིམས་དང་བཟོད་པའི་ཕ་རོལ་ཏུ་ཕྱིན་པ་ནི་བསོད་ནམས་ཀྱི་ཚོགས་སོ། །བསམ་གཏན་དང་ཤེས་རབ་ནི་ཡེ་ཤེས་ཀྱི་ཚོགས་སོ། །བསམ་གཏན་ནི་ཤེས་རབ་དང་རྗེས་སུ་མཐུན་པའི་ཕྱིར་དང་བརྩོན་འགྲུས་ནི་གཉིས་ཀ་ལ་ཕན་འདོགས་པའི་ཕྱིར་གཉི་གའི་ནང་དུ་གཏོགས་སོ་ཞེས་ཟེར་རོ། །འབྲས་བུ་ཕུན་སུམ་ཚོགས་པ་རྣམ་པ་བཞི་ནི་ཡེ་ཤེས་ཕུན་སུམ་ཚོགས་པ་དང་སྤངས་པ་ཕུན་སུམ་ཚོགས་པ་དང་གཞན་ལ་ཕན་པ་ཕུན་སུམ་ཚོགས་པ་དང་གཟུགས་ཀྱི་སྐུ་ཕུན་སུམ་ཚོགས་པ་སྟེ་འདིར་ཡེ་ཤེས་དང་སྤངས་པ་དང་གཞན་ལ་ཕན་པ་ཕུན་སུམ་ཚོགས་པ་རྣམས་ནི་འབྲས་བུའི་ཡོན་ཏན་ཉིད་དུ་བཞེད་པའོ། །ཡོན་ཏན་བརྗོད་པ་ནི་ཡོན་ཏན་རྣམས་མངོན་ཅིང་གསལ་བར་བྱེད་པའོ། །དེ་ལ་ཕྱག་འཚལ་བ་རྩོམ་མོ་ཞེས་པ་ལ། དེ་ལ་ཞེས་པ་ནི་རང་གི་སྟོན་པ་ལའོ། །ཕྱག་འཚལ་བའི་སྒྲ་སྦྱོར་བ་ན་རྣམ་དབྱེ་བཞི་པ་སྟེ་དོན་གྱི་དབང་གིས་རྣམ་པར་དབྱེ་བ་ཡོངས་སུ་འགྱུར་རོ། །ཕྱག་འཚལ་བ་རྩོམ་མོ་ཞེས་པ་བསྟན་བཅོས་བྱེད་པར་འདོད་པ་ཞེས་པ་འདི་དང་མངོན་པར་འབྲེལ་ཏེ། ཐུན་མོང་མ་ཡིན་པའི་ཡོན་ཏན་བརྗོད་པ་སྔོན་དུ་འགྲོ་བས་སྤྱི་བོས་རབ་ཏུ་འདུད་པ་ནི་ཕྱག་འཚལ་བའོ། །ཡོན་ཏན་བརྗོད་པ་ཉིད་ཀྱིས་ཆེ་བའི་བདག་ཉིད་གྲུབ་པ་མ་ཡིན་ནམ། དེ་ལ་ཕྱག་འཚལ་བས་ཅི་ཞིག་བྱ་ཞེ་ན། དེས་ཀྱང་ཆེ་བའི་བདག་ཉིད་མཚོན་མོད་ཀྱི། ཆེ་བའི་བདག་ཉིད་ཡོད་པ་མ་ཡིན་པ་ལ་སློབ་དཔོན་ཕྱག་འཚལ་བ་རྩོམ་པ་དང་བསྟན་བཅོས་བྱེད་པར་འདོད་པ་མེད་དོ། །ཡང་ན་རང་དང་གཞན་གྱི་རྒྱུད་ལ་བསོད་ནམས་ཉེ་བར་བསགས་པའི་ཕྱིར་ལུས་དང་ངག་དང་ཡིད་རྣམས་ཀྱིས་སྟོན་པ་ལ་སྒྲུབ་པའི་མཆོད་པ་བྱ་བའི་ཕྱིར་ཡོན་ཏན་བརྗོད་པ་སྔོན་དུ་འགྲོ་བས་ཕྱག་འཚལ་བ་རྩོམ་མོ། །དེ་ལྟར་ན་ཆེ་བའི་བདག་ཉིད་ཀྱང་ཤེས་པར་བྱས་ལ་རང་དང་གཞན་གྱི་རྒྱུད་ལ་བསོད་ནམས་ཉེ་བར་སོག་པ་ལ་ནན་ཏན་བྱས་པར་ཡང་འགྱུར་རོ། །དེ་ལ་རང་གི་སྟོན་པ་ལ་བསྟོད་པ་མངོན་པར་བརྗོད་པས་ནི་འབྲེལ་པ་དང་དགོས་པ་དང་བརྗོད་བྱ་རྣམས་སོ་སོར་བསྟན་ཏེ། དེ་ཡང་བསྟན་བཅོས་བྱེད་པར་འདོད་པས་ཞེས་པས་ནི་འབྲེལ་པའོ། །ཆེ་བའི་བདག་ཉིད་ཀྱང་ཤེས་པར་
བྱ་བའི་ཕྱིར་ཞེས་པས་ནི་དགོས་པའོ། །ཡོན་ཏན་བརྗོད་པ་སྔོན་དུ་འགྲོ་བས་ཕྱག་འཚལ་བ་རྩོམ་མོ་ཞེས་པས་ནི་བརྗོད་བྱའི་ཚིག་དང་དོན་ནོ། །གང་གི་ཕྱིར་རྟོགས་པ་སྔོན་དུ་འགྲོ་བས་དག་དོན་རྟོགས་པས་ན་ཚིག་དོན་ནོ། །ད་ནི་གང་ཞིག་ཅེས་བྱ་བ་སངས་རྒྱས་བཅོམ་ལྡན་འདས་ཀྱི་དབང་དུ་བྱས་ནས་སྨྲས་སོ་ཞེས་པ་ལ་བསམ་པར་བྱ་སྟེ། གང་ཞིག་ཅེས་བྱ་བ་ནི་མིང་ཐམས་ཅད་པ་སྟེ་སྤྱིའི་སྒྲ་ཡང་དོན་དང་སྐབས་དང་རྟགས་ལ་སོགས་ལ་མ་ལྟོས་པར་བྱེ་བྲག་ལ་གནས་པར་བྱ་བར་མི་ནུས་སོ། །དེའི་ཕྱིར་འདི་ནི་ཆོས་མངོན་པ་འཆད་པ་ན་སྐབས་ཀྱིས་གཞན་རྣམ་པར་བཅད་ནས་སངས་རྒྱས་བཅོམ་ལྡན་འདས་ཉིད་ལ་འཇུག་སྟེ། ཆོས་མངོན་པ་འཆད་པར་རྩོམ་པ་ན་སངས་རྒྱས་ལས་གཞན་ལ་བསྟོད་པ་མངོན་པར་བརྗོད་པ་མ་ཡིན་པར་རྟོགས་པའི་ཕྱིར་རོ། །ཡང་ན་ཡེ་ཤེས་དང་སྤངས་པ་དང་སེམས་ཅན་ལ་ལན་འདོགས་པར་བཤད་པ་གང་ཡིན་པ་དེ་རྣམས་སངས་རྒྱས་ལས་གཞན་ལ་མི་ལྡན་པར་བཤད་པས་གང་ཞིག་ཅེས་པ་སངས་རྒྱས་བཅོམ་ལྡན་འདས་ཀྱི་དབང་དུ་བྱས་ནས་གསུངས་པའོ་ཞེས་བྱའོ། །ལྡན་པ་ཡང་སྤྱིའི་སྒྲ་བྱེ་བྲག་ལ་གནས་པའི་རྒྱུར་མཐོང་སྟེ། དཔེར་ན་དྲུས་མ་འོར་ཅིག་ཅེས་བརྗོད་པ་ན་བེའུ་དང་བཅས་པའམ། རྡེའུ་དང་བཅས་པ་ལ་གོ་བ་བཞིན་ནོ། །ཤེས་བྱ་ཐམས་ཅད་ལ་མ་ཆགས་མ་ཐོགས་པའི་ཡེ་ཤེས་ནུས་པ་རྒྱས་པ་དང་ལྡན་པས་ན་རང་ཉིད་སངས་རྒྱས་ཏེ་པདྨ་ཁ་རྒྱས་པ་བཞིན་ནོ། །ཡང་ན་ཉོན་མོངས་པ་དང་ཉོན་མོངས་པ་ཅན་མ་ཡིན་པའི་གཏི་མུག་གི་གཉིད་གཏན་དུ་ཟད་པའི་ཕྱིར་སངས་རྒྱས་ཏེ་སྐྱེས་བུ་གཉིད་སད་པ་བཞིན་ནོ། །ཇི་ལྟར་གཉིད་སད་པའི་ཕྱིར་སྐྱེས་བུ་གཉིད་སད་པ་ནི་རང་ཉིད་སད་པ་ཞེས་བརྗོད་པར་བྱའི་གཞན་དག་གི་སད་པར་བྱས་པ་ནི་མ་ཡིན་པ་དེ་བཞིན་དུ་འདིར་ཡང་ངོ༌། །བདུད་བཞི་བཅོམ་པ་དང་ལྡན་པའི་ཕྱིར་བཅོམ་ལྡན་ནོ། །བདུད་དེ་རྣམས་ཀྱང་ལྷའི་བུའི་བདུད་དང་ཉོན་མོངས་པ་དང་འཆི་བདག་དང་ཕུང་པོ་ཞེས་མངོན་པར་བརྗོད་པ་རྣམས་སོ། །ཡང་ན་འདི་ལ་སྐལ་བ་མངའ་བས་སྐལ་ལྡན་ཏེ། སྐལ་པ་ཡང་ཇི་སྐད་དུ། དབང་ཕྱུག་དང་ནི་གཟུགས་བཟང་དང༌། །གྲགས་དང་དཔལ་དང་ཡེ་ཤེས་དང༌། །
བརྩོན་འགྲུས་ཕུན་སུམ་ཚོགས་པ་སྟེ། །དྲུག་པོ་རྣམས་ལ་སྐལ་ཞེས་བྱ། །ཞེས་སོ། །སངས་རྒྱས་ལས་གཞན་ལ་དབང་ཕྱུག་དང་གཟུགས་དང་གྲགས་པ་ལ་སོགས་པ་འདི་དག་ཚང་བར་ཡོད་པ་མ་ཡིན་པ་དེའི་ཕྱིར་སངས་རྒྱས་ཁོ་ན་བཅོམ་ལྡན་འདས་སོ། །ཇི་ལྟར་སངས་རྒྱས་ལས་གཞན་ལ་གྲགས་པ་ལ་སོགས་པ་རྣམས་ཚང་བར་ཡོད་པ་མ་ཡིན་པ་དེ་ལྟར་ལེགས་པའི་ལམ་བསྟན་པ་སོགས་སུ་སློབ་དཔོན་དཔའ་བོ་ལ་སོགས་པ་རྣམས་ཀྱིས་རྒྱ་ཆེར་བཤད་མོད་ཀྱི་འདིར་ནི་གཞུང་མངས་པའི་འཇིགས་པས་མ་བརྗོད་དོ། །གལ་ཏེ་སངས་རྒྱས་ཁོ་ན་བཅོམ་ལྡན་འདས་ཡིན་གྱི། གཞན་མ་ཡིན་ན་ཅིའི་ཕྱིར་སངས་རྒྱས་དང་བཅོམ་ལྡན་འདས་གཉི་ག་སྨོས་ཤེ་ན། གང་གི་ཕྱིར་སངས་རྒྱས་ཀྱི་སྒྲ་ཉེ་བའི་ཚིག་དང་བྲལ་བ་ནི་ཉན་ཐོས་དང་རང་སངས་རྒྱས་དང་ཡང་དག་པར་རྫོགས་པའི་སངས་རྒྱས་དང་གསུམ་ཀ་ལ་འཇུག་པས་དེའི་ཕྱིར་བཅོམ་ལྡན་འདས་ཞེས་སྨོས་སོ། །བཅོམ་ལྡན་འདས་ཀྱི་སྒྲ་ཡང་བདག་ཉིད་མ་སྦྱངས་པ་ཁ་ཅིག་གིས་གཞན་དུ་ཡང་སྦྱར་བས་ན་སངས་རྒྱས་ཞེས་སྨོས་སོ། །ཡང་ན་ཉེ་བའི་ཚིག་མེད་པར་བཅོམ་ལྡན་འདས་ཀྱི་མཚན་ནས་སྨོས་པ་མི་རིགས་པས་གཉི་ག་སྨོས་སོ། །ཀུན་ལ་མུན་པ་གཏན་བཅོམ་ཞིང༌། །ཞེས་བྱ་བ་ལ་མུན་པ་བཅོམ་ཞེས་པ་ནི་ཚིག་གཉིས་པ་འབྲུ་མང་པོ་པའི་སྙིང་པོ་ཅན་ནོ། །ཀུན་ལ་གཏན་ཞེས་པའི་ཉེ་བའི་ཚིག་ནི་བདུན་པའི་དེའི་སྐྱེས་བུའི་བསྡུ་བའོ། །འདི་འབྲུ་མང་པོ་པ་མ་ཡིན་ནོ་ཞེས་ཤེས་པར་བྱ་བའི་ཕྱིར་གསུངས་པ། འདིའི་འམ་འདིས་མུན་པ་བཅོམ་པས་མུན་བཅོམ་མོ། །ཅིའི་ཕྱིར་འདི་འབྲུ་མང་པོ་པར་མི་འདོད་ཅེ་ན། འབྲུ་མང་པོ་ལ་ནིཥྛ་ཞེས་པ་ནིཥྛའི་མཐའ་ཅན་སྔ་མར་ཚིག་ཕྲད་དུ་གྱུར་པ་ལས་ཀུན་ལ་མུན་བཅོམ་ཞེས་པར་འགྱུར་གྱི་མུན་པ་ཀུན་ཞེས་པ་ནི་མ་ཡིན་ནོ། །ཨཱ་ཧི་ཏ་ཨགྣི་ལ་སོགས་པར་གཏོགས་པའི་ཕྱིར་ནིཥྛའི་མཐའ་ཅན་གོང་དུ་འདོན་པའི་ངེས་པ་མེད་དོ། །དེ་ལྟར་ཡང་བཅོམ་པ་དང་མུན་པའི་སྒྲ་དག་དང་ཐམས་ཅད་ཀྱི་སྒྲ་ཐ་དད་པའི་དབང་དུ་བྱས་པའི་ཕྱིར་རོ། །ཐ་དད་པ་མ་ཡིན་པའི་དབང་དུ་བྱས་ན་ཐམས་ཅད་དུ་འབྲུ་མང་པོ་པ་ཐོབ་སྟེ། དེའི་ཕྱིར་ཀུན་ལ་མུན་བཅོམ་ཞེས་པ་བདུན་པ་དེའི་སྐྱེས་བུ་ཉིད་དེ་འདི་ནི་འབྲུ་མང་པོ་པའོ། །གང་གི་ཚེ་འདིའི་མུན་པ་
བཅོམ་ཞེས་དྲུག་པ་ཡིན་པར་ཚིག་རྣམ་པར་སྦྱར་བ་དེའི་ཚེ་བཅོམ་ལྡན་འདས་མུན་པ་འཇོམས་པའི་འབྲེལ་པ་ཅན་ཉིད་དུ་ཉེ་བར་བཟུང་བས་མུན་པ་བཅོམ་པའི་བྱེད་པ་པོ་དང་བྱེད་པ་མ་བསྟན་ལ། གང་གི་ཚེ་འདིས་མུན་པ་བཅོམ་ཞེས་བྱེད་པ་པོའི་མཚན་ཉིད་ཀྱིས་གསུམ་པ་ཡིན་པར་ཚིག་རྣམ་པར་སྦྱར་བ་དེའི་ཚེ་ཡང་བཅོམ་ལྡན་འདས་མུན་པ་འཇོམས་པའི་བྱེད་པ་པོ་ཉིད་དུ་བརྗོད་པར་འདོད་པའི་ཕྱིར་རོ། །གང་གི་འབྲས་བུའམ་བྱེད་པ་གང་གིས་ཞེས་མུན་པ་བཅོམ་པའི་འབྲེལ་ཅན་དང་བྱེད་པ་མི་ཤེས་སོ་ཞེ་ན། ཉེས་པ་འདི་ནི་མེད་དེ། གཞན་འཇོམས་པ་ཕོ་དང་འབྲེལ་པ་ཅན་དུ་མ་བསྟན་པའི་ཕྱིར་དེ་ཉིད་ཀྱི་མུན་པའི་འཇོམས་པ་པོ་དང་འདིས་བདག་ཉིད་ཀྱི་མུན་པ་བཅོམ་མོ་ཞེས་བྱ་བར་ཁོང་དུ་ཆུད་པར་འགྱུར་ཏེ། དེ་ཉིད་ཀྱི་ཕྱིར་ཅི་ནས་ཀྱང་དེ་ཉིད་མུན་པ་འཇོམས་པ་ལ་བྱེད་པ་པོ་ཉིད་དང་འབྲེལ་བ་ཅན་ཉིད་དུ་ཤེས་པར་བྱ་བའི་ཕྱིར་གཉི་ག་ལྟར་ཡང་ཚིག་རྣམ་པར་སྦྱར་རོ། །བྱེད་པ་ནི་གཉེན་པོ་བརྙེས་པ་སྟེ་དེ་ཡོད་ན་མུན་པ་སྤང་བའི་ཕྱིར་རོ། །ཐམས་ཅད་ལ་མུན་པ་བཅོམ་པས་ན་ཀུན་ལ་མུན་བཅོམ་ཞེས་པ་སྟེ། ཚིག་གཉིས་ཀྱི་འབྲུ་མང་པོ་པའི་སྙིང་པོ་ཅན་བདུན་པ་དེའི་སྐྱེས་བུའོ། །གཏན་ཞེས་བྱ་བ་ནི་ཉེ་བའི་ཚིག་ཡིན་གྱི་དེ་དང་ཚིག་བསྡུ་བ་ནི་མ་ཡིན་ཏེ་མི་ཟད་པ་མ་ཡིན་པའི་ཕྱིར་རོ། །འོ་ན་མུན་པ་བཅོམ་པ་ནི་ཚིག་ཕྱི་མ་གཙོ་བོ་ཡིན་པའི་ཕྱིར་མུན་པ་བཅོམ་པ་ཉིད་གཙོ་བོ་མ་ཡིན་ནམ་ཞེ་ན། གཙོ་བོ་ཡང་བྱ་བ་གཞན་དང་འབྲེལ་བར་མཐོང་སྟེ། པ་ཁྲ་མོ་ཁྲིད་ཤོག་ཅེས་པ་བཞིན་ནོ། །དེ་བཞིན་དུ་འདིར་ཡང་ཤེས་བྱ་ཐམས་ཅད་ལ་མུན་པ་བཅོམ་པ་ནི་བཅོམ་ལྡན་འདས་ཉིད་དུ་ཤེས་པར་བྱའོ། །ཡང་ན་དེའི་མུན་པ་བཅོམ་པ་འདི་ལྟ་བུའི་འདོད་པ་མ་ཡིན་ནོ། །འོ་ན་ཅིའི་འདོད་པ་ཡིན་ཞེ་ན། ཤེས་བྱ་ཐམས་ཅད་ལ་བཅོམ་ལྡན་འདས་མུན་པ་བཅོམ་པ་ཉིད་ན། བཅོམ་ལྡན་འདས་ཞེས་བདུན་པ་དེའི་སྐྱེས་བུར་ཡང་མི་སྦྱར་རོ། །འདི་ནི་ངེས་པར་གཙོ་བོ་ཉིད་དང་འབྲེལ་བ་མ་ཡིན་པས་ཡོན་ཏན་དུ་གྱུར་པ་མ་ཡིན་ཏེ། དོན་ལས་འབྲེལ་བ་བསྟན་པའི་ཕྱིར་རོ། །དཔེར་ན། ཁྱོད་གདོང་ཨུཏྤལ་སྔོན་པོའི་འདབ་འདྲའི་མིག །དེ་ཡི་ཟེ་འབྲུ་དང་མཚུངས་དྲི་ལྡན་འདིའི། །ཞེས་སོ། །ཀུན་ལ་མུན་པ་བཅོམ་པ་མི་སྲིད་དོ་ཞེ་ན། མི་སྲིད་པ་ཡང་མ་ཡིན་ཏེ།
སྲིད་པ་ལས་ནི་ཡོན་ཏན་དུ་གྱུར་པ་ལས་མུན་པ་བཅོམ་པ་ཉིད་ཀྱིས་ཡུལ་ཐམས་ཅད་ཤེས་པར་འགྱུར་ཏེ། ཆང་གིས་མ་མྱོས་པ་བཞིན་ནོ། །དཔེར་ན་ཆང་གི་བཏུང་བ་དང་མིག་ཉམས་པ་མིག་ཉམས་བཞིན་ནོ། །མྱོས་པའམ་མི་གཞར་བས་བཏུང་བའི་གཞི་དང་མིག་གི་གཞི་ཤེས་པར་མི་འགྱུར་རོ། །འོ་ན་ཅི་ཞེ་ན་གང་ཞིག་མ་མྱོས་པའམ་མ་ལོང་བ་དེས་ནི་བཏུང་བའི་ཡུལ་དང་མིག་གི་ཡུལ་ཡང་རྣམ་པར་ཤེས་སོ། །དེ་བཞིན་དུ་འདིར་ཡང་བཅོམ་ལྡན་འདས་ཀྱིས་མུན་པ་བཅོམ་པ་ནི་ཡུལ་ཐམས་ཅད་ཤེས་པར་འགྱུར་བས་མཆོག་ཏུ་མུན་པ་བཅོམ་པ་ཉིད་དེ། །དེའི་ཕྱིར་འདི་ནི་ཚིག་གཉིས་པའི་འབྲུ་མང་པོ་པའི་སྙིང་པོ་ཅན་བདུན་པའི་སྐྱེས་བུ་ཞེས་སོ། །དེ་ལ་འབད་པ་ནི་རྣམ་པ་ཐམས་ཅད་དུའོ། །གཏན་ཞེས་བྱ་བ་ནི་དོན་ཉེ་བར་སྟོན་པ་ལྷུར་བྱེད་པ་ཡིན་གྱི་ཚིག་རྣམ་པར་སྦྱར་བ་ལྷུར་བྱེད་པ་ནི་མ་ཡིན་ལ། ཀུན་ལ་མུན་བཅོམ་ཞེས་བྱ་བ་འདི་ནི་ཚིག་རྣམ་པར་སྦྱར་བ་ལྷུར་བྱེད་པ་ཡིན་ནོ། །དེ་ལ་མུན་པའི་རྣམ་པ་ཐམས་ཅད་ནི་ཉོན་མོངས་པ་ཅན་དང་ཉོན་མོངས་པ་མ་ཡིན་པ་རྣམ་པ་གཉིས་དང༌། འདོད་པ་དང་གཟུགས་མེད་པ་ན་སྤྱོད་པའི་དབྱེ་བ་དང་དོན་གྱི་དབྱེ་བས་རྣམ་པ་གསུམ་མམ། སྤོང་བའི་དབྱེ་བས་རྣམ་པ་ལྔའོ། །ཤེས་བྱ་ཐམས་ཅད་ནི་སྐྱེ་མཆེད་བཅུ་གཉིས་རྣམས་ཏེ། མདོ་ལས་བྲམ་ཟེ་ཐམས་ཅད་ཅེས་བྱ་བ་ནི་སྐྱེ་མཆེད་བཅུ་གཉིས་ཀྱི་བར་རྣམས་སོ་ཞེས་གསུངས་པའི་ཕྱིར་རོ། །རྣམ་པ་ལྔ་ནི་གཟུགས་དང་སེམས་དང་སེམས་ལས་བྱུང་བ་དང་ལྡན་པ་མ་ཡིན་པའི་འདུ་བྱེད་དང་འདུས་མ་བྱས་རྣམས་སོ། །རྣམ་པ་གཉིས་ནི་ཟག་པ་དང་བཅས་པ་དང་ཟག་པ་མེད་པའམ། འདུས་བྱས་དང་འདུས་མ་བྱས་སོ། །འཇིག་རྟེན་ན་ཕྱི་རོལ་གྱི་མུན་པ་ནི་བུམ་པ་ལ་སོགས་པའི་གཟུགས་མཐོང་བ་ལ་གེགས་སུ་གྱུར་པའི་ཕྱིར་སྐྱེ་བོ་ལོང་བ་བཞིན་དུ་བྱེད་པས་མུན་པ་ཞེས་གྲགས་ཀྱི། འདིར་ནི་ཡང་དག་པའི་དོན་མཐོང་བའི་གེགས་སུ་གྱུར་པས་འདྲ་བའི་ཕྱིར་མི་ཤེས་པ་ཁོ་ན་མུན་པའོ་ཞེས་བསྟན་པའི་ཕྱིར་མི་ཤེས་པ་ནི་ཡང་དག་པའི་དོན་མཐོང་བ་ལ་གེགས་སུ་གྱུར་པའི་ཕྱིར་མུན་པ་སྟེ་ཞེས་གསུངས་སོ། །ཡང་དག་པའི་དོན་མཐོང་བ་ནི་ཐོས་པ་དང་བསམ་པ་དང་བསྒོམས་པས་བསྡུས་པ་ཕྱིན་ཅི་མ་ལོག་པའི་
དོན་མཐོང་བའོ། །དེ་ལ་གེགས་སུ་གྱུར་པ་ནི་ཡང་དག་པའི་དོན་མཐོང་བ་དེ་ལ་གེགས་སྐྱེད་པའོ། །ཡང་དག་པ་མ་ཡིན་པའི་དོན་མཐོང་བ་ནི་འཇིག་ཚོགས་ལ་ལྟ་བ་ལ་སོགས་པ་སྟེ། དེ་ལ་ནི་གེགས་སུ་གྱུར་པ་མ་ཡིན་ཏེ་མ་རིག་པས་ཕན་བཏགས་པ་ཁོ་ན་ལས་དེ་བྱུང་བའི་ཕྱིར་རོ། །དེ་ཉིད་ཀྱི་ཕྱིར་ཡང་དག་པའི་དོན་མཐོང་བ་སྨོས་པ་ནི་ཁྱད་པར་ཡིན་ནོ་ཞེས་ཁ་ཅིག་གོ །ཟག་པ་མེད་པ་མཐོང་བ་གཙོ་བོར་གྱུར་པའི་ཕྱིར་ཡང་དག་པའི་དོན་མཐོང་བའོ་ཞེས་གཞན་དག་གོ །འདིར་དོན་གཞན་དེ་ཉིད་ཡང་དག་པའི་དོན་དུ་བཞེད་དེ། དེ་ལྟར་ཡང་སངས་རྒྱས་ཀྱི་ཆོས་ཡུལ་དང་དུས་ཤིན་ཏུ་བསྐལ་པ་དང་དོན་རབ་ཏུ་དབྱེ་བ་མཐའ་ཡས་པ་རྣམས་ལ་ཉོན་མོངས་པ་ཅན་མ་ཡིན་པའི་མི་ཤེས་པ་ཡོད་པ་ཉིད་དོ་ཞེས་གསུངས་ཏེ། དེ་བཞིན་གཤེགས་པའི་ཡེ་ཤེས་ཀྱི་མི་མཐུན་ཕྱོགས་སུ་གྱུར་པ་ནི་མ་རིག་པའི་ཞེས་བཞེད་དོ། །ཐོས་པ་ལས་བྱུང་བ་ལ་སོགས་པས་མཐོང་བ་ཡང་དག་པའི་དོན་མཐོང་བ་ཡིན་ཏེ། འདིའི་ཤེས་བྱའི་ཡུལ་ཐམས་ཅད་བསམ་གྱིས་མི་ཁྱབ་པ་ཉིད་དོ། །དེ་དག་ལྷག་མ་མ་ལུས་ཤིང་ཕྱིན་ཅི་མ་ལོག་པ་རང་དང་སྤྱིའི་མཚན་ཉིད་ཀྱི་རྣམ་པ་ཅན་དུ་མཁྱེན་པ་ནི་ཡང་དག་པའི་དོན་མཐོང་བར་བཞེད་དོ་ཞེས་ཤེས་པར་བྱའོ། །གཞན་གྱི་རྣམ་པ་འབའ་ཞིག་ཉིད་ནི་མ་ཡིན་ཏེ། ཉོན་མོངས་པ་དང་ཉོན་མོངས་པ་ཅན་མ་ཡིན་པའི་ཀུན་ཏུ་རྨོངས་པ་སྤོང་བའི་དབང་དུ་བྱས་ནས་ཤེས་བྱ་ཐམས་ཅད་ལ་ཞེས་གསུངས་པའི་ཕྱིར་རོ། །གཉེན་པོ་བརྙེས་པས་ཞེས་བྱ་བ་ལ་མི་མཐུན་པའི་ཕྱོགས་སྤོང་བར་བྱེད་པའི་ཕྱོགས་ནི་གཉེན་པོ་སྟེ། དེ་ཡང་གཅིག་ན་རྡོ་རྗེ་ལྟ་བུའི་ཏིང་ངེ་འཛིན་ཡིན་ཏེ། འདི་ལྟར་རྡོ་རྗེ་ལྟ་བུའི་ཏིང་ངེ་འཛིན་གྱི་མཇུག་ཐོགས་སུ་བཅོམ་ལྡན་འདས་གཉི་གའི་ཆ་ལས་རྣམ་པར་གྲོལ་བ་དང་ཐམས་ཅད་ལ་ཐོགས་པ་མི་མངའ་བའི་ཡེ་ཤེས་ཀྱི་ནུས་པ་མངའ་བར་འགྱུར་རོ་ཞེས་ཟེར་རོ། །དེ་བརྙེས་པ་ནི་མངོན་དུ་གྱུར་པའི་ངོ་བོས་སོ། །དེ་དང་པོར་ཐོབ་པས་སོ་ཞེས་གཞན་དག་གོ །འདི་ནི་བསམ་པར་བྱ་སྟེ། རྡོ་རྗེ་ལྟ་བུ་ཉིད་ཀྱིས་དེ་མ་སྤངས་པའི་ཕྱིར་རོ། །མཐོང་བས་སྤང་བར་བྱ་བ་རྣམས་ལས་སྲིད་པའི་རྩེ་མོ་པ་དང༌། བསྒོམ་པས་སྤང་བར་བྱ་བའི་ཉོན་མོངས་པའི་རྣམ་པ་ཆུད་དུའི་ཆུང་ངུ་ལས་གཞན་
བསྒོམ་པས་སྤང་བར་བྱ་བ་ཐམས་ཅད་ཀྱི་གཉེན་པོ་མ་ཡིན་ཞེས་གཞན་དག་སེམས་ཏེ། རྡོ་རྗེ་ལྟ་བུ་ཁོ་ན་ནི་མ་ཡིན་པར་བཞེད་དོ། །འོ་ན་ཅི་ཞེ་ན། རྡོ་རྗེ་ལྟ་བུའི་ཏིང་ངེ་འཛིན་གྱི་བར་སྤོང་བའི་ལམ་ཐམས་ཅད་ཉིད་དེའི་གཉེན་པོར་བཞེད་དེ། ཟག་པ་མེད་པའི་ཡེ་ཤེས་དང་དེའི་འཕྲིན་ལས་གཉེན་པོ་ཉིད་ཡིན་པའི་ཕྱིར་ཉེ་བ་གཉེན་པོ་ཉིད་དུ་བཟུང་ནས་སོ་ཞེས་གཞན་དག་གོ །གཉེན་པོ་བརྙེས་ནས་བཅོམ་གྱི་ངོ་བོ་ཉིད་འདོད་རྒྱལ་དང་དམ་པ་སྦྱིན་པའི་མཐུས་ནི་མ་ཡིན་ནོ་ཞེས་སྟོན་པར་བྱེད་དོ། །ཤིན་ཏུ་མཐར་ཐུག་པའི་གཉེན་པོ་བརྙེས་ནས་བཅོམ་སྟེ་ཞེས་བྱ་བ་ནི་དེའི་སོ་སོར་བརྟགས་པའི་འགོག་པ་བརྙེས་པ་སྟོན་པར་བྱེད་ལ། ཕྱིས་མི་སྐྱེ་བའི་ཆོས་ཅན་དུ་གྱུར་པའི་ཕྱིར་ཞེས་བྱ་བ་འདིས་ནི་སོ་སོར་བརྟགས་པ་མ་ཡིན་པའི་འགོག་པ་བརྙེས་པ་སྟོན་པར་བྱེད་དེ། དེ་ལྟ་ཡིན་དང་སྟོན་པ་མུན་པ་སྤངས་པ་དང་ཡོངས་སུ་མི་ཉམས་པའི་ཆོས་ཅན་ཉིད་དུ་གསལ་བར་བྱས་པར་འགྱུར་ཏེ་སོ་སོར་བརྟགས་པའི་འགོག་པ་བརྙེས་པའི་ཕྱིར་རོ་ཞེས་གཞན་དག་སེམས་སོ། །གཞན་དེ་བཅོམ་ཞེས་པ་འདི་ཉིད་ཀྱིས་སོ་སོར་བརྟགས་པ་དང་སོ་སོར་བརྟགས་པ་མ་ཡིན་པའི་འགོག་པ་ཐོབ་པ་བཤད་དོ། །སོ་སོར་བརྟགས་པའི་འགོག་པ་འབའ་ཞིག་ཐོབ་པ་ལས་ཤིན་ཏུ་བཅོམ་པས་སླར་སྐྱེ་ཞིང་འབྱུང་བ་མ་ཡིན་པའི་ཕྱིར་རོ། །དེ་བས་ན་འདས་པ་དང་མ་འོངས་པ་དག་ནི་ཉམས་པ་ལས་མི་སྐྱེ་བའི་ཕྱིར་དང་ད་ལྟར་བྱུང་བ་ནི་འགོག་པ་ལ་མངོན་དུ་ཕྱོགས་པའི་ཕྱིར་སྤངས་པ་མེད་དོ་ཞེས་དོགས་པ་བསལ་བའི་ཕྱིར་གསུངས་པ། ཕྱིས་མི་སྐྱེ་བའི་ཆོས་ཅན་དུ་གྱུར་པའི་ཕྱིར་ཞེས་པ་ནི། ཇི་ལྟར་སྔར་ཡོད་པ་མ་ཡིན་པའི་གཉེན་པོ་ཐོབ་པ་སྐྱེད་པར་བྱེད་ལ། དེ་ལྟར་གཉེན་པོ་ཐོབ་པ་ལ་ཕྱིས་མི་སྐྱེ་བ་ཡོད་ཅེས་པ་སྟེ། གཉེན་པོ་ཐོབ་པས་བཅོམ་པ་ཞེས་བརྗོད་པར་བྱའོ། །གཞན་དག་ནི་མི་ཤེས་པའི་རྣམ་པ་འགའ་ཞིག་ལ་དེ་ལ་དམིགས་པའི་ཉོན་མོངས་པ་སྤངས་པས་ཤིན་ཏུ་སྤངས་པ་མཐར་ཕྱིན་པར་སྤངས་པ་ལ་ཡང་ཀུན་ཏུ་སྤྱོད་པ་འབྱུང་བས་ཁྱད་པར་དུ་བྱེད་དོ་ཞེས་སེམས་སོ། །ཕྱིས་མི་སྐྱེ་བའི་ཆོས་ཅན་དུ་གྱུར་པའི་ཕྱིར་བཅོམ་པ་ནི། ཇི་ལྟར་གཞན་རྣམས་ཀྱི་ཡང་དེ་ལ་དམིགས་པའི་ཉོན་མོངས་པ་སྤངས་པ་ཙམ་ལས་ནི་མ་ཡིན་ཞེས་གཞན་དག་ཟེར་རོ། །གཉེན་པོ་བརྙེས་པས་གནས་
ཡོངས་སུ་གྱུར་ཏེ་ཕྱིས་ཤིན་ཏུ་མི་སྐྱེ་བའི་ཆོས་ཅན་དུ་གྱུར་པའི་ཕྱིར་བཅོམ་པ་སྟེ། དེ་ལྟར་ཡང་ཉོན་མོངས་པ་སྐྱེད་པ་དང་འགལ་བའི་སྐྱེ་མཆེད་དྲུག་གི་ལམ་སྐྱེད་པའི་རྐྱེན་དང་ཉོན་མོངས་པ་སྐྱེད་པའི་ས་བོན་གྱི་སྐྱེ་མཆེད་དྲུག་སྐྱེད་པ་ལ་འགལ་བ་ཉིད་དང་སྡུག་བསྔལ་ལ་ཆོས་ཤེས་པའི་བཟོད་པ་མངོན་དུ་གྱུར་པའི་ཕྱིར་དེའི་སྤང་བྱ་ཉོན་མོངས་པ་ལྡོག་པའི་རྒྱུར་གྱུར་པའི་སྐྱེ་མཆེད་དྲུག་སྐྱེད་པར་བྱེད་དོ། །དེ་བཞིན་དུ་རྡོ་རྗེ་ལྟ་བུའི་ཏིང་ངེ་འཛིན་གྱི་བར་མངོན་དུ་གྱུར་པའི་ཕྱིར་ཉོན་མོངས་པ་དང་ཉོན་མོངས་པ་ཅན་མ་ཡིན་པའི་ཀུན་ཏུ་རྨོངས་པའི་ས་བོན་མ་ལུས་པ་ལྡོག་པའི་སྐྱེ་མཆེད་དྲུག་སྐྱེད་པར་བྱེད་དོ། །དེ་སྐྱེས་པས་རྟེན་དང་ས་བོན་མེད་པའི་ཕྱིར་ཕྱིས་ཀུན་ཏུ་རྨོངས་པ་མི་སྐྱེ་བར་བྱེད་དོ། །དེས་ན་ཕྱིས་ཤིན་ཏུ་མི་སྐྱེ་བའི་ཆོས་ཅན་དུ་གྱུར་བའི་ཕྱིར་བཅོམ་པ་ཞེས་བརྗོད་པར་བྱའོ། །དེ་ལ་ཡང་གཉེན་པོ་བརྙེས་པས་ཤིན་ཏུ་མི་སྐྱེ་བའི་ཆོས་ཅན་དུ་གྱུར་པའི་ཕྱིར་བཅོམ་ཞེས་འདི་དང་མངོན་པར་འབྲེལ་པས་འགའ་ཞིག་ནི་མི་ཤེས་པ་ཅུང་ཟད་ཀྱི་གཉེན་པོ་ཐོབ་པས་དེ་ལ་དམིགས་པའི་ཉོན་མོངས་པ་བཅོམ་ཡང་འགའ་ཞིག་གི་ཚེ་ས་བོན་སྐྱེ་བ་ཡོད་པས་བཅོམ་ལྡན་འདས་ནི་གཉེན་པོ་བརྙེས་པས་མི་ཤིས་པ་མ་ལུས་པའི་ས་བོན་དྲུངས་ནས་ཕྱུང་བའི་ཕྱིར་ན་ཕྱིས་ཤིན་ཏུ་མི་སྐྱེ་བའི་ཕྱིར་བཅོམ་ཞེས་སྟོན་པར་བྱེད་དོ། །དེ་ཡང་གང་གིས་ཇི་ལྟར་ཡུལ་གང་དུ་བཅོམ་ཞེ་ན་དེ་བསྟན་པའི་ཕྱིར་ཀུན་ལ་མུན་པ་གཏན་བཅོམ་ཞེས་གསུངས་ཏེ། སངས་རྒྱས་བཅོམ་ལྡན་འདས་འདིས་ནི་ཤེས་བྱ་ཐམས་ཅད་ལ་མུན་པ་གཏན་དུ་བཅོམ་པས་མཁྱེན་ནོ། །གང་གི་ཕྱིར་སངས་རྒྱས་བཅོམ་ལྡན་འདས་འདིས་ཀུན་ལ་མུན་པ་གཏན་དུ་བཅོམ་ཞེ་ན། ཤེས་བྱའི་རྣམ་པ་ཐམས་ཅད་ཀྱི་མུན་པ་མུན་ནག་ནི་གཉེན་པོ་བརྙེས་པས་ཕྱིས་ཤིན་ཏུ་མི་སྐྱེ་བའི་ཆོས་ཅན་དུ་གྱུར་པའི་ཕྱིར་བཅོམ་པའོ། །འདིས་ཀྱང་བཅོམ་ལྡན་འདས་རང་གི་དོན་ཕུལ་དུ་ཕྱིན་པ་དང་ཡེ་ཤེས་ཕུན་སུམ་ཚོགས་པ་དང་སྤངས་པ་ཕུན་སུམ་ཚོགས་པར་ཡང་བཤད་དོ། །དེ་ལ་ཀུན་ལ་མུན་བཅོམ་ཞེས་པས་ཡེ་ཤེས་ཕུན་སུམ་ཚོགས་པ་སྟེ་ཤེས་བྱ་ཐམས་ཅད་མཁྱེན་པ་ལ་གེགས་སུ་གྱུར་པའི་མུན་པ་སྤོང་བའི་ཐབས་བསྟན་པ་དང་བཅོམ་ལྡན་འདས་ཀྱི་མཁྱེན་པ་ཡུལ་ཐམས་ཅད་ལ་མ་ཆགས་མ་ཐོགས་པར་འཆད་པར་བྱེད་དོ། །ཀུན་ལ་
མུན་པ་བཅོམ་ཞེས་པ་འདིས་སྤངས་པ་ཕུན་སུམ་ཚོགས་པ་ཡང་བསྟན་ཏེ་འཇིག་རྟེན་པ་རྣམས་ལ་ཉོན་མོངས་པ་ཅན་གྱི་མི་ཤེས་པ་མ་ལུས་པར་སྤངས་པ་མི་སྲིད་པའི་ཕྱིར་རོ། །སྤངས་པ་ཡང་ཕྱིས་སྐྱེ་བ་སྟེ་ཉན་ཐོས་དང་རང་སངས་རྒྱས་རྣམས་ཉོན་མོངས་པ་ཅན་མ་ཡིན་པའི་མི་ཤེས་པ་ཀུན་ཏུ་སྤྱོད་པའི་ཕྱིར་རོ། །དེ་དག་གི་སྤངས་པ་ནི་སྤངས་པ་ཕུན་སུམ་ཚོགས་པ་མ་ཡིན་ནོ། །དེ་བཞིན་གཤེགས་པ་ཁོ་ནའི་སྤངས་པ་ནི་ཀུན་ཏུ་རྨོངས་པའི་རྣམ་པ་ཐམས་ཅད་ཕྱིས་ཤིན་ཏུ་མི་སྐྱེ་བའི་ཆོས་ཅན་དུ་གྱུར་པའི་ཕྱིར་སྤངས་པ་ཕུན་སུམ་ཚོགས་པར་རྣམ་པར་གཞག་པར་བྱའོ། །གལ་ཏེ་འདོད་ཆགས་ལ་སོགས་པ་དག་ཀྱང་ཤེས་བྱ་ཐམས་ཅད་ལ་ཕྱིས་མི་སྐྱེ་བའི་ཆོས་ཅན་དུ་གྱུར་པའི་ཕྱིར་གཏན་རྣམ་པ་ཐམས་ཅད་དུ་བཅོམ་པ་མ་ཡིན་ན། ཅིའི་ཕྱིར་མི་ཤེས་པ་བཅོམ་པ་ཁོ་ནའི་སྒོ་ནས་བཅོམ་ལྡན་འདས་ལ་བསྟོད་པ་བརྗོད་ཅེ་ན། མི་ཤེས་པ་ནི་གཙོ་བོ་ཡིན་པའི་ཕྱིར་རོ། །གཞན་ཡང་སྟོན་པ་ཉིད་ཕུན་སུམ་ཚོགས་པ་བསྟན་པར་བྱ་བའི་ཕྱིར་རོ། །སྟོན་པ་ཉིད་ཕུན་སུམ་ཚོགས་པ་ཡང་ཐམས་ཅད་ལ་ཐོགས་པ་མེད་པའི་ཡེ་ཤེས་དང་འགྲོ་བ་འཁོར་བའི་འདམ་ནས་འདྲེན་པར་མཛད་པའི་སྦྱོར་བ་སྟེ། གཞན་གྱི་དོན་ལ་རབ་ཏུ་མི་སྦྱོར་བའམ། ཕྱིན་ཅི་ལོག་ཏུ་སྦྱོར་བ་ནི་བསྟན་པ་མ་ཡིན་ནོ། །དེ་ལ་ཤེས་བྱ་ཐམས་ཅད་མཁྱེན་པ་ལ་མི་མཐུན་པའི་ཕྱོགས་སུ་གྱུར་པའི་མུན་པ་བཅོམ་པར་བསྟན་པས་ནི་བཅོམ་ལྡན་འདས་ཐམས་ཅད་ལ་ཐོགས་པ་མེད་པའི་ཡེ་ཤེས་མངའ་བར་རྟོགས་པར་བྱེད་དོ། །གཞན་གྱི་ཉོན་མོངས་པ་བཅོམ་པར་བརྗོད་པ་ནི་མ་ཡིན་པའི་ཕྱིར་དོན་དམ་པ་ལ་རབ་ཏུ་སྦྱོར་བ་ཡང་ཚིགས་སུ་བཅད་པའི་རྐང་པ་གཉིས་པ་དང་རྐང་པ་གསུམ་པས་བསྟན་ཏོ། །ཡང་ན་རང་གི་དོན་ཕུལ་དུ་བྱུང་བའི་མི་མཐུན་པའི་ཕྱོགས་ཀྱི་མུན་པ་བཅོམ་པ་ཉིད་གསུངས་ཀྱི་གཞན་གྱི་ཉོན་མོངས་པ་བཅོམ་པ་ནི་མ་ཡིན་ནོ། །ཡེ་ཤེས་ཕུན་སུམ་ཚོགས་པ་དང་སྤངས་པ་ཕུན་སུམ་ཚོགས་པ་ཡང་སྟོན་པའི་བདག་ལ་ཕན་པ་ཕུལ་དུ་བྱུང་བའོ། །གཞན་གྱི་ཉོན་མོངས་པ་བཅོམ་པ་མ་ཡིན་པའི་ཕྱིར་གཉི་ག་ཡང་འདིས་སྒྲུབ་པར་ནུས་པས་ན་མུན་པ་བཅོམ་པ་ཉིད་བཤད་དོ། །ཡང་ན་ཉོན་མོངས་པ་ཐམས་ཅད་སྤངས་པར་བསྟན་པའི་ཆེད་ཁོ་ནར་གསུངས་པར་འགྱུར་ཏེ། གང་གི་ཕྱིར་མི་ཤེས་པ་ནི་
ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་དང་མཚུངས་པར་ལྡན་ཞིང་ཀུན་ཏུ་རྨོངས་པ་དང་ཅིག་ཤོས་སླར་མི་སྐྱེ་བ་མ་ཡིན་པས་དེ་ལྟར་ཉོན་མོངས་པ་གཞན་དང་ཉོན་མོངས་པ་ཐམས་ཅད་མཚུངས་པར་ལྡན་ནོ། །དེའི་ཕྱིར་མི་ཤེས་པ་སྤངས་པས་ཅིག་ཤོས་ཉོན་མོངས་པ་དང་ཉེ་བའི་ཉོན་མོངས་པ་སྤངས་པ་ནི་མ་བརྗོད་ཀྱང་གྲུབ་པ་ཉིད་དེ་གཉེན་པོ་གཅིག་པའི་ཕྱིར་རོ། །ཡང་ན་ཉན་ཐོས་དང་རང་སངས་རྒྱས་རྣམས་ཀྱིས་ཀྱང་འདོད་ཆགས་ལ་སོགས་པའི་ཉོན་མོངས་པ་བཅོམ་པས་འདོད་ཆགས་ལ་སོགས་པ་ཀུན་ལ་གཏན་བཅོམ་པར་བརྗོད་པ་ཡོད་དོ་ཞེ་ན་མ་ཡིན་ཏེ། དེ་རྣམས་དང་སྟོན་པ་ལ་ཁྱད་པར་བརྗོད་པས་སྟོན་པ་དང་དེ་རྣམས་མུན་པ་བཅོམ་པར་མཚུངས་པ་མ་ཡིན་ཏེ། །ཉན་ཐོས་དང་རང་སངས་རྒྱས་རྣམས་ལ་ཉོན་མོངས་པ་ཅན་མ་ཡིན་པའི་མི་ཤེས་པ་ཡོད་པའི་ཕྱིར་རོ། །ཀུན་ལ་མུན་པ་གཏན་བཅོམ་ཞེས་གཉིས་མངོན་པར་བརྗོད་པའི་དོན་ཅི་ཡིན་ཞེ་ན། གཞན་དུ་བརྗོད་ན་བཅོམ་ལྡན་འདས་དང་གཞན་རྣམས་ལ་ཁྱད་པར་མ་བཤད་པར་འགྱུར་བས་སོ། །དེ་ལྟར་ཡང་ཅི་སྟེ་མུན་པ་ཀུན་བཅོམ་ཞེས་བརྗོད་ན། དེ་ལྟ་ན་ཉན་ཐོས་ལ་སོགས་པ་རྣམས་ལ་ཡང་ཐལ་བར་འགྱུར་རོ། །དེ་རྣམས་ཀྱིས་ཀྱང་ཉོན་མོངས་པ་ཅན་གྱི་མི་ཤེས་པ་སྤངས་པའི་ཕྱིར་རོ། །གལ་ཏེ་མུན་པ་གཏན་བཅོམ་ཞེས་བརྗོད་ན། དེ་ལྟ་ན་སངས་རྒྱས་ཀྱི་ཆོས་ཤིན་ཏུ་བསྐལ་བའི་ཡུལ་དང་དུས་དང་རབ་ཏུ་དབྱེ་བ་དཔག་ཏུ་མེད་པ་རྣམས་ལ་ཉོན་མོངས་པ་ཅན་མ་ཡིན་པའི་ཀུན་ཏུ་རྨོངས་པ་དང་མ་བྲལ་བའི་ཕྱིར་ཉན་ཐོས་ལ་སོགས་པ་རྣམས་ཀྱང་མུན་པ་ཀུན་བཅོམ་པ་ཉིད་དུ་ཐལ་ལོ། །དེའི་ཕྱིར་དེ་དག་རྣམ་པར་གཅད་པའི་ཕྱིར་གཉི་ག་བརྗོད་དོ། །ཡང་ན་སྟོན་པ་ལས་གཞན་ལ་ཀུན་ཏུ་རྨོངས་པ་གཏན་སྤངས་པ་མི་སྲིད་པས་དེ་བཞིན་ནོ། །འོ་ན་མུན་པ་གཏན་བཅོམ་ཞེས་བརྗོད་ན་སྟོན་པའི་སྤངས་པ་ཕུན་སུམ་ཚོགས་པ་ཁོ་ན་ཕན་པར་འགྱུར་གྱི་ཡེ་ཤེས་ཕུན་སུམ་ཚོགས་པ་ནི་མ་ཡིན་ནོ་ཞེ་ན། སྤངས་པ་ཕུན་སུམ་ཚོགས་པ་ཉིད་ཀྱིས་ཡེ་ཤེས་ཕུན་སུམ་ཚོགས་པ་རྟོགས་པར་འགྱུར་བ་མ་ཡིན་ནམ། ཏང་བི་ནཱ་བྷཱ་བི་ཏྭཱཏ། ཡ་རྒྱ་སྱེ་ཏ་དེ་བ་ཏ་ཐླ་བི་ཡ་བྱཱ་བྷཱ་བླ་དླ་བྱེ་བཱ་པྲ་ཧཱ་ཎཱཊ། བྱང་ཆུབ་ཀྱི་བར་དུ་བདག་ལ་ཕན་པ་ཕུན་སུམ་
ཚོགས་པ་ཉིད་ཀྱིས་ཡེ་ཤེས་ཕུན་སུམ་ཚོགས་པ་བསྒྲུབས་པས་དེའི་གཉེན་པོ་བརྙེས་པས་དེའི་ངོ་བོའམ་དེ་སྤང་བའི་ཕྱིར། སྟོན་པའི་སྤངས་པ་དང་ཡེ་ཤེས་ཁྱད་པར་འཕགས་པ་ནི་རང་ལ་ཕན་པ་སྒྲུབ་པ་ཕུན་སུམ་ཚོགས་པ་འབྱུང་བའི་རང་བཞིན་དུ་བསྟན་པར་འགྱུར་རོ། །འོ་ན་ཉན་ཐོས་ལ་སོགས་པ་རྣམས་ལ་ཡང་ཤེས་བྱ་ཐམས་ཅད་ལ་ཉོན་མོངས་པ་དང་ཉོན་མོངས་པ་ཅན་མ་ཡིན་པའི་ཀུན་ཏུ་རྨོངས་པ་སྤངས་པ་ཡོད་པ་མ་ཡིན་ནམ་ཞེ་ན། གང་གི་ཕྱིར་སྤངས་པ་འགའ་ཞིག་གི་རྣམ་པས་དེ་རྣམས་མི་སློབ་པ་ཉིད་ཁོ་ནར་འགྱུར་བ་ཡིན་ནོ། །གལ་ཏེ་དེ་ཉིད་འདིར་ཀུན་ཏུ་སྤྱོད་པ་སྤངས་པར་འདོད་ཀྱི་དེ་ལ་དམིགས་པའི་ཉོན་མོངས་པ་སྤངས་པ་ནི་འཆད་པར་འདོད་པ་མ་ཡིན་ཏེ་ཉན་ཐོས་ལ་སོགས་པ་རྣམས་དང་མཚུངས་པའི་ཕྱིར་རོ། །ཉན་ཐོས་ལ་སོགས་པ་ལ་ཡང་ཤེས་བྱ་ཐམས་ཅད་ལ་ཉོན་མོངས་པ་ཅན་གྱི་ཡིད་ཕྱིས་ཤིན་ཏུ་མི་སྐྱེ་བའི་ཆོས་ཅན་དུ་གྱུར་པའི་ཕྱིར། ཀུན་ཏུ་སྤྱོད་པ་སྤངས་པ་ཡོད་པ་མ་ཡིན་ནམ་ཞེ་ན། དེའི་ཕྱིར་ཉན་ཐོས་དང་རང་སངས་རྒྱས་ལ་སོགས་པ་རྣམས་ལ་ཡང་མུན་པ་ཀུན་བཅོམ་པ་ནི་འདོད་ཀྱི་ཞེས་གསུངས་ཏེ་ཡང་དག་པའི་གདམས་ངག་གི་འབྲས་བུ་སྒྲོག་པར་བྱེད་པས་ན་ཉན་ཐོས་སོ། །བདག་ཉིད་གཅིག་པུ་སོ་སོར་སངས་རྒྱས་པས་ན་རང་སངས་རྒྱས་རྣམས་ཏེ། དེ་དག་ནི་བདག་ཉིད་གཅིག་པུ་འདུལ་བར་བྱེད་ཀྱི་གཞན་ནི་མ་ཡིན་ནོ། །འདོད་མོད་ཀྱི་ཞེས་བྱ་བ་ནི་ཁས་བླངས་ནས་ལན་བརྗོད་པར་འདོད་པས་ཡིན་མོད་ཀྱི་ཞེས་བྱ་བའི་དོན་ཏོ། །ཉོན་མོངས་པ་ཅན་གྱི་ཀུན་ཏུ་རྨོངས་པ་དང་བྲལ་བའི་ཕྱིར་ཞེས་བྱ་བས་ནི་ཀུན་ལ་མུན་པ་བཅོམ་པ་སྟོན་པར་བྱེད་དོ། །གལ་ཏེ་ཉན་ཐོས་ལ་སོགས་པ་རྣམས་ཐམས་ཅད་དུ་ཉོན་མོངས་པ་ཅན་གྱི་ཀུན་ཏུ་རྨོངས་པ་དང་གཏན་བྲལ་བར་མི་འགྱུར་ན་ཉོན་མོངས་པ་དང་ལས་དང་སྐྱེ་བའི་ཀུན་ནས་ཉོན་མོངས་པ་དང་བྲལ་བར་མི་འགྱུར་ཏེ། ཉོན་མོངས་པ་དང་ལས་དང་སྐྱེ་བའི་ཀུན་ནས་ཉོན་མོངས་པ་རྣམས་ནི་ཉོན་མོངས་པ་ཅན་གྱིས་ཀུན་ཏུ་རྨོངས་པའི་རྒྱུ་ཅན་ཡིན་པའི་ཕྱིར་རོ། །ཡང་ཅི་ལྟར་ཉོན་མོངས་པ་ཅན་མ་ཡིན་པའི་མི་ཤེས་པ་ཡོད་པས་ཉན་ཐོས་དང་རང་སངས་རྒྱས་རྣམས་ལ་ཀུན་ནས་ཉོན་མོངས་པ་གསུམ་ལྡོག་པར་འགྱུར་ཞེ་ན། ཉོན་མོངས་པ་ཅན་ཉིད་ཀུན་ནས་ཉོན་མོངས་པའི་
རྒྱུ་ཡིན་པའི་ཕྱིར་རོ། །གང་གི་ཕྱིར་ཉོན་མོངས་པ་ཅན་ཉིད་ཁོ་ན་བདེན་པའི་དོན་མཐོང་བའི་མི་མཐུན་པའི་ཕྱོགས་སུ་གྱུར་པའི་ཕྱིར་ཀུན་ནས་ཉོན་མོངས་པའི་རྒྱུའོ། །ཉོན་མོངས་པ་ཅན་མ་ཡིན་པ་ནི་བདེན་པའི་དོན་མཐོང་བའི་མི་མཐུན་པའི་ཕྱོགས་མ་ཡིན་པས་དེ་ནི་སངས་རྒྱས་ཀྱི་ཆོས་ལ་སོགས་པ་མཁྱེན་པའི་མི་མཐུན་པའི་ཕྱོགས་ཉིད་དེ། བདེན་པའི་དོན་མཐོང་བ་ལས་གཞན་དུ་ཡེ་ཤེས་འཇུག་པའི་གེགས་སུ་གྱུར་པའི་ཕྱིར་དེ་ནི་སངས་རྒྱས་རྣམས་ཁོ་ནའི་སྒྲིབ་པ་བརྗོད་པར་བྱའི་ཉན་ཐོས་དང་རང་སངས་རྒྱས་རྣམས་ཀྱི་མ་ཡིན་ནོ། །ཉན་ཐོས་དང་རང་སངས་རྒྱས་ཀྱི་ནི་ཉོན་མོངས་པ་ཅན་ཁོ་ན་ཡེ་ཤེས་ལ་སྒྲིབ་པའོ། །གཏན་ནས་ནི་མ་ཡིན་ཏེ་ཞེས་པ་ཅི་ཞེ་ན། མུན་པ་བཅོམ་པ་ཞེས་བྱ་བ་དང་སྦྱར་ཏེ། སྐབས་སུ་བབ་པའི་ཕྱིར་རོ། །འདི་ལྟར་དེ་དག་ལ་ཞེས་རྒྱས་པར་བརྗོད་པ་དེའི་ཚེ། ཧ་ཞེས་པ་གང་གི་ཕྱིར་ཞེས་བྱ་བའི་ཐ་ཚིག་གོ །སངས་རྒྱས་ཀྱི་ཆོས་རྣམས་ལ་ཞེས་བྱ་བ་ལ། སངས་རྒྱས་ཀྱི་ཆོས་ནི་སྟོབས་དང་མི་འཇིགས་པ་ལ་སོགས་པ་རྣམས་ཏེ། དེ་དག་ནི་ཐམས་ཅད་མཁྱེན་པ་མ་ཡིན་པའི་ཤེས་པའི་ཡུལ་ལས་འདས་པས་དེ་ལ་ཐམས་ཅད་མཁྱེན་པ་ལས་གཞན་པ་རྣམས་ཀྱི་ཤེས་པ་མི་འཇུག་གོ །དེ་ཉིད་ཀྱི་ཕྱིར་ཐོགས་བ་མེད་པའི་དོན་གྱིས་ཐམས་ཅད་མཁྱེན་པ་རྣམས་ཁོ་ན་ཡེ་ཤེས་ཀྱི་སྟོབས་ཅན་དུ་བརྗོད་པར་བྱའི་གཞན་རྣམས་ནི་མ་ཡིན་ནོ། །གཞན་དུ་ན་ཉན་ཐོས་དང་རང་སངས་རྒྱས་རྣམས་ལས་ཁྱད་པར་འཕགས་པ་ཉིད་དུ་ཡང་མི་འགྱུར་རོ། །མདོ་ལས་ཀྱང་ཤཱ་རིའི་བུ་ཁྱོད་ཀྱིས་དེ་བཞིན་གཤེགས་པའི་ཚུལ་ཁྲིམས་ཀྱི་ཕུང་པོ་དང་ཏིང་ངེ་འཛིན་གྱི་ཕུང་པོ་དང་རྣམ་པར་གྲོལ་བའི་ཕུང་པོ་དང་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཤེས་སམ་ཞེས་དྲིས་པ་དང༌། གསོལ་པ། བཅོམ་ལྡན་འདས་མ་ལགས་སོ་ཞེས་གསུངས་ཏེ། དེའི་ཕྱིར་སངས་རྒྱས་ཀྱི་ཆོས་རྣམས་ལ་སངས་རྒྱས་ལས་གཞན་པའི་ཤེས་པ་མི་འཇུག་གོ །དེའི་ཕྱིར་ཉན་ཐོས་ལ་སོགས་པ་རྣམས་ལ་སངས་རྒྱས་ཀྱི་ཆོས་ཀྱི་ཡུལ་ལ་ཉོན་མོངས་པ་ཅན་མ་ཡིན་པའི་མི་ཤེས་པ་ཡོད་དོ་ཞེས་བྱ་བར་གསུངས་སོ། །ཡུལ་དང་དུས་ཤིན་ཏུ་བསྐལ་པ་དང་དོན་ཞེས་བྱ་བ་ལ་
ཡུལ་ཤིན་ཏུ་བསྐལ་པ་ནི་འཇིག་རྟེན་གྱི་ཁམས་བརྒྱ་སྟོང་ཕྲག་དུ་མས་ཆོད་པའི་གཞིའི་ཡུལ་རྣམས་སོ། །འོ་ན་རྣམ་པར་རིག་བྱེད་མ་ཡིན་པ་གཟུགས་ཅན་མ་ཡིན་པའི་ཆོས་རྣམས་ཡུལ་ན་མི་གནས་པ་ཉིད་ཀྱིས་ཅི་ལྟར་ན་དེ་དག་ཡུལ་གྱིས་བསྐལ་ཞེ་ན། དེ་བསྐྱེད་པའི་རྟེན་གྱི་ཡུལ་བསྐལ་པའི་ཕྱིར་དེ་དག་ཀྱང་ཡུལ་གྱི་བསྐལ་པར་བརྗོད་པར་བྱའོ། །དགྲ་བཅོམ་བསེ་རུ་སྟོན་རྣམས་ཀྱིས། །སྟོང་གཉིས་གསུམ་པ་གྲངས་མེད་མཐོང༌། །ཞེས་གསུངས་པའི་ཕྱིར་ཡུལ་ཤིན་ཏུ་བསྐལ་པའི་དོན་རྣམས་ལ་ཉན་ཐོས་དང་རང་སངས་རྒྱས་རྣམས་ཀྱི་ཤེས་པ་མི་འཇུག་སྟེ། གནས་བརྟན་མཽངྒལ་གྱི་བུས་རང་གི་མ་སྐྱེས་པའི་ཡུལ་ཡོངས་སུ་མ་ཤེས་པ་དཔེར་བརྗོད་པར་བྱའོ། །དུས་ཤིན་ཏུ་བསྐལ་པ་ནི་འདས་པ་དང་མ་འོངས་པའི་བསྐལ་པ་དུ་མས་ཆོད་པ་རྣམས་ཏེ། དེ་ལ་ཡང་དེ་རྣམས་ཀྱི་ཤེས་པ་ཐོགས་པ་ཁོ་ན་སྟེ། གང་གི་དབང་དུ་མཛད་ནས་བཅོམ་ལྡན་འདས་ཀྱིས། ང་ཡིས་འདི་ཡི་ཐར་པ་ཡི། །ས་བོན་ཤིན་ཏུ་ཕྲ་བ་ཡང༌། །ཚོན་དང་རྡོ་ཡི་གསེང་ན་གསེར། །བག་ལ་ཞ་བ་ལྟ་བུར་གཟིགས། །ཞེས་གསུངས་ཏེ། གནས་བརྟན་ཤཱ་རིའི་བུས་རབ་ཏུ་འབྱུང་བར་འོས་པའི་སྐྱེས་བུ་ཕྱིར་བཏང་བ་དཔེར་བརྗོད་པར་བྱའོ། །བཅོམ་ལྡན་འདས་ཀྱི་སངས་རྒྱས་ཀྱི་ཆོས་ཡུལ་དང་དུས་ཤིན་ཏུ་བསྐལ་པ་རབ་ཏུ་དབྱེ་བ་མཐའ་ཡས་པ་སྟེ། ཁམས་དང་ས་དང་འགྲོ་བ་དང་སྐྱེ་གནས་དང་རིགས་དང་ཉོན་མོངས་པ་དང་ཉོན་མོངས་པ་ཅན་མ་ཡིན་པ་སྤངས་པ་ལ་སོགས་པས་ཕྱེ་བ་རབ་ཏུ་དབྱེ་བ་མཐའ་ཡས་པ་རྣམས་ལ་ཉན་ཐོས་དང་རང་སངས་རྒྱས་རྣམས་ལ་ཉོན་མོངས་པ་ཅན་མ་ཡིན་པའི་མི་ཤེས་པ་ཡོད་པ་ཉིད་དོ། །ཡང༌། རྨ་བྱའི་མདོངས་ནི་གཅིག་པུ་ལ། །རྒྱུ་ཡི་རྣམ་པ་ཐམས་ཅད་དག །ཀུན་མཁྱེན་མིན་པའི་ཤེས་བྱ་མིན། །དེ་ཤེས་ཀུན་མཁྱེན་སྟོབས་ཡིན་ནོ། །ཞེས་གསུངས་སོ། །དངོས་པོའི་རང་བཞིན་ཤེས་པ་ལ་ཐོགས་པ་ནི་དེའི་རབ་ཏུ་དབྱེ་བ་ཤེས་པ་ལ་འོ། །སངས་རྒྱས་ཀྱི་ཆོས་ཡུལ་དང་དུས་ཤིན་ཏུ་བསྐལ་པ་དང་དོན་རྣམས་ལ་ཞེས་པ་ནི་དངོས་པོའི་རང་བཞིན་ཉིད་དོ། །ཉན་ཐོས་ལ་སོགས་པ་རྣམས་ལ་ཉོན་མོངས་པ་ཅན་མ་ཡིན་པའི་མི་ཤེས་པ་ཡོད་པས་ཞེས་པ་ནི་སངས་རྒྱས་ཀྱི་
ཆོས་ལ་སོགས་པའི་རབ་ཏུ་དབྱེ་བ་མཐའ་ཡས་པ་རྣམས་ལ་ཆགས་ཤིང་ཐོགས་པ་དང་འབྲེལ་བའོ། །དེ་ལ་རབ་ཏུ་དབྱེ་བ་ཤེས་པ་ཆགས་པ་མེད་པ་ནི་སངས་རྒྱས་ཀྱི་ཆོས་རྣམས་ཀྱི་རང་བཞིན་ཁོང་དུ་ཆུད་པ་སྟེ། དེའི་རབ་ཏུ་དབྱེ་བ་རྣམས་ཁོང་དུ་ཆུད་པའི་ངོ་བོར་བཤད་པའི་ཕྱིར་རོ། །གཞན་དུ་སངས་རྒྱས་ཀྱི་ཆོས་ཡུལ་དང་དུས་ཆོས་ཉེ་བ་ཉིད་ཀྱི་དོན་ཏེ་རབ་ཏུ་དབྱེ་བ་མཐའ་ཡས་པ་ཞེས་པ་དང་ཡང་སྦྱར་རོ། །དེ་ལྟར་ན་འདིར་ཉན་ཐོས་ལ་སོགས་པ་རྣམས་ཀྱིས་མི་ཤེས་པའི་རྒྱུ་རྣམ་པ་བཞི་བཤད་པར་འགྱུར་ཏེ། ཤེས་བྱ་རིང་བ་ཉིད་དང་ཡུལ་རིང་བ་ཉིད་དང་དུས་རིང་བ་ཉིད་དང་རབ་ཏུ་དབྱེ་བ་རིང་བ་ཉིད་དོ། །དེ་ཉིད་ཀྱི་ཕྱིར། ཤེས་བྱ་ཡུལ་དང་རབ་དབྱེ་དང༌། །དུས་ནི་རིང་བ་ཉིད་དང་ཡང༌། །རིང་བ་ཉིད་བཞིར་རབ་བཤད་པ། །རྫོགས་སངས་རྒྱས་ཀྱིས་རབ་ཏུ་མཁྱེན། །ཞེས་བཤད་དོ། །གང་གི་ཕྱིར་དེ་ལྟར་ཉན་ཐོས་ལ་སོགས་པ་རྣམས་ལ་ནི་སངས་རྒྱས་ཀྱི་ཆོས་ལ་སོགས་པ་རྣམས་ལ་ཉོན་མོངས་པ་ཅན་མ་ཡིན་པའི་མི་ཤེས་པ་ཡོད་པ་ཉིད་ཡིན་པ་དང་ཡེ་ཤེས་དེའི་གེགས་ཙམ་བྱེད་པ་དེའི་ཕྱིར་དེ་དག་ཀུན་ལ་མུན་པ་གཏན་བཅོམ་པ་ཡིན་ནོ། །ཡང་ཅིའི་ཕྱིར་འདིར་ཀུན་ཏུ་རྨོངས་བའི་དངོས་པོ་རྣམ་པ་དུ་མ་བསྟན་ཅེ་ན། རྣམ་པ་གཅིག་བསྟན་པས་ཀྱང་ཉན་ཐོས་ལ་སོགས་པ་རྣམས་ཀྱི་མུན་པ་བཅོམ་པ་གཏན་དུ་མ་ཡིན་པ་རྟོགས་པར་འགྱུར། ཡང་དེ་ལས་བཟློག་པས་སངས་རྒྱས་བཅོམ་ལྡན་འདས་ཀྱིས་ཉོན་མོངས་པ་ཅན་གྱི་ཀུན་ཏུ་རྨོངས་པ་ཐམས་ཅད་དུ་སྤངས་པ་བསྟན་པའི་ཕྱིར་རྣམ་པ་དུ་མ་བསྟན་པས་ཤིན་ཏུ་གསལ་བར་ཤེས་པར་འགྱུར་བས་ན་འདི་ལ་སྐྱོན་ཡོད་པ་མ་ཡིན་ཏེ། མདོ་སྡེའི་སྟོབས་དང་སྟོབས་མ་ཡིན་པ་བསམས་ཏེ་བཤད་ཅིང་དོན་བསྡུས་ནས་རྣམ་པར་འགྲེལ་པ་ལ་འཇུག་པའི་ཕྱིར་རོ། །དེ་ལྟར་བདག་ལ་ཕན་པ་བསྒྲུབ་པ་ཕུན་སུམ་ཚོགས་པས་ཡང་དག་པར་བསྟན་ནས་ཞེས་བྱ་བ་ལ་དེ་ལྟར་བྱེད་པ་ནི་ཇི་སྐད་བཤད་པའི་བསྟོད་པའི་རྣམ་པ་བསྟན་པར་བྱ་བའི་ཕྱིར་རོ། །བདག་ཅེས་བྱ་བ་ནི་ངའོ་སྙམ་པའི་ང་རྒྱལ་སྐྱེད་པ་ཕུང་པོའི་རྒྱུད་དོ། །བདག་ལ་ཕན་པའི་ཕྱིར་བསྒྲུབ་པ་ནི་བདག་ལ་ཕན་པ་སྒྲུབ་བའོ། །གང་ལས་བདག་ལ་ཕན་པ་འཐོབ་པའི་བདག་ལ་
ཕན་པ་ཡང་འདིར་ཐམས་ཅད་ཤེས་པ་ཉིད་ལ་མངོན་པར་འདོད་ལ། དེ་ཡང་མུན་པ་བཅོམ་པ་ལས་འཐོབ་བའི་ཕྱིར་མུན་པ་བཅོམ་པ་ནི་འདིར་བདག་ལ་ཕན་པ་སྒྲུབ་པའོ། །དེའི་ཕུན་སུམ་ཚོགས་པ་ནི་ཐམས་ཅད་ལ་རྣམ་པ་ཐམས་ཅད་དུ་སྤངས་པའོ། །ཡང་ན་བདག་ལ་ཕན་པ་ནི་ཀུན་ཏུ་རྨོངས་པ་སྤངས་པ་སྟེ། དེ་ཡང་འདོད་རྒྱལ་ལམ་དམ་པ་སྦྱིན་པའི་མཐུས་ནི་མ་ཡིན་ནོ། །འོ་ན་ཅི་ཞེ་ན་གཉེན་པོ་བརྙེས་པས་སོ། །གཉེན་པོ་བརྙེས་པས་བདག་ལ་ཕན་པ་སྒྲུབ་པ་དེ་ནི་ཡུལ་ཐམས་ཅད་རྣམ་པ་ཐམས་ཅད་དུ་མི་ཤེས་པའི་གཉེན་པོ་ཕུན་སུམ་ཚོགས་པ་ཉིད་དོ། །ཡང་ན་བདག་ལ་ཕན་པའི་ཕྱིར་བསྒྲུབ་པ་ནི་བདག་ལ་ཕན་པ་སྒྲུབ་པ་སྟེ། བྱང་ཆུབ་ཏུ་སེམས་བསྐྱེད་པ་ནས་བཟུང་སྟེ། རྡོ་རྗེ་ལྟ་བུའི་ཏིང་ངེ་འཛིན་གྱི་བར་བྱང་ཆུབ་སེམས་དཔའི་ལམ་ཐམས་ཅད་ཉིད་དོ། །དེའི་འབྲས་བུ་ཕུན་སུམ་ཚོགས་པ་གྲུབ་པ་ནི་བཤད་མ་ཐག་པའི་ཡེ་ཤེས་ཕུན་སུམ་ཚོགས་པ་དང་སྤངས་པ་ཕུན་སུམ་ཚོགས་པའོ། །དེས་ན་བདག་ལ་ཕན་པ་སྒྲུབ་པ་ཕུན་སུམ་ཚོགས་པས་ཡང་དག་པར་བསྟོད་ནས་ཞེས་པ་གཏན་ཚིགས་ལ་གསུམ་པའོ། །ཡོན་ཏན་ཕུལ་དུ་བྱུང་བ་བརྗོད་པ་ནི་བསྟོད་པ་སྟེ། བསྟོད་པ་ནི་ཡོན་ཏན་ཕུན་སུམ་ཚོགས་པའི་གཏན་ཚིགས་སམ་རྒྱུའོ། །ཡང་ན་བདག་ལ་ཕན་པ་ནི་བླ་ན་མེད་པའི་ཡེ་ཤེས་དང་སྤངས་པ་སྟེ། དེ་སྒྲུབ་པ་ནི་དེ་རྟོགས་པ་དང་དེ་ཐོབ་པའི་བྱེད་པ་སྟེ། བླ་ན་མེད་པའི་ཡེ་ཤེས་དང་སྤངས་པ་ཕུན་སུམ་ཚོགས་ཤིང་རབ་ཏུ་གྱུར་པ་ཐོབ་པར་བྱེད་པའོ། །གལ་ཏེ་བྱང་ཆུབ་སེམས་དཔའ་རྣམས་ཀྱི་སྦྱོར་བ་དང་འབྲས་བུ་ཐམས་ཅད་ཀྱང་གཞན་གྱི་དོན་ཉིད་ཡིན་ཏེ། ཇི་སྐད་དུ། ཁྱོད་ཀྱི་བསོད་ནམས་བསོད་ནམས་འབྲས་བུ་གང་ལགས་ཀུན། །གཞན་གྱི་དོན་ཏེ་བདག་ཕྱིར་མིན་ཞེས་གསུངས་པ་མ་ཡིན་ནམ། དེའི་ཕྱིར་ཇི་ལྟར་ན་བདག་ལ་ཕན་པ་སྒྲུབ་པར་བརྗོད་ཅེ་ན། བྱང་ཆུབ་སེམས་དཔའ་རྣམས་ཀྱིས་གཞན་ལ་ཕན་པའི་ཕྱིར་བསྒྲུབ་པའི་ཕན་ཡོན་དང་འབྲས་བུ་ནི་བདག་ལ་ཕན་པའི་འབྲས་བུ་ཉིད་ཡིན་པའི་ཕྱིར་བདག་ལ་ཕན་པའི་སྒྲུབ་པ་ཞེས་བརྗོད་པས་འདི་ལ་ཉེས་བ་མེད་དོ། །ཇི་སྐད་དུ། གང་འདིར་ཤེས་རབ་ཡོན་ཏན་གཙོ་བོར་གཞན་གྱི་དབང་བཟུང་ནས། །བཅོམ་ལྡན་འགྲོ་བར་འཕྲིན་ལས་བསོད་ནམས་འབྲས་བུ་མི་
ཟད་པ། །ཉེ་བར་བཟུང་བ་དེ་རྣམས་གཞན་དུ་གྱུར་ལས་བཅོམ་ལྡན་གྱི། །འགྲོ་ལ་ཡོངས་སུ་བསྔོ་བ་འདི་ནི་དོན་མེད་གྱུར་མ་ལགས། །དེའི་ཕྱིར་ཇི་ལྟར་འགོད་པ་ཉིད་ལ་རག་གོ །ཡང་བཅོམ་ལྡན་འདས་དེ་ཉིད་ལ་ཞེས་བྱ་བ་ལ། ཡང་གི་སྒྲ་ནི་བཅོམ་ལྡན་འདས་དེ་ཉིད་ལ་རྣམ་པ་གཞན་གྱི་སྒོ་ནས་བསྟོད་པ་བརྗོད་པ་མཚོན་པར་བྱེད་བའོ། །གཞན་ལ་ཕན་པ་སྒྲུབ་བ་ཕུན་སུམ་ཚོགས་པས་བསྟོད་པ་ནི་ཞེས་གཞན་ལ་ཕན་པའི་ཕྱིར་བསྒྲུབ་པ་ནི་གཞན་ལ་ཕན་པའོ། །དེ་ཡང་སེམས་ཅན་རྣམས་མྱ་ངན་ལས་འདས་པའི་ས་ལ་འགོད་པར་བྱེད་པ་སྟེ། འཁོར་བའི་འདམ་ལས་འགྲོ་བ་དྲངས་མཛད་པ། །ཞེས་གང་གསུངས་པའོ། །གཞན་དག་ཕན་པ་ལ་སྦྱོར་བ་ནི་གཞན་ལ་ཕན་པའི་སྒྲུབ་པའོ། །དེའི་ཕུན་སུམ་ཚོགས་པ་ནི་འགྲོ་བ་ལ་བླ་ན་མེད་པའི་དོན་སྒྲུབ་པར་མཛད་པའོ། །འཁོར་བ་ནི་འགྲོ་བ་ཀུན་ཏུ་ཆགས་པའི་གནས་ཡིན་པའི་ཕྱིར་དང་བརྒལ་བར་དཀའ་བའི་ཕྱིར་འདམ་ལྟ་བུ་ཡིན་ཏེ་ཞེས་བྱ་བ་ལ། འདི་དག་གིས་སམ་འདིར་འགྲོ་བ་དག་འཁོར་བས་ན་འཁོར་བ་སྟེ་ཉེ་བར་ལེན་པའི་ཕུང་པོ་ལྔ་འགྲོ་བ་ལྔ་པོའོ། །ཀུན་ནས་ཆགས་པས་ཀུན་ཏུ་ཆགས་པའམ། འདིས་ཆགས་པར་བྱེད་པས་ཀུན་ཏུ་ཆགས་པ་སྟེ། བདག་དང་བདག་གི་པའི་སྲིད་པའི་གཞིའི་ངོ་བོའི་ཕྱིར་འགྲོ་བ་ཀུན་ཏུ་ཆགས་པའི་གནས་ཡིན་ལ། བདག་དང་བདག་གིར་ལྟ་བའི་གནས་ཡིན་བས་ན་བརྒལ་བར་དཀའ་པ་སྟེ། འཇིག་ཚོགས་ལ་ལྟ་བའི་དབང་གིས་འགོག་པ་ལ་སྐྲག་པས་དེ་ལས་མི་བརྒལ་པའི་ཕྱིར་རོ། །ཀུན་ཏུ་ཆགས་པའི་གནས་ཡིན་པ་དང་བརྒལ་བར་དཀའ་བ་དག་གིས་ན་འཁོར་བ་ནི་འདམ་ལྟ་བུ་སྟེ་འདམ་དང་འདྲའོ། །ཡང་ན་འཁོར་བ་ནས་ཐོག་མ་དང་ཐ་མ་མེད་བ་ནས་ཀུན་ཏུ་བརྒྱུག་ཅིང་སྐད་ཅིག་ཀྱང་མི་གནས་པ་སྟེ། རིས་མཐུན་པ་དང་སྐལ་བ་མཉམ་པ་རྣམས་ལས་སྔར་སྐྱེས་པ་ཞིག་ནས་བར་མ་ཆད་པར་ལུས་གཞན་ཐོབ་པའོ་ཞེས་བྱ་བའི་ཐ་ཚིག་གོ །འཁོར་བ་ནི་འདམ་དང་ཆོས་མཚུངས་པ་ལས་འདམ་དང་འདྲ་བས་ན་འདམ་ཞེས་བྱ་སྟེ། དཔེར་ན་འདམ་ཆུས་བརླན་པའི་དབང་གིས་འགྲོ་བ་ཀུན་ཏུ་ཆགས་པའི་གནས་ཏེ་བྱིང་བར་བྱེད་པའི་བདག་
ཉིད་ཡིན་ལ། དེར་བྱིང་བ་བ་ལང་རྒན་པོ་ལ་སོགས་པ་རྣམས་ཀྱིས་རང་གི་གཡོ་འགུལ་དག་གིས་བརྒལ་བར་དཀའ་བ་དེ་བཞིན་དུ་འཁོར་བ་ཡང་སྲིད་པའི་སྲེད་པའི་བརླན་གྱི་དབང་གིས་འགྲོ་བ་ཀུན་ཏུ་ཆགས་པའི་གནས་ཡིན་ལ། བདག་ལ་སྲེད་པ་ཀུན་ཏུ་སྤྱོད་པའི་ཕྱིར་བརྒལ་དཀའ་བའོ། །ཡང་ན་འཇིག་ཚོགས་ལ་ལྟ་བ་དང་བདག་དང་བདག་གིར་འཛིན་བ་ཉེ་བར་ལེན་པས་དེ་ཉིད་དུ་འགྲོ་བ་རྣམས་འབྱིང་བས་ཀུན་ཏུ་ཆགས་པའི་གནས་ཡིན་ལ། བདག་ལ་སྲེད་པ་ཀུན་ཏུ་སྤྱོད་པའི་ཕྱིར་བརྒལ་དཀའ་བ་སྟེ་བསམ་པ་དེ་དང་མི་འབྲལ་བའི་ཕྱིར་རོ། །ཡང་ན་སྲེད་པ་ལ་བརྟེན་པའི་ཕྱིར་ཀུན་ཏུ་ཆགས་པའི་གནས་ཡིན་ལ། དེ་ལས་སྐྱེ་བ་མི་འབྱུང་བའི་ཕྱིར་རོ། །ངའོ་སྙམ་པའི་ང་རྒྱལ་ནི་བརྒལ་དཀའ་བ་སྟེ། དེ་ནི་འཁོར་བ་ལས་ངེས་པར་འབྱུང་བ་བསྟན་བ་དང་མཉམ་པའི་གེགས་ཡིན་པའི་ཕྱིར་རོ། །ཡང་ན་འཇིག་ཚོགས་ལ་ལྟ་བས་དེའི་འགོག་པ་ལ་སྐྲག་པས་འཇིག་ཚོགས་ལ་ལྟ་བའི་དབང་གིས་ཀུན་ཏུ་ཆགས་པའི་གནས་ཡིན་ལ། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་ཐེ་ཚོམ་གྱིས་བརྒལ་བར་དཀའ་བ་སྟེ། ལམ་གཞན་ལ་བརྟེན་པ་དང་ལམ་ལ་ཐེ་ཚོམ་ཟ་བའི་ཕྱིར་ཏེ། དེ་ལྟར་ཡང༌། འགྲོ་མི་འདོད་དང་ལམ་ནོར་དང། །ལམ་ལ་ཐེ་ཚོམ་དེ་སྙེད་ཅིག །ཐར་པ་བགྲོད་ལ་གེགས་བྱེད་པ། །དེ་ཡི་ཕྱིར་ན་གསུམ་བསྟན་ཏོ། །ཞེས་བཤད་དོ། །ཡང་ན་འདམ་མི་འབྲལ་བའི་བདག་ཉིད་ཡིན་པའི་ཕྱིར་ཀུན་ཏུ་ཆགས་པའི་གནས་ཡིན་ལ། གཞན་ལ་བརྟེན་ནས་བརྒལ་བ་ཡིན་པའི་ཕྱིར་བརྒལ་བར་དཀའ་བ་ཡིན་པ་དེ་བཞིན་དུ་འཁོར་བ་ཡང་རྗེས་སུ་ཆགས་པའི་ཀུན་ཏུ་སྦྱོར་བའི་དབང་གིས་འགྲོ་བ་ཀུན་ཏུ་ཆགས་པའི་གནས་ཡིན་ལ། ཡང་དག་པར་རྫོགས་པའི་སངས་རྒྱས་ལ་བརྟེན་ནས་བརྒལ་བའི་ཕྱིར་བརྒལ་བར་དཀའ་བ་སྟེ། སངས་རྒྱས་འབྱུང་བ་ནི་ཨུ་དུམ་ཝཱ་རའི་མེ་ཏོག་ལྟར་དཀོན་པའི་ཕྱིར་རོ། །ཡང་ན་ཉོན་མོངས་པ་ཐམས་ཅད་ཉིད་འགྲོ་བ་འཁོར་བར་ཀུན་ཏུ་ཆགས་པའི་གནས་ཡིན་ཏེ། ཉོན་མོངས་པ་རྣམས་གང་ཡང་རུང་བ་ཡོད་ན་འཁོར་བ་དང་མི་འབྲལ་བའི་ཕྱིར་བསོད་ནམས་དང་ཡེ་ཤེས་ཀྱི་ཚོགས་ཉེ་བར་བསགས་པས་སངས་རྒྱས་འབྱུང་བའི་བར་སྐབས་སུ་ཡང་ལམ་སྐྱེད་པ་
དང་ཐར་པ་ཁོང་ཆུད་པར་མི་འགྱུར་བས་བརྒལ་དཀའ་བའོ། །འགྲོ་བ་དེར་བྱིང་བ་སྐྱབས་མེད་པ་ལ་ཐུགས་བརྩེ་བ་དང་ལྡན་པ་ཞེས་བྱ་བ་ལ་འགྲོ་བར་བྱེད་པས་ན་འགྲོ་བ་སྟེ། སྐད་ཅིག་ཀྱང་མི་གནས་བར་རིས་མཐུན་པ་དང་སྐལ་བ་མཉམ་པའི་གནས་སུ་ཤིན་ཏུ་འགྲོ་བའི་ཕྱིར་རོ། །བྱིང་བ་ནི་ནུབ་པ་སྟེ་དེའི་བདག་ཉིད་དུ་གནས་ཞེས་བྱ་བའི་ཐ་ཚིག་གོ །སྐྱབས་མེད་པ་ནི་དཔུང་གཉེན་མེད་ཅིང་ཆོ་ངེས་བརྡུང་བ་མེད་བའོ། །ཐུགས་བརྩེ་བ་དང་ལྡན་པ་ནི་སྙིང་བརྩེ་བ་དང་ལྡན་བ་སྟེ། ཐུགས་རྗེ་དང་ལྡན་པས་འཁོར་བའི་འདམ་ལས་འགྲོ་བ་དྲངས་སོ་ཞེས་བྱ་བའོ། །ཨི་ཡ་ཏེ་སཱ་ཏྲེ་སྐྱབས་མེད་པ་ལ་ཐུགས་བརྩེ་བ་དང་ལྡན་པ་ཞེས་པ་གང་ལས་འདི་རྟོགས་ཤེ་ན། ཐུགས་བརྩེ་བ་ནི་གཞན་ལ་ཕན་པ་བསྒྲུབ་པའི་རྒྱུ་ཡིན་པས་གཞན་ལ་ཕན་པའི་བྱ་བ་དེ་རང་གི་དོན་ཡོངས་སུ་གྲུབ་པའི་ཐབས་དང་རྗེས་སུ་བརྩེ་བ་ལ་ངེས་པར་བལྟོས་པ་ཡིན་ནོ། །དེ་ཡང་བཅོམ་ལྡན་འདས་རྣམས་ཀྱིས་བླ་ན་མེད་པའི་རང་གི་དོན་ཐོབ་པ་ནི་སཾ་བྷ་པ་ཏཱི་ཏ་ཐོབ་པར་བྱེད་དོ། །འདི་ནི་སྐྱབས་མེད་པ་ལ་ཐུགས་བརྩེ་བ་ལྡན་པ་ཞེས་བྱའོ། །དམ་པའི་ཆོས་སྟོན་པ་ཞེས་བ་ལ། དམ་པ་ནི་བཀྲ་ཤིས་ཤིང་མཆོད་པར་འོས་བ་རྣམས་སོ། །ཆོས་ནི་མདོ་ལ་སོགས་པ་རྣམས་སོ། །སྟོན་པ་ནི་གསལ་བར་བྱེད་པའོ། །དམ་པའི་ཆོས་སྟོན་པ་མི་སྲིད་པ། ཉིད་ཕྱག་བརྐྱང་བ་ཡིན་པས་དམ་པའི་ཆོས་སྟོན་པའི་ཕྱག་བརྐྱང་བའོ། །ཕྱག་བརྐྱང་བ་དང་འདྲ་བས་ཕྱག་བརྐྱང་བ་ཞེས་བྱས་ནས་འཁོར་བའི་འདམ་དུ་བྱིང་བ་དྲངས་པ་དང་འབྲེལ་པས་འདམ་དུ་བྱིང་བ་འདྲེན་པར་བྱ་བའི་རང་བཞིན་གྱིས་ཕྱག་བརྐྱང་བའོ། །མང་པོའི་ཚིག་ནི་གདུལ་བྱའི་དབྱེ་བ་བསྟན་པའི་ཕྱིར་ཏེ། སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་བོ་མཐུན་པར་གསུངས། །ཞེས་ཇི་སྐད་གསུངས་བ་ལྟ་བུའོ། །གལ་ཏེ་བདག་ཅག་ལ་སོགས་པ་རྣམས་འཁོར་བ་ན་གནས་ན་ཇི་ལྟར་ན་འགྲོ་བ་འཁོར་བའི་འདམ་ལས་དྲངས་ཤེ་ན། དོགས་པ་འདི་བསལ་བའི་ཕྱིར་སྐལ་བ་ཇི་ལྟ་བ་བཞིན་དྲངས་སོ་ཞེས་གསུངས་སོ། །ཕྱོགས་ཅན་བཞིན་དུ་ཕྱོགས་ལ་ཡང་འདོགས་པའི་ཕྱིར་རམ་འགྲོ་བ་མ་ལུས་པ་ལ་ཕན་འདོགས་པའི་བསམ་པ་འཇུག་པའི་ཕྱིར་ཆོས་བསྟན་པས་འགྲོ་བ་འདྲེན་
པར་བྱེད་ཅིང་འགྲོ་བ་མ་ལུས་པ་འདྲེན་བར་སྤྱོད་པའི་དབང་དུ་བྱས་ནས་དེ་སྐད་བརྗོད་དེ་ཉི་མ་བཞིན་ནོ། །འདི་ལྟར་ཉི་མ་ནི་པདྨ་ཁ་འབྱེད་པར་ནུས་པ་ཡིན་ཡང་ཡོངས་སུ་སྨིན་པ་དེ་ཉིད་ཁ་འབྱེད་པར་བྱེད་པ་དེ་བཞིན་དུ། བཅོམ་ལྡན་འདས་ཀྱིས་ཀྱང་འགྲོ་བ་འདྲེན་པར་སྤྱོད་པ་ན་གང་དག་རྒྱུད་ཡོངས་སུ་སྨིན་པ་དེ་དག་ཁོ་ན་དྲངས་ཀྱི་གཞན་དག་ནི་མ་ཡིན་ནོ། །འདིར་བརྣན་པ་ཡང་སྟེ་གང་དང་གང་སྐལ་བ་དང་ལྡན་པ་དེ་དང་དེ་དྲངས་སོ་ཞེས་བྱ་བའི་ཐ་ཚིག་གོ །སྐལ་བ་དང་ལྡན་པ་ཡང་གང་ཞིག་ཡིན་ཅེ་ན། ཐར་པའི་ཆ་དང་མཐུན་པའི་དགེ་བའི་རྩ་བ་ཡོངས་སུ་སྨིན་པའོ། །སྐལ་བ་དང་མི་ལྡན་པ་རྣམས་ནི་རང་གིས་ཉེས་པས་སངས་རྒྱས་བཅོམ་ལྡན་འདས་སེམས་ཅན་འདུལ་བའི་ཐབས་ལ་མཁས་པ་མཐར་ཕྱིན་པ་བརྙེས་པ་རྣམས་ཀྱིས་ཀྱང་འཁོར་བའི་འདམ་ནས་དྲངས་པར་མི་སྤྱོད་དེ། དེ་སྐད་དུ། ཁྱོད་ཀྱིས་ཕྱི་རོལ་ཡན་ལག་སྟོབས། །མཐའ་དག་ཡང་དག་བསྒྲུབས་མོད་ཀྱི། །ནང་གི་བདག་ཉིད་སྟོབས་བྲལ་བས། །བྱིས་པ་རྣམས་ནི་ཉོན་མོངས་བསྟེན། །ཞེས་བཤད་དོ། །སྐལ་བ་དང་མི་ལྡན་པ་ཉིད་ནི་ལོག་བ་ཉིད་དུ་ངེས་བ་ནས་ཐར་བའི་ཆ་དང་མཐུན་པའི་དགེ་བའི་རྩ་བ་ཡོངས་སུ་མ་སྨིན་པ་དང༌། མ་བསྟན་པ་དང༌། གཟུགས་དང་གཟུགས་མེད་པར་སྐྱེས་པ་རྣམས་ཏེ། དེར་མཐོང་བའི་ལམ་མི་སྐྱེ་བའི་ཕྱིར་རོ། །དེའི་ཕྱིར་སྐལ་བ་དང་ལྡན་པ་རྣམས་ཁོ་ན་ཕྱི་དང་ནང་གི་ཕུན་སུམ་ཚོགས་པ་དང་ལྡན་པ་དྲངས་པ་ཡིན་ནོ། །ལྷ་ཡི་རྒྱལ་པོས་ཆར་ཕབ་ཀྱང༌། །ས་བོན་མི་རུང་མི་འཁྲུངས་ལྟར། །སངས་རྒྱས་རྣམས་ནི་བྱུང་གྱུར་ཀྱང༌། །སྐལ་བ་མེད་པས་འབྲས་མི་མྱོང༌། །ཞེས་བཤད་དོ། །ཡང་ན་གང་ཞིག་རྣམ་པ་གང་གི་སྐལ་བ་དང་ལྡན་པ་དེ་དེ་ཁོ་ནས་དྲངས་ཏེ། ཕུང་པོ་བསྟན་པའམ། ཁམས་དང་སྐྱེ་མཆེད་དམ་རྟེན་ཅིང་འབྲེལ་པར་འབྱུང་བ་བསྟན་པས་སོ། །དེས་ན་འདི་ནི་བཅོམ་ལྡན་འདས་ཀྱིས་ཆོས་བསྟན་པ་དོན་དང་བཅས་པར་སྟོན་པར་བྱེད་དོ། །ཡང་ན་ཉན་ཐོས་དང་རང་སངས་རྒྱས་ཀྱི་རིགས་ཅན་ཡིན་པས་སེམས་ཅན་རྣམ་པ་གསུམ་ཡིན་ལ། དེ་དག་ལས་གང་ཞིག་ཐེག་པ་གང་གིས་དྲང་བའི་སྐལ་བ་ལྡན་པ་དེ་དེ་ཉིད་ཀྱིས་དྲང་བར་བྱ་སྟེ། འདིས་ནི་བཅོམ་ལྡན་འདས་སེམས་ཅན་ཐམས་ཅད་ལ་ཕན་
འདོགས་པ་དང༌། བླ་ན་མེད་པའི་དགེ་བའི་བཤེས་གཉེན་ཉིད་དུ་བསྟན་ཏོ། །དེ་ལྟར་ཡང༌། དགེ་བའི་བཤེས་གཉེན་མཁས་པ་གང༌། །གང་ཞིག་བག་མེད་སྡིག་སྤྱོད་པ། །ནུས་ཀྱང་ཡོན་ཏན་གཞན་དག་ལ། །ངེས་པར་སྦྱོར་བ་མིན་པ་ཉིད། །ཅེས་བཤད་དོ། །དེ་ལྟར་བདག་དང་གཞན་ལ་ཕན་པ་སྒྲུབ་པ་ཕུན་སུམ་ཚོགས་པ་དེ་ལྟ་བུ་དང་ལྡན་པ་ཞེས་བྱ་བ་ལ། དེ་ལྟར་གྱི་སྒྲ་ནི་ཇི་སྐད་བཤད་པའི་བསྟོད་པའི་རྣམ་པ་བསྟན་པར་བྱ་བའི་ཕྱིར་རོ། །སྤངས་པ་དང་ཡེ་ཤེས་ཕུན་སུམ་ཚོགས་ཚོགས་པ་དང་ལྡན་པས་བདག་ལ་ཕན་པ་ཕུན་སུམ་ཚོགས་པ་དང་ལྡན་པ་ཡིན་ལ། དམ་པའི་ཆོས་སྟོན་པ་འབྲས་བུ་དང་བཅས་པའི་སྟོན་པ་པོ་ཡིན་པའི་ཕྱིར་གཞན་ལ་ཕན་པ་ཕུན་སུམ་ཚོགས་པ་དང་ལྡན་པས་སོ། །མགོས་བཏུད་ནས་ཞེས་པ་འདིས་ལུས་ཀྱི་ལས་སྟོན་པར་བྱེད་དོ། །དེ་ལྟར་ལུས་དང་ངག་དང་ཡིད་ཀྱིས་སྟོན་པ་ལ་མཆོད་པ་བྱས་ཏེ་བསྟན་བཅོས་རྩོམ་མོ་ཞེས་བཤད་པར་འགྱུར་རོ། །ཡང་ཕྱག་འཚལ་བ་དག་གི་ལས་ཡིན་པས་མགོས་བཏུད་ནས་ཞེས་བ་འདི་མི་འཐད་དོ་ཞེ་ན། མི་རིགས་ཏེ་ཕྱག་འཚལ་བ་ནི་ལུས་དང་སེམས་ཀྱིས་འདུས་པ་ཡང་ཡིན་ལ་འགའ་ཞིག་གི་ཚེ་དག་ཏུ་རབ་ཏུ་བརྟག་ཅིང་འགའ་ཞིག་གི་ཚེ་མགོ་བོ་ལ་སོགས་པ་རྣམས་ཀྱིས་ཏེ་འདིར་ནི་གུས་པའི་ཁྱད་པར་བསྟན་པའི་ཕྱིར་རོ། །ཕྱག་འཚལ་ནས་ཞེས་བྱ་བ་ནི་མགོས་བཏུད་ནས་སོ་ཞེས་བཤད་དོ། །གང་ཡང་འདུད་པའི་སྒྲ་ལན་མ་ཞེས་སྦྱར་བ་ན་རྣམ་དབྱེ་བཞི་པ་རིགས་པས་འདི་ཉེ་བའི་ཚིག་གི་མཚན་ཉིད་ཀྱི་བྱ་བ་ལས་སུ་ཉེ་བར་བཏགས་བ་སྟེ། འཐབ་པ་ལ་གོ་བགོ །ཁྱིམ་ཐབ་ལ་ཉལ་ལོ་ཞེས་བ་ལྟ་བུའོ། །བཏུད་ནས་ཀྱི་སྒྲ་ནི་ན་མའི་སྒྲ་དང་མཚུངས་པའི་ཕྱིར་སྐྱོན་མེད་དོ། །སྦྱོར་བ་སྨོས་པ་ལས་གཞན་དུ་ཡང་དེའི་དོན་ཉིད་ལ་བཞིར་འགྱུར་རོ་ཞེས་ཤེས་པར་བྱའོ། །དོན་བཞིན་སྟོན་པ་ཞེས་བྱ་བ་ལ་དོན་གང་ཞིག་ཇི་ལྟར་གནས་པ་དེ་ཁོ་ན་ལྟར་སྟོན་གྱི་གཞན་དུ་མ་ཡིན་པས་དོན་བཞིན་སྟོན་པའོ། །ཡང་ན་དོན་ཇི་ལྟ་བ་དང་དགོས་པ་ཇི་ལྟ་བ་བཞིན་དུ་འདུལ་བར་བྱེད་པས་ན་དོན་བཞིན་སྟོན་བ་སྟེ། ཉན་ཐོས་ཀྱི་བྱང་ཆུབ་འདོད་པ་རང་སངས་རྒྱས་ཀྱི་བྱང་ཆུབ་ལ་འདུལ་བ་ལྟ་བུ་མ་ཡིན་པ་སྟེ་དེ་བཞིན་དུ་གཞན་ལ་ཡང་བརྗོད་པར་བྱའོ། །
ཡང་དོན་བཞིན་སྟོན་པ་འདི་རང་དང་གཞན་ལ་ཕན་པ་སྒྲུབ་པ་ཕུན་སུམ་ཚོགས་པའི་ལྡོག་པ་ནས་ཡིན་ནམ་ཅི་ཞེ་ན། འདིས་དོན་བཞིན་སྟོན་པ་དེའི་ལྡོག་པ་ནས་མ་ཡིན་གྱི། འོན་ཀྱང་གཞན་ལ་ཕན་པ་སྒྲུབ་པའི་ཐབས་འདིས་གསལ་བར་བྱེད་པའོ། །དེ་ལ་གཞན་ལ་ཕན་པ་སྒྲུབ་པའི་ཐབས་ནི་སྙིང་རྗེ་དང་ལྡན་པས་གཞན་དག་ལ་དམ་པའི་ཆོས་སྟོན་པ་སྟེ་དེ་ནི་དོན་བཞིན་སྟོན་པ་ཉིད་དོ། །ཡང་ཇི་ལྟར་ན་དོན་བཞིན་སྟོན་པ་ཉིད་ཀྱི་སྒོ་ནས་འདིར་གཞན་ལ་ཕན་པ་སྒྲུབ་པའི་ཐབས་གསལ་བར་བྱེད་ཅེ་ན། དེའི་ཕྱིར་དེ་ནི་སྟོན་པ་ན་ཡང་དག་པ་ཇི་ལྟ་བ་བཞིན་དུ་སྟོན་པས་འཁོར་བའི་འདམ་ལས་འགྲོ་བ་དྲངས་ཀྱི་རྫུ་འཕྲུལ་དང་དམ་པ་སྦྱིན་པའི་མཐུན་ཆ་མ་ཡིན་ནོ་ཞེས་གསུངས་ཏེ། མཐུའི་སྒྲ་ནི་ནུས་པ་བརྗོད་པར་བྱེད་པ་སྟེ། རྫུ་འཕྲུལ་གྱིས་མ་ཡིན་དམ་པ་སྦྱིན་པས་མ་ཡིན་ཞེས་རེ་རེ་ལ་ཡང་སྦྱར་བར་བྱའོ། །གལ་ཏེ་ཡང་དེ་བཞིན་གཤེགས་པའི་བྱིན་གྱིས་རླབས་ཀྱི་མཐུས་སེམས་ཅན་རྣམས་སྐད་ཅིག་ཙམ་ཞེ་སྡང་དང་བྲལ་བ་ལ་སོགས་པར་ནི་འགྱུར་ལ། གཞན་གྱི་སེམས་ཀྱང་ཤེས་མོད་ཀྱི། བཅོམ་ལྡན་འདས་ཀྱི་བྱིན་རླབས་ཀྱིས་དེ་རྣམས་ཉོན་མོངས་པ་སྤངས་པར་ནི་མི་འགྱུར་རོ། །འོ་ན་ཅི་ཞེ་ན་དམ་པའི་ཆོས་བསྟན་པ་ལས་དོན་རྟོགས་ཏེ་ཉོན་མོངས་པ་སྤོང་བར་བྱེད་དོ། །དེ་སྐད་དུ་ཡང༌། ཡང་དག་པའི་ལྟ་བ་སྐྱེད་པ་ལ་རྒྱུ་གཉིས་དང་རྐྱེན་གཉིས་ཏེ། གཞན་གྱི་སྒྲ་དང་ནང་གི་ཚུལ་བཞིན་ཡིད་ལ་བྱེད་པའི་ཞེས་གསུངས་སོ། །ཉོན་མོངས་པ་སྤངས་པ་མེད་པར་འཁོར་བའི་འདམ་དང་བྲལ་བ་ཡང་ཡོད་པ་མ་ཡིན་ཏེ། དེའི་ཕྱིར་དེ་ནི་སྟོན་པ་ན་ཡང་དག་པ་ཇི་ལྟ་བ་བཞིན་དུ་སྟོན་པས་འཁོར་བའི་འདམ་ལས་འགྲོ་བ་དྲངས་སོ། །རྫུ་འཕྲུལ་ནི་ནམ་མཁའ་ལ་འགྲོ་བ་ལ་སོགས་པའོ། །དམ་པ་སྦྱིན་བ་ནི་དཔེར་ན་དབང་ཕྱུག་ཆེན་པོ་ལ་སོགས་པ་རྣམས་ཀྱིས་སྲིན་པོའི་དབང་པོ་སྒྲ་སྒྲོགས་ལ་སོགས་པ་དག་ལྷ་ལ་སོགས་པ་རྣམས་ཀྱིས་གསང་པར་བྱ་བ་མ་ཡིན་པ་ལྟ་བུའོ། །གཞན་དག་མཐུ་ནི་རྫུ་འཕྲུལ་དང་དམ་ཕ་སྦྱིན་པ་ལས་ལོགས་སུ་འདོད་དེ། ཇི་ལྟར་ནོར་བུ་དང་སྨན་གྱི་མཐུས་རིམས་ལ་སོགས་པ་དང་བྲལ་བར་འགྱུར་བ་ལྟ་བུའོ། །ཉོན་མོངས་པ་རྣམས་དང་རྟེན་མི་མཚུངས་པའི་ཕྱིར་རྫུ་འཕྲུལ་ལ་སོགས་པ་རྣམས་ཉོན་མོངས་པའི་
གཉེན་པོ་ཉིད་དུ་མི་འགྱུར་རོ། །གང་གི་ཚེ་རྟེན་ནད་ཀྱི་རྒྱུ་ཡིན་པ་དེའི་ཚེ་རྟེན་ཉིད་ནང་མེད་པའི་རྒྱུར་གསོ་དཔྱད་ལ་སོགས་པ་རྣམས་སུ་མཐོང་བས་རྟེན་ཐ་དད་པ་མི་འདོད་དོ། །དེ་བཞིན་དུ་རྫུ་འཕྲུལ་མཐོང་ཡང་གཉེན་པོ་སྐྱེས་པ་མེད་པར་ཉོན་མོངས་པ་སྤངས་པ་འགའ་ཡང་མི་མཐོང་ངོ༌། །དམ་པ་སྦྱིན་པའི་མཐུས་ཀྱང་མ་ཡིན་ཏེ། རྒྱུ་འགལ་བ་ཅན་རྣམས་ལ་དེའི་འབྲས་བུ་ཡང་འགལ་བ་ཅན་ཉིད་དུ་མཐོང་ངོ༌། །ཉོན་མོངས་པ་སྤྱོད་པ་རྣམས་ལ་རྒྱུ་མི་འགལ་བ་ཡོད་པ་མ་ཡིན་ཏེ། དཔེར་ན་མི་སྡུག་པ་དང་མི་རྟག་པ་སོགས་པ་བསྒོམ་པ་ལ་ཡང་མན་ངག་མེད་པ་མེད་པར་དེ་བསྒོམ་པ་མེད་པ་བཞིན་ནོ། །རྫུ་འཕྲུལ་དང་ཀུན་བརྗོད་པ་དག་གིས་ནི་སེམས་ཅན་རྣམས་རངས་པ་ཙམ་ཞིག་ཏུ་འགྱུར་ན། རངས་པ་ཙམ་གྱིས་ནི་ཉོན་མོངས་པ་སྤོང་བ་ཡང་མ་ཡིན་ནོ། །ཉོན་མོངས་པ་ནི་འཁོར་བའི་རྩ་བ་ཡིན་བའི་ཕྱིར་ཉོན་མོངས་པ་སྤངས་པ་མེད་པར་འཁོར་བའི་འདམ་ལས་བརྒལ་བ་ཡོད་བ་མ་ཡིན་ཏེ། དེའི་ཕྱིར་རྫུ་འཕྲུལ་དང་དམ་པ་སྦྱིན་པའི་མཐུས་འཁོར་བའི་འདམ་ལས་དྲངས་བ་མེད་དོ། །ཚིགས་སུ་བཅད་པ་འདིར་ནི་གཞན་གྱི་སྟོན་པ་དང་བསྟན་པ་དང་སློབ་མ་རྣམས་ལས། བཅོམ་ལྡན་འདས་དང་དེའི་བསྟན་པ་དང་དེའི་སློབ་མ་རྣམས་ཁྱད་པར་དུ་འཕགས་པར་བརྗོད་དོ། །སྤངས་པ་དང་རྟོགས་པ་ཕུན་སུམ་ཚོགས་པའི་ཕྱིར་དང༌། འཁོར་བའི་འདམ་ལས་བརྒལ་བའི་ཐབས་ཡིན་པའི་ཕྱིར་དང༌། འཁོར་བའི་འདམ་ལས་བརྒལ་བའི་ཕྱིར་རོ། །གཞན་དག་ནི་སྟོན་པར་ཁས་བླངས་པར་ཟད་ཀྱི། སྤངས་པ་དང་རྟོགས་པ་ཕུན་སུམ་ཚོགས་པ་མ་ཡིན་ལ། དེ་དག་གིས་བསྟན་པ་ནི་འཁོར་བའི་འདམ་ལས་བརྒལ་བའི་ཐབས་མ་ཡིན་ཞིང༌། དེ་དག་གི་སློབ་མ་རྣམས་ཀྱང་འཁོར་བའི་འདམ་ལས་བརྒལ་བ་མ་ཡིན་ནོ་ཞེས་དོན་གྱིས་བསྟན་པ་ཡིན་ནོ། །ཡང་ན་བསྟན་པ་ནི་རྟེན་དང་རྒྱུ་དང་བརྗོད་བྱ་དང་གནས་དང་དགོས་པའི་ཁྱད་པར་བསྟན་པས་གཞན་གྱི་བསྟན་པ་ལས་ཁྱད་པར་འཕགས་པར་བཤད་དེ། དེ་ལ་བརྟེན་ནི་ཕྱིན་ན་གཤེགས་པའི་བསྟན་པ་ལ་སེམས་ཅན་རྣམས་མངོན་པར་དད་པ་བསྐྱེད་པར་བྱ་བའི་ཕྱིར་རོ། །རྒྱུ་ནི་ཐམས་ཅད་དུ་ཐོགས་པ་མི་མངའ་བའི་ཡེ་ཤེས་
དང་བླ་ན་མེད་པའི་སྤངས་པ་དང་ལྡན་པའི་བཅོམ་ལྡན་འདས་སོ། །བརྗོད་བྱ་ནི་ཕྱིན་ཅི་མ་ལོག་པའི་དོན་སྡུག་བསྔལ་དང་སྟོང་པ་དང་བདག་མེད་པ་ལ་སོགས་པའོ། །གནས་ནི་འཁོར་བའི་འདམ་དུ་བྱིང་བ་རྣམས་སོ། །དགོས་པ་ནི་སེམས་ཅན་རྣམས་འཁོར་བའི་འདམ་ནས་འདྲེན་པའོ། །ཡང་ན་ཡེ་ཤེས་ཕུན་སུམ་ཚོགས་པ་དང་སྤངས་པ་ཕུན་སུམ་ཚོགས་པ་དང་གཞན་ལ་ཕན་པ་ཕུན་སུམ་ཚོགས་པ་སྟེ། འཇིག་རྟེན་གསུམ་གྱི་སྟོན་པ་གཅིག་པུ་ཉིད་ཀྱི་བསྟན་པ་ཕྱིན་ཅི་མ་ལོག་པའི་ཕྱིར་འཇིག་རྟེན་གསུམ་གྱི་སྟོན་པ་གཅིག་པུ་ཉིད་དོ། །ཡང་ན་ཀུན་ཏུ་མུན་བཅོམ་ཞེས་བྱ་སྟེ། ཡེ་ཤེས་ཐོགས་པ་མི་མངའ་བའི་ཕྱིར་ཏེ། སེམས་ཅན་རྣམས་ཀྱི་ཚེ་རབས་འདི་དང་ཕྱི་མ་དང་ངེས་པར་ལེགས་པར་མ་ལུས་བའི་དོན་བྱེད་ནུས་པ་ལ་བཤད་དོ། །མུན་པ་གཏན་བཅོམ་ཞེས་པ་འདིས་ནི་རྗེས་སུ་ཆགས་པ་དང་ཁོང་ཁྲོ་བ་འབྱུང་བ་ཡོད་པ་མ་ཡིན་ནོ། །གཞན་གྱི་དོན་མཐར་ཕྱིན་པའི་རྒྱུ་ནི་གཞན་གྱི་དོན་མཐར་ཕྱིན་པའི་ཐབས་སོ། །ཡང་ན་ཡེ་ཤེས་ཕུན་སུམ་ཚོགས་པ་དང་སྤངས་པ་ཕུན་སུམ་ཚོགས་པ་རྗེས་སུ་དཔག་པ་དང་བཅས་པ་ཡོངས་སུ་གསལ་བར་བསྟན། དོན་བཞིན་སྟོན་པ་ཉིད་ཀྱིས་ཡེ་ཤེས་ཕུན་སུམ་ཚོགས་པ་རྗེས་སུ་དཔག་པར་བྱའོ། །སེམས་ཅན་རྣམས་འཁོར་བའི་འདམ་ནས་འབྱིན་པས་སྤངས་པ་ཕུན་སུམ་ཚོགས་པ་སྟེ། གང་གི་ཕྱིར་འཁོར་བའི་འདམ་ལས་བརྒལ་བ་དེའི་ཕྱིར་འགྲོ་བ་འདྲེན་པར་ནུས་པའོ། །འདམ་གྱི་གནས་དང་འདྲ་བས་འདམ་དུ་བྱིང་བའོ། །ཡང་ན་རྟོགས་པ་མཐར་ཕྱིན་པ་དང་སྤངས་བ་མཐར་ཕྱིན་པ་དང་གཞན་ལ་ཕན་པ་མཐར་ཕྱིན་པ་དང་གཞན་ལ་ཕན་པར་བྱེད་པའི་ཐབས་མཐར་ཕྱིན་པ་རྣམས་སོ། །དེ་ལ་ཕྱག་འཚལ་ནས་ཞེས་གསུངས་པ་ལ་བྱེད་པ་པོ་མཚུངས་པའི་བྱ་བ་གཉིས་ཀྱིས་སྔ་མའི་དུས་ཀྱི་བྱ་བ་ལ་ནས་ཞེས་པ་བསྒྲུབ་པར་བྱ་སྟེ། དཔེར་ན་ཁྲུས་བྱས་ནས་ཟ་ཞེས་པ་ལྟ་བུའོ། །དེའི་ཕྱིར་བྱ་བ་གཞན་ལ་བལྟོས་པས་ཅི་ཞིག་བྱ་ཞེ་ན། ཞེས་བྱ་བ་གསུངས་སོ། །སློབ་དཔོན་གྱིས་ཀྱང་བསྟན་བཅོས་རབ་བཤད་བྱ་ཞེས་བྱ་བ་གསུངས་ཏེ། སློབ་མ་མཆོད་པའི་ཕྱིར་དང་སློབ་མ་འདུལ་བར་བྱ་བའི་ཕྱིར་བསྟན་བཅོས་སོ། །འདི་སྐད་བཤད་པར་འགྱུར་ཏེ། ཕན་པ་འཐོབ་པའི་རྒྱུ་དང་མི་ཕན་པ་སྤོང་བའི་རྒྱུ་དག་གིས་ཡང་དག་པར་
རྗེས་སུ་འཆོས་པ་དང་ཉེས་པ་དང་སྡུག་བསྔལ་རྣམས་ལས་སྐྱོབ་པའི་ཕྱིར་བསྟན་བཅོས་སུ་བཤད་དེ། ཕན་པ་དང་མི་ཕན་པ་འཐོབ་པ་དང་སྤོང་པའི་རྒྱུར་གྱུར་པ་དག་གིས་རྗེས་སུ་འཆོས་པ་དང་ཉེས་པ་དང་སྡུག་བསྔལ་རྣམས་ལས་སྐྱོབ་པའི་ཕྱིར་བསྟན་བཅོས་སོ། །བསྟན་བཅོས་ཨ་ཏོ་ནྱ་ཐཱ་དེ་ཡང་གསལ་བར་བྱ་བའམ་རབ་ཏུ་དབྱེ་བར་བྱ་བའི་ཕྱིར་བསྟན་བཅོས་རབ་བཤད་བྱ་ཞེས་སོ། །དུ་མ་ཉིད་བཅད་པའི་ཕྱིར་འདྲི་བར་བྱེད་པ་ལ་ཆོས་མངོན་མཛོད་ཅེས་ཏེ། ཆོས་མངོན་པ་སྨོས་པ་ནི་འདུལ་བ་ལ་སོགས་པའི་བསྟན་བཅོས་རྣམ་པར་བཅད་པའི་དོན་ཏོ། །མཛོད་སྨོས་བ་ནི་ཆོས་མངོན་པའི་བསྡུས་པའི་ངོ་བོ་ཤེས་པར་བྱ་བའི་ཕྱིར་རོ། །ཅིའི་ཕྱིར་འདི་བརྩམས་ཤེ་ན་ཆོས་མངོན་པ་རྒྱས་བ་བསྡུ་བར་བྱ་བའི་ཕྱིར་རོ། །ད་ལྟ་ཡིན་དང་བྱ་བ་དུ་མས་སེམས་གཡེང་བ་དང་བློ་ཞེན་པ་རྣམས་རྗེས་སུ་གཟུང་བ་བྱས་པར་འགྱུར་རོ། །དེ་ལ་གང་ལ་བསྟོད་པ་དང་ཇི་ལྟར་དང་གང་གི་དོན་དུ་བསྟོད་པ་ཚིགས་སུ་བཅད་པ་འདིས་བསྟན་ཏོ། །ཆོས་མངོན་པ་མཛོད་ཅེས་བརྗོད་པ་ནི་ཚིག་བསྡུས་པའི་ཡན་ལག་ཡིན་པའི་ཕྱིར་གཉིས་དམ་བཅས་བར་འགྱུར་ཏེ་ཆོས་མངོན་པ་དང་མཛོད་དོ། །ཆོས་མངོན་པ་དམིགས་ཀྱིས་དགར་བའི་ཕྱིར་མངོན་པ་ཞེས་བྱ་བ་འདི་གང་ཞེ་ན་ཞེས་བྱ་བ་སྨྲས་ཏེ། ཡན་ལག་གི་དོན་དེ་དམིགས་ཀྱིས་བཀར་ན་ཚིག་བསྡུ་བའི་དོན་བདེ་བླག་ཏུ་ཁོང་དུ་ཆུད་པར་འགྱུར་རོ། །ཆོས་མངོན་ཤེས་རབ་དྲི་མེད་རྗེས་འབྲང་བཅས། །ཞེས་བྱ་བ་ལ་ཤེས་རབ་སྨོས་བ་ནི་གཙོ་བོ་ཡིན་པའི་ཕྱིར་ཏེ། ཆོས་མངོན་པ་ནི་ཕུང་པོ་ལྔའོ་ཞེས་གསུངས་པའི་ཕྱིར་ཤེས་རབ་ཁོ་ན་ཆོས་མངོན་བ་ནི་མ་ཡིན་ནོ། །ཆོས་རབ་ཏུ་རྣམ་པར་འབྱེད་པའོ་ཞེས་བྱ་བ་ནི་ཆོས་རྣམས་རྣམ་པར་ཕྱེ་སྟེ་རང་དང་སྤྱིའི་མཚན་ཉིད་རྟོགས་པའོ། །དྲི་མེད་ཅེས་བྱ་བ་ནི་ཟག་པ་དང་བཅས་པ་གསལ་བར་བྱ་བའི་ཕྱིར་ཏེ་དོན་དམ་པ་བརྗོད་པར་འདོད་པའི་ཕྱིར་རོ། །དྲི་མ་རྣམས་ནི་ཟག་པའི་རྣམ་གྲངས་ཡིན་པའི་ཕྱིར་ཟག་པ་མེད་པའོ་ཞེས་སྨོས་ཏེ། དེ་ལ་འདོད་ཆགས་ལ་སོགས་པ་ཟག་པ་རྣམས་རྒྱས་བར་མི་འགྱུར་བས་ན་ཟག་པ་མེད་པའོ། །ཡང་ཅི་ཤེས་རབ་དྲི་མ་མེད་པ་ཁོ་ན་ཆོས་མངོན་པ་ཡིན་ནམ་ཞེ་ན། སྨྲས་པ་
མ་ཡིན་ནོ། །འོ་ན་ཅི་ཞེ་ན་རྗེས་འབྲང་བཅས་སོ། །རྗེས་སུ་འབྲང་བ་ཡང་ཤེས་རབ་གཙོ་བོར་གྱུར་པའི་ཕྱིར་ཏེ། ཡང་ཤེས་རབ་འཁོར་ནི་མ་ཡིན་ནོ། །གང་དག་གཟུགས་ལ་སོགས་པ་དང་དུས་དང་འབྲས་བུ་ལ་སོགས་པ་དག་དང་དགེ་བ་ཉིད་ཀྱིས་ཤེས་རབ་ཀྱི་རྗེས་སུ་འཇུག་སྟེ། དེ་ནི་ཤེས་རབ་ཀྱི་འཁོར་རོ། །དེ་ལ་མི་ལྕོགས་པ་མེད་པ་དང་བསམ་གཏན་དང་བསམ་གཏན་ཁྱད་པར་ཅན་ལ་བརྟེན་པའི་ཤེས་རབ་ལ་ནི་གང་གིས་གང་དེ་སྐད་དུ་བཤད་པ་ཡང་དག་པའི་ངག་དང་ལས་ཀྱི་མཐའ་དང་འཚོ་བས་བསྡུས་པ་རྣམ་པར་རིག་བྱེད་མ་ཡིན་པའི་གཟུགས་ཀྱང་རྗེས་སུ་འཇུག་པ་ཡོང་ངོ༌། །དེ་ལྟར་ཟག་པ་མེད་པའི་ཕུང་པོ་ལྔ་ལ་ཆོས་མངོན་པ་ཞེས་བསྟན་པར་འགྱུར་རོ། །གཟུགས་མེད་པ་གསུམ་ལ་བརྟེན་པའི་ཆོས་མངོན་པ་ནི་ཕུང་པོ་བཞི་སྟེ། དེ་ལྟར་དེ་ནི་ཕུང་པོ་ལྔ་ལས་ཡིན་ཞིང་དེ་ཉིད་ཟག་པ་མེད་པའི་ཤེས་རབ་རྗེས་འབྲང་བཅས་པ་ཆོས་མངོན་པའོ། །གལ་ཏེ་སེམས་ལས་བྱུང་བ་ཐམས་ཅད་ཀྱི་རྟེན་ཡིན་པའི་ཕྱིར་སེམས་ཉིད་གཙོ་བོ་ཡིན་ཏེ། དེའི་ཕྱིར་དེ་ཉིད་དྲི་མ་མེད་པའི་རྗེས་སུ་འབྲང་བ་དང་བཅས་པ་ཆོས་མངོན་པ་ཡིན་ལ་རག་མོད་ཅེ་ན། བྱ་བ་དང་མཐོང་བ་དང་དམིགས་པ་མངོན་པར་རྟོགས་པ་ལ་ནུས་པ་དང་ལྡན་པའི་ཕྱིར་ཤེས་རབ་ཁོ་ན་རྗེས་འབྲང་དང་བཅས་པ་ལ་ཆོས་མངོན་པ་ཞེས་བརྗོད་དོ། །བྱ་བ་མངོན་པར་རྟོགས་པ་ཉིད་ནི་གཟུགས་དང་རིགས་ལ་སོགས་པ་རྣམས་མཐོང་བས་ཅིག་ཤོས་སེམས་ལ་སོགས་པ་རྣམས་ཀྱི་ཞེས་དོན་འདི་ལ་སེམས་ནི་མ་ཡིན་གྱི་ཤེས་རབ་གཙོ་བོར་ཡོད་དོ། །གལ་ཏེ་མཐོང་བ་བཞིན་དུ་ཚོར་བ་ལ་སོགས་པ་རྣམས་ཀྱང་ཉམས་སུ་མྱོང་བའོ་ཞེ་ན། རྗེས་སུ་རྟོགས་པའི་ཕྱིར་ཚོར་བ་ལ་སོགས་པ་རྣམས་བདེན་པ་ཡོངས་སུ་བཅད་པར་ནུས་པ་མེད་པའི་ཕྱིར་ཉམས་སུ་མྱོང་བ་མ་ཡིན་པ་ལ་སོགས་ཚོར་བ་ལ་སོགས་པ་རྣམས་མངོན་པར་རྟོགས་པ་གསུམ་པར་སྡུག་བསྔལ་ལ་སོགས་པའི་མཚན་ཉིད་དུ་ཁོང་དུ་ཆུད་དེ། གང་གི་ཕྱིར་བདེན་པ་ཡོངས་སུ་བཅད་དེ་འཇུག་པའི་ཕྱིར་རོ། །ཤེས་རབ་གཙོ་བོར་གྱུར་པ་ནི་མཐོང་བ་མངོན་པར་རྟོགས་པའོ། །ཤེས་རབ་གཙོ་བོར་བཟུང་བས་ཚོར་བ་ལ་སོགས་པ་ཅིག་ཅར་གྱིས་ཀྱང་འཇུག་པར་བྱེད་དོ། །དེ་དང་དེར་ཁྲིད་པར་
བྱེད་པས་ན་མངོན་པར་རྟོགས་པ་སྟེ། གཙོ་བོར་གྱུར་པ་དེའི་ཕྱིར་ཟག་པ་མེད་པའི་ཤེས་རབ་ཀྱི་དབང་པོ་རྗེས་འབྲང་དང་བཅས་པ་ནི་དོན་དམ་པའི་ཆོས་མངོན་པ་ཞེས་ལེགས་པར་བཤད་པར་འགྱུར་རོ། །རེ་ཞིག་འདིས་ནི་དོན་དམ་བ་པའི་ཞེས་བྱ་བ་ནི་དོན་དམ་པའི་དགོས་པ་ཅན་ཏེ། མྱ་ངན་ལས་འདས་པའི་དགོས་པ་ཅན་ཡིན་པས་དོན་དམ་པ་པའོ། །དོན་དམ་པ་ཉིད་ནི་དམ་པ་པ་སྟེ་འདུལ་བ་པ་བཞིན་ནོ། །ཡང་ཅི་ལས་འདི་ཤེས་པར་བྱང་ཅེ་ན། ཆོས་མངོན་ཤེས་རབ་དྲི་མེད་རྗེས་འབྲང་བཅས། །ཞེས་ཏེ། ཤ་ཀྲཱ་དི་བྲ་བཱ་ར་ཎཱ་རྒྱནྡྷ་ཧ་མེ་ན་མ། ཆོས་མངོན་པ་ཞེས་པས་འདུལ་བ་ལ། པྲ་བཱ་ར་ཡེ་ཡ་མི་ཏི། ལམ་དང་ལམ་གྱི་འབྲས་བུ་ལ་འགོད་པར་བྱའོ་ཞེས་བྱ་བའི་ཐ་ཚིག་གོ །དོན་དམ་པ་པ་ཞེས་ཁྱད་པར་དུ་བྱས་པས་བརྡར་བཏགས་པ་ཡང་ཡོད་དོ་ཞེས་ཤེས་པར་བྱས་པ་ཡིན་ནོ། །བརྡར་བཏགས་པ་ཞེས་བྱ་བ་ཡང་བཏགས་པ་བ་དང་ཀུན་ཐ་སྙད་པ་དང་གཞུང་ལུགས་པ་ཞེས་བྱ་བའི་ཐ་ཚིག་གོ །གང་དང་ཞེས་བྱ་བ་ནི་ཐོས་པ་དང་བསམ་པ་དང་བསྒོམ་པ་ལས་བྱུང་བ་དང་ཟག་པ་དང་བཅས་བ་ཞེས་བྱའོ། །ཟག་པ་མེད་པ་རྣམ་པར་བཅད་པའི་ཕྱིར་ཟག་པ་དང་བཅས་པ་ཞེས་ཁྱད་པར་དུ་བྱས་པ་ནི་བསྒོམ་པ་ལས་བྱུང་བ་ཁོ་ན་རྣམ་པ་གཉིས་ཡིན་པའི་ཕྱིར་ཏེ་ཐམས་ཅད་ལ་ནི་ཁྱད་པར་མ་ཡིན་ནོ། །འདིར་ཐོས་པ་ལ་སོགས་བ་ལས་བྱུང་བའི་ཤེས་རབ་རྣམས་ཀྱི་གོ་རིམས་ནི་སྐྱེ་བའི་དབང་གིས་ཏེ་ཤེས་རབ་འདི་དག་གི་ཁྱད་པར་ལས་མ་ཡིན་ནོ། །མི་ལྕོགས་པ་མེད་པ་ལས་ཟག་པ་མེད་པ་སྐྱེའོ། །འདི་དག་གི་མཚན་ཉིད་ནི། ཐོས་སོགས་ལས་བྱུང་བློ་རྣམས་ནི། །མིང་དང་གཉི་ག་དོན་ཡུལ་ཅན། །ཞེས་བ་འཆད་པར་འགྱུར་རོ། །གཞན་ནི་ལུང་དང་རིགས་པ་དང་བསམ་པ་དང་བསྒོམ་པ་ལས་ངེས་སོ། །ཐོས་པ་ལས་བྱུང་བ་སོགས་ཞེས་པའི་རྒྱུ་ལ་མ་ཡ་ཊའི་རྐྱེན་བསྒྲུབ་པའོ། །སྐྱེས་ནས་ཐོབ་པ་ཞེས་བྱ་བ་ནི་སྐྱེས་པས་ཐོབ་ཅིང་ལྡན་པ་གང་ལ་ཡོད་པ་ཡིན་གྱི་སྦྱོར་བ་ལས་བྱུང་བ་ནི་མ་ཡིན་ཏེ། གང་ནས་འདོད་པའི་ཁམས་སུ་སྐྱེ་བའི་ཉོན་མོངས་པ་དང་ཉེ་བའི་ཉོན་མོངས་པ་བཞིན་ནོ། །འགྲོ་བ་ལྔ་པོ་རྣམས་སུ་ཐོབ་ཅིང་མངོན་དུ་གྱུར་པའི་ངོ་བོ་ནི་འགྲོ་བར་ངེས་པས་འདོད་པའི་
ཁམས་ནས་ས་གོང་མར་སྐྱེ་བ་ན་གང་དུ་སྐྱེ་བ་དེ་ཉིད་དུ་ཐོབ་པོ། །རྣམ་པར་ཉམས་པ་སྔར་ཉིད་དུ་ཡང་ཐོབ་པར་བྱེད་དོ། །སྔར་མ་ཡིན་པ་ཉིད་ཀྱི་ཕྱིར་སྐྱེ་བས་ཐོས་པ་ཞེས་བྱའོ། །པྲ་ཏིའི་སྒྲ་ནི་སླར་ཡང་ཞེས་བའི་དོན་ཏེ་མིག་ལ་སོགས་པ་བཞིན་དུ་ཡང་ཡང་རྟོགས་ཤིང་ཡང་དང་ཡང་རིས་མཐུན་པ་དང་སྐལ་བ་མཉམ་པ་རྣམས་སུ་སྐྱེ་བས་ཐོབ་པའོ་ཞེས་གཞན་དག་ཟེར་རོ། །རྗེས་འབྲང་དང་བཅས་པའོ་ཞེས་ཁ་མར་བསྟན་པ་ནི་ཐོས་པ་ལས་བྱུང་བ་ལ་སོགས་པ་རྣམས་ལ་ཡང་སྦྱར་རོ། །དེ་ལ་ཇི་ལྟར་སྐྱེ་བས་ཐོབ་རྗེས་འབྲང་དང་བཅས་པ་ཕུང་པོ་བཞིའི་རང་བཞིན་ཡིན་པ་དེ་བཞིན་དུ་ཐོས་པ་ལས་བྱུང་བ་དང་བསམ་པ་ལས་བྱུང་བ་ཡིན་ནོ། །བསྒོམ་པ་ལས་བྱུང་བ་ནི་ཕུང་པོ་ལྔ་པོ་སྟེ་ཉེར་བསྡོགས་དང་བསམ་གཏན་དང་བསམ་གཏན་ཁྱད་པར་ཅན་རྣམས་ན་བསམ་གཏན་གྱི་སྡོམ་པ་ཡོད་པའི་ཕྱིར་རོ། །ཉེར་བསྡོགས་རྣམས་དང་གཟུགས་མེད་པ་རྣམས་ན་ནི་ཕུང་པོ་བཞི་པའོ། །བསྟན་བཅོས་གང་ནི་ཡེ་ཤེས་ལ་འཇུག་པ་ལ་སོགས་པ་སྟེ། དེ་ཡང་མིང་དང་ཚིག་དང་ཡི་གེའི་ཚོགས་ཀྱི་བདག་ཉིད་ཡིན་པའི་ཕྱིར་མི་ལྡན་པའི་འདུ་བྱེད་ཀྱི་རང་བཞིན་ཡིན་ལ། ཚིག་གི་རང་བཞིན་ཡིན་པའི་ཕྱིར་སྒྲའི་རང་བཞིན་ཏེ། དེ་སྐད་དུ་ཡང༌། ཚིག་གམ་མིང་ཡིན་དེ་དག་ཀྱང༌། །གཟུགས་དང་འདུ་བྱེད་དག་ཏུ་འདུས། །ཞེས་གསུངས་སོ། །འདིར་ཡང་འཁོར་དང་བཅས་པ་སྨོས་པ་རྗེས་སུ་འཇུག་པས་བསྟན་བཅོས་ཀྱང་ཕུང་པོ་གཉིས་པའམ་ཕུང་པོ་གཅིག་པ་ཞེས་སེམས་སོ། །བསྟན་བཅོས་ནི་དོན་གསལ་བར་བྱེད་པས་ཤེས་རབ་ཀྱི་ཚོགས་སུ་འདོད་དེ། རིགས་དང་སྤྱི་ལ་སོགས་པ་མི་ལྡན་པའི་འདུ་བྱེད་ནི་དོན་གསལ་བར་བྱེད་ནུས་པ་མ་ཡིན་ནོ། །འདི་ཡང་ཤེས་རབ་ཀྱི་འཁོར་དུ་གྱུར་པར་སེམས་པ་མ་ཡིན་ནམ་ཞེ་ན། རིགས་ལ་སོགས་པ་དོན་ཉིད་ལ་དམིགས་པ་མ་ཡིན་ཏེ། སེམས་དང་སེམས་ལས་བྱུང་བ་བཞིན་ནོ། །ཡང་ན་ཆོས་མངོན་པར་མི་འདོད་པ་ནི་དེ་ལ་དམིགས་པ་མེད་པའི་ཕྱིར་རོ། །སྐྱེ་བས་ཐོབ་ལ་ལ་སོགས་པའི་ཤེས་རབ་ཆོས་མངོན་པར་འདོད་དོ། །ཅི་སྟེ་ཕྱི་མ་ཕྱི་མ་ཤེས་རབ་ཀྱི་རྒྱུ་དང་ཤེས་རབ་མ་ཡིན་པའི་རྒྱུ་ཡིན་པའི་ཕྱིར་འདི་ཐམས་ཅད་ཚོགས་པ་ཐ་དད་
པའི་འབྲས་བུའི་ཕྱིར་ཕྱི་མ་ཕྱི་མ་ཤེས་རབ་འཁོར་དང་བཅས་པའི་རྒྱུར་འགྱུར་རོ་ཞེ་ན། ཤེས་རབ་མ་ཡིན་པའི་འཁོར་དུ་གྱུར་པའི་རིགས་ལ་སོགས་པ་ཆོས་མངོན་པ་ཉིད་དུ་འགལ་ལོ། །དེ་ཡང་དེའི་ཚོགས་སུ་གྱུར་པའི་ཕྱིར་ཆོས་མངོན་པ་ཞེས་བརྗོད་དེ་དེ་ལྟར་བསྟན་བཅོས་ཀྱང་ཟག་པ་མེད་པའི་ཤེས་རབ་ཀྱི་ཚོགས་སུ་གྱུར་པའི་ཕྱིར་ཆོས་མངོན་བ་ཞེས་བརྗོད་དོ། །ཇི་ལྟར་སྐྱེ་བས་ཐོབ་པའི་ཤེས་རབ་མེད་པར་ཡེ་ཤེས་ལ་འཇུག་པ་ལ་སོགས་པ་ཚིག་གི་རྣམ་པར་འདོན་མི་ནུས་པས་དངོས་སམ་བརྒྱུད་པའི་སྒོ་ནས་ཟག་པ་མེད་པའི་ཤེས་རབ་ཀྱི་ཚོགས་སུ་འགྱུར་བས་ཐོབ་པ་ཆོས་མངོན་བར་འདོད་པ་དེ་བཞིན་དུ་བསྟན་བཅོས་ཀྱང་དོན་གསལ་བར་བྱེད་པ་ཡིན་པའི་ཕྱིར་དངོས་སམ་བརྒྱུད་པའི་སྒོ་ནས་ཐོས་བ་ལས་བྱུང་བ་ལ་སོགས་པའི་ཤེས་རབ་ཀྱི་ཚོགས་སུ་གྱུར་བས་ཆོས་མངོན་པ་ཞེས་བྱའོ། །ཇི་ལྟར་ཡང་གང་ཁོ་ན་ཟག་པ་མེད་པའི་ཤེས་རབ་དང་བསྟན་བཅོས་ཀྱི་ཚོགས་སུ་གྱུར་པ་དེ་ཁོ་ན་ཆོས་མངོན་པ་ཉིད་དང་གང་ཁོ་ན་སྐྱེ་བས་ཐོབ་པ་ལ་སོགས་པའི་ཤེས་རབ་དངོས་སམ་བརྒྱུད་པས་ཟག་པ་མེད་པའི་ཤེས་རབ་ཀྱི་དབང་པོའི་ཚོགས་སུ་གྱུར་པ་ཁོ་ན་ཆོས་མངོན་པ་ཡིན་གྱི་གཞན་ནི་མ་ཡིན་པ་ཉིད་དོ། །དེ་ལྟར་ན་འོ་ན་མདོ་སྡེ་ལ་སོགས་པ་དེ་བཞིན་གཤེགས་པའི་གསུང་གི་རྣམ་པ་ཐམས་ཅད་ཟག་པ་མེད་པའི་ཤེས་རབ་ཀྱི་ཚོགས་སུ་གྱུར་པའི་ཕྱིར་ཆོས་མངོན་པ་ཉིད་དུ་འགྱུར་རོ་ཞེ་ན། དེ་ནི་དེ་ལྟ་ཡིན་མོད་ཀྱི། འོན་ཀྱང་མདོ་སྡེ་ནི་ཕལ་ཆེར་གདུལ་བྱའི་བསམ་པ་ལ་མངོན་དུ་ཕྱོགས་པ་ཡིན་ཞིང་འདུལ་བ་ནི་བྱུང་བས་རབ་ཏུ་ཕྱེ་བ་ཡིན་ལ། ཆོས་མངོན་པ་ནི་ཆོས་ཀྱི་མཚན་ཉིད་ལ་མངོན་དུ་ཕྱོགས་པ་ཁོ་ན་ཡིན་པས་དེ་ཁོ་ན་ལ་ཆོས་མངོན་པ་ཞེས་མིང་དུ་ཆགས་སོ། །དེའི་ཕྱིར་གཞན་དུ་ཐལ་བ་མེད་དོ། །བཙུན་པ་འདུས་བཟང་ན་རེ། གང་ཞེས་བྱ་བས་འཇིག་རྟེན་པའི་བསྒོམ་པ་ལས་བྱུང་བ་དང༌། ཡང་ཞེས་བྱ་བས་བསམ་པ་ལས་བྱུང་བ་དང༌། དང་ཞེས་བྱ་བས་ཐོས་པ་ལས་བྱུང་བ་དང༌། བསྟན་བཅོས་གང་དང་ཞེས་པ་འདིར་དང་གི་སྒྲས་སྐྱེ་བས་ཐོབ་པ་བཟུང་ངོ་ཞེས་ཟེར་རོ། །ཅིའི་ཕྱིར་ཡང་འདིར་གང་ཞེས་པ་འདིས་བསྒོམ་པ་ལས་
བྱུང་བ་ཉིད་བཟུང་ཞེ་ན། ནཱ་ཏཱ་སྱཱ་ཨེ་བ་སཱཀྵ་ཏ་ཀཱ་རཎ་བྷཱ་བཱ་ད་བནྟ་དྷི་ཡཱ་ན་སཱ་ཀྵ་ཏ་བསྒོམ་པ་ལས་བྱུང་བའི་རྒྱུར་དེ་གཟུང་བའི་ཕྱིར་ཡང་འབད་པ་བར་སྐབས་སུ་བྱ་བར་འགྱུར་རོ། །དེའི་ཕྱིར་དངོས་སམ་བརྒྱུད་པས་ཟག་པ་མེད་པའི་ཤེས་རབ་ཀྱི་དབང་པོའི་ཚོགས་སུ་གྱུར་པ་གང་ཡིན་པ་དེ་མ་ལུས་པ་གང་ཞེས་པ་འདིས་བཟུང་ངོ༌། །འདི་སྐད་བཤད་པར་འགྱུར་ཏེ། ཟག་པ་མེད་པའི་ཤེས་རབ་འགའ་ཞིག་ཁོ་ན་ཆོས་མངོན་པ་མ་ཡིན་ནོ། །འོ་ན་ཅི་ཞེ་ན། དེའི་ཚོགས་སུ་གྱུར་པའི་ཕྱིར་ཟག་པ་དང་བཅས་པའི་ཤེས་རབ་གང་ཡིན་པ་དེ་རྣམས་ཀྱང་ཆོས་མངོན་པ་སྟེ། དེ་ལྟར་གཉི་ག་ལ་ཡང་ངེས་པའི་ཚིག་ཏུ་ན་དོན་མཚུངས་སོ། །ངེས་པའི་ཚིག་ནི་ངེས་པར་ཕྱེ་ནས་གཏན་ལ་ཕབ་པའི་ཚིག་སྟེ། མིང་འདོགས་པའི་རྒྱུ་མཚན་སྟོན་པའོ་ཞེས་བྱ་བའི་ཐ་ཚིག་གོ །རང་གི་མཚན་ཉིད་འཛིན་པའི་ཕྱིར་ཆོས་ཏེ་རང་བཞིན་ལས་མི་འདའོ་ཞེས་བྱ་བའི་ཐ་ཚིག་གོ ། དེ་ལ་ཟག་པ་མེད་པའི་ཤེས་རབ་ཀྱི་བདག་ཉིད་ཀྱི་ཆོས་འཁོར་དང་བཅས་པ་འདི་ནི་དོན་དམ་པའི་ཆོས་སམ་མྱ་ངན་ལས་འདས་པའམ་ཆོས་ཀྱི་མཚན་ཉིད་ལ་མངོན་དུ་ཕྱོགས་པར་བྱེད་པའི་ཆོས་ཡིན་པས་ན་ཆོས་མངོན་པའོ། །དམ་པའི་སྒྲ་ནི་མཆོག་གི་རྣམ་གྲངས་སོ། །དོན་གྱི་སྒྲ་ནི་ཤེས་བྱའི་རྣམ་གྲངས་སོ། །ཇི་ལྟར་ཡིད་ཀྱི་རྣམ་པར་ཤེས་པའི་དོན་ནི་ཆོས་ཐམས་ཅད་ཅེས་བྱ་སྟེ་ཆོས་ཀྱི་སྒྲ་ནི་དངོས་པོའི་རྣམ་གྲངས་སོ། །དོན་དམ་པའི་དངོས་པོ་ཞེས་བྱ་བས་མཆོག་ཏུ་གྱུར་པའི་ཤེས་བྱའི་དངོས་པོ་ཞེས་ཇི་སྐད་བཤད་པ་དེ་བསྟན་པར་འགྱུར་རོ། །དེ་ཡང་ཅི་ཞེ་ན། དེའི་ཕྱིར་མྱ་ངན་ལས་འདས་པ་ཞེས་གསུངས་སོ། །འམ་གྱི་སྒྲ་ནི་རྣམ་པར་བརྟགས་པའི་དོན་ཏོ། །མྱ་ངན་ལས་འདས་པ་ནི་དགེ་བ་དང་དག་པའི་ཕྱིར་འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་ལས་མཆོག་ཡིན་ནོ། །འདུས་བྱས་ཀྱི་ཆོས་ཐམས་ཅད་ཡོངས་སུ་བཏང་བས་སམ་དེ་ཁས་མ་བླངས་པའི་ཕྱིར་མཆོག་གོ །ཡང་ན་དམ་པ་ནི་འཇིག་རྟེན་ལས་འདས་པའི་ཡོ་ཤེས་སོ། །དེའི་དོན་ནི་དམ་པའོ། །སྡུག་བསྔལ་དང་ཀུན་འབྱུང་དང་ལམ་རྣམས་ཀྱང་དེའི་དོན་ཡིན་པས་དེའི་ཕྱིར་མྱ་ངན་ལས་འདས་པ་ཞེས་སྨོས་སོ། །ཡང་ན་དོན་གྱི་སྒྲ་ནི་དགོས་པ་བརྗོད་པའོ། །
དགོས་པ་དམ་པ་ནི་དོན་དམ་པ་སྟེ། དེ་ལས་གཞན་པའི་དགོས་པ་ཁྱད་པར་ཅན་ཡོད་པ་མ་ཡིན་ནོ། །དེ་ཡང་ཅི་ཞིག་ཅེ་ན་དེའི་ཕྱིར་མྱ་ངན་ལས་འདས་པ་ཞེས་སྨོས་སོ། །ཡང་ན་དགེ་བ་ཟག་པ་མེད་པ་ཉིད་ཀྱི་ཕྱིར་དམ་པ་ནི་ལམ་མོ། །དེ་ལ་རབ་ཏུ་སྦྱོར་བའི་ཕྱིར་མྱ་ངན་ལས་འདས་པ་ནི་དོན་དམ་པའོ། །ལམ་བསྒོམས་པ་ཡང་འབྲལ་བའི་དོན་ཅན་ཡིན་པའི་ཕྱིར་ཏེ། སྐྱེ་འཆི་དག་དང་བྲལ་ཏེ་མྱ་ངན་ལས་འདས་པར་འགྱུར་རོ། །མྱ་ངན་ལས་འདས་པའི་ཆོས་ཀྱི་སྒྲ་ཡང་ཐམས་ཅད་དུ་དམ་པ་མ་ཡིན་པའི་དངོས་པོར་རྟོག་པ་བསལ་བའི་ཕྱིར་རོ། །ཆོས་ཀྱི་མཚན་ཉིད་ནི་དེས་མཚོན་པར་བྱེད་པས་མཚན་ཉིད་དེ། ཟག་པ་དང་བཅས་པ་རྣམས་མི་རྟག་པ་ལ་སོགས་པའི་རྣམ་པ་དང༌། རྒྱུ་ལ་སོགས་པའི་རྣམ་པ་དང༌། ཟག་པ་མེད་པ་རྣམས་ཞི་བ་ལ་སོགས་པའི་རྣམ་པ་དང༌། ལམ་ལ་སོགས་པའི་རྣམ་པ་དང༌། ཐམས་ཅད་རྟེན་ཅིང་འབྲེལ་པར་འབྱུང་བར་རོ། །མངོན་པ་ནི་མངོན་དུ་ཕྱོགས་པར་བྱེད་པ་སྟེ་དེ་ལ་མྱ་ངན་ལས་འདས་པ་ཐོབ་པར་བྱེད་པས་མྱ་ངན་ལས་འདས་པ་ལ་མངོན་དུ་ཕྱོགས་པ་དང༌། ཆོས་ཀྱི་མཚན་ཉིད་མངོན་པར་རྟོགས་པར་བྱེད་པས་ཆོས་ཀྱི་མཚན་ཉིད་ལ་མངོན་དུ་ཕྱོགས་པའོ། །ཡང་གཞན་དག་ན་རེ། དོན་དམ་པ་དང་བརྡར་བཏགས་པ་པ་དག་ཀྱང་དོན་དམ་པའི་ཆོས་མྱ་ངན་ལས་འདས་པ་ཐོབ་པར་བྱེད་པ་ལ་མངོན་དུ་ཕྱོགས་ལ་ཁྱད་པར་ནི་ཉེ་བ་དང་རིང་བའི་བྱེ་བྲག་གོ །གཉི་ག་ཡང་ཆོས་ཀྱི་མཚན་ཉིད་ལ་དམིགས་ཤིང་མངོན་དུ་ཕྱོགས་སོ། །བསྟན་བཅོས་ཀྱི་མིང་ཅན་གྱི་མྱ་ངན་ལས་འདས་པ་ཐོབ་བར་བྱེད་པའི་མཚན་ཉིད་གསལ་བར་བྱེད་པས་མངོན་དུ་ཕྱོགས་པའོ་ཞེས་ཟེར་རོ། །དེ་ལྟར་དོན་དམ་པ་པ་ནི་ངེས་པའི་ཚིག་གིས་དང་བརྡར་བཏགས་པ་པ་ནི་དོན་དམ་པ་པའི་ཚོགས་སུ་གྱུར་པའི་ཕྱིར་ཆོས་མངོན་པའི་སྒྲ་འཇུག་སྟེ། དཔེར་ན་གཡོ་བའི་ཚོགས་ལས་རྒྱ་མཚོ་དང༌། དེའི་སྒྲ་ཐོས་པ་ལས་སྐྱེས་བུ་འདིའོ་ཞེས་དཔྱོད་པ་བཞིན་ནོ། །ཅི་སྟེ་དེའི་ཚོགས་སུ་གྱུར་པ་ཉིད་རྣམ་པ་འདིས་བཤད་ཅེ་ན། དེ་བཞིན་དུ་མྱ་ངན་ལས་འདས་པ་ཡང་ཆོས་ཀྱི་མཚན་ཉིད་ལ་མངོན་དུ་ཕྱོགས་པས་ཆོས་མངོན་པ་ཉིད་མ་ཡིན་གྱི།
འོ་ན་ཅི་ཞེ་ན་ཚོགས་སུ་གྱུར་པ་ཉིད་ལས་ཞེས་པ་འདི་ནི་ལན་མ་ཡིན་ནོ། །ཚིག་བསྡུ་བ་དུ་མ་འཐད་པས་ཚིག་བསྡུ་བ་ཁོང་དུ་ཆུད་པར་འདོད་ནས་བསྟན་བཅོས་འདི་ཇི་ལྟར་ན་ཆོས་མངོན་པའི་མཛོད་ཡིན་ཞེ་ན་ཞེས་བྱ་བ་གསུངས་ཏེ་དོན་གང་གིས་ཡིན་ཞེས་བྱ་བའི་དོན་ཏོ། །ཡང་ན་ཤེས་རབ་ཀྱི་ཚོགས་སུ་གྱུར་པའི་ཁྱིམ་བསྟན་བཅོས་འདི་ཡང་ཆོས་མངོན་པ་ཉིད་ཡིན་ཏེ། ཡེ་ཤེས་ལ་འཇུག་པ་ལ་སོགས་པ་བཞིན་ནོ། །ཇི་ལྟར་ཆོས་མངོན་པའི་མཛོད་ཅེས་བརྗོད་པར་བྱ་ཞེ་ན། དེའི་ཕྱིར་འདིར་དེ་དོན་དུ་ཞེས་བྱ་བ་ལ་སོགས་བ་གསུངས་ཏེ། དེ་ཞེས་བྱ་བ་ནི་བསྟན་བཅོས་ཀྱི་མིང་ཅན་ཏེ་དེ་མ་ཐག་པ་ཡིན་པའི་ཕྱིར་རམ་ཤེས་རབ་ཀྱི་བདག་ཉིད་ཅན་ལ་མི་སྲིད་པའི་ཕྱིར་རོ། །སྔ་མར་ནི་དྲུག་པའི་སྐྱེས་བུའོ། །ཕྱི་མར་ནི་འབྲུ་མང་པོ་པའོ། །དོན་དུ་ཞེས་པ་ཡི་གེའི་སྒོ་ནས་ནི་མ་ཡིན་ཏེ་ཆུད་པ་མི་སྲིད་པའི་ཕྱིར་རོ། །དོན་དུ་ཡང་ཇི་ལྟར་གཅེས་གཅེས་ཡིན་གྱི་མཐའ་དག་ནི་མ་ཡིན་ནོ། །དོན་རྣམས་ཀྱི་གཅེས་པ་ནི་གང་ཞིག་བསྟན་ན་དོན་དུ་མ་བསྟན་པར་འགྱུར་བའོ། །དེ་ལས་འདི་བྱུང་བ་ནི་དོན་གཅེས་གཅེས་རྣམས་ཕྱི་མིང་དང་ཚིག་དང་ཡི་གེ་བླངས་བ་ལས་སོ། །མཛོད་དང་འདྲ་བས་ན་མཛོད་དེ། རལ་གྲིའི་ཤུབས་དང་མཚུངས་པའི་ཕྱིར་རོ། །དཔེར་ན་རལ་གྲི་གང་ལས་འབྱུང་བ་དང་གང་དུ་འཇུག་པ་དེ་ལ་དེའི་ཤུབས་ཞེས་འཇིག་རྟེན་ན་བརྗོད་པ་བཞིན་ནོ། །དེ་ལྟར་ན་ཆོས་མངོན་པ་རྣམ་པ་གཉིས་བསྟན་ཏེ། དོན་དམ་པ་པ་དང་བརྡར་བཏགས་པ་པ་ཡང་རྣམ་པ་གཉིས་ཏེ། ཤེས་རབ་དང་བསྟན་བཅོས་ཀྱི་བདག་ཉིད་ཅན་གྱི་ཕྱིར་དང་བསྟན་བཅོས་ཀྱང་རྟེན་དང་བརྟེན་པའི་ཕྱིར་རོ། །ཚིག་བསྡུ་བ་གཉིས་ཀྱི་དོན་ངེས་པར་བཟུང་བ་བྱས་ཟིན་ཏེ། ཡང་ཅིའི་ཕྱིར་ཆོས་མངོན་པ་བསྟན་ཞེས་བྱ་བ་ལ་སོགས་པ་ནི་དགོས་པ་ཅི་ཡོད་ཅེས་བྱའོ། །དགོས་པ་ཆུང་བའི་བསྟན་བཅོས་དག་ཀྱང་ཡོད་ལ། དོན་མ་ཡིན་པའི་དགོས་པ་ཅན་ཡང་ཡོད་པས་དེའི་ཕྱིར་དགོས་པ་དྲིས་པ་ཡིན་ནོ། །འདི་དང་པོ་ཉིད་དུ་སུས་བསྟན་ཅེ་ན་ཞེས་པ་ནི་སྔོན་དུ་སུས་བསྟན་ཅེས་པ་སྟེ། དགོས་པའི་དབང་དུ་བྱས་ནས་འཇུག་པས་འབྲས་བུ་དང་ལྡན་པ་མངོན་པར་ཡིད་ཆེས་པས་བསྟན་པ་མཐོ་རིས་ལ་སོགས་པའི་
དགོས་པ་ཅན་ལ་ཕལ་ཆེར་འཇུག་གི་ཐམས་ཅད་ལ་མ་ཡིན་པས་ཉེ་བར་སྟོན་པ་བ་ཚོལ་བ་ཡིན་ནོ། །སློབ་དཔོན་འདུས་བཟང་ན་རེ། ཆོས་ལ་རྟོན་པར་བྱའི་གང་ཟག་ལ་མ་ཡིན་ནོ་ཞེས་གསུངས་པའི་ཕྱིར་འདི་བཙལ་བར་བྱ་བ་མ་ཡིན་ནོ་ཞེ་ན། གང་ཟག་ཚད་མར་བྱེད་པའི་དབང་དུ་བྱས་ནས་འདི་དང་པོ་ཉིད་དུ་སུས་བསྟན་ཞེས་དེ་སྐད་བསྙད་དེ། དེ་ལྟར་གསུངས་སོ་ཞེས་བྱ་བ་དེ་ཡང་མདོའི་དོན་ཡོངས་སུ་མ་ཤེས་པས་སོ། །དེ་ལ་གང་གི་ཕྱིར་སངས་རྒྱས་ཀྱིས་གསུངས་པ་ཁོ་ན་ཆོས་ལ་རྟོན་པར་གསུངས་སོ། །སངས་རྒྱས་ཀྱིས་གསུངས་པ་ཉིད་གཏན་ལ་དབབ་བ་གང་ཡིན་པ་དེ་ལ་མི་འགལ་ལོ། །དེ་ལས་གཞན་གྱིས་བསྟན་པ་ལ་ཡང་གཟུང་བར་བྱ་སྟེ་འགལ་བ་མེད་ཞེས་པ་འདི་ནི་འདིར་མདོའི་དོན་ཏེ། བཅོམ་ལྡན་འདས་རྩ་བ་ལགས་སོ། །བཙུན་པ་བཅོམ་ལྡན་འདས་ཆོས་རྣམས་ཀྱི་ཚུལ་ཅན་ལགས་སོ། །བཅོམ་ལྡན་འདས་རྟོན་པར་བྱ་བ་ལགས་སོ་ཞེས་གསུངས་པའི་ཕྱིར་དེ་ལས་འདི་བཙལ་བར་བྱ་བ་མི་འཐད་པ་མེད་དོ། །ཆོས་མངོན་པ་འདི་ནི་འཕགས་པ་ཀཱ་ཏྱཱ་ཡ་ནའི་བུ་ལ་སོགས་པ་རྣམས་ཀྱིས་བྱས་པར་གྲག་གོ་ཞེས་ཐོས་ནས་ཚོལ་བར་བྱེད། གང་ཡང་གང་ཟག་ཚད་མར་བྱེད་པའི་དབང་དུ་བྱས་ནས་གསུངས་པ་སྐྱོན་མེད་དོ་ཞེས་པ་གང་ཞིག་བཅོམ་ལྡན་འདས་ཚད་མར་གྱུར་པས་བཀག་པ་དེ་ཉིད་ཚད་མར་ཁས་ལེན་པར་མི་བྱེད་པ་འདི་ནི་མི་རིགས་སོ། །འདི་ལྟར་སློབ་དཔོན་ཆོས་མངོན་པ་འཆད་པར་གུས་ཞེ་ན་ཞེས་པ་ནི་འཆད་པར་གུས་པར་བྱེད་ཅེས་བྱ་བའི་ཐ་ཚིག་གོ །གང་གི་ཕྱིར་ཆོས་རྣམས་རབ་ཏུ་རྣམ་འབྱེད་མེད་པར་ཞེས་བྱ་བ་ལ། དེ་ལ་ཆོས་རབ་ཏུ་རྣམ་པར་འབྱེད་པ་ལས་གཞན་དུ་ཉོན་མོངས་པ་ཉེ་བར་ཞི་བར་བྱ་བའི་ཐབས་ཡོད་པ་མ་ཡིན་ནོ། །འོ་ན་ཅི་ཞེ་ན་ཆོས་རབ་ཏུ་རྣམ་པར་འབྱེད་པ་ཁོ་ན་ཉོན་མོངས་པ་ཉེ་བར་ཞི་བར་བྱེད་པའི་ཐབས་ཡིན་གྱི་གཞན་ནི་ཡོད་པ་མ་ཡིན་ནོ་ཞེས་པ་དག་གི་དོན་ཏོ། །ཡང་བཅོམ་ལྡན་འདས་ཀྱིས་ཆོས་གཅིག་ཡིད་ཀྱི་མངོན་པར་ཤེས་པ་དང་ཡོངས་སུ་ཤེས་པ་སྤངས་པ་ཡང་དག་པར་སྡུག་བསྔལ་ཟད་པར་ང་མི་སྨྲའོ་ཞེས་ལྟ་བའི་རྣམ་པ་ཁོ་ན་བསྟན་ཏོ། །འདི་སྐད་བརྗོད་
པར་འགྱུར་ཏེ། སྒྲ་ཁོང་དུ་ཆུད་པ་ལ་བརྡ་སྤྲོད་པ་ལས་གཞན་པའི་ཐབས་སླ་བ་ཡོད་པ་མ་ཡིན་པས་བརྡ་སྤྲོད་པ་ལས་གཞན་པའི་ཐབས་སླ་བས་སྒྲ་ཤེས་པའི་ནུས་པ་བཞིན་ནོ། །གལ་ཏེ་ཉོན་མོངས་པ་སྤངས་པར་མ་གྱུར་ན་དེ་ལས་ཅིར་འགྱུར་ཞེ་ན། དེའི་ཕྱིར་ཉོན་མོངས་པས་ཀྱང་འཇིག་རྟེན་ཞེས་བྱ་བ་ལ་སོགས་པ་སྨོས་ཏེ། གཏིང་ཐུག་པར་དཀའ་བ་དང་བརྒལ་བར་དཀའ་བའི་ཕྱིར་འཁོར་བ་ནི་མཚོ་ཆེན་པོ་བཞིན་ནོ། །འཁོར་བ་ཞེས་བྱ་བ་ཡང་ཁམས་གསུམ་པོའམ་འགྲོ་བ་ལྔ་པོར་སེམས་ཅན་རྣམས་ཀྱི་ཉོན་མོངས་པའི་རྒྱུ་མཚན་གྱིས་སྐྱེ་བ་ཡང་དང་ཡང་དུ་གནས་པས་ན་འཇིག་རྟེན་འཁྱམ་པར་བྱེད་དོ། །དེ་བས་ཞེས་བྱ་བ་ནི་ཇི་སྲིད་ཉོན་མོངས་པ་རྣམས་ཀྱིས་འཇིག་རྟེན་འཁོར་བའི་རྒྱ་མཚོ་ཆེན་པོ་འདིར་འཁྱམ་པར་བྱེད་པས་སོ། །དེའི་ཕྱིར་ཞེས་བྱ་བ་ནི་ཆོས་སུ་རྣམ་པར་འབྱེད་པ་དེའི་དོན་དུ་སྟེ་དེའི་རྒྱུ་མཚན་དུ་ཞེས་བྱ་བའི་དོན་ཏོ། །སྟོན་པ་ཞེས་བྱ་བ་ནི་སངས་རྒྱས་བཅོམ་ལྡན་འདས་སོ། །གསུངས་སོ་ཞེས་བྱ་བ་ནི་བསྟན་པ་སྟེ། ཤཱ་རིའི་བུ་ལ་སོགས་པ་སློབ་མ་རྣམས་ཀྱིས་ཆོས་ཀྱི་མཚན་ཉིད་བསྟན་པ་དང་རབ་ཏུ་རྣམ་པར་འབྱེད་པར་མི་ནུས་བས་སྟོན་པ་སངས་རྒྱས་ཀྱིས་བསྟན་བཅོས་མཛད་པར་རིགས་པའི་ཕྱིར་ཆོས་མངོན་པ་འདི་ཉེ་བར་བསྟན་ཏོ། །ཡང་ཇི་ལྟར་ཆོས་རབ་ཏུ་རྣམ་པར་འབྱེད་པ་ལས་གཞན་པ་ཉོན་མོངས་པ་སྤོང་བའི་ཐབས་མེད་དོ་ཞེས་བྱ་བ་འདི་ཁོང་དུ་ཆུད་པར་བྱ་ཞེ་ན། ཆོས་རབ་ཏུ་རྣམ་པར་འབྱེད་པ་ནི་གཏི་མུག་གི་གཉེན་པོ་ཡིན་པའི་ཕྱིར་ལ། ཉོན་མོངས་པ་དང་ཉེ་བའི་ཉོན་མོངས་པ་འབྱུང་བ་ཡང་བླུན་པོ་ལ་སྲིད་ཀྱི་བླུན་པོ་མ་ཡིན་པ་ལ་མ་ཡིན་ཏེ། དེའི་ཕྱིར་ཆོས་རབ་ཏུ་རྣམ་པར་འབྱེད་པ་ལ་ཉོན་མོངས་པ་སྤོང་བའི་ཐབས་གཞན་མེད་དོ། །འདིར་ཅིའི་ཕྱིར་ཆོས་མངོན་པ་བསྟན་ཞེས་བྱ་བ་དེའི་ལན་ནོ། །ཆོས་རབ་ཏུ་རྣམ་པར་འབྱེད་པའི་དོན་དུ་ཞེས་བྱ་བའོ། །ལྷག་མ་ནི་ཆོས་རབ་ཏུ་རྣམ་པར་འབྱེད་པའི་དགོས་པའོ། །འདི་དང་པོ་ཉིད་དུ་སུས་བསྟན་ཞེས་བྱ་བ་དེའི་ལན་ནི་སངས་རྒྱས་བཅོམ་ལྡན་འདས་ཀྱིས་ཞེས་བྱ་བའོ། །གལ་ཏེ་ཆོས་མངོན་པའི་བྱེད་པ་པོ་དག་ནི་ཅི་ལྟར་ཡེ་ཤེས་ལ་འཇུག་པ་ན་
འཕགས་པ་ཀཱ་ཏྱཱ་ཡ་ནའི་བུའོ། །རྣམ་པར་ཤེས་པའི་ཚོགས་ནི་གནས་བརྟན་ལྷ་སྐྱིད་དོ། །རབ་ཏུ་བྱེད་པའི་རྐང་པ་ནི་འཕགས་བ་དབྱིག་བཤེས་སོ། །དེ་བཞིན་དུ་གཞན་དག་ཀྱང་གཞན་གྱིས་ཏེ་དེ་ལྟ་བུ་ལ་སོགས་པ་ཐོས་བ་མ་ཡིན་ནམ། ཅི་ལྟར་ན་ཆོས་མངོན་པ་བཅོམ་ལྡན་འདས་ཀྱིས་གསུངས་ཞེས་བྱ་བའི་དོགས་བ་བསལ་པའི་ཕྱིར་དེ་ནི་བཅོམ་ལྡན་འདས་ཀྱིས་སིལ་བུར་བཤད་ཅེས་གསུངས་ཏེ། ཆོས་མངོན་པ་དེ་ནི་བཅོམ་ལྡན་འདས་ཀྱིས་གདུལ་བྱའི་རང་བཞིན་གྱི་དྲི་བ་ལ་བལྟོས་ནས་སིལ་བུར་བཤད་ལ། སྟོན་པ་མྱ་ངན་ལས་འདས་ནས་གསུང་རབ་ཏུ་གྱུར་པ་ན་གནས་བརྟན་ཀཱ་ཏྱཱ་ཡ་ནའི་བུ་ལ་སོགས་པ་མངོན་པར་ཤེས་པ་དྲུག་དང་ལྡན་པ་རྣམས་ཀྱིས་སྨོས་ནས་ཤེས་པས་ཆོས་ཀྱི་རྗེས་དགོངས་པ་དང་ཆོས་ཉིད་ལ་བལྟོས་ཏེ་བསྡུས་ཤིང་ཚོམས་སུ་བྱས་ནས་སིལ་བུ་ལ་སོགས་པ་ཕུང་པོར་བཅད་དེ་བཞག་སྟེ། བཙུན་པ་ཆོས་སྐྱོབ་ཀྱིས་ཆེད་དུ་བརྗོད་པའི་ཚོམས་སྡེ་ཚན་དུ་བྱས་པ་བཞིན་ནོ། །ཆེད་དུ་བརྗོད་པའི་ཚིགས་སུ་བཅད་བདག་ནི་ལུང་དག་དང་འདུལ་བ་ལས་ལ་ལར་བཤད་ལ་དེ་དག་ཀྱང་བཙུན་པ་ཆོས་སྐྱོབ་ཀྱིས་སྡེ་ཚན་དུ་བྱས་ནས་བཞག་པ་བཞིན་དུ་ཆོས་མངོན་པ་ཡང་ཡིན་ནོ། །དེས་ན་ཆོས་མངོན་པ་ནི་སངས་རྒྱས་ཀྱིས་གསུངས་པ་ཁོ་ནའོ། །ལོའི་སྒྲ་ནི་མདོ་སྡེ་པ་ཆོས་མངོན་པ་སངས་རྒྱས་ཀྱིས་གསུངས་པར་མི་འདོད་པ་ཀུན་ཏུ་མཚོན་པར་བྱེད་པའི་དོན་ཏེ། དེ་ལྟར་མི་འདོད་པ་ཡང་ཅིའི་ཕྱིར་ཞེ་ན། གནས་བརྟན་ཀཱ་ཏྱཱ་ཡ་ནའི་བུ་ལ་སོགས་པས་བྱས་པར་ཐོས་པ་དང་ཉེ་བར་བསྟན་པ་མེད་པ་ལ་རྟོན་པ་ཉིད་དང་མདོ་སྡེ་ལ་རྟོན་པར་མི་བྱའོ་ཞེས་བརྗོད་པའི་ཆོས་མངོན་པ་ལ་མི་རྟོན་པས་རིས་མཐུན་པ་གཞན་ལ་ཡང་སྟེ། ཆོས་མངོན་པའི་གཞུང་གི་བྱེ་བྲག་ལས་རིགས་པ་དང་འགལ་བ་གང་དག་ཆོས་མངོན་པར་བཤད་པའི་ལྡན་པ་མ་ཡིན་པ་དང་འདས་པ་དང་མ་འོངས་པ་དང་དགྲ་བཅོམ་པ་ཡོངས་སུ་ཉམས་པ་ལ་སོགས་པ་རྣམས་སོ། །དེ་ཡིས་རིགས་པ་བཟོད་དོ་ཞེ་ན་མ་ཡིན་ཏེ་རིགས་པ་དང་འགལ་བའི་ཚིག་ཡོད་པས་སོ། །བཙུན་པ་འདུས་བཟང་ན་རེ། སངས་རྒྱས་ཀྱིས་རྗེས་སུ་བཞེད་པའི་ཕྱིར་སངས་རྒྱས་ཀྱིས་གསུངས་པ་སྟེ།
ཡང་དག་པར་འགྲོ་བའི་རྣམ་གྲངས་བཞིན་ནོ། །སངས་རྒྱས་ཀྱིས་རྗེས་སུ་བཞེད་པ་ཡང་འདིར་ཡང་དག་པར་དཔྱད་དེ་ཀུན་ནས་ཉོན་མོངས་པ་དང་རྣམ་པར་བྱང་བའི་རྒྱུ་དང་འབྲས་བུ་ཡོངས་སུ་ཤེས་པ་དང་རྗེས་སུ་མཐུན་པའི་ཕྱིར་རོ། །སངས་རྒྱས་ཀྱིས་རྗེས་སུ་བཞེད་ཅེས་པ་གལ་ཏེ་འདི་སྔ་མ་དང་མཚུངས་ན་ཡང་དག་པར་འགྲོ་བའི་རྣམ་གྲངས་ལ་སོགས་པ་མདོ་ཡོངས་སུ་འདོར་བ་མ་ཡིན་པར་འགྱུར་ཏེ། སངས་རྒྱས་ཀྱིས་རྗེས་སུ་བཞེད་པའི་ཕྱིར་དང་སོ་སོ་ཐར་པ་ལ་རྟོན་པར་བྱ་བར་གསུངས་པའི་ཕྱིར་དང་ལྷག་མ་ཡང་དེ་རྒྱས་པའི་ཕྱིར་རོ། །རྟོན་པར་བྱ་བ་མ་ཡིན་པར་མངོན་པར་བརྗོད་པའི་ཕྱིར་མུ་དུ་མའོ། །གལ་ཏེ་ཆོས་མངོན་པ་ཡང་མདོ་རྒྱས་པའི་ཕྱིར་རྟོན་པར་བྱའོ་ཞེ་ན། སངས་རྒྱས་ཀྱིས་མ་གསུངས་པའི་ཕྱིར་མདོ་རྒྱས་པ་ཉིད་མ་བ་ཀག་ལ་སངས་རྒྱས་ཀྱིས་རྗེས་སུ་མི་གནས་པའི་ཕྱིར་རྟོན་པར་བྱ་བ་མ་ཡིན་ནོ། །ཡེ་ཤེས་ཀྱི་ཕུང་པོ་དེའི་ཚོགས་ཆོས་མངོན་པའོ་ཞེས་བསྒྲུབ་བྱར་འདོད་ན་ཡང་ཡེ་ཤེས་ལ་རྟོན་པར་གསུངས་པའི་ཕྱིར་འདི་ལ་རྟོན་པར་བྱ་བ་ཉིད་ཡིན་པར་རྟོགས་པར་བྱེད་དོ། །གང་ཡང་མདོ་ལ་རྟོན་པར་གསུངས་པ་མུ་དུ་མ་ལས་ཞེས་པ་འདིས་ནི་སྒྲུབ་བྱེད་འགའ་ལ་ཡང་སྐྱོན་བརྗོད་མ་ཡིན་ནོ། །གལ་ཏེ་མུ་དུ་མ་ཞེས་བ་མུ་དུ་མ་མ་ཡིན་ཞེ་ན། འདིར་ནི་རྟོན་པར་བྱ་བ་ཉིད་ཀྱིས་མངོན་པར་བརྗོད་པའི་རྒྱུ་ཡིན་ནོ། །རྟོན་པར་བྱ་བ་མ་ཡིན་པ་ཉིད་ཀྱིས་མངོན་པར་བརྗོད་པ་ནི་གང་ཡང་དྲང་བའི་དོན་གྱི་མདོ་སྟེ། དཔེར་ན་དོན་དེས་ཚད་མར་བྱེད་པ་མ་ཡིན་པ་དེའི་དོན་ཅན་གྱི་ཕྱིར་གང་ཅི་ཡང་རུང་བ་འདི་དགོངས་པ་ཅན་མ་ཡིན་པའོ། །གང་ཡང་མདོའི་ཁྱད་པར་ལས་གསུངས་པའི་ཕྱིར་ཆོས་མངོན་པ་ལ་རྟོན་པར་བྱ་བ་གསུངས་ཏེ་དབྱངས་ཀྱིས་བསྙད་པ་ལ་སོགས་པ་བཞིན་ནོ། །དེ་ལྟར་དེ་སྐད་གསུངས་པ་ཡང་ཡེ་ཤེས་ལ་འཇུག་པ་ལ་སོགས་པ་མ་ཡིན་གྱི་མདོའི་ཁྱད་པར་ལས་སོ། །གང་གི་ཕྱིར་སྟོན་པ་འདས་པའི་གསུང་རབ་ཏུ་གྱུར་པ་ན་འཕགས་པ་ཀཱ་ཏྱཱ་ཡ་ནའི་བུ་ལ་སོགས་པ་རྣམས་ཀྱིས་བཀོད་པའོ། །བཅོམ་ལྡན་འདས་ཀྱིས་ཀྱང་དགེ་སློང་དག་ཅི་ལྟར་ན་དགེ་སློང་ཆོས་ཤེས་པ་ཡིན་ཞེ་ན། འདི་ལ་དགེ་སློང་ཆོས་ཤེས་པ་ནི་འདི་ལྟ་སྟེ། མདོ་དང་དབྱངས་ཀྱིས་བསྙད་པ་དང༌།
ལུང་བསྟན་པ་དང་ཚོགས་སུ་བཅད་པ་དང་ཆེད་དུ་བརྗོད་པ་དང་གླེང་གཞི་དང་རྟོགས་པ་བརྗོད་པ་དང་དེ་ལྟ་བུ་བྱུང་བ་དང་སྐྱེས་པའི་རབས་དང་ཤིན་ཏུ་རྒྱས་པ་དང་རྨད་དུ་བྱུང་བ་དང་གཏན་ལ་དབབ་པའི་ཆོས་རྣམས་སོ་ཞེས་གསུངས་ཏེ། དེ་ལ་གསུང་རབ་ཡན་ལག་བཅུ་གཉིས་ལས་ཡེ་ཤེས་ལ་འཇུག་པ་ལ་སོགས་པ་ཆོས་མངོན་པའི་ནང་དུ་འདུས་པ་དེའི་ཚེ་ཡེ་ཤེས་ལ་འཇུག་པ་ལ་སོགས་པ་མེད་པ་མ་ཡིན་ནོ། །བཅོམ་ལྡན་འདས་ཀྱིས་ཆེད་དུ་བརྗོད་པ་བཞིན་དུ་སིལ་བུར་གསུངས་པ་མ་ཡིན་ནམ་ཞེ་ན། དེ་ལྟར་མདོ་སྡེ་པ་རྣམས་ཀྱིས་ཁས་ལེན་མོད་ཀྱི་བཤད་པ་འདི་ནི་མ་ཡིན་ནོ། །ཆེད་དུ་བརྗོད་པ་ཡང་མདོ་ལ་སོགས་པ་རྣམས་སུ་སིལ་བུར་བསྟན་པ་དམིགས་ལ། དེ་ལྟར་ཆོས་མངོན་པ་མེད་པ་ལྟ་བུ་ནི་མཚུངས་པ་མ་ཡིན་ནོ། །གང་ཡང་མདོ་སྡེ་ལ་རྟོན་པར་བྱའོ་ཞེས་གསུངས་པའོ། །འདིར་རྟོན་པའི་སྒྲ་ཚད་མའི་དོན་མ་ཡིན་ནོ། །འོ་ན་ཅི་ཞེ་ན་སྔར་ནི་བདག་མེད་པ་དང་སེམས་ཅན་མེད་པ་དང་གང་ཟག་མེད་པ་ལ་རྟོན་པར་གྱུར་ལ། ད་ནི་མདོ་སྡེ་བརྗོད་པ་མེད་པ་ལྷུར་བྱའོ་ཞེས་པ་འདི་ནི་འདིའི་དོན་ཏོ། །དེ་ལྟར་ན་ཡང་གཏན་ཚིགས་འགའ་ཞིག་ལ་སྐྱོན་བཤད་པ་མེད་དོ། །འོ་ན་ཅི་ཞེ་ན་གཏན་ཚིགས་ཀྱི་ནུས་པ་ཉིད་འདི་ལ་གནོད་བྱེད་མ་ཡིན་ནོ་ཞེས་རྣམ་པར་བཤད་པའོ། །གལ་ཏེ་ཆོས་མངོན་པ་སངས་རྒྱས་ཀྱིས་གསུངས་ན། ཅིའི་ཕྱིར་བཅོམ་ལྡན་འདས་ཀྱིས་འཕགས་པ་ཀུན་དགའ་བོ་ཆོས་མངོན་པ་བརྗོད་པ་མེད་པ་ལྷུར་བྱེད་པ་ལ་མ་སྦྱར་ཞེ་ན། གང་ཡང། འདིར་ནི་དེ་བཞིན་གཤེགས་པའི་གསུང༌། །ཐམས་ཅད་མདོ་སྡེའི་སྒྲ་ཡིས་བརྗོད། །ཅེས་གསུངས་པས་འདི་ཡང་གནོད་བྱེད་མ་ཡིན་ནོ། །ཆོས་མངོན་པ་དེ་བཞིན་གཤེགས་པའི་གསུང་མ་ཡིན་པ་འདིར་བསྡུས་པ་ནི་མ་ཡིན་ནོ། །གང་ཡང་མདོ་སྡེ་ཞེས་བརྗོད་པས་ཆོས་མངོན་པ་ཉིད་བཤད་དེ། དེ་ནི་མདོ་སྡེ་སྟེ་ལུགས་དེས་དྲང་བའི་དོན་གྱི་མདོ་ཡོངས་སུ་བཅད་པའི་ཕྱིར་དང་འདི་གང་ཁས་མ་བླངས་པའི་ཕྱིར་རོ། །དེའི་ཕྱིར་ཡང་མ་གྲུབ་པའི་དོན་ཉིད་གཏན་ཚིག་སོ། །གང་ཡང་དེ་གཞུང་ལུགས་ཀྱི་ཁྱད་པར་ལས་ཞེས་པ་འདིའི་
གཏན་ཚིགས་མུ་དུ་མ་བསྒོམ་པའི་ཕྱིར་གསུངས་པ་མདོ་རྣམས་ཀྱང་རིས་མཐུན་པ་གཞན་རྣམས་ལ་དབྱེ་བ་མཐོང་སྟེ། མདོའི་དབྱེ་བ་ཁོ་ན་ལས་ཀྱང་དེའི་གཞུང་གི་དབྱེ་བ་ཞེས་པ་འདིར་ནི་ཕན་ཚུན་འགའ་བ་དོན་གཞན་མངོན་པར་བརྗོད་པ་རིས་མཐུན་པ་གཞན་རྣམས་ལའོ། །ཆོས་མངོན་པའི་རྟོགས་པའི་དབྱེ་བ་བརྗོད་པར་བྱ་སྟེ། གཞུང་གི་དབྱེ་བ་ལས་ནི་མ་ཡིན་པ་དེའི་ཕྱིར་མདོ་ཉེ་བར་བཀོད་པ་དང་ནི་མ་སྦྱར་རོ། །དོན་དང་འགལ་བ་ཡོད་པ་མ་ཡིན་པའི་མདོ་སྡེ་ནི་ངེས་པའི་དོན་ཏེ། མདོ་དང་མི་འགལ་བའི་དྲང་པའི་དོན་གྱི་མདོ་ཁས་བླངས་པའི་ཕྱིར་རོ། །དེ་ཉིད་ཀྱི་ཕྱིར་མདོ་སྡེའི་དོན་དང་མི་འགལ་བར་བསྟན་པའི་བཅོམ་ལྡན་འདས་ཀྱིས་ངེས་པའི་དོན་གྱི་མདོ་སྡེ་ལ་རྟོན་པར་བྱའི། དྲང་བའི་དོན་ལ་མ་ཡིན་ནོ་ཞེས་གསུངས་ཏེ། རིས་མཐུན་པའི་མདོ་གཞན་ལ་ལྷག་པ་དང་ཆད་པར་བརྗོད་པ་ཕན་ཚུན་མི་འགལ་བའི་ཕྱིར་རོ། །དེའི་ཕྱིར་མདོ་སྡེའི་དབྱེ་བ་ལས་མ་ཡིན་གྱི་ཆོས་མངོན་པའི་རྟོགས་པའི་དབྱེ་བ་ལས་སོ། །ཇི་སྐད་དུ། སྲིད་པ་བདུན་རྣམས་ཞེས་མདོར་མངོན་པར་བརྗོད་པ་དེ་རྣམས་ཀྱིས་ཆོས་མངོན་པར་སྲིད་པ་པར་མ་ཡོད་པར་རྣམ་པར་གཞག་པ་ན་འདིས་སངས་རྒྱས་ཀྱིས་ཆོས་མངོན་པ་གསུངས་པར་ཁས་བླངས་པ་ཡིན་ནོ། །གལ་ཏེ་ཡང་ཆོས་མངོན་པ་ངེས་པའི་དོན་ཡིན་གྱི་དེ་དང་རིས་མཐུན་པ་གཞན་དག་མ་ཡིན་ན། ཚིག་དོན་གཞན་དང་གཞན་དུ་རྣམ་པར་གཞག་པ་མི་རིགས་སོ། །ཅི་སྟེ་རིས་མཐུན་པ་ལས་བཟློག་པ་ངེས་པའི་དོན་དུ་འདོད་ན། སངས་རྒྱས་བཅོམ་ལྡན་འདས་རྣམས་ལ་ཕན་ཚུན་འགལ་བའི་མངོན་པར་བརྗོད་པར་ཡོད་པ་མི་སྲིད་པས་འདི་ཡང་དག་པ་མ་ཡིན་ནོ། །ཅི་སྟེ་དྲང་བའི་དོན་ཉིད་ཡིན་པ་དེ་ལྟ་ན་ཡང་སྟོན་པར་བྱ་བ་མ་ཡིན་པར་ཐལ་ལོ། །གལ་ཏེ་དེ་བཞིན་གཤེགས་པས་རབ་ཏུ་བྱུང་བ་རྒན་པོ་སྡེ་སྣོད་གསུམ་པ་རྙེད་པར་དཀའོ་ཞེས་གསུངས་པའི་ཕྱིར་སངས་རྒྱས་ཀྱིས་གསུངས་པའི་ཆོས་སོ་ཞེ་ན། སྡེ་སྣོད་ཕྲན་ཚོགས་ཀྱིས་དགོངས་པའི་ཚིག་གོ །གལ་ཏེ་འདི་མདོ་མ་ཡིན་པའི་ཕྱིར་ཞེ་ན། འདི་ནི་དེ་ལྟ་མ་ཡིན་ཏེ་དེ་མདོ་ཉིད་དུ་ཁས་བླངས་པའི་ཕྱིར་རམ་མདོའི་བྱེ་བྲག་ཡིན་པའི་ཕྱིར་རོ། །གལ་ཏེ་ཁྱོད་ཀྱི་འདོད་པས་ཆོས་མངོན་པ་
བཞི་ན་ཆོས་མངོན་པ་བྱེ་བྲག་མ་ཡིན་ནོ་ཞེ་ན། དེ་གསུང་རབ་ཡན་ལག་བཅུ་གཉིས་སུ་མ་འདུས་པའི་ཕྱིར་སངས་རྒྱས་ཀྱིས་གསུངས་པ་ཉིད་མ་ཡིན་པར་ཐལ་ལོ། །གལ་ཏེ་མདོའི་སྒྲས་མངོན་པར་མ་བརྗོད་པའི་ཕྱིར་མདོ་མ་ཡིན་ནོ་ཞེ་ན། དབྱངས་ཀྱིས་བསྙད་པ་ལ་སོགས་པ་རྣམས་ཀྱང་མདོ་མ་ཡིན་པ་ཉིད་དང༌། སྡེ་སྣོད་གསུམ་དུ་མ་འདུས་པ་ཉིད་དང་སངས་རྒྱས་ཀྱིས་མ་གསུངས་པ་ཉིད་དུ་ཐལ་ལོ། །གང་ཡང་མདོ་སྡེ་དང་འདུལ་བ་དང་མ་མོ་འཛིན་པ་ཞེས་གསུངས་ཀྱི་ཕྲན་ཚེགས་འཛིན་བ་ཞེས་འགའ་ཡང་མ་གསུངས་སོ། །ཡང་ཁ་ཅིག་ཏུ་མ་མོ་འཛིན་པ་ཞེས་གསུངས་པ་ལྟར་ཆོས་མངོན་པ་འཛིན་པ་ཞེས་གསུངས་སམ་ཅི་ཞེ་ན་གསུངས་སོ། །ཡང་ཅི་མ་མོ་ནི་ཆོས་མངོན་པའོ་ཞེས་འགའ་ཞིག་ཏུ་གསུངས་སམ་ཞེ་ན། དོན་གྱིས་གསུངས་ཏེ་གང་གི་ཕྱིར་གནས་བརྟན་འོད་སྲུངས་ཆེན་པོས། ཚོ་དང་ལྡན་པ་མ་མོ་ཞེས་བྱ་བ་ལ་མ་མོ་གང་ཞེ་ན། དྲན་པ་ཉེ་བར་གཞག་པ་བཞི་དང་ཞེས་བྱ་བ་ནས་ཇི་སྲིད་འཕགས་པའི་ལམ་ཡན་ལག་བརྒྱད་པ་དང༌། འཁོར་བཞི་དང༌། ཆོས་ཀྱི་སྡོམ་བཞི་དང༌། སོ་སོ་ཡང་དག་པར་རིག་པ་བཞི་དང༌། སྟོང་བ་ཉིད་དང་སྟོང་པ་ཉིད་མ་ཡིན་པ་དང༌། སྨོན་པ་མེད་པ་དང་སྨོན་པ་མེད་པ་མ་ཡིན་པ་དང༌། མཚན་མ་མེད་པ་དང་མཚན་མ་མེད་པ་མ་ཡིན་པ་དང༌། མངོན་པར་རྟོགས་པའི་མཐའ་ལས་བྱུང་བ་དང༌། ཀུན་རྫོབ་ཤེས་པ་དང༌། རྣམ་པར་འཐོར་བ་བསྒོམ་པ་དང༌། བསམ་གཏན་ཁྱད་པར་ཅན་དང༌། སྨོན་གནས་ཤེས་པ་དང༌། རབ་ཀྱི་མཐའ་པ་དང༌། ཞི་གནས་དང་ལྷག་མཐོང་དང༌། ཡང་དག་པར་འགྲོ་བའི་རྣམ་གྲངས་དང༌། ཆོས་ཀྱི་ཕུང་པོ་དང་གདགས་པ་རྣམས་ཏེ་འདི་རྣམས་ནི་མ་མོ་ཞེས་བརྗོད་པར་བྱའོ་ཞེས་གསུངས་ཏེ། ཆོས་ཕྲན་ཚེགས་རྣམས་ཐམས་ཅད་ནི་ཉེ་བར་ཐོབ་པ་མ་ཡིན་ནོ། །དེའི་ཕྱིར་སྡེ་སྣོད་ཕྲན་ཚོགས་གསུམ་པ་ཞེས་པའི་བརྗོད་པ་དེ་ལེགས་པ་མ་ཡིན་ནོ། །འདིར་མདོ་སྡེ་དང་འདུལ་བ་དང་མ་མོ་རྣམས་ནི་གཞུང་ལ་འདོད་ཀྱི་དོན་ལ་མ་ཡིན་པས་དེའི་ཕྱིར་དྲན་པ་ཉེ་བར་གཞག་པ་བཞི་དང་ཞེས་བྱ་བ་ལ་སོགས་པས་གཞུང་ཉེ་བར་མཚོན་གྱི་འདི་དག་གི་དོན་ཉེ་བར་མཚོན་པ་ནི་མ་ཡིན་ནོ། །ཕྲན་ཚེགས་
ཀྱི་ཆོས་མངོན་པའི་མདོ་དེ་རྣམས་ཀྱང་ཡོད་དོ། །གལ་ཏེ་མདོ་སྨོས་པ་ཉིད་ཀྱིས་སྨོས་སོ་ཞེ་ན། དེ་ལྟ་ན་འོ་ན་ཡང་དག་པར་འགྲོ་བའི་རྣམ་གྲངས་ཀྱང་བརྗོད་པར་མི་བྱ་སྟེ་མདོ་སྨོས་པ་ཉིད་ཀྱིས་དེ་སྨོས་པའི་ཕྱིར་རོ། །གལ་ཏེ་འདིར་མ་མོའི་སྒྲ་ཆོས་མངོན་པ་ལ་འདོད་ན། ཅིའི་ཕྱིར་ཆོས་མངོན་པ་འཛིན་པ་ཉིད་མ་བརྗོད། ཡང་དག་པར་འགྲོ་བའི་རྣམ་གྲངས་བཞིན་དུ་ཡེ་ཤེས་ལ་འཇུག་པ་ལ་སོགས་པ་ཅིའི་ཕྱིར་དངོས་སུ་མ་བརྗོད་པ་ཉིད་ཅེ་ན། ཡང་དག་པར་འགྲོ་བའི་རྣམ་གྲངས་ཆོས་མངོན་པ་མ་ཡིན་ཞེས་སྒྲུབ་པར་ནུས་སོ། །དེ་ལྟར་ཕྱོགས་ཙམ་དཔྱད་པ་འདིས་ལྷག་མ་དག་ཀྱང་རྟོགས་པར་བྱ་སྟེ་སྤྲོས་པས་ཆོག་གོ །དཀྱུས་མ་ཉིད་བརྩམ་པར་བྱ་སྟེ། ཆོས་རབ་ཏུ་རྣམ་པར་འབྱེད་པའི་ཕྱིར་ཆོས་མངོན་པ་སྨྲས་ན། ཆོས་དག་ནི་མ་སྨྲས་པས་དེ་ངེས་པར་གཟུང་བར་བྱ་བའི་ཕྱིར། །ཟག་བཅས་ཟག་པ་མེད་ཆོས་རྣམས། །ཞེས་གསུངས་པ་ལ། ཆོས་ཞེས་སྨོས་པ་རྗེས་སུ་འཇུག་པ་ལ་ཡང་ཆོས་སྨོས་པས་ནི་འདི་ནི་ཆོས་ཙམ་ཁོ་ན་སྟེ། འདི་ན་བདག་གམ་བདག་གི་བ་ཡོད་པ་མ་ཡིན་ཞེས་ཤེས་པར་བྱ་བའི་དོན་ཏོ། །ཟག་པ་དང་བཅས་པ་དང་ཟག་པ་མེད་པའི་ཆོས་རྣམས་ནི་རྣམ་པ་གཉིས་ཁོ་ན་སྟེ། རྣམ་པར་རྟོག་པ་གཞན་མེད་པའི་ཕྱིར་རོ། །ཡང་ཅིའི་ཕྱིར་ཕུང་པོ་ལྔ་ཞེས་ཕུང་པོ་བསྟན་པ་མ་སྨོས་ཤེ་ན་ཆོས་ཐམས་ཅད་དེ་རྣམས་སུ་མ་འདུས་པའི་ཕྱིར་རོ། །དེ་ལྟ་ན་འོ་ན་ཁམས་བསྟན་པ་དང་སྐྱེ་མཆེད་བསྟན་པ་ཡིན་ལ་རག་གོ་ཞེ་ན། དེ་ཡང་ཀུན་ནས་ཉོན་མོངས་པ་དང་རྣམ་པར་བྱང་བ་འཚོལ་བའི་ཕྱིར་ལ། འདིར་ནི་ཀུན་ནས་ཉོན་མོངས་པ་དང་རྣམ་པར་བྱང་བའི་ཕྱོགས་གཉིས་མ་འཆོལ་བར་བསྟན་པ་བརྗོད་པར་འདོད་པའི་ཕྱིར་རོ། །རྣམ་པར་བྱང་བ་ནི་ཀུན་ནས་ཉོན་མོངས་པ་སྔོན་དུ་འགྲོ་བ་ཅན་ཡིན་པའི་ཕྱིར་ཟག་པ་དང་བཅས་པ་སྔར་སྨོས་སོ། །ཆོས་ཐམས་ཅད་ཅེས་བྱ་བ་འདི་ནི་ཟག་པ་དར་བཅས་པ་མེད་པའི་རབ་ཏུ་དབྱེ་བ་ལས་ཐ་དད་པའི་ཆོས་འགའ་ཡང་ཡོད་པ་མ་ཡིན་ནོ་ཞེས་བསྟན་པའོ། །ཆོས་རྣམས་རྒྱས་པར་སྟོན་པ་ཁམས་དང་སྐྱེ་མཆེད་དག་ཀྱང་ཡོད་པས་མདོར་བསྡུས་ཏེ་བསྟན་པའོ་ཞེས་ཁྱད་པར་དུ་བྱས་སོ། །ངེས་པར་གཟུང་བ་མེད་པའི་དག་ནི་འབྲས་བུ་
མེད་པ་ཡིན་པས། འདིར་གདོན་མི་ཟ་བར་ངེས་པར་གཟུང་བར་འགྱུར་དགོས་སོ། །དེ་ལ་གལ་ཏེ་འདི་ནི་མདོར་བསྡུས་ཏེ་བསྟན་པ་ཁོ་ན་ཡིན་པས་དེ་ལྟར་ངེས་པར་གཟུང་པ་འདི་ངེས་པར་གཟུང་བར་བཤད་ན་མི་རིགས་ཏེ། ཇི་ལྟ་ཁམས་ལ་སོགས་པ་བསྟན་པ་ལ་བལྟོས་ནས་འདི་བསྡུས་པའི་ཚིག་ཡིན་པ་དེ་བཞིན་དུ་ཆོས་བསྟན་པ་ལ་བལྟོས་ནས་རྒྱས་པའི་ཚིག་ཀྱང་ཡིན་ནོ། །ཅི་སྟེ་འདི་ཁོ་ན་མདོར་བསྡུས་ཏེ་བསྟན་པ་ཡིན་ནོ་ཞེས་ངེས་པར་འཛིན་ན་འདི་ཡང་མི་རིགས་སོ། །མདོར་བསྡུས་ཏེ་བསྟན་པ་ནི་གཞན་ཡང་ཡོད་དོ། །དཔེར་ན་འདུས་བྱས་དང་འདུས་མ་བྱས་དང་གཟུགས་ཅན་དང་གཟུགས་ཅན་མ་ཡིན་པ་དང༌། རྟག་པ་དང་མི་རྟག་པ་ཞེས་བྱ་བ་ལ་སོགས་པ་ལྟ་བུའོ་ཞེ་ན་གཉི་ག་ལྟར་ཉེས་པ་མེད་དོ། །ཆོས་རྣམས་ཀྱི་རང་བཞིན་ཁོང་དུ་མ་ཆུད་པར་གྱུར་པ་ལ་དེའི་རང་བཞིན་རྣམ་པར་ཕྱེ་སྟེ་བ་གསལ་བའི་དོན་དུ། ཟག་བཅས་ཟག་མེད་ཅེས་བཤད་ན། ཆོས་ཀྱི་སྒྲ་ནི་དེའི་རང་བཞིན་རྣམ་པར་ཕྱེ་སྟེ་སྟོན་པར་བྱེད་པ་མ་ཡིན་པས་འདིར་ཆོས་ཀྱི་སྒྲ་ལ་ཐལ་བར་འགྱུར་བ་མེད་དེ། དེའི་ཕྱིར་འདི་ནི་མདོར་བསྡུས་ཏེ་བསྟན་པ་ཁོ་ན་ཡིན་གྱི་རྒྱས་པར་ཡང་མ་ཡིན་ནོ། །འདུས་བྱས་དང་འདུས་མ་བྱས་ལ་སོགས་པར་བསྟན་པ་ཡང་ཀུན་ནས་ཉོན་མོངས་པ་དང་རྣམ་པར་བྱང་བ་བསྟན་པ་དག་འཆོལ་ལོ། །འདིར་ནི་འཆོལ་བ་མདོར་བསྡུས་ཏེ་བསྟན་པ་བརྗོད་པར་འདོད་པ་མིན་གྱི་གཞན་ནི་མ་ཡིན་ནོ། །གལ་ཏེ་འཐབ་བ་དང་འཐབ་པ་མེད་པ་ལ་སོགས་པ་ཡང་འཆོལ་བ་མེད་པར་སྟོན་པ་ཡང་མ་ཡིན་ནམ་ཞེན་ཡོད་མོད་ཀྱི། དེ་ཡང་ཟག་པ་དང་བཅས་པ་དང་ཟག་པ་མེད་པའི་རྣམ་གྲངས་ཉིད་ཡིན་པར་གཞན་དུ་བརྗོད་ན་མི་འདོད་དེ། དེའི་ཕྱིར་འདི་ཁོ་ན་མདོར་བསྡུས་ཏེ་བསྟན་པ་བརྗོད་པར་འདོད་ཀྱི་གཞན་ནི་མ་ཡིན་ནོ་ཞེས་བྱ་བར་གསུངས་སོ། །ཟག་པ་དང་བཅས་པ་རྣམས་ཀྱང་ཇི་ལྟ་བུ་ཉིད་ཡིན་སྙམ་པ་ལ། དེའི་ཕྱིར་དེ་ལ་ཟག་པ་དང་བཅས་པའི་ཆོས་རྣམས་གང་ཞེ་ན་ཞེས་བྱ་བ་གསུངས་ཏེ། དེ་ལ་ཞེས་བྱ་བ་ནི་ཟག་པ་དང་བཅས་པ་དང་ཟག་པ་མེད་པ་དག་གོ །ལམ་མ་གཏོགས་པའི་འདུས་བྱས་རྣམས་ཟག་བཅས་ཞེས་བྱ་བ་ལ་འདུས་མ་བྱས་ནི་ཟག་པ་མེད་པ་ཡིན་ཏེ། དེའི་ཕྱིར་འདུས་བྱས་སྨོས་པས་རྣམ་པར་
བཅད་དོ། །ལམ་ནི་འདུས་བྱས་ཉིད་ཡིན་བཞིན་དུ་ཟག་པ་མེད་པ་ཁོ་ན་ཡིན་པས་དེའི་ཕྱིར་ལམ་མ་གཏོགས་པ་ཞེས་སྨོས་སོ། །དེ་དག་ཀྱང་གང་ཞེ་ན་གཟུགས་ལ་སོགས་པ་ཉེ་བར་ལེན་པའི་ཕུང་པོ་ལྔའོ། །བདེན་པ་སྨོས་པ་མེད་ཀྱང་འགྲེལ་པ་ལས་ལམ་གྱི་བདེན་པ་མ་གཏོགས་པ་ཞེས་བཤད་པ་ནི་དེ་མ་ཐག་ཏུ་ཟག་མེད་ལམ་གྱི་བདེན་པ་དང་ཞེས་གསལ་བར་ཡོངས་སུ་གཟུང་བས་སོ། །དེ་ཡང་ཡོངས་སུ་འཇུག་པ་ཐོབ་པས་འདིར་ཡང་དག་པའི་ལྟ་བ་ལ་སོགས་པ་རྣམས་ལམ་གྱི་བདེན་པར་འདོད་དེ། མྱ་ངན་ལས་འདས་པར་འགྲོ་བར་བྱེད་པ་ལ་ཐ་དད་པ་མེད་པའི་བྱེད་པ་ཡིན་པའི་ཕྱིར་རོ། །ལམ་གྱི་བདེན་པ་མ་གཏོགས་པའི་འདུས་བྱས་རྣམས་ཉིད་ལ་ཟག་པ་དང་བཅས་པ་ཉིད་མི་སྲིད་པར་འདྲི་བ་པ་ནི་ཅིའི་ཕྱིར་ཞེ་ན་ཞེས་བྱ་བའོ། །འདི་ལྟར་ནོར་དང་བཅས་པ་བཞིན་དུ་ཟག་པ་རྣམས་ཀྱང་གདོན་མི་ཟ་བར་ཡོད་པ་ནི་ཟག་པ་དང་བཅས་པའོ་ཞེས་ཁས་བླང་བར་བྱ་དགོས་སོ། །དེ་ལ་གལ་ཏེ་ཟག་པ་རྣམས་ཀྱི་དམིགས་པས་ཟག་པ་ཡོད་པ་ཡིན་ན་ནི་འགོག་པ་དང་ལམ་གྱི་བདེན་པ་དག་ཀྱང་དེ་དག་ལ་དམིགས་པའི་ཉོན་མོངས་པ་ཡོད་པའི་ཕྱིར་ཟག་པ་དང་བཅས་པ་ཉིད་དུ་ཐལ་བར་འགྱུར་རོ། །ཅི་སྟེ་བརྟན་པ་ཡིན་ན་དེ་ལྟ་ན་མིག་ལ་སོགས་པ་རྣམས་ཁོ་ན་ཟག་པ་དང་བཅས་པ་ཡིན་གྱི། གཟུགས་ལ་སོགས་པ་རྣམས་མ་ཡིན་ལ་མིག་ལ་སོགས་པ་རྣམས་ཀྱང་ཐམས་ཅད་མ་ཡིན་ཏེ། ཐམས་ཅད་ཉོན་མོངས་པའི་རྟེན་མ་ཡིན་པའི་ཕྱིར་རོ། །འོན་ཏེ་མཚུངས་པར་ལྡན་པས་ཡིན་ན། དེ་ལྟ་ན་ཡང་སེམས་དང་སེམས་ལས་བྱུང་བའི་ཕྱོགས་གཅིག་ཟག་པ་མེད་པ་ཉིད་དུ་འགྱུར་ཏེ། སེམས་དང་སེམས་ལས་བྱུང་བ་ཐམས་ཅད་ཉོན་མོངས་པ་དང་མཚུངས་པར་མི་ལྡན་པའི་ཕྱིར་རོ། །དེ་སྟེ་ཟག་པ་རྣམས་དང་ལྷན་ཅིག་འབྱུང་བས་ཟག་པ་ཡོད་པ་ཡིན་ན། དེ་ལྟ་ན་ཡང་ཉོན་མོངས་པ་ཅན་གྱི་སེམས་ཁོ་ནའི་ཉེ་བར་ལེན་པའི་ཕུང་པོ་ལྔ་ཟག་པ་དང་བཅས་པར་འགྱུར་གྱི་སེམས་གཞན་གྱི་ནི་མ་ཡིན་ནོ་ཞེ་ན། ཟག་པ་རྣམས་རྒྱས་པར་འགྱུར་བས་ཟག་པ་ཡོད་པ་ནི་ཟག་པ་དང་བཅས་པ་ཡིན་གྱི་གཞན་དུ་ནི་མ་ཡིན་ཞེས་བསྟན་པའི་ཕྱིར། གང་ཕྱིར་དེ་དག་ལ། ཟག་རྣམས་ཀུན་ཏུ་རྒྱས་པར་འགྱུར། །ཞེས་གསུངས་སོ། །ཡང་ན་ཇི་ལྟར་བྱ་བ་
ཉེ་བར་བྱེད་པས་ཉེ་བར་ལེན་པ་སྟེ། ཉེ་བར་ལེན་པ་དང་བཅས་པ་ཞེས་བརྗོད་དོ། །ཉེ་བར་བྱེད་པ་ཡོད་པ་མ་ཡིན་པས་ཀྱང་གྲོགས་བྱེད་པས་གྲོགས་དང་བཅས་པ་ཞེས་བརྗོད་དོ། །ཡིད་པ་མ་ཡིན་པ་ཉིད་དེ་ལྟར་ཡིན་མོད་ཀྱི་ཕྲ་རྒྱས་དང་ཟག་པ་རྣམས་ནི་ཟག་པ་དང་བཅས་པ་ཡིན་པས་ཡོད་པ་ཞེས་བྱའོ། །འཇིག་ཚོགས་ལ་ལྟ་བ་ལ་སོགས་ཉོན་མོངས་པ་དང་ཟག་པའི་མིང་ཅན་ཉོན་མོངས་པ་ཅན་གྱི་སེམས་ཀྱི་རྒྱུན་ནི་ཟག་པ་ཡིན་པའི་ཕྱིར་རོ། །དེ་རྣམས་ཀྱང་ཡུལ་གང་དང་མཚུངས་པར་ལྡན་པ་གང་གིས་རྒྱས་པར་འགྱུར་བ་དེ་ལ་རྒྱས་ཞེས་བརྗོད་པར་བྱའོ་ཞེས་སློབ་དཔོན་འདུས་བཟང་ཟེར་རོ། །འདིར་རྒྱུད་ལ་བལྟོས་ནས་རྒྱས་པར་ཡོངས་སུ་རྟོགས་པའི་སྐབས་སུ་འགྱུར་གྱི་རང་གི་བདག་ཉིད་ལ་བལྟོས་པ་ནི་མ་ཡིན་ཏེ། སྐད་ཅིག་མའི་བདག་ཉིད་ལ་དབྱེ་བ་མེད་པའི་ཕྱིར་རོ། །འདི་སྐད་བཤད་པར་འགྱུར་ཏེ། གང་གི་ཚེ་གང་དང་མཚུངས་པར་ལྡན་པ་ལ་དམིགས་པས་ཉོན་མོངས་པ་ཆུང་དུ་ལ་བརྟེན་ནས་འབྲིང་སྐྱེ་ལ། འབྲིང་ལ་བརྟེན་ནས་ཆེན་པོ་སྟེ་ཆོས་དེ་རྣམས་ཟག་པ་དང་བཅས་པ་ཞེས་བྱ་བ་འདི་ཡང་འགོག་པ་དང་ལམ་དག་ལ་ཡང་མཚུངས་སོ་ཞེས་གང་ཅུང་ཟད་འདྲིའོ། །ཇི་ལྟ་ཇི་ལྟར་གནོད་པའི་ཆོས་རྒྱས་ཤིང་རྒྱས་པ་དེ་ལྟ་དེ་ལྟར་དེ་ལ་དམིགས་པ་དང་མཚུངས་པར་ལྡན་པའི་ཉོན་མོངས་པ་རང་ཉིད་རྒྱས་ཤིང་རྒྱས་པར་འགྱུར་རོ། །དམིགས་པ་དང་མཚུངས་པར་ལྡན་པས་རྒྱས་པར་བསྒྲུབ་པའི་ཕྱིར་དེ་ལ་རྒྱས་པར་འགྱུར་ཞེས་བརྗོད་དེ་གནས་ཐོབ་པའི་དོན་ནམ་ཕྲ་རྒྱས་ཀྱི་དོན་ནོ། །མཚུངས་པར་ལྡན་པ་གང་ལ་དམིགས་ནས་གནས་ཐོབ་པ་ནི་གནས་རྙེད་པ་སྟེ་ཟག་བཅས་དེ་རྣམས་སོ། །གནས་ཐོབ་པ་ནི་རང་གི་རྒྱུད་ལ་གནས་སོ་ཞེས་འདི་ལྟར་བཤད་པ་ཡིན་ནོ། །འདི་ཡང་འགོག་པ་དང་ལམ་དག་ལ་མཚུངས་སོ་ཞེ་ན་ཉེ་བར་མ་བཅོམ་པ་ནི་གནས་པར་མཐོང་བ་བཞིན་ནོ། །ལྟ་བ་ལ་སོགས་པ་ལ་དམིགས་པས་ནི་དེ་ལ་གནས་ཐོབ་པ་མ་ཡིན་ནོ། །ཨུ་པ་གྷཱ་ཏ་ཡ་ལ་སོགས་པས་ཀྱང་འགོག་པ་དང་ལམ་དག་ལ་མཚུངས་སོ་ཞེ་ན་འདི་ནི་གནས་པའི་དོན་མ་ཡིན་ནོ། །འོ་ན་ཅི་ཞེ་ན་བདག་ཏུ་ལྟ་བ་དང་སྲེད་པས་བདག་གིར་བྱས་པའི་དངོས་པོ་ལ་དམིགས་པ་ནི་ངེས་པར་གནས་ཐོབ་པའི་དོན་ཏོ། །དེའི་ཕྱིར་འགོག་པ་
དང་ལམ་དག་ནི་དེས་བདག་གིར་མ་བྱས་ཤིང་དེ་ལ་མ་དམིགས་པས་དེ་ལ་ཉོན་མོངས་པ་རྣམས་ཀྱི་གནས་ཐོབ་པ་མ་ཡིན་ཞེས་བརྗོད་པར་བྱའོ། །ཁ་ཅིག་ན་རེ་ཉོན་མོངས་པ་རྗེས་མཐུན་པ་ལ་ཕྲ་རྒྱས་ཀྱི་དོན་ཏོ་ཞེས་ཟེར་རོ། །ཇི་ལྟར་པདྨའི་འདབ་མའི་ཆུ་དེ་ནི་གཞི་ལ་ཡང་མི་འབྱར་ཞིང་གོས་ལ་སོགས་པ་རྣམས་ལ་རྗེས་སུ་འགྲོ་བ་དེ་བཞིན་དུ་ཉོན་མོངས་པ་རྣམས་ཀྱང་ཆོས་གང་དག་ལ་ཆགས་པ་དེ་དག་ལ་བརྟེན་ནས་རྒྱས་པར་འགྱུར་ཞེས་བརྗོད་པར་བྱའོ། །ཕྲ་རྒྱས་ཀྱི་དོན་ནི་རྗེས་སུ་འགྱུར་བའི་དོན་ཏེ། གོས་ལ་སྣུམ་རྗེས་སུ་ཞེན་པ་བཞིན་ནོ། །གཞན་དག་ནི་འདྲེས་པར་བྱེད་པའོ་ཞེས་ཟེར་རོ། །སློབ་དཔོན་གཞན་དག་ན་རེ་གང་ལ་ཉོན་མོངས་པ་སྐྱེ་བར་འགྱུར་བ་དེ་ཟག་པ་དང་བཅས་པ་ཡིན་ཏེ། གང་ལ་ཉོན་མོངས་འཕེལ་འགྱུར་བ། །དེ་ནི་ཟག་དང་བཅས་པར་བརྗོད། །ཅེས་ཟེར་བ་དེ་དགག་པའི་ཕྱིར་འགོག་པ་དང་ལམ་གྱི་བདེན་པ་ལ་དམིགས་པས་ཀྱང་ཟག་པ་སྐྱེ་བར་ནི་འདོད་མོད་ཀྱི་ཞེས་བྱ་བ་ལ་སོགས་པ་གསུངས་ཏེ། འདོད་མོད་ཀྱི་ཞེས་བྱ་བ་ནི་ཡིན་མོད་ཀྱི་ཞེས་བྱ་བའི་དོན་ཏོ། །ལོག་པར་ལྟ་བ་དང་ཐེ་ཚོམ་དང་དེ་དག་འབའ་ཞིག་པ་དང་མཚུངས་པར་ལྡན་པ་དང་མ་རིག་པ་དང་འགོག་པ་དང་ལམ་མཐོང་བས་སྤང་བར་བྱ་བ་སྟེ་ཕྲ་རྒྱས་དྲུག་པོ་འདི་དག་འགོག་པ་དང་ལམ་གྱི་བདེན་པ་ལ་དམིགས་ནས་འབྱུང༌། འགོག་པ་དང་ལམ་གྱི་བདེན་པ་དེ་དག་ལ་རྒྱས་པར་འགྱུར་བ་མེད་པས་ཟག་བཅས་སུ་ཐལ་བ་མེད། ཨེ་ཏེ་ན་བི་ས་བྷཱ་ག་དྷཱ་ཏུ་བྷཱུ་མྱཱ་ལམྦ་ནཻཿཀླེ་ཤཻརྦིར་ས་བྷཱ་ག་སྱ་དྷཱ་ཏོརྦྷཱ་མིརྦཱ་ན་པཱ་ཤྲི་བི་ཏྭི་ཏེ་ཥཱཾ་ཏ་ཏྲཱ་ན་ནུ་ཤ་ཡ་ནཱ་དི་ཀཾ་ཞེས་གསུངས་པ་ཡིན་ནོ། །གལ་ཏེ་མདོ་ལས་གང་ལ་ཉོན་མོངས་པ་སྐྱེ་བ་དེ་ཟག་བཅས་སོ་ཞེས་གསུངས་པ་མ་ཡིན་ནམ་ཞེ་ན། བཅོམ་ལྡན་འདས་ཉིད་ཀྱིས་ཟག་པ་དང་བཅས་པའི་ཆོས་མཚན་ཉིད་གསུངས་ཏེ། ཟག་པ་དང་བཅས་པའི་ཆོས་རྣམས་གང་ཞེ་ན། ཉེ་བར་ལེན་པའི་གཟུགས་གང་ཡིན་པ་དང༌། གཟུགས་གང་ལ་འདས་པ་དང་མ་འོངས་པ་དང༌། ད་ལྟར་བྱུང་བ་ན་འདོད་ཆགས་སྐྱེ་བའམ། །ཞེ་སྡང་སྐྱེ་བའམ། །གཏི་མུག་གམ་གཞན་ཡང་རུང་སྟེ་སེམས་ཉེ་བར་ཉོན་མོངས་པར་བྱེད་པའོ། །དེ་བཞིན་དུ་རྣམ་པར་ཤེས་པའི་བར་ཏེ་བཟློག་པས་ནི་ཟག་པ་མེད་
པའོ། །གང་གི་ཕྱིར་དགེ་སློང་ཁྱེད་རྣམས་ཀྱིས་ཟག་པ་དང་བཅས་པ་དང་ཟག་པ་མེད་པའི་ཆོས་རྣམས་བསྟན་པར་བྱའོ་ཞེས་བཅོམ་ལྡན་འདས་ཀྱིས་གསུངས་སོ། །ཟག་པ་དང་བཅས་པ་དང་ཟག་པ་མེད་པའི་མཚན་ཉིད་ཀྱི་ཆོས་བསྟན་པ་མི་འགལ་བར་བཤད་པ་ཉིད་འདི་ཡང་ཇི་ལྟར་ཤེས་པར་བྱ་ཞེ་ན། དེ་ལ་དམིགས་པས་ཀྱང་རྒྱས་པར་མི་འགྱུར་བ་ནི་ཞེས་བྱ་བ་ལ་སོགས་པ་སྟེ། ཕྲ་རྒྱས་བསྟན་པར། ཟག་མེད་གོང་མའི་ཡུལ་ཅན་མིན། །བདག་གིར་མ་བྱས་གཉེན་པོའི་ཕྱིར། །ཞེས་པ་འདིར་ཤེས་པར་བྱའོ། །ཨནྱཱ་ཧ་ས་མཱ་ནཱ་ཤྲ་པ་ཏྭཱཏ། ཟག་པ་དང་བཅས་པ་ནི་ས་གོ་ཏྲ་བ་དཱ་པྲ་བ། དུཥྚ་ཏྭཱ་ད། ཁ་ཟས་དུག་དང་བཅས་པ་བཞིན་ནོ། །ཟག་མེད་ལམ་གྱི་བདེན་པ་དང༌། །ཞེས་བྱ་བ་གལ་ཏེ་ཟག་པ་དང་བཅས་པ་ཉིད་བཀག་པ་ཁོ་ན་ལས་འདི་ཟག་པ་མེད་པ་ཉིད་དུ་ཤེས་པ་མ་ཡིན་ནམ། ཡང་ཅིའི་ཕྱིར་འདི་ཟག་པ་མེད་པ་ཉིད་ཀྱི་ནང་དུ་སྨོས་ཤེ་ན། མདོ་སྡེ་པའི་གཟུགས་བཞིན་དུ་རྣམ་གྲངས་ཀྱིས་ཟག་པ་དང་བཅས་པ་དང་ཟག་པ་མེད་པ་ཉིད་ཡིན་པ་དགག་པར་བྱ་བའི་དོན་ཏེ། ཟག་པ་དང་བཅས་པ་དག་ལས་བཀོལ་བ་ཡིན་པས་ཟག་པ་མེད་པར་ངེས་པའི་རྒྱུ་མེད་པའི་ཕྱིར་རོ། །དེ་ནི་དེ་ལྟ་མ་ཡིན་ཏེ་རྣམ་པ་ཉིད་བཀོད་པ་ལས་ཟག་པ་དང་བཅས་པ་དག་ཏུ་བཀག་པས་དོན་གྱིས་ཟག་པ་མེད་པར་ཤེས་པར་འགྱུར་རོ་ཞེ་ན། གལ་ཏེ་མ་བསྟན་པར་ཡང་དོན་གྱིས་ཤེས་ན་ནི། འདུས་བྱས་རྣམས་ཟག་བཅས་ཞེས་པས་འདུས་མ་བྱས་ཀྱང་མ་བསྟན་པ་ཁོ་ནར་ཟག་པ་མེད་པ་ཉིད་དུ་ཤེས་པར་འགྱུར་རོ། །གོཤྩཱ་ཏྲ་ནི་ཡ་མོ་ཡ་ད་ནཱ་ཤྲ་པ་ཏྭ་མེ་བ་རྠཱ་དཱ་པཪྻ་ཏེ་ན་པུ་ནཿ། ཟག་བཅས་ཟག་པ་མེད་པ་ཉིད། །ཞེས་པ། ཡཏྤ་དེ་ཎ་བདྟ་བྱ་ཏཏྟ་མ་བ་བྲཱུ་ཥེ། འདུས་མ་བྱས་ཀྱང་ལམ་བཞིན་དུ་ཟག་པ་མེད་པ་ཉིད་དུ་སྨོས་པར་མི་བྱའོ། །རྣམ་པ་གཉིས་ཉེ་བར་བཀོད་པ་ལས་དང་རྣམ་པར་རྟོག་པ་གསུམ་པ་ཡང་མི་སྲིད་དོ་ཞེས་པ་འདི་ནི་ལམ་མ་ཡིན་ནོ། །ལམ་གྱི་སྒྲ་ནི་འཇིག་རྟེན་པ་དང་འཇིག་རྟེན་ལས་འདས་པ་གཉིས་ཀ་ལ་ཐུན་མོང་མ་ཡིན་མོད་ཀྱི། །འདིར་འཇིག་རྟེན་པ་ལ་རྣམ་པར་བཅད་པའི་ཕྱིར། ཟག་མེད་
ལམ་གྱི་བདེན་པ་དང་ཞེས་གསུངས་ཏེ། དེ་ཉིད་ཀྱི་ཕྱིར་ལམ་གྱི་བདེན་པ་སྨོས་པར་མཛད་པ་ཡིན་ནོ། །འཇིག་རྟེན་པ་ནི་ལམ་ཁོ་ན་ཡིན་གྱི་ལམ་གྱི་བདེན་པ་ནི་མ་ཡིན་ནོ། །འགྲེལ་པ་ལས་ཀྱང་འཆད་པར་འགྱུར་བ་ལ་བལྟོས་པ་ཉིད་ཀྱིས་ལམ་གྱི་བདེན་པ་མ་གཏོགས་པ་ཞེས་གསུངས་སོ། །ཡང་ན་གྲུབ་པར་གྱུར་པ་ལ་བརྩམས་པ་ངེས་པའི་དོན་དུ་ཡིན་ཏེ་ལམ་གྱི་བདེན་པ་འདུས་བྱས་དག་ལས་བཀོལ་བས་ཟག་པ་མེད་པ་ཉིད་དུ་གྲུབ་བཞིན་དུ་སླར་ཡང་ཟག་པ་མེད་པ་དག་གི་ནང་དུ་སྨོས་པ་ནི་ངེས་པར་བྱ་བའི་དོན་དུའོ། །ཁ་ཅིག་ཡོངས་སུ་ཤེས་པའི་ཁམས་དམིགས་པ་ལས་སེམས་དང་སེམས་ལས་བྱུང་བའི་དོན་ཐམས་ཅད་དང༌། དགྲ་བཅོམ་པའི་མ་ཟིན་པའི་གཟུགས་ཟག་པ་མེད་པར་འདོད་དོ། །དེའི་ཕྱིར་འདུས་བྱས་དག་ལས་ལམ་གྱི་བདེན་པ་ཁོ་ན་ཟག་པ་མེད་པ་ཡིན་གྱི་འདུས་བྱས་ཀྱི་ཆོས་གཞན་ནི་མ་ཡིན་ཞེས་པ་ཉིད་ངེས་པ་ཡིན་ནོ། །དེ་བཞིན་དུ་གཅིག་ནི་སོ་སོར་བརྟགས་པའི་འགོག་པ་ཁོ་ན་འདུས་མ་བྱས་དང་ཟག་པ་མེད་པར་ཁས་ལེན་གྱི་ནམ་མཁའ་ནི་མ་ཡིན་ནོ། །དེ་ནི་ཟག་བཅས་དང་འདུས་མ་བྱས་ཏེ། སོ་སོར་བརྟགས་པ་མ་ཡིན་པའི་འགོག་པ་ནི་ཁས་མི་ལེན་པ་ཉིད་དོ། །གཞན་དག་ནི་འདུས་མ་བྱས་རྣམ་པ་གསུམ་བཏགས་པར་ཁས་ལེན་གྱི་རྫས་སུ་མ་ཡིན་ནོ། །དེའི་ཕྱིར་འདུས་མ་བྱས་ཟག་བ་དང་བཅས་པ་ཉིད་ཡིན་པ་བསལ་དུ་ཟིན་ཀྱང་འདུས་མ་བྱས་ཉིད་དང་ཟག་པ་མེད་པ་ཉིད་དང༌། དངོས་པོ་ཉིད་དུ་ཁས་བླང་བར་ཤེས་པར་བྱ་བའི་ཕྱིར་འདུས་མ་བྱས་རྣམ་གསུམ་ཡང་སྟེ། ཞེས་བྱ་བ་གསུངས་སོ། །ཡང་ན་ཆོས་ཐམས་ཅད་མདོར་བསྡུ་ན་རྣམ་པ་གཉིས་སུ་བསྟན་ཏེ། ཟག་པ་དང་བཅས་པ་དང་ཟག་པ་མེད་པའོ། །དེ་ལ་ཟག་པ་དང་བཅས་པ་རྣམས་ནི་ངོ་བོ་དང་མཚན་ཉིད་ཀྱི་སྒོ་ནས་བཤད་པ་བྱས་ཟིན་ཏེ། ལམ་མ་གཏོགས་པ་འདུས་བྱས་རྣམས། །ཞེས་བྱ་བས་རང་གི་ངོ་བོའི་སྒོ་ནས་སོ། །གང་ཕྱིར་དེ་དག་ལ། ཟག་རྣམས་ཀུན་ཏུ་རྒྱས་པར་འགྱུར། །ཞེས་བྱ་བས་ནི་མཚན་ཉིད་ཀྱི་སྒོ་ནས་སོ། །དེ་བཞིན་དུ་ཟག་པ་མེད་པ་རྣམས་ཀྱང་རང་གི་ངོ་བོ་དང་མཚན་ཉིད་ཀྱི་སྒོ་ནས་བཤད་པར་བྱ་དགོས་པས་དེའི་ཕྱིར། ཟག་མེད་ལམ་གྱི་བདེན་པ་
དང། །འདུས་མ་བྱས་རྣམ་གསུམ་ཡང་སྟེ། །ཞེས་བྱ་བས་རང་གི་ངོ་བོའི་སྒོ་ནས་སོ། །མཚན་ཉིད་ནི་མ་གསུངས་ཀྱང་སྨྲས་ཟིན་པ་ལས་བཟློག་པའི་སྒོ་ནས། གང་ཕྱིར་དེ་དག་ལ། ཟག་རྣམས་རྒྱས་པར་མི་འགྱུར་རོ། །ཞེས་རྟོགས་པ་ཉིད་དོ། །དེའི་ཕྱིར་འདི་ནི་མཚན་ཉིད་བརྗོད་པར་བྱ་བའི་ཕྱིར་སྨྲས་ཟིན་པའི་དོན་རྗེས་སུ་བརྗོད་པ་ཡིན་པས་སྐྱོན་མེད་དོ། །འདུས་མ་བྱས་ནི་རྟེན་གྱི་ཕྱིར་དང་རབ་ཏུ་མ་གྲགས་པའི་ཕྱིར་སྨོས་སོ། །དང་གི་སྒྲ་ནི་བསྡུ་པའི་དོན་ཏོ། །ཡང་གི་སྒྲ་ནི་རྣམ་གསུམ་ཁོ་ནའོ་ཞེས་ངེས་པར་གཟུང་བའི་དོན་ཏོ། གལ་ཏེ་ཆོས་རབ་ཏུ་རྣམ་པར་ཕྱེ་བས་ཉོན་མོངས་པ་ཉེ་བར་ཞི་བའི་རྒྱུར་གྱུར་པའི་ཆོས་དེ་དག་ཁོ་ན་བསྟན་པར་བྱ་བ་ཡིན་ནམ། ནམ་མཁའ་དང་སོ་སོར་བརྟགས་པ་མ་ཡིན་པའི་འགོག་པ་དག་ནི་མ་ཡིན་ནོ་ཞེ་ན། དེ་གཉིས་བདེན་པའི་ཁོངས་སུ་མ་གཏོགས་པའི་ཕྱིར་ནམ་མཁའ་དང་སོ་སོར་བརྟགས་པ་མ་ཡིན་པའི་འགོག་པ་རྣམ་པར་ཕྱེ་བ་ནི་ཉོན་མོངས་པ་ཉེ་བར་ཞི་བའི་ཐབས་མ་ཡིན་མོད་ཀྱི། དེ་ལྟར་ཡིན་ཡང་ཟག་པ་མེད་པའི་ཆོས་ཀྱི་ཞར་ལ་ཟག་པ་མེད་པ་ཐམས་ཅད་ཉེ་བར་བསྟན་ཏོ། །དེ་དག་ཟག་པ་རྒྱས་པར་མི་འགྱུར་བ་ནི་གནས་མི་ཐོབ་བོ་ཞེས་བྱ་བའོ། །འདུས་མ་བྱས་ནི་བརྗོད་བྱ་ཉུང་བས་དེ་བསྟན་པའི་མཇུག་ཐོགས་སུ་བཤད་པར་བརྩམ་སྟེ། བརྗོད་བྱ་མང་བའི་ཕྱིར་འདུས་བྱས་ནི་མ་ཡིན་པ་ཉིད་དོ། །མ་གྲགས་པའི་ཕྱིར་རྣམ་པ་གསུམ་གང་ཞེ་ན་ཞེས་བྲིས་པ་དང༌། ནམ་མཁའ་དང་ནི་འགོག་པ་གཉིས། །ཞེས་སོ། །ནམ་མཁའ་ནི་འཇིག་རྟེན་ན་ཡང་རབ་ཏུ་གྲགས་པས་སྔར་སྨོས་སོ། །འགོག་པ་གཉིས་ནི་འགར་ཡང་མ་གྲགས་ཏེ། དེ་ཉིད་ཀྱི་ཕྱིར་དེ་གཉིས་གང་ཞེ་ན་ཞེས་སྨྲས་སོ། །དེ་ལ་ནམ་མཁའ་མི་སྒྲིབ་པ་ཞེས་བྱ་བ་ལ། དེ་ལ་ནི་འདུས་མ་བྱས་རྣམ་པ་གསུམ་ལའོ། །དེ་ལ་མི་སྒྲིབ་པ་ལ་དངོས་པོ་དང་ཐོགས་པ་མེད་པ་ཐམས་ཅད་ཀྱང་ནམ་མཁའ་ཉིད་དུ་ཐལ་བའི་ཕྱིར། མི་སྒྲིབ་པ་ནི་སྒྲིབ་པ་མེད་པ་ཙ་མ་ཡིན་པ་སྒྲིབ་པ་ལས་གཞན་བ་དག་ཀྱང་མ་ཡིན་ནོ། །འོ་ན་ཅི་ཞེ་ན་རང་བཞིན་གྱི་ཁྱད་པར་ཏེ། དེ་ཉིད་ཀྱི་ཕྱིར་སྒྲིབ་པ་མེད་པའི་རང་བཞིན་ཏེ་ཞེས་སྨོས་སོ། །སྒྲིབ་པ་ནི་སྒྲིབ་པ་ཡིན་
ལ། འདི་ནི་སྒྲིབ་པ་མེད་པའི་རང་བཞིན་ཡིན་པས་སྒྲིབ་པ་མེད་པ་སྟེ། སྒྲིབ་པའི་འགལ་ཟླའི་ཆོས་ཏེ་དོན་མ་ཡིན་པ་བཞིན་ནོ། །དགག་པ་ནི་མི་མཐུན་པའི་ཕྱོགས་ཀྱི་དོན་ཡིན་པའི་ཕྱིར་ཏེ། དེའི་ཕྱིར་འདི་ལ་སྒྲིབ་པ་མེད་པའི་རང་བཞིན་ཡོད་པས་ཞེས་ཚིག་རྣམ་པར་སྦྱར་རོ། །ཡང་ན་འདི་མི་སྒྲིབ་པའི་རང་བཞིན་ཡིན་པས་ཞེས་ཚིག་རྣམ་པར་སྦྱར་ཏེ། འདི་ལ་སྒྲིབ་པར་བྱེད་པ་ཡང༌། །ཞེས་པ་རང་བཞིན་གྱི་དབང་དུ་བྱས་པའི་ཕྱིར་རམ་འབྲེལ་པ་ཅན་བརྗོད་པར་ཤེས་པར་བྱའོ། །དེ་ཅིའི་ཕྱིར་ཞེ་ན། གང་གི་དབང་དུ་བྱས་པ་གང་དང་འབྲེལ་པ་ཅན་ཉིད་ཀྱི་ཕྱིར་སྒྲིབ་པ་དེ་དང་དེ་ལས་པྲ་ཏི་སིདྡྷེ་ཏེ་ན་སུ་ན་དེ་བཾ་ནམ་མཁའི་རང་བཞིན་བཤད་པ་ཡིན་ནོ། །ཚིག་ལེའུར་བྱས་པར་ཡང་ཚིག་དོན་གཞན་གཙོ་བོར་བརྗོད་པར་བྱ་བར་འགྱུར་རོ། །ཚོར་བ་ལ་སོགས་པ་རྣམས་ལ་ཐལ་པར་ཡང་འགྱུར་ཏེ། དེ་རྣམས་ལ་དེ་རྣམས་ཀྱི་སྒྲིབ་པ་མེད་པའི་ཕྱིར་རོ་ཞེས་སློབ་དཔོན་འཕགས་པའི་འབངས་ཟེར། རང་བཞིན་ནི་རང་གི་ངོ་བོ་སྟེ་རང་བཞིན་མེད་པ་ལྡོག་པས་གོ་སྐབས་ཡོད་པ་གང་ལས་དེ་སྒྲིབ་པ་མེད་པ་འདིའི་རང་བཞིན་ཞེས་འདིར་ཚིག་རྣམ་པར་སྦྱར་བ་ལ་མཚན་ཉིད་མ་བརྗོད་པར་འགྱུར་རོ། །དེའི་ཕྱིར་ཚིག་རྣམ་པར་སྦྱར་བ་འདི་ལ་སྒྲིབ་པ་མེད་པ་འདིའི་རང་བཞིན་ཞེས་འདི་སྐད་བརྗོད་པ་ཡིན་ཏེ། འདིར་ཚིག་རྣམ་པར་སྦྱར་བ་འགའ་ཞིག་གི་ཁྱད་པར་ལས་དོན་ལ་ཁྱད་པར་མེད་དོ། །ཚིག་ལེའུར་བྱས་པར་གང་གསུངས་པ་ཚིག་དོན་གཞན་གཙོ་བོར་བརྗོད་པར་བྱའོ་ཞེས་པ་ནི་གཉི་ག་ལ་མཚུངས་སོ། །ཡང་དངོས་པོའི་རང་བཞིན་ལས་དོན་གཞན་ཤེས་པར་བྱ་བའི་ཕྱིར་བརྗོད་པ་ཉིད་དོ། །གང་ཡང་ཚོར་བ་ལ་སོགས་པ་རྣམས་ལ་ཐལ་བར་འགྱུར་ཞེས་བཤད་པ་དེ་ཡང་མི་རིགས་ཏེ། ཚོར་བ་ལ་སོགས་པ་དག་ནི་སྒྲིབ་པ་མེད་པའི་རང་བཞིན་ཅན་མ་ཡིན་གྱི། ཉམས་སུ་མྱོང་བ་ལ་སོགས་པའི་རང་བཞིན་ཅན་ཡིན་པའི་ཕྱིར་རོ། །སློབ་དཔོན་འདུས་བཟང་ནི་གང་ཞིག་སྒྲིབ་པ་མེད་པ་ཉིད་རང་བཞིན་ཏེ་ནམ་མཁའོ་ཞེས་ཟེར་ཏེ། སྒྲིབ་པ་མེད་པ་ཞེས་བྱ་བ་ནི་འབྱུང་བ་དང་འབྱུང་བ་ལས་གྱུར་པའི་ཚོགས་ཀྱིས་མི་ཁྱབ་པ་ཞེས་བྱ་བའི་དོན་ཏོ། །འགའ་ཞིག་ཀྱང་མི་འཛིན་པ་ཐམས་
ཅད་དུ་ཡོད་པ་ཉིད་ཀྱི་ཕྱིར། གལ་ཏེ་དེ་ནི་ནམ་མཁར་མི་འགྱུར་ཏེ་དེ་ལ་བུམ་པ་ལ་སོགས་པ་མི་གནས་པའི་ཕྱིར་རོ། །མི་སྒྲིབ་པ་ནི་རང་གི་ཡུལ་དུ་གཟུགས་སྐྱེ་བ་ལ་གེགས་མི་བྱེད་པའི་དོན་ཏོ། །གལ་ཏེ་གེགས་མི་བྱེད་ན་གཟུགས་གཉིས་པ་ཅིའི་ཕྱིར་དར་ཐོགས་པར་བྱེད་ཅེ་ན། དེ་ནི་ནམ་མཁས་ཐོགས་པར་བྱེད་པ་མ་ཡིན་གྱི། འོ་ན་ཅི་ཞེ་ན་དེར་གནས་པའི་གཟུགས་གཞན་གྱིས་སོ། །གཞན་དུ་ན་དེ་དང་བྲལ་ཡང་ཐོགས་པར་འགྱུར་རོ། །སློབ་དཔོན་འཕགས་པའི་འབངས་ཀྱིས་གསུངས་པ། འདི་ལ་ཡང་རྣམ་པར་བཤད་པར་ཚོར་བ་ལ་སོགས་པ་རྣམས་ལ་ཐལ་བར་འགྱུར་ཞེས་པ་འདི་ཡང་སྔ་མ་ཁོ་ན་སླར་བརྗོད་པ་ཡིན་པས་འདིའི་མཐའ་ངེས་པར་བསྟན་པར་བྱ་སྟེ། གཟུགས་ཀྱི་བདག་ཉིད་དུ་མེད་པས་ནམ་མཁའོ་ཞེས་པའི་ཚིག་གིས་རྟོགས་པར་བྱའོ། །གང་ན་གཟུགས་ཀྱི་གོ་ཡོད་པའོ་ཞེས་བྱ་བས་ནི་བྱ་བའི་སྒོ་ནས་ཀྱང་འདི་ཡོད་པ་ཉིད་དུ་སྟོན་པར་བྱེད་དོ། །གཟུགས་ཀྱི་ནི་ཡུལ་ལ་གནས་པའི་ཕྱིར་ཡུལ་གཞན་དག་ཏུ་སྐྱེ་བ་གོ་མི་འབྱེད་པ་མི་རྙེད་པར་འགྱུར་གྱི་གཞན་དག་གིས་ནི་མ་ཡིན་ཏེ་ཡུལ་ལ་མི་གནས་པའི་ཕྱིར་རོ། །དེའི་ཕྱིར་གཟུགས་ཉིད་ལ་དེ་སྐད་བཤད་དོ། །འདིར་ནི་ཕུང་པོའི་གཟུགས་ཡོངས་སུ་གཟུང་གི་སྐྱེ་མཆེད་ཀྱི་གཟུགས་ནི་མ་ཡིན་ནོ། །དེ་ལྟར་ན་འདིར་ནམ་མཁའ་ནི་རང་གི་ངོ་བོ་དང་བྱ་བའི་སྒོ་ནས་བཤད་པ་བྱས་པ་ཡིན་ནོ། །སོ་སོར་བརྟགས་པས་འགོག་པ་ཞེས་བྱ་བས་ནི་མཚན་གཞི་སྟོན་པའོ། །གང་བྲལ་བའོ་ཞེས་བྱ་བ་ནི་སྐྱེ་བ་དང་སྙོམས་པར་འཇུག་པ་དང་མི་རྟག་པ་ཉིད་དང་སོ་སོར་བརྟགས་པ་མ་ཡིན་པའི་འགོག་པ་རྣམས་རྣམ་པར་བཅད་པའི་སྒོ་ནས་མཚན་ཉིད་བཤད་དེ། དེ་རྣམས་བྲལ་བ་མ་ཡིན་པའི་བདག་ཉིད་ཡིན་པའི་ཕྱིར་རོ་ཞེས་ཁ་ཅིག་གོ །འགོག་པ་གཞན་རྣམས་ནི་འདིར་ཐལ་བ་མེད་དེ་སོ་སོར་བརྟགས་པས་འགོག་པ་སྨོས་པའི་ཕྱིར་ཞེས་པ་འདི་ལ་བསམ་པ་ནི་ཟག་པ་དང་བཅས་པའི་ཆོས་རྣམས་ཀྱི་བྲལ་བ་གང་ཡིན་པ་ཞེས་པའོ། །ཟག་པ་མེད་པ་རྣམས་ལས་ཁྱད་པར་དུ་བྱ་བའི་ཕྱིར་ཟག་བཅས་སྨོས་ཏེ། དེ་རྣམས་ནི་སྤང་བྱ་དང་ཀུན་སྦྱོར་དང་འཆིང་བ་མ་ཡིན་པ་ཉིད་ཀྱི་ཕྱིར་རོ། །བྲལ་བ་ཞེས་བྱ་བ་ནི་དེའི་འགལ་ཟླ་
ཐར་པ་དང་མི་འདྲ་བར་ལྡན་པ་ལས་སོ། །ལྡན་པ་ཞེས་བྱ་བ་འདི་ཡང་ཅི་ཉོན་མོངས་པ་དང་ཕྲ་རྒྱས་ཤེ་ན། བསྟན་བཅོས་སུ་ཇི་སྐད་བཤད་པ་གང་ཟག་གང་གི་ཕྲ་རྒྱས་གང་དངོས་པོ་གང་ལ་རྒྱས་པར་འགྱུར་བ་དེ་གང་ཟག་དེ་ཕྲ་རྒྱས་དེ་དང་དངོས་བོ་དེ་ལྡན་པར་བརྗོད་པར་བྱའོ། །དེའི་ཕྱིར་ཕྲ་རྒྱས་གནས་པའི་མཚན་ཉིད་ཕྲ་རྒྱས་དངོས་པོ་ལ་ལྡན་པ་དེ་འགལ་ཟླའི་ཆོས་ཟག་བཅས་ཀྱི་ཆོས་རྣམས་དང་མི་ལྡན་བའོ། །གང་ཟག་གི་ལྡན་པའམ་གང་ཟག་གི་མི་ལྡན་པ་ཡང་ཇི་ལྟར་ཞེ་ན། རྟེན་གང་ལ་གང་ཟག་ཏུ་བརྗོད་པའི་རྒྱུད་ལ་ལྡན་པའམ་མི་ལྡན་པའི་ཐོབ་པ་མངོན་དུ་གྱུར་པ་ལ་ལྡན་པའམ་མི་ལྡན་པ་ཞེས་བྱ་བར་རྣམ་པར་གཞག་པར་བྱའོ། །ཡང་ན་ཉོན་མོངས་པ་ཅན་གྱི་ཆོས་རྣམས་ཀྱི་ཐོབ་བ་ནི་ལྡན་པའོ། །ཉོན་མོངས་པ་ཅན་མ་ཡིན་པའི་ཟག་པ་དང་བཅས་པ་གང་ཡང་རུང་བ་དང་ཉོན་མོངས་པ་ཅན་གྱི་དེ་ལ་དམིགས་པའི་ཉོན་མོངས་པའི་ཐོབ་པ་ཡང་ལྡན་པའོ། །ཇི་སྐད་བཤད་པའི་སྤངས་པ་སྡུག་བསྔལ་མཐོང་བས་སྤང་བར་བྱ་བ་དང་ལྡན་པའི་ལྷག་མ་ཀུན་ཏུ་འགྲོ་བ་དང༌། སྔར་སྤངས་པའི་རྣམ་པ་དང་ལྷག་མ་དེའི་ཡུལ་གྱི་དྲི་མ་རྣམས་དང་དེའི་ཐོབ་པ་ནི་ཟག་པ་དང་བཅས་པའི་ཆོས་རྣམས་དང་མི་འདྲ་བའི་ཆོས་ཅན་གྱི་ཕྱིར་མི་ལྡན་པ་ཞེས་བརྗོད་པར་བྱའོ། །ཡང་ཅི་ལྟར་འདི་དང་ཉེ་བ་མ་ཡིན་པ་དེ་ཐོབ་པ་དང་ལྷན་ཅིག་ཉོན་མོངས་པ་ཅན་གྱི་ཆོས་རྣམས་ཀྱི་ཐོབ་པ་སྐྱེ་ཞེ་ན། དེ་ལྟར་བྱས་ནས་མི་ལྡན་པར་བྱེད་པས་སམ་འདི་ལས་ཐོབ་པས་ན་མི་ལྡན་པའོ། །འདིས་བྲལ་བར་བྱེད་པ་དང་བྲལ་བས་བྲལ་བ་མ་ཡིན་ནོ། །དེ་ལྟར་བྱེད་ན་ནི་ལས་དང་ཟག་པ་དང་བཅས་པའི་ཆོས་ཀྱི་ཐོབ་པ་དང་བྲལ་བ་ཙམ་ལ་ཡང་ཐལ་བར་འགྱུར་རོ། །ཅིག་ཤོས་ལ་ཡང་མྱ་ངན་ལས་འདས་པའི་ཐོབ་པ་དང་བཅས་པའི་ཆོས་ཀྱི་ཐོབ་པ་མི་ལྡན་པར་ཐལ་བར་མ་ཡིན་ནམ་ཞེ་ན་ཐལ་བར་འགྱུར་བ་མ་ཡིན་ནོ། །འདུས་མ་བྱས་ཀྱི་དབང་དུ་བྱས་ནས་དེ་ལྟ་ན་ཏ་དྷི་ཡནྣནྟ་ར་མརྠ་ཀཾ་སཾ་ཁྱཱ་ནི་ཏུ་ལ་ནི་བི་ཙ་ཡ་པྲཛྙ་ཏྱ་ན་རྠནྡཱ་རམྤྲ་ཏི་བཱིཔྶཱ་རྠཿའྡི་སྐད་བསྟན་པར་འགྱུར་ཏེ། སྡུག་བསྔལ་ལ་སོགས་པ་འཕགས་པའི་བདེན་པ་རྣམས་ལ་སོ་སོ་སོ་སོར་བརྟགས་པས་སོ་སོར་བརྟགས་པའོ། །
འཕགས་པའི་བདེན་པ་སྨོས་པ་ནི་ཚོར་བ་རྣམ་པར་བཅད་པའི་ཕྱིར་རོ། །བསྟན་པ་འདི་ནི་ཕལ་ཆེ་བའམ་གཙོ་བོ་ཡིན་ཏེ། གཞན་དུ་ན་འཇིག་རྟེན་པའི་ལམ་གྱིས་ཐོབ་པ་སོ་སོར་བརྟགས་པའི་འགོག་པར་མི་འགྱུར་རོ། །གལ་ཏེ་འཇིག་རྟེན་པས་བྲལ་བས་ཐོབ་པ་འདི་ཅི་ལྟར་འཇིག་རྟེན་པ་ཡིན་ཞེས་ཁ་ཅིག་གོ །ཨེ་ཏཙྪན་ས་ཧི་སྲེད་པའི་ཕྲ་རྒྱས་ཀྱི་ཕྱིར་དང་འཇིག་རྟེན་པའི་སྤང་བྱའི་ས་བདུན་པའི་འདོད་ཆགས་ཀྱི་ཕྲ་རྒྱས་ཉིད་ཀྱི་ཕྱིར་རོ། །དེའི་ཕྱིར་འདི་ཡང་འཇིག་རྟེན་ལས་འདས་པའི་ལམ་བཞིན་དུ་བྲལ་བ་ཐོབ་པར་བྱེད་དོ། །ཤེས་རབ་ཀྱི་བྱེ་བྲག་གོ་ཞེས་བྱ་བ་ནི་བར་ཆད་མེད་པའི་ལམ་སྟེ་དེས་ཐོབ་བྱའོ། །བར་གྱི་ཚིག་མི་མངོན་པར་བྱས་པས་ཞེས་པ་ནི་སྒྲའི་སྒོ་ནས་གྲགས་པ་བྱེ་བྲག་ཏུ་རྟོགས་པར་བྱེད་པའོ། །ཡང་ཅི་འགོག་པ་ལྟར་གཅིག་ཁོ་ནའམ་གལ་ཏེ་བྲལ་བའི་རྫས་ལྟར་དུ་མ་ཡིན་ཞེ་ན། དེའི་ཕྱིར་སོ་སོ་སོ་སོ་ཡིན་གསུངས་ཏེ་གཞན་དང་གཞན་ཡིན་ནོ་ཞེས་བྱ་བའི་ཐ་ཚིག་གོ །འདི་ཉིད་འཆད་པར་བྱེད་པ་ནི། །ལྡན་པའི་རྫས་རྣམས་ཇི་སྙེད་པ། །ཞེས་རྒྱས་པར་འབྱུང་སྟེ། རྫས་སུ་སཏྟཱ་ནུ་པ་པ་ཏྟེཿསློབ་དཔོན་གུ་ཎ་ནནྡི་ན་ར་གཅིག་དང་དུ་མ་ཉིད་མི་སྲིད་དོ་ཞེས་ཟེར་ཏེ་དེ་ལྟར་མི་བསམ་མོ། །ཁ་ཅིག་ན་རེ་བྲལ་བ་ཐམས་ཅད་གཅིག་ཉིད་ཁོ་ནར་འདོད་དོ་ཞེས་ཟེར་ཏོ། ཡང་གཅིག་ཉིད་ཅེས་ལྡན་པའི་ཆེད་དུ་རྫས་ཞེས་ཚིག་རྣམ་པར་སྦྱར་ཏེ་ཐོབ་པའི་རྒྱུ་ཉིད་ཀྱི་ཕྱིར་རོ། །ཡང་ན་དམིགས་པ་དང་མཚུངས་པར་ལྡན་པའི་སྒོ་ནས་ཉོན་མོངས་པ་དང་ཕྲ་རྒྱས་རྣམས་སྐྱེ་བའི་ཕྱིར་ཏེ་དེ་དག་ཀྱང་ཉེ་བར་ལེན་པའི་ཕུང་པོ་ལྔའོ། །ཡང་ན་ལྡན་པར་གྱུར་པའི་རྫས་རྣམས་ཏེ་འཆིང་བར་གྱུར་པའི་ཕྱིར་རོ། །བྲལ་བ་ཉིད་རྫས་ཡིན་པ་ནི་བྲལ་བའི་རྫས་རྣམས་ཏེ། དེ་དག་ཀྱང་ནམ་མཁའ་དང་སོ་སོར་བརྟགས་པ་མ་ཡིན་པའི་འགོག་པ་དག་དང་གཞན་འདུས་མ་བྱས་སོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་ཟག་པ་དང་བཅས་པའི་ཆོས་ཐམས་ཅད་ཀྱི་སོ་སོར་བརྟགས་པ་འགོག་པ་གཅིག་ཉིད་དུ་གྱུར་ན་ཞེས་པའོ། །ཉོན་མོངས་པ་ཐམས་ཅད་འགོག་པ་མངོན་དུ་བྱེད་པར་ཞེས་བྱ་བ་ནི་ཀུན་འབྱུང་དང་འགོག་པ་དང་ལམ་མཐོང་བ་དང་བསྒོམ་པས་སྤང་
པར་བྱ་བའི་ཉོན་མོངས་པ་འགོག་པ་ཐོབ་པར་འགྱུར་རོ་ཞེས་བྱ་བའི་ཐ་ཚིག་གོ །སྡུག་བསྔལ་མཐོང་བས་སྤང་བར་བྱ་བའི་ཉོན་མོངས་པ་འགོག་པ་ཉིད་ཀྱིས་དེ་འགོག་པའི་ཕྱིར་དེ་ལྟ་ཡིན་ན་ཞེས་རྒྱ་ཆེར་འབྱུང་སྟེ། ལམ་གྱི་སྐད་ཅིག་མ་གཉིས་ཀྱིས་ཕྲ་རྒྱས་མ་ལུས་པའི་བྲལ་བ་ཐོབ་པའི་ཕྱིར་གཉེན་པོ་ལྷག་མ་བསྒོམ་པ་དོན་མེད་པ་ཉིད་དུ་འགྱུར་རོ། །རྫས་གཅིག་ལ་ཅུང་ཟད་ཅིག་ནི་མངོན་སུམ་དུ་བྱས་ལ། ཅུང་ཟད་ཅིག་མངོན་སུམ་དུ་མ་བྱས་སོ་ཞེས་བརྗོད་པར་ཡང་མི་རིགས་སོ། །ཅི་བདེན་པ་མ་མཐོང་བ་མཐོང་བར་བྱ་བའི་དོན་ཡིན་པའི་ཕྱིར་ལྷག་མའི་གཉེན་པོ་བསྒོམ་པ་འབྲས་བུ་དང་བཅས་པར་ཡང་མི་རུང་སྟེ། བདེན་པ་ལྷག་མ་མཐོང་བ་ནི་དེ་དག་མཐོང་བས་སྤང་བར་བྱ་བའི་ཉོན་མོངས་པའི་བྲལ་བ་ཐོབ་པའི་དོན་ཁོ་ན་ཡིན་པའི་ཕྱིར་རོ། །གལ་ཏེ་བདེན་པ་དང་པོ་མཐོང་བ་ཉིད་ཀྱིས་ཉོན་མོངས་པ་མ་ལུས་པའི་བྲལ་བ་ཐོབ་ན་ནི། དེ་ལྟ་ན་བདེན་པ་ལྷག་མ་མཐོང་བ་དོན་བྱས་ཟིན་པ་ཡིན་པས་དེ་དག་མཐོང་བ་དོན་མེད་པ་ཉིད་དུ་འགྱུར་རོ། །བསྒོམ་པའི་ལམ་དུ་ཡང་མ་མཐོང་བའི་བདེན་པ་མཐོང་བ་མེད་པའི་ཕྱིར་བསྒོམ་པ་དོན་མེད་པ་ཉིད་དང༌། ཉོན་མོངས་པ་སྤངས་པ་ཐག་པ་སྲིང་བར་བྱ་བའི་ཕྱིར་ཁྱད་པར་གྱི་ལམ་བསྒོམ་ཞེ་ན། ཡང་མི་གཡོ་བའི་ཆོས་ཅན་ལ་དོན་མེད་པར་ཐལ་བར་འགྱུར་ཞིང༌། ཉོན་མོངས་པའི་བྱེ་བྲག་རྣམ་པར་གཞག་པ་དང༌། གང་ཟག་གི་བྱེ་བྲག་རྣམ་པར་གཞག་པ་ཐོབ་པར་ཡང་མི་འགྱུར་ཏེ། ཁམས་གསུམ་པོ་མ་ལུས་པ་ཡང་འདོད་པའི་སྡུག་བསྔལ་མཐོང་བས་སྤང་བར་བྱ་བ་མ་ཡིན་པའི་ཕྱིར་རོ། །འོ་ན་ཞེས་རྒྱས་པར་འབྱུང་བ་ལ། གང་ལས་བཤད་ཅེ་ན་མདོ་ལས་ཏེ། དགེ་སློང་མ་ཆོས་སྦྱིན་ལ་ཁྱིམ་བདག་ས་གས། ཅི་འཕགས་མ་འགོག་པ་འདྲ་བ་ཡིན་ནམ། འོན་ཏེ་མི་འདྲ་བ་ཡིན་ཞེས་དྲིས་པ་དང༌། ཚེ་དང་ལྡན་པ་ས་ག་འདྲ་བ་མ་ཡིན་ནོ་ཞེས་བཤད་དོ། །འདྲ་བ་ནི་སྐལ་བ་དང་བཅས་པའམ་སྐལ་བ་དང་མཉམ་པ་སྟེ་འདྲ་ཞིང་མཚུངས་ཞེས་བྱ་བའི་དོན་ཏོ། །དུ་མ་ཉིད་ཡིན་ན་གཉིས་པ་དང་བཅས་པ་ཉིད་དམ་འདྲ་བ་ཉིད་མི་འགལ་བས་ཇི་ལྟར་གཅིག་པ་ཉིད་ཅེས་དེ་དགག་པར་མི་བྱའོ། །ཀཱ་ཡོ་སླ་བྷཱ་ག་ནི་རོ་དྷ་ཨཻ་ཧི། འདིའི་འདྲ་བའི་རྒྱུ་གང་ཡང་
མ་ཡིན་ལ་ཞེས་རྒྱས་པར་འབྱུང་བ་ལ། འདིར་ནི་རྒྱུའི་སྒྲ་མི་མངོན་པར་བྱས་པས་འདྲ་བའི་རྒྱུ་ཉིད་ལ་འདྲ་བ་ཞེས་བརྗོད་དེ། དཔེར་ན་འཇིགས་པ་སྔ་ལ་འཇིགས་པ་ཞེས་བྱ་བ་བཞིན་ནོ། །དེ་ལྟར་སྐལ་མཉམ་གྱི་རྒྱུ་རྒྱུ་མ་ཡིན་པ་བཀག་པར་ཤེས་པར་བྱའི། སྐལ་བ་བཀག་པ་དང་འདྲ་བ་བཀག་པ་ནི་མ་ཡིན་ནོ། །འགོག་པའི་རྣམ་པ་གཅིག་ཉིད་ཀྱང་སྤང་བྱ་ཉོན་མོངས་པའི་དབང་གིས་སོ་སོ་སོ་སོར་མངོན་དུ་བྱེད་དེ། དཔེར་ན་ཟག་པ་དང་བཅས་པའི་དངོས་པོ་གཅིག་གི་ཡང་སྡུག་བསྔལ་དང་ཀུན་འབྱུང་བའི་རྣམ་པ་དག་ལས་ཀྱང་སྐལ་བ་མཉམ་པའི་འགོག་པ་ཞེས་བྱ་བ་འདིར་གཉིས་པ་ཉིད་དུ་འགྱུར་རོ། །ཀ་ཤྭཱ་ཏི་ཤ་ཡ། སྐལ་བ་མཉམ་པའི་རྒྱུ་འགོག་གོ་ཞེས་ཁ་ཅིག་གོ །འདི་ལ་བསམ་པ་ནི་འགོག་པ་གཅིག་ཏུ་སྨྲ་བ་མ་ཡིན་གྱི་སྡུག་བསྔལ་མཐོང་བས་འགོག་པ་ཅུང་ཟད་མངོན་དུ་མ་བྱས་པར་གང་ཀུན་འབྱུང་མཐོང་བས་མངོན་དུ་བྱ་བ་མེད་དོ། །ཅི་སྟེ་ཅུང་ཟད་མངོན་དུ་མ་བྱས་པ་ཉིད་ཡོད་དོ་ཞེ་ན། འོ་ན་སྤངས་པ་དུ་མ་ཐོབ་པར་བྱེད་དེ། མངོན་དུ་བྱས་པ་ལས་མངོན་དུ་མ་བྱས་པ་གཞན་ཡིན་པའི་ཕྱིར་ཟག་པ་དང་བཅས་པའི་དངོས་པོ་ཤེས་པ་མངོན་དུ་བྱའོ་ཞེས་རྣམ་པ་གཞན་གྱིས་མངོན་དུ་མ་བྱས་པ་དང༌། མངོན་དུ་བྱས་པ་མི་འགལ་ལོ། །ཐོབ་པ་མངོན་དུ་བྱ་བ་ནི་སྤངས་པར་ཐོབ་པའི་མ་ཡིན་ནོ། །ཡང་ཐོབ་པའི་རིགས་པ་འདིས་ཀྱང་ཐལ་བར་མི་འགྱུར་བའི་ཕྱིར་རོ། །འགོག་པ་དུ་མ་དེ་ཡང་འགོག་པ་ཐམས་ཅད་ཅིག་ཅར་མངོན་དུ་བྱས་པར་ཐལ་ལོ། །ལམ་གྱི་ཐོབ་པ་མེད་པས་ཉོན་མོངས་པ་རྣམས་སམ་བྲལ་བས་ལྷན་ཅིག་བྱེད་པའི་རྒྱུ་དང་འབྲེལ་པ་ལ་སོགས་པ་མེད་པའི་ཕྱིར་ངེས་པའི་རྒྱུ་འགའ་ཞིག་ཡོད་པ་གང་ལས་འདི་ཉིད་བྲལ་བ་ལས་གཞན་མ་ཡིན་པ་ཉིད་དེ། དེ་ལམ་གྱིས་ཐོབ་ཀྱི་གཞན་གྱིས་མ་ཡིན་ནོ། །ཉོན་མོངས་པ་འདི་དག་གི་བྲལ་བ་འདི་ཉིད་གཞན་གྱི་མ་ཡིན་ཞེས་རྣམ་པར་གཞག་གོ །དེ་ལྟར་ངེས་པའི་རྒྱུ་མེད་ན་ཅིག་ཅར་བྲལ་བ་ཐམས་ཅད་ཐོབ་པའམ། བྲལ་བ་མ་ཐོབ་བོ་ཞེས་ཁས་བླང་བར་བྱའོ། །གང་ཞིག་ཉོན་མོངས་པ་ཐམས་ཅད་དང་བྲལ་བའི་བདག་ཉིད་ཁོ་ན་འགོག་པར་བྱེད་པ་དེའི་སྡུག་བསྔལ་ལ་ཆོས་ཤེས་པའི་བཟོད་པས་
སྡུག་བསྔལ་མཐོང་བས་སྤང་བར་བྱ་བའི་ཉོན་མོངས་པ་རྣམས་ཁོ་ན་དང་བྲལ་བ་ཉིད་ཐོབ་ལ་ཀུན་འབྱུང་མཐོང་བ་ལ་སོགས་སྤང་བྱ་རྣམས་ལ་མ་ཡིན་ནོ། །ཡོད་པ་མ་ཡིན་པ་ཙམ་གྱིས་འགོག་པ་ཉོན་མོངས་པ་རྣམས་བྲལ་བ་དང་ལྡན་པ་མེད་པར་ཐལ་བའི་ཕྱིར་རོ། །འོ་ན་ཅི་ཞེ་ན། དེ་ལ་ཐོབ་པ་གང་དང་གང་ལམ་གྱིས་ཐོབ་པ་དེ་དང་དེས་ཉོན་མོངས་པ་དང་བྲལ་བ་ཉིད་དུ་རྣམ་པར་མི་འཇོག་གི་སྤང་བྱའི་ཉོན་མོངས་པ་དང་བྲལ་བ་ཉིད་ཀྱིས་རྣམ་པར་འཇོག་གོ །ཇི་ལྟར་ན་འདིར་ལམ་བསྒོམ་པ་དོན་མེད་པ་ཉིད་ཅེ་ན། གང་ཡང་བཤད་པ་དེ་དང་དེ་ནི་ཕུལ་དུ་བྱུང་བ་དགག་པ་རབ་ཏུ་གྱུར་པའི་རྣམ་པ་སྟེ། ཅི་ལྟར་ཡང་དེར་སྐལ་བ་མཉམ་པའི་རྒྱུར་ཐལ་བ་ནི་དགེ་བ་ཟག་པ་མེད་པ་ཉིད་ཀྱི་ཕྱིར་རོ། །ལམ་བཞིན་དུ་འདི་ལས་མ་ལྷུང་བའི་ཕྱིར་དགག་པར་མི་བྱའོ། །སྐལ་བ་མཉམ་པ་མ་ཡིན་པ་ཞེས་བྱ་བ་ནི་གཞན་གྱི་རྒྱུར་ནི་ཐལ་བ་མ་ཡིན་པའམ་ཞེས་བྱ་བའོ། །དེ་དགག་པ་མ་ཡིན་ནོ། །རྒྱུའི་གཏན་ཚིགས་ནི་ཁས་བླང་བར་བྱ་བ་ཉིད་ཅེས་པ་སྟེ་འོན་ཀྱང་དགེ་བ་ཡིན་པའི་ཕྱིར་རོ། །རྣམ་པར་སྨིན་པའི་རྒྱུར་ཐལ་བ་ཡང་འདི་ལ་མེད་དེ། དགེ་བ་ཟག་པ་མེད་པ་མེད་པ་ཡིན་པའི་ཕྱིར་རོ། །ལམ་བཞིན་ཡིན་པ་ཉིད་དེའི་ཚེ་སྐལ་བ་མཉམ་པའི་རྒྱུ་ཐལ་བ་ཡང་མེད་པ་ཉིད་དེ། སྐྱེས་པའི་ཐོག་མ་མེད་པའི་ཕྱིར་དང་སས་མ་བསྡུས་པའི་ཕྱིར་རོ། །ནམ་མཁའ་དང་སོ་སོར་བརྟགས་བ་མ་ཡིན་པའི་འགོག་པ་བཞིན་ནོ། །ཡང་གཞན་དག་ནི་འགོག་པ་མཐའ་དག་གི་དབང་དུ་བྱས་ནས་འགོག་པ་ནི་འདྲ་བ་མ་ཡིན་ནོ་ཞེས་བཤད་དེ། འགོག་པ་དང་འདྲ་བ་ཆོས་གཞན་པ་དང་དགེ་བ་གཞན་ནི་ཡོད་པ་མ་ཡིན་ནོ། །སྐྱེ་ལ་གཏན་དུ་གེགས་བྱེད་པ། །ཞེས་པ་ལ་འདས་པ་དང་ད་ལྟར་བྱུང་བ་རྣམས་སྐྱེ་བ་ལ་གེགས་བྱེད་པ་མ་ཡིན་པས་མ་འོངས་པ་རྣམས་ཁོ་ནའི་འཐོབ་པའོ། །འགོག་པ་ཡང་རྣམ་པ་ལྔ་བསམ་པར་བྱ་སྟེ། མི་རྟག་པ་དང་སྙོམས་པར་འཇུག་པ་དང༌། སྐྱེ་བ་དང་སོ་སོར་བརྟགས་པ་དང༌། སོ་སོར་བརྟགས་པ་མ་ཡིན་པའི་འགོག་པའི་དབྱེ་བ་ལས་སོ། །དེ་ལ་སྐྱེ་བ་སྨོས་པ་ནི་མི་རྟག་པ་ཉིད་ཀྱི་འགོག་པ་རྣམ་པར་བཅད་པའི་ཕྱིར་དུའོ། །དེ་ནི་ད་ལྟར་བྱུང་བ་རྣམས་གནས་པ་ལ་གེགས་སུ་གྱུར་པ་ཡིན་གྱི་སྐྱེ་བ་ལ་ནི་མ་ཡིན་
ནོ། །གཏན་དུ་ཞེས་སྨོས་པ་ནི་སྙོམས་པར་འཇུག་པ་དང་སྐྱེ་བའི་འགོག་པ་བཟློག་པའི་ཕྱིར་ཏེ། དེ་གཉིས་ནི་མ་འོངས་པའི་སེམས་དང་སེམས་ལས་བྱུང་བ་སྐྱེ་བ་ལ་དུས་ཅུང་ཟད་ཅིག་གེགས་སུ་གྱུར་པའི་ཕྱིར་རོ། །གཞན་སྨོས་པ་ནི་དེ་མ་ཐག་ཏུ་སྨོས་པ་བྲལ་བའི་མཚན་ཉིད་སོ་སོར་བརྟགས་པས་འགོག་པ་ལས་རྣམ་པར་བཅད་པའི་ཕྱིར་རོ། །སོ་སོར་བརྟགས་པ་ནི་རིག་པ་དང་དཔྱད་པས་བསྒྲུབས་པའི་ཤེས་རབ་སྟེ་དེ་ནི་དེས་ཐོབ་པ་མ་ཡིན་ནོ། །འོ་ན་ཅི་ཞེ་ན་དེ་མེད་པར་རྐྱེན་མ་ཚང་བས་ཐོབ་སྟེ་དེ་ལྟར་གཞན་དུ་བརྗོད་དོ། །གང་ཞིག་རྒྱུ་དང་མཚུངས་པ་དེ་མ་ཐག་དང་དམིགས་པ་དང་བདག་པོ་སྟེ་རྐྱེན་བཞི་པོ་དག་ལས་བཞིའམ་གསུམ་གཉིས་ཀྱང་རུང་ཇི་སྙེད་ཅིག་གིས་སྐྱེད་པ་དེ་སྐྱེ་བ་ལ་དེ་དག་མ་ཚང་བས་གཏན་དུ་གེགས་སུ་གྱུར་བས་སོ་སོར་བརྟགས་པ་མ་ཡིན་པ་ཞེས་བྱ་བའི་རྫས་ཤིག་འཐོབ་པོ། །དཔེར་ན་མིག་དང་ཡིད་གཟུགས་གཅིག་ལ་ཡེངས་པའི་ཞེས་བྱ་བ་ལ། གཟུགས་གཅིག་ལ་ཡེངས་པའི་མིག་དང་ཡིད་གང་ཡིན་པ་ཞེས་ཚིག་རྣམ་པར་སྦྱར་རོ། །གང་ཞིག་གཟུགས་ལས་གཞན་རྣམས་ཞེས་བྱ་བ་ཡུལ་དུ་བྱས་པ་ལས་གཞན་པ་སྒྲ་དང་དྲི་དང་རོ་དང་རེག་རྣམས་ཀྱང་ཞེས་པའོ། །ཐམས་ཅད་ཉིད་ནི་དེ་རྣམས་ཐམས་ཅད་ཉིད་ལ་དམིགས་པའི་ཕྱིར་རོ། །འདས་པར་འགྱུར་ལ་ཞེས་བྱ་བ་ནི་ཞིག་འགྱུར་བ་སྟེ། ད་ལྟར་བའི་དུས་ན་རྒྱུ་དང་དམིགས་པ་དང་བདག་པོའི་རྐྱེན་ཡོད་ཀྱང་དེ་མ་ཐག་རྐྱེན་མ་ཚང་བའི་ཕྱིར། དེ་ལ་དམིགས་པའི་རྣམ་པར་ཤེས་པའི་ཚོགས་ལྔ་པོ་དག་ནི་ཡང་སྐྱེ་བར་མི་ནུས་ཏེ་སོ་སོར་བརྟགས་པ་མ་ཡིན་པས་འགོག་པ་ཐོབ་པའི་ཕྱིར་རོ། །ཡང་སྐྱེ་བར་མི་འགྱུར་རོ་ཞེས་བྱ་བ་འདི་ཅི་ལྟར་ཤེས་པར་བྱ་ཞེ་ན། དེའི་ཕྱིར་དེ་དག་འདས་པའི་ཡུལ་ལ་དེ་དམིགས་པའི་མཐུ་མེད་པའི་ཕྱིར་རོ་ཞེས་གསུངས་ཏེ་འདི་སྐད་བསྟན་པར་འགྱུར་ཏེ། མིག་ལ་སོགས་པའི་རྣམ་པར་ཤེས་པ་རྣམས་ནི་ད་ལྟར་བའི་ཡུལ་ཅན་ཡིན་པའི་ཕྱིར་གཟུགས་ལ་སོགས་པ་འདས་པ་རྣམས་ལ་མི་སྐྱེ་སྟེ། དམིགས་པའི་རྐྱེན་མ་ཚང་བའི་ཕྱིར་རོ་ཞེས་བྱའོ། །སློབ་དཔོན་འདུས་བཟང་ན་རེ་སེམས་དང་སེམས་ལས་བྱུང་བ་རྣམས་ཀྱང་ངེས་པར་རྐྱེན་བཞི་ལས་
སྐྱེའོ་ཞེས་ཟེར་རོ། །ཡིད་དང་ཆོས་ཀྱི་སྐྱེ་མཆེད་ཀྱི་ཕྱོགས་འགའ་ཞིག་ཀྱང་བརྗོད་པར་བྱ་སྟེ། མིག་ལ་སོགས་པའི་རྣམ་པར་ཤེས་པ་དག་ནི་དཔེ་ཉིད་དུ་བརྗོད་པར་འདོད་པའི་ཕྱིར་རོ། །འདིར་གཞན་དག་གིས་རྒོལ་བ་ནི་མིག་དང་ཡིད་གཟུགས་གཅིག་ལ་ཡེངས་པ་ན་གཞན་རྣམ་པར་ཤེས་པའི་ཚོགས་ཅི་ལས། གང་དག་སྐྱེ་བ་མེད་པ་ཡེ་པི་ཙ་སནྣི་གཟུགས་ལ་སོགས་པ་དམིགས་པ་གཅིག་རྣམ་པར་ཤེས་པ་ལ་སོགས་པ་ནི་སེམས་ཅན་གྱི་རྒྱུད་དོ་ཞེས་པ། གལ་ཏེ་རྣམ་པར་ཤེས་པ་གཅིག་ལ་སོགས་པའི་ཕྱིར་སེམས་ཅན་གྱི་རྒྱུད་ལ་རྐྱེན་མ་ཚང་བའི་ཕྱིར་རྣམ་པར་ཤེས་པ་མི་སྐྱེ་བར་འདོད་ན་དེ་ཅི་ལྟར་རྣམ་པར་ཤེས་པ་རྣམ་པ་དྲུག་དང་སྟོང་ཕྲག་མང་པོ་རྣམས་ཡིན། གཅིག་ཉིད་དུས་གཅིག་ཏུ་རྒྱུད་དང་དམིགས་པ་དང་བདག་པོའི་རྐྱེན་དུ་གྱུར་བས་མིག་ལ་སོགས་པ་རྣམས་འདོད་ཀྱི་ཅིག་ཤོས་མ་ཡིན། གལ་ཏེ་སྔ་མ་དང་ཕྱི་མར་གནས་པའི་གོ་རིམས་བཞིན་དུ་སྐྱེ་བར་ངེས་ན། སྐྱེས་བུའི་བྱེད་པ་དོན་མེད་པར་ཐལ་བས་མ་འོངས་པའི་དུས་བ་རྒྱུ་བ་ཡོ་གེ་ནཱ་པ་བརྒ་བྲ་སངྒ་ད་པ་བརྒ་མེད་པར་ཐལ་བར་འགྱུར་བས་འདི་ཡང་འདོད་པ་མ་ཡིན་པ་ཉིད་དོ། །གལ་ཏེ་དམིགས་པའི་སྐད་ཅིག་ངེས་པས་མཚུངས་པར་ལྡན་པ་རྣམས་ཀྱི་རྐྱེན་མ་ཚང་བ་ཉིད་ལས་གཏན་མི་སྐྱེ་བ་མ་ཡིན་ནམ། ཡང་སོ་སོར་བརྟགས་པ་མ་ཡིན་པའི་འགོག་པ་རྟོགས་པར་བྱེད་ཅེ་ན། འདི་ལ་ཁ་ཅིག་གིས་ལན་བརྗོད་པ། ཐོབ་པ་གང་ལ་རྐྱེན་མ་ཚང་བའི་ཕྱིར་གཏན་མི་སྐྱེ་བའི་ཆོས་ཅན་དུ་ཤེས་པར་བྱ་བ་མ་འོངས་པ་དེ་སོ་སོ་བརྟགས་པ་མ་ཡིན་པའི་འགོག་པ་གཏན་མི་སྐྱེ་བའི་ཆོས་ཅན་མ་འོངས་པའོ། །འདི་ནི་ལན་མ་ཡིན་ནོ། །ཕྱོགས་སྔ་མ་དང་སྦྱར་ན་འདིར་རྐྱེན་མ་ཚང་བ་ནི་རྫས་ལས་མ་ཡིན་ཞིང་བྱེད་པ་ལས་མ་ཡིན་ནོ། །རྐྱེན་མེད་པར་འདུས་བྱས་ཀྱི་ཆོས་འགའ་ཡང་ཡོད་པ་མ་ཡིན་ཏེ། ཐམས་ཅད་ཀྱང་མ་འོངས་མ་འོངས་པའི་ཆོས་མ་འོངས་པ་རྣམས་རྐྱེན་ནོ། །སྐྱེས་བུའི་བྱེད་པ་མེད་ཅེས་པ་སོ་སོར་བརྟགས་པ་མ་ཡིན་པའི་འགོག་པ་ཐོབ་པའོ། །འོ་ན་ཅི་ཞེ་ན། འདིས་ཕྲད་པར་བྱེད་པས་ན་རྐྱེན་དེ་དེ་ལྟར་འདི་ལས་ཀྱང་གང་གནས་པའི་བྱ་བ་དང་ཕྲད་པར་བྱེད་པས་ན་དེ་གནས་པ་རྣམས་ལ་མ་ཚང་བ་ཞེས་
ཤེས་པར་བྱའོ། །ཀི་མ་བ་སྠེ་བྷྱཿཀཱརྻི་པྲ་ཏྱེ་ཏེ་ནུས་པ་དེ་རྣམས་སམ་འདས་པ་དང་ད་ལྟར་བྱུང་བ་ཉིད་དང་དེ་ལས་ཆེས་གཞན་པ་དེ་དང་འགལ་བའི་རྐྱེན་འཇུག་པ་ཐོབ་པ་ལས་གནོད་པའམ། མ་ཚང་བའི་གཟུགས་མིག་དང་ཡིད་གཟུགས་གཅིག་ལ་ཡེངས་པ་ནི་དེ་ལས་གཞན་པའི་གཟུགས་ལ་སོགས་པ་དང་རྣམ་པར་ཤེས་པ་རྣམས་ཀྱི་གནས་དང་དམིགས་པ་ལ་རག་ལུས་པའི་སྐྱེ་བ་རྣམས་ཀྱི་རྒྱུ་དང་དམིགས་པ་དང་བདག་པོའི་རྐྱེན་རྣམས་དང་འབྲས་བུ་སྦྱིན་པའི་གནས་རྣམས་ལ་དེ་དང་མཐུན་པའི་དེ་མ་ཐག་པའི་རྐྱེན་དུ་གྱུར་པའི་ཕྱིར་རྐྱེན་རྣམས་མ་ཚང་བ་ཞེས་བྱའོ། །འདིར་སོ་སོར་བརྟགས་པ་མ་ཡིན་པས་འགོག་པ་ཐོབ་པ་ནི་མུ་བཞི་པར་འགྱུར་ཏེ། དེའི་ཕྱིར་ཟག་པ་དང་བཅས་པ་རྣམས་ཉིད་ནི་སོ་སོར་བརྟགས་པས་འགོག་པ་ཐོབ་ལ། འདུས་བྱས་མི་སྐྱེ་བའི་ཆོས་ཅན་རྣམས་ནི་སོ་སོར་བརྟགས་པ་མ་ཡིན་པས་འགོག་པའོ། །ཟག་པ་དང་བཅས་པ་འདས་པ་དང་ད་ལྟར་བྱུང་བ་སྐྱེ་བའི་ཆོས་ཅན་རྣམས་སོ་སོར་བརྟགས་པས་འགོག་པ་ཁོ་ནའི་ཡིན་གྱི་སོ་སོར་བ་རྟགས་པ་མ་ཡིན་པས་འགོག་བ་ནི་མ་ཡིན་ཏེ། དེ་ནི་མི་སྐྱེ་བའི་ཆོས་ཅན་རྣམས་ཁོ་ནའི་ཡིན་ནོ། །ཟག་པ་བཅས་པ་སྨོས་པ་ནི་ཟག་པ་མེད་པ་རྣམ་པར་གཅད་པར་བྱ་བའི་ཕྱིར་ཏེ། ཉེས་པ་མེད་པའི་ཕྱིར་ཟག་མེད་རྣམས་ནི་སོ་སོར་བརྟགས་པས་འགོག་པ་ཡིན་ཏེ། དེ་ལ་རང་གི་རྒྱུད་དུ་གཏོགས་པའི་འདས་པ་དང་མ་འོངས་པའི་ཉོན་མོངས་པ་ཅན་གྱི་ཆོས་རྣམས་ནི་ཤེས་རབ་ཀྱི་སྟོབས་ཀྱིས་ད་ལྟར་བྱུང་བའི་ཐོབ་པ་འགོག་པའི་ཕྱིར་སོ་སོར་བརྟགས་པས་འགོག་པ་ཐོབ་བོ། །གཞན་གྱི་རྒྱུད་དུ་གཏོགས་བའི་ཉོན་མོངས་པ་དུས་གསུམ་པ་རྣམས་ཐམས་ཅད་ཀྱང་སོ་སོར་བརྟགས་པས་དེ་ལ་དམིགས་པའི་ཉོན་མོངས་པའི་ཐོབ་པ་གཅོད་པའི་ཕྱིར་སོ་སོར་བརྟགས་པས་འགོག་པ་ཐོབ་པོ། །ཡང་ན་རང་གི་རྒྱུད་དུ་གཏོགས་པའི་ཉོན་མོངས་པ་རྣམས་འདས་པ་དང་མ་འོངས་པ་དང་ད་ལྟར་བྱུང་བའི་ཐོབ་པ་དང་བྲལ་བའི་ཕྱིར་དང༌། ཐོབ་པ་ནི་ད་ལྟར་རང་གི་ཐོབ་པ་དང་བྲལ་བའི་ཕྱིར་སོ་སོར་བརྟགས་པས་འགོག་པ་ཐོབ་བོ། །ཡང་ན་རང་གི་རྒྱུད་ལ་ཡང་དུས་གསུམ་པའི་སྤངས་པ་
ཐོབ་བོ། །སཾ་ཡོ་ག་ནི་རོ་དྷྱོ་ཧི་བི་སཾ་ཡོ་ག་ཨཱ་ཀཱ་ཤཱ་ཏ་སོ་སོར་བརྟགས་པས་འགོག་པའི་ལྡན་པ་ཡང་ཀུན་ཏུ་སྦྱོར་བ་འཁོར་དང་བཅས་པ་རྣམས་ཀྱི་ཐོབ་པ་རྣམས་སོ། །ཀུན་ཏུ་སྦྱོར་བའི་འཁོར་གྱི་ཐོབ་པ་དེ་རྣམས་ཀྱང་སོ་སོར་བརྟགས་པས་འགོག་པ་ཉིད་ཐོབ་པ། ཟག་པ་མེད་པའི་འདུས་བྱས་མི་སྐྱེ་བའི་ཆོས་ཅན་རྣམས་ནི་སོ་སོར་བརྟགས་པ་མ་ཡིན་པས་འགོག་པ་ཐོབ་པ་ཁོ་ན་སྟེ། དེ་དག་ཟག་པ་མེད་པ་ཡིན་པའི་ཕྱིར་སོ་སོར་བརྟགས་པས་འགོག་པ་མེད་ཀྱི་རྐྱེན་མ་ཚང་བ་ཉིད་ཀྱི་ཕྱིར་སོ་སོར་བརྟགས་པ་མ་ཡིན་པས་འགོག་པ་ཐོབ་བོ། །མི་སྐྱེ་བའི་ཆོས་ཅན་སྨོས་པ་ནི་འདས་པ་དང་ད་ལྟར་བྱུང་བའི་སྐྱེ་བའི་ཆོས་རྣམ་པར་གཅད་པའི་ཕྱིར་དུའོ། །ཟག་པ་མེད་པ་སྨོས་པ་ནི་ཟག་པ་དང་བཅས་པ་བསལ་བའི་ཕྱིར་དུའོ། །འདུས་བྱས་སྨོས་པ་ནི་འདུས་མ་བྱས་བསལ་བའི་ཕྱིར་ཏེ་དེ་ཡང་མི་སྐྱེ་བའི་ཆོས་ཅན་དང་ཟག་པ་མེད་པ་ཡིན་ནོ། །དཔེར་ན་དད་པས་རྗེས་སུ་འབྲང་བའི་ལམ་མངོན་དུ་གྱུར་པ་ན་ཆོས་ཀྱི་རྗེས་སུ་འབྲང་བའི་ལམ་རྐྱེན་མ་ཚང་བས་སོ་སོར་བརྟགས་པ་མ་ཡིན་པས་འགོག་པར་ཐོབ་པ་དང་སྡུག་བསྔལ་ལ་ཆོས་ཤེས་པའི་བཟོད་པའི་ཚེ་སྡུག་བསྔལ་ལ་ཆོས་ཤེས་པའི་བཟོད་པ་མ་འོངས་པ་རྣམས་བཞི་ཆར་དང༌། དེ་བཞིན་དུ་སྡུག་བསྔལ་ལ་རྗེས་སུ་ཤེས་པའི་བཟོད་པའི་ཚེ་སྡུག་བསྔལ་ལ་རྗེས་སུ་ཤེས་པའི་བཟོད་པ་རྣམས་ཏེ་དེ་ལྟར་བདེན་པ་སོ་སོ་ལ་བརྗོད་པར་བྱ་ཞིང༌། དེ་བཞིན་དུ་གཞན་ལ་ཡང་སྦྱར་བར་བྱའོ། །གཉི་ག་ཟག་པ་དང་བཅས་པ་མི་སྐྱེ་བའི་ཆོས་ཅན་རྣམས་ཏེ་འདི་དག་ཟག་པ་དང་བཅས་པའི་ཕྱིར་སོ་སོར་བརྟགས་པས་འགོག་པ་ཡིན་ལ། མི་སྐྱེ་བའི་ཆོས་ཅན་ཡིན་པའི་ཕྱིར་སོ་སོར་བརྟགས་པ་མ་ཡིན་པས་འགོག་པའོ། །གཉི་ག་མ་ཡིན་པ་ནི་ཟག་པ་མེད་པ་འདས་པ་དང་ད་ལྟར་བྱུང་བ་དང་སྐྱེ་བའི་ཆོས་ཅན་རྣམས་ཏེ། དེ་རྣམས་ནི་ཟག་པ་མེད་པ་ཡིན་པའི་ཕྱིར་སོ་སོར་བརྟགས་པས་འགོག་པ་མི་འཐོབ་པོ། །སྐྱེས་པ་དང་སྐྱེ་བའི་ཆོས་ཅན་ཉིད་ཀྱི་ཕྱིར་སོ་སོར་བརྟགས་པ་མ་ཡིན་པས་འགོག་པའོ། །ཇི་ལྟར་ཟག་པ་དང་བཅས་པ་རྣམས་ཤེས་པར་བྱ་བ་ཡིན་པ་དེ་བཞིན་དུ་འདུས་བྱས་རྣམས་ཀྱང་ཡིན་པས་འདུས་བྱས་དེ་དག་གང་ཞེ་ན་ཞེས་དྲིས་ཏེ།
ལམ་གྱི་བདེན་པ་མ་གཏོགས་པ་བསྡུ་བའི་ཕྱིར་འདུས་བྱས་ཞེས་བཟུང་ནས་དྲིས་སོ། །དེའི་ཕྱིར། འདུས་བྱས་ཆོས་རྣམས་དེ་དག་ཀྱང༌། །གཟུགས་ལ་སོགས་པའི་ཕུང་པོ་ལྔ། །ཞེས་གསུངས་ཏེ། དེ་ལ་ནད་དང་རྒ་ཤི་ལ་སོགས་པ་ཉེ་བར་འཚོ་བའི་ཁྱད་པར་རྣམས་ཀྱིས་གནོད་པས་ན་ཕུང་པོའོ། །ཚུལ་ཁྲིམས་ལ་སོགས་པ་དང་འབྲེལ་བའི་ཕུང་པོ་ལྔ་རྣམ་པར་གཅད་པའི་ཕྱིར་དུ་གཟུགས་ལ་སོགས་པ་སྨོས་སོ། །གཟུགས་ལ་སོགས་པའི་ཡུལ་དགག་པའི་ཕྱིར་ཕུང་པོ་ཞེས་སྨོས་སོ། །གལ་ཏེ་གཟུགས་ལ་སོགས་པ་བྱས་པའི་ཕྱིར་ན་བྱས་ན་ཞེས་བརྗོད་པར་བྱ་བ་མ་ཡིན་ནམ་བྱེད་པའི་དུས་བྱས་ཞེས་པ་དོན་མེད་དོ་ཞེ་ན། དོན་མེད་པ་མ་ཡིན་ཏེ་དེ་ནི་རྐྱེན་གཅིག་གིས་སྐྱེད་པ་འགའ་ཡང་མེད་དོ་ཞེས་བསྟན་པའི་ཕྱིར་དེ་ལྟར་བཤད་དོ། །བྱས་པ་ཞེས་བརྗོད་ན་ནི་གཟུགས་ལ་སོགས་བ་རྐྱེན་གཅིག་གིས་སྐྱེད་པ་ཉིད་མ་བཀག་པར་འགྱུར་རོ། །འདུས་བྱས་ཀྱི་སྒྲའི་དོན་བསྟན་པའི་ཕྱིར་རྐྱེན་རྣམས་འདུས་ཤིང་ཕྲད་ནས་བྱས་པས་ན་འདུས་བྱས་ཞེས་གསུངས་ཏེ། འདུས་ཤིང་ཞེས་བྱ་བ་ནི་ཚོགས་ཤིང་ཞེས་བྱ་བ་སྟེ་འབྲས་བུ་བསྐྱེད་པ་ལ་ཕན་ཚུན་རྗེས་སུ་མཐུན་པར་གྱུར་ནས་ཞེས་བྱ་བའི་ཐ་ཚིག་གོ །འདིར་སྔ་མ་ནི་བསྟན་པའི་ཚིག་ཡིན་ལ་ཕྱི་མ་ནི་བཤད་པའི་ཚིག་ཡིན་ཏེ་སྔ་མ་ཁོ་ནའི་རྣམ་གྲངས་ཡིན་པའི་ཕྱིར་རོ། །འདུས་ཤིང་ཞེས་བྱ་བ་འདིས་ནི་དུས་ཐ་དད་པ་རྣམས་འབྲས་བུ་རྗེས་སུ་མཐུན་པའི་ཕྱིར་འདུས་པར་སྟོན་ཏེ། དཔེར་ན་ཡིད་རྣམ་པར་ཤེས་པ་ལ་འདས་པའི་ཡིད་དང་མ་འོངས་པའི་ཆོས་རྣམས་ལྟ་བུའོ། །ཕྲད་ནས་ཞེས་བྱ་བ་འདིས་ནི་དུས་ཐ་མི་དད་པ་རྣམས་ཏེ། དཔེར་ན་མིག་གི་རྣམ་པར་ཤེས་པ་ལ་མིག་དང་གཟུགས་དག་དང༌། མྱུ་གུ་ལ་ས་དང་ཆུ་དང་ས་བོན་རྣམས་བཞིན་ནོ་ཞེས་ཁ་ཅིག་གོ །ཡང་གཞན་དག་ན་རེ་འདུས་ཤིང་ཞེས་བྱ་བ་ནི་བར་ཆད་མེད་པར་སྐྱེ་བར་བྱེད་པ་ས་དང་ཆུ་དང་ས་བོན་བཞིན་ནོ། །ཕྲད་ནས་ཞེས་བྱ་བ་མིག་དང་གཟུགས་དུས་གཅིག་ཏུ་གྱུར་པ་བཞིན་ནོ་ཞེས་ཟེར་རོ། །གཞན་དག་ན་རེ་སྔ་མས་ནི་ཕན་ཚུན་ཕྲད་པ་སྟོན་ལ། ཕྱི་མས་ནི་རྐྱེན་ཐམས་ཅད་ཀྱི་བྱ་བ་སྟོན་ཏོ། །བཤད་པ་སྔ་མར་རེས་འགའ་གཅིག་གིས་ཀྱང་བྱས་སོ་སྙམ་དུ་དོགས་པར་འགྱུར་བས་དེའི་ཕྱིར་ཕྲད་
ནས་ཞེས་བྱ་བ་སྨོས་སོ་ཞེས་གཞན་དག་གོ །བཤད་པ་འདི་དག་ལ་དང་པོ་གཉིས་ནི་ཕྲད་ནས་ཞེས་བྱ་བ་འདིའི་དོན་མ་ཡིན་ཏེ་བྱ་བ་ཐམས་ཅད་ལ་རྗེས་སུ་མཐུན་པའི་ཁྱད་པར་མེད་པའི་ཕྱིར་རོ། །ཕྱི་མ་གཉིས་ནི་རྐྱེན་གཅིག་གིས་སྐྱེད་པ་ནི་འགའ་ཡང་མེད་དོ་ཞེས་པ་དང་འབྲེལ་མེད་པ་ཉིད་དོ། །ཇི་སྐད་དུ། བཞི་ཡིས་སེམས་དང་སེམས་བྱུང་རྣམས། །གསུམ་གྱིས་སྙོམས་པར་འཇུག་པ་གཉིས། །གཞན་ནི་གཉིས་པོ་དག་ལས་སྐྱེས། །དབང་ཕྱུག་སོགས་མིན་རིམ་སོགས་ཕྱིར། །ཞེས་སོ། །བྱུང་བའི་གྱུར་པའི་དུས་ལ་རྐྱེན་ཀྟྭཱ་བསྒྲུབ་པའི་ཕྱིར། མ་བྱས་པ་ཉིད་དང་བྱེད་པར་འགྱུར་བ་སྐྱེ་བའི་ཆོས་ཅན་རྣམས་འདུས་བྱས་ཉིད་དོ། །ཅི་ལྟར་བརྗོད་ཅེ་ན་དེའི་ཕྱིར། དེ་དང་རིགས་མཐུན་པའི་ཕྱིར་མ་འོངས་པ་དག་ལ་ཡང་མི་འགལ་ཏེ་འོ་མ་བཞིན་ནོ་ཞེས་གསུངས་ཏེ། དཔེར་ན་དེ་དང་རིགས་མཐུན་པའི་ཕྱིར་འཇོ་བར་འགྱུར་བ་དང་འཇོ་བར་འགྱུར་བ་མ་ཡིན་པ་དག་ལ་ཡང་འོ་མ་ཞེས་བརྗོད་པ་དེ་བཞིན་དུ་མ་འོངས་པ་སྐྱེ་བའི་ཆོས་ཅན་དང་སྐྱེ་བའི་ཆོས་ཅན་མ་ཡིན་པ་དག་ལ་ཡང་འདུས་བྱས་ཞེས་བརྗོད་པར་བྱ་སྟེ། སྐྱེ་བ་ལ་སོགས་པ་མཚན་ཉིད་དང་ལྡན་པས་འདུས་མ་བྱས་རྣམ་པར་གཅད་པའི་སྒོ་ནས་རང་གི་མཚན་ཉིད་འདྲ་བའི་ཕྱིར་དང་དེ་དང་རིགས་མཐུན་པའི་ཕྱིར་རོ། །བཅོམ་ལྡན་འདས་ཀྱིས་དུས་ལ་སོགས་པ་རྣམས་ཀྱང་བསྟན་ལ། འདུས་བྱས་དང་འདུས་མ་བྱས་མ་གཏོགས་པའི་ཆོས་གཞན་དག་ཀྱང་མེད་ན་དེ་ཅི། དུས་ལ་སོགས་པ་རྣམས་འདུས་བྱས་སམ་འོན་ཏེ་འདུས་མ་བྱས་ཡིན་ཞེ་ན། དེའི་ཕྱིར་དེ་དག་ཉིད་དུས་གཏམ་གཞི་དང༌། །ངེས་པར་འབྱུང་བཅས་གཞི་དང་བཅས། །ཞེས་བྱ་བ་གསུངས་ཏེ། ཡང་ན་འདུས་བྱས་ཀྱི་ཆོས་རྣམས་ཀྱི་མིང་རབ་ལས་གྲགས་པ་འཆད་པར་བྱེད་པའོ། །ཀུན་ཏུ་རྨོངས་པ་མེད་པར་བྱ་བའི་ཕྱིར་དེ་དག་ཉིད་དུས་ཞེས་བྱ་བ་ལ་སོགས་པ་སྟེ། དེ་དག་ཉིད་ནི་གཟུགས་ལ་སོགས་པའི་ཕུང་པོ་རྣམས་སོ། །སྐྱེ་བ་དང་འཇིག་པའི་ཆོས་ཅན་གྱི་ཕྱིར་སོང་བ་དང་འགྲོ་བ་དང་འགྲོ་བར་འགྱུར་བའི་ངོ་བོ་ཡིན་པའི་ཕྱིར་དུས་རྣམས་ཏེ་གཟུགས་ལ་སོགས་པའི་ཕུང་པོ་ལས་ཐ་དད་པའི་དུས་ཡོད་པ་མ་ཡིན་ནོ་ཞེས་སྟོན་པར་བྱེད་དོ། །ངོ་བོའི་སྒྲ་ནི་རེ་རེ་ལ་ཡང་
སྦྱར་བར་བྱའོ། །གལ་ཏེ་འཇིག་རྟེན་ན་བགྲོད་པར་བྱ་བ་ལམ་གྱི་སྒྲ་རབ་ཏུ་གྲགས་པ་མ་ཡིན་ནམ། ཇི་ལྟར་བྱེད་པ་པོ་ལ་ལམ་གྱི་སྒྲ་བྱེ་བྲག་ཏུ་བཤད་ཅེ་ན། འཇིག་རྟེན་ན་བྱེད་པ་པོ་ལ་ཡང་ལམ་གྱི་སྒྲ་མཐོང་སྟེ་ལམ་འདི་ནི་གྲོང་ཆེ་གེ་མོ་ཞིག་ཏུ་སོང་བ་དང་འགྲོ་བར་འགྱུར་རོ་ཞེས་ཟེར་བ་ལྟ་བུ་སྟེ། དེའི་ཕྱིར་བྱེད་པ་པོ་ལ་ལམ་གྱི་སྒྲ་བསྟན་དུ་རུང་ངོ༌། །མི་རྟག་པ་ཉིད་ཀྱིས་ཟ་བའི་ཕྱིར་དུས་རྣམས་སོ་ཞེས་པ་ཅི་ཞེ་ན། ངེས་པའི་ཚིག་གི་ཚུལ་གྱིས་ཏེ། ཟ་ཞིང་འཆའ་ལ་འཇིག་ཅེས་བྱ་བའི་ཐ་ཚིག་གོ །རིག་པ་ནི་རེ་ཞིག་གང་སྐྱེ་བའི་ཆོས་ཅན་དང་ད་ལྟར་བྱུང་བ་དེ་རང་གི་ངང་གིས་འཇིག་སྟེ་མི་རྟག་པ་ཉིད་ཀྱིས་སོ་ཞེས་པ་ལ་གནག་ནི་འདས་པ་དང་མི་སྐྱེ་བའི་ཆོས་ཅན་ནོ། །དེ་ཇི་ལྟར་ཞེ་ན་སྐྱོན་མེད་དེ་དེ་ཡང་དེའི་རིགས་ཅན་ཡིན་པའི་ཕྱིར་རྨ་བྱ་བཞིན་ཞེས་སོ། །གཏམ་ནི་དག་གོ་ཞེས་བྱ་བ་ལ་སོགས་པ་ལ་དེའི་ནི་གཏམ་གྱིའོ། །གཞི་ནི་ཡུལ་ལམ་རྟེན་ཏེ། ངག་ནི་མིང་ལ་འཇུག་ལ། མིང་ནི་དོན་རྗོད་པར་བྱེད་དོ་ཞེས་འཆད་པར་འགྱུར་བའི་ཕྱིར་རོ། །གལ་ཏེ་མིང་གཏམ་གྱི་གཞི་ཡིན་ན་གཟུགས་ལ་སོགས་པའི་ཕུང་པོ་རྣམས་གཏན་གྱི་གཞི་མ་ཡིན་ཏེ། །མིང་ནི་འདུ་བྱེད་ཀྱི་ཕུང་པོའི་ཕྱོགས་གཅིག་པོའི་ཕྱིར་རོ་ཞེ་ན། དེའི་ཕྱིར་དོན་དང་བཅས་པའི་གཞི་སྨོས་པའི་ཕྱིར་ན་ཞེས་བྱ་བ་གསུངས་སོ། །ཡང་ཅི་ལྟར་གཏམ་གྱི་གཞི་ཞེས་བཤད་པ་ལ་དོན་དང་བཅས་པའི་ཞེས་སྨོས་པ་ནི། ཡུལ་ལ་ཡུལ་ཅན་བཞིན་དུ་བཏགས་པ་སྟེ། དཔེར་ན་བསྟན་བཅོས་ཀྱི་ཡུལ་ཡི་གེའི་འབྲིས་བ་ལ་བསྟན་བཅོས་ཞེས་པ་བཞིན་ནོ། །ཡང་ཅི་ལྟར་མིང་དང་བཅས་པའི་གཞི་སྨོས་བ་ཞེས་བྱ་བ་འདི་ཤེས་པར་བྱ་ཞེ་ན། དེའི་ཕྱིར་བཤད་བ་རབ་ཏུ་བྱེད་པའི་གཞུང་གཏམ་གྱི་གཞི་རྣམས་ནི་ཁམས་བཅོ་བརྒྱད་ཀྱིས་བསྡུས་སོ་ཞེས་བྱ་བ་དང་འགལ་བར་འགྱུར་རོ། །ཇི་ལྟར་ན་གཞན་དུ་མ་ཡིན་ཞེ་ན། གལ་ཏེ་མིང་གི་གཞི་དོན་དང་བཅས་པ་ལ་སྨོས་ན་ནི། མིང་ནི་ཆོས་ཀྱི་ཁམས་ཀྱི་ཕྱོགས་གཅིག་གིས་བསྡུས་པའི་ཕྱིར། ཇི་ལྟར་གཏམ་གྱི་གཞི་རྣམས་ཁམས་བཅོ་བརྒྱད་ཀྱིས་བསྡུས་པར་འགྱུར། དེ་ལྟར་དོན་དང་བཅས་པའི་གཏམ་གྱི་གཞི་གཟུང་བར་བྱའོ། །ཅི་ལྟར་ཡང་མི་ལྡན་པའི་མིང་ལ་དོན་
ཡོད་པར་འགྱུར་ཞེ་ན། ངག་ནི་མིང་ལ་འཇུག་པའི་ཕྱིར་ལ། མིང་ནི་དོན་རྗོད་པར་བྱེད་པའི་ཕྱིར་རོ། །གཞན་དག་ན་རེ། འདི་རྗོད་པར་བྱེད་པས་ན་གཏམ་སྟེ། ངག་ཏུ་རྗོད་པར་བྱེད་པས་སོ། །གཏམ་ཞེས་བྱ་བ་ལ་གཏམ་དེ་དག་གི་གཞིའི་མིང་གི་དོན་ཡང་ཇི་ལྟར་རིགས་པ་ཉིད་དོ། །གཏམ་གྱི་གཞིའི་སྒྲ་ནི་མིང་དང་དོན་དག་སྨོས་པ་དང་དོན་དང་བཅས་པའི་གཏམ་གྱི་གཞི་སྨོས་པས་རབ་ཏུ་བྱེད་པའི་གཞུང་དང་མི་འགལ་ལོ། །མདོ་སྡེ་པ་རྣམས་ནི་མིང་དག་གི་ཡུལ་ཅན་ཡིན་པའི་ཕྱིར་དོན་དང་བཅས་པའི་གཞི་སྨོས་པ་མེད་པར་ཡང་གཏམ་གྱི་གཞི་གཞན་རྣམས་ཀྱང་ཁམས་བཅོ་བརྒྱད་ཀྱིས་བསྡུས་པར་རུང་ངོ་ཞེས་སོ། །གལ་ཏེ་དོན་དང་བཅས་པ་དང་གཏམ་གྱི་གཞི་བཟུང་ན་མ་བསྡུས་པ་དེ་ལ་ཡང་གཏམ་གྱི་གཞིའི་མིང་ཡོད་པས་ཅི་ལྟར་ཡང་འདིར་འདུས་མ་བྱས་བསལ་ཞེ་ན། མདོ་ལས་དུས་སུ་གཏོགས་པ་ཁོ་ན་གཏམ་གྱི་གཞི་ཉིད་དུ་བསྟན་ཏེ། དགེ་སློང་དག་གསུམ་པོ་འདི་དག་ནི་གཏམ་གྱི་གཞི་ཡིན་ཏེ་བཞི་པ་དང་ལྔ་པ་ནི་མ་ཡིན་ནོ། །གང་དག་ཏུ་གཏོགས་པར་མཐོང་བ་ཡང་དོན་ལས་བརྩམས་ཏེ་གཏམ་དུ་གྱུར་པ་དང་གཏམ་དུ་འགྱུར་པ་དང་གཏམ་དུ་བྱེད་པ་ལྟ་བུའི་ཐོས་པ་དང་འདོད་པ་དང་རྣམ་པར་ཤེས་པ་ཡང་དོན་ལས་བརྩམས་ཏེ་གཏམ་དང་གཏམ་དུ་འགྱུར་བ་དང་གཏམ་དུ་བྱེད་པ་གང་ཞེ་ན། འདས་པ་ནི་གཏམ་གྱི་གཞིའོ། །མ་འོངས་པ་ནི་གཏམ་གྱི་གཞིའོ། །ད་ལྟར་བྱུང་བ་ནི་གཏམ་གྱི་གཞིའོ་ཞེས་གསུངས་སོ། །གལ་ཏེ་འདུས་མ་བྱས་པ་ལས་ཀྱང་བརྩམས་ཏེ་གཏམ་དུ་འགྱུར་བ་མ་ཡིན་ནམ། ཅིའི་ཕྱིར་དེ་གཏམ་གྱི་གཞི་ཡིན་པ་ཉིད་མདོ་ལས་བཀག་ཅེ་ན། མིང་དེ་དོན་དང་ལྷན་ཅིག་རིགས་པས་གཏམ་གྱི་གཞི་ནི་དོན་དང་བཅས་པའི་མིང་ངོ་ཞེས་བཤད་དོ། དེའི་ཕྱིར་མིང་གང་ཞིག་དོན་དང་ལྷན་ཅིག་བརྗོད་པར་ནུས་པ་དེ་གཏམ་གྱི་གཞི་ཡིན་ན། མིང་དུས་སུ་གཏོགས་པ་དང་འདུས་མ་བྱས་སུ་གཏོགས་པ་ནི་ལྷན་ཅིག་གོ་ཞེས་བྱ་བར་མི་རུང་བས་དེའི་ཕྱིར་འདུས་མ་བྱས་ནི་གཏམ་གྱི་གཞི་མ་ཡིན་ནོ་ཞེས་སློབ་དཔོན་འདུས་བཟང་ཟེར་རོ། །གལ་ཏེ་འདི་དེ་ལྟར་གྱུར་ན་ཐ་དད་མེད་པའི་དོན་ཅན་ཁོ་ན་དོན་དུ་འགྱུར་གྱི་མིང་དུ་མ་ཡིན་
ནོ། །གཞན་ཡང་མིང་དེ་ལྟར་བྱུང་བ་དང་དོན་འདས་པ་དང་མ་འོངས་པ་དག་དང་དངོས་པོ་འདས་པ་ཡང་ད་ལྟར་བྱུང་བ་དང་མ་འོངས་པ་དག་དང༌། མ་འོངས་པ་ཡང་ད་ལྟར་བྱུང་བ་དང་འདས་པ་དག་དང་ལྷན་ཅིག་གོ་ཞེས་མི་ནུས་པས་འདུས་བྱས་ཀྱང་གཏམ་གྱི་གཞི་མ་ཡིན་པར་འགྱུར་རོ། །གཞན་དག་ན་རེ་གང་ན་ངག་དང་མིང་དང་དོན་གསུམ་ཡོད་པ་དེ་གཏམ་གྱི་གཞི་ཡིན་ན། འདུས་མ་བྱས་ནི་དོན་ཁོ་ན་ཡིན་གྱི་ངག་དང་མིང་མ་ཡིན་པས་དེ་གཏམ་གྱི་གཞི་མ་ཡིན་ནོ་ཞེས་ཟེར་རོ། །དེ་ལ་ཡང་མཐའ་དག་གཏམ་གྱི་གཞི་ཉིད་ཅེས་བྱ་བར་ཐོབ་པ་ནི་བྱ་བ་སྟེ་དུས་མ་ཡིན་པས་དེ་ལ་འགའ་ཞིག་གིས་བརྗོད་པར་བྱ་སྟེ། དུས་གནས་པ་ལ་འདི་བསྟན་པ་ཡོད་ཀྱང་བཞི་པ་དང་ལྔ་པ་ཁོ་ན་ལས་མ་ཡིན་ལྔ་པ་མ་ཡིན་ཞེས་གསུངས་པས་ན་འདི་བསམ་པར་བྱའོ། །སཾ་སྐྲྀ་ཏི་ནཻ་པ་འདུས་མ་བྱས་སུ་བཏགས་པ་སེམས་ཅན་དང་འགལ་བ་འགག་པ་སྐྱེད་པ་ལ་གཏན་དུ་བགེགས་བྱེད་པ་མི་སྒྲིབ་པ་ནམ་མཁའ་ཞེས་པས། འདུས་བྱས་ཁོ་ན་གཏམ་གྱི་གཞི་ཡིན་གྱི་ཅིག་ཤོས་མ་ཡིན་པའི་སྒོ་ནས་མངོན་པར་འདོད་པའི་ཕྱིར་རོ་ཞེས་གཞན་དག་གོ །གང་ངེས་པར་འདུས་བྱས་ཨ་ནུ་བྷཱུ་ཏ་མ་ནུ་བྷཱུཾ་ཏ་ཛཱ་ཏཱི་ཡཾ་བཱ་ཏནྣཱམྣཱ་ནུ་བྷཱ་བཱ་ཀཱ་ར་བྱ་ཏི་རེ་ཀེ་ཎ་བྱོ་ཏྱནྟ་དུ་པཱ་ཤྲ་ཡེ་ཎཻ་པ་སཱ་ཊི་ཀོ་ན་ཏཻ་བ་ལ་སཾ་སྐྲྀ་ཏ་མ་ནུ་བྷཱུ་ཏ་མ་ནུ་བྷཱུ་ཏ་ཐཱ་ཏཱི་ཡཾ་བཱ་གཏམ་གྱི་སྤྲོས་པ་ལ་མངོན་པར་དགའ་བའི་འཆད་པ་པོ་རྣམས་ཀྱིས་ཉན་པ་པོ་རྣམས་ལ་མིང་གིས་སྟོན་པར་བྱེད་པས་ད་གཏམ་གྱི་གཞི་ནི་མ་ཡིན་ནོ། །གང་གི་ཕྱིར་མངོན་དུ་བྱས་པའི་འདུས་བྱས་དང་འདུས་མ་བྱས་རྣམས་ལ་ཡང་དེའི་ཡུལ་ཤེས་པ་ལས་བྱུང་བའི་མིང་རྗེས་སུ་གཞག་པའི་ཕྱིར་རྒྱུའི་ཡུལ་མ་ཡིན་པའི་ཕྱིར་རྒྱུ་མ་ཡིན་པར་འདོད་དོ། །ཨེ་པཾ་ཏརྷྱ་སཾ་སྐྲྀ་ཏ་སྱེ་ཡནྣཱ་མནཱ་ཡ་ཏེ་ཏ་ཏ་བྲ་ཡོ་ཛ་ན་མེ་བ་ད་བྷ་བ་ཏྱ་པྲ་ཡོ་ཛ་ནཾ་སཾ་སྐྲྀ་ཏ་བྱ་བཙྪེ་དན་ཏ་ད་པརྐལྤ་མཱ་ནོ་པཱ་ཡི་ཏྭཱ་དི་ཏི། སློབ་དཔོན་འཕགས་པའི་འབངས་འདུས་བྱས་ལ་ནི་སོ་སོར་སྦྱོར་བ་རྣམ་པར་གཅོད་པའི་རྣམ་པ་ཉིད་ཀྱིས་མིང་འཇུག་གོ་ཞེས་འདི་སེམས་སོ། །མདོ་སྡེ་པ་རྣམས་ནི་མིང་ཙམ་ཉིད་ཀྱི་ཕྱིར་འདུས་མ་བྱས་གཏམ་གྱི་གཞི་མ་ཡིན་ཏེ་གང་ཟག་བཞིན་ནོ། །དེ་ལྟར་ན་འོ་ན་
འདས་པ་དང་མ་འོངས་པ་དག་ལ་ཡང་ཐལ་བར་འགྱུར་ཏེ། དེ་དག་ཀྱང་མིང་ཙམ་ཉིད་ཀྱི་ཕྱིར་རོ་ཞེ་ན། ཐལ་བར་འགྱུར་བ་མེད་དེ་བྱུང་བ་ཉིད་དང་འབྱུང་བར་འགྱུར་བ་ཉིད་ལ་དེར་ཐ་སྙད་པའི་ཕྱིར་རོ། །དེ་བཞིན་དུ་ཡང་ཡོད་པ་ཉིད་མ་ཡིན་ནོ། །གཞན་དག་ནི་དེ་ལྟར་བཞི་པོ་དེ་གཏམ་དུ་བྱ་བ་མ་ཡིན་ནོ་ཞེས་སོ། །གདོན་མི་ཟ་བར་འབྱུང་བའི་ངེས་པར་འབྱུང་བ་སྟེ་ཞེས་བྱ་བ་ལ་འབྱུང་བར་བྱེད་པས་ནི་འབྱུང་བ་སྟེ་འགྲོ་ཞེས་བྱ་བ་ནི་འཆག་གོ །གོང་མ་ཆགས་པར་འབྱུང་བ་ནི་ངེས་པར་འབྱུང་བའོ། །དེ་ཡང་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཏེ། དེར་སོང་བ་ལ་སླར་འོངས་པ་མེད་པའི་ཕྱིར་རོ། །དེ་ཉིད་ཀྱི་ཕྱིར་འདུས་བྱས་ཐམས་ཅད་ཀྱི་མྱ་ངན་ལས་འདས་པའོ་ཞེས་བྱ་བ་སྨོས་ཏེ། ལམ་ཡང་གཟིགས་དང་འདྲ་བ་ཉིད་ཀྱིས་སྤང་བར་བྱ་བར་བཤད་དེ། དེའི་ཕྱིར་འདུས་བྱས་ཐམས་ཅད་ཀྱི་ཞེས་བྱ་བ་སྨོས་སོ། །ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་ནི་འདུས་བྱས་ཐམས་ཅད་ཀྱི་མ་ཡིན་པས་དེ་འདིར་མི་འདོད་དོ། །འདིར་མུ་བཞི་དང་འགལ་བ་ཡོད་པ་མ་ཡིན་ཏེ། ཐོབ་པ་ལ་མུ་བཞི་བརྗོད་པའི་ཕྱིར། ཕུང་པོ་ལྷག་མ་མེད་པ་ལ་ཐོབ་པ་མེད་པའི་ཕྱིར་རོ། །དེ་འདི་དག་ལ་ཡོད་པས་ངེས་པར་འབྱུང་བ་དང་བཅས་པ་དག་སྟེ་ནོར་དང་བཅས་པ་བཞིན་ནོ། །ཡང་གཞན་དག་ན་རེ། སླར་ཡང་ཉིད་ཅེས་པས་འདུས་བྱས་རྣམས་ངེས་པར་གཟུང་སྟེ། ངེས་པར་འབྱུང་བ་བཅས་པ་ཁོ་ན་ཞེས་པ་མ་ཡིན་གྱི། དེ་ལམ་གྱི་ཡང་མཚན་ཉིད་ཡིན་པའི་ཕྱིར་རོ། །དེ་ལྟར་ངེས་པར་འབྱུང་བཅས་ཞེས་པ་ནི་འདུས་བྱས་ཀྱི་ཆོས་ཐམས་ཅད་ཀྱི་རྣམ་གྲངས་སོ། །སྱཱ་དི་ཥྱ་ཏ་ཨི་བེ་ཏི་ཙི་ཏ་ཡུཀྟ་མི་ཥྱ་ཏེ། གང་དག་ཟག་པ་དང་བཅས་པ་ཞེས་ཁྱད་པར་བྱས་པ་དོན་མེད་པར་ཐལ་བ་ལས། དེར་ཡང་འདུས་བྱས་ཉིད་ཁོ་ན་ངེས་པར་གཟུང་བར་འདོད་པས་ཉེ་བར་ལེན་པའི་ཕུང་པོ་འདུས་བྱས་ཉིད་དོ། །འབྱུང་བར་བྱེད་པ་ནི་སྡུག་བསྔལ་དང་ཀུན་འབྱུང་དག་ལས་ཀྱང་ཞེས་རྒྱ་ཆེར་འབྱུང་ངོ༌། །སློབ་དཔོན་འཕགས་པའི་འབངས་ནི་འདིར་མྱ་ངན་ལས་འདས་པ་མར་མེ་ཤི་བ་ལྟ་བུར་འཇུག་པར་ཉེ་བར་ཞི་བ་སྟེ། དེ་ཡང་སོ་སོར་བརྟགས་པ་མ་ཡིན་པའི་
འགོག་པ་དང་རྟག་པ་ཉིད་ཀྱི་འགོག་པ་དང་མི་སྐྱེ་བའི་ཆོས་ཅན་རྣམས་ཡིན་གྱི་སོ་སོར་བརྟགས་པ་ནི་བ་ཡིན་ནོ་ཞེས་ཟེར་རོ། །མི་རྟག་པ་ཉིད་དེ་ནི་མི་རྟག་པ་ཉིད་ཀྱི་འགོག་པ་སྟེ་གཞན་མ་ཡིན་ནོ། །དེ་ཡང་འདུས་བྱས་ཏེ་རྟག་པ་དང་རྗེས་སུ་འབྲེལ་པ་ནི་ངེས་པར་འབྱུང་བཅས་སུ་མི་རུང་ངོ༌། །སོ་སོར་བརྟགས་པ་མ་ཡིན་པས་འགོག་པ་ནི་འདུས་བྱས་ཐམས་ཅད་ཀྱི་མ་ཡིན་ནོ་ཞེས་པ་བསམ་པར་བྱེད་དོ། །རྒྱུ་དང་བཅས་པའི་ཕྱིར་གཞི་དང་བཅས་པ་དག་སྟེ་ཞེས་བྱ་བ་ལ་དེའི་ལས་ཀྱིས་གནས་པས་ནི་གཞི་སྟེ་རྒྱུའོ། །ཀུན་ནས་འགེབས་པར་བྱེད་ཅེས་བྱ་བའི་ཐ་ཚིག་གོ །རྒྱུ་དང་འབྲས་བུ་དག་ནི་སྔ་མ་དང་ཕྱི་མ་ཡིན་པའི་ཕྱིར་དང་ཕྲ་བ་དང་རགས་པ་ཡིན་པའི་ཕྱིར་འདིར་གནས་པར་བྱེད་པའོ། །ལས་ཞེས་བྱ་བ་ནི་གཞི་གནས་པར་བྱེད་པའམ་དེ་ལས་སྐྱེ་བའོ། །རྒྱུ་དེ་གང་དག་ལ་སོགས་པ་དེ་ནི་རྒྱུ་དང་བཅས་པ་དག་གོ །གསུང་རབ་ལས་དོན་མང་པོ་ལ་གཞིའི་སྒྲ་མཐོང་བའི་ཕྱིར་རྒྱུ་དང་བཅས་པའི་ཕྱིར་ཞེས་ཁྱད་པར་དུ་བྱས་སོ། །འདི་ནི་རྒྱུའི་ཚིག་ཡིན་ནོ། །ལོ་ཞེས་བྱ་བ་ལ་ལོའི་སྒྲ་ནི་འདིར་གཞིའི་སྒྲ་རང་བཞིན་གྱི་ཚིག་ཡིན་གྱི་རྒྱུའི་ཚིག་མ་ཡིན་ནོ་ཞེས་ཤེས་པར་བྱ་བའི་ཕྱིར་རོ། །གཞན་དུ་ཡང་མཚུངས་པ་མ་ཡིན་ནམ། གསུང་རབ་ལས་ནི་དོན་ལྔ་ལ་གཞིའི་སྒྲ་མཐོང་སྟེ། རང་བཞིན་དང༌། ཡུལ་དང་ལྡན་པ་དང༌། རྒྱུ་དང་ཡོངས་སུ་འཛིན་པ་ལའོ། །དེ་ལ་རང་བཞིན་ལ་ནི་ཇི་སྐད་དུ་གནས་བརྟན་ཀུན་དགའ་བོས། བཙུན་པ་བདག་གིས་དགེ་སློང་གསར་བུ་གསར་བུ་འདི་དག་ལ་ཇི་ལྟར་གདམས་པར་བ་གྱི། ཇི་ལྟར་རྗེས་སུ་བསྟན་པར་བགྱི། ཇི་ལྟར་འདི་དག་ལ་ཆོས་བསྟན་པར་བགྱི་ཞེས་གསོལ་བ་དང༌། ཀུན་དགའ་བོ་ཁྱོད་ཀྱིས་འདིར་དགེ་སློང་གསར་བུ་གསར་བུ་བ་དག་གཞི་འཛིན་དུ་ཆུག་ཅིག །གཞི་ཀློག་ཏུ་ཆུག་ཅིག་ཅེས་བྱ་བ་ལྟ་བུ་སྟེ། འདིར་ནི་རང་བཞིན་ཡིན་ནོ་ཞེས་བྱ་བར་ཁོང་དུ་ཆུད་དོ། །གཞི་ཇི་ལྟར་ཐོབ་པ་དང་ལྡན་པ་དེ་ནི་གཞིའི་རང་བཞིན་ཡིན་ནོ་ཞེས་རྟོགས་པར་བྱེད་དོ། །ཤེས་བྱའི་ཆོས་རྣམས་གང་ཞེ་ན། བཤད་པ། ཆོས་ཐམས་ཅད་དངོས་པོ་ཇི་ལྟ་བ་བཞིན་དུ་
ཤེས་པས་ཤེས་པར་བྱ་བ་ཡིན་ནོ་ཞེས་བྱ་བ་ནི་ཡུལ་ཇི་ལྟ་བ་བཞིན་དུ་ཤེས་པར་རྟོགས་སོ། །གཞི་གང་ལ་རྗེས་སུ་ཆགས་པའི་ཀུན་ཏུ་སྦྱོར་བ་དང་ལྡན་པའི་གཞི་དེ་ལ་ཁོང་ཁྲོ་བའི་ཀུན་ཏུ་སྦྱོར་བ་ཡང་ལྡན་ནོ་ཞེས་བྱ་བ་ནི་ལྡན་པའོ་ཞེས་བྱ་བར་ཁོང་དུ་ཆུད་དོ། །གཞི་དང་བཅས་པའི་ཆོས་རྣམས་གང་ཞེ་ན། འདུས་བྱས་ཀྱི་ཆོས་ཐམས་ཅད་དོ་ཞེས་བྱ་བས་ནི་རྒྱུ་དང་བཅས་པའོ་ཞེས་བྱ་བར་རྟོགས་སོ། །ཇི་ལྟར་དངོས་པོ་གང་ཞིག་མངོན་པར་ཤེས་པ་དང་ཡོངས་སུ་ཤེས་པའི་དངོས་པོ་དེ་ལ་བརྟེན་ནས་དེ་ལྟར་དགེ་སློང་ཉེ་བར་ཞི་བ་ནི་གཞི་ཆད་པ་སྐྱེ་བའི་འཁོར་བ་ཟད་པ་དེ་ནི་ཡང་སྲིད་མེད་པའོ་ཞེས་བྱ་བས་རྒྱུ་ཆད་པའོ་ཞེས་རྟོགས་སོ། །ཞིང་གི་གཞི་དང་ཁྱིམ་གྱི་གཞི་དང་ཚོང་ཁང་གི་གཞི་དང་ནོར་གྱི་གཞི་དང་ཡོངས་སུ་གཟུང་བ་སྤངས་ཏེ་ཞེས་བྱ་བས་ནི་ཡོངས་སུ་འཛིན་པ་ཞེས་རྟོགས་ཏེ། དེའི་ཕྱིར་དེ་ལྟར་གཞིའི་སྒྲ་དོན་དུ་མ་ཅན་ཡིན་པ་དང༌། འདིར་རང་བཞིན་གྱི་དོན་ཞེས་ཇི་ལྟར་རྟོགས་ཤེ་ན། དེ་ནི་ཅིག་ཤོས་ལ་ཡང་མཚུངས་སོ། །ཡང་གཞི་མེད་པའི་ཆོས་རྣམས་གང་ཞེ་ན། འདུས་མ་བྱས་ཀྱི་ཆོས་རྣམས་སོ་ཞེས་བཤད་པ་ལ། དེ་རྣམས་ཀྱང་རང་བཞིན་མེད་པ་ཉིད་ཀྱི་ཕྱིར། གཞིའི་སྒྲ་ནི་རང་བཞིན་བརྗོད་པའོ་ཞེས་ཤེས་པར་བྱའོ། །ཡང་རང་བཞིན་དང་དམིགས་པ་དང་ལྡན་པ་དང་རྒྱུ་ཡོངས་སུ་འཛིན་པ་རྣམས་ལ་ཡང་ཐམས་ཅད་དུ་གཞིའི་སྒྲ་ནི་རང་བཞིན་གྱི་ཚིག་ཉིད་དོ། །དེ་ལྟར་དེ་དག་ནི་འདུས་བྱས་ཀྱི་ཆོས་ཀྱི་རྣམ་གྲངས་ངག་ཡིན་ཏེ། བརྗོད་པར་བྱ་བའི་དངོས་པོ་མཚུངས་པའི་ཕྱིར་རོ། །གཞན་དུ་ན་འདུས་བྱས་ཇི་སྲིད་པ་གཞི་དང་བཅས་པའོ། །ཇི་སྐད་དུ་འགྲེལ་པར། ཡང་འདུས་བྱས་དེ་དག་ཉིད་གང་དག་ཟག་བཅས་ཉེར་ལེན་པའི། ཕུང་པོའང་དེ་དག་ཅེས་འབྱུང་བ་ལ་གལ་ཏེ། ལམ་མ་གཏོགས་པ་འདུས་བྱས་རྣམས། །ཟག་བཅས་ཞེས་ཟག་པ་དང་བཅས་པ་རྣམས་ཀྱིས་བཤད་པ་སྔར་ཉིད་དུ་བྱས་ཟིན་པ་མ་ཡིན་ནམ་ཞེ་ན། འདི་ནི་བདེན་མོད་ཀྱི། འདིར་ནི་དེ་དག་ཁོ་ནའི་མིང་གི་ངེས་པ་གཞན་དག་བསྟན་པའི་ཕྱིར་ཏེ། འདུས་བྱས་ཐམས་ཅད་ཕུང་པོ་ཞེས་བྱ་བར་བཤད་ན། ཟག་པ་དང་བཅས་པའི་ཕུང་པོ་ཞེས་བྱ་བ་
གང་ཡིན་པ་དེ་ནི་ཉེ་བར་ལེན་པའི་ཕུང་པོ་ཞེས་བྱ་བ་དང༌། ཟག་པ་མེད་པའི་ཕུང་པོ་ཞེས་བྱ་བ་ཉིད་ཀྱང་ཡིན་ནོ། །ཞེས་འདི་ལ་དོན་གྱིས་རྟོགས་པས་མིང་ངེས་པར་བྱ་བའི་ཕྱིར་དུ་འདི་བརྩམས་པའོ། །འདིས་ཅི་ཞིག་འགྲུབ་བར་འགྱུར་ཞེ་ན། ཉེ་བར་ལེན་པའི་ཕུང་པོ་གང་དག་ཡིན་པ་དེ་དག་ནི་ཕུང་པོ་ཡང་ཡིན་ཏེ། གཟུགས་ལ་སོགས་པའི་དངོས་པོ་ལ་སྤུངས་པའི་དོན་བྱེ་བྲག་མེད་པའི་ཕྱིར་རོ། །ཕུང་པོ་དག་ཁོ་ན་ཡིན་པ་ཉེ་བར་ལེན་པའི་ཕུང་པོ་མ་ཡིན་པ་དག་ཀྱང་ཡོད་དེ་ཟག་པ་མེད་པའི་ཕུང་པོ་རྣམས་སོ། །དེ་དག་ནི་ཉེ་བར་ལེན་པ་དག་ལས་བྱུང་བ་མ་ཡིན་ལ། ཉེ་བར་ལེན་པ་དག་ལ་རག་ལུས་པ་ཡང་མ་ཡིན་ཞིང༌། དེ་དག་ལས་ཉེ་བར་ལེན་པ་རྣམས་འབྱུང་བ་ཡང་མ་ཡིན་ནོ། །འདོད་ཆགས་ལ་སོགས་པའི་ཉེ་བར་ལེན་པ་རྣམས་ཁོ་ན་ལ་ཉོན་མོངས་པའི་མིང་གིས་བཏགས་ཏེ། དེ་དག་གིས་སྲིད་པ་གསུམ་དུ་སྐྱེ་བ་འཛིན་པའི་ཕྱིར་རམ། ཡང་སྲིད་འཕེན་པར་བྱེད་པའི་ལས་ཉེ་བར་ལེན་པའི་ཕྱིར་རོ། །དེ་དག་ལས་བྱུང་བའི་ཕྱིར་ན་ཉེ་བར་ལེན་པའི་ཕུང་པོ་དག་གོ །གལ་ཏེ་རེ་ཞིག་དེ་དག་གི་རྒྱུ་མཐུན་པ་དང་རྣམ་པར་སྨིན་པའི་འབྲས་བུ་ཡིན་པའི་ཕྱིར་གང་ཉོན་མོངས་པ་ཅན་དང་རིགས་གཅིག་པ་དང༌། ལུང་དུ་མ་བསྟན་པ་ཁ་ཅིག་དག་ནི་ཉེ་བར་ལེན་པ་ལས་བྱུང་བར་རིགས་མོད་ཀྱི། འོན་ཀྱང་དགེ་བ་ཟག་པ་དང་བཅས་པ་དང་རིགས་གཅིག་པ་དང་ལུང་དུ་མ་བསྟན་པ་ཁ་ཅིག་ཉེ་བར་ལེན་པ་ལས་བྱུང་བར་ཅི་ལྟར་བརྗོད་ཅེ་ན། བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་འདུ་བྱེད་རྣམས་ནི་མ་རིག་པའི་རྐྱེན་ཅན་ཉིད་ཡིན་པའི་ཕྱིར་དང༌། ཟག་བ་དང་བཅས་པ་ཉོན་མོངས་པ་ཅན་མ་ཡིན་པ་རྣམས་དེའི་རྣམ་པར་སྨིན་པ་དང་སྐྱེས་བུ་བྱེད་པ་དང་བདག་པོའི་འབྲས་བུ་ཡིན་པའི་ཕྱིར་རོ། །བསོད་ནམས་ཀྱི་འདུ་བྱེད་སྲིད་པའི་ལོངས་སྤྱོད་ཀྱི་བྱེ་བྲག་ཐ་དད་པ་དོན་དུ་གཉེར་བ་དང་མཐུན་པ་དོན་དུ་གཉེར་བ་ཨ་བ་དཱ་ནེ་ཧྱ་རྣམས་ཀྱང་དེའི་ས་དང་ངེས་པར་འབྱུང་བ་དང་ལྟ་བ་ཀུན་ནས་སློང་བ་དང་ལྡན་པ་དེ་དང་ལྷན་ཅིག་ཏུ་འབྱུང་བ་མ་རིག་པ་ཀུན་ནས་སྤོང་བའི་རྒྱུ་ཞེས་བྱའོ། །ཡང་ན་ཉེ་བར་ལེན་པ་ནི་ཕུང་པོ་རྣམ་པའོ། །ཇི་ལྟར་ཉེ་བར་ལེན་པ་ཡིན་ཞེ་ན། ཉེ་བར་ལེན་
པ་ལ་རག་ལས་པའི་ཕྱིར་རྒྱལ་པོའི་སྐྱེས་བུ་བཞིན་ནོ། །ཉེ་བར་ལེན་པའི་དབང་གིས་དམིགས་པ་དང་འགྲོ་བ་གཞན་དག་ཏུ་གཞོལ་བའི་ཕྱིར་ཏེ་འཇུག་པའི་ཕྱིར་རོ་ཞེས་བྱ་བའི་དོན་ཏོ། །དགྲ་བཅོམ་པ་དག་གི་ཕུང་པོ་རྣམས་ཀྱང་ཉོན་མོངས་པས་ཟིན་པའི་གནོད་པའི་དབང་གིས་གཟུགས་ཀྱི་ཕུང་པོ་རྣམ་པར་འགྱུར་བའི་ཕྱིར་དང་དེ་དག་དང་རྗེས་སུ་མཐུན་པའི་སེམས་དང་སེམས་ལས་བྱུང་བ་སྐྱེ་བའི་ཕྱིར་ཉེ་བར་ལེན་པ་ལ་རག་ལས་པ་ཡིན་ནོ། །ཡང་ན་དེ་དག་ལ་ཉེ་བར་ལེན་པ་རྣམས་འབྱུང་བ་ཉེ་བར་ལེན་པའི་ཕུང་པོ་རྣམས་སོ། །དགྲ་བཅོམ་པའི་རྒྱུད་ཀྱི་ཟག་པ་དང་བཅས་པ་དག་ལས་ཀྱང་རྒྱུད་གཞན་གྱི་ཉེ་བར་ལེན་པ་རྣམས་འབྱུང་སྟེ་དམིགས་པའི་སྒོ་ནས་རྒྱས་པར་འགྱུར་བའི་ཕྱིར་རོ། །གཞན་དག་ནི་ཡང་ཉེ་བར་བླངས་པས་ཉེ་བར་ལེན་པ་སྟེ། ཚེ་དང་ལྡན་པ་ཀུན་དགའ་བོ་ཉེ་བར་བླངས་པ་མེད་ན་ངའོ་སྙམ་པ་མི་འགྱུར་རོ་ཞེས་ཏེ། དེ་རྣམས་གཞན་ཉེ་བར་ལེན་པ་ཡང་ཡིན་ལ་ཕུང་པོ་ཡིད་ཡིན་པས་ཉེ་བར་ལེན་པའི་ཕུང་པོ་ཞེས་བྱ་བ་ལས་འཛིན་པའི་བསྡུ་བའོ། །ཟག་པ་མེད་པ་ལ་ནི་ངའོ་སྙམ་པའི་ཕྱིར་རོ། །འཐབ་པ་ནི་ཉོན་མོངས་པའོ་ཞེས་བྱ་བ་ལ། འཐབ་པས་ན་འཐབ་པ་སྟེ་དེ་ཉིད་ཀྱི་ཕྱིར་བརྟག་པའི་རྒྱུ་མཚན་བསྟན་པའི་ཕྱིར། བདག་དང་གཞན་ལ་གནོད་པའི་ཕྱིར་རོ་ཞེས་གསུངས་ཏེ། འཇིག་རྟེན་ན་ཡང་གང་དུ་བདག་དང་གཞན་ལ་གནོད་པ་དེ་ནི་འཐབ་པ་སྟེ་གཡུལ་ཞེས་བརྗོད་ལ། ཉོན་མོངས་པ་ཡང་འབྱུང་བ་ན་བདག་དང་གཞན་ལ་གནོད་པར་བྱེད་དེ། མདོ་ལས་དེའི་འདོད་པའི་འདོད་ཆགས་སྐྱེས་ན་བདག་ལ་གནོད་བའི་ཕྱིར་གནས་སོ། །གཞན་ལ་གནོད་པ་དང་གཉི་ག་ལ་གནོད་པའི་ཕྱིར་གནས་སོ་ཞེས་གསུངས་པའི་ཕྱིར་རོ། །གཞན་དག་ན་རེ་དག་པའི་ཕྱོགས་འཁྲུག་པར་བྱེད་པའི་ཕྱིར་འཐབ་པ་ཞེས་ཟེར་རོ། །འཐབ་པ་དང་ལྷན་ཅིག་པ་ཡིན་པས་འཐབ་བཅས་ཏེ། འདིར་ཡང་ལྷན་ཅིག་པའི་དོན་ཏོ། །དེའི་ཕྱིར་དེ་དག་གིས་རྒྱས་པར་བྱས་པ་ཉིད་ཀྱི་ཕྱིར་ཏེ། དམིགས་པ་དང་མཚུངས་པར་ལྡན་པ་དང་རྟེན་པ་རྣམས་ནི་ཟག་པ་དང་བཅས་པ་བཞིན་ནོ་ཞེས་བཤད་དོ། །དེ་ལྟར་ཟག་པ་དང་བཅས་པ་ཞེས་པ་འདི་དང་དོན་ལ་ཁྱད་པར་ཡོད་པ་མ་ཡིན་ཡང༌། འདི་དང་ལྷན་
ཅིག་ཏུ་གྱུར་ན་འཐབ་པ་འབྱུང་བ་ཉིད་ཀྱིས་འཐབ་པ་དང་ལྷན་ཅིག་པས་འཐབ་བཅས་སོ་ཞེས་སློབ་དཔོན་འདུས་བཟང་ཟེར་རོ། །དེ་ལ་ཉོན་མོངས་པ་ཅན་ཁོ་ན་འཐབ་བཅས་སུ་འགྱུར་རོ་ཞེ་ན་ཉེས་པ་འདི་མེད་དེ། ཟག་པ་དང་བཅས་པ་ཉིད་འཐབ་བཅས་སོ་ཞེས་ངེས་པར་གཟུང་བའི་ཕྱིར་རོ། །ཡང་ན་ཟག་པ་དང་བཅས་པ་དང༌། འཐབ་པ་དང་བཅས་པ་དང༌། ཟད་ཡིད་དང་བཅས་པ་དང༌། དྲི་མ་དང་བཅས་པ་དང༌། ཟུག་རྔུ་དང་བཅས་དང༌། བགེགས་དང་བཅས་པ་ཞེས་གསུང་རབ་ལས་རྣམ་གྲངས་ཀྱིས་གསུངས་པའི་དོན་གྱི་འཇུག་པ་བསྟན་པར་བྱ་བའི་ཕྱིར་འཐབ་བཅས་ཞེས་བཤད་དོ། །ཟག་པ་དང་བཅས་པའི་ཆོས་དེ་དག་ཉིད་གསུང་རབ་ལས་མིང་གཞན་དག་གིས་ཀྱང་ཐ་སྙད་འདོགས་ཏེ། སྡུག་བསྔལ་ཀུན་འབྱུང་འཇིག་རྟེན་དང༌། །ལྷ་གནས་སྲིད་པའང་དེ་དག་ཡིན། །ཞེས་བྱ་སྟེ། འཕགས་པ་རྣམས་དང་མི་མཐུན་པའི་ཕྱིར་ཞེས་བྱ་བ་ལ། འཕགས་པ་སྨོས་པ་ནི་བདེ་བ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཚོགས་དང་བཅས་པ་དག་ནི་འཕགས་པ་མ་ཡིན་པ་རྣམས་དང་མི་མཐུན་པ་མ་ཡིན་པའི་ཕྱིར་ཏེ། འདུ་བྱེད་ཀྱི་སྡུག་བསྔལ་ཉིད་ཀྱིས་ཟག་པ་དང་བཅས་པ་ཐམས་ཅད་ཡིད་འབྱུང་བའི་གནས་ཡིན་པའི་ཕྱིར་འཕགས་པ་རྣམས་དང་མི་མཐུན་པར་འགྱུར་རོ། །སྡུག་བསྔལ་ཐམས་ཅད་ཀྱི་གནས་སུ་གྱུར་བའི་ཕྱིར་སྡུག་བསྔལ་ལོ་ཞེས་སློབ་དཔོན་འདུས་བཟང་ཟེར་རོ། །སྡུག་བསྔལ་གྱི་གནས་སུ་གྱུར་བ་དང་དེའི་རྒྱུར་གྱུར་བའི་ཕྱིར་སྡུག་བསྔལ་དང་ཀུན་འབྱུང་བའི་བདེན་པའི་རྣམ་པ་དག་ཡིན་གྱི་གཞན་ནི་མ་ཡིན་ནོ། །འདི་ཁྱད་པར་མེད་པར་ཐལ་བར་འགྱུར་ཞེས་སེམས་པའོ། །ཅི་སྟེ་སྡུག་བསྔལ་གྱི་གནས་སུ་གྱུར་པའི་ཕྱིར་འཕགས་པ་རྣམས་དང་མི་མཐུན་པའི་ཕྱིར་དང་སྡུག་བསྔལ་དང་གནོད་པའི་གནས་སུ་གྱུར་པའི་ཕྱིར། ཀུན་འབྱུང་བའི་བདེན་པ་མངོན་པར་རྟོགས་པ་ལས་མི་མཐུན་བར་འགྱུར་གྱི་བདེན་བ་མངོན་པར་རྟོགས་པ་ལས་ནི་མ་ཡིན་ནོ། །སྡུག་བསྔལ་གྱི་བདེན་པ་མངོན་པར་རྟོགས་པ་ལས་ནི་འདུ་བྱེད་སྡུག་བསྔལ་བ་ཉིད་ཀྱིས་མི་མཐུན་པར་འགྱུར་གྱི། ཐམས་ཅད་
སྡུག་བསྔལ་གྱི་གནས་སུ་གྱུར་པ་ལས་མ་ཡིན་ནོ། །འདུ་བྱེད་སྡུག་བསྔལ་གྱི་དབང་དུ་མཛད་དེ། བཅོམ་ལྡན་འདས་ཀྱིས་མདོར་ན་ཉེ་བར་ལེན་པའི་ཕུང་པོ་ལྔ་སྡུག་བསྔལ་ལོ་ཞེས་གསུངས་པའི་སྡུག་བསྔལ་ནི་འདུན་པའི་འདོད་ཆགས་ཀྱི་གཞིའོ། །ལམ་གྱི་བདེན་པ་ནི་འདུ་བྱེད་ཀྱི་སྡུག་བསྔལ་ཉིད་དུ་ཡོད་བ་མ་ཡིན་ཏེ་གཉེན་པོ་ཡིན་པའི་ཕྱིར་རོ། །འཕགས་པ་རྣམས་དང་མི་མཐུན་པ་ཡོད་པ་ཡང་གང་དུ་སེམས་ཅན་ལ་གང་གིས་གནོད་པར་བྱེད་པ་དེ་ཉིད་སུན་འབྱིན་པ་ཡིན་པས་འདུ་བྱེད་ཀྱི་སྡུག་བསྔལ་ཉིད་དོ། །ལམ་ལ་ཐལ་བར་འགྱུར་བ་ཡོད་པ་མ་ཡིན་ནོ། །འདི་ལས་སྡུག་བསྔལ་ཀུན་འབྱུང་བས་ཞེས་བྱ་བ་ནི་འདི་ལས་སྡུག་བསྔལ་སྐྱེ་ཞེས་བྱ་བའི་དོན་གང་ཡིན་པ་སྟེ་དངོས་པོ་རིགས་མཐུན་པའི་རྒྱུ་ཡིན་པའི་ཕྱིར་རོ། །ལམ་ལ་ཡང་ཀུན་འབྱུང་ཉིད་ཐལ་བར་འགྱུར་རོ་ཞེ་ན་མ་ཡིན་ཏེ། སྡུག་བསྔལ་ལ་སྐྱོ་བར་གྱུར་བ་རྣམས་འདིའི་ཀུན་འབྱུང་བ་གང་ཡིན་ཞེས་དེའི་རྒྱུ་ཡོངས་སུ་རྟོགས་པ་ལ་འཇུག་པའི་ཕྱིར་སྡུག་བསྔལ་གྱི་རྒྱུ་ཁོ་ན་ཀུན་འབྱུང་ཡིན་གྱི་ལམ་གྱི་རྒྱུ་ནི་མ་ཡིན་ནོ། །འདི་ལྟར་འགའ་ཡང་ལམ་ལ་སྐྱོ་བ་དེའི་རྒྱུ་ཡོངས་སུ་རྟོགས་པར་མི་བྱེད་དོ། །ལམ་གྱིས་ནི་མྱ་ངན་ལས་འདས་པ་ཐོབ་པའི་རྒྱུ་དེའི་རྒྱུ་ཡོངས་སུ་བརྟག་པའི་ཕྱིར་ལམ་ཐམས་ཅད་དངོས་པོ་རིགས་མཐུན་པའི་རྒྱུ་མ་ཡིན་པས་དེའི་རྒྱུ་ལ་ཀུན་འབྱུང་བའི་རྒྱུ་ཉིད་དུ་ཐལ་བ་མེད་དོ། །འཇིག་པས་ན་འཇིག་རྟེན་ཞེས་པ་ལ་འགོག་པའི་ཕྱིར་གཉེན་པོ་ཉིད་དོ། །འཇིག་པ་ལམ་ལ་ཐལ་བར་འགྱུར་བ་མེད་དོ། །གཞན་དག་ན་རེ་མི་རྟག་པ་ཉིད་ཀྱིས་འཇིག་གོ་ཞེས་ཟེར་རོ། །དེ་ལྟར་ན་ལམ་ལ་ཡང་ཐལ་བར་འགྱུར་རོ། །གང་དུ་འཇིག་རྟེན་གྱི་སྒྲ་འདི་གཏིང་ཚུགས་པ་དེ་ཉིད་དུ་འདིའི་ངེས་པའི་ཚིག་བྱང་བས་ལམ་ལ་ཐལ་བ་མེད་དོ། །འདི་ལ་ལྟ་བ་ནི་འཇིག་ཚོགས་ལ་ལྟ་བ་ལ་སོགས་པ་རྣམ་པ་ལྔ་རྣམས་སོ། །རྒྱས་པར་འགྱུར་བའི་སྒོ་ནས་གནས་བས་ན་ཞེས་པ་ལ། གལ་ཏེ་ཟག་པ་དང་བཅས་པའི་དངོས་པོ་ལ་ཉོན་མོངས་པ་ཐམས་ཅད་རྒྱས་པར་འགྱུར་བ་དང་ཟག་པ་དང་ཉེ་བར་ལེན་པ་དང་འཐབ་པ་ཞེས་བཤད་པའི་ཕྱིར་དང་ལྟ་བ་རྣམས་ཀྱང་འདོད་ཆགས་ལ་སོགས་པ་བཞིན་ནོ། །ཞེས་སྔར་ཉིད་དུ་བསྟན་པ་མ་ཡིན་ནམ་ཞེ་ན་འདི་ནི་
བདེན་མོད་ཀྱི་དེ་ལྟ་ན་ཡང་ཟག་པ་དང་བཅས་པའི་དངོས་པོ་ཐམས་ཅད་ཀྱི་ཚེ་རྣམ་གྲངས་མེད་པར་ནི་ལྟ་བ་རྣམས་ཀྱི་གནས་གཡོ་བ་མེད་པ་ཡིན་ཏེ་བརྟན་པར་འཛིན་པའི་ཕྱིར་རོ། །དེའི་ཕྱིར་ཟག་པ་དང་བཅས་པའི་དངོས་པོ་ནི་དེ་ཁོ་ནའི་གནས་ཡིན་གྱི། དེ་ལྟར་འདོད་ཆགས་ལ་སོགས་པ་དང་མ་རིག་པ་དང་ཐེ་ཚོམ་རྣམས་ཀྱི་ནི་མ་ཡིན་ནོ། །རང་གི་མཚན་ཉིད་ཀྱི་ཉོན་མོངས་པ་ཡིན་པའི་ཕྱིར་འདོད་ཆགས་ལ་སོགས་པ་ནི་ཐམས་ཅད་མ་ཡིན་ལ་ཐམས་ཅད་ཀྱི་ཚེ་ཡང་མ་ཡིན་ནོ། །མ་རིག་ནི་ཐམས་ཅད་ཀྱི་ཚེ་ཡིན་གྱི་རྣམ་གྲངས་མེད་པར་ནི་མ་ཡིན་ཏེ། འདོད་ཆགས་ལ་སོགས་པ་དང་མཚུངས་པར་ལྡན་པ་ཐམས་ཅད་འདོད་ཆགས་ལ་སོགས་པ་བཞིན་དུ་རྟོག་པའི་ཕྱིར་རོ། །ཐེ་ཚོམ་ལ་ནི་ཐམས་ཅད་ཡོད་མོད་ཀྱི་བརྟན་པར་འཛིན་པ་ནི་མ་ཡིན་ནོ། །དེའི་ཕྱིར་དེ་ནི་དེ་དག་གི་གནས་སུ་མི་བརྗོད་དོ། །འབྱུང་བས་ན་སྲིད་པ་སྟེ་ཞེས་པ་ནི་གང་ཞིག་ཀུན་འབྱུང་བ་ལས་བྱུང་བ་དེ་ལ་མངོན་པར་འདོད་དོ། །དེ་ལྟ་ན་ལམ་ལ་ཡང་ཐལ་བ་མེད་དོ། །ཡང་ན་སྲིད་པའི་སྒྲ་འདི་ནི་ཉེ་བར་ལེན་པའི་ཕུང་པོ་ལྔ་ལ་མཚམས་བཅད་པས་དེ་དག་ཉིད་ལ་ངེས་པར་བརྗོད་དེ། མདོ་ལས་སྲིད་པ་གང་ཞེ་ན་ཉེ་བར་ལེན་པའི་ཕུང་པོ་ལྔའོ་ཞེས་གསུངས་པའི་ཕྱིར་རོ། །ཡང་ན་ཟག་པ་དང་བཅས་པའི་ཆོས་ཀྱི་འཇུག་པ་འབྱུང་བས་ན་སྲིད་པ་ཞེས་བརྗོད་དོ། །གཞན་དག་ནི་འདི་ལས་འབྱུང་བ་དང་འདི་ལ་འབྱུང་བས་ན་སྲེད་པའོ་ཞེས་ཟེར་རོ། །འང་གི་སྒྲ་ནི་ཟང་ཟིང་དང་བཅས་པ་ལ་སོགས་པའི་རྣམ་གྲངས་ཉེ་བར་བསྡུ་བའི་དོན་ཏོ། །དེ་ལྟར་ན་འདི་དག་ནི་ཟག་པ་དང་བཅས་པའི་ཞེས་བྱ་བ་རྒྱས་པར་འབྱུང་བ་ལ། ཉེ་བར་ལེན་པའི་ཕུང་པོ་ཞེས་བྱ་བ་ནས་སྲིད་པ་ཞེས་བྱ་བའི་བར་འདི་དག་ནི་ཟག་པ་དང་བཅས་པའི་རྣམ་གྲངས་དོན་ཇི་ལྟ་བར་བཤད་པའི་ཉེ་བར་ལེན་པའི་ཕུང་པོ་ལ་སོགས་པའི་དོན་གྱི་རྗེས་སུ་འགྲོ་བ་དོན་དང་འདྲ་བ་དོན་དང་མཐུན་པའི་ཟག་པ་དང་བཅས་པའི་རྣམ་གྲངས་ཡིན་ནོ། །གཟུགས་ལ་སོགས་པ་ཕུང་པོ་ལྔ་ཞེས་སྨྲས་པ་དེ་ལ་ཞེས་བྱ་བ་ལ་སྨྲས་པའི་ཚིག་ནི་གཟུགས་ལ་སོགས་པ་ཕུང་པོ་རྣམས་ཀྱི་དབང་དུ་བྱས་པ་ལ་རབ་ཏུ་བསྟན་པར་བྱ་བའི་དོན་ཏོ། །གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་
ཉིད། །ཅེས་བྱ་བ་ལ་གཟུགས་སྨོས་པས་ནི་སྐབས་ཀྱི་ཕུང་པོའི་གཟུགས་གཟུང་བར་རིག་པར་བྱའི་སྐྱེ་མཆེད་ཀྱི་གཟུགས་ནི་མ་ཡིན་ནོ། །གཉི་གར་གྲངས་བསྟན་པ་ནི་དབང་པོ་རྣམས་དང་ཡུལ་རྣམས་མང་བའི་ཕྱིར་རོ། །ཐམས་ཅད་གཟུགས་ཀྱི་བདག་ཉིད་དུ་ཁས་བླངས་པའི་ཕྱིར་དང་ཡུལ་ཅན་དང་ཡུལ་གྱི་སྒོ་ནས་གཟུགས་ཀྱི་ཕུང་པོ་བསྟན་པའི་ཕྱིར་མིག་ལ་སོགས་པ་དག་དང་གཟུགས་ལ་སོགས་པ་དག་ལ་མངོན་པར་འདོད་དོ་ཞེས་ཤེས་པར་བྱའོ། །རྣམ་པར་རིག་བྱེད་མ་ཡིན་པ་ནི་ཆོས་ཀྱི་སྐྱེ་མཆེད་ཀྱིས་བསྡུས་པའི་ཕྱིར་དོན་ལྔའི་ཁོང་གསུམ་འདུས་པས་དབང་པོ་ལྔའི་ཡུལ་མ་ཡིན་པའི་ཕྱིར་ལོགས་ཤིག་ཏུ་བསྟན་ཏོ། །ཉིད་ཀྱི་སྒྲ་ནི་ངེས་པར་གཟུང་བའི་དོན་ཏེ་རྣམ་པར་རིག་བྱེད་མ་ཡིན་པ་ཁོ་ནའི་ཞེས་དེ་ལས་གཞན་པ་ཆོས་ཀྱི་སྐྱེ་མཆེད་ཀྱིས་བསྡུས་པའི་གཟུགས་མདོ་སྡེ་པ་ལ་སོགས་པས་ཀུན་བཏགས་པ་རྣམ་པར་གཅད་པར་བྱ་བའི་ཕྱིར་རོ། །དང་གི་སྒྲ་ནི་བསྡུ་བའི་དོན་ཏོ། །མིག་ལ་སོགས་པ་དག་གང་དག་གི་རྣམ་པར་ཤེས་པ་དག་གིས་རྟོགས་པས་ན་དོན་ཏེ་ཁོང་དུ་ཆུད་ཅེས་བྱ་བའི་དོན་ཏོ། །འདིར་གཟུགས་ཀྱི་ཕུང་པོ་ནི་སྐྱེ་མཆེད་བཅུ་དང་གཅིག་གི་ཕྱོགས་གཅིག་ཡིན་ནོ་ཞེས་བསྟན་པ་ཡིན་ཏེ། ཅི་སྟེ་འདི་དག་གི་མཚན་ཉིད་ཅི་ཞིག་ཅེ་ན། དེའི་ཕྱིར། དེ་དག་རྣམས་ཀྱི་རྣམ་ཤེས་རྟེན། །མིག་ལ་སོགས་གཟུགས་དང་བ་རྣམས། །ཞེས་བྱ་བ་གསུངས་ཏེ། དེ་ཞེས་པའི་སྒྲ་ནི་བར་དུ་མཆོད་པའི་ཕྱིར་འཇིག་རྟེན་ལ་གྲགས་པ་ཁས་བླངས་ཏེ་གཟུགས་ལ་སོགས་པའི་དོན་རྣམས་དང་སྦྱར་བར་བྱའོ། །འཇིག་རྟེན་ན་ནི་གཟུགས་ཀྱི་བློ་སྒྲའི་བློ་ཞེས་ཡུལ་གྱི་སྒོ་ནས་རྣམ་པར་ཤེས་པ་སྟོན་གྱི། རྣམ་པར་ཤེས་པའི་སྒོ་ནས་མ་ཡིན་ནོ། །རྣམ་པར་ཤེས་པ་དེ་དག་གི་རྟེན་ནི་དེ་དག་རྣམས་ཀྱི་རྣམ་ཤེས་ཏེ། ཇི་སྐད་དུ། དེ་དག་གྱུར་པས་གྱུར་ཉིད་ཕྱིར། །རྟེན་ནི་མིག་ལ་སོགས་པ་ཡིན། །ཞེས་བཤད་བ་ལྟ་བུའོ། །གཟུགས་དང་བའི་བདག་ཉིད་ལྔ་པོ་ཞེས་བྱ་བ་ནི་གཟུགས་ཀྱི་རང་བཞིན་ཅན་ནོ། །དབང་པོ་ལས་འདས་པའི་དོན་རྟོགས་པ་ནི་ལུང་ངམ་རིགས་པ་ལས་འགྱུར་ལ། ཡིད་ཆེས་པ་མ་ཡིན་པ་རྣམས་ཀྱི་ཚིག་ཙམ་ལ་ནི་གུས་པར་བྱ་བ་ཡང་མ་ཡིན་པས། མིག་ལ་སོགས་གཟུགས་དང་བ་རྣམས་ཞེས་བྱ་བ་འདི་ལ་ལུང་
སྟོན་པ་ནི། བཅོམ་ལྡན་འདས་ཀྱིས་ཇི་སྐད་དུ་ཞེས་རྒྱ་ཆེར་འབྱུང་བ་དེ་ལ་དང་བའི་དོན་ནི་འདི་ཡིན་ཏེ། དཔེར་ན་མེ་ལོང་དང་བའམ་ཆུའི་སྣོད་དུ་གཟུགས་ལ་བརྟེན་ནས་དེའི་སྣང་བ་གཟུགས་བརྙན་འབྱུང་བ་དེ་བཞིན་ནས་གཟུགས་ཀྱི་བདག་ཉིད་དང་བ་ལྔ་པོ་ལ་ཡང་གཟུགས་ལ་སོགས་པ་དག་ལ་བརྟེན་དེའི་སྣང་བའི་རྣམ་རིག་འབྱུང་ངོ༌། །འདིར་གཟུགས་དང་བའི་བདག་ཉིད་དུ་ཁྱད་པར་མེད་པའི་ཕྱིར་དང༌། རྟེན་གྱི་དངོས་པོར་ཁྱད་པར་མེད་པའི་ཕྱིར་ན་མིག་ལ་སོགས་པ་རྣམས་ཕན་ཚུན་དང་ཡིད་ལས་རྣམ་པར་གཅད་པར་བྱ་དགོས་ཏེ། དེའི་ཕྱིར་དེ་དག་རྣམས་ཀྱི་རྣམ་པར་ཤེས་པའི་རྟེན་དང་གཟུགས་དང་བ་ཞེས་བྱ་བ་གཉི་ག་བརྗོད་དོ། །དེ་ལ་དེ་དག་རྣམས་ཀྱི་རྣམ་པར་ཤེས་པའི་རྟེན་ཉིད་ཀྱིས་ནི་མིག་ལ་སོགས་བ་རྣམས་ཕན་ཚུན་ལས་རྣམ་པར་གཅོད་དེ། གཟུགས་ཀྱི་རྣམ་པར་ཤེས་པའི་རྟེན་མིག་ཁོ་ན་ཡིན་གྱི་རྣ་བ་ལ་སོགས་པ་རྣམས་མ་ཡིན་ནོ། །དེ་བཞིན་དུ་ཇི་སྲིད་རེག་བྱའི་རྣམ་པར་ཤེས་པའི་རྟེན་ནི་ལུས་ཁོ་ན་ཡིན་གྱི་མིག་ལ་སོགས་པ་རྣམས་མ་ཡིན་ནོ་ཞེས་བྱ་བའི་བར་རོ། །གལ་ཏེ་དེ་ལྟར་ན། ལྔ་རྣམས་ཀྱི། །དེ་དང་ལྷན་ཅིག་སྐྱེས་པའང་ཡིན། །ཞེས་གསུངས་པའི་ཕྱིར་ཡོད་ཀྱང་མིག་ལ་སོགས་པ་ཉིད་དུ་ཐལ་བར་འགྱུར་ཏེ། དེ་ཡང་དེའི་རྟེན་ཡིན་པའི་ཕྱིར་རོ་ཞེ་ན། དེའི་ཕྱིར་གཟུགས་དང་བ་ཞེས་བརྗོད་དོ། །དེ་དག་གི་རྣམ་པར་ཤེས་པའི་རྟེན་གཟུགས་དང་བའི་བདག་ཉིད་ཅན་གང་དག་ཡིན་པ་དེ་དག་ནི་མིག་ལ་སོགས་པ་རྣམས་ཁོ་ན་ཡིན་གྱི། ཡིད་མ་ཡིན་ནོ་ཞེས་ཤེས་པར་བྱས་པར་འགྱུར་རོ། །འོ་ན་གཟུགས་སྨོས་ཀྱི་དོན་མ་ཡིན་པ་ཅི་ཞེ་ན། དེ་དག་གི་རྣམ་པར་ཤེས་པའི་རྟེན་དང་བ་མིག་ལ་སོགས་པ་རྣམས་ཞེས་བྱ་བ་འདི་ས་གྲུབ་པའི་ཕྱིར་རོ། །གཟུགས་ཅན་ནམ་གཟུགས་ཅན་མ་ཡིན་པ་དེ་དག་གི་རྣམ་པར་ཤེས་པའི་རྟེན་དང་བ་ལས་གཞན་ཡོད་པ་མ་ཡིན་ནོ། །གང་ཁྱད་པར་གྱི་དོན་གཟུགས་སུ་གསུངས་པ་དོན་དང་བཅས་པར་འགྱུར་བར་མདོ་ལས་གསུངས་པའི་ཕྱིར་རོ། །དེ་ལྟར་གལ་ཏེ་མདོ་ལས་མིག་ལ་སོགས་པའི་རྣམ་པར་ཤེས་པའི་རྟེན་གྱི་ཁྱད་པར་གྱི་ཚིག་མ་གསུངས་པར་བསྟན་བཅོས་ཁོ་ནར་ཀློག་པར་བྱེད་པ་ཡིན་ནོ། །དེ་ལ་ཡང་འདི་གསུངས་
པའི་ཕྱིར་རོ། །དེ་ལྟར་འོ་ན་ཐེ་ཚོམ་མེད་པའི་དོན་དུ་གཟུགས་གསུངས་ན་འབྲུ་མང་པོ་པར་རྟོགས་པས་མིག་ལ་སོགས་པ་ཞེས་བྱ་བ་དང་བ་ལ་ཐལ་བར་འགྱུར་རོ། །གཟུགས་གསུངས་པའི་ཕྱིར་བསྡུ་བ་དེ་ལྡོག་པར་ཉེ་བར་བསྟན་པ་ཡིན་ནོ། །གང་ལ་མིག་ལ་སོགས་པའི་རྣམ་པར་ཤེས་པའི་རྟེན་ཉིད་དུ་རྟོག་པར་འགྱུར་བས་དང་བ་གཟུགས་ཀྱི་རང་བཞིན་ནི་མེད་དོ། །དེ་ལྟར་དོན་དང་བཅས་པ་ཉིད་གཟུགས་སུ་གསུངས་པ་འདིས་བསྟན་བཅོས་ལ་གནོད་པ་བཤད་དོ་ཞེས་སློབ་དཔོན་འདུས་བཟང་ཟེར་རོ། །མདོ་ལས་གང་གསུངས་པ་མིག་ལ་སོགས་པའི་རྣམ་པར་ཤེས་པའི་རྟེན་ཁྱད་པར་གྱི་ཚིག་མ་གསུངས་སོ། །གཟུགས་སྨོས་པ་གནོད་པ་མེད་པ་ཅན་ནོ་ཞེས་པ་དེ་ཡང་མི་རིགས་ཏེ་འབྱུང་བ་རྒྱུར་བྱས་པར་གསུངས་པའི་ཕྱིར་རོ། །གཟུགས་སྨོས་པ་དོན་མེད་པ་ཅན་ཏེ་གཟུགས་ཅན་མ་ཡིན་པའི་དང་བ་འབྱུང་བ་རྒྱུར་བྱས་པ་མེད་དོ། །དེའི་ཕྱིར་མདོ་ཡང་འབྱུང་བ་རྒྱུར་བྱས་པའི་དང་བ་ཞེས་བརྗོད་པར་བྱའི་གཟུགས་དང་བ་ཞེས་ནི་མ་ཡིན་ནོ། །འདིར་འབྲུ་མང་པོ་པའི་བསྡུ་བ་ལྡོག་པའི་ཕྱིར་དུ་གཟུགས་སྨོས་པ་རིགས་པ་མ་ཡིན་ནོ། །གཟུགས་ཀྱི་ཕུང་པོའི་དབང་དུ་བྱས་པ་ཁོ་ན་གཟུགས་ཀྱི་བདག་ཉིད་དུ་གྲུབ་ཀྱི། ན་ཙ་ཤྲཱཏྨ་ཀཿདང་བའི་གཟུགས་ཀྱིས་བསྡུས་པས་ན་འབྲུ་མང་པོ་བར་དོགས་པ་ཡང་མེད་པ་ཉིད་དོ་ཞེས་འདི་ཉིད་སེམས་སོ། །མདོ་ནི་གདུལ་བྱའི་བསམ་པ་ལ་ལྟོས་ནས་བཅོམ་ལྡན་འདས་ཀྱིས་བསྟན་པས་ན་དེ་ལ་ལྕི་བ་དང་ཡང་བ་བསམ་པར་མི་བྱའོ། །སློབ་དཔོན་གྱིས་ཀྱང་མདོ་ལས་བསྟན་པ་དང་མི་འགལ་བ་དེ་བཞིན་ཁོ་ནར་འདིར་གཟུགས་དང་པ་ཞེས་གསུངས་སོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱི་གསུང་ཉེ་བར་བསྟན་པའི་ཕྱིར་བཅོམ་ལྡན་འདས་ཀྱིས་འདི་སྐད་དུ་ཞེས་བྱ་བ་ལ་སོགས་པ་གསུངས་སོ། །ཡང་ན་གང་འཇིག་རྟེན་ན་ཀྲྀཥྞ་སཱ་ར་དང་ཨུཏྤ་ལའི་འདབ་མའི་བདག་ཉིད་དུ་གནས་པ་ལ་མིག་ཅེས་བརྗོད་དེ། དེ་ལ་མིག་གི་རྣམ་པར་ཤེས་པ་བརྟེན་ནོ་ཞེས་བཟློག་སྟེ་བརྗོད་པའི་ཕྱིར་ཁ་དོག་དང་དབྱིབས་ཀྱི་མཚན་ཉིད་ཅན་གྱི་མིག་མ་ཡིན་པ་ལ་ཡང་མིག་གི་རྣམ་པར་ཤེས་པའི་རྟེན་གཟུགས་དང་བ་ཞེས་བྱ་སྟེ། དེ་བཞིན་དུ་གཞན་ལ་ཡང་བརྗོད་པར་བྱའོ། །གཞན་དག་
ན་རེ་གཟུགས་ལ་སོགས་པའི་རྣམ་པར་ཤེས་པའི་རྟེན་རྣམ་པ་གཉིས་ཏེ། མིག་ལ་སོགས་པ་དང་ཡོང་ངོ༌། །དང་བ་ནི་རྣམ་པ་གསུམ་སྟེ་དང་པའི་དང་བ་དང༌། སྐྱེ་མཆེད་ཀྱི་གཟུགས་དང་བ་དང༌། དབང་པོའི་གཟུགས་དང་བ་རྣམས་སོ། །དེ་ལ་དེ་དག་གི་རྣམ་པར་ཤེས་པའི་རྟེན་སྨོས་པ་ནི་སྐྱེ་མཆེད་ཀྱི་གཟུགས་དང་བ་ལས་ཁྱད་པར་དུ་བྱེད་དོ། །གཟུགས་སྨོས་པས་ནི་དང་བའི་བདག་ཉིད་ལས་ཁྱད་པར་དུ་བྱེད་དོ། །དང་བ་སྨོས་པས་ནི་ཡིད་ལས་ཁྱད་པར་དུ་བྱེད་དོ། །གལ་ཏེ་དད་པ་རྣམ་པར་ཤེས་པ་རྣམས་ཀྱི་རྟེན་མ་ཡིན་པའི་ཕྱིར་དེ་དག་གི་རྣམ་པར་ཤེས་པའི་རྟེན་སྨོས་པ་ཉིད་ཀྱིས་བསལ་བ་མ་ཡིན་ནམ་ཞེ་ན། གཟུགས་སྨོས་པ་དོན་མེད་པ་ཅན་དང་བ་ནི་དེ་མ་ཐག་པའི་རྐྱེན་དུ་གྱུར་པ་ནོཏྤི་སོ་རྣམ་པར་ཤེས་པར་འདོད་པ་དེའི་ཕྱིར་ཡིད་བཞིན་དུ་དེ་མ་ཐག་པའི་རྐྱེན་དུ་གྱུར་བ་རྣམ་པར་ཤེས་པའི་རྟེན་ཡིན་ནོ། །གཅིག་ལ་ཡང་ཚོགས་དང་ལྷན་ཅིག་ཏུ་གྱུར་པ་མཚུངས་པར་ལྡན་པའི་རྒྱུར་མངོན་པར་འདྲ་ལ་བའི་ཕྱིར་རྣམ་པར་ཤེས་པའི་རྟེན་དང་པའོ་ཞེས་རུང་བ་འདི་ནི་དེ་ལྟ་མ་ཡིན་ཏེ་བསྟན་བཅོས་དང་འགལ་བའི་ཕྱིར་རོ། །བསྟན་བཅོས་སུ་ནི་མིག་གི་རྣམ་པར་ཤེས་པ་ལ་སོགས་པའི་རྟེན་གསུངས་སོ། །དེ་ལྟ་ན་སེམས་ལས་བྱུང་བ་རྟེན་ཡིན་པའི་ཕྱིར་རྟེན་རྣམས་ཀྱང་དུ་མར་ཐལ་ལོ་ཞེ་ན། རྣམ་པར་ཤེས་པ་ནི་རྣམ་པར་ཤེས་པ་གཞན་དང་ལྷན་ཅིག་ཏུ་གྱུར་པ་ཡོད་པ་མ་ཡིན་གྱི། །རྣམ་པར་ཤེས་པ་སྔ་མ་འགག་པ་དང་རྣམ་པར་ཤེས་པ་ཕྱི་མ་སྐྱེ་བའི་གོ་སྐབས་སྦྱིན་བ་ལ་རྟེན་ཞེས་བརྗོད་དེ། དེ་ལྟར་ན་སེམས་ལས་བྱུང་བ་རྣམས་སེམས་དང་ལྷན་ཅིག་འགག་པ་ནི་མ་ཡིན་ནོ། །གང་འགག་པ་ལས་རྣམ་པར་ཤེས་པ་སྐྱེ་བའི་གོ་སྐབས་ཞེས་པ་ཡིད་བཞིན་དུ་དེ་དག་གི་ཡང་རྟེན་ཉིད་དུ་ཀུན་ཏུ་རྟོགས་ན་འདི་ལ་ངེས་པ་མེད་དེ་གང་ཞིག་གང་གི་རྒྱུ་ཡིན་པ་དེ་དེའི་རྟེན་མ་ཡིན་ནོ་ཞེས་སོ། །གཞན་དུ་འབྱུང་བ་རྣམས་ཀྱང་འབྱུང་བའི་རྟེན་ཉིད་དུ་འཐོབ་སྟེ་འདི་ཡང་འདོད་པ་མ་ཡིན་ནོ། །གསུང་རབ་ལས་ལྷན་ཅིག་བྱུང་བ་ཉིད་ཀྱི་ཕྱིར་སེམས་ཉིད་སེམས་ལས་བྱུང་བའི་རྟེན་ཉིད་བཤད་དོ། །སེམས་ལས་བྱུང་བ་རྣམས་ནི་སེམས་ཀྱི་རྟེན་མ་ཡིན་ནོ། །གཞན་དུ་ན་སེམས་
དང་སེམས་བྱུང་བའི་རྣམ་པར་གཞག་པ་འཆོལ་བར་འགྱུར་རོ། །ཡང་ན་མིག་ལ་སོགས་པ་འདི་དག་སྨོས་པ་གང་དག་ཡིན་པ་ཞེས་རྒྱ་ཆེར་འབྱུང་བ་དེ་ལ་མིག་ལ་སོགས་པ་རྣམས་ཆོད་པ་ཡིན་ཀྱང་ཤུགས་ཀྱིས་དེ་དག་གི་སྒྲ་དང་འབྲེལ་པ་ལྟར་ཏེ། ཤུགས་ཀྱིས་གསུང་རབ་ལས་ཀྱང་མིག་གི་རྣམ་པར་ཤེས་པ་རྣ་བའི་རྣམ་པར་ཤེས་པ་ཞེས་དབང་པོ་དག་གི་རྣམ་པར་ཤེས་པ་སྟོན་པའི་ཕྱིར་རོ། །དེ་ལྟར་ན་རྣམ་པར་ཤེས་པ་དྲུག་མ་འདྲེས་པར་བསྟན་པར་འགྱུར་རོ། །ཡུལ་དག་གིས་མ་ཡིན་ཏེ་དེར་མིག་ལ་སོགས་པའི་རྣམ་པར་ཤེས་པ་དང་ཡིད་ཀྱི་རྣམ་པར་ཤེས་པ་དབྱེར་མེད་བའི་ཕྱིར་རོ། །དེ་ཉིད་ཀྱི་ཕྱིར་དེ་ལྟར་བཤད་ན་རབ་ཏུ་བྱེད་པའི་གཞུང་དང་ཡང་མཐུན་པར་འགྱུར་རོ་ཞེས་སོ། །འོ་ན་དེ་ལྟར་རྟེན་ཕན་ཚུན་ཡིན་པའི་ཕྱིར་ནུས་པ་མི་འགྱུར་བ་ཡིན་ནམ་ཞེ་ན། མིག་གི་རྣམ་པར་ཤེས་པའི་རྟེན་གཟུགས་དང་བའོ། །མིག་གི་རྣམ་པར་ཤེས་པ་གང་ཞེ་ན། མིག་ལ་བརྟེན་ནས་གཟུགས་སོ་སོར་རྣམ་པར་རིག་པའོ་ཞེས་འདི་དག་ཕན་ཚུན་རྟེན་མ་ཡིན་པར་ཆེས་གཞན་དུ་རིག་པར་བྱས་ཏེ་དེས་ན་དེ་ནི་ཅིག་ཤོས་ཀྱི་ཤེས་བྱེད་དོ། །སློབ་དཔོན་འདུས་བཟང་ན་རེ། རྣ་བའི་དབང་པོ་དགག་པའི་ཕྱིར་ཚིག་སྔ་མ་གཟུགས་དང་པའི་རང་བཞིན་ཏེ། གང་གི་ཕྱིར་དེ་མིག་གི་རྣམ་པར་ཤེས་པའི་རྟེན་གྱི་ངོ་བོར་མེད་པའི་ཕྱིར་རོ། །དེ་ལ་མིག་ལ་སོགས་པ་ཉིད་དུ་ཐལ་བ་མེད་དོ། །ཕྱི་མ་ནི་བར་ཆད་མེད་པར་འགག་པའི་རྟེན་དགག་པའི་ཕྱིར་མིག་ལ་སོགས་པའི་རྣམ་པར་ཤེས་པའི་རྟེན་ཉིད་ལ་ཡང་དེའི་གཟུགས་དང་བའི་རང་བཞིན་མེད་པས་དེ་ལ་མིག་ལ་སོགས་པ་ཞེས་བྱ་བར་ཐལ་བ་མེད་དོ། །སྔ་མས་སྐལ་བ་མཉམ་པའི་མིག་དང་ཕྱི་མས་དེ་དང་སྐལ་བ་མཉམ་པའོ་ཞེས་ཟེར་རོ། །གོང་དུ་བཤད་པའི་ངག་གི་ཁྱད་པར་གྱིས་ཡིད་དགག་པ་མ་ཡིན་པར་ཤེས་པར་བྱ་ཞིང་ཡུལ་གྱི་གཟུགས་དང་བ་ཞེས་པའི་སྐྱོན་ཡང་མེད་དོ། །གལ་ཏེ་དེ་དང་སྐལ་བ་མཉམ་པ་རྣམས་ལ་དེའི་རྣམ་པར་ཤེས་པའི་རྟེན་ཉིད་མེད་པས་སོ་ཞེ་ན། དེ་ནི་དེ་ལྟ་མ་ཡིན་ཏེ་ནུས་པའི་ཤུགས་ཡོངས་སུ་བཟུང་བས་བཤད་པ་སྔ་མ་ལ་ནི་གཟུགས་སྨོས་པ་དོན་མེད་པ་ཅན་ཞེས་བཤད་དོ། །སྔ་མ་ཁོ་ནའི་གཟུགས་དང་བའི་
མཚན་ཉིད་ཀྱི་ཁྱད་པར་ལ་ཡང་མིག་ལ་སོགས་པ་རྣམས་ཕན་ཚུན་གྱིས་ཐ་དད་ངོ་ཞེས་ཤེས་པར་བྱའོ། །འོ་ན་འདིར་བཤད་པ་ཁོ་ན་དེ་དག་གི་རྣམ་པར་ཤེས་པའི་རྟེན་ཡིན་པའི་ཕྱིར་རྗེས་སུ་དཔག་པ་མ་ཡིན་ནམ་ཞེ་ན། དེ་ཡང་ཕན་ཚུན་ཐུན་མོང་དུ་རྒྱུ་དང་འབྲས་བུའི་དངོས་པོ་ཉིད་དེ་མིག་ལ་སོགས་པ་རྣམས་ལ་བཤད་པ་དེ་ལྟར་ལོང་བ་ལ་གཟུགས་ཀྱི་བློ་མེད་དོ། །ཡོད་པ་རྣམས་ཀྱང་རྣ་བ་ལ་སོགས་པ་རྣམས་སོ། །དེ་བཞིན་དུ་འོན་པ་ལ་སོགས་པ་རྣམས་ལ་ཡང་སྒྲའི་བློ་དག་བརྗོད་བར་བྱའོ། །ཕན་ཚུན་ཐུན་མོང་དུ་རྒྱུ་དང་འབྲས་བུ་ཉིད་ཀྱང་དེའི་རྒྱུའི་དབྱེ་བས་འབྲས་བུའི་ས་བོན་རྣམས་ལ་ཁྱབ་ཅེས་བྱའོ། །མིག་ལ་སོགས་པ་དབྱེ་བ་མེད་པ་རྣམས་ལ་དོགས་པར་མི་རུང་སྟེ་རྒྱུ་ཐ་དད་དུ་གྱུར་བའི་ཕྱིར་དང༌། ཐ་དད་དུ་གྱུར་པའི་རྒྱུ་རྣམས་ནི་རྒྱུ་མ་ཡིན་པའི་ཝང་དང་གླིང་བུ་དང་འཁར་རྔ་ལ་སོགས་པའི་སྒྲ་རྣམས་ལ་དབྱེ་བ་མཐོང་ངོ༌། །ཐམས་ཅད་དུ་ཐ་མི་དད་པའི་མཚན་ཉིད་ཀྱི་ཕྱིར་འབྱུང་བ་རྣམས་ཀྱི་དབྱེ་བ་སྒྲུབ་པ་དབྱེར་མེད་པའི་མཚན་ཉིད་ལ་ཡང་འདིར་དབྱེ་བ་ཉིད་དོ། །ནང་དང་ཕྱིའི་དབྱེ་བ་བཞིན་ནམ་ཚོར་བ་བཞིན་དུ་ཉམས་སུ་མྱོང་བའི་མཚན་ཉིད་ཀྱི་ཁྱད་པར་ལ་ཡང་བདེ་བ་དང་སྡུག་བསྔལ་དང༌། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་དབྱེ་བ་གྲུབ་པོ། །འོ་ན་དེ་ལྟར་ཐ་མི་དད་པའི་མཚན་ཉིད་ཀྱི་ཕྱིར་མིག་ལ་སོགས་པ་རྣམས་སྒྲ་བཞིན་དུ་སྐྱེ་མཆེད་གཅིག་ཏུ་ཐལ་ལོ་ཞེ་ན། འདི་ནི་དེ་ལྟ་མ་ཡིན་ཏེ་རྣམ་པ་གཞན་དུ་སྐྱེ་མཆེད་རྣམ་པར་བཞག་པའི་ཕྱིར་རིགས་གཅིག་པའི་རྣམ་པར་ཤེས་པ་སྐྱེ་བའི་སྒོར་གྱུར་བས་སྐྱེ་མཆེད་དུ་རྣམ་པར་གཞག་བར་བྱའི། རང་གི་ངོ་བོ་ལ་བལྟོས་ནས་ནི་མ་ཡིན་ཏེ་ཐ་དད་པའི་མཚན་ཉིད་རྣམས་ཀྱང་སྐྱེ་མཆེད་གཅིག་གིས་བསྡུས་པའི་ཕྱིར་རོ། །དེ་ལ་སྒྲ་བཞིན་དུ་མིག་ལ་སོགས་པ་རྣམས་སྐྱེ་མཆེད་གཅིག་ཉིད་དུ་ཐལ་བ་མེད་དོ། །གཞན་དག་ན་རེ་གཟུགས་མ་ཡིན་པའི་དང་པའི་བདག་ཉིད་ནི་མིག་གི་རྣམ་པར་ཤེས་པའི་རྟེན་ཡིན་པའི་ཕྱིར་དཔེར་ན་ཡིད་ལྟ་བུའོ་ཞེས་ཟེར་རོ། །ཐམས་ཅད་དུ་བྱེ་བྲག་པ་སེམས་ཅན་གཅིག་གི་རྣམ་པར་ཤེས་པའི་རྟེན་གྱིས་ཀྱང་འདི་ཁྱབ་པའི་ཕྱིར།
དེ་གྲུབ་པར་འདོད་པ་ནི་གནོད་བྱེད་དུ་འགལ་ལོ། །དེའི་ཕྱིར་གཏན་ཚིགས་མ་གྲུབ་པ་མིག་གི་རྣམ་པར་ཤེས་པ་ལ་བརྟེན་པའི་ཕྱིར་དཔེ་དང་སྒྲུབ་བྱེད་མ་ཚད་པའོ། །སེར་སྐྱ་བ་ཡང་ཡོན་ཏན་གསུམ་གྱིས་གཏན་ཚིགས་དང་ཁྱབ་པ་འདོད་དེ་གནོད་བྱེད་འགལ་བའོ། །ཡིད་ནི་ཡོན་ཏན་གསུམ་ཞེས་པ་ཚད་མ་ཀུན་ལས་བཏུས་པའི་བཤད་སྦྱར་དུ་རྒྱ་ཆེར་བསྟན་པས་དེར་ཤེས་པར་བྱའོ། །གཏན་ཚིགས་མ་གྲུབ་པ་ཡང་འདིར་ནི་གཞུང་མངས་པའི་འཇིགས་བསམ་བརྗོད་དོ། །འགྲེལ་བཤད་འདི་ལས་གཞན་ཉིད་ཀྱི་ཕྱིར་རྟེན་དང་བརྟེན་པ་རྣམས་ལ་ནི་དབྱེ་བ་མཐོང་སྟེ། འཁར་གཞོང་དང་རྒྱ་ཤུག་ལ་སོགས་པ་རྣམས་བཞིན་ནོ། །ན་ཙ་ས་ཨཻ་པ་ཏ་སྱཻ་བཱ་ཤྲ་ཡོ་དྲིཥྚ་ཨིཥྚོ་བཱ་དཔེ་དང་སྒྲུབ་བྱེད་མ་ཚང་བའོ། །མིག་གི་དབང་པོའི་འཇུག་པ་ཡིད་ལ་བརྟེན་ནས་འཇུག་པ་མ་ཡིན་ཏེ་གྲངས་ཅན་དང་སངས་རྒྱས་པའི་ཁས་བླངས་བཱ་དྷཱ། མདོ་ལས་བཅོམ་ལྡན་འདས་ཀྱིས་མིག་ལ་སོགས་པ་གཟུགས་དང་བ་ཉིད་མངོན་པར་བརྗོད་པའི་ཕྱིར་རོ། །གཞན་དག་ནི་གཟུགས་མ་ཡིན་པ་དང་བའི་བདག་ཉིད་མིག་ལ་སོགས་པའི་དབང་པོ་ཡིན་པའི་ཕྱིར་ཡིད་ཀྱི་དབང་པོ་བཞིན་ཞེས་ཟེར་རོ། །གཟུགས་དང་བའི་བདག་ཉིད་ལས་ལྡོག་པས་གཞན་མ་ཡིན་པའི་མིག་ལ་སོགས་པ་ཡོད་དོ་ཞེས་བྱ་བ་ནི་རྟེན་མ་གྲུབ་པའི་གཏན་ཚིགས་སོ། །གཞན་དུ་ན་གཞན་གྱི་ངོ་བོར་ཁས་བླངས་པའི་གཟུགས་དང་བའི་བདག་ཉིད་དགག་པར་བྱའོ། །དེ་བཞིན་དུ་ཡང་རྟེན་མ་གྲུབ་པར་གྱུར་པ་དེ་ཁས་བླངས་པའི་ཕྱིར་ཡོད་ཀྱང་རུང་དེ་ལ་དབང་པོ་ཉིད་རབ་ཏུ་མ་གྲུབ་པས་ཕྱོགས་ཆོས་དང་གཏན་ཚིགས་མ་ཡིན་ནོ། །ངེས་པར་གཟུགས་ཀྱི་བདག་ཉིད་ཀྱིས་མིག་ལ་སོགས་པ་ཁས་བླང་བར་བྱའོ། །ཐོགས་པ་དང་བཅས་པ་ཉིད་རྣམ་པར་ཆད་པའི་གཞི་བསྟན་པའི་ཕྱིར་དང༌། ཐམས་ཅད་དུ་སོང་བའི་ཕྱིར་དབང་པོ་རྣམས་རྣམ་པར་ཆད་པའི་གཞི་བསྟན་པ་ཉིད་རབ་ཏུ་མ་གྲུབ་པོ། །དེ་ལྟར་ཡང་ལྟས་སྦྱིན་ལ་སོགས་པའི་དབང་པོ་རྣམས་བྲམ་ཟེ་རྣམས་ཀྱི་དབང་པོའི་གནས་སུ་ཡོད་ཅེས་ཁས་བླང་བའི་ཕྱིར་བྲམ་ཟེའི་དབང་པོ་དང་དབང་པོའི་གནས་གང་ཡིན་པ་དེ་རྣམས་དེ་ཉིད་ལས་གཞན་མ་ཡིན་པ་དེའི་གནས་སུ་འཇུག་པའི་ཕྱིར་གཟུགས་ལ་སོགས་པ་བཞིན་
ལུས་ལས་ཕྱི་རོལ་མ་ཡིན་ནོ། །མིག་ལ་སོགས་པའི་དབང་པོ་རྣམས་དེ་ལ་ཐེ་ཚོམ་ལ་སོགས་པ་རབ་ཏུ་སྦྱོར་ལས་སམ་ཤིང་གེལ་བ་ལ་སོགས་པ་བཞིན་ཞེས་བྱ་སྟེ་སྤྲོས་པས་ཆོག་གོ །གཟུགས་ཀྱི་ཕུང་པོ་རྫས་བཅུ་གཅིག་པ་བསྟན་པ་ལས་དབང་པོ་ལྔ་རྣམས་བཤད་པ་བྱས་ཟིན་ཏོ། །དེའི་མཇུག་ཐོགས་སུ་དེ་དག་གི་དོན་རྣམས་བཤད་པར་བྱ་དགོས་ཏེ། དེའི་ཕྱིར་དབང་པོ་ལྔ་རྣམས་བཤད་ཟིན་ཏོ། །དོན་ལྔ་རྣམས་བཤད་པར་བྱ་བ་གསུངས་ཏེ། དེ་ལ་ཞེས་པ་དབང་པོ་དང་དོན་དེ་རྣམས་ལའོ། །རེ་ཞིག་གི་སྒྲ་ནི་རིམ་པའི་དོན་ཏེ་རེ་ཞིག་གཟུགས་བསྟན་པར་བྱ་དགོས་པའོ། །གཟུགས་རྣམ་གཉིས་དང་ཞེས་བྱ་བ་ནི་རྣམ་པ་གཉིས་སོ་ཞེས་བྱ་བའི་ཐ་ཚིག་གོ །གཟུགས་ལ་སོགས་པ་དག་ནི་མིག་ལ་སོགས་པ་དབང་པོའི་ཡུལ་དག་གོ་ཞེས་འཇིག་རྟེན་ན་རབ་ཏུ་གྲགས་པས་དེ་དག་གི་མཚན་ཉིད་མ་བརྗོད་པར་དེ་དག་གི་དབྱེ་བ་ཁོ་ན་སྟོན་ཏེ་དེ་ནི་འཇིག་རྟེན་ན་གྲགས་པའི་ཕྱིར་རོ། །སྔོན་པོ་ལ་སོགས་པའོ་ཞེས་བྱ་བ་ལ་སོགས་པའི་སྒྲས་ནི་སེར་པོ་དང་དམར་པོ་དང་དཀར་པོ་སྡུད་དོ། །གཞན་དག་ནི་དེའི་བྱེ་བྲག་གོ་ཞེས་བྱ་བ་ནི་སྔོན་པོ་ལ་སོགས་པའི་ཁ་དོག་གི་བྱེ་བྲག་ཅེས་བྱ་བའི་དོན་ཏོ། །དེ་དག་ཀྱང་གང་ཞེ་ན། སྤྲིན་དང་དུ་བ་རྡུལ་དང་ཁུག་རྣ་དང་གྲིབ་མ་དང་ཉི་མ་དང་སྣང་བ་དང་མུན་པའོ། །དེ་ལྟར་བྱས་ན་ཁ་དོག་རྣམ་པ་བཅུ་གཉིས་སུ་འགྱུར་ཏེ། རྩ་བའི་ཁ་དོག་བཞི་དང༌། དེ་དག་ཤས་ཆེ་བ་དང༌། ཤས་ཆུང་བ་དང་འབྲེལ་བའི་བྱེ་བྲག་གིས་སྤྲིན་ལ་སོགས་པ་བརྒྱད་དོ། །ཁ་ཅིག་ན་རེ་ནམ་མཁའི་ཁམས་ཀྱི་བྱེ་བྲག་ཁོ་ན་ཡིན་གྱི་ཁ་དོག་གཞན་མ་ཡིན་ནོ་ཞེའོ། །གྲིབ་མ་དང་མུན་པ་ནི་འོད་ལ་གནོད་པ་བྱས་པས་སྐྱེད་པའོ། །འདིར་ཁྱད་པར་ནི་འདི་ཡིན་ཏེ། གྲིབ་མ་ནི་གང་ན་གཟུགས་རྣམས་སྣང་བའོ། །བཟློག་པ་ནི་མུན་པ་སྟེ་གང་ན་གཟུགས་རྣམས་མི་སྣང་བའོ་ཞེས་བྱ་བའི་ཐ་ཚིག་གོ ། རྣམ་པར་མ་ཕྱེའོ་ཞེས་པ་ནི་རྣམ་པར་དབྱེ་བ་མ་བྱས་པའོ། །གཟུགས་ཀྱི་སྐྱེ་མཆེད་ཁ་དོག་ཏུ་ཡོད་ལ་དབྱིབས་སུ་མེད་པ་ཡང་ཡོད་དེ་ཞེས་བྱ་བ་ལ་དབྱིབས་ཞེས་བྱ་བ་འདི་ཡང་ཅི་མ་བཤད་པའི་རིང་པོ་ལ་སོགས་པའོ་ཞེས་དེ་ཉིད་ཤེས་པར་བྱའོ། །གང་ལ་རིང་པོ་ལ་སོགས་པའི་བློར་འགྱུར་
བ་དེ་ནི་རིང་པོ་ལ་སོགས་པའི་དབྱིབས་སོ། །དེ་ལྟར་ན་ཁ་དོག་ལ་སོགས་པ་ལས་ཐ་དད་པའི་དབྱིབས་ཁས་བླང་བར་བྱ་བ་ཅིའི་ཕྱིར་ན། གང་ལས་ཕྱོགས་གཅིག་གི་སྒོ་ནས་འཇུག་པ་ཁ་དོག་གི་ཚོགས་མང་བ་ལ་རིང་པོའི་བློར་ཞིང༌། ཉུང་བ་ལ་ཐུང་ངུའི་བློ་དང་ཕྱོགས་བཞི་མཉམ་པ་ལ་གྲུ་བཞིའི་བློ་དང༌། ཕྱོགས་ཀུན་ནས་མཉམ་པ་ལ་ཟླུམ་པོའི་བློ་དང༌། དབུས་སུ་ཕལ་ཆེ་བ་ལ་མཐོ་བའི་བློ་དང༌། ཉུང་བ་ལ་དམའ་བའི་བློ་དང༌། ཁ་ཕྱོགས་གཅིག་ཏུ་ཕྱོགས་པ་ལ་ཕྱ་ལེ་བའི་བློ་དང༌། ཕྱོགས་ཐ་དད་པར་ཕྱོགས་པ་ལ་ཡང་ཕྱ་ལེ་བ་མ་ཡིན་པའི་བློར་འགྱུར་རོ། །ཅི་ལྟར་ཡང་འདི་རྟོགས་པར་བྱ་ཞེན། ཁ་དོག་ལ་སོགས་པའི་སྤྱི་ལ་རིང་པོ་ལ་སོགས་པའི་བློ་མ་ཡིན་ཡང་དོན་གཞན་དུ་གྱུར་པའི་དབྱིབས་ཞེས་དང༌། རེག་པར་བྱེད་པའི་སྒོ་ནས་ཀྱང་རིང་པོ་ལ་སོགས་པའི་བློ་སྐྱེའོ། །གཞན་དབང་པོའི་ཡུལ་མ་ཡིན་པ་དང་དབང་པོ་ལས་འདས་པའི་སྒོ་ནས་ཀྱང་བློ་སྐྱེ་བ་འདི་དབང་པོའི་ཤེས་པ་མ་ཡིན་ནོ། །འོ་ན་ཅི་ཞེ་ན་རྗེས་སུ་དཔག་པའི་ཤེས་པ་སྟེ་དེའི་དྲི་ལས་མེ་ཏོག་གི་ཁ་དོག་ཤེས་པ་བཞིན་དྲི་ཡང་མེ་ཏོག་གི་ཁ་དོག་ལས་ངེས་པར་དེ་ལྟ་བུའི་རེག་བྱ་གང་ཅི་ཡང་རུང་བ་འདི་ནི་དབྱིབས་མ་ཡིན་ནོ། །དེའི་ཕྱིར་གཉི་གའི་དབང་པོའི་སྒོ་ནས་བུམ་པ་ལ་སོགས་པ་བཞིན་རིང་པོ་ལ་སོགས་པའི་དབྱིབས་ཀྱི་ཤེས་པ་འཇུག་པ་དེ་ཁ་དོག་ལ་སོགས་པ་རྣམས་ལས་དོན་གཞན་མ་ཡིན་ནོ། །འདི་ནི་ཕྱོགས་ལས་བསྟན་པའི་མཛོད་ཀྱི་གནས་སུ་ཡང་རྣམ་པར་དཔྱོད་བར་འགྱུར་ཏེ་སྤྲོས་པས་ཆོག་གོ །གཉི་གར་ཡོད་པ་ཡང་ཡོད་དེ་ཞེས་བྱ་བ་ནི་ལུས་ཀྱི་རྣམ་པར་རིག་བྱེད་མ་གཏོགས་པ་རིང་པོ་ལ་སོགས་པའི་དབྱིབས་དང༌། སྤྲིན་དང་དུ་བ་དང་རྡུལ་དང་ཁུག་རྣའོ། །གཞན་དག་ན་རེ་ཉི་མ་དང་སྣང་བ་ཁོ་ན་ཁ་དོག་ཏུ་ཡོད་ཀྱི། སྔོན་པོ་དང་སེར་པོ་དང་དམར་པོ་དང་དཀར་པོ་དང་གྲིབ་མ་དང་མུན་པ་ཞེས་བྱ་པ་ནི་མ་ཡིན་ནོ་ཞེས་ཟེར་རོ། །ཅིའི་ཕྱིར་ཞེ་ན་འདི་ལྟར་རིང་པོ་ལ་སོགས་པའི་དབྱིབས་མ་གཏོགས་པར་སྔོན་པོ་ལ་སོགས་པ་འཛིན་པ་མེད་དོ། །ཅི་ལྟར་མུན་པ་ལ་རིང་པོ་ལ་སོགས་པའི་དབྱིབས་འཛིན་ཅིང་སྤྱོད་པ་ལ་སོགས་པ་རྣམས་ལ་མཐར་དེ་བཞིན་དུ་ཡོངས་སུ་གཅོད་པའི་ཕྱིར་རོ། །
གལ་ཏེ་དེ་ལྟ་ན་ཉི་མ་དང་སྣང་བ་གཉིས་ལ་ཡང་ཐལ་བར་འགྱུར་རོ་ཞེ་ན་ཐལ་བ་མེད་དེ། སྣང་བ་དང་ཉི་མ་ཨུ་པ་གྷ་རྟེན་གྱི་དབྱིབས་སུ་གཟུང་བའི་ཕྱིར་དེ་མུན་པ་ཡོད་པ་མ་ཡིན་ནོ་ཞེས་བཤད་པར་བྱའོ། །ཇི་ལྟར་ན་རྫས་གཅིག་ལ་རྫས་གཉི་གར་ཡོད་ཅེ་ན་ཞེས་བྱ་བ་ནི་འདི་ཡོད་པའི་དོན་དུ་ཁས་བླངས་ནས་རྒོལ་བའོ། །གཉི་གར་ནི་རྣམ་པ་གཉི་གར་རོ། །འདི་ལྟར་རང་ངོ་བོ་ཐ་དད་པས་ནི་རྫས་ཐ་དད་པ་ཡིན་ཏེ། དེའི་ཕྱིར་དེ་ལ་གཅིག་ཉིད་འགལ་ལོ། །དེ་ལ་གཅིག་ཉིད་ལ་ངོ་བོའི་དབྱེ་བ་མེད་པས་ན་དེའི་ཕྱིར་སྣང་བ་ལ་སོགས་པ་བཞིན་ནམ་ལུས་ཀྱི་རྣམ་པར་རིག་བྱེད་བཞིན་དུ་དབྱིབས་དང་ཁ་དོག་གི་སྒོ་ནས་དེ་ཉིད་དམ་དེ་ཁས་བླང་བར་བྱའི་གཉི་ག་ཇི་ལྟ་བ་བཞིན་མ་ཡིན་ནོ། །དེ་ལ་གཉི་ག་མངོན་པའི་ཕྱིར་ཏེ་ཞེས་བྱ་བ་ལ་དེ་ལ་ཞེས་བྱ་བ་ནི་རྫས་གཅིག་ལ་སྟེ་ཁ་དོག་ལ་ཡང་དབྱིབས་དང་དབྱིབས་ལ་ཡང་ཁ་དོག་མངོན་པའི་ཕྱིར་རོ། །ཡོད་པ་འདི་ཤེས་པའི་དོན་ཡིན་གྱི་ཡོད་པའི་དོན་ནི་མ་ཡིན་ནོ་ཞེས་བྱ་བ་ལ། འདི་སྐད་དུ་གཉི་ག་མངོན་པའི་ཕྱིར་རོ་ཞེས་བཤད་པར་འགྱུར་རོ། །གང་ཁ་དོག་ཁོ་ནར་ཡོད་ལ་དབྱིབས་སུ་མ་ཡིན་པ་ཉིད་ཡོད་པའོ་ཞེས་བཤད་པ་དེར་ནི་ཡོད་པའི་དོན་ཉིད་སྤྱི་ལ་བརྟེན་པའི་ཕྱིར་ཡོད་པའི་དོན་དུ་ཡང་མི་འགལ་ལོ་ཞེས་གཞན་དག་གོ །སྤྱིའི་དངོས་པོ་གཅིག་ལ་མཚན་ཉིད་འདོད་ཉོད་པ་ཉིད་འགལ་བ་མེད་དོ་ཞེས་བྱ་བ་འདི་གཟུགས་ཀྱི་སྐྱེ་མཆེད་དུ་གསུངས་པའི་ཕྱིར་ཨ་ཀ་ཝ་ན། དེ་ཉིད་ཀྱི་ཕྱིར་གཉི་ག་རྫས་གཅིག་པ་ཇི་ལྟ་བ་ནི་ཡོད་པ་མ་ཡིན་ནོ་ཞེས་གསུངས་སོ། །འོ་ན་ནི་ལུས་ཀྱི་རྣམ་པར་རིག་བྱེད་ལ་ཡང་ཁ་དོག་དང་དབྱིབས་སུ་ཡོད་པ་ཞེས་བྱ་བ་ཐལ་བར་འགྱུར་ཏེ། ལུས་ཀྱི་རྣམ་པར་རིག་བྱེད་ཀྱི་རང་བཞིན་ཐལ་མོ་སྦྱར་བ་ལ་སོགས་དག་ཡང་སྔོན་པོ་ལ་སོགས་པའི་ཁ་དོག་མངོན་པའི་ཕྱིར་རོ། །དེའི་ཕྱིར་ལུས་ཀྱི་རྣམ་པར་རིག་བྱེད་ནི་དབྱིབས་ཁོ་ནར་ཞེས་བྱ་བ་དེ་དང་འགལ་བར་འགྱུར་རོ། །འདི་ནི་འགའ་ཞིག་གི་མི་མཐུན་པ་ཉེ་བར་བཀོད་པ་སྟེ། ལྷག་མ་ཉི་མ་དང་སྣང་བ་ལས་ཐ་དད་པའི་གཟུགས་ཀྱི་སྐྱེ་མཆེད་ལ་རྣམ་པར་སྨིན་པ་ལས་སྐྱེས་པའམ་རྒྱས་པ་ལས་བྱུང་བའམ་རྒྱུ་མཐུན་པས་བྱུང་བ་མངོན་པར་བྱེད་པའི་ཁ་དོག་དང་དབྱིབས་དག་དབྱེར་
མེད་པར་ཚོགས་པ་ནི་རྣམ་པར་སྨིན་པའི་རྒྱུའམ་རྒྱས་པ་ལས་བྱུང་བའི་རྒྱུའམ་སྐལ་བ་མཉམ་པའི་རྒྱུའོ། །དེ་ལྟར་རྣམ་པར་རིག་བྱེད་ཀྱི་དུས་སུ་མངོན་པར་བྱེད་པ་རྣམ་པར་རིག་བྱེད་མ་ཡིན་པ་དང་ལྡན་པ་དབྱེར་མེད་པར་ཚོགས་པ་རྣམ་པར་སྨིན་པའི་རྒྱུ་ལས་བྱུང་བ་ལ་སོགས་པ་ཡོད་བ་མ་ཡིན་ནམ་ཞེ་ན། དེར་ནི་ཐལ་མོ་སྦྱར་བ་ལ་སོགས་པ་དགེ་བའམ་མི་དགེ་བའམ་ལུང་དུ་མ་བསྟན་པ་ཡང་རུང་སྟེ་དབྱིབས་ཀྱི་ཆོས་ལ་འདིར་ལུང་དུ་མ་བསྟན་པ་ཉིད་དོ། །དེའི་ཕྱིར་ཁ་དོག་གང་ཡིན་པ་གཟུགས་ཀྱི་སྐྱེ་མཆེད་ལྷག་མས་བསྡུས་པ་ཉིད་དོ། །དེ་ལས་གཞན་པ་དབྱིབས་དང་ཐ་མི་དད་པའི་རྒྱུ་ཉིད་ཀྱི་ཁ་དོག་གི་རྣམ་པར་རིག་བྱེད་ཀྱི་རང་བཞིན་གཟུགས་ཀྱི་སྐྱེ་མཆེད་དེའི་རྒྱུ་མཐུན་པ་ལས་བྱུང་བ་ཉིད་ཅེས་བྱ་བ་ཁ་དོག་དང་ལྷན་ཅིག་རྒྱུ་ཚོགས་གཅིག་པ་འགལ་ལོ། །དབྱིབས་ཀྱི་སྒོ་ནས་ཡོད་པ་ཉིད་ནི་མ་ཡིན་པ་ཁོ་ནའོ་ཞེས་བརྗོད་པར་བྱའོ། །འོ་ན་གང་འདིས་གཟུགས་ཅན་དང་ལྷན་ཅིག་སྐྱེ་བ་ངེས་པའི་མཚན་ཉིད་འདོད་ན་དབང་པོ་མེད་པ་དང༌། སྒྲ་མེད་ཕྲ་རབ་རྡུལ་རྫས་བརྒྱད། །ཅེས་བྱ་བ་དེ་ལ་འདི་ཅི་ལྟར་མང་བ་ཡིན་རྣམ་པར་རིག་བྱེད་མ་ཡིན་པ་ལྷན་ཅིག་ཏུ་གྱུར་པ་ཐ་མི་དད་པའི་རྒྱུ་དང་མཐུན་པའི་རྒྱུ་དགེ་བ་དང་མི་དགེ་བ་རྣམས་ལ་དྲི་ལ་སོགས་པ་འབྱུང་བ་ལས་གྱུར་པ་རྣམས་མེད་པའི་ཕྱིར་རོ་ཞེས་སོ། །དེ་བཞིན་དུ་རྫས་ལྔ་པོའི་རྣམ་པར་རིག་བྱེད་ཀྱི་རྡུལ་ཕྲ་རབ་དེ་ལྟར་གྲུབ་པར་འགྱུར་རོ། །འདིར་སྤྱི་ཁོ་ན་གཉིས་ཀ་ལྟ་བུར་མངོན་ཏེ་རྫས་ནི་མ་ཡིན་ནོ། །གཞན་དུ་རྫས་འགལ་བ་གཉི་གའི་རང་བཞིན་ལ་མི་འཇུག་གོ །གང་དུ་སྤྱི་ལ་རྣམ་པར་རིག་བྱེད་དུ་བརྗོད་པའི་དབྱིབས་བཏགས་པ་དེ་ལ་ཁ་དོག་ཀྱང་རྣམ་པར་རིག་བྱེད་དུ་ཐལ་བར་བཤད་དོ་ཞེ་ན་མ་ཡིན་ཏེ། འདིར་ཐ་མི་དད་ཚོགས་པ་ལས་བྱུང་བ་ཅུང་ཟད་ཕན་པར་བྱེད་པ་འདོད་པ་ན་སྤྱོད་པའི་རྡུལ་ཕྲ་རབ་རྫས་བརྒྱད་པ་ཅན་ཉིད་དེ་ལས་གཞན་པ་ཚོགས་པའི་དྲི་ལ་སོགས་པ་དང་བྲལ་བ་མེད་པའི་ཕྱིར་ཞེས་བ་སྟེ་སྤྲོས་པས་ཆོག་གོ །སྒྲ་ནི་རྣམ་པ་བརྒྱད་ཡོད་དེ། །ཞེས་བྱ་བ་ལ་འདིས་དངོས་པོ་རྣམས་སྒྲོག་པར་བྱེད་པས་ན་སྒྲའོ། །ཡང་ན་གྲག་པར་བྱེད་པས་སྒྲའོ། །བདེ་བར་གཤེགས་པ་པ་དག་ན་རེ་རྣ་བའི་ཡུལ་དུ་གྱུར་པའི་གཟུགས་འབྱུང་བ་
བཞི་ལས་གྲུབ་པའོ་ཞེས་ཟེར་རོ། །དེ་ལ་ཟིན་པ་དག་ནི་ལུས་སུ་གཏོགས་པ་རྣམས་ཏེ། ཕན་ཚུན་མཐུན་བར་བྱེད་པའི་ཕྱིར་སེམས་དང་སེམས་ལས་བྱུང་བ་དག་གི་རྟེན་གྱི་དངོས་པོར་ཉེ་བར་གཟུང་བའི་ཕྱིར་རོ། །དེ་ནི་མིག་ལ་སོགས་པ་ད་ལྟར་བྱུང་བ་དང་ཐ་དད་པ་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་དག་སྟེ་བཟློག་པ་ནི་མ་ཟིན་པ་དག་གོ །དེ་དག་གང་ལ་རྒྱུར་ཡོད་པས་ན་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བའོ། །དེ་ལ་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ་ནི་འདི་ལྟ་སྟེ། ལག་པ་དང་ངག་གི་སྒྲ་ལྟ་བུའོ་ཞེས་བྱ་བ་ལ། གལ་ཏེ་ངག་གི་སྒྲ་མ་ཡིན་པའི་འབྱུང་བ་ཆེན་པོའི་རྒྱུ་ལས་བྱུང་བ་ཡང་ཡོད་པ་མ་ཡིན་ནམ། དཔེར་ན་ཚངས་པ་འདོད་པར་གཏོགས་པའི་སྤྲུལ་པས་སྨྲས་པ་དང༌། བསམ་གཏན་གཉིས་པར་སྐྱེས་པ་རྣམས་ཀྱི་ངག་གི་རྣམ་པར་རིག་བྱེད་ལྟ་བུ་སྟེ། རྣམ་རིག་དཔྱོད་དང་བཅས་དག་ན། །ཞེས་གསུངས་པའི་ཕྱིར་དང༌། དེ་ལྟར་སྒྲ་ནི་འབྱུང་བ་རྒྱུར་བྱས་པ་ལུས་དང་ངག་གི་ལས་ཟག་པ་དང་བཅས་པའི་མཚན་ཉིད་ཅན་གྱི་ཕྱིར་རོ་ཞེ་ན། ཡོད་མོད་ཀྱི་འདི་ནི་ཉེས་པ་མེད་དེ། དཔེ་ཉིད་དུ་ཉེ་བར་བླངས་པའི་ཕྱིར་དང༌། འདིར་ལག་པ་དང་ངག་གི་སྒྲ་ནི་ཟིན་པའི་འབྱུང་བ་ཆེན་པོའི་རྒྱུ་ཁོ་ན་ལས་བྱུང་བ་ཡིན་ནོ་ཞེས་ངེས་པར་གཟུང་བ་ཡིན་པའི་ཕྱིར་རོ། །སེམས་ཅན་དུ་སྟོན་པ་ནི་ངག་གི་རྣམ་པར་རིག་བྱེད་ཀྱི་སྒྲའོ། །གཞན་ནི་སེམས་ཅན་དུ་སྟོན་པ་མ་ཡིན་པའོ་ཞེས་བྱ་བ་ནི་གང་ཞིག་ངག་གི་རྣམ་པར་རིག་བྱེད་ཀྱི་སྒྲ་ལས་གཞན་པ་ཟིན་པ་མ་ཡིན་པའི་འབྱུང་བའི་རྒྱུ་ཅན་རྣམ་པ་གཉིས་ཆར་ཡང་ངོ༌། །དེ་ལྟར་ན་ཟིན་པ་དང་མ་ཟིན་པའི་འབྱུང་བའི་རྒྱུ་ཅན་གཉིས་རེ་རེ་ཞིང་སེམས་ཅན་དུ་སྟོན་པ་དང་སེམས་ཅན་དུ་སྟོན་པ་མ་ཡིན་པའི་ཕྱིར་རྣམ་པ་བཞི་ཡིན་ལ། རྣམ་པ་བཞི་པོ་ཡང་རེ་རེ་ཞིང་ཡིད་དུ་འོང་བ་དང་ཡིད་དུ་མི་འོང་བའི་དབྱེ་བས་རྣམ་པ་བརྒྱད་ཡིན་ནོ། །ཡིད་དུ་འོང་བ་ནི་ཡིད་དང་མཐུན་པ་སྟེ་མར་འཛིན་པ་དང་ཕར་འཛིན་པ་བཞིན་ནོ། །འདིར་རྒྱུའི་དབྱེ་བ་དང་རང་གི་ངོ་བོའི་དབྱེ་བ་ལས་སྒྲའི་རབ་ཏུ་དབྱེ་བའི་མཚན་ཉིད་བསྟན་ཏོ། །གཞན་དག་ན་རེ་ཟིན་པ་དང་མ་ཟིན་བའི་འབྱུང་བ་ཆེན་པོའི་རྒྱུ་ལས་གྱུར་པའི་སྒྲ་ཡང་ཡོད་དེ་ཞེས་བྱ་བ་འབྱུང་སྟེ། དེ་
ལ་ལག་པའི་འབྱུང་བ་ཆེན་པོ་དག་ནི་ཟིན་པའོ། །རྫ་རྔའི་འབྱུང་བ་ཆེན་པོ་དག་ནི་མ་ཟིན་པའོ། །ལག་པ་དང་རྫ་རྔ་ཕྲད་པ་ལས་འབྱུང་བ་གཉི་ག་ལ་བརྟེན་ནས་སྐྱེས་པའི་ཕྱིར་ཟིན་པ་དང་མ་ཟིན་པའི་རྒྱུ་ལས་བྱུང་བའོ། །དེ་ནི་ཅི་ལྟར་ཁ་དོག་གི་རྡུལ་ཕྲ་རབ་གཅིག་ལ་ཞེས་རྒྱས་པར་འབྱུང་སྟེ། ལག་པ་དང་རྫ་རྔ་ཕྲད་པ་ལས་སྐྱེས་པའི་སྒྲའི་རྡུལ་ཕྲ་རབ་ནི་འབྱུང་བ་བཞི་ཆེན་གཉིས་རྒྱུར་བྱས་པ་ལས་སྐྱེས་པ་མ་ཡིན་ཏེ་རྒྱུར་བྱས་པའི་གཟུགས་ཡིན་པའི་ཕྱིར་ཁ་དོག་གི་རྡུལ་ཕྲ་རབ་བཞིན་ནོ། །ལུས་དང་ཐ་མི་དད་པའི་ཕྱིར་རོ། །འབྱུང་བ་བཞི་ཚན་གཉིས་ནི་ཕན་ཚུན་ལྷན་ཅིག་པའི་རྒྱུ་ཉིད་དོ་ཞེས་སློབ་དཔོན་འདུས་བཟང་ཟེར་རོ། །དེ་ལས་ཅིར་འགྱུར་ན་དེའི་རིགས་དང་ཐ་དད་པར་འགྱུར་ཞིང་དེ་ལས་ཀྱང་ཐོགས་པ་ཉིད་དུ་འགྱུར་རོ། །ན་ནུ་ཙ་པྲྀ་ཐི་པཱི་དྷཱ་ཏོར་བྷཱ་ཏུ་ནཱ་བི་མ་བྷཱ་གོ་ན་ཅེ་ན་ས་པྲ་ཏི་གྷ་ཏྭ་མི་ཏི་ཙི་ན་ཏྱཾ་མེ་ཏ་ཏ། འབྱུང་བ་བཞི་ཆེན་གཉིས་ཀྱིས་སྤྲུལ་པའི་རྡུལ་ཕྲ་རབ་ནི་ཕྱི་སྟེ་དེ་ལ་ཟིན་པ་དང་མ་ཟིན་པའི་འབྱུང་བའི་རྒྱུ་ལས་བྱུང་བ་ཞེས་བྱ་བ་མི་འགལ་ལོ་ཞེས་སློབ་དཔོན་འདུས་བཟང་ཟེར་རོ། །སེམས་ཅན་དུ་སྟོན་པ་དང་སེམས་ཅན་དུ་མི་སྟོན་པ་ནི་ཟིན་པ་དང་མ་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བའི་ཕྱིར་རོ། །ཡིད་དུ་འོང་བ་དང་ཡིད་དུ་མི་འོང་བའི་དབྱེ་བ་གཟུགས་ལ་སོགས་པ་རྣམས་ལ་ཡང་ཡོད་ན་སྒྲ་ཁོ་ན་རྣམ་པ་གཉིས་ཞེ་ན་ཟིན་པ་དང་མ་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བའི་ཕྱིར་རོ། །ཡིད་དུ་འོང་བ་དང་ཡིད་དུ་མི་འོང་བ་བཞིན་གཟུགས་ལ་སོགས་པ་རྣམས་ལ་ཡང་ཟིན་པ་དང་མ་ཟིན་པའི་འབྱུང་བའི་རྒྱུ་ལས་བྱུང་བ་ཡོད་པ་མ་ཡིན་ནམ་ཞེ་ན། གཟུགས་ལ་སོགས་པ་རྣམས་ཀྱི་བཞིན་དུ་སྒྲའི་རྒྱུ་ཁོ་ན་རྣམ་པ་གཉིས་ཏེ། རང་གི་ངོ་བོ་ལ་ཡང་དེ་ལྟར་བསྟན་བཅོས་སུ་སྨོས་པ་སྒྲའི་མཚན་ཉིད་དེ། དེའི་ཕྱིར་ལྡོག་པའི་དབྱེ་བས་ཁ་དོག་དང་དབྱིབས་ལ་བརྗོད་པ་བཞིན་དུ་བརྗོད་དོ། །གཞན་ལ་ཡང་དབྱེ་བ་ཡོད་དེ། ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ་ནི་སེམས་ཅན་ལ་སོགས་པའི་འདུ་བྱེད་ལས་སྐྱེས་པའོ། །དེ་ལ་ངེས་པར་བལྟོས་པ་སེམས་ཅན་གྱི་མངོན་པར་འདུ་བྱེད་པ་ལས་སྐྱེས་པ་དེ་ཡང་ལག་པ་ལ་སོགས་པའི་མངོན་པར་འདུ་བྱེད་པ་ལས་སྐྱེས་པའམ་ངག་གི་
རྣམ་པར་རིག་བྱེད་དོ། །ངག་གི་རྣམ་བར་རིག་བྱེད་ཀྱང་མིང་གི་གནས་རྣམས་ལ་བལྟོས་པའོ། །དེ་ལྟར་དགེ་བ་ལ་སོགས་པའི་དགེ་བས་དབྱེ་བ་རྣམ་པ་མང་དུ་ཡོད་ཅེས་བྱའོ། །སེམས་ཅན་དུ་སྟོན་པ་དང་སེམས་ཅན་དུ་མི་སྟོན་པ་དག་རེ་རེ་ཡང་ཟིན་པ་དང་མ་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ་ནི་མི་འཁྲུལ་བའི་ཕྱིར་སོ་སོར་མངོན་པར་བརྗོད་པའོ། །ཁ་དོག་དང་དབྱིབས་ལྟ་བུ་འཁྲུལ་པ་ལ་ཡང་རེ་ཞིག་སྔོན་པོ་ལ་སོགས་པ་དང་རིང་པོ་ལ་སོགས་པ་སོ་སོར་མངོན་པར་བརྗོད་པར་འདོད་དོ། །འདིར་ནི་འཁྲུལ་པ་ལ་ཡང་མི་འདོད་དོ་ཞེས་པ་རྒྱུ་མེད་བར་ཤེས་བར་བྱའོ། །སྔོན་པོ་ལ་སོགས་པ་དང་རིང་པོ་ལ་སོགས་པ་ཁ་དོག་དང་དབྱིབས་ཀྱི་ལྡོག་པས་སྤྲིན་ལ་སོགས་པ་རྣམས་ལ་མེད་ཀྱང་ལོགས་སུ་བསྟན་བར་ཤེས་པར་བྱའོ། །འདིར་རྒྱུ་ཤེས་བར་བྱ་བ་མ་ཡིན་ཏེ་བསྟན་བཅོས་ཕྱོགས་སུ་ལྷུང་བ་རྒྱུའི་བྱེ་བྲག་བཤད་པ་དང་མ་བཤད་པར་གྱུར་པ་ཟིན་པ་དང་མ་ཟིན་པའི་འབྱུང་བའི་རྒྱུ་བཞིན་ནོ། །ཇི་སྐད་བཤད་པའི་ཡིད་དུ་འོང་བ་དང་མི་འོང་བ་ཉིད་གཟུགས་ལ་སོགས་པ་རྣམས་ལ་ཡང་ཞེས་པ་དེ་ཡང་དགོངས་པར་མངོན་པའི་ཕྱིར་འདི་སློབ་དཔོན་གྱི་དགོངས་པའོ་སྙམ་ནས་འདིར་འདི་ལྟར་རབ་ཏུ་ཕྱེ་ཞིང་ཡོངས་སུ་བཤད་དོ། །རོ་ནི་རྣམ་དྲུག་ཅེས་བྱ་བ་ལ་མྱང་བར་བྱ་བས་ན་རོ་སྟེ་རོ་མྱང་བར་བྱ་ཞེས་བྱ་བའི་ཐ་ཚིག་གོ །རང་བཞིན་གྱི་བྱེ་བྲག་ཁས་བླངས་ནས་བྱེ་བྲག་དྲུག་བསྟན་གྱི། དབྱེ་བ་གཞན་ནི་དེ་དག་སྦྱར་བྱའི་བྱེ་བྲག་ལས་མཐའ་ཡས་པས་མ་བརྗོད་དོ། །གོ་རིམས་ཐ་དད་པ་ནི་དེའི་ཡུལ་ཅན་གྱི་རྣམ་པར་ཤེས་པ་སྐྱེ་བ་ངེས་པ་མེད་པར་བསྟན་བར་བྱ་བའི་ཕྱིར་རོ། །དྲི་རྣམ་བཞི་ཞེས་བྱ་བ་ལ་བསྣམ་པར་བྱ་བས་ན་དྲི་སྟེ་དེ་ཡང་རྣམ་པ་བཞིའོ། །དྲི་ཞིམ་པ་དང་དྲི་ང་བ་དག་དྲི་མཉམ་པ་དང་མི་མཉམ་པ་ཡིན་པའི་ཕྱིར་རྣམ་པ་བཞིའོ། །རིགས་ལས་ནི་དྲི་ཞིམ་པ་དང་དྲི་ང་བ་ཞེས་བྱ་བ་རྣམ་པ་གཉིས་ཁོ་ན་ཡིན་ནོ་ཞེས་སྟོན་པར་བྱེད་དོ། །ཡང་བསྟན་བཅོས་ལས་གསུམ་པ་དྲི་མཉམ་པ་བཤད་པ་དེ་ནི་ཁ་ཅིག་དྲི་ཞིམ་པའི་ཕྱོགས་སུ་བསླན་བར་བྱ་ལ། ཁ་ཅིག་དྲི་ང་བའི་ཕྱོགས་སུ་བསླན་པར་བྱ་བ་ཡིན་པས་རིགས་ལས་གསུམ་པ་ཡོན་པ་མ་ཡིན་ནོ། །དེ་ཡང་མཉམ་པ་ལས་བྱུང་བ་དང་མ་མཉམ་
བ་ལས་བྱུང་བ་ཡང་རུང་སྟེ་རྟེན་ལ་བཏགས་པའི་འཇུག་པའི་དབྱེ་བ་གཞན་ཡིན་པའི་ཕྱིར་རོ་ཞེས་ཁ་ཅིག་གོ །གཞན་དག་བསྟན་བཅོས་སུ་རྣམ་པ་གསུམ་ནི་ཤས་ཆུང་བ་དང་ཆེ་བའི་དབྱེ་བ་ལས་ཡིན་ཏེ། དྲི་ཞིམ་པ་དང་དྲི་ང་བ་དང་དྲི་མཉམ་པའོ། །བསྟན་བཅོས་སུ་ཡང་དྲི་མི་མཉམ་བ་དང་དྲི་ཞིམ་པ་དང་དྲི་ང་བ་མ་བཤད་ལ། དེ་ལས་གཞན་པ་ཐུན་མོང་དུ་དྲི་ཞིམ་པ་བཤད་ཅིང༌། དྲི་ཞིམ་པ་དང་དྲི་ང་བ་དག་ལས་ཐ་དད་པ་ཁོ་ནར་དྲི་མཉམ་པ་བསྟན་བཅོས་སུ་བཤད་དོ་ཞེས་གཞན་དག་གོ །དེ་ལ་དབང་བོའི་འབྱུང་བ་ཆེན་པོ་དང་ཏིང་ངེ་འཛིན་རྒྱས་པར་བྱེད་བ་ནི་དྲི་ཞིམ་བའོ། །བཟློག་པ་ནི་དྲི་ང་བའོ། །ཁྱད་པར་དེ་གཉིས་ཀ་མེད་པ་ནི་དྲི་མཉམ་པའོ། །རེག་བྱ་བཅུ་གཅིག་བདག་ཉིད་དོ་ཞེས་བྱ་བ་ལ། རེག་པར་བྱ་བ་ཡིན་པས་ན་རེག་བྱའམ་ལུས་ཀྱི་དབང་པོས་རེག་པར་ནུས་པས་རེག་བྱའོ། །གལ་ཏེ་གང་གིས་གང་ལ་རེག་བ་དེ་ལ་ཡང་དེས་རེག་པས་ན་ལུས་ཀྱི་དབང་པོ་ཡང་རེག་བྱར་འགྱུར་བ་མ་ཡིན་ནམ་ཞེ་ན། ལུས་ཀྱི་དབང་པོ་ནི་རེག་བར་བྱེད་པ་ཡིན་གྱི་རེག་པར་བྱ་བ་ནི་མ་ཡིན་ཏེ་མིག་བཞིན་ནོ། །མིག་ནི་ལྟ་བར་བྱེད་པ་ཡིན་གྱི་བལྟ་བར་བྱ་བ་ནི་མ་ཡིན་ནོ། །འགའ་ཞིག་གིས་འགའ་ཞིག་ལ་རེག་པའམ་རྟེན་དང་དམིགས་པ་བར་མ་ཆད་པ་ནི་རེག་པའི་འདུ་ཤེས་དེ་ལ་བརྟེན་པའི་རྣམ་པར་ཤེས་པ་གང་ཡིན་པ་ལ་ཡུལ་དམིགས་པ་ནི་དེ་ཡུལ་དང་བཅས་པ་ལ་རེག་པས་ཉེ་བར་སྤྱོད་ཀྱི། ཡུལ་དང་རྣམ་པར་ཤེས་བའི་རྟེན་གྱིས་ནི་མ་ཡིན་ནོ། །དེ་ཉིད་ཀྱི་ཕྱིར་ལུས་ཀྱི་དབང་པོས་འབྱུང་བ་རྣམས་ཉིད་ལ་རེག་པར་བྱེད་པས་ཉེ་བར་སྤྱོད་དོ། །དེ་ལ་བརྟེན་པའི་གཟུགས་ལ་སོགས་པ་རྣམས་ཀྱི་རྣམ་པར་ཤེས་པས་མི་འཛིན་ནོ། །མེ་ཏོག་ལ་སོགས་པ་རྣམས་ལ་ཡང་ཁ་དོག་ལ་གནོད་བ་ལས་དེའི་རྟེན་ལ་གནོད་ཀྱི་ལུས་རེག་པ་ལས་ནི་མ་ཡིན་ནོ། །འཇམ་པ་ཉིད་ནི་མཉེན་པའོ་ཞེས་བྱ་བ་ལ་འཇམ་པ་ཁོ་ན་འཇམ་པ་ཉིད་དེ་སོ་སོས་ཁོ་ན་སོ་སོ་ཉིད་ཡིན་པ་བཞིན་ནོ། །ངེས་པའི་ཚིག་ནི་སྦྲེལ་བར་བྱ་བས་ན་འཇམ་པའོ། །མཉེན་པ་ནི་རུད་རུད་པོ་མ་ཡིན་བ་སྟེ་སྤེད་པར་བཟོད་པ་ཞེས་བྱ་བའི་ཐ་ཚིག་གོ །རྩུབ་པ་ཉིད་ནི་རུད་རུད་པོའོ་ཞེས་བྱ་བ་ལ་རྩུབ་པ་འདི་ལ་ཡོད་པས་རྩུབ་པ་སྟེ་སྤུ་ཅན་
བཞིན་ནོ། །རྩུབ་པ་ཞེས་བྱ་བ་ནི་སྟོབས་ཀྱི་རྣམ་གྲངས་ཏེ་རྩུབ་པ་ཁོ་ན་རྩུབ་པ་ཉིད་དོ། །རུད་རུད་པོ་ནི་གྱོང་པོ་སྟེ་ཤིན་ཏུ་འཇམ་པ་མ་ཡིན་པ་ཞེས་བྱ་བའི་ཐ་ཚིག་གོ །ལྕི་བ་ཉིད་གང་གིས་ན་དངོས་པོ་རྣམས་འཇམ་པའོ་ཞེས་བྱ་བ་ནི་དམའ་བར་བྱེད་ཅེས་བྱ་བའི་ཐ་ཚིག་གོ །འདི་ཡོད་ན་དམའ་བར་འགྱུར་བས་ན་ལྕི་བ་སྟེ་ནོངས་པར་འགྱུར་ཞེས་བྱ་བའི་ཐ་ཚིག་གོ །ལྕི་བ་ཁོ་ན་ལྕི་བ་ཉིད་དོ། །བྱེ་བྲག་ཏུ་སྨྲ་བ་རྣམས་ནི་གང་ལས་སྲང་མཐའ་མཐོ་བར་འགྱུར་པའོ་ཞེས་སོ། །བཟློག་པ་ནི་ཡང་བའོ་ཞེས་བྱ་བ་ལ་གང་གིས་དངོས་པོ་རྣམས་འཇལ་བར་མི་བྱེད་པ་སྟེ། འདི་ཡོད་ན་དམའ་བར་མི་འགྱུར་བས་ཡང་བའོ། །དབྱིབས་རྒྱ་ཆེ་བ་ཉིད་ལ་ཡང་ཡདྡྷཱ་བཱཏ་སུ་ཁ་མཱ་ཧྲི་ཡནྟེ་བྷཱ་བཱཿ་འཇལ་བན་སྲང་མཐའ་དམར་པོའི་རྒྱུ་མཚན་ལས་ཞེས་བྱེ་བྲག་ཏུ་སྨྲ་བ་རྣམས་ཟེར་རོ། །ཡང་བ་ཁོ་ན་ཡང་བ་ཉིད་དོ། །གྲང་བ་ན་དྲོ་བ་འདོད་པར་བྱེད་པའོ་ཞེས་བྱ་བ་ནི་གང་གིས་ཉམ་ཐག་པས་དྲོ་བར་འདོད་པར་འགྱུར་བ་སྟེ། དེ་ནི་བགྲང་བས་ན་གྲང་བ་སྟེ་ཕན་འདོགས་པ་དང་གནོད་པ་བྱེད་པ་ཡིན་པའི་ཕྱིར་མྱུར་དུ་བགྲོད་པར་བྱའོ་ཞེས་བྱ་བའི་ཐ་ཚིག་གོ །གལ་ཏེ་ཡང་སོས་ཀ་དང་སྟོན་ཀའི་དུས་བ་ཞིན་གྲང་བ་ནི་དྲོ་བར་འདོད་པར་བྱེད་པར་མི་འགྱུར་བ་མ་མིན་ནམ་ཞེ་ན། དྲོ་བ་མངོན་པར་འདོད་པ་ལས་རིགས་གཞན་མེད་པའི་ཕྱིར་གྲང་བ་ཁོ་ན་དྲོ་བ་མངོན་པར་འདོད་པའོ་ཞེས་ངེས་པར་གཟུང་བར་བྱ་སྟེ། དེ་ལྟར་ཡང་དེའི་ལས་དང་དེའི་རིགས་ཅན་ཡིན་པའི་ཕྱིར་མཚན་ཉིད་ཅན་གྱིས་མཚོན་བར་བྱའོ། །བཀྲེས་བ་ནི་ཟས་འདོད་པར་བྱེད་པའོ། །སྐོམ་བ་ནི་སྐོམ་འདོད་བར་བྱེད་བའོ་ཞེས་བྱ་བ་ལ་གལ་ཏེ་སེམས་ལས་བྱུང་བའི་ཆོས་ནི་ལུས་ཀྱི་དབང་པོའི་ཡུལ་དུ་ཡོད་པ་མ་ཡིན་ཞེ་ན། དེའི་ཕྱིར་རྒྱུ་ལ་འབྲས་བུ་བཏགས་པའི་ཕྱིར་ཏེ་ཞེས་བྱ་བ་གསུངས་ཏེ། ཁོང་པ་ནས་ཟས་འདོད་པ་དང་སྐོམ་འདོད་པའི་རྒྱུ་རེག་བྱའི་ཁྱད་པར་ཞིག་འབྱུང་སྟེ། དེར་ཟས་འདོད་པའི་རྒྱུ་ལ་བཀྲེས་པ་དང༌། སྐོམ་འདོད་པའི་རྒྱུ་ལ་སྐོམ་བ་ཞེས་བཤད་དེ། རྒྱུ་ལ་འབྲས་བུ་བཏགས་པ་བྱས་པའི་ཕྱིར་རོ། །གལ་ཏེ་འདིར་རྒྱུ་ལ་འབྲས་བུ་བཏགས་བ་བརྗོད་པར་མི་འདོད་ན་ནི་འདི་སྐད་དུ་བཀྲེས་པ་ནི་ཟས་འདོད་པར་
བྱེད་པའོ། །སྐོམ་པ་ནི་སྐོམ་འདོད་པར་བྱེད་པའོ་ཞེས་མི་བརྗོད་པར་འགྱུར་ཏེ། འོ་ན་ཅི་ཞེ་ན་བཀྲེས་པ་དང་སྐོམ་པ་དག་ནི་ཟས་དང་སྐོམ་འདོད་པ་དག་གོ་ཞེས་དེ་སྐད་བརྗོད་པར་འགྱུར་རོ། །དེ་ཉིད་ལ་དཔེ། སངས་རྒྱས་རྣམས་ནི་འབྱུང་བ་བདེ། །ཞེས་རྒྱ་ཆེར་འབྱུང་བ་ལ། སངས་རྒྱས་འབྱུང་བ་བདེ་བ་ཉིད་མ་ཡིན་གྱི། བདེ་བའི་རྒྱུ་ཡིན་པས་བདེ་བར་བཤད་དོ། །དེ་བཞིན་དུ་ཆོས་བསྟན་པ་ལ་སོགས་པ་གཞན་དག་ལ་ཡང་བརྗོད་པར་བྱའོ། །མུརྩྪ་མ་ལ་དཽརྨྨ་ལྱ་ལ་སོགས་པའི་རེག་བྱའི་ཁྱད་པར་ཡོད་པ་ནི་འདི་དག་གི་ནང་དུ་འདུས་པའི་ཕྱིར་སོ་སོར་མ་བརྗོད་དེ་སྔར་གྱི་འཇམ་པ་ཉིད་ལྟ་བུའོ། །ན་བི་ཪྻ་ཏེ་ཀརྐ་ཤ་གུ་རུ་ཏྭཱ་ཏ། དེ་བཞིན་དུ་རེག་བྱའི་ཁྱད་པར་གཞན་དག་ལ་ཡང་རིགས་པས་བསྡུ་བར་བྱའོ། །འཇམ་པ་ལ་སོགས་པ་འདི་དག་གི་ཕན་ཚུན་གྱི་ཁྱད་པར་ནི་རྟེན་གྱི་ཁྱད་པར་ལས་རྟོགས་པར་བྱ་སྟེ། ཆུ་དང་མེའི་ཁམས་ལས་བྱུང་བའི་ཕྱིར་འཇམ་པ་ཉིད་དོ། །སའི་ཁམས་ལས་བྱུང་བའི་ཕྱིར་ལྕི་བ་ཉིད་དོ། །མེ་དང་རླུང་གི་ཁམས་ལས་བྱུང་བའི་ཕྱིར་ཡང་བ་ཉིད་དོ། །དེ་ཉིད་ཀྱི་ཕྱིར་ཤི་བའི་ལུས་ལ་ལྗིད་ལྷག་པོ་ཡོད་པ་ཉིད་ཡིན་ནོ། །ཆུ་དང་རླུང་གི་ཁམས་ལས་བྱུང་བའི་ཕྱིར་གྲང་བའོ། །རླུང་གི་ཁམས་ལས་བྱུང་བའི་ཕྱིར་བཀྲེས་པའོ། །མེའི་ཁམས་ལས་བྱུང་བའི་ཕྱིར་སྐོམ་པའོ། །དེ་བཞིན་དུ་གཞན་ལ་ཡང་རྒྱུར་བྱས་པའི་གཟུགས་ལ་ཇི་ལྟར་སྲིད་པའི་རྟེན་གྱི་ཁྱད་པར་རྟོགས་པར་བྱ་སྟེ། འདིར་ནི་གཞུང་མངས་པས་ལེན་གྱི་དོན་མ་བརྗོད་དོ། །དེ་ལ་གཟུགས་ཀྱི་ཁམས་ན་ནི་བཀྲེས་བ་དང་སྐོམ་བ་དག་མེད་དེ། ཁམ་གྱི་ཟས་ཀྱི་འདོད་ཆགས་དང་བྲལ་བ་རྣམས་དེར་སྐྱེ་བའི་ཕྱིར་དང༌། ལུས་ལ་གནོད་པ་མེད་པའི་ཕྱིར་རོ། །གཞན་དུ་ན་དེ་ན་ཡང་བཀྲེས་པ་དང་སྐོམ་པའི་སྡུག་བསྔལ་ཡོད་པར་འགྱུར་རོ། །ཡང་བ་ཉིད་ལ་སོགས་པ་ལྷག་མ་རྣམ་པ་ལྔ་ནི་ཡོད་དོ། །གལ་ཏེ་གདགས་པ་ལས་བྱང་གི་སྒྲ་མི་སྙན་པ་རྣམས་ཀྱི་དཔག་བསམ་གྱི་ཤིང་གི་གོས་ནི་སྲང་གཅིག་འཇལ་ལོ། །རྒྱལ་ཆེན་རིས་བཞི་པ་རྣམས་ཀྱི་ནི་དེའི་ཕྱེད་དོ། །སུམ་ཅུ་རྩ་གསུམ་པ་རྣམས་ཀྱི་ནི་དེའི་ཕྱེད་དོ། །དེ་ལྟར་ཕྱེད་ཕྱེད་ཕྲི་བས་གཞན་འཕྲུལ་དབང་བྱེད་པ་རྣམས་ཀྱི་དཔག་བསམ་ཤིང་གི་གོས་
ནི་སྲང་གཅིག་གི་དྲུག་ཅུ་རྩ་བཞིའི་ཆ་འཇལ་གྱི། དེ་ཡན་ཆད་གཟུགས་ན་སྤྱོད་པ་རྣམས་ཀྱི་གོས་དག་ནི་མི་འཇལ་ལོ་ཞེས་བཤད་ན། ལྕི་བ་ཉིད་ཡོད་ན་ཇི་ལྟར་མི་འཇལ། གཟུགས་ཀྱི་ཁམས་ན་ནི་སེམས་ཅན་གྱི་ལུས་རྣམས་དང༌། དེའི་རྟེན་རྣམས་ནོར་བུའི་འོད་ལྟར་དང་བའི་ཕྱིར་ལྕི་བ་ཉིད་མི་སྲིད་དོ་ཞེ་ན། དེ་ལ་གདགས་པའི་བསྟན་བཅོས་གཞུང་གཟུགས་པར་བྱ་བའི་ཕྱིར། གལ་ཏེ་དེ་ནི་གོས་རེ་རེ་ནས་མི་འཇལ་ཡང་བསགས་པ་དག་ནི་འཇལ་ལོ་ཞེས་གསུངས་ཏེ། དེ་ཇི་ལྟར་ཤེས་པར་བྱ་ཞེ་ན། བསྡུས་པ་དང་བརྐྱང་བ་ལས་ཏེ། ཀཱ་ཤའི་མེ་ཏོག་གི་སྣལ་མ་བཞིན་ནོ། །ཀཱ་ཤི་ཀའི་མེ་ཏོག་གི་སྣལ་མ་བསྡུས་པ་དང་བརྐྱང་བ་དང་ལྡན་པ་དག་ལ་ནི་ཚོགས་པ་དག་འཇལ་གྱི་རེ་རེ་བ་མ་ཡིན་ནོ། །རྟེན་ཡོད་པའི་ཕྱིར་ཡང་གཟུགས་ཀྱི་ཁམས་ན་ལྕི་བ་ཉིད་ཡོད་དོ། །པ་ཏཱི་ནཱཾ་ཧྱཱ་དྷཱ་རེ་ཎ་བྲ་ཡ་ཛ་ན་ནཱ་ནྱ་ཥཱེ་ཀརྐ་ཤ་ཏྭ་མུ་བ་རི་བྷཱུ་མི་སཽ་ཀུ་མཱརྒྱ་པེ་ཀྵ་ཡ་དྷ་ར་སུ་ནི་རྨཱ་ཎེ་ཥུ་ཙ་གནོད་པར་བྱེད་པའི་གྲང་བ་མེད་ཀྱི་ཕན་བར་བྱེད་པ་ནི་ཡོད་དོ། །ལོ་ཞེས་བྱ་བ་ལ་ཁ་ཅིག་ན་རེ་ལོའི་སྒྲ་ནི་ཏིང་ངེ་འཛིན་པས་ཐ་དད་པའི་ཕན་འདོགས་པར་བྱེད་པ་ཁས་མ་བླངས་པར་གསལ་བར་བྱ་བའི་དོན་དུའོ་ཞེས་ཟེར་རོ། །སློབ་དཔོན་འཕགས་པའི་འབངས་ན་རེ། དེ་དག་གི་ལྟར་ན་བསམ་གཏན་དང་པོ་ན་རྣམ་པར་ཤེས་བའི་ཚོགས་གསུམ་གྱི་བདེ་བས་ཕན་འདོགས་པར་བྱེད་པར་མི་འགྱུར་རོ་ཞེས་ཟེར་རོ། །གཞན་དག་ནི་དེ་ནས་ཤིན་ཏུ་སྦྱངས་བ་ཞེས་བྱ་བའི་རེག་པའི་ཁྱད་པར་ལས་གཞན་པའི་རེག་པ་ཕན་འདོགས་པར་བྱེད་པ་མེད་དོ་ཞེས་ཟེར་རོ། །ལོའི་སྒྲའི་དགོངས་པ་ནི་ཐམས་ཅད་ཀྱི་མ་ཡིན་གྱི་གཞན་དག་གི་འདིའི་ཕན་བར་བྱེད་པའི་རྒྱུ་འགོག་པའོ་ཞེས་པ་འདི་བསམ་མོ། །གྲང་བ་ནི་དྲོ་བ་མངོན་པར་འདོད་པར་བྱེད་པའོ་ཞེས་མཚན་ཉིད་ཐ་དད་པ་ནི་ལོའི་སྒྲས་གསལ་བར་བྱེད་དོ་ཞེས་གཞན་དག་གོ །གཞན་དག་ན་རེ་ལོའི་སྒྲ་ནི་ལུང་གི་ཚུལ་འདི་མཐོང་བ་དང་རྗེས་སུ་དཔག་པ་ལས་འདས་ཞེས་ཟེར་རོ། །དེ་ལ་རེས་འགའ་ནི་རྫས་གཅིག་ཞེས་བྱ་བ་རྒྱས་པར་འབྱུང་སྟེ། འདིར་རྫས་ཀྱི་སྒྲས་ནི་སྔོན་པོ་ལ་སོགས་པའི་རིགས་བརྗོད་ཀྱི་རྡུལ་ཕྲ་རབ་ཀྱི་རྫས་ནི་མ་ཡིན་ཏེ། རྣམ་པར་ཤེས་པའི་ཚོགས་ལྔ་པོ་རྣམས་ན་
བསགས་པ་ལ་དམིགས་པའི་ཕྱིར་རོ། །དེའི་རྣམ་པ་བྱེ་བྲག་ཏུ་གཅོད་པ་ཞེས་བྱ་བ་ནི་མི་འཆོལ་བའི་ཕྱིར་ཡིད་ཀྱི་རྣམ་པར་ཤེས་པས་སྔོན་པོ་མ་ཡིན་པ་བསལ་ནས་སྔོན་པོའོ་སྙམ་པ་སྟེ་དེ་བཞིན་དུ་གཞན་ལ་ཡང་བརྗོད་པར་བྱའོ། །མིག་ལ་སོགས་པའི་རྣམ་པར་ཤེས་པས་ན་ཡུལ་བྱེ་བྲག་ཏུ་གཅོད་པར་མི་ནུས་ཏེ་རྣམ་པར་རྟོག་པ་མེད་པའི་ཕྱིར་རོ་ཞེས་ཁ་ཅིག་ཟེར་རོ། །གང་གི་ཚེ་མིག་གི་རྣམ་པར་ཤེས་པ་རྫས་གཅིག་གི་རྒྱུ་ཅན་ཞིག་རྫས་གཞན་གྱི་རང་གི་ངོ་བོ་ལ་མ་རེག་པར་བྱེ་བྲག་ཏུ་བཅད་པའི་ཡུལ་ལ་སྐྱེ་བ་དེའི་ཚེ། དེའི་རྣམ་པ་བྱེ་བྲག་ཏུ་གཅོད་པ་ཞེས་བྱའོ། །མིག་གི་རྣམ་པར་ཤེས་པས་རྫས་གཞན་གྱི་རང་གི་ངོ་བོས་དབེན་པའི་དོན་གཅིག་བཟུང་སྟེ་ཕྱིན་ནས་རིམ་གྱིས་ཡིད་ཀྱི་རྣམ་པར་ཤེས་པས་དེ་ལས་གཞན་པའི་དངོས་པོ་རྣམ་པར་གཅོད་པའི་སྒོ་ནས་རྣམ་པར་རྟོག་པར་བྱེད་དེ། དེའི་ཕྱིར་མིག་གི་རྣམ་པར་ཤེས་པ་ཡང་དེའི་རྣམ་པ་བྱེ་བྲག་ཏུ་གཅོད་པ་མི་འགལ་ལོ། །ཉེ་ན་ཁ་དོག་དང་དབྱིབས་འཛིན་བའི་གོ་སྐབས་ཡོད་པ་དེའི་ཕྱིར། དཔེར་ན་ཐག་རིང་པོ་ནས་དམག་བཤམས་པའམ་ཞེས་བྱ་བ་ལ་སོགས་པ་སྨོས་ཏེ། རྣ་བ་ལ་སོགས་པའི་རྣམ་པར་ཤེས་པ་ལ་ཡང་དེ་བཞིན་དུ་རིག་པར་བྱའོ་ཞེས་བྱ་བ་ལ། རེས་འགའ་ནི་རྫས་གཅིག་གིས་རྣ་བའི་རྣམ་པར་ཤེས་བ་བསྐྱེད་དེ། གང་གི་ཚེ་འདི་ནི་རྡ་པ་ཊ་ཧའི་ཡིན་གྱི་དུང་གི་སྒྲ་ནི་མ་ཡིན་ནོ་ཞེས་དེའི་རྣམ་པ་བྱེ་བྲག་ཏུ་གཅོད་པར་འགྱུར་བ་ནའོ། །རེས་འགའ་ནི་མང་པོས་ཏེ་གང་གི་ཚེ་དེའི་རྣམ་པ་བྱེ་བྲག་ཏུ་མི་གཅོད་པ་ན་སྟེ་ཅ་ཅོའི་སྒྲ་དང་གླུ་དབྱངས་ཀྱི་སྒྲ་དུ་མ་ཉན་པའི་ལྟ་བུའོ། །ལུས་ཀྱི་རྣམ་པར་ཤེས་པ་ནི་ཞེས་བྱ་བ་ལ། རེས་འགའ་ནི་གཅིག་གིས་ཏེ་གང་གི་ཚེ་འདི་ནི་གྲང་བ་ཡིན་གྱི་དྲོ་བ་ནི་མ་ཡིན་ནོ། །འཇམ་པ་ཡིན་གྱི་རྩུབ་པ་ནི་མ་ཡིན་ནོ་ཞེས་རྣམ་པ་བྱེ་བྲག་ཏུ་གཅོད་པར་འགྱུར་བ་ནའོ། །རེས་འགའ་ནི་གཉིས་ཀྱིས་ཏེ་འབྱུང་བ་གཉིས་སམ་འབྱུང་བ་ལས་གྱུར་པ་གཉིས་སོ། །ཡང་རེས་འགའ་ནི་གསུམ་དང་བཞི་ནས་ལྔའི་བར་གྱིས་ཏེ་འབྱུང་བ་རྣམས་དང་འཇམ་པ་ལ་སོགས་པ་གཅིག་གིས་ཏེ། རྩུབ་པ་ཉིད་ལ་སོགས་པ་རྣམས་ནི་འབྱུང་བ་བཞི་ཚན་གཞན་ལ་བརྟེན་པའི་ཕྱིར་རོ། །ཐམས་ཅད་ཀྱིས་ཀྱང་ཞེས་རྒྱས་པར་འབྱུང་བ་ལ། འདིར་ཡང་ཤིན་ཏུ་མང་ན་
ཞེས་བྱ་བ་རྗེས་སུ་འཇུག་སྟེ་ལྕི་བ་དང་གྲང་བ་དང་རྩུབ་པའི་ངོ་བོ་ཉེ་བར་བཟུང་ནས་བྱེ་བྲག་ཏུ་མ་བཅད་པར་འཛིན་པར་མཐོང་བ་ཡང་ཡིན་ནོ། །དེའི་ཕྱིར་དྲུག་དང་བདུན་དང་བཅུ་གཅིག་གི་བར་དག་གིས་ཀྱང་མཆོངས་པ་དང་རྐྱལ་བྱེད་པ་རྣམས་ལ་དྲོ་བ་དང་གྲང་བ་ལ་སོགས་པ་ཅིག་ཅར་ཉམས་སུ་མྱོང་བ་དང༌། ཁ་ཅིག་ལ་བཀྲེས་པ་དང་སྐོམ་པའི་རེག་བྱ་དག་ཀྱང་སྟེ་ལུས་ཀྱི་རྣམ་པར་ཤེས་པ་རེག་བྱ་བཅུ་གཅིག་གི་ཡུལ་ཅན་བྱེ་བྲག་ཏུ་མ་བཅད་པ་སྐྱེ་བ་ཡིན་ནོ། །དེ་ལྟར་ན་སྤྱི་ལ་དམིགས་པའི་ཕྱིར་ཞེས་བྱ་བ་ལ་སོགས་པ་ལ། ཆོས་མངོན་པ་ལས་རྣམ་པར་ཤེས་པའི་ཚོགས་ལྔ་རང་གི་མཚན་ཉིད་ཀྱི་ཡུལ་ཅན་དུ་འདོན་ཏེ། དེའི་ཕྱིར་སྔོན་པོ་ལ་སོགས་པའི་རྣམ་བ་བྱེ་བྲག་ཏུ་མ་བཅད་པ་རྣམ་པར་ཤེས་པའི་གཟུང་བ་ནི་སྤྱི་ལ་དམིགས་ནས་འཛིན་བའི་ཕྱིར་སྤྱིའི་ཡུལ་ཅན་ཉིད་དང་སྤྱི་ལ་དམིགས་པའི་ཕྱིར་སྔོན་པོ་ལ་སོགས་པའི་སྤྱི་གང་ཡིན་པ་དེའི་རྣམ་པར་འཛིན་པའི་ཕྱིར་སྤྱིའི་ཡུལ་ཅན་ཉིད་དུ་འགྱུར་རོ་ཞེས་གཞན་དག་རྩོད་པར་བྱེད་དོ། །གཞན་དག་ནི་འདི་ལ་རྣམ་པར་ཤེས་པའི་ཚོགས་ལྔ་ནི་སྤྱིའི་ཡུལ་ཅན་ཡིན་ཏེ་རང་གི་ཡུལ་མཐའ་དག་ལ་དམིགས་པའི་ཕྱིར། ཆོས་ཐམས་ཅད་བདག་མེད་པ་བཞིན་ནོ་ཞེས་པའི་རབ་ཏུ་སྦྱོར་བ་ཉིད་དོ། །དེའི་ཕྱིར་འདི་དག་ནི་སྐྱེ་མཆེད་ཀྱི་རང་གི་མཚན་ཉིད་ཀྱི་ཞེས་རྒྱས་བར་འབྱུང་ངོ༌། །བསྟན་བཅོས་ལས་ནི་སྐྱེ་མཆེད་ཀྱི་མཚན་ཉིད་ཀྱི་དབང་དུ་མཛད་ནས་རང་གི་མཚན་ཉིད་ཀྱི་ཡུལ་ཅན་དུ་བཤད་ལ་སྐྱེ་མཆེད་ཀྱི་རང་གི་མཚན་ཉིད་དེ་ཡང་སྔོན་པོ་དང་རིང་པོ་ལ་སོགས་པ་རྣམས་ཀྱི་སྤྱི་ཡིན་པས་སྤྱིའི་ཡུལ་ཅན་ཉིད་དུ་ཁས་བླངས་པར་འགྱུར་ཏེ་དེའི་ཕྱིར་གྲུབ་པ་བསྒྲུབ་པའོ། །འགའ་ཞིག་རང་གི་སྐྱེ་མཆེད་ཀྱི་རྫས་དུ་མས་བསྐྱེད་པར་བྱ་བ་ཡིན་པའི་ཕྱིར་སྤྱི་ཡིན་པར་ཁྱད་པར་མེད་ལ་བྱེ་བྲག་ཏུ་མ་བཅད་པར་དེ་དག་ཡུལ་དུ་ཡོད་པས་སྤྱིའི་ཡུལ་ཅན་ཡིན་གྱི་སྤྱི་ཉིད་ནི་མ་ཡིན་ཏེ། དེ་ནི་བཏགས་པར་ཡོད་པའི་ཕྱིར་དང་རྣམ་པར་ཤེས་པ་ཡང་འདིས་བདག་མེད་པར་བཤད་པའི་ཕྱིར་རོ། །གཞན་དུ་ན་སྔོན་བོ་ལ་སོགས་པའི་རང་གི་མཚན་ཉིད་ཀྱི་ཤེས་པ་ཡང་སྤྱིའི་ཡུལ་ཅན་དུ་འགྱུར་ཏེ་རྡུལ་ཕྲ་རབ་ཀྱི་རྫས་དུ་མས་བསྐྱེད་པར་བྱ་བ་ཡིན་
པའི་ཕྱིར་རོ། །འདིར་གཏན་ཚིགས་མ་གྲུབ་པ་དང་དཔེ་དང་བསྒྲུབ་བྱའི་ཆོས་མ་ཚང་བ་ཡང་བསམ་པར་བྱའོ། །ཡང་སྐྱེ་མཆེད་ཀྱི་མཚན་ཉིད་ཅི་རྫས་ཀྱི་མཚན་ཉིད་ཅི་ཞེ་ན། མིག་ལ་སོགས་པའི་རྣམ་པར་ཤེས་པ་མཚུངས་པར་ལྡན་པ་དང་བཅས་པའི་རྟེན་དང་དམིགས་པར་རུང་པ་ནི་ཇི་ལྟར་སྲིད་པ་བཞིན་དུ་མིག་ལ་སོགས་པའི་སྐྱེ་མཆེད་རྣམས་དང༌། གཟུགས་ལ་སོགས་པ་དམིགས་པ་རྣམས་ཀྱི་མཚན་ཉིད་དོ། །དེ་ལ་མིག་གི་དབང་པོའི་ཡུལ་ཁོ་ན་ལ་མིག་གི་རྣམ་པར་ཤེས་པ་སྐྱེའི་གཞན་ལས་ནི་མ་ཡིན་པས་འདི་དག་ནི་སྐྱེ་མཆེད་ཀྱི་མཚན་ཉིད་ལ་བརྟེན་ནས་རང་གི་མཚན་ཉིད་ཀྱི་ཡུལ་ཅན་ཡིན་གྱི་ཐ་དད་པ་དག་ལ་ཐ་མི་དད་པར་བརྟགས་པ་ལས་ནི་མ་ཡིན་ཏེ། དེ་དག་ནི་རྣམ་པར་རྟོག་པ་མེད་པ་ཡིན་པའི་ཕྱིར་རོ། །རྫས་ཀྱི་རང་གི་མཚན་ཉིད་ནི་སྔོན་པོ་ལ་སོགས་པ་རྣམས་ཀྱི་རང་གི་ངོ་བོ་བརྗོད་དུ་མེད་པ་རྣམ་པར་རྟོག་པ་མེད་པ་ཡེ་ཤེས་ཀྱི་ཡུལ་ཏེ་དེ་ལྟར་ཡང་བསྟན་བཅོས་ལས་མིག་གི་རྣམ་པར་ཤེས་པས་སྔོན་པོ་རྣམ་པར་ཤེས་ཀྱི་སྔོན་པོའོ་སྙམ་དུ་ནི་མ་ཡིན་ནོ་ཞེས་སོ། །འདི་དཔྱད་པར་བྱ་སྟེ་ཞེས་བྱ་བ་རྒྱས་པར་འབྱུང་སྟེ་ལུས་དང་ལྕེའི་དབང་པོ་གཉིས་ནི་རྟེན་གཅིག་ཡིན་པའི་ཕྱིར་དང༌། ཕྲད་ནས་འཛིན་པའི་ཕྱིར་དང༌། རོ་དང་རེག་བྱ་དག་ཀྱང་ཕན་ཚུན་ཐ་དད་མེད་པའི་ཕྱིར་ཡུལ་དང་ཕྲད་པའི་གོ་རིམས་ལས་རྣམ་པར་ཤེས་པ་སྐྱེ་བའི་གོ་རིམས་མི་སྲིད་པས་དེའི་ཕྱིར་དཔྱད་པའོ། །ཟ་བར་འདོད་པས་རྒྱུད་གཏད་པའི་ཕྱིར་ཞེས་བྱ་བ་ལ། ཟ་བར་འདོད་པ་ནི་འདུན་པ་ཡིན་ཞིང༌། དེ་ཡང་ཡིད་ལ་བྱེད་པ་དང་མཚུངས་པར་ལྡན་པ་ཡིན་ལ། ཡིད་ལ་བྱེད་པའི་དབང་གིས་ཀྱང་སེམས་ཀྱི་རྒྱུད་དམིགས་པ་གཞན་རྣམས་ལ་འཇུག་པས་དེའི་ཕྱིར་ལྕེའི་རྣམ་པར་ཤེས་པ་སྔར་སྐྱེའོ། །གང་གི་ཚེ་ཡུལ་མཉམ་པ་དང་ཕྲད་ལ་ཟ་བར་འདོད་པ་མེད་པ་དེའི་ཚེ་ནི་གང་གི་ཡུལ་ཡིན་པ་དེ་སྔར་སྐྱེའོ། །དབང་པོ་ལྔའི་དོན་དང་ཞེས་བྱ་བ་ལ་སོགས་པ་ལ། དེ་དག་ཇི་ལྟར་འཛིན་པ་ནི་རེས་འགའ་ནི་རྫས་གཅིག་གིས་མིག་གི་རྣམ་པར་ཤེས་པ་སྐྱེད་དོ་ཞེས་རྒྱས་པར་རོ། །ད་ནི་དེ་དག་གི་མཇུག་ཐོགས་སུ་བསྟན་པའི་ཕྱིར་དེ་དག་བཤད་པའི་མཇུག་ཐོགས་སུ་དེ་ནི་རྣམ་པར་རིག་བྱེད་མ་ཡིན་པ་བརྗོད་པར་བྱའོ། །
གཡེངས་དང་སེམས་མེད་པ་ཡི་ཡང༌། །ཞེས་བྱ་བ་ནི་ངག་གི་རྣམ་པར་རིག་བྱེད་ལས་ཁྱད་པར་བྱེད་པ་སྟེ་ངག་གི་རྣམ་པར་རིག་བྱེད་ནི་སེམས་གཡེངས་པ་དང་སེམས་མེད་པ་དག་ལ་མི་འབྱུང་སྟེ་རྒྱུན་ཆད་པའི་ཕྱིར་རོ། །རྗེས་འབྲེལ་གང་ཞེས་བྱ་བ་ནི་ལུས་ཀྱི་རྣམ་པར་རིག་བྱེད་ལས་ཁྱད་པར་དུ་བྱེད་པའོ། །གལ་ཏེ་རྣམ་པར་རིག་བྱེད་ཀྱང་རྗེས་སུ་འབྲེལ་བ་མ་ཡིན་ནམ་ཞེ་ན། རྣམ་པར་རིག་བྱེད་ལོག་ཀྱང་རྣམ་པར་རིག་བྱེད་མ་ཡིན་པ་མི་ལྡོག་པའི་ཕྱིར་འདིར་མཆོག་ཏུ་གྱུར་པར་ཤེས་པར་བྱའོ། །ཡང་ན་རྗེས་འབྲེལ་ཉིད་ངེས་པར་བཟུང་བའི་ཕྱིར་རྣམ་པར་རིག་བྱེད་དུ་ཐལ་བ་མེད་དེ། རྣམ་པར་རིག་བྱེད་ནི་དེའི་སྐད་ཅིག་ལ་ཡང་ཡོད་དོ། །དགེ་དང་མི་དགེ་ཞེས་བྱ་བ་ནི་མིག་ལ་སོགས་པའི་རྒྱུན་ལས་ཁྱད་པར་དུ་བྱེད་པའོ། །འབྱུང་བ་ཆེ་རྣམས་རྒྱུར་བྱས་པ། །ཞེས་བྱ་བ་ནི་ཐོབ་པའི་རྒྱུན་ལས་ཁྱད་པར་དུ་བྱ་བའི་ཕྱིར་རོ། །བསྟན་བཅོས་ལས་སེམས་གཡེངས་པ་ཉོན་མོངས་པ་ཅན་གྱི་སེམས་སུ་བཤད་པས་དེའི་ཕྱིར་དེ་ལས་གཞན་བའི་སེམས་ཀྱི་ཡང་ཡིན་པའོ་ཞེས་བྱ་བ་གསུངས་ཏེ། འདིར་དེའི་སྒྲ་ཡིས་ནི་ཀུན་ནས་སློང་པའི་སེམས་ཤིག་བརྗོད་པར་འདོད་ལ། དེ་ལས་གཞན་པ་ནི་དེ་སློང་པར་བྱེད་པའི་སེམས་དང་མི་འདྲ་བའི་ཕྱིར་དགེ་བ་དང་མི་དགེ་བ་དང་ལུང་དུ་མ་བསྟན་པ་ཡང་རུང་སྟེ། རྗེས་སུ་འཇུག་པར་བྱེད་པ་གཡེངས་པ་ཐམས་ཅད་ལ་བརྗོད་ཀྱི་ཉོན་མོངས་པ་ཅན་ཁོ་ན་ནི་མ་ཡིན་ནོ། །གཉིད་དང་བརྒྱལ་བ་སེམས་མེད་པར་ཁས་མ་བླངས་པའི་ཕྱིར་དང༌། འདུ་ཤེས་མེད་པ་ལ་རྣམ་པར་རིག་བྱེད་མ་ཡིན་པ་མེད་པའི་ཕྱིར་འདུ་ཤེས་མེད་པ་དང་འགོག་པའི་སྙོམས་པར་འཇུག་པ་ལ་སྙོམས་པར་ཞུགས་པའི་ཡང་ཡིན་པའོ་ཞེས་གསུངས་ཏེ། སེམས་མེད་པ་ནི་སྙོམས་པར་འཇུག་པ་གཉིས་ཁོ་ན་ཡིན་ནོ་ཞེས་སྟོན་པར་བྱེད་དོ། །ཡང་ཞེས་བྱ་བའི་སྒྲས་ནི་ཞེས་བྱ་བ་ནི་ཡང་གི་སྒྲ་གང་ཞིག་ཚིག་ལེའུར་བྱས་པ་ལས། གཡེངས་དང་སེམས་མེད་པ་ཡི་ཡང༌། །ཞེས་བྱ་བ་སྟེ་མ་གཡེངས་པ་སེམས་དང་བཅས་པའི་ཡང་ཡིན་ནོ་ཞེས་བྱ་བའོ། །འདིར་ཡང་སེམས་དང་བཅས་པ་སྨོས་པ་ནི་འདིའི་སེམས་གཡེངས་པ་མེད་པས་མི་གཡེངས་པ་ཞེས་བྱ་བ་ཡིན་ན་སེམས་མེད་
པ་ལ་ཡང་ཐལ་བར་འགྱུར་བའི་ཕྱིར་དེ་དགག་པའི་དོན་དུ་གཉི་གའོ། །ཇི་ལྟར་ཡང་སེམས་མི་གཡེང་བ་ནི་སེམས་གཡེང་བ་དགག་པའི་ཕྱིར་དང་མི་གཡེང་བ་མངོན་དུ་གྱུར་པའི་ཕྱིར་རོ། །ཡང་ན་སེམས་དང་བཅས་པའི་གནས་སྐབས་རྣམ་པ་གཉིས་ཏེ། གཡེངས་པའི་སེམས་དང་བཅས་པའི་གནས་སྐབས་དང༌། མ་གཡེངས་པའི་སེམས་དང་བཅས་པའི་གནས་སྐབས་སོ། །དེ་ལ་གཡེངས་པ་སེམས་དང་བཅས་པའི་གནས་སྐབས་ནི་དངོས་སུ་བསྟན་ལ། མ་གཡེངས་པ་སེམས་དང་བཅས་པའི་གནས་སྐབས་ནི་ཡང་གི་སྒྲས་སོ། །དེ་ལྟར་ན། གཡེངས་དང་སེམས་མེད་པ་ཡ་ཡང༌། །ཞེས་པ་འདིས་གནས་སྐབས་གསུམ་བསྟན་པར་འགྱུར་རོ། །ཡང་ན་འདིར་མི་གཡེང་བ་ནི་རྣམ་པར་རིག་བྱེད་ཀྱིས་ཀུན་ནས་སློང་པ་པའི་སེམས་དང་བཅས་པ་དང་མཉམ་པར་གཞག་པའི་སེམས་དང་མཉམ་པར་གཞག་པ་དང་མཉམ་པར་མ་བཞག་པའི་རྣམ་པར་རིག་བྱེད་མ་ཡིན་པའི་ཀུན་སློང་གི་སེམས་བསྟན་པ་ཡིན་ནོ། །ཇི་སྐད་དུ། རྣམ་པར་རིག་བྱེད་དང་ཏིང་ངེ་འཛིན་ལས་བྱུང་བའི་ཞེས་རྒྱ་ཆེར་འབྱུང་ངོ༌། །རྗེས་སུ་འབྲེལ་པ་གསུངས་པའི་ཕྱིར་ཀུན་སློང་གི་ཆར་གྱུར་པའི་སེམས་ཀྱི་གནས་སྐབས་མི་གཡེང་བ་ཞེས་བྱ་བར་གཟུང་བར་བྱའོ་ཞེས་སློབ་དཔོན་འཕགས་པའི་འབངས་ཟེར་རོ། །སྐད་ཅིག་མ་ལས་གཞན་པའི་རྗེས་སུ་འབྲེལ་པའི་རྒྱུན་མེད་དོ། །གལ་ཏེ་སྐད་ཅིག་མ་དང་པོ་ལ་རྒྱུན་མེད་པ་དེ་ཡང་རྣམ་པར་རིག་བྱེད་ཀྱི་སྐད་ཅིག་མེད་པའི་ཕྱིར། ནྻཱུ་ནཽ་རྣམ་པར་རིག་བྱེད་མ་ཡིན་པའི་སྐད་ཅིག་ན་ནུ་ཙོ་ཀྟ་མཱ་དྱ་ཨེ་བ་ན་བྷ་གཱི་ཏི། དེ་ལྟར་འོ་ན་གཉིས་པ་ལ་སོགས་པ་ཡང་སོ་སོར་རྒྱུན་གྱིས་རྗེས་སུ་འབྲེལ་བ་མེད་པའི་ཕྱིར་རྣམ་པར་རིག་བྱེད་མེ་ཡིན་པ་མེད་དོ་ཞེ་ན། དང་པོ་ཡང་སྐད་ཅིག་ཕྱི་མ་ལ་བལྟོས་ནས་རྗེས་སུ་འབྲེལ་པའི་ཕྱིར་རོ། །དེ་འབའ་ཞིག་མ་ཡིན་གྱི་དེའི་ཀུན་སློང་ཡང་བརྗོད་པར་བྱའོ། །དེ་དང་འདྲ་བ་ཉིད་ན་དེའི་ཕྱིར་རྗེས་འབྲེལ་བ་ཞེས་བརྗོད་ཅེ་ན། རྣམ་པར་རིག་བྱེད་ཀྱི་གནས་སུ་གྱུར་པ་འགགས་ཀྱང་མ་བཏང་གི་བར་དུ་རྗེས་སུ་འཇུག་པར་ཤེས་པར་བྱ་བོའི་ཕྱིར་རོ། །ཐོབ་པའི་རྒྱུན་ཡང་ཞེས་བྱ་བ་ལ་སོགས་པ་ལ། ཐོབ་པ་རྣམས་ནི་མི་ལྡན་པ་ཡིན་པའི་ཕྱིར་འབྱུང་བ་ཆེན་པོ་རྣམས་རྒྱུར་བྱས་པ་མ་ཡིན་ནོ། །རྒྱུར་བྱས་པའི་དོན་ནི་རྒྱུའི་
དོན་ཏེ་ཞེས་བྱ་བ་ལ་ཕྲད་ནས་རྣམ་པར་ཤེས་པ་སྐྱེད་པ་ལ་སོགས་པའི་རྒྱུའི་ངོ་བོ་ཡིན་པའི་ཕྱིར་ཞེས་བརྗོད་དེ། སྐྱེད་པ་དང་རྟེན་པ་དང་གནས་པ་དང་རྟོན་པ་དང་འཕེལ་བར་བྱེད་པས་སོ། །དེ་ལ་སྐྱེད་པ་ནི་རང་གི་གནས་འབྱུང་བ་ཆེན་པོ་རྣམས་རྒྱུར་བྱས་ནས་དེ་བསྐྱེད་པའོ། །རྟེན་པ་ནི་དེ་རྗེས་སུ་སྒྲུབ་པ་སྟེ། གནས་ཀྱི་བདག་ཉིད་ཀྱི་ལུས་འབྱུང་བ་ཆེན་པོ་རྒྱུ་བྱས་པ་དང་མཐུན་པར་འཇུག་པ། ཤྩཀྲ་སྱེ་བ་སཾ་བ་རི་བརྟ་མཱ་ན་བྱ་བྷོ་མཽ་སའི་ཕྱོགས་སུ་ལུས་ཀྱི་འབྱུང་བ་ཆེན་པོ་རྣམས་རྣམ་པར་རིག་བྱེད་མ་ཡིན་པ་དང་མཐུན་པར་འཇུག་པའི་རྒྱུར་འགྱུར་བའོ། །གནས་པ་ནི་ལུས་ཀྱི་འབྱུང་བ་ཆེན་པོ་རྣམས་རྟེན་པའི་གནས་སྐབས་སོ། །རྟོན་པ་ནི་རྣམ་པར་གནོན་པས་ཉེ་བར་འཚེ་བའོ། །གཉི་ག་གསལ་བར་སྐྱེས་པ་ལ་རྟེན་གྱི་རྣམ་འགྱུར་ནི་ཏ་དྭི་ནི་བྲི་ཏྟོ་ཏཿ་འཕེལ་བ་ནི་ལུས་ཀྱི་འབྱུང་བ་ཆེན་པོ་རྣམས་གཞན་འདོད་པའི་རྒྱུ་མེད་པར་རྒྱུན་རབ་ཏུ་འབྲེལ་བར་བྱེད་པའི་ཕྱིར་རོ། །གཟུགས་དང་བྱེད་པའི་རང་བཞིན་ཡིན་ཡང་ཞེས་བྱ་བ་ལ་གཟུགས་སྨོས་པ་ནི་སེམས་པ་ལས་ཁྱད་པར་དུ་བྱ་བའི་ཕྱིར་རོ། །བྱེད་པ་སྨོས་པ་ནི་མིག་ལ་སོགས་པ་ལས་ཁྱད་པར་དུ་བྱ་བའི་ཕྱིར་རོ། །དེའི་ཕྱིར་དེ་ལྟ་ན་ནའི་སྒྲ་ལ་འདི་ཤེས་རབ་བྱས་པར་འགྱུར་རོ། །རྣམ་པར་རིག་བྱེད་མ་ཡིན་པ་ནི་རྣམ་པར་རིག་བྱེད་བཀག་པ་ཙམ་མ་ཡིན་ལ། གཟུགས་ཟང་གཅིག་རྣམ་པར་རིག་བྱེད་ལས་གཞན་པ་ཡང་མ་ཡིན་ནོ། །འོ་ན་ཅི་ཞེ་ན་གཟུགས་དང་བྱེད་པའི་རང་བཞིན་ཡིན་པའི་ཕྱིར་རྣམ་པར་རིག་བྱེད་དང་འདྲ་བའི་གཟུགས་གཞན་ཞིག་ཀུན་ནས་སློང་བར་བྱེད་པའི་སེམས་དང་སེམས་ལས་བྱུང་བ་རྣམས་ལྷག་པར་རིག་པར་མི་བྱེད་པའི་ཕྱིར་རྣམ་པར་རིག་བྱེད་མ་ཡིན་པ་ཞེས་བརྗོད་དེ་འདྲ་བའི་དབང་དུ་བྱས་ནས་གཞན་ལ་ཡང་ངག་གི་ཚིག་རིགས་སོ། །དེ་བཞིན་དུ་གང་གི་ཕྱིར་གྱི་དོན་ཞེས་པ་ཡོངས་སུ་དྲི་བ་ཉིད་དོ། །ཡང་ནའི་སྒྲས་འདི་བ་གཞན་ཉིད་ལ་ཨ་ཡམ་བཱ་ར་ཞེས་གསལ་བར་བྱ་བའི་ཕྱིར་རོ། །ནའི་སྒྲ་ནི་དེའི་མིང་གི་རྒྱུ་ཤེས་པར་བྱེད་པའི་དོན་ཏོ། །བརྗོད་ཅེས་བྱ་བ་སློབ་དཔོན་གྱི་ཚིག་ཡིན་པར་སྟོན་པའོ་ཞེས་བྱ་བ་ནི་སྟོན་པའི་གསུང་མ་ཡིན་ནོ་སྙམ་དུ་དགོངས་པའོ། །ཡང་ན་དེ་སློབ་དཔོན་ཉིད་འབའ་ཞིག་གི་བརྗོད་ཀྱི་མངོན་སུམ་མམ་རྗེས་སུ་དཔག་པའི་སྒོ་ནས་མ་
ཡིན་པའོ། །མདོར་ན་རྣམ་པར་རིག་བྱེད་དང་ཏིང་ངེ་འཛིན་ལས་བྱུང་བ་ཞེས་རྒྱས་པར་འབྱུང་སྟེ། དེ་ལ་དགེ་བ་དང་མི་དགེ་བ་ཞེས་མ་བརྗོད་ན་ནི་རྣམ་པར་རིག་བྱེད་དང་ཏིང་ངེ་འཛིན་ལས་བྱུང་བའི་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་དག་ལ་ཡང་ཐལ་བར་འགྱུར་རོ། །རྣམ་པར་རིག་བྱེད་དང་ཏིང་ངེ་འཛིན་ལས་བྱུང་བ་མ་བརྗོད་ན་ནི་རིག་བྱེད་ཀྱི་གཟུགས་ལ་ཡང་ཐལ་བར་འགྱུར་ཏེ་དེའི་ཕྱིར་གཉི་ག་སྨོས་སོ། །དེ་ལ་རྣམ་པར་རིག་བྱེད་ལས་སྐྱེས་པ་ནི་སྡོམ་པ་དང་སྡོམ་པ་མ་ཡིན་པའི་བདག་ཉིད་ཅན་དགེ་བ་དང་མི་དགེ་བའོ། །ཅིག་ཤོས་ཀྱང་འདོད་པ་དང་མི་འདོད་པའི་འབྲས་བུ་ཉིད་ཀྱིས་བདེ་བ་དང་མི་བདེ་བའི་ཕྱིར་རོ། །ཏིང་ངེ་འཛིན་ལས་བྱུང་བ་ནི་དགེ་བ་ཁོ་ན་སྟེ་བསམ་གཏན་དང་ཟག་མེད་ཀྱི་སྡོམ་པ་དག་གོ །ཏིང་ངེ་འཛིན་ནི་གཅིག་ཏུ་འདོད་པའི་འབྲས་བུ་ཉིད་ཀྱི་ཕྱིར་ཞེས་སོ། །འདི་ནི་རྣམ་པར་རིག་བྱེད་མ་ཡིན་པ་མཐའ་དག་གི་མཚན་ཉིད་ཝཱ་སྱཱ་ཏ་བྱ་སྟ་བཱ། དོ་ལ་རེ་ཞིག་མཐའ་དག་ལ་རུང་བ་མ་ཡིན་ཏེ་རྣམ་པར་རིག་བྱེད་ཀྱི་རྫས་གཅིག་འདིས་མཐའ་དག་མཚོན་བ་མ་ཡིན་ན་ནི་མི་བྱ་སྟེ་མཚན་གཞི་ལ་འཁྲུལ་བའི་ཕྱིར་རོ། །མི་གཡེངས་པ་སེམས་དང་བཅས་པ་གང་ཡིན་པ་རྒྱུར་བྱས་པའི་གཟུགས་ཀྱི་བདག་ཉིད་རྣམ་བར་རིག་བྱེད་མ་ཡིན་པའི་རྫས་དགེ་བ་དེ་ཉིད་གཡེངས་དང་སེམས་མེད་པ་ཡང་རུང་དེ་ཉིད་མ་ཡིན་ནོ། །དགེ་བ་ཞེས་བྱ་བ་ཡོད་ཀྱང་རྣམ་པར་རིག་བྱེད་མ་ཡིན་པའི་གཟུགས་ཀྱི་མཚན་ཉིད་གཞི་མ་ཡིན་ཞིང་འདི་མཚན་ཉིད་དུ་མི་རུང་ངོ༌། །དབྱེ་བའི་མཚན་ཉིད་དུ་ནི་འགལ་བ་མེད་དོ། །དེ་ནི་དེ་ལས་གཞན་དུ་ཡང་འཇུག་སྟེ། ནིརྫྙཱ་ཏ་མིག་གི་རྣམ་པར་ཤེས་པའི་རྟེན་གཟུགས་དང་བ་དང་མིག་གི་མཚན་ཉིད་དང་རྣམ་པར་སྨིན་པ་ལས་སྐྱེས་པ་དང༌། རྒྱས་པ་ལས་འབྱུང་བ་དང་སྐལ་བ་མཉམ་པ་དང་འདྲ་བ་ལ་སོགས་པའི་མཚན་ཉིད་བཞིན་ནོ། །སློབ་དཔོན་འདུས་བཟང་ན་རེ། འདི་ནི་རྣམ་པར་རིག་བྱེད་མ་ཡིན་པའི་མཚན་ཉིད་སྐྱོན་མེད་པ་མ་ཡིན་ཏེ། སྐད་ཅིག་མ་དང་པོ་ནི་རྒྱུན་ཅེས་བྱ་བ་མི་རུང་ངོ༌། །དེ་ལྟ་བས་ན་མཚན་ཉིད་འདིར་བསྡུས་པ་མེད་པས་མ་ཚང་བ་ཡིན་ནོ། །རྒྱུན་ཡང་རྗེས་སུ་མེད་པའི་ཕྱིར་རྣམ་པར་རིག་བྱེད་མ་ཡིན་བ་རྗེས་སུ་མེད་པར་འགྱུར་རོ། །མཉམ་པར་གཞག་
པའི་ནི་གཡེངས་པ་དང་སེམས་མེད་པའི་རྗེས་སུ་འབྲེལ་བ་མེད་པས་དེ་རྣམ་པར་རིག་བྱེད་མ་ཡིན་པར་ཐལ་བར་འགྱུར་བའི་ཕྱིར་ཉམས་པ་ཡིན་ནོ། །གལ་ཏེ་མ་གཡེངས་པ་དང་སེམས་དང་བཅས་པའི་རྗེས་སུ་འབྲེལ་བའི་ཕྱིར་འདི་ནི་ཉེས་པ་མེད་དོ་ཞེ་ན། དགེ་བ་དང་མི་དགེ་བ་ཡང་རྣམ་པར་རིག་བྱེད་མ་ཡིན་པའི་མཚན་ཉིད་དུ་ཐལ་བར་འགྱུར་རོ། །གོང་མ་ཁོ་ནས་མཆོག་པའི་ཕྱིར་སེམས་མེད་པའི་པང་ཞེས་བྱ་བའི་སྒྲ་དོན་མེད་པར་འགྱུར་ཏེ། སེམས་གཡེངས་པའི་ཡང་ཞེས་བྱ་འདིས་སེམས་དང་བཅས་པའི་གནས་སྐབས་ཐམས་ཅད་བསྡུས་ཟིན་ན་གང་ཡང་ཞེས་བྱ་བའི་སྒྲ་གཉིས་པས་བསྡུ་བར་བྱ་བའི་གནས་སྐབས་གཞན་ཅི་ཞིག་ཡོད། སེམས་མེད་པའི་དབང་དུ་བྱས་ཏེ་དགེ་བའི་རྣམ་པར་རིག་བྱེད་མ་ཡིན་པའི་རྗེས་སུ་འབྲེལ་པ་ཁྱད་པར་དུ་བྱ་དགོས་པ་ལས་མཚང་བ་དང་བསྟན་བཅོས་ཀྱི་ལུས་ཉམས་པར་ཐལ་བར་འགྱུར་རོ། །ཡང་གི་སྒྲ་ལྷག་པར་བརྗོད་པས་ཁྱད་པར་དུ་བྱ་བ་ཁྱད་པར་དུ་མ་བྱས་པ་ཡང་ངོ༌། །དེ་ལ་སོ་སོར་ནི་ཐམས་ཅད་ལ་ཡང་རྣམ་པར་རིག་བྱེད་མ་ཡིན་པའི་མཚན་ཉིད་ལས་རྒྱུན་མ་ཡིན་པ་དང་དང་པོ་འབའ་ཞིག་བ་མ་ཡིན་པ་ཉིད་མཚན་ཉིད་དེ་རྒྱུན་སྨོས་པ་ལ་ཡང་དེའི་ཡན་ལག་ཐམས་ཅད་ཕན་སྟོན་པའི་ཕྱིར་ཏེ། དཔེར་ན་བུམ་པའི་སྒྲས་གཟུགས་ལ་སོགས་པ་སྨོས་པ་བཞིན་ནོ། །དེའི་ཕྱིར་མ་ཚང་བ་མེད་པ་ཉིད་དོ། །རྫས་སུ་ཡོད་པ་མ་ཡིན་པ་ལ་ཡང་རྣམ་པར་རིག་བྱེད་མ་ཡིན་པ་མེད་དེ། རྒྱུན་སྨོས་པས་དེའི་ཡན་ལག་བཟུང་བས་རྣམ་པར་རིག་བྱེད་ལ་ཡང་ཐལ་བར་འགྱུར་རོ། །གང་གི་ཕྱིར་དེའི་སྐད་ཅིག་ཉེ་བར་གནས་པ་སེམས་མེད་པ་ལ་ཡང་ངེས་པ་དེའི་ཕྱིར་བརྗོད་པར་བྱའོ་ཞེས་པ་ནི་སེམས་མེད་པ་ལ་ཡང་དགེ་བ་དང་མི་དགེ་བ་ངེས་པར་གཟུང་བའི་ཕྱིར་ཐལ་བ་མེད་དོ། །ཡང་གི་སྒྲ་ལྷག་པར་བརྗོད་པ་ཡང་མེད་པ་ཉིད་དོ། །ཇི་སྐད་བཤད་པ་སྔར་ཁྱད་པར་དུ་བྱ་དགོས་པ་ཡང་འདིར་ཁྱད་པར་དུ་བྱས་པ་ཉིད་དེ། དགེ་བ་དང་མི་དགེ་བ་དག་གི་རྣམ་པར་རིག་བྱེད་མ་ཡིན་པའི་གཟུགས་དག་གི་ཇི་ལྟར་སྲིད་བའི་ངག་ཡོངས་སུ་རྫོགས་པ་ལ་མཚན་ཉིད་འདི་སྐྱོན་དང་བཅས་པའོ་ཞེས་ཟེར་བ་ནི་མ་ཡིན་པ་ཉིད་དོ། །གཞན་དུ་དེའི་མཚན་ཉིད་བཤད་པ་བྱས་པ་དང་མི་འདྲ་བའི་སེམས་ལའང་སེམས་མེད་པ་ལ་
གང། །ལུང་བསྟན་ཐོགས་པ་མེད་པའི་གཟུགས། །དེ་ནི་རྣམ་པར་རིག་བྱེད་མིན་འདོད། །བྱས་པ་དང་ཡང་ཞེས་པ་ནི་བྱེད་པ་དང་བྱ་བ་གཞན་ཡང་ངོ༌། །མི་འདྲ་བའི་སེམས་ལའང་ཞེས་པ་ནི་ཀུན་སློང་དུ་གྱུར་བའི་འདྲ་བའི་སེམས་ལ་ཡང་ངོ༌། །ལྷག་མ་གོ་སླ་བ་ཉིད་དོ། །འདི་མཐའ་དག་གི་བྱ་སྟཾ་པཱ། མཚན་ཉིད་དུ་ཡོངས་སུ་རྟོག་ན་ཡང་དེ་ལ་རེ་ཞིག་མཐའ་དག་གི་མ་ཡིན་ཏེ། ཐམས་ཅད་ཀྱི་རེ་རེ་རྣམ་པར་རིག་བྱེད་མ་ཡིན་པའི་རྫས་ཀྱི་མཚན་ཉིད་ཀྱི་ཕྱིར་རོ། །ནཱ་པི་བྱ་སྟཾ་ཐམས་ཅད་ལ་མཚོན་དུ་མེད་པའི་ཕྱིར་རོ། །དེའི་ཕྱིར་ལུང་བསྟན་ཐོགས་པ་མེད་པའི་གཟུགས་ཞེས་པ་དེ་ཁོ་ན་འདིའི་མཚན་ཉིད་ཡིན་གྱི་ལྷག་མ་ནི་དོན་མེད་པ་ཉིད་དོ། །ཡང་ན་ཐོགས་པ་མེད་པའི་གཟུགས་ཞེས་ཨ་སྡུ་ལུང་བསྟན་བསྟན་པ་སྨོས་པ་ཡང་དོན་མེད་པ་ཅན་ནོ། །འདིར་ཡང་རྒྱུན་ཉིད་དེའི་མཚན་ཉིད་ཡིན་གྱི་རྫས་ནི་མ་ཡིན་ནོ། །ཨ་ཏ་སྨིནྦཱ་ཏ་ཏ་པྲ་ཡོ་ག་ཨི་ཏང་ཧུ་བྲ་ཀ་ར་བི་ཤྲཱི་ཎཱི་ཏ་ཤཱ་ཀ་ཐེ་ཏི། སྤྲོས་པས་ཆོག་གོ །སྐབས་སུ་གསལ་ཉིད་བརྩམ་པར་བྱ་སྟེ། འབྱུང་བ་དག་ནི་ས་ཁམས་དང༌། །ཞེས་བྱ་བ་ལ་སོགས་པ་ལ། དང་པོ་དང་མཐར་ཁམས་སྨོས་པ་ནི་བར་དུ་ཡང་ཤེས་པར་བྱ་བའི་ཕྱིར་རོ། །ཁམས་སྨོས་པ་ནི་ཁ་དོག་དང་དབྱིབས་ཀྱི་བདག་ཉིད་ཀྱིས་ལ་སོགས་པ་བསལ་བའི་ཕྱིར་ཏེ། གཞན་དུ་བཤད་ན་ནི་དེ་དག་ལ་ཡང་ཐལ་བར་འགྱུར་རོ། །ས་ཉིད་ཁམས་ཡིན་པ་ནི་སའི་ཁམས་ཏེ་ལྷག་མ་ལ་ཡང་དེ་སྐད་དུ་བརྗོད་པར་བྱའོ། །གཞན་དག་ནི་སའི་ཁམས་ནི་སའི་ཁམས་སོ་ཞེས་འཆད་དོ། །དེ་ལྟ་ན་ནི་ཐམས་ཅད་རྒྱུར་བྱས་པའི་གཟུགས་འཛིན་པའི་ཕྱིར་ཁམས་ཉིད་དུ་འགྱུར་རོ། །རང་གི་མཚན་ཉིད་དང་རྒྱུར་བྱས་པའི་གཟུགས་འཛིན་བའི་ཕྱིར་ཁམས་དག་གོ་ཞེས་བྱ་བ་ནི་ངེས་པའི་ཚིག་གི་ཚུལ་གྱིས་ཏེ། རང་གི་མཚན་ཉིད་ནི་སྲ་བ་དང་གཤེར་བ་ལ་སོགས་པའོ། །རྒྱུར་བྱས་པའི་གཟུགས་ནི་འབྱུང་བ་དག་ལས་གཞན་པའི་གཟུགས་ཐམས་ཅད་དོ། །གཞན་དག་ནི་གཟུགས་ཐམས་ཅད་ཀྱི་འབྱུང་གནས་ཡིན་པའི་ཕྱིར་ཁམས་རྣམས་སོ་ཞེས་སོ། །འབྱུང་བ་རྣམས་ཀྱང་འབྱུང་བ་རྣམས་ཀྱི་གནས་ཡིན་ཏེ་སྐལ་བ་མཉམ་པའི་རྒྱུ་ཡིན་པའི་ཕྱིར་རོ། །འཇིག་རྟེན་ན་ཡང་འབྱུང་གནས་དག་ལ་ཁམས་ཀྱི་མིང་འདོགས་པའོ། །འདིར་ནི་ས་ལ་སོགས་པ་སོ་སོ་རྣམས་ལ་རིགས་ཀྱི་དོན་མེད་
བཞིན་ནོ། །ཁམས་བཅོ་བརྒྱད་ཀྱི་གནས་སྐབས་སུ་ནི་ཐམས་ཅད་རེག་བྱའི་ཁམས་ཏེ་རིགས་ཀྱི་དོན་རྒྱུའི་དོན་དུ་དགོངས་པའོ། །འདིར་ནི་ས་ལ་སོགས་པ་སོ་སོ་རྣམས་ལ་རིགས་ཀྱི་དོན་མེད་དོ་ཞེས་གཞན་དག་སྟེ། འབྱུང་བ་སོ་ས་རྣམས་ཀྱི་རིགས་ཀྱི་དོན་ཀྱང་ཁམས་ཀྱི་སྒྲ་ལ་འགལ་བ་མེད་དོ། །འབྱུང་བ་ཆེན་པོ་བཞི་རྣམས་ཞེས་བྱ་བ་ལ། ཡང་ཇི་ལྟར་འདི་དག་ཆེན་པོ་ཉིད་དང་འབྱུང་བ་ཉིད་དང་གཞི་ཉིད་ཡིན་ཞེ་ན། འདི་དག་གཟུགས་གཞན་ཐམས་ཅད་ཀྱི་རྟེན་ཉིད་དང་རགས་པའི་ཕྱིར་ཆེན་པོ་ཉིད་དོ་ཞེས་བྱ་བ་ལ། གང་ཞིག་འབྱུང་བ་དག་ལས་གཞན་པའི་གཟུགས་དེའི་རྟེན་ཉིད་དང་རགས་པའི་ཕྱིར་ཏེ། གཏོས་ཆེ་བའི་ཕྱིར་རོ་ཞེས་བྱ་བའི་ཐ་ཚིག་གོ །ཡང་ན་འབྱུང་བ་དེ་དག་གི་ཤས་ཆེ་བ་གང་དག་ལ་ཡོད་བས་སལ་སོགས་པའི་ཕུང་པོ་དེ་དག་ནི་དེ་དག་གི་བྱ་བ་ཤས་ཆེ་བ་དག་གོ །བྱ་བ་ནི་འཛིན་པ་ལ་སོགས་པའི་ལས་སོ། །ཤས་ཆེ་བ་ཉིད་ནི་མཚན་ཉིད་རྒྱས་པ་ལས་དེ་དག་མངོན་པར་གསལ་བའོ། །ས་ལ་སོགས་པའི་ཕུང་པོ་དག་ནི་ཁ་དོག་དང་དབྱིབས་ཀྱི་བདག་ཉིད་ཅན་དག་གོ །ཆེན་པོར་གནས་པ་ཉིད་ནི་རྒྱ་ཆེན་པོར་གནས་པ་ཉིད་དོ། །གཟུགས་ལ་སོགས་པའི་ཚོགས་ཐམས་ཅད་ལ་སྲ་བ་ལ་སོགས་ལ་ཡོད་པས་ན་དེ་དག་ནི་ཆེན་པོ་ཉིད་དོ་ཞེས་སློབ་དཔོན་འདུས་བཟང་ཟེར་རོ། །དེ་ལྟར་ཕྱི་རོལ་ཏུ་བཤད་པའི་ཚོགས་པ་ལ་གཟུགས་ལ་སོགས་པ་དང་མ་བཤད་པ་ལ་རོ་ལ་སོགས་པ་དང་ཐམས་ཅད་དུ་གཟུགས་ཀྱི་ཁམས་ནི་དྲི་དང་རོ་དང་མེད་དོ། །སྔོན་པོ་ལ་སོགས་པ་རྣམས་ཀྱང་དེ་དག་ཚོགས་པ་རྣམས་ལ་ཕན་ཚུན་མེད་པ་དེ་ལྟར་སྲ་བ་ལ་སོགས་རྣམས་ལ་འགར་ཡང་མེད་པ་མ་ཡིན་ནོ། །དེ་ལྟར་རེ་ཞིག་ཆེན་པོ་ཉིད་ཡིན་ནོ། །འབྱུང་བ་ཉིད་ནི་གཟུགས་རྣམ་པ་སྣ་ཚོགས་མངོན་པར་འགྲུབ་པ་འདེ་དང་དེ་དག་མི་རྣམས་པ་འབྱུང་བས་ན་འབྱུང་བ་དག་གོ །གཞན་དག་ན་རེ་འཁོར་བ་ཐོག་མ་མེད་པ་ནས་སེམས་ཅན་ཐམས་ཅད་ཀྱི་ལས་ཀྱི་དབང་གིས་ནམ་ཡང་མ་བྱུང་བ་བྱང་བས་ན་འབྱུང་བ་དག་གོ་ཞེས་ཟེར་རོ། །ཡང་ན་འབྱུང་བ་ཉིད་འབྱུང་བའི་དངོས་པོའི་ངོ་བོ་མཆེད་པར་བྱེད་བས་ན་འབྱུང་བ་སྟེ་དངོས་པོའི་ཡོད་པ་དང་སེམས་ཅན་གྱི་སྐྱེ་བ་རྒྱས་བར་བྱེད་ཅེས་བྱ་བའི་ཐ་ཚིག་གོ །ཡང་ཇི་ལྟར་འབྱུང་བ་ཆེན་པོ་དག་ནི་
བཞི་ཁོ་ན་ཡིན་གྱི་ནམ་མཁའ་ནི་མ་ཡིན་ཞེས་ཁོང་དུ་ཆུད་བར་བྱ་ཞེ་ན། ནམ་མཁའ་ནི་འབྱུང་བ་བཞིན་དུ་དངོས་པོ་རྣམས་ལ་ཕན་འདོགས་པ་དང་གནོད་པར་བྱེད་པའི་རྒྱུ་མཚན་མ་ཡིན་པས་འབྱུང་བ་དང་མཚན་ཉིད་མི་མཐུན་པའི་ཕྱིར་དང་གོ་སྐབས་འབྱེད་པའི་ཕྱིར་འབྱུང་བ་མ་ཡིན་ནོ། །འབྱུང་བ་རྣམས་ནི་དེ་ལ་ཡང་ཕན་འདོགས་པ་དང་གནོད་པས་འཇུག་གོ །གང་དུ་གཟུགས་ཚོགས་པ་དེ་ནས་ནམ་མཁའ་འགྲོ་བ་མེད་པས་གོ་སྐབས་འབྱེད་པ་མི་རུང་འོ་ཞེ་ན། དེ་སྒྲིབ་པ་མེད་པའི་ངོ་པོས་གནས་པས་ཐོགས་པ་མེད་པའི་ཕྱིར་རོ། །འདི་ལ་ཕན་འདོགས་པ་དང་གནོད་པ་བྱེད་པའི་འཇུག་པ་མེད་དོ། །དེས་ན་ཐོགས་པ་དང་བཅས་པ་རྣམས་ལ་གོ་སྐབས་འབྱེད་པས་བཏགས་པ་ཡོད་ལ། དེ་ལ་ནམ་མཁའི་ཁམས་སམ་ནམ་མཁའ་ཉིད་ཀྱིས་ཉེ་བར་བཏགས་སོ། །དེ་ལྟར་འབྲས་བུ་སྣ་ཚོགས་པ་མི་བྱེད་པའི་ཕྱིར་ནམ་མཁའ་བ་ཆེན་པོ་མ་ཡིན་ནོ། །ས་ལ་སོགས་པའི་འབྱུང་བ་དག་ནི་མིག་ལ་སོགས་པ་འབྲས་བུ་སྣ་ཚོགས་སུ་བྱེད་བར་མཐོང་ན་ནམ་མཁའ་ནི་རྟག་པ་གཅིག་པུ་ཡིན་ཞིང་སྣ་ཚོགས་པ་མ་ཡིན་ནོ། །རྟག་པ་དང་སྣ་ཚོགས་པ་མ་ཡིན་པ་ནི་རྒྱུ་ལས་འབྲས་བུ་སྣ་ཚོགས་པ་དང་མི་རྟག་པར་མི་རུང་ངོ༌། །དངོས་པོ་རྣམས་སྐྱེ་བ་དང་འཇིག་པའི་དུས་དག་ཏུ་ཁྱད་པར་མེད་པའི་ཕྱིར་ནམ་མཁའ་ནི་སལ་སོགས་པ་བཞིན་དུ་འབྱུང་བ་ཆེན་པོ་མ་ཡིན་ནོ། །ས་བོན་ལ་སོགས་པའི་གནས་སྐབས་ཀྱི་འབྱུང་བ་དག་ནི་རྣམ་པར་འགྱུར་བ་སྐྱེ་བ་ན་མྱུ་གུ་ལ་སོགས་པའི་གནས་སྐབས་ཀྱི་རྐྱེན་དག་ཏུ་མཐོང་ན་ནམ་མཁའ་ནི་དེ་ལྟར་རྣམ་བར་འགྱུར་བ་མ་ཡིན་ཏེ་རྟག་པའི་ཕྱིར་རོ། །གཞན་དག་ན་རེ་ནམ་མཁའ་ནི་ཆེན་པོ་ཡིན་གྱི་འབྱུང་བ་ནི་མ་ཡིན་ཏེ། འབྱུང་བ་ནི་སྐྱེས་པའི་རྣམ་གྲངས་ཡིན་པའི་ཕྱིར་རོ། །ཇི་སྐད་དུ་འབྱུང་བ་ཆེན་པོ་ཉིད་ཀྱིས་འཐད་པའི་ཕྱིར་དང་གང་ཡང་རུང་བཞི་མ་ཚང་ན་འབྱུང་བ་ལས་གྱུར་བ་སྐྱེད་པར་མི་ནུས་པའི་ཕྱིར་ལྷག་ཆད་མེད་པར་བཞི་ཉིད་ཁོ་ནའོ་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་ན་རེ་ནུས་པ་མེད་པ་དོན་མེད་པར་ཐལ་བའི་ཕྱིར་ཏེ་ཁྲིའུ་རྐང་པ་བཞི་པ་བཞིན་ནོ་ཞེས་སོ། །ཡང་ཁམས་དེ་དག་ཅེས་བྱ་བ་རྒྱས་པར་འབྱུང་བ་ལ་གལ་ཏེ་རང་གི་ངོ་བོ་ཙམ་ཞིག་བསྟན་
བར་བྱ་བ་ཡིན་བཞིན་དུ་ཅིའི་ཕྱིར་སའི་ཁས་ལ་སོགས་པའི་ལས་བརྗོད་ཅེ་ན། གཟུགས་ཀྱི་ཚོགས་པ་ཐམས་ཅད་མ་དེ་དག་གི་རང་བཞིན་མ་དམིགས་ཀྱང་ལས་དེ་ཡོད་པ་ཉིད་དུ་རྗེས་སུ་དཔག་པར་བྱ་བའི་ཕྱིར་ཏེ། དེ་ལྟར་དེ་དག་ཕན་ཚུན་ཐ་དད་པ་ཉིད་བཤད་པར་འགྱུར་རོ། །འདི་ལྟར་རྡོ་བ་ལ་སོགས་པ་རྣམས་ལ་སྡུད་པ་དང་འཕེལ་བ་དང་ལྟུང་བ་རྣམས་ལྡན་པས་སའི་ཁམས་ཆུ་དང་རླུང་དང་ལྷན་ཅིག་སྤྱོད་པར་ཤེས་པར་བྱའོ། །ཆུ་ལ་ཡང་གྲུ་འདེགས་པ་དང་པོ་མ་དང་འབྲས་བུ་སྨིན་པ་དང་དྲོ་བ་དང་གཡོ་བ་རྣམས་མཐོང་བས་ས་དང་རླུང་དང་མེ་རྣམས་ཆུའི་ཁམས་དང་ལྷན་ཅིག་དང་མེ་ལ་ཡང་བརྟན་པ་དང་གང་བུར་འདུག་པ་དང་གཡོ་མཐོང་བའི་ཕྱིར་ས་དང་ཆུ་དང་རླུང་རྣམས་མེ་དང་ལྷན་ཅིག་དང༌། རླུང་ལ་ཡང་འཛིན་པ་དང་གོས་ལ་སོགས་པ་སྐེམས་པ་དང་འཇུག་པ་རྣམ་པར་རྒྱུ་བ་མཐོང་བས་དང་མེ་དང་ཆུན་མ་རླུང་དང་ལྷན་ཅིག་སྤྱོད་པར་ཤེས་པར་བྱའོ། །ལས་དང་རང་བཞིན་ཁྱད་པར་ཅི་ཡོད་ཅེ་ན་བྱེད་པ་ལ་བལྟོས་པ་དང་དེ་བཞིན་དུ་ལས་ཀྱི་ཀུན་སྤྱོད་རྫས་འཛིན་པ་ལ་བལྟོས་པ་ན། དེ་ལྟར་ལས་ཀྱི་ཀུན་སྤྱོད་རྫས་འཛིན་པ་ལ་བལྟོས་པས་སའི་ཁམས་ལ་འཛིན་བའི་ལས་སུ་བརྗོད་པར་བྱའོ། །ཀུན་སྡུད་པ་ལ་བལྟོས་ཏེ་གཞན་ཀུན་སྡུད་པའི་ལས་བརྗོད་པ་ལ་བལྟོས་ནས་མ་དང་ལྡན་པའི་ལས་བརྗོད་པ་བྱའོ། །མེར་མེར་བོ་ནི་མྱུ་གུ་ལ་སོགས་པ་ཡ་བ་ལྟོས་ཏེ་གསོ་འཕེལ་བའི་ལས་སུ་བརྗོད་པར་བྱའོ། །གཞན་དག་ན་རེ་འབྱུང་བའི་མཚན་ཉིད་ལས་རྣམས་ནི་གསུམ་པ་དང་དུ་གཅིག་བ་ཉིད་ཡིན་ནོ་ཞེས་ཟེར་རོ། །རང་བཞིན་ནི་རང་གི་ངོ་བོ་ཉིད་དེ་དེ་ཡང་ཐམས་ཅད་དུ་དངོས་པོ་གཞན་ལ་བལྟོས་པའོ་ཞེས་པ་ནི་ཁྱད་པར་རོ། །རྒྱས་བར་བྱེད་བཞི་འཕེལ་བར་བྱེད་པ་དང་རྒྱས་བར་བྱེད་པ་ཡིན་ནོ། །འཕེལ་བ་ནི་མྱུ་གུ་ལ་སོགས་པ་རྣམས་སྟེང་དང་འོག་དང་ངོས་སུ་བ་ནི་ལ་སོགས་པ་དག་ལས་ཆེས་ལྷག་པར་སྐྱེ་བ་ཡིན་ལ། རྒྱས་པར་བྱེད་པ་ནི་ཤིང་ལྗོན་པ་ལ་སོགས་པ་རྣམས་བར་ཆད་མེད་པར་ཡུལ་གཞན་དག་ཏུ་སྐྱེ་བའོ། །སྲ་ག་ཤེར་དེ་ཉི་གཡོ་བ་རྣམས། །ཞེས་བྱ་བ་ལ། དངོས་པོའི་རྐྱེན་བཤད་པ་ནི་རྫས་ལས་དངོས་པོ་དོན་གཞན་མ་ཡིན་པ་ཉིད་དུ་ཤེས་བར་བྱ་བའི་ཕྱིར་ཏེ། དེ་ཉིད་ཀྱི་ཕྱིར་དྲོ་བ་
ཉིད་ནི་མེ་ཁམས་སོ་ཞེས་བཤད་དོ། །དངོས་པོ་རྣམས་ཀྱི་མཚན་ཉིད་ནི་རང་བཞིན་ཁོ་ན་ཡིན་ཏེ་མི་འཁྲུལ་བའི་ཕྱིར་རོ། །མཁྲང་བ་དང་འཐས་བ་ཞེས་བྱ་བའི་བར་དུ་བསྟན་པར་འགྱུར་རོ། །གཤེར་བ་ནི་ཆུའི་ཁམས་སོ་ཞེས་བྱ་བ་ལ། བརླན་པའི་བདག་ཉིད་ཅན་ཡིན་པའི་ཕྱིར་གཤེར་བའོ། །གཞན་དག་ཕྲག་ཉིད་དོ་ཞེས་ཟེར་རོ། །དྲོ་བ་ནི་སྲེག་པར་བྱེད་བ་ཞེས་བྱ་བའི་ཐ་ཚིག་གོ །འབྱུང་བ་སྨོས་པ་ནི་གཟུགས་ཅན་མ་ཡིན་པ་ནི་ཡུལ་ན་མི་གནས་བའི་ཕྱིར་རམ་ཡུལ་གཞན་དུ་སྐྱེད་པ་མི་སྲིད་པའི་ཕྱིར་རོ། །རྒྱུན་སྨོས་པ་ནི་སྐད་ཅིག་མ་གཅིག་ལ་ཡུལ་གཞན་དུ་སྐྱེ་བ་མེད་པའི་ཕྱིར་རོ། །སྒྲོན་མེ་གཡོ་བ་བཞིན་དུ་ཞེས་བྱ་བ་ལ། ཇི་ལྟར་སྒྲོན་མེ་སྐད་ཅིག་མ་ཡིན་པས་འགྲོ་བ་བཞིན་དུ་ཡུལ་གཞན་དུ་སྐྱེད་པ་རླུང་གིས་གཡོ་བར་བརྗོད་པ་དེ་བཞིན་དུ་གཞན་འབྱུང་བའི་རྒྱུན་ལ་ཡང་ཡིན་ནོ། །མདོ་སྡེ་དང་བསྟན་བཅོས་འགལ་བ་སྤང་བའི་ཕྱིར་རོ། །རབ་ཏུ་བྱེད་བ་དག་ཅེས་བྱ་བ་རྒྱས་བར་འབྱུང་བ་ལ། རབ་ཏུ་བྱེད་པ་དག་ལས་རླུང་གི་ཁམས་གང་ཞན། ཡང་ཞིང་གཡོ་བ་ཉིད་དོ་ཞེས་བསྟན་ལ། མདོ་སྡེ་ལས་ནི་རླུང་གི་ཁམས་ནི་ཡང་བ་ཉིད་དོ་ཞེས་བསྟན་ཏོ། །ཡང་བ་ཉིད་དེ་ནི་རླུང་གི་ཁམས་ཉིད་མ་ཡིན་ཏེ། འོ་ན་ཅི་ཞེན་རབ་ཏུ་བྱེད་པ་དག་ལས་ལྕི་བ་ཉིད་དང་ཡང་བ་ཉིད་དོ་ཞེས་བཤད་པ་རྒྱུར་བྱས་པའི་གཟུགས་གཞན་ཡང་ཡིན་ནོ། །དེའི་ཕྱིར་རླུང་གེ་ཁམས་གང་ཞེ་ན། ཡང་བ་ཉིད་དོ་ཞེས་བརྗོད་པ་ནི་རྒྱུར་བྱས་པའི་གཟུགས་ལ་ཡང་ཐལ་བར་འགྱུར་ན། གཡོ་བ་ཉིད་དོ་ཞེས་བརྗོད་ན་ལས་སུ་འགྱུར་བས་ན། གཡོ་བའི་རང་བཞིན་ཡིན་པས་རླུང་ལ་ཡང་བ་དང་གཡོ་བ་གཉི་ག་བརྗོད་དོ། །རང་བཞིན་གྱི་སྒྲ་ནི་འདིར་ལས་ལ་བལྟ་བར་བྱའི་རང་བཞིན་ལ་ནི་མ་ཡིན་ཏེ། དེའི་བྱ་བ་ནི་འབྱུང་བ་རྣམས་ཡུལ་གཞན་དུ་སྐྱེད་པའོ། །དེ་ཉིད་ཀྱི་ཕྱིར་འདིའི་རང་བཞིན་ལས་ཀྱིས་གསལ་བ་ཡིན་ནོ་ཞེས་རྣམ་པར་བཤད་དོ། །འདི་སྐད་བཤད་པར་འགྱུར་ཏེ། གཡོ་བའི་ལས་ཅན་གྱི་ཡང་བ་ནི་རླུང་གི་ཁམས་ཡིན་གྱི་ཐམས་ཅད་དུ་གཞན་ཡང་བ་མ་ཡིན་པ་ནི་རླུང་གི་ཁམས་ཀྱི་རང་བཞིན་མ་ཡིན་ནོ་ཞེས་སློབ་དཔོན་འདུས་བཟང་ཟེར་རོ། །།འོན་མདོ་སྡེ་དང་རབ་ཏུ་བྱེད་པར་གསུངས་པ་རླུང་གི་ཁམས་ཅི་ལྟར་ཞེ་ན། རྒྱུ་ལ་འབྲས་བུ་བཏགས་
པའི་ཕྱིར་རོ། །གལ་ཏེ་མེའི་ཁམས་ལ་ཡང་ཡང་བ་ཉིད་ཀྱི་རྒྱུ་ཡོད་ཀྱང་དེ་ནི་རླུང་གི་ཁམས་ལྟར་ཐམས་ཅད་དུ་ཡང་བ་མ་ཡིན་ལ། ཀཱ་ཤའི་མེ་ཏོག་ལ་སོགས་པའི་ཡང་བ་ཉིད་ལ་ཡང་གཞན་དུ་ན་མེའི་ཁམས་ལས་བྱུང་བའི་དྲོ་བ་དེར་དམིགས་སོ། །དེའི་ཕྱིར་ཡང་བ་ཐམས་ཅད་ཀྱི་རྒྱུ་ཉིད་ཀྱི་ཕྱིར་རླུང་གི་ཁམས་ལ་འདི་གདགས་པར་རིགས་སོ། །ས་ལ་སོགས་པ་རྣམས་ལ་ནི་དེའི་འབྲས་བུ་ལྕི་བ་ཉིད་ལ་སོགས་པ་རྣམས་དང་བུ་ཁ་ཏ་ར་པྲ་ཧྱ་ཏ་རེ་ཉིད་ཀྱི་ཕྱིར་དེའི་རང་བཞིན་གྱིས་ཞེས་པ་ཡང་བའི་ཁྱད་པར་རླུང་གི་ཁམས་ལ་ཀི་བཱརྨ་ཏེ། གང་ལ་རྒྱུ་ལ་འབྲས་བུ་བཏགས་པར་རྟག་པར་བྱེད། གཡོ་བ་ཞེས་པ་ཡང་ལས་ཀྱིས་འདི་བསྟན་གྱི་རང་བཞིན་གྱིས་ནི་མ་ཡིན་ཏེ། རང་བཞིན་ནི་གཞན་ལ་ལྟོས་པ་མེད་པའི་ཕྱིར་སྲ་བ་ལ་སོགས་པ་བཞིན་ནོ། །རབ་ཏུ་བྱེད་པར་ཡང་ཞིང་གཡོ་བ་ཉིད་ཅེས་གཉི་ག་བསྟན་པ་དོན་མེད་པ་མ་ཡིན་ནོ། །གཞན་དུ་ཡང་ངེས་པར་ཤེས་པ་ངོ་བོའི་རང་བཞིན་གྱིས་ཡང་བ་ཉིད་བསྟན་པ་ནི་རྒྱུ་ལ་འབྲས་བུ་བཏགས་པ་ཞེས་སྒྲུབ་བར་ནུས་ཏེ་གཞན་དུ་མ་ཡིན་ནོ། །དེ་ལྟར་ན་འདིར་མདོ་བྱེད་པ་ལ་རབ་ཏུ་སྡང་བས་རྣམ་པར་བཤད་པ་ལ་རྣམ་པར་རྟོག་པས་རྒྱུ་གཞན་ཚོལ་བར་བྱེད་པ་ཡང་དམིགས་སོ། །ས་ལ་སོགས་པ་དག་གིས་འབྱུང་བ་རྣམས་མ་བསྟན་པའི་ཕྱིར་ས་ལ་སོགས་པ་དག་འབྱུང་བ་རྣམས་ལས་གཞན་ཡིན་ནོ་ཞེས་དོན་གྱིས་སྨྲས་བར་འགྱུར་རོ། །དེའི་ཕྱིར་འདྲི་བ་ནི་ས་ལ་སོགས་པ་དང་ཞེས་རྒྱ་ཆེར་འབྱུང་བའོ། །ས་ནི་ཁ་དོག་དང་དབྱིབས་སོ་ཞེས་གལ་ཏེ་སའི་སྒྲས་ཚོགས་པ་བཟུང་ལ་དེ་ལ་དྲི་དང་རོ་དང་རེག་པ་ཡོད་ཀྱང་ཁ་དོས་དང་དབྱིབས་ཁོ་ན་ལས་ཞེས་བྱ་བའི་རྒྱུ་བརྗོད་པར་བྱའོ་ཞེ་ན། འཇིག་རྟེན་གྱི་ཐ་སྙད་དུ་ཞེས་བརྗོད་པ་མ་ཡིན་ནམ། འཇིག་རྟེན་ལས་གྲགས་པ་ནི་བཏགས་པར་ཡོད་པ་ཡིན་ལ། འཇིག་རྟེན་ན་ཡང་ས་སྟོན་པ་ན་ཁ་དོག་དང་དབྱིབས་སྟོན་པར་བྱེད་དོ། །འཇིག་རྟེན་ན་སྣམ་བུ་སྟོན་པ་ན་ཡང་དེ་ལྟ་ཡིན་ནམ་ཞེ་ན། ཡིན་ཏེ་རིང་བོ་འམ་དཀར་པོའོ་ཞེས་ཁ་དོག་དང་དབྱིབས་ཁོ་ན་སྟོན་པར་བྱེད་དོ། །ཡང་སྣམ་བུ་ནི་སྐྱེ་མཆེད་བཞིའི་བདག་ཉིད་དུ་འདོད་དེས་བསྣམ་པར་བྱའོ། །མྱང་བར་བྱའོ། །རེག་པར་བྱའོ་ཞེས་
དྲི་ལ་སོགས་པ་རྣམས་ཀྱིས་ཀྱང་འཇིག་རྟེན་ན་ས་ལ་ཉེ་བར་སྤྱོད་དོ། །ས་དང་ཆུ་དང་མེའི་ཁྱད་པར་ལས་ཁ་དོག་དང་དབྱིབས་དག་དངས་ལ་དྲི་ལ་སོགས་པ་ཡོད་ཀྱང་གཟུགས་ཀྱི་སྐྱེ་མཆེད་ཉིད་ཀྱིས་ཉེ་བར་སྤྱོད་དོ། །ཆུ་ལ་དྲི་མེད་ཀྱང་བསྣམ་པར་བྱའོ་ཞེས་དྲི་ཡིས་ཉེ་བར་སྤྱོད་དོ། །མེ་ལ་དྲི་དང་རོ་དག་མེད་ཀྱང་ཁམས་གཉིས་དང་ས་ལ་གཟུགས་ཀྱི་སྐྱེ་མཆེད་ཁྱད་པར་མེད་པའི་ཕྱིར་ཞེས་སློབ་དཔོན་འདུས་བཟང་ཟེར་རོ། །དེ་ལྟ་ན་འོ་ན་ཐམས་ཅད་དུ་ཁྱད་པར་མེད་པར་རེག་པ་ཡིས་ཀྱང་ཉེ་བར་སྤྱོད་པར་ཐལ་བར་འགྱུར་རོ། །འཇིག་རྟེན་ན་ནི་ཁ་དོག་དང་དབྱིབས་ལ་ས་སྟེ་བསྣམ་པར་བྱའོ་མྱང་བར་བྱའོ་རེག་པར་བའོ་ཞེས་སྟོན་པར་བྱེད་ཀྱི་དྲི་ལ་སོགས་པ་རྣམས་ནི་མ་ཡིན་ཏེ་གཟུགས་ཀྱི་སྐྱེ་མཆེད་བཞིན་ནོ། །འཇིག་རྟེན་གྱི་ཐ་སྙད་ཀྱིས་ས་ཉིད་དུ་ཁས་བླངས་ནས་དེ་ལྟར་བཤད་དེ། འཇིག་རྟེན་གྱི་ཐ་སྙད་ལ་ལྟོས་ནས་ཞེས་བྱ་བའི་ཐ་ཚིག་གོ །དེ་བཞིན་དུ་རྣམ་པར་དཔྱད་མི་ལང་པ་ཉིད་ཀྱིས་འཇིག་རྟེན་གྱི་གདགས་པ་ལ་ངེས་པ་ཡོད་པ་མ་ཡིན་ཞེས་བྱའོ། །ཆོས་མངོན་པ་དག་གིས་འདིར་ས་དང་སྣམ་བུ་དག་གིས་བསྟན་པས་དེའི་ཕྱིར་དྲི་ལ་སོགས་པ་རྣམས་ཀྱིས་ཀྱང་ས་ཉེ་བར་སྤྱོད་པ་སྐྱོན་མེད་དོ། །གང་ཁ་དོག་དང་དབྱིབས་དག་གིས་སྟོན་པར་བྱེད་པ་དེ་དག་ལ་སླར་འདི་སྐད་བཤད་དོ། །འཇིག་རྟེན་པ་ཐམས་ཅད་ལ་བཏགས་པ་གཅིག་ཏུ་མཚུངས་པ་ནི་མེད་དོ། །སྣམ་བུ་ནི་སྐྱེ་མཆེད་བཞིའི་བདག་ཉིད་དུ་ཡོངས་སུ་བཟུང་བས་ཐམས་ཅད་ཚོགས་པ་ལ་ཇི་ལྟར་རིགས་པར་བསྟན་པ་བྱས་བར་འགྱུར་རོ་ཞེས་སློབ་དཔོན་འདུས་བཟང་ཟེར་རོ། །གང་གི་ཚེ་ཁ་དོག་དང་དབྱིབས་ལས་ཞེས་པ་དེ་བཞིན་དུ་ཆུ་མེ་ཡང་ངོ༌། །ཆུ་རྣམས་ལ་རེ་ཞིག་སྔོན་པོ་དང་རིང་པོ་དག་གིས་ཆུ་སྟོན་པར་བྱེད་དེ་རྫས་ཉིད་ཀྱིས་ཀྱང་ཉེ་བར་འདོགས་པ་འདི་ལྟ་བུ་ཡོད་པར་སྨྲའོ། །ཆུ་རྣམས་དྲ་བནྟཱི་ཏི་ན་ཏི་ཁ་དོག་དང་དབྱིབས་ཕྲ་བ་ཉིད་ཕན་ཚུན་གཤེར་བ་ཉིད་ཡོད་པ་དེའི་ཕྱིར་ཁ་དོག་དང་དབྱིབས་ཕྲ་མོ་རྣམས་ཚོགས་པའོ། །རླུང་གིས་བསྐུལ་བའི་དབང་གིས་ཡུལ་གཞན་དུ་སྐྱེད་པ་ཡང་མཐོང་བར་འགྱུར་རོ་ཞེས་བརྗོད་དོ། །འགྲོ་བར་བྱེད་པས་ན་ཆུའོ། །མེ་ལ་ཡང་མེ་སྟག་དམར་པོ་ འབར་བ 
་དང་རིང་པོ་ཞེས་འཇིག་རྟེན་གྱིས་གདགས་བར་བྱེད་དོ། །རླུང་ཚོགས་
ཁམས་ཉིད་ཡིན་ཞེས་པ་གཡོ་བའི་ལས་ཅན་ཡང་བའོ། །རྫས་གཅིག་པུ་ཉིད་ལ་འཇིག་རྟེན་ན་རླུང་ཞེས་པས་དེའི་ཕྱིར་རླུང་དང་རླུང་གི་ཁམས་ལ་ཁྱད་པར་མེད་དོ། །རླུང་རྣམས་ཀྱི་ཚོགས་ནི་རླུང་ཡོད་པ་སྟེ་འཇིག་རྟེན་ན་རླུང་སྔོན་པོ་རླུང་ཟླུམ་པོ་ཞེས་སྨྲ་བར་བྱེད་དེ། དེ་འགའ་ཞིག་ཏུ་ཉེ་བར་དམིགས་པས་སྨྲ་བར་བྱེད་པ་ནི་དེ་དང་འདྲ་བའང་ཡིན་ཞེས་བ་སྟེ། དེ་ལ་འདིས་འདི་འཐོར་ས་འཐོར་བར་ནུས་ཏེ་དེའི་ཕྱིར་རླུང་གི་ཁམས་ཉིད་རླུང་ངོ་ཞེས་སྔ་རབས་པ་རྣམས་ཟེར་རོ། །སྒྲའི་ངེས་གཟུང་གི་ཕྱིར་ཁམས་ཉིད་ཡིན་ཞེས་བྱའོ། །ས་ལ་སོགས་པ་ནི་ཁ་དོག་དང་དབྱིབས་ཀྱི་བདག་ཉིད་ཁོ་ན་དེ་ལྟར་རིགས་ཏེ། ཟད་པར་གྱི་སྐྱེ་མཆེད་རྣམས་ལ་མི་སྡུག་པའི་ཁྱད་པར་ཉིད་ལས་དང་མི་སྡུག་པ་ལས་ཀྱང་གཟུགས་མེད་པའི་ཕྱིར་རོ། །རང་གི་ངོ་བོ་ཕན་ཚུན་ཐ་དད་པ་དག་ལ་སྒྲ་ཐ་མི་དད་པ་འཇུག་པའི་རྒྱུ་མཚན་ཁོང་དུ་མ་ཆུད་པའི་ཕྱིར་རམ། ཐམས་ཅད་དུ་འཆད་པར་འགྱུར་བའི་ངེས་ཚིག་མེད་པའི་ཕྱིར་འདྲི་བ་ནི་ཅིའི་ཕྱིར་རྣམ་པར་རིག་བྱེད་མ་ཡིན་པའི་ཞེས་རྒྱ་ཆེར་འབྱུང་བའོ། །གཟུགས་སུ་རུང་བ་ཞེས་བྱ་བ་ནི་གནོད་པ་བྱར་རུང་ཞེས་བྱ་བ་འདི་ལ་ཤེས་བྱེད་ཀྱི་ཁུངས་ནི་དོན་གྱི་སྡེ་ཚན་དག་ལས་མདོ་གསུངས་པ་ཡིན་ནོ། །འདི་ལ་དཔེར་བརྗོད་པ་ནི། ཟུག་རྔུས་ཟུག་བཞིན་གནོད་པར་འགྱུར། །ཞེས་བྱ་བ་འདི་ཡིན་ཏེ་གནོད་པའི་གནས་སུ་གཟུགས་སུ་རུང་བའི་སྒྲར་སྦྱར་བའི་ཕྱིར་རོ། །གལ་ཏེ་ཟུག་རྔུས་ཟུག་པ་ལ་སེམས་པ་དང་བཅས་པས་ཟུག་རྔུས་བསྣུན་པ་ལས་སྐྱེས་པའི་སྡུག་བསྔལ་གྱིས་གནོད་པར་འགྱུར་བ་དང་གནོད་པ་ཚོལ་བར་བྱེད་པ་ལ། དེའི་ཚོར་བའི་འདོད་པ་ལ་གནོད་པ་བྱས་པས་བསྐྱེད་པས་གནོད་པར་འགྱུར་ཞེས་བྱ་བ་ནི་རིགས་ན། གཟུགས་ནི་སེམས་ཅན་མ་ཡིན་པས་སྡུག་བསྔལ་མེད་པའི་ཕྱིར་རམ། ཡང་ན་གཟུགས་སྐད་ཅིག་མ་ཡིན་པ་ཉིད་ཀྱིས་གནོད་པ་བྱེད་པའི་དུས་མེད་པའི་ཕྱིར་གནོད་པ་གང་ཞིག་ཡོད་ཅེ་ན། དེའི་ཕྱིར་ཡོངས་སུ་གྱུར་པ་བསྐྱེད་པའོ་ཞེས་བྱ་བ་གསུངས་ཏེ། རྒྱུན་གྱི་དབང་དུ་བྱས་ནས་ཡིན་གྱི་སྐད་ཅིག་གིས་ནི་མ་ཡིན་ནོ། །ཡོངས་སུ་འགྱུར་བ་ནི་གཞན་དུ་འབྱུང་བ་ཉིད་དོ། །མི་འདྲ་བ་ཡོངས་སུ་འགྱུར་བ་ནི་ཡོངས་སུ་འགྱུར་བ་སྟེ་སྔ་མ་དང་མི་འདྲ་བ་ཉིད་དུ་
བསྐྱེད་པའོ་ཞེས་བྱ་བའི་དོན་ཏོ། །གཟུགས་སུ་རུང་བ་ནི་ཐོགས་པའོ་ཞེས་བྱ་བ་ནི་རང་གི་ཡུལ་དུ་གཞན་སྐྱེ་བའི་གེགས་སོ། །གང་གི་ཕྱིར་སྔོན་གྱི་ལས་གོམས་པ་ལས་དཔྱད་ན་གཟུགས་ཁ་དོག་ངན་པ་དང་ཁ་དོག་བཟང་པོ་ཨནྟི་ཡེ་ཡཾ་ཚད་མས་རྟོགས་པར་བྱ་བ་ཨུ་དཀྲོ་དྷ་ན་བྷ་བཏ་ཡུ་བ་ནཱ་ཧི་ཞེས་གསུངས་པའི་ཕྱིར་མཐར་ཕྱིན་པའམ་དངོས་པོ་ལ་མངོན་བར་དཔྱད་པས་གཟུགས་བྱརྠ་ཚེ་དང་ལྡན་པ་ཁྱོད་ཀྱི་དབང་པོ་རྣམས་ནི་རབ་ཏུ་དང་བ་ལས་ན་ཁྱོད་ཀྱིས་བདུད་རྩི་ཅུང་ཟད་རྟོགས་སོ་ཞེས་གསུངས་པས་སོ་ཞེས་སློབ་དཔོན་འདུས་བཟང་ཟེར་རོ། །འདི་ནི་སེམས་ཅན་དུ་སྟོན་པ་དང་བསྟན་དུ་ཡོད་པ་ཉིད་ཀྱི་སྟེང་ངེས་པའི་ཚིག་ཀྱང་གཟུགས་ཅན་མ་ཡིན་པ་ཐམས་ཅད་ལ་མེད་པའི་ཕྱིར་གཟུགས་ཅན་ཁོ་ན་ལ་དེའི་དོན་སྲིད་དོ་ཞེས་པ་ཡིན་ནོ། །གཟུགས་ཀྱི་ངེས་པའི་ཚིག་གང་ལ་ཡིན་པ་དེ་ཁོ་ན་ལ་དེའི་དོན་ལས་གཟུགས་བསྟན་པར་འགྱུར་གྱི་གཞན་ལས་མ་ཡིན་ཞེས་སོ། །སྐྱོན་དེ་ཉིད་དུ་ཐལ་བའམ་དེའི་རིགས་ཡིན་པའི་ཕྱིར་མི་སྐྱེ་བའི་ཆོས་ཅན་དོ་ཥེ་ཨི་ཏི་ཙེ་ཏ་བསྟན་དུ་ཡོད་པ་དང་བསྟན་དུ་མེད་པ་དག་རིགས་མཚུངས་པ་ཡོད་པ་མ་ཡིན་ནོ། །ཡོད་པ་ནི་མི་སྐྱེ་བའི་ཆོས་ཅན་མིག་ལ་སོགས་པའི་རིགས་ཉིད་རྒྱུར་བྱས་པའི་གཟུགས་ཀྱི་རིགས་ཡོངས་སུ་བཟུང་བ་ལ་ཡང་འབྱུང་པ་རྣམས་གཟུགས་ཉིད་དུ་མི་འགྱུར་རོ། །འདིར་དེའི་ཤེས་བྱེད་བཤད་པ་གང་ཡིན་པ་དེ་རྣམས་ཀྱང་མ་འབྲེལ་བ་ཉིད་དེ། བདེ་བར་གཤེགས་པ་བའི་ངེས་པའི་ཚིག་མ་ཡིན་ནོ། །དེ་སྐད་ཅེས་རྒོལ་བ་ལ་ཐམས་ཅད་དུ་བྲ་ཏི་བིདྷཱ་ནོཀྟྲ། འོ་ན་ནི་རྡུལ་ཕྲ་རབ་ཅེས་བྱ་བ་ལ་གལ་ཏེ་གཟུགས་སུ་རུང་བ་ཡོངས་སུ་འགྱུར་བ་བསྐྱེད་པ་དང་ཐོགས་པ་ཡིན་ན་ནི་གཉི་ག་ལྟར་ཡང་གཟུགས་སུ་མི་འགྱུར་ཏེ་ཆ་ཤས་མེད་པའི་ཕྱིར་རོ། །དེ་ནི་ཇི་ལྟར་བལྟ་བར་མི་ནུས་པ་དེ་བཞིན་དུ་ལག་པ་ལ་སོགས་པའི་འདུས་ཏེ་རེག་པ་དག་གིས་རེག་པར་ཡང་མི་ནུས་ཏེ་ཡོངས་སུ་འགྱུར་བ་ཡང་མ་ཡིན་ལ་ཐོགས་པ་ཡང་མ་ཡིན་སྙམ་དུ་བསམས་པའོ། །འདི་ན་རྫས་ཀྱི་རྡུལ་ཕྲ་རབ་ལ་མངོན་པར་འདོད་ཀྱི་འདུས་པའི་རྡུལ་ཕྲ་རབ་ནི་མ་ཡིན་ཏེ། དེ་ནི་རྫས་བརྒྱད་པ་ཡིན་པས་གཟུགས་སུ་རུང་བར་མི་འགལ་ལོ། །དེ་ཉིད་ཀྱི་ཕྱིར་རྡུལ་ཕྲ་རབ་ཀྱི་རྫས་གཅིག་ལོགས་ཤིག་
ཏུ་གྱུར་བ་ནི་མེད་པ་ཉིད་དོ་ཞེས་བྱ་བ་གསུངས་ཏེ། འདོད་ན་དབང་པོ་མེད་པ་དང༌། །སྒྲ་མེད་ཕྲ་རབ་རྡུལ་རྫས་བརྒྱད། །ཅེས་བྱ་བ་ལ་སོགས་པར་ངེས་པའི་ཕྱིར་རོ། །འདུས་པ་ལ་གནས་པ་དེ་ནི་གཟུགས་སུ་རུང་བ་ཉིད་དོ། གཟུགས་སུ་རུང་བའམ་ཐོགས་པ་ཡིན་ནོ། །གཞན་དག་ནི་རྡུལ་ཕྲ་རབ་ལོགས་སུ་གྱུར་ཏེ་ཡོད་པ་ཉིད་ཀྱང་གཟུགས་སུ་རུང་བའོ་ཞེས་ཟེར་རོ། །སོ་སོའི་རྣམ་པར་རིག་བྱེད་བསྐྱེད་བ་ནི་མ་ཡིན་ཏེ། རྣམ་པར་ཤེས་པའི་ཚོགས་ལྔ་པོ་རྣམས་ནི་བསགས་པ་ལ་བརྟེན་ནས་དམིགས་པའི་ཕྱིར་རོ། །འདི་ལྟར་ཡུལ་ངེས་པ་མེད་པ་རྣམས་ཐོགས་པ་མེད་པའི་ངོ་བོ་ཡང་ཐོགས་པ་དང་བཅས་པར་འདོད་དེ། དེ་རྣམས་ཐོགས་པའི་ངོ་བོར་ཡོད་པ་བྱས་ནས་གཟུགས་རྣམས་དེ་ལྟར་རྟོག་པར་བྱའོ། །འོ་ན་ནི་འདས་པ་དང་མ་འོངས་པ་ཞེས་པ་ཞེས་བྱ་བ་ལ་ཡུལ་ན་མི་གནས་པའི་ཕྱིར་གནོད་པ་བྱར་རུང་བ་མ་ཡིན་ཞིང་ཐོགས་པ་མ་ཡིན་ཏེ་གཟུགས་ཅན་མ་ཡིན་ནོ་སྙམ་དུ་བསམས་པའོ། །དེ་ཡང་གཟུགས་སུ་ཡོད་ཟིན་པ་དང་ཞེས་བྱ་བ་ནི་འདས་པའོ། །གཟུགས་སུ་ཡོད་པར་འགྱུར་བ་ཞེས་བྱ་བ་ནི་མ་འོངས་པ་སྐྱེ་བའི་རྒྱུའི་ཆོས་ཅན་ནོ། །དེ་དང་རིགས་མཐུན་པ་ཞེས་བྱ་བ་ནི་གཟུགས་སུ་ཡོད་པར་གྱུར་པ་དང་རིགས་མཐུན་པ་མི་སྐྱེ་བའི་ཆོས་ཅན་ལ་འདོད་དེ་བུད་ཤིང་བཞིན་ནོ། །དཔེར་ན་ཤིང་ལ་སོགས་པ་འབུད་བཞིན་པ་མ་ཡིན་པ་ལ་ཡང་བུད་ཤིང་དུ་བརྗོད་དེ། དེ་དང་རིགས་མཐུན་པའི་ཕྱིར་བུད་ཤིང་ཡིན་པ་དེ་བཞིན་དུ་འདིར་ཡང་ཡིན་ནོ། །འོ་ན་རྣམ་པར་རིག་བྱེད་མ་ཡིན་པ་གཟུགས་མ་ཡིན་པར་འགྱུར་ཏེ་དེ་དང་རིགས་མཐུན་པ་མ་ཡིན་པའི་ཕྱིར་དང་ཐོགས་པ་མེད་པའི་ཕྱིར་རོ་ཞེན། རྣམ་པར་རིག་བྱེད་རྒྱུར་བྱས་པའི་གཟུགས་དང་རིགས་མཐུན་པའི་ཕྱིར་གཟུགས་དང་རིགས་མཐུན་པ་ཉིད་མ་ཡིན་ནམ། དེ་ཉིད་ལེགས་པར་དཔྱད་ན་འབྱུང་བ་ཆེན་པོའི་རྒྱུ་ལས་བྱུང་བའི་དངོས་པོ་ནི་ཇི་ལྟར་ཡུལ་ན་མི་གནས་ཞེས་བྱའོ། །དེ་ཡང་རྣམ་པར་རིག་བྱེད་ལ་གཟུགས་ཡོད་པའི་ཕྱིར་གཟུགས་སུ་ཡོད་པར་འགྱུར་ཏེ། ཤིང་ལྗོན་པ་གཡོས་པས་གྲིབ་མ་གཡོ་བ་བཞིན་ནོ། །ཉེ་བར་འཇལ་བ་དང་དཔེར་བརྗོད་པ་འདི་ནི་འདྲ་བ་མ་ཡིན་ཏེ། །ཤེས་པས་ཤེས་བྱེད་འཇལ་བ་བ་ལང་གིས་བ་མེན་བཞིན་ནོ། །དེ་ལྟར་ན་
གྲིབ་མ་གཡོས་པ་དང་རྣམ་པར་རིག་བྱེད་མ་ཡིན་པ་འདྲ་བ་མ་ཡིན་ནོ། །དཔེར་བརྗོད་པ་འདིར་གང་དཔེར་བརྗོད་པ་དང་སྒྲུབ་བྱེད་ཀྱི་ཕྱིར་བསྟན་པའི་ངག་འདི་འདིར་སྒྲུབ་བྱེད་ཀྱི་ཆོས་ཅི་ཡིན། རབ་ཏུ་སྦྱོར་བ་དུ་མ་བསྡུས་པའི་དོན་ནི་རབ་ཏུ་སྦྱོར་བའི་ངག་མ་ཡིན་ལ། རབ་ཏུ་སྦྱོར་བའི་ངག་ནི་རང་གི་རྟེན་གྱུར་པ་ལ་སྒྲུབ་པར་བྱེད་པ་སྟེ་རྣམ་པར་རིག་བྱེད་མ་ཡིན་པ་ལ་བརྟེན་པའི་ཕྱིར་གྲིབ་མ་བཞིན་ནོ། །ཡང་ན་རྣམ་པར་རིག་བྱེད་ཐམས་ཅད་ལ་བརྟེན་པའི་དབང་དུ་བྱས་ཏེ། གཟུགས་རྗེས་སུ་རྣམ་པར་འགྱུར་བའི་རྒྱུ་ལ་བརྟེན་པའི་ཕྱིར་ལྗོན་ཤིང་བཞིན་ནོ། །བསམ་གཏན་དང་ཟག་པ་མེད་པའི་སྡོམ་པ་རྣམ་པར་རིག་བྱེད་མ་ཡིན་པ་ནི་རྣམ་པར་རེག་བྱེད་ལ་མི་ལྟོས་པ་ཡིན་ཡང་དེའི་རིགས་ཅན་ཡིན་པའི་ཕྱིར་འགྱུར་བ་མེད་པའི་ཕྱིར་མ་ཡིན་ཏེ་ཞེས་རྒྱ་ཆེར་འབྱུང་བ་ལ། ཁ་ཅིག་ན་རེ་དམ་བཅའི་ཁྱད་པར་འདི་ནི་གཟུགས་ལ་མེད་དོ། །འགྱུར་བ་ཞེས་པ་དེའི་ཕྱིར་འདི་སྐད་བརྗོད་པར་འགྱུར་ཏེ་རྣམ་པར་རིག་བྱེད་འགྱུར་བ་ནི་དེ་རིག་བྱེད་མ་ཡིན་པ་ཡང་མ་ཡིན། །རྣམ་པར་རིག་བྱེད་གྱུར་ན་མི་འགྱུར་བས་ཞེས་སོ། །དེ་ནི་དེ་ལྟ་མ་ཡིན་ཏེ་གང་གི་ཕྱིར་གཟུགས་སུ་རུང་བ་ལག་པ་དང་རྐང་པ་ལ་སོགས་པའི་འདུས་ཏེ་རེག་པ་དག་གིས་གཞན་དུ་བསྐྱེད་པ་དེ་ཡང་ཐོགས་པ་མེད་པའི་ཕྱིར་རྣམ་པར་རིག་བྱེད་མ་ཡིན་པ་དེར་དངོས་སུ་མི་འགྱུར་བས་དེའི་ཕྱིར་རྣམ་པར་རིག་བྱེད་ཀྱི་ཕྱིས་ཁས་བླངས་པ་དེ་འདི་ལྟར་དགག་པར་མི་བྱའོ། །མི་འགྱུར་བའི་ཕྱིར་ཞེས་པ་ཁྱད་པར་མེད་པའོ། །འགྲམ་ལྕག་དང་ཐལ་མོ་དང་འབྲུ་ལ་སོགས་པ་རྣམ་པར་འགྱུར་བ་ལ་རྣམ་པར་རིག་བྱེད་མ་ཡིན་པའི་ཁྱད་པར་ཡོད་པ་མ་ཡིན་པས་དེའི་ཕྱིར་གཞན་གཟུགས་སུ་རུང་བ་མ་ཡིན་པའི་མཚན་ཉིད་རྣམ་པར་འགྱུར་བ་ནི་རྣམ་པར་རིག་བྱེད་ཀྱི་ཕྱི་ནས་དང་རྣམ་པར་རིག་བྱེད་མ་ཡིན་པ་དག་ལའོ་ཞེས་བཤད་པར་མི་འགྱུར་རོ། །ཤིང་ལྗོན་པ་ལ་ནི་ཡལ་ག་དང་ལོ་མ་ལ་སོགས་པའི་ཆུང་བ་དང་འཕེལ་བ་དང་གྲིབ་མ་ཆུང་བ་དང་འཕེལ་བར་འགྱུར་བས་ཤིང་ལྗོན་པ་གཡོས་པས་གྲིབ་མ་གཡོས་པ་མི་འགལ་ལོ། །དེ་བཞིན་དུ་སྒྲུབ་བྱེད་ལ་སྐྱོན་བཤད་པ་ཡང་གང་ཞེ་ན། གཏན་ཚིགས་མ་གྲུབ་པ་ཉིད་དེ། གང་གྱུར་པས་གང་ལ་གྱུར་པའི་དངོས་པོ་དེ་དག་རྟེན་དང་
བརྟེན་པའི་དངོས་པོར་མེད་དེ། དཔེར་ན་ཤིང་བ་ལཱ་ཤ་དང་དེའི་གྲིབ་མ་བཞིན། ཡང་ན་ཁས་བླངས་པའི་དྷཱི་དྷཱཾ་རྒོལ་བར་བྱེད་དེ། རྣམ་པར་རིག་བྱེད་གྱུར་ཀྱང་རྣམ་པར་རིག་བྱེད་མ་ཡིན་བ་ལ་ཇི་ལྟར་གཡེང་བ་རྗེས་སུ་འཇུག་པའི་ཕྱིར་སྤྱིར་བཏང་བ་ཁས་བླངས་པས་རྣམ་པོར་རིག་བྱེད་ཀྱི་གཟུགས་ལས་རྣམ་པར་རིག་བྱེད་མ་ཡིན་པའི་གཟུགས་སེལ་བར་བྱེད་དེ། རྣམ་བར་རིག་བྱེད་ལོག་ན་ཞེས་སོ། །འདིར་ཡང་གཏན་ཚིགས་མ་གྲུབ་པ་ཉིད་དེ། རྣམ་པར་རིག་བྱེད་མ་ཡིན་པ་ནི་རྣམ་པར་རིག་བྱེད་ལ་བརྟེན་པ་མ་ཡིན་ཞིང་དེ་ལོག་ན་དོ་ལྡོག་པ་མ་ཡིན་ནོ། །བཟློག་པས་གྲིབ་མ་རྣམ་པར་རིག་བྱེད་ཨེ་ཀྵི་ར་ཀྵི་བྱེད་པ་ལ་ཡང་སྒྲུབ་བྱེད་བརྗོད་པར་བྱ་བ་ནི་གོ་སླ་བས་མ་བཤད་དོ། །ཡང་ན་གྲིབ་མ་སོང་བ་ཉིད་ཀྱིས་རྟེན་ལོག་ན་བཟློག་པས་ཁྱབ་ཅེས་བྱ་བ་ལ་རྣམ་པར་རིག་བྱེད་ལོག་ན་རྣམ་པར་རིག་བྱེད་མ་ཡིན་པ་བཟློག་ཅེས་བྱ་བ་སྟེ། འདོད་པ་ལ་གནོད་བྱེད་འགལ་བའོ། །འགལ་བར་མཐོང་བ་མ་ཡིན་ཏེ་དེ་ལས་གཞན་དུ་ཁས་བླངས་ལ་གནོད་པ་ཉིད་དེ། རེ་ཞིག་དཔེར་བརྗོད་ཁས་བླངས་ནས་སྐྱོན་མེད་པ་དང་དཔེ་ལ་ཡང་སྐྱོན་མེད་དོ། །རྟེན་གྱུར་ན་གྱུར་པར་འདྲ་བའི་ཕྱིར་དཔེ་ཉིད་ཀྱང་རྣམ་པར་རིག་བྱེད་གྱུར་ན་ཡང་མ་གྱུར་པའི་ཕྱིར་རྣམ་པར་རིག་བྱེད་མ་ཡིན་པའི་དཔེ་མ་ཡིན་པར་གྲིབ་མ་ཞེས་སྟོན་པར་བྱེད་དེ། རྣམ་པར་རིག་བྱེད་ལོག་ན་ཡང་དེ་མ་ལོག་ལ་དེ་གྱུར་ན་ཡང་མ་གྱུར་རོ་ཞེས་ཤེས་པར་བྱའོ། །ཁ་ཅིག་ན་རེ་རྣམ་པར་རིག་བྱེད་གྱུར་པ་ལས་གྱུར་པ་ནི་རྣམ་པར་རིག་བྱེད་ཉིད་དོ་ཞེས་ཟེར་རོ། །འདི་ལྟར་རྣམ་པར་རིག་བྱེད་མ་ཡིན་པ་ནི་རྣམ་པར་རིག་བྱེད་ཆུང་ངུ་དང་འབྲིང་དང་ཆེན་པོ་ལ་བལྟོས་ནས་ཆུང་དུ་དང་འབྲིང་དང་ཆེན་པོར་འགྱུར་བ་ནི་མ་ཡིན་གྱི། སྔ་མ་ལས་གཞན་དུ་སྐྱེ་བ་ལ་འདིར་གྱུར་པར་དགོངས་པས་ན་འདི་ནི་ཀླན་ཀ་མ་ཡིན་ནོ། །གཞན་དག་ན་རེ། རྟེན་གྱི་འབྱུང་བ་ལ་གཟུགས་སུ་ཡོད་པའི་ཕྱིར་ཞེས་ཟེར་རོ་ཞེས་བྱ་བ་ནི་སློབ་དཔོན་དབྱིག་གཉེན་བྱ་བ་སྟེ། སྔོན་པོ་ལ་སོགས་པ་རྒྱུར་བྱས་པའི་གཟུགས་འབྱུང་བ་ལ་བརྟེན་པ་ན། འབྱུང་བ་དང་གྲུབ་པ་དང་བདེ་བ་གཅིག་པར་མཐོང་སྟེ་དེའི་ཕྱིར་རྒྱུར་བྱས་པའི་གཟུགས་ཡིན་པས་འདི་ཡང་རྟེན་གྱི་འབྱུང་བ་ལ་གཟུགས་སུ་ཡོད་པའི་ཕྱིར་གཟུགས་སུ་རུང་བའོ། །ཐོགས་པ་དང་བཅས་པའི་ཕྱིར་རྒྱུར་
བྱས་པའི་གཟུགས་གཞན་གཟུགས་སུ་ཡོད་པ་དངོས་སུ་ཁས་བླངས་པའི་ཕྱིར་ལ། འདི་ནི་ཐོགས་པ་མེད་པའི་ཕྱིར་རྟེན་གྱི་སྒོ་ཁོ་ན་ནས་གཟུགས་སུ་རུང་བ་ཡིན་ནོ་ཞེས་སོ། །དེ་ལྟ་ན་འོན་ནི་མིག་གི་རྣམ་པར་ཤེས་པ་ལ་སོགས་པ་དག་ཀྱང་ཞེས་རྒྱ་ཆེར་འབྱུང་སྟེ། དེ་རྣམས་ཀྱི་རྟེན་མིག་ལ་སོགས་པ་དག་ནི་ཐོགས་པ་དང་བཅས་པ་ཡིན་ནོ་ཞེས་སོ། །དེ་ཉིད་ཐལ་བའི་སྒོ་ནས་འཁྲུལ་པར་སྟོན་པར་བྱེད་དོ། །གཞན་དག་ན་རེ། རྟེན་འབྱུང་བ་གཟུགས་སུ་ཡོད་པའི་ཕྱིར་གཟུགས་ཉིད་དུ་བཤད་པ་ལ། མིག་ལ་སོགས་པའི་རྣམ་པར་ཤེས་པ་རྣམས་ལ་ཐལ་བ་ཅི་ཞེ་ན། དེ་དག་གི་རྟེན་འབྱུང་བ་མེད་དོ། །འདིར་ནི་ཐོགས་པ་དང་བཅས་པའི་རྟེན་གྱི་སྒོ་ནས་རྣམ་པར་རིག་བྱེད་མ་ཡིན་བ་ཉིད་དོ། །གཟུགས་ཉིད་འདོད་པ་འབྱུང་བ་རྟེན་མ་ཡིན་པའི་ཕྱིར། དེས་ན་མིག་ལ་སོགས་པ་རྣམ་པར་ཤེས་པ་ལ་སོགས་པ་རྣམས་ལ་ཐལ་བའོ། །ཉེ་བར་བཀོད་པ་འདི་ནི་མི་མཐུན་པ་ཡིན་ཏེ་ཞེས་བྱ་བ་ནི་དེ་ཉིད་ལ་ལ་ན་སྨྲའོ། །རྣམ་པར་རིག་བྱེད་མ་ཡིན་པ་ནི་ལྗོན་པ་ལ་གྲིབ་མ་ཉིད་ཅེས་བྱ་བ་རྒྱ་ཆེར་འབྱུང་སྟེ། ཇི་ལྟར་ཤིང་ལྗོན་བ་དང་གྲིབ་མ་དག་དང་ནོར་བུ་དང་འོད་དག་གྲུབ་པ་དང་བདེ་བ་དང་གཅིག་པ་དེ་བཞིན་དུ་རྣམ་པར་རིག་བྱེད་མ་ཡིན་པ་དང་འབྱུང་བ་དག་གྲུབ་བ་དང་བདེ་བ་གཅིག་གོ་སྙམ་དུ་དགོངས་པའོ། །མིག་གི་རྣམ་བར་ཤེས་བ་ལ་སོགས་བ་དག་ནི་མིག་ལ་སོགས་པ་དང་དེ་ལྟར་ཡང་མ་ཡིན་ཏེ། དེ་དག་ནི་དེ་དག་གི་སྐྱེ་བའི་རྒྱུ་ཙམ་འབའ་ཞིག་ཏུ་ཟད་པའི་བྱིར་རོ། །འདི་ནི་རེ་ཞིག་བྱེ་བྲག་ཏུ་སྨྲ་བ་མ་ཡིན་ཏེ་ཞེས་བྱ་བ་ལ་ཤིང་ལྗོན་པ་ལ་བརྟེན་ནས་གྲིབ་མ་དང་ཞེས་རྒྱ་ཆེར་འབྱུང་བའོ། །ཅི་ལྟར་བྱེ་བྲག་ཏུ་སྨྲ་པའི་མ་ཡིན་ཞེ་ན། གྲིབ་མ་ལ་སོགས་པ་ཁ་དོག་གི་རྡུལ་ཕྲ་རབ་རྣམས་ཞེས་བྱ་བ་ལ་སོགས་པའོ། །དེ་ལ་གྲིབ་མ་དང་འོད་ཅེས་བྱ་བ་ནི་ཁ་དོག་གི་གཟུགས་ཁོ་ན་ལ། ཁ་དོག་གི་རྡུལ་ཕྲ་རབ་རྣམས་ནི་རང་གི་འབྱུང་བ་བཞི་ཆེན་ལ་བརྟེན་པའི་ཕྱིར་ཤིང་ལྗོན་པ་ལ་སོགས་བདག་གི་རྟེན་དུ་མི་འདོད་དོ། །གྲིབ་མ་དང་འོད་ཀྱི་རྡུལ་ཕྲ་རབ་རྣམས་ཀྱི་འབྱུང་བ་རྣམས་ནི་ཤིང་ལྗོན་པའི་འབྱུང་བ་རྣམས་རྒྱུ་སྟེ་དེ་སྐྱང་བ་དང་གནས་པ་དང་གྱུར་བའི་རྗེས་སུ་འབྱུང་ཞིང་འཇུག་པའི་རྒྱུ་དང་རྟེན་སྐྱེད་པ་དང་རྗེས་སུ་འཇུག་པའི་རྒྱུ་དང་
གནས་པར་གྱུར་པ་དང་མཐུན་པར་སྒྲུབ་པའི་ཕྱིར་རོ། །དེའི་གྲིབ་ཆ་ལ་སོགས་པའི་རྡུལ་ཕྲ་རབ་ཀྱི་རང་གི་འབྱུང་བ་རྣམས་ཉིད་རྟེན་སྐྱེད་བའི་ཕྱིར་ཤིང་ལྗོན་པ་བརྟེན་པ་ནི་མ་ཡིན་པར་འགྱུར་རོ། །དེའི་ཕྱིར་འདི་ཉིད་བྱེ་བྲག་ཏུ་སྨྲ་བའི་མ་ཡིན་ཞེས་པ། །གཞན་དག་ནི་ཁ་དོག་དང་དབྱིབས་ནི་ཁ་དོག་ལ་སོགས་པའི་སྤྱིའམ་ཀུན་བཏགས་པའོ། །གལ་ཏེ་ཁ་དོག་དང་དབྱིབས་ཙམ་ཁོ་ནར་བདེན་པ་བྱེ་བྲག་ཏུ་སྨྲ་བའི་ཁ་དོག་དང་དབྱིབས་བར་མངོན་པར་བརྟེན་ནས་ལུས་རབ་ཏུ་དབྱེ་བ་བྱེ་བྲག་ཏུ་སྨྲ་བ་འདོད་དོ། །ཅི་སྟེ་བདོག་ལ་སོགས་པའི་སྤྱི་ཉིད་ཁོ་ན་ཡང་བྱེ་བྲག་ཏུ་སྨྲ་བ་རྣམས་ཀྱི་མ་ཡིན་ཏེ་དེ་ནི་བཏགས་པར་ཡོད་པས་བྱེ་བྲག་ཏུ་སྨྲ་བ་རྣམས་རྒྱུ་ཉིད་དུ་ཁས་མི་ལེན་ནོ་ཞེས་གཞན་དག་ཟེར་རོ། །སློབ་དཔོན་འདུས་བཟང་ན་རེ། གྲིབ་མ་ཞེས་བྱ་བ་ཁ་དོག་མཐའ་དག་གི་སྤྱི་ལ་གཟུང་གི་ཁ་དོག་ཉིད་པ་ནི་མ་ཡིན་ཏེ་ཤིང་ལྗོན་པ་བཞིན་ནོ་ཞེས་ཟེར་རོ། །དེ་ལྟར་གཉིས་པོ་དག་ཀྱང་བཏགས་པར་ཡོད་པའི་རྟེན་དང་བརྟེན་པའི་ངོ་བོས་ཧཱི་ཡི་སྟེ། རྫས་ཀྱི་རྟེན་དང་བརྟེན་པའི་ངོ་བོར་ཁས་མ་བླངས་པའི་ཕྱིར་རོ། །ད་ལྟ་ཡིན་དང་འབྱུང་བ་རྣམས་དང་འབྱུང་བ་ལ་བརྟེན་པ་རྣམས་དང༌། རྒྱུར་བྱས་པའི་གཟུགས་ལ་བརྟེན་པ་རྣམས་བྱ་བ་དེ་རྣམས་སུ་ཐལ་བར་འགྱུར་རོ། །རྒྱུར་བྱས་པའི་གཟུགས་ཀྱང་རྒྱུར་བྱས་པའི་གཟུགས་ལ་བརྟེན་ཅིང་ཞེས་པ་ཡོད་ཀྱང་གཟུགས་ལ་བརྟེན་པ་ཉིད་ཅེས་པ་ལྗོན་ཤིང་དང་ནོར་བུ་ལ་བརྟེན་པ་ཉིད་ཅེས་འབྲེལ་དང་སྦྱར་རོ། །གྲིབ་མ་དང་འོད་ནི་རང་གི་འབྱུང་བ་ལ་བརྟེན་ཏེ་དེའི་རྗེས་སུ་བྱེད་བའི་ཕྱིར་རོ། །རྣམ་པར་རིག་བྱེད་མ་ཡིན་པའི་རྟེན་འབྱུང་བ་ཆེན་པོ་དག་འགགས་ཀྱང་ཞེས་བྱ་བ་ལ། འདོད་གཏོགས་རྣམ་རིག་མིན་སྐད་ཅིག །ཕྱིན་ཆད་འདས་པའི་རྒྱུ་ལས་བྱུང༌། །ཞེས་གསུངས་བའི་ཕྱིར་རྟེན་གྱི་འབྱུང་བ་ཆེན་པོ་དག་འགགས་ཀྱང་རྣམ་པར་རིག་བྱེད་མའི་ནས་རྗེས་སུ་འཇུག་པ་ཡིན་གྱི། གྲིབ་མ་དང་འོད་དག་ནི་དེ་ལྟར་རྟེན་འགགས་ཀྱང་མི་འགག་པ་མ་ཡིན་ནོ། །དེའི་ཕྱིར་རྣམ་པར་རིག་བྱེད་མ་ཡིན་པ་ནི་ཤིང་ལྗོན་པ་ལ་གྲིབ་མ་ཉིད་དང་ཞེས་བྱ་བ་ལ་སོགས་པ་གང་སྨྲས་པ་དེ་ལན་མ་ཡིན་ནོ། །ཨ་བྷཱུ་ཏེ་ར་ས་མ་ནྱཱ་ག་ཏ་བྱཱ་ཙ་བི་ཛྙཱ་བྷི་རསྟཱེ་ཏྱ་སམྦནྡྷ་མེ་ཏི་ནྣི་རུ་དྷྱ་ཏེ་ཏེ་ཥཱ་སྱ་བི་ཛྙཱ་བཏི་སློབ་དཔོན་
འདུས་བཟང་ཟེར་རོ། །གཞན་དག་ནི་སྐྱེད་བྱེད་ཀྱི་འབྱུང་བ་རྣམས་རྣམ་པར་རིག་བྱེད་མ་ཡིན་པའི་རྟེན་དུ་འདོད་དོ། །ཅིག་ཤོས་ནི་འབྲེལ་བ་མེད་པས་འདིའི་རྟེན་ཡིན་ནོ། །གཞན་དག་གིས་ནི་འདི་ལ་ཞེས་པ་ནི་སློབ་དཔོན་ཉིད་དེ། མིག་ལ་སོགས་པའི་རྣམ་པར་ཤེས་པ་དག་གཟུགས་ཉིད་དུ་ཐལ་བར་འགྱུར་རོ་ཞེས་བྱ་བ་འདི་ལའོ། །འདི་སྐད་དུ་བསྟན་པར་འགྱུར་ཏེ་གལ་ཏེ་རྟེན་གཟུགས་སུ་ཡོད་པའི་ཕྱིར་མིག་ལ་སོགས་པའི་རྣམ་པར་ཤེས་པ་དག་ཀྱང་རྣམ་པར་རིག་བྱེད་མ་ཡིན་པ་ལྟར་གལ་ཏེ་གཟུགས་ཉིད་ཡིན་ན་ནི། དེ་ལྟ་ན་དེའི་རྟེན་གཟུགས་སུ་ཡོད་པ་མ་ཡིན་པའི་ཕྱིར་འགའ་ཞིག་གཟུགས་ཉིད་མ་ཡིན་པར་ཡང་འགྱུར་ན་གཅིག་ལ་ཆོས་ཕན་ཚུན་འགལ་བ་འདུ་བ་ཡང་མ་ཡིན་ཏེ་རྟག་པ་དང་མི་རྟག་པ་བཞིན་ནོ། །རྣམ་པར་རིག་བྱེད་མ་ཡིན་པ་དེ་ལྟར་རྟེན་ཐ་དད་དུ་གྱུར་པ་མ་ཡིན་ཏེ། འོ་ན་ཅི་ཞེ་ན་ཐམས་ཅད་གཟུགས་སུ་ཡོད་པ་མ་ཡིན་ནོ། །དེ་ལྟ་བས་ན་འདྲ་བར་ཐལ་བ་མེད་དོ་ཞེས་བྱ་བ་ནི་གཞན་གྱི་མཚན་ཉིད་མཚན་གཞི་ཉིད་ལ་འབྱུང་བ་རྣམས་སུ་ཡང་ཐལ་བའོ། །དེ་ལྟར་གཞན་གྱི་འབྱུང་བའི་གཟུགས་རྣམས་ཀྱི་སྔ་མ་ལ་སོགས་པ་བཞིན་དུ་རྣམ་པར་རིག་བྱེད་མ་ཡིན་ཞེས་པ་རྗེས་སུ་དཔག་པའི་གཟུགས་ཉིད་དུ་གསུངས་ཏེ། ལུས་དང་ངག་གི་ལས་ཉིད་ཀྱི་ཕྱིར་དང་རྣམ་པར་རིག་བྱེད་བཞིན་དུ་ཚོར་བ་ལ་སོགས་པའི་ཕུང་པོས་མ་བསྡུས་པའི་ཕྱིར་རོ། །འདི་རང་ཁོ་ནའི་གཟུགས་ཉིད་ལས་མཚན་ཉིད་གཞན་མ་ཡིན་པས་ཞེས་སོ། །འདིའི་ངེས་པའི་ཚིག་ཙམ་ཡང་གཟུགས་རུང་བས་གཟུགས་ཉེ་བར་ལེན་པའི་ཕུང་པོ་ཞེས་བྱ་སྟེ་མཚན་ཉིད་ལ་བརྟེན་ནས་ཁྱད་པར་དུ་མ་བྱས་པའི་ཕྱིར་མིག་ལ་སོགས་པའི་རྣམ་པར་ཤེས་པའི་རྟེན་གཟུགས་སུ་རུང་བས་གཟུགས་ཉིད་དུ་ཐལ་བར་མི་འགྱུར་རོ་ཞེས་པ་སློབ་དཔོན་གྱི་ལེན་མངོན་པར་བརྗོད་པ་མི་རིགས་པ་ལ་བརྟེན་པའི་སྤྱི་བཟུང་ནས་ངེས་པར་གཟུང་བའི་ཕྱིར་དང་གོ་སྐབས་མེད་པར་ལེན་མངོན་པར་བརྗོད་པའོ། །གཞན་དག་ན་རེ་མིག་ལ་སོགས་པའི་རྣམ་པར་ཤེས་པའི་རྟེན་གཟུགས་སུ་རུང་བས་གཟུགས་ཉིད་དུ་ཐལ་བ་མེད་དོ། །དེའི་རིགས་ལས་གཞན་དུ་ན་རྣམ་པར་ཤེས་པ་དངོས་པོར་ཡོད་པ་གཟུགས་ལ་མི་ལྟོས་པའོ་ཞེས་ཟེར་རོ། །ཕུང་པོ་རྣམ་པར་གཞག་པའི་
མཇུག་ཐོགས་སུ་ཁམས་དང་སྐྱེ་མཆེད་རྣམ་པར་གཞག་པར་རིགས་པ་ལ་དེ་ལས་བརྒལ་ཏེ་ཚོར་བ་ལ་སོགས་པའི་མཚན་ཉིད་མ་བརྗོད་བ་ཉིད་དུ་གཟུགས་ཀྱི་ཕུང་པོའི་སྐྱེ་མཆེད་དང་ཁམས་རྣམ་པར་གཞག་པ་བདེ་བླག་ཏུ་བསྟན་པར་བྱ་བའི་ཕྱིར། དབང་དོན་དེ་དག་ཁོ་ན་ལ་སྐྱེ་མཆེད་དང་ཁམས་བཅུར་འདོད་ཅེས་རྒྱ་ཆེར་གསུངས་སོ། །དེའི་སྐྱེ་མཆེད་དང་ཁམས་རྣམ་པར་གཞག་པ་ཞེས་བྱ་བ་ནི་རྣམ་པར་རིག་བྱེད་མ་ཡིན་པའི་རྣམ་པར་གཞག་པ་མེད་པས་འདི་ལྷག་མ་དང་བཅས་བ་སྟེ་རྣམ་པར་རིག་བྱེད་མ་ཡིན་པའི་གཟུགས་ཞེས་བྱ་བ་ཅུང་ཟད་ཀྱང་ཡོད་པ་མ་ཡིན་ནོ་ཞེས་བསྟན་པའི་དོན་དུའོ། །ཚོར་བ་ལ་སོགས་པ་བརྗོད་པར་བྱ་སྟེ་ཞེས་བྱ་བ་ནི། འདུས་བྱས་ཆོས་རྣམས་དེ་དག་ཀྱང༌། །གཟུགས་ལ་སོགས་པ་ཕུང་པོ་ལྔ། །ཞེས་བརྗོད་པ་དེ་ལ་གཟུགས་ཀྱི་ཕུང་པོ་བཤད་ཟིན་ནས་ད་ནི་ཚོར་བ་ལ་སོགས་པ་བརྗོད་པར་བྱ་ཞེས་པའོ། །ཚོར་མྱོང་བ་ཞེས་བྱ་བ་ལ་ཉམས་སུ་མྱོང་བས་ན་མྱོང་བའོ། །དངོས་པོའི་རང་གི་ངོ་བོ་སིམ་པ་དང་ཉེ་བར་གདུང་བ་དང་རྣམ་པ་དེ་གཉིས་ཀ་ལས་རྣམ་པར་གྲོལ་བའི་རང་བཞིན་མངོན་སུམ་དུ་བྱེད་པའོ། །དངོས་པོའི་རང་བཞིན་སིམ་པ་དང་ཡོངས་སུ་གདུང་བ་དང་རྣམ་པ་གཉིས་ཀ་ལས་གྲོལ་བའི་ཉམས་སུ་མྱོང་པར་བྱེད་པས་ཀྱང་ཉམས་སུ་མྱོང་བ་སྟེ། དེ་ཡང་རང་བཞིན་གྱི་དབྱེ་བ་ལས་རྣམ་པ་གསུམ་མོ། །དེ་ལ་ལུས་དང་སེམས་འཕེལ་བར་འཇུག་པ་ནི་བདེ་བའོ། །འགྲིབ་པར་འཇུག་པ་ནི་སྡུག་བསྔལ་ལོ། །གང་ཞིག་གཉིས་ཀ་ཡང་མི་འཇུག་ལ་ཡོད་པའི་མྱོང་བ་དེ་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་སྟེ་གནག་པ་ཡང་མ་ཡིན་དཀར་བ་ཡང་མ་ཡིན་པའི་ལས་བཞིན་ནོ། །རྒྱུ་མཚན་གྱི་དབྱེ་བ་ལས་ནི་རྣམ་པ་དྲུག་སྟེ་མིག་དང་གཟུགས་དང་རྣམ་པར་ཤེས་པ་གསུམ་ཚོགས་པ་ནི་མིག་གི་འདུས་ཏེ་རེག་པ་ཡིན་ལ། དེ་བཞིན་དུ་རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་འདུས་ཏེ་རེག་པ་ལས་བྱུང་བ་ཡང་རིག་པར་བྱའོ། །ཚོར་བ་ཉམས་སུ་མྱོང་བ་ནི་རེག་པའི་ཡིན་ནོ་ཞེས་སློབ་དཔོན་འདུས་བཟང་ཟེར་རོ། །གང་འདོད་པ་དང་མི་འདོད་པ་གཉི་ག་ལས་བཟློག་པའི་རེག་པ་ཉམས་སུ་མྱོང་བ་ལས་དེ་ཚོར་བ་སྟེ། དེ་ལྟར་བདེ་བ་མྱོང་བར་འགྱུར་བའི་ཚོར་བ་དང་ཞེས་བྱ་བ་དེ་ལྟ་བུ་ལ་སོགས་པ་གསུངས་
སོ། །བདེ་བའི་ཚོར་བ་སྐྱེད་པ་ཉིད་དེ་ལ་ཕན་པའི་ཕྱིར་རོ། །གལ་ཏེ་ཡུལ་ཉམས་སུ་མྱོང་བ་ལས་ཚོར་བར་འགྱུར་ན་དམིགས་པ་གཅིག་པ་རྣམས་ལ་འདིའི་ཁྱད་པར་ཅི་ཞིག་ཏུ་འགྱུར་ཞེ་ན། དེའི་ཕྱིར་རེག་པ་ཉམས་སུ་མྱོང་བས་ཚོར་བའོ་ཞེས་རྣམ་པར་གཞག་གོ །དེ་ལྟར་ན་འདུ་ཤེས་དང་མོས་པ་དང་དྲན་པ་དང་ཤེས་རབ་ལ་སོགས་པ་རྣམས་ཀྱང་དམིགས་པའི་སྒོ་ནས་ཚོར་བཞིན་ཏེ་རང་བཞིན་ལས་བརྗོད་པར་མི་བྱའོ། །འོན་ཏེ་དམིགས་པ་གཅིག་པ་རྣམས་ལ་མཚན་མར་འཛིན་པ་ལ་སོགས་པ་རྣམས་ཀྱིས་འདུ་ཤེས་ལ་སོགས་པ་རྣམས་དང་ཁྱད་པར་འདོད་ན། ཚོར་བ་ཡང་ཡུལ་ཉམས་སུ་མྱོང་བས་ཅི་སྟེ་མི་འདོད། རེག་པ་ཉམས་སུ་མྱོང་བ་ཡང་དེ་དང་མཚུངས་པར་ལྡན་པའི་རྒྱུའི་ངོ་བོའམ་དམིགས་པ་ལས་བྱུང་བའི་ཕྱིར་རོ། །དེ་ལས་དེ་དང་མཚུངས་པར་ལྡན་པའི་སེམས་ལས་བྱུང་བ་ཐམས་ཅད་རིག་པ་དང་མཚུངས་པར་ལྡན་པའི་ཁྱད་པར་ལས་མ་ཡིན་ཡང་རྒྱུར་གྱུར་པའི་སེམས་ལས་བྱུང་བ་ཐམས་ཅད་རེག་པའི་རྒྱུར་མེད་པའི་ཕྱིར་འཇིག་རྟེན་དང་བསྟན་བཅོས་ལས་ཀྱང་ཉམས་སུ་མྱོང་བའི་སྒྲ་འབྲས་བུའམ་རྒྱུར་རབ་ཏུ་གྲགས་པ་མེད་དོ། །རབ་ཏུ་གྲགས་པ་ནི་མངོན་དུ་བྱས་པ་མ་ཡིན་པས་སོ། །ཡང་ཅི་ལྟར་བདེ་བ་དང་སྡུག་བསྔལ་ལས་ཐ་དད་པའི་གསུམ་པ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཉམས་སུ་མྱོང་བ་ཡོད་ངོ་ཞེས་ཤེས་པར་བྱ་ཞེ་ན་ལུང་དང་རིགས་པ་ལས་ཏེ། གང་གི་ཕྱིར་མདོ་ལས་བདེ་བ་ཡང་སྤངས་སྡུག་བསྔལ་ཡང་སྤངས་ཏེ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་ཞེས་ཚོར་བ་རྣམ་པ་གསུམ་གསུངས་པ་དང༌། རིག་པ་ནི་ཚོར་བ་དང་བྲལ་བའི་སེམས་སྐྱེ་བ་མེད་པའི་ཕྱིར་དང་བདེ་བ་དང་སྡུག་བསྔལ་དང་བྲལ་བའི་སེམས་དམིགས་པའི་ཕྱིར་རོ་ཞེས་བྱའོ། །འདུ་ཤེས་ནི་མཚན་མར་འཛིན་པའི་བདག་ཉིད་དོ་ཞེས་བྱ་བ་ལ་མཚན་ནི་ཁྱད་པར་ཏེ་བདག་དང་རང་བཞིན་དང་རང་གི་ངོ་བོ་ཞེས་པ་རྣམས་རྣམ་གྲངས་སོ། །འདི་སྐད་དུ། ཁྱད་པར་འཛིན་པའི་རང་བཞིན་ནོ། །ཞེས་བརྗོད་པར་འགྱུར་རོ། །ཆོས་དང་སེམས་ཅན་དང་རྣམ་པར་རྟོག་པའི་གནས་ལ་འཇུག་པའི་ཕྱིར་འདུ་ཤེས་ཏེ་འདི་ཙམ་ཞིག་དཔེར་བརྗོད་དོ། །ཡང་ན་སྔོན་པོ་ལ་སོགས་པའི་ཁ་དོག་དང་དབྱིབས་དང་རྟེན་སྐྱེས་པ་དང་བུད་
མེད་དུ་རྣམ་པར་རྟོག་པ་དང་སྐྱེས་པའི་རྟེན་ལ་མཛའ་བོ་དང་དགྲར་རྣམ་པར་རྟོག་པ་དང་དེ་དག་གི་རྟེན་ལ་རབ་ཏུ་སྦྱོར་བ་ཇི་ལྟ་བར་བདེ་བ་དང་སྡུག་བསྔལ་དུ་འཛིན་པ་སྟེ་དེ་ལྟ་བུ་ལ་སོགས་པ་སྒྲ་དང་སྒྲ་ལ་མངོན་པར་ཞེན་ཅིང་ཁྱད་པར་དུ་འཛིན་པ་ལ་བརྗོད་པར་བྱའོ། །དེའི་ཕྱིར་འདི་དག་གི་གོ་རིམས་དེ་ལྟ་བུའོ། །ཚོར་བ་བཞིན་ཞེས་བྱ་བ་ལ་དཔེར་ན་ཚོར་བའི་ཕུང་པོ་རྟེན་གྱི་དབྱེ་བས་དྲུག་ཏུ་ཕྱེ་བ་དེ་བཞིན་དུ་འདུ་ཤེས་ཀྱི་ཕུང་པོ་ཡང་མིག་གི་འདུས་ཏེ་རེག་པ་ལས་བྱུང་བའི་འདུ་ཤེས་ནས་ཡིད་ཀྱི་འདུས་ཏེ་རེག་པ་ལས་བྱུང་བའི་འདུ་ཤེས་ཞེས་བྱ་བའི་བར་དྲུག་ཏུ་དབྱེའོ། །ཚོགས་ཀྱི་སྒྲ་ནི་རེ་རེ་ཞིང་རྫས་དུ་མ་ཡིན་པར་ཤེས་པར་བྱ་བའི་ཕྱིར་རོ། །གལ་ཏེ་ཡུལ་གྱི་ཁྱད་པར་འཛིན་པའི་རྣམ་པར་རྟོག་པ་ནི་ཐོགས་བའི་རེག་པ་རྣམ་པར་རྟོག་པ་མེད་པ་དང་མཚུངས་པར་ལྡན་པར་ཇི་ལྟར་རུང་ཞེ་ན། འདུ་ཤེས་ནི་ས་མང་པོ་བ་ཡིན་པའི་ཕྱིར་ཚོར་བ་བཞིན་དུ་རྣམ་པར་ཤེས་པ་ཐམས་ཅད་དང་མཚུངས་པར་ལྡན་ཏེ་ཐོགས་པའི་རེག་པ་དང་ལྡན་པ་ནི་གཡེང་བའི་ཕྱིར་བདག་མ་ཡིན་ཞེས་པས་ན་དེ་ལ་བྱ་བ་མངོན་པར་གསལ་བར་མི་འགྱུར་གྱི་གཡེང་བའི་ཕྱིར་ཚིག་བླ་དགས་ཀྱི་རེག་པ་དང་མཚུངས་པར་ལྡན་པ་ལ་ནི་དེའི་བྱ་བ་མངོན་པར་གསལ་བར་འགྱུར་རོ་ཞེས་བྱ་བ་འདི་ནི་ཁྱད་པར་རོ། །མིག་གི་རྣམ་པར་ཤེས་པའི་དུས་སུ་མཚན་མར་མ་བཟུང་བར་ནི་ཡིད་ཀྱི་རྣམ་པར་ཤེས་པས་ངེས་པར་རྟོགས་པར་མི་ནུས་སོ། །དེའི་ཕྱིར་ཚོར་བ་བཞིན་དུ་འདུ་ཤེས་ཀྱང་འདུས་ཏེ་རེག་པ་ཐ་དད་པ་ལ་ཐ་དད་པར་མི་འགལ་ལོ། །འདུ་བྱེད་ཕུང་པོ་བཞི་ལས་གཞན། །ཞེས་བྱ་བ་ལས་གང་ཇི་སྐད་དུ་བཤད་པ་གསུམ་དང་འཆད་བར་འགྱུར་བའི་རྣམ་པར་ཤེས་པའི་ཕུང་པོ་ལས་གཞན་པ་མཚུངས་པར་ལྡན་པ་དང་མཚུངས་པར་ལྡན་པ་མ་ཡིན་པའི་འདུ་བྱེད་དེ་དག་ནི་འདུ་བྱེད་ཀྱི་ཕུང་པོའོ། །རྣམ་པར་ཤེས་པའི་ཕུང་པོ་མ་བསྟན་པར་བཞི་ལས་གཞན་ཅེས་བརྗོད་པ་ཅི་ལྟར་ཡིན་ཞེ་ན། འདུས་བྱས་ཆོས་རྣམས་དེ་དག་ཀྱང༌། །གཟུགས་ལ་སོགས་པ་ཕུང་པོ་ལྔ། །ཞེས་སྔར་ཉིད་དུ་རྣམ་པར་ཤེས་པ་བསྟན་ཟིན་པས་ཉེས་པ་འདི་མེད་དོ། །བཅོམ་ལྡན་འདས་ཀྱིས་མདོ་ལས་ཞེས་བྱ་བ་ལ་སོགས་པས་ནི་ལུང་དང་འགལ་བ་སྤོང་བར་བྱེད་དོ། །མདོ་ལས་ནི་འདུ་བྱེད་ཀྱི་ཕུང་པོ་གང་ཞེ་ན། སེམས་པའི་ཚོགས་དྲུག་གོ་ཞེས་གསུངས་ལ། ཁ་
ཅིག་མདོ་འདི་ལ་བརྟེན་ནས་འདུ་བྱེད་ཀྱི་ཕུང་པོ་ནི་སེམས་ཁོ་ན་ཡིན་ནོ་སྙམ་དུ་སེམས་ཏེ་དེ་དག་ལ་མདོ་འདི་དགོངས་པ་ཅན་ཡིན་ནོ་སྙམ་དུ་ཤེས་པར་བྱ་བའི་ཕྱིར། བཅོམ་ལྡན་འདས་ཀྱིས་མདོ་ལས་ཞེས་བྱ་བ་གསུངས་སོ། །ཡང་ཅིའི་ཕྱིར་སེམས་ལས་བྱུང་བ་འདུ་བྱེད་ཀྱི་ཕུང་པོས་བསྡུས་པ་གཞན་དག་ཀྱང་ཡོད་ན་སེམས་པ་ཁོ་ན་འདུ་བྱེད་ཀྱི་ཕུང་པོ་ཉིད་དུ་གསུངས་ཤེ་ན། དེའི་ཕྱིར་གཙོ་བོ་ཡིན་པའི་ཕྱིར་ཏེ་ཞེས་བྱ་བ་གསུངས་སོ། །གང་དག་ལས་གཙོ་བོ་ཡིན་ཞེ་ན། དེ་ལས་གཞན་འདུ་བྱེད་ཀྱི་ཕུང་པོས་བསྡུས་པར་བྱ་བ་དང་ཡིད་ལ་བྱེད་པ་དང་ཐོབ་པ་ལ་སོགས་པ་རྣམས་ལས་སོ། །ལྷག་མ་རྣམས་ལས་དེ་གཙོ་བོར་གྱུར་པ་ཅིས་བྱས་པ་ཞིག་ཅེ་ན། དེའི་ཕྱིར་བཤད་པ་དེ་ནི་ལས་ཀྱི་རང་བཞིན་ཡིན་པའི་ཕྱིར་དེ་དང་མཚུངས་པར་ལྡན་པ་རྣམས་ལས་མངོན་པར་འདུ་བྱ་བ་ལ་གཙོ་བོ་ཡིན་ནོ། །མངོན་པར་འདུ་བྱ་བ་ནི་རྣམ་པར་སྨིན་པ་འཕེན་པ་ཡིན་ལ་དེའི་དབང་གིས་ལྷག་མ་རྣམ་པར་སྨིན་པ་འཕེན་པའི་ཕྱིར་གཙོ་བོ་ཡིན་ནོ། །གཞན་དག་ན་རེ་འདི་ལྟ་བུ་དང་འདི་ལྟ་བུར་གྱུར་ཅིག་ཅེས་དེ་ལྟར་མངོན་པར་འདུ་བྱ་བ་ལ་གཙོ་བོ་ཡིན་ནོ་ཞེས་ཟེར་རོ། །དེ་ཉིད་ཀྱི་ཕྱིར་ཞེས་བྱ་བ་ནི་སེམས་པ་མངོན་པར་འདུ་བྱ་བ་གཙོ་བོ་དེ་ཉིད་ཀྱི་ཕྱིར་རོ། །བཅོམ་ལྡན་འདས་ཀྱིས་འདུས་བྱས་མངོན་པར་འདུ་བྱེད་དོ་ཞེས་རྒྱས་པར་འབྱུང་བ་ལ། གལ་ཏེ་ཡང་འདུས་བྱས་སུ་གྱུར་པ་དེ་ཉིད་ཇི་ལྟར་སེམས་པས་འདུ་བྱེད་ཅེ་ན། ཅུང་ཟད་ཅིག་ཡོད་དུ་ཟིན་ཀྱང་འབྲས་བུ་འཕེན་པ་ལ་གཙོ་བོ་ཡིན་པས་སྐྱེ་བ་དང་རྗེས་སུ་མཐུན་པར་རྣམ་པར་འཇོག་པར་བྱེད་པས་འདུས་བྱས་མངོན་པར་འདུ་བྱེད་ཅེས་བརྗོད་པར་བྱའོ་ཞེས་སོ། །ཁ་ཅིག་ན་རེ་འབྱུང་བར་འགྱུར་བའི་མིང་གིས་ཡིན་པ་དེ་བཞིན་དུ་ཕུང་པོ་ལྔའི་མཚན་ཉིད་ཀྱི་འདུས་བྱས་ཀྱང་འདི་ལྟར་གྱུར་ཅིག་ཅེས་དེ་ལྟར་མངོན་པར་འདུ་བྱེད་དོ་ཞེས་སོ། །གཞན་དག་ནི་གཞན་དུ་ཡང་སྟེ་རེག་པ་དང་ཡིད་ལ་བྱེད་པ་ལ་སོགས་པ་སེམས་པ་དང་མཐུན་པར་སྒྲུབ་པའི་ཕྱིར་འདུ་བྱེད་ཀྱི་ཕུང་པོ་སྟེ། གཞན་དུ་ན་འདུས་བྱས་མངོན་པར་འདུ་བྱེད་པ་ནི་དེའི་ཕྱིར་བརྗོད་པར་བྱ་སྟེ་ཞེས་པ་དོན་མེད་པ་ཅན་མ་ཡིན་པར་འགྱུར་ཏེ། ཚོར་བ་ལ་སོགས་པ་ཉེ་བར་ལེན་པའི་ཕུང་པོ་རྣམས་ལ་མངོན་པར་བརྗོད་པ་འཇུག་པའི་རྒྱུ་མཚན་གསུངས་པ་
མེད་པ་དེའི་ཕྱིར་སེམས་པ་ཁོ་ན་འདུ་བྱེད་ཀྱི་ཕུང་པོར་བསྟན་པ་དགོངས་པ་ཅན་ཡིན་ནོ་ཞེས་ཤེས་པར་བྱ་བའི་ཕྱིར། བཅོམ་ལྡན་འདས་ཀྱིས་འདུས་བྱས་མངོན་པར་འདུ་བྱེད་དེ་ཞེས་རྒྱ་ཆེར་འབྱུང་ངོ༌། །ཡང་ན་ཕུང་པོ་བཞིས་མ་བསྡུས་པའི་འདུ་བྱེད་རྣམས་བསྡུ་བར་བྱ་བའི་ཕྱིར་ཆོས་ཀྱི་སྐྱེ་མཆེད་དང་ཁམས་བཞིན་དུ་འདུ་བྱེད་ཉེ་བར་ལེན་པའི་ཕུང་པོའོ་ཞེས་འདུ་བྱེད་ཀྱི་སྒྲས་སྤྱིར་བསྟན་ཏོ། །དེ་ལྟ་མ་ཡིན་ན་ཚོར་བ་ལ་སོགས་པ་ལྟར་སེམས་པའི་ཕུང་པོ་ཞེས་བརྗོད་པར་འགྱུར་རོ། །དེ་ལྟ་མ་ཡིན་ན་ཞེས་བྱ་བ་ལ་གལ་ཏེ་སེམས་པ་ཁོ་ན་འདུས་བྱས་ཀྱི་ཕུང་པོ་ཡིན་གྱི། རེག་པ་དང་ཡིད་ལ་བྱེད་པ་ལ་སོགས་པ་རྣམས་དང་ཐོབ་པ་ལ་སོགས་པ་མ་ཡིན་བ་དེ་ལྟ་ན། དེ་རྣམས་གཟུགས་དང་ཚོར་བ་དང་འདུ་བྱེད་དང་རྣམ་པར་ཤེས་པའི་ཕུང་པོ་དག་ཏུ་མ་བསྡུས་པའི་ཕྱིར། སྡུག་བསྔལ་དང་ཀུན་འབྱུང་བའི་བདེན་པ་ཉིད་དུ་མི་འགྱུར་ཏེ། འདུས་མ་བྱས་བཞིན་ནོ། །གལ་ཏེ་དེ་ལས་ཅིར་འགྱུར་ཞེ་ན། ཡོངས་སུ་ཤེས་པ་དང་སྤངས་པར་མི་འགྱུར་ཏེ། སྡུག་བསྔལ་ཡོངས་སུ་ཤེས་བ་དང་ཀུན་འབྱུང་སྤོང་བར་མི་འགྱུར་རོ། །ཡོངས་སུ་ཤེས་པ་དང་སྤངས་པ་མེད་ན་ཉེས་པ་ཅི་ཡོད་ཅེ་ན། དེའི་ཕྱིར་བཅོམ་ལྡན་འདས་ཀྱིས་ནི་ཞེས་རྒྱ་ཆེར་གསུངས་སོ། །མངོན་པར་མ་ཤེས་ཞེས་བྱ་བ་ནི་མཐོང་བའི་ལམ་གྱིས་སོ། །ཡོངས་སུ་མ་ཤེས་པར་ཞེས་བྱ་བ་ནི་བསྒོམ་པའི་ལམ་གྱིས་སོ། །ཡང་ན་མངོན་པར་མ་ཤེས་ཤིང་ཞེས་བྱ་བ་ནི་འཇིག་རྟེན་པའི་ཤེས་པས་སོ། །ཡོངས་སུ་མ་ཤེས་པར་ཞེས་བྱ་བ་ནི་འཇིག་རྟེན་ལས་འདས་པའི་ཤེས་པས་ཡིན་ཏེ། ཟག་པ་མེད་པའི་ཤེས་པ་ནི་ཡོངས་སུ་ཤེས་པའོ་ཞེས་བཤད་པའི་ཕྱིར་རོ། །ཡང་ན་གོ་རིམས་ཇི་ལྟ་བ་བཞིན་ཆོས་དང་རྗེས་སུ་ཤེས་པ་དག་གམ་བཟོད་པ་དང་ཤེས་པ་དག་གིས་ཡིན་པར་རིག་པར་བྱའོ། །དེ་བཞིན་དུ་མ་སྤངས་པ་ཞེས་གསུངས་ཏེ་ཞེས་བྱ་བ་ནི་ཆོས་གཅིག་ཀྱང་མངོན་པར་མ་ཤེས་ཤིང་མ་སྤངས་པར་སྡུག་བསྔལ་མཐར་བྱེད་པར་ང་མི་སྨྲའོ་ཞེས་བྱ་བའོ། །དེ་ལ་སྡུག་བསྔལ་ཤེས་པས་ཡོངས་སུ་མ་ཤེས་ཤིང༌། ཀུན་འབྱུང་ཤེས་པས་མ་སྤངས་པར་ཏེ་བཤད་པ་ནི་ཐལ་མ་ཐག་ཏུ་བསྟན་པ་ཉིད་ཡིན་ནོ། །དེའི་ཕྱིར་གདོན་མི་ཐ་བར་རེག་པ་དང་ཡིད་ལ་བྱེད་པ་
ལ་སོགས་པ་དེ་རྣམས་འདུ་བྱེད་ཀྱི་ཕུང་པོས་བསྡུས་པར་ཁས་བླངས་པར་བྱ་སྟེ། དེ་ལྟ་མ་ཡིན་ན་སངས་རྒྱས་འབྱུང་བ་དང་ཆོས་བསྟན་པ་དོན་མེད་པར་ཐལ་བར་འགྱུར་རོ། །འདི་ལྟར་མངོན་པར་མ་ཤེས་ཤིང་ཡོངས་སུ་མ་ཤེས་པ་ཉིད་ཀྱིས་འདི་ནམ་མཁའ་དང་སོ་སོར་བརྟགས་པའི་འགོག་པ་བཞིན་དུ་འགྱུར་རོ། །ནམ་མཁའ་དང་སོ་སོར་བརྟགས་པའི་འགོག་པ་ཡང་སྡུག་བསྔལ་མཐར་བྱེད་དོ་སྙམ་པ་འདི་ནི་ང་རྒྱལ་གྱི་དངོས་པོ་ཡིན་པའི་ཕྱིར་དང༌། ང་རྒྱལ་ནི་སྡུག་བསྔལ་ཟད་པའི་གེགས་སུ་གྱུར་པའི་ཕྱིར་རོ། །དེ་ལྟར་ན་སེམས་པ་ཁོ་ན་འདུ་བྱེད་ཀྱི་ཕུང་པོ་དང་ཡིད་ལ་བྱེད་པ་ལ་སོགས་པ་རྣམས་ནི་དེའི་ཁྱད་པར་རོ་ཞེས་སློབ་དཔོན་དཔལ་ལེན་ཟེར་རོ། །འདི་ནི་མ་ཡིན་ཏེ་ཡིད་ལ་བྱེད་པ་ལ་སོགས་པ་རྣམས་དང་སེམས་པ་རང་བཞིན་ཐ་དད་པའི་ཕྱིར་རང་བཞིན་གཞན་མ་ཡིན་པར་ངེས་པར་གཟུང་བར་བྱ་སྟེ་སེམས་པ་དང་སེམས་ལས་བྱུང་བ་མ་སྤངས་པ་གཞན་འགའ་ཞིག་ཐོབ་པར་བྱེད་དོ། །དེས་ན་འདུ་བྱེད་ཀྱི་ཕུང་པོ་ཡང་རྫས་དུ་མ་སྟེ་སེམས་པ་སྨོས་པས་ཀྱང་འདི་ཁོང་དུ་ཆུད་དོ། །དེ་ལྟར་ན་སེམས་པ་དང་ཐ་དད་པའི་སེམས་པ་ཞེས་བྱ་བ་གཉི་ག་ཡང་མེད་བར་ཐལ་བ་མ་ཡིན་ཏེ། འདུན་པ་དང་དད་པ་དང་རྨོངས་པ་དང་ཁྲོ་བ་དང་འདོད་ཆགས་ལ་སོགས་པ་རྣམས་ནི་ཕན་ཚུན་ངོ་བོ་ཐ་དད་པ་ཡིན་པའི་ཕྱིར་རོ། །ཐ་མི་དད་པའི་ཚུལ་གྱིས་འཇུག་པ་སེམས་པའི་རང་བཞིན་ནོ། །དེ་ཞེས་བྱ་བ་ནི་རྣམ་པར་ཤེས་པའི་ཕུང་པོ་རྣམ་པར་གཅད་པར་བྱ་བའི་ཕྱིར་རོ། །གསུམ་ཞེས་བྱ་བ་ནི་གཟུགས་ཀྱི་ཕུང་པོ་བསལ་བའི་ཕྱིར་རོ། །སྐྱེ་མཆེད་བཅུ་གཅིག་དང་ཁམས་བཅུ་བདུན་གྱིས་བསྡུས་པའི་ཆོས་རྣམས་ཐམས་ཅད་ཆོས་ཀྱི་སྐྱེ་མཆེད་དང་ཆོས་ཀྱི་ཁམས་ཀྱིས་བསྡུས་པས། དེའི་ཕྱིར་རྣམ་རིག་བྱེད་མིན་དང༌། །འདུས་མ་བྱས་དང་བཅས་པ་ནི། །ཞེས་བྱ་བ་གསུངས་སོ། །རྣམ་པར་ཤེས་པ་ནི། རྣམ་ཤེས་སོ་སོར་རྣམ་རིག་པ། །ཞེས་བྱ་སྟེ་སོ་སོར་རྣམ་པར་རིག་པའི་སྒྲས་ཤེས་རབ་ལ་སོགས་པ་རྣམས་ལས་ཁྱད་པར་དུ་བྱེད་དོ། །གཟུགས་བརྙན་དང་སྒྲ་བརྙན་ལྟར་ཡུལ་སོ་སོར་སྣང་བའི་ཕྱིར་དངོས་པོ་ཙམ་ལ་ལྟ་བ་ཉིད་ནི་རྣམ་པར་ཤེས་པའོ། །ཤེས་རབ་ནི་སླར་ཡང་རང་གི་མཚན་ཉིད་ཡོངས་སུ་གཅོད་པའོ། །འདུ་ཤེས་ནི་ཡུལ་གྱི་ཁྱད་པར་ལ་དམིགས་པ་སྟེ་དེ་ལྟར་འདི་ནི་
ཁྱད་པར་ཡིན་ནོ། །གཞན་དག་ན་རེ་རྣམ་པར་ཤེས་པའི་ཁམས་ཀྱི་རབ་ཏུ་དབྱེ་བ་བསྟན་པའི་དོན་དུ་སོ་སོར་ཞེས་པ་སྟེ་བརྣན་བའི་དོན་ཏོ་ཞེས་ཟེར་རོ། །དེ་ཉིད་ཀྱི་ཕྱིར་ཡུལ་དང་ཡུལ་སོ་སོར་རྣམ་པར་རིག་བྱེད་ཅེས་གསུངས་ཏེ། དེ་ཡང་གང་ཞིག་ཅེ་ན་དམིགས་པ་ཞེས་བྱ་བ་གསུངས་ཏེ། དེ་ཡང་དངོས་པོ་ཙམ་གྱི་སྣང་བརྙན་ཉིད་ཡིན་པར་རིག་པར་བྱའོ། །དེ་ལ་མིག་གི་རྣམ་པར་ཤེས་པ་རྣམ་པར་གཞག་བ་ལ་གཟུགས་ཉིད་ཉེ་བར་དམིགས་ཀྱི་སྒྲ་ལ་སོགས་པ་རྣམས་མ་ཡིན་ནོ། །སྔོན་པོ་ཡང་ཉེ་བར་དམིགས་ཀྱི་སྔོན་པོའོ་སྙམ་དུ་ནི་མ་ཡིན་ནོ། །དེ་བཞིན་དུ་བུད་མེད་དང་སྐྱེས་པ་ལ་སོགས་པ་རྣམས་ཡིད་དུ་འོང་བ་དང་ཡིད་དུ་མི་འོང་བའི་ངོ་བོས་མི་དམིགས་ཏེ་གཟུགས་ཙམ་དམིགས་པའི་ཕྱིར་རོ། །དེ་བཞིན་དུ་རྣམ་བའི་རྣམ་པར་ཤེས་པ་ལ་སོགས་པ་རྣམས་ལ་ཡང་ཇི་སྲིད་པ་བཞིན་དུ་བརྗོད་པར་བྱའོ། །གང་ཞིག་མདོ་ལས། རྣམ་པར་ཤེས་པར་བྱེད་པས་ན། །ཞེས་བྱེད་པ་པོ་བསྟན་པ་ནི་རང་གི་ངོ་བོ་ཙམ་སྟེ། དེ་ལས་ཐ་དད་པའི་རྣམ་པར་ཤེས་པ་པོར་རྟོག་པ་དགག་པར་བྱ་བའི་ཕྱིར་རོ། །དཔེར་ན་གྲིབ་མ་འགྲོའོ་ཞེས་བྱ་བ་ལྟ་བུ་སྟེ། དེ་ནི་བར་མཚམས་མེད་པར་ཡུལ་གཞན་དག་ཏུ་སྐྱེ་བ་ན་ཅུང་ཟད་ཀྱང་མི་བྱེད་པའི་བྱེད་པ་པོར་བརྟན་པ་འཐོབ་པ་དེ་བཞིན་དུ་རྣམ་པར་ཤེས་པ་ཡང་ཡུལ་གཞན་དག་ཏུ་རྒྱུན་ཆགས་སུ་སྐྱེ་བ་ན་ཅུང་ཟད་ཀྱང་མི་བྱེད་ཀྱང་ཡུལ་དེ་དང་དེ་ཤེས་པར་བྱེད་དོ་ཞེས་བྱེད་པ་པོའི་བརྟན་པ་འཐོབ་པོ། །གང་ལས་ཤེ་ན། གྲ་སྐྱེས་རྣམ་པར་ཤེས་པར་བྱེད་དོ་ཞེས་ནི་ང་མི་སྨྲའོ་ཞེས་གཞན་ལས་བྱེད་པ་པོ་བཀག་པའི་ཕྱིར་རོ། །སྐད་ཅིག་མའི་ངོ་བོར་བསྟན་པ་ལས་ཐ་དད་པའི་རྣམ་པར་ཤེས་པར་རྟོག་པ་དགག་པའི་ཕྱིར་རོ། །གཞན་དག་ན་རེ་དཔེར་ན་གྲིབ་མ་འགྲོའོ་ཞེས་པ་དེ་ཡང་ཡུལ་གཞན་དུ་རྒྱུད་ལ་བྱེད་པ་པོ་བསྟན་ཏོ་ཞེས་ཟེར་རོ། །འདིས་ཀྱང་དུས་མངོན་པར་འཕངས་པའི་ཕྱིར་རྣམ་པར་ཤེས་པའི་ཚོགས་དྲུག་ནི་རྣམ་པར་ཤེས་པའི་ཕུང་པོའོ་ཞེས་བརྗོད་དོ། །ཡིད་ཀྱི་སྐྱེ་མཆེད་ཀྱང་དེ་ཡིན། ཁམས་བདུན་དག་ཏུའང་འདོད་པ་སྟེ། །ཞེས་བྱ་བ་ལ་གཉི་ག་ལ་འང་གི་སྒྲ་ནི་རྣམ་པར་ཤེས་པའི་རྫས་རེ་རེ་ཞིང་ཡིད་ཀྱི་སྐྱེ་མཆེད་ཡིན་གྱི་འདི་བཏགས་པ་ཚོགས་པ་པ་ནི་མ་ཡིན་པའོ་ཞེས་བསྟན་པར་བྱ་བའི་ཕྱིར་རོ། །
འདིར་ཞེས་བྱ་བ་ནི་འདུས་བྱས་དང་འདུས་མ་བྱས་ཞེས་འཆད་པར་རོ། །གཞན་དག་ན་རེ་ཟག་བཅས་དང་ཟག་པ་མེད་པར་རོ་ཞེས་ཟེར་རོ། །རྣམ་པར་ཤེས་པའི་ཕུང་པོ་ནི་རྣམ་པར་ཤེས་པ་དྲུག་གི་བདག་ཉིད་ཡིན་ལ་དེ་དག་ཀྱང་ཁམས་རྣམ་པར་གཞག་པ་ནི་མིག་གི་རྣམ་པར་ཤེས་པའི་ཁམས་ནས་ཡིད་ཀྱི་རྣམ་པར་ཤེས་པའི་ཁམས་ཀྱི་བར་རོ་ཞེས་བསྟན་པ་ཉིད་དེ། དེའི་ཕྱིར་ཡིད་ཀྱི་ཁམས་རྣམ་པར་ཤེས་པའི་ཕུང་པོས་མ་བསྡུས་པ་ནི་ཡོད་པ་མ་ཡིན་ནོ་ཞེས་དེ་ལྟར་ཐུགས་ལ་བཞག་ནས་ཡང་དེ་དག་ལས་གཞན་པ་ཡིད་ཀྱི་ཁམས་དེ་དག་གང་ཡིན་ཞེས་འདྲི་སྟེ། དྲུག་པོ་འདས་མ་ཐག་པ་ཡི། །ཞེས་རྒྱ་ཆེར་འབྱུང་བ་ལ་དེ་མ་ཐག་པ་སྨོས་པ་ནི་བར་དང་བཅས་པ་རྣམ་པར་གཅད་པའི་ཕྱིར་རོ། །འདས་པ་སྨོས་པ་ནི་མ་འོངས་པ་རྣམ་པར་གཅད་པར་བྱ་བའི་ཕྱིར་རོ། །རྣམ་པར་ཤེས་པ་སྨོས་བ་ནི་འདས་མ་ཐག་པའི་ཚོར་བ་ལ་སོགས་པ་རྣམ་བར་གཅད་པར་བྱ་བའི་ཕྱིར་རོ། །ནིའི་སྒྲ་ནི་རྣམ་པར་ཤེས་པ་དྲུག་ལས་དེ་མ་ཐག་ཏུ་འདས་པ་ཁོ་ན་ཡིན་གྱི་ཡིན་གྱི་དེ་ལས་ཐ་དད་པ་ནི་ཡོད་པ་མ་ཡིན་ནོ་ཞེས་ངེས་པར་གཟུང་བའི་དོན་ཏོ། །འདིར་འདས་མ་ཐག་པ་ནི་རིགས་མཐུན་པའི་སྐད་ཅིག་མས་ཆོད་པ་འདས་པ་ཡིན་གྱི་རིགས་མི་མཐུན་པའི་སྐད་ཅིག་མའི་དེ་མ་ཐག་པ་ནི་མ་ཡིན་ཏེ། དེ་ལྟར་ན་འགོག་པའི་སྙོམས་པར་འཇུག་པ་ལས་ལྡང་བའི་སེམས་ལ་ཡང་ཡོད་པ་ཉིད་དུ་འགྱུར་རོ། །དཔེར་ན་བུ་དེ་ཉིད་དུས་དང་གནས་སྐབས་ཀྱིས་ཆོད་པ་ན་གཞན་གྱི་བར་འགྱུར་བ་དང༌། འབྲས་བུ་དེ་ཉིད་དུས་དང་གནས་སྐབས་ཀྱིས་ཆོད་པ་ན་གཞན་གྱི་ས་བོན་ཡིན་པ་ལྟ་བུའོ། །དེ་བཞིན་དུ་མིག་ལ་སོགས་པའི་རྣམ་པར་ཤེས་པ་གཞན་ལ་བརྟེན་པ་དེ་ཉིད་དུས་དང་གནས་སྐབས་ཀྱིས་ཆོད་པ་ན་གཞན་གྱི་རྟེན་དུ་འགྱུར་རོ། །དེ་ལྟར་ན་དེ་ཉིད་བརྟེན་པ་ཡིན་པའི་ཕྱིར་རྣམ་པར་ཤེས་པ་ཡིན་ལ་རྟེན་ཡིན་པའི་ཕྱིར་ཡིད་ཡིན་ནོ་ཞེས་བྱ་བར་འགྲུབ་པར་འགྱུར་རོ། །སློབ་དཔོན་འཕགས་པའི་འབངས་ན་རེ་མིག་གི་རྣམ་པར་ཤེས་པ་ནི་ཡིད་ཀྱི་རྣམ་པར་ཤེས་པ་ལ་ཡིད་དུ་འགྱུར་རོ། །མིག་གི་རྣམ་པར་ཤེས་པ་ལ་སོགས་པ་རྣམས་དེ་མ་ཐག་ཏུ་དེ་མི་སྐྱེ་བ་མ་ཡིན་པས་ལུས་ཀྱི་རྣམ་པར་ཤེས་པའི་བར་ཉིད་ཡིད་དུ་འགྱུར་ལ། དེ་ལས་གཞན་པའི་རྣམ་པར་ཤེས་
པ་ནི་ཡིད་ཀྱི་རྣམ་པར་ཤེས་པ་སྟེ་དྲུག་པོ་རྣམས་ཀྱང་ཡིད་དུ་འགྱུར་རོ་ཞེས་ཟེར་རོ། །འདི་ཡང་ངེས་པའི་རྒྱུ་མེད་པའི་ཕྱིར་སེམས་ཇི་ལྟ་བར་ཐམས་ཅད་ཀྱི་ཕྱི་མ་མི་སྲིད་དོ། །དེའི་ཕྱིར་མ་ལ་ཡང་སོ་སོར་བསྟེན་པར་བྱའོ། །གཅིག་གི་ནང་དུ་གཅིག་འདུས་པའི་ཕྱིར་ཞེས་བྱ་བ་ལ་གྲངས་བསྒྲུབ་པ་ནི་དོན་གྱི་དབང་གིས་འགྱུར་གྱི་རིམ་པའི་དབང་གིས་མ་ཡིན་ནོ། །དེ་ལ་གལ་ཏེ་ཡིད་ཀྱི་ཁམས་དྲུག་གི་ནང་དུ་འདུས་སོ་ཞེས་བྱ་བ་ཡིན་ན་ནི་དེ་ལྟ་ནི་ཡིད་ཀྱི་ཁམས་མ་གཏོགས་པ་གཞན་ཁམས་བཅུ་བདུན་རྫས་སུ་ཡོད་པར་འགྱུར་རོ། །ཅི་སྟེ་རྣམ་པར་ཤེས་པའི་ཁམས་དྲུག་ཡིད་ཀྱི་ནང་དུ་འདུ་ན་ནི་དེ་ལྟ་ན་གཟུགས་ཅན་བཅུ་དང་ཡིད་ཀྱི་ཁམས་དང་ཆོས་ཀྱི་ཁམས་ཞེས་བྱ་བ་བཅུ་གཉིས་སུ་འགྱུར་རོ། །དེ་ལྟའང་ཡིན་མོད་ཀྱི་ཞེས་བྱ་བ་ལ་དངོས་སུ་ན་དེ་ལྟར་བཅུ་བདུན་ནམ་བཅུ་གཉིས་ཡིན་མོད་ཀྱི་འོན་ཀྱང་རྟེན་དང་བརྟེན་པའི་དབྱེ་བས་ཕྱེ་ན། དྲུག་པའི་རྟེན་ནི་རབ་བསྒྲུབ་ཕྱིར། །ཁམས་ནི་བཅོ་བརྒྱད་དག་ཏུ་འདོད། །ཅེས་བྱ་སྟེ་གང་གི་ཕྱིར་ཇི་ལྟར་རྣམ་པར་ཤེས་པ་རྣམས་དམིགས་པ་མེད་པ་ན་སྐྱེ་བར་མི་འགྱུར་བ་དེ་བཞིན་དུ་རྟེན་མེད་ན་ཡང་ཡིན་ལ། དྲུག་པ་ཡིད་ཀྱི་རྣམ་པར་ཤེས་པའི་ཁམས་ལ་ནི་ཇི་ལྟར་མིག་ལ་སོགས་པའི་རྣམ་པར་ཤེས་པ་རྣམས་ལ་མིག་ལ་སོགས་པ་ལྟ་བུར་རྟེན་གཞན་ཡོད་པ་མ་ཡིན་ནོ། །དེའི་ཕྱིར་ཡིད་ཀྱི་རྣམ་པར་ཤེས་པའི་ཁམས་ཀྱི་རྟེན་རབ་ཏུ་བསྒྲུབ་པར་བྱ་བའི་ཕྱིར་ཡིད་ཀྱི་ཁམས་བསྟན་ཏོ། །ཡང་ཇི་ལྟར་འགགས་ཟིན་པ་ད་ལྟར་བའི་རྟེན་དུ་བརྗོད་ཅེ་ན། དེ་སྐྱེ་བ་ལ་ཉེ་བའི་རྒྱུར་གྱུར་བའི་ཕྱིར་རོ། །ཇི་ལྟར་གཟུགས་ཡོད་ཀྱང་མིག་མེད་པར་དེའི་རྣམ་པར་ཤེས་པ་ཕྱི་མ་མི་སྐྱེ་བ་དེ་བཞིན་དུ་ཡུལ་རྣམས་ཡོད་ཀྱང་རྣམ་པར་ཤེས་པ་སྔ་མ་འགགས་པ་མེད་པར་རྣམ་པར་ཤེས་པ་ཕྱི་མ་མི་འབྱུང་ངོ༌། །དེ་ཉིད་ཀྱི་ཕྱིར་འགགས་མ་ཐག་པ་ཞེས་བརྗོད་ཀྱི་ཆེས་སྔ་བར་འགགས་པ་ནི་མ་ཡིན་ནོ། །དེས་གོ་སྐབས་ཕྱིར་ཡང་མ་སྐྱེ་བའི་ཕྱིར་དེའི་ཕྱིར་འདི་ནི་འདིར་རྟེན་གྱི་དངོས་པོའོ། །ད་ལྟར་བ་ཁོ་ནས་དེའི་རྟེན་གྱི་བྱ་བ་བྱེད་དེ། དེ་མཚུངས་པ་དེ་མ་ཐག་པའི་རྐྱེན་གྱི་འབྲས་བུ་ཉིད་དུ་ཡོངས་སུ་གཟུང་བའི་ཕྱིར་རོ། །འདས་པས་ནི་བྱ་བ་བྱས་ཟིན་པ་ཁོ་ནའོ། །གལ་ཏེ་རྟེན་སེམས་ཡིན་པའི་ཕྱིར་
སེམས་ལས་བྱུང་བ་ཉིད་དུ་ཐལ་ལོ་ཞེ་ན་དེའི་རྗེས་སུ་མི་འཇུག་པའི་ཕྱིར་ཐལ་བ་མེད་དོ། །འོན་ཏེ་ཅིའི་ཕྱིར་རྣམ་པར་ཤེས་པ་ཉིད་དུ་རྣམ་པར་གཞག་ཅེ་ན། ཡིད་ཀྱི་ཁམས་སེམས་ལས་བྱུང་བ་མ་ཡིན་ཡང་མཚུངས་པ་དེ་མ་ཐག་པའི་རྐྱེན་ངེས་པ་ལས་སེམས་སུ་ངེས་པ་དེ་སེམས་བྱུང་དུ་ངེས་པ་ལས་ཡིད་ཀྱི་ཁམས་མ་ཡིན་ནོ། །འོ་ན་དེ་ལྟར་འབྱུང་བ་ཆེན་པོ་རྣམས་ལ་ཡིད་ཀྱི་ཁམས་ཉིད་ཡོད་པར་འགྱུར་ཏེ་ངེས་པའི་ཕྱིར་རོ། །སྐྱེ་བ་གཅིག་བུ་ལ་ཡིད་ཀྱི་ཁམས་མེད་ཅིང་ཡོད་ཀྱི་ཁམས་ཞེས་ཀྱང་མི་རུང་ངོ༌། །རྣམ་པར་ཤེས་པ་རྒྱུ་ཉིད་ཀྱི་ཕྱིར་སེམས་ལས་བྱུང་བ་རྣམས་རྣམ་པར་ཤེས་པའི་རྟེན་དུ་མི་རུང་ངོ༌། །དེ་ལ་རྟེན་དྲུག་ཚན་ནི་མིག་ལ་སོགས་པ་ཡིད་ཀྱི་མཐར་ཐུག་པའོ། །བརྟེན་པ་དྲུག་ཚན་ནི་མིག་གི་རྣམ་པར་ཤེས་པ་ལ་སོགས་པ་ཡིད་ཀྱི་རྣམ་པར་ཤེས་པ་ལ་ཐུག་པའོ། །དམིགས་པ་དྲུག་ཚན་ནི་གཟུགས་ལ་སོགས་པ་ཆོས་ཀྱི་ཁམས་ཀྱི་མཐར་ཐུག་པའོ། །འོ་ན་ནི་དགྲ་བཅོམ་པ་ཞེས་བྱ་བ་ལ་ཐ་མ་ནི་གང་ནས་མཚམས་མི་སྦྱོར་བ་ཡོངས་སུ་མྱ་ངན་ལས་འདས་པའི་དུས་ཀྱི་ཚེ་ཐམས་ཅད་ཀྱི་ཐ་མ་གང་ཡིན་པའོ། །དེ་ཉིད་ལ་རྒྱུ་སྨྲས་བ་ནི། དེ་གང་གི་ཞེས་རྒྱས་པར་འབྱུང་བ་སྟེ། རྣམ་པར་ཤེས་པ་འདས་མ་ཐག་པ་ལ་ཡིད་ཅེས་བྱ་བ་ལ། དེ་གང་གི་འདས་མ་ཐག་པར་འགྱུར་པ་དགྲ་བཅོམ་པའི་སེམས་ཐ་མ་ལས་སེམས་གཞན་སྐྱེ་བ་ཡང་མ་ཡིན་ནོ། །དེ་ཡང་ཡིད་ཀྱི་ངོ་བོར་ཞེས་བྱ་བ་ལ་ཕྱི་མའི་རྟེན་གྱི་ངོ་བོར་གནས་པའི་ཕྱིར་ན། དེར་ཡིད་ཉིད་མ་ཉམས་སོ་སྙམ་དུ་དགོངས་སོ། །གལ་ཏེ་དེ་རྟེན་གྱི་ངོ་བོར་རྣམ་པར་མ་བཞག་ན་ཅིའི་ཕྱིར་ཕྱི་མ་མི་སྐྱེ་ཞེ་ན། དེའི་ཕྱིར་རྒྱུ་གཞན་མ་ཚང་བའི་ཕྱིར་རྣམ་པར་ཤེས་པ་ཕྱི་མ་མི་སྐྱེ་བར་ཟད་དོ་ཞེས་གསུངས་ཏེ། དེ་ལ་ཡིད་ལས་མཇུག་ཐོགས་སུ་རྣམ་པར་ཤེས་པ་སྐྱེ་བའི་རྒྱུ་གཞན་ནི་མཐོང་བའི་ཆོས་ཀྱི་རྣམ་པར་སྨིན་པ་ལྷག་མ་དང་འགྲོ་བར་ཉིང་མཚམས་སྦྱོར་བའི་ཉོན་མོངས་པའི་ཐོབ་པ་ཡིན་ནོ། །དགྲ་བཅོམ་པའི་རྣམ་པར་ཤེས་པ་ཐ་མ་ལ་ནི་ཡིད་ཀྱི་ངོ་བོར་གནས་ཀྱང་གཉི་ག་མེད་པས་རྣམ་པར་ཤེས་པ་ཕྱི་མ་མི་སྐྱེའོ། །གལ་ཏེ་དྲུག་པོ་འདས་མ་ཐག་པའི་རྣམ་པར་ཤེས་པ་ཡིད་ཉིད་ཡིན་ན་མིག་ལ་སོགས་པའི་རྣམ་པར་ཤེས་པ་རྣམས་ཀྱང་ཡིད་ལ་བརྟེན་ནས་སྐྱེ་བས་ཏེ་ཡིད་ལ་བརྟེན་ནས་ཆོས་
རྣམས་ཀྱང་སྐྱེ་བར་བརྗོད་པར་བྱའི་ཡིད་ཀྱི་རྣམ་པར་ཤེས་པ་ལས་མ་ཡིན་ཏེ། ཡིད་ཀྱི་རྐྱེན་ཉིད་མ་བཀག་པར་མིག་ལ་བརྟེན་ནས་ཞེས་གསུངས་པ་ཡིན་ནོ། །འོ་ན་འདི་རྐྱེན་གྱི་གཙོ་བོར་བསྟན་པ་ཅི་ཞེ་ན། གླན་ཀའི་སྐབས་མེད་དོ། །དེ་ལ་ཕུང་པོ་དག་གིས་ནི་ཞེས་བྱ་བ་ལ་སོགས་པ་ལ། འདུས་བྱས་ཆོས་རྣམས་དེ་དག་ཀྱང༌། །ཞེས་བྱ་བ་དེར་ཟག་པ་དང་བཅས་པ་དང་ཟག་པ་མེད་པ་ཐམས་ཅད་བསྡུས་པའི་ཕྱིར་ཕུང་པོ་དག་གིས་ནི་འདུས་བྱས་ཐམས་ཅད་བསྡུས་སོ། །གང་དག་ཟག་བཅས་ཉེར་ལེན་པའི། །ཕུང་པོའང་ཞེས་བྱ་བ་དེར་ཟག་པ་དང་བཅས་པ་རྣམས་ཁོ་ན་ཉེ་བར་ལེན་པའི་རྒྱུར་གྱུར་པའི་ཕྱིར་རམ་ཉེ་བར་ལེན་པ་ལས་བྱུང་བའི་ཕྱིར་རམ་ཉེ་བར་ལེན་པ་ལ་རག་ལུས་པའི་ཕྱིར་ཉེ་བར་ལེན་པའི་ཕུང་པོ་དག་གིས་ནི་ཟག་པ་དང་བཅས་པ་ཐམས་ཅད་བསྡུས་སོ། །སྐྱེ་མཆེད་དང་ཁམས་དག་གིས་ནི་ཆོས་ཐམས་ཅད་བསྡུས་སོ། །ཆོས་ཐམས་ཅད་ཀྱང་ཕུང་པོ་ལྔ་དང་འདུས་མ་བྱས་ཀྱིས་སོ། །འདི་ནི་རེ་ཞིག་རྒྱས་པའི་སྒོ་ནས་ཆོས་ཐམས་ཅད་བསྡུས་པ་ཡིན་ལ། བསྡུས་པ་ནི་ཕུང་པོ་དང་ནི་ཞེས་རྒྱ་ཆེར་འབྱུང་སྟེ། དང་གི་སྒྲ་ནི་ཀུན་སྡུད་པའི་དོན་ཏོ། །འདི་ཅི་ལྟར་ཤེས་པར་བྱ་ཞེ་ན། གཟུགས་ཀྱི་ཕུང་པོ་དང༌། ཡིད་ཀྱི་སྐྱེ་མཆེད་དང་ཆོས་ཀྱི་ཁམས་བསྡོམས་པ་ཉིད་ཀྱིས་དེ་ལྟར་ཤེས་པར་བྱའི་རེ་རེས་ནི་མ་ཡིན་པའོ། །དེ་ལ་གཟུགས་ཀྱི་ཕུང་པོས་ནི་གཟུགས་ཅན་གྱི་ཁམས་བཅུ་དང་རྣམ་པར་རིག་བྱེད་མ་ཡིན་པའོ། །ཡིད་ཀྱི་སྐྱེ་མཆེད་ཀྱིས་ནི་སེམས་ཀྱི་ཁམས་བདུན་ནོ། །ཆོས་ཀྱི་ཁམས་ཀྱིས་ནི་ཚོར་བ་ལ་སོགས་པ་གསུམ་དང་འདུས་མ་བྱས་དང་རྣམ་པར་རིག་བྱེད་མ་ཡིན་པའོ། །ཡང་ཅིའི་ཕྱིར་གསུམ་པོ་འདི་དག་ཁོ་ནས་ཡིན་གྱི་གཞན་དག་གིས་སམ་གཉིས་སམ་གཅིག་གིས་མ་ཡིན་ཞེ་ན། དེའི་ཕྱིར་བསྡུ་བ་དེ་ནི་ཞེས་རྒྱ་ཆེར་གསུངས་ཏེ། གང་དང་གང་ནས་བྱུང་ཡང་རུང་ཞེས་བྱ་བ་ལ། ཕུང་པོ་དང་སྐྱེ་མཆེད་དང་ཁམས་དག་གིས་ཡིན་པ་འབའ་ཞིག་ཏུ་མ་ཟད་ཀྱི། འོ་ན་ཅི་ཞེ་ན་གཞན་ཡང་བདེན་པ་དང་འགྲོ་བ་དང་ཁམས་དང་རྟེན་ཅིང་འབྲེལ་པར་འབྱུང་བས་བསྡུ་བ་ཡང་རིག་པར་བྱའོ། །རང་གི་ངོ་བོ་ཉིད་ཀྱིས་ཏེ་གཞན་གྱི་དངོས་པོས་བསྡུས་པ་ནི་མ་ཡིན་ནོ། །འོན་ཕུང་པོ་
གསུམ་གྱིས་འཕགས་པའི་ལམ་ཡན་ལག་བརྒྱད་ཅི་ལྟར་བསྡུས་ཏེ། ཡང་དག་པའི་རྟོག་པ་དང་རྩོལ་བ་དག་གིས་ཤེས་རབ་ཀྱི་ཕུང་པོ་བསྡུས་པར་མི་འགྱུར་ཞིང་ཡང་དག་པའི་དྲན་པས་ཏིང་ངེ་འཛིན་གྱི་ཕུང་པོ་བསྡུས་པ་མ་ཡིན་ཏེ་དེའི་རང་བཞིན་མ་ཡིན་པའི་ཕྱིར་རོ། །དེ་ཡང་ལྟའོ་ཞེས་པ་གཞན་གྱི་དངོས་པོས་བསྡུས་ཀྱང་ཆོས་རྣམས་ལ་འདོད་པར་བྱའོ་ཞེས་པས་རིགས་མཐུན་པ་གཞན་དག་གཞན་གྱི་དངོས་པོ་ཉིད་ཀྱི་ཁྱད་པར་ལས་ངེས་པ་འདི་ནི་ཅི་ལས་ཡིན་ཞེ་ན། ཡང་དག་པའི་རྟོག་པ་དང་རྩོལ་བ་དག་ཉིད་ཀྱིས་ཤེས་རབ་ཀྱི་ཕུང་པོ་བསྡུས་ཀྱི་ལམ་གྱི་ཡན་ལག་ལྷག་མ་རྣམས་ནི་མ་ཡིན་ནོ། །ཅི་སྟེ་གསལ་བའི་ཕྱིར་ཡང་དག་པའི་རྟོག་པ་དང་རྩོལ་བ་དག་ཤེས་རབ་ཀྱི་མཚན་ཉིད་བསྟན་ལ་ཏིང་ངེ་འཛིན་ལ་སོགས་པ་མ་ཡིན་ཞིང༌། དྲན་པ་དང་ཏིང་ངེ་འཛིན་གྱི་མཚན་ཉིད་ཡང་དག་པའི་རྟོག་པ་ལ་སོགས་པ་མ་ཡིན་པས་ཡོད་པར་ངེས་པའི་རྒྱུ་གྲུབ་པོ། །འོན་རང་བཞིན་གྱིས་བསྡུས་པའི་མཚན་ཉིད་མེད་པར་བསྡུས་པ་ཁས་བླངས་པའི་ཕྱིར། ཇི་ལྟར་གཞན་གྱི་དངོས་པོ་དང་མཚུངས་པར་ལྡན་པས་ཐམས་ཅད་ཀྱི་ཐམས་ཅད་དུ་མཚུངས་པར་ལྡན་པ་ཉིད་གཞན་གྱི་ཆོས་བསྡུས་པ་ལ་ཡང་ཅིའི་ཕྱིར་འདོད་པར་མི་བྱེད་ཅེ་ན། མཚུངས་པར་ལྡན་པ་ནི་དམིགས་པ་དང་བཅས་པ་རྣམས་ཉིད་དེ། དེ་ཡང་རྟེན་དང་དམིགས་པ་དང་རྣམ་པ་དང་དུས་དང་རྫས་ཀྱི་རྣམ་པ་སྨོས་པའི་རྒྱུ་མཚན་གྱིས་ཐམས་ཅད་ཀྱི་ཐམས་ཅད་དུ་མི་རུང་ངོ༌། །བསྡུ་བའི་དངོས་པོ་ནི་ཆོས་རྣམས་ཐམས་ཅད་ཀྱི་གཞན་གྱི་དངོས་པོའི་ཁྱད་པར་ལ་སྟེ། ངེས་པའི་རྒྱུ་མེད་པའི་ཕྱིར་ཐམས་ཅད་ཀྱི་ཐམས་ཅད་དུ་མ་ཡིན་ནོ། །འོ་ན་གལ་ཏེ་དེ་ལྟར་ཕུང་པོ་གསུམ་གྱིས་ལམ་བསྡུས་སོ་ཞེས་བརྗོད་པ་མིང་ཙམ་ཞིག་གམ་ཅི་ཞེ་ན། འདི་ནི་བསྡུ་བའི་སྒྲ་དང་རྗེས་སུ་མཐུན་པས་བརྗོད་པའོ། །རང་བཞིན་གྱིས་བསྡུ་བ་འདི་ནི་འདི་ལྟར་དངོས་པོ་རྣམས་ཀྱི་རང་བཞིན་ཉིད་དོ། །དེ་ཉིད་ཀྱི་ཕྱིར་རང་བཞིན་གྱིས་བསྡུས་པ་ཐམས་ཅད་ནི་དངོས་པོ་ལ་མ་ལྟོས་པའི་ཕྱིར་དང་རྒྱུ་མེད་པའི་ཕྱིར་འདི་ཇི་ལྟར་ཁོང་དུ་ཆུད་པར་བྱ་ཞེ་ན། གཞན་གྱི་དངོས་པོ་དང་མི་ལྡན་པ་ནི་མིག་སྟེ་འདིར་རྣ་བའི་དངོས་པོ་དང་མི་ལྡན་པའོ། །མི་ལྡན་གང་དང་གང་ཡིན་པ་དེ་དང་དེ་
ཉིད་ཀྱིས་བསྡུས་སོ་ཞེས་བྱ་བ་རིགས་མ་ཡིན་པའི་སྨྲ་བར་ཁོང་དུ་ཆུད་པར་བྱའོ། །དངོས་པོ་རྣམས་ཀྱིས་བསྡུས་པའི་རང་བཞིན་ནི་འདིར་རང་བཞིན་གྱི་རང་གི་ངོ་བོ་ནི་མ་ཡིན་ནོ་ཞེས་གཞན་དག་ཟེར་རོ། །རང་བཞིན་ནི་རང་གི་མཚན་ཉིད་དོ། །རང་གི་མཚན་ཉིད་ཀྱང་དངོས་པོ་རྣམས་ཕན་ཚུན་འབྱེད་པར་བྱེད་པ་ཡིན་ལ་གང་ལ་ཕྱེ་བ་དེ་ཉིད་དུ་བསྡུ་བ་ལ་མི་རིག་པ་མེད་དོ། །དེ་ལྟ་མ་ཡིན་ན་དབྱེ་བ་མེད་པས་བསྡུ་བ་ཉིད་དུ་མི་འགྱུར་ཏེ། བསྡུ་བ་ནི་རྫས་གཞན་པ་རྣམས་གཅིག་ཏུ་བྱེད་པ་ཉིད་ཡིན་པ་དེའི་ཕྱིར་འདིར་དོན་དུ་རུང་ངོ༌། །གཅེར་བུ་རྣམས་ཀྱང་རང་བཞིན་མངོན་པར་འདོད་པ་འདིའི་མིང་གི་དོན་ཡང་ཅི་ཞེ་ན། གང་གི་ཕྱིར་རྣམ་པར་རྟོག་པ་མེད་པའི་ཡེ་ཤེས་ཀྱི་སྤྱོད་ཡུལ་གྱི་དངོས་པོ་གཞན་རྣམ་པར་བཅད་པས་སྟོན་པར་བྱེད་དོ། །དེ་ཉིད་ཀྱི་ཕྱིར་བསྟན་བཅོས་ལས་ཀྱང་མིག་གི་རྣམ་པར་ཤེས་པས་སྔོན་པོ་རྣམ་པར་ཤེས་ཀྱི་སྔོན་པོའོ་སྙམ་དུ་ནི་མ་ཡིན་ནོ། །ཡིད་ཀྱི་རྣམ་པར་ཤེས་པས་ནི་སྔོན་པོ་རྣམ་པར་ཤེས་ཤིང་སྔོན་པོའོ་སྙམ་དུ་ཡང་ངོ་ཞེས་གསུངས་སོ། །སློབ་དཔོན་འདུས་བཟང་ན་རེ། གཞན་གྱི་དངོས་པོས་བསྡུས་ན་ནི་ཆོས་གཅིག་སྐྱེས་བ་དང་འཇིག་པས་ཆོས་ཐམས་ཅད་སྐྱེ་བ་དང་འཇིག་པ་མི་འདོད་པ་ཉིད་དུ་ཐལ་བར་འགྱུར་ལ། རིགས་གཅིག་སྤངས་པ་ལས་ཐམས་ཅད་སྤངས་པར་འགྱུར་བས་གོང་མའི་གཉེན་པོ་དོན་མེད་པ་ཉིད་དོ། །རང་གི་ངོ་བོས་བསྡུས་པར་བསྟན་པའི་ཕྱིར་འདི་ལྟར་གཞན་གྱི་ངོ་བོས་བསྡུས་པར་ཡང་མི་འགྱུར་ཏེ་འདི་ལ་སྐྱོན་མེད་དོ། །དཔེར་ན་མིག་གི་དབང་པོ་ནི་གཟུགས་ཀྱི་ཕུང་པོ་དང་ཞེས་རྒྱ་ཆེར་འབྱུང་སྟེ། གཟུགས་ཀྱི་མཚན་ཉིད་དང་རྗེས་སུ་འབྲེལ་བའི་ཕྱིར་གཟུགས་ཀྱི་ཕུང་པོས་སོ། །མིག་གི་སྐྱེ་མཆེད་དང་ཁམས་དག་ནི་མི་རྟག་པ་ཉིད་ཀྱི་ཕྱིར་སྡུག་བསྔལ་གྱི་བདེན་པ་དང༌། དེའི་རྒྱུ་ཡིན་པའི་ཕྱིར་ཀུན་འབྱུང་གི་བདེན་པས་བསྡུས་སོ། །གཞན་དང་གཞན་བསྡུས་པ་ཡང་དེ་ལྟར་རྒྱ་ཆེར་སྦྱར་རོ། །བསྡུ་བའི་དངོས་པོ་ནི་སྦྱིན་པ་དང་སྙན་པར་སྨྲ་བ་དང་དོན་སྤྱོད་པ་དང་དོན་མཐུན་པ་རྣམས་སོ། །འཁོར་རྣམས་ནི་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་རྣམས་སོ། །བསྡུ་བའི་དངོས་པོས་འཁོར་བསྡུས་པ་ཡང་རང་བཞིན་གྱིས་ནི་མ་ཡིན་ཏེ། འདི་རེས་འགའ་
བ་ཡིན་པའི་ཕྱིར་དང་བརྡར་བཏགས་པའི་ཡིན་པར་རིག་པར་བྱའོ། །བསྡུ་བའི་དངོས་པོ་རྣམས་ཀྱིས་ནི་འཁོར་རྣམས་བདག་གིར་བྱེད་པ་ཙམ་ལ་འདིར་བསྡུ་བར་གསུངས་སོ། །དེ་ནི་རྟག་ཏུ་མེད་པ་དང་ཕྱིས་ཀྱང་རེས་འགའ་བ་ཡིན་ནོ། །རང་བཞིན་གྱིས་བསྡུས་པ་ནི་རྟག་པ་དང་དོན་དམ་པ་པ་ཡིན་ནོ་ཞེས་བསྟན་པར་འགྱུར་རོ། །རྟེན་གྱི་དབྱེ་བས་ཁམས་ཀྱི་དབྱེ་བའི་དབང་དུ་བྱས་ནས་འདྲི་བ་ནི། མིག་དང་རྣ་བ་དག་ཅེས་བྱ་བ་རྒྱས་པར་འབྱུང་བའོ། །རིགས་དང་སྤྱོད་ཡུལ་དང་རྣམ་པར་ཤེས་པའི་དབྱེ་བས་ཁམས་དབྱེ་བར་བྱའི་རྟེན་གྱི་དབྱེ་བས་ནི་མ་ཡིན་ནོ་ཞེས་བསྟན་པའི་ཕྱིར། མི་འགྱུར་ཏེ་འདི་ལྟར་ཞེས་བྱ་བ་ལ་སོགས་པ་གསུངས་ཏེ། དེ་ལ་མིག་ལ་སོགས་པ་ལྔ་པོ་རྣམས་ནི་ཕན་ཚུན་རིགས་དང་སྤྱོད་ཡུལ་དང་རྣམ་པར་ཤེས་པ་ཐ་དད་པ་ལས་ཁམས་ཐ་དད་དོ། །གཟུགས་ལ་སོགས་པ་ཡུལ་གྱི་ཁམས་རྣམས་ནི་རིགས་དང་རྣམ་པར་ཤེས་པ་ཐ་དད་པ་ལས་སོ། །རྣམ་པར་ཤེས་པའི་ཁམས་དྲུག་ནི་རིགས་དང་སྤྱོད་ཡུལ་ཐ་དད་པ་ལས་སོ། །ཡིད་ཀྱི་རྣམ་པར་ཤེས་པའི་ཐུན་མོང་མ་ཡིན་པའི་ཡུལ་ནི་ཆོས་ཀྱི་ཁམས་སོ། །ཡིད་ཀྱི་ཁམས་སྤྱོད་ཡུལ་ནི་རྣམ་པར་ཤེས་པའི་དབྱེ་བ་ལས་ཆོས་ཀྱི་ཁམས་སྤྱོད་ཡུལ་ཡིན་པའི་ཕྱིར་དང༌། ཡིད་ཀྱི་རྣམ་པར་ཤེས་པའི་རྟེན་ཡིན་པའི་ཕྱིར་རོ། །དེ་ལ་རིགས་ཀྱི་དབྱེ་བ་ཡོད་དེ་རྣམ་པར་ཤེས་པའི་ཁམས་དྲུག་གིས་བསྡུས་པའི་ཕྱིར་རོ། །མིག་དང་རྣ་བ་དང་སྣ་རྣམས་ལས་རིགས་ཐ་དད་པར་ཡོད་པ་མ་ཡིན་ནོ། །རིགས་ཀྱི་དོན་ནི་ཁམས་ཀྱི་དོན་ཏོ་ཞེས་སོ། །འབྲས་བུའི་དབྱེ་བས་རྟེན་རྣམ་པར་བཅད་དེ་ཁམས་ཀྱི་དབྱེ་བ་རྣམ་པར་གཞག་གོ །དེའི་ཕྱིར་མིག་ལ་སོགས་པ་རྣམ་པ་གཉིས་ཡིན་མོད་ནའང་ཁམས་གཅིག་ཉིད་དེ། འདིར་ཡང་དཔེ་ནི་སྐད་ཅིག་མའི་རྒྱུན་གཞན་གྱི་མིག་ལ་སོགས་པ་རྣམས་སོ། །དེ་ལྟ་མ་ཡིན་ན་ཁམས་ཉི་ཤུ་རྩ་གཅིག་ཏུ་འགྱུར་བ་མ་ཡིན་ནམ་ཞེས་བརྗོད་པར་མི་བྱའི། འོ་ན་ཅི་ཞེ་ན་འདི་སྐད་དུ་ཁམས་ཚད་མེད་པ་དག་ཏུ་འགྱུར་བ་མ་ཡིན་ཞེས་བརྗོད་པར་བྱའོ། །དེ་བཞིན་དུ་རྣ་བ་དང་སྣ་དག་ལ་ཡང་སྦྱར་བར་བྱའོ་ཞེས་བྱ་བ་ལ་རིགས་འདྲ་བ་ནི་སོ་སོར་གཉིས་ཀ་ཡང་རྣ་བ་དང་སྣའི་རང་བཞིན་ཡིན་པའི་ཕྱིར་རོ། །སྤྱོད་ཡུལ་འདྲ་བ་ནི་སྒྲ་དང་དྲིའི་ཡུལ་ཅན་ཡིན་པའི་ཕྱིར་རོ། །རྣམ་པར་
ཤེས་པ་འདྲ་བ་ནི་སོ་སོར་གཉིས་ག་རྣ་བ་དང་སྣའི་རྣམ་པར་ཤེས་པའི་རྟེན་ཡིན་པའི་ཕྱིར་རོ། །སྤྱོད་ཡུལ་འདྲ་བ་དང་རྣམ་པར་ཤེས་པ་འདྲ་བར་འཁྲུལ་བ་ནི་ཡིད་ཀྱི་ཁམས་དང་ཡུལ་ལ་ཡང་ཡོད་པའི་ཕྱིར་རིགས་གཅིག་ཏུ་ཡོད་པ་ཉིད་དོ་ཞེས་པའི་ཁྱད་པར་འདི་ལ་སྐྱོན་མེད་དེ། དེ་ལྟར་ན་འོ་ན་སྤྱོད་ཡུལ་དང་རྣམ་པར་ཤེས་པ་འདྲ་བ་ནི་དོན་མེད་པ་ཅན་ཏེ་སྔ་མ་ཉིད་ཀྱིས་གྲུབ་པའི་ཕྱིར་ཞེ་ན། མིག་གི་ཁམས་དང་ཡིད་ཀྱི་ཁམས་ཡུལ་མཚུངས་པ་ནི་མེད་དོ། །རྣམ་པར་ཤེས་པ་འདྲ་བ་ནི་གཉི་ག་མིག་གི་རྣམ་པར་ཤེས་པའི་རྟེན་ཉིད་ཀྱི་ཕྱིར་རོ། །ཡུལ་ནི་ཡིད་ཀྱི་རྣམ་པར་ཤེས་པའི་ལྷག་པར་དམིགས་པའོ་ཞེས་བྱ་བར་ཐལ་བ་མེད་དོ། །ཁ་ཅིག་རིགས་གཞན་དུ་སེམས་སོ། །ལུས་ཀྱི་དབང་པོས་ཐ་དད་པ་མེད་པར་བསྡུས་པའི་ཕྱིར་ལུས་ཀྱི་ཁམས་མ་ཡིན་པའི་ཕོའི་དབང་པོ་དང་མོའི་དབང་པོ་མེད་པ་ཉིད་དོ། །དེ་ཐམས་ཅད་ལུས་སུ་རིགས་གཅིག་པས་རིགས་མཚུངས་པ་དང༌། ཐམས་ཅད་ཀྱི་ཡུལ་རེག་བྱ་ཡིན་པས་སྤྱོད་ཡུལ་མཚུངས་པའི་ཕྱིར་རོ། །རེག་བྱའི་ཁྱད་པར་ལས་དབང་པོ་གཞན་ནི་མ་ཡིན་ཏེ། མིག་དང་བྲང་ལ་སོགས་པ་བཞིན་ནོ། །མིག་དང་བྲང་དང་མགྲིན་པ་དག་ཀྱང་ཐུན་མོང་མ་ཡིན་པའི་རེག་བྱ་དུ་བ་ལ་སོགས་པ་དང་ཕྲད་པ་ན་དེ་དག་དབང་པོ་གཞན་མ་ཡིན་ཏེ་ཐམས་ཅད་ལུས་ཀྱི་རྣམ་པར་ཤེས་པའི་རྟེན་ཡིན་པའི་ཕྱིར་རོ། །སྤྱོད་ཡུལ་མཚུངས་ཀྱང་རྣམ་པར་ཤེས་པ་འདྲ་བ་དང་རྣམ་པར་ཤེས་པ་མི་འདྲ་བར་གསལ་བར་འབྱུང་ངོ༌། །དབང་པོ་རྣམས་ནི་ལྷག་པར་དབང་བྱེད་པ་ཉིད་ཀྱི་ཕྱིར་ཏེ། ཁ་ཅིག་ཏུ་དེ་དག་ཉིད་ཀྱང་དབང་བྱེད་པས་སྐྱེ་མཆེད་དང་ཁམས་གཅིག་ཉིད་དང་ཡུལ་རེག་བྱ་ཡིན་པར་རིགས་མཐུན་པ་ལ་ཡང་དབང་པོ་སོ་སོར་བསྟན་པ་དབང་པོ་བཅུ་གཅིག་རྣམས་ཆོས་ཀྱི་སྐྱེ་མཆེད་དང་ཁམས་གཅིག་ཉིད་ལ་ཡང་དབང་པོ་སོ་སོར་བསྟན་པ་བཞིན་ནོ་ཞེས་སོ། །གལ་ཏེ་མིག་ལ་སོགས་པ་རྣམས་ཁམས་གཅིག་ཉིད་ཡིན་ན། ཅིའི་ཕྱིར་དེ་རྣམས་ཀྱི་རྟེན་གཅིག་ཉིད་དུ་མི་འགྱུར་ཞེ་ན། དེའི་ཕྱིར་མཛེས་བྱའི་ཕྱིར་ན་གཉིས་བྱུང་ངོ་ཞེས་གསུངས་སོ། །གལ་ཏེ་དངོས་པོ་རྣམས་འབྱུང་བ་རྒྱུའི་དབང་གིས་ཡིན་གྱི་དགོངས་པའི་དབང་གིས་མ་ཡིན་པ་མ་ཡིན་ནམ་ཞེ་ན། འདི་ནི་དེ་
ལྟར་ཡིན་ནོ། །ཅིའི་ཕྱིར། མཛེས་པའི་ཕྱིར་ན་གཉིས་བྱུང་ངོ༌། །ཞེས་བྱ་བ་སྨྲས་ཤེ་ན། ཇི་ལྟར་ད་ལྟའི་སེམས་ཅན་སོ་སོར་རིགས་མཐུན་པ་རྣམས་མིག་དག་གིས་རྟེན་ཐ་དད་པས་ཡན་ལག་རྣམ་པར་འབྱེད་པའི་རྟེན་ལ་མཛེས་པར་རློམ་པ་དེ་བཞིན་དུ་འདས་པའི་དུས་ན་ཡང་ཡིན་པར་གདོན་མི་ཟ་སྟེ། དེའི་ཕྱིར་སྲིད་པ་སྔོན་དུ་འགྲོ་བ་ཅན་གྱི་ལས་ཀྱིས་མངོན་པར་བསྒྲུབ་པའི་ལུས་ལ་དགོངས་ནས། མཛེས་བྱའི་ཕྱིར་ན་གཉིས་འབྱུང་ངོ་ཞེས་བཤད་དོ། དེ་སྐྱེས་པའི་ལས་ཀྱི་གཞི་བསྟན་པའི་ཕྱིར་རོ། །དཔེར་ན་རྒྱན་མཛེས་པ་ལ་དམིགས་པའི་འདུན་པའི་འདོད་ཆགས་ཀྱི་རྒྱུ་ཅན་གྱི་འབྲས་བུ་ཡིན་པས་མཛེས་པར་བྱ་བའི་དོན་དུ་བརྗོད་པ་བཞིན་ནོ། །སློབ་དཔོན་འདུས་བཟང་ན་རེ། དབང་པོའི་རྣམ་པ་འདི་རྣམས་ཉིད་ཀྱི་རྣམ་པ་མངོན་པར་འགྲུབ་པ་དེ་ནི། རྒྱུའི་མི་མཐུན་ཕྱོགས་མེད་པ་གཉིས་ཀྱིས་མངོན་པར་འགྲུབ་སྟེ། ལུས་ཀྱི་དབང་པོའི་ལག་པ་དང་རྐང་པའི་གནས་ཀྱི་དབྱེ་བ་བཞིན་ནོ། །གང་ཞིག་འདོད་ཆགས་ལ་སོགས་པ་ལུས་ཀྱི་དབང་པོའི་རྟེན་རྣམ་པར་རྟོག་པ་དག་ཏུ་མཐོང་བ་དེའི་རྒྱུ་ནི་དེ་དག་ཉིད་ཀྱི་མཐུན་པའི་ཕྱོགས་འཛིན་པས་དེ་རྟེན་མེད་པ་དང་བཅས་པ་གཉིས་བཞིན་དུ་ཅིའི་ཕྱིར་རྒྱུ་ལ་བལྟོས་པས་དབང་པོ་མངོན་པར་འགྲུབ་ཅེས་སོ། །གལ་ཏེ་རྒྱུ་ལ་བལྟོས་པས་དབང་པོ་མངོན་པར་འགྲུབ་པ་དེ་ཉིད་བརྗོད་པར་བྱ་བ་དབང་པོ་འདི་རྣམས་ཀྱི་རྒྱུ་ཉིད་རྣམ་པ་གང་གིས་གཉིས་ཉིད་ཀྱིས་འཇུག་པར་བྱེད། དེ་ལ་རིགས་ཁོ་ན་རྣམ་པ་ཞེ་ན། ལས་ཀྱི་རྣམ་པར་ཐལ་བ་ལས། དེ་ཉིད་ལྷག་པར་དབང་བྱེད་པ་ཐོབ་པའི་སྒྲ་ཡིས་བརྗོད་པར་བཤད་དོ། །གལ་ཏེ་མིག་ལ་སོགས་པ་རྟེན་རེ་རེར་གྱུར་ན་ལྷག་པར་དབང་བྱེད་པ་ཉམས་ཏེ། ཇི་ལྟར་གཉིས་དག་གིས་ཡོངས་སུ་གསལ་བར་མཐོང་བ་དེ་ལྟར་རེ་རེར་མ་ཡིན་ནོ། །དེ་ལྟར་དབང་པོ་རྣམས་ཀྱིས་ལྷག་པར་དབང་བྱེད་པ་འགྲིབ་པ་དང་ཉམས་པར་འགྱུར་བ་ན། མཛེས་བྱའི་ཕྱིར་ཞེས་པ་ལྷག་པར་དབང་བྱེད་པའོ་ཞེས་བཤད་པར་བྱ་སྟེ། མཛེས་བྱའི་ཕྱིར་ཞེས་པའི་སྒྲ་ཡིས་ལྷག་པར་དབང་བྱེད་པ་བརྗོད་པར་བྱའོ་ཞེས་ཟེར་རོ། །འདི་ནི་རྟོག་པ་ཙམ་སྟེ་ཇི་ལྟར་ལྕེ་ལ་སོགས་པ་རྣམས་རྟེན་གཅིག་དང་རྟེན་དུ་མ་ལ་ཡང་དེ་དང་འདྲ་བས་དབང་བྱེད་པ་ཉམས་པས་འདི་དག་གི་གཅིག་ལའང་མིག་ལ་
སོགས་པར་འགྱུར་རོ་ཞེས་པ་དང༌། ལས་ཀྱིས་ལྕེ་ནི་རྟེན་ཉིད་དུ་གསལ་བར་དམིགས་པའི་རྟེན་དུ་གྱུར་པ་རྒྱ་ཆེན་པོ་ཞིག་སྐྱེ་བར་འདོད་དོ་ཞེས་བརྗོད་པར་མི་ནུས་སོ། །རིགས་མཐུན་པས་འདྲ་བ་རྣམས་ལ་ཡང་གཟུགས་མཛེས་པར་རློམ་པ་ངེས་པ་སྟེ། དཔེར་ན་འུག་པ་ལ་སོགས་པ་རྣམས་ལ་ཡང་རང་གི་ལུས་མཛེས་པའི་སྲིད་པ་ལས་སྐྱེས་པ་ཉིད་ཀྱི་མིག་ལ་སོགས་པའི་རྟེན་གྱི་དབྱེ་བ་ལྟ་བུའོ། །དེ་ལྟ་མ་ཡིན་ཏེ་ཞེས་བྱ་བ་ལ་གལ་ཏེ་མིག་ལ་སོགས་པ་རྟེན་གཉིས་པར་མ་གྱུར་ན་ཤིན་ཏུ་མི་མཛེས་པར་འགྱུར་ཏེ། རྟེན་གཉིས་པའི་མིག་ལ་སོགས་པ་དག་ལ་མཛེས་པར་མངོན་པར་རློམ་པའི་ཕྱིར་རོ། །ཕུང་པོ་དང་ཁམས་དང་སྐྱེ་མཆེད་ཀྱི་དོན་ཞེས་བྱ་བ་རྒྱ་ཆེར་འབྱུང་བ་ལ། ཕུང་པོ་དང་སྐྱེ་མཆེད་དང་ཁམས་རྣམས་ལ་དངོས་པོའི་སྒོ་ནས་དབྱེ་བ་ཡོད་པ་མ་ཡིན་ཏེ། ཇི་ལྟར་གང་ཕུང་པོ་རྣམས་འདུས་མ་བྱས་ཁྱད་པར་དུ་ཤེས་པར་བྱ་བར་གསུངས་ལ། སྐྱེ་མཆེད་དང་ཁམས་རྣམས་ལ་ཡང་དེ་ཉིད་དེ་དེའི་ཕྱིར་འདིར་ཕུང་པོ་ལ་སོགས་པའི་དོན་གྱི་ཁྱད་པར་ལས་བྱེད་པ་ཡིན་གྱི། དེ་ཡང་དངོས་པོའི་ཁྱད་པར་ཤེས་པར་བྱ་བ་མ་ཡིན་ནོ། །འདུ་བྱེད་ལ་སོགས་པའི་སྒྲ་རྣམས་སོ་སོར་དོན་དུ་མ་ཡིན་པའི་ཕྱིར་ཕུང་པོ་དང་སྐྱེ་མཆེད་དང་ཁམས་ཀྱི་དོན་རྣམ་གྲངས་གཞན་གྱིས་ཏེ། དེའི་ཕྱིར་དེ་ལྟར་ཕུང་པོ་ལ་སོགས་པའི་དོན་བསྟན་པའི་ཕྱིར། སྤུངས་དང་སྐྱེ་སྒོ་རིགས་ཀྱི་དོན། །ཕུང་པོ་སྐྱེ་མཆེད་ཁམས་རྣམས་ཡིན། །ཞེས་བྱ་བ་གསུངས་ཏེ། འདི་རྣམས་ལ་སྤུངས་པ་དང་སྐྱེ་བའི་སྒོ་དང་རིགས་དག་ཡོད་པས་ན་ཞེས་བྱ་བར་ཚིག་རྣམ་པར་སྦྱར་རོ། །དེ་རྣམས་ཀྱང་གང་ཞེ་ན། ཕུང་པོ་སྐྱེ་མཆེད་ཁམས་རྣམས་ཡིན། །ཞེས་བྱ་བ་སྟེ་སྒྲ་རྣམས་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །ཕུང་པོའི་དོན་ནི་སྤུངས་པའི་དོན་ཡིན་ནོ་ཞེས་བྱ་བར་ཇི་ལྟར་རྟོགས་ཤེ་ན། མདོ་ལས་དེ་ཐམས་ཅད་གཅིག་ཏུ་བསྡུས་ཏེ་གཟུགས་ཀྱི་ཕུང་པོ་ཞེས་བྱ་བའི་གྲངས་སུ་འགྲོའོ་ཞེས་འབྱུང་བའི་ཕྱིར་རོ། །མི་རྟག་པ་ཉིད་ཀྱིས་འགག་པའོ་ཞེས་བྱ་བ་ནི་འགོག་པ་ནི་རྣམ་པ་ལྔར་འགྱུར་བ་ལས་མི་རྟག་པ་ཉིད་ཀྱི་མཚན་ཉིད་ཀྱི་འགོག་པའི་ཁྱད་བར་རོ། །གཞན་དག་ནི་སྙོམས་པར་འཇུག་པའི་འགོག་པ་དང༌། སྐྱེ་བའི་འགོག་པ་དང་སོ་སོར་བརྟགས་པའི་འགོག་པ་དང༌།
སོ་སོར་བརྟགས་པ་མ་ཡིན་པའི་འགོག་པའོ། །འདིར་མི་རྟག་པ་ཉིད་ཀྱིས་འགགས་པ་ནི་སོ་སོར་བརྟགས་པའི་འགགས་པ་རྣམ་པར་གཅད་པའི་ཕྱིར་རོ། །གཟུགས་ཀྱི་སྐབས་ལས་སྐྱེ་བ་དང་སྙོམས་པར་འཇུག་པའི་འགོག་པ་དག་ནི་སེམས་དང་སེམས་ལས་བྱུང་བ་རྣམས་ཉིད་གཟུགས་མ་ཡིན་ནོ་ཞེས་ཁ་ཅིག་གོ །དེ་བཞིན་དུ་ཚོར་བ་ལ་སོགས་པ་ལ་ཡང་རིག་པར་བྱ་ཞིང༌། ཤིན་ཏུ་བསྟན་པས་རང་གི་མཚན་ཉིད་ཀྱི་འགོག་པ་ཤེས་པར་བྱའོ། །འགོག་པ་རྣམ་པར་གཅད་པའི་དོན་དུ་མི་རྟག་པ་ཉིད་སྨོས་པར་ཤེས་པར་བྱའོ། །སྙོམས་པར་འཇུག་པ་དང་སྐྱེ་བ་དང་སོ་སོར་བརྟགས་པས་འགོག་པ་རྣམས་མ་འོངས་པ་ཉིད་དོ། །སོ་སོར་བརྟགས་པས་འགོག་པ་དུས་གསུམ་པ་ཅན་ནོ། །ཟག་པ་དང་བཅས་པ་རྣམས་ཀྱི་རང་གི་མཚན་ཉིད་ཀྱི་འགོག་པ་ནི་ད་ལྟར་བྱུང་བ་ཉིད་དོ། །ད་ལྟར་བྱུང་བ་ནི་བྱུང་ལ་མ་འགག་ས་པའོ་ཞེས་བྱ་བ་ལ། བྱུང་བ་ཞེས་བྱ་བ་དེ་ཙམ་ཞིག་ཡིན་ན་ནི་འདས་པ་ལ་ཡང་ཐལ་བར་འགྱུར་རོ། །མ་འགགས་པ་ཞེས་བྱ་བ་དེ་ཙམ་ཞིག་ཡིན་ན་ནི་མ་འོངས་པ་ལ་ཡང་ཐལ་བར་འགྱུར་བས་དགག་པའི་ཕྱིར་གཉིས་ཀ་སྨོས་སོ། །ནང་ནི་རང་གི་རྒྱུད་ལ་ཡོད་པའོ་ཞེས་བྱ་བ་ནི་མིག་ལ་སོགས་པ་དང་གཟུགས་ལ་སོགས་པའོ། །གཞན་ནི་ཕྱིའི་འོ་ཞེས་བྱ་བ་ནི་གང་ཞིག་གཞན་གྱི་རྒྱུད་ཀྱི་དང་རྒྱུད་མ་གཏོགས་པའོ། །ཡང་ན་སྐྱེ་མཆེད་ཀྱི་སྒོ་ནས་ཞེས་བྱ་བ་ནི་མིག་ལ་སོགས་པ་ནང་གི་སྐྱེ་མཆེད་དྲུག་དང་གཟུགས་ལ་སོགས་པ་ཕྱིའི་སྐྱེ་མཆེད་དྲུག་གོ །དེའི་ཕྱིར་གཞན་གྱི་རྒྱུད་དུ་གཏོགས་པའི་གཟུགས་ལ་སོགས་པ་རྣམས་ཕྱིའི་འོ་ཞེས་བྱའོ། །རིགས་པ་ནི་ཐོགས་པ་དང་བཅས་པ་སྟེ་སྐྱེ་མཆེད་བཅུའི་རང་བཞིན་ནོ། །ཕྲ་བ་ནི་ཐོགས་པ་མེད་པ་སྟེ་རྣམ་པར་རིག་བྱེད་མ་ཡིན་པའི་གཟུགས་སོ། །ཡང་ན་བལྟོས་པ་པ་ཡིན་ཏེ་བིལ་བའི་གཟུགས་ནི་རགས་པ་དང་ཡིན་ལ་སྐྱུ་རུ་རའི་གཟུགས་ནི་ཕྲ་བའོ། །གལ་ཏེ་བལྟོས་པ་པ་མ་ཡིན་པའི་ཕྱིར་མ་གྲུབ་པ་སྟེ་རྣམ་པར་གནས་པ་མེད་དོ་ཞེ་ན། ཇི་ལྟར་སྐྱུ་རུ་རའི་གཟུགས་དེ་ཉིད་བིལ་བ་དང་རྒྱ་ཤུག་ལ་བལྟོས་ནས་ཕྲ་བ་དང་རགས་པ་ཡང་ཡིན་པས་ཅུང་ཟད་ཕྲ་བ་དང་རགས་པར་གནས་པར་མི་འགྱུར་ཏེ། ཕ་རོལ་དང་ཚུ་རོལ་བཞིན་ནོ་ཞེ་ན་མ་ཡིན་ཏེ་བལྟོས་པས་ཐ་དད་པའི་ཕྱིར་རོ་
ཞེས་བྱ་བ་ལ་གང་ལ་བལྟོས་ནས་མངོན་པར་བརྗོད་པ་དེ་ལ་བལྟོས་པ་གནས་སྐབས་ཏེ། དཔེར་ན་ཕ་དང་བུ་བཞིན་ནོ། །ངན་པ་ནི་ཉོན་མོངས་པ་ཅན་ཏེ་བསྒྲིབས་པ་དང་མི་དགེ་བ་རྒྱ་ནོམ་པ་ནི་ཉོན་མོངས་པ་ཅན་མ་ཡིན་པ་སྟེ་དགེ་བ་དང་མ་བསྒྲིབས་ལ་ལུང་དུ་མ་བསྟན་པའོ། །རིང་བ་ནི་འདས་པ་དང་མ་འོངས་པ་སྟེ་ཕན་ཚུན་ད་ལྟར་བྱུང་བའི་དངོས་པོས་ཆོད་པའི་ཕྱིར་རོ། །ཉེ་བ་ནི་ད་ལྟར་བྱུང་བ་སྟེ་འདས་པ་དང་མ་འོངས་པ་དག་གིས་མཆོད་པའི་ཕྱིར་རོ། །ཡང་ན་བྱེད་པ་པོ་འདས་པ་དང་མ་འོངས་པ་ནི་རིང་པའོ། །ད་ལྟར་བྱུང་བ་ནི་ཉེ་བའོ། །རྣམ་པར་ཤེས་པའི་བར་དུ་ཡང་དེ་དང་འདྲའོ་ཞེས་བྱ་བ་ལ། ཚོར་བ་དང་འདུ་ཤེས་དང་འདུ་བྱེད་གང་ཅི་ཡང་རུང༌། རྣམ་པར་ཤེས་པ་གང་ཅི་ཡང་རུང༌། འདས་པ་དང་མ་འོངས་པ་དང་ད་ལྟར་བྱུང་བའམ། ནང་གིའམ། ཕྱིའི་འམ། རགས་པའམ། ཕྲ་བའམ། ངན་པའམ། གྱ་ནོམ་བའམ། ཐག་རིང་བ་ན་ཡོད་པ་གང་ཡིན་པའམ། ཉེ་བ་ན་ཡོད་པ་གང་ཡིན་པ་དེ་ཐམས་ཅད་གཅིག་ཏུ་བསྡུས་ཏེ་རྣམ་པར་ཤེས་པའི་ཕུང་པོ་ཞེས་བྱ་བའི་གྲངས་སུ་འགྲོའོ་ཞེས་བྱ་བར་རོ། །དེ་ལ་རགས་པ་དང་ཕྲ་བ་མ་གཏོགས་པ་འདས་པ་ལ་སོགས་པ་རྣམས་ནི་དེ་ཁོ་ན་ལྟར་བསྟན་ཏོ། །དེ་ཉིད་ཀྱི་ཕྱིར་འདི་ནི་ཁྱད་པར་ཡིན་ཏེ། ཞེས་བྱ་བ་གསུངས་སོ། །རགས་པ་ནི་དབང་པོ་ལྔ་ལ་བརྟེན་པའོ་ཞེས་བྱ་བ་ནི་རྟེན་གྱི་རྗེས་སུ་བྱེད་པའི་ཕྱིར་རོ། །ཕྲ་བ་ནི་ཡིད་ལས་བྱུང་བའོ་ཞེས་བྱ་བ་ནི་མ་བསགས་པ་དང་ཐོགས་པ་མེད་པའི་རྟེན་ཅན་ཡིན་པའི་ཕྱིར་རོ། །ཡང་ན་ས་ལས་ཀྱང་ཞེས་བྱ་བ་ལ་བལྟོས་པ་ཉིད་ཀྱི་ཕྱིར་འདོད་པར་གཏོགས་པ་ནི་རགས་པ་ཉིད་དང་སྲིད་པའི་རྩེ་མོ་པ་ནི་ཕྲ་བ་ཉིད་དོ། །འདས་པ་དང་མ་འོངས་པ་ནི་རང་གི་སྒྲས་བརྗོད་པ་ཡིན་བཞིན་དུ་རིང་པོར་སྒྲོ་བཏགས་པ་དང་ངན་པ་དང་གྱ་ནོམ་པའི་དོན་ཡོངས་སུ་རྒྱས་པར་མ་རངས་པས་བྱེ་བྲག་ཏུ་སྨྲ་བ་རྣམས་ན་རེ་ཞེས་གསུངས་སོ། །བཙུན་པ་ཞེས་བྱ་བ་ནི་དཔེ་སྟོན་སྡེ་པའི་གནས་བརྟན་ཆོས་སྐྱོབ་བོ། །དབང་པོ་ལྔས་གཟུང་བར་བྱའོ་ཞེས་བྱ་བ་ནི་ཕྱིའི་སྐྱེ་མཆེད་ལྔའོ། །གཞན་ནི་ཕྲ་བའོ་ཞེས་བྱ་བ་ནི་ཡིད་ཀྱི་དབང་པོའི་གཟུང་པར་བྱ་བ་སྟེ་དེ་ཡང་མིག་ལ་སོགས་པ་སྐྱེ་མཆེད་གཟུགས་ཅན་རྣམས་དང་རྣམ་པར་རིག་བྱེད་མ་ཡིན་པའོ། །ཡིད་
དུ་མི་འོང་བའོ་ཞེས་བྱ་བ་ནི་ཡིད་དང་མི་མཐུན་པ་སྟེ། །དེ་ནི་ཡིད་དུ་འོང་བར་བྱེད་པ་མ་ཡིན་ཞིང་དགའ་བར་བྱེད་པ་མ་ཡིན་པའི་ཕྱིར་རོ། །ཡིད་དུ་འོང་བ་ནི་ཡིད་དང་མཐུན་པ་སྟེ། དེ་ནི་ཡིད་དུ་འཐད་པའི་ཕྱིར་ཡིད་དུ་འོང་བར་བྱེད་པའོ། །དེ་ལྟ་ན་རྡོར་བའི་དོན་གྱིས་ནི་ངན་པ་ཡིན་ལ། ཚིམ་པར་བྱེད་པའི་དོན་གྱིས་ན་གྱ་ནོམ་པའོ། །རིང་བ་ནི་ཡུལ་མི་སྣང་བ་ཅན་ནོ་ཞེས་བྱ་བའི་རྟེན་གྱི་ཡུལ་གྱི་དབང་དུ་བྱས་ནས་ཡིན་ཏེ། འགའ་ཞིག་ཉེ་ཡང་ཕྲ་བའི་ཕྱིར་མི་སྣང་བས་ཡུལ་སྨོས་སོ། །ཅུང་ཟད་ཅིག་ཉེ་བ་ཡིན་ཡང་ཆད་པའི་ཕྱིར་ཡུལ་མི་སྣང་བ་ཅན་དུ་འགྱུར་མོད་ཀྱི། དེའི་རྟེན་ནི་གནས་དང་ཉིད་ཀྱིས་ལྟ་བར་ནུས་པས་ཀྲིཏ་ཀྱི་རྐྱེན་ནི་ནུས་པའི་དོན་ལ་རིག་པར་བྱའོ། །ཉེ་བ་ནི་ཡུལ་སྣང་བ་ཅན་ནོ་ཞེས་བྱ་བ་ལ་སྐར་མ་ལ་སོགས་པ་ནི་ཅུང་ཟད་ཅིག་ནི་རིང་ཡང་སྣང་བ་དེའི་ཕྱིར་ཡུལ་སྣང་བ་ཅན་ཞེས་སྨོས་སོ། །ཡང་རྒྱུ་ཅིའི་ཕྱིར་བཙུན་པས་བྱེ་བྲག་ཏུ་སྨྲ་བས་བཤད་པའི་རིང་བ་དང་ཉེ་བ་ལ་རྣམ་པ་གཞན་དུ་རིང་བ་དང་ཉེ་བ་བསྟན་ཅེ་ན། དེའི་ཕྱིར་འདས་པ་ལ་སོགས་པ་རང་གི་མིང་གི་བསྟན་པའི་ཕྱིར་ཏེ་ཞེས་བྱ་བ་ལ་གསུངས་ཏེ། འདི་ལྟར་ཅུང་ཟད་ཅིག་རང་གི་སྒྲས་རབ་ཏུ་དབྱེ་བར་སྨྲས་པ་ནི་རབ་ཏུ་དབྱེ་བ་གཞན་གྱི་མཚན་ཉིད་ལ་འཇུག་པ་མ་ཡིན་ཏེ་ཐ་མི་དད་པར་འགྱུར་རོ་ཞེས་དགོངས་སོ། །དེ་དག་གི་ཉེ་བ་དང་རིང་བ་དག་ནི་ཞེས་བྱ་བ་ལ་ཚོར་བ་ལ་སོགས་པ་ཡུལ་མི་སྣང་བ་ལ་བརྟེན་པ་ནི་རིང་བ་ཡིན་ལ། ཡུལ་སྣང་བ་ལ་བརྟེན་པ་ཞི་ཉེ་བའོ། །སྔ་མ་བཞིན་ནོ་ཞེས་བྱ་བ་ནི་དབང་པོ་ལ་བརྟེན་པ་ནི་རགས་པའོ། །ཡིད་ལས་བྱུང་བ་ནི་ཕྲ་བའོ། །ཡང་ན་ས་ལས་ཀྱང་ངོ་ཞེས་བཤད་པ་ལྟར་རོ། །སེམས་དང་སེམས་ལས་བྱུང་བ་རྣམས་སྐྱེ་བའི་སྒོའི་དོན་ནི་སྐྱེ་མཆེད་ཀྱི་དོན་ཏེ་ཞེས་བྱ་བ་ལ། གང་ལས་རྟོགས་ཤེ་ན་ངེས་པའི་ཚིག་ཏུ་ན་སེམས་དང་སེམས་ལས་བྱུང་བ་རྣམས་ཞེས་རྒྱ་ཆེར་འབྱུང་ངོ༌། །སྐྱེ་བ་ནི་འོང་བ་ལ་བརྗོད་དོ། །སེམས་དང་སེམས་ལས་བྱུང་བ་རྣམས་སྐྱེ་ཞིང་བདག་གི་དངོས་པོར་རེད་པའོ། །དེའི་ཕྱིར་དེ་དག་ནི་སེམས་དང་སེམས་ལས་བྱུང་བ་རྣམས་སྐྱེ་བ་མཆེད་པར་བྱེད་པས་ན་སྐྱེ་མཆེད་དེ། མཆེད་པར་བྱེད། རྒྱས་པར་བྱེད། བདག་གི་དངོས་པོར་རེད་པ་རྒྱུན་དུ་གནས་པར་བྱེད་ཅེས་བྱ་བའི་ཐ་ཚིག་གོ །ཇི་སྐད་དུ་བྲམ་ཟེ་མིག་གི་སྒོ་ནས་ཇི་སྲིད་གཟུགས་
རྣམས་ལ་བལྟ་བའི་ཕྱིར་ཞེས་བྱ་བ་དེ་ལ། དྲུག་པོ་རྣམས་ཉིད་སྒོའི་དོན་དུ་འཐད་དེ། སེམས་དང་སེམས་ལས་བྱུང་བའི་སྒོའི་དོན་ནི་བཅུ་གཉིས་པོ་རྣམས་ཏེ། མིག་ལ་བརྟེན་ནས་གཟུགས་རྣམས་ལ་མིག་གི་རྣམ་པར་ཤེས་པ་སྐྱེ་ཞིང་གསུམ་འདུས་པ་ལས་རེག་པ་དང་ལྷན་ཅིག་ཚོར་བ་དང་འདུ་ཤེས་སྐྱེའོ་ཞེས་གསུངས་པའི་ཕྱིར་རོ། །རིགས་ཀྱི་དོན་ནི་ཁམས་ཀྱི་དོན་ཏེ་ཞེས་བྱ་བ་ལ། གང་ལས་ཁོང་དུ་ཆུད་ཅེ་ན་རིགས་སུ་འདྲ་བའི་ཕྱིར་རོ། །དེ་ཉིད་ཀྱི་ཕྱིར་དཔེར་ན་རི་འགའ་ཞིག་ལ་ཞེས་རྒྱ་ཆེར་གསུངས་ཏེ། དཔེར་ན་གསེར་དང་ས་བོན་གྱི་རིགས་ལ་ཁམས་ཞེས་བརྗོད་པ་ལྟ་བུའོ། །རྟེན་ཏམ་རྒྱུད་ཅེས་རྒྱས་པར་འབྱུང་བ་ལ། ལུས་སམ་སེམས་དང་སེམས་ལས་བྱུང་བའི་རྒྱུད་གཅིག་ལའོ། །གཞན་དག་ན་རེ་སྐད་ཅིག་མའི་རྒྱུན་གཅིག་ལའོ་ཞེས་ཟེར་རོ། །རིགས་བཅོ་བརྒྱད་རྣམས་ནི་ས་བོན་བཅོ་བརྒྱད་ལ་ཁམས་བཅོ་བརྒྱད་དུ་བརྗོད་པའོ། །སྐལ་བ་མཉམ་པའི་རྒྱུ་ཡིན་པའི་ཕྱིར་རོ་ཞེས་བྱ་བ་ལ་མིག་གི་དབང་པོ་ནི་མིག་གི་དབང་པོ་ཕྱིས་སྐྱེས་པ་དང་མ་སྐྱེས་པའི་སྐལ་བ་མཉམ་པའི་རྒྱུ་ཡིན་ཏེ། དེ་བཞིན་དུ་གཞན་ལ་ཡང་བརྗོད་པར་བྱའོ། །འདུས་མ་བྱས་ཁམས་མ་ཡིན་པར་འགྱུར་རོ་ཞེ་ན་ཞེས་བྱ་བ་ལ་སྔ་མ་དང་ཕྱི་མ་ཉིད་མེད་པའི་ཕྱིར་ཏེ། དེ་ནི་འགའི་ཡང་སྐལ་བ་མཉམ་པའི་རྒྱུ་མ་ཡིན་པའི་ཕྱིར་རོ། །དེ་ནི་སེམས་དང་སེམས་ལས་བྱུང་བ་རྣམས་ཀྱི་དམིགས་པ་དང་བདག་པོའི་རྐྱེན་དུ་གྱུར་པའི་ཕྱིར་འདུས་མ་བྱས་ཀྱང་འབྱུང་གནས་ཉིད་དུ་གྲུབ་པོ། །དེ་ལྟ་ན་ཡང་དེར་སྐྱེ་མཆེད་དང་ཁམས་ཀྱི་དོན་དག་དབྱེར་མེད་པར་འགྱུར་ཏེ། གཉི་ག་ཡང་སེམས་དང་སེམས་ལས་བྱུང་བའི་འབྱུང་གནས་སུ་གྱུར་བའི་ཕྱིར་རོ། །དེའི་ཕྱིར་གཞན་དག་ན་རེ་ཁམས་ཞེས་བྱ་བའི་སྒྲ་འདི་ནི་རིགས་ཀྱི་ཚིག་ཡིན་ནོ་ཞེས་ཟེར་རོ། །དཔེར་ན་གསེར་ལ་སོགས་པའི་རིགས་རྣམས་ཕན་ཚུན་རིགས་ཐ་དད་པ་དེ་བཞིན་དུ་མིག་ལ་སོགས་པ་དག་ཀྱང་ཡིན་ནོ། །དེ་ལྟར་ན་རིགས་སུ་འོང་བས་ཁམས་ཀྱི་སྒྲ་འདི་ནི་རིགས་ཀྱི་ཚིག་ཡིན་ནོ། །རང་བཞིན་ཞེས་བྱ་བ་ལ་རང་བཞིན་ནི་རིགས་གཞན་རྣམ་པར་བཅད་པའི་སྒོ་ནས་རང་གི་ངོ་བོ་སྟེ། མཚན་ཉིད་མཚུངས་པ་ལ་བཤད་ཀྱི་རྫས་ཀྱི་རང་བཞིན་ཉིད་ནི་མ་ཡིན་ནོ། །ཁམས་སོ་སོར་མཚུངས་
པར་ཡང་མི་འགྱུར་རོ། །དྲུག་པ་རྣམས་རིགས་ཐ་དད་པའི་ཕྱིར་བརྟེན་དང་རྟེན་གྱི་རིགས་ཀྱི་དབྱེ་བ་ལས་མ་ཡིན་ཞིང་བཏགས་པའི་དུས་ཀྱི་དབྱེ་བ་ལས་སམ་སྔ་མ་དྲུག་ཉིད་ལས་ཡིད་ཀྱི་ཁམས་དྲུག་རྣམས་ཀྱང་ངོ༌། །དེ་སྔོན་དུ་འགྲོ་བ་ལས་ཤིན་ཏུ་གསལ་བར་ཕྱེ་བས་དུས་གསུམ་པ་ཅན་ཉིད་ལ་ཡང་དེ་དག་ཐམས་ཅད་གང་ལ་གནས་པ་དེ་ལ་བལྟོས་ནས་མིང་དུ་རྣམ་པར་གཞག་གོ །ཡིད་སྔོན་དུ་འགྲོ་བས་རྣམ་པར་ཤེས་པའི་ཁམས་དྲུག་ཏུ་འགྱུར་རོ། །མ་འོངས་པའི་དུས་ལ་ཇི་ལྟར་དེ་དག་དེའི་སྔོན་དུ་འགྲོ་བ་འཐད་ཅེ་ན། ཡིད་ཇི་ལྟ་བར་ཁམས་ཀྱང་དེ་བཞིན་པས་རྣམ་པར་ཤེས་པའི་ཁམས་དྲུག་ཅེས་བྱའོ། །བྱེ་བྲག་ཏུ་སྨྲ་བ་རྣམས་ཀྱི་སྐྱེ་མཆེད་དང་ཁམས་ལྟར་ཕུང་པོ་ཡང་རྫས་སུ་འདོད་ལ། སྤུངས་པ་ཡང་རྫས་དུ་མ་འདུས་པའི་བདག་ཉིད་ཅན་ཡིན་པས་རྫས་སུ་ཡོད་པ་ལ་སྤུངས་པ་ཉིད་མི་སྲིད་དོ་སྙམ་སྟེ་འདྲི་བ་ནི། གལ་ཏེ་སྤུངས་པའི་དོན་ཕུང་པོ་ཞེས་བྱའོ། །སྤུངས་པ་དང་གང་ཟག་བཞིན་ནོ་ཞེས་བྱ་བ་ལ། ཇི་ལྟར་འབྲུ་ལ་སོགས་པ་རྫས་དུ་མ་འདུས་པའི་ཕྱིར་བཏགས་པའི་ཕུང་པོ་ཡིན་གྱི་རྫས་ཀྱི་མ་ཡིན་ཏེ། འབྲུ་ལ་སོགས་པ་གསལ་ན་དེ་འཛིན་པ་མེད་པའི་ཕྱིར་རོ། །དེ་བཞིན་དུ་གང་ཟག་གི་གཟུགས་ཀྱི་ཕུང་པོ་སྟོང་ཕྲག་ཉིད་ཀྱང་རྫས་སུ་མེད་པ་ཡིན་ཏེ། ཇི་ལྟར་ཡན་ལག་ཚོགས་ལས་ནི། །ཤིང་རྟ་ཞེས་ནི་མི་བཏགས་པ། །དེ་བཞིན་ཕུང་པོ་ལ་བརྟེན་ནས། །ཀུན་རྫོབ་ཏུ་ནི་སེམས་ཅན་བརྗོད། །ཅེས་བྱ་བའི་ལུང་ལས་སོ། །དེ་བཞིན་དུ་འདས་པ་དང་མ་འོངས་པ་ལ་སོགས་པའི་རྫས་ཚོགས་པའི་བདག་ཉིད་ཅན་ཡིན་པའི་ཕྱིར་ཕུང་པོ་རྣམས་ཀྱང་བཏགས་པའི་ཡོད་པར་འགྱུར་ན། དེ་ཡང་འདོད་པ་མ་ཡིན་པས་ཕུང་པོའི་དོན་གཞན་ཞིག་བརྗོད་པར་བྱ་དགོས་སོ་ཞེ་ན་མ་ཡིན་ཏེ། རྡུལ་ཕྲ་རབ་གཅིག་ཀྱང་ཕུང་པོ་ཡིན་པའི་ཕྱིར་རྡུལ་ཕྲ་རབ་གཅིག་པུ་ཡང་ཕུང་པོར་བརྗོད་དེ། གཞན་དུ་ན་ཕུང་པོ་རྣམས་རང་བཞིན་མེད་པའི་ཕྱིར་ཕུང་པོ་རྣམས་སྐྱེ་མཆེད་དང་ཁམས་ལྟར་ཆོས་རྣམས་ཀྱི་རང་བཞིན་བསྡུས་པར་མི་འགྱུར་རོ། །ཕུང་པོ་རྣམས་བཏགས་པའི་ཡོད་པ་རང་བཞིན་ཉིད་མ་ཡིན་ན། དེ་ལྟ་འོ་ན་འདི་གཞན་དང་འགལ་ལོ། །འོ་ན་སྤུངས་པའི་དོན་ནི་ཕུང་པོའི་དོན་ཏོ་ཞེས་བྱ་བ་མ་ཡིན་ཏེ། དང་པོར་སྤུངས་པ་ཉེ་བར་ལེན་པ་དག་འདིར་དོན་
གྱི་སྤུངས་པ་ཉིད་དོན་མ་ཡིན་ཏེ་རྫས་དང་རྣམ་གྲངས་ཡིན་པའི་ཕྱིར་རོ་ཞེས་སློབ་དཔོན་འདུས་བཟང་ཟེར་རོ། །རྡུལ་ཕྲ་རབ་གཅིག་པུ་ཡང་དུས་གསུམ་གྱིས་བསྡུས་པའི་ཕྱིར་བློས་མངོན་པར་བསྡུས་པའི་སྒོ་ནས་སྤུངས་པ་ཉིད་འཐད་པས་ཕུང་པོ་རྣམས་བཏགས་པའི་ཡོད་པ་མ་ཡིན་ནོ་ཞེ་ན། དེ་ཉིད་ལ་སྨྲས་པ། དེ་ལྟ་ན་ཡང་མདོ་དང་འགལ་ཏེ། དེ་དག་ཐམས་ཅད་གཅིག་ཏུ་བསྡུས་ཏེ་གཟུགས་ཀྱི་ཕུང་པོ་ཞེས་བྱ་བའི་གྲངས་སུ་འགྲོའོ་ཞེས་གསུངས་པའི་ཕྱིར་རོ། །སློབ་དཔོན་འཕགས་པའི་འབངས་ན་རེ། ཕན་ཚུན་བལྟོས་པས་རྫས་ནི་རྫས་མ་དྲ། ཕུང་པོ་གང་ལ་གཅིག་ནི་མེད་དེ་ཕུང་པོ་དེ་ལ་བལྟོས་པ་མེད་པའི་ཕྱིར་རོ། །ཇི་ལྟར་གཞན་དུ་ན་མི་རྟག་པ་དང་སྡུག་བསྔལ་བ་དང་སྟོང་པ་ཞེས་བྱ་བ་ལས་སྤུངས་པར་བྱ་བ་དང་ཡོངས་སུ་ཤེས་པར་བྱ་བ་གང་ཟག་བཏགས་པ་ཉེ་བར་ལེན་པའི་ཕུང་པོར་གྱུར་བ་རྫས་སུ་ཡོད་པ་ཉིད་ཉམས་ཀྱི་ཆོས་ཀྱི་ཁམས་འདི་རྣམས་ཡིན་ནོ་ཞེ་ན་མ་ཡིན་ཏེ། གང་ཟག་ནི་བཏགས་པར་ཡོད་པ་ཉིད་དེ་མིང་ཙམ་ཉིད་ཀྱི་བྱིར་རོ། །དེ་ལྟ་ན་བོན་བུམ་པ་དང་སྣམ་བུ་ལ་སོགས་པ་ཡང་རྫས་སུ་ཡོད་པར་ཐལ་བར་འགྱུར་ཏེ། དེ་དག་ལ་ཡང་རྫས་དང་རྫས་ཕན་ཚུན་ལྟོས་བ་བུམ་པ་དང་སྣམ་བུའི་དོན་དེ་ལྟར་བརྗོད་ནུས་པས་གཟུགས་ཇི་སྙེད་པའི་རྫས་དེ་སྙེད་ཕུང་པོར་འགྱུར་རོ། །དེ་ལྟར་ཡིན་ན་དེ་དག་ཐམས་ཅད་གཅིག་ཏུ་བསྡུས་ཏེ་གཟུགས་ཀྱི་ཕུང་པོ་ཞེས་བྱ་བའི་གྲངས་སུ་འགྲོའོ་ཞེས་བྱ་བ་དེ་དང་འགལ་བར་འགྱུར་རོ། །དེ་ལ་སྨྲས་པ། མི་འགྱུར་ཏེ་ཕན་ཚུན་བལྟོས་པས་ཕུང་པོ་ཞེས་བྱ་བ་མང་པོ་རྣམས་ཀྱི་མིང་འདི་ལྟ་སྟེ་མང་པོ་རྣམས་སོ་ཞེས་བྱ་བ་གཞན་མ་ཡིན་པ་དེ་རྣམས་ལ་ཞེས་བགྲང་བར་བྱ་སྟེ་ཡུལ་གཅིག་ལ་ནི་མ་ཡིན་ནོ་ཞེས་བྱ་བ་འདི་དཔེའི་ཞེས་ཟེར་རོ། །འདི་ནི་མི་མཐུན་པ་ཉེ་བར་བཀོད་པ་སྟེ། དེ་ལ་ཡང་མང་པོ་རྣམས་ཉིད་རེ་རེ་ལ་ནི་མ་ཡིན་ཏེ་འདས་པའི་རྫས་རྣམས་ལ་ཕུང་པོ་ཞེས་བྱ་བ་མེད་པར་མཚུངས་སོ། །ཅི་སྟེ་དེ་རྣམས་མཐའ་དག་ཉིད་ལ་ཕུང་པོར་བཏགས་པ་ཉིད་ན་སྲན་མ་མཱ་ཥའི་ཕུང་པོ་བཞིན་དུ་སེམས་ཅན་གྱི་ཕུང་པོ་ཞེས་བྱ་བ་བཏགས་པར་གྲུབ་པོ། །ལུས་ཀྱང་མི་རྟག་པ་དང་སྡུག་བསྔལ་པ་དང་སྟོང་པ་ལས་གཞན་མ་ཡིན་ཏེ་སོ་སོར་འགྲོ་བར་བརྗོད་པས་དེ་བཏགས་པ་མ་ཡིན་པ་མེད་དོ། །དེ་ལྟར་སེམས་ཅན་རྣམས་ཀྱང་
མི་རྟག་པར་གསུངས་ཏེ། གང་གི་ནུབ་མོ་ཁོ་ན་ནས། །མངལ་དུ་དང་པོ་འཇུག་པའི་མི། །སྡོད་པ་མེད་པར་འགྲོ་འགྱུར་ཏེ། །སོང་བ་ལས་ཀྱང་ལྡོག་པ་མེད། །ཅེས་སོ། །སེམས་ཅན་ནི་རྫས་སུ་ཡོད་པ་ཡིན་པ་ལ་ཉེ་བར་གནས་པ་ལས་གདུལ་བྱའི་ཁྱད་པར་ལམ་ལྟོས་ནས་སངས་རྒྱས་བཅོམ་ལྡན་འདས་རྣམས་ཀྱིས་ཆོས་བསྟན་ཏེ། དེ་ལྟར་ཕུང་པོ་ཞེས་བྱ་བ་ཡང་མི་རྟག་པར་བསྟན་པ་དང་འགལ་བ་མེད་དོ། །བཏགས་པར་མཐོང་བ་དང་བཏགས་པ་ཉེ་བར་བཟུང་ནས་ནགས་ཚལ་གྱི་ལྗོན་ཤིང་དང་དམག་དཔུང་དང་དམག་དཔུང་གི་ཡན་ལག་རྣམས་ཇི་སྙེད་པ་དེ་རྣམས་ནི་སྐྲག་པ་འཕེལ་བ་ཉིད་ཀྱིས་མ་བྲིས་ཤིང་དེ་ལྟར་རྣམ་པར་མི་སྤྱོད་དོ། །གཞན་དག་ན་རེ་ཁུར་ཁྱེར་བའི་དོན་ནམ་ཞེས་བྱ་བ་ལ་བྱ་བ་ཉིད་ཁུར་ཡིན་པ་ན་བྱ་བའི་ཁུར་རོ། །ཁྱེར་བ་ནི་དེ་ལ་རག་ལས་པ་ཉིད་དོ། །དེ་ལ་རག་ལུས་ཤིང་བདག་ཉིད་རྙེད་ཅེས་བྱ་བའི་དོན་ཏོ། །འདི་ལྟར་ལུས་ཀྱི་ཕྱོགས་གང་ཞིག་ཁུར་ཁྱེར་བར་ནུས་པ་ནི་ཕྲག་པ་ཡིན་ལ། འདི་ཡང་བྱ་བའི་ཁུར་ཁྱེར་བའི་དོན་ཕུང་པོའི་དོན་ཡིན་ནོ། །གང་ཞིག་གང་གི་བྱ་བའི་ཁུར་ཡིན་ཞེ་ན། རེ་ཞིག་ཐུན་མོང་དུ་ནི་ཕུང་པོ་ལྔ་རྣམས་ཀྱི་སྐྱེ་མཆེད་དྲུག་ཡིན་ཏེ། ཇི་སྐད་དུ་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བཤད་པ་ལྟ་བུའོ། །གཟུགས་དང་རྣམ་པར་ཤེས་པ་གཉིས་ཀྱི་བྱ་བའི་ཁུར་ནི་རེག་པ་སྟེ་སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་འབྱུང་བའི་ཕྱིར་དང༌། ཚོར་བའི་ནི་སྲེད་པ་སྟེ་ཚོར་བའི་རྐྱེན་གྱིས་སྲེད་པ་ཞེས་དང༌། འདུ་བྱེད་རྣམས་ཀྱི་རྣམ་པར་ཤེས་པ་དང་རྣམ་པར་ཤེས་པའི་མིང་དང་གཟུགས་ཏེ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་དང༌། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་གསུངས་པའི་ཕྱིར་རོ། །དེ་བཞིན་དུ་གཞན་ལ་ཡང་སྦྱར་བར་བྱའོ། །དེ་ཉིད་རྫས་གཅིག་ཀྱང་ཕུང་པོ་ཉིད་དུ་གྲུབ་ལ་ཚོགས་པ་རྣམས་ཀྱི་རེ་རེས་ཀྱང་བྱ་བའི་ཁུར་ཁྱེར་བར་ནུས་པའི་ཕྱིར་རོ། །ཡོངས་སུ་ཆད་པའི་དོན་ཞེས་རྒྱ་ཆེར་འབྱུང་བ་ལ། ལྷན་ཅིག་སྐྱེ་བའི་འབྱུང་བ་དང་འབྱུང་བ་ལས་གྱུར་པ་རྣམས་དང༌། སེམས་དང་སེམས་ལས་བྱུང་བ་རྣམས་གཅིག་ཀྱང་བློས་དཔྱད་པར་བྱ་བ་ནུས་པས་ཡོངས་སུ་ཆད་པའོ། །བྱ་བར་འདོད་པ་ནི་འདུས་བྱས་སོ། །དེ་ལ་ཡོངས་སུ་ཆད་པ་གང་ཡིན་པ་དང་མ་འོངས་པ་དང་ད་ལྟར་བྱུང་བ་རྣམས་ཏེ། དེ་ལྟར་ཕུང་
པོ་རྣམས་རྫས་སུ་ཡོད་པ་ཡིན་གྱི་བཏགས་པར་ནི་མ་ཡིན་ནོ། །དེ་ནི་མདོ་དང་འགལ་ལོ་ཞེས་རྒྱས་པར་འབྱུང་བ་ལ། སློབ་དཔོན་འདུས་བཟང་ན་རེ། སྐྱེ་མཆེད་དང་ཁམས་ཀྱི་དོན་གྱི་མདོ་གཟུང་བར་བྱའི། ཕུང་པོའི་དོན་གྱི་མདོ་ནི་མི་འདོད་དོ་ཞེས་ཟེར་རོ། །རིགས་པ་འདི་ནི་ཅི་དེ་ལ་རིགས་ན་སྐྱེ་མཆེད་དང་ཕུང་པོའི་དོན་གྱི་མདོ་ལས་མ་གསུངས་པ་ལ་དེ་ལྟར་མདོ་དང་འགལ་བ་ཡོད་པ་མ་ཡིན་ལ། ཕུང་པོའི་དོན་གྱི་མདོ་ལས་བཅོམ་ལྡན་འདས་ཀྱིས་གསུངས་པས་དེ་དང་མི་འགལ་བ་གཞན་མ་ཡིན་ནོ། །བསྒྲུབ་བར་ནུས་པའི་མདོར་ཡང་ཕུང་པོའི་དོན་ཉིད་གསུངས་ཏེ་དེ་ཐམས་ཅད་གཅིག་ཏུ་བསྡུས་ཤིང་ཞེས་གསུངས་པའི་ཕྱིར་རོ། །རེ་རེས་ནི་མི་ནུས་པ་ཉིད་དོ། །བྱ་བའི་ཁུར་ཁྱེར་བའི་དོན་ནམ་ཡོངས་སུ་ཆད་པའི་དོན་ནི་ཕུང་པོའི་ཞེས་ཤེས་པར་བྱའོ། །ཐལ་བར་འགྱུར་བའི་སྒོ་ནས་ཕུང་པོ་རྣམས་བཏགས་པའི་ཡོད་པ་ཉིད་བཟློག་པར་འདོད་བས་ན། དེ་ལྟར་ན་སྐྱེ་མཆེ་ད་གཟུགས་ཅན་རྣམས་ཀྱང་ཞེས་བྱ་བ་རྒྱས་པར་སྨོས་ཏེ། ཐོགས་པ་མེད་པའི་སྐྱེ་མཆེད་བཀག་སྟེ་བཅུ་ཆར་ཡང་གཟུང་ངོ༌། །མིག་ལ་སོགས་པའི་རྡུལ་ཕྲ་རབ་མང་པོ་རྣམས་སྐྱེ་བའི་སྒོར་གྱུར་བའི་ཕྱིར་རོ་ཞེས་བྱ་བ་ནི་བཏགས་པའི་ཡོད་པ་ཉིད་ལ་རྒྱུར་སྨྲས་པ་སྟེ། རྣམ་པར་ཤེས་པའི་ཚོགས་ལྔ་ནི་བསགས་པ་ལ་བརྟེན་པ་དང་དམིགས་པ་ཡིན་པའི་ཕྱིར་རོ། །མིག་གི་དབང་པོའི་རྡུལ་ཕྲ་རབ་དང་ཁ་དོག་གི་རྡུལ་ཕྲ་རབ་མང་པོ་བསགས་པ་ཁོ་ན་རྟེན་དང་དམིགས་པའི་ངོ་བོས་མིག་གི་རྣམ་པར་ཤེས་པ་མཚུངས་པར་ལྡན་པ་དང་བཅས་པ་སྐྱེ་བའི་སྒོར་འགྱུར་ཏེ། ལུས་ཀྱི་སྐྱེ་མཆེད་དང་རེག་བྱའི་སྐྱེ་མཆེད་ཀྱི་བར་དུ་ཡང་དེ་དང་འདྲའོ། །དེའི་ཕྱིར་རྫས་དུ་མ་འདུས་པའི་ཕྱིར་མིག་གི་སྐྱེ་མཆེད་ལ་སོགས་པ་བཏགས་པར་ཡོད་པ་ཉིད་དོ། །མ་ཡིན་ཏེ་ཚོགས་པ་རྣམས་རེ་རེ་ནས་རྒྱུའི་ངོ་བོར་གྱུར་བའི་ཕྱིར་ཞེས་བྱ་བ་ལ། གང་མང་པོ་རྣམས་སྐྱེ་བའི་སྒོར་གྱུར་པའི་ཕྱིར། ཞེས་བཤད་པ་དེ་ལྟར་ཁས་མི་ལེན་ཏེ། གང་གི་ཕྱིར་ཚོགས་ཐམས་ཅད་ཀྱང་རེ་རེ་ནས་རྒྱུར་འགྱུར་ཏེ་མིག་ལ་སོགས་པའི་རྣམ་པར་ཤེས་པ་རྣམས་རྡུལ་ཕྲ་རབ་རེ་རེ་ལ་བརྟེན་པའི་ཕྱིར་རྡུལ་ཕྲ་རབ་རེ་རེ་ལ་དམིགས་པའི་ཕྱིར་རོ། །ཅི་སྟེ་ཅིའི་ཕྱིར་བསགས་པ་ཁོ་ན་རྟེན་ཡིན་ཞིང་བསགས་པ་ཁོ་ན་དམིགས་
པ་ཡིན་སྙམ་དུ་སེམས་ན། དེ་ཉིད་ཀྱི་ཕྱིར་རྫས་དུ་མ་འདུས་པ་ཉིད་མི་འདའ་སྟེ་བལྟོས་པ་དང་བཅས་པ་རྣམས་རྒྱུ་ཡིན་པའི་ཕྱིར་རོ། །འདི་ལྟར་གལ་ཏེ་རེ་རེ་ཞིང་སྐྱེ་མཆེད་དུ་འགྱུར་ན་ནི་གཟུགས་ཅན་མ་ཡིན་པའི་སྐྱེ་མཆེད་ལྟར་གཉིས་པ་ལ་མི་བལྟོས་པར་འགྱུར་བ་ཞིག་གོ་སྙམ་ན། འདིའི་ལེན་དུ་ཡུལ་ལྷན་ཅིག་བྱེད་པ་ཡིན་པའི་ཕྱིར་ཞེས་བྱ་བ་རྒྱས་པར་གསུངས་ཏེ། གལ་ཏེ་ལྷན་ཅིག་བྱེད་པ་ལ་བལྟོས་པ་དང་བཅས་པ་རྣམས་རྒྱུར་གྱུར་པའི་ཕྱིར་དབང་པོའི་རྡུལ་ཕྲ་རབ་རྣམས་རེ་རེ་ནས་སྐྱེ་མཆེད་ཉིད་དུ་མི་འདོད་ན། དེ་ལྟར་མིག་ལ་སོགས་པ་དབང་པོའི་གཟུགས་ལ་སོགས་པ་དག་ལས་ལོགས་ཤིག་ཏུ་སྐྱེ་མཆེད་དུ་མི་འགྱུར་རོ། །ཅིའི་ཕྱིར་ཞེ་ན་ཡུལ་ལྷན་ཅིག་བྱེད་པའི་ཕྱིར་རོ། །ཡུལ་ལ་བལྟོས་པ་མེད་པར་དབང་པོ་རྣམས་འབའ་ཞིག་སེམས་དང་སེམས་ལས་བྱུང་བ་རྣམས་ཀྱི་སྐྱེ་བའི་སྒོར་མི་འགྱུར་ལ། ཁྱོད་ཀྱི་ལྟར་ན་མིག་གི་དབང་པོ་གཟུགས་ལ་སོགས་པ་དག་ལས་ལོགས་ཤིག་ཏུ་སྐྱེ་མཆེད་དུ་མི་འགྱུར་བ་ཡང་མ་ཡིན་ཏེ། མདོ་ལས་སྐྱེ་མཆེད་བཅུ་གཉིས་སོ་ཞེས་གསུངས་པའི་ཕྱིར་རོ། །དེ་ལྟར་ན་མིག་ལ་སོགས་པའི་རྡུལ་ཕྲ་རབ་རྣམས་ཀྱང་སོ་སོར་སྐྱེ་མཆེད་ཡིན་ནོ་ཞེས་བྱ་བར་ཤེས་པར་བྱའོ། །ཡང་ཅིའི་ཕྱིར་མིག་ལ་སོགས་པ་རྡུལ་ཕྲ་རབ་རྣམས་ཡུལ་གྱི་རྡུལ་ཕྲ་རབ་རྣམས་ཀྱི་ལྷན་ཅིག་བྱེད་པ་ཡིན་ཡང་ཐ་དད་དུ་བྱས་ཤེ་ན། དེ་དག་ལྷན་ཅིག་བྱེད་པ་ཡིན་པའི་ཕྱིར་གཅིག་ཏུ་བྱས་པ་མ་ཡིན་གྱི། འོ་ན་ཅི་ཞེན་རིགས་དང་སྤྱོད་ཡུལ་དང་རྣམ་པར་ཤེས་པ་འདྲ་བའི་ཕྱིར་རོ། །ཡུལ་གྱི་རྡུལ་ཕྲ་རབ་རྣམས་ནི་རིགས་ཐ་དད་པས་འདི་དག་གི་སྤྱོད་ཡུལ་དུ་ཡོད་པ་མ་ཡིན་ཏེ། སྔོན་པོ་ལ་སོགས་པ་ཐམས་ཅད་ཀྱིས་རྣམ་པར་ཤེས་པ་སྐྱེད་པ་ལ་མིག་གི་དབང་པོའི་རྡུལ་ཕྲ་རབ་རྣམས་ཀྱང་ཐུན་མོང་བའི་ཕྱིར་སྔོན་པོ་ལ་སོགས་པའི་རྡུལ་ཕྲ་རབ་རྣམས་ཁོ་ན་ནི་མ་ཡིན་པས་གཅིག་ཏུ་མ་བྱས་ཏེ། དེ་བཞིན་དུ་གཞན་ལ་ཡང་རིག་པར་བྱའོ། །བྱེ་བྲག་ཏུ་བཤད་པ་ལས་ནི་ཞེས་བྱ་བ་འདིས་ཕུང་པོ་རྣམས་བཏགས་པར་ཡོད་པ་ཡིན་ནོ་ཞེས་སྟོན་པར་བྱེད་དོ། །ཡང་ཅི་ཕུང་པོ་འདི་བཏགས་པའི་ཡོད་པར་ལྟ་བར་བྱེད་ན་འདས་བའི་མིང་ལ་སོགས་པ་གཅིག་ཏུ་བསྡོམས་པ་ལ་བལྟོས་ཏེ་མ་བལྟོས་པའི་མཐའ་འཇུག་པར་བྱེད་པ་དེ་ཡིས་དེ་ལ་བལྟོས་ནས་ཕུང་པོ་ཞེས་བརྗོད་དེ། མ་བལྟོས་
པར་སྤུངས་པ་བཞིན་དུ་གཅིག་གི་ངོ་བོར་མི་རིགས་སོ། །རང་གི་ཚོགས་པ་ཅན་ནི་ཚོགས་པར་བཤད་པས་རྡུལ་ཕྲ་རབ་གཅིག་ཀྱང་ཕུང་པོའི་ཕྱོགས་ཞེས་བྱའོ། །ཡང་ན་ཕུང་པོ་བཏགས་པ་ལ་བལྟོས་པ་ཞེས་པ་སྟེ་ཕུང་པོར་གྱུར་པས་བཏགས་པ་ལ་བལྟོས་པའོ། །གཞན་དག་ན་རེ་བཏགས་པར་ཡོད་པའི་ཕུང་པོ་ནི་གཞན་ལ་བལྟོས་པའོ་ཞེས་ཟེར་རོ། །རྡུལ་ཕྲ་རབ་ཁམས་གཅིག་ཅེས་བྱ་བ་ནི་གཟུགས་ཅན་བཅུ་ལས་གང་ཡང་རུང་བའོ། །སྐྱེ་མཆེད་གཅིག་ཅེས་བྱ་བ་ནི་གཟུགས་ཅན་རྣམས་ལས་གང་ཡང་རུང་བའོ། །ཕུང་པོ་གཅིག་གི་ཞེས་བྱ་བ་ནི་ཕུང་པོ་ལྔ་ལས་གཟུགས་ཀྱི་ཕུང་པོའོ། །ཕྱོགས་ཆ་ནི་ཆ་ཤས་ཏེ་རྫས་ཀྱི་རྡུལ་ཕྲ་རབ་ཀྱི་དབང་དུ་བྱས་པའོ། །བཏགས་པ་ལ་བལྟོས་པ་མེད་བར་ཕྱོགས་ལ་མི་འཇུག་པའི་སྒྲ་ཕྱོགས་སུ་བརྗོད་དེ། ཡང་ན་བལྟོས་པས་ཕུང་པོ་བཏགས་པར་བཤད་པ་ཞེས་རྒྱས་བར་ཏེ། ཇི་ལྟར་འདི་འདོད་པ་སྤྱོད་བར་དམིགས་ཞེས་བཤད་པར་འགྱུར་རོ། །ཕྱོགས་ལ་ཡང་ཕྱོགས་ཅན་བཞིན་དུ་ཉེ་བར་འདོགས་པའི་ཐ་དད་ཡོད་དེ། དེ་ལ་ཕྱོགས་ནི་རྡུལ་ཕྲ་རབ་པོ། །ཕྱོགས་ཅན་ནི་གཟུགས་ཅན་གང་ཡང་རུང་བ་ཁམས་དང་སྐྱེ་མཆེད་དང་ཕུང་པོ་རྣམས་སོ། །དེ་ཉིད་ལ་འཇིག་རྟེན་ལ་གྲགས་པའི་དཔེ་སྨོས་པ་ནི་དཔེར་ན་རས་ཡུག་གི་ཕྱོགས་ཞེས་བྱ་བ་རྒྱས་པར་འབྱུང་པའོ། །ལ་བ་ལ་སོགས་པ་ཚིག་པ་དགག་པ་བརྗོད་པར་འདོད་པ་དང་མ་ཚིག་པ་དགག་པ་བརྗོད་པར་འདོད་པའི་ཚེ་རས་ཡུག་གི་ཕྱོགས་གཅིག་ཚིག་པ་ལ་རས་ཡུག་ཚིག་གོ་ཞེས་བརྗོད་ཀྱི། རིལ་དང་ཕྱོགས་གཅིག་ཚིག་པ་བརྗོད་པར་འདོད་པའི་ཚེ་ནི་མ་ཡིན་པ་དེ་བཞིན་དུ་འདིར་ཡང་ཕུང་པོ་གཞན་དགག་པ་བརྗོད་པ་དང། ཕུང་པོ་མ་ཡིན་པ་དགག་པ་བརྗོད་པར་འདོད་པའི་ཚེ་ཕུང་པོའི་ཕྱོགས་གཅིག་ལ་ཕུང་པོར་འདོགས་ཏེ། ཕྱོགས་དང་ཕྱོགས་ཅན་དག་གཙོ་བོ་མ་ཡིན་པའི་ཕྱིར་རོ། །ཕུང་པོ་དང་སྐྱེ་མཆེད་དང་ཁམས་རྣམས་ཀྱི་ཆོས་ཐ་དད་པ་ལ་ཐ་དད་པར་བསྟན་པའི་དགོས་པ་འདྲི་བ་ནི། ཡང་ཅིའི་ཕྱིར་བཅོམ་ལྡན་འདས་ཀྱིས་ཞེས་རྒྱ་ཆེར་འབྱུང་བའོ། །བདེ་བར་གཤེགས་པའི་དགོངས་པ་ནི་ཤེས་པར་དཀའ་མོད་ཀྱི། རྟོག་གེ་བ་རྣམས་ལ་ནི་འདི་ལྟར་སྣང་སྟེ་གདུལ་བྱ་རྣམས་ཀྱི། རྨོངས་དབང་འདོད་རྣམ་གསུམ་གྱི་ཕྱིར། །ཞེས་བྱ་བ་རྒྱས་པར་འབྱུང་བའོ། །རྣམ་གསུམ་གྱི་སྒྲ་ནི་རེ་རེ་དང་སྦྱར་བར་བྱ་སྟེ།
རྨོངས་པ་རྣམ་པ་གསུམ་གྱི་ཕྱིར། །ཞེས་བྱ་བ་ནི་ས་འདོད་པ་རྣམ་པ་གསུམ་གྱི་ཕྱིར་གྱི་བར་རོ། །གྲག་གོ་ཞེས་བྱ་བ་གྲག་གོའི་སྒྲ་ནི་འདི་མདོའི་དོན་མ་ཡིན་པའོ། །གང་ལས་ཕུང་པོ་ལྔ་ལ་སོགས་པ་རྣམས་སུ་ཕུང་པོ་ལ་སོགས་པ་བསྟན་པ་ལ་དགོས་པ་གཞན་གསུངས་ཏེ། གོ་རིམས་ཇི་ལྟ་བ་བཞིན་དུ་གཅིག་པ་ཉིད་དང་བྱེད་པ་པོ་ཉིད་དང་ཟ་བ་པོ་ཉིད་དུ་འཛིན་པ་བསལ་བའི་སྒོ་ནས་ཕུང་པོ་ལ་སོགས་པ་གསུམ་བསྟན་ཏེ། དེ་དག་ལ་བདག་ཏུ་འཛིན་པ་ནི་གཅིག་པ་ཉིད་དུ་འཛིན་པ་ལ་སོགས་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །ཡང་ན་སྤྱོད་པ་སྟོང་ཕྲག་བརྒྱད་ཅུའི་དབྱེ་བ་ལ་ཀུན་ཏུ་རྨོངས་པའི་གཉེན་པོར་ཕུང་པོ་ལ་སོགས་པ་བསྟན་ཏོ་ཞེས་གྲག་གོ །ཁ་ཅིག་ནི་སེམས་ལས་བྱུང་བ་རྣམས་ལ་ཀུན་ཏུ་རྨོངས་ཏེ་ཇི་ལྟར་ཞེ་ན། རིལ་པོའི་བདག་ཏུ་འཛིན་པས་ཞེས་བྱ་སྟེ་རྒྱུ་ལ་རྨོངས་པས་རིལ་པོའི་རིལ་པོ་ལ་བདག་སྙམ་དུ་འཛིན་བས་སོ། །ཡང་ན་སེམས་ལས་བྱུང་བ་རྣམས་ལ་རིལ་པོར་བཟུང་སྟེ། ཕྱིས་བདག་ཏུ་འཛིན་པས་ཚོར་བ་དང་འདུ་ཤེས་དང་འདུ་བྱེད་ཕན་ཚུན་པ་དང་བདག་ཀྱང་མཚན་ཉིད་གཅིག་པ་ཉིད་དུ་བཟུང་ནས་བདག་ཏུ་མངོན་པར་ཞེན་ཏེ། དེའི་ཕྱིར་དེ་དག་ལ་བདག་ཏུ་འཛིན་པ་སྔོན་དུ་འགྲོ་བ་ཅན་རིལ་པོར་འཛིན་པ་སྟེ། རིལ་པོར་འཛིན་པའི་གཉེན་པོར་ཕུང་པོ་བསྟན་པ་བརྩམས་སོ། །དེ་ལྟར་ན་ཚོར་བ་ལ་སོགས་པའི་དབྱེ་བ་བསྟན་པས་ཕུང་པོ་ལ་རིལ་པོར་འཛིན་པ་ལོག་པ་དང་བདག་ཏུ་འཛིན་པ་ཡང་ལྡོག་པར་འགྱུར་ཏེ། དེ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །ཁ་ཅིག་ནི་གཟུགས་ཁོ་ན་ལའོ་ཞེས་བྱ་བ་ལ་རིལ་པོའི་བདག་ཏུ་འཛིན་པས་ཀུན་ཏུ་རྨོངས་སོ་ཞེས་བྱ་བར་སྦྱར་རོ། །ཀུན་ཏུ་རྨོངས་པ་དེའི་གཉེན་པོར་གཟུགས་ཉིད་རྣམ་པ་བཅུར་ཕྱེ་བ་དང་སེམས་དང་སེམས་ལས་བྱུང་བ་རྣམས་སྐྱེ་མཆེད་གཅིག་ཉིད་དེ། དེ་ལྟར་རིལ་པོར་ཕྱེ་བ་ལ་རིལ་པོར་འཛིན་པ་སྔོན་དུ་འགྲོ་བ་ཅན་གྱི་བདག་ཏུ་འཛིན་བ་ལྡོག་པར་འགྱུར་རོ། །ཁ་ཅིག་ནི་གཟུགས་དང་སེམས་ལ་སྟེ་རྨོངས་སོ་ཞེས་བྱ་བར་སྙེགས་སོ། །དེ་དག་གི་རྨོངས་པ་བཟློག་པར་བྱ་བའི་ཕྱིར་ཁམས་བསྟན་པ་ལས་གཟུགས་རྣམ་པ་བཅུ་དང་སེམས་རྣམ་པ་བདུན་དུ་ཕྱེ་ནས་བསྟན་ཏོ། །དེ་ལ་སེམས་དང་སེམས་ལས་བྱུང་བ་དག་ལ་རྨོངས་པ་གང་ཡིན་པ་དེ་ནི་རྨོངས་པའི་རྣམ་པ་ཆུང་བ་ཡིན་ཏེ། དངོས་པོ་ཕྲ་བ་དང་རིགས་མཐུན་པ་ལ་རྨོངས་པའི་ཕྱིར་རོ། །
གང་ཞིག་གཟུགས་ལ་རྨོངས་པ་དེ་ནི་རྨོངས་པའི་རྣམ་པ་འབྲིང་པོ་ཡིན་ཏེ། དངོས་པོ་རགས་ཤིང་རིགས་མཐུན་པ་ལ་རྨོངས་པའི་ཕྱིར་རོ། །གང་ཞིག་གཟུགས་དང་སེམས་དག་ལ་རྨོངས་པ་དེ་ནི་རྨོངས་པའི་རྣམ་པ་ཆེན་པོ་ཡིན་ཏེ། དངོས་པོ་ཕྲ་བ་དང་རགས་པ་དང་རིགས་མཐུན་པ་དང་མི་མཐུན་པ་རྣམས་ལ་རྨོངས་པའི་ཕྱིར་རོ། །དེ་ལྟར་ན་ཕུང་པོ་བསྟན་པ་འདིས་ཇི་སྐད་བཤད་པའི་ཀུན་ཏུ་རྨོངས་པ་དང་འཇིག་ཚོགས་ལ་ལྟ་བ་རིལ་པོར་འཛིན་པ་སྔོན་དུ་འགྲོ་བ་ཅན་བཟློག་སྟེ། དེ་སྔོན་དུ་འགྲོ་བ་ཅན་གྱི་ཉོན་མོངས་བ་རྣམས་ཀྱང་སྤོང་བ་ཡིན་ནོ། །དབང་པོ་དག་ཀྱང་རྣམ་པ་གསུམ་སྟེ་ཞེས་བྱ་བ་ལ། འདིར་དབང་པོ་རྣམས་ནི་དད་པ་ལ་སོགས་པའོ། །དབང་པོ་རྟུལ་པོ་དང་འབྲིང་པོ་དག་གིས་ནི་ཁམས་དང་སྐྱེ་མཆེད་རབ་ཏུ་དབྱེ་བ་རྟོགས་ཀྱི་ཕུང་པོ་བསྟན་པ་ནི་མ་ཡིན་ནོ། །དབང་པོ་རྟུལ་པོ་ལ་ནི་ཁམས་ཀྱི་རབ་ཏུ་དབྱེ་བ་ལས་ཕན་བཏགས་པར་འགྱུར་གྱི་སྐྱེ་མཆེད་ཀྱིས་མ་ཡིན་ནོ། །དབང་པོ་རྣོན་པོ་དང་འབྲིང་པོ་དག་ལ་ནི་ཕུང་པོ་བསྟན་པ་དང་སྐྱེ་མཆེད་བསྟན་པས་སྐྱེ་མཆེད་དང་ཁམས་ཀྱི་དབྱེ་བ་རྟོགས་པར་ནུས་ཏེ། དེའི་ཕྱིར་སྐྱེ་མཆེད་བསྟན་པ་དང་ཁམས་བསྟན་པ་དོན་མེད་པར་འགྱུར་བའམ་གཞན་དུ་ན་དེ་བཞིན་གཤེགས་པ་ལ་ཡིད་མི་ཆེས་པར་འགྱུར་རོ། །དེའི་ཕྱིར་གང་ཟག་དབང་པོ་རྣོན་པོའི་དབང་དུ་བྱས་ནས་ཕུང་པོ་བསྟན་པ་དང་དབང་པོ་འབྲིང་པོ་ལ་སྐྱེ་མཆེད་བསྟན་པ་དང་དབང་པོ་རྟུལ་པོ་ལ་ཁམས་བསྟན་པ་སྟེ། དེ་ལྟར་ན་ཐམས་ཅད་ལ་ཕན་གདགས་པ་བྱས་པར་འགྱུར་རོ། །འདོད་པ་ཡང་རྣམ་པ་གསུམ་སྟེ་ཞེས་བྱ་བ་ལ། འདོད་པ་ནི་མོས་པ་སྟེ། གཞན་དུ་ན་མོས་པ་རྣམས་ལ་གཞན་དུ་ཆོས་བསྟན་པ་ནི་ཡིད་མི་ཆེས་པའི་རྒྱུར་འགྱུར་བ་ཁོ་ན་འབའ་ཞིག་ཏུ་ཟད་པས། གདུལ་བྱའི་མོས་པའི་ཁྱད་པར་ལས་ཕུང་པོ་ལ་སོགས་པའི་སྒོ་ནས་རྣམ་པ་གསུམ་སྟེ། འདི་དག་ཐམས་ཅད་ཀྱང་ཆོས་རབ་ཏུ་རྣམ་པར་འབྱེད་པའི་དོན་ཏེ། ཆོས་རབ་ཏུ་རྣམ་པར་འབྱེད་པ་མེད་པར་ཉོན་མོངས་པ་སྤོང་བ་མེད་པས་ན། ཕུང་པོ་བསྟན་པའི་དགོས་པ་ནི་སྔར་ཉིད་དུ་ཤེས་པར་བྱས་ཟིན་ཏོ། །དེ་ལས་གཞན་པའི་སེམས་ལས་བྱུང་བ་ཕུང་པོ་ཐ་དད་པར་བྱས་པ་མི་འགལ་བ་གང་ཡིན་པ་འདིར་བརྗོད་པར་བྱ་བ་ནི་ཡང་ཅིའི་ཕྱིར་ཞེས་རྒྱས་པར་འབྱུང་བའོ། །འདོད་པར་བྱ་བས་ན་འདོད་པ་
སྟེ་གཟུགས་ལ་སོགས་པའི་ཡུལ་རྣམས་སོ། །དེ་དག་ལ་ལྷག་པར་ཆགས་པ་ནི་འདུན་པའི་འདོད་ཆགས་སོ། །ལྟ་བ་དག་ནི་འཇིག་ཚོགས་ལ་ལྟ་བ་ལ་སོགས་པ་རྣམས་སོ། །དེ་དག་ལ་ལྷག་པར་ཆགས་པ་ནི་འདུན་པའི་འདོད་ཆགས་ཁོ་ནའོ། །སྔ་མ་ནི་ཕལ་ཆེར་ཁྱིམ་པའི་ཕྱོགས་དང༌། ཕྱི་མ་ནི་ཕལ་ཆེར་རབ་ཏུ་འབྱུང་བའི་ཕྱོགས་ཀྱིའོ། །དེ་ལྟར་ཡང་མདོ་ལས་འདོད་པའི་འདོད་ཆགས་ལ་ལྷག་པར་ཞེན་པ་དང་འཆུམས་པ་དང་ཡོངས་སུ་ཞེན་པ་དང་ལྷན་ཅིག་ཏུ་གྱུར་བས་ཁྱིམ་པ་རྣམས་ནི་ཁྱིམ་པ་རྣམས་དང་ལྷན་ཅིག་ཏུ་རྩོད་པར་བྱེད་འགྱེད་བར་བྱེད་དོ་ཞེས་གསུངས་ཏེ། དེ་གཉིས་ཀྱིས་ཞེན་པ་ནི་ཚོར་བ་དང་འདུ་ཤེས་སོ། །གཙོ་བོ་སྨོས་པ་ནི་མ་རིག་པ་ལ་སོགས་པ་རྣམས་ཀྱང་དེ་གཉིས་ཀྱི་རྒྱུར་འགྱུར་བའི་ཕྱིར་རོ། །ཚོར་བ་རོ་མྱང་བའི་དབང་གིས་ནི་ཞེས་བ་ལ་རོ་མྱང་དམ་པ་ནི་ཚོར་བ་ཉིད་རོ་མྱང་བ་ཡིན་པས་ན་ཚོར་བ་མྱང་བའོ། །དེ་ནི་རོ་མངར་བ་དང་འདྲ་བས་ན་རོ་མྱང་བ་སྟེ་དེའི་དབང་གིས་འདུན་པའི་འདོད་ཆགས་ཀྱི་སྒོ་ནས་འདོད་པ་ལ་མངོན་པར་ཞེན་པ་ཡིན་ནོ། །ཡང་ན་ཚོར་བ་ལ་རོ་མྱང་བའི་ཕྱིར་ཚོར་བ་རོ་མྱང་བ་སྟེ་དེ་ལ་སྲེད་པའི་དབང་གིས་ཚོར་བ་ལ་ཕན་འདོགས་ཤིང་འདོད་པ་ལ་མངོན་པར་ཞེན་པ་དང་ལྷག་པར་ཆགས་པ་ཡིན་ནོ། །འདུ་ཤེས་ཕྱིན་ཅི་ལོག་གི་དབང་གིས་ཞེས་བྱ་བ་ནི་ཆོས་མ་ཡིན་པས་ཆོས་སུ་འདུ་ཤེས་པ་དང་བ་དག་མེད་པ་ལ་སོགས་པ་རྣམས་ལ་བདག་ལ་སོགས་པར་འདུ་ཤེས་པ་སྟེ། དེ་དག་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་བ་དང་འཇིག་ཚོགས་དང་མཐར་འཛིན་བར་ལྟ་བ་ལ་སོགས་པ་སྟེ་ལྟ་བ་དེ་དག་ལ་མངོན་པར་ཞེན་ནོ། །གང་གི་ཚེ་བདེན་པ་མཐོང་བ་རྣམས་ལ་འདུ་ཤེས་ཡོད་ཀྱང་ཕྱིན་ཅི་ལོག་མེད་པས་ལྟ་བ་ལ་མངོན་པར་ཞེན་པ་ཡོད་པ་མ་ཡིན་ཏེ། དེའི་ཕྱིར་གང་གིས་འདུ་ཤེས་ཕྱིན་ཅི་ལོག་ཏུ་བྱས་པ་དེ་ཉིད་ལྟ་བ་ལ་མངོན་པར་ཞེན་པའི་རྒྱུ་ཡིན་ཏེ། དེ་ཡོད་པ་དང་མེད་པ་དག་གིས་ཡོད་པ་དང་མེད་པའི་ཕྱིར་རོ་ཞེ་ན། དེ་ནི་དེ་ལྟ་མ་ཡིན་ཏེ་མི་གསལ་བའི་བདག་ཉིད་ཀྱིས་མུན་པ་དང་འདྲ་བའི་ཕྱིར་ན་ཕྱིན་ཅི་ལོག་ཏུ་རྟོག་པའི་རྒྱུ་མ་རིག་པ་ནི་ལྟ་བ་ལ་མངོན་པར་ཞེན་པའི་རྒྱུར་ཤེས་པར་བྱ་བ་མ་ཡིན་གྱི། གང་ཞིག་དེ་དང་འདྲེས་ཤིང་མཚན་མར་འཛིན་པའི་རྣམ་པ་ཅན་གྱི་འདུ་ཤེས་དེ་ནི་རྒྱུ་ཡིན་ནོ། །སྨྲས་པ། འདམ་བྱིང་ཉ་ནི་ཡང་ཡང་འཕར་བ་
ཡིས། །ཆུ་དག་རྙོག་པར་བྱེད་པ་ཇི་བཞིན་དུ། །མ་རིག་པ་དང་རྗེས་འབྲེལ་འདུ་ཤེས་ཀྱིས། །རིག་པ་སུན་འབྱིན་བྱེད་པའང་དེ་དང་འདྲ། །དེའི་ཕྱིར་འདུ་ཤེས་ཕྱིན་ཅི་ལོག་གི་དབང་གིས་ནི་ལྟ་བ་དག་ལ་མངོན་པར་ཞེན་ཏོ་ཞེས་བྱ་བའི་རིགས་སོ། །ཚོར་བ་ལ་ཞེན་པ་ནི་ཚོར་བ་ལ་ཚོགས་པའོ། །འདུ་ཤེས་ཕྱིན་ཅི་ལོག་ཏུ་གྱུར་པ་ནི་ཕྱིན་ཅི་ལོག་ཏུ་མཚན་མར་འཛིན་པའོ། །དེ་ལ་ཚོར་བ་ལ་ཞེན་ཅིང་སྲེད་པ་ལ་སྤྱོད་པ་ནི་འཁོར་བར་འཁོར་རོ། །འདུ་ཤེས་ཕྱིན་ཅི་ལོག་ཏུ་གྱུར་པས་ནི་ལྟ་བར་སྤྱོད་དོ། །ཚོར་བ་ལ་ཞེན་པ་ནི་ཕྱིན་ཅི་ལོག་པ་ཞིས་འདུ་ཤེས་ཕྱིན་ཅི་ལོག་ཏུ་གྱུར་པ་ཁོ་ནས་ཉིང་མཚམས་སྦྱོར་བའི་ཚེ་འཁོར་ཏེ། ཇི་སྐད་དུ། བློ་ནི་ཕྱིན་ཅི་ལོག་གྱུར་ལས། །རྩེ་དགས་འགྲོ་བའི་ཡུལ་དུ་འགྲོ། །ཞེས་བཤད་པ་ལྟ་བུའོ། །འདིར་འཁོར་བའི་རྒྱུའི་ངོ་བོ་དག་དེ་ལྟར་གསུངས་ཏེ་དངོས་སུ་ནི་ཕྱིན་ཅི་ལོག་ཏུ་ཞེན་པ་ཁོ་ན་རྒྱུ་ཉིད་དེ་སངས་རྒྱས་རྣམས་ལ་དགོངས་པ་སྔོན་དུ་མ་བཏང་བའི་ཆོས་སྟོན་པ་མི་མངའ་ཞིང༌། དགོངས་པ་ཡང་འདིར་གསལ་བར་བྱས་པའི་ཕྱིར་ཞེས་སོ། །འོ་ན་ཅིའི་ཕྱིར་སྐྱེ་མཆེད་དང་ཞེས་བྱ་བ་ལ་སོགས་པ་ནི་དྲི་བའོ། །ཕུང་པོ་ངག་ཏུ་འདུས་མ་བྱས། །དོན་དུ་རུང་ཕྱིར་མ་བཤད་དོ། །ཕུང་པོ་དག་འཆད་པ་ན་འདུས་མ་བྱས་ནི་དེ་དག་ཁོ་ནའི་ཁོངས་སུ་བསྡུས་པར་རམ་དེ་དག་ལས་ཐ་དད་པར་གཞན་ཞིག་ཏུ་རྣམ་པར་འཇོག །དེ་ཡང་ཉེ་བར་ལེན་པའི་ཕུང་པོ་དག་གམ་ཕུང་པོ་དག་གི་ཁོངས་སུ་སྡུད་གྲང་ན་རྣམ་པ་ཐམས་ཅད་དུ་ཡང་མི་རུང་ངོ༌། །ཅིའི་ཕྱིར་ཞེ་ན་དོན་དུ་མི་རུང་པའི་ཕྱིར་རོ། །རེ་ཞིག་ཕུང་པོ་དག་གི་ཁོངས་སུ་བསྡུ་བར་ནི་མི་ནུས་ཏེ། དེ་དག་གི་ཉེ་བར་ལེན་པའི་དོན་མི་རིག་པའི་ཕྱིར་རོ། །དེ་དག་གི་ཉེ་བར་ལེན་པ་ནི་གཟུགས་དང་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་དག་ཡོད་ན་འདུས་མ་བྱས་ནི་གཟུགས་ལ་སོགས་པའི་བདག་ཉིད་ཀྱང་མ་ཡིན་ཏེ། ཇི་ལྟར་དེའི་བདག་ཉིད་མ་ཡིན་པ་དེ་གཟུགས་ལ་སོགས་པའི་ཕུང་པོ་དག་གིས་བསྡུས་པར་རིགས་སོ། །དེ་ཉིད་ཀྱི་ཕྱིར་དེ་ནི་གཟུགས་མ་ཡིན་ཞིང་རྣམ་པར་ཤེས་པའི་བར་དུ་ཡང་མ་ཡིན་པས་ཞེས་བཤད་དོ། །འདི་སྐད་བཤད་པར་འགྱུར་ཏེ་དེ་ནི་གཟུགས་སུ་རུང་བ་མ་ཡིན་པ་ནས་རྣམ་པར་རིག་པ་མ་ཡིན་པའི་བར་དུ་སྟེ། ཕུང་པོ་དྲུག་པར་བརྗོད་པར་ཡང་མི་རུང་སྟེ་
སྤུངས་པའི་དོན་མི་རུང་བའི་ཕྱིར་རོ། །གལ་ཏེ་ཕུང་པོའི་དོན་ནི་སྤུངས་པ་ཡིན་པས་འདུས་མ་བྱས་ཀྱང་ཚོར་བ་བཞིན་དུ་ཕུང་པོ་དྲུག་པ་ཞིག་ཏུ་ཅིས་མི་འདོད་དེ། ཇི་ལྟར་གཟུགས་ལ་སོགས་པ་འདས་པ་ལ་སོགས་པའི་བྱེ་བྲག་གིས་ཐ་དད་པ་རྣམས་ཕན་ཚུན་འདུས་ཏེ་རེག་པ་ལ་མ་ལྟོས་པར་བློས་བསྡོམས་ནས་ཕུང་པོར་བརྗོད་པར་འགྱུར་བ་དེ་བཞིན་དུ་འདུས་མ་བྱས་ཀྱང་བློས་བསྡོམས་པ་ལ་བལྟོས་ནས་ཕུང་པོར་བྱས་པ་ལ་འགལ་བ་ཅི་ཞིག་ཡོད་ཅེ་ན། འདི་ལ་འགལ་བ་ཡོད་དེ་ཕུང་པོར་བྱེད་པ་ནི་ཕྱོགས་ནས་འགུགས་བར་རམ་དུས་ལས་འགུགས་བ་ཞིག་ཡིན་གྲང་ན། གཉི་ག་ཡང་འདུས་མ་བྱས་ཕྱོགས་དང་དུས་སུ་མ་གཏོགས་པ་ལ་སྲིད་པ་མ་ཡིན་ནོ། །དེ་ཉིད་ཀྱི་ཕྱིར་འདུས་མ་བྱས་ནི་འདས་པ་ལ་སོགས་པའི་བྱེ་བྲག་གིས་ཐ་དད་པ་མ་ཡིན་ནོ་ཞེས་གསུངས་སོ། །འདས་པ་ལ་སོགས་པའི་བྱེ་བྲག་གིས་ཐ་དད་པ་ཕུང་པོར་རྣམ་པར་འཇོག་ན་དེ་ལྟ་བུའི་མཚན་ཉིད་འདུས་མ་བྱས་ཕུང་པོར་བརྗོད་པ་ལ་མི་རུང་ངོ༌། །གཉི་ག་ལྟར་ཡང་ཕུང་པོར་བསྟན་པ་ལ་དགོས་པ་མེད་པའི་ཕྱིར་གཉི་ག་ལྟར་ཡང་འདུས་མ་བྱས་ཕུང་པོར་མ་བཤད་དོ། །ཡང་ཀུན་ནས་ཉོན་མོངས་པའི་གཞི་ཤེས་པར་བྱ་བའི་ཕྱིར་ཞེས་བྱ་བ་ལ། གཞིའི་སྒྲ་ནི་འདིར་རྒྱུའི་རྣམ་གྲངས་ཏེ། ཟག་པ་དང་བཅས་པ་རྣམས་ནི་ཀུན་ནས་ཉོན་མོངས་པའི་རྒྱུ་ཡིན་པའི་ཕྱིར་རོ། །བྱ་བའི་ཕྱིར་གྱི་སྒྲ་ནི་འདིར་དགོས་པའི་ཚིག་གོ །ཀུན་ནས་ཉོན་མོངས་པ་དང་རྣམ་པར་བྱང་བའི་གཞི་ཤེས་པར་བྱ་བའི་ཕྱིར་ཞེས་བྱ་བ་ནི་ཟག་པ་དང་བཅས་པ་རྣམས་ཀུན་ནས་ཉོན་མོངས་པའི་རྒྱུ་ཡིན་པའི་ཕྱིར་ལ་ཟག་པ་མེད་པ་རྣམས་རྣམ་པར་བྱང་བའི་རྒྱུའི་ཕྱིར་ཡིན་ན་འདུས་མ་བྱས་ནི་གཉི་ག་ཡང་མ་ཡིན་ནོ། །ཀུན་ནས་ཉོན་མོངས་པ་རྒྱས་པར་མི་འགྱུར་བའི་ཕྱིར་ཀུན་ནས་ཉོན་མོངས་པ་མ་ཡིན་ནོ། །ལམ་མ་ཡིན་པའི་ཕྱིར་རྣམ་པར་བྱང་བའི་དངོས་པོ་མ་ཡིན་ནོ། །གཞན་དག་ན་རེ་འདུས་མ་བྱས་ཡིན་པའི་ཕྱིར་དངོས་པོ་གཉི་ག་ཡང་མ་ཡིན་པ་ཉིད་དོ་ཞེས་ཟེར་རོ། །གཞན་དག་ན་རེ་རྣམ་པར་བྱང་བའི་རྒྱུ་ཉིད་ཀྱི་ཕྱིར་འདུས་བྱས་ཀྱི་དངོས་པོ་མ་ཡིན་ཞིང་ཀུན་ནས་ཉོན་མོངས་པ་དང་རྣམ་པར་བྱང་བའི་དངོས་པོ་མ་ཡིན་ནོ་ཞེས་ཟེར་རོ། །དེ་ལ་འདིས་རྣམ་པར་བྱང་བ་བྱས་པས་ན་རྣམ་པར་བྱང་བ་སྟེ་ལམ་ལ་མངོན་པར་འདོད་དོ། །
དེ་ལྟར་སོ་སོར་བརྟགས་པའི་འགོག་པ་ཉིད་ནི་གཉི་གའི་དངོས་པོར་བཤད་དེ། འདིས་འདུས་མ་བྱས་ཐམས་ཅད་ཀྱིའོ་ཞེས་བྱ་བ་འདི་བསམ་པར་བྱའོ། །ཇི་ལྟར་བུམ་པ་ཆག་པ་ཞེས་བྱ་བ་ནི་བུམ་པ་འགགས་པ་སྟེ། བུམ་པ་མ་ཡིན་པ་དེ་བཞིན་དུ་ཕུང་པོ་ཞིག་པ་སྟེ་ཕུང་པོ་འགགས་པ་ཡང་འདུས་མ་བྱས་ཡིན་པས་ཕུང་པོ་མ་ཡིན་ཞིང༌། ནམ་མཁའ་ནི་གཅིག་ཁོ་ན་ཡིན་པས་ཕུང་པོ་མ་ཡིན་ནོ་ཞེས་ཟེར་རོ། །དེ་དག་ཇི་ལྟ་བ་ན་ཁམས་དང་སྐྱེ་མཆེད་ཞིག་པ་ཡང་ཁམས་དང་སྐྱེ་མཆེད་མ་ཡིན་པར་ཐལ་བར་འགྱུར་ཏེ། ཁམས་དང་སྐྱེ་མཆེད་ཀྱི་བདག་ཉིད་ཁོ་ན་ཁམས་དང་སྐྱེ་མཆེད་ཞིག་པར་རུང་བ་མ་ཡིན་པའོ། །དེ་ནི་དེ་ལྟར་མ་ཡིན་ཏེ་ཟག་པ་དང་བཅས་པའི་ཕུང་པོ་བཞིན་ནོ། །ཟག་པ་དང་བཅས་པའི་སྐྱེ་མཆེད་རྣམས་ལ་ཡང་འགོག་པར་འགྱུར་རོ་ཞེས་པའི་གནས་སྐབས་སུ་ཐལ་བར་འགྱུར་རོ། །གཞན་དག་ན་རེ་འདིར་ཕུང་པོ་སྤུངས་པ་ཞིག་པར་འདོད་པ་མ་ཡིན་ནོ་ཞེས་ཟེར་རོ། །ནམ་མཁའ་དང་སོ་སོར་བརྟགས་པ་མ་ཡིན་པའི་འགོག་པ་དག་མ་སྤངས་པའི་བདག་ཉིད་ཀྱི་ཕྱིར་རོ། །འོ་ན་ཅི་ཞེ་ན་གང་ལ་མཚན་ཉིད་མེད་པ་དེ་ཕུང་པོ་རྣམས་ལས་ཨུ་བར་ཏ་མེ་བ་བཱ། འདུས་མ་བྱས་གསུམ་ཡང་ཕུང་པོ་ཞིག་པར་མི་རུང་ཞེས་པ་ནི་དགའ་བ་ཚིགས་སུ་བཅད་པའི་དོན་ཏོ། །ཕུང་པོ་རྣམས་ཀྱི་རྣམ་པ་གཞན་བཤད་ཟིན་ཏོ་ཞེས་བྱ་བ་ལ། སྐྱེ་མཆེད་དང་ཁམས་དག་གི་རྣམ་པ་གཞན་མངོན་པར་བརྗོད་པའི་ཕྱིར་ཏེ། ཀུན་ནས་ཉོན་མོངས་པ་ལ་སོགས་པའི་དངོས་པོ་རིམ་པ་གཞན་གྱི་ངོ་བོ་སྐྱེ་མཆེད་དང་ཁམས་སུ་རྣམ་པར་གཞག་པ་ལ་སོགས་པ་གོ་རིམས་ལྷག་མ་ལུས་པ་དེ་བརྗོད་པར་བྱའོ། །སངས་རྒྱས་རྣམས་ཀྱི་གསུང་ནི་དགོངས་པ་སྔོན་དུ་བཏང་ནས་འཇུག་པ་དེའི་ཕྱིར། འདིར་རིམ་ནི་རགས་དང་ཀུན་ཉོན་མོངས་པ་ཞེས་བྱ་བ་ལ་སོགས་པ་གསུངས་ཏེ། རགས་པ་ཇི་ལྟ་བ་དང་ཀུན་ནས་ཉོན་མོངས་པ་ཇི་ལྟ་བ་དང་སྣོད་ལ་སོགས་པའི་དོན་གྱི་ཁམས་རྣམས་ཀྱང་ངོ༌། །གཟུགས་ནི་ཐོགས་པ་དང་རྣམ་པའི་ཕྱིར་ཐམས་ཅད་ལ་རགས་ཞེས་བྱ་བ་ནི་གཏོགས་ཆེ་བའོ། །གཞན་དག་ན་རེ་རྣམ་པར་ཤེས་པའི་ཚོགས་ལྔའི་རྟེན་ཡིན་པའི་ཕྱིར་རགས་སོ་ཞེས་ཟེར་རོ། །རྒྱུ་བ་རགས་པ་ནི་གསུམ་མོ་ཞེས་ཚིག་རྣམ་
པར་སྦྱར་ཏེ་ལུས་ཀྱང་རྒྱུ་བའི་ས་བཅས་པས་རྟོགས་པར་ཆེས་སླ་བའི་ཕྱིར་རོ། །དེ་ཉིད་ཀྱི་ཕྱིར་འདི་ལྟར་བསྟན་པ་རྒྱ་ཆེར་སྦྱར་ཏེ། འདུ་ཤེས་ནི་འདུ་བྱེད་དང་རྣམ་པར་ཤེས་པ་གཉིས་ལས་ཆེས་རགས་ཏེ་དེའི་བྱ་བ་རྟོགས་པར་ཆེས་སླ་བའི་ཕྱིར་རོ། །འདུ་ཤེས་ནི་སྐྱེས་པ་དང་བུད་མེད་ལ་སོགས་པའི་མཚན་མར་འཛིན་པའོ། །རྣམ་པར་ཤེས་པ་བས་ནི་འདུ་བྱེད་རགས་ཏེ། འདོད་ཆགས་ལ་སོགས་པའི་ཀུན་ཏུ་སྤྱད་པ་ཤིན་ཏུ་གསལ་བར་རྟོགས་པའི་ཕྱིར་རོ། །གཞན་དག་ན་རེ་མངོན་པར་འདུ་བྱེད་པའི་མཚན་ཉིད་ཀྱི་བདེ་བ་དང་སྡུག་བསྔལ་ལ་སོགས་པའི་འཇུག་པ་ཉེ་བར་མཚོན་པའི་ཕྱིར་རོ་ཞེས་ཟེར་རོ། །ཐམས་ཅད་པས་ཕྲ་བའི་ཕྱིར་རྣམ་པར་ཤེས་པ་ནི་མཐར་ཏེ། གདུལ་བྱ་རྣམས་གཟུད་པ་དང་རྗེས་སུ་མཐུན་པའི་ཕྱིར་ན་འདི་ནི་རགས་པའི་རིམ་པ་སྟེ། ཀུན་ནས་ཉོན་མོངས་པ་ཇི་ལྟ་བའོ། །ཕན་ཚུན་གཟུགས་ལ་མངོན་པར་དགའ་སྟེ་ཞེས་བྱ་བ་ལ། ཕན་ཚུན་ཁ་དོག་དང་དབྱིབས་དང་སྒྲ་དང་དྲི་དང་རོ་དང་རེག་བྱ་ལ་མངོན་པར་ཞེན་པར་བྱེད་དོ་ཞེས་བྱ་བའི་ཐ་ཚིག་གོ །དེ་བཞིན་དུ་གཟུགས་གཅིག་ནི་ཆགས་པར་བྱ་བ་མ་ཡིན་ཏེ། ཇི་ལྟར་མདོ་ལས་སྐྱེས་པ་དང་བུད་མེད་ཕན་ཚུན་གཟུགས་ལ་རེག་པར་བྱེད་དོ་ཞེས་རྒྱ་ཆེར་འབྱུང་ངོ༌། །དེ་དག་ཀྱང་ཚོར་བའི་རོ་མྱང་བ་ལ་ཆགས་པའི་ཕྱིར་ཕན་ཚུན་གཟུགས་ཀྱིས་མངོན་པར་དགའ་ཞིང་ཚོར་བའི་རོ་མྱང་བ་ནས་ཕྲད་པ་དང་བྲལ་བའི་སྲེད་པས་ཞེན་ཅིང་ཚོར་བའི་རོ་མྱང་བ་དང་ཚོར་བ་ལ་ཆགས་པའི་བར་དུའོ། །གཞན་དག་ན་རེ་གལ་ཏེ་ཚོར་བ་ཐོབ་པ་ཉིད་ཀྱི་ཕྱིར་ཆགས་པ་དང་མངོན་པར་ཆགས་པ་ལས་སོ་ཞེས་སོ། །འདུ་ཤེས་ཕྱིན་ཅི་ལོག་པའི་ཕྱིར་རོ་ཞེས་བྱ་བ་ལ། སྡུག་བསྔལ་ལ་བདེའོ་སྙམ་པ་ནི་འདུ་ཤེས་ཕྱིན་ཅི་ལོག་པ་སྟེ། ཚོར་བ་བདེ་བ་ཉིད་ཀྱང་འདུ་བྱེད་འགྱུར་བའི་སྡུག་བསྔལ་དག་གིས་སྡུག་བསྔལ་བ་ཉིད་དོ། །ཕྱིན་ཅི་ལོག་དེ་ཡང་ཀུན་ནས་ཉོན་མོངས་པ་དག་གིས་སོ་ཞེས་བྱ་བ་ལ། མི་རྟག་པ་དང། སྡུག་བསྔལ་བ་དང་མི་གཙང་བ་དང་བདག་མེད་པ་རྣམས་ལ་ཉོན་མོངས་པས་རྣམ་པར་འཕྲུལ་ཏེ་འདུ་ཤེས་ཕྱིན་ཅི་ལོག་ཏུ་འགྱུར་རོ། །སེམས་ཀྱང་དེ་དག་གིས་ཀུན་ནས་ཉོན་མོངས་པ་ཅན་དུ་བྱས་པ་ཞེས་བྱ་བ་ཀུན་ནས་ཉོན་མོངས་པས་ཡང་སྲིད་ཀྱི་རྣམ་པར་ཤེས་པ་མཚམས་སྦྱོར་བའི་ཉོན་མོངས་
པ་ལ་འཇུག་པས་རྣམ་པར་ཤེས་པ་མཐར་གསུངས་སོ་ཞེས་གཞན་དག་ཟེར་རོ། །གང་ནས་ཀུན་ནས་ཉོན་མོངས་པ་དང༌། གང་གི་དོན་དང་ཇི་ལྟར་དང་གང་ཞིག་དང་གང་དག་གིས་ཀུན་ནས་ཉོན་མོངས་པ་དེ་བསྟན་པར་བྱ་བའི་ཕྱིར་ཉོན་མོངས་པ་ཇི་ལྟ་བ་བཞིན་གོ་རིམས་བརྗོད་དོ། །ཡང་ན་སྣོད་ལ་སོགས་པའི་དོན་གྱིས་ཏེ་ཞེས་རྒྱ་ཆེར་འབྱུང་བ་ལ། གཟུགས་ནི་སྣོད་ལྟ་བུ་སྟེ་ཚོར་བ་ཟས་དང་འདྲ་བའི་རྟེན་ཡིན་པའི་ཕྱིར་རོ། །ཚོར་བ་ནི་ཟས་ལྟ་བུ་སྟེ་རོ་མྱང་བར་བྱ་བ་ཡིན་པའི་ཕྱིར་རོ། །གཞན་དག་ན་རེ་སེམས་ཅན་རྣམས་ལ་ཟས་ནི་ཕན་པ་དང་གནོད་པར་འཇུག་པའི་ཕྱིར་རོ་ཞེས་ཟེར་རོ། །འདིས་གསལ་བར་བྱེད་པས་ན་འདུ་ཤེས་ནི་ཚོད་མ་ལྟ་བུ་སྟེ། དེས་ཡིད་དུ་འོང་བ་དང་ཡིད་དུ་མི་འོང་བའི་མཚན་མ་བཟུང་ནས་ཚོར་བ་གསལ་བར་བྱེད་དོ། །ཡང་ན་འདུ་ཤེས་ནི་ཕྱིན་ཅི་ལོག་གི་དབང་གིས་ཚོར་བའི་རོ་མངོན་པར་འདོད་པའི་ཕྱིར་ན་འདུ་ཤེས་ནི་ཚོད་མ་ལྟ་བུའོ། །གཞན་དག་ན་རེ་ཀུན་ནས་ཉོན་མོངས་པས་དགྲ་དང་མཛའ་བོ་དང་བྲན་དང་བདེ་བ་ལ་སོགས་པར་མཚན་མར་འཛིན་པས་སོ་ཞེས་ཟེར་རོ། །འདུ་བྱེད་རྣམས་ནི་བྱན་པོ་ལྟ་བུ་སྟེ་དེའི་དབང་གིས་རྣམ་པར་སྨིན་པ་ཡིད་དུ་འོང་བ་དང་མི་འོང་བ་མངོན་པར་འགྲུབ་པའི་ཕྱིར་རོ། །དམིགས་པའི་ཕྱིར་ན་རྣམ་པར་ཤེས་པ་ནི་ཟབ་པོ་ལྟ་བུ་སྟེ། གཞན་དག་ན་རེ་དེ་ལ་བདག་ཏུ་འཛིན་པའི་ཕྱིར་རོ་ཞེས་ཟེར་རོ། །གཞན་དག་ན་རེ་སེམས་ཅན་གྱི་རྫས་གཙོ་བོ་ཡིན་པའི་ཕྱིར་ཏེ་ཏྦུ་དོ་ཛ་བ་ཏྭཱཏ་ཚོར་བ་ལ་སོགས་པ་རྣམས་སོ་ཞེས་ཟེར་རོ། །སེམས་ཅན་གྱི་དབང་པོའི་གཟུགས་གང་ཡུལ་གཟུགས་སུ་ཡོད་པའི་ཕྱིར་འདོད་པའི་ཡོན་ཏན་གཟུགས་ཀྱིས་རབ་ཏུ་ཕྱེ་བ་ནི་འདོད་པའི་ཁམས་སོ། །ཚོར་བས་རབ་ཏུ་ཕྱེ་བ་ནི་བསམ་གཏན་རྣམས་ཏེ་ཚོར་བ་ཐ་དད་པས་དེ་ཐ་དད་པའི་ཕྱིར་ཏེ། འདི་ལྟར་སྙོམས་པར་འཇུག་པའི་བསམ་གཏན་དང་པོ་གཉིས་ན་ནི་ཡིད་བདེ་བའོ། །གོང་མ་གཉིས་ན་ནི་བཏང་སྙོམས་ངག་གོ །སྐྱེ་བའི་བསམ་གཏན་དག་ན་ནི། །ཡིད་བདེ་བདེ་དེ་བཏང་སྙོམས་དང༌། །བཏང་སྙོམས་ཡིད་བདེ་བདེ་བ་དང༌། །བཏང་སྙོམས་བཏང་སྙོམས་ཚོར་བ་ཡོད། །ཅེས་པའོ། །གཞན་དག་ན་རེ་སྐྱེ་བའི་བསམ་གཏན་རྣམས་སུ་འདུ་བྱེད་ཐམས་ཅད་ཀྱི་ཁྱད་པར་སོ་སོར་རིག་ཅིང་དམིགས་པས་
གཟུགས་ཀྱི་ཁམས་ཚོར་བས་རབ་ཏུ་ཕྱེ་བའོ་ཞེས་ཟེར་རོ། །འདུ་ཤེས་ཀྱིས་རབ་ཏུ་ཕྱེ་བ་ནི་གཟུགས་མེད་པ་གསུམ་མོ་ཞེས་བྱ་བ་ལ། དེ་དག་ནི་དེའི་མཚན་མ་གསལ་བའི་ཕྱིར་འདུ་ཤེས་གཙོ་བོ་ཡིན་ནོ། །བཏང་སྙོམས་ཐུན་མོང་བ་རྣམ་པར་བཅད་པ་མེད་པའི་ཕྱིར་དེ་ནི་གཙོ་བོ་མ་ཡིན་ནོ། །གཞན་དག་ན་རེ་ལུས་མེད་པས་ནམ་མཁའ་ལ་སོགས་པའི་འདུ་ཤེས་ཀྱིས་རྣམ་པར་འབྱེད་པའི་ཕྱིར་འདུ་ཤེས་ཀྱིས་རབ་ཏུ་ཕྱེ་བའོ་ཞེས་ཟེར་རོ། །འདུ་བྱེད་ཙམ་གྱིས་རབ་ཏུ་ཕྱེ་བ་ནི་སྲིད་པའི་རྩེ་མོ་སྟེ་ཞེས་བྱ་བ་ནི་འདི་ཐམས་ཅད་བས་དེའི་སེམས་ལ་འབྲས་བུ་ཆེ་བའི་ཕྱིར་རོ། །ཕྱེ་བ་ནི་གསལ་བར་བྱས་པ་ཞེས་བྱ་པའི་ཐ་ཚིག་སྟེ་གང་ན་གང་ཞིག་གཙོ་བོ་དེ་ཉིད་ཀྱིས་དེ་ཉེ་བར་མཚོན་པར་བྱས་པ་ཡིན་ནོ། །འདི་དག་ནི་རྣམ་པར་ཤེས་པ་གནས་པ་ཡིན་ལ་ཞེས་བྱ་བ་ནི་གཟུགས་སུ་ཉེ་བར་འགྲོ་བ་འདོད་པའི་ཁམས་དང་ཚོར་བར་ཉེ་བར་འགྲོ་བ་གཟུགས་ཀྱི་ཁམས་དང་འདུ་ཤེས་སུ་ཉེ་བར་འགྲོ་བ་གཟུགས་མེད་པ་གསུམ་དང༌། འདུ་བྱེད་དུ་ཉེ་བར་འགྲོ་བ་སྲིད་པའི་རྩེ་མོའོ། །དེ་དག་ལ་རྣམ་པར་ཤེས་པ་གནས་སོ་ཞེས་བྱ་བ་ནི་དེ་དག་གི་སྲེད་པའི་རླན་གྱི་མཐུས་སོ། །ཞིང་དང་ས་བོན་གྱི་གོ་རིམས་ལྟ་བུར་བསྟན་པའི་ཕྱིར་རོ་ཞེས་བྱ་བ་ལ། ཞིང་ནི་སྔར་ཡིན་ལ། ས་བོན་ནི་ཕྱི་ནས་ཏེ། སྔར་ཇི་ལྟར་བཤད་པའི་ཕུང་པོ་རྣམས་ཞིང་གོ་རིམས་པས་བསྟན་པའི་དོན་དེ་ཉིད་ཀྱི་ཕྱིར་རགས་པ་ལ་སོགས་པའི་རྒྱུ་རྣམས་ཇི་ལྟ་བར་ཕུང་པོ་རྣམས་ལྔ་ལས་མི་ཉུང་མི་མང་ངོ༌། །རིམ་རྒྱུའི་ཕྱིར་ཞེས་གང་སྨྲས་པ་དེ་སྦྱར་བར་བྱ་བའི་ཕྱིར་གོ་རིམས་ཀྱི་རྒྱུ་དེ་ཉིད་ཀྱི་ཕྱིར་ཞེས་རྒྱ་ཆེར་འབྱུང་ངོ༌། །དེའི་དབང་ཉིད་ཀྱིས་ནི་ཞེས་བྱ་བ་ལ་སོགས་པ་ལ། ཇི་ལྟར་ཞེ་ན་ཡུལ་ཅན་གྱི་རྟེན་གྱི་གཙོ་བོ་ཡིན་པའི་ཕྱིར་ཏེ། ཡུལ་རྣམ་པར་གཞག་པ་ནི་ཡུལ་ཅན་གྱི་དབང་ཡིན་པའི་ཕྱིར་རོ། །དབང་ནི་རག་ལས་པའོ། །བརྟེན་པར་རྣམ་པར་གཞག་པ་ཡང་རྟེན་གྱི་དབང་ངོ༌། །དབང་པོ་དྲུག་ལས་དང་པོར་ལྔ་སྟེ་མིག་ལ་སོགས་པ་དག་གོ །ཅིའི་ཕྱིར་ཞེ་ན་ད་ལྟའི་དོན་ཕྱིར་ཞེས་བྱ་བ་སྟེ། འདི་དག་གི་ཡུལ་ད་ལྟར་བ་ཡིན་པས་ད་ལྟར་བའི་དོན་གྱི་དངོས་པོ་ནི་ད་ལྟར་བའི་དོན་ཉིད་དུ་ལྷག་པར་བཟུང་ནས་ད་ལྟར་བྱུང་བར་སྐྱེས་པས་ན་དེའི་ཡུལ་རྣམས་སྔར་སྨོས་སོ། །ཡིད་ནི་ཁ་
ཅིག་ཡུལ་ད་ལྟར་བྱུང་བ་སྟེ་དཔེར་ན་གཞན་གྱི་སེམས་ཤེས་པ་ལྟ་བུའོ། །ཁ་ཅིག་གིས་དུས་གསུམ་དང་དུས་མེད་པའི་ཡུལ་ཅན་ཏེ། ཤེས་རྒྱུད་འདས་པའི་ཡུལ་ཅན་ནི་སྔོན་གྱི་གནས་རྗེས་སུ་དྲན་པའི་ཤེས་པ་ལྟ་བུའོ། །མ་འོངས་པའི་ཡུལ་ཅན་ནི་མངོན་པར་འདོད་པའི་ཤེས་པ་ལྟ་བུའོ། །ཁ་ཅིག་ནི་དུས་གསུམ་པའི་ཡུལ་ཅན་ཏེ། དཔེར་ན་འདུ་བྱེད་མི་རྟག་པ་ལྟ་བུའོ། །ཁ་ཅིག་ནི་དུས་མེད་པའི་ཡུལ་ཅན་ཏེ། དཔེར་ན་འགོག་པ་ལ་དམིགས་པ་བཞིན་ནོ། །ཁ་ཅིག་ནི་དུས་གསུམ་དང་དུས་མེད་པའི་ཡུལ་ཅན་ཏེ། དཔེར་ན་ཆོས་ཐམས་ཅད་བདག་མེད་དོ་སྙམ་པ་ལྟ་བུ་སྟེ། དེའི་ཕྱིར་ཡིད་ནི་མ་ངེས་པས་ཕྱིས་བཤད་དོ། །འབྱུང་བ་ལས་གྱུར་དོན་ཕྱིར་གཞི། །ཞེས་བྱ་བ་ལ་སྔར་བཤད་པའི་རེག་བྱ་མ་གཏོགས་པའི་འབྱུང་བ་ལས་གྱུར་པ་རྣམས་འདི་ཉིད་ཀྱི་ཡུལ་ལོ། །འབྱུང་བ་གཞན་རྣམས་ཀྱང་དེའི་ཡུལ་དུ་མ་ངེས་པས་ན་བཞི་པ་རྣམས་སོ། །རྗེས་སུ་བཤད་པ་ཟས་ལྕེ་དང་མ་ཕྲད་པ་ཉིད་ཀྱིས་དྲི་འཛིན་པའི་ཕྱིར་རོ་ཞེས་བྱ་བ་ལ། གལ་ཏེ་མ་ཕྲད་པའི་ཟས་ཀྱི་གོང་བུ་ལ་བརྟེན་པའི་དྲི་ཁོ་ན་སྣས་འཛིན་ན་སྣ་ཕྲད་ནས་འཛིན་པ་ཉིད་ལ་གནོད་པར་འགྱུར་རོ་ཞེས་འགའ་ཞིག་ཟེར་རོ། །ཟས་དང་འདྲེས་པའི་རྫིས་མྱུར་དུ་སྣའི་ཡུལ་དུ་ཕྱིན་པར་བྱེད་པ་ཡིན་ཏེ། དེ་དང་རིགས་མཐུན་པའི་ཕྱིར་རྫི་ལ་བརྟེན་པའི་དྲི་ལ་ཟས་ཀྱི་དྲི་ཞེས་བྱའོ། །རང་གི་འབྱུང་བ་བཞི་ཚན་ལ་བརྟེན་པ་ཉིད་ཟས་ཀྱི་དྲི་སྟེ་འབྱུང་བ་ཆེན་པོ་ལ་བརྟེན་པའོ། །གྲིབ་མ་ཉིད་ཤིང་ལྗོན་པའི་གྲལ་རིམ་གྱིས་འཇུག་པ་དེ་བཟུང་ཞེས་གཞན་དག་ཟེར་རོ། །ཡང་ཅིའི་ཕྱིར་རྫས་བརྒྱད་པའི་རྡུལ་ཕྲ་རབ་གང་ལ་དྲི་ཡིན་པ་དེ་ལ་ཁ་དོག་སྨོས་པ་རྗེས་སུ་འཇུག་སྟེ་གྲིབ་མ་དང་སྣང་བ་དག་བཞིན་རེག་བྱའི་ཞེས་པ་ཕྲེང་བ་བཞིན་དེར་གནས་སོ། །གསུམ་པོ་རྣམས་གནས་ཀྱི་དབང་གིས་ཏེ། རྣ་བ་གནས་དག་ཇི་ལྟར་གནས་པའི་རིམ་པས་འགྱུར་རོ། །ཡིད་ཀྱང་དེ་དག་ལ་བརྟེན་པ་དང་ཞེས་བྱ་བ་ནི་རྣམ་པར་ཤེས་པའི་ཚོགས་ལྔའི་མཚན་ཉིད་དང༌། ཡིད་ཀྱི་རྣམ་པར་ཤེས་པའི་ཚོགས་ལྔའི་མཚན་ཉིད་དང༌། ཡིད་ཀྱི་རྣམ་པར་ཤེས་པའི་ཚོགས་ཀྱི་མཚན་ཉིད་དེ། འདི་དག་རྣམ་པ་དྲུག་ཅར་ཡང་གཟུགས་ཅན་མ་ཡིན་པའི་ཕྱིར་ཡུལ་ན་མི་གནས་
སོ། །གཞན་དག་ན་རེ་དང་པོ་ལྔ་ནི་དེའི་འཇུག་པ་ལྔ་རྣམས་ཏེ། གསུམ་པོ་གང་དག་ལས་ཆེས་གསལ་བར་རིང་དུ་འཇུག་པ་གང་ཡིན་པའོ། །དཔེར་ན་གནས་ཀྱི་རིམ་པས་མིག་ལ་སོགས་པ་རྣམས་ཡུལ་ལ་སྔོན་དུ་འཇུག་ལ། ཡིད་ནི་དེ་དག་ལ་ཕྱིར་འཇུག་པ་ལྟ་བུའོ་ཞེས་ཟེར་རོ། །དེ་རྣམས་ལ་ཡང་འཇུག་པའི་རྣམ་པར་ཤེས་པའི་རྟེན་གྱི་དངོས་པོར་ཉེ་བར་འགྲོ་བའི་ཡུལ་སྨོས་པ་ནི། མིག་དང་རྣ་བ་དག་ཡུལ་རྒྱང་རིང་བའི་ཕྱིར་གཉིས་པ་དེ་དག་སྔར་སྨོས་སོ། །དེ་ལས་ཀྱང་མིག་ནི་ཆེས་རྒྱང་རིང་བ་ལ་འཇུག་གོ །སྣ་དང་ལྕེ་དང་ལུས་གསུམ་པོ་རྣམས་ལས་ཀྱང་གང་ཞིག་ཆེས་གསལ་བ་སྟེ། ཇི་ལྟར་སྣ་ཡིས་དྲི་ཕྲ་མོ་དམིགས་པ་དེ་ལྟར་ལྕེས་རོ་མ་ཡིན་ལ། ཇི་ལྟར་ལྕེས་རོ་ལྟར་ལུས་ཀྱིས་གྲང་བ་དང་དྲོ་བ་དག་མ་ཡིན་ནོ། །གལ་ཏེ་མིག་ལ་སོགས་པས་ཉམས་སུ་མྱོང་བའི་གཟུགས་ལ་སོགས་པ་ཁོ་ན་ལ་ཡིད་ཀྱི་རྣམ་པར་ཤེས་པ་འཇུག་ན། ཇི་ལྟར་གཉིད་ལོག་པ་རྣམས་གཟུགས་ལ་སོགས་པའི་ཡུལ་འཛིན་ཅེ་ན། ཁ་ཅིག་ན་རེ་སྔོན་ཉམས་སུ་མྱོང་བ་དྲན་པ་ལས་དེ་ཡིན་ནོ། །དེ་ལྟ་མ་ཡིན་ན་དམུས་ལོང་གིས་ཀྱང་གཟུགས་དམིགས་ཏེ། དེ་རྨི་ལམ་རྗེས་སུ་དྲན་པ་ཁོ་ནར་གཉིད་སད་པ་བཞིན་འདི་ང་ཡིས་གཟུགས་ལ་སོགས་པ་འཛིན་པ་མ་ཡིན་པའི་ཕྱིར་རྨི་ལམ་མོ་ཞེས་ཉམས་སུ་མྱོང་བ་སྔོན་གཉིད་མ་ལོག་པས་དྲན་པར་བྱེད་དེ། འདི་ནི་དེས་ཡུལ་ཡོངས་སུ་གཅོད་པ་མ་ཡིན་པས་ཉམས་སུ་མྱོང་བ་ཉིད་རྨི་ལམ་དུ་དམིགས་པ་མ་ཡིན་ནོ། །གལ་ཏེ་དེ་ཡང་སྐྱེ་བ་གཞན་དུ་ཉམས་སུ་མྱོང་བས་སོ་ཞེ་ན། འོ་ན་དེ་ལྟ་ན་དམུས་ལོང་གིས་ཀྱང་རྨི་ལམ་དུ་གཟུགས་དམིགས་པར་ཐལ་བར་འགྱུར་ཏེ་སྐྱེ་བ་གཞན་དུ་ཉམས་སུ་མྱོང་བའི་ཕྱིར་རོ། །ལོང་བས་ཀྱང་རྨི་ལམ་དུ་གཟུགས་མི་མཐོང་བ་འདི་མ་གྲུབ་པ་དེའི་ཕྱིར་རྨི་ལམ་ཡང་སྔོན་གྱི་དམིགས་པ་གཞན་ནི་སྲིད་པས་བསྟན་བཅོས་སོ་སོར་བཤད་ལ། མིག་གི་རྣམ་པར་ཤེས་པས་ཉམས་སུ་མྱོང་བ་ཡིད་ཀྱི་རྣམ་པར་ཤེས་པས་ཤེས་པར་བྱ་བ་རྣམས་ཇི་སྙེད་པ་དང་དེ་སྙེད་པ་བཤད་དོ། །ངེས་པ་ཁོ་ནར་ལྔ་རྣམས་ཕན་ཚུན་གཞན་ལ་ཡང་མ་ཡིན་ནོ། །མངོན་དུ་གྱུར་པའི་ཕྱིར་ཞེས་བྱ་བ་གཟུགས་ལ་སོགས་པའི་ཡུལ་གང་ཡིན་པ་རྣམས་རྨི་ལམ་དུ་ཉེ་བར་
དམིགས་པ་དེ་དང་མངོན་པར་འབྲེལ་པ་ཉིད་དོ། །ད་བསྟན་བཅོས་སུ་བརྗོད་ཅེས་བྱ་བ་དེ་ཡང་གཟུགས་བསྟན་དུ་ཡོང་བ་དང་ཞིང་སྒྲིབ་པ་མེད་པར་བྱེད་པ་ནམ་མཁའི་ཁམས་ལྟ་བུའོ། །གལ་ཏེ་དེའི་གཟུགས་གླང་པོ་ཆེ་དང་རྟ་དང་རི་བོ་དང་ལྗོན་ཤིང་ལ་སོགས་པ་པའི་རྣམ་པ་དང་ཞིང་སྒྲིབ་པ་མེད་པར་བྱས་ནས་དེའི་རྣམ་པ་དེ་བཞིན་དུ་མཐོང་བ་དང་ཅི་སྟེ་དེའི་རྣམ་པ་མ་ཡིན་པ་ཡང་རྨི་ལམ་གྱི་ནང་དུ་གཟུགས་དམིགས་པའི་ཕྱིར་ཡོད་པ་མ་ཡིན་པ་དམིགས་པ་དེ་ཤེས་པར་འགྱུར་རོ། །དེ་ལ་ནི་རྣམ་པར་དཔྱད་པ་གཞན་ཏེ་དེ་ཉིད་ཀྱི་ཕྱིར་གཏམ་འཕྲོས་པ་ཞར་ལ་བྱུང་བས་ཆོག་གོ །དཀྱུས་མ་ཉིད་བརྩམ་པར་བྱ་སྟེ། དབང་དོན་དེ་དག་ཁོ་ན་ལ། །སྐྱེ་མཆེད་དང་ནི་ཁམས་བཅུར་འདོད། །ཅེས་བྱ་བ་དེར་གཟུགས་ཅན་གྱི་སྐྱེ་མཆེད་བཅུ་གཟུགས་ཀྱི་ཕུང་པོའི་རང་བཞིན་དུ་བཤད་ལ། ཆོས་རྣམས་རབ་ཏུ་རྣམ་འབྱེད་མེད་པར་ཞེས་བྱ་བ་དེར་སྐྱེ་མཆེད་ཐམས་ཅད་ཆོས་ཀྱི་རང་བཞིན་དུ་བཤད་པ་དེའི་ཕྱིར་འདྲི་བ་ནི། ཡང་ཅིའི་ཕྱིར་ཞེས་བྱ་བ་ལ་སོགས་པ་སྟེ་གཟུགས་ཀྱི་བདག་ཉིད་དུ་ཁྱད་པར་མེད་ཀྱང་གཅིག་ནི་གཟུགས་ཀྱི་སྐྱེ་མཆེད་ཅེས་བྱ་བར་བརྗོད་ཀྱི་གཞན་དག་ནི་མ་ཡིན། ཡང་ན་སྒྲ་ལ་སོགས་པའི་སྐྱེ་མཆེད་ལྟར་ཡིན་པ་ཡང་མིང་གཞན་ཇི་ལྟར་མི་བརྗོད། གཞན་གཟུགས་ཀྱི་སྐྱེ་མཆེད་ཉིད་ཀྱིས་བརྗོད་ཅེས་བྱ་བ་འདི་ལ་དགོས་པ་ཅི་ཞིག་ཡོད། དེ་བཞིན་དུ་ཆོས་ཀྱི་སྐྱེ་མཆེད་ལ་ཡང་བརྗོད་པར་བྱའོ་ཞེ་ན། སྨྲས་པ། བྱེ་བྲག་དོན་དང་ཞེས་བྱ་བ་ལ་སོགས་པ་སྟེ་གཟུགས་ཀྱི་ཆོས་ཉིད་དུ་ཁྱད་པར་མེད་པ་རྣམས་སོ་སོར་སྐྱེ་མཆེད་ཡིན་པར་ཤེས་པར་བྱེདོ་ལའོ། །བྱེ་བྲག་ཀྱང་ཅི་ཞེ་ན་དེ་ནི་ཁྱད་པར་གྱི་མིང་ངོ༌། །གལ་ཏེ་གཟུགས་ཀྱི་རང་བཞིན་ཡིན་པའི་ཕྱིར་བཅུ་ཆར་ཡང་གཟུགས་ཀྱི་སྐྱེ་མཆེད་ཅེས་བརྗོད་ན་ནི། མིག་ལ་སོགས་པ་དང་གཟུགས་ལ་སོགས་པ་རྣམས་སོ་སོར་ཡུལ་དང་ཡུལ་ཅན་གྱི་དངོས་པོར་རྟོགས་པར་མི་འགྱུར་ལ། དེ་མ་རྟོགས་པས་ཀྱང་དེ་དག་སོ་སོར་སྐྱེ་མཆེད་ཉིད་དུ་ཤེས་པར་མི་འགྱུར་རོ། །དེའི་དོན་དུ་གཟུགས་ཀྱི་བདག་ཉིད་ཅན་དུ་ཁྱད་པར་མེད་ཀྱང་གཅིག་གཟུགས་ཀྱི་སྐྱེ་མཆེད་དུ་བརྗོད་ནས་སྒྲ་ལ་སོགས་པ་རྣམས་མིང་གཞན་དག་གི་སྐྱེ་མཆེད་དུ་རྣམ་
པར་གཞག་པ་མཛད་དོ། །གཟུགས་ལ་ཡང་སྐྱེ་མཆེད་གཞན་རྣམ་པར་གཅད་པར་བྱ་བའི་ཕྱིར་མིང་གཞན་མི་འདོགས་ཏེ། དེ་ནི་བྱེད་རྒྱུ་ལྟར་གཟུགས་ཀྱི་མིང་ཐུན་མོང་བ་ཁོ་ནས་གཞན་དག་ལས་རྣམ་པར་གཅོད་པས་ཁྱད་པར་གྱི་མིང་གདགས་པ་དོན་མེད་དོ། །དེ་ཉིད་ཀྱི་ཕྱིར་མིག་ལ་སོགས་པ་བྱེ་བྲག་ཏུ་བྱས་པ་དག་གིས་ཞེས་རྒྱ་ཆེར་གསུངས་སོ། །ཡང་ན་གཟུགས་ཀྱི་སྐྱེ་མཆེད་གཙོ་བོ་ཡིན་པའི་ཕྱིར་གཟུགས་ཀྱི་མིང་ཐུན་མོང་བས་སྟོན་པར་མཛད་ཀྱི། གཟུགས་ཀྱི་བདག་ཉིད་ཡིན་ཡང་གཞན་དག་གིས་ནི་མ་ཡིན་ཏེ། གཙོ་བོ་མ་ཡིན་པའི་ཕྱིར་རོ། །ལྷག་མ་རྣམས་ལ་གཙོ་བོར་བསྟན་པའི་ཕྱིར། །དེ་ནི་ཐོགས་པ་དང་བཅས་པ་ཡིན་པའི་ཕྱིར་ཏེ་ཞེས་བྱ་བ་རྒྱ་ཆེར་གསུངས་སོ། །རེག་པ་མ་ཡིན་པའི་ཕྱིར་གཟུགས་ཀྱི་སྐྱེ་མཆེད་ལ་ལག་པ་ལ་སོགས་པའི་འདུས་ཏེ་རེག་བདག་གིས་ཅི་ལྟར་རེག་ཅེ་ན། དེ་ཉིད་ལ་ནི་རེག་པར་མི་བརྗོད་དེ། འོན་ཀྱང་དེའི་རྟེན་འབྱུང་བ་རྣམས་ལ་ལག་པ་ལ་སོགས་པའི་འདུས་ཏེ་རེག་པ་དག་གིས་རེག་པ་ན་སྟེ། ཕྲད་ན་གཟུགས་སུ་རུང་ཞིང་གཞོམ་དུ་རུང་ངོ༌། །འདི་ཞེས་བྱ་བ་ནི་གཟུགས་ཀྱི་དངོས་པོ་ཙམ་བརྟག་ཏུ་རུང་བས་རྟེན་ལ་གནས་པ་བརྟག་ཏུ་རུང་བའོ། །ཆེ་གེ་མོ་ཞེས་བྱ་བ་ནི་རྟེན་བསྐལ་བ་ན་གནས་པ་བརྟག་ཏུ་རུང་བའོ། །ཡང་ན་རྣམ་པ་གཉི་ག་བརྟག་ཏུ་རུང་བ་ཉིད་དེ་ཐོགས་པ་བརྟག་ཏུ་རུང་བ་དང་ཡུལ་བརྟག་ཏུ་རུང་བའོ། །འདི་ནི་འདི་ནའོ་ཞེས་བྱ་བ་ནི་ཡུལ་ཉེ་བ་བརྟག་ཏུ་རུང་བའོ། །ཆེ་གེ་མོ་ཞིག་ནའོ་ཞེས་བྱ་བ་ནི་ཡུལ་ཐག་རིང་བ་བརྟག་ཏུ་རུང་བའོ། །དེའི་ཕྱིར་དེ་ལྟར་ན་གཟུགས་སུ་རུང་བའི་ཕྱིར་དང་བརྟག་ཏུ་རུང་བའི་ཕྱིར་གཟུགས་ཀྱི་སྐྱེ་མཆེད་ཁོ་ན་གཙོ་བོ་ཡིན་ནོ། །གཞན་དག་ལ་ནི་བརྟག་ཏུ་རུང་བ་མེད་པའི་ཕྱིར་གཙོ་བོ་མ་ཡིན་ཏེ། གང་གི་ཕྱིར་མིག་ལ་སོགས་པ་རྣམས་ནི་རྗེས་སུ་དཔག་བས་གཟུང་བར་བྱ་བ་ཡིན་པའི་ཕྱིར་འདི་ནའོ་ཆེ་གེ་ནོ་ཞེས་ནའོ་ཞེས་དངོས་སུ་བརྟག་ཏུ་མི་རུང་ལ། དྲི་དང་རོ་དང་རེག་བྱའི་སྐྱེ་མཆེད་དག་ནི་ཕྲད་ནས་གཟུང་བར་བྱ་བ་ཡིན་པའི་ཕྱིར་ཆེ་གེ་མོ་ཞིག་ནའོ་ཞེས་ཡོངས་སུ་བརྟག་པར་མི་ནུས་སོ། །སྒྲའི་སྐྱེ་མཆེད་ལ་ཡང་ཕྱོགས་བསྟན་པ་བརྟག་ཏུ་ཡོད་པར་ཟད་ཀྱི་ཡུལ་བརྟག་ཏུ་རུང་བ་ནི་མེད་དོ། །འཇིག་རྟེན་ན་ཡང་གཟུགས་སོ་ཞེས་གྲགས་ཀྱི་སྒྲ་ནི་མ་ཡིན་
ལ་བཅོམ་ལྡན་འདས་ཀྱིས་བསྟན་པ་ཡང་འཇིག་རྟེན་ལ་བསྟན་པའི་ཕྱིར་ཡིན་ཏེ། བསྟན་བཅོས་རིག་པ་རྣམས་ཀྱིས་ཀྱང་སྒྲ་ལ་སོགས་པ་རྣམས་གཟུགས་ཉིད་དུ་མ་རྟོགས་སོ། །ཆོས་མང་བ་དང་མཆོག་བསྡུས་ཕྱིར། །ཞེས་བྱ་བ་ལ། འདིར་ཆོས་ཀྱི་མིང་ཅན་གྱི་ཆོས་མང་པོ་རྣམས་ཁོ་ན་བསྡུས་ཏེ། ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང༌། ཤེས་པ་དང༌། རྗེས་སུ་དྲན་པ་དང༌། དད་པ་དང༌། དྲན་པ་ཉེ་བར་གཞག་པ་དང༌། སོ་སོ་ཡང་དག་པར་རིག་པ་དང༌། སྐྱབས་དང་དཀོན་མཆོག་ལ་སོགས་པ་རྣམས་སོ། །འདིར་ཚོར་བ་ལ་སོགས་པ་ཆོས་མང་པོ་ཞེས་བྱ་བ་ལ། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། འདུས་མ་བྱས་རྣམས་དང༌། རྣམ་པར་རིག་བྱེད་མ་ཡིན་པ་བསྡུས་ཏེ། ཆོས་ཀྱི་སྒྲ་སྤྱི་མིང་མེད་པར་དེ་དག་ཇི་ལྟར་འཛིན་པར་འགྱུར། དགེ་བ་དང་རྟག་པའི་ཕྱིར་རམ་སྡུག་བསྔལ་རྒྱུ་དང་བཅས་བ་ཉེ་བར་ཞི་བའི་བདག་ཉིད་ཡིན་པའི་ཕྱིར་ཆོས་ཀྱི་མཆོག་ནི་མྱ་ངན་ལས་འདས་པ་སྟེ། ཆོས་ཀྱི་མཆོག་བསྡུས་པའི་ཕྱིར་ན་ཆོས་ཀྱི་སྐྱེ་མཆེད་གཙོ་བོ་ཉིད་དུ་སྟོན་པར་བྱེད་དོ། །ཤའི་དང་ལྷའི་དང་འཕགས་པའི་ཤེས་རབ་དང་མིག་གསུམ་གྱི་སྤྱོད་ཡུལ་ཡིན་པའི་ཕྱིར་ཞེས་བྱ་བ་ནི། དེ་ལ་ཤའི་མིག་ནི་བདག་ཅག་རྣམས་ཀྱི་ལྟ་བུའོ། །ལྷའི་ནི་ལྷ་རྣམས་ཀྱིའོ། །འཕགས་པའི་ཤེས་རབ་ཀྱི་མིག་ནི་འཕགས་པ་རྣམས་ཀྱི་སྟེ། ཟག་པ་མེད་པའི་ཤེས་པ་སྟེ་ཆོས་ཐམས་ཅད་ལ་དམིགས་པའོ། །ཤའི་མིག་དང་ལྷའི་ནི་གཟུགས་ཀྱི་ཡུལ་ཅན་ཁོ་ན་སྟེ། རྣམ་པ་ཉི་ཤུས་རགས་པ་ཉིད་ཀྱིས་དོན་རྣམ་པ་དུ་མར་བརྟག་ཏུ་རུང་བའི་ཕྱིར་དང༌། གོ་རིམས་བཞིན་དུ་ཤའི་དང་ལྷའི་མིག་གིས་མདུན་དུ་རགས་པ་དང༌། ཐམས་ཅད་ཕྲ་བར་བརྟག་ཏུ་རུང་བའི་ཕྱིར་དང༌། འཕགས་པའི་ཤེས་རབ་ཀྱི་མིག་གིས་མི་རྟག་པ་ལ་སོགས་པར་བརྟག་ཏུ་རུང་བའི་ཕྱིར་གཅིག་གཟུགས་ཀྱི་སྐྱེ་མཆེད་དུ་བསྟན་ཏོ། །ཕན་ཚུན་ཞེས་བྱ་བ་རྒྱ་ཆེར་འབྱུང་བ་ལ། མདོ་གཞན་ལས་བསྟན་པའི་ཕུང་པོ་དང་སྐྱེ་མཆེད་དང་ཁམས་འདི་དག་ཁོ་ནར་འདུ་ན་ནི་དེ་ལྟར་ཡིན་དང་གང་ཞིག་གང་དུ་འདུ་བ་བརྗོད་པར་བྱའོ། །འོན་ཏེ་ཐ་དད་པ་ཡིན་ན་ནི་དེ་ལྟར་ན་ཡང་འདུས་བྱས་ཐམས་ཅད་དང་ཟག་
པ་དང་བཅས་པ་རྣམས་དང༌། ཆོས་ཐམས་ཅད་ནི་གོ་རིམས་བཞིན་དུ་ཕུང་པོ་དག་དང་ཉེ་བར་ལན་པའི་ཕུང་པོ་དག་དང་སྐྱེ་མཆེད་དང་ཁམས་དག་གིས་བསྡུས་སོ་ཞེས་བྱ་བ་དེ་དང་འགལ་བར་འགྱུར་རོ། །མདོ་གཞན་ལས་གསུངས་པ་དེ་འདི་དག་གི་ནང་དུ་མི་འདུ་ན་ཅིར་འགྱུར་ཞེ་ན། གསུང་རབ་ཀྱི་ཐ་སྙད་ལ་ཀུན་ཏུ་རྨོངས་པར་འགྱུར་རོ། །དེ་བཟློག་བར་བྱ་བའི་ཕྱིར་འདི་དག་ཏུ་འདུ་བར་བརྗོད་པར་བྱ་སྟེ། སྒྲའི་རང་བཞིན་ཡིན་པའི་ཕྱིར་གཟུགས་ཀྱི་ཕུང་པོས་བསྡུས་སོ། །མིང་ནི་མི་ལྡན་པའི་འདུ་བྱེད་ཀྱི་རང་བཞིན་ཡིན་པའི་ཕྱིར་འདུ་བྱེད་ཀྱི་ཕུང་པོས་བསྡུས་སོ། །གལ་ཏེ་གསུང་ནི་ཚིག་ཡིན་པར་གྲགས་པ་མ་ཡིན་ནམ། ཇི་ལྟར་མིང་སངས་རྒྱས་ཀྱི་གསུང་ཉིད་དུ་བརྗོད་ཅེ་ན། །འདི་ཚིག་ཡོད་པས་དེའི་ཕྱིར་འགལ་བ་མེད་དོ། །སངས་རྒྱས་ཀྱི་གསུང་ནི་དོན་གྱིས་རབ་ཏུ་དབྱེ་བའི་ཕྱིར་ལ། མིང་ཡང་དོན་བརྗོད་པར་བྱེད་པའི་ཕྱིར་སངས་རྒྱས་ཀྱི་གསུང་མིང་གི་བདག་ཉིད་ཡིན་ནོ་ཞེས་རྗོད་པར་བྱེད་དོ། །ངེས་པ་དེ་ལ་མིང་ནི་དཔེ་ཙམ་དུ་ཟད་དོ། །སངས་རྒྱས་ཀྱི་གསུང་མིང་དང་ཚིག་དང་ཡི་གེའི་ཚོགས་ཀྱི་བདག་ཉིད་ཡིན་པའི་ཕྱིར་རོ། །དེ་ལ་དོན་དམ་པ་དང་ཀུན་རྫོབ་ཏུ་ཡོད་པའི་རང་གི་ངོ་བོ་གསལ་བར་བྱེད་པ་ནི་མིང་སྟེ། དཔེར་ན་གཟུགས་སོ། །བུམ་པའོ། །རྟག་པའོ། །མིའོ་ཞེས་པ་ལྟ་བུའོ། །གང་གིས་ཐེ་ཚོམ་མེད་པར་བྱ་བ་དང་དུས་དང་ཡོན་ཏན་གྱི་ཁྱད་པར་དང་འབྲེལ་བ་རྟོགས་པར་བྱེད་པ་ནི་ཚིག་སྟེ། དཔེར་ན་ལྷས་བྱིན་གཱ་མ་བྷཱ་ཛ་ཀྲྀཥྞཾ་ཞེས་པ་ལྟ་བུའོ། །ཡི་གེ་ནི་ཡིག་འབྲུ་ཨ་ཡིག་ལ་སོགས་པའོ། །ཕུང་པོ་ལ་སོགས་གཏམ་རེ་ཡིན། །ཞེས་བྱ་བ་ལ་ཕུང་པོ་ལས་བརྩམས་ཏེ་བསྟན་པ་ནི་ཆོས་ཀྱི་ཕུང་པོ་གཅིག་གོ །དེ་བཞིན་དུ་སྐྱེ་མཆེད་དང་ཁམས་དང་རྟེན་ཅིང་འབྲེལ་བར་འབྱུང་བ་ལ་སོགས་པ་རྣམས་ལ་ཡང་བརྗོད་པར་བྱའོ། །ལ་སོགས་ཀྱི་སྒྲས་དགེ་བ་དང་མི་དགེ་བའི་ལས་ཀྱི་ལམ་དང་བསྡུ་བའི་དངོས་པོ་ལ་སོགས་པ་རྣམས་སྡུད་པར་བྱེད་དོ། །སྤྱོད་པ་རྣམས་ཀྱི་གཉེན་པོར་ནི། །ཞེས་བྱ་བ་རྒྱ་ཆེར་འབྱུང་སྟེ། འདི་ནི་གནས་པ་ཡིན་ཏེ་སེམས་ཅན་རྣམས་ཀྱི་སྤྱོད་པ་ནི་འདོད་ཆགས་དང་ཞེ་སྡང་དང་གཏི་མུག་དང༌། ངའོ་སྙམ་པའི་ང་རྒྱལ་དང༌། ལྟ་བ་དང་རྟོག་པ་ལ་སོགས་པའི་བྱེ་བྲག་གིས་བརྒྱད་
ཁྲི་སྟེ། དེ་རྣམས་ཀྱི་གཉེན་པོར་བཅོམ་ལྡན་འདས་ཀྱིས་མི་སྡུག་པ་དང་བྱམས་པ་དང་རྟེན་ཅིང་འབྲེལ་བར་འབྱུང་བ་དང༌། མི་རྟག་པའི་འདུ་ཤེས་དང༌། སྟོང་པ་ཉིད་དང༌། དབུགས་རྔུབ་པ་དང་འབྱུང་བ་དྲན་པ་ལ་སོགས་པ་བསྟན་པའི་སྒོ་ནས་ཆོས་ཀྱི་ཕུང་པོ་བརྒྱད་ཁྲི་གསུངས་པར་གྲག་གོ །གཞན་དག་ན་རེ། ཕུང་པོ་ལ་སོགས་གཏམ་རེ་ཡིན། །ཞེས་བྱ་བ་འདི་ཉིད། སྤྱོད་པ་རྣམས་ཀྱི་གཉེན་པོར་ནི། ཞེས་རྣམ་གྲངས་གཞན་གྱིས་བསྟན་ཏེ། གང་ཞིག་ཉོན་མོངས་པའི་གཉེན་པོར་མི་འགྱུར་བའི་ཕུང་པོ་བསྟན་པ་དེ་ནི་འགའ་ཡང་མེད་པའི་ཕྱིར་རོ་ཞེས་ཟེར་རོ། །ཚུལ་ཁྲིམས་ཀྱི་ཕུང་པོ་ནི་གཟུགས་ཀྱི་ཕུང་པོས་ཞེས་བྱ་བ་ལ། ཚུལ་ཁྲིམས་ནི་ལུས་དང་ངག་གི་ལས་ཀྱི་རང་བཞིན་ཡིན་པའི་ཕྱིར་གཟུགས་ཀྱི་ཕུང་པོས་བསྡུས་སོ། །ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་རྣམས་ནི་ཚོར་བ་དང་འདུ་ཤེས་ལས་ཐ་དད་ཅིང་སེམས་དང་མཚུངས་པར་ལྡན་པའི་འདུ་བྱེད་ཀྱི་ཕུང་པོའི་མཚན་ཉིད་ཅན་ཡིན་པའི་ཕྱིར་འདུ་བྱེད་ཀྱི་ཕུང་པོས་བསྡུས་སོ། །འདིར་ནི་རྣམ་པར་གྲོལ་བའི་ཕུང་པོ་མི་སློབ་པའི་མོས་པ་ཡིན་གྱི། འདུས་མ་བྱས་ནི་མ་ཡིན་ནོ། །བརྒྱད་ནི་མ་ཆགས་པའི་རང་བཞིན་ཡིན་པའི་ཕྱིར་ཞེས་བྱ་བ་ལ། ཟད་པར་ནམ་མཁའ་དང་རྣམ་པར་ཤེས་པ་མ་གཏོགས་པ་ལ་སོགས་པའི་ཟད་པར་རྣམས་ཏེ། ཟད་པར་བཅུའོ་བརྒྱད་མ་ཆགས། །ཞེས་གསུངས་པའི་ཕྱིར་རོ། །མ་ཆགས་པ་ཡང་ཆོས་ཀྱི་སྐྱེ་མཆེད་ཀྱིས་བསྡུས་པའི་ཕྱིར་ཟད་པར་གྱི་སྐྱེ་མཆེད་བརྒྱད་ནི་ཆོས་ཀྱི་སྐྱེ་མཆེད་ཀྱིས་བསྡུས་སོ། །འཁོར་རྣམས་དང་བཅས་ན་ནི་ཞེས་རྒྱ་ཆེར་འབྱུང་བ་ལ། དེ་ལ་རྣམ་པར་རིག་བྱེད་མ་ཡིན་པའི་གཟུགས་ནི་གཟུགས་ཀྱི་ཕུང་པོས་སོ། །རྣམ་པར་ཤེས་པའི་ཕུང་པོ་ནི་ཡིད་ཀྱི་སྐྱེ་མཆེད་ཀྱིས་བསྡུས་སོ། །ལྷག་མ་རྣམས་ནི་ཆོས་ཀྱི་སྐྱེ་མཆེད་ཀྱིས་སོ། །ཟིལ་གྱིས་གནོན་པའི་སྐྱེ་མཆེད་རྣམས་ཀྱང་དེ་དང་འདྲའོ་ཞེས་བྱ་བའི་སྒྲས་ནི་དེ་ལ་མ་ཆགས་པའི་བདག་ཉིད་འཁོར་དང་བཅས་པ་རྣམས་ནི་ཕུང་པོ་ལྔའི་རང་བཞིན་དང་ཡིད་དང་ཆོས་ཀྱི་སྐྱེ་མཆེད་དག་གི་ནང་དུ་འདུས་བར་ཡོངས་སུ་གཟུང་བར་བྱའོ། །ཟད་པར་ནམ་མཁའ་དང་རྣམ་ཤེས་མཐའ་ཡས་སྐྱེ་མཆེད་ཅེས་བྱ་བ་ནི། ཟད་པར་སྐྱེ་
མཆེད་བཅུ་ལས། ཁྱད་པར་དུ་ནམ་མཁའ་མཐའ་ཡས་ལ་སོགས་པ་བཞི་སྟེ། ནམ་མཁའ་དང་རྣམ་པར་ཤེས་པ་དང་ཅི་ཡང་མེད་པ་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དག་ནི་རྗེས་སུ་འབྲང་བའི་གཟུགས་མེད་པའི་ཕྱིར་ཕུང་པོ་བཞིའི་རང་བཞིན་ནོ། །རྣམ་པར་གྲོལ་བའི་སྐྱེ་མཆེད་ལྔ་ནི་ཞེས་རྒྱ་ཆེར་འབྱུང་བ་ལ། རྣམ་པར་གྲོལ་བའི་སྐྱེ་མཆེད་དང་པོ་གསུམ་ལ་ནི་གཞུང་འཛིན་པས་སྒྲའི་སྐྱེ་མཆེད་དོ། །བཞི་པ་ཡང་གལ་ཏེ་བརྗོད་ཅིང་སེམས་པར་བྱེད་ན་ནི་སྐྱེ་མཆེད་གསུམ་ཡོད་ལ། དེ་ལྟ་མ་ཡིན་ན་ཡིད་དང་ཆོས་ཀྱི་སྐྱེ་མཆེད་ཀྱིས་བསྡུས་སོ། །ལྔ་པ་ཡང་ཡིད་དང་ཆོས་ཀྱི་སྐྱེ་མཆེད་དག་ཡོད་དེ། དེའི་ཕྱིར་འཁོར་དང་བཅས་པ་རྣམས་ནི་སྒྲ་དང་ཡིད་དང་ཆོས་ཀྱི་སྐྱེ་མཆེད་རྣམས་ཀྱིས་བསྡུས་སོ། །རྣམ་པར་གྲོལ་བའི་སྐྱེ་མཆེད་ལྔ་གང་ཞེ་ན། མདོ་ལས་འདི་ན་དགེ་སློང་ལ་སྟོན་པའམ་ཚངས་པ་མཚུངས་པར་སྤྱོད་པ་བླ་མའི་གནས་ལྟ་བུ་གང་ཡང་རུང་བ་ཞིག་གིས་ཆོས་སྟོན་པར་བྱེད་པ་ན། འདི་ལ་སྟོན་པའམ་ཚངས་པ་མཚུངས་པར་སྤྱོད་པ་བླ་མའི་གནས་ལྟ་བུ་གང་ཡང་རུང་བ་ཞིག་ཇི་ལྟ་ཇི་ལྟར་ཆོས་སྟོན་པ་དེ་ལྟ་དེ་ལྟར་ཆོས་དེ་དག་ལ་དོན་སོ་སོ་ཡང་དག་པར་རིག་པ་དང་ཆོས་སོ་སོ་ཡང་དག་པར་རིག་པར་འགྱུར་རོ། །དོན་སོ་སོ་ཡང་དག་པར་རིག་པ་དང་ཆོས་སོ་སོ་ཡང་དག་པར་རིག་པ་དེ་དག་ལས་རབ་ཏུ་དགའ་བ་སྐྱེའོ། །རབ་ཏུ་དགའ་བར་གྱུར་པ་ལས་ཡིད་དགའ་བ་སྐྱེའོ། །ཡིད་དགའ་བར་གྱུར་ན་ལུས་ཤིན་ཏུ་སྦྱངས་བར་འགྱུར་རོ། །ལུས་ཤིན་ཏུ་སྦྱངས་བས་བདེ་བ་མྱོང་བར་འགྱུར་རོ། །བདེ་བར་གྱུར་ན་སེམས་མཉམ་པར་འཇོག་གོ །སེམས་མཉམ་པར་བཞག་ན་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། འདི་ནི་རྣམ་པར་གྲོལ་བའི་སྐྱེ་མཆེད་དང་པོའོ། །དེ་ལྟར་གནས་པའི་དགེ་སློང་ངམ་དགེ་སློང་མ་ཏིང་ངེ་འཛིན་ལ་མཉམ་པར་འཇོག་པ་ནི་ཟག་པ་ཡོངས་སུ་མ་ཟད་པ་ཡོངས་སུ་ཟད་པར་བྱེད། མ་ཐོབ་པ་བླ་ན་མེད་པའི་གྲུབ་པ་དང་བདེ་བའི་མྱ་ངན་ལས་འདས་པ་ཐོབ་པར་བྱེད་དོ། །གཞན་ཡང་ལྷན་ཅིག་ཉིད་དུ་སྟོན་པའམ་ཚངས་པ་མཚུངས་པར་སྤྱོད་པ་མཁས་པ་བླ་མའི་གནས་ལྟ་བུ་གང་ཡང་རུང་བ་ཞིག་གིས་ཆོས་སྟོན་པ་ན་ཇི་ལྟར་ཐོས་པ་དང་བཤད་པའི་ཆོས་རྣམས་
གཞན་དག་ལ་རྒྱ་ཆེར་ཁ་དོན་བྱེད་དུ་འཇུག་པ་དེ་ལྟ་དེ་ལྟར་དེ་ཆོས་རྣམས་ལ་དོན་སོ་སོ་ཡང་དག་པར་རིག་པར་འགྱུར། ཆོས་སོ་སོ་ཡང་དག་པར་རིག་པར་འགྱུར་ཞིང་ཞེས་བྱ་བ་སྔ་མ་བཞིན་ཏེ་འདི་ནི་རྣམ་པར་གྲོལ་བའི་སྐྱེ་མཆེད་གཉིས་པའོ། །གཞན་ཡང་ལྷན་ཅིག་ཉིད་དུ་སྟོན་པའམ་ཚངས་པ་མཚུངས་པར་སྤྱོད་པ་མཁས་པ་བླ་མའི་གནས་ལྟ་བུ་གང་ཡང་རུང་བ་ཞིག་གིས་ཆོས་སྟོན་པར་བྱེད་པ་ན། ཇི་ལྟར་ཐོས་པ་དང༌། ཇི་ལྟར་བཤད་པ་དང༌། ཇི་ལྟར་ཀུན་ཆུབ་པར་བྱས་པའི་ཆོས་རྣམས་རྒྱ་ཆེར་དབྱངས་ཀྱི་ཁ་ཏོན་དུ་བྱེད་པ་དང༌། ཡང་ཇི་ལྟར་ཐོས་པ་དང༌། ཇི་ལྟར་བཤད་པ་དང༌། ཇི་ལྟར་ཀུན་ཆུབ་པར་བྱས་པའི་ཆོས་རྣམས་གཞན་དག་ལ་རྒྱ་ཆེར་ཡང་དག་པར་སྟོན་པར་བྱེད་དེ། ཇི་ལྟ་ཇི་ལྟར་གཞན་དག་ལ་རྒྱ་ཆེར་ཡང་དག་པར་སྟོན་པ་དེ་ལྟ་དེ་ལྟར་དེ་དོན་རྣམས་ལ་དོན་སོ་སོ་ཡང་དག་པར་རིག་པར་འགྱུར། ཆོས་སོ་སོ་ཡང་དག་པར་རིག་པར་འགྱུར་ཞིང་ཞེས་བྱ་བ་སྔ་མ་བཞིན་ཏེ། འདི་ནི་རྣམ་པར་གྲོལ་བའི་སྐྱེ་མཆེད་གསུམ་པའོ། །གཞན་ཡང་སྔར་བཤད་པ་མི་བྱེད་མོད་ཀྱི། ཇི་ལྟར་ཐོས་པ་དང༌། ཇི་ལྟར་བཤད་པ་དང༌། ཇི་ལྟར་ཀུན་ཆུབ་པར་བྱས་པ་རྣམས་ལ་སེམས་པར་བྱེད་འཇལ་བར་བྱེད་ཡོངས་སུ་རྟོགས་པར་བྱེད་དེ། ཇི་ལྟ་ཇི་ལྟར་དེ་དག་ལ་སེམས་པར་བྱེད་པ་དང་འཇལ་བར་བྱེད་པ་དང་ཡོངས་སུ་རྟོགས་པར་བྱེད་པ་དེ་ལྟ་དེ་ལྟར་དེ་ཆོས་རྣམས་ལ་དོན་སོ་སོ་ཡང་དག་པར་རིག་པར་འགྱུར། ཆོས་སོ་སོ་ཡང་དག་པར་རིག་པར་འགྱུར་ཞིང་ཞེས་བྱ་བ་སྔ་མ་བཞིན་ཏེ། འདི་ནི་རྣམ་པར་གྲོལ་བའི་སྐྱེ་མཆེད་བཞི་པའོ། །གཞན་ཡང་སྔར་བཤད་པ་མི་བྱེད་མོད་ཀྱི། དེ་ཏིང་ངེ་འཛིན་གྱི་མཚན་མ་བཟང་པོ་ལེགས་པར་འཛིན་པར་བྱེད། ལེགས་པར་སྟོན་པར་བྱེད། ལེགས་པར་སྦྱོར་བར་བྱེད་དེ། ཇི་ལྟ་ཇི་ལྟར་ཏིང་ངེ་འཛིན་གྱི་མཚན་མོ་བཟང་པོ་ལེགས་པར་འཛིན་པར་བྱེད་པ་དང༌། ལེགས་པར་སྟོན་པར་བྱེད་པ་དང༌། ལེགས་པར་སྦྱོར་བར་བྱེད་པ་དེ་ལྟ་དེ་ལྟར་དེ་ཆོས་རྣམས་ལ་དོན་སོ་སོ་ཡང་དག་པར་རིག་པར་འགྱུར། ཆོས་སོ་སོ་ཡང་དག་པར་རིག་བར་འགྱུར་ཞིང་ཞེས་བྱ་བ་སྔ་མ་བཞིན་ཏེ། འདི་ནི་རྣམ་པར་གྲོལ་བའི་སྐྱེ་མཆེད་ལྔ་པའོ། །རྣམ་པར་གྲོལ་བ་སྐྱེ་བའི་སྒོར་གྱུར་པས་སྐྱེ་མཆེད་དག་གོ །སྐྱེ་མཆེད་གཉིས་ལས་ཞེས་བྱ་
བ་ནི་མདོ་ལས་ཇི་ལྟར་དུ་རྒྱ་ཆེར་སེམས་ཅན་གཟུགས་ཅན་ལ་འདུ་ཤེས་མེད་ཅིང་སོ་སོར་འདུ་ཤེས་མེད་པ་དག་ཀྱང་ཡོད་དེ། འདི་ལྟ་སྟེ་ལྷ་འདུ་ཤེས་མེད་པའི་སེམས་ཅན་ལྟ་བུ་སྟེ་འདི་ནི་སྐྱེ་མཆེད་དང་པོ་ཡིན་ནོ། །སེམས་ཅན་གཟུགས་མེད་པ་ལ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱས་ཏེ་གནས་པ་དག་ཀྱང་ཡོད་དེ། འདི་ལྟ་སྟེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བ་རྣམས་ལྟ་བུ་སྟེ། འདི་ནི་སྐྱེ་མཆེད་གཉིས་པའོ་ཞེས་གསུངས་པ་ཡིན་ཏེ། སྐྱེ་མཆེད་འདི་གཉིས་ལས་འདུ་ཤེས་མེད་པའི་སེམས་ཅན་ནི་སྐྱེ་མཆེད་བཅུས་བསྡུས་ཏེ། དེ་དག་ལ་འཆི་འཕོ་བ་དང་སྐྱེ་བའི་དུས་དག་ན་སེམས་དང་སེམས་ལས་བྱུང་བའི་ཡོད་པའི་ཕྱིར་རོ། །ཁམས་མང་པོ་པ་ལས་ཁམས་དྲུག་ཅུ་རྩ་གཉིས་བསྟན་པ་ཞེས་བྱ་བ་ལ། མདོ་ལས་བཙུན་པ་ཇི་ཙམ་གྱིས་ན་མཁས་པ་ཁམས་ལ་མཁས་པ་ལགས། ཀུན་དགའ་བོ་མཁས་པ་ནི་ཁམས་བཅོ་བརྒྱད་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། མིག་གི་ཁམས་དང་གཟུགས་ཀྱི་ཁམས་དང༌། མིག་གི་རྣམ་པར་ཤེས་པའི་ཁམས་དང་ཞེས་རྒྱ་ཆེར་འབྱུང་ངོ༌། །དེ་ལ་སའི་ཁམས་དང་ཆུའི་ཁམས་དང༌། མེའི་ཁམས་དང་རླུང་གི་ཁམས་ཞེས་བྱ་བ་དང་པོ་བཞི་ནི་རེག་བྱའི་ཁམས་ཀྱིས་བསྡུས་སོ། །ནམ་མཁའི་ཁམས་ནི་གཟུགས་ཀྱི་ཁམས་ཀྱིས་སོ། །རྣམ་པར་ཤེས་པའི་ཁམས་ནི་རྣམ་པར་ཤེས་པའི་ཁམས་དྲུག་གིས་བསྡུས་སོ། །ཡང་ཁམས་དྲུག་ཉིད་དེ་འདོད་པའི་ཁམས་དང༌། གནོད་སེམས་ཀྱི་ཁམས་དང༌། ངེས་པར་འབྱུང་པའི་ཁམས་དང༌། གནོད་སེམས་མེད་པའི་ཁམས་དང༌། རྣམ་པར་མི་འཚེ་བའི་ཁམས་ཏེ་འདི་དག་ནི་ཆོས་ཀྱི་ཁམས་ཀྱིས་བསྡུས་སོ། །སྨྲས་པ། འོན་འདོད་པའི་ཁམས་ནི་རྣམ་པ་ལྔ་དང་རྣམ་པ་ཉི་ཤུ་སྟེ། དམྱལ་བ་དང་ཡི་དགས་དང་དུད་འགྲོ་དང་མི་དང་ལྷ་རྣམ་པ་དྲུག་དང༌། དམྱལ་བ་དང་བཅས་པ་གླིང་གི་དབྱེ་བས་ཉི་ཤུ་སྟེ་དེ་དག་ཀྱང་དགེ་བ་དང་ཉོན་མོངས་པ་ཅན་དང་ལུང་མ་བསྟན་པ་ཡིན་པས་ཁམས་དེ་དག་ཁམས་བཅོ་བརྒྱད་ཀྱིས་བསྡུས་པ་མ་ཡིན་ནམ་ཞེ་ན། དེ་ནི་དེ་ལྟ་ཡིན་མོད་ཀྱི། འདིར་ནི་འདོད་པའི་ཁམས་ཞེས་བྱ་བ་འདོད་པའི་འདོད་ཆགས་ལ་དགོངས་པས་ཐམས་ཅད་ཀྱིས་བསྡུས་པ་མ་
ཡིན་ཏེ། གཞན་དུ་ན་དེའི་ཁོངས་སུ་འདུ་བའི་ཕྱིར་གནོད་སེམས་ཀྱི་ཁམས་དང་རྣམ་པར་འཚེ་བའི་ཁམས་ལོགས་ཤིག་ཏུ་མི་བརྗོད་པར་འགྱུར་རོ། །ཡང་ཁམས་དྲུག་སྟེ་སྡུག་བསྔལ་གྱི་ཁམས་དང་བདེ་བའི་ཁམས་དང་ཡིད་མི་བདེ་བའི་ཁམས་དང་ཡིད་བདེ་བའི་ཁམས་དང་བཏང་སྙོམས་ཀྱི་ཁམས་དང་མ་རིག་པའི་ཁམས་ཏེ་འདི་དག་ཀྱང་ཆོས་ཀྱི་ཁམས་ཀྱིས་བསྡུས་སོ། །ཡང་ཁམས་བཞི་སྟེ་ཚོར་བའི་ཁམས་དང༌། འདུ་ཤེས་ཀྱི་ཁམས་དང༌། འདུ་བྱེད་ཀྱི་ཁམས་དང༌། རྣམ་པར་ཤེས་པའི་ཁམས་ཏེ་གསུམ་ནི་ཆོས་ཀྱི་ཁམས་ཀྱིས་བསྡུས་ལ། རྣམ་པར་ཤེས་པའི་ཁམས་ནི་རྣམ་པར་ཤེས་པའི་ཁམས་དྲུག་གིས་སོ། །ཡང་ཁམས་གསུམ་སྟེ་འདོད་པའི་ཁམས་དང༌། གཟུགས་ཀྱི་ཁམས་དང༌། གཟུགས་མེད་པའི་ཁམས་ཏེ་དེ་ལ་འདོད་པའི་ཁམས་ནི་ཁམས་བཅོ་བརྒྱད་ཀྱིས་བསྡུས་སོ། །གཟུགས་ཀྱི་ཁམས་ནི་ཁམས་བཅུ་བཞིས་བསྡུས་སོ། །གཟུགས་མེད་པའི་ཁམས་ནི་ཡིད་དང་རྣམ་པར་ཤེས་པའི་ཁམས་ཀྱིས་བསྡུས་སོ། །ཡང་ཁམས་གསུམ་སྟེ་གཟུགས་ཀྱི་ཁམས་དང་གཟུགས་མེད་པའི་ཁམས་དང༌། འགོག་པའི་ཁམས་ཏེ་གཉིས་ཀྱིས་བསྡུས་པ་ནི་བཤད་ཟིན་ཏོ། །འགོག་པའི་ཁམས་ནི་ཆོས་ཀྱི་ཁམས་སུ་འདུའོ། །ཡང་ཁམས་གསུམ་སྟེ་འདས་པའི་ཁམས་དང་མ་འོངས་པའི་ཁམས་དང༌། ད་ལྟར་བྱུང་བའི་ཁམས་ཏེ་འདི་དག་སོ་སོར་བཅོ་བརྒྱད་ཀྱིས་བསྡུས་སོ། །ཡང་ཁམས་གསུམ་སྟེ་དམན་པའི་ཁམས་དང༌། གྱ་ནོམ་པའི་ཁམས་དང༌། བར་མའི་ཁམས་ཏེ། གསུམ་པོ་འདི་དག་ཀྱང་ཅི་རིགས་པར་ཁམས་བཅོ་བརྒྱད་དག་ཏུ་འདུའོ། །ཡང་ཁམས་གཞན་གསུམ་སྟེ་དགེ་བའི་ཁམས་དང་མི་དགེ་བའི་ཁམས་དང་ལུང་དུ་མ་བསྟན་པའི་ཁམས་ཏེ། འདི་དག་གི་དང་པོ་གཉིས་ཏེ། གཟུགས་ཀྱི་ཁམས་དང༌། སྒྲའི་ཁམས་དང༌། ཡིད་ཀྱི་ཁམས་དང༌། རྣམ་པར་ཤེས་པའི་ཁམས་དྲུག་དང༌། ཆོས་ཀྱི་ཁམས་སུ་ཡང་འདུའོ། །གསུམ་པོ་ནི་བཅོ་བརྒྱད་པོ་ཐམས་ཅད་དུའོ། །ཡང་ཁམས་གསུམ་སྟེ་སློབ་པའི་ཁམས་དང༌། མི་སློབ་པའི་ཁམས་དང༌། སློབ་པ་ཡང་མ་ཡིན་མི་སློབ་པ་ཡང་མ་ཡིན་པའི་ཁམས་ཏེ་དེ་ལ་སློབ་པ་དང་མི་སློབ་པ་དང་
མི་སློབ་པའི་ཁམས་ནི། ཡིད་དང་ཡིད་ཀྱི་རྣམ་པར་ཤེས་པའི་ཁམས་དང་ཆོས་ཀྱི་ཁམས་དག་ཏུ་འདུའོ། །གསུམ་པོ་ནི་ཁམས་བཅོ་བརྒྱད་པོ་ཐམས་ཅད་དུའོ། །ཡང་ཁམས་གཉིས་བཤད་དེ། ཟག་པ་དང་བཅས་པའི་ཁམས་དང་ཟག་པ་མེད་པའི་ཁམས་ཏེ། དང་པོ་ནི་ཁམས་བཅོ་བརྒྱད་དུ་འདུའོ། །གཉིས་པ་ནི་ཡིད་དང་ཡིད་ཀྱི་རྣམ་པར་ཤེས་པའི་ཁམས་དང་ཆོས་ཀྱི་ཁམས་དག་ཏུའོ། །ཡང་གཉིས་ཏེ་འདུས་བྱས་ཀྱི་ཁམས་དང་འདུས་མ་བྱས་ཀྱི་ཁམས་སོ། །དང་པོ་ནི་ཁམས་བཅོ་བརྒྱད་དུ་འདུའོ། །གཉིས་པ་ནི་ཆོས་ཀྱི་ཁམས་སུ་འདུ་སྟེ། དེ་ལྟར་དེ་དག་ནི་ཁམས་བཞི་བཅུ་རྩ་བཞི་རྣམས་དེ་ལྟར་བཅོ་བརྒྱད་ཀྱིས་བསྡུས་པར་འགྱུར་ཞིང་དྲུག་ཅུ་རྩ་གཉིས་སུ་ཡང་འགྱུར་རོ། །གཉིས་ཀྱི་མཚན་ཉིད་མ་བཤད་ན་ཞེས་བྱ་ནི་ནམ་མཁའ་དང་རྣམ་པར་ཤེས་པ་གཉིས་ཀྱིའོ། །སའི་ཁམས་ལ་སོགས་པ་རྣམས་ཀྱི་ནི། སྲ་གཤེར་དྲོ་ཉིད་གཡོ་བ་རྣམས། །ཞེས་བྱ་བར་བཤད་ཟིན་ཏོ། །གལ་ཏེ་རྣམ་ཤེས་སོ་སོ་རྣམ་རིག་པ་ཞེས་བྱ་བར་རྣམ་པར་ཤེས་པའི་ཁམས་ཀྱི་མཚན་ཉིད་ཀྱང་བཤད་པ་མ་ཡིན་ནམ་ཞེ་ན། སོ་སོར་རྣམ་པར་རིག་པའི་མཚན་ཉིད་ཀྱི་ཁྱད་པར་ཞེས་བྱ་བ་མིག་ལ་སོགས་པའི་རྣམ་པར་ཤེས་པ་རྣམས་ཕན་ཚུན་ལས་ཁམས་ཉིད་ཀྱི་ཁྱད་པར་ཞེས་ཤེས་པར་བྱ་བ་མ་ཡིན་ནོ། །ཅི་འདིར་རྣམ་པར་ཤེས་པ་ཐམས་ཅད་ཀྱང་རྣམ་པར་ཤེས་པའི་ཁམས་སུ་འདོད་པ་དེས་ཁྱད་པར་དུ་བྱས་པ་ཞེས་བྱ་བ་དེ་ལྟ་བུ་མ་ཡིན་མོད། ས་ལ་སོགས་པ་རྣམས་ལ་སྲ་བ་ལ་སོགས་པ་ཁྱད་པར་མེད་པ་ལ་ཡང་ས་ལ་སོགས་པའི་ཁམས་ཐ་དད་པས་སོ། །ནམ་མཁའི་མཚན་ཉིད་བཤད་པ་ནམ་མཁའི་ཁམས་མ་ཡིན་པ་དེའི་ཕྱིར་རྣམ་པར་ཤེས་པར་མི་བྱའོ། །ཅི་ནམ་མཁའི་ཁམས་གཞན་དུ་ན་ཞེས་བྱ་བ་ལ་དེ་ཉིད་ཀྱི་ཕྱིར། ཅི་ནམ་མཁའ་ཉིད་ནམ་མཁའི་ཁམས་ཡིན་ལ་ཞེས་རྒྱ་ཆེར་གསུངས་སོ། །བུ་ག་ཞེས་བྱ་བ་ཅི་ཞིག་ཡིན། རིག་པར་བྱ་ཞེས་བྱ་བ་ལ་ནམ་མཁའ་བཞིན་དུ་བུ་གའི་དོན་ཡང་མ་རྟོགས་པའི་ཕྱིར་རམ། བུ་ག་ནི་ནམ་མཁའ་ཉིད་ཡིན་ནོ་སྙམ་དུ་ལོག་པར་རྟོགས་པའི་ཕྱིར་འདྲི་བའོ། །སྣང་དང་མུན་པ་དག་ཡིན་ལོ། །ཞེས་བྱ་བ་ནི་གལ་ཏེ་བུ་གནམ་མཁའི་ཁམས་ཡིན་ལ། ནམ་མཁའི་
ཁམས་ཀྱང་བུ་ག་ཡིན་ན་ནི། དེར་ཡང་དེ་ལྟར་འགྱུར་བས་ཐུག་པ་མེད་པར་འགྱུར་བ་ཞིག་གོ །ལོའི་སྒྲ་ནི་རྡུལ་ཕྲ་རབ་རྣམས་ལ་ཕན་ཚུན་རེག་པ་མེད་པའི་ཕྱིར་བསགས་པ་ལ་གདོན་མི་ཟ་བར་བུ་ག་ཡོད་པར་འགྱུར་བས་མ་རངས་པའི་དོན་ཏོ། །དེ་ཉིད་ཐོགས་པའི་ཉེ་འཁོར་གྱི་གཟུགས་ཞེས་བཤད་པ་ལ་དེ་ཉིད་ནི་ནམ་མཁའི་ཁམས་སོ། །གཞན་དག་ན་རེ་ཐོགས་པ་བདེན་པར་བཤད་པ་བུ་གའི་ཁྱད་པར་འགའ་ཞིག་ལ་ཡོད་པ་མ་ཡིན་ནོ་ཞེས་བྱ་བ་བྱེ་བྲག་ཏུ་སྨྲ་བའི་ཚིག་ཏུ་བསྟན་པའི་ཕྱིར་ཞེས་ཟེར་རོ། །མུན་པ་ནི་མཚན་མོའི་རང་བཞིན་དང་སྣང་བ་ནི་ཉིན་མོའི་རང་བཞིན་ནོ། །ཐོགས་པ་ཞེས་བྱ་བསགས་པའི་གཟུགས། །ཤིན་ཏུ་གནོད་པ་བྱར་རུང་བ། །ཞེས་བྱ་བ་རྐང་པ་གཉིས་པོ་འདི་དག་གི་རྐང་པ་དང་པོ་ཨ་གྷཾ་ཀི་ལི་ཙི་ཏ་སྠི་ཞེས་པའི་ཨ་ཡིག་བཟུང་ནས། རྐང་པ་གཉིས་པ་རཱུ་པ་མི་ཏྱརྠ་གྷ་ཏ་ཞེས་པའི་གྷ་ཡིག་དག་དང་ངེས་པའི་ཚིག་གི་ཚོགས་སྦྱར་ཏེ། ཨ་གྷ་ཞེས་པ་ནི་ཐོགས་པ་ཞེས་བྱའོ། །བསགས་པ་ནི་ཚོགས་པའོ། །བསགས་པར་གནས་པ་ནི་བསགས་པ་ལ་གནས་ཤིང་འདུས་པ་ལ་གནས་པ་ཞེས་བྱ་བའི་དོན་ཏོ། །ཤིན་ཏུ་གནོད་པར་བྱར་རུང་བ། །ཞེས་བྱ་བ་ནི་གནོད་པར་བྱེད་པ་དང་གནོད་པར་བྱེད་པར་བྱར་རུང་བ་ཞེས་དགོངས་པའོ། །ནམ་མཁའི་ཁམས་ནི་གནོད་པར་བྱེད་པ་ཉིད་དང་གནོད་པར་བྱར་རུང་བ་དེ་ལ་སྒྲིབ་པ་མེད་པ་དེའི་ཉེ་འཁོར་ཏེ་ཀུན་ནས་ཁོར་ཡུག་ཏུ་འགྱུར་རོ་ཞེས་བྱ་བའི་ཐ་ཚིག་གོ །དེ་ཉིད་ནི་མ་ཡིན་ནོ་ཞེས་བྱ་བ་དེའི་རིགས་སོ། །ཉེ་འཁོར་གྱི་གཟུགས་ཞེས་བྱ་བ་གཟུགས་ཀྱི་ཁམས་དང་སྐྱེ་མཆེད་དང་ཕུང་པོའི་རང་བཞིན་ཞེས་བྱ་བའི་ཐ་ཚིག་གོ །སྣང་དང་མུན་པ་ཞེས་བྱ་བ་ནི་ཁ་དོག་གི་ཁྱད་པར་རོ། །མདོ་སྡེ་པ་རྣམས་ན་རེ། བསྟན་བཅོས་ལས་ནི་ནམ་མཁའི་ཁམས་ཀྱི་མཚན་ཉིད་ནམ་མཁའ་ལས་ཐ་དད་པ་ཡོད་པ་མ་ཡིན་ཞིང༌། ནམ་མཁའི་ཁམས་དང་ནམ་མཁའ་ཡང་རྫས་མ་ཡིན་པའི་ཕྱིར་ནམ་མཁའི་ཁམས་རྫས་སུ་མེད་ཅེས་ཟེར་རོ། །སློབ་དཔོན་འདུས་བཟང་ན་རེ། ནམ་མཁའི་ཁམས་ནི་ནམ་མཁའ་ལས་ཐ་དད་པར་ཡོད་དེ། བཅོམ་ལྡན་འདས་ཀྱིས་འདི་སྐད་དུ་ནམ་མཁའ་ནི་གཟུགས་མེད་པ་བསྟན་དུ་མེད་པ་ཐོགས་པ་མེད་པ་སྟེ། དེ་ནི་ཅི་ལ་ཡང་བརྟེན་པར་མི་འགྱུར་རོ། །
འོན་ཀྱང་འཇིག་རྟེན་ན་ནམ་མཁའ་གདགས་པ་ཡོད་དོ་ཞེས་གསུངས་པའི་ཕྱིར་ཡོད་པ་ཉིད་དང་ཐ་དད་པ་གཉིས་ཀ་ཤིན་ཏུ་གསལ་བར་གསུངས་སོ་ཞེས་ཟེར་རོ། །གཟུགས་ཀྱི་འདོད་ཆགས་དང་བྲལ་བ་ལ་ནམ་མཁའི་ཁམས་སྤངས་པར་བསྟན་པའི་ཕྱིར་ཏེ། བཅོམ་ལྡན་འདས་ཀྱིས་གང་གི་ཕྱིར་སེམས་དེའི་ཁམས་ལྔ་ལས་འདོད་ཆགས་དང་བྲལ་བ་རྣམ་པར་གྲོལ་བར་འགྱུར་ལ། དེ་ནས་དེའི་རྣམ་པར་ཤེས་པ་ཉིད་ལྷག་མར་ལུས་པར་འགྱུར་རོ་ཞེས་གསུངས་པའི་ཕྱིར་རོ། །ནམ་མཁའ་ནི་སྤངས་པར་བསྙད་པར་རིགས་པ་ཡང་མ་ཡིན་ཏེ་ཟག་པ་མེད་པའི་ཕྱིར་རོ། །ནང་དང་ཕྱི་གསུངས་པའི་ཕྱིར་ཏེ་ནང་གི་ནམ་མཁའི་ཁམས་ནི་མིག་གི་བུ་ག་གང་ཡིན་པ་དང་ཞེས་རྒྱ་ཆེར་གསུངས་སོ། །ཕྱིའི་ནམ་མཁའ་གང་ཡིན་པ་ནམ་མཁར་གྱུར་པའོ། །འདུས་མ་བྱས་ལ་ནི་ནང་དང་ཕྱི་ཞེས་རུང་བ་མ་ཡིན་ནོ། །དཔེ་སྟོན་སྡེ་བ་ན་རེ་སྣང་བ་དང་ནམ་མཁའ་ནི་གཞན་མ་ཡིན་པ་ཉིད་དེ། སྣང་བ་ཉིད་ཀྱང་ནམ་མཁའི་ཁམས་ཉིད་དུ་རྟོགས་པར་བྱའོ་ཞེས་ཟེར་རོ། །མདོ་དང་འགལ་བའི་གནས་མེད་དེ་ནམ་མཁའ་ཉིད་རྫས་སུ་སྒྲུབ་པ་ལ་ཕྱི་མ་འདིར་རྣམ་པར་དཔྱད་པ་མ་ཡིན་ནོ། །སྤངས་པའི་ཚིག་ཀྱང་ཉོན་མོངས་པ་ལ་འཇུག་པར་ཁས་བླངས་པའི་ཕྱིར་འགལ་བ་མེད་དོ། །གཞན་དུ་ན་འབྱུང་བ་སྤངས་པ་ཙམ་ཁོ་ན་བརྗོད་དགོས་སོ། །དེ་སྤངས་པ་ཁོ་ན་ལྷག་མ་རྒྱུར་བྱས་པའི་གཟུགས་སྤངས་པ་བཞིན་ནམ་མཁའི་ཁམས་ཀྱང་སྤངས་པར་གྲུབ་བོ། །ནང་དང་ཕྱི་ཡང་བརྟེན་པའི་དབྱེ་བས་འགལ་བ་མེད་དོ། །གང་གསུངས་པ་ལ་སོགས་པ་ལྟར་སྐྱེས་བུར་གདགས་པའི་ཉེ་བར་ལེན་པའི་ཕྱིར་དང་དེ་ལ་བརྟེན་ནས་མངལ་དུ་འཇུག་པར་གསུངས་པའི་ཕྱིར་རོ། །འདུས་བྱས་དང་ཟག་བཅས་དང་ནམ་མཁའི་ཁམས་ཞེས་བྱ་བ་རྒྱུ་གཉིས་ཀྱིས་འདི་འགལ་ཏེ། འདུས་བྱས་ཇི་ལྟ་བ་ཉིད་ཀྱིས་ཟག་པ་དང་བཅས་པ་ཉིད་ལ་ཁྱབ་སྟེ། དེ་བཞིན་དུ་གཟུགས་ཀྱི་སྐྱེ་མཆེད་ཉིད་ཀྱིས་ཀྱང་ཞེས་བྱ་སྟེ་ཞར་ལ་བྱུང་བས་ཆོ་ག་གོ །རྣམ་པར་ཤེས་པའི་ཁམས་ནི་རྣམ་པར་ཤེས་པ་ཟག་པ་དང་བཅས་པ་སྟེ། དེ་ཅིའི་ཕྱིར་ཞེ་ན། འདི་ལྟར་ཁམས་དྲུག་པོ་འདི་དག་ནི་ཞེས་རྒྱུ་རྒྱས་པར་སྨྲས་ཏེ། སྐྱེས་བུ་འདི་ནི་ཁམས་དྲུག་པ་ཡིན་ནོ་ཞེས་མདོ་
ལས་གསུངས་པའི་ཕྱིར་ཁམས་དྲུག་ལ་བརྟེན་ནས་མངལ་དུ་འཇུག་པར་འགྱུར་རོ། །སའི་ཁམས་ལ་སོགས་པ་ལྟར་སྐྱེ་བའི་རྟེན་ཉིད་དུ་འདོད་པའི་ཕྱིར་རྣམ་པར་ཤེས་པའི་ཁམས་ཀྱང་ཟག་པ་དང་བཅས་པ་ཉིད་དོ། །སྐྱེ་བ་ནི་ནང་གི་སྐྱེ་མཆེད་རྣམས་ཏེ་དེ་ནི་རྟེན་ནོ། །དེ་དག་མེད་ན་སྐྱེ་བ་མེད་པའམ་འཇུག་པ་མེད་པར་སོ་སོར་རིག་པར་བྱའོ། །དེ་ཉིད་ཀྱི་ཕྱིར་དེ་དག་ནི་སྐྱེ་བ་ཉིང་མཚམས་སྦྱོར་བའི་སེམས་ལས་ཞེས་རྒྱ་ཆེར་གསུངས་སོ། །ཟག་པ་མེད་པའི་ཆོས་རྣམས་ནི་དེ་ལྟ་མ་ཡིན་ནོ་ཞེས་བྱ་བ་ནི་སྐྱེ་བ་རྒྱུན་གཅོད་པ་དང༌། གནོད་པར་བྱེད་པ་དང་ཡོངས་སུ་གཅོད་པ་ལ་སོགས་པར་འཇུག་པའི་ཕྱིར་རོ། །གཞན་དག་ན་རེ་སྐྱེད་པར་བྱེད་པ་དང་གསོས་འདེབས་པ་དང་སྤེལ་བར་བྱེད་པའི་གཞིར་གྱུར་པ་ཞེས་ཟེར་ཏེ། འདི་ལ་སྐྱེད་པར་བྱེད་པ་ནི་རྣམ་པར་ཤེས་པའི་ཁམས་ཏེ། ཉིང་མཚམས་སྦྱོར་བའི་ས་བོན་ཡིན་པའི་ཕྱིར་རོ། །གསོ་བར་བྱེད་པ་ནི་འབྱུང་བ་རྣམས་ཏེ་རྟེན་དུ་གྱུར་པའི་ཕྱིར་རོ། །སྤེལ་བར་བྱེད་པ་ནི་ནམ་མཁའི་ཁམས་ཏེ་གོ་འབྱེད་པའི་ཕྱིར་རོ། །ཆོས་དེ་དག་ཐམས་ཅད་ཀྱི་བྱ་བ་ནི་ཕུང་པོ་དང་ཁམས་དང་སྐྱེ་མཆེད་ཀྱིས་ཇི་ལྟར་རིགས་པར་བསྡུས་སོ། །ད་ནི་ཆོས་རབ་ཏུ་རྣམ་པར་དབྱེ་བ་ལ་ཕན་པ་དེ་དག་གི་དོན་གྱི་རྣམ་པ་བསམ་པར་བྱ་སྟེ་དེ་ལ་ཁམས་རྣམས་སུ་གཟུགས་དང་སེམས་རྣམ་པར་ཕྱེ་སྟེ་བསྟན་པས་ཟག་པ་དང་བཅས་པའི་རྣམ་པ་ལ་སོགས་པ་རྣམས་བདེན་པ་བདེ་བླག་ཏུ་ཁོངས་སུ་ཆུད་པས་ཁམས་རྣམས་ཁོ་ན་ལས་བརྩམས་ཏེ་བསམ་པར་བྱའི། །ཕུང་པོ་དང་སྐྱེ་མཆེད་དག་ལས་བརྩམས་ཏེ་མ་ཡིན་ནོ། །དེ་ཉིད་ཀྱི་ཕྱིར་གང་དག་ཁམས་བཅོ་བརྒྱད་བསྟན་པ་ཞེས་བྱ་བ་རྒྱ་ཆེར་གསུངས་སོ། །བསྟན་ཡོད་འདིར་ནི་ཞེས་བྱ་བ་ལ་ཁམས་ཞེས་སྐབས་དང་སྦྱོར་བ་ཡང་གང་ཞིག་ཡིན་པ་མི་ཤེས་པས་དེའི་ཕྱིར་དེ་གང་ཞེ་ན་ཞེས་བྱ་བ་གསུངས་སོ། །གཟུགས་ཞེས་བྱ་བ་ལ་གཟུགས་ནི་བསྟན་པ་ཉིད་དེ་གཟུགས་ཞེས་བྱ་བ་འཇུག་པའི་རྒྱུ་ཉིད་ཀྱིས་སྔར་ཉིད་དུ་བཤད་པ་མ་ཡིན་ནམ་ཞེ་ན། འཆད་པར་འགྱུར་བ་ལ་བལྟོས་ནས་གཙོ་བོར་བསྟན་པར་བྱ་བའི་ཕྱིར་རོ། །དེར་བཤད་པའི་གཟུགས་ཅན་རྣམས་ཁོ་ན་ལ་དེར་ཁྱད་པར་གྱི་དོན་རིགས་ཀྱི། གཟུགས་ཅན་མ་ཡིན་པ་རྣམས་ལ་མ་
ཡིན་པ་དང་ལྷན་ཅིག་ཏུ་བསྟན་པས་འདི་ལ་ཉེས་པ་མེད་དོ། །བསྟན་པ་ཞེས་བྱ་བ་འདི་ཡང་གང་ཞིག་ཅེ་ན་འདི་ནི་འདི་ནའོ། །འདི་ནི་ཆེ་གེ་མོ་ཞིག་ནའོ་ཞེས་བསྟན་པའི་སྟོབས་ལས་བྱུང་བའི་མིག་གི་རྣམ་པར་ཤེས་པ་ལ་སྟེ། དེའི་ཡུལ་ཅན་ཡིན་པའི་ཕྱིར་གཟུགས་ལ་དེ་དང་ལྷན་ཅིག་གིས་ཞེས་བསྙད་དོ། །དེ་བཞིན་དུ་ཁྱད་པར་གང་གིས་བསྟན་པར་ནུས་པའི་ཁྱད་པར་དེས་འདི་བསྟན་པར་བྱ་བས་ན་བསྟན་པ་ཞེས་བྱ་སྟེ། དེ་ཡང་མིག་གི་དབང་པོའི་ཡུལ་ཉིད་དོ་ཞེས་ཁ་ཅིག་ཟེར་རོ། །གཞན་དག་ན་རེ། འདི་ནི་འདི་ནའོ་ཆེ་གེ་མོ་ཞིག་ནའོ་ཞེས་བསྙད་པ་འདི་ཉིད་བསྟན་པ་ཡིན་ལ། གང་ཞིག་ལ་དེ་ཡོད་པས་ན་བསྟན་དུ་ཡོད་པ་སྟེ། དམིགས་པ་དང་བཅས་པ་བཞིན་ནོ་ཞེས་ཟེར་རོ། །སློབ་དཔོན་འདུས་བཟང་ན་རེ། གཉིས་བསྟན་པར་ལྷན་ཅིག་མཐོང་བས་ངེས་པའི་ཕྱིར་མིག་དང་གཟུགས་དག་ཅིག་ཅར་སྐྱེའོ་ཞེས་ཟེར་རོ། །གཞན་དག་ན་རེ་བསྟན་དུ་ཡོད་པ་ཞེས་བྱ་བ་ནི་མེ་ལོང་ལ་སོགས་པ་རྣམས་ལ་གཟུགས་བརྙན་སྣང་བ་ཇི་ལྟ་བ་དེ་ལྟར་འདི་བསྟན་དུ་ཡོད་པའོ། །བྲག་ཅ་ལ་སོགས་པ་ལ་ནི་ཐལ་བར་མི་འགྱུར་ཏེ་ཅིག་ཅར་མི་སྐྱ་བའི་ཕྱིར་རོ་ཞེས་ཟེར་རོ། །བསྟན་དུ་ཡོད་པའི་མཚན་ཉིད་ཇི་སྐད་བཤད་པ་བཟློག་པའི་སྒོ་ནས་ལྷག་མ་རྣམས་ནི་བསྟན་དུ་མེད་པའོ་ཞེས་བཤད་པར་འགྱུར་རོ། །ཐོགས་དང་བཅས་པ་གཟུགས་ཅན་བཅུ། །ཞེས་བྱ་བ་ལ་གཟུགས་ཅན་སྨོས་པ་ནི་གཟུགས་ཅན་མ་ཡིན་པ་རྣམ་པར་གཅད་པར་བྱ་བའི་ཕྱིར་རོ། །ཆོས་ཀྱི་སྐྱེ་མཆེད་ལ་རྣམ་པར་རིག་བྱེད་མ་ཡིན་པའི་གཟུགས་ཡོད་པའི་ཕྱིར་གཟུགས་ཅན་དུ་ཐ་སྙད་གདགས་སུ་ཡོད་པས་བཅུ་ཞེས་བྱ་བ་སྨོས་སོ། །དེ་ཉིད་ཀྱི་ཕྱིར་བཤད་པ་ལས་ཀྱང་བཅུ་གང་དག་ཅེས་བྱ་བ་རྒྱ་ཆེར་གསུངས་སོ། །དེ་དག་ལ་གཟུགས་སུ་རུང་བའི་གཟུགས་ཡོད་པས་གཟུགས་སུ་རུང་བ་དང༌། རྟེན་དང་བརྟེན་པའི་གཟུགས་སམ་ཇི་ལྟར་སྲིད་པ་འདི་དག་ལ་ཡོད་པས་གཟུགས་སུ་རུང་བའོ། །མིག་གི་རྣམ་པར་ཤེས་པ་ལ་སོགས་པ་རྣམས་ལ་ཐལ་བར་མི་འགྱུར་ཏེ། མིག་ལ་སོགས་པ་ཀུན་ཏུ་འཛིན་པའི་དོན་གྱིས་དེ་དག་གི་རྟེན་མ་ཡིན་པའི་ཕྱིར་རོ། །ཐོགས་པ་ཞེས་བྱ་བ་ནི་རྡུགས་པ་སྟེ། དེ་འདི་ལ་ཡོད་པས་ཐོགས་པ་དང་བཅས་
྅ 88A་པའོ། །དེ་ཡང་རྣམ་པ་དང་ལྡན་པའམ་རྣམ་པ་ཐམས་ཅད་དུ་མ་ཡིན་པར་ཐོགས་པ་དང་བཅས་པར་འདོད་ཅེ་ན། དེ་ཡང་རྣམ་པ་གསུམ་སྟེ་ཞེས་བྱ་བ་རྒྱ་ཆེར་གསུངས་ཏེ། དཔེར་ན་ལག་པ་ལ་ལག་པ་ཐོགས་པ་ནི་རང་གི་ཡུལ་དུ་དེ་སྐྱེ་བ་ལ་གེགས་སུ་གྱུར་པའི་ཕྱིར་ཏེ་དེར་དམིགས་པ་ལ་དེ་ལྟར་བརྗོད་དོ། །རྡོ་བ་ལ་ལག་པ་ཐོགས་པ་ཡང་དེ་བཞིན་ཏེ་དེའི་ཡུལ་དུ་མི་སྐྱེ་བ་ཡིན་གྱི་འཇོམས་པ་མ་ཡིན་ནོ། །རྡོ་བ་ཡང་དེ་གཉིས་ལ་ཞེས་བྱ་བ་ལག་པའི་ཡུལ་དུ་རྡོ་བ་དག་དེའི་ཡུལ་དུ་མི་སྐྱེ་བ་ལ་ཐོགས་པ་བརྗོད་དོ། །ཡུལ་ལ་ཐོགས་པ་ནི་ཡུལ་ཅན་རྣམས་ཡུལ་ལ་ཐོགས་པའོ། །མིག་ཆུའི་ཡུལ་གྱི་གཟུགས་རྣམས་ལ་མི་ཐོགས་ལས་ཐད་ལ་མ་ཡིན་པ་ཡང་ཡོད་དོ། །ཆུ་ལ་ཡང་ཉེ་བ་ལ་སོགས་པ་རྣམས་ཐོགས་པས་དེའི་ཕྱིར་མི་ཕལ་ཆེའི་ལྟ་བུའོ་ཞེས་གསུངས་སོ། །གཉིས་ཀར་མ་ཡིན་པ་ཡོད་དེ་ཞེས་རྒྱས་པར་འབྱུང་བ་ལ། མངལ་དུ་ངེས་པར་འཆི་བ་དང༌། དམིགས་པ་གཞན་ལ་སེམས་གཡེང་བ་དང༌། འགོག་པ་དང་འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་པ་དང་འདུ་ཤེས་མེད་པ་མངོན་དུ་གྱུར་པ་དང༌། འཇིག་རྟེན་གྱི་བར་དག་ཏུ་སྐྱེས་པ་རྣམས་ཀྱི་མིག་ནི་གཉི་གར་ཡང་མི་ཐོགས་སོ། །ཕ་བོང་ཞེས་བྱ་བ་ནི་ལྤགས་བྱེའུའོ། །མི་ཕལ་ཆེའི་ལྟ་བུ་ཞེས་བྱ་བ་ལ། ཕལ་ཆེ་བ་སྨོས་པ་ནི་ཁ་ཅིག་གི་མཚན་མོར་ཡང་འཇུག་སྟེ་ལས་དང་སྨན་ལ་བལྟོས་པའི་ཕྱིར་རོ། །གཉི་གར་མ་ཡིན་པ་ཞེས་བྱ་བ་ནི་མངལ་དུ་ངེས་པར་འཆི་བ་ནས་འཇིག་རྟེན་གྱི་བར་དག་ཏུ་སྐྱེས་པའི་བར་རོ། །དམིགས་པ་ལ་ཐོགས་པ་ནི་སེམས་དང་སེམས་ལས་བྱུང་བ་རྣམས་ཀྱི་རང་གི་དམིགས་པ་འཛིན་པ་སྟེ། དེའི་ཕྱིར་འདི་ནི་སེམས་དང་སེམས་ལས་བྱུང་བ་རྣམས་ཁོ་ནའི་རང་གི་དམིགས་པ་དག་ལ་རྣམ་པར་གཞག་གོ །ཡང་བྱེད་པ་ཞེས་བྱ་བ་འདི་ཅི་ཞིག་ཅེ་ན་ནུས་པ་སྟེ། འདི་ལྟར་གང་ཞིག་གང་ལ་ནུས་པར་འགྱུར་བ་དེ་ནི་དེར་དེའི་ཡུལ་ཡིན་ནོ་ཞེས་སྨྲ་བ་པོར་འགྱུར་རོ། །གང་ཞིག་དེའི་སྣང་བ་སྐྱེས་པ་ལས་སེམས་དང་སེམས་ལས་བྱུང་བ་རྣམས་ཀྱིས་འཛིན་ཅིང་དམིགས་པ་དེ་ནི་དམིགས་པའོ། །ཐོགས་པ་ནི་རྡུགས་པ་ཡིན་ལ། འཇུག་པ་མ་རྡུགས་པ་ནི་མ་རྡུགས་པ་ཡིན་ནོ་
྅ 88B་ཞེས་འཇིག་རྟེན་ན་གྲགས་པ་དེའི་ཕྱིར། ཡང་ཇི་ལྟར་ན་རང་གི་ཡུལ་ལམ་ཞེས་དྲི་བ་རྒྱ་ཆེར་འབྱུང་ངོ༌། །དེ་ལས་གཞན་དུ་མི་འཇུག་པའི་ཕྱིར་རོ་ཞེས་བྱ་བ་ལ། རྣམ་པར་ཤེས་པའམ་དབང་པོ་ཡང་རུང་སྟེ། གཟུགས་ལ་སོགས་པའི་ཆ་ཤས་གང་ཞིག་ཏུ་ཞུགས་པ་དེ་ལས་གཞན་མི་འཛིན་པའི་ཕྱིར་རོ། །གང་ཞིག་གང་གིས་བསྒྲིབས་པ་དེ་ནི་དེ་ལས་གཞན་དུ་མི་འཇུག་པ་ཡིན་པ་དེ་བཞིན་དུ་འདིར་ཡང་རུང་བའི་ཡུལ་ལས་གཞན་དུ་འཇུག་པ་ཐོགས་པ་ཡིན་ནོ། །དམིགས་པ་ལ་ཐོགས་པས་དོགས་པ་དང་བཅས་བར་རྣམ་པར་གཞག་གོ །རང་གི་ཡུལ་ལ་འཇུག་པ་ཡང་ཅི་ཞེ་ན། དེའི་ཡུལ་དང་དབང་པོ་དེར་དམིགས་པ་ལས་རྣམ་པར་ཤེས་པ་སྐྱེ་བ་སྟེ། དེ་ལ་གཞན་དག་ན་རེ། ཡུལ་གང་ཡིན་པ་དེ་མིག་གིས་དམིགས་པ་ཉིད་དང༌། རྣམ་པར་ཤེས་པ་ཡུལ་ཅན་གྱི་ངོ་བོ་དང༌། མིག་གི་རྣམ་པར་ཤེས་པ་ནི་འཛིན་པ་པོའི་ངོ་བོ་སྟེ། གལ་ཏེ་དེ་ལྟར་མི་འཇུག་ན་དེ་ནི་དེ་ལ་ཐོགས་པ་ཞེས་བརྗོད་པར་བྱའོ་ཞེས་ཟེར་རོ། །དམིགས་པ་ལ་ཐོགས་པ་ནི་རང་གི་ཡུལ་དུ་གཞན་སྐྱེ་བ་ལ་གེགས་བྱེད་པ་སྟེ། དེ་ཡང་སེམས་ལ་ནི་གཟུགས་ཉིད་དོ། །ཁམས་བཅུ་ཐོགས་པ་དང་བཅས་པ་དང༌། ཐོགས་པ་ཡང་རྣམ་པ་གསུམ་མོ་ཞེས་བྱ་བ་བཤད་པ་དེ་ལ། ཐོགས་པ་གང་གིས་ཐོགས་པ་དང་བཅས་པ་མི་ཤེས་པ་དེའི་ཕྱིར་དེ་ལྟ་བས་ན་འདིར་བཅུ་པོ་འདི་དག་ནི་སྒྲིབ་པ་ལ་ཐོགས་པས་ཞེས་རྒྱ་ཆེར་འབྱུང་ངོ༌། །ཕན་ཚུན་སྒྲིབ་པའི་ཕྱིར་རོ་ཞེས་བྱ་བ་འདི་ནི་རྡུལ་ཕྲ་རབ་བསགས་པ་ཡིན་པའི་ཕྱིར་ཕན་ཚུན་སྒྲིབ་པར་བྱེད་དོ་ཞེས་སྒྲིབ་པ་ལ་ཐོགས་པས་ཐོགས་པ་དང་བཅས་པ་ཉིད་ཀྱི་རྒྱུ་ཡིན་ནོ། །དེ་ལྟ་ཡིན་དང་སྒྲིབ་པ་ལ་ཐོགས་པ་ནི་གཟུགས་ལ་སོགས་པ་རྣམས་དང་མིག་ལ་སོགས་པ་རྣམས་སོ། །ཡུལ་ལ་ཐོགས་པ་ནི་མིག་ལ་སོགས་པ་རྣམས་དང་སེམས་དང་སེམས་ལས་བྱུང་བ་རྣམས་སོ། །དམིགས་པ་ལ་ཐོགས་པ་ནི་སེམས་དང་སེམས་ལས་བྱུང་བ་རྣམས་ཁོ་ནའོ། །དེའི་ཕྱིར་མུ་བཞི་དང་ཚིག་ཕྱི་མ་སྦྱོར་བར་ཡང་འགྱུར་རོ། །སེམས་ཀྱི་ཁམས་བདུན་དང་ཆོས་ཀྱི་ཁམས་ཀྱི་ཕྱོགས་ཞེས་བྱ་བ་ལ། གང་ཞིག་སེམས་དང་སེམས་ལས་བྱུང་བ་རྣམས་ཀྱི་དམིགས་པ་གང་ཡིན་པ་
྅ 90A་ནི་རྣམ་པར་སྨིན་པ་ལས་སྐྱེས་པར་སྒྲུབ་པར་ནུས་པ་ཁོ་ནའོ། །ལུས་ཀྱི་རྣམ་པར་ཤེས་པ་ནི་དུས་ཡོངས་སུ་འགྱུར་བ་ཡང་ངོ་ཞེས་པ་མ་ཏེ་ཤྭཱ་པ་ཀསྟཙྪེ་ནཻ་བ་སྲེད་པའི་ཚོགས་དྲུག་རྣམ་པར་གཞག་སྟེ། མིག་གི་འདུས་ཏེ་རིག་པ་ལས་སྐྱེས་པའི་སྲེད་པ་ནས་ཡིད་ཀྱི་འདུས་ཏེ་རེག་པ་ལས་སྐྱེས་པའི་སྲེད་པའི་བར་ཏེ། མིག་གི་འདུས་ཏེ་རེག་པ་ལས་སྐྱེས་པ་མ་ཡིན་པའི་ཚོར་བ་ལ་སོགས་པ་མངོན་པར་བརྗོད་པ་བཞིན་དུ། མིག་གི་འདུས་ཏེ་རེག་པ་ལས་སྐྱེས་བའི་མཚུངས་པ་དེ་མ་ཐག་པར་ཁས་བླང་བར་བྱའོ། །འདི་ལྟར་མིག་གི་འདུས་ཏེ་རེག་པ་ལས་སྐྱེས་པའི་ཚོར་བ་ལ་སོགས་པ་རྣམས་འདུས་ཏེ་རེག་པའི་དེ་མ་ཐག་ཏུ་སྐྱེ་བར་འདོད་དོ། །རྣམ་པ་གཉིས་ཀྱང་སྲོག་ཆགས་རྣམས་ཀྱི་ཉོན་མོངས་པ་ཆུང་ངུ་དང་ཉོན་མོངས་པ་ཆེན་པོ་དག་གོ །དེ་ལ་ཉོན་མོངས་པ་ཆུང་ངུ་ནི་ཕྱིན་ཅི་ལོག་གི་རྟོག་པ་སྔོན་དུ་འགྲོ་བ་ཅན་ནོ། །ཉོན་མོངས་བ་སྔོན་དུ་གྱུར་པ་ནི་ཉོན་མོངས་པ་ཆེན་པོ་སྟེ་ཡུལ་དང་མཚུངས་པར་ལྡན་པ་ཉིད་དོ། །དེའི་ཕྱིར་འགའ་ཞིག་ལ་ཉོན་མོངས་པ་ཅན་གྱི་ཡིད་སྔོན་དུ་འགྲོ་བ་ལས་རྣམ་པར་ཤེས་པ་བ་སྐྱེའོ། །འགའ་ཞིག་ལ་ཉོན་མོངས་པ་ཅན་མ་ཡིན་པ་སྔོན་དུ་འགྲོ་བས་ཞེས་བྱ་བ་མ་ཆགས་པ་ལ་སོགས་པའི་རང་བཞིན་ནོ། །མ་ཆགས་པ་དང་ཞེ་སྡང་མེད་པ་དང་གཏི་མུག་མེད་པ་དང་ངོ་ཚ་ཤེས་པ་དང༌། ཁྲེལ་ཡོད་པ་དང་ཆོས་ལྔ་པོ་དེ་དག་ནི་རང་གི་ངོ་བོས་དགེ་བ་ཡིན་གྱི་གཞན་དང་མཚུངས་པར་ལྡན་པས་ནི་མ་ཡིན་ནོ། །ཚོར་བ་ལ་སོགས་པ་སེམས་ལས་བྱུང་བ་གཞན་དག་མ་ཆགས་པ་ལ་སོགས་བ་དང་མཚུངས་པར་ལྡན་པ་དེ་དག་ནི་མཚུངས་པར་ལྡན་པ་ཁོ་ནས་དགེ་བ་ཡིན་གྱི་རང་གི་ངོ་བོས་ནི་མ་ཡིན་ནོ། །མ་ཆགས་ལ་སོགས་པས་ཀུན་ནས་བསླང་བས་སྐྱེ་བ་ལ་སོགས་པ་དང་ལྡན་པ་མ་ཡིན་པ་དང་རྣམ་པར་རིག་བྱེད་མ་ཡིན་པའི་གཟུགས་ཀྱང་སྟེ། འདི་དག་གི་དགེ་བ་ཉིད་ནི་ཀུན་ནས་སློང་བའི་དབང་གིས་ཡིན་གྱི་མཚུངས་པར་ལྡན་པ་དང་རང་གི་ངོ་བོས་ནི་མ་ཡིན་ནོ། །སོ་སོར་བརྟགས་པས་འགོག་པ་ནི་ཞེས་བྱ་བ་ནི་དོན་དམ་པས་དགེ་བ་ཡིན་ནོ། །ཆགས་པ་ལ་སོགས་པའི་ངོ་བོ་ཉིད་དང་ཞེས་བྱ་བ་ལ། ཆགས་པ་དང་སྡང་བ་དང་རྨོངས་པ་དང༌། ངོ་ཚ་
྅ 90B་མེད་པ་དང་ཁྲེལ་མེད་པ་ནི་རང་གི་ངོ་བོས་མི་དགེ་བའོ། །ཆགས་པ་ལ་སོགས་པ་དང་མཚུངས་པར་ལྡན་པ་ཚོར་བ་ལ་སོགས་པ་ནི་མཚུངས་པར་ལྡན་པའི་སྒོ་ནས་སོ། །སྐྱེ་བ་ལ་སོགས་པ་དང་རྣམ་པར་རིག་བྱེད་མ་ཡིན་པའི་གཟུགས་ནི་ཀུན་ནས་སློང་བའི་སྒོ་ནས་སོ། །གཞན་ནི་ལུང་དུ་མ་བསྟན་པ་ཡིན་ནོ་ཞེས་བྱ་བ་ནི། གང་ཞིག་རང་གི་ངོ་བོས་དགེ་བ་དང་མི་དགེ་བ་མ་ཡིན་པ་དང༌། དེ་དང་མཚུངས་པར་ལྡན་པ་མ་ཡིན་པ་དང༌། དེ་དག་གིས་ཀུན་ནས་བསླང་བ་མ་ཡིན་པ་སྟེ་དཔེར་ན་ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་དང་ལུང་དུ་མ་བསྟན་པའི་སེམས་དང་མཚུངས་པར་ལྡན་པའི་ཚོར་བ་ལ་སོགས་པ་དང༌། ཇི་ལྟར་བཤད་པའི་སེམས་དང་སེམས་ལས་བྱུང་བའི་ཀུན་ནས་སློང་བ་ལྡན་པ་མ་ཡིན་པ་དག་གོ །ལུས་དང་ངག་གི་རྣམ་པར་རིག་བྱེད་ཀྱི་ཀུན་སློང་གི་དབང་གིས་དགེ་བ་དང་མི་དགེ་བ་ཉིད་དོ་ཞེས་བྱ་བ་དེའི་ཕྱིར། གཟུགས་དང་སྒྲའི་ཁམས་ནི་ཞེས་བྱ་བ་ལ་སོགས་པ་གསུངས་སོ། །དེ་ལས་གཞན་དག་ནི་ལུང་དུ་མ་བསྟན་པ་ཡིན་ནོ་ཞེས་བྱ་བ་ལ། ལུང་དུ་མ་བསྟན་པའི་སེམས་ཀྱིས་ཀུན་ནས་བསླང་བའི་ལུས་ངག་གི་རྣམ་པར་རིག་བྱེད་དང༌། རྣམ་པར་རིག་བྱེད་ལས་ཐ་དད་པའི་གཟུགས་དང་སྒྲ་ཐམས་ཅད་དོ། །དགེ་བ་ལ་སོགས་པའི་དབྱེ་བ་བཤད་ཟིན་ཏོ། །གཏོགས་པ་ནི་མ་བྲལ་བ་སྟེ། འདོད་པའི་ཁམས་ཀྱི་རང་བཞིན་ནོ་ཞེས་བྱ་བའི་ཐ་ཚིག་གོ །ཁམ་གྱི་ཟས་ནི་གཟུགས་ཀྱི་ཁམས་ན་ཡོད་བར་མི་འགྱུར་བ་ཅི་ལས་ཤེ་ན། འདི་ནི་དགོས་པ་མེད་པའི་ཕྱིར་ཏེ། གཟུགས་མེད་པའི་ཁམས་ན་གཟུགས་ལ་སོགས་པ་བཞིན་དུ་དགོས་པ་མེད་པ་ཉིད་དོ། །ཡང་ཁམ་གྱི་ཟས་ལ་འདོད་ཆགས་དང་བྲལ་པ་རྣམས་གཟུགས་ཀྱི་ཁམས་སུ་སྐྱེ་བར་རྟོགས་པར་བྱ་སྟེ་གཟུགས་ཀྱི་འདོད་ཆགས་དང་བྲལ་བ་རྣམས་གཟུགས་མེད་པའི་ཁམས་སུ་སྐྱེ་བ་བཞིན་ནོ། །གཟུགས་ལ་སོགས་པ་རྣམས་ཞེས་བྱ་བ་ལ། དྲི་དང་རོ་དག་མེད་པའི་ཕྱིར་སྣ་དང་ལྕེའི་རྣམ་པར་ཤེས་པ་དག་ཀྱང་མེད་དོ། །དམིགས་པ་མེད་པའི་ཕྱིར་ཡུལ་འགའ་ལ་ཡང་རྣམ་པར་ཤེས་པ་མི་སྐྱེ་སྟེ། དཔེར་ན་གཟུགས་མེད་པའི་ཁམས་སུ་གཟུགས་དང་སྒྲ་ལ་སོགས་པའི་རྣམ་པར་
དེ་ཡིན་ན་ཞེས་བྱ་བ་ནི་ཤུགས་ཀྱིས་མ་ངེས་པ་སྟེ། བསྟན་དུ་ཡོད་པ་རྣམས་ཁོ་ན་མཛེས་ཀྱི་བསྟན་དུ་མེད་པ་རྣམས་ནི་མ་ཡིན་པས་རྟེན་ཁོ་ནས་ཆོག་གི་ཞེས་རྒྱ་ཆེར་འབྱུང་ངོ༌། །དེའི་ཕྱིར་དབང་པོ་མེད་པའི་རྟེན་ནི་འཁྲུལ་པ་ཉིད་དོ་ཞེས་བྱ་བ་དེ་ལ། མིག་ལ་སོགས་པའི་རྟེན་ནི་ཆོས་མཐུན་པའི་སྒོ་ནས་ཡིན་ལ། ཕོའི་དབང་པོའི་རྟེན་ནི་ཆོས་མི་མཐུན་པའི་སྒོ་ནས་སོ། །དེ་ལ་དགོས་པ་ལ་ཡང་རྟེན་སྲིད་པ་ལ་སྔར་དབང་པོའི་དགོས་པ་བཤད་པར་གྱུར་པ་དེའི་ཕྱིར་སླར་ཡང་དེ་མི་སྲིད་པར་རིགས་པ་ནི་མ་ངེས་པ་མ་ཡིན་པ་ཉིད་དོ། །ཕོའི་དབང་པོའི་རྟེན་གྱིས་ནི་དེར་མཛེས་པ་ལ་སོགས་པའི་དགོས་པ་མི་བསྒྲུབ་པས་དགོས་པ་མེད་པའི་ཕྱིར་དྲི་དང་རོ་བཞིན་དུ་མི་སྲིད་པ་རིགས་ཀྱི་སྣ་དང་ལྕེའི་རྟེན་ནི་མཛེས་པ་དང་མངོན་པར་བརྗོད་པའི་དགོས་པ་དང་ལྡན་པའི་ཕྱིར་དབང་པོ་མེད་པར་སྲིད་པར་རིགས་སོ། །དགོས་པ་ལ་བལྟོས་ནས་སྐྱེ་བར་བརྗོད་པ་མེད་ཀྱི། དབང་པོ་ལ་བལྟོས་ནས་རྟེན་སྐྱེའོ་ཞེས་པ་རིགས་པར་ཁས་བླང་བར་བྱའོ། །དགོས་པ་དང་བཅས་པ་འབའ་ཞིག་ཏུ་མ་ཟད་ཀྱི་དགོས་པ་མེད་པར་ཡང་དབང་པོ་མངོན་པར་འགྲུབ་པར་འགྱུར་རོ། །ཇི་ལྟར་དེ་དེ་དང་སྐལ་བ་མཉམ་པ་རྣམས་ཉིད་ཀྱང་ཁྱད་པར་ཉེ་བར་བཟུང་ནས་སྣ་དང་ལྕེའི་དབང་པོ་གང་ཡིན་པ་དེ་ལ་ས་ནཱ་ལཾ་རྒྱུ་ལ་འཁྲུལ་པའི་ཕྱིར་རོ་སྙམ་དུ་སེམས་སོ། །དོན་འདི་ནི་དཔེ་མེད་པར་བསྟན་པར་མི་ནུས་པས། དཔེར་ན་མངལ་དུ་ངེས་པར་འཆི་བ་རྣམས་ཀྱི་ལྟ་བུའོ་ཞེས་དཔེ་གསུངས་ཏེ། ངེས་པ་སྨོས་པ་ནི་འཆི་བར་མ་ངེས་པ་རྣམས་ལ་ཕྱོགས་གཅིག་དགོས་པ་དང་བཅས་པའི་ཕྱིར་ཏེ་སྐྱེས་པས་གཟུགས་ལ་སོགས་པ་མཐོང་བ་སྲིད་པར་འགྱུར་ཞེས་དགོས་པ་མེད་ཀྱང་མངལ་དུ་ངེས་པར་འཆི་བའི་ལྟར་གཟུགས་ཀྱི་ཁམས་སུ་ཡང་དབང་པོ་དག་སྐྱེའོ། །མངལ་དུ་ངེས་པར་འཆི་བ་ལ་རྒྱུ་མེད་པ་མ་ཡིན་པ་བཞིན་གཟུགས་ཀྱི་ཁམས་སུ་སྣ་དང་ལྕེའི་དབང་པོ་དག་མངོན་པར་འགྲུབ་པའི་རྒྱུ་ཡོད་པ་མ་ཡིན་པས་དེ་ན་དེ་དག་མེད་དེ། མིག་ལ་སོགས་པ་ནི་ཆོས་མཐུན་པའི་སྒོ་ནས་སོ། །ཕོའི་དབང་པོ་ནི་ཆོས་མི་མཐུན་པའི་སྒོ་ནས་སོ། །སྣ་དང་ལྕེའི་དབང་པོ་དག་དེ་ན་རྒྱུ་མེད་པ་མི་སྲིད་དོ་སྙམ་སྟེ། དབང་པོ་
སྐྱེ་བའི་རྒྱུ་གང་ཞེ་ན་ཞེས་བྱ་བའོ། །དབང་པོ་ལ་སྲེད་པ་དང་བཅས་པའི་ལས་ཀྱི་ཁྱད་པར་རོ་ཞེས་བྱ་བ་ལ་སྐྱེ་མཆེད་དྲུག་ལ་བདག་ཏུ་ཆགས་པ་དང་ལྡན་པའི་ཡུལ་མངོན་པར་ཞེན་པའི་ཕྱིར་ཏེ། དེ་ཉེ་བར་ལོངས་སྤྱོད་པའི་དབང་པོ་ལ་སྲེད་བ་དང་བཅས་པའི་ལས་ཀྱི་ཁྱད་པར་རོ། །གང་ཡང་ཡུལ་ལ་སྲེད་པ་དང་བྲལ་བ་དེ་དབང་པོ་ལས་ཀྱང་སྲེད་པ་དང་བྲལ་བ་ཡིན་པས་ཞེས་བྱ་བ་ལ། ཡུལ་སོ་སོར་མྱོང་བ་བྱས་པའི་ཕྱིར་དབང་པོ་འདོད་དེ་དཔེར་ན་གང་ཞིག་འཁྲིག་པའི་རེག་པ་ལ་འདོད་ཆགས་དང་བྲལ་བ་དེ་ནི་ཕོའི་དབང་པོ་ལས་ཀྱང་འདོད་ཆགས་དང་བྲལ་བ་བཞིན་ནོ། །དེའི་ཕྱིར་སྣ་དང་ལྕེའི་དབང་པོ་ལ་འདོད་ཆགས་དང་བྲལ་བའི་ཕྱིར་དེ་ན་དེ་དག་གི་རྒྱུ་ལས་ཀྱི་ཁྱད་པར་ཡོད་པ་མ་ཡིན་ཏེ་ཕོའི་དབང་པོའི་རྒྱུ་བཞིན་ནོ། །ཅི་སྟེ་ཡུལ་འདོད་ཆགས་དང་བྲལ་ཡང་དབང་པོ་ལ་འདོད་ཆགས་དང་བྲལ་བར་མི་འགྱུར་རོ་ཞེ་ན། རྒྱུ་མེད་པའི་སྣ་དང་ལྕེ་དག་དེར་སྐྱེ་བ་མ་ཡིན་ཏེ། དེའི་ཕྱིར་གལ་ཏེ་རྒྱུ་མེད་པར་སྐྱེ་ན་ཕོའི་དབང་པོ་ཡང་ཅི་སྟེ་འགྲུབ་པར་འགྱུར། གལ་ཏེ་འདོད་ཆགས་དང་བྲལ་བར་གྱུར་པའི་ཕྱིར་རྒྱུ་དང་བཅས་པས་སྐྱེ་བ་མི་མཛེས་པའི་ཕྱིར་ཡིན་གྱི་འདོད་ཆགས་དང་བྲལ་བའི་ཕྱིར་ནི་མ་ཡིན་ནོ་ཞེའོ། །རྫོགས་པའི་སངས་རྒྱས་དང་འཁོར་ལོས་སྒྱུར་བ་ལྟར་འདོམས་ཀྱི་སྦ་བ་སྦུབས་སུ་ནུབ་པ་རྣམས་ཀྱི་ཅིའི་ཕྱིར་མི་མཛེས་པར་འགྱུར། འདོམས་ཀྱི་སྦ་བ་ནི་ཕོའི་དབང་པོའོ། །འདོམས་ནི་གང་གིས་ཕོའི་དབང་པོ་དེ་བསྡུམས་པའོ། །གང་དག་ལ་འདོམས་ཀྱི་སྦ་བ་སྡུབས་སུ་ནུབ་པ་ཡོད་པ་དེ་དག་གི་ཞེས་ཚིག་བསྡུའོ། །ཕོའི་དབང་པོ་ལ་འདོད་ཆགས་དང་བྲལ་བ་རྣམས་དེར་སྐྱེ་བས་ཕོའི་དབང་པོ་མངོན་པར་མི་འགྲུབ་སྟེ། དེ་ལ་འདོད་ཆགས་དང་བྲལ་བ་རྣམས་ལ་ནི་དེའི་རྟེན་མངོན་པར་མི་འགྲུབ་པར་རྟོགས་པར་བྱའོ། །སློབ་དཔོན་འདུས་བཟང་ན་རེ་གང་ཞིག་དབང་པོ་ལ་འདོད་ཆགས་དང་བྲལ་པ་དེ་ངེས་པར་དེའི་རྟེན་ལས་ཀྱང་ངོ་ཞེས་ཟེར་རོ། །དེ་ཉིད་ཀྱི་ཕྱིར་སྣ་དང་ལྕེའི་རྟེན་མངོན་པར་གྲུབ་པས་དེ་དག་སྣ་དང་ལྕེ་ལ་འདོད་ཆགས་བྲལ་བ་ཞེས་བྱ་བ་མ་ཡིན་པར་ངེས་པར་བྱའོ། །གང་ཞིག་རྟེན་ལ་འདོད་ཆགས་དང་མ་བྲལ་བ་དེ་ནི་ངེས་པར་དབང་པོ་ལས་ཀྱང་ཞེས་སོ། །དབང་པོ་ལ་སྲེད་པ་དང་བྲལ་ཡང་དེའི་རྟེན་ལ་སྲེད་པ་མེད་པ་འགའ་
ཞིག་དགོས་པའི་དབང་གིས་མི་འགལ་ཏེ་རྣམ་པར་ཤེས་པའི་རྟེན་བཞིན་ནོ། །དཔེར་ན་མིག་ལ་སོགས་པའི་རྣམ་པར་ཤེས་པ་ལ་སྲེད་པ་དང་བྲལ་ཡང་དགོས་པའི་དབང་གིས་དེའི་རྟེན་ལ་སྲེད་པ་དང་བྲལ་བ་མ་ཡིན་པ་སྟེ་བསམ་གཏན་གཉིས་པ་སོགས་པར་སྐྱེའོ། །དེ་བཞིན་དུ་ཡང་ཡུལ་ལ་སྲེད་པ་དང་བྲལ་ཡང་དགོས་པའི་དབང་གིས་དབང་པོ་ལ་སྲེད་པ་ཡང་མ་བྲལ་བའོ་ཞེས་བརྗོད་པའམ་བསྟན་པར་ནུས་ཏེ། ཇི་སྐད་བཤད་པའི་དགོས་པའི་ཁྱད་པར་ལས་དབང་པོ་ལ་གནོད་པར་མི་འགྱུར་ཞེས་སོ། །སྣ་དང་ལྕེའི་དབང་པོ་དག་གཟུགས་ཀྱི་ཁམས་སུ་སྐྱེ་བ་དེ་ལྟ་བུ་འདི་མི་རིགས་པ་དེ་ལྟར་ཁས་མ་བླངས་པའི་ཕྱིར་རོ། །དེ་ན་འདི་དཔེར་བརྗོད་པ་རབ་ཏུ་སྒྲུབ་པའི་ཕྱིར་བསྟན་པ་གང་ཡིན་པ་དེ་རྣམས་ཀྱང་མ་འབྲེལ་བ་ཉིད་དེ། གཞུང་མངས་པའི་འཇིགས་པས་དེ་དག་ལ་རྣམ་པར་དཔྱད་དོ། །དགོས་པའི་དབང་གིས་འབྱུང་བ་ཡང་མ་ཡིན་ནོ། །དགོས་པའི་དབང་མ་ཡིན་ནོ། །འོ་ན་ཅི་ཞེ་ན། རྒྱུའི་དབང་གིས་ཞེས་བྱ་བ་ལ་སོགས་པ་སྟེ། གལ་ཏེ་སྐྱེས་བུ་ཆེན་པོའི་མཚན་རྣམས་ལ་ནི་དེ་ལྟར་མི་བརྗོད་ཀྱི། རྒྱུ་ཡོད་ན་མི་མཛེས་པར་བྱེད་པ་བཞིན་དུ་ཡང་འབྱུང་བར་འགྱུར་བ་ཉིད་དོ། །འོ་ན་ནི་མདོ་ལས་དབང་པོ་རྣམས་ཞེས་བྱ་བ་ལ་སོགས་པ་འདིས་ནི་ཁས་བླངས་པ་ལ་གནོད་པ་གསུངས་པའོ། །ད་ནི་དབང་པོ་གང་དག་ཞེས་བྱ་བ་ལ་སོགས་པ་འགལ་བ་སྤོང་བའོ། །དེ་ལྟ་མ་ཡིན་ན་ཞེས་བྱ་བ་ལ་སོགས་པ་ལ། གལ་ཏེ་འདོད་པའི་ཁམས་སུ་གང་ཡིན་པ་དེའི་དབང་དུ་བྱས་ནས་མདོ་ལས་བཤད་པ་ཡང་ཁས་བླངས་ཏེ། དེ་བཞིན་དུ་དེ་ན་ཕོའི་དབང་པོ་ཡང་ཡོད་པར་ཐལ་ཏེ་སྣ་དང་ལྕེའི་དབང་པོ་བཞིན་ནོ། །དེ་ལྟར་བཅུ་བཞི་བཤད་པ་ནི་རྣལ་འབྱོར་སྤྱོད་པ་རྣམས་སོ། །ལུས་ཀྱི་སྒོ་ནས་ཞེས་བྱ་བ་ལ་སོགས་པ་ལ། འདི་ལ་བདག་ཏུ་ང་རྒྱལ་བཞག་བས་ན་སྐྱེ་མཆེད་དྲུག་ལུས་ཡིན་ཏེ་ངའམ་ངའོ་སྙམ་དུ་བསམ་པའི་ཕྱིར་རོ། །དེའི་ཕྱིར་ཁྱད་པར་མེད་པར་སྐྱེ་མཆེད་དྲུག་ལ་སྲེད་པ་འཇུག་གོ །ཡུལ་གྱི་སྒོ་ནས་ནི་མ་ཡིན་པས་ཞེས་བྱ་བ་ནི་ཡུལ་གྱི་དམིགས་པའི་སྒོ་ནས་མ་ཡིན་པ་སྟེ། དེའི་ཕྱིར་ཡུལ་ལ་འདོད་ཆགས་དང་བྲལ་བས་དེའི་འཛིན་པར་བྱེད་པ་དབང་པོ་ལ་འདོད་ཆགས་དང་བྲལ་བར་མི་འགྱུར་རོ། །
འཁྲིག་པའི་རེག་པའི་འདོད་ཆགས་དང་བྲལ་བ་རྣམས་ནི་ཕོའི་དབང་པོ་ལས་འདོད་ཆགས་པར་བྲལ་བར་འགྱུར་ཏེ། འཁྲིག་པའི་རེག་པའི་སྒོ་ནས་དེ་ལ་སྲེད་པ་འཇུག་པའི་ཕྱིར་ཏེ། འཁྲིག་པའི་རེག་པ་དམིགས་པའི་ཕྱིར་ཞེས་བྱ་བའི་ཐ་ཚིག་གོ །དེའི་ཕྱིར་ཕོའི་དབང་པོ་ཡང་ལུས་ཀྱི་དབང་པོའི་བདག་ཉིད་ཡིན་པའི་ཕྱིར་སྐྱེ་མཆེད་དྲུག་གིས་བསྡུས་པ་མ་ཡིན་ནམ། དེའི་ཕྱིར་དེ་ལ་ལུས་ཀྱི་སྒོ་ནས་སྲེད་པ་འཇུག་པར་ཐལ་བར་འགྱུར་རོ་ཞེ་ན། འདིར་ཕོའི་དབང་པོ་ཡང་དག་པར་འགྲུབ་པའི་ལས་ནི་འཁྲིག་པའི་རེག་པ་ལ་སྲེད་པ་སྔོན་དུ་འགྲོ་བ་ཅན་ཡིན་ཏེ། དེའི་ཕྱིར་འདི་ལ་ཡུལ་གྱི་སྒོ་ནས་སྲེད་བ་ཀུན་ཏུ་སྤྱོད་ཀྱི་ལུས་ཀྱི་སྒོ་ནས་ནི་མ་ཡིན་ནོ། །རྟེན་དང་དམིགས་པ་ཞེས་བྱ་བ་ནི་མིག་ལ་སོགས་པ་རྣམས་རྟེན་དང་གཟུགས་ལ་སོགས་པ་རྣམས་དམིགས་པའོ། །འདི་ལྟར་རྟེན་དང་དམིགས་པ་མེད་པའི་རྣམ་པར་ཤེས་པ་ཡོད་པ་མ་ཡིན་ནོ། །དེའི་ཕྱིར་དེ་ནི་མིག་ལ་སོགས་པ་རྣམས་དང་གཟུགས་ལ་སོགས་པ་རྣམས་མེད་པའི་ཕྱིར་མིག་ལ་སོགས་པ་རྣམ་པར་ཤེས་པའི་ཁམས་རྣམས་ཡོད་པ་མ་ཡིན་ནོ། །གང་དག་ལམ་གྱི་བདེན་པ་དང་འདུས་མ་བྱས་ཀྱིས་བསྡུས་པ་ཞེས་བྱ་བ་ལ། འདིར་སློབ་དཔོན་ལ་རྒོལ་བར་བྱེད་པ་ནི་ནམ་མཁའ་དང་སོ་སོར་བརྟགས་པའི་འགོག་པ་ཡོད་པ་མ་ཡིན་ཡང་ཟག་པའི་གཉེན་པོ་ཡིན་པའི་ཕྱིར་ཟག་པ་མེད་པའི་ཕྱིར་ཟག་པ་མེད་པ་ཉིད་དུ་ཡོངས་སུ་བརྟག་པར་བྱའོ། །བྱེ་བྲག་ཏུ་སྨྲ་བ་རྣམས་ཀྱིས་ཟག་པའི་གཉེན་པོ་ཉིད་ཀྱིས་ཟག་པ་མེད་པ་ཉིད་དུ་བརྗོད་པ་མ་ཡིན་ནོ། །འཇིག་རྟེན་པའི་ལམ་ནི་ཟག་པ་མེད་པ་ཉིད་དུ་མ་གྱུར་པའོ། །སོ་སོར་བརྟགས་པའི་འགོག་པ་ནི་རྣམ་པར་གྲོལ་བ་དང་ཁྱད་པར་གྱི་ལམ་ཡང་ཟག་པ་དང་བཅས་པ་ཉིད་དོ་ཞེས་རྒོལ་བ་དང་དགོས་པ་རྣམ་པར་མི་ཤེས་སོ། །བཅོ་ལྔ་པོ་དེ་དག་ནི་གཅིག་ཏུ་ཟག་པ་དང་བཅས་པ་ཡིན་ནོ་ཞེས་བྱ་བ་དེ་ལ་ཡང་རྒོལ་བར་བྱེད་པ་ནི་ཉོན་མོངས་པའི་ཐོབ་པ་མེད་པའི་ཕྱིར་དང་མཚུངས་པར་ལྡན་པ་མེད་པའི་ཕྱིར་རྒྱས་པར་མི་འགྱུར་བ་རྣམས་ཟག་པ་མེད་པ་རྣམ་པར་ཤེས་པའི་ཚོགས་ལ་སོགས་པ་རྣམས་ལམ་གྱི་དབང་གིས་ཡོངས་སུ་ཤེས་པར་དམིགས་པ་རྣམས་ཟག་པ་མེད་པ་ཉིད་དུ་འགྱུར་རོ། །སོ་སོར་བརྟགས་
པའི་འགོག་པ་ཐོབ་པ་བཞིན་ཞེས་བྱ་བ་གཟུགས་ལ་སོགས་པ་རྣམས་ཀྱང་ཉོན་མོངས་པའི་ཐོབ་པ་མེད་པའི་ཕྱིར་དང་ཉོན་མོངས་པ་དང་མཚུངས་པར་ལྡན་པ་མེད་པའི་ཕྱིར་རྒྱས་པར་མི་འགྱུར་ཏེ་དེ་ལྟར་དེ་ཡང་ཟག་པ་མེད་པར་འགྱུར་རོ། །གཟུགས་ལ་སོགས་པ་ལ་ནི་ཐལ་བར་མི་འགྱུར་ཏེ་ཡོངས་སུ་ཤེས་པ་ལ་དམིགས་པའི་ཕྱིར་རོ། །ཡང་ཅི་འདིར་ཡོངས་སུ་ཤེས་པ་ལ་དམིགས་པ་ཉིད་ཟག་པ་མེད་པའི་རྒྱུ་ཡིན་ཞེ་ན། ཇི་ལྟར་རྒྱས་པར་མི་འགྱུར་བ་ཉིད་ཡོངས་སུ་ཤེས་པ་ལ་དེར་དམིགས་པ་སྟེ་སྡུག་བསྔལ་ལ་ཆོས་ཤེས་པ་ལ་སོགས་པ་རྣམས་ལ་འཁྲུག་པར་བྱེད་པས་རྒྱུ་མ་ཡིན་ནོ། །རྒྱས་པར་མི་འགྱུར་བ་ཉིད་ཀྱང་གཟུགས་ལ་སོགས་པ་རྣམས་ལ་ཞེས་བཤད་པ་དེ་བཞིན་ནོ། །ཉོན་མོངས་པའི་ཐོབ་བ་ལས་སམ་མཚུངས་བར་ལྡན་པ་ལས་ཟག་པ་དང་བཅས་པར་འདོད་པ་མ་ཡིན་ཏེ། ཟག་པ་མེད་པ་རྣམས་དགེ་བ་ཟག་པ་དང་བཅས་པའི་ཟག་བ་བཅས་པ་ཟག་པ་མེད་པར་ཐལ་བར་འགྱུར་རོ། །འོ་ན་ཅི་ཕྲ་རྒྱས་རྣམས་ཟག་པ་མེད་པ་རྣམས་རྒྱས་པར་འགྱུར་བ་དང་རྒྱུད་གཞན་གྱི་ཉོན་མོངས་པ་རྣམས་ཡོངས་སུ་ཤེས་པའི་ཁམས་དམིགས་པ་ལ་རྣམ་པར་ཤེས་པའི་ཚོགས་དྲུག་ལ་སོགས་པ་རྣམས་ལ་སྟེ། དེ་བས་ན་ཟག་པ་དང་བཅས་པ་འདི་དག་གཟུགས་ལ་སོགས་པ་བཞིན་ནོ། །གཞན་ཡང་དེ་ལྟ་བུ་ནི་མདོ་དང་འགལ་བར་འགྱུར་ཏེ། ཟག་པ་དང་བཅས་པའི་ཆོས་རྣམས་གང་ཞེ་ན། ཇི་སྲིད་མིག་ནས་གཟུགས་ལ་སོགས་པ་དང༌། མིག་གི་རྣམ་པར་ཤེས་པ་དང༌། མིག་གི་འདུས་ཏེ་རེག་པ་དང༌། གང་ཡང་མིག་གི་འདུས་ཏེ་རེག་པའི་རྐྱེན་གྱིས་ནང་དུ་ཚོར་བ་སྐྱེ་བ་བདེ་བའམ་སྡུག་བསྔལ་བའམ། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའམ་ཞེས་བྱ་བ་ལ་སོགས་པ་སྟེ། དེ་ལ་ལམ་གྱི་བདེན་པས་བསྡུས་པའི་ཆོས་ཀྱི་ཁམས་ནི་ཟག་པ་མེད་པའི་སྡོམ་པ་སེམས་ལས་བྱུང་བ་རྣམས་སོ། །མི་ལྡན་པ་དང་ཟག་པ་མེད་པ་ཡིད་ཀྱི་ཁམས་ཀྱི་རྣམ་པར་ཤེས་པའི་ཁམས་ཀྱང་ལམ་གྱིས་བསྡུས་སོ། །ཟག་པ་མེད་པའི་རྣམ་པར་ཤེས་པ་དང་འདུས་མ་བྱས་ནི་ཆོས་ཀྱི་ཁམས་བསྡུས་པ་ཉིད་དོ། །རྟོག་དང་དཔྱོད་དང་བཅས་པ་ནི། །ཞེས་བྱ་བ་ལ། ནིའི་སྒྲ་ནི་རྟོག་པ་དང་དཔྱོད་པ་དང་བཅས་པ་ཁོ་
ནའོ་ཞེས་ངེས་པར་གཟུང་བའི་དོན་ཏེ། དེའི་ཕྱིར་འདི་དག་ནི་རྟག་ཏུ་ཞེས་བྱ་བ་ལ་སོགས་པ་སྨོས་སོ། །ཡང་ཅིའི་ཕྱིར་འདི་རྟག་ཏུ་རྟོག་པ་དང་དཔྱོད་པ་དག་དང་མཚུངས་པར་ལྡན་ཞེ་ན། འདི་ལྟར་དེ་དག་ཁ་ཕྱི་རོལ་དུ་བལྟས་པའི་རྩིང་བ་ཡིན་ནོ་ཞེས་བྱ་བ་ནི་བསྟན་བཅོས་ཀྱི་ཡི་གེའོ། །དེ་ལྟར་ཡིན་དང་ཁ་ནང་དུ་ཕྱོགས་པའི་རྒྱུ་མེད་པ་རྣམས་རྟག་ཏུ་སྦྱོར་བ་མཐོང་བའི་ཕྱིར་རོ་ཞེས་སློབ་དཔོན་འདུས་བཟང་ཟེར་རོ། །དེ་ལ་སཱདྷྱ་སྱ་བྱ་བྷི་ཙཱ་རོ་ན་ཧེ་ཏོ་ན་ཙ་སཱ་དྷྱ་བྱ་བྷི་ཙཱ་རནྣ་ཧེ་ཏུ་པྲ་ཡ་ཏཱརྻ་ཀ་ཏྭཱ་དེ་ཏཏྐི་ལ་པ་དང་མི་ཏི་ཀཱ་ར་ཎཱནྟ་ར་མཱ་ཧ། རྟོག་པ་དང་དཔྱོད་པ་དང་བཅས་པའི་ས་ནི་དེ་ཡོད་པའི་ཕྱིར་ཞེས་བྱའོ། །ཐ་མ་གསུམ་ཞེས་བྱ་བ་ལ་གཉི་ག་ངེས་པར་གཟུང་བ་ལ་ཡང་སྐྱོན་མེད་དོ། །མཐར་འདོན་པས་ནི་ཐ་མའོ། །ལྡན་པ་མ་ཡིན་པ་ལ་རྟོག་པ་དང་དཔྱོད་པ་དང་མཚུངས་པར་ལྡན་པ་མེད་པས་རྟོག་པ་དང་བཅས་པ་མི་སྲིད་པས་དེའི་ཕྱིར་མཚུངས་པར་ལྡན་པ་ཞེས་བྱ་བ་ལ་སོགས་པ་སྨོས་སོ། །ཆོས་ཀྱི་ཁམས་མཚུངས་པར་ལྡན་པ་སྨོས་པས་རྟོག་པ་དང་དཔྱོད་པ་གཉིས་ལ་ཐལ་བར་འགྱུར་ལ། དེ་དག་ལ་རྟོག་པ་དང་དཔྱོད་པ་གཉིས་པ་མེད་པས་རྟོག་པ་དང་དཔྱོད་པ་དང་བཅས་པ་མི་སྲིད་དོ། །དེའི་ཕྱིར་རྟོག་པ་དང་དཔྱོད་པ་དག་ལས་གཞན་པ་ཞེས་བྱ་བ་སྨོས་སོ། །བསམ་གཏན་དང་པོའི་གོང་ན་རྟོག་པ་མེད་པའི་ཕྱིར་དང༌། བསམ་གཏན་ཁྱད་པར་ཅན་གྱི་གོང་ན་དཔྱོད་པ་མེད་པའི་ཕྱིར་དང༌། ཁམས་ཐ་མ་གསུམ་ཡིན་པའི་ཕྱིར་འདོད་པའི་ཁམས་དང་བསམ་གཏན་དང་པོ་ན་ཞེས་བྱ་བ་གསུངས་ཏེ། འདོད་པའི་ཁམས་དང་བསམ་གཏན་དང་པོ་དག་ན་ནི་གང་ཞིག་རྟོག་པ་དང་དཔྱོད་པ་དང་མཚུངས་པར་མི་ལྡན་པར་འགྱུར་བ། རྟོག་པ་དང་དཔྱོད་པ་སྤངས་པའི་སེམས་ལས་བྱུང་བའི་རྣམ་པ་འགའ་ཡང་ཡོད་པ་མ་ཡིན་ནོ། །བསམ་གཏན་ཁྱད་པར་ཅན་རྣམ་པར་རྟོག་པ་མེད་ལ་དཔྱོད་པ་ཙམ་གྱིས་རྣམ་པར་དཔྱོད་པ་ཉིད་དེ། མཚུངས་པར་ལྡན་པའི་རྟོག་པ་ཞེས་བྱ་བའི་དོན་ཏོ། །རྟོག་པ་མེད་ཅིང་དཔྱོད་པ་མེད་པ་ཞེས་བྱ་བ་ནི་བསམ་གཏན་ཁྱད་པར་ཅན་གྱི་གོང་ན་རྟོག་པ་དང་དཔྱོད་པ་མེད་པའི་ཕྱིར་ཆོས་ཀྱི་ཁམས་མཚུངས་པར་ལྡན་པ་མ་ཡིན་པ་ཐམས་ཅད་ཀྱང་གཉི་ག་མ་ཡིན་པ་སྟེ། ཐམས་ཅད་སྨོས་པ་ནི་འདུས་བྱས་དང་འདུས་མ་
བྱས་བསྡུ་བར་བྱ་བའི་ཕྱིར་དང༌། ས་ཐམས་ཅད་བསྡུ་བར་བྱ་བའི་ཕྱིར་རོ། །བསམ་གཏན་ཁྱད་པར་ཅན་གྱི་དཔྱོད་པ་ནི་རྟོག་པ་མེད་པའི་ཕྱིར་དང༌། དཔྱོད་པ་གཉིས་པ་མེད་པའི་ཕྱིར་ཏེ། རྟོག་པ་ཡང་མེད་ལ་དཔྱོད་པ་ཡང་མེད་པ་ཡིན་ནོ་ཞེས་བྱ་བར་བསྙེགས་སོ། །དཔྱོད་པ་ནི་རྟག་ཏུ་དཔྱོད་པ་མེད་ཅིང་རྣམ་པར་རྟོག་པ་ཙམ་སྟེ་རྣམ་པར་རྟོག་པ་ཡང་ཞེས་བྱ་བ་རྣམ་པ་གསུམ་མོ། །རྟོག་པ་ནི་རྟག་ཏུ་རྣམ་པར་རྟོག་པ་མེད་ཅིང་རྟག་ཏུ་དཔྱོད་པ་ཙམ་སྟེ་དཔྱོད་པ་མ་ཡིན་ཞེས་སོ། །འདོད་པའི་ཁམས་དང་བསམ་གཏན་དང་པོའི་ཞེས་རྒྱ་ཆེར་འབྱུང་བ་ལ། རྟོག་པ་དང་བཅས་པ་དང་དཔྱོད་པ་དང་བཅས་པ་འདི་དག་གི་ནང་དུ་མི་འདུ་ན་ཞེས་བྱའོ། །སློབ་དཔོན་འདུས་བཟང་ན་རེ། དཔྱོད་པ་མེད་པའི་ཕྱིར་ཅིག་ཤོས་ཀྱི་རྣམ་པ་དག་གི་ནང་དུ་འདུ་བར་མི་འགྱུར་ཏེ། རྣམ་པར་རྟོག་པ་དང་མཚུངས་པར་ལྡན་པའི་ཕྱིར་རོ་ཞེས་ཟེར་རོ། །གལ་ཏེ་རྣམ་པར་རྟོག་པ་གཉིས་པ་མེད་པའི་ཕྱིར་བརྗོད་པར་མི་བྱ་བར་གྱུར་ན་ཅི་ཞིག་མཚུངས་པར་ལྡན་པར་འགྱུར་ཞེ་ན། དེ་ལ་ཚོར་བ་གཉིས་པ་ཡོད་དེ་དེ་དང་མཚུངས་པར་ལྡན་པ་མ་ཡིན་པ་ཞེས་བྱ་བ་ནུས་པ་མེད་པའི་རྒྱུའི་རང་བཞིན་དང་མཚུངས་པར་ལྡན་པར་ཐལ་བའམ། ཁྱད་པར་མེད་ཀྱང་མཚུངས་པར་ལྡན་པ་ཁས་བླངས་པས་དེའི་ཕྱིར་རང་བཞིན་དང་མཚུངས་པར་ལྡན་པའི་ཕྱིར་ཞེས་བརྗོད་པར་བྱའོ། །རྣམ་པར་རྟོག་པ་གཉིས་པ་མེད་པའི་ཕྱིར་ནི་མ་ཡིན་ཞེས་སོ། །གཞན་ལ་གཞན་དང་མཚུངས་པར་ལྡན་པ་ཞེས་རབ་ཏུ་གྲུབ་པ་ནི་དེའི་ཚོགས་ལ་རྣམ་པར་དཔྱོད་པ་བཞིན་མ་ཡིན་ནོ། །རྣམ་པར་རྟོག་པ་གཉིས་པ་ཡོད་ཅེས་པ་དེའི་ཕྱིར་རྣམ་པར་རྟོག་པ་གཉིས་པ་མེད་ཅེས་གསུངས་ཏེ། གང་བཤད་པའི་ཚོར་བ་གཉིས་པ་ཡོད་དོ། །དེ་དང་མཚུངས་པར་ལྡན་པ་མ་ཡིན་པ་ཡོད་ཅེས་བྱ་བ་འདི་ལ་ཡང་རིམ་པ་བཞིན་དུ་རྒོལ་པར་བྱེད་དེ། གལ་ཏེ་ཡང་དེའི་ཚོགས་ལ་ཚོར་བ་གཉིས་པ་ཡོད་པ་མ་ཡིན་པར་གྱུར་ན། ཅི་ཞིག་གིས་དེ་ཉིད་དེ་དང་མཚུངས་པར་ལྡན་པར་དཔྱོད་པར་བྱེད་དེ་འདུ་ཤེས་ལ་སོགས་པ་བཞིན་ནོ། །དེ་ཉིད་ཀྱི་ཕྱིར་ཞེས་པ་ལ་གང་གི་ཕྱིར་དེ་ན་དཔྱོད་པ་རྣམ་པ་གསུམ་པོ་དག་ཏུ་མི་འདུ་བར་གྱུར་པའོ། །རྟོག་པ་དང་བཅས་དཔྱོད་པ་བཅས་པ་དག་ན་ཞེས་བྱ་བ་
ལ། འདོད་པའི་ཁམས་དང་བསམ་གཏན་དང་པོ་ནའོ། །རྣམ་པ་དང་པོ་ནི་རྟོག་པ་དང་མཚུངས་པར་ལྡན་པའི་ཕྱིར་རོ། །རྣམ་པ་གཉིས་པ་ནི་དཔྱོད་པ་དང་མཚུངས་པར་ལྡན་པའི་ཕྱིར་དང༌། རྟོག་པ་གཉིས་པ་མེད་པའི་ཕྱིར་རོ། །གསུམ་པ་ནི་ལྡན་པ་མ་ཡིན་པའི་ཕྱིར་རོ། །བཞི་པ་ནི། རྟོག་པ་དང་མཚུངས་པར་ལྡན་པའི་ཕྱིར་དང༌། དཔྱོད་པ་གཉིས་པ་མེད་པའི་ཕྱིར་རོ། །ལྷག་མ་རྣམས་ནི་གཉིས་ཀ་སྤངས། །ཞེས་བྱ་བ་ལ་དེ་དག་དང་མཚུངས་པར་མི་ལྡན་པའི་ཕྱིར་རྟོག་པ་དང་དཔྱོད་པ་སྤངས་པའོ། །གལ་ཏེ་རྣམ་པར་ཤེས་པའི་ཚོགས་ལྔ་ཞེས་རྒྱ་ཆེར་འབྱུང་བ་ལ། རྟོག་པ་ནི་རྣམ་པར་རྟོག་པ་ཡིན་ན་དེ་དང་མཚུངས་པར་ལྡན་པ་རྣམས་ཇི་ལྟར་རྣམ་པར་རྟོག་པ་མེད་པ་དག་ཅེས་བྱ། ཡང་རྣམ་པར་རྟོག་པ་མེད་པ་དག་ཅེས་གང་དུ་བཤད་ཅེ་ན། ཡིད་ཀྱི་རྣམ་པར་ཤེས་པ་ཁོ་ན་དེ་དང་དེ་ལས་རྣམ་པར་རྟོག་པ་ཅན་ཉིད་དུ་བསྟན་པས་དོན་གྱིས་ན་རྣམ་པར་ཤེས་པའི་ཚོགས་ལྔ་ནི་རྟོག་པ་མེད་པར་བཤད་དོ། །ངེས་པར་རྟོག་དང་རྗེས་དྲན་པའི། །རྣམ་པར་རྟོག་པས་རྣམ་མི་རྟོག །ཅེས་བྱ་བ་ལ། ངོ་བོ་ཉིད་ཀྱི་རྣམ་པར་རྟོག་པས་ནི་མ་ཡིན་ནོ། །རྣམ་པར་རྟོག་པ་རྣམ་པ་བརྒྱད་ཐུགས་པར་བཞག་ནས་གཞན་དུ་གྲག་གོའི་སྒྲ་རབ་ཏུ་སྦྱར་ཏེ། རྣམ་པར་རྟོག་པ་ནི་རྣམ་པ་གསུམ་མོ་ཞེས་གྲག་གོ་ཞེས་སོ། །དཔེར་ན་རྟ་རྐང་པ་གཅིག་པ་ལ་རྐང་པའི་བྱ་བ་མི་ནུས་པའི་ཕྱིར་རྐང་མེད་ཅེས་བྱ་བ་དེ་བཞིན་དུ་དམིགས་པ་ངེས་པར་རྟོག་པ་དང་མངོན་པར་བརྗོད་པ་མེད་པའི་ཕྱིར་རྣམ་པར་རྟོག་པ་གཅིག་པ་དག་ལ་ཡང་རྣམ་པར་རྟོག་པ་མེད་པ་ཞེས་བྱའོ། །གལ་ཏེ་ཡིད་ཀྱི་རྣམ་པར་ཤེས་པ་ཡང་རྣམ་པར་རྟོག་པ་གཅིག་པ་ཡོད་པ་མ་ཡིན་ནམ་ཞེ་ན། ཡིད་ཀྱི་རྣམ་པར་ཤེས་པའི་རིགས་ལ་བསམས་ནས་དེ་སྐད་བཤད་དོ། །སེམས་རྩིང་བས་རྟོག་པའི་ཕྱིར་ངོ་བོ་ཉིད་ཀྱི་རྣམ་པར་རྟོག་པར་རྣམ་པར་རྟོག་སྟེ་རྟོག་པར་བྱེད་པའི་བདག་ཉིད་ཡིན་པའི་ཕྱིར་རོ་ཞེས་སློབ་དཔོན་འདུས་བཟང་ཟེར་རོ། །དེ་དང་འདྲ་བར་འཇུག་པའི་ཤེས་རབ་དང་དྲན་པ་དག་ལ་ཡང་རྣམ་པར་རྟོག་པར་བཤད་དེ། འདི་ལྟར་རྣམ་པ་མེད་པར་དམིགས་པ་ཐམས་ཅད་ལ་གསལ་བའི་ཕྱིར་འཇུག་བར་བྱེད་པ་གསལ་བའི་ཁྱད་པར་ལ་འཇུག་ལ་འདུ་ཤེས་ཀྱི་མ་
ཡིན་ནོ། །མི་གསལ་བ་ངེས་པར་མ་གཟུང་བའི་ཕྱིར་མོས་པ་མ་ཡིན་པའི་གཞི་དང་དམིགས་པ་དང་རྣམ་པ་དང་དུས་མཉམ་པ་ཉིད་ཀྱིས་འཇུག་པའི་སེམས་ལས་བྱུང་བ་རྣམས་ལ་འཇུག་པའི་དུས་ཀྱི་དབྱེ་བ་ལས་རྣམ་པར་རྟོག་པའི་རང་བཞིན་ཁོ་ན་རྣམ་པར་རྟོག་པར་མོས་པ་དཀའོ། །འདིར་སེམས་ལས་བྱུང་བའི་རང་བཞིན་སྟོན་པ་སྐབས་སུ་མ་བབ་པོ་ཞེ་ན། དེའི་ཕྱིར་དེ་ནི་འོག་ནས་སེམས་ལས་བྱུང་བ་དག་གི་ཞེས་བྱ་བ་ལ་སོགས་པའོ། །ངེས་པར་རྟོག་པ་དང་རྗེས་སུ་དྲན་པའི་རྣམ་པར་རྟོག་པ་དག་ནི་གནས་སྐབས་ཀྱི་བཞག་པ་དེ་ཉིད་ཀྱི་མཚན་ཉིད་ནི་འདིར་ངེས་པར་བརྗོད་པར་བྱ་དགོས་ཏེ་གཞན་དུ་སྐབས་མེད་པའི་ཕྱིར་རོ། །དེའི་ཕྱིར་གཞན་དག་གིས་རང་བཞིན་ཅི་ཞེས་བྱ་བ་ལ་སོགས་པ་གསུངས་ཏེ། ཤེས་རབ་ནི་མིག་ལ་སོགས་པའི་རྣམ་པར་ཤེས་པ་དང་ལྷན་ཅིག་སྐྱེ་བ་དང་ཡིད་ལས་བྱུང་བ་ཡང་ཡོད་ལ། ཡིད་ལས་བྱུང་བ་ལ་རྣམ་པར་གཞག་པ་དང་མཉམ་པར་མ་བཞག་པ་ཡང་ཡོད་པས་དེའི་ཕྱིར། ཡིད་ཀྱི་ཞེས་བྱ་བ་དང་གཡེང་བ་ཞེས་ཁྱད་པར་གཉིས་ཉེ་བར་གཟུང་ངོ༌། །སྙོམས་པར་འཇུག་པའི་ཤེས་རབ་ནི་ངེས་པར་རྟོག་པ་མི་སྐྱེ་བའོ། །གཡེང་བ་ནི་ངེས་པར་རྟོག་པའི་རྣམ་པར་རྟོག་པ་ལ་བརྗོད་དེ། མཉམ་པར་གཞག་པ་མ་ཡིན་པ་ཤེས་པ་ནི་ངེས་མིང་ལ་བལྟོས་ཏེ་ཡུལ་ལ་འཇུག་པ་སྐྱེ་བར་བྱེད་དོ། །མཉམ་པར་གཞག་པ་ནི་མིང་ལ་མི་ལྟོས་པ་ཁོ་ནར་དོན་ལ་འཇུག་སྟེ། དེའི་ཕྱིར་མཉམ་པར་གཞག་པ་མ་ཡིན་པའི་ཤེས་རབ་ནི་གཡེང་བ་ཞེས་བྱའོ། །དེ་ཉིད་ཀྱི་ཕྱིར་མིག་གི་རྣམ་པར་ཤེས་པ་ལ་སོགས་པ་དང་མཚུངས་པར་ལྡན་པའི་ཤེས་རབ་ནི་ངེས་པར་རྟོག་པའི་རྣམ་པར་རྟོག་པ་མ་ཡིན་ནོ། །ཡིད་ཀྱི་དྲན་པ་ཐམས་ཅད་ཉིད། །ཅེས་བྱ་བ་ལ་ཐམས་ཅད་སྨོས་པ་ནི་མཉམ་པར་གཞག་པ་ཉེ་བར་གཟུང་བའི་དོན་ཏོ། །ཡིད་སྨོས་པ་ནི་མིག་གི་རྣམ་པར་ཤེས་པ་ལ་སོགས་པ་དང་མཚུངས་པར་ལྡན་པའི་དྲན་པ་གསལ་བར་བྱ་བའི་ཕྱིར་རོ། །དམིགས་པ་མངོན་བར་བརྗོད་པ་ཡིན་པའི་ཕྱིར་དང་སྙོམས་པར་འཇུག་པའི་མིང་ལ་བལྟོས་པའི་ཕྱིར་མཉམ་པར་གཞག་པ་དང་མཉམ་པར་མ་བཞག་པ་ཐམས་ཅད་ཡིད་ལས་བྱུང་བའི་
དྲན་པ་སྟེ་དྲན་པར་བྱེད་པའི་རྣམ་པར་རྟོག་པའོ། །མིག་གི་རྣམ་པར་ཤེས་པ་ལ་སོགས་པ་དང་མཚུངས་པར་ལྡན་པ་ནི་མི་གཡེང་བའི་ཕྱིར་དང་ཁྱད་པར་དུ་རྣམ་པར་རྟོག་པའི་མཚན་ཉིད་མེད་པའི་ཕྱིར་རྣམ་པར་རྟོག་པ་ཞེས་མི་བྱ་བ་དེ་ལ་འདོད་པའི་ཁམས་དང་བསམ་གཏན་དང་པོ་ན་མཉམ་པར་མ་བཞག་པའི་ཡིད་ཀྱི་རྣམ་པར་ཤེས་པ་གང་ཡིན་པ་དེ་ནི་རྣམ་པར་རྟོག་པ་གསུམ་གྱིས་རྣམ་པར་རྟོག་པ་དང་བཅས་པ་ཡིན་ནོ། །བསམ་གཏན་དང་པོ་ནི་མཉམ་པར་གཞག་པའོ། །གཉིས་པ་ལ་སོགས་པ་རྣམས་སུ་ཡང་མཉམ་པར་མ་བཞག་པའོ། །གཉིས་དག་གིས་མཉམ་པར་གཞག་པ་ཉིད་ཀྱིས་སོ། །དམིགས་པ་ཞེས་སེམས་ཀྱི་ཁམས་བདུན་ནོ་ཞེས་བྱ་བ་ལ། བདུན་ནི་དམིགས་པ་དང་བཅས་པ་ཉིད་དོ་ཞེས་ངེས་པར་གཟུང་བར་བྱའོ། །འདི་གང་ལས་ཤེ་ན་ཆོས་ཀྱི་ཕྱེད་ཀྱང་ཞེས་འབྱུང་བའི་ཕྱིར་རོ། །འདི་ལ་དམིགས་པ་ཡོད་པས་ན་དམིགས་པ་དང་བཅས་པའོ། །ཡུལ་དང་སྤྱོད་ཡུལ་དང་དམིགས་པ་ཞེས་བྱ་བ་ནི་རྣམ་གྲངས་སོ། །ཆོས་ཀྱི་ཕྱེད་ཀྱང་ཞེས་བྱ་བ་ལ་དང་གི་སྒྲ་ནི་བསྡུ་བའི་དོན་ཏོ། །གཞན་དག་ན་རེ་ངས་པར་གཟུང་བའི་དོན་ཏེ་ཞེས་ཟེར་རོ། །དེ་ལྟར་ན་སེམས་དང་སེམས་ལས་བྱུང་བ་རྣམས་ལས་གཞན་པ་རྣམས་ནི་དམིགས་པ་མེད་པའོ་ཞེས་བྱ་བར་གྲུབ་བོ། །འདོད་པ་གཞན་སྟོན་པའི་ཕྱིར་རོ་ཞེས་བྱ་བ་ནི་ཁ་ཅིག་རྡུལ་ཕྲ་རབ་རེ་རེ་བ་ཡུལ་གྱི་དངོས་པོར་འཐད་ཀྱི་མཐའ་དག་ཡུལ་གྱི་དངོས་པོར་མི་འཐད་དོ་ཞེས་ཟེར་རོ། །སློབ་དཔོན་དཔལ་ལེན་ན་རེ་ཡུལ་རྣམས་རྫས་མེད་པ་སྟེ། རྣམ་པར་ཤེས་པའི་ཚོགས་ལྔ་པོ་བསགས་པའི་ཡུལ་ཅན་ཡིན་པའི་ཕྱིར་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་ན་རེ་རྣམ་པར་ཤེས་པའི་ཚོགས་ལྔ་པོའི་ཡུལ་རྫས་སུ་ཡོད་པ་ཁོ་ན་སྟེ། རྡུལ་ཕྲ་རབ་ཚོགས་པ་ཡུལ་ཡིན་པའི་ཕྱིར་རྡུལ་ཕྲ་རབ་དེ་རྣམས་ཉིད་དེ་ལྟར་འདུས་པ་ལས་མིག་ལ་སོགས་པའི་རྣམ་པར་ཤེས་པའི་སྐྱེ་བ་ལ་རྒྱུར་འགྱུར་རོ། །འདུས་པ་མ་ཡིན་པ་མེད་པར་གྱུར་པའམ་དེ་དག་འདུས་པའི་རྫས་ཡུལ་ཡིན་པའི་ཕྱིར་རེ་རེ་དམིགས་པར་འགྱུར་བ་མ་ཡིན་ནོ་ཞེས་ཟེར་རོ། །འདུས་པ་མ་ཡིན་པའི་ཡུལ་ལ་རྣམ་པར་མི་རྟོག་པའི་ཕྱིར་དང་འདུས་པ་ཞེས་བྱ་བ་འགའ་ཞིག་དངོས་
པོར་ཡོད་པས་གང་ལ་རྣམ་པར་རྟོག་པ་མེད་པར་མཐོང་བ་ནས་རེག་པའི་བར་དུ་སྐྱེ་བར་འགྱུར་ཏེ། འདུས་པའི་ཡུལ་ཉིད་མ་ཡིན་ན་སྔོན་པོ་དང་སེར་པོའོ་སྙམ་དུ་ཞེན་པར་མི་འགྱུར་ཞིང་མིག་གི་རྣམ་པར་ཤེས་པས་ཁ་དོག་སྔོན་པོ་མ་བཟུང་བར་ཡིད་ཀྱི་རྣམ་པར་ཤེས་པ་ལ་སྔོན་པོའོ་སྙམ་དུ་རྣམ་པར་རྟོག་པའི་ནུས་པ་ཡོད་པ་མ་ཡིན་པས་ཚོགས་པ་མེད་ན་སྔོན་པོ་དང་སེར་པོ་ལ་སོགས་པ་རྣམས་རྫས་མ་ཡིན་པར་ཐལ་བར་འགྱུར་བའི་ཕྱིར་རོ། །བཅོམ་ལྡན་འདས་མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེའོ་ཞེས་བྱ་བ་ནས་ཡིད་དང་ཆོས་ལ་བརྟེན་ནས་ཡིད་ཀྱི་རྣམ་པར་ཤེས་པ་སྐྱེའོ་ཞེས་བྱ་བའི་བར་དུ་གསུངས་སོ། །ཚོགས་པ་མ་ཡིན་པ་གཟུགས་ལ་སོགས་པའི་རང་བཞིན་ཞེས་བྱ་བ་ལ། དེ་མིག་གི་རྣམ་པར་ཤེས་པ་ལ་སོགས་པའི་གཟུང་བ་མ་ཡིན་ནོ། །གལ་ཏེ་དོན་དམ་པའི་ཡུལ་ཅན་རྣམ་པར་ཤེས་པའི་ཚོགས་ལྔ་ཅི་ལས་ཤེ་ན། དེ་རྣམས་འདོད་ཆགས་དང་བྲལ་བའི་རང་གི་མཚན་ཉིད་ཀྱི་ཡུལ་མ་ཡིན་པའི་ཕྱིར་དང་ཁ་ཕྱི་རོལ་ཏུ་བལྟས་པའི་ཕྱིར་དང༌། མཉམ་པར་མ་བཞག་པའི་ཕྱིར་དང་རྣམ་པར་མི་རྟོག་པའི་ཕྱིར་དང༌། ལན་ཅིག་ཚོགས་པའི་ཕྱིར་དང་ཉུང་བའི་ཕྱིར་རོ། །དེའི་ཕྱིར་དམིགས་པ་དང་བཅས་པའི་ཆོས་ཀྱི་ཁམས་ཉིད་ཀྱང་ཞེས་བྱ་སྟེ། རིག་པ་དེ་དག་ལས་ལྔ་ནི་དོན་དམ་པ་ལ་དམིགས་པ་དང་ལྷག་མ་ཡུལ་ཞེས་བྱ་བ་ནི་ཀུན་རྫོབ་ལ་དམིགས་པ་ཡང་མ་ཡིན་ནོ་ཞེས་བྱ་སྟེ་ཞར་ལས་བྱུང་བས་ཆོག་གོ །དཀྱུས་མ་ཉིད་བརྩམ་པར་བྱ་སྟེ། མ་ཟིན་དགུ་ཞེས་བྱ་བ་ལ། འདིར་ངང་གི་སྒྲ་དང་པོ་ནི་བསྡུ་བའི་དོན་ཏོ། །གཉིས་པ་ནི་སྒྲའི་རྣམ་གྲངས་གསལ་བར་བྱེད་པའི་དོན་ཏོ། །ཁ་ཅིག་ན་རེ་སྒྲ་ཡང་དབང་པོ་དང་ཐ་མི་དད་པ་ཡོད་དོ་ཞེས་ཟེར་རོ། །དགུ་པོ་གཞན་ནི་རྣམ་པ་གཉིས། །ཞེས་གསུངས་པའི་ཕྱིར། དགུ་ནི་མ་ཟིན་པ་ཁོ་ནའོ་ཞེས་ཤེས་པར་བྱའོ། །ཆོས་ཀྱི་ཁམས་ཀྱི་ཕྱེད་ཀྱི་དམིགས་པ་དང་བཅས་པར་བཤད་ཀྱི་ཐམས་ཅད་ནི་མ་ཡིན་པ་མ་ཟིན་པ་ནི་ཐམས་ཅད་འདོད་པ་ཉིད་དེ། དེའི་ཕྱིར་བརྒྱད་པའི་ཕྱེད་དང་བཅས་ཏེ་ཞེས་གསུངས་སོ། །དགུ་པོ་གཞན་ནི་རྣམ་པ་གཉིས། །ཞེས་གསུངས་པའི་ཕྱིར་དགུ་ནི་མ་ཡིན་པ་ཁོ་ནའོ་ཞེས་ཤེས་པར་བྱའོ། །ཆོས་
ཀྱི་ཁམས་ཀྱི་ཕྱེད་དམིགས་པ་དང་བཅས་པར་བཤད་ཀྱི་ཐམས་ཅད་ནི་མ་ཡིན་ལ། མི་ཟིན་པར་ནི་ཐམས་ཅད་འདོད་པ་ཉིད་དེ། དེའི་ཕྱིར་བརྒྱད་པའི་ཕྱེད་དང་བཅས་ཏེ་ཞེས་གསུངས་སོ། །དགུ་པོ་གཞན་ནི་རྣམ་པ་གཉིས། །ཞེས་བྱ་བ་ལ་བརྩམས་པར་མ་གྱུར་ན་ནི་ཟིན་པ་ཁོ་ནའོ་ཞེས་བྱ་བར་ཤེས་པར་འགྱུར་བ་ཞིག་གོ །ད་ལྟར་བྱུང་བ་རྣམས་ནི་ཟིན་པ་ཡིན་ཏེ་དེ་དག་ལ་ཕན་བཏགས་པ་དང་གནོད་པ་བྱས་ན་སེམས་དང་སེམས་ལས་བྱུང་བ་རྣམས་ལ་ཕན་བཏགས་པ་དང་གནོད་པ་བྱས་པར་འགྱུར་བའི་ཕྱིར་རོ། །འདས་པ་དང་མ་འོངས་པ་རྣམས་ནི་མ་ཟིན་པ་ཡིན་ཏེ། དེ་དག་ལ་ཕན་བཏགས་པ་དང་གནོད་པ་མི་སྲིད་པའི་ཕྱིར་རོ། །གཟུགས་ལ་སོགས་པ་དབང་པོ་དང་ཐ་མི་དད་པ་རྣམས་དང་དབང་པོ་ནི་གྲུབ་པ་དང་བདེ་བ་ལྷན་ཅིག་པའི་ཕྱིར་དབང་པོ་བཞིན་ཐ་མི་དད་དོ། །གཞན་དག་ནི་ད་ལྟར་བ་ཡིན་ཡང་མ་ཟིན་པ་རྣམས་ཏེ། གང་དག་ལུས་འདི་ལ་དབང་པོ་དང་ཐ་དད་པར་གནས་པ་རྣམས་སོ། །འདི་ལྟ་སྟེ་རྩ་བ་མ་གཏོགས་པའི་ཞེས་བྱ་བ་ལ། སྐྲ་དང་བ་སྤུ་དང་སེན་མོ་དང་སོ་དག་གི་རྩ་བ་ནི་ལུས་ཀྱི་དབང་པོ་དང་ཐ་མི་དད་པས་སྤངས་པའི་ཕྱིར་ཏེ། འདི་ལྟར་སྐྲ་ལ་སོགས་པ་རྩ་བ་ནས་བཏོན་ན་ཚོར་བ་འབྱུང་གི་བཅད་ན་ནི་མ་ཡིན་ནོ། །དེ་ལྟར་རེ་ཞིག་ནང་དག་ལ་ཡོད་པའོ། །ཕྱི་རོལ་དག་ལ་ཡོད་པ་བཤད་པ་ནི་ས་དང་ཆུ་ལ་སོགས་པ་རྣམས་ལ་ཡོད་པ་ཞེས་བྱ་བ་སྟེ། སོགས་པ་སྨོས་པ་ནི་མེ་དང་རླུང་དང་ཤིང་དང་སོ་ཕག་ལ་སོགས་པ་དག་སྡུད་དོ། །འདུ་བྱེད་རྣམས་བདག་མེད་པ་ཡིན་དང་འཛིན་པ་པོ་མེད་པས་མིག་ལ་སོགས་པ་རྣམས་ལ་ཟིན་པ་ཉིད་མི་སྲིད་དོ་སྙམ་སྟེ་འདྲི་བ་ནི་ཟིན་པ་ཞེས་བྱ་བའི་དོན་ཅི་ཞེ་ན་ཞེས་བྱ་བའོ། །བསྟན་བཅོས་ལས་ནི་བདག་གིས་ལུས་སུ་གཏོགས་པའི་ཞེས་འབྱུང་ངོ༌། །དེ་ཡང་ཅི་ཞིག་ཅེ་ན་སེམས་དང་སེམས་ལས་བྱུང་བ་རྣམས་ཀྱི་བདག་གིར་བྱས་པ་གང་ཡིན་པའོ། །བདག་གིར་བྱས་པ་ཞེས་བྱ་བ་ནི་གང་ཞིག་སེམས་དང་སེམས་ལས་བྱུང་བ་རྣམས་ཀྱིས་རྟེན་གྱི་དངོས་པོར་ཉེ་བར་བཟུང་བའོ། །སེམས་དང་སེམས་ལས་བྱུང་བ་གཟུགས་ཅན་མ་ཡིན་པ་ཡུལ་ན་མི་གནས་པ་རྣམས་ཀྱིས་རྟེན་གྱི་དངོས་པོ་ཉེ་བར་བཟུང་བ་ནི་མོས་
པར་དཀའོ་ཞེ་ན། དེའི་ཕྱིར་ཕན་པ་དང་གནོད་པ་དག་གིས་ཕན་ཚུན་མཐུན་པར་བྱེད་པའི་ཕྱིར་ཉེ་བར་བཟུང་བ་ཡིན་གྱི་དེ་ལ་གནས་པའི་ཕྱིར་ནི་མ་ཡིན་ནོ། །འདི་ལྟར་མིག་ལ་སོགས་པ་རྣམས་ལ་མིག་སྨན་ལ་སོགས་པས་ཕན་བཏགས་ན་རྣམ་པར་ཤེས་པ་གསལ་ཞིང་མ་འཁྲུགས་པ་སྐྱེ་ལ་རླུང་ལ་སོགས་པས་གནོད་པ་བྱས་ན་མི་གསལ་བ་དང་འཁྲུག་པ་སྐྱེ་བ་ཡིན་ནོ། །དེ་བཞིན་དུ་རྣམ་པར་ཤེས་པ་ཚོར་བ་བདེ་བ་དང་སྡུག་བསྔལ་དང་མཚུངས་པར་ལྡན་པ་རྣམས་སྐྱེས་ན་མིག་ལ་སོགས་པ་རྣམས་འཕེལ་བ་དང་འགྲིབ་པར་འགྱུར་ཏེ་དེ་ལྟར་ཕན་ཚུན་མཐུན་བར་བྱེད་པ་ཡིན་ནོ། །སེམས་དང་སེམས་ལས་བྱུང་བ་རྣམས་མིག་ལ་སོགས་པ་རྣམས་ཀྱི་ཟིན་པ་ཉིད་དུ་ཐལ་བར་འགྱུར་བ་སྤང་བའི་ཕྱིར། འཇིག་རྟེན་ན་སེམས་པ་དང་བཅས་པའོ་ཞེས་བརྗོད་པ་གང་ཡིན་པའོ་ཞེས་བྱ་བ་གསུངས་ཏེ། གང་ཞིག་ལ་འཇིག་རྟེན་ན་སེམས་པ་དང་བཅས་པའོ་ཞེས་བརྗོད་ཅེ་ན། རྟེན་གང་ལ་གནོད་པ་བྱས་པ་སྡུག་བསྔལ་འབྱུང་བ་དང༌། གང་ཞིག་འདིས་རྩྭ་ཀུ་ཤ་དང་ཚ་རྒོད་དང་མེ་དང་ཚེར་མ་དང་གནམ་ལྕགས་ལ་སོགས་པ་དག་ལས་བསྲུང་པ་དང༌། གང་ཞིག་འདོད་པ་དང་ཁྲོ་བ་དང་མྱ་ངན་དང་འཇིགས་པ་དང་དགའ་བ་ལ་སོགས་པ་དག་གི་རྣམ་པར་འགྱུར་བའོ། །སེམས་དང་སེམས་ལས་བྱུང་བ་རྣམས་ནི་འཛིན་པ་ཡིན་པའི་ཕྱིར་ཟིན་པའོ་ཞེས་མི་བརྗོད་དོ། །བྱེ་བྲག་ཏུ་སྨྲ་བ་རྣམས་ནི་གཟུགས་གང་ཞིག་ལ་གཟིར་བའམ་བཅད་པ་ན་སྡུག་བསྔལ་འབྱུང་ཞིང་བཟློག་པས་བདེ་བ་འབྱུང་བ་དེ་ནི་ཟིན་པའོ་ཞེས་ཟེར་རོ། །གཞན་དག་ན་རེ་ལུས་སུ་གཏོགས་པ་འདི་ལ་ང་དང་དའོ་སྙམ་པའི་ང་རྒྱལ་གྱིས་ཡོངས་སུ་ཟིན་པ་ནི་ཟིན་པའོ་ཞེས་ཟེར་རོ། །དེ་ལྟ་ནི་མ་ཡིན་ཏེ་སེམས་དང་སེམས་ལས་བྱུང་བ་རྣམས་ཟིན་པ་ཡིན་པར་འགྱུར་དུ་འོང་ངོ༌། །ང་རྒྱལ་ཉིད་ཀྱིས་ནི་དུས་སུ་མི་འདུང་པའི་ཕྱིར་དང་གཟུགས་ཉིད་ཀྱི་ཕྱིར་ཏེ། ཉེ་བར་ལེན་པར་བྱེད་པ་དང༌། ཉེ་བར་ལེན་པའི་བྱེད་པ་པོའི་གཟུགས་ཀྱི་ཕྱིར་ཞེས་བྱ་བའི་ཐ་ཚིག་གོ །གཞན་དག་ན་རེ་ལུས་ཀྱི་དབང་པོ་དང་ཐ་མི་དད་པ་གང་ཡིན་པ་དེ་ཟིན་པའོ་ཞེས་ཟེར་རོ། །ལུས་ཀྱི་དབང་པོའི་ཟིན་པ་དེ་ལྟ་བུ་ལ་ནི་དཔྱད་
པར་བྱ་སྟེ། དེ་ལྟར་ན་གཟུགས་ལ་སོགས་པ་དང་སེམས་དང་སེམས་ལས་བྱུང་བ་རྣམས་དབང་པོ་མ་ཡིན་པའི་ཕྱིར་དང་རྟེན་མ་ཡིན་པས་མ་ཟིན་པར་ཐལ་བར་འགྱུར་བ་མ་ཡིན་ནམ་ཞེ་ན། དབང་པོ་དང་ཐ་མི་དད་པའི་གཟུགས་ལ་སོགས་པ་དང་སེམས་དང་སེམས་ལས་བྱུང་བ་རྣམས་རྟེན་ཡིན་པས་འདི་ལ་ཉེས་པ་མེད་དེ། རེག་བྱ་རྣམ་པ་གཉིས་ཡིན་ཏེ་ཞེས་ངེས་པར་གཟུང་སྟེ། ལྷག་མ་གཟུགས་ཅན་དགུ་པོ་ནི། འབྱུང་འགྱུར་ཆོས་ཁམས་ཕྱོགས་གཅིག་ཀྱང་ཞེས་གསུངས་པའི་ཕྱིར་རོ། །འབྱུང་བ་རྣམས་ལ་ཡོད་པའི་ཕྱིར་རོ་ཞེས་བྱ་བ་ནི་བསྐྱེད་པ་ལ་སོགས་པའི་ངོ་བོས་འབྱུང་བ་རྣམས་དེའི་རྒྱུར་གྱུར་པའི་ཕྱིར་འབྱུང་བ་རྣམས་ལ་ཡོད་པ་ཞེས་བརྗོད་དོ། །ལྷག་མ་ཞེས་སྨོས་པས་གཟུགས་ཅན་མ་ཡིན་པ་ལ་ཡང་ཐལ་བར་འགྱུར་བས་གཟུགས་ཅན་ཞེས་བྱ་བ་སྨོས་སོ། །ཆོས་ཀྱི་ཁམས་ལ་ཡང་རྣམ་པར་རིག་བྱེད་མ་ཡིན་པའི་གཟུགས་ཡོད་པས་གཟུགས་ཅན་ཉིད་ཡིན་པ་དེའི་དགུ་པོ་ཞེས་བྱ་བ་སྨོས་སོ། །རྣམ་པར་རིག་བྱེད་མ་ཡིན་པའི་གཟུགས་ཀྱང་འབྱུང་བ་ལས་གྱུར་པ་ཡིན་པས་དེ་བསྡུ་བར་བྱ་བའི་ཕྱིར་ཆོས་ཁམས་ཕྱོགས་གཅིག་ཀྱང་ཞེས་བྱ་བ་སྨོས་སོ། །ཀྱང་གི་སྒྲ་ནི་བསྡུ་བའི་དོན་ཏོ། །གཞན་དག་ན་རེ་ཀྱང་གི་སྒྲ་ནི་ཁམས་འབྱུང་བའི་བདག་ཉིད་ཁོ་ན་ཡོད་པ་མ་ཡིན་པ་ཉིད་དུ་བསྟན་པའི་དོན་ཏོ་ཞེས་ཟེར་རོ། །ལྷག་མ་རྣམས་ནི་མ་བརྩམས་པ་ཁོ་ནས་གཉི་ག་མ་ཡིན་པ་ཞེས་བྱ་བར་གྲུབ་པོ། །སྐྱེ་མཆེད་བཅུ་པོ་དག་ནི་འབྱུང་བ་ཙམ་མོ་ཞེས་ཟེར་ཏེ་ཞེས་བྱ་བ་ལ། ཙམ་གྱི་སྒྲ་ནི་འབྱུང་བ་ལས་གྱུར་བ་ཡིན་པ་རྣམ་པར་བཅད་པའི་དོན་ཏོ། །དེ་ལྟ་ཡིན་དང་དྲི་བ་དང་ལན་མི་འཐད་དོ་ཞེའོ། །སྐྱེ་མཆེད་བཅུ་པོ་དག་ནི་འབྱུང་བ་ཙམ་མོ་ཞེས་བྱ་བ་དེ་ནི་དེ་ལྟ་མ་ཡིན་ནོ། །ཚིག་ཙམ་གྱིས་དད་པར་མི་འགྱུར་བས་རྒྱུ་སྨྲས་པ། འབྱུང་བ་རྣམས་ནི་བཞི་ཉིད་དང་སྲ་བ་ལ་སོགས་པ་མཚན་ཉིད་དུ་ངེས་པར་གཟུང་བའི་ཕྱིར་ཞེས་བྱ་བ་སྟེ། མདོ་ལས་བཞི་ཉིད་དུ་ངེས་པར་གཟུང་བའི་ཕྱིར་དང༌། སྲ་བ་ལ་སོགས་པ་མཚན་ཉིད་དུ་ངེས་པར་གཟུང་བའི་ཕྱིར་རོ། །དེ་ལ་འདི་དག་ནི་འབྱུང་བ་ཆེན་པོ་བཞི་སྟེ་ཞེས་བཞིར་ངེས་པར་གཟུང་བ་དང༌། སའི་ཁམས་གང་ཞེན་སྲ་བ་ཉིད་དོ་ཞེས་རྒྱ་ཆེར་འབྱུང་སྟེ་སྲ་བ་ལ་སོགས་པའི་མཚན་ཉིད་ངེས་པར་གཟུང་
པ་དང་བཞིའི་ངེས་པར་བཟུང་བས་ནི་འབྱུང་བ་ཆེན་པོ་བཅུ་དག་མེད་དོ་ཞེས་སྟོན་ཏོ། །གལ་ཏེ་འབྱུང་བ་ལས་ཐ་དད་པའི་འབྱུང་བ་ལས་གྱུར་པ་མེད་ན། དེ་ལྟ་ཡིན་དང་སྐྱེ་མཆེད་བཞིའམ་གཅིག་གོ་ཞེས་བརྗོད་དགོས་ཀྱི་བཅུ་ཞེས་མ་ཡིན་ནོ། །སྲ་བ་ལ་སོགས་པའི་མཚན་ཉིད་དུ་ངེས་པར་བཟུང་བས་ནི་མིག་ལ་སོགས་པ་རྣམས་དང་གཟུགས་ལ་སོགས་པ་རྣམས་འབྱུང་བ་དག་གི་ནང་དུ་མ་འདུས་པར་སྟོན་ཏེ། སྲ་བ་ལ་སོགས་པའི་རང་གི་ངོ་བོ་དང་མཚན་ཉིད་མི་མཐུན་པའི་ཕྱིར་ཏེ་ཚོར་བ་ལ་སོགས་པ་བཞིན་ནོ། །ཡང་ཇི་ལྟར་དེ་རྣམས་འབྱུང་བ་དག་དང་མཚན་ཉིད་མི་མཐུན་པར་ཁོང་དུ་ཆུད་ཅེ་ན། འབྱུང་བ་དེ་དག་རེག་བྱ་ཡིན་པའི་ཕྱིར་དང་རེག་པའི་ཡུལ་ཡིན་པའི་ཕྱིར་རོ། །མིག་ལ་སོགས་པ་རྣམས་ཀྱི་ནི་གཟུགས་ལ་སོགས་པ་རྣམས་ཡིན་གྱི་རེག་བྱ་ནི་མ་ཡིན་པའི་ཕྱིར་རོ། །གཟུགས་ལ་སོགས་པ་རྣམས་པ་ལྟ་བར་བྱ་བ་དང་བསྣམ་པར་བྱ་བ་མྱང་བར་བྱ་བ་དང་མིག་ལ་སོགས་པ་རྣམས་ཀྱང་ལྟ་བར་བྱེད་པ་དང་སྣོམ་པར་བྱེད་པ་དང་མྱོང་བར་བྱེད་པ་ཡིན་གྱི་རེག་པར་མི་བྱེད་པའི་ཕྱིར་རེག་བྱ་ནི་མ་ཡིན་ནོ། །འབྱུང་བའི་བདག་ཉིད་ཅན་ཁྱད་པར་མེད་པའི་ཕྱིར་གཟུགས་ལ་སོགས་པ་ཐམས་ཅད་དབང་པོ་ཐམས་ཅད་ཀྱི་གཟུང་བར་བྱ་བར་འགྱུར་ན། དེ་ནི་ཡོད་པ་ཡང་མ་ཡིན་ཏེ། མིག་ལ་སོགས་པས་ཀྱང་སྟེ་མིག་དང་རྣ་བ་དང་སྣ་དང་ལྕེ་རྣམས་ཀྱིས་ནི་སྲ་བ་ལ་སོགས་པ་སྟེ། སྲ་བ་དང་གཤེར་བ་དང་དྲོ་བ་དང་ཡང་ཞིང་གཡོ་བ་ཉིད་དང་མི་འཛིན་ཏེ། དེའི་ཕྱིར་ས་ལ་སོགས་པ་དག་གཟུགས་ལ་སོགས་པའི་བདག་ཉིད་མ་ཡིན་ནོ། །ལུས་ཀྱི་དབང་པོས་ཀྱང་ཁ་དོག་ལ་སོགས་པ་སྟེ། ཁ་དོག་དང་སྒྲ་དང་དྲི་དང་རོ་དག་འཛིན་པ་མ་ཡིན་ཏེ། དེའི་ཕྱིར་གཟུགས་ལ་སོགས་པ་རྣམས་འབྱུང་པའི་རང་བཞིན་མ་ཡིན་པ་ཞེས་བྱ་བར་གྲུབ་པ་ཡིན་ནོ། །མིག་ལ་སོགས་པ་རྣམས་ནི་ཡུལ་ཅན་ཡིན་པའི་ཕྱིར་དང༌། ཡུལ་ངེས་པའི་ཕྱིར་ཡུལ་དག་དང་ཕན་ཚུན་རང་བཞིན་ཐ་དད་པར་ཁོང་དུ་ཆུད་པར་བྱའོ། །མདོ་ལས་འབྱུང་བ་རྣམ་བཞི་ཉིད་དུ་ངེས་པར་བཟུང་བ་དང་སྲ་བ་ལ་སོགས་པའི་རང་བཞིན་ངེས་པར་བཟུང་བའི་ཕྱིར་ཁ་དོག་ལ་སོགས་པ་རྣམས་ལུས་ཀྱི་དབང་པོའི་གཟུང་བར་བྱ་བ་ལས་བཟློག་པ་ཡིན་པས་སྐྱེ་མཆེད་བཅུ་པོ་རྣམས་ནི་འབྱུང་བ་
ཙམ་མ་ཡིན་པར་གྲུབ་པོ། །གཟུགས་སུ་རུང་བས་ན་གཟུགས་ཏེ་གནོད་པ་བྱར་རུང་བ་ཞེས་བྱ་བའི་ཐ་ཚིག་གོ །དེ་འདི་ལ་ཡོད་པས་ན་མིག་ལ་སོགས་པའི་སྐྱེ་མཆེད་གཟུགས་ཅན་ཞེས་བྱའོ། །རེག་བྱའི་སྐྱེ་མཆེད་ཁོ་ན་འབྱུང་བ་ཆེན་པོ་བཞི་དག་གོ་ཞེས་བྱ་བར་གསུངས་ཀྱི་མིག་ལ་སོགས་པའི་སྐྱེ་མཆེད་རྣམས་ནི་མ་ཡིན་ཏེ། འབྱུང་བ་ལས་ཐ་དད་པའི་འཇམ་པ་ཉིད་ལ་སོགས་པ་རེག་བྱའི་སྐྱེ་མཆེད་དུ་གསུངས་པས་འབྱུང་བ་ཆེན་པོ་བཞི་དག་རྒྱུར་བྱས་པ་ཞེས་བྱའོ། །རེག་བྱའི་སྐྱེ་མཆེད་ཀྱི་ཕྱོགས་གཅིག་ཁོ་ནས་འབྱུང་བ་རྣམས་བསྡུས་པའི་ཕྱིར་ལྷག་མ་མིག་ལ་སོགས་པ་དང་འཇམ་པ་ཉིད་ལ་སོགས་པ་ནི་འབྱུང་བ་ངག་མ་ཡིན་ནོ་ཞེས་བྱ་བ་གསལ་བར་ཀུན་ཏུ་བསྟན་པ་ཡིན་ནོ། །ཐམས་ཅད་འབྱུང་བའི་བདག་ཉིད་ཡིན་ཏེ་རེག་བྱའི་སྐྱེ་མཆེད་ཁོ་ན་རྣམ་པ་གཉིས་སུ་བསྟན་གྱི་མིག་ལ་སོགས་པའི་སྐྱེ་མཆེད་རྣམས་མ་ཡིན་པ་དང་མིག་ལ་སོགས་པའི་སྐྱེ་མཆེད་རྣམས་ཁོ་ན་རྣམ་པ་གཅིག་ཏུ་བསྟན་གྱི་རིག་བྱའི་སྐྱེ་མཆེད་མ་ཡིན་པ་ཞེས་བྱ་བ་འདི་ལ་འབྱུང་བ་དང་འབྱུང་བ་ལས་གྱུར་པ་གཉིས་རང་གི་ངོ་བོ་ཐ་དད་པས་རྒྱུ་གཞན་པ་མ་ཡིན་ཏེ། དེའི་ཕྱིར་མདོ་དང་འགལ་བས་སྐྱེ་མཆེད་བཅུ་པོ་རྣམས་འབྱུང་བ་ཙམ་མ་ཡིན་ནོ། །འོ་ན་མདོ་ལས་ཞེས་རྒྱ་ཆེར་འབྱུང་བ་ལ། གལ་ཏེ་མིག་འབྱུང་བའི་རང་བཞིན་མ་ཡིན་ན། ཅིའི་ཕྱིར་འདི་སྐད་དུ། མིག་གི་ཤའི་གོང་བུ་ལ་སྲ་བ་དང་མཁྲང་བར་གྱུར་པ་གང་ཡིན་པ་ཞེས་བྱ་བ་ཞེས་གསུངས་ཤེ་ན། མིག་ལ་སོགས་པའི་འབྱུང་བ་ཚོགས་པའི་བདག་ཉིད་གང་ཡིན་པ་དེ་ལ་ནི་འདིར་དབང་པོ་རྣམས་འབྱུང་བའི་རང་བཞིན་དུ་བསྟན་པ་འཐད་ཅིང་གོང་བུ་སྨོས་པ་ཡང་དོན་དང་བཅས་པའོ། །གང་ཡང་འབྱུང་བ་དང་མཚན་ཉིད་མི་མཐུན་པ་དེ་ལ་ནི་དབང་པོ་རྣམས་འབྱུང་བའི་རང་བཞིན་དུ་བསྟན་པ་མི་འཐད་དེ། ཆ་ཤས་མ་ཡིན་པའི་ཕྱིར་དང༌། དེའི་བདག་ཉིད་མ་ཡིན་པའི་ཕྱིར་རོ། །གོང་བུ་སྨོས་པ་ཡང་དོན་མེད་དོ། །མཁྲང་པར་གྱུར་པ་ཞེས་བྱ་བ་ནི་མཁྲང་བའི་རྣམ་པའོ། །དེ་དང་ཐ་མི་དད་པར་འཇུག་པ་ཞེས་རྒྱ་ཆེར་འབྱུང་བ་ལ། དེ་ལ་མིག་དེ་དང་ཐ་མི་དད་པར་འཇུག་པའི་ངང་ཚུལ་ཡོད་པས་ན་ཐ་མི་དད་པར་འཇུག་པའོ། །འདི་སྐད་དུ་བསྟན་པར་འགྱུར་ཏེ། མིག་གི་དབང་པོ་ཡང་ཡིན་པ་དང་ལྷན་ཅིག་འཇུག་
པའི་ཤའི་གོང་བུ་དེའི་རྟེན་དུ་གྱུར་པ་ལ་མིག་གི་ཤའི་གོང་བུ་གང་ཡིན་པ་ཞེས་པ་འདི་ཉེ་བར་བཏགས་ཏེ་རྟེན་ལ་བརྟེན་པས་བཏགས་པའི་ཕྱིར་རོ། །དེ་ལྟ་བུ་ཡང་ཤའི་གོང་བུ་སྨོས་པའི་ནུས་པ་ལས་ཡིན་ནོ། །མིག་ནི་ཤའི་གོང་བུའི་བདག་ཉིད་མ་ཡིན་ཏེ་དང་པོའི་བདག་ཉིད་ཡིན་པའི་ཕྱིར་རོ། །གཞན་དག་ན་རེ། འཇིག་རྟེན་གྱི་ཐ་སྙད་དང་མཐུན་པར་གདགས་པའི་ཕྱིར་དེ་སྐད་གསུངས་ཏེ། འཇིག་རྟེན་ན་ནི་དེའི་རྟེན་ཤའི་གོང་བུ་འབྱུང་བ་དང་འབྱུང་བ་ལས་གྱུར་པའི་བདག་ཉིད་ཅན་ལ་མིག་ཏུ་འདུ་ཤེས་ཀྱི་དབང་པོ་ལ་ནི་མ་ཡིན་ནོ་ཞེས་ཟེར་རོ། །གཞན་དུ་ན་མིག་ལ་ཞེས་བྱ་བ་ཁོ་ན་ཞིག་བཤད་པར་འགྱུར་རོ། །ཡང་རྒྱུ་མཚན་གྱི་བདུན་པ་བརྗོད་པས་རྟོག་པར་འགྱུར་ཏེ། དེ་ལས་དབང་པོ་ཐ་མི་དད་པར་འཇུག་པའི་གོང་བུ་མཐའ་དག་གི་རྟེན་འབྱུང་བ་རྣམས་རྗེས་སུ་བཟུང་བས་ན། དེ་ཉིད་ཀྱི་ཕྱིར་བདུན་པས་བསྟན་པ་ཞེས་བྱ་སྟེ་རྟེན་གྱི་ཤའི་གོང་བུ་མཐའ་དག་གཟུང་བའི་དོན་ཏོ། །གལ་ཏེ་མིག་ལ་སོགས་པ་རྣམས་དང་གཟུགས་ལ་སོགས་པ་རྣམས་འབྱུང་བའི་བདག་ཉིད་མ་ཡིན་ན། དགེ་སློང་སྐྱེས་བུ་འདི་ནི་ཁམས་དྲུག་པ་ཡིན་ཏེ་ཞེས་བྱ་བའི་སྟོན་པའི་གསུང་དང་འགལ་བར་འགྱུར་ཏེ། ས་ལ་སོགས་པའི་ཁམས་རྣམས་གཟུགས་ལ་སོགས་པའི་ཁམས་དང་མིག་ལ་སོགས་པའི་ཁམས་རྣམས་ལས་ཐ་དད་པར་ཡོད་ན་སྐྱེས་བུ་འདི་ནི་ཁམས་དྲུག་པ་ཡིན་ནོ་ཞེས་བརྗོད་པར་མི་རིགས་སོ་ཞེ་ན་མངལ་དུ་འཇུག་པའི་རྫས་ཀྱི་གཞི་བསྟན་པར་བྱ་བའི་ཕྱིར་ཏེ། མདོ་ནི་དགོངས་པ་ཅན་ཡིན་པའི་ཕྱིར་འགལ་བ་མེད་དོ། །དེ་ལ་ནུར་ནུར་པོ་ལ་སོགས་པའི་གནས་སྐབས་ནི་སེམས་ཅན་གྱི་རྫས་ཀྱི་གཞི་སྟེ། དེ་བསྟན་པའི་ཕྱིར་གཟུགས་ལ་སོགས་པ་རྣམས་ཡོད་བཞིན་དུ་ཁམས་དྲུག་ཏུ་གསུངས་ཏེ། དེ་ལ་གཞན་དག་ན་རེ་རེག་པའི་སྐྱེ་མཆེད་རྣམས་དང་མིག་ལ་སོགས་པ་རྣམས་འབྱུང་བ་བཞི་ཚན་གྱི་བདག་ཉིད་དེ་རེག་པའི་སྐྱེ་མཆེད་རྣམས་ནི་རྣམ་པར་ཤེས་པ་སྐྱེ་བའི་རྩ་བའི་རྫས་ཡིན་པ་དང༌། མིག་ལ་སོགས་པ་རྣམས་ཀྱང་འབྱུང་བ་ལ་བརྟེན་པའི་ཕྱིར་འབྱུང་བ་རྣམས་ནི་རྩ་བའོ་ཞེས་ཟེར་རོ། །གཞན་དག་ནི་ཉིང་མཚམས་སྦྱོར་བར་འབྲེལ་བའི་ཚེ། མིག་ལ་སོགས་པ་རྣམས་མེད་པས་དེ་དག་མ་གསུངས་
ལ། དེའི་ཚེ་ལུས་ཀྱི་དབང་པོ་ཡོད་མོད་ཀྱི་དེའི་དེའི་གནས་སྐབས་ན་གྲང་བ་ལ་སོགས་པ་ཡོངས་སུ་གཅོད་པར་མི་ནུས་པས་ཡོད་ཀྱང་རང་གི་དགོས་པ་མི་བྱེད་པ་གང་ཡིན་པ་དེ་ནི་དགོས་པ་དང་མི་ལྡན་པ་ཉིད་ཀྱི་རྒྱུ་དང་བཅས་པར་རྣམ་པར་མི་འཇོག་གོ་སྙམ་དུ་སེམས་སོ། །དེ་ཉིད་ཀྱི་ཕྱིར་ཁམས་དྲུག་པོ་འདི་དག་སེམས་ཅན་གྱི་རྫས་ཀྱི་གཞི་ཡིན་ཏེ། ཉིང་མཚམས་སྦྱོར་བའི་སེམས་ནས་འཆི་འཕོ་བའི་སེམས་ཀྱི་བར་དུ་དགོས་པ་དང་བཅས་པའི་ཕྱིར་རོ། །འགོག་པའི་སྙོམས་པར་འཇུག་པ་རྣམས་ཀྱི་རྣམ་པར་ཤེས་པ་ལ་སོགས་པ་ཅི་ལྡང་བའི་སེམས་ཀྱི་དེ་མ་ཐག་པའི་རྐྱེན་ཉིད་དོ། །ལུས་ཀྱི་དབང་པོ་ལ་ཡང་འོ་ན་སྐལ་བ་མཉམ་པའི་རྒྱུ་སྦྱིན་པའི་ཕྱིར་མཚུངས་པར་ལྡན་པའི་རྣམ་པར་ཤེས་པ་སྐྱེས་པའི་རྟེན་གྱི་དངོས་པོ་ནི་ལུས་ཀྱི་དབང་པོའི་དགོས་པའོ། །སྐལ་བ་མཉམ་པའི་རྒྱུ་སྦྱིན་པ་མ་ཡིན་ཏེ། གཞན་དང་མཚུངས་པར་ལྡན་པའི་ཕྱིར་རོ། །རྫས་ཀྱི་གཞི་བསྟན་པ་ཡང་སྲ་བ་ལ་སོགས་པ་རྣམས་ཉིད་དེ། གཟུགས་ལ་སོགས་པ་རྣམས་ཀྱི་རྟེན་རྫས་གཞན་མ་ཡིན་པའི་གཟུགས་ལ་སོགས་པ་རྣམས་མ་ཡིན་ནོ། །སྲ་བ་ལ་སོགས་པ་རྣམས་ཞེས་བྱ་བ་ལ་སེམས་ཁོ་ན་འཆིང་བ་དང་ཐར་པར་འོས་ཀྱི་གཞན་ནི་མ་ཡིན་ཏེ། ཚོར་བ་ལ་སོགས་པ་རྣམས་སེམས་ཀྱི་རྟེན་དང་སེམས་ཀྱི་རྗེས་སུ་འཇུག་པའི་ཕྱིར་རོ། །ཁ་ཅིག་ན་རེ་བདག་མེད་པར་བསྟན་པའི་ཕྱིར་རོ་ཞེས་ཟེར་རོ། །འདིར་རྒྱུ་གང་ལས་རྟེན་ནི་སྲ་བ་ཉིད་ལས་གཞན་པ་ཁ་དོག་ལ་སོགས་པ་རྣམས་མ་ཡིན་ཞེ་ན། ཚོགས་པ་ཐམས་ཅད་ལ་ཁྱབ་པ་ས་ལ་སོགས་པའི་མཚན་ཉིད་ལ་ཡོད་ཀྱི་ཁ་དོག་ལ་སོགས་པ་མ་ཡིན་ཏེ། འདི་དག་རྟེན་ཉིད་དང་ཁ་དོག་ལ་སོགས་པ་སྐྱེད་པ་དང་ཆེན་པོ་ཉིད་དུ་གྲུབ་པ་མ་ཡིན་ནོ། །འདི་སྟོན་པའི་དགོངས་པ་པ་ཡིན་གྱི་ཡང་འབྱུང་བ་ཙམ་ཞིག་བཞེད་པ་མ་ཡིན་ནོ་ཞེས་བྱ་བ་ཇི་ལྟར་ཁོང་དུ་ཆུད་པར་བྱ་ཞེ་ན། ཡང་རེག་པའི་སྐྱེ་མཆེད་དྲུག་གསུངས་པའི་ཕྱིར་ཏེ། མདོ་འདི་ཉིད་ལས་ཀྱང་རེག་པའི་སྐྱེ་མཆེད་དྲུག་གསུངས་པ་ནི་མིག་གི་འདུས་ཏེ་རེག་པའི་སྐྱེ་མཆེད་ནས་ཡིད་ཀྱི་འདུས་ཏེ་རེག་པའི་སྐྱེ་མཆེད་ཀྱི་བར་དྲུག་གསུངས་ཏེ་དེའི་ཕྱིར་འབྱུང་བ་ཙམ་མ་ཡིན་པའི་ཕྱིར་ཁམས་དྲུག་གསུངས་པ་
ཡིན་ནོ་ཞེས་བྱ་བར་ཤེས་པར་བྱ་སྟེ། དེ་ལྟ་མ་ཡིན་ན་མིག་ལ་སོགས་པ་ལྔ་པོ་རྣམས་སའི་ཁམས་ལ་སོགས་པ་ལས་ཐ་མི་དད་པའི་ཕྱིར་རེག་པའི་སྐྱེ་མཆེད་དྲུག་ཅེས་ཡང་མི་གསུང་བར་འགྱུར་རོ། །དེ་ལ་མིག་ཉིད་རེག་པའི་སྐྱེ་མཆེད་ཡིན་པ་ནི་མིག་གི་རེག་པའི་སྐྱེ་མཆེད་དེ། ཡིད་ཀྱི་རེག་པའི་སྐྱེ་མཆེད་ཀྱི་བར་ནི་སེམས་ལས་བྱུང་བའི་ཆོས་རེག་པའི་རྟེན་ཡིན་ནོ་ཞེས་བྱ་བའི་དོན་ཏོ། །སེམས་ལས་བྱུང་བ་རྣམས་མེད་པར་ཐལ་བར་འགྱུར་བའི་ཡང་ཕྱིར་རོ། །ཅི་ཡིན་ཞེ་ན་ཁམས་དྲུག་ཙམ་ཡིན་པའི་ཕྱིར་མདོ་ལས་ཁམས་དྲུག་གསུངས་ཀྱི་འབྱུང་བ་ལས་གྱུར་པ་ནི་ཡོད་པ་ཡིན་ནོ། །འོ་ན་ཅི་ཞེ་ན་རྫས་ཀྱི་གཞི་བསྟན་པའི་ཕྱིར་ཞེས་སྦྱར་རོ། །གལ་ཏེ་མདོ་ལས་སའི་ཁམས་ལ་སོགས་པ་ལྟར་མིག་ལ་སོགས་པ་དང་གཟུགས་ལ་སོགས་པ་རྣམས་མ་གསུངས་པས་དེ་རྣམས་མེད་པར་འདོད་ན། དེ་ལྟར་ན་ཚོར་བ་ལ་སོགས་པ་སེམས་ལས་བྱུང་བ་རྣམས་ཀྱང་མ་གསུངས་པས་དེ་དག་ཀྱང་མེད་པར་ཐལ་བར་འགྱུར་རོ། །ཅི་སྟེ་ཇི་ལྟར་འབྱུང་བ་རྣམས་ཁོ་ནས་འབྱུང་བ་ལས་བྱུང་བ་ཡིན་པ་དེ་བཞིན་དུ་སེམས་ཉིད་སེམས་ལས་བྱུང་བ་ཡིན་གྱི་སེམས་ལས་དོན་གཞན་དུ་གྱུར་པ་ནི་མ་ཡིན་པས་ཐལ་པ་འདིར་མི་འགྱུར་རོ་ཞེ་ན། དེའི་ཕྱིར་སེམས་ཉིད་ཅེས་བྱ་བ་ལ་སོགས་པ་རྒྱ་ཞེས་གསུངས་སོ། །ཅིའི་ཕྱིར་ཞེ་ན་མདོ་དང་འགལ་བའི་ཕྱིར་ཏེ། མདོ་ལས་འདུ་ཤེས་དང་ཞེས་བྱ་བ་རྒྱ་ཆེར་འབྱུང་ངོ༌། །ཡང་སེམས་འདོད་ཆགས་དང་བཅས་པ་ལ་སོགས་པ་གསུངས་པའི་ཕྱིར་ཏེ་མདོ་ལས་ཞེས་བྱ་བར་སྦྱར་རོ། །སེམས་ཉིད་སེམས་ལས་བྱུང་བ་རྣམས་ཡིན་ནོ་ཞེས་བྱ་བར་ཁས་བླངས་པ་ནི་མི་རིགས་ཏེ། གང་གི་ཕྱིར་སེམས་འདོད་ཆགས་དང་བཅས། སེམས་ཞེ་སྡང་དང་བཅས། སེམས་གཏི་མུག་དང་བཅས་ཞེས་གསུངས་པའི་ཕྱིར་རོ། །འབྱུང་བ་ཙམ་ནི་འགའ་ཞིག་ཡོངས་སུ་སྤང་བར་བཤད་དོ། །ལུས་ཀྱི་རྟེན་ལ་སོགས་པའི་འབྱུང་བ་བཞིན་སྲ་བ་ལ་སོགས་པ་སྣ་ཚོགས་པར་འགྱུར་ཏེ་འགའ་ཞིག་ནི་གཟུང་བའོ། །འགའ་ཞིག་ནི་འཛིན་པའོ། །འགའ་ཞིག་མིག་གི་དབང་པོའི་གཟུང་བའོ། །སྲ་བ་ལ་སོགས་པ་སྣ་ཚོགས་པ་དང་སྣ་ཚོགས་པ་
མ་ཡིན་པ་འདི་ལྟར་ཐ་དད་དེ། སྲ་བ་ལ་སོགས་པ་མིག་གིས་གཟུང་བར་བྱ་བ་མ་ཡིན་ཞིང་ཁ་དོག་ལ་སོགས་པ་ཡང་ལུས་ཀྱིས་མ་ཡིན་ནོ། །ཨཻ་ཧྱེ་ཏཾ་ན་གྲི་ཧྲི་ཏ་མི་བྱེ་གེ། ཁ་དོག་ལ་སོགས་པ་རྣམས་ཀྱང་ངོ༌། །དེ་ལ་འབྱུང་བ་ཙམ་ཉིད་དེ་རྣམས་ཀྱང་རྣམ་པ་སྣ་ཚོགས་པ་སོ་སོར་ངེས་པའི་དབང་པོའི་གཟུང་བར་བྱ་བ་རྣམས་སོ། །དེ་ལ་གལ་ཏེ་ལུས་ཀྱི་དབང་པོའི་གཟུང་བར་བྱ་བའི་དབང་དུ་བྱས་ནས་བཤད་པ་ལ་སོགས་པ་རྣམས་ནི་མིག་གིས་གཟུང་བྱ་མ་ཡིན་ཏེ། དབང་པོའི་གཟུང་བྱ་གཞན་མ་ཡིན་ནོ། །ཁ་དོག་ལ་སོགས་པ་རྣམས་ཀྱང་ལུས་ཀྱིས་མ་ཡིན་ནོ། །ཨི་ཏྱེཏ་ཏྤ་རེ་ཏཱ་ཎཱསྣྻུ་པ་གམྱ་ཏ་ཨེ་བ་ན་ཏྭེ་ཏཱ་པ་ཏཱ། གཟུགས་ལ་སོགས་པ་འབྱུང་བའི་བདག་ཉིད་དགག་པར་འགྱུར་རོ། །རིགས་གཅིག་ལ་ཡང་སྣ་ཚོགས་པ་མཐོང་སྟེ་ཚོར་བ་ལ་སོགས་པ་བཞིན་ནོ། །དཔེར་ན་ཚོར་བ་ཁ་ཅིག་ནི་ཕན་འདོགས་པ་དང༌། ཁ་ཅིག་ནི་གནོད་པ་དང༌། ཁ་ཅིག་རྣམ་པ་གཉིས་ཀ་ཡིན་པ་ལྟ་བུའོ། །གང་བཤད་པའི་དཀར་པོ་པྲ་བི་ར་ལ་སོགས་པ་མཚོན་པའི་དོན་དུ་ཁ་དོག་ལ་སོགས་པ་རྣམས་ལ་ཞེས་བྱ་བ་དེ་ལ་འབྱུང་བ་རྣམས་ཀྱི་མཆོག་དང་ཐ་མའི་དབྱེ་བས་དཀར་པོ་ལ་སོགས་པའི་དབྱེ་བ་བཤད་ཅེས་བྱ་སྟེ། འབྱུང་བ་ཚོགས་པའི་བདག་ཉིད་ཀྱི་གཟུགས་ལ་སོགས་པ་རྣམས་སོ་ཞེས་དགོངས་པའོ། །དེ་ལ་ནི་ད་མུ་ཏྟ་ར་ས་ཏྱཾ་ཁ་དོག་ལ་སོགས་པ་རྣམས་ལ་ཡོད་པ་འབྱུང་བ་རྣམས་ལ་ནི་བཱརྻ་སུན་ར་ཁ་དོག་ལ་སོགས་པའི་འབྱུང་བ་རྣམས་ཉིད་ཅེས་རྒྱུ་མངོན་པར་བརྗོད་པའི་ཕྱིར་རོ། །གང་བཤད་པའི་མདོ་ལ་མི་བརྟེན་པ་དང་བརྟེན་པའི་དབྱེ་བའི་དབང་དུ་བྱས་ནས་ན་བྱ་ཧཱ་ནྱ་ཏེ། གང་གི་ཕྱིར་རྒྱུར་བྱས་པའི་གཟུགས་ཀྱི་རང་བཞིན་རྣམས་འབྱུང་བ་རྣམས་བརྟེན་པ་དང༌། རེག་བྱ་བཅུ་གཅིག་པ་བསྡུས་པ་རྣམས་མ་བརྟེན་པ་རྣམས་སོ་ཞེས་པ་འདི་ལ་ཡང་ལན་དུ་མི་སྦྱར་རོ། །དེ་ནི་འདོད་པ་ཙམ་སྟེ། གཞི་ཉིད་དང་སྲ་བ་ཉིད་དང་སོགས་ངེས་པར་གཟུང་བའི་ཕྱིར་རོ། །དེ་ལྟར་རྒྱུ་ཅིས་གཞན་ལ་མི་བརྟེན་པ་ཉིད་ཅེ་ན། འབྱུང་བ་ཆེན་པོའི་དབང་དུ་བྱས་ནས་གསུངས་པར་ཁས་བླང་བར་བྱའོ་ཞེས་སོ། །གཟུགས་ཅན་བཅུ་ནི་བསགས་པའོ། །ཞེས་བྱ་བ་ལ་གཟུགས་ཅན་བཅུ་ཁོ་ན་བསགས་པ་ཞེས་བྱ་བར་ངེས་པར་གཟུང་བ་ཉིད་ཀྱིས་གཞན་བརྒྱད་བསགས་པ་མ་ཡིན་
པ་ཞེས་བྱ་བར་རྟོགས་སོ། །ཡང་ཇི་ལྟར་ན་དེ་དག་བསགས་པ་ཡིན་ཞེ་ན། དེའི་ཕྱིར་རྡུལ་ཕྲ་རབ་འདུས་པ་ཡིན་པའི་ཕྱིར་ཞེས་བྱ་བ་གཟུང་ངོ༌། །གཅོད་བྱེད་གཅད་པར་བྱ་བ་ཉིད། །ཕྱི་རོལ་མི་མཁས་པ་བཞི་ཡིན། །ཞེས་བྱ་བ་ལ་ཕྱི་རོལ་སྨོས་བ་ནི་ནང་གི་ཁམས་བསལ་བར་བྱ་བའི་ཕྱིར་རོ། །བཞི་སྨོས་པ་ནི་སྒྲ་དང་ཆོས་ཀྱི་ཁམས་བསལ་བར་བྱ་བའི་ཕྱིར་རོ། །དགྲ་སྟ་དང་ཤིང་ཞེས་བྱ་བ་ལ་སོགས་པའོ་ཞེས་བྱ་བ་ལ། སོགས་པའི་སྒྲ་ནི་རེ་རེ་དང་སྦྱར་པར་བྱའོ། །དགྲ་སྟ་དང་རལ་གྲི་ཞེས་བྱ་བ་ལ་སོགས་པ་ནི་གཅོད་པར་བྱེད་པའོ། །ཤིང་དང་རྩྭ་དང་འུས་ཞེས་བྱ་བ་ལ་སོགས་པ་ནི་གཅད་པར་བྱའོ། །འདིར་དང་གི་སྒྲ་ནི་གཉིས་ཆར་ལ་གཉིས་ཀ་བསྟན་པའི་དོན་ཏོ། །འདིར་ནི་གྲགས་པའི་དབང་གིས་ཐ་དད་ཕྱིར་དཔེར་བརྗོད་དོ། །སོ་སོ་བ་གཉིས་སུ་མེད་པར་མངོན་པར་སྦྱར་བ་ལ་སྐྱོན་མེད་དོ། །ཉིད་ཅེས་བྱ་བ་ནི་ངེས་པར་གཟུང་བའི་དོན་ཏོ། །ཕྱི་རོལ་གྱི་ཁོ་ནའོ་སྙམ་དུ་དགོངས་སོ། །བདག་ཉིད་དུ་རེད་མ་ཐག་ཏུ་འཇིགས་པའི་འདུ་ཤེས་ཐམས་ཅད་ལ་བྱ་བ་མེད་པས་གཅོད་བ་ཞེས་བྱ་བའི་ཆོས་འདི་ཅི་ཞེ་ན་ཞེས་བྱ་བ་ནི། ཡང་ན་སྐད་ཅིག་མ་ཉིད་ཀྱི་ཕྱིར་གཅད་པར་བྱ་བ་དང་གཅོད་པར་བྱེད་པ་མེད་ན་གཅོད་པ་ཞེས་བྱ་བའི་ཆོས་ཅི་ཞིག་ཅེས་བྱ་བའོ། །འདུས་པའི་རྒྱུན་འབྲེལ་བར་འབྱུང་བ་ཅན་རྣམ་པར་འབྱེད་པ་སྐྱེད་པའོ་ཞེས་བྱ་བ་ལ་འབྲེལ་པ་སྐྱེད་པ་ནི་གཅད་པར་བྱ་བ་ཞེས་བྱའོ། །གཅོད་པ་ཞེས་བྱ་བ་གཅད་པར་བྱ་བའི་རྒྱུན་ལས་དོན་གཞན་དུ་གྱུར་པ་ནི་མ་ཡིན་ནོ། །རྡུལ་ཕྲ་རབ་གཅིག་ལ་རྣམ་པར་འབྱེད་པ་སྐྱེ་བ་མེད་པའི་ཕྱིར་དང༌། འབྲེལ་པ་དང་རྣམ་པར་འབྱེད་པའི་དུས་གཉིས་ཀྱང་རྫས་ཀྱི་སྐད་ཅིག་གཅིག་ལ་མི་སྲིད་པས་འདུས་པའི་རྒྱུན་ལ་ཞེས་བྱ་བ་སྨོས་སོ། །ལུས་ཀྱི་དབང་པོ་ལ་སོགས་པ་ནི་གཅད་པར་བྱ་བ་མ་ཡིན་ཞེས་བྱ་བ་ལ། ལུས་ཀྱི་དབང་པོ་ལ་སོགས་པ་དག་ལ་ནི་རྣམ་བ་དེ་ལྟ་བུའི་གཅོད་པ་དེ་མི་རིགས་ཏེ། དེ་ཅིའི་ཕྱིར་ཞེ་ན། ཡན་ལག་མ་ལུས་པར་བཅད་ན་དེ་དག་ལ་གཉིས་སུ་བྱར་མེད་པའི་ཕྱིར་རོ། །མ་ལུས་པ་སྨོས་པ་ནི་ཡན་ལག་འཕྲོ་དང་བཅས་པ་བཅད་ན་དབང་པོ་ལ་རྣམ་པར་དབྱེ་བ་མཐོང་བའི་ཕྱིར་རོ། །འདི་ལ་ཡང་ཚིག་ཙམ་གྱིས་དད་པར་
མི་འགྱུར་རོ་ཞེ་ན། དེའི་ཕྱིར་དབང་པོ་རྣམས་ལ་ནི་གཉིས་སུ་འགྱུར་བ་མེད་དོ་ཞེས་བྱ་བ་གསུངས་སོ། །ནིའི་སྒྲ་ནི་དབང་པོ་རྣམས་ནི་གཅོད་པར་བྱེད་པའི་རྐྱེན་གྱིས་རྣམ་པ་གཉིས་སུ་བྱར་མི་ནུས་པ་ཉིད་དོ་ཞེས་ངེས་བར་གཟུང་བའི་དོན་ཏོ། །དེ་ཉིད་ལ་རྒྱུ་སྨྲས་པ། བཅས་པའི་ཡན་ལག་ལ་དབང་པོ་མེད་པའི་ཕྱིར་རོ། །དེ་ཡང་ཡན་ལག་དེས་ཡུལ་འཛིན་པ་ལ་ཤེས་ཏེ། འདི་ནི་རབ་ཏུ་གྲགས་པས་མ་བཤད་དོ། །དེ་ལྟ་ན་གལ་ཏེ་སྣའི་རྩེ་མོ་བཅད་པ་སླར་སྦྱར་བ་ལུས་ཀྱི་རྣམ་པར་ཤེས་པ་ཇི་ལྟར་བསྐྱེད་ཅེ་ན། རྒྱས་པ་ལས་བྱུང་བའི་དབང་པོ་སྐྱེ་བའི་ཕྱིར་ཉེས་པ་མེད་དེ། འདིས་ནི་དུད་འགྲོའི་ཁྱད་པར་འགའ་ཞིག་གི་མཇུག་མ་བཅད་པ་སླར་སྐྱེ་བ་ཡང་རྣམ་པར་བཤད་པ་ཡིན་ནོ། །གཅོད་པར་བྱེད་པ་ཡང་མ་ཡིན་ཏེ་ཞེས་བྱ་བ་ལ། དང་བའི་མཚན་ཉིད་ཅན་རྣམས་ནི་ནོར་བུའི་འོད་བཞིན་དུ་དང་བའི་ཕྱིར་རོ། །ནོར་བུའི་འོད་ནི་གཅད་པར་བྱ་བ་མ་ཡིན་ཏེ། ནོར་བུ་མ་ལུས་པར་བཅད་ན་དེ་གཉིས་སུ་མེད་པའི་ཕྱིར་ཏེ། འདི་ནི་ངེས་པར་གཟུང་བ་ལས་རྙེད་པར་འགྱུར་རོ། །སྒྲ་ཡང་མ་ཡིན་ཏེ་ཆད་པའི་ཕྱིར་རོ་ཞེས་བྱ་བ་ལ། གཟུགས་ལ་སོགས་པ་དང་ལྷན་ཅིག་རྒྱུན་མི་འཇུག་པས་དེའི་ཕྱིར་འདི་ལ་དྲུག་མཚན་འདི་དག་ཡོད་པ་མ་ཡིན་ནོ། །བསྲེག་པ་ཞེས་བྱ་བའི་ཆོས་འདི་ཅི་ཞེ་ན། རྒྱུའི་རྒྱུན་ལས་མེ་ལ་སོགས་པའི་རྐྱེན་གྱི་རྒྱུ་ཅན་འབྲས་བུ་མི་འདྲ་བ་སྐྱེ་བའོ། །དབང་པོ་རྣམས་ནི་མ་ཡིན་ཏེ་དང་བའི་ཕྱིར་རོ་ཞེས་བྱ་བ་ལ། དང་བའི་ཕྱིར་དེ་ཥཱ་མ་གྣིདྷ་རེ་བ་བྱཱ་ནྣ་བི་ཀཱ་རོ་བི་ཀཱ་རཤྩ་དཱ་ཧ། བསྲེག་དང་གཞལ་ལ་མི་མཐུན་སྨཱ། །ཞེས་བྱ་བ་ལ། ཨ་ཀྵེ་པ་པ་དམ་གཅོད་པ་ལ་སོགས་པ་རྣམས་ལ་ཡང་འབྱུང་བ་གཙོ་བོ་ལ་རྣམ་པར་དཔྱད་པར་བྱ་བས་ན་ཁམས་བཞི་པོ་ཁོ་ན་གཅོད་པར་བྱེད་པའོ། །ན་གྭ་ཙི་ཏེ་ཀ་བྱ་ཙི་ཏ་ནུས་པ་མཐོང་བའི་ཕྱིར་རོ། །དེ་ལ་སྲ་བ་ལ་སོགས་པ་རྣམས་ན་རེ་ཞིག་དགྲ་སྟ་དང་རླུང་གི་རྒྱུ་དང་མ་དང་རླུང་གི་ཕུང་པོ་རྣམ་པར་ཤེས་བ་ལ་ཚ་བར་འདུག་པ་སྟེ། ཤིང་དང་རི་བོ་དང་བུད་ཤིང་དང་ཡལ་ག་ལ་སོགས་པ་རྣམ་པ་གཉིས་ཀྱི་དངོས་པོར་ནུས་པ་མཐོང་བས་སོ། །རོ་ལ་སོགས་པ་རྣམས་ལ་ཡང་སྟེ། ཕྱེ་དང་རྒྱ་སྲན་ཀུ་ལཏྠ་ལ་སོགས་པ་མཉམ་པར་བསགས་པ་ལས་རྒྱམ་ཚ་དང་རྡོ་བ་ལ་སོགས་
པ་གཅོད་པས་སོ། །དེ་ལ་སྲ་བ་ལ་སོགས་པ་རྣམས་ཀྱིས་བྱས་པ་ཁོ་ན་གཅད་པ་ཞེས་བྱ་བ་རིགས་པ་མ་ཡིན་ཏེ། དེ་ཉིད་ལས་གཞན་པ་སྲ་བ་ལ་སོགས་པ་རྣམས་ཀྱིས་མ་བཅད་པའི་ཕྱིར་རོ། །སྲ་བ་ལ་སོགས་པ་རྣམས་ནི་རང་བཞིན་དང་ཁྱད་པར་འགའ་ཡང་མེད་དོ། །རོ་ལ་སོགས་པ་རྣམས་ཇི་ལྟ་བ་དེ་ཉིད་ཀྱང་སྲེག་པར་བྱེད་དེ། མེ་དང་ཕྲད་པ་ལས་དུ་བ་ལ་སོགས་པའི་རྣམ་འགྱུར་རྣམས་ཀྱིས་སོ། །དེ་ཡང་ལག་པས་འཇལ་བ་སོགས་བྱེད་པས་ན་གཞལ་བའོ། །བསྲེག་པ་དང་གཞལ་བ་དག་ལ་མི་མཐུན་པར་སྨྲ་བ་ནི་རིགས་ཏེ། ཕྱོགས་གཉིས་ཀ་རིག་པར་མཐོང་བའི་ཕྱིར་རོ། །ཁ་ཅིག་ན་རེ་མེའི་ཁམས་ཤས་ཆེ་བར་འཇུག་པ་ཁོ་ན་སྲེག་པར་བྱེད་པ་ཉིད་ཡིན་ཏེ། མེའི་ཁམས་ཉིད་སྨིན་པར་བྱེད་པ་ཡིན་པའི་ཕྱིར་དང༌། སའི་ཁམས་ལ་སོགས་པའི་བྱེད་པ་གཞན་དང་ལྡན་པའི་ཕྱིར་དང༌། སའི་ཕུང་པོ་ལ་སོགས་པ་རྣམས་ཀྱིས་སྲེག་པ་མི་སྲིད་པའི་ཕྱིར་དང་འབྱུང་བ་གཞན་ཟིལ་གྱིས་མནན་ནས་མེའི་ཁམས་ཀྱི་བྱ་བ་ཐོབ་པའི་ཕྱིར་རོ་ཞེས་ཟེར་རོ། །གཞན་དག་ན་རེ་ཕྱི་རོལ་གྱི་ཁམས་བཞི་པོ་འབྱུང་བ་མེ་ཤས་ཆེ་བ་ཁོ་ན་སྲེག་པར་བྱེད་དེ། གལ་ཏེ་མེའི་ཁམས་ཁོ་ན་སྲེག་པར་བྱེད་ན་ནི་ལྷན་ཅིག་ཏུ་གྱུར་པའི་འབྱུང་བ་རྣམས་དང༌། དེ་དག་ལ་བརྟེན་བ་རྒྱུར་བྱས་པའི་གཟུགས་ཀྱང་སྲེག་པར་བྱེད་པར་འགྱུར་ཞིང༌། ཁམས་བཞི་པོ་ཐམས་ཅད་ཉིད་སྲེག་པ་ཞེས་བྱ་བ་རྣམ་པར་འགྱུར་བའི་རྒྱུ་ཡིན་གྱི། མེའི་ཁམས་ཁོ་ན་ནི་སྲེག་པར་བྱེད་པ་མ་ཡིན་ནོ་ཞེས་ཟེར་རོ། །ཕྱི་རོལ་གྱི་ཁམས་བཞི་པོ་ཉིད་གཞལ་བ་ལ་ནི་མཐའ་དག་སྲང་མགོ་དམའ་བའི་རྒྱུ་ཡིན་པའི་ཕྱིར་ལྕི་བ་ཉིད་ཁོ་ན་གཞལ་བར་བྱ་བ་ཡིན་ཏེ། ཡང་བ་རྣམས་ལ་སྲང་མགོ་དམའ་བའི་རྒྱུ་མི་སྲིད་པའི་ཕྱིར་རོ། །ལྕི་བ་ཉིད་ཀྱི་ལྷན་ཅིག་བྱེད་པ་དང་ལྡན་པའི་རྫས་རྣམས་སྲང་མགོ་དམའ་བའི་རྒྱུ་ཉིད་དུ་སྨྲའི་ཡང་བ་ཉིད་ཀྱི་ལྷན་ཅིག་བྱེད་པ་དང་ལྡན་པ་རྣམས་ནི་མ་ཡིན་ཏེ། དེ་ལྟ་ན་ཡང་དེར་ལྕི་བ་ཉིད་ནུས་པ་དང་ལྡན་པར་འདོད་དོ་ཞེས་དེ་ལྟར་བསམ་པར་བྱའོ། །རྣམ་པར་སྨིན་ལས་སྐྱེས་པ་དང༌། །རྒྱས་ལས་བྱུང་བ་ནང་གི་ལྔ། །ཞེས་བྱ་བ་ལ། ལྔ་ཞེས་བྱ་བ་ནི་རྣམ་པར་ཤེས་པའི་ཁམས་བསལ་བར་བྱ་བའི་ཕྱིར་རོ། །ནང་གི་
ཞེས་བྱ་བ་ནི་ཡུལ་གྱི་ཁམས་བསལ་བར་བྱ་བའི་ཕྱིར་རོ། །འདིར་ཡང་ནང་གི་ལྔ་ནི་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བའོ་ཞེས་ངེས་པར་གཟུང་བར་བྱའོ། །འདི་གང་ལས་ཤེ་ན་གང་གི་ཕྱིར་རྒྱུ་མཐུན་པ་ནི་མེད་དོ་ཞེས་གསུངས་པས་སོ། །གལ་ཏེ་མིག་ལ་སོགས་པ་ལྔར་སྐྱེས་པ་རྣམས་ནི་མིག་ལ་སོགས་པ་ཕྱིས་སྐྱེས་པ་རྣམས་དང་མ་སྐྱེས་པ་རྣམས་ཀྱི་སྐལ་བ་མཉམ་པའི་རྒྱུས་རྒྱུ་མ་ཡིན་ནམ། རྒྱུ་མཐུན་པ་ཡང་སྐལ་བ་མཉམ་པའི་རྒྱུའི་འབྲས་བུ་ཡིན་ནོ་ཞེ་ན། ཇི་ལྟར་རྒྱུ་མཐུན་དུ་ཡོད་པ་མ་ཡིན་པ་དེ་ལས་ཐ་དད་པའི་རྒྱུ་མཐུན་མེད་པའི་ཕྱིར་ཡོད་པ་མ་ཡིན་ཞེས་བཤད་ཀྱིས་མེད་པ་ནི་མ་ཡིན་ཏེ། ཇི་ལྟར་རྣམ་པར་སྨིན་པ་ལས་ཐ་དད་པའི་རྒྱས་པ་ལས་བྱུང་བ་ཡོད་པ་དང་རྒྱས་པ་ལས་བྱུང་བ་ལས་ཐ་དད་པའི་རྣམ་པར་སྨིན་པ་ལས་སྐྱེས་པ་སྟེ། ཇི་ལྟར་ཤི་བ་ལ་རྒྱུ་མཐུན་པ་ལས་བྱུང་བའི་གཟུགས་པ་སོགས་པ་དམིགས་པ་དེ་བཞིན་དུ་དེ་དག་ལ་རྣམ་པར་སྨིན་པ་ལས་སྐྱེས་པ་དང་རྒྱུ་མཐུན་པ་ནི་དེ་ལས་ཐ་དད་པར་དམིགས་པ་མེད་དེ། དེའི་ཕྱིར་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་མ་གཏོགས་པའི་རྒྱུ་མཐུན་པ་མེད་པའི་ཕྱིར་མིག་ལ་སོགས་པ་ལ་རྒྱུ་མཐུན་པ་ལས་བྱུང་བ་མེད་པར་བཤད་དོ། །ལས་ཀྱི་རྣམ་པ་ཞེས་བཤད་པ་དེའི་འབྲས་བུ་མི་འདྲ་བར་སྨིན་པས་ན་རྣམ་པར་སྨིན་པའོ། །གལ་ཏེ་རྣམ་པར་སྨིན་པ་ནི་རྣམ་པར་སྨིན་པ་གཞན་དང་འབྲེལ་བ་མ་ཡིན་ན། ཇི་ལྟར་དེ་དག་རྣམ་པར་སྨིན་པ་ལས་སྐྱེས་པ་ཞེས་བྱ་ཞེ་ན། རྣམ་པར་སྨིན་པ་ལས་སྐྱེས་པ་ནི་རྣམ་པར་སྨིན་པ་མ་ཡིན་ནོ། །འོ་ན་ཅི་ཞེ་ན། རྣམ་པར་སྨིན་པའི་རྒྱུ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པ་སྟེ་བར་གྱི་ཚིག་མི་མངོན་པར་བྱས་པའོ། །འབྲས་བུའི་དུས་སུ་ཕྱིན་པའི་ངག་གི་ལས་ནི་ཞེས་བྱ་བ་ལ། དུས་གང་གི་ཚེ་བར་མེད་པར་ལས་ལས་འབྲས་བུ་སྐྱེ་བ་ནི་འབྲས་བུའི་དུས་ཏེ། དེ་ཚེ་ལས་དེ་རྣམ་པར་སྨིན་པར་འགྱུར་བས་རྣམ་པར་སྨིན་པ་ཞེས་བྱའོ། །འདི་སྐད་བསྟན་པར་འགྱུར་ཏེ་བར་མེད་པར་འབྲས་བུ་བསྐྱེད་པར་རུང་བའི་ལས་ལས་སྐྱེས་པས་ན་རྣམ་པར་སྨིན་པ་ལས་སྐྱེས་པའོ། །གལ་ཏེ་འབྲས་བུ་ལ་མངོན་དུ་ཕྱོགས་པའི་ལས་རྣམ་པར་སྨིན་པར་འགྱུར་བས་རྣམ་
པར་སྨིན་པ་ཡིན་ན། འོ་ན་འབྲས་བུ་ཇི་ལྟར་རྣམ་པར་སྨིན་པ་ཡིན་ཞེ་ན། དེའི་ཕྱིར་འབྲས་བུ་ནི་རྣམ་པར་སྨིན་པ་ཁོ་ན་ཡིན་པས་རྣམ་པར་སྨིན་པའོ་ཞེས་བྱ་བ་གསུངས་སོ། །རྣམ་པར་སྨིན་པ་དང་བྲལ་བའི་རྒྱུ་ལ་སྨིན་པས་རྣམ་པར་སྨིན་པའོ། །གཞན་དག་ན་རེ་རྣམ་པར་སྨིན་པ་ལས་སྐྱེས་པས་རྣམ་པར་སྨིན་པའོ་ཞེས་ཟེར་རོ། །རྒྱས་པ་ལ་ཡོད་པ་ནི་རྒྱས་པ་ལས་བྱུང་བ་དག་སྟེ་སྡེ་ཚན་བཞིན་ནོ། །ཡང་ན་རྒྱས་པ་ཉིད་རྒྱས་པ་ལས་བྱུང་བ་དག་སྟེ་རང་གི་དོན་ལ་འཕེལ་བ་བྱས་པའི་སྒྲ་འདུལ་བ་པ་ཞེས་པ་ལྟ་བུའོ། །ལེགས་པར་བྱ་བ་ནི་ཁྲུས་དང་བསྐུ་མཉེ་དང་འབད་རྩོལ་དང་བསྐུ་བྱུག་ལ་སོགས་པའོ། །ཁྱད་པར་གྱི་སྒྲ་ནི་རེ་རེ་དང་སྦྱར་རོ། །ཟས་ལ་སོགས་པ་ཡོད་ཀྱང་མི་ཚངས་པར་སྤྱོད་ངས་རྒྱས་པ་ལས་བྱུང་བ་ལ་གནོད་བར་མཐོང་བའི་ཕྱིར་རོ། །ཚངས་པར་སྤྱོད་པས་ནི་མི་གནོད་པ་ཙམ་དུ་ཟད་ཀྱི། རྒྱས་པ་ནི་ཟས་ལ་སོགས་པ་དག་ཁོ་ནས་ཡིན་ནོ། །ཟས་ལ་སོགས་པ་དག་ནི་རྣམ་པར་སྨིན་པ་ལ་ཕན་འདོགས་པར་བྱེད་དེ། དེ་ཉིད་ཀྱི་ཕྱིར་རྒྱས་པའི་རྒྱུད་ནི་རྣམ་པར་སྨིན་བའི་རྒྱུད་ལ་ཕྱིར་བཞིན་དུ་ཀུན་ཏུ་བསྲུང་བོ་ཞེས་བྱ་བ་གསུངས་སོ། །རྣམ་པར་སྨིན་པའི་རྒྱུད་ནི་འགྲོ་བ་ལ་སོགས་པའི་བྱ་བ་ལ་ནུས་པ་མེད་པའི་ཕྱིར་སྟོབས་ཆུང་བ་ཡིན་ལ། རྒྱས་པའི་རྒྱུད་ནི་སྟོབས་ཆུང་བ་རི་བོ་དང་འདྲ་བ་དེ་གནས་པར་བྱ་བའི་ཕྱིར་ཕྱིའི་རི་བོ་དང་འདྲ་བར་འགྱུར་རོ། །རྒྱས་པ་ལས་བྱུང་བ་མེད་པར་ནི་རྣམ་པར་སྨིན་པ་ལས་སྐྱེས་པ་མེད་ཀྱི། རྣམ་པར་སྨིན་པ་ལས་སྐྱེས་པ་མེད་པར་རྒྱས་པ་ལས་བྱུང་བ་ནི་ཡོད་པར་འགྱུར་ཏེ་དཔེར་ན་ལྷའི་མིག་བཞིན་ནོ། །རྣམ་བར་སྨིན་བ་ལས་བྱུང་བ་ཁོ་ན་བཀག་པས། སྒྲ་ནི་རྒྱས་བ་ལས་བྱུང་བ་དང༌། རྒྱུ་མཐུན་པ་ལས་བྱུང་བ་ཡོད་དོ་ཞེས་བྱ་བར་ཁོང་དུ་ཆུད་པར་འགྱུར་ཏེ། མགྲིན་པ་ལ་སོགས་པའི་འབྱུང་བ་ཆེན་པོ་རྒྱས་པ་ལས་བྱུང་བ་དང་ཐ་མི་དད་པར་འདུག་པའི་སྒྲ་ནི་རྒྱས་པ་ལས་བྱུང་བའོ། །རྒྱུ་མཐུན་པ་ལས་བྱུང་བའི་བྱུང་བ་དང་ཐ་མི་དད་བར་འདུག་པ་ནི་རྒྱུ་མཐུན་པ་ལས་བྱུང་བའོ། །སྒྲ་ནི་རྣམ་སྨིན་ལས་སྐྱེད་མིན། །ཞེས་བྱ་བ་ལ་ཚིག་ཙམ་གྱིས་འདོད་པ་མི་འགྲུབ་པས་དེའི་རྒྱུ་དྲིས་པ་དང༌། འདོད་དགུར་འབྱུང་བའི་
ཕྱིར་རོ་ཞེས་གསུངས་ཏེ། མིག་ལ་སོགས་པ་རྣམ་པར་སྨིན་པ་ཅན་ནི་འདོད་ཀྱང་མི་འབྱུང་ལ་མི་འདོད་ཀྱང་འབྱུང་གི་སྒྲ་ནི་དེ་ལྟ་བུ་མ་ཡིན་ཏེ། བརྗོད་པར་འདོད་པ་སྔོན་དུ་འགྲོ་བའི་ཕྱིར་རོ། །རྣམ་པར་སྨིན་པ་ལས་སྐྱེས་བའི་གཟུགས་ནི་རྣམ་པར་ཆད་ནས་ཡང་སྐྱེ་བ་ཡང་མ་ཡིན་ན། སྒྲ་ནི་སྐྱེ་བ་ཡང་ཡིན་ཏེ། དེའི་ཕྱིར་རྣམ་པར་སྨིན་པའི་ཆོས་ལས་འདས་པའི་ཕྱིར་སྒྲ་ནི་རྣམ་པར་སྨིན་པ་ལས་སྐྱེས་པ་མ་ཡིན་ནོ། །བསྟན་བཅོས་དང་འགལ་བ་བརྗོད་པའི་ཕྱིར། འོ་ན་གང་བསྟན་བཅོས་བཏགས་པ་ལས་ཞེས་བྱ་བ་རྒྱ་ཆེར་གསུངས་ཏེ། འགྲུབ་པ་བདེན་མོད་ཀྱི་འདི་ནི་རྣམ་པར་སྨིན་པ་མ་ཡིན་པས་བསྟན་བཅོས་དང་འགལ་བ་མེད་དོ། །འོ་ན་ཅི་ཡིན་ཞེ་ན། ཁ་ཅིག་ན་རེ་བརྒྱུད་པ་འདི་ནི་གསུམ་པ་ཡིན་ཏེ། དེ་ལྟ་ན་ཚིག་རྩུབ་བོ་སྤོང་བ་སྒྲའི་རྒྱུའི་རྒྱུ་ཡིན་གྱི་དངོས་སུ་མ་ཡིན་ལ། སྒྲ་ནི་རྣམ་པར་སྨིན་པ་ལས་སྐྱེས་པ་དེ་ལྟར་ཡང་མ་ཡིན་ནོ་ཞེས་ཟེར་རོ། །ཁ་ཅིག་ན་རེ་གང་གི་ཕྱིར་རྣམ་པར་སྨིན་པ་ལས་སྐྱེས་བ་ལས་རྣམ་པར་སྨིན་པ་ལས་སྐྱེས་བ་སྐྱེ་བར་མི་རིགས་ཏེ། དེའི་ཕྱིར་བརྒྱུད་པ་འདི་ནི་བཞི་པའམ་ལྔ་པ་ཡིན་ཏེ། ཟས་དང་ལེགས་པར་བྱ་བའི་ཁྱད་པར་དག་གིས་བསྐྱེད་ཀྱང་རྣམ་པར་སྨིན་པ་ལས་སྐྱེས་པའི་འབྱུང་བ་རྣམས་ལ་བརྟེན་ནས་སྐྱེ་བ་དེ་དག་ལས་རྒྱས་པ་ལས་བྱུང་བ་རྣམས་ཏེ་ཞེས་བརྗོད་དོ། །དེ་དག་ལ་ནི་རྒྱུ་མཐུན་པ་ལས་བྱུང་བ་རྣམས་ཏེ། དེ་རྣམས་ནི་དེ་དག་གི་སྐལ་བ་མཉམ་པའི་རྒྱུ་ཡིན་པའི་ཕྱིར་རོ། །དེ་དག་ལ་ནི་སྒྲའོ་ཞེས་ཟེར་རོ། །རྒྱས་པ་ལས་བྱུང་བ་རྣམས་ལ་རྒྱས་པ་ལས་བྱུང་བ་དང༌། རྒྱུ་མཐུན་པ་ལས་བྱུང་བ་རྣམས་ལ་རྒྱུ་མཐུན་པ་ལས་བྱུང་བ་དང༌། གང་གི་ཕྱིར་འབྱུང་བ་ལ་ལྟོས་པར་སྒྲའི་གནས་སྐབས་ཇི་ལྟ་བ་ལས་ལུང་དུ་མ་བསྟན་པ་ལས་དགེ་བ་དང་མི་དགེ་བ་དང༌། ཟིན་པ་རྣམས་ལ་མ་ཟིན་པ་དང༌། ལུས་ཀྱི་དབང་པོའི་ཡུལ་རྣམས་ལ་རྣ་བའི་དབང་པོའི་ཡུལ་དང༌། དེ་བཞིན་དུ་རྣམ་པར་སྨིན་པ་ལས་སྐྱེས་པ་ལ་རྣམ་པར་སྨིན་པ་ལས་སྐྱེས་པ་མ་ཡིན་པ་རྣམས་སུ་འགྱུར་རོ། །དེ་ལྟ་ན་འོ་ན་ལུས་ཀྱི་ཚོར་བ་ཡང་ཞེས་བྱ་བ་རྒྱ་ཆེར་འབྱུང་བ་ལ། དེ་ལ་གང་ཞིག་དངོས་ཀྱི་ལས་ཀྱི་འབྲས་བུ་ཡིན་པ་དེ་ནི་རྣམ་པར་སྨིན་པར་འགྱུར་གྱི། ལས་ལས་སྐྱེས་པའི་འབྱུང་བ་ལས་སྐྱེས་
ད་ནི་མ་ཡིན་ཏེ། སྒྲ་བཞིན་ནོ་སྙམ་དུ་དགོངས་སོ། །གལ་ཏེ་སྒྲ་བཞིན་དུ་རིགས་པ་དང་འགལ་བར་འགྱུར་ན་ཞེས་བྱ་བ་ལ། རྣམ་པར་སྨིན་པ་མ་ཡིན་པར་འགྱུར་རོ་ཞེས་བྱ་བར་སྦྱར་རོ། །ལས་ལས་སྐྱེས་པའི་འབྱུང་བ་ལས་བྱུང་བ་ཉིད་རྣམ་པར་སྨིན་པའི་མཚན་ཉིད་མ་ཡིན་ནོ། །འོ་ན་ཅི་ཞེ་ན། ཇི་སྐད་བཤད་པ་འདོད་ཀྱང་མི་འབྱུང་ལ་མི་འདོད་ཀྱང་འབྱུང་བ་འདི་རྣམ་པར་སྨིན་པའི་མཚན་ཉིད་དེ། ལས་ཀྱི་འབྱུང་བ་ལས་བྱུང་བའི་ཚོར་བ་ལ་ནི་མི་འགལ་ཏེ་མིག་ལ་སོགས་པ་བཞིན་ནོ། །སྒྲ་ལ་ནི་མི་སྲིད་དེ་འདི་དེ་དགུར་འབྱུང་བའི་ཕྱིར་རོ། །དེ་ལ་བདེ་བ་དང་སྡུག་བསྔལ་གྱི་རྐྱེན་ཉེ་བར་འདུས་པ་མེད་ཀྱང་འབྱུང་ཞིང་བདེ་བ་དང་སྡུག་བསྔལ་གྱི་རྐྱེན་ལོག་ཀྱང་མི་ལྡོག་པའི་ཚོར་བ་བདེ་བ་དང་སྡུག་བསྔལ་དེ་ནི་རྣམ་པར་སྨིན་བ་ལས་སྐྱེས་པ་ཡིན་ལ། གང་ཞིག་བདེ་བ་དང་སྡུག་བསྔལ་མྱོང་བར་འགྱུར་བའི་ཡུལ་ཉེ་བར་ཚོགས་པ་ལས་བྱུང་ཞིང༌། དེ་མེད་ན་མི་འབྱུང་བ་དེ་ནི་རྒྱུ་མཐུན་པ་ལས་བྱུང་བའོ། །སློབ་དཔོན་འདུས་བཟང་ན་རེ། ལུས་ཀྱི་ཚོར་བ་ཐམས་ཅད་ལས་ལས་སྐྱེས་པ་དང་འབྱུང་བ་རྒྱུ་མཐུན་པ་མ་ཡིན་ཞིང་རྣམ་བར་སྨིན་པ་ལས་སྐྱེས་བ་ཡང་མ་ཡིན་ལ། འབྱུང་བ་ལས་ཐ་དད་པ་རྣམས་ཀྱང་རྣམ་པར་སྨིན་པ་ལས་སྐྱེས་པ་མ་ཡིན་ཏེ། དེ་བསྐྱེད་པའི་རྒྱུ་མཚན་གྱི་ཕྱིར་རོ། །ལུས་དང་རེག་བྱ་ལ་བརྟེན་ནས་ལུས་ཀྱི་རྣམ་པར་ཤེས་པ་སྐྱེ་བའི་ལུས་ཀྱི་ཚོར་བ་དེ་ནི་རྣམ་པར་སྨིན་པ་ལས་སྐྱེས་བ་འབྱུང་བའི་རྒྱུ་རྐྱེན་ཁོ་ནའོ། །དེ་གལ་ཏེ་རྣམ་པར་སྨིན་པ་ཡོངས་སུ་རྟོག་ན་རྣམ་པར་སྨིན་པའི་ཆོས་ལས་འདས་པར་འགལ་ལོ། །རྣམ་པར་སྨིན་པ་མ་ཡིན་པ་ལ་ནི་འགལ་བ་མེད་དོ་ཞེས་ཟེར་རོ། །དེ་ལ་གང་གི་ཕྱིར་རྣམ་པར་སྨིན་པའི་ཆོས་ལས་འདས་པའི་ཕྱིར་རྣམ་པར་སྨིན་པ་མ་ཡིན་པ་ཞེས་བྱ་བ་འདི་ཉིད་སྦྱར་གྱི་ལྷག་མ་ནི་མ་སྦྱར་བའི་ཕྱིར་གཞུང་ཁ་བསྐང་བའི་ཆེད་ཁོ་ནར་གསུངས་པ་མཚོན་བར་བྱ་སྟེ་གཞན་རྣམ་གསུམ་ཞེས་གསུངས་པའི་ཕྱིར་རོ། །རྒྱུ་མཐུན་ལས་བྱུང་རྣམ་སྨིན་སྐྱེས། །ཐོགས་པ་མེད་བརྒྱད་ཅེས་བྱ་བ་ལ། རྒྱུ་མཐུན་པ་ལས་བྱུང་བ་དང༌། རྣམ་པར་སྨིན་པ་ལས་སྐྱེས་པ་ཁོ་ནའོ་ཞེས་ངེས་པར་གཟུང་བར་བྱའོ། །གང་དག་སྐལ་བ་
མཉམ་པ་དང༌། ཀུན་ཏུ་འགྲོ་བའི་རྒྱུས་བསྐྱེད་ཅིང་རྣམ་པར་སྨིན་པ་ལས་ཐ་དད་བ་རྣམས་ནི་རྒྱུ་མཐུན་པ་ལས་བྱུང་བ་དག་གོ །གང་དག་རྣམ་པར་སྨིན་བ་རྒྱུས་བསྐྱེད་པ་དེ་དག་ནི་རྣམ་པར་སྨིན་པ་ལས་སྐྱེས་པ་དག་གོ །དེ་ལ་ཆོས་ཀུན་ནས་ཉོན་མོངས་པ་ཅན་གང་དག་ཀུན་ཏུ་འགྲོ་བའི་རྒྱུས་བསྐྱེད་བ་དེ་དག་ནི་སྐལ་བ་མཉམ་བའི་རྒྱུས་བསྐྱེད་པ་ཡང་ཡིན་ནོ། །སྐལ་བ་མཉམ་པའི་རྒྱུས་བསྐྱེད་པ་ཁོ་ན་ཡིན་གྱི། ཀུན་ཏུ་འགྲོ་བའི་རྒྱུས་བསྐྱེད་པ་མ་ཡིན་པ་ཡང་ཡོད་དེ། དགེ་བ་དང་མ་བསྒྲིབས་ལ་ལུང་དུ་མ་བསྟན་པ་རྣམས་སོ། །རྒྱས་པ་ལས་བྱུང་བ་རྣམས་ནི་མེད་དེ། ཅིའི་ཕྱིར་ཞེ་ན། ཐོགས་པ་མེད་པ་རྣམས་ལ་རྒྱས་བ་མེད་པའི་ཕྱིར་རོ། །གཟུགས་ཅན་རྣམས་ཕན་ཚུན་ཐོགས་པས་བར་མཚམས་མེད་པར་གནས་བ་ལ་སོགས་པ་ཞེས་བརྗོད་དེ། འདི་ནི་ཐོགས་པ་མེད་པ་དག་ལ་མི་སྲིད་པས་དེ་དག་ལ་རྒྱས་བ་ལས་བྱུང་བ་མེད་དོ། །ཁ་ཅིག་ན་རེ་རྒྱས་པ་ལས་བྱུང་བ་ཡོད་པ་ལ་ཡང་སྔོན་གྱི་རྒྱུའི་ནུས་པའི་མཐུ་ལྷག་པ་ལས་ཆེས་རྒྱས་པར་སྐྱེའོ་ཞེས་ཟེར་རོ། །གཟུགས་ཅན་རྣམས་ལ་ཡང་འཕེལ་བ་དང་ཁྱད་བར་དུ་འཕགས་པ་དང་ཡང་བ་ཞེས་བཤད་པ་དེ་ནི་རྒྱུ་མཐུན་པ་བཞིན་དུ་ལྡན་པའོ། །གང་ཞིག་སྔོན་གྱི་རྒྱུའི་ནུས་པའི་མཐུ་ལྟག་པ་ལས་བྱུང་བ་ནི་རྒྱུ་མཐུན་པ་ཉིད་ལ་ཡང་དེ་ལྟར་བཤད་དོ། །སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུའི་སྒོ་ནས་སྐྱེས་བ་རྣམས་ནི་རྒྱས་བ་ལས་བྱུང་བ་དང་རྒྱུ་མཐུན་པ་ལས་བྱུང་བའི་ལྷན་ཅིག་བྱེད་པ་ཡིན་པའི་ཕྱིར་རྒྱས་བ་ལས་བྱུང་བ་ཡོད་ཀྱང་རྡུལ་ཕྲ་རབ་བསགས་པ་མེད་པའི་ཕྱིར་རྒྱས་པ་ལས་བྱུང་བ་ཞེས་བྱ་བ་ལ་བརྗོད་དོ། །གཞན་རྣམ་གསུམ་ཞེས་བྱ་བ་ནི་རྣམ་པ་གཉིས་དང་རྣམ་པ་གཅིག་ནི་མ་ཡིན་ནོ་ཞེས་ངེས་པར་གཟུང་ངོ༌། །དེ་ལ་རྣམ་པར་སྨིན་པའི་དབང་པོ་དང་ཐ་མི་དད་པ་རྣམས་ནི་རྣམ་པར་སྨིན་པ་ལས་སྐྱེས་པ་དག་གོ །རྒྱས་པ་ལས་བྱུང་བའི་དབང་པོ་དང་ཐ་མི་དད་པར་འདུག་པ་རྣམས་ནི་རྒྱས་པ་ལས་བྱུང་བ་དག་གོ །ལྷག་མ་རྣམས་ནི་རྒྱུ་མཐུན་པ་ལས་བྱུང་བ་དག་གོ །གཟུགས་ལ་སོགས་པ་ཐུན་མོང་གི་ལོངས་སྤྱོད་རྣམས་རྣམ་པར་སྨིན་པ་ཉིད་དུ་མི་རུང་སྟེ། ཨཱཀྵེ་པ་བ་ད་བ་བྱ་ཏཱ་ནི་ཏ་སྱ་རྣམ་པར་སྨིན་པ་དང་བདག་བོའི་འབྲས་བུ་ཡང་སྟེ། འདི་
བདག་པོའི་འབྲས་བུ་ཉིད་ཅེས་བྱའོ། །རྣམ་པར་སྨིན་པ་ལ་ཡང་དེ་ལྟར་ཐུན་མོང་དུ་ལོངས་སྤྱད་པ་ཉིད་མི་འགལ་ལོ་ཞེ་ན། དེ་ལྟ་ན་མིག་ལ་སོགས་པ་རྣམས་ལ་ཡང་ཐལ་བར་འགྱུར་རོ། །འདོད་པ་ཉིད་དོ་ཞེ་ན། ཤ་ཟ་ལ་སོགས་པ་ཞུགས་པའི་མིག་ལ་སོགས་པས་མཐོང་བ་ལ་སོགས་པ་འདི་ཡང་གཞན་གྱི་རྐྱེན་གྱིས་གྲུབ་བས་རང་གི་གྲུབ་པའི་མཐའ་དང་འགལ་ལོ། །ཅི་ལྟར་གཞན་གྱི་མིག་གིས་གཞན་ལ་མཐོང་བ་བྱེད་པར་འགྱུར། གང་བཤད་པ་གང་ཞིག་དབང་པོའི་རྟེན་དེ་དང་ཐ་མི་དད་པའི་ཚོར་བ་ནི་ལོངས་སྤྱོད་ཅེས་བྱ་སྟེ། འདི་ལ་ཐུན་མོང་བ་མེད་དོ། །ཐུན་མོང་བའི་ལོངས་སྤྱོད་ཉིད་ནི་ཟིན་པའི་གཟུགས་ལ་སོགས་པ་རྣམས་སོ་སྙམ་པ་འདི་ལ་ཡང་ཅི་འདི་ལ་མཐོང་བ་ལ་སོགས་པ་ལ་ལོངས་སྤྱོད་དུ་འདོད་དམ། འོན་ཏེ་ཚོར་བ་ཡིན་ཞེས་པ་སྦྱར་བར་བྱའོ། །འདུས་མ་བྱས་ནི་དགེ་བ་དང་རྟག་པའི་ཕྱིར་རམ། འདུས་བྱས་ཐམས་ཅད་ཡོངས་སུ་བོར་བས་དོན་དུ་གཉེར་བའི་ཕྱིར་སྙིང་པོ་སྟེ། གཞན་དག་ན་རེ་རྟག་པའི་ཕྱིར་སྙིང་པོ་ཉིད་རྫས་ཞེས་བྱའོ། །གསེར་ལ་སོགས་པ་བཞིན་གྱིས་ཡོད་པ་ཉིད་ཙམ་ནི་མ་ཡིན་པའི་ཕྱིར་གཟུགས་ལ་སོགས་པ་བཞིན་ནོ་ཞེས་ཟེར་རོ། །འདི་དག་གི་སྐད་ཅིག་མ་ལ་ནི་རྒྱུ་མཐུན་པ་ཡོད་བ་མ་ཡིན་པས་སྐད་ཅིག་མ་སྟེ་གང་གི་ཕྱིར་ལམ་གྱི་སྐད་ཅིག་མ་དང་པོ་ནི་སྐལ་བ་མཉམ་པའི་རྒྱུ་མེད་པར་སྐྱེ་བས་རྒྱུ་མཐུན་ལས་བྱུང་བ་མ་ཡིན་ནོ། །འདུས་བྱས་ཀྱི་ཆོས་གཞན་ནི་རྒྱུ་མཐུན་པ་ལས་མ་བྱུང་བ་འགའ་ཡང་མེད་དོ། །སྡུག་བསྔལ་ལ་ཆོས་ཤེས་པའི་བཟོད་པའི་སྐད་ཅིག་མ་ནི་སྐལ་བ་མཉམ་པའི་རྒྱུ་ལ་བལྟོས་བ་མེད་པར་སྐྱེ་སྟེ། མཚུངས་པ་དེ་མ་ཐག་པའི་རྐྱེན་ཆེས་སྟོབས་དང་ལྡན་པའི་ཕྱིར་རོ། །དེ་སྟོབས་དང་ལྡན་པ་ཉིད་ནི་འཕགས་པའི་ལམ་དང་རྣམ་པ་མཚུངས་པའི་ཆོས་དུ་མས་གསོས་བཏབ་ཅིང་དེའི་བདག་ཉིད་དུ་གྱུར་བ་ནི་དོན་དེ་ལ་རབ་ཏུ་སྦྱོར་བའི་ཕྱིར་རོ། །རྒྱུད་གཅིག་ལ་མིག་ལ་སོགས་པ་གཉིས་སུ་ཐལ་བར་འགྱུར་བའི་ཕྱིར་ཏེ། གཉི་གའི་བྱ་བ་མཐོང་བའི་ཕྱིར་རོ། །མིག་ལ་སོགས་པ་ནི་རྣམ་པར་སྨིན་པ་ལས་སྐྱེས་པ་ཁོ་ན་སྟེ་རྒྱས་པ་ལས་བྱུང་བ་མ་ཡིན་ནོ། །སློབ་དཔོན་དཔལ་ལེན་ནི་སྒྲ་ཡང་རྣམ་པར་སྨིན་པ་ལས་སྐྱེས་པ་སྟེ།
གང་གི་ཕྱིར་རྒྱུ་གཞན་གྱི་རྣམ་པར་སྨིན་པའི་རང་བཞིན་རྣམས་སོ་ཞེས་ཟེར་རོ། །རྫས་སྤྱིའི་དབྱེ་བ་ལས་མིག་ལ་སོགས་པ་རྣམས་རྟེན་དང་རྒྱུད་གཅིག་ལ་རྣམ་པ་གཉིས་ཏེ་དེའི་རྒྱུའི་དབྱེ་བ་ལས་སོ། །དེ་ཉིད་ཀྱི་ཕྱིར་མིག་ལ་རྒྱུ་མཐུན་པ་ཡོད་པ་མ་ཡིན་ནོ། །དེའི་ཐ་དད་པའི་རྒྱུ་མེད་པའི་ཕྱིར་ཞེས་བྱ་བས་འདི་ལ་གནོད་པ་མེད་དོ། །ཅི་སྟེ་སྤྱིའི་རྒྱུད་མངོན་པར་བརྗོད་པའོ་ཞེས་བྱ་བ་ནི་སྐྱོན་མེད་དོ། །མིག་གི་རྣམ་པར་ཤེས་པའི་མཚུངས་པར་ལྡན་པ་སྐྱེད་པ་དེའི་བྱ་བ་ལ་རྣམ་པར་སྨིན་པ་ལས་སྐྱེས་བ་མེད་པ་ཉིད་དེ། མིག་དེའི་རྣམ་པར་ཤེས་བསྐྱེད་པའི་རྒྱུ་རྒྱས་པ་ལས་བྱུང་བ་མ་ཡིན་པས་རིགས་པ་མངོན་བར་བརྗོད་པར་འདོད་པ་ནི་ལྷའི་མིག་གོ །དེའི་རྣམ་པར་ཤེས་པ་སྐྱེད་པའི་རྒྱུ་མེད་པར་ཐལ་བ་ལས། ནུས་པ་མེད་པ་ནི་རྣམ་པར་སྨིན་པ་ལས་སྐྱེས་པའི་མིག་སྟེ། རྒྱས་པ་ལས་བྱུང་བ་མེད་པར་དེའི་རྣམ་པར་ཤེས་པ་སྐྱེ་བར་འདོད་ཅེས་བ་གཉི་ག་དེར་པ་སྐྱེད་པ་ལས་ནུས་པ་དང་ལྡན་ནོ། །དབང་པོ་རྣམས་ནི་དེ་ལྟ་མ་ཡིན་ནོ། །གཉིས་ཁས་བླངས་བ་ལ་ཁ་ཅིག་ཆོས་ཉིད་ཀྱིས་ཡོད་དོ། །གང་བཤད་པ། རྣམ་པར་སྨིན་པ་ལས་སྐྱེས་པའི་རྒྱུའི་ཕྱིར་སྒྲ་རྣམ་པར་སྨིན་པ་ལས་སྐྱེས་བ་ཞེས་བྱ་བ་སྔར་ཉིད་དུ་དེ་ལ་སོ་སོར་བྱས་ཏེ། འདོད་བའི་རྗེས་སུ་བྱེད་པའི་ཕྱིར་ལུས་ཀྱི་རྣམ་པར་རིག་བྱེད་བཞིན་དུ་སྒྲ་ཡང་རྣམ་པར་སྨིན་པ་མ་ཡིན་ཞེས་བྱ་སྟེ། རྒྱུའི་ཆོས་ཐམས་ཅད་འབྲས་བུ་ལ་འགྱུར་བ་མ་ཡིན་ནོ། །གཞན་དུ་ན་སྒྲའི་རྒྱུ་ཉིད་རྣམ་པར་སྨིན་པ་ལས་སྐྱེས་པ་ཉིད་ཀྱིས་དེར་འགྱུར་རོ། །དེའི་ཕྱིར་རྣམ་པར་སྨིན་པ་ལས་སྐྱེས་པ་རྣམས་ཀྱང་རྣམ་པར་སྨིན་བ་མ་ཡིན་པ་ལས་སྐྱེ་བའི་རྒྱུ་ལ་འགལ་ལོ། །འདོད་པའི་ཁམས་ན་ཞེས་རྒྱ་ཆེར་འབྱུང་བ་ལ། ཆོས་འདས་པ་དང་མ་འོངས་པ་རྣམས་ནི་དགེ་བ་དང་ཉོན་མོངས་པ་ཅན་དང་ལྡན་ལ། ད་ལྟར་བྱུང་བ་ནི་ལུང་དུ་མ་བསྟན་པ་དང་ལྡན་པ་ཉིད་ཡིན་ཏེ། ལུང་བསྟན་མིན་ཐོབ་ལྷན་ཅིག་སྟེ། །ཞེས་གསུངས་པའི་ཕྱིར་རོ། །འདོད་པའི་ཁམས་སྨོས་པ་ནི་གཟུགས་ཀྱི་ཁམས་རྣམ་པར་གཅད་པར་བྱ་བའི་ཕྱིར་རོ། །རིམ་པ་སྨོས་བ་ནི་རྫུས་ཏེ་སྐྱེ་བ་བསལ་བའི་ཕྱིར་རོ། །གང་གི་ཕྱིར་ནུར་ནུར་པོ་ལ་སོགས་པའི་གནས་སྐབས་ནི་ཉིང་མཚམས་སྦྱོར་པའི་གནས་སྐབས་ནས་བཟུང་ནས་
མིག་གི་རྣམ་པར་ཤེས་པ་དགེ་བ་དང་ཉོན་མོངས་པ་ཅན་དང་ལྡན་པ་ཁོ་ན་ཡིན་གྱི་མིག་གི་ཁམས་དང་ནི་མ་ཡིན་ནོ། །དེའི་ཕྱིར་གང་གི་ཚེ་མིག་གི་ཁམས་ཁོ་ན་དང་མི་ལྡན་པ་ལྡན་པ་འཐོབ་ཀྱི། མིག་གི་རྣམ་པར་ཤེས་པའི་ཁམས་དང་ནི་མ་ཡིན་ནོ། །སྔར་ཁོ་ན་ནས་ལྡན་ཟིན་པའི་ཕྱིར་རོ། །གཟུགས་མེད་པར་སྐྱེས་པ་རྣམས་གཉི་ག་དང་མི་ལྡན་པའི་ཕྱིར་གཟུགས་མེད་པ་ནས་ཤི་འཕོས་ནས་ཞེས་བཤད་དོ། །བསམ་གཏན་གཉིས་པ་ལ་སོགས་པ་སྨོས་པ་ནི། དེ་ན་མིག་གི་རྣམ་པར་ཤེས་པ་ལ་སོགས་པ་མེད་པའི་ཕྱིར་སྐྱེ་བ་ན་ཞེས་བྱ་བ་སྲིད་པ་བར་མའི་གནས་སྐབས་སུ་དེ་དབང་པོ་མ་ཚང་བ་མ་ཡིན་པའི་ཕྱིར་བསམ་གཏན་གཉིས་པ་ལ་སོགས་པར་སྐྱེ་བ་ལྟ་བར་བྱེད་དོ། །དེ་དག་མིག་གི་ཁམས་དང་ནི་མི་ལྡན་པ་ཡོད་པ་མ་ཡིན་ཏེ། དེ་དག་དབང་པོ་མ་ཚང་བ་མེད་པའི་ཕྱིར་རོ། །མིག་གི་རྣམ་པར་ཤེས་པ་ནི་དེའི་ས་མེད་པའི་ཕྱིར་བསམ་གཏན་དང་པོའི་ས་པའི་མིག་གི་རྣམ་པར་ཤེས་པ་ལུང་དུ་མ་བསྟན་པ་མངོན་དུ་བྱེད་དེ། དེའི་ཕྱིར་ལྟ་བའི་ཚེ་ཁོ་ན་མིག་གི་རྣམ་པར་ཤེས་པ་དང་ལྡན་པ་འཐོབ་ཀྱི་མིག་གི་ཁམས་དང་ནི་མ་ཡིན་ནོ། །དེ་དག་ནས་ཤི་འཕོས་ནས་ས་འོག་མར་སྐྱེ་བ་ནའོ་ཞེས་བྱ་བ་ནི། བསམ་གཏན་གཉིས་པ་ནས་ཤི་འཕོས་ནས་ཚངས་པའི་འཇིག་རྟེན་ནམ་འདོད་བའི་ཁམས་སུ་སྐྱེ་བ་སྟེ། དེ་ནི་མིག་གི་ཁམས་དང་ལྡན་ཟིན་པ་ཁོ་ན་ཡིན་ལ། མིག་གི་རྣམ་པར་ཤེས་པའི་ཁམས་ཁོན་དང་མི་ལྡན་པ་ལས། སྲིད་པ་བར་མ་དོའི་གནས་སྐབས་སུ་ལྡན་པ་འཐོབ་པོ། །གཟུགས་མེད་པའི་ཁམས་ནས་ཤི་འཕོས་ནས་ཞེས་བྱ་བ་ལ། དེ་ནི་སྔར་ནས་གཉི་ག་དང་མི་ལྡན་པ་ལས་ཚངས་པའི་འཇིག་རྟེན་ནམ་འདོད་པའི་ཁམས་སུ་སྐྱེ་བ་ན་ཅིག་ཅར་ལྡན་པ་འཐོབ་པོ། །གཉི་ག་མ་ཡིན་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ནི། གཟུགས་མེད་པའི་ཁམས་ནས་ཤི་འཕོས་ནས་དེ་ཉིད་དུ་སྐྱེ་བ་དང༌། ཚངས་པའི་འཇིག་རྟེན་ནས་དེ་ཉིད་དུ་སྐྱེ་བ་ནའོ། །འདོད་པའི་ཁམས་སུ་ཡང་མིག་ཐོབ་པ་ཉམས་པའོ། །མུ་དང་པོ་ནི་བསམ་གཏན་གཉིས་པ་ལ་སོགས་པར་སྐྱེ་བ་ཞེས་རྒྱ་ཆེར་འབྱུང་བ་ལ། བསམ་གཏན་གཉིས་པ་ལ་སོགས་པར་སྐྱེས་པ་ནི་མིག་གི་ཁམས་ཁོ་ན་དང་
ལྡན་གྱི་མིག་གི་རྣམ་པར་ཤེས་པ་ནི་མངོན་དུ་མི་བྱེད་དོ། །མིག་གི་རྣམ་པར་ཤེས་པའི་ཁམས་དང་ནི་མ་ཡིན་ཏེ་རང་གི་ས་པ་མེད་པའི་ཕྱིར་དང་བསམ་གཏན་དང་པོའི་ས་པ་ཡང་མངོན་དུ་མ་བྱས་པའི་ཕྱིར་རོ། །མུ་གཉིས་པ་ནི་འདོད་པའི་ཁམས་ན་ཞེས་རྒྱ་ཆེར་འབྱུང་སྟེ། དེ་ནི་མིག་གི་རྣམ་པར་ཤེས་པ་མ་འོངས་པ་ཁོ་ན་དང་ལྡན་གྱི་མིག་གི་ཁམས་དང་ནི་མ་ཡིན་ནོ། །མ་ཐོབ་པ་ནི་དམུས་ལོང་ངོ༌། །ཉམས་པ་ནི་མིག་ལ་གནོད་པ་བྱས་པས་ལོང་བའོ། །བསམ་གཏན་དང་པོར་སྐྱེས་པ་ནི་དེ་ན་དབང་པོ་མཆེད་པ་མེད་པའི་ཕྱིར་མིག་མ་ཐོབ་པ་དང་ཉམས་པ་ཞེས་མི་བྱའོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ནི་གཟུགས་མེད་པར་སྐྱེས་པ་སྟེ་དེ་ནི་གཉི་ག་དང་ལྡན་པ་མ་ཡིན་ནོ། །དེ་བཞིན་དུ་མིག་གི་ཁམས་དང་གཟུགས་ཀྱི་ཁམས་དག་དང་ཞེས་རྒྱ་ཆེར་འབྱུང་སྟེ། གང་མིག་གི་ཁམས་དང་མི་ལྡན་པ་འཐོབ་པ་དེ་གཟུགས་ཀྱི་ཁམས་དང་ཡིན་ནམ་ཞེ་ན་འདི་ལ་ནི་མུ་བཞི་མེད་དོ། །འོ་ན་ཅི་ཞེ་ན་ཚིག་ཕྱི་མ་དང་སྦྱོར་བ་སྟེ། གང་གཟུགས་ཀྱི་ཁམས་དང་མི་ལྡན་པ་ཐོབ་པ་དེ་མིག་གི་ཁམས་དང་ཡིན་ཏེ། གཟུགས་མེད་པའི་ཁམས་ནས་ཤི་འཕོས་ནས་འདོད་པའི་ཁམས་དང་གཟུགས་ཀྱི་ཁམས་སུ་སྐྱེ་བ་ནའོ། །མིག་གི་ཁམས་ཁོ་ན་དང་མི་ལྡན་པ་ལྡན་པ་འཐོབ་པ་ཡིན་གྱི་སྔན་ས་ལྡན་པའི་ཕྱིར་གཟུགས་ཀྱི་ཁམས་དང་མ་ཡིན་པ་ཡོད་དེ་རིམ་གྱིས་མིག་གི་དབང་པོ་ཐོབ་པའོ། །གང་མིག་གི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡིན་ནམ་ཞེ་ན་འདིར་ཡང་མུ་བཞི་མི་རིགས་ཏེ། འོན་ཅི་ཞེ་ན་ཚིག་སྔ་མ་དང་སྦྱོར་བ་སྟེ། གང་མིག་གི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡང་ཡིན་ནོ། །གཟུགས་ཀྱི་ཁམས་ཁོ་ན་དང་ཡིན་གྱི་མིག་གི་ཁམས་དང་མ་ཡིན་པ་ཡང་ཡོད་དེ་མིག་མ་ཐོབ་པ་དང་ཉམས་པའོ། །གང་མིག་གི་རྣམ་པར་ཤེས་པ་དང་མི་ལྡན་པ་ལྡན་པ་འཐོབ་པ་དེ་གཟུགས་ཀྱི་ཁམས་དང་ཡང་ཡིན་ན། དེར་མུ་བཞི་སྟེ་མུ་དང་པོ་ནི་བསམ་གཏན་གཉིས་པ་ལ་སོགས་པར་སྐྱེས་པ་མིག་གི་རྣམ་པར་ཤེས་པ་མངོན་དུ་བྱེད་པ་དང༌། བསམ་གཏན་གཉིས་པ་ལ་སོགས་པན་ས་ཤི་འཕོས་ནས་འདོད་པའི་ཁམས་དང་ཚངས་པའི་འཇིག་རྟེན་དུ་སྐྱེ་བ་ནའོ། །གཉིས་པ་ནི་གཟུགས་མེད་པ་ནས་ཤི་འཕོས་ནས་བསམ་གཏན་གཉིས་པ་ལ་སོགས་པ་དག་ཏུ་སྐྱེ་བ་ན་སྟེ། དེ་ནི་གཟུགས་ཀྱི་ཁམས་ཁོ་ན་དང་མི་ལྡན་པ་ལྡན་པ་འཐོབ་ཀྱི།
མིག་གི་རྣམ་པར་ཤེས་པའི་ཁམས་དང་ནི་མ་ཡིན་ཏེ། བསམ་གཏན་གཉིས་པ་ལ་སོགས་པ་ས་པའི་མིག་གི་རྣམ་པར་ཤེས་པ་མེད་པའི་ཕྱིར་རོ། །མུ་གསུམ་པ་ནི་གཟུགས་མེད་པའི་ཁམས་ནས་ཤི་འཕོས་ནས་བསམ་གཏན་དང་པོ་དག་ཏུ་སྐྱེ་བ་ན་སྟེ། དེ་ནི་གཟུགས་ཀྱི་ཁམས་དང་མི་ལྡན་པ་འཐོབ་ལ། མིག་གི་རྣམ་པར་ཤེས་པའི་ཁམས་དང་ཡང་ཡིན་ནོ། །མུ་བཞི་པ་ནི་གཟུགས་མེད་པའི་ཁམས་སུ་སྐྱེས་པ་དེ་ནས་ཤི་འཕོས་ནས་དེ་ཉིད་དུ་སྐྱེ་བ་དང༌། འདོད་པའི་ཁམས་དང་བསམ་གཏན་དང་པོར་སྐྱེས་པ་དེ་དག་དེ་ནས་ཤི་འཕོས་ནས་དེ་དག་ཉིད་དུ་སྐྱེ་པའོ། །གང་མིག་གི་རྣམ་པར་ཤེས་པའི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡང་ཡིན་ནམ་ཞེ་ན། འདིར་ཡང་ཚིག་སྔ་མ་དང་སྦྱོར་བ་སྟེ། གང་མིག་གི་རྣམ་པར་ཤེས་པའི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡང་ཡིན་ཏེ། འདོད་པའི་ཁམས་དང་བསམ་གཏན་དང་པོར་སྐྱེས་པ་དང༌། བསམ་གཏན་གཉིས་པ་ལ་སོགས་པར་སྐྱེས་པ་མིག་གི་རྣམ་པར་ཤེས་པ་མངོན་དུ་བྱེད་པ་ནའོ། །གཟུགས་ཀྱི་ཁམས་ཁོ་ན་དང་ཡིན་གྱི་རྣམ་པར་ཤེས་པའི་ཁམས་དང་མ་ཡིན་པ་ཡང་ཡོད་དེ། བསམ་གཏན་གཉིས་པ་ལ་སོགས་པར་མིག་གི་རྣམ་པར་ཤེས་པ་མངོན་དུ་མི་བྱེད་པ་ནའོ། །དམུས་ལོང་འདོད་པའི་ཁམས་སུ་སྐྱེ་བ་ན། དེའི་ས་པ་ལས་གཞན་པའི་སྲིད་པའི་མིག་གི་རྣམ་པར་ཤེས་པའི་ཁམས་འཐོབ་བོ། །དེ་ལྟར་སྲིད་པ་འཆོལ་བ་ཡོངས་སུ་སྤང་བའམ། རྣམ་པར་སྨིན་པ་ལ་སོགས་པའི་དབང་གིས་སྲིད་པ་རྣམ་པར་གཞག་པར་བྱའོ་ཞེས་སོ། །ཨཱ་ཀྵེ་པ་བ་ད་འདི་ལ་ཡང་དགོངས་པ་མི་ཤེས་ཏེ། གལ་ཏེ་དམུས་ལོང་སྐྱེ་བ་ལས་སྔར་གཞན་དུ་མེད་དེ་ཁྱད་པར་ལས་བྱུང་བའི་དོན་མེད་དོ། །སྐྱེ་བ་ན་མིག་གི་རྣམ་པར་ཤེས་པ་འཐོབ་པ་མ་ཡིན་ཏེ་སྔོན་ཉིད་དུ་ལྡན་པའི་ཕྱིར་རོ། །སྲེད་པའི་དབང་གིས་སྲིད་པ་རྣམ་པར་གཞག་པ་དང༌། རྣམ་པར་སྨིན་པའི་དབང་གིས་སྐྱེ་བ་རྣམ་པར་གཞག་པ་འདི་ལ་མི་འཐད་པ་ཅི་ཞིག་ཡོད། ནང་གི་བཅུ་གཉིས་ཞེས་བྱ་བ་ལ། འདི་ཅི་ཞིག་ཏུ་གཟུང་བར་བྱ་ཞེ་ན། གཉི་ག་ལྟར་ཡང་ངེས་པར་གཟུང་བར་བྱ་སྟེ། འདིས་གཞན་དག་ཕྱིའི་ཞེས་བྱ་བ་བཤད་
པར་འགྱུར་རོ། །གྲངས་ཙམ་ཞིག་བསྟན་པས་ཁྱད་པར་རྟོགས་པར་མི་འགྱུར་བས་དེའི་ཕྱིར་བཅུ་གཉིས་གང་དག་ཅེ་ན་ཞེས་དྲིས་སོ། །དེ་དམིགས་ཀྱི་ས་དགར་བའི་ཕྱིར། གཟུགས་ལ་སོགས་མ་གཏོགས་ཞེས་བྱ་བ་གསུངས་སོ། །བདག་གི་དབང་དུ་བྱས་པས་ན་ནང་གི་སྟེ། ནང་གི་ཉིད་ནི་ནང་གིའོ། །བདག་མེད་ན་ཇི་ལྟར་ནང་གིའམ་ཕྱིར་འགྱུར་ཏེ། ཚུལ་ཁྲིམས་མེད་པར་ནི་ལྷག་པའི་ཚུལ་ཁྲིམས་ཀྱི་ལྷག་པར་མི་འགྱུར་བ་བཞིན་ནོ་ཞེ་ན། སེམས་ནི་ངར་འཛིན་པའི་རྟེན་ཡིན་པའི་ཕྱིར་ཞེས་རྒྱ་ཆེར་འབྱུང་སྟེ། བདག་ཏུ་སྨྲ་བ་རྣམས་ཀྱི་ངར་འཛིན་པའི་རྟེན་ལ་བདག་ཅེས་བརྗོད་དེ། འདི་ལྟར་བདག་གི་ཡོན་ཏན་ཉིད་དམ། བདག་གི་ཡུལ་ཅན་ཉིད་དུ་རྟོག་པས་ཀྱང་འཛིན་པ་འཇུག་གོ །ངར་འཛིན་པ་ཡང་སེམས་ལ་བརྟེན་ཏེ་དེ་ལས་མ་གཏོགས་པའི་བདག་མེད་པའི་ཕྱིར་རོ། །འདི་ལ་བདག་ཏུ་ང་རྒྱལ་བཞག་པས་ན་སེམས་ཁོ་ན་བདག་ཡིན་ལ། སེམས་ལས་བྱུང་བ་རྣམས་དང་སེམས་ལ་བརྟེན་པའི་ཕྱིར་སེམས་ཁོ་ན་ལ་བདག་ཏུ་ཉེ་བར་འདོགས་སོ། །འདིར་སེམས་ལ་བདག་ཏུ་འདོགས་སོ་ཞེས་བྱ་བ་འདི་ཡང་ཇི་ལྟར་རྟོགས་ཤེ་ན་དེའི་ཕྱིར། མཁས་པས་བདག་ཉིད་དུལ་བས་ནི། །ཞེས་རྒྱ་ཆེར་འབྱུང་ངོ༌། །འདི་ཡང་ལུང་གཞན་ལ་བལྟོས་ཏེ་དོན་དེ་ཉིད་ཀྱི་ཤེས་བྱེད་ཡིན་གྱི། ཡན་གར་བ་ནི་མ་ཡིན་ནོ་ཞེས་བསྟན་པའི་ཕྱིར་བཅོམ་ལྡན་འདས་ཀྱིས་གཞན་ལས་ཞེས་རྒྱ་ཆེར་གསུངས་ཏེ། འདི་ལས་ནི། སེམས་དུལ་བས་ནི་བདེ་བ་འདྲེན། །ཞེས་སེམས་དུལ་བ་གསུངས་སོ། །དེའི་ཕྱིར་འདིར་བདག་གི་སྒྲ་སེམས་ཁོ་ན་ལ་མངོན་པར་བཞེད་དོ་ཞེས་བྱ་བར་ཤེས་པར་བྱའོ། །བདག་ཉིད་ལེགས་པར་དུལ་བ་ཡི། །མཁས་པས་མཐོ་རིས་ཐོབ་པར་འགྱུར། །ཞེས་སོ། །རྟེན་གྱི་དངོས་པོར་ཉེ་བར་གྱུར་བའི་ཕྱིར་ན་ཞེས་བྱ་བ་ལ། མིག་ལ་སོགས་པ་རྣམས་ལ་གང་ཞིག་གཟུགས་ལ་སོགས་པ་ངག་ཡོ་དེ་པ་མ་ཡིན་པས། སེམས་ཡུལ་ན་མི་གནས་པའི་རྟེན་གྱི་དངོས་པོ་གང་ཞིག་ཡོང་ཅེ་ན། ཁྱད་པར་གང་ཞིག་ཡོད་ན་སེམས་དེ་དག་འགྱུར་བའི་རྗེས་སུ་བྱེད་པར་འགྱུར་ལ། དེ་དག་འགྱུར་བའི་རྗེས་སུ་བྱེད་པ་ལས་ཀྱང་རྣམ་པར་ཤེས་པ་དེ་ཡུལ་ན་མི་གནས་ཀྱང་མིག་ལ་
སོགས་པ་དག་ཁོ་ན་ལ་མངོན་གྱི། གཟུགས་ལ་སོགས་པ་དག་ལ་ནི་མ་ཡིན་ཏེ། འདི་ལྟར་ཚོར་བ་བདེ་བ་དང་སྡུག་བསྔལ་དང་མཚུངས་པར་ལྡན་པ་དེ་ནི་ལུས་གྱི་ཡུལ་ལ་ཡོངས་སུ་གཅོད་ཀྱི། གཟུགས་ལ་སོགས་པའི་ཡུལ་གྱི་ཕྱོགས་ལ་ནི་མ་ཡིན་ནོ། །དེའི་ཕྱིར་ཁྱད་པར་འདི་ལས་མིག་ལ་སོགས་པ་དང་གཟུགས་ལ་སོགས་པ་རྣམས་རྣམ་པར་ཤེས་པ་བསྐྱེད་པའི་རྒྱུར་ཁྱད་པར་མེད་ཀྱང་རྟེན་ཉིད་དང་ཡུལ་ཉིད་དུ་འགྲུབ་པ་ཡིན་ཏེ། དེའི་ཕྱིར་ནང་གི་དང་ཕྱིའི་ཉིད་ཀྱང་ཡིན་པའོ། །འདི་ལ་སྐྱེད་པ་དང་གནས་པ་གཅིག་དང་འགོག་པ་འབྲས་བུ་གཅིག་ལ་སོགས་པ་རྣམས་ལ་སེམས་དང་སེམས་ལས་བྱུང་བ་རྣམས་ལ་རྒྱུ་ཅི་ཞེ་ན། གནས་བརྟན་འདུས་བཟང་ནི། སེམས་ལ་ནང་དང་སེམས་ལས་བྱུང་བ་རྣམས་ལ་ཕྱི་ཞེས་ཟེར་རོ། །གཟུགས་ལ་སོགས་པ་ཡུལ་གྱི་ངོ་བོ་ཡིན་པའི་ཕྱིར་རིང་བ་ཉིད་ཕྱིའི་རྒྱུ་དང༌། མིག་ལ་སོགས་པ་སེམས་དང་སེམས་ལས་བྱུང་བའི་རྟེན་གྱི་ངོ་བོ་ཡིན་པའི་ཕྱིར་ཉེ་བ་ཉིད་དང་ནང་ཉིད་དུ་བཤད་པ་མ་ཡིན་ནམ་ཞེ་ན། དེ་ལྟར་བཤད་པའི་རྒྱུད་དུ་ཡོངས་སུ་དྲི་བ་ནི། གཞུང་ཁ་བསྐང་བ་འབའ་ཞིག་ཏུ་མངོན་ཏེ། གང་བཤད་པ་སེམས་ལས་བྱུང་བ་རྣམས་ཁོ་ན་སུ་ཏ་རེ། ནང་ཉིད་དང་སེམས་ཀྱི་རྟེན་ཉིད་དུ་ཉེ་བར་གྱུར་པའི་ཕྱིར་རོ་ཞེས་བྱ་བ་འདི་ཡང་མ་འབྲེལ་བ་ལྟ་བུར་མངོན་ནོ། །གང་གི་ཕྱིར་ཕན་འདོགས་པ་ཉེ་བ་དང་རིང་བ་ཉིད་ཀྱིས་ནང་དང་ཕྱི་རོལ་དུ་འདོད་ན། མིག་ལ་སོགས་པ་ཐུན་མོང་མ་ཡིན་པའི་རྟེན་གྱི་དངོས་པོས་ཕན་འདོགས་པ་ཉིད་ཀྱིས་ཉེ་བ་དང་ནང་ཞེས་བརྗོད་པར་བྱ་ཞིང༌། གཟུགས་ལ་སོགས་པ་རྣམས་ནི་ཡུལ་གྱི་ངོ་བོས་ཕན་འདོགས་པ་ཉིད་ཀྱི་རིང་པ་དང་ཕྱི་རོལ་ཏེ་དེ་ལྟར་རྒྱ་ཆེར་རྣམ་པར་བཤད་དོ། །གང་ཡང་སེམས་གང་ཅི་ཡང་རུང་བ་ངར་འཛིན་པའི་རྟེན་ཡིན་པའི་ཕྱིར་ཐམས་ཅད་ནང་ཡིན་ནོ་ཞེས་པ་ནི། ངར་འཛིན་པའི་རྟེན་ཡིན་པའི་ཕྱིར་སེམས་སུ་གདགས་པར་མི་རུང་སྟེ། བདག་གི་ཡུལ་ནི་ངར་འཛིན་པའོ་ཞེས་བདག་ཏུ་སྨྲ་བ་རྣམས་ལ་རབ་ཏུ་གྲགས་པས་དེ་ཉིད་ཀྱི་ཕྱིར་དེ་ལྟར་བཤད་དོ། །བདག་གི་དངོས་པོ་ཡང་བདག་ཏུ་འཛིན་པའི་རྟེན་ཡིན་པའི་ཕྱིར་སེམས་ལ་བདག་ཏུ་ཉེ་བར་བཏགས་ཏེ། དེའི་ཕྱིར་ནང་དང་ཕྱི་རོལ་
ཏུ་རྣམ་པར་གཞག་གོ །གང་ཡང་འདོད་ཆགས་ལ་སོགས་པའི་རྟེན་ཡིན་པའི་ཕྱིར་ཐམས་ཅད་ཉོན་མོངས་པ་དང་མཚུངས་པར་ལྡན་པའི་ཁྱད་པར་གྱི་རྒྱུ་མེད་པས་ངར་འཛིན་པའི་རྟེན་ཡིན་པའི་ཕྱིར་སེམས་ལ་བདག་ཅེས་བཏགས་པས་བདག་ཏུ་ནི་མི་འགྱུར་ཏེ་དེའི་ངང་བཞིན་གཞན་ཡིན་པའི་ཕྱིར་རོ། །གཞན་ལ་ཡང་བདག་ཏུ་འཛིན་པ་ལ་འགལ་བ་མེད་དོ། །པདྨ་ཅན་བཞིན་འདོད་ཆགས་ལ་སོགས་པའི་རྟེན་ཡིན་པའི་ཕྱིར་དེའི་སེམས་ཉོན་མོངས་པ་ཅན་ཁོ་ནར་འགྱུར་བ་ནོ་པ་ཙརྻ་ཏེ། དེ་ལྟར་ཡུལ་ལ་རྣམ་པར་གཞག་གོ །ས་ཨེ་པཱ་ཧ་ས་ཏ་ཏ་མ་བདག་དེ་ཡང་ངར་འཛིན་པའི་རྟེན་ཡིན་པའི་ཕྱིར་སེམས་ནི་རྟག་ཏུ་ཡུལ་ལ་ན་ཏ་ཏི་འདི་འགའ་ཞིག་གི་ཚེ་ཡུལ་མེད་པར་འགྱུར་རོ་ཞེས་བྱ་བ་དེ་ལྟ་བུ་ནི་མ་ཡིན་ཏེ་སེམས་ལས་བྱུང་བ་རྣམས་ལ་ཡང་ཐལ་བར་འགྱུར་རོ་ཞེ་ན། ཉེ་བར་མི་སྲིད་དོ།། ཡིད་སྔོན་དུ་འགྲོ་བའི་ཕྱིར་དང༌། གཅིག་དེ་ཉིད། སྨྲས། རྟག་ཏུ། པུར་སྤྱོད་པར་གསུངས་པའི་ཕྱིར་ཐལ་བ་མེད་དོ། །དེ་ལ་བརྟེན་པ་ཁོ་ན་ཡུལ་དུ་འགྱུར་བའི་ཕྱིར་སེམས་ལས་བྱུང་བ་རྣམས་ཀྱང་སེམས་དུལ་བས་དུལ་བར་བསྟན་པ་ལྟ་བུའོ། །ངེས་པར་བསྟན་པ་འདི་རྣམས་ནི་སེམས་གཙོ་བོ་སྟེ་པྲ་ཏི་རཱུ་པ་ཀཱ་ནི་སེམས་ལས་བྱུང་པ་རྣམས་ཡུལ་རྣམས་ལ་པ་ཏ་ཏ་མ་པྲ་ཏི་ཥེ་དྷ་ཀཱ་ནི་བསྟན་དུ་བསྟན་པའི་རྒྱུ་མཚན་གཙོ་བོ་མ་ཡིན་ནོ། །འོ་ན་ཅི་ཞེ་ན། ས་ཏ་ཏ་མ་ཏ་ན་ཙཱཪྻཾ་བ་ལང་གི་སྒྲ་བཞིན་ཆགས་ཏེ། གང་གི་ཕྱིར་གཞན་ལ་སྒྲའི་རྒྱུ་མཚན་ཡོད་ཀྱང་མི་འཇུག་པ་དེའི་ཕྱིར་སེམས་སེམས་རྒྱ་དཔེ་ན་ཏི་མེད། ལས་བྱུང་བ་རྣམས་ལ་ཐལ་བ་འདིར་ཡང་རྟག་ཏུ། གནས་པ། རྣམ་ཤེས། ནི་བཱརྻཿཡང་སེམས་ལས་བྱུང་བ་རྣམས་ཀྱང་བདག་དང་རྟག་ཏུ། འདོད་པའམ་བཞེད་པ། སྤྱོད་བ་མིན། འཇིག་ཚོགས་ལ་ལྟ་བ་ཅི་ཡིས་ཤེ་ན། དེ་ལྟར་ཡང་ཉེ་བར་ལེན་པའི་ཕུང་པོའི་ཡུལ་ཡིན་པའི་ཕྱིར་རོ། །འདིར་རྟེན་དང་དམིགས་པའི་ངོ་བོས་ངར་འཛིན་པའི་རྟེན་ཉིད་སེམས་ལ་འདོད་ཀྱི་དམིགས་པའི་ངོ་བོ་ཁོ་ནས་མ་ཡིན་པ་སེམས་ལས་བྱུང་བ་རྣམས་ལ་ངར་འཛིན་པའི་རྟེན་ཉིད་མེད་དོ། །གལ་ཏེ་ནང་གི་མིག་ལ་སོགས་པ་དག་རྣམ་པར་ཤེས་པའི་རྟེན་གྱི་དངོས་པོ་ཡིན་ན། དེ་ལྟ་འོ་ན་རྣམ་པར་ཤེས་པའི་ཁམས་དྲུག་པོ་དག་ཅེས་བྱ་བ་རྒྱས་པར་འབྱུང་ངོ༌། །དེ་དག་ཡིད་ཀྱི་
ཁམས་ཉིད་དུ་མ་གྱུར་པ་ཞེས་བྱ་བ་ནི་དྲུག་པོ་འདས་མ་ཐག་པའི་གནས་སྐབས་མ་ཐོབ་པའོ། །ད་ལྟར་བྱུང་བའམ་མ་འོངས་པ་ནི་སེམས་ཀྱི་རྟེན་མ་ཡིན་ཏེ། མཚུངས་པ་དེ་མ་ཐག་པ་འདས་པའི་གནས་སྐབས་ནི་མིག་ལ་སོགས་པའི་རྣམ་པར་ཤེས་པའི་ཁམས་ཉིད་དུ་རྣམ་པར་གཞག་པ་མ་ཡིན་ནོ། །དྲུག་པོ་འདས་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ། །ཞེས་དེའི་ཚེ་ཡིད་ཀྱི་ཁམས་ཉིད་དུ་རྣམ་པར་གཞག་པའི་ཕྱིར་རོ། །གང་གི་ཚེ་ཡིན་པ་དེའི་ཚེ་ན་ཡང་ཞེས་བྱ་བ་ལ་འདས་པའམ་ད་ལྟར་བྱུང་བ་ཡིན་ཡང་རུང་སྟེ། མིག་གི་རྣམ་པར་ཤེས་པའི་ཁམས་ལ་སོགས་པ་དེ་དག་སྟེ་ཡིད་ཀྱི་ཁམས་ནི་མ་ཡིན་ནོ། །རྣམ་པར་ཤེས་པ་འདས་པ་ལ་ནི་སྔར་མ་བྱུང་བའི་ཡིད་ཀྱི་ཁམས་ཉིད་དུ་འགྱུར་པའམ། མིག་ལ་སོགས་པའི་རྣམ་པར་ཤེས་པའི་ཁམས་ཉིད་སྔར་ཡོད་པའམ་ལྡོག་པ་མེད་དེ། རྣམ་པར་ཤེས་པ་ཉིད་རྣམ་པར་ཤེས་པ་གཞན་གྱི་རྟེན་གྱི་དངོས་པོས་ཡིད་ཀྱི་ཁམས་སུ་འཇོག་པའི་ཕྱིར་རོ། །དེའི་ཕྱིར་ཡིད་ཀྱི་ཁམས་ཀྱི་མཚན་ཉིད་ལས་མི་འདའོ། །དེ་ལྟ་མ་ཡིན་ན་ཞེས་གསུངས་པ་ལ། གལ་ཏེ་རྣམ་པར་ཤེས་པ་ད་ལྟར་བྱུང་བ་དང་མ་འོངས་པ་ཡིད་ཀྱི་ཁམས་སུ་མི་འགྱུར་ན་ནི་འདས་པ་ཡང་ཡིད་ཀྱི་ཁམས་དང་མིག་ལ་སོགས་པའི་ཤེས་པར་མི་འགྱུར་རོ། །དེ་ལྟ་ཡིན་ན་ཡིད་ཀྱི་ཁམས་འདས་པ་ཁོ་ན་ཡིན་པར་འགྱུར་གྱི་ཞེས་བྱ་བ་རྒྱས་པར་འབྱུང་ངོ༌། །གལ་ཏེ་ཡིད་ཀྱི་ཁམས་འདས་པ་ཁོ་ན་ཡིན་པར་གྱུར་ན་ཅིར་འགྱུར་ཞེ་ན། དེའི་ཕྱིར་ཁམས་བཅོ་བརྒྱད་པོ་དག་ནི་ཞེས་རྒྱ་ཆེར་གསུངས་སོ། །ཡང་ཅིའི་ཕྱིར་དེ་ལྟར་འདོད་ཅེ་ན། དེའི་ཕྱིར་གལ་ཏེ་ཡང་རྣམ་པར་ཤེས་པ་མ་འོངས་པ་དང་ཞེས་བྱ་བ་ལ་སོགས་པ་གསུངས་ཏེ། དེ་ཉིད་ལ་རྒྱུ་བཤད་པ་ནི་མཚན་ཉིད་ནི་དུས་རྣམས་སུ་འཁྲུལ་པ་མེད་དོ་ཞེས་བྱ་བ་སྟེ། འཁྲུལ་པ་རྣམས་ནི་མ་འོངས་པ་གཞན་དག་ཡིན་པ་ད་ལྟར་བྱུང་བ་གཞན་དག་ཡིན་ལ་འདས་པ་གཞན་ཡིན་པ་སྟེ། ཐམས་ཅད་འབད་པ་དོན་མེད་པར་འགྱུར་རོ། །དངོས་པོ་དང་དངོས་པོ་མེད་པ་དག་ལ་ཡང་སོ་དྷཱ་ཁྱ་ནི་རུ་པཱ་ཁྱ་དྭེ་ནཱ་ནཱ་དེ་དུས་བཤད་པ་ཉེ་བར་བཤད་པ་མེད་པ་ཉིད་ཀྱི། མཚན་ཉིད་
མི་མཐུན་པའི་ཕྱིར་ཕན་ཚུན་འཇུག་པ་ཡང་མི་རིགས་ཏེ། དེའི་རྣམ་པར་ཤེས་པ་རྣམས་རྣམ་པར་ཤེས་པ་གཞན་གྱི་རྟེན་གྱི་དངོས་པོ་རང་བཞིན་དུ་དུས་ཐམས་ཅད་དུ་ཡོད་པས་དེ་ནི་འདས་པ་རྣམས་ལ་འཁྲུལ་པ་མེད་དོ་ཞེས་བཤད་དོ། །དྲུག་པོ་འདས་མ་ཐག་པ་ཡི། །རྣམ་ཤེས་དང་ཡིན་དེ་ཡིད་དོ། །ཞེས་སོ། །ཆོས་ཞེས་བྱ་བ་ནི་བརྟེན་པ་དང་བཅས་པ་ཞེས་བྱ་བ་ལ། རྟེན་དང་བཅས་པ་ཁོ་ནའོ་ཞེས་ངེས་པར་གཟུང་བ་སྟེ་ལྷག་མ་ནི། དེ་དང་མཚུངས་པ་དག་ཀྱང་ཡིན། །ཞེས་གསུངས་པའི་ཕྱིར་རོ། །འདི་ནི་རྟེན་དང་བཅས་པའི་ཡུལ་གྱི་མཚན་ཉིད་དེ། ཡུལ་གང་ཞིག་རྣམ་པར་ཤེས་པ་གང་གི་ཡུལ་དུ་ངེས་ལ། དེ་ལྟ་ཡིན་དང་ཇི་ལྟར་ཡིད་ཀྱི་རྣམ་པར་ཤེས་པ་ནི་ཆོས་ཀྱི་ཁམས་ཐུན་མོང་མ་ཡིན་པའི་ཡུལ་དུ་ངེས་པ་ཉིད་ཀྱི་ཕྱིར། གལ་ཏེ་དེ་ལ་རྣམ་པར་ཤེས་པ་དེ་སྐྱེས་པ་ཞེས་བྱ་བ་རྒྱ་ཆེར་འབྱུང་ངོ༌། །སྐྱེ་བའི་ཆོས་ཅན་ཞེས་བྱ་བ་ནི་མི་སྐྱེ་བའི་ཆོས་ཅན་ལས་ཁྱད་པར་དུ་བྱེད་པའོ། །དེ་ལྟར་ན་དེ་ནི་ཡུལ་གཟུང་བ་འཛིན་པར་འགྱུར་བས་རྟེན་པ་དང་བཅས་པ་ཞེས་བྱའོ། །གང་ལ་ཡིད་ཀྱི་རྣམ་པར་ཤེས་པ་ཞེས་བྱ་བ་ལ་སོགས་པ་ལ། ཡིད་ནི་ཤེས་བྱ་མ་ལུས་པའི་ཡུལ་ཅན་ཡིན་པའི་ཕྱིར། གང་ལ་ཡིད་ཀྱི་རྣམ་པར་ཤེས་པ་མཐའ་ཡས་པ་མ་སྐྱེས་པའམ་སྐྱེ་བར་མི་འགྱུར་པའི་ཆོས་ཀྱི་ཁམས་དུས་གསུམ་བའམ་དུས་མེད་པ་གང་ཡིན་པ་དེ་ནི་འགའ་ཡང་མེད་དོ། །མཐའ་ཡས་བ་ཞེས་བྱ་བ་ནི་ཡོངས་སུ་བགྲང་དུ་མེད་པའི་ཕྱིར་རོ། །རང་གི་བདག་ཉིད་ལ་བྱེད་པ་འགལ་པའི་ཕྱིར་དང༌། དམིགས་པ་མཚུངས་པའི་ཕྱིར་དང༌། ཤིན་ཏུ་ཉེ་བའི་ཕྱིར་རང་གི་ངོ་བོ་དང་ལྷན་ཅིག་འབྱུང་བ་ལ་དམིགས་པ་མ་ཡིན་ནོ། །ལྷན་ཅིག་འབྱུང་བ་སྨོས་པས་མཚུངས་པར་ལྡན་པ་ཡང་གཟུང་ངོ༌། །འོ་ན་ཁམས་བཅོས་རྒྱད་པ་ཐམས་ཅད་བདག་མེད་པའི་ཤེས་པའི་ཡུལ་ཡིན་པའི་ཕྱིར། ཆོས་ཀྱི་ཁམས་བཞིན་དུ་རྟེན་པ་དང་བཅས་པར་འགྱུར་རོ་ཞེ་ན་མི་འགྱུར་ཏེ། དེ་དག་ནི་རང་གི་བྱེད་པ་ལ་བལྟོས་ནས་རྟེན་པ་དང་བཅས་པ་དང༌། དེ་དང་མཚུངས་པ་ཉིད་དུ་རྣམ་པར་འཇོག་པའི་ཕྱིར་རོ། །རང་གི་ཡུལ་གྱི་བྱེད་པས་ཞེས་ཡུལ་སྨོས་པ་ནི་སྐལ་བ་མཉམ་པའི་རྒྱུའི་རྟེན་ལ་སོགས་
པའི་དངོས་པོའི་བྱེད་པ་གཞན་བཟློག་པའི་དོན་ཏོ། །གཟུགས་རྣམས་མ་མཐོང་བར་འགག་པ་དང་ཞེས་བྱ་བ་ལ། མིག་ད་ལྟར་བ་ནི་འགག་པ་ལ་མངོན་དུ་ཕྱོགས་པའི་ཕྱིར་འགག་པ་ཞེས་བྱ་སྟེ། མི་རྟག་པ་ཉིད་ཀྱི་བྱེད་པ་གནས་པའི་ཕྱིར་རོ། །མ་འོངས་པ་ནི་སྐྱེ་བའི་ཆོས་ཅན་ཡིན་པའི་ཕྱིར་འགག་པར་འགྱུར་བ་ཞེས་བྱ་སྟེ། དེ་ནི་གདོན་མི་ཟ་བར་ཇི་ལྟར་སྐྱེ་བ་དེ་བཞིན་དུ་འགག་པར་འགྱུར་བ་ཡིན་ནོ། །རྣམ་པར་ཤེས་པ་དང་ལྡན་པ་དང་ལྡན་པ་མ་ཡིན་པ་ཞེས་བྱ་བ་ནི། ཇི་ལྟར་མིག་ད་ལྟར་བ་འགའ་ཞིག་ནི་རྣམ་པར་ཤེས་པ་དང་ལྡན་པ་ཡིན་ལ། འགའ་ཞིག་ནི་མི་ལྡན་པ་ཡིན་པ་དེ་བཞིན་དུ་མི་སྐྱེ་བའི་ཆོས་ཅན་ཡང་ཡིན་ནོ། །ཡིད་ནི་མི་སྐྱེ་བའི་ཆོས་ཅན་ཁོ་ན་དེ་དང་འདྲ་བ་ཡིན་ཏེ། སྐྱེས་པ་གདོན་མི་ཟ་བར་དམིགས་པ་འཛིན་པ་ཡིན་ནོ། །འདི་ལྟར་དམིགས་པ་མེད་པའི་ཤེས་པ་སྐྱེ་བ་ནི་ཡོད་པ་མ་ཡིན་ནོ། །རང་གི་དབང་པོའི་བྱེད་པས་ཞེས་བྱ་བ་ལ། དབང་པོའི་བྱེད་པ་སྨོས་པ་སྐལ་བ་མཉམ་པའི་རྒྱུ་ལ་སོགས་པའི་བྱེད་པ་བསལ་བར་བྱེད་པའི་ཕྱིར་རོ། །དྲི་ལ་སོགས་པ་ནི་གང་དག་གཅིག་གིས་ཞེས་བྱ་བ་ལ། རེས་འགའ་ཞིག་རྐྱེན་ཉེ་ན་དེ་དག་ཉིད་གཞན་གྱི་སྣ་ལ་སོགས་པའི་ཡུལ་དུ་སྐྱེས་ནས་དེ་དག་གི་རྣམ་པར་ཤེས་པ་སྐྱེད་པར་འགྱུར་རོ། །གལ་ཏེ་ཆོས་ཀྱི་ཁམས་ཀྱང་ཐུན་མོང་ཡིན་པའི་ཕྱིར་གཟུགས་ལ་སོགས་པ་བཞིན་དུ་རྒྱུད་དུ་མའི་དབང་གིས་རྟེན་པ་དང་བཅས་པ་དང་དེ་དང་མཚུངས་པ་ཉིད་དུ་ཅིའི་ཕྱིར་རྣམ་པར་མི་འཇོག་ཅེ་ན། གཟུགས་ནི་ད་ལྟར་བྱུང་བ་ཁོ་ན་མཐོང་གི་འདས་པ་དང་མ་འོངས་པ་དང་མི་སྐྱེ་བའི་ཆོས་ཅན་ནི་མ་ཡིན་ཏེ། རེག་བྱའི་བར་དུ་ཡང་དེ་དང་འདྲ་སྟེ། ད་ལྟར་བྱུང་བའི་རེག་བྱ་ཁོ་ན་ལ་རེག་གི་འདས་པ་དང་མ་འོངས་པ་དང་ནི་སྐྱེ་བའི་ཆོས་ཅན་ལ་ནི་མ་ཡིན་ནོ་ཞེས་སོ། །དེའི་ཕྱིར་གཟུགས་རྣམས་ཀྱི་རྟེན་པ་དང་བཅས་པ་དང་དེ་དང་མཚུངས་པའི་ངོ་བོ་རྒྱུད་ཀྱི་དབང་གི་བྱ་བ་བྱེད་པ་ལས་རྣམ་པར་གཞག་པའོ། །ཆོས་ཞེས་བྱ་བ་རྣམས་ལ་ནི་རྣམ་པར་རྟོག་པ་དེ་ལྟ་བུ་ཡོད་པ་མ་ཡིན་ཏེ། དེ་ནི་དུས་གསུམ་དང་དུས་སུ་མ་གཏོགས་པ་ལ་ཡང་ཡུལ་ཡིན་པའི་ཕྱིར་རོ། །རྒྱུད་ཀྱི་དབང་གིས་མ་ཡིན་པར་ཅིའི་ཕྱིར་རྣམ་
པར་འཇོག་པར་མི་ནུས་ཤེ་ན། ཀརྟུཾ་ཀོ་བྷཱ་ག་འདི་དག་ཇི་ལྟར་བརྟེན་པ་དང་བཅས་པ་ཞེས་ཤེས་པར་མི་འགྱུར་རོ། །དེའི་ཕྱིར་བརྟེན་པ་དང་བཅས་པ་ཞེས་བྱ་བའི་དོན་ཅི་ཞེ་ན་ཞེས་གསུངས་ཏེ། རྟེན་པར་བྱེད་པས་ན་བརྟེན་པའོ། །དེ་འདི་ལ་ཡོད་པས་བརྟེན་པ་དང་བཅས་པའོ། །དེ་ཡང་དབང་པོ་དང་ཡུལ་དང་རྣམ་པར་རྒྱ་དཔེ་གཅིག་ན་བཀྟུཾ་ཟེར། ཤེས་པ་རྣམས་ཕན་ཚུན་རྟེན་པར་བྱེད་པ་གང་ཡིན་པ་སྟེ། རྟེན་དང་བརྟེན་པ་དང་ཡུལ་དང་ཡུལ་ཅན་གྱི་དངོས་པོར་ཕན་ཚུན་རྗེས་སུ་མཐུན་པ་ཉིད་ཅེས་བྱ་བའི་ཐ་ཚིག་གོ །ཡང་བྱེད་པ་ལ་རྟེན་པར་བྱེད་པས་བརྟེན་པ་སྟེ། གང་ཞིག་གང་གི་བྱེད་པ་ཡིན་པ་དེ་དེ་དང་རྗེས་སུ་མཐུན་པ་ཉིད་ཀྱིས་རྟེན་པའོ། །དཔེར་ན་མིག་གི་དབང་པོའི་བྱེད་པ་ལྟ་བ་ཡིན་པ་དང༌། རྣམ་པར་ཤེས་པའི་རྣམ་པར་ཤེས་པ་དང༌། གཟུགས་ཀྱི་དེ་དག་གི་ཡུལ་གྱི་དངོས་པོར་གནས་པར་བྱེད་པ་ལྟ་བུ་སྟེ་དེ་བཞིན་དུ་གཞན་ཡང་བརྗོད་པར་བྱའོ། །འདི་ནི་སྔར་རང་གི་ལས་བྱེད་པ་བརྟེན་པ་དང་བཅས་པའོ་ཞེས་བཤད་དོ། །ཡང་ན་འབྲས་བུ་རེག་པ་མཚུངས་པའི་ཕྱིར་ཏེ་བརྟེན་ཕ་མཚུངས་པ་ཡིན་ནོ་ཞེས་བྱ་བར་སྦྱར་རོ། །འདི་ལྟར་རེག་པའི་ནི་ཡུལ་དང་དབང་པོ་དང་རྣམ་པར་ཤེས་པ་རྟེན་པར་བྱེད་པས་བརྟེན་པ་སྟེ། དེ་ལ་རག་ལས་པའི་ཕྱིར་རོ། །དེའི་ཕྱིར་བརྟེན་པ་མཚུངས་པས་རྟེན་མཚུངས་ཏེ་རེག་པ་མཚུངས་པ་ཞེས་བྱ་བའི་ཐ་ཚིག་གོ །དེ་དག་གི་རེག་པ་ནི་སེམས་ལས་བྱུང་བའི་ཆོས་འབྲས་བུ་མཚུངས་པ་དེས་ན་རྒྱུའི་དངོས་པོར་མཚུངས་པའི་ཕྱིར་ཏེ་འདྲ་བའི་ཕྱིར་རོ་ཞེས་བྱ་བའི་དོན་ཏོ། །གང་དག་བརྟེན་པ་དང་བཅས་པ་མ་ཡིན་པ་ཞེས་བྱ་བ་ལ། དེ་དག་ནི་བརྟེན་པ་དང་བཅས་པ་དེ་དག་དང་རིགས་མཐུན་པས་མཚུངས་པའི་ཕྱིར་དེ་དང་མཚུངས་པ་སྟེ་དེ་དང་འདྲ་བ་ཞེས་བྱ་བའི་ཐ་ཚིག་གོ །དེ་དག་གཉི་གཡང་ལྟ་བ་དང་སྐྱེ་མཆེད་གཅིག་དང་ཁམས་གཅིག་ཡིན་ནའོ། །ཡང་ཕན་ཚུན་རྒྱུ་ཡིན་པའི་ཕྱིར་རིགས་འདྲ་བ་སྟེ་ཕན་ཚུན་འབྲེལ་བའི་ཕྱིར་དང༌། ཕན་ཚུན་འདྲེན་པར་བྱ་བའི་ཕྱིར་དང༌། མཐོང་བས་སྤང་བར་བྱ་བའི་ཁམས་རྣམས་ནི་དུ་ཞེས་རྒྱ་ཆེར་འབྱུང་བ་ལ། དེ་ལ་གང་དག་མཐོང་བའི་ལམ་གྱིས་སྤོང་པར་འགྱུར་བ་དེ་དག་ནི་མཐོང་བས་སྤོང་
བར་བྱ་བ་སྟེ། རྣམ་པ་དགུ་ཅར་ཡང་ལམ་རྣམ་པ་གཅིག་གིས་སྤོང་བ་གང་ཡིན་པ་དེ་དག་ནི་མཐོང་བས་སྤོང་བར་བྱ་བ་རྣམས་སོ། །རྣམ་པ་དགུ་ལམ་རྣམ་པ་དགུ་ཉིད་ཀྱིས་སྤོང་བ་གང་ཡིན་པ་དེ་ནི་བསྒོམ་པས་སྤང་བར་བྱ་བ་རྣམས་སོ། །གཟུགས་ཅན་སྨོས་པ་ནི་གཟུགས་ཅན་མ་ཡིན་པ་རྣམ་པར་གཅད་པར་བྱ་བའི་ཕྱིར་རོ། །བཅུ་ཞེས་བྱ་བ་ནི་ཆོས་ཀྱི་ཁམས་གསལ་བར་བྱ་བའི་ཕྱིར་རོ། །ལྔ་ཡང་ཞེས་བྱ་བ་ནི་ཡིད་ཀྱི་རྣམ་པར་ཤེས་པའི་ཁམས་མ་གཏོགས་པ་མིག་ལ་སོགས་པ་རྣམ་པར་ཤེས་པའི་ཁམས་དག་གོ །ཐ་མ་ནི་རྣམ་གསུམ་ཞེས་བྱ་བ་དེ་ཉིད་ཀྱི་ཕྱིར་བསྒོམ་པས་སྤང་བར་བྱ་བ་ཁོ་ནའོ་ཞེས་ངེས་པར་གཟུང་སྟེ། བདེན་པ་དག་ལ་ལོག་པར་རྟོགས་པ་མེད་པའི་ཕྱིར་རོ། །ཟག་པ་དང་བཅས་པའི་ཕྱིར་དང༌། དམིགས་པ་མེད་པའི་ཕྱིར་དང༌། ཁ་ཕྱི་རོལ་ཏུ་བལྟས་པའི་ཕྱིར་གཞན་རྣམས་ལ་ཡང་རྟོགས་པར་བྱའོ། །ཡང་གི་སྒྲ་ནི་བསྡུ་བའི་དོན་ཏོ། །འདོན་པའི་གོ་རིམས་མཐའ་ན་ཡོད་པའི་ཕྱིར་ཐ་མའོ། །ཕྲ་རྒྱས་བརྒྱད་ཅུ་རྩ་བརྒྱད་ནི་ཁམས་གསུམ་གྱི་བདེན་པ་མཐོང་བས་སྤང་བར་བྱ་བ་དག་གོ །དེ་དག་དང་ལྷན་ཅིག་འབྱུང་པ་སྨོས་པ་ནི་དེ་དག་དང་མཚུངས་པར་ལྡན་པ་སེམས་དང་སེམས་ལས་བྱུང་བ་རྣམས་དང༌། དེ་དག་གི་མཚན་ཉིད་དང༌། ཕྲ་རྒྱས་རྣམས་ཀྱི་མཐུན་པའི་མཚན་ཉིད་རྣམས་གཟུང་ངོ༌། །དེའི་ཐོབ་པ་རྣམས་ནི་མ་ཡིན་ནོ། །དེའི་ཕྱིར་ཐོབ་པ་རྣམས་ནི་སྔར་སྐྱེས་པ་དང་ཕྱིས་སྐྱེ་བ་ཡང་ཡོད་པས་དེ་དག་སོ་སོ་སྨོས་པས་དེའི་ཐོབ་པ་རྣམས་ཀྱང་འཁོར་དང་བཅས་པ་སྟེ། རྗེས་སུ་འབྲང་བ་རྗེས་ཀྱི་ཐོབ་པ་དང་ཐོབ་པའི་མཚན་ཉིད་རྣམས་སོ། །དེ་ལ་ཕྲ་རྒྱས་བརྒྱད་ཅུ་རྩ་བརྒྱད་དང་མཚུངས་པར་ལྡན་པའི་རྣམ་པར་ཤེས་པ་ནི་ཡིད་ཀྱི་ཁམས་དང་ཡིད་ཀྱི་རྣམ་པར་ཤེས་པའི་ཁམས་སོ། །ལྷག་མ་མཚུངས་པར་ལྡན་པ་ཕྲ་རྒྱས་དག་དང་ལྷན་ཅིག་པ་རྣམས་དང་ལྡན་པ་མ་ཡིན་པ་རྣམས་ནི་ཆོས་ཀྱི་ཁམས་སོ། །ཧ་ཅང་ཐལ་བར་འགྱུར་བ་ཡོད་པས་ཟག་པ་མེད་པ་རྣམས་ལས་ཁྱད་པར་དུ་བྱ་བའི་ཕྱིར་ཟག་པ་སྨོས་སོ། །ཁ་ཅིག་ན་རེ་གང་གི་ཕྱིང་སོ་སོའི་སྐྱེ་བོ་ཉིད་དང་ངན་སོང་བའི་ལུས་དང་ངག་གི་ལས་ཀྱང་འཕགས་པའི་ལམ་དང་འགལ་
བའི་ཕྱིར་འཇིག་ཚོགས་དང་མཐར་འཛིན་པར་ལྟ་བ་ལ་སོགས་པ་ལྟར་མཐོང་བས་སྤང་བར་བྱ་བ་ཡིན་ཏེ། འདི་ལྟར་ལམ་གྱི་སྐད་ཅིག་དང་པོ་སྐྱེས་པ་ན་སོ་སོའི་སྐྱེ་བོ་ཉིད་དང་མི་ལྡན་པ་འཐོབ་པ་དང༌། རྒྱུན་དུ་ཞུགས་པ་ལོག་པར་མི་ལྟུང་བ་ཆོས་ཅན་ནོ་ཞེས་ཀྱང་བཤད་ན། ངན་སོང་བའི་ལུས་དང་ངག་གི་ལས་མ་སྤངས་པར་ནི་ངན་སོང་ཟད་པར་ཡང་མི་རིགས་སོ། །བདག་གི་དམྱལ་བཟད་དོ་ཞེས་རྒྱ་ཆེར་གསུངས་ཤིང་ཟད་པ་དང་སྤངས་པ་ལས་བདག་གི་སྐྱེ་བ་ཟད་དོ་ཞེས་དགྲ་བཅོམ་པ་ཉིད་བརྡ་སྤྲོད་པས་དེའི་ཕྱིར་ཕྲ་རྒྱས་བརྒྱད་ཅུ་རྩ་བརྒྱད་དང༌། དེ་དང་ལྷན་ཅིག་འབྱུང་བ་དང་ཞེས་བྱ་བ་ལ་སོགས་པ་ནི་ཤིན་ཏུ་ཉུང་བར་བརྗོད་པ་ཡིན་ནོ་ཞེས་ཟེར་རོ། །འདི་ལ་ལན་བརྗོད་པར་བྱ་སྟེ། སོ་སོའི་སྐྱེ་བོ་ཉིད་དང༌། ངན་སོང་བའི་ལུས་དང་ངག་གི་ལས་དེ་དག་ནི་མཐོང་བས་སྤང་བར་བྱ་བ་མ་ཡིན་ཏེ། དེ་ཅིའི་ཕྱིར་ཞེ་ན། དེའི་ཕྱིར། མདོར་བསྡུ་བ་ནི་འདི་ཡིན་ནོ། །ཞེས་གསུངས་ཏེ། ཉན་མོངས་ཅན་མིན་མཐོང་སྤང་མིན། །ཞེས་བྱ་བ་འདིས་སོ་སོའི་སྐྱེ་བོ་ཉིད་སྤང་བར་བྱ་བ་མ་ཡིན་ནོ་ཞེས་སྟོན་ཏོ། །གཟུགས་མིན་ཞེས་བྱ་བ་འདིས་ནི་ཉོན་མོངས་པ་ཅན་ཡིན་ཡང་ངན་སོང་བའི་ལུས་དང་ངག་གི་ལས་མཐོང་བས་སྤང་བར་བྱ་བ་མ་ཡིན་ནོ་ཞེས་སྟོན་ཏོ། །དྲུག་པ་མིན་སྐྱེས་མིན་ཞེས་བྱ་བ་འདིས་ནི་ཉོན་མོངས་པ་ཅན་ཡིན་ཡང་མཐོང་བས་སྤང་བར་བྱ་བ་མ་ཡིན་ནོ་ཞེས་སྟོན་པར་བྱེད་དོ། །གལ་ཏེ་བཅུ་ནི་བསྒོམ་པས་སྤང་བྱ་ཡིན། ལྔ་ཡང་ཞེས་བཤད་ན་ཡང་ཅིའི་ཕྱིར། གཟུགས་མིན་དྲུག་པ་མིན་སྐྱེས་མིན། །ཞེས་བརྗོད་ཅེ་ན། ངེས་པར་བྱ་བའི་ཕྱིར་རོ། །ཐ་མ་གསུམ་ནི་རྣམ་གསུམ་མོ། །ཞེས་བཤད་པ་དེར་ཉོན་མོངས་པ་ཅན་མ་ཡིན་པ་ནི་མ་ཐོང་བས་སྡང་བར་བྱ་བ་མ་ཡིན་ལ། ཉོན་མོངས་པ་ཅན་ཡང་རྣམ་པར་རིག་བྱེད་མ་ཡིན་པའི་གཟུགས་མཐོང་བས་སྤང་བར་བྱ་བ་མ་ཡིན་ཞིང༌། ཉོན་མོངས་པ་ཅན་ཡིན་ཡང་ཚོར་བ་ལ་སོགས་པ་དྲུག་པ་ལས་སྐྱེས་པ་མ་ཡིན་པས་མཐོང་བས་སྤང་བར་བྱ་བ་མ་ཡིན་ནོ་ཞེས་ངེས་པར་བྱེད་པ་མ་ཡིན་ཏེ། ཉོན་མོངས་པ་ཅན་མ་ཡིན་པ་ནི་མཐོང་བས་སྤང་བར་བྱ་བ་ཅུང་ཟད་ཀྱང་མེད་ལ་གཟུགས་ཀྱང་མ་ཡིན་ཏེ་མིག་ལ་སོགས་པ་བཞིན་ཞེས་
རྗེས་སུ་འགྲོ་བ་སྟོན་པར་བྱེད་དོ། །ཉོན་མོངས་པ་ཅན་མ་ཡིན་པ་དང་ལུང་མ་བསྟན་པ་ཡང་ངོ༌། །སོ་སོའི་སྐྱེ་བོ་ཉིད་ནི་མ་བསྒྲིབས་ལ་ལུང་དུ་མ་བསྟན་པའོ་ཞེས་བྱ་བའི་ཐ་ཚིག་གོ །འདིས་ཕྱོགས་ཆོས་དང་གཏན་ཚིགས་སྟོན་པར་བྱེད་དོ། །མི་དགེ་བའི་ཆོས་ཐམས་ཅད་ཀྱི་གནས་སུ་གྱུར་པ་དེ་ཉོན་མོངས་པ་ཅན་མ་ཡིན་པ་མི་རིགས་སོ། །དེ་ལྟར་ལོག་པར་རྟོག་པ་ལ་དེ་རབ་ཏུ་བསྒྲུབ་པར་བྱ་བའི་ཕྱིར། དགེ་བའི་རྩ་བ་ཀུན་ཏུ་ཆད་པ་དང་ཞེས་རྒྱ་ཆེར་གསུངས་སོ། །གལ་ཏེ་དེ་དགེ་བ་ཡིན་པར་གྱུར་ན་ནི་དགེ་བའི་རྩ་བ་ཆད་པ་རྣམས་སོ་སོའི་སྐྱེ་བོ་མ་ཡིན་པར་འགྱུར་ཏེ། དགེ་བ་ཡིན་པའི་ཕྱིར་དང་དེ་ཡང་ཆད་པའི་ཕྱིར་རོ། །དེ་ནི་འདོད་པ་ཡང་མ་ཡིན་ཏེ་དེའི་ཕྱིར་དགེ་བ་ཡང་མ་ཡིན་ནོ། །མི་དགེ་བ་ཡང་མ་ཡིན་ཏེ་འདོད་ཆགས་དང་བྲལ་བ་རྣམས་ཀྱང་དེ་དང་ལྡན་པའི་ཕྱིར་རོ། །གཞན་དུ་སོ་སོ་སྐྱེ་བོ་ནི་འདོད་པའི་འདོད་ཆགས་བྲལ་བའི་སོ་སོ་སྐྱེ་བོར་འགྱུར་རོ། །སྐྱེ་པ་དང་རྟེན་དང་འབྲེལ་བའི་ཕྱིར་དེ་དང་ལྡན་པར་འགྱུར་ཞིང་གཞན་དུ་སྐྱེ་བ་ནི་ཁམས་དང་ས་གཞན་དང་ལྡན་པར་འགྱུར་ཏེ། དེའི་ཕྱིར་ཉོན་མོངས་པ་ཅན་ཡང་མི་རིགས་སོ། །ལུས་དང་ངག་གི་ལས་ནི་གཟུགས་ཡིན་ན། གཟུགས་ནི་ཉོན་མོངས་པ་ཅན་ནམ་ཉོན་མོངས་པ་ཅན་མ་ཡིན་ཡང་རུང་སྟེ། མཐོང་བས་སྤང་བར་བྱ་བ་ཅུང་ཟད་མེད་དོ། །ཅིའི་ཕྱིར་ཞེ་ན། བདེན་པ་རྣམས་ལ་ལོག་པར་རྟོག་པའི་ཕྱིར་དང༌། རྩ་བའི་ཆོས་ཉིད་དུ་ཡོད་པ་ལ་མི་དམིགས་པའི་ཕྱིར་རྒྱུ་ཁྱད་པར་མེད་པའོ། །མཐོང་བས་སྤང་བར་བྱ་བ་རྣམས་ནི་སྐྱེ་བ་ལ་སོགས་པ་རྣམས་ཀྱིས་མཐའ་དུ་མར་འགྱུར་རོ། །སྡུག་བསྔལ་ལ་ཆོས་ཤེས་པའི་བཟོད་པ་ནི་སོ་སོ་སྐྱེ་བོ་ཉིད་དུ་ཐལ་བར་འགྱུར་བའི་ཡང་ཕྱིར་རོ་ཞེས་བྱ་བ་ལ། གལ་ཏེ་སྡུག་བསྔལ་ལ་ཆོས་ཤེས་པའི་བཟོད་པས་དེ་སྤོང་ན་ནི་བཟོད་པ་སྐྱེ་བ་ན་ཡང་དེ་ལ་སྤང་བར་བྱ་བ་རྣམས་དང་ལྡན་པའི་ཕྱིར་འཕགས་པ་ཡང་སོ་སོ་སྐྱེ་བོར་འགྱུར་རོ། །སློབ་དཔོན་འདུས་བཟང་ན་རེ། དེ་ལྟ་ན་སོ་སོ་སྐྱེ་བོ་ཉིད་གང་ཞེ་ན། འཕགས་པའི་ཆོས་མ་ཐོབ་པའོ་ཞེས་བྱ་བའི་བསྟན་བཅོས་དང་འགལ་ལོ་ཞེས་ཟེར་རོ། །དེ་ལ་དམིགས་པའི་
ཉོན་མོངས་པ་སྤོང་བ་ལས་དེ་སྤོང་གི་གཟུགས་ནི་མཐོང་བས་སྤང་བར་བྱ་བ་མ་ཡིན་ནོ། །ཉོན་མོངས་པ་ཅན་མ་ཡིན་པའི་དངོས་པོའི་རྣམ་པ་ནི་འཆིང་བའི་གཙོ་བོ་མ་ཡིན་ཡང་འཇུག་པར་གང་བརྗོད་པ་ནི་རང་བཞིན་གྱིས་སྤོང་བའི་ཡུལ་དང་འབྲེལ་བར་ཡང་གང་བཤད་པ་དམིགས་པས་སྤང་བའོ། །ཆོས་མངོན་པ་པ་རྣམས་ཀྱིས་དེ་ལ་གང་ཞིག་གཉེན་པོ་སྐྱེས་པ་དང་སྤང་བ་ཐོབ་པ་དེའི་རང་བཞིན་སྤངས་པ་སྟེ། དཔེར་ན་ཀུན་ཏུ་སྦྱོར་བ་འབྲས་བུ་གཅིག་པ་རྣམས་ཀྱི་སྤང་བ་གང་ཡིན་པ་གཞི་གང་དང་མི་ལྡན་པའོ། །ཐོབ་པ་ལས་ཐམས་ཅད་དུ་དེ་ལ་དམིགས་པའི་ཟག་པ་ཐམས་ཅད་སྤངས་པ་མ་ཡིན་ནམ་ཞེ་ན། མཐོང་བས་སྤང་བར་བྱ་བ་དང་བསྒོམ་པས་སྤང་བར་བྱ་བའི་ཀུན་ཏུ་སྦྱོར་བ་དང་དེ་དང་མཚུངས་པར་ལྡན་པའི་ཉོན་མོངས་པ་རྣམས་རིམ་གྱིས་སྤོང་བར་བྱེད་པ་ན་བྲལ་བའི་ཐོབ་པ་རྣམས་སོ་སོ་བདག་སྐྱེ་བས་དེ་དག་སྤོང་བར་བྱེད་ཅེས་བྱའོ། །གཟུགས་ལ་ནི་དེའི་རྗེས་སུ་འགྲོ་བ་དང་རིགས་རྣམས་དང་གཞན་ཡང་ཉོན་མོངས་པ་ཅན་མ་ཡིན་པ་རྣམས་ལ་དེ་ལྟར་བྲལ་བའི་ཐོབ་པ་སྐྱེ་བ་མ་ཡིན་ནོ། །དེའི་ཕྱིར་དེ་དག་ལ་ཇི་ལྟ་བར་བར་ཆད་མེད་པའི་ལམ་གྱིས་སྤང་བར་བྱ་བ་ཉིད་དུ་རིགས་སོ། །མཐོང་བའི་ལམ་གྱིས་ནི་ས་འགའ་ཞིག་དང་ཆགས་པ་དང་བྲལ་བར་བྱེད་པ་མ་ཡིན་པས་ཅི་ལྟར་ན་གཟུགས་དེ་སྤང་བྱ་ཡིན་པར་འགྱུར། ངན་སོང་བའི་ཆོས་རྣམས་ནི་བདེན་པ་མཐོང་བ་རྣམས་ལ་རྐྱེན་མ་ཚང་བས་མི་སྐྱེ་སྟེ། དེའི་ཡུལ་ཉོན་མོངས་པ་རྣམས་སྤངས་པ་ལས་ཏེ། དེ་དག་སྤང་བ་ཞེས་བྱ་བ་སྤོང་བ་གཞན་དུ་སྐྱེད་པར་བྱེད་པ་འདོད་ཆགས་ལ་སོགས་པ་རྣམས་ཡིན་ནོ། །ཅིའི་ཕྱིར་ལྟ་བ་ལ་སོགས་པ་རྣམས་བཞིན་དུ་མཐོང་བས་སྤང་བར་བྱ་བ་ཉིད་དུ་མི་བརྗོད་ཅེ་ན་དེ་ལྟར་ངེས་པར་བརྗོད་པར་བྱའོ། །བདེན་པ་རྣམས་ལ་ལོག་པར་མི་རྟོག་པའི་ཕྱིར་ཞེས་པ་འདི་ཉིད་རྒྱུ་ལ་དམིགས་པའི་དབང་གིས་སོ། །གང་གི་ཕྱིར་འདོད་ཆགས་ལ་སོགས་པ་སྤོང་བའི་གནས་སྐབས་སུ་གལ་ཏེ་དེ་ལ་དམིགས་པའི་ཉོན་མོངས་པ་སྤང་བའི་ཕྱིར་སོ་སོའི་སྐྱེ་བོ་ཉིད་སྤོང་བར་བྱེད་དེ་འཕགས་པའི་གང་ཟག་ལྔ་པོ་རྣམས་ཇི་ལྟར་སོ་སོ་སྐྱེ་བོ་ཉིད་དུ་ཐལ་བར་མི་འགྱུར། སྡུག་བསྔལ་ལ་ཆོས་ཤེས་པའི་བཟོད་
པའི་དུས་སུ་དེའི་ཐོབ་པ་རྣམ་པར་ཉམས་པའི་ཕྱིར་དང་མཐོང་བའི་ལམ་ལས་དུས་ཕྱིས་བསྒོམ་པས་སྤང་བར་བྱ་བ་དེ་ལ་མ་སྐྱེས་པས་འཕགས་པའི་ལམ་སོ་སོ་སྐྱེ་བོ་ཉིད་དུ་ཐལ་བར་འགྱུར་རོ། །གང་གི་ཕྱིར་སྔར་དེས་བྱས་པའི་སྤངས་པ་མ་ཡིན་པ་ཞེས་བྱ་བ་ཕྱིས་སྤོང་བར་བྱེད་དོ། །ཡང་རྣམ་པར་ཉམས་པ་དང་སྤངས་པ་དག་ལ་ཁྱད་པར་ཅི་ཞེ་ན་ཡོད་དེ། གང་གི་ཕྱིར་རྣམ་པར་ཉམས་པ་ནི་དམིགས་པ་ལས་ཉོན་མོངས་པ་སྐྱེ་བ་སྲིད་ཀྱི་སྤང་བ་ནི་དམིགས་པ་ལས་མ་ཡིན་པའོ། །གལ་ཏེ་དེ་ལྟ་ན་འོ་ན། དད་པའི་རྣམ་པ་སྤངས་ཀྱང་དེའི། །ཡུལ་ཅན་དྲི་མ་རྣམས་ཀྱི་ལྡན། །ཞེས་ཅི་སྟེ་བརྗོད་ཅེ་ན། ཚུལ་དེ་ནི་ཉོན་མོངས་པ་ཅན་ཡིན་ལ། སོ་སོའི་སྐྱེ་བོ་ཉིད་ནི་ཉོན་མོངས་པ་ཅན་མ་ཡིན་པའི་ལུང་དུ་མ་བསྟན་པ་ཡིན་པས་འགལ་བ་མེད་དོ། །ལྟ་བ་ནི་སྤང་བྱ་ཉོན་མོངས་པ་ཅན་མ་ཡིན་ཞེས་བྱ་བ་ལ་སོགས་པ་འདོད་པར་གྲགས་པའི་དབང་དུ་བྱས་ནས་བཤད་པ་དེའི་ཕྱིར་རྣམ་པར་དཔྱད་པར་བྱ་སྟེ། ཇི་ལྟར་སོ་སོ་སྐྱེ་བོ་ཉིད་ཡིན་པའི་ཕྱིར་ཞེས་བྱ་བས་མཐོང་བས་སྤང་བར་བྱ་བ་ཞེས་བྱ་བའི་ཚིག་གིས་འཕངས་པ་བདེ་ན་པ་རྣམས་ལ་ལོག་པར་མི་བསྒྲུབ་པའི་ཕྱིར་ཉོན་མོངས་པ་ཅན་མ་ཡིན་པའོ། །དེ་ལ་དམིགས་པའི་ཉོན་མོངས་པ་སྤངས་པ་ཡང་སྤང་བའི་ཕྱིར་ཞེས་རྒྱུ་གསུངས་པ་འདི་ལ་རྣམ་པར་དཔྱད་པ་ནི། ཟག་པ་མེད་པའི་སྐད་ཅིག་དང་པོ་ལ་སོ་སོ་སྐྱེ་བོ་ཉིད་དུ་ཐལ་བར་འགྱུར་བའི་ཕྱིར་རོ་ཞེས་བྱ་བ་ལུགས་ངན་པ་སྟེ། དེ་ལྟར་གྱུར་པའི་ཚིག་གིས་འཕངས་པའི་དགོངས་པ་ཅི་ཞེ་ན། སྐྱེ་བར་བྱེད་པ་ན་དེ་མ་སྤངས་པའི་ཕྱིར་ཟག་པ་མེད་པ་སྒད་ཅིག་དང་པོ་ན་སོ་སོ་སྐྱེ་བོ་ཉིད་དུ་ཐལ་བར་མི་འགྱུར་ཞེས་པའོ། །འདི་ཡང་ལུགས་ངན་པ་སྟེ་རང་གི་ལུགས་དང་གཞན་གྱི་ལུགས་དག་ནི་སྐྱེ་བ་དང་གནས་པ་དང་འགག་པའི་གནས་སྐབས་རྣམས་སུ་ལམ་ལ་ཁྱད་པར་མེད་པའི་ཕྱིར་རོ། །བྱེ་བྲག་ཏུ་སྨྲ་བ་རྣམས་ནི་སྤང་བྱའི་དབྱེ་བ་ལས་འདོད་དེ་སྤངས་པའི་ཐོབ་པ་ཕྲ་རྒྱས་ཀྱི་ཐོབ་པ་དང་འགལ་བ་ཀུན་ཏུ་འཛིན་པ་དང་ལམ་གྱི་སྤངས་པའི་བྲལ་བ་ཐོབ་པ་འདྲེན་བར་བྱེད་ཅིང་འགག་བཞིན་པའི་ལམ་གྱིས་དེའི་སྒྲིབ་པ་སྤོང་བར་བྱེད་དོ། །འདི་ལ་ནི་གཞན་དུ་ཡང་རྣམ་པར་དཔྱད་པ་ཉིད་དོ། །གཏམ་
རྣམ་པར་འཕྲོས་པ་ཞར་ལས་བྱུང་བས་ཆོག་གོ །སློབ་དཔོན་འདུས་བཟང་ན་རེ། མིག་གི་སྐྱེ་མཆེད་ལ་སོགས་པ་ལ་ཡང་ཚོར་བ་ལ་སོགས་པ་མཐོང་བས་སྤང་བར་བྱ་སྟེ། གཟུགས་ལ་སོགས་པའི་ཡུལ་ལ་མིག་གི་རྣམ་པར་ཤེས་པ་ལ་སོགས་པ་བཞིན་ཁ་ཕྱི་རོལ་ཏུ་བལྟས་པས་འཇུག་པའི་ཕྱིར་རོ་ཞེས་ཟེར་རོ། །འདི་ལས་ཡང་ཁ་ཕྱི་རོལ་ཏུ་བལྟས་པས་འཇུག་བ་རྒྱུ་ཅིས་མཐོང་བས་སྡང་བར་བྱ་བ་མ་ཡིན། དེ་ཉིད་ལ་གཏན་ཚིགས་བརྗོད་པར་བྱ་དགོས་ཏེ་བདེན་པ་རྣམས་ལ་ལོག་པར་མི་རྟོག་པའི་ཕྱིར་དེ་ལས་ཁ་ཕྱི་རོལ་ཏུ་བལྟས་པའི་རྒྱུ་ཡིན་ནོ། །མིག་དང་ཆོས་ཀྱི་ཁམས་ཕྱོགས་ནི་ལྟ་བ་ཡིན་ཞེས་འབྱུང་སྟེ། དེ་ལ་ཆོས་ཐམས་ཅད་ཀྱི་ནང་ནས་ལྟ་བའི་རང་བཞིན་ནི་ཆོས་གཉིས་ཡིན་ཏེ་གཟུགས་ཅན་རྣམས་ལས་ནི་མིག་གི་དབང་པོའོ། །གཟུགས་ཅན་མ་ཡིན་པ་རྣམས་ནི་ཤེས་བྱ་ལ་རྟོག་པ་རྒྱུ་བ་གསལ་བ་ཅན་གྱི་ཤེས་རབ་ཁ་ནང་དུ་བལྟས་པར་ཞུགས་པའོ། །དེ་ལ་རེ་ཞིག་མིག་གི་མཚན་ཉིད་ནི་དེ་ལ་ལྟ་བ་ཡང་དག་པར་སྒྲུབ་པར་བྱེད་ཅིང་ཀུན་ཏུ་ལྟ་བའི་ཕྱིར་དང༌། ལོང་བ་དང་འགལ་བའི་ཕྱིར་དང་གསལ་བར་ལྟ་བའི་ཕྱིར་རོ། །དེ་ལ་འཇིག་ཚོགས་ལ་ལྟ་བ་ལ་སོགས་པ་རྣམས་ནི་འདོད་ཆགས་ལ་སོགས་པ་བཞིན་དུ་ཕྲ་རྒྱས་ཀྱི་རང་བཞིན་ཡིན་པའི་ཕྱིར་ཕྲ་རྒྱས་བསྟན་པའི་སྐབས་སུ་བབ་པར་འགྱུར་བས་འདིར་མ་བརྗོད་ཅིང༌། ལྷག་མ་ལྟ་བ་བཞི་པོ་དག་གིས་རང་གི་ངོ་པོ་ནི་གཞན་དུ་སྟོན་པའི་སྐབས་མེད་པས་འདི་ཉིད་དུ་དེ་དག་གི་ངོ་བོ་བསྟན་ཏོ། །མིག་ལ་སོགས་པའི་རྣམ་པར་ཤེས་པ་དང་མཚུངས་པར་ལྡན་པའི་ཤེས་རབ་མི་དགེ་བ་དང་ལུང་དུ་མ་བསྟན་པ་དང་ཟག་པ་མེད་པ་ཡོད་པས་དེའི་ཕྱིར་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པའི་ཤེས་རབ་དགེ་བ་ཟག་པ་དང་བཅས་པའོ་ཞེས་ཁྱད་པར་རྣམ་པ་གསུམ་བརྗོད་དོ། །སློབ་པའི་ཟག་པ་མེད་པའི་ཤེས་རབ་ནི་སློབ་པའི་ལྟ་བ་སྟེ། སློབ་པ་སྨོས་པ་ནི་མི་སློབ་པ་ལས་ཁྱད་པར་དུ་བྱ་བའི་ཕྱིར་རོ། །ཟག་པ་མེད་པ་སྨོས་པ་ནི་ཟག་པ་དང་བཅས་པ་ལས་ཁྱད་པར་དུ་བྱ་བའི་ཕྱིར་རོ། །མི་སློབ་པའི་ཟག་པ་མེད་པའི་ཤེས་རབ་ནི་མི་སློབ་པའི་ལྟ་བའོ། །ཡང་དག་པའི་ལྟ་བ་བསྟན་པ་ཉིད་ཀྱིས་འདི་དག་གསུམ་ཆར་ཡང་
བསྟན་པར་འགྱུར་བ་མ་ཡིན་ནམ་ཞེ་ན། དེ་ལྟ་ཡིན་མོད་ཀྱི་སོ་སོ་སྐྱེ་བོ་དང་སློབ་པ་དང་མི་སློབ་པའི་ས་བསྟན་པར་བྱ་བའི་ཕྱིར་དང༌། སྐྱེ་བའི་རིམ་པ་བསྟན་པར་བྱ་བའི་ཕྱིར་རྣམ་པ་གསུམ་དུ་དབྱེ་བར་བྱའོ། །སྤྲིན་དང་བཅས་པ་དང་སྤྲིན་མེད་པའི་མཚན་མོ་དང་ཉིན་མོའི་གཟུགས་ལ་ལྟ་བ་བཞིན་དུ་ཞེས་རྒྱ་ཆེར་འབྱུང་སྟེ། དེ་ལ་སྣང་བ་དང་བྲལ་བའི་ཕྱིར་དང་མུན་པས་ཟིལ་གྱིས་གནོན་པའི་ཕྱིར་མཚན་མོ་སྒང་གཤོང་སྤེལ་མ་དག་ལ་ཕྱིན་ཅི་ལོག་ཏུ་ལྟ་བ་དེ་བཞིན་དུ་འཇིག་ཚོགས་ལ་ལྟ་བ་ལ་སོགས་པ་རྣམས་ཀྱི་ལྟ་བའོ། །དེ་ནས་འཇིག་རྟེན་པའི་ཡང་དག་པའི་ལྟ་བ་ཆེས་ཡོངས་སུ་དག་པར་འགྱུར་ཏེ། སྤྲིན་དང་བྲལ་བའི་ཟླ་བའི་འོད་ཀྱིས་མུན་པ་བཅོམ་པའི་མཚན་མོ་གཟུགས་དམིགས་པའི་ཕྱིར་རོ། །དེ་ནས་སློབ་པའི་ལྟ་བ་ནི་ཉི་མའི་དཀྱིལ་འཁོར་གྱིས་གཡོགས་པའི་ཉིན་མོ་གཟུགས་མཐོང་བ་བཞིན་ནོ། །མི་སློབ་པའི་ལྟ་བ་ནི་དེ་བས་ཆེས་ཁྱད་པར་དུ་འཕགས་པ་སྟེ། སྤྲིན་མེད་པའི་ཉི་མའི་འོད་ཟེར་གྱིས་མུན་པ་བསལ་བའི་ཉིན་མོ་གཟུགས་དམིགས་པ་བཞིན་ནོ། །རྣལ་འབྱོར་བ་རྣམས་ཇི་ལྟ་ཇི་ལྟར་ཤེས་རབ་གོམས་པའི་སྒོ་ནས་སྙིང་གི་མུན་པ་སྤོང་བ་དེ་ལྟ་དེ་ལྟར་དམིགས་པ་རྣམ་པར་དག་བ་ཁྱད་པར་དུ་འགྱུར་ཏེ། འདི་ལྟར་དམིགས་པ་ལ་རྣམ་པར་དག་པ་དང་མ་དག་པ་ནི་ཅུང་ཟད་ཀྱང་མེད་ཀྱི་རྣམ་པར་དག་པས་རྣམ་པར་དག་པར་འགྱུར་ཞེས་བྱ་བ་ནི། བློ་དྲི་མ་ཅན་ཉིད་དག་པར་བྱས་པ་ལ་ངེས་པར་གཟུང་བར་བྱའོ། །བསྡུས་པའི་དོན་ནི་འདི་ཡིན་ཏེ། ལྟ་བ་རྣམས་ནི་རྣམ་པ་ལྔ་སྟེ། ལུང་དུ་མ་བསྟན་པ་དང༌། ཉོན་མོངས་པ་ཅན་དང༌། དགེ་བའི་སེམས་ཟག་པ་དང་བཅས་པ་དང༌། སློབ་པ་དང་མི་སློབ་པའི་དབྱེ་བས་སོ། །དེ་ལ་ལུང་དུ་མ་བསྟན་པའི་རིགས་ལས་ནི། མིག་གི་དབང་པོ་ལྟ་བ་ཡིན་གྱི། རྣ་བ་ལ་སོགས་པ་དང༌། ཤེས་རབ་མ་བསྒྲིབས་ལ་ལུང་དུ་མ་བསྟན་པ་ཐམས་ཅད་ནི་མ་ཡིན་ནོ། །ཉོན་མོངས་པ་ཅན་གྱི་རིགས་ལས་ནི་ལྟ་བ་ལྔ་པོ་དེ་དག་ལས་གཞན་པའི་ཤེས་རབ་ལྟ་བ་མ་ཡིན་ཏེ། དེ་ཡང་འདོད་ཆགས་དང༌། ཁོང་ཁྲོ་དང༌། ང་རྒྱལ་དང༌། མ་འདྲེས་པའི་མ་རིག་པ་དང༌། ཐེ་ཚོམ་དང་ལྷན་ཅིག་སྐྱེས་
པའོ། །སློབ་པའི་རིགས་ལས་ནི་ལྟ་བ་མ་ཡིན་པའི་ཤེས་རབ་འགའ་ཡང་མེད་དོ། །མི་སློབ་པའི་རིགས་ལ་ནི་ཟད་པ་དང་མི་སྐྱེ་བ་ཤེས་བ་ལྟ་བ་མ་ཡིན་ནོ། །དགེ་བ་ཟག་པ་དང་བཅས་པའི་རིགས་ལས་ནི། ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པ་ཁོ་ན་ཡིན་ནོ། །རེ་ཞིག་དགེ་བ་ཟག་པ་དང་བཅས་པ་བཏགས་པ་འགའ་ཞིག་ལྟ་བ་མ་ཡིན་ཏེ། འགའ་ཞིག་རྣམ་པར་ཤེས་པའི་ཚོགས་ལྡས་མངོན་པར་བསྒྲུབས་པ་རྣམ་པར་རིག་བྱེད་མ་ཡིན་པའི་ཀུན་སློང་དུ་གྱུར་པ་འཆི་བའི་མཐར་གྱུར་པའི་དགེ་བ་ཟག་པ་དང་བཅས་པ་རྣམས་སོ། །འོན་ཏེ་ཅིའི་ཕྱིར་འཇིག་རྟེན་པའི་ལྟ་བ་དགེ་བ་ཟག་པ་དང་བཅས་པ་ཉིད་དུ་ཁྱད་པར་མེད་ཀྱང་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པ་ཁོ་ན་ལ་བྱའི་རྣམ་པར་ཤེས་པ་ལྔ་དང་མཚུངས་པར་ལྡན་པ་ནི་མ་ཡིན་ཞེ་ན། རྣམ་ཤེས་ལྔ་དང་མཚུངས་སྐྱེས་བློ། །ངེས་རྟོག་མེད་ཕྱིར་ལྟ་མ་ཡིན། །ཞེས་བྱ་བ་འབྱུང་སྟེ། རྟོག་པར་བྱེད་པ་ན་ལྟ་བ་ཡིན་ཏེ། ངེས་པར་སེམས་པ་ལ་ཞུགས་པ་ཡིན་པའི་ཕྱིར་རོ། །ངེས་པར་རྟོག་པ་ནི་ཡུལ་ངེས་པར་སེམས་པ་སྔོན་དུ་འགྲོ་བ་ཅན་ངེས་པར་འདྲེན་པར་བྱེད་པ་ཅན་ཡིན་ན་རྣམ་པར་ཤེས་པ་ལྔ་དང་ལྷན་ཅིག་སྐྱེས་པའི་ཤེས་རབ་ནི་དེ་ལྟ་མ་ཡིན་ཏེ་ཞེས་བྱ་བ་རྒྱ་ཆེར་འབྱུང་ངོ༌། །དེ་ཉིད་ཀྱི་ཕྱིར་ཤེས་རབ་ཉོན་མོངས་པ་ཅན་ཞེས་བྱ་བ་ནི། ཇི་ལྟར་ངེས་པར་སེམས་པ་ལ་འཇུག་པའི་ཕྱིར་མིག་གི་རྣམ་པར་ཤེས་པ་ལ་སོགས་པ་དང་མཚུངས་པར་ལྡན་པའི་ཤེས་རབ་རྟོག་པར་བྱེད་པ་མ་ཡིན་ཞིང་ལྟ་བ་མ་ཡིན་པ་དེ་བཞིན་དུ་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པའི་ཤེས་རབ་གཞན་ལ་རྟོག་པ་ལ་སེམས་པར་མ་ཞུགས་པའི་ཕྱིར་རྟོག་པར་བྱེད་པ་མ་ཡིན་པས་ལྟ་བ་མ་ཡིན་ཏེ། དེ་ཡང་སྔར་ཉིད་དུ་རྒྱས་པར་བཤད་ཟིན་ཏོ། །གལ་ཏེ་རྟོག་པར་བྱེད་པ་ཡིན་པའི་ཕྱིར་ཤེས་རབ་ལྟ་བ་ཡིན་ན་ནི། འོ་ན་ནི་མིག་དང་རྟོག་པར་བྱེད་པ་ཉིད་མེད་ན་ཇི་ལྟར་ལྟ་བ་ཡིན་ཞེ་ན། གཟུགས་ལ་ལྟ་བའི་དོན་གྱིས་ཏེ་ཞེས་བྱ་བ་ལ། མིག་ནི་གཟུགས་ལ་ལྟ་བའི་དོན་གྱིས་ལྟ་བ་ཞེས་བརྗོད་དེ། ངེས་པར་རྟོག་པའི་དོན་གྱིས་ནི་མ་ཡིན་ལ། ཤེས་རབ་ནི་ངེས་པར་བྱེད་པའི་དོན་གྱིས་ཡིན་གྱི། ལྟ་བའི་དོན་གྱིས་མ་ཡིན་
པས་གཉི་ག་ཡང་ལྟ་བ་ཉིད་ཡིན་པར་འགལ་བ་མེད་དོ། །གང་ཤེས་པ་དང་མཐོང་བ་ལ་གང་བརྗོད་པ་དེའི་དོན་ལ་མངོན་སུམ་དུ་འཇུག་པ་ཉིད་ཀྱིས་ལྟ་བར་བྱེད་པའི་དོན་གྱིས་མ་ཡིན་ཞིང་རྟོག་པར་བྱེད་པས་ཀྱང་མ་ཡིན་ནོ། །གང་གི་ཕྱིར་མིག་གིས་གཟུགས་རྣམས་མཐོང་ཞེས་བྱ་བ་ལ། གཟུགས་མཐོང་བ་ནི་གཟུགས་ལ་བལྟ་བ་ཡིན་ཏེ། དེའི་ཕྱིར་གཟུགས་ལ་ལྟ་བའི་དོན་གྱིས་མིག་ལ་བལྟ་བ་ཞེས་བྱའོ། །རྣམ་པར་ཤེས་པ་གཞན་དང་ལྡན་པས་ཀྱང་ཞེས་བྱ་བ་ནི། རྣམ་པར་ཤེས་པ་གཞན་མངོན་དུ་གྱུར་བས་ཀྱང་ཞེས་བྱ་བའི་དོན་ཏོ། །དེ་བཞིན་དུ་རྣ་བ་ལ་སོགས་པ་རང་གི་རྣམ་པར་ཤེས་པ་ལ་བལྟོས་པ་མེད་པ་རྣམས་ལ་ཡང་ཉན་པ་ལ་སོགས་པ་ཁས་བླངས་པའི་ཕྱིར་དང༌། ཡུལ་ཐམས་ཅད་ཅིག་ཅར་དམིགས་པར་ཐལ་བར་འགྱུར་རོ་ཞེ་ན། མིག་ཐམས་ཅད་ཀྱི་མཐོང་བ་ནི་མ་ཡིན་པ་ཉིད་དེ། མིག་འགའ་ཞིག་ཁོ་ནས་བལྟ་བར་ཁས་བླངས་པའི་ཕྱིར་རོ། །རྣམ་པར་ཤེས་པ་དང་བཅས་པ་ཞེས་བྱ་བ་ནི་རྣམ་པར་ཤེས་པ་གནས་པའོ། །རྣམ་པར་ཤེས་པ་རྣམས་ནི་ཅིག་ཅར་དབང་པོ་རྣམས་ལ་གནས་པ་ཡང་མ་ཡིན་པས་ཡུལ་ཐམས་ཅད་ཅིག་ཅར་དམིགས་པར་ཐལ་བར་ཡང་མི་འགྱུར་རོ། །དེ་ལྟ་ན་འོ་ན་ནི་ཞེས་རྒྱ་ཆེར་འབྱུང་བ་ལ། རྣམ་པར་ཤེས་པ་ཁོ་ན་ལྟ་བ་ལ་ནུས་པ་དང་ལྡན་པར་སྣང་བའི་ཕྱིར་རྣམ་པར་ཤེས་པ་ཉིད་ཀྱིས་མཐོང་བར་འགྱུར་རོ་ཞེ་ན། འདི་ལ་སློབ་དཔོན་འདུས་བཟང་ན་རེ། རྣམ་པར་ཤེས་པའི་རྟེན་རྣམ་པར་ཤེས་པ་དང་ལྷན་ཅིག་སྐྱེས་པའི་འབྱུང་བ་ཆེན་པོ་ཉེ་བར་བསགས་པ་ལས་མིག་གིས་བལྟ་བར་ནུས་ཀྱི་དེ་ལ་བརྟེན་པའི་རྣམ་པར་ཤེས་པས་མཐོང་ཞེས་བྱ་བ་ནི་མ་ཡིན་ཏེ། གང་གི་ཕྱིར་དམིགས་པའི་རྒྱུ་ཡོད་ན་དམིགས་པར་འགྱུར་བ་དེའི་ཕྱིར་དམིགས་པའི་རྒྱུ་ཉིད་དམིགས་པའོ་ཞེས་བྱ་བ་ནི་རིགས་པར་བརྗོད་པའོ་ཞེས་ཟེར་རོ། །འདི་ཡང་མ་གྲུབ་པ་མ་ཡིན་པའི་ཕྱིར་རྣམ་པར་ཤེས་པའི་རྟེན་བདག་གི་ཁྱད་པར་ལས་གྱུར་པ་ནི་འགའ་ཡང་མ་བཤད་དོ། །མདོ་ལས་ཀྱང་མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བར་གསུངས་ཀྱི། རྣམ་པར་ཤེས་པ་དང་གཟུགས་
ལ་བརྟེན་ནས་མིག་སྐྱེའོ་ཞེས་འགའ་ཡང་མ་གསུངས་པས་དེའི་ཕྱིར་རྣམ་པར་ཤེས་པ་མིག་གི་རྒྱུའོ་ཞེས་བྱ་བ་ནི་རང་གི་རྣམ་པར་རྟོག་པ་ཙམ་སྟེ། གལ་ཏེ་རྣམ་པར་ཤེས་པའི་རྒྱུ་རྒྱས་པ་ལས་བྱུང་བའི་ཁྱད་པར་ལས་རྟེན་པ་དང་བཅས་པའི་མིག་གིས་མཐོང་བར་འདོད་ན། དེ་ལྟ་ན་དེ་དང་མཚུངས་པའི་མིག་གིས་ཀྱང་མཐོང་བར་ཐལ་བར་འགྱུར་རོ། །རྟེན་པ་དང་བཅས་པའི་རྒྱུ་ཉེ་བར་བསགས་པའི་ཕྱིར་ཆེས་ཁྱད་པར་དུ་འཕགས་པར་མཐོང་བ་ཞེས་བྱ་བ་འདིའི་ཁྱད་པར་དུ་འགྱུར་རོ། །ཅི་སྟེ་རྟེན་པ་དང་བཅས་པ་དང་དེ་དང་མཚུངས་པ་ལས་རྣམ་པར་ཤེས་པས་བྱས་པའི་རང་བཞིན་གྱི་དབྱེ་བར་འདོད་ན། དེ་ལྟ་ན་ཡང་ཁམས་དང་སྐྱེ་མཆེད་རིགས་པ་ཉིད་དུ་འགལ་བས་ཅི་ལས་ངེས་པར་བྱ། མིག་ལ་བརྟེན་པའི་རྣམ་པར་ཤེས་པས་མཐོང་བ་མ་ཡིན་ཞེས་བྱ་བ་བསྟན་བཅོས་ལ་སོགས་བ་རྣམ་པར་ཤེས་པའི་ཁྱད་པར་ལས་མིག་གི་རྣམ་པར་ཤེས་པ་རིགས་གཅིག་པ་ལ་མཐོང་བ་དང་མཐོང་བ་མ་ཡིན་པ་མི་རུང་ངོ༌། །གལ་ཏེ་རྟེན་གྱི་ཁྱད་པར་ལས་འདིའི་ཁྱད་པར་རོ་ཞེ་ན། རྟེན་གྱི་ཁྱད་པར་ལས་ཆོས་གཞན་ཉིད་དུ་འགྱུར་བ་མེད་དོ། །འདི་དེ་ལྟ་མ་ཡིན་ན་རྣམ་པར་ཤེས་པའི་རིགས་སུ་ཁྱད་པར་མེད་ཀྱང་གང་གི་ཕྱིར་སྭ་ག་ཏ་ཁྱད་པར་འདི་རྣ་བ་ལ་སོགས་པའི་རྣམ་པར་ཤེས་པའི་རྟེན་དང་དམིགས་པ་རྣམས་ལས་ཐ་དད་པའི་དམིགས་པ་དང་རྟེན་ནོ། །དེ་ནས་ཁྱད་པར་ལས་གཞན་པ་ཉིད་རྣམ་པར་ཤེས་བ་རྣམས་ལ་ཡང་འདི་ཉིད་མཐོང་ངོ་ཞེས་ཅིའི་ཕྱིར་མི་འདོད། ཇི་ལྟར་མིག་གི་རིགས་སུ་ཁྱད་པར་མེད་པ་ལ་བལྟ་བ་དང་མི་བལྟ་བ་ཉིད་ཡིན་པ་དེ་ལྟར་རྣམ་པར་ཤེས་པ་ལ་ཡང་ཅིའི་ཕྱིར་མི་འདོད། གང་གི་ཕྱིར་མིག་ལ་རྒྱས་པ་ལས་བྱུང་བའི་ཁྱད་པར་ཡོད་དོ་ཞེ་ན། རྒྱས་པ་ལས་བྱུང་བའི་ཁྱད་པར་མེད་དེ། རང་བཞིན་གཞན་དུ་འགྱུར་བར་མཚུངས་སོ། །འདིའི་མཐོང་བ་ཡང་ཅི་མིག་ཉིད་དམ་འོན་ཏེ་མིག་མ་ཡིན་པ་འགའ་ཞིག །གལ་ཏེ་མིག་ཉིད་ཡིན་ན། དེ་ལྟ་ན་རྟེན་བཅས་དང་དེ་མཚུངས་ཀྱི་དབྱེ་བ་མི་རིགས་ཏེ། གཉི་ག་མིག་ཉིད་ཡིན་པའི་ཕྱིར་ལྟ་བ་དེ་ཅི་ཞིག་ཁྱད་བར་དུ་བྱེད། མིག་ནི་ལྟ་བས་ཁྱད་པར་དུ་བྱེད་ཅིང་ལྟ་བ་ཡང་མིག་གིས་སོ་ཞེ་ན། སྔོན་བྱེད་པའི་རྣམ་པ་
བསྟན་པའོ། །ཅི་སྟེ་མིག་ལྟ་བ་ཡང་ཅི། །དེའི་ལྟ་བ་གཟུགས་ལ་ལྟ་བ་ཡིན་ན། འདི་ཡང་མིག་གི་དབྱེ་བ་མི་ཤེས་སོ། །མིག་གཞན་རྣམ་པར་ཤེས་པ་བཞིན་གཞན་མ་ཡིན་པའི་རང་བཞིན་ཉིད་ཡོད་པ་མ་ཡིན་ན་ཡང་ཅུང་ཟད་རྗེས་སུ་ལྟ་བ་དང༌། དངོས་པོ་ལས་གཞན་མ་ཡིན་པ་དེའི་རང་བཞིན་ལས་གཞན་པ་གང་ཡིན་པ་ཉིད་སྤང་བ་མེད་དོ། །གལ་ཏེ་མེད་ན་འདི་ཚིག་ཙམ་གྱིས་སྒྲུབ་བར་ཅི་ཞིག་ཞུས། གསུམ་ཉིད་ཁས་བླངས་པར་གྱུར་པའི་དངོས་པོའི་བྱེད་པ་དེའི་རང་བཞིན་དེ་ལ་གལ་ཏེ་རང་བཞིན་ཐ་དད་ན། རང་བཞིན་མེད་པའི་བྱེད་པ་ཁོ་ན་གཞན་ཉིད་ཉམས་སོ། །ཕན་ཚུན་ཐ་དད་པའི་རང་བཞིན་རྣམས་གཞན་ཉིད་དུ་མཐོང་བ་མེད་དོ། །ཅི་སྟེ་དངོས་པོའི་བྱེད་པ་རང་བཞིན་མེད་པ་ཉིད་ཀྱང་དེ་མེད་པར་ཐལ་བ་ལས་གཞན་མ་ཡིན་པ་ཉིད་རང་བཞིན་མེད་པ་ལ་ཡོད་པའི་རྗེས་སུ་འགྲོ་བ་ཅུང་ཟད་ཀྱང་ཡོད་པ་མ་ཡིན་པ་དེའི་ཕྱིར་རྣམ་པར་ཤེས་པ་ལས་གཞན་པའི་མིག་དག་གིས་མཐོང་བ་མི་འཐད་དོ། །ཤེས་རབ་དེ་ཡང་རྣམ་པར་ཤེས་པ་ལྟ་བར་འགྱུར་རོ། །གཞན་དག་གིས་ཤེས་རབ་ལ་རྟོག་བར་བྱེད་པའི་བདག་ཉིད་ཀྱི་ཁྱད་པར་ཡོད་པས་རྣམ་པར་ཤེས་པས་ཀྱང་ད་ལྟ་བའི་གཟུགས་བཏགས་པའི་རྣམ་པ་ཉིད་ཀྱི་ཁྱད་པར་ཅི་ཞིག་མི་འཛིན་ཞེ་ན། གང་བཤད་པ། གལ་ཏེ་མིག་གིས་མཐོང་བ་མ་ཡིན་པ་དེ་མེད་པའི་ཕྱིར་ཡོང་བ་ཞེས་མི་བརྗོད་དོ། །དེ་ནི་དེ་ལྟ་བུ་མ་ཡིན་ཏེ་གང་གི་ཕྱིར་མིག་གིས་མཐོང་བ་ལ་ཐུན་མོང་མ་ཡིན་པའི་རྒྱུ་དེ་མེད་པའི་ཕྱིར་འདིས་ཡང་མཐོང་བར་མི་འགྱུར་བས་ལོང་བ་ཞེས་བརྗོད་པ་མ་ཡིན་ནོ། །མིག་གི་རྣམ་པར་ཤེས་པས་མཐོང་ན་ལོང་པ་ཡང་མ་ཡིན་པར་ཐལ་བར་འགྱུར་རོ། །ལོང་བ་ལ་དེ་སྐྱེ་བ་མེད་པའི་ཕྱིར་མ་ཡིན་ཡང་འདས་པ་དང་མ་འོངས་པའི་མིག་གི་རྣམ་བར་ཤེས་པའི་རྫས་ཡོད་པ་དེ་ཐོབ་བའམ། དེ་ལས་འདས་པ་པ་དང་མ་འོངས་པའི་མིག་གི་རྣམ་པར་ཤེས་པ་དང་ལྡན་པའི་ཕྱིར་ལོང་བ་ཡང་མ་ཡིན་ཞེས་བྱ་བ་འདི་ལ་སྐྱོན་མེད་དོ་ཞེ་ན། གང་བཤད་པ། མིག་ཉིད་དེ་དང་དེར་མཐོང་བའི་སྒྲ་ཡིས་བཤད་པ་ཞེས་བྱ་བ་དེ་གནོད་བྱེད་མ་ཡིན་ཏེ། རྒྱུ་ལ་འབྲས་བུ་བཏགས་པའི་ཕྱིར་རོ། །གང་བཤད་པ་
འཇིག་རྟེན་དང་འགལ་ཞེས་བྱ་བ་ལ་འདི་འཇིག་རྟེན་དང་འགལ་བ་མ་ཡིན་ཏེ། མིག་གི་རྣམ་པར་ཤེས་པའི་ཐུན་མོང་མ་ཡིན་པའི་རྒྱུ་ཉིད་ཀྱིས་འཇིག་རྟེན་ན་མིག་གིས་མཐོང་ངོ་ཞེས་བྱ་བ་འཐད་དོ། །གང་བཤད་པ། གལ་ཏེ་རྣམ་པར་ཤེས་པ་ཁོ་ན་མཐོང་བ་ཡིན་ན་ཆོས་གཅིག་དང་གཉིས་ཀྱི་བདག་ཉིད་དུ་འགྱུར་བས་ཤེས་རབ་ལ་ཡང་འདི་ཉིད་ཐལ་བར་འགྱུར་ཏེ། མཐོང་བ་དང་ཤེས་རབ་དག་ཐ་མི་དད་པར་ཁས་བླངས་པའི་ཕྱིར་རོ། །འོ་ན་འདིར་ཅིའི་དོན་དུ་དབྱེ་བ་ཁས་ལེན་བར་བྱེད། དེའི་ཕྱིར་གཅིག་དང་གཉིས་ཀྱི་བདག་ཉིད་ཐལ་བར་འགྱུར་རོ་ཞེས་ཟེར་ཏེ་ཞར་ལས་བྱུང་བས་ཆོག་གོ །འདི་ནི་ཕྱོགས་ཙམ་ཞིག་ཡིན་གྱི་གཞུང་མངས་པའི་འཇིགས་བས་རྣམ་པར་དཔྱད་པ་རྒྱས་པར་ནི་མ་བྱས་སོ། །དཀྱུས་མ་ཉིད་བརྩམ་པར་བྱ་སྟེ། ཅི་ལས་ཞེ་ན། གང་ཕྱིར་བར་དུ་ཆོད་པ་ཡི། །གཟུགས་ནི་མཐོང་བ་མིན་ཕྱིར་ལོ། །ཞེས་བྱ་བ་ལ། ལོའི་སྒྲ་ནི་རྒྱུ་འདིས་ནི་རྣམ་པར་ཤེས་པ་མཐོང་བ་འགོག་པར་ནུས་པ་མ་ཡིན་ནོ་ཞེས་མི་འདོད་བར་བསྟན་པའི་དོན་དུའོ། །གལ་ཏེ་རྣམ་པར་ཤེས་པས་མཐོང་ན་རྩིག་པ་ལ་སོགས་པ་དག་ལ་ཐོགས་པ་མེད་པའི་ཕྱིར་མཆོད་པ་ལྟར་རྩིག་པས་ཆོད་པའི་གཟུགས་ཀྱང་མཐོང་བར་འགྱུར་ན། ཆོད་པ་ནི་མཐོང་བ་ཡང་མ་ཡིན་ཏེ། དེའི་ཕྱིར་གང་གིས་ན་ཆོད་པ་མི་མཐོང་བར་འགྱུར་བར་ལྟ་བའི་བདག་ཉིད་མ་ཡིན་པས་རྒྱུ་གཞན་ཡོད་པ་མ་ཡིན་ནོ། །དེ་ལྟ་ན་གཟུགས་ཆོད་པ་མི་མཐོང་བའི་ཕྱིར་རྣམ་པར་ཤེས་པ་བལྟ་བའི་བདག་ཉིད་ཅན་མ་ཡིན་ལ་བལྟ་བའི་བདག་ཉིད་ཅན་མ་ཡིན་པའི་ཕྱིར་ན་ཆོད་པ་ཡང་མི་མཐོང་ངོ༌། །མིག་ནི་བལྟ་བའི་བདག་ཉིད་ཡིན་ཡང་བར་དུ་ཆོད་པ་ལ་ཐོགས་པས་བར་དུ་ཆོད་པའི་གཟུགས་མི་མཐོང་བ་དང༌། ཐོགས་པ་མེད་པས་བར་དུ་མཆོད་པར་མཐོང་བ་འགལ་བ་མེད་དོ། །བསྒྲིབ་པ་ལ་ནི་མིག་གི་རྣམ་པར་ཤེས་པ་མི་སྐྱེ་བ་ཉིད་དེ་ཞེས་བྱ་བ་རྒྱ་ཆེར་འབྱུང་སྟེ། ལྟ་བའི་བདག་ཉིད་མ་ཡིན་པའི་ཕྱིར་བསྒྲིབ་པ་མི་མཐོང་བ་ནི་མ་ཡིན་ནོ། །འོ་ན་ཅི་ཞེ་ན། མ་སྐྱེས་པའི་ཕྱིར་མི་མཐོང་བའི་བདག་ཉིད་ཀྱི་རྒྱུ་ནི་མི་མཐོང་བའི་ཞས་སྟོན་པར་བྱེད་དོ། །དེའི་ལུགས་
ལ་མིག་བཞིན་དུ་ཐོགས་པ་དང་བཅས་པ་ཉིད་ཀྱང་ཉེ་བར་དམིགས་པའི་ནུས་པ་ལ་སྒྲིབ་བས་མི་དམིགས་པ་བཞིན་དུ་དེ་ལྟར་འགྱུར་རོ་ཞེ་ན་འདི་ནི་མཚུངས་སོ། །ཅི་སྟེ་མི་སྐྱེ་ཞེས་བྱ་བ་རྒྱས་པར་འབྱུང་སྟེ། རྣམ་པར་ཤེས་པ་ཁོ་ན་ཡུལ་ལ་བྱེད་པ་ཡིན་གྱི་མིག་མ་ཡིན་ཏེ། མིག་ནི་རྣམ་པར་ཤེས་པ་ཁོ་ནར་བྱེད་པ་ཡིན་ལ། རྣམ་པར་ཤེས་པ་ཡང་ཐོགས་པ་མེད་པ་ཡིན་ནོ། །དེའི་ཕྱིར་ཡུལ་དང་མིག་ཡོད་ན་རྣམ་པར་ཤེས་པ་ཅིའི་ཕྱིར་མི་སྐྱེ། །གང་གི་ལྟར་ན་མིག་གིས་མཐོང་ཞིང་རྣམ་པར་ཤེས་པས་ཤེས་པ་དེའི་ལྟར་ན་ནི། རྣམ་པར་ཤེས་པ་རྟེན་མིག་དང་ལྷན་ཅིག་ཏུ་ཡུལ་གཅིག་ལ་འཇུག་པའི་ཕྱིར་གཟུགས་གང་ཞིག་མིག་གིས་མཐོང་བ་དེ་ཉིད་རྣམ་པར་ཤེས་པས་རྣམ་པར་ཤེས་སོ། །དེའི་ཕྱིར་རྟེན་དང་ལྷན་ཅིག་ཡུལ་ལ་འཇུག་ཅིང་མིག་ཀྱང་ཐོགས་པ་དང་བཅས་པའི་ཕྱིར་ཆོད་པའི་གཟུགས་ལ་འཇུག་པ་མེད་ཅིང་མཐོང་བ་མེད་དེ། དེའི་ཕྱིར་རྣམ་པར་ཤེས་པ་མི་སྐྱེ་བ་རུང་ངོ༌། །གང་བཤད་པ། སྐྱེ་བ་ཉིད་དེའི་མཐོང་བ་དང་མཐོང་བ་ཉིད་ཀྱིས་སྐྱེ་བའོ་ཞེས་བྱ་བ་དེ་ཉིད་ཀྱི་ཕྱིར་བཤད་པ། ཅི་ལྟར་སྐྱེ་བ་མེད་པར་གྱུར་པ་དང༌། ཅི་ལྟར་མཐོང་བར་འགྱུར་ཞེས་བྱ་བ་ཅི་ལྟར་སྐྱེ། མ་མཐོང་བའམ་ཅི་ལྟར་མཐོང་ཞེས་བྱ་བ་དང༌། བྱེ་བྲག་ཏུ་སྨྲ་བའི་སྐྱེ་བ་ལས་གཞན་བའི་མཐོང་བ་ཞེས་བྱ་བ་ཡང་ཅི་ཞེ་ན། བྱེད་པའི་རིགས་ཡིན་པའི་ཕྱིར་མཐོང་བར་སྒྲུབ་པ་རྟེན་པ་དང་བཅས་པའི་མིག་གཞན་ལ་གཞན་སྐྱེད་པ་མི་རུང་ངོ༌། །འདུས་མ་བྱས་ཀྱང་དེར་ཐལ་བའི་ཕྱིར་རྒྱུ་དང་འབྲས་བུའི་འབྲེལ་བ་མེད་དོ། །ཐལ་བར་འགྱུར་བ་ལས་ཀྱང་བྱེད་བའམ་འདུས་བྱས་ཉིད་གཞན་བསྐྱེད་དོ་ཞེས་བྱ་བར་ཐལ་བའམ། དེར་ཡང་དེ་ལྟར་ཞེས་བྱ་བ་སྐབས་མ་ཡིན་ནོ། །ཅི་སྟེ་ཉེས་པ་འདིར་མི་འགྱུར་ཏེ། དེ་ལྟར་སྐྱེད་པ་དང་མི་སྐྱེད་པ་གཞན་ཉིད་དོ་ཞེ་ན། དེ་ལྟ་ན་འོ་ན་སྐྱེ་བ་ཉིད་མཐོང་བ་དང་མཐོང་བ་ཉིད་སྐྱེ་བའོ་ཞེས་བྱ་བ་བྱེ་བྲག་ཏུ་སྨྲ་བའི་ཕྱོགས་ལ་ཡང་དེ་ཉིད་སྐྱོན་ཡིན་ནོ། །ཡང་སྐྱེད་པའི་སྒྲ་ཡིས་བདག་ཉིད་དུ་གྱུར་བ་ཙམ་དང༌།
མཐོང་བའི་སྒྲ་ཡིས་བདག་ཉིད་ཀྱི་ཁྱད་པར་བརྗོད་དོ་ཞེ་ན། སྒྲ་དང་དོན་དག་ཐ་དད་པའི་ཕྱིར་མི་སྐྱེ་བ་ཉིད་མཐོང་བ་དང་མི་མཐོང་བ་ཉིད་སྐྱེད་པའོ་ཞེས་ཅིའི་ཕྱིར་མི་གཟུང༌། གང་བཤད་པ། མཆིང་བུ་དང་ལྷང་ཚེར་ལ་སོགས་པས་ཆོད་པ་ལ་མིག་གི་རྣམ་པར་ཤེས་པ་སྐྱེ་བ་ཉིད་དེ་ལ་མ་བསྒྲིབས་པ་ལ་སྐྱེ་བ་ཞེས་ཇི་ལྟར་བརྗོད་ཅེ་ན། དེ་ལ་ཡང་གཞན་གྱིས་བཤད་པ། གལ་ཏེ་རྣམ་པར་ཤེས་པས་མཐོང་བ་ན་བར་དུ་ཆོད་པའི་གཟུགས་ཀྱང་མཐོང་སྟེ། ལྟ་བར་མི་བྱེད་པ་དེའི་ཕྱིར་མཐོང་བའི་བདག་ཉིད་ནི་མིག་གི་རྣམ་པར་ཤེས་པའོ་ཞེས་བྱ་བ་འདིར་འདི་ལྟར་བཤད་དེ། སྐྱེ་བ་མེད་པའི་ཕྱིར་མ་མཐོང་བ་ནི་མཐོང་བའི་བདག་ཉིད་མ་ཡིན་པའི་ཕྱིར་ཞེས་བྱ་བ་དེ་ལྟར་བཤད་དོ། །འདི་ནི་ལན་དུ་མ་འབྲེལ་བ་ཉིད་དེ། བར་དུ་ཆོད་པ་ལ་ཡང་སྐྱེ་ཞེས་བྱའོ། །མིག་ཀྱང་ལུས་ཀྱི་དབང་པོ་བཞིན་དུ་ཞེས་རྒྱ་ཆེར་འབྱུང་བ་ལ། ལུས་ཀྱི་དབང་པོ་བཞིན་དུ་ཞེས་བྱ་བ་ནི། ཐོགས་པ་དང་བཅས་པའི་ཕྱིར་བར་ཆོད་ཀྱིས་བར་དུ་བཅས་པའི་ཡུལ་དང་མ་ཕྲད་པའི་ཕྱིར་མི་རིག་གོ་ཞེས་བྱ་བར་མི་རིགས་ན། མིག་གི་དབང་པོ་ནི་ཡིད་ལྟར་མ་ཕྲད་པའི་ཡུལ་ཅན་ཡིན་པའི་ཕྱིར། བར་དུ་གཅོད་པས་ཅུང་ཟད་ཀྱང་བྱེད་པ་མ་ཡིན་པས་བར་དུ་ཆོད་པའི་གཟུགས་ཀྱང་ཅི་སྟེ་མི་མཐོང༌། སློབ་དཔོན་འདུས་བཟང་ན་རེ། དེ་ལ་གང་བཤད་པ། ཐོགས་པ་དང་བཅས་པ་ཉིད་ཀྱི་ཕྱིར་ཆོད་པ་དང་སྒྲིབ་པ་མེད་པ་ཞེས་བརྗོད་པར་བྱ་བ་དེ་མི་རིགས་ཏེ། ཡུལ་ལ་ཐོགས་པ་དེ་དང་དེར་ཐོགས་པ་དང་བཅས་པའི་ཕྱིར་རོ། །ཆོད་པ་དང་སྒྲིབ་པ་མེད་པར་བཤད་པ་ནི། སྒྲིབ་པའི་ཐོགས་པ་མེད་པས་སོ་ཞེས་ཟེར་རོ། །དེ་ལྟ་ན་ཡང་ཆོད་པ་སྨོས་པ་ནི་བྲལ་བའི་དོན་ཅན་ཏེ། མིག་གི་རྣམ་པར་ཤེས་པ་ཡང་ཡུལ་ལ་ཐོགས་པས་ཐོགས་པ་དང་བཅས་པ་ཞེས་བྱའོ། །མིག་ནི་ཐོགས་པ་དང་བཅས་པ་ཉིད་ཀྱི་ཕྱིར། ཆོད་པ་དང་སྒྲིབ་པ་ཞེས་བརྗོད་པར་བྱ་བ་མ་ཡིན་ནོ། །གང་བཤད་པ། མིག་དང་ཡུལ་གང་ཡིན་པ་དང༌། དེ་ལ་བརྟེན་པའི་རྣམ་པར་ཤེས་པ་ཡང་དེ་ཉིད་དང་ཅིག་ཅར་དུ་ཡིན། དེའི་ཕྱིར་ཇི་ལྟར་ཡུལ་དང་བཅས་པ་མི་སྣང་བར་བྱེད་པས་ཡུལ་
གཞན་ལ་མིག་འཇུག་པ་འགོག་པར་བྱེད་པའོ། །དེ་བཞིན་དུ་དེའི་རྣམ་པར་ཤེས་པ་ལ་ཡང་ཞེས་བྱ་བ་དེའི་དོན་དུ་འདི་བརྗོད་པར་བྱ་སྟེ། རྣམ་པར་ཤེས་པ་དེ་ལ་ཡང་འཇུག་པའི་རྟེན་ཡུལ་གཅིག་ལ་འཇུག་པའི་ཕྱིར་ཞེས་བྱ་བ་འདི་ཡང་མ་འབྲེལ་ལོ། །འོ་ན་འདིར་ཆོད་པར་བྱེད་པ་ཅི་ཞེ་ན། གང་གི་ཚེ་རྟེན་ཡུལ་གཅིག་པའི་ཕྱིར་མ་ཆོད་པའི་གཟུགས་གཞན་ལ་རྣམ་པར་ཤེས་པ་འཇུག་པར་མི་འགྱུར་བ་ཉིད་དོ། །དེའི་ཕྱིར་སྒྲིབ་པ་ནི་ཐོགས་པ་ཉིད་ལ་འདིར་མངོན་པར་འདོད་དེ། ཡུལ་ལ་ཐོགས་ཞེས་ཤེས་པར་བྱའོ། །མཆིང་བུ་དང༌། ལྷང་ཚེར་དང༌། ཤེལ་དང་ཆུ་དག་གིས་ཞེས་བྱ་བ་རྒྱས་པར་འབྱུང་སྟེ། གལ་ཏེ་མིག་ཐོགས་པ་དང་བཅས་པའི་ཕྱིར་ལུས་ཀྱི་དབང་པོ་བཞིན་རང་གི་ཡུལ་རྩིག་པ་ལ་སོགས་པས་ཆོད་པ་ལ་མི་འཇུག་ན། མཆིང་བུ་དང་ལྷང་ཚེར་ལ་སོགས་པས་ཆོད་པ་ལ་ཡང་དེ་ཁོ་ན་ལྟར་མི་འཇུག་པར་འགྱུར་བ་ཞིག་ན། མཆིང་བུ་ལ་སོགས་པ་དག་གིས་བར་དུ་ཆོད་པ་ནི་མཐོང་བ་ཡིན་གྱི་རེག་པ་ནི་མ་ཡིན་ནོ། །དེའི་ཕྱིར་ཐོགས་པ་དང་བཅས་པ་ཉིད་རྒྱུ་མ་ཡིན་ནོ། །འོ་ན་ཅི་ཞེ་ན། གང་ལ་སྣང་བ་ལ་གེགས་མེད་ན་ཞེས་བྱ་བ་འབྱུང་སྟེ། མིག་ནི་སྣང་བའི་ལྷན་ཅིག་བྱེད་པ་ཅན་ཡིན་པའི་ཕྱིར། ལྷང་ཚེར་ལ་སོགས་པ་གང་ལ་སྣང་བ་ལ་གེགས་མེད་ན་དེས་གཟུགས་བསྒྲིབས་བཞིན་དུ་ཡང་མིག་གི་རྣམ་པར་ཤེས་པ་སྐྱེ་བ་ཉིད་ཡིན་པས་དེས་ཆོད་པའི་གཟུགས་ཀྱང་མཐོང་ལ། གང་དུ་རྩིག་པ་ལ་སོགས་པའི་གེགས་ཡོད་ན་ནི། དེས་ཆོད་པའི་གཟུགས་ལ་མིག་གི་རྣམ་པར་ཤེས་པ་མི་སྐྱེ་སྟེ། ལྷན་ཅིག་བྱེད་པའི་རྒྱུ་མེད་པའི་ཕྱིར་རོ། །དེ་བས་ན་མི་སྐྱེ་བའི་ཕྱིར་རྩིག་པ་ལ་སོགས་པ་དག་གིས་བསྒྲིབས་པ་མི་མཐོང་ངོ༌། །གལ་ཏེ་མིག་ཁོ་ན་སྣང་བ་བཞིན་དུ་ཁ་ཅིག་འབྱུང་བ་ཚོགས་པ་ལ་ཐོགས་པ་དང་ཐོགས་པ་མེད་པའི་ཕྱིར་དང་འགའ་ཞིག་ཐོགས་པ་མེད་པའི་ཕྱིར་ཆོད་པའི་གཟུགས་མཐོང་བ་དང་མི་མཐོང་བར་འགྱུར་བ་མ་ཡིན་ནམ་ཞེ་ན། དེ་ནི་དེ་ལྟ་མ་ཡིན་ཏེ། མིག་ནི་ཐམས་ཅད་དུ་གེགས་མེད་ན་མ་ཕྲད་པའི་བྱེད་པ་ཅན་ཡིན་པའི་ཕྱིར་དང༌།
སྣང་བ་ནི་དེ་ལྟ་མ་ཡིན་ཏེ་ཕྲད་པའི་བྱེད་པ་ཅན་ཡིན་པའི་ཕྱིར། སློབ་དཔོན་འདུས་བཟང་ན་རེ། རྩིག་པ་ལ་སོགས་པས་ཆོད་པ་ནི་སྣང་བ་མེད་པའི་ཕྱིར་མི་འཛིན་ནོ་ཞེས་ཟེར་རོ། །དེ་ལྟར་སྨྲ་བ་ནི་ཁ་ཅིག་ཏུ་སྣང་བ་མེད་ཀྱང་འཛིན་པའི་ཕྱིར་རོ། །འོ་ན་ཅི་ལྟར་འགའ་ཞིག་ཏུ་གཟུགས་ཚོགས་བསྒྲིབ་པའི་བདག་ཉིད་ཡིན་པའི་ཕྱིར། མུན་པ་སྣང་བ་བཞིན་དུ་མཚུངས་སོ་ཞེ་ན། གང་གི་ཕྱིར་གཟུགས་ཀྱི་སྐྱེ་མཆེད་མུན་པས་བསྒྲིབས་པ་མི་འཛིན་པ་ཡོད་ཀྱང་ཆོད་པ་འཛིན་པར་བཤད་པ་ནི། དེ་དག་བསྒྲིབས་པས་ཆོད་པ་འཛིན་གྱི་ཚོགས་པ་ལ་སོགས་པས་ཆོད་པ་ནི་མ་ཡིན་ནོ། །རྩིག་པ་ལ་སོགས་པས་ཆོད་པ་མི་འཛིན་པའི་རྒྱུ་ཡང་ཅི་ཞེ་ན། ཤེལ་ལ་སོགས་པ་རྣམས་ཀྱིས་ཆོད་པ་འཛིན་པས་དྲིས་པ་ལ། དེ་ཉིད་བརྗོད་པར་མི་བྱ་སྟེ། དེ་ལ་རྒྱུ་གཞན་མེད་པའི་ཕྱིར་སྣང་བའི་གེགས་དང་གེགས་མ་ཡིན་པ་ཞེས་བྱ་སྟེ། འདིས་ནི་མུན་པ་དང་སྣང་བ་དག་རྣམ་པར་བཤད་དོ། །མུན་པ་ནི་སྣང་བ་དང་འགལ་བ་སྟེ་དེ་མེད་པའི་ཡུལ་འཛིན་པ་ཉིད་ཀྱིས་དེ་དང་འདྲ་བ་ཞེས་བྱའོ། །དེ་ཉིད་ཀྱི་ཕྱིར་དེས་བསྒྲིབས་པ་མི་འཛིན་ཏོ། །མཚན་མོ་རྒྱུ་བ་རྣམས་ནི་རྣམ་པར་སྨིན་པ་ཉིད་ཀྱིས་དེ་དང་འདྲ་བ་སྟེ། གང་ཞིག་མུན་པས་ཆོད་པའི་གཟུགས་ཀྱང་མཐོང་བར་བྱེད་དོ། །གཞན་དག་ལ་ཡང་ལས་ཀྱི་རྣམ་པར་སྨིན་པའི་དབང་གིས་དེ་དང་འདྲ་བ་ཡོད་དེ། གང་གིས་དེའི་ཁོང་ན་གནས་པ་མཐོང་བ་ལྟ་བུའོ། །མིག་ཐམས་ཅད་ཐམས་ཅད་དུ་ལྷན་ཅིག་བྱེད་པའི་རྒྱུ་རྐྱེན་མ་ཡིན་ཏེ། སྣང་བ་ལ་འདོད་པ་ཅི། གང་དག་གིས་མིག་གི་རྣམ་པར་ཤེས་པ་སྣང་བ་ལ་མ་བལྟོས་བར་སྐྱེ་བ་དེ་དག་གི་ལྟར་ན་རྩིག་པ་ལ་སོགས་པས་ཆོད་པ་ལ་ནི་སྣང་བའི་གེགས་སུ་གྱུར་པ་དང་མི་སྐྱེ་བའི་ཕྱིར་མཐོང་བ་མ་ཡིན་ནོ། །ཤེལ་ལ་སོགས་པས་ཆོད་པ་ལ་ནི་སྣང་བའི་གེགས་མེད་པའི་ཕྱིར་སྐྱེའོ། །དེའི་ཕྱིར་མཐོང་ཞེས་བརྗོད་པར་བྱའོ། །འོ་ན་གང་མདོ་ལས་ཞེས་བྱ་བས་ནི་ལུང་དང་འགལ་བ་སྟོན་པར་བྱེད་དོ། །གལ་ཏེ་རྣམ་པར་ཤེས་པས་མཐོང་ན་ནི་འདི་སྐད་དུ། མིག་གི་རྣམ་པར་ཤེས་པས་གཟུགས་རྣམས་མཐོང་ནས་ཞེས་བྱ་བ་
དེ་ལྟ་བུ་ཞིག་གསུང་བར་འགྱུར་བ་ཞིག་ན། མིག་གིས་གཟུགས་རྣམས་མཐོང་ནས་མཚན་མར་འཛིན་པར་མི་འགྱུར། མངོན་རྟགས་སུ་འཛིན་པར་མི་འགྱུར་ཞེས་བྱ་བ་དེ་སྐད་དུ་རྒྱ་ཆེར་གསུངས་པ་ཡང་ཡིན་ཏེ། དེའི་ཕྱིར་མིག་ཁོ་ནས་མཐོང་གི་རྣམ་པར་ཤེས་པས་ནི་མ་ཡིན་ནོ་ཞེས་བྱ་བར་ངེས་སོ། །དེ་ནི་དེ་ལྟར་མ་ཡིན་ཏེ། མདོ་ནི་དགོངས་པ་ཅན་ཡིན་པའི་ཕྱིར་རོ། །ཡང་འདིར་དགོངས་པ་ནི་དེ་ཡིན་ཞེ་ན། འདིར་དགོངས་པ་ནི་དེ་ལ་བརྟེན་ཏེ་ཞེས་བྱ་བ་འདི་ཡིན་ཏེ། ཡིད་ལ་བརྟེན་ནས་རྣམ་པར་ཤེས་པས་གཟུགས་རྣམས་མཐོང་ནས་ཞེས་བྱ་བའི་དོན་ཏོ། །ཇི་ལྟར་དེ་ལ་བརྟེན་ནས་རྣམ་པར་ཤེས་པས་ཞེས་བྱ་བ་ཡིན་གྱི་མིག་ཁོ་ནས་མ་ཡིན་ནོ་ཞེས་བྱ་བ་འདི་ཇི་ལྟར་ཤེས་པར་བྱ་ཞེ་ན། དེའི་ཕྱིར་དཔེར་ན་ཡིད་ཀྱིས་ཆོས་རྣམས་རྣམ་པར་ཤེས་པར་བྱས་ནས་ཞེས་བྱ་བ་གསུངས་ཏེ། མདོ་དེ་ཉིད་ལས་ཡིད་ཀྱིས་ཆོས་རྣམ་པར་ཤེས་པར་བྱས་ནས་མཚན་མར་འཛིན་པར་མི་འགྱུར་ན་དོན་རྟགས་སུ་འཛིན་པར་མི་འགྱུར་ཞེས་གསུངས་སོ། །ཡིད་ནི་འདས་པ་ཡིན་པའི་ཕྱིར་ཞེས་བྱ་བ་ལ། འདས་པ་ནི་བྱེད་པ་ཞིག་པའི་ཕྱིར་རམ་བརྗོད་དུ་མེད་པའི་ཕྱིར་ཡིད་ཀྱིས་ཆོས་རྣམས་རྣམ་པར་མི་ཤེས་སོ། །འོ་ན་ཅི་ཞེ་ན། ད་ལྟར་བ་ཡིན་པའི་ཕྱིར་ཡིད་ཀྱི་རྣམ་པར་ཤེས་པ་ཡིན་ཏེ། དེའི་ཕྱིར་དེ་ལ་བརྟེན་ནས་ཞེས་བྱ་བར་རྟོགས་སོ། །ཡང་ན་བརྟེན་པའི་ལས་རྟེན་ལ་ཉེ་བར་བཏགས་པ་ཡིན་ཏེ་ཞེས་བྱ་བ་ལ། བརྟེན་པ་མིག་གི་རྣམ་པར་ཤེས་པ་དེའི་ལས་གཟུགས་མཐོང་བ་དེའི་རྟེན་མིག་དག་ལ་ཉེ་བར་བཏགས་པ་ཡིན་ནོ། །མིག་གིས་གཟུགས་མཐོང་ནས་ཞེས་བྱ་བ་དེ་ཉིད་ལ་དཔེ་ནི། དཔེར་ན་ཁྲིའུ་དག་འབོད་དོ་ཞེས་བྱ་བ་སྟེ། བརྟེན་པའི་ལས་འབོད་པ་དེའི་རྟེན་ལ་ཉེ་བར་འདོགས་པ་བཞིན་ནོ། །ཇི་ལྟར་མདོ་ལས། མིག་གི་རྣམ་པར་ཤེས་པར་བྱ་བའི་ཞེས་བྱ་བ་ལ། རྣམ་པར་ཤེས་པ་ནི་དེའི་བརྟེན་པ་རྣམ་པར་ཤེས་པའི་ལས་ཡིན་གྱི་མིག་གི་མ་ཡིན་ཏེ། དེའི་ཕྱིར་བརྟེན་པའི་ལས་རྟེན་ལ་ཉེ་བར་བཏགས་སོ་ཞེས་ཤེས་པར་བྱའོ། །ཡང་ན་གཟུགས་སོ་སོར་རྣམ་པར་རིག་པའི་
རྟེན་གྱི་དངོས་པོ་དང་ཉེ་བའི་རྒྱུར་གྱུར་པའི་ཕྱིར་མིག་ལ་བརྟེན་ནས་རྣམ་པར་ཤེས་པར་བྱ་བས་ན། མིག་གི་རྣམ་པར་ཤེས་པར་བྱས་སོ། །མདོ་ལས་བྲམ་ཟེ་ཞེས་བྱ་བ་རྒྱས་པར་འབྱུང་སྟེ། གལ་ཏེ་མིག་གིས་མཐོང་ན་ཅིའི་ཕྱིར་བཅོམ་ལྡན་འདས་ཀྱིས་སྒོ་ཉིད་དུ་ངེས་པར་གསུངས། སྒོ་ནས་ནི་གཞན་གྱིས་མཐོང་བ་ཡིན་གྱི་སྒོས་ནི་མ་ཡིན་ཏེ། དེའི་ཕྱིར་མིག་གི་སྒོ་ནས་རྣམ་པར་ཤེས་པས་མཐོང་ངོ་ཞེས་བྱ་བར་ཁོང་དུ་ཆུད་དོ། །དེར་ནི་ལྟ་བ་ལ་སྒོ་ཞེས་བྱ་བར་ཟད་དོ་ཞེས་བྱ་བ་ལ། མདོ་དེར་ནི་ལྟ་བ་གང་ཡིན་པ་དེ་མིག་གི་ལས་ཡིན་ཞིང་ལྟ་བ་དེ་ལ་སྒོ་ཞེས་བརྗོད་པ་ཡིན་ཏེ། དེའི་ཕྱིར་མིག་ཉིད་ཀྱིས་མཐོང་གི་རྣམ་པར་ཤེས་པས་ནི་མ་ཡིན་ནོ། །སྒོ་དང་ལྟ་བའི་སྒྲས་དོན་ཐ་མི་དད་པ་ཉིད་ཡིན་ན་ནི་བརྗོད་པ་དོན་མེད་པའི་ཕྱིར་འདིར་ནི་མི་རུང་ངོ༌། །ཅི་ཞེ་ན་མིག་གིས་གཟུགས་རྣམས་མཐོང་བར་བྱ་བ་ལ་ལྟ་བ་ཡིན་ནོ་ཞེས་དེ་སྐད་སྨྲ་བར་འགྱུར་བའོ། །གལ་ཏེ་གཟུགས་རྣམས་མཐོང་བ་ལ་གཟུགས་མཐོང་བ་ཉིད་སྒོར་གྱུར་པ་ཡིན་ན། གཞན་མཐོང་བ་ལ་སྒོར་གྱུར་པ་གང་ཞེ་ན། ཡིད་ནི་ཆོས་རྣམས་ཤེས་པར་བྱ་བ་ལ་སྒོ་ཡིན་ནོ་ཞེས་བྱ་བ་གསུངས་པ་དེར་ཡང་ཡིད་འདས་པ་ཁོ་ན་ཡིད་ཀྱི་རྣམ་པར་ཤེས་པའི་རྟེན་གྱི་དངོས་པོར་གྱུར་པས་སྒོ་ཞེས་གསུངས་ཏེ། ཡིད་འདས་པས་ཆོས་ཐམས་ཅད་རྣམ་པར་ཤེས་པའི་ནུས་པ་མེད་པའི་ཕྱིར་རོ། །དེ་བཞིན་དུ་འདིར་ཡང་གཟུགས་མཐོང་བའི་རྟེན་ཡིན་པའི་ཕྱིར་མིག་ལ་སྒོ་ཞེས་གསུངས་ཀྱི། དེ་ལ་མཐོང་བའི་ནུས་པ་ཡོད་པ་ནི་མ་ཡིན་ཏེ། བེམས་པོ་ཡིན་པའི་ཕྱིར་རོ། །གནས་བརྟན་འདུས་བཟང་ན་རེ། གང་གི་ཕྱིར་ཡིད་ཀྱི་ཆོས་རྣམས་རྣམ་པར་ཤེས་སོ་ཞེས་གསུངས་པ་དེའི་ཕྱིར་འདིར་དགོངས་པ་ནི་དེ་ལ་བརྟེན་ནས་ཞེས་བྱ་བ་འདི་ཡིན་ནོ་ཞེས་ཟེར་རོ། །དེ་ལ་འདི་ནི་ཤེས་བྱེད་དུ་མི་འཐད་དོ། །དེ་དག་རིགས་གཅིག་པའི་ཕྱིར་རོ། །གང་གི་ཕྱིར་དེའི་མཚན་ཉིད་ལས་ཡིད་ཀྱི་རྣམ་པར་ཤེས་པ་ཡང་ཡིད་ཉིད་ཀྱི་ཕྱིར་རོ། །གལ་ཏེ་ཡིད་ཀྱི་རྣམ་པར་ཤེས་པ་ཞེས་བརྗོད་པ་ན། དེར་ནི་མཚན་ཉིད་དུ་འགལ་བར་མི་འགྱུར་རོ། །གང་གི་ཕྱིར་ཡིད་རབ་ཏུ་སྤང་བས་སྨྲ་བའམ།
བྱེད་པ་འདས་པའི་རྣམ་པར་ཤེས་པ་ལས་ལུས་དང་ངག་གི་ལས་སློང་པར་བྱེད་པའི་ནུས་པ་མེད་པར་བརྗོད་ཅིང༌། ད་ལྟ་བའི་རྣམ་པར་ཤེས་པ་ལ་མ་ཡིན་པས་ཡིད་ཉིད་རབ་ཏུ་གྲུབ་པོ། །འོ་ན་མདོ་དེ་ལས་རྣམ་པར་ཤེས་པའི་རྟེན་དུ་གྱུར་པ་ཉིད་མིག་ལ་སོགས་པར་བཞེད་ཀྱི་ཐམས་ཅད་མ་ཡིན་པ་ཅི་ཞེ་ན། རྟེན་བཅས་རྣམས་ལ་མཐོང་བ་མེད་པའི་ཕྱིར་རོ། །དེའི་ཕྱིར་དེ་ལ་ཡིད་ཀྱང་རྣམ་པར་ཤེས་པའི་རྟེན་དུ་གྱུར་པ་ལས་མངོན་པར་འདོད་ཀྱི་ཐམས་ཅད་ནི་མ་ཡིན་ནོ་ཞེས་ཤེས་པར་བྱའོ། །དེ་ཡང་འདས་པ་ཁོ་ན་རྟེན་དུ་འགྱུར་གྱི་མ་སྐྱེས་པ་དང་ད་ལྟར་བྱུང་བ་ཡང་མ་ཡིན་ཞེས་བྱའོ། །འདི་ཅི་ལྟར་ན་དེའི་ཤེས་བྱེད་མ་ཡིན་པ་ཉིད་ཡིན་ཞེ་ན། འདི་ན་ཕྱོགས་སྔ་མའི་བསམ་པ་མ་གཏོགས་པའི་ཕྱིར་དགག་པའི་ཕྱིར་ལན་བརྗོད་པ་ཐམས་ཅད་འབྲེལ་མེད་པར་འགྱུར་རོ། །གང་བཤད་པ། རྣམ་པར་ཤེས་པ་ལས་མཐོང་བའི་ལས་རབ་ཏུ་མ་གྲགས་པ་ལ། རྟེན་ལ་དེར་བཏགས་པ་མི་རིགས་སོ་ཞེ་ན། དེ་ཡང་མི་རིགས་ཏེ་རབ་ཏུ་གྲགས་པའི་ཕྱིར་རོ། །གང་གི་ཕྱིར་འཇིག་རྟེན་ན་མིག་གི་སྒོ་ནས་གཟུགས་དམིགས་པ་ལ་མཐོང་ཞེས་རྗོད་པར་བྱེད་དོ། །མིག་ལ་ཡོད་ཀྱང་གང་མཐོང་བ་མེད་དོ། །རྣམ་པར་ཤེས་པ་ནི་དེ་ལྟ་བུ་མ་ཡིན་ཏེ། རྣམ་པར་ཤེས་པ་ཁོ་ན་མཐོང་བ་ཞེས་བྱ་བར་ཤེས་པར་བྱའོ། །བྲམ་ཟེ་མིག་ནི་སྒོ་ཡིན་ནོ། །ཞེས་བྱ་བ་དེའི་དོན་གང་ཡིན་པ་རྣམས་ནི་གནས་བརྟན་འདུས་བཟང་གིས་བཤད་དོ། །དེ་དག་ནི་ཤིན་ཏུ་དབྱེ་དཀའ་བ་དང་གཞུང་མངས་པའི་འཇིགས་པས་རྣམ་པར་དཔྱད་པ་མ་བྱས་སོ། །གལ་ཏེ་རྣམ་པར་ཤེས་པ་མཐོང་ན་གང་གིས་རྣམ་པར་ཤེས། གང་གི་ལྟར་ན་མིག་གིས་མཐོང་བ་དེའི་ལྟར་ན་ནི་རྣམ་པར་ཤེས་པས་གཟུགས་མཐོང་ངོ༌། །རྣམ་པར་ཤེས་སོ་ཞེས་ཐ་སྙད་རིགས་ན། གང་གི་ལྟར་ན་རྣམ་པར་ཤེས་པས་མཐོང་བ་དེའི་ལྟར་ན་ནི་གཞན་གྱི་རྣམ་པར་ཤེས་པ་མེད་པས་ཐ་སྙད་མེད་པར་འགྱུར་རོ། །མཐོང་བ་དང་རྣམ་པར་ཤེས་པ་འདི་གཉིས་ལ་ཁྱད་པར་ཅི་ཞིག་ཡོད། གང་གིས་ཞེས་བྱ་བ་རྒྱས་པར་འབྱུང་སྟེ། གང་གིས་གཟུགས་མཐོང་བ་དམིགས་པ་དེ་ཉིད་ཀྱིས་འདི་རྣམ་པར་ཤེས་པ་ཡིན་
ནོ། །གལ་ཏེ་དམིགས་པ་མཐོང་བ་ཡིན་ན་སྒྲ་ལ་སོགས་པ་དག་ཏུ་ཡང་དམིགས་པ་མཐོང་བར་འགྱུར་རོ་ཞེ་ན། ཐོག་མའི་དམིགས་པ་ལ་མཐོང་བ་རྣམ་པར་ཤེས་པར་འདོད་ཀྱི་དམིགས་པ་ཐམས་ཅད་ནི་མ་ཡིན་ནོ། །དཔེར་ན་ཤེས་རབ་འགའ་ཞིག་ལ་མཐོང་བ་ཞེས་བྱ་བ་རྒྱས་པར་འབྱུང་སྟེ། ལྟ་བའི་རང་བཞིན་བརྒྱད་མཐོང་བ་ཡང་ཡིན་ཞིང༌། རབ་ཏུ་ཤེས་པ་ཡང་ཡིན་ལ། དེ་དག་ལས་གཞན་རྣམས་ནི་རབ་ཏུ་ཤེས་པ་ཁོ་ན་ཡིན་པ་དེ་བཞིན་དུ། མིག་གི་རྣམ་པར་ཤེས་པ་ནི་མཐོང་བ་ཡང་ཡིན་ཞིང༌། རྣམ་པར་ཤེས་པ་ཡང་ཡིན་གྱི། རྣ་བ་ལ་སོགས་པའི་རྣམ་པར་ཤེས་པ་ནི་རྣམ་པར་ཤེས་པ་ཁོ་ན་ཡིན་ནོ། །ཤེས་རབ་ནི་རྟོག་པར་བྱེད་པའི་བདག་ཉིད་ཡིན་པའི་ཕྱིར་དང་དེ་ལ་མཐོང་བ་མེད་པའི་ཕྱིར་མཐོང་བ་ཞེས་བྱ་བར་མི་རུང་ངོ༌། །དམིགས་པའི་བདག་ཉིད་ཀྱི་ཁྱད་པར་ལས་རྣམ་པར་ཤེས་པ་འགའ་ཞིག་ལ་ཁྱད་པར་ཡོད་པས་འགའ་ཞིག་བདག་མེད་པར་མངོན་པར་མཐོང་བར་མི་རུང་ངོ་ཞེ་ན། རྣམ་པར་ཤེས་པ་ཡང་བསྟན་དུ་ཡོད་པའི་ཡུལ་ཉིད་ལ་ཁྱད་པར་ཡོད་པས་འདི་ནི་མཚུངས་ཏེ། སྔར་ཡང་ཁྱད་པར་བསྟན་ཟིན་ཏོ། །གཞན་དག་ན་རེ་གལ་ཏེ་མིག་གིས་མཐོང་ན་ཞེས་བྱ་བ་ལ་སོགས་པ་ལ། དེ་ལ་མིག་འབྱེད་པ་ན་མཐོང་བ་ཞེས་བརྗོད་པ་རྣམ་པར་ཤེས་པ་ལས་མ་གཏོགས་པའི་བྱ་བ་གཞན་འདྲ་བ་ཞིག་ཡོད་ལ། བྱ་བ་མེད་པར་ཡང་བྱེད་པ་པོ་ཉིད་མི་རིགས་ཏེ། འགྲོ་བ་ཉིད་བཞིན་ནོ་ཞེས་ཟེར་རོ། །དེ་ནི་གླན་གར་མི་རུང་སྟེ་ཞེས་བྱ་བ་རྒྱས་པར་འབྱུང་སྟེ། རྣམ་པར་ཤེས་པ་ལ་རྣམ་པར་ཤེས་པ་ཞེས་བརྗོད་ན། དེ་ལ་ནི་བྱེད་པ་པོ་དང་བྱ་བ་བྱེ་བྲག་ཀྱང་མེད་དེ། རྣམ་པར་ཤེས་པ་ལས་མ་གཏོགས་པའི་རྣམ་པར་ཤེས་པའི་བྱ་བ་མེད་པའི་ཕྱིར་རོ། །དེ་བཞིན་དུ་འདིར་ཡང་བྱེད་པ་པོ་ལས་མ་གཏོགས་པའི་བྱ་བ་མེད་པས་མིག་གིས་མཐོང་ངོ་ཞེས་བྱེད་པ་པོ་བསྟན་པར་འགྱུར་རོ། །གལ་ཏེ་འདིར་ཡང་དེ་གནས་སོ་ཞེ་ན་དེ་ནི་དེ་ལྟ་མ་ཡིན་ཏེ། ཐམས་ཅད་དུ་དངོས་པོ་ཙམ་གྱི་བྱེད་པ་བསྟན་པའི་ཕྱིར་རོ། །དཔེར་ན་གྲིབ་མ་འགྲོའོ་མི་འགྲོའོ་ཞེས་བྱ་བ་དེ་བཞིན་དུ་རྣམ་པར་ཤེས་པ་ཡང་རང་གི་རྐྱེན་དག་ལས་ཡུལ་གང་ལ་སྐྱེ་བ་དེའི་རྣམ་པར་སྐྱེད་པ་ལས་བྱ་བ་མེད་ཀྱང་དེ་ཉིད་ཀྱིས་ཡུལ་རྣམ་པར་ཤེས་པ་ཞེས་
བརྗོད་དོ། །གཞན་དག་ན་རེ་མཐོང་བ་ནི་མིག་གི་རྣམ་པར་ཤེས་པ་ཡིན་ལ་ཞེས་བྱ་བ་ལ། མཐོང་བ་ནི་བལྟ་བའོ། །དེའི་རྟེན་དུ་གྱུར་པའི་ཕྱིར་ཞེས་བྱ་བ་ལ། མིག་ནི་མིག་གི་རྣམ་བར་ཤེས་པའི་རྟེན་དུ་གྱུར་པའི་ཕྱིར་ཞེས་བྱ་བ་ནི་ལས་ལ་བྱེད་པ་པོ་བཞིན་འཇུག་པས་རབ་ཏུ་གྲགས་པའི་དཔེ་ཡང་མིག་ལ་འཇུག་སྟེ། དེའི་ཕྱིར་མིག་གིས་མཐོང་ཞེས་བརྗོད་པར་བྱའོ། །དཔེར་ན་སྒྲོགས་པའི་རྟེན་དུ་གྱུར་པའི་ཕྱིར་ཞེས་བྱ་བ་ནི་དེ་ཉིད་ལ་འཇིག་རྟེན་ན་གྲགས་པའི་དཔེ་སྨྲས་པའོ། །དེ་ལྟ་ན་མིག་ཅེས་བྱ་བ་ལ། གལ་ཏེ་མཐོང་བའི་རྟེན་དུ་གྱུར་པའི་ཕྱིར་མིག་གིས་མཐོང་ངོ་ཞེས་བྱ་བ་ཡིན་ན། དེ་ལྟ་ན་རྣམ་པར་ཤེས་པའི་རྟེན་དུ་གྱུར་པའི་ཕྱིར་མིག་གིས་རྣམ་པར་ཤེས་སོ་ཞེས་བྱ་བར་འགྱུར་རོ་ཞེ་ན་མི་འགྱུར་ཏེ། བྱེད་བ་པོ་དང་བྱ་བའི་ཐ་སྙད་འདི་ནི་འཇིག་རྟེན་པ་ཡིན་ནོ། །འཇིག་རྟེན་ན་རྣམ་པར་ཤེས་པ་དེ་ནི་མཐོང་བའོ་ཞེས་གྲགས་ཏེ་ཞེས་རྒྱ་ཆེར་འབྱུང་ངོ༌། །བྱེ་བྲག་ཏུ་བཤད་པ་ལས་ཞེས་བྱ་བ་རྒྱ་ཆེར་འབྱུང་སྟེ། འཇིག་རྟེན་ན་ཡིན་པ་འབའ་ཞིག་ཏུ་མ་ཟད་ཀྱི་བསྟན་བཅོས་ལས་ཀྱང་དེ་མཐོང་བར་བརྗོད་དོ་ཞེས་སྟོན་ཏོ། །མིག་དང་ཕྲད་ཅིང་ཞེས་བྱ་བ་ནི་མིག་གིས་བལྟས་ཤིང་དེ་ལ་སྣང་བར་གྱུར་པ་སྟེ། དེ་ཡུལ་གྱི་དངོས་པོར་གྱུར་ཅིང་ཞེས་བྱ་བའི་ཐ་ཚིག་གོ །གལ་ཏེ་མཐོང་བའི་རྟེན་དུ་གྱུར་པའི་ཕྱིར་མིག་གིས་མཐོང་ངོ་ཞེས་བྱ་བ་ན། འོ་ན་ནི་གང་གི་རྟེན་དུ་གྱུར་པས་རྣམ་པར་ཤེས་པས་གཟུགས་རྣམ་པར་ཤེས་སོ་ཞེས་བརྗོད་དོ། །དེ་ལས་རྣམ་པར་ཤེས་པ་ལས་ཐ་དད་པའི་བྱ་བ་གཞན་ནི་ཡོད་པ་མ་ཡིན་ནོ་ཞེ་ན། དེའི་ཕྱིར་རྣམ་པར་ཤེས་པ་ནི་ཡོད་ཙམ་གྱིས་ཞེས་བྱ་བ་སྨོས་སོ། །མིག་ནི་ཉེ་བ་ཙམ་གྱིས་མཐོང་ངོ་ཞེས་བསྟན་པར་མི་ནུས་ཏེ། དེ་དང་མཚུངས་པའི་མིག་ཀྱང་ཡོད་པའི་ཕྱིར་རོ། །རྣམ་པར་ཤེས་པ་ནི་དེ་ལྟ་མ་ཡིན་པས་དེ་ཡོད་པ་ཙམ་གྱིས་གཟུགས་རྣམ་པར་ཤེས་སོ་ཞེས་བརྗོད་དེ། དཔེར་ན་ཉི་མས་ཉིན་མོར་བྱེད་དོ་ཞེས་བྱ་བ་བཞིན་ནོ། །འདི་ལྟར་གླིང་རྣམས་ཀྱི་སྣང་བའི་གནས་ནི་ཉིན་མོ་ཡིན་ལ། དེ་ཡང་འོད་དང་བཅས་པའི་ཉི་མ་ལས་གཞན་ཡོད་པ་མ་ཡིན་ནོ། །
དེའི་ཕྱིར་ཉི་མ་ཡོད་པ་ལས་ཉིན་མོར་བྱེད་པའོ། །ཡང་ན་གལ་ཏེ་མཐོང་བའི་རྟེན་དུ་གྱུར་པའི་ཕྱིར་མིག་གིས་མཐོང་བ་རྣམ་པར་ཤེས་པའི་རྟེན་དུ་གྱུར་པའི་ཕྱིར་མཐོང་བ་མ་ཡིན་པ་ཉིད་དེ། ཡིད་ཁོ་ནས་རྣམ་པར་ཤེས་བར་བྱེད་པས་ན། རྣམ་པར་ཤེས་པ་ཞེས་ཐལ་བར་མི་འགྱུར་རོ། །བཅོམ་ལྡན་འདས་ཀྱིས་ཀྱང་རྣམ་པར་ཤེས་པས་རྣམ་པར་ཤེས་སོ་ཞེས་གསུངས་མོད་ཀྱི། མིག་ལ་སོགས་པ་རྣམ་བར་ཤེས་པ་ལས་གཞན་པའི་བདག་ཉིད་དུ་ཡོད་པས་དེ་ལྟ་ན་ཡང་མཚུངས་བ་དེ་མ་ཐག་པ་འདས་པའི་རྣམ་པར་ཤེས་པ་ནི་རྣམ་པར་ཤེས་པ་གཞན་གྱི་རྟེན་དུ་འགྱུར་བས་ད་ལྟ་བའི་མིག་གི་རྣམ་པར་ཤེས་པ་ལ་སོགས་པས་ཤེས་སོགས་བྱ་བར་མི་འགྱུར་ཏེ། འདས་པ་ཁོ་ནས་དོན་དམ་པ་ལས་རྣམ་པར་ཤེས་པའི་བྱ་བ་ད་ལྟར་བ་མ་ཡིན་པ་དེ་ལས་མ་གཏོགས་པའི་རྣམ་པར་ཤེས་པ་མེད་པའི་ཕྱིར། རྣམ་པར་ཤེས་པ་ནི་ཡོད་པ་ཙམ་གྱིས་གཟུགས་རྣམ་པར་ཤེས་སོ་ཞེས་བྱ་སྟེ་ཉེ་བར་བཏགས་སོ་ཞེས་བྱ་བའི་ཐ་ཚིག་གོ །ཡང་ན་མཐོང་བའི་རྟེན་གྱིས་མཐོང་ངོ་ཞེས་བྱ་བ་བཤད་པ་ལ། རྣ་བའི་རྣམ་བར་ཤེས་བའི་རྟེན་ཡང་འགའ་ཞིག་གི་ཚེ་མིག་གི་རྣམ་པར་ཤེས་པའི་དེ་མ་ཐག་པའི་འདས་པར་གྱུར་པ་ན་དེས་སྒོ་རྣམ་པར་ཤེས་སོ་ཞེས་བྱ་བར་འགྱུར་བ་དེའི་ཕྱིར་རྣམ་པར་ཤེས་པ་ནི་ཞེས་བྱ་བ་ལ་སོགས་པ་གསུངས་ཏེ། རྣ་བའི་རྣམ་པར་ཤེས་པའི་དུས་སུ་མིག་གི་རྣམ་བར་ཤེས་པ་ཉེ་བ་མ་ཡིན་པས་དེ་ཡང་ཡོད་པ་ཙམ་གྱིས་གཟུགས་རྣམ་པར་ཤེས་སོ་ཞེས་བརྗོད་དེ། དེའི་ཕྱིར་མིག་གི་རྣམ་པར་ཤེས་པས་སྒྲ་རྣམ་པར་ཤེས་སོ་ཞེས་ཐལ་བར་འགྱུར་པ་མེད་དོ། །འདི་ནི་མིག་གིས་མཐོང་ངོ༌། །རྣམ་པར་ཤེས་པས་རྣམ་པར་ཤེས་སོ་ཞེས་བྱ་བ་འདིའི་དགོངས་བ་གང་ཡིན་པ་དེ་ཡིན་ནོ། །གཞན་དག་ན་རེ་དེ་ལ་མཐོང་བ་དང་རྣམ་པར་ཤེས་པ་དག་ཁྱད་པར་མེད་པར་བཤད་པ་ལ། དེའི་ཁྱད་པར་འཆད་པར་འདོད་པས་འདི་བཤད་དེ། མཐོང་བའི་རྟེན་དུ་གྱུར་པའི་ཕྱིར་མིག་གིས་མཐོང་ངོ༌། །ཡོད་པ་ཙམ་གྱིས་རྣམ་པར་ཤེས་པས་རྣམ་པར་ཤེས་ཀྱི་འདིས་མཐོང་བ་ནི་མ་ཡིན་ནོ་ཞེས་ཟེར་རོ། །འདི་ལ་
མདོ་སྡེ་པ་རྣམས་ན་རེ་ཞེས་བྱ་བ་ལ། ཅི་མིག་གིས་མཐོང་ངམ་རྣམ་པར་ཤེས་པས་མཐོང་ཞེས་བྱ་བའི་སྐབས་གང་ཡིན་པ་དེར་རོ། །དེ་དག་ཇི་སྐད་ཟེར་ཞེ་ན། ནམ་མཁའ་བ་ལྡད་པ་འདི་ཅི་དགོས་ཞེས་བྱ་བ་སྟེ། རྣམ་པར་དཔྱད་པ་འདི་ནི་ནམ་མཁའ་འཆའ་བ་དང་འདྲ་བར་དགོས་པ་མེད་དེ་ཞེས་བྱ་བའི་དོན་ཏོ། །ཡང་ཇི་ལྟར་རྣམ་པར་དཔྱད་པ་འདི་དགོས་པ་མེད་ཅེ་ན། དེའི་ཕྱིར་མིག་དང་གཟུགས་ལ་བརྟེན་ནས་ཞེས་བྱ་བ་རྒྱས་པར་འབྱུང་བ་ལ། འདི་སྐད་བསྟན་པར་འགྱུར་ཏེ། འབྲས་བུའི་ཡོད་པ་ནི་རྒྱུའི་ཡོད་པ་སྔོན་དུ་འགྲོ་བ་ཡིན་ན་དེ་ལ་བལྟ་བ་ནི་སུ་ཞིག་མཐོང་བར་བྱེད་པ་སུ་ཞིག་ཡིན། འདི་ལ་ཚིག་ཙམ་གྱིས་དད་པར་མི་འགྱུར་ཞེ་ན། དེའི་ཕྱིར་འདི་ནི་བྱེད་པ་མེད་པ་དང་ཞེས་བྱ་བ་ལ་སོགས་པ་གསུངས། བྱེད་པ་མེད་བ་དང་ཞེས་བྱ་བ་ནི་རྒྱུའི་ཡོད་པ་ལས་ཐ་དད་པའི་བྱ་བ་འགལ་བ་དེ། དེ་ལས་ཐ་དད་པའི་བྱ་བ་ཁས་བླངས་ན་སྐད་ཅིག་མར་འཇིག་པ་ལ་གནོད་པར་འགྱུར་ན། དངོས་པོ་རྣམས་སྐད་ཅིག་ཕན་ཆད་གནས་པ་ནི་ཚད་མ་དག་དང་འགལ་ལོ། །ཆོས་ཙམ་ཞེས་བྱ་བ་ནི་ནང་གི་བྱེད་པའི་སྐྱེས་བུ་འགོག་པར་བྱེད་པའོ། །རྒྱུའི་བྱེད་པ་དང་ནང་གི་བྱེད་པའི་སྐྱེས་བུ་མེད་ཀྱང་རྒྱུ་དང་འབྲས་བུ་དག་ལ་རྒྱུ་དང་འབྲས་བུའི་འབྲེལ་པ་མི་འགལ་ལོ་ཞེས་བསྟན་པའི་ཕྱིར་རྒྱུ་དང་འབྲས་བུ་ཙམ་དུ་ཟད་ལ་ཞེས་བྱ་བ་སྨོས་སོ། །ཐ་སྙད་གདགས་པའི་དོན་དུ་ཞེས་བྱ་བ་ནི། འཇིག་རྟེན་དང་བསྟན་བཅོས་སུའོ། །འདུན་པའི་སྒོ་ནས་ཞེས་བྱ་བ་ནི་དོན་གྱི་མཚན་གྱིས་ནི་མ་ཡིན་ནོ་ཞེས་སྟོན་པར་བྱེད་པའོ། །འདི་ལ་མངོན་པར་ཞེན་པར་མི་བྱ་སྟེ། ཐ་སྙད་པའི་དོན་ནི་བཏགས་པ་ཡིན་པའི་ཕྱིར་རོ། །དོན་དམ་པར་བཙལ་ན་མི་དམིགས་པའི་ཕྱིར་རོ། །བཅོམ་ལྡན་འདས་ཀྱིས་ཞེས་བྱ་བས་ནི་ཐ་སྙད་པའི་དོན་ལ་མངོན་པར་ཞེན་པ་ནི་བཅོམ་ལྡན་འདས་ཀྱིས་དགག་པ་མཛད་དོ་ཞེས་སྟོན་པར་བྱེད་དོ། །ལྗོངས་ཀྱི་མིའི་ངེས་པའི་ཚིག་ལ་མངོན་བར་ཞེན་པར་མི་བྱའོ་ཞེས་བྱ་བ་ལ། ལྗོངས་ཀྱི་མི་དང་ལྗོངས་ཀྱི་མིའི་ངེས་པ་སྟེ། གཏན་ལ་ཕབ་པའི་ངེས་པའི་ཚིག་གོ །ཅིའི་ཕྱིར་
འདི་འདིས་ངེས་པར་བྱས་ཞེས་དེ་དག་ལ་མངོན་པར་ཞེན་པར་མི་བྱ་སྟེ། ཅིའི་ཕྱིར་འདི་ནི་ངེས་པའི་ཚིག་ཡིན་གྱི་ཐམས་ཅད་དོན་དང་ལྡན་པར་རྟོག་པར་མི་བྱའོ་ཞེས་བྱ་བའི་དོན་ཏོ། །འཇིག་རྟེན་གྱི་མིང་ལ་རབ་ཏུ་བརྒྱུག་པར་མི་བྱའོ་ཞེས་བྱ་བ་ལ། རྟོག་པ་དང་རབ་ཏུ་བརྒྱུག་པར་བྱ་ཞེས་བྱ་བ་འདི་ནི་དོན་གཅིག་གོ །གཞན་དག་ན་རེ་ལུས་ལ་སོགས་པ་ལས་ཐ་དད་པའི་བདག་ནི་ཡོད་དེ་ཞེས་བྱ་བར་ཡང་དག་པ་མ་ཡིན་པར་སྒྲོ་བཏགས་པའི་སྒོ་ནས་བདག་དང་སྲོག་ཅེས་བྱ་བ་དེ་ལྟ་བུ་ལ་སོགས་པ་འཇིག་རྟེན་པའི་ཐ་སྙད་ལྷག་པར་སྒྲོ་བཏགས་པར་མི་བྱའོ་ཞེས་ཟེར་ཏེ། དོན་མེད་པའི་ཕྱིར་མིང་ཡང་མེད་དོ་ཞེས་བཏགས་པར་བྱའོ་ཞེས་བྱ་བའི་དོན་ཏོ། །འདི་ནི་ཁ་ཆེ་བྱེ་བྲག་ཏུ་སྨྲ་བ་རྣམས་ཀྱི་གྲུབ་བའི་མཐའ་ཡིན་ན་ཞེས་བྱ་བ་ལ། འདི་ནི་ཁ་ཆེ་བྱེ་བྲག་ཏུ་སྨྲ་བ་རྣམས་ལ་རབ་ཏུ་གྲགས་པའི་ཆོས་མངོན་པ་བཤད་པའི་སྐབས་སུ་བབ་པས་དེའི་ཕྱིར་དེ་དག་ཉིད་ཕྱོགས་ཕྱི་མར་གནས་པར་བྱེད་དོ། །གལ་ཏེ་གང་ཡང་རུང་བ་ཞིག་བཙུམས་ན། གཟུགས་གང་ཡང་རུང་བ་ཞིག་དམིགས་པའི་ཕྱིར་གཉི་གས་མཐོང་བར་ནུས་པར་གྲུབ་བཞིན་དུ། ཡང་ཅིའི་ཕྱིར་མིག་གཅིག་གིས་ཞེས་རྒྱས་བར་དཔྱོད་ཅེ་ན། གཉི་ག་ཕྱེ་ན་མཐོང་བ་གང་ཡིན་པ་དེ། ཅི་རིམ་གྱིས་སམ་འོན་ཏེ་ཅིག་ཅར་ཡིན་ཞེས་བྱ་བ་འདི་མ་དཔྱད་པས་དེའི་ཕྱིར་དམིགས་ཀྱིས་ངེས་པར་བྱ་བའི་ཕྱིར་རྩོམ་མོ། །འདི་ལ་ངེས་པ་མེད་དེ་ཞེས་བྱ་བ་ལ། དེ་དག་གང་ཡང་རུང་བ་ཞིག་བཙུམས་པའམ་རྣམ་པར་ཉམས་ན་ཅིག་ཤོས་ཀྱིས་མཐོང་བའི་ནུས་པ་ལ་གནོད་དོ་ཞེས་ཁ་ཅིག་གོ །མིག་གིས་གཟུགས་མཐོང་ཡང་བཙུམས་པ་དང་ཉམས་པ་དག་གིས་ནི་མ་ཡིན་ནོ། །ཅིག་ཅར་དུ་མིག་གཉི་ག་དག་གིས་མཐོང་སྟེ། ཀྱང་གི་སྒྲས་ནི་གཅིག་གིས་ཀྱང་འདི་གཉིས་ཁོ་ནའམ་གཅིག་ཁོ་ནས་ཞེས་ངེས་པར་ནི་མི་གཟུང་ངོ༌། །དེས་པ་འདི་གང་ལས་ཤེ་ན་གསལ་བར་མཐོང་བའི་ཕྱིར་རོ། །ཆོས་མངོན་བ་པ་སྨོས་པ་ནི། མདོ་སྡེ་པ་རྣམས་ལས་ཁ་ཅིག་གིས་ཀྱང་མཐོང་ངོ་ཞེས་འདོད་པ་བསྟན་པའི་ཕྱིར་རོ། །འདི་ལྟར་གཉི་ག་ཕྱེ་ན་ཞེས་རྒྱས་པར་འབྱུང་པ་ལ། མིག་གཅིག་བཙུམས་ན་གཟུགས་གང་ཞིག་རྒྱུན་
ཆགས་སུ་འཇུག་པ་མི་གསལ་བར་དམིགས་པ་དེ་གཉི་ག་ཕྱེ་བས་ཆེས་གསལ་བར་དམིགས་ཏེ། གཅིག་གིས་མཐོང་ན་ནི་སྔ་མ་དང་ཕྱི་མ་དག་ཏུ་མཐོང་བ་ཁྱད་པར་དུ་མི་འགྱུར་རོ། །གང་ཡང་རུང་བ་ཞིག་གཞན་དུ་གྱུར་ན་ནི་མ་ཡིན་ནོ་ཞེས་བྱ་བ་ལ། གལ་ཏེ་ཕྱེ་བ་གང་ཡིན་པ་དེ་ཕྱེད་བཙུམས་པའམ་ཕྱེད་བཙུམས་པ་དེ་ཐམས་ཅད་ཕྱེ་བའམ། ཐམས་ཅད་བཙུམས་ན་དེས་ཟླ་བ་གཉིས་འཛིན་པར་མི་འགྱུར་ཏེ། དེའི་ཕྱིར་མིག་གཅིག་གིས་མཐོང་བ་ཡིན་ནོ། །དེ་ལྟ་མ་ཡིན་ན་མིག་གཅིག་ཕྱེ་བ་དང༌། གཉིས་པ་ཕྱེད་བཙུམས་པ་ན་ཟླ་བ་གཉིས་འཛིན་པར་མི་འགྱུར་རོ། །གཅིག་ཕྱེད་བཙུམས་པའམ་ཕྱེ་བ་དག་གིས་ཟླ་བ་གཉིས་འཛིན་པར་མཐོང་བ་དེའི་ཕྱིར་གཉིས་ཀ་ཡང་དེར་ནུས་སོ་ཞེས་བྱ་བར་ངེས་པའོ། །རྣམ་གྲངས་མཐོང་བ་དཔེར་བརྗོད་པར་འགྱུར་རོ། །འདྲ་བ་མཐོང་བ་ལ་གཉིས་ཉིད་དུ་མངོན་པར་བརྗོད་པའི་ཕྱིར་ཞེས་པའི་ཚིག་གིས་འཕངས་པའོ། །ཕྱེད་ཕྱེ་བ་དང་བཙུམས་པ་དག་གིས་ཟླ་བ་གཉིས་འཛིན་པ་རྟེན་འགྱུར་བའི་རྗེས་སུ་བྱེད་པའི་ཕྱིར་གཉི་གའི་རྟེན་ཉིད་དུ་བཤད་དོ། །ཅིག་ཤོས་མ་ཡིན་པ་གཞན་དུ་འགྱུར་བས་ཟླ་བ་གཉིས་འཛིན་པའི་རྟེན་རྣམ་པར་འགྱུར་བ་མེད་པའི་ཕྱིར་རོ། །གལ་ཏེ་གཉི་གས་མཐོང་ན་རྟེན་རྣམ་པར་ཆད་པས་རྣམ་པར་ཤེས་པ་རྣམ་པར་ཆད་པས་སེམས་ཅན་གཅིག་གི་མིག་གི་དབང་པོ་ལྟར་སྐད་ཅིག་མ་གཅིག་ལ་རྣམ་པར་ཤེས་པ་གཉིས་སུ་ཐལ་བར་འགྱུར་རོ་ཞེ་ན། ལུས་ཀྱི་རྣམ་པར་ཤེས་པ་ཡང་རྣམ་པར་མ་ཆད་པ་ལུས་ཀྱི་དབང་པོའི་རྟེན་ཡིན་པས། དེའི་ཕྱིར་མིག་གཅིག་ཉིད་ཀྱིས་མཐོང་གི་གཉིས་དག་གིས་མ་ཡིན་ཏེ། འཇུག་པ་མྱུར་བའི་ཕྱིར་དེར་མངོན་པར་ང་རྒྱལ་བ་ཙམ་ལ་གཉིས་དག་གིས་མཐོང་ཞེས་བྱའོ། །དེའི་ཕྱིར་རྟེན་རྣམ་བར་ཆད་བས་ཞེས་བྱ་བ་རྒྱ་ཆེར་སྨོས་སོ། །ཅིའི་ཕྱིར་ཞེ་ན། ཡུལ་ནི་མི་གནས་པའི་ཕྱིར་རོ། །མིག་གི་རྣམ་པར་ཤེས་པ་ནི་འཁར་གཞོང་དང་རྒྱ་ཤུག་བཞིན་རྟེན་དང་བརྟེན་པའི་ངོ་བོས་མིག་ལ་གནས་ཏེ། དེ་དག་གྱུར་པས་འགྱུར་བའི་ཕྱིར་མིག་ལ་དེའི་རྟེན་ཞེས་བྱའོ། །དེའི་ཕྱིར་རྟེན་གཅིག་ལ་རག་ལས་པའི་ཕྱིར་དང༌། ཡུལ་
ན་མི་གནས་པའི་ཕྱིར་མིག་རྒྱས་ཀྱང་རྣམ་པར་ཤེས་པ་གཅིག་སྐྱེད་པར་འགལ་བ་མེད་ན་གཉིས་ཀྱིས་ཡིན་པ་ལྟ་སྨོས་ཀྱང་ཅི་དགོས། དཔེར་ན་ལག་པ་གཉིས་ཀྱི་ཅིག་ཅར་དྲོ་བའི་འདུས་ཏེ་རེག་པ་ལས་ལུས་ཀྱི་རྣམ་པར་ཤེས་པ་རེ་རེ་རྣམ་པར་མ་ཆད་པར་སྐྱེ་སྟེ། སུན་འབྱིན་པས་ཆོད་པ་ན་གཅིག་གིས་ཀྱང་རྣམ་པར་ཤེས་པ་དུ་མ་སྐྱེད་པར་ཐལ་བ་མེད་དོ། །ཐམས་ཅད་ཀྱི་རྐྱེན་ཉེན་ཅིག་ཅར་རམ་རིམ་གྱིས་སྐྱེ་བར་སྨྲ་བ་རྣམས་རེ་ཤིག་མིག་གཡས་པའི་རྣམ་པར་ཤེས་པ་སྐྱེའི་ཅིག་ཤོས་ཀྱི་མ་ཡིན་ཞེས་བྱ་བ་འདི་ཅི་ལས་ཤེ་ན། ཐུན་མོང་མ་ཡིན་པའི་རྒྱུ་དང་ཡུལ་དང་འབྲས་བུ་སྨྲ་བའི་བདག་ཉིད་མིག་གིས་མཐོང་བ་ལ་ཡང་ཡན་ལག་དུ་མས་རྣམ་པར་ཤེས་པ་སྐྱེད་པར་ཐལ་བར་འགྱུར་རོ། །ཐམས་ཅད་ཁྱད་པར་མེད་ན་རྡུལ་ཕྲ་རབ་གཅིག་ལ་རྟེན་པ་ཉིད་ཀྱང་མི་རུང་སྟེ། ཁྱད་པར་གྱི་རྒྱུ་མེད་པའི་ཕྱིར་ཡུལ་ན་མི་གནས་པ་དེའི་རྟེན་རྣམ་པར་ཆད་པས་རྣམ་པར་ཆད་པའོ། །གཟུགས་བཞིན་དུ་ཞེས་བྱ་བ་ནི་མི་མཐུན་པའི་དཔེའོ། །གལ་ཏེ་ཡུལ་ན་མི་གནས་པའི་སེམས་དང་སེམས་ལས་བྱུང་བ་རྣམས་ཇི་ལྟར་མིག་གི་དབང་པོའི་རྟེན་གཟུགས་སོ་སོར་རྣམ་པར་རིག་པ་མིག་གི་རྣམ་པར་ཤེས་པ་ཞེས་བྱ། ཅི་ལྟར་མིག་ལས་དེའི་རྣམ་པར་ཤེས་པའི་རྟེན་ཉིད་དེ་དང་དེར་མི་གནས་པའི་འགལ་བ་མེད་ཅེ་ན། སྐྱེད་པ་ལ་ཐུན་མོང་མ་ཡིན་པ་ཉིད་ཀྱིས་ཉེ་བའི་རྒྱུ་མེད་པའི་ཕྱིར་གནས་དང་རྟེན་དུ་བརྗོད་དོ། །དེའི་གནས་སྐབས་སུ་གསུངས་པ་མ་ཡིན་པ་དེ་དེའི་རྟེན་དུ་གསུངས་པར་གྱུར་ཞེ་ན་འབྲུའི་རྟེན་པ་བཞིན་ནོ། །ལྷས་བྱིན་རྒྱལ་པོ་ལ་བརྟེན་ཅིང་གནས་ཞེས་བརྟགས་པ་མཐོང་བའི་ཕྱིར་རོ། །གལ་ཏེ་དབང་པོ་ལ་ཕན་པ་དང་གནོད་པའི་རྗེས་སུ་བྱེད་པའི་ཕྱིར་དེ་ལ་གནས་སོ་ཞེ་ན་མ་ཡིན་ཏེ། གྲིབ་མ་དང་འོད་དང་གཟུགས་བརྙན་ལ་སོགས་པ་དང་ཤིང་དང་བཅས་པ་ལ་སོགས་པ་གནས་ལ་ཡང༌། རྗེས་སུ་བྱེད་བ་མཐོང་བའི་ཕྱིར་ཏེ། རྒྱ་མཚོ་ཟླ་བ་ཟད་པ་དང་འཕེལ་བའི་རྗེས་སུ་བྱེད་བ་བཞིན་འདི་དག་དེ་ལ་གནས་པ་མ་ཡིན་ཏེ། དབང་པོ་རྣམས་ཡུལ་ལ་འཇུག་པ་གཅིག་པའི་ཕྱིར་རྣམ་པར་ཤེས་པས་ཤའི་གོང་བུ་སྐྱེ་བོ་སུན་འབྱིན་བ་རྫི་མ་དང་
ཐུར་མ་ལ་སོགས་པ་རྣམས་མི་འཛིན་ཏེ་ཆ་ཉེ་བར་གྱུར་བས་དབང་པོའི་ཡུལ་དུ་མི་གནས་པའི་ཕྱིར་རོ། །དེ་ཉིད་ཀྱི་ཕྱིར་ཡུལ་གྱིས་བསྐལ་པའི་གཟུགས་ཀྱང་མི་འཛིན་ནོ། །དེ་ལྟ་མ་ཡིན་ན་ཡུལ་གྱིས་བསྐལ་བའི་གཟུགས་འཛིན་པ་ལ་སུ་ཞིག་གེགས་བྱེད་པར་འགྱུར། གལ་ཏེ་དབང་པོའི་ཡུལ་ཉིད་ཀྱི་ཕྱིར་རྣམ་པར་ཤེས་པའི་མིག་གིས་ཤའི་གོང་བུ་རྣམས་འཛིན་པར་འགྱུར་ན། གང་དུ་གཟུགས་ཀྱི་ཡུལ་ལ་དེ་མི་གནས་བས་དེ་འཛིན་པར་མི་འགྱུར་རོ། །དེའི་ཕྱིར་ཆོས་དེ་དག་གི་རྣམ་བར་ཤེས་བ་རྣམས་དེའི་རྟེན་ལ་སོགས་པ་ཉེ་བ་དང་རིང་བ་དག་མི་འཛིན་ཏེ་ཐུན་མོང་མ་ཡིན་པའི་རྒྱུའི་ཡུལ་ཉིད་དོ། །གཞན་དག་ན་རེ་སེམས་དང་སེམས་ལས་བྱུང་བའི་འབྲས་བུ་ཉིད་ཀྱིས་མྱུ་གུ་ལ་སོགས་པ་བཞིན་ནོ། །གཟུགས་བརྙན་ལ་སོགས་པ་རྣམས་ལ་མཐའ་དུ་མའོ་ཞེས་ཟེར་རོ། །ཇི་ལྟར་ཐུན་མོང་མ་ཡིན་པའི་འབྲས་བུའི་ཡུལ་དེ་བཞིན་དུ་དེའི་རྒྱུད་དུ་གཏོགས་པ་ལ་ཡང་རྣམ་པར་ཤེས་པ་དང་ཡིད་ནི་མིག་ལ་སོགས་པའི་ཡུལ་མ་ཡིན་ཞིང༌། དེ་རྣམ་པར་ཤེས་པའི་རྒྱུད་མ་ཡིན་པའི་ཕྱིར་དེ་ལྟར་དབང་པོ་བརྟེན་པ་ཉིད་ཀྱང་རྣམ་པར་ཤེས་པ་ཆ་ཤས་དང་བཅས་པ་ཉིད་དང་དུ་མ་ཉིད་དུ་ཐལ་བར་འགྱུར་བ་སྔར་ཉིད་དུ་བཤད་དོ། །ཁྱད་པར་མེད་པའི་ཕྱིར་ལྷག་མ་དབང་པོའི་རྡུལ་ཕྲ་རབ་བཞིན་དུ་རྡུལ་ཕྲ་རབ་གཅིག་ཀྱང་དེའི་རྟེན་དུ་མི་རུང་ངོ༌། །ཅི་འདི་དག་ཡུལ་དང་ཕྲད་པ་ཞིག་གམ་ཞེས་བྱ་བ་ལ་སོགས་པ་ལ། ཐེ་ཚོམ་འདི་ག་ལས་ཤེ་ན། གཉི་ག་ཡང་བསྙད་པ་མཐོང་བའི་ཕྱིར་རོ། །བཅོམ་ལྡན་འདས་ཀྱིས་འདི་སྐད་དུ་མིག་ནི་ཡིད་དུ་འོང་བ་དང་ཡིད་དུ་མི་འོང་བའི་གཟུགས་རྣམས་ལ་ཐོགས་སོ་ཞེས་གསུངས་ན། མ་ཕྲད་པ་ལ་ནི་ཐོགས་པ་མི་རིགས་སོ། །སླར་ཡང་དེ་ལྷའི་མིག་གིས་སེམས་ཅན་རྣམས་ལ་བལྟའོ་ཞེས་རྒྱ་ཆེར་འབྱུང་བ་ལ། རིང་བ་གང་དག་ཡིན་པ་དང་ཉེ་བ་གང་དག་ཡིན་པ་ཞེས་གསུངས་ན། ཡུལ་དང་ཕྲད་པ་ཉིད་ཡིན་ན་ནི་ཉེ་བ་དང་རིང་བའི་རྣམ་པར་གཞག་པ་མི་སྲིད་དོ། །གལ་ཏེ་ཡུལ་དང་ཕྲད་པའི་དབང་དུ་བྱས་ན་ཡུལ་འཛིན་པ་ཐམས་ཅད་ཕྲད་པ་ཉིད་དོ། །ཅི་སྟེ་བར་མཚམས་མེད་པར་ཕྲད་ན་དེའི་ཕྱིར། མིག་དང་ཡིད་དང་རྣ་བ་ནི། ཡུལ་དང་མ་
ཕྲད། འདི་ལྟར་གཟུགས་རྒྱང་རིང་པོ་ནས་མཐོང་ཞིང་ཞེས་བྱ་བ་འདིས་ནི་ཡུལ་དང་མ་ཕྲད་པའོ་ཞེས་བྱ་བར་ཤེས་པར་བྱེད་དོ། །མིག་ལ་ཡོད་པའི་མིག་སྨན་མི་མཐོང་ཞེས་བྱ་བ་འདིས་ནི་ཡུལ་དང་ཕྲད་པ་ཡིན་པ་ཟློག་པར་བྱེད་པའོ། །དེ་ལྟ་ཡིན་པས་ཡུལ་དང་མ་ཕྲད་པ་ཁོ་ནའོ་ཞེས་བྱ་བར་ངེས་པར་གཟུང་བར་འགྱུར་རོ། །གང་གི་ཕྱིར་ཡུལ་དང་ཕྲད་པ་དང་མ་ཕྲད་པ་ཉིད་ནི་གཉི་ག་ཇི་ལྟ་བས་སྨོས་པས་ཡུལ་དང་ཕྲད་པ་ཉིད་བཟློག་པར་འགྱུར་རོ། །གང་དག་བརྟེན་ནས་བྱུང་སྟེ་ཡུལ་ལ་གནས་སོ་ཞེས་ཡུལ་དང་ཕྲད་བར་འདོད་བ་དེ་དག་གིས་ནི་ཡང་འདོད་པ་ཙམ་དུ་ཟད་དེ་ཉེ་བ་དང་རིང་བ་དག་ལ་དུས་མཉམ་པར་རྟོགས་པའི་ཕྱིར་རོ། །ཆོས་འདི་ནི་ནག་པོ་ལ་སོགས་པ་འགྲོ་བ་དང་ལྡན་པ་རྣམས་ལ་མཐོང་བ་ཡང་མ་ཡིན་ནོ། །གལ་ཏེ་མིག་ནི་འོད་ཟེར་ཡིན་པའི་ཕྱིར་མར་མེ་བཞིན་དུ་ཐག་ཉེ་བ་དང་རིང་བ་དག་ལྷན་ཅིག་གསལ་བར་བྱེད་པ་མི་འགལ་ཞེ་ན། བལྟ་བར་འདོད་པ་མུན་ཁུང་དུ་སྣང་བ་ཚོལ་བའི་ཕྱིར་འོད་ཟེར་ཉིད་མ་གྲུབ་པོ། །གལ་ཏེ་མིག་ནི་འོད་ཟེར་ཉུང་བའི་ཕྱིར་ཕྱི་རོལ་གྱི་སྣང་བ་ཚོལ་བར་བྱེད་དོ་ཞེ་ན། ཉུང་ངུ་ནི་མང་པོས་ཟིལ་གྱིས་གནོན་པར་མཐོང་བའི་ཕྱིར་དམིགས་པ་ཉིད་དུ་མི་འགྱུར་རོ། །དཔེ་དང་དཔེ་ཅན་མཚུངས་པ་ཡང་མ་ཡིན་ཏེ། བར་མེད་པར་ཕྲད་པ་གསལ་བར་བྱེད་པའི་ཕྱིར་རོ། །མར་མེ་ནི་སྡོང་བུ་དང་མར་ལ་སོགས་པ་ཕྲད་བསྲེག་ཅིང་སྣང་བར་བྱེད་ན། མིག་ནི་མིག་སྨན་ལ་སོགས་པ་ཤིན་ཏུ་ཉེ་བ་རྣམས་འཛིན་པར་བྱེད་བ་མ་ཡིན་ནོ། །མར་མེ་ནི་བར་མེད་པར་ཐམས་ཅད་སྣང་བར་བྱེད་ན། མིག་ནི་མདུན་གྱི་རི་པོ་དང་ཤིང་ལ་སོགས་པ་འཛིན་པར་བྱེད་པ་དེའི་ཕྱིར་མིག་ནི་མར་མེ་ལྟ་བུའོ་ཞེས་བྱ་བ་མ་ཡིན་ནོ། །གལ་ཏེ་མིག་ནི་འོད་ཟེར་ཡིན་པའི་ཕྱིར་མར་མེ་བཞིན་དུ་ཐག་ཉེ་བ་དང་རིང་བ་དག་ལན་ཅིག་གསལ་བར་བྱེད་པ་མི་འགལ་ལོ་ཞེ་ན། ཤེལ་ལ་སོགས་པས་ཆོད་པ་ཡང་དམིགས་པས་མ་ཕྲད་པ་འཛིན་པའི་ཕྱིར་དང་ཐེ་ཚོམ་མཐོང་བའི་ཕྱིར་ན་མིག་ནི་ཡུལ་དང་ཕྲད་པ་མ་ཡིན་ནོ། །ཕྲད་པ་ཡིན་ན་ནི་རེང་རེང་པོར་བལྟ་བ་མཐོ་ཡོར་ལ་མི་ཡིན་སྙམ་དུ་དེའི་ཁྱད་པར་དག་ལ་ཐེ་ཚོམ་ཟ་བར་ཡང་མི་རིགས་ཏེ། རེད་རེད་པོ་དང་ཕྲད་པ་འཛིན་པས་ཁྱད་པར་མེད་དོ་སྙམ་པའི་གཏན་ཚིགས་ཅི། དཔག་ཚད་སྟོང་
ཕྲག་དུ་མས་བསྐལ་བ་དང་ཕྲད་པ་མི་སྲིད་པའི་ཡང་ཕྱིར་ཏེ། ལན་ཅིག་ཕྱེ་མ་ཐག་ཏུ་མིག་ཟླ་བ་དང་ཕྲད་དོ་ཞེས་བྱ་བར་བརྗོད་པར་ནི་མི་རིགས་ཏེ། དེའི་ཕྱིར་མིག་ནི་ཡུལ་དང་མ་ཕྲད་པ་ཉིད་ཡིན་ནོ། །དེ་བཞིན་དུ་སྒྲ་རྒྱང་རིང་པོ་ནས་ཐོས་སོ་ཞེས་བྱ་བ་རྣ་བ་ཡུལ་དང་མ་ཕྲད་པ་ཉིད་ཀྱིས་ཤེས་པར་བྱ་བ་སྟེ། ཡུལ་དང་ཕྲད་པ་ཉིད་ཡིན་ན་ནི་སྣ་ལ་སོགས་པ་ལྟར་ཕྲད་པའི་ཡུལ་ཁོ་ན་རྟོགས་པར་འགྱུར་གྱི་རིང་བ་ནི་མ་ཡིན་ནོ། །སྒྲ་རྒྱང་རིང་པོ་ནས་ཐོས་སོ་ཞེས་བྱ་བ་ཇི་ལྟར་རྟོགས་ཤེ་ན། ཕྱོགས་ལ་སོགས་པའི་བྱེ་བྲག་གི་སྒོ་ནས་ངེས་པའི་ཕྱིར་ཏེ། ལྷོ་ཕྱོགས་ཀྱི་སྒྲའོ། །བྱང་ཕྱོགས་ཀྱིའོ། །ཉེ་བའོ། །རིང་བའོ་ཞེས་དེ་ལྟར་ངེས་པའི་ཕྱིར་རོ། །ཕྲད་པ་ལ་དེ་མི་རིགས་ཏེ་དྲི་ལ་སོགས་པ་བཞིན་ནོ། །སྣང་ཡང་ཕྱོགས་ལ་སོགས་པས་བསྙད་བ་མཐོང་བ་མ་ཡིན་ནམ་ཞེ་ན་མཐོང་བ་ཡོད་དེ། དེ་ནི་ཡོངས་སུ་རྒྱུ་བའི་རྗེས་སུ་ཕྱོགས་ཆེས་གསལ་བའི་དྲི་དམིགས་པ་ལས་རྗེས་སུ་རློམ་སེམས་པའོ། །ཡོངས་སུ་མི་རྒྱུ་བའི་མིག་དང་རྣ་བ་དག་དང་དེ་ལྟར་མཚུངས་པ་མེད་དོ། །ཉེ་བ་དང་རིང་བ་ལས་གསལ་བ་དང་མི་གསལ་བའི་སྒྲ་འཛིན་བའི་ཕྱིར་ཉེ་བ་ནི་ཕྲད་པ་འཛིན་པ་ཉིད་དོ། །ཐམས་ཅད་དུ་ཐུན་མོང་མ་ཡིན་པའི་རྒྱུར་གྱུར་པས་ཐེ་ཚོམ་མེད་དོ། །རིང་བ་ལ་ནི་ཐམས་ཅད་དུ་ཐེ་ཚོམ་ཉིད་དུ་འགྱུར་ཏེ་ཁྱད་པར་གྱི་རྒྱུ་མེད་པའི་ཕྱིར་རོ། །ཡུལ་དང་ཕྲད་པ་ཉིད་གཅིག་ཡིན་ན་ནི་ཞེས་བྱ་བ་རྒྱས་པར་འབྱུང་བ་ལ། འདི་ན་ཞེས་བྱ་བ་ནི་མིའི་ཡུལ་དག་ནའོ། །གལ་ཏེ་མིག་ཡུལ་དང་མ་ཕྲད་པ་ཉིད་ཀྱིས་རྣ་བ་ལ་སོགས་པ་དག་ལས་ཁྱད་པར་དུ་གྱུར་ན་ནི། བསམ་གཏན་པ་རྣམས་ལ་ལྷའི་མིག་གཟུགས་ཕྲ་བ་དང་ཆོད་པ་དང་ཐག་རིང་བ་ལ་སོགས་པ་འཛིན་པར་བྱེད་པ་སྐྱེ་བར་མི་འགལ་ཏེ། འབད་རྩོལ་གྱི་ཁྱད་པར་ལས་བྱུང་བའི་ཕྱིར་རོ། །འབྲས་བུའི་ཁྱད་པར་སྐྱེ་བདེ་ལྟར་རྣ་བ་ལ་ཡང་བརྗོད་པར་བྱའོ། །ཡུལ་དང་ཕྲད་བ་ཉིད་ཡིན་ན་ནི་ལྷའི་དང་ལྷའི་མ་ཡིན་པ་དག་ལ་ཁྱད་པར་མེད་པའི་ཕྱིར་འབད་རྩོལ་དོན་མེད་པར་འགྱུར་རོ། །འདི་ནི་བསམ་གཏན་པ་རྣམས་ལ་ལྷའི་མིག་དང་རྣ་བ་སྐྱེ་བར་མི་འགྱུར་ཏེ། ཡིད་དང་སྣ་ལ་སོགས་པ་བཞིན་ནོ། །གལ་ཏེ་མིག་ཡུལ་དང་
མ་ཕྲད་པ་ཡིན་ན་ཅིའི་ཕྱིར་ཐག་རིང་བ་དང་ཞེས་བྱ་བ་ལ། གཞན་དུ་མི་འཛིན་པའི་རྒྱུ་ཡོད་པ་མ་ཡིན་ཏེ། གཞན་དུ་མ་ཕྲད་པ་འཛིན་ན་ལ་སོགས་པ་བཞིན་དུ་དེ་ཡང་མ་ཕྲད་པ་མི་སྣང་བ་ཉེ་བ་དག་ལ་ཡང་མཚུངས་པས་ན་མིག་ནི་ཡུལ་དང་མ་ཕྲད་པ་རུང་བ་མ་ཡིན་ནོ་ཞེ་ན། དེ་ལ་མ་ཕྲད་པ་འཛིན་པའི་རྒྱུ་འདོད་པ་མ་ཡིན་ཏེ། འཇིག་པའི་རྒྱུ་ཡང་མ་ཕྲད་པའོ། །འོ་ན་ཅི་ཞེ་ན་ནུས་པའི་ཁྱད་པར་ལས་ཏེ། གཞན་དུ་ན་དབང་པོ་ཐམས་ཅད་ཀྱི་ཡུལ་ཐམས་ཅད་ཉིད་དུ་ཐལ་བར་འགྱུར་རོ། །ཡུལ་དང་མ་ཕྲད་པའི་བྱེད་པ་ཅན་རྣམས་ལ་ཡང་ནུས་པའི་ངེས་པ་མཐོང་སྟེ་རྡོ་ཁབ་ལེན་བཞིན་ནོ། །ཁབ་ལེན་གྱིས་ཀྱང་མ་ཕྲད་པའི་ལྕགས་འདྲེན་པར་བྱེད་དེ། ཆོད་པ་དང་ཐག་རིང་བ་དང་མངོན་དུ་ཕྱོགས་པར་མི་གནས་པའི་ལྕགས་ཐམས་ཅད་འདྲེན་ནུས་པ་ནི་མ་ཡིན་པ་ཉིད་དོ། །དེ་བཞིན་དུ་མིག་ཀྱང་ཡུལ་དང་མ་ཕད་པ་ཡིན་མོད་ཀྱི། མ་ཕྲད་པ་ཐམས་ཅད་མཐོང་བ་ནི་མ་ཡིན་ནོ། །གཞན་ཡང་ཕྲད་པ་ལ་དཔེར་བརྗོད་པ་མ་ཕྲད་ཀྱང་མ་ཆོད་ལ་གཟུགས་བརྙན་འབྱུང་བ་དེ་ལྟར་ཆོད་པ་དང་ཐག་རིང་བ་རྣམས་ལ་འབྱུང་བ་མ་ཡིན་པ་དེ་བཞིན་དུ་ཆོད་པ་དང་ཐག་རིང་བའི་ཡུལ་ལས་མིག་ལ་ཡུལ་གྱི་གཟུགས་བརྙན་གྱི་བདག་ཉིད་ཀྱི་རྣམ་པར་ཤེས་པ་མི་སྐྱེའོ་ཞེ་ན། ཡུལ་དང་ཕྲད་པ་ཉིད་ཡིན་ན་ཡང་འདི་ཉིད་མཚུངས་སོ། །གཞན་དུ་བརྗོད་པར་བྱ་བ་མཚུངས་པར་སོ་སོར་གནས་པ་ལ་མིག་སྨན་ནམ་མ་ཐུར་མ་ཕྲད་པ་མ་མཐོང་ངོ༌། །གཞན་དུ་མཐོང་བོ་ཞེས་བྱ་བ་འདི་ལ་རྒྱུ་ཅི་ཞིག་ཅེ་ན། འདི་ལ་ནུས་པའི་ཡུལ་གྱི་རྣམ་པར་རྟོག་པ་ནི་རུང་བ་མ་ཡིན་ཏེ་ཕྲད་པ་ཁྱད་པར་མེད་པའི་ཕྱིར་རོ། །དབང་པོའི་འཇུག་པ་ཕྱིའི་རྟེན་དང་ནང་གི་རྣམ་པ་ལས་ཀྱང་མ་ཡིན་ཏེ། ཡུལ་མི་འཛིན་པའི་ཕྱིར་རོ། །དེའི་ཕྱིར་མིག་ནི་ཡུལ་དང་མ་ཕྲད་པའོ། །ཇི་ལྟར་ཡང་སྣ་ལ་སོགས་པ་ཞེས་བྱ་བ་ལ། ནུས་པ་ཐ་དད་པས་སྣ་ལ་སོགས་པ་བཞིན་ནོ། །ཐམས་ཅད་ནི་མ་ཡིན་ཏེ། མིག་ནི་ཡུལ་དང་མ་ཕྲད་པའོ་ཞེས་བྱ་བ་དེའི་ཤེས་པར་བྱེད་པ་ལས་ཕྱི་རོལ་ཏུ་རྟོགས་པར་བྱའོ། །ལྷན་ཅིག་སྐྱེས་པའི་དྲི་ལ་སོགས་པ་མི་འཛིན་པའི་ཕྱིར་ཞེས་བྱ་བ་ལ། གཞན་དག་ནང་གི་བདག་ཉིད་ཁོ་ནའི་གྲངས་ཀྱི་ཟས་ཀྱི་བྱ་བ་བྱེད་དོ་ཞེས་གསུངས་པའི་ཕྱིར། ནང་སྨོས་པས་དེ་ཟས་ཀྱི་བྱ་བ་བྱེད་དོ་ཞེས་
ཟེར་རོ། །དེ་ནི་དེ་ལྟ་མ་ཡིན་ཏེ། འདི་ལ་ངེས་པ་ཡོད་པ་མ་ཡིན་ཏེ། རྣམ་པར་ཤེས་པ་ཁོ་ན་ཟས་ཏེ། ཟས་ཀྱི་བྱ་བ་བྱེད་པར་རྟོགས་པར་བྱེད་དོ་ཞེས་སོ། །མར་མེས་བུམ་པའི་གཟུགས་དང་ག་པུར་ལ་སོགས་པའི་དྲི་སྦྱར་བ་རྣམས་ཀྱིས་དྲི་དང་ལྡན་པ་ལྟ་བུ་ནི་མ་ཡིན་ནོ། །ཡིད་ནི་གཟུགས་ཅན་མ་ཡིན་པའི་ཕྱིར་ཞེས་བྱ་བ་ལ། ཕྲེང་བ་ནི་ཕན་ཚུན་འདབ་ཆགས་བར་འབྱུང་བ་ཡིན་ལ། དེ་ཡང་ཡུལ་ན་མི་གནས་པའི་གཟུགས་ཅན་རྣམས་ཁོ་ན་ཡིན་ན། ཡིད་ནི་གཟུགས་ཅན་མ་ཡིན་པའི་ཕྱིར་ཡུལ་ན་མི་གནས་ཏེ། དེའི་ཕྱིར་རང་གི་ཡུལ་དང་ཕྲད་པ་ནི་མི་ནུས་པ་ཉིད་དོ། །གང་གི་ཕྱིར་ཕྲད་པར་འདོད་པ་ནི་ཕྲད་པའི་ཡུལ་འཛིན་པར་བྱེད་ཅིང་མ་ཕྲད་བ་ལ་ནི་དེ་ལྟར་རྣམ་པར་དཔྱོད་པ་རྩོམ་པར་བྱེད་དོ། །ཡིད་ནི་ཕྲེང་བ་ཉིད་དུ་མི་ནུས་པས་མིག་ལ་སོགས་པ་རྣམས་ལ་ཇི་ལྟ་བར་རྣམ་པར་དཔྱད་པ་ནི་མ་བྱས་སོ། །གཞན་དག་ན་རེ་ལྷན་ཅིག་འབྱུང་བ་དང་མཚུངས་པར་ལྡན་བ་རྣམས་མི་འཛིན་པའི་ཕྱིལ་ཡིད་ནི་མ་ཕྲད་པའི་ཡུལ་ཅན་མོ་ཞེས་ཟེར་རོ། །དེ་དག་ནི་ལྷན་ཅིག་སྐྱེས་བའི་དྲི་ལ་སོགས་བ་ནི་འཛིན་པའི་ཕྱིར་མཐའ་དུ་མའོ། །ཡང་ཁ་ཅིག་ནི་རྣ་བའི་ནང་དུ་ཡང་ཞེས་བྱ་བ་ལ། ཡང་གི་སྒྲ་ནི་ཐག་རིང་པོ་ནས་ཀྱང་ཐོས་པའི་རྣམ་པ་ཡུལ་དང་མ་ཕྲད་བ་ཡིན་པར་སེམས་སོ། །ཁ་ཅིག་ན་རེ་སྒྲ་རྒྱུན་ཆགས་པར་འཇུག་པའི་རིམ་པ་བ་རྣམ་བར་འདོད་པ་རྟོགས་པར་བྱེད་པའི་ཕྱིར་རྣ་བ་ནི་ཡུལ་དང་ཕྲད་པ་ཁོ་ན་ཡིན་ནོ་ཞེས་ཟེར་རོ། །དེ་ཡང་དེ་ལྟ་མ་ཡིན་ཏེ་ལག་པར་བཅངས་པའི་དྲིལ་བུའི་སྒྲ་འགགས་མ་ཐག་ཏུ་སྒྲ་མི་ཐོས་པའི་ཕྱིར་རོ། །རེ་ཞིག་ཀྱང་གང་ཞིག་བར་ནས་ཆུ་རླབས་ཀྱི་ཚུལ་དུ་འོང་བའི་སྒྲ་དེ་འཛིན་པ་སུས་བཟློག །དེའི་ཕྱིར་དྲིལ་བུའི་ཡུལ་ན་གནས་པའི་སྒྲ་ཁོ་ན་འཛིན་གྱི་ཆུ་རླབས་ཀྱི་ཚུལ་དུ་རྣ་བུག་གི་བུ་གར་ཕྱིན་པ་ནི་མ་ཡིན་ནོ། །གལ་ཏེ་མར་མེ་འགགས་པ་ནི་འོད་ལན་ཅིག་པ་བཞིན་དུ་སྒྲའི་རྒྱུ་འགགས་པ་ན་འབྲས་བུའི་སྒྲ་འགག་གོ་ཞེ་ན། འཇིག་པ་གཞན་མ་ཡིན་པས་འབྲས་བུའི་སྒྲ་འཇིག་པ་མ་ཡིན་ནོ། །སྐད་ཅིག་མ་དང་པོ་ཉིད་ཁས་བླང་བར་བྱ་ཞིང་རྒྱུད་ཐ་དད་པའི་ཕྱིར་རོ། །མར་མེ་དང་གསལ་བ་དག་སེམས་
དང་སེམས་ལས་བྱུང་བ་བཞིན་ནོ། །སྒྲ་ནི་མར་མེ་དང་མཚུངས་པ་མ་ཡིན་ཏེ། དེ་ལ་མར་མེ་དང་གསལ་བ་དག་མཚུངས་པའི་རྒྱུ་གྲུབ་པའི་ཕྱིར་རོ། །དེའི་ཀཱ་ར་ཎཱ་བཱ་ལ་ཕན་ཅིག་ཞིག་པ་འགལ་བ་མེད་དེ་སེམས་དང་སེམས་ལས་བྱུང་བ་བཞིན་ནོ། །རྒྱུད་ཐ་མི་དད་བ་ནི་སྒྲ་སྟེ། དེར་རྒྱུ་མ་ཡིན་པ་འཇིག་པའི་ཕྱིར་འབྲས་བུ་འཇིག་པ་དང༌། ས་བོན་འཇིག་པ་དང་མྱུ་གུ་འཇིག་པ་བཞིན་ནོ། །དེས་ན་རྒྱུ་ཐ་དད་བའི་ཕྱིར་སྒྲ་སྔ་མ་ཞིག་པ་དང༌། ངན་སོང་གི་རྒྱུ། སྒྲ་ཕྱི་མ་སྐྱེ་བས་དེ་འཛིན་བ་སུས་ཟློག་པར་བྱེད། དེའི་ཕྱིར་རྟེན་བརྟེན་བ་ལས་སྐྱེ་བ་ཉིད་སྒྲར་ཡིད་ཆེས་ཏེ་རྣ་བའི་རྣམ་པར་ཤེས་པ་སྐྱེའོ། །ཕྲད་པར་ཡོངས་སུ་བརྟགས་ན་ནི་སྒྲ་ལ་ཐག་རིང་བ་དང་ཉེ་བ་ངེས་པར་མི་འགྱུར་ཏེ་རེག་བྱ་བཞིན་ནོ། །སྦྲང་བུའི་དར་དིར་གྱི་སྒྲ་ཡང་དབང་བོ་དང་ཉེ་བ་འཛིན་པར་བྱེད་དེ་རོ་ལ་སོགས་པ་བཞིན་ནོ། །བར་མེད་པས་ན་རྣ་བ་ཡུལ་དང་མ་ཕྲད་པ་ཉིད་དོ། །ཡང་རྒྱུ་ཅིས་དེ་ལ་ཡང་དྲིལ་བུ་ལ་སོགས་པའི་གཟུགས་མིག་གིས་མ་དམིགས་ཤེ་ན། དཔེ་སྟོན་པ་རྣམས་ན་རེ། མིག་དང་གཟུགས་དག་ལ་ལྷན་ཅིག་བྱེད་པའི་རྒྱུ་སྣང་བ་མེད་པའི་ཕྱིར་རོ་ཞེས་ཟེར་རོ། །སློབ་དཔོན་འདུས་བཟང་ན་རེ། དམིགས་པ་ལ་གེགས་བྱེད་པའི་ཕྱིར་དང༌། རྒྱུ་ཡོད་པ་མ་ཡིན་པའི་ཕྱིར་རོ་ཞེས་ཟེར་རོ། །ཡང་མུན་པ་དམིགས་པ་ལ་གེགས་བྱེད་པ་ཅི་ཞེ་ན། སྣང་བའི་གེགས་བྱེད་པའི་ཕྱིར་རོ། །ཅི་ཞེས་སྣང་བའི་གེགས་ལ་བལྟོས་བ་མེད་པའི་མིག་ལ་སོགས་པ་ཅུང་ཟད་ཀྱང་མེད་པའི་ཕྱིར་དང༌། གལ་ཏེ་སྣང་བའི་གེགས་ཀྱི་རྒྱུ་ལས་དེ་བཞིན་དུ་ཡོད་པའི་མིག་གི་རྣམ་པར་ཤེས་པའི་དངོས་པོ་ལ་སོགས་པའི་རྒྱུའི་དོན་ཏེ། གཟུགས་ལ་སོགས་པ་བཞིན་སུས་ཟློག་པར་བྱེད། ཅི་སྟེ་སྣང་བའི་གེགས་ལ་བལྟོས་པ་མེད་བ་དེ་ལྟ་ན་ཡང་མུན་པས་ཆོད་བ་རྣམས་སུ་མར་མོའི་གཟུགས་ལ་སོགས་པ་རྣམས་འཛིན་པར་མི་འགྱུར་ཏེ། ཐམས་ཅད་ཀྱང་རྒྱུ་དང་འབྲས་བུ་མ་ཚང་བའི་ཕྱིར་མི་སྐྱེ་བ་ཉིད་དོ། །གེགས་ཀྱི་རྒྱུ་ཡོད་པ་ལས་ནི་མ་ཡིན་ཏེ། གེགས་ཀྱི་རྒྱུ་ནི་དེའི་རྒྱུ་དང་འགལ་བ་ལས། དེ་ལྟར་རྣམ་པར་གཞག་པར་བྱའི་དངོས་སུ་ནི་མ་ཡིན་ནོ། །འདིར་གཞན་གྱི་ཕྱོགས་སུ་འབྱིན་པ་དང༌། རང་གི་ཕྱོགས་གནས་པར་
བྱེད་པ་མང་དུ་བཤད་པ་གང་ཡིན་པ་དེ་དག་ནི་གཞུང་ལྕི་བའི་འཇིགས་པས་རྣམ་པར་དཔྱད་པ་མ་བྱས་སོ། །གསུམ་གཞན་དུ་ཞེས་བྱ་བ་ལ། གཞན་དུ་ཞེས་སྨོས་པ་ནི་ཡུལ་དང་ཕྲད་པ་ཉིད་དོ་ཞེས་ངེས་པར་གཟུང་བར་བྱ་བའི་ཕྱིར་རོ། །གལ་ཏེ་ཡུལ་དང་ཕྲད་པ་དང་མ་ཕྲད་པ་ཡིན་པར་འདོད་ན་ནི་དེ་ལྟར་ན་གཞན་དུ་དང་གཞན་དུ་མ་ཡིན་པ་ཞེས་བྱ་བར་སྨྲ་བར་འགྱུར་རོ། །སྣ་ཇི་ལྟར་ཡུལ་དང་ཕྲད་པ་ཡིན་ཞེ་ན་ཞེས་བྱ་བ་ལ། གང་ལས་ཐེ་ཚོམ་ཟ་ཞེ་ན། དྲིའི་རྟེན་མེ་ཏོག་ལ་སོགས་བ་ཐག་རིང་པོ་ནས་འཛིན་པའི་ཕྱིར་ཏེ། རོ་དང་རེག་བྱ་དག་ནི་དེ་ལྟ་མ་ཡིན་ནོ། །དབུགས་མ་རྔུབ་པར་དྲི་མི་འཛིན་པའི་ཕྱིར་རོ་ཞེས་བྱ་བ་ལ། དབུགས་རྔུབ་བ་དང་བཅས་པས་དྲི་དང་ལྡན་པའི་མེ་ཏོག་གིས་བསྒོས་པའི་རླུང་སྣའི་དབང་པོ་དང་འདབ་ཆགས་པར་སྐྱེས་བ་ན་དྲི་འཛིན་པའི་ཕྱིར་རམ། དྲིའི་འབྱུང་བ་ཆེན་པོས་དྲངས། སྣའི་དབང་པོ་དང་འདབ་ཆགས་པར་སྐྱེས་པའི་དྲི་འཛིན་བའི་ཕྱིར་དང༌། དྲངས་པ་མེད་པས་མ་རྔུབས་བ་ལ་དྲི་དང་དབང་པོ་ཕྲད་པ་མེད་པ་དེའི་ཕྱིར་སྣ་ནི་ཡུལ་དང་ཕྲད་པ་ཉིད་དུ་ངེས་སོ། །ཡུལ་དང་མ་ཕྲད་པ་ཉིད་ཡིན་ན་ནི། མིག་དང་རྣ་བ་བཞིན་དུ་རྔུབ་པ་དང་བཅས་པས་དང། མ་རྔུབས་པ་གཉིས་ལ་ཁྱད་པར་འགའ་ཡང་མེད་པར་འགྱུར་ཏེ། དུས་ཐམས་ཅད་དུ་འཛིན་པའི་ཕྱིར་རོ། །སློབ་དཔོན་འདུས་བཟང་ན་རེ། འདི་ནི་དོན་ཐ་དད་པ་མ་ཡིན་ཏེ། དབུགས་རྔུབ་པ་དང་བཅས་པས་དྲི་འཛིན་པ་ལ། དེ་ལ་ཕྲད་པར་འཛིན་པ་ཉིད་ཅི་ལྟར་གྲུབ་པར་འགྱུར། གང་གི་ཚེ་རྡུལ་ཕྲ་རབ་རྣམས་ཕན་ཚུན་མི་རེག་པ་དེའི་ཕྱིར། དབང་པོ་དང་པོ་ཉེ་བར་སྐྱེས་པའི་ཡུལ་འཛིན་པས་ཕྲད་པ་འཛིན་ནོ་ཞེས་ཟེར་རོ། །སྣ་དང་ལྕེ་དང་ལུས་ཞེས་བྱ་བ་ལ། ཨ་དྷྱཱར་བ་ཨེ་ཥ་ལཀྵྱ་ཏེ། འདིར་ཐ་མི་དད་པར་བསྟན་པ་མེད་པའི་ཕྱིར་ཡུལ་དང་དབང་པོ་དག་ཡུལ་དང་ཕྲད་པའི་དབང་དུ་བྱས་ནས་དབུགས་མ་རྔུབས་བར་དྲི་མི་འཛིན་པའི་ཕྱིར་ཞེས་རྒྱུ་གསུངས་སོ། །འོ་ན་ཅི། གང་འདིར་ཐོབ། ཡཱ་ཏྲ་བྲཱཔྟི་མོཀྵཾ་ཏེ་རྒྱ་དཔེ་གཅིག་ན་X འདིར་ལྡན་བར་སྒྲོ་བཏགས་པ་མཚོན་ནོ། དེས་ཡུལ་དང་ཕྲད་པ་གསུམ་གསུངས་
སོ། །སྣ་ནི་རང་ཉིད་དང་ཉེ་བར་སྐྱེས་པའི་དྲི་འཛིན་པར་བྱེད་ཀྱི། མིག་གཞན་དུ་ཡང་ཐག་རིང་པོ་ན་ཡོད་པ་མ་ཡིན་ནོ། །དྲིས་པ་ལ་འདི་ངེས་པར་བརྗོད་པར་བྱ་སྟེ། དབུགས་མ་རྔུབས་པར་དྲི་མི་འཛིན་པའི་ཕྱིར་རོ་ཞེས་པ་འདི་ནི་མངོན་པར་ཞེན་པ་ཙམ་མོ། །ཁ་ཅིག་ཕྲད་པའི་དངོས་པོ་དོན་གཞན་འདོད་དེ། དཔེར་ན་བྱེ་བྲག་པ་རྣམས་ཀྱི་གཞན་དུ་ནམ་མཁའི་ཁམས་ཀྱིས་ཆོད་པ་དང་ཉེ་བར་སྐྱེ་བ་དང༌། གཞན་དུ་བདག་ཉིད་འཇིག་རྟེན་གྱི་ཁམས་ཀྱིས་ཆོད་པར་སྐྱེའོ་ཞེས་བྱ་བ་ལྟ་བུའོ། །དེའི་ཕྱིར་ཕྲད་པ་ཞེས་བྱ་བ་འདི་ཅི་ཞེ་ན་ཞེས་པ་དྲིས་སོ། །འདབ་ཆགས་པར་འབྱུང་བའོ་ཞེས་བྱ་བ་ལན་ཏེ། དེ་ལྟར་ན་འདབ་ཆགས་བར་འབྱུང་བ་ལས་མ་གཏོགས་པའི་ཕྲད་པ་གཞན་ཡོད་པ་མ་ཡིན་ནོ་ཞེས་བྱ་བར་ཤེས་པར་བྱས་བར་འགྱུར་རོ། །འདབ་ཆགས་བར་འབྱུང་བ་ཡང་ཁ་ཅིག་གི་ལྟར་ན་ནམ་མཁའི་ཁམས་མ་གཏོགས་པའི་གཟུགས་ཀྱིས་མཆོད་པ་ཉིད་ཀྱི་ཕྱིར་ཡིན་ལ། གཞན་དག་གི་ལྟར་དུ་གཟུགས་ཐམས་ཅད་ཀྱིས་མཆོད་པ་ཉིད་ཀྱི་ཕྱིར་ཡིན་ནོ། །ཅི་རྡུལ་ཕྲ་རབ་རྣམས་ཞེས་རྒྱ་ཆེར་འབྱུང་བ་ལ་གལ་ཏེ་ཕན་ཚུན་རེག་ན་ཆ་ཤས་དང་བཅས་པར་ཐལ་བར་འགྱུར་ལ། ཆ་ཤེས་མེད་པ་ཉིད་ཡིན་ན་ཡང་སེམས་དང་སེམས་ལས་བྱུང་ལྟར་རེག་པ་མེད་དོ། །ཅི་སྟེ་མི་རེག་ན་དེ་ལྟ་ཡིན་ཡང་གསུམ་ནི་ཡུལ་དང་ཕྲད་པའོ་ཞེས་བྱ་བར་འགལ་ཏེ་མ་རེག་བ་ནི་ཕྲད་པ་མ་ཡིན་ནོ། །འདིར་ནི་རྫས་ཀྱི་རྡུལ་ཕྲ་རབ་ལ་མངོན་པར་འདོད་ཀྱི། འདུས་པའི་རྡུལ་ཕྲ་རབ་ནི་མ་ཡིན་ཏེ། དེ་ནི་ཆ་ཤས་དང་བཅས་པའི་ཕྱིར་རོ། །འདྲེས་པར་འགྱུར་རོ་ཞེས་བྱ་བ་ནི་ཡུལ་ཐ་མི་དད་པར་འགྱུར་རོ་ཞེས་བྱ་བའི་དོན་ཏེ། དེའི་ཆ་ཤས་ཀྱི་དངོས་བོ་མེད་པར་ཐལ་བར་སྣང་ངོ༌། །དེའི་ཕྱིར་བདག་ཉིད་ཐམས་ཅད་ཀྱི་མི་རེག་གོ །འོན་ཏེ་ཕྱོགས་གཅིག་གིས་རེག་ན་ནི་ཞེས་བྱ་བ་ལ། འགའ་ཞིག་གིས་རེག་ཅིང་འགའ་ཞིག་གིས་མི་རེག་ན་ཆ་ཤས་དང་བཅས་པ་དག་ཏུ་ཐལ་བར་འགྱུར་རོ། །གཞན་ཡང་རྡུལ་ཕྲ་རབ་གང་ཡིན་པ་དེ་རྣམས་གལ་ཏེ་ཕྱོགས་གཅིག་གིས་ཕན་ཚུན་རེག་ན་དེ་རྣམས་གོས་མཚུངས་པས་དེ་ནས་རྡུལ་ཕྲ་རབ་གཞན་དང་རེག་པས་རྫས་རྣམས་འདྲེས་པར་འགྱུར་རོ། །དེ་ཉིད་དུ་གནས་པ་ཉིད་
ཡིན་ན། ཕྱོགས་གཅིག་རེག་པས་ཁྱད་པར་ཅི་ཞིག་བྱེད། ཅི་སྟེ་མི་རེག་ན་རྡུལ་ཕྲ་རབ་དེ་རྣམས་ཕན་ཚུན་ཆ་ཤས་སུ་མི་རུང་ངོ༌། །རེག་པའི་མཚན་ཉིད་ཅན་ཐོགས་པ་ལས་སྒྲ་འབྱུང་བ་མཐོང་སྟེ། འདྲི་བ་ནི། འོ་ན་ཅི་ལྟར་ཞེས་བྱ་བ་ལ་སོགས་པ་སྟེ། གལ་ཏེ་བདག་ཉིད་ཐམས་ཅད་ཀྱིས་མ་ཡིན་ཞིང༌། ཕྱོགས་གཅིག་གིས་ཀྱང་མ་ཡིན་ན། ཕན་ཚུན་མི་རེག་བའི་ཕྱིར་ཇི་ལྟར་སྒྲ་འགྲུབ་བར་འགྱུར་ཞེ་ན། དེ་ཉིད་ཀྱི་ཕྱིར་ཏེ་ཞེས་བྱ་བ་སྟེ། གང་གི་ཕྱིར་རྡུལ་ཕྲང་བ་ཕན་ཚུན་མི་རེག་པ་དེ་ཉིད་ཀྱི་ཕྱིར་སྒྲ་འགྲུབ་བོ། །ལག་པས་ལག་པ་ལ་ཞེས་རྒྱ་ཆེར་འབྱུང་བ་ལ། གོས་མཚུངས་པའི་ཕྱིར་རོ་སྙམ་དུ་དགོངས་པའོ། །དེའི་ཕྱིར་ཐོགས་པ་དང་བཅས་པ་ཉིད་ཉམས་པར་འགྱུར་ལ། དེ་མེད་ན་ཐོགས་པ་མེད་བས་གང་ལས་སྒྲ་འབྱུང་བར་འགྱུར། ལྡན་པའི་དུས་མི་འཐད་པས་གཟེགས་ཟན་པ་ལྟར་ལྡན་བ་ལས་སྒྲ་འབྱུང་བར་ཁས་བླང་པར་ཡང་མི་བྱ་སྟེ། འོ་ན་ཅི་ཞེ་ན། གསུང་རབ་ལས་འབྱུང་བ་དག་ཁོ་ན་ལ་ལྡན་པའི་མིང་ངམ་ཕྲད་བ་ཞེས་གཏོགས་སོ། །འབྱུང་ཆེན་འགའ་ཞིག་གིས་ནི་འབྱུང་བའི་ཁྱད་པར་གཞན་འདབ་ཆགས་སུ་སྐྱེས་པ་ན་གང་ཞིག་སྒྲ་བསྐྱེད་པར་འགྱུར་བ་ཕྲད་པ་ཞེས་བྱ་བའི་མིང་ཐོབ་ལ། དེ་དང་ལྷན་ཅིག་སྐྱེས་པའི་སྒྲ་འཛིན་བས་འདིར་ཅི་སྟེ་མི་དཔྱོད། ཇི་ལྟར་བསགས་པ་ལ་ཞེས་བྱ་བ་ནི། བོང་བ་དང་སོ་ཕག་ལ་སོགས་པ་སྟེ་དེ་དག་གི་རྡུལ་ཕྲ་རབ་རྣམས་ཕན་ཚུན་མ་འབྱར་པའི་ཕྱིར་བརྒྱབ་ན་བྱེ་མ་འདུས་པ་བཞིན་ཇི་ལྟར་མ་འཇིག་པར་འགྱུར་ཞེ་ན། རླུང་གི་ཁམས་ཀྱིས་གཟུང་བའི་ཕྱིར་རོ། །གལ་ཏེ་རླུང་གི་ཁམས་ནི། བརྡབས་པའི་དངོས་པོ་རྣམས་ལ་འབྲལ་བའི་རྒྱུར་མཐོང་བ་མ་ཡིན་ནམ་ཞེ་ན། འདི་ལ་ནི་གཅིག་ཏུ་ངེས་པ་མེད་དེ། སེམས་ཅན་གྱི་ལས་ཀྱི་དབང་གིས་བྱུང་བའི་རླུང་གི་ཁམས་ཁ་ཅིག་ནི་འཇིག་པར་ཞུགས་པ་ཡིན་ཏེ། དཔེར་ན་འཇིག་པའི་ཚེའི་ལྟ་བུའོ། །ཁ་ཅིག་ནི་འཛིན་བར་ཞུགས་པ་ཡིན་ཏེ། དཔེར་ན་ཆགས་བའི་ཚེའི་ལྟ་བུའོ། །འདི་ཡང་སྔ་མ་དང་མཚུངས་སོ། །མ་རིག་པའི་ཕྱིར་རླུང་གི་ཁམས་ཀྱིས་འཛིན་པར་ནུས་པ་མ་ཡིན་ནོ། །རེག་པར་ཁས་བླངས་པ་ཉིད་ནི་ཡང་དེ་ཉིད་ཐོགས་པ་མེད་པར་ཉིད་དང་ཆ་ཤས་དང་བཅས་པ་ཉིད་ཀྱི་
སྐྱོན་ནོ། །མ་རེག་པ་ཉིད་དུ་འཛིན་པར་བྱེད་དེ། དཔེར་ན་ལུས་ཀྱི་དབང་པོ་མ་རེག་པར་ཁོ་ནར་ལུས་ཀྱི་རྣམ་པར་ཤེས་བ་སྐྱེ་བ་བཞིན་ནོ། །གལ་ཏེ་རྡུལ་ཕྲ་རབ་རྣམས་ཕན་ཚུན་མི་རེག་ན། ད་ནི་ཇི་ལྟར་འདབ་ཆགས་བར་ཞེས་བྱ་བ་རྒྱ་ཆེར་འབྱུང་སྟེ། ཕན་ཚུན་ཕྲད་པ་མེད་པར་འདབ་ཆགས་པ་ཉིད་མི་རིགས་སོ། །དེ་དག་གི་དབུས་ན་ཅུང་ཟད་མེད་པ་ཞེས་བྱ་བ་ནི། སྣང་བ་ལ་སོགས་པའི་གཟུགས་བཞིན་ནོ། །ཡང་ཞེས་བྱ་བ་ནི་གཞན་ཡང་ཞེས་བྱ་བའི་ཐ་ཚིག་གོ །ཉེས་པ་མེད་དོ་ཞེས་བྱ་བ་ནི་བདག་ཉིད་ཐམས་ཅད་ཀྱིས་རེག་གམ་ཕྱོགས་གཅིག་གིས་རེག་ཅེས་ཉེས་པ་བརྗོད་པ་གང་ཡིན་པའོ། །གཞན་དག་ན་རེ་ད་ནི་ཇི་ལྟར་འདབ་ཆགས་པར་ཕྲད་པ་ཞེས་བྱ་བ་ལ་སོགས་པ་སྨྲས་པ་གང་ཡིན་པ་དེ་ཉིད་ཉེས་པ་མེད་དོ་ཞེས་ཟེར་རོ། །དེ་ལྟར་བྱས་ན་ཞེས་བྱ་བ་ལ། གལ་ཏེ་འདུས་བ་རྣམས་ཕན་ཚུན་རེག་པ་ནའོ། །ཅི་རེག་པའི་རྒྱུ་ཅན་གྱི་ཞེས་བྱ་བ་ལ། རེག་པ་རྒྱུར་ཡོད་ལ་དེ་ནི་རེག་པའི་རྒྱུ་ཅན་ནོ། །རེག་པ་ཞིག་སྐྱེ་བའམ་ཞེས་བྱ་བ་ནི། གང་ཞིག་གཞན་གྱི་རེག་བའོ། །མ་རེག་པའི་རྒྱུ་ཅན་ཞེས་བྱ་བ་ནི་མ་རེག་བརྒྱུར་གང་ལ་ཡོད་པའོ་ཞེས་ཚིག་རྣམ་པར་སྦྱར་ཏེ་རྡུལ་ཕྲ་རབ་རྣམས་ནི་ཕན་ཚུན་མ་རེག་བསམ་རེག་པའོ། །རྒྱུའི་ཕྱིར་ཞེས་བྱ་བ་ལ། རེག་པའམ་མ་རེག་པ་ཡང་རུང་སྟེ། གང་ཞིག་གང་གི་རྒྱུ་ཡིན་བ་དེ་ནི་དེའི་རྒྱུ་སྟེ། རྒྱུའི་ཕྱིར་ཞེས་གསུངས་སོ། །རེས་འགའ་ནི་མ་རེག་པའི་རྒྱུ་ཅན་གྱིས་ཞེས་བྱ་བ་རྒྱས་བར་འབྱུང་བ་ལ། གང་གི་ཚེ་བསགས་བའི་རྡུལ་ཕྲ་རབ་རྣམས་ཞིག་བར་གནས་པ་དེའི་ཚེ་མ་རེག་པའི་རྒྱུ་ཅན་གྱིས་མ་རེག་པའོ། །གང་གི་ཚེ་རྡུལ་ཕྲ་རབ་རྣམས་བསགས་བར་འགྱུར་བ་དེའི་ཚེ་མ་རེག་བའི་རྒྱུ་ཅན་གྱིས་རེག་པའོ། །གང་གི་ཚེ་བསགས་པ་དང་ལྡན་པ་བསགས་པ་སྟེ། འདུས་པ་རྣམས་འདུས་པ་དེའི་ཚེ་རེག་བའི་རྒྱུ་ཅན་གྱིས་རེག་པ་སྟེ་ཉི་ཟེར་གྱི་རྡུལ་ནི་རྒྱུན་གྱི་སྐད་ཅིག་གཉིས་པ་མ་ཕྲད་བའི་རྒྱུ་ཅན་མ་ཕྲད་པ་སྟེ། དེ་ནི་ཕན་ཚུན་མི་རེག་བསམ་རེག་པ་ཞེས་བྱའོ། །སློབ་དབོན་འདུས་བཟང་ན་རེ། རགས་པ་ཚོགས་པའི་དབང་དུ་བྱས་ཏེ་ཕྲ་མོ་ལ་རེག་པར་བརྗོད་དོ། །དེའི་རྒྱུ་ཅན་ནི་རགས་པ་ལ་མ་རེག་པའི་རྒྱུ་ཅན་གྱིས་རེག་པར་བརྗོད་དེ་ཉེས་པར་མི་འགྱུར་རོ། །གང་གི་ཚེ་འདིར་གཟུགས་དེའི་རྐྱེན་
ཚོགས་པ་ལས་འཛིན་པར་བྱེད་པའི་རླུང་གི་ཁམས་དང་མི་འགལ་བར་དེ་ལས་བཟློག་པ་སྐྱེ་བ་དེའི་ཚེ་རེག་པའི་རྒྱུ་ཅན་གྱིས་མ་རེག་པར་སྐྱེ་སྟེ། རགས་པ་འདུས་པའི་རྒྱུ་ཅན་གྱིས་ཕྲ་མོ་ཞེས་བྱ་བའི་ཐ་ཚིག་གོ །དེ་ཉིད་ཀྱི་ཕྱིར་ཉི་ཟེར་གྱིས་རྡུལ་འཛིན་པར་བྱེད་པའི་རླུང་གི། ཁམས་མ་སྐྱེས་པ་ལ་དེ་མེད་པའི་ཕྱིར་དང་ཕྲ་བའི་ཕྱིར་འདུས་པ་རྣམས་ལ་ནི་དེ་མ་རེག་པའི་རྒྱུ་ཅན་གྱིས་མ་རེག་པ་ཞེས་བཤད་དོ། །དེའི་ཕྱིར་འདིར་དགོངས་པ་ནི་འདི་ཡིན་པར་མངོན་ནོ་སྙམ་མོ། །བྱེ་བྲག་ཏུ་སྨྲ་བ་རྣམས་ཀྱིས་གང་མ་རེག་པ་ལ་རྒྱུ་བཤད་པ། གལ་ཏེ་བདག་ཉིད་ཐམས་ཅད་ཀྱིས་རེག་ན་འདྲེས་པར་འགྱུར་རོ། །རྫས་རྣམས་སྐད་ཅིག་པ་ཉིད་ལ་རེག་པའི་དུས་མི་སྲིད་པའི་ཕྱིར་དེ་ལ་ནི་མི་གུས་སོ། །སྐད་ཅིག་མར་འཛིན་པ་དང་འགལ་བ་ལ་རྒྱུ་སྨྲས་པ་ནི། སྐད་ཅིག་མ་ཕྱི་མར་གནས་པར་འགྱུར་རོ་ཞེས་བྱ་བ་སྟེ། རེག་པའི་སྐད་ཅིག་ནི་སྐྱེས་པའི་སྐད་ཅིག་པས་ཕྱི་བ་ཡིན་ཏེ། བདག་ཉིད་ཐོབ་མ་ཐག་ཏུ་ཕན་ཚུན་རེག་པའི་ཕྱིར་རོ། །སྐད་ཅིག་མ་ཕྱི་མར་གནས་པ་ཡང་མ་ཡིན་ཏེ། དེའི་ཕྱིར་རེག་པའི་དུས་སུ་འགགས་པའི་ཕྱིར་དེ་མི་རེག་གོ །རེག་པ་ནི་གོས་མཚུངས་པར་སྐྱེ་བ་སྟེ། དེ་ཡང་སྐད་ཅིག་མ་ཕྱི་མར་གནས་པ་མེད་པར་ཡང་ཡུལ་ཐ་དད་པའི་རྒྱུ་ལས་འགལ་བ་མེད་དོ་ཞེས་དེ་ལྟར་བསམ་པར་བྱའོ། །འདབ་ཆགས་པ་ལ་རེག་གོ་སྙམ་དུ་འདུ་ཤེས་པར་ཟད་དོ། །བྱེ་བྲག་ཏུ་སྨྲ་བའི་ལུགས་ལས་འདི་ལ་ཁྱད་པར་ཅི་ཡོད་ཅེ་ན། འདི་ནི་གཟུགས་འབའ་ཞིག་ཏུ་མ་ཟད་ཀྱི་བར་དུ་ནམ་མཁའ་ཡང་མེ་འདོད་དོ། །བཙུན་པའི་ལུགས་འདོད་པར་བྱེ་བྲག་ཏུ་སྨྲ་བའི་ལུགས་མ་ཡིན་ནོ། །འདི་ལ་རྒྱུ་ཉིད་གསུངས་བ་དེ་ལྟ་མ་ཡིན་ན་ནི་ཞེས་བྱ་བ་ལ་སོགས་པ་སྟེ། གལ་ཏེ་བཙུན་པའི་ལུགས་ལས་གཞན་དུ་རྡུལ་ཕྲ་རབ་ཀྱི་བར་དག་ཏུ་ནམ་མཁའ་འདོད་ནའོ། །བར་སྟོང་པ་དག་ཏུ་ཞེས་བྱ་བ་ནི་གཟུགས་གཞན་གྱིས་མ་བཀག་པ་དག་ཏུའོ། །འགྲོ་བ་ལ་འགོག་པ་ནི་ཐོགས་པ་སྟེ། དེ་ནི་རྡུལ་ཕྲ་རབ་ཀྱི་བར་སྟོང་པ་དག་ལ་མི་རིགས་པས་ཐོགས་བ་དང་བཅས་པ་ཉིད་ཉམས་པར་འགྱུར་རོ། །གནས་བརྟན་འདུས་བཟང་ན་རེ། བཙུན་པའི་ལུགས་འདོད་པར་ཡང་མི་བྱ་སྡང་བར་མི་བྱའོ། །འོ་ན་ཅི་ཞེ་ན། བཙལ་བར་བྱ་སྟེ། གལ་ཏེ་འདི་དག་ལ་བར་ཅུང་ཟད་མེད་ན་དེ་ལྟ་ན་
ཆ་ཤས་དང་བཅས་པའམ་གོ་ས་གཅིག་པར་འགྱུར་རོ། །ཉེས་པ་སྔ་མ་ལས་མི་འདའ་བའི་ཕྱིར་ཇི་ལྟར་བཙུན་བའི་ལུགས་འདོད་ཅེས་ཟེར་རོ། །ཡང་ཇི་སྐད་དུ་འདུས་པ་རྣམས་ནི་ཆ་ཤས་དང་བཅས་པ་ཡིན་པའི་ཕྱིར་རེག་པར་འགྱུར་བས་ཞེས་ལན་སྨྲ་བ། རྡུལ་ཕྲ་རབ་རྣམས་ལས་བསགས་པ་དག་ཅེས་བྱ་བརྒྱ་ཆེར་འབྱུང་སྟེ། ཇི་ལྟར་རྡུལ་ཕྲ་རབ་ཕན་ཚུན་ལྟོས་པ་རྣམས་གཟུགས་སུ་རུང་སྟེ། འདུས་པ་ནི་མ་ཡིན་པ་དེ་བཞིན་དུ། རྡུལ་ཕྲ་རབ་རྣམས་བསགས་པ་ཁོ་ན་ལ་རེག་གི །འདུས་པ་དག་ལ་ནི་མ་ཡིན་ཏེ་འདུས་པ་རྣམས་རྡུལ་ཕྲ་རབ་ལས་ཐ་དད་པ་མེད་པའི་ཕྱིར་རོ། །དེའི་ཕྱིར་རྡུལ་ཕྲ་རབ་རྣམས་ལ་འདྲེས་པར་འགྱུར་བ་དང༌། ཆ་ཤས་དང་བཅས་པ་ཉིད་ཀྱི་ཉེས་པ་ནི་འདུས་པ་ཉིད་དོ། །འོན་ཏེ་ཕྱོགས་གཅིག་གིས་རེག་ན་ནི་ཆ་ཤས་དང་བཅས་པ་དག་ཏུ་ཐལ་བར་འགྱུར་པ་ཞིག་ན་ཞེས་གང་སྨྲས་པ་དེ་ལ་བཤད་པ་ནི་གལ་ཏེ་རྡུལ་ཕྲ་རབ་ལ་ཕྱོགས་ཐ་དད་པས་རྟོགས་ན་ནི་ཞེས་བྱ་བ་རྒྱ་ཆེར་འབྱུང་བ་ལ། ཕྱོགས་ཆས་ཐ་དད་པ་ནི་ཕྱོགས་ཐ་དད་པ་སྟེ། ཤར་གྱི་གཞན་ཉིད་ཡིན་ལ་ནུབ་ཀྱང་གཞན་ཉིད་དུ་ཡིན། སྟེང་ནི་གཞན་ཉིད་ཡིན། འོག་གི་བར་དུ་ཡང་ཡིན་ནོ། །དེ་ལྟར་ན་ཕྱོགས་ཐ་དད་པ་ཡོད་པ་ཉིད་ཀྱི་ཕྱིར་རེག་པ་འབའ་ཞིག་ཏུ་མ་ཟད་ཀྱི་མ་རེག་པ་ཡང་ཆ་ཤས་དང་བཅས་བར་ཐལ་བར་འགྱུར་རོ། །གལ་ཏེ་ཕྱོགས་ཐ་དད་པར་རྟོགས་པ་མ་ཡིན་ན་ནི་རེག་ཀྱང་ཐལ་བར་མི་འགྱུར་རོ། །གང་དུ་ཞེ་ན་ཆ་ཤས་དང་བཅས་པ་ཉིད་དུ་སྟེ། གོ་ས་གཅིག་པར་ནི་མ་ཡིན་ནོ། །ཕྱོགས་ཆ་ཐ་དད་པར་བརྗོད་པ་ནི་ཆ་ཤས་དང་བཅས་པར་བརྗོད་པའི་རྣམ་གྲངས་ཡིན་ནོ། །ཆ་ཤས་མེད་པར་ཁས་བླངས་པ་ཉིད་ཀྱིས་ཕྱོགས་ཆ་ཐ་དད་པ་བཟློག་པར་བྱས་པ་ཉིད་དོ། །གལ་ཏེ་རྡུལ་ཕྲ་རབ་ཕྱོགས་ཆ་ཐ་ཐ་དད་པས་མངོན་པར་བརྗོད་པ་འདི་དགོངས་པ་ཡིན་པར་ཤེས་པར་མི་བྱ་སྟེ། ཕྱོགས་གཅིག་གིས་ཀྱང་མ་ཡིན་ནོ། །མ་རེག་པ་ལ་ཆ་ཤས་དང་བཅས་པ་ཉིད་མ་བཤད་དོ། །འོ་ན་གོ་ས་མཚུངས་པ་དེ་ཉིད་འདིར་བརྗོད་པ་ཅི་ཞེ་ན། རེག་ཀྱང་ཐལ་བར་མི་འགྱུར་ཞེས་བྱ་བ་སློབ་དཔོན་གྱི་དགོངས་པར་ཤེས་པར་མི་བྱའོ། །རྡུལ་ཕྲ་རབ་ལས་གཞན་པ་ཅི་ཞིག་གི་ཆ་ཤས་དང་གང་གིས་ཆ་ཤས་དང་བཅས་པ་ཉིད་མ་ཡིན་ཏེ། དེ་ནི་རྡུལ་ཕྲ་རབ་ཉིད་དུ་མི་འགྱུར་ཞེས་པའི་ཚིག་གིས་འཕངས་
པ་དེ་ཆ་ཤས་དང་བཅས་པའོ། །གལ་ཏེ་ཕྱོགས་ཆ་ཐ་དད་པར་བརྗོད་པ་ལས་ཀྱང༌། ཙཏཏྤ་ར་མེ་བཱ་ནེ་ཡཾ། དེ་བཞིན་ཉིད་འདྲེན་པར། མི་མཐུན་པའི་ཕྱོགས་སུ་རྣམ་པར་གཞག་པའི་དབང་ལས་བརྗོད་དོ། །སློབ་དཔོན་འདུས་བཟང་ན་རེ། རྡུལ་ཕྲ་རབ་དང་ཉེ་བ་ལས་ཟས་ཀྱི་དྲི་ལ་སོགས་པ་འཛིན་པས་སྣ་ལ་སོགས་བས་ཕྲད་པ་འཛིན་པར་འདོད་ཀྱི་སྣ་དང་དྲི་ལ་སོགས་པའི་རྡུལ་ཕྲར་བ་རྣམས་ཕན་ཆུན་རེག་པ་ནི་མ་ཡིན་ནོ། །མ་རེག་པའི་ཕྱིར་སྒྲིབ་བ་དང་ཐོགས་པ་མ་ཡིན་ཞིང་ཐོགས་པ་དང་བཅས་པ་མ་ཡིན་པའི་ཕྱིར་རོ་ཞེས་ཟེར་རོ། །ཡང་རེག་བྱའི་རྡུལ་ཕྲ་རབ་རྣམས་ཕན་ཚུན་རེག་གམ་ཅི་ཞེ་ན། རེག་པར་མི་བྱེད་དེ་འདྲེས་པ་དང་ཆ་ཤས་དང་བཅས་པ་ཉིད་ཀྱི་སྐྱོན་དུ་ཐལ་བར་འགྱུར་བའི་ཕྱིར་རོ། །གལ་ཏེ་རེག་བྱ་ཡང་ཕན་ཚུན་རེག་པར་མི་བྱེད་ན། དེ་ལྟ་ན་འོ་ན་རེག་བྱ་མ་ཡིན་པའི་རྒྱུ་མེད་དོ། །ཀིམ་པུ་ན་སྟེ་ཥཱཾ་བི་བར་མ་སྤྲཥྚ་རཱུ་པ་མ་དྱ་ལེ་ན་ཅེ་དི་ཏྱེ་ན། རྒྱུར་བྱས་པའི་གཟུགས་འབྱུང་བ་ལ་མ་ལྟོས་པ་ཡོད་བ་མ་ཡིན་ཞིང༌། འབྱུང་བ་རྣམས་ཀྱང་དེར་འབྱུང་བ་དེའི་ཕྱིར་རེག་བྱ་མ་ཡིན་པའི་གཟུགས་གཞན་དུ་བརྗོད་པར་བྱའོ། །རྒྱུར་བྱས་པའི་གཟུགས་ཉིད་ཏ་སྱ་ཧཱི་ལ་ཏེ། བི་བར་དཱུ་པ་རཱུ་པ་སྱ་ཙཱ་ཉེ་ན། ཅི་ཡང་དེ་རྣམས་རྒྱས་པ་རེག་བ་དང་བའི་གཟུགས། འགའ་ཡང་ཞེས་པ་འདི བི་བ་ར། རཱུ་པེ་ཎ་བྷ་བི་ཏ་བྱི། དེ་ཡང་གཞན་དུ་མི་གནས་སོ། །དེ་ཁས་བླངས་པ་ཉིད་དེ། བི་བར། མེད་པའི་ཕྱིར། བི་བ་ར། གཟུགས་ཀྱིས་དེ་ཆོད་པ་དག་ཏུ་རྡུལ་ཕྲ་རབ་དག་གིས་རེག་པར་ཐལ་བའི་ཕྱིར་རྡུལ་ཕྲ་གཟུགས་ཀྱི་ཡང་གཞན་གྱི་རབ་རྣམས་གོས་མཚུངས་པ་ཉིད་དམ། ཆ་ཤས་དང་བཅས་པ་ཉིད་ནི་པ་པ་རི་ཧྲི་ཏེ་གཟུགས་ཀྱིས་བསྒོམ་པར་བྱའོ། འགྱུར་རོ། །གང་ཡང་བུ་ག་གཟུགས་ཀྱི་བར་སྟོང་བ་དག་ཏུ་དེ་ལས་གཞན་རྒྱས་པའི་པའི་རྡུལ་ཕྲ་རབ་ཀྱི་སྐབས་ལ་གེགས་སུ་མི་འགྱུར་ཏེ། ཐོགས་པ་དང་བཅས་པ་ཉིད་སྐབས་ཀྱི་གེགས་སོ་ཞེས་སློབ་དཔོན་འདུས་བཟང་ཟེར་རོ། ཕན་ཚུན་གོ་ས་ལན་ཉིད་མ་ཡིན་ནོ། སྐྱེས་པ་ལ་སྒྲིབ་པ་དང་ཐོགས་པས་ཐོགས་པ་ཉིད་དུ་མི་རུང་བ་མ་ཡིན་ཏེ། རང་གི་ཡུལ་དུ་སྐྱེད་པར་སྒྲུབ་པ་ལ་སྡང་བ་ནི་དེ་དག་ཐོགས་བ་དང་བཅས་པ་ཉིད་དུ་འདོད་དོ། །ཨ་ཏཱ་པི་ཡང་སྱ་འགྱུར་དྷརྨ་ཏི་ཙེ་ཆོས་ཉིད་འདི་ཡཾ་ཡ་གང༌། སྟེ་ཐོགས་པ་དང་བཅས་པ་ཡུལ་ཐ་མི་དད་
པ་ཉིད་དོ། །ངེས་པར་རྡུལ་ཕྲ་རབ་རྣམས་རྡུལ་ཕྲ་རབ་དེ་རྣམས་དང་རེག་པ་ལས་གོས་མཚུངས་པ་ཉིད་དུ་འགྱུར་རོ། །ཨེ་ཏི་ཏཏརྷ་རྡུལ་ཕྲ་རབ་ཆ་ཤས་དང་བཅས་པར་འགྱུར་ཏེ། གཉིས་ཀྱི་ཆ་ཤས་མེད་པའི་ཕྱིར་རོ། །སློབ་དཔོན་དཔལ་ལེན་ན་རེ། ཨ་བཻ་དེ་ཤྱེ་ནཱ་བ་སྠཱ་ནཾ། ཞེས་ཟེར་རོ། །དེ་ཉིད་ཀྱི་ཕྱིར་ཨ་བྷིརྦྷ་གོ་སྱ་བཻ་དེ་ཤྱེ་ན་བྷཱ་བཱ་ཏ་ཞེས་བྱ་བ་ཐམས་ཅད་ཀྱི་ཉུང་བ་ཉིད་ནི་རྡུལ་ཕྲ་རབ་པ་རྣམས་སུ་སྨྲའོ། །འདི་འོ་ན། ཨ་བཻ་དེ་ཤྱེ་ཁས་བླངས་པར་འགྱུར་རོ། །གལ་ཏེ་བཱ་ཡཾ་གོ་སྐབས་ཡོན་པ་ལྔ་རྣམས་ཨ་བཻ་དེ་ཤྱེ་ཡུལ་དང་བྲལ་བ་མ་ཡིན་གནས་སྐབས།ཞེས་བྱ་བ་བྱེ་བ་བརྒྱ་སྟོང་རྣམས་ཀྱི་ཨ་བཻ་དེ་ཤྱེ་ཆ་ཤས་འདི་ཡུལ་དང་བྲལ་བ་མེད་པའི་ཕྱིར། ཀོ་བི་བནྡྷཿ་དེ་བཞིན་དུ་ཨ་བཻ་དེ་ཤ་ཀའི་རྡུལ་ཕྲ་རབ་ཇི་སྙེད་པ་ཐམས་ཅད་ཀྱང་དེ་སྙེད་དུ་གྱུར་ན་འགྲོ་བ་མཐའ་དག་རྡུལ་ཕྲན་ཙམ་དུ་ཐལ་བར་འགྱུར་རོ། །ཙ་ཙཱ་ཕུ་ནར་ཨ་བཻ་དེ་ཤྱཾ་རྡུལ་ཕྲ་རབ་གཅིག་གི་ཕུལ་ལས་ལྔ་འདུས་པའི་ཡུལ་ཆེས། ཡུལ་དང་བྲལ་བ་མ་ཡིན་པའི་གེགས། ཡངས་པའི་ཕྱིར་དེའི་ཆ་ཤས་ཉིད་མ་རེག་པར་ཡང་ཁས་བླང་བར་བྱའོ། །དེའི་ཕྱིར་ཐམས་ཅད་འདུས་བ་རྣམས་ལས་རྦེ་ཥཱཾ་བྷཱ་བ་ད་བྷི་ནི་བྷ་གི་ཏྭ་མེ་ཥཾ་ནཱ་བེ་དེ་ཤྱྀ་དི་ཏི། མྱུར་དུ་འཇུག་བས་ཞེས་ཡང་ཡུལ་དང་བྲལ་བ་མ་ཡིན་པའི། བྱ་བ་ནི་ལྟ་བ་དང་ཉན་པའི་ཕྱེད་པ་མྱུར་དུ་འཇུག་པས་སོ། །མགལ་མེའི་འཁོར་ལོ་བཞིན་ཞེས་བྱ་བ་ལ། དཔེར་ན་ཡུལ་གཞན་དུ་མྱུར་དུ་འཇུག་པས་ན་མགལ་མེ་ལ་འཁོར་ལོའི་བློར་འགྱུར་བ་བཞིན་ནོ། །དབང་པོའི་ཡུལ་འདི་རྣམས་ཐམས་ཅད་དངོས་པོ། ཆ་ཤས་ཉིད་འདི་རྣམས་དུ་བ་མིན་འབྲལ་བ་ཞེས་སོ། །ཕྲ་རབ་རྣམས་ཇི་སྙེད་པ་ཞེས་རྒྱ་ཆེར་འབྱུང་བ་ལ། སྣ་ལ་སོགས་པ་དག་གིས་ནི་དབང་པོའི་རྡུལ་ཕྲ་རབ་དག་ལས་ཆེས་ལྷག་པའི་ཡུལ་གྱི་རྡུལ་ཕྲ་རབ་རྣམས་མི་གཏོགས་སོ། །འདི་ལྟར་དབང་པོའི་རྡུལ་ཕྲ་རབ་རྣམས་ནི་ཡུལ་ཆེས་ཆུང་བ་ལ་ཡང་དེ་སྙེད་ཅིག་བྱེད་བ་དང་བཅས་ཀྱི། ཆེས་ཉུང་བ་དང་ཆེས་མང་བ་དག་ལམ་ཡིན་ཏེ། དེ་ལྟ་ན་དེ་དག་ཡུལ་དང་ཕྲད་པ་ཉིད་དུ་འགྱུར་གྱི་གཞན་དུ་ནི་མ་ཡིན་ནོ། །མིག་དང་རྣ་བ་དག་གི་ནི་མ་ངེས་པར་བཤད་པའི་ཕྱིར་སྔར་བཤད་པ་རྣམས་ལ་མཉམ་པ་ཁོ་ན་འཛིན་ནོ་ཞེས་ངེས་པ་བཤད་པར་འགྱུར་རོ། །རེས་འགའ་ནི་ཆུང་སྟེ་ཞེས་བྱ་བརྒྱ་ཆེར་འབྱུང་བ་ལ་འདི་སྐད་དུ། ཡུལ་མ་ངེས་པའི་ཕྱིར་ལྷག་པར་འཛིན་གྱི་མག་ལ་མེའི་འཁོར་ལོ་བཞིན་དུ་མྱུར་
དུ་འཇུག་པའི་ཕྱིར་ནི་མ་ཡིན་ནོ་ཞེས་བསྟན་པར་འགྱུར་རོ། །མ་ཕྲད་པར་ཁྱད་པར་མེད་པ་ནི་ཁྱད་པར་གྱི་རྒྱུ་མེད་པའི་ཕྱིར་རིམ་གྱིས་འཛིན་པར་མི་རིགས་པ་དེའི་ཕྱིར་ཐམས་ཅད་ཀྱིས་རེ་ཤིག་རྡུལ་ཕྲ་རབ་རྣམས་ཁོ་ན་ལན་གཅིག་འཛིན་ནོ། །མིག་ཕྱེ་བ་ཙམ་གྱིས་ཞེས་བྱ་བ་ལ། ཙམ་སྨོས་པ་ནི་མྱུར་དུ་བསྒྱུར་བར་རྟོག་པ་བཟློག་པར་བྱ་བའི་ཕྱིར་རོ། །ཚད་ནི་ལུས་ཅན་གྱི་རྫས་ལ་བརྟེན་པའི་ཕྱིར་ན་ཡིད་ལ་ཚད་ཡོད་པ་མ་ཡིན་ཏེ། ལུས་ཅན་མ་ཡིན་པའི་ཕྱིར་རོ། །དེའི་ཕྱིར་འདི་ལ་ཚད་མི་དཔྱད་དོ། །དབང་པོ་ཉམས་པ་རྣམས་ལ་རྟེན་ཡོད་ཀྱང་གཟུགས་མཐོང་བ་ཡོད་པ་མ་ཡིན་པ་དེའི་ཕྱིར་མིག་ལ་སོགས་པ་དག་རྟེན་ལས་གཞན་ཡིན་ནོ་ཞེས་བྱ་བར་ངེས་མོད་ཀྱི། དེ་དག་ཏུའམ་ཇི་ལྟར་གནས་པ་ནི་མ་ངེས་པས་དེའི་ཕྱིར་འདྲི་བ་ནི། ཡང་མིག་གི་དབང་པོ་ལ་སོགས་པ་འདི་དག་གི་ཞེས་རྒྱ་ཆེར་འབྱུང་སྟེ། མིག་གིས་གཟུང་བར་བྱ་བ་མ་ཡིན་པའི་ཕྱིར་འདི་དག་གི་གནས་ཚུལ་རྣམ་པར་གཞག་པ་ནི་དཀའ་མོད་ཀྱི། ཐོགས་པ་དང་བཅས་པ་རྣམས་ཡུལ་ཐ་དད་པར་གནས་པའི་ཕྱིར་དང༌། འདུས་པ་རྣམས་སྐྱེ་བའི་ཕྱིར་གདོན་མི་ཟ་བར་གང་དག་ཇི་ལྟར་གནས་པ་དེ་བརྗོད་པར་བྱ་དགོས་སོ། །རེ་ཞིག་མིག་གི་རྡུལ་ཕྲ་རབ་རྣམས་ནི་ཞེས་བྱ་བ་རྒྱས་པར་འབྱུང་སྟེ། མིག་གི་འབྲས་བུ་སྟེ། མཐོང་ཕྱེད་ཀྱི་དཀྱིལ་འཁོར་ལ་གོ་སྙོད་ཀྱི་མེ་ཏོག་བཞིན་དུ་ཡུལ་ལ་མངོན་དུ་ཕྱོགས་པར་གནས་སོ། །གོ་སྙོད་ཀྱི་མེ་ཏོག་སྨོས་པ་ནི་ཕན་ཚུན་མ་འབྲེལ་བར་བསྟན་པའི་ཕྱིར་རོ། །ཕན་ཚུན་མ་འབྲེལ་བའི་ཕྱིར་གྱེས་པར་ཐལ་ཞེས་བྱ་བའི་དོགས་པ་བཟློག་པའི་ཕྱིར་ཁ་དོག་དང་བས་བཀག་པས་ཞེས་བྱ་བ་ལ་སོགས་པ་སྨོས་ཏེ། ཁ་དོག་དང་སྨོས་པ་ནི་ཤེལ་ལྟར་ལྟ་བའི་གེགས་བསལ་བར་བྱ་བའི་ཕྱིར་རོ། །བླ་འོག་ན་གནས་ན་ནང་མ་རྣམས་ལ་སྒྲིབ་པར་འགྱུར་རོ་ཞེ་ན། དེའི་ཕྱིར་ཕན་ཚུན་མི་སྒྲིབ་བོ་ཞེས་བྱ་བ་ལ་སོགས་པ་སྨོས་སོ། །ཤེལ་གྱི་ཆ་ཤས་དག་ནི་ཕན་ཚུན་མི་སྒྲིབ་སྟེ། །ཕན་ཚུན་བསྒྲིབས་ན་ཤེལ་གྱིས་བསྒྲིབས་པའི་གཟུགས་མི་འཛིན་པར་འགྱུར་རོ། །རྣ་བའི་བུ་ག་གི་ནང་ན་གནས་སོ་ཞེས་བྱ་བ་ལ། རྣ་བའི་བུ་ག་ནི་རྣ་ཁུང་གི་བུ་གའི་མཐར་ཐུག་པའོ། །མཚུལ་བའི་ནང་ན་ཞེས་བྱ་བ་ནི། སྣའི་ནང་ན་རྟེན་དང་འདྲ་བང་ཁ་ཐུར་དུ་བལྟས་པའོ། །སྐྲའི་རྩེ་མོའི་ཁྱོན་ཙམ་
ཞིག་མ་ཁེབས་པ་ནི་མ་ཁྱབ་པའོ། །གྲག་གོའི་སྐྲ་ནི་སྲིད་པར་བསྟན་པའི་ཕྱིར་རོ། །ཐམས་ཅད་ཀྱིས་རྣམ་པར་ཤེས་པ་སྐྱེད་ན་ནི་ཞེས་བྱ་བ་ལ། ལོའི་སྒྲ་ནི་དེར་ལུས་མི་འཇིག་པ་ནི་ལས་ཀྱིས་གཟུང་བའི་ཕྱིར་ཡིན་གྱི་ཐམས་ཅད་ཀྱིས་རྣམ་པར་ཤེས་པ་མི་སྐྱེད་པའི་ཕྱིར་ནི་མ་ཡིན་ནོ་ཞེས་བྱ་བའོ། །དེ་ཉིད་ཀྱི་ཕྱིར་ཞེས་བྱ་བ་ནི། གང་གི་ཕྱིར་དབང་པོའི་རྡུལ་ཕྲ་རབ་པའི་ཡུལ་གྱི་རྡུལ་ཕྲ་རབ་གཅིག་གིས་རྣམ་པར་ཤེས་པ་སྐྱེད་པ་མེད་པའི་ཕྱིར་རོ། །ཡིད་ནི་གཅིག་པུ་ཞིག་ཁོ་ན་ཡིད་ཀྱི་རྣམ་པར་ཤེས་པའི་རྟེན་དུ་འགྱུར་ལ། ཆོས་གཅིག་དང་དུ་མ་ཡང་ལྔ་པོ་དག་གི་ཞེས་ཁྱད་པར་དུ་བྱས་སོ། །རྟེན་དང་དམིགས་པ་ནི་བསགས་པ་ཡིན་པའི་ཕྱིར་ཞེས་བྱ་བ་ནི། བསགས་པ་ལ་བརྟེན་པའི་ཕྱིར་དང་བསགས་པ་ལ་དམིགས་པའི་ཕྱིར་རོ། །བསྟན་དུ་མེད་པ་ཡང་དོན་གང་གིས་ཤེ་ན། དེ་ཉིད་ཀྱི་ཕྱིར་ཞེས་སྨོས་སོ། །ཅི་མིག་ནི་རྣམ་པར་ཤེས་པ་ན་ཞེས་བྱ་བ་འབྱུང་སྟེ། འདི་ནི་རྟེན་ངེས་པར་བསྟན་པར་བྱ་བའི་ཕྱིར་བརྩམས་ཀྱི། རྟེན་བསྟན་པར་བྱ་བའི་ཕྱིར་ནི་མ་ཡིན་ནོ། །ཐ་མའི་རྟེན་འདས་ཞེས་བྱ་བ་ནི་གོང་དུ་དྲུག་པོ་འདས་མ་ཐག་པ་ཡི། ཞེས་བྱ་བའི་མདོ་དེར་བསྟན་ཟིན་ཏོ། །དེ་བཞིན་དུ། མིག་གིས་གཟུགས་རྣམས་མཐོང་རྟེན་བཅས། །དེ་ལ་བརྟེན་པའི་རྣམ་ཤེས་མིན། །ཞེས་བྱ་བ་དེ་ཉིད་དུ་ལྔ་པོ་རྣམས་ཀྱི་རྟེན་ད་ལྟར་བྱུང་བའི་དངོས་པོར་གྱུར་པའི་དོན་ཉིད་ཀྱི་ཕྱིར་རོ། །ཐ་མའི་རྟེན་འདས་ཞེས་བྱ་བ་ལ། ཐ་མ་ནི་འདོད་པའི་རིམ་པ་སྟེ། ཡིད་ཀྱི་རྣམ་པར་ཤེས་པ་དེའི་རྟེན་ནི་འདས་པ་ཉིད་ཡིན་གྱི། དེ་ལྟར་བྱུང་བ་དང་མ་འོངས་པ་རྣམས་མ་ཡིན་ནོ། །ཡང་ཞེས་བྱ་བའི་སྒྲ་ནི་འདས་པ་ཡང་ཡིན་པའོ་ཞེས་བྱ་བ་ལ། ལྔ་རྣམས་ཀྱི། དེ་དག་ལྷན་ཅིག་སྐྱེས་པ་ཡིན། །ཞེས་སྐྱེས་ན་འདས་པ་མི་རྟོགས་ལ། འདས་པ་ནི་འདོད་པ་ཡང་ཡིན་ཏེ། དེའི་ཕྱིར་ཡང་གི་སྒྲ་ནི་དེ་བསྡུ་བར་བྱ་བའི་ཕྱིར་ཡིན་ནོ་ཞེས་སྟོན་པར་བྱེད་དོ། །དེ་ལྟར་ན་ལྔ་པོ་རྣམས་ཀྱི་འདས་པ་དང་ད་ལྟར་བ་ཡིན་གྱི་མ་འོངས་པ་ནི་མ་ཡིན་པས་རྟེན་གྱི་རྣམ་པར་གཞག་པ་ཡུལ་དང་འདྲ་བ་མ་ཡིན་ནོ་ཞེས་པ་ཤེས་པར་བྱས་པར་འགྱུར་རོ། །དེ་ཉིད་ཀྱི་ཕྱིར་ཞེས་བྱ་བ་ནི་གང་གི་ཕྱིར་རྣམ་པར་ཤེས་པའི་ཚོགས་ལྔ་དབང་པོ་གཉིས་ཀྱི་རྟེན་ཅན་ཡིན་ལ། ཡིད་ཀྱི་རྣམ་པར་ཤེས་པ་ཡིད་ཀྱི་དབང་པོ་ཁོ་ནའི་རྟེན་ཅན་ཡིན་
པའི་ཕྱིར་རོ། །མུ་དང་པོ་ནི་མིག་ཡིན་ནོ་ཞེས་བྱ་བ་རྟེན་གྱི་དངོས་པོ་ཡིན་གྱི་མཚུངས་པ་དེ་མ་ཐག་པའི་རྐྱེན་གྱི་དབང་པོར་ནི་མ་ཡིན་ཏེ། མིག་གི་རྣམ་པར་ཤེས་པ་དང་ལྷན་ཅིག་སྐྱེས་པའི་ཕྱིར་དང༌། སེམས་དང་སེམས་ལས་བྱུང་པ་ཁོ་ན་མཚུངས་པ་དེ་མ་ཐག་པའི་དངོས་པོར་ངེས་པའི་ཕྱིར་མིག་གི་རྣམ་པར་ཤེས་པའི་མཚུངས་པ་དེ་མ་ཐག་པའི་རྐྱེན་མ་ཡིན་ནོ། །གཉིས་པ་ནི་ཆོས་ཀྱི་ཁམས་སེམས་ལས་བྱུང་བ་འདས་མ་ཐག་པ་ཡིན་ནོ་ཞེས་བྱ་བ་ལ། སེམས་ལས་བྱུང་བ་རྣམས་རྣམ་པར་ཤེས་པའི་རྟེན་མ་ཡིན་པའི་ཕྱིར་མཚུངས་པ་དེ་མ་ཐག་པའི་རྟེན་གྱི་དངོས་པོ་ཁོ་ན་ཡིན་གྱི། རྟེན་གྱི་དངོས་པོར་ནི་མ་ཡིན་ནོ། །སེམས་ལས་བྱུང་བ་སྨོས་པ་ནི་ལྡན་པ་མ་ཡིན་པ་དགག་པར་བྱ་བའི་ཕྱིར་རོ། །འདས་མ་ཐག་པ་སྨོས་པ་ནི་མ་འོངས་པ་དགག་པར་བྱ་བའི་ཕྱིར་རོ། །དེ་མ་ཐག་པ་སྨོས་པ་ནི་པར་དང་བཅས་པ་དགག་པར་བྱ་བའི་ཕྱིར་རོ། །གསུམ་པ་ནི་འདས་མ་ཐག་པའི་ཡིད་ཡིན་ནོ། །ཞེས་བྱ་བ་ནི་རྟེན་གྱི་དངོས་པོར་ཡང་ཡིན་ལ། མཚུངས་པ་དེ་མ་ཐག་པའི་དངོས་པོར་ཡང་ཡིན་པའོ། །བཞི་པ་ནི་བཤད་པ་ལམ་གཏོགས་པའི་ཆོས་རྣམས་ཡིན་ཏེ་ཞེས་བྱ་བ་ནི་རྟེན་གྱི་དངོས་པོར་ཡང་མ་ཡིན་ལ། མཚུངས་པ་དེ་མ་ཐག་པའི་དངོས་པོར་ཡང་མ་ཡིན་པ་སྟེ། དེ་དག་ཀྱང་གཟུགས་ལ་སོགས་པ་ཡུལ་རྣམས་དང་རྣ་བ་ལ་སོགས་པ་རྣམས་དང༌། སེམས་ལས་བྱུང་བ་མི་སྐྱེ་བའི་ཆོས་ཅན་རྣམས་དང་འདུས་མ་བྱས་རྣམས་སོ། །དེ་བཞིན་དུ་ལུས་ཀྱི་རྣམ་པར་ཤེས་པའི་བར་དུ་ཡང་རང་གི་དབང་པོ་བརྗོད་པར་བྱའོ་ཞེས་བྱ་བ་ནི། རྣ་བའི་རྣམ་པར་ཤེས་པའི་རྣ་བ་དང༌། སྣའི་རྣམ་པར་ཤེས་པའི་སྣ་དང༌། ལྕེའི་རྣམ་པར་ཤེས་པའི་ལྕེ་དང༌། ལུས་ཀྱི་རྣམ་པར་ཤེས་པའི་ལུས་ཀྱི་དབང་པོ་སྟེ་མུ་དང་པོ་ནི་དེ་ལྟ་བུའོ། །ལྷག་མ་ནི་སྔ་མ་བཞིན་ནོ། །ཡིད་ཀྱི་རྣམ་པར་ཤེས་པ་ཡིན་ཚིག་སྔ་མ་དང་སྦྱར་བ་སྟེ་ཞེས་བྱ་བ་ལ། གང་དུ་སྔར་མཐོང་བའི་ཚིག་གིས་དོན་གོ་བ་དང་དེ་ནི་ཚིག་སྔ་མ་དང་སྦྱོར་བའོ། །གང་དུ་ཕྱི་མར་མཐོང་བའི་ཚིག་གིས་དོན་གོ་བ་ནི་ཚིག་ཕྱི་མ་དང་སྦྱར་བའོ། །རེ་ཞིག་གང་རྟེན་གྱི་དངོས་པོར་ཡིན་པ་དེ་མཚུངས་པ་དེ་མ་ཐག་པའི་རྐྱེན་གྱི་དངོས་པོར་ཡང་ཡིན་ནོ་ཞེས་བྱ་བ་ལ། འདས་མ་ཐག་པའི་ཡིད་ནི་དེའི་རྟེན་དང་མཚུངས་པ་དེ་མ་ཐག་པའི་རྐྱེན་ཡང་ཡིན་ནོ་
ཆོས་ཀྱི་ཁམས་སེམས་ལས་བྱུང་བ་འདས་མ་ཐག་པའོ་ཞེས་བྱ་བ་ལ། དེ་ནི་དེའི་མཚུངས་པ་དེ་མ་ཐག་པའི་རྐྱེན་ཁོ་ན་ཡིན་གྱི་རྟེན་ནི་མ་ཡིན་ནོ། །ཡང་ཅིའི་ཕྱིར་རྣམ་པར་ཤེས་པ་ལྔ་པོ་རྣམས་ཀྱི་ཡུལ་ད་ལྟར་བ་ཁོ་ན་ཡིན་གྱི་འདས་པ་ཡང་མ་ཡིན་ཞེ་ན། རྟེན་ད་ལྟར་བའི་དབང་གིས་ཡུལ་རྣམ་པར་གཞག་གོ །གཞན་དུ་ན་ཡིད་ཀྱི་རྣམ་པར་ཤེས་པ་དུས་གསུམ་པའི་ཡུལ་ཅན་མ་ཡིན་པར་འདས་པ་ཁོ་ནའི་ཡུལ་ཅན་དུ་འགྱུར་རོ། །གཞན་ཡང་རྟེན་དང་ལྷན་ཅིག་ཡུལ་ལ་འཇུག་པའི་ཕྱིར་དང༌། རྟེན་རྣམས་ཀྱང་ལྐོག་ཏུ་གྱུར་པའི་དོན་ལ་འཇུག་པ་མེད་པའི་ཕྱིར་རོ། །ད་ལྟར་བའི་གཟུགས་ལ་སོགས་པ་རྣམས་ཉིད་ཡུལ་གྱི་འདས་པ་དང་མ་འོངས་པ་རྣམས་ཡུལ་མ་ཡིན་ནོ། །གཞན་དག་མིག་གི་རྣམ་པར་ཤེས་པ་ལ་སོགས་པ་འགའ་ཞིག་གི་ཡུལ་འདས་པར་ཡང་སེམས་ཏེ། སྔར་སྐྱེས་ཁོ་ནའི་རྐྱེན་གྱིས་འབྲས་བུ་སྐྱེད་པ་རུང་གི་ལྷན་ཅིག་སྐྱེས་པ་མ་ཡིན་པ་དང༌། དེ་བཞིན་དུ་ད་ལྟར་བའི་རྐྱེན་ཡང་འདས་པ་ཁོ་ན་རུང་གི་ལྷན་ཅིག་སྐྱེས་པ་མ་ཡིན་ནོ་ཞེས་ཟེར་རོ། །རང་གི་རྒྱུད་འཛིན་པའི་ཕྱིར་འདས་པ་ཐམས་ཅད་ཡུལ་ཉིད་དུ་ཐལ་བ་མེད་དོ། །གལ་ཏེ་ཡོད་པ་མ་ཡིན་པའི་རྒྱུ་མི་རིགས་སོ་ཞེ་ན། དེ་ནི་མ་ཡིན་པ་ཉིད་དེ། འདས་པ་དང་ད་ལྟར་བྱུང་བའི་རྒྱུ་འདོད་དོ། །འོ་ན་ཅི་ད་ལྟར་བྱུང་བ་དང་མ་འོངས་པ་གང་གི་ཚེ་རྣམ་པར་ཤེས་པ་ད་ལྟར་བྱུང་བ་དེའི་ཚེ་འདས་པ་ཞེས་བརྗོད་པར་བྱེད་ཅེ་ན། དེ་ལྟ་ན་འོ་ན་མ་འོངས་པ་དང་ད་ལྟར་བྱུང་བ་ཡུལ་ཡིན་ཞེས་བརྗོད་པར་བྱའི་འདས་པ་ནི་ཡུལ་ཞེས་བརྗོད་པར་མི་བྱ་སྟེ། འདས་པ་ཡུལ་མ་ཡིན་པས་སོ། །དུས་གཞན་གྱི་རྐྱེན་གྱིས་དུས་གཞན་གྱི་ཡུལ་ཞེས་བྱ་བ་རིགས་པར་བརྗོད་པ་མ་ཡིན་ནོ། །གང་ཞིག་རྐྱེན་གྱི་ངོ་བོ་མི་སྣང་བས་རྣམ་པར་ཤེས་པ་སྐྱེས་པ་དེ་དམིགས་པའི་རྐྱེན་ཞེས་བྱའོ། །གཞན་དུ་ནི་དམིགས་པའི་རྐྱེན་མ་ལུས་པའི་ཁྱད་པར་ཅི། དེའི་རྣམ་པ་སྐྱེ་བ་མེད་པར་རྣམ་པར་ཤེས་པ་དུས་གཞན་གྱི་དམིགས་པ་འཛིན་པ་ཡོད་པ་མ་ཡིན་ནོ། །འོ་ན་ཅི་གང་ཞིག་ད་ལྟར་བྱུང་བའི་ཡུལ་ལ་ད་ལྟར་བྱུང་བའི་རྣམ་པར་ཤེས་པ་སྐྱེ་བར་རྟོགས་པར་བྱེད་ཅེ་ན། ད་ལྟར་བྱུང་བའི་རྒྱུ་མཚན་ལས་ད་ལྟར་བྱུང་བའི་རྣམ་པར་ཤེས་པ་ལ་དེའི་རྣམ་པ་སྐྱེའོ་ཞེས་བྱ་བ་ནི་རིགས་པར་བརྗོད་པ་མ་ཡིན་ནོ། །དེའི་རྣམ་པ་ལས་རྣམ་པར་ཤེས་པ་ལ་ཡུལ་ངེས་པ་ཡང་མི་རིགས་
སོ། །དེའི་ཕྱིར་ད་ལྟར་བྱུང་བའི་ཡུལ་ཉིད་རྣམ་པར་ཤེས་པ་སྐྱེ་བར་འདོད་པའི་དམིགས་པའི་རྐྱེན་གྱི་ངོ་བོར་རྣམ་པར་གནས་སོ། །གང་གི་ཚེ་དེའི་རྣམ་པར་ཤེས་བ་སྐྱེ་བར་འགྱུར་བ་དེའི་ཚེ་ཡུལ་དང་བཅས་པར་འགགས་པས་ན་འདས་པ་ཡུལ་དུ་བརྗོད་དོ། །འདས་པ་ཡུལ་དུ་བརྗོད་ཅེས་བྱ་བས་འདས་པའི་ཡུལ་མིག་གི་རྣམ་པར་ཤེས་པའི་ལམ་དུ་ལྡན་པ་ལྟ་བུ་ནི་མ་ཡིན་ཏེ། དེ་ལྟར་ཞར་ལས་བྱུང་བས་ཆོག་གོ །དཀྱུས་མ་ཉིད་བརྩམ་པར་བྱ་སྟེ། ཡང་རྣམ་པར་ཤེས་པ་ནི་གཉིས་ཀ་ལ་རག་ལུས་ཏེ་སྐྱོན་ཞེས་བྱ་བ་ལ། གཉི་ག་ལ་རག་ལུས་པ་ཡང་ཇི་ལྟར་ཤེས་པར་བྱ་ཞེ་ན། མིག་གི་རྣམ་པར་ཤེས་པ་ལ་སོགས་པ་སྐྱེའོ་ཞེས་བྱ་བ་ལུང་ལ་གྲུབ་སྟེ། ཁ་ཅིག་ལུང་ལས་མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེའོ་ཞེས་བྱ་བ་ནས་དེ་བཞིན་དུ་ཡིད་དང་ཆོས་ལ་བརྟེན་ནས་ཡིད་ཀྱི་རྣམ་པར་ཤེས་པ་སྐྱེའོ་ཞེས་བྱ་བའི་བར་རོ། །ཉམས་སུ་མྱོང་བ་ནི་རིག་བཞིན་པ་རྣམས་ཏེ། མིག་གི་རྣམ་པར་ཤེས་པ་ལ་སོགས་པ་རྣམས་ནི་མིག་ལ་སོགས་པ་རྣམས་དང་གཟུགས་ལ་སོགས་པ་མེད་པ་ལས་མི་སྐྱེ་ཞིང་གཟུགས་ལ་སོགས་པ་ཉེ་ཡང་མིག་ལ་སོགས་པ་མེད་པའི་ཕྱིར་ལོང་བ་ལ་སོགས་པ་རྣམས་ལ་མི་སྐྱེའོ། །གལ་ཏེ་ཡིད་ལ་བྱེད་པ་ལས་སྐྱེ་བར་བཤད་པ་མ་ཡིན་ནམ་ཞེ་ན། གཟུགས་དང་སྣང་པ་དེ་ལས་སྐྱེས་པའི་ཡིད་ལ་བྱེད་པ་ཉེ་བར་གནས་པ་ལས་འགྱུར་གྱི་མིག་ཡོངས་སུ་གྲུབ་པ་ལས་མ་ཡིན་ནོ། །དེ་བཞིན་དུ་དེ་ལས་སྐྱེས་པའི་མིག་གི་རྣམ་པར་ཤེས་པ་འབྱུང་བར་འགྱུར་རོ། །དེ་ལ་ཅིའི་ཕྱིར་གཉིས་ཁོ་ན་ཉེ་བར་བཀོད་ཅེ་ན། ཡིད་ལ་བྱེད་པ་ནི་སེམས་ལས་བྱུང་བ་ཡིན་ཞིང་སེམས་ལ་བརྟེན་པ་ཡིན་པའི་ཕྱིར་དང་སེམས་ཀྱི་རྟེན་དུ་མི་འགྱུར་བས་ཉེ་བར་བཀོད་དོ། །དེ་དག་གྱུར་པས་འགྱུར་ཉིད་ཕྱིར། །ཞེས་བྱ་བ་ལ་སོགས་པ་ལ། དེ་དག་གི་རྣམ་པར་འགྱུར་བ་ནི་དེ་དག་གྱུར་པའོ། །དེ་དག་རྣམ་པར་འགྱུར་རོ་ཞེས་ཚིག་རྣམ་པར་སྦྱར་རོ། །ཕན་པ་དང་གནོད་པ་དང་གསལ་བ་དང་མི་གསལ་བ་ཉིད་ཀྱི་རྗེས་སུ་བྱེད་པའི་ཕྱིར་རོ་ཞེས་བྱ་བ་ལ། ཕན་པ་དང་གནོད་པ་དག་ནི་རྐྱེན་ལ་བལྟོས་པ་ཡིན་ལ། གསལ་བ་དང་མི་གསལ་བ་ཉིད་ཅེས་བྱ་བ་ནི་མིག་གི་རང་བཞིན་ཉིད་དོ། །རྗེས་སུ་བྱེད་པའི་སྒྲ་ནི་ཕན་པའི་རྗེས་སུ་བྱེད་པའི་ཕྱིར་རོ་ཞེས་
བྱ་བ་ནས། མི་གསལ་བའི་རྗེས་སུ་བྱེད་པའི་ཕྱིར་ཞེས་བྱ་བའི་བར་རེ་རེ་དང་སྦྱར་རོ། །མིག་ལ་སོགས་པའི་རྣམ་པར་ཤེས་པ་རྣམས་ནི་གོ་རིམས་བཞིན་དུ་བདེ་བ་སྐྱེ་བ་དང་སྡུག་བསྔལ་སྐྱེ་བའི་སྒོ་ནས་མིག་ལ་སོགས་པ་དག་མིག་སྨན་དང་རྡུལ་ལ་སོགས་པ་དག་གིས་ཕན་བཏགས་པ་དང་གནོད་པ་བྱས་པའི་རྗེས་སུ་བྱེད་ཅིང༌། དེ་བཞིན་དུ་གསལ་བ་དང་མི་གསལ་བར་སྐྱེས་པས་གསལ་བ་དང་མི་གསལ་བའི་རང་བཞིན་དུ་གྱུར་བ་ཉིད་ཀྱང་རྗེས་སུ་བྱེད་དེ། དེའི་ཕྱིར་མིག་ལ་སོགས་པ་རྣམ་པར་གྱུར་བས་རྣམ་པར་ཤེས་པ་རྣམས་འགྱུར་པ་ཡིན་ནོ་ཞེས་བྱ་བ་ཤེས་པར་བྱའོ། །གཟུགས་ལ་སོགས་པ་དག་གྱུར་པས་དེ་དག་འགྱུར་བ་ནི་མ་ཡིན་ཏེ། གཟུགས་ལ་སོགས་པ་དག་གི་ཕན་པ་དང་གནོད་པ་གསལ་བ་དང་མི་གསལ་བ་ཉིད་ཀྱི་རྗེས་སུ་མི་བྱེད་པའི་ཕྱིར་རོ། །འདི་ལྟར་གཟུགས་ལ་སོགས་པ་ཡང་མི་གསེར་གྱིས་མིག་ཉམས་པ་རྣམས་ཀྱིས་དུང་སེར་པོར་མཐོང་བ་ཡིན་ལ། རབ་རིབ་ལ་སོགས་པས་གནོད་པ་བྱས་ན་གཟུགས་རྣམ་པར་འགྱུར་བར་མཐོང་བ་ཡིན་ནོ། །དེ་བཞིན་དུ་མིག་མི་གསལ་ན་གཟུགས་རང་གི་མཚན་ཉིད་ཀྱིས་ཚང་ཡང་མིག་གི་རྣམ་པར་ཤེས་པ་མི་གསལ་བ་ཉིད་དུ་འགྱུར་རོ། །དེ་ལྟར་ན་མིག་གསལ་ན་གཟུགས་མི་གསལ་ཡང་དེའི་རྣམ་པར་ཤེས་པ་གསལ་བར་སྐྱེའོ། །འདིར་རྟེན་གྱི་དོན་ནི་རྗེས་སུ་བྱེད་པའི་དོན་ཡིན་ནོ། །ཤིན་ཏུ་ལེགས་པ་ཡིན་གྱི་ཞེས་བྱ་བ་ནི་ཆེས་ལེགས་པ་ཡིན་ནོ་ཞེས་བྱ་བའི་ཐ་ཚིག་གོ །ལུས་རླུང་ལ་སོགས་པས་སུན་ཕྱུང་བ་དང་རྣམ་པར་དག་པ་ལས་རྣམ་པར་ཤེས་པ་འཁྲུགས་པ་དང་མ་འཁྲུགས་པ་སྐྱེ་སྟེ། དེ་དེའི་རྟེན་ནི་མ་ཡིན་ནོ། །ཡོད་ཀྱང་རྗེས་སུ་བྱེད་དོ་ཞེས་བརྗོད་པར་བྱ་བ་དེ་ལྟ་ན་དེའི་ཚེ་ཡང་རང་གི་རྟེན་གྱི་རྗེས་སུ་བྱེད་པ་ཉིད་དོ། །གང་ཞིག་གི་ལུས་སྡུག་བསྔལ་བར་སྐྱེས་པ་དེ་ལ་སྡུག་བསྔལ་གྱི་ཚོར་བ་དང་ལྷན་ཅིག་ཐམས་ཅད་འཁྲུགས་པའི་ལུས་ཀྱི་རྣམ་པར་ཤེས་པ་འགགས་ནས་རྒྱུད་དེ་ཉིད་ལ་ཡིད་ཀྱི་རྣམ་པར་ཤེས་པ་འཁྲུགས་པ་སྐྱེའོ། །དེ་ལས་བཟློག་པས་ནི་འཁྲུགས་པ་མ་ཡིན་པ་སྐྱེ་སྟེ། དེའི་ཕྱིར་དེ་ནི་ཡིད་ཉིད་ཀྱི་རྗེས་སུ་བྱེད་པའོ། །གལ་ཏེ་རང་གི་རྟེན་གྱི་རྗེས་སུ་བྱེད་ན། ཇི་ལྟར་ཟག་པ་དང་བཅས་པ་ལས་ཟག་པ་མེད་པའི་རྣམ་པར་ཤེས་པར་འགྱུར་ཞེ་ན། ཟག་པའི་ཆོས་ཐམས་
ཅད་རྟེན་པར་མི་འགྱུར་ཏེ། རྟེན་མེད་པར་ཐལ་བའི་ཕྱིར་རོ། །གཞན་དུ་ན་ལུང་དུ་མ་བསྟན་པའི་མིག་ལས་མིག་གི་རྣམ་པར་ཤེས་པ་དགེ་བ་དང་མི་དགེ་བ་ཞེས་བྱ། གང་ལ་རྣམ་པར་ཤེས་པའི་བྱེད་པ་ཉིད་ཀྱིས་དེ་བསྙད་པར་རིགས་སོ་སྙམ་དུ་བསམ་སྟེ་འདྲི་བ་ནི། ཡང་ཅིའི་ཕྱིར་ཞེས་བྱ་བ་རྒྱ་ཆེར་འབྱུང་བའོ། །རྟེན་གྱི་དོན་བཤད་ཟིན་པའི་ཕྱིར་ཐུན་མོང་མ་ཡིན་པ་ཉིད་ཀྱི་འདྲི་བ་ནི། ཇི་ལྟར་ཐུན་མོང་མ་ཡིན་པ་ཉིད་ཡིན་ཞེ་ན། གཞན་གྱི་མིག་གིས་གཞན་ཉིད་ནི་མ་ཡིན་ཏེ། རང་གི་རྒྱུད་དུ་གཏོགས་པའི་རིགས་ཀྱི་དབྱེ་བ་ལས་ཡིད་ཀྱི་རྣམ་པར་ཤེས་པ་དང༌། མིག་གི་རྣམ་པར་ཤེས་པ་ནི་རིགས་མཚུངས་པ་ཉིད་ཡིན་ཡང་སེམས་ཅན་གྱི་རྟེན་ཐ་དད་པའི་ཕྱིར་རོ། །ལུས་ཀྱི་བར་དུ་ཡང་དེ་དང་འདྲའོ། །དང་ཞེས་བྱ་བ་ནི་དྲི་ལ་སོགས་པ་རྣམས་ལ་ནི་ཡུལ་དང་ཕྲད་པའི་ཕྱིར་སྲིད་པའི་དབང་དུ་བྱས་ནས་བརྗོད་པ་གཞན་སྣ་ལ་སོགས་པའི་རྣམ་པར་ཤེས་པའི་དམིགས་པར་འགྱུར་པ་རྣམས་སོ། །དཔེར་ན་རྔ་བོ་ཆེའི་སྒྲ་དང་ནས་ཀྱི་མྱུ་གུ་བཞིན་ཞེས་བྱ་བ་ལ། སྒྲ་དང་མྱུ་གུ་འབྱུང་བ་རྒྱུ་དུ་མ་ལ་རག་ལས་པ་ཡིན་ཡང༌། རྔ་བོ་ཆེ་དང་ནས་གཉིས་ཐུན་མོང་མ་ཡིན་པ་ཉིད་ཀྱི་ཕྱིར་དང་རྟེན་ཡིན་པའི་ཕྱིར་རྔ་བོ་ཆེའི་སྒྲ། ནས་ཀྱི་མྱུ་གུ་ཞེས་དེ་དག་གིས་བསྟན་གྱི། དབྱུ་གུ་ལ་སོགས་པ་དང་ཆུ་ལ་སོགས་པ་དག་ནི་རྔ་པ་ཊ་ཧ་ལ་སོགས་པའི་སྒྲ་དག་སཱ་ལུའི་མྱུ་གུ་ལ་སོགས་པ་དག་ལ་ཐུན་མོང་བ་ཡིན་པའི་ཕྱིར་དེ་དག་གིས་མ་བསྟན་ཏེ། འོན་ཀྱང་རྔ་བོ་ཆེའི་སྒྲ་ནས་ཀྱི་མྱུ་གུ་ཞེས་བསྟན་པར་ནུས་སོ། །དེ་བཞིན་དུ་འདིར་ཡང་མིག་གི་རྣམ་པར་ཤེས་པ་ནས་ཡིད་ཀྱི་རྣམ་པར་ཤེས་པའི་བར་དུ་བསྟན་པར་ནུས་ཀྱི་ཡུལ་རྣམས་ཀྱིས་ནི་མ་ཡིན་ནོ། །དེ་ལྟ་མོད་ཀྱི་མིག་གི་རྣམ་པར་ཤེས་པ་ཉི་བར་བཀོད་པ་གཞན་ཅིའི་དོན་དུ་ཞེ་ན། ཐུན་མོང་མ་ཡིན་པ་ཉིད་ཀྱིས་ཤེས་པར་བྱེད་པའི་དོན་ཏོ། །རིགས་མཐུན་པ་རྣམས་ཀྱང་རྣམ་པར་ཤེས་པ་གཞན་གྱི་རྟེན་དུ་འགྱུར་ན་རིགས་ཐ་དད་པ་རྣམས་ལྟ་སྨོས་ཀྱང་ཅི་དགོས་ཞེས་པའོ། །གལ་ཏེ་ཐུན་མོང་མ་ཡིན་པ་ཉིད་ཀྱི་ཕྱིར་གཟུགས་ལ་སོགས་པ་བཀག་ན་རྟེན་བཀག་པར་གྱུར་པས་ཉེ་བར་ལེན་པ་དོན་མེད་པ་ཅན་མ་ཡིན་ན་མ་ཞེ་ན། ཡིད་ཀྱི་རྣམ་པར་ཤེས་པའི་ཡུལ་ལ་དེ་ལས་གཞན་པའི་རྣམ་པར་ཤེས་པ་ཐུན་མོང་མ་ཡིན་པའི་ཕྱིར། དེ་དག་ཡིད་ཀྱི་རྣམ་པར་ཤེས་
པའི་རྟེན་གྱིས་མ་ཡིན་ནོ། །དེའི་ཕྱིར་རྟེན་དུ་གྱུར་པའི་ཕྱིར་ཐུན་མོང་མ་ཡིན་པ་ཉིད་ཅེས་བྱའོ། །ཐུན་མོང་མ་ཡིན་པ་ཉིད་ཅེས་བྱ་བ་ཕན་ཚུན་གྱི་དོན་དུ་སྟོན་པར་བྱེད་དོ། །གང་གི་ཕྱིར་སྐྱེ་གནས་གཅིག་ལ་གནས་པའི་གཟུགས་ལ་ཡང་སྐྱེ་གནས་བཞི་ལ་གནས་པའི་མིག་གི་རྣམ་པར་ཤེས་པ་སྐྱེའི། སྐྱེ་གནས་གཅིག་ལ་གནས་པའི་མིག་གི་སྐྱེ་གནས་གཉིས་ལ་གནས་པའི་མིག་གི་རྣམ་པར་ཤེས་པ་ཡང་མི་སྐྱེ་ན། སྐྱེ་གནས་བཞི་ལ་གནས་པ་ལྟ་ཅི་སྨོས། དེ་བཞིན་དུ་ཁམས་དང་འགྲོ་བ་དང་རིས་ངེས་པ་ལས་ཀྱང་ཐུན་མོང་མ་ཡིན་ནོ། །མིག་གཞན་ལ་ཡང་དེ་བཞིན་དུ་བརྗོད་པར་བྱའོ། །གལ་ཏེ་ཡང་སྐྱེ་གནས་གཞན་ལ་གནས་པའི་ཡིད་ཀྱིས་ཡིད་ཀྱི་རྣམ་པར་ཤེས་པ་སྐྱེ་གནས་གཞན་ལ་གནས་པ་སྐྱེ་མོད་ཀྱི་གཅིག་གིས་ཅིག་ཅར་སྐྱེ་གནས་དུ་མ་ལ་གནས་པ་སྐྱེད་པ་ནི་མ་ཡིན་ཏེ། གཟུགས་ལ་སོགས་པ་དག་ལ་ཇི་ལྟ་བ་བཞིན་ནོ། །དེའི་ཕྱིར་རྟེན་གྱི་རྗེས་སུ་བྱེད་པའི་ཕྱིར་དང༌། ཕན་ཚུན་ངེས་པས་རྟེན་རྣམས་ཁོ་ནས་རྣམ་པར་ཤེས་པ་རྣམས་རྟེན་གྱི་ཡུལ་རྣམས་ཀྱིས་ནི་མ་ཡིན་ནོ། །གཞན་དག་ན་རེ་གཉི་ག་ནང་གི་བདག་ཉིད་ཡིན་པའི་ཕྱིར་ཞེས་ཟེར་རོ། །གཞན་དག་ན་རེ་གཉི་ག་སེམས་ཅན་དུ་བགྲང་བ་ཡིན་པའི་ཕྱིར་གཟུགས་ལ་སོགས་པ་རྣམས་ལས་ཐ་དད་དོ་ཞེས་ཟེར་རོ། །མིག་གི་རྣམ་པར་ཤེས་པ་རྐྱེན་དུ་མ་ལས་གྲུབ་པ་ཡིན་བཞིན་དུ་ཡང་གཉིས་ཁོ་ན་ཅིའི་ཕྱིར་སྨོས་ཤེ་ན། རྟེན་དང་དམིགས་པ་ཉིད་ཀྱི་སྒོ་ནས་རྐྱེན་ཆེས་ཉེ་བ་ཡིན་པའི་ཕྱིར་རོ། །སྣང་བ་མེད་ཀྱང་མཚན་མོ་རྒྱུ་བ་རྣམས་དང༌། ནམ་མཁའ་མེད་པར་ཆུ་ལ་རྒྱུ་བ་རྣམས་དང༌། མཆིང་བུ་དང་ལྷང་ཚེར་དང་ཤེལ་གྱིས་བར་དུ་ཆོད་པ་ལ་མིག་རྣམ་དང༌། གཉི་ག་མེད་པར་ལྷའི་མིག་དང་ལྡན་པ་ལ་མིག་གི་རྣམ་པར་ཤེས་པ་སྐྱེ་བ་དེ་ལྟར་མིག་དང་གཟུགས་དག་མེད་པ་ནི་མ་ཡིན་ནོ། །ཡིད་ལ་བྱེད་པ་ཡང་རྣམ་པར་ཤེས་པའི་ཚོགས་དྲུག་བསྐྱེད་པ་ལ་རྐྱེན་ཐུན་མོང་བ་ཡིན་ཏེ། མིག་དང་གཟུགས་དག་ནི་དེ་ལྟར་མ་ཡིན་ནོ། །དེའི་ཕྱིར་འདི་གཉིས་ཁོ་ན་སྨོས་པ་མཛེས་སོ། །གདུལ་བྱའི་དབང་ལས་ཁམས་རྣམས་ཀྱང་བསྟན་ཏོ། །ཡིད་ལ་བྱེད་པ་ལ་སོགས་པ་སྨོས་པ་ཡང་གླང་པོ་ཆེའི་རྗེས་ལྟ་བུ་ལ་སོགས་པ་རྣམས་ལའོ་ཞེས་སོ། །ཡང་ལུས་གང་ལ་གནས་ཏེ་ཞེས་བྱ་བ་ལ།
གང་ལ་ཞེས་བྱ་བ་ནི་འདོད་པར་གཏོགས་པའམ། བསམ་གཏན་དང་པོའམ། གཉིས་པའམ། གསུམ་པའམ། བཞི་བའི་ས་པའོ། །ཅི་ལུས་དང་ཞེས་བྱ་བ་ལ་སོགས་པ་ལ། ཅི་ལུས་འདོད་པར་གཏོགས་ན་མིག་དང་གཟུགས་དང༌། རྣམ་པར་ཤེས་པ་དག་ཀྱང་འདོད་པར་གཏོགས་པ་ཁོ་ན་ཡིན་པས་ན། །དེ་བཞིན་དུ་ལུས་བསམ་གཏན་བཞི་པའི་ས་པ་ཡིན་ན། མིག་དང་གཟུགས་དང་རྣམ་པར་ཤེས་པ་དག་ཀྱང་བསམ་གཏན་བཞི་པའི་ས་པའི་བར་དུ་ཡིན་པ་ཞིག་གམ། འོན་ཏེ་ལུས་འདོད་པར་གཏོགས་ན། མིག་དང་གཟུགས་དང་རྣམ་པར་ཤེས་པ་གཞན་གྱིས་པ་ཡིན་པ་ནས་དེ་བཞིན་དུ་ལུས་བསམ་གཏན་བཞི་པའི་ས་པ་ཡིན་ན་མིག་དང་གཟུགས་དང་རྣམ་པར་ཤེས་པ་དག་ཀྱང་གཞན་གྱི་ས་པའི་བར་དུ་ཡིན་པ་ཞིག་ཅེ་ན། བཞི་ཅར་ཡང་ཕན་ཚུན་ངེས་པ་མེད་པར་བསྟན་པའི་ཕྱིར། ཐམས་ཅད་ལ་བྱེ་བྲག་ཡོད་དེ་ཞེས་བྱ་བ་སྨོས་སོ། །འདོད་པའི་ཁམས་དང་བསམ་གཏན་དང་པོར་སྐྱེས་པ་མ་གཏོགས་པ་གཞན་དུ་སྐྱེས་པ་རྣམས་ཀྱི་བཞི་པོ་འདི་དག་ཐམས་ཅད་རང་གི་ས་པ་ཡིན་པ་མི་སྲིད་དེ། འདོད་པ་དང་བསམ་གཏན་དང་པོར་སྐྱེས་པ་དག་ལ་ནི་རང་གི་མིག་གིས་རང་གི་གཟུགས་རྣམས་ལ་ལྟ་བ་ན་ཐམས་ཅད་རང་གིས་པ་ཡང་སྲིད་དོ། །དེ་ཉིད་བསྟན་པའི་ཕྱིར་འདོད་ལའི་ཁམས་སུ་སྐྱེས་པ་རང་གི་མིག་གིས་ཞེས་བྱ་བ་རྒྱ་ཆེར་གསུངས་སོ། །དེ་ལྟར་བསམ་གཏན་གསུམ་པ་དང་བཞི་པའི་ས་པའི་མིག་གིས་ཞེས་བྱ་བ་ལ་སོགས་པ་ལ། ཇི་ལྟར་འདོད་པའི་ཁམས་སུ་སྐྱེས་པ་བསམ་གཏན་དང་པོ་དང་གཉིས་པའི་མིག་གིས་དེའི་ས་པ་དང་ས་འོག་མའི་གཟུགས་རྣམས་ལ་ལྟ་བ་ན་གང་གི་ས་པ་ཡིན་པ་དེ་རྒྱས་པར་བཤད་པ་དེ་བཞིན་དུ། བསམ་གཏན་གསུམ་པ་དང་བཞི་པའི་མིག་གིས་ལྟ་བར་ཡང་སྦྱར་བར་བྱའོ། །དེ་ལ་བསམ་གཏན་གསུམ་པའི་མིག་གིས་འདོད་པར་གཏོགས་པའི་གཟུགས་རྣམས་ལ་ལྟ་བ་ན། གཟུགས་དང་ལུས་ནི་འདོད་པར་གཏོགས་པ་ཡིན་ལ། མིག་གི་རྣམ་པར་ཤེས་པ་ནི་བསམ་གཏན་དང་པོའི་ས་པ་ཡིན་ནོ། །མིག་ནི་གསུམ་པའི་ཡིན་ནོ། །བསམ་གཏན་དང་པོའི་གཟུགས་ལ་ལྟ་བ་ན། ལུས་ནི་འདོད་པ་ན་སྤྱོད་པ་
ཡིན་ལ། གཟུགས་རྣམས་དང་མིག་གི་རྣམ་པར་ཤེས་པ་ནི་དང་པོའོ། །མིག་ནི་བསམ་གཏན་གསུམ་པའི་ས་པའོ། །བསམ་གཏན་གཉིས་པའི་ས་པའི་གཟུགས་རྣམས་ལ་ལྟ་བ་ན། ལུས་ནི་འདོད་པར་གཏོགས་པ་ཡིན་ལ། མིག་གི་རྣམ་པར་ཤེས་པ་ནི་དང་པོའི་ཡིན་ནོ། །གཟུགས་རྣམས་ནི་གཉིས་པའི་ཡིན་ནོ། །མིག་ནི་བསམ་གཏན་གསུམ་པའི་ས་པ་ཡིན་ནོ། །རང་གི་གཟུགས་རྣམས་ལ་ལྟ་བ་ན། ལུས་དང་མིག་གི་རྣམ་པར་ཤེས་པ་ནི་སྔ་མ་བཞིན་ནོ། །གཟུགས་དང་མིག་ནི་གསུམ་པའི་འོ། །དེ་བཞིན་དུ་བསམ་གཏན་བཞི་པའི་མིག་གིས་འདོད་པར་གཏོགས་པ་རྣམས་ལ་ལྟ་བ་ན། ལུས་དང་གཟུགས་ནི་འདོད་པའི་ཁམས་ཡིན་ལ། མིག་གི་རྣམ་པར་ཤེས་པ་ནི་དང་པོའི་ཡིན་ནོ། །མིག་ནི་བསམ་གཏན་བཞི་པའི་ས་པ་ཡིན་ནོ། །བསམ་གཏན་དང་པོའི་ས་པ་རྣམས་ལ་ལྟ་བ་ན། ལུས་ནི་སྔ་མ་དང་འདྲ་ལ་གཟུགས་རྣམས་དང་རྣམ་པར་ཤེས་པ་ནི་དང་པོའི་ཡིན་ནོ། །མིག་ནི་བཞི་པའི་ཡིན་ནོ། །བསམ་གཏན་གཉིས་པའི་ས་པ་རྣམས་ལ་ལྟ་བ་ན། ལུས་ནི་འདོད་པ་ན་སྤྱོད་པ་ཡིན་ལ། མིག་གི་རྣམ་པར་ཤེས་པ་ནི་དང་པོའི་ཡིན་ནོ། །གཟུགས་རྣམས་ནི་གཉིས་པའི་ཡིན་ནོ། །མིག་ནི་བཞི་པའི་ཡིན་ནོ། །བསམ་གཏན་གསུམ་པའི་ས་པ་རྣམས་ལ་ལྟ་བ་ན་ལུས་ནི་སྔ་མ་བཞིན་ནོ། །རྣམ་པར་ཤེས་པ་ནི་བསམ་གཏན་དང་པོའི་ཡིན་ནོ། །གཟུགས་ནི་གསུམ་པའི་ཡིན་ནོ། །མིག་ནི་བཞི་པའི་ཡིན་ནོ། །རང་གི་ས་པ་ལ་ལྟ་ན། ལུས་དང་རྣམ་པར་ཤེས་པ་ནི་སྔ་མ་བཞིན་ནོ། །གཟུགས་དང་མིག་ནི་བཞི་པའི་ཡིན་ནོ། །བསམ་གཏན་གསུམ་པའི་མིག་གིས་ལྟ་བ་ལ་སོགས་པ་ལ་ཡང་དེ་བཞིན་དུ་སྦྱར་པར་བྱའོ་ཞེས་བྱ་བ་ལ། བསམ་གཏན་དང་པོར་སྐྱེས་པ་བསམ་གཏན་གསུམ་པའི་མིག་གིས་འདོད་པའི་གཟུགས་རྣམས་ལ་ལྟ་བ་ན། གཟུགས་རྣམས་ནི་འདོད་པ་ན་སྤྱོད་པ་ཡིན་ལ། ལུས་དང་རྣམ་པར་ཤེས་པ་དག་ནི་དང་པོའི་ཡིན་ནོ། །མིག་ནི་གསུམ་པའི་ཡིན་ནོ། །བསམ་གཏན་དང་པོའི་གཟུགས་རྣམས་ལ་ལྟ་བ་ན། ལུས་དང་རྣམ་པར་ཤེས་པ་དང་ངག་རྣམས་ནི་དང་པོའི་ཡིན་ལ། མིག་ནི་གསུམ་པའི་ཡིན་ནོ། །བསམ་གཏན་གཉིས་པའི་གཟུགས་རྣམས་ལ་ལྟ་བ་ན། ལུས་དང་
རྣམ་པར་ཤེས་པ་དག་ནི་དང་པོའི་ཡིན་ལ། གཟུགས་ནི་གཉིས་པའི་ཡིན་ནོ། །མིག་ནི་གསུམ་པའི་ཡིན་ནོ། །རང་གི་གཟུགས་རྣམས་ལ་ལྟ་བ་ན། ལུས་དང་རྣམ་པར་ཤེས་པ་དག་ནི་དང་པོའི་ཡིན་ལ། མིག་དང་གཟུགས་ནི་གསུམ་པ་ཡིན་ནོ། །བསམ་གཏན་བཞི་པའི་མིག་གིས་ལྟ་བའི་ཡང་དེ་བཞིན་དུ་སྦྱར་བར་བྱའོ། །བསམ་གཏན་གཉིས་པ་ལ་སོགས་པར་སྐྱེས་པ་ཞེས་བྱ་བ་ལ། དེ་ལ་བསམ་གཏན་གཉིས་པར་སྐྱེས་པའི་རང་གི་མིག་ནི་བསམ་གཏན་གཉིས་པའི་ས་པ་ཡིན་ནོ། །བསམ་གཏན་གསུམ་པ་དང་བཞི་པ་ནི་གཞན་གྱི་མིག་གོ །དེ་བཞིན་དུ་བསམ་གཏན་གསུམ་པར་སྐྱེས་པའི་རང་གི་མིག་ནི་བསམ་གཏན་གསུམ་པའི་ས་པའོ། །གཞན་གྱི་མིག་ནི་བསམ་གཏན་བཞི་པའི་ས་པའོ། །བསམ་གཏན་བཞི་པར་སྐྱེས་པའི་མིག་ནི་རང་གི་ས་པ་ཁོ་ན་ཡིན་གྱི། གཞན་གྱི་ས་པ་ནི་མ་ཡིན་ནོ། །རང་དང་གཞན་གྱི་གཟུགས་རྣམས་ལ་ལྟ་བའི་ཡང་ཞེས་བྱ་བ་ལ། བསམ་གཏན་གཉིས་པར་སྐྱེས་པའི་རང་གི་ས་པའི་གཟུགས་ནི་བསམ་གཏན་གཉིས་པའི་གཟུགས་དག་གོ །ལྷག་མ་གོང་མ་དང་འོག་མ་དག་ནི་གཞན་གྱི་ས་པ་རྣམས་སོ། །བསམ་གཏན་གསུམ་པ་དང་བཞི་པར་སྐྱེས་པ་དག་ལ་ཡང་དེ་བཞིན་དུ་བརྗོད་པར་བྱ་སྟེ། བཞི་པར་སྐྱེས་པའི་གཞན་གྱི་ས་པའི་གཟུགས་རྣམས་ནི་འོག་མ་དག་ཁོ་ན་ཡིན་གྱི་གོང་མ་དག་ནི་ཡོད་པ་མ་ཡིན་ནོ། །ཅི་རིགས་པར་སྦྱར་བར་བྱའོ་ཞེས་བྱ་བ་འབྱུང་བ་སྟེ། དེ་ལ་རིགས་པ་ནི་འདི་ཡིན་ཏེ། བསམ་གཏན་གཉིས་པར་སྐྱེས་པ་ལ་འདོད་པར་གཏོགས་པ་དང་བསམ་གཏན་དང་པོའི་ས་པའི་མིག་མེད་ཀྱི་རང་གི་ས་པའི་མིག་གིས་རང་དང་འོག་མའི་གཟུགས་ལ་ལྟ་སྟེ་གོང་མ་དག་ལ་ནི་མ་ཡིན་ནོ། །བསམ་གཏན་གསུམ་པའི་ས་པས་ནི། བསམ་གཏན་བཞི་པའི་གཟུགས་མ་གཏོགས་པའི་གཟུགས་རྣམས་ལ་ལྟའོ། །བསམ་གཏན་བཞི་པའི་མིག་གིས་ནི་གཟུགས་ཐམས་ཅད་ལ་ལྟའོ། །དེ་ལྟ་ན་བསམ་གཏན་གསུམ་པ་དང་བཞི་པར་སྐྱེས་པ་རྣམས་ལ་ནི་ས་འོག་མའི་མིག་མེད་ཀྱི། རང་གི་ས་པའི་མིག་གིས་རང་གི་ས་པ་དང་ས་འོག་མའི་གཟུགས་ལ་ལྟ་སྟེ། ས་གོང་མ་ལ་ནི་མ་ཡིན་ནོ། །ལུས་ལ་འོག་མའི་མིག་མ་
ཡིན། །ཞེས་བྱ་བ་ལ། འོག་མ་བཀག་པས་རང་གི་ས་པ་དང༌། ས་གོང་མ་པ་གནང་བར་འགྱུར་རོ། །འདི་ལྟར་ས་གོང་མའི་ལུས་ལས་འོག་མ་པའི་མིག་རྣམ་པར་སྨིན་པ་ལས་སྐྱེས་པ་མི་རིགས་ཏེ། ས་འོག་མ་པའི་རྣམ་པར་སྨིན་པའི་རྒྱུས་གོང་མའི་འབྲས་བུ་མི་འབྱིན་པའི་ཕྱིར་རོ། །རྒྱས་པ་ལས་བྱུང་བ་ཡང་མི་རུང་སྟེ། ས་འོག་མ་པའི་རྒྱས་པའི་རྒྱུ་མེད་པའི་ཕྱིར་རོ། །ལུས་དང་མིག་དང་གཟུགས་རྣམས་ནི་གཟུགས་ཀྱི་རང་བཞིན་ཡིན་པའི་ཕྱིར་དང༌། བསམ་གཏན་བཞི་པའི་གོང་ན་གཟུགས་མེད་པའི་ཕྱིར་ས་ལྔ་པ་ཁོ་ན་ཡིན་གྱི། ས་གོང་མ་དག་ན་ནི་མེད་དོ། །མིག་གི་རྣམ་པར་ཤེས་པ་ནི་ས་གཉིས་པ་སྟེ་ཞེས་བྱ་བ་ལ། འདོད་པའི་ཁམས་དང་བསམ་གཏན་དང་པོ་ན་ཡོད་ཀྱི་གོང་ན་ནི་ཡོད་པ་མ་ཡིན་ཏེ། རྟོག་པ་དང་བཅས་ཤིང་དཔྱོད་པ་དང་བཅས་པའི་ཕྱིར་དང༌། བསམ་གཏན་གཉིས་པ་ལ་སོགས་པ་དག་ན་རྟོག་པ་དང་དཔྱོད་པ་མེད་པའི་ཕྱིར་རོ། །མིག་གིས་གོང་མའི་གཟུགས་མ་ཡིན། །ཞེས་བྱ་བ་ལ་གོང་མ་བཀག་པས་རང་གི་ས་པ་དང་ས་འོག་མ་ཁས་བླངས་པར་འགྱུར་རོ། །ཡང་ཅིའི་ཕྱིར་མིག་གོང་མའི་ཡུལ་ཅན་དུ་མི་འདོད་ཅེ་ན། ས་འོག་མའི་མིག་ནི་ཡུལ་རགས་བ་ལ་འཚམ་པའི་ཕྱིར་ས་འོག་མའི་གཟུགས་ཕྲ་མོ་ལ་ལྟ་བའི་ནུས་པ་མེད་དོ། །རྣམ་པར་ཤེས་པའང་གོང་མ་ནི་མིག་གི་མ་ཡིན་ཏེ། ཞེས་བྱ་བ་འདིར་ཡང་རང་གི་ས་པ་དང་ས་འོག་མ་པ་ཁས་བླངས་པར་འགྱུར་ཏེ། ཇི་ལྟར་ས་གོང་མའི་གཟུགས་ས་འོག་མའི་མིག་གི་ཡུལ་མ་ཡིན་བ་དེ་བཞིན་དུ། ས་འོག་མ་པའི་རྣམ་པར་ཤེས་པ་ཡངས་འོག་མ་བའི་མིག་གིས་བརྟེན་པར་མི་འགྱུར་ཏེ་རང་རྟེན་དང་ལྷན་ཅིག་ཡུལ་གཅིག་ལ་འཇུག་པའི་ཕྱིར་རོ། །འདི་ནི་ལྷ་ཚངས་པ་ལ་སོགས་པ་མཐོང་བའི་ཕྱིར་དང༌། དེའི་དབང་གིས་རྣམ་པར་ཤེས་པ་སྐྱེ་བའི་ཕྱིར་འདི་ནི་དཔྱད་པར་བྱ་དགོས་སོ་ཞེས་བྱ་བ་འདི་ནི་རྒོལ་བའི་གཞི་ཡིན་ནོ་ཞེ་ན། སྤྲུལ་བའི་གཟུགས་མཐོང་བའི་ཕྱིར་ན་འདི་ནི་དཔྱད་ཟིན་ཏོ། །དེའི་གཟུགས་ལུས་ཀྱི་འང་གཉི་ག་ཐམས་ཅད་དུ། །ཞེས་བྱ་བ་ལ། དེའི་ཞེས་བྱ་བ་ནི་བཤད་མ་ཐག་པའི་མིག་གི་རྣམ་པར་ཤེས་པའི་ཡུལ་ནི་ཐམས་ཅད་དུ་རང་དང་འོག་དང་གོང་མའི་ས་པའི་གཟུགས་ཡིན་ལ། ལུས་ཀྱིའང་གཟུགས་དང་རྣམ་པར་ཤེས་པ་དག་
གཉི་ག་རང་དང་འོག་དང་གོང་མའི་ས་པ་དག་ཐམས་ཅད་དུ་ཡིན་ནོ། །དེ་ལ་རྣམ་པར་ཤེས་པའི་རང་གི་ས་པའི་གཟུགས་ནི་རང་གི་རྣམ་པར་ཤེས་པས་རྣམ་པར་ཤེས་པའི་འདོད་པ་དག་བསམ་གཏན་དང་པོའི་གཟུགས་སོ། །བསམ་གཏན་དང་པོའི་རྣམ་པར་ཤེས་པའི་གོང་མ་ནི་ས་པའི་བསམ་གཏན་གཉིས་པ་ལ་སོགས་པའི་གཟུགས་སོ། །ས་འོག་མ་པ་ནི་འདོད་པའི་གཟུགས་སོ། །ལུས་དང་གཟུགས་དང་རྣམ་པར་ཤེས་པ་རང་གི་ས་པ་དག་ནི་འདོད་པ་དང་བསམ་གཏན་དང་པོར་སྐྱེས་པའིའོ། །ས་འོག་མ་པ་དག་ནི་བསམ་གཏན་གཉིས་པ་ལ་སོགས་པར་སྐྱེས་པའི་འོ། །ས་གོང་མ་པ་དག་ནི་འདོད་པའི་ཁམས་སུ་སྐྱེས་པ་ཁོ་ནའིའོ། །ལུས་དང་གཟུགས་ཀྱང་རང་དང་འོག་མའི་ས་པའོ། །གོང་མའི་མིག་གི་ཡུལ་གོང་མ་དང་རང་དང་འོག་མའི་ས་པ་ཞེས་བྱའོ། །གསུམ་དག་ནི་ཞེས་བྱ་བ་རྒྱ་ཆེར་འབྱུང་སྟེ། ཡུལ་དང་ཕྲད་པ་ཡིན་པའི་ཕྱིར་རོ། །ལུས་དང་དབང་པོ་དང་ཡུལ་གྱི་བདག་ཉིད་ཅན་གསུམ་ཆར་གདོན་མི་ཟ་བར་རང་གི་ས་པ་ཡིན་གྱི། རྣམ་པར་ཤེས་པ་ལ་ནི་བྱེ་བྲག་ཡོད་དོ། །འདི་ལྟ་སྟེ། འདོད་པའི་ཁམས་དང་ཞེས་བྱ་བ་ལ། ལུས་ལ་སོགས་པ་བཞིན་རྣམ་པར་ཤེས་པ་ཡང་དེའི་ས་པ་ཉིད་དོ། །ལུས་དང་རེག་བྱ་དང་དབང་པོ་ནི་ས་ལྔ་པ་ཡིན་ལ། ལུས་ཀྱི་རྣམ་པར་ཤེས་པ་ནི་ས་གཉིས་པ་ཡིན་པ་དེའི་ཕྱིར་འདི་ལ་དབྱེ་བ་ཡོད་དོ། །ཡིད་ནི་མ་ངེས་ཏེ་ཞེས་བྱ་བ་ལ། རེ་ཞིག་མཚུངས་པའི་ས་པ་ནི་ས་ལྔ་པོ་དག་ཏུ་སྐྱེས་པ་གང་ཡིན་པའི་རང་གི་ས་པ་བཞི་པོ་ཁོ་ན་ཡིན་ནོ། །སྙོམས་པར་འཇུག་པ་དང་སྐྱེ་བའི་ཚེ་ཞེས་བྱ་བ་ལ། དེ་ལ་སྙོམས་པར་འཇུག་པའི་ཚེ་ཡིད་ས་གོང་མ་ཡིན་པ་ནི། གང་གི་ཚེ་འདོད་པའི་ཁམས་སུ་སྐྱེས་པ་ཞིག་བསམ་གཏན་དང་པོའི་མཇུག་ཐོགས་སུ་འདོད་པ་ན་སྤྱོད་པའི་ཡིད་ཀྱི་རྣམ་པར་ཤེས་པས་འདོད་པ་ན་སྤྱོད་པའི་ཆོས་རྣམས་ཤེས་པ་སྟེ། དེའི་ཚེ་ཡིད་ནི་ས་གོང་མ་ཡིན་ལ། ལུས་དང་ཡིད་ཀྱི་རྣམ་པར་ཤེས་པ་དང་ཆོས་རྣམས་ནི་ས་འོག་མ་པ་ཡིན་ནོ། །བསམ་གཏན་གཉིས་པའམ་བཞི་པའི་མཇུག་ཐོགས་སུ་བསམ་གཏན་དང་པོ་དང་གཉིས་པ་དང་གསུམ་པའི་ས་པའི་ཡིད་ཀྱི་རྣམ་པར་ཤེས་པས་བསམ་གཏན་དང་པོ་དང་གཉིས་པ་དང་གསུམ་པའི་ས་པའི་ཆོས་རྣམས་
རྣམ་པར་ཤེས་པ་ན། དེའི་ཡིད་ནི་ས་གོང་མ་པ་ཡིན་ལ། གསུམ་ནི་ས་འོག་མ་པ་ཡིན་ནོ། །བསམ་གཏན་དང་པོར་སྐྱེས་པ་ཞིག་གིས་བསམ་གཏན་གཉིས་པའི་མཇུག་ཐོགས་སུ་བསམ་གཏན་དང་པོའི་ཡིད་ཀྱི་རྣམ་པར་ཤེས་པས་བསམ་གཏན་དང་པོའི་ས་པའི་ཆོས་རྣམས་ཤེས་པ་ན། ཡིད་ཀྱི་གོང་མའི་ས་པ་ཡིན་ལ། གསུམ་ནི་འོག་མའི་ས་པ་ཉིད་དོ། །བསམ་གཏན་གསུམ་པ་དང་བཞི་པའི་མཇུག་ཐོགས་སུ་བསམ་གཏན་གཉིས་པ་དང་གསུམ་པའི་ས་པའི་ཡིད་ཀྱི་རྣམ་པར་ཤེས་པས་བསམ་གཏན་གཉིས་པ་དང་གསུམ་པའི་ས་པའི་ཆོས་རྣམ་པར་ཤེས་པ་ནི། ཡིད་ནི་གོང་མའི་ས་པ་ཡིན་ལ། གསུམ་ནི་འོག་མའི་ས་པ་ཉིད་དོ། །བསམ་གཏན་གཉིས་པ་ལ་སོགས་པར་སྐྱེས་པ་ཡང་ཇི་ལྟར་རིགས་པར་བརྗོད་པར་བྱའོ། །འདོད་པའི་ཁམས་སུ་སྐྱེས་པ་འདོད་པར་གཏོགས་པའི་སྤྲུལ་བ་སྤྲུལ་བར་བྱེད་པ་ན། ཡིད་ནི་ཅི་རིགས་པར་བསམ་གཏན་བཞི་བའི་ས་པ་ཡིན་ལ། གསུམ་ནི་འདོད་པར་གཏོགས་པའོ། །ལུས་འདོད་པའི་ཁམས་སུ་སྐྱེས་པ་ནི། ཡིད་ས་འོག་མ་པའོ། །དེའི་ཕྱིར་སྔར་ཐོད་རྒལ་གྱི་བསམ་གཏན་གྱི་སྙོམས་པར་འཇུག་པ་ལ་ས་གོང་མ་པའི་ཡིད་དང་རྣམ་པར་ཤེས་པ་དང་ཆོས་རྣམས་ཇི་ལྟར་སྲིད་པའོ། །འདོད་པར་གཏོགས་པའི་སྤྲུལ་པ་སྡུད་པའི་ཚེ་ཡང་ཡིད་ནི་ས་འོག་མ་པ་དང༌། ལུས་ནི་རང་གི་ས་པ་དང༌། ཡིད་ཀྱི་རྣམ་པར་ཤེས་པ་ས་གོང་མ་བ་དང༌། ཆོས་ནི་ཇི་ལྟར་སྲིད་པའོ། །སྐྱེ་བའི་ཚེ་ཡང་ས་གོང་མ་ཡིན་ལ། ལུས་ས་འོག་མ་པར་མི་རུང་སྟེ། ས་འོག་མ་པའི་ལུས་ཀྱི་དབང་པོ་མི་འགགས་པར་འགའ་ཡང་སྐྱེ་བར་མི་འགྱུར་རོ། །འགའ་ཞིག་ནི་མ་ཡིན་ཡང་རིགས་མི་མཐུན་པའི་སེམས་ལ་གནས་ཏེ་དུས་བྱེད་དོ། །དེ་ལྟར་ས་གོང་མ་ལུས་ལས་འོག་མ་པའི་ཡིད་མེད་པས་ཨ་བ་སཱང་བྱཾ་ས་གོང་མ་པའི་ཡིད་ས་འོག་མ་པའི་ལུས་ལ་མི་འཐད་དོ། །གང་ཞིག་ས་གོང་མ་པའི་རྣམ་པར་ཤེས་པའི་མཇུག་ཐོགས་སུ་འདོད་པ་དང་གཟུགས་དང་གཟུགས་མེད་པའི་ཁམས་སུ་ཉིད་རྒྱ་དཔེ་གཅིག་གི་ལུགས་འདོད་པའི་ཁམས་སུ་ཉིང་མཚམས་སྦྱར་ཞེས་པ་སྣང༌། མཚམས་སྦྱོར་བ་ན། དེའི་ཡིད་ནི་ས་གོང་མ་པ་ཡིན་ལ། ལུས་དང་ཡིད་ཀྱི་རྣམ་པར་ཤེས་པ་ནི་ས་འོག་མ་པ་ཡིན་ནོ། །ཆོས་རྣམས་ནི་དེའི་ས་པ་དང༌། ས་གོང་མ་པ་དང་མི་
ལྡན་པ་དག་ཡིན་ནོ། །དེ་བཞིན་དུ་ཡང་ས་འོག་མ་པ་མ་ཡིན་ལ། ལུས་ས་གོང་མ་པ་ཡིན་པ་ཡང་བརྗོད་པར་བྱའོ། །སྙོམས་པར་འཇུག་པའི་དུས་སུ་ལུས་ས་གོང་མ་པ་དང་ཡིད་ས་འོག་མ་པ་རུང་སྟེ། རྣམ་པར་ཤེས་པ་དང་ལུས་སྤྲུལ་པའི་སེམས་ཀྱིས་མངོན་དུ་བྱེད་པའི་ཕྱིར་རོ། །དེ་བཞིན་དུ་ཡིད་ཀྱི་རྣམ་པར་ཤེས་པ་དང་ཆོས་ལ་ཡང་བརྗོད་པར་བྱའོ། །རྒྱས་པར་སྙོམས་འཇུག་བསྟན་པ་ལས་ཞེས་བྱ་བ་ལ་སོགས་པ་ནི། ཟག་པ་མེད་པའི་མཇུག་ཐོགས་སུ། །ལྟག་འོག་གསུམ་པའི་བར་དགེ་བ། །སྐྱེ་བོ་དག་པ་ལས་དེ་བཞིན། །རང་གི་ས་པའི་ཉོན་མོངས་ཀྱང༌། །ཉོན་མོངས་ཅན་ལས་རང་དག་དང༌། །ཉོན་མོངས་འོག་མའི་དག་གཅིག་ཀྱང༌། །འཆི་འཕོ་དག་ལ་ཉོན་མོངས་ཀུན། །ཉོན་མོངས་ཅན་ལ་གོང་མ་མིན། །ཞེས་བྱ་བ་དང༌། རིགས་མི་མཐུན་པའི་གསུམ་པར་འགྲོ། །ཐོད་རྒལ་གྱི་ནི་སྙོམས་འཇུག་ཡིན། །ཞེས་བྱ་པ་དེ་ལྟ་བུ་ལ་སོགས་པའོ། །ཞར་ལས་འོངས་པའི་སྐབས་ཞེས་བྱ་བ་ལ། ཞར་ལས་འོངས་པ་ནི་ཞར་ལས་བྱུང་བ་སྟེ། ལུས་གང་ལ་གནས་ཏེ་ཞེས་བྱ་ལ་སོགས་པ་འདི་ནི་མིག་གིས་གཟུགས་རྣམས་མཐོང་ཞེས་བྱ་བ་དེ་ལས་འོངས་པ་ཡིན་ནོ། །གཉིས་ཀྱིས་རྣམ་ཤེས་ཕྱི་ཡི་ལྔ། ཞེས་བྱ་བ་ལ། ལྔ་ཞེས་བྱ་བ་ནི་ཆོས་ཀྱི་ཁམས་བསལ་བར་བྱ་བའི་ཕྱིར་རོ། །ཕྱིའི་ཞེས་བྱ་བ་ནི་མིག་ལ་སོགས་པ་བསལ་བར་བྱ་བའི་ཕྱིར་རོ། །ཕྱིའི་ལྔ་པོ་ཁོ་ན་གཉིས་ཀྱིས་ཤེས་པར་བྱ་བ་ཡིན་ནོ་ཞེས་ངེས་པར་གཟུང་པས་ལྷག་མ་བཅུ་གསུམ་ནི་རྣམ་པར་ཤེས་པ་གཅིག་གི་ཡུལ་ཡིན་ནོ་ཞེས་བྱ་བར་གྲུབ་པར་འགྱུར་ཏེ། ལྔ་པོ་རྣམས་ཀྱི་ཡུལ་མ་ཡིན་པའི་ཕྱིར་རོ། །འདུས་མ་བྱས་ནི་རྟག་པ་ཁོ་ནའོ་ཞེས་ངེས་པར་གཟུང་བས་ཆོས་ཀྱི་ཁམས་ཀྱི་ཕྱོགས་གཅིག་རྟག་གོ །ལྷག་མ་རྣམས་དང༌། ཆོས་ཀྱི་ཁམས་ཀྱི་ཕྱོགས་གཅིག་ནི་མི་རྟག་གོ་ཞེས་བྱ་བར་ཤེས་པར་བྱས་པར་འགྱུར་རོ། །མ་བསྒྲིབས་པ་དང་བསྒྲིབས་པ་དག་ཕན་ཚུན་འགལ་བ་ལ་ས་དྱཱ་ཀཱ་ནམ་མཁའི་ལྡན་པ་བསྐྱེད་པ་འགོག་པ་ཡང་འདོད་དོ་ཞེས་སོ།། ཤ་སྱཱ་སཾ་ཡོ་གོ་ཏྦཱ་ད་ནི་རོ་དྷེ་ཙི་ཏི་སོ་སོར་བརྟགས་པ་དང་སོ་སོར་བརྟགས་པ་མ་ཡིན་པའི་འགོག་པ་དག་རྟག་པ་ཉིད་ལ་རྣམ་པར་དཔྱད་པར་བྱའོ་ཞེས་
བྱ་བ་རྒོལ་བའི་གཞིའོ། །སྒྲིབ་པ་མེད་པས་ནམ་མཁའ་མེད་ནའོ་ན་ཅི་གང་གི་ཚེ་སྒྲིབ་པ་ལས་བཟློག་པའི་ཆོས་གཞན་གང་དུ་དོན་དང་བཅས་པའི་གོ་སྐབས་ལ་སྒྲིབ་པར་བྱེད་པ་དེའི་ཚེ་ནམ་མཁའ་གང་ལ་གཟུགས་ཀྱི་སྐབས་སུ་འགྱུར། འདིས་ནི་ཚོར་བ་ལ་སོགས་པ་རྣམས་ལས་བྱེ་བྲག་ཏུ་བཤད་དོ། །ཇི་ལྟར་ཡང་རྩིག་པ་ལ་སོགས་པ་ལ་སོར་མོ་ལ་སོགས་པའི་གཟུགས་ཀྱི་སྐབས་སུ་འགྱུར། དེ་ལ་ནམ་མཁའ་ཡོད་པ་མ་ཡིན་ནོ་ཞེ་ན། འདི་ནི་དེ་ལྟ་མ་ཡིན་ཏེ། རྩིག་པ་ལ་སོགས་པ་ཐོགས་པ་དེར་སོར་མོ་ལ་སོགས་པའི་གཟུགས་ཀྱི་སྐབས་སུ་འགྱུར་རོ། །གལ་ཏེ་དེ་ཡང་ནམ་མཁར་འགྱུར་ན། རེ་ཞིག་རྩིག་པ་ལ་སོགས་པའི་གཟུགས་དེ་ཉིད་ག་ལ་གནས་པར་འགྱུར། འདི་ནི་གང་འཐུག་པ་ལ་དེའི་གླགས་མེད་དོ་ཞེས་འཐུག་པ་ལ་དེ་མེད་པར་རྟོག་པ་ཡང་བཀག་གོ །ཕྲད་པ་འཇིག་པ་དང་ཕྲད་པ་སྐྱེད་པ་སྐྱེད་པ་ཙམ་ནི་བྲལ་བ་མ་ཡིན་ནོ། །གང་ཞིག་མ་བྱུང་བ་ལས་བྱུང་བ་དང་བྱུང་བ་ནས་མེད་པ་ནི་མི་རྟག་པར་འགྱུར་ན། འོ་ན་ཅི་ཞེ་ན་ཕྲད་པ་ལས་བཟློག་པའི་ཆོས་ཀྱང་ཕྲད་པ་བནྡྷཿ་སཾ་ཡོ་ཛན་མ་ནུ་ཤ་ཡ་ན་མ་ཏ་སྟ་ཏ་ཐོབ་པར་བྱེད་པའི་མཚན་ཉིད་དང་བྲལ་བའི་ཐོབ་པ་གང་ཡིན་པ་ཐོབ་བོ། །ཕྲད་པ་དང་བྲལ་བ་འདི་ལས་སོ་སོར་བརྟགས་པ་མ་ཡིན་པའི་འགོག་པས་མ་འོངས་པའི་ཆོས་མི་སྐྱེ་བ་ཙམ་སྐྱེ་བ་ལ་གཏན་དུ་གེགས་བྱེད་པའི་ཆོས་གང་ཡིན་པ་ཐོབ་པོ། །འཆིང་བ་དང་ཀུན་སྦྱོར་དང་ཕྲ་རྒྱས་སོ། །དེའི་ཕྱིར། འདི་ནི་ནམ་ཡང་སྐྱེ་བར་མི་འགྱུར་ཏོ། །འདུས་བྱས་ཀྱང་རྟག་ཏུ་རང་གི་མཚན་ཉིད་ཀྱིས་གནས་པའི་ཕྱིར་རོ། །ཇི་ལྟར་འདུས་མ་བྱས་ཁོ་ན་རྟག་པ་ཡིན་ཞེ་ན་དུས་སུ་རྒྱུ་བ་མེད་པའི་ཕྱིར་རོ། །དེ་མེད་པ་ནི་སྐྱེ་བ་ལ་སོགས་པ་འདུས་བྱས་ཀྱི་མཚན་ཉིད་དང་མི་ལྡན་པའི་ཕྱིར་རོ། །མདོ་ལས་ནི་སྐྱེ་མཆེད་དྲུག་རྣམ་པར་གཞག་པ་ལས་ལུས་ཀྱི་དབང་པོའི་མཇུག་ཐོགས་སུ་ཡིད་ཀྱི་དབང་པོ་བཤད་པ་ལ། ཆོས་མངོན་པ་བ་རྣམས་ཀྱིས་ནི་རྣམ་པ་སྟོན་པ་དག་ཏུ་ཆེས་བདེ་བླག་ཏུ་བསྟན་པར་བྱ་བའི་ཕྱིར། ཡང་དམིགས་པ་རྣམས་འདོན་པའི་གོ་རིམས་གཅིག་ཏུ་བྱས་ཏེ། དེ་ནས་དམིགས་པ་དང་བཅས་པའི་དང་པོར་ཡིད་ཀྱི་དབང་པོ་བསྟན་ཏོ། །དེ་ལ་ཞེས་བྱ་བ་ནི་ཉེ་བར་འགོད་པའི་ཚིག་སྟེ། དབང་པོ་གང་དག་བཤད་
པ་ལ། ཆོས་ཀྱི་ཁམས་ཀྱི་ཕྱོགས་གཅིག་ཡིན་པའི་ཕྱིར་ཆོས་ཀྱི་ཕྱེད་ཅེས་བྱའོ། །སྲོག་གི་དབང་པོ་ལ་སོགས་པ་བཅུ་གཅིག་དང་ཞེས་བྱ་བ་ལ། སྲོག་གི་དབང་པོ་དང༌། ཚོར་བའི་དབང་པོ་ལྔ་དང༌། དང་པོ་ལ་སོགས་པ་ལྔའོ། །ཆ་ཞེས་བྱ་བ་ནི་ཀུན་ཤེས་ལྡན་པའི་དབང་པོ་ལ་སོགས་པར་བཟུང་བའི་ཆ་དད་པ་ལ་སོགས་པ་ལྔ་དང༌། བདེ་བ་དང་ཡིད་བདེ་བ་དང་བཏང་སྙོམས་ཀྱི་དབང་པོ་རྣམས་ཏེ། དེ་ལ་གསུམ་གྱི་ཆ་ནི་དབང་པོ་བརྒྱད་པོ་དེ་རྣམས་སུ་བཤད་དོ། །འོག་ནས་འཆད་དོ་ཞེས་བྱ་བ་ནི། ལུས་ལས་ཕོ་དང་མོ་དབང་དག །ཅེས་བྱ་བ་དེ་ནས་སོ། །ལྷག་མི་ཁམས་ལྔ་པོ་དག་ཅེས་བྱ་བ་ནི་གཟུགས་ལ་སོགས་པ་རྣམས་སོ། །ཆོས་ཀྱི་ཁམས་ཀྱི་ཕྱོགས་གཅིག་ནི་དབང་པོ་མ་ཡིན་པ་ཞེས་བྱ་བ་ནི་དབང་པོ་བཅུ་གཅིག་མ་གཏོགས་པ་རྣམས་སོ། །སློབ་དཔོན་བཙུན་བ་བློ་གྲོས་བརྟན་པས་ཉེ་བར་བཀོད་པ་ཆོས་མངོན་པ་མཛོད་ཀྱི་བཤད་པའི་རྒྱ་ཆེར་འགྲེལ་པ་དོན་གྱི་དེ་ཉིད་ཅེས་བྱ་བ་ལས་གནས་དང་པོ་རྫོགས་སོ།། །།སངས་རྒྱས་ལ་ཕྱག་འཚལ་ལོ། །དབང་པོ་རྣམས་བཤད་པ་ལ་ཞེས་བྱ་བ་ལ། ཁམས་ཀྱི་མཛོད་ཀྱི་མཐར་བསྡུས་པ་དང་རབ་ཏུ་དབྱེ་བའི་སྒོ་ནས་ཏེ། ཆོས་ཀྱི་ཕྱེད་དང་གང་དག་ནི། །བཅུ་གཉིས་ནང་གིར་བཤད་དབང་པོ། །ཞེས་བྱ་བ་ནི་བསྡུས་པས་སོ། །མིག་གི་དབང་པོ་ནས་ཀུན་ཤེས་ལྡན་པའི་དབང་པོ་དང་ཞེས་བྱ་བའི་བར་ནི་རབ་ཏུ་དབྱེ་བས་སོ། །དེ་ལྟར་དབང་པོ་བཤད་པ་ལ། །དབང་པོའི་དོན་མི་ཤེས་པས་དེའི་ཕྱིར་དབང་པོའི་དོན་ཅི་ཞེ་ན་ཞེས་སྨྲས་སོ། །འདི་ནི་སྒྲའི་དོན་གྱི་དབང་དུ་བྱས་ནས་དྲིས་པ་ཡིན་གྱི་དངོས་པོའི་དོན་ནི་མ་ཡིན་ཏེ། དངོས་པོ་ཕན་ཚུན་ཐ་དད་པ་རྣམས་ལ་དོན་ཐ་མི་དད་པ་ཉེ་བར་བཟུང་ནས་སྒྲ་འཇུག་པ་ནི་མི་རིགས་ཏེ། ཧ་ཅང་ཐལ་བའི་ཕྱིར་རོ། །དངོས་པོའི་དོན་ནི་མིག་ལ་སོགས་པ་ཕོའི་དབང་པོ་དྲུག་པོ་འགའ་ཞིག་ནི་མཛོད་ཀྱི་གནས་དང་པོ་ཁོ་ནར་བསྟན་ལ། སྲོག་གི་དབང་པོ་ནི་ལྡན་པ་མ་ཡིན་པ་རྣམས་ཀྱི་ནང་ནས་འཆད་དོ། །དད་པ་ལ་སོགས་པ་རྣམས་ནི་སེམས་ལས་བྱུང་བ་རྣམས་ཀྱི་ནང་ནས་སོ། །བདེ་བ་ལ་སོགས་པ་དང་མི་ཤེས་པ་
ཀུན་ཤེས་པར་བྱེད་པའི་དབང་པོ་ལ་སོགས་པ་དག་ནི་དབང་པོའི་སྐབས་འདི་ཉིད་ནས་སྟོན་པར་འགྱུར་རོ། །དེའི་ཕྱིར་དངོས་པོའི་དོན་གྱི་དབང་དུ་བྱས་ནས་དྲིས་པ་མ་ཡིན་ནོ་ཞེས་བྱ་བར་ཤེས་སོ། །སློབ་དཔོན་ཡང་སྒྲའི་དོན་ཁོ་ན་སྟོན་ཅིང༌། སྐད་ཀྱི་བྱིངས་དོན་ཡོངས་སུ་འཛིན་པར་མཛད་པ་ནི། དབང་ནི་དབང་ཕྱུག་དམ་པའོ་ཞེས་བྱ་བ་སྟེ། དངོས་པོའི་ཡུལ་ཅན་དྲི་བ་ཡིན་ན་ནི་འདི་ལན་དུ་མི་རུང་ངོ༌། །དེ་དབང་བྱེད་པས་ཞེས་བྱ་བ་ལ། དེའི་བྱིངས་ལས་དབང་བྱེད་པས་ན་དབང་པོ་རྣམས་ཏེ་དབང་བདག་ཅེས་བྱ་བའི་དོན་ཏོ། །འདུས་པ་འདི་ལ་དབང་བྱེད་དོ་སྙམ་དུ་བསམས་པའོ། །དེའི་ཕྱིར་ཞེས་བྱ་བ་ལ། གང་གི་ཕྱིར་དབང་བྱེད་པས་དབང་པོ་རྣམས་ཡིན་པ་དེའི་ཕྱིར་དབང་བྱེད་པའི་དོན་ནི་དབང་པོའི་དོན་ཏོ། །གལ་ཏེ་དབང་བྱེད་པས་དབང་པོ་རྣམས་ཉིད་ཡིན་ན་དེ་ལྟ་ན་དབང་པོ་རྣམས་ཁོ་ན་དབང་པོ་རྣམས་སོ་ཞེས་བྱ་བར་འགྱུར་རོ་ཞེ་ན། དབང་པོ་ནི་དབང་བྱེད་པའི་རྟགས་དང༌། དབང་བྱེད་པས་བརྟེན་པ་དང༌། དབང་བྱེད་པས་བྱུང་བའོ་ཞེས་བྱ་བར་འདོན་པའི་ཕྱིར་དབང་པོ་ཞེས་བྱ་བར་འགྱུར་རོ། །དེ་ལྟ་ན་ཡང་གྷ་ཙའི་དོན་བརྗོད་པར་བྱ་དགོས་ན་དེ་ཡང་མ་སྨོས་པས་སོ། །འདི་ནི་ལན་མ་ཡིན་ནོ། །འདི་ནི་རྣམ་པར་ཤེས་པ་དང་འདྲ་བར་འགྱུར་ཏེ། དཔེར་ན་རྣམ་པར་ཤེས་པར་བྱེད་པས་ན་རྣམ་པར་རིགས་པའོ་ཞེས་བྱ་བར་འགྱུར་བ་ནི། དེ་ལས་ཐ་དད་པའི་ཤེས་པ་པོས་བསྡུས་པ་བསལ་བར་བྱ་བའི་ཕྱིར། ལུ་ཊའི་དོན་ལ་གུས་པ་མེད་པར་བྱས་ཏེ། རྣམ་པར་ཤེས་པ་ཞེས་བཤད་པ་དེ་བཞིན་དུ་འདིར་ཡང་དབང་བྱེད་པ་ཞེས་བྱ་བ་དབང་པོ་ལས་ཐ་དད་པའི་རྟགས་སུ་རྟོག་པ་བསལ་བར་བྱ་བའི་ཕྱིར་རོ། །ཏ་ཐོ་ཀྟ་སྱཱ་ཙྩིཏྟ་ཀརྨ་ཎོ་ར་བེ་ཙེ་ཏ་བ་རི་ཀལྤ་ནཻ་རླི་ཧ་ཏྭཏྟེ་ན་པྲཥྣཾ་སྲིཥྛ་ཛུ་ཥྚ་ཙོ་ཏྱ་ནུ་པ་པཏྟི་སརྦ་སྱ་ཙནྡྲི་ཡཏྭ་པྲ་སཾ་གཿ་དྲྀཥྚ་ཏྭཱ་རྒྱ་བི་ཤེ་ཥཱ་ཏེ་པེ་གེ་སྱ་ཏི་པྲ་སཾ་གཿ་དེའི་ཕྱིར་བཅོམ་ལྡན་འདས་ཀྱིས་དེ་དག་ལས་ཐ་དད་པའི་དབང་བྱེད་པའི་རྟགས་བསལ་བར་བྱ་བའི་དོན་དུ་དེ་དང་དེ་དག་ལ་དབང་དེ་སྐད་དུ། སེམས་ལས་རྣམས་ཀྱང་སེམས་འབྱུང་ཐམས་ཅད་དབང་པོ་ཉིད་དུ་བྲལ་བར་འགྱུར་རོ། །མཐོང་བའི་ཕྱིར་གང་ཁྱད་པར་ལས་རྟོགས་པས་ཡང་ཧ་ཅང་ཐལ། བྱེད་པར་འགྱུར་བའི་ཕྱིར། དབང་བྱེད་པའི་དོན་གྱིས་ན་དབང་པོ་རྣམས་སོ་ཞེས་གསུངས་སོ། །
ལྔ་པོ་རྣམས་ནི་དོན་བཞི་ལ་ཞེས་བྱ་བ་ལ། གྲངས་མི་མཉམ་པར་བསྟན་པའི་ཕྱིར་དང་བརྣན་པ་མི་མངོན་པར་བྱས་པའི་ཕྱིར། ལྔ་པོ་རྣམས་རེ་རེ་ཞིང་དོན་བཞི་ལ་དབང་བྱེད་དོ་ཞེས་བྱ་བར་ཤེས་སོ། །དེ་ཉིད་ཀྱི་ཕྱིར། རེ་ཞིག་མིག་དང་རྣ་བ་དག་ཅེས་དོན་ཐ་དད་པ་བྱེ་བྲག་ཏུ་ཕྱེ་སྟེ་ཉེ་བར་བཀོད་པའོ། །རེ་རེ་ཞིང་ཞེས་བྱ་བ་ནི་བསྡུས་པ་མ་ཡིན་པའོ། །ལུས་མཛེས་པར་བྱ་བ་དང་ཞེས་བྱ་བ་ལ། འདིར་ལུས་ནི་གཟུགས་ཀྱི་ཚོགས་པ་ལ་མངོན་པར་འདོད་དོ། །མཛེས་པ་ནི་གཟུང་བར་བྱ་བའི་ངོ་བོ་ཉིད་དོ། །མི་མཛེས་པའི་ངོ་བོ་ཡིན་བའི་ཕྱིར་ཞེས་བྱ་བ་ནི་གཟུང་བར་འོས་པའི་ངོ་བོ་མ་ཡིན་པའི་ཕྱིར་ཏེ། མ་ལོང་བ་དང༌། མ་འོན་པ་དག་ནི་རྟེན་དུ་གཟུང་བར་འོས་པ་ཉིད་ཀྱི་ཕྱིར་ལུས་མཛེས་པར་བྱ་བ་ལ་དབང་བྱེད་པའོ། །ལུས་ཡོངས་སུ་བསྲུང་བ་དང་ཞེས་བྱ་བ་ནི་མིག་དང་རྣ་བ་དག་དབང་བྱེད་དོ་ཞེས་བྱ་བར་སྦྱར་རོ། །ཡོངས་སུ་བསྲུང་བ་ནི་སྲོག་གི་བར་ཆད་ཀྱི་རྒྱུ་ཡོངས་སུ་སྤང་བ་ཞེས་བྱ་བའི་དོན་ཏོ། །ཇི་ལྟར་མིག་དང་རྣ་བ་དག་གིས་ལུས་ཡོངས་སུ་བསྲུང་བ་ཡིན་ཞེ་ན། །དེའི་ཕྱིར་མཐོང་བ་དང་ཐོས་ནས་ཞེས་རྒྱ་ཆེར་གསུངས་ཏེ། གཡང་ས་ལ་སོགས་པ་མཐོང་ཞིང་སྟག་ལ་སོགས་པའི་སྒྲ་ཐོས་ནས་སྲོག་གི་བར་ཆད་དུ་འགྱུར་བའི་ཡང་བ་དེ་དག་སྤོང་བར་བྱེད་པ་སྟེ། དོན་དེ་དག་གི་ཚིགས་སུ་བཅད་པ་ལུང་ལས་སོ། །མཚུངས་པར་ལྡན་པ་དང་བཅས་པ་དག་ཅེས་བྱ་བ་ནི། སེམས་ལས་བྱུང་བ་དང་བཅས་པ་དག་སྟེ། མིག་དང་རྣ་བ་གྱུར་པའི་རྗེས་སུ་བྱེད་པས་རྟེན་གྱི་ངོ་བོར་གནས་པའི་ཕྱིར་དེ་དག་གི་རྣམ་པར་ཤེས་པ་སྐྱེད་པ་ལ་དབང་བྱེད་དོ། །གཟུགས་ལྟ་བ་དང་སྒྲ་མཉན་པ་དག་གིས་ཞེས་བྱ་བ་ལ། གཟུགས་དང་སྒྲ་འཛིན་པ་དག་གིས་ཞེས་བྱ་བ་ནི་དོན་ཏེ། འདི་དག་གི་བྱེད་པ་ནི་ཡུལ་འཛིན་པ་ཙམ་ཞིག་འདོད་པའི་ཕྱིར་རོ། །ཐུན་མོང་མ་ཡིན་པའི་རྒྱུ་ཉིད་ལ་ཞེས་བྱ་བ་ནི་ཡུལ་མ་འདྲེས་པ་ཡིན་པའི་ཕྱིར་ཏེ། རྣ་བས་གཟུགས་ལ་ལྟ་བའམ། མིག་གིས་སྒྲ་ཉན་པ་ནི་མ་ཡིན་ནོ། །དེའི་ཕྱིར་མིག་དང་རྣ་བ་དག་ཁོ་ན་གཟུགས་ལ་ལྟ་བ་དང༌། སྒྲ་ཉན་པ་དག་གིས་ཐུན་མོང་མ་ཡིན་པའི་རྒྱུ་ཉིད་དོ། །སྣ་དང་ལྕེ་དང་ལུས་རྣམས་ནི་
ཞེས་བྱ་བ་རྒྱ་ཆེར་འབྱུང་བ་ལ། དེ་དག་ལས་དབང་པོ་གང་ཡང་རུང་བ་ཞིག་ཉམས་ན་རྟེན་གཟུང་བར་མི་འོས་པའི་ཕྱིར་ཏེ་སྔ་མ་བཞིན་ནོ། །དེ་དག་གིས་ཁམ་གྱི་ཟས་ལ་ཡོངས་སུ་ལོངས་སྤྱོད་པའི་ཕྱིར་ཞེས་བྱ་བ་ལ། ཁམ་གྱི་ཟས་ནི་དྲི་ལ་སོགས་པ་སྐྱེ་མཆེད་གསུམ་གྱི་བདག་ཉིད་ཡིན་ལ། དྲི་ལ་སོགས་པ་དེ་དག་སྣ་ལ་སོགས་པ་དག་གིས་ལོངས་སྤྱོད་པས་ཁམ་གྱི་ཟས་ཡོངས་སུ་ལོངས་སྤྱོད་པའི་ཕྱིར་སྣ་ལ་སོགས་པ་རྣམས་ཀྱིས་ལུས་ཡོངས་སུ་བསྲུང་བ་ཡིན་ཏེ། འགྲོ་བ་ཟས་ཀྱིས་གནས་པ་ཡིན་ཞེས་གསུངས་པའི་ཕྱིར་རོ། །ས་ལ་སོགས་པའི་རྣམ་པར་ཤེས་པ་ཞེས་བྱ་བ་ལ་སོགས་པ་ནི་དོན་གོ་བར་ཟད་དོ། །གཞན་དག་ནི། །མིག་དང་རྣ་བ་དག་སྐྱེ་བའི་ཆོས་དང་ལུས་ཡོངས་སུ་བསྲུང་བ་ལ་རིམ་པ་བཞིན་དབང་བྱེད་དོ་ཞེས་ཟེར་རོ། །སྔར་བཤད་བའི་ཚིགས་སུ་བཅད་པ་གཉིས་ནི་ལུང་ངོ༌། །གཞན་དག་ན་རེ་གཉི་ག་ཡང་གཉི་ག་སྟེ། སྐྱེས་བུ་དམ་པ་བསྟེན་པ་དང༌། དམ་པའི་ཆོས་ཉན་པ་ལ་སོགས་པ་ལ་དབང་བྱེད་པས་སོ་ཞེས་སོ། །བཞི་རྣམས་གཉིས་པའོ་ཞེས་བྱ་བ་ལ། འདིར་ཡང་བརྣན་པ་སྟེ། རེ་རེ་ཞིང་དོན་གཉིས་གཉིས་ལ་དབང་བྱེད་དེ་ཞེས་བྱ་བར་སྐབས་དང་སྦྱར་རོ། །བཞི་པོ་རྣམས་རེ་རེ་ཞིང་དབང་བྱེད་དོ། ཡུལ་དང་ཡུལ་ཅན་གྲངས་མི་མཉམ་པའི་ཕྱིར་རེ་རེ་ཞིང་ཡིན་ནོ་ཞེས་བྱ་བར་ཤེས་སོ། །ལོའི་སྒྲ་ནི་རྣམ་གྲངས་ཕྱི་མ་གསལ་བར་བྱེད་པའི་དོན་ཏོ། །སེམས་ཅན་གྱི་བྱེ་བྲག་དང་ཁྱད་པར་དག་ལ་དབང་བྱེད་དེ་ཞེས་བྱ་བ་ལ། སེམས་ཅན་རྣམས་མིག་ལ་སོགས་པ་དབང་པོ་ཅན་དུ་མཚུངས་ཀྱང་པོའམ་མོ་ཞེས་བྱ་བའི་བྱེ་བྲག་འདི་ཕོ་དང་མོའི་དབང་པོས་བྱས་པ་ཡིན་ཏེ། འདི་ལྟར་བསྐལ་པ་དང་པོ་པ་རྣམས་ནི་དབང་པོ་གཉིས་འབྱུང་བའི་གོང་རོལ་ཏུ་སེམས་ཅན་སེམས་ཅན་ཞེས་བྱ་བར་བྱེ་བྲག་མེད་པར་རྣམ་པར་གནས་ལ། དབང་པོ་གཉིས་བྱུང་ནས་ནི་ཕོའི་མོའོ་ཞེས་བྱ་བ་དེ་ལྟར་བྱེ་བྲག་ཏུ་འགྱུར་རོ། །གང་གི་ཕྱིར་དབང་པོ་གཉིས་བྱུང་བའི་གོང་རོལ་ཏུ་བསྐལ་བ་དང་པོ་པ་རྣམས་ལ་ནུ་མ་ལ་སོགས་པ་དབྱིབས་དང་ང་རོ་དང་སྤྱོད་པ་ལ་སོགས་པ་བྱེ་བྲག་མེད་ལ། དབང་པོ་བྱུང་ནས་ནུ་མ་ལ་སོགས་པའི་དབྱིབས་དང་ང་རོ་དང་སྤྱོད་པ་ལ་སོགས་པ་བྱེ་བྲག་ཡོད་པ་དེའི་ཕྱིར། དེ་དག་ནི་སེམས་ཅན་
གྱི་ཁྱད་པར་ལ་ཡང་དབང་བྱེད་དོ། །དེ་ལྟ་ན་འོ་ན་སེམས་ཅན་གྱི་ཁྱད་པར་ཁོ་ན་སེམས་ཅན་གྱི་དབྱེ་བར་འགྱུར་རོ་ཞེ་ན། །གང་གི་ཕྱིར་ནུ་མ་ལ་སོགས་པའི་དབྱིབས་དང་ང་རོ་དང་སྤྱོད་པ་ཡོད་ཀྱང་དབང་པོ་མེད་པའི་ཕྱིར་རོ། །གཞན་དུ་སྐྱེས་པ་དང་བུད་མེད་ཀྱི་དབང་པོ་མེད་ན་ཕོ་འོ་མོའོ་ཞེས་སྟོན་པར་མི་འགྱུར་ཏོ། །དེའི་ཕྱིར་སེམས་ཅན་གྱི་ཁྱད་པར་སེམས་ཅན་གྱི་དབྱེ་བ་ལ་དབང་བྱེད་དོ། །ས་ཏྭ་བྷེ་དཱརྻ་བྷེ་དཿ་གཞན་དག་སེམས་ཅན་གྱི་ཁྱད་པར་ནི་གོས་དང་རྒྱན་ལ་སོགས་པ་གཞན་ཉིད་དོ་ཞེས་ཟེར་རོ། །གཞན་དག་ན་རེ་ཀུན་ནས་ཉོན་མོངས་པ་དང་རྣམ་པར་བྱང་བ་དག་ལ་དབང་བྱེད་དོ་ཞེས་ཟེར་རོ། །གཟུགས་ན་སྤྱོད་པ་རྣམས་ལ་ཕོའི་དབང་པོ་མེད་རྒྱ་དཔེ་གཅིག་ན་བྷེ་ད་རྨ་བྷེ་དཿ་སེམས་ཅན་གྱི་དབྱེ་བ་འཕགས་པའི་དབྱེ་བའོ།ཀྱང་སེམས་ཅན་གྱི་ཁྱད་པར་འགྲུབ་པའི་ཕྱིར། སེམས་ཅན་གྱི་བྱེ་བྲག་དང་ཁྱད་པར་དག་ལ་དབང་བྱེད་པ་ནི་མ་ཡིན་ཏེ། སེམས་ཅན་གྱི་བྱེ་བྲག་ནི་ཁྱད་པར་གྱིས་བྱས་པ་ཡིན་ནོ་སྙམ་དུ་བསམས་པ་ཡིན་ནོ། །འདི་ལྟར་ཞེས་བྱ་བ་ནི་གང་གི་ཕྱིར་གྱི་དོན་ཏོ། །དེ་དག་དང་མི་ལྡན་པ་དང་ཉམས་པ་ཞེས་བྱ་བ་ནི། དེ་དག་དང་མི་ལྡན་པ་དང༌། དེ་དག་ཉམས་པའོ། །ཕོ་དང་མོའི་དབང་པོ་དང་བྲལ་བ་ནི་ཟ་མ་རྣམས་སོ། །དེ་དག་ཉམས་པ་ནི་མ་ནིང་དང་མཚན་གཉིས་པ་དག་སྟེ། །སྐྱེས་པའི་དབང་པོ་ཉམས་པ་ནི་མ་ནིང་ངོ༌། །མཚན་གཉིས་པ་ནི་གཉིས་ཀ་ཉམས་པ་སྟེ། གནས་ཉམས་པ་དང་བདེ་བ་ཆུང་ངུའི་རྒྱུ་ཡིན་པའི་ཕྱིར་རོ། །ཀུན་ནས་ཉོན་མོངས་པ་ནི་ཉེས་པར་སྤྱོད་པ་རབ་དང་དེའི་རྒྱུ་ཉོན་མོངས་པ་སྟེ། དེ་ནི་སྡོམ་པ་མ་ཡིན་པ་དང༌། མཚམས་མེད་པ་དང༌། དགེ་བའི་རྩ་བ་ཆད་པ་རྣམས་སོ། །འདིས་ཉོན་མོངས་པ་རྣམས་དང་དེ་དག་གིས་ཀུན་ནས་བསླང་བའི་ལས་རྣམ་པར་བྱང་བར་བྱེད་པས་ན་རྣམ་པར་བྱང་བ་སྟེ། དེ་སྡོམ་པ་དང༌། འབྲས་བུ་ཐོབ་པ་དང༌། འདོད་ཆགས་དང་བྲལ་བ་རྣམས་སོ། །གང་གི་ཕྱིར་ཀུན་ནས་ཉོན་མོངས་པ་དང་རྣམ་པར་བྱང་བ་སྐྱེས་པ་དང་བུད་མེད་ཁོ་ན་ལ་ཡོད་ཀྱི་ཟ་མ་དང་མ་ནིང་དང་མཚན་གཉིས་པ་དག་ལ་མེད་པ་དེའི་ཕྱིར། ཕོ་དང་མོའི་དབང་པོ་དག་ནི་ཀུན་ནས་ཉོན་མོངས་པ་
དང་རྣམ་པར་བྱང་བ་ལ་དབང་བྱེད་དོ་ཞེས་བྱ་བར་ངེས་སོ། །སྲོག་གི་དབང་པོ་ནི་ཞེས་བྱ་བ་ལ་སོགས་པ་ལ། འདིར་རིགས་མཐུན་པར་མཚམས་སྦྱོར་བ་ནི་འཆི་བའི་སྲིད་པའི་མཇུག་ཐོགས་སུ་སྲིད་པ་བར་མ་དོར་མཚམས་སྦྱོར་བའམ། སྐྱེ་བའི་སྲིད་པའི་མཚམས་སྦྱོར་བ་གཟུང་སྟེ། གཟུགས་མེད་པའི་ཁམས་དག་ཏུ་ཡང་དེ་རྙེད་པ་ཡིན་པ་དང་སྐྱེ་བ་ངེས་པའི་ཕྱིར་རོ། །དེའི་འོག་རོལ་ཏུ་ནི་ཡང་དག་པར་འཛིན་ཏོ། །འདི་ལྟར་ཉོན་མོངས་པ་དང་དགེ་བའི་སེམས་དང་ལྡན་པ་ཐམས་ཅད་དང་སྲོག་གི་དབང་པོའི་སྟོབས་ཀྱིས་གཟུགས་མེད་པའི་ཁམས་ནས་འཆི་འཕོ་བ་མེད་པར་མཐོང་ངོ༌། །གཞན་དག་ན་རེ་དབང་པོ་བཏགས་པ་ལས་དབང་པོ་ཡོངས་སུ་གཅོད་པ་ལ་དབང་བྱེད་དོ་ཞེས་ཟེར་རོ། །ཏརྦྷ་བི་བྷཱ་བཱ་ཏྟ་བྷཱ་བོ་བཱ་བྷཱ་བཱ་ཏ། ཞེས་སོ་དེའི་ཚེ་དྲི་ཟའི་སེམས་གཉིས་པོ་ཞེས་རྒྱ་ཆེར་འབྱུང་སྟེ། ཕ་མ་དག་ལོག་པར་འཇུག་པའི་དུས་སུའོ། །འདིས་ནི་ཀུན་ནས་ཉོན་མོངས་པ་ཅན་གྱི་སེམས་ཀུན་ཏུ་སྤྱོད་པ་མེད་པར་སྐྱེ་བའི་སྲིད་པ་མེད་པའི་ཕྱིར་ཡིད་ཀྱི་དབང་པོ་ནི་ཡང་སྲིད་དངོས་པོ་ལ་དངོས་པོ་ལས་རྒྱ་དཔེ་ཅིག་ན་བེ་ཙ་ཟེར་དངོས་པོ་མེད་པའི་ཕྱིར་རོ། མཚམས་སྦྱོར་བ་ལ་ཡང་དབང་བྱེད་དོ་ཞེས་སྟོན་པར་བྱེད་དོ། །གཞན་དག་ནི་འདི་ལ་ཀུན་དགའ་བོ་གལ་ཏེ་རྣམ་པར་ཤེས་པ་མའི་མངལ་དུ་མཇུག་པར་མ་གྱུར་ན་ནི་ཞེས་བྱ་བ་རྒྱ་ཆེར་འབྱུང་བ་ཁུངས་སུ་སྨྲའོ། །དབང་གི་ངོ་བོ་མཐུན་པར་བྱེད་པ་ལ་དབང་བྱེད་པ་ཉིད་ཀྱིས་ནི་དབང་གི་ལུས་དང་ངག་དག་མཐུན་པར་འཇུག་གོ་ཞེས་བྱ་བའི་དོན་ཏོ། །དེ་ཉིད་ལ་ཁུངས་ནི་ཇི་སྐད་དུ་ཞེས་བྱ་བ་རྒྱ་ཆེར་སྨོས་ཏེ། འཇིག་རྟེན་འདི་ནི་སེམས་ཀྱིས་ཁྲིད། །སེམས་ཀྱིས་ཡོངས་སུ་དྲངས་པ་ཡིན། །སེམས་ཀྱི་ཆོས་ནི་གཅིག་པུ་ཡི། །དབང་གི་རྗེས་སུ་ཆོས་ཀུན་འགྲོ། །ཞེས་བྱ་བ་འབྱུང་ངོ༌། །འདིར་འཇིག་རྟེན་ནི་ཉེ་བར་ལེན་པའི་ཕུང་པོ་ལྔ་ལ་བྱ་སྟེ། ཉེ་བར་ལེན་པའི་ཕུང་པོ་ལྔའི་མཚན་ཉིད་ཅན་རྟེན་ཐམས་ཅད་དམ། དབང་པོ་དང་བཅས་པའི་ལུས་ལ་སེམས་དབང་བྱེད་པར་གསུངས་སོ། །གཞན་དག་ན་རེ། སེམས་ཉོན་མོངས་པ་ཐམས་ཅད་ཀྱིས་ཀུན་ནས་ཉོན་མོངས་པར་བྱེད་དོ། །རྣམ་པར་བྱང་བའི་རྒྱུས་རྣམ་པར་བྱང་བར་བྱེད་དོ་ཞེས་གསུངས་པའི་ཕྱིར་ཀུན་ནས་
ཉོན་མོངས་པ་དང་རྣམ་པར་བྱང་བ་དག་ལ་དབང་བྱེད་དོ་ཞེས་ཟེར་རོ། །ལྔ་དང་བརྒྱད་ནི་ལྔ་དང་བརྒྱད་པོ་རྣམས་ཏེ། ལྔ་ནི་ཀུན་ནས་ཉོན་མོངས་པ་དང༌། བརྒྱད་ནི་རྣམ་པར་བྱང་བ་ལ་དབང་བྱེད་དེ། གྲངས་མི་མཉམ་པར་བསྟན་པའི་ཕྱིར་རོ། །དེ་ཉིད་ཀྱི་ཕྱིར་གོ་རིམས་བཞིན་དུ་ཞེས་བྱ་བ་སྨོས་སོ། །དེ་དག་ལ་འདོད་ཆགས་ལ་སོགས་པ་རྒྱས་པར་འགྱུར་བའི་ཕྱིར་རོ་ཞེས་བྱ་བ་ནི་དམིགས་པ་དང་མཚུངས་པར་ལྡན་པའི་སྒོ་ནས་འདོད་ཆགས་ལ་སོགས་བརྒྱས་པར་འགྱུར་བའི་ཕྱིར་ཞེས་བྱ་བའི་དོན་ཏེ། ཇི་སྐད་དུ། ཚོར་བ་བདེ་བ་ལས་ནི་འདོད་ཆགས་རྒྱས་པར་འགྱུར་རོ། །སྡུག་བསྔལ་ལས་ནི་ཞེ་སྡང་ངོ༌། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལས་ནི་གཏི་མུག་གོ །ཞེས་གསུངས་པ་ལྟ་བུའོ། །དེ་ལྟ་མོད་ཀྱི་བཏང་སྙོམས་ནི་ཐམས་ཅད་དང་མཚུངས་པར་ལྡན་པ་དེ་ལྟ་ན་ཡང་འདོད་ཆགས་ཁོ་ན་བདེ་བའོ་ཞེས་ངེས་པར་གཟུང་བར་ཤེས་པར་བྱ་སྟེ། གཏི་མུག་ཀྱང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཉིད་དོ་ཞེས་བྱ་བར་སྐྱོན་མེད་དོ། །དད་པ་ལ་སོགས་པ་རྣམས་ནི་རྣམ་པར་བྱང་བ་ལ་དབང་བྱེད་དེ་ཞེས་བྱ་བ་དེ་ཉིད་ལ་རྒྱུ་སྨོས་པ་ནི། དེ་དག་གིས་རྣམ་པར་བྱང་བར་བྱེད་དོ་ཞེས་བྱ་བ་སྟེ། གང་གི་ཕྱིར་དེ་དག་གིས་རྣམ་པར་བྱང་བར་བྱེད་པ་དེའི་ཕྱིར་དེ་དག་རྣམ་པར་བྱང་བ་ལ་དབང་བྱེད་དོ་ཞེས་བྱ་བ་ནི་རྣམ་པར་དག་པར་བྱེད་དོ་ཞེས་བྱ་བའི་དོན་ཏེ། དེ་སྐད་དུ་ཡང༌། འཕགས་པ་ཉན་ཐོས་དད་པའི་སྒོ་གཏན་ཕུན་སུམ་ཚོགས་པ། བརྩོན་འགྲུས་ཀྱི་དཔུང་ཕུན་སུམ་ཚོགས་པ། དྲན་པའི་སྒོ་སྲུང་ཕུན་སུམ་ཚོགས་པ། སེམས་མཉམ་པར་གཞག་བ་ནི་ཤེས་རབ་ཀྱི་མཚོན་གྱིས་རྣམ་པར་གྲོལ་བར་འགྱུར་རོ་ཞེས་བྱ་བ་དེ་ལྟ་བུ་ལ་སོགས་པ་གསུངས་སོ། །གསུམ་པ་དག་ནི་འདི་དག་ཁོ་ནའི་ནང་དུ་འདུས་སོ། །གཞན་དག་ན་རེ་བདེ་བ་ལ་སོགས་པ་རྣམས་ནི་རྣམ་པར་བྱང་བ་ལ་ཡང་ཞེས་བྱ་བ་ལ། ཡང་གི་སྒྲ་ནི་ཀུན་ནས་ཉོན་མོངས་པ་ལ་ཡང་ངོ་ཞེས་བྱ་བར་རྟོགས་ཏེ། བདེ་བར་གྱུར་བའི་སེམས་མཉམ་པར་འཇོག་གོ །སེམས་མཉམ་པར་གཞག་པས་ཡང་དག་པའི་ལྟ་བ་བཞིན་རབ་ཏུ་ཤེས་སོ། །ཡང་དག་པ་ཇི་ལྟ་བ་བཞིན་རབ་ཏུ་ཤེས་པས་འདོད་ཆགས་དང་བྲལ་
བར་འགྱུར་རོ། །འདོད་ཆགས་དང་བྲལ་བས་རྣམ་པར་གྲོལ་བར་འགྱུར་རོ་ཞེས་བྱ་བ་དེ་ལྟ་བུ་ལ་སོགས་པ་གསུངས་སོ། །དེ་ལྟར་ན་བདེ་བའི་དབང་པོ་རྣམ་པར་བྱང་བ་ལ་ཡང་དབང་བྱེད་དོ། །དད་པ་གང་ལ་སྡུག་བསྔལ་གྱི་རྒྱུ་ཅན་ཏེ་རྒྱུ་ཅན་དུ་ཡོད་པ་དེ་ནི་སྡུག་བསྔལ་གྱི་རྒྱུ་སྟེ། འདིས་ནི་དད་པ་སྡུག་བསྔལ་གྱི་རྒྱུ་ཅན་ཡིན་པའི་ཕྱིར་སྡུག་བསྔལ་གྱི་དབང་པོ་ཡང་རྣམ་པར་བྱང་བ་ལ་དབང་བྱེད་པར་སྟོན་ཏོ། །ངེས་པར་འབྱུང་བ་ལ་བརྟེན་པ་དྲུག་ནི་ངེས་པར་འབྱུང་བ་ལ་དམིགས་པའོ། །ངེས་པར་འབྱུང་བ་ནི་ཟག་པ་དང་བཅས་པ་དང་ཟག་པ་མེད་པའི་ལམ་སྟེ། ཡིད་བདེ་བ་ལ་སོགས་པའོ། །སོགས་པའི་སྒྲས་ནི་ཡིད་མི་བདེ་བ་དང་བཏང་སྙོམས་བཟུང་ངོ༌། །གཟུགས་ལ་སོགས་པ་ཡུལ་གྱི་དབྱེ་བས་ནི་རྣམ་པ་དྲུག་ཏུ་དབྱེ་སྟེ། མདོ་ལས་ཇི་སྐད་དུ། མིག་གིས་ཤེས་པར་བྱ་བའི་གཟུགས་རྣམས་བརྟེན་ནས་ཡིད་བདེ་བ་ངེས་པར་འབྱུང་བ་ལ་བརྟེན་པ། ངེས་པར་འབྱུང་བ་དང་མཐུན་པ་ངེས་པར་འབྱུང་བ་ལ་དམིགས་པ་སྐྱེའོ་ཞེས་བྱ་བ་ནས་དེ་བཞིན་དུ་ཡིད་ཀྱིས་ཤེས་པར་བྱ་བའི་ཆོས་རྣམས་ལ་བརྟེན་ནས་ཡིད་བདེ་བ་ངེས་པར་འབྱུང་བ་ལ་བརྟེན་པ་སྐྱེའོ་ཞེས་བྱ་བའི་བར་དང༌། དེ་བཞིན་དུ་ཡིད་མི་བདེ་བ་དང༌། བཏང་སྙོམས་ཀྱང་བསྡུས་པ་ལྟ་བུའོ། །གཟུགས་ལ་སོགས་པ་རྣམས་ལ་སོ་སོར་རྟོག་པ་ལ་ནི་ཡོངས་སུ་དཔྱོད་པ་སྔོན་དུ་འགྲོ་བ་ཅན་གྱི་ཡིད་བདེ་བ་དགེ་བ་འདོད་ཆགས་དང་བྲལ་བ་དང་མཐུན་པའི་ཕྱིར་ངེས་པར་འབྱུང་བ་ལ་བརྟེན་པ་སྐྱེ་ལ། གཟུགས་ལ་སོགས་པ་དག་གིས་བསླུས་པ་ལ་ནི་ཚུལ་བཞིན་དུ་ཡིད་མི་བདེ་བ་འདོད་ཆགས་དང་བྲལ་བ་དང་མཐུན་པའི་ཕྱིར་ངེས་པར་འབྱུང་བ་ལ་བརྟེན་པའོ། །གཟུགས་ལ་སོགས་པའི་ཡུལ་དག་ལ་སོ་སོར་བརྟགས་ཤིང་བཏང་སྙོམས་སུ་གནས་ཏེ། ཡིད་བདེ་བར་ཡང་མི་འགྱུར་ཡིད་མི་བདེ་བར་ཡང་མི་འགྱུར་བ་ཞེས་བྱ་བ་ནི་ངེས་པར་འབྱུང་བ་ལ་བརྟེན་པའི་བཏང་སྙོམས་ཏེ། འདོད་ཆགས་དང་བྲལ་བ་དང་རྗེས་སུ་མཐུན་པའི་ཕྱིར་རོ། །དེ་ལྟར་ན་ཡིད་བདེ་བ་དང་ཡིད་མི་བདེ་བ་དང་བཏང་སྙོམས་རྣམས་ཀྱང་རྣམ་པར་བྱང་བ་ལ་དབང་བྱེད་དོ་ཞེས་བྱ་བར་ཤེས་སོ་ཞེས་ཟེར་རོ། །ཞེས་བྱ་བ་ནི་བྱེ་བྲག་ཏུ་སྨྲ་བས་ཇི་སྐད་སྨྲས་པའི་དོན་མ་ལུས་པ་རྣམས་ལ་དབང་བྱེད་
པ་མི་སྲིད་པས་སློབ་དཔོན་མ་རངས་པར་སྟོན་པར་བྱེད་དོ། །གཞན་དག་ན་རེ་ཞེས་བྱ་བ་ནི་དཔེ་སྟོན་པ་རྣམས་སོ། །རྣམ་པར་ཤེས་ནས་ཡང་བ་ཡོངས་སུ་སྤང་བའི་ཕྱིར་ཞེས་བྱ་བ་ལ། དེ་ལ་གནོད་པ་བྱུང་བ་ཡོངས་སུ་གཅོད་པས་རྣམ་པར་ཤེས་པ་ཡང་བ་སྤོང་གི་མིག་དང་རྣ་བ་དག་གིས་ནི་ལུས་སུ་བསྲུང་བ་མ་ཡིན་ཏེ། འདི་ལྟར་མ་བྱུང་བ་ནི་མཐོང་ཞིང་ཐོས་ཀྱང་ཡོངས་སུ་མི་སྤོང་ངོ༌། །གལ་ཏེ་ལུས་ཡོངས་སུ་བསྲུང་བ་མ་ཡིན་ན། དེ་དག་གང་ལ་དབང་བྱེད་ཅེ་ན། དེ་གཉིས་རྣམ་པར་ཤེས་པ་ལ་ནི་དབང་བྱེད་དོ་ཞེས་བྱ་བ་གསུངས་ཏེ། ནའི་སྒྲ་ནི་རྣམ་པར་ཤེས་པ་ཁོ་ན་ལའོ་ཞེས་ངེས་པར་གཟུང་བའི་ཕྱིར་རོ། །གལ་ཏེ་མིག་གིས་མཐོང་ངོ་རྣ་བས་ཐོས་སོ་ཞེས་བྱ་བ་མ་ཡིན་ནམ་ཞེ་ན། དེའི་ཕྱིར་གཟུགས་མཐོང་བ་དང་སྒྲ་ཐོས་པ་དག་ལ་ཡང་ཐུན་མོང་མ་ཡིན་པའི་རྒྱུ་གཉིས་ལ་དབང་བྱེད་པར་ཤེས་པ་མ་ཡིན་པ་ཉིད་དོ། །དེ་ལྟ་ན་ལུས་ཡོངས་སུ་བསྲུང་བ་ལ་དབང་བྱེད་པ་མི་འགལ་ལོ། །གང་དག་གི་ལྟར་ན་རྣམ་པར་ཤེས་པ་ཁོ་ནས་མཐོང་བ་དང་ཐོས་པ་དེ་དག་གི་ལྟར་ན་ལུས་བསྲུང་བ་ལ་མིག་དང་རྣ་བ་དག་དབང་བྱེད་པ་འགལ་ལོ། །དེའི་ཕྱིར་རྣམ་པར་ཤེས་པ་ལས་གཞན་པ་གཟུགས་མཐོང་བའམ་སྒྲ་ཐོས་པ་མེད་པ་དེའི་ཕྱིར་ཞེས་བྱ་བ་རྒྱ་ཆེར་གསུངས་ཏེ། གལ་ཏེ་མིག་གིས་མཐོང་ངོ་རྣ་བས་ཐོས་སོ་ཞེས་བྱ་བ་དེ་ཡང་རྣམ་པར་ཤེས་པའི་རྟེན་གྱི་ངོ་བོ་ཡིན་པས་མཐོང་བ་དང་ཐོས་པར་བཤད་དོ། །དེའི་ཕྱིར་དེ་ལ་དེ་ཉིད་དབང་བྱེད་པར་མི་འགྱུར་ཏེ། གང་ཞིག་མཐོང་བ་ལ་སོགས་པའི་བྱེད་པ་ལ་ཡོད་པ་བྱ་བའི་དུས་སུ་དེ་མི་གནས་པའི་ཕྱིར་རོ། །གཟུགས་མཐོང་བའི་ཕྱིར་རོ་ཞེས་བྱ་བ་ཡང་གཟུགས་ལ་སོགས་པ་སྨོས་པ་ལས་གཞན་མ་ཡིན་ཏེ་གཟུགས་ལ་སོགས་པ་སྨོས་པ་ཡང་རྣམ་པར་ཤེས་པ་ཉིད་ཀྱིས་སོ། །རྣམ་པར་ཤེས་པ་ལས་གཞན་པས་གཟུགས་ལ་སོགས་པ་མཐོང་བ་མ་ཡིན་ནོ། །ལུས་མཛེས་པ་ལ་རྟེན་ཁོ་ན་དབང་བྱེད་ཀྱི། དབང་པོ་ལས་འདས་པའི་ཕྱིར་དབང་པོ་རྣམས་མ་ཡིན་ཏེ། འདི་ཡང་མཛེས་པར་བྱ་བའི་དོན་དང་ཚིག་གི་དོན་དུ་རྟེན་ཁོ་ནས་ཚིག་གི་ཞེས་སྔར་བཤད་ཟིན་པས་ཉེ་བར་མ་བཀོད་དོ། །སྣ་ལ་སོགས་པ་རྣམས་ཀྱིས་ཀྱང་ལུས་ཡོངས་སུ་བསྲུང་བ་ཉིད་མ་ཡིན་
ཏེ། དབང་པོ་རྣམས་ཀྱིས་གནོད་པར་འགྱུར་བའི་ཁམ་གྱི་ཟས་ཀྱང་ཡོངས་སུ་ལོངས་སྤྱོད་པའི་ཕྱིར་རོ། །ཡིད་ཀྱི་དབང་པོ་ཡང༌། ཡང་སྲིད་ཉིད་མཚམས་སྦྱོར་བ་ལ་དབང་གི་ངོ་བོ་དང་མཐུན་པར་འཇུག་པ་མ་ཡིན་ཏེ། ལས་དང་ཉོན་མོངས་པའི་དབང་གིས་ཡང་སྲིད་ཉིང་མཚམས་སྦྱོར་བའི་ཕྱིར་དང༌། འཕགས་པ་རྣམས་དེའི་དབང་གིས་མི་འཇུག་པའི་ཕྱིར་རོ། །འདི་ལ་དོན་རྣམས་ཀྱང་དབང་བྱེད་པ་མ་ཡིན་ནམ་ཞེན་ཞེས་བྱ་བ་ལ། ཇི་ལྟར་དབང་པོ་མེད་པར་དམིགས་པ་མི་འགྱུར་བ་དེ་ལྟར་དོན་མེད་པར་ཡང་ཞེས་བྱ་སྟེ། འོན་ཀྱང་དབང་པོ་བཞིན་ནོ། །དེ་ལ་དབང་བྱེད་ཀྱི་དོན་ལ་དབང་བྱེད་པ་ནི་མ་ཡིན་ནོ། །ལྷག་པར་གཙོ་བོར་བྱེད་པ་ནི་དབང་བྱེད་པ་སྟེ་དབང་བྱེད་པ་དང་གཙོ་བོ་ཉིད་དག་རྣམ་གྲངས་ཡིན་ནོ། །གཙོ་བོ་ཉིད་ནི་དེའི་རྒྱུ་དང་འབྲས་བུ་འབྲེལ་པར་སྐྱེ་བས་དེའི་ཕྱིར་བདག་པོ་ཉིད་ཀྱི་དོན་ཏོ། །ལྷག་པར་དབང་བྱེད་པ་ནི་མ་ཡིན་ཏེ། དེ་ལ་ལྷག་པར་དབང་བྱེད་པ་མེད་པའི་ཕྱིར་རོ། །ཡང་ལྷག་པར་དབང་བྱེད་པའི་དོན་གང་ཡིན་པ་མེད་པ་ཅི་ཞེ་ན། གཟུགས་ཐམས་ཅད་དམིགས་པར་བྱ་བ་ལ་ཞེས་རྒྱ་ཆེར་འབྱུང་སྟེ། གསལ་བ་དང་མི་གསལ་བ་ལ་སོགས་པའི་རྗེས་སུ་བྱེད་པའི་ཕྱིར་ཞེས་བྱ་བ་ལ། སོགས་པའི་སྒྲས་ནི་འཁྲུགས་པ་དང་མ་འཁྲུགས་པ་དང་རིག་པ་དང་མི་རིགས་པའི་རྗེས་སུ་བྱེད་པ་གཟུང་ངོ༌། །དེ་ལས་བཟློག་པ་ཡིན་པའི་ཕྱིར་གཟུགས་ཀྱི་ནི་མ་ཡིན་ཏེ་ཞེས་བྱ་བ་ལ། གཟུགས་ཐམས་ཅད་དམིགས་པ་ལ་མིག་བཞིན་དུ་གཟུགས་ནི་མ་ཡིན་ཏེ། ཐུན་མོང་བའི་རྒྱུར་ཡིད་ཆེས་ཤིང་ངེས་པའི་གཟུགས་དམིགས་པའི་རྒྱུ་ཡིན་པའི་ཕྱིར་དམིགས་པ་དེ་ལ་གསལ་བ་དང་མི་གསལ་བའི་བྱེད་པ་མི་འཇུག་གོ །དེའི་ཕྱིར་གཟུགས་ལ་སོགས་པ་ལ་དབང་བྱེད་ཀྱི་གཟུགས་ནི་མ་ཡིན་ནོ། །ཡིད་ཆོས་རྣམས་ལ་དབང་བྱེད་པའི་བར་དུ་ཡང་དེ་བཞིན་དུ་སྦྱར་རོ་ཞེས་བྱ་བ་ལ། རྣ་བ་དང་སྣ་དང་ལྕེ་དང་ལུས་དང་ཡིད་རྣམས་སྒྲ་དང་དྲི་དང་རོ་དང་རེག་བྱ་དང་ཆོས་རྣམས་དམིགས་པ་ལ་ལྷག་པར་དབང་བྱེད་པ་ཡིན་ཏེ། སྒྲ་ལ་སོགས་པ་ཐམས་ཅད་དམིགས་པའི་ཐུན་མོང་བའི་རྒྱུ་ཡིན་པའི་ཕྱིར་རོ། །གསལ་བ་དང་མི་གསལ་བ་ལ་སོགས་པའི་རྗེས་སུ་བྱེད་པའི་ཕྱིར་དམིགས་ཏེ། དེ་
ལས་བཟློག་པའི་ཕྱིར་སྒྲ་ལ་སོགས་པ་རྣམས་ལ་མ་ཡིན་ཏེ། དེ་མཚུངས་རྣམས་དབང་པོ་མ་ཡིན་པར་ཐལ་བའི་ཕྱིར་རོ། །སློབ་དཔོན་འདུས་བཟང་ན་རེ་འདི་ནི་མི་རིགས་ཏེ། དེ་མཚུངས་རྣམས་ཀྱིས་དབང་བྱེད་པ་མེད་དེ། དེ་དག་གིས་རྣམ་པར་ཤེས་པ་མི་སྐྱེད་པའི་ཕྱིར་རོ་ཞེས་ཟེར་རོ། །འོ་ན་རྒྱུ་གཞན་མ་ཚང་བའི་ཕྱིར་ཞེས་བྱ་བ་ཅི་ཞེ་ན། དེ་ལ་དབང་པོ་མ་ཡིན་པར་ཐལ་བ་མེད་དེ། རྟེན་པ་དང་བཅས་པའི་རིགས་ཡིན་པའི་ཕྱིར་དེ་ཡང་དབང་པོ་ཞེས་བྱའོ། །དེ་མ་ཡིན་ན་ཁམས་གསུམ་པའི་འདོད་ཆགས་བྲལ་བའི་ཡིད། ཡང་སྲིད་མཚམས་སྦྱོར་བ་ལ་དབང་གི་ངོ་བོ་དང་མཐུན་པར་འཇུག་པ་མི་ལྡན་པའི་ཕྱིར་དབང་པོ་མ་ཡིན་པ་ཉིད་དུ་འགྱུར་རོ། བྱེ་བྲག་ཏུ་སྨྲ་བ་ལ་ནི་དེ་མཚུངས་དབང་པོ་མ་ཡིན་པར་ཐལ་བ་ཉིད་དོ། །རྟེན་གཟུང་བར་བྱ་བ་ཉིད་ཀྱིས་དབང་བྱེད་པར་ཡང་བརྗོད་པ་ནི་ལྷག་མ་གསུམ་པ་མེད་ན་ཡང་འདི་ལ་སྐྱོན་མེད་དོ། །གནས་ཁོ་ན་རྟེན་དུ་གཟུང་བ་ཉིད་ཡིན་ན་ཡང་དབང་པོ་མ་ཡིན་པར་མ་བརྟེན་པའི་ཕྱིར་དབང་པོ་མ་ཡིན་པར་ཐལ་བ་བཟློག་པར་དཀའོ། །གང་བཤད་པ། མིག་ཐམས་ཅད་གཟུགས་ཐམས་ཅད་དམིགས་པར་བྱ་བ་ལ་ཐུན་མོང་གི་རྒྱུ་མ་ཡིན་ཏེ་སྐད་ཅིག་པ་ཡིན་པའི་ཕྱིར་ཞེ་ན། དེ་ནི་དེ་ལྟ་མ་ཡིན་ཏེ། གང་གི་ཕྱིར་ཐམས་ཅད་ཉིད་རྣམ་པར་སྨིན་པ་ལས་སྐྱེས་པའམ་རྒྱས་པ་ལས་བྱུང་བའི་མིག་སྐད་ཅིག་མ་ཉིད་ལ་སྐད་ཅིག་སོ་སོར་གཟུགས་ཐམས་ཅད་དམིགས་པའི་རྒྱུའི་དངོས་པོའི་རྗེས་སུ་འགྲོ་སྟེ། གང་ཡང་དམིགས་པའི་ཡུལ་བཟུང་བས་ལྷན་ཅིག་བྱེད་པའི་རྒྱུ་ཉིད་ཀྱིས་དེ་སྐྱེད་པར་བྱེད་དེ། དེ་ཡུལ་གྱི་དངོས་པོར་གཞན་གྱིས་མ་ཡིན་པ་དེའི་ཕྱིར། གཟུགས་ཐམས་ཅད་དམིགས་པ་སྐྱེད་པར་ནུས་པའི་ཕྱིར། སྐད་ཅིག་སོ་སོར་གཟུགས་ཐམས་ཅད་དམིགས་པ་ལ་ཐུན་མོང་གི་རྒྱུ་ཉིད་ཅེས་བཤད་དོ། །གཟུགས་སེར་པོ་མིག་གིས་མཐོང་བ་ཡང་འགའ་ཞིག་གི་ཚེ་སྔོན་པོ་དམིགས་པའི་རྒྱུར་འགྱུར་བ་དེ་ལྟ་བུ་ནི་མ་ཡིན་ནོ། །མིག་དང་གཟུགས་མཉམ་པ་ཉིད་མེད་དོ། །གང་བཤད་པ། རྗེས་སུ་བྱེད་པ་ལ་ཡང་རྒྱུ་མེད་པར་སྐྱེ་བ་ལ་རྗེས་སུ་བྱེད་པའི་ཕྱིར་མ་སྐྱེས་པ་སྐྱེས་པའི་ཕྱིར་མཚུངས་པ་ལ་དབང་བྱེད་པས། གང་ཡང་རུང་
བ་ཞིག་མ་ཚང་ན་མི་སྐྱེའོ་ཞེས་བྱ་བ་འདི་ཡང་རིགས་པ་མ་ཡིན་ཏེ། མ་སྐྱེས་པའི་རྗེས་སུ་བྱེད་པ་མ་ཡིན་པའི་གནས་སྐབས་མེད་པའི་ཕྱིར་མིག་གི་དབང་པོ་ཡང་དེའི་རྒྱུ་ཉིད་དུ་ཐལ་བའི་ཕྱིར་རོ། །དེའི་ཕྱིར་དབང་པོ་ལས་བྱུང་བ་རྣམ་པར་ཤེས་པའི་བདག་ཉིད་དུ་གྱུར་པ་ཁོ་ན་བསལ་བ་དང་མི་གསལ་བ་ལ་སོགས་པའི་ཁྱད་པར་དུ་འགྱུར་རོ། །གང་ཞིག་དབང་པོ་མ་ཡིན་པའི་རྗེས་སུ་བྱེད་པ་ཞེས་བྱ་བ་དེ་ལྟར་ན་དམིགས་པ་ལས་བྱུང་བའི་རྣམ་པར་ཤེས་པ་དེ་མི་སྣང་བའི་བདག་ཉིད་དུ་གྱུར་པ་ཡིན་ནོ། །གང་གིས་དེ་ཡུལ་རྣམ་པར་ཤེས་པར་བྱེད་དོ་ཞེས་བྱ་བ་ཡང་དེའི་རྣམ་པ་སྐྱེ་བ་དང་མི་སྐྱེ་བ་ལས་གཞན་རྣམ་པར་ཤེས་པའི་བྱ་བ་ཡོད་པ་མ་ཡིན་ཏེ། དེའི་ཕྱིར་རྒྱུ་ཁོ་ན་འདིར་རྗེས་སུ་བྱེད་པའོ་ཞེས་ཤེས་པར་བྱའོ། །གང་བཤད་པ་དམིགས་པའི་རྟེན་གྱི་རྗེས་སུ་བྱེད་པ་ཉིད་ཀྱིས་མིག་གིས་ལུས་ཡོངས་སུ་བསྲུང་བ་གཙོ་བོར་མ་གྲུབ་སྟེ། གཙོ་བོ་མ་ཡིན་པ་གཙོ་བོའི་རྗེས་སུ་བྱེད་པའི་ཕྱིར་རོ། །འདི་ཡང་ཤེས་པར་བྱེད་པ་དོན་གཞན་མ་ཡིན་པའི་ཕྱིར། འདིར་ནི་ཡུལ་དང་དབང་པོ་དག་གཙོ་བོ་མ་ཡིན་པ་གཞན་གྱི་རྗེས་སུ་བྱེད་པར་ཤེས་པར་བྱའོ། །ལུས་ཡོངས་སུ་བསྲུང་བ་ནི་གཙོ་བོ་མ་ཡིན་པའི་ཕྱིར་རོ། །གང་ཡང་དམིགས་པའི་རྟེན་ཡོད་ཀྱང་ཡང་བ་མ་མཐོང་བས་པྲསྠ་ལ་ལྟུང་བ་ནམ་ཞེས་བཤད་པ་འདི་ནི་མཐོང་བ་དང་ཐོས་པ་དག་ལ་ཡང་མཚུངས་སོ། །གང་སྔར་བཤད་པའི་དོན་བཅུ་གཅིག་ཁོ་ན་འདིར་ཡང་བཤད་པ་ནི། དེའི་དོན་ངེས་པར་གཟུང་བའི་ཕྱིར་སླར་ཡང་བརྗོད་པ་སྟེ། ལུས་ཡོངས་སུ་བསྲུང་བ་ལ་སོགས་པ་ལ་མིག་ལ་སོགས་པ་རྣམས་དབང་བྱེད་པར་སྦྱར་རོ། །ལུས་ཀྱི་དབང་པོ་ཁོ་ན་ལས་ཞེས་བྱ་བ་རྒྱ་ཆེར་འབྱུང་བ་ལ། རེག་བྱའི་ཡུལ་ཅན་ཡིན་པའི་ཕྱིར་ལུས་ཀྱི་དབང་པོ་ལས་གཞན་མ་ཡིན་ཞེས་བྱ་བར་ཤེས་སོ། །གཞན་ཉིད་ཡིན་ན་ནི་མིག་ལ་སོགས་པ་བཞིན་དུ་རེག་བྱའི་ཡུལ་ཅན་དུ་མི་འགྱུར་རོ། །ལུས་ཀྱི་རྣམ་པར་ཤེས་པའི་རྟེན་ཡིན་པའི་ཕྱིར་ཡང་ལུས་ཀྱི་དབང་པོ་ལས་གཞན་མ་ཡིན་ཏེ། གཞན་ཉིད་ཡིན་ན་ནི་མིག་ལ་སོགས་པ་ལྟར་མི་ལུས་ཀྱི་རྣམ་པར་རྟོག་པའི་བར་དུ་མི་འགྱུར་རོ། །དེའི་ཕྱིར་འདོད་པ་ན་སྤྱོད་པའི་ལུས་ཀྱི་དབང་པོའི་ཕྱོགས་ཡིན་ཏེ།
འདོད་ཆགས་དང་ལྷན་ཅིག་སྐྱེས་པའི་ལུས་ཀྱི་རྣམ་པར་ཤེས་པ་ཉོན་མོངས་པ་ཅན་ཁོ་ནའི་རྟེན་དུ་གྱུར་པ་གང་ཡིན་པའོ། །མོ་ཉིད་ལ་དབང་བྱེད་པའི་ཕྱིར་དང༌། ཕོ་ཉིད་ལ་དབང་བྱེད་པའི་ཕྱིར་ན་མོའི་དབང་པོ་དང་ཕོའི་དབང་པོ་རྣམ་པར་གཞག་གོ །མོ་ཉིད་ནི་མོའི་ངོའི་བོའོ། བསམ་པ་ལ་ཡང་ངོ་བོ་ཞེས་བྱ་བ་སྟེ། དེའི་ཕྱིར་བུད་མེད་ཀྱི་ཆ་བྱད་དང་ཞེས་བྱ་བ་སྨོས་སོ། །ཁ་ཅིག་ཆ་བྱད་ཀྱང་དོན་གཞན་ཡིན་པར་སེམས་པ་དེའི་ཕྱིར་ང་རོ་དང་གཡོ་བ་དང་བསམ་པ་དག་སྟེ་ཞེས་བྱ་བ་སྨོས་སོ། །འདི་ཉིད་རྣམ་པར་དཔྱད་པར་བྱ་བའི་ཕྱིར། དེ་ནི་མོའི་མོ་ཉིད་ཡིན་ནོ་ཞེས་བྱ་བ་སྨོས་ཏེ། ཇི་ལྟར་ཁ་ཅིག་རྟོག་པར་བྱེད་པ་ལྟར་བུད་མེད་ཀྱི་སྐལ་བ་མཉམ་པའི་མཚན་ཉིད་དོན་གཞན་ནི་མ་ཡིན་ནོ། །ཕོའི་ངོ་བོ་ནི་ཕོའི་ཆ་བྱད་དང་ཞེས་བྱ་བ་འདིར་ཡང་བཤད་ཟིན་པའི་རྗེས་སུ་འབྲངས་ཏེ་བརྗོད་པར་བྱའོ། །དེ་ལ་བུད་མེད་ཀྱི་བསམ་པ་ནི་སྐྱེས་པའི་ཡུལ་ཅན་ཏེ་བུད་མེད་ནི་སྐྱེས་པའི་བསམ་པ་ཅན་ནོ་ཞེས་འབྱུང་བའི་ཕྱིར་རོ། ཕོའི་བསམ་པ་ནི་བུད་མེད་ཀྱི་ཡུལ་ཅན་སྐྱེས་པ་དག་ནི་བུད་མེད་ཀྱི་ཡུལ་ཅན་ཡིན་པའི་ཕྱིར་རོ་ཞེས་འབྱུང་བའི་ཕྱིར་རོ། །ཕོ་དང་མོ་གཉིས་ཀྱི་ང་རོ་ཡང་ཐ་དད་དེ་འདི་ལྟར་མ་མཐོང་བར་ཕོའམ་མོར་སྐད་ཀྱིས་ཤེས་པར་འགྱུར་རོ། གཡོ་བ་དང་འཕྲོས་ལ་སོགས་པ་ཡང་ཕོ་དང་མོ་རྣམས་ལ་ཕན་ཚུན་མཚན་ཉིད་མི་མཐུན་པར་དམིགས་སོ། །འདིར་ཡང་ང་རོ་དང་གཡོ་བ་དང་བསམ་པ་རྣམས་སོ། །བུད་མེད་དང་སྐྱེས་པའི་དབང་པོ་དབྱེ་བ་ཐ་དད་པ་ལ་རྒྱུད་གཞན་དམིགས་པ་མ་ཡིན་ཏེ། སེམས་ཅན་གྱི་དབྱེ་བ་ལས་མོ་ཉིད་དང་ཕོ་ཉིད་རྒྱུ་མཚན་དེ་ཉིད་ལས་མོ་དང་ཕོའི་མིང་འཇུག་གོ །ནུ་མ་ལ་སོགས་པའི་དབྱིབས་ནི་འཁྲུལ་བའི་ཕྱིར་མ་ཡིན་ཏེ། སེམས་ཅན་གྱི་ཁྱད་པར་ནི་མོ་དང་ཕོའི་དབང་བོས་བྱས་པ་ཉིད་དོ། །སློབ་དཔོན་འདུས་བཟང་ན་རེ་འདི་ཡང་སྔ་མ་དང་རྣམ་གྲངས་ཀྱིས་འཇུག་སྟེ་དེའི་ཕྱོགས་གཅིག་སྨོས་པའི་ཕྱིར་རོ། །གལ་ཏེ་ཡང་མི་འཇུག་པ་དེ་ལྟ་ན་སླར་ཡང་ངེས་པའི་དོན་དུ་ཅི་སྟེ་བརྗོད་པར་བྱེད་ཅེས་ཟེར་རོ། །སྲོག་གི་དབང་པོ་ནི་རིས་མཐུན་པར་གནས་པར་བྱ་ཞེས་རྒྱ་ཆེར་འབྱུང་བ་ལ། གནས་པ་ནི་འདིར་རྒྱུན་རྗེས་སུ་འཇུག་པ་སྟེ། འདི་ལྟར་
གཟུགས་མེད་པའི་ཁམས་ན་དགེ་བ་དང་ཉོན་མོངས་པ་ཅན་གྱི་སེམས་དང་ལྡན་པ་རྣམས་ཀྱང་སྲོག་གི་དབང་པོའི་མཐུ་ལས་རིས་མཐུན་པ་རྗེས་སུ་འཇུག་ལ། སྲོག་གི་དབང་པོ་འགགས་ན་འགག་བར་འགྱུར་རོ། །གལ་ཏེ་འགྲོ་བ་ཟས་ཀྱིས་གནས་པ་ཡིན། །ཞེས་བྱ་བ་ཟས་དག་ཀྱང་དབང་པོ་ཉིད་དུ་ཐལ་བར་འགྱུར་བ་མ་ཡིན་ནམ་ཞེ་ན་མ་ཡིན་ཏེ་མེད་ཀྱང་གནས་པའི་ཕྱིར་ཏེ། གཟུགས་དང་གཟུགས་མེད་པར་སྐྱེས་པ་རྣམས་ནི་ཁམ་གྱི་ཟས་མེད་ཀྱང་རིས་མཐུན་པར་རྗེས་སུ་འཇུག་པ་ཡིན་ནོ། །དེ་བཞིན་དུ་འགོག་པའི་སྙོམས་པར་འཇུག་པ་དང༌། འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་པ་རྣམས་དང༌། འདུ་ཤེས་མེད་པ་པ་མངོན་དུ་གྱུར་པ་རྣམས་རེག་པ་དང་སེམས་པ་དང་རྣམ་པར་ཤེས་པ་མེད་ཀྱང་རིས་མཐུན་པར་རྗེས་སུ་འཇུག་པ་མཐོང་ཞིང་སྲོག་གི་དབང་པོ་མེད་པར་ནི་མ་ཡིན་ནོ། །དེའི་ཕྱིར་རིས་མཐུན་པར་གནས་པ་ལ་དབང་བྱེད་པའི་ཕྱིར་ན་སྲོག་གི་དབང་པོ་ཁོ་ན་དབང་པོ་ཉིད་ཡིན་གྱི་ཟས་རྣམས་ནི་མ་ཡིན་ནོ། །རིས་མཐུན་པར་འབྲེལ་པ་ལ་ནི་སྲོག་གི་དབང་པོ་དབང་བྱེད་པ་མ་ཡིན་ཏེ། དེ་དང་ལྷན་ཅིག་སྐྱེས་པའི་ཕྱིར་རིས་མཐུན་པར་འབྲེལ་བ་ལ་ནི་ལས་དང་ཡིད་དག་དབང་བྱེད་དོ། །སློབ་དཔོན་འདུས་བཟང་ན་རེ་འདི་ཡང་རྣམ་གྲངས་སྔ་མ་དང་ཁྱད་པར་མེད་ན་རྩོམ་པ་དོན་མེད་པར་འགྱུར་ཏེ། དེ་ཡང་དོན་ངེས་པར་མ་གཟུང་བའི་ཕྱིར་རོ་ཞེས་སོ། །ཚོར་བ་རྣམས་ནི་ཀུན་ནས་ཉོན་མོངས་པར་བྱ་བ་ལ་དབང་བྱེད་དེ་ཞེས་བྱ་བ་ལ། གལ་ཏེ་འདི་ཡང་བྱེ་བྲག་ཏུ་སྨྲ་བ་དང་མཚུངས་པ་དེ་ལྟ་ན་ཡང༌། བརྩམས་པ་ནི་བདེ་བ་ལ་སོགས་པ་ནི་རྣམ་པར་བྱང་བ་ལ་ཡང་དབང་བྱེད་དོ་ཞེས་པ་བསལ་བའི་ཕྱིར་རོ། །ལྷག་པར་དབང་བྱེད་པ་ཉིད་ནི་དབང་བྱེད་པ་ཡིན་གྱི་རྒྱུ་ཙམ་ནི་མ་ཡིན་ལ། ཚོར་བ་རྣམས་ཀྱང་ཀུན་ནས་ཉོན་མོངས་པ་ལ་ལྷག་པར་དབང་བྱེད་ཀྱི་རྣམ་པར་བྱང་བ་ལ་ནི་མ་ཡིན་པས་དེ་དག་ནི་ཀུན་ནས་ཉོན་མོངས་པ་ཁོ་ན་ལ་དབང་བྱེད་དོ། །དེ་ཉིད་བསྟན་པར་བྱ་བའི་ཕྱིར། འདི་ལྟར་མདོ་ལས། ཚོར་བ་བདེ་བ་ལས་ནི་འདོད་ཆགས་རྒྱས་པར་འགྱུར། །ཞེས་བྱ་བ་ལ་སོགས་པ་སྨོས་ཏེ། དམིགས་པས་རྒྱས་པ་ནི་འཁྲུལ་པའི་ཕྱིར་མཚུངས་པར་ལྡན་པའི་སྒོ་ནས་སོ། །དེ་ལྟར་རྟོགས་པར་བྱ་བ་
ཡིན་མོད་ཀྱི་བཏང་སྙོམས་ནི་ཐམས་ཅད་དང་མཚུངས་པར་ལྡན་བ་དེ་ལྟ་ན་ཡང་སྔར་བཤད་པ་ངེས་པར་གཟུང་བའི་ཕྱིར་སྐྱོན་མེད་དོ། །དད་ལ་སོགས་པ་ལྔ་པོ་དག་ནི་ཞེས་བྱ་བ་ལ། འདིས་རྣམ་པར་བྱང་བར་བྱེད་པས་ན་རྣམ་པར་བྱང་བ་སྟེ་ལམ་མོ། །འདི་ལྟར་དེ་དག་གིས་ཞེས་བྱ་བ་རྒྱ་ཆེར་འབྱུང་བ་ལ། གང་གི་ཕྱིར་དེ་དག་གིས་ཏེ། དྲན་པ་ཉེ་བར་གཞག་པ་དང་དྲོ་བར་གྱུར་བའི་གནས་སྐབས་དག་གིས་ལམ་སྐྱེ་བའི་གེགས་སུ་གྱུར་པའི་ཉོན་མོངས་པ་རྣམས་ཀྱང་རྣམ་པར་གནོན་ལ། སྐལ་བ་མཉམ་པའི་རྒྱུ་མེད་པར་དེའི་སྟོབས་ཀྱིས་ལམ་བསྐྱེད་པའི་ཕྱིར་ཆེས་མཆོག་གི་གནས་སྐབས་དག་གིས་ནི་ལམ་ཡང་འདྲེན་པར་བྱེད་དེ། །དེ་དག་ཁོ་ན་རྣམ་པར་བྱང་བ་ལ་དབང་བྱེད་ཀྱི། རྣམ་པར་བྱང་བའི་བདག་ཉིད་ཡིན་པའི་ཕྱིར་ཀུན་ཤེས་པར་བྱེད་པའི་དབང་ལ་སོགས་པ་དག་གིས་ནི་མ་ཡིན་ནོ་ཞེས་ངེས་པར་བྱ་བའི་ཕྱིར་ཡང་སྨོས་སོ། །དེ་བཞིན་ཞེས་བྱ་བའི་སྒྲ་ནི་ཇི་ལྟར་མིག་ལ་སོགས་པ་ནས་དད་པ་ལ་སོགས་པའི་མཐར་ཐུག་པ་རྣམས་སོ་སོར་དབང་པོ་ཡིན་པ་དེ་བཞིན་དུ་ཀུན་ཤེས་པར་བྱེད་པ་ཞེས་བྱ་བ་དང༌། ཀུན་ཤེས་པ་ཞེས་བྱ་བ་དང་ཀུན་ཤེས་ལྡན་པ་ཞེས་བྱ་བ་ཡང་སོ་སོར་དབང་པོ་ཡིན་ནོ་ཞེས་བསྟན་པར་བྱ་བའི་ཕྱིར་རོ། །གལ་ཏེ་དབང་བྱེད་པ་ཐ་དད་པ་ཉིད་ཀྱིས་སོ་སོར་དབང་པོ་ཉིད་དུ་ཤེས་པ་མ་ཡིན་ནམ་ཞེན། རྫས་ཐ་མི་དད་པས་ཐེ་ཚོམ་ཟ་བ་བསལ་བར་བྱ་བའི་ཕྱིར་དེ་བཞིན་ཞེས་བྱ་བའི་སྒྲ་རབ་ཏུ་སྦྱར་རོ། །སློབ་དཔོན་འདུས་བཟང་ན་རེ། མཐོང་བའི་ས་ལ་སོགས་པའི་དབྱེ་བས་ཕྱེ་བ་རྣམས་ཕན་ཚུན་བསྡུས་པ་ལས་དགོས་པར་འགྱུར་བས་སོ་ཞེས་སོ། །བར་ཆད་མེད་པ་དང་རྣམ་པར་གྲོལ་བའི་ལམ་གྱི་དབྱེ་བས་ཕྱེ་བ་རྣམས་ཕན་ཚུན་བསྡུས་པའི་ཕྱིར་དགོས་པའི་སྐབས་ཡོད་པས། གང་ཡང་དགུ་པོ་རྣམས་གཞན་མ་ཡིན་པ་ཉིད་ལ་དབང་བྱེད་པའི་དབྱེ་བས་འདི་དབང་པོ་གཅིག་ཉིད་དུ་འགྱུར་བ་མཐོང་བ་མ་ཡིན་ནོ། །ཕོ་དང་མོའི་དབང་པོ་དག་ཕན་ཚུན་བསྡུས་པའི་ཕྱིར་ཞེས་བྱ་བ་འདི་ཡང་མི་རིགས་ཏེ། དགུ་པོ་ལས་གཞན་མ་ཡིན་པའི་ཕྱིར་དང༌། དབང་བྱེད་པའི་དབྱེ་བས་གཅིག་ཉིད་དུ་བསྟན་པ་ལས་དགོས་པའི་གནས་ཉིད་ཀྱི་ཕྱིར་དང༌། དེ་རྣམ་པར་གཅད་པའི་ཕྱིར་དེ་བཞིན་
གྱི་སྒྲ་རབ་ཏུ་སྦྱར་རོ། །དབང་བྱེད་པའི་དབྱེ་བས་ཀྱང་གཅིག་ཉིད་དུ་ཁས་བླངས་པས། དེའི་ཕྱིར་འདི་ནི་མངོན་པར་ཞེན་པས་རྣམ་པར་གླལ་བའོ། །གང་ཡང་ཁོ་བོ་ཅག་གིས་སྨྲས་པ་དེ་བཞིན་གྱི་སྒྲ་ནི་རང་བཞིན་ཐ་དད་པ་གསུམ་བསྟན་པའི་ཕྱིར་ཞེས་བྱ་བ་སྟེ། མཐོང་བསྒོམ་མི་སློབ་ལམ་ལ་དགུ། །གསུམ་ཡིན་ཞེས་གསུངས་པའི་ཕྱིར་རོ། །རང་བཞིན་ཐ་དད་པ་ཉིད་མ་གྲུབ་པ་ལ་དོན་དུ་མ་དོན་མེད་པ་ཅན་ཏེ། དེ་ལ་དེ་བཞིན་གྱི་སྒྲ་མི་རྩོམ་པར་དེ་བཞིན་གྱི་སྒྲ་ཉིད་ཀྱིས་བསྟན་པའི་ཕྱིར་རོ། །ཡང་ན་སོ་སོར་དབང་པོ་ཞེས་བྱ་བ་ལ། ཀུན་ཤེས་པའི་དབང་པོ་ལ་སོགས་པའི་ཚོགས་པའི་བདག་ཉིད་བཟློག་སྟེ། མཐོང་བ་དང་སྒོམ་པ་དང་མི་སློབ་པའི་ལམ་རྣམས་ལ་ཐ་དད་པ་ལ་སོགས་པའི་དབང་པོ་རྣམས་སོ་སོར་ཀུན་ཤེས་པར་བྱད་པ་དང༌། ཀུན་ཤེས་པ་དང་ཀུན་ཤེས་པ་དང་ལྡན་པའི་དབང་པོ་ཞེས་བྱ་བར་རྣམ་པར་གཞག་པར་བྱ་སྟེ། དེའི་ཚོགས་པ་མིག་གི་དབང་པོའི་རྡུལ་ཕྲ་རབ་ལྟ་བུ་ནི་མ་ཡིན་ནོ། །དེ་ལ་ཀུན་ཤེས་པར་བྱེད་པའི་དབང་པོ་ནི་ཀུན་ཤེས་པའི་དབང་པོ་ཐོབ་པར་བྱ་བ་ལ་དབང་བྱེད་དོ་ཞེས་བྱ་བ་ནི་སྒོམ་པའི་ལམ་ནི་མཐོང་བའི་ལམ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །ཀུན་ཤེས་པའི་དབང་པོ་ནི་ཀུན་ཤེས་པ་དང་ལྡན་པའི་དབང་པོ་ཐོབ་པར་བྱ་བ་ལ་བྱེད་དེ། མི་སློབ་པའི་ལམ་ནི་སྒོམ་པའི་ལམ་སྔོན་དུ་འགྲོ་བ་ཅན་ཡིན་པའི་ཕྱིར་ལ། དེ་དག་ཀྱང་མཐོང་བ་དང་སྒོམ་པའི་ལམ་ལ་རྣམ་པར་གཞག་པའི་ཕྱིར་རོ། །ཀུན་ཤེས་པ་དང་ལྡན་པའི་དབང་པོ་ནི་ཡོངས་སུ་མྱ་ངན་ལས་འདའ་བར་བྱ་བ་ལ་དབང་བྱེད་དེ་ལམ་གཞན་མེད་པའི་ཕྱིར་རོ། །མྱ་ངན་ལས་འདས་པ་ནི་འདིར་ཕུང་པོ་ལྷག་མ་མེད་པའོ། །དེ་ཉིད་ཀྱི་ཕྱིར་སེམས་རྣམ་པར་མ་གྲོལ་བ་ལ་མྱ་ངན་ལས་འདའ་བ་མེད་པའི་ཕྱིར་རོ་ཞེས་གསུངས་ཏེ། སེམས་རྣམ་པར་གྲོལ་བ་ནི་ཟད་པ་ཤེས་པ་ཡིན་ལ། དེ་དང་དེའི་འོག་རོལ་གྱི་ཟག་པ་མེད་པའི་ལམ་ཐམས་ཅད་ནི་ཀུན་ཤེས་པ་དང་ལྡན་པའི་དབང་པོ་ཡིན་ཏེ། དེའི་ཕྱིར་ཀུན་ཤེས་པ་དང་ལྡན་པའི་དབང་པོ་ནི་ཡོངས་སུ་མྱ་ངན་ལས་འདས་པ་ལ་དབང་བྱེད་དོ། །སྔ་རོལ་ཏུ་ནི་མ་ཡིན་ཏེ་འདུས་བྱས་ཁོ་ན་འདུས་བྱས་ཀྱི་བདག་པོའི་འབྲས་བུའོ་ཞེས་འབྱུང་
བའི་ཕྱིར་རོ། །གཞན་དག་ཀུན་ཤེས་པ་དང་ལྡན་པའི་དབང་པོ་ནི་ཡོངས་སུ་མྱ་ངན་ལས་འདས་པ་ལ་དབང་བྱེད་དོ་ཞེས་ཟེར་བ་ནི། ཡོངས་སུ་མྱ་ངན་ལས་འདས་པ་ཐོབ་པའི་དབང་དུ་བྱས་པས་སྐྱོན་མེད་དོ། །སོགས་པའི་སྒྲ་ནི་རྣམ་གྲངས་གཞན་བསྟན་པར་བྱ་བའི་ཕྱིར་ཏེ་ཞེས་རྒྱ་ཆེར་འབྱུང་བ་ལ། དབང་པོ་དང་པོ་གཉིས་ནི་མཐོང་བ་དང་སྒོམ་པས་བསྡུས་པས་གོ་རིམས་བཞིན་དུ་མཐོང་བ་དང་སྒོམ་པས་སྤང་བར་བྱ་བའི་ཉོན་མོངས་པ་སྤོང་པ་ལ་དབང་བྱེད་པ་ཉིད་དོ། །སློབ་དཔོན་འདུས་བཟང་ན་རེ། དབང་པོ་ཉིད་ནི་སྦྱོར་བ་དང་མཐོང་བ་དང༌། རྣམ་པར་གྲོལ་བ་དང་ཁྱད་པར་གྱི་ལམ་རྣམས་ཏེ་དེ་ལ་དབང་པོ་ཉིད་མེད་པས་གསུམ་པ་ལ་ཡང་ཀུན་ཤེས་པའི་དབང་པོ་ཉིད་དུ་ཐལ་བར་འགྱུར་རོ་ཞེས་ཟེར་ཏེ། དེ་དག་ཀྱང་དེ་དང་རིགས་མཐུན་པའི་ཕྱིར་དབང་པོ་ཉིད་དུ་འགལ་བ་མེད་དེ། མི་སྐྱེ་བའི་ཆོས་ཅན་གྱི་དབང་པོ་བཞིན་ནོ། །གལ་ཏེ་ཟིན་པའི་བྱ་བ་ཁོ་ན་དབང་པོར་འདོད་ན། དེ་ལྟ་ན་ཕྱིས་འཚོ་བའི་ཕྱོགས་རྣམས་དབང་པོ་མ་ཡིན་པར་འགྱུར་ཏེ། རིས་མཐུན་པ་དང་འབྲེལ་བ་ཐུན་མོང་པ་མེད་པའི་ཕྱིར་རོ། །དེའི་ཕྱིར་མིང་འཇུག་པ་ལ་རྒྱུར་བརྗོད་དོ། །མིང་འཇུག་པ་ནི་ཀཱ་ར་ཎཱ་བཱ་ཡེ་ལ་ཡང་རྗེས་སུ་འཇུག་སྟེ། བ་ལང་གི་མིང་རྗེས་སུ་འཇུག་བ་བཞིན་ནོ། །དེ་ལ་རྒྱུ་སྲིད་པ་མ་ཡིན་ཡང་གཞན་དུ་འཇུག་སྟེ། དེ་ལ་དེ་ལྟར་གྲགས་པའི་ཕྱིར་ན་སྐྱོན་མེད་དོ། །རྣམ་པར་གྲོལ་བས་དགའ་བ་དང་བདེ་བ་སོ་སོར་ཡང་དག་པར་མྱང་བའི་ཀཱ་རཎ་རྒྱུ་དང་བྱེད་པ་དང་གནོད་པ་རྣམས་ལ་འཇུག། ཡ་གཱེ་ཡ་ངན་སོང་ལའོ། ཕྱིར་རོ་ཞེས་བྱ་བ་ལ། རྣམ་པར་གྲོལ་བ་ནི་ཉོན་མོངས་པ་སྤངས་པའོ། །དགའ་བ་ནི་ཡིད་བདེ་བའོ། །བདེ་བ་ནི་ཤིན་ཏུ་སྦྱངས་པའི་བདེ་བའོ། །རྣམ་པར་གྲོལ་བས་དགའ་བ་དང་བདེ་བ་ཡང་དག་པར་མྱང་བ་ནི། རྣམ་པར་གྲོལ་བའི་དགའ་བ་དང་བདེ་བ་ཡང་དག་པར་མྱང་བའོ། །སློབ་དཔོན་འདུས་བཟང་ན་རེ། འདི་རྣམ་གྲངས་གཞན་དུ་མི་རིགས་ཞེས་ཟེར་རོ། །ཟག་པ་མེད་པའི་ཤེས་རབ་ཀྱིས་མངོན་པར་མ་གཏོགས་པ་བདེན་པ་མངོན་པར་རྟོགས་པའི་སྔ་རོལ་ཏུ་ཡང་དབང་བྱེད་དོ། །བདེན་པའི་མངོན་པར་རྟོགས་པས་ཉོན་མོངས་པའི་སྐྱོན་ལས་
ངེས་པར་འབྱིན་པ་དང༌། སྐྱོན་གཉིས་པ་མངོན་པར་བཅོམ་པས་མཐོང་བའི་ཆོས་ལ་བདེ་བར་གནས་པ་དང༌། གསུམ་པའི་ཞེས་བྱ་བ་ནི་དེ་ལ་ཡང་ཐེ་ཚོམ་གྱིས་མངོན་པར་རྟོགས་པའི་ཤེས་པས་མངོན་པར་མ་རྟོགས་པ་ལས་རྣམ་པར་གྲོལ་བའི་ལམ་རྣམས་དབང་པོ་མ་ཡིན་པ་ཉིད་དུ་ཐལ་བར་འགྱུར་རོ། །ལམ་རྗེས་སུ་ཤེས་པ་དང་ལམ་རྗེས་སུ་མ་ཤེས་པའི་བཟོད་པ་མངོན་པར་མ་རྟོགས་པའི་ཕྱིར་རོ། །མངོན་བར་རྟོགས་པ་ལས་ལམ་རྗེས་སུ་ཤེས་པ་ཡང་ཀུན་ཤེས་པའི་དབང་པོ་ཉིད་དུ་ཐལ་བར་འགྱུར་རོ། །གང་བཤད་པ་མ་ངེས་པའི་ཕྱིར་མཐོང་བ་མངོན་པར་རྟོགས་པ་ངེས་པ་ནི་ཤེས་པ་དང་མངོན་པར་རྟོགས་པ་ཡིན་པའི་ཕྱིར། མངོན་པར་མ་རྟོགས་པ་ཁོ་ན་དེར་བརྗོད་པ་དེ་ལྟ་ན་ཡང་བཟོད་པ་རྣམས་དབང་པོ་མ་ཡིན་པར་གྱུར་པ་ཉིད་དམ། ཤེས་པ་དང་བཟོད་པ་རྣམས་མ་ངེས་པའི་བདག་ཉིད་ཀྱི་ཕྱིར། མ་ངེས་པའི་བདག་ཉིད་ཀྱིས་མངོན་པར་མ་རྟོགས་པའི་ཕྱིར་ལམ་རྗེས་སུ་ཤེས་པའི་སྐད་ཅིག་མ་དང་པོ་ཀུན་ཤེས་པའི་དབང་པོ་ཉིད་དུ་ཐལ་བར་འགྱུར་ཏེ། བདེན་པ་མངོན་པར་མ་རྟོགས་པ་མངོན་པར་རྟོགས་པའི་ཕྱིར་རོ། །མ་རིག་པ་ལ་སོགས་པས་ཁ་བསྐང་དགོས་ཏེ་ཅི་ཞེ་ན། བྱ་དགོས་སོ་ཞེས་བྱ་བ་ནི་ཚིག་གི་ལྷག་མའོ། །མཚན་ཉིད་ཀྱིས་བརྗོད་པ་ཐོབ་པ་ལ་ཚིག་ཏུ་མ་བརྗོད་པ་ནི་ཁ་བསྐང་བའོ། །སོགས་པ་སྨོས་པས་ནི་འདུ་བྱེད་དང་རྣམ་པར་ཤེས་པ་ལ་སོགས་པ་རྟེན་ཅིང་འབྲེལ་པར་འབྱུང་བའི་ཡན་ལག་རྣམས་ཡོངས་སུ་གཟུང་ངོ༌། །དེ་ཉིད་ཀྱི་ཕྱིར་མ་རིག་པ་ལ་སོགས་པ་དག་ཀྱང་ཞེས་བྱ་བ་ལ་སོགས་པ་གསུངས་སོ། །འདིར་ཡང་སོགས་པ་སྨོས་པས་རྣམ་པར་ཤེས་པ་ལ་སོགས་པ་རྣམས་ཡོངས་སུ་གཟུང་ངོ༌། །ཀུན་ཏུ་དགའ་བའི་བདེ་བ་ནི་བདེ་བ་དང་དགའ་བའི་ཁྱད་པར་རོ། །ཁ་བསྐང་བར་མི་བྱ་སྟེ་བཅོམ་ལྡན་འདས་ཀྱིས་དོན་གང་ཞིག་ཤེས་པར་བྱ་བའི་ཕྱིར་དབང་པོ་ནི་ཉི་ཤུ་རྩ་གཉིས་དག་གོ་ཞེས་མདོ་ལས་བསྟན་པ་དེ་ལ། མ་རིག་པ་ལ་སོགས་པ་དགོས་པ་མེད་པའི་ཕྱིར་རོ། །དོན་དེ་ཡང་གང་ཞིག་ཡིན་ཞེ་ན། དེའི་ཕྱིར་སེམས་ཀྱི་རྟེན་དང་དེའི་བྱེ་བྲག་ཅེས་བྱ་བ་རྒྱ་ཆེར་གསུངས་སོ། །བདག་ཏུ་གྱུར་པའི་སེམས་ཀྱི་རྟེན་ནི་དེའི་རྟེན་ནོ། །བྱེ་བྲག་ནི་ཕོའོ་མོའོ་ཞེས་བྱ་བའོ། །
གནས་ནི་རྒྱུན་རྗེས་སུ་འཇུག་པའོ། །ཀུན་ནས་ཉོན་མོངས་པ་ནི་བདག་ཏུ་གྱུར་པའི་སེམས་ཁོ་ནའིའོ། །རྣམ་པར་བྱང་བའི་ཚོགས་ནི་རྣམ་པར་བྱང་བའི་འོ། །སྐྱེ་མཆེད་དྲུག་པོ་དེ་ནི་སེམས་ཅན་གྱི་རྫས་ཀྱི་གཞི་ཡིན་ནོ་ཞེས་བྱ་བ་ནི་དང་པོ་དང་གཙོ་བོའོ། །སེམས་ཀྱི་རྫས་ནི་གཅིག་ཏུ་སེམས་ཅན་གྱི་གྲངས་སུ་བགྲང་བའི་ཕྱིར་རོ། །དེ་དག་གི་རྟེན་གཟུགས་ལ་སོགས་པ་དག་དང༌། དེ་དག་གི་རྣམ་པར་ཤེས་པ་དག་ནི་སེམས་ཅན་གྱི་རྫས་ཡིན་གྱི་གཞི་ནི་མ་ཡིན་ཏེ་དེའི་དབང་གིས་བྱུང་བའི་ཕྱིར་རོ། །ཡང་ན་ལྷག་པར་ཆགས་པའི་གནས་ཡིན་པའི་ཕྱིར་ཏེ། དེ་ལ་རབ་ཏུ་ཆགས་པར་འགྱུར་བའི་ཕྱིར་རོ་ཞེས་བྱས་ནས་ཁ་ན་མ་ཐོ་བ་མེད་པ་ཡང་ཡོད་དོ། །གཞན་དག་བདག་གི་རྒྱུད་མ་ཡིན་པ་དེ་ནི་དབང་པོ་མ་ཡིན་པས་དེའི་ཕྱིར་གཞིའོ་ཞེས་ཟེར་རོ། །རྣམ་པར་བྱང་བའི་ཚོགས་ནི་རྣམ་པར་བྱང་བའི་ཚོགས་ཏེ་རྣམ་པར་བྱང་བའི་འཁོར་དུ་གྱུར་པའི་ཕྱིར་རོ། །གཞན་དག་དབང་པོའི་རྣམ་པར་གཞག་པ་རྣམ་པ་གཞན་དུ་འཆད་པ་ནི། ཡང་ན་འཇུག་པའི་རྟེན་དང་ནི། །ཞེས་བྱ་བ་རྒྱ་ཆེར་འབྱུང་བའོ། །འཁོར་བའི་འཇུག་པ་དང་ལྡོག་པ་དག་ནི་གཙོ་བོ་ཡིན་ལ། དེ་དག་གི་རྟེན་དང་སྐྱེ་བ་དང་གནས་པ་དང་ཉེ་བར་སྤྱོད་པས་གང་དག་དབང་བྱེད་པ་དེ་དག་དབང་པོ་ཉིད་དུ་རྣམ་པར་གཞག་གོ །འཇུག་པ་ནི་འབྱུང་བ་སྟེ་འཁོར་བ་ཞེས་བྱ་བའི་དོན་ཏོ། །སེམས་ཅན་གྱི་རྫས་སྐྱེ་མཆེད་དྲུག་ནི་འཁོར་བར་བྱེད་པས་ན་འཇུག་པའི་རྟེན་ཡིན་ཏེ། དེའི་བདག་ཉིད་ཡིན་པའི་ཕྱིར་རོ། །དེའི་ཕྱིར་དབང་པོ་དྲུག་པོ་དག་ནི་འགྲོ་བ་དག་ཏུ་སྐྱེ་བ་རྒྱུན་ཆགས་པའི་མཚན་ཉིད་ཅན་འཇུག་པའི་རྟེན་ནི་རྒྱུར་གྱུར་པ་ཡིན་ལ་འཇུག་པ་ནི་འབྲས་བུར་གྱུར་པ་ཡིན་ནོ། །ཡང་ན་རང་གི་རྒྱུད་ཀྱི་དངོས་པོ་ཡིན་པའི་ཕྱིར་སྐྱེ་མཆེད་དྲུག་ནི་རྟེན་ཡིན་ལ། དེ་རྒྱུར་བྱས་པ་བཏགས་པ་འཇུག་པ་སྐྱེད་པའི་ལས་ནི་དེ་ལ་ཕྱོགས་པས་འཇུག་པའི་རྟེན་ནོ་ཞེས་གཞན་དག་གོ །དེ་ལས་སྐྱེས་པའི་ཕྱིར་ཞེས་བྱ་བ་ལ། དེའི་རྐྱེན་གྱི་སྐྱེ་བས་འདིར་སྐྱེ་བའི་རྒྱུ་ཕོ་དང་མོའི་དབང་པོ་དག་ལ་སྐྱེ་བ་ཞེས་བསྟན་ཏོ། །དེ་དག་ནི་ཁུ་བ་དང་ཁྲག་འཇུག་པའི་དུས་ན་ལུས་དང་ཡིད་ཀྱི་དབང་པོ་གཉིས་ཀྱིས་ནི་དངོས་
ཀྱི་རྒྱུ་ཡིན་ལ། མིག་ལ་སོགས་པའི་དབང་པོ་བཞི་པོ་དག་གིས་ནི་བརྒྱུད་ནས་ཡིན་ཏེ་མཐར་གྱིས་ཞེས་འབྱུང་བའི་ཕྱིར་རོ། །ཚུལ་འདི་ནི་མི་དང་དུད་འགྲོ་དང་ཡི་དྭགས་ཀྱི་འགྲོ་བ་དག་ལ་ཡིན་གྱི། གཞན་ལ་མངལ་སྐྱེས་པ་དང་སྒོང་སྐྱེས་ཀྱི་སེམས་ཅན་མེད་པའི་ཕྱིར་མ་ཡིན་ནོ། །སྲོག་གི་དབང་པོས་ནི་གནས་པར་བྱེད་དེ། སྐྱེ་མཆེད་དྲུག་གི་རྒྱུན་མི་གཅད་པའི་ཕྱིར་རོ། །ཚོར་བ་རྣམས་ཀྱིས་ནི་ཉེ་བར་སྤྱོད་པར་བྱེད་དེ་འཇུག་པའི་རྟེན་ལ་ཕན་པ་དང་གནོད་པ་བྱེད་པར་ཞུགས་པའི་ཕྱིར་རོ། །དེ་ལྟར་ན་བཅུ་བཞི་པོ་འདི་དག་ནི་འཇུག་པ་ལ་གཙོ་བོར་བྱེད་པར་ཞུགས་པའི་ཕྱིར་དབང་པོ་ཉིད་དོ། །རྣམ་པ་དེ་ཉིད་ཀྱིས་ཞེས་བྱ་བ་ནི་རྟེན་ལ་སོགས་པའི་རྣམ་པས་ཞེས་བྱ་བའི་དོན་ཏོ། །གཞན་དག་ནི་ལྡོག་པ་ཡིན་ཏེ་ཞེས་བྱ་བ་རྒྱ་ཆེར་འབྱུང་བ་ལ་ལྡོག་པ་ནི་མི་འཇུག་པ་སྟེ་དེ་ཡང་སྐྱེ་མཆེད་དྲུག་གཏན་འགགས་པའོ། །དེ་ཐོབ་པའི་རྟེན་ནི་དང་པོ་ལ་སོགས་པ་རྣམས་ཡིན་ཏེ། དགེ་བའི་རྩ་བ་ཐམས་ཅད་སྐྱེ་བ་ལ་དེ་གཙོ་བོ་ཡིན་པའི་ཕྱིར་རོ། །སྐྱེ་བ་ནི་ཀུན་ཤེས་པར་བྱེད་པའི་དབང་པོ་ཡིན་ཏེ། ནངས་ཀྱི་དང་པོར་ཡང་དག་པར་ངེས་པའི་ཕུང་པོ་ལ་གནས་པའི་ཕྱིར་རོ། །གནས་པའི་ཀུན་ཤེས་པའི་དབང་པོ་ཡིན་ཏེ་རྒྱུན་དང་ལྡན་པར་འཇུག་པའི་ཕྱིར་རོ། །ཀུན་ཤེས་པ་དང་ལྡན་པའི་དབང་པོས་ཉེ་བར་སྤྱོད་པར་བྱེད་དོ། །མཐོང་བའི་ཆོས་ལ་བདེ་བར་གནས་པས་རབ་ཏུ་ཕྱེ་བའི་ཕྱིར་རོ། །ཡང་ན་ལྡོག་པ་རྣམ་པ་གཉིས་ཏེ་ཉོན་མོངས་པ་ལྡོག་པ་དང་སྐྱེ་བ་ལྡོག་པ་སྟེ། འདིར་ནི་ཉོན་མོངས་པ་ལྡོག་པ་ལ་དགོངས་ཏེ་ལྷག་མ་སྔ་མ་བཞིན་ནོ། །ཡང་ན་འདིས་འཁོར་བ་ལྡོག་པར་བྱེད་པ་སྟེ། ལྡོག་པའི་རྟེན་ཟག་པ་མེད་པའི་ཆོས་རྣམས་སོ། །དེའི་ཕྱིར་དང་པ་ལ་སོགས་པ་ནི་ལྡོག་པའི་རྟེན་ནོ། །ལམ་གྱི་ཚོགས་སུ་གྱུར་བའི་ཕྱིར་ཀུན་ཤེས་པར་བྱེད་པའི་དབང་པོ་ནི་སྐྱེ་བ་སྟེ། ཟག་པ་མེད་པའི་ལམ་གྱི་དང་པོ་ཡིན་པའི་ཕྱིར་རོ། །དེ་བཞིན་དུ་ཀུན་ཤེས་པར་བྱེད་པའི་དབང་པོ་སྐྱེད་པ་གནས་པ་ནི་ཀུན་ཤེས་པའི་དབང་པོ་ཡིན་ཏེ་རྒྱུན་དང་ལྡན་པའི་ཕྱིར་རོ། །དེ་ལྟར་ན་ཀུན་ཤེས་པའི་དབང་པོ་ནི་ལྡོག་པ་གནས་པར་བྱེད་པ་ཡིན་ནོ། །ཉེ་བར་སྤྱོད་པ་ནི་ཀུན་ཤེས་པའི་དབང་པོས་བྱེད་དེ། རྣམ་
པར་གྲོལ་བའི་དགའ་བ་དང་བདེ་བ་ཡང་དག་པར་མྱོང་བའི་ཕྱིར་རོ། །སེམས་རྣམ་པར་མ་གྲོལ་བ་ལ་མྱ་ངན་ལས་འདས་པ་མེད་པའི་ཕྱིར་ཀུན་ཤེས་ལྡན་པའི་དབང་པོ་ཡང་ལྡོག་པར་བྱེད་པ་ཉིད་ལ་འགལ་པ་མེད་དོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་དབང་པོ་དེ་སྙེད་ཅིག་གསུངས་ཏེ། དེ་སྙེད་ཅིག་ཁོ་ནས་བརྗོད་པར་འདོད་པའི་དོན་ཡོངས་སུ་རྫོགས་པའི་ཕྱིར་རོ། །དེའི་ཕྱིར་མ་རིག་པ་ལ་སོགས་པ་དབང་པོ་ཉིད་དུ་ཁ་བསྐང་བར་མི་བྱ་སྟེ། མདོ་གཉིས་ལས་བཤད་པའི་དབང་པོའི་དོན་མི་སྲིད་པའི་ཕྱིར་རོ། །དེ་ཉིད་ཀྱི་ཕྱིར་དེ་དག་གི་གོ་རིམས་ཀྱང་དེ་ཡིན་ཏེ། སེམས་ཀྱི་རྟེན་ཡིན་པའི་ཕྱིར་སྔར་མིག་ལ་སོགས་པ་རྣམས་བཤད་དོ། །དེའི་ཕྱིར་བྱེ་བྲག་གི་རྒྱུ་ཡིན་པའི་ཕྱིར་དེའི་མཇུག་ཐོགས་སུ་ཕོ་དང་མོའི་དབང་པོའོ་ཞེས་བྱ་བ་རྒྱ་ཆེར་བརྗོད་པར་བྱའོ། །ཡང་ན་ལྡོག་པ་ནི་འཇུག་པ་སྔོན་དུ་འགྲོ་བ་ཅན་ཡིན་པས་སྐྱེ་མཆེད་དྲུག་འཇུག་པའི་རྟེན་ཉིད་དུ་སྔར་བཤད་དེ། དེ་བཞིན་དུ་གཞན་ལ་ཡང་རྒྱ་ཆེར་བརྗོད་པར་བྱའོ། །དག་ནི་དབང་པོ་མ་ཡིན་པ་ཉིད་དེ། ཚིག་ཏུ་བརྗོད་པའི་ཡུལ་ལ་དབང་བྱེད་པས་དབང་པོ་ཉིད་དེ། དེ་དང་ལྡན་པས་དག་ལ་དབང་པོའི་སྒྲ་འཇུག་པས་སོ་ཞེ་ན་འདི་སྐད་བཤད་པར་འགྱུར་ཏེ། དག་ནི་བརྗོད་པ་ལ་དབང་བྱེད་པ་མ་ཡིན་ནོ། །ཚིག་ཏུ་སྨྲ་བ་ལ་ཞེས་སྦྱར་ཏེ། དེ་ཉིད་སློབ་པའི་རྒྱུའི་ཁྱད་པར་ལ་ལྟོས་པའི་ཕྱིར་རོ། །འདི་ལྟར་ལེགས་པར་སྦྱར་བ་དང་ཐ་མལ་བའི་ཡུལ་གྱི་བྱེ་བྲག་གིས་སློབ་པ་ལ་བལྟོས་ནས་ཚིག་ཐ་དད་པ་ཡིན་ནོ། །གང་ཞིག་གང་ལ་དབང་བྱེད་པ་དེ་དང་དེ་ནི་ལོགས་སུ་སློབ་པ་ལ་བལྟོས་པ་མ་ཡིན་ཏེ་མིག་གི་རྣམ་པར་ཤེས་པ་ལ་སོགས་པ་བཞིན་ནོ། །རེ་ཞིག་དེ་དག་དབང་པོ་ཉིད་ཅི་ཞིག་ཡིན་གལ་ཏེ་གང་ལས་ཚིག་འབྱུང་བ་ཡིན་ན། དེ་ལྟ་ན་ནི་རྟོག་པ་དང་དཔྱོད་པ་ལ་སོགས་པ་དག་དང༌། དེ་དག་ཀུན་ནས་སློང་བའི་རླུང་རྣམས་ཀྱང་དེའི་དབང་པོ་ཉིད་དུ་ཐལ་བར་འགྱུར་རོ། །གལ་ཏེ་ཡང་མགྲིན་པ་དང་དཀན་དང་མཆུ་ལ་སོགས་པ་རྣམས་ལ་བརྟེན་ནས་འབྱུང་མོད་ཀྱི། དེ་ལྟ་ན་ཡང་རྟོག་པ་ལ་སོགས་པ་དག་དེ་ཀུན་ནས་སློང་བར་བྱེད་པའི་ཕྱིར་གཙོ་བོ་ཡིན་ནོ། །ལག་པ་དང་རྐང་པ་ཡང་
ལེན་པ་དང་འགྲོ་བ་ལས་གཞན་མ་ཡིན་པའི་ཕྱིར་ཏེ་ཞེས་བྱ་བ་ལ། ལག་པ་དེ་ཉིད་གཞན་དང་གཞན་དུ་འབྱུང་བ་ལ་ལེན་པ་ཞེས་བྱ་བ་ལ། རྐང་པ་དེ་ཉིད་གཞན་དང་གཞན་དུ་འབྱུང་བ་ལ་འགྲོ་བ་ཞེས་བྱ་སྟེ། དེ་ལ་ནི་སྐད་ཅིག་མ་མ་ཡིན་པའི་ཕྱིར་ཡུལ་གཞན་དུ་ཕྱིན་པ་མེད་ཅིང་བྱ་བ་དོན་གཞན་དུ་གྱུར་པ་ཡང་མེད་དོ། །དེའི་ཕྱིར་ལེན་པ་དང་འགྲོ་བ་ལག་པ་དང་རྐང་པ་ལས་གཞན་མ་ཡིན་ནོ། །དེའི་ཕྱིར་ད་ལ་དབང་བྱེད་པ་མ་ཡིན་ཏེ། རང་ཉིད་ལ་དབང་བྱེད་པར་ནི་མི་རུང་ངོ༌། །སྦྲུལ་ལ་སོགས་པ་རྣམས་ལ་ཞེས་བྱ་བ་ལ། སྦྲུལ་ལ་སོགས་པ་རྣམས་ལ་ལག་པ་དང་རྐང་པའི་དབང་པོ་ཡོད་པ་མ་ཡིན་མོད་ཀྱི། དེ་ལྟ་ན་ཡང་ཁས་ལེན་པ་དང་བྲང་གིས་འགྲོ་བ་ཡིན་ཏེ། དེ་བཞིན་དུ་ཉ་ལ་སོགས་པ་རྣམས་ལ་ཡང་བརྗོད་པར་བྱའོ། །རྐུབ་ཀྱང་རྟུག་པར་བྱ་བ་ལ་དབང་པོ་ཉིད་མ་ཡིན་ཏེ་ཞེས་བྱ་བ་ནི། མི་གཙང་བ་འདོར་བ་ལའོ། །དེ་ནི་རླུང་གིས་ཀྱང་བྲོ་བར་བྱེད་པའི་ཕྱིར་རོ། །ཞེས་བྱ་བ་ནི་མི་གཙང་བ་བྲོ་བར་བྱེད་པའི་ཕྱིར་རོ། །ཁ་ཅིག་ཁ་ནས་ཀྱང་བཤང་པ་འདོར་བ་མཐོང་བའི་ཕྱིར། དེ་ལྟ་ན་དབང་པོའི་རྣམ་པར་གཞག་པ་འཚོལ་བར་འགྱུར་ཏོ། །ཁས་ལེན་པ་དང་བཤད་པ་འདོར་བའི་ཕྱིར་དང༌། ལག་པ་གཉིས་ཀྱིས་ལེན་པ་དང་འགྲོ་བའི་ཕྱིར་རོ། །དེ་བཞིན་དུ་རྐང་པ་གཉིས་ཀྱིས་ཀྱང་ངོ༌། །ཀུན་ཏུ་དགའ་བ་ནི་ཉོན་མོངས་པ་ཅན་གྱི་བདེ་བའོ། །དེ་ཉིད་ཀྱི་ཕྱིར་བདེ་བ་དེ་ནི་ཕོ་དང་མོའི་དབང་པོས་བྱས་པའི་ཕྱིར་རོ་ཞེས་བྱ་བ་སྨོས་སོ། །གལ་ཏེ་དེ་ཉིད་འདོམས་ཡིན་ནོ་ཞེ་ན། དེ་ལྟ་ན་འོན་ནི་འདོམས་ཀྱི་དབང་པོ་ལུས་ཀྱི་དབང་པོ་ལས་གཞན་མ་ཡིན་ཏེ། ཕོ་དང་མོའི་དབང་པོ་དག་ནི་ལུས་ཀྱི་དབང་པོའི་ཕྱོགས་གཅིག་ཡིན་པའི་ཕྱིར་རོ། །བྱ་བ་དོན་གཞན་གཉིས་མེད་པའི་ཕྱིར་མ་རིག་པ་ལ་སོགས་པ་བཞིན་དུ་དག་ལ་སོགས་པ་དབང་པོ་མ་ཡིན་ནོ། །དེའི་ཕྱིར་ཁ་བསྐང་བར་མི་བྱའོ། །དེ་ལྟ་མ་ཡིན་ན་ལྐོག་མ་ལ་སོགས་པ་རྣམས་ཀྱང་གྲངས་བཞིན་དུ་དམིགས་པ་ལ་སོགས་པ་ལ་དབང་བྱེད་པའི་ཕྱིར་དབང་པོར་ཐལ་བར་གྱུར་ཏེ་ངེས་པའི་རྒྱུ་མེད་པའི་ཕྱིར་རོ། །ས་བོན་དང་མྱུ་གུ་ལ་སོགས་པ་རྒྱུར་གྱུར་པ་ཐམས་ཅད་ཀྱང་རང་གི་བྱ་བ་མྱུ་གུ་དང་འདབ་མ་དང་སྦལ་མིག་འཆོས་པའི་
མཚན་ཉིད་ལ་དབང་བྱེད་པའི་ཕྱིར་དབང་པོར་ཐལ་བར་འགྱུར་རོ། །ཡང་ཅི་དབང་པོ་ཉི་ཤུ་རྩ་གཉིས་པོ་འདི་དག་རྗེས་སུའམ་འོན་ཏེ་བཏགས་བར་འདོད་ཅེ་ན། དབང་བྱེད་པར་བཤད་པས་རྫས་སུ་ངེས་སོ། །གཞན་དག་ན་རེ་རྫས་སུ་བཅུ་གཅིག་སྟེ། མོ་དང་ཕོའི་དབང་པོ་དག་ལུས་ཀྱི་དབང་པོའི་ནང་དུ་འདུས་པའི་ཕྱིར་དང༌། དད་པ་ལ་སོགས་པ་རྣམས་དང་ཡིད་དང་བདེ་བ་དང་ཡིད་བདེ་བ་དང་བཏང་སྙོམས་རྣམས་ཀུན་ཤེས་པའི་དབང་པོ་གསུམ་དུ་འདུས་པའི་ཕྱིར་ཏེ། དེ་ལྡོག་པ་རྣམས་དད་པ་ལ་སོགས་པ་རྣམས་དང་ཡིད་ལ་སོགས་པ་རྣམས་སུ་གྱུར་པའི་ཕྱིར་རོ་ཞེས་ཟེར་རོ། །གཞན་དག་ན་རེ་ཉི་ཤུའོ་ཞེས་ཟེར་རོ། །དབང་པོའི་དོན་དང་དེ་རྣམ་པར་གཞག་པའི་རྒྱུ་བཤད་ཟིན་ཏོ། །དེ་དག་གིས་རང་གི་ངོ་བོ་བརྗོད་པར་བྱ་སྟེ། དེ་ལ་མིག་ལ་སོགས་པ་ཕོའི་དབང་པོ་ལ་ཐུག་པ་རྣམས་ནི་བསྟན་ཟིན་ཏོ་ཞེས་བྱ་བ་ནི། དེ་དག་རྣམས་ཀྱི་རྣམ་ཤེས་རྟེན། །མིག་ལ་སོགས་གཟུགས་དང་བ་རྣམས། །ཞེས་བྱ་བ་དང༌། ལུས་ལས་ཕོ་དང་མོ་དབང་དག །ཅེས་བྱ་བ་ལས་སོ། །བདེ་བ་ལ་སོགས་པ་དང༌། ཀུན་ཤེས་པར་བྱེད་པའི་དབང་པོ་ལ་སོགས་པ་ནི་བཤད་པར་བྱ་སྟེ་ཞེས་བྱ་བ་ལ། གལ་ཏེ་བདེ་བ་ལ་སོགས་པ་རྣམས་ཀྱང་སེམས་ལས་བྱུང་བ་ཡིན་པའི་ཕྱིར་དད་པ་ལ་སོགས་པ་བཞིན་དུ་སེམས་ལས་བྱུང་བ་དག་གི་ནང་ནས་བཤད་པར་བྱ་བ་མ་ཡིན་ནམ་ཞེན་མ་ཡིན་ཏེ། སེམས་ལས་བྱུང་བ་དག་ཏུ་ནི། །ཚོར་དང་སེམས་པ་འདུ་ཤེས་དང༌། །ཞེས་སྤྱིའི་དབང་དུ་བྱས་ཀྱི། དེའི་ཕྱིར་འདི་ཉིད་དུ་དེ་དག་གི་ཁྱད་པར་གྱི་མཚན་ཉིད་བསྟན་པའི་སྐབས་སུ་བབ་པས་དབང་པོའི་སྐབས་འདི་ཉིད་དུ་སྟོན་པར་བྱེད་དོ། །གལ་ཏེ་ཡིད་ཀྱི་མཚན་ཉིད་ནི་བཤད་ཟིན་ལ་དད་པ་ལ་སོགས་པ་རྣམས་ནི་སེམས་ལས་བྱུང་བ་རྣམས་ཀྱི་ནད་ནས་འཆད་པར་འགྱུར་ཞིང༌། བདེ་བ་དང་ཡིད་བདེ་བ་དང་བཏང་སྙོམས་རྣམས་འདི་ཉིད་ནས་འཆད་ན། གང་ཞིག་འདི་བཤད་པར་བྱ་བའི་བརྗོད་པ་ཀུན་ཤེས་ལྡན་པར་བྱེད་པའི་དབང་པོ་ལ་སོགས་པ་གསུམ་པོ་གཞན་གང་ཞིག་ཡོད་ཅེ་ན་དེ་ནི་དེ་དག་ལས་གཞན་མེད་དོ། །འོ་ན་ཅི་ཞེ་ན། འདི་དག་གནས་སྐབས་གང་ཞིག་གི་ཁྱད་པར་དུ་འཕགས་པ་ན། ཀུན་ཤེས་པར་
བྱེད་པ་ཞེས་བྱ་བའི་དབང་པོ་ལ་སོགས་པའི་མིང་འཐོབ་པའི་གནས་སྐབས་དེ་བསྟན་པར་བྱ་དགོས་པས་ན། ཀུན་ཤེས་པར་བྱེད་པ་ལ་སོགས་པའི་དབང་པོ་བཤད་པར་བྱ་སྟེ་དེ་བརྗོད་པར་བྱའོ་ཞེས་དེ་སྐད་དུ་བསྟན་པ་ཡིན་ནོ། །ལུས་ཚོར་སིམ་པ་མ་ཡིན་པ་དག་སྡུག་བསྔལ་དབང་པོ་ཞེས་བྱ་བ་ལ། ལུས་ཀྱི་ཚོར་བ་སིམ་པ་ཡང་ཡོད་པས་སིམ་པ་མ་ཡིན་པ་ཞེས་བྱ་བ་ཁྱད་པར་དུ་བྱས་སོ། །སེམས་ཀྱི་སིམ་པ་མ་ཡིན་པ་ཡང་ཡོད་པས་ལུས་ཀྱི་ཞེས་བྱ་བ་སྨོས་སོ། །སིམ་པ་མ་ཡིན་པ་ཞེས་བརྗོད་པའི་དོན་མ་རྟོགས་པའི་ཕྱིར་རྣམ་གྲངས་གཞན་གྱིས་དེའི་དོན་སྟོན་པར་བྱེད་པ་ནི། སིམ་པ་མ་ཡིན་པ་ཞེས་བྱ་བ་ནི་གནོད་པར་བྱེད་པ་སྟེ། སྡུག་བསྔལ་ཞེས་བྱ་བའི་ཐ་ཚིག་གོ །འདི་སྐད་བསྟན་པར་འགྱུར་ཏེ། རྣམ་པར་ཤེས་པ་ལྔ་དང་ལྷན་ཅིག་སྐྱེས་པའི་གནོད་པར་ཉམས་སུ་མྱོང་བ་ནི་སྡུག་བསྔལ་གྱི་དབང་པོ་ཞེས་བྱའོ། །སིམ་པ་ནི་བདེ་བའི་དབང་པོ་སྟེ་ལུས་ཀྱི་ཞེས་བྱ་བར་སྐབས་དང་སྦྱར་རོ། །འདིར་ཡང་ཁྱད་པར་དང་ཁྱད་པར་ཅན་གྱི་དངོས་པོ་ནི་སྔ་མ་བཞིན་ནོ། །འདི་སྐད་བསྟན་པར་འགྱུར་ཏེ། རྣམ་པར་ཤེས་པ་ལྔ་དང་ལྷན་ཅིག་སྐྱེས་པ་དང༌། རྣམ་པར་ཤེས་པ་གསུམ་དང་ལྷན་ཅིག་སྐྱེས་པའི་ཉམས་སུ་མྱོང་བ་ཕན་འདོགས་པ་ནི་བདེ་བའི་དབང་པོའོ། །བསམ་གཏན་གསུམ་པ་ན་ཡང་བདེ་བའི་དབང་པོ་ཡོད་པར་འདོད་ན། དེ་ནི་ལུས་ཀྱི་ཡིན་པར་འདོད་པ་ཡང་མ་ཡིན་ནོ་ཞེ་ན་དེའི་ཕྱིར། བསམ་གཏན་གསུམ་པ་ན། སེམས་ཀྱི་དེ་ནི་བདེ་དབང་པོ། །ཞེས་བྱ་བ་སྨོས་ཏེ། སེམས་ཀྱི་ཞེས་བྱ་བ་འདིས་ནི་ལུས་ཀྱི་རྣམ་པར་གཅོད་པར་བྱེད་དོ། །དེ་ནི་ཞེས་བྱ་བ་འདིས་ནི་སིམ་པ་མ་ཡིན་པ་རྣམ་པར་གཅོད་དེ། དེ་ཉིད་ཀྱི་ཕྱིར། དེ་ནི་ཞེས་བྱ་བ་སྨོས་ཏེ། སེམས་ཀྱི་ཚོར་བ་སིམ་པ་ནི་བདེ་བའི་དབང་པོ་ཡིན་ནོ། །ཡང་ཅིའི་ཕྱིར་འདོད་པའི་ཁམས་དང་བསམ་གཏན་དང་པོར་ལུས་ཀྱི་སིམ་པ་བདེ་བའི་དབང་པོར་རྣམ་པར་བཞག་ལ། བསམ་གཏན་གསུམ་པར་ནི་སེམས་ཀྱི་ཡིན་ཞེ་ན། དེའི་ཕྱིར་ལུས་ཚོར་བ་ནི་མེད་དོ་ཞེས་བྱ་བ་སྨོས་སོ། །ཅིའི་ཕྱིར་མེད་ཅེ་ན། དེའི་ཕྱིར་དེ་ན་རྣམ་པར་ཤེས་པའི་ཚོགས་ལྔ་མེད་པའི་ཕྱིར་ཞེས་བྱ་བ་སྨོས་སོ། །གཞན་ན་དེ་ནི་ཡིད་བདེ་ཡིན། །ཞེས་བྱ་བ་
ལ། ཡིད་ཀྱིས་སིམ་པར་མྱང་བ་འཇུག་པའི་དབྱེ་བའི་རྣམ་པས་འགྱུར་རོ། །ལུས་ཀྱི་ཡང་དབྱེ་བ་འཇུག་པའི་ཕྱིར་བདེ་བ་ཁོ་ནའོ། །དེའི་ཕྱིར་སེམས་ཀྱི་ཚོར་བ་སིམ་པ་ནི་བསམ་གཏན་གསུམ་པ་ལས་གཞན་ན་ཡིད་བདེ་བའི་དབང་པོ་ཡིན་ནོ། །གཞན་ན་ཞེས་སྨོས་པས་བསམ་གཏན་གསུམ་པའི་གོང་དུ་ཡང་དེར་ཐལ་བར་འགྱུར་བ་བཟློག་པའི་ཕྱིར། འདོད་པའི་ཁམས་དང་བསམ་གཏན་དང་པོ་དང་གཉིས་པ་ན་ནི་ཞེས་བྱ་བ་སྨོས་ཏེ། དེ་ནི་དེ་དག་ཁོ་ནར་སྲིད་པའི་ཕྱིར་རོ། །ཡང་ཅིའི་ཕྱིར་བསམ་གཏན་དང་པོ་དང་གཉིས་པ་བཞིན་དུ་བསམ་གཏན་གསུམ་པར་ཡང་དེ་ཡིད་བདེ་བའི་དབང་པོར་མ་བཤད་ཅེ་ན། དེའི་ཕྱིར་བསམ་གཏན་གསུམ་པ་ན་ནི་ཞེས་བྱ་བ་རྒྱ་ཆེར་འབྱུང་ངོ༌། །ཡིད་བདེ་བ་ནི་དགའ་བ་སྟེ་སེམས་ལས་བྱུང་བ་སིམ་པ་ཙམ་མོ། །དགའ་བའི་འདོད་ཆགས་དང་བྲལ་བས་ཀྱང་བསམ་གཏན་གསུམ་པ་འཐོབ་སྟེ། མདོ་ལས་དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་པ། དྲན་པ་དང་ལྡན་པ། བདེ་བ་ལ་གནས་པ་ཞེས་གསུངས་སོ། །དེའི་ཕྱིར་བསམ་གཏན་གསུམ་པ་ན་བདེ་བའི་དབང་པོ་ཁོ་ནར་བརྗོད་ཀྱི། ཡིད་བདེ་བའི་དབང་པོར་ནི་མ་ཡིན་ནོ། །ཡང་ཡིད་འདི་གཉིས་ཕན་འདོགས་པ་ཉམས་སུ་མྱོང་བར་མཚུངས་ན་ཁྱད་པར་ཅི་ཞིག་ཡོད་ཅེ་ན་ཡོད་དེ། སེམས་ཀྱི་བདེ་བའི་དབང་པོ་ནི་བརྟན་པར་འཇུག་པ་ཡིན་ལ། ཡིད་བདེའི་དབང་པོ་ནི་མི་བསྟན་པར་འཇུག་པ་ཡིན་ཏེ། སེམས་པ་ཡང་ཡོད་པར་བྱེད་པའི་ཕྱིར་རོ། །ཨཱ་ནུ་གྲ་ཧོ་པི་རཱུརྦ་སྱ་ནཱ་ཏི་པ་ལ་བཱཉ་ཐཏྟ་ར་སྱཱ་ཏ་ཨཱ་པཱ་ཡཱཔྟ་དཱ་གི་སྠཱ་ན་མི་ཏྱེ་ཙཀྵ་ཏེ། དགའ་བའི་རྣམ་པས་མི་འཇུག་པའི་དབང་དུ་བྱས་ནས་བསམ་གཏན་གསུམ་པ་ན་བདེ་བའི་དབང་སྟེ་ཡིད་ཀྱི་རྣམ་པར་དཔྱོད་བརྟེན་གྱི་དབྱེ་བས་ལྡན་ན་ནི་མ་ཡིན། ཕན་འདོགས་པ་ཡང་སྔ་མའི་ཧ་ཅང་སྟོབས་ལྡན་མ་ཡིན་པའི་ཕྱིར་ལན་ཇི་ལྟར་འགྱུར་ཉིད་ཞེས་བཤད་པ་རྒོལ་རྒྱ་དཔེ་གཅིག་ན་ཏྲ་དཀྱུང་ཆགས་པའི་ཐེག་པ་གནས་ཞེས་སྨྲའོ། བའི་གཞིའོ་ཞེ་ན། འདི་ལ་སྐྱོན་མེད་དེ། ཡིད་བདེ་ནི་འཇུག་པ་མི་བརྟན་པ་ཡིན་ལ་སེམས་ཀྱི་བདེ་བའི་དབང་པོ་ནི་འཇུག་པ་བརྟན་པ་ཉིད་དོ། །གནས་སྐབས་གཞན་ལ་མིང་གཞན་མཐོང་སྟེ་མར་སར་དང་མར་བཞིན་ནོ། །ལུས་ཀྱིས་སིམ་པ་མ་ཡིན་པར་
མྱོང་བ་ནི་སྡུག་བསྔལ་ཡིན་ལ། སེམས་ཀྱི་ནི་ཡང་མི་དང་བ་ཞེས་བྱའོ། །ལུས་དང་སེམས་ཀྱི་སིམ་པ་དང་སིམ་པ་མ་ཡིན་པའི་དབྱེ་བས་ཚོར་བ་གསུམ་པོ་རྣམ་པར་བཞག་པ་བྱས་ཟིན་ཏོ། །ད་ནི་བཏང་སྙོམས་ཀྱི་དབང་པོ་བརྗོད་པར་བྱ་སྟེ། དེའི་ཕྱིར་བཏང་སྙོམས་ནི་བར་མའོ་ཞེས་བྱ་བ་རྒྱས་པར་གསུངས་ཏེ། སིམ་པ་ནི་བདེ་བའི་སིམ་པ་མ་ཡིན་པ་ནི་སྡུག་བསྔལ་ལོ་ཞེས་བྱ་བ་ནི་བཤད་མ་ཐག་པ་ཡིན་ལ། འདིར་ནི་བར་མའོ་ཞེས་བཤད་པ་དེའི་ཕྱིར་སིམ་པ་ཡང་མ་ཡིན་པ་ཡང་མ་ཡིན་པ་ཞེས་བྱ་བ་སྨོས་སོ། །དེ་ལྟ་ན་ཡང་མི་ཤེས་པ་དེའི་ཕྱིར་གསུང་རབ་ལས་གྲགས་པའི་རྣམ་གྲངས་གཞན་གྱིས་སྟོན་པར་བྱེད་པ་ནི་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ནི་ཞེས་བྱ་བ་ལ་སོགས་པའོ། །བདེ་བ་དང་སྡུག་བསྔལ་ལྟར་ལུས་དང་སེམས་ལ་བརྟེན་པའི་ཕྱིར་དང༌། དེ་དང་འདྲ་བར་ཕྱེ་ནས་བསྟན་པའི་ཕྱིར་ཐེ་ཚོམ་ཟ་བ་ན་འདྲི་བ་ནི། ཅི་ལུས་ཀྱིའམ་སེམས་ཀྱི་ཞེས་བྱ་བ་སྟེ་བཏང་སྙོམས་ཀྱི་དབང་པོ་ཞེས་བྱ་བར་སྐབས་དང་སྦྱར་རོ། །དེའི་ཕྱིར་སྨྲས་པ་གཉི་གའི་ཡིན་ནོ་ཞེས་བྱ་སྟེ་ལུས་དང་སེམས་ཀྱི་ཞེས་བྱ་བའི་དོན་ཏོ། །བཏང་སྙོམས་ཀྱི་དབང་པོའི་སྐབས་སུ་ཡང་ཅིའི་ཕྱིར་ཞེས་རྒྱ་ཆེར་འབྱུང་སྟེ། བདེ་བ་དང་སྡུག་བསྔལ་དག་རྟེན་ཐ་དད་པས་དབང་པོ་ཐ་དད་པ་ཡིན་ལ། འདིར་ཡང་རྟེན་ཐ་དད་པ་ལ་གུས་པ་མེད་པར་བྱས་ཏེ། བསྡུས་ཤིང་བསྒོམས་ནས་དབང་པོ་གཅིག་ཏུ་བྱས་པ་འདི་ལ་རྒྱུ་ཅི་ཞིག་ཡོད། དེ་བཞིན་གཤེགས་པ་རྣམས་ལ་ནི་ཐམས་ཅད་ལ་ཐོགས་པ་མེད་པའི་ཡེ་ཤེས་མངའ་བའི་ཕྱིར་དང༌། ཐམས་ཅད་ལ་དགོངས་པ་ཉེ་བར་གནས་པའི་རྒྱུ་མེད་པར་ཆོས་སྟོན་པ་མི་མངའོ་ཞེ་ན། དེའི་ཕྱིར་མི་རྟོག་ཕྱིར་ཞེས་བྱ་བ་སྨོས་སོ། །བསྡུས་ནས་དབང་པོ་གཅིག་ཏུ་བྱས་པ་ལ་རྒྱུ་སྨོས་པ་ནི། སེམས་ཀྱི་བདེ་བ་དང་སྡུག་བསྔལ་པ་ནི་ཕལ་ཆེར་རྣམ་པར་རྟོག་པ་ལས་ཞེས་རྒྱ་ཆེར་འབྱུང་བའོ། །ཕལ་ཆེར་སྨོས་པ་ནི་དགའ་བའི་བདེ་བ་ཏིང་ངེ་འཛིན་ལས་སྐྱེས་པ་དང༌། རྟོག་པ་ལས་མི་སྐྱེ་བ་དང་རྣམ་པར་སྨིན་པ་ལས་སྐྱེས་པ་ཡུལ་གྱི་སྟོབས་ཀྱིས་སྐྱེ་བ་དང༌། ཡིད་བདེ་བ་རྣམ་པར་སྨིན་པ་ལས་སྐྱེས་པ་མཉམ་པར་གཞག་པ་ལ་ཡང་ཡིད་མི་བདེ་བ་མེད་དོ། །
འདི་དག་སྤང་བར་བྱ་བའི་ཕྱིར་རོ་ཞེས་བྱ་བ་འདི་སྟོན་ཏེ། ལུས་ཀྱི་བདེ་བ་དང་སྡུག་བསྔལ་རྣམ་པར་རྟོག་པ་ལས་མི་སྐྱེ་བ་དེ་ཉིད་ལ་རྒྱུ་སྨྲས་པ་ནི། ཡུལ་གྱི་དབང་གིས་ནི་ཞེས་བྱ་བ་ལ་སོགས་པ་སྟེ། ཡུལ་ཉེ་བ་ལས་ནི་དེ་རྟག་ཏུ་སྐྱེ་ཞིང༌། ཡུལ་འདུས་པ་ལ་རྣམ་པར་རྟོག་པའི་ནུས་པ་ཡོད་པ་མ་ཡིན་ནོ། །མཛའ་བ་དང་མི་མཛའ་བའི་རྣམ་པར་རྟོག་པ་སྤངས་པའི་དགྲ་བཅོམ་པ་རྣམས་ལ་ཡང་ཡུལ་ཡིད་དུ་འོང་བ་དང་མི་འོང་བའི་དབང་གིས་ངེས་པར་སྐྱེ་བའི་ཕྱིར་རོ། །དེའི་ཕྱིར་དེ་དག་ཅེས་བྱ་བ་ལ། ལུས་ཀྱི་དང་སེམས་ཀྱི་བདེ་བ་དང་སྡུག་བསྔལ་དག་བདེ་བའི་དབང་པོ། །སྡུག་བསྔལ་གྱི་དབང་པོ། །ཡིད་བདེའི་དབང་པོ། །ཡིད་མི་བདེ་བའི་དབང་པོ་ཞེས་དབང་པོ་ཉིད་ཀྱིས་ཐ་དད་དོ། །བཏང་སྙོམས་ནི་ལུས་ཀྱིའམ་སེམས་ཀྱིའམ་རྣམ་པར་སྨིན་པ་ལས་སྐྱེས་པའམ། རྒྱུ་མཐུན་པ་ལས་བྱུང་བ་ཡིན་ཡང་རུང་སྟེ། རྣམ་པར་མི་རྟོག་པ་ཁོ་ནར་རང་གི་ངང་གིས་མངོན་པར་འདུ་བྱ་བ་མེད་པར་སྐྱེ་སྟེ། དེའི་ཕྱིར་དབང་པོ་གཅིག་ཏུ་བྱས་སོ། །ལུས་ཀྱི་བདེ་བ་ཡང་གཞན་དུ་ཕན་འདོགས་པ་ཞེས་རྒྱ་ཆེར་འབྱུང་བ་ལ། ལུས་ཀྱི་བདེ་བ་དང་སྡུག་བསྔལ་ནི་ཉི་ཚེ་བ་བཞུགས་པས་ལུས་དང༌། སེམས་དག་ལ་ཕན་འདོགས་པ་དང་གནོད་པ་བྱེད་པ་ཡིན་ལ་ལུས་ཀྱི་བདེ་བ་དང་སྡུག་བསྔལ་ནི་དྲག་པ་དང་མགྱོགས་པར་བྱེད་པ་དང་རྒྱུན་ཆགས་པ་ཡང་ཡིན་གྱི་སེམས་ཀྱི་ནི་དེ་ལྟ་མ་ཡིན་ཏེ། ཡིད་ལ་སྨོན་པ་ཡོངས་སུ་རྫོགས་པ་དང་སྡུག་པའི་རྣམ་པར་རྟོག་པའི་རྒྱུ་ཅན་གྱིས་དུས་ཅུང་ཟད་ཕན་འདོགས་པའམ་གནོད་པ་བྱེད་པ་ཡོད་དོ། །བཏང་སྙོམས་པ་ནི་ལུས་ཀྱི་བཏང་སྙོམས་ནི་གཞན་དུ་ཕན་འདོགས་ལ། སེམས་ཀྱི་ཡང་གཞན་དུ་ཕན་འདོགས་སོ་ཞེས་བྱ་བའི་ཁྱད་པར་འདི་མེད་དེ། དེ་བས་ན་བཏང་སྙོམས་ལ་བྱེ་བྲག་མེད་པས་ལུས་ཀྱི་དང་སེམས་ཀྱི་དབང་པོ་ཐ་དད་པ་མེད་དོ། །གཞན་དག་ན་རེ་གང་དུ་རྣམ་པར་ཤེས་པ་དང༌། ལུས་ཐ་དད་པ་དེར་ཡིད་ཀྱི་བདེ་བ་དང་སྡུག་བསྔལ་ནི་བརྟན་པ་དང་བྲལ་བ་ཡིན་ལ། ལུས་ཉིད་ཀྱི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་དང་ཁྱད་པར་མེད་པས་དེ་ནི་བརྟན་པ་ཁོ་ན་ཡིན་པས་
དབང་པོ་གཅིག་གོ་ཞེས་སོ། །གཞན་དག་ནི་གཞན་དུ་ལུས་ཀྱི་བདེ་པ་མཛའ་བཤེས་རྣམས་ལ་འཇུག་ལ། གཞན་དུ་སེམས་ཀྱི་སྡུག་བསྔལ་ཡང་དགྲ་བོ་རྣམས་ལ་སྟེ། དེ་བཞིན་དུ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ནི་བར་མ་རྣམས་ལའོ། དེའི་ཕྱིར་བར་མའི་ཕྱོགས་ལ་བཏང་སྙོམས་ནི་ཁྱད་པར་མེད་པའི་ཕྱིར་དབང་པོ་ཐ་དད་པར་མ་བསྟན་ཏོ་ཞེས་སེམས་སོ། །ཟག་པ་མེད་པ་རྣམས་ཀྱི་སྐབས་སུ་བབ་ལ། དེ་དག་ལ་ནི་ལོགས་སུ་བསྟན་པར་བྱ་བ་ཅུང་ཟད་ཀྱང་མེད་མོད་ཀྱི། འོན་ཀྱང་མཐོང་སྒོམ་མི་སློབ་ལམ་ལ་དགུ། །གསུམ་ཡིན་ཞེས་ལམ་གསུམ་དུ་དབང་པོ་དགུ་ལ་ཀུན་ཤེས་པར་བྱེད་པའི་དབང་པོ་ལ་སོགས་པར་བརྗོད་དོ། །ཀུན་ཤེས་པར་བྱེད་པའི་དབང་པོ་ལ་སོགས་པ་རྣམས་བུམ་པ་བཞིན་དུ་བཏགས་པའི་ཡོད་པ་ཉིད་དུ་འགྱུར་བ་མ་ཡིན་ནམ་ཞེ་ན་མི་འགྱུར་ཏེ། དབང་བྱེད་པའི་དོན་ནི་དབང་པོའི་དོན་ཡིན་ལ། ཚོགས་པ་དག་ཀྱང་རེ་རེ་ཞིང་དབང་བྱེད་པའོ། །མཐོང་བའི་ལམ་ལ་སོགས་པ་དང་པོ་ན་ཡོད་པའི་རྣམ་པར་ཤེས་པ་གང་ཡིན་པ་དེ་ནི་ཡིད་ཀྱི་དབང་པོའོ། །བདེ་བ་ལ་སོགས་པ་ཚོར་བའི་དབང་པོ་གསུམ་ནི་ཅི་རིགས་པར་ཏེ། མཐོང་བ་དང་སྒོམ་པའི་ལམ་དག་ནས་དྲུག་པ་དངས་དགུ་པ་ཡིན་པའི་ཕྱིར་རོ། །དགེ་ལ་ཐམས་ཅད་དག་ཏུ་ལྔ། །ཞེས་བྱ་བ་དང་པོ་ལ་སོགས་པ་དག་ནི་ཐམས་ཅད་ན་ཡོད་ཀྱི། བདེ་བ་དང་ཡིད་བདེ་བ་དང༌། བཏང་སྙོམས་རྣམས་ནི་དེ་ལྟར་ཅིག་ཅར་སྲིད་པ་མ་ཡིན་ནོ། །ཡང་ཅིའི་ཕྱིར་འདི་དག་ལ་གནས་སྐབས་གསུམ་དུ་ཀུན་ཤེས་པར་བྱེད་པའི་དབང་པོ་ལ་སོགས་པ་ཉིད་ཅེས་བྱ་ཞེ་ན། མཐོང་བའི་ལམ་ལ་ནི་བདེན་པ་བཞི་མི་ཤེས་པ་ཀུན་ཤེས་སོ་སྙམ་དུ་ཞུགས་པ་ཀུན་ཤེས་པར་བྱེད་པའི་དབང་པོ་ཡིན་ནོ། །སྒོམ་པའི་ལམ་ལ་ནི་སྔོན་མ་མཐོང་བ་ཀུན་ཤེས་པར་བྱེད་པ་ནི་མེད་ཀྱི་ཞེས་བྱ་བ་ནི་ཀུན་ཤེས་པའི་དབང་པོ་ཉིད་ཀྱིས་ཤེས་པའི་བདེན་པ་བཞི་རྣམས་སོ། །དེའི་ཕྱིར་སྒོམ་པའི་ལམ་ལ་སྔོན་མེད་པ་ཀུན་ཤེས་པར་བྱ་བ་མེད་དེ། དེའི་ཕྱིར་བདེན་པ་བཞིའི་བདེན་པ་རྟོགས་པ་གང་ཡིན་པ་དེ་ཉིད་དབང་པོའོ། །དེ་ཉིད་ཀུན་ཤེས་པར་བྱེད་པའོ་ཞེས་བྱ་བ་འབྱུང་སྟེ། སྒོམ་པའི་ལམ་ནི་མཐོང་
བའི་ལམ་གྱིས་མངོན་པར་རྟོགས་ཟིན་པའི་བདེན་པ་བཞིའི་ཡུལ་ཅན་ཡིན་པའི་ཕྱིར་རོ། །གལ་ཏེ་མཐོང་བའི་ལམ་ཉིད་ཀྱིས་བདེན་པ་བཞི་ཀུན་ཤེས་པར་བྱས་ན་ཡང་ཅིའི་ཕྱིར་བསྒོམ་པའི་ལམ་གྱིས་རྟོགས་པར་བྱེད་ཅེ་ན། ཕྲ་རྒྱས་ལྷག་མ་སྤང་བར་བྱ་བའི་ཕྱིར་རོ། །འདི་ལྟར་མཐོང་བའི་ལམ་གྱིས་ནི་མཐོང་བས་སྤང་བར་བྱ་བའི་ཕྲ་རྒྱས་སྤང་བར་བྱ་བའི་ཕྱིར་ཀུན་ཤེས་པར་བྱེད་པ་ཡིན་ལ། སྒོམ་པའི་ལམ་གྱིས་ནི་བསྒོམ་པས་སྤང་བར་བྱ་བའི་ཉོན་མོངས་པ་སྤང་བར་བྱ་བའི་ཕྱིར་ཀུན་ཤེས་པ་ཡིན་ནོ། །ཀུན་ཤེས་སོ་སྙམ་པ་དང་ལྡན་པར་རྟོགས་པ་ནི་ཀུན་ཤེས་ལྡན་པ་སྟེ། ཟད་པ་དང་མི་སྐྱེ་བ་ཤེས་པའི་སྐད་ཅིག་གོ །དེ་འདི་ལ་ཡོད་པས་ཞེས་རྒྱ་ཆེར་འབྱུང་སྟེ། དེ་ལྟར་གྱུར་པ་ནི་ཀུན་ཤེས་ལྡན་པའམ་ཀུན་ཤེས་བསྲུང་བའི་དབང་པོའོ། །ཀུན་ཤེས་བསྲུང་བའི་ངང་ཚུལ་འདི་ལ་ཡོད་པས་ན་ལྡན་པ་སྟེ། རྟོགས་པའི་དོན་ཏོ། །ཀུན་ཤེས་པའི་དབང་པོ་དང་འདི་ལ་ཁྱད་པར་ཅི་ཞིག་ཡོད། དེས་ཀྱང་ཀུན་ཤེས་པ་ཉིད་ཡིན་ནོ་ཞེ་ན་དེའི་ཕྱིར་ཟད་པ་དང་མི་སྐྱེ་བ་ཤེས་པའི་ཡེ་ཤེས་ཐོབ་པའི་ཕྱིར་ཞེས་བྱ་བ་རྒྱ་ཆེར་འབྱུང་ངོ༌། །དེ་ལྟ་བུའི་དབང་པོ་ནི་ཞེས་བྱ་བ་ནི་ཀུན་ཤེས་པ་རྟོགས་པ་དང་བསྲུང་བའི་ངང་ཚུལ་ཅན་གྱི་ཞེས་བྱ་བའི་ཐ་ཚིག་གོ །སློབ་དཔོན་འདུས་བཟང་ན་རེ་དེ་ལྟར་དབང་པོ་རྣམས་མིང་གི་སྒོ་ནས་ཉི་ཤུ་རྩ་གཉིས་དང་རྫས་སུ་ནི་བཅུ་བདུན་དུ་འགྱུར་ཏེ། མོ་དང་ཕོའི་དབང་པོ་དག་ལུས་ཀྱི་དབང་པོའི་ཕྱོགས་གཅིག་ཡིན་པའི་ཕྱིར་དང༌། ཟག་པ་མེད་པ་མེད་པ་རྣམས་ཀྱང་དགུ་པོ་རྣམས་ལས་གཞན་མ་ཡིན་པའི་ཕྱིར་རོ་ཞེས་ཟེར་རོ། །མཐོང་བསྒོམ་མི་སློབ་ལམ་ལ་དགུ། །གསུམ་ཡིན་ཞེས་པ་ཡང་སྲིད་པའི་དབང་དུ་བྱས་ནས་བཤད་པ་སྟེ་རྣམ་པ་ལས་ནི་མ་ཡིན་ནོ། །རྣམ་པ་ལས་ནི་ཤེས་རབ་ཀྱི་རང་བཞིན་གསུམ་གོང་ནས་གོང་དུ་མྱ་ངན་ལས་འདས་པ་ཐོབ་པས། དབང་བྱེད་པས་འདི་དག་ཨ་ས་མ་དྷཱ་ནཱ་ད་པྲ་བཪྻ་ཏྭཙྪཱ་དགོངས་པ་ཅན་ཞེས་པའི་ཚིག་གིས་འཕངས་པའོ། །ཤེས་རབ་ཀྱི་ལྡོག་པ་ལས་འདི་དག་དབང་པོ་བཅུ་དགུར་འགྱུར་རོ། །དེའི་ཕྱིར་ཇི་ལྟར་ལུས་ཀྱི་དབང་པོ་ཁོ་ནའི་དང་བའི་ཁྱད་པར་ལ་དབང་བྱེད་པའི་དབྱེ་བ་ལས་མོ་དང་ཕོའི་དབང་པོ་ཞེས་བྱ་བར་འགྱུར་ཞིང༌། མཉམ་དང་འཁྱོག་པ་མ་ཡིན་པའི་ཕྱིར་དང༌།
དེ་བཞིན་དུ་དབང་པོ་དགུ་པོ་རྣམས་གནས་སྐབས་གསུམ་ཉིད་དུ་འགྱུར་བ་ལས་ཤེས་རབ་ཀྱི་འཇུག་པ་གསུམ་དུ་བརྗོད་པར་བྱའོ། །བསམ་གཏན་དང་གཟུགས་མེད་པ་བཞིན་སྔ་མ་སྔ་མ་ལ་རག་ལས་བས་ཕྱི་མ་ཕྱི་མ་ཐོབ་པས་ན་ཕྱི་མ་ཕྱི་མ་མྱ་ངན་ལས་འདས་པ་ཐོབ་པ་ལ་དབང་བྱེད་པ་འདི་དག་གི་རང་བཞིན་ནོ། །གང་དུ་ཇི་ལྟར་སྤྲོས་པ་དེ་ལྟར་སྲིད་པ་མ་ཡིན་པས་དེ་སྤྲོས་པ་མ་ཡིན་ཞེས་བྱ་སྟེ། འདི་དག་ཇི་ལྟར་རྣམ་པར་གཞག་པ་དེ་ལྟར་སྲིད་པ་མ་ཡིན་པ་དེའི་ཕྱིར་འདི་སྤྲོས་པ་མ་ཡིན་པ་དང་དགོངས་པ་ཅན་མ་ཡིན་ནོ། །སརྦཱ་བཱ་ཆོས་རྣམ་པར་གཞག་པ་དགོངས་པ་ཅན་དུ་འགྱུར་རོ། །གང་འདིར་རང་གི་ངོ་བོ་སྟོན་པའི་དབང་དུ་བྱས་ནས་ལུས་ཚོར་སིམ་པ་མ་ཡིན་གང༌། སྡུག་བསྔལ་དབང་པོ་ཞེས་བྱ་བ་ལ་སོགས་པས་དེ་དག་གི་རང་གི་ངོ་བོ་བསྟན་ཅིང་འཆད་པར་འགྱུར་བའི་སྲོག་གི་དབང་པོ་ལ་སོགས་པ་རྣམས་རང་གི་ངོ་བོ་བསྟན་ཟིན་པར་བྱས་ཏེ། རང་གི་ངོ་བོ་བསྟན་ནས་ཞེས་བྱ་བ་འདི་མངོན་པར་བརྗོད་དོ། །རྣམ་པའི་བྱེ་བྲག་བརྗོད་པར་བྱ་སྟེ་ཞེས་བྱ་བ་ནི་ཟག་པ་དང་བཅས་པ་དང༌། ཟག་པ་མེད་པ་ལ་སོགས་པ་སྟེ། ཆོས་མངོན་པའི་བསྟན་བཅོས་བསྟན་པ་གང་ཡིན་པ་འདི་ཡང་ཆོས་རབ་ཏུ་རྣམ་པར་དབྱེ་བའི་དོན་དུ་ཡིན་པའི་ཕྱིར་རོ། །གསུམ་ནི་དྲི་མ་མེད་ཅེས་བྱ་བ་ལ། གསུམ་ནི་དྲི་མ་མེད་པ་ཁོ་ནའོ་ཞེས་ངེས་པར་གཟུང་བར་བྱ་སྟེ། དགུ་རྣམ་གཉིས་ཞེས་འབྱུང་བའི་ཕྱིར་དང༌། ཟག་པ་མེད་པའི་ལམ་གསུམ་གྱིས་བསྡུས་པའི་ཕྱིར་འདི་དག་ཟག་པ་དང་བཅས་པ་ནི་མེད་དོ། །གཟུགས་ཅན་སྲོག་དང་སྡུག་བསྔལ་དག ། ཟག་དང་བཅས་པ་ཁོ་ནའོ། །ཞེས་ངེས་པར་གཟུང་སྟེ། དགུ་རྣམ་གཉིས་ཞེས་འབྱུང་བའི་ཕྱིར་དང༌། ལམ་གྱི་བདེན་པ་དང་འདུས་མ་བྱས་ཀྱིས་མ་བསྡུས་པའི་ཕྱིར་རོ། །གཟུགས་ཀྱི་ཕུང་པོས་བསྡུས་པའི་ཕྱིར་རོ་ཞེས་བྱ་བ་ནི་གཟུགས་ཅན་རྣམས་བརྗོད་པ་འཇུག་པའི་རྒྱུ་མཚན་བསྟན་པའི་ཕྱིར་སྨོས་སོ། །དགུ་རྣམ་གཉིས་ཞེས་བྱ་བ་ནི། །ལམ་དང་ལམ་མ་ཡིན་པས་བསྡུས་པའི་ཕྱིར་རོ། །གལ་ཏེ་མཐའ་གཅིག་ཏུ་ཟག་པ་དང་བཅས་པ་དང་ཟག་པ་མེད་པ་ངེས་པར་གཟུང་བའི་ཕྱིར་དགུ་རྣམ་གཉིས་ཞེས་བྱ་བ་སྨོས་ཀྱང༌། གཉིས་ཉིད་དུ་རྟོགས་པར་འགྱུར་བ་མ་ཡིན་
ནམ་ཞེ་ན། འདི་ནི་བཞི་ཁོ་ན་མ་ཡིན་གྱི་དགུ་ཆར་ཡང་རྣམ་པ་གཉིས་ཡིན་ནོ་ཞེས་དད་པ་ལ་སོགས་པ་མཐའ་གཅིག་ཏུ་ཟག་པ་མེད་པ་ཉིད་ཡིན་པ་དགག་པར་བྱ་བའི་ཕྱིར་ཡིན་པར་འགྱུར་རོ། །ཁ་ཅིག་ན་རེ། དད་པ་ལ་སོགས་པ་རྣམས་ཟག་པ་མེད་པ་ཁོ་ན་ཡིན་གྱི། ཟག་པ་དང་བཅས་པ་ནི་མེད་དོ་ཞེས་ཟེར་རོ། །དོན་དེ་ལ་ཁུངས་སྨྲས་པ་ནི་བཅོམ་ལྡན་འདས་ཀྱིས་ཞེས་བྱ་བ་ལ་སོགས་པ་རྒྱས་པར་འབྱུང་བའོ། །རྣམ་པ་ཐམས་ཅད་དུ་ཞེས་བྱ་བ་ནི། ཆུང་ངུ་དང་འབྲིང་དང་ཆེན་པོའི་རྣམ་པར་རོ། །ཐམས་ཅད་ཅེས་བྱ་བ་ནི་ལྔ་ཆར་ཞེས་བྱ་བའི་དོན་ཏོ། །འདི་ལྟར་ཟག་པ་དང་བཅས་པའི་ཆོས་རྣམས་ནི་ཟག་པ་མེད་པ་ལྟར་སོ་སོ་སྐྱེ་བོ་རྣམས་ལ་མེད་པ་མ་ཡིན་ལ། དད་པ་ལ་སོགས་པ་རྣམས་ནི་སོ་སོའི་སྐྱེ་བོ་རྣམས་ལ་ཡོད་པ་མ་ཡིན་ཏེ་དགག་པ་མཛད་པའི་ཕྱིར་རོ། །དེའི་ཕྱིར་ཟག་པ་མེད་པ་ཁོ་ན་ཡིན་ནོ་ཞེས་བྱ་བར་ཤེས་སོ་ཞེ་ན། འདི་དད་པ་ལ་སོགས་པ་རྣམས་ཟག་པ་མེད་པ་ཡིན་པའི་ཤེས་བྱེད་དུ་མི་རུང་སྟེ། ཅིའི་ཕྱིར་ཞེ་ན། ཟག་པ་མེད་པའི་དབང་དུ་མཛད་ནས་གསུངས་པའི་ཕྱིར་རོ། །གལ་ཏེ་ཁྱད་པར་མེད་པར་དད་པ་ལ་སོགས་པ་དབང་པོ་རྣམས་ཀྱི་དབང་དུ་མཛད་པར་གྱུར་ན་ནི་ཁུངས་སུ་འགྱུར་བ་ཞིག་ན། འདི་ནི་ཟག་པ་མེད་པ་རྣམས་ཁོ་ནའི་དབང་དུ་མཛད་པ་ཡིན་ཏེ། དེའི་ཕྱིར་འདི་ཁུངས་སུ་མི་རུང་ངོ༌། འདི་ཇི་ལྟར་ཤེས་ཤེ་ན། དེའི་ཕྱིར་འདི་ལྟར་འཕགས་པའི་གང་ཟག་རྣམ་པར་གཞག་པའི་དབང་དུ་མཛད་ནས་ཞེས་བྱ་བ་རྒྱ་ཆེར་གསུངས་སོ། །འདི་ལྟར་ཞེས་བྱ་བ་ནི་གང་གི་ཕྱིར་གྱི་དོན་ནོ། །མདོ་ལས་དགེ་སློང་དག་དབང་པོ་ལྔ་པོ་འདི་དག་ཙམ་སྟེ། ལྔ་གང་ཞེ་ན་དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་དབང་པོའོ། །དགེ་སློང་དག་དབང་པོ་ལྔ་པོ་འདི་དག་རབ་ཡིན་པའི་ཕྱིར་དང་རྣོ་བ་ཡིན་པའི་ཕྱིར་དང་ཡོངས་སུ་རྫོགས་པ་ཡིན་པའི་ཕྱིར་དགྲ་བཅོམ་པ་གཉི་གའི་ཆ་ལས་རྣམ་པར་གྲོལ་བ་ཡིན་ནོ། །དེ་ལས་ཆེས་རྟུལ་བ་ནི་དགྲ་བཅོམ་པ་ཤེས་རབ་ཀྱིས་རྣམ་པར་གྲོལ་བ་ཡིན་ནོ། །དེ་བས་ཆེས་རྟུལ་བ་དག་གིས་ནི་རྣམ་པར་གྲོལ་བ་དུས་
དང་སྦྱོར་བ་ཡིན་ནོ། །དེ་བས་ཆེས་རྟུལ་བ་དག་གིས་ནི་མཐོང་བས་ཐོབ་པའོ། །དེ་བས་ཆེས་རྟུལ་བ་དག་གིས་ནི་དད་པས་མོས་པའོ། །དེ་བས་ཆེས་རྟུལ་བདག་གིས་ནི་ཆོས་ཀྱི་རྗེས་སུ་འབྲང་བའོ། །དེ་བས་ཆེས་རྟུལ་བ་ནི་དད་པའི་རྗེས་སུ་འབྲང་བ་ཡིན་ནོ་ཞེས་བྱ་བ་ནས། དགེ་སློང་དག་འདི་ལྟར་དབང་པོའི་ཕ་རོལ་ཏུ་ཕྱིན་པ་ལ་བརྟེན་ནས་སྟོབས་ཀྱི་ཕ་རོལ་ཏུ་ཕྱིན་པ་གདགས་སོ། །སྟོབས་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་གང་ཟག་གི་ཕ་རོལ་ཏུ་ཕྱིན་པ་གདགས་སོ། །གང་ལ་དབང་པོ་ལྔ་པོ་འདི་དག་ཐམས་ཅད་དུ་མེད་པར་ནི་ཕྱི་རོལ་སོ་སོ་སྐྱེ་བོའི་ཕྱོགས་ལ་གནས་པར་སྨྲའོ་ཞེས་བྱ་བའི་བར་དུ་གསུངས་སོ། །དེའི་ཕྱིར་དེ་ལྟར་ན་འཕགས་པའི་གང་ཟག་རྣམ་པར་གཞག་པར་མཛད་ནས། གང་ལ་དབང་པོ་ལྔ་པོ་འདི་དག་ཅེས་བྱ་བར་གསུངས་ཏེ། གང་དག་འདིར་དབང་དུ་མཛད་པ་མ་ཡིན་ནོ་ཞེས་བྱ་བར་རྟོགས་སོ། །དེ་ལྟ་མ་ཡིན་ན་གང་ལ་དབང་པོ་ལྔ་འདི་དག་ཅེས་མི་གསུང་པར་འགྱུར་བ་ཞིག་གོ །དེའི་ཕྱིར་དེར་དད་པ་ལ་སོགས་པའི་དབང་པོ་ཐམས་ཅད་ཀྱི་དབང་དུ་མཛད་པ་མ་ཡིན་ནོ་ཞེས་བྱ་བར་རྟོགས་སོ། །དེའི་ཕྱིར་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་ཟག་པ་དང་བཅས་པ་དག་དང་ལྡན་པ་མི་འགལ་ལོ། །ཡང་ན་སོ་སོ་སྐྱེ་བོ་རྣམ་པ་གཉིས་ཏེ། །ནང་པ་དང་ཕྱི་རོལ་པའོ། །དགེ་བའི་རྩ་བ་ཀུན་ཏུ་མ་ཆད་པ་ནི་ནང་བ་ཞེས་བྱ་སྟེ། བདེན་པ་མངོན་པར་རྟོགས་པར་རུང་བའི་ཕྱིར་དང༌། དེའི་ཚོགས་སོག་པར་རུང་བའི་ཕྱིར་རོ། །དགེ་བའི་རྩ་བ་ཀུན་ཏུ་ཆད་པ་ནི་ཕྱི་རོལ་པ་སྟེ་བཟློག་པའི་ཕྱིར་རོ། །དེ་ལྟ་མ་ཡིན་ན་ནི་ཕྱི་རོལ་གསུངས་པ་ལ་དོན་མི་གསལ་བར་འགྱུར་རོ། །དགེ་བའི་རྩ་བ་ཀུན་ཏུ་ཆད་པ་དང༌། ཀུན་ཏུ་མ་ཆད་པ་གཉིས་ཆར་འཕགས་པའི་ཆོས་མ་ཐོབ་པར་མཚུངས་པའི་སྒོ་ནས་སོ་སོ་སྐྱེ་བོའི་ཕྱོགས་ལ་གནས་ལས་ནང་པ་ལས་ཁྱད་པར་དུ་བྱ་བའི་ཕྱི་རོལ་ཞེས་གསུངས་སོ། །རྣམ་པ་ཐམས་ཅད་དུ་ཞེས་བྱ་བ་ནི་ཟག་པ་དང་བཅས་པ་དང་ཟག་པ་མེད་པའི་རྣམ་པར་རོ། །ཐམས་ཅད་ཅེས་བྱ་བ་ནི་རྣམ་པ་ཆུང་ངུའི་ཆུང་ངུ་ཡང་མེད་པའོ། །ནང་ན་ཐམས་ཅད་ཀྱི་ཐམས་ཅད་དུ་ཞེས་བྱ་བ་ནི་གང་ཞིག་འཇིག་རྟེན་
པའི་རྒྱུ་ལ་ཡང་མ་ཡིན་ཞེས་དགོངས་པའོ། །ཕྱི་རོལ་ཞེས་བྱ་བ་ནི་ཤཱཀྱའི་སྲས་མ་ཡིན་པའི་སོ་སོའི་སྐྱེ་བོའི་ཕྱོགས་ལ་གནས་པ་ཞེས་བྱ་བ་སྟེ། འཕགས་པའི་ཆོས་ཀྱི་མི་མཐུན་པའི་ཕྱོགས་ལ་གནས་པའོ། །དེ་ལྟ་མ་ཡིན་ན་གང་ལ་དབང་པོ་ལྔ་པོ་འདི་དག་མེད་པ་དེ་ནི་སོ་སོའི་སྐྱེ་བོའི་ཕྱོགས་ལ་གནས་པར་ང་སྨྲའོ་ཞེས་གསུང་བར་མི་འགྱུར་རོ། །དང་པོ་ལ་རྣམ་གྲངས་ནི། ནང་ནི་བདེན་པ་མཐོང་བའོ། །ཕྱི་རོལ་ནི་བདེན་པ་མ་མཐོང་བ་སྟེ། འཕགས་པ་ལ་བདེན་པ་བཞིའི་ཆོས་རྣམས་མ་ཐོབ་པའི་ཕྱིར་སོ་སོ་སྐྱེ་བོའི་ཕྱོགས་ལ་གནས་པའོ། །དད་པ་ལ་སོགས་པ་ཟག་པ་དང་བཅས་པ་ཉིད་དུ་རབ་ཏུ་སྒྲུབ་པ་ལ་ཁུངས་གཞན་སྨོས་པ་ནི། མདོ་ལས་ཀྱང་ཞེས་བྱ་བ་རྒྱ་ཆེར་འབྱུང་སྟེ། མདོ་འདི་ཡང་ཟག་པ་མེད་པ་རྣམས་ཀྱི་དབང་དུ་མཛད་ནས་གསུངས་སོ་ཞེ་ན། དེའི་ཕྱིར་ཆོས་ཀྱི་འཁོར་ལོ་མ་བསྐོར་བ་ཁོ་ནའི་ཚེ་ཞེས་བྱ་བ་དྲངས་ཏེ། ཆོས་ཀྱི་འཁོར་ལོ་མ་བསྐོར་བར་ནི་འཇིག་རྟེན་ན་སེམས་ཅན་རྣམས་ལ་དད་པ་ལ་སོགས་པ་ཟག་པ་མེད་པ་རྣམས་ཡོད་པ་ཉིད་མི་འཐད་དེ་སངས་རྒྱས་འབྱུང་བ་དང་ཆོས་ཀྱི་འཁོར་ལོ་བསྐོར་བ་དོན་མེད་པར་ཐལ་བར་འགྱུར་བའི་ཕྱིར་རོ། །དེའི་ཕྱིར་ཆོས་ཀྱི་འཁོར་ལོ་བསྐོར་བའི་གོང་རོལ་ན་སེམས་ཅན་རྣམས་ཀྱི་དད་པ་ལ་སོགས་པ་དག་ཟག་པ་དང་བཅས་པ་ཁོ་ནའོ་ཞེས་བྱ་བར་ཤེས་སོ། །གལ་ཏེ་དབང་པོ་རྣོན་པོ་ལ་སོགས་པ་བསྟན་པ་ནི་ཡིད་ཀྱི་དབང་པོའི་དབང་དུ་མཛད་པ་ཡིན་ནོ་ཞེ་ན་མ་ཡིན་ཏེ། དད་པ་ལ་སོགས་པ་ཕུན་སུམ་ཚོགས་པ་སྐལ་པ་དང་ལྡན་པ་ཉིད་ཡིན་པའི་ཕྱིར་རོ། །འདི་ལྟར་མདོ་ལས་ནི། སེམས་ཅན་དབང་པོ་རྣོན་པོ་དག་ཀྱང་མཆིས། །ཞེས་བྱ་བ་ནས། ཇི་སྲིད་བཅོམ་ལྡན་འདས་ཀྱི་ཆོས་ཀུན་ཤེས་པར་འགྱུར། །ཞེས་བྱ་བའི་བར་གསུངས་པས། དད་པ་ལ་སོགས་པ་ཕུན་སུམ་ཚོགས་པས་སྐལ་པ་དང་ལྡན་པ་ཡིན་གྱི། ཡིད་ཀྱི་དབང་པོ་ཕུན་སུམ་ཚོགས་པ་ནི་མ་ཡིན་ནོ། །ཤེས་རབ་རྣམས་ཀྱང་ཡིན་ན་ནི་དགེ་བའི་རྩ་བ་ཆད་པ་རྣམས་སྐལ་བ་དང་མི་ལྡན་པའི་ཕྱིར་རོ། །ཡང་ངས་ཇི་སྐད་དུ་ཞེས་རྒྱ་ཆེར་འབྱུང་སྟེ། འདི་ནི་དད་པ་ལ་སོགས་པ་དག་ཟག་པ་
དང་བཅས་པ་ཉིད་དུ་རབ་ཏུ་སྒྲུབ་པ་ལ་ལུང་གཞན་ཡིན་ནོ་ཞེས་སྟོན་ཏོ། །ཅི་སྟེ་ཡང་མདོ་འདི་ཉིད་ཟག་པ་མེད་པའི་དབང་དུ་མཛད་ནས་གསུངས་པ་ཡིན་ནོ་སྙམ་ན་དེའི་ཕྱིར་ཟག་པ་མེད་པ་རྣམས་ལ་ནི་ཞེས་བྱ་བ་སྨོས་སོ། །གལ་ཏེ་ཡང་ལམ་ལས་ཡང་སྐྱེ་བ་དང་འགག་པ་ཡོད་པས་ཀུན་འབྱུང་བ་དང་མི་སྣང་བ་གཉིས་སྲིད་མོད་ཀྱི། རོ་མྱང་བ་དང་ཉེས་དམིགས་དང་ངེས་པར་འབྱུང་བ་ནི་མི་སྲིད་པས་ལམ་ལ་ཡང་ཡོངས་སུ་བརྟགས་པ་རྣམ་པ་འདི་མི་རིགས་སོ། །དེའི་ཕྱིར་དད་པ་ལ་སོགས་པའི་དབང་པོ་རྣམས་ཟག་པ་དང་བཅས་པ་དང་ཟག་པ་མེད་པ་ཡིན་ནོ། །ཟག་པ་མེད་པ་རྣམས་ཁོ་ན་ཇི་ལྟ་བར་གཉི་གར་སྨྲ་བ་རྣམས་ལ་བཟོད་པའི་གནས་སྐབས་སུ་བཞག་གོ་ཞེས་པའི་ཚིག་གིས་འཕངས་པ་དེ་ལྟར་མི་བརྗོད་དེ། སྔར་དབང་པོ་མ་ཡིན་པར་ཡོད་པའི་དད་པ་ལ་སོགས་པ་རྣམས་བཟོད་པའི་གནས་སྐབས་སུ་དབང་པོ་ཞེས་བརྗོད་དོ། །གང་གི་ཕྱིར་འདི་ནི་མཚུངས་སོ། །འོ་ན་ཅི་ཞེ་ན་དབང་ཐོབ་པའི་ཕྱིར་ཏེ། བཟོད་པ་རྣམས་སུ་དབང་པོ་རྣམས་མཐུ་ཅན་དུ་གྱུར་པས་སོ། །རེ་ཞིག་གཅིག་ཏུ་ཞེས་བྱ་བ་ནི་བྱེ་བྲག་མེད་ཅེས་བྱ་བའི་དོན་ཏོ། །སྲོག་ནི་རྣམ་སྨིན་ཞེས་བྱ་བ་ལ་སྲོག་གི་དབང་པོ་ནི་རྣམ་པར་སྨིན་པ་ཁོ་ན་ཡིན་ནོ་ཞེས་ངེས་པར་གཟུང་སྟེ། བཅུ་གཉིས་གཉིས་ཞེས་འབྱུང་བའི་ཕྱིར་རོ། །སྲོག་གི་དབང་པོ་གང་ཡིན་པ་དེ་གང་གི་རྣམ་པར་སྨིན་པ་ཡིན་ཞེ་ན་ཞེས་བྱ་བ་ནི་ཚེ་རབས་གཞན་གྱི་ལས་ཡིན་ནམ་འོན་ཏེ་དེ་ལྟར་བྱུང་བའི་ཚེ་རབས་ཀྱི་ཡིན་ཞེས་བྱ་བའོ། །བསྟན་བཅོས་ལས་ཞེས་བྱ་བ་ནི། དེ་སྐྱེ་བ་ད་ལྟར་བའི་ལས་ཀྱི་འབྲས་བུ་ཡིན་ནོ་ཞེས་ལུང་གིས་སྟོན་པར་བྱེད་པའོ། །དགྲ་བཅོམ་པ་ཞེས་བྱ་བ་ནི་ཕྱིར་མི་འོང་བ་མ་ཡིན་པའོ། །རྫུ་འཕྲུལ་དང་ལྡན་པ་ཞེས་བྱ་བ་ནི་མངོན་པར་ཤེས་པ་ཐོབ་པའོ། །སེམས་ལ་དབང་ཐོབ་པ་ཞེས་བྱ་བ་ནི་དུས་དང་མི་སྦྱོར་བར་རྣམ་པར་གྲོལ་བའོ། །གང་ཟག་ལ་ཞེས་བྱ་བ་ནི་གང་དུ་མཐོང་བའི་ཆོས་ལ་མྱང་བར་འགྱུར་བ་སྟེ། དེ་བསམས་ཏེ་དེ་ཆེར་བསམས་ཤིང་སེམས་ལ་བཞག་སྟེ་འདུན་པ་བསྐྱེད་ནས་སོ། །ཇི་ལྟར་ཞེ་ན་བདག་གི་ལོངས་སྤྱོད་ཀྱི་རྣམ་པར་སྨིན་པ་གང་ཡིན་པ་དེ་ཚེའི་རྣམ་པར་སྨིན་པར་གྱུར་ཅིག་སྙམ་དུའོ། །དེའི་ལོངས་སྤྱོད་ཀྱི་རྣམ་པར་སྨིན་པ་
གང་ཡིན་པ་ཞེས་བྱ་བ་ལ་སོགས་པ་ལ། སྨོན་ལམ་དེའི་ཤུགས་དང་རབ་ཀྱི་མཐའ་པའི་མཇུག་ཐོགས་སུ་བརྗོད་པའི་རྣམ་པར་རིག་བྱེད་ཀྱི་ཤུགས་ཀྱིས་དགེ་འདུན་ནམ་གང་ཟག་ལ་འབུལ་བའི་སེམས་པའི་མཚན་ཉིད་ཅན་གྱི་ལས་ཀྱིས་ལོངས་སྤྱོད་ཀྱི་རྣམ་པར་སྨིན་པ་གང་ཡིན་པ་ཚེའི་རྣམ་པར་སྨིན་པར་སྒྲུབ་པར་བྱེད་དོ། །དེའི་ཕྱིར་དེ་ཡང་དགེ་འདུན་ནམ་གང་ཟག་ལ་འབུལ་བའི་སེམས་པའི་འབྲས་བུ་ཡིན་པའི་ཕྱིར་རྣམ་པར་སྨིན་པ་ཁོ་ནའོ། །རྣམ་པར་སྨིན་པ་ན་ཅི་ལྷག་མ་རྣམ་པར་སྨིན་པར་བྱེད་དོ་ཞེས་བྱ་བ་འབྱུང་ངོ༌། །དུས་མ་ཡིན་པར་འཆི་བས་ཚེའི་རྣམ་པར་སྨིན་པ་ཡོངས་སུ་རྫོགས་ཤིང་རྣམ་པར་སྨིན་པའི་ལས་གང་ཡིན་པ་དེའི་རྣམ་པར་སྨིན་པ་ལྷག་མ་སྟེ་རབ་ཀྱི་མཐའ་བའི་བསམ་གཏན་བཞི་བ་བསྒོམ་པའི་སྟོབས་ཀྱིས་དྲངས་ནས་སོ་སོར་མྱོང་བར་བྱེད་དོ། །དེའི་ཕྱིར་གཞན་དག་ནི་རྣམ་པ་འདིས་ཀྱང་སྲོག་གི་རྣམ་པར་སྨིན་པ་ཁོ་ན་ཡིན་པར་འགྱུར་ཏེ། སྙོམས་པར་འཇུག་པའི་མཐུས་སྐྱེ་བ་གཞན་སྔ་མ་ལ་མྱོང་བར་འགྱུར་བར་ངེས་པའི་ལས་ཀྱིས་འཕངས་པའི་ཚེ་དག་དྲངས་ནས་འདིར་སོ་སོར་མྱོང་བར་བྱེད་དོ་ཞེས་ཟེར་རོ། །ཚོའི་འདུ་བྱེད་དག་ཇི་ལྟར་གཏོང་ཞེ་ན་ཞེས་བྱ་བ་རྒྱ་ཆེར་འབྱུང་སྟེ། དེའི་དེ་ལྟ་བུར་འགྱུར་རོ་ཞེས་བྱ་བ་ལ་ཚེའི་རྣམ་པར་སྨིན་པ་ལོངས་སྤྱོད་ཀྱི་རྣམ་པར་སྨིན་པར་འགྱུར་རོ། །ལུས་དེ་ཉིད་ལ་ཞེས་བྱ་བ་ནི་འདོད་པ་ན་སྤྱོད་པ་ལའོ། །ཚེ་དང་མཐུན་པ་ཞེས་བྱ་བ་ནི་སྔོན་གྱི་ལས་ཀྱི་རྣམ་པར་སྨིན་པ་སྲོག་གནས་པ་དང་མཐུན་པ་དག་གོ །རྣམ་པ་འདིས་ཀྱང་སྲོག་ནི་རྣམ་པར་སྨིན་པ་ཁོ་ན་ཡིན་ནོ། །སྲོག་ཡོངས་སུ་རྫོགས་པར་ངེས་པ་དུས་ལ་བལྟོས་པའི་རྣམ་པ་ཡིན་ཡང་མི་སྐྱེ་བའི་རྐྱེན་རྗེས་སུ་འཇུག་གོ་ཞེས་བྱ་བ་མི་རུང་སྟེ། རྣམ་པ་དེ་ལྟ་བུ་འབྱུང་བ་ཆེན་པོའི་རྐྱེན་མེད་པའི་ཕྱིར་ངེས་པར་དུས་ལ་བལྟོས་ཞེས་བྱའོ། །ལས་རྣམས་ནི་མ་ཡིན་ཏེ། དེའི་ཕྱིར་རྗེས་སུ་འཇུག་པའི་རྐྱེན་ཡོད་ན་རྗེས་སུ་འཇུག་གོ །དེ་བཞིན་དུ་རོ་དང་བཅུད་ལེན་ལ་སོགས་པའི་ནུས་པ་མི་འདྲ་བ་ཡིན་ནོ། །འགལ་བ་དག་ཅེས་བྱ་བ་ནི་འབྱུང་བ་ཆེན་པོ་དག་སྟེ་ཚེ་དང་མཐུན་པ་ཞེས་བྱ་བར་སྦྱར་རོ། །ཁ་ཅིག་ན་རེ། དེ་དག་གཟུགས་ན་སྤྱོད་པ་དག་ནི་མ་ཡིན་ཏེ། དེ་དག་དང་འགལ་བ་ཉིད་ནི་སྲིད་པའི་ཕྱིར་རོ་ཞེས་ཟེར་རོ། །ལོངས་སྤྱོད་
ཀྱི་རྣམ་པར་སྨིན་པ་ལོངས་སྤྱོད་ཀྱི་འཕེན་པ་ཞིག་པའི་བྱེད་པ་ཅན་གང་ཡིན་པ་རབ་ཀྱི་མཐའ་པའི་མཇུག་ཐོགས་སུ་བརྗོད་པའི་རྣམ་པར་རིག་བྱེད་ཀྱི་སྟོབས་ཀྱིས་སླར་ཡང་ཚེ་འཕེན་པར་ནུས་པ་མ་ཡིན་ལ། ཚེའི་རྣམ་པར་སྨིན་པ་ཚེའི་འཕེན་པ་ཞིག་པས་ཀྱང་ལོངས་སྤྱོད་འཕེན་པར་འདོད་པ་མི་རིག་པར་མཐོང་ནས་སློབ་དཔོན་གྱིས་འདི་ལྟ་བུ་ཡིན་ཏེ་ཞེས་བྱ་བ་རྒྱ་ཆེར་གསུངས་ཏེ། བསམ་གཏན་པ་རྣམས་ཀྱི་བསམ་གཏན་གྱི་ཡུལ་ནི་བསམ་གྱིས་མི་ཁྱབ་པོ་ཞེས་འབྱུང་བའི་ཕྱིར་རོ། །ཏིང་ངེ་འཛིན་གྱི་མཐུ་ཁོ་ནས་དེ་ལྟར་མཐོང་ངོ་ཞེས་བྱ་བར་ཤེས་སོ། །གང་གིས་ཞེས་བྱ་བ་ཏིང་ངེ་འཛིན་གྱི་མཐུ་ཁོ་ན་དང་སྦྱར་རོ། །ཚེ་རབས་གཞན་སྔ་མ་ལ་བྱས་པའི་ལས་ལས་སྐྱེས་པ་ནི་སྔོན་གྱི་ལས་ལས་སྐྱེས་པའོ། །གནས་པ་ནི་དབང་པོའི་འབྱུང་བ་ཆེན་པོ་རྣམས་ཀྱི་རྒྱུན་ནོ། །གནས་པའི་དུས་ནི་གནས་པའི་དུས་སོ། །དེའི་འཕེན་པ་ནི་གནས་པའི་དུས་ལ་བལྟོས་པ་ཞེས་བྱ་བའི་དོན་ཏོ། །འདིའི་འཕེན་པ་ཡང་ཅི་ཞེ་ན། ཡང་སྲིད་དུ་མཚམས་སྦྱོར་བའི་སྐད་ཅིག་སྟེ། གང་གི་རྒྱུན་དུ་དེ་སྲིད་དུ་འཇུག་པར་འགྱུར་ཞིང་སྔོན་གྱི་ལས་དག་གིས་དེ་ལྟ་བུའི་རང་བཞིན་གྱི་ནུས་པ་བཞག་པ་དེ་ནི་འཕེན་པའི་ཤུགས་ཞེས་བྱའོ། །ཉིང་མཚམས་སྦྱོར་བ་ཡང་རྣམ་པ་གསུམ་སྟེ། སྐད་ཅིག་མ་དང་གནས་སྐབས་དང་རིས་མཐུན་པའི་མཚན་ཉིད་རྣམས་སོ། །དེ་ལ་སྐད་ཅིག་མའི་ཉིང་མཚམས་སྦྱོར་བ་ནི་སྐད་ཅིག་མ་ནས་སྐད་ཅིག་མ་གཞན་དུ་སྐྱེ་བའོ། །གནས་སྐབས་ཀྱི་ཉིང་མཚམས་སྦྱོར་བ་ནི་ལུས་ཀྱི་མེར་མེར་པོ་དང་ནུར་ནུར་པོ་ལ་སོགས་པའོ། །རིས་མཐུན་པའི་ཉིང་མཚམས་སྦྱོར་བ་ནི་རིས་མཐུན་པར་གཞན་རིས་མཐུན་པ་གཞན་དུ་སྐྱེད་པའོ། །དབང་པོའི་འབྱུང་བ་ཆེན་པོ་རྣམས་ཀྱི་ཞེས་བྱ་བ་ལ། དབང་པོ་རྣམས་དང་འབྱུང་བ་ཆེན་པོ་རྣམས་ཀྱི་གནས་པའི་དུས་ཀྱི་འཕེན་པ་སྔོན་གྱི་ལས་ལས་སྐྱེས་པ་ནི་ཏིང་ངེ་འཛིན་གྱི་མཐུས་ཟློག་པར་བྱེད་ལ། དབང་པོའི་འབྱུང་བ་ཆེན་པོ་རྣམས་ཀྱི་གནས་པའི་དུས་ཀྱི་འཕེན་པ་སྔོན་མེད་པ་ནི་ཏིང་ངེ་འཛིན་གྱི་མཐུས་འཕེན་པར་བྱེད་དེ། དེ་ལྟ་བས་ན་ཏིང་ངེ་འཛིན་གྱི་མཐུས་འཕངས་པའི་སྲོག་གི་དབང་པོ་གང་ཡིན་པ་དེ་ནི་རྣམ་པར་སྨིན་པ་མ་ཡིན་ལ། དེ་ལས་གཞན་པ་ནི་རྣམ་པར་སྨིན་པ་ཡིན་ཏེ། ཏིང་ངེ་འཛིན་ལས་སྐྱེས་པ་ལས་
གཞན་པ་སྔོན་གྱི་ལས་ལས་སྐྱེས་པ་གང་ཡིན་པའོ་ཞེས་བྱ་བའི་དོན་ཏོ། །སློབ་དཔོན་འདུས་བཟང་ན་རེ་འདི་ཡང་མི་རིགས་ཏེ། གང་གི་ཕྱིར་རྟོག་པར་བྱེད་པ་ནི་རྒྱས་པ་ལས་བྱུང་བ་ལ་སོགས་པ་ལས་ཆེས་གཞན་པར་བརྟག་པར་བྱའོ་ཞེས་ཟེར་རོ། །དེ་ལ་རེ་ཞིག་རྒྱས་པ་ལས་བྱུང་བ་ནི་མ་ཡིན་ཏེ། དེའི་རྣམ་པར་སྨིན་པ་སྲུང་བར་བྱེད་པའི་ཕྱིར་རམ་རྣམ་པར་སྨིན་པ་གནས་པར་བྱེད་པའི་ཕྱིར་རོ། །རྣམ་པར་སྨིན་པ་ཆད་པའི་རྒྱུད་རྣམས་ལ་རྒྱས་པ་ལས་བྱུང་བ་མི་རིགས་ཏེ། ཧ་ཅང་ཐལ་བའི་ཕྱིར་དང་རྒྱུ་མཐུན་ལས་བྱུང་བའི་མིག་ལ་སོགས་པ་རྣམས་རྒྱུ་མཐུན་པ་ལས་བྱུང་བ་མ་ཡིན་པའི་ཕྱིར་རོ། །དགེ་བའམ་ལུང་དུ་མ་བསྟན་པ་རྒྱུ་མཐུན་པར་མི་འཐད་དེ། ཁམས་འཚོལ་བའི་ཉེས་པར་འགྱུར་བའི་ཕྱིར་དང་རྣམ་པར་སྨིན་པ་ལས་སྐྱེས་པ་མ་ཡིན་པ་རྣམ་པར་སྨིན་པའི་རྒྱུར་མི་འཐད་པའི་ཕྱིར་རོ། །དེ་བཞིན་ཁོ་ནར་ཡང་དམ་བཅས་པ་དེ་ལས་དོན་འདི་ཚིག་གིས་བརྗོད་པར་བྱ་བ་དེ་ལྟར་བརྗོད་པར་འགྱུར་རོ། །འདི་ནི་མིང་ངོ་ཞེས་བྱ་སྟེ། རྒྱས་པ་ལས་བྱུང་བ་དེ་ཏིང་ངེ་འཛིན་གྱི་རྒྱུ་མཚན་ཉིད་ཀྱི་ཕྱིར་རྒྱས་པ་ལས་བྱུང་བ་མ་ཡིན་པ་རྣམ་པར་སྨིན་པ་ལས་སྐྱེས་པ་ལ་རག་ལས་ཏེ་འཇུག་པར་འདོད་དེ། གཞན་དུ་ན་བཅུད་ལེན་ལ་སོགས་པའི་ནུས་པ་ལས་བྱུང་བ་སྐྱེ་བར་འགྱུར་ཏེ་མངལ་དང་བྱིས་པ་དང་གཞོན་ནུ་དང་ལང་ཚོ་ལ་སོགས་པའི་གནས་སྐབས་རྣམས་སུ་དབང་པོ་འཕེལ་བ་མཐོང་བའི་ཕྱིར་རོ། །རྣམ་པར་སྨིན་པ་དང་རྒྱས་པ་ལས་བྱུང་བ་ཞེས་བྱ་བར་ཤེས་སོ། །དེ་ལྟ་མ་ཡིན་ན་རང་གི་རྟེན་བཅུ་གཅིག་འཕེལ་བ་ཉིད་རྣམ་པར་སྨིན་པར་འགྱུར་གྱི་གནས་མཐའ་དག་ལ་ཁྱབ་པར་བྱེད་པ་པོ་ཉིད་མ་ཡིན་ནོ། །ཟས་ལ་སོགས་པ་ལ་བལྟོས་པ་ཡང་མ་ཡིན་ཏེ་རྣམ་པར་སྨིན་པའི་ལས་དེ་ཉིད་ཀྱིས་འཇུག་པར་འགྱུར་རོ། །གང་གི་ཕྱིར་རྣམ་པར་སྨིན་པ་ཁོ་ནར་འགྱུར་གྱི་རྒྱས་པ་ལས་བྱུང་བ་མ་ཡིན་པ་དེའི་ཕྱིར། རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་དག་ཕན་ཚུན་བལྟོས་པ་ཡོད་པར་མི་འགྱུར་བས་འདི་ལ་སྐྱོན་མེད་དོ། །བཙུན་པ་གོ་ཆ་མཐའ་ཡས་ན་རེ། ཁྱད་པར་སྟོན་པ་དེ་དག་བཞི་ག་ཡང་སྐྱོན་དང་བཅས་པ་ཡིན་ནོ་ཞེས་ཟེར་རོ། །ཇི་ལྟར་ཞེ་ན། དང་པོ་ལྟར་ན་ནི་ཚེའི་རྣམ་པར་སྨིན་པའི་ལས་མཐོང་བའི་ཆོས་ཀྱི་འབྲས་བུ་ཅན་འགྱུར་ན། ཚེའི་རྣམ་པར་སྨིན་པའི་ལས་ནི་མཐོང་བའི་
ཆོས་ལ་མྱོང་བར་འགྱུར་བར་ཡང་མི་རིགས་ཏེ། ལས་འབྲས་བུ་ཉེ་བ་འབྲས་བུ་རིང་བ་མ་ཡིན་པ་ཡང་ཡོད་ཅེས་བྱ་བ་རྒྱ་ཆེར་འབྱུང་ངོ༌། །གཉིས་པ་ལྟར་ན་ལས་རྣམས་ངེས་པ་མེད་པར་ཐལ་བར་འགྱུར་ཏེ་གལ་ཏེ་རྣམ་པར་སྨིན་པ་ལྷག་མ་སྨིན་པར་བྱེད་པར་འགྱུར་ན་ནི་ལས་གསུམ་པོ་མཐོང་བའི་ཆོས་དང་ལན་གྲངས་གཞན་དང་སྐྱེས་ནས་མྱོང་བར་འགྱུར་བ་རྣམས་ངེས་པ་མེད་པར་འགྱུར་རོ། །ཇི་ལྟར་ཞེ་ན། འདིར་སྐྱེས་ནས་མྱོང་བར་འགྱུར་བའི་ལས་ཀྱི་རྣམ་པར་སྨིན་པར་འགྱུར་ལ། ལས་དེ་ཉིད་ཀྱི་རྣམ་པར་སྨིན་པ་ལྷག་མ་ནི་ལན་གྲངས་གཞན་ལ་ཡིན་ནོ། །མཐོང་བའི་ཆོས་ལ་མྱོང་བར་འགྱུར་བ་མི་མཐོང་བ་ནི་མཐོང་བའི་ཆོས་ལ་རྣམ་པར་སྨིན་པར་འགྱུར་ལ། དེ་ཉིད་ཀྱི་སྐྱེ་བ་གསུམ་པ་མ་ཡིན་ན་ལས་དེ་ཉིད་མཐོང་བའི་ཆོས་ལ་མྱོང་བར་འགྱུར་བར་ཡང་འགྱུར་ཞིང༌། དེ་ཉིད་སྐྱེས་ནས་དང་ལན་གྲངས་གཞན་ལ་མྱོང་བར་འགྱུར་བར་འགྱུར་ན། འདི་ནི་འདོད་པ་ཡང་མ་ཡིན་ནོ། །གསུམ་པ་ལྟར་ན་ནི་གཟུགས་ན་སྤྱོད་པའི་འབྱུང་བ་ཆེན་པོ་རྣམས་ལ་འགལ་བ་ཉིད་མི་སྲིད་པའི་ཕྱིར་ཕན་འདོགས་པར་བྱེད་པར་གྱུར་པ་དེ་དག་ཚེ་རྒྱུན་གཅོད་པར་བྱེད་པར་ཇི་ལྟར་འགྱུར་ཏེ་གནོད་པར་བྱེད་པ་མ་ཡིན་པའི་མཚན་ཉིད་ཅན་ཡིན་པའི་ཕྱིར་རོ། །བཞི་པ་ལྟར་ན་སྔོན་གྱི་ལས་ཀྱི་རྣམ་པར་སྨིན་པ་ཟད་པའི་ཕྱིར་དང༌། སྔོན་མེད་པ་སྐྱེས་པའི་ཕྱིར་འཆི་འཕོས་པ་དང་སྐྱེས་པར་འགྱུར་ཏེ། དེའི་ཕྱིར་ཚེ་རབས་གཞན་བཞིན་དུ་སོ་སོར་ཐར་པའི་སྡོམ་པ་བཏང་བར་འགྱུར་ཏེ། བསླབ་པ་ཕུལ་དང་ཤི་འཕོས་དང༌། །ཞེས་འབྱུང་བའི་ཕྱིར་རོ། །མཱ་ཏྲཱ་དྱ་བྷི་ག་མཻ་ཙ་ནཱཾ་ཏི་གུ་རུཿ་ལས་ཀྱིས་འབྲེལ་བར་འགྱུར་ཞེས་བྱ་བ་འདིར་འཆི་འཕོ་བའམ་སྐྱེ་བར་མི་རུང་སྟེ། སྔར་གྱི་རིས་མཐུན་པ་རྗེས་སུ་འཇུག་པའི་ཕྱིར་དང་སྔར་གྱི་རིས་མཐུན་པ་མ་ཡིན་པ་ཉེ་བར་ལེན་པ་མེད་པས་དེའི་ཕྱིར་ཇི་སྐད་བཤད་པའི་སྐྱོན་དུ་ཐལ་བར་འགྱུར་བ་མེད་དོ། །མཱ་ཏྲི་མ། ཨཱ་དི། ལ་སོགས། ཨ་བྷི་ག་མེ། མངོན་པར་འགྲོ་བ། ལྕི་ཡང་གི་དོན་རགས་པ། ཨ་ཏི་གུ་རུཿཧ་ཅང་ལྕི་བ། དེ་ཉིད་ཀྱིས་རང་གི་ལུགས་སྨྲས་པ་ནི། ཚེ་མ་ངེས་པ་འཕེན་པ་ཡིན་ཏེ། འདི་ན་མ་ངེས་ཐ་མར་ནི། །ལོ་བཅུ་དང་པོ་དཔག་ཏུ་མེད། །ཅེས་འབྱུང་བའི་ཕྱིར་དུས་མ་ངེས་པ་ཞེས་བྱ་བའི་ཐ་ཚིག་གོ །འདིར་མ་ངེས་པའི་ཚིག་ནི་ཇི་ལྟར་གཞན་དུ་ཐམས་ཅད་ཀྱི་ཚེ་དུས་མ་ངེས་པ་དེ་བཞིན་དུ་འདིར་མེད་དོ་
ཞེས་བསྟན་པའི་ཕྱིར་རོ། །དེ་ལ་ངེས་པ་མེད་པའི་ཕྱིར་རོ། །ཐམས་ཅད་དུ་བསྐལ་པའི་མཐའ་ལ་བལྟོས་ནས། ཐ་མར་ནི། ལོ་བཅུ་དང་པོ་དཔག་ཏུ་མེད། །ཅེས་བྱ་བའི་ཁྱད་པར་བསྟན་པ་དགོས་པ་མེད་དོ། །གང་བཤད་པ་སྐྱེ་བར་ངེས་པར་ཁས་བླངས་ནས་བཅོམ་ལྡན་འདས་ཀྱིས་དེང་སང་མི་རྣམས་ནི་ཚེ་ལོ་བརྒྱ་བའོ་ཞེས་གསུངས་ཤེ་ན། དེ་ལས་གོང་དུ་གནས་པའི་ཆ་རྐྱེན་འབྱུང་བ་ཆེན་པོ་མེད་པའི་ཕྱིར་རོ། །དེང་སང་ཚེ་སྐྱེ་བ་ན་ལོ་བརྒྱར་སྐྱེའོ་ཞེས་བྱ་བའི་དོན་ཅི་ཞེ་ན། ཐམས་ཅད་དུ་ལོ་བརྒྱ་ལས་གོང་དུ་གནས་པའི་ཆ་རྐྱེན་དུ་གྱུར་པའི་འབྱུང་བ་མེད་དོ། །གལ་ཏེ་སྔོན་གྱི་སྲིད་པ་ཡང་སྲིད་པ་འདི་ཉིད་ཀྱིས་འཕེན་པར་བྱེད་པ་ཉིད་དུ་མི་འགྱུར་རོ་ཞེ་ན། དེ་ལྟར་འདོད་ན་བསོད་ནམས་ཟད་པ་ལས་འཆི་བར་འགྱུར་གྱི་ཚེ་ཟད་པ་ལས་མ་ཡིན་པ་ཡང་ཡོད་དོ་ཞེས་བྱ་བ་ལ་སོགས་པ་མུ་བཞི་ལ་གནོད་པར་འགྱུར་རོ། །གང་ཡང་འདིར་ལན་བརྗོད་པ། འབྱུང་བ་ཆེན་པོ་རྣམས་ནི་རྣམ་པ་གཉིས་ཏེ། རབ་ཏུ་གྲགས་པ་སྲོག་གནས་པའི་ཆ་རྐྱེན་དུ་གྱུར་པ་དང་རབ་ཏུ་མ་གྲགས་པ་སྲོག་གནས་པའི་ཆ་རྐྱེན་དུ་གྱུར་པ་ཏིང་ངེ་འཛིན་གྱི་ཁྱད་པར་གྱིས་བསྒྲུབས་པ་རྣམས་སོ། །རབ་ཏུ་གྲགས་པ་སྲོག་གནས་པའི་རྒྱུར་གྱུར་པ་ཟས་ལ་སོགས་པའི་འབྱུང་བ་ཆེན་པོ་སྟེ། དེ་མ་ཚང་བ་དང་ཞིག་པ་དང་བསོད་ནམས་ཟད་པ་ལས་འཆི་བར་གསུངས་པས་སྐྱོན་མེད་དོ་ཞེས་བྱ་བ་འདིར་ཡང་ཕྱོགས་སྔ་མའི་ལན་དུ་སྦྱར་རོ། །དྲི་བ་ལས་དྲི་བ་གཞན་འབྱུང་སྟེ་ཞེས་བྱ་བ་ནི། འོ་ན་དགེ་སློང་དགྲ་བཅོམ་པའི་ཚེའི་འདུ་བྱེད་དག་འཇོག་པར་བྱེད་པའི་ཞེས་བྱ་བའི་དྲི་བ་དེ་ལས་དྲི་བ་གཞན་འདི་འབྱུང་ངོ༌། །ཅིའི་ཕྱིར་ཚེའི་འདུ་བྱེད་དག་བྱིན་གྱིས་རློབ་པར་བྱེད་ཅེ་ན་ཞེས་བྱ་བ་ལས། སངས་རྒྱས་བཅོམ་ལྡན་འདས་རྣམས་ནི་གཞན་ལ་ཕན་པའི་དོན་དུའོ། །གཞན་ནི་བསྟན་པ་གནས་པར་བྱ་བའི་དོན་དུ་ཡང་ངོ༌། །གལ་ཏེ་བསྟན་པ་གནས་པ་ཡང་གཞན་ལ་ཕན་པའི་དོན་ཁོ་ན་མ་ཡིན་ནམ་ཞེ་ན། འདི་ལ་ཁྱད་པར་ཡོད་དེ་བསྟན་པ་གནས་པར་གྱུར་ཀྱང་གཞན་ལ་ཕན་པ་འགའ་ཞིག་ལ་གཞན་གྱིས་ནུས་པ་མཐོང་ངོ༌། །དེ་ཉིད་ཀྱི་ཕྱིར་དེ་ལས་གཞན་ནུས་པ་ཡང་མ་མཐོང་བ་ཡིན་ནོ་ཞེས་བྱ་བ་སྨོས་སོ། །གཞན་ལ་ཕན་པ་ཆུང་བ་དང་ཞེས་བྱ་བ་ནི། ཆོས་གོས་དང་བསོད་སྙོམས་ལ་སོགས་པ་བསླང་བ་ཉེ་བར་ལོངས་སྤྱོད་
པས་བྱས་པའོ། །ནད་ལ་སོགས་པ་ལྟ་བུ་ཞེས་བྱ་བ་ནི་ནད་དང་འབྲས་དང་ཟུག་རྔུ་ལ་སོགས་པ་ལྟ་བུ་སྟེ་སྡུག་བསྔལ་དུ་མ་དང་ལྡན་པའི་ཕྱིར་རོ། །ཚེ་ཟད་པར་གྱུར་ཞེས་བྱ་བ་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པའི་དུས་སུའོ། །མིའི་ནང་དག་ཏུ་ཞེས་བྱ་སྟེ་མིའི་ནད་ཁོ་ན་རེ་སངས་རྒྱས་འབྱུང་བ་དང་བསྟན་པ་གནས་པའི་ཕྱིར་རོ། །གླིང་གསུམ་པོ་དག་ཏུ་ཞེས་བྱ་བ་ནི་མིའི་ནང་ཐམས་ཅད་དུ་ནི་མ་ཡིན་ནོ་ཞེས་སྟོན་པར་བྱེད་པ་སྟེ། བསྟན་པ་མེད་པའི་ཕྱིར་བྱང་གི་སྒྲ་མི་སྙན་དུ་ནི་མ་ཡིན་ནོ། །ཕོ་མོ་དག་ཅེས་བྱ་བ་ནི་ཟ་མ་ལ་སོགས་པ་དག་ལ་མངོན་པར་རྟོགས་པ་མེད་པའི་ཕྱིར་རོ། །གཉི་ག་སྨོས་པ་ནི་དགྲ་བཅོམ་པ་དུས་དང་མི་སྦྱོར་རྣམ་པར་གྲོལ་བའི་ཡིན་གྱི། ཕྱིར་མི་འོང་བ་དང་རྣམ་པར་གྲོལ་བ་དུས་དང་སྦྱོར་བའི་ནི་མ་ཡིན་ནོ་ཞེས་བསྟན་པར་བྱ་བའི་ཕྱིར་རོ། །དེ་ནི་རབ་ཀྱི་མཐའ་བའི་བསམ་གཏན་ཐོབ་པས་ཏིང་ངེ་འཛིན་ལ་དབང་ཞིང་ཉོན་མོངས་པ་མེད་པས་ཉོན་མོངས་པ་དག་གིས་ཀྱང་རྒྱུད་མ་བརྟན་པ་ཡིན་ཏེ། ཁམས་གསུམ་གྱི་འདོད་ཆགས་དང་བྲལ་བའི་ཕྱིར་རོ། །ཕྱིར་མི་འོང་བ་ལ་ནི་ཏིང་ངེ་འཛིན་ལ་དབང་བ་ཉིད་ཡོད་མོད་ཀྱི། ཉོན་མོངས་པ་དག་གིས་རྒྱུད་ཉེ་བར་མ་བརྟན་པ་ནི་མ་ཡིན་ཏེ་ཉོན་མོངས་པ་དང་བཅས་པའི་ཕྱིར་རོ། །རྣམ་པར་གྲོལ་བ་དུས་དང་སྦྱོར་བ་ནི་ཉོན་མོངས་པ་དག་གིས་རྒྱུད་ཉེ་བར་མ་བརྟན་པ་ཡིན་མོད་ཀྱི་ཏིང་ངེ་འཛིན་ལ་དབང་བ་ཉིད་མ་ཡིན་ཏེ་གཅིག་ནི་ཉོན་མོངས་པས་བཅིངས་ལ། གཉིས་པ་ལ་ནི་ཏིང་ངེ་འཛིན་གྱི་ཁྱད་པར་མེད་དོ། །དེ་བཞིན་དུ་དུས་དང་སྦྱོར་བར་རྣམ་པར་གྲོལ་བ་སྨོས་པ་ནི་ཐ་དད་དོ། །ཁ་ཅིག་ན་རེ་ཏིང་ངེ་འཛིན་ལ་དབང་བ་ཉིད་ཤེས་པར་བྱ་བའི་ཕྱིར་དུས་དང་མི་སྦྱོར་བར་རྣམ་པར་གྲོལ་བ་སྨོས་སོ་ཞེས་ཟེར་རོ། །དེ་ལྟར་ཡང་རབ་ཀྱི་མཐའ་པའི་བསམ་གཏན་ཐོབ་པས་ཐ་དད་དོ། །དེའི་ཕྱིར་ཉོན་མོངས་པས་རྒྱུད་ཉེ་བར་མ་བརྟན་པ་ནི་དུས་དང་མི་སྦྱོར་བར་རྣམ་པར་གྲོལ་བ་དང་ཡོངས་སུ་མི་ཉམས་པའི་ཆོས་ཅན་ཡིན་པའི་ཕྱིར་རོ། །དེ་ལྟ་ཡིན་པས་དགྲ་བཅོམ་པ་སྨོས་པ་དོན་མེད་པ་ཅན་དུ་བསྟན་པའི་ཕྱིར་རོ། །སྲོག་གཏང་བ་དང་བྱིན་གྱིས་རློབ་པའི་ཞར་ལ་འདི་དཔྱད་པར་བྱ་སྟེ། མདོ་ལས་བཅོམ་ལྡན་འདས་ཀྱིས་སྲོག་གི་འདུ་བྱེད་དག་བྱིན་གྱིས་བརླབས་ནས་ཞེས་བྱ་བ་རྒྱ་ཆེར་འབྱུང་ངོ༌། །མིང་ཐ་དད་པས་དོན་ཐ་དད་པར་དགོས་ཏེ་
འདྲི་བ་ནི། དེ་དག་ལ་ཁྱད་པར་ཅི་ཞིག་ཡོད་ཅེས་བྱ་བའོ། །སྲོག་གི་འདུ་བྱེད་དག་བྱིན་གྱིས་བརླབས་ནས་ཞེས་འབྱུང་བའི་ཕྱིར་སྲོག་གི་འདུ་བྱེད་དག་ནི་ད་ལྟར་བྱུང་བའི་ལས་ཀྱི་འབྲས་བུ་ཡིན་པར་རྟོགས་སོ། །ཚེའི་འདུ་བྱེད་བཏང་ངོ་ཞེས་བྱ་བ་ནི་སྔར་བླངས་པ་བཏང་བ་ཡིན་ཏེ། སྔོན་གྱི་ལས་ཀྱི་འབྲས་བུ་ནི་ཚེའི་འདུ་བྱེད་དོ་ཞེས་བྱ་བར་ཤེས་སོ། །སྐད་ཅིག་མ་གཅིག་གཏོང་བའམ་བྱིན་གྱིས་རློབ་པ་ལ་ནི་དགོས་པ་ཡོད་པ་མ་ཡིན་ཏེ། དེས་གཞན་ལ་ཕན་པ་དང་བསྟན་པ་གནས་པའི་མཚན་ཉིད་ཅན་གྱི་དོན་ཐོབ་པར་མི་བྱེད་པའི་ཕྱིར་དང༌། ཚེ་སྐད་ཅིག་མ་གཅིག་གཏོང་བའམ་བྱིན་གྱིས་རློབ་པ་ལ་ནི་དགོས་པ་ཡོད་པ་མ་ཡིན་ཏེ། དེས་གཞན་ལ་ཕན་པ་དང་བསྟན་པ་གནས་པའི་མཚན་ཉིད་ཅན་གྱི་དོན་ཐོབ་པར་མི་བྱེད་པའི་ཕྱིར་དང༌། ཚེ་སྐད་ཅིག་མ་གཅིག་ལུས་བ་ལ་གཏོང་བ་དང་བྱིན་གྱིས་རློབ་པའི་སེམས་ཀུན་ཏུ་སྦྱོང་བ་མི་རིགས་པའི་ཕྱིར་རོ། །དུས་གཞན་གྱི་བར་དུ་འདུག་པའི་ཞེས་བྱ་བ་ལ། འདིས་ནི་ཚེ་སྐད་ཅིག་མ་ཉིད་དུ་སྟོན་པར་བྱེད་དོ། །གནས་པའི་ངང་ཚུལ་ནི་འདུག་པའོ། །འདུ་བྱེད་མང་པོ་རྣམས་ལ་ཞེས་བྱ་བ་རྒྱ་ཆེར་འབྱུང་བ་ལ། འདིས་ཅི་རིགས་པར་གཟུགས་ལ་སོགས་པ་ལྔ་དང་ཚོར་བ་ལ་སོགས་པ་ཕུང་པོ་བཞི་ལ་ལྡན་པ་མ་ཡིན་པའི་འདུ་བྱེད་ཀྱི་མཚན་ཉིད་ཅན་སྲོག་གི་དབང་པོ་འགོག་པར་བྱེད་དེ། དེ་ཉིད་ཀྱི་ཕྱིར་ཚེའི་རྫས་གཅིག་པུ་ནི་མེད་དོ་ཞེས་བྱ་བ་སྨོས་སོ། །དེ་ལྟ་མ་ཡིན་ན་ཞེས་བྱ་བ་ནི། གལ་ཏེ་ཚེའི་དབང་པོ་རྫས་ཡོད་པར་གྱུར་ན་ནི་ཞེས་བྱ་བའི་དོན་ཏོ། །འོ་ན་ཅི་ཞེ་ན། སྲོག་དག་བྱིན་གྱིས་བརླབས་ནས་ཚེ་དག་གཏང་ངོ་ཞེས་གསུངས་པར་འགྱུར་རོ། །ཁྱད་པར་གྱི་དོན་དུ་སྲོག་གི་མིང་ཅན་གྱི་འདུ་བྱེད་བྱིན་གྱིས་བརླབས་ཏེ། དེ་ལས་གཞན་པའི་ཚེའི་འདུ་བྱེད་བཏང་ནས་སོ་ཞེས་གཞན་དག་ཟེར་རོ། །གཞན་དག་ན་རེ་བཏགས་པར་ཡོད་པའི་ཚེ་འོ་ཞེས་འདི་ཤེས་པར་བྱ་བའི་ཕྱིར་འདུ་བྱེད་ཀྱི་ཚེ་ཚིག་དང་མང་པོའི་ཚིག་གོ་ཞེས་ཟེར་རོ། །ཅིའི་ཕྱིར་ཟླ་བ་གསུམ་ཁོ་ན་བྱིན་གྱིས་བརླབས་ཀྱི་ལྷག་པ་དང་ཆད་པ་མ་ཡིན་ཞེ་ན། དེའི་ཕྱིར་གདུལ་བའི་དོན་མེད་པའི་ཕྱིར་ཞེས་བྱ་བ་སྨོས་སོ། །དུས་དེ་ཙམ་གྱིས་ཀུན་ཏུ་རྒྱུར་བ་བཟང་གི་རྒྱུད་ཡོངས་སུ་སྨིན་པའི་ཕྱིར་ཟླ་བ་གསུམ་ལས་ལྷག་པར་བྱིན་གྱིས་བརླབས་པ་ལ་དགོས་པ་མེད་དོ། །གང་ཡང་རྫུ་འཕྲུལ་གྱི་རྐང་པ་ཞེས་རྒྱ་ཆེར་འབྱུང་བ་ལ། དེ་
ལྟ་མ་ཡིན་ན་ཚིག་ཙམ་དུ་འགྱུར་བས་སོ། །ཕུང་པོ་དང་འཆི་བདག་གི་བདུད་དག་ཅེས་བྱ་བ་ལ། ཕུང་པོའི་བདུད་ལས་རྒྱལ་བར་བྱ་བའི་ཕྱིར་ནི་བཏང་ལ། བཏང་ན་འགྲོངས་པར་འགྱུར་བས་དེ་ནས་འཆི་བདག་གི་བདུད་ལས་རྒྱལ་བར་བྱ་བའི་ཕྱིར་བྱིན་གྱིས་བརླབས་སོ། །བྱང་ཆུབ་ཀྱི་ཤིང་དྲུང་དུ་ནི་ཞེས་རྒྱ་ཆེར་འབྱུང་སྟེ། ཇི་སྐད་དུ། ཁྱོད་ཀྱིས་བྱང་ཆུབ་བརྙེས་ནས་ནི། །འདོད་པའི་ཁམས་ཀྱི་དབང་ཕྱུག་བཏུལ། །བྱང་ཆུབ་བར་ཆད་མེད་ལམ་དུ། །ཁམས་གསུམ་དབང་ཕྱུག་ལས་རྒྱལ་ལོ། །ཞེས་གསུངས་པ་ལྟ་བུའོ། །ཉོན་མོངས་པ་དང་ལྷའི་བུ་དག་ནི་ཕུང་པོ་དང་འཆི་བདག་གི་བདུད་ལས་འདའ་བར་བྱ་བ་ལ་བར་དུ་གཅོད་པའི་ཕྱིར་བདུད་ཉིད་ཡིན་ནོ། །དེ་ལྟར་བཅོམ་ལྡན་འདས་ནི་བདུད་བཞི་ལས་རྣམ་པར་རྒྱལ་བ་ཡིན་ནོ་ཞེས་བྱ་བར་འཐད་པ་ཡིན་ནོ། །བཅུ་གཉིས་གཉིས་ཞེས་བྱ་བ་ནི་རྣམ་པར་སྨིན་པ་ཡང་ཡིན་ལ། རྣམ་པར་སྨིན་པ་མ་ཡིན་པའོ། །དབང་པོ་ཉི་ཤུ་རྩ་གཅིག་པོ་རྣམས་ལ་ཁྱད་པར་མེད་པའི་ཕྱིར་དེ་དག་མི་ཤེས་པས་འདྲི་བ་ནི། བཅུ་གཉིས་གང་ཞེ་ན་ཞེས་བྱ་བའོ། །དེའི་ཕྱིར། ཐ་མ་བརྒྱད་དང་ཡིད་མི་བདེ། །མ་གཏོགས་པ་སྟེ་ཞེས་བྱ་བ་སྨོས་སོ། །ཐ་མ་བརྒྱད་ནི་གཅིག་ཏུ་དགེ་བ་ཡིན་ལ། རྣམ་པར་སྨིན་པ་ནི་ལུང་དུ་མ་བསྟན་པ་ཡིན་ནོ། །ཡིད་མི་བདེ་བ་ཡང་དགེ་བའམ་མི་དགེ་བ་ཡིན་གྱི་ལུང་དུ་མ་བསྟན་པ་ནི་མེད་དེ། དེའི་ཕྱིར་ཐ་མ་བརྒྱད་དང་ཡིད་མི་བདེ་བ་མ་གཏོགས་པའོ། །སྲོག་གི་དབང་པོ་ལས་གཞན་པ་རྣམས་ཞེས་བྱ་བ་ནི་བདེ་བླག་ཏུ་ཁོང་དུ་ཆུད་པར་བྱ་བའི་ཕྱིར་རོ། །སྲོག་གི་དབང་པོ་ལས་གཞན་པ་རྣམས་ཞེས་བྱ་བ་ནི་ཡིད་མི་བདེ་བ་ལས་གཞན་ཚོར་བ་བཞི་དང་ཡིད་དང་མིག་ལ་སོགས་པ་བདུན་ནོ། །དེ་ལ་མིག་ལ་སོགས་པ་ཞེས་བྱ་བ་རྒྱ་ཆེར་འབྱུང་བ་ལ། མིག་ལ་སོགས་པ་རྣམས་ལ་རྣམ་པར་སྨིན་པ་ལས་སྐྱེས་པ་དང༌། རྒྱས་པ་ལས་བྱུང་བ་མ་གཏོགས་པའི་བྱེ་བྲག་གཞན་མེད་པ་དེའི་ཕྱིར་ལྷག་མ་རྣམས་ནི་རྣམ་པར་སྨིན་པ་ཡིན་ནོ་ཞེས་བྱ་བ་སྨོས་སོ། །དགེ་བ་དང་ཉོན་མོངས་པ་ཅན་རྣམས་དང་ཞེས་བྱ་བ་ནི་རྣམ་པར་སྨིན་པ་ལུང་དུ་མ་བསྟན་པ་ཡིན་པའི་ཕྱིར་རོ། །སྤྱོད་ལམ་པ་དང་བཟོའི་གནས་པ་དང་སྤྲུལ་པ་རྣམས་ནི་ཞེས་བྱ་བ་ནི་ལུང་མ་བསྟན་པ་ཡིན་ཡང་འབད་པས་བསྒྲུབ་པར་བྱ་བ་ཡིན་པའི་ཕྱིར་རྣམ་པར་སྨིན་པ་མ་ཡིན་ནོ། །ཅི་རིགས་པར་ཞེས་བྱ་བ་འདི་དག་ནི་སྤྱོད་ལམ་པ་ལ་སོགས་པ་མངོན་
པར་འདུ་བྱ་བར་ཞུགས་པའི་ཕྱིར་རྟོག་པ་དང་བཅས་པ་ཡིན་པས་ཡིད་ཀྱི་རྣམ་པར་ཤེས་པ་ཁོ་ན་ཡིན་ནོ། །དེ་ལ་འདོད་པའི་ཁམས་ན་ནི་གསུམ་ཆར་ཡང་ཡོད་དོ། །གཟུགས་ཀྱི་ཁམས་ན་ནི་བཟོའི་གནས་མ་གཏོགས་པ་དག་གོ །གཟུགས་མེད་པའི་ཁམས་ན་ནི་སྤྱོད་ལམ་ལ་སོགས་པ་མེད་པའི་ཕྱིར་གསུམ་ག་ཡང་མེད་དོ། །དེ་ལ་འདོད་པ་ན་སྤྱོད་པའི་སྤྱོད་ལམ་པ་དང་བཟོའི་གནས་ལ་ནི་ཡིད་དང༌། ཡིད་བདེ་བ་དང༌། བཏང་སྙོམས་ཀྱི་དབང་པོ་དག་གོ །བདེ་བ་དང་སྡུག་བསྔལ་གཉིས་ཀ་ནི་མེད་དོ། དེ་དག་ནི་འདོད་པའི་ཁམས་ན་རྣམ་པར་ཤེས་པའི་ཚོགས་ལྔ་པ་ཡིན་པའི་ཕྱིར་དང༌། ཡིད་མི་བདེ་བ་ཡང་མ་ཡིན་ཏེ། དགེ་བ་དང་མི་དགེ་བ་ཡིན་པའི་ཕྱིར་རོ། །གཟུགས་ན་སྤྱོད་པའི་སྤྱོད་ལམ་པ་ལ་ནི་ཡིད་དང་བདེ་བ་དང་བཏང་སྙོམས་ཀྱི་དབང་རྣམས་སོ། །དེ་ལ་ནི་བསམ་གཏན་གསུམ་པའི་ཡིད་ཀྱི་ས་པའི་བདེ་བ་ཡོད་པ་ཡིན་ནོ། །སྡུག་བསྔལ་ནི་གཟུགས་ཀྱི་ཁམས་ན་ནམ་ཡང་ཡོད་པ་མ་ཡིན་ནོ། །སྤྲུལ་པ་ནི་ས་ལྔ་ཆར་ལ་ཡང་ཡིད་དང་བཏང་སྙོམས་ཀྱི་དབང་པོ་གཉིས་སོ། །བདེ་བ་དང་ཡིད་བདེ་བའི་དབང་པོ་གཉིས་ནི་མེད་དོ། །སྦྱོར་བའི་ཁྱད་པར་གྱིས་བསྒྲུབ་པར་བྱ་བ་ཡིན་པའི་ཕྱིར་རོ། །བཙུན་པ་གོ་ཆ་མཐའ་ཡས་ན་རེ། སྤྱོད་ལམ་པ་དང་བཟོའི་གནས་དང་སྤྲུལ་པའི་སེམས་རྣམས་རྟག་ཏུ་བཏང་སྙོམས་ཀྱི་དབང་པོ་ཁོ་ན་དང་མཚུངས་པར་ལྡན་པ་དེའི་ཕྱིར་ཅི་རིགས་པ་སེམས་དང་སེམས་ལས་བྱུང་བ་རྣམས་དང་ལྷན་ཅིག་དབང་བྱེད་དོ། །འདི་རྣམས་ཁོ་ན་དེར་སེམས་རྣམས་དང་ཡིད་ཀྱི་དབང་པོར་རིག་པར་བྱ་སྟེ་དེ་ལྟ་བུ་ནི་ཅི་རིགས་པའི་དོན་ཏོ་ཞེས་ཟེར་རོ། །ལྷག་མ་རྣམས་ཞེས་བྱ་བ་ནི་གང་དག་རྣམ་པར་སྨིན་པའི་རྒྱུ་ལས་བཟློག་པ་དེ་དག་ནི་ཡིད་ལ་སོགས་པ་སྟེ་རྣམ་པར་སྨིན་པའོ། །ལྷག་མ་རྣམས་ནི་རྣམ་པར་སྨིན་པ་མ་ཡིན་ཞེས་བྱ་བ་ལ་དད་པ་ལ་སོགས་པ་བརྒྱད་དང་ཡིད་མི་བདེ་བའོ། །ཡང་ཇི་ལྟར་དེ་རྣམས་རྣམ་པར་སྨིན་པ་མ་ཡིན་པར་གྲུབ་ཅེ་ན། གཅིག་ཏུ་རྣམ་པར་སྨིན་པ་ཉིད་དང་རྣམ་པར་སྨིན་པ་མ་ཡིན་པ་བསྟན་པ་ལས་སོ། །དེ་ལྟར་ན་སྲོག་གི་དབང་པོ་རྣམ་པར་སྨིན་པ་ཁོ་ནའོ། །དགུ་ནི་རྣམ་པར་སྨིན་པ་མ་ཡིན་པ་ཁོ་ནའོ། །བཅུ་གཉིས་ནི་རྣམ་པ་གཉིས་སོ། །མདོ་འདི་ཇི་ལྟར་དྲང་ཞེ་ན་ཞེས་བྱ་བ་ལ། གལ་ཏེ་ཡིད་བདེ་བ་དང་བཏང་སྙོམས་མྱོང་བར་འགྱུར་
པའི་ལས་ལྟར་ཡིད་མི་བདེ་བ་མྱོང་བར་འགྱུར་བ་ཡིད་མི་བདེ་བའི་རྣམ་པར་སྨིན་པའི་ལས་ཅན་དུ་མི་འདོད་པ་དེའི་ཕྱིར་མདོ་དང་འགལ་ལོ་ཞེས་སྟོན་ཏོ། །བདེ་བར་མྱོང་བར་འགྱུར་བའི་རེག་པ་ལྟར་མཚུངས་པར་ལྡན་པ་མྱོང་བར་འགྱུར་བའི་དབང་དུ་མཛད་ནས་གསུངས་པ་ཡིན་གྱི་རྣམ་པར་སྨིན་པ་མྱོང་བར་འགྱུར་བའི་དབང་དུ་མཛད་ནས་ནི་མ་ཡིན་པས་མདོ་དང་འགལ་བ་མེད་དོ། །ལས་འདི་ལ་ཡིད་མི་བདེ་བ་མེད་པར་འགྱུར་བའམ་ཡིད་མི་བདེ་བ་སྟེ། མཚུངས་པར་ལྡན་པ་མྱོང་བར་འགྱུར་བ་ཞེས་བྱ་བའི་ཐ་ཚིག་གོ །མྱོང་འགྱུར་རྣམ་པ་ལྔ་ཞེས་བྱ། །ཞེས་ཕྱི་ནས་འཆད་པར་འགྱུར་རོ། །འོ་ན་ནི་ཡིད་བདེ་བ་དང་བཏང་སྙོམས་མྱོང་བར་འགྱུར་བའི་ལས་དག་ཀྱང་ཞེས་བྱ་བ་ལ་སོགས་པ་ལ། ཡིད་མི་བདེ་བ་མྱོང་བར་འགྱུར་བའི་ལས་བཞིན་དུ་ཡིད་བདེ་བ་དང་བཏང་སྙོམས་མྱོང་བར་འགྱུར་བའི་ལས་དག་ཀྱང་མཚུངས་པར་ལྡན་པ་མྱོང་བར་འགྱུར་བ་ཁོ་ནའི་དབང་དུ་མཛད་ནས་སྟོན་པར་ཐལ་བར་འགྱུར་རོ། །ཡིད་བདེ་བ་དང་བཏང་སྙོམས་དག་དང་མཚུངས་པར་ལྡན་པའི་ལས་ཡིད་བདེ་བ་དང་བཏང་སྙོམས་མྱོང་བར་འགྱུར་བའི་ལས་ཡིན་པས། དེ་ལྟར་ན་ཡིད་བདེ་བ་དང་བཏང་སྙོམས་གཉིས་ཀྱང་ཡིད་མི་བདེ་བ་དང་འདྲ་བར་རྣམ་པར་སྨིན་པ་མ་ཡིན་པར་འགྱུར་ཏེ། དགེ་བ་དང་མི་དགེ་བའི་ལས་དག་དང་མཚུངས་པར་ལྡན་པའི་ཕྱིར་རོ། །ཇི་ལྟར་དགའ་བ་དེ་ལྟར་ཡིན་ལ་རག་སྟེ། ཞེས་བྱ་བ་ནི་གཉི་ག་ལྟར་ཡང་འགལ་བ་མེད་པའི་ཕྱིར་རོ། །ཡིད་བདེ་བ་དང་བཏང་སྙོམས་མྱོང་བར་འགྱུར་བའི་ལས་ཞེས་བྱ་བ་ནི་ཡིད་བདེ་བ་དང་བཏང་སྙོམས་རྣམ་པར་སྨིན་པ་ཅན་དང༌། ཡིད་བདེ་བ་དང་བཏང་སྙོམས་དང་མཚུངས་པར་ལྡན་པ་ཞེས་བྱ་བ་ནི་གཉི་ག་ལྟར་ཡང་འགལ་བ་མེད་དོ། །དེའི་ཕྱིར་ཇི་ལྟར་དགའ་བ་དེ་ལྟར་ཡིན་ལ་རག་གོ །གོ་སྐབས་མེད་པས་དེ་ནི་དེ་ལྟར་ཤེས་སོ་ཞེས་བྱ་བ་ལ། གོ་སྐབས་མེད་པ་ནི་མི་སྲིད་པའོ། །གལ་ཏེ་ཡིད་མི་བདེ་བ་ལྟར་ཡིད་བདེ་བ་དང་བཏང་སྙོམས་དག་ལ་རྣམ་པར་སྨིན་པའི་གོ་སྐབས་མེད་པར་གྱུར་ན་ནི་དེའི་ཕྱིར་ཡིད་བདེ་བ་དང་བཏང་སྙོམས་དག་ཀྱང་ཡིད་མི་བདེ་བ་དང་འདྲ་བར་མཚུངས་པར་ལྡན་པ་མྱོང་བར་འགྱུར་བའི་དབང་དུ་མཛད་ནས་བསྟན་གྱི། རྣམ་པར་སྨིན་པ་མྱོང་བར་འགྱུར་བའི་དབང་དུ་མཛད་ནས་མ་ཡིན་པ་དེ་ལྟར་ཤེས་པར་འགྱུར་རོ། །ཡང་ན་འདི་ནི་དོན་གཞན་ཡིན་ཏེ། གོ་སྐབས་མེད་པས་ན་ཡིད་མི་བདེ་
བ་མྱོང་བར་འགྱུར་བ་དེ་ལས་དེ་ནི་མཚུངས་པར་ལྡན་པ་མྱོང་བར་འགྱུར་བའི་དབང་དུ་མཛད་ནས་གསུངས་སོ་ཞེས་བྱ་བར་ཤེས་པར་འགྱུར་བ། ཡིད་མི་བདེ་བ་ལ་ནི་ཡིད་བདེ་བ་དང་བཏང་སྙོམས་ལྟར་རྣམ་པར་སྨིན་པ་སྲིད་པ་ཡོད་པ་མ་ཡིན་ནོ། །གང་གི་ཕྱིར་ཡིད་མི་བདེ་བ་མྱོང་བར་འགྱུར་བའི་ལས་ཀྱང་ཡིད་བདེ་བ་དང་བཏང་སྙོམས་མྱོང་བར་འགྱུར་བའི་ལས་ལྟར་རྣམ་པར་སྨིན་པ་མྱོང་བར་འགྱུར་བའི་དབང་དུ་མཛད་ནས་གསུངས་སོ་ཞེས་བྱ་བར་རྟོགས་སོ། །ཚིག་ཙམ་གྱིས་དད་པར་མི་འགྱུར་བ་དེའི་ཕྱིར་རྣམ་པར་སྨིན་པའི་གོ་སྐབས་བཟློག་པའི་རྒྱུ་བྲིས་པ་ནི། འདི་ལ་རིགས་པ་ཅི་ཞིག་ཡོད་ཅེས་བྱ་བ་ལ་སོགས་པའོ། །རྒྱུ་སྨྲས་པ་ནི། ཡིད་མི་བདེ་བ་ནི་ཞེས་རྒྱ་ཆེར་འབྱུང་སྟེ། ཡིད་མི་བདེ་བ་ནི་ཡིད་དུ་མི་འོང་བའི་བསམ་པ་ལ་སོགས་པ་ཀུན་ཏུ་རྟོག་པའི་ཁྱད་པར་དག་གིས་སྐྱེད་པར་བྱེད་ཅིང་ཞི་བར་བྱེད་པ་ཡིན་གྱི། རྣམ་པར་སྨིན་པ་ནི་དེ་ལྟར་མ་ཡིན་ནོ། །མིག་ལ་སོགས་པ་རྣམ་པར་སྨིན་པ་ནི་རྣམ་པར་རྟོག་པ་ལ་མི་ལྟོས་པས་ལས་ཀྱི་འཕེན་པའི་དབང་གིས་འཇུག་པ་དང་ལྡོག་པ་ཉིད་ཡིན་ནོ། །དེ་ལྟར་ན་ཡིད་བདེ་བ་ཡང་དེ་དང་འདྲ་ཞེས་བྱ་བ་འདིས་འཁྲུལ་པར་སྟོན་ཏེ། ཡིད་བདེ་བ་ཡང་ཡིད་དུ་འོང་བའི་བསམ་པ་ལ་སོགས་པའི་རྣམ་པར་རྟོག་པ་དག་གིས་སྐྱེད་པར་བྱེད་ཅིང་ཞི་བར་བྱེད་པ་ཡིན་མོད་ཀྱི། འོན་ཀྱང་རྣམ་པར་སྨིན་པར་འདོད་པས་འདི་ནི་རིགས་པ་མ་ཡིན་ནོ། །ཡིད་མི་བདེ་བ་རྣམ་པར་སྨིན་པ་མ་ཡིན་པ་ཉིད་དུ་སྒྲུབ་པ་ལ་རིགས་པ་ནུས་པ་དང་ལྡན་པ་གཞན་སྨྲ་བ་ནི། འོ་ན་གལ་ཏེ་ཡིད་མི་བདེ་བ་ཞེས་བྱ་བ་རྒྱ་ཆེར་འབྱུང་བའོ། །དེའི་ཕྱིར་ཞེས་བྱ་བ་སྟེ། མཚམས་མེད་པའི་རྒྱུ་ཅན་གྱིས་ཡིད་མི་བདེ་བ་སྐྱེ་བས་ལང་དེ་རྣམ་པར་སྨིན་པར་འགྱུར་རོ། །དེ་ལྟར་ན་མཐོང་བའི་ཆོས་ལ་མྱོང་བར་འགྱུར་བ་ཡིན་གྱི་སྐྱེས་ནས་མྱོང་བར་འགྱུར་བ་ཡང་མ་ཡིན་ཞིང་དམྱལ་བ་མྱོང་བར་འགྱུར་བ་ཡང་མ་ཡིན་ནོ། །ཡིད་བདེ་བ་ཡང་དེ་དང་འདྲ་སྟེ་ཞེས་བྱ་བ་ལ། སྐྱེས་ནས་མྱོང་བར་འགྱུར་བའི་ལས་དགེ་བ་མཐོང་བའི་ཆོས་ལ་མྱོང་བར་འགྱུར་བ་ཉིད་ཡིན་ན་མི་རུང་བས་ཡིད་མི་བདེ་བཞིན་དུ་ཡིད་བདེ་བ་ཡང་རྣམ་པར་སྨིན་པ་ཁས་བླང་བར་མི་བྱའོ། །ཡིད་བདེ་བ་བཞིན་དུ་ཡིད་མི་བདེ་བ་ཡང་དེའི་རྒྱུ་མཚན་ལས་ལས་ཀྱི་རྣམ་པར་སྨིན་པའོ་ཞེས་ཁས་བླང་བར་མི་བྱའོ་ཞེས་དེ་ལྟར་འཁྲུལ་པ་སྨྲས་པ་དང༌། ཡང་ཡིད་མི་བདེ་བ་རྣམ་པར་སྨིན་པ་མ་ཡིན་པ་ཉིད་
ལ་རྒྱུ་གཞན་སྨྲས་པ་ནི། འོ་ན་འདོད་ཆགས་དང་བྲལ་བ་ལ་ཞེས་རྒྱ་ཆེར་འབྱུང་བའོ། །འདོད་ཆགས་དང་བྲལ་བ་རྣམས་ལ་ནི་སྡུག་བསྔལ་གྱི་དབང་པོ་ལྟར་ཡིད་མི་བདེ་བ་རྗེས་སུ་འཇུག་པ་མ་ཡིན་ཏེ། སྟོན་པ་མྱ་ངན་ལས་འདས་ཀྱང་བདག་ལ་མྱ་ངན་ལ་སོགས་པ་མི་འབྱུང་ངོ་ཞེས་མདོ་ལས་བཀག་པའི་ཕྱིར་རོ། །རྣམ་པར་སྨིན་པ་ནི་དེ་ལྟ་མ་ཡིན་ནོ་ཞེས་བྱ་བ་ལ། མིག་ལ་སོགས་པ་རྣམ་པར་སྨིན་པ་ནི་འདོད་ཆགས་དང་བྲལ་བ་རྣམས་ལ་ལྡོག་པ་མ་ཡིན་ནོ། །དགོས་པ་མེད་པའི་ཕྱིར་ན་དགེ་བ་མངོན་དུ་བྱེད་པ་ཡང་མ་ཡིན་ཏེ། དེ་ནི་ཡིད་བདེ་བ་དང་འདྲ་བར་ཕན་འདོགས་པར་བྱེད་པས་ཡིན་ནོ། །དེ་དག་གི་ཡིད་བདེ་བ་ཞེས་རྒྱས་པར་འབྱུང་བ་ལ། འདོད་ཆགས་དང་བྲལ་བ་རྣམས་ལ་ཡིད་བདེ་བ་དགེ་བ་སྙོམས་པར་འཇུག་པས་བསྡུས་པ་དང༌། བསམ་པའི་རྒྱུ་ཅན་ཡོད་མོད་ཀྱི། །དགེ་བ་རྣམ་པར་སྨིན་པ་ནི་མ་ཡིན་ནོ། །དེའི་ཕྱིར་དེ་དག་གི་ཡིད་བདེ་བ་ལུང་དུ་མ་བསྟན་པ་རྣམ་པར་སྨིན་པ་ཇི་ལྟ་བུ་ཡིན་པ་བརྗོད་པར་བྱ་སྟེ། ཀུན་ཏུ་འབྱུང་བ་ནི་གཅད་དུ་མེད་དོ། །ཅི་འདྲ་ཡང་རུང་སྟེ་ཞེས་བྱ་བ་རྒྱ་ཆེར་འབྱུང་སྟེ། ཡིད་བདེ་བ་ནི་ཀུན་ཏུ་འབྱུང་བ་སྲིད་པས་རྣམ་པར་སྨིན་པའི་གོ་སྐབས་ཡོད་དེ། དེ་ནི་གང་གི་ཚེ་རེས་འགའ་ཕྱི་རོལ་གྱི་རྒྱུ་མཚན་མེད་པ་ནི་ཀུན་ཏུ་རྟོག་པ་མེད་པར་སྐྱེ་སྟེ། ལུང་དུ་མ་བསྟན་པ་རྣམ་པར་སྨིན་པ་ནི་དེ་ལྟ་བུ་ཡིན་ནོ། །ཡིད་མི་བདེ་བ་ནི་ཐམས་ཅད་དུ་ཡང་ཀུན་ཏུ་མི་འབྱུང་བས་ཞེས་བྱ་བ་འབྱུང་བ་ལ། དགེ་བ་དང་ལུང་དུ་མ་བསྟན་པ་ཡིན་ན། དགེ་བ་གང་དག་ལས་ཡིན། ལུང་ལས་ཀྱང་སྟེ། གང་ལ་བརྟེན་ནས་ཡིད་བདེ་བ་རྣམ་པར་སྨིན་པ་སོ་སོར་ཡང་དག་པ་མྱོང་བར་བྱེད་ཅེས་གསུངས་ཀྱི། དེ་ལྟར་ནག་པོའི་ཕྱོགས་ལ་ནི་ཡིད་མི་བདེ་བ། བ་ཙ་ན་མི་ཏྱ་པ་བི་དྡྷཾ་དེ་རྣམ་པར་སྨིན་པའི་ལས་ལས། ཡིད་མི་བདེ་བ་ཀུན་ཏུ་རྟོག་པའི་ཁྱད་པར་གྱིས་བསྐྱེད་དོ། །སྤྲུལ་པའི་ཚེ་བཞིན་དུ་གཞན་གྱིས་བསྐྱེད་པ་ཡང་རྣམ་པར་སྨིན་པར་འགྱུར་བར་ཚིག་གིས་འཕངས་པ་ལ་ཉེས་པ་ཅི་ཞེ་ན། བྱེ་བྲག་ཏུ་སྨྲ་བ་རྣམས་ནི་སྤྲུལ་པའི་ཚེ་མི་འདོད་དེ། སྤྲུལ་པའི་ཚེའི་རླུང་གཅིག་ཅེས་བྱ་བ། འདིར་ཨ་ས་བྷིདྡྷཾ་མི་ཤེས་པ་དང་མ་བཅོས་པ་དང་མ་དག་པ་གསུམ་ལ་འཇུག་པས་གང་དང་འབྲེལ་བརྟག་པར་བྱའོ། །སེམས་ཅན་དུ་བགྲང་བ་ཉིད་ཀྱི་ཕྱིར་དང་ཆོས་ཀྱི་སྐྱེ་མཆེད་ཀྱི་སྤྲུལ་པ་མེད་པའི་ཕྱིར་རོ། །ཅི་སྟེ་རྟེན་ཁོ་ན་སྤྲུལ་པར་གསུངས་པ་དེ་ལྟ་ན་ཡང་དེ་ལས་གཞན་སྐྱེད་པ་མ་ཡིན་ཏེ། རབ་ཀྱི་མཐའ་པའི་བསམ་
གཏན་དང་སྙོམས་པར་འཇུག་པ་ལས་ལོངས་པའི་མཇུག་ཐོགས་སུ་བརྗོད་པའི་རྣམ་རིག་བྱེད་ཀྱི་དབང་བྱེད་པས་ལོངས་སྤྱོད་ཀྱི་འབྲས་བུའི་ལས་དེའི་རྣམ་པར་སྨིན་པའི་རྒྱུའི་ངོ་བོར་གྱུར་པའི་ཕྱིར་རོ། །མཐའ་གཅིག་ཏུ་དེའི་སྒྲུབ་བྱེད་རྣམ་པར་སྨིན་པ་མ་ཡིན་པ་ཉིད་ཁོང་ཁྲོ་བཞིན་དུ་འདོད་ཆགས་དང་བྲལ་བ་རྣམས་ལ་མེད་པ་གང་ཡིན་པ་དེ་རྣམ་པར་སྨིན་པ་མ་ཡིན་ནོ། །གང་ཡང་འདོད་ཆགས་དང་བྲལ་བ་རྣམས་ལ་དེའི་རྣམ་པར་སྨིན་པ་མེད་པ་མ་ཡིན་ཏེ། དཔེར་ན་ཚེ་ལྟ་བུའོ། །ཇི་སྐད་དུ། འདིའི་རྒྱུད་ལ་གང་ཅུང་ཟད་རྣམ་པར་སྨིན་པ་དེ་ནི་ཡིད་མི་བདེ་བའི་སེམས་པ་མ་ཡིན་ནོ་ཞེས་ཏེ། འདོད་ཆགས་དང་བྲལ་བའི་མངོན་པར་འདོད་པ་ཇི་ལྟ་བ་ལས་སོ། །རྒྱུད་ལ་རྣམ་པར་སྨིན་པར་བྱེད་པའི་འདོད་ཆགས་དང་བྲལ་བའི་རྒྱུད་ལ་རྣམ་པར་སྨིན་པ་མ་ཡིན་ནོ་ཞེས་ཉེ་བར་བསྟན་པར་བྱའོ། །དེ་ལ་བརྒྱད་པ་སྲོག་གི་དབང་པོ་དང་ལྡན་པ་རྣམས་ནི་ཞེས་རྒྱ་ཆེར་འབྱུང་བ་ལ། མིག་ལ་སོགས་པ་པོའི་དབང་པོའི་མཐར་ཐུག་པ་རྣམས་ནི་བརྒྱད་པ་སྲོག་གི་དབང་པོ་དང་ཞེས་བྱ་སྟེ། མིག་ལ་སོགས་པ་རྣམས་བརྒྱད་པ་སྲོག་གི་དབང་པོ་དང་ལྡན་པའོ། །བདེ་འགྲོ་ནི་ལྷ་དང་མིའོ། །ངན་འགྲོ་ནི་ངན་སོང་གསུམ་མོ། །ཡིད་ཀྱི་དབང་པོའི་ནི་གཉིས་ཀར་ཞེས་བྱ་བ་ལ། གཉིས་ཀ་ཞེས་བྱ་བ་ནི་བདེ་འགྲོ་དང་ངན་འགྲོ་དག་ཏུའོ། །གཉིས་ཀའི་ཞེས་བྱ་བ་ནི་དགེ་བ་དང་མི་དགེ་བ་སྟེ། གང་གི་ཚེ་ཡིད་ཀྱི་དབང་པོ་རྣམ་པར་སྨིན་པ་ལས་སྐྱེས་པ་སྡུག་བསྔལ་དང་མཚུངས་པར་ལྡན་པར་གྱུར་པ་དེའི་ཚེ་ནི། བདེ་འགྲོ་འམ་ངན་འགྲོ་ན་ཉེས་པར་སྤྱད་པའི་རྣམ་པར་སྨིན་པའོ། །གང་གི་ཚེ་རྣམ་པར་སྨིན་པ་ལས་སྐྱེས་པ་བདེ་བ་དང༌། ཡིད་བདེ་བ་དང་བཏང་སྙོམས་དང་མཚུངས་པར་ལྡན་པར་གྱུར་པ་དེའི་ཚེ་ནི་དགེ་བའི་ཡིན་ནོ། །བདེ་བ་དང་ཡིད་བདེ་བ་དང་བཏང་སྙོམས་ཀྱི་དབང་པོ་རྣམས་ནི་དགེ་བའི་རྣམ་པར་སྨིན་པ་ཡིན་ནོ་ཞེས་བྱ་བ་ནི་དམྱལ་བ་དག་མ་གཏོགས་པའི་བདེ་འགྲོའམ་ངན་འགྲོ་ནའོ། །སྡུག་བསྔལ་གྱི་དབང་པོའི་མི་དགེ་བ་ནི་ཞེས་བྱ་བ་ནི་བདེ་འགྲོ་དང་ངན་འགྲོ་དག་ཏུའོ། །བརྒྱད་པ་སྲོག་གི་དབང་པོ་དང་ལྡན་པ་རྣམས་ནི་བདེ་འགྲོ་ན་ནི་དགེ་བའི་ལས་ཀྱི་རྣམ་པར་སྨིན་པ་ཡིན་ལ་ཞེས་བཤད་ན། མཚན་གཉིས་པའི་དབང་པོ་གཉིས་བདེ་འགྲོ་ན་དགེ་བའི་རྣམ་པར་སྨིན་པ་ཇི་ལྟར་ཡིན་ཞེ་ན། དེའི་ཕྱིར་བདེ་འགྲོ་ན་ཞེས་བྱ་བ་རྒྱས་པར་སྨོས་སོ། །བདེ་འགྲོ་སྟེ་མི་དག་
གི་ནང་ནས་མི་དགེ་བའི་ལས་ཀྱིས་དབང་པོ་གཉིས་པོ་དེ་རྗེས་སུ་མི་འཚམ་པའི་གནས་སུ་རྙེད་པ་ཡིན་ཏེ། དེ་ནི་སེམས་དང་ལྡན་པ་མ་ཡིན་པའི་འདུ་བྱེད་དོ། །དབང་པོ་ནི་ལུས་ཀྱི་དབང་པོའི་ཕྱོགས་གཅིག་ཡིན་པའི་ཕྱིར་དགེ་བ་ཁོ་ནའི་ཡིན་ཏེ། ལུས་ཀྱི་དབང་པོ་བཞིན་དུ་བདེ་འགྲོ་ན་གཅིག་ཏུ་དགེ་བ་ཁོ་ནའི་རྣམ་པར་སྨིན་པ་ཡིན་ནོ། །དེ་ཉིད་ཀྱི་ཕྱིར་དབང་པོ་ནི་མ་ཡིན་ཏེ། དགེ་བས་འཕངས་པ་ཡིན་པའི་ཕྱིར་རོ་ཞེས་བྱ་བ་སྨོས་སོ། །དབང་པོ་ནི་རྣམ་པར་སྨིན་པ་དང་བཅས་ཞེས་བྱ་བ་ལ་སོགས་པ་ལ། རྣམ་པར་སྨིན་པ་དང་ལྷན་ཅིག་པ་ནི་རྣམ་པར་སྨིན་པ་དང་བཅས་པ་དག་སྟེ། གང་དག་ལ་རྣམ་པར་སྨིན་པའི་འབྲས་བུ་ཡོད་པ་ཞེས་བྱ་བའི་དོན་ཏོ། །གང་འདི་ཡིད་མི་བདེ་བ་རྣམ་པར་སྨིན་པ་མ་ཡིན་ནོ་ཞེས་བཤད་མ་ཐག་པ་དེ་ནི་རྣམ་པར་སྨིན་པ་དང་བཅས་པ་དེ་གཅིག་པུ་ནི་རྣམ་པར་སྨིན་པ་དང་བཅས་པ་ཁོ་ན་ཡིན་ཏེ། ལུང་དུ་མ་བསྟན་པ་དང་ཟག་པ་མེད་པ་རྣམས་ཁོ་ན་རྣམ་པར་སྨིན་པའི་རྒྱུ་མ་ཡིན་པའི་ཕྱིར་དང་དེ་ནི་གཉིས་ཀ་ལས་ལོག་པའི་ཕྱིར་རོ། །ནི་ཞེས་བྱ་བའི་སྒྲ་ནི་ཁོ་ན་ཞེས་བྱ་བའི་དོན་དང་ཞེས་བྱ་བ་ནི་ངེས་པར་གཟུང་བའི་དོན་དང་ཞེས་བྱ་བའི་ཐ་ཚིག་གོ །རིམ་པ་བཞིན་དུ་སྦྱར་བ་ཞེས་བྱ་བ་ནི། དེ་གཅིག་པུ་རྣམ་པར་སྨིན་བཅས་ནི་ཞེས་མཐར་རིག་པར་བྱ་སྟེ་ཞེས་བྱ་བའི་དོན་ཏོ། །རིམ་པ་བཞིན་དུ་སྦྱར་ན་ནི་ཇི་སྐད་བཤད་པའི་ངེས་པར་གཟུང་བར་རིགས་ཏེ། དེ་ལྟ་མ་ཡིན་ན་དེ་ཁོ་ན་རྣམ་པར་སྨིན་པ་དང་བཅས་སོ། །ཞེས་བྱ་བར་ངེས་པར་གཟུང་བར་ཤེས་པར་འགྱུར་རོ། །དེ་ལྟ་ན་གཞན་དག་རྣམ་པར་སྨིན་པ་མེད་པར་ཐལ་བར་འགྱུར་བས་བཅུ་རྣམ་གཉིས་ཞེས་བརྗོད་པར་མི་བྱའོ། །དེ་ལྟར་འོ་ན་ཚིག་འདི་ལས་དེ་གཅིག་པུ་རྣམ་པར་སྨིན་པ་དང་བཅས་པ་ཞེས་བྱ་བ་འདིར་ཇི་སྐད་བཤད་པའི་ངེས་པར་གཟུང་བར་རྟོགས་པར་བྱའོ། །ཀིནྟུ་ཤབྡེ་ན་ཀྲ་མ་བྷ་ད་སྡུ་ལུང་དུ་མ་བསྟན་པ་ཟག་པ་མེད་པ་ཉིད་ཀྱི་བྱསྟ་སྱ་རྣམ་པར་སྨིན་པ་མ་ཡིན་པ་ཉིད་ཀྱི་རྒྱུ་བསྟན་པའི་ཕྱིར་རོ། །ཇི་ལྟར་མཐའ་གཅིག་ཏུ་རྣམ་པར་སྨིན་པ་དང་བཅས་པ་ཉིད་མཐའ་དག་གི་རྒྱུ་མ་ཡིན་པ་ཉིད་ཅེས་བྱའོ། །ཡིད་མི་བདེ་བ་རྣམ་པར་སྨིན་པ་དང་བཅས་པ་ཁོ་ན་ཡིན་ནོ་ཞེས་བྱ་བ་གང་ཡིན་འོན་ཏེ་སྒྲའི་རིམ་པ་ཐ་དད་པས་ནི། པ་འདི་ལ་རྒྱུ་ཅི་ཞིག་ཡོད་ཅེ་ན། དེའི་གསལ་བ་ཐ་དག །ཕྱིར་དེ་ནི་ལུང་དུ་མ་བསྟན་པ་ཡང་མེད་ལ་ཞེས་བྱ་བ་རྒྱ་ཆེར་འབྱུང་སྟེ། །ས་བོན་རུལ་བ་བཞིན་ལུང་དུ་མ་བསྟན་པ་ནི་རྣམ་པར་སྨིན་པ་མེད་པ་ཡིན་ལ། ཟག་པ་
མེད་པ་ཡང་ས་བོན་གྲུང་པོ་རླན་གྱི་ས་མ་བརླན་པ་ལྟར་སྲ་བས་མ་བརླན་པའི་ཕྱིར་རྣམ་པར་སྨིན་པ་མེད་པ་ཡིན་ཞིང༌། ཡིད་མི་བདེ་བ་ནི་དགེ་བ་ཟག་པ་དང་བཅས་པ་ཡིན་པའི་ཕྱིར་དང་མི་དགེ་བ་ཡིན་པའི་ཕྱིར་རྣམ་པར་སྨིན་པ་དང་བཅས་པ་ཡིན་ནོ། །མཉམ་པར་གཞག་པ་མ་ཡིན་པའི་ཕྱིར་ཞེས་བྱ་བ་ནི། ཟག་པ་མེད་པ་ཉིད་ཀྱིས་མེད་པ་ལ་རྒྱུ་སྨྲས་པ་སྟེ། མཉམ་པར་མ་བཞག་པའི་ཟག་པ་མེད་པ་འདུས་བྱས་ནི་ཡོད་པ་མ་ཡིན་ནོ། །བཅུ་རྣམ་གཉིས་ཞེས་བྱ་བ་ལ་བཅུ་ཁོ་ན་རྣམ་པ་གཉིས་ཡིན་ནོ་ཞེས་ངེས་པར་གཟུང་བས་གཞན་རྣམ་པ་གཅིག་གོ་ཞེས་བྱ་བ་གྲུབ་པར་འགྱུར་རོ། །གཞན་ནི་རྣམ་པར་སྨིན་པ་མེད་པ་ཡིན་ནོ་ཞེས་བྱ་བར་གྲུབ་པོ། །གཞན་གང་ཞེ་ན་དབང་པོ་བཅུ་གཅིག་གོ །དེ་ལ་མིག་ལ་སོགས་པ་དང༌། བརྒྱད་པ་སྲོག་དང་ལྡན་པ་རྣམས་ནི་ལུང་དུ་མ་བསྟན་པའི་ཕྱིར་དང༌། ཀུན་ཤེས་པར་བྱེད་པའི་དབང་པོ་ལ་སོགས་པ་གསུམ་ནི་ཟག་པ་མེད་པའི་ཕྱིར་རྣམ་པར་སྨིན་པ་མེད་པའོ། །དགེ་བ་བརྒྱད་ཅེས་བྱ་བ་མ་ཆགས་པ་ལ་སོགས་པ་དང་མཚུངས་པར་ལྡན་པའི་ཕྱིར་དགེ་བ་ཁོ་ན་ཡིན་ནོ་ཞེས་བྱ་བར་ངེས་པར་བཟུང་སྟེ། དེ་ལས་གཞན་པ་རྣམས་ཀྱང་དགེ་བ་ཡིན་པའི་ཕྱིར་རོ། །ཡིད་མི་བདེ་བ་རྣམ་གཉིས་ཞེས་བྱ་བ་ལ། ཡིད་མི་བདེ་བ་ནི་རྣམ་པར་སྨིན་པ་དང་བཅས་པའི་ཕྱིར་རྣམ་པ་གཉིས་ཁོ་ནའོ། །ཡིད་དང་ཚོར་གཞན་ནི་རྣམ་གསུམ་ཞེས་བྱ་བ་ལ། ཚོར་གཞན་ཞེས་སྨོས་པ་ནི་ཡིད་མི་བདེ་བ་ལས་གཞན་པའི་ཚོར་བ་གཟུང་ངོ༌། །དབང་པོ་ལྔ་པོ་འདི་དག་དགེ་བའི་རྩ་བ་དང་མཚུངས་པར་ལྡན་པ་ནི་དགེ་བའོ། །མི་དགེ་བ་དང་མཚུངས་པར་ལྡན་པ་ནི་མི་དགེ་བའོ། །དེ་དག་ལས་གཞན་པ་རྣམ་པར་སྨིན་པ་ལས། སྐྱེས་པ་དང༌། སྤྱོད་ལམ་དང༌། བཟོའི་གནས་པ་དང༌། སྤྲུལ་པ་བ་དག་ནི་ལུང་དུ་མ་བསྟན་པ་རྣམས་སོ། །གཞན་ནི་རྣམ་པ་གཅིག་ཅེས་བྱ་བར་ངེས་པར་གཟུང་ངོ༌། །ངེས་པར་མ་བཟུང་ན་ནི་ཅིར་འགྱུར་ཞེ་ན་ཅི་རྣམ་པ་གཅིག་ཡིན་ནམ་རྣམ་པ་གཉིས་ཡིན་སྙམ་དུ་ཐེ་ཚོམ་ཟ་བར་འགྱུར་རོ། །དེ་ལྟ་ན་ཡང་ཐེ་ཚོམ་ཟ་བ་ཁོ་ནའོ་ཅི་ཞེ་ན། དགེ་བའམ་མི་དགེ་བའམ། ལུང་དུ་མ་བསྟན་པའོ། །ལུང་དུ་མ་བསྟན་བརྒྱད་དག་ཉིད། །གཟུགས་སྒྲ་མ་གཏོགས་ཞེས་བྱ་བ་དང༌། སྲོག་ནི་རྣམ་སྨིན་ཞེས་བྱ་བ་དང༌། རྣམ་སྨིན་ལུང་དུ་མ་བསྟན་པ་ཞེས་བྱ་བ་འབྱུང་བའི་
ཕྱིར་ཐེ་ཚོམ་ཟ་བར་མི་འགྱུར་རོ། །དྲི་མེད་མ་གཏོགས་འདོད་པར་གཏོགས། །ཞེས་བྱ་བ་ལ། དབང་པོ་ཐམས་ཅད་འདོད་པར་གཏོགས་སོ་ཞེས་བྱ་བ་འདི་ནི་སྤྱིར་བཏང་བ་ཡིན་ལ། དྲི་མེད་མ་གཏོགས་ཞེས་བྱ་བ་ནི་འདིའི་དམིགས་ཀྱིས་བསལ་བའོ། །དེ་ལྟར་ན་དྲི་མ་མེད་པ་ཁོ་ན་མ་གཏོགས་པའི་ལྷག་མ་ནི་འདོད་པར་གཏོགས་པའོ་ཞེས་བྱ་བར་གྲུབ་པ་ཡིན་ནོ། །དྲི་མ་མེད་པའི་དབང་པོ་མ་གཏོགས་པའི་རྒྱུ་སྨྲས་པ་ནི། དེ་ནི་ལྡན་པ་མ་ཡིན་པ་ཁོ་ན་ཡིན་ནོ་ཞེས་བྱ་བའོ། །ཀྱང་གི་སྒྲ་ནི་དྲི་མེད་ཀྱང༌། །ཞེས་རྗེས་སུ་དྲང་བའི་དོན་ཏེ་མ་གཏོགས་ཞེས་བྱ་བར་སྦྱར་རོ། །སྡུག་བསྔལ་དག་ཅེས་བྱ་བ་ནི་སྡུག་བསྔལ་དང་ཡིད་མི་བདེ་བ་དག་སྟེ། གཉི་ག་ཡང་རྗེས་སུ་མི་མཐུན་པའི་ཕྱིར་སྒྲ་གཅིག་གིས་བརྗོད་དོ། །གཟུགས་ཀྱི་ཁམས་ན་ནི་ཕོ་དང་མོ་དང་ཡིད་མི་བདེ་བའི་དབང་པོ་དག་དང༌། སྔར་སྨྲས་པའི་ཟག་པ་མེད་པ་གསུམ་མ་གཏོགས་པ་དབང་པོ་ལྷག་མའོ། །མི་མཛེས་པར་བྱེད་པའི་ཕྱིར་ཞེས་བྱ་བ་ནི། འདོམས་ཀྱི་སྦ་བ་སྦུབས་སུ་ནུབ་པ་རྣམས་ཀྱི་ཅིའི་ཕྱིར་མི་མཛེས་ཏེ། དེའི་ཕྱིར་ནུབ་པ་ཁོ་ན་ལེགས་སོ་ཞེས་སློབ་དཔོན་འདུས་བཟང་ཟེར་རོ། །འདིར་ཕོའི་རྒྱུ་མཚན་ཅན་དུ་མཐོང་ནས་དྲི་བ་ནི་ཕོའི་དབང་པོ་མེད་ན་དེ་ནི་ལྟར་ན་དེ་དག་ཕོ་ཞེས་བྱའོ། །ཚུལ་བཞིན་མ་ཡིན་པར་དྲིས་པའི་ཕྱིར་དྲི་བ་ནི་ག་ལས་དབྱུང་ཞེས་བྱ་བའོ། །དེ་ན་ཕོའི་ངོ་བོ་ཕོའི་དབང་པོ་ལས་གཞན་པ་འདོད་པའི་ཁམས་ན་ཡོད་པ་གང་ཡིན་པ་དེ་ནི་ཡོད་དོ། །དེ་ནི་ང་རོ་དང་གཡོ་བ་དང་དབྱིབས་ཀྱིས་བསྡུས་པ་ཡིན་ཏེ། དེ་ཡང་འདོད་པའི་ཁམས་ན་ཕོའི་དབང་པོ་དང་ལྷན་ཅིག་རྒྱུ་བར་མཐོང་གི་མོའི་དབང་པོ་དང་ལྷན་ཅིག་རྒྱུ་བར་ནི་མ་ཡིན་ནོ། །གཞན་དག་ན་རེ་འདོད་ཆགས་དང་བྲལ་བས་ངེས་པར་འབྱུང་བའི་སྐྱེས་བུའི་བྱེད་པ་ཡོད་པའི་ཕྱིར་རོ་ཞེས་ཟེར་ཏེ། འདི་མོའི་དབང་པོ་ལ་ཡང་མཚུངས་སོ། །སྡུག་བསྔལ་གྱི་དབང་པོ་མེད་དོ་ཞེས་རྒྱ་ཆེར་འབྱུང་བ་ལ། སྡུག་བསྔལ་གྱི་དབང་པོ་ནི་བརྡེག་པ་ལས་སྐྱེས་པའམ་རྣམ་པར་སྨིན་པ་ལས་སྐྱེས་པ་ཡིན་ན། དེ་ན་ལུས་དང་བའི་ཕྱིར་བརྡེག་པ་ལས་སྐྱེས་པ་མེད་ལ། མི་དགེ་བ་མེད་པའི་ཕྱིར་རྣམ་པར་སྨིན་པ་ལས་སྐྱེས་པ་ཡང་མེད་དོ། །ཡིད་མི་བདེ་བའི་དབང་པོ་མེད་དོ་ཞེས་བྱ་བ་ལ་སོགས་པ་ལ། དེ་ཡང་རྒྱུས་སྐྱེད་པ་དང་རྐྱེན་གྱིས་སྐྱེད་པ་ཞིག་ཏུ་འགྱུར་གྲང༌། དེ་ན་རྒྱུས་བསྐྱེད་པ་མེད་དེ། རྒྱུད་ཞི་གནས་ཀྱིས་
བརླན་པའི་ཕྱིར་རོ་ཞེས་བྱ་སྟེ། ཞི་གནས་ཀྱི་ཏིང་ངེ་འཛིན་གྱིས་ཁོང་ཁྲོ་བ་དང་བྲལ་བའི་ཕྱིར། དེ་དག་གི་རྒྱུད་ལ་རྩུབ་པ་ཉིད་མེད་དེ། དེའི་ཕྱིར་དེའི་རྒྱུ་ཅན་གྱི་ཡིད་མི་བདེ་བའི་དབང་པོ་ཡང་མེད་དོ། །རྒྱུད་ལ་ཡོད་པའི་རྩུབ་པ་ནི་ཁོང་ཁྲོ་བའོ། །དེའི་ཕྱིར་འདིས་ནི་དེ་ན་རང་གི་སེམས་རྩུབ་པས་བསྐྱེད་པའི་ཡིད་མི་བདེ་བ་མེད་དོ་ཞེས་བྱ་བར་ཤེས་པར་བྱས་པར་འགྱུར་རོ། །ཀུན་ནས་མནར་སེམས་ཀྱི་གཞི་མེད་པའི་ཕྱིར་ཞེས་བྱ་བས་ནི་དེ་ན་རྐྱེན་གྱིས་བསྐྱེད་པ་མེད་དོ་ཞེས་བྱ་བར་ཤེས་པར་བྱེད་དོ། །ཀུན་ནས་མནར་སེམས་ནི་རབ་ཏུ་འཁྲུགས་པའོ། །དེའི་གཞི་ནི་ཡུལ་ལའོ། །དེའི་ཕྱིར་འདིས་ནི་ཡུལ་གྱིས་བསྐྱེད་པའི་ཡིད་མི་བདེ་བ་མེད་དོ་ཞེས་བྱ་བར་ཤེས་ཏེ། དེ་ན་མནར་སེམས་ཀྱི་གཞི་དགུ་མེད་པའི་ཕྱིར་རོ། །དེ་དག་ཀྱང་བདག་ལ་གནོད་པར་བྱས་སོ། །བྱེད་དོ། །བྱེད་པར་འགྱུར་རོ་ཞེས་བྱ་བ་ནི་མནར་སེམས་ཀྱི་གཞི་གསུམ་མོ། །བདག་གིས་མཛའ་བོ་ལ་གནོད་པ་བྱས། བྱེད་དོ། །བྱེད་པར་འགྱུར་རོ་ཞེས་བྱ་བ་འདི་ནི་གཞན་གསུམ་མོ། །བདག་གིས་དགྲ་ལ་ཕན་པར་བྱས་སོ། །བྱེད་དོ། །བྱེད་པར་འགྱུར་རོ་ཞེས་བྱ་བ་འདི་ནི་གཞན་གསུམ་མོ། །གཞན་དག་ནི་ཉོན་མོངས་པ་ཅན་མ་ཡིན་པའོ་ཞེས་ཟེར་རོ། །གཞན་དག་ནི་མི་ཤེས་པས་བསྒྲུབ་པའི་ཕྱིར་དེ་དག་ཀྱང་འདོད་ཆགས་དང་བྲལ་བ་ལ་ཡེ་ཤེས་དང་ལྡན་པ་མ་ཡིན་པས་དེར་ཡིད་མི་བདེ་བ་མ་ཡིན་ནོ་ཞེས་ཟེར་རོ། །གཟུགས་མེད་གཏོགས་ཞེས་རྒྱ་ཆེར་འབྱུང་བ་ལ། །ངང་གི་སྒྲ་ནི་ཕོ་དང་མོའི་དབང་པོ་དག་དང་སྡུག་བསྔལ་དག་དང༌། དྲི་མ་མེད་པ་ཞེས་བྱ་བ་དང་སྤྲེལ་ཏེ། སྐབས་སུ་བབ་པའི་ཕྱིར་ན་མ་གཏོགས་པ་ཞེས་བྱ་བར་སྦྱར་རོ། །བདེ་བ་ཞེས་བྱ་བ་ནི་བདེ་བ་དང་ཡིད་བདེ་བ་དག་སྟེ། ཕན་འདོགས་པར་བྱེད་པ་ཉིད་དུ་མཚུངས་པས་གཉི་ག་ཡང་སྒྲ་གཅིག་གིས་བརྗོད་དོ། །གཟུགས་ཅན་སྨོས་པས་ནི་མིག་ལ་སོགས་པ་དབང་པོ་ལྔ་པོ་རྣམས་བསྡུས་སོ། །གལ་ཏེ་གཟུགས་ཅན་སྨོས་པས་ཕོ་དང་མོའི་དབང་པོ་གཉིས་ཀྱང་གཟུང་བ་མ་ཡིན་ནམ་ཞེ་ན། གལ་ཏེ་གཟུགས་ཅན་སྨོས་པ་ཉིད་ཀྱིས་མིག་ལ་སོགས་པ་བཞིན་ཕོ་དང་མོའི་དབང་པོ་གཉིས་ཀྱང་བཀག་ན་ནི། དེ་ལྟ་ཡིན་དང༌། སྡུག་བསྔལ་ལ་སོགས་པ་རྣམས་བསལ་བར་བྱ་བའི་ཕྱིར་སླར་ཡང་འབད་པས་གཞན་
བདག་གིར་བྱེ་དགོས་སོ། །དེའི་ཕྱིར་འདིར་དབང་པོ་གཟུགས་ཅན་དངོས་སུ་དགག་པ་ཉིད་དུ་བརྗོད་པར་འདོད་དོ། །ལྷག་མ་རྣམས་ནི་སྐབས་དང་མཐུན་པར་སྦྱར་བ་ཁོ་ནས་བཀག་པ་ཉིད་དོ། །ཡིད་དང་ཚོར་བ་གསུམ་རྣམ་གསུམ་ཞེས་བྱ་བ་ལ། བདེ་བ་དང༌། ཡིད་མི་བདེ་བ་དང༌། བཏང་སྙོམས་ནི་ཡིད་ཀྱི་རྣམ་པར་ཤེས་པའི་ཚོགས་པ་ཡིན་པའི་ཕྱིར་དང༌། ཟག་པ་དང་བཅས་པ་དང་ཟག་པ་མེད་པ་ཡིན་པའི་ཕྱིར་གསུམ་ཉིད་དོ། །བདེ་བ་ནི་བསམ་གཏན་གསུམ་པའི་ས་པའི་སེམས་ཀྱི་ཡིན་ལ། འདོད་པའི་ཁམས་དང༌། བསམ་གཏན་དང་པོ་ན་ནི་ལུས་ཀྱི་ཁོ་ན་ཡིན་ནོ། །དེ་ལ་ལུས་ཀྱི་བདེ་བ་དང༌། བཏང་སྙོམས་ཀྱི་དབང་པོ་དག་དང༌། རྣམ་པར་ཤེས་པ་ལྔའི་བདག་ཉིད་ཀྱི་ཡིད་ནི་བསྒོམ་པས་སྤང་བར་བྱ་བ་ཁོ་ནའོ། །སེམས་ཀྱི་བདེ་བ་དང༌། བཏང་སྙོམས་དང༌། ཡིད་བདེ་བ་དང༌། ཡིད་ཀྱི་རྣམ་པར་ཤེས་པའི་བདག་ཉིད་ཅན་གྱི་ཡིད་མཐོང་བས་སྤང་བར་བྱ་བའི་ཉོན་མོངས་པ་དང༌། མཚུངས་པར་ལྡན་པ་དེ་དག་ནི་མཐོང་བས་སྤང་བར་བྱ་བ་ཡིན་ནོ། །ལྷག་མ་ཉོན་མོངས་པ་ཅན་དང༌། ལུང་དུ་མ་བསྟན་པ་དག་དང༌། དགེ་བ་ཟག་པ་དང་བཅས་པ་རྣམས་ནི་བསྒོམ་པས་སྤང་བར་བྱ་བ་ཡིན་ནོ། །ཟག་པ་མེད་པ་རྣམས་ནི་སྤང་བར་བྱ་བ་མ་ཡིན་པ་ཡིན་ནོ། །གཉིས་ཀྱིས་སྤང་བྱ་ཡིད་མི་བདེ། །ཞེས་བྱ་བ་ལ། ཡིད་མི་བདེ་བ་དང་ལྡན་པས་ནི་ཡིད་མི་བདེ་བའོ། །དེའི་དངོས་པོ་ནི་ཡིད་མི་བདེ་བ་ཉིད་དོ། ཡིད་མི་བདེ་ཅེས་བྱ་བའི་དོན་ཏོ། །མཉམ་པར་གཞག་པ་མེད་པའི་ཕྱིར་ཟག་པ་མེད་པ་མེད་དོ། །མཐོང་བས་སྤང་བར་བྱ་བའི་ཉོན་མོངས་པ་དང་མཚུངས་པར་ལྡན་པ་ནི་མཐོང་བས་སྤང་བར་བྱ་བའོ། །ལྷག་མ་དགེ་བ་དང་ཉོན་མོངས་པ་ཅན་ནི་བསྒོམ་པས་སྤང་བར་བྱའོ། །མིག་ལ་སོགས་པ་བདུན་དང༌། སྲོག་དང་སྡུག་བསྔལ་གྱི་དབང་པོ་ན་ཅི་རིགས་པར་གཟུགས་ཅན་ཡིན་པའི་ཕྱིར་དང༌། ཉོན་མོངས་པ་ཅན་མ་ཡིན་པའི་ཕྱིར་དང༌། དྲུག་པ་ལས་སྐྱེས་པ་མ་ཡིན་པའི་ཕྱིར་བསྒོམས་པས་སྤང་བར་བྱ་བ་ཁོ་ན་ཡིན་གྱི། མཐོང་བས་སྤང་བར་བྱ་བ་ནི་མ་ཡིན་ཏེ། ཇི་སྐད་དུ། ཉོན་མོངས་ཅན་མིན་མཐོང་སྤང་མིན། །གཟུགས་མིན་དྲུག་པ་མིན་སྐྱེས་མིན། །ཞེས་བཤད་པ་བཞིན་ནོ། །གཅིག་ཏུ་ཟག་པ་དང་བཅས་པའི་ཕྱིར་སྤང་བར་བྱ་བ་མ་ཡིན་པ་ནི་མ་ཡིན་ནོ། །ལྔ་པོ་ནི་སྤང་བར་བྱ་བ་མིན་ཡང་ཞེས་བྱ་བ་ལ།
ཡང་གི་སྒྲ་ནི་ཡོད་པའི་ཕྱིར་དང་སྐབས་སུ་བབ་པའི་ཕྱིར་དང༌། བསྒོམ་པས་སྤང་བར་བྱ་བ་དག་ཀྱང་མ་ཡིན་ཞེས་བྱ་བར་ཤེས་སོ། །ཟག་པ་མེད་པའི་ཕྱིར་སྤང་བར་བྱ་བ་མ་ཡིན་པ་དག་ཡིན་ལ། དགེ་བ་ཟག་པ་དང་བཅས་པའི་ཕྱིར་བསྒོམ་པས་སྤང་བར་བྱ་བ་ཡིན་ནོ། །གསུམ་མིན་ཞེས་བྱ་བ་ལ་ཀུན་ཤེས་པར་བྱེད་པའི་དབང་པོ་ལ་སོགས་པ་གང་དུ་ཡང་ནི་སྤང་བྱ་མ་ཡིན་པ་ཉིད་དེ། ཟག་པ་མེད་པ་རྣམས་ནི་ཉེས་པ་མེད་པའི་ཕྱིར་རོ། །གལ་ཏེ་གཟིངས་ལྟ་བུའི་ཆོས་ཀྱི་རྣམ་གྲངས་ལས་ལམ་ཡང་སྤང་བར་བྱ་བ་ཉིད་དུ་གསུངས་པ་མ་ཡིན་ནམ་ཞེ་ན། གསུངས་མོད་ཀྱི། མཐོང་བ་དང་བསྒོམ་པ་དག་གིས་ནི་སྤང་བར་བྱ་བ་མ་ཡིན་ཏེ། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པའི་ཚེ་གཏོང་བས་སྤང་བ་ཞེས་བྱ་བ་ཡིན་ནོ། །ཁམས་གང་དུ་དང་པོ་ཉིད་དུ་ཞེས་བྱ་བ་རྒྱས་པར་འབྱུང་བ་ལ། རྣམ་པར་སྨིན་པ་ཞེས་བྱ་བ་ཁོ་ན་དང་པོར་རྙེད་པ་དྲིས་པ་ལ་སོགས་པ་ཅི་ཡོད་ཅེ་ན། ཉོན་མོངས་པ་མ་ཡིན་པའི་སེམས་ཉིད་ཀྱི་ཉིད་མཚམས་སྦྱོར་བ་གསལ་བར་བྱའོ། །འདོད་པར་དང་པོར་རྣམ་སྨིན་གཉིས། །ཞེས་བྱ་བ་ལ། དང་པོར་ཞེས་བྱ་བ་ཅིའི་དོན་དུ་ཡིན་ཞེ་ན། མིག་དང༌། རྣ་བ་དང༌། སྣ་དང༌། ལྕེའི་དབང་པོ་རྣམ་པར་སྨིན་པས་བསྡུས་པ་རྣམས་ཕྱིས་རིམ་གྱིས་རྙེད་པའི་ཕྱིར་རོ། །མིག་ལ་སོགས་པ་རྣམས་ཀྱི་ས་བོན་དེའི་ཚེ་ཁོ་ན་རྙེད་པར་འཐད་དོ། །ཇི་ལྟར་ལུས་ཀྱི་དབང་པོ་དེའི་ཚེ་རང་གི་རྣམ་པར་ཤེས་པ་བསྐྱེད་པའི་རྒྱུར་གྱུར་པ་དེ་ལྟར་མིག་ལ་སོགས་པ་ནི་མ་ཡིན་ནོ། །དེ་ཉིད་ཀྱི་ཕྱིར་གཉིས་ཞེས་བརྗོད་པར་གང་ཡིན་པ་དེ་དག་ནི་དམུས་ལོང་ལ་སོགས་པ་ལ་ཡང་སྦྱར་རོ། །སློབ་དཔོན་འདུས་བཟང་ན་རེ། ད་ནི་དེ་ལྟར་མི་བརྗོད་དེ། །ཉིད་མཚམས་སྦྱོར་བ་ལ་རྣམ་པར་ཤེས་པ་ལྔ་སྲིད་པའི་ཕྱིར་རོ་ཞེས་ཟེར་རོ། །རྫུས་ཏེ་སྐྱེ་བས་མིན་ཞེས་བྱ་བ་ལ། རྫུས་ཏེ་སྐྱེ་བ་རྣམས་ནི་དབང་པོ་ཚང་བར་སྐྱེ་བའི་ཕྱིར་ཅི་ཕྱིར་ཡིད་དང་བཏང་སྙོམས་ཀྱི་དབང་པོ་དག་མ་ཡིན་ཞེ་ན་རྣམ་པར་སྨིན་པའི་དབང་དུ་བྱས་པའི་ཕྱིར་རོ། །སྐྱེ་བའི་སྲིད་པ་ཉོན་མོངས་ཅན། །ཞེས་བྱ་བའི་ངག་དེས་གདོན་མི་ཟ་བར་ཉོན་མོངས་པ་ཅན་དུ་འགྱུར་ལ། རྣམ་པར་སྨིན་པ་ནི་ལུང་དུ་མ་བསྟན་པ་ཡིན་ནོ། །དད་པ་ལ་སོགས་པ་རྣམས་ཀྱང་དེའི་ཚེ་རྙེད་མོད་ཀྱི། དེ་དགེ་བ་ཡིན་པའི་ཕྱིར་རྣམ་པར་
སྨིན་པ་ནི་མ་ཡིན་ནོ། །ནུར་ནུར་པོ་ལ་སོགས་པའི་གཟུགས་དབང་པོ་མ་ཡིན་པའི་རྣམ་པར་སྨིན་པ་ལས་སྐྱེས་པ་རྣམས་ཀྱང་དེའི་ཚེ་རྙེད་མོད་ཀྱི། དེ་དག་འདི་ནི་མ་སྨོས་ཏེ་དབང་པོའི་སྐབས་སུ་བབ་པ་ཡིན་པའི་ཕྱིར་རོ། །ཡང་རྫུས་ཏེ་སྐྱེ་བདག་གིས་དུ་ཞིག་འཐོབ་ཅེ་ན། འདོད་པ་དག་ཏུ་དང་པོར་ཞེས་སྦྱར་རོ། །གལ་ཏེ་མཚན་མེད་པ་ཞིག་ཡིན་ན་སྟེ་ཞེས་བྱ་བ་ནི་ཕོ་དང་མོའི་དབང་པོ་མེད་པའི་ཕྱིར་རོ། །ཕོ་དང་མོ་ཉིད་དུ་མངོན་པར་གསལ་བར་བྱེད་པ་ཡིན་པའི་ཕྱིར་ཕོའི་དབང་པོ་དང་མོའི་དབང་པོ་ལ་མཚན་ཞེས་བརྗོད་དོ། །རྫུས་ཏེ་སྐྱེ་བ་མཚན་མེད་པ་རྣམས་ད་ལྟ་མེད་པས་འདིར་བསྐལ་པ་དང་པོ་བ་ལྟ་བུའོ་ཞེས་བྱ་བ་སྨོས་སོ། །མཚན་གཅིག་པ་ཞིག་ཡིན་ན་སྟེ། །ཞེས་བྱ་བ་ནི་ཕོ་དང་མོའི་དབང་པོ་གང་ཡང་རུང་བ་ཞིག་མེད་པའི་ཕྱིར་རོ། །མི་རྣམས་ཀྱི་ནང་ན་ད་ལྟ་རྫུས་ཏེ་སྐྱེ་བ་མེད་པས་འདི་ལྟར་ལྷ་ལ་སོགས་པ་ནའོ་ཞེས་བྱ་བ་སྨོས་སོ། །འདི་ནི་སྐྱེ་གནས་ཁྱད་པར་དུ་འཕགས་པ་ཡིན་ནོ་ཞེས་བྱ་བར་མཐོང་སྟེ། འདྲི་བ་ནི། ཅི་རྫུས་ཏེ་སྐྱེ་བ་ཡང་མཚན་གཉིས་པ་ཞེས་བྱ་བ་རྒྱས་པར་འབྱུང་བའོ། །འདོད་པའི་སྒྲ་ནི་ཡུལ་དག་གམ་ཡུལ་གྱི་འདོད་ཆགས་ལ་འཇུག་གི་ཁམས་ལ་ནི་མ་ཡིན་ནོ་ཞེ་ན། དེའི་ཕྱིར་འདོད་པ་གཙོ་བོ་ཡིན་པའི་ཕྱིར་ཞེས་བྱ་བ་རྒྱས་པར་སྨོས་ཏེ་འདོད་པ་ནི་གཟུགས་ལ་སོགས་པ་ཡུལ་རྣམས་ཡིན་ལ། དེ་གཙོ་བོར་གྱུར་པ་ནི་འདོད་པའི་ཁམས་ཡིན་ཏེ་དེའི་ཕྱིར་འདོད་པའི་ཁམས་ཞེས་བསྟན་ཏོ། །འདོད་པ་དང་གཟུགས་ཀྱི་ཁམས་གཉི་ག་གཟུགས་ཡོད་པ་ཉིད་དུ་མཚུངས་བཞིན་དུ་གཟུགས་ཀྱི་ཁམས་ཁོ་ན་གཟུགས་ཞེས་བྱ་བའི་སྒྲས་ཅིའི་ཕྱིར་བརྗོད་ཅེ་ན། དེའི་ཕྱིར་གཟུགས་གཙོ་བོ་ཡིན་པའི་ཕྱིར་ཞེས་བྱ་བ་རྒྱས་པར་སྨོས་ཏེ། གཟུགས་དེ་ནི་དད་པ་ཡིན་པའི་ཕྱིར་དང་འོད་ཅན་ཡིན་པའི་ཕྱིར་གཙོ་བོ་ཡིན་ནོ། །མདོ་ལས་ཀྱང་ཞེས་བྱ་བ་འདིས་ནི་མདོ་ལས་གཟུགས་གཙོ་བོ་ཡིན་པའི་ཕྱིར་གཟུགས་ཀྱི་སྒྲས་གཟུགས་ཀྱི་ཁམས་གསུངས་སོ་ཞེས་སྟོན་ཏོ། །གོང་མར་གཅིག་ཅེས་བྱ་བ་ལ་གཟུགས་མེད་པའི་ཁམས་ནི་གཟུགས་ཀྱི་ཁམས་པས་གོང་མ་ཡིན་ནོ། །ཡུལ་ནི་མི་གནས་པས་གཟུགས་མེད་པའི་ཁམས་གཟུགས་ཀྱི་ཁམས་པས་གོང་མར་ཅི་ལྟར་བརྗོད་ཅེ་ན། དེའི་ཕྱིར་སྙོམས་པར་འཇུག་པས་རིང་བའི་ཕྱིར་དང་ཞེས་བྱ་བ་རྒྱ་ཆེར་སྨོས་ཏེ། གང་གི་ཕྱིར་
གཟུགས་སུ་སྙོམས་པར་འཇུག་པ་ནི་སྔ་ལ་གཟུགས་མེད་པར་སྙོམས་པར་འཇུག་པ་ནི་འཕྱི་བ་ཡིན་ནོ། །དེ་ལྟར་སྔ་ཕྱི་ཉིད་ཀྱིས་ཡིན་གྱི་འདོད་པ་དང་གཟུགས་ཀྱི་ཁམས་ལྟར་ཡུལ་ན་གནས་པ་ཉིད་ཀྱིས་ནི་མ་ཡིན་ནོ། །གང་གི་ཕྱིར་གཟུགས་མེད་པའི་ཁམས་ནི་གཟུགས་ཀྱི་ཁམས་བས་སྐྱེ་པས་ཆེས་མཆོག་ཡིན་པའི་ཡང་ཕྱིར་རོ། །དེར་ནི་བསྐལ་པ་སྟོང་ཕྲག་མང་པོར་ཆེས་རབ་ཏུ་ཞི་བ་རྣམ་པར་སྨིན་པར་འགྱུར་ཏེ་དེའི་ཕྱིར་ཡང་གོང་མ་ཡིན་ནོ། །སྲོག་གི་དབང་པོ་གཅིག་པུ་ཁོ་ན་དང་པོར་རྣམ་པར་སྨིན་པ་ཞེས་བྱ་བར་སྐབས་དང་སྦྱར་རོ། །དེ་ན་གཟུགས་མེད་པའི་ཕྱིར་མིག་ལ་སོགས་པ་རྣམས་མ་ཡིན་ལ། དགེ་བ་དང་ཉོན་མོངས་བ་ཅན་ཡིན་པའི་ཕྱིར་གཞན་རྣམས་ཀྱང་མ་ཡིན་ནོ། །སློབ་དཔོན་འདུས་བཟང་ན་རེ། སྲོག་གི་དབང་པོ་རྫས་སུ་ཡོད་པ་ཉིད་ཀྱིས་ཤེས་བར་བྱེད་པ་ནི་འདི་ཁོ་ན་ཡིན་ཏེ། དེ་མེད་ན་གང་རྙེད་པས་གཟུགས་མེད་པ་དག་ཏུ་སྐྱེས་པ་ཞེས་བྱ། དགེ་བ་ཉོན་མོངས་པ་ཅན་ནི་དེ་སྐྱེ་བའི་ལས་ཀྱི་འབྲས་བུ་མ་ཡིན་ལ། སྐྱེ་བ་མེད་པར་ཡང་དེ་མངོན་དུ་གྱུར་པ་སྲིད་པའི་ཕྱིར་རྣམ་པར་སྨིན་པའི་སེམས་ཀྱིས་མཚམས་སྦྱོར་བ་ཡང་མི་རིགས་ལ། ཉོན་མོངས་པ་ཅན་གྱི་སེམས་ཀྱིས་སྐྱེ་བར་ཉིང་མཚམས་སྦྱོར་བར་ཁས་བླངས་པའི་ཕྱིར་ན་རྣམ་པར་སྨིན་པ་དང་འབྲེལ་བ་མེད་པར་སྐྱེ་བ་ཡང་མ་རིགས་པ་དེའི་ཕྱིར་གདོན་མི་ཟ་བར་སྐྱེ་བའི་རྟགས་སུ་གྱུར་པ་ཆོས་གཞན་ཞིག་ཁས་བླང་བར་བྱ་དགོས་སོ་ཞེས་ཟེར་རོ། །གཟུགས་མེད་དག་ཏུ་འཆི་བ་ནི། །ཞེས་བྱ་བ་རྒྱས་བར་འབྱུང་བ་ནི་སྲོག་དང་ཡིད་དང༌། བཏང་སྙོམས་རྣམས་ཕན་ཚུན་མི་གཏོང་བའི་ཕྱིར་ཏེ། བཏང་སྙོམས་དང་ནི་སོགས་དང་ནི། །ཡིད་དང་ལྡན་ལ་ངེས་གསུམ་ལྡན། །ཞེས་འཆད་པར་འགྱུར་རོ། །ཉོན་མོངས་པ་ཅན་དང་ལུང་དུ་མ་བསྟན་པའི་སེམས་ཀྱིས་འཆི་བ་ལ་དད་པ་ལ་སོགས་པ་མེད་པས་གཟུགས་མེད་པའི་ཁམས་སུ་འཆི་བ་ན་གདོན་མི་ཟ་བའི་གསུམ་པོ་དེ་དག་འགག་གོ །གཉིས་ཀྱང་ཞེས་བྱ་བའི་ཚིག་ཕྲད་དག་གིས་གཉིས་ཀ་དོན་གཅིག་སྟེ། སྔ་མས་ནི་ཚོར་བ་ངེས་པར་འཛིན་ཏོ། །འོག་མས་ནི་གཟུགས་ཅན་འགག་པ་འགོག་སྟེ། ཁ་ཅིག་ན་རེ་དེ་ན་གཟུགས་ཡོད་དོ་ཞེས་ཟེར་རོ། །མི་ལྡན་པའི་འདུ་བྱེད་ཀྱི་དངོས་པོ་ལ་རྣམ་པར་སྨིན་པའི་རྒྱུད་གང་ཡིན་པ་རྣམ་པར་གཅད་པས་
གཟུགས་མེད་པ་རྣམས་ནས་འཆི་འཕོ་བ་ཞེས་བྱ་སྟེ། རྣམ་པར་སྨིན་པ་ལས་སྐྱེས་པ་མ་ཡིན་པའི་ཕུང་པོ་བཞི་དགེ་བ་ཉོན་མོངས་པ་ཅན་མངོན་དུ་གྱུར་ན་འཆི་འཕོས་པར་ཐལ་བ་མེད་དོ། །ཡོངས་སུ་ཟད་པར་ཐལ་བར་འགྱུར་བའི་ཕྱིར་དེའི་ས་པའི་རྣམ་པར་སྨིན་པ་ཉོན་མོངས་པ་ཅན་གྱིས་དགེ་བའི་སེམས་སོ། །དེ་ལ་ལས་གང༌། དེའི་རྣམ་པར་སྨིན་པ་གང་ཞེ་ན། སོ་སོར་མྱོང་བ་དང་མངོན་དུ་མ་གྱུར་པར་སོ་སོར་མྱོང་བསྐྱེད་པའོ། །གལ་ཏེ་རྣམ་པར་སྨིན་པས་བསྒོས་པ་མི་འཐད་པའི་སྐྱོན་མེད་དོ་ཞེ་ན། ལས་ཀྱིས་བསྒོས་པ་བཞིན་ཡོངས་སུ་ཟད་པ་ལ་ཡང་རྣམ་པར་སྨིན་པ་དེ་བསྒོས་པ་མི་འཐད་པ་ཉིད་ཀྱིས་འཆི་འཕོ་བར་འགྱུར་རོ། །གལ་ཏེ་རྣམ་པར་སྨིན་པ་ཡོངས་སུ་མ་ཟད་པས་བསྒོས་པ་ཡོད་དོ་ཞེ་ན། ལས་སུ་ཡང་མ་གྱུར་པ་དེའི་ཕྱིར་འབྲས་བུ་མ་ཡིན་པའི་ཕྱིར་རྣམ་པར་སྨིན་པས་བསྒོས་པའོ། །རྣམ་པར་སྨིན་པ་ལས་སྐྱེས་པ་ནི་རྗེས་སུ་མི་འཇུག་གོ །འབྲས་བུ་ཚད་མེད་པ་ནི་ལས་ཀྱིས་བསྒོས་པའི་རྒྱུ་མཐུན་པའི་འབྲས་བུར་འགྱུར་རོ། །ཚད་ཡོད་པའི་ཕྱིར་ལས་རྣམས་ནི་མ་ཡིན་ཏེ། ཟད་པ་ཡོད་པས་ན་ལས་ཀྱི་བག་ཆགས་བཟློག་པ་མ་ཡིན་ནོ། །ཇི་ལྟར་རྣམ་པར་སྨིན་པ་ཟད་པ་ལས་དེ་མ་ཐོབ་པར་ལས་ཟད་པ་ལས་རྣམས་མ་ཡིན་ནོ། །དེ་བཞིན་དུ་རྣམ་བར་སྨིན་པ་ཟད་པ་ལ་རྣམ་པར་སྨིན་པས་བསྒོས་པའི་ཕྱིར་བཟློག་པ་ནི་ལས་ཟད་པ་ལ་ལས་རྣམས་མ་ཡིན་ནོ་ཞེས་སོ། །རྣམ་པར་སྨིན་པས་བསྒོས་པ་རྗེས་སུ་འཇུག་པ་ནི་རྣམ་པར་སྨིན་པ་མྱོང་བར་མི་རིགས་སོ། །དེའི་བདག་ཉིད་མ་ཡིན་པའི་ཕྱིར་རྣམ་པར་སྨིན་པའི་བག་ཆགས་རྗེས་སུ་འཇུག་པ་ཉིད་རྣམ་པར་སྨིན་པ་མྱོང་བ་མ་ཡིན་ནོ། །དེའི་འབྲས་བུ་མྱོང་བ་ནི་རྣམ་པར་སྨིན་པ་མྱོང་བའོ། །དེའི་ཕྱིར་གཟུགས་མེད་པ་རྣམས་སུ་རྫས་གཞན་མེད་ཀྱང་རྣམ་པར་སྨིན་པའི་བག་ཆགས་རྗེས་སུ་འཇུག་པ་མངོན་དུ་གྱུར་ཀྱང་འཆི་འཕོ་བར་མི་འགྱུར་ལ། དེ་ལས་བཟློག་པ་ནི་འཆི་འཕོ་བར་འགྱུར་རོ། །གཟུགས་ན་བརྒྱད་དག་འགག་གོ །དེ་ཉིད་ལ་རྒྱུ་སྨྲས་པ་ནི། །རྫུས་ཏེ་སྐྱེ་བ་ཐམས་ཅད་ནི། །ཞེས་བྱ་བ་རྒྱས་པར་འབྱུང་བ་སྟེ། རྫུས་ཏེ་སྐྱེ་བ་རྣམས་ལ་མེར་མེར་པོ་ལ་སོགས་པ་རྣམས་མེད་པའི་ཕྱིར་དང༌། རིམ་གྱིས་འཆི་བ་མེད་པའི་ཕྱིར་དབང་པོ་ཚང་བ་རྣམས་སྐྱེ་ཞིང་འཆི་བ་ཡིན་ནོ། །འདོད་པར་བཅུའམ་དགུའམ་བརྒྱད། །ཅེས་བྱ་བ་ལ། མཚན་གཉིས་པ་དབང་པོ་ཚང་བ་
ཞིག་ཡིན་ན་ནི་བཅུ་འགག་གོ །མཚན་གཅིག་པ་ཞིག་ཡིན་ན་ནི། །ཞེས་བྱ་བ་ནི་ཕོ་དང་མོའི་དབང་པོ་དག་ལས་གང་ཡང་རུང་བ་ཞིག་དང་ལྡན་བའོ། །མཚན་མེད་པ་ནི་དེ་གཉིས་ཀ་དང་བྲལ་བའོ། །ཅིག་ཅར་འཆི་བ་ལ་ནི། འདོད་པར་བཅུའམ་དགུ། བརྒྱད་ཅེས་བྱ་བ་ཚུལ་དེ་ལྟ་བུ་ཡིན་ནོ། །རིམ་གྱིས་འཆི་བ་དག་ལ་ཞེས་བྱ་བ་འདི་ག་ལས་ཤེ་ན། རིམ་གྱིས་འཆི་བདག་ལ་བཞི་ཞེས་མཇུག་ཐོགས་སུ་འཆད་པ་ལས་སོ། །མིག་ལ་སོགས་པ་རྣམས་སྔར་འགགས་ཟིན་པའི་ཕྱིར་དང༌། ལུས་དང༌། སྲོག་དང༌། ཡིད་ཀྱི་དབང་པོ་དང༌། བཏང་སྙོམས་རྣམས་ཕན་ཚུན་མི་འདོར་བས་སོ་སོར་འགག་བ་མ་ཡིན་པ་དེའི་ཕྱིར་རིམ་གྱིས་འཆི་བདག་ལ་བཞི་འགག་གོ །ཚུལ་དེ་ལྟ་བུ་ཡིན་པར་ཞེས་བྱ་བ་རྒྱས་པར་འབྱུང་བ་ལ། འཆི་བའི་སྲིད་པའི་སེམས་ནི་གསུམ་སྟེ། ཉོན་མོངས་པ་ཅན་དང༌། ལུང་དུ་མ་བསྟན་པ་དང་དགེ་བའོ། །དེ་ལ་ཉོན་མོངས་པ་ཅན་དང། ལུང་དུ་མ་བསྟན་པའི་སེམས་ཀྱིས་འཆི་བ་ལ་ནི་ཇི་སྐད་བཤད་པའི་དབང་པོ་འགག་པར་རིག་པར་བྱ་སྟེ་དབང་པོ་གཞན་མེད་བའི་ཕྱིར་རོ། །དགེ་ལ་ཐམས་ཅད་དག་ཏུ་ལྔ། །ཞེས་བྱ་བ་ལ། ཐམས་ཅད་དག་ཏུ་ཞེས་བྱ་བ་ནི་ཁམས་གསུམ་ཆར་གྱི་འཆི་བ་ལ་ཡང་ཞེས་བྱ་བའི་དོན་ཏོ། །དགེ་བ་ལ་ནི་གདོན་མི་ཟ་བར་དད་པ་ལ་སོགས་པ་ལྔ་པོ་འགག་སྟེ། དད་པོ་ལ་སོགས་པ་རྣམས་ནི་དགེ་བའི་སེམས་ལ་ངེས་པར་ཡོད་བའི་ཕྱིར་རོ། །འང་ཞེས་བྱ་བའི་སྒྲ་ནི་ཇི་སྐད་བཤད་པའང་འགག་གོ་ཞེས་ཤེས་པར་བྱེད་དོ། །རྒྱས་པར་བརྩི་བར་བྱའོ་ཞེས་བྱ་བ་ནི་འདོད་པའི་ཁམས་ན་ཅིག་ཅར་འཆིང་ལ་བཅོ་ལྔའམ། བཅུ་བཞིའམ། བཅུ་གསུམ་ཡིན་ལ། རིམ་གྱིས་འཆི་བ་དག་ལ་དགུ་ཞེས་བྱ་བའོ། །དབང་པོའི་སྐབས་སུ་ཞེས་བྱ་བ་རྒྱས་པར་འབྱུང་བ་ལ། ཆོས་རབ་ཏུ་རྣམ་པར་དབྱེ་བར་བྱ་བའི་ཕྱིར་བསྟན་བཅོས་བརྩམས་པས། དེའི་ཕྱིར་དབང་པོའི་སྐབས་སུ་དབང་པོའི་ཆོས་ཐམས་ཅད་དཔྱད་པར་བྱའོ། །དགེ་སྦྱོང་ཚུལ་གྱིས་འབྲས་བུ་རྒྱ་ཆེར་འབྱུང་སྟེ། དབང་པོ་མ་ཡིན་པ་དག་གིས་ཀྱང་དགེ་སྦྱོང་གི་འབྲས་བུ་རྣམས་འཐོབ་མོད་ཀྱི། དབང་པོ་རྣམས་ཀྱི་སྐབས་སུ་བབ་པ་དེའི་ཕྱིར་དེ་རྣམས་ཁོ་ན་དཔྱད་པར་བྱའོ། །འབྲས་བུ་ཐ་མ་གཉིས་དགུས་འཐོབ། །ཅེས་བྱ་བ་དགུ་ཁོ་ནས་ཞེས་ངེས་པར་གཟུང་
ངོ། །བསྟན་བཅོས་ལས་ནི་གང་ཟག་འབྲས་བུ་ཐམས་ཅད་ཐོབ་པའི་དབང་དུ་མཛད་ནས་འདོན་ཏོ། །མཐའ་ན་ཡོད་པའི་ཕྱིར་རྒྱུན་ཏུ་ཞུགས་པའི་འབྲས་བུ་དང༌། དགྲ་བཅོམ་པ་དག་གི་མཐའ་མའོ། །དེ་གཉིས་ཀྱི་བར་ཡིན་པའི་ཕྱིར་ལན་ཅིག་ཕྱིར་འོང་བ་དང༌། ཕྱིར་མི་འོང་བ་དག་ནི་བར་མའོ། །དེ་ལ་རྒྱུན་ཏུ་ཞུགས་པའི་འབྲས་བུ་ནི་ཞེས་བྱ་རྒྱས་པར་འབྱུང་སྟེ། རྒྱུན་ཏུ་ཞུགས་པའི་འབྲས་བུ་ནི་མཐོང་བ་དང་བསྒོམ་བའི་ལམ་གྱི་འབྲས་བུ་ཡིན་བའི་ཕྱིར་དད་པ་ལ་སོགས་པ་དང༌། ཀུན་ཤེས་བ་དང་ལྡན་པའི་དབང་པོ་མ་གཏོགས་པ་དག་དང་ཞེས་བྱ་བ་སྨོས་སོ། །དེ་ལ་དགེ་བ་ཡིན་པའི་ཕྱིར་དད་པ་ལ་སོགས་པ་རྣམས་ཡོད་དོ། །ལམ་ལ་རྗེས་སུ་ཤེས་པའི་བཟོད་པ་མཐོང་བའི་ལམ་ཡིན་པའི་ཕྱིར་དེ་ན་ཀུན་ཤེས་པར་བྱེད་པའི་དབང་པོ་ཡོད་དོ། །ལམ་ལ་རྗེས་སུ་ཤེས་པ་ནི་བསྒོམ་པའི་ལམ་ཡིན་པས་དེ་ན་ཀུན་ཤེས་པའི་དབང་པོ་ཡོད་དོ། །རྒྱུན་ཏུ་ཞུགས་པའི་འབྲས་བུའི་ལམ་ནི་མི་ལྕོགས་པ་མེད་པས་བསྡུས་པའི་ཕྱིར་དང༌། དེ་ན་ཚོར་བ་བཏང་སྙོམས་ཁོ་ན་ཡོད་པས་བཏང་སྙོམས་ཀྱི་དབང་པོ་ཡང་ཡོད་དོ། །དེ་ན་ཡོད་པའི་རྣམ་པར་ཤེས་པ་གང་ཡིན་པ་དེ་ནི་ཡིད་ཀྱི་དབང་པོའོ། །ལམ་ལ་རྗེས་སུ་ཤེས་པའི་བཟོད་པ་ནི་བར་ཆད་མེད་པའི་ལམ་ལའོ། །རྗེས་སུ་ཤེས་པ་ནི་རྣམ་པར་གྲོལ་བའི་ལམ་ལའོ། །གཉིས་པས་ཀྱང་ཞེས་བྱ་བ་ནི་བར་ཆད་མེད་པའི་ལམ་དང༌། རྣམ་པར་གྲོལ་བའི་ལམ་གཉིས་ཀས་སོ། །དེ་འཐོབ་སྟེ་ཞེས་བྱ་བ་ནི་རྒྱུན་ཏུ་ཞུགས་པའི་འབྲས་བུའོ། །ཇི་ལྟར་ཞེ་ན། བྲལ་བའི་ཐོབ་པའི་ཞེས་བྱ་བ་རྒྱས་པར་འབྱུང་བ་ལ། བར་ཆད་མེད་པའི་ལམ་ནི་འདྲེན་པར་བྱེད་པ་ཡིན་པའི་ཕྱིར་ཏེ། བྲལ་བའི་ཐོབ་པ་སྐྱེ་བའི་གེགས་སུ་གྱུར་པའི་ཉོན་མོངས་པའི་ཐོབ་པ་གཅོད་པའི་ཕྱིར་རོ། །དེ་ཉིད་ཀྱི་ཕྱིར་བྲལ་བའི་ཐོབ་པ་ནི་བར་ཆད་མེད་པའི་ལམ་རྣམས་ཀྱི་རྒྱུ་མཐུན་པ་དང་སྐྱེས་བུ་བྱེད་པའི་འབྲས་བུ་ཡིན་ནོ། །རྣམ་པར་གྲོལ་བའི་ལམ་དང་ལྷན་ཅིག་ཏུ་བྲལ་བའི་ཐོབ་པ་སྐྱེ་བའི་ཕྱིར་རྣམ་པར་གྲོལ་བའི་ལམ་ནི་བྲལ་བའི་ཐོབ་པའི་རྟེན་ཉིད་ཡིན་ནོ། །དེ་ལྟར་ན་བྲལ་བ་ནི་རྣམ་པར་གྲོལ་བའི་ལམ་གྱི་འབྲས་བུ་མ་ཡིན་ཅིང༌། དེ་ཐོབ་བའི་ཡང་མ་ཡིན་ན། ཇི་ལྟར་ཀུན་ཤེས་པའི་དབང་པོས་རྒྱུན་ཏུ་ཞུགས་པའི་འབྲས་བུ་ཐོབ་བོ་ཞེས་བརྗོད་ཅེ་ན། བར་ཆད་མེད་བའི་ལམ་རྣམས་ནི་རྣམ་པར་
གྲོལ་བའི་ལམ་གྱི་འཁོར་ཡིན་པའི་ཕྱིར་རོ། །རྒྱལ་པོའི་འཁོར་གྱིས་བྱས་པ་རྒྱལ་པོ་ལ་ཉེ་བར་འདོགས་པ་བཞིན་ཏེ། དེ་བཞིན་དུ་བར་ཆད་མེད་པའི་ལམ་གྱིས་བྱས་པ་རྣམ་པར་གྲོལ་བའི་ལམ་རྣམས་ལ་ཉེ་བར་འདོགས་པ་ཡིན་ནོ་ཞེས་ཁ་ཅིག་ཟེར་རོ། །ནུབ་ཕྱོགས་པ་རྣམས་ན་རེ། རྣམ་པར་གྲོལ་བའི་ལམ་དང་ལྷན་ཅིག་བྲལ་བའི་ཐོས་པ་མངོན་དུ་བྱས་པའི་ཕྱིར་རོ་ཞེས་ཟེར་རོ། །སློབ་དཔོན་འདུས་བཟང་ན་རེ། བྲལ་བ་ནི་དེའི་འབྲས་བུ་ཉིད་དུ་ཐལ་བར་འགྱུར་བའི་ཕྱིར་འདི་ཡོད་པ་མ་ཡིན་ནོ་ཞེས་ཟེར་རོ། །དེ་ཉིད་ལ་སྨྲས་པ། འདོད་པའི་སྐལ་བ་མཉམ་པའི་རྒྱུའི་ངེས་པས་དགེ་སྦྱོང་ཚུལ་གྱིས་འབྲས་བུ་ལ་སོགས་པ་རྣམ་པར་གྲོལ་བའི་ལམ་རྣམས་ཀྱི་འབྲས་བུར་མི་རུང་ངོ༌། །མཚུངས་པར་ལྡན་པའི་ལྷན་ཅིག་འབྱུང་བའི་ངེས་པས་ནི་མ་ཡིན་པས་སྐྱོན་མེད་དོ། །ཕན་ཚུན་གེགས་བསྐྱེད་པ་རྣམས་ནི་དགེ་སྦྱོང་ཚུལ་གྱི་བདག་ཉིད་ཕན་ཚུན་སྐྱེས་བུ་བྱེད་པའི་འབྲས་བུ་ཉིད་ཡིན་པ་ཅིས་ཟློག་པར་བྱེད་དོ། །གལ་ཏེ་སྦྱོར་བ་དང་བར་ཆད་མེད་པ་དང་ཁྱད་པར་གྱི་ལམ་རྣམས་ཀྱང་དེར་ཐལ་བར་འགྱུར་རོ་ཞེ་ན། དེ་ལྟར་བྱས་ན་སྐྱོན་མེད་དོ། སྐལ་བ་མཉམ་པའི་རྒྱུའི་ངེས་པས་རྒྱུན་ཏུ་ཞུགས་པའི་འབྲས་བུ་ཀུན་ཤེས་པའི་དབང་པོས་འཐོབ་བོ། །དེ་དབང་པོ་འཕོ་བའི་དུས་སུ་ཞེས་བྱ་བ་སྲིད་པར་མངོན་པར་བརྗོད་པའི་ཕྱིར་དགྲ་བཅོམ་པ་ཉིད་བཞིན་སྐྱོན་མེད་དོ། །འདིར་སྐལ་བ་མཉམ་པའི་རྒྱུའི་དབང་དུ་བྱས་ནས་བར་ཆད་མེད་པའི་ལམ་རྣམས་དགེ་སྦྱོར་ཚུལ་གྱི་འབྲས་བུ་ཞེས་བྱ་བའི་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་ནི་མ་ཡིན་ནོ། །རྒྱུན་ཏུ་ཞུགས་པའི་འབྲས་བུ་བརྒྱད་རྣམས་ཀྱིས་འཐོབ་པོ་ཞེས་ཀྱང་བརྗོད་པར་བྱ་སྟེ། དབང་པོ་འཕོ་བས་ཐོབ་པ་གང་ཡིན་པ་དེ་ཡང་བརྒྱད་རྣམས་ཉིད་ཀྱིས་འཐོབ་པོ། །དཔེར་ན་དབང་པོ་བཅུ་གཅིག་གིས་སྲིད་ཀྱང་དགུས་དགྲ་བཅོམ་པ་ཐོབ་པར་བཤད་པ་བཞིན་ནོ། །དགྲ་བཅོམ་པ་ཉིད་ནི་དད་པ་ལ་སོགས་པ་ཀུན་ཤེས་པར་བྱེད་པའི་དབང་པོ་མ་གཏོགས་པ་དང་ཞེས་བྱ་བ་ལ། རེ་ཞིག་དད་པ་ལ་སོགས་པ་དག་ནི་དགེ་བའི་སེམས་ལས་བྱུང་ངོ༌། །དགྲ་བཅོམ་པ་ཉིད་ནི་བསྒོམ་པའི་ལམ་གྱི་འབྲས་བུ་ཡིན་པའི་ཕྱིར་ན་བར་ཆད་མེད་པའི་ལམ་ནི་ཀུན་ཤེས་པའི་དབང་པོ་སྟེ་དེ་ཡང་རྡོ་རྗེ་ལྟ་བུའི་ཏིང་ངེ་འཛིན་ཏོ། །རྣམ་པར་གྲོལ་བའི་
ལམ་ནི་ཀུན་ཤེས་པ་དང་ལྡན་པའི་དབང་པོ་སྟེ་དེ་ཡང་ཟད་པ་ཤེས་པའི་ཚེ་ནའོ། །བར་ཆད་མེད་པ་དང་རྣམ་པར་གྲོལ་བའི་ལམ་དག་ནི་བྲལ་པའི་ཐོབ་པ་འདྲེན་པར་བྱེད་པ་དང་བརྟེན་པ་ཡིན་པའི་ཕྱིར་རོ། །ཀུན་ཤེས་པར་བྱེད་པའི་དབང་པོ་ནི་མ་གཏོགས་ཏེ། མཐོང་བའི་ལམ་གྱི་བདག་ཉིད་ཡིན་པའི་ཕྱིར་རོ། །ཡིད་ཀྱི་དབང་པོ་དང་ཞེས་བྱ་བ་ལ། ཡིད་ཀྱི་དབང་པོ་ནི་རྡོ་རྗེ་ལྟ་བུ་དང༌། ཟད་པ་ཤེས་པ་ན་ཡོད་པའི་རྣམ་པར་ཤེས་པ་གང་ཡིན་པའོ། །བདེ་བ་དང༌། ཡིད་བདེ་བ་དང༌། བཏང་སྙོམས་ཀྱི་དབང་པོ་རྣམས་ལས་གང་ཡང་རང་བ་ཞིག་དང་ཞེས་བྱ་བ་ལ། དགྲ་བཅོམ་པ་ཉིད་ཀྱི་རྟེན་ནི་དགུ་སྟེ། བསམ་གཏན་བཞི་བ་དང༌། མི་ལྕོགས་པ་མེད་པ་དང༌། ཁྱད་པར་ཅན་དང༌། གཟུགས་མེད་པ་གསུམ་དག་གོ །མདོ་ལས་དགེ་སློང་དག་བསམ་གཏན་དང་པོ་ལ་བརྟེན་ནས་ཟད་པར་སྨྲའོ་ཞེས་བྱ་བ་ནས། ཅི་ཡང་མེད་པའི་སྐྱེ་མཆེད་ལ་བརྟེན་ནས་ཞེས་བྱ་བའི་བར་གསུངས་སོ། །དེ་ལ་བསམ་གཏན་གསུམ་པ་ལ་བརྟེན་ནས་ཐོབ་ན་ནི་བདེ་བའི་དབང་པོའོ། །བསམ་གཏན་དང་པོ་དང་གཉིས་པ་ལ་བརྟེན་ནས་ཐོབ་ན་ནི་ཡིད་བདེ་བའི་དབང་པོའོ། །མི་ལྕོགས་པ་མེད་པ་དང༌། བསམ་གཏན་ཁྱད་པར་ཅན་དང༌། བསམ་གཏན་བཞི་བ་དང༌། གཟུགས་མེད་པ་གསུམ་ལ་བརྟེན་ནས་ཐོབ་ན་ནི་བཏང་སྙོམས་ཀྱི་དབང་པོའོ། །དེ་ལྟར་རྟེན་གྱི་བྱེ་བྲག་གིས་བདེ་བ་དང༌། ཡིད་བདེ་བ་དང༌། བཏང་སྙོམས་རྣམས་ལས་གང་ཡང་རུང་བ་ཞིག་གིས་དགྲ་བཅོམ་པ་ཉིད་འཐོབ་བོ། །གཉིས་ནི་བདུན་དང་བརྒྱད་དང་དགུས། །ཞེས་བྱ་བ་ལ་འཐོབ་པོ་ཞེས་བྱ་བ་ནི་སྤྱིར་བཏང་བ་ཡིན་ནོ། །རེ་ཞིག་གལ་ཏེ་ལན་ཅིག་ཕྱིར་འོང་བའི་འབྲས་བུ་མཐར་གྱིས་ཐོབ་ན། འཇིག་རྟེན་པའམ་འཇིག་རྟེན་ལས་འདས་པའི་ལམ་ཐོབ་ལ། ཕྱིས་འདོད་ཆགས་དང་བྲལ་བའམ། མཐོང་བའི་ལམ་གྱིས་སོ། །དེ་ལ་རྒྱུན་ཏུ་ཞུགས་པའི་འབྲས་བུ་གང་ཡིན་པ་མཐར་གྱིས་ཐོབ་ནས་ལན་ཅིག་ཕྱིར་འོང་བའི་འབྲས་བུ་འཐོབ་བོ། །ཕྱིས་འདོད་ཆགས་དང་བྲལ་བའོ། །གང་ཞིག་འཇིག་རྟེན་པའི་ལམ་གྱིས་འདོད་པར་གཏོགས་པ་རྣམ་པ་དྲུག་སྤངས་པ་དེ་ནི་མཐར་གྱིས་པའོ། །འཇིག་རྟེན་པའི་ལམ་དག་གིས་འཐོབ་ན་ནི། དབང་པོ་བདུན་དག་གིས་འཐོབ་པོ། །ཇི་ལྟར་བྱས་ནས་ཤེ་ན། ལམ་མི་ལྕོགས་པ་མེད་པའི་ས་བ་ཡིན་པའི་ཕྱིར་ན་
བཏང་སྙོམས་ཀྱི་དབང་པོ་དང༌། དེ་དང་མཚུངས་པར་ལྡན་པའི་སེམས་ཁོ་ནས་ཐོབ་པོ། །ཡིད་ཀྱི་དབང་པོ་དང་དད་པ་ལ་སོགས་པ་ལྔ་ནི་ཟག་པ་དང་བཅས་པ་ཡིན་པའི་ཕྱིར། ཀུན་ཤེས་པའི་དབང་པོ་ལ་སོགས་པའི་ལམ་གསུམ་ན་མེད་དེ་དེའི་ཕྱིར་དབང་པོ་བདུན་ཁོ་ནས་འཐོབ་པོ། །ཅི་སྟེ་འཇིག་རྟེན་ལས་འདས་པའི་ལམ་གྱིས་འཐོབ་ན་ནི་ཞེས་རྒྱ་ཆེར་འབྱུང་བ་ལ། མཐར་གྱིས་བ་དེ་ཉིད་གང་གི་ཚེ་ཟག་པ་མེད་པའི་ལམ་གྱི་ལན་ཅིག་ཕྱིར་འོང་བའི་འབྲས་བུ་འཐོབ་ན་ནི། དེའི་ཚེ་དབང་པོ་བརྒྱད་དག་གིས་འཐོབ་སྟེ། སྔ་མ་བདུན་ལ་ཀུན་ཤེས་པའི་དབང་པོ་བསྣན་པས་བརྒྱད་ཡིན་ནོ། །གཉིས་ཀ་ཡང་བསྒོམ་པའི་ལམ་ཡིན་པའི་ཕྱིར་ན་དེའི་བར་ཆད་མེད་པ་དང༌། རྣམ་པར་གྲོལ་བའི་ལམ་དག་ལ་ཀུན་ཤེས་པའི་དབང་པོ་ཁོ་ན་ཡིན་ནོ། །ཅི་སྟེ་ཕལ་ཆེར་ལས་འདོད་ཆགས་དང་བྲལ་བ་ཞིག་གིས་ཞེས་བྱ་བ་ལ། དེའི་རྒྱུན་ཏུ་ཞུགས་པའི་འབྲས་བུ་མཐོང་བའི་ལམ་གྱིས་འཐོབ་པ་ལྟ་བུ་སྟེ། དེ་བཞིན་ཁོ་ནར་དབང་པོ་དགུ་རྣམས་ཀྱིས་འཐོབ་པོ། །གལ་ཏེ་ཕྱིར་མི་འོང་བའི་འབྲས་བུ་མཐར་གྱིས་འཐོབ་ལ་ཞེས་བྱ་བ་ལ། ལན་ཅིག་ཕྱིར་འོང་བའི་འབྲས་བུ་མཐར་གྱིས་འཐོབ་པ་དེ་ཡང་འཇིག་རྟེན་པའི་ལམ་དང་འཇིག་རྟེན་ལས་འདས་པའི་ལམ་གྱིས་འཐོབ་ན་ཀུན་ཤེས་པའི་དབང་པོ་བརྒྱད་པར་འགྱུར་རོ། །དེའི་ཕྱིར་འཇིག་རྟེན་པའི་ཞེས་སྨོས་ཏེ། གང་གི་ཚེ་ལན་ཅིག་ཕྱིར་འོང་བའི་འབྲས་བུ་ཞེས་བྱ་བ་སྟེ། ལྔ་རྣམས་ཀྱིས་དེ་བཞིན་ཏེ། བཏང་སྙོམས་དང་ཡིད་ཀྱི་དབང་པོས་སོ། །ཇི་ལྟར་ལན་ཅིག་ཕྱིར་འོང་བ་བྲག་པ་མེད་པའི་ལམ་གྱིས་འཐོབ་ན། ཀུན་ཤེས་པའི་དབང་པོ་བརྒྱད་པར་འགྱུར་བ་ཡང་དེ་དང་འདྲའོ། །འཕགས་པའི་ལམ་གྱིས་ཕྱིར་མི་འོང་བའི་འབྲས་བུ་མཐར་གྱིས་འཐོབ་ན་ཀུན་ཤེས་པའི་དབང་པོ་བརྒྱད་པར་འགྱུར་རོ། །ཅི་སྟེ་འདོད་ཆགས་དང་བྲལ་བ་ཞིག་གིས་ཞེས་བྱ་བ་ལ་དེ་ནི་འདོད་པའི་འདོད་ཆགས་བྲལ་ཞིང༌། ཅི་ཡང་མེད་པའི་སྐྱེ་མཆེད་ཀྱི་བར་ལ་འདོད་ཆགས་དང་བྲལ་བ་སོ་སོའི་སྐྱེ་བོར་གྱུར་པས་མཐོང་བའི་ལམ་བསྐྱེད་པ་ཞིག་སྟེ། དེ་ནི་དེའི་ཚེ་བདེན་པ་མངོན་པར་རྟོགས་པའི་མཐར་འདོད་པར་གཏོགས་པའི་ཉོན་མོངས་པ་རྣམ་པ་དགུ་པོ་སྤངས་པའི་ཕྱིར་ཕྱིར་མི་འོང་བ་ཁོ་ན་ཡིན་ནོ། །རྒྱུན་ཏུ་ཞུགས་པའི་འབྲས་བུ་ཇི་ལྟར་བཞིན་ནོ་ཞེས་བྱ་བ་ལ། བར་ཆད་མེད་པའི་ལམ་ལ་
ཀུན་ཤེས་པར་བྱེད་པའི་དབང་པོ་དང༌། རྣམ་པར་གྲོལ་བའི་ལམ་ལ་ཀུན་ཤེས་པའི་དབང་པོ་དང༌། དད་པ་ལ་སོགས་པ་རྣམས་དང༌། ཡིད་དེ་དེ་ཁོ་ན་དང་འདྲའོ། །འདི་ནི་ཁྱད་པར་ཡིན་ཏེ། ཞེས་བྱ་བ་རྒྱས་པར་འབྱུང་བ་ལ། མི་ལྕོགས་པ་མེད་པ་མེད་པས་ཐོབ་པར་བྱ་བ་ཡིན་པའི་ཕྱིར་ན། རྒྱུན་ཏུ་ཞུགས་པ་དང་ལན་ཅིག་ཕྱིར་འོང་བའི་འབྲས་བུ་དག་ནི་རྟག་ཏུ་བཏང་སྙོམས་ཀྱི་དབང་པོ་ཁོ་ན་ཡིན་གྱི། ཕྱིར་མི་འོང་བའི་འབྲས་བུ་ལ་ནི་རྟེན་གྱི་བྱེ་བྲག་ལས་བདེ་བ་དང༌། ཡིད་བདེ་བ་དང༌། བཏང་སྙོམས་ཀྱི་དབང་པོ་ལས་གང་ཡང་རུང་བ་ཞིག་སྟེ། བསམ་གཏན་གསུམ་པ་ལ་བརྟེན་ནས་ཐོབ་པ་ན་ནི་བདེ་བའི་དབང་པོའོ། །བསམ་གཏན་དང་པོ་དང་གཉིས་པ་ལ་བརྟེན་ནས་བདེན་པ་དག་མཐོང་ན་ནི་ཡིད་བདེ་བའི་དབང་པོའོ། །མི་ལྕོགས་པ་མེད་པ་དང༌། བསམ་གཏན་ཁྱད་པར་ཅན་དང༌། བསམ་གཏན་བཞི་པ་ལ་བརྟེན་ནས་འཐོབ་ན་ནི། བཏང་སྙོམས་ཀྱི་དབང་པོའོ། །གང་གི་ཚེ་འདི་མཐར་གྱིས་པ་ཞིག་ཡིན་ལ་ཞེས་བྱ་བ་རྒྱས་པར་འབྱུང་བ་ལ། དབང་པོ་རྣོན་པོ་ཁོ་ན་རྣམ་པར་གྲོལ་བའི་ལམ་དགུ་པ་ལ་ཉེར་བསྡོགས་ནས་བསམ་གཏན་ལ་འཇུག་པར་ནུས་ཀྱི་དབང་པོ་རྟུལ་པོ་ནི་མ་ཡིན་ནོ། །ཚོར་བ་སྤོ་བར་དགའ་བའི་ཕྱིར་དང༌། དབང་པོ་རྣོ་ཡང་དེས་པ་མེད་པའི་ཕྱིར། གང་གི་ཚེ་འདི་མཐར་གྱིས་པ་ཞིག་ཡིན་ལ་ཞེས་བྱ་བ་ལ་སོགས་པ་སྨོས་ཏེ། དེ་ལ་རྣམ་པར་གྲོལ་བའི་ལམ་དགུ་པ་ལ་བསམ་གཏན་གྱི་དངོས་གཞིའི་ས་པའི་ཡིད་ད་དེ་བའི་དབང་པོ་ལྷག་པ་ཡིན་ནོ། །བར་ཆད་མེད་པའི་ལམ་ནི་རྟག་ཏུ་བཏང་སྙོམས་ཀྱི་དབང་པོ་ཁོ་ན་སྟེ་ཞེས་བྱ་བ་ལ། གལ་ཏེ་བསམ་གཏན་ལ་འཇུག་པའམ། མི་འཇུག་ཀྱང་ངོ༌། །དེ་ནི་གཉིས་ཀས་ཀྱང་འཐོབ་པོ། །ཞེས་བྱ་བ་ནི་བཏང་སྙོམས་དང༌། ཡིད་བདེ་བའི་དབང་པོ་གཉིས་ཀས་ཏེ་གོ་རིམས་བཞིན་དུ་དེ་དག་པར་ཆད་མེད་པ་དང༌། རྣམ་པར་གྲོལ་བའི་ལམ་ཡིན་པའི་ཕྱིར་བྲལ་བའི་ཐོབ་པ་འདྲེན་པར་བྱེད་པ་དང་རྟེན་ཡིན་པའི་ཕྱིར་རོ། །འོན་ཏེ་འཇིག་རྟེན་ལས་འདས་པས་ཞེས་བྱ་བ་ལ། གལ་ཏེ་འཇིག་རྟེན་ལས་འདས་པའི་ལམ་གྱི་ཕྱིར་མི་འོང་བའི་འབྲས་བུ་ཐོབ་ཅིང༌། དབང་པོ་རྣོན་པོ་ཡིན་པའི་ཕྱིར་རྣམ་པར་གྲོལ་བའི་ལམ་དགུ་པ་ལ་བསམ་གཏན་ལ་འཇུག་ན་ནི། དེ་ལ་སྔར་སྨོས་པ་བདུན་དང༌། བསམ་གཏན་གྱི་དངོས་གཞིའི་ས་པའི་ཡིད་
བདེ་བའི་དབང་པོ་བརྒྱད་པ་དང༌། ཀུན་ཤེས་པའི་དབང་པོ་དགུ་པ་ཡིན་ནོ། །དད་པ་ལ་སོགས་པ་མངོན་དུ་གྱུར་པ་ཉིད་ཀྱིས་བཤད་པའི་ཕྱིར་རོ། །ཀུན་ཤེས་པའི་དབང་པོ་གསུམ་མིང་ཙམ་མོ་ཞེས་པའི་ཚིག་གིས་འཕངས་པ། གནས་སྐབས་གཞན་དུ་མིང་གཞན་གྱིས་བསྟན་པའི་ཕྱིར་ནད་པ་ལ་སོགས་པ་གཞན་རྣམས་ཉིད་གཉི་ག་ཇི་ལྟ་བར་བརྩི་སྟེ། ཆེས་གཞན་ཉིད་བགྲང་བ་དང་གཞན་ཉིད་བགྲང་བ་མ་ཡིན་ནོ། །གང་གི་ཕྱིར་གནས་སྐབས་གཞན་དུ་བཏགས་པ་ཀུན་ཤེས་པའི་དབང་པོ་ཡིན་པས། དད་པ་ལ་ནི་བཏགས་པའི་མཚན་ཉིད་ཡོད་དེ་ཚོགས་པ་ལ་ཀུན་ཤེས་པར་བྱེད་པའི་དབང་པོ་ལ་སོགས་པ་བཏགས་སོ། །ཚོགས་པ་ཅན་དང་ཚོགས་པའི་བདག་ཉིད་ནི་དུ་མ་ལ་དོན་མཚུངས་པར་དབང་བྱེད་པའི་རྟེན་གྱི་དབྱེ་བ་ལ་སོགས་པ་ལས་མ་ཡིན་ནོ། །འབྲས་བུ་ཐ་མ་གཉིས་དགུས་འཐོབ། །ཅེས་བྱ་བ་འདི་ལ་འགལ་བ་བསྟན་པའི་ཕྱིར། འོ་ན་ཆོས་མངོན་པ་ལས་ཞེས་བྱ་བ་སྨོས་ཏེ་ཡེ་ཤེས་ལ་འཇུག་པ་ལས་སོ། །ཚོར་བ་གསུམ་ཆར་མངོན་དུ་གྱུར་བ་མ་ཡིན་ཏེ། དེའི་ཕྱིར་དེ་ནི་དགུ་ཁོ་ནས་འཐོབ་བོ། །དེའི་ཕྱིར་འགལ་བ་མེད་དོ། །བསྟན་བཅོས་ནི་དགོངས་བ་ཅན་ཡིན་པའི་ཕྱིར་རོ། །འདིར་དགོངས་པ་གང་ཡིན་ཞེ་ན། དེའི་ཕྱིར་བཅུ་གཅིག་དག་གིས་དགྲ་བཅོམ་ཉིད་ཅེས་བྱ་བ་ལ་སོགས་པ་སྨོས་སོ། །བདེ་བས་ཐོབ་པ་ལས་ཡོངས་སུ་ཉམས་ཤིང་ཡང་ཡིད་བདེ་བས་འཐོབ་ལ། དེ་ལས་ཀྱང་ཡོངས་སུ་ཉམས་ཏེ། སླར་བཏང་སྙོམས་ཀྱིས་འཐོབ་ཀྱི། ས་ཐ་དད་པ་ཡིན་པའི་ཕྱིར་དང༌། ཕན་ཚུན་རྣམ་པ་འགལ་བའི་ཕྱིར་དང༌། རྫས་མཉམ་ཉིད་མཚུངས་པར་ལྡན་པའི་ཕྱིར། བདེ་བ་ལ་སོགས་པ་རྣམས་དུས་གཅིག་ཏུ་སྲིད་པ་ཡོད་པ་ནི་མ་ཡིན་ནོ། །འདི་ཕྱིར་མི་འོང་བ་ལ་ཡང་ཞེས་བྱ་བ་རྒྱས་པར་འབྱུང་སྟེ། ཕྱིར་མི་འོང་བའི་འབྲས་བུ་ཡང་དགྲ་བཅོམ་པ་ཉིད་ལྟར་བདེ་བ་དང༌། ཡིད་བདེ་བ་དང་བཏང་སྙོམས་རྣམས་ཀྱིས་འཐོབ་སྟེ། དེའི་ཕྱིར་དེ་ཡོངས་སུ་ཉམས་ནས་དབང་པོ་བཅུ་གཅིག་དག་གིས་ཐོབ་པར་འགྱུར་རོ་སྙམ་དུ་སེམས་ན། འདི་ནི་ཡོངས་སུ་ཉམས་ཕན་ཆད། །ཅེས་བྱ་བ་རྒྱས་པར་འབྱུང་སྟེ། ཕྱིར་མི་འོང་བའི་འབྲས་བུ་ལས་ཡོངས་སུ་ཉམས་པ་གང་ཡིན་པ་དེ་ནི་འདོད་པའི་ཁམས་ལས་འདོད་ཆགས་དང་བྲལ་བ་ལས་
ཀྱང་ཡོངས་སུ་ཉམས་པར་འགྱུར་ཏེ། དེའི་ཕྱིར་དེ་ལ་ཕྱིས་བདེ་བའི་དབང་པོས་འཐོབ་པ་མི་སྲིད་དེ། བདེ་བའི་དབང་པོ་ནི་བསམ་གཏན་གསུམ་པའི་ས་པ་ཡིན་པའི་ཕྱིར་དང༌། ཡིད་བདེ་བའི་དབང་པོ་ནི་ཡོད་པ་སྲིད་པར་བཤད་པས་རྣམ་པར་གྲོལ་བའི་ལམ་ལ་བསམ་གཏན་གྱི་དངོས་གཞིས་འཇུག་པའི་ཕྱིར་རོ། །དེ་ཉིད་ཀྱི་ཕྱིར་འདི་ནི་ཉམས་ཕན་ཆད་བདེ་བའི་དབང་པོས་འཐོབ་པ་མེད་དོ་ཞེས་བྱ་བ་སྨོས་སོ། །གལ་ཏེ་དབང་པོ་ཤིན་ཏུ་རྟུལ་པོ་ནི་དབང་པོ་འཕོ་བར་དཀའ་བའི་ཕྱིར་བསམ་གཏན་གྱི་དངོས་གཞི་ལ་འཇུག་པ་ཡོད་པ་དེ་ལྟ་ན་ཡང་མཐར་གྱིས་པས་ཡིད་བདེ་བའི་དབང་པོས་འཐོབ་པ་ཡོད་སྲིད་ཀྱིས་དེ་བས་ནི་མ་ཡིན་ནོ་ཞེས་དེ་ལྟར་བཤད་དོ། །ཅི་སྟེ་འཇིག་རྟེན་པའི་འདོད་ཆགས་དང་བྲལ་བ་བདེ་བའི་དབང་པོ་འཐོབ་པ་ནས་ཡོངས་སུ་ཉམས་ཏེ། ཡང་ཡིད་བདེ་བ་དང་བཏང་སྙོམས་དག་གིས་འཐོབ་པར་འགྱུར་རོ་སྙམ་ན། དེའི་ཕྱིར་འདོད་ཆགས་དང་བྲལ་བ་སྔོན་དུ་འགྲོ་བ་ལ་ནི་ཞེས་བྱ་བ་སྨོས་སོ། །ཡོངས་སུ་ཉམས་པ་མེད་པའི་རྒྱུ་ནི་དེའི་འདོད་ཆགས་དང་བྲལ་བ་ན་ཞེས་བྱ་བ་ལ་སོགས་པ་སྟེ། འདོད་པའི་འདོད་ཆགས་དང་བྲལ་བ་ནི་འཇིག་རྟེན་པ་དང་འཇིག་རྟེན་ལས་འདས་པའི་ལམ་གཉིས་ཀྱིས་བརྟན་པར་བྱས་པས། དེའི་ཕྱིར་དེ་ལས་ཉམས་པ་མེད་དོ། །དབང་པོའི་སྐབས་སུ་དབང་པོའི་ཆོས་ཐམས་ཅད་དཔྱད་པར་བྱ་བ་ཡིན་པས་དབང་པོ་དུ་ཞིག་དང་ལྡན་ཞེས་བྱ་བ་ལ་སོགས་པ་འདི་ཡང་དཔྱད་པར་བྱའོ། །འདི་དག་ནི་ཕན་ཚུན་མེད་ན་མི་ལྡན་པ་ཡིན་ནོ། །ཅིའི་ཕྱིར་ཞེ་ན། ས་དང་སེམས་ཅན་གྱི་རྟེན་ཐམས་ཅད་ལ་ཁྱབ་པར་བྱེད་པ་ཡིན་པའི་ཕྱིར་རོ། །འདི་ལྟར་དད་པ་ལ་སོགས་པ་རྣམས་ནི་ས་ཐམས་ཅད་ལ་ཁྱབ་པར་བྱེད་པ་ཡིན་ཡང་སེམས་ཅན་གྱི་ལུས་ཐམས་ཅད་ལ་ཁྱབ་པར་བྱེད་བ་མ་ཡིན་ལ། དད་པ་ལ་སོགས་པ་གཞན་པ་རྣམས་ནི་གཉི་ག་ལ་ཁྱབ་བར་བྱེད་པ་མ་ཡིན་པས་དེའི་ཕྱིར་ལྷག་མ་རྣམས་དང་ནི་མ་ངེས་ཏེ། བཏང་སྙོམས་ལ་སོགས་པ་གསུམ་ལས་གཞན་པ་གང་ཡིན་པ་དེ་ནི་ལྡན་པ་ཡང་ཡོད། མི་ལྡན་པ་ཡང་ཡོད་དོ། །གཟུགས་མེད་པར་སྐྱེས་པ་དག་དང་མི་ལྡན་ཏེ། གཟུགས་ཀྱི་འདོད་ཆགས་དང་བྲལ་བ་རྣམས་དེར་སྐྱེས་པའི་ཕྱིར་གཟུགས་མི་སྲིད་དོ། །དེ་ཉིད་དུ་སྐྱེས་པ་མ་ཡིན་ཡང་མ་ཐོབ་པ་དང༌། ཉམས་པ་དག་ཀྱང་མིག་ལ་སོགས་
པ་རྣམས་དང་ལྡན་པ་མ་ཡིན་ཏེ། ནུར་ནུར་པོ་ལ་སོགས་པའི་གནས་སྐབས་སུ་མ་སྐྱེས་པ་དག་དང༌། དམུས་ལོང་ལ་སོགས་པ་རྣམས་ལ་ཕྱིས་ཀྱང་མི་ལྡན་ནོ། །ཉམས་པ་ནི་སྐྱེས་ནས་གནོད་པ་བྱས་པའམ། ནད་ཀྱིས་ཆུད་ཟོས་པ་དག་གོ །ལུས་ཀྱང་དབང་པོ་ལས་ལོགས་སུ་སྨོས་པ་ནི་འདོད་པ་དང་གཟུགས་སུ་སྐྱེས་པའི་སེམས་ཅན་ལ་ཁྱབ་པར་བྱེད་པའི་ཕྱིར་རོ། །དེ་ཉིད་ཀྱི་ཕྱིར་གཟུགས་མེད་པར་སྐྱེས་པ་ཞེས་བྱ་བ་ལ་སོགས་པ་སྨོས་སོ། །བསམ་གཏན་བཞི་བ་དང་གཟུགས་མེད་པར་སྐྱེས་པའི་སོ་སོ་སྐྱེ་བོ་ཞེས་བྱ་བ་ལ། བསམ་གཏན་གསུམ་པའི་གོང་ན་བདེ་བའི་དབང་པོ་མེད་པའི་ཕྱིར་དང༌། ས་འཕོས་བས་བསམ་གཏན་གསུམ་པར་གཏོགས་པའི་བདེ་བའི་དབང་པོ་ཡོངས་སུ་བཏང་བའི་ཕྱིར། བསམ་གཏན་གསུམ་པ་ལས་གོང་དུ་སྐྱེས་པའི་སོ་སོ་སྐྱེ་བོ་ནི་བདེ་བའི་དབང་པོ་དང་མི་ལྡན་ནོ། །འཕགས་པ་ནི་སྐྱེས་ཀྱང་སྔར་བསྐྱེད་པའི་བསམ་གཏན་གསུམ་པས་བསྡུས་པའི་བདེ་བའི་དབང་པོ་དང་ལྡན་པ་ཉིད་དོ། །དེ་ནི་ཟག་པ་མེད་པ་རྣམས་སྤང་པར་བྱ་བ་མ་ཡིན་པའི་ཕྱིར་སྤངས་པ་མེད་ལ། མི་ལྡན་པ་ཡིན་པའི་ཕྱིར་ས་འཕོས་པས་གཏོད་པའང་མ་ཡིན་ཏེ། དེའི་ཕྱིར་འཕགས་པ་ལས་ཁྱད་པར་དུ་བྱ་བའི་ཕྱིར་སོ་སོ་སྐྱེ་བོ་ཞེས་སྨོས་སོ། །གསུམ་པ་ཐོབ་པའི་ཕྱིར་བསམ་གཏན་གཉིས་པར་སྐྱེས་པ་ཡང་བདེ་བའི་དབང་པོ་ལྡན་ནོ་ཞེས་ཤེས་པར་བྱ་བ་མ་ཡིན་ནམ་ཞེ་ན་བརྗོད་བར་མི་བྱ་སྟེ། བསམ་གཏན་གསུམ་པའི་ས་བའི་ཉོན་མོངས་པ་དང་ལྡན་པའི་ཕྱིར་རོ། །ཡིད་བདེ་བའི་དབང་པོ་དང་ནི་ཞེས་རྒྱ་ཆེར་འབྱུང་བ་ལ། འཕགས་པ་ནི་བསམ་གཏན་གཉིས་པའི་གོང་དུ་སྐྱེས་ཀྱང་ཟག་བ་མེད་པའི་བདེ་བ་དེའི་དབང་པོ་དང་ལྡན་པ་སོ་སོའི་སྐྱེ་བོ་ཁོ་ན་དང་ཞེས་ཁྱད་པར་དུ་བྱས་སོ། །སྡུག་བསྔལ་གྱི་དབང་པོས་ཞེས་བྱ་བ་ལ། སྡུག་བསྔལ་གྱི་དབང་པོ་ནི་འདོད་པར་གཏོགས་པ་ཁོ་ན་ཡིན་པས་དེ་དང་གཟུགས་དང་གཟུགས་མེད་པར་སྐྱེས་པ་མི་ལྡན་ནོ། །ཡིད་མི་བདེ་བ་དང་འདོད་པའི་འདོད་ཆགས་དང་བྲལ་བ་མི་ལྡན་པ་ནི་རྒྱུད་ཞི་གནས་ཀྱིས་བརླན་པའི་ཕྱིར་རོ། །ཀུན་ནས་མནར་སེམས་ཀྱི་གཞི་ནི་བྱེ་བྲག་མེད་པར་ཡིད་མི་བདེ་བ་དང་མི་ལྡན་པ་མེད་དོ། །ཀུན་ཤེས་པར་བྱེད་པའི་དབང་པོ་དང་ནི་ཞེས་བྱ་བ་ལ། ཟག་པ་མེད་པའི་
ཕྱིར་སོ་སོ་སྐྱེ་བོ་དང་མི་ལྡན་ནོ། །མཐོང་བའི་ལམ་བཏང་བའི་ཕྱིར་འབྲས་བུ་ལ་གནས་པ་དང་མི་ལྡན་ནོ། །ཀུན་ཤེས་པའི་དབང་པོ་དང་ནི་ཞེས་བྱ་བ་ལ། ཟག་པ་མེད་པའི་བསྒོམ་པའི་ལམ་གྱི་བདག་ཉིད་ཡིན་པའི་ཕྱིར། སོ་སོའི་སྐྱེ་བོ་དང༌། མཐོང་བ་དང༌། མི་སློབ་པའི་ལམ་ལ་གནས་པ་རྣམས་མི་ལྡན་ནོ། །ཀུན་ཤེས་པ་དང་ལྡན་པའི་དབང་པོ་དང་ནི་ཞེས་བྱ་བ་ལ་མི་སློབ་པའི་ལམ་གྱི་བདག་ཉིད་ཡིན་པའི་ཕྱིར་སོ་སོའི་སྐྱེ་བོ་དང༌། སློབ་པ་དག་མི་ལྡན་ནོ། །མ་བཀག་པའི་གནས་སྐབས་དག་ཏུ་ནི་ཞེས་བྱ་བ་རྒྱས་པར་འབྱུང་སྟེ། མིག་ལ་སོགས་པ་བཞི་དང་གཟུགས་ཀྱི་ཁམས་སུ་སྐྱེས་བ་དང་ལྡན་ནོ། །འདོད་པའི་ཁམས་ན་ཐོབ་པ་དང་མ་ཉམས་པ་ཡང་མིག་ལ་སོགས་པ་དག་དང་ལྡན་ནོ། །ལུས་ཀྱི་དབང་པོ་དང་ནི་འདོད་བ་དང༌། །གཟུགས་ཀྱི་ཁམས་སུ་སྐྱེས་པ་དག་དང་ལྡན་ནོ། །ཕོ་དང་མོའི་དབང་པོ་དང་ནི་འདོད་པའི་ཁམས་ཁོ་ནར་ཐོབ་པ་དང་མ་ཉམས་པ་ལྡན་ནོ། །བདེ་བའི་དབང་པོ་ནི་བསམ་གཏན་བཞི་པའི་འོག་ཏུ་སྐྱེས་པ་དང༌། བསམ་གཏན་བཞི་པ་ལ་སོགས་པར་སྐྱེས་པའི་འཕགས་པ་ལྡན་ནོ། །སྡུག་བསྔལ་གྱི་དབང་པོ་དང་ནི་འདོད་པའི་ཁམས་སུ་སྐྱེས་པ་ལྡན་ནོ། །ཡིད་མི་བདེ་བའི་དབང་པོ་ནི་འདོད་པའི་འདོད་ཆགས་དང་མ་བྲལ་བ་ལྡན་ནོ། །དད་པ་ལ་སོགས་པ་དག་དང་ནི་དགེ་བའི་རྩ་བ་ཀུན་ཏུ་མ་ཆད་པ་ལྡན་ནོ། །ཀུན་ཤེས་པར་བྱེད་པའི་དབང་པོ་དང་ནི་མཐོང་པའི་ལམ་ལ་གནས་པ་ལྡན་ནོ། །ཀུན་ཤེས་པའི་དབང་པོ་ནི་བསྒོམ་པའི་ལམ་ལ་གནས་པ་ལྡན་ནོ། །ཀུན་ཤེས་པ་དང་ལྡན་པའི་དབང་པོ་ནི་མི་སློབ་བའི་ལམ་ལ་གནས་པ་དག་ལྡན་ནོ། །དེ་ལྟར་ན་མ་བཀག་པའི་གནས་སྐབས་དེ་དག་ཏུ་ནི་ཇི་ལྟར་བཤད་པ་དང་ལྡན་པར་རིག་པར་བྱའོ། །བདེ་ལུས་ལྡན་ལ་བཞི་དག་དང༌། །ཞེས་བྱ་བ་ལ། བདེ་བའི་དབང་པོ་ལ་བཏང་སྙོམས་དང༌། སྲོག་དང་ཡིད་དག་གིས་ཁྱབ་པའི་ཕྱིར་རོ། །གང་ཞིག་བདེ་བའི་དབང་པོ་དང་ལྡན་པ་དེ་ནི་གདོན་མི་ཟ་བར་དབང་པོ་བཞི་དང་ལྡན་ནོ་ཞེས་བྱ་བ་རྒྱ་ཆེར་འབྱུང་སྟེ། དེ་བཞིན་དུ་ལུས་ཀྱི་དབང་པོ་དང་ལྡན་པ་ཡང་བརྗོད་པར་བྱའོ། །ལྡན་པ་ནི་མ་ངེས་སོ། །དེ་ལ་རེ་ཞིག་གཟུགས་མེད་པར་སྐྱེས་པའི་འཕགས་པ་ནི་བདེ་བའི་དབང་པོ་དང་ལྡན་ནོ། །མིག་དང་རྣ་བ་དང་
སྣ་དང་ལྕེ་རྣམས་དང་མ་ཡིན་ལ། འདོད་པའི་ཁམས་སུ་གང་གིས་མ་ཐོབ་པར་རྣམ་པར་ཉམས་པ་དག་དེ་བཞིན་ནོ། །ལུས་ཀྱི་དབང་པོ་དང་ནི་མ་ཡིན་ནོ། །ཕོ་དང་མོའི་དབང་པོ་དང་ནི་གཟུགས་མེད་པར་སྐྱེས་པའི་འཕགས་པ་དང༌། དེ་ལས་གཞན་པ་འདོད་པའི་ཁམས་སུ་ཡང་གང་གིས་མ་ཐོབ་པ་དང༌། རྣམ་པར་ཉམས་པ་དག་དེ་བཞིན་དུ་མི་ལྡན་པར་བརྗོད་པར་བྱའོ། །ཡིད་བདེའི་དབང་པོ་དང་ནི་བསམ་གཏན་གསུམ་པར་སྐྱེས་པའི་སོ་སོ་སྐྱེ་བོ་མི་ལྡན་ནོ། །སྡུག་བསྔལ་གྱི་དབང་པོ་དང་ནི་བསམ་གཏན་གསུམ་དུ་སྐྱེས་པའི་འཕགས་པ་དང་བསམ་གཏན་གསུམ་པ་ལས་གོང་དུ་སྐྱེས་པ་རྣམས་མི་ལྡན་ནོ། །ཡིད་མི་བདེ་བ་དང་ནི་འདོད་པ་ལ་འདོད་ཆགས་དང་བྲལ་བ་རྣམས་མི་ལྡན་ནོ། །དད་པ་ལ་སོགས་པ་རྣམས་དང་ནི་དགེ་བའི་རྩ་བ་ཀུན་ཏུ་ཆད་པ་རྣམས་མི་ལྡན་ནོ། །ཀུན་ཤེས་པར་བྱེད་པའི་དབང་པོ་དང་ནི་འབྲས་བུ་ལ་གནས་པ་རྣམས་དང་འདོད་པའི་ཁམས་དང༌། བསམ་གཏན་གསུམ་དུ་སྐྱེས་པའི་སོ་སོ་སྐྱེ་བོ་རྣམས་མི་ལྡན་ནོ། །ཀུན་ཤེས་པའི་དབང་པོ་དང་ཡང་སྔ་མ་བཞིན་དུ་སོ་སོ་སྐྱེ་བོ་རྣམས་དང་འཕགས་པ་ཡང་མཐོང་བ་དང་མི་སློབ་པའི་ལམ་ལ་གནས་པ་རྣམས་མི་ལྡན་ནོ། །ཀུན་ཤེས་པ་དང་ལྡན་པའི་དབང་པོ་དང་ནི་སོ་སོ་སྐྱེ་བོ་དང་སློབ་པ་རྣམས་མི་ལྡན་ནོ། །མ་བཀག་པའི་གནས་སྐབས་རྣམས་སུ་ཇི་སྐད་བཤད་པ་ལྡན་པར་རིག་པར་བྱའོ། །གང་ཞིག་ལུས་ཀྱི་དབང་དང་ལྡན་པ་དེ་ནི་ངེས་པར་དབང་པོ་བཞི་དང་ལྡན་ནོ། །ལྷག་མ་ནི་ལྡན་པ་ཡང་ཡོད། མི་ལྡན་པ་ཡང་ཡོད་དོ། །དེ་ལ་མིག་དང་རྣ་བ་དང་སྣ་དང་ལྕེ་རྣམས་དང་ནི་འདོད་པའི་ཁམས་སུ་གང་གིས་མ་ཐོབ་པ་ཉམས་པ་རྣམས་མི་ལྡན་ནོ། །བུད་མེད་སྐྱེས་པའི་དབང་པོ་དག་དང་ནི་གཟུགས་ཀྱི་ཁམས་སུ་སྐྱེས་པ་དང༌། འདོད་པའི་ཁམས་སུ་ཡང་གང་གིས་མ་ཐོབ་པ་དང་རྣམ་པར་ཉམས་པ་མི་ལྡན་ནོ། །བདེ་བའི་དབང་པོ་དང་ནི་བསམ་གཏན་བཞི་པར་སྐྱེས་པའི་སོ་སོ་སྐྱེ་བོ་མི་ལྡན་ནོ། །སྡུག་བསྔལ་གྱི་དབང་པོ་དང་ནི་གཟུགས་ཀྱི་ཁམས་སུ་སྐྱེས་པ་མི་ལྡན་ནོ། །ཡིད་མི་བདེའི་དབང་པོ་དང་ནི་འདོད་པའི་ཁམས་ལས་འདོད་ཆགས་ལས་བྲལ་བ་མི་ལྡན་ནོ། །དད་པ་ལ་སོགས་པ་རྣམས་དང་དགེ་བའི་རྩ་བ་ཀུན་ཏུ་ཆད་པ་མི་ལྡན་ནོ། །ཀུན་ཤེས་པར་བྱེད་པའི་
དབང་པོ་དང་ནི་འདོད་པའི་ཁམས་སུ་སྐྱེས་པའི་སོ་སོ་སྐྱེ་བོ་དང་འབྲས་བུ་ལ་གནས་པ་རྣམས་མི་ལྡན་ནོ། །ཀུན་ཤེས་པར་བྱེད་པའི་དབང་པོ་དང་ནི་འདོད་པའི་ཁམས་སུ་སྐྱེས་པའི་སོ་སོ་སྐྱེ་བོ་དང༌། འབྲས་བུ་ལ་གནས་པ་རྣམས་མི་ལྡན་ནོ། །ཀུན་ཤེས་པའི་དབང་པོ་དང་ནི་ཁམས་གཉིས་སུ་སྐྱེས་པའི་སོ་སོ་སྐྱེ་བོ་དང་མཐོང་བ་དང་མི་སློབ་པའི་ལམ་ལ་གནས་པའི་འཕགས་པ་རྣམས་ཇི་ལྟར་སྲིད་པ་བཞིན་མི་ལྡན་ནོ། །ཀུན་ཤེས་པ་དང་ལྡན་པའི་དབང་པོ་དང་ནི་སོ་སོ་སྐྱེ་བོ་དང་སློབ་པ་རྣམས་མི་ལྡན་ནོ། །མ་བཀག་པའི་གནས་སྐབས་རྣམས་སུ་ནི་ཇི་སྐད་བཤད་པ་ལྡན་པར་རིག་པར་བྱའོ། །མིག་སོགས་ལྡན་ལ་ལྔ་དང་ལྡན། །ཞེས་བྱ་བ་ལ། མིག་དང་རྣ་བ་དང་སྣ་དང་ལྕེ་ནས་ནི་རེ་རེ་ཞིང་བཏང་སྙོམས་ལ་སོགས་པ་བཞིས་ཁྱབ་པའི་ཕྱིར་ན། གང་ཞིག་མིག་ལ་སོགས་པ་གང་ཡང་རུང་བ་ཞིག་དང་ལྡན་པ་ནི་གདོན་མི་ཟ་བར་དབང་པོ་ལྔ་དང་ལྡན་ནོ། །དེ་ལ་མིག་གི་དབང་པོ་དང་ལྡན་པ་ནི་གདོན་མི་ཟ་བར་རྣ་བ་དང་ལྡན་པ་མ་ཡིན་ཏེ། འདོད་པའི་ཁམས་ན་དེ་དག་མ་ཐོབ་པ་དང་ཉམས་པ་སྲིད་པའི་ཕྱིར་རོ། །མོ་དང་ཕོའི་དབང་པོ་དག་དང་ནི་གཟུགས་ཀྱི་ཁམས་སུ་སྐྱེས་པ་དང༌། འདོད་པའི་ཁམས་སུ་ཡང་མ་ཐོབ་པ་དང་ཉམས་པ་འགའ་ཞིག་མི་ལྡན་ནོ། །བདེ་བ་ལ་སོགས་པ་དང་མི་ལྡན་པ་ཡང་ལུས་ཀྱི་དབང་པོ་བཞིན་དུ་རྒྱ་ཆེར་བརྗོད་པར་བྱའོ། །རྣ་བ་དང་སྣ་དང་ལྕེའི་དབང་པོ་དང་ལྡན་པ་ཡང་དེ་དང་འདྲ་བར་རིག་པར་བྱའོ་ཞེས་བྱ་བ་ལ། མིག་ལ་སོགས་པ་འདི་དག་ནི་ལུས་ཀྱི་དབང་པོ་མེད་པར་མི་འབྱུང་སྟེ་དེ་ལ་རག་ལས་ཏེ་འཇུག་པའི་ཕྱིར་རོ། །ཕན་ཚུན་ནི་མ་ཡིན་ཏེ། ཕན་ཚུན་བལྟོས་པ་མེད་པར་འཇུག་པའི་ཕྱིར་དང་ས་ལྔ་པ་ཡིན་པའི་ཕྱིར་རོ། །མིག་གི་དབང་པོ་བཞིན་དུ་རྣ་བ་ལ་སོགས་པ་དབང་པོ་གཞན་ལ་ཡང་འཁྲུལ་བ་རྒྱས་པར་བརྗོད་པར་བྱའོ། །ཡིད་བདེ་ལྡན་ཡང་སྟེ། མིག་ལ་སོགས་པའི་དབང་པོ་དང་ལྡན་པ་ལྟར་གདོན་མི་ཟ་བར་བཏང་སྙོམས་དང་སྲོག་དང་ཡིད་དང༌། བདེ་བ་དང༌། ཡིད་བདེ་བ་སྟེ་དབང་པོ་ལྔ་དང་ལྡན་ནོ། །ལྷག་མ་རྣམས་དང་ནི་ལྡན་པ་ཡང་ཡོད་མི་ལྡན་པ་ཡང་ཡོད་དོ། །དེ་ལ་གཟུགས་མེད་པའི་ཁམས་སུ་སྐྱེས་པའི་འཕགས་པ་ནི། ཡིད་བདེ་བ་དང་ལྡན་གྱི་མིག་ལ་སོགས་པ་དང་ནི་མ་ཡིན་ནོ། །འདོད་
པའི་ཁམས་སུ་སྐྱེས་པ་ཡང་གང་གིས་མ་ཐོབ་པ་དང་ཉམས་པ་ནི་མི་ལྡན་ནོ། །བསམ་གཏན་དང་པོ་དང་གཉིས་པ་དང་གསུམ་པ་དང༌། བཞི་པར་སྐྱེས་པའི་འཕགས་པ་རྣམས་ཕོ་དང་མོའི་དབང་པོ་དང་མི་ལྡན་ལ། འདོད་པའི་ཁམས་སུ་སྐྱེས་པ་རྣམས་ཀྱི་ཡང་གང་ཞིག་ལུས་ཀྱི་དབང་པོ་མ་ཐོབ་པ་དང་ཉམས་བདག་མི་ལྡན་ནོ། །སྡུག་བསྔལ་གྱི་དབང་པོ་དང་གཟུགས་དང་གཟུགས་མེད་པར་སྐྱེས་བའི་འཕགས་པ་དང༌། བསམ་གཏན་དང་པོ་དང་གཉིས་པར་སྐྱེས་པའི་སོ་སོ་སྐྱེ་བོ་དག་མི་ལྡན་ནོ། །ཡིད་མི་བདེ་བ་དང་འདོད་པ་ལ་འདོད་ཆགས་དང་བྲལ་བ་རྣམས་མི་ལྡན་ནོ། །དད་པ་ལ་སོགས་པ་དང་ཀུན་ཤེས་པར་བྱེད་པའི་དབང་པོ་ལ་སོགས་པ་ཡང་སྔ་མ་བཞིན་དུ་བརྗོད་པར་བྱའོ། །མ་བཀག་པའི་གནས་སྐབས་རྣམས་སུ་ནི་ཇི་སྐད་བཤད་པ་ལྡན་པར་རིག་པར་བྱའོ། །བསམ་གཏན་གཉིས་པར་སྐྱེས་པ་བསམ་གཏན་གསུམ་པ་མ་ཐོབ་བ་ལ་ལུས་ཀྱི་བདེ་བ་མེད་ཅིང་སེམས་ཀྱི་བདེ་བ་མེད་དེ། དེའི་ཕྱིར་ཡིད་བདེ་བ་དང་ལྡན་པ་ནི་མིག་ལ་སོགས་པ་ལྟར་བདེ་བའི་དབང་པོ་དང་ཡང་གདོན་མི་ཟ་བར་ལྡན་པ་མ་ཡིན་ནོ་སྙམ་དུ་བསམས་ཏེ་འདྲི་བ་ནི། བསམ་གཏན་གཉིས་པར་སྐྱེས་པ་ཞེས་རྒྱ་ཆེར་འབྱུང་བའོ། །བསམ་གཏན་གསུམ་པའི་ས་པའི་ཉོན་མོངས་པ་ཅན་དང་ལྡན་ནོ་ཞེས་བྱ་བ་ལ། ས་འོག་མ་པའི་མི་སྲིད་བའི་ཕྱིར་དང༌། བསམ་གཏན་གསུམ་པའི་ས་པའི་དགེ་བ་དང་ལུང་དུ་མ་བསྟན་པ་མི་སྲིད་པའི་ཕྱིར་ཏེ། དེ་གཉིས་ཀྱི་ཕྱིར་ཉོན་མོངས་པ་ཅན་དང་ལྡན་ནོ་ཞེས་སྨོས་སོ། །དེ་མི་སྲིད་པ་དེ་དེའི་ཐོབ་པ་སྐྱེ་བ་བཏང་སྙོམས་ཅན་ཉིད་ཀྱི་ཕྱིར་རོ། །ཇི་ལྟར་ས་གཞན་དང་ལྡན་ཞེས་བརྗོད་པར་བྱའོ། །གལ་ཏེ་ས་འོག་མའི་ཉོན་མོངས་པ་ཅན་ཉིད་ཀྱི་ཕྱིར་རོ་ཞེ་ན། མི་མཚུངས་བའི་ཕྱིར་ཉོན་མོངས་བ་ཅན་གྱིས་ཅི་ཞིག་བྱ། གཟུགས་མེད་པ་རྣམས་ལས་ཤིན་ཏུ་འདས་པའི་འཕགས་པ་ནི་ཇི་ལྟར་ན་བདེ་བ་དང་ཡིད་བདེ་བ་དག་དང་ལྡན་ཞེས་བྱ་བ་རྒོལ་བའི་གཞིའོ། །གལ་ཏེ་ས་གོང་མའི་ཉོན་མོངས་པ་ས་འོག་མར་སྐྱེས་བ་དང་མི་ལྡན་ན། འོ་ན་སྤངས་བ་ལས་འདོད་བ་ལ་སོགས་པར་སྐྱེས་པ་བསམ་གཏན་ལ་སོགས་པ་ལ་ཆགས་པ་དང་བྲལ་བར་ཡོངས་སུ་རྟོགས་པ་ཅི་ཞེ་ན། སྤངས་པས་འདོད་ཆགས་དང་བྲལ་བ་དེའི་ཕྱིར་གདོན་མི་
ཟ་བར་ས་གོང་མའི་ཉོན་མོངས་པ་དང་ལྡན་པར་ཁས་བླང་བར་བྱའོ། །གཞན་དུ་ན་དེ་ནི་སྤངས་པ་མེད་པའི་ཕྱིར་ས་གོང་མ་ལ་ཆགས་པ་དང་བྲལ་བ་ཉིད་དུ་མི་འགྱུར་རོ། །ཉོན་མོངས་པ་མེད་པ་ནི་ཉོན་མོངས་པ་ཅན་བཞིན་དུ་ལྡན་པར་མི་རིགས་སོ། །སྦྱོར་བ་ལ་རག་ལས་པའི་ཕྱིར་དགེ་བ་དང་མ་ཡིན་ཏེ། སྦྱོར་བ་ལ་དེ་མི་འཐད་པའི་ཕྱིར་རོ། །སྐྱེ་བས་ཐོབ་པ་དང་ཡང་མ་ཡིན་ཏེ་ལྷན་ཅིག་སྐྱེས་པས་ཐོབ་པའི་ཕྱིར་རོ། །ལུང་དུ་མ་བསྟན་པ་དང་མ་ཡིན་ཏེ། མཐའ་ལས་ཡང་དག་པར་འདས་པའི་ཕྱིར་རོ། །གཟུགས་མེད་པར་སྐྱེས་པའི་འཕགས་པའི་ལམ་བཏང་བའི་རྒྱུ་མེད་པའི་ཕྱིར་བདེ་བ་དང་ཡིད་བདེ་བ་དག་དང་དེའི་རྟེན་ལས་འདས་པས་མངོན་དུ་ནི་མི་བྱེད་དེ། སར་གཏོགས་པ་ནི་ས་གཏོང་བ་མི་རིགས་སོ། །སྡུག་བསྔལ་ལྡན་ནི་གདོན་མི་ཟ་བར་ལྡན་ནོ་ཞེས་སྙེགས་ཏེ། དེའི་ཕྱིར་སྡུག་བསྔལ་གྱི་དབང་པོ་དང་ལྡན་པ་ཞེས་བྱ་བ་ལ་སོགས་པ་སྨོས་སོ། །ལྷག་མ་ནི་ལྡན་པ་ཡང་ཡོད་མི་ལྡན་པ་ཡང་ཡོད་དོ། དེ་ལ་སྡུག་བསྔལ་གྱི་དབང་པོ་དང་ལྡན་པ་ནི་མིག་ལ་སོགས་པ་དང་ནི་མ་ཐོབ་པ་དང་ཉམས་པ་དག་མི་ལྡན་ནོ། །དེ་བཞིན་དུ་ཕོ་དང་མོའི་དབང་པོ་དག་ཀྱང་ངོ༌། །ཡིད་མི་བདེ་བ་དང་འདོད་ཆགས་དང་བྲལ་བ་མི་ལྡན་ནོ། །དད་པ་ལ་སོགས་པ་དང་དགེ་བའི་རྩ་བ་ཆད་པ་མི་ལྡན་ནོ། །ཀུན་ཤེས་པར་བྱེད་པའི་དབང་པོ་དང་ནི་འདོད་པའི་ཁམས་སུ་སོ་སོ་སྐྱེ་བོ་དང་འབྲས་བུ་ལ་གནས་པ་རྣམས་མི་ལྡན་ནོ། །དེ་བཞིན་དུ་ཀུན་ཤེས་པའི་དབང་པོ་དང་ཀུན་ཤེས་ལྡན་པའི་དབང་པོ་ཡང་བརྗོད་པར་བྱའོ། །མ་བཀག་པའི་གནས་སྐབས་རྣམས་སུ་ཇི་སྐད་བཤད་པ་ལྡན་པར་རིག་པར་བྱའོ། །མོ་ཡི་དབང་སོགས་ལྡན་བརྒྱད་དང༌། །གདོན་མི་ཟ་བར་ལྡན་ནོ་ཞེས་བྱ་བར་སྦྱར་ཏེ། བཤད་མ་ཐག་པའི་བདུན་པོ་དེ་དག་དང་ལྡན་ནོ། །ལྷག་མ་རྣམས་དང་ནི་ལྡན་པ་ཡང་ཡོད་མི་ལྡན་པ་ཡང་ཡོད་དོ། །དེ་ལ་མིག་ལ་སོགས་པ་རྣམས་དང་ནི་མ་ཐོབ་པ་དང་ཉམས་པ་དག་མི་ལྡན་ནོ། །དེ་བཞིན་དུ་ཕོའི་དབང་པོ་དང་ཡིད་མི་བདེ་བ་དང་འདོད་ཆགས་དང་བྲལ་བ་མི་ལྡན་པ་ལ་སོགས་པ་ལྷག་མ་སྔ་མ་བཞིན་ནོ། །མ་བཀག་པའི་གནས་སྐབས་རྣམས་སུ་ཇི་སྐད་བཤད་པ་ལྡན་པར་རིག་པར་བྱའོ། །གང་ཞིག་ཕོའི་དབང་པོའམ། ཡིད་མི་བདེ་བའི་དབང་པོ་དང་ལྡན་པ་དེ་ནི་གདོན་མི་
ཟ་བར་དབང་པོ་བརྒྱད་དང་ལྡན་པ་ཡིན་ཏེ། ཇི་སྐད་བཤད་པ་བདུན་དང༌། བརྒྱད་པ་ཕོའི་དབང་པོ་འམ་ཡིད་མི་བདེ་བའི་དབང་པོ་དང་ལྡན་ནོ། །གང་གི་ཕྱིར་གང་ཞིག་ཡིད་མི་བདེ་བ་དང་ལྡན་པ་དེ་ནི་གདོན་མི་ཟ་བར་ཚོར་བ་ལྔ་དང༌། ལུས་དང༌། སྲོག་དང་ཡིད་དང་ལྡན་ཏེ། །ལྷག་མ་ནི་སྔ་མ་བཞིན་དུ་བརྗོད་པར་བྱའོ། །དད་པ་ལ་སོགས་པ་དང་ལྡན་པ་ནི་ཞེས་བྱ་བ་རྒྱས་པར་འབྱུང་བ་ལ། གང་ཞིག་དད་པའི་དབང་པོ་དང་ལྡན་པ་དེ་ནི་གདོན་མི་ཟ་བར་དབང་པོ་བརྒྱད་དང་ལྡན་ཏེ། དད་པ་ལ་སོགས་པ་རྣམས་ནི་བཏང་སྙོམས་ལ་སོགས་པ་དག་མེད་པར་མི་འབྱུང་ཞིང༌། དེ་བཞིན་དུ་ཕན་ཚུན་མེད་ན་མི་འབྱུང་བའི་ཕྱིར་རོ། །དེ་ཉིད་ཀྱི་ཕྱིར་དད་པ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་ཀྱི་དབང་པོ་སྟེ་ལྔ་པོ་དེ་དག་དང༌། བཏང་སྙོམས་དང༌། སྲོག་དང༌། ཡིད་དག་དང་ལྡན་ནོ་ཞེས་བྱ་བ་སྨོས་སོ། །དེ་བཞིན་དུ་རེ་རེ་བརྩོན་འགྲུས་ལ་སོགས་པ་དག་དང་ལྡན་པ་ཡང་བརྗོད་པར་བྱའོ། །ལྷག་མ་རྣམས་དང་ནི་ལྡན་པ་ཡང་ཡོད་མི་ལྡན་པ་ཡང་ཡོད་དོ། །ཀུན་ཤེས་ཀུན་ཤེས་ལྡན་པ་ཡི། །དབང་པོ་ལྡན་པ་བཅུ་གཅིག་ལྡན། །ཞེས་བྱ་བ་ལ། དབང་པོ་ལྡན་ཞེས་བྱ་བའི་སྒྲ་ནི་ཀུན་ཤེས་པའི་དབང་པོ་དང་ལྡན་པ་དང༌། ཀུན་ཤེས་པ་དང་ལྡན་པ་ལ་ཞེས་རེ་རེ་དང་སྦྲེལ་བར་བྱའོ། །ཀུན་ཤེས་པ་དང་ལྡན་པའི་དབང་པོ་ཁོ་ན་ལ་ཀུན་ཤེས་པ་ཞེས་བརྗོད་དེ། དེ་ནི་སྡུག་བསྔལ་ཡོངས་སུ་ཤེས་སོ། །ཀུན་འབྱུང་སྤངས་སོ། །འགོག་པ་མངོན་དུ་བྱས་སོ། །ལམ་བསྒོམས་སོ་སྙམ་དུ་བདེན་པ་བཞི་ཀུན་ནས་ཤེས་པ་ཡིན་པས་ཀུན་ཤེས་པ་ཞེས་བཤད་དེ། དེ་ཉིད་ཀྱི་ཕྱིར། ཀུན་ཤེས་པ་ལ་དབང་བྱེད་པས་ན་ཀུན་ཤེས་པ་དང་ལྡན་པའི་དབང་པོའོ། །གང་ཞིག་ཀུན་ཤེས་པའི་དབང་པོ་དང་ལྡན་པ་ཞེས་བྱ་བ་རྒྱ་ཆེར་འབྱུང་སྟེ། བསྒོམ་པའི་ལམ་གྱིས་བསྡུས་པའི་ཕྱིར་ཀུན་ཤེས་པའི་དབང་པོ་དང་ནི་སློབ་པ་ཁམས་གསུམ་དུ་སྐྱེས་པ་ཡང་ལྡན་པ་སྲིད། དོ། །བཅུ་གཅིག་མ་གཏོགས་པ་རྣམས་དང་ནི་ལྡན་པ་ཡང་ཡོད། མི་ལྡན་པ་ཡང་ཡོད་དོ། །དེ་ལ་མིག་ལ་སོགས་པ་རྣམས་དང་གཟུགས་མེད་པའི་ཁམས་སུ་བསྒོམ་པའི་ལམ་ལ་གནས་པའི་ཕྱིར་མི་འོང་བ་མི་ལྡན་ནོ། །འདོད་པའི་ཁམས་སུ་ཡང་མ་ཐོབ་པ་དང་ཉམས་པ་མི་ལྡན་ནོ། །ལུས་ཀྱི་དབང་
པོ་དང་གཟུགས་མེད་པར་སྐྱེས་པའི་སློབ་བ་མི་ལྡན་ནོ། །མོ་དང་ཕོའི་དབང་པོ་དང་ནི་གཟུགས་མེད་པར་སྐྱེས་པའི་ཕྱིར་མི་འོང་བ་དང་འདོད་པའི་ཁམས་སུ་ཡང་མ་ཐོབ་པ་དང་ཉམས་པ་དག་བསྒོམ་པའི་ལམ་ལ་གནས་པ་རྣམས་མི་ལྡན་ནོ། །སྡུག་བསྔལ་གྱི་དབང་པོ་ནི་གཟུགས་དང་གཟུགས་མེད་པར་སྐྱེས་པའི་འཕགས་པ་རྣམས་མི་ལྡན་ནོ། །ཡིད་མི་བདེ་བ་དང་ནི་འདོད་པ་ལ་འདོད་ཆགས་དང་བྲལ་བ་རྣམས་མི་ལྡན་ནོ། །ཀུན་ཤེས་པར་བྱེད་པའི་དབང་པོ་དང་ཀུན་ཤེས་པ་དང་ལྡན་པའི་དབང་པོ་དང་ཡང་མི་ལྡན་པ་ཉིད་དོ། །དེ་དག་མཐོང་བ་དང་མི་སློབ་པའི་ལམ་ཉིད་དེ་བསྒོམ་པའི་ལམ་གྱི་གནས་སྐབས་སུ་ཡང་དེ་བཞིན་དུ་ཀུན་ཤེས་པ་དང་ལྡན་པའི་དབང་པོ་དང་ལྡན་པ་རྒྱས་པར་ཇི་ལྟར་སྲིད་པ་བཞིན་བརྗོད་པར་བྱ་སྟེ། མ་བཀག་པའི་གནས་སྐབས་སུ་ཇི་སྐད་བཤད་པ་ལྡན་པར་རིག་པར་བྱའོ། །ཀུན་ཤེས་བྱེད་པའི་དབང་ལྡན་ལ། །བཅུ་གསུམ་དག་དང་ལྡན་པ་ཡིན། །ངེས་པར་ཞེས་བྱ་བ་འཇུག་སྟེ། མཐོང་བའི་ལམ་ནི་འདོད་པའི་ཁམས་ཁོ་ནར་ཡིན་ཏེ། དེའི་ཕྱིར་གདོན་མི་ཟ་བར་ལུས་ཀྱི་དབང་པོ་དང་ལྡན་ནོ། །འདོད་ཆགས་དང་བྲལ་བ་ངེས་པ་ལ་འཇུག་པའི་ཚེ་ཡིད་མི་བདེ་བ་མི་སྲིད་དོ་ཞེ་ན། དེའི་ཕྱིར་ཚོར་བ་བཞི་དག་དང་ཞེས་སྨོས་སོ། །ལྷག་མ་རྣམས་དང་ནི་ལྡན་པ་ཡང་ཡོད་མི་ལྡན་པ་ཡང་ཡོད་དོ། །དེ་ལ་མ་ཐོབ་བ་དང་ཉམས་པ་ནི་མིག་ལ་སོགས་པ་དང་མི་ལྡན་ནོ། །དེ་བཞིན་དུ་མོ་དང་ཕོའི་དབང་པོ་དག་དང་ཀུན་ཤེས་པའི་དབང་པོ་མཐོང་བའི་ལམ་ལ་གནས་པ་དག་མི་ལྡན་ནོ། །མ་བཀག་པའི་གནས་སྐབས་རྣམས་སུ་ལྡན་པར་རིག་པར་བྱའོ། །དེ་ལ་ཐོབ་པ་དང་མ་ཉམས་པ་ནི་མིག་ལ་སོགས་པ་རྣམས་དང་ལྡན་ནོ། །མོ་དང་ཕོའི་དབང་པོ་དག་དང་ཀུན་ཤེས་པ་དང་ཀུན་ཤེས་ལྡན་པའི་དབང་པོ་དག་མི་ལྡན་པ་ཉིད་དོ། །དེ་དག་དང་འབྲེལ་བའི་ཕྱིར་མོ་དང་ཕོའི་དབང་པོ་དང་ལས་གང་ཡང་རུང་བ་ཞིག་བརྗོད་པར་བྱའོ་ཞེས་བྱ་བའི་བརྒལ་བའི་ཚིག་བརྗོད་པར་མི་བྱ་སྟེ་འཁྲུལ་བའི་ཕྱིར་རོ། །རེས་འགའ་རིམ་གྱིས་འཆི་བའི་གནས་སྐབས་སུ་ཕོ་དང་མོའི་དབང་པོ་འགག་ཀྱང༌། དེའི་ཚེ་སྐྱེ་བ་སྐྱེ་ཞིང་ངེས་པ་ལ་འཇུག་པར་འགྱུར་ཏེ། དེ་ཉིད་ཀྱི་ཕྱིར་མོ་ཡིན་ལ་མོའི་དབང་པོ་དང་མི་ལྡན་པ་ཡོད་དམ་ཞེ་ན་ཡོད་དོ་ཞེས་བརྗོད་པར་བྱ་སྟེ། མོའི་དབང་པོ་འགག་ཀྱང་དེའི་རིགས་མཐུན་
པ་མི་འགག་པའི་ཕྱིར་རོ། ཕོའི་དབང་པོ་ལ་ཡང་དེ་དང་འདྲ་བར་བརྗོད་པར་བྱའོ། །གནས་སྐབས་མ་ངེས་པར་དབང་པོ་ལྡན་པ་བཤད་ཟིན་ཏོ། །ད་ནི་གང་ཟག་ངེས་པར་བརྗོད་པར་བྱ་སྟེ། ཡང་ན་གང་ཞིག་གི་ནང་ན་ཉུང་བ་དང་ལྡན་པ་ཞེས་བྱ་བ་རྒྱས་པར་འབྱུང་བ་ལ། འདིར་ནི་ཉུང་བ་དག་དང་ལྡན་པ་འགོག་པ་ཡིན་གྱི། མང་བ་དག་ཏུ་ལྡན་པ་ནི་མ་ཡིན་ནོ། །དགེ་བའི་རྩ་བ་ཀུན་ཏུ་ཆད་པ་ནི་དགེ་བའི་ཆོས་ཐམས་ཅད་དང་མི་ལྡན་པའི་ཕྱིར་དགེ་མེད་ཅེས་བྱའོ། །དགེ་བའི་རྩ་བ་ཀུན་ཏུ་ཆད་བ་ལ་ནི་འདོད་པའི་ཁམས་ལ་འདོད་ཆགས་དང་བྲལ་བ་སྲིད་པ་ཡོད་པ་མ་ཡིན་ཏེ། དེའི་ཕྱིར་ཚོར་བ་ལྔ་དག་དང་ཞེས་བྱ་བ་སྨོས་སོ། །འདོད་པའི་ཁམས་ལས་གཞན་ན་ནི་དགེ་བའི་རྩ་བ་ཀུན་ཏུ་ཆད་པ་མ་ཡིན་ནོ། །འདོད་པའི་ཁམས་ན་ལུས་ཀྱི་དབང་པོ་འཁྲུལ་པ་ཡང་མ་ཡིན་ཏེ། དེའི་ཕྱིར་ལུས་དང་ཞེས་བྱ་བ་སྨོས་སོ། །ཚོར་བར་བྱེད་པ་ནི་མྱོང་བ་སྟེ། ཚོར་བར་བྱེད་པའི་ཕྱིར་རོ་ཞེས་བྱ་བ་ནི་བྱེད་པ་པོ་སྟེ། དངོས་པོའི་བྱེད་པ་པོ་ཡང་སྟོན་པར་བྱེད་དོ། །དགེ་བ་མེད་པའི་ཕྱིར་དད་པ་ལ་སོགས་པ་རྣམས་དང་ཟག་པ་མེད་པ་དག་དང་ལྡན་པ་ཡང་མ་ཡིན་ནོ། །མིག་ལ་སོགས་པ་ཕོའི་དབང་པོའི་མཐར་ཐུག་པ་མ་ཐོབ་པ་དང་ཉམས་བ་རྣམས་དང་ཡང་ལྡན་པ་མ་ཡིན་ནོ། །གཟུགས་མེད་བྱིས་པའང་དེ་བཞིན་ཏེ། །ཞེས་བྱ་བ་ལ་དེ་བཞིན་ཞེས་བྱ་བའི་སྒྲ་ནི་གྲངས་ཙམ་ཞིག་དང་སྦྱར་གྱི། གང་དག་དང་དགེ་མེད་ལྡན་པ་དེ་དག་ཁོ་ན་དང་ལྡན་པ་ནི་མ་ཡིན་ནོ། །དེ་ཉིད་ཀྱི་ཕྱིར། བཏང་སྙོམས་སྲོག་ཡིད་དགེ་རྣམས་དང༌། །ཞེས་བྱ་བ་སྨོས་སོ། །བྱིས་པ་ཞེས་བྱ་བ་ནི་སོ་སོ་སྐྱེ་བོའི་མིང་ཡིན་ནོ་ཞེས་བྱ་བ་འདི་ལྟར་རྟོགས་ཤེ་ན། མདོ་ལས་འབྱུང་བའི་ཕྱིར་ཏེ། བཅོམ་ལྡན་འདས་ཀྱིས་དགེ་སློང་དག་བྱས་པ་སོ་སོའི་སྐྱེ་བོ་ཐོས་བ་དང་མི་ལྡན་པ་རྟག་པར་ལྷུང་བ་རྣམས་ནི་བདག་དང་བདག་གི་ཞེས་བྱ་བ་རྒྱ་ཆེར་གསུངས་ཏེ། དེ་ནི་བྱ་བ་དང་བྱ་བ་མ་ཡིན་པ་མི་ཤེས་པས་བྱིས་པ་དང་འདྲ་བས་བྱིས་པ་ཡིན་ནོ། །ཀུན་ཤེས་པར་བྱེད་པའི་དབང་པོ་ལ་སོགས་པ་རྣམས་ཀྱང་གཟུང་བར་ཐལ་བར་འགྱུར་ཏེ། དེ་དག་ཀྱང་དད་པ་ལ་སོགས་པ་ལྟར་གཅིག་ཏུ་དགེ་བ་ཡིན་ནོ་ཞེ་ན། མ་ཡིན་ཏེ། བརྒྱད་ཀྱི་སྐབས་ཡིན་པའི་ཕྱིར་རོ། །དགེ་མེད་ནང་ན་ཉུང་ལྡན་པ། །ལུས་ཚོར་སྲོག་ཡིད་བརྒྱད་དང་ལྡན། །
ཞེས་པ་འདིར་བརྒྱད་ཀྱི་དབང་དུ་བྱས་པ་ཡིན་ཏེ། དེ་དག་འཛིན་ན་བཅུ་གཅིག་ཏུ་འགྱུར་གྱི་བརྒྱད་ནི་མ་ཡིན་ནོ། །བྱིས་པའི་སྐབས་ཡིན་བའི་ཕྱིར་རོ་ཞེས་བྱ་བ་ལ། བྱིས་པ་ཞེས་བྱ་བ་སོ་སོ་སྐྱེ་བོ་ལ་བྱ་སྟེ། སོ་སོ་སྐྱེ་བོ་ཉིད་ནི་འཕགས་པའི་ཆོས་རྣམས་མ་ཐོབ་པའོ་ཞེས་འབྱུང་བའི་ཕྱིར་རོ། །དེས་ན་ཀུན་ཤེས་པར་བྱེད་པའི་དབང་པོ་ལ་སོགས་པ་འཛིན་པ་མ་ཡིན་ནོ། །ཡང་ན་གཟུགས་མེད་པ་ན་ཀུན་ཤེས་པར་བྱེད་པའི་དབང་པོ་མེད་པའི་ཕྱིར་རོ། །ཡང་གང་ཞིག་གི་ནང་ན་དབང་པོ་མང་པོ་དག་དང་ལྡན་པ་ཞེས་བྱ་བ་རྒྱ་ཆེར་འབྱུང་བ་ལ། མཚན་གཉིས་པ་ལ་ནི་ཟག་པ་མེད་པའི་ཆོས་མེད་པའི་ཕྱིར་ཀུན་ཤེས་པར་བྱེད་བའི་དབང་པོ་ལ་སོགས་པ་དག་དང་མི་ལྡན་ནོ། །མཚན་གཉིས་པ་གདོན་མི་ཟ་བར་བཅུ་དགུ་དང་ལྡན་པ་ཡང་མ་ཡིན་ཏེ། སྲིད་པའི་དབང་དུ་བྱས་ནས་བརྗོད་པ་ཡིན་ནོ། །དབང་པོ་ཚང་བ་གང་ཡིན་པ་ནི་མིག་ལ་སོགས་པ་ཕོའི་དབང་པོའི་མཐར་ཐུག་པ་ཐོབ་བ་དང་ཉམས་པ་དག་དང་ལྡན་ནོ། །མཚན་གཉིས་པ་ཉིད་ཡིན་པའི་ཕྱིར་དགེ་བའི་རྩ་བ་ཀུན་ཏུ་ཆད་པ་མེད་པའི་ཕྱིར་དང་འདོད་པ་ལ་འདོད་ཆགས་དང་བྲལ་བ་མེད་པའི་ཕྱིར་དད་པ་ལ་སོགས་པ་དག་དང༌། ཚོར་བ་ལྔ་དག་དང༌། སྲོག་དང་ཡིད་དང་ལྡན་ནོ། །འཕགས་པ་ཆགས་བཅས་ཏེ་ཞེས་བྱ་བ་ལ། འཕགས་པ་སྨོས་བ་ནི་སོ་སོ་སྐྱེ་བོ་ལས་ཁྱད་པར་དུ་བྱ་བའི་ཕྱིར་ཏེ། དེ་ནི་ཟག་པ་མེད་པའི་དབང་པོ་དང་ལྡན་པ་ཡིན་ནོ། །ཆགས་བཅས་ཞེས་བྱ་བ་ནི་ཆགས་པ་དང་བྲལ་བ་ལས་ཁྱད་པར་དུ་བྱེད་པ་སྟེ་དེ་ནི་ཡིད་མི་བདེ་བ་དང་ལྡན་ནོ། །མཚན་གཅིག་དྲི་མེད་གཉིས་མ་གཏོགས། །ཞེས་བྱ་བ་ལ། མཚན་གཅིག་ནི་པོའི་དབང་པོའམ་མོའི་དབང་པོའོ། །དེ་ཅིའི་ཕྱིར་མ་གཏོགས་ཤེ་ན། མཚན་གཉིས་པ་ལ་འཕགས་པའི་ལམ་མི་སྐྱེ་བའི་ཕྱིར་རོ། །གལ་ཏེ་མཐོང་བའི་ལམ་ལ་གནས་པ་ཡིན་ན་ནི། དེའི་ཕྱིར་ཀུན་ཤེས་པའི་དབང་པོ་དང༌། ཀུན་ཤེས་བ་དང་ལྡན་པའི་དབང་པོ་མ་གཏོགས་ཏེ། དེ་གཉིས་ནི་བསྒོམ་པ་དང་མི་སློབ་པའི་ལམ་ཡིན་པའི་ཕྱིར་རོ། །འོན་ཏེ་བསྒོམ་པའི་ལམ་ལ་གནས་པ་ཡིན་ན་ནི། དེའི་ཕྱིར་ཀུན་ཤེས་བར་བྱེད་པའི་དབང་པོ་དང་ཀུན་ཤེས་པ་དང་ལྡན་པའི་དབང་པོ་མ་གཏོགས་ཏེ། དེ་དག་ནི་མཐོང་བ་དང་མི་སློབ་པའི་ལམ་ཡིན་པའི་ཕྱིར་རོ། །དབང་པོ་རྣམས་ཀྱི་རབ་ཏུ་དབྱེ་བས་ཞེས་བྱ་བ་རྒྱས་པར་
འབྱུང་ངོ༌། །ཇི་ལྟར་ཞེ་ན། ཁམས་རབ་ཏུ་དབྱེ་བའི་ཞར་ལས་འོངས་པ་ཞེས་བྱ་བ་འབྱུང་སྟེ། ཁམས་བཅོ་བརྒྱད་པོ་དེ་དག་ལས་དབང་པོ་རྣམས་ནི་དུ། དབང་པོ་མ་ཡིན་པ་རྣམས་ནི་དུ་ཞེས་པ་དེ་ལྟར་ཁམས་རབ་ཏུ་དབྱེ་བའི་ཞར་ལས་འོངས་པ་རྣམས་ཀྱི་རབ་ཏུ་དབྱེ་བ་རྒྱས་པ་བཤད་ཟིན་ཏེ། རང་གི་ངོ་བོ་དང་རྣམ་པ་རབ་ཏུ་དབྱེ་བ་བརྗོད་པའི་ཕྱིར་རོ། །ད་ནི་འདི་དཔྱད་པར་བྱ་སྟེ། ཅི་འདུས་བྱས་ཀྱི་ཆོས་འདི་དག་ཅེས་བྱ་བ་རྒྱ་ཆེར་འབྱུང་ངོ༌། །དཔྱོད་པ་འདི་ལ་དགོས་པ་ཅི་ཡོད་ཅེ་ན། ཆོས་རབ་ཏུ་རྣམ་པར་དབྱེ་བའི་དོན་དུ་ཆོས་མངོན་པ་བསྟན་ཏོ། །ཞེས་དང་པོ་ཉིད་ཁོ་ནར་བཤད་པ་མ་ཡིན་ནམ། ཡང་ན་རྒྱུ་དང་རྐྱེན་རྣམས་ཀྱི་འབྲས་བུ་གཅིག་པ་དགག་པའི་ཕྱིར་རོ། །ཞེས་སློབ་དཔོན་འདུས་བཟང་ཟེར་རོ། །ཁ་ཅིག་ནི་འདི་རྒྱུ་མ་ཡིན་པ་ལས་སྐྱེ་བར་སེམས་སོ། །འདི་རང་ལས་སྐྱེའོ་ཞེས་སོ། །ཁ་ཅིག་ནི་རྒྱུ་གཅིག་པ་ཅན་ཡིན་ནོ། །ཁ་ཅིག་ནི་རྒྱུ་མི་མཉམ་པ་ཅན་ཏེ་རང་བཞིན་ལ་སོགས་པར་རྟོགས་པ་ལས་སོ། །ཁ་ཅིག་སྔར་སྐྱེས་པ་ཙམ་གྱི་རྒྱུ་ཅན་ཞེས་ཏེ། དེའི་ཕྱིར་ཇི་ལྟར་འདི་ལྟར་ཕྱིན་ཅི་མ་ལོག་པར་སྐྱེ་བ་དེ་བཞིན་ཁོ་ནར་གཞན་དུ་དཔྱད་པར་བྱའོ། །འདི་ཡང་རྒྱུ་དང་རྐྱེན་གྱི་སྐབས་སུ་རྣམ་པར་དཔྱད་དོ། །འདིར་ནི་མ་ཡིན་ཏེ། དངོས་པོ་རྣམས་ཀྱི་ངེས་པར་ལྷན་ཅིག་སྐྱེས་པ་ཙམ་བསྟན་པའི་ཕྱིར་རོ། །ཇི་ལྟར་མཚན་ཉིད་ཐ་དད་པ་ཞེས་བྱ་བ་ནི། གཟུགས་ནི་གཟུགས་སུ་རུང་བའི་མཚན་ཉིད་ཅན་ནོ། །ཚོར་བ་ནི་མྱོང་བའི་མཚན་ཉིད་ཅན་ནོ། །ཞེས་རང་གི་མཚན་ཉིད་ཐ་དད་པས་སོ། །འདུས་མ་བྱས་རྣམས་ཀྱང་མཚན་ཉིད་ཐ་དད་མོད་ཀྱི་སྐྱེ་བ་ནི་མ་ཡིན་པས་འདིར་འདུས་མ་བྱས་མི་གཟུང་ངོ༌། །ངེས་པར་ལྷན་ཅིག་སྐྱེ་བ་ཡང་ཡོད་ཅེས་བྱ་བ་ལ་ཁ་ཅིག་ལྷན་ཅིག་སྐྱེ་བ་ཡོད་ཀྱི་ངེས་པར་ལྷན་ཅིག་སྐྱེ་བ་ནི་མ་ཡིན་ཏེ། དཔེར་ན་མིག་ལ་སོགས་པའི་རྣམ་པར་ཤེས་པ་རྣམས་དང་མིག་ལ་སོགས་པ་དག་ལྟ་བུ་སྟེ་མིག་ལ་སོགས་པ་དག་ནི་རྟེན། བ་དང་བཅས་པ་དང་དེ་དང་མཚུངས་པ་ཉིད་ཡིན་པའི་ཕྱིར་རོ། །དེའི་ཕྱིར་ངེས་པ་སྨོས་སོ། །ཆོས་འདི་དག་ཐམས་ཅད་ནི་ཞེས་བྱ་བ་ལ། རྣམ་པ་དུ་མ་ཡོད་ཀྱང་མདོར་བསྡུས་པ་བརྗོད་པར་འདོད་ན་ལྔར་འགྱུར་རོ། །ཇི་ལྟར་ཞེ་ན་ཆོས་རྣམས་ནི་རྣམ་པ་གཉིས་ཏེ། གཟུགས་ཅན་དང་གཟུགས་ཅན་མ་ཡིན་པའོ། །
དེ་ལ་གཟུགས་ཅན་མ་ཡིན་པ་རྣམས་ལ་རྣམ་པ་བཞིར་དབྱེ་བ་བྱས་ཏེ་ལྔར་འགྱུར་རོ། །ཡང་ཅིའི་ཕྱིར་རྣམ་པ་ལྔར་བསྟན་ཅེ་ན། ལོག་པར་རྟོག་པ་དགག་པའི་ཕྱིར་ཏེ། གཟུགས་ལ་སོགས་པར་རྟོགས་པ་དེ་དགག་པར་བྱ་བའི་ཕྱིར་འབྱུང་བ་དང༌། འབྱུང་བ་ལས་གྱུར་པ་ཐ་དད་པར་བཤད་དོ། །སེམས་དང་སེམས་ལས་བྱུང་བ་དོན་གཞན་མ་ཡིན་ནོ་སྙམ་པ་ལ། སེམས་དང་སེམས་བྱུང་དེས་ལྷན་ཅིག །ཅེས་འཆད་པར་འགྱུར་རོ། །ཐོབ་པ་ལ་སོགས་པ་རྣམས་ནི་ཡོད་པ་མ་ཡིན་ནོ་སྙམ་པ་ལ། མི་ལྡན་པའི་འདུ་བྱེད་རྣམས་ཞེས་འཆད་པར་འགྱུར་རོ། །འདུས་མ་བྱས་རྫས་མ་ཡིན་ནོ་སྙམ་པ་ལ། བྲལ་བ་བློ་ཡིས་ཟད་པ་ཡིན། །ཞེས་འཆད་དོ། །དེ་ལྟར་ན་བསྟན་པ་འདིས་ནི་ལོག་པར་རྟོག་པ་དེ་རྣམས་བཀག་པར་འགྱུར་ལ། རང་གི་གྲུབ་མཐའ་ཡང་གསལ་བར་བྱས་པར་འགྱུར་རོ། །དེ་ལ་འདུས་མ་བྱས་ལ་ནི་སྐྱེ་བ་མེད་པ་ཉིད་དོ་ཞེས་བྱ་བ་འབྱུང་སྟེ། དེ་ལ་ངེས་པར་ལྷན་ཅིག་སྐྱེ་བ་བསམ་པའི་སྐབས་ཡོད་པ་མ་ཡིན་ནོ། །ཆོས་གཟུགས་ཅན་རྣམས་ཀྱི་ཞེས་བྱ་བ་ལ། ཆོས་གཟུགས་ཅན་རྣམས་ནི་རྣམ་པ་གཉིས་ཏེ། དབང་པོ་མེད་པ་རྡུལ་ཕྲ་རབ་ཅེས་བྱ་བ་དང༌། རྡུལ་ཕྲ་རབ་མ་ཡིན་པ་ཞེས་བྱའོ། །རྡུལ་ཕྲ་རབ་ཅེས་བྱ་བ་ཡང་རྣམ་པ་གཉིས་ཏེ། འདོད་པ་ན་སྤྱོད་པ་རྣམས་དང༌། གཟུགས་ན་སྤྱོད་པ་རྣམས་སོ། །འདོད་པ་ན་སྤྱོད་པ་རྣམས་ཀྱང་རྣམ་པ་གཉིས་ཏེ། དབང་པོ་མེད་པ་རྣམས་དང་དབང་པོ་དང་བཅས་པ་རྣམས་སོ། །གཟུགས་ན་སྤྱོད་པ་རྣམས་ཀྱང་དེ་དང་འདྲ་བར་རྣམ་པ་གཉིས་ཁོ་ནའོ། །ངེས་པ་ནི་འདི་ཡིན་ཏེ་ཞེས་བྱ་བ་ནི་འཆད་པར་འགྱུར་བ་ཐམས་ཅད་འཕེན་པའོ། །དེ་ལ་རེ་ཞིག །འདོད་ན་དབང་པོ་མེད་པ་དང༌། །སྒྲ་མེད་ཕྲ་རབ་རྡུལ་རྫས་བརྒྱད། །ཅེས་བྱ་བ་རྒྱས་པར་འབྱུང་ངོ༌། །ཐམས་ཅད་པས་ཕྲ་བ་བསགས་པའི་གཟུགས་ནི་རྡུལ་ཕྲ་རབ་ཅེས་བྱ་སྟེ་ཞེས་བྱ་བ་ལ། རྡུལ་ཕྲ་རབ་ནི་རྣམ་པ་གཉིས་ཏེ། རྫས་ཀྱི་རྡུལ་ཕྲ་རབ་དང༌། བསགས་པའི་རྡུལ་ཕྲ་རབ་བོ། །དེ་ལ་རྫས་ཀྱི་རྡུལ་ཕྲ་རབ་ནི་ཐམས་ཅད་པས་ཕྲ་བ་ཐོགས་པ་དང་བཅས་པའི་གཟུགས་ཀྱི་ཡན་ལག་སྟེ། གང་ཞིག་གཟུགས་གཞན་ནམ། བློས་ཀྱང་རབ་ཏུ་རྣམ་པར་དབྱེ་བར་མི་ནུས་པའོ། །དེ་ཉིད་ཀྱི་ཕྱིར་དེ་ལ་
ཆ་ཤས་མེད་པས་དེ་ལ་གཟུགས་ཀྱི་མཐའ་ཞེས་བྱ་སྟེ། སྐད་ཅིག་མ་ཕྱེད་མེད་པས་སྐད་ཅིག་མ་དུས་ཀྱི་མཐའ་ཡིན་པ་བཞིན་ནོ། །འདུས་པའི་རྡུལ་ཕྲ་རབ་ནི་གང་ལས་ཆེས་ཕྲ་བའི་འདུས་པ་གཞན་མེད་པ་ཚོགས་པའི་ཡན་ལག་སྟེ། གཟུགས་གཞན་གྱིས་གཞོམ་པར་མི་ནུས་པ་གང་ཡིན་པའོ། །གལ་ཏེ་འདུས་པའི་རྫས་ཡིན་པའི་ཕྱིར་སྐྱེ་བ་མི་རིགས་པ་མ་ཡིན་ནམ་ཞེ་ན། འདུས་པ་སྐྱེའོ་ཞེས་དེ་སྐད་སྨྲ། འོ་ན་ཅི་ཞེ་ན། འདོད་པའི་ཁམས་ན་དབང་པོ་དང་སྒྲའི་རྡུལ་ཕྲ་རབ་མ་གཏོགས་པ་རྫས་བརྒྱད་ཕན་ཚུན་འབྲེལ་པ་མེད་པ་སྐྱེའོ། །འདི་སྐད་དུ་རྫས་བརྒྱད་སྐྱེའོ། །གང་ཡང་རུང་བ་ཞིག་མ་ཚང་བ་ནི་མ་ཡིན་ནོ་ཞེས་བསྟན་པར་འགྱུར་རོ། །འདི་གཞན་དག་ཀྱང་གཟུགས་ལ་སོགས་པའི་རྡུལ་ཕྲ་རབ་རྫས་སུ་མངོན་པར་འདོད་པས་རློམ་པར་བྱེད་དོ། །དེ་ནི་འདོད་པའི་ཁམས་ན་སྒྲ་དང༌། དབང་པོ་དང་བྲལ་བའི་རྫས་བརྒྱད་མ་འབྲེལ་བར་སྐྱེ་བ་ཡིན་ནོ། །འདོད་པ་སྨོས་པ་ནི་གཟུགས་ཀྱི་ཁམས་བསལ་བར་བྱ་བའི་ཕྱིར་ཏེ། དེ་ན་དྲི་དང་རོ་མེད་པས་རྣམ་པ་གཞན་དུ་ངེས་པར་སྐྱེ་བར་རྣམ་པར་གཞག་གོ །ལུས་དབང་ལྡན་ལ་ཞེས་བྱ་བ་ལ། རྡུལ་ཕྲ་རབ་དང་སྦྱར་ཏེ་འཁོར་བ་ཅན་བཞིན་ནོ། །དེ་ནི་རྫས་དགུ་ངེས་པར་ལྷན་ཅིག་སྐྱེ་སྟེ། ལུས་ཀྱི་དབང་པོ་ནི་མིག་ལ་སོགས་པ་མ་གཏོགས་པར་ཡོད་པའི་ཕྱིར་རོ། །དབང་པོ་གཞན་ལྡན་རྫས་བཅུའོ། །ཞེས་བྱ་བ་ལ། འདུས་པ་གང་ལ་མིག་ལ་སོགས་པ་གཞན་ཡོད་པ་དེ་ནི་རྫས་བཅུ་པ་ཡིན་ཏེ། མིག་ལ་སོགས་པ་རྣམས་ནི་ལུས་ཀྱི་དབང་པོ་མེད་ན་མི་འབྱུང་བའི་ཕྱིར་དང༌། ཕན་ཚུན་ཐ་དད་པར་འཇུག་པའི་ཕྱིར་རོ། །རྡུལ་ཕྲ་རབ་དེ་དག་སྒྲ་དང་བཅས་པ་ཞིག་ཏུ་ཞེས་བྱ་བ་རྒྱས་པར་འབྱུང་སྟེ། དེ་ལ་དབང་པོ་མེད་པ་ནི་དགུ་པའོ། །ལུས་ཀྱི་དབང་པོ་དང་ལྡན་པ་ནི་རྫས་བཅུ་པའོ། །དབང་པོ་གཞན་དང་ལྡན་པ་ནི་རྫས་བཅུ་གཅིག་པ་སྟེ། དེ་དག་ནི་རེས་འགའ་སྒྲ་མེད་པར་ཡང་ཡིན་ཏེ། སྒྲ་ནི་འབྱུང་བ་བརྡེག་པ་ལས་སྐྱེས་པའི་ཕྱིར་ན། གཟུགས་ལ་སོགས་པ་བཞིན་དུ་རྟག་ཏུ་མེད་པའི་ཕྱིར་རོ། །དེའི་ཕྱིར་ན་རྡུལ་ཕྲ་རབ་དེ་དག་སྒྲ་དང་བཅས་པ་ཞིག་ཏུ་སྐྱེ་ན་ནི་ཞེས་བྱ་བ་སྨོས་སོ། །དེ་ཉིད་ཀྱི་ཕྱིར་དབང་པོ་དང་ཐ་མི་དད་པའི་སྒྲ་མ་དམིགས་
པར་དོགས་པར་བྱས་པ་དེའི་ཕྱིར། དབང་པོ་དང་ཐ་མི་དད་པའི་སྒྲ་ཡང་ཡོད་དེ་ཞེས་བྱ་བ་རྒྱས་པར་སྨོས་ཏེ། ཇི་ལྟར་ན་འབྱུང་བ་རྣམས་ཐ་མི་དད་པ་ལས་འདི་ན་ཞེས་བྱ་བ་དང༌། ངེས་པར་ལྷན་ཅིག་སྐྱེ་བའི་ཕྱིར་ན་དབང་པོ་རྣམས་ནི་ཐ་མི་དད་པ་སྟེ། འོ་མ་དང་ཆུ་བཞིན་ཕན་ཚུན་རྣམ་པར་དབྱེ་བར་མི་ནུས་སོ་ཞེས་བྱ་བའི་ཐ་ཚིག་གོ །དེའི་ཕྱིར་ཇི་ལྟར་ན་ཐ་དད་པ་མེད་ན། འདུས་པ་ཁ་ཅིག་ཁོ་ན་ནི་ཞེས་བྱ་བ་རྒྱས་པར་འབྱུང་སྟེ། འདུས་པ་ཐམས་ཅད་ལ་ཐམས་ཅད་མཚུངས་པར་ཡོད་པས་ཐམས་ཅད་ཀྱི་རང་གི་ངོ་བོ་དམིགས་པར་འགྱུར་གྱི། སྲ་བ་ལ་སོགས་པ་རེ་རེར་དམིགས་པར་ནི་མི་འགྱུར་རོ་སྙམ་དུ་སེམས་ན། གང་ཞིག་གང་ན་ཆེས་གསལ་བའི། །ཞེས་བྱ་བ་སྨོས་སོ། །ཇི་ལྟར་ཞེ་ན་བཤད་པ། མཐུའི་སྒོ་ནས་ཤས་ཆེ་བ་སྟེ། ནུས་པའི་སྒོ་ནས་ཤས་ཆེ་བའི་རྫས་ཏེ། ཚད་ཀྱི་སྒོ་ནས་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ནི་དེ་ན་དམིགས་ཏེ་ཞེས་བྱ་བ་ལ། འབྱུང་བ་འདུས་པ་སྲ་བ་ནི་སའི་འབྱུང་བ་མཐུའི་སྒོ་ནས་ཤས་ཆེ་སྟེ། དེའི་ཕྱིར་དེ་ཁོ་ན་དེར་དམིགས་ཀྱི་གཞན་དག་ནི་མ་ཡིན་ཏེ་བྱ་བ་ཤས་ཆེ་བ་མ་ཡིན་པའི་ཕྱིར་རོ། །དེ་བཞིན་དུ་ལྷག་མ་རྣམས་ལ་ཡང་བརྗོད་པར་བྱའོ། །དེ་ཉིད་ལ་དཔེ་ནི་དཔེར་ན་ཁབ་དང་སྡོང་བུའི་ཚོགས་ལ་རེག་པ་ལྟ་བུ་དང་ཞེས་བྱ་བ་རྒྱས་པར་འབྱུང་སྟེ། དམིགས་པའི་རྒྱུ་ནི་ཡོད་པ་ཙམ་ཁོ་ན་མ་ཡིན་ནོ། །འོ་ན་ཅི་ཞེ་ན། གསལ་བ་ཉིད་ཀྱང་ཡིན་ཏེ། དཔེར་ན་ཁབ་དང་སྡོང་བུ་རྣམས་དང༌། ཕྱེ་དང༌། ལན་ཚྭ་དག་ཚད་མཉམ་ཡང་ཁབ་དང་སྡོང་བུའི་ཚོགས་ལ་མཐུའི་སྒོ་ནས་སྲ་བ་ཤས་ཆེ་བའི་ཕྱིར་ཁབ་ཀྱི་རེག་བྱ་ཁོ་ན་དམིགས་ཀྱི་སྡོང་བུའི་རེག་བྱ་ནི་མ་ཡིན་ནོ། །དེ་བཞིན་དུ་མཐུ་དང་ལྡན་པའི་ཕྱིར་ལན་ཚྭའི་རོ་ཁོ་ན་དམིགས་པར་འགྱུར་གྱི་ཕྱིའི་རོ་ནི་མ་ཡིན་ནོ། །གང་གི་ཕྱིར་ཟིལ་གྱིས་མནན་པས་མ་དམིགས་པ་ནི་མ་ཡིན་ཏེ། འོ་ན་ཅི་ཞེ་ན་མེད་པས་ཀྱང་ཡིན་ནོ་ཞེས་འདྲི་བ་ནི། ཡང་ཇི་ལྟར་དེ་དག་ན་ཞེས་བྱ་བ་སྟེ། སྲ་བ་དང༌། གཤེར་བ་དང༌། དྲོ་བ་ལ་སོགས་པའི་འདུས་པ་དག་ལས་འབྱུང་བ་ལྷག་མ་གསུམ་ཡོད་པ་ཉིད་དུ་རྟོགས་ཤེ་ན་ལས་ཀྱི་སྒོ་ནས་ཏེ། འབྱུང་བ་རྣམས་ཀྱི་ལས་སོ་སོར་ངེས་པར་འཛིན་པ་སྟེ། སྡུད་པ་དང༌། སྨིན་པ་དང༌། འཕེལ་བའི་
བདག་ཉིད་ཅན་ནི་འཛིན་པ་ལ་སོགས་ལས་སུ་གྲུབ་ཅེས་བྱ་བས་གོང་ཁོ་ནར་བཤད་ཟིན་ཏོ། །དེའི་ཕྱིར་གང་ན་གང་གི་ལས་དམིགས་པ་དེ་ན་དེ་ཡོད་པ་ཉིད་དོ་ཞེས་བྱ་བར་རྟོགས་ཏེ། འཛིན་པ་ལ་སོགས་པ་ལས་ནི་བྱེད་པ་པོ་ལ་མི་ལྟོས་པའམ། བྱེད་པ་པོ་གཞན་དང་ལྡན་པ་མེད་པའི་ཕྱིར་རོ། །དེ་ལ་རྡོ་བ་ལ་སོགས་པའི་འདུས་པ་སྲ་བ་ལ་ནི། སྡུད་པ་དང༌། མི་འབྱུང་བ་དང༌། འཕེལ་ཞིང་ལྷུང་བ་དག་ལས་ཆུ་དང༌། མེ་དང་རླུང་རྣམས་ཡོད་པ་ཉིད་དུ་རྟོགས་ལ། འདུས་པ་གཤེར་བ་ལ་ནི་གྲུ་ལ་སོགས་པ་རྣམས་འཛིན་པའི་ཕྱིར་དང༌། དྲོ་བའི་ཕྱིར་དང༌། གཡོ་བའི་ཕྱིར་ལྷག་མ་རྣམས་ཡོད་པ་ཉིད་དུ་རྟོགས་སོ། །མེས་འདུས་པ་དྲོ་བ་ལ་མེ་ལྕེ་རྣམས་བརྟན་པ་དང༌། བསྡུས་པ་དང༌། གཡོ་བ་ལས་ལྷག་མ་རྣམས་ཡོད་པ་ཉིད་དུ་རྟོགས་སོ། །རླུང་གིས་འདུས་པ་གཡོ་བ་ལ་འཛིན་པ་དང༌། གྲང་བ་དང༌། དྲོ་བ་དང༌། དམིགས་པ་ལས་ལྷག་མ་རྣམས་ཡོད་པ་ཉིད་དུ་རྟོགས་སོ། །རྐྱེན་དང་ཕྲད་ན་ཞེས་བྱ་བ་རྒྱས་པར་འབྱུང་སྟེ། མེ་ལ་སོགས་པའི་རྐྱེན་དང་ཕྲད་ན་ཟངས་ལ་སོགས་པ་རྣམས་གཤེར་བར་དམིགས་པའི་ཕྱིར་དེ་ལ་ཆུའི་ཁམས་ཡོད་པར་ཁོང་དུ་ཆུད་ལ། གྲང་བ་ལ་སོགས་པའི་རྐྱེན་དང་ཕྲད་པས་གཤེར་བ་ལ་སྲ་བ་ལ་སོགས་པ་མཐོང་བའི་ཕྱིར་དེ་ལ་སའི་ཁམས་ཡོད་པ་ཉིད་དུ་ངེས་སོ། །དེ་བཞིན་དུ་སྲ་བའི་ཚོགས་དྲུག་པ་ལས་དྲོ་བ་དམིགས་པའི་ཕྱིར་མེ་ཡོད་པ་ཉིད་དང༌། མངོན་པར་བརྡེགས་པ་ལས་ཡིན་ལག་བྱེར་བ་ལས་རླུང་གི་ཁམས་ཡོད་པ་ཉིད་དུ་ཤེས་སོ། །ཡོད་པ་ཉིད་ནི་རྐྱེན་གྱི་མཐུའི་སྒོ་ནས་བྱ་བ་ཤས་ཆེ་བ་ཉིད་དུ་བྱེད་ཀྱི། མེད་པ་སྐྱེ་བ་ནི་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །གཞན་དག་ན་རེ། ཆུ་དག་ལ་གྲང་བའི་ཁྱད་པར་གྱི་སྒོ་ནས་ཞེས་བྱ་བ་ནི་སློབ་དཔོན་དཔལ་ལེན་ཡིན་ཏེ། མེ་ཆུང་ཆེས་པ་དང༌། ཆེས་ཆུང་བ་དང༌། ཆུང་བ་དང་འདྲེས་པའི་ཕྱིར་ཆུ་དག་ལ་གྲང་བའི་ཁྱད་པར་ཏེ། གྲང་བ་དང༌། ཆེས་གྲང་བ་དང༌། གྲང་ཆེས་བ་ཞེས་བྱ་བ་རུང་སྟེ། གྲང་བ་ནི་དྲོ་བའི་གཉེན་པོ་ཡིན་པའི་ཕྱིར་རོ་ཞེས་ཟེར་རོ། །དངོས་པོ་རྣམས་མི་མཐུན་པའི་ཕྱོགས་དང་འདྲེས་པ་ཉིད་ལས་ཆེས་ཞན་པ་དང༌། ཞན་ཆེས་པ་ལ་སོགས་པར་ཐ་
དད་དོ་ཞེས་བྱ་བ་འདི་ནི་གཅིག་ཏུ་ངེས་པ་མ་ཡིན་ནོ་ཞེས་བསྟན་པའི་ཕྱིར་རོ། །མ་འདྲེས་ཀྱང་ཞེས་བྱ་བ་རྒྱས་པར་འབྱུང་སྟེ། ཇི་ལྟར་སྒྲ་རྫས་གཞན་དང་འདྲེས་བ་མེད་ཅིང་རང་གི་རིགས་ལས་མ་འདས་པ་གསལ་བ་དང༌། ཆེས་གསལ་བ་དང༌། གསལ་ཆེས་པ་ཡིན་པ་དང༌། དེ་བཞིན་དུ། བདེ་བ་དང༌། སྡུག་བསྔལ་ཅིག་ཅར་སྲིད་པ་མེད་མོད་ཀྱི། འོན་ཀྱང་རང་གི་རིགས་ལས་མ་འདས་པར་ཚོར་བ་ལ་ཁྱད་པར་མཐོང་བའི་ཕྱིར་ན་ཚོར་བ་བདེ་བ། ཚོར་བ་སྡུག་བསྔལ་དང་འདྲེས་པ་ལ་བལྟོས་པ་མེད་ལ། སྡུག་བསྔལ་ཚོར་བ་དང་འདྲེས་པ་ལ་སོགས་པ་ལ་བལྟོས་པ་མེད་པ་དེ་བཞིན་དུ་ཆུ་དག་ལ་ཡང་རྫས་གཞན་དང་འདྲེས་པ་མེད་ཅིང་རང་གི་རིགས་ལས་མ་འདས་པར་གྲང་བ་ཁྱད་པར་དུ་འགྱུར་རོ། །གཞན་དག་ན་རེ་དེ་དག་ལ་དེ་དག་ས་བོན་གྱི་སྒོ་ནས་ཡོད་ཀྱི་ཞེས་བྱ་བ་ལ་སོགས་པ་ལ། ས་བོན་གྱི་སྒོ་ནས་ཞེས་བྱ་བ་ནི་ནུས་པའི་སྒོ་ནས་སོ། །དེ་དག་ལ་ཞེས་བྱ་བ་ནི་སྲ་བ་ལ་སོགས་པའི་ཚོགས་པ་དག་ལའོ། །དེ་དག་ཅེས་བྱ་བ་ནི་ས་ལ་སོགས་པ་དག་གོ །རང་གི་ངོ་བོར་ནི་མ་ཡིན་ནོ་ཞེས་བྱ་བ་ནི་རྫས་སུ་ནི་མ་ཡིན་ཏེ་ཞེས་བྱ་བའི་དོན་ནོ། །ཅིའི་ཕྱིར་རང་གི་ངོ་བོ་མ་ཡིན་ཞེ་ན། དེའི་ཕྱིར་ཤིང་གི་ཕུང་པོ་འདི་ལ་ཁམས་རྣམ་པ་སྣ་ཚོགས་ཡོད་དོ་ཞེས་བྱ་བ་སྨོས་ཏེ། ས་བོན་རྣམས་ཞེས་བྱ་བར་རྟོགས་ཀྱི་གསེར་ལ་སོགས་པའི་ཁམས་རྣམས་རང་གི་ངོ་བོས་གནས་པ་ནི་མ་ཡིན་ཏེ་འགལ་བའི་ཕྱིར་རོ། །ཤིང་གི་ཕུང་པོའི་ཆ་ཤས་ཆུང་ཡང་བསམ་གཏན་པ་དུ་མའི་མོས་པ་ཐ་དད་པའི་ཕྱིར་རོ། །གལ་ཏེ་རྡུལ་ཕྲ་རབ་རྫས་བརྒྱད་པ་ངེས་པར་ལྷན་ཅིག་སྐྱེ་ན། རླུང་ལ་ཁ་དོག་ཇི་ལྟར་ཡོད་ཅེས་པའམ། ཡང་ན་གཤེར་བ་ཉིད་ལ་སོགས་པ་རྐྱེན་ཡོད་ན་སྲ་བ་ལ་སོགས་པ་རྣམས་ལ་གཤེར་བ་ཉིད་ལ་སོགས་པ་དམིགས་པའི་ཕྱིར་སྔར་ཡང་དེ་ཡོད་པ་ཉིད་དུ་སྨྲས་ན། གང་དང་འབྲེལ་པ་ལས་རླུང་ལ་ཁ་དོག་དམིགས་པར་འགྱུར་བའི་རྐྱེན་ནི་འགའ་ཡང་ཡོད་པ་མ་ཡིན་ཏེ། དེའི་ཕྱིར་རླུང་ལ་ཁ་དོག་ཇི་ལྟར་ཡོད་པ་བརྗོད་པར་བྱའོ་ཞེ་ན། དོན་འདི་ནི་དད་པར་བྱ་བ་ཡིན་གྱི་རྗེས་སུ་དཔག་པར་བྱ་བ་ནི་མ་ཡིན་ནོ་ཞེས་བྱ་བ་འབྱུང་སྟེ། ལྐོག་ཏུ་གྱུར་པའི་དོན་ལ་ནི་རྣམ་པ་གཉིས་ཀྱིས་རྟོགས་ཏེ། རྗེས་སུ་དཔག་པ་དང་
ཡིད་ཆེས་པའི་ལུང་གིས་སོ། །དེའི་ཕྱིར་འདི་ནི་བཤད་མ་ཐག་པའི་རྗེས་སུ་དཔག་པ་མི་སྲིད་ཀྱི། ཡིད་ཆེས་པའི་ཚིག་ཚད་མ་ཉིད་དུ་གྱུར་པ་ཁོ་ན་ལས་རྟོགས་པར་བྱའོ། །དོན་འདི་ནི་མཆོག་ཏུ་ཡིད་ཆེས་པ་དག་གིས་སོ་ཞེས་བྱ་བར་རྟོགས་པར་བྱའོ། །དོན་འདི་རྗེས་སུ་དཔག་པས་བསྒྲུབ་པར་བྱ་བ་ནི་མ་ཡིན་ནོ། །ཡང་ན་དད་པར་བྱ་བ་ཡིན་པ་འབའ་ཞིག་ཏུ་མ་ཟད་དེ། །འོ་ན་ཅི་ཞེ་ན། རྗེས་སུ་དཔག་པར་བྱ་བ་ཡང་ཡིན་ནོ། །འདྲེས་པར་དྲི་འཛིན་པའི་ཕྱིར་རོ་ཞེས་བྱ་བ་ལ། དྲི་དང་ལྡན་པའི་རྫས་དང་འདྲེས་པས་རླུང་གིས་དྲི་ཁྲིད་ནས་འོང་པའི་ཕྱིར་དང༌། འཛིན་པའི་ཕྱིར་དང༌། དྲི་འོངས་པ་ལས་ཀྱང་ཁ་དོག་འཁྲུལ་པ་མེད་པའི་ཕྱིར་རོ། །གཟུགས་ནི་གཟུགས་ཀྱི་ཁམས་ལ་དྲི་འཁྲུལ་གྱི་དྲི་ནི་གཟུགས་ལ་མ་ཡིན་ཏེ། དེའི་ཕྱིར་གང་ན་དྲི་ཡོད་པ་དེ་ན་གཟུགས་ཡོད་དོ་ཞེས་བྱ་བ་རྟོགས་པར་བྱའོ། །རྫས་དྲུག་དང༌། བདུན་དང། བརྒྱད་དང་ལྡན་པ་ཞེས་བྱ་བ་ལ། གཟུགས་ཀྱི་ཁམས་ན་ནི་དྲི་དང་རོ་གཉིས་མེད་དེ། དེའི་ཕྱིར་དབང་པོ་དང༌། སྒྲ་དང་བྲལ་བ་ནི་རྫས་དྲུག་དང་ལྡན་ནོ། །ལུས་ཀྱི་དབང་པོ་དང་ལྡན་པ་ནི་རྫས་བདུན་དང་ལྡན་ནོ། །དབང་པོ་གཞན་དང་ལྡན་པ་ནི་རྫས་བརྒྱད་པ་ཡིན་ནོ། །དེ་དག་སྒྲ་དང་བཅས་ན་ནི་རྫས་བདུན་དང༌། བརྒྱད་དང༌། དགུ་དང་ལྡན་ནོ། །དོན་གྱིས་བཤད་ཟིན་པ་དང་འདྲ་བ་ཉིད་ཀྱི་ཕྱིར། དེ་བཤད་ཟིན་པ་འདྲ་བའི་དངོས་པོ་ནི་བཤད་ཟིན་པ་འདྲ་བ་ཉིད་དོ། །བརྗོད་པ་དོན་མེད་པར་ཐལ་བར་འགྱུར་བའི་ཕྱིར་ཡང་མི་བཤད་དོ། །ཡང་ཅི་འདིར་ཞེས་བྱ་བ་ནི་རྡུལ་ཕྲ་རབ་རྫས་བརྒྱད་དང་ལྡན་པར་རོ། །རྫས་ཁོ་ན་རྫས་སུ་གཟུང་ཞེས་བྱ་བ་ནི་རྫས་ཀྱི་སྒྲས་ས་ལ་སོགས་པའི་རང་གི་མཚན་ཉིད་ཁོ་ན་བརྗོད་ཀྱི་སྐྱེ་མཆེད་ཀྱི་རང་གི་མཚན་ཉིད་མ་ཡིན་པའོ། །འོན་ཏེ་སྐྱེ་མཆེད་ཀྱི་ཞེས་བྱ་བ་ནི་སྐྱེ་མཆེད་ཀྱི་མཚན་ཉིད་ཡིན་གྱི་རྫས་ཀྱི་རང་གི་མཚན་ཉིད་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་རྫས་ཁོ་ན་ལ་རྫས་སུ་ཞེས་བྱ་བ་ལ། གལ་ཏེ་རྫས་ཁོ་ན་རྫས་ཀྱི་སྒྲས་གཟུང་གི་སྐྱེ་མཆེད་ཀྱི་རང་གི་མཚན་ཉིད་མ་ཡིན་ན་ནི། དེ་ལྟ་ཡིན་ན་ཧ་ཅང་ཉུང་བར་སྨྲ་བ་ཡིན་ཏེ། རྡུལ་ཕྲ་རབ་དེ་ལ་བརྒྱད་དང་དགུ་དང་བཅུ་ལས་ཐ་དད་པའི་
རྫས་གཞན་ཡང་ཡོད་པའི་ཕྱིར་ཏེ། དེ་ཡང་རྡུལ་ཕྲ་རབ་བསགས་པ་ཡིན་པའི་ཕྱིར་རོ། །བུམ་པ་དང་སྣམ་བུ་ལ་སོགས་པའི་ཁ་དོག་གི་གཟུགས་ལ་ཁ་དོག་གི་རྡུལ་ཕྲ་རབ་བསགས་པས་རྡུལ་ཕྲ་རབ་དེ་ལ་ཁ་དོག་ངེས་པར་ཡོད་པར་འགྱུར་རོ། །དེ་བཞིན་དུ་བུམ་པ་དང་སྣམ་བུ་ལ་སོགས་པ་ལ་དབྱིབས་ཀྱི་རྡུལ་ཕྲ་རབ་ཀྱང་བསགས་པས་ན་རྡུལ་ཕྲ་རབ་དེ་ལ་དབྱིབས་ཀྱང་ངེས་པར་ཡོད་པར་འགྱུར་རོ། །ལྕི་བ་ཉིད་དང་ཡང་བ་ཉིད་དག་དང༌། འཇམ་པ་ཉིད་དང༌། རྩུབ་པ་ཉིད་དག་ལས་གང་ཡང་རུང་བ་ཞིག་ཀྱང་ངེས་པར་ཡོད་དོ། །འདུས་བའི་གཟུགས་ནི་ལྕི་བ་ཉིད་དང་བྲལ་བ་འམ། འཇམ་པ་ཉིད་དང་རྩུབ་པ་ཉིད་དང་བྲལ་བ་འགའ་ཡང་མེད་དོ། །གྲང་བ་དང་བཀྲེས་པ་དང་སྐོམ་པ་དག་ནི་རྡུལ་ཕྲ་རབ་ཐམས་ཅད་ལ་མི་སྲིད་པས་ཁ་ཅིག་ལ་ནི་ཞེས་བྱ་བ་སྨོས་སོ། །དེ་བཞིན་དུ་རྫས་བརྒྱད་པ་ཉིད་དམ། རྫས་བཅུ་པའམ། རྫས་བཅུ་གཉིས་པ་ནས་རྫས་བཅུ་བཞི་པའམ་བཅོ་ལྔ་པའི་བར་དུ་ཡང་འགྱུར་རོ། །དེ་བཞིན་དུ་གཟུགས་ཀྱི་ཁམས་སུ་ཡང་རྫས་དྲུག་དང་བདུན་དང་བརྒྱད་དང་དགུའི་བར་དུ་སྲིད་པར་བྱའོ། །རྫས་ངེས་པས་ངེས་བར་ལྷན་ཅིག་སྐྱེ་བར་བརྗོད་པའི་ཕྱིར་སྐྱོན་མེད་དོ་ཞེས་སློབ་དཔོན་འདུས་བཟང་ཟེར་རོ། །འདི་སྣང་བ་ལ་སོགས་པ་རྣམས་ལ་དབྱིབས་ལ་སོགས་པ་ངེས་པ་མེད་པ་འདི་དཔྱད་པར་བྱ་བ་ལས། འདི་གཞན་དུ་ཡང་དཔྱད་ཟིན་པས་གཏམ་རྣམ་པར་འཕྲོས་པས་ཆོག་གོ །འོན་ཏེ་སྐྱེ་མཆེད་ལ་ཞེས་བྱ་བ་རྒྱས་པར་འབྱུང་སྟེ། གལ་ཏེ་སྐྱེ་མཆེད་ཀྱི་རང་གི་མཚན་ཉིད་ཀྱི་དབང་དུ་བྱས་ནས་རྫས་སུ་བརྗོད་ཀྱི། རྫས་ཀྱི་རང་གི་མཚན་ཉིད་མ་ཡིན་ནོ། །རྫས་བཞི་དང་ལྡན་པ་ཞེས་བྱ་བ་ལ། རྫས་བརྒྱད་ཀྱི་དབང་དུ་བྱས་ནས་བཤད་དོ། །ཅིའི་ཕྱིར་ཞེ་ན། དེའི་ཕྱིར་འབྱུང་བ་ལས་གྱུར་པ་འབའ་ཞིག་ཏུ་མ་ཟད་ཀྱི་འབྱུང་བ་ཇི་སྙེད་པ་དག་ཀྱང་རེག་བྱའི་སྐྱེ་མཆེད་ཡིན་ནོ་ཞེས་བྱ་བ་སྨོས་སོ། །རྟེན་དུ་གྱུར་པ་གང་ཡིན་པའོ་ཞེས་བྱ་བ་ནི་ས་ལ་སོགས་པ་སྟེ། དེ་ནི་རྒྱུར་བྱས་པའི་གཟུགས་ཀྱི་རྟེན་ཡིན་ནོ། །རྟེན་ཅན་དུ་གྱུར་པ་གང་ཡིན་པའོ་ཞེས་བྱ་བ་ནི་རྒྱུར་བྱས་པའི་གཟུགས་སོ། །དེ་ལྟར་ན་དབྱིབས་ནི་གཟུགས་ཀྱི་སྐྱེ་མཆེད་ཀྱི་ཁོངས་སུ་
འདུ་ལ། ལྕི་བ་ཉིད་ལ་སོགས་པ་རྣམས་ནི་རེག་བྱའི་སྐྱེ་མཆེད་ཀྱི་ཁོངས་སུ་འདུ་བའི་ཕྱིར་ཧ་ཅང་ཉུང་བ་དང་ཧ་ཅང་མང་བར་སྨྲས་པ་མ་ཡིན་ནོ། །གལ་ཏེ་རྟེན་དུ་གྱུར་པ་རྗེས་སུ་བཟུང་བ་དེ་ལྟ་ན་ཡང་མ་ངེས་པ་ཉིད་ལས་མི་གྲོལ་ལོ། །ཅིའི་ཕྱིར་ཞེ་ན་ཁ་དོག་སོགས་པ་རྒྱུར་བྱས་པའི་གཟུགས་རྣམས་སོ་སོར་འབྱུང་བ་བཞི་ཚན་ལ་བརྟེན་པའི་ཕྱིར་རོ། །འབྱུང་བའི་རྫས་རྣམས་ནི་མང་པོ་ཉིད་ཡིན་ལ་དེ་དག་ཀྱང་རྒྱུར་བྱས་པའི་གཟུགས་ལྟར་གདོན་མི་ཟ་བར་ཕན་ཚུན་ངེས་པར་ལྷན་ཅིག་སྐྱེ་བར་འགྱུར་རོ། །འདི་ནི་རིགས་ལ་རྫས་སུ་བཟུང་སྟེ་ཞེས་བྱ་བ་ནི་ས་ལ་སོགས་པའི་རིགས་སོ། །དེ་ཉིད་ཀྱི་རྒྱུ་བཤད་པ་འབྱུང་བ་བཞི་ཚན་དག་ཀྱང་ས་ལ་སོགས་པའི་རིགས་ལས་མི་འདའ་བའི་ཕྱིར་རོ། །མིག་ལ་སོགས་པ་རེ་རེའི་རྟེན་འབྱུང་བ་བཞི་ཚན་གང་དག་ཡིན་པ་དེ་དག་ནི་ཕན་ཚུན་འབྱུང་བ་བཞི་ཚན་གྱི་རིགས་ལས་མི་འདའ་སྟེ། དེའི་ཕྱིར་འབྱུང་བ་ཆེན་པོ་བཞི་ཞེས་འབྱུང་བའི་བཞི་ཚན་གཅིག་ཉིད་དུ་བཤད་དོ། །དེ་ལྟར་འབད་དེ་ཞེས་བྱ་བ་རྒྱས་པར་འབྱུང་སྟེ། འདིར་ཅུང་ཟད་ཅིག་ནི་རྫས་ཁོ་ན་རྫས་ཡིན་ཞིང༌། ཅུང་ཟད་ཅིག་ནི་སྐྱེ་མཆེད་ཀྱི་རྫས་ཡིན་ཞིང༌། སླར་ཡང་རིགས་ཀྱི་རྫས་ཡིན་ནོ་ཞེས་དེ་ལྟར་བྱེ་བྲག་ཏུ་བསྟན་པར་བྱ་བའི་ཕྱིར་འབྱུང་བ་འདི་ལ་དོན་ཅི་ཡོད། བདུན་པའི་སྒོ་ནས་ཞེས་བྱ་བའི་དོན་ཏོ། །མདོར་བསྡུས་པ་དང་རྒྱས་པའི་རྫས་སུ་བྱེད་པའི་ཕྱིར་རོ། །དོན་ལ་བརྟག་པར་བྱའོ་ཞེས་བྱ་བ་ནི་ཅི་རྫས་འདི་དག་ངེས་པར་ལྷན་ཅིག་སྐྱེ་བ་ཡིན་ནམ་མ་ཡིན་ཞེས་བྱ་བའི་བར་རོ། །སློབ་དཔོན་འདུས་བཟང་ན་རེ། སྐྱེ་མཆེད་ངེས་པ་ལ་ཡང་འབྱུང་བའི་རིགས་ནི་འབྱུང་བར་བརྗོད་ལ། དེ་ཡང་དམིགས་ཀྱིས་བསལ་བ་དུ་མའི་ངེས་པའི་དོན་ཏོ་ཞེས་ཟེར་རོ། །གང་ཞིག་འབྱུང་བ་དང་འབྱུང་བ་ལས་གྱུར་པ་གཞན་མ་ཡིན་པའི་དམིགས་ཀྱིས་བསལ་བ་སྟེ། རེག་བྱ་རྒྱུར་བྱས་པའི་གཟུགས་མེད་པ་དམིགས་ཀྱིས་བསལ་བ་འདུས་པ་ཐམས་ཅད་ལ་ཐམས་ཅད་ཡོད་པ་མ་ཡིན་པའི་དམིགས་ཀྱིས་བསལ་བ་དང་གྲངས་ངེས་པའི་དམིགས་ཀྱིས་བསལ་བ་སོ་སོ་སྐྱེ་བོའི་རིགས་བརྗོད་པས་ནི་སེལ་བ་ཡིན་ནོ་རས་སྟོ་བྷ་བ་ཏི། འབྱུང་བ་ལས་གྱུར་པ་སོ་སོར་ངེས་པའི་འབྲས་བུ་ཉིད་
ཡིན་པའི་ཕྱིར་འབྱུང་བའི་རྫས་མང་པོ་ཉིད་དུ་ཐལ་བ་ཡོད་པ་མ་ཡིན་ཏེ་རིགས་ངེས་པའི་ཕྱིར་རོ། །གལ་ཏེ་འདི་ཐམས་ཅད་འབྱུང་བ་བཞི་ཚན་ལ་བརྟེན་པར་འགྱུར་ན་ཅིས་གནོད། རིགས་ཐ་དད་པ་དང་འགལ་བའི་འབྱུང་བ་རྒྱུར་བྱས་པའི་གཟུགས་བཞིན་ཞེས་བྱ་བ་རྒོལ་བའི་གཞིའོ་ཞེ་ན་བདེན་ཏེ། རྒྱུའི་ཁྱད་པར་ལས་འབྲས་བུའི་ཁྱད་པར་དང་འགལ་བ་རུང་བ་མ་ཡིན་ཏེ། གཅིག་དང་དུ་མའི་ནུས་པ་ཡོད་པ་མ་ཡིན་པ་དེའི་ཕྱིར་རྒྱུར་བྱས་པའི་གཟུགས་ཀྱི་དབྱེ་བ་བཞིན་ནོ། །དེའི་ཉེ་བར་ལེན་པའི་བྱེ་བྲག་ལས་ཞེས་བྱ་བ་འདིར་ཡང་རིགས་ལ་རྗེས་སུ་གཟུང་ཞེས་སྨོས་སོ། །ཐོགས་པ་དང་བཅས་པ་རྒྱུར་བྱས་པའི་གཟུགས་ཕན་ཚུན་ལྷན་ཅིག་འབྱུང་པའི་རྒྱུ་ཅིར་འགྱུར་ཞེ་ན། སེམས་ཀྱི་རྗེས་སུ་འབྲང་བའི་གཟུགས་བཞིན་ནོ། །འབྲས་བུ་དུ་མ་རྣམ་པར་སྨིན་པ་དང་རྒྱུ་མཐུན་པ་དང་ལྷན་ཅིག་འབྱུང་བའི་རྒྱུར་འགྱུར་བ་ཅི་ཞིག །མ་ངེས་པར་འགྱུར་བ་ཅི་ཞིག་ཅེ་ན། གཟུགས་ཅན་རྣམས་ཀྱི་ངེས་པར་ལྷན་ཅིག་སྐྱེ་བ་བཤད་ཟིན་ཏོ། །འདོད་ན་དབང་པོ་མེད་པ་དང༌། །སྒྲ་མེད་ཕྲ་རབ་རྡུལ་རྫས་བརྒྱད། །ཅེས་བྱ་བ་ལ་སོགས་པ་ལྷག་མ་རྣམས་ཀྱིས་བརྗོད་པར་བྱའོ་ཞེས་བྱ་བ་ནི། སེམས་དང་སེམས་ལས་བྱུང་བ་དང་ལྡན་པ་མ་ཡིན་པ་རྣམས་ཀྱིའོ། །སེམས་དང་སེམས་འབྱུང་ངེས་ལྷན་ཅིག །ཅེས་བྱ་བ་ལ། སེམས་ཐམས་ཅད་སེམས་ལས་བྱུང་བ་ཐམས་ཅད་དམ། སེམས་ལས་བྱུང་བ་ཐམས་ཅད་སེམས་ཐམས་ཅད་དང་ངེས་པར་ལྷན་ཅིག་སྐྱེ་བ་ནི་མ་ཡིན་ཏེ། འོ་ན་ཅི་ཞེ་ན། སེམས་དང་སེམས་ལས་བྱུང་བ་རྣམས་ཕན་ཚུན་བྲལ་བ་སྐྱེ་བ་མ་ཡིན་ནོ་ཞེས་བྱ་བར་ངེས་པར་གཟུང་བར་བྱའོ། །དེ་ཉིད་ཀྱི་ཕྱིར་འདི་དག་ནི་ཞེས་བྱ་བ་རྒྱས་པར་སྨོས་ཏེ། ཕན་ཚུན་རག་ལས་ཏེ་ལུས་རྙེད་པའི་ཕྱིར་ཕན་ཚུན་མེད་ན་འབྱུང་བར་མི་ནུས་སོ། །ཐམས་ཅད་འདུས་བྱས་མཚན་ཉིད་དང། །ཞེས་བྱ་བ་ལ། གཟུགས་དང་སེམས་དང་སེམས་ལས་བྱུང་བ་དང་ལྡན་པའི་འདུ་བྱེད་དག་ཡིན་གྱི་འདུས་མ་བྱས་ནི་མ་ཡིན་ཏེ་སྐྱེ་བའི་དབང་དུ་བྱས་པའི་ཕྱིར་རོ། །དེ་ཉིད་ཀྱི་ཕྱིར་གང་ཅུང་ཟད་སྐྱེ་བ་ཞེས་སྨོས་སོ། །ཐོབ་བའམ་ཞེས་བྱ་བ་ལ། ཐོབ་པ་ནི་རང་གི་
རྒྱུད་དུ་གཏོགས་པ་རྣམས་ཀྱིའོ་ཞེས་བྱ་སྟེ། སེམས་ཅན་དུ་སྟོན་པ་ཁོ་ན་ཐོབ་པ་དང་ལྷན་ཅིག་གདོན་མི་ཟ་བར་སྐྱེའོ། །སེམས་ཅན་དུ་མི་སྟོན་པ་ནི་མ་ཡིན་ནོ། །དེ་ཉིད་ཀྱི་ཕྱིར་རྣམ་པར་བརྟག་པའི་དོན་དུའམ་ཞེས་བྱ་བའི་སྒྲ་སྨོས་ཏེ། ཅུང་ཟད་ཅིག་ནི་ཐོབ་པ་དང་ལྷན་ཅིག་སྐྱེ་ལ། ཅུང་ཟད་ཅིག་མེ་སྐྱེའོ་ཞེས་བསྟན་པར་བྱ་བའི་ཕྱིར་རོ། །བཤད་མ་ཐག་པའི་འདུས་བྱས་རྣམ་པ་བཞི་ལས་གཟུགས་ནི་ཕུང་པོ་བསྟན་པར་རྣམ་པར་ཕྱེ་ཟིན་ཏོ། །སེམས་ནི་ཁམས་བསྟན་པར་རོ། །སེམས་ལས་བྱུང་བ་རྣམས་དང་ལྡན་པ་མ་ཡིན་པ་རྣམས་རྣམ་པར་དབྱེ་བ་མ་བྱས་ཏེ། དེའི་ཕྱིར་སེམས་ལས་བྱུང་བའི་རྣམ་པར་དབྱེ་བ་བསྟན་པའི་ཕྱིར། སེམས་བྱུང་རྣམ་ལྔ་སྟེ་ཞེས་བྱ་བ་སྨོས་སོ། །ས་ཞེས་བྱ་བ་ནི་གོ་སྐབས་ཀྱི་ཡུལ་ཏེ་ཞེས་བྱ་བའོ། །གོ་སྐབས་ཞེས་བྱ་བ་ནི་གོའམ་སྐྱེ་བའོ། །གང་ཞིག་གང་གི་གོ་སྐབས་ཀྱི་ཡུལ་ཡིན་པ་ཞེས་བྱ་བ་ལ། གང་དུ་གང་གི་གོ་མི་འཇུག་པ་དེ་ནི་གོ་སྐབས་ཀྱི་ཡུལ་ཏེ། དེ་ཉིད་ལ་འཇིག་རྟེན་ནས་ཞེས་བྱའོ། །དེ་ལ་འདི་དག་ལ་ས་མང་པོ་ཡོད་པས་ན་ས་མང་པོ་པ་རྣམས་ཏེ། གང་དག་རྣམ་པ་ཐམས་ཅད་དུ་སེམས་ཐམས་ཅད་དང་ལྷན་ཅིག་སྐྱེ་བའོ། །དེ་ཉིད་ཀྱི་ཕྱིར་སེམས་ནི་ས་ཆེན་པོ་པ་མ་ཡིན་ཏེ། སེམས་གཞན་དང་ལྷན་ཅིག་མི་འབྱུང་བའི་ཕྱིར་རོ། །གོ་སྐབས་ཀྱི་ཡུལ་ནི་གོ་སྐབས་ཀྱི་ཡུལ་ལོ་ཞེས་བྱ་བ་ནི་དམིགས་པ་དང་རྣམ་པས་སེམས་དང་མངོན་པར་འབྲེལ་ལོ། །རྣམ་པ་ཐམས་ཅད་དུ་ཉོན་མོངས་པའི་ས་ཆེན་པོ་པ་ལ་སོགས་པ་རྣམས་ལ་སྡུག་བསྔལ་འབྲེལ་ལོ་ཞེས་པའི་ཚིག་གིས་འཕངས་པས་འདིར་དོགས་པ་སྐྱེའོ། །རྟེན་གྱི་ཡུལ་ཉིད་ཀྱིས་འཆད་པར་འདོད་པ་ཉིད་ཀྱི་ཕྱིར་འདི་ལས་ས་གང་ཡིན་པ་དེ་དག་དེའི་རྟེན་ཉིད་དུ་བརྗོད་དོ། །ས་ཆེན་པོ་པ་ནི་རྟེན་ཉིད་དུ་ཡོངས་སུ་བཅད་པས་ཡུལ་ཆེན་པོ་ཞེས་བྱ་སྟེ། སེམས་ཐམས་ཅད་ལ་འབྱུང་བ་དེའི་ཕྱིར་འདི་ལེགས་པར་འབྲེལ་ལོ། །ཆོས་བཅུ་པོ་འདི་དག་ནི་ཞེས་བྱ་བ་བྱས་པར་འབྱུང་བ་ལ། གྲག་གོ་ཞེས་བྱ་བའི་སྒྲ་ནི་ཡིད་ལ་བྱེད་པ་དང་བཏང་སྙོམས་མི་རྩོལ་བ་གཉིས་སེམས་གྱི་སྐད་ཅིག་གཅིག་ལ་འགལ་བས་མི་འདོད་པར་བསྟན་པར་བྱ་བའི་ཕྱིར་རོ། །
ཚོར་བ་མྱོང་བ་ཞེས་བྱ་བ་ལ། སྔར་ཚོར་བའི་རང་གི་ངོ་བོ་བཤད་ནས་ད་ནི་རབ་ཏུ་དབྱེ་བ་ཙམ་ཞིག་སྟོན་པ་ནི་མྱོང་བ་རྣམས་པ་གསུམ་སྟེ། དབང་པོ་རྣམ་པར་གཞག་པར་ལུས་ཀྱི་དང་སེམས་ཀྱི་དབྱེ་བ་རྣམ་པར་བཤད་པ་གང་ཡིན་པ་དེ་ནི་མྱོང་བ་རྣམ་པ་གསུམ་པ་ལས་མི་འདའོ་ཞེས་བསྟན་པའི་ཕྱིར་ཡང་མྱོང་བ་རྣམ་པ་གསུམ་སྟེ་ཞེས་བཤད་དོ། །དེ་ལ་བདེ་པ་དང་སྡུག་བསྔལ་བ་དང་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཉམས་སུ་མྱོང་བ་ནི་གོ་རིམས་བཞིན་དུ་ལུས་ལ་ཕན་འདོགས་པ་དང་གནོད་པ་དང་སྙོམས་པར་བྱེད་པ་འདོད་པ་དང་མི་འདོད་པ་དང་གཉིས་ཀ་ལས་བཟློག་པའི་རེག་པས་བསྐྱེད་པ་ཡིན་པར་རིག་པར་བྱའོ། །སེམས་པ་ནི་སེམས་མངོན་པར་འདུ་བྱེད་པའོ་ཞེས་བྱ་བ་ལ། སེམས་པ་ནི་ཡིད་གཡོ་བ་དགེ་བ་དང་མི་དགེ་བ་དང་ལུང་དུ་མ་བསྟན་པ་དམན་པ་དང་བར་མ་དང་གྱ་ནོམ་པ་སེམས་གཡོ་བ་དང་རབ་ཏུ་གཡོ་བ་སྟེ། གང་ཞིག་ཡོད་ན་ཁབ་ལོང་གི་དབང་གིས་ལྕགས་གཡོ་བ་ལྟར་སེམས་དམིགས་པ་ལ་གཡོ་བར་འགྱུར་བ་སྟེ། སྐད་ཅིག་གཞན་དུ་མི་གནས་ཤིང༌། །བྱེད་མེད་ཡིད་ཀྱང་གང་གིས་ན། །བྱེད་དང་བཅས་པར་སྣང་གྱུར་པ། །སེམས་པ་དེ་ནི་ཡིད་ཀྱི་ལས། །ཞེས་སོ། །ཡུལ་ལ་མཚན་མར་འཛིན་པའོ་ཞེས་བྱ་བ་ལ། མཚན་མ་ནི་ཡུལ་གྱི་བྱེ་བྲག་སྟེ། སྐྱེས་པ་དང་བུད་མེད་ལ་སོགས་པའི་དམིགས་པ་རྣམ་པར་འཇོག་པའི་རྒྱུ་ཞེས་བྱ་བའི་དོན་ཏོ། །མིག་གི་རྣམ་པར་ཤེས་པ་ལ་སོགས་པ་དང་མཚུངས་པར་ལྡན་པའི་འདུ་བྱེད་ནི་མཚན་མར་འཛིན་པའི་བདག་ཉིད་ཅན་ཏེ་ཁྱད་པར་གྱི་མཚན་ཉིད་ཀྱི་ཕྱིར་རོ། །དེ་ཡང་མཚན་མར་འཛིན་པའི་དོན་གྱི་མཚན་ཉིད་ཅན་ཡིན་གྱི་ཡོངས་སུ་གཅོད་པར་བྱེད་པ་ནི་མ་ཡིན་ཏེ་ཞན་པའི་ཕྱིར་རོ། །འདུན་པ་ནི་བྱེད་འདོད་པའོ་ཞེས་བྱ་བ་ནི་དམིགས་པ་འཛིན་པར་མངོན་པར་འདོད་ཅེས་བྱ་བའི་དོན་ཏོ། །སེམས་དང་སེམས་ལས་བྱུང་བ་ཐམས་ཅད་ནི་མངོན་པར་འདོད་པ་སྔོན་དུ་འགྲོ་བ་ཅན་ཏེ། དེ་ཉིད་ཀྱི་ཕྱིར་ཆོས་ཐམས་ཅད་ནི་འདུན་པའི་རྩ་བ་ཅན་དུ་བརྗོད་དོ། །གལ་ཏེ་འདུན་པ་མངོན་པར་འདོད་པའི་བདག་ཉིད་ཅན་ཡིན་ན་འདུན་པ་
དང་སྲེད་པ་གཉིས་ལ་ཁྱད་པར་ཅི་ཡོད་ཅེ་ན། སྲེད་པ་ནི་མངོན་པར་ཞེན་པའི་མཚན་ཉིད་ཅན་ཡིན་ལ། འདུན་པ་ནི་མངོན་པར་འདོད་པའི་མཚན་ཉིད་ཅན་ཡིན་པས་ཁྱད་པར་ཡོད་དོ། །རེག་པ་ནི་ཞེས་བྱ་བ་རྒྱས་པར་འབྱུང་བ་ལ། དབང་པོ་དང་ཡུལ་དང་རྣམ་པར་ཤེས་པ་རྒྱུ་དང་འབྲས་བུར་གྱུར་པ་དག་ཕན་ཚུན་རེག་པ་དང་འདྲ་བ་གནས་སྐབས་དེ་དང་ལྡན་པ་དག་ལས་སེམས་ལས་བྱུང་བའི་ཆོས་གཞན་དུ་གྱུར་པ་ཚོར་བ་ཐམས་ཅད་ཀྱི་རྒྱུ་རེག་པ་ཞེས་བྱ་བ་ཞིག་སྐྱེ་བ་དེ་ལ་རེག་པ་ཞེས་བརྗོད་དོ། །ཤེས་རབ་ནི་ཆོས་རབ་ཏུ་རྣམ་པར་འབྱེད་པའོ་ཞེས་བྱ་བ་ལ། རབ་ཏུ་རྣམ་པར་འབྱེད་པར་བྱེད་པས་ན་རབ་ཏུ་རྣམ་པར་འབྱེད་པ་སྟེ། གང་གིས་ཡང་དག་པ་དང་ལོག་པ་ཉིད་དང་རང་དང་སྤྱིའི་མཚན་ཉིད་འདྲེས་པའི་ཆོས་རྣམས་ལ་རྣམ་པར་འབྱེད་བར་བྱེད་ཅིང་རྟོག་པ་སྟེ་འདི་དག་ནི་ཟག་པ་དང་བཅས་པ་རྣམས་སོ། །འདི་དག་ནི་ཟག་པ་མེད་པ་རྣམས་སོ། །འདི་དག་ནི་གཟུགས་ཅན་རྣམས་སོ། །འདི་དག་ནི་གཟུགས་ཅན་མ་ཡིན་པ་རྣམས་སོ་ཞེས་བྱ་བ་ལྟ་བུའོ། །དྲན་པ་ནི་དམིགས་པ་མི་བརྗེད་པའོ་ཞེས་བྱ་བ་ནི། རང་གི་དམིགས་པ་འཛིན་པ་ཆུད་མི་ཟ་བའི་རྒྱུ་ཅན་ནོ་ཞེས་བྱ་བའི་ཐ་ཚིག་གོ །ཏིང་ངེ་འཛིན་དང་དྲན་པ་དག་ལ་ཁྱད་པར་ཅི་ཡོད་ཅེ་ན། ཏིང་ངེ་འཛིན་ནི་སེམས་ལས་བྱུང་བ་རྣམས་དམིགས་པ་ལ་རྩེ་གཅིག་པ་ཡིན་ལ། དྲན་པ་ནི་དམིགས་པ་ལས་ཡོངས་སུ་ཉམས་ཀྱང་སླར་དམིགས་པ་ལ་སེམས་འགུགས་པར་བྱེད་པའོ། །ཡིད་ལ་བྱེད་པ་ནི་སེམས་ཀྱི་འཇུག་པའོ་ཞེས་བྱ་བ་ནི། དམིགས་པ་ལ་སེམས་འཇུག་པར་བྱེད་པའི་ལས་ཅན་མཐུན་པར་སེམས་པ་སེམས་ལས་བྱུང་བའི་ཆོས་ནི་ཡིད་ལ་བྱེད་པ་སྟེ། གང་ཞིག་ལ་འཇིག་རྟེན་པ་རྣམས་སེམས་གཏོད་པ་ཞེས་སྨྲ་བའོ། །ཡིད་ལ་བྱེད་པས་ན་ཡིད་ལ་བྱེད་པ་སྟེ། བྱེད་པ་ནི་དོན་དུ་མ་ཅན་ཡིན་པས་སེམས་མཚུངས་པར་ལྡན་པ་དང་བཅས་པ་དམིགས་པ་ལ་འཇུག་པར་བྱེད་དོ་ཞེས་བྱ་བའི་དོན་གང་ཡིན་པ་སྟེ། དེ་ནི་ལག་པའི་རིལ་བ་བྷྲིཾ་གཱ་ར་ལྟར་འཇུག་ཅིང་སེམས་དམིགས་པ་ལ་འཇུག་པར་བྱེད་པའོ། །མོས་པ་ནི་འདོད་པའོ་ཞེས་བྱ་བ་ནི། འདི་ནི་འདི་ལྟར་ཡིན་ན་སྙམ་
པ་སྟེ་འདོད་པའོ་ཞེས་བྱ་བའི་དོན་ཏོ། །གཞན་དག་ན་རེ་ངེས་པར་གྱུར་པ་མི་འདོར་བའི་ལས་ཅན་ཡིན་པའི་ཕྱིར་ངེས་པར་འཛིན་པའོ་ཞེས་ཟེར་རོ། །གཞན་དག་ན་རེ་མོས་པ་ནི་དམིགས་པ་ལ་འཇུག་པ་ལ་གེགས་མེད་པའི་སེམས་ལས་བྱུང་བ་སྟེ། ལྷག་པའི་ཚུལ་ཁྲིམས་བཞིན་ནོ་ཞེས་ཟེར་རོ། །ཏིང་ངེ་འཛིན་ནི་སེམས་རྩེ་གཅིག་པ་ཉིད་དོ་ཞེས་བྱ་བ་ལ། རྩེ་ནི་དམིགས་པ་དང་ཡུལ་ཞེས་བྱ་བའི་དོན་ཏོ། །གང་ཡོད་ན་སེམས་དང་སེམས་ལས་བྱུང་བ་རྣམས་དམིགས་པ་ལ་རྩེ་གཅིག་ཏུ་འཇུག་པའི་ཆོས་དེ་ནི་ཏིང་ངེ་འཛིན་ཞེས་བྱ་སྟེ། རྣམ་པར་མ་སྤྲོས་པའི་ཚུལ་གྱིས་ཡུལ་འཛིན་པ་ལ་མི་གཡེང་བའི་རྒྱུ་ཞེས་བྱ་བའི་ཐ་ཚིག་གོ །སློབ་དཔོན་དཔལ་ལེན་ན་རེ། ས་མང་པོ་པ་རྣམས་མེད་ཀྱི། གལ་ཏེ་བརྟག་ན་ནི་གསུམ་ཁོ་ན་ཞིག་སྟེ། ཚོར་བ་དང་འདུ་ཤེས་དང་སེམས་པ་དག་ནི་ལྷན་ཅིག་སྐྱེའི་ཞེས་མདོ་ལས་འབྱུང་བའི་ཕྱིར་རོ་ཞེས་ཟེར་རོ། །དེ་ནི་མ་ཡིན་ཏེ། རེག་པས་མང་པོ་ཉིད་ཡིན་པ་དགག་ནུས་པ་མ་ཡིན་རེག་པ་ལ་དེར་མངོན་པར་བརྗོད་པའི་ཕྱིར་དང༌། གསུམ་འདུས་པ་ལས་རེག་པ་ཞེས་བྱ་བ་མིག་དང་གཟུགས་དང་རྣམ་པར་ཤེས་པ་ལས་ཐ་དད་པའི་རེག་པ་ནི་མེད་དོ། །གང་ཆོས་འདི་གསུམ་འདུས་ཤིང་ཚོགས་པ་དེ་རེག་པ་ཞེས་གསུངས་པའི་ཕྱིར་རོ། །ཅིའི་ཕྱིར་ཞེ་ན། རྒྱུ་ལ་འབྲས་བུ་ཉེ་བར་བཏགས་ཏེ་གསུངས་པའི་ཕྱིར་རོ། །རེག་པའི་རྐྱེན་ཉིད་ཉེ་བར་བསྟན་པས་སྐྱེ་མཆེད་དྲུག་གི་རྐྱེན་ཉིད་ཉེ་བར་བསྟན་ཏེ། ཚིགས་སུ་བཅད་པ་ལས་ཀྱང་རྐྱེན་གཉིས་བཤད་དོ། །འདི་དག་ཕན་ཚུན་རྟེན་མ་ཡིན་ཏེ། གང་གི་ཕྱིར་རེག་པ་དང་རེག་པའི་རྐྱེན་ཡང་བརྟག་པར་བྱའོ། །མིག་དང་གཟུགས་ཀྱི་རྐྱེན་ཉིད་མིག་གི་རྣམ་པར་ཤེས་པ་མ་ཡིན་ལ། རྐྱེན་མིག་དང་གཟུགས་ཕན་ཚུན་རྐྱེན་མ་ཡིན་ནོ། །འདི་དག་རེག་པའི་རྐྱེན་དུ་བཤད་པ་དེར་རྟོགས་པ་ནི་འདོད་པ་གཞན་དུ་འགྱུར་བ་ཉིད་དེ་མིག་ལ་སོགས་པ་རྣམས་ལས་རེག་པ་ཞེས་བྱ་བ་རྟེན་དང་དམིགས་པའི་ངོ་བོ་སྟེ། གང་གི་ཕྱིར་དེ་ནི་མིག་དང་གཟུགས་ཀྱི་རྐྱེན་ནོ། །འབྲས་བུ་གཅིག་དང་བྲལ་བའི་རྐྱེན་གྱི་ངོ་བོས་རྣམ་པར་ཤེས་
པའོ། །དེའི་ཕྱིར་དེ་ཉིད་རེག་པ་ཞེས་བརྗོད་དོ། །སྐྱེ་མཆེད་དྲུག་གི་རྐྱེན་དང་རེག་པ་བཤད་ཟིན་ཏོ། །དངོས་པོའི་རྐྱེན་གྱིས་དངོས་པོ་གཞན་ཉེ་བར་བསྟན་ཏེ། མདོ་ལས་ཚོར་བའི་རྐྱེན་གྱིས་སྲེད་པ་ཞེས་སོ། །དེ་ལ་དངོས་པོ་གཞན་ཁོ་ན་མིག་ལ་སོགས་པ་རྣམས་དང་རེག་གི་ཚོར་བ་ལ་སོགས་པ་རྣམས་མིག་ལ་སོགས་པ་རྣམས་དང་ནི་མ་ཡིན་ནོ། །རང་བཞིན་ཐ་དད་པ་ངེས་པར་གཟུང་བའི་ཕྱིར་དངོས་པོ་གཞན་དང་རེག་གོ་ཞེས་སེམས་ན། བྱ་བའི་སྒོ་ནས་མ་ཡིན་ཏེ་མིག་ལ་སོགས་པ་བཞིན་དེ་ཡོད་པ་ཉིད་ངེས་པར་གཟུང་བའི་ཕྱིར་གསུང་རབ་འགར་ཡང་རབ་ཏུ་གྲགས་པ་མེད་དོ། །བྱ་བ་བསྟན་པ་རྣམ་པར་ཤེས་པ་ལ་སོགས་པ་བཞིན་ཡིན་ན། འདི་རྣམས་རེག་པའི་རྐྱེན་མ་ཡིན་ཏེ་རྣམ་པར་ཤེས་པའི་བྱ་བ་བསྟན་ཅིང༌། དངོས་པོ་དང་ཡུལ་གྱི་འབྲས་བུ་དང་རྒྱུའི་དངོས་པོ་སྐྱེ་བ་རྣམས་ལ་རེག་པ་བསྟན་པ་མ་ཡིན་ནོ། །རྟེན་ཅིང་འབྲེལ་པར་འབྱུང་བ་ཞེས་བྱ་བ་ནི་རིགས་ཐ་དད་པ་རྣམས་ལ་རྐྱེན་ནོ་ཞེས་རྐྱེན་དུ་གྱུར་པ་བསྟན་པས་མཐོང་བའི་ཕྱིར་འདི་ལས་ཀྱང་འདུས་པ་མ་ཡིན་ན་དེར་རེག་པ་སེམས་ལས་བྱུང་བ་ཉིད་དུ་བསྟན་པའི་ཕྱིར་ཚོར་བ་ལ་སོགས་པ་བཞིན་དུ་བཅོམ་ལྡན་འདས་ཀྱིས་གསུངས་སོ། །མིག་དང་གཟུགས་གཉིས་ལ་བརྟེན་ནས་སྐྱེ་བའི་སེམས་ལས་བྱུང་བའི་ཆོས་རྣམས་རྣམ་པར་ཤེས་པ་རེག་པ་དང་ལྷན་ཅིག་སྐྱེ་བའི་ཚོར་བ་དང་འདུ་བྱེད་དུ་རྟོགས་པའི་རྒྱུ་ཅན་ཞེས་བྱའོ། །རྣམ་པར་ཤེས་པ་བཞིན་ཟས་ཉིད་དུ་ཡང་བསྟན་པས་ཀྱང་ངོ༌། གང་ཡང་ཟས་ལ་བསམས་ཏེ་གསུམ་འདུས་པ་ལས་རེག་པར་མངོན་པར་འདོད་ན། འོ་ན་རེག་པ་ཁོ་ན་འདིར་རེག་པ་ཞེས་བྱ་ན། འདི་ཡང་མི་རིགས་ཏེ། རེག་པ་ནི་ལུས་ཀྱི་རྣམ་པ་ཉིད་དུ་གཏོགས་པའི་ཕྱིར་ཟས་ནི་གསུམ་ཁོ་ནར་ཐལ་བར་འགྱུར་རོ། །རེག་པ་ཟས་སུ་བཤད་པ་ལ་ཡང་སྤོང་བ་དང་ཡོངས་སུ་ཤེས་པ་དང་ཚོར་བ་གསུམ་སྤོང་བར་འགྱུར་རོ། །སྲིད་པའི་རྩེ་མོ་ལ་འདོད་ཆགས་དང་བྲལ་བས་ནི་མ་ལུས་པ་སྤངས་བའི་ཕྱིར་རེག་བྱ་མ་ཡིན་པ་ཆགས་པ་དང་བྲལ་བས་རེག་པའི་རྐྱེན་གྱིས་ཚོར་བ་བཤད་པ་ནི་རྟེན་ཅིང་འབྲེལ་པར་འབྱུང་བའི་རིམ་པའོ། །
དེ་སྤང་པ་ཉིད་ཀྱིས་ཚོར་བ་སྤངས་པར་རིགས་སོ། །རེག་བྱ་སྤངས་པ་མ་ཡིན་པ་དེའི་ཕྱིར་སེམས་ཀྱི་དངོས་པོ་ཐམས་ཅད་དང་ལྷན་ཅིག་ཏུ་ཡོད་པའི་སེམས་ལས་བྱུང་བའི་ཆོས་གཞན་རེག་པ་ཞེས་རབ་ཏུ་གྲུབ་བོ། །དེའི་ཕྱིར་ས་མང་པོ་པ་གསུམ་ཁོ་ན་མ་ཡིན་ཞེས་བྱའོ། །ཅི་སྟེ་བཞི་པོ་རྣམས་ལས་གཞན་པའི་ས་མང་པོ་པ་ཡོད་པ་ཉིད་དུ་ཇི་ལྟར་རྟོགས་ཤེ་ན་དེ་དང་དེར་གསུངས་པ་ཉིད་ཀྱི་ཕྱིར་དང་སེམས་སྐྱེ་བ་ཐམས་ཅད་ལ་ཡོད་པ་ཉིད་དང་བྱ་བའི་ཆ་ཤས་ཀྱང་མཐོང་བའི་ཕྱིར་རོ། །བཅོམ་ལྡན་འདས་ཀྱིས་ཆོས་ཐམས་ཅད་ནི་འདུན་པའི་རྩ་བ་ཅན་ཡིད་ལ་བྱེད་པ་ལས་བྱུང་བ་རེག་པའི་ཀུན་འབྱུང་བ་ཅན་ཚོར་བ་ལ་བརྟེན་པ། དྲན་པའི་བདག་པོ་ཅན་ཏིང་ངེ་འཛིན་གཙོ་བོར་གྱུར་པ། ཤེས་རབ་མཆོག་ཏུ་གྱུར་པ། རྣམ་པར་གྲོལ་བའི་སྙིང་པོ་ཅན། །མྱ་ངན་ལས་འདས་པའི་མཐར་ཐུག་པའོ། །ཞེས་གསུངས་པས་འདིར་ནི་འདུ་ཤེས་དང་ཚོར་བ་ནི་མ་བཤད་ཀྱང་གྲུབ་པའི་ཕྱིར་མ་བཤད་དོ། །དམིགས་པ་ལ་མཚན་མར་འཛིན་པ་ནི་འདུ་ཤེས་ཏེ། སེམས་སྟོང་པ་ཉིད་ལ་འཇུག་པ་ལ་ནི་མཚན་མར་འཛིན་པ་ཡོད་པ་མ་ཡིན་ཏེ། སེམས་པའི་རྗེས་སུ་ཡིད་ལ་བྱེད་པ་ཁོ་ན་འདི་ཉིད་ཡིན་པས་མདོ་ལས་ས་མང་པོ་ཉིད་དུ་རབ་ཏུ་བསྒྲུབས་པ་མཐོང་ངོ༌། །དེ་ལ་འདུན་པ་ནི་སེམས་ཀྱི་བྱ་བ་སྐྱེ་བ་ཐམས་ཅད་ལ་གསུངས་པས་འཇུག་པ་ཐམས་ཅད་ཀྱི་ས་བོན་ཡིན་པའི་ཕྱིར་མངོན་པར་འདོད་པའི་འདུན་པ་སྟེ་གང་གི་ཕྱིར་ལྷན་ཅིག་སྐྱེས་པའི་རྐྱེན་ལ་བརྟེན་ནས་ཡིད་ཀྱི་ཡུལ་ཐམས་ཅད་ལ་འཇུག་པར་འགྱུར་བས་ན་འདུན་པ་ནི་ས་མང་པོ་པ་མ་ཡིན་ནོ་ཞེས་སློབ་དཔོན་དཔལ་ལེན་ཟེར་རོ། །འདུན་པ་ཅན་དུ་འགྱུར་རོ་ཞེས་གསུངས་པའི་ཕྱིར་རིག་པར་བྱ་བའི་འདུན་པའི་དབང་དུ་བྱས་ན་སྐྱོན་མེད་དོ། །གང་གི་ཕྱིར་དེ་ལ་ངེས་པ་ཡོད་པའི་འདོད་པའི་དངོས་པོ་ནི་མངོན་པར་འདོད་པར་གསུངས་པས་འདུན་པ་ཅན་ཞེས་བྱ་བ་དེ་རྟོགས་པར་བྱ་སྟེ། རིག་པར་བྱས་པའི་འདུན་པ་ནི་མངོན་པར་འཛིན་པ་ཉིད་ལ་གསུངས་པས་འདུན་པ་ཉིད་ནི་མ་ཡིན་ནོ། །འཇིག་རྟེན་ན་ཡང་དད་པ་མེད་པའི་བུ་ནི་བུ་མ་ཡིན་ཞེས་བརྗོད་པ་བཞིན་ནོ། །མ་རིག་པ་དང་ཐེ་ཚོམ་དང་ལྷན་ཅིག་སྐྱེས་
པའི་སེམས་པ་མེད་པ་ནི་ཤེས་རབ་ཅེས་བྱ་སྟེ། འདི་ས་མང་པོ་པ་ཉིད་མ་ཡིན་ནོ། །གང་གི་ཕྱིར་ཤེས་པ་དང་མི་ཤེས་པ་དག་ཅིག་ཅར་སྐྱེ་བ་མེད་དོ། །ཐེ་ཚོམ་དང་ངེས་པ་དག་ཀྱང་སྟེ་ལོག་པར་མཐོང་བ་རབ་ཏུ་མ་གྲུབ་ཅིང་གཏི་མུག་མེད་པར་ལོག་པར་མཐོང་བ་སྐྱེ་བ་མེད་དོ། །ཅི་སྟེ་མ་འདྲེས་པ་ཞེས་བྱ་བ་གྲུབ་ཅེ་ན། རེ་ཞིག་གཏི་མུག་དང་མཚུངས་པར་ལྡན་པའི་ཤེས་རབ་ལས་ཏེ། དེ་དང་མ་འདྲེས་པ་གྲུབ་ཀྱང་གཞན་བར་ཡོད་པའི་ཕྱིར། དེ་མངོན་པར་མི་གསལ་བ་དང་ཐེ་ཚོམ་ཅན་དུ་རྣམ་པར་བཤད་པ་ཉིད་དོ། །བདེན་པ་མ་ཡིན་པས་དེར་ཤེས་རབ་ལ་རྣམ་པར་འབྱེད་པ་གཉིས་སུ་མི་འགྱུར་ཏེ། ཕྱོགས་གཉི་ག་ཁྱད་པར་མེད་པར་རྟོགས་པར་བྱའོ། །དྲན་པ་དྲུག་དང་བརྗེད་ངས་པ་ནི་ས་མང་པོ་པ་མ་ཡིན་ནོ་ཞེས་གསུངས་པའི་ཕྱིར་རོ། །དྲན་པ་ནི་ཕལ་ཆེར་འདས་པ་ལ་རབ་ཏུ་སྦྱོར་བར་མཐོང་སྟེ། དེར་ཡང་དྲན་པའི་ཤེས་པ་ཉིད་དེ་བཞིན་ཁོ་ནར་འཇུག་པ་མེད་པ་ཉིད་མ་ཡིན་པར་མ་བཤད་པས་མི་འཐད་དོ། །སེམས་དང་སེམས་ལས་བྱུང་བ་རྣམས་ཀྱི་བྱེ་བྲག་ནི་དཀའ་བས་ཞེས་བྱ་བ་ལ། བརྩོན་འགྲུས་མེད་པ་དང༌། ཤེས་རབ་མེད་པ་དང། དད་པ་མེད་པ་དག་གིས་རྟོགས་པར་མི་ནུས་སོ། །འདི་ལྟར་ཕྲ་བ་ཞིག་སྟེ། གང་ཞིག་རྒྱུན་རྣམས་ལ་ཡང་བཅད་པར་དཀའ་ན་སྐད་ཅིག་མ་དག་ལ་སྟེ་སྨོས་ཀྱང་ཅི་དགོས། དད་པ་དང་བརྩོན་འགྲུས་དང་ཤེས་རབ་ཅན་དག་གིས་ཁ་ཅིག་ནི་རང་གི་ངོ་བོའི་སྒོ་ནས་ཡོངས་སུ་གཅད་པར་བྱ་བར་ནུས་ལ། ཁ་ཅིག་ནི་བྱ་བའི་སྒོ་ནས་ཡོངས་སུ་གཅད་པར་བྱ་བར་ནུས་པས་ཡོངས་སུ་གཅད་པར་དཀའ་ན་ཞེས་བྱ་བ་སྨོས་སོ། །སེམས་པ་དང་ཡིད་ལ་བྱེད་པ་དག་ནི་ཤིན་ཏུ་མཚན་ཉིད་ཐ་དད་དོ་སྙམ་དུ་མཐོང་བས་རེ་ཞིག་སྨན་ལ་སོགས་པ་གཟུགས་ཅན་རྣམས་ལ་ཡང་ཞེས་བྱ་བ་སྨོས་ཏེ། ཨ་རུ་ར་ལ་སོགས་པ་རྣམས་ལའོ། །ཨ་རུ་ར་ནི་ལན་ཚྭའི་རོ་མ་དང༌། གཏོགས་པ་ལྷག་མ་རོ་ལྔ་དག་ཡོད་པ་ཡིན་ནོ། །དབང་པོས་གཟུང་བར་བྱ་བ་ཞེས་པ་ནི་ལྕེའི་དབང་པོས་གཟུང་བར་བྱ་བའོ། །དང་བ་ནི་སེམས་དང་བའོ་ཞེས་བྱ་བ་ལ། དང་བ་ནི་སེམས་ཀྱི་རྙོག་
པ་དང་འགལ་བ་སྟེ། དེ་དང་མཚུངས་པར་ལྡན་ན་ཉོན་མོངས་པ་དང་ཉེ་བའི་ཉོན་མོངས་པའི་དྲི་མའི་རྙོག་པ་དང་བྲལ་བར་འགྱུར་བའི་ཕྱིར། དད་པ་ལ་བརྟེན་ནས་སེམས་དད་པར་འགྱུར་བས་སེམས་དད་པའོ་ཞེས་བརྗོད་དོ། །དད་པ་ནི་སེམས་ལས་བྱུང་བའི་ཆོས་གཞན་ནོར་བུ་ཆུ་འདང་པ་འདྲ་བ་ཞིག་གོ །གཟུགས་དང་བ་ཡང་ཡོད་པས་དེའི་ཕྱིར་སེམས་དང་བའོ་ཞེས་སྨོས་སོ། །གཞན་དག་ན་རེ་བདེན་པ་དང་དཀོན་མཆོག་ཅེས་བྱ་བ་ལ་སོགས་པ་ལ། བདེན་པ་རྣམས་དང་དཀོན་མཆོག་རྣམས་དང༌། ལས་རྣམས་དང་འབྲས་བུ་རྣམས་ལ་མངོན་པར་ཡིད་ཆེས་པ་སྟེ། ཡིད་ཆེས་ཤིང་ལེགས་པར་འདོད་པ་དང་མོས་པ་གསོས་འདེབས་པ་ནི་དད་པའོ། །བག་ཡོད་པ་ནི་ཞེས་བྱ་བ་རྒྱ་ཆེར་འབྱུང་སྟེ། གང་ཡོད་ན་ཞེས་བརྗོད་པར་བྱའོ། །དགེ་བའི་ཆོས་རྣམས་བསྒོམས་པ་ནི་རྙེད་པ་དང་བསྟན་པ་ལ་མངོན་པར་འདོད་དེ་དེ་ནི་བག་ཡོད་པ་ལས་འགྱུར་རོ། །དེ་ཉིད་ཀྱི་ཕྱིར་དེ་དག་ལས་གཞན་པ་ཞེས་བྱ་བ་སྨོས་སོ། །དགེ་བའི་ཆོས་དག་ལས་གཞན་པའི་བསྒོམ་པ་སྟེ། ཡོད་པ་མ་ཡིན་ནོ་སྙམ་དུ་དགོངས་པའོ། །དེ་དག་ཉིད་ལ་གཅེས་སུ་འཛིན་པ་གང་ཡིན་པའོ་ཞེས་བྱ་བ་ལ། གཅེས་སུ་འཛིན་པ་ཞེས་བྱ་བ་འདི་ཅི་ཞིག། ལྷུར་ལེན་པའོ། །ལྷུར་ལེན་པ་འདི་ཞིག་ན། གང་ཡོད་ན་དགེ་བའི་ཕྱོགས་ལྷུར་བྱེད་པར་འགྱུར་བའོ། །སེམས་ཀུན་ཏུ་བསྲུང་བའོ་ཞེས་བྱ་བ་ལ། བདག་ལ་ཕན་པ་གཅེས་སུ་འཛིན་པའི་ལུས་དང་ངག་དང་ཡིད་ཀུན་ནས་བསྲུང་བ་ལྷུར་ལེན་པ་བག་མེད་པ་དང་འགལ་བའི་ཆོས་ནི་བག་ཡོད་པའོ། །ཤིན་ཏུ་སྦྱངས་པ་ནི་སེམས་ལས་སུ་རུང་བ་ཉིད་དོ་ཞེས་བྱ་བ་ལ། ལས་སུ་རུང་བ་ཉིད་ཀྱང་གང་ཞེ་ན། ཡང་དག་པར་ཡིད་ལ་བྱེད་པ་ལ་ཞུགས་པའི་སེམས་སིམ་པ་དང་ཡོད་པའི་རྒྱུ་སེམས་ལས་བྱུང་བའི་ཆོས་གཞན་གང་ཡིན་པ་སྟེ། དེ་དང་ལྡན་པས་སེམས་དམིགས་པ་ལ་མ་ཆགས་པར་འཇུག་པ་དེའི་ཕྱིར་སེམས་ལས་སུ་རུང་བ་ཉིད་དོ་ཞེས་བརྗོད་དོ། །མདོ་ལས་གང་ཞིག་ཤིན་ཏུ་སྦྱངས་པ་ཡང་དག་པར་བྱང་ཆུབ་ཀྱི་ཡན་ལག་ཏུ་འགྱུར་བའི་རྣམ་གྲངས་གང་ཞེ་ན། ལུས་ཤིན་ཏུ་སྦྱངས་པ་ཡང་ཡོད་དོ། །སེམས་ཤིན་ཏུ་སྦྱངས་པ་
ཡོད་དོ། །གང་ཡང་ལུས་ཤིན་ཏུ་སྦྱངས་པ། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དེ་ཡང་མངོན་པར་ཤེས་པ་དང་རྫོགས་པར་བྱང་ཆུབ་པ་དང་མྱ་ངན་ལས་འདའ་བར་བྱེད་པར་འགྱུར་རོ། །གང་ཡང་སེམས་ཤིན་ཏུ་སྦྱངས་པ། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དེ་ཡང་མངོན་པར་རྫོགས་པར་བྱང་ཆུབ་བ་དང་མྱ་ངན་ལས་འདའ་བར་བྱེད་པར་འགྱུར་རོ་ཞེས་ལུས་ཤིན་ཏུ་སྦྱངས་པ་ཡང་གསུངས་པ་ཡིན་ནམ། འདིར་སེམས་ལས་སུ་རུང་བ་ཁོ་ན་ཤིན་ཏུ་སྦྱངས་པར་བཤད་པས་ཤིན་ཏུ་སྦྱངས་བའི་མཚན་ཉིད་མ་ཁྱབ་པ་མ་ཡིན་ནམ་ཞེ་ན། མདོ་ལས་མ་གསུངས་པ་ནི་མ་ཡིན་ནོ། །དེ་ནི་ལུས་ཀྱི་ཚོར་བ་ཇི་ལྟ་བ་དེ་བཞིན་དུ་ཞེས་བྱ་བ་ལ། སེམས་ཀྱི་ཡིན་ཡང་དབང་པོ་གཟུགས་ཅན་ལ་བརྟེན་ནས་སྐྱེ་བའི་ཕྱིར། མིག་ལ་སོགས་པའི་རྣམ་པར་ཤེས་པ་དང་མཚུངས་པར་ལྡན་པ་ལ་ལུས་ཀྱི་ཞེས་བཤད་པ་དེ་བཞིན་དུ་ལུས་ཤིན་ཏུ་སྦྱངས་པ་ཡང་རིག་པར་བྱ་སྟེ། སེམས་ཀྱི་ཡིན་ཡང་དབང་པོ་གཟུགས་ཅན་ལ་བརྟེན་པའི་ཕྱིར་རྣམ་པར་ཤེས་པ་ལྔ་དང་མཚུངས་པར་ལྡན་པ་ལ་ལུས་ཀྱི་ཞེས་བྱའོ། །དེ་ཡང་མིག་ལ་སོགས་པའི་རྣམ་པར་ཤེས་པ་དགེ་བ་རྣམས་སུ་རུང་བ་ཉིད་དེ། ཤིན་ཏུ་སྦྱངས་པ་ནི་དགེ་བའི་ས་མང་པོ་ཡིན་པའི་ཕྱིར་རོ། །དེས་ན་ལུས་དང་སེམས་ཤིན་ཏུ་སྦྱངས་པ་གཉིས་ལ་ངོ་བོ་ཁྱད་པར་འགའ་ཡང་ཡོད་པ་མ་ཡིན་པས་མཚན་ཉིད་ཁྱབ་པ་ཡིན་གྱི་མ་ཁྱབ་པ་ནི་མ་ཡིན་ནོ། །དེ་ཇི་ལྟར་ན་བྱང་ཆུབ་ཀྱི་ཡན་ལག་ཏུ་ཞེས་བྱ་བ་ལ། མིག་ལ་སོགས་པའི་རྣམ་པར་ཤེས་པ་རྣམས་མཉམ་པར་མ་བཞག་པའི་ས་པ་ཡིན་པའི་ཕྱིར་དང༌། བྱང་ཆུབ་ཀྱི་ཡན་ལག་རྣམས་ཟག་པ་མེད་པ་ཡིན་པའི་ཕྱིར་མིག་ལ་སོགས་པའི་རྣམ་པར་ཤེས་པ་དང་མཚུངས་པར་ལྡན་པའི་ཤིན་ཏུ་སྦྱངས་པ་ནི་བྱང་ཆུབ་ཀྱི་ཡན་ལག་ཏུ་རུང་བ་མ་ཡིན་ནོ་ཞེ་ན། འོ་ན་མདོ་དེར་ནི་ལུས་ལས་སུ་རུང་བ་འབྱུང་བའི་ཁྱད་པར་དགའ་བས་དྲངས་པ་ཁོ་ན་ལུས་ཤིན་ཏུ་སྦྱངས་པ་ཡིན་པར་རིག་པར་བྱ་སྟེ། མདོ་ལས་ལུས་ཤིན་ཏུ་སྦྱངས་པའི་ཡིད་དགའ་བར་འགྱུར་རོ་ཞེས་འབྱུང་བའི་ཕྱིར་རོ། །ཁ་ཅིག་ན་རེ་ལུས་མཉེན་པ་ཉིད་དུ་ཞེས་ཟེར་རོ། །
དེ་ཇི་ལྟར་ན་བྱང་ཆུབ་ཀྱི་ཡན་ལག་ཅེས་བྱ་ཞེ་ན་ཞེས་བྱ་བ་ལ། བྱང་ཆུབ་ཀྱི་ཡན་ལག་རྣམས་ནི་ཡིད་ཀྱི་ས་པ་དང་ཟག་པ་མེད་པ་དག་ཡིན་ལ། ལུས་ཤིན་ཏུ་སྦྱངས་པ་ནི་སེམས་ལས་བྱུང་བའི་བདག་ཉིད་མ་ཡིན་ཞིང༌། དེ་བྱང་ཆུབ་ཀྱི་ཡན་ལག་ཏུ་མི་རུང་ངོ་ཞེ་ན། བྱང་ཆུབ་ཀྱི་ཡན་ལག་དང་མཐུན་པའི་ཕྱིར་ཏེ་ཞེས་བྱ་སྟེ། ལུས་ཤིན་ཏུ་སྦྱངས་པ་དེ་ནི་སེམས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་གི་བདག་ཉིད་ཅན་དང་རྗེས་སུ་མཐུན་པས་དེ་ལ་ཡང་བྱང་ཆུབ་ཀྱི་ཡན་ལག་ཅེས་བརྗོད་དོ། །ཇི་ལྟར་མཐུན་ཞེ་ན། ལུས་ལས་སུ་རུང་བ་དེ་ནི་ཞེས་རྒྱ་ཆེར་འབྱུང་སྟེ། དེ་ལྟ་བུ་ཞེས་བྱ་བ་ནི་དེའི་རང་བཞིན་མ་ཡིན་ཡང་མཐུན་པའི་ཕྱིར་དེ་དང་འདྲ་བར་ཉེ་བར་འདོགས་པའོ། །དགའ་བའི་གནས་ལྟ་བུའི་ཆོས་རྣམས་དེའི་རང་བཞིན་མ་ཡིན་ཡང་དགའ་བ་ཡང་དག་བྱང་ཆུབ་ཀྱི་ཡན་ལག་དང་རྗེས་སུ་མཐུན་པས་དགའ་བ་ཡང་དག་བྱང་ཆུབ་ཀྱི་ཡན་ལག་ཏུ་གསུངས་ཤིང༌། ཁོང་ཁྲོ་བའི་རྒྱུ་མཚན་ཀུན་ནས་མནར་སེམས་ཀྱི་གཞི་དགུ་གནོད་སེམས་དང་རྗེས་སུ་མཐུན་པའི་ཕྱིར་གནོད་སེམས་ཀྱི་སྒྲིབ་པར་གསུངས་ལ། གང་གི་ཚེ་ལམ་ཕུང་པོ་གསུམ་པར་མཛད་པ་དེའི་ཚེ་ཡང་དག་པའི་རྟོག་པ་དང་རྩོལ་བ་དག་ཤེས་རབ་ཀྱི་ཕུང་པོར་གསུངས་ན། རྟོག་པ་དང་རྩོལ་བ་དག་ནི་ཤེས་རབ་ཀྱི་རང་བཞིན་མ་ཡིན་ཏེ། འོ་ན་ཅི་ཞེ་ན། རྟོག་པ་ནི་བརྩོན་འགྲུས་ཀྱི་རང་བཞིན་ཡིན་ལ། བཏང་སྙོམས་ནི་སེམས་མཉམ་པ་ཉིད་ཅེས་བྱ་བ་བྱིང་བ་དང་རྒོད་པའི་མི་མཐུན་པའི་ཕྱོགས་ཏེ་སེམས་ཚུལ་བཞིན་དུ་རྒྱུ་བ་ལས་མ་འདས་པ་ཞེས་བྱ་བའི་དོན་ཏོ། །སེམས་ལྷུན་གྱིས་གྲུབ་པ་ཉིད་དོ་ཞེས་འབྱུང་བའི་ཕྱིར་རོ། །གཞན་དག་ན་རེ་ཡིད་ལ་བྱ་བའི་གེགས་ཡིན་ནོ་ཞེས་ཟེར་རོ། །འདི་ནི་འདུ་བྱེད་བཏང་སྙོམས་པར་རེག་བྱའོ། །ཚོར་བ་ནི་མྱོང་བ་རྣམ་གསུམ་མོ་ཞེས་བྱ་བ་དེ་ཉིད་ལས་དེ་སྨོས་པའི་ཕྱིར་ཚོར་བ་བཏང་སྙོམས་མ་ཡིན་ལ། དགེ་བའི་སེམས་ཐམས་ཅད་ལ་འབྱུང་བའི་ཕྱིར་ཚད་མེད་པ་བཏང་སྙོམས་ཀྱང་མ་ཡིན་ནོ། །ད་ནི་ཇི་ལྟར་ན་ཞེས་རྒྱ་ཆེར་འབྱུང་བ་ལ། ས་མང་པོ་བ་ཡིན་པའི་ཕྱིར་དང༌། དགེ་བའི་ས་མང་པོ་པ་ཡིན་པའི་ཕྱིར་ཡིད་ལ་བྱེད་པ་དང་བཏང་
སྙོམས་དག་སེམས་གཅིག་ལ་འབྱུང་བ་དེ་ནི་འཐད་པ་ཡང་མ་ཡིན་ཏེ་ཕན་ཚུན་འགལ་བའི་ཕྱིར་རོ། །ཤེས་པར་དཀའ་བ་ཡང་ཞེས་རྒྱ་ཆེར་འབྱུང་སྟེ། གང་ཞིག་རེག་པ་ཇི་ལྟ་བ་དེ་བཞིན་དུ་སེམས་ཀྱི་སྐད་ཅིག་གཅིག་ལ་སེམས་ལས་བྱུང་བའི་ཆོས་གཞན་དང་མི་འགལ་བ་དེ་ནི་ཤེས་པར་དཀའ་ཡང་ཤེས་པ་ཡིན་གྱི། གང་ཞིག་རྩོལ་བ་དང་རྩོལ་བ་མེད་པ་ཕན་ཚུན་འགལ་བ་དག་གཅིག་ལ་འབྱུང་བ་མི་འགལ་ལོ་ཞེས་བྱ་བ་འདི་ནི་ཤིན་ཏུ་ཤེས་པར་དཀའ་སྟེ། བདེ་བ་དང་སྡུག་བསྔལ་འགལ་བ་དག་ནི་སེམས་གཅིག་ལ་འབྱུང་བར་མ་མཐོང་ངོ༌། །རྩོལ་བ་ཡང་གཞན་དུ་འབྱུང་ལ་ཞེས་བྱ་བ་རྒྱ་ཆེར་འབྱུང་བ་ལ། ཆོས་གཞན་ཉིད་དུ་ཡིན་པའི་ཕྱིར་རྩོལ་བ་ཉིད་རྩོལ་བ་མེད་པ་མ་ཡིན་ལ། དེ་གཉིས་དངོས་པོ་གཅིག་ལ་འཇུག་པ་ཡང་མ་ཡིན་ཏེ། གང་གི་ཚེ་གཟུགས་ལ་རྩོལ་བ་དེའི་ཚེ་སྒྲ་ལ་སོགས་པ་དག་ལ་རྩོལ་བ་མེད་པ་ཡིན་པས་འདི་ལ་འགལ་བ་ཞིག་ཡོད་ཅེ་ན། འོ་ན་ནི་ད་ཞེས་བྱ་བ་ལ་སོགས་པ་ལ། རྩོལ་བ་དང་རྩོལ་བ་མེད་པ་གཉིས་ཡུལ་ཐ་དད་པའི་ཕྱིར་མཚུངས་པར་ལྡན་པ་ཐམས་ཅད་དམིགས་པ་གཅིག་པར་མི་འགྱུར་ན། མཚུངས་པར་ལྡན་པ་རྣམས་དམིགས་པ་ཐ་དད་པ་ཉིད་དུ་འདོད་པ་ཡང་ཡིན་ཏེ། དམིགས་པ་མཚུངས་པ་ཉིད་ཀྱིས་མཚུངས་པར་ཁས་བླངས་པའི་ཕྱིར་རོ། །འདི་ལས་འདི་ལྟ་བུའི་རིགས་ཞེས་བྱ་བ་ལ། དཔེར་ན་རྟོག་པ་དང་དཔྱོད་པ་གཉིས་བཞིན་དུ་འགལ་ཡང་མི་འགལ་བའི་རིགས་ཏེ། རྩིང་པ་དང་ཞིབ་པ་དག་ཕན་ཚུན་འགལ་བའི་ཕྱིར་རོ། །མི་འགལ་བ་ནི་སེམས་གཅིག་ལ་འབྱུང་བའི་ཕྱིར་རོ། །ངོ་ཚ་ཤེས་པ་དང་ཁྲེལ་ཡོད་པ་དག་ནི་འོག་ནས་འཆད་པར་འགྱུར་ཞེས་བྱ་བ་ནི། མ་གུས་ངོ་ཚ་མེད་ཁྲེལ་མེད། །ཅེས་བྱ་བ་དེར་ཏེ། ངོ་ཚ་མེད་པ་དང་ཁྲེལ་མེད་པ་ལས་བཟློག་པ་ནི་ངོ་ཚ་ཤེས་པ་དང་ཁྲལ་ཡོད་པར་རིག་པར་བྱའོ། །གཞན་དག་ན་རེ་རིགས་ཤིང་ཚད་མར་གྱུར་པའི་ཆོས་ཀྱི་དབང་དུ་བྱས་ནས་སྐྱེས་པ་སྲེད་པ་མེད་པའི་རྒྱུ་མཐུན་པ་དང་འགལ་བའི་སེམས་ཀྱི་དབང་དུ་གྱུར་པ་ནི་ངོ་ཚ་མེད་པ་ཡིན་ལ། ཡོན་ཏན་ལ་མ་གོམས་སྔོན་དུ་འགྲོ་བ་ཅན་གྱི་གཏི་
མུག་མེད་པའི་རྒྱུ་མཐུན་པ་དང༌། འགལ་བ་དམན་ཞིང་སྨད་པའི་ཆོས་ནི་ཁྲེལ་མེད་པའོ་ཞེས་ཟེར་རོ། །གཞན་དག་ན་རེ་ངན་འགྲོ་དང་གཞན་གྱིས་སྨོད་པའི་འཇིགས་པ་རྒྱུ་མཚན་དུ་མི་བྱེད་པ་ནི་ངོ་ཚ་མེད་པའོ་ཞེས་ཟེར་རོ། །རྩ་བ་གཉིས་ནི་ཞེས་རྒྱ་ཆེར་འབྱུང་སྟེ། དེ་ལ་མ་ཆགས་པ་ནི་རྙེད་པ་དང་མ་རྙེད་པའི་ཡུལ་ལ་ལྷག་པར་ཞེན་པ་དང་དོན་དུ་གཉེར་བ་དང་འགལ་ཞིང་མངོན་པར་མ་ཞེན་པའོ། །ཞེ་སྡང་མེད་པ་ནི་སེམས་ཅན་རྣམས་ལ་གནོད་སེམས་མེད་ཅིང་རྗེས་སུ་བརྩེ་བའི་ས་བོན་དུ་གྱུར་པའོ། །དགེ་བའི་རྩ་བ་རྣམས་ཕན་ཚུན་མེད་ན་མི་འབྱུང་བའི་ཕྱིར་དགེ་བའི་སེམས་ཐམས་ཅད་ལ་མཚུངས་པར་འབྱུང་ཡང་གཏི་མུག་མེད་པ་མ་བསྟན་པས་དགེ་བའི་ས་མང་པོ་བའི་བཤད་པ་མ་ཚང་བ་ཡིན་ནོ་སྙམ་དུ་དོགས་པ་སྤང་བའི་ཕྱིར། གཏི་མུག་མེད་པ་ཡང་ཡོད་མོད་ཀྱི་ཞེས་བྱ་བ་རྒྱ་ཆེར་སྨོས་སོ། །འདི་སྐད་བསྟན་པར་འགྱུར་ཏེ། གང་དག་དགེ་བའི་སེམས་གཞན་ལ་ཡང་འབྱུང་བས་དགེ་བའི་ས་མང་པོ་པ་ཡིན་ཏེ། གཏི་མུག་མེད་པ་ནི་ཤེས་རབ་ཀྱི་བདག་ཉིད་ཡིན་པའི་ཕྱིར་ས་མང་པོ་པ་ཞེས་བྱའོ། །དེ་ནས་སེམས་གཞན་ལ་ཡང་འབྱུང་བས་དགེ་བའི་ས་མང་པོ་པ་མ་ཡིན་ཏེ། འདུན་པ་ལ་སོགས་པ་བཞིན་ནོ། །དེའི་ཕྱིར་དགེ་བའི་ས་མང་པོ་པའི་བཤད་པ་ལ་མ་ཚང་བ་ཉིད་མེད་དོ། །རྣམ་པར་མི་འཚེ་བ་ནི་རྣམ་པར་མཐོ་མི་འཚམ་པའོ་ཞེས་བྱ་བ་ནི། སེམས་ཅན་གཞན་ལ་གནོད་པར་དགའ་བ་དང་དགའ་བ་སེམས་བཟང་པོ་ཉིད་ནི་རྣམ་པར་མི་འཚེ་བའོ། །བརྩོན་འགྲུས་ནི་སེམས་མངོན་པར་སྤྲོ་བའོ་ཞེས་བྱ་བ་ནི། ཡོན་ཏན་དང་སྐྱོན་སྐྱེས་ཟིན་པ་ཀུན་ཏུ་བསྲུང་བ་དང་སྤང་བ་དང་མ་སྐྱེས་པ་བསྐྱེད་པ་དང་མི་བསྐྱེད་པར་བྱ་བའི་ཕྱིར་སེམས་ལ་ལེ་ལོ་མེད་པ་ནི་མངོན་པར་སྤྲོ་བ་སྟེ། གང་ཡོད་ན་སེམས་རིགས་པར་རྩོམ་པ་དང་མཆོག་ཏུ་འགྱུར་བ་དེ་ནི་བརྩོན་འགྲུས་སོ། །འདིར་དང་གི་སྒྲ་ནི་སྐྱོབ་དང་རབ་ཏུ་དགའ་བ་བསྡུ་བའི་དོན་ཏོ། །དེ་ལ་སྐྱོ་བ་ནི་དགེ་བའི་སེམས་ཉེ་བར་འཚེ་བ་དུ་མས་ཉེ་བར་གཙེས་པའི་ཆོས་དེ་ཉིད་ཉེ་བར་མཚོན་པ་ཆགས་བྲལ་དང་རྗེས་སུ་མཐུན་པའི་ཡིད་འབྱུང་བ་སྟེ། གང་དང་མཚུངས་པར་ལྡན་ན་ངེས་པར་འབྱུང་བ་ཡིད་ལ་བྱེད་པ་ཞེས་བྱའོ། །
རབ་ཏུ་དགའ་བ་ནི་དགེ་བའི་སེམས་ཉེ་བར་འཚེ་བ་ལས་ངེས་པར་འབྱིན་པའི་གཉེན་པོ་འཚོལ་བ་དེ་རྟོགས་པས་ཡིད་ཡོངས་སུ་ཚིམ་པ་སྟེ། དགའ་བ་དང་མ་བྲལ་བ་རྣམས་ལ་ཡང་མི་ལྕོགས་པ་མེད་པ་ལ་སོགས་པ་རྣམས་ལ་གང་དང་མཚུངས་པར་ལྡན་པས་རབ་ཏུ་དགའ་བ་ཡིད་ལ་བྱེད་པ་ཞེས་བྱ་བའོ། །དེ་གཉིས་ནི་རྣམ་པ་འགལ་བའི་ཕྱིར་སེམས་གཅིག་ལ་སྲིད་པ་མ་ཡིན་པས་དགེ་བའི་ས་མང་པོ་བ་ཉིད་དུ་མི་འཐད་པའི་ཕྱིར་དང༌། རབ་ཏུ་བྱེད་པ་དག་ལས་མ་བཤད་པའི་ཕྱིར་རོ། །གང་གི་ཕྱིར་ཡིད་བདེ་བ་ནི་སྐྱོ་བའི་རྣམ་པས་ཀྱང་འཇུག་པ་ཡོད་ལ། རབ་ཏུ་དགའ་བ་ལ་ནི་སྐྱོ་བའི་རྣམ་པ་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་དང་གི་སྒྲ་གཉིས་འབྱུང་སྟེ། ཚོགས་པ་གཉིས་ལ་དེ་དག་དམིགས་པའི་ཕྱིར་རོ། །འདི་དག་ལ་ཉོན་མོངས་པའི་ས་མང་པོ་ཡོད་པ་ཞེས་བྱ་བ་ནི་ཉོན་མོངས་པའི་སྒོ་ནས་དེ་དག་མཚུངས་པར་ལྡན་པའི་སེམས་ཁོ་ན་སྟོན་ཏོ། །དེ་ཉིད་ཀྱི་ཕྱིར་གང་དག་ཉོན་མོངས་པ་ཅན་གྱི་སེམས་ལ་རྟག་ཏུ་འབྱུང་བ་ཡིན་ནོ་ཞེས་བྱ་བ་སྨོས་སོ། །དེ་ལ་རྨོངས་པ་ཞེས་བྱ་བ་ནི་མ་རིག་པའོ། །མ་རིག་པ་འདི་གང་ཞིག་ཅེ་ན་མི་ཤེས་པའོ། །མི་ཤེས་པ་འདི་གང་ཞེ་ན་མི་གསལ་བའོ། །མི་གསལ་བ་འདི་ཡང་ཅི་ཞིག་ཅེ་ན། གསལ་བ་ནི་ཤེས་རབ་ཡིན་ཏེ། དེའི་ཕྱིར་ཤེས་བྱ་དག་ལ་ཇི་ལྟ་བ་བཞིན་རྟོགས་པའི་གེགས་སུ་གྱུར་པའི་མི་གསལ་བའི་མཚན་ཉིད་ཅན་ཆོས་ནི་རྨོངས་པ་ཞེས་བྱའོ། །བག་མེད་པ་ནི་དགེ་བའི་ཆེས་རྣམས་མི་བསྒོམ་པ་སྟེ་ཞེས་བྱ་བ་ལ། གང་ཞིག་ཡོད་ན་ཞེས་བྱ་བར་ཁོང་དུ་ཆུད་པར་བྱའོ། །དགེ་བའི་ཆོས་རྣམས་མི་བསྒོམ་པ་ནི་མ་རྙེད་པ་རྣམས་མངོན་དུ་མི་བྱེད་པའོ། །བསྒོམ་པའི་མི་མཐུན་པའི་ཕྱོགས་ཞེས་བྱ་བ་ནི་བདག་ལ་ཕན་པ་གཅེས་སུ་འཛིན་པ་ཡལ་བར་འདོར་ཞེས་བྱ་བའི་ཐ་ཚིག་གོ །ལེ་ལོ་ནི་སེམས་མངོན་པར་མི་སྤྲོ་པ་སྟེ་ཞེས་བྱ་བ་ནི་དགེ་བའི་ལས་ལ་སྟེ་དོ་ཉིད་ཀྱི་ཕྱིར་བརྩོན་འགྲུས་ཀྱི་མི་མཐུན་པའི་ཕྱོགས་སོ་ཞེས་བྱ་བ་སྨོས་སོ། །དེ་ལྟར་བྱས་པ་ན་མི་དགེ་བའི་ལས་ལ་སེམས་མངོན་པར་སྤྲོ་བ་དེ་ནི་བརྩོན་འགྲུས་མ་ཡིན་ནོ། །དེ་ནི་རིགས་པའི་
རྒྱུ་མཐུན་པའི་ལེ་ལོ་སྟེ། དེ་ཉིད་ཀྱི་ཕྱིར་བརྩོན་འགྲུས་དམན་པ་ཉིད་ཅེས་བྱའོ། །དམན་པར་ཞུགས་པས་ན་ལེ་ལོ་སྟེ། དེའི་ངོ་བོ་ནི་ལེ་ལོ་ཉིད་དོ། །མ་དད་པ་ནི་སེམས་མ་དད་པ་སྟེ་ཞེས་བྱ་བ་ལ། ལོག་པར་ལྟ་བའི་རྒྱུ་མཐུན་པ་སྟེ། བདེན་པ་དང་དཀོན་མཆོག་དང་སྙོམས་པར་འཇུག་པ་རྣམས་ལ་བརྙེས་པས་ཉེ་བར་གནས་པ་སྦྱིན་པ་ལ་སོགས་པ་དང་དེའི་འབྲས་བུ་ལ་ནི་ཡིད་མི་ཆེས་ཤིང་དད་པ་མངོན་པར་མི་སྐྱེད་པ་སྟེ་མ་དད་པའོ། །དེ་ཉིད་ཀྱི་ཕྱིར་དད་པའི་མི་མཐུན་ཕྱོགས་ཞེས་བྱ་བ་སྨོས་སོ། །རྨུགས་པ་གང་ཞེན་ཞེས་རྒྱ་ཆེར་འབྱུང་བ་ལ། ཚིག་སྔ་མ་སྔ་མ་གཉིས་རྣམ་པར་བཤད་པ་ཡིན་པར་བསམས་ཏེ། ཚིག་ཕྱི་མ་གཉིས་མངོན་པར་བརྗོད་དོ། །འགལ་བ་དང་མི་དགའ་བས་བསྐྱེད་པའི་སེམས་ལྕི་བ་ནི་རྨུགས་པ་ཉིད་དེ། གང་གིས་བཟུང་ན་བླུན་པ་ཉིད་ཀྱི་ཚུལ་གྱིས་སེམས་ལས་སུ་མི་རུང་བ་ཉིད་དུ་འགྱུར་བའོ། །དེ་ཉིད་ཀྱི་ཕྱིར་འདི་ནི་ཤིན་ཏུ་སྦྱངས་པའི་མི་མཐུན་པའི་ཕྱོགས་ཞེས་བྱ་བའོ། །ལུས་ཀྱི་ཚོར་བ་ཇི་ལྟ་བ་བཞིན་ནོ་ཞེས་བྱ་བ་ལ། དབང་པོ་གཟུགས་ཅན་ལ་བརྟེན་ནས་སྐྱེ་བའི་ཕྱིར་སེམས་ཀྱི་ཡིན་བཞིན་དུ་ལུས་ཀྱི་ཞེས་བྱ་བ་བརྗོད་པ་དེ་བཞིན་དུ། རྣམ་པར་ཤེས་པའི་ཚོགས་ལྔ་རྨུགས་པ་སེམས་ཀྱི་ཁོ་ན་ཡིན་བཞིན་དུ། དབང་པོ་གཟུགས་ཅན་ལ་བརྟེན་པའི་ཕྱིར་ལུས་ཀྱི་ཞེས་བརྗོད་དོ། །གཞན་དག་ན་རེ་འབྱུང་བ་ཆེན་པོ་སྐྱེད་པར་བྱེད་པའི་ཕྱིར་སེམས་ཀྱི་སྔོན་དུ་འགྲོ་བས་ལུས་ལྕི་བ་ཉིད་ཀྱང་རྨུགས་པའི་སྒྲས་བརྗོད་ཀྱི། རྨུགས་པ་དེ་ལུས་ཀྱི་རྣམ་པར་ཤེས་པའི་ཡུལ་ནི་མ་ཡིན་པའི་ཕྱིར་རོ་ཞེས་ཟེར་རོ། །རྨུགས་པ་དང་གཉིད་དག་གི་ཐ་དད་དུ་བྱེད་པ་ནི། སེམས་ལས་སུ་མི་རུང་བས་རྨུགས་པ་དང༌། སེམས་མངོན་པར་སྡུད་པས་གཉིད་དོ། །རྒོད་པ་ནི་སེམས་རྣམ་པར་མ་ཞི་བ་སྟེ་ཞེས་བྱ་བ་ལ། འདོད་པས་བསྐྱོད་པའི་རྣམ་པར་རྟོག་པ་ལ་སོགས་པ་ལས་སྐྱེས་པ་སེམས་རྣམ་པར་མ་ཞི་བ་སྟེ། གང་དང་ལྡན་ན་ལམ་གོལ་བར་ཞུགས་པར་འགྱུར་བ་དེ་ནི་རྒོད་པའོ། །ཆོས་མངོན་བ་ལས་ཞེས་བྱ་བ་རྒྱ་ཆེར་འབྱུང་བ་ལ། བརྗེད་ངས་པ་དང༌། རྣམ་པར་གཡེང་བ་དང༌། ཤེས་བཞིན་མ་ཡིན་པ་དང༌། ཚུལ་བཞིན་
མ་ཡིན་པ་ཡིད་ལ་བྱེད་པ་དང༌། ལོག་པར་མོས་པ་ཉོན་མོངས་པའི་ས་མང་པོ་པ་ཉིད་དུ་བརྗོད་པའི་ཕྱིར་དང༌། མ་བསྟན་པའི་རྨུགས་པ་ཉོན་མོངས་པའི་ས་མང་པོ་བའི་ནང་དུ་བརྗོད་པའི་ཕྱིར། ཆོས་མངོན་པ་དང་འགལ་ལོ་ཞེ་ན། འགྱུར་བ་ཤེས་པ་ཞེས་བྱ་བ་ནི་གཞུང་ཚད་མར་བྱས་ཏེ་བཅུར་འགྱུར་རོ་ཞེས་བྱ་བ་ཤེས་ཀྱི། སློབ་དཔོན་གྱི་འདོད་པ་སྟེ། སློབ་དཔོན་གྱི་བཞེད་པ་ནི་ཤེས་པ་མ་ཡིན་ཏེ། བརྗེད་ངས་པ་ལ་སོགས་པ་དེ་དག་ནི་ས་མང་པོ་བ་ཡིན་པའི་ཕྱིར་ཉོན་མོངས་པའི་ས་མང་པོ་པ་ཡོད་ཀྱང་འདིར་དེ་དག་གི་ནང་དུ་མི་རིགས་ཏེ། ཉོན་མོངས་པའི་ས་མང་པོ་པ་རྣམས་ཁོ་ན་འཆད་པར་འདོད་པའི་ཕྱིར་རོ། །ཡང་ཅི་ལྟར་དེ་དག་ས་མང་པོ་བ་ཡིན་ཞེ་ན། དེའི་ཕྱིར་དྲན་པ་ཉོན་མོངས་པ་ཅན་ཁོ་ན་ཞེས་རྒྱ་ཆེར་སྨོས་སོ། །སོགས་པའི་སྒྲས་ནི་ཤེས་རབ་ཉོན་མོངས་པ་ཅན་ཁོ་ནས་ཤེས་བཞིན་མ་ཡིན་པ་དང༌། ཡིད་ལ་བྱེད་པ་ཉོན་མོངས་པ་ཅན་ཁོ་ན་ཚུལ་བཞིན་མ་ཡིན་པ་ཡིད་ལ་བྱེད་པ་མ་ཡིན་ནོ། །མོས་པ་ཉོན་མོངས་པ་ཅན་ཁོ་ན་ལོག་པར་མོས་པ་ཡིན་ནོ། །དེ་ཉིད་ཀྱི་ཕྱིར་ཞེས་བྱ་བ་ནི་གང་གི་ཕྱིར་དྲན་པ་ལ་སོགས་པ་ཉོན་མོངས་པ་ཅན་དག་ཁོ་ན་བརྗེད་ངས་པ་ལ་སོགས་པ་དག་ཡིན་པའི་ཕྱིར་རོ། །དེ་ལྟར་ན་མུ་བཞིར་འགྱུར་ཏེ། དྲན་པ་ལ་སོགས་པ་རྣམ་པ་གཉིས་ཀའི་བདག་ཉིད་ཡིན་པའི་ཕྱིར་རོ། །མུ་དང་པོ་ནི་ས་མང་པོ་པ་ཁོ་ན་སྟེ་ཚོར་བ་ལ་སོགས་པ་རྣམས་སོ། །གཉིས་པ་ནི་ཉོན་མོངས་པའི་ས་མང་པོ་པ་ཁོ་ན་སྟེ། མ་དད་པ་ལ་སོགས་པ་རྣམས་སོ། །གསུམ་པ་ནི་ས་མང་པོ་པ་དག་ཀྱང་ཡིན་ལ་ཉོན་མོངས་པའི་ས་མང་པོ་པ་དག་ཀྱང་ཡིན་ཏེ། དྲན་པ་ལ་སོགས་པ་ལྔའོ། །བཞི་པ་ནི་ས་མང་པོ་པ་དག་ཀྱང་མ་ཡིན་ལ། ཉོན་མོངས་པའི་ས་མང་པོ་བ་དག་ཀྱང་མ་ཡིན་པའོ། །རྣམ་པ་དེ་དག་མ་གཏོགས་པ་ཞེས་བྱ་བ་ནི་དགེ་བའི་ས་མང་པོ་པ་རྣམས་དང་ཉོན་མོངས་པ་ཆུང་ངུའི་ས་པ་རྣམས་དང༌། གཞན་ལྡན་པ་མ་ཡིན་པ་ལ་སོགས་པ་རྣམས་སོ། །དེ་དག་གི་མུ་བཞི་བ་ནི་དེ་ལྟར་མ་ཡིན་ནོ་ཞེས་བྱ་བ་ལ། ཇི་ལྟར་དེ་ལྟར་མ་ཡིན་ཞེ་ན། སྔར་ནེ་ལེ་ལོ་ལ་སོགས་པ་ཆོས་ལྔ་མུ་གཉིས་པ་ཡིན་པར་
བཤད་ལ། ད་ལྟ་ནི་རྣམ་པར་གཡེང་བ་ལྷག་པར་བསྣན་ཏེ་དྲུག་ཏུ་འགྱུར་རོ། །སྔར་ནི་རྣམ་པར་གཡེང་བ་དང་བཅས་པ་ལྔ་མུ་གསུམ་པ་ཡིན་ལ། ད་ལྟ་ནི་རྣམ་པར་གཡེང་བ་བོར་བ་བཞི་ཡིན་ནོ། །སྔར་ནི་ཚོར་བ་ལ་སོགས་པ་ཆོས་བཞི་མུ་དང་པོ་ཡིན་ལ། ད་ནི་ཏིང་ངེ་འཛིན། ལྷག་པར་བསྟན་ཏེ་ལྔར་འགྱུར་རོ། །དེ་ལས་རྨུགས་པ་མི་འབྱུང་སྟེ་ཞེས་བྱ་བ་གང་སྨྲས་པ་དེའི་ལན་ནི། རྨུགས་པ་ནི་ཞེས་བྱ་བ་ལ། རྨོངས་པ་ལ་སོགས་པ་ལྟར་ཉོན་མོངས་པ་ཐམས་ཅད་དང་མཚུངས་པར་ལྡན་པའི་ཕྱིར་ཉོན་མོངས་པའི་ས་མང་པོ་བར་འདོད་པས། དེ་ལྟར་དེ་ཉོན་མོངས་པའི་ས་མང་པོ་པའི་མཚན་ཉིད་དང་ལྡན་ཡང་ཉོན་མོངས་པའི་ས་མང་པོ་པ་དག་གི་ནང་དུ་མ་བཏོན་པ་སུ་ཞིག་གིས་ཉེས། ཅི་ངས་ཉེས་སམ། འོན་ཏེ་ཆོས་མངོན་པ་གང་དག་མི་འདོན་པས་ཉེས་ཟེར་ན། གདོན་པར་བྱ་བ་ནི་ཡིན་མོད་ཀྱི་ཞེས་བྱ་བའོ། །ཅིའི་ཕྱིར་མ་བཏོན་ཞེ་ན། ཏིང་ངེ་འཛིན་དང་མཐུན་པའི་ཕྱིར་མ་བཏོན་ནོ། །ཇི་ལྟར་ན་དེ་དང་མཐུན་པ་ཉིད་ཡིན་ཞེ་ན། རྨུགས་པ་སྤྱོད་པ་ནི་ཏིང་ངེ་འཛིན་ཤིན་ཏུ་མྱུར་དུ་ཞེས་བྱ་བ་རྒྱ་ཆེར་འབྱུང་སྟེ། རྨུགས་པ་ནི་རྣམ་པར་གཡེང་བར་བྱེད་པ་མ་ཡིན་པའི་ཕྱིར། དེ་སྤྱོད་པ་ནི་ཏིང་ངེ་འཛིན་མྱུར་དུ་སྐྱེ་བར་བྱེད་ཀྱི། རྒོད་པ་སྤྱོད་པ་ནི་མ་ཡིན་ཏེ། རྣམ་པར་གཡེང་བར་བྱེད་པའི་ཕྱིར་རོ། །གྲག་གོ་ཞེས་བྱ་བའི་སྒྲ་ནི་མི་སྲིད་པའོ། །བྱིང་བ་དང་རྒོད་པ་གཉིས་ནི་ཏིང་ངེ་འཛིན་གྱི་གེགས་སུ་གྱུར་པའི་ཕྱིར་གེགས་ཁོ་ན་ཡིན་པ་ནི་མཐུན་པར་རིགས་པ་མ་ཡིན་ཏེ་མ་རིག་པས་ཉེ་བར་བཅོམ་པའི་ཕྱིར་རོ། །གཞན་དག་ནི་རྨུགས་པ་ཉོན་མོངས་པའི་ས་མང་པོ་པའི་ནང་དུ་འདོན་ཏོ། །གཞན་དག་ནི་རྨུགས་པ་ཉིད་མ་རིག་པའི་སྒྲས་བརྗོད་དོ་ཞེས་ཟེར་རོ། །མ་རིག་པ་ནི་མང་པོ་ཐམས་ཅད་དུ་སོང་བའི་ཕྱིར་ཉོན་མོངས་པའི་ས་མང་པོ་པ་ཡིན་ནོ། །གང་ཞིག་རྒོད་པ་མི་སྤྱོད་ལ་ཞེས་བྱ་བ་ལ་སོགས་པ་ལ། འདི་སྐད་བསྟན་པར་འགྱུར་ཏེ། གང་ཞིག་རྨུགས་པ་སྤྱོད་པ་དེ་ནི་གདོན་མི་ཟ་བར་རྒོད་པ་སྤྱོད་པ་ཡིན་ལ། གང་ཞིག་རྒོད་པ་སྤྱོད་པ་དེ་ཡང་གདོན་མི་ཟ་བར་རྨུགས་པ་སྤྱོད་པ་ཡིན་ནོ། །ཅིའི་ཕྱིར་ཞེ་ན། དེའི་ཕྱིར་འདི་དག་ནི་ནམ་དུ་ཡང་ལྷན་
ཅིག་སྤྱོད་པ་འདོར་བར་མི་འགྱུར་མོད་ཀྱི་ཞེས་བྱ་བ་སྨོས་ཏེ། ནམ་དུ་ཡང་ཞེས་བྱ་བ་ནི་གཞར་ཡང་ངོ༌། །ལྷན་ཅིག་སྤྱོད་པའི་ཆོས་ནི་ལྷན་ཅིག་སྤྱོད་པ་ཡིན་ལ། དེའི་དངོས་པོ་ནི་ལྷན་ཅིག་སྤྱོད་པ་ཉིད་དོ། །འོན་ཀྱང་ཞེས་བྱ་བ་འབྱུང་སྟེ། གལ་ཏེ་ཡང་དེ་ལྟ་ཡིན་མོད་ཀྱི། དེ་ལྟ་ན་ཡང་རྨུགས་པ་དང་རྒོད་པ་གང་ཞིག་གང་ལ་མཐུའི་སྒོ་ནས་ཤས་ཆེའི། ཚད་ཀྱི་སྒོ་ནས་མ་ཡིན་པ་དེ་ནི་དེ་སྤྱོད་པར་ཤེས་པར་བྱ་སྟེ། དེའི་ཕྱིར་ཉོན་མོངས་པའི་ས་ཆེན་པོ་པ་ན་དྲུག་ཁོ་ནར་གྲུབ་ཀྱི་བཅུར་ནི་མ་ཡིན་ནོ། །ཡང་ཅིའི་ཕྱིར་གཞན་དག་ཀྱང་ཡོད་བཞིན་དུ་འདི་དག་ཁོ་ན་ཉོན་མོངས་པའི་ས་མང་པོར་བརྗོད་ཅེ་ན། དེ་དག་ཀྱང་ནི་རྟག་ཏུ་ཉོན་མོངས་པ་ཅན་གྱི་སེམས་ལ་འབྱུང་གི་གཞན་དུ་མ་ཡིན་པས་ཉོན་མོངས་པའི་ས་ཆེན་པོ་པར་བརྗོད་དོ། །མི་དགེ་ལ་ནི་ཁྲེལ་མེད་དང༌། །ངོ་ཚ་མེད་པའོ་ཞེས་བྱ་བ་ལ་ནི། ཞེས་བྱ་བའི་སྒྲ་ནི་ངེས་པར་གཟུང་བའི་དོན་ཏོ། །འདི་དག་ལ་ཉོན་མོངས་པ་ཆུང་ངུའི་ས་ཡོད་པས་ཞེས་བྱ་བ་རྒྱ་ཆེར་འབྱུང་བ་ལ། ཆུང་ཞེས་བྱ་བ་ནི་ཉུང་དུ་སྟེ། དེ་དག་ནི་ཉོན་མོངས་པ་ཅན་གྱི་སེམས་ཐམས་ཅད་ལ་དམིགས་ལ། གང་དུ་དམིགས་པ་དེར་ཡང་རེ་རེ་ནས་དམིགས་ཀྱི་ཚོགས་པར་ནི་མ་ཡིན་ནོ། །མ་རིག་པ་ཙམ་དང་ཞེས་བྱ་བ་ལ། ཙམ་གྱི་སྒྲ་ནི་འདོད་ཆགས་ལ་སོགས་པ་བསལ་བར་བྱ་བའི་ཕྱིར་ཏེ། ཁྲོ་བ་ལ་སོགས་པ་རྣམས་ནི་རང་དབང་བ་ཡིན་པའི་ཕྱིར་འདོད་ཆགས་ལ་སོགས་པ་དང་མཚུངས་པར་ལྡན་པ་མ་ཡིན་ནོ། །བསྒོམ་པས་སྤང་བར་བྱ་བ་དང་ཞེས་བྱ་བ་ནི་མཐོང་བས་སྤང་བར་བྱ་བ་མ་ཡིན་པ་སྟེ། ཁྲོ་བ་ལ་སོགས་པ་རྣམས་བསྒོམ་པས་སྤང་བར་བྱ་བ་ཡིན་པའི་ཕྱིར་རོ། །ཡིད་ཀྱི་ས་པ་ཁོ་ན་དང་ཞེས་བྱ་བ་ནི་མིག་ལ་སོགས་པའི་རྣམ་པར་ཤེས་པ་དང་མཚུངས་པར་ལྡན་པ་མ་ཡིན་ཏེ། ཁྲོ་བ་ལ་སོགས་པ་རྣམས་ཡིད་ཀྱི་ས་པ་ཡིན་པའི་ཕྱིར། དང་གི་སྒྲ་ནི་བསྡུ་བའི་དོན་ཏོ། །འདི་སྐད་བསྟན་པར་འགྱུར་ཏེ། བསྒོམ་པས་སྤང་བར་བྱ་བའི་མ་རིག་པ་ཙམ་དང་ལྷན་ཅིག་སྐྱེས་པའི་ཡིད་ཀྱི་རྣམ་པར་ཤེས་པ་ཁོ་ན་དང་མཚུངས་པར་ལྡན་པའི་ཕྱིར་ཉོན་མོངས་པ་ཆུང་ངུའི་བ་དག་ཅེས་བྱའོ། །འདི་དག་ནི་ཉེ་
བའི་ཉོན་མོངས་པ་དག་གི་ནང་ནས་ཞེས་བྱ་བ་དེ་ལ། གནོད་སེམས་དང་རྣམ་པར་འཚེ་བ་མ་གཏོགས་པ་སེམས་ཅན་རྣམས་ལ་དུས་རིང་དུ་བདེ་བར་བྱེད་པའོ། །ཁྲོ་བ་ནི་ཀུན་ནས་མནར་སེམས་ཀྱི་དངོས་པོ་མང་དུ་འཛིན་བར་བྱེད་པའོ། །ཁོ་ན་དུ་འཛིན་པ་ནི་སེམས་གྱ་གྱུ་བའོ། །གཡོ་ནི་གང་གིས་ཡང་དག་པར་ཇི་ལྟ་བ་བཞིན་གསལ་བར་མི་བྱེད་པ་སྟེ། རྣམ་པར་གཡེང་བས་ཡོངས་སུ་མི་གསལ་བར་སྒྲུབ་པའོ། །ཕྲག་དོག་ནི་ཕ་རོལ་དྲན་པན་སེམས་རྩུབ་པའོ། །འཚེག་པ་ནི་ཁན་མ་ཐོ་བ་དང་བཅས་པའི་དངོས་པོ་ལ་དལ་དུ་འཛིན་པ་སྟེ། གང་གི་རིགས་པར་གསོལ་པ་མི་འཛིན་པའོ། །འཆབ་པ་ནི་ཁ་ན་མཐོ་བ་སྦེད་པའོ། །སེར་སྣ་ནི་ཆོས་དང་ཟང་ཟིང་དང་དགེ་བ་སྦྱིན་པ་ལ་སེམས་མཆོག་ཏུ་འགལ་བའོ། །སྒྱུ་ནི་གཞན་བསླུ་བའོ། །རྒྱགས་པ་ནི་རང་གི་ཆོས་ལ་ཆགས་པ་སྟེ། སྲེད་པའི་སེམས་ཡོངས་སུ་གཏུགས་པའོ་ཞེས་འཆད་པར་འགྱུར་རོ། །རྣམ་པར་འཚེ་བ་ནི་གང་གིས་མཚོན་ཆ་དང་ཚིག་རྩུབ་ལ་སོགས་པ་རྣམས་ཀྱིས་གཞན་ལ་རྣམ་པར་མཐོ་འཚམ་པ་སྟེ་འཚེ་བ་ཡང་ངོ༌། །ཡང་གི་སྒྲ་ནི་དབང་པོ་གཞན་ཀུན་ཏུ་རྩོམ་པ་ལ་སོགས་པ་ཉེ་བར་སྡུད་པའི་དོན་ཏོ། །སེམས་ལས་བྱུང་བ་རྣམ་པ་ལྔ་པོ་དག་བཤད་ཟིན་ཏོ་ཞེས་བྱ་བ་ལ། གང་ཞིག་དགེ་བ་དང་མི་དགེ་བ་དང་ལུང་དུ་མ་བསྟན་པ་སེམས་ཐམས་ཅད་ལ་འབྱུང་བ་དེ་ནི་ས་མང་པོ་པ་དང༌། དགེ་བ་ཁོ་ན་ལ་འབྱུང་བ་དེ་དགེ་བའི་ས་མང་པོ་པ་དང༌། ཉོན་མོངས་ཅན་ཁོ་ན་ལ་འབྱུང་བ་དེ་ཉོན་མོངས་པའི་ས་མང་པོ་དང། མི་དགེ་བ་ཁོ་ན་ལ་འབྱུང་བ་དེ་མི་དགེ་བའི་ས་མང་པོ་པ་དང༌། གང་ཞིག་ཉོན་མོངས་པ་ཆུང་ངུའི་སེམས་ལ་འབྱུང་བ་དེ་ཉོན་མོངས་པ་ཆུང་ངུའི་མང་པོ་པ་ཞེས་བྱའོ། །དེ་ཐམས་ཅད་སེམས་ལས་བྱུང་བའི་རྗེས་སུ་ཡོད་པར་རྟོགས་པར་བྱའོ། །སློབ་དཔོན་འདུས་བཟང་ན་རེ་ཅིག་ཅར་དོན་དུ་མའི་རྣམ་པར་རྟོགས་སོ་ཞེས་ཟེར་རོ། །ཆོས་གཞན་རྗེས་སུ་ཞུགས་ན་རྒྱུན་རྣམས་ལ་ཡང་རམ་པར་འགྱུར་བ་མཐོང་སྟེ། འབྲུ་མར་བསྣན་པ་དང་དྲི་མ་དང་ཆུ་དང་རླུང་ཞུགས་ན། མར་མེའི་རྒྱུན་ལ་ཅིག་ཅར་ཡོངས་སུ་གསལ་བ་དང༌། ཡོངས་སུ་མི་གསལ་བ་དང༌། སྒྲ་དང༌།
གཡོ་བ་ལ་སོགས་པ་མཐོང་བའི་ཕྱིར་རོ། །སེམས་ལས་བྱུང་བ་རྣམ་པ་ལྔ་པོ་དེ་དག་འབའ་ཞིག་ཁོ་ནར་མ་ཟད་ཀྱི། འོ་ན་ཅི་ཞེ་ན། མ་ངེས་པ་གཞན་དག་ཀྱང་ཡོད་དོ། །དེ་དག་གང་ཞེ་ན། དེའི་ཕྱིར་རྟོག་པ་དང་དཔྱོད་པ་དང༌། འགྱོད་པ་དང༌། གཉིད་ལ་སོགས་པ་ཞེས་བྱ་བ་སྨོས་སོ། །སོགས་པ་ཞེས་བྱ་བའི་སྒྲས་ནི་འདོད་ཆགས་དང་ཁོང་ཁྲོ་དང་ང་རྒྱལ་དང་ཐེ་ཚོམ་དག་གཟུང་ངོ༌། །འདི་དག་ནི་གདོན་མི་ཟ་བར་ངེས་པར་ལྷན་ཅིག་འབྱུང་བ་མ་ཡིན་ནོ། །ད་ནི་ཐམས་ཅད་ཀྱི་སེམས་གང་ལ་དུ་ཞིག་གདོན་མི་ཟ་བར་འབྱུང་བ་རྣམ་པར་དབྱེ་བར་བྱའོ། །སེམས་ནི་རྣམ་པ་ལྔ་སྟེ་ཞེས་བྱ་བ་ལ། ཇི་ལྟར་ཞེ་ན་དགེ་བ་ནི་རྣམ་པ་གཅིག་ཁོ་ན་དང༌། མི་དགེ་བ་རྣམ་པ་གཉིས་ཏེ། གང་ལ་མ་རིག་པ་འབའ་ཞིག་ཡོད་པ་མ་འདྲེས་པ་དང༌། འདོད་ཆགས་ལ་སོགས་པ་ཉོན་མོངས་པ་གཞན་དང་མཚུངས་པར་ལྡན་པ་དང༌། ལུང་དུ་མ་བསྟན་པ་དང་རྣམ་པ་གཉིས་ཏེ་བསྒྲིབས་ལ་ལུང་དུ་མ་བསྟན་པ་འཇིག་ཚོགས་ལ་ལྟ་བ་དང་མཐར་འཛིན་པར་ལྟ་བ་དང་མཚུངས་པར་ལྡན་པ་དང༌། མ་བསྒྲིབས་ལ་ལུང་དུ་མ་བསྟན་པ་རྣམ་པར་སྨིན་པ་ལས་སྐྱེས་པ་དང༌། སྤྱོད་ལམ་པ་དང༌། བཟོའི་གནས་པ་དང། སྤྲུལ་པ་རྣམས་སོ། །དེ་ལྟར་ཉི་ཤུ་རྩ་གཉིས་འབྱུང་གཉིས་འབྱུང་གི །ཉི་ཤུ་རྩ་གཉིས་ཁོ་ནའོ་ཞེས་ངེས་པར་ནི་མིག་གཟུང་སྟེ། ལ་ལ་དག་ཏུ་འགྱོད་པ་བསྣན། །ཞེས་འབྱུང་བའི་ཕྱིར་རོ། །བརྩོན་འགྲུས་དང་བཏང་སྙོམས་དག་ཅིག་ཅར་མི་སྲིད་དེ། འཇུག་པ་འགལ་བའི་ཕྱིར་ཏེ་འགྲོ་བ་དང་སྡོད་བཞིན་ནོ། །རྩོལ་བ་དང་བཏང་སྙོམས་དག་ཅིག་ཅར་མ་ཡིན་ཏེ་མདོ་ལས་ཀྱང་འདི་དག་ཅིག་ཅར་འབྱུང་བ་བཀག་གོ །ལ་ལ་དག་ཏུ་འགྱོད་པ་བསྣན། །མ་ངེས་པའི་ས་མང་པོ་པའི་ཆོས་ནི་གཉིས་ཏེ། འགྱོད་པ་དང་གཉིད་དོ། །གང་གི་ཕྱིར་འདི་གཉིས་ནི་རྣམ་པར་ཤེས་པའི་ཚོགས་དྲུག་པ་མ་ཡིན་ལ། ཁམས་གསུམ་པ་ཡང་མ་ཡིན་ཞིང་གཅིག་ཏུ་ཉོན་མོངས་པ་ཅན་ཡང་མ་ཡིན་ལ། དེའི་ཕྱིར་དེ་དག་དགེ་བའི་སེམས་གང་ལ་འགྱོད་པའི་གོ་སྐབས་ཡོད་པ་དེར་དེ་བསྣན་པས་ཉི་ཤུ་རྩ་གསུམ་དུ་འགྱུར་རོ། །ངན་པར་བྱས་པའི་ངོ་བོ་ནི་འགྱོད་
པའོ་ཞེས་བྱ་བ་ལ། བྱས་པ་ཉིད་དང་ནི་དོན་འབྲེལ་གྱི་སེམས་ཀྱི་ཆོས་ནི་མ་ཡིན་ནོ། །དེ་ཉིད་ཀྱི་ཕྱིར་འདིར་ནི་ཞེས་བྱ་བ་རྒྱ་ཆེར་འབྱུང་ངོ༌། །ཅི་འགྱོད་པའི་དམིགས་པ་ཐམས་ཅད་ཉིད་འགྱོད་པ་ཡིན་ནམ་འོན་ཏེ་མ་ཡིན་ཞེ་ན། ཡིད་ལ་གཅགས་པའོ་ཞེས་སོ། །ཇི་ལྟར་ན་འགྱོད་པ་ལ་དམིགས་པའི་ཡིད་ལ་གཅགས་པ་ལ་འགྱོད་པ་ཞེས་བྱ་བ་སྟེ་དེ་ནི་ངན་པར་བྱས་པའི་ངོ་བོ་མ་ཡིན་ནོ་ཞེ་ན། དམིགས་པར་བྱེད་པ་ལ་དམིགས་པ་ཉེ་བར་བཏགས་པའི་ཕྱིར་རོ། །དཔེར་ན་སྟོང་པ་ཉིད་ལ་དམིགས་པ་ཞེས་རྒྱ་ཆེར་འབྱུང་སྟེ། སྟོང་པ་ཉིད་ནི་འདུ་བྱེད་རྣམས་ནང་གི་བྱེད་པའི་སྐྱེས་བུ་དང་བྲལ་བ་ཡིན་ལ། དེ་ལ་དམིགས་པའི་ཏིང་ངེ་འཛིན་ལ་རྣམ་པར་ཐར་པའི་སྒོ་སྟོང་པ་ཉིད་ཅེས་བྱ་སྟེ། མི་སྡུག་པ་ནི་རྣམ་པར་བ་མས་པ་དང་རྣམ་པར་བསྔོས་པ་ལ་སོགས་པའི་དངོས་པོས་བསྡུས་པ་ཡིན་ལ། དེ་ལ་དམིགས་པའི་མ་ཆགས་པ་ལ་མི་སྡུག་པ་ཞེས་བྱ་བ་བཞིན་ནོ། །ཡང་ན་གནས་པའི་གནས་ཀྱིས་བཏགས་པས་ངན་པར་བྱས་པ་ལ་དམིགས་པའི་ཡིད་ལ་གཅགས་པ་ལ་འགྱོད་པ་ཞེས་བྱའོ། །གནས་པ་ལ་གནས་ཀྱིས་བཏགས་པ་གར་མཐོང་ཞེ་ན། འཇིག་རྟེན་ན་ཡང་ཞེས་བྱ་བ་རྒྱ་ཆེར་སྨོས་ཏེ། བསྟན་བཅོས་ལས་ཡིན་པ་འབའ་ཞིག་ཏུ་མ་ཟད་ཀྱི་ཞེས་བྱ་བར་དགོངས་པའོ། །འགྱོད་པ་ཡང་ཡིད་ལ་གཅགས་པའི་གནས་སུ་གྱུར་པ་ཡིན་ཏེ་དེ་ལ་བརྟེན་ནས་འབྱུང་བའི་ཕྱིར་རོ། །དེའི་ཕྱིར་འགྱོད་པ་ཞེས་བྱ་བ་འགྱོད་པ་གནས་ཀྱིས་གནས་པ་ཡིད་ལ་གཅགས་པ་ཕྱིས་གདུང་བའི་མཚན་ཉིད་ཅན་རྟོན་པར་བྱེད་དོ། །ཡང་ན་འདི་ནི་འབྲས་བུ་ལ་རྒྱུ་བཏགས་པ་ཡིན་ཏེ་ཞེས་བྱ་བ་ལ། རྒྱུ་ནི་འགྱོད་པ་དང་འབྲས་བུ་ནི་ཡིད་ལ་གཅགས་པའོ། །རྒྱུ་ལ་ཉེ་བར་བཏགས་པ་ལས་འགྱོད་པ་ཞེས་བྱ་བ་ནི་མ་ཡིན་ནོ། །དེ་ཉིད་ལ་དཔེ་ནི་དཔེར་ན་རེག་པའི་སྐྱེ་མཆེད་དྲུག་པོ་འདི་དག་ནི་ཞེས་བྱ་བ་རྒྱ་ཆེར་འབྱུང་བའོ། །མིག་ལ་སོགས་པ་རིག་པའི་སྐྱེ་མཆེད་རྣམས་ནི་སྔོན་གྱི་ལས་མ་ཡིན་ཏེ་འོ་ན་ཅི་ཞེ་ན། སྔོན་གྱི་ལས་ཀྱི་འབྲས་བུ་ཡིན་པའི་ཕྱིར་སྔོན་གྱི་ལས་ཡིན་ནོ་ཞེས་བཤད་དོ། །ཁོ་ན་གང་མ་བྱས་པ་ལ་དམིགས་པ་ཞེས་བྱ་བ་ལ་མ་བྱས་པའི་
ངོ་བོ་ནི་འགྱོད་པ་ཡིན་ན། མ་བྱས་པ་ནི་ངན་པར་བྱས་པ་མ་ཡིན་པས་དེའི་ངོ་བོ་འགྱོད་པར་མི་རུང་སྟེ། དེ་ལ་དམིགས་པའི་ཡིད་ལ་གཅགས་མི་དགོས་པའི་གནས་ཀྱི་རྒྱུ་ལ་ཉེ་བར་བཏགས་པ་ལས་འགྱོད་པར་བསྟན་པ་མི་རུང་ངོ་ཞེས་བྱ་བ་ནི་འདྲི་བའི་བསམ་པའོ། །མ་བྱས་པ་ལ་ཡང་བྱས་པ་ཞེས་བྱ་བ་ཡོད་དེ་ཞེས་བྱ་བ་རྒྱ་ཆེར་འབྱུང་སྟེ། དེ་ཡང་གང་དགེ་བ་མ་བྱས་པ་དང་མི་དགེ་བ་བྱས་པ་ལ་ཡང་བརྗོད་དེ། དེ་ལ་ཡང་བྱས་པ་ཞེས་བྱ་བའི་སྒྲའི་བརྗོད་བྱར་དམིགས་པའི་ཕྱིར། ངན་པ་བྱས་པར་བརྗོད་དོ། །འགྱོད་པ་དགེ་བ་ནི་ངན་པར་བྱས་པ་ལ་དམིགས་པ་ངན་པར་བྱས་པ་ལ་འགྱོད་པའོ། །བཟློག་པ་ནི་འགྱོད་པ་མི་དགེ་བ་ཡིན་ཏེ་ཞེས་བྱ་བ་ནི། གང་ཞིག་མི་དགེ་བ་མ་བྱས་པ་དང་དགེ་བ་བྱས་པ་དེ་ལའོ། དེ་གཉི་ག་ཡང་ཞེས་བྱ་བ་ནི་དགེ་བ་དང་མི་དགེ་བའོ། །འགྱོད་པའོ། །གཉི་ག་ལ་བརྟེན་པ་ཡིན་ནོ་ཞེས་བྱ་བ་ནི་ཇི་སྐད་བཤད་པའི་ཚུལ་དུ་དགེ་བ་དང་མི་དགེ་བ་ལ་བརྟེན་པའོ། །ལྟ་དང་ལྡན་པ་ཞེས་བྱ་བ་ལ། དང་ཞེས་བྱ་བའི་སྒྲ་ནི་ངེས་པར་གཟུང་བའི་དོན་ཏོ། །ལྟ་དང་ལྡན་པ་ཉི་ཤུ་ཉིད་འགྱོད་པ་མ་འདྲེས་པ་ལ་ཡང་གོ་སྐབས་ཡོད་དོ་ཞེས་མཚོན་པར་བྱེད་པའོ། །འགྱོད་པ་དགེ་བ་ཉིད་ལ་ནི་ཕྲ་རྒྱས་གཞན་དང་མཚུངས་པར་ལྡན་པ་མེད་པ་མ་ཡིན་ནོ། །འདོད་ཆགས་དང་ང་རྒྱལ་དག་ནི་དགའ་བའི་རྣམ་པས་འཇུག་པ་དག་གོ་ཞེས་བྱ་བ་ནི་དེ་དག་ནི་གསལ་བ་དང་ཁ་ཕྱིར་ཕྱོགས་པས་འཇུག་པའོ། །རགས་པ་ཡང་ཞེས་བྱ་བ་སྟེ། དེ་དག་དང་ཐེ་ཚོམ་ཡང་སྟེ། ངེས་པ་དང་མ་ངེས་པ་ལ་འགྱོད་པའོ། །དེ་དང་ལྟ་བ་དང་དགའ་བའི་རྣམ་པས་འཇུག་པ་རྣོ་བ་ཡང་ངོ་ཞེས་བྱ་བའི་དོན་ཏོ། །འགྱོད་པ་ནི་དེ་ལྟ་བུ་མ་ཡིན་ཏེ། དེ་ནི་ལེགས་པར་སྤྱད་པ་དང་ཉེས་པར་སྤྱད་པའི་གནས་ལ་འཇུག་གོ །ལྟ་བ་རྣམས་དང་ཡང་དེ་ལྟ་བུ་མ་ཡིན་ཏེ། དེ་རྣམས་དང་མ་ཡིན་པའོ། །ཞན་པའི་རྣམ་པས་འཇུག་པ་ནི་ལོག་པར་ལྟ་བ་དང་མཚུངས་པར་ལྡན་པ་མ་ཡིན་ཏེ། དེའི་ཕྱིར་རྒྱུ་གཉིས་ཁོ་ན་ངེས་པར་གཟུང་རིགས་བ་ལས་སོ། །དེ་ཉིད་ཀྱི་ཕྱིར་འགྱོད་པ་མི་དགེ་བ་གང་ཡིན་པ་དེ་ནི་མ་འདྲེས་པ་ཉིད་ཀྱིས་ཚོགས་སུ་ངེས་
སོ་ཞེས་སློབ་དཔོན་འདུས་བཟང་ཟེར་རོ། །ཀུན་ལ་མི་འགལ་བར་གྲུབ་པའི་ཕྱིར་ལྟ་བ་དང་ལྡན་པ་ལ་ཉི་ཤུ་རྩ་གཅིག་ཏུ་འགྱུར་ཏེ། དེའི་ཕྱིར་དེ་ཉིད་ཁོ་ན་ངེས་པར་གཟུང་རིགས་པ་མ་ཡིན་ནམ་ཞེ་ན། གང་ཞིག་གཉིད་དང་མཚུངས་པར་ལྡན་པ་ཉེས་པར་གཟུང་བ་ན། འགྱོད་པ་དང་མཚུངས་པར་ལྡན་པ་མ་འདྲེས་པ་འདི་ཉིད་ཀྱང་ངེས་པར་གཟུང་བ་མི་འགལ་ཏེ། འདོད་ཆགས་ལ་སོགས་པ་རྣམས་ཀྱང་མ་འདྲེས་པ་ཁོ་ན་དང་མཚུངས་པར་ལྡན་པ་ཉིད་དོ་སྙམ་དུ་འདི་ལྟར་བསམ་པའོ། །དེའི་ཕྱིར་དང་གི་སྒྲ་ནི་འདིར་ཀུན་སྡུད་པའི་དོན་ཉིད་མཚོན་པར་བྱེད་དོ། །ཤེས་རབ་ཀྱི་ཁྱད་པར་གཟུང་བ་ནི་ལྟ་བ་མ་ཡིན་པའི་ཤེས་རབ་གསལ་བར་བྱ་བའི་ཕྱིར་རོ། །འཇིག་ཚོགས་དང་མཐར་འཛིན་པར་ལྟ་བ་ལ་ཐལ་བར་མི་འགྱུར་རོ། །མི་དགེ་བའི་རྣམ་པ་ལས་ཉོན་མོངས་བཞི་དང་ཞེས་བྱ་བ་ལ་སོགས་པ་ལ། ཉི་ཤུ་རྩ་གཅིག་འབྱུང་བ་ཁོ་ན་ཡིན་གྱི། ཉི་ཤུ་རྩ་གཅིག་ཁོ་ན་ནི་མ་ཡིན་ཏེ། གཉིད་ནི་ཀུན་ལ་མི་འགལ་བའི་ཕྱིར་རོ། །ཉོན་མོངས་པ་བཞི་དང་མཚུངས་པར་ལྡན་པ་དང་ཁྲོ་བ་ལ་སོགས་པ་དང་མཚུངས་པར་ལྡན་པ་དེ་ལ་ནི་མ་འདྲེས་པར་བཤད་པ་ཉི་ཤུ་དང༌། ཉོན་མོངས་པ་དང་ཉེ་བའི་ཉོན་མོངས་པ་དང་འགྱོད་པ་ལ་སོགས་པ་ཇི་སྐད་བཤད་པ་རྣམས་ལས་གང་རུང་བའོ། །བསྒྲིབས་ལ་བཅོ་བརྒྱད་ཅེས་བྱ་བ་ལ། འདོད་པའི་ཁམས་ན་འཇིག་ཚོགས་ལ་ལྟ་བ་དང༌། མཐར་འཛིན་པར་ལྟ་བ་དང་མཚུངས་པར་ལྡན་པའི་སེམས་ཏེ། དེ་ལ་ནི་གདོན་མི་ཟ་བར་བཅོ་བརྒྱད་འབྱུང་གི །བཅོ་བརྒྱད་ཁོ་ནའོ་ཞེས་ངེས་པར་ནི་མི་གཟུང་སྟེ། གཉིད་ནི་ཀུན་ལ་མི་འགལ་བའི་ཕྱིར་རོ། །ལུང་མ་བསྟན་གཞན་ལ་བཅུ་གཉིས་དག་ཏུ་འདོད་ཅེས་བྱ་བ་ལ། འདིར་ཡང་གཉིད་མི་འགལ་བའི་ཕྱིར་སྔ་མ་བཞིན་དུ་ངེས་པར་གཟུང་ངོ༌། །ཉི་འོག་པ་དག་ནི་ཞེས་རྒྱ་ཆེར་འབྱུང་བ་ལ། གང་དག་ཡིད་མི་བདེ་བ་ཡང་ཡིད་བདེ་བ་དང་འདྲ་བར་ལུང་དུ་མ་བསྟན་པར་འདོད་པའོ། །དེ་ལ་ལུང་དུ་མ་བསྟན་པ་ཡིན་པའི་ཕྱིར་ཡིད་ལ་གཅགས་བ་གང་ཡིན་པ་དེ་འགྱོད་པ་ལུང་དུ་མ་བསྟན་ཏེ། ངས་མ་ཞུ་བར་ཅིའི་ཕྱིར་ཐོས་ཞེས་བྱ་བའམ་རྩིག་པ་
དེ་ཅི་སྟེ་མ་བྲལ་སྙམ་དུ་ཡིད་ལ་གཅགས་པ་དེ་ཅི་ལྟར་ལུང་མ་བསྟན་དུ་མི་འགྱུར་སྙམ་པའོ། །ཁ་ཆེ་བ་རྣམས་ན་རེ་འགྱོད་པ་ལུང་དུ་མ་བསྟན་པ་མེད་དོ། ཡིད་མི་བདེ་བ་དང་རྗེས་སུ་འབྲེལ་པའི་ཕྱིར་དང༌། འདོད་ཆགས་དང་བྲལ་བ་རྣམས་ལ་མེད་པའི་ཕྱིར་ཞེས་ཟེར་རོ། །མ་བསྒྲིབས་ལ་ཞེས་གོང་དུ་སྨོས་པ་ལ། རྣམ་པར་སྨིན་པ་ལས་སྐྱེས་པ་དང༌། སྤྱོད་ལམ་པ་དང་བཟོའི་གནས་པ་དང༌། སྤྲུལ་པའི་སེམས་ཀྱི་བདག་ཉིད་ནི་ལུང་དུ་མ་བསྟན་པའོ། །བཅུ་གསུམ་འབྱུང་བར་འགྱུར་རོ་ཞེས་བྱ་བ་ནི་ས་མང་པོ་པ་བཅུ་དང་རྟོག་པ་དང་དཔྱོད་པ་དང་འགྱོད་པ་ལུང་དུ་མ་བསྟན་པ་དེ་ཉིད་དོ། །གཉིད་ནི་ཀུན་ལ་མི་འགལ་ཕྱིར། །ཞེས་བྱ་བ་རྒྱ་ཆེར་འབྱུང་སྟེ། གཉིད་ནི་དགེ་བ་དང་མི་དགེ་བ་དང་ལུང་དུ་མ་བསྟན་པ་ཡིན་པའི་ཕྱིར་སེམས་ཐམས་ཅད་དང་མི་འགལ་ཏེ། གཉིད་ལོག་པ་ལ་ཡང་དགེ་བ་དང་མི་དགེ་བ་དང་ལུང་དུ་མ་བསྟན་པའི་སེམས་སྲིད་པའི་ཕྱིར་རོ། །དེའི་ཕྱིར་གཉིད་ནི་དེ་དག་དང་མི་འགལ་ལོ། །དེའི་ཕྱིར་སེམས་གང་ལ་གཉིད་ཡོད་པ་དེ་ལ་དེ་ཉིད་བསྣན་ནོ། གང་ལ་ཉི་ཤུ་རྩ་གཉིས་ཞེས་བྱ་བ་འབྱུང་སྟེ། གཉིད་ནི་ཀུན་ལ་མི་འགལ་བའི་ཕྱིར་ཇི་སྐད་བཤད་པའི་རྗེས་སུ་འབྲངས་ཏེ་རྒྱ་ཆེར་བརྗོད་པར་བྱའོ། །བཟོའི་གནས་ལ་སོགས་པ་ནི་ལུང་མ་བསྟན་དུ་རིགས་པ་ཉིད་དེ། སེམས་མངོན་པར་སྤྲོ་བ་ནི་བརྩོན་འགྲུས་ཏེ་ཉོན་མོངས་པ་ཅན་མ་ཡིན་པའི་ཕྱིར་ལེ་ལོ་མ་ཡིན་ནོ། །དེ་ལ་འགྱོད་གཉིད་མི་དགེ་རྣམས། །བསམ་གཏན་དང་པོ་དག་ན་མེད། །ཅེས་བྱ་བ་ལ་བསམ་གཏན་དང་པོ་ན་སེམས་དང་སེམས་ལས་བྱུང་བའི་ངེས་པ་ཇི་སྐད་བཤད་བདེ་ལས་འགྱོད་པ་ལ་སོགས་པ་རྣམས་མེད་དེ། འགྱོད་པ་ནི་ཡིད་མི་བདེ་བ་དང་མཚུངས་པར་ལྡན་ན་དེ་དག་ནི་རྒྱུད་ཞི་གནས་ཀྱིས་བརླན་པ་ཡིན་པས་དེ་ན་ཡིད་མི་བདེ་བ་མེད་དོ། །གཉིད་ནི་སེམས་མངོན་པར་སྡུད་པའི་མཚན་ཉིད་ཅན་ཡིན་ནོ། །དེ་དག་ནི་སེམས་སྡུད་པ་ནི་ཏིང་ངེ་འཛིན་ཁོ་ན་ལ་ཉེ་བར་གནས་པར་འགྱུར་བ་ས་དེ་ན་གཉིད་མེད་དོ། །གང་ཡང་ཅུང་ཟད་མི་དགེ་བ། །ཞེས་བྱ་བ་རྒྱས་པར་འབྱུང་ངོ༌། །གཡོ་དང༌། སྒྱུ་
དང་རྒྱགས་པ་མ་གཏོགས་པ་ཁྲོ་བ་ལ་སོགས་པ་དང་ཞེས་བྱ་བ་ནི། ཁྲོ་བ་དང༌། ཁོན་དུ་འཛིན་པ་དང༌། ཕྲག་དོག་དང༌། འཚིག་པ་དང༌། འཆབ་པ་དང༌། སེར་སྣ་དང༌། རྣམ་པར་འཚེ་བ་རྣམས་ཐམས་ཅད་དུ་མེད་དོ་ཞེས་བྱ་བ་སྐབས་དང་སྦྱར་རོ། །གཞན་ཐམས་ཅད་ནི་དེ་དང་འདྲའོ། །ཇི་ལྟར་བྱས་ནས་ཤེ་ན། བསམ་གཏན་དང་པོའི་སེམས་ནི་རྣམ་པ་བཞི་སྟེ། དགེ་བ་དང་བསྒྲིབས་ལ་ལུང་དུ་མ་བསྟན་པའོ། །དེ་ནི་རྣམ་པ་གཉིས་ཏེ། མ་འདྲེས་པ་དང༌། ཉོན་མོངས་པ་གཞན་དང་མཚུངས་པར་ལྡན་པ་དང༌། མ་བསྒྲིབས་ལ་ལུང་དུ་མ་བསྟན་པའོ། །དེ་ལ་རེ་ཞིག་དགེ་བའི་སེམས་ལ་ནི་སེམས་ལས་བྱུང་བ་ཉི་ཤུ་རྩ་གཉིས་འབྱུང་སྟེ། ས་མང་པོ་པ་དང་བཅུ་དང༌། དགེ་བའི་ས་མང་པོ་པ་བཅུ་དང༌། རྟོག་པ་དང༌། དཔྱོད་པའོ། །མ་འདྲེས་པ་ལ་ནི་བཅོ་བརྒྱད་དེ། ས་མང་པོ་པ་བཅུ་དང༌། ཉོན་མོངས་པའི་ས་མང་པོ་པ་དྲུག་དང༌། རྟོག་པ་དང༌། དཔྱོད་པའོ། །ལྟ་བ་ལྡན་པ་ལ་ཡང་དེ་བཞིན་ནོ། །དེ་འདོད་ཆགས་དང༌། ང་རྒྱལ་དང༌། ཐེ་ཚོམ་དང་མཚུངས་པར་ལྡན་པ་ལ་ནི་བཅུ་དགུ་སྟེ། ཉོན་མོངས་པ་དེ་དང་མ་འདྲེས་པར་བཤད་པ་བཅོ་བརྒྱད་དོ། །གཡོ་དང༌། སྒྱུ་དང༌། རྒྱགས་པ་དང་མཚུངས་པར་ལྡན་བའི་སེམས་ལ་ཡང་བཅུ་དགུ་ཁོ་ན་སྟེ། གཡོ་ལ་སོགས་པ་རྣམས་རང་དབང་མ་ཡིན་པའི་ཕྱིར་རོ། །མ་བསྒྲིབས་ལ་ལུང་དུ་མ་བསྟན་པ་ལ་ཡང་ཅི་རིགས་པར་རྣམ་པར་སྨིན་པ་ལས་སྐྱེས་པ་ལ་སོགས་བ་རྣམས་ལས་གང་ཡང་རུང་བ་ཞིག་ལ་བཅུ་གཉིས་འབྱུང་སྟེ། ས་མང་པོ་པ་བཅུ་དང༌། རྟོག་པ་དང་དཔྱོད་པའོ། །རྟོག་པའང་བསམ་གཏན་ཁྱད་པར་ཅན། །ཞེས་བྱ་བ་ལ། འདི་ཞེས་བྱ་བའི་སྒྲས་ནི་འགྱོད་པ་དང༌། གཉིད་དང་མི་དགེ་བ་རྣམས་ཀྱང་མེད་དོ། །ལྷག་མ་ནི་དེ་དང་འདྲའོ་ཞེས་བྱ་བ་ལ། དགེ་བའི་སེམས་ལ་ནི་སྔ་མ་བཞིན་དུ་རྟོགས་པ་མ་གཏོགས་སེམས་ལས་བྱུང་བ་ཉི་ཤུ་རྩ་གཅིག་འབྱུང་སྟེ། མ་འདྲེས་པ་དང༌། ལྟ་བ་དང་མཚུངས་པར་ལྡན་པ་ནི་རྟོག་པ་ཉིད་མ་གཏོགས་པ་བཅུ་བདུན་ནོ། །འདོད་ཆགས་ལ་སོགས་པ་དང་མཚུངས་པར་
ལྡན་པ་ལ་བཅོ་བརྒྱད་འབྱུང་སྟེ། སྔར་བཤད་པ་བཅུ་བདུན་དང༌། འདོད་ཆགས་ལ་སོགས་པ་རྣམས་ལས་གང་ཡང་རུང་བའོ། །མ་བསྒྲིབས་ལ་ལུང་དུ་མ་བསྟན་པ་ལ་ནི་བཅུ་གཅིག་སྟེ། ས་མང་པོ་པ་བཅུ་དང་དཔྱོད་པའོ། །དེ་ཡི་གོང་ན་དཔྱོད་པ་ཡང༌། །ཞེས་བྱ་བ་ལ། ཡང་གི་སྒྲས་ནི་འགྱོད་པ་དང་གཉིད་དང་མི་དགེ་བ་ཡང་མེད་དོ། །ཡང་གི་སྒྲས་ནི་གཡོ་དང་སྒྱུ་ཡང་མེད་དོ། །ལྷག་མ་ནི་དེ་དང་འདྲའོ། །ཇི་ལྟར་ཞེ་ན། རེ་ཞིག་དགེ་པ་ལ་ནི་རྟོག་པ་དང་དཔྱོད་པ་མ་གཏོགས་པ་སེམས་ལས་བྱུང་བ་ཉི་ཤུ་འབྱུང་ངོ༌། །མ་འདྲེས་པའི་བསྒྲིབས་ལ་ལུང་དུ་མ་བསྟན་པ་དང༌། ལྟ་བ་དང་མཚུངས་པར་ལྡན་པ་ལ་ནི་བཅུ་དྲུག་གོ །འདོད་ཆགས་ལ་སོགས་པ་ཉོན་མོངས་པ་དང་ཉེ་བའི་ཉོན་མོངས་པ་དང་མཚུངས་པར་ལྡན་པ་ལ་བཅུ་བདུན་ནོ། །མ་བསྒྲིབས་ལ་ལུང་དུ་མ་བསྟན་པ་ལ་ནི་ས་མང་པོ་པ་བཅུ་ཁོ་ན་འབྱུང་ངོ༌། །ཚངས་པའི་བར་དུ་གཡོ་ཡོད་པར་འགྱུར་གྱི་ཞེས་བྱ་བ་འབྱུང་སྟེ། གཡོ་ནི་སྒྱུ་སྔོན་དུ་འགྲོ་བ་ཡིན་པའི་ཕྱིར་སྒྱུ་ཡང་གཟུང་བར་འགྱུར་རོ། །ཇི་ལྟར་ན་ཚངས་པ་འདོད་ཆགས་དང་བྲལ་བ་ལ་གཡོ་ཡོད་ཅེ་ན། དེའི་ཕྱིར་འཁོར་དང་འབྲེལ་བའི་ཕྱིར་རོ་ཞེས་བྱ་བ་སྨོས་སོ། །དེ་ཉིད་ཀྱི་ཕྱིར། འཁོར་མེད་པའི་ཕྱིར་ཚངས་པའི་གོང་བསམ་གཏན་གཉིས་པ་ལ་སོགས་པ་རྣམས་ན་གཡོ་མེད་དོ། །འདི་ལྟར་འཁོར་ནི་བརྒྱད་འདོན་ཏེ། རྒྱལ་རིགས་ཀྱི་འཁོར་དང༌། ཚངས་པའི་འཁོར་དང༌། བྲམ་ཟེའི་འཁོར་དང༌། ཁྱིམ་བདག་གི་འཁོར་དང༌། དགེ་སྦྱོང་གི་འཁོར་དང༌། རྒྱལ་ཆེན་བཞིའི་འཁོར་དང༌། སུམ་ཅུ་རྩ་གསུམ་པའི་འཁོར་དང༌། བདུད་ཀྱི་འཁོར་རོ། །ཚངས་པའི་འཇིག་རྟེན་གྱི་གོང་དུ་ནི་འཁོར་མ་བསྟན་ཏེ། དེ་ས་ན་དེ་ན་འཁོར་དང་འབྲེལ་བ་མེད་དོ། །ཇི་ལྟར་དེ་ན་འཁོར་དང་འབྲེལ་པས་གཡོ་ཡོད་པར་ཤེས་ན། དེའི་ཕྱིར་དེ་ནི་རང་གི་འཁོར་གྱི་ནང་དུ་ཞེས་བྱ་བ་རྒྱ་ཆེར་སྨོས་སོ། །དེ་ནི་རང་གི་འཁོར་ལ་བག་འཁུམས་པ་ཡོངས་སུ་སྤང་པར་འདོད་ནས། གཟུགས་མེད་པའི་ཁམས་སུ་འབྱུང་བ་ཆེན་པོ་དག་དགག་མོད་ཀྱི། དེའི་སྙོམས་
པར་འཇུག་པ་མ་ཐོབ་པའི་ཕྱིར་མ་ཤེས་ནས་གཏམ་རླུང་ལ་བསྐུར་རོ། །ཚངས་པའོ་ཞེས་སྨྲས་ནས་ཡང་ཚངས་པ་ཆེན་པོའི་ཞེས་ཟེར་བ་ནི། དེ་ལས་གཞན་པའི་ཚངས་བ་དག་ལས་མཆོག་ཡིན་བར་ཤེས་པར་བྱ་བའི་ཕྱིར་རོ། །དབང་ཕྱུག་གོ །བྱེད་པོའོ་ཞེས་བྱ་བ་ནི། །ཕྱི་མ་ཕྱི་མས་བཤད་པའོ། །ས་གང་སེམས་གང་ལ་ཞེས་བྱ་བ་འབྱུང་བ་ལ། ས་དག་ནི་གསུམ་སྟེ། རྟོག་པ་དང་བཅས་ཤིང་དཔྱོད་པ་དང་བཅས་པའི་ས་དང༌། རྟོག་པ་མེད་ལ་དཔྱོད་པ་ཙམ་གྱིས་དང༌། རྟོག་པ་ཡང་མེད་དཔྱོད་པ་ཡང་མེད་པའི་སའོ། །ས་གསུམ་པོ་འདི་དག་ན་སེམས་གང་ལ་སེམས་ལས་བྱུང་བ་ཇི་སྙེད་ཅིག་མཚུངས་པར་ལྡན་པ་དེ་རྒྱས་པར་བཤད་ཟིན་ཏོ། །ཡང་ན་མཉམ་པར་གཞག་པ་དང་མཉམ་པར་གཞག་པ་མ་ཡིན་པའི་སའམ། བསམ་གཏན་ཁྱད་པར་ཅན་དང་བཅས་པ་ས་བཅུ་དང་སྦྱར་རོ། །ད་ནི་གཞུང་ལས་སེམས་ལས་བྱུང་བ་ཁ་ཅིག་གི་ཞེས་རྒྱ་ཆེར་འབྱུང་བ་ལ། རང་གི་ངོ་བོ་འདྲ་བས་དེ་དག་གི་བྱེ་བྲག་བདེ་བླག་ཏུ་ཁོང་དུ་མི་ཆུད་དེ། དེའི་ཕྱིར་དེ་དག་རབ་ཏུ་བསྟན་པར་བྱ་བའི་ཕྱིར་གཞུང་ལས་ཐ་དད་དུ་བྱ་བ་བཤད་པ་བརྗོད་པར་བྱའོ། །གཞུང་ལས་འབྱུང་བ་ཞེས་བྱ་བ་ཅིའི་ཕྱིར་ཞེ་ན། འཇིག་རྟེན་པ་དང་སངས་རྒྱས་པ་ཁ་ཅིག་གིས་གཉིས་ཀ་ཡང་འཛོམ་པའི་བདག་ཉིད་དུ་ཁས་བླང་བའི་ཕྱིར་རོ། །ཐ་དད་དུ་བྱ་བ་ཅི་ཡོད་ཅེས་བྱ་བ་ནི་ཁྱད་པར་ཅི་ཡོད་ཅེས་བྱ་བའོ། །མ་གུས་ངོ་ཚ་མེད་ཅེས་བྱ་བ་རྒྱས་པར་འབྱུང་བ་ལ། ཡོན་ཏན་རྣམས་ཞེས་བྱ་བ་ནི། ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་རྣམས་སོ། །ཡོན་ཏན་ཅན་རྣམས་ལ་ཞེས་བྱ་བ་ནི་ཆོ་ག་དང༌། སྤྱོད་ཡུལ་ཕུན་སུམ་ཚོགས་པ་རྣམས་ལ་སྟེ། མཁན་པོ་ལ་སོགས་པ་གང་ཟག་རྣམས་ལ་བརྙས་པ་ནི་མ་གུས་པ་ཉིད་དོ། །འདི་ལ་གུས་པ་མེད་པས་ན་མ་གུས་པའོ། །དེའི་དངོས་པོ་ནི་མ་གུས་པ་ཉིད་དེ། སེམས་ལས་བྱུང་བའི་ཆོས་སོ། །བཀུར་བ་མེད་པ་ཉིད་ཅེས་བྱ་བ་ལ། སློབ་མ་ལ་དབང་བས་ནི་བཀུར་བ་སྟེ། བླ་མའམ་བླ་མའི་གནས་དང་འདྲ་བའོ། །འདི་ལ་བཀུར་བ་མེད་པས་ན་བཀུར་བ་མེད་
པའོ། །དེའི་དངོས་པོ་ནི་བཀུར་བ་མེད་པ་ཉིད་དོ། །འཇིགས་པས་དབང་སྒྱུར་བའི་ངང་ཚུལ་འདི་ལ་ཡོད་པས་ན་འཇིགས་པས་དབང་སྒྱུར་བའོ། །འཇིགས་པས་དབང་སྒྱུར་བ་མེད་པ་ནི་འཇིགས་པས་དབང་མི་སྒྱུར་བ་སྟེ། དེའི་དངོས་པོ་ནི་འཇིགས་པས་དབང་མི་སྒྱུར་བ་ཉིད་དོ། །འཇིགས་པ་ཞེས་བྱ་བ་ནི་སེམས་ལས་བྱུང་བའི་ཆོས་ཡིད་ཀྱིས་བྱས་ཏེ། རྟོག་པ་མེད་པའི་ཕྱིར་རྣམ་པར་ཤེས་པའི་ཚོགས་ལྔ་པོ་དག་ལ་ནི་འཇིགས་པ་མེད་དོ། །བླ་མ་དག་དང་བླ་མ་འདྲ་བ་དག་ལ་གུས་ཕ་དང་བཅས་པ་ནི་དེ་དག་ལ་འཇིགས་པར་འགྱུར་གྱི། མི་གུས་པ་ནི་མ་ཡིན་ལ། འཇིགས་པ་དང་བཅས་པ་ཡང་དབང་དུ་འགྱུར་གྱི། མི་འཇིགས་པ་ནི་མ་ཡིན་ནོ། །ཇི་ལྟར་ན་བླ་མའམ་བླ་མའི་གནས་ལྟ་བུ་དག་ལ་འཇིགས་པ་ཡིན་ཞེ་ན། དེ་དག་ལ་བརྙས་པས་ཆོས་མ་ཡིན་པར་འགྱུར་རོ་སྙམ་དུ་དོགས་བ་ལས་སོ། །འདིར་མ་གུས་པ་ནི་གུས་པ་མེད་པ་ཙམ་མ་ཡིན་ལ། གཞན་གང་ཅི་ཡང་རུང་བ་ཡང་མ་ཡིན་ཏེ། འོ་ན་ཅི་ཞེ་ན། གུས་པའི་གེགས་སུ་གྱུར་པའི་ཆོས་སོ། །འདི་སྐད་བསྟན་པར་འགྱུར་ཏེ། ངོ་བོའི་རྣམ་པས་གུས་པའི་གེགས་སུ་གྱུར་པའི་སེམས་ལས་བྱུང་བའི་ཆོས་གཞན་ཞིག་ལ་བརྗོད་དོ། །གཞན་དག་ན་རེ། ཡོན་ཏན་རྣམས་དང་ཡོན་ཏན་ལྡན་པ་རྣམས་ལ་མ་གུས་པ་དང་བཀུར་བ་མེད་པ་ཉིད་དོ་ཞེས་ཟེར་རོ། །ཁྲེ་ལ་མེད་ཁ་ན་མ་ཐོ་འཇིགས་མི་ལྟ། །ཞེས་བྱ་བ་ལ། ཁ་ན་མ་ཐོ་བ་ནི་སྨྲ་བར་བྱ་བ་མ་ཡིན་པ་སྟེ། དེ་ཉིད་ཀྱི་ཕྱིར་ཁ་ན་མ་ཐོ་བ་ཞེས་བྱ་བ་ནི་གང་ཞིག་དམ་པ་རྣམས་ཀྱིས་སྨད་པ་སྟེ་ཞེས་བྱ་བ་སྨོས་ཏེ། སླར་གཤེ་བ་དང་སྤངས་པའོ། །དེའི་སྨད་པ་དང་འབྲས་བུ་རྣམ་པར་སྨིན་པ་ཡིད་དུ་མི་འོང་བ་སྟེ། དེ་ལ་འཇིགས་པར་མི་ལྟ་བ་ནི་ཁྲེལ་མེད་པའོ། །ཨ་ནཱསྠེ་དྱརྴྦ་:་འཇིགས་པ་ཞེས་བྱ་བ་ནི་འཇིག་རྟེན་ན་སྐྲག་པ་ལ་གྲགས་སོ། །དེའི་ཕྱིར་འདིར་འཇིགས་པ་ནི་མི་འདོད་པའི་འབྲས་བུ་སྟེ་ཞེས་བྱ་བ་སྨོས་ཏེ། དེ་ཇི་ལྟར་འཇིགས་པ་ཡིན་ཞེ་ན། དེའི་ཕྱིར་འདི་ལས་འཇིགས་པར་འགྱུར་བའི་ཕྱིར་རོ་ཞེས་བྱ་བ་སྨོས་སོ། །གལ་ཏེ་ཁ་ན་མ་ཐོ་བ་དེའི་གནས་མ་ཡིན་པ་ཞེས་བྱ་བའི་དོན་ཏོ། །འབྲས་བུ་མི་
འཇིགས་པར་ལྟ་བ་ཡིན་ན་ནི། ལྟ་བ་ཤེས་རབ་ཀྱི་རྣམ་གྲངས་ཡིན་པའི་ཕྱིར་ཤེས་རབ་ཡིན་པར་ཤེས་པར་འགྱུར་རོ། །གལ་ཏེ་མི་འདོད་བའི་འབྲས་བུ་འཇིགས་པར་མི་ལྟ་བ་ཡིན་ན་ནི། མ་རིག་པ་ཡིན་པར་ཤེས་པར་འགྱུར་ཏེ། མི་ལྟ་བ་ནི་མ་རིག་པའི་རྣམ་གྲངས་ཡིན་པའི་ཕྱིར་རོ། །དེ་གཉིས་ཀྱི་རྒྱུ་མཚན་ཞེས་བྱ་བ་ལ། ལྟ་བ་དང་མི་ལྟ་བ་གཉིས་སོ། །ཤེས་པ་དང་ལོག་པའི་ཤེས་བ་དག་ཀུན་ཏུ་སྤྱོད་པའི་རྒྱུར་གྱུར་པའི་ཆོས་ཉེ་བའི་ཉོན་མོངས་པ་ཞེས་བྱ་བ་འགའ་ཞིག་ཡོད་བ་དེ་ནི་ཁྲེལ་མེད་པ་སྟེ། ཁ་ན་མ་ཐོ་བ་ཀུན་ཏུ་སྤྱོད་པ་དོགས་པ་མེད་ཅེས་བྱ་བའི་དོན་ཏོ། །གཞན་དག་ན་རེ་བདག་ལ་བལྟོས་ནས་ཞེས་བྱ་བ་རྒྱ་ཆེར་འབྱུང་སྟེ། བདག་ཉིད་ཉེས་པ་ལ་འཇུག་པར་མི་རིགས་པ་ཉིད་དུ་མཐོང་ཡང་ཉེས་པ་དག་ལ་མི་འཛེམ་པ་ནི་ངོ་ཚ་མེད་པ་ཡིན་ལ། འདི་ནི་གཞན་དག་གིས་སྨད་པ་ཡིན་ནོ་ཞེས་བྱ་བ་མཐོང་བཞིན་དུ་ཡང་ཉེས་པ་དག་ལ་མི་འཛེམ་པ་ནི་ཁྲེལ་མེད་པའོ་ཞེས་སོ། །མི་དགེ་བའི་ས་མང་པོ་པ་ཡིན་པའི་ཕྱིར་སེམས་གཅིག་ལ་གཉི་ག་འགལ་ལོ་ཞེས་བསྟན་པའི་ཕྱིར། དེ་ལྟ་ན་ཡང་བལྟོས་པ་གཉིས་ཞེས་བྱ་བ་རྒྱ་ཆེར་སྨོས་སོ། །གཞན་གྱི་བདག་ཉིད་དག་ནི་ཅིག་ཅར་བལྟོས་པར་མི་རིགས་ཏེ། ཡུལ་ཐ་དད་པའི་ཕྱིར་རོ། །བདག་དང་གཞན་ལ་བལྟོས་པ་ཅིག་ཅར་རོ་ཞེས་ནི་མི་ཟེར་རོ་ཞེས་བྱ་བ་ལ་སོགས་པ་ལ། རྣམ་གྲངས་ཀྱི་འཇུག་པར་འདོད་པས་དེ་དག་ཅིག་ཅར་འཇུག་པར་མི་འདོད་པས་སྐྱོན་མེད་དོ། །བདག་ཉིད་ལ་བལྟོས་ནས་ཉེས་པ་དེ་དག་ལ་མི་འཛེམ་པ་ངོ་ཚ་མེད་པ་དང༌། གཞན་ལ་བལྟོས་ནས་ནི་ཁྲེལ་མེད་པ་སྟེ། གང་གི་ཕྱིར་རྣམ་པར་སྨིན་པའི་འབྲས་བུ་ལ་བརྟེན་ཡང་དེ་རྣམ་པར་དག་པར་མི་འགྱུར་རོ། །སློབ་དཔོན་འདུས་བཟང་ན་རེ། འདི་མི་འདོད་པའི་འབྲས་བུ་མི་བརྩི་བས་དེ་ལྟར་བསམ་པའོ་ཞེས་ཟེར་རོ། །གཞན་དག་ན་རེ་ཉོན་མོངས་པ་རྣམ་པར་སྨད་པ་ལས་ཁྲལ་མེད་པའོ་ཞེས་ཟེར་རོ། །གཞན་དག་ནི་གཅིག་པུ་ཉེས་པར་སྤྱོད་པ་ལ་མི་འཛེམ་པ་ནི་ངོ་ཚ་མེད་པ་དང༌། ཚོགས་ཀྱི་ནང་དུ་ཞུགས་པ་ལས་ཁྲེལ་མེད་པའོ་ཞེས་སོ། །ཁ་ཅིག་ནི་མི་དགེ་བའི་རྣམ་པར་སྨིན་པའི་རྒྱུ་ཀུན་ཏུ་སྤྱོད་པ་
བལྟོས་པ་མེད་པ་ནི་ཁྲེལ་མེད་པའོ་ཞེས་སོ། །ཐམས་ཅད་ཀྱང་མི་དགེ་བའི་སེམས་ཀུན་ཏུ་སྤྱོད་པ་རྒྱུ་དང་འབྲས་བུ་ལ་བལྟོས་པ་མེད་པ་ཡིན་པས་དེའི་ཕྱིར་འདི་དག་སེམས་གཅིག་ལ་ཡང་འགྱུར་རོ་ཞེས་སོ། །རེ་ཞིག་རྟོག་པ་དང་པོ་ལྟར་ན་ཞེས་བྱ་བ་རྒྱས་པར་འབྱུང་སྟེ། འདིས་གནོན་ཅིང་སྤྱོད་པར་བྱེད་པས་ན་གུས་པའོ། །གུས་པའི་དངོས་པོ་ནི་གུས་པ་ཉིད་དེ། དེ་ནི་ཡུལ་དང༌། རྒྱུ་མཚན་གྱི་གཅེས་སྤྲས་ཏེ། འདི་ནི་ཡུལ་གྱི་བདུན་པའམ། རྒྱུ་མཚན་གྱི་བདུན་པ་ཡིན་པའི་ཕྱིར་རོ། །གུས་པ་དང་ལྷན་ཅིག་གུས་པ་དང་བཅས་པ་སྟེ་ནོར་དང་བཅས་པ་བཞིན་ནོ། །དེའི་དངོས་པོ་ནི་གུས་པ་དང་བཅས་པ་ཉིད་དེ། གང་ཞིག་ཡོད་ན་བླ་མའི་གནས་རྣམས་དང༌། ཡོན་ཏན་རྣམས་ལས་འདའ་བར་མི་ནུས་པ་སེམས་ལས་བྱུང་བའི་ཆོས་སོ། །ཆོས་གང་དང་ལྡན་པས་བཀུར་བ་དང་བཅས་པར་འགྱུར་བ་དེ་ནི་བཀུར་པ་དང་བཅས་པ་ཉིད་དོ། །གུས་པ་དང་བཅས་པ་ནི་བླ་མ་དང་འདྲ་བའི་གནས་དག་ལ་འཇིགས་པར་འགྱུར་གྱི་མ་གུས་པར་ནི་མ་ཡིན་ལ། འཇིགས་པ་དང་བཅས་པ་ནི་དབང་སྒྱུར་གྱི། མི་འཇིགས་པ་ནི་མ་ཡིན་ནོ། །དེའི་ཕྱིར་གང་དང་ལྡན་པས་འཇིགས་པས་དབང་སྒྱུར་བ་དང་བཅས་པར་འགྱུར་བ་དེ་ནི་འཇིགས་པས་དབང་སྒྱུར་བ་དང་བཅས་པ་ཉིད་དོ། །ཁ་ན་མ་ཐོ་བ་དག་ལ་ཞེས་བྱ་བ་ནི་གང་དང་འབྲེལ་པ་ལས་འཇིགས་པས་དབང་སྒྱུར་བར་འགྱུར་བའོ། །རྟོག་པ་གཉིས་པ་ལྟར་ན་ཞེས་བྱ་བ་རྒྱས་པར་འབྱུང་སྟེ། བདག་ལ་བལྟས་ནས་ཉེས་པ་དག་ལ་འཛེམ་པ་ནི་ངོ་ཚ་ཤེས་པ་ཡིན་ལ། གཞན་ལ་བལྟོས་ནས་ནི་ཁྲེལ་ཡོད་པའོ། །འདིར་ཡང་བལྟོས་པ་གཉིས་སེམས་གཅིག་ལ་མི་སྲིད་དོ་ཞེས་རྒྱ་ཆེར་སྔ་མ་བཞིན་དུ་བརྗོད་པར་བྱའོ། །གཞན་དག་ནི་བསམ་པ་རྣམ་པར་དག་པའི་དོན་ཉིད་དུ་མངོན་པར་འདོད་པའི་ལས་མཆོག་ལ་བརྟེན་པ་ནི་ངོ་ཚ་ཤེས་བ་དང༌། གང་ཞིག་མངོན་པར་འདོད་པའི་འབྲས་བུ་ཐོབ་པའི་ཆེད་ཉིད་ནི་ཁྲེལ་ཡོད་པ་སྟེ། ལྷན་ཅིག་མི་འགལ་བའོ། །རྒྱུ་དང་འབྲས་བུ་ལ་མ་རྨོངས་པས་དགེ་བའི་སེམས་ཀུན་ཏུ་
སྤྱོད་པ་ཐམས་ཅད་ལ་སྡུག་བསྔལ་ཡོངས་སུ་བསྒོམ་པ་ལ་སོགས་པ་སྟེ་སེམས་གཅིག་ལ་ཡང་ཁྲེལ་ཡོད་པ་འབྱུང་ངོ་སྙམ་དུ་སེམས་སོ། །དགའ་དང་ཞེས་བྱ་བ་ནི་དགའ་བ་ཉོན་མོངས་པ་ཅན་མ་ཡིན་པ་ལ་བསམས་ནས་བརྗོད་པ་ཡིན་ཏེ། དེ་ཉིད་ཀྱི་ཕྱིར་དགའ་བ་རྣམ་པ་གཉིས་ཏེ། ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པའོ་ཞེས་རྒྱ་ཆེར་སྨོས་སོ། །ཉོན་མོངས་པ་ཅན་མ་ཡིན་པ་དེ་ནི་དད་པ་སྟེ་ཞེས་བྱ་བ་ལ་དད་པ་ཡང་རྣམ་པ་གཉིས་ཏེ། མངོན་པར་ཡིད་ཆེས་པའི་མཚན་ཉིད་དང༌། འདོད་པའི་མཚན་ཉིད་ཅན་ནོ། །མངོན་པར་ཡིད་ཆེས་པ་ནི་འགའ་ཞིག་ལ་འདོད་པ་སྐྱེ་སྟེ། དེའི་ཕྱིར་འདིར་དགའ་བ་དད་པ་ཕྱི་མ་མ་ཡིན་ནོ། །དགའ་བ་ཉོན་མོངས་པ་ཅན་ཐམས་ཅད་ནི་དད་པ་མ་ཡིན་ཞིང༌། དད་པ་ཅན་ཐམས་ཅད་ཀྱང་དགའ་བ་མ་ཡིན་ཏེ། རྒྱུ་ལས་འབྲས་བུ་ཉེ་བར་བཏགས་པའི་ཕྱིར་རོ། །དགའ་བ་ནི་བདེན་པ་དང་ཉེ་བའི་རྒྱུར་གྱུར་པའི་ཕྱིར་སྔོན་དུ་ཡང་དགའ་བར་འགྱུར་རོ་ཞེས་གཞན་དག་གོ །དེ་ཡང་མུ་བཞི་མི་འགལ་ཏེ། དོན་དམ་པ་ལས་ཀྱང་དགའ་བའི་ཕྱིར་རོ། །སྡུག་བསྔལ་དང་ཀུན་འབྱུང་བ་ལ་དམིགས་བའི་དད་པ་ཁོ་ན་ཡིན་གྱི་དགའ་བ་མ་ཡིན་ཏེ། མངོན་པར་འདོད་པ་མ་ཡིན་པ་ལ་དམིགས་པའི་ཕྱིར་རོ། །བུ་དང་ཆུང་མ་ལ་སོགས་པ་དག་ལ་དགའ་བ་ནི་དད་པ་མ་ཡིན་ཏེ། ཉོན་མོངས་པ་ཅན་ཡིན་པའི་ཕྱིར་དང༌། དད་པ་ནི་དགེ་བའི་ས་མང་པོ་པ་ཡིན་པའི་ཕྱིར་རོ། །གཉི་ག་ཡིན་པ་ནི་དགའ་བ་ཡང་ཡིན་ལ་དད་པ་ཡང་ཡིན་པ་སྟེ། འགོག་པ་དང་ལམ་ལ་དམིགས་པའི་དད་པའོ། །གཉིས་ཀ་མ་ཡིན་པ་ཞེས་བྱ་བ་ནི་དད་པ་ཡང་མ་ཡིན་ལ། དགའ་བ་ཡང་མ་ཡིན་པའོ། །རྣམ་པ་དེ་དག་མ་གཏོགས་པ་ཞེས་བྱ་བ་ནི་རྣམ་པ་དེ་དག་སྟེ། སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་ལ་དམིགས་པ་དད་པ་དང༌། བུ་ལ་སོགས་པ་ལ་དམིགས་པ་སྲེད་པ་དག་མ་གཏོགས་གང་དག་སེམས་ལས་བྱུང་བ་གཞན་རྣམས་དང་ལྡན་པ་མ་ཡིན་པ་ལ་སོགས་པའི་ཆོས་རྣམས་སོ། །ཆོས་ལ་སོགས་པ་དང་འབྲེལ་པའི་སློབ་མ་ནི་ལྷན་ཅིག་གནས་
པའོ། །རིག་པ་ལ་སོགས་པ་བླངས་པ་དང་འབྲེལ་པ་ནི་ཉེ་གནས་སོ། །རྣམ་པ་དེ་དག་མ་གཏོགས་ཞེས་བྱ་བ་ནི་འབྲེལ་བ་མེད་པ་དང༌། ཡོན་ཏན་མེད་པ་དང༌། འཇིག་རྟེན་གཞན་གང་ཡིན་པ་སྟེ། དེ་ལ་ནི་དགའ་བ་ཡང་མ་ཡིན་ལ། མ་གུས་པ་ཡང་མ་ཡིན་ནོ། །གཞན་དག་ན་ཡོན་ཏན་ཡོད་དོ་སྙམ་པ་ནི་དད་པ་ཡིན་ལ། དེའི་སྒོ་ནས་དགའ་བ་སྐྱེ་སྟེ། དེའི་ཕྱིར་དགའ་བ་ནི་དད་པའི་འབྲས་བུ་ཡིན་གྱི་དད་པ་ནི་མ་ཡིན་ནོ་ཞེས་ཟེར་རོ། །གཞན་དག་ན་རེ་གུས་པ་ནི་ཞེས་བྱ་བ་རྒྱ་ཆེར་འབྱུང་བ་ལ། གུས་པའི་འབྲས་བུ་འཛེམ་པ་ནི་ངོ་ཚ་ཤེས་པ་ཡིན་གྱི་གུས་པ་ཉིད་ནི་མ་ཡིན་ནོ་ཞེས་ཟེར་རོ། །འདི་དག་ལ་ངོ་ཚ་ཤེས་པ་ནི་གུས་པ་ལས་སྐྱེ་ལ། གུས་པ་དང་བཅས་པའི་སྔོན་དུ་འཛེམ་པ་སྐྱེ་བ་ཡོད་པ་མ་ཡིན་ནོ། །དེ་གཉིས་འདོད་པ་དང་གཟུགས་དག་ན་ཞེས་བྱ་བ་ངེས་པར་གཟུང་བའི་དོན་དུ་བརྩམས་པ་སྟེ། དེ་ཉིད་ཀྱི་ཕྱིར་གཟུགས་མེད་པའི་ཁམས་ན་ནི་དགའ་བ་དང་གུས་པ་དག་མེད་དོ་ཞེས་བྱ་བ་སྨོས་སོ། །དེ་དག་མེད་པའི་རྒྱུ་ཅི་ཞིག་ཅེ་ན། དགའ་བ་དང་གུས་པའི་རྟེན་མེད་པ་དང་དེ་དག་གི་རྒྱུ་མེད་པའོ། །རྟེན་ནི་སློབ་དཔོན་དང་སློབ་མ་ལ་སོགས་པའོ། །དེ་ལ་སློབ་མ་རྣམས་ནི་སློབ་དཔོན་ལ་དགའ་བ་དང༌། གུས་པ་ཡིན་ལ། སློབ་དཔོན་རྣམས་ནི་སློབ་མ་རྣམས་ལ་དགའ་བ་ཁོ་ན་ཡིན་གྱི་གུས་པ་མ་ཡིན་ནོ། །རྒྱུ་ནི་ལུས་དང་ངག་གི་ལས་དག་པ་དང་འདྲིས་པ་ཡིན་ནོ། །དེ་གཉི་ག་ཡིད་གཟུགས་མེད་པ་དག་ནི་མེད་དོ། །དེའི་ཕྱིར་དགའ་བ་དང་གུས་པ་མེད་དོ། །དད་པ་དང་ངོ་ཚ་ཤེས་པ་ཞེས་བྱ་བ་རྒྱས་པར་འབྱུང་སྟེ། དགའ་བ་དང༌། གུས་པ་གཉིས་ནི་དད་པ་དང་ངོ་ཚ་ཤེས་པའི་རང་བཞིན་ཡིན་ལ། དད་པ་དང་ངོ་ཚ་ཤེས་པ་དག་ནི་དགེ་བའི་ས་མང་པོ་པ་ཡིན་པའི་ཕྱིར་གཟུགས་མེད་པར་བཀག་པ་འགལ་ལོ་ཞེ་ན་དད་པ་ནི་རྣམ་པ་གཉིས་ཏེ་ཞེས་བྱ་བ་ལ་སོགས་པ་རྒྱས་པར་འབྱུང་སྟེ། དེར་ནི་གང་ཟག་ལ་དམིགས་པ་དད་པ་ངོ་ཚ་ཤེས་པ་དག་བཀག་གི་ཆོས་ལ་དམིགས་པ་དག་ནི་མ་ཡིན་པས་འགལ་བ་མེད་དོ། །འདི་གང་ལས་ཤེ་ན། སྐབས་ཀྱིས་ཏེ།
གང་ཟག་དག་ལ་དགའ་བ་དང་གུས་པ་ཡིན་ནོ་ཞེས་བྱ་བ་ནི་སྐབས་ཡིན་ནོ། །དེ་ཉིད་ཀྱི་ཕྱིར་འདིར་ནི་དགའ་བ་དང་གུས་པ་དེ་དག་ལ་བསམས་པ་ཡིན་ནོ། །ཞེས་བྱ་བ་སྨོས་ཏེ། གང་དག་གང་ཟག་དག་ལ་དམིགས་པའི་དད་པ་དང༌། ངོ་ཚ་ཤེས་པ་དག་ལ་ཡིན་གྱི། ཆོས་ལ་དམིགས་པ་དག་ལ་ནི་མ་ཡིན་ནོ། །རྟོག་པ་དང་དཔྱོད་པ་དག་ལ་ཞེས་བྱ་བ་རྒྱས་པར་འབྱུང་ངོ༌། །སེམས་གཅིག་ལ་དེ་གཉིས་ཇི་ལྟར་ལྡན་ཞེ་ན་ཞེས་བྱ་བ་ལ། དེ་དག་གི་རང་གི་ངོ་བོ་མ་བསྟན་པས་སེམས་གཞན་ཉིད་མ་ཡིན་ལ། སེམས་གཅིག་ལ་རྩིང་བ་དང་ཞིབ་པ་ཉིད་ཡོད་པ་ཡང་མ་ཡིན་ཏེ་ཕན་ཚུན་འགལ་བའི་ཕྱིར་རོ་ཞེ་ན། ཁ་ཅིག་ན་རེ་ཞེས་བྱ་བ་རྒྱས་པར་འབྱུང་ངོ༌། །མར་སར་ཆུ་དག་གི་ནང་དུ་བོར་བ་ཞེས་བྱ་བ་ལ་སོགས་པ་ལ། བསྒྱུར་བ་ཞེས་བྱ་བའི་ཐ་ཚིག་གོ །རྟོག་པ་དང༌། དཔྱོད་པ་དང༌། རྗེས་སུ་འབྲེལ་བའི་ཕྱིར་སེམས་ཧ་ཅང་རྩིང་བ་དང༌། ཧ་ཅང་ཞིབ་པར་མི་འགྱུར་རོ་ཞེས་བྱ་བ་ནི་དཔེ་དང་ཆོས་མཚུངས་པའོ། །ཧ་ཅང་ཡང་མི་འཁྱག་ཅེས་བྱ་བ་ནི་ཧ་ཅང་འཐས་བར་མི་འགྱུར་བའོ། །ཧ་ཅང་མི་འཇུ་བ་ནི་ཧ་ཅང་ཞུ་བར་མི་འགྱུར་བའོ། །དེ་དག་གི་ངོ་བོ་ཉིད་ནི་མ་ཡིན་པ་སྟེ་ཞེས་བྱ་བ་ལ། རྩིང་བ་དང་ཞིབ་བ་ཉིད་ཀྱི་རང་གི་ངོ་བོ་ནི་མ་ཡིན་ནོ། །གལ་ཏེ་རྟོག་པ་དང་དཔྱོད་པ་དག་ནི་སེམས་ཀྱི་རྩིང་བ་དང་ཞིབ་པ་ཉིད་དོ་ཞེས་བྱ་བ་འདི་ནི་བྱ་བའི་སྒོ་ནས་བསྟན་པ་ཡིན་གྱི། རང་གི་ངོ་བོའི་སྒོ་ནས་ནི་མ་ཡིན་ཞེས་བ་ཁས་ལེན་ཏེ། དེའི་ཕྱིར་རྒྱུ་མཚན་དུ་གྱུར་བ་ཡིན་ནོ་ཞེས་བྱ་བའི་ཐལ་བ་འདིར་མི་འགྱུར་རོ། །འདི་ལྟར་མདོ་ལས་རྣམ་པར་ཤེས་པ་གང་ཅི་ཡང་རུང་སྟེ། རགས་པའམ། ཕྲ་བའམ་ཞེས་བྱ་བ་གསུངས་ཏེ། དེའི་ཕྱིར་ཆོས་གང་ཡོད་ན། སེམས་རྩིང་བར་སྐྱེ་བ་དེ་ནི་རྟོག་པ་ཡིན་ལ། གང་ཡོད་ན་ཞིབ་པར་སྐྱེ་བ་དེ་ནི་དཔྱོད་པའོ། །དེ་ལྟ་ན་ས་དང་སེམས་གཅིག་ལ་རྩིང་བ་དང་ཞིབ་པ་གཉིས་མི་འཐད་དེ་ཕན་ཚུན་འགལ་བའི་ཕྱིར་རོ། །སློབ་དཔོན་འདུས་བཟང་ན་རེ། སེམས་གཅིག་ལ་དམིགས་ཤིང་རྫས་མཉམ་ཡང་མཐུའི་དུས་གཞན་ཉིད་ཡིན་པའི་ཕྱིར་འགལ་བ་མེད་དེ། ཚོགས་ལ་རྟོག་པའི་མཐུ་བླ་ལྷག་ན་ནི་དཔྱོད་པ་
ཉམས་པའི་ཕྱིར་སེམས་རྩིང་བར་འགྱུར་ལ། དཔྱོད་པའི་མཐུ་བླ་ལྷག་ན་ནི་རྟོག་པའི་མཐུ་ཉམས་པའི་ཕྱིར་ཞིབ་པར་འགྱུར་ཏེ་ཚྭ་དང་ཆུ་གྲང་བཞིན་ནོ། །འདིར་གང་ཞིག་མཐུ་ཤས་ཆེ་བ་དེ་ནི་ཚྭ་དང་མཚུངས་ལ། གང་ཞིག་ཤས་ཆུང་བ་དེ་ནི་ཆུ་དང་མཚུངས་པས་དེ་ལས་མི་མཐུན་པ་མེད་དོ། །དེ་ལྟར་ན་རྟོག་པ་དང་དཔྱོད་པ་ཅིག་ཅར་བ་ཡིན་ལ། སེམས་རྩིང་བ་ཉིད་ནི་ཞིག་པ་མ་ཡིན་ནོ་ཞེས་ཟེར་རོ། །རྩིང་བ་དང་ཞིབ་པས་དང་རྣམ་པའི་བྱེ་བྲག་གིས་ཞེས་བྱ་བ་འབྱུང་སྟེ། དེ་ལ་སའི་བྱེ་བྲག་གིས་མངོན་པར་འདུ་བྱ་བ་ཆེ་བའི་ཕྱིར་བསམ་གཏན་དང་པོ་ལ་བལྟོས་ནས་འདོད་པའི་ཁམས་རགས་ལ། འདུ་བྱ་བ་ལ་ཆུང་བའི་ཕྱིར་འདོད་པའི་ཁམས་ལ་བལྟོས་ནས་བསམ་གཏན་དང་པོ་ཕྲ་ཞིང་རབ་ཏུ་ཞིབ་པ་ཡིན་ནོ། །ཡང་དེ་ཉིད་བསམ་གཏན་གཉིས་པ་ལ་བལྟོས་ནས་རགས་ལ། བསམ་གཏན་གཉིས་པ་ཡང་བསམ་གཏན་དང་པོ་ལ་བལྟོས་ནས་ཕྲ་བ་ཡིན་ཏེ། སྲིད་པའི་རྩེ་མོའི་བར་དུ་ཡང་དེ་དང་འདྲ་བར་བརྗོད་པར་བྱའོ། །རྣམ་པའི་བྱེ་བྲག་གིས་ནི་ས་གཅིག་པ་ཡང་ཆུང་ངུ་དང༌། འབྲིང་དང༌། ཆེན་པོ་རྣམས་ལས་སླར་ཆུང་ངུ་ལ་སོགས་པར་ཕྱེ་བ་ལས། དེ་ལྟར་སྲིད་པའི་རྩེ་མོའི་བར་རྟོག་པ་དང༌། དཔྱོད་པ་དག་ཡོད་པར་འགྱུར་རོ། །སའི་བྱེ་བྲག་གིས་ནི་འདོད་པའི་ཁམས་ན་རྟོག་པ་ཁོ་ན་ཡོད་ལ། སྲིད་པའི་རྩེ་མོ་ན་དཔྱོད་པ་ཁོ་ན་ཡོད་ཅིང་བར་ན་གཉིས་ཀ་ཡོད་པར་འགྱུར་རོ། །རྣམ་པའི་བྱེ་བྲག་གིས་ནི་ས་ཐམས་ཅད་ན་གཉིས་ཀ་ཡོད་ཀྱི། འདོད་པའི་ཁམས་དང་བསམ་གཏན་དང་པོ་གཉིས་ཁོ་ན་ན་ཡོད་པ་ནི་མ་ཡིན་ནོ། །དེ་བཞིན་དུ་འབྲས་བུའི་སྒོ་ནས་རྟོག་པ་དང་དཔྱོད་པ་བསྟན་པ་ལ་སེམས་དང་སེམས་གཞན་གྱི་རགས་པ་དང་པྲ་བ་དག་ལ་བལྟོས་པའི་རྒྱུ་ཉིད་ཀྱི་ཕྱིར་རྟོག་པ་དང་དཔྱོད་པར་འགྱུར་རོ། །ཡང་ན་སྲིད་པའི་རྩེ་མོ་ལས་རྟོག་པ་དང་དཔྱོད་པ་དག་འགྱུར་བ་མ་ཡིན་གྱི། འདོད་པའི་ཁམས་དང་བསམ་གཏན་དང་པོ་དག་ཁོ་ན་ཉིད་དོ། །གལ་ཏེ་ཚོགས་ལ་རྟོག་པའི་མཐུ་བླ་ལྷག་ན་རགས་པ་ཉིད་དང་དཔྱོད་པའི་མཐུ་བླ་ལྷག་ན་ཕྲ་བ་ཉིད་དོ། །གང་གི་ཚེ་རགས་
པའམ་ཕྲ་བར་གྱུར་པ་དེའི་ཚེས་དང་རྣམ་པའི་ཁྱད་པར་ལ་བལྟོས་པ་མ་ཡིན་ཏེ། དེ་ཉིད་ཕྲ་བ་དང་དེ་ཉིད་རགས་པར་འགྱུར་རོ། །སློབ་དཔོན་འདུས་བཟང་ནི་སླར་ཡང་སེམས་རྩིང་བ་དང་ཞིབ་པ་ཉིད་ནི་སེམས་ཀྱི་རྩིང་བ་དང་ཞིབ་པ་ཉིད་དོ་ཞེས་མི་སྨྲའོ། །འོ་ན་ཇི་ལྟར་ཞེ་ན། སེམས་རྩིང་བ་ནི་སེམས་ལ་ཡོད་པའི་རྩིང་བའོ། །དེའི་དངོས་པོ་ནི་སེམས་རྩིང་བ་ཉིད་དོ། །སེམས་ཞིབ་པ་ཡང་དེ་དང་འདྲའོ་ཞེས་ཟེར་རོ། །རྩིང་བ་དང་ཞིབ་པ་ཉིད་ཅེས་བྱ་བ་ལ་སོགས་པ་ལ། རྩིང་བ་དང་ཞིབ་པ་ཉིད་དེ་རྟོག་པ་དང་དཔྱོད་པ་དག་ཕན་ཚུན་སེམས་ལས་རང་བཞིན་ཐ་དད་པར་ཡང་རིགས་པ་མ་ཡིན་ཏེ་རང་གི་ངོ་བོ་ཐ་དད་པ་མ་ཡིན་ནོ་ཞེས་བྱ་བའི་ཐ་ཚིག་སེམས་དེ་ཉིད་གནས་སྐབས་འགའ་ཞིག་ལ་ཞིབ་པ་ཡིན་ལ། གནས་སྐབས་འགའ་ཞིག་ལ་རྩིང་བ་ཡིན་གྱི། དེ་ལ་རྩིང་བའམ་ཞིབ་པའི་ཆོས་གཞན་ནི་མེད་དོ་སྙམ་དུ་བསམས་པའོ། །ཡང་ན་ཚོར་བ་དང་འདུ་ཤེས་ཀྱང་རྟོག་པ་དང་དཔྱོད་པ་ཉིད་དུ་ཐལ་བར་འགྱུར་ཏེ། ཚོར་བ་ནི་རགས་པ་ཡིན་ལ། འདུ་ཤེས་ནི་དྲ་བ་ཡིན་པའི་ཕྱིར་རོ། །ཕན་ཚུན་རགས་པ་དང་ཕྲ་བ་ཉིད་ཀྱིས་དེ་དག་རང་བཞིན་ཐ་དད་པར་རིགས་སོ། །རང་བཞིན་ཐ་དད་པར་གྱུར་པ་ལ་ནི་ཐ་དད་པ་མཐོང་ན། ཇི་ལྟར་ཚོར་བ་དང་འདུ་ཤེས་དག་ལ་རྩིང་བ་དང་ཞིབ་པ་ཉིད་ཀྱི་ས་མ་ཡིན་ཏེ། རང་བཞིན་གཅིག་ལ་ཡང་རྩིང་བ་དང་ཞིབ་བ་མཐོང་བའི་ཕྱིར་རོ། །གཞན་དག་ན་རེ་ཞེས་བྱ་བ་ལ་སོགས་པ་འབྱུང་ངོ༌། །ངག་མངོན་པར་འདུ་བྱེད་པ་ཞེས་བྱ་བ་ལ་ངག་གི་ཀུན་སློང་དུ་གྱུར་པའི་ཤེས་རབ་ལ་སོགས་པ་ནི་ངག་མངོན་པར་འདུ་བྱེད་པའོ། །རྟོག་པ་དང་དཔྱོད་པ་དག་ནི་ངག་མངོན་པར་འདུ་བྱེད་པ་ཡིན་པས་འདོད་དོ་ཞེས་བྱ་བ་ག་ལས་ཤེ་ན། དེའི་ཕྱིར་མདོ་ལས་ཞེས་བྱ་བ་རྒྱ་ཆེར་གསུངས་ཏེ། བརྟགས་ཤིང་དཔྱད་ནས་དེ་བཞིན་ཁོ་ནར་ཚིག་ཏུ་སྨྲའོ་ཞེས་བྱ་བའི་དོན་ཏོ། །དེ་ལ་རྩིང་བ་གང་དག་ཡིན་པ་ཞེས་བྱ་བ་ནི་ངག་རྩིང་བར་འཇུག་པར་བྱེད་དོ། །ཞིབ་པ་ནི་བཟློག་པའོ། །བརྟག་པ་འདི་ལྟར་ན་ནི་རྟོག་པ་དང་དཔྱོད་པ་གཉིས་བཏགས་པར་ཡོད་པ་དང་རྣམ་གྲངས་ཀྱིས་ཡོད་པར་ཁས་བླངས་
བར་འགྱུར་ཏེ། སེམས་དང་སེམས་ལས་བྱུང་བ་ཚོགས་པ་དག་ཀུན་ནས་སློང་བར་བྱེད་པ་ཡིན་པའི་ཕྱིར་དང་ངག་རྩིང་བ་དང་ཞིབ་པ་དག་ཀྱང་ཅིག་ཅར་མི་འབྱུང་བའི་ཕྱིར་རོ། །གཞན་དུ་ན་དེའི་རང་བཞིན་བསྟན་པར་ནུས་པའི་ཕྱིར་དག་གི་འདུ་བྱེད་ཀྱི་ལས་ཀྱིས་དེའི་རང་བཞིན་གསལ་བར་བྱས་སོ། །གལ་ཏེ་སེམས་གཅིག་ལ་ཞེས་བྱ་བ་རྒྱ་ཆེར་འབྱུང་སྟེ། སེམས་གཅིག་ལ་དེ་གཉིས་ཇི་ལྟར་ལྡན་ཞེས་གང་སྨྲས་པ་དེ་ལ་ཁས་བླངས་ནས་ལན་སྨྲས་པ། འདི་ལ་འགལ་བ་ཅི་ཞིག་ཡོད་ཅེས་བྱ་བ་སྟེ། གལ་ཏེ་ཚོར་བ་དང་འདུ་ཤེས་ལྟར་སེམས་གཅིག་ལ་རྟོག་པ་རྩིང་བ་ཡང་ཆོས་གཞན་ཡིན། ཞིབ་པ་དཔྱོད་པ་ཡང་གཞན་ཡིན་པ་ཞེས་བྱ་བ་འདི་ལ་འགལ་བ་ཅི་ཡོད་ཅེས་ཟེར་རོ། །གལ་ཏེ་ཚོར་བ་དང་འདུ་ཤེས་གཞན་དུ་རྟོག་པ་དང་དཔྱོད་པ་གཉིས་ཀྱང་རིགས་ཐ་དད་པ་ཞིག་ཡིན་ན་ནི་འགལ་བ་མེད་པར་འགྱུར་རོ། །རིགས་ཐ་དད་པ་ཡིན་ན་ཚོར་བ་རགས་པ་ཡིན་ཞིང་འདུ་ཤེས་ཕྲ་བ་ཡིན་པས་དེ་གཉིས་རྩིང་བ་དང་ཞིབ་པ་ཡིན་ཡང་སེམས་གཅིག་ལ་མི་འགལ་ན། རྟོག་པ་དང་དཔྱོད་པ་དག་ལ་ནི་དེ་ལྟར་རིགས་ཐ་དད་པ་མེད་དོ། །རྩིང་བ་དང་ཞིབ་པ་ཉིད་མ་གཏོགས་པར་དེ་དག་རང་གི་ངོ་བོ་ངེས་པར་མ་གཟུང་བའི་ཕྱིར། མཚན་ཉིད་ངེས་པར་མ་ཟིན་པའི་རིགས་གཅིག་ལ་ཆུང་ངུ་དང་ཆེན་པོ་ཉིད་དེ། རྩིང་བ་དང་ཞིབ་པ་ཉིད་ཅིག་ཅར་བྱུང་བ་མི་སྲིད་དེ་སེམས་ཀྱི་རྫས་གཅིག་ལའོ། །གཞན་དག་ན་རེ་སེམས་གཅིག་ལ་ཡང་རྩིང་བ་དང་ཞིབ་པ་གསུངས་པའི་ཕྱིར་རྩིང་བ་དང་ཞིབ་པ་འབའ་ཞིག་ཏུ་མ་ཟད་ཀྱི་ཚོར་བ་དང་འདུ་ཤེས་ལྟར་རིགས་ཐ་དད་པ་ཡང་ཡོད་དེ། དེའི་ཕྱིར་རྟོག་པ་དང་དཔྱོད་པ་གཉིས་ཅིག་ཅར་འབྱུང་བ་མི་འགལ་ལོ། །འོ་ན་ནི་རྟོག་པ་དང་དཔྱོད་པ་དག་གི་རིགས་ཐ་དད་པ་སྟེ། ཚོར་བ་དང་འདུ་ཤེས་ལྟར་ཕན་ཚུན་རང་གི་ངོ་བོ་ཁྱད་པར་དུ་འཕགས་པར་ངེས་པར་གཟུང་སྟེ། བརྗོད་བར་བྱ་དགོས་ཏེ། མ་བརྗོད་པར་ནི་རྟོགས་པར་མི་ནུས་སོ། །ཁྱད་པར་ཕྲ་བའི་ཕྱིར་དེ་ནི་བརྗོད་པར་དཀའ་སྟེ། དེའི་ཆུང་ངུ་དང་ཆེན་པོ་ཉིད་ཀྱིས་རགས་པ་དང་ཕྲ་བ་ཉིད་ཅེས་བྱ་
སྟེ་དེའི་བྱ་བ་མ་འཁྲུལ་པའི་ཕྱིར་རོ། །སློབ་དཔོན་འདུས་བཟང་ན་རེ་ཆོས་ཀྱི་མཚན་ཉིད་རྣམ་པ་དུ་མར་བསྟན་པའི་ཕྱིར་རང་བཞིན་དང་མཚུངས་པར་ལྡན་པ་དང༌། རྒྱུ་དང་འབྲས་བུ་དང་ནུས་པ་དང༌། དམིགས་པ་ལ་སོགས་པ་རྣམས་ཀྱི་མཚན་ཉིད་སྟོན་པར་བྱེད་ཀྱི། གདན་མི་ཟ་པར་རང་བཞིན་ཁོ་ན་ནི་མ་ཡིན་ཏེ། སའི་ཁམས་ནི་སྲ་བ་ཉིད་དོ། །མི་དགེ་བ་ནི་ངོ་ཚ་མེད་པ་དང་ཁྲེལ་མེད་པ་དང་མཚུངས་པར་ལྡན་ནོ། །ཏིང་ངེ་འཛིན་སེམས་རྩེ་གཅིག་པ་ཉིད་དེ་གསུམ་འདུས་པ་ལས་རེག་པའོ། །མིག་གི་རྣམ་པར་ཤེས་པ་མིག་གི་དབང་པོ་ལ་བརྟེན་ཏོ། །ཆོས་ཤེས་པ་གང་ཞེ་ན། འདོད་པ་དང་མཚུངས་པར་ལྡན་པའོ་ཞེས་བྱ་བ་དེ་ལྟ་བུ་ལ་སོགས་པ་སྟེ། རིགས་པ་འདིས་དེ་ལྟ་བུ་ལ་སོགས་པའི་ཆོས་ཀྱི་མཚན་ཉིད་བཙལ་བར་བྱ་སྟེ། ཆོས་ཀྱི་རང་བཞིན་རྣམས་ནི་མཆོག་ཏུ་རྟོགས་པར་དཀའོ་ཞེས་ཟེར་རོ། །གཞན་དག་ན་རེ་དེ་ལྟ་ན་ནི་གསལ་བར་མི་འགྱུར་ཏེ། ཅི་ཞེ་ན། རིགས་ཐ་དད་པའོ། །ཅིའི་ཕྱིར་ཞེ་ན། རིགས་རྣམས་རེ་རེ་ཞིང་ཆུང་ངུ་དང་ཆེན་པོ་ལ་སོགས་པ་ཐ་དད་པས་རྩིང་བ་དང་ཞིབ་པ་ཉིད་དོ་ཞེས་ཟེར་རོ། །དེ་བཞིན་དུ་ཤེས་པ་ལྷག་མ་ལ་ཡང་བརྗོད་པར་བྱའོ། །རྟོག་པ་དང་དཔྱོད་པ་དང་འདོད་པ་ན་དཔྱོད་པ་དག་ནི་རགས་པའོ། །བསམ་གཏན་དང་པོའི་ས་པ་དག་ནི་ཞིབ་པའོ། །བསམ་གཏན་ཁྱད་པར་ཅན་གྱི་དཔྱོད་པ་ནི་ཆེས་ཞིབ་པའོ། །དེ་ལ་རིགས་ཐ་དད་དུ་ཁས་བླངས་པ་མ་ཡིན་ཏེ། གང་གི་ཕྱིར་རྟོག་པ་དང་དཔྱོད་པ་དག་གཅིག་ཏུ་མ་ཡིན་ཞེས་བྱ་བ་ལ་སོགས་པ་ལ། རྣམ་གྲངས་ཀྱིས་འབྱུང་བའི་ཕྱིར་སེམས་ཀྱི་སྐད་ཅིག་རྩིང་བ་དང་ཞིབ་པ་ཉིད་དུ་ཐལ་བར་མི་འགྱུར་རོ་སྙམ་དུ་བསམས་པའོ། །རྣམ་གྲངས་ཀྱིས་འཇུག་པ་གཉིས་ཀ་ལ་ཡང་ཁྱད་པར་ནི་གཏོང་བར་བྱེད་པས་རྟོག་པའོ། །གཏོང་བར་བྱེད་པས་དཔྱོད་པའོ་ཞེས་ཁ་ཅིག་གོ །དམིགས་པ་རགས་བའི་རྣམ་པ་ལས་རྟོག་པའོ། །ཡོངས་སུ་དཔྱོད་པའི་རྣམ་པས་དཔྱོད་པའོ་ཞེས་གཞན་དག་གོ །ཤིན་ཏུ་བའི་རྣམ་པས་རྟོག་པ་དང་ཡོངས་སུ་དཔྱོད་པའི་རྣམ་པས་དཔྱོད་པའོ་ཞེས་གཞན་དག་གོ །འགའ་ཞིག་ནི་མངོན་པར་རྟོགས་པའི་རྣམ་པས་རྟོག་པ་དང༌།
རྣམ་པར་དཔྱོད་པའི་རྣམ་པས་དཔྱོད་པའོ་ཞེས་སོ། །གཞན་དག་ནི་འབྱུང་བའི་རྣམ་པས་ནི་རྟོག་པའོ། །ངེས་པར་རྟོག་པའི་རྣམ་བས་དཔྱོད་པའོ་ཞེས་སོ། །གལ་ཏེ་རྟོག་པ་དང་དཔྱོད་པ་དག་རྣམ་གྲངས་ཀྱིས་འཇུག་ན་ཅི་ལྟར་ད་ནི་བསམ་གཏན་དང་པོ་ལ་ཡན་ལག་ལྔ་སྟེ། རྟོག་པ་དང་དཔྱོད་པ་དང་དགའ་བ་དང་བདེ་བ་དང་ཏིང་ངེ་འཛིན་རྣམས་སོ་ཞེས་བསམ་གཏན་དང་པོ་ཡན་ལག་ལྔར་བཤད་དེ། ཡན་ལག་བཞི་ཞེས་བརྗོད་པར་བྱ་སྟེ། རྟོག་པ་དང་དཔྱོད་པ་དག་ལས་གང་ཡང་རུང་བ་ཞིག་མེད་པའི་ཕྱིར་རོ་སྙམ་དུ་བསམས་པའོ། །ས་ལས་བསམ་གཏན་དང་པོ་དེ་ཡན་ལག་ལྔ་པར་བཤད་དེ། རྟོག་པ་དང་དཔྱོད་པ་དག་འཆོལ་བ་སྲིད་པའི་དབང་དུ་བྱས་ནས་གསུངས་སོ། །རྒྱུན་ལས་བསམ་གཏན་དང་པོ་ཡན་ལག་ལྔར་བཤད་ཀྱི། སྐད་ཅིག་ལས་མ་ཡིན་ཏེ། སྐད་ཅིག་ལ་ནི་རྟོག་པ་དང་དཔྱོད་པ་དག་ཅིག་ཅར་འབྱུང་བར་མི་འགྱུར། སློབ་དཔོན་འདུས་བཟང་ན་རེ། རྟོག་པ་དང་དཔྱོད་པ་དག་ཏིང་ངེ་འཛིན་གྱི་བར་དུ་རྣམ་པར་གཞག་གོ་ཞེས་ཟེར་རོ། །བསམ་གཏན་ཁྱད་པར་ཅན་ལ་འཇུག་པའི་གེགས་སུ་གྱུར་པ་རྟོག་པ་སྟེ། དེ་ཡང་རགས་པའོ། །བསམ་གཏན་གཉིས་པ་ལ་འཇུག་པའི་གེགས་སུ་གྱུར་བ་ནི་དཔྱོད་པ་སྟེ་དེ་ཡང་ཞིབ་པའོ། །གང་ཡང་རུང་བ་ཞེས་བྱ་བ་ནི་དེ་ཉིད་དང་དེ་ཉིད་མ་ཡིན་པའོ། །ཕ་རོལ་པོ་ལས་ཁྱད་པར་ཡོངས་སུ་བརྟགས་ནས་སེམས་ཁེངས་པ་ནི་ང་རྒྱལ་ལོ། །བདག་ནི་ཐོས་པ་དང་ལྡན་ནོ། །ནོར་དང་ལྡན་ནོ། །ཚུལ་ཁྲིམས་དང་ལྡན་ནོ། །བློ་དང་ལྡན་ནོ་སྙམ་དུ་རང་གི་ཆོས་ཁོ་ན་ལ་ཆགས་པ་སེམས་ལ་དགེ་བའི་རྩ་བ་ཡོངས་སུ་གཏུགས་པར་བྱེད་པའི་ཆོས་སྐྱེ་བ་གང་ཡིན་པ་དེ་ནི་དྲེགས་པ་སྐྱེ་བཞེས་བྱའོ། །ཡོངས་སུ་གཏུགས་པ་ནི། དགེ་བའི་བྱ་བ་ཐམས་ཅད་ལ་རང་གི་སེམས་སོ་སོར་ཐོགས་པ་ཞེས་བྱ་བའི་དོན་ཏོ། །ཡང་ན་འདིས་ཡོངས་སུ་གཏུགས་པར་བྱེད་བས་ན་ཡོངས་སུ་གཏུགས་པ་སྟེ། སེམས་ལས་བྱུང་བའི་ཆོས་རང་གི་ཆོས་ལ་ཆགས་པ་ལས་སྐྱེས་པ་སྟེ། འདིར་རང་གི་ཆོས་ལ་དམིགས་པའི་སེམས་ཡོངས་སུ་གཏུགས་ཤིང་རྣམ་པར་འཕྲོ་བ་གང་གིས་
ཆོས་རྣམས་དང་སེམས་ཀུན་ཏུ་འགལ་བར་བྱེད་པ་ནི་ཡོངས་གཏུགས་པར་གཟུང་ངོ༌། །གཞན་དག་ན་རེ་དག་བའི་ཕྱོགས་ཐམས་ཅད་ལ་རྣམ་པར་མི་འཕྲོ་བའི་ཚུལ་གྱི་སེམས་ལས་བྱུང་བ་ཉོན་མོངས་པ་དེ་ནི་རྒྱགས་པའོ་ཞེས་ཟེར་རོ། །གཞན་དག་ན་རེ་ཚད་ལས་སྐྱེ་བ་ཇི་ལྟ་བ་དེ་བཞིན་དུ་ཞེས་རྒྱ་ཆེར་འབྱུང་བ་ལ། ཀུན་ཏུ་དགའ་བའི་བྱེ་བྲག་སྨོས་པ་ནི་ཡིད་བདེ་བ་ལས་ཁྱད་པར་དུ་བྱ་བའི་ཕྱིར་རོ། །སེམས་ལས་བྱུང་བ་རྣམས་སེམས་དང་བཅས་ཏེ་རྣམ་པར་རེ་རེ་ནས་བཤད་ཟིན་ཏོ་ཞེས་བྱ་བ་ལ། རེ་ཞིག་སེམས་ནི་རང་གི་མཚན་ཉིད་དང་ཕུང་པོ་དང་ཁམས་དང་སྐྱེ་མཆེད་དང༌། དགེ་བ་དང་མི་དགེ་བ་དང་ལུང་དུ་མ་བསྟན་པ་དང༌། ཁམས་ཀྱི་རབ་ཏུ་དབྱེ་བས་རྣམ་པ་རེ་རེ་ནས་བཤད་ཟིན་ཏོ། །སེམས་ལས་བྱུང་བ་རྣམས་ཀྱང་རང་གི་མཚན་ཉིད་དང་ཕན་ཚུན་གྱི་ཁྱད་པར་དང་གྲངས་ངེས་པར་གཟུང་བ་དང༌། འདོད་བའི་ཁམས་དང་བསམ་གཏན་དང་པོ་ལ་སོགས་པ་སའི་རབ་ཏུ་དབྱེ་བས་རྣམ་པ་རེ་རེ་ནས་བཤད་དེ། རང་གི་མཚན་ཉིད་ཀྱིས་གང་དག་དང་གང་དག་ལྷན་ཅིག་འབྱུང་བའོ། །གསུང་རབ་ལས་ཞེས་བྱ་བ་རྒྱ་ཆེར་འབྱུང་སྟེ། མིང་དང་མིང་ཅན་གྱི་འགྲེལ་བ་ལ་བྱང་བའི་སློབ་མ་ནི་གསུང་རབ་ལས་བདེ་བླག་ཏུ་ཐ་སྙད་འདོགས་པའི་ཕྱིར་དེ་དག་གི་མིང་འདི་དག་བརྗོད་དོ། །སེམས་དང་ཡིད་དང་རྣམ་ཤེས་ནི། །དོན་གཅིག་ཅེས་བྱ་བ་ལ། ངེས་པའི་ཚིག་གིས་བྱས་པའི་ཁྱད་པར་འགའ་ཞིག་ནི་ཡོད་དོ། །དགེ་བ་དང་མི་དགེ་བའི་ལས་སོག་པར་བྱེད་བས་སེམས་ཏེ། མངོན་པར་འདུ་བྱེད་ཅེས་བྱ་བའི་དོན་ཏོ། །ཤེས་པས་ནི་ཡིད་དེ་ཅེས་བྱ་བ་ནི་རློམ་པར་བྱེད་པའི་དོན་གྱིས་ཏེ། ངར་འཛིན་པའི་རྟེན་ཡིན་པའི་ཕྱིར་རོ། །རྣམ་པར་ཤེས་པས་ན་ཞེས་བྱ་བ་ནི། གཟུགས་ལ་སོགས་པའི་ཡུལ་རྟོགས་བས་ནའོ། །ཁ་ཅིག་ན་རེ་ཞེས་བྱ་བ་ལ། དགེ་བ་དང་མི་དགེ་བའི་ཆོས་ཀྱི་བག་ཆགས་གནས་པའི་ཚུལ་གྱིས་བསགས་པའི་ཕྱིར་སེམས་ཞེས་བྱའོ། །དེ་ཉིད་དུ་གྱུར་བ་ཞེས་བྱ་བ་ལ། འདས་མ་ཐག་བའི་རྟེན་དུ་གྱུར་པ་ཡིད་དོ། །ད་ལྟར་བ་ལ་བརྟེན་པའི་དངོས་པོ་ལ་
བལྟོས་ནས་རྣམ་པར་ཤེས་པ་ཞེས་བྱའོ། །དབང་པོ་ལ་བརྟེན་པའི་ཕྱིར་ཞེས་བྱ་བ་ནི་མིག་ལ་སོགས་པ་སྐྱེ་མཆེད་དྲུག་ལ་པ་རྟེན་པའི་ཕྱིར་རོ། །འདི་དག་ལ་དམིགས་པ་ཡོད་པས་ན་དམིགས་པ་དང་བཅས་པ་དག་སྟེ་ཡུལ་འཛིན་པའི་ཕྱིར་རོ། །རྣམ་པ་རེ་རེ་ནས་བྱེ་བྲག་ཏུ་གཅོད་པའི་ཕྱིར་རོ་ཞེས་བྱ་བ་ནི། རྣམ་པ་རེ་རེ་ནས་འཛིན་པའི་ཕྱིར་རོ། །ཇི་ལྟར་ཞེ་ན། རྣམ་པར་ཤེས་པས་ནི་སྔོན་པོ་ལ་སོགས་པའི་རྣམ་པ་རྣམས་བྱེ་བྲག་ཏུ་གཅོད་པར་བྱེད་ལ། ཇི་ལྟར་དམིགས་པ་དེ་ཉིད་ཀྱི་དངོས་པོ་ནི་འདུ་ཤེས་ཀྱིས་འཛིན་པར་བྱེད་དོ། །ཚོར་བས་མྱོང༌། སེམས་པས་སེམས་པར་བྱེད་དོ། །གཞན་དང་ལྷན་ཅིག་མཉམ་པར་ལྡན་པར་གྱུར་པའི་ཕྱིར་མཚུངས་པར་ལྡན་པ་དག་གོ་ཞེས་བྱ་བ་ལ། རྟེན་མཚུངས་པ་ཉིད་ནི་མིག་ལ་སོགས་པའི་དབང་པོའི་སྐད་ཅིག་གང་དག་རྣམ་པར་ཤེས་པའི་རྟེན་ཡིན་བ་དེ་དག་ཁོ་ན་དང་མཚུངས་པར་ལྡན་པ་ཡིན་ནོ། །སེམས་ཐམས་ཅད་དམིགས་པ་ཐ་མི་དད་པའི་ཕྱིར་ན། དམིགས་པ་མཚུངས་པ་ཉིད་ཡིན་ལ། ཐམས་ཅད་རྣམ་པ་གཅིག་ཏུ་འབྱུང་བའི་ཕྱིར་རྣམ་པ་མཚུངས་པ་ཉིད་དོ། །རྫས་མཚུངས་པ་ནི་གྲངས་མཉམ་པའོ། །དེ་ཉིད་ཀྱི་ཕྱིར་ཇི་ལྟར་ཞེས་བྱ་བ་ལ་སོགས་པ་རྒྱ་ཆེར་འབྱུང་སྟེ། རྒྱས་པ་དང་རབ་ཏུ་དབྱེ་བ་དང་བཅས་པ་ཞེས་བྱ་བ་ལ་རྒྱས་པ་ཉིད་རབ་ཏུ་དབྱེ་བ་ཡིན་བ་ནི་རྒྱས་པ་དང་རབ་ཏུ་དབྱེ་བའོ། །རྒྱས་པ་དང་རབ་ཏུ་དབྱེ་བ་དང་ལྷན་ཅིག་པ་ནི་རྒྱས་པ་དང་རབ་ཏུ་དབྱེ་བ་དང་བཅས་པའོ། །དེ་ལ་རེ་ཞིག་སེམས་ཀྱི་རྒྱས་པ་དང་རབ་ཏུ་དབྱེ་བ་ནི། རྣམ་ཤེས་སོ་སོ་རྣམ་རིག་པ། །ཡིད་ཀྱི་སྐྱེ་མཆེད་ཀྱང་དེ་ཡིན། །ཞེས་བྱ་བ་དེ་ལྟ་བུ་ལ་སོགས་པས་སོ། །སེམས་ལས་བྱུང་བ་རྣམས་ཀྱི་ནི། །ཚོར་བ་མྱོང་བ་ཞེས་བྱ་བ་ནས་བརྩམས་ཏེ་སེམས་བྱུང་རྣམ་ལྔ་སྟེ་ཞེས་བྱ་བའི་བར་གྱིས་སོ། །དེ་ནི་སེམས་ལས་བྱུང་བ་རྣམས་ཀྱི་འཇུག་ཐོགས་སུ་བསྟན་པ་ལྡན་པ་མ་ཡིན་པ་རྣམས་བཤད་པའི་སྐབས་སུ་བབ་པས་དེའི་མཚན་ཉིད་བརྗོད་པར་འདོད་ནས་མི་ལྡན་པའི་འདུ་བྱེད་རྣམས་ཞེས་བྱ་བ་རྒྱ་ཆེར་སྨོས་སོ། །ཡང་གི་སྒྲ་ནི་ཀུན་སྡུད་པ་ལ་སོགས་
བ་ཉེ་བར་བསྡུ་བའི་དོན་ཏོ། །གཉིས་པའི་འདོད་པ་བརྟག་པའི་དོན་ནི། གལ་ཏེ་གནས་པ་དང་རྙེད་པ་ལ་སོགས་པ་རྣམས་ཐོབ་པ་ལས་ཐ་དད་དོ་ཞེས་སོ། །ཐོབ་པ་ལ་སོགས་པའི་ཆོས་འདི་དག་ནི་སེམས་དང་བྱ་བ་མངོན་པར་མི་འབྲེལ་བའི་སེམས་དང་མི་ལྡན་པ་ཞེས་བརྗོད་པར་བྱ་སྟེ། སེམས་ལས་བྱུང་བ་དག་ལྟར་སེམས་དང་ལྷན་ཅིག་དམིགས་པ་ལ་མི་འཇུག་ཅེས་བྱ་བའི་དོན་ཏོ། །སེམས་དང་ལྡན་པ་མ་ཡིན་ཞེས་སྨོས་པ་ནི། དེ་སེམས་དང་རིགས་མཐུན་པར་ཤེས་པར་བྱ་བའི་ཕྱིར་རོ། །དེ་ཉིད་ཀྱི་ཕྱིར་གཟུགས་ནི་སེམས་དང་རིགས་མཐུན་པའི་ཕྱིར་ལྡན་པ་མ་ཡིན་པའི་མིང་མི་འཐོབ་སྟེ། གང་ཁོ་ན་དང་མཚུངས་བར་ལྡན་པ་སྲིད་བ་དེ་ཁོ་ན་དང་མི་ལྡན་པ་ཞེས་བྱའི་གཟུགས་ལ་ནི་དོགས་པ་མི་སྐྱེ་འོ། །གཟུགས་ཅན་ཉིད་དང་གཟུགས་ཅན་ཉེ་བ་དང་ཡང་མ་ཡིན་ནོ། །སེམས་ལས་བྱུང་བ་རྣམས་ཀྱང་དེ་དང་རིགས་མཐུན་པས་དམིགས་པ་མེད་པ་ངེས་པར་གཟུང་བ་དེ་བསལ་བྱ་བའི་ཕྱིར་ཡང་ལྡན་པ་མ་ཡིན་པ་སྨོས་སོ། །འདུས་མ་བྱས་ཀྱང་དེ་དང་རིགས་མཐུན་པ་དང༌། དམིགས་པ་མེད་པ་ཡིན་པས་དེ་དག་སྤང་བའི་ཕྱིར་འདུ་བྱེད་སྨོས་ཏེ། དེ་ཉིད་ཀྱི་ཕྱིར་འདུ་བྱེད་འདི་དག་ནི་སེམས་དང་མཚུངས་པར་ལྡན་པ་ཡང་མ་ཡིན་ལ། གཟུགས་ཀྱི་རང་བཞིན་ཡང་མ་ཡིན་པས་ཞེས་བྱ་བ་སྨོས་སོ། །འདི་སྐད་བསྟན་བར་འགྱུར་ཏེ། སེམས་དང་མཚུངས་པར་མི་ལྡན་པ་ཁོ་ན་ལ་ལྡན་པ་མ་ཡིན་པ་ཞེས་མི་བྱའོ། གང་དག་འདུ་བྱེད་ཡིན་བཞིན་དུ་གཟུགས་ཀྱི་རང་བཞིན་ཡང་མ་ཡིན་ལ། སེམས་དང་མཚུངས་པར་ལྡན་པ་ཡང་མ་ཡིན་པ་དེ་དག་ལ་ལྡན་པ་མ་ཡིན་པ་ཞེས་བྱའོ། །གཞན་དག་ན་རེ་འདུ་བྱེད་སྨོས་པས་འདུས་མ་བྱས་རྣམ་པར་གཅོད་དོ། །སེམས་དང་མི་ལྡན་པ་སྨོས་པས་མཚུངས་པར་ལྡན་པ་རྣམ་པར་གཅོད་དོ་ཞེས་ཟེར་རོ། །འདིར་སེམས་སྨོས་པ་ནི་གཙོ་བོ་ཡིན་བའི་ཕྱིར་ཡིན་གྱི། སེམས་ཁོ་ན་དང་མི་ལྡན་པ་ནི་མ་ཡིན་ནོ། །དེ་ལྟ་མ་ཡིན་ན་སེམས་དང་མཚུངས་པར་མི་ལྡན་བའི་ཕྱིར་སེམས་ལྡན་པ་མ་ཡིན་པ་ཉིད་དུ་ཐལ་བར་འགྱུར་ཏེ། རང་གི་
ངོ་བོ་དང་མཚུངས་པར་མི་ལྡན་པའི་ཕྱིར་རོ། །དེ་ཉིད་ཀྱི་ཕྱིར་གཟུགས་ཀྱི་རང་བཞིན་ཡང་མ་ཡིན་པ་ཞེས་སྨོས་སོ། །དེ་ལྟར་ན་བསྟན་པ་འདི་དག་གི་བཤད་པ་བྱ་དགོས་སོ་ཞེ་ན། དེ་ལ་རེ་ཞིག་ཅེས་བྱ་བ་སྨོས་ཏེ། དེ་ལ་ཞེས་བྱ་བ་ནི་དམིགས་ཀྱིས་དགར་བའི་དོན་དུ་སྟེ་དེ་དག་ལའོ། །རེ་ཞིག་གི་སྒྲ་ནི་རིམ་པའི་དོན་ཏེ། ཅིག་ཅར་བསྟན་པར་མི་ནུས་པའི་ཕྱིར་རོ། །ཐོབ་པ་ཞེས་བྱ་བ་ནི་བསྟན་པའི་ཚིག་གོ །རྙེད་པ་དང་ལྡན་པའོ་ཞེས་བྱ་བ་ནི་བཤད་པའི་ཚིག་གོ །ཐོབ་པ་དང་ལྡན་པའི་སྒོ་དོན་གཅིག་བར་འདོད་མོད་ཀྱི། འོན་ཀྱང་རྙེད་པ་དང་ལྡན་པ་ཞེས་བྱ་བ་འདི་ནི་བྱེ་བྲག་ཏུ་བསྟན་པ་ཡིན་ནོ། །སྔར་མ་ཐོབ་པ་རྣམས་ཀྱི་ཐོབ་པ་རྣམས་གང་ཡིན་པ་དེ་ནི་ཞེས་བྱ་བ་ཁྱད་པར་དུ་བསྟན་ཏེ། ནངས་ཀྱི་དང་པོར་ཐོབ་བ་སྐྱེས་པ་ནི་རྙེད་པ་ཡིན་པའི་ཕྱིར་རོ། །ཐོབ་ཟིན་པ་རྣམས་ཀྱི་ཐོབ་པ་གང་ཞིག་སྐད་ཅིག་གཉིས་པ་ལ་སོགས་པ་དག་ན་ཡོད་པ་དེ་ནི་ལྡན་པ་སྟེ། ཀུན་ཏུ་རྗེས་སུ་འགྲོ་བ་ནི་ལྡན་པ་ཡིན་པའི་ཕྱིར་རོ། །དེའི་ཕྱིར་དེ་ལྟར་ན་ཐོབ་པའི་སྒྲ་ནི་རྙེད་པ་དང་ལྡན་པ་ལ་འཇུག་གོ །དེ་ཉིད་ཀྱི་ཕྱིར་ཐོབ་པ་ནི་རྣམ་པ་གཉིས་ཏེ་ཞེས་རྒྱས་པར་སྨོས་སོ། །མ་ཐོབ་པ་སྟེ་སྔར་ནམ་ཡང་མ་ཐོབ་པ་གང་ཡིན་པ་དང༌། རྣམ་པར་ཉམས་པ་སྟེ་ཐོབ་ནས་ས་འཕོས་པ་དང༌། ཡོངས་སུ་ཉམས་པ་ལ་སོགས་པ་ལས་བཏང་བ་ལ་ནངས་ཀྱི་དང་པོར་ཐོབ་པ་ནི་རྙེད་པའོ། །སྐད་ཅིག་གཉིས་པ་ལ་སོགས་པ་དག་ན་ནི་ཐོབ་ནས་ལྡན་པའོ། །བཟློག་པ་ནི་མ་ཐོབ་པ་ཞེས་བྱ་པ་ལ་སོགས་པ་ལ། སྔར་མ་ཐོབ་པ་རྣམས་ནི་མ་རྙེད་པའོ། །ཐོབ་པ་ཉམས་པ་རྣམས་ནི་མི་ལྡན་པའོ། །དེ་ལྟར་ན་ཐོབ་བ་ལས་བཟློག་པ་ནི་མ་ཐོབ་པ་ཡིན་ནོ། །དེ་ཉིད་ཀྱི་ཕྱིར་སོ་སོའི་སྐྱེ་བོ་ཉིད་ནི་འཕགས་པའི་ཆོས་རྣམས་ཀྱི་མ་རྙེད་པ་ཞེས་བྱའི་མི་ལྡན་པ་ནི་མ་ཡིན་ནོ། །ཐོབ་པ་དང་མ་ཐོབ་པ་འདི་དག་གང་དག་གི་ཡིན་ཞེས་བྱ་བ་ནི་འདུས་བྱས་སམ། འདུས་མ་བྱས་སམ། སེམས་ཅད་དུ་སྟོན་པའམ། སེམས་ཅན་དུ་སྟོན་པ་མ་ཡིན་པའམ། རང་གི་རྒྱུད་དུ་གཏོགས་བའམ། གཞན་གྱི་རྒྱུད་དུ་གཏོགས་པ་མ་ཡིན་པ་ཞིག་གིས་
ཡིན་ཞེས་བྱེ་བྲག་ཏུ་མ་བྱས་པར་འདྲི་བའོ། །རེ་ཞིག་འདུས་བྱས་ཀྱི་དབང་དུ་བྱས་ནས་བརྗོད་པར་བྱ་སྟེ། ཐོབ་དང་མ་ཐོབ་པ་རང་རྒྱུད་དུ་གཏོགས་པ་རྣམས་ཀྱིས་སོ། །འདི་རང་རྒྱུད་དུ་གཏོགས་པ་རྣམས་ཀྱི་ཞེས་ངེས་པར་གཟུང་གི །གཞན་གྱི་རྒྱུད་དུ་གཏོགས་པ་རྣམས་ཀྱི་ཡང་མ་ཡིན་ལ། རྒྱུད་དུ་མ་གཏོགས་པ་རྣམས་ཀྱི་ཡང་མ་ཡིན་ནོ། །དེ་ལ་རང་རྣམས་ཀྱི་ཞེས་བྱ་བ་དེ་ཙམ་ཞིག་སྨྲས་ན་གོས་ལ་སོགས་པ་སེམས་ཅན་དུ་སྟོན་པ་མ་ཡིན་པ་རྣམས་དང་ལྡན་པར་འགྱུར་ལ། རྒྱུད་དུ་གཏོགས་པ་རྣམས་ཀྱི་ཞེས་བརྗོད་ན་གཞན་གྱི་རྒྱུད་དུ་གཏོགས་པ་རྣམས་དང་ཡང་ལྡན་པར་འགྱུར་ཏེ། དེས་ན་གཉི་གར་ཐལ་བར་འགྱུར་བ་སྤང་པའི་ཕྱིར་རང་ཞེས་བྱ་བ་དང་རྒྱུད་དུ་གཏོགས་པ་ཞེས་བྱ་བ་སྨོས་སོ། །སྐྲ་ལ་སོགས་པ་དབང་པོ་གཟུགས་ཅན་དང་འབྲེལ་བ་སེམས་ཅན་དུ་སྟོན་པ་དང་ཡང་མ་ཡིན་ཏེ། ཕན་པ་དང་གནོད་པར་འགྱུར་བའི་རྗེས་སུ་བྱེད་པའི་ཕྱིར་ཏེ། འདི་ལྟར་སྐྲ་ལ་སོགས་པ་རྣམས་ལ་ཁ་དོག་ལ་སོགས་པའི་རྣམ་པར་འགྱུར་བ་མཐོང་བོ། །གཞན་གྱི་ཕུང་པོ་ལ་སོགས་པ་རྣམས་དང་ནི་འགའ་ཡང་ལྡན་པ་མེད་དོ། །དེ་དག་ལྡན་ན། སོ་སོ་སྐྱེ་པོ་དང་འཕགས་བ་སློབ་པ་དང་འདོད་ཆགས་དང་བྲལ་བ་དང་དགེ་བའི་རྩ་བ་ཀུན་ཏུ་ཆད་པ་ལ་སོགས་པ་འཆོལ་བར་འགྱུར་རོ། །སེམས་ཅན་དུ་མི་བགྲང་བ་གོས་དང་རྒྱན་ལ་སོགས་པ་དག་དང་ནི་འགའ་ཡང་ལྡན་པ་མེད་དེ། དེའི་ཕྱིར་རྒྱུད་དུ་མ་གཏོགས་བ་རྣམས་ལ་ཐོབ་པ་མེད་དོ། །དེ་ལ་གཟུགས་ཀྱི་ཕུང་པོ་དང་འདུ་བྱེད་ཀྱི་ཕུང་པོ་དང་ཐོབ་པ་གཅིག་གོ །དེ་བཞིན་དུ་ཚོར་བ་ལ་སོགས་པའི་ཕུང་པོ་དང་འདུ་བྱེད་ཀྱི་ཕུང་པོ་དག་དང་མིག་གི་སྐྱེ་མཆེད་དང་ཆོས་ཀྱི་སྐྱེ་མཆེད་དང་མིག་གི་ཁམས་དང་ཆོས་ཀྱི་ཁམས་དག་ཀྱང་ངོ་ཞེས་རྒྱ་ཆེར་བརྗོད་པར་བྱའོ། །དེ་བཞིན་དུ་ཟག་པ་དང་བཅས་པ་དང་ཟག་པ་མེད་བ་དག་དང་འདུས་བྱས་དང་འདུས་མ་བྱས་དག་ཀྱང་ཐོབ་པ་གཅིག་གོ་ཞེས་རིག་པར་བྱའོ། །འདུས་མ་བྱས་རྣམས་ཀྱི་ཞེས་བྱ་བ་རྒྱ་ཆེར་འབྱུང་སྟེ། སོ་སོར་བརྟགས་དང་སོ་སོར་བརྟགས་པ་མ་ཡིན་པས་
འགོག་པ་དག་ཀྱང་ཐོབ་པ་དང་མ་ཐོབ་པར་འགྱུར་རོ་ཞེས་སྟོན་པར་བྱེད་དོ། །འགོག་པ་རྣམས་ནི་ཟག་པ་དང་བཅས་པའམ་ཟག་པ་མེད་པའི་འདུས་བྱས་རྣམས་འགོག་པ་ལ་ཡོད་དེ། ཇི་ལྟར་སྲིད་པ་བཞིན་ཤེས་རབ་སྔོན་དུ་འགྲོ་བའམ་ཤེས་རབ་སྔོན་དུ་མི་འགྲོ་ཡང་རུང་ཐོབ་པ་དང་མ་ཐོབ་པ་དག་མ་ཐོབ་པ་དག་གོ །དེ་ཉིད་ཀྱི་ཕྱིར་རོ། །ནམ་མཁའ་དང་ནི་གཉིས་ཀ་ཡང་མ་ཡིན་ཏེ། ནམ་མཁའ་ལ་ནི་འགའ་ཡང་འབྲེལ་བ་མེད་དོ། །དགག་པར་བྱ་བ་དང་འགོག་པ་འགའ་ཡང་མེད་པའི་ཕྱིར་རོ། །གང་ཟག་གང་ཞིག་འགོག་པ་གང་ཞིག་དང་ལྡན་ཞེ་ན། དེའི་ཕྱིར་སོ་སོར་བརྟགས་པ་མ་ཡིན་བས་འགོག་པ་དང་ནི་ཞེས་བྱ་བ་ལ་སོགས་པ་སྨོས་ཏེ། འདི་ཉིད་བསྟན་པའི་ཕྱིར་དེ་ཉིད་ཀྱི་ཕྱིར་ཞེས་བྱ་བ་རྒྱ་ཆེར་སྨོས་སོ། །ཟག་པ་མེད་པ་ཉིད་ཀྱང་འདི་ལས་གཞན་ལྟ་བ་དང་སྲིད་པ་གོམས་པ་བདག་གིར་བྱས་པའི་ཕྱིར་རོ། །གྲག་གོ་པའི་སྒྲ་ནི་ལྡན་པ་རྫས་སུ་ཡོད་པ་ཉིད་མི་འཐད་པའི་ཕྱིར་དང༌། འགོག་པ་གཉིས་ཀྱང་རྫས་སུ་ཡོད་པ་ཉིད་དུ་མ་གྱུར་པས་མ་རངས་པར་བསྟན་པའི་ཕྱིར་རོ། །སོ་སོར་བརྟགས་པས་འགོག་པ་དང་ནི་ཞེས་བྱ་བ་རྒྱ་ཆེར་འབྱུང་བ་ལ། འཆིང་བ་མཐའ་དག་དང་ལྡན་པ་ཡང་དེ་ཡིན་ལ་སྐད་ཅིག་མ་དང་པོ་ལ་གནས་པ་ཡང་ཡིན་པས་ཞེས་ཚིག་རྣམ་པར་སྦྱར་རོ། །དེ་དག་སྤངས་པ་གང་དག་ལ་ཡོད་པ་དེ་རྣམས་ནི་འཆིང་བ་མཐའ་དག་དང་ལྡན་པ་སྐད་ཅིག་དང་པོ་ལ་གནས་པ་མ་གཏོགས་པའོ། །དེ་དག་རྣམས་གང་དག་ཅིག་ཅེ་ན། དེའི་ཕྱིར་འཕགས་པ་ཐམས་ཅད་ཅེས་བྱ་བ་སྨོས་ཏེ། སྐད་ཅིག་མ་དང་པོ་ནི་སྡུག་བསྔལ་ལ་ཆོས་ཤེས་པའི་བཟོད་པ་སྟེ། འཆིང་བ་མཐའ་དག་དང་མི་ལྡན་པ་སྐད་ཅིག་མ་དང་པོ་ལ་གནས་པ་དག་དང༌། སྐད་ཅིག་མ་གཉིས་དག་ནི་སོ་སོར་བརྟགས་པས་འགོག་པ་དང་ལྡན་པས་འཆིང་བ་མཐའ་དག་དང་ལྡན་པ་དང༌། སྐད་ཅིག་མ་དང་པོ་ལ་གནས་པ་ཞེས་གཉིས་ཀ་སྨོས་སོ། །སྔར་ཉོན་མོངས་པ་ལ་སྤངས་པ་སྐད་ཅག་མ་དང་པོ་གནས་པ་སྟེ། འཕགས་པ་ཡང་འཆིང་བ་མཐའ་དག་དང་མི་ལྡན་པ་ཉིད་དོ། །སོ་སོར་
བརྟགས་པས་འགོག་པ་དང་ཞེས་བྱ་སྟེ་དེའི་ཕྱིར་ནི་མ་གཏོགས་པ་ཡིན་ནོ། །དེ་ལས་གཞན་པ་འཕགས་པ་ཉོན་མོངས་པ་མཐའ་དག་དང་མི་ལྡན་པ་སྐད་ཅིག་མ་དང་པོ་ལ་གནས་པ་དང་སྐད་ཅིག་མ་གཉིས་པ་ལ་སོགས་པ་ལ་གནས་པ་ཐམས་ཅད་ལྡན་པ་ཡིན་ནོ། །སོ་སོ་སྐྱེ་བོ་ཁ་ཅིག་ཀྱང་ལྡན་པ་ཡིན་ནོ་ཞེས་བྱ་བ་ནི། གང་དག་འཇིག་རྟེན་པའི་ལམ་གྱི་བྲལ་བའི་ཐོབ་པ་རྙེད་པའོ། །ནམ་མཁའ་དང་ནི་འགའ་ཡང་ལྡན་པ་མེད་དེ་འབྲེལ་བ་མེད་པའི་ཕྱིར་རོ། །གང་ལ་ཐོབ་པ་ཡོད་པ་མ་ཡིན་པ་དེ་ལ་ནི་མ་ཐོབ་པ་ཡང་མེད་དེ་བྲལ་བ་ནི་ལྡན་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ་ཞེས་ཁ་ཅིག་གོ །དེ་ལྟ་ན་ཐོབ་པ་རྣམས་ཁོ་ན་ལ་མ་ཐོབ་པ་ཡོད་པར་འགྱུར་གྱི་མ་ཐོབ་པ་རྣམས་ལ་ནི་མ་ཡིན་ཏེ། དེའི་ཕྱིར་གྲུབ་པའི་མཐའ་ཚད་མར་བྱས་པ་ཉིད་ལས་འདོད་པ་ཡིན་ནོ། །གཞན་གྱི་རྒྱུད་དུ་གཏོགས་པ་དང༌། །སེམས་ཅན་མ་ཡིན་པ་ནམ་མཁའ་དང་འགའ་ཡང་ལྡན་པ་ཡིན་ཞེས་བྱ་བ་དམ་བཅའ་བ་ཙམ་ནི་རྒོལ་བའི་གཞིའོ། །ལྡན་པ་ཞེས་བྱ་བ་རྒྱུད་དང་ཐ་མི་དད་པར་མངོན་དུ་གྱུར་པའི་ཆོས་དེའི་རིགས་རྒྱུ་དང་འབྲས་བུས་བསྡུས་པ་སྟེ་རྒྱུད་མ་ཡིན་པ་ནི་མ་ཡིན་ནོ། །འདི་སེམས་ཅན་མ་ཡིན་པ་ལ་སོགས་པ་དང་གྲངས་རྣམས་དང་ཤིན་ཏུ་འབྲེལ་བ་མེད་པ་རྣམས་ལ་རིགས་པ་མ་ཡིན་ཞིང༌། འགོག་པ་དག་ཀྱང་རང་གི་རྒྱུད་དུ་གཏོགས་པའི་ཆོས་རྣམས་ལ་དེ་བཞིན་ནོ། །གང་ཞིག་དམ་བཅའ་བ་ཙམ་ནི་མ་ཡིན་ཏེ། ལྡན་པ་མེད་པ་དེ་ལ་མ་ཐོབ་པ་ཡང་མེད་པར་འགྱུར་ཏེ། ཡོངས་སུ་མྱ་ངན་ལས་འདས་པའི་སེམས་བཞིན་ནོ་ཞེས་བྱ་བ་རྩོད་པའི་གཞིའོ་ཞེ་ན། མྱ་ངན་ལས་འདས་པ་ནི་མ་ཐོབ་པར་མ་འདོད་དེ། གལ་ཏེ་མ་ཐོབ་པར་གྱུར་ན་ཐོབ་པར་ཡང་འགྱུར་རོ། །མ་ཐོབ་པ་མི་ལྡན་པའི་ཕྱིར་ཐོབ་པ་མེད་དོ་ཞེས་རྒྱ་ཆེར་འབྱུང་ངོ༌། །དབང་པོ་ལས་འདས་པའི་དོན་རྟོག་པ་ནི་ལུང་ངམ་རིགས་པ་ཞིག་ལས་འགྱུར་བ་ཞིག་ན། དེ་ལ་ཐོབ་པ་ཞེས་བྱ་བ་ཆོས་གཞན་ཡོད་དོ་ཞེས་བྱ་བར་ཅི་ལུང་ལས་རྟོགས་སམ་འོན་ཏེ་རིགས་པ་ལས་ཡིན། དངོས་པོ་གཞན་དུ་གྱུར་པ་ལ་ལོག་པར་རྟོག་པས་ས་བོན་གྱི་
བདག་ཉིད་ཡོད་དོ་ཞེས་སྨྲས་པར་འགྱུར་རོ། །ལུང་ལས་ངེས་སོ་ཞེས་བསྟན་པའི་ཕྱིར་མདོ་ལས་ཞེས་སྨོས་སོ། །མདོ་ལས་ཏེ་ཞེས་རྒྱས་བར་འབྱུང་བ་ལ། མི་སློབ་པའི་ཆོས་བཅུ་ནི་མི་སློབ་པའི་འཕགས་པའི་ལམ་ཡན་ལག་བརྒྱད་དང༌། ཡང་དག་པའི་རྣམ་པར་གྲོལ་བ་དང་ཡང་དག་པའི་ཡེ་ཤེས་སོ། །བསྐྱེད་པ་ནི་མངོན་དུ་ཕྱོགས་པའོ། །སོ་སོར་ཐོབ་པ་ནི་ཐོག་མར་ཐོབ་པའོ། །ཀུན་ཏུ་ལྡན་པ་ནི་ཕྱི་ནས་ཐོབ་པའོ། །ཡན་ལག་ལྔ་སྤང་པ་ཞེས་བྱ་བ་ལ་ཐ་མའི་ཆ་དང་མཐུན་པའི་ཀུན་ཏུ་སྤྱོད་པ་ལྔ་དག་སྤང་པར་འགྱུར་ཞིང་ཡོངས་སུ་ཤེས་པར་འགྱུར་བ་སྟེ། འདི་ལྟ་སྟེ། གཟུགས་ཀྱི་འདོད་ཆགས་དང༌། གཟུགས་མེད་པའི་འདོད་ཆགས་དང༌། རྒོད་པ་དང༌། ང་རྒྱལ་དང༌། གཏི་མུག་གོ །ཁ་ཅིག་ནི་ལྔ་པར་མཚུངས་པས་ལྔ་ཞེས་བྱའོ་ཞེས་ཟེར་རོ། །གཞན་དག་ནི་གོང་མའི་ཆ་དང་མཐུན་པ་རྣམས་འདིར་བཟུང་སྟེ། སྔ་མ་ཉིད་སློབ་པའི་གནས་སྐབས་སུ་སྤངས་པའི་ཕྱིར་རོ་ཞེས་ཟེར་རོ། །ཐོབ་པ་ནི་གང་ཞིག་ཡོད་ན་མངོན་དུ་མ་གྱུར་པ་ཡང་ཆུད་མི་ཟ་བར་འདྲ་བར་འགྱུར་བའི་ཆོས་ཞིག་གོ །འདིར་ཤེས་པར་བྱེད་པ་ནི་སོ་སོར་ཐོབ་པ་ཀུན་ཏུ་ལྡན་པས་ན་ཞེས་བྱ་བ་འདི་ཡིན་ནོ། །གལ་ཏེ་མདོ་ལས་སོ་སོར་ཐོབ་པ་དང་ཀུན་ཏུ་ལྡན་པ་འབྱུང་བའི་ཕྱིར་ཆོས་ཐོབ་པ་གཞན་ཡིན་ན། འོ་ན་ནི་དེས་ན་སེམས་ཅན་དུ་མི་སྟོན་པ་དག་དང་ཞེས་བྱ་བ་རྒྱ་ཆེར་འབྱུང་སྟེ། སེམས་ཅན་གཞན་དག་དང་སེམས་ཅན་དུ་མི་སྟོན་པ་དག་དང་ལྡན་པར་རྟོག་པ་ནི་རིགས་པ་མེད་པ་དང་ལུང་མེད་པ་ཡིན་ནོ་སྙམ་དུ་སེམས་ཏེ་འདྲི་བ་ནི་ཅིའི་ཕྱིར་ཞེས་བྱ་བའོ། །སློབ་དཔོན་གྱིས་མདོ་ལས་ཞེས་བྱ་བ་རྒྱས་པར་སྨོས་ཏེ། འདི་ལས་ཀྱང་ལྡན་པ་ཞེས་འབྱུང་བའི་ཕྱིར་དངོས་པོ་གཞན་དང་ལྡན་པར་འགྱུར་ཏེ། དེའི་ཕྱིར་སེམས་ཅན་དུ་སྟོན་པ་མ་ཡིན་པ་དག་སེམས་ཅན་གཞན་དག་དང་ལྡན་པར་ཐལ་བར་འགྱུར་རོ། །རིན་པོ་ཆེ་སྣ་བདུན་ནི། འཁོར་ལོ་རིན་པོ་ཆེ་དང༌། གླང་པོ་རིན་པོ་ཆེ་དང༌། རྟ་རིན་པོ་ཆེ་དང༌། ནོར་བུ་རིན་པོ་ཆེ་དང༌། བུད་མེད་རིན་པོ་ཆེ་དང༌། ཁྱིམ་བདག་རིན་པོ་ཆེ་དང༌།
བློན་པོ་རིན་པོ་ཆེའོ། །དེ་ལ་ནོར་བུ་རིན་པོ་ཆེ་དང༌། འཁོར་ལོ་རིན་པོ་ཆེ་ནི་སེམས་ཅན་དུ་མི་སྟོན་པའོ། །ལྷག་མ་ལྔ་པོ་རྣམས་ནི་སེམས་ཅན་དུ་སྟོན་པའོ། །ཕན་ཚུན་བགྲངས་པ་དེ་ཉིད་ཀྱི་ཕྱིར་དབང་ཉིད་དགའ་དགུར་བྱེད་པའི་ཕྱིར་རོ་ཞེས་བྱ་བ་ལ་ཚིག་ཕྱི་མ་ནི་སྔ་མའི་རྣམ་པར་བཤད་པ་ཡིན་ནོ། །དགའ་དགུར་བྱེད་པ་ནི་འདོད་པའི་རྗེས་སུ་བྱེད་པ་ཡིན་ནོ། །དེར་ནི་དབང་བ་ཉིད་ཅེས་བྱ་བ་རྒྱ་ཆེར་འབྱུང་བ་ལ། མདོ་གཉིས་སུ་ལྡན་པའི་སྒྲར་ཁྱད་པར་མེད་ཀྱང་གཅིག་ཏུ་ནི་ལྡན་བར་དབང་བ་ཉིད་ཡིན་ལ། གཞན་དུ་ནི་ཆོས་གཞན་ཡིན་ནོ་ཞེས་བྱ་བ་འདི་ག་ལས་ཏེ། ཅི་རིགས་པ་ལས་སམ་འོན་ཏེ་མདོ་གཞན་ལས་ཡིན། སློབ་དཔོན་འདུས་བཟང་ན་རེ། གཅིག་ཏུ་ནི་ལྡན་པ་དབང་བ་ཉིད་ཡིན་ལ་གཞན་དུ་ནི་ཆོས་གཞན་ཡིན་ནོ་ཞེས་བྱ་བ་འདི་འཐད་པ་ལས་ཡིན་ནོ། །དེ་ལྟ་བུ་ཁོ་ན་ལ་དབང་བ་ཉིད་འཐད་དེ། དེའི་བདག་པོའི་འབྲས་བུ་ཡིན་པའི་ཕྱིར་དང༌། རྟག་ཏུ་དེ་དང་ཉེ་བའི་ཕྱི་དང། དགེ་བ་མངོན་དུ་མ་གྱུར་པ་དང༌། འདས་པ་དང་མ་འོངས་པའི་མི་དགེ་བ་དག་ལ་ནི་འཐོབ་པ་མ་གཏོགས་པའི་དབང་བ་ཉིད་གཞན་ཅི་ཞིག་བརྟག་ཅེས་ཟེར་རོ། །གང་ཡང་འདས་པ་དང་མ་འོངས་པ་དངོས་པོ་མེད་པའི་ཞེས་བྱ་བ་སྟེ། འགའ་ཞིག་སྐལ་བ་བསྐྱེད་པའི་ཞེས་བྱ་སྟེ། མི་འདོད་པ་ཐལ་བར་འགྱུར་བ་མ་ཡིན་ནོ། །སྲིད་པ་ཐམ་པའི་སོ་སོ་སྐྱེ་པོའི་འོག་ཏུ་སེམས་ཅན་དུ་འཐོབ་པ་དང༌། འཆི་བའི་མཐའི་སེམས་ཀྱི་གནས་སྐབས་ཀྱི་དགྲ་བཅོམ་པའི་ཟག་པ་མེད་པའི་ཆོས་སྐྱེད་པ་ལ་སྐལ་བ་མེད་པས་དགྲ་བཅོམ་པ་ཉིད་དུ་ཐལ་བ་དང༌། འཇིག་རྟེན་པའི་བཟོད་གཅིག་ནས་སྐབས་སུ་མཐོང་བས་སྤང་བར་བྱ་བའི་ཉོན་མོངས་བ་སྐྱེད་པའི་སྐལ་བ་མེད་པ་ཉིད་ཀྱིས་རྒྱུན་ཏུ་ཞུགས་བ་ལ་སོགས་པར་ཐལ་བར་འགྱུར་རོ་ཞེས་བྱ་བ་ནི་བསྟན་བཅོས་མཛད་པའི་དགོངས་པ་ཡོངས་སུ་མ་ཤེས་པའི་ཕྱིར་འདི་དག་སྒྲོ་བཏགས་པ་ཉིད་དུ་མཚོན་ནོ། །དེ་ལ་འཁོར་ལོས་སྒྱུར་བའི་མདོ་བཞིན་དུ་ཅིག་ཤོས་ལ་ཡང་དབང་བ་ཉིད་ལྡན་པ་ཞེས་མི་བརྗོད་དོ། །འོ་ན་ཅི་ཇི་ལྟར་འཁོར་ལོས་སྒྱུར་བའི་མདོར་དབང་བ་ཉིད་ལྡན་བ་ཆོས་གཞན་མ་ཡིན་པ་ཁོ་ན་ཅིག་ཤོས་ལ་ཡང་འདིའི་ས་བོན་འཇིན་པ་དང་མ་ཉམས་པ་དང་ཡོངས་སུ་རྒྱས་པ་དང་དབང་བ་ཉིད་ཀྱི་དུས་ལ་
ལྡན་པའི་སྒྲས་བརྗོད་དེ་ཆོས་གཞན་མ་ཡིན་ནོ། །དེ་ལྟར་རྣམ་པར་གཞག་པ་ན་གང་ཞིག་དབང་བ་ཉིད་དང་སྐལ་བ་སྐྱེད་པ་ལ་སྒྲོ་བཏགས་བའི་སྐྱོན་བརྗོད་པ་ནི་མ་འབྲེལ་བའོ། །དེ་ལྟ་ན་ཡང་མི་རུང་བ་ཅི་ཞིག་ཡོད་ཅེས་བྱ་བ་འབྱུང་སྟེ། ཇི་ལྟར་འཁོར་ལོས་སྒྱུར་པའི་མདོར་ཆོས་གཞན་དང་མི་ལྡན་པའི་ཕྱིར་དབང་བ་ཉིད་དུ་རྟོག་ལ། དེ་བཞིན་དུ་ཅིག་ཤོས་སུ་ཆོས་གཞན་ནོ་ཞེས་ཡོངས་སུ་བཏགས་པ་ལས། གང་ལས་དེར་ནི་ལྡན་པ་ཆོས་གཞན་དུ་མི་འདོད་པར་གྱུར་བ་རིགས་པའམ་བསྟན་བཅོས་དང་འགལ་པ་ཅི་ཞིག་ཡོད། འགལ་བ་འདི་ཡོད་དེ་རྫས་ཀྱི་ཆོས་མི་སྲིད་པའོ། །རྫས་ཀྱི་ཆོས་ནི་རང་གི་ངོ་བོས་མངོན་སུམ་གྱི་ཚད་མའི་ཡུལ་ཉིད་ཡིན་པའམ། འབྲས་བུའི་སྒོ་ནས་རྗེས་སུ་དཔག་པའི་ཡུལ་ཉིད་ཡིན་ནོ། །ཐོབ་པ་ནི་རང་གི་ངོ་བོས་སྣང་བ་ཡང་མ་ཡིན་ཏེ་མངོན་སུམ་གྱི་ཚད་མས་མ་དམིགས་པའི་ཕྱིར་རོ། །གཟུགས་དང་སྒྲ་ལ་སོགས་པ་ལྟར་རམ། འདོད་ཆགས་དང་ཞེ་སྡང་ལ་སོགས་པ་ལྟར་ཞེས་བྱ་བ་ནི་ཆོས་མི་མཐུན་བའི་དཔེ་སྟེ་གཟུགས་ལ་སོགས་པ་རྣམས་ནི་མིག་ལ་སོགས་པའི་རྣམ་པར་ཤེས་པ་དག་གིས་རང་གི་ངོ་བོས་དམིགས་ལ། དེའི་མཇུག་ཐོགས་སུ་ནི་ཡིད་ཀྱི་རྣམ་པར་ཤེས་པས་དམིགས་སོ། །འདོད་ཆགས་དང་ཞེ་སྡང་ལ་སོགས་པ་རྣམས་ནི་ཡིད་ཀྱི་རྣམ་པར་ཤེས་པ་ཁོ་ནས་དམིགས་སོ། །མིག་དང་རྣ་བ་ལ་སོགས་པ་ལྟར་བྱ་བ་ཡང་མི་སྣང་བ་ཞེས་བྱ་བ་ལ། མིག་ལ་སོགས་པ་རྣམས་ནི་དབང་པོ་ལས་འདས་པའི་ཕྱིར་མངོན་སུམ་གྱིས་རང་གི་ངོ་བོ་མ་དམིགས་ཀྱང་འབྲས་བུ་ལས་དེ་གཟུགས་ལ་སོགས་པ་ལས་ཐ་དད་པར་ཡོད་བ་ཉིད་དུ་རྗེས་སུ་དཔག་པ་ཡིན་ནོ། །འདི་ལྟར་གཟུགས་དང་ལྡན་པ་དང༌། ཡིད་ལ་བྱེད་པ་ལ་སོགས་ཡོད་ཀྱང་ལོང་བ་དང་འོན་པ་ལ་སོགས་པ་རྣམས་ལ་མིག་ལ་སོགས་པའི་རྣམ་པར་ཤེས་པ་མི་སྐྱེ་ལ། ལོང་བ་ལ་སོགས་པ་དང་བྲལ་ན་ཕྱིས་སྐྱེ་བ་ཡིན་ནོ། །དེའི་ཕྱིར་གང་ལ་གནོད་པ་བྱས་པ་དང༌། གནོད་པ་མ་བྱས་པ་ལས་མིག་ལ་སོགས་པའི་རྣམ་པར་ཤེས་པ་མ་སྐྱེ་བ་དང༌། སླར་སྐྱེ་བར་འགྱུར་པ་གཟུགས་ལ་སོགས་པ་མ་གཏོགས་པའི་
རྒྱུ་གཞན་ཞིག་ཡོད་དོ་ཞེས་བྱ་བར་ངེས་སོ། །ཐོབ་པ་ནི་རང་གི་ངོ་བོ་མ་དམིགས་པས་མངོན་སུམ་མ་ཡིན་ལ། འབྲས་བུ་མ་དམིགས་པས་རྗེས་སུ་དཔག་བས་གཟུང་བར་བྱ་བ་ཡང་མ་ཡིན་ནོ། །དེའི་ཕྱིར་རྫས་ཀྱི་ཆོས་མི་སྲིད་པས་མི་རུང་ངོ༌། །ཆོས་མཐུན་པའི་དཔེ་ནི་དམག་ལ་སོགས་པ་རྣམས་སོ། །སྐྱེ་བའི་རྒྱུ་ཞེས་བྱ་བ་ལ། དངོས་པོ་སྐྱེ་བ་ཐོབ་པའི་འབྲས་བུས་ཡིན་ཏེ། དེའི་ཕྱིར་རང་གི་ངོ་བོ་མ་དམིགས་པ་རྣམས་ཀྱང་མིག་ལ་སོགས་པ་ལྟར་འབྲས་བུ་ལ་ངེས་པས་རྫས་ཀྱི་ཆོས་ལས་འདས་པ་མེད་དོ་ཞེ་ན། འདུས་མ་བྱས་ཀྱིས་མ་ཡིན་པར་འགྱུར་རོ་ཞེས་བྱ་བ་ལ། སྐྱེ་བའི་འབྲས་བུ་ཅན་ཡིན་པའི་ཕྱིར་རོ། །དེ་རྣམས་ལ་ཐོབ་པ་ཡོད་དོ་ཞེས་བྱ་བར་དངོས་པོ་རྣམས་ཀྱི་ཐོབ་པ་སྐྱེ་བའི་སྒོ་ནས་རྟོག་ན་ནི། འདུས་མ་བྱས་ལ་སྐྱེ་བ་མེད་པའི་ཕྱིར་ནམ་མཁའ་ལྟར་ཐོབ་པའི་རྗེས་སུ་དཔག་པ་མེད་པས་འདུས་མ་བྱས་ཀྱིས་མ་ཡིན་པར་འགྱུར་རོ། །ཆོས་གང་དག་མ་ཐོབ་པ་རྣམས་དང་ཞེས་བྱ་བ་རྒྱ་ཆེར་འབྱུང་སྟེ། དེ་ལ་མ་ཐོབ་པ་རྣམས་ནི་སྦྱོར་བ་ལས་བྱུང་བ་རྣམས་དང༌། འཇིག་རྟེན་པའི་འདོད་ཆགས་དང་བྲལ་བ་རྣམས་སོ། །ས་འཕོས་བས་བཏང་བ་དག་ནི། ཉོན་མོངས་པ་ཅན་མ་མ་ཡིན་པ་རྣམས་ཏེ། དེ་དག་ཀྱང་དགེ་བ་དང་མ་བསྒྲིབས་ལ་ལུང་དུ་མ་བསྟན་པ་རྣམས་སོ། །འདོད་ཆགས་དང་བྲལ་བས་བཏང་བ་ནི་ཉོན་མོངས་པ་ཅན་རྣམས་ཏེ། དེ་དག་ཀྱང་མི་དགེ་བ་དང་བསྒྲིབས་པ་རྣམས་སོ། །སྐྱེ་བའི་རྒྱུ་ཐོབ་པ་མེད་པའི་ཕྱིར། དེ་དག་ཇི་ལྟར་སྐྱེ་བར་འགྱུར་ཏེ། གང་གི་ཚེ་ས་གོང་མ་ནས་འཆི་འཕོས་ནས་ས་འོག་མར་སྐྱེ་བའམ། དེ་ལས་འདོད་ཆགས་དང་བྲལ་བ་ལས་ཡོངས་སུ་ཉམས་པ་དེའི་ཚེ། ཐོབ་པ་མེད་པས་ས་འོག་མའི་ཆོས་རྣམས་སྐྱེ་བར་མི་འགྱུར་ལ། ཐོབ་པ་ལྷན་ཅིག་སྐྱེ་བ་ཡིན་པའི་ཕྱིར་མ་བསྒྲིབས་ལ་ལུང་དུ་མ་བསྟན་པ་རྣམས་ཀྱང་སྐྱེ་བར་མི་འགྱུར་རོ། །དེའི་ཕྱིར་ཐོབ་པ་མེད་ཀྱང་སྐྱེ་བ་མཐོང་བའི་ཕྱིར་འབྲས་བུ་མ་ཡིན་ནོ། །དེའི་ཕྱིར་འབྲས་བུ་མེད་པའི་ཕྱིར་ཐོབ་པ་རྗེས་སུ་དཔག་པས་གཟུང་བར་བྱ་བ་མ་ཡིན་པས་རྫས་ཀྱི་ཆོས་མི་སྲིད་པ་སོན་འདུག་གོ །འོན་ཏེ་ལྷན་ཅིག་སྐྱེས་པའི་ཐོབ་པའི་
རྒྱུ་ཅན་ཡིན་ཞེ་ན་ཞེས་བྱ་བ་ལ་མ་ཐོབ་བ་ལ་སོགས་པའི་ཆོས་གང་དག་ཡིན་པ་དེ་དག་ལ་སྔར་སྐྱེས་པའི་ཐོབ་པ་མེད་མོད་ཀྱི་ལྷན་ཅིག་སྐྱེས་པ་ནི་ཡོད་དེ། དེའི་ཕྱིར་དེ་དག་གི་སྐྱེ་བ་ནི་མ་བསྒྲིབས་ལ་ལུང་དུ་མ་བསྟན་པ་ལྟར་ལྷན་ཅིག་སྐྱེས་བའི་ཐོབ་བའི་རྒྱུ་ཅན་ཡིན་ཏེ། དེའི་ཕྱིར་དེ་དག་ཀྱང་སྐྱེ་བ་མཐོང་བ་ཞེས་བྱ་བ་ནི་མི་རིགས་པར་སྨྲས་པ་ཡིན་ནོ་ཞེ་ན། དེའི་ཚེ་སྐྱེ་བའམ་ཞེས་བྱ་བ་འབྱུང་སྟེ། གལ་ཏེ་ཆོས་ལྷན་ཅིག་སྐྱེས་པའི་རྒྱུ་ཅན་ཡིན་ན་ནི་དེའི་ཚེ་སྐྱེ་བ་ཅི་ཞིག་བྱེད་པར་འགྱུར་རོ། །གང་གི་ཕྱིར་སྐྱེ་བའི་འབྲས་བུས་ཐུན་མོངས་ཡིན་པ་ནི་བསྐྱེད་པ་ཁོ་ན་ཡིན་ནོ། །གལ་ཏེ་ཐོབ་པ་སྐྱེད་པར་བྱེད་པ་ཡིན་ན་ནི་དེའི་ཚེ་སྐྱེ་བ་ཅི་ཞིག་བྱེད་པར་འགྱུར་ཏེ། གནས་པ་ལ་སོགས་པ་ལྟར་དེ་ལ་བྱེད་པ་གཞན་མེད་པའི་ཕྱིར་རོ། །དེས་ན་དེ་ཡོངས་སུ་བརྟགས་པ་དོན་མེད་པར་འགྱུར་ལ། ཡང་ན་ཆོས་རྣམས་ལྷན་ཅིག་སྐྱེས་པའི་ཐོབ་པའི་རྒྱུ་ཅན་ཡིན་ནོ་ཞེས་བྱ་བ་ཁས་བླངས་པར་མི་བྱའོ། །ཅི་སྟེ་སྐྱེ་བ་དོན་མེད་པར་འགྱུར་དུ་འོང་བས་དེའི་ཚེ་ན་ཐོབ་པས་སྐྱེ་བ་སྐྱེད་བར་བྱེད་ལ། སྐྱེ་བས་ཆོས་སྐྱེད་བར་བྱེད་དོ་ཞེས་བྱ་བ་དེ་ལྟར་འདོད་དོ་སྙམ་ན། དེའི་ཕྱིར་སྐྱེ་བའི་སྐྱེ་བ་ཞེས་བྱ་བ་སྨོས་ཏེ། འདིར་ཡང་སྐྱེ་བ་བཞིན་དུ་བརྗོད་པར་བྱའོ། །ཡང་ན་གལ་ཏེ་ཐོབ་པའི་ཆོས་སྐྱེད་བ་དེ་ལྟར་ན་སྐྱེ་བའི་ཐོབ་པ་ཡང་སྐྱེ་བས་སྐྱེད་ཅེས་པའི་འཐད་པ་བརྗོད་པར་བྱ་དགོས་ཏེ་དེ་ནི་སྐྱེ་བས་ཅི་ཞིག་བྱེད་པར་འགྱུར། སྐྱེ་བ་ཉིད་ལ་ཆོས་མི་མཐུན་པ་མངོན་པར་སྐྱེ་བས་སྐྱེད་པ་དེ་ཉིད་ཀྱིས་ཐོབ་བ་དེ་སྐྱེ་ན། དེ་ནི་སྐྱེ་བས་ཅི་ཞིག་བྱེད་སྐྱེ་བའི་སྐྱེ་བ་ཡང་ཞེས་བརྗོད་པར་བྱ་དགོས་སོ། །འཆིང་བ་མཐའ་དག་དང་ལྡན་པ་ཞེས་རྒྱ་ཆེར་འབྱུང་བ་ལ། འཆིང་བ་མཐའ་དག་དང་ལྡན་པ་ཞེས་བྱ་བ་ནི་གང་དག་གིས་ཉོན་མོངས་པའི་རྣམ་པ་གཅིག་ཀྱང་མ་སྤངས་པའོ། །གང་གི་ཕྱིར་ཐོབ་པ་དང་ལྡན་པའི་ཁྱད་པར་ཐོབ་པ་ལ་ཁྱད་པར་མེད་པ་དེའི་ཕྱིར་འཆིང་བ་མཐའ་དག་དང་ལྡན་པ་རྣམས་ཀྱིས་ཉོན་མོངས་པ་ཆུང་ངུ་དང་འབྲིང་དང་ཆེན་པོ་སྐྱེ་བ་ཁྱད་པར་དུ་མི་འགྱུར་ཏེ། དེའི་རྒྱུར་འགྱུར་བའི་ཐོབ་པ་ལ་བྱེ་བྲག་མེད་པའི་ཕྱིར་རོ། །
གཞན་དག་ན་དེ་ནི་རྒྱུད་གཞན་ལ་བལྟོས་ན་ཐོབ་པ་བྱེ་བྲག་མེད་པའི་ཕྱིར་རོ། །འདི་ལྟར་འཆིང་བ་མཐའ་དག་དང་ལྡན་པ་ཐམས་ཅད་ཀྱི་ཐོབ་པ་རྣམས་མཚུངས་ཏེ། ཉོན་མོངས་པ་ཆུང་དུའི་ཆུང་དུ་རྣམས་ཀྱིས་ཐོབ་པ་ཆུང་ངུའི་ཆུང་ངུ་ཡིན་པ་ནས་ཆེན་པོའི་ཆེན་པོ་རྣམས་ཀྱིས་ཐོབ་པ་ཆེན་པོའི་ཆེན་པོའི་བར་ཡིན་པས། ཐམས་ཅད་ཀྱིས་ཐོབ་པ་བྱེ་བྲག་མེད་ཀྱང༌། ལྷས་བྱིན་ལ་སོགས་པ་རྣམས་ཀྱི་ཉོན་མོངས་པ་ཆུང་ངུ་དང༌། འབྲིང་དང༌། ཆེན་པོ་སྐྱེ་བའི་ཁྱད་པར་དུ་མ་ལ་འགྱུར་ཏེ། རྒྱུ་ལ་བྱེ་བྲག་མེད་ན་འབྲས་བུའི་བྱེ་བྲག་མི་རིགས་སོ་ཞེས་ཟེར་རོ། །འཆིང་བ་མཐའ་དག་དང་ལྡན་པ་སྨོས་པ་ནི་འཆིང་བ་དང་བྲལ་བ་རྣམས་ལ་ཆུང་དུ་ལ་སོགས་པའི་ཁྱད་པར་དུ་ཉོན་མོངས་བ་སྐྱེ་བའི་གོ་སྐབས་ཡོད་པར་བསྟན་པའི་ཕྱིར་རོ། །ཅི་སྟེ་ཐོབ་པ་ལ་བྱེ་བྲག་མེད་ཀྱང་གོམས་པ་ལ་སོགས་པ་རྒྱུ་མཚན་གཞན་ལས་ཉོན་མོངས་པ་སྐྱེ་བ་ཁྱད་པར་དུ་འགྱུར་བས་ཉེས་པ་འདི་མེད་སྙམ་ན། དེའི་ཕྱིར་དེ་ལས་དེ་དག་གི་བྱེ་བྲག་ཏུ་འགྱུར་ན་ནི་ཞེས་བྱ་བ་སྨོས་སོ། །གོམས་པའམ་གཞན་ལས་ཆུང་དུ་དང་འབྲིང་དང་ཆེན་པོའི་བདག་ཉིད་ཅན་དུ་འགྱུར་བ་དེ་ཁོ་ན་ལས་དེ་དག་སྐྱེ་ལ་རག་སྟེ། རྒྱུ་གཞན་གང་ཞིག་ལས་ཉོན་མོངས་པའི་ཁྱད་པར་ཡོངས་སུ་བརྟགས་པ་དེ་ཁོ་ནས་ཉོན་མོངས་པ་རྣམས་ཆུང་དུ་དང་འབྲིང་དང་ཆེན་པོ་ཉིད་དུ་སྐྱེ་ལ་རག་མོད། ཐོབ་པ་དོན་གཞན་དུ་གྱུར་པ་ཡོངས་སུ་བརྟགས་བ་ཅི་དགོས། དེ་སྐད་དུས་སུ་ཟེར་ཞེས་བྱ་བ་རྒྱས་པར་འབྱུང་སྟེ། རྣམ་པར་གཞག་པ་ནི་ངེས་བའི་རྒྱུ་ཞེས་བྱ་བའི་དོན་ནོ། །རེ་ཞིག་སོ་སོ་སྐྱེ་བོ་རྣམས་ནི་འཇིག་རྟེན་པའི་ཡིད་དང་ལྡན་པ་དང༌། འཕགས་པ་རྣམས་ནི་ཟག་པ་མེད་པའི་ལམ་མངོན་དུ་གྱུར་པའི་ཚེ་འཇིག་རྟེན་ལས་འདས་པར་འགྱུར་བས་དེའི་ཕྱིར་འཇིག་རྟེན་པའི་ཡིད་དང་ལྡན་པ་སྨོས་སོ། །ཡིད་ནི་ཡིད་ཉིད་དོ། །ལམ་མངོན་སུམ་དུ་གྱུར་བའི་ཚེ་ནི་ཐོབ་པ་མེད་པར་འཕགས་པ་དང་སོ་སོ་སྐྱེ་བོའི་རྣམ་པར་གཞག་པར་བྱ་བར་ནུས་ཏེ། ལམ་ཉིད་རྣམ་པར་གཞག་པའི་རྒྱུ་ཡིན་པའི་ཕྱིར་རོ། །འཇིག་
རྟེན་པའི་ཡིད་དང་ལྡན་པ་རྣམས་ལ་ནི་ཐོབ་པ་མེད་པར་འདི་དག་ནི་འཕགས་པ་རྣམས་སོ། །འདི་དག་ནི་སོ་སོ་སྐྱེ་བོ་རྣམས་སོ་ཞེས་བྱ་བར་རྣམ་པར་གཞག་པར་མི་འགྱུར་ན། འདོད་པ་ཡང་མ་ཡིན་ཏེ། དེའི་ཕྱིར་ཟག་པ་མེད་པའི་ལམ་གྱི་ཐོབ་པ་ཡོད་པ་དང། དེ་མེད་པ་ནི་འཕགས་པ་དང་སོ་སོ་སྐྱེ་བོ་རྣམ་པར་གཞག་པའི་རྒྱུ་ཡིན་ནོ་ཞེས་བྱ་བར་ངེས་སོ། །སློབ་དཔོན་འདུས་བཟང་ན་རེ། རྫས་ཀྱི་ཆོས་མི་སྲིད་པས་མི་རུང་ངོ་ཞེས་བྱ་བ་ནི་ཡོད་པ་མ་ཡིན་ཏེ། ཐོབ་པ་ནི་ཆོས་ཐོབ་ཟིན་པ་ཆུད་མི་ཟ་བའི་རྒྱུ་ཡིན་པའི་ཕྱིར་དང༌། ཐོབ་པ་འདི་ནི་འདིའོ་ཞེས་ཤེས་པའི་རྟགས་མཚན་ཡིན་པའི་ཕྱིར་རོ། །ཅི་འོ་ན་འདི་ལས་གཞན་མ་ཡིན་པ་དང་འབྲས་བུ་ཡོད་པ་ཞེས་བྱ་བར་རྣམ་པར་གཞག་པའི་རྒྱུ་ཞེས་བྱ་བར་མིང་གཞན་གྱིས་བརྗོད་ཅེ་ན། ཆུད་མི་ཟ་བའི་རྒྱུ་ཞེས་བྱ་བ་གཞན་མ་ཡིན་པ་ཤེས་པའི་རྟགས་མཚན་དུ་གྱུར་བ་ཡང་མི་རིགས་ཏེ། ཐོབ་པ་མངོན་སུམ་མ་ཡིན་པའི་ཕྱིར་རོ། །འོན་ཏེ་སངས་རྒྱས་རྣམས་ཀྱིས་ཞེ་ན་སངས་རྒྱས་རྣམས་ཀྱིས་ཡང་མ་ཡིན་ཏེ་རྗེས་སུ་དཔག་པ་ཅན་ཉིད་དུ་ཐལ་བའི་ཕྱིར་རོ། །རང་བཞིན་དང་འབྲས་བུ་ངེས་པར་གཟུང་བས་དེ་ཡོད་པ་ཉིད་དུ་འཐད་པ་ཡང་མ་ཡིན་ནོ། །གལ་ཏེ་ཐོབ་པ་མི་འདོད་ན་འོ་ན་འཕགས་པ་དང་སོ་སོའི་སྐྱེ་བོ་རྣམ་པར་གཞག་པ་དང༌། ཐོབ་པའི་ཆོས་ཆུད་མི་ཟ་བ་དང༌། འདི་ནི་འདིའོ་ཞེས་བྱ་བར་ཤེས་པ་ཡང་ཅི་ཞིག་ལས་ཡིན་ཞེ་ན། དེ་ཉིད་ཀྱི་ཕྱིར་དེ་ནི་ཉོན་མོངས་པ་སྤངས་པ་དང་མ་སྤངས་པ་ཉིད་ཀྱི་བྱེ་བྲག་ལས་འགྱུར་བར་འོས་སོ་ཞེས་སྨོས་ཏེ། ཉོན་མོངས་པ་སྤངས་པ་དང་མ་སྤངས་པ་དག་གི་དངོས་པོ་ནི་ཉོན་མོངས་པ་སྤངས་པ་དང་མ་སྤངས་པ་ཉིད་དེ་དེ་ཉིད་བྱེ་བྲག་ཡིན་ནོ། །དེ་ལ་ཉོན་མོངས་པ་སྤངས་པ་ཉིད་ནི་ཉོན་མོངས་པའི་ས་བོན་རྩ་བ་ནས་བཏོན་པ་ལས་ཉོན་མོངས་པ་རྣམས་ཀྱང་མི་སྐྱེ་བའོ། །ཉོན་མོངས་པ་མ་སྤངས་པ་ཉིད་ནི་ཉོན་མོངས་པའི་ས་བོན་རྩ་བ་ནས་མ་བཏོན་པ་ལས་ཉོན་མོངས་བ་ཡང་སྐྱེ་བ་སྲིད་པའོ། །དེ་ལྟར་ན་འཇིག་རྟེན་བའི་ཡིད་དང་ལྡན་པ་ཡིན་ཡང་གང་ལ་ས་བོན་མེད་པས་ཉོན་མོངས་པ་ནམ་ཡང་མི་སྐྱེ་བའི་ཆོས་ཅན་ཡིན་པ་དེ་དག་ནི་འཕགས་པ་ཡིན་ལ། གང་དག་
ལ་ས་བོན་རྒྱུན་མ་བཅད་པས་ཀྱང་སྐྱེ་བར་འགྱུར་བ་དེ་དག་ནི་སོ་སོའི་སྐྱེ་བོ་ཡིན་པས་རྣམ་པར་གཞག་བ་གྲུབ་པོ། །ཐོབ་པ་ནི་འདིར་ས་བོན་ཁོ་ནའོ། །དེའི་ཕྱིར་ཐོབ་པ་ཆུད་མི་ཟ་བ་ཡང་ས་བོན་ཉིད་དེ་དེའི་ཞེས་བྱ་བ་ཤེས་པའོ། །འདི་ཉིད་དུ་ཡང་ཇི་ལྟར་འགྱུར་ཞེས་བྱ་བ་ལ་སོགས་པ་ལ། འདི་ལྟར་འཕགས་པ་དང་སོ་སོ་སྐྱེ་བོ་རྣམས་ལས་གང་ལས་འདི་དག་ནི་ཉོན་མོངས་པ་སྤངས་པའོ། །འདི་དག་ནི་ཉོན་མོངས་པ་མ་སྤངས་པའོ་ཞེས་བྱ་བར་རྟོགས་པར་འགྱུར་བ་ཉོན་མོངས་པ་སྤངས་པ་དང་མ་སྤངས་པའི་རྟགས་མཚན་ཅུང་ཟད་ཀྱང་མེད་དེ། དེའི་ཕྱིར་ཉོན་མོངས་པ་སྤངས་པ་དང་མ་སྤངས་པ་ཉིད་དུ་མི་རྟོགས་པའི་ཕྱིར། འདི་དག་ནི་འཇིག་རྟེན་པའི་ཡིད་དང་ལྡན་པའི་འཕགས་པའོ། །འདི་དག་སོ་སོ་སྐྱེ་བོ་ཞེས་བྱ་བའི་རྣམ་པར་གཞག་པ་མེད་པ་སོན་འདུག་གོ །ཐོབ་པ་ཡོད་ན་ནི་འདི་དག་ནི་ཉོན་མོངས་པ་སྤངས་པའོ། །འདི་དག་ནི་ཉོན་མོངས་པ་མ་སྤངས་པའོ་ཞེས་བྱ་བ་འདི་འགྲུབ་པར་འགྱུར་རོ། །ཇི་ལྟར་ཞེ་ན། དེའི་ཕྱིར། དེ་དང་བྲལ་བ་དང་མ་བྲལ་བ་ལས་ཞེས་སྨོས་ཏེ། གང་དག་གི་རྒྱུད་ལ་ཉོན་མོངས་པའི་ཐོབ་པ་རྣམས་དང་མི་ལྡན་པ་དང༌། རྣམ་པར་ཆད་པ་དེ་དག་ནི་ཉོན་མོངས་པ་སྤངས་པའོ། །གང་དག་གི་རྒྱུད་ལ་མ་བྲལ་བ་དང་རྒྱུན་མ་ཆད་བ་དེ་དག་ཉོན་མོངས་པ་མ་སྤངས་བའོ། །སོ་སོ་སྐྱེ་བོ་ཁ་ཅིག་ཀྱང་འཕགས་པ་དང་ཉོན་མོངས་པའི་ཐོབ་པ་ཆད་བར་མཚུངས་པ་མ་ཡིན་ནམ། དེ་ལ་ཅི་ལྟར་ན་ལམ་གྱིས་ཆད་བས་འཕགས་བ་དང་སོ་སོ་སྐྱེ་བོར་རྣམ་པར་གཞག་ཅེ་ན། ཟག་པ་དང་བཅས་པ་དང་ཟག་པ་མེད་པའི་ལམ་གྱིས་རྣམ་པར་ཆད་པའི་ཕྱིར་རོ། དེ་ཡང་ཇི་ལྟར་ཤེས་པར་བྱ་ཞེ་ན། ཟག་པ་དང་བཅས་པ་དང་ཟག་པ་མེད་པའི་བྲལ་བའི་ཐོབ་པ་ཐ་དད་པའི་ཕྱིར་རོ། །འདི་ནི་རྟེན་གྱི་བྱེ་བྲག་ལས་གྲུབ་པར་འགྱུར་ཏེ་ཞེས་བྱ་ནི། འདི་དག་ནི་ཉོན་མོངས་པ་སྤངས་པའོ། །འདི་དག་ནི་ཉོན་མོངས་བ་མ་སྤངས་པའོ་ཞེས་བྱ་བའོ། །འདིར་རྟེན་ནི་ཕུང་པོ་ལྔའོ། །གཞན་དག་ན་རེ་སེམས་དང་སེམས་ལས་བྱུང་བའི་བདག་ཉིད་དོ་ཞེས་ཟེར་རོ། །འཕགས་པ་དང་སོ་སོ་སྐྱེ་བོ་དག་དང༌། ཉོན་མོངས་པ་སྤངས་པ་དང་མ་སྤངས་བ་དག་གི་རྟེན་གྱི་བྱེ་བྲག་
བསྟན་པའི་ཕྱིར། འཕགས་པ་རྣམས་ཀྱིས་གནས་ནི་ཞེས་རྒྱ་ཆེར་སྨོས་སོ། །འཕགས་པའི་ལམ་མ་སྐྱེས་པའི་རྟེན་ནི་མཐོང་བ་དང་བསྒོམ་པས་སྤང་བར་བྱ་བའི་ཉོན་མོངས་པའི་ས་བོན་དང༌། རྗེས་སུ་འབྲེལ་བའི་རྟེན་གཞན་གྱི་རྒྱུར་འགྱུར་པས་གནས་སྐབས་དེར་ནི་སོ་སོ་སྐྱེ་བོ་ཞེས་བྱ་སྟེ། ཁམས་གསུམ་པའི་ཉོན་མོངས་པ་མ་ལུས་པའི་ས་བོན་དང་རྗེས་སུ་འབྲེལ་པའི་སྐད་ཅིག་གཞན་སྐྱེད་པར་བྱེད་པ་ཡིན་པའི་ཕྱིར་རོ། །ཉོན་མོངས་པའི་གཉེན་པོ་ནི་མཐོང་བའི་ལམ་མམ་བསྒོམ་པའི་ལམ་མངོན་དུ་གྱུར་ལ། དེ་མངོན་དུ་གྱུར་ན་རྟེན་དེ་དག་གི་སྤང་བར་བྱ་བའི་ཉོན་མོངས་པའི་ས་བོན་དང་རྗེས་སུ་འབྲེལ་པའི་སྐད་ཅིག་མ་གཞན་གྱི་རྒྱུ་མ་ཡིན་ཏེ་ད་སྐྱེ་བ་དང་འགལ་བའི་རྐྱེན་ཐོབ་པའི་ཕྱིར་རོ། །སྤང་བར་བྱ་བའི་ཉོན་མོངས་པའི་ས་བོན་མི་ལྡོག་པའི་བདག་ཉིད་ཁོ་ན་བར་མཆད་དུ་དེ་སྐྱེ་བ་དང་རྗེས་སུ་མཐུན་པའི་རྐྱེན་ཐོབ་པས་རྒྱུའི་ངོ་བོ་སྟེ་འདས་པ་ཡང་ངོ༌། །དེའི་ཕྱིར་རྟེན་དེས་མཐོང་བ་དང་བསྒོམ་པས་སྡང་བར་བྱ་བའི་ཉོན་མོངས་པ་རྣམས་ཀྱང་བསྐྱེད་པར་མི་ནུས་ཏེ། ས་བོན་མེད་པའི་ཕྱིར་རོ། །ས་བོན་མེད་པ་རྣམས་ནི་སྐྱེ་བར་མི་རིགས་ཏེ་ཧ་ཅང་ཐལ་བའི་ཕྱིར་རོ། །དེ་ཉིད་ཀྱི་ཕྱིར་ཉོན་མོངས་པའི་ས་བོན་རྒྱུན་ཆད་པ་ལས་མཐོང་བ་དང་བསྒོམ་པའི་ལམ་གྱི་མཐུས་ཇི་ལྟར་དེ་དག་གི་སྤང་བར་བྱ་བའི་ཉོན་མོངས་པ་རྣམས་ཀྱང་འབྱུང་བར་མི་འགྱུར་ཏོ། །དེ་ལྟར་གྱུར་པ་ཡིན་ཏེ་ཞེས་བྱ་བ་སྨོས་ཏེ། རྟེན་དེ་ལ་ས་བོན་དྲུངས་ཕྱུང་བའི་ཕྱིར་རོ། །དེའི་ཕྱིར་རྟེན་འབྲུ་མེས་ཚིག་པ་བཞིན་དུ་ཞེས་བྱ་བ་ལ་སོགས་པ་སྨོས་ཏེ། འབྲུ་མེས་ཚིག་པ་ལས་མྱུ་གུ་བསྐྱེད་པའི་ས་བོན་མེད་པས་རྟེན་དེ་ཡང་མྱུ་གུ་མི་སྐྱེད་པས་ས་བོན་དུ་མ་གྱུར་བ་དེ་བཞིན་དུ་རྟེན་ལམ་གྱི་མེས་ཚིག་ཅིང་ཉོན་མོངས་པ་རྣམས་ཀྱི་ས་བོན་དུ་མ་གྱུར་བས་ན་ཉོན་མོངས་པ་སྤངས་པ་ཞེས་བྱའོ། །དེ་ལྟ་ན་འོ་ན་འཇིག་རྟེན་པའི་འདོད་ཆགས་དང་བྲལ་བས་ཉོན་མོངས་པ་སྤངས་པར་མི་འགྱུར་ཏེ། འཇིག་རྟེན་པའི་ལམ་གྱིས་ཉོན་མོངས་པའི་ས་བོན་རྒྱུན་མི་གཅོད་པའི་ཕྱིར་རོ་ཞེ་ན། དེའི་ཕྱིར་རྟེན་པ་འཇིག་རྟེན་པའི་ལམ་གྱིས་ཉོན་མོངས་པ་རྣམས་ཀྱི་ས་བོན་གྱི་དངོས་པོ་ཉམས་པར་བྱས་ན་ཉོན་མོངས་པ་སྤངས་
པ་ཞེས་བྱའོ། །བཟློག་པ་ནི་སྤངས་པ་མ་ཡིན་པ་ཞེས་བྱ་བ་ལ། འཕགས་པ་དང་འཕགས་པ་མ་ཡིན་པའི་ལམ་དག་གིས་རྟེན་མ་ཚིག་ཅིང་ས་བོན་གྱི་དངོས་པོ་ཉམས་བར་མ་བྱས་ན་ཉོན་མོངས་པ་མ་སྤངས་པ་ཞེས་བྱའོ། །རྟེན་ལ་རྩ་ནས་མ་བཏོན་པ་དང༌། ཉམས་པར་མ་བྱས་པའི་ས་བོན་ཡོད་པས་གང་མ་སྤངས་པ་དེ་དང་ནི་ལྡན་ནོ། །རྟེན་ལས་ས་བོན་རྩ་ནས་བཏོན་པའི་ཕྱིར་རམ། ས་བོན་ཉམས་པར་བྱས་པའི་ཕྱིར་གང་སྤངས་པ་དེ་དང་ནི་མི་ལྡན་ནོ། །དེ་ལྟར་འཇིག་རྟེན་པའི་ཡིད་དང་ལྡན་པ་ཉིད་དུ་ཁྱད་པར་མེད་ཀྱང་རྟེན་ལ་ས་བོན་རྩ་ནས་བཏོན་པ་དང༌། རྩ་ནས་མ་བཏོན་པའི་ཕྱིར་འཕགས་པ་དང་སོ་སོ་སྐྱེ་བོར་རྣམ་པར་བཞག་ལ། ས་བོན་ཉམས་པར་བྱས་པ་དང་མ་བྱས་པའི་ཕྱིར་འཇིག་རྟེན་བའི་འདོད་ཆགས་དང་བྲལ་བ་དང༌། འདོད་ཆགས་དང་བྲལ་བ་མ་ཡིན་པ་ཞེས་བྱ་བར་རྣམ་པར་གཞག་གོ་ཞེས་བྱ་བར་གདམས་ཏེ། ས་བོན་རྒྱན་ཆད་པ་དང་ཉམས་པར་བྱས་པའི་ཕྱིར་དང་རྒྱུན་མ་ཆད་པ་དང་ཉམས་པར་མ་བྱས་པའི་ཕྱིར་ཐ་སྙད་གདགས་སོ་ཞེས་བྱ་བའི་ཐ་ཚིག་གོ །ལྡན་པ་འདི་ནི་གང་ཟག་ལ་སྟེ། དགེ་བའི་ཆོས་རྣམས་དང་མི་དགེ་བའི་ཆོས་རྣམས་ཀྱང་ཞེས་མདོ་ལས་འབྱུང་བའི་ཕྱིར་རོ། །ཆོས་ཉོན་མོངས་པ་ཅན་རྣམས་ཀྱི་ལྡན་པ་དང་མི་ལྡན་པའི་ཐ་སྙད་བརྗོད་པའི་མཇུག་ཐོགས་སུ་དགེ་བ་རྣམས་ཀྱིས་བརྗོད་པར་བྱ་བ་ཡིན་པས། དེའི་ཕྱིར་དགེ་བའི་ཆོས་རྣམས་ཀྱང་རྣམ་པ་གཉིས་ཏེ་ཞེས་བྱ་བ་རྒྱས་པར་སྨོས་སོ། །མ་འབད་པར་སྐྱེ་པ་རྣམས་ནི་འབད་པ་ལ་མི་བལྟོས་པ་རྣམས་ཏེ། གང་དག་སྐྱེས་པ་ཙམ་གྱིས་ཐོབ་པའོ། །འབད་དེ་སྐྱེ་བ་རྣམས་ནི་གང་དག་སྐྱེ་བ་ལ་མི་བལྟོས་པར་སྦྱོར་བའི་ཁྱད་པར་གྱིས་འཐོབ་པའོ། །དེ་ཉིད་ཀྱི་ཕྱིར་གང་དག་སྐྱེ་བས་ཞེས་བྱ་བ་རྒྱས་པར་སྨོས་ཏེ། གང་དག་སྐྱེས་པ་ཉིད་ཀྱིས་འཐོབ་ཀྱི་འབད་རྩོལ་གཞན་ལ་མི་བལྟོས་པ་དེ་དག་ནི་སྐྱེ་བས་འཐོབ་པ་རྣམས་སོ། །འདིར་སྐྱེ་བ་ནི་ཅི་རིགས་པར་སྲིད་པ་བར་མར་ཉིང་མཚམས་སྦྱོར་བ་དང༌། སྐྱེ་བའི་སྲིད་པར་ཉིང་མཚམས་སྦྱོར་བའོ། །གང་དག་སྦྱོར་བའི་ཁྱད་པར་ལ་རག་ལས་ཏེ་སྐྱེ་བ་དེ་དག་ནི་སྦྱོར་བ་ལས་བྱུང་བའོ། །དེ་དག་གིས་ས་བོན་གྱི་དངོས་པོ་ཉམས་པར་མ་བྱས་པའི་ཕྱིར་ཞེས་
བྱ་བ་ལ་དེ་དག་གི་སྒྲ་ནི་མ་འབད་པར་སྐྱེ་བ་དང་སྦྱར་རོ། །དགེ་བའི་རྩ་བ་ཀུན་ཏུ་མ་ཆད་པ་རྣམས་ལ་ནི་ལོག་པར་ལྟ་བ་མེད་པའི་ཕྱིར་དེ་དག་གིས་ས་བོན་གྱི་དངོས་པོ་ཉམས་པར་མ་བྱས་པས་མ་འབད་བར་སྐྱེས་པ་རྣམས་དང་ནི་དགེ་བའི་རྩ་བ་ཀུན་ཏུ་མ་ཆད་པར་ལྡན་ནོ་ཞེས་བྱའོ། །ས་བོན་གྱི་དངོས་པོ་དེ་གང་དག་གིས་ཉམས་པར་བྱེད་ཅེ་ན། དེའི་ཕྱིར་དེ་ཉམས་པ་ཡང་ཞེས་བྱ་བ་ལ་སོགས་པ་སྨོས་སོ། །དགེ་བའི་ཆོས་རྣམས་ཀྱི་རྩ་བ་གཏན་དུ་ཡང་དག་པར་བཅོམ་པ་མ་ཡིན་ནོ་ཞེས་བྱ་བར་ཇི་ལྟར་རྟོགས་ཤེ་ན། ཡང་དགེ་བའི་རྩ་བ་ཉིད་མཚམས་སྦྱོར་བའི་ཕྱིར་དང་ས་བོན་ཀུན་ཏུ་ཆད་པ་རྣམས་ཡང་འབྱུང་བའི་ཕྱིར་རོ། །མདོ་ལས་ཀྱང་དགེ་སློང་དག་ལྷས་བྱིན་གྱིས་དགེ་བའི་རྩ་བ་རྣམས་ཉིང་མཚམས་སྦྱོར་བ་ཉིད་ཅེས་གསུངས་སོ། །གང་ཡང་ཇི་སྐད་དུ་དགེ་སློང་དག་གང་ངས་ལྷས་བྱིན་གྱི་རྒྱུད་ལ་དགེ་བའི་ཆོས་སྐྲའི་རྩེ་མོ་ཙམ་ཡང་མ་གཟིགས་ཏེ། ལྷས་བྱིན་དེ་ངས་དགེ་བའི་རྩ་བ་ཀུན་ཏུ་ཆད་པ་སྡིག་པ་ཅན་དུ་ལུང་བསྟན་ཏོ་ཞེས་གསུངས་སོ། །དེ་བཞིན་དུ་གང་ཟག་དེ་ལ་དགེ་བའི་ཆོས་རྣམས་མི་མངོན་པར་འགྱུར་རོ། །མི་དགེ་བའི་ཆོས་རྣམས་སྐྱེ་བར་འགྱུར་རོ། །དེ་ལ་དག་པའི་རྩ་བ་ཀུན་ཏུ་ཆད་པ་རྡུལ་དང་མཉམ་པ་ཞིག་ཡོད་དེ། དེའི་དེ་ཡང་དུས་གཞན་དུ་ཐམས་ཅད་ཀྱི་ཐམས་ཅད་དུ་འཆད་པར་འགྱུར་རོ་ཞེས་གསུངས་ཤེ་ན། དེ་ནི་རྣམ་པ་ཐམས་ཅད་དུ་མངོན་དུ་མི་རྒྱུ་བའི་དངོས་པོ་མེད་པའི་དབང་དུ་མཛད་ནས་གསུངས་པར་རིག་པར་བྱའོ། །གང་དག་འབད་དེ་སྐྱེ་བ་ནི་ཞེས་བྱ་བ་རྒྱས་པར་འབྱུང་སྟེ་སྐྱེ་བའི་དབང་ཉིད་དོ། །དེ་ཡང་ཅི་ཞིག་ཅེ་ན། དེ་ལས་སྐྱེས་ཤིང་དེའི་རྒྱུར་གྱུར་པའི་ནུས་པའི་ཁྱད་བར་ཞིག་སྟེ་དེ་ལ་ཐོགས་པ་མེད་པའི་ཕྱིར་ཏེ། གེགས་མ་བྱས་པའི་ཕྱིར་དེ་དག་དང་ལྡན་ནོ། །དེའི་ཕྱིར་འདིར་ས་བོན་ཁོ་ན་རྩ་ནས་བཏོན་པ་ཞེས་བྱ་བ་རྒྱས་པར་འབྱུང་སྟེ། དེ་ལ་རྩ་ནས་མ་བཏོན་པ་ནི་འཇིག་རྟེན་ལས་འདས་པའི་ལམ་གྱིས་ཉོན་མོངས་པ་ཅན་རྣམས་ཀྱི་ས་བོན་ནོ། །ཉམས་པར་མ་བྱས་པ་ནི་འཇིག་རྟེན་པའི་ལམ་གྱིས་དེ་དག་ཉིད་ཀྱི་ས་བོན་དང་ལོག་པར་ལྟ་བ་ཀུན་ཏུ་མི་རྒྱུ་བ་ལས་དགེ་བ་སྐྱེས་ནས་ཐོབ་པ་རྣམས་ཀྱི་ས་བོན་ནོ། །དབང་པའི་དུས་
ན་རྒྱས་པར་གྱུར་པ་ནི་ཞེས་བྱ་བ་ནི་འབད་དེ་སྐྱེ་བའི་སྟེ་ས་བོན་ཞེས་བྱ་བའི་སྐབས་ཡིན་ནོ། །རྒྱས་པར་གྱུར་པ་ནི་རིགས་པར་བརྩོན་པས་ཡང་དང་ཡང་དུ་བསྐྱེད་པ་ལས་སོ། །ཐོགས་པ་ནི་སྐྱེད་པར་བྱེད་པའི་ཕྱིར་མི་བརྩོན་པའམ། ལོག་པར་བརྩོན་པ་ལ་སོགས་པ་ལ་ས་བོན་ཞེས་བྱ་བ་ནི་ཅི་ཞིག་ཡིན་ཞེས་བྱ་བ་ནི་དེའི་རང་གི་ངོ་བོས་ངེས་བར་མ་ཟིན་པའི་ཕྱིར་འདྲི་པའོ། །འབྲས་བུ་བསྐྱེད་བར་བྱ་བ་ལ་ཞེས་བྱ་ལ་སོགས་པ་ལ། འབྲས་བུ་ནི་དགེ་བ་དང༌། མི་དགེ་བ་དང༌། ལུང་དུ་མ་བསྟན་པའི་ཆོས་རྣམས་ཏེ། དེ་ལ་བསྐྱེད་པར་བྱ་བ་ལ་ནུས་པའི་མིང་དང་གཟུགས་གང་ཡིན་པ་དེ་ནི་དེ་དག་གི་ས་བོན་ནོ་ཞེས་བྱའོ། །མངོན་སུམ་མམ་བརྒྱུད་པས་ཞེས་བྱ་བ་ལ། མངོན་སུམ་ནི་བར་མེད་པའོ། །བརྒྱུད་པ་ནི་རྒྱུན་ཏུ་གཏོགས་པའི་སྐད་ཅིག་གཞན་གྱིས་བར་ཆོད་པའོ། །ཡོངས་སུ་འགྱུར་བ་གཞན་ལས་ཁྱད་བར་དུ་གྱུར་བ་ནི་འགྱུར་བའི་བྱེ་བྲག་གོ །དེ་ནི་འབྲས་བུ་བསྐྱེད་པར་བྱེད་པའི་ནུས་པ་ཞིག་སྟེ་གང་གི་མཇུག་ཐོགས་སུ་འབྲས་བུ་སྐྱེ་བའོ། །གྲངས་ཅན་པའི་འགྱུར་བ་ལས་རྣམ་པར་དབྱེ་བར་བྱ་བའི་ཕྱིར། །འགྱུར་བ་ཞེས་བྱ་བ་འདི་ཅི་ཡིན་ཞེས་བྱ་བ་སྨོས་སོ། །དེ་ཉིད་ཀྱི་ཕྱིར་རྒྱུད་གཞན་ཉིད་དུ་འགྱུར་བའི་ཞེས་བྱ་བ་སྨོས་ཏེ། རྒྱུད་ཐ་དད་པའི་རྒྱུ་ལས་མི་འདྲ་བའི་འབྲས་བུ་འབྱུང་བ་ཞེས་བྱ་བའི་དོན་ཏོ། །རྒྱུད་ཅེས་བྱ་བ་འདི་ཡང་ཅི་ཞིག་ཡིན་ཞེས་བྱ་བ་ནི་དངོས་པོ་རྣམས་ཀྱིས་རྣམ་པར་གཞག་པ་ནི་གཉིས་ཏེ། དོན་དམ་པ་དང༌། བཏགས་པའོ། །དེ་ལ་གལ་ཏེ་དོན་དམ་པ་རྒྱུད་དུ་འདོན་ན་ནི། དེ་ལྟ་ན་གྲངས་ཅན་པ་རྣམས་དང་ཁྱད་པར་མེད་དེ། དེ་དག་གི་ལྟར་ན་ཡང་རྣམ་པར་གནས་པའི་རྫས་ཀྱི་གཞན་དུ་འགྱུར་བ་ཉིད་འགྱུར་བ་ཡིན་ནོ། །འོན་ཏེ་བཏགས་པར་འདོད་པ་ཡིན་ན་ནི། ཇི་ལྟར་དེ་བཞིན་གྱུར་པ་ཉིད་ཡིན་ནོ་སྙམ་དུ་ཤེས་པར་འདོད་པས་འདྲི་བའོ། །འདུ་བྱེད་དུས་གསུམ་རྒྱུ་དང་འབྲས་བུར་གྱུར་པ་རྣམས་སོ་ཞེས་གཉིས་ཀ་སྨོས་པ་ནི་ལྷན་ཅིག་སྐྱེས་པ་རྣམས་ཀྱང་རྒྱུ་དང་འབྲས་བུའི་དངོས་པོ་ཡིན་པའི་ཕྱིར་དང༌། རྒྱུ་དང་འབྲས་བུར་མ་གྱུར་པ་རྣམས་ཀྱང་དུས་གསུམ་པ་ཡིན་པའི་ཕྱིར་རོ། །དེ་ལྟར་ན་འདུ་བྱེད་རྒྱུན་མ་ཆད་པར་འཇུག་པ་རྣམས་རྒྱུད་ཡིན་ནོ་ཞེས་བསྟན་པར་འགྱུར་ཏེ། རྒྱུད་ཀྱི་ཉེ་བར་ཕན་པར་གྱུར་བའི་འདུ་བྱེད་རྣམས་སྔ་མ་དང་
ཕྱི་མར་མི་འདྲ་བར་སྐྱེ་བ་ནི་རྒྱུད་གཞན་དུ་གྱུར་པ་ཉིད་དོ་ཞེས་བྱའོ། །གང་ལ་ཚོགས་པ་དང་ལྡན་པ་ཞེས་བྱ་བ་རྒྱ་ཆེར་འབྱུང་སྟེ། གལ་ཏེ་དེ་ལ་ཚོགས་པའི་ས་བོན་ཁོ་ན་རྩ་ནས་མ་བཏོན་པ་དང༌། ཉམས་པར་མ་བྱས་པ་ནི་ལྡན་པའོ་ཞེས་བྱ་བ་ནི་ནམ་ཡང་དྲན་པ་ཉེ་བར་གཞག་པ་དག་བསྒོམ་པར་མི་ནུས་པར་འགྱུར་ཞིང༌། དེའི་ཕྱིར་ཨ་དྷི་བཱ་ས་ན་མ་ཎི་རཱ་ཀ་ར་ན་མེ་བ། དེ་ལ་ཚོགས་པ་དང་ལྡན་ནོ། །དེ་ལྟར་སྒྲས་གསུངས་སོ་ཞེས་བྱ་བར་ཤེས་སོ། །དེ་ལྟར་ན་ཞེས་བྱ་བ་རྒྱ་ཆེར་འབྱུང་སྟེ། གལ་ཏེ་སྐྱེ་བའི་རྒྱུའམ་རྣམ་བར་གཞག་པའི་རྒྱུ་ཡང་རུང་སྟེ། རྣམ་པ་ཐམས་ཅད་དེ་རྣམ་པ་ཀུན་ཏུ་བཏགས་པའི་ཆོས་ཏེ་བཏགས་ལྷག་པར་གནས་པའོ། །ནོར་བུའི་འབྱུང་གནས་ཉིད་དོ། །བའི་ཐ་སྙད་ཀྱིས་རྣམ་པར་གཞག་ཅེས་བྱ་བའི་དོན་ཏོ། །སྔར་བཤད་པའི་རྒྱུས་རྫས་ཀྱི་ཆོས་ནི་མ་ཡིན་ནོ། །ཕྱིས་ནི་དགག་སྟེ་མི་ལྡན་པ་ཞེས་བྱའོ། །གང་ས་བོན་དང་ལྡན་པའི་སྒྲས་བརྗོད་པ་དེ་དགག་པའོ། །སློབ་དཔོན་འདུས་བཟང་ན་རེ། མིང་དང་གཟུགས་མཐའ་དག་མ་ཡིན་ཞིང་རེ་རེ་མ་ཡིན་པར་རིགས་མཐུན་པའི་ས་བོན་གྱི་ངོ་བོར་མི་རུང་སྟེ། ཅིའི་ཕྱིར་ཞེ་ན། བཏགས་པའི་རྫས་སུ་ཡོད་པས་དེའི་ཕྱིར་ས་བོན་དུ་མི་རིགས་སོ། །གལ་ཏེ་རེ་རེ་ལ་ཡིན་ན་ལུང་དུ་མ་བསྟན་པའི་གཟུགས་དགེ་བའི་ཆོས་རྣམས་ཀྱི་ས་བོན་དུ་ཇི་ལྟར་འགྱུར། རིགས་མཐུན་པའི་མ་ཡིན་ཡང་དགེ་བའི་མཇུག་ཐོགས་སུ་དགེ་བ་སྐྱེད་པའི་ས་བོན་མེད་པ་ཉིད་དུ་ཐལ་བར་འགྱུར་བའི་ཕྱིར་རོ་ཞེས་ཟེར་རོ། །འདི་ཡང་ཐམས་ཅད་མ་འབྲེལ་བ་སྟེ། རྒྱུའི་རྐྱེན་རྣམས་ནི་འབྲས་བུ་མཐའ་དག་བསྐྱེད་པ་ལ་རྒྱུ་ཡིན་པས། ཅིས་དེ་དག་བཏགས་པར་ཡོད། མིག་གི་རྣམ་པར་ཤེས་པ་ལ་སོགས་པ་རྣམས་ཀྱང་དབང་པོའི་རྡུལ་ཕྲ་རབ་མང་པོ་ལ་བརྟེན་པ་ཡིན་པས། ཅིས་དེ་དག་བཏགས་པར་ཡོད། ལུང་དུ་མ་བསྟན་པ་ཡང་དགེ་བ་དང་མི་དགེ་བ་རྣམས་ཀྱི་ས་བོན་ཉིད་དུ་མི་འདོད་པ་ཉིད་དོ། །དེ་མ་ཡིན་ན་གཞན་དུ་ལུང་མ་བསྟན་གྱི་རྣམ་པར་ཤེས་པ་ལས་དགེ་བ་དང་མི་དགེ་བར་མི་འགྱུར་རོ་ཞེ་ན་རིགས་མཐུན་པ་ཉིད་ལ་ཡང་ནུས་པའི་སྒོ་ནས་རྒྱུ་དང་འབྲས་བུའི་ངོ་བོར་རྣམ་པར་གཞག་གི །དགེ་བ་ལ་སོགས་པའི་ངོ་བོས་ནི་མ་ཡིན་ནོ། །གལ་ཏེ་ཡང་མིང་དང་གཟུགས་ཐམས་
ཅད་ཕན་ཚུན་བལྟོས་པས་ས་བོན་དུ་བརྗོད་ན་ཞེས་པ་ཅིར་འགྱུར། འོན་ཀྱང་མིང་དང་གཟུགས་ཉིད་ཇི་ལྟར་སྲིད་པ་བཞིན་འདུས་བྱས་ཀྱི་ཆོས་རྣམས་ཀྱི་ས་བོན་གྱི་གཞན་ནི་མ་ཡིན་ནོ། །བསྟན་བཅོས་མཛད་པའི་དགོངས་པ་ཡོངས་སུ་མ་ཤེས་པའི་ཕྱིར་འདི་ལ་སྟོན་གྱི་ཚོགས་ཉེ་བར་གནས་སོ། །བཤད་པ་དེ་ལྟ་མོད་ཀྱི་ནུས་པའི་ཁྱད་པར་དེ་ལས་དགེ་བ་འམ་མ་དགེ་བ་ལས་སྤྱི་དོན་གཞན་མ་ཡིན་པ་ཞེས་བྱ་བ་འདི་ཡང་མི་རིགས་ཏེ། དྲི་བ་མི་འཐད་པའི་ཕྱིར་རོ། །གང་བཤད་པ་ཉིད་ཀྱི་མིང་དང་གཟུགས་ནི་འབྲས་བུ་བསྐྱེད་པའི་ནུས་པ་སྟེ། ས་བོན་ལས་ནུས་པ་གཞན་མ་ཡིན་ནོ། །ཇི་སྐད་བཤད་པ་སེམས་སྔ་མ་དང་ལྷན་ཅིག་སྐྱེས་པའི་སེམས་པའི་ཁྱད་པར་ལས་ནུས་པའི་ཁྱད་པར་གྱི་སེམས་སྐྱེའོ། །དེ་ཡང་ས་བོན་ནི་ནུས་པའི་ཁྱད་པར་ལ་མི་བརྗོད་ཀྱི། རྒྱུད་ཡོངས་སུ་འགྱུར་བའི་ཁྱད་བར་ལས་འབྲས་བུ་བསྐྱེད་པར་འགྱུར་བའོ། །དེ་ལ་གཞན་ནུས་པའི་ཁྱད་པར་དང་སེམས་གཞན་ནི་མ་ཡིན་ནོ། །འོ་ན་ཅི་ཞེ་ན། སེམས་པ་དང་ལྷན་ཅིག་པའི་སེམས་ཀྱི་སྐད་ཅིག་གོ །སེམས་པའི་ཁྱད་པར་གྱི་སྟོབས་བསྐྱེད་བས་ཁྱད་པར་དུ་གྱུར་བ་ནི་འབྲས་བུ་བསྐྱེད་པའི་ནུས་པ་སྟེ་སེམས་གཞན་གྱི་རྒྱུར་འགྱུར་རོ། །དེ་ནི་ཐོབ་པའི་ཁྱད་པར་གྱི་ཆོས་བསྟན་པའི་ཕྱིར་ཞེས་གྲག་སྟེ་ཞེས་བྱ་བ་རྒྱས་པར་འབྱུང་བ་ལ། གྲག་གོ་ཞེས་པ་ནི་ཐོབ་པའི་ཁྱད་པར་སེམས་པ་ནི། རི་བོང་གི་རྭའི་རྣ་བ་ལ་བརྟགས་པ་བཞིན་ཏེ། དེའི་རྟེན་མེད་པའི་ཕྱིར་རོ་ཞེས་མ་རངས་བར་མཚོན་པའི་དོན་ནོ། །ཐོབ་པའི་རྒྱུན་ལ་བལྟོས་ཏེ། འདས་པ་ལ་སོགས་པ་རྣམས་རེ་རེ་ལ་ཡང་ཐོབ་པ་གསུམ་གསུམ་མོ། །བཤད་པ་འདི་ནི་དམིགས་ཀྱིས་བསལ་བ་དང་བཅས་པ་ཞིག་སྟེ། ལུང་བསྟན་མིན་ཐོབ་ལྷན་ཅིག་སྐྱེས། །ཞེས་འབྱུང་བའི་ཕྱིར་རོ། །ཇི་ལྟར་ཞེན་འདས་པ་རྣམས་ཀྱི་སྔར་སྐྱེས་པ་དང་ལྷན་ཅིག་སྐྱེས་པ་དང་དུས་ཕྱིས་སྐྱེས་པའི་ཐོབ་པ་སྟེ། དེ་ཡང་སྐྱེས་ལ་འགགས་པ་ནི་འདས་པའོ། །སྐྱེས་ལ་མ་འགགས་པ་ནི་ད་ལྟར་བའོ། །དུས་ཕྱིས་སྐྱེས་པ་ནི་མ་འོངས་པའོ། །ད་ལྟར་བྱུང་བ་རྣམས་ཀྱི་སྔར་སྐྱེས་པ་ནི་འདས་པའོ། །ལྷན་ཅིག་སྐྱེས་པ་ནི་ད་ལྟར་བའོ། །དུས་ཕྱིས་སྐྱེས་པ་ནི་མ་འོངས་པའོ། །མ་འོངས་པ་སྐྱེས་པ་རྣམས་ཀྱི་ཡང་སྐྱེས་ལ་འགགས་པ་ནི་འདས་པའོ། །སྐྱེས་ལ་མ་
འགགས་པ་ནི་ད་ལྟར་བྱུང་བའོ། །མ་སྐྱེས་པ་ནི་མ་འོངས་པ་སྟེ། དེ་ལྟར་ན་སྔར་སྐྱེས་པ་དང་ལྷན་ཅིག་སྐྱེས་པ་དང་དུས་ཕྱིས་སྐྱེས་པ་ཞེས་བྱ་བ་རྣམ་པ་གསུམ་གསུམ་མོ་ཞེས་ཁ་ཅིག་གོ །སྐྱེ་བ་མེད་པའི་ཆོས་རྣམས་ལ་དེ་ལྟར་རྣམ་པ་གསུམ་དུ་མི་འགྱུར་རོ། །ཅི་སྟེ་ཁམས་གོང་མ་ནས་ཤི་འཕོས་ཏེ་སྐྱེ་བ་ན་ཉོན་མོངས་པ་གང་ཞིག་མངོན་དུ་གྱུར་ནས་ལྷན་ཅིག་སྐྱེས་པ་ཐོབ་ཅེ་ན། དགེ་བ་གཞན་དང་ཉོན་མོངས་པ་ཅན་རང་གི་ས་བ་སྔར་ལྡང་ངོ༌། །གང་གི་ཚེ་འདོད་པའི་ཁམས་ལ་འདོད་ཆགས་དང་བྲལ་བ་བསམ་གཏན་དང་བོར་སྐྱེ་བ་དེའི་ཚེ་བསམ་གཏན་གྱི་ཡོན་ཏན་ལས་བྱུང་བ་འདས་པ་དང་མ་འོངས་པའི་ཐོབ་པ་རྣམས་སྐྱེའོ། །དགེ་བ་ལ་སོགས་ཀྱི་ཞེས་བྱ་བ་ལ་སོགས་པ་ལ། དེ་ནི་དགེ་བ་ལ་སོགས་པ་རེ་རེ་ལ་ཡང་དགེ་བ་ལ་སོགས་པ་ཡིན་པར་འགྱུར་ན་ནི་མི་རུང་བ་དེའི་ཕྱིར་གོ་རིམས་བཞིན་དུ་ཞེས་བྱ་བ་སྨོས་སོ། །ཡང་ཅིའི་ཕྱིར་ཐོབ་པ་ཆོས་དང་འདྲ་བར་རྣམ་པར་གཞག་གི །དེ་ལྟ་མ་ཡིན་པར་ཆོས་ལས་བཟློག་སྟེ་མ་ཡིན་ཞེ་ན། འདོད་ཆགས་དང་བྲལ་བ་མི་དགེ་བའི་ཆོས་རྣམས་དང་ལྡན་པ་དང༌། དགེ་བའི་རྩ་བ་ཀུན་ཏུ་ཆད་པ་དགེ་བའི་ཆོས་རྣམས་དང་ལྡན་པ་ཐལ་བར་འགྱུར་ཏེ། དེ་ལྟར་ནའོ་ན་ཐམས་ཅད་དུ་ལུང་དུ་མ་བསྟན་པ་ཡིན་པར་འགྱུར་རོ་ཞེ་ན། དེ་ནི་དེ་ལྟ་མ་ཡིན་ཏེ། །ལུང་དུ་མ་བསྟན་པའི་ཆོས་ལྟར་གཞན་དག་ཏུ་ཡང་འདྲ་བ་ཉིད་ཐལ་བར་འགྱུར་རོ། །ལུང་དུ་མ་བསྟན་པ་ཡིན་པའི་ཕྱིར་ཆོས་ཉོན་མོངས་པ་ཅན་རྣམས་ཀྱི་ཐོབ་པ་ལམ་དང་མི་འགལ་བར་འགྱུར་རོ། །དེའི་ཕྱིར་ཉོན་མོངས་པ་རྣམས་ཀྱི་རང་གི་ངོ་བོ་སྤངས་པ་མ་ཡིན་པས་ཆོས་དང་འདྲ་བ་ཁོ་ནར་འདོད་དོ། །དེར་གཏོགས་རྣམས་ཀྱི་རང་ཁམས་པ། །ཞེས་བྱ་བ་ལ། ལྡན་པ་ནི་ལྡན་པ་ཅན་ལ་རག་ལས་པས་ཁམས་གཞན་པ་རྣམས་ཀྱི་ཐོབ་པ་ནི་ཁམས་གཞན་བ་མ་ཡིན་ནོ། །དེ་ལ་རེ་ཞིག་འདོད་པའི་ཁམས་སུ་ཡང་སྐྱེས་པའི་འདོད་པ་ན་སྤྱོད་པ་རྣམས་ཀྱིས་ནི་འདོད་པ་རྣམས་ན་སྤྱོད་པའོ། །གཟུགས་དང་གཟུགས་མེད་པ་ན་སྤྱོད་པ་རྣམས་ཀྱིས་ནི་གཟུགས་དང་གཟུགས་མེད་པ་ན་སྤྱོད་པའོ། །གཟུགས་ཀྱི་ཁམས་སུ་སྐྱེས་པའི་གཟུགས་ན་སྤྱོད་པ་རྣམས་ཀྱིས་ནི་གཟུགས་
ན་སྤྱོད་པ་ཡིན་ལ། འདོད་པར་གཏོགས་པ་སྤྲུལ་པའི་སེམས་ཀྱིས་ནི་འདོད་པ་ན་སྤྱོད་པའོ། །གཟུགས་མེད་པ་ན་སྤྱོད་པ་ཉོན་མོངས་པ་ཅན་རྣམས་ཀྱིས་ནི་གཟུགས་མེད་པ་ན་སྤྱོད་པའོ། །གཟུགས་མེད་པའི་ཁམས་སུ་སྐྱེས་པའི་གཟུགས་མེད་པའི་ཁམས་ན་སྤྱོད་པ་རྣམས་ཀྱིས་ནི་གཟུགས་མེད་པའི་ཁམས་པ་ཁོ་ནའོ། །མ་གཏོགས་རྣམས་ཀྱི་རྣམ་པ་བཞི། །ཞེས་བྱ་བ་ལ་ཟག་པ་མེད་པ་རྣམས་ནི་འདོད་པ་དང་གཟུགས་དང༌། གཟུགས་མེད་པའི་སྲེད་པས་བདག་གིར་མ་བྱས་པའི་ཕྱིར་མ་གཏོགས་པ་རྣམས་སོ། །དེ་ལ་སོ་སོར་བརྟགས་པ་མ་ཡིན་པའི་འགོག་པའི་ནི་ཁམས་གསུམ་པའི་ཡིན་ནོ་ཞེས་བྱ་བ་ལ། དེ་ནི་ཁམས་གསུམ་པའི་རྐྱེན་མཚང་བས་ཐོབ་པར་བྱ་བ་ཡིན་པའི་ཕྱིར་དང༌། སྐྱེ་བའི་དབང་གིས་ཁམས་གསུམ་པ་ཉིད་ཡིན་གྱི། གང་དག་གི་རྐྱེན་མཚང་བར་འགྱུར་བ་ཆོས་ཀྱི་དབང་གིས་ནི་མ་ཡིན་ཏེ། གཞན་དུ་ན་ལམ་གྱི་བདེན་པས་བསྡུས་པའི་ཆོས་རྣམས་ཀྱིས་སོ་སོར་བརྟགས་པས་འགོག་པ་མི་ལྡན་པར་འགྱུར་རོ། །སོ་སོར་བརྟགས་པས་འགོག་པའི་ཞེས་བྱ་བ་ལ་སོགས་པ་ལ། གཟུགས་ན་སྤྱོད་པའི་ལམ་གྱིས་ཐོབ་པའི་ནི་གཟུགས་ན་སྤྱོད་པ་ཡིན་ལ། གཟུགས་མེད་བ་ན་སྤྱོད་པའི་ལམ་གྱིས་ཐོབ་པའི་ནི་གཟུགས་མེད་པ་ན་སྤྱོད་པ་སྟེ། འདི་ནི་འཕགས་པ་མ་ཡིན་པའི་འདོད་ཆགས་དང་བྲལ་བ་ལ་ངེས་པའོ། །འཇིག་རྟེན་པས་ནི་འཕགས་པ་འདོད་ཆགས་དང་བྲལ་བའི་ཟག་པ་དང་བཅས་པ་དང༌། ཟག་པ་མེད་པ་ཡང་ཡིན་ནོ། །ཟག་པ་མེད་པས་ཐོབ་པའི་ནི་ཟག་པ་མེད་པའོ། །འདོད་པའི་ཁམས་ཀྱིས་ནི་གཉེན་པོ་ཉིད་ཀྱི་ཕྱིར་འདོད་པ་ན་སྤྱོད་པའི་བྲལ་བའི་ཐོབ་པ་མེད་དོ། །ལམ་གྱི་བདེན་པའི་ནི་ཟག་པ་མེད་པ་ཉིད་དེ་ཞེས་བྱ་བ་ལ། དེ་ནི་ལམ་གཞན་དུ་མ་གཏོགས་པ་ཡིན་པའི་ཕྱིར་ན་ཆོས་ཀྱི་དབང་ཁོ་ནས་ཐོབ་པ་ངེས་པ་ཡིན་ནོ། །སོ་སོར་བརྟགས་པའི་འགོག་པའི་ཐོབ་པ་ར་ས་ཏི་ལམ་འདུས་བྱས་ཀྱི་མཚན་ཉིད་ལ་ཅི་ལྟར་ཟག་པ་མེད་པ་ཞེས་བྱ་བ་རྒོལ་བའི་གཞིའོ། །ཟག་པ་མེད་པའི་ལམ་འདུས་བྱས་ཞེས་བྱ་བ་ལ། གྲུབ་པའི་མཐའ་ལས་སོ་སོར་བརྟགས་པ་མ་ཡིན་པའི་འགོག་པའི་ཐོབ་པ་ལ་ལམ་གྱི་མཚན་ཉིད་ཀྱི་ངོ་བོ་མེད་དོ། །སོ་སོར་བརྟགས་པ་
མ་ཡིན་པའི་འགོག་པ་ལ་ཡང་ཇི་ལྟར་ཟག་པ་དང་བཅས་པ་དང་ཟག་པ་མེད་པ་རྣམས་ཀྱིས་ཟག་པ་མེད་པ་རྣམས་ཀྱང་ཟག་པ་མེད་པའི་གཞི་ཞེས་བྱ་བ་རྒོལ་བའི་གཞིའོ། །ཟག་པ་མེད་པ་མངོན་དུ་གྱུར་བའི་ཐོབ་པ་སོ་སོར་བརྟགས་པ་མ་ཡིན་པའི་འགོག་པའམ། ཟག་པ་མེད་པ་སོ་སོར་བརྟགས་པ་མ་ཡིན་པའི་ཐོབ་བ་དག་ལ་ཟག་པ་མེད་པའི་བྱ་བ་འགའ་ཡང་ཡོད་པ་མ་ཡིན་ནོ། །རྒྱུའི་ངོ་བོར་ཁས་བླངས་པའི་ཚུལ་གྱིས་སོ་སོར་བརྟགས་པའི་འགོག་པའི་ཐོབ་པ་ཇི་ལྟ་བ་བཞིན་ནོ་ཞེས་བྱ་བ་འདི་ནི་འབྲེལ་མེད་དོ། །སློབ་པའི་གང་ཟག་གི་ནི་ཟག་པ་མེད་པའི་ཆོས་རྣམས་སོ། །མི་སློབ་པའི་ནི་མི་སློབ་པ་རྣམས་སོ། །དེ་ལ་རེ་ཞིག་སློབ་པའི་ཆོས་རྣམས་ཀྱི་ཐོབ་པ་ནི་སློབ་པའི་ལམ་གྱིས་བསྡུས་པའི་ཕྱིར་སློབ་པ་ཁོ་ན་ཡིན་ནོ། །དེ་བཞིན་དུ་མི་སློབ་པའི་རྣམས་ཀྱང་རིག་བར་བྱའོ། །ཟག་པ་དང་བཅས་པའི་ཆོས་རྣམས་དང༌། འདུས་མ་བྱས་རྣམས་ནི་སློབ་པ་དང་མི་སློབ་པའི་ལམ་གྱིས་མ་བསྡུས་པའི་ཕྱིར་སློབ་པ་ཡང་མ་ཡིན་མི་སློབ་པ་ཡང་མ་ཡིན་པ་རྣམས་སོ། །རེ་ཞིག་ཟག་པ་དང་བཅས་པ་རྣམས་ཀྱི་ཐོབ་པ་ནི་སློབ་པ་དང་མི་སློབ་པ་མི་སྲིད་བས་སློབ་པ་ཡང་མ་ཡིན་མི་སློབ་པ་ཡང་མ་ཡིན་ནོ། །འདུས་མ་བྱས་ཀྱིས་ནི་འགའ་ཞིག་སློབ་པ་ཡང་མ་ཡིན་མི་སློབ་པ་ཡང་མ་ཡིན་ལ། གང་ཞིག་གི་ནི་རྣམ་པ་གསུམ་ཡིན་པས་དེའི་ཕྱིར་སོ་སོར་བརྟགས་པ་མ་ཡིན་པས་ཞེས་བྱ་བ་སྨོས་ཏེ། སློབ་པ་ཡང་མ་ཡིན་མི་སློབ་པ་ཡང་མ་ཡིན་ནོ་ཞེས་བྱ་བར་སྦྱར་རོ། །འཕགས་པ་མ་ཡིན་པས་ཐོབ་པ་ཞེས་བྱ་བ་ལ་སོགས་པ་ལ་འཕགས་པ་མ་ཡིན་པའི་ལམ་གྱི་ཐོབ་པ་སོ་སོར་བརྟགས་བས་འགོག་པ་ཐོབ་པ་ནི་ཟག་པ་དང་བཅས་པའི་ལམ་གྱིས་བསྡུས་པའི་ཕྱིར་སློབ་པ་ཡང་མ་ཡིན་མི་སློབ་པ་ཡང་མ་ཡིན་ནོ། །དང་གི་སྒྲ་ནི་སྐབས་སུ་བབ་བ་རྗེས་སུ་དྲང་བའི་དོན་ནོ། །སློབ་པའི་ལམ་གྱིས་བསྡུས་པའི་ཕྱིར་སློབ་པའི་ལམ་གྱིས་ཐོབ་བའི་ཐོབ་པ་ནི་སློབ་པའོ། །དེ་བཞིན་དུ་མི་སློབ་པ་ཡང་རིག་པར་བྱའོ། །བར་ཆད་མེད་པ་དང་རྣམ་པར་གྲོལ་བའི་ལམ་དག་ནི་ཟད་པའི་ཐོབ་པ་འདྲེན་པར་བྱེད་པ་དང༌། རྟེན་དུ་གྱུར་བའི་ཕྱིར་ཟད་པ་ཤེས་པ་ལ་སོགས་པ་ལ་འགོག་པ་ཐོབ་བར་བྱེད་པའི་ནུས་པ་ཡོད་པས། དེའི་ཕྱིར་མི་སློབ་པའི་
ལམ་གྱིས་ཐོབ་པའི་ནི་མི་སློབ་པའོ་ཞེས་བྱ་བ་སྨོས་སོ། །མཐོང་བ་དང་བསྒོམ་པས་སྤང་བར་བྱ་བ་ཁོ་ན་ཡིན་ནོ་ཞེས་བྱ་བ་འབྱུང་སྟེ། མཐོང་བ་དང་བསྒོམ་པས་སྤང་བར་བྱ་བ་རྣམས་ཀྱིས་ཐོབ་པ་ནི་ཆོས་ཀྱི་དབང་གིས་རྣམ་པར་གཞག་བའི་ཕྱིར་རོ། །སྤང་བར་བྱ་བ་མ་ཡིན་པ་རྣམས་ཀྱི་ནི་བྱེ་བྲག་ཡོད་པས་ཞེས་བྱ་བ་རྒྱས་པར་འབྱུང་སྟེ། སོ་སོར་བརྟགས་པ་མ་ཡིན་པས་འགོག་པའི་ཐོབ་པ་ལུང་དུ་མ་བསྟན་པ་དང༌། འཇིག་རྟེན་པས་སོ་སོར་བརྟགས་པས་འགོག་པའི་དགེ་བ་ཟག་པ་དང་བཅས་པ་ཡིན་པས་ཉོན་མོངས་པ་ཅན་མ་ཡིན་པའི་ཕྱིར་དང༌། ཟག་པ་དང་བཅས་པ་ཡིན་པའི་ཕྱིར་བསྒོམ་པས་སྤང་བར་བྱ་བ་སྟེ། དེ་སྐད་དུ་ཡང༌། ཉོན་མོངས་ཅན་མིན་མཐོང་སྤང་མིན། །ཞེས་བཤད་དོ། །དེ་ཉིད་ཅེས་བྱ་བ་ལ་སོ་སོར་བརྟགས་པས་འགོག་པ་འཕགས་པའི་ལམ་གྱིས་ཐོབ་པའོ། །འཕགས་པ་རྣམས་ཀྱིས་འཇིག་རྟེན་པའི་ལམ་གྱིས་ཐོབ་པའི་ཟག་པ་མེད་པ་གང་ཡིན་པ་དེ་ཡང་འཕགས་པའི་ལམ་གྱི་སྟོབས་ཀྱིས་འཐོབ་སྟེ་དེའི་ཕྱིར་ཟག་མེད་པ་ཡིན་ནོ། །ལམ་གྱི་བདེན་པའི་ཡང་ཟག་པ་མེད་པ་ཡིན་པའི་ཕྱིར་སྤང་བར་བྱ་བ་མ་ཡིན་ནོ། །ལུང་བསྟན་མིན་ཐོབ་ལྷན་ཅིག་སྐྱེ། །ཞེས་བྱ་བ་ལ། དམིགས་ཀྱིས་བསལ་བ་འདི་ནི་དམིགས་ཀྱིས་བསལ་བ་དང་བཅས་པ་ཞིག་སྟེ། མངོན་ཤེས་སྤྲུལ་བ་མ་གཏོགས་པ་ཞེས་འབྱུང་བའི་ཕྱིར་རོ། །སྟོབས་ཆུང་བའི་ཕྱིར་ཞེས་བྱ་བ་ལ་སྟོབས་ཆུང་བ་ཉིད་ནི་རྣམ་པར་སྨིན་པ་ཡིན་པའི་ཕྱིར་རོ། །ཟག་པ་མེད་པ་རྣམས་ལ་ཐལ་བར་འགྱུར་བ་ཡང་མ་ཡིན་ཏེ་མངོན་པར་འདུ་བྱ་བ་ཆེན་པོས་བསྒྲུབ་པར་བྱ་བ་ཡིན་པའི་ཕྱིར་རོ། །དེའི་ཚེ་མངོན་པར་འདུ་བྱ་བ་མེད་པས་བསྒྲུབ་བར་བྱ་བ་ནི་སྟོབས་ཆུང་པའོ། །མངོན་ཤེས་སྤྲུལ་པ་མ་གཏོགས་པ་ལུང་དུ་མ་བསྟན་བ་རྣམས་ཀྱི་ཐོབ་བ་ལྷན་ཅིག་སྐྱེའོ་ཞེས་བྱ་བར་སྦྱར་རོ། །མངོན་བར་འདུ་བྱེད་པ་ནི་རྣམ་པ་གཉིས་ཏེ། ལྷའི་མིག་དང་རྣ་བ་སྟེ། །མིག་དང་རྣ་བའི་མངོན་ཤེས་ནི། །ལུང་དུ་མ་བསྟན་ཞེས་འབྱུང་བའི་ཕྱིར་རོ། །སྤྲུལ་བའི་སེམས་ཞེས་བྱ་བ་ནི། །ལུང་བསྟན་མིན་རྣམ་བཞི་ཞེས་འབྱུང་བའི་ཕྱིར་རོ། །དེ་དག་ནི་སྦྱོར་བའི་ཁྱད་པར་གྱིས་འགྲུབ་བ་ཞེས་བྱ་བ་འདིས་ནི་མངོན་བར་འདུ་བྱེད་པ་ལས་འབྱུང་བའི་ཕྱིར་སྟོབས་དང་ལྡན་པ་ཉིད་
ཞེས་སྟོན་པར་བྱེད་དོ། །བཟོའི་གནས་པ་ཞེས་བྱ་བ་ལ་སོགས་པ་ལ། འདིར་འདུ་བྱེད་ཀྱི་ཁྱད་པར་ལ་བརྟེན་ཏེ་འདུ་བྱེད་ཙམ་ལ་ནི་མ་ཡིན་ནོ། །དེ་ཉིད་ཀྱི་ཕྱིར་ཤིན་ཏུ་གོམས་པའི་ཕྱིར་ཞེས་བྱ་བ་སྨོས་ཏེ་འདོད་པར་བྱེད་ཅེས་བྱ་བའོ། །སྤྱོད་ལམ་བའི་ནི་བཅོམ་ལྡན་འདས་དང༌། རྟ་ཐུལ་ལ་སོགས་པའི་ལྟ་བུའོ། །བཟོའི་གནས་པ་ནི་ལས་ཐམས་ཅད་པ་དང་མི་འམ་ཅི་ལ་སོགས་པ་རྣམས་ཀྱི་ལྟ་བུའོ། །དེ་དག་ནི་སྦྱོར་བའི་ཁྱད་པར་གྱིས་འགྲུབ་པས་སྟོབས་དང་ལྡན་པའི་ཕྱིར་རོ། །གཞན་དག་ནི་སྟོབས་ཆུང་བའི་ཕྱིར་ཏེ། སྤྱོད་ལམ་པ་རྣམས་ནི་ཕུང་པོ་བཞི་རྣམས་ཀྱི་དོན་གྱི་སྐད་ཅིག་ཡོངས་སུ་ཆད་པས་འཐོབ་པོ། །དེ་བཞིན་དུ་བཟོའི་གནས་པ་རྣམས་ཀྱང་ངོ༌། །བསྒྲིབས་པའི་གཟུགས་ཀྱིས་ཀྱང་ཞེས་བྱ་བ་ལ་སོགས་པ་ལ། གཟུགས་སྨོས་པ་ནི་གཟུགས་མ་ཡིན་པ་རྣམ་པར་གཅད་བར་བྱ་བའི་ཕྱིར་ཏེ། དེའི་ཐོབ་པ་ནི་རྣམ་པ་གཞན་དུ་འཇོག་པའི་ཕྱིར་རོ། །བསྒྲིབས་པ་ནི་བསམ་གཏན་དང་བོ་ཁོ་ནའི་ལུས་དང་ངག་གི་རྣམ་པར་རིག་བྱེད་ཀྱི་གཟུགས་ཉོན་མོངས་པ་ཅན་ཡིན་གྱི། གོང་མའི་མ་ཡིན་ཞིང་འདོད་པའི་ཁམས་ཀྱིས་མ་ཡིན་ཏེ། ཀུན་ནས་སློང་བར་བྱེད་བ་མེད་པའི་ཕྱིར་རོ། །བསྒྲིབས་པའི་སེམས་ཆེན་པོས་ཀུན་ནས་སློང་བའི་རྣམ་པར་རིག་བྱེད་ཀྱིས་ཀྱང་རྣམ་པར་རིག་བྱེད་མ་ཡིན་པ་འཕེན་པར་མི་ནུས་པས་སྟོབས་ཆུང་བར་གྲུབ་སྟེ་དེའི་ཕྱིར་ཐོབ་པ་ལྷན་ཅིག་སྐྱེས་བ་ཁོ་ནའོ། །འདོད་པ་ན། གཟུགས་ཀྱི་སྔར་ནི་སྐྱེ་བ་མེད། །ཅེས་བྱ་བ་ལ་འདོད་པའི་ཁམས་ཀྱི་སྡོམ་པ་ལ་སོགས་པའི་གཟུགས་དགེ་བ་དང༌། མི་དགེ་བའི་ཐོབ་པ་ནི་རྣམ་པ་ཐམས་ཅད་དུ་སྔར་སྐྱེ་བ་མེད་དོ། །ལྷན་ཅིག་སྐྱེ་བ་དང་དུས་ཕྱིས་སྐྱེ་བ་ནི་ཡོད་དེ་ཞེས་འབྱུང་སྟེ། དེ་ལ་ལྷན་ཅིག་སྐྱེ་བ་ནི་ལྷན་ཅིག་འབྱུང་བའོ། །ཕྱིས་སྐྱེ་བ་ནི་ཕྱིས་འདས་བ་སྐྱེ་བ་སྟེ། དེ་ནི་འདས་པ་དང་ད་ལྟར་བ་ཡང་ཡིན་ནོ། །དེ་ལ་འདོད་པ་ན་ཞེས་བྱ་བ་ནི་གཟུགས་ན་སྤྱོད་པ་བསལ་བའི་ཕྱིར་རོ། །གཟུགས་སྨོས་པ་ནི་གཟུགས་ཅན་མ་ཡིན་པ་བསལ་བར་བྱ་བའི་ཕྱིར་རོ། །རྣམ་པ་ཐམས་ཅད་དུ་ཞེས་བྱ་བས་ནི་དགེ་བའི་ཡང་མེད་ལ་མི་དགེ་བའི་ཡང་མེད་དོ་ཞེས་བྱ་བར་རྟོགས་པར་འགྱུར་ཏེ། མ་བསྒྲིབས་ལ་ལུང་དུ་མ་བསྟན་པ་རྣམས་གོང་དུ་བཀག་པའི་ཕྱིར་རོ། །འདོད་པ་ན་སྤྱོད་
པའི་གཟུགས་དགེ་བ་དང་མི་དགེ་བ་ནི་སྦྱོར་བ་ལས་བྱུང་བ་ཡིན་གྱི་སྐྱེས་ནས་ཐོབ་ནི་མ་ཡིན་ནོ། །མཉམ་པར་མ་བཞག་པའི་ས་པ་ཡིན་པའི་ཕྱིར་མ་འོངས་པ་མ་རྙེད་པ་ནི་མ་ཡིན་ཏེ་དེའི་ཕྱིར་དེའི་ཐོབ་པ་སྔར་སྐྱེས་པ་མེད་དོ། །ཐོབ་པ་བཤད་ཟིན་ཏོ། །ཅི་མ་ཐོབ་པ་ལ་ཡང་ཐོབ་བ་བཞིན་དུ་རྣམ་པར་བྱེ་བྲག་ཡོད་དམ། སྨྲས་པ་མེད་དོ། །འོ་ན་ཅི་ལྟ་བུ་ཞེ་ན་མ་ཐོབ་མ་བསྒྲིབས་ལ་ལུང་མ་བསྟན་མ་ཐོབ་མ་བསྒྲིབས་ལ་ལུང་དུ་མ་བསྟན་པ་ཁོ་ན་ཡིན་ནོ་ཞེས་བྱ་བར་ཇི་ལྟར་རྟོགས་ཤེ་ན། གལ་ཏེ་ཆོས་དང་འདྲ་བ་ཡིན་ན་ནི། དེ་ལྟར་ན་དགྲ་བཅོམ་པ་རྣམས་མི་དགེ་བའི་ཆོས་རྣམས་དང༌། བསྒྲིབས་ལ་ལུང་དུ་མ་བསྟན་པ་རྣམས་དང་ལྡན་པར་འགྱུར་ལ། དགེ་བའི་རྩ་བ་ཀུན་ཏུ་ཆད་པ་རྣམས་ཀྱང་དགེ་བ་རྣམས་དང་ལྡན་པར་འགྱུར་ཞིང༌། སོ་སོའི་སྐྱེ་བོ་རྣམས་ཀྱང་འཕགས་པའི་ཆོས་རྣམས་དང་ལྡན་པར་འགྱུར་རོ། །འོན་ཏེ་ཆོས་ལས་བཟློག་པ་ཡིན་ན། དེ་ལྟ་ན་ཡང་དགྲ་བཅོམ་པ་རྣམས་ཀྱང་ཆོས་ཉོན་མོངས་པ་ཅན་རྣམས་དང་ལྡན་པར་འགྱུར་ལ། དགེ་བའི་རྩ་བ་ཀུན་ཏུ་ཆད་པ་རྣམས་ཀྱང་དགེ་བ་དག་དང་ལྡན་པར་འགྱུར་རོ། །དེའི་ཕྱིར་མ་ཐོབ་བ་ནི་མ་བསྒྲིབས་ལ་ལུང་དུ་མ་བསྟན་པ་ཁོ་ན་ཡིན་ནོ། །འདས་མ་སྐྱེས་ཀྱི་དེ་རྣམས་གསུམ། །ཞེས་བྱ་བ་ནི་རྒྱུན་ལ་ལྟོས་ནས་སོ། །ད་ལྟར་བྱུང་བའི་མ་ཐོབ་བ་དང་ད་ལྟར་བྱུང་བ་ནི་མེད་དོ་ཞེས་བྱ་བས་འདས་པ་དང་མ་འོངས་པ་ནི་ཡོད་དོ་ཞེས་བྱ་བར་རྟོགས་སོ། །ད་ལྟར་བྱུང་བ་གདོན་མི་ཟ་བར་ཐོབ་པ་དང་ལྷན་ཅིག་འབྱུང་བར་འགྱུར་ན། ཐོབ་པ་དང་མ་ཐོབ་པ་དག་ནི་ཅིག་ཅར་ཡོད་པ་མ་ཡིན་པས་ད་ལྟར་བའི་མ་ཐོབ་པ་ད་ལྟར་མ་ཡིན་པ་མི་རིགས་སོ། །འདོད་སོགས་གཏོགས་དང་ཞེས་བྱ་བ་ལ་སོགས་པ་ལ། འདོད་པ་ལ་སོགས་པར་གཏོགས་པ་རྣམས་ནི་འདོད་སོགས་གཏོགས་ཏེ་འདོད་པ་དང་མི་ལྡན་བ་མ་ཡིན་ཞེས་བྱ་བའི་དོན་ནོ། །མ་ཐོབ་པ་ནི་སྐྱེ་བའི་རྟེན་གྱི་དབང་གིས་རྣམ་པར་གཞག་གི །ཆོས་ཀྱི་དབང་གིས་ནི་མ་ཡིན་ཏེ། ཆོས་དང་འགལ་བའི་ཕྱིར་རོ། །དེ་ལ་འདོད་པའི་ཁམས་སུ་སྐྱེས་བའི་འདོད་པ་དང༌། གཟུགས་དང༌། གཟུགས་མེད་པ་ན་སྤྱོད་པ་རྣམས་ཀྱི་མ་ཐོབ་པ་ནི་འདོད་པ་ན་སྤྱོད་པའོ། །ཇི་ལྟར་ཞེ་ན། འདོད་པ་ན་སྤྱོད་པའི་སྦྱོར་བ་ལས་བྱུང་བ་རྣམས་དང༌། དགེ་
བའི་རྩ་བ་ཀུན་ཏུ་ཆད་པས་སྐྱེས་ནས་ཐོབ་པ་དང༌། གཟུགས་དང་གཟུགས་མེད་བན་སྤྱོད་པ་རྣམས་ལས་ཉོན་མོངས་པ་རྣམས་དང་ལྡན་པ་ཁོ་ན་ཡིན་མོད་ཀྱི། འདོད་ཆགས་དང་བྲལ་བ་མ་ཡིན་པའི་ཕྱིར་ཉོན་མོངས་པ་ཅན་མ་ཡིན་པ་རྣམས་དང༌། སོ་སོའི་སྐྱེ་བོ་ཡིན་པའི་ཕྱིར་ཟག་པ་མེད་པ་རྣམས་ཀྱི་མ་ཐོབ་པ་ནི་འདོད་པ་ན་སྤྱོད་པ་ཡིན་ནོ། །དེ་བཞིན་དུ་གཟུགས་དང་གཟུགས་མེད་པའི་ཁམས་སུ་སྐྱེས་པའི་འདོད་པ་དང༌། གཟུགས་དང་གཟུགས་མེད་པ་ན་སྤྱོད་པའི་ཆོས་རྣམས་དང༌། ཟག་པ་མེད་པ་རྣམས་ཀྱི་མ་ཐོབ་པ་ནི་གཟུགས་དང་གཟུགས་མེད་པ་ན་སྤྱོད་པ་ཡིན་ནོ་ཞེས་རྒྱས་པར་བརྗོད་པར་བྱའོ། །མ་ཐོབ་པ་ཆོས་ཀྱི་དབང་གིས་རྣམ་པར་མི་བཞག་གོ་ཞེས་བྱ་བ་འདིས་ཤེས་པར་བྱེད་བ་ནི་མ་ཐོབ་པ་ཟག་བ་མེད་པ་ནི་འགའ་ཡང་མེད་དོ་ཞེས་བྱ་བ་འདི་ཁོ་ན་ཡིན་ནོ། །མ་ཐོབ་པ་ཟག་པ་མེད་དོ་ཞེས་བྱ་བ་འདི་གང་ལས་རྟོགས་ཤེ་ན་བསྟན་བཅོས་ལས་སོ། །འདི་ལྟར་ཞེས་བྱ་བ་ནི་རྒྱས་པར་བསྟན་བཅོས་ཉེ་བར་འགོད་པའོ། །འདིར་བསྟན་བཅོས་ནི་ཡེ་ཤེས་ལ་འཇུག་པ་ལ་མངོན་པར་འདོད་དེ། སོ་སོའི་སྐྱེ་པོ་ཉིད་ནི་ཟག་པ་མེད་པ་ཡིན་པར་མི་འོས་སོ་ཞེས་བྱ་བ་ལ། ཅིའི་ཕྱིར་ཞེ་ན། སོ་སོའི་སྐྱེ་བོའི་དངོས་པོ་ནི་སོ་སོའི་སྐྱེ་བོ་ཉིད་ཡིན་ན་ཟག་པ་མེད་པའི་ཆོས་རྣམས་ནི་སོ་སོའི་སྐྱེ་བོའི་དངོས་པོར་རུང་བ་ཡང་མ་ཡིན་ཏེ། འཕགས་པ་རྣམས་ཀྱང་སོ་སོའི་སྐྱེ་བོ་ཉིད་དུ་ཐལ་བར་འགྱུར་བའི་ཕྱིར་རོ། །སློབ་པ་དང་མི་སློབ་པའི་བྱེ་བྲག་དང༌། གང་ཟག་གི་བྱེ་བྲག་དང༌། གཉེན་པོའི་བྱེ་བྲག་གིས་འཕགས་པའི་ཆོས་རྣམས་མང་བའི་ཕྱིར་དང་འཕགས་པའི་ཆོས་རྣམས་ཀྱི་མ་རྙེད་པའོ་ཞེས་ཁྱད་པར་མེད་པར་བརྗོད་པའི་ཕྱིར། འཕགས་པའི་ཆོས་གང་དག་གིས་ཞེས་དྲིས་པ་དང༌། དེའི་ཕྱིར། ཐམས་ཅད་ཀྱི་ཡིན་ཏེ་ཞེས་བྱ་བ་སྨོས་ཏེ། སློབ་པ་དང་མི་སློབ་པ་ལ་སོགས་པའི་བྱེ་བྲག་གིས་ཐ་དད་བ་རྣམས་ཀྱིའོ། །འདི་གང་ལས་རྟོགས་ཤེ་ན། དེའི་ཕྱིར། ཁྱད་པར་མེད་པར་འབྱུང་བའི་ཕྱིར་རོ་ཞེས་བྱ་བ་སྨོས་ཏེ། བསྟན་བཅོས་ལས་ཞེས་བྱ་བར་སྦྱར་རོ། །གལ་ཏེ་ཐམས་ཅད་ཀྱིས་མ་རྙེད་བ་སོ་སོའི་སྐྱེ་བོ་ཉིད་ཡིན་ན། དེ་ལྟ་ན་ཐམས་ཅད་ཀྱིས་རྙེད་པ་ལས་འཕགས་པ་ཡིན་ནོ་ཞེས་བྱ་བར་ཐལ་བར་འགྱུར་ལ། དེ་ལྟ་ན་
འགའ་ལ་ཡང་ཟག་པ་མེད་པའི་ཆོས་མ་ལུས་པ་རྙེད་པ་མེད་པས་འཕགས་པ་མེད་པར་ཐལ་བར་འགྱུར་རོ་ཞེ་ན་དེའི་ཕྱིར། དེ་ནི་རྙེད་པ་མེད་པ་གང་ཡིན་པ་དེ་ཞེས་བྱ་བ་སྨོས་སོ། །སོ་སོའི་སྐྱེ་བོ་ཉིད་ནི་ཐམས་ཅད་ཀྱིས་མ་རྙེད་པ་ལ་བརྗོད་ཀྱི། འགའ་ཞིག་གིས་མ་རྙེད་པ་ན་མ་ཡིན་ལ། འཕགས་པས་ནི་འགའ་ཞིག་དག་མ་རྙེད་པ་ཡིན་པས་དེ་འཕགས་པ་མ་ཡིན་བ་ཉིད་དུ་ཐལ་བར་མི་འགྱུར་རོ། །དེ་ལྟ་ཡིན་དང་འཕགས་པའི་ཆོས་རྣམས་ཀྱི་མ་རྙེད་པ་རྣམ་པ་གཉིས་བསྟན་བར་འགྱུར་ཏེ། མ་རྙེད་པ་སྔོན་དུ་འགྲོ་བ་ཅན་དང་རྙེད་བ་སྔོན་དུ་འགྲོ་བ་ཅན་ཡིན་པའོ། །དེ་ལ་སོ་སོའི་སྐྱེ་བོ་ཉིད་ནི་མ་རྙེད་པ་སྔོན་དུ་འགྲོ་བ་ཅན་གང་ཡིན་པ་དེ་ཡིན་གྱི་རྙེད་པ་སྔོན་དུ་འགྲོ་བ་ཅན་ནི་མ་ཡིན་ནོ། །ད་ལྟ་མ་ཡིན་ན་ཞེས་བྱ་བ་ལ། གལ་ཏེ་རྙེད་པ་སྔོན་དུ་འགྲོ་བ་ཅན་སོ་སོའི་སྐྱེ་བོ་ཉིད་ཡིན་པར་གྱུར་ནའོ། །རང་གི་རིགས་ཅན་རྣམས་ཁོ་ན་རྙེད་པའི་ཕྱིར་སངས་རྒྱས་ཀྱང་ཞེས་བྱ་བ་རྒྱས་པར་འབྱུང་ངོ༌། །འོ་ན་ནི་ཁོ་ན་ཞེས་བྱ་བའི་སྒྲ་གདོན་དགོས་སོ་ཞེས་བྱ་བ་ནི་འཕགས་པའི་ཆོས་རྣམས་མ་རྙེད་པ་ཁོ་ན་ཞེས་བྱ་བར་ངེས་ཏེ། དེ་ལྟ་ན་ནི་རྙེད་པར་གྱུར་བ་ན་རྙེད་བ་གང་ཡིན་པ་དེ་སོ་སོའི་སྐྱེ་བོ་ཉིད་མ་ཡིན་ནོ་ཞེས་བྱ་བར་བསྟན་པར་འགྱུར་གྱི། གཞན་དུ་ནི་མ་ཡིན་ནོ། །གདོན་མི་དགོས་སོ། །ཅིའི་ཕྱིར་ཞེ་ན། དེར་ངེས་པར་གཟུང་བ་མ་བཏོན་ཡང་རྟོགས་པར་འགྱུར་བ་ཉིད་དོ། །ཇི་ལྟར་ན་མ་སྨྲས་པར་རྟོགས་པར་འགྱུར་ཞེ་ན། དེའི་ཕྱིར། ཚིག་གཅིག་པུ་དག་ཀྱང་ཞེས་བྱ་བ་རྒྱ་ཆེར་སྨོས་སོ། །ཆུ་འཐུང་ངོ༌། །རླུང་ཟའོ་ཞེས་བྱ་བ་འདིར་ཁོ་ན་ཞེས་བྱ་བའི་སྒྲ་མེད་པས་ཚིག་གཉིས་པ་མེད་མོད་ཀྱི། འོན་ཀྱང་འདིར་ཆུ་ཁོ་ན་འཐུང་བའོ། །རླུང་ཁོ་ན་ཟའོ་ཞེས་ངེས་པར་གཟུང་བ་རྟོགས་པ་ཡིན་ནོ། །གལ་ཏེ་ཆུ་ཡང་འཐུང་ཞིང་ཟས་ཀྱང་ཟ་བ་ཡིན་ན་ནི་ཆུ་འཐུང་ངོ་ཞེས་བྱ་བའི་ངག་འདི་ལ་འབྲས་བུ་ཅི་ཞིག་དེའི་ཕྱིར་ཆུ་འཐུང་ངོ་ཞེས་བྱ་བ་ངེས་པར་གཟུང་བ་ཁོངས་སུ་བསྡུས་པའི་ཕྱིར་ཁོ་ནའི་སྒྲས་ཡང་མི་བརྗོད་དེ། དེ་བཞིན་དུ་འདིར་ཡང་གལ་ཏེ་འཕགས་པའི་ཆོས་རྣམས་ཀྱི་རྙེད་པ་དང་མ་རྙེད་པ་སོ་སོའི་སྐྱེ་བོ་ཉིད་ཡིན་ན་སོ་སོའི་སྐྱེ་བོ་ཉིད་ནི་འཕགས་པའི་ཆོས་རྣམས་ཀྱིས་མ་རྙེད་པའོ་ཞེས་བྱ་བའི་ངག་འདི་ལ་འབྲས་བུ་ཅི་ཞིག་ཡོད་དེའི་ཕྱིར་འདི་ནི་ངེས་པར་གཟུང་བའི་ཁོངས་སུ་བསྡུས་པ་ཁོ་ན་ཡིན་ནོ་ཞེས་བྱ་བར་ཤེས་
སོ། །དེའི་ཕྱིར་ཁོ་ན་ཞེས་བྱ་བའི་སྒྲའི་དོན་ཁོང་དུ་ཆུད་པའི་ཕྱིར་འདིར་ཁོ་ན་ཞེས་བྱ་བའི་སྒྲ་དོན་མེད་པ་མི་འདོན་ནོ། །དེ་བཞིན་དུ་རླུང་བའོ་ཞེས་བྱ་བ་ལ་ཡང་བརྗོད་པར་བྱའོ། །གཞན་དག་ན་རེ་བསྟན་པའི་ཉེས་བ་ཡོངས་སུ་སྤང་བར་བྱ་བའི་ཕྱིར། སྡུག་བསྔལ་ལ་ཆོས་ཤེས་པའི་བཟོད་པ་དང༌། དེ་དག་ལྷན་ཅིག་འབྱུང་བ་རྣམས་ཀྱིའོ་ཞེས་ཟེར་རོ། །སོ་སོའི་སྐྱེ་བོ་ཉིད་ནི་ཆོས་ཤེས་པའི་བཟོད་པའི་མ་རྙེད་པ་ཡིན་གྱི། དེ་ལས་གཞན་འཕགས་པའི་ཆོས་རྣམས་ཀྱི་མ་རྙེད་ནི་མ་ཡིན་ཏེ། དེའི་ཕྱིར་སྡུག་བསྔལ་ལ་ཆོས་ཤེས་པ་ལ་སོགས་པ་རྣམས་མ་རྙེད་ཀྱང༌། སྐད་ཅིག་མ་དང་པོ་ལ་གནས་པ་སོ་སོའི་སྐྱེ་བོ་ཉིད་དུ་ཐལ་བར་མི་འགྱུར་རོ། །དེ་ལྟ་ན་འོ་ན་འབྲས་བུ་ཐོབ་པའི་དུས་ན་དེ་བཏང་བའི་ཕྱིར་འཕགས་པ་མ་ཡིན་པ་ཉིད་དུ་ཐལ་བར་འགྱུར་རོ་ཞེ་ན། དེའི་ཕྱིར་དེ་དག་བཏང་ཞེས་བྱ་བརྒྱས་པར་སྨོས་སོ། །དེ་ཉིད་ལ་རྒྱུ་བཤད་པ་ནི། དེ་དག་གིས་མ་རྙེད་པ་གཏན་དུ་བཅོམ་པའི་ཕྱིར་རོ་ཞེས་བྱ་བ་སྟེ། སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པས་སྡུག་བསྔལ་ལ་ཆོས་ཤེས་པའི་བཟོད་པ་དང༌། དེ་དང་ལྷན་ཅིག་འབྱུང་བ་རྣམས་ཀྱིས་མ་རྙེད་པ་སོ་སོའི་སྐྱེ་བོ་ཉིད་ཅེས་བྱ་བ་གཏན་དུ་བཅོམ་པའི་ཕྱིར་རོ། །འཕགས་པའི་ཆོས་རྣམས་ཀྱི་མ་ཐོབ་པ་དེ་ནི་དེའི་རྒྱུད་ལ་ནམ་ཡང་འབྱུང་བར་མི་འགྱུར་རོ། །འདིར་ཡང་སྔར་བཤད་པའི་ཉེས་པར་ཐལ་བར་བྱ་བའི་ཕྱིར། འོ་ན་ནི་དེ་དག་ཀྱང་ཞེས་བྱ་བ་རྒྱས་པར་སྨོས་ཏེ། སྡུག་བསྔལ་ལ་ཆོས་ཤེས་པའི་བཟོད་པ་དང༌། དེ་དང་ལྷན་ཅིག་འབྱུང་བ་དག་གོ །རིགས་གསུམ་ནི་ཉན་ཐོས་དང༌། རང་སངས་རྒྱས་དང༌། ཡང་དག་པར་རྫོགས་པའི་སངས་རྒྱས་ཀྱི་རིགས་ཡིན་པའི་ཕྱིར་རོ། །ཉན་ཐོས་ལ་སོགས་པ་དག་རེ་རེས་ཐམས་ཅད་རྙེད་པ་ཡང་མ་ཡིན་ལ། རིགས་གསུམ་པོ་ཐམས་ཅད་ཀྱིས་མ་རྙེད་པ་ཡང་ཉན་ཐོས་ལ་སོགས་པ་རྣམས་ལ་མཚུངས་ཏེ། དེའི་ཕྱིར་འདྲི་བ་ནི། གང་དག་གི་ཞེས་བྱ་བ་སྟེ། དེའི་ཕྱིར་བཤད་པ། ཐམས་ཅད་ཀྱིས་མ་རྙེད་པ་ལས་སོ་སོའི་སྐྱེ་བོ་ཞེས་བྱའོ། །དེ་ལྟ་ན་ཉེས་པ་དེ་ཉིད་དུ་འགྱུར་རོ་ཞེས་བྱ་བ་ནི་གལ་ཏེ་ཐམས་ཅད་ཀྱིས་མ་རྙེད་བ་སོ་སོའི་སྐྱེ་བོ་ཉིད་ཡིན་ན་ནི་སངས་རྒྱས་ཀྱང་ཉན་ཐོས་དང༌། རང་སངས་རྒྱས་ཀྱི་རིགས་ཅན་དགེ་དང་མི་ལྡན་པའི་ཕྱིར་འཕགས་པ་མ་
ཡིན་པར་འགྱུར་རོ་ཞེས་སྔར་གང་གསུངས་པའོ། །ལན་ཡང་དེ་ཉིད་ཡིན་ནོ་ཞེས་བྱ་བའི་ནི་དེ་ཉིད་རྙེད་པ་མེད་པ་གང་ཡིན་པ་སྟེ་ཞེས་བྱ་བ་ནས། འོ་ན་ནི་ཁོ་ན་ཞེས་བྱ་བའི་སྒྲ་གདོན་དགོས་སོ། །གདོན་མི་དགོས་ཏེ། ཚིག་གཅིག་པུ་དག་ཀྱང་ངེས་པར་འཛིན་པ་ཡིན་ཏེ་ཞེས་བྱ་བའོ། །འོ་ན་ནི་སྔར་བཤད་པ་ལས་ཁྱད་པར་མེད་པའི་ཕྱིར་འབད་པ་དོན་མེད་པར་འགྱུར་ཏེ། སྔར་བཤད་པའི་ཉེས་པ་ཡོངས་སུ་སྤང་བའི་སྒོ་ནས་འདིར་ཉེ་བར་བཀོད་ན། ཉན་ཐོས་ལ་སོགས་པ་རྣམས་འཕགས་པ་མ་ཡིན་པ་ཉིད་ཀྱི་ཉེས་པ་ནི་འདི་ན་ཡང་སོན་འདུག་པ་ཉིད་དོ། །གལ་ཏེ་འདིར་ཡང་མ་རྙེད་པ་མེད་པ་ཞེས་བྱ་བའི་ལན་དེ་ཉིད་འདོད་ན་ནི་དེ་ལྟར་ན་སྡུག་བསྔལ་ལ་ཆོས་ཤེས་པའི་བཟོད་པ་དང༌། དེ་དང་ལྷན་ཅིག་འབྱུང་བ་རྣམས་ཀྱིས་ཡིན་གྱི། གཞན་དག་གི་མ་ཡིན་ནོ་ཞེས་བྱ་བའི་འབད་པ་གང་ཡིན་པ་དོན་མེད་པར་འགྱུར་རོ། །འཕགས་པའི་ཆོས་རྣམས་མ་སྐྱེས་པའི་ཞེས་བྱ་བ་རྒྱས་པར་འབྱུང་ངོ༌། །རྒྱུད་ལ་འཕགས་པའི་ཆོས་གང་དག་མ་སྐྱེས་པ་སོ་སོའི་སྐྱེ་བོ་ཉིད་ཡིན་ཞེས་བྱ་བ་འདིར་ཡང་སྔ་མ་བཞིན་དུ་ཉན་ཐོས་ལ་སོགས་པ་རྣམས་འཕགས་པ་ཉིད་མ་ཡིན་པའམ་འབད་བ་དོན་མེད་པར་འགྱུར་རོ་ཞེ་ན། འདི་ལ་འབད་པ་དོན་མེད་པ་ཡོད་པ་མ་ཡིན་ཏེ་དོན་གཞན་དང་ལྡན་པའི་ཕྱིར་རོ། །རྒྱུད་སྨོས་པས་ན་སོ་སོའི་སྐྱེ་བོ་ཉིད་ནི་ཀུན་རྫོབ་ཏུ་ཡོད་པ་ཡིན་གྱི། ཆོས་གཞན་ནི་མ་ཡིན་ནོ་ཞེས་བསྟན་པའི་དོན་དུ་དེ་སྐད་སྨྲས་ཀྱི་ཉེས་པ་སྔ་མ་སྤང་བར་བྱ་བའི་ཕྱིར་ནི་མ་ཡིན་ནོ། །སློབ་དཔོན་འདུས་བཟང་ན་རེ། མིག་ལ་སོགས་པའི་སྐད་ཅིག་མ་རེ་རེ་སོ་སོའི་སྐྱེ་བོ་ཉིད་ཀྱི་རྒྱུད་དུ་གཏོགས་ཏེ། མདོ་བྱེད་པའི་ནི་མ་ཡིན་ནོ། །སྐད་ཅིག་མ་རེ་རེ་རྒྱུད་དུ་འགྱུར་བར་འོས་པ་མ་ཡིན་ནོ། །སྐད་ཅིག་མ་རྫས་མ་ཡིན་པ་ཉིད་དུ་ཐལ་བར་འགྱུར་རོ། །དེས་ན་འོན་མིག་ལ་སོགས་པའི་སྐད་ཅིག་སོ་སོའི་སྐྱེ་བོ་རྒྱུད་ཉིད་ཡིན་ནོ། །སྐད་ཅིག་མ་གང་ཉེ་བར་བཟུང་སྟེ་འདོགས་པར་བྱེད་ཅེ་ན། དེ་རྣམས་ལས་དེ་ཉིད་དང་གཞན་དུ་བརྗོད་དུ་མེད་དོ་ཞེས་སྨྲའོ། །འདི་མིག་ལ་སོགས་པའི་སྐད་ཅིག་ལ་སོ་སོ་སྐྱེ་བོ་ཉིད་དུ་ལྷག་པར་བཏགས་པས་ན། དེས་ན་མདོ་དང་འགལ་ཡང་སླར་བཤད་པ་བརྗོད་པ་འདི་ནི་དད་པས་རྗེས་སུ་འབྲང་པའོ། །འཇུག་པ་ནི་ཡང་དག་པ་ཉིད་དུ་
ངེས་པ་ལ་འཇུག་པའོ། །སོ་སོ་སྐྱེ་བོའི་ས་ནི་འདིར་སོ་སོ་སྐྱེ་བོའི་གནས་སྐབས་ལ་མངོན་པར་འདོད་དོ། །དེ་ཡང་གང་གི་གནས་སྐབས་སུ་ཉོན་མོངས་པ་དང་ལས་དང་ཉོན་མོངས་འཇུག་པར་ངེས་པའོ། །དེ་ལྟ་ན་བརྗོད་པ་རྣམས་ཁོ་ན་སོ་སོ་སྐྱེ་བོ་ཉིད་དུ་ཐལ་བར་འགྱུར་ཏེ། ཉོན་མོངས་པ་ལ་སོགས་པའི་འཇུག་པ་ངེས་པས་བཟོད་པ་ཐོབ་པའོ། །འདི་མདོ་སྡེ་པས་ལས་ལེན་པར་བྱེད་དེ། འདི་གང་ན་མི་དེ་ཡིན་པས་དཔྱད་པར་བྱ་བ་ཡང་མ་ཡིན་ནོ། །ཡང་ན་སོ་སོའི་སྐྱེ་བོ་ཉིད་ནི་སོ་སོ་སྐྱེ་བོའི་ས་སྟེ། འཕགས་པའི་ཆོས་རྒྱུད་ལམ་སྐྱེས་པ་སྟེ་ཆོས་གཞན་ནི་མ་ཡིན་ནོ། །འཕགས་པའི་ཆོས་སྐྱེས་པ་ནི་སླར་སོ་སོ་སྐྱེ་བོ་ཉིད་ཀྱིས་ཉེ་བར་ལེན་བ་མངོན་དུ་འགྱུར་བ་མེད་དེ་སོ་སོ་སྐྱེ་བོའི་ས་འཕོས་པ་ཞེས་བྱའོ། །དེ་ཐོབ་དང་ས་འཕོས་བས་ནི་རྣམ་ཉམས་འགྱུར་ཞེས་བྱ་བ་ལ། དེ་ཐོབ་བ་དང་ས་འཕོས་པ་ལས་རྣམ་པར་ཉམས་པར་འགྱུར་ཏེ། ས་འཕོས་པ་ནི་ཁམས་དང་སར་སྐྱེས་པས་འཕོས་པའོ། །དེ་ལ་མ་ཐོབ་པ་ཆོས་གང་གི་ཡིན་པ་དེ་ནི་དེ་ཐོབ་བ་ལས་རྣམ་པར་ཉམས་པར་འགྱུར་ཏེ། རེ་ཞིག་ཇི་ལྟར་སོ་སོ་སྐྱེ་བོ་ཉིད་འཕགས་པའི་ལམ་གྱིས་མ་རྙེད་པ་ཡིན་པ་ལྟར། རྙེད་པས་ཁམས་གསུམ་པ་ཡང་རྣམ་པར་ཉམས་པར་འགྱུར་རོ། །ས་འཕོས་པ་ལས་ཀྱང་ཡིན་ནོ། །ཅི་ཞེ་ན། སོ་སོ་སྐྱེ་བོ་ཉིད་རྣམ་པར་ཉམས་པར་འགྱུར་ཏེ། འདི་ལྟར་གང་གི་ཚེ་འདོད་པའི་ཁམས་ལས་འདོད་ཆགས་དང་བྲལ་བ་དེའི་ཚེ། དེའི་འདོད་པར་གཏོགས་པའི་སོ་སོ་སྐྱེ་བོ་ཉིད་དེ་ལ་དམིགས་པའི་འདུན་པའི་འདོད་ཆགས་སྤངས་པ་ལས་སྤང་བར་འགྱུར་གྱི། རྣམ་པར་ཉམས་པར་འགྱུར་བ་ནི་མ་ཡིན་ལ། གང་གི་ཚེ་བསམ་གཏན་དང་པོར་སྐྱེས་པས་ས་འཕོས་པ་དེའི་ཚེ་ནི་འདིའི་དེ་རྣམ་པར་ཉམས་བར་འགྱུར་གྱི་སྤངས་པ་མ་ཡིན་ཏེ་སྔར་སྤངས་ཟིན་པའི་ཕྱིར་རོ། །འཕགས་པར་འགྱུར་བ་ཡང་མ་ཡིན་ཏེ། བསམ་གཏན་དང་པོའི་ས་པའི་སོ་སོ་སྐྱེ་བོ་ཉིད་རྙེད་པའི་ཕྱིར་རོ། །དེ་བཞིན་དུ་ས་དང་བོའི་ཁམས་གོང་མ་བཞིན་དུ་འཕོ་བ་ལ་ཡང་རྒྱས་པར་བརྗོད་པར་བྱའོ། །གཞན་དག་གིས་ཡང་དེ་བཞིན་དུ་སྦྱར་བར་བྱའོ་ཞེས་བྱ་བ་ལ། ཇི་ལྟར་ལམ་ཐོབ་པས་སོ་སོའི་སྐྱེ་བོ་ཉིད་རྣམས་པར་ཉམས་འགྱུར་བ་དེ་བཞིན་དུ་གཞན་དག་གི་ཐོབ་པས་ཀྱང་དེ་དག་གི་
ཐོབ་པ་རྣམ་པར་ཉམས་པར་འགྱུར་རོ། །ཇི་ལྟར་ཞེ་ན། རེ་ཞིག་འདོད་བ་ན་སྤྱོད་པའི་ཐོབ་པ་དང༌། བསམ་བ་ལས་བྱུང་བ་རྣམས་དང་གཟུགས་ན་སྤྱོད་པའི་ཐོབ་པ་དང༌། བསྒོམ་པ་ལས་བྱུང་བ་རྣམས་དང༌། གཟུགས་མེད་པ་ན་སྤྱོད་པའི་བསྒོམ་པ་ལས་བྱུང་བ་རྣམས་ཀྱིས་མ་རྙེད་པ་ནི་དེ་དག་ཐོབ་པས་རྣམ་པར་ཉམས་པར་འགྱུར་ལ། ཁམས་གོང་མ་པའི་ཕུང་པོ་འགྲོ་བས་བསྡུས་པ་རྣམས་ཀྱིས་མ་རྙེད་པ་ནི་ས་གོང་མར་སྐྱེ་བས་རྣམ་པར་ཉམས་པར་འགྱུར་རོ། །དེ་བཞིན་དུ་དགེ་བ་སྐྱེས་ནས་ཐོབ་པ་རྣམས་དང་ཅི་རིགས་པར་སྡུག་བསྔལ་ལ་ཆོས་ཤེས་པའི་བཟོད་བ་ནས་དགྲ་བཅོམ་པ་ཉིད་ཀྱི་བར་གྱི་ཟག་པ་མེད་པ་རྣམས་ཀྱི་མ་རྙེད་པ་ནི་དེ་དག་རྙེད་པས་རྣམ་པར་ཉམས་པར་འགྱུར་རོ། །དེ་བཞིན་དུ་རྣམ་པར་གྲོལ་བ་དུས་དང་སྦྱོར་བ་དང༌། དུས་དང་མི་སྦྱོར་བར་རྣམ་པར་གྲོལ་བའི་དགྲ་བཅོམ་པ་ཉིད་མ་ཐོབ་པ་ཡང་དེ་ཐོབ་པས་རྣམ་པར་ཉམས་པར་འགྱུར་རོ། །རྣམ་པར་ཉམས་པ་ཡང་མ་ཤེས་པས་དེའི་ཕྱིར་རྣམ་པར་ཉམས་པར་འགྱུར་ཞེས་བྱ་བ་ནི་ཞེས་བྱ་བ་སྨོས་སོ། །ཐུག་པ་མེད་པར་ཐལ་བར་དོགས་པས་འདྲི་བ་ནི། ཅི་མ་ཐོབ་པ་དང་ཐོབ་པ་དག་གི་ཡང་ཞེས་བྱ་བ་ལ་སོགས་པའོ། །གཉི་གའི་ཡང་གཉི་ག་ཞེས་བྱ་བ་ལ། ཐོབ་པའི་མ་ཐོབ་པའི་ཆོས་ནི་ཐོབ་པར་འདོད་པའི་ནུས་པ་སྟེ་དེ་མ་ཐོབ་པར་འགྱུར་བ་མེད་དོ། །མ་ཐོབ་པའི་མ་ཐོབ་པའི་ཆོས་ནི་དེའི་ཆོས་མ་ཐོབ་པར་མི་རིགས་པས་དེ་ལྟར་ན་ངེས་པར་མ་ཐོབ་པ་ཡང་མ་ཐོབ་པར་འགྱུར་བ་མེད་དོ། །དེ་ལྟར་ན་ཐོབ་པ་རྣམས་ཐུག་པ་མེད་པར་ཐལ་བར་འགྱུར་བ་མ་ཡིན་ནམ། ཇི་ལྟར་ཞེ་ན། ཐོབ་པ་ལ་ཡང་ཐོབ་པ་ཡོད་ཅིང༌། དེ་ལ་གཞན་ཡོད་ལ། དེ་ལ་ཡང་གཞན་ཡོད་པས་དེ་ལྟར་ན་ཐུག་པ་མེད་དེ། །དེ་བཞིན་དུ་མ་ཐོབ་པ་ལ་ཡང་བརྗོད་པར་བྱའོ། །མ་ཐོབ་པ་ནི་མ་ཐོབ་པ་དང་ལྷན་ཅིག་སྐྱེ་བ་མེད་དོ། །འོ་ན་ཅི། ཐོབ་པ་ཁོ་ན་དེ་དང་ལྷན་ཅིག་སྐྱེའོ། །ཐོབ་པའི་ཐོབ་པ་ཡང་ངོ༌། །ཐོབ་པ་དང་མ་ཐོབ་པ་དག་ཅིག་ཅར་མི་སྲིད་དོ། །དགེ་བ་ཡང་རུང་ཉོན་མོངས་པ་ཅན་ཡང་རུང་ཞེས་བྱ་བས་ནི་མ་བསྒྲིབས་ལ་ལུང་དུ་མ་བསྟན་པ་ནི་མ་ཡིན་ནོ་ཞེས་སྟོན་པར་བྱེད་དེ། དེ་ནི་ཐོབ་པ་དང་ལྷན་ཅིག་སྐྱེས་པ་ཅན་ཡིན་པའི་ཕྱིར་སྐད་ཅིག་གཉིས་པ་ལ་ཐོབ་པ་མེད་
དོ། །སྐད་ཅིག་གཉིས་པ་ལ་ཐོབ་པ་གསུམ་རྣམས་སོ། །སྐད་ཅིག་མ་གཉིས་པ་ལ་སྐད་ཅིག་དང་པོར་སྐྱེས་པ་ཆེས་བདག་ཉིད་གཏོགས་པ་གསུམ་དང་ལྡན་པས་སྐད་ཅིག་མ་གཉིས་པ་ལ་ཐོབ་པ་གསུམ་འབྱུང་བར་འགྱུར་ལ། རྗེས་ཀྱི་ཐོབ་པ་ཡང་གསུམ་མོ། །སྐད་ཅིག་མ་གསུམ་པ་ལ་ནི། སྐད་ཅིག་མ་དང་པོར་སྐྱེས་པ་བདག་ཉིད་གཏོགས་པ་གསུམ་གྱིས་གསུམ་དང༌། སྐད་ཅིག་མ་གཉིས་པར་སྐྱེས་པའི་ཐོབ་པའི་རྫས་དྲུག་གིས་དྲུག་སྟེ། དེ་ལྟར་དགུར་འགྱུར་ལ། ཡང་དེ་དག་གིས་རྗེས་ཀྱི་ཐོབ་པ་དགུ་སྟེ། དེ་ལྟར་ན་བཅོ་བརྒྱད་དུ་འགྱུར་རོ། །སྐད་ཅིག་མ་གོང་ནས་གོང་དུ་སྟེ་སྐད་ཅིག་མ་གོང་ནས་གོང་དུ་སྤེལ་བའི་སྐད་ཅིག་མ་གོང་ནས་གོང་དུ་སྤེལ་བ་དེ་ཡིས་བསྐྱེད་ན་ཐལ་བར་འགྱུར་བའོ། །མཚུངས་པར་ལྡན་པ་དང་ལྷན་ཅིག་འབྱུང་བར་བཅས་པ་ཞེས་བྱ་བ་ནི། མཚུངས་པར་ལྡན་པ་ནི་སེམས་དང་སེམས་ལས་བྱུང་བའོ། །ལྷན་ཅིག་འབྱུང་པ་ནི་སྐྱེ་བ་ལ་སོགས་པ་སྟེ། ཐོག་མ་དང་ཐ་མ་མེད་པའི་འཁོར་བར་གཏོགས་པའོ། །ལུས་ཀྱི་སྐད་ཅིག་མ་རེ་རེ་ལ་རྫས་མཐའ་ཡས་པ་ཅན་ཏེ། ཐོབ་པ་རྣམས་མཐའ་ཡས་པའི་ཕྱིར་རོ། །ཐོགས་པ་མེད་པ་ནི་ཆོས་ཀྱི་ཁམས་ཀྱིས་བསྡུས་པའི་ཕྱིར་རོ། །དེ་ལྟར་མ་ཡིན་ན་ཞེས་བྱ་བ་ནི་གལ་ཏེ་ཕན་ཚུན་སྒྲིབ་པར་འགྱུར་ནའོ། །སྐལ་མཉམ་སེམས་ཅན་འདྲ་བའོ་ཞེས་བྱ་བ་ནི་སྐལ་བ་མཉམ་པ་ནི་སྐལ་པ་འདྲ་བ་སྟེ། སྤྱོད་པ་དང་རང་བཞིན་མཚུངས་ཞེས་བྱ་བའི་ཐ་ཚིག་གོ །དེའི་དངོས་པོ་ནི་སྐལ་བ་མཉམ་པ་ཉིད་དེ། མདོ་ལས། ལྷ་རྣམས་ནི་ལྷར་སྐལ་པ་མཉམ་པ་ཉིད་དང༌། མི་རྣམས་ནི་མིར་སྐལ་བ་མཉམ་པ་ཉིད་དོ་ཞེས་འབྱུང་བའི་ཕྱིར་རོ། །སེམས་ཅན་སྨོས་པ་ནི་སྐལ་པ་མཉམ་པ་ཉིད་ནི་སེམས་ཅན་དུ་བགྲངས་པ་ཁོ་ནའི་ཡིན་གྱི་སེམས་ཅན་དུ་མི་བགྲང་བ་རྣམས་ཀྱི་མ་ཡིན་ནོ་ཞེས་བསྟན་པའི་ཕྱིར་རོ། །རྫས་སྨོས་བ་ན་བཏགས་པར་ཡོད་པ་དགག་པར་བྱ་བའི་ཕྱིར་རོ། །སེམས་ཅན་རྣམས་ཀྱི་འདྲ་བ་ཞེས་བྱ་བ་ནི་མཚུངས་པ་ཉིད་དེ། དེ་ནི་ཐ་དད་པ་རྣམས་ལ་སྣང་བ་དང་བརྗོད་པ་ཐ་དད་པའི་རྒྱུ་ཡིན་ནོ། །དེ་ནི་སེམས་ཅན་རེ་རེ་ལ་གཞན་དང་གཞན་ཡིན་གྱི། སྤྱི་ཆེན་པོ་ལྟར་སེམས་
ཅན་ཐམས་ཅད་ལ་ཁྱབ་པ་གཅིག་པུ་ནི་མ་ཡིན་ནོ། །དེ་ཡང་ཐ་དད་པ་མ་ཡིན་པ་དང༌། ཐ་དད་པ་སྟེ་ཞེས་བྱ་བ་ལ། གང་ཞིག་ཐམས་ཅད་ལ་སེམས་ཅན་རེ་རེ་ཡོད་པ་དེ་ནི་རྫས་སུ་ཐ་དད་ཀྱང་རིགས་སུ་ཐ་མི་དད་པ་མ་ཡིན་པ་ཞེས་བྱའོ། །གང་ཞིག་ཐམས་ཅད་ལ་ཡོད་པ་མ་ཡིན་པ་དེ་ནི་ཐ་དད་པའོ། །དེ་ཉིད་ཀྱི་ཕྱིར། ཐ་དད་པ་མ་ཡིན་སེམས་ཅན་ཐམས་ཅད་ཅེས་བྱ་བ་རྒྱས་པར་སྨོས་སོ། །ཐ་དད་པ་ནི་སེམས་ཅན་དེ་དག་ཉིད་ཅེས་བྱ་བ་ལ་སོགས་པ་འབྱུང་ངོ༌། །བྱེ་བྲག་གིས་སོ་སོར་ངེས་བའོ་ཞེས་བྱ་བ་ནི་ཁམས་ལ་སོགས་པ་རྣམས་རེ་རེ་དང་སྦྱར་བར་བྱ་སྟེ། གང་ལས་བློ་འཇུག་པ་དང་འདོགས་པར་འགྱུར་བ་འདོད་པའི་ཁམས་སུ་སྐྱེ་བའོ། །གཟུགས་དང་གཟུགས་མེད་པའི་ཁམས་སུ་སྐྱེ་བའོ་ཞེས་བྱ་བ་འདི་ཡིན་ནོ། །སའི་བྱེ་བྲག་གིས་སོ་སོར་ངེས་པ་ནི་ལྷོ་ཕྱོགས་ཀྱི་རྒྱུད་པ་དང༌། གཽ་ཌ་པ་དང༌། ཤར་གྱི་ལུས་འཕགས་པོ་དང༌། འཛམ་བུའི་གླིང་དང༌། རྒྱལ་ཆེན་བཞི་པ་དང༌། བསམ་གཏན་དང་པོའི་ས་པ་ཞེས་བྱ་བ་དེ་ལྟ་བུ་ལ་སོགས་པའོ། །འགྲོ་བའི་བྱེ་བྲག་གིས་ངེས་པ་ནི་ལྷ་དང་མི་ཞེས་བྱ་བ་ལ་སོགས་པའོ། །སྐྱེ་གནས་བྱེ་བྲག་གིས་ནི་མངལ་ནས་སྐྱེས་པ་དང༌། སྒོ་ང་ལས་སྐྱེས་པ་ལ་སོགས་པའོ། །རིགས་ཀྱི་བྱེ་བྲག་གིས་ནི་རྒྱལ་རིགས་དང། བྲམ་ཟེའི་རིགས་ལ་སོགས་པའོ། །རྟགས་ཀྱི་བྱེ་བྲག་གིས་ནི་ཕོ་དང་མོ་ཞེས་བྱ་བ་ལ་སོགས་པའོ། །སྡོམ་པའི་བྱེ་བྲག་གིས་ནི་དགེ་བསྙེན་དང༌། དགེ་སློང་ཞེས་བྱ་བའོ། །ལམ་གྱི་བྱེ་བྲག་གིས་ནི་སློབ་པ་དང༌། མི་སློབ་པ་ཞེས་བྱ་བའོ། །སོགས་པ་ཞེས་བྱ་བའི་སྒྲས་ནི་དགེ་བསྙེན་མ་དང༌། དགེ་སློང་མ་དང༌། སློབ་པ་ཡང་མ་ཡིན་མི་སློབ་པ་ཡང་མ་ཡིན་པ་ལ་སོགས་པ་ཡོངས་སུ་གཟུང་ངོ༌། །ཆོས་ཀྱི་སྐལ་པ་མཉམ་པ་ནི་ཕུང་པོ་དང༌། སྐྱེ་མཆེད་དང༌། ཁམས་ཀྱི་སྒོ་ནས་སོ་ཞེས་བྱ་བ་ལ་སོ་སོར་ངེས་པའོ་ཞེས་བྱ་བར་སྦྱར་རོ། །ཕུང་པོ་ཕུང་པོ་ཞེས་བྱ་བ་ནི་སྤྱིའི་སྒོ་ནས་ཕུང་པོའི་སྐལ་པ་མཉམ་པའོ། །གཟུགས་ཀྱི་ཕུང་པོ་ཚོར་བའི་ཕུང་པོ་ཞེས་བྱ་བ་ནི་བྱེ་བྲག་གི་སྒོ་ནས་སོ། །སྤྱི་དང་བྱེ་བྲག་གི་སྒོ་ནས་སྐྱེ་མཆེད་དང༌། ཁམས་ཀྱི་སྐལ་པ་མཉམ་པ་ཡང་དེ་བཞིན་དུ་ཤེས་པར་བྱའོ། །འབྲས་བུ་ལས་དེ་རྫས་སུ་ཡོད་པ་ཉིད་དུ་བསྟན་པའི་ཕྱིར།
གལ་ཏེ་སྐལ་བ་མཉམ་པ་ཞེས་བྱ་བ་རྒྱས་པར་འབྱུང་ངོ༌། །རྫས་ཞེས་བྱ་བ་ནི་རྟོགས་པ་བསམ་པར་བྱ་བའི་ཕྱིར་ཏེ། བཏགས་པ་ལ་འབྲས་བུ་མེད་པའི་ཕྱིར་རོ། །ཁྱད་པར་མེད་པ་ཞེས་བྱ་བའི་འདྲ་བ་ཡིན་གྱི། སྤྱི་བཞིན་གཅིག་ཉིད་ནི་མ་ཡིན་ནོ། །ཕན་ཚུན་ཁྱད་པར་ནི་ཁ་དོག་དང་དབྱིབས་དང་ང་རོ་དང་སྤྱོད་པ་ལ་སོགས་པ་དང༌། ཁམས་དང་ས་དང་འགྲོ་བ་དང་སྐྱེ་གནས་ལ་སོགས་པ་སྟེ་ཐ་མི་དད་པའི་དངོས་པོ་གཞན་ཞིག་མེད་ན་ཁྱད་པར་དེས་ཐ་དད་པ་སྟེ། ཕན་ཚུན་མི་འདྲ་བའི་སེམས་ཅན་དེ་དག་ཐམས་ཅད་ལ་བྱེ་བྲག་མེད་པར་སེམས་ཅན་སེམས་ཅན་ཞེས་བྱ་བའི་བློ་འཇུག་པ་དང་འདོགས་པར་ཡང་འགྱུར་ཏེ། འདོགས་པ་ནི་མངོན་པར་བརྗོད་པའོ། །དེའི་ཕྱིར་སེམས་ཅན་ཕན་ཚུན་ཐ་དད་པ་དག་ལ་བློ་དང་སྒྲ་དང་འབྲས་བུ་ཉིད་ལས་དགེ་སྦྱོང་གི་ཚུལ་བཞིན་དུ་སྐལ་བ་མཉམ་པའི་རྫས་ཞིག་ཡོད་དོ་ཞེས་བྱ་བར་ངེས་སོ། །དེ་བཞིན་དུ་ཕན་ཚུན་ཁྱད་པར་ཐ་དད་པའི་ཕུང་པོ་དང་སྐྱེ་མཆེད་དང་ཁམས་རྣམས་ལ་ཡང་གལ་ཏེ་ཕུང་པོའི་སྐལ་བ་མཉམ་པའི་རྫས་ཁྱད་པར་མེད་པ་ཞིག་མེད་ན་ཕུང་པོ་ཞེས་བློ་ཐ་མི་དད་པ་འཇུག་པ་དང་འདོགས་པར་ཡང་མི་འགྱུར་རོ། །སྐྱེ་མཆེད་དང༌། ཁམས་དག་ལ་ཡང་དེ་བཞིན་དུ་བརྗོད་པར་བྱའོ། །འཆི་བར་འགྱུར་ཞིང་སྐྱེ་བར་ཡང་འགྱུར་ལ་ཞེས་བྱ་བ་རྒྱ་ཆེར་འབྱུང་སྟེ། འདིར་སེམས་ཅན་སྐལ་བ་མཉམ་པ་ནི་མི་ལ་སོགས་པ་ལ་མངོན་པར་འདོད་ཀྱི་སེམས་ཅན་ཙམ་ལ་ནི་མ་ཡིན་ནོ། །དེ་ལྟ་མ་ཡིན་ན་མུ་གསུམ་པ་འགལ་བར་འགྱུར་ཏེ། གང་གིར་ཡོངས་སུ་མྱ་ངན་ལས་འདས་པ་ཉིད་ན་སེམས་ཅན་གྱི་སྐལ་བ་མཉམ་པ་འདོར་བར་འགྱུར་གྱི་གཞན་གྱི་ཚེ་ལ་ཡིན་ནོ། །གལ་ཏེ་དེ་ཉིད་དུ་སྐྱེ་བ་ན་སེམས་ཅན་གྱི་སྐལ་བ་མཉམ་པ་ཉིད་འདོར་བར་ཡང་མི་འགྱུར་ཐོབ་པར་ཡང་མི་འགྱུར་ལ། འོ་ན་ཇི་ལྟར་འཆི་འཕོ་བ་དང་སྐྱེ་བར་ཡང་བརྗོད་ཅེ་ན། ཚེ་ཟད་པའི་ཕྱིར་འཆི་འཕོ་ཞིང༌། དེ་ཉིད་དུ་སྐྱེ་བའི་ཕྱིར་སྐྱེ་བས་ན་འདི་ལ་སྐྱོན་མེད་དོ། །སློབ་དཔོན་འདུས་བཟང་ན་རེ། སྐལ་བ་མཉམ་བ་ཞེས་བྱ་བ་ནི་སེམས་ཅན་འགྲོ་བ་གཅིག་ཏུ་སྐྱེས་པ་རྣམས་ཀྱི་ལུས་དང་དབང་པོ་དང་དབྱིབས་དང་སྤྱོད་
པ་དང་ཟས་ལ་སོགས་པའི་རྒྱུར་གྱུར་ཅིང་ཕན་ཚུན་དགའ་བར་འབྲེལ་པའི་རྒྱུ་མཚན་ཡིན་ནོ། །དེ་ལྟ་ན་འོ་ན་ལས་རྣམས་འབྲས་བུ་མེད་པ་ཉིད་དུ་ཐལ་བས་རིགས་མཐུན་པའི་ཚོགས་ཀྱི་ལུས་ཀྱི་དབང་པོ་ལ་སོགས་པ་སྐལ་བ་མཉམ་པའི་རྒྱུ་ཉིད་ཀྱི་ཕྱིར་རོ། །དེ་ནི་དེ་ལྟ་མ་ཡིན་ཏེ། ཁ་དོག་དང་བའི་ལས་རྣམ་པར་སྨིན་པའི་འབྱུང་བ་རྣམས་ཀྱི་རྒྱུའི་དངོས་པོ་ལས་རིས་མཐུན་པའི་རྒྱུ་ཅན་ཉིད་ཀྱིས་ལུས་ལ་སོགས་པ་ནི་སྐལ་བ་མཉམ་པའོ། །འདི་ཡང་ཇི་ལྟར་རྟོགས་པར་བྱ་ཞེ་ན་རུས་མཐུན་པའི་རྒྱུ་ཡང་འདིར་ལས་ཁོ་ན་ཡང་མ་ཡིན་ཏེ་འདི་ལ་ཡང་དཔེ་གཅིག་མ་ཡིན་ཏེ་རིས་མཐུན་པའི་རྒྱུ་མ་ཡིན་པ་ཉིད་དང་རྒྱུར་གྱུར་པ་ཉིད་ཀྱི་ལས་འཕེན་པ་མཚུངས་པའི་འབྲས་བུ་རྣམས་ལ་ཡང་སྐྱེ་བ་དང་སྤྱོད་པ་དང་ཟས་ལ་སོགས་པ་ཐ་དད་པ་མཐོང་བས་དེ་ལས་ཀྱི་འབྲས་བུ་ཁོ་ནའོ་ཞེས་ཤེས་བར་བྱ་བ་མིན་ནོ། །དེ་ལྟ་ན་འོ་ན་རིས་མཐུན་པའི་འབྲས་བུ་ཡང་དེར་ཁས་བླང་བར་མི་བྱ་སྟེ། རུས་མཐུན་པ་དེ་རྣམས་ལ་དབྱེ་བ་མེད་པའི་ཕྱིར་རོ། །དེའི་ཕྱིར་འཕེན་པ་དང་རྫོགས་པར་བྱེད་པའི་ལས་འདྲ་བ་དང་སྔོན་གོམས་པའི་ཁྱད་པར་དང་ལེགས་པ་དང་ལེགས་པ་མ་ཡིན་པ་ཕྲད་པ་ལས་ཉེས་པའི་གནས་སྐབས་ཀྱི་ཁྱད་པར་ལས་ཇི་ལྟར་རིགས་པར་ལུས་དང་དབང་པོ་ལ་སོགས་པའི་སྐལ་པ་མཉམ་པ་དང་རིས་མཐུན་པའོ་ཞེས་སོ། །སོ་སོ་སྐྱེ་བོ་ཉིད་ལས་ནི་དེར་སོ་སོ་སྐྱེ་བོ་ཞེས་བྱ་བའི་བློ་དང་སྒྲ་དག་ཏུ་འགྱུར་ན་དེ་དག་ནི་སོ་སོ་སྐྱེ་བོའི་སྐལ་པ་མཉམ་པ་ཉིད་ཀྱི་རྒྱུ་ཡིན་པས། སོ་སོ་སྐྱེ་བོ་ཉིད་ཀྱིས་ཅི་ཞིག་བྱ་སྟེ། དཔེར་ན་མིའི་སྐལ་པ་མཉམ་པ་ཉིད་ནི་མི་ཉིད་ལས་གཞན་མ་ཡིན་པར་བརྟག་པ་བཞིན་ནོ། །སློབ་དཔོན་འདུས་བཟང་ན་རེ་སོ་སོ་སྐྱེ་བོ་ཉིད་ནི་སོ་སོའི་སྐལ་བ་མཉམ་པ་ཉིད་དབྱེ་བ་ནི་མ་ཡིན་ནོ། །རྒྱུ་ཅིས་ཞེ་ན། དགོས་པ་ཐ་དད་པ་ལས་སྤྱོད་པ་དང༌། བསམ་པ་འདྲ་བའི་རྒྱུ་ཅན་ནི་སྐལ་བ་མཉམ་པ་ཉིད་དོ་ཞེས་སོ། །འཕགས་པའི་ལམ་ལྡན་པ་ལ་ནི་འགལ་ཏེ། སོ་སོ་སྐྱེ་བོའི་རྒྱུ་མཚན་སོ་སོ་སྐྱེ་བོ་ཉིད་ཀྱི་ངེས་པ་འཕོས་པའི་ཕྱིར་རོ། །སོ་སོ་སྐྱེ་པོ་ཉིད་རྣམ་པར་ཉམས་པ་ཐོབ་པ་སྟེ། སྤྱོད་པ་དང་བསམ་པ་ལ་སོགས་པ་རྣམས་དང་འདོད་པ་ལས་སྐལ་པ་མཉམ་
པ་ཉིད་དུ་འཐད་པ་བསྐལ་བ་མཉམ་པའི་རྒྱུ་མི་སྐྱེ་བའོ། །རྒྱུ་ཡོད་པ་ཉིད་ལ་འབྲས་བུ་མེད་པ་མ་ཡིན་ཞིང་དེ་ལས་བཟློག་པས་འབྲས་བུ་སྐྱེས་པ་མི་རིགས་སོ། །གང་བཤད་པ་སོ་སོ་སྐྱེ་བོ་ཉིད་ནི་སོ་སོ་སྐྱེ་བོ་ཞེས་པའི་རྒྱུ་མཚན་སྐལ་པ་མཉམ་པ་ཉིད་དོ་ཞེས་འདོད་པ་དང་ཐོབ་པ་འདི་ནི་མི་རིགས་ཏེ་མ་འབྲེལ་པའི་ཕྱིར་རོ། །འཇིག་རྟེན་གྱིས་ཞེས་བྱ་བ་རྒྱ་ཆེར་འབྱུང་སྟེ། གཟུགས་ཅན་ཁོ་ན་སྣང་བར་འགྱུར་ན། སྐལ་པ་མཉམ་པ་ཉིད་ནི་གཟུགས་ཅན་མ་ཡིན་པས་དབང་པོ་མ་ཉམས་པ་རྣམས་ཀྱིས་ཀྱང་འདི་བལྟ་བར་མ་ནུས་སོ། །མི་སྣང་ཡང་ཚོར་བ་ལ་སོགས་པ་ལྟར་ཤེས་རབ་ཡོངས་སུ་གཅོད་དོ་ཞེས་བྱ་བ་འདི་བསལ་བར་བྱ་བའི་ཕྱིར། འདི་ནི་ཤེས་རབ་ཀྱིས་ཡོངས་སུ་མ་ཆོད་མོད་ཀྱིས་ཞེས་བྱ་བ་ལ་སོགས་པ་སྨོས་ཏེ། ཡིད་རྣམ་པར་ཤེས་པས་ཡོངས་སུ་ཆོད་ཞེས་བྱ་བའི་དོན་ཏོ། །དེ་ལྟར་ན་རུས་མཐུན་པ་མངོན་སུམ་དང་རྗེས་རྟོགས་པའི་ཡུལ་མ་ཡིན་པ་ཉིད་དུ་ཡང་བསྟན་པར་འགྱུར་ཞིང་སེམས་ཅན་རྣམས་ཀྱི་རིས་ཐ་མི་དད་པ་ཡང་རྟོགས་པར་འགྱུར་ཏེ། སེམས་ཅན་སེམས་ཅན་ཞེས་ཐ་སྙད་རྗེས་སུ་འཇུག་པ་མཐོང་བའི་ཕྱིར་རོ། བློ་ཐ་དད་པའི་རྒྱུ་མ་བཟུང་བར་ནི་ཕན་ཚུན་ཐ་དད་པའི་སེམས་ཅན་རྣམས་ལ་བློ་དང་སྒྲ་ཐ་མི་དད་པ་འཇུག་པ་མི་རིགས་སོ། །དེའི་ཕྱིར་འོན་རིས་མཐུན་པ་རྣམས་ལ་བློ་ཐ་དད་པ་མེད་པས་སོ། །ཡོད་དུ་ཆུག་ན་ཡང་ཞེས་བྱ་བ་ནི། ཁས་བླངས་པན་ཡང་རིས་མཐུན་པ་མ་བཟུང་པའི་ཕྱིར་དེ་སེམས་ཅན་མ་ཡིན་པ་རྣམས་ལ་བློ་དང་སྒྲ་ཐ་མི་དད་བར་འཇུག་པའི་བྱ་བ་ཡོད་ཞེས་སྟོན་པར་བྱེད་དོ། །སློབ་དཔོན་འདུས་བཟང་ན་རེ། རིགས་ཐ་མི་དད་བར་རྟོགས་པས་གཟུགས་ཅན་གྱི་སྐལ་བ་མཉམ་པ་ཉིད་དང་དེའི་བྱ་བ་སྒྲུབ་པ་ལས་བྱཱ་བྲྀ་ཡ་ཏེ། རིགས་གཞན་དུ་གྱུར་བའི་ལས་ལ་འཇུག་པ་དེ་འབྲས་བུ་སྒྲུབ་པ་བཞིན་ནོ་ཞེས་ཟེར་རོ། །འདི་ཡོད་པའི་འབྲས་བུ་རབ་ཏུ་གྲུབ་པ་མུ་བྷཱ་བྲ་ཏྱ་བ་སྠཱ་ནཾ། བདེན་པ་ཐ་དད་པའི་སྒྲུབ་པ་ཡང་འབྲས་བུ་ཁོ་ན་ལས་ཡིན་གྱི། རིས་མཐུན་པ་ལས་མ་ཡིན་པའི་ཕྱིར་དེ་ལྟར་ཐལ་བར་འགྱུར་བའོ་ཞེས་ཟེར་རོ། །སེམས་ཅན་མ་ཡིན་པ་སྐལ་བ་མཉམ་པ་ཉིད་ཀྱང་ཅིའི་ཕྱིར་
མི་འདོད་པ་ཞེས་བྱ་བ་རྒྱ་ཆེར་འབྱུང་བ་ལ། གལ་ཏེ་ཕན་ཚུན་ཐ་དད་པའི་སེམས་ཅན་རྣམས་ལ་སྐལ་པ་མཉམ་པའི་རྒྱུ་མཚན་བློ་དང་འདོགས་པ་ཐ་མི་དད་པ་ཉིད་ཡིན་ན་སེམས་ཅན་དུ་བགྲང་བ་མ་ཡིན་པ་སཱ་ལི་ལ་སོགས་པ་རྣམས་ལ་ཡང་སྐལ་བ་མཉམ་པ་ཡོད་པར་ཁས་བླང་དགོས་ཏེ། དེ་དག་ཀྱང་ཞེས་བྱ་བ་ཕན་ཚུན་ཁྱད་པར་དུ་གྱུར་བ་དེ་རྣམས་ལ་སཱ་ལིའོ་སྙམ་པ་ལ་སོགས་པའི་བློ་དང་འདོགས་པ་ཐ་མི་དད་བར་འཇུག་གོ །འོན་ཏེ་བཅོམ་ལྡན་འདས་ཀྱིས་མ་གསུངས་བའི་ཕྱིར་ཁས་མི་ལན་ནོ་སྙམ་ན། འོ་ན་སེམས་ཅན་རྣམས་ལ་སྐལ་བ་མཉམ་པ་ཉིད་ཀྱི་བློ་དང་འདོགས་པ་ཐ་མི་དད་པ་ཡང་བསམས་ཏེ་བརྗོད་པར་བྱའོ། །ཕན་ཚུན་ཐ་དད་པ་རྣམས་ཞེས་བྱ་བ་ལ། སེམས་ཅན་རིགས་གཅིག་པ་རྟེན་གྱི་དབྱེ་བས་ཕན་ཚུན་ཐ་དད་པ་རྣམས་ལ་རིགས་ཀྱི་དབྱེ་བ་དང་རྟེན་གྱི་དབྱེ་བས་ཀྱང་ཕན་ཚུན་ཐ་དད་པར་གདགས་པར་བྱའོ་ཞེས་བྱ་བ་ནི་བློའི་ཡུལ་མ་ཡིན་པའི་ཕྱིར་བཏགས་པ་ཙམ་ཉེ་བར་བཀོད་དོ། །སློབ་དཔོན་འདུས་བཟང་ན་རེ། ཁྱེད་ཅག་གིས་ཀྱང་འགྲོ་བ་དག་དང་སྐྱེ་གནས་ཁས་བླངས་པས་བདེ་འགྲོའི་རྩ་བ་དང་གང་ཟག་དག་ཀྱང་ཅི་སྟེ་ཁས་མི་ལེན། བཅོམ་ལྡན་འདས་ཀྱིས་མ་གསུངས་པའི་ཕྱིར་མ་ཡིན་ན། སེམས་ཅན་མ་ཡིན་པ་སྐལ་བ་མཉམ་པ་ཡང་ཁས་མི་ལེན་ཏེ། བཅོམ་ལྡན་འདས་ཀྱིས་མ་གསུངས་པའི་ཕྱིར་རོ་ཞེས་ཟེར་རོ། །རྩྭ་ལ་སོགས་པ་རྣམས་ཇི་ལྟར་རྫས་གཞན་ཞེས་བྱ་བ་འདི་དཔྱད་པར་ནུས་ཏེ། སྤྱོད་པ་དང་བསམ་པ་མཚུངས་པ་ལ་སོགས་པ་མི་འཐད་པའི་ཕྱིར་རྩྭ་ལ་སོགས་པ་ལ་སྐལ་པ་མཉམ་པ་མི་བཤད་དོ། །རྩྭ་ལ་སོགས་པ་བསྐྱེད་པ་སེམས་ཅན་ལ་བལྟོས་པ་ཉིད་ཀྱིས་སེམས་ཅན་གྱི་སྐལ་བ་མཉམ་པ་ཁོ་ན་བརྗོད་དོ། །སྔོན་གྱི་ལས་དང་ད་ལྟར་གྱི་རྩོལ་བས་གྲུབ་པ་འདི་གཉིས་ཀ་ཡང་རྩྭ་ལ་སོགས་པ་རྣམས་ལ་མི་འཇུག་གོ །འདི་ཉིད་རྫས་སུ་ཡོད་པ་ཉིད་ཀྱི་ཤེས་བྱེད་ནི། ཤིང་དང་གླེགས་པ་མ་དང་རི་མོ་དང་སྒྱུ་མ་ལ་སོགས་པ་ལ་ཡང་ཁ་དོག་དང་དབྱིབས་ཐུན་མོང་དུ་ཡོད་པའོ། །འགའ་ཞིག་བཏགས་པ་ལས་ཏེ་འདྲ་བའི་ཁྱད་པར་ལས་དེར་བཏགས་པར་མཐོང་གི་འདྲ་བ་
ཙམ་ལས་དེ་རྟོགས་པ་མ་ཡིན་ནོ། །འགའ་ཞིག་ཁྱད་པར་གྱི་ཆོས་མཐའ་དག་ཡོད་པ་གང་ལ་བལྟོས་ནས་འགའ་ཞིག་ཁོ་ནས་དེ་བཏགས་པས་འདི་ཐམས་ཅད་བླ་ན་མེད་པ་སྟེ་རང་གི་ལས་ཀྱི་ཁྱད་པར་ལ་བལྟོས་པས་སོ། །འགྲོ་བ་དང་སྐྱེ་གནས་དག་ཀྱང་ཞེས་བྱ་བ་ནི་རྩྭ་ལ་སོགས་པ་རྣམས་ལ་སྤྱོད་པ་དང་བསམ་པ་ལ་སོགས་པ་མེད་པས་རིས་མཐུན་པ་མི་འདོད་དེ། སེམས་ཅན་ལ་བལྟོས་པའི་སྐྱེ་བ་ཉིད་སྔོན་གྱི་ལས་དང་ད་ལྟར་བྱུང་བའི་འབྲས་བུའོ་ཞེས་སྔར་བཤད་པ་ཉིད་དོ། །འདིར་རྒྱུ་འགའ་ཞིག་བརྗོད་ཀྱི་ཚིག་ཙམ་གྱིས་སྒྲུབ་པར་ནུས་པ་མ་ཡིན་ནོ། །འདྲ་བའི་ཁྱད་པར་ལ་དེ་ཉེ་བར་བཏགས་ཞེས་གང་བཤད་པ། དེ་ལྟར་འདྲ་པ་དང་མི་འདྲ་བ་དོན་གཞན་སཱ་ལི་ལ་སོགས་པ་རྣམས་ཉིད་ལའོ་ཞེས་སོ། །དེ་ལྟ་ན་ནི་བྱེ་བྲག་པ་རྣམས་ཀྱི་གསལ་བར་བྱས་པ་ཡིན་ཏེ་ཞེས་བྱ་བ་རྒྱ་ཆེར་འབྱུང་བ་ལ། སློབ་དཔོན་འདུས་བཟང་ན་རེ། གལ་ཏེ་དེ་ལྟར་གཅིག་དང་དུ་མའི་སྐད་ཅིག་མ་ལ་མི་བརྟེན་པ་ཕན་ཚུན་ཐ་དད་པ་ནི་ཉེས་པ་ཆུང་ངོ་ཞེས་ཟེར་རོ། །བྱེ་བྲག་པ་རྣམས་ཀྱི་སྤྱིའི་ཚིག་གི་དོན་ཐ་དད་པ་དག་ལ་རྟོགས་པ་ཐ་མི་དད་པའི་རྒྱུ་མཚན་གཞན་ལ་བཏགས་པས་ན་བསལ་བར་བྱས་པ་ཡིན་ཏེ་ཞེས་བརྗོད་དོ། །རྒྱུ་མཚན་གཞན་པ་དེ་ནི་ཡོད་པ་ཡང་མ་ཡིན་ཏེ། འདྲ་བ་རྗེས་སུ་གཟུང་བའི་ཕྱིར་དང་འདྲ་བར་རྟོགས་པ་ལ་འདྲ་བའི་བློ་མེད་པས་ཅུང་ཟད་ཀྱང་འདྲ་བ་མེད་དེ། དེ་ལྟར་རྣམ་པ་དེ་ལྟ་བུ་དང་དེ་ཡང་དེ་བཞིན་དུ་གྱུར་པ་མེད་དོ། །གང་དག་མི་ལ་སོགས་པར་འདོགས་པའི་རྒྱུར་གྱུར་པ་ཡིན་ལ་སོགས་པ་དབྱིབས་ལོག་བའི་རྣམ་བའི་དབྱེ་བས་ཐ་དད་པ་རྣམས་ནི་སྐལ་པ་མཉམ་པ་ཉིད་དེ་སཱ་ལི་ལ་སོགས་པའི་སྐལ་བ་མཉམ་པ་དང་འདྲའོ། །འདུ་ཤེས་མེད་པ་ལ་འདུ་ཤེས་མེད་པར་ཞེས་བྱ་བ་ནི་འགོག་པ་དང་འདུ་ཤེས་མེད་པའི་སྙོམས་པར་འཇུག་པ་རྣམ་པར་གཅད་པར་བྱ་བའི་ཕྱིར་རོ། །དེ་ཉིད་ཀྱི་ཕྱིར། འདུ་ཤེས་མེད་པའི་ལྷ་རྣམས་ཀྱི་ནང་དུ་ཞེས་བྱ་བ་རྒྱ་ཆེར་སྨོས་སོ། །སེམས་དང་སེམས་ལས་བྱུང་བ་རྣམས་འགོག་པ་ཞེས་བྱ་བ་ལ། གང་ལས་ཞེས་བྱ་བ་ནི་ཚིག་གི་ལྷག་མའོ། །ཡང་ན་རྫས་འདིས་སེམས་དང་སེམས་ལས་
བྱུང་བ་རྣམས་འགོག་པས་ན་འགོག་པ་སྟེ། དེ་ཉིད་ཀྱི་ཕྱིར་གང་གིས་མ་འོངས་པའི་དུས་ཀྱི་སེམས་དང་སེམས་ལས་བྱུང་བ་རྣམས་ཞེས་བྱ་བ་རྒྱས་པར་སྨོས་སོ། །དེ་ཡང་གཅིག་ཏུ་རྣམ་སྨིན་གཅིག་ཏུ་ཞེས་སྨོས་པ་ནི་རྒྱས་པ་ལས་བྱུང་བ་དང་རྒྱུ་མཐུན་པ་ལས་བྱུང་བ་རྣམ་པར་གཅད་པར་བྱ་བའི་ཕྱིར་རོ། །འདུ་ཤེས་མེད་པ་པ་དང༌། གཟུགས་ནི་འདུ་ཤེས་མེད་པའི་སྙོམས་པར་འཇུག་པའི་རྣམ་པར་སྨིན་པར་འགྱུར་རོ། །རིས་མཐུན་པ་ནི་འཕེན་བར་མི་ནུས་པའི་ཕྱིར་རོ། །སྲོག་གི་དབང་པོ་དང་རིས་མཐུན་པ་ནི་སེམས་དང་བཅས་པའི་བསམ་གཏན་བཞི་པའི་རྣམ་པར་སྨིན་པ་ཡིན་ལ། ས་དེ་བའི་ཕུང་པོ་ལྷག་མ་རྣམས་གཉི་གའི་ཡིན་ནོ། །བསམ་གཏན་ཁྱད་པར་ཅན་བཞིན་ནོ་ཞེས་བྱ་བ་ལ། དཔེར་ན་གང་དག་ཕྱོགས་གཅིག་ཏུ་གྱུར་བ་ན་ཚངས་བ་ཆེན་པོ་ཁ་ཅིག་འཁོད་པའི་ལྷ་དེ་དག་ནི་ཚངས་པའི་མདུན་ན་འདོན་ཞེས་བྱ་བ་དེ་བཞིན་དུ། འདིར་ཡང་འབྲས་བུ་ཆེ་བ་དག་གི་ཕྱོགས་གཅིག་ན་འདུ་ཤེས་མེད་པའི་སེམས་ཅན་རྣམས་འཁོད་དོ། །གནས་དེ་ནི་ཆེས་མཆོག་ཏུ་གྱུར་པ་ཞིག་གོ །དེ་རྣམས་ལས་གང་གི་དེ་རིས་མཐུན་པར་འཕངས་པ་དང༌། སེམས་གང་གིས་མཚམས་སྦྱར་བ་དང༌། སེམས་གང་ཞིག་གི་མཇུག་ཐོགས་སུ་འདུ་ཤེས་མེད་བ་པར་འཇུག་པ། ལས་དང༌། སྐྱེ་བ་དང༌། མཚུངས་པ་དེ་མ་ཐག་པའི་རྐྱེན་གྱིས་ཟས་དང་ལྡན་པ་རྣམས་ཏེ། དེས་ན་དེ་དག་ནི་རིག་པ་ལ་སོགས་པ་དག་གིས་ཟས་དང་བཅས་པ་ཡིན་ནོ། །སྙོམས་པར་ཞུགས་པ་རྣམས་ལ་ནི་སྔར་ཟས་ཟོས་པ་ལས་རེག་པ་ལ་སོགས་པ་དག་གིས་ཟས་ཀྱི་བྱ་བ་བྱེད་ཀྱི་དུས་ད་ལྟར་ཉ་བར་སྟོན་པ་ལས་ནི་མ་ཡིན་ནོ། །སེམས་དང་བཅས་པ་རྣམས་ལ་ནི་གཉིས་ཀ་ལྟར་ཡང་ཡིན་ནོ། །ཅི་དེ་དག་ནམ་ཡང་འདུ་ཤེས་ཅན་དུ་མི་འགྱུར་རམ་ཞེས་བྱ་བ་རྒྱས་པར་འབྱུང་བ་ལ། སེམས་མེད་པའི་གནས་སྐབས་ཕལ་ཆེ་བའི་ཕྱིར། འདུ་ཤས་མེད་པའི་སེམས་ཅན་རྣམས་ཞེས་བརྗོད་དེ། མདོ་ལས་སེམས་ཅན་དེ་དག་ནི་འདུ་ཤེས་སྐྱེ་ས་ནས་གནས་དེ་ནས་འཆི་འཕོ་བར་འགྱུར་རོ་ཞེས་འབྱུང་བའི་ཕྱིར་རོ། །དུས་རིང་མོ་ཞིག་
ཏུ་ཞེས་བྱ་བ་ནི་སྐད་ཅིག་མ་གཅིག་ཏུ་མ་ཡིན་ནོ། །སྐྱེ་བའི་དུས་དང་འཆི་འཕོ་བའི་དུས་ན་འདུ་ཤེས་ཅན་དུ་འགྱུར། ཤི་འཕོ་ནས་ཀྱང་འདོད་པའི་ཁམས་ཁོ་ནར་སྐྱེ་བར་འགྱུར་རོ། །སྔོན་གྱི་སྙོམས་པར་འཇུག་པའི་འདུ་བྱེད་ཡོངས་སུ་ཟད་པའི་ཕྱིར་དང་ཞེས་བྱ་བ་ལ། དེའི་སྙོམས་པར་འཇུག་པའི་སེམས་ཀྱིས་འཕངས་པའི་ཚེ་ཡོངས་སུ་ཟད་པའི་ཕྱིར་དང་ཞེས་བྱ་བ་ལ། དེའི་སྙོམས་པར་འཇུག་པའི་སེམས་ཀྱིས་འཕངས་པའི་ཚེ་ཡོངས་སུ་ཟད་པའི་ཕྱིར་དང་ཞེས་བྱ་བའི་དོན་ནོ། །སྔོན་མེད་པ་མ་བསགས་པའི་ཕྱིར་ཞེས་བྱ་བ་འབྱུང་སྟེ། སེམས་དང་སེམས་ལས་བྱུང་བ་མེད་བར་ནི་ལས་དག་ཉེ་བར་སོག་པ་མ་ཡིན་ཏེ། སེམས་པ་དང་བསམ་པའི་ལས་ཞེས་འབྱུང་བའི་ཕྱིར་རོ། །འདོད་པའི་ཁམས་སུ་སྐྱེ་བར་འགྱུར་ཏེ་ཞེས་བྱ་བ་འདི་ལ་རྒྱུ་ཅི་ཡོད་ཅེ་ན། དེའི་ཕྱིར། གང་ཞིག་དེ་སྐྱེ་བར་འགྱུར་བ་ཞེས་བྱ་བ་རྒྱས་པར་སྨོས་ཏེ། བྱང་གི་སྒྲ་མི་སྙན་པ་རྣམས་ཀྱི་ལྷར་སྐྱེ་བའི་ལས་དེ་བཞིན་དུ་འདུ་ཤེས་མེད་པའི་སེམས་ཅན་རྣམས་ཀྱི་འདོད་པའི་ཁམས་མྱོང་བར་འགྱུར་བའི་ལས་ངེས་པ་ཡིན་པའི་ཕྱིར་རོ། །ཡང་སྙོམས་འཇུག་དག་ཅེས་གང་བཤད་པ་ཞེས་བྱ་བ་ལ། གང་ལས་བཤད་ཅེ་ན། ཐོབ་དང་མ་ཐོབ་སྐལ་མཉམ་དང༌། །འདུ་ཤེས་མེད་པའི་སྙོམས་འཇུག་དག །ཅེས་བསྟན་པའི་མདོ་ལས་སོ། །འདུ་ཤེས་མེད་པའི་སྙོམས་པར་འཇུག་པ་ནི་འདུ་ཤེས་མེད་པའི་རྒྱུ་ཡིན་པར་སྔར་བསྟན་པས་འདྲི་བ་ནི། འདུ་ཤེས་མེད་པའི་སྙོམས་པར་འཇུག་པ་འདི་ཅི་ཞེ་ན་ཞེས་བྱ་བའོ། །དེ་བཞིན་དུ་ཞེས་བྱ་བའི་སྒྲ་ནི་པ་ལྟོས་པ་དང་བཅས་པ་ཡིན་པའི་ཕྱིར་བཤད་ལ། ཇི་ལྟར་གང་ལས་སེམས་དང་སེམས་ལས་བྱུང་བ་རྣམས་འགོག་པ་དེ་ལ་འདུ་ཤེས་མེད་པ་པ་ཞེས་བཤད་བ། དེ་བཞིན་འདུ་ཤེས་མེད་སྙོམས་འཇུག །འདུ་ཤེས་མེད་པ་རྣམས་ཀྱི་སྙོམས་པར་འཇུག་པ་ནི་འདུ་ཤེས་པའི་སྙོམས་པར་འཇུག་པ་སྟེ། གང་དག་དེར་སྙོམས་པར་འཇུག་པའོ། །འདུ་ཤེས་མེད་པ་ཅན་ཡིན་པས་ཞེས་བྱ་བ་ནི་སྙོམས་པར་འཇུག་པ་དང་སྦྱར་ཏེ། འདི་ལ་
འདུ་ཤེས་ཡོད་པ་མ་ཡིན་པས་ན་འདུ་ཤེས་མེད་པའི་སྙོམས་པར་འཇུག་པའོ། །ཡང་དག་པ་དང་ཏེ་པོར་སྙོམས་པར་ཞུགས་པས་ན་འདུ་ཤེས་མེད་པའི་སྙོམས་པར་འཇུག་པ་སྟེ། རིགས་ཡང་དག་པར་སྒྲུབ་པ་ནི་སྙོམས་པར་འཇུག་པའོ། །གཞན་དག་ན་རེ་སེམས་དང་འབྱུང་བ་ཆེན་པོ་མཉམ་པ་ཉིད་དུ་བསྒྲུབ་པས་ན་སྙོམས་པར་འཇུག་པའོ་ཞེས་ཟེར་རོ། །སེམས་དང་སེམས་ལས་བྱུང་པ་ཐམས་ཅད་འགོག་པ་ལ་ཡང་ས་ཛྙཱ་དྭེ་ཥ་ཎ་དེ་བསྐྱེད་པའི་ཕྱིར་འདུ་ཤེས་ཅན་གྱི་སྙོམས་པར་འཇུག་པ་ཞེས་བྱའོ། །ན་ཧི་ནཱོ་རླ་བེ་ནཱ་དྲེ་ཥཱི་ཏངྒརྤ་དེ་བས་མཱ་པིཏྟ་པྲ་པེ་ཤཱཏ་དེ་བཞིན་ཞེས་བྱ་བའི་སྒྲས་ནི་དེ་ཙམ་ཞིག་མཐུན་པར་འདྲེན་ཏོ་ཞེས་བྱ་བ་ནི་དེ་བཞིན་ཞེས་བྱ་བའི་སྒྲས་ནི་སྤྱིར་མ་ཞིག་ཁོ་ན་མཐུན་པར་འདུ་ཤེས་མ་སྟོང་པས། འདྲེན་གྱི། ཁྱད་པར་ནི་མ་ཡིན་ནོ་ཞེས་སྟོན་མེད་མིན་འཕགས་པ་ཚོར་བ་སྟོང་པ་ངས་སྙོམས་ལྔ་སྙོམས་པ་འཇུག་པ་ལ་ཞུགས་པས་སོ། །པར་བྱེད་པའོ། །གཉི་ག་ཡང་མ་འོངས་པའི་སེམས་དང་སེམས་ལས་བྱུང་བའི་གེགས་ཀྱི་བདག་ཉིད་དུ་མཚུངས་ཏེ། དེ་ཉིད་ཀྱི་ཕྱིར་ཕྱིར་སྐྱོན་མེད་དོ། །འདུ་ཤེས་མེད་པའི་སྙོམས་པར་འཇུག་པ་འདུ་ཞེས་བྱ་བ་སྨོས་སོ། །བསམ་གཏན་ཐ་མར་ཞེས་བྱ་བ་བརྗོད་པར་བྱ་སྟེ། རྒྱུ་ཅིས་འདུ་ཤེས་མེད་པ་པ་འབྲས་བུ་ཆེ་བ་རྣམས་སུ་རྣམ་པར་སྨིན་པ་ཞེས་བཤད། འབྲས་བུ་ཆེ་བ་ནི་བསམ་གཏན་བཞི་བར་འཆད་པར་འགྱུར་རོ། །དེ་རྒྱུ་ཅིས་གཞན་གྱིས་པར་འགྱུར་ཞེ་ན་མ་བཤད་པའི་ཕྱིར་སྐྱོན་མེད་དོ། །འདུ་ཤེས་མེད་པའི་སྙོམས་པར་འཇུག་པ་འདུ་ཤེས་མེད་པ་བའི་རྒྱུར་འགའ་ཞིག་གིས་བཤད་པ་དེ་ནི་མ་ཡིན་ནོ། །འདི་རྣམ་པར་སྨིན་པ་ཞེས་མདོ་ལས་བཤད་པ་མ་ཡིན་ནམ་ཞེ་ན། འགའ་ཞིག་ནི་བསྟེན་བཅོས་སུ་ཡང་མ་ཡིན་ཏེ། འདིར་མདོར་བྱས་པ་ཉིད་ཀྱིས་དེ་གྲུབ་པའོ། །བསམ་གཏན་བཞི་པ་སྨོས་པ་ནི་དེ་ལས་གཞན་པའི་བསམ་གཏན་དང་གཟུགས་མེད་པའི་ས་བ་ཉིད་བསལ་བར་བྱ་བའི་ཕྱིར་རོ། །སོ་སོ་སྐྱེ་བོ་རྣམས་ནི་ཚོ་རབ་ལ་ཆགས་པས་བསམ་གཏན་དང་གཟུགས་མེད་པ་དག་ལ་སྙོམས་པར་འཇུག་ན། དེ་ན་ནི་ཚོར་བ་ཡོད་པ་མ་ཡིན་པས་དེའི་ཕྱིར་འདྲི་བ་ནི། ཅིའི་ཕྱིར། འདི་ལ་སྙོམས་པར་འཇུག་ཅེ་
ན་ཞེས་བྱ་བའོ། །འབྱུང་འདོད་པས་ཞེས་བྱ་བ་ལ། དེ་དག་ནི་སྙོམས་པར་འཇུག་པ་ལམ་དུ་འདུ་ཤེས་ཤིང༌། འདུ་ཤེས་མེད་པ་ལ་ཐར་པར་འདུ་ཤེས་པ་ཡིན་ནོ། །འདི་ནི་དགེ་བ་སྟེ། འདི་ནི་རྣམ་པར་སྨིན་པའི་རྒྱུ་ཉིད་ཀྱི་ཕྱིར་དགེ་བ་ཉིད་དུ་མ་བཤད་ཀྱང་གྲུབ་པོ། །དེའི་རྣམ་པར་སྨིན་པ་ནི་འདུ་ཤེས་མེད་པའི་སེམས་ཅན་གྱི་ནང་དུ་ཕུང་པོ་ལྔའོ། །ཉོན་མོངས་པ་ཅན་དང་ལུང་དུ་མ་བསྟན་པ་ཡང་མ་ཡིན་ཏེ། འདི་ལས་བཟློག་པ་ངེས་པར་གཟུང་བ་དེའི་ཚེ་བརྗོད་པར་བྱའོ། །མེད་པར་ཡང་རྟོགས་པར་བྱ་སྟེ་ཞེས་བྱ་བ་འདི་སོ་སོའི་སྐྱེ་བོར་བཤད་དོ། །ཨ་རམྠ་ཏ། སྐྱེས་ནས་མྱོང་འགྱུར་ཉིད་ཅེས་བྱ་བ་ལ། དེ་ཐོབ་པ་ཡོངས་སུ་ཉམས་པ་ན་བདག་ཉིད་ཐར་པ་ལས་ཡོངས་སུ་ཉམས་པར་སེམས་ཤིང་སྐྱོ་བ་དྲག་པོ་འབྱུང་སྟེ། དེའི་ཕྱིར་དེ་བསྐྱེད་པ་ཁོ་ན་ལ་གུས་པའི་ཕྱིར་སངས་རྒྱས་རྣམས་ཀྱིས་འདུལ་བར་བྱ་བ་ཡང་མ་ཡིན་ཏེ། བརྩམ་པའི་ཕྱིར་རོ། །འགོག་པ་མངོན་སུམ་དུ་མཐོང་བར་རློམ་པའི་ཕྱིར་རོ། །དེའི་ཕྱིར། གང་གིས་འདི་བསྐྱེད་ནས་ཡོངས་སུ་ཉམས་པ་དེ་ཡང་ཞེས་བྱ་བ་རྒྱས་པར་འབྱུང་སྟེ། གྲག་གོ་ཞེས་བྱ་བའི་སྒྲ་ནི་ལུགས་གཞན་བསྟན་པར་བྱ་བའི་ཕྱིར་རོ། །གཞན་དག་ན་རེ། སྐྱེས་ནས་མྱོང་བར་འགྱུར་བ་དང་མྱོང་བར་ངེས་པའི་ཡང་ཡིན་ནོ་ཞེས་ཟེར་རོ། །ཡོངས་སུ་ཉམས་སམ་ཡོངས་སུ་མ་ཉམས་ཀྱང་རུང་སྟེ་གལ་ཏེ་དགེ་བའི་བཤེས་གཉེན་དང་ཕྲད་པ་ལས་སྐྱོན་དུ་ལྟ་བར་འགྱུར་ན་ནི་དེ་ནས་ངེས་པ་ལ་འཇུག་པར་འགྱུར་ལ། ཞུགས་པ་ན་ཡང་བསྐྱེད་པར་མི་བྱེད་ཅིང་མངོན་དུ་ཡང་མི་བྱེད་དོ། །རྒྱུ་ཅིས་སོ་སོ་སྐྱེ་བོ་ཀུན་ཏུ་སྤྱོད་པ་ལས་ཉམས་ནས་སྙོམས་པར་འཇུག་པ་དང་མི་ལྡན་ཞེ་ན། དེ་ཡང་ཆོས་འདི་དང་ཆོས་གཞན་ཅི་ཡང་རུང་བ་སོ་སོ་སྐྱེ་བོའི་ཁོ་ན་ཡིན་པར་འདོད་ཀྱི། འཕགས་པའི་མ་ཡིན་ཞེས་བྱ་སྟེ། འཕགས་པ་རྣམས་ནི་ངེས་པ་ལ་ཞུགས་པ་ཉིད་ཀྱིས་ངན་སོང་གི་འགྲོ་བ་རྣམས་དང་འདུ་ཤེས་མེད་པ་པ་དང༌། ཚངས་པ་ཆེན་པོར་སྐྱེ་བ་ལ་སོགས་པ་རྣམས་ཀྱི་སོ་སོར་བརྟགས་པ་མ་ཡིན་པའི་འགོག་པ་འཐོབ་སྟེ། ལྟ་བའི་གནས་ཡིན་པའི་ཕྱིར་དང་
འཕགས་པའི་ལམ་དང་འགལ་བའི་ཕྱིར་རོ། །དེས་ན་རྣམ་པར་ལྟུང་བའི་གནས་ལྟ་བུར་གཟིགས་པས་སྙོམས་པར་མི་འཇུག་གོ །ངེས་བར་འབྱུང་བའི་འདུ་ཤེས་ཅན་ནི་སྙོམས་པར་འཇུག་གོ །འཕགས་པ་རྣམས་ནི་སྲིད་པ་ལ་ངེས་པར་འབྱུང་བ་འདུ་ཤེས་པ་ཡང་མ་ཡིན་པས་དེ་ལ་སྙོམས་པར་མི་འཇུག་གོ །འབྱུང་འདོད་པས་ཞེས་མདོར་བྱས་པ་ནི་སོ་སོ་སྐྱེ་བོ་ཉིད་ཀྱི་དབང་དུ་བྱས་པར་འགྲུབ་པོ། །སླར་ཡང་བརྩམས་པའི་དགོངས་པ་མི་ཤེས་སོ། །རེ་ཞིག་གཞན་དག་གིས་ཀྱང་ཞེས་རྒྱ་ཆེར་འབྱུང་སྟེ། གང་དག་མངོན་དུ་བྱེད་ཅིང་དོན་དུ་གཉེར་བ་དེ་དག་དང༌། གང་དག་གིས་ཀྱང་མི་ཐོབ་ན། འཕགས་པ་རྣམས་ཀྱིས་ལྟ་སྨོས་ཀྱང་ཅི་དགོས། མངོན་པར་འདུ་བྱ་བ་ཆེན་པོས་བསྒྲུབ་པར་བྱ་བ་ཡིན་པའི་ཕྱིར་དང་ཞེས་བྱ་བ་ནི། འབད་པ་ཆེན་པོས་བསྒྲུབ་པར་བྱ་བ་མིན་པའི་ཕྱིར་དང་ཞེས་བྱ་བའི་ཐ་ཚིག་གོ །དེའི་ཕྱིར་འདྲིས་ཀྱང་མ་བཙལ་བར་མི་ཐོབ་པོ། །འོ་ན་ཅི་ཞེ་ན། དུས་གཅིག་འཐོབ་འདི་ནི་གནས་སྐབས་ཐམས་ཅད་དུ་སོ་སོར་ཐར་པའི་སྡོམ་པ་བཞིན་སྔོན་མེད་པ་ཐོབ་པའི་ཕྱིར་འདས་པའི་མི་འཐོབ་པོ་སེམས་མེད་པའི་ཕྱིར་མ་འོངས་པ་ཡང་མི་འཐོབ་སྟེ། དེའི་ཕྱིར་ཇེ་དང་པོར་ད་ལྟ་ཁོ་ན་འཐོབ་པོ། །སྐད་ཅིག་གཉིས་པ་ལ་སོགས་པ་དག་ཏུ་འདས་པ་ཡང་ལྡན་ལ། མ་འོངས་པ་ནི་ད་ལྟར་བ་དང་ཡང་ངོ༌། །འདས་པ་ནི་འདས་པ་ཁོ་ན་དང་ངོ༌། །ཇི་སྲིད་མི་གཏོང་བ་དེ་སྲིད་དུ་ཞེས་བྱ་བ་ནི། ཡོངས་སུ་མ་ཉམས་ཀྱི་བར་དུ་ཞེས་བྱ་བའི་དོན་ཏོ། །སེམས་མེད་པའི་ཕྱིར་མ་འོངས་པ་མི་འཐོབ་སྟེ་ལྷའི་མིག་དང་རྣ་བ་བཞིན་ནོ། །སེམས་དང་མཚུངས་པར་ལྡན་པ་ནི་མ་འོངས་པ་ཐོབ་པར་ནུས་ཏེ། གསལ་བའི་ཕྱིར་བཟོད་པ་ལ་སོགས་པ་བཞིན་ནོ། །བེམས་པོ་ཡིན་པའི་ཕྱིར་ཅིག་ཤོས་ནི་མ་ཡིན་ནོ། །གང་བཤད་པ། གལ་ཏེ་འདིར་སྙོམས་པར་འཇུག་པ་ཇི་ལྟར་དེར་སྐྱེ་བ་ན། དང་པོ་དང་ཐ་མ་དག་ཏུ་སེམས་དང་བཅས་པ་ཉིད་ཀྱིས་སྐྱེ་བ་དེའི་ཕྱིར་ཕུང་པོ་ལྔ་པོའི་རྣམ་པར་སྨིན་པའི་ངོ་བོ་ཞེས་བྱ་བ་ནི་རྩོད་བའི་ཚིག་གོ །སེམས་དང་བཅས་པའི་གནས་སྐབས་ལ་འདུ་ཤེས་མེད་པ་པ་ཞེས་མི་བརྗོད་
དེ་དེ་འཇུག་པ་དང་ལྡང་བའི་སེམས་ཀྱི་འཁོར་ལས་ཕུང་པོ་ལྔ་པ་ནི་རྣམ་པར་སྨིན་པ་དངོས་གཞིའོ། །ཡོངས་སུ་རྫོགས་པར་བྱེད་པ་ཉིད་ཀྱིས་འདུ་ཤེས་མེད་པ་བའི་གཟུགས་ཀྱང་རིས་མཐུན་པ་ལ་བལྟོས་པའོ། །དེ་བཞིན་ཞེས་བྱ་བའི་སྒྲས་ཞེས་བྱ་བ་རྒྱ་ཆེར་འབྱུང་བ་ལ། ཇི་ལྟར་གང་ལས་སེམས་དང་སེམས་ལས་བྱུང་བ་རྣམས་འགོག་པ་དེ་འདུ་ཤེས་མེད་པའི་སྙོམས་འཇུག་པ་ཡིན་པར་བཤད་པ་དེ་བཞིན་དུ་དེ་ལས་ཅི་ཡང་མེད་པའི་སྐྱེ་མཆེད་ཀྱི་འདོད་ཆགས་དང་བྲལ་བའི་སེམས་དང་སེམས་ལས་བྱུང་བ་རྣམས་འགོག་པ་དེ་ནི་འགོག་པའི་སྙོམས་པར་འཇུག་པའོ་ཞེས་བྱའོ། །ཞི་བར་གནས་པའི་འདུ་ཤེས་སྔོན་དུ་བཏང་བའི་ཞེས་བྱ་བ་ལ། ཡིད་ལ་བྱེད་པ་སཱ་ལ་གནས་པ་འདི་ནི་ཞིའོ་སྙམ་པའི་འདུ་ཤེས་སྔོན་དུ་བཏང་བ་ཡོད་པ་ནི་ཞེས་བྱ་བར་ཚིག་རྣམ་པར་སྦྱར་རོ། །འདུ་ཤེས་དང་ཚོར་བ་ཀུན་ཏུ་འབྱུང་བས་ཡོངས་སུ་སྐྱེ་བ་ནི་འགོག་པའི་སྙོམས་པར་འཇུག་པ་ལ་དེ་མེད་པས་ཞི་བར་གནས་པའི་འདུ་ཤེས་སུ་འགྱུར་ལ། དེ་ནས་དྲ་བབས་ཀྱང་ཕྲ་བ་སྲིད་པའི་རྩེ་མོའི་ཡིད་ལ་བྱེད་པའི་མཇུག་ཐོགས་སུ་དེ་ལ་སྙོམས་པར་འཇུག་གོ །དེ་ལྟར་ན་འདི་ནི་ཞི་བར་གནས་པའི་འདུ་ཤེས་སྔོན་དུ་འགྲོ་བའི་ཡིད་ལ་བྱེད་པ་ཡིན་ནོ། །གནས་པ་ནི་གནས་པ་སྟེ་སྡོད་པ་ཞེས་བྱ་བའི་ཐ་ཚིག་གོ །ཡང་ན་འདིས་གནས་པར་བྱེད་པས་ན་གནས་པའོ། །དེ་ལ་ནི་འདུ་ཤེས་མེད་པའི་སྙོམས་པར་འཇུག་པ་ལའོ། །ངེས་པར་འབྱུང་བའི་འདུ་ཤེས་སྔོན་དུ་བཏང་བས་ཞེས་བྱ་བ་ལ། ངེས་པར་འབྱུང་བ་ནི་ངེས་པར་འབྱུང་བ་སྟེ། མྱ་ངན་ལས་འདས་པ་ཡིན་ནོ། །དེ་ནི་འབྲས་བུ་ལ་ངེས་པར་འབྱུང་བའོ་སྙམ་པའི་འདུ་ཤེས་ནི་ངེས་པར་འབྱུང་བའི་འདུ་ཤེས་སོ། །ཡང་ན་འདིས་འཁོར་བ་ལས་ངེས་པར་འབྱིན་པར་བྱེད་པས་ན་ངེས་པར་འབྱིན་པ་སྟེ་ལམ་མོ། །སྙོམས་པར་འཇུག་པ་དེ་ལ་ལམ་དུ་འདུ་ཤེས་པ་ནི་ངེས་པར་འབྱུང་བའི་འདུ་ཤེས་ཏེ། དེ་ཡིད་ལ་བྱེད་པ་གང་ལ་སྔོན་དུ་འགྲོ་བ་ཡོད་པ་དེ་ནི་ངེས་པར་འབྱིན་པའི་འདུ་ཤེས་སྔོན་དུ་བཏང་བའོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་སྐྱེ་བ་འཕེན་པར་བྱེད་པའི་ལས་ནི་
ཐམས་ཅད་པས་མཆོག་ཡིན་པའི་ཕྱིར་རམ། སྲིད་པའི་མཐར་ཐུག་པ་ཡིན་པའི་ཕྱིར་སྲིད་པའི་རྩེ་མོ་ཞེས་བྱ་སྟེ། ཤིང་ལྗོན་པའི་རྩེ་མོ་བཞིན་ནོ། །ཅིའི་ཕྱིར་སྲིད་པའི་རྩེ་མོའི་འོག་གིས་དག་ཏུ་འགོག་པ་ལ་སྙོམས་པར་མི་འཇུག་ཅེ་ན། རྒྱབ་ཀྱིས་ཕྱོགས་པ་དང༌། སེམས་མཐར་ཐུག་པར་གཅོད་པ་དག་གིས་སོ། །རྣམ་པར་ཐར་བ་དེ་ནི་རྒྱུ་གཉིས་ཀྱིས་རྣམ་པར་གཞག་སྟེ། རྒྱབ་ཀྱིས་ཕྱོགས་པ་དང་སེམས་མཐར་ཐུག་པར་གཅོད་པས་སོ། །ས་འོག་མ་དག་ན་ནི་དམིགས་པ་དང་བཅས་པ་ཐམས་ཅད་འཇུག་པ་ལ་རྒྱབ་ཀྱིས་ཕྱོགས་པར་མི་འགྱུར་ལ། མཐར་ཐུག་པར་གཅོད་པར་ཡང་མི་འགྱུར་གྱི། ས་དེའི་གོང་ན་སེམས་ཡོད་པས་བར་དུ་གཅོད་པར་འགྱུར་རོ། །འདི་དགེ་བ་ལ་སོགས་པའི་བྱེ་བྲག་གིས་ནི་དགེ་བ་ཁོ་ན་ཡིན་ཏེ། ཉོན་མོངས་པ་ཅན་ལ་ལུང་དུ་མ་བསྟན་པའི་གནས་ནི་འཕགས་པ་རྣམས་རྣམ་པར་གཡེང་བ་ལ་སོགས་པ་རྣམས་ཀྱིས་ཞི་བར་མི་འཛིན་ཏོ། །ཇི་ལྟར་ན་ལན་གྲངས་གཞན་ལ་མྱོང་བར་འགྱུར་བ་ཡིན་ཞེ་ན། གང་གི་ཚེ་འདི་འགོག་པའི་སྙོམས་པར་འཇུག་པ་བསྐྱེད་ནས་གཟུགས་མེད་པའི་འདོད་ཆགས་དང་བྲལ་བ་ལས་ཡོངས་སུ་ཉམས་པས་བསམ་གཏན་དག་ཏུ་སྐྱེས་ཏེ། ཡང་སྲིད་པའི་རྩེ་མོ་ཐོབ་ནས། དེར་སྐྱེ་བ་དེའི་ཚེ་འདི་འགོག་པའི་སྙོམས་པར་འཇུག་བ་ནི་ཐོབ་ནས་ཡོངས་སུ་ཉམས་པ་ཡིན་ཡང༌། རྣམ་པར་སྨིན་པ་རྫོགས་པར་བྱེད་པ་ཡིན་ནོ། །རྣམ་པར་སྨིན་པའི་ཕྱིར་མ་ངེས་པ་ཡང་ཡིན་ཏེ་ཞེས་བྱ་བ་ལ་གལ་ཏེ་ལུས་ཀྱིས་མངོན་སུམ་དུ་བྱེད་པའམ། གཉི་གའི་ཆ་ལས་རྣམ་པར་གྲོལ་བ་ཞིག་འདི་ཉིད་དུ་ཡོངས་སུ་མྱ་ངན་ལས་འདའ་བར་བྱེད་ན་ནི་དེའི་རྣམ་པར་མ་སྨིན་པ་ཁོ་ནར་འགྱུར་རོ། །རྣམ་པར་སྨིན་པ་ནི་སྲིད་པའི་རྩེ་མོའི་ཕུང་པོ་བཞི་ཡིན་ཏེ་གཟུགས་ཀྱི་ཕུང་པོ་མེད་པའི་ཕྱིར་རོ། །འདུ་ཤེས་མེད་པའི་སྙོམས་པར་འཇུག་པ་ནི་སོ་སོ་སྐྱེ་བོ་ཁོ་ནའི་ཡིན་ནོ་ཞེས་བཤད་ན་འདི་ནི་གཅིག་ཏུ་འཕགས་པ་ཁོ་ནའི་ཡིན་ནོ། །ཅིའི་ཕྱིར་ཞེ་ན། དེའི་ཕྱིར་སོ་སོ་སྐྱེ་བོ་རྣམས་ཀྱི་ས་ནི་ཞེས་བྱ་བ་རྒྱས་པར་སྨོས་སོ། །སོ་སོ་སྐྱེ་བོ་སྲིད་པའི་རྩེ་མོ་
ཐོབ་པ་རྣམས་ནི་སེམས་ཀྱི་རྒྱུད་ལ་བདག་ཏུ་མངོན་པར་རློམ་ལ། སེམས་དེ་ཡང་དེར་རྒྱུན་ཆད་པས་བདག་ཆད་པས་འཇིགས་པའི་ཕྱིར་སྙོམས་པར་མི་འཇུག་གོ །འདུ་ཤེས་མེད་པའི་སྙོམས་པར་འཇུག་པ་ལ་ཡང་ཐལ་བར་འགྱུར་བ་མཚུངས་སོ་ཞེ་ན། དེ་ནི་དེ་ལྟར་མ་ཡིན་ཏེ། དེ་དག་ནི་གཟུགས་ལ་བདག་ཏུ་འདུ་ཤེས་ཀྱི་སེམས་དང་སེམས་ལས་བྱུང་བ་དག་ལ་ནི་མ་ཡིན་ཏེ། དེའི་ཕྱིར་གཟུགས་ཡོད་པས་དེ་དག་ལ་བདག་མེད་པར་འགྱུར་རོ་སྙམ་དུ་སྐྲག་པ་ཡོད་པ་མ་ཡིན་ནོ། །གལ་ཏེ་སྲིད་པའི་རྩེ་མོར་སེམས་དང་སེམས་ལས་བྱུང་བ་རྣམས་ཀྱང་ཀུན་ཏུ་ཆད་ན་ནི་གཟུགས་མེད་པའི་ཕྱིར་ཁོ་བོ་ཅག་བདག་ཉིད་ཐམས་ཅད་ཀུན་ཏུ་ཆད་དོ་སྙམ་དུ་སྐྲག་པར་འགྱུར་རོ། །འཕགས་པའི་ལམ་གྱི་སྟོབས་ཀྱིས་བསྐྱེད་པའི་ཕྱིར། སོ་སོ་སྐྱེ་བོ་རྣམས་ནི་འགོག་པའི་སྙོམས་པར་འཇུག་པ་སྐྱེད་པར་བྱེད་པ་མ་ཡིན་ཏེ་ཞེས་བྱ་བར་སྦྱར་རོ། །ཇི་ལྟར་ན་འཕགས་པའི་ལམ་གྱི་སྟོབས་ཀྱིས་བསྐྱེད་ན་མྱ་ངན་ལས་འདས་པ་མཐོང་ན་ནི་དེ་ལ་མོས་བའི་ཕྱིར་རོ། །མྱ་ངན་ལས་འདས་པ་མཐོང་བ་ནི་འགོག་པའི་སྙོམས་པར་འཇུག་པ་དེ་ལ་སེམས་དང་སེམས་ལས་བྱུང་བ་འགོག་པའི་བདག་ཉིད་ཀྱི་སྒོ་ནས་མོས་ཀྱི། མྱ་ངན་ལས་འདས་པ་མ་མཐོང་བ་ནི་མ་ཡིན་ནོ། །སོ་སོ་སྐྱེ་བོས་ནི་ཤེས་རབ་ཀྱིས་མྱ་ངན་ལས་འདས་པ་འདུ་ཤེས་ལྡོག་པའི་མཚན་ཉིད་ཅན་ལ་ཞི་བར་ཡང་མ་མཐོང་སྟེ། དེའི་ཕྱིར་འདི་ནི་སེམས་དང་སེམས་ལས་བྱུང་པ་འགོག་པ་ལ་མི་མོས་ལ། མ་མོས་པས་སོ་སོ་སྐྱེ་བོ་ནི་སྙོམས་པར་མི་འཇུག་གོ །སློབ་དཔོན་འདུས་བཟང་ན་རེ། དེའི་ས་པའི་འཆིང་བ་མ་སྤངས་པའི་ཕྱིར་དེ་བསྐྱེད་པར་མི་ནུས་ཏེ། མཐོང་བས་སྤང་བར་བྱ་བ་ལས་མ་འདས་པར་ནི་སྲིད་པའི་རྩེ་མོར་འགོག་པའི་སྙོམས་པར་འཇུག་པ་དེ་བསྐྱེད་པར་མི་ནུས་ལ། སོ་སོ་སྐྱེ་བོ་ནི་དེ་ལས་འདས་པ་ཡོད་པ་ཡང་མ་ཡིན་ནོ་ཞེས་ཟེར་རོ། །འདི་ཡང་བརྩོན་འགྲུས་ཀྱིས་སོ་ཞེས་བཤད་པ་ན་འཕགས་པའི་ལམ་གྱི་སྟོབས་བསྐྱེད་པས་ཞེས་འབྱུང་བའི་ཕྱིར་རོ། །འདི་ནི་སྦྱོར་བས་
ཐོབ་པར་བྱ་བ་ཁོ་ན་ཡིན་པས་ཞེས་བྱ་བ་ནི་འདོད་ཆགས་དང་བྲལ་བས་ཐོབ་པར་བྱ་བ་མ་ཡིན་ཏེ། འདི་ལྷན་ཅིག་པའི་ཐོབ་པ་ཅན་འདི་ཉིད་ཡིན་པར་སྟོན་ཏོ། །འདས་པ་ཡང་མི་འཐོབ་ལ་ཞེས་བྱ་བ་ལ། གལ་ཏེ་ཡོངས་སུ་ཉམས་ཏེ་སླར་དེ་ཉིད་བསྐྱེད་པར་བྱེད་པ་དེའི་སོ་སོ་ཐར་པའི་སྡོམ་པ་བཞིན་དུ་སྔོན་མེད་པ་ཁོ་ན་སྦྱོར་བས་འཐོབ་གྱི། སྔར་ཉམས་པ་ནི་མ་ཡིན་ནོ། །མ་འོངས་པ་ཡང་མི་འཐོབ་སྟེ་ཞེས་བྱ་བ་ལ། སྦྱོར་བས་འཐོབ་པ་ཡིན་ཡང་མ་འོངས་པ་འཐོབ་བར་མི་འགྱུར་རོ། །ཅིའི་ཕྱིར་ཞེ་ན། དེའི་ཕྱིར་དེ་ནི་སེམས་ཀྱི་སྟོབས་ཀྱིས་འཐོབ་པའི་ཕྱིར་རོ་ཞེས་བྱ་བ་སྨོས་ཏེ། དེའི་རིགས་ཅན་མ་འོངས་པ་གང་ཅུང་ཟད་ཅིག་འཐོབ་པ་དེ་ནི་སེམས་ཀྱི་སྟོབས་ཀྱིས་ཡིན་ཏེ། དཔེར་ན་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་དག་བཞིན་ནོ། །འགོག་པའི་སྙོམས་པར་འཇུག་པ་ནི་སྦྱོར་བ་ཁོ་ནས་འཐོབ་པ་ཡང་ཡིན་ནོ་ཞེས་བཤད་ལ། གཞན་ལས་ནི། དགེ་བའི་མཐར་འབྱོན་ཁྱེད་ཀྱི་ནི། །སྦྱོར་བ་ལས་བྱུང་ཅུང་ཟད་མེད། །གང་དུ་བཞེད་པར་མཁྱེན་པ་ཉིད། །བཞེད་པ་ཙམ་ལ་རག་ལས་ལགས། །ཞེས་བཤད་པ་དེའི་ཕྱིར་འདྲི་བ་ནི། ཅི་བཅོམ་ལྡན་འདས་ཀྱི་ཡང་སྦྱོར་བ་ལས་བྱུང་བ་ཡིན་ནམ་ཞེས་བྱ་བའོ། །བྱང་ཆུབ་ཀྱིས་ཐོབ་ཅེས་བྱ་བ་ལ། གང་དེ་ཡང་ཟད་པ་དང་མི་སྐྱེ་བའི་བྱང་ཆུབ་ཡིན་མོད་ཀྱི། འདིར་ནི་ཟད་པ་ཤེས་པ་ལ་མངོན་པར་འདོད་དོ། །དེ་ཉིད་ཀྱི་ཕྱིར། ཟད་མཁྱེན་པ་དང་དུས་མཉམ་དུ། །ཞེས་བྱ་བ་རྒྱས་པར་སྨོས་སོ། །འདི་ལྟར། དེ་དག་གི་ཡོན་ཏན་ཞེས་བྱ་བ་ལ་སོགས་པ་ནས། དེ་བས་ན་དེ་དག་གི་ཞེས་བྱ་བའི་བར་རྒྱས་པར་འབྱུང་སྟེ། ཙམ་ཞེས་བྱ་བའི་སྒྲ་ནི་འབད་རྩོལ་རྣམ་པར་གཅད་པར་བྱ་བའི་ཕྱིར་རོ། །གཉི་གའི་ཆ་ལས་རྣམ་པར་གྲོལ་བ་ཞེས་བྱ་བ་ལ། གཉི་གའི་ཆ་ནི་ཉོན་མོངས་པའི་སྒྲིབ་པ་དང་སྙོམས་པར་འཇུག་པའི་སྒྲིབ་པའོ། །དེ་ལ་རྡོ་རྗེ་ལྟ་བུས་ནི་ཉོན་མོངས་པའི་སྒྲིབ་པ་ལས་གྲོལ་བར་བྱེད་ལ། ཟད་པ་ཤེས་པའི་དུས་ན་ནི་རྣམ་པར་གྲོལ་བ་ཡིན་ནོ། །འགོག་པའི་སྙོམས་པར་འཇུག་པ་སྐྱེད་
པར་བྱེད་པས་ནི་སྙོམས་པར་འཇུག་པའི་སྒྲིབ་པ་ལས་རྣམ་པར་གྲོལ་བར་བྱེད་ལ། བསྐྱེད་ཟིན་པའི་ཚེ་ནི་རྣམ་པར་གྲོལ་བ་ཡིན་ན། བཅོམ་ལྡན་འདས་ནི་གང་ལས་ཟད་པ་མཁྱེན་པའི་དུས་ན་གཉི་གའི་ཆ་ལས་རྣམ་པར་གྲོལ་བ་ཞེས་བྱ། འགོག་པའི་སྙོམས་པར་འཇུག་པ་མ་བསྐྱེད་པའི་ཚེ། ཇི་ལྟར་སྙོམས་པར་འཇུག་པའི་སྒྲིབ་པ་ལས་རྣམ་པར་གྲོལ་བར་འགྱུར་ཞེ་ན། དེའི་སྒྲིབ་པ་དང་བྲལ་བའི་ཕྱིར་དང༌། དེ་མི་ལྡན་པ་རྣམ་པར་ཉམས་པའི་ཕྱིར་བཅོམ་ལྡན་འདས་ཀྱི་ཟད་པ་མཁྱེན་པའི་དུས་ན་དེ་བསྐྱེད་ཟིན་པ་བཞིན་དུ་མངའ་བརྙེས་པའི་ཕྱིར་ཏེ། དེ་མངོན་སུམ་དུ་བསྐྱེད་པར་ནུས་པའི་གེགས་དང་བྲལ་བའི་ཕྱིར་རོ་ཞེས་བྱ་བའི་དོན་ཏོ། །དེའི་ཕྱིར་མ་བསྐྱེད་པ་ན་ཡང་གཉི་གའི་ཆ་ལས་རྣམ་པར་གྲོལ་བ་གྲུབ་པོ། །ནུབ་ཕྱོགས་པ་དག་ན་རེ། དེ་ནི་དང་པོ་ཞེས་བྱ་བ་རྒྱས་པར་འབྱུང་སྟེ། ཅི་ལྟར་ཞེ་ན། བྱང་ཆུབ་སེམས་དཔའ་ཅི་ཡང་མེད་པའི་སྐྱེ་མཆེད་ལས་འདོད་ཆགས་དང་བྲལ་བ་ཡིན་ཡང༌། བསམ་གཏན་བཞི་པ་ལ་བརྟེན་ཏེ་བདེན་པ་རྣམས་མཐོང་ཞིང་ཕྱིར་མི་འོང་བའི་འབྲས་བུ་ཐོབ་ནས། དེ་ལས་ལངས་ནས་སྲིད་པའི་རྩེ་མོ་ལ་སྙོམས་པར་འཇུག་ལ། དེ་ནས་འགོག་པའི་སྙོམས་པར་འཇུག་པ་ལ་འཇུག་གོ །འགོག་པའི་སྙོམས་བར་འཇུག་པ་ལས་ལངས་ནས་བསམ་གཏན་བཞི་པ་ལ་བརྟེན་ཏེ། སྲིད་པའི་རྩེ་མོའི་ཉོན་མོངས་པ་བསྒོམ་པས་སྤང་བར་བྱ་བ་སྤངས་ནས་སངས་རྒྱས་བཅོམ་ལྡན་འདས་སུ་འགྱུར་རོ་ཞེས་བྱ་བ་གང་ཡིན་པ་འདི་ནི་ཆོས་ཉིད་ཡིན་ནོ། །དེ་ལྟར་ན་སློབ་བའི་གནས་སྐབས་ན་སྐྱེད་པར་བྱེད་པ་ཡིན་ནོ་ཞེས་ཟེར་རོ། །དེའི་ཕྱིར་བར་སྐབས་འདིར་ཞེས་བྱ་བ་ལ། སྐད་ཅིག་མ་སུམ་ཅུ་རྩ་བཞིའི་བར་སྐབས་སུའོ། །མི་འདྲ་བའི་སེམས་ནི་སྲིད་པའི་རྩེ་མོའམ། བསམ་གཏན་བཞི་བ་ལས་ལྡང་བའི་སེམས་ཀྱང་རུང་སྟེ། ཟག་པ་དང་བཅས་པའི་ཕྱིར་དེ་སྲིད་པས་འགོག་པའི་སྙོམས་པར་འཇུག་པར་མི་རུང་སྟེ། དེ་ནི་སྲིད་པའི་རྩེ་མོ་བས་ཕྲ་བའི་མཇུག་ཐོགས་
སུ་སྙོམས་པར་འཇུག་པའི་ཕྱིར་མི་སྲིད་དོ་ཞེས་བྱ་བའི་དོན་ཏོ། །ཅིར་འགྱུར་ཞེས་བྱ་བ་ནི་བསྟན་བཅོས་དང་འགལ་བའམ། རིག་པ་དང་འགལ་བ་ཞིག་ཏུ་འགྱུར་ཞེས་བྱའོ། །བསམ་པ་ལྡང་བ་ཅན་དུ་འགྱུར་ཏེ་ཞེས་བྱ་བ་རྒྱས་པར་འབྱུང་བ་ལ། བསམ་པ་ནི་དགོངས་པའོ། །གང་གི་ཕྱིར་བསམ་པ་མི་ལྡང་བ་ཅན་དུ་འགྱུར་བ་འདི་ལ་རྒྱུ་ཅི་ཞེ་ན། བྱེ་བྲག་ཏུ་སྨྲ་བ་རྣམས་ན་རེ། བསོད་ནམས་དང་ཡེ་ཤེས་ཀྱི་ཚོགས་ལེགས་པར་བསགས་པའི་ཕྱིར་དང༌། ཐུགས་རྗེ་ཆེན་པོ་མངའ་ཕྱིར་དང༌། །མི་མཐུན་པའི་ཕྱོགས་ཟིལ་གྱིས་མནན་པའི་ཕྱིར་དང༌། བརྩོན་འགྲུས་བརྩམ་པའི་ཕྱིར་དང༌། དམ་བཅའ་བ་བརྟེན་པའི་ཕྱིར་དགེ་བའི་རྩ་བ་ལས་དགོངས་པ་གཞན་མི་མངའ་སྟེ། བྱང་ཆུབ་སེམས་དཔའི་དགེ་བའི་རྩ་བ་དེ་དག་ནི། གང་དག་མངོན་དུ་མཛད་པས་སྟན་གཅིག་ལས་མ་བཞེངས་པ་ཁོ་ནར་བྱང་ཆུབ་བརྙེས་པར་བྱེད་པ་འདི་འདྲ་བ་ཞིག་གོ་ཞེས་ཟེར་རོ། །སྔ་མ་ཁོ་ན་ཡིན་ནོ་ཞེས་བརྗོད་དོ་ཞེས་བྱ་བ་ལ། འདི་སངས་རྒྱས་བཅོམ་ལྡན་འདས་ཀྱི་ཟད་པ་མཁྱེན་པ་དང་དུས་མཉམ་དུ་བརྙེས་སོ་ཞེས་དེ་སྐད་དུ་ཟེར་རོ། །ཅིའི་ཕྱིར་ཞེ་ན། ཟག་པ་ཟད་པ་མ་ཐོབ་ཀྱི་བར་དུ་རེ་ཤིག་སྐྱིལ་མོ་ཀྲུང་མི་བཤིག་གོ་སྙམ་པའི་བསམ་པ་འདིས་ཟག་པ་མེད་པའི་ལམ་ལས་མི་ལྡང་བར་གྲུབ་པའི་ཕྱིར་རོ། །སློབ་དཔོན་འདུས་བཟང་ན་རེ། ཇི་ལྟར་བྱང་ཆུབ་སེམས་དཔའ་འཁོར་བ་ཐོག་མ་དང་མི་ལྡན་པ་ནས་འཇིག་རྟེན་པའི་སྙོམས་པར་འཇུག་པའི་ཁྱད་པར་གྱིས་བསླུས་པས། ཟག་པ་ཟད་པའི་བསམ་པས་སྐྱིལ་མོ་ཀྲུང་བཅས་ཏེ། སྲིད་པའི་རྩེ་མོའི་མཐོང་བས་སྤང་བར་བྱ་བ་སྔོན་རྩ་ནས་མ་བཏོན་པ་རྩ་བ་དང་བཅས་ཏེ། དྲུངས་ཕྱུངས་ནས་ཉོན་མོངས་པའི་དགྲ་དྲུངས་ཕྱུངས་པའི་ལྷག་སྤང་བའི་ཕྱིར་ཡིད་གཏད་པ་ནི་དེའི་གཉེན་པོ་གཏང་ནས་འབད་པ་ཐུན་མོང་པས་ཐོབ་པར་བྱ་བའི་འཇིག་རྟེན་པའི་སྙོམས་པར་འཇུག་པ་ཐོབ་པར་བྱ་བའི་ཕྱིར་གུས་པར་བྱེད་པར་འགྱུར་ཏེ། དེའི་ཕྱིར་བྱེ་བྲག་ཏུ་སྨྲ་བ་རྣམས་
སྔ་མ་ཁོ་ན་ཡིན་ནོ་ཞེས་བརྗོད་པར་བྱེད་པ་འདི་ནི་རིག་པ་ཡིན་ནོ་ཞེས་ཟེར་རོ། །སྙོམས་པར་འཇུག་པ་འདི་གཉིས་ཀྱིས་ཞེས་བྱ་བ་རྒྱས་པར་འབྱུང་བ་ལ། འདུ་ཤེས་མེད་པའི་སྙོམས་པར་འཇུག་པ་ནི་བསམ་གཏན་བཞི་པའི་ས་པ་ཡིན་ནོ། །འགོག་པའི་སྙོམས་པར་འཇུག་པ་ནི་སྲིད་པའི་རྩེ་མོའི་ས་པ་ཡིན་ནོ། །འདུ་ཤེས་མེད་པའི་སྙོམས་པར་འཇུག་པ་ལ་ནི་ཐར་པ་འདོད་པ་ཉིད་ཀྱིས་སྙོམས་པར་འཇུག་གོ །འགོག་པའི་སྙོམས་པར་འཇུག་པ་ལ་ནི་གནས་དོན་དུའོ། །འདུ་ཤེས་མེད་པའི་སྙོམས་པར་འཇུག་པ་ནི་སྐྱེས་ནས་མྱོང་བར་འགྱུར་བ་ཁོ་ནའོ། །འགོག་པའི་སྙོམས་པར་འཇུག་པ་ནི་སྐྱེས་ནས་མྱོང་བར་འགྱུར་དང༌། ལན་གྲངས་གཞན་ལ་མྱོང་བ་དང་མ་ངེས་པ་ཡིན་ནོ། །འདུ་ཤེས་མེད་པའི་སྙོམས་པར་འཇུག་པ་ནི་སོ་སོ་སྐྱེ་བོའི་རྒྱུད་ལ་སྐྱེ་བ་ཡིན་ནོ། །འགོག་པའི་སྙོམས་པར་འཇུག་པ་ནི་འཕགས་པའི་རྒྱུད་ལ་སྐྱེ་བ་ཡིན་ནོ། །འདུ་ཤེས་མེད་པའི་སྙོམས་པར་འཇུག་པ་ནི་སྦྱོར་བ་ལས་བྱུང་བ་ཡིན་ནོ། །འགོག་པའི་སྙོམས་པར་འཇུག་པ་ནི་སྦྱོར་བ་ལས་བྱུང་བ་དང༌། བྱང་ཆུབ་ཀྱི་ས་ཐོབ་པ་ཡིན་ནོ། །གཉིས་ཀ་འདོད་དང་གཟུགས་རྟེན་ཅན། །ཞེས་བྱ་བས་ནི་འདི་གཉིས་ཀྱི་ཆོས་མཐུན་པ་ནི་འདི་ཡིན་ནོ་ཞེས་སྟོན་ཏོ། །ཁ་ཅིག་ན་རེ་རྒྱུ་དང་འབྲས་བུ་དག་ཧ་ཅང་ཉེ་ན་མི་རུང་བས་གཟུགས་ཀྱི་ཁམས་ན་ནི་བསམ་གཏན་གསུམ་པ་དག་ན་འདུ་ཤེས་མེད་པར་སྙོམས་པར་འཇུག་གི །བཞི་པ་ན་ནི་མ་ཡིན་ནོ་ཞེས་ཟེར་རོ། །གཞན་དག་ན་རེ་སྐྱེ་བ་ནི་དེའི་འབྲས་བུ་ཡིན་པའི་ཕྱིར་འདུ་ཤེས་མེད་པའི་སེམས་ཅན་མ་གཏོགས་པར་བཞི་པར་ཡང་སྙོམས་པར་འཇུག་གོ་ཞེས་ཟེར་རོ། །དེ་དག་གི་ལྟར་ན་ཆོས་མངོན་པའི་གཞུང་ཞེས་བྱ་བ་ནི་ཆོས་མངོན་པ་དང་འགལ་བར་སྟོན་ཏོ། །གཟུགས་ཀྱི་སྲིད་པ་ཡིན་ལ། སྲིད་པ་དེ་རྣམ་པར་འདྲིད་པ་ཅན་ལྔ་མ་ཡིན་པ་ཡང་ཡོད་དམ་ཞེ་ན། མུ་བཞི་སྟེ། དེ་ལ་གཟུགས་ཀྱི་སྲིད་པ་མ་ཡིན་ལ་རྣམ་པར་འདྲིད་པ་ཅན་ལྔ་མ་ཡིན་པ་ནི་གཟུགས་ན་སྤྱོད་པའི་སེམས་ཅན་ཞེས་བྱའོ། །དེ་
ན་ལྷ་འདུ་ཤེས་མེད་པ་དག་ཀྱང་ཡོད་པས་དེའི་ཕྱིར་ལྷ་འདུ་ཤེས་མེད་པ་ཞེས་བྱ་བ་སྨོས་སོ། །འདུ་ཤེས་ཅན་སེམས་འདྲ་བ་ལ་གནས་པ་དག་ཀྱང་ཡོད་པས་དེའི་ཕྱིར། སེམས་མི་འདྲ་བ་ལ་གནས་པ་རྣམས་དང་ཞེས་བྱ་བ་སྨོས་སོ། །དེ་ལ་མི་འདྲ་བའི་སེམས་ནི་འདོད་པ་ན་སྤྱོད་པའི་སྤྲུལ་པའི་སེམས་དང༌། ཟག་པ་མེད་པ་དང༌། གཟུགས་མེད་པར་གཏོགས་པའོ། །རང་གི་ས་བའི་ཕུང་པོ་རྣམས་ཁོ་ན་སྲིད་བ་ཞེས་བྱ་བ་ཡིན་པས་གཞན་གྱིས་ཕ་རྣམས་ཀྱི་གཟུགས་ཀྱི་སྲིད་པར་མི་འདོད་དོ། །དེ་དག་ནི་གཟུགས་ཀྱི་སྲིད་པ་ཡིན་གྱི། རྣམ་བར་འདྲིད་པ་ཅན་ལྔ་ནི་མ་ཡིན་ནོ། །འགོག་པའི་སྙོམས་པར་འཇུག་པ་དང༌། འདུ་ཤེས་མེད་པའི་སྙོམས་པར་འཇུག་པ་རྣམས་དང༌། འདུ་ཤེས་མེད་པ་པ་ལ་མངོན་དུ་གྱུར་ན་ཡང་གཟུགས་ཀྱི་སྲིད་པ་ཡིན་ལ་རྣམ་པར་འདྲིད་པ་ཅན་ལྔ་མ་ཡིན་ཏེ། སེམས་དང་སེམས་ལས་བྱུང་བ་མེད་པའི་ཕྱིར་རོ། །འདིར་ནི་ལྷ་འདུ་ཤེས་མེད་པ་ཅན་ཞེས་བྱ་བ་དང༌། འདུ་ཤེས་མེད་པའི་སྙོམས་པར་འཇུག་པ་དང་ཞེས་བྱ་བ་འདི་དང་འགལ་བ་ཡིན་ནོ། །རྣམ་པར་འདྲིད་པ་ལྔ་ཞེས་བྱ་བ་ནི་ཕུང་པོ་ལྔ་ཞེས་བྱ་བའི་དོན་ཏོ། །དེ་བཞིན་གཤེགས་པ་འོད་སྲུང་ཀྱིས་གསུངས་པ་ལས་ཕུང་པོ་ལ་རྣམ་པར་འདྲིད་ཞེས་མིང་བཏགས་པ་ཡིན་ནོ། །རྣམ་པར་འདྲིད་པ་ཅན་ལྔ་ཡིན་ལ། གཟུགས་ཀྱི་སྲིད་པ་མ་ཡིན་པ་ཡང་ཡོད་དོ། །འདོད་པ་ན་སྤྱོད་པའི་སེམས་ཅན་རང་གི་ས་པའི་སེམས་ལ་གནས་པ་རྣམས་ཀྱི་སྲིད་པ་གང་ཡིན་པའོ། །གཟུགས་ཀྱི་སྲིད་པ་ཡང་ཡིན་ལ་རྣམ་པར་འདྲིད་པ་ཅན་ལྔ་ཡོད་དེ། གཟུགས་ན་སྤྱོད་པའི་སེམས་འདྲ་བ་ལ་གནས་པ་རྣམས་ཀྱིའོ། །གཟུགས་ཀྱི་སྲིད་པ་ཡང་མ་ཡིན་ལ་རྣམ་པར་འདྲིད་པ་ཅན་ལྔ་ཡང་མ་ཡིན་པ་ཡོད་དེ། གཟུགས་མེད་པར་སྐྱེས་པའི་སེམས་ཅན་རྣམས་དང༌། འདོད་པའི་ཁམས་སུ་སྐྱེས་པ་སེམས་མི་འདྲ་བ་ལ་གནས་པ་རྣམས་དང༌། འགོག་པའི་སྙོམས་པར་འཇུག་པ་དང༌། འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་པ་རྣམས་ཀྱི་སྲིད་པ་གང་ཡིན་པའོ། །འགོག་པ་དང་པོ་མི་ནང་དུ་མི་དག་གི་
ནང་ཁོ་ནར་ཏེ། སྟོན་པ་པོ་དང་འཆད་པ་པོ་དང་སྦྱོར་བའི་སྟོབས་ཡོད་པའི་ཕྱིར་རོ། །ཕྱིས་ནི་སྔར་ཡོངས་སུ་ཉམས་པ་དག་གིས་གཟུགས་ཀྱི་ཁམས་སུ་བསྐྱེད་ཀྱི། གཟུགས་མེད་པའི་ཁམས་སུ་ནི་མ་ཡིན་ཏེ་རྟེན་མེད་པའི་ཕྱིར་རོ། །སྲོག་གི་དབང་པོ་ནི་གཟུགས་དང་སེམས་ལ་བརྟེན་ནས་འབྱུང་ན་གཟུགས་མེད་པའི་ཁམས་སུ་འགོག་པ་ལ་སྙོམས་པར་ཞུགས་བ་ལ་དེ་ནི་རྒྱུན་ཆད་པ་ཡིན་ནོ། །ཕུང་པོ་རྣམས་ཕན་ཚུན་སྟོབས་ཀྱིས་གནས་པའི་ཕྱིར་ཕུང་པོ་གཅིག་པའི་ལུས་ཀྱང་མེད་དོ། །སེམས་དང་སེམས་ལས་བྱུང་བ་རྣམས་ཐ་མི་དད་པར་འཇུག་པའི་ཕྱིར་ཕུང་པོ་གསུམ་པ་ཡང་མི་རུང་ངོ༌། །འདུ་ཤེས་མེད་པའི་སྙོམས་པར་འཇུག་པ་ནི་དང་པོ་གཟུགས་ཀྱི་ཁམས་སུ་ཡང་སྐྱེ་སྟེ། འཁོར་བ་ཐོག་མ་མེད་པ་ནས་འདྲིས་པའི་ཕྱིར་རོ། །སྙོམས་པར་འཇུག་པ་འདི་ནི་མྱ་ངན་ལས་འདས་པ་དང་འགོག་པའི་ཕྱིར་ཁྱད་པར་དུ་འཕགས་པ་ཞིག་སྟེ་དེའི་ཕྱིར་ཡོངས་སུ་ཉམས་པ་མི་སྲིད་དེ་སྙམ་དུ་སེམས་ལ་བྱས་ནས། ཅི་འདི་ལས་ཀྱང་ཡོངས་སུ་ཉམས་པ་ཡོད་དམ་ཞེས་འདྲི་བར་བྱེད་དོ། །འཆད་བྱེད་ཀྱི་མདོ་ནི་གླེང་གཞི་མཉན་དུ་ཡོད་པ་ན་སྟེ། དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་འདི་ན་ཞེས་བྱ་བ་ནི་མི་དག་གི་ནང་ནའོ། །དགེ་སློང་ཚུལ་ཁྲིམས་དང་ལྡན་པ་ཞེས་བྱ་བ་ལ་སོགས་པས་ནི་ཕུང་པོ་གསུམ་གྱིས་བསྡུས་པའི་ལམ་གསུངས་སོ། །མཐོང་བའི་ཆོས་ཁོ་ན་ཞེས་བྱ་བ་ནི་མཐོང་བའི་སྐྱེ་བ་ཁོ་ན་ལའོ། །དང་པོ་ཉིད་དུ་ཞེས་བྱ་བ་ནི་ཐོག་མ་ཁོ་ནར་རོ། །ཀུན་ཤེས་པ་ནི་དགྲ་བཅོམ་པ་ཉིད་དོ། །ཐོབ་པར་མི་བྱེད་པ་ནི་རྙེད་པར་མི་བྱེད་པའོ། །ལུས་ཞིག་ནས་ཞེས་བྱ་བ་ནི་མིང་དང་གཟུགས་ཀྱི་ཚོགས་དག་སོ་སོར་གནས་ནས་ཏེ་ཤི་ནས་ཞེས་བྱ་བའི་དོན་ཏོ། །ཁམ་གྱི་ཟས་ཟ་བ་ཞེས་བྱ་བ་ནི་འདོད་པ་ན་སྤྱོད་པའི་ལྷ་དག་གོ །མདོ་དེར་ཡང་བཅོམ་ལྡན་འདས་ཀྱིས་ཡིད་ལས་བྱུང་བའི་ལུས་ཅན་གྱི་ལྷ་ནི་གཟུགས་ན་སྤྱོད་པ་ཡིན་པར་གསུངས་ལ་ཞེས་བྱ་བ་ལ། དེར་འཆར་
བྱེད་ཀྱི་ཡིད་ལས་བྱུང་བ་གཟུགས་མེད་པ་ན་སྤྱོད་པའི་ལུས་ཡིན་པར་སེམས་ལ་བསམས་ཏེ། ཚེ་དང་ལྡན་པ་ཤཱ་རིའི་བུ་དགེ་སློང་ཡིད་ལས་བྱུང་བའི་ལུས་གང་ཡང་རུང་བ་ཞིག་ཏུ་སྐྱེས་པ་ཞིག་ཡང་དང་ཡང་དུ་འདུ་ཤེས་དང་ཚོར་བ་འགོག་པ་ལ་སྙོམས་པར་འཇུག་པ་པ་དང་ལྡན་པའི་གནས་དེ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་འདུ་ཤེས་སོ་ཞེས་བྱ་བ་གང་ཡིན་པ་དེ་ནི་གནས་མ་ཡིན་ཞིང་སྐབས་མེད་དེ། དེ་ནི་གནས་མེད་དོ་ཞེས་འཕགས་པ་ཤཱ་རིའི་བུ་ཕྱིར་ཟློག་པར་བྱེད་དོ། །དེ་ལྟར་ལན་གསུམ་དུ་བཀག་པ་དང། འཕགས་པ་ཤཱ་རིའི་བུ་བཅོམ་ལྡན་འདས་ཀྱི་ཐད་དུ་དོང་ངོ༌། །དེར་ཡང་དེས་ལན་གསུམ་ཁོ་ནར་བཀག་སྟེ་འདིར་ཡང་ཅང་མི་སྨྲ་བར་གྱུར་ཏོ། །དེར་བཅོམ་ལྡན་འདས་ཀྱིས་ཚེ་དང་ལྡན་པ་འཆར་བྱེད་ལ་བཀའ་སྩལ་པ། འཆར་བྱེད་ཁྱེད་ཀྱིས་ཡིད་ལས་བྱུང་བའི་ལྷའི་ལུས་གང་ཡང་རུང་བ་ཇི་ལྟར་ཤེས་གཟུགས་མེད་པའི་ཁོ་ན་ཡིན་པར་ཤེས་སམ། བཅོམ་ལྡན་འདས་དེ་ལྟ་ལགས་སོ། །རེ་ཞིག་ཁྱོད་ཀྱི་སྐྱེས་བུ་རྨོངས་པ་ལོང་བ་ཁོ་ན་ཡིན་བཞིན་དུ་ཤཱ་རིའི་བུ་དགེ་སློང་མིག་དང་ལྡན་པ་དང་ལྷན་ཅིག་ཆོས་མངོན་པ་དང་འདུལ་བའི་གཏམ་བྱ་བར་སེམས། འདིར་ཤཱ་རིའི་བུ་ནི་ཡིད་ཀྱི་རང་བཞིན་གྱི་ལུས་གཟུགས་ན་སྤྱོད་པ་ཡིན་པར་འདོད་དེ། ཕྱི་རོལ་གྱི་ཁུ་བ་དང༌། ཁྲག་ལ་སོགས་པ་ལ་མ་བརྟེན་བར་འབྱུང་བའི་ཕྱིར་རོ། །འཆར་བྱེད་ནི་གཟུགས་མེད་པ་ན་སྤྱོད་པ་ཡིད་ལས་བྱུང་བ་ཡིན་པར་འདོད་དེ་ཡིད་ཙམ་ལས་སྐྱེས་པའི་ཕྱིར་རོ། །དེ་ལྟ་ན་འཆར་བྱེད་སྨད་པར་མཛད་པའི་ཕྱིར་དང༌། ཤཱ་རིའི་བུའི་ཕྱོགས་ཡོངས་སུ་གཟུང་བའི་ཕྱིར་སྙོམས་པར་འཇུག་པ་འདི་གཟུགས་མེད་པའི་ཁམས་སུ་མི་སྐྱེ་བས་ཡིད་ལས་བྱུང་བའི་ལུས་ནི་གཟུགས་ན་སྤྱོད་པ་ཡིན་ནོ་ཞེས་བཤད་པར་འགྱུར་རོ། །མདོ་ལས་མཐར་གྱིས་གནས་པའི་སྙོམས་པར་འཇུག་པ་དགུ་ཞེས་བྱ་བ་ནི་བསམ་གཏན་བཞི་དང༌། གཟུགས་མེད་པ་བཞི་དང་འདུ་ཤེས་དང་ཚོར་བ་འགོག་པའོ། །གལ་ཏེ་བསམ་གཏན་པའི་ས་པའི་ཡིན་ན་ནི། དེ་ལྟ་ཡིན་དང༌།
བསམ་གཏན་བཞི་བའི་མཇུག་ཐོགས་སུ་དེ་ལ་སྙོམས་པར་འཇུག་པས་དབུས་སུ་འདོན་པར་འགྱུར་གྱི་ཐ་མར་ནི་མ་ཡིན་ནོ། །དེ་ལྟར་ན་མཐར་གྱིས་གནས་པའི་སྙོམས་པར་འཇུག་པ་དགུ་ཞེས་བྱ་བའི་མདོ་དང་འགལ་བར་འགྱུར་རོ། །ཐོད་རྒལ་དུ་སྙོམས་པར་འཇུག་པ་པོ་དག་ནི་གང་དག་དང་པོ་ནས་གཉིས་པ་བརྒལ་ཏེ། གསུམ་པ་ལ་སྙོམས་པར་འཇུག་གོ །གཞན་ལ་ཡང་དེ་བཞིན་དུ་བརྗོད་པར་བྱའོ། །མཐར་གྱིས་གནས་པའི་སྙོམས་པར་འཇུག་པ་དགུ་ཞེས་བྱ་བ་འདི་ནི་རྩོམ་པ་དང་པོ་ཕ་ལ་ངེས་པ་ཡིན་ཏེ། འདིར་ནི་བསམ་གཏན་དང་པོ་མ་བསྐྱེད་པར་ནི་བསམ་གཏན་གཉིས་པ་ལ་སྙོམས་པར་འཇུག་པར་མི་ནུས་སོ། །དེ་བཞིན་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་མ་བསྐྱེད་པར་འདུ་ཤེས་དང་ཚོར་བ་འགོག་པ་ལ་སྙོམས་པར་འཇུག་པའི་བར་དུ་མི་ནུས་སོ། །དགའ་མགུར་དབང་བ་ནི་ཕུལ་དུ་བྱུང་བར་དབང་བ་ཉིད་དོ། །རྣམ་པར་བརྒལ་ཏེ་ཡང་སྙོམས་པར་འཇུག་གོ་ཞེས་བྱ་བ་ནི་དང་པོ་ནས་གསུམ་པར་རོ། །གསུམ་པ་ནས་ནམ་མཁའ་མཐའ་ཡས་སྐྱེ་མཆེད་དུའོ་ཞེས་བྱ་བ་ལ་སོགས་པའོ། །འགོག་པའི་སྙོམས་པར་འཇུག་པ་ལས་སྲིད་པའི་རྩེ་མོར་ཕུང་པོ་བཞི་པ་རྣམ་པར་སྨིན་པའི་ངོ་བོ་ཞེས་བྱ་བ་རྩོད་པའི་ཚིག་གོ །ཚེ་ལ་སོགས་པ་རྣམས་ཀྱི་རང་བཞིན་སེམས་དང་ལུས་ལ་བརྟེན་ནས་འཇུག་པའི་ཕྱིར་སྲིད་པའི་རྩེ་མོར་ཡང་གཟུགས་མེད་པའི་ཕྱིར་སེམས་མེད་པའི་གནས་སྐབས་མེད་དོ། །ཕུང་པོ་གཅིག་པའི་སྲིད་པ་མི་སྲིད་པ་དེའི་ཕྱིར་སེམས་དང་སེམས་ལས་བྱུང་བ་མེད་པར་མི་འོས་སོ། །ཅི་ལྟར་འདུ་ཤེས་མེད་པའི་སྙོམས་པར་འཇུག་པ་དྷྱཱ་ནོ་ཏྱཻ། སྲིད་པའི་རྩེ་མོར་ཡང་འགོག་པའི་སྙོམས་པར་འཇུག་པ། ར་སཾ་ག་ཏྱ་ན་ནུ་བརྟ་ཏེ། འདུ་ཤེས་ལ་སོགས་པ་ཡང་ཞེས་བྱ་བ་རྩོད་པའི་ཚིག་གོ །བསམ་གཏན་བཞི་པ་དང་སྲིད་པའི་རྩེ་མོའི་ས་པ་ཉིད་དེའི་ས་པའི་རྒྱས་པར་བྱས་པའི་ཕྱིར་རོ། །དེའི་མཇུག་ཐོགས་སུ་སྐྱེད་པར་བྱེད་པ་དེ་ཡང་མི་རིགས་ཏེ། བི་ཙཱ་རི་ཎི་ཡ་མི་ཏེ། དེ་མི་རིགས་ཏེ་དེ་མ་ཐག་ཏུ་བསྐྱེད་པ་མེད་
པས་དེའི་ས་པ་ཉིད་ཀྱི་རྒྱུར་ཧ་ཅང་ཐལ་བའི་ཕྱིར་རོ། །གང་བཤད་པ། གལ་ཏེ་བསམ་གཏན་བཞི་པའི་མཇུག་ཐོགས་སུ་སེམས་མེད་པའི་འགོག་པའི་སྙོམས་པར་འཇུག་པར་གྱུར་ན་བསམ་གཏན་བཞི་བ་སྔོན་དུ་འགྲོ་བའི་མཐར་གྱིས་གནས་པའི་སྙོམས་པར་འཇུག་པ་ཉིད་དོ། །མཐར་གྱིས་བསྐྱེད་པའི་དབང་དུ་བྱས་ནས་འདིར་འགྱུར་བས་ན། དེ་ལྟ་བུ་ལ་གེགས་ཅི་ཕྱིར་མི་འོང་བས་བསམ་གཏན་བཞི་བའི་སྙོམས་བར་འཇུག་པའི་མཇུག་ཐོགས་སུ་འགོག་པའི་སྙོམས་པར་འཇུག་པ་བསྐྱེད་ཅེས་བྱ་བ་རྩོད་པའི་ཚིག་གོ །གང་གི་ཚེ་འདི་སེམས་གཅོད་པ་དང་རྗེས་སུ་མཐུན་པ་མངོན་པར་འདུ་བྱེད་པ་མེད་པར་དེའི་རྒྱུ་བ་ཆེས་ཕྲ་བར་ལམ་མངོན་པར་སྒྲུབ་པར་བྱེད་དེ། དེ་ཐོབ་ནས་མཐར་གྱིས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་མཚན་ཉིད་སེམས་གཅོད་པ་དྲན་པས་ཅི་ཡང་མེད་པའི་སྐྱེ་མཆེད་ཀྱི་འདོད་ཆགས་དང་བྲལ་བས་སྒྲུབ་པར་བྱེད་པས་འགོག་པའི་སྙོམས་པར་འཇུག་པ་སྲིད་པའི་རྩེ་མོ་ཉིད་སྒྲུབ་བྱེད་དོ། །དེ་འདོད་ཆགས་དང་བྲལ་བས་སྙོམས་པར་འཇུག་པའམ་མཐར་གྱིས་གནས་པའི་སྙོམས་པར་འཇུག་པ་རྣམས་ཞེས་བྱ་བ་དེའི་གནས་སྐབས་མདོ་དང་འགལ་བར་འགྱུར་བ་དེའི་ཕྱིར་འདུ་ཤེས་མེད་པའི་སྙོམས་པར་འཇུག་པ་ཡང་འདིར་ཐལ་བར་འགྱུར་རོ་ཞེས་བྱའོ། །དེ་དགེ་རྒྱས་ཀྱི་འདོད་ཆགས་དང་བྲལ་བ་གོང་མའི་འདོད་ཆགས་བྲལ་བ་མ་ཡིན་ཞེས་བྱ་བ་ངེས་པའོ། །དེ་ལྟར་སྙོམས་པར་འཇུག་པ་འདི་གཉིས་ནི་ཞེས་བྱ་བ་ལ་སོགས་པ་འབྱུང་སྟེ་ཚུལ་ནི་ཇི་སྐད་བཤད་པ་བཞིན་ནོ། །མྱོང་བར་འགྱུར་བ་ངེས་པ་དང་གཉི་ག་ཡིན་པའི་ཕྱིར་རོ་ཞེས་བྱ་བ་ལ། འདུ་ཤེས་མེད་པའི་སྙོམས་པར་འཇུག་པ་ནི་མྱོང་བར་འགྱུར་བར་ངེས་པའོ། །འགོག་པའི་སྙོམས་པར་འཇུག་པ་ནི་གཉིས་ཀ་ཡིན་ཏེ། ཕྱིར་མི་འོང་བ་ནི་མྱོང་བར་འགྱུར་བར་ངེས་པ་ཡིན་གྱི་དགྲ་བཅོམ་པའི་ནི་མ་ཡིན་ཏེ། དེ་ནི་དེ་ཉིད་ལ་ཡོངས་སུ་མྱ་ངན་ལས་འདའ་བའི་ཕྱིར་རོ། །ཡང་ན་སྐྱེས་ནས་མྱོང་བར་འགྱུར་བ་དང༌། ལན་གྲངས་གཞན་ལ་མྱོང་བར་འགྱུར་བ་ལས་གཉིས་
ཀ་མྱོང་བར་འགྱུར་བ་ཡིན་ནོ། །དང་པོ་སྐྱེས་པ་ལས་ཀྱང་ཞེས་བྱ་བ་རྒྱས་པར་འབྱུང་བ་ལ། །འདུ་ཤེས་མེད་པའི་སྙོམས་པར་འཇུག་པ་ནི་ཁ་ཅིག་དང་པོ་མི་དག་གི་ནང་དུ་སྐྱེས་པ། ཁ་ཅིག་གིས་ནི་ལྷ་དག་གི་ནང་དུའོ། །འགོག་པའི་སྙོམས་པར་འཇུག་པ་ནི་དང་པོ་མི་དག་གི་ནང་ཁོ་ནར་སྐྱེ་ལ། ཡོངས་སུ་ཉམས་པས་ནི་ཡང་གཟུགས་ཀྱི་ཁམས་སུ་སྐྱེའོ། །ཡང་ཅིའི་ཕྱིར་འདི་དང་པོ་མི་དག་གི་ནང་ཁོ་ནར་སྐྱེའི་འདུ་ཤེས་མེད་པའི་སྙོམས་པར་འཇུག་པ་བཞིན་གཟུགས་ཀྱི་ཁམས་སུ་མ་ཡིན་ཞེ་ན། མཉམ་པར་མ་བཞག་པ་ཡིན་པའི་ཕྱིར་འདོད་པའི་ཁམས་ཀྱི་འདུ་ཤེས་དང་ཚོར་བའི་སྒོ་ནས་རྟོག་པ་དང་དཔྱོད་པ་ལ་སོགས་པ་སེམས་ལས་བྱུང་བ་རབ་ཏུ་རྒྱུ་བས་ཡོ་དས་སུ་སྐྱོ་བས་ཕྱིར་མི་འོང་བ་རྣམས་འགོག་པ་ལ་ཞི་བར་གནས་པས་བདེ་བར་གནས་པར་བྱའོ་སྙམ་པས་འགོག་པའི་སྙོམས་པར་འཇུག་པ་རྙེད་པར་བྱེད་ཅིང་ཡང་ཡང་སྒྲུབ་པར་བྱེད་དོ། །ཕྱིར་མི་འོང་བ་གཟུགས་ཀྱི་ཁམས་སུ་སྐྱེས་པ་ནི་གཟུགས་ཀྱི་ཁམས་མཉམ་པར་གཞག་པ་ཡིན་པའི་ཕྱིར་སེམས་དང་སེམས་ལས་བྱུང་བ་འབྱུང་བས་དེ་ལྟར་གནོད་པར་མི་བྱེད་པས་དེར་དང་པོར་འགོག་པའི་ཏིང་ངེ་འཛིན་བསྐྱེད་པར་མི་བྱེད་དོ། །བསྐྱེད་ཟིན་པ་ཡོངས་སུ་ཉམས་པ་ནི་སྔོན་གོམས་པའི་དབང་གིས་སྐྱེད་པར་བྱེད་དོ། །འདུ་ཤེས་མེད་པའི་སྙོམས་པར་འཇུག་པ་ལ་ཐར་པའི་ལམ་དུ་འདུ་ཤེས་པ་སྐྱེད་པར་བྱེད་པས་ན། གཟུགས་ཀྱི་ཁམས་སུ་ཡང་དང་པོར་དེ་བསྐྱེད་པ་མི་འགལ་ལོ། །སེམས་དང་སེམས་ལས་བྱུང་བ་འགོག་པའི་རང་བཞིན་དུ་མཚུངས་པས་མིང་འཇུག་པའི་རྒྱུ་ཐ་དད་པ་མ་མཐོང་སྟེ། འདྲི་པ་ནི། ཡང་ཅིའི་ཕྱིར་འདི་དག་ཅེས་བྱ་བ་རྒྱས་པར་འབྱུང་སྟེ། སྒྲ་འཇུག་པའི་རྒྱུ་མཚན་ཁྱད་པར་མེད་པའི་ཕྱིར་འགོག་པའི་སྙོམས་པར་འཇུག་པ་ཞེས་གཉིས་ཀ་ཡང་མིང་ཁྱད་པར་མེད་པར་འགྱུར་དགོས་སོ་ཞེས་བྱ་བའོ། །ཡང་ན་སེམས་དང་སེམས་ལས་བྱུང་བ་ཐམས་ཅད་འགོག་པའི་རང་བཞིན་ཡིན་ཡང་ཅིའི་ཕྱིར། འདུ་ཤེས་དང་ཚོར་བ་འགོག་པ་དག་གི་བསྙད་ཀྱི་
སེམས་དང་སེམས་ལས་བྱུང་བ་གཞན་གྱི་ས་ནི་མ་ཡིན་ནོ་ཞེས་བྱའོ། །དེ་དག་དང་མི་མཐུན་པས་ཞེས་པ་ནི་འདུ་ཤེས་དང་མི་མཐུན་པ་དང༌། འདུ་ཤེས་དང་ཚོར་བ་དང་མི་མཐུན་པས་སོ། །སྙོམས་པར་འཇུག་པ་དེ་དག་ལ་སྦྱོར་བ་ནི་དེ་དག་ལ་སྙོམས་པར་འཇུག་པར་སྦྱོར་བའོ། །དེ་ལ་འདུ་ཤེས་དང་མི་མཐུན་པས་འདུ་ཤེས་མེད་པའི་སྙོམས་པར་འཇུག་པ་ལ་སྦྱོར་ཏེ། འདུ་ཤེས་ནི་ནད་ཡིན་ནོ། །འདུ་ཤེས་ནི་འབྲས་ཡིན་ནོ། །འདུ་ཤེས་ནི་ཟུག་རྔུ་ཡིན་ནོ་ཞེས་བྱ་བ་དང༌། འདི་ནི་ཞི་བའོ་འདི་ནི་གྱ་ནོམ་པ་ཞེས་བྱ་བ་རྒྱས་པར་འབྱུང་བའོ། །འདུ་ཤེས་དང་ཚོར་བ་དང་མི་མཐུན་པས་ནི་འགོག་པའི་སྙོམས་པར་འཇུག་པ་ལ་སྦྱར་ཏེ། གཅིག་ནི་ལྟ་བའི་ཀུན་ནས་ཉོན་མོངས་པའི་གཞི་ཡིན་ལ། གཉིས་པ་ནི་སྲིད་པའི་ཀུན་ནས་ཉོན་མོངས་པའི་གཞི་ཡིན་ནོ། །དེའི་ཕྱིར་དེ་དག་དང་མི་མཐུན་པ་ཉིད་ཡིན་ནོ། །གཞན་གྱི་སེམས་ཤེས་པ་ཞེས་བྱ་བ་བཞིན་ནོ་ཞེས་བྱ་བ་ལ། གཞན་གྱི་སེམས་ཤེས་པར་བྱ་བའི་ཕྱིར་དེ་ལ་རབ་ཏུ་སྦྱོར་བས་ན། དེ་ལ་གཞན་གྱི་སེམས་ཤེས་པ་ཞེས་བྱའི་དེས་ཚོར་བ་ལ་སོགས་པའི་ཆོས་རྣམས་ནི་ཤེས་པ་ནི་མ་ཡིན་ཏེ་དེ་བཞིན་དུ་འདིར་ཡང་ཡིན་ནོ། །གཞན་དག་ན་རེ། མཚུངས་པར་ལྡན་པའི་ཆོས་རྣམས་བསྐྱེད་པ་འགོག་པས་སྤངས་པ་ཐོབ་པའི་ཕྱིར་འདི་དུས་མཚུངས་པར་འཇུག་པ་ཅན་ཞེས་བྱ་བ་མིང་དང་འདོད་པ་སྣ་ཚོགས་ཀྱི་ཆོས་སྟོན་པ་མི་རིགས་ཏེ། འདི་རྣམ་པར་ཤེས་པའི་ཚོགས་ལས་མ་འདས་པར་འགྱུར་རོ་ཞེས་སོ། །འགའ་ཞིག་འདུ་ཤེས་མེད་པའི་སྙོམས་པར་འཇུག་པ་འདུ་ཤེས་ཙམ་འགོག་པ་ཉིད་དུ་འདོད་པ་ཇི་ལྟ་བར་འགོག་པའི་སྙོམས་པར་འཇུག་པ་འདུ་ཤེས་དང་ཚོར་བ་འགོག་པ་སྟེ་དེ་དག་པ་རི་ཧཱར་མནྟ་རེ་ཎ་མུ་ཁྱཻ་བ་བྲྀ་ཧྱཱ་དེ་དག་འདུ་ཤེས་ཀྱི་འཇུག་པས་མང་པོ་པའི་དབྱེ་བ་རྣམས་སུ་ཁས་བླངས་པས་འདུ་ཤེས་དང་ཚོར་བ་དག་མང་པོ་པར་ངེས་པར་ཁས་ལན་པར་བྱེད་དེ། རྟོག་པ་དང་དཔྱོད་པ་དང་གཉིད་བཞིན་ནོ་ཞེས་ཟེར་རོ། །ད་ནི་ཇི་ལྟར་ཞེས་བྱ་བ་རྒྱ་ཆེར་འབྱུང་སྟེ། གང་གི་ཕྱིར་མྱུ་གུ་ལ་སོགས་པ་རྒྱུ་དང་ལྡན་པ་རྣམས་ནི་དེ་ལྟར་
ཞིག་ནས་ཡུན་རིང་དུ་ལོན་པའི་ས་བོན་ལས་སྐྱེ་བ་མ་མཐོང་ངོ༌། །འདས་པ་ཡང་ཡོད་པའི་ཕྱིར་ཞེས་བྱ་བ་འབྱུང་སྟེ། གལ་ཏེ་ཡོད་ན་ཇི་ལྟར་འདས་པ་ཡིན་ཞེ་ན། བྱེད་པ་འགགས་པའི་འདས་པ་ཞེས་བྱའི་རང་གི་ངོ་བོ་ཡོངས་སུ་གཏང་བའི་ཕྱིར་ནི་མ་ཡིན་ནོ། །དེའི་ཕྱིར་འགགས་མ་ཐག་པ་ལྟར་འགགས་ནས་ཡུན་རིང་དུ་ལོན་པ་ཡང་བྱེ་བྲག་ཏུ་སྨྲ་བ་རྣམས་མཚུངས་པ་དེ་མ་ཐག་པའི་རྐྱེན་ཉིད་དུ་འདོད་དོ། །ཀུན་གཞི་རྣམ་པར་ཤེས་པ་ཡོད་པ་མ་ཡིན་པ་སེམས་ལ་བཞག་ནས་བྱེ་བྲག་ཏུ་སྨྲ་བ་སྨོས་སོ། །ཨ་ཏྲ་སཱུ་ཡརྠཾ། འདི་གཉིས་ནི་ཕན་ཚུན་ས་བོན་ཅན་ཡིན་ནོ་ཞེས་བྱ་བ་ནི་སེམས་ལ་ཡང་དབང་པོ་དང་བཅས་པའི་ཡུལ་གྱི་ས་བོན་ཡོད་ལ། ལུས་ལ་ཡང་དབང་པོ་དང་བཅས་པའི་སེམས་ཀྱི་ས་བོན་ཡོད་དེ། དེ་ལྟར་ན་གཉིས་ཀ་ཕན་ཚུན་གྱི་ས་བོན་ཅན་ཡིན་ནོ། །སྔོན་གྱི་སློབ་དཔོན་རྣམས་ནི་སྔོན་གྱི་མདོ་སྡེ་པ་རྣམས་སོ། །གལ་ཏེ་རིས་མཐུན་པའི་རྒྱུ་ལ་མ་བལྟོས་པར་དབང་པོ་དང་བཅས་པའི་ལུས་ལས་རྣམ་པར་ཤེས་པ་སྐྱེ་བ་ཉིད་ཡིན་ན། རྟེན་དང་དམིགས་པ་ཅིག་ཅར་གནས་པ་ན་ཡུལ་ཐམས་ཅད་ལ་རྣམ་པར་ཤེས་པ་སྐྱེ་བར་འགྱུར་རོ། །སེམས་སྔ་མ་གང་ཡིན་པ་དེ་ལ་རག་ལས་པས་སེམས་ཕྱི་མ་སྐྱེ་བས་ན་གཉིས་པ་ལ་མཚུངས་པ་དེ་མ་ཐག་པའི་རྐྱེན་མེད་པས་རྟེན་དང་དམིགས་པ་ཡོད་ཀྱང་ཅིག་ཅར་མི་སྐྱེ་བར་ཐལ་བར་འགྱུར་རོ། །གལ་ཏེ་སེམས་ཡོད་པ་མ་ཡིན་ཡང་སེམས་མེད་པའི་དབང་པོ་དང་བཅས་པའི་ལུས་ཀྱི་ས་བོན་ལས་སོ་ཞེ་ན་འདི་ཡང་མི་རིགས་ཏེ་ཁྱད་པར་གྱི་རྒྱུ་མེད་པའི་ཕྱིར་རོ། །ཡོངས་སུ་དྲི་བ་ལས་ཞེས་བྱ་བ་ནི་དེ་ཉིད་ཀྱིས་བྱས་པའི་བསྟན་བཅོས་དེ་ལས་སོ། །སྐྱོན་དུ་འགྱུར་གྱི་ཞེས་བྱ་བ་ནི། ད་ནི་ཇི་ལྟར་འགགས་ནས་ཡུན་རིང་དུ་ལོན་པའི་སེམས་ལས་ཡང་སེམས་སྐྱེ་བར་འགྱུར་ཞེས་གང་སྔར་བརྗོད་པའོ། །འགགས་ནས་རིང་དུ་ལོན་པ་སྨོས་པ་ནི་དེ་མ་ཐག་པ་བསལ་བར་བྱ་བའི་ཕྱིར་རོ། །དེ་མ་ཐག་འགགས་པ་ལས་ཀྱང་སྐྱེ་བར་མི་རུང་ངོ༌། །འགགས་པ་
ནི་ཡོད་པ་མ་ཡིན་པའི་ཕྱིར་འགགས་ནས་ཡུན་རིང་དུ་ལོན་པ་བཞིན་ནོ། །ཅི་སྟེ་ད་མ་ཐག་པ་འགགས། །གལ་ཏེ་འགགས་ནས་ཡུན་རིང་ལོན་ཡང་དེ་མ་ཐག་འགགས་པ་བཞིན་དེ་ཉིད་ཀྱི་ཕྱིར་སྐྱེ་བ་མི་འགལ་ལོ། །དེ་མ་ཐག་འགགས་པ་ནི་ཡོད་པ་ཉིད་དུ་མི་འདོད་དེ། དེ་མ་ཐག་འགགས་པ་ལ་བརྟེན་ནས་འཇིག་པའི་གནས་སྐབས་ཀྱི་སེམས་སྐྱེ་བ་མི་འགལ་ལོ། །དེ་སྐྱེས་པས་དེ་ཡང་འགག་གོ་ཞེས་བྱ་སྟེ། དེ་ལ་བཙུན་པ་དབྱིག་བཤེས་ནི་ཡིད་ཀྱི་རྣམ་པར་ཤེས་པའི་སེམས་དང་བཅས་པ་འདོད་ཀྱི་ཀུན་གཞི་རྣམ་པར་ཤེས་པའི་སེམས་དང་བཅས་པ་ནི་མ་ཡིན་ནོ། །དེ་ནི་མི་འཐད་དེ་ཞེས་བྱ་བ་འབྱུང་སྟེ། འགོག་པའི་སྙོམས་པར་འཇུག་པ་སེམས་དང་བཅས་པ་ཡིན་ནོ་ཞེས་གང་སྨྲས་པ་དེ་མི་འཐད་དོ། །གསུམ་འདུས་པ་ལས་རེག་པ་ཞེས་བྱ་བ་ནི་དབང་པོ་དང་ཡུལ་དང་རྣམ་པར་ཤེས་པ་རྣམས་སོ། །རེག་པའི་རྐྱེན་གྱིས་ཚོར་བ་དང་ཞེས་བྱ་བ་རྒྱས་པར་འབྱུང་བ་ལ། གེགས་བྱེད་པ་མེད་པའི་རྒྱུ་ཡོད་ན་འབྲས་བུ་གདོན་མི་ཟ་བར་འབྱུང་བས་འགོག་པའི་སྙོམས་པར་འཇུག་པའི་རྫས་འདི་ལ་འདུ་ཤེས་དང་ཚོར་བ་དག་ཀྱང་འགོག་པར་མི་འགྱུར་ཏེ་རེག་པ་བཞིན་ནོ། །འོན་ཏེ་ཞེས་བྱ་བ་རྒྱས་པར་འབྱུང་བ་ལ། རེག་པའི་རྐྱེན་གྱིས་ཚོར་བ་དང༌། འདུ་ཤེས་དང༌། སེམས་པ་ཐམས་ཅད་ཡིན་གྱི། རེག་པ་ཐམས་ཅད་ནི་ཚོར་བ་ལ་སོགས་པ་རྣམས་ཀྱི་རྐྱེན་མ་ཡིན་པས་འགོག་པའི་སྙོམས་པར་འཇུག་པར་རེག་པ་རྐྱེན་ཡོད་པས་འདུ་ཤེས་དང་ཚོར་བ་ལ་སོགས་པ་དག་མི་དགག་པར་ཐལ་བར་འགྱུར་རོ། །འདུ་ཤེས་དང་ཚོར་བ་ལ་རྒྱབ་ཀྱིས་ཕྱོགས་པས་གནས་སྐབས་དེ་འཐོབ་པས་གནས་སྐབས་དེ་ན་རེག་པ་ཡོད་ཀྱང༌། འདུ་ཤེས་དང་ཚོར་བ་དག་གི་རྐྱེན་ཉིད་བསྒྲུབ་པར་མི་ནུས་སོ། །དེ་ཉིད་ལ་དཔེ་ནི་ཚོར་བའི་རྐྱེན་གྱིས་སྲེད་པ་ཞེས་བྱ་བ་ལ་སོགས་པའོ། །ཚོར་བ་ལ་སོགས་པ་མི་འབྱུང་ངོ་ཞེས་བྱ་བ་ལ་སོགས་པས་ཞེས་བྱ་བའི་སྒྲས་ནི་འདུ་ཤེས་དང་སེམས་པ་ཡོངས་སུ་གཟུང་ངོ༌། །ཁྱད་པར་དུ་བྱས་པའི་ཕྱིར་མ་ཡིན་ཏེ་ཞེས་བྱ་བ་ལ། ཚོར་བ་བཞིན་དུ་རེག་པ་ཐམས་ཅད་ཚོར་བའི་
རྐྱེན་མ་ཡིན་ནོ་ཞེས་བྱ་བ་དེ་ནི་མ་ཡིན་ནོ། །ཅིའི་ཕྱིར་ཞེ་ན། མདོ་གཞན་ལས་ཚོར་བ་ཁྱད་པར་དུ་བྱས་པའི་ཕྱིར་རོ། །མ་རིག་པའི་འདུས་ཏེ་རེག་པ་ལས་སྐྱེས་པ་ཞེས་བྱ་བ་རྒྱས་པར་འབྱུང་བ་ལ། མ་རིག་པ་དང་འབྲེལ་བའི་རེག་པ་ནི་མ་རིག་པའི་འདུས་ཏེ་རེག་པའོ། །མ་རག་པའི་འདུས་ཏེ་རེག་པ་ལས་བྱུང་བ་ནི་མ་རིག་པའི་འདུས་ཏེ་རེག་པ་ལས་སྐྱེས་པའོ། །དེ་ལྟར་སྲེད་པ་སྐྱེ་བ་ལ་ཚོར་བ་མ་རིག་པའི་འདུས་ཏེ་རེག་པ་ལས་སྐྱེས་པ་ཉིད་ཀྱི་ཁྱད་པར་བྱས་པ་མ་ཡིན་ཏེ། དེའི་ཕྱིར་མ་རིག་པ་མེད་པའི་ཚོར་བ་ནི་སྲེད་པའི་རྐྱེན་ཡིན་ནོ་ཞེས་བྱ་བར་སྒྲུབ་པར་མི་ནུས་སོ། །ཚོར་བ་སྐྱེ་བ་ལ་ཞེས་བྱ་བ་ལ་སོགས་པ་ལ། རེག་པ་འདི་འདྲ་བ་ནི་ཚོར་བའི་རྐྱེན་ཡིན་ལ། འདི་འདྲ་བ་ནི་མ་ཡིན་ཞེས་བྱེ་བྲག་ཏུ་མ་བྱས་ཏེ། དེའི་ཕྱིར་བྱེ་བྲག་མེད་པར་ཉེ་བར་བླངས་པའི་ཕྱིར་རེག་པ་ཐམས་ཅད་ཚོར་བའི་རྐྱེན་ཡིན་པས་དཔེ་འདི་མཚུངས་པ་མ་ཡིན་ནོ། །དེ་ལྟ་བས་ན་བྱེ་བྲག་ཏུ་སྨྲ་བ་རྣམས་ནི་ཞེས་བྱ་བ་ལ་སོགས་པ་འདུ་ཤེས་དང་ཚོར་བ་སྙོམས་པར་འཇུག་པའི་རྐྱེན་གྱི་རྣམ་པ་མ་ཡིན་ཏེ། དེ་དག་གིས་རེག་པ་བསྐྱེད་ཅིང་རྟོག་པ་མེད་པའི་བསམ་གཏན་བཞིན་ནོ་ཞེས་བྱ་བ་རྩོད་པའི་ཚིག་གོ །འདི་ཡང་འདི་ཉིད་ཀྱིས་སོ་སོར་བཤད་དེ། འོན་ཀྱང་ཇི་སྐད་དུ། ཚོར་བ་གང་ཡིན་པ་དང༌། སེམས་གང་ཡིན་པ་དང༌། འདུ་ཤེས་གང་ཡིན་པ་དང༌། རྣམ་པར་ཤེས་པ་གང་ཡིན་པ་འདྲེས་པའི་ཆོས་འདི་དག་གི་མ་འདྲེས་པ་ཞེས་བྱ་བ་འདི་འགལ་ཏེ་དེ་ལྟར་ན་རྟོག་པ་དང་དཔྱོད་པ་དང་སེམས་འདྲེས་པའི་ངེས་པ་མདོར་བྱས་པ་མ་ཡིན་ནོ། །ཏིང་ངེ་འཛིན་སེམས་དང་བཅས་པ་དགེ་བ་ནི་སེམས་དང་སེམས་ལས་བྱུང་བརྩེ་གཅིག་པར་བསྒྲུབ་པའི་ཕྱིར་སྙོམས་པར་འཇུག་པ་ཉིད་དུ་རུང་གི་གཞན་དུ་ནི་མ་ཡིན་ནོ་ཞེས་བསམས་ཏེ་འདྲི་བ་ནི། ཇི་ལྟར་ན་སེམས་མེད་པ་སྙོམས་པར་འཇུག་པ་ཡིན་ཞེས་བྱ་བའོ། །འབྱུང་བ་ཆེན་པོ་མཉམ་པ་ཉིད་དུ་བསྒྲུབ་པའི་ཕྱིར་རམ་ཞེས་བྱ་བ་ལ། འབྱུང་བ་ཆེན་པོ་རྣམས་ཀྱི་མཉམ་པ་ཉིད་ནི་སེམས་དང་སེམས་ལས་བྱུང་བ་སྐྱེ་བ་དང་མི་མཐུན་པར་གནས་པ་སྟེ་བསྒྲུབ་པ་ནི་དེ་ལྟར་བྱེད་པའོ། །སྙོམས་པར་འཇུག་པའི་སྦྱོར་བའི་སེམས་ཁོ་ན་འབྱུང་བ་ཆེན་པོ་མཉམ་པ་ཉིད་དུ་སྒྲུབ་པར་བྱེད་དེ། ལུས་དང་སེམས་དག་ཕན་ཚུན་
མཐུན་པར་བྱེད་པའི་ཕྱིར་རོ། །གཞན་དག་ན་རེ་འབྱུང་བ་ཆེན་པོ་མཉམ་པ་ཉིད་ནི་གནོད་པ་མེད་པའི་ཆོས་ཅན་ཉིད་ཡིན་ཏེ། འདི་ལྟར་འགག་པའི་སྙོམས་པར་འཇུག་པ་ནི་གནོད་པ་མེད་པའི་ཆོས་ཅན་ཡིན་ནོ། །ཡང་ན་སེམས་ཀྱི་འགོག་པའི་སྙོམས་པར་འཇུག་པ་དེ་ལ་སྙོམས་པར་འཇུག་པ་ནི་སྙོམས་པར་འཇུག་པ་ཡིན་ཏེ། སྙོམས་པར་འཇུག་པ་དང་སེམས་གཉིས་ལྷན་ཅིག་གནས་པར་འགལ་བའི་ཕྱིར་ཇི་ལྟར་སྙོམས་པར་འཇུག་ཅེ་ན། དེའི་ཕྱིར་ཐོབ་པར་འགྱུར་བས་ན་ཞེས་བྱ་བ་སྨོས་ཏེ། འདི་ལྟར་སྙོམས་པར་འཇུག་པའི་སྦྱོར་བའི་སེམས་ནི་སེམས་དང་སེམས་ལས་བྱུང་བ་འབྱུང་བ་དང་འགོག་པའི་སྙོམས་པར་འཇུག་པ་འདྲེན་པ་ཡིན་ནོ། །སེམས་སྐྱེ་བ་ལས་གེགས་བྱེད་པའི་ཕྱིར་ཞེས་བྱ་བ་ལ། གང་གི་ཕྱིར་འགོག་པའི་སྙོམས་པར་འཇུག་པ་ནི་ཆུ་འབབ་པ་ལ་ཆུ་ལོན་ལྟར་དུས་གཞན་གྱི་བར་དུ་སེམས་སྐྱེ་བ་ལ་གེགས་བྱེད་པ་ཞིག་སྟེ། མེད་པ་ནི་སེམས་བསྐྱེད་པའི་གེགས་བྱེད་པར་ཇི་ལྟར་འགྱུར། འཇུག་བཞིན་པའི་སེམས་མི་འཇུག་པ་ནི་རྒྱུ་བདེ་བའམ། དེ་འཇུག་པ་དང་འགལ་བའི་ཕྱིར་རྐྱེན་ཉེ་བ་ལས་ཡིན་གྲང༌། དེ་རེ་ཞིག་རྒྱུ་ཟད་པ་ལས་ནི་མ་ཡིན་ཏེ། ཡང་འབྱུང་བའི་ཕྱིར་རོ། །དེའི་ཕྱིར་འགལ་བའི་རྐྱེན་གཞན་གྱིས་བྱས་པ་ཡིན་ནོ་ཞེས་བྱ་བར་རྟོགས་ལ། འགལ་བའི་རྐྱེན་གང་ཡིན་པ་དེ་ཡང་འགོག་པའི་སྙོམས་པར་འཇུག་པ་ཡིན་ན། མ་ཡིན་ཏེ་སྙོམས་པར་འཇུག་པའི་སེམས་ཁོ་ནས་དེ་ལ་གེགས་བྱེད་པའི་ཕྱིར་རོ་ཞེས་བྱ་བ་ལ་འགལ་བའི་རྐྱེན་གཞན་གྱིས་བྱས་པ་དེའི་ཚེ་སེམས་མི་འཇུག་པ་ནི་བདེན་ན་འགལ་བའི་རྐྱེན་དེ་ནི་སེམས་གཞན་སྐྱེ་བ་དང་འགལ་བ་སྙོམས་པར་འཇུག་པའི་སེམས་ཁོ་ན་ཡིན་གྱི་གཞན་ནི་མ་ཡིན་ནོ། །འཇུག་པའི་རྒྱུ་ལས་སེམས་འཇུག་པ་རྣམ་པར་ཆད་པར་ཡང་མི་རིགས་ལ། སེམས་ཀྱང་འཇུག་པའི་རྒྱུ་ཡིན་ཏེ། དེ་ཕྱིར་མར་མེ་ལ་རླུང་ལྟར་སེམས་ལ་ཡང་མི་འཇུག་པའི་རྒྱུ་གཞན་ཁོ་ན་ཞིག་ཁས་བླང་བར་བྱའོ་ཞེ་ན། དེའི་ཕྱིར་དེ་དང་འགལ་བའི་རྟེན་བསྐྱེད་པའི་ཕྱིར་ཞེས་བྱ་བ་སྨོས་ཏེ། སེམས་སྐྱེ་བ་དང་འགལ་བའི་རྟེན་བསྐྱེད་པའི་ཕྱིར་ཞེས་བྱ་བའི་དོན་ནོ། །མར་མེ་སྡོང་བུ་ལ་རག་ལས་པ་ལྟར་སེམས་འཇུག་པ་ནི་རྟེན་ལ་རག་ལས་ཏེ། དེའི་ཕྱིར་རྟེན་ཉམས་པས་སེམས་མི་འཇུག་པར་མི་
འགལ་ལོ། །རྟེན་ཉམས་པ་དེ་ནི་སྙོམས་པར་འཇུག་པའི་སེམས་ཀྱིས་བྱེད་དེ་དེའི་ཕྱིར་སྙོམས་པར་འཇུག་པའི་སེམས་ཁོ་ན་དེ་ལ་གེགས་བྱེད་པའི་ཕྱིར་རོ་ཞེས་དེ་སྐད་དུ་བཤད་དོ། །དེ་ལ་སྙོམས་པར་འཇུག་པ་ཞེས་བྱ་བ་ལ། སེམས་མི་འཇུག་པ་དེ་ལ་སྙོམས་པར་འཇུག་པ་ཞེས་གདགས་སོ། །དེ་གདགས་པའི་ཉེ་བར་ལན་པ་པོ་གང་ཞིག་ཡིན། ཉེ་བར་ལེན་པ་མེད་པ་ནི་ཅུང་ཟད་ཀྱང་བཏགས་པ་ཡོད་པ་མ་ཡིན་ནོ་ཞེ་ན། སེམས་གང་དག་མི་འཇུག་པ་དེ་དག་དེ་མི་འཇུག་པའི་ཉེ་བར་ལེན་པ་ཡིན་ནོ། །གལ་ཏེ་མ་སྐྱེས་པའི་ཕྱིར་ཡོད་པ་མ་ཡིན་པ་དེ་དག་ཇི་ལྟར་ན་བཏགས་པའི་ཉེ་བར་ལེན་པར་རུང་ཞེ་ན། མ་འོངས་པ་ཡིན་ཡང་སེམས་ལ་གནས་པ་དེ་དག་ནི་མི་འཇུག་པའི་ཉེ་བར་ལེན་པ་ཉིད་དུ་འདོད་དེ། དཔེར་ན། རྫོགས་སངས་རྒྱས་རྣམས་མ་བྱུང་ཞིང༌། །ཉན་ཐོས་རྣམས་ཀྱང་ཟད་པ་ན། །རང་སངས་རྒྱས་ཀྱི་ཡེ་ཤེས་ནི། །བརྟེན་པ་མེད་པ་རབ་ཏུ་འབྱུང༌། །ཞེས་བྱ་བ་བཞིན་ནོ། །དེར་ནི་སངས་རྒྱས་མ་འོངས་པ་བློ་ལ་གནས་པ་རྣམས་ཁོ་ན་མི་འབྱུང་བ་ཡིན་ཏེ། མ་སྐྱེས་པའི་སངས་རྒྱས་ནི་ཡོད་པ་ཡང་མ་ཡིན་ནོ། །ཉན་ཐོས་རྣམས་ཀྱང་ཞིག་ཅིང་བློ་ལ་གནས་པ་རྣམས་ཁོ་ན་ཟད་པར་བརྗོད་ཀྱི་ད་ལྟར་བ་རྣམས་ནི་མ་ཡིན་ནོ། །དེའི་ཕྱིར་འདས་པ་དང་མ་འོངས་པ་ཡོད་པ་མ་ཡིན་ཡང་ཞིག་པ་དང་མ་སྐྱེས་པ་དག་བློ་ལ་གནས་པ་ཁོ་ན་བཏགས་པའི་ཉེ་བར་ལེན་པ་ཡིན་པར་མི་འགལ་ལོ། །གལ་ཏེ་སྙོམས་པར་འཇུག་པ་མ་འོངས་པའི་སེམས་མི་འཇུག་པ་ཙམ་ཡིན་ལ། དེ་ཡང་དངོས་པོ་མེད་པ་ཡིན་པས་འདུས་མ་བྱས་སུ་འགྱུར་རོ་ཞེ་ན། དེའི་ཕྱིར་མི་འཇུག་པ་ཙམ་དེ་ཡང་ཞེས་བྱ་བ་རྒྱས་པར་སྨོས་སོ། །འདིར་གང་གི་དབང་དུ་བྱས་ནས་འདུས་བྱས་ཞེས་བརྗོད་པ་མི་འཇུག་པ་ཙམ་ཞེས་བྱ་བ་འདུས་བྱས་གྲུབ་པར་འགྱུར་བ་ནི་ཅུང་ཟད་ཀྱང་མེད་ཀྱི་འོན་ཀྱང་སྙོམས་པར་འཇུག་པ་སྔོན་དང་ཕྱིས་མེད་པས་མི་འཇུག་པ་ཙམ་གྱིས་སྙོམས་པར་འཇུག་པ་ལ་འདུས་བྱས་སུ་གདགས་སོ། །ཡང་ན་རྟེན་ཉིད་ཅེས་བྱ་བ་རྒྱས་པར་འབྱུང་བ་ལ་སྔར་ནི་ཐ་སྙད་ཀྱི་སྒོ་ནས་སེམས་མི་འཇུག་པ་ཙམ་སྙོམས་པར་མི་འཇུག་པ་ཉིད་ཡིན་པ་དང༌། འདུས་བྱས་ཉིད་དུ་བཤད་ལ་ད་ལྟ་ནི་སྙོམས་པར་འཇུག་པའི་དབང་གིས་གནས་སྐབས་གཞན་
ཐོབ་པའི་རྟེན་ཉིད་སྙོམས་པར་འཇུག་པ་ཡིན་ཏེ། དེའི་ཕྱིར་དོན་དམ་པའི་སྒོ་ནས་འདུས་བྱས་ཀྱི་རྫས་ཡོད་པ་མ་ཡིན་ཡང་སྙོམས་པར་འཇུག་པ་ཞེས་བཤད་པར་འགྱུར་རོ། །འདུ་ཤེས་མེད་པ་པ་ཡང་དེ་བཞིན་དུ་ཞེས་བྱ་བ་ལ། ཇི་ལྟར་འགོག་པའི་སྙོམས་པར་འཇུག་པ་བཏགས་པ་ཙམ་ཡིན་པ་དེ་བཞིན་དུ་འདུ་ཤེས་མེད་པ་པ་ཡང་ཡིན་ནོ། །རྣལ་འབྱོར་པ་ལ་ནི་དེའི་སྨོན་ལམ་གྱིས་འཕེན་པའི་ཤུགས་ལས་སྙོམས་པར་འཇུག་པ་འཕངས་པ་ཆད་ན་ཡིད་དང་ཆོས་དག་ལ་བརྟེན་ནས་ཡིད་ཀྱི་རྣམ་པར་ཤེས་པ་སྐྱེ་ལ། འདུ་ཤེས་མེད་པ་པ་ནི་ལས་ཀྱི་རྣམ་པར་སྨིན་པའི་འཕེན་པ་ཟད་པས་འཆི་འཕོ་བར་འགྱུར་རོ། །སྙོམས་པར་འཇུག་པ་དག་བསྟན་ཟིན་ཏོ། །སྲོག་ནི་ཚེ་ཡིན། འདི་རྣམ་གྲངས་བརྗོད་པ་ཡིན་གྱི་མཚན་ཉིད་ནི་མ་ཡིན་ཏེ་བསྟན་བཅོས་ལས་བསྟན་པའི་ངོར་བྱས་པའི་ཕྱིར་རོ། །དེ་ཉིད་ཀྱི་ཕྱིར་ཆོས་མངོན་པ་ལས་འདི་སྐད་དུ་ཞེས་བྱ་བ་སྨོས་སོ། །རྣམ་གྲངས་ནི་གྲུབ་ན་མཚན་ཉིད་བྱེད་པ་ཡིན་ནོ། །འདི་ནི་སྲོག་དང་འདྲ་བར་གྲུབ་པས་འདིས་སྲོག་གི་དོན་ངེས་པར་མི་ནུས་ཏེ་དེའི་ཕྱིར་ཚེ་ཞེས་བྱ་བའི་ཆོས་འདི་གང་ཡིན་པ་ཞེས་བྱ་བ་རྒྱས་པར་འབྱུང་ངོ༌། །དྲོད་དང་ནི་རྣམ་ཤེས་རྟེན་གང་ཡིན་པའོ་ཞེས་བྱ་བ་དེ་འབྲས་བུའི་སྒོ་ནས་འཆད་པའོ། །གནས་པའི་རྒྱུ་ཞེས་བྱ་བ་ནི་རྟེན་དུ་གྱུར་པ་ཞེས་བྱ་བ་འདི་རྣམ་པར་བཤད་པའོ། །འདི་སྐད་བསྟན་པར་འགྱུར་ཏེ་ཇི་སྲིད་དུ་ཚེ་ཡོད་པ་དེ་སྲིད་དུ་འདི་གཉིས་རྒྱུན་ཆགས་སུ་འཇུག་པ་ཡིན་ནོ། །ད་ནི་ཚེའི་རྟེན་དུ་གྱུར་པ་ཞེས་བྱ་བ་འབྱུང་སྟེ་གནས་པའི་རྒྱུ་གང་ཡིན་ཞེས་བྱ་བའི་དོན་ཏོ། །དྲོད་དང་རྣམ་པར་ཤེས་པ་དེ་དག་ཉིད་ཡིན་ནོ་ཞེས་བྱ་བ་འབྱུང་སྟེ་ཚེ་ནི་དེ་དག་ལ་རག་ལས་ཏེ་གནས་པའི་ཕྱིར་རོ། །འོ་ན་ནི་ཞེས་བྱ་བ་རྒྱས་པར་འབྱུང་བ་ལ། གང་དག་ལ་ཕན་ཚུན་བལྟོས་ཏེ་འཇུག་པ་ཡོད་པ་དེ་དག་ནི་ཕན་ཚུན་བལྟོས་ཏེ་འཇུག་པའོ། །དེའི་དངོས་པོ་ནི་ཕན་ཚུན་བལྟོས་ཏེ་འཇུག་པ་ཉིད་དེ་ཕན་ཚུན་བལྟོས་ཏེ་འཇུག་པ་ནི་དེའི་ཕྱིར་རོ། །དེ་དག་ལས་ནི་དྲོད་དང་རྣམ་པར་ཤེས་པ་དང་ཚེ་གསུམ་ལས་སོ། །གང་ཞིག་སྔར་ལྡོག་པར་འགྱུར་ཏེ་ཞེས་བྱ་བ་རྒྱས་པར་འབྱུང་སྟེ། ཚེ་མ་ལྡོག་པར་གཞན་དག་ལྡོག་པ་མེད་ལ་གཞན་དག་ལྡོག་པ་མེད་པར་ཡང་ཚེ་ལྡོག་པ་མེད་དོ། །དེ་བཞིན་དུ་གཞན་ལ་ཡང་བརྗོད་པར་བྱ་སྟེ། དེ་ལྟར་ན་རྟག་ཏུ་ལྡོག་པ་མེད་པར་ཐལ་
བར་འགྱུར་རོ། །དེའི་ཕྱིར་དེ་དག་ཕན་ཚུན་ཉིད་དུ་མི་རུང་ངོ༌། །འོ་ན་ནི་ཚེའི་རྟེན་དུ་གྱུར་པ་ནི་ལས་ཡིན་གྱི། དྲོད་དང་རྣམ་པར་ཤེས་པ་དག་ནི་མ་ཡིན་ནོ། །དེ་ལྟ་ན་ལས་ཀྱིས་འཕེན་པ་ཟད་པས་ལྡོག་ཚེ་ལ། དེ་ལོག་པས་དྲོད་དང་རྣམ་པར་ཤེས་པ་དག་ལྡོག་པས་རྟག་ཏུ་ལྡོག་པ་མེད་པར་ཐལ་བར་མི་འགྱུར་རོ། །ཅི་ལྟར་ལས་ཚེའི་རྟེན་དུ་གྱུར་པ་ཡིན་ཞེ་ན་དེའི་ཕྱིར་ལས་ཀྱིས་ཇི་སྲིད་དུ་འཕངས་པ་དེ་སྲིད་དུ་རྗེས་སུ་འཇུག་པའི་ཕྱིར་རོ་ཞེས་བྱ་བ་སྨོས་སོ། །དེ་རྗེས་སུ་འཇུག་པ་ནི་ལས་ཀྱིས་འཕེན་པའི་རྒྱུ་ཅན་ཡིན་ནོ། །དྲོད་དང་རྣམ་པར་ཤེས་པ་དག་གི་རྟེན་དུ་གྱུར་པ་ཡང་ལས་ཁོ་ན་ཡིན་པར་ཅིའི་ཕྱིར་མི་འདོད་དེ་སྲོག་གི་དབང་པོ་དང་ཅིག་ཅར་སྐྱེ་བའི་ཕྱིར་དང་འཇིག་པའི་ཕྱིར་རོ་སྙམ་དུ་བསམས་པ་ཡིན་ནོ། །མ་ཤིའི་བར་དུ་རྣམ་པར་ཤེས་པ་ཐམས་ཅད་ཅེས་བྱ་བ་རྒྱས་པར་འབྱུང་བ་ལ། རྣམ་པར་ཤེས་པ་ལས་ཀྱིས་ཇི་སྲིད་འཕངས་པ་དེ་སྲིད་དུ་རྗེས་སུ་འཇུག་པའི་སྲོག་ལྟར་ལས་ཀྱི་རྟེན་ཅན་དུ་འགྱུར་ན་མ་ཤིའི་བར་དུ་རྣམ་པར་ཤེས་པ་དགེ་བ་དང་ཉོན་མོངས་པ་ཅན་དང༌། སྤྱོད་ལམ་པ་དང༌། བཟོའི་གནས་པ་དང༌། སྦྲུལ་པ་པ་ཐམས་ཅད་སྲོག་བཞིན་དུ་རྣམ་པར་སྨིན་པར་འགྱུར་རོ། །འོ་ན་དྲོད་ཀྱི་ཞེས་བྱ་བ་ལ་སོགས་པ་ལ། སྲོག་གི་དབང་པོ་དང་ལྷན་ཅིག་སྐྱེ་བ་དང་འགག་པའི་ཕྱིར་དང༌། ལུང་དུ་མ་བསྟན་པ་ཡིན་པའི་ཕྱིར་རྣམ་པར་སྨིན་པའི་དོ་བོར་འགལ་བ་མེད་པས། དྲོད་ཀྱི་རྟེན་ཏུ་གྱུར་པ་ནི་ལས་ཡིན་པར་འགྱུར་རོ། །དེ་ལྟ་ན་ནི་ཞེས་བྱ་བ་ལ་སོགས་པ་འབྱུང་ངོ༌། །དྲོད་མེད་པའི་ཕྱིར་ཞེས་བྱ་བ་ལ་དྲོད་ནི་མེའི་ཁམས་ཡིན་ན། འབྱུང་བ་དག་ནི་གཟུགས་མེད་པའི་ཁམས་ན་ཡོད་པ་མ་ཡིན་ནོ། །དྲོད་མེད་པའི་ཕྱིར་གཟུགས་མེད་པའི་རྣམ་པར་ཤེས་པ་དེའི་རྟེན་ནི་ལས་ཡིན་པར་འགྱུར་རོ། །གང་ལ་ལར་ནི་ཞེས་བྱ་བ་རྒྱས་པར་འབྱུང་བ་ལ། དངོས་པོ་རྣམས་ཀྱི་རྒྱུ་དང་འབྲས་བུའི་དངོས་པོའི་རང་བཞིན་གྱི་རྒྱུ་ཅན་ཡིན་པའི་ཕྱིར་འདོད་པའི་སྒོ་ནས་འབྲེལ་བ་མ་ཡིན་ཏེ། དེའི་ཕྱིར་ཐམས་ཅད་དུ་ཐམས་ཅད་ཀྱི་ཚེ་རྒྱུ་དང་འབྲས་བུའི་དངོས་པོ་འཁྲུལ་པ་མེད་དོ་སྙམ་དུ་བསམས་པ་ཡིན་ནོ། །བཤད་ཟིན་ཏོ་ཞེས་བྱ་བ་རྒྱས་པར་འབྱུང་བ་ལ། སྲོག་བཞིན་དུ་རྣམ་པར་
ཤེས་པ་ལས་ལ་བརྟེན་པ་ཉིད་མིན་ན་ནི། གཟུགས་མེད་པ་དག་ན་རྣམ་པར་ཤེས་པ་ཉོན་མོངས་པ་ཅན་དང༌། དགེ་བ་མེད་པར་འགྱུར་རོ། །གཞན་དག་ན་རེ། ཚེ་ནི་གཅིག་ཏུ་རྣམ་པར་སྨིན་པ་ཉིད་ཡིན་པའི་ཕྱིར་སྐྱེ་བ་མཐའ་དག་གི་རྗེས་སུ་འཇུག་གོ །ལས་ནི་རྟེན་ནོ། །དྲོད་གཅིག་ཏུ་རྣམ་པར་སྨིན་པ་འདུ་ཤེས་སམ་མིང་སཾ་ཛྙཱཾ་ནོ་ནཾ་གཉི་ག་ལྟར་ཡང་མ་ཡིན་བྷ་ཡ་ཐཱ། གང་དུ་ཡང་སྐྱེ་བ་མཐའ་དག་གི་རྗེས་སུ་འཇུག་པ་མ་ཡིན་ནོ། །དེར་ཡང་ལས་ལས་སྐྱེས་པ་ཁོ་ནའོ། །དེའི་རྟེན་ནི་ལས་སོ། །ལས་ལས་སྐྱེས་པའི་རྣམ་པར་ཤེས་པ་རྒྱུན་མི་འཇུག་པ་ལ་ལས་རྣམས་ནུས་པ་ཅི་ཡང་ཡོད་པ་མ་ཡིན་ནོ། །དེའི་ཕྱིར་དེ་དག་ཚེའི་རྟེན་ཞེས་བཤད་དོ། །རྣམ་པར་སྨིན་པ་ལས་སྐྱེས་པ་ཞེས་བྱ་བ་ནི་དེའི་རིས་མཐུན་པ་ཅན་རྣམ་པར་ཤེས་པའི་རྒྱུན་ཆད་ནས་སླར་སྐྱེ་བ་ལ་ཚེ་ཁོ་ན་རྟེན་ཡིན་ནོ། །དེ་ལ་བས་ན་དེ་གཉིས་ཀྱི་རྟེན་དུ་གྱུར་པའི་ཚེ་ན་ཡོད་པ་ཁོ་ནའོ། །འཇིག་རྟེན་དང་བསྟན་བཅོས་དག་དང་འགལ་བའི་ཕྱིར་མེད་དོ་ཞེས་ནི་མི་སྨྲ་མོད་ཀྱི་རྫས་གཞན་ནི་མེད་དོ་ཞེས་སྨྲའོ། །ཅིའི་ཕྱིར་ཞེ་ན། རང་གི་ངོ་བོ་དང་འབྲས་བུ་ངེས་པར་མ་ཟིན་པའི་ཕྱིར་རོ་ཞེས་སྔར་བཤད་པའི་གཏན་ཚིགས་ཁོ་ནའི་རྗེས་སྙེག་གོ །གལ་ཏེ། རྫས་གཞན་མ་ཡིན་ན། འོ་ན་དེ་ཅི་ཡིན་ཞེ་ན། དེའི་ཕྱིར་ཁམས་གསུམ་པའི་ལས་ཀྱིས་ཞེས་བྱ་བ་རྒྱས་པར་འབྱུང་བ་ལ། རིས་མཐུན་པ་ནི་དེ་ལྟ་བུར་གྱུར་པའི་འདུ་བྱེད་ཅི་རིགས་པར་སྐྱེ་མཆེད་དྲུག་གི་བདག་ཉིད་ཅན་རྟེན་དང་བཅས་པ་དེ་དག་ཁོ་ན་ཡིན་ལ་དེ་གནས་པ་ནི་རྒྱུན་ཆགས་པར་རྗེས་སུ་འཇུག་པའོ། །དེའི་དུས་ནི་ཇི་སྲིད་ཀྱི་བར་དུ་དེ་རྗེས་སུ་འཇུག་པར་འགྱུར་བའོ། །དེའི་འཕེན་པ་ནི་ཉིང་མཚམས་སྦྱོར་བའི་སྐད་ཅིག་མ་ལ་ཅི་རིགས་པར་སྐྱེ་བ་མ་མའི་ལས་ཀྱིས་རྒྱུའི་དངོས་པོར་གནས་པར་བྱས་པའོ། །ཡང་རྒྱུའི་དངོས་པོ་དེ་ཅི་ཞིག་ཅེ་ན་ནུས་པ་སྟེ་འདི་ལྟར་ཉིང་མཚམས་སྦྱོར་བའི་སྐད་ཅིག་མ་ནི་ལས་ཀྱི་སྟོབས་བསྐྱེད་པའི་ཕྱིར་རིས་མཐུན་པའི་རྒྱུན་གྱི་མཚན་ཉིད་ཅན་གྱི་གནས་པའི་དུས་ངེས་པ་ཡིན་ཏེ་དེ་ཉིད་ཀྱི་ཕྱིར་གནས་པའི་དུས་ཀྱིས་འཕེན་པ་ཞེས་བྱ་སྟེ། དུས་དེའི་རྒྱུན་འཕེན་པར་བྱེད་པའི་ཕྱིར་འབྲུ་རྣམས་ཀྱི་ཞེས་བྱ་བ་རྒྱས་པར་
འབྱུང་བ་ལ། དཔེར་ན་ས་བོན་གྱི་མྱུ་གུ་ལ་གང་ཞིག་སྨིན་པའི་དུས་ཀྱི་བར་དུ་བརྒྱུད་ནས་འབྲུའི་རྒྱུན་གྱིས་འགྱུར་ལ། འབྲུ་རྣམས་ཀྱི་སྨིན་པའི་དུས་ཀྱི་འཕེན་པ་ནུས་པའི་ཁྱད་པར་གྱི་མཚན་ཉིད་ཅན་བསྐྱེད་པ་དེ་དང་འདྲའོ། །མདའ་འཕངས་པ་དག་གིས་གནས་པའི་དུས་ཀྱི་འཕེན་པ་བཞིན་ནོ་ཞེས་བྱ་བ་འབྱུང་སྟེ། དེ་ལ་མདའ་འཕངས་པ་དག་གིས་གནས་པ་ནི་ཡུལ་གཞན་དུ་སྐྱེ་བ་རྒྱུན་རྗེས་སུ་འཇུག་པའོ། །དེའི་དུས་ནི་གང་ཕྱིན་ཆད་དེ་མི་འབྱུང་བའི་མུ་མཚམས་སོ། །དེའི་འཕེན་པ་ནི་རྒྱུའི་དངོས་པོར་རྣམ་པར་གནས་པའོ། །མདའི་སྐད་ཅིག་དང་པོའི་དེ་ཡང་རྩོལ་བར་གྱུར་པ་ཕུལ་དུ་བྱུང་བས་བསྒྲུབ་པའི་རླུང་གི་ཁམས་ཀྱིས་བསྐྱེད་པའི་ནུས་པའི་ཁྱད་པར་ལས་སོ། །གང་ཞིག་ཅེས་བྱ་བ་རྒྱས་པར་འབྱུང་བ་ལ། བྱེ་བྲག་པ་ནི་མདའ་འཕངས་པ་ལ་རླུང་གི་ཁམས་ཀྱིས་བསྐྱེད་པའི་ནུས་པའི་ཁྱད་པར་ལས་ཡུལ་དག་ཏུ་རྒྱུན་སྐྱེ་བའི་བདག་ཉིད་ཅན་མི་འདོད་པས་འདུ་བྱེད་ཅེས་བྱ་བ་ལ་སོགས་པ་དེ་ལྟར་སེམས་ཏེ། བྱེ་བྲག་པའི་ལྟར་ན་འགྲོ་བའི་ཕྱིར་ན་ཐོག་མར་མདའ་ལ་ལས་སྐྱེ་ལ། དེ་ལས་ནི་འགྲོ་བའི་རྒྱུ་འདུ་བྱེད་དེ་འདུ་བྱེད་པས་ནི་མ་ལྷུང་གི་བར་དུ་འགྲོ་བའོ། །མདའི་འགྲོ་བ་ནི་ཡུལ་གཞན་དུ་ཕྱིན་པ་ཡིན་གྱི་སྐྱེ་བ་ནི་མ་ཡིན་ནོ། །དེའི་ཞེས་བྱ་བ་ནི་བྱེ་བྲག་པའིའོ། །དེ་ནི་གཅིག་པུ་ཡིན་པའི་ཕྱིར་ཞེས་བྱ་བ་ནི་འདུ་བྱེད་གཅིག་པུ་ཡིན་པའི་ཕྱིར་རོ། །གེགས་བྱེད་པ་མེད་པའི་ཕྱིར་ཞེས་བྱ་བ་ལ། ནམ་མཁའ་ལ་ནི་རེག་པ་དང་ལྡན་པའི་རྫས་དང་འབྲེལ་པའི་བདག་ཉིད་ཅན་གྱི་ཐོགས་པ་འགའ་ཡང་ཡོད་པ་མ་ཡིན་ནོ། །གེགས་ཆེན་པོ་དང་འབྲིང་དང་ཆུང་ངུ་བྱས་ན་ནི་འདུ་བྱེད་བྱེ་བྲག་མེད་བཞིན་དུ་ཕྱིན་པའི་དུས་ཀྱི་བྱེ་བྲག་ཏུ་གྱུར་པ་ན་གེགས་ནི་ཡོད་པ་མ་ཡིན་ནོ། །དེའི་ཕྱིར་ཡུལ་གཞན་དག་ཏུ་མགྱོགས་པ་དང་ཆེས་དང་ཤིན་ཏུ་ཆེས་མགྱོགས་པར་ཕྱིན་པའི་དུས་ཀྱི་བྱེ་བྲག་ཡོད་པའི་ཕྱིར་མ་ལྷུང་བར་དུས་འགྲོ་བ་འདུ་བྱེད་གཅིག་པུའི་རྒྱུ་ཅན་མ་ཡིན་ནོ། །ལྷུང་བ་ཡང་མི་འཐད་དོ་ཞེས་བྱ་བ་ནི་འདུ་བྱེད་གཅིག་པུ་ཡིན་པའི་ཕྱིར་དང༌། གེགས་བྱེད་པ་མེད་པའི་ཕྱིར་རོ། །གལ་ཏེ་རླུང་གིས་དེ་ལ་གེགས་བྱེད་དོ་ཞེས་བྱ་བ་ལ།
རླུང་གིས་གེགས་བྱས་པའི་འདུ་བྱེད་ནི་ལས་ཆེན་པོ་དང༌། འབྲིང་དང༌། ཆུང་ངུའི་རྒྱུ་ཡིན་ལ། མཐར་ནི་འདུ་བྱེད་མེད་པའི་ཕྱིར་དང༌། ལྕི་བ་ཉིད་ཀྱི་ཕྱིར་ལྟུང་བ་ཡིན་ནོ་ཞེའོ། །དྲུང་དུ་ལྟུང་བའམ་ཞེས་བྱ་བ་ལ། གཞུ་རྒྱུད་དང་རྣམ་པར་ཕྱེ་མ་ཐག་ཏུ་རླུང་དང་ལྡན་པའི་ཕྱིར་རོ། །དེ་ལྟར་རེག་པ་དང་ལྡན་པའི་རྫས་དང་ལྡན་པ་ལས་མེད་པ་ཡིན་ནོ་ཞེས་བྱ་བ་འདི་ནི་བྱེ་བྲག་པ་རྣམས་ཀྱི་མདོ་ཡིན་ནོ། །ཡང་ན་གཞར་ཡང་ཞེས་བྱ་བ་ལ་མ་ལྟུང་བར་ཐལ་བར་འགྱུར་རོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། དེའི་ཕྱིར་རླུང་ལ་ཁྱད་པར་མེད་པའི་ཕྱིར་ཞེས་བྱ་བ་སྨོས་ཏེ། གང་ལས་ཕྱིས་གེགས་བྱེད་ཀྱི་སྔར་མ་ཡིན་པར་འགྱུར་བ་ཕྱིས་རླུང་ལ་ཁྱད་པར་ཡོད་པ་ནི་མ་ཡིན་ནོ། །དེ་ལས་ཁྱད་པར་མེད་པའི་ཕྱིར་ནི་ལྡན་པ་ལ་ཡང་ཁྱད་པར་མེད་དོ། །གང་ཞིག་ལས་བཞིན་དུ་འདུ་བྱེད་ཀྱང་དུ་མ་སྙམ་དུ་སེམས་པ་དེའི་ཡང་ཡུལ་གཞན་དུ་མགྱོགས་པ་དང༌། ཆེས་ཤིན་ཏུ་མགྱོགས་པར་ཕྱིན་པའི་དུས་ཀྱི་བྱེ་བྲག་མི་འཐད་དོ། །འདུ་བྱེད་ལས་ནི་ལས་བརྩམས་པར་བྱ་བ་ལ་བྱེ་བྲག་ཡོད་པ་མ་ཡིན་ལ། གང་ཞིག་འདུ་བྱེད་ཆེས་གསལ་བས་བསྐྱེད་པའི་ལས་ཀྱིས་ཅིག་ཅར་རྫས་ཡུལ་མང་པོ་གནོད་པར་བྱེད་པ་ཡང་ཡོད་པ་མ་ཡིན་ཏེ། རིས་ཀྱིས་རང་གི་རྟེན་དུ་རྡུལ་ཕྲ་རབ་ཙམ་གྱི་ཕྱོགས་དང་ལྡན་པ་དང༌། རྣམ་པར་བྱང་བའི་རྒྱུ་ཅན་ཡིན་པའི་ཕྱིར་རོ། །སློབ་དཔོན་འདུས་བཟང་ན་རེ། གཟུགས་མེད་པའི་ཁམས་སུ་སྐྱེས་པ་རྣམས་ཀྱི་ཉོན་མོངས་པ་དག་དགེ་བ་དང་ཟག་པ་མེད་པའི་རྣམ་པར་ཤེས་པའི་རྒྱུན་གྱི་རྒྱུན་རབ་ཏུ་གྱུར་པ་བསྐྱེད་པ་ལ་ལས་དང་བྱ་བ་ཅི། གང་དུ་ལས་དང་འབྲས་བུ་བསྐྱེད་པའི་སྐད་ཅིག་ནས་བརྩམས་ཏེ། ཇི་སྲིད་འཆི་བའི་བར་དུ་ཅུང་ཟད་ཀྱང་མ་ཆད་པར་འཇུག་གོ །དེ་ལ་ལས་རྣམས་ཀྱི་དུས་ཡོངས་སུ་གཟུང་བས་རྒྱུན་ངེས་པ་ཡང་རིགས་སོ། །ཨ་ས་ཏི། ཡོད་པ་མ་ཡིན། ཀང་དང་ཡ་སྨེཤྩ་ཏི་ལས་དང་འབྲས་བུའི་རྒྱུན་ཀིཾ་ཅི་དེའི་ཚེ་རྣམ་པ། ཏ་དཱ་བི་དྷྭཾ་ལས་གང་ཡིན་པ་སྲོག་གི་དབང་པོ་ཞེས་བརྗོད་དོ། །ཅིའི་ཕྱིར་དག་སོ་སོའི་ལས་ཀྱི་དུས་ཡོངས་སུ་འཛིན་པར་བྱེད། ཡང་ཅིའི་ཕྱིར་འདིའི་རྒྱུན་ངེས་པ་ལས་ཀྱིས་བྱས་ཟེར་རོ། །འདི་ནི་
རེ་ཞིག་མདོ་བྱེད་པ་ལ་སྐྱོན་མེད་པ་སྦྱར་ཏེ་དགེ་བ་དང་ཉོན་མོངས་པ་དང་ཟག་པ་མེད་པའི་རྣམ་པར་ཤེས་པའི་རྒྱུན་གྱི་གནས་སྐབས་ནི་གཟུགས་མེད་པའི་ཁམས་སུ་ཀུན་གཞི་རྣམ་པར་ཤེས་པ་རྣམ་པར་སྨིན་པའི་བདག་ཉིད་ཁས་བླངས་པའི་ཕྱིར་དེ་ཉིད་ལས་དང་འབྲས་བུ་སྐྱེ་བའི་སྐད་ཅིག་ནས་བརྩམས་ཏེ་འཆི་བའི་བར་དུ་མ་ཆད་པ་འཇུག་གོ །དེ་ལ་ལས་ཀྱི་དུས་ཡོངས་སུ་གཟུང་བ་དང་རྒྱུན་ངེས་པ་འགལ་བ་མེད་དོ། །གང་ཡང་དཔེ་སྟོན་པ་རྣམས་ནི་ཀུན་གཞི་རྣམ་པར་ཤེས་པ་མི་འདོད་པས། དེ་དག་གཟུགས་མེད་པར་སྐྱེ་བའི་དགེ་བ་དང་ཉོན་མོངས་པ་དང་ཟག་པ་མེད་པའི་རྣམ་པར་ཤེས་པ་རྣམས་དེའི་རྣམ་པར་སྨིན་པའི་རྒྱུའི་ངོ་བོར་རྗེས་སུ་འགྲོ་བ་འདྲ་བར་རྣམ་པར་སྨིན་པའི་རྣམ་པར་ཤེས་པ་བཞིན་དེ་དང་རིས་མཐུན་པར་རྣམ་པར་གཞག་པའི་ཕྱོགས་བསྟན་པར་བྱེད་དོ། །རིས་མཐུན་པ་གནས་པའི་དུས་ཀྱི་འཕེན་པ་སྲོག་ཅེས་བཤད་པས་སྔོན་གྱི་སྲིད་པའི་རྣམ་པར་ཤེས་པ་དེར་ཐལ་བར་མི་འགྱུར་རོ། །རིས་མཐུན་པའི་ནང་དུ་འདུས་པའི་ཕྱིར་ཟག་པ་མེད་པའི་སྲིད་པ་ནི་མ་ཡིན་ཏེ། སྲིད་པས་བདག་གིར་བྱས་པའི་ཕྱིར་རོ། །བྱེ་བྲག་ཏུ་སྨྲ་བ་རྣམས་ནི་འདི་སྐད་དུ་ཚེ་རྫས་གཞན་ཁོ་ན་གཅིག་ཡོད་དོ་ཞེས་ནི་བརྗོད་དོ། །སྲོག་གི་དབང་པོ་དེ་ཉིད་ལུས་ཁོ་ན་ལ་བརྟེན་ནས་འཇུག་པ་མ་ཡིན་ཏེ། གཟུགས་མེད་པ་རྣམས་སུ་ཡང་ཡོད་པའི་ཕྱིར་རོ། །སེམས་ཁོ་ན་དང་ཡང་མ་ཡིན་ཏེ་སེམས་མེད་པ་རྣམས་ལ་ཡང་རྗེས་སུ་འཇུག་པའི་ཕྱིར་རོ། །འོ་ན་དེའི་འཕེན་པར་བྱེད་པའི་ལས་སྔ་མ་དང་ད་ལྟར་བའི་རིས་མཐུན་པ་དག་ཀྱང་ཅི། གལ་ཏེ་རིས་མཐུན་པ་གནས་པའི་དུས་འཕེན་པའི་ལས་ཚེ་ཡིན་ན། ཅི་ལྟར་བར་མི་ཆོད་ཅེས་བྱ་བ་རྩོད་པའི་ཚིག་གོ །ལོ་ཏོག་རྣམས་སྨིན་པའི་དུས་ཀྱི་འཕེན་པ་བཞིན་བར་ཆད་ཀྱང་སྟོབས་དང་ལྡན་པའི་ཕྱིར། གང་ཞིག་ཡོད་པ་མ་ཡིན་པ་ད་ལ་ཡང་རེ་ཞིག་འཕེན་པ་རྗེས་སུ་འཇུག་གོ །དེ་བཞིན་ཁོ་ནར་ཞེས་བྱ་བ་ནི་གཞན་དུ་མ་ཡིན་པར་ངེས་པའི་དོན་དུ་བརྗོད་པར་བྱའོ། །འོན་ཏེ་གཞན་དུ་ཡང་ཡིན་ཞེ་ན་ཞེས་བྱ་བ་ལ། ཚེ་ཡང་རྒྱུ་མཚན་གཞན་གྱིས་ཡིན་ཞེས་བྱ་བའི་དོན་ནོ། །བཏགས་པ་ལས་ཞེས་བྱ་བ་
འདིས་ནི་ཚེ་ཡོད་ཀྱང་འཆི་བ་ཡོད་དེ་ཞེས་སྟོན་པར་བྱེད་དོ། །དང་པོ་ནི་ཚེའི་རྣམ་པར་སྨིན་པ་ཅན་ཡིན་གྱི་ལོངས་སྤྱོད་ཀྱི་རྣམ་པར་སྨིན་པ་ཅན་མ་ཡིན་ཏེ་ལས་ཀྱིས་འཕངས་པའི་སྲོག་གི་དབང་པོ་རྒྱུན་ཡོངས་སུ་རྫོགས་པའི་ཕྱིར་ཚེའི་རྣམ་པར་སྨིན་པ་ཅན་གྱི་ལས་ཡོངས་སུ་གཏུགས་པ་ཡིན་ནོ། །གཉིས་པ་ནི་ལོངས་སྤྱོད་ཀྱི་རྣམ་པར་སྨིན་པ་ཅན་ནོ། །ལས་ཡོངས་སུ་གཏུགས་པ་ལས་སོ་ཞེས་བྱ་བར་སྦྱར་ཏེ་ཚེའི་རྣམ་པར་སྨིན་པ་ཅན་ནི་མ་ཡིན་ཏེ་གསུམ་པ་ནི་གཉིས་ཀའོ། །ཚེ་དང་ལོངས་སྤྱོད་རྣམ་པར་སྨིན་པ་ཅན་དག་སྟེ། ལས་ཡོངས་སུ་ཟད་པ་ལས་ཞེས་བྱ་བར་སྦྱར་རོ། །བཞི་པ་ནི་ཚེ་དང་ལོངས་སྤྱོད་ཀྱི་རྣམ་པར་སྨིན་པ་ཅན་ལས་ངག་མ་ཟད་ཀྱང་ཡང་བ་ཡོངས་སུ་མི་སྤོང་བས་སོ། །བག་མེད་པ་སྤྱོད་པས་སོ་ཞེས་བྱ་བའི་ཐ་ཚིག་གོ །མར་མེ་བཞིན་ཏེ། ཇི་ལྟར་མར་མེ་ནི་རེས་འགའ་སྙིང་པོ་ཟད་པ་ཉིད་ལས་འགགས་ལ། རེས་འགའ་ནི་འབྲུ་མར་ཟད་པ་ཉིད་ལས་ཡིན་གྱི་སྙིང་པོ་ཟད་པ་ལས་ནི་མ་ཡིན་ནོ། །རེས་འགའ་ནི་གཉིས་ཀ་ཟད་པ་ལས་རེས་འགའ་ནི་གཉིས་ཀ་ཡོད་ཀྱང་རླུང་ལ་སོགས་པས་སོ། །ཚེ་བཏང་བ་ལས་ཀྱང་བརྗོད་པར་བྱའོ། །བརྗོད་པར་མི་བྱ་སྟེ། མུ་དང་པོའི་ཁོངས་སུ་འདུ་བའི་ཕྱིར་རོ། །དེའི་ཚེ་རྣམ་པར་སྨིན་པ་ཅན་གྱི་ལས་གང་ཡིན་པ་དེ་ལོངས་སྤྱོད་ཀྱི་རྣམ་པར་སྨིན་པར་འགྱུར་པས་ཚེ་ཟད་པ་ཁོ་ནས་འཆི་བ་ཡིན་ནོ། །ཚེ་ཟད་ན་ཞེས་བྱ་བ་རྒྱས་པར་འབྱུང་བ་ལ། ལོངས་སྤྱོད་ཟད་ན་ཚེ་ཟད་པ་ཡང་ལྡོག་ནས་ལོངས་སྤྱོད་ཟད་པས་འཆི་བར་བྱ་བ་ལ་ནུས་པ་ཡོད་ན་ཚེ་ཟད་ན་བཟློག་པར་བྱ་བའི་ཕྱིར་ལོངས་སྤྱོད་ཟད་པ་འཆི་བར་བྱ་བ་ལ་ནུས་པ་དེའི་ཕྱིར། གཉིས་ཀ་ཟད་པ་ལས་ཞེས་བྱ་བའི་མུ་གསུམ་པ་མི་རིགས་ཏེ་དེའི་ཕྱིར་སྲིད་པའི་དབང་དུ་བྱས་ནས་གཉིས་ཀ་ཟད་པ་ལས་འཆི་བར་བཤད་དེ། ཚེ་ཟད་ནས་བསོད་ནམས་ཟད་པ་ལས་འཆི་བར་བྱ་བ་ལ་ནུས་པ་ཡོད་པ་ནི་མ་ཡིན་ནོ། །དེ་ལྟ་མོད་ཀྱི་དེའི་ཕྱིར་གཉིས་ཀ་ཟད་པས་འཆི་བ་ཡོད་པས་གཉིས་ཀ་ཟད་པའི་ཕྱིར་ཞེས་བཤད་དོ། །ཡང་ཚེ་ཟད་ནས་བསོད་ནམས་ཟད་པ་ལས་འཆི་བར་བྱ་བ་ལ་ནུས་པ་ཡོད་པ་ནི་མ་ཡིན་ནོ། །ཚེ་ཟད་པ་ལས་ཀྱང་འཆི་བ་ལ་བསོད་ནམས་ཟད་པའི་བྱ་བ་དེ་མེད་དེ། ཕན་ཚུན་མེད་ཀྱང་འཆི་བའི་ཕྱིར་ཞེས་བྱ་བ་རྩོད་པའི་གཞིའོ། །བསོད་ནམས་ཟད་པ་ལས་ཀྱང་འཆི་བ་
བདེན་ཏེ། དེ་མེད་པས་ཚེ་གནས་པའི་རྒྱུ་ཉེ་བར་མཁོ་བ་མེད་པས་དེ་ལྟར་ཚེའི་གནས་སྐབས་མེད་པའི་ཕྱིར་རོ། །བསོད་ནམས་ཟད་པ་ཁོ་ན་ལས་འཆི་བ་མ་ཡིན་ཏེ། ཇི་ལྟར་ཚེ་ཟད་པ་ཁོ་ན་ལས་མ་ཡིན་པ་བཞིན་ནོ། །ཚེ་ཟད་པ་ལ་བསོད་ནམས་ཟད་པ་ལས་འཆི་བ་ལ་ནུས་པ་ཡོད་པ་མ་ཡིན་ནོ། །ཡང་བསྟན་བཅོས་གཞན་གྱི་སྒོ་ནས་དུས་མ་ཡིན་པར་འཆི་བ་ཡོད་པར་བསྟན་པའི་ཕྱིར་ཡེ་ཤེས་ལ་འཇུག་པ་ལས་ཞེས་བྱ་བ་རྒྱས་པར་སྨོས་སོ། །བཤད་པ་འདིས་ཇི་ལྟ་བུས་མ་ཡིན་པར་འཆི་བ་བསྟན་ཅེས་མི་ཤེས་པས་འདྲི་བ་ནི། བཤད་པ་འདིའི་དོན་གང་ཡིན་ཞེས་བྱའོ། །གང་ལ་ལུས་ལ་གནོད་པས་ཞེས་བྱ་བ་ལ། འགོག་པ་དང་འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་པ་མ་གཏོགས་པའི་འདོད་པ་ན་སྤྱོད་པ་རྣམས་ཀྱི་ལུས་ལ་ནི་གནོད་པར་བྱ་བར་ནུས་ཏེ། དེའི་ཕྱིར་དེ་དག་ཚེ་ལ་ནི་ལུས་ལ་གནོད་པ་བྱས་པས་གནོད་པ་ཡིན་ཏེ། ལུས་ཀྱི་རྒྱུད་ལ་མ་བལྟོས་པའི་ཚེ་འཇུག་པ་མེད་པས་ལུས་ཀྱི་རྒྱུད་ལ་རག་ལས་པའི་ཕྱིར་རོ། །དང་པོ་ཡིན་ནོ་ཞེས་བྱ་བ་ལ་འདོད་པ་ན་སྤྱོད་པ་ཞེས་བྱ་བ་ནས་བརྩམས་ཏེ། རྒྱུད་ལ་རག་ལས་ཏེ་འཇུག་པ་ཞེས་བརྗོད་པར་བྱའོ་ཞེས་བྱ་བའི་བར་འདི་ནི་དང་པོའོ། །གཟུགས་དང་གཟུགས་མེད་པ་ན་སྤྱོད་པ་རྣམས་དང། འདོད་པའི་ཁམས་སུ་འགོག་པ་དང༌། འདུ་ཤེས་མེད་པའི་སྙོམས་པར་འཇུག་པ་རྣམས་ལ་ནི་རྟེན་ལ་ནི་གནོད་པར་བྱས་པས་ཚེ་ལ་གནོད་པ་མེད་དེ། རང་དང་གཞན་གྱིས་གནོད་པའི་ཡུལ་ལས་འདས་པའི་ཕྱིར་རོ། །དེའི་ཕྱིར་དེ་ནི་ཇི་ལྟར་སྐྱེས་བཞིན་གནས་པས་བར་སྐབས་སུ་རྒྱུན་རྣམ་པར་ཆད་པ་མེད་དོ། །གཉིས་པ་ཡིན་ནོ་ཞེས་བྱ་བ་ལ། སྙོམས་པར་ཞུགས་པ་རྣམས་དང་ཞེས་བྱ་བ་ནས་བརྩམས་ནས་བརྗོད་པར་བྱའོ་ཞེས་བྱ་བའི་བར་འདི་ནི་གཉིས་པའོ། །གློ་བུར་དང་བཅས་པ་ནི་དང་པོ་ཡིན་ནོ། །དེ་གློ་བུར་དང་བཅས་པ་ནི་ལུས་ལ་གནོད་པ་བྱས་པའི་སྒོ་ནས་ཏེ་གེགས་དང་བཅས་ཞེས་བྱ་བའི་དོན་ནོ། །གློ་བུར་མེད་པ་ནི་གཉིས་པ་ཡིན་ནོ་ཞེས་བྱ་བ་ལ། དེའི་རྟེན་ལ་གནོད་པ་མེད་པའི་ཕྱིར་འདི་ནི་གློ་བུར་མེད་ཅིང་གེགས་མེད་པ་ཡིན་ནོ། །དེ་ལྟ་བས་ན་དུས་མ་ཡིན་པར་འཆི་བ་ནི་ཡོད་དོ་ཞེས་བྱ་བ་ནི་གང་གི་ཕྱིར་ཚེ་རྒྱུད་ལ་རག་ལས་པ་དང༌། གློ་བུར་དང་བཅས་པ་
བཤད་པའི་ཕྱིར་རོ། །མདོ་ལས་ཞེས་བྱ་བ་རྒྱས་པར་འབྱུང་བ་ལ། ཆོས་མངོན་པ་ལས་བཤད་པ་འབའ་ཞིག་ཏུ་མ་ཟད་དོ། །འོ་ན་ཅི་ཞེ་ན། མདོ་ལས་ཀྱང་དུས་མ་ཡིན་པར་འཆི་བ་གསུངས་སོ། །བདག་རྒྱུར་གྱུར་པའི་འཆི་བ་ནི་བདག་ཉིད་འཆི་བའོ། །གཞན་རྒྱུར་གྱུར་པའི་འཆི་བ་ནི་གཞན་གྱིས་གསོད་པའོ། །མུ་བཞིར་ཞེས་བྱ་བ་འབྱུང་སྟེ་གང་དུ་བདག་ཉིད་འཆི་ལ་གཞན་དག་གིས་གསོད་པ་མ་ཡིན་པ་དང༌། གང་དུ་གཞན་དག་གིས་གསོད་ལ་བདག་ཉིད་འཆི་བ་མ་ཡིན་པ་དང༌། གང་དུ་གཉིས་ཀ་ཡིན་པ་དང༌། གང་དུ་གཉིས་ཀ་མ་ཡིན་པ་བགྲང་བའོ། །རབ་ཏུ་དགའ་བ་དང་ཡིད་རབ་ཏུ་འཁྲུགས་པ་དག་གིས་ཞེས་བྱ་བ་ལ། ལྷ་རྩེད་མོས་མྱོས་པ་རྣམས་ནི་རབ་ཏུ་དགའ་བ་སྟེ། དེ་དག་ནི་ཤིན་ཏུ་རྩེ་བ་དང༌། དགའ་བ་ལ་སོགས་པས་ལུས་དུབ་བ་དང༌། དྲན་པ་མྱོས་པ་དག་གིས་གནས་དེ་ནས་འཆི་བར་འགྱུར་རོ། །ཡིད་རབ་ཏུ་འཁྲུགས་པ་རྣམས་ནི་ཡིད་རབ་ཏུ་འཁྲུགས་པ་སྟེ། དེ་དག་ནི་ཕན་ཚུན་མིག་གིས་མིག་ལ་བལྟོས་པས་ཡིད་འཁྲུགས་པར་འགྱུར་ཞིང་དེས་ན་གནས་དན་འཆི་བར་འགྱུར་རོ། །སངས་རྒྱས་རྣམས་ཀྱི་ཡང་ཡིན་པར་བརྗོད་པར་བྱ་སྟེ་ཞེས་བྱ་བ་ནི་བདག་ཉིད་འགྲོངས་པར་འགྱུར་གྱི། གཞན་གྱིས་འགྲོངས་པ་ནི་མ་ཡིན་ནོ་ཞེས་བྱ་བའོ། །དེ་ཉིད་ལ་རྒྱུ་སྨྲས་པ་ནི། བདག་ཉིད་འགྲོངས་པའི་ཕྱིར་རོ་ཞེས་བྱ་བ་སྟེ། སངས་རྒྱས་བཅོམ་ལྡན་འདས་རྣམས་ནི་གནོད་པ་མི་མངའ་བའི་ཆོས་ཅན་དང་སྐུ་ཚེ་གཏོང་བ་ལ་མངའ་བརྙེས་པ་ཡིན་ནོ། །གཉིས་པའི་ནི་གཞན་གྱིས་གསོད་པ་ཁོ་ནར་འགྱུར་གྱི་བདག་ཉིད་འཆི་མི་འགྱུར་བ་སྟེ་མངལ་ན་འདུག་པ་ནུར་ནུར་པོ་དང༌། གོར་གོར་བོ་དང། མཁྲང་འགྱུར་དང༌། རྐང་ལག་འགྱུས་པའི་གནས་སྐབས་ན་འདུག་པ་དང༌། སྒོང་ན་འདུག་པ་རྣམས་ལ་བདག་ཉིད་འཆི་བ་མེད་པའི་ཕྱིར་རོ། །གཉིས་ཀ་ནི་བདག་ཉིད་འཆི་བ་དང༌། གཞན་གྱིས་གསོད་པ་ཡིན་ནོ། །འདོད་པ་ན་སྤྱོད་པ་གཞན་དག་ཅེས་བྱ་བ་ནི་གང་དག་བཤད་པར་གྱུར་པ་ལས་གཞན་པ་རྣམས་སོ། །ཕལ་ཆེར་ཞེས་བྱ་བ་སྨོས་པ་ནི་འཆད་པར་འགྱུར་བའི་སྲིད་པ་བར་མ་ལ་སོགས་པ་འདོད་པ་ན་སྤྱོད་པ་རྣམས་ཡོངས་སུ་སྤང་བར་བྱ་བའི་ཕྱིར་རོ། །བཞི་པ་ནི་གཉིས་ཀ་མ་ཡིན་ཞེས་བྱ་བ་སྟེ། བདག་ཉིད་འཆི་བ་མ་ཡིན་ཞིང་གཞན་གྱིས་གསོད་པ་མ་ཡིན་པའོ། །རྒྱལ་པོའི་དྲང་སྲོང་དང༌། ཆོས་ལེན་དང༌། མཆོག་
ཅན། གངྒཱ་ལན་ལ་སོགས་པ་རྣམས་ནི་སྔོན་གྱི་གཏམ་རྒྱུད་རྣམས་ལས་ཁོང་དུ་ཆུད་པར་བྱའོ། །རྒྱལ་བའི་ཕོ་ཉ་ནི་ཇི་སྲིད་ཕོ་ཉའི་དོན་མ་བྱས་པ་དེ་སྲིད་དུ་བདག་ཉིད་འཆི་བ་མ་ཡིན་ཞིང་གཞན་གྱིས་གསོད་བར་མི་འགྱུར་རོ། །རྒྱལ་བས་བསྟན་པ་ནི་དུས་འདི་སྲིད་གཅིག་གི་བར་དུ་འཚོ་བར་འགྱུར་རོ་ཞེས་བྱ་བའི་དུས་དེ་སྲིད་དུ་བདག་ཉིད་འཆི་བ་ཡང་མ་ཡིན་ལ། གཞན་གྱིས་གསོད་བར་ཡང་མི་འགྱུར་རོ། །སྲིད་པ་ཐ་མ་པ་ཞེས་པ་ནི་གང་གི་སྐྱེ་བ་དེ་ཉིད་ལ་དགྲ་བཅོམ་པ་ཉིད་འཐོབ་པར་འགྱུར་བ་སྟེ། དེ་དག་དེ་མ་ཐོབ་པར་བདག་ཉིད་འཆི་བར་ཡང་མི་འགྱུར་ལ། གཞན་གྱིས་གསོང་པར་ཡང་མི་འགྱུར་རོ། །དེ་ལྷུམས་ན་གནས་པ་ཞེས་བྱ་བ་ལ། ཇི་སྲིད་བྱང་ཆུབ་སེམས་དཔའ་ལྷུམས་ན་གནས་པ་དང། འཁོར་ལོས་སྒྱུར་བ་མངལ་ན་གནས་པ་དེ་སྲིད་དུ་ཡུལ་བདག་ཉིད་འཆི་བར་མི་འགྱུར་ལ། གཞན་གྱིས་གསོད་པར་ཡང་མི་འགྱུར་རོ། །ཡང་ཅིའི་ཕྱིར་མདོ་ལས་བཙུན་པ་ཞེས་བྱ་བ་རྒྱས་པར་འབྱུང་ངོ༌། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་གཞན་པ་དག་ན་ནི་ཉོན་མོངས་བ་གཞོམ་པར་བྱ་བའི་ཕྱིར་བདག་ཉིད་འཆི་བ་ནི་རང་གི་ས་པའི་འཕགས་པའི་ལམ་ལ་བརྗོད་དོ། །གཞན་གྱིས་གསོད་པ་ནི་ཉོན་མོངས་པ་གཞོམ་པ་ཁོ་ནའི་དབང་དུ་བྱས་ནས་ས་གོང་མའི་ཉེར་བསྡོགས་ཡིན་ཏེ། དེས་ས་འོག་མ་དག་ལས་འདོད་ཆགས་དང་བྲལ་བར་འགྱུར་བའི་ཕྱིར་རོ། །དེས་ན་གཉིས་ཀ་མེད་དོ་ཞེས་བྱ་བ་ལ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ན་ནི་རང་གི་ས་བའི་འཕགས་པའི་ལམ་ཡང་མེད་པ་ཉིད་ལ་ས་གོང་མའི་ཉེར་བསྡོགས་ཀྱང་མེད་དེ། དེའི་གོང་ན་ས་གཞན་མེད་པའི་ཕྱིར་རོ། །དེ་ལྟ་ན་འོ་ན་ཡང་ཞེས་བྱ་བ་རྒྱས་པར་འབྱུང་བ་ལ། དེ་ན་ཡང་མི་ལྕོགས་པ་མེད་པའི་ས་པའི་འཕགས་པའི་ལམ་པ་གཞན་གྱིས་གསོད་པར་འགྱུར་ཏེ། འདི་ལྟར་ཟག་པ་མེད་པའི་མི་ལྕོགས་པ་མེད་པས་ཐམས་ཅད་ལ་འདོད་ཆགས་དང་བྲལ་བར་འགྱུར་བ་དང༌། འཕགས་པའི་ལམ་ས་བརྒྱད་པོས་རང་དང༌། གོང་མའི་ས་ལ་འདོད་ཆགས་དང་བྲལ་བར་འདོད་པ་དང་སྲིད་པའི་རྩེ་མོར་སྐྱེས་པའི་ཕྱིར་མི་འོང་བ་རྣམས་ཀྱིས་ཅི་ཡང་མེད་པའི་སྐྱེ་མཆེད་མངོན་དུ་བྱས་པར་གྱུར་པ་ལས་ཟག་པ་ཟད་པ་ཡིན་ནོ། །བཤད་པ་འདིར་ཡང་བདག་ཉིད་གཞན་གྱིས་གསོད་པའི་འཆི་བར་འགྱུར་རོ་ཞེས་བྱ་བ་མི་རུང་སྟེ། ཉོན་མོངས་པ་སྤངས་པ་ནི་འཆི་བའམ་མི་འཆི་བའི་རྒྱུ་མཚན་ཅན་མ་ཡིན་ནོ། །སློབ་དཔོན་འདུས་བཟང་ན་རེ། མཆོག་ལ་ཡང་
གཞན་གྱི་སྒྲ་འཇུག་པས། འདིར་ས་དང་ལམ་ཆོས་མཆོག་ཏུ་གྱུར་པས་གཞན་གྱིས་གསོད་བར་མངོན་པར་འདོད་ཀྱི་ས་ཐམས་ཅད་པ་ནི་མ་ཡིན་ནོ། །གང་དུ་དབང་ཉིད་མེད་པ་དེ་གཞན་ཞེས་བརྗོད་དེ། ཐམས་ཅད་ཀྱི་རྟེན་དང་ས་ལ་གནས་པ་ནི་དབང་བ་ཉིད་ཡིན་པས་འདི་ནི་ས་གཞན་མ་ཡིན་ཞེས་བྱའོ། །གལ་ཏེ་མཆོག་གི་ས་པ་ཁོ་ནའི་ལམ་གཞན་གྱིས་གསོད་པ་ཡིན་ནོ། འོ་ན་ས་གཞན་གཉི་ག་མ་ཡིན་པ་ཞེས་བྱ་སྟེ་གཞན་བ་དེ་ལ་འདི་བརྗོད་པར་བྱའོ། །གཉེན་པོ་མཚུངས་པའི་ངོ་བོ་ལ་ནི་ས་གོང་མ་བ་ཁོ་ན་གཞན་གྱིས་གསོད་པར་བརྗོད་དེ་ས་འོག་མ་བ་ནི་མ་ཡིན་ནོ། །འདི་ལ་རྒྱུ་ཅི། དེའི་ཕྱིར་འདི་དང་འདི་ནི་གང་ཅུང་ཟད་ཀྱང་མདོའི་དོན་དུ་མི་རུང་ངོ༌། །འོ་ན་ནི་མཐའ་སྨོས་པས་དེ་ལ་སོགས་པ་གོའོ་ཞེས་བྱ་བ་ལ། དེ་ལ་མཐའ་ནི་འདུ་ཤེས་མེད་འདུ་ཤེས་མེད་མིན་སྐྱེ་མཆེད་དོ། །དེ་ལ་སོགས་པ་ནི་དེ་ལ་སོགས་པ་སྟེ། མཉམ་པར་གཞག་པ་ཉིད་དུ་མཚུངས་པའི་ཕྱིར་བསམ་གཏན་དང་པོའི་བར་ཡིན་གྱི་འདོད་པའི་ཁམས་ནི་མ་ཡིན་ཏེ། མཉམ་བར་མ་བཞག་བའི་ཕྱིར་རོ། །སྙོམས་པར་འཇུག་པ་ནི་བསམ་གཏན་དང་གཟུགས་མེད་པ་གསུམ་མོ། །དེ་ལ་སོགས་པ་ནི་བསམ་གཏན་དང་པོའི་སྙོམས་པར་འཇུག་པ་ནས་ཅི་ཡང་མེད་པའི་སྐྱེ་མཆེད་དང་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྙོམས་པར་འཇུག་པའི་བར་ཏེ་དེ་ལ་སོགས་པ་གོ་བའོ། །སྲིད་པའི་རྩེ་མོར་སྐྱེས་པ་ལྟར་དེ་ལ་སོགས་པ་སྐྱེས་པ་རྣམས་ཀྱང་བདག་ཉིད་འཆི་བར་མི་འགྱུར་ལ། གཞན་གྱིས་གསོད་བར་ཡང་མི་འགྱུར་རོ། །གཞན་ལས་ཀྱང་དེ་ལྟ་བུའི་མཚན་ཉིད་ཅན་གྱི་བསྟན་པ་ཡོད་དོ་ཞེས་བསྟན་པའི་ཕྱིར་ལ་ལར་ནི་མཐའ་ཡང་དང་པོར་ཞེས་རྒྱ་ཆེར་འབྱུང་སྟེ། འདིར་དང་པོ་ནི་ཚངས་རིས་ཀྱི་ལྷ་དག་ཡིན་ལ། མཐའ་ནི་ཚངས་པ་མདུན་ན་འདོན་དག་དང༌། ཚངས་པ་ཆེན་པོ་དག་སྟེ་བདེ་བ་སྐྱེ་བ་དང་པོས་བསྡུས་པའི་ཕྱིར་རོ། །ལ་ལར་དང་པོ་ཡང་མཐའ་གོ་སྟེ་ཞེས་རྒྱ་ཆེར་འབྱུང་བ་ལ། འདིར་མཐའ་ནི་འོད་གསལ་བ་རྣམས་ཏེ་དེ་སྨོས་པས་དེའི་དང་པོ་ཚད་མེད་འོད་པ་རྣམས་དང༌། འོད་ཆུང་པ་རྣམས་རྟོགས་པར་འགྱུར་ཏེ། བདེ་བ་སྐྱེ་བ་གཉིས་པས་བསྡུས་པའི་ཕྱིར་རོ། །འདི་ལྟ་སྟེ་ཞེས་བྱ་བའི་སྒྲ་ནི་དཔེ་བརྗོད་པའི་ཕྱིར།
འདི་མཚན་ཉིད་ཀྱི་སྒྲ་མ་ཡིན་ནོ། །ལྷག་མ་གོ་ཞེས་བྱ་བ་ནི་ཚངས་པ་མདུན་ན་འདོན་དང་ཚངས་ཆེན་གོ་བའོ། །ཚད་མེད་འོད་ཀྱང་གོ་བ་ཅིའི་ཕྱིར་ཞེ་ན། དཔེའི་ཆོས་ནི་གང་གཅིག་ཡིན་ཀྱང་ཞེས་རྒྱ་ཆེར་འབྱུང་སྟེ། གཅིག་དཔེ་ཉིད་དུ་བརྗོད་ན། དེའི་རིགས་ཅན་གཞན་ཡང་ཡོད་ན་འདི་ལྟ་སྟེ་ཞེས་བྱ་བའི་སྒྲ་དེ་ཡང་འདི་ན་མེད་དོ། །འདིར་འདི་ལྟ་སྟེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བ་རྣམས་ཡིན་ནོ་ཞེས་མ་གསུངས་ཏེ། དེའི་ཕྱིར་འདི་ལྟ་སྟེ་ཚངས་རིས་ཀྱི་ལྷ་དག་ལྟ་བུའོ་འདི་ལྟ་སྟེ་འོད་གསལ་གྱི་ལྷ་དག་ལྟ་བུ་སྟེ་ཞེས་བྱ་བ་འདི་ནི་ཉེ་བར་སྦྱར་དུ་མི་རུང་ངོ༌། །གལ་ཏེ་འདི་ལྟ་སྟེ་ཞེས་བྱ་བའི་སྒྲ་འདི་དཔེར་བརྗོད་པ་ཡིན་ན་ནི། འདི་ལྟ་སྟེ་མི་རྣམས་དང་ལྷ་ཁ་ཅིག་གོ་ཞེས་བྱ་བ་འདིར་ཐོབ་པར་མི་འགྱུར་རོ། །ཅིའི་ཕྱིར་ཞེ་ན། གང་གི་ཕྱིར་འདི་ལྟ་སྟེ་ཞེས་བྱ་བའི་སྒྲ་འདི་མི་རྣམས་དང༌། ཁ་ཅིག་དཔེར་གྱུར་པ་དག་དང་དཔེ་ལས་བྱུང་བའི་དོན་འགའ་ཡང་སྦྲེལ་བར་མི་བྱེད་དེ། ལུས་ཐ་དད་ཅིང་འདུ་ཤེས་ཐ་དད་པ་ཉིད་མ་ལུས་པ་དག་བསྟན་པའི་ཕྱིར་རོ། །དེ་ལྟ་བས་ན་འདི་ནི་ཉེ་བར་བསྟན་པའི་དོན་ཞེས་བྱ་བ་ལ། ལུས་ཐ་དད་ཅིང་འདུ་ཤེས་ཐ་དད་པ་དེ་དག་འདི་ལྟ་སྟེ་ཞེས་བྱ་བའི་སྒྲ་འདིས་ཉེ་བར་སྟོན་པ་དེ་བཞིན་དུ་འདིར་ཡང་མཐའ་སྨོས་པས་དེ་ལ་སོགས་པ་གོའོ། །དཔེར་ན་ཚངས་རིས་ཀྱི་ལྷ་ལྟ་བུ་སྟེ་ཞེས་བྱ་བ་དང༌། འོད་གསལ་གྱི་ལྷ་རྣམས་ལྟ་བུ་སྟེ་ཞེས་བྱ་བའི་མདོའི་འདི་ལྟ་སྟེ་ཞེས་བྱ་བའི་སྒྲ་འདི་ཡང་ཉེ་བར་བསྟན་པའི་དོན་ཁོ་ན་ཡིན་ནོ་ཞེས་བྱ་བའི་ཐལ་བ་མཐོང་བ་ཡིན་ནོ། །ཁ་ཅིག་ཏུ་སྲིད་པའི་རྩེ་མོ་ལས་གཞན་པའི་བསམ་གཏན་དང་གཟུགས་མེད་པ་རྣམས་སེམས་སོ། །རྩེག་མོས་མྱོས་པ་དང་ཡིད་འཁྲུགས་པའི་སེམས་ཅན་དེ་དག་ལྟར་དེ་དང་འདྲ་པའི་ཉོན་མོངས་པའི་ཤུགས་བསྐྱེད་པས་དེ་རྣམས་གནས་དེ་དག་ནས་འཆི་འཕོ་བས་འགྱུར་ཏེ། དེའི་ཕྱིར་དེ་དག་ནི་བདག་ཉིད་གསོད་པར་འགྱུར་རོ། །སྲིད་པའི་རྩེ་མོ་ནི་དེ་ལྟར་མ་ཡིན་ཏེ་དེའི་ཕྱིར་དེར་ནི་བདག་ཉིད་འཆི་བ་མ་ཡིན་ལ་གཞན་གྱིས་གསོད་པ་ཡང་མ་ཡིན་ནོ་ཞེས་བཤད་དེ་སྲོག་བཤད་ཟིན་ཏོ། །དེའི་མཇུག་ཐོགས་སུ་མཚན་ཉིད་རྣམས་སྟོན་ཏེ། སྲོག་དང་མཚན་
ཉིད་རྣམས་དང་ནི་ཞེས་འབྱུང་བ་དེའི་ཕྱིར་མཚན་ཉིད་རྣམས་ཁོ་ན་བསྟན་པར་བྱ་སྟེ། མཚན་ཉིད་དག་ནི་སྐྱེ་བ་དང༌། །ཞེས་རྒྱ་ཆེར་འབྱུང་ངོ༌། །འདུས་བྱས་སུ་མངོན་ནོ་ཞེས་བྱ་བ་ནི་འདུས་བྱས་སུ་མཚོན་པར་བྱེད་པའོ། །འདི་སྐད་བསྟན་པར་འགྱུར་ཏེ། འདི་དག་འདུས་བྱས་ཀྱི་ངོ་བོར་གསལ་བར་བྱེད་པ་ཡིན་པའི་ཕྱིར་འདུས་བྱས་ཀྱི་མཚན་ཉིད་རྣམས་སོ། །བཟློག་པ་ནི་གང་ལ་མེད་པའོ། །དེ་ལ་སྐྱེ་བས་ནི་ཆོས་དེ་སྐྱེད་པར་བྱེད་དོ་ཞེས་བྱ་བ་ལ་འདུ་བྱེད་ཐམས་ཅད་ཉིད་ཀྱི་སྐྱེ་བའི་སྐྱེ་བར་བརྗོད་པ་འདིར་ནི་བྱེ་བྲག་པའི་སྐྱེ་བ་གེགས་མེད་པའི་རྒྱུས་བསྐྱེད་པར་མངོན་པར་འདོད་དོ། །དེས་ཡོངས་སུ་གཟུང་བའི་དངོས་རྣམས་སྐྱེ་བས་ན་འདིར་ཡོངས་སུ་གཟུང་བའི་དངོས་པོ་སྐྱེད་པར་བྱེད་དོ། །འགའ་ཞིག་ནི་ཆོས་ཀྱི་དངོས་པོའི་རྐྱེན་གཙོ་བོའོ། །གནས་པས་ནི་གནས་པར་བྱེད་དོ་ཞེས་བྱ་བ་ནི། སྐྱེས་ལ་མ་འགགས་པ་འབྲས་བུ་འཕེན་པ་གེགས་མེད་པར་གནས་པར་བྱེད་པའོ། །དེར་ཡང་ཆེས་ཉེ་བའི་རྒྱུ་གནས་པ་ཡིན་པས་གནས་པར་བྱེད་དོ་ཞེས་བྱའོ། །རྒ་བས་ནི་རྒས་པར་བྱེད་དོ་ཞེས་བྱ་བ་ནི་སྟོབས་ཆུང་བར་བྱེད་དེ། འཇིག་པ་ལ་མངོན་དུ་ཕྱོགས་པའི་གནས་སྐབས་སུ་བྱེད་ཅེས་བྱ་བའི་ཐ་ཚིག་གོ །སློབ་དཔོན་འདུས་བཟང་ན་རེ་འགྲོ་བ་རྣམས་ཀྱི་འདུ་བྱེད་ཀྱི་རྒྱུད་ཕྱི་མ་ཕྱི་མ་སྔ་མ་ལས་རྣམ་པ་གཞན་དུ་བྱེད་པའོ་ཞེས་ཟེར་རོ། །ད་ལྟར་ཡང་སྐད་ཅིག་མ་དང་པོ་དགའ་བ་མེད་ཅིང༌། སྔ་མའི་ཆོས་དགའ་བ་ལས་ཕྱི་མའི་ཆོས་ཀྱི་བྱ་བ་སྐྱེ་བ་ལ་སོགས་པ་ལྟ་བུ་ནི་མཚན་ཉིད་དུ་མི་རུང་ངོ༌། །མི་རྟག་པ་ཉིད་ཀྱིས་ནི་འཇིག་པར་བྱེད་དོ་ཞེས་བྱ་བ་ལ། འདུ་བྱེད་འགོག་པ་ལ་ལྷན་ཅིག་སྐྱེ་བའི་རྒྱུ་ཁྱད་པར་དུ་འཕགས་པ་ནི་མི་རྟག་པ་ཉིད་དོ། །མདོ་ལས་གསུམ་པོ་འདི་དག་ནི་ཞེས་བྱ་བ་ལ། མདོ་ལས་ནི་འདུས་བྱས་ཀྱི་མཚན་ཉིད་ནི་གསུམ་གསུངས་སོ། །གལ་ཏེ་འདུས་བྱས་ཀྱི་མཚན་ཉིད་བཞི་ཡིན་ན་ནི་དེར་བཞི་པ་ཡང་བརྗོད་པར་འགྱུར་ན། གསུངས་པ་ཡང་མ་ཡིན་ལ། མདོ་ནི་ཚད་མ་ཡང་ཡིན་ཏེ། དེའི་ཕྱིར་འདུས་བྱས་ཀྱི་མཚན་ཉིད་ནི་གསུམ་ཁོ་ན་ཡིན་ནོ། །བཞི་པ་མ་བསྟན་པ་མི་སྲིད་དོ་སྙམ་སྟེ་འདྲི་བ་ནི་དེར་གང་ཞིག་མ་གསུངས་ཞེས་བྱ་བའོ། །གནས་པ་ནི་གཞན་དུ་འགྱུར་བ་ཉིད་ཀྱི་ཁྱད་པར་ཉིད་དུ་ཉེ་
བར་བླངས་པས་འདུས་བྱས་ཀྱི་མཚན་ཉིད་དུ་ཉེ་བར་མ་བླངས་སོ་སྙམ་དུ་བསམས་པའོ། །གནས་པ་དང་གཞན་དུ་འགྱུར་བ་ནི་གནས་པ་དང་གཞན་དུ་འགྱུར་བའོ་སྙམ་དུ་བསམས་ནས་འོ་ན་ནི་ཞེས་བྱ་བ་རྒྱས་པར་སྨོས་སོ། །འདི་ནི་རྒ་བའི་རྣམ་གྲངས་ཡིད་ཏེ་ཞེས་བྱ་བ་ལ་སོགས་པ་ལ། ཇི་ལྟར་དངོས་པོ་འབྱུང་བས་སྐྱེ་བའི་རྣམ་གྲངས་འབྱུང་བ་ཡིན་པ་དང༌། དངོས་པོ་འཇིག་པས་མི་རྟག་པ་ཉིད་ཀྱི་འཇིག་པ་ཡིན་པ་དེ་བཞིན་དུ་དངོས་པོ་གནས་སྐབས་གཞན་དུ་བསྒྲུབ་པའི་ཕྱིར་གནས་པ་གཞན་དུ་འགྱུར་པ་ཉིད་ནི་རྒ་བའི་རྣམ་གྲངས་ཡིན་ནོ། །མདོ་ལས་ནི་ཡིད་བྱུང་བའི་བྱ་བའི་ཕྱིར་ཆོས་གང་དག་ཅེས་བྱ་བ་རྒྱས་པར་འབྱུང་སྟེ། མདོ་ལས་བསྙན་པ་ནི་དགོངས་ཅན་ཡིན་གྱི་མཚན་ཉིད་པ་མ་ཡིན་ལ། ཆོས་མངོན་པ་ལས་བྱུང་བ་ནི་མཚན་ཉིད་པ་ཡིན་གྱི་དགོངས་པ་ཅན་མ་ཡིན་པས་འགལ་བ་མེད་དོ། །ཡང་དུས་འཕོ་བས་ཞེས་བྱ་བ་འདི་ཅི་ཞིག་ཅེ་ན། མ་འོངས་པར་གྱུར་ནས་ད་ལྟ་བར་འགྱུར་བ་དང༌། ད་ལྟར་བར་གྱུར་ནས་འདས་པར་འགྱུར་བ་གང་ཡིན་པའོ། །སྐྱེ་བས་ནི་འདུ་བྱེད་རྣམས་ཞེས་བྱ་བ་རྒྱས་པར་འབྱུང་བ་ལ། སྐྱེ་བ་ལ་སོགས་རྣམས་ལ་དུས་སྤོ་བར་བྱ་བ་ལ་ནུས་པ་ཡོད་དོ་ཞེས་བྱ་བར་ཇི་ལྟར་རྟོགས་ཤེ་ན། དེ་དག་གི་ནུས་པ་གང་ཡིན་པ་ནི་མངོན་སུམ་ཉིད་ཀྱིས་རྟོགས་ཏེ། གལ་ཏེ་དེ་དག་མེད་ན་ཇི་ལྟར་འདས་པ་དང༌། མ་འོངས་པ་འདུས་བྱས་སུ་རྟོགས། འདུས་མ་བྱས་ཀྱང་རང་གི་མཚན་ཉིད་ལ་གནས་པ་ཡོད་པའི་ཕྱིར་ཞེས་བྱ་བ་ལ། དེའི་ཕྱིར་གནས་པས་འདུས་བྱས་སུ་མི་རྟོགས་ཏེ་འཁྲུལ་པའི་ཕྱིར་རོ། །གནས་པ་ནི་འདུས་བྱས་དང་འདུས་མ་བྱས་ཀྱི་ཕྱོགས་ལ་བརྟེན་པའི་ཕྱིར་གདུལ་བྱ་རྣམས་འདུས་མ་བྱས་ལ་ཡང་འདུས་མ་བྱས་ལྟར་རམ། འདུས་བྱས་ལ་ཡང་འདུས་མ་བྱས་ལྟར་རྟོགས་པར་འགྱུར་ན་མི་རུང་བས་ཐེ་ཚོམ་མི་ཟ་བར་བྱ་བའི་ཕྱིར་དེ་མ་སྨོས་ལ། གང་དག་འདུས་བྱས་མི་འཁྲུལ་བ་དེ་དག་ནི་མདོ་ལས་འདུས་བྱས་ཀྱི་མཚན་ཉིད་དུ་གསུངས་སོ། །འདི་ཉིད་ཆོས་མངོན་པ་ལ་ཡང་ཐལ་བར་འགྱུར་བ་མ་ཡིན་ནམ་ཞེ་ན་ཐལ་བར་འགྱུར་བ་མེད་དེ། འདུས་མ་བྱས་རྣམས་ཀྱི་རང་བཞིན་ཐ་དད་དུ་གནས་པར་ཁས་མ་བླངས་པའི་ཕྱིར་རོ། །འདུས་བྱས་རྣམས་ཀྱང་འདས་པ་ལ་སོགས་པའི་དངོས་པོའི་རང་བཞིན་གྱིས་གནས་ཕྱིར་རོ། །གནས་པ་དང་རྒོལ་བ་བསྡུས་ཏེ་ཞེས་རྒྱ་ཆེར་
འབྱུང་ངོ༌། །འདི་ལྟར་མ་ཡིན་ན་ནི་གཞན་དུ་འབྱུང་བ་ཙམ་ཞིག་གསུངས་པར་འགྱུར་ཏེ། འདིར་གནས་པའི་ཚིག་གིས་དགོས་པ་ཅུང་ཟད་ཀྱང་མི་རྙེད་པའི་ཕྱིར་རོ། །དེ་ལྟར་བསྟན་ན་འདུས་བྱས་ཀྱིས་གནས་བ་གཞན་དུ་འགྱུར་བ་ཉིད་དུ་མངོན་ཏེ། འདུས་མ་བྱས་ཀྱི་གནས་པ་ལ་ནི་དེ་མེད་དོ། །སྐྱེ་བ་ལ་སོགས་པ་དེ་དག་ཀྱང་རྩ་བའི་ཆོས་ལྟར་ཡིན་པའི་ཕྱིར་སྐྱེ་བ་ལ་སོགས་པ་གཞན་དག་ཀྱང་ཡོད་པར་འགྱུར་རོ་ཞེ་ན། དེ་དག་སྐྱེ་བའི་སྐྱེ་ལ་སོགས། །ཞེས་འབྱུང་བ་ལ་ཁ་ཅིག་ངེས་པར་གཟུང་བར་བྱ་བའི་ཕྱིར་དུ་དེ་དག་ལ་དེ་དག་ཁོ་ན་ཡོད་ཀྱི་དེ་དག་ལ་གཞན་ནི་མ་ཡིན་ནོ་ཞེས་ཀྱང་གི་སྒྲ་འདོན་པར་བྱེད་དོ། །བཅོམ་ལྡན་འདས་ཀྱིས་གང་ལས་མཐུན་པའི་མཚན་ཉིད་རྣམས་གསུངས་ཤེ་ན། སྐྱེ་བ་ལ་སོགས་པ་རྣམས་འདུས་བྱས་ཡིན་པའི་ཕྱིར་དང༌། སྐྱེ་བའི་སྐྱེ་བ་ལ་སོགས་པ་རྣམས་ཀྱང་སྐྱེ་བ་ལ་སོགས་པའི་བདག་ཉིད་ཡིན་པའི་ཕྱིར་འདུས་བྱས་སྐྱེ་བར་ཡང་མངོན་ཞེས་བྱ་བ་ལ་སོགས་པར་མཚན་ཉིད་ཀྱིས་མདོ་ཉིད་ལས་གསུངས་པ་མ་ཡིན་ནམ། ཇི་ལྟར་འདིར་མཐུན་པའི་མཚན་ཉིད་རྣམས་འདིར་ཁོང་དུ་ཆུད་པར་འགྱུར། ཐམས་ཅད་ལ་ཡང་ཞེས་བྱ་བ་ནི་འགལ་བའི་ཕྱིར་རོ། །འདུས་བྱས་སྐྱེ་བར་ཡང་མངོན་ལ། ཡང་གི་སྒྲས་ནི་གཞན་གཉིས་ལ་ཡང་དེ་དག་འདྲའོ། །དེ་ལྟ་མ་ཡིན་ན་གསུམ་ཀ་ལ་ཡང་གི་སྒྲ་གསུངས་པ་ལ་དགོས་པ་ཅུང་ཟད་ཀྱང་མེད་དོ། །རེ་རེ་ལ་ཡང་མཚན་ཉིད་བཞིར་འགྱུར་བ་མ་ཡིན་ནམ་ཞེ་ན་འདུས་བྱས་ཡིན་པའི་ཕྱིར་རྩ་བའི་ཆོས་བཞིན་ནོ། །དེ་དག་ལ་ཡང་སྐྱེ་བ་ལ་སོགས་པ་གཞན་ཡོད་པར་ཞེས་བྱ་བ་ནི་དེ་དག་ལས་གཞན་པའོ། ཡང་ན་རྩ་བའི་སྐྱེ་བ་ལ་སོགས་པ་རྣམས་ལ་ཡང་སྐྱེ་བའི་སྐྱེ་བ་ལ་སོགས་པ་ཁས་བླངས་པར་མི་བྱའོ་ཞེ་ན་མི་འགྱུར་ཏེ། དེ་ཆོས་བརྒྱད་དང་གཅིག་ལ་འཇུག་ཅེས་བྱ་བ་རྒྱས་པར་འབྱུང་ངོ༌། །འཇུག་པ་ཞེས་བྱ་བའི་སྒྲ་ནི་གནས་པ་དང་བྱེད་པ་ཡིན་པས་འདྲི་བ་ནི་འཇུག་པ་ཞེས་བྱ་བ་འདི་ཅི་ཞེ་ན་ཞེས་བྱ་བའོ། །ཕྱི་མ་ཕྱི་མ་བཤད་པ་ཡིན་པར་བསམས་ཏེ་སྨྲས་པ་ནི་བྱེད་པ་སྟེ་སྐྱེས་བུའི་རྩལ་པོ་ཞེས་བྱ་བའི། །དེ་ལ་སྐྱེ་བ་ནི་རང་གི་བདག་ཉིད་ལ་བྱེད་པ་འགལ་བའི་ཕྱིར་བདག་ཉིད་མ་གཏོགས་པ་ཆོས་གཞན་བརྒྱད་མ་འོངས་པའི་དུས་སྤོ་བ་ལ་བརྗོད་དོ། །གནས་
པའི་འཇུག་པ་ནི་སྐྱེ་བས་ན་ད་ལྟར་བ་ཉིད་དུ་དྲངས་པའི་ཚེ་བདག་ཉིད་མ་གཏོགས་པ་ལྷག་མ་གནས་པར་བྱེད་པ་སྟེ། སྐྱེ་བའི་མཚན་ཉིད་མེད་པར་ནི་དེ་དག་གནས་པར་མི་འགྱུར་བའི་ཕྱིར་རོ། །རྒ་བའི་འཇུག་པ་ནི་དེ་དག་གནས་པར་གྱུར་པའི་ཚེ་བདག་ཉིད་མ་གཏོགས་པའི་ནུས་པ་འཇོམས་པར་བྱེད་པ་སྟེ། དེ་ལྟ་མ་ཡིན་ན་དེ་དག་བྱ་བ་བྱེད་པའི་ནུས་པ་མ་བཅོམ་པའི་ཕྱིར་འགག་པ་ཉིད་དུ་མི་འགྱུར་རོ། །མི་རྟག་པ་ཉིད་ཀྱིས་འཇུག་པ་ནི་ནུས་པ་ཉམས་པའི་ཚེ་བདག་ཉིད་མ་གཏོགས་ལ་འདས་པའི་དུས་སུ་སྦོ་བའོ། །སྐྱེ་བའི་སྐྱེ་བ་ལ་སོགས་པ་ནི་ཆོས་གཅིག་ལ་ཞེས་བྱ་བ་ལ་སྐྱེ་བའི་སྐྱེ་བ་ཁོ་ན་ལ་འཇུག་གི་གཞན་ལ་ནི་མ་ཡིན་ནོ། །མི་རྟག་པ་ཉིད་ཀྱི་མི་རྟག་པ་ནི་མི་རྟག་པ་ཉིད་ཁོ་ན་ལ་འཇུག་པའི་བར་ཡང་དེ་དང་འདྲའོ། །སྐྱེ་བ་ལ་སོགས་པ་རྣམས་དང་སྐྱེ་བའི་སྐྱེ་བ་ལ་སོགས་པ་རྣམས་ནུས་པ་ཐ་དད་པས་ཆོས་བརྒྱད་དང་གཅིག་ལ་འཇུག་པ་ཉིད་དེ། དཔེར་ན་ཚོར་བས་ཕན་པ་དང་གནོད་པ་ལས་བྱུང་བའི་ཁྱད་པར་ལས་ཡིད་ཀྱི་རྣམ་པར་ཤེས་པ་དང་མིག་གི་རྣམ་པར་ཤེས་པ་ཡུལ་མང་བ་དང་ཉུང་བ་ཉིད་ཡིན་པ་བཞིན་ནོ། །ཡང་ན་འབྲས་བུ་ཐ་དད་པ་ལས་རིགས་ཐ་དད་པ་ཡང་མཐོང་ངོ༌། །དེ་ལྟ་བས་ན་ཐུག་པ་མེད་པར་ཞེས་རྒྱ་ཆེར་འབྱུང་སྟེ། འདུས་བྱས་ཀྱི་མཚན་ཉིད་དངོས་པོ་བ་མ་ཡིན་པའི་ཕྱིར་ནམ་མཁའ་འདྲལ་བའམ་རྣམ་པར་འབྱེད་པར་བྱེད་ཅེས་པའོ། །ཇི་ལྟར་རྣམ་པར་འབྱེད་པ་ལྟར་ཞེས་བྱ་བ་ལ། ཇི་ལྟར་རྣམ་པར་འབྱེད་པར་བྱེད་ཅེ་ན། སྐྱེ་བས་ནི་བདག་ཉིད་མ་གཏོགས་པ་ཆོས་གཞན་བརྒྱད་སྐྱེད་པར་བྱེད་ལ། སྐྱེ་བའི་སྐྱེ་བས་ནི་དེ་ཁོ་ན་སྐྱེད་པར་བྱེད་པ་སྟེ། དེ་བཞིན་དུ་གཞན་དག་ལ་ཡང་བརྗོད་པར་བྱའོ། །ཅི་དེ་དག་རྣམ་པར་ཕྱེ་བ་ལས་རྫས་སུ་ཡོད་དམ་ཞེ་ན་སྨྲས་པ་མ་ཡིན་ནོ། །འོ་ན་ཚིག་འདི་ལ་ནུས་པ་ཅི་ཡོད་ཅེ་ན་ནུས་པ་འདི་ཡོད་དེ། གཞན་གྱི་བྱ་བ་དང་བྱེད་པའི་དངོས་པོས་རྫས་སུ་ཡོད་པ་དག་ཏུ་རྣམ་པར་ཕྱེ་ན། བྱ་བ་དང་བྱེད་པའི་རྣམ་པར་དབྱེ་བ་ཙམ་གྱི་སྒོ་ནས་དེ་དག་རྫས་སུ་ཡོད་པར་འགྱུར་བ་ཡང་མ་ཡིན་ནོ། །འོ་ན་ཅི་ཞེ་ན། མངོན་སུམ་མ་མ་རྗེས་དཔག་གམ་ཡིད་ཆེས་པའི་ལུང་ལས་ཡིན་ནོ། །དེ་ཉིད་ཀྱི་ཕྱིར་ཚད་མ་མེད་པའི་ཕྱིར་ཞེས་འཆད་དེ། ཚིག་ཙམ་ལ་དད་པར་མི་འགྱུར་བས་དེའི་ཕྱིར་རྒྱུ་དྲིས་པ་ནི། ཅིའི་
ཕྱིར་ཞེ་ན་ཞེས་བྱ་བའོ། །ཚད་མ་མིན་པའི་ཕྱིར་ཏེ་ཞེས་བྱ་བ་རྒྱས་པར་འབྱུང་བ་ལ། ཇི་ལྟར་གཟུགས་ལ་སོགས་པ་ཞེས་བྱ་བ་ནི་ཆོས་མི་མཐུན་པའི་དཔེ་ཡིན་ནོ། །དེ་ལ་རེ་ཞིག་གཟུགས་ཡོད་པ་ཉིད་ལ་ནི་ཚད་མ་མངོན་སུམ་ཡིན་ནོ། །མིག་ཡོད་པ་ཉིད་ལ་ནི་མིག་གི་རྣམ་པར་ཤེས་པ་རྗེས་སུ་དཔག་པ་ཡིན་ནོ། །གཉིས་ཀ་ཡོད་པ་ནི་མིག་དང་རྣམ་པར་ཤེས་པ་དག་གོ །གཟུགས་དང་བཞེས་བྱ་བ་ནི་ལུང་ངོ༌། །དེ་བཞིན་དུ་མིག་དང་གཟུགས་དག་ལ་ཡང་རྒྱ་ཆེར་བ་ལྟ་བར་བྱའོ། །དེ་བཞིན་དུ་སྒྲ་ལ་སོགས་པ་རྣམས་ལ་ཡང་སྦྱར་རོ། །ཡང་ན་ཇི་ལྟར་གཟུགས་ལ་སོགས་པ་རྣམས་ཞེས་བྱ་བ་ལ་སོགས་པ་ལ་སོགས་པ་སྨོས་པ་ནི་ཚོར་བ་ལ་སོགས་པ་རྣམས་གཟུང་ངོ༌། །དེ་མ་ཚོར་བ་ཡོད་པ་ཉིད་ལ་ནི་དེའི་མཇུག་ཐོགས་སུ་འབྱུང་བ་དེ་ཡོངས་སུ་གཅོད་པར་བྱེད་པ་ཡིད་ཀྱི་རྣམ་པར་ཤེས་པ་ནི་མངོན་སུམ་ཚད་མ་ཡིན་ནོ། །ལུས་ལ་རྣམ་པར་དཔྱད་པས་གཞན་གྱི་རྒྱུད་ལ་བདེ་བ་དང་སྡུག་བསྔལ་མྱོང་བར་རིག་པ་ནི་རྗེས་སུ་དཔག་པའོ། །མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེའོ་ཞེས་བྱ་བ་ནི་ལུང་ངོ༌། །ལྷན་ཅིག་སྐྱེས་པའི་ཚོར་བ་ཞེས་རྒྱས་པར་འབྱུང་སྟེ། དེ་བཞིན་དུ་མིག་གིས་གཟུགས་རྣམས་མཐོང་ནས་ཡིད་བདེ་བར་གནས་ཞེས་རྒྱ་ཆེར་འབྱུང་ངོ༌། །དེ་བཞིན་དུ་འདུ་ཤེས་ལ་སོགས་པ་རྣམས་ལ་ཡང་སྦྱར་རོ། །སྐྱེ་བ་ལ་སོགས་པ་དག་ནི་མིག་ལ་སོགས་པས་གཟུང་བར་བྱ་བ་མ་ཡིན་ལ། དེ་དག་ཡོད་པ་ཉིད་ལ་ནུས་པ་དང་ལྡན་པའི་རྗེས་སུ་དཔག་པ་ཡང་ཡོད་པ་མ་ཡིན་ཞིང་རྫས་སུ་ཡོད་པ་ཉིད་ལ་ལུང་ཡང་ཡོད་པ་མ་ཡིན་ནོ། །ཅི་གང་ལས་བཏགས་པར་ཡོད་པ་ཉིད་དུ་འགྱུར་བ་དེ་དག་བཏགས་པ་ཉིད་དུ་ཁས་ལེན་པའི་ཚད་མ་ཡོད་དམ་ཞེ་ན་ཡོད་དེ། ཆོས་གང་དག་རྫས་སུ་ཡོད་པ་ཉིད་ལ་ཚད་མ་དམིགས་ཤིང་ཡོད་དོ་ཞེས་བྱ་བར་ཀུན་ཏུ་ཐ་སྙད་འདོགས་པ་དེ་དག་ནི་བཏགས་པར་ཡོད་པ་ཡིན་ཏེ་བུམ་པ་ལ་སོགས་པ་བཞིན་ནོ་ཞེས་བྱ་བར་ངེས་སོ། །འོ་ན་གང་མདོ་ལས་ཞེས་རྒྱས་པར་འབྱུང་བ་ལ། སྐྱེ་བ་ལ་སོགས་པ་རྣམས་ལ་ཡང་རྒྱུན་ཡོད་དོ་ཞེས་ལུང་གིས་སྟོན་པར་བྱེད་དོ་ཞེ་ན། ལུང་འདི་ཡོད་མོད་ཀྱི་འདུས་བྱས་ཀྱི་སྐྱེ་བ་ལ་སོགས་པ་དག་རྫས་སུ་ཡོད་དོ་ཞེས་བྱ་བ་འདིའི་དོན་ནི་མ་ཡིན་ནོ། །དེ་ཉིད་ཀྱི་ཕྱིར་ཚིག་ཤེས་པ་ནི་ལྷ་རྣམས་དགའ་བ་ཡིན་གྱི་ཞེས་བྱ་བ་ལ་སོགས་པའོ། །དོན་ལས་རྟོན་པར་གསུངས་སོ་ཞེས་བྱ་
བ་ནི་དོན་ལ་རྟོན་པར་བྱའི་ཚིག་ལ་ནི་མ་ཡིན་ནོ་ཞེས་བྱའོ། །འདིའི་དོན་གང་ཡིན་ཞེ་ན་ཞེས་བྱ་བ་སྟེ། གང་འདི་མདོ་ལས་འདུས་བྱས་སྐྱེ་བར་ཡང་མངོན་ནོ་ཞེས་བྱ་བ་ལ་སོགས་པའོ། །མ་རིག་པས་མདོངས་པའི་བྱིས་པ་རྣམས་ཞེས་རྒྱ་ཆེར་འབྱུང་བ་ལ། འདུ་བྱེད་རྣམས་དང་གཟུགས་དང་ཚོར་བ་ལ་སོགས་པ་རྣམས་ཀྱི་རྒྱུན་སྐྱེ་བ་གཅིག་གམ་གནས་སྐབས་ཀྱི་ཁྱད་པར་དག་མ་རིག་པས་བློའི་མིག་ཉམས་པའི་ཕྱིར་རྒྱུན་ཡིན་ནོ་སྙམ་དུ་མི་རྟོགས་སོ། །དེའི་ཕྱིར་དེ་ལ་རྟག་པ་དང་གཅིག་ཉིད་དུ་འཛིན་པ་མངོན་དུ་འགྲོ་བ་ཅན་གྱི་བདག་དང་བདག་གིར་མོས་པ་ཡིན་ལ། དེ་ལས་དེ་ལ་སྲེད་པ་སྐྱེ་ཞིང་དེ་དང་མི་འབྲལ་བར་འདོད་པས་མངོན་པར་ཞེན་ཏེ་ཆགས་པ་ཡིན་ནོ་ཞེས་བྱ་བའི་དོན་ནོ། །དེ་ཞེས་བྱ་བ་ནི་བདག་དང་བདག་གིར་མོས་པ་སྟེ། བཟློག་པར་བྱ་བའི་ཕྱིར་ཞེས་བྱ་བ་ནི་སྤང་བར་བྱ་བའི་ཕྱིར་རོ། །རྟེན་ཅིང་འབྲེལ་བར་འབྱུང་བ་ཉིད་འཆད་པ་ཡིན་ཏེ། འདུས་བྱས་ཉིད་བསྟན་པས་བདག་དང་བདག་གིར་འཛིན་པ་ལྡོག་པར་འགྱུར་རོ། །འདུས་བྱས་ཉིད་དེ་ཡང་སྐྱེ་བ་ལ་སོགས་པ་བསྟན་པ་མེད་པར་ཤེས་པར་མི་ནུས་པའོ། །དེའི་ཕྱིར། གསུམ་པོ་འདི་དག་ནི་ཞེས་བྱ་བ་རྒྱས་པར་བཤད་དོ། །ཡང་ཇི་ལྟར་མཚན་ཉིད་འདི་དག་རྒྱུན་ཁོ་ན་ལ་བཤད་ཀྱི། སྐད་ཅིག་ལམ་ཡིན་པར་ཤེས་ཤེ་ན། དེ་ཉིད་ཀྱི་ཕྱིར། སྐད་ཅིག་མ་ལ་ནི་སྐྱེ་བའི་སྐྱེ་པ་ལ་སོགས་པ་མི་མངོན་ནོ་ཞེས་བྱ་བ་སྨོས་ཏེ། སྐད་ཅིག་མ་ཉིད་ངེས་པར་མ་ཟིན་པའི་ཕྱིར་རོ། །བསྡུས་པར་ཡང་མིན་ཏེ་ཕན་ཚུན་འགལ་བའི་ཕྱིར་རོ། །སྐད་ཅིག་མ་ལ་མི་མངོན་པ་དག་ནི་དེའི་མཚན་ཉིད་ཡིན་པར་འོས་པ་ཡང་མ་ཡིན་ཏེ། འདིས་མཚོན་པར་བྱེད་པས་ན་མཚན་ཉིད་ཡིན་ན། རང་ཉིད་མ་ཤེས་པ་ནི་གཞན་མཚོན་པར་བྱེད་པ་མ་ཡིན་ནོ། །དེ་ཉིད་ཀྱི་ཕྱིར་མདོ་ལས་ཞེས་བྱ་བ་རྒྱས་པར་འབྱུང་བ་ལ། གང་གི་ཕྱིར་རྒྱུན་ལ་སོགས་པ་དག་མངོན་གྱི། སྐད་ཅིག་མ་ལ་མ་ཡིན་པ་དེའི་ཕྱིར་མདོ་ལས། འདུས་བྱས་སྐྱེ་བར་ཡང་མངོན་ཞེས་བྱ་བ་རྒྱས་པར་འབྱུང་ངོ༌། །གལ་ཏེ་མདོར་སྐད་ཅིག་ལ་མངོན་པར་བཞེད་པར་གྱུར་ན་ནི་དེའི་ཕྱིར་སྐྱེ་བ་ཡང་འདུས་བྱས་ཀྱི་མཚན་ཉིད་ཡིན། འཇིག་པ་དང་གནས་པ་གཞན་དུ་འགྱུར་བ་ཡང་འདུས་བྱས་ཀྱི་མཚན་ཉིད་ཡིན་ཞེས་དེ་སྐད་གསུང་པར་འགྱུར་ན་གསུངས་པ་ཡང་མ་
ཡིན་ཏེ། སྐད་ཅིག་ལ་མི་མངོན་པའི་ཕྱིར་རོ། །ཡང་འདུས་བྱས་ཞེས་སྨོས་པ་ནི་ཞེས་བྱ་བ་རྒྱས་པར་འབྱུང་བ་ལ། འདུས་བྱས་ཀྱི་མཚན་ཉིད་དག་ཡིན་ནོ་ཞེས་འདུས་བྱས་སྨོས་པ་གཉིས་པ་ནི་འདི་དག་ནི་འདུས་བྱས་ཀྱི་མཚན་ཉིད་ཡིན་ནོ་ཞེས་བྱ་བར་ཤེས་པར་བྱ་བ་ཡིན་ཏེ། འདུས་བྱས་ཉིད་ཀྱི་མཚན་ཉིད་དག་ནི་འདུས་བྱས་ཀྱི་མཚན་ཉིད་དག་ཡིན་པའི་ཕྱིར་རོ། །དེ་ལྟ་མ་ཡིན་ན་གསུམ་པོ་འདི་དག་ནི་འདུས་བྱས་ཀྱི་མཚན་ཉིད་དག་ཡིན་ནོ་ཞེས་བྱ་བ་འདི་ཙམ་ཞིག་གསུངས་པར་འགྱུར་ཞིང༌། འདི་དག་ནི་ཆུ་དང་ཆུ་སྐྱར་ལྟ་བུ་འདུས་བྱས་ཀྱི་ཡོད་པ་ཉིད་ཀྱི་མཚན་ཉིད་དག་ཡིན་ནོ་སྙམ་དུ་དོགས་པར་འགྱུར་རོ། །འདི་ནི་ཆོས་མི་མཐུན་པའི་སྒོ་ནས་དཔེ་ཡིན་ནོ། །ཇི་ལྟར་ཆུ་སྐྱར་ཆུ་ཡོད་པ་ཉིད་ཀྱི་མཚན་ཉིད་ཡིན་གྱི། ཆུ་ཉིད་ཀྱི་ས་མ་ཡིན་པ་དེ་བཞིན་དུ་འདི་དག་ཀྱང་འདུས་བྱས་ཀྱི་ཡོད་པ་ཉིད་ཀྱི་མཚན་ཉིད་ཡིན་གྱི། འདུས་བྱས་ཉིད་ཀྱིས་ནི་མ་ཡིན་ནོ་ཞེས་བྱ་བར་ཤེས་པར་འགྱུར་ལ། ཡང་ན་བུ་མོའི་མཚན་ཉིད་ནི་དགེ་བ་དང་མི་དགེ་བ་ཉིད་ཡིན་གྱི། བུ་མོ་ཉིད་ཀྱིས་མ་ཡིན་པ་དེ་བཞིན་དུ་འདིར་ཡང་དགེ་བ་དང་མི་དགེ་བ་ཉིད་ཀྱི་མཚན་ཉིད་ཡིན་གྱི། འདུས་བྱས་ཉིད་ཀྱིས་ནི་མ་ཡིན་ནོ་སྙམ་དུ་ཤེས་པར་འགྱུར་རོ། །འདུས་བྱས་ཞེས་བྱ་བ་སྨོས་པ་གཉིས་པས་ནི་འདི་དག་འདུས་བྱས་ཉིད་ཀྱི་མཚན་ཉིད་ཡིན་གྱི། ཡོད་པ་ཉིད་ཀྱིས་མ་ཡིན་ཞིང༌། དགེ་བ་དང་མི་དགེ་བ་ཉིད་ཀྱིས་མ་ཡིན་ནོ་ཞེས་བྱ་བར་ཤེས་པར་བྱས་པ་ཡིན་ནོ། །འདུས་བྱས་ཉིད་ནི་རྒྱུ་དང་རྐྱེན་དག་གིས་འདུས་ནས་བྱས་པ་ཉིད་དོ། །ཡོད་པ་མ་ཡིན་པའི་ཕྱིར་སྐྱེ་པ་ལ་སོགས་པ་རྣམས་སྐད་ཅིག་མ་ལྟར་རྒྱུན་ལ་ཡང་རྣམ་པར་གཞག་པ་དང༌། མངོན་པར་མི་རུང་ངོ་ཞེ་ན། སྐྱེ་བ་ལ་སོགས་པ་མེད་དོ་ཞེས་དེ་སྐད་དུ་སུས་སྨྲས། ཇི་ལྟར་རྣམ་པར་འབྱེད་པ་དེ་ལྟར་མེད་དོ་ཞེས་སྨྲས་ཀྱི། བདག་ཉིད་ཐམས་ཅད་ཀྱིས་མེད་པ་ནི་མིན་ནོ། །དེ་ལྟར་ན་གལ་ཏེ་རྒྱུན་གྱི་སྐྱེ་བ་གང་ཡིན། འཇིག་པ་ནི་གང་ཡིན། གནས་པ་གཞན་དུ་འགྱུར་བ་གང་ཡིན་པ་བརྗོད་པར་བྱའོ་ཞེ་ན། དེའི་ཕྱིར་དེ་ལ་རྒྱུན་གྱི་དངོས་པོ་ནི་སྐྱེ་བ་ཡིན་ནོ་ཞེས་བྱ་བ་རྒྱས་པར་སྨོས་སོ། །ཡང་རྒྱུན་ཞེས་བྱ་བ་ནི་གང་ཡིན་ཞེ་ན། རྒྱུ་དང་འབྲས་བུར་གྱུར་པ་དུས་ཐ་མི་དད་ཅིང་ཡུལ་རྣམ་པར་མ་ཆད་པ་རྣམས་གཅིག་གི་ཉིད་དུ་བརྗོད་
ཅིང་འཛིན་པ་གང་ཡིན་པ་སྟེ། དཔེར་ན་ནུར་ནུར་པོ་ལ་སོགས་པའི་གནས་སྐབས་དག་གིས་མི་དང་མྱུ་གུ་ལ་སོགས་པའི་གནས་སྐབས་དག་གིས་འབྲུ་བཞིན་ནོ། །དེ་ནི་བཏགས་པའི་ཉེ་བར་ལེན་པ་དག་ལས་གཞན་པ་མ་ཡིན་ཞིང༌། གཞན་མ་ཡིན་པ་ཡང་མ་ཡིན་ཏེ། རྫས་སུ་ཡོད་པ་ཉིད་དུ་ཐལ་བའི་ཕྱིར་རོ། །མེད་པ་ཉིད་ཀྱང་མ་ཡིན་ཏེ། བདེན་པ་གཉིས་ཁས་བླངས་པའི་ཕྱིར་རོ། །ཀུན་རྫོབ་དང་དོན་དམ་པའི་བདེན་པ་ཡོད་པ་ཉིད་དུ་ནི་འདོད་པ་ཡིན་ནོ། །གང་ཡང་ཕན་ཚུན་ལྟོས་པའི་རྒྱུད་ཁོ་ན་རྒྱུད་ཀྱི་སྒྲས་བརྗོད་པར་བྱ་བ་མ་ཡིན་པར་སེམས་ན། ཡུལ་དབང་པོའི་རྡུལ་ཕྲ་རབ་རྣམས་ཡུལ་ལ་དམིགས་པའི་སྒྲས་བསྟན་ཏེ། དེ་དག་གིས་དེ་ཡང་དོན་དམ་པ་ཉིད་ཡིན་པའི་ཕྱིར་ཀུན་རྫོབ་ཀྱི་བདེན་པ་མེད་པར་ཐལ་བར་འགྱུར་རོ། །གལ་ཏེ་དེ་ཉིད་ནི་ལྟོས་པ་དང་བཅས་པའམ་ལྟོས་པ་མེད་པར་བྱས་ནས། འདས་པ་དང་མ་འོངས་པ་དག་ཡོད་པ་མ་ཡིན་པའི་ཕྱིར་ད་ལྟར་བ་ཡང་རྒྱུད་གཅིག་ཉིད་དུ་མེད་དོ་ཞེ་ན། ན་ཧྱ་བྷ་བ་ཨེ་ཀོ་པ་རྒྱུད་ལ་བཏགས་པའི་རྒྱུར་འགྱུར་བས་འདས་པ་དང༌། མ་འོངས་པ་དང་ད་ལྟར་བྱུང་བའི་གནས་སྐབས་རྒྱུ་དང་འབྲས་བུར་གྱུར་པ། བར་མེད་པར་སེམས་གཡེང་བར་བྱེད་པའི་རང་བཞིན་ཡོད་པ་མ་ཡིན་ནོ། །དེ་ཉེ་བར་བླངས་ནས་རྒྱུད་དུ་བཏགས་པའི་དངོས་པོ་མེད་པ་ནི་གཅིག་མ་ཡིན་པས་ཏེ། དེ་རྣམས་ཀྱང་གཅིག་ཉིད་ལ་བརྟེན་ནས་མི་དང་འབྲུ་ཞེས་བ་ལྟ་བུ་དེ་དག་འདས་པ་དང་མ་འོངས་པར་ཡོད་པ་ཡང་འབྱུང་བ་ཉིད་སྣ་ཚོགས་པའི་གཟུགས་ཉིད་ཀྱི་རྣམ་པར་ཤེས་པའི་བདག་ཉིད་གསལ་བར་བྱེད་དོ། །མིང་དང་གཟུགས་ཀྱིས་ཞེས་བྱ་བ་དེའི་ཕྱིར་རྒྱུད་གཅིག་ཏུ་བཏགས་པ་རྒྱུ་མཚན་ཡོད་པ་མ་ཡིན་པས། རྒྱུད་ཀྱི་ངོ་བོ་མ་ཡིན་ནོ། །དེ་བཞིན་དུ་ཀུན་རྫོབ་དང་དོན་དམ་པར་ཡོད་པ་ལས་དོན་གཞན་མ་ཡིན་པ་དག་བསྐྱེད་དེ། གང་གི་ཕྱིར་ཕྱི་རོལ་ན་ཡོད་པ་མ་ཡིན་པ་རྣམ་པར་ཤེས་པའི་བདག་ཉིད་ཀུན་ཏུ་གཡེང་བར་བྱེད་པའི་རང་བཞིན་ཕྱི་རོལ་ལྟ་པུར་རབ་ཏུ་སྟོན་ཏོ། །དེ་ཀུན་རྫོབ་ཏུ་ཡོད་པ་གང་ཡིན་པ་ནི་ཤིན་ཏུ་ཡོད་པ་ཉིད་ཀྱི་ཕྱི་རོལ་ཏུ་ཡོངས་སུ་གྲུབ་པ་རྣམ་པར་ཤེས་པའི་བདག་ཉིད་དུ་སྟོན་ཏོ། །དེ་དོན་དམ་པར་ཡོད་པ་ནི་མ་ཡིན་པས། དེ་ལྟར་ཡང་གང་གི་ཚེ་བུམ་པ་ལ་སོགས་པ་རང་གི་ངོ་བོ་ཐ་དད་མེད་པ་ཡང་རྣམ་པར་ཤེས་པ་ལ་སྣང་བ་ཐ་དད་
པའི་ཕྱིར་བློ་ཐ་དད་པ་ཉིད་སྐྱེ་སྟེ། དཔེར་ན་སྔར་བཅོམ་པ་གཅིག་ལ་གཅིག་ཤིན་ཏུ་མེད་པ་རྣམས་ལྟ་བུའོ། །འོ་ན་ཇི་ལྟར་གཟུགས་ལ་སོགས་པ་ཉེ་བར་བཟང་ནས་བུམ་པར་བཏགས་ཞེ་ན། དེ་ཡོད་པར་འཇུག་པའི་ཁྱད་པར་ལས་བུམ་པའི་བློ་སྐྱེ་བ་སྟེ་དེ་ཡང་ཡོད་པར་ཞུགས་པ་ལས་ཡིན་གྱི་གཟུགས་ལ་སོགས་པའི་བདག་ཉིད་ཅན་གཟུགས་ལ་སོགས་པའི་རྡུལ་ཕྲ་རབ་རྣམས་ལ་ནི་མ་ཡིན་ཏེ། ཆ་ཤས་མེད་པའི་ཕྱིར་རོ། །ནཱ་པི་ས་མུ་དེ་ཉིད་བྷྱོ་ནརྠཱ་ནྡཱ་ར་ནྣ་ཧི་ས་མུ་ཏི་ཏ་ནཱ་མཱཏྨ་ཧཱ་ན་མཏྨཱ་ནྟ་ར་པྲ་ཏི་བཏྟེ་རྦཱ་བྷ་བ་ཏེ། བྱ་སྟ་ས་མུ་དཱི་ཏཱ་བཱ་ཏེ་ཨེ་བ་ཏ་ཨི་ཏི་སྲི་ཏཱ། གཟུགས་ལ་སོགས་པ་བུམ་པ་ལ་སོགས་པ་རྣམས་དང་གཅིག་དང་དུ་མ་ཉིད་དུ་ཐལ་བའི་ཕྱིར་དེར་ཁས་མ་བླངས་པའི་ཕྱིར་ཕྱི་རོལ་གྱི་དངོས་པོའི་སྒོ་ནས་ཡོད་པ་བུམ་པའི་མ་ཡིན་ཡང་ཚོགས་པ་རྣམས་ལས་དོན་གཞན་མ་ཡིན་མོད་ཚོགས་པ་རྣམས་ཀྱི་བདག་ཉིད་འབྲས་བུའི་བདག་ཉིད་གཞན་འགྲུབ་པར་འགྱུར་རོ། གསལ་བ། ཡང་ན་དེ་ཉིད་ཀྱི་ཕྱིར་དེ་རྣམས་སོ་ཞེས་བྱས་ནས། གཟུགས་ལ་སོགས་པ་རང་བཞིན་ཐ་དད་པའི་གཟུགས་མེད་པ་འདིའི་རྣམ་པར་རྟོག་པ་གསུམ་པ་མེད་པའི་ཕྱིར་རོ། །གཉི་ག་ཇི་ལྟ་བར་ཡང་མི་སྐྱེ་སྟེ། དེའི་ཕྱིར་དེ་ལྟར་གནས་པའི་གཟུགས་ལ་སོགས་པའི་མཚན་མ་དང་དེའི་ཤེས་པ་དའི་རྣམ་པ་ཅན་གྱི་གཟུགས་ལ་དམིགས་པ་མེད་པའི་ཕྱིར་དམིགས་པའི་དངོས་པོ་གཞན་མ་ཡིན་ཏེ། དེ་མེད་པའི་ཕྱིར་རོ། །དཔེར་ན་འཁྲི་ཤིང་འཁྱིལ་པ་ལ་སྦྲུལ་དུ་ཤེས་པ་བཞིན་ནོ། །ཡང་ཅི་ལྟར་གཟུགས་ལ་དམིགས་པའི་ཤེས་པ་སྐྱེ་ཞེ་ན། རྨི་ལམ་དང་རབ་རིབ་ཅན་ལ་སོགས་པ་རྣམས་ཀྱི་ལྟ་བུའོ། །ཡང་ཅི་ལྟར་རང་གི་རྣམ་པར་ཤེས་པ་ཡོངས་སུ་འགྱུར་བའི་དོན་གྱིས་གཞན་དང་ལྷན་ཅིག་ཀུན་ཏུ་ཐ་སྙད་བྱེད་ཅེ་ན། མིག་ནད་ཀྱིས་མང་དུ་ཉེན་པ་དག་ཐམས་ཅད་དུ་ཁ་དོག་སེར་པོར་ཐ་སྙད་བྱེད་པ་བཞིན་ནོ། །དེ་བཞིན་དུ་སྒྱུ་མ་དང་དྲི་ཟའི་གྲོང་ཁྱེར་ལ་སོགས་པ་རྣམས་དང་རྣམ་པར་ཤེས་པ་སྐྱེ་བ་རྣམ་པ་མཚུངས་པས་ཇི་ལྟར་སྲིད་པ་བཞིན་རྒྱུན་ལ་ཡང་བརྗོད་པར་བྱ་སྟེ་སྤྲོས་པས་ཆོག་གོ །དཀྱུས་མ་ཉིད་བརྗོད་པར་བྱ་སྟེ། དང་པོ་ནི་སྐད་ཅིག་མ་ཐོག་མ་སྟེ་དེ་ནས་རྒྱུན་འཇུག་པའི་ཕྱིར་རོ། །གང་དུ་སྐྱེས་པའོ་སྙམ་དུ་མངོན་པར་འགྱུར་བ་དེ་ནི་དང་པོ་སྟེ། སྐད་ཅིག་མ་སྔ་མ་ཞིག་པ་དང༌། སྐད་ཅིག་མ་ཕྱི་མ་ཉིད་མཚམས་མི་སྦྱོར་བ་མི་ལྡོག་པ་མ་ཡིན་ཏེ། སྐད་ཅིག་མའི་མཐར་འཇིག་ཅེས་པའི་དོན་ཏོ། །རྒྱུན་དེ་
ཉིད་རྗེས་སུ་འཇུག་པ་ནི་ཞེས་བྱ་བ་ལ། དེ་རྗེས་སུ་འཇུག་པ་གང་ཡིན་ཞེ་ན། རྒྱུན་ཞེས་རྗེས་སུ་འཇུག་པ་ནི་སྐད་ཅིག་མ་སྔ་མ་སྔ་མ་ཞིག་པའི་ཚེ་སྐད་ཅིག་མ་ཕྱི་མ་ཕྱི་མས་བདག་ཉིད་ཐོབ་པའོ། །དེའི་ཞེས་བྱ་བ་ནི་གནས་པའི་སྔ་ཕྱི་སྟེ། རྒྱུ་དང་འབྲས་བུའི་བྱེ་བྲག་མི་འདྲ་བ་ཉིད་ནི་གནས་པ་གཞན་དུ་འགྱུར་བ་ཡིན་ནོ། །རྒྱུན་གྱི་ཞེས་བྱ་བ་ནི་ཐམས་ཅད་ལ་སྦྱར་ཏེ་སྐབས་སུ་བབ་པ་ཡིན་པའི་ཕྱིར་རོ། །ཡང་ན་སྔ་མ་ལས་ཕྱི་མའི་བྱེ་བྲག་སྟེ། རྒྱུའི་སྐད་ཅིག་ལས་འབྲས་བུའི་བྱེ་བྲག་ནི་ཞེས་བྱ་བའི་དོན་ནོ། །དེ་ལྟ་ཡིན་པས་ན་ཞེས་བྱ་བ་ནི་གང་གི་ཕྱིར་རྒྱུན་ཉིད་རྗེས་སུ་འཇུག་པ་ནི་གནས་པ་ཡིན་པའམ། སྐྱེ་བ་ལ་སོགས་པ་དག་རྒྱུན་གྱི་མཚན་ཉིད་བཤད་ཀྱི་སྐད་ཅིག་མའི་མ་ཡིན་པས་སོ། །རིགས་ཀྱི་བུ་དགའ་བོའི་ཚོར་བ་ནི་རིག་བཞིན་དུ་ཞེས་བྱ་བ་རྒྱས་པར་འབྱུང་བ་ལ། རིག་བཞིན་པའི་སྐད་ཅིག་མ་ནི་དུས་ཕྱིས་གནས་མི་སྲིད་དེ་སྐད་ཅིག་མ་ཡིན་པའི་ཕྱིར་རོ། །ཚོར་པའི་རྫས་གཅིག་ནི་སྐྱེ་བ་དང༌། གནས་པ་དང༌། འཇིག་པའི་དུས་དག་ཏུ་སེམས་གཅིག་གིས་རིག་པ་ཡང་མ་ཡིན་ལ་སྐྱེ་བ་ལ་སོགས་པ་རྣམས་དུས་ཐ་དད་པའི་ཕྱིར་དུ་མས་ཀྱང་མ་ཡིན་ཏེ་དུ་མ་མི་སྲིད་པའི་ཕྱིར་དང༌། རང་གི་བདག་ཉིད་ལ་བྱེད་པ་ཁས་མ་བླངས་པའི་ཕྱིར་རང་གི་ངོ་བོ་རིག་པ་ཡང་ཡོད་པ་མ་ཡིན་ནོ། །མངོན་སུམ་དུ་བྱས་པར་གྱུར་པ་ལ་རིག་པར་ཁས་ལེན་ན་ཡང་དགའ་བོ་ལ་གཞན་དག་པས་ཅི་ཞིག་གསུང་བར་འགྱུར། དེའི་ཕྱིར་རྒྱུན་ལོ་ནའི་དབང་དུ་མཛད་ནས་བཅོམ་ལྡན་འདས་ཀྱིས་རིགས་ཀྱི་བུ་དགའ་བོའི་ཚོར་བ་ནི་རིག་བཞིན་དུ་སྐྱེའོ་ཞེས་རྒྱས་པར་གསུངས་ཀྱི་སྐད་ཅིག་ལ་ནི་མ་ཡིན་ནོ། །བཤད་མ་ཐག་པའི་དོན་ཉིད་ཚིགས་སུ་བཅད་པ་གཉིས་ཀྱིས་བསྟན་པར་བྱ་བའི་ཕྱིར། རྒྱུན་གྱི་དང་པོ་སྐྱེ་བ་ཡིན། །ཞེས་བྱ་བ་སྨོས་ཏེ། གཉིས་ག་ཡང་རྒྱུན་དང་སྦྱར་རོ། །གང་ཞིག་ཆད་བ་ཞེས་བྱ་བ་འདིར་ཡང་སྔ་མ་བཞིན་ནོ། །གནས་པ་དེ་ཞེས་བྱ་བ་རྒྱུན་ཉིད་གནས་པ་སྟེ། རྣམ་པ་གཞན་དུ་ནི་མེད་ཅེས་བྱ་བ་ལ་སོགས་པ་འདིར་ཡང་གཉིས་ཀ་ལ་རྒྱུན་ཅེས་སྦྱར་རོ། །སྐད་ཅིག་མའི་ཆོས་ལ་ནི་ཞེས་བྱ་བརྒྱ་ཆེར་འབྱུང་བ་ལ། སྐད་ཅིག་མའི་ཆོས་ནི་གནས་པ་མེད་དང་འཇིག་པར་འགྱུར་ཏེ། དེའི་ཕྱིར་འདིའི་གནས་པ་ཁས་ལེན་པ་ཡིན་ནོ། །ཆོས་དེ་ཡང་གནས་པ་མེད་དུ་ཟིན་ཡང་འཇིག་པར་འགྱུར་བ་ཉིད་དེ། སྐད་
ཅིག་མ་ཡིན་པ་ཁོ་ནས་གནས་པ་དོན་མེད་དོ། །ཡོངས་སུ་རྟོགས་པ་དེའི་ཕྱིར་རྒྱུན་ཁོ་ན་གནས་པ་ཡིན་ཏེ། གང་གི་ཕྱིར་སྐད་ཅིག་མའི་ཆོས་གནས་པར་ཡོངས་སུ་རྟོགས་ན་དོན་མེད་དོ། །དེ་ལྟ་བས་ན་ཞེས་བྱ་བ་སྟེ། གནས་པ་ནི་རྒྱུན་ཁོ་ན་ཡིན་པ་དེས་ནའོ། །དེ་ལྟར་བཤད་ན་ཆོས་མངོན་པ་ལ་གནས་པ་གང་ཞེན་ཞེས་རྒྱ་ཆེར་འབྱུང་སྟེ། སྐྱེས་བས་སྐད་ཅིག་མ་ལ་ནི་འཇིག་པ་མེད་དེ། སྐད་ཅིག་མ་མ་ཡིན་པ་ཉིད་དུ་ཐལ་བར་འགྱུར་བའི་ཕྱིར་རོ། །དེའི་ཕྱིར་འདུ་བྱེད་སྐྱེས་པ་རྣམས་ལ་མི་འཇིག་པས་རྒྱུན་ཆགས་པར་འབྲེལ་བའི་དབང་དུ་མཛད་ནས་གསུངས་ཀྱི་སྐད་ཅིག་མ་ནི་མ་ཡིན་ནོ་ཞེས་བྱ་བར་རྟོགས་སོ། །གང་ཡང་ཡེ་ཤེས་ལ་འཇུག་པ་ལས་ཞེས་བྱ་བ་རྒྱས་པར་འབྱུང་བ་ལ། དེར་ནི་གཅིག་ལ་ཞེས་འབྱུང་བའི་ཕྱིར། སེམས་ཀྱི་སྐད་ཅིག་ཁོ་ན་བཞེད་དོ་སྙམ་དུ་སེམས་པ་བསལ་བར་བྱ་བའི་ཕྱིར་འདི་ཉེ་བར་བཀོད་དེ། དེར་ཡང་རིས་མཐུན་པའི་སེམས་ལ་རིགས་ཀྱི་སེམས་ཀྱི་སྐད་ཅིག་ནི་མ་ཡིན་ནོ་སྙམ་དུ་སེམས་པའོ། །རིས་མཐུན་པའི་སེམས་ནི་དང་པོར་ཉིད་མཚམས་སྦྱོར་བའི་སྐད་ཅིག་མ་ནས། འཆི་བའི་མཐར་ཐུག་པ་སྐྱེ་བ་གཅིག་གི་བདག་ཉིད་ཅན་ཡིན་ནོ། །འདི་གང་ལས་ཤེ་ན། གང་གི་ཕྱིར། འཇིག་པ་གང་ཞེ་ན་རྣམ་པར་འཇིག་པའོ་ཞེས་ལན་བརྗོད་པར་བྱ་བ་ལ། འཆི་བའོ་ཞེས་བྱ་བ་སྨྲས་པ་དེས་ན། རིས་མཐུན་པའི་སེམས་ལ་དགོངས་པ་ཡིན་ནོ་ཞེས་བྱ་བར་རྟོགས་སོ། །གང་གི་ཕྱིར་སྐད་ཅིག་མ་ཡིན་པའི་ཕྱིར། སྐད་ཅིག་མ་གཅིག་གནས་པ་དང༌། དེ་བཞིན་དུ་འགྱུར་བའི་རྒ་བ་ཡིན་པར་མ་གྲུབ་པ་དེས་ན་རྒ་བ་ནི་རྣམ་པ་གཞན་ཉིད་དོ་ཞེས་པའི་དབང་དུ་བྱས་ཏེ། འཇིག་པའི་རྣམ་པར་འགྱུར་བ་ཁོ་ན་གཞན་ནོ། །གནས་པ་དང་སྐྱེ་བ་ལས་གཞན་དུ་རྒ་བ་ནི་རྣམ་པར་འཇིག་པར་ཡང་འགྱུར་ཏེ། སྔོན་གྱི་གནས་སྐབས་ལས་རྣམ་པར་འགྱུར་བ་མེད་པ་ནི་གཞན་མ་ཡིན་པས་ཞེས་སྦྱར་རོ། །དེར་ནི་གནས་པ་ལས་གཞན་དུ་འགྱུར་བ་རྒ་བའོ་ཞེས་གསུངས་སོ། །དེའི་ཕྱིར་དེའི་རིགས་མཐུན་པའི་སེམས་ལ་རུང་གི་སེམས་ཀྱི་སྐད་ཅིག་ལ་ནི་མ་ཡིན་ནོ། །རྒྱུན་ཡང་སེམས་ལ་སྣང་བའི་ཕྱིར་དང་སེམས་ཀྱང་གཅིག་ཉིད་ཀྱི་ཕྱིར་ཞེས་བྱ་བ་ལ་སོགས་པ་རྣམས་ཀྱི་སྐད་ཅིག་མ་བཞིན་རྒྱུན་ཡང་མི་འབྱུང་བ་མ་ཡིན་ནམ་ཞེ་ན། འདི་ནི་དེ་ལྟ་མ་ཡིན་ཏེ། འཇིག་
རྟེན་ན་སྣང་བའི་བདག་ཉིད་ཀྱང་རྒྱུན་ཡུལ་གྱི་རང་བཞིན་རྣམ་པར་ཤེས་པ་ལས་ཕྱི་རོལ་ལྟ་བུར་སྟོན་ཏེ། རྣམ་པར་ཤེས་པའི་ངོ་བོ་ས་མ་ཡིན་ནོ། །དཔེར་ན་རབ་རིབ་ཅན་གྱིས་རྣམ་པར་ཤེས་པ་ལ་སྐྲ་དང་སྦྲང་བུ་ལ་སོགས་པ་སྣང་བ་བཞིན་ནོ། །དེས་ན་བདག་དང་བདག་གིར་འཛིན་པའི་ཆགས་པ་མེད་པ་རྣམས་ལ་ནི་མི་ལྡན་ཏེ། དེར་འཛིན་པ་ལྡོག་བའི་ཕྱིར་བཅོམ་ལྡན་འདས་ཀྱིས་འདུས་བྱས་ཀྱི་མཚན་ཉིད་རྣམས་གསུངས་སོ། །དེ་སྔར་ཉིད་དུ་བཤད་པ་དེའི་ཕྱིར་དེའི་རྒྱུན་ཅི་སྐད་བཤད་པའི་རྣམ་པས་སྐྱེ་བ་ལ་སོགས་པར་རྟོགས་པར་བྱ་སྟེ། རབ་རིབ་ཅན་ལ་སྐྲ་ལ་སོགས་པ་དང། ནམ་ལངས་པ་ན་འཁྱོག་ཅིང་འཁྱིལ་བ་ལ་སྤྲུལ་ལ་སོགས་པ་བཞིན་དུའོ། །འདིར་མི་རིགས་པ་ཅི་ཞེ་ན་གང་དུ་སེམས་ཅན་རྣམས་ཉོན་མོངས་སྐྱེ་བ་དང་སྒྲོ་འདོགས་པ་ལས་ཡིན་གྱི། དོན་དམ་པ་ལས་ནི་མ་ཡིན་ནོ། །དེ་སུན་འབྱིན་པའི་ཆེད་ཁོ་ནར་སངས་རྒྱས་བཅོམ་ལྡན་འདས་རྣམས་ཆོས་སྟོན་པར་མཛད་དེ། འདི་ལྟར། བསགས་པ་ཀུན་གྱི་མཐའ་འཛད་ཅིང༌། །བསླང་བའི་མཐའ་ནི་འགྱེལ་བར་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ལྟ་བུའོ། །སྐད་ཅིག་མ་རེ་རེ་ལ་ཡང་ཞེས་རྒྱ་ཆེར་འབྱུང་བ་ལ། སྐྱེ་བ་ནི་སྔར་མེད་པ་ལས་བྱུང་ཞིང་བདག་ཉིད་དུ་ཐོབ་པ་དང། རྫས་གཞན་ཡིན་པར་འོས་པ་ཡང་མ་ཡིན་ཏེ། དངོས་པོ་མ་སྐྱེས་པ་ཉིད་དུ་ཐལ་བའི་ཕྱིར་རོ། །དེའི་སྐྱེ་བའི་རྒྱུ་ཡིན་པའི་ཕྱིར་སྐྱེ་བ་ཉིད་དུ་བརྟག་གོ་ཞེ་ན། རྐྱེན་ཐམས་ཅད་སྐྱེ་བ་ཉིད་དུ་ཐལ་བར་འགྱུར་ཏེ། དེའི་སྐྱེ་བའི་རྒྱུ་ཉིད་དུ་ཁྱད་པར་མེད་པའི་ཕྱིར་རོ། །དེའི་ཕྱིར། སྐད་ཅིག་མ་རེ་རེ་ལ་མ་བྱུང་བ་ལས་བྱུང་བ་ནི་སྐྱེ་བ་ཡིན་གྱི། རྫས་གཞན་མ་ཡིན་ནོ། །བདག་ཉིད་རྙེད་པའི་བདག་ཉིད་ལོག་པ་ནི་འཇིག་པ་ཡིན་གྱི། དོན་གཞན་དུ་གྱུར་པ་ཡིན་ཏེ། དེ་ལྡོག་པ་མེད་པར་ཐལ་བར་འགྱུར་པའི་ཕྱིར་རོ། །དེའི་ཕྱིར་བྱུང་ནས་མེད་པ་ནི་འཇིག་པ་ཡིན་གྱི་རྫས་གཞན་ནི་མེད་དོ། །རྒྱུ་དང་འབྲས་བུ་རྗེས་སུ་འབྲེལ་པ་ནི་གནས་པ་ཡིན་གྱི་སྐྱེས་པ་མི་འཇིག་པ་ནི་མ་ཡིན་ཏེ། དེའི་རྒྱུ་སྐད་ཅིག་མ་མ་ཡིན་པ་ཉིད་དུ་ཐལ་བར་འགྱུར་བའི་ཕྱིར་རོ། །འདི་ལྟར་སྨྲ་བ་བདག་ད་རུང་དུ་ཡང་མར་མེད་དེ་ཉིད་འཇུག་གོ་ཞེས་ཟེར་བ་ཡིན་ནོ། །དེའི་ཕྱིར། སྔ་མ་སྔ་མ་དང་སྐད་ཅིག་མ་ཕྱི་མ་ཕྱི་མ་རྗེས་སུ་འབྲེལ་བ་ནི་གནས་པ་ཡིན་གྱི། དོན་
གཞན་དུ་གྱུར་པ་ནི་མེད་དོ། །རྒྱུའི་སྐད་ཅིག་མ་ལས་འབྲས་བུའི་སྐད་ཅིག་མ་བྱེ་བྲག་ཏུ་གྱུར་པ་ནི་གནས་པ་གཞན་དུ་གྱུར་པ་ཡིན་གྱི་སྐད་ཅིག་མའི་གནས་སྐབས་ཐ་དད་པ་གཞན་ཉིད་དུ་ཐལ་བའི་ཕྱིར་རོ། །གནས་པ་དེ་སྐད་ཅིག་མ་སྔ་མ་དང་མི་འདྲ་བས་གནས་པ་ལས་གཞན་དུ་འགྱུར་བ་ཉིད་ཡིན་གྱི་དོན་གཞན་དུ་གྱུར་པ་ནི་མ་ཡིན་ནོ། །དེ་ལྟར་ཡང་འདུ་བྱེད་ཀྱི་རྒྱུན་ལ་བདག་ཏུ་མོས་པ་རྣམས་ཀྱི་བདག་ཏུ་མོས་པ་བཟློག་པར་བྱ་བའི་ཕྱིར། རྒྱུན་དང་སྐད་ཅིག་མ་དུ་མའི་དབྱེ་བ་ཐ་དད་པས་ཐ་དད་པ་རྣམས་ལ་བཟློག་པར་བྱ་བ་མ་ཡིན་པར་བཞེད་ནས། ལུས་སྐྱོ་བ་ཡང་མངོན་ཞེས་བྱ་བ་ལ་སོགས་པའི་དོན་འདི་བརྩམས་པ་དེ་ལྟ་ན་ཡང་གང་གི་ཚེ་འདྲ་བར་ཡང་སྐྱེས་སོ། །དེའི་ཚེ་མི་འདྲ་བ་ཉིད་མེད་པས་གནས་པ་གཞན་དུ་འགྱུར་བ་ཉིད་མེད་དོ་སྙམ་དུ་བསམས་པའོ། །དེ་དག་འདྲ་བར་ཡང་དམིགས་མོད་ཀྱི་རྣམ་པ་ཐམས་ཅད་དུ་ཁྱད་པར་མེད་པ་མ་ཡིན་ནོ། །འདྲ་བར་དམིགས་ཀྱང་རྣམ་པ་ཐམས་ཅད་དུ་ཁྱད་པར་མེད་པ་ཡིན་ནོ། །ཞེས་བྱ་བ་འདི་ཅི་ལྟར་ཤེས་ཤེ་ན། དེའི་ཕྱིར། རྡོ་རྗེ་ལ་སོགས་པ་འཕངས་པ་དང་མ་འཕངས་པ་དང༌། སྟོབས་ཆེན་པོ་དང་སྟོབས་ཆུང་དུས་འཕངས་པ་ཞེས་བྱ་བ་ལ་སོགས་པ་སྨོས་སོ། །འཕངས་པ་དང་མ་འཕངས་པ་ནི་འཕངས་པ་དང་མ་འཕངས་པ་དག་གོ ། སྟོབས་ཆེན་པོས་འཕངས་པ་དང་སྟོབས་ཆུང་ངུས་འཕངས་པ་ནི་སྟོབས་ཆེན་པོ་དང༌། སྟོབས་ཆུང་ངུས་འཕངས་པ་དག་སྟེ། འདི་ནི་འཕངས་པའི་དབྱེ་བ་རྣམ་པ་གཉིས་ཡིན་ནོ། །འཕངས་པ་དང་མ་འཕངས་པ་དག་དང་སྟོབས་ཆེན་པོ་དང་སྟོབས་ཆུང་ངུས་འཕངས་པ་དག་ནི་འཕངས་པ་དང་མ་འཕངས་པ་དང༌། སྟོབས་ཆེན་པོ་དང་སྟོབས་ཆུང་ངུས་འཕངས་པའོ། །རྡོ་རྗེ་ལ་སོགས་པ་དེ་ནི་འཕངས་པ་དང་མ་འཕངས་པ་དང༌། སྟོབས་ཆེན་པོ་དང་སྟོབས་ཆུང་ངུས་འཕངས་པ་སྟེ། དངོས་པོ་གཅིག་དང་འདྲ་བར་བྱས་པའི་ཕྱིར་རོ། །སོགས་པ་ཞེས་བྱ་བའི་སྒྲས་ནི་ལྕགས་དང་རྡོ་རྗེ་ལ་སོགས་པ་བསྡུའོ། །བུལ་བ་དང༌། མྱུར་བ་དང༌། ཆེས་མྱུར་བར་ལྟུང་བའི་དུས་ཀྱི་བྱེ་བྲག་ལས་ཞེས་བྱ་བ་ལ། སྟོབས་ཆུང་ངུས་འཕངས་པ་ནི་མྱུར་དུ་ལྟུང་ལ། སྟོབས་ཆེན་པོས་འཕངས་པ་ནི་ཆེས་མྱུར་བར་ལྟུང་ངོ༌། །དུས་དེའི་བྱེ་བྲག་ནི་བུལ་བ་དང༌། མྱུར་བ་དང༌། ཆེས་མྱུར་བའི་དུས་ཀྱི་བྱེ་
བྲག་སྟེ། བུལ་བ་དང༌། མྱུར་བ་དང༌། ཆེས་མྱུར་བའི་དུས་ཀྱི་བྱེ་བྲག་དེ་ལས་སོ། །དེའི་བྱུང་བ་རྣམས་ཞེས་བྱ་བ་ནི་རྡོ་རྗེ་ལ་སོགས་པར་འབྱུང་བ་རྣམས་སོ། །ཡོངས་སུ་འགྱུར་བའི་བྱེ་བྲག་འགྲུབ་པའི་ཕྱིར་རོ་ཞེས་བྱ་བ་ལ། བུལ་བ་དང༌། མྱུར་བ་དང༌། ཆེས་མྱུར་བར་ལྟུང་བའི་དུས་ཀྱི་བྱེ་བྲག་ལས་རྡོ་རྗེ་ལ་སོགས་པའི་འབྱུང་བ་ཆེན་པོས་འཕངས་པ་དེ་རྣམས་ཡོངས་སུ་འགྱུར་བའི་བྱེ་བྲག་འགྲུབ་པ་ཡིན་ནོ། །ཇི་ལྟར་ཞེ་ན། མ་འཕངས་པ་ལྟུང་བ་ན་ནམ་མཁའ་ལ་སྐད་ཅིག་མ་རྣམས་སུ་ཡུལ་ཐ་དད་པའི་སྐད་ཅིག་མ་གཞན་དག་གི་རྒྱུར་འགྱུར་ལ། ཆེས་ཉུང་བ་རྣམས་ཡུལ་ཐ་མི་དད་པའི་སྐད་ཅིག་མ་གཞན་སྐྱེ་བའི་རྒྱུར་འགྱུར་རོ། །སྟོབས་ཆུང་ངུས་འཕངས་ན་ནི་ཧ་ཅང་མང་བ་ཡང་མ་ཡིན་ཧ་ཅང་ཉུང་བ་ཡང་མ་ཡིན་པ་རྣམས་རང་གི་ཡུལ་གཞན་དུ་སྐད་ཅིག་མ་གཞན་སྐྱེ་བའི་རྒྱུ་ཡིན་ནོ། །སྟོབས་དང་ལྡན་པས་འཕངས་ན་ནི་རང་གི་ཡུལ་དུ་ཆེས་ཉུང་བ་རྣམས་ཡུལ་གཞན་དུ་སྐད་ཅིག་མ་གཞན་མང་པོ་དག་སྐྱེ་བའི་རྒྱུ་ཡིན་ནོ། །གང་དག་གདོན་མི་ཟ་བ་རང་གི་ཡུལ་དང་ཡུལ་གཞན་དུ་སྐད་ཅིག་གཞན་གྱི་རྒྱུ་ཡིན་པ་དེ་དག་གི་བྱེ་བྲག་ཁས་བླང་བར་བྱའོ། །ལྷག་མ་རྣམས་ལ་ཡང་རང་གི་ཡུལ་དང་ཉེ་བ་དང་རིང་བ་ལས་བྱེ་བྲག་ཤེས་པར་བྱའོ། །རྡོ་རྗེ་ལ་སོགས་དེ་དག་ལ་ཇི་སྐད་བཤད་པའི་ཡོངས་སུ་འགྱུར་བ་མེད་པར་བུལ་བ་དང༌། མྱུར་བ་དང༌། ཆེས་མྱུར་བའི་དུས་ཀྱི་བྱེ་བྲག་མི་རུང་བ་དེའི་ཕྱིར་འདུ་བྱེད་ཐམས་ཅད་ལ་སྐྱེ་བ་བཞིན་དུ་གཞན་དུ་འགྱུར་བ་ཉིད་མི་འགལ་ལོ། །གལ་ཏེ་འདུ་བྱེད་ཀྱི་ཁྱད་པར་རམ། ལྕི་བ་ཉིད་ལས་བུལ་བ་དང༌། མྱུར་བ་དང༌། ཆེས་མྱུར་བའི་ལྟུང་བའི་དུས་ཀྱི་བྱེ་བྲག་ཏུ་འགྱུར་རོ་ཞེ་ན་དེ་ནི་མི་རིགས་ཏེ། འདུ་བྱེད་བཀག་ཟིན་པའི་ཕྱིར་དང༌། ལྕི་བ་ཉིད་ལ་ཁྱད་པར་མེད་པའི་ཕྱིར་ལྟུང་བའི་དུས་ཀྱི་བྱེ་བྲག་མི་འཐད་དོ། །གལ་ཏེ་རྡོ་རྗེ་ལ་སོགས་པ་དག་ལ་ཡང་སྔ་མ་ལས་སྐད་ཅིག་མ་ཕྱི་མ་མི་འདྲ་བར་སྐྱེ་ན། ཁྱད་པར་དེ་ཅིའི་ཕྱིར་མི་འཛིན་ཅེ་ན། དེའི་ཕྱིར་འདུ་བྱེད་རྣམས་ནི་བྱེ་བྲག་གི་ཁྱད་པར་ཚར་གཅིག་མེད་པས་ཞེས་བྱ་བ་རྒྱས་པར་སྨོས་སོ། །འདུ་བྱེད་གང་དག་ཁྱད་པར་བྱེ་བྲག་རགས་པ་མེད་ཅིང་ཕྲ་བ་ཡོད་པ་དེ་དག་ནི་ཁྱད་པར་མེད་པ་ཁོ་ནར་འཛིན་གྱི། ཁྱད་པར་དུ་ནི་མ་ཡིན་ཏེ། །ཕྲ་བའི་ཕྱིར་རོ། །དེའི་ཕྱིར་དེ་དག་འདྲ་
བ་ཞིག་ཏུ་སྣང་བ་མཚེ་མ་བཞིན་ནོ། །འོ་ན་ནི་སྒྲ་དང་མེ་ལྕེའི་སྐད་ཅིག་མ་ཐ་མ་ཞེས་བྱ་བ་རྒྱས་པར་འབྱུང་བ་ལ་སྐད་ཅིག་མ་ཕྱིན་སྔ་མ་ལས་བྱེ་བྲག་ཏུ་གྱུར་པ་གནས་པ་ལས་གཞན་དུ་གྱུར་པ་ཉིད་ཡིན་ན། རྒྱུན་ཆད་པའི་དུས་དང༌། ཡོངས་སུ་མྱ་ངན་ལས་འདའ་བའི་དུས་ན། གང་གི་བྱེ་བྲག་སྔ་མའི་གནས་པ་གཞན་དུ་འགྱུར་བ་ཉིད་དུ་རྣམ་པར་གཞག་པ་སྒྲ་དང་མེ་ལྕེའི་སྐད་ཅིག་མ་དང༌། སྐྱེ་མཆེད་དྲུག་གི་སྐད་ཅིག་མ་ལས་སྐད་ཅིག་མ་གཞན་མཚམས་སྦྱོར་བ་མ་ཡིན་ཏེ། དེ་ལྟར་ན་སྒྲ་དང་མེ་ལྕེའི་སྐད་ཅིག་མ་ཐ་མ་དག་དང༌། ཡོངས་སུ་མྱ་ངན་ལས་འདའ་བའི་ཚེ་སྐྱེ་མཆེད་དྲུག་གི་སྐད་ཅིག་མ་ལ་གནས་པ་གཞན་དུ་འགྱུར་བ་ཉིད་མེད་པའི་ཕྱིར། མཚན་ཉིད་རྣམ་པར་གཞག་པ་འདུ་བྱེད་ཐམས་ཅད་ལ་མ་ཁྱབ་ཅན་དུ་འགྱུར་རོ། །འདུས་བྱས་ཀྱི་མཚན་ཉིད་ནི་ཞེས་བྱ་བ་རྒྱས་པར་འབྱུང་བ་ལ། འདུས་བྱས་ཀྱི་མཚན་ཉིད་ཀྱི་མདོ་ལས་གནས་པ་ཁོ་ན་མཚན་ཉིད་དུ་མ་བརྗོད་དེ། འོ་ན་ཅི་ཞེ་ན་གནས་པ་གཞན་དུ་འགྱུར་བ་ཉིད་ཀྱང་ཡིན་ཏེ། གནས་པ་སྐད་ཅིག་མ་ཕྱི་མ་རྗེས་སུ་འབྲེལ་པའི་མཚན་ཉིད་ཅན་གྱི་གཞན་དུ་འགྱུར་བ་ཉིད་ཀྱང་ཡིན་ནོ། །དེའི་ཕྱིར་སྐད་ཅིག་གང་ལ་གནས་པ་འབྲས་བུའི་མཚན་ཉིད་གཅིག་ཡིན་པ་དེ་ལ་ནི་གནས་པ་དེ་ཡོད་དང་གདོན་མི་ཟ་བར་གནས་པ་གཞན་དུ་འགྱུར་བ་མི་འདྲ་བ་ཉིད་ཀྱང་ཡོད་ཀྱི། གང་ལ་གནས་པ་མེད་པ་དེ་ལ་གནས་པ་གཞན་དུ་འགྱུར་བ་ཉིད་ཀྱང་མེད་དེ། དཔེར་ན་སྒྲ་དང་མེ་ལྕེའི་སྐད་ཅིག་མ་ཐ་མ་དག་དང༌། ཡོངས་སུ་མྱ་ངན་ལས་འདས་པའི་ཚེའི་སྐྱེ་མཆེད་དྲུག་གི་སྐད་ཅིག་མ་བཞིན་ནོ། །དེ་ལྟར་ན་གང་ལ་གནས་པ་མེད་པ་དེའི་མཚན་ཉིད་ནི་སྐྱེ་བ་དང་འཇིག་པ་གཉིས་ཁོ་ན་ཡིན་ནོ། །ཞེས་བསྟན་པར་འགྱུར་བ་རྣམ་པར་གཞག་པ་ཉམས་པ་མེད་དོ། །གལ་ཏེ་གནས་བཞིན་པ་ལ་གཞན་དུ་འགྱུར་བ་མེད་ན་ནི་མཚན་ཉིད་རྣམ་པར་གཞག་པ་མ་ཁྱབ་པ་མེད་པ་ཅན་དུ་འགྱུར་བ་ཞིག་གོ ། སྒྲ་དང་མེ་ལྕེའི་སྐད་ཅིག་མ་ཐ་མ་རྣམས་ཀྱང་གནས་པ་ཞེས་བྱ་བ་རྒྱུན་གྱི་ཁོངས་སུ་འདུ་བའི་ཕྱིར་ལ། དེ་ལ་གཞན་དང་གཞན་དུ་འགྱུར་བ་ཡོད་པའི་ཕྱིར་མཚན་ཉིད་གསུམ་ཆར་ཡང་སྲིད་དོ་ཞེས་བསྟན་པའི་ཕྱིར་ཡང་མདོར་ན་བཅོམ་ལྡན་འདས་ཀྱིས་ནི་ཞེས་བྱ་བ་རྒྱས་པར་སྨོས་སོ། །འདི་དག་ཐམས་ཅད་ཀྱི་
སོ་སོའི་སྐྱེ་བ་དང་འཇིག་པ་དག་གི་རྒྱུན་ནི་ཐམས་ཅད་ཀྱི་གནས་པ་ཞེས་བྱ་སྟེ། དེའི་ཕྱིར་དེ་ལས་རྣམ་པ་གཞན་དུ་འདི་དག་གི་མཚན་ཉིད་ཅེས་བྱ་བ་གྲུབ་པ་ཡིན་ནོ། །རྒྱུན་གྱི་ཕྱོགས་ལ་ཡང་ཇི་སྐད་བཤད་པའི་ཚུལ་བཞིན་མཚན་ཉིད་རྣམ་པར་གཞག་པ་བརྗོད་པར་བྱའོ། །ད་ནི་ཇི་ལྟར་ན་མཚན་ཉིད་ཀྱི་གཞིའི་ཆོས་དེ་ཉིད་ཅེས་བྱ་བ་རྒྱས་པར་འབྱུང་བ་ལ། ཆོས་ཁོ་ན་མ་བྱུང་བ་ལས་བྱུང་བ་དང༌། བྱུང་ནས་ཡང་མི་འབྱུང་བ་དང༌། ཆོས་མ་ཡིན་པ་ལས་དོན་གཞན་དུ་གྱུར་པ་ཉིད་ཡིན་ན་མཚན་ཉིད་ཀྱི་གཞིའི་ཆོས་གང་ཡིན་པ་དེ་ཉིད་རང་གི་བདག་ཉིད་ཀྱི་ཡིན་ནོ་ཞེས་ཁས་བླངས་པར་འགྱུར་ན། དེ་ནི་འཐད་པ་ཡང་མ་ཡིན་ཏེ། གཞན་གྱིས་གཞན་མཚོན་པར་བྱེད་པའི་ཕྱིར་ཏེ། མེ་དང་དུ་བ་བཞིན་ན། འདུས་བྱས་ཀྱི་བདག་ཉིད་དུ་རེད་ལ་དེ་ཉིད་ཁོ་ན་ཡོད་པ་ཉིད་དང་དེ་ཉིད་སྐྱེ་བ་དང་དེ་ཉིད་འདུས་བྱས་ཉིད་དོ། །དེའི་ཕྱིར་དངོས་པོ་རྣམས་ཀྱི་མཚན་ཉིད་ཀྱི་གཞིའི་ཆོས་གང་ཡིན་པ་དེ་ཉིད་དེའི་མཚན་ཉིད་དུ་མི་རུང་ངོ་ཞེ་ན། རེ་ཞིག་ཇི་ལྟར་ཞེས་བྱ་བ་རྒྱས་པར་འབྱུང་སྟེ། སྐྱེས་བུ་ཆེན་པོ་དང་བ་ལང་ནི་ཚོགས་པའི་བདག་ཉིད་ཡིན་ཞིང༌། སྐྱེས་བུ་ཆེན་པོའི་མཚན་ཉིད་རྣམས་དང༌། ལྐོག་ཤལ་ལ་སོགས་པ་དག་ནི་ཚོགས་པ་ཅན་གྱི་རང་བཞིན་ཡིན་ལ། བྱེ་བྲག་པ་རྣམས་ཀྱི་ལྟར་ཚོགས་པ་ལས་གཞན་ཅིག་ཀྱང་མ་ཡིན་མོད་ཀྱི། འོན་ཀྱང་གཞན་ཉིད་མེད་ཀྱང་སྐྱེས་བུ་ཆེན་པོ་ཉིད་དང༌། བ་ལང་གི་བ་ལང་ཉིད་མཚན་ཉིད་ཡིན་ནོ། །སའི་ཁམས་ལ་སོགས་པ་ནི་ས་དང་ཆུ་དང་མེ་དང་རླུང་གི་ཁམས་རྣམས་སོ། །དེ་རྣམས་ཀྱི་མཚན་ཉིད་སྲ་བ་ལ་སོགས་པ་ནི་སྲ་བ་དང་གཤེར་པ་དང་དྲོ་བ་དང་གཡོ་བ་རྣམས་ཉིད་དོ། །དེ་རྣམས་ས་ལ་སོགས་པའི་ཁམས་རྣམས་ལས་གཞན་མ་ཡིན་པ་ཉིད་སའི་ཁམས་ལ་སོགས་པའི་མཚན་ཉིད་དུ་འགྱུར་རོ། །གཞན་ཡང་ཇི་ལྟར་གྱེན་དུ་འགྲོ་བ་ཞེས་བྱ་བ་ལ། གྱེན་དུ་འགྲོ་བ་ནི་བར་མེད་པར་ཡུལ་གོང་མར་སྐྱེ་བ་སྟེ། སྐྱེ་བ་མངོན་དུ་གཞན་དུ་གྱུར་པའོ། །ལྷག་མ་ནི་གོ་བར་ཟད་དོ། །འདིར་ཡང་ཚུལ་དེ་ཉིད་ཡིན་ནོ་ཞེས་བྱ་བ་ནི་མེ་དང་དུ་བའི་ཚུལ་ལོ། །འདི་ལྟར་སྐྱེ་བ་ལ་སོགས་པ་དག་ཀྱང་འདུས་བྱས་ལས་གཞན་མ་ཡིན་མོད་ཀྱི། འོན་ཀྱང་འདུས་བྱས་ཉིད་ཀྱི་མཚན་ཉིད་ཡིན་ནོ་ཞེས་བྱ་བར་མི་འགལ་ལོ། །འདུས་
བྱས་གཟུགས་ལ་སོགས་པ་ཞེས་བྱ་བ་རྒྱས་པར་འབྱུང་བ་ལ། ཇི་སྲིད་སྔ་ན་མེད་པ་མི་ཤེས་པ་ཞེས་སྐབས་དང་སྦྱར་ཏེ། ཕྱིས་མེད་པ་ནི་ཞི་གནས་མེད་པའོ། །རྒྱུན་གྱི་བྱེ་བྲག་ནི་གཞན་དུ་འགྱུར་བ་ཉིད་དོ། །དེ་ལྟ་ན་འདིར་མཚན་ཉིད་གསུམ་དག་བཤད་པར་འགྱུར་ཏེ། འདིར་གཟུགས་ལ་སོགས་པ་ནི་ཆོས་ཅན་ནོ། །རྒྱུ་དང་རྐྱེན་ལ་རག་ལས་པའི་བདག་ཉིད་ཐོབ་པ་ནི་འདུས་བྱས་སོ། །སྔ་ན་མེད་པ་དང་ཞིག་ནས་མེད་པ་དང་གཞན་དུ་གྱུར་པ་ཉིད་དག་ནི་མཚན་ཉིད་ཡིན་ནོ། །འདིར་དེ་ཉིད་ཁོ་ན་དེའི་མཚན་ཉིད་མ་ཡིན་ནོ། །འོ་ན་ཅི་ལྟར་གལ་ཏེ་སྔ་ནས་མེད་པའི་མཚན་ཉིད་སྐྱེ་བར་བརྗོད་ཅེ་ན། སྐྱེ་བར་ཡང་མངོན་ཞེས་བྱ་སྟེ། སྔ་ནས་མེད་པ་སྐྱེ་བར་འོས་པ་མ་ཡིན་པས་སོ། །འདིར་སྐྱེ་བ་སྨོས་པ་ནི་སྔ་ནས་མེད་པ་ཉེ་བར་མཚོན་པའི་དོན་ཏེ། སྐྱེ་བ་ནི་བདག་ཉིད་དུ་རེད་པའོ། །དེ་ཡང་སྔ་ནས་མེད་པ་ལས་ལྟོས་པ་མེད་དེ། ལཱ་བྷོ་ཧྱ་ལ་བྷ་སྭ་བྷ་བ་ཏི་ལ་བྷ་སྱེ་ཏི། གང་གི་ཕྱིར་མ་ཐོབ་པ་ལས་ཐོབ་པའི་ཐོབ་པ་ཞེས་བྱ་བ་ལྟ་བུའོ། །ཡང་ན་སྐྱེ་བ་ཉིད་ནི་མཚན་ཉིད་དོ། །དེ་ནི་གཟུགས་ལ་སོགས་པ་རྣམས་ཀྱི་སྤྱིའི་ཆོས་ཏེ། གཟུགས་ལ་སོགས་པ་རྣམས་ནི་སོ་སོར་མཚོན་པས་འདུས་བྱས་ཉིད་དོ། །འདུས་ཐོབ་པ་མ་ཐོབ་པ་ཡིན་ནོ། །ཐོབ་པའི་ཞེས་བྱ་བ་བྱས་ཉིད་ཀྱང་རྐྱེན་རྣམས་འདུས་ཏེ་བྱུང་བ་ལས་བྱས་པའི་གཟུགས་ལ་སོགས་པའོ། །ཡོད་པ་སྨོས་པས་དེའི་སྐྱེ་བ་སྔོན་དུ་འགྲོ་བ་ཅན་གཟུང་གི་འདུས་བྱས་ཀྱི་ཡོད་པ་ནི་མ་ཡིན་ནོ། །མཚན་ཉིད་འདི་རྣམས་རང་བཞིན་ལས་ཡིན་ཞིང་གཟུང་བ་རྣམས་ལ་ཡང་གཟུགས་ལ་སོགས་པ་རྣམས་ལ་ནི་རེ་ཞིག་མ་ཡིན་ནོ། །དེ་དག་གཟུགས་ཀྱི་རང་བཞིན་མ་ཡིན་བའི་ཕྱིར་ལ། གཟུགས་ལ་སོགས་པའི་རང་བཞིན་མ་ཡིན་ན་ཡང་དེ་དག་རྫས་སུ་ཡོད་པ་ཉིད་དུ་ཐལ་བར་འགྱུར་རོ། །དེ་དག་ལས་སྐྱེ་བ་ལ་སོགས་པ་ཞེས་བྱ་བ་ལ་སོགས་པ་ལ། གཟུགས་ལ་སོགས་པ་དག་ལས་གཞན་རྫས་ཉིད་དུ་ཡོད་པ་ཡང་མ་ཡིན་ཏེ། སྐྱེ་བ་ལ་སོགས་པ་རྣམས་བཏགས་པར་ཡོད་པའི་ཕྱིར་ཏེ། དེ་སྐད་དུ་ཡང༌། རྒྱུན་གྱི་དང་པོ་སྐྱེ་བ་ཡིན། །ཞེས་རྒྱས་པར་བཤད་དོ། །ཅིར་འགྱུར་ཞེས་བྱ་བ་ནི་ལུང་ངམ་རིགས་པ་དང་འགལ་སྙམ་དུ་བསམས་པའོ། །དེ་དག་ནི་ལྷན་ཅིག་འབྱུང་བའི་ཕྱིར་
ཞེས་བྱ་བ་ལ། སྐྱེ་བ་ལ་སོགས་པ་དག་ཆོས་དང་ལྷན་ཅིག་འབྱུང་བ་ཉིད་དུ་ཁས་བླངས་པའི་ཕྱིར་བྱ་བ་ཡོད་པར་ཐལ་བར་འགྱུར་རོ། །དེའི་ཕྱིར་ཆོས་གཅིག་ཏུ་ཞེས་བྱ་བ་ལ། ཆོས་དང་པོར་སྐྱེ་བར་འགྱུར་ཞིང༌། དེ་ནས་གནས་པ་དང༌། དེ་ནས་རྒ་བ་དང༌། དེ་ནས་འཇིག་པ་ནི་མ་ཡིན་ཏེ། དེའི་ཕྱིར་དེ་ལྟར་ན་དུས་གཅིག་ཏུ་སྐྱེ་བ་དང༌། གནས་པ་དང༌། ཞིག་པར་འགྱུར་རོ། །དེ་ལྟ་མ་ཡིན་ཏེ། བྱ་བའི་དུས་ཐ་དད་པའི་ཕྱིར་རོ། །ལྷན་ཅིག་འབྱུང་བའི་རྒྱུ་ཡིན་པའི་ཕྱིར་དུས་གཅིག་ཏུ་སྐྱེ་བ་ལ་སོགས་པར་འགྱུར་མོད་ཀྱི། འོན་ཀྱང་དེ་དག་གི་བྱ་བའི་དུས་ཐ་དད་དེ། གང་གི་ཕྱིར་སྐྱེ་བ་མ་འོངས་པའི་ཆོས་མ་འོངས་པ་ལ་བྱ་བ་བྱེད་དོ། །འདི་ལྟར་མ་སྐྱེས་པ་བསྐྱེད་དོ། །ཞེས་བྱ་བ་ནི་འདི་ཉིད་ལ་རྒྱུ་སྨྲས་པའོ། །གང་གི་ཕྱིར་སྐྱེ་བའི་བྱ་བ་ནི་སྐྱེད་པར་བྱེད་པ་ཡིན་གྱི། སྐྱེས་ཟིན་པ་ལ་ཡང་སྐྱེད་པར་ནི་མི་ནུས་ཏེ། དེའི་ཕྱིར་སྐྱེ་བ་མ་འོངས་པ་ཁོ་ནས་ཆོས་མ་འོངས་པ་སྐྱེད་པར་བྱེད་དོ་ཞེས་བྱ་བར་མི་འགལ་ལོ། །ད་ལྟར་གྱི་གནས་སྐབས་སུ་ནི་བྱ་བ་གཞན་ཞིག་པར་འགྱུར་རོ། །བསྐྱེད་ཟིན་པའི་ཆོས་ལ་ནི་ཞེས་བྱ་བ་རྒྱས་པར་འབྱུང་བ་ལ། ཆོས་སྐྱེས་པ་ནི་གནས་པ་དང༌། རྒ་བ་དང༌། གཞིག་པར་ནུས་ཀྱི་མ་སྐྱེས་པ་ནི་མ་ཡིན་ཏེ། དེའི་ཕྱིར། སྐྱེས་ཟིན་པའི་ཆོས་ལ་གནས་པ་ལ་སོགས་པ་ད་ལྟར་བ་བྱ་བ་བྱེད་དོ། །དེའི་ཕྱིར། གང་གི་ཚེ་སྐྱེ་བ་ལ་སོགས་པ་འབྱུང་ངོ༌། །རེ་ཞིག་འདིར་ཅི་ཞེས་རྒྱས་པར་འབྱུང་བ་ལ། མ་འོངས་པ་ནི་རྫས་སུ་ཡོད་པ་མ་ཡིན་པ་ཁོ་ན་སྟེ། དེ་མེད་ན་ཇི་ལྟར་སྐྱེ་བ་མ་འོངས་པ་ཡོད་པ་ཡིན་པས་བསྐྱེད་པར་བྱ་བ་བསྐྱེད་པར་འགྱུར་སྙམ་དུ་བསམས་པའོ། །མ་འོངས་པ་དེ་རྫས་སུ་ཡོད་དུ་ཆུག་ཡང་སྐྱེ་བ་བྱ་བ་མེད་ན་ཞེས་རྒྱས་པར་འབྱུང་བ་ལ། བྱ་བ་མ་ཐོབ་པ་ནི་མ་འོངས་པ་ཡིན་པར་འདོད་ལ། བྱ་བ་བྱེད་བཞིན་པ་ནི་ད་ལྟར་བའོ། །བྱ་བ་ཞིག་པ་འདས་པ་ཡིན་ནོ་ཞེས་དེ་ལྟར་དུས་རྣམ་པར་གནས་པ་ཡིན། སྐྱེ་བ་བྱ་བ་བྱེད་ན་ཇི་ལྟར་མ་འོངས་པར་འགྲུབ་པར་འགྱུར་ཏེ། མ་འོངས་པའི་དུས་ནི་སྐྱེས་བུའི་བྱེད་པའི་ཕྱིར་མི་འགྲུབ་པ་ཉིད་དོ་སྙམ་དུ་བསམས་པའོ། །གལ་ཏེ་རྫས་སུ་ཡོད་པ་བྱ་བ་བྱེད་བཞིན་པ་མ་འོངས་པ་ཡིན་ན་ནི་
མ་འོངས་པའི་མཚན་ཉིད་ཀྱང་བརྗོད་པར་བྱའོ། །བྱུང་བ་ཡང་བྱ་བ་ཞིག་པ་ཡིན་ན་ཞེས་བྱ་བ་རྒྱས་པར་འབྱུང་བ་ལ། བྱ་བ་ཞིག་པ་ནི་འདས་པ་ཡིན་པར་འདོད་ན། གལ་ཏེ་ད་ལྟར་བའི་གནས་སྐབས་སུ་སྐྱེ་བ་བྱ་བ་ཞིག་པ་ཡིན་ན་ཡང་འདས་པ་ཡིན་པར་འགྱུར་གྱི། ད་ལྟར་བ་ནི་མ་ཡིན་ནོ། །གནས་པ་ལ་སོགས་པ་ཡང་ཅིག་ཅར་བྱ་བ་ལ་འཇུག་པ་ཡིན་ན་ཞེས་བྱ་བ་རྒྱས་པར་འབྱུང་བ་ལ། སྐྱེས་ཟིན་པའི་ཆོས་ལ་ད་ལྟར་གནས་པ་ལ་སོགས་པ་རྣམས་བྱ་བ་བྱེད་པར་ཁས་བླངས་པས་དེ་དག་ཅིག་ཅར་བྱ་བ་ལ་འཇུག་པར་ཁས་བླངས་པར་འགྱུར་རོ། །དེའི་ཕྱིར་སྐད་ཅིག་མ་གཅིག་ཁོ་ན་ལ་ཆོས་ཐམས་ཅད་དུ་འགྱུར་རོ། །འདི་གང་གི་ཚེ་ཞེས་རྒྱས་པར་འབྱུང་བ་ལ། གནས་པ་དང༌། རྒ་བ་དང༌། འཇིག་པའི་བྱ་བ་དག་ནི་ཕན་ཚུན་འགལ་བའི་ཕྱིར་ཏེ། ཆོས་གནས་པ་ཡང་ཡིན་ལ་འཇིག་པ་ཡང་ཡིན་ནོ། །ཞེས་བྱ་བར་ནི་རྣམ་པར་གཞག་པར་མི་རིགས་སོ། །འདི་ཅི་དུས་དེར་ཞེས་བྱ་བ་རྒྱས་པར་འབྱུང་བ་ལ། གནས་པ་ལ་སོགས་པ་རྣམས་ཕན་ཚུན་འགལ་བའི་ཕྱིར་ད་ལྟར་བ་ལ་ཡང་བྱ་བ་བྱེད་དོ་སྙམ་དུ་སེམས་སོ། །གང་སྐྱེ་བ་ལ་སོགས་པ་རྣམས་ཀྱང་ཞེས་བྱ་བ་ལ་སོགས་པ་ལ། ཇི་ལྟར་སྐྱེས་པ་མི་སྐྱེ་བ་དེ་བཞིན་དུ་མི་གནས་པ་མི་རྒ་ལམ་རྒས་པས་མི་འཇིག་པ་དེའི་ཕྱིར། གནས་པ་ལ་སོགས་པ་རྣམས་ཀྱང་བྱ་བ་རིམ་གྱིས་བྱེད་དོ་ཞེས་ཟེར་བ་དེའི་ལྟར་ན་སྐད་ཅིག་མ་ཉིད་ལ་གནོད་པར་འགྱུར་རོ། །སྐད་ཅིག་མ་ཞེས་བྱ་བ་ནི་དུས་ཐམས་ཅད་པས་ཆུང་བ་ཡིན་ན་འདིར་ནི་གནས་པ་དང༌། རྒ་བའི་དུས་དག་ཏུ་མི་འཇིག་པའི་ཕྱིར་སྐད་ཅིག་མ་གསུམ་དུ་གནས་པས་སྐད་ཅིག་མ་ཉིད་ལ་གནོད་པར་འགྱུར་རོ། །འོན་ཏེ་འདི་སྐད་དུ་ཞེས་བྱ་བ་རྒྱས་པར་འབྱུང་བ་ལ། སྐད་ཅིག་མ་ནི་དུས་ཇི་ཙམ་གྱིས་སྐྱེ་བ་དང༌། གནས་པ་དང༌། རྣམ་པར་འགྱུར་བ་དང༌། འཇིག་པ་རྣམས་རྫོགས་པར་འགྱུར་བའི་དུས་དེ་ལ་བརྗོད་ཀྱི། སྐྱེས་མ་ཐག་ཏུ་འཇིག་པ་ནི་མ་ཡིན་ནོ་ཞེ་ན། དེ་ལྟ་ན་ཡང་དེ་དག་དང་ལྷན་ཅིག་འབྱུང་བ་ལས་ཞེས་བྱ་བ་རྒྱས་པར་འབྱུང་བ་ལ། ལྷན་ཅིག་འབྱུང་བ་རྣམས་ནི་རིམ་གྱིས་བྱ་བ་བྱེད་པར་མི་རུང་སྟེ། སྔོན་དང་ཕྱིས་ཁྱད་པར་མེད་པའི་ཕྱིར་དང༌། ལྷན་ཅིག་
བྱེད་པའི་རྐྱེན་ཁྱད་པར་མེད་པའི་ཕྱིར་རོ། །དེར་ཡང་སྔར་གནས་པས་བྱ་བ་བྱེད་ཀྱི། རྒ་བ་དང་མི་རྟག་པ་ཉིད་ཀྱིས་ནི་མ་ཡིན་ནོ་ཞེས་བྱ་བ་འདི་ལ་རྒྱུ་ཅི་ཞིག་ཡོད། གནས་པ་སྟོབས་དང་ལྡན་པའི་ཕྱིར་རོ་ཞེས་བྱ་བ་ནི་རྒྱུ་སྨོས་པ་སྟེ། དེའི་སྟོབས་དང་ལྡན་པའི་ཕྱིར་རྒ་བ་དང་མི་རྟག་པ་ཉིད་དག་གི་བྱ་བ་ལ་གེགས་བྱས་ནས་རང་གིས་བྱ་བ་བྱེད་དོ། །ཕྱིས་ཅིའི་ཕྱིར་སྟོབས་དང་ལྡན་པ་ཉིད་དུ་གྱུར་ཞེས་བྱ་བ་ལ། གང་ལས་འདི་ཆོས་དང་ལྷན་ཅིག་ཏུ་མི་རྟག་པ་ཉིད་ཀྱིས་འཇོམས་པར་འགྱུར་བ་གནས་པ་ཕྱིས་སྟོབས་ཆུང་བའི་རྒྱུ་ནི་ཡོད་པ་མ་ཡིན་ནོ། །དེའི་ཕྱིར་གནས་པ་ལ་སོགས་པ་རྣམས་ཀྱི་བྱ་བ་ནི་སྐྱེས་མ་ཐག་ཏུ་ལྷན་ཅིག་ཏུ་ཡོད་པར་འགྱུར་བའམ། གལ་ཏེ་སྟོབས་དང་ལྡན་པའི་བྱ་བ་སྔར་འདོད་ན་མི་རྟག་པ་ཉིད་ཀྱི་བྱ་བ་ཁོ་ན་ཡིན་པར་འགྱུར་རོ། །བྱ་བ་བྱས་པས་ཞེས་བྱ་བ་རྒྱས་པར་འབྱུང་བ་ལ། འདིས་ཕྱིས་ནི་སྟོབས་དང་མི་ལྡན་པ་ཉིད་ཀྱི་རྒྱུ་སྨྲས་པ་སྟེ། བྱ་བ་མ་བྱས་པའི་གནས་པ་ནི་རྒ་བ་དང་མི་རྟག་པ་ཉིད་དག་པས་སྟོབས་དང་ལྡན་པའི་ཡིན་གྱི། བྱ་བ་བྱས་པས་ནི་ཡང་བྱ་བ་བྱེད་པར་མི་ནུས་ཏེ་སྐྱེ་བ་བཞིན་ནོ། །དེའི་ཕྱིར་ཆོས་དང་ལྷན་ཅིག་ཏུ་མི་རྟག་པ་ཉིད་ཀྱི་འཇིག་པར་འགྱུར་རོ། །སྐྱེ་བས་ནི་མི་ནུས་པར་རིགས་ཏེ་ཞེས་བྱ་བ་འདིས་ནི་དཔེ་དོན་དང་མི་མཐུན་པར་སྟོན་པར་བྱེད་དོ། །སྐྱེ་བས་ནི་ད་ལྟར་བ་ཉིད་དུ་ཁྱེར་ཏེ་འོངས་ནས་ཡང་བཀུར་བར་མི་ནུས་སོ། །དེའི་ཕྱིར་འདི་བྱ་བ་བྱས་ཟིན་པ་ཡང་བྱ་བ་བྱེད་པ་ལ་ནུས་པ་མེད་པར་རིགས་སོ། །གནས་པ་བྱ་བ་བྱས་ཟིན་པ་ཉིད་ཡང་བྱ་བ་མི་བྱ་བ་ལ་ནི་རྒྱུ་ཡོད་པ་མ་ཡིན་ཏེ། གང་གི་ཕྱིར་གནས་པས་ནི་གནས་པར་བྱ་བ་ཡང་གནས་པར་བྱ་བར་ནུས་པའི་ཕྱིར་རོ། །ཡང་ན་འདི་ལ་གེགས་བྱེད་པ་ཡང་གང་ཞིག་ཡིན་ཞེས་བྱ་བ་ལ། གལ་ཏེ་བྱ་བ་བྱས་ཟིན་པ་ཡང་བྱ་བ་བྱེད་པ་དེ་ལ་གེགས་བྱེད་པ་འགའ་ཞིག་ཡོད་ན་ནི་བྱ་བ་མི་བྱེད་པར་འགྱུར་བ་ཞིག་ན། གེགས་བྱེད་པ་ནི་ཡོད་པ་ཡང་མ་ཡིན་ནོ། །གེགས་བྱེད་པ་ཡོད་དོ། །རྒ་བ་དང་མི་རྟག་པ་དེ་དག་ཁོ་ན་ཡིན་ནོ། །འདི་ལྟར་སྟོབས་ཆུང་བའི་གེགས་བྱེད་པ་ནི་སྟོབས་ཆེ་བ་ཡིན་ནོ། །གལ་ཏེ་གནས་པ་བས་སྟོབས་དང་ལྡན་པ་ཞིག་ཡིན་ན་ནི་སྔོན་ཁོ་ནས་
གནས་པ་རང་གི་བྱ་བ་མི་བྱེད་པར་འགྱུར་ཏེ། དེ་དག་གི་གེགས་བྱས་པའི་ཕྱིར་རོ། །གནས་པ་སྔོན་སྟོབས་དང་ལྡན་པ་ཡིན་ལ། ཕྱིས་ནི་རྒ་བ་དང་མི་རྟག་པ་དག་གོ །འདིས་རྒ་བ་དང་མི་རྟག་པ་དག་གིས་གནས་པ་དང་ལྷན་ཅིག་བྱེད་པ་ལ། སྔར་གནས་པ་ཤིན་ཏུ་བྱེད་པ་མེད་པར་འགྱུར་རོ། །རང་བཞིན་དང་རྒྱུ་ཁྱད་པར་མེད་ཀྱང་གནས་པ་སྔོན་སྟོབས་དང་ལྡན་ལ། ཕྱིས་སྟོབས་དང་མི་ལྡན་ནོ་ཞེས་བྱ་བ་འདི་ཡང་དད་པར་བྱ་དཀའ་བ་ཞིག་གོ །དེ་ལྟར་ན་རྒ་བ་དང་མི་རྟག་པ་དག་ཀྱང་སྔར་སྟོབས་དང་མི་ལྡན་ལ་ཕྱིས་སྟོབས་དང་ལྡན་ནོ་ཞེས་བྱ་བར་སྒྲུབ་པར་མི་ནུས་སོ། །གནས་པའི་བྱ་བ་ལོག་ན་ཡང་ཞེས་བྱ་བ་རྒྱས་པར་འབྱུང་བ་ལ། གནས་པ་ནི་མི་གནས་པ་དང་འགལ་བའི་སྒོ་ནས་ཡིན་ནོ། །གནས་པའི་བྱ་བ་ཞིག་ན་ཡང་རྒ་བ་དང་མི་རྟག་པ་ཉིད་དག་ཀྱང་མི་གནས་ལ། རྒ་བ་དང་མི་རྟག་པ་ཉིད་དག་གང་གི་ཡིན་པའི་ཆོས་དེ་ཡང་མི་གནས་སོ། །དེ་དག་ནི་གནས་པས་བྱ་བ་ཡོངས་སུ་གཟུང་བས་གནས་པ་ཡིན་ཞིང་དེ་ཞིག་པས་དེ་དག་ངེས་པར་མི་གནས་པ་ཡིན་པས་ཇི་ལྟར་བདག་ཉིད་མི་གནས་པའི་རྒ་བ་དང་མི་རྟག་པ་དག་གིས་བྱ་བ་བྱེད་ནུས་པར་འདོད། ཆོས་མི་གནས་པ་ནི་འགག་པ་ཉིད་ཡིན་ན་དེ་འགགས་ན་ནི་གང་ཞིག་ལ་བྱ་བ་བྱེད་པར་ནུས་པར་འདོད། ཡང་ན་རྒ་བ་དང་མི་རྟག་པ་ཉིད་དེ་དག་གིས་ཅི་ཞིག་བྱ་བ་ཅུང་ཟད་ཀྱང་མེད་དོ་སྙམ་དུ་དགོངས་པ་ཡིན་ནོ། །ཅིའི་ཕྱིར་ཞེ་ན། དེའི་ཕྱིར་གནས་པས་ཡོངས་སུ་གཟུང་བའི་ཕྱིར་ཞེས་བྱ་བ་སྨོས་ཏེ། གནས་པས་ཡོངས་སུ་གཟུང་བའི་ཕྱིར་ཆོས་སྐྱེས་བ་ཙམ་དེ་མ་ཞིག་པ་ཡིན་ནོ། །དེ་གནས་པས་དེས་ཡལ་བར་བཏང་ན་ནི་ཞེས་བྱ་བ་ལ། གནས་པར་མ་བྱས་པ་ནི་ངེས་པར་རང་གི་དེ་ཁོ་ནས་མི་གནས་པ་ཡིན་ནོ། །དེ་ཉིད་འདི་འཇིག་པ་ཡིན་ནོ་ཞེས་བྱ་བ་ནི་མི་གནས་པ་གང་ཡིན་པའོ། །རེ་ཞིག་ཆོས་སྐྱེས་པ་གཅིག་ལ་ཞེས་བྱ་བ་རྒྱས་པར་འབྱུང་བ་ལ། ཇི་ལྟར་སྐྱེས་པ་དེ་བཞིན་ཁོ་ནར་འཇིག་སྟེ། འཇིག་པ་དང་གནས་པ་དང་མི་རྟག་པ་ཞེས་བྱ་བ་གཅིག་དང་དངོས་པོར་ཡོད་པ་མ་ཡིན་ནོ། །སྐྱེས་པ་ལ་མི་འཇིག་པ་མེད་དོ་ཞེས་བྱ་བ་ཁས་མ་བླངས་པར་བརྗོད་པར་བྱའོ། །གཅིག་ལ་རྒ་བ་ནི་ཞེས་བྱ་བ་ལ་སོགས་པ་ལ།
རྒ་བ་ཞེས་བྱ་བ་ནི་འཇིག་པ་དང་མཐུན་པ་སྐྱེས་པའི་གནས་སྐབས་གཞན་དུ་འགྱུར་ཞིང་རྣམ་པར་འགྱུར་བ་ཡིན་ནོ། །དེ་ཉིད་ལས་དེའི་རྣམ་པ་གཞན་དུ་མི་རུང་བ་མ་ཡིན་ནོ། །གལ་ཏེ་འདི་ཁོ་ན་ཡིན་ན་ཇི་ལྟར་གཞན་དུ་འགྱུར་བ་ཡིན་ལ། གཞན་དུ་འགྱུར་བ་ཡིན་ན་ཇི་ལྟར་དེ་ཁོ་ན་ལྟར་ཡིན་ཏེ། དེ་ཁོ་ན་བཞིན་དུ། གཞན་དུ་འགྱུར་བ་ཞེས་བྱ་བ་འདི་ནི་འགལ་ལོ། །གཅིག་ཀྱང་གཞན་ལ་བལྟོས་ནས་དེ་ལྟར་རྣམ་པ་གཞན་དུ་ཡང་ཞེས་བྱ་བ་ལ། དཔེར་ན་ནམ་མཁའ་དང་འདྲ་བར་རྗེས་སུ་འཇུག་པའི་ལས་ལ་དེ་ལྟར་རྣམ་པ་གཞན་དུ་ཡང་ཞེས་བསྟན་ཏེ། བདག་ཉིད་ལ་བལྟོས་ནས་ནི་རྣམ་པ་གཞན་དུ་ན་ཞེས་བརྗོད་པར་མི་ནུས་སོ། །དེ་ལ་རྣམ་པ་གཞན་དང་གཞན་ཉིད་ཡོད་པའི་ཕྱིར་རོ། །གང་ཡང་སྡེ་བ་གཞན་དག་ན་རེ་ཞེས་བྱ་བ་རྒྱས་པར་འབྱུང་བ་ལ། འཇིག་པའི་རྒྱུ་དང་ཕྲད་ནས་མི་རྟག་པ་ཉིད་ཀྱིས་འཇིག་པའི་ཕྱིར་ལ། གནས་པ་ནི་རྒྱུ་གཞན་ལ་མི་ལྟོས་པར་གནས་པར་བྱེད་པ་ལ་དེའི་ཕྱིར་གནས་པ་དང་མི་རྟག་པ་ཉིད་ཀྱི་བྱ་བ་དུས་ཐ་དད་དོ་ཞེས་ཟེར་རོ། །འཇིག་པའི་རྒྱུ་དེ་ཉིད་ཀྱིས་འཇིག་ན་ཞེས་བྱ་བ་ལ། འཇིག་པའི་རྒྱུ་ཡོད་ན་འཇིག་པའི་ཕྱིར་དང༌། དེ་མེད་ན་མི་འཇིག་པའི་ཕྱིར་ལ། མི་རྟག་པ་ཉིད་ཀྱིས་ནི་དེ་ཡོད་ན་མ་ཡིན་པས་མི་རྟག་པ་ཉིད་དོན་མེད་པར་རྟོགས་པ་ཡིན་ཏེ། འཇིག་པའི་རྒྱུ་ལྟར་དེ་ལ་འཇིག་པར་བྱ་བ་ལ་ནུས་པ་མ་མཐོང་བའི་ཕྱིར་རོ། །དེ་བཞིན་དུ་ལྷ་དང་འཁྲུ་བ་དག་ལ་ཡང་བརྗོད་པར་བྱའོ། །སེམས་དང་སེམས་ལས་བྱུང་བ་རྣམས་ཞེས་བྱ་བ་ལ། སྡེ་བ་གཞན་དེ་གཟུགས་ཅི་ཡང་རུང་བ་སྐད་ཅིག་མར་འདོད་པས་སྐད་ཅིག་མ་མ་ཡིན་པ་ཅུང་ཟད་ཀྱང་མེད་དོ། །དེ་བཞིན་དུ་མི་ལྡན་པའི་འདུ་བྱེད་རྣམས་དང་སེམས་དང་སེམས་ལས་བྱུང་བ་རྣམས་ཡང་མི་རྟག་པ་ཉིད་འཇིག་པའི་རྒྱུ་ལ་མི་ལྟོས་པར་འཇིག་པར་འདོད་དོ། །དེ་ལྟ་མ་ཡིན་ན་དེ་དག་སྐད་ཅིག་མ་ཉིད་ཡིན་པ་ལ་གནོད་པར་འགྱུར་རོ། །དེ་བཞིན་དུ་མི་རྟག་པ་ཉིད་གནས་པ་བཞིན་སྐྱེ་བ་གཞན་ཉིད་ལ་རྒྱུ་གཞན་ལ་མི་ལྟོས་པའི་ཕྱིར་བྱ་བ་བྱེད་པར་འགྱུར་ཞིང༌། དེའི་ཕྱིར་གནས་པ་དང་མི་རྟག་པ་དག་དུས་ཐ་མི་དད་པར་བྱ་བ་བྱེད་པ་ཐལ་བར་འགྱུར་བས། སེམས་དང་སེམས་ལས་
བྱུང་བ་རྣམས་དུས་གཅིག་ཏུ་གནས་པ་དང་འཇིག་པ་ཉིད་དུ་ཐལ་བར་འགྱུར་རོ། །དེ་ལྟ་བས་ན་རྒྱུན་ལ་འདུས་བྱས་ཀྱི་མཚན་ཉིད་འདི་དག་ཅེས་བྱ་བ་ལ་སོགས་པ་འབྱུང་ངོ༌། །དེ་ལྟ་ན་མདོ་སྡེ་འདི་ཞེས་བྱ་བ་ལ། གསུམ་པོ་འདི་དག་ནི་འདུས་བྱས་ཀྱི་མཚན་ཉིད་དེ་ཞེས་རྒྱས་པར་གསུངས་པ་ལེགས་པར་དྲངས་པར་འགྱུར་རོ། །སྐྱེ་བ་ལ་སོགས་པ་རྣམས་རྒྱུན་ལ་འགལ་བ་མེད་པའི་ཕྱིར་འདུས་བྱས་ཀྱི་མཚན་ཉིད་ནི་འདི་དག་རྒྱུན་ལ་བཤད་པ་དེ་ལྟར་ནི་ལེགས་པར་དྲངས་པར་འགྱུར་ཞིང༌། སྐད་ཅིག་གི་དབང་དུ་བྱས་ནས་བཤད་ན་མ་ཡིན་ཏེ། ཇི་སྐད་དུ་བཤད་པའི་ཚུལ་དང་འགལ་བའི་ཕྱིར་རོ། །གཞན་ཡང་གལ་ཏེ་མ་འོངས་པའི་སྐྱེ་བ་ཞེས་བྱ་བ་རྒྱས་པར་འབྱུང་བ་ནི་ཐམས་ཅད་སྐྱེ་བ་དང་ལྡན་པའི་ཕྱིར་དང༌། མ་འོངས་པ་སྐྱེ་བ་བསྐྱེད་པར་བྱེད་པ་ཉིད་དུ་ཁས་བླངས་པའི་ཕྱིར་འདྲི་བའོ། །རྒྱུ་དང་རྐྱེན་དག་མེད་པར་ནི་ཞེས་བྱ་བ་ལ། རྒྱུ་དང་རྐྱེན་ལ་མི་ལྟོས་པར་སྐྱེ་བ་སྐྱེད་པར་བྱེད་པར་མི་འདོད་ལ་མ་འོངས་པ་ལ་ཐམས་ཅད་ལ་ཡང་རྒྱུ་དང་རྐྱེན་གྱི་ཚོགས་པ་ཅིག་ཅར་ཡོད་པ་མ་ཡིན་ཞིང༌། གང་ཡང་རུང་བ་ཞིག་མེད་པར་ཡང་འབྲས་བུ་སྐྱེ་བར་མི་འགྱུར་བས། མ་འོངས་པ་ཐམས་ཅད་ཅིག་ཅར་སྐྱེ་བ་མ་ཡིན་ནོ། །སྐྱེ་བ་ནི་གདོན་མི་ཟ་བར་རང་གི་སྡེ་དང་རིགས་མཐུན་པའི་རྒྱུར་སྔར་སྐྱེས་པ་དང༌། ཕྱི་རོལ་གྱི་རྐྱེན་གྱི་ཚོགས་ལ་ལྟོས་པ་ཡིན་ཏེ། དཔེར་ན་མྱུ་གུའི་སྐྱེ་བ་ས་བོན་དང༌། ཞིང་ལ་སོགས་པ་རྣམས་ལ་ལྟོས་པ་བཞིན་ནོ། །འོ་ན་ནི་ཚོགས་པ་ཞེས་བྱ་བ་རྒྱས་པར་འབྱུང་བ་ལ། བསྐྱེད་པར་བྱ་བ་འདི་རྒྱུ་དང་རྐྱེན་རྣམས་ཀྱི་ཚོགས་པ་ཡོད་ན་ནི་འབྱུང་ལ། མེད་ན་མི་འབྱུང་བས་རྒྱུ་དང་རྐྱེན་ཁོ་ནའི་མཐུ་ཡིན་པར་ངེས་པར་གཟུང་གི་སྐྱེ་བ་ནི་མ་ཡིན་ཏེ། དེ་ཡོད་ཀྱང་འབྲས་བུ་སྐྱེ་བ་མེད་པའི་ཕྱིར་རོ། །སློབ་དཔོན་འདུས་བཟང་ན་རེ། དེ་ནི་དེ་ལྟར་མ་ཡིན་ཏེ། སྐྱེ་བ་ཐམས་ཅད་ཀྱི་རྒྱུ་མཚུངས་པའི་ཕྱིར་རོ། །གལ་ཏེ་མ་འོངས་པའི་ཆོས་ཀྱི་ཁྱད་པར་སྐྱེ་བ་ལ། དེའི་རྒྱུ་ཉེ་ཡང་ཅིའི་ཕྱིར་མ་འོངས་པ་ཐམས་ཅད་ཅིག་ཅར་མི་སྐྱེ། འདི་ནི་མཚུངས་སོ་ཞེ་ན་འདི་ཁ་ཅིག་ཏུ་མི་མཚུངས་ཏེ་རྒྱུའི་ནུས་པ་མཐོང་བ་ལས་འབྲས་བུ་མེད་པ་ནི་ནུས་པ་མ་གོམས་
པ་ལས་སོ། །དཔེར་ན་འབྱུང་བ་རྣམས་ལས་རྒྱུར་བྱས་པའི་གཟུགས་སྐྱེ་བ་ལ་སྔོན་གྱི་ལས་ལ་རག་ལས་པའི་ནུས་པ་རྣམས་མཐོང་བས་མིག་སྐྱེད་པ་ལམ་གོམས་པ་བཞིན་ནོ། །འདི་ལ་བཙུན་པ་ཆོས་དགའ་ན་རེ། དཔེར་ན་མིག་ནི་སྣང་བ་ལ་སོགས་པའི་རྐྱེན་མེད་པར་མིག་གི་རྣམ་པར་ཤེས་པ་སྐྱེད་པར་མི་བྱེད་མོད་ཀྱི། དེའི་ཕྱིར་དེ་སྐྱེ་བའི་རྒྱུ་མ་ཡིན་པ་ཡང་མ་ཡིན་པ་དེ་བཞིན་དུ། སྐྱེ་བ་ཡང་རྒྱུ་དང་རྐྱེན་དག་མེད་པར་ཆོས་སྐྱེད་པར་མི་བྱེད་མོད་ཀྱི། དེའི་ཕྱིར་དེ་སྐྱེ་བའི་རྒྱུ་མ་ཡིན་པ་ཡང་མ་ཡིན་ནོ་ཞེས་ཟེར་ཏེ། འདི་ལ་སྨྲས་པ་འདི་ནི་མི་འདྲའོ། །སྣང་བ་ལ་སོགས་པ་ཡོད་དུ་ཟིན་ཀྱང་ལོང་བ་མ་ཡིན་པ་དག་གི་མིག་ནི་མིག་གི་རྣམ་པར་ཤེས་པ་སྐྱེ་བ་དང་མི་སྐྱེ་བ་སྣང་བའི་ཕྱིར་མིག་གི་ནུས་པ་ནི་མཐོང་གི་སྐྱེ་བ་ནི་དེ་ལྟ་མ་ཡིན་ནོ། །ཆོས་ཀྱི་རང་བཞིན་ཕྲ་མོ་རྣམས་ལ་ཡང་ཆོས་ཀྱི་རང་བཞིན་ལས་སྐྱེ་བ་གཅད་པའི་ཕྱིར། དེ་ལྟར་སེམས་ལས་བྱུང་བ་ཕྲ་མོ་རེག་པ་ལ་སོགས་པ་ངེས་པར་གཟུང་ཡང༌། རང་བཞིན་ལས་ཆོས་ཀྱི་བྱེད་པ་ཡོད་དོ་ཞེས་ངེས་པར་གཟུང་གི །སྐྱེ་བ་ལས་རེག་པ་བཞིན་བྱེད་པ་ཡོད་པ་ནི་མ་ཡིན་ནོ། །གང་ཡང་ཆོས་སྐྱེད་པའི་བྱེད་པ་གསུངས་པ་དེ་ཡང་རྒྱུ་དང་རྐྱེན་དག་ཁོ་ན་ལ་རུང་གི་སྐྱེ་བ་ལས་མ་ཡིན་ཏེ་སྐྱེ་བ་དགག་པར་བྱའོ། །རང་གི་ངོ་བོའི་སྒོ་ནས་མ་རྟོགས་པ་ནི་མ་ཡིན་ནོ་ཞེས་བྱ་བ་འདི་ནི་ལན་མ་ཡིན་ནོ། །ཆོས་ཀྱི་རང་བཞིན་ཕྲ་མོ་དག་ཡོད་བཞིན་དུ་ཞེས་བྱ་བ་ལ། ད་ནི་བྱ་བ་གཞན་བསྟན་པའི་ཕྱིར་སྐྱེ་བ་ཞིག་མེད་ན་ཞེས་བྱ་བ་ལ་སོགས་པ་སྨྲས་སོ། །རང་གི་མཚན་ཉིད་ལ་ལྟོས་པའི་ཕྱིར་གཟུགས་ལ་སོགས་པ་རྣམས་ལ་གཟུགས་ལ་སོགས་པ་རྐྱེན་ཏེ། དེའི་རང་གི་མཚན་ཉིད་ལྟར་གཟུགས་ལ་སོགས་པ་རྣམས་ལ་སོ་སོར་ངེས་སོ། །སྐྱེ་བ་ལ་སོགས་པའི་རྐྱེན་ནི་གཟུགས་ལ་སོགས་པ་རྣམས་ལ་མཚུངས་པའི་ཕྱིར། གཟུགས་ལ་སོགས་པའི་རྒྱུ་མ་ཡིན་ནོ། །རྒྱུ་ཡིན་པར་འོས་པ་མ་ཡིན་ཏེ། དེའི་ཕྱིར་རྒྱུ་གང་ཡིན་པ་དེ་རྣམས་རྐྱེན་ཏེ་གཟུགས་ལ་སོགས་པ་རྣམས་ལ་རབ་ཏུ་འཇུག་གོ །གཟུགས་སྐྱེས་སོ། །ཚོར་བ་སྐྱེས་སོ་ཞེས་དེ་དག་ལ་གཟུགས་ལ་སོགས་པ་རྣམས་ཡོད་དོ་ཞེས་བྱ་བར་རྟོགས་པར་བྱའོ། །དྲུག་པའི་
ཚིག་ཏུ་ཡང་མི་འགྱུར་ཏེ་ཞེས་བྱ་བ་ལ། གཟུགས་ཀྱི་སྐྱེ་བ་ཞེས་བྱ་བའི་དྲུག་པ་འདི་ནི་འབྲེལ་པའི་རྒྱུ་མཚན་ཅན་ཡིན་ལ། འབྲེལ་པ་ཡང་ལྷས་བྱིན་གྱི་ཞང་པོ་ཞེས་བྱ་བ་ལྟར་གཞན་དུ་ཡིན་གྱི་དེ་ཉིད་དང་དེའི་མ་ཡིན་པས་གཟུགས་ཀྱི་ཞེས་བྱ་བས་མ་ཡིན་ནོ། །དེའི་ཕྱིར་ངེས་པར་སྐྱེ་བ་ལ་སོགས་པའི་ཆོས་དོན་གཞན་དུ་གྱུར་པ་ཁས་བླང་པར་བྱའོ། །དེ་ལྟ་མ་ཡིན་ན་དྲུག་པའི་ཚིག་ཏུ་མི་འགྱུར་ཞེས་བྱ་བའོ། །དེ་བཞིན་དུ་མི་རྟག་པ་ཉིད་ཀྱི་བར་དུ་ཞེས་བྱ་བ་ལ། གནས་པ་ལ་སོགས་པ་དག་མེད་ན། གནས་སོ་རྒས་སོ་ཞིག་གོ་ཞེས་བྱ་བ་དང༌། གཟུགས་ཀྱི་གནས་པ་དང་མི་རྟག་པ་ཉིད་ཅེས་བྱ་བའི་བར་གྱི་དྲུག་པའི་ཚིག་ཏུ་ཡང་མི་འགྱུར་རོ། །འོ་ན་ནི་དེས་ན་ཞེས་བྱ་བ་ལ། གལ་ཏེ་སྐྱེས་སོ་གནས་སོ་ཞེས་བྱ་བ་ལ་སོགས་པའི་ཡིད་ཆེས་པ་རབ་ཏུ་བསྒྲུབ་པར་བྱ་བའི་ཕྱིར་དང༌། དྲུག་པའི་ཚིག་གི་ཕྱིར་སྐྱེ་བ་ལ་སོགས་པ་དོན་གཞན་དུ་གྱུར་པ་དག་འདོད་ན། འོ་ན་ནི་དེས་ན་བདག་མེད་པའི་བློ་དང༌། གཟུགས་ཀྱི་བདག་མེད་པ་ཉིད་ཅེས་དྲུག་པའི་ཚིག་འགྲུབ་པར་བྱ་བའི་ཕྱིར་བདག་མེད་པ་ཉིད་གཅིག་ཀྱང་འདོད་པར་བྱ་སྟེ། བདག་མེད་པའི་བློ་དང་སྐྱེ་བ་ལ་སོགས་པའི་བློ་ཡང་གཟུགས་དང༌། ཚོར་བ་ལ་སོགས་པའི་རང་གི་ངོ་བོའི་རྒྱུ་ཅན་ནི་མ་ཡིན་ཏེ་ཐམས་ཅད་མཚུངས་པར་འབྱུང་བའི་ཕྱིར་རོ། །དེ་བཞིན་དུ་བསྟན་དུ་ཡོད་པ་དང༌། ཐོགས་དང་བཅས་པ་དག་ལ་ཡང་བརྗོད་པར་བྱའོ། །མུ་སྟེགས་བྱེད་ཀྱི་ཡོངས་སུ་བརྟག་པ་ཞེས་པ་ནི་བྱེ་བྲག་པས་ལོངས་སུ་བརྟགས་པའོ། །ཡོད་པ་ལ་སོགས་པ་ཞེས་བྱ་བ་ལ། སོགས་པ་ཞེས་བྱ་བའི་སྒྲ་ནི་རྫས་ཉིད་དང་གཟུགས་ཉིད་དང་བུམ་པ་ལ་སོགས་པ་དང་སྦྲེལ་ལོ། །གཟུགས་གཅིག །གཟུགས་གཉིས། གཟུགས་མང་པོ་སྙམ་པའི་ཤེས་པ་འགྲུབ་པར་བྱ་བའི་ཕྱིར་གཅིག་ལ་སོགས་པའི་གྲངས་ཁས་བླང་བར་བྱ་དགོས་སོ། །གཟུགས་ཆུང་ངོ༌། །གཟུགས་ཆེའོ་སྙམ་པའི་ཤེས་པ་འགྲུབ་པར་བྱ་བའི་ཕྱིར་ཆུང་ངུ་དང༌། ཚད་ཆེན་པོ་ཡང་ཁས་བླང་བར་བྱའོ། །དེ་བཞིན་དུ་ཐ་དག་པ་དང་ལྡན་པ་དང༌། རྣམ་པར་དབྱེ་བ་དང༌། གཞན་དང་གཞན་མ་ཡིན་པའི་ཤེས་པ་རབ་ཏུ་བསྒྲུབ་པར་བྱ་བའི་ཕྱིར་ཐ་དད་པ་ཉིད་དང་ལྡན་པ་དང༌། རྣམ་པར་དབྱེ་
བ་དང། གཞན་ཉིད་དང༌། གཞན་ཉིད་མ་ཡིན་པ་དག་ཀྱང་ཁས་བླང་བར་བྱ་དགོས་སོ། །ཡོད་པ་ལ་སོགས་པའི་བློ་འགྲུབ་པར་བྱ་བའི་ཕྱིར་ཞེས་བྱ་བའི་སོགས་པའི་སྒྲས་ནི་རྫས་དང༌། བུམ་པ་དང༌། སྒྲ་ལ་སོགས་པའི་བློ་བསྡུ་སྟེ། དེ་དག་བསྒྲུབ་པར་བྱ་བའི་ཕྱིར་ཡོད་པ་དང༌། རྫས་དང༌། བུམ་པ་ཉིད་དང༌། གཟུགས་ལ་སོགས་པ་ལ་སྤྱི་དང་བྱེ་བྲག་དག་ཀྱང་ཁས་བླང་བར་བྱའོ། །གཟུགས་ཀྱི་ལྡན་པ་ཞེས་བྱ་བ་ལ། འདིར་ལྡན་པ་ཞེས་བྱ་བ་ནི་དཔེར་བརྗོད་པ་སྟེ། གཟུགས་ཀྱི་རྣམ་པར་དབྱེ་བ་གཟུགས་གཅིག་ཉིད་ཅེས་བྱ་བ་ལ་སོགས་པ་གཞན་ལ་ཡང་བརྗོད་པར་བྱའོ། །གཟུགས་ཀྱི་རང་བཞིན་ཞེས་བྱ་བའི་དྲུག་ལ་འདི་ཡང་ཇི་ལྟར་བརྟག །གང་གི་ཕྱིར་རང་བཞིན་གཟུགས་ལས་གཞན་ཡོད་པ་ནི་མ་ཡིན་ནོ། །དེའི་ཕྱིར་གདོན་མི་ཟ་བར་འདི་ལྟར་བརྟག་པར་བྱ་སྟེ། ཚོར་བ་ལ་སོགས་པ་དག་ལ་ཡང་ཡོད་པའི་ཕྱིར། རང་བཞིན་ནི་རྣམ་པ་མང་དུ་ཡོད་པ་དེ་བྱེ་བྲག་ཏུ་བྱ་བའི་ཕྱིར་གཟུགས་ཀྱི་རང་བཞིན་ཞེས་དྲུག་པར་མཛད་དེ། ཅི་ནས་ཀྱང་གཟུགས་གཟུགས་ཞེས་བྱ་བ་ཁོ་ན་རང་བཞིན་དུ་ཤེས་པར་བྱའི་གཞན་ནི་ཤེས་པར་མི་འགྱུར་བར་བྱ་བ་ཡིན་ནོ། །དེ་ལྟ་བས་ན་སྐྱེ་བ་ཞེས་བྱ་བ་འདི་ནི་མ་བྱུང་བ་ལས་བྱུང་བར་ཤེས་པར་བྱ་བའི་དོན་དུ། སྐྱེ་བ་ལ་ལྟོས་པ་མེད་པ་རྟག་པ་ཙམ་མཛད་པ་ཡིན་ཏེ། དཔེར་ན་གྲངས་ལ་སོགས་པ་དག་མེད་ཀྱང་ཟླ་བོ་མེད་པར་ཤེས་པར་བྱ་བའི་ཕྱིར་གཅིག་ཅེས་གཏགས་པ་ཙམ་དང༌། ཆུང་ངུ་ཤེས་པར་བྱ་བའི་ཕྱིར་ཆུང་ངུ་དང༌། ཡུལ་འདབ་ཆགས་པར་སྐྱེ་བར་ཤེས་པར་བྱ་བའི་ཕྱིར་ལྡན་པ་ཞེས་བྱ་བ་དང༌། ཡུལ་ཐ་དད་པར་སྐྱེས་པ་ཤེས་པར་བྱ་བའི་ཕྱིར་རྣམ་པར་དབྱེ་བ་ཞེས་བྱ་བ་དེ་ལྟ་བུ་ལ་སོགས་པ་བྱེད་པ་བཞིན་ནོ། །རྣམ་པ་མང་དུ་ཡོད་པ་ཞེས་བྱ་བ་རྣམ་པ་མང་པོ་ཡོད་པ་སྟེ། གཟུགས་དང༌། ཚོར་བ་ལ་སོགས་པ་རྣམ་པ་ཐ་དད་པའི་ཕྱིར་རོ། །སྐྱེ་བ་ཞེས་བྱ་བ་ཧ་ཅང་ཐལ་བ་ཡིན་ཡང༌། བྱེ་བྲག་ཏུ་བྱ་བའི་ཕྱིར་གཟུགས་ཀྱི་སྐྱེ་བ་ཞེས་དྲུག་པར་མཛད་པ་ཡིན་ཏེ། དཔེར་ན་ཧ་ཅང་ཐལ་བ་ཡིན་ཡང༌། རང་བཞིན་གཞན་རྣམ་པར་གཅད་པར་བྱ་བའི་ཕྱིར་གཟུགས་ཀྱི་རང་བཞིན་ཞེས་དྲུག་པ་བྱེད་པ་བཞིན་ནོ། །འདི་
ཉིད་ཤེས་པར་བྱ་བའི་ཕྱིར། ཅི་ནས་ཀྱང་གཟུགས་ཤེས་བྱ་བ་ཁོ་ན་སྐྱེ་བར་ཤེས་པར་བྱའི་ཞེས་རྒྱས་པར་སྨོས་སོ། །དཔེར་ན་ཙན་དན་གྱི་ཞེས་བྱ་བ་ལ་སོགས་པ་ལ། དྲི་ལ་སོགས་པ་དག་ལ་ཙན་དན་གཞན་མེད་མོད་ཀྱི། དྲི་ལ་སོགས་པ་ཙན་དན་གྱི་བདག་ཉིད་མ་ཡིན་པ་དག་ཀྱང་གུར་ཀུམ་ལ་སོགས་པ་དག་ལ་ཡོད་པའི་ཕྱིར། དེ་རྣམ་པར་གཅད་པར་བྱ་བའི་ཕྱིར། ཙན་དན་གྱི་ཞེས་དྲུག་པ་བྱེད་པ་ཡིན་ནོ། །མཆི་གུའི་ལུས་ཞེས་བྱ་བ་ལ། གཟུགས་ལ་སོགས་པའི་ཚོགས་པའི་བདག་ཉིད་ཅན་མཆི་གུའི་ལུས་ལས་ལུས་གཞན་མེད་མོད་ཀྱི། སྟག་ལ་སོགས་པའི་ལུས་ལས་ཁྱད་པར་དུ་བྱ་བའི་ཕྱིར་མཆི་གུའི་ལུས་ཞེས་དྲུག་པ་བྱེད་པ་ཡིན་ནོ། །དེ་བཞིན་དུ་གནས་པ་ལ་སོགས་པ་ཡང་ཅི་རིགས་པར་རིག་པར་བྱའོ་ཞེས་བྱ་བ། གནས་པ་ཞེས་བྱ་བ་ནི་རྒྱུན་གྱི་མིང་སྟེ། དེ་ཡང་རྣམ་པ་མང་དུ་ཡོད་པས་དེ་བྱེ་བྲག་ཏུ་བྱ་བའི་ཕྱིར་ལུས་ཀྱི་གནས་པ་ཞེས་དྲུག་པར་མཛད་དེ། དེ་ལྟར་ལུས་ཁོ་ནའི་རྒྱུན་ཤེས་པར་བྱའི་གཞན་གྱི་མ་ཡིན་ཞེས་བྱའོ། །རྒས་པ་ཞེས་བྱ་བ་ཡང་རྒྱུན་སྔ་ཕྱིའི་ཁྱད་པར་ལ་བརྗོད་ལ་སྔ་ཕྱིའི་ཁྱད་པར་རྒྱུན་དེ་ཡང་རྣམ་པ་དུ་མ་ཡོད་པ་ཞེས་གོང་མ་བཞིན་དུ་རྒྱ་ཆེར་བརྗོད་པར་བྱའོ། །འཇིག་པ་ཞེས་བྱ་བ་ཡང་རྒྱུན་ཆད་པ་ལ་བརྗོད་དེ། འདིར་ཡང་རྒྱ་ཆེར་སྔ་མ་བཞིན་དུ་བརྗོད་པར་བྱའོ། །སློབ་དཔོན་འདུས་བཟང་ན་རེ། གཅིག་ལ་སོགས་པའི་བློ་དག་ཀྱང་ཐམས་ཅད་དུ་གཞན་ཉིད་དུ་མི་འདོད་དེ། སྐྱེ་བ་ལ་སོགས་པའི་བློ་བཞིན་རིགས་མཐུན་པ་གཞན་འགོག་པའི་ཕྱིར་རོ། །གཅིག་ཅེས་བྱ་བ་གཞན་ལས་འགྱུར་ཞིང། ཐུང་ངུ་དང་རིང་པོ་དག་ཀྱང་ཕན་ཚུན་བལྟོས་པའོ། །རྡུལ་ཕྲ་རབ་ཡོད་པ་ལ་གནས་པའི་བལྟོས་པར་བྱ་བ་རྫས་གཞན་བལྟོས་ཤེ་ན་དེ་བཞིན་དུ་ལྡན་པ་དང་རྣམ་པར་དབྱེ་བ་ཞེས་བྱ་བའོ། །མ་བྱུང་བའི་རྒྱུའི་ཆོས་ཡོད་པ་ལས་ཡོད་པ་ཉིད་དང་དེ་བཞིན་དུ་ཐམས་ཅད་གཞན་ལ་བལྟོས་པར་བསྟན་པ་ཡིན་ནོ། །ཆོས་མངོན་པ་རྣམས་ནི་འདུ་བྱེད་གང་ཡིན་པ་དེ་དག་ལ་དེ་ལས་གཞན་པའི་སྐྱེ་བ་ཡོད་པར་ནམ་ཡང་མི་སྨྲ་སྟེ། རྟག་ཏུ་ཞེས་བྱ་བ་བལྟོས་པ་མེད་པའོ། །དེ་ཉིད་བདག་མེད་པ་ལ་སོགས་པ་ལ་ཡང་བརྗོད་པར་བྱའོ། །དེ་བཞིན་དུ་འདིར་ཡང་མ་སྐྱེས་པ་ལ་བལྟོས་ནས་
སྐྱེས་བ་དང༌། མི་གནས་པ་ལ་བ་ལྟོས་ནས་གནས་པ་དང་མ་རྒས་པ་ལ་བལྟོས་ནས་རྒས་པ་དང་མ་ཞིག་པ་ལ་བལྟོས་ནས་ཞིག་པ་ཞེས་བྱ་སྟེ། དོན་གཞན་དུ་གྱུར་པའི་སྐྱེ་བ་ལ་སོགས་པ་ཡོངས་སུ་བརྟགས་པ་ཅི་ཞིག་ཡོད། སྐྱེ་བ་ལ་མི་བལྟོས་བར་འདུ་བྱེད་རྣམས་ཡོད་པ་ཉིད་དུ་མི་རུང་སྟེ། འདི་ནི་བཤད་མ་ཐག་པ་ཉིད་དོ། །གལ་ཏེ་སྐྱེ་བ་མེད་པར་སྐྱེ་ན་ཞེས་བྱ་བ་རྒྱས་པར་འབྱུང་བ་ལ། འདི་སྐད་སྨྲས་པར་འགྱུར་ཏེ། སྐྱེ་བ་ནི་འདུ་བྱེད་རྣམས་ཀྱི་སྐྱེ་བའི་རྒྱུ་ལྷན་ཅིག་སྐྱེས་པ་ཡིན་ལ། རྒྱུ་དང་རྐྱེན་ལྷག་མ་རྣམས་ནི་དེའི་ལྷན་ཅིག་བྱེད་པ་ཡིན་ཏེ། དེའི་ཕྱིར་གང་ལ་སྐྱེ་བ་དེ་ལ་དེ་སྐྱེད་པར་བྱེད་པའི་ཕྱིར་རྒྱུ་དང་རྐྱེན་གཞན་དག་ཀྱང་བྱེད་པར་ནུས་ན། འདུས་མ་བྱས་ལ་ནི་སྐྱེ་བ་མེད་པ་སྟེ། དེའི་ཕྱིར་དེ་ལ་དེ་ལས་གཞན་རྐྱེན་རྣམས་ཀྱི་བྱེད་པ་རྡུགས་པས་བྱེད་པ་སྐྱེ་བ་ཡིན་ནོ། །སྐྱེས་པ་ཞེས་བྱ་བ་ནི་མ་བྱུང་བ་ལས་བྱུང་བ་ལ་བརྗོད་ན། མ་བྱུང་བ་ཡང་འདུས་བྱས་ཁོ་ན་ལ་རིགས་ཏེ། སྐྱེ་བའི་སྔ་རོལ་ན་མེད་པའི་ཕྱིར་རོ། །འདུས་མ་བྱས་ནི་རྟག་ཏུ་ཡོད་པ་ཡིན་ཏེ། དེས་ན་དེ་མ་བྱུང་བ་ལས་བྱུང་བ་མ་ཡིན་པས་མི་སྐྱེ་བ་ཡིན་ཏེ་སྐྱེ་བ་ཡིན་ཏེ་སྐྱེ་བ་མེད་པ་ནི་མ་ཡིན་ནོ། །ཡང་ཇི་ལྟར་ཆོས་ཉིད་ཀྱི་ཞེས་བྱ་བ་ཆོས་ཉིད་ནི་ཆོས་རྣམས་ཀྱི་རང་བཞིན་དང་ངོ་བོའོ། །འདུས་བྱས་ཁོ་ན་སྐྱེ་བ་དང་ལྡན་པར་འདོད་ཀྱི། འདུས་མ་བྱས་ནི་མ་ཡིན་པ་གང་ཡིན་པ་འདི་ལ་ཆོས་ཉིད་ལས་མ་གཏོགས་པའི་རྒྱུ་ཅུང་ཟད་ཀྱང་ཡོད་པ་མ་ཡིན་ནོ། །དེ་ལྟར་སྐྱེ་བ་མེད་ཀྱང་ཆོས་ཉིད་ཀྱིས་ཐམས་ཅད་མི་སྐྱེའོ། །ཞེས་བྱ་བར་འདོད་པར་བྱའོ། །ཡང་ཇི་ལྟར་སྐྱེ་བ་དང་ལྡན་པར་མཚུངས་པ་ལས་ཞེས་བྱ་བ་ནི་གཟུགས་དང་ཚོར་བ་ལ་སོགས་པ་རྣམས་སོ། །དེ་ལས་གཞན་པའི་རྐྱེན་རྣམས་ཀྱིས་ཞེས་བྱ་བ་ལ། དེ་དག་ལས་གཞན་པའི་རྐྱེན་རྣམས་ནི་གཟུགས་སྐྱེད་པའི་རྐྱེན་དག་ལས་གཞན་པ་སྟེ། ཚོར་བ་ལ་སོགས་པ་སྐྱེད་པའི་རྐྱེན་རྣམས་སོ། །དེ་དག་ལས་གཞན་བ་ཞེས་བྱ་བ་རྒྱས་པར་འབྱུང་བ་ལ། ཚོར་བ་ལ་སོགས་པ་དེ་དག་ལས་གཞན་པའོ། །དེ་ཡང་གང་ཞིག་ཅེ་ན་གཟུགས་ཏེ་ཚོར་བ་ལ་སོགས་པའི་རྐྱེན་རྣམས་ཀྱིས་དེ་དག་ལས་གཞན་པ་དེ་
སྐྱེད་བར་ནུས་པ་མ་ཡིན་པ་བཞིན་དུ་སྐྱེ་བ་མེད་ཀྱང༌། གཟུགས་དང་ཚོར་བ་ལ་སོགས་པའི་རྐྱེན་ཐམས་ཅད་ཀྱིས་ཀྱང་ནམ་མཁའ་སོགས་པ་འདུས་མ་བྱས་སྐྱེད་པར་མི་ནུས་པར་མི་འགྱུར་རོ། །སྔར་ནི་རང་བཞིན་ངེས་པའི་སྒོ་ནས་བཤད་པ་ཡིན་ལ། ད་ལྟར་ནི་ནུས་པ་ངེས་པའི་སྒོ་ནས་ཡིན་ནོ། །རྫས་ཀྱི་ངོ་བོས་ཀྱང་བཀག་གོ །བྱེ་བྲག་སྨྲ་བ་རྣམས་ན་རེ། རྫས་ཀྱི་ངོ་བོས་སྐྱེ་བ་ལ་སོགས་པ་རྣམས་གྲུབ་པ་ཉིད་དོ་ཞེས་ཟེར་རོ། །དེའི་ཕྱིར་ཞེ་ན། སུན་འབྱིན་པ་ཡོད་ཅེས་བྱ་བ་ལ་སོགས་པ་རྒྱ་ཆེར་བརྗོད་པར་བྱ་སྟེ། གང་གི་ཕྱིར་སུན་འབྱིན་པ་ལ་བལྟོས་ནས་གྲུབ་པའི་མཐའ་འདོར་བ་མ་ཡིན་ཏེ། དེ་བས་ན་ཁྱད་པར་ཡིད་ཆེས་པ་སྐྱེ་བའི་ཕྱིར་དུ་སྐྱོན་རྣམས་ལ་ཡང་ལན་གདབ་པར་བྱ་སྟེ། ལན་བསམས་པ་ལ་འབད་པར་བྱ་ཞེས་པའི་དོན་ཏོ། །གྲུབ་པའི་མཐའི་རྗེས་སུ་འབྲང་བར་ཡང་བྱའོ་ཞེས་ཏེ་སྐྱོན་མེད་པའམ་སྐྱོན་དང་བཅས་པའོ། །མཚན་ཉིད་རྣམས་བཤད་ཟིན་ཏོ།། །།མིང་གི་ཚོགས་ལ་སོགས་པ་ནི་མིང་དང་ཚིག་དང་ཡི་གེའི་ཚོགས་རྣམས་ཏེ་མིང་གི་ཚོགས་ནི་མིང་གི་ཚོགས་སོ། །ཚིག་གི་ཚོགས་ནི་ངག་གི་ཚོགས་སོ། །ཡི་གེའི་ཚོགས་ནི་ཡི་གེའི་ཚོགས་སོ། །དེ་ལ་མིང་བྱེད་པ་ནི་མིང་སྟེ་ཞེས་བྱ་བ་ལ། མིང་དུ་བྱེད་པ་ནི་འདུ་ཤེས་སུ་བྱེད་པ་སྟེ། གང་གིས་འདིར་འདུ་ཤེས་པར་བྱས་ཏེ་སེམས་ལས་བྱུང་བའི་ཆོས་དེ་དང་དེ་ལ་གཞོལ་བར་བྱེད་པས་ན་མིང་ངོ༌། །ཡང་ན་ཇི་ལྟ་ཇི་ལྟར་བརྗོད་པ་དེ་ལ་གཞོལ་བར་བྱེད་པས་དོན་ཇི་ལྟར་གནས་པ་དེ་དང་དེ་དག་དང་དོན་གྱི་ཁྱད་པར་དག་ལ་སེམས་དང་སེམས་ལས་བྱུང་བའི་རྒྱུད་གཞོལ་བར་བྱེད་པས་ན་མིང་ངོ༌། །གཞན་དག་ན་རེ་དོན་ལ་མངོན་པར་འཇུག་པའི་ཡི་གེའི་གནས་སྐབས་ནི་མིང་ངོ་ཞེས་ཟེར་ཏེ། དེ་ལྟར་ན་ཡི་གེ་རྣམས་དང་མིང་ཐ་དད་མེད་པར་འགྱུར་རོ། །གཞན་དག་ནི་མིང་དང་མཚན་ཞེས་བྱ་བ་རྣམ་གྲངས་ཏེ་དེ་ནི་དོན་དུ་འདུ་ཤེས་ཏེ། དེར་བྱེད་པའི་དོན་རྣམས་ལ་བྱེ་བྲག་ཏུ་བཤད་པ་དང་དོན་དེ་གསལ་བར་བྱེད་པ་ཡིན་གྱི་ཡོད་པ་ཙམ་གྱིས་ནི་མ་ཡིན་ནོ། །ཡང་ན་བྱ་བ་དང་བྱེད་པ་དོན་གཞན་ལ་མ་ཡིན་ནོ། །ད་ཡང་མང་དུ་རྣམ་པར་རྟོག་པ་ཞེས་བྱ་སྟེ། ཇི་ལྟར་མིང་གིས་མཚན་ཉིད་ཁོ་ན་བྱེད་པར་ཤེས་པ་དེ་ལྟར་
བསྟན་ཏོ། །འོ་ན་དེ་ལྟར་མིང་ཞེས་བྱ་བ་ཁོ་ན་སྨོས་པས་ཆོག་མོད་བྱེད་པ་སྨོས་པས་ཅི་བྱ་ཞེ་ན། བྱེད་པ་མ་སྨོས་ན་སེམས་ལས་བྱུང་བ་ལ་མིང་དུ་གོ་བར་འགྱུར་རོ། །བྱེད་པ་ཁོ་ན་སྨོས་ན་ཡང་མི་ལྡན་པ་ཉིད་གོ་བར་འགྱུར་རོ། །དེའི་བློ་ནི་སྔར་གྱི་དོན་ལ་བྱ་བ་བྱེད་པས་སོ། །འདི་ས་གོ་བར་བྱེད་ཅིང་ཐེ་ཚོམ་མེད་པར་བྱེད་པས་ན་ཚིག་སྟེ། དེ་ཡང་ངག་ཁོ་ནས་དེ་ལ་ཐེ་ཚོམ་མེད་པར་བྱེད་པའི་ཕྱིར་རོ། །དེ་ཉིད་ཀྱི་ཕྱིར་ངག་ནི་ཚིག་སྟེ་ཞེས་སྨོས་སོ། །འཆད་པར་འདོད་པའི་བྱེ་བྲག་ལས་ཚིག་གི་དོན་ངེས་པར་བྱ་བའི་ཕྱིར། ཇི་ཙམ་གྱིས་དོན་ཡོངས་སུ་རྫོགས་པ་སྟེ་ཞེས་བྱ་བ་སྨོས་སོ། །མིང་གི་དོན་བཞིན་ཚིག་དང་ཚིག་གི་དོན་ངེས་པ་མེད་དོ། །དེ་ལ་རང་གི་མཚན་ཉིད་གསལ་བར་བྱེད་པས་ན་མིང་སྟེ། གཟུགས་དང་སྒྲ་ཞེས་བྱ་བ་ལྟ་བུའོ། །བྱ་བ་དང་ཡོན་ཏན་དང་དུས་དང་འབྲེལ་པའི་ཁྱད་པར་སྟོན་པར་བྱེད་པ་ནི་ཚིག་སྟེ། སུཔ་དང་ཏིང་གི་མཐའ་ཅན་ནོ། །དེ་ལ་བྱ་བ་དང་འབྲེལ་པའི་ཁྱད་པར་སྟོན་པར་བྱེད་པ་ནི། འཚེད་དོ། །འདོན་ཏོ། །འགྲོའོ་ཞེས་བྱ་བ་ལྟ་བུའོ། །ཡོན་ཏན་དང་འབྲེལ་པའི་ཁྱད་པར་སྟོན་པར་བྱེད་པ་ནི་དཀར་པོའོ་ནག་པོའོ་ཞེས་བྱ་བ་ལྟ་བུའོ། །དུས་དང་འབྲེལ་པའི་ཁྱད་པར་སྟོན་པར་བྱེད་པ་ནི། འཚེད་དོ། །འཚེད་པར་འགྱུར་རོ། །བཙོས་སོ་ཞེས་བྱ་བ་ལྟ་བུ་སྟེ། ཇི་ཙམ་གྱིས་དོན་ཡོངས་སུ་རྫོགས་པ་སྟེ་ཞེས་འབྱུང་བའི་ཕྱིར་རོ། །གཞན་དག་ན་རེ་མངོན་པར་བརྗོད་པ་གཅིག་ཁོ་ན་ཚིག་གོ་ཞེས་ཟེར་རོ། །ཀྱེ་མ་འདུ་བྱེད་རྣམས་མི་རྟག །ཅེས་མདོར་བསྟན་པ་གང་གིས་བྱ་བ་དང་ཡོན་ཏན་དང་དུས་དང་འབྲེལ་པའི་ཁྱད་པར་སོ་སོར་རྟོགས་པར་བསྟན་ཏོ། །ཡི་གེ་ནི་ཡི་གེ་སྟེ་ཞེས་བྱ་སྟེ། འདིར་རམ་འདིས་མིང་དང་ཚིག་གསལ་བར་བྱེད་པས་ན་ཡི་གེའོ། །རྣམ་གྲངས་ཀྱིས་ན་མི་འགྱུར་བའི་ཕྱིར་ཡི་གེའོ། །དྲན་པ་ཉེ་བར་གནས་པ་དང་ལྡན་པ་ལ་མི་འགྱུར་བ་རྣམས་སོ། །གང་གི་ནུས་པ་ཐེ་ཚོམ་མེད་པར་བསྒྲུབས་པ། ཡེ་ན་ཤསྣོ་ཏྱས་དིགྡྷ་མཱ་དཱ་དྷཱ་ཡི་ཏུ་གཞན་པ་མ་ནྱ་སྨཻ་བཱ་ནི་བེ་ད་ཡི་ཏུཾ་རིག་པར་བྱེད་པ་དེར་དེ་དག་གིས་ཡི་གེ་ག་ལ་སོགས་པའི་མིང་སྐྱེད་པར་བྱེད་ཕྱིར་ཡི་གེ་རྣམས་ཀྱང་ཡིག་འབྲུའི་ཡན་ལག་གི་མིང་དག་མ་ཡིན་ནམ། དེའི་ཕྱིར་ཡི་གེ་ནི་མིང་ལས་ཐ་
དད་པར་བརྗོད་པར་མི་བྱའོ་ཞེ་ན། ཡིག་འབྲུའི་ཡན་ལག་རྣམས་གོ་བར་བྱ་བའི་ཕྱིར་ནི་ཞེས་བྱ་བརྒྱ་ཆེར་འབྱུང་བ་ལ། ཇི་ལྟར་བརྗོད་བྱ་གོ་བར་བྱ་བའི་ཕྱིར་མིང་བྱས་པ་དེ་བཞིན་དུ་ཡི་གེ་རྣམས་གོ་བར་བྱ་བའི་ཕྱིར་ཡིག་འབྲུའི་ཡན་ལག་རྣམས་བྱས་པ་ཡིན་ནོ། །ལྷག་མ་གོ་བར་ཟད་དོ། །དེ་ལ་མིང་གི་ཚོགས་ནི་ཞེས་བྱ་བ་རྒྱ་ཆེར་འབྱུང་བ་ལ། སྔར་དཔེ་ནི་གཟུགས་དང་སྒྲ་ཞེས་བྱ་བ་ལ་སོགས་པ་ལྟ་བུའོ་ཞེས་གང་བཤད་པ་དེ་ནི་མིང་གི་ངོ་བོ་བསྟན་པར་བྱ་བའི་ཕྱིར་ཡིན་ལ། འདིར་དཔེར་ན་གཟུགས་སྒྲ་དྲི་རོ་རེག་བྱ་དག་ཅེས་བྱ་བ་སྟེ། དེ་ལྟ་བུ་ལ་སོགས་པའོ་ཞེས་གང་བཤད་པ་དེ་ནི་མིང་གི་ཚོགས་བསྟན་པར་བྱ་བའི་དོན་དུའོ། །དེ་བཞིན་དུ་སྔར་ནི་ཚིག་གི་ངོ་བོ་བསྟན་པའི་ཕྱིར་བཤད་ལ། འདིར་ནི་ཚིག་གི་ཚོགས་བསྟན་པའི་ཕྱིར་དཔེར་ན་འདུ་བྱེད་ཐམས་ཅད་ནི་ཞེས་བྱ་བ་དེ་ལྟ་བུ་ལ་སོགས་པའོ། །དེ་བཞིན་དུ་ཡི་གེ་རྣམས་ལ་ཡང་བརྗོད་པར་བྱའོ་ཞེས་སློབ་དཔོན་འདུས་བཟང་ཟེར་རོ། །སློབ་དཔོན་ནི་རྫས་སུ་ཡོད་པའི་མཚན་ཉིད་དུ་བརྗོད་པར་འདོད་པ་མེད་དེ། འདུས་པ་ལ་དྲི་བ་བྱས་པའི་ཕྱིར་རོ། །དེའི་ཕྱིར་མིང་གི་ཚོགས་ནི་མིང་གི་ལུས་ཏེ་མིང་གི་རྫས་ཞེས་བྱ་བའི་དོན་ཏོ། །གང་གི་ཕྱིར་མཚན་ཉིད་བསམ་པ་ལ་འདུས་པས་དགོས་པ་མེད་པ་ཅི་ཞེ་ན། བསྟན་བཅོས་ལས་བཤད་པ། མིང་གི་ཚོགས་གང་ཞེ་ན། མིང་གང་ཡིན་པ་ཞེས་རྒྱ་ཆེར་འབྱུང་སྟེ། གལ་ཏེ་ཚོགས་ཀྱི་སྒྲ་ནི་ལུས་བརྗོད་པ་ཉིད་དེས་ཏི་ཀཱ་ཡ་གྲ་ལྕི་བ་པ་མ་ནརྠ་ཀཾ། མིང་དང་མིང་ཁོ་ན་ལས་དེའི་རང་བཞིན་རྗོད་པར་བྱེད་པའི་ཕྱིར་རོ། །དེ་བཞིན་དུ་བུམ་པ་ལ་སོགས་པ་ལ་ཡང་བརྗོད་པར་བྱའོ། །བསྟན་བཅོས་སུ་མིང་གི་ཚོགས་གང་ཞེ་ན་ཞེས་དྲིས་ཏེ། ཇི་སྐད་དུ་མིང་གང་ཡིན་པ་དང་ཞེས་བྱ་བ་ནི་དེ་ལས་དོན་གཞན་སོགས་པའི་ཚོགས། དོན་མ་ཡིན་པ་ཅན་དུ་གྱུར་པའི་མིང་གི་ཚོགས་དགག་པའི་དོན་ཏོ། །ཇི་ལྟར་བསྟན་བཅོས་སུ་དྲི་བ་བྱ་བ་དེ་ལྟར་སློབ་དཔོན་གྱི་འདི་ལ་འགལ་བ་ཅི་ཞིག་ཡོད། དེ་ཉིད་ཀྱི་ཕྱིར་སློབ་དཔོན་གྱིས་སྔར་ནི་དེའི་ངོ་བོ་བསྟན་ལ། ཕྱིས་ནི་ཚོགས་པ་དང་ཚོགས་པ་ཅན་གྱི་ཚོགས་དོན་གཞན་མ་ཡིན་པའོ། །དེ་དག་ཀྱང་ངག་གི་རང་བཞིན་ཡིན་པའི་ཕྱིར། ཞེས་བྱ་བ་རྒྱས་པར་འབྱུང་བ་ལ།
བརྗོད་པར་འདོད་པ་སྔོན་དུ་འགྲོ་བ་མགྲིན་པ་དང༌། དཀན་དང༌། མཆུ་དང༌། སོ་དང་ལྕེ་ཕྲད་པ་ལས་ཡི་གེ་ཨ་ལ་སོགས་པའི་ངོ་བོར་གྱུར་པའི་སྒྲ་ལ་ངག་ཅེས་བྱ་ལ། ངག་ལས་ཐ་དད་བར་མིང་གི་ཚོགས་ལ་སོགས་པ་དག་རང་གི་ངོ་བོ་འམ། འབྲས་བུའི་སྒོ་ནས་འཛིན་པ་ཡང་མ་ཡིན་ནོ། །དེའི་ཕྱིར་དེ་དག་ངག་གི་རང་བཞིན་ཁོ་ན་ཡིན་ལ། ངག་གི་རང་བཞིན་ཡིན་པའི་ཕྱིར་སྒྲའི་བདག་ཉིད་ཡིན་པས་གཟུགས་ཀྱི་རང་བཞིན་དུ་འགྱུར་ཏེ། སྒྲ་ནི་གཟུགས་ཀྱི་ཕུང་པོས་བསྡུས་པའི་ཕྱིར་རོ། །དེས་ན་ཅིའི་ཕྱིར་སེམས་དང་ལྡན་པ་མ་ཡིན་པ་རྣམས་ཞེས་བྱ་སྟེ། དེ་དག་རྣ་བའི་དབང་པོས་གཟུང་བར་འདོད་བཞིན་དུ་ཡང་ཞེས་བྱ་བར་བསམས་པའོ། །དེ་དག་ནི་ངག་གི་རང་བཞིན་མ་ཡིན་ཏེ་ཞེས་བྱ་བ་ནི་སྒྲའི་བདག་ཉིད་མ་ཡིན་པའོ། །དེ་ཉིད་ལ་རྒྱུ་སྨྲས་པ་ནི་ངག་ནི་སྒྲ་ཡིན་ན་ཞེས་བྱ་བ་རྒྱས་པར་འབྱུང་བའོ། །ཙམ་ཞེས་བྱ་བའི་སྒྲ་ནི་མིང་དང་ཚིག་རྣམ་པར་གཅད་པར་བྱ་བའི་ཕྱིར་རོ། །སྒྲ་ནི་རྒྱུད་ནས་མིང་དང་ཚིག་གསལ་བར་བྱེད་པ་ཡིན་པའི་ཕྱིར་དོན་རྟོགས་པའི་རྒྱུ་ཡིན་གྱི། མིང་དང་ཚིག་ལ་བལྟོས་པ་མེད་པར་དངོས་སུ་ནི་མ་ཡིན་ཏེ། དེའི་ཕྱིར་གང་གིས་དོན་རྟོགས་པར་བྱེད་པ་མིང་གི་ཚོགས་ལ་སོགས་པ་དག་ལས་ཐ་དད་པར་ཡོད་དོ། །དེའི་ཕྱིར་ངག་གིས་དོན་རྗོད་པར་བྱེད་པ་མ་ཡིན་ཏེ། འོ་ན་ཅི་ཞེ་ན། ངག་ནི་མིང་གསལ་བར་བྱེད་པ་འམ། མིང་སྐྱེད་པར་བྱེད་པའི་ཕྱིར་མིང་ལ་འཇུག་ལ། མིང་གི་དོན་རྗོད་པར་བྱེད་དེ། དེ་གོ་བར་བྱེད་པའི་ཕྱིར་རོ། །འདིས་ནི་མིང་འདི་དོན་དག་ལ་དངོས་སུ་འཇུག་གི ། ཚིག་ནི་མ་ཡིན་ནོ་ཞེས་སྟོན་པར་བྱེད་དོ། །སྒྲ་ཙམ་ཁོ་ན་ནི་ངག་མ་ཡིན་གྱི། འོ་ན་ཅི་ཞེ་ན། སྒྲའི་ཁྱད་པར་རོ། ཡང་དེ་ཅི་འདྲ་བ་ཞིག་ཅེ་ན། དེའི་ཕྱིར་བཤད་པ། ཡི་གེ་ཀ་ལ་སོགས་པའི་བདག་ཉིད་སྒྲ་གང་གིས་དོན་གོ་བར་འགྱུར་བའི་སྒྲ་དེ་དག་ཡིན་ནོ། །མིང་ལ་སོགས་པའི་ཚོགས་བཀག་ཕས་འདྲི་བ་ནི། སྒྲ་གང་གིས་དོན་གོ་བར་འགྱུར་ཞེ་ན་ཞེས་བྱ་བ་ལ་སོགས་པའོ། །གང་ཞིག་སྨྲ་བ་པོ་རྣམས་ཀྱིས་དོན་དག་ལ་མཚམས་བཅད་པ་སྟེ་ཞེས་བྱ་བ་ལ། ཡི་གེ་ཨ་ལ་སོགས་པ་འདི་སྙེད་ཅིག་གི་རིམ་པ་འདིས་དོན་འདི་རྗོད་པར་བྱེད་པ་སྟེ། གང་ཞིག་དེ་ལྟར་དོན་གང་དག་ལ་མཚམས་
བཅད་པ་དེས་དོན་རྟོགས་པར་བྱེད་ཀྱི་ཐམས་ཅད་ཀྱིས་ནི་མ་ཡིན་ནོ། །འདིས་ནི་བརྡ་ལ་བལྟོས་ནས་སྒྲ་དོན་གོ་བར་བྱེད་ཀྱི་ཐམས་ཅད་ཀྱིས་ཀྱང་མ་ཡིན་ལ། ཡོད་པ་ཙམ་གྱིས་ཀྱང་མ་ཡིན་ནོ་ཞེས་སྟོན་པར་བྱེད་དོ། །དཔེར་ན་གཽཿཞེས་བྱ་བ་ལ་སོགས་པ་ལ་ཡི་གེ་ག་དང༌། ཡི་གེ་ཨཽ་དང། ཚེག་དྲག་གི་བདག་ཉིད་ཅན་གྱི་སྒྲ་ནི་གོ་རིམས་འདིས་དོན་དགུ་དག་ལ་མཚམས་བཅད་པ་དེ་ལས་དེ་དག་རྟོགས་པར་འགྱུར་རོ། །གང་ཡང་མིང་གི་དོན་རྗོད་པར་བྱེད་དོ་སྙམ་དུ་སེམས་པ་ཞེས་བྱ་བ་རྒྱས་པར་འབྱུང་བ་ལ། ཇི་ལྟར་དོན་གོ་བ་ཅན་ཡིན་ཞེ་ན། དོན་འདིའི་མིང་ནི་འདི་ཡིན་ནོ། །རྒྱས་པར་བྱས་པ་ལས་ཏེ། དོན་གོ་བ་ཅན་མ་ཡིན་པས་རྟོགས་ན་ནི་བརྡ་བྱང་བ་མེད་པར་ཡང་གོ་བར་འགྱུར་བ་ཞིག་ན་འགྱུར་བ་ཡོང་པ་མ་ཡིན་ནོ། །དེ་ནི་དོན་གོ་བ་ཅན་གྱི་སྒྲ་ཙམ་ཁོ་ནས་འགྲུབ་ལ་ཞེས་བྱ་བ་ལ། དོན་རྗོད་པར་བྱེད་པ་དེ་ནི་མིང་དང་བྲལ་ཞིང་དོན་གོ་བ་ཅན་གྱི་སྒྲས་འགྲུབ་པོ། །འབྲེལ་པ་ལ་བྱང་བས་དོན་གོ་བ་འདི་ལ་ཡོད་པ་ནི་སྒྲ་དོན་གོ་བ་ཅན་ཏེ། དོན་འདིའི་མིང་འདི་ཡིན་ནོ་ཞེས་བརྡར་བཏགས་པས་འབྲེལ་པ་ལ་བྱང་བའི་ཕྱིར་རོ། །ཇི་ལྟར་ན་གང་མིང་ལ་འཇུག་པ་འདི་ཡང་ཞེས་བྱ་བ་ལ་སོགས་པ་རྒྱས་པར་འབྱུང་བ་ལ། ངག་ནི་སྒྲའི་བདག་ཉིད་ཡིན་ན། དེ་གལ་ཏེ་རང་གི་བྱེ་བྲག་མིང་སྐྱེད་པར་བྱེད་པ་འམ་གསལ་བར་བྱེད་བ་ཞིག་ཡིན་གྲང༌། དེ་ལྟ་ཡིན་ན་འདིར་བྱེ་བྲག་ཁས་མ་བླངས་པའི་ཕྱིར་སྒྲ་ཐམས་ཅད་ཀྱིས་ཀྱང་མིང་སྐྱེད་པའམ་གསལ་བར་བྱེད་པར་འགྱུར་རོ། །འོན་ཏེ་མིང་ཕན་ཚུན་ཁྱད་པར་དུ་འགྱུར་བ་ཁོ་ནའི་སྒྲ་ངག་ཏུ་འདོད་དོ་ཞེ་ན། འོན་ཏེ་སྒྲའི་ཁྱད་པར་དེ་ལྟ་བུ་ཞིག་ཅེས་བྱ་བ་རྒྱ་ཆེར་འབྱུང་ངོ༌། །དོན་བརྗོད་པ་ནི་དོན་གྱི་ཡུལ་ཅན་གྱི་ཤེས་པ་སྐྱེད་པ་ཡིན་ན། དེ་ནི་སྒྲའི་ཁྱད་པར་དོན་དག་ལ་མཚམས་བཅད་བ་ཁོ་ནས་བྱེད་པར་འགྱུར་བས་འདིར་དེ་ལ་ཐ་དད་པར་མིང་བཏགས་པས་ཅི་དགོས། སྒྲའི་ཁྱད་པར་གྱིས་མིང་གི་ཁྱད་པར་གསལ་བར་བྱེད་པ་ཡང་མ་ཡིན་ཏེ་ངེས་པའི་རྒྱུ་མེད་པའི་ཕྱིར་རོ། །སྒྲ་ཐམས་ཅད་ཀྱིས་མིང་ཐམས་ཅད་གསལ་བར་བྱེད་པའམ་གསལ་བར་མི་བྱེད་པ་ཉིད་དུ་ཁས་བླང་བར་བྱའོ། །གལ་ཏེ་བརྡ་ལ་བྱང་བ་ངེས་པའི་རྒྱུ་ཡིན་ནོ་ཞེ་ན། དེ་ལྟ་ན་དོན་ཡོད་པ་ཉིད་ཀྱིས་
གསལ་བར་བྱེད་དེ། བརྡ་ལ་བྱང་བ་ལ་བལྟོས་པའི་ཕྱིར་ཞེས་ཅི་སྟེ་མི་འདོད། དེས་ན་མིང་དང་ངག་ཐ་དད་པར་ཉེ་བར་དམིགས་སོ། །དེ་ལ་བརྡ་ལ་བྱང་བ་ཡོད་པ་མ་ཡིན་པ་མི་རིགས་ཏེ། ཤེས་པ་དང་ཐ་དད་པ་མེད་པས་གཟུགས་བརྙན་བཞིན་དུ་ཤེས་བྱའི་རྒྱུ་མཚན་གྱི་མིང་ངེས་པར་གཟུང་སྟེ། དེའི་ཕྱིར་ཤེས་པ་ཁོ་ན་ཤེས་བྱའི་གཟུགས་བརྙན་གྱི་བདག་ཉིད་ཅན་གྱི་སྒྲ་སྐྱེད་པ་མ་ཡིན་པས་དོན་གསལ་བར་མི་བྱེད་པར་འདོད་པ་ཅི་ཞིག་ཡིན་ཞེས་བྱའོ། །ཡང་སྒྲ་རྣམས་ནི་ཚོགས་པ་མེད་པ་ཞེས་བྱ་བ་ལ་སོགས་པ་ལ། ངག་ནི་རིམ་གྱིས་ཡི་གེ་དག་ལ་གནས་པའི་ཕྱིར་ཡི་གེ་རྣམས་ཀྱང་སྐད་ཅིག་མ་ཡིན་པའི་ཕྱིར་ཡི་གེ་ཨ་ལ་སོགས་པའི་སྒྲ་རྣམས་ཅིག་ཅར་ཡོད་པ་མ་ཡིན་ལ། ཆ་མེད་པའི་ཕྱིར་ཆོས་གཅིག་ཆ་ཤས་ཀྱིས་སྐྱེ་བ་ཡང་མ་ཡིན་ནོ། །སྐྱེད་པར་བྱེད་པ་ན་ཞེས་བྱ་བ་ལ་སོགས་པ་ལ་ཡི་གེ་དུ་མ་ཅན་གྱི་མིང་ནི་སྒྲ་དུ་མ་ལ་བལྟོས་ནས་ཡོངས་སུ་གཅད་པར་བྱ་བ་ཡིན་པས་དེ་སྐྱེད་པར་བྱེད་པ་ན་ཇི་ལྟར་ངག་གིས་སྐྱེད་པར་བྱེད་དེ། ཅི་འདས་པའམ། མ་འོངས་པའམ། ད་ལྟར་བྱུང་བ་ཞིག་གིས་ཡིན། འདི་ལྟར་སྒྲ་རྣམས་ལ་ནི་ཅིག་ཅར་བ་ཉིད་ཡོད་པ་མ་ཡིན་ཏེ། རིམ་གྱིས་འཇུག་པའི་ཕྱིར་དང༌། སྐད་ཅིག་མ་ཡིན་པའི་ཕྱིར་རོ། །དེའི་ཕྱིར་རེ་ཞིག་ཇི་ལྟར་འདས་པ་ལ་བལྟོས་པའི་ཞེས་བྱ་བ་རྒྱས་པར་སྨྲས་སོ། །སོ་སོར་ཐར་པའི་སྡོམ་པ་ལེན་པའི་ཚེ་ལུས་དང་ངག་གི་རྣམ་པར་རིག་བྱེད་རྣམས་ཚོགས་པ་མེད་མོད་ཀྱི། འོན་ཀྱང་འདས་པའི་ལུས་ངག་གི་རྣམ་པར་རིག་བྱེད་ཀྱི་སྐད་ཅིག་ལ་བལྟོས་པའི་རྣམ་པར་རིག་བྱེད་ཀྱི་སྐད་ཅིག་མ་ཐ་མ་དེ་བཞིན་དུ་ལན་གཉིས་ལན་གསུམ་དུ་སྲོག་གཅོད་པ་སྤོང་བར་བགྱིད་དོ་ཞེས་བྱ་བའི་སྒྲ་གང་ཡིན་པས་སོ་སོར་ཐར་པའི་སྡོམ་པས་བསྡུས་པའི་རྣམ་པར་རིག་བྱེད་མ་ཡིན་པ་སྐྱེད་པར་བྱེད་པ་དེ་བཞིན་དུ་འདས་པའི་སྒྲ་ལ་བལྟོས་པའི་ངག་གི་སྒྲ་ཐ་མས་མིང་སྐྱེད་པར་བྱེད་དེ། དེའི་ཕྱིར་གཅིག་ཆ་ཤས་ཀྱིས་སྐྱེ་བར་ཐལ་བར་མི་འགྱུར་རོ། །སློབ་དཔོན་འདུས་བཟང་ན་རེ། མངོན་པར་འདོད་པའི་མིང་ལ་ཡིད་བཞག་ནས་འདི་དང་འདི་བརྗོད་པར་བྱའོ་སྙམ་དུ་དུས་ཕྱི་མའི་བརྗོད་པ་འཇུག་པར་འགྱུར་བས་དེ་ལྟར་བརྗོད་དེ། ངག་ནི་མིང་ལ་འཇུག་གོ་ཞེས་ཟེར་རོ། །དེའི་ཕྱིར་དོན་ཇི་སྙེད་དག་ལ་མཚམས་
བཅད་པའི་སྒྲ་མཐའ་དག་བྱེ་བྲག་མེད་པར་ཡིད་ལ་བཟུང་སྟེ། ཕྱིས་རིམ་གྱིས་རྗོད་པར་བྱེད་ལ། རྟོགས་པ་པོ་ཡང་རིམ་གྱིས་བརྗོད་པ་ཁོ་ན་མཉན་ནས་ཕྱིས་ཐམས་ཅད་བྱེ་བྲག་མེད་པར་ཡིད་ལ་བྱེད་དོ། །དེའི་ཕྱིར་ཡིད་ཀྱི་ཡུལ་གཅིག་པུར་ཐ་དད་མེད་པར་བྱས་ཏེ་སྒྲའི་གཟུགས་ལས་བརྡ་བྱང་བ་ལ་བལྟོས་ནས་དོན་རྟོགས་པར་བྱེད་དོ། །དེས་ན་སྒྲའི་གཟུགས་མཐའ་དག་ལས་ཐ་དད་པའི་མིང་ཡོད་པ་དེ་ལྟར་ཡང་མ་ཡིན་ནོ། །འདིར་ནི་རྣམ་པར་དཔྱད་པས་བརྗོད་པར་བྱ་བ་མང་པོ་འབྱུང་སྟེ། དེ་ལྟར་ཐལ་བར་མི་འགྱུར་བས་གང་འདིར་མངོན་པར་བརྗོད་པའི་སྒྲ་དང་མིང་ལ་སོགས་པ་རྣམས་དོན་གཞན་ཉིད་དུ་རབ་ཏུ་བསྒྲུབ་པའི་ཕྱིར་མང་དུ་བཤད་པ་དེ་ཡང་འདས་པ་དང་འབྲེལ་བས་རྣམ་པར་དཔྱད་དོ། །དེ་ལྟ་ན་འོ་ན་ནི་སྒྲ་ཐ་མ་ཁོ་ནས་ཞེས་བྱ་རྒྱས་པར་འབྱུང་བ་ལ། ཡི་གེ་དུ་མ་ཅན་གྱི་མིང་ལ། གང་ཞིག་ཡི་ག་ཐ་མ་གཅིག་གིས་བསྡུས་པའི་སྒྲ་ཐོག་མ་དེས་ཀྱང་དོན་དེ་གོ་བར་འགྱུར་ཏེ། སྒྲ་ཕྱི་མ་ཁོ་ནས་མིང་སྐྱེད་པར་བྱེད་པའི་ཕྱིར་རོ། །གལ་ཏེ་དམིགས་པའི་སྒྲ་འདས་པ་ལ་བལྟོས་པའི་སྒྲ་ཐམས་ཅད་མིང་སྐྱེད་པར་བྱེད་པས་ཉེས་པ་འདི་མེད་དོ་ཞེ་ན། དེ་ལྟ་ན་འོ་ན་རྣམ་པར་རིག་བྱེད་དཔེ་མ་ཡིན་ཏེ། རྣམ་པར་རིག་བྱེད་ཀྱི་སྐད་ཅིག་མ་ཐ་མ་ནི་རྣམ་པར་རིག་བྱེད་ཀྱི་སྐད་ཅིག་སྔར་སྐྱེས་པ་དམིགས་ཤིང་འགགས་པ་དག་ལ་བལྟོས་ནས་རྣམ་པར་རིག་བྱེད་མ་ཡིན་བ་སྐྱེད་པར་མི་བྱེད་ཀྱི། འོ་ན་ཅི་ཞེ་ན། དེ་ཡོད་པ་ཙམ་ཉིད་ལ་བལྟོས་ནས་རྣམ་པར་རིག་བྱེད་མ་ཡིན་པའི་རྒྱུར་འགྱུར་བ་ཡིན་ནོ། །དེ་ལྟ་མ་ཡིན་ན་གཡེངས་པ་དང་སེམས་མེད་པ་ལ་རྣམ་པར་རིག་བྱེད་མ་ཡིན་པ་མེད་པར་འགྱུར་རོ། །དེའི་ཕྱིར་སྒྲ་ཐ་མ་ནི་རྣམ་པར་རིག་བྱེད་ཁོ་ན་ལྟར་མིང་སྐྱེད་པར་བྱེད་ཀྱི། སྔར་གྱི་སྒྲ་དམིགས་པ་ལ་བལྟོས་བ་ནི་མ་ཡིན་ནོ། །འོན་ཏེ་འདི་སྙམ་དུ་ཞེས་བྱ་བ་ལ་སོགས་པ་ལ་དེ་ལྟར་ན་སྨྲས་མ་ཐག་པའི་སྐྱོན་མེད་དེ། སྒྲ་རེ་རེ་ལ་ཡི་གེ་སྐྱེ་བའི་ཕྱིར་དང༌། ཡི་གེ་དག་གིས་ཀྱང་མིང་སྐྱེད་པར་བྱེད་པའི་ཕྱིར་རོ། །འདི་ལ་ཡང་སྐྱོན་དེ་ཉིད་ཡོད་དོ་ཞེས་བྱ་བ་ནི་སྒྲ་རྣམས་མིང་སྐྱེད་བ་ལ་བསྟན་བ་གང་ཡིན་པའོ། །ཅི་ལྟར་ཞེ་ན། ཡི་གེ་རྣམས་ནི་ཚོགས་བ་མེད་བའི་ཕྱིར་དང༌། སྒྲ་ལྟར་རིམ་རིམ་གྱིས་འཇུག་པའི་ཕྱིར་དང༌། སྒྲ་ལྟར་རིམ་གྱིས་འཇུག་བའི་ཕྱིར་དང༌། སྐད་ཅིག་མ་ཉིད་ཡིན་པའི་ཕྱིར་ཡེ་གེ་རྣམས་ལ་ཡང་ཅིག་ཅར་
བ་ཉིད་མེད་དོ། །དེར་མིང་ཡི་གེ་དུ་མས་བསྐྱེད་པར་བྱ་བ་ཆ་མེད་པ་གཅིག་ལ་རིམ་གྱིས་ཆ་ཤས་ཀྱིས་སྐྱེད་པར་ཡང་རིགས་པ་མ་ཡིན་ནོ། །ཅི་སྟེ་འདས་པའི་ཡི་གེ་ལ་བལྟོས་པའི་ཡི་གེ་ཕྱི་མ་ཁོ་ནས་མིག་སྐྱེད་པར་བྱེད་དོ་སྙམ་ན། དེ་ལྟ་ན་འོ་ན་ནི་གང་གིས་ཡི་གེ་ཐ་མ་སྐྱེད་པར་བྱེད་པའི་སྒྲ་ཐོས་པ་དེས་ཀྱང་དོན་དེ་གོ་བར་འགྱུར་ཏེ། ཡི་གེ་ཐ་མ་ཁོ་ནས་མིང་བསྐྱེད་པའི་ཕྱིར་དང༌། མིང་གིས་ཀྱང་དོན་རྗོད་པར་བྱེད་པའི་ཕྱིར་རོ། །ངག་མིང་གསལ་བར་བྱེད་པ་ཡིན་ན་ཡང་ཞེས་བྱ་བ་ལ་སོགས་པ་ལ། གང་ཞིག་ཅེ་ན། མིང་སྐྱེད་པར་བྱེད་པ་ཉིད་ལ་བསྟན་པ་ཁོ་ནའོ། །ཡང་སྒྲ་རྣམས་ཚོགས་པ་མེད་ལ། ཆོས་གཅིག་ལ་ཆ་ཤས་ཀྱིས་གསལ་བ་ཡང་རིགས་པ་མ་ཡིན་ནོ། །ཞེས་བྱ་བ་ཐམས་ཅད་རྒྱས་པར་བརྗོད་པར་བྱའོ། །གོང་དུ་ནི་ངག་ལས་ཐ་དད་པའི་ཡི་གེ་ཁས་བླངས་ནས་ཡི་གེ་མིང་གིས་སྐྱེད་པ་ཉིད་ཡིན་པ་བཀག་པ་ཡིན་ལ། ད་ནི་ངག་ལས་ཐ་དད་པའི་ཡི་གེ་ཡོད་པ་མ་ཡིན་པ་དེ་ཉིད་ཀྱི་ཕྱིར་ཡི་གེ་ཡང་དག་ངག་ཅེས་བྱ་བ་རྒྱས་པར་སྨོས་སོ། ངག་ལས་ཐ་དད་པའི་ཡི་གེ་ནི་ཡོད་པ་མ་ཡིན་ཏེ། དེའི་ཕྱིར་ཡོད་པ་མ་ཡིན་པའི་ཡི་གེ་ཇི་ལྟར་ངག་གིས་སྐྱེད་པའམ་གསལ་བར་བྱེད་པ་འདི་ཇི་ལྟར་ཞེས་ཤེ་ན། དེའི་ཕྱིར་ཤེས་རབ་དང་ལྡན་པ་ཞེས་བྱ་བ་ལ་སོགས་པ་སྨོས་སོ། །ཤེས་རབ་འཆལ་བ་ནི་ཤེས་རབ་ཉམས་པའི་ཕྱིར་ལ། ཤེས་རབ་ལྡན་པ་ཡང་གཡེང་བ་ཡོད་པའི་ཕྱིར་ཡོངས་སུ་བཅད་པར་མི་ནུས་པས་ཤེས་རབ་དང་ལྡན་པ་ཡིད་བསྟང་པས་ཀྱང་ཞེས་གཉིས་ཀ་བརྗོད་དོ། །མཚན་ཉིད་ཀྱི་སྒོ་ནས་ཞེས་བྱ་བ་ནི་རང་གི་ངོ་བོའི་སྒོ་ནས་སོ། དེའི་ཕྱིར་ངག་ལས་ཐ་དད་པའི་ཡི་གེ་མེད་པས་ངག་ནི་མིང་ལྟར་ཡི་གེ་སྐྱེད་པར་བྱེད་པ་ཡིན་པར་ཡང་མི་རུང་ལ། གསལ་བར་བྱེད་པ་ཡིན་པར་ཡང་མི་རུང་ངོ༌། །གཞན་ཡང་ངག་ནི་སྒྲ་ཙམ་ཡིན་པའི་ཕྱིར་སྒྲ་ཙམ་ཐམས་ཅད་ཡི་གེས་སྐྱེད་པའམ་གསལ་བར་བྱེད་པར་འགྱུར་རོ། །ཞེས་ཐམས་ཅད་འདིར་ཡང་རྒྱས་པར་བརྗོད་པར་བྱའོ། །གང་ཞིག་སྒྲ་ཙམ་མིང་ཡིན་ན་དེ་ལ་ཡང་མིང་གི་ཡི་གེ་དུ་མ་རྣམས་ཀྱི་སྒྲ་ཅིག་ཅར་དོན་གོ་བར་བྱེད་པ་མེད་དེ། བརྡར་བྱས་པའི་སྒྲ་བརྗོད་པ་ལ་བསྟད་པ་རྣམས་ཀྱིས་ཀྱང་སྒྲ་དམིགས་ཀྱི་དོན་ངེས་པར་འཛིན་པ་མ་ཡིན་ནོ། །ཡང་དེ་རྣམས་ཉིད་ངེས་པར་
གཟུང་བས་འདིར་ཉེ་བར་དམིགས་པ་ཡང་མ་ཡིན་གྱི་དེའི་དོན་ངེས་པར་གཟུང་བ་དང་དེ་ནམ་ཞིག་རྣ་བས་ཐོས་པས་ཀྱང་ཉེ་བར་དམིགས་སོ། །དེ་གཞན་དུ་གཏོགས་པ་ལས་སྒྲ་དང་ཐ་དད་པ་དེ་ཉིད་དོན་རྣམས་དང་མཚུངས་པར་ལྡན་པར་འགྱུར་བས་ན། སློབ་དཔོན་འདུས་བཟང་གིས། མངོན་པར་འདོད་པའི་མིང་ལ་ཡིད་བཞག་ནས་འདི་དང་འདི་བརྗོད་པར་བྱའོ་སྙམ་དུ་དུས་ཕྱི་མའི་བརྗོད་པ་འཇུག་པར་འགྱུར་བས་དེ་ལྟར་བརྗོད་དེ། ངག་ནི་མིང་ལ་འཇུག་གོ་ཞེས་བཤད་དོ། །གང་ཡང་སྒྲ་སྔ་མ་ཕྱི་མའི་ཚོགས་ཐམས་ཅད་བསྡོམས་ནས་བསྐྱེད་པས་ན། དེ་ལྟར་ཡི་གེ་སོ་སོ་རྣ་བའི་རྣམ་པར་ཤེས་པས་དམིགས་པ་རྣམས་ཕྱིས་རྣ་བའི་རྣམ་པར་ཤེས་པའི་སྟོབས་ཀྱིས་རང་བཞིན་མཐའ་དག་དྲན་པའི་ཡུལ་དུ་གྱུར་པ་ན་བརྡ་ལ་བྱང་བས་དོན་གོ་བ་ཡིན་གྱི། ཡི་གེ་དེ་རྣམས་ཡོད་པ་ཙམ་གྱིས་ནི་མ་ཡིན་ནོ། །འབྲེལ་པ་ལ་བྱང་བའི་དུས་ཉིད་དུ་ཡང་མཐའ་དག་དྲན་པའི་ཡུལ་དུ་བྱས་ཏེ་བརྡ་ལ་བྱང་བར་བྱས་པས་འབྲེལ་པ་དང་མཐུན་པར་སྒྲའི་དོན་རྟོགས་ཀྱི། གཞན་དུ་ནི་མ་ཡིན་ཏེ་འབྲེལ་པ་དོན་མེད་པར་ཐལ་བའི་ཕྱིར་རོ། །གང་བཤད་པ་མངོན་པར་འདོད་པའི་མིང་ལ་ཡིད་བཞག་ནས་ཞེས་བྱ་བ་ལ་སོགས་པ་དེ་ཡང་གནོད་པ་ཅན་ཏེ། སྒྲ་མཐའ་དག་ཡིད་ལ་བཞག་ནས་ཕྱིས་རིམ་གྱིས་བརྗོད་པའི་ཕྱིར་རོ། །འོན་ཏེ་མིང་དོན་དང་ལྷན་ཅིག་སྐྱེས་པ་ཡིན་ཏེ་ཞེས་བྱ་བ་ལ་སོགས་པ་རྒྱ་ཆེར་འབྱུང་བ་ལ། དེ་ལ་ངག་གི་བྱ་བ་མེད་པའི་ཕྱིར་སྐྱོན་མེད་དོ་སྙམ་དུ་བསམས་པའོ། །དེ་ལྟར་ཡང་མིང་མངོན་པར་གསལ་བ་ཉིད་ལས་མངོན་པར་མི་གསལ་བའི་བྱ་བ་ཡོད་པ་གཟུང་བའི་ཕྱིར་རོ། །གཞན་དུ་ན་ངག་མེད་མིང་ལ་འཇུག་ཅེས་པ་འགལ་ཏེ་མངོན་པར་མི་གསལ་བ་ནི་ཚིག་ཏུ་མི་འཐད་དོ་ཞེས་རྒྱ་ཆེར་བཤད་དོ། །དེ་ལྟ་ན་དོན་འདས་པ་དང་མ་འོངས་པའི་ཞེས་བྱ་བ་རྒྱས་པར་འབྱུང་བ་ལ། ཇི་ལྟར་འདས་པ་དང་མ་འོངས་པའི་སྐྱེ་བ་དང༌། གནས་པ་དང༌། རྒ་བ་དང༌། མི་རྟག་པ་ཉིད་དང༌། སྐྱེ་བའི་སྐྱེ་བ་ལ་སོགས་པ་རྣམས་ད་ལྟར་བ་མ་ཡིན་པ་དེ་བཞིན་དུ་མིང་ཡང་ང་ལྟར་བ་ཡིན་པར་མི་འགྱུར་རོ། །དེའི་ཕྱིར་འདས་པ་དང་མ་འོངས་པའི་ཐ་སྙད་ཀུན་ཏུ་འཆད་པར་འགྱུར་རོ། །འདི་ལྟར་འདས་པ་དང་མ་འོངས་པའི་མིང་གིས་ནི་དོན་བརྗོད་པར་མི་ནུས་ཏེ་ངག་བཞིན་ནོ། །འདས་པ་དང་མ་འོངས་པའི་ངག་གིས་ནི་མིང་གསལ་བར་བྱ་བར་མི་ནུས་ཏེ། གོ་རིམས་
བཞིན་འགགས་ཟིན་པའི་ཕྱིར་དང་མ་སྐྱེས་པའི་ཕྱིར་རོ། །ཕ་རྣམས་ཀྱི་བུ་དག་གིས་ཞེས་བྱ་བ་ལ། གཅིག་གིས་མིང་ནི་སྐྱེ་བ་ལ་སོགས་པ་བཞིན་དུ་གཅིག་ཁན་ལྷན་ཅིག་སྐྱེའི། རྣམ་པར་གཞག་པ་མེད་པའི་ཕྱིར་དུ་མ་ནི་མ་ཡིན་པས། འདིར་མིང་གང་གིས་དེ་དང་ལྷན་ཅིག་སྐྱེས་པར་བརྗོད་པར་བྱ། ཆོས་འདུས་མ་བྱས་ཀྱི་ཞེས་བྱ་བ་ལ། མིང་ནི་མི་སྐྱེ་བའི་ཆོས་ཅན་ཁོ་ནར་འགྱུར་ཏེ། འདུས་མ་བྱས་རྣམས་མི་སྐྱེ་བའི་ཕྱིར་རོ། །ཚིགས་བཅད་མིང་ལ་བརྟེན་པ་སྟེ། ཞེས་བྱ་བ་ལ། འདིར་ལྡན་པ་མ་ཡིན་པའི་མིང་ཡོད་དེ་ཞེས་བྱ་བའི་ཁུངས་ནི་འདི་ཡིན་ཏེ། དེ་མེད་ན་ཚིགས་སུ་བཅད་པ་མེད་པར་ཐལ་བའི་ཕྱིར་རོ། །རྟེན་མེད་པར་ནི་བརྟེན་པ་ཡོད་པར་བྱ་བར་མི་ནུས་སོ། །ཚིགས་སུ་བཅད་པ་མིང་ལ་བརྟེན་པ་བདེན་མོད་ཀྱི། དེ་དང་མི་ལྡན་པ་མ་ཡིན་པ་ནི་ཞལ་གྱིས་མ་བཞེས་ཏེ། འོ་ན་ཅི་ཞེ་ན། དོན་རྣམས་ལ་མཚམས་བྱས་པའི་སྒྲ་ནི་མིང་ཡིན་ལ། མིང་རྣམས་བཀོད་པའི་ཁྱད་པར་ཡང་ཚིགས་སུ་བཅད་པ་ཡིན་པས། མིང་རྗོད་པར་བྱེད་པ་ཇི་ལྟར་བཀོད་པ་རྣམས་ཀྱིས་ཚིགས་སུ་བཅད་པ་ཞེས་བྱ་བ་ཐོབ་པའི་བཀོད་པ་དེ་ཚིགས་སུ་བཅད་པ་ཡིན་གྱི་ཐམས་ཅད་ནི་མ་ཡིན་ནོ་ཞེས་ཤེས་པར་བྱ་བའི་ཕྱིར་བཀོད་པའི་ཁྱད་པར་ཞེས་བྱ་བ་སྨོས་སོ། །འདས་པ་དང་མ་འོངས་པའི་སྒྲ་རྣམས་མེད་པའི་ཕྱིར་ཐམས་ཅད་ལ་བརྟེན་པའི་དངོས་པོར་མི་རིགས་པས་དེ་ཉིད་ཀྱི་ཕྱིར། བཀོད་པའི་ཁྱད་པར་ཡང་རྫས་གཞན་དུ་མི་འཐད་དོ་ཞེས་སྨོས་སོ། །ཇི་ལྟར་ཞེ་ན་ཕྲེང་བ་བཞིན་ནོ། །ཇི་ལྟར་ཕྲེང་བ་ནི་ཤིང་ལྗོན་པ་དང༌། འདབ་ཆགས་དང༌། གྲོག་མ་ལ་སོགས་པ་རྣམས་ཕན་ཚུན་ཉེ་བ་ན་གནས་པ་ལས་མ་གཏོགས་པའི་རྫས་གཞན་དུ་མི་འཐད་དེ། དཔུང་པ་བཞིན་དུ་དེ་མ་གཟུང་ན་དེའི་བློ་མེད་པའི་ཕྱིར་རོ། །དེ་ལྟ་ན་ཡང་དཔེ་ནི་མཚུངས་ཏེ། ཤིང་ལྗོན་པ་ལ་སོགས་པ་ད་ལྟར་བ་རྣམས་ཁོ་ནའི་བཀོད་པའི་ཁྱད་པར་ལས་ཕྲེང་དུ་སྙེད་པའི་ཕྱིར་རོ་ཞེ་ན། དེའི་ཕྱིར་སེམས་ཀྱི་རིམ་པ་ལྟ་བུའོ་ཞེས་སྨོས་ཏེ། ཇི་ལྟར་སེམས་དང་སེམས་ལས་བྱུང་བ་དུས་སྔ་ཕྱིར་བྱུང་བ་རྣམས་ལ་བར་མེད་པར་འགག་པ་དང༌། སྐྱེ་བ་ལས་མ་གཏོགས་པའི་རིམ་པ་གཞན་ཡོད་པ་མ་ཡིན་པ་དེ་བཞིན་དུ་སྒྲ་སྔ་ཕྱིར་བྱུང་བ་རྣམས་ལ་ཡང་བར་མཚམས་མེད་པར་འགག་པ་དང༌། སྐྱེ་བ་
ལས་མ་གཏོགས་པའི་བཀོད་པའི་ཁྱད་པར་མི་དམིགས་སོ། །དེའི་ཕྱིར་འདས་པ་དང་མ་འོངས་པའི་སྒྲ་རྣམས་ཀྱང་སེམས་ལྟར་བཀོད་པའི་ཁྱད་པར་གྱི་རྟེན་གྱི་ངོ་བོར་མི་འགལ་ལོ། །ཡི་གེ་ཙམ་ཞིག་ཞེས་བྱ་བ་ལ། ཉེས་པ་ཆུང་བའི་ཕྱིར་རོ་སྙམ་དུ་བསམས་པ་ཡིན་གྱི། ངེས་པར་མ་ཟིན་པའི་ཕྱིར་ངག་ལས་ཁྱད་པར་འཕགས་པའི་ཡི་གེ་ཡོད་པ་ནི་མ་ཡིན་ནོ། །དེ་དག་ཏུ་རྟོགས་པ་དོན་མེད་པ་ཡིན་ན་ཞེས་བྱ་བ་ལ། ཡི་གེ་དག་ལས་མིང་དང་ཚིག་ཐ་དད་པར་ཡོངས་སུ་རྟོགས་པ་དོན་མེད་དོ། །སློབ་དཔོན་འདུས་བཟང་ན་རེ། ཡི་གེ་རྣམས་ཅིག་ཅར་འཛིན་པ་མེད་པའི་ཕྱིར་དང་སྐད་ཅིག་མ་ཉིད་ཡིན་པའི་ཕྱིར་དང་ཚོགས་པ་མི་འཐད་པའི་ཕྱིར་ཡི་གེ་རྣམས་ཚོགས་པ་མིང་གི་ཚོགས་ལ་སོགས་པ་མ་ཡིན་ནོ་ཞེས་ཟེར་རོ། །ཡི་གེ་རྣམས་ནི་རིམ་གྱིས་སོ་སོ་སོ་སོར་དམིགས་པ་དེའི་སྟོབས་ཀྱིས་མཐའ་དག་མ་འདྲེས་པའི་རིམ་པས་གཅིག་ཏུ་དྲན་པའི་ཤེས་པས་ཤེས་པའི་ཡུལ་གྱི་ངོ་བོར་བཞག་པ་ཚོགས་སུ་བསྟན་པར་བྱས་པས་ན་འདི་ལ་སྐྱོན་མེད་དོ། །ཁྱེད་ཀྱང་ཡི་གེའི་ཚོགས་འདོད་པ་ཉིད་དེ། འདི་ལྟར་བཤད་པ། ཤིང་ཞེས་བྱ་བ་འབྱུང་བ་དང་འབྱུང་བ་ལས་གྱུར་པའི་ཚོགས་པ་ལ་བརྟེན་ནས་གྲིབ་མར་འགྱུར་ཏེ། འདི་ཉེར་ལེན་མེད་པ་མ་ཡིན་ཞིང་ཐ་དད་པར་མི་འགྱུར་རོ། །ཡི་གེ་དེའི་ཚོགས་པ་མངོན་པར་མཚོན་པ་ནི་རེ་ཞིག་མིང་དང་ཚིག་གི་ཚོགས་སུ་འགྱུར་ཏེ། དོན་གཞན་ཉིད་མ་ཡིན་པར་བརྗོད་པ་མ་ཡིན་ནོ། །དེའི་ཕྱིར་བཅོམ་ལྡན་འདས་ཀྱིས་ཀྱང་ཡི་གེ་ཚོགས་པ་མེད་པའི་ཕྱིར་ཡི་གེའི་ཚོགས་པ་མངོན་པར་མཚོན་པ་དག་མིང་དང་ཚིག་གི་ཚོགས་དག་ཏུ་འགྱུར་ཞེས་གསུངས་སོ། །མཚུངས་པའི་ཕྱིར་གཅིག་ཏུ་བརྗོད་པར་མི་བྱ་སྟེ། ཐམས་ཅད་བཏགས་པ་ཁོ་ནར་ཡོད་པ་དང་རྫས་ཉིད་དུ་རྣམ་པར་གཞག་པར་ཡང་ཅི་ལྟར་ནུས། ཡི་གེ་གཅིག་པའི་མིང་ཡང་ཡོད་དོ། །ཉེ་བར་ལན་པའི་རྫས་གཅིག་ནི་བཏགས་པར་ཡོད་པ་དང་ཡོད་པའི་ཁྱད་པར་ཡང་མ་ཡིན་ནོ། །རྫས་གཅིག་ཉིད་ཚོགས་པའི་རྒྱུན་གྱིས་ཉེ་བར་ལེན་པ་ཡིན་ཏེ། འདི་གནས་སྐབས་ཀྱི་ཁྱད་པར་ལ་ཡོད་པ་མ་ཡིན་ནོ། །དེ་ལ་ཅི་ལྟར་ཡི་གེ་ལས་དོན་གཞན་དུ་གྱུར་པའི་མིང་རྟོགས་པར་བྱེད། གང་བཤད་པ་མཚུངས་པར་ལྡན་པ་ཉིད་ཀྱི་ཕྱིར་ཐ་དད་པ་མ་ཡིན་པའི་བི་བྷཱ་བྱ་སྟེ་རྩིག་པ་དང་ཉི་མའི་གཟུགས་བཞིན་ཞེས་བྱ་སྟེ། རྩིག་པ་དང་ཉི་མའི་
གཟུགས་དག་ནི་སོ་སོ་སོ་སོར་དམིགས་ཏེ། འདི་ཡང་སྔོན་པོ་དང་སེར་པོ་དང་དམར་པོ་དང་རྩིག་པའི་གཟུགས་ལ་ཉི་མ་ཐ་དད་དུ་ཉེ་བར་དམིགས་ཏེ་དེ་ཉིད་ཀྱི་ཕྱིར་ཁ་དོག་ཐ་དད་པའོ་ཞེས་བྱ་བ་སྟེ་སྤྲོས་པས་ཆོག་གོ །གཞན་ཡང་ཆོས་ཐམས་ཅད་རྟོག་གེའི་སྤྱོད་ཡུལ་མ་ཡིན་པས་ཞེས་བྱ་བ་ལ། དེ་ལྟར་ཡིད་ཆེས་པའི་ལུང་གི་ཚད་མ་ལས་གྲུབ་པ་ཡིན་ཏེ། ཆོས་ཁ་ཅིག་དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་ཁོ་ན་ཡིན་པ་ཡང་ཡོད་དོ། །རྣམ་པའི་བྱེ་བྲག་བཤད་པ་བརྗོད་པར་འདོད་པས་དྲི་བ་བྱེད་པ་ནི། ཡང་ཅི་མིང་གི་ཚོགས་ལ་སོགས་པ་འདི་དག་གང་དང་ལྡན་པའམ་ཞེས་བྱ་བ་རྒྱ་ཆེར་འབྱུང་བའོ། །གང་དང་ལྡན་ཞེས་བྱ་བ་ནི་ཁམས་གང་དང་ལྡན་ཞེས་བྱ་བའོ། །འདོད་པ་དང་གཟུགས་སུ་གཏོགས་པ་ཁོ་ན་ཡིན་གྱི། གཟུགས་མེད་པར་གཏོགས་པ་ནི་མ་ཡིན་ཏེ། དེ་ན་ངག་མེད་པའི་ཕྱིར་རོ། །གཞན་དག་ན་རེ་གཟུགས་མེད་པར་གཏོགས་པ་ཡང་ཡོད་མོད་ཀྱི་དེ་དག་ནི་བརྗོད་པར་བྱ་བ་མ་ཡིན་ནོ་ཞེས་ཟེར་རོ་ཞེས་བྱ་བ་ལ། གཞན་གྱིས་པའི་ངག་གིས་ས་གཞན་གྱི་མིང་གི་ཚོགས་ལ་སོགས་པ་དག་བརྗོད་པ་ནི་མ་ཡིན་ལ་གཟུགས་མེད་པ་དག་ན་ངག་མེད་པས་བརྗོད་པར་བྱ་བ་མ་ཡིན་ནོ། །གཟུགས་ཀྱི་ཁམས་སུ་ཡང་བསམ་གཏན་དང་པོ་དང་གཉིས་པ་ལ་སོགས་པ་རྣམས་སུའོ་ཞེས་ཁ་ཅིག་ཟེར་རོ། །གཉིས་པ་ལ་སོགས་པ་རྣམས་སུ་ཡོད་ཀྱང་བརྗོད་པར་བྱ་བ་ནི་མ་ཡིན་ནོ་ཞེས་གཞན་དག་གོ །ས་གང་ཡིན་པ་དེའི་ས་པའི་ངག་དང་མིང་ངོ་ཞེས་བྱ་སྟེ། འདོད་པ་ན་སྤྱོད་པ་ནི་འདོད་པ་ན་སྤྱོད་པའི་ངག་དང་བརྗོད་པ་སྟེ། རང་གི་ས་པའི་ངག་དང་མིང་དང་གང་ཟག་དང་དོན་དུ་འགྱུར་གྱི། ཁམས་གསུམ་པའི་ལྡན་པ་མ་ཡིན་ནོ། །དེ་བཞིན་དུ་བསམ་གཏན་དང་པོའི་ས་པའི་ངག་དང་བརྗོད་པ་ནི་བསམ་གཏན་དང་པོའི་ས་པའི་ངག་དང་མིང་དང་དོན་ནོ། །སྔ་མ་ཁོ་ན་ལྟར་བསམ་གཏན་དང་པོར་སྐྱེས་པ་ལ་ཡང་སྦྱར་ཏེ། གང་ཟག་ས་གང་གི་ཡིན་པ་དེའི་ས་པའི་མིང་ངོ་ཞེས་གཞན་དག་ཟེར་རོ། །དེ་དག་རང་གི་སའི་མིང་དང་གང་ཟག་དང་ངག་ཏུ་འགྱུར་རོ། །རང་གི་སར་འགྱུར་བ་ནི་གཞན་གྱིས་མ་ཡིན་པའི་དོན་ཏོ། །སྔ་མ་ཁོ་ན་ལྟར་མིང་གི་ཚོགས་ལ་སོགས་པ་རྣམས་གཟུགས་མེད་པའི་ཁམས་སུ་བརྗོད་པར་བྱ་བ་མ་ཡིན་ཏེ། དེར་
སྐྱེས་པ་རྣམས་ལ་ངག་མེད་པའི་ཕྱིར་རོ། །དེ་དག་ནི་སེམས་ཅན་དུ་བགྲང་བ་ཡིན་ཏེ། འགོག་པ་གཉིས་མ་གཏོགས་པའི་སེམས་ཅན་དུ་བགྲང་བ་མ་ཡིན་པ་དང་ལྡན་པ་མེད་པའི་ཕྱིར་རོ། །གང་རྗོད་པར་བྱེད་པ་དེ་དག་དང་ལྡན་གྱི་ཞེས་བྱ་བ་ལ། གང་བརྗོད་པར་བྱ་བ་དེ་དག་དང་ལྡན་པར་འགྱུར་རོ་སྙམ་པའི་དོགས་པ་འདི་གང་ལས་ཤེ་ན། མིང་འདི་ནི་དོན་གྱི་ཡིན་ནོ་ཞེས་ཐ་སྙད་འདོགས་པ་ལས་སོ། །ཇི་ལྟར་མིང་གི་དབང་པོ་ལྟ་བ་པོ་ཁོ་ན་ཡིན་གྱི། བལྟ་བར་བྱ་བ་མ་ཡིན་པ་དེ་བཞིན་དུ་འདིར་ཡང་གང་གི་ཚེ་མིང་རྗོད་པར་བྱེད་པ་དེའི་ཚེ་གང་དག་དང་ལྡན་པ་དེ་དག་ཁོ་ནས་བརྗོད་པར་བྱའོ། །སྐལ་བ་མཉམ་པའི་རྒྱུས་བསྐྱེད་པའི་ཕྱིར། རྒྱུ་མཐུན་པ་ལས་བྱུང་བ་ཁོ་ན་ཡིན་གྱི། རྒྱས་པ་ལས་བྱུང་བ་མ་ཡིན་ཏེ་རྡུལ་ཕྲ་རབ་བསགས་པ་མ་ཡིན་པའི་ཕྱིར་རོ། །རྣམ་པར་སྨིན་པ་ལས་སྐྱེས་པ་ཡང་མ་ཡིན་ཏེ། འདོད་དགུར་འབྱུང་བའི་ཕྱིར་རོ། །བཅོམ་ལྡན་འདས་ཀྱིས་ནི་ལས་ཀྱི་བདག་པོའི་འབྲས་བུ་ཡིན་པའི་ཕྱིར་མིང་ཡང་ལས་ལས་སྐྱེས་པར་སྨྲའོ་ཞེས་གསུངས་སོ། །མ་བསྒྲིབས་ལ་ལུང་དུ་མ་བསྟན་པ་དག་ཀྱང་ཡིན་ཏེ། དེ་ཉིད་ཀྱི་ཕྱིར་དགེ་བའི་རྩ་བ་ཀུན་ཏུ་ཆད་པ་ཆོས་དགེ་བ་རྣམས་བརྗོད་པ་ན་དགེ་བ་རྣམས་དང་མི་ལྡན་ལ། དེ་དག་གི་མིང་དང་ནི་ལྡན་པ་ཡིན་ནོ། །དེ་བཞིན་དུ་འདོད་ཆགས་དང་བྲལ་བ་ཆོས་མི་དགེ་བ་དག་བརྗོད་པ་ན་ཞེས་བྱ་བ་བརྗོད་པར་བྱའོ། །དེ་བཞིན་དུ་སྐལ་མཉམ་ཞེས་བྱ་བ་ལ། སྐལ་མཉམ་སེམས་ཅན་འདྲ་བའོ། །ཞེས་འབྱུང་བའི་ཕྱིར་ན་སེམས་ཅན་དུ་སྟོན་པ་ཁོ་ནའོ། །དགེ་བའི་རྩ་བ་ཀུན་ཏུ་ཆད་པ་རྣམས་དང༌། འདོད་ཆགས་དང་བྲལ་བ་རྣམས་ཀྱང་དེ་དང་ལྡན་པའི་ཕྱིར་ན་ལུང་དུ་མ་བསྟན་པའོ། །དེ་ནི་རྒྱུ་མཐུན་པ་འབའ་ཞིག་མ་ཡིན་གྱི་རྣམ་པར་སྨིན་པའང་ཡིན་ནོ། །དེ་ལ་རྣམ་པར་སྨིན་པ་ལས་སྐྱེས་པ་ནི་དཔེར་ན་དམྱལ་བ་ལ་སོགས་པ་རྣམས་དམྱལ་བ་ལ་སོགས་པ་དག་དང་སྐལ་བ་མཉམ་པ་ལྟ་བུ་སྟེ། ལྷ་རྣམས་དང་སྐལ་པ་མཉམ་པར་སྐྱེའོ་ཞེས་འབྱུང་བའི་ཕྱིར་རོ། །རྒྱུ་མཐུན་པ་ལས་བྱུང་བ་ནི་ཁམས་དང་གླིང་དང་མདོག་དང་རིགས་དང་རུས་དང་དགེ་སྦྱོང་དང་བྲམ་ཟེ་དང་བསླབ་པ་ལ་སོགས་པ་སྐལ་པ་མཉམ་པའོ། །རྣམ་པར་སྨིན་པ་ལས་སྐྱེས་པ་ཆོས་ཀྱི་སྐལ་པ་མཉམ་པ་ནི་རྣམ་པར་སྨིན་
པ་ལས་སྐྱེས་པའོ། །རྒྱུ་མཐུན་པ་ལས་བྱུང་བའི་ཆོས་ཀྱི་སྐལ་པ་མཉམ་པ་ནི་རྒྱུ་མཐུན་པ་ལས་བྱུང་བའོ། །གཞན་དག་ན་རེ། སྔོན་གྱི་ལས་ཀྱིས་བསྒྲུབས་པ་རྣམ་པར་སྨིན་པ་ལས་སྐྱེས་པ་ད་ལྟར་བའི་སྦྱོར་བས་གྲུབ་པ་ནི་རྒྱུ་མཐུན་པ་ལས་བྱུང་བའོ་ཞེས་ཟེར་རོ། །ཁམས་ཀྱི་དབྱེ་བས་ནི་མིང་གི་ཚོགས་ལ་སོགས་པ་བལྟར་འདོད་པ་དང༌། གཟུགས་སུ་གཏོགས་པ་འབའ་ཞིག་ཏུ་མ་ཟད་ཀྱི། ཁམས་གསུམ་པ་སྟེ། སེམས་ཅན་འདྲ་བའོ་ཞེས་འབྱུང་བའི་ཕྱིར་དང༌། སེམས་ཅན་རྣམས་ཀྱང་ཁམས་གསུམ་པ་ཡིན་པའི་ཕྱིར་རོ། །ཐོབ་རྣམ་གཉིས་ཞེས་བྱ་བ་ནི། རྣམ་པར་སྨིན་པ་ལས་སྐྱེས་པ་རྣམས་ཀྱིས་ནི་རྣམ་པར་སྨིན་པ་ལས་སྐྱེས་པ་དག་གོ །ལྷག་མ་རྣམས་ཀྱིས་ནི་རྒྱུ་མཐུན་པ་ལས་བྱུང་བའོ། །རྒྱས་པ་ལས་བྱུང་བ་ནི་མ་ཡིན་ཏེ། གཟུགས་ཅན་མ་ཡིན་པའི་ཕྱིར་རོ། །མཚན་ཉིད་རྣམས་ཀྱང་རྣམ་པར་སྨིན་པ་ལས་སྐྱེས་པ་རྣམས་ཀྱིས་ནི་རྣམ་པར་སྨིན་པ་ལས་སྐྱེས་པ་དག་གོ །ལྷག་མ་རྣམས་ཀྱིས་ནི་རྒྱུ་མཐུན་པ་ལས་བྱུང་བ་དག་གོ །རྒྱས་པ་ལས་བྱུང་བ་དག་ནི་མེད་དེ། གཟུགས་ཅན་མ་ཡིན་པ་རྣམས་ལ་བསགས་པ་མེད་པའི་ཕྱིར་རོ། །སེམས་མེད་པའི་སྙོམས་པར་འཇུག་པ་གཉིས་ནི་འགོག་པའི་སྙོམས་པར་འཇུག་པ་དང་འདུ་ཤེས་མེད་པའི་སྙོམས་པར་འཇུག་པ་སྟེ། སྙོམས་པར་འཇུག་པ་དང་བསམ་གཏན་གྱིས་བསྡུས་པའི་ཕྱིར་རྣམ་པར་སྨིན་པ་མ་ཡིན་ནོ། །རྣམ་པར་སྨིན་པ་ནི་སྐྱེ་བའི་བསམ་གཏན་གྱིས་བསྡུས་པ་ཁོ་ན་ཡིན་ནོ། །རྒྱས་པ་ལས་བྱུང་བ་དག་ཀྱང་མ་ཡིན་ཏེ་གཟུགས་ཅན་མ་ཡིན་པའི་ཕྱིར་རོ། །མི་ལྡན་པ་ནི་མ་ཐོབ་པ་སྟེ། རྣམ་པར་སྨིན་པའི་མི་ལྡན་པ་ནི་རྣམ་པར་སྨིན་པ་ཡིན་པར་མི་རུང་སྟེ། དེའི་ཕྱིར་འདི་དག་གསུམ་ཀ་ཡང་རྒྱུ་མཐུན་པ་ལས་བྱུང་བ་ཡིན་ནོ། །འདི་དག་གི་བརྗོད་པར་བྱ་བ་ལྷག་མ་ཞེས་བྱ་བ་ནི་ཐོབ་པ་དང༌། མཚན་ཉིད་དང༌། སྙོམས་པར་འཇུག་པ་དང་མི་ལྡན་པ་དག་གིའོ། །ལྷག་མ་དེ་ཡང་གང་ཞིག་ཅེ་ན། ཐོབ་པ་རྣམས་དང་སྙོམས་པར་འཇུག་པ་དག་དང་མི་ལྡན་པའི་སེམས་ཅན་དུ་སྟོན་པ་ཉིད་དང༌། མཚན་ཉིད་རྣམས་ཀྱི་སེམས་ཅན་དུ་སྟོན་པ་དང༌། སེམས་
ཅན་དུ་སྟོན་པ་མ་ཡིན་པ་དང༌། ཐོབ་པ་རྣམས་དང༌། མཚན་ཉིད་རྣམས་ཀྱི་ཁམས་གསུམ་པ་ཉིད་དང༌། མི་ལྡན་པ་ཉིད་དང༌། དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ཉིད་དང༌། མི་ལྡན་པའི་ཁམས་གསུམ་པ་ཉིད་དང༌། སྙོམས་པར་འཇུག་པ་དག་གི་དགེ་བ་ཉིད་དང༌། གཟུགས་སུ་གཏོགས་པ་ཉིད་དོ། །གཞན་དུ་སེམས་ཅན་དུ་བགྲང་བ་མ་ཡིན་པ་དང་ལྡན་པ་མེད་པའི་ཕྱིར་དང་ལྡན་པ་ཞེས་འབྱུང་བར་གལ་བ་མེད་དོ། །སེམས་ཅན་དུ་སྟོན་པ་ཉིད་བཤད་ཟིན་ཏོ།། །།ཇི་ལྟར་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ཉིད་བཤད་ཅེ་ན། དགེ་ལ་སོགས་ཀྱིས་དགེ་ལ་སོགས། །ཞེས་བཤད་པའི་ཕྱིར་རོ། །ཇི་ལྟར་ཁམས་གསུམ་པ་ཉིད་དང་མི་ལྡན་པ་ཉིད་བཤད་ཅེ་ན། དེར་གཏོགས་རྣམས་ཀྱི་རང་ཁམས་པ། །མ་གཏོགས་རྣམས་ཀྱི་རྣམ་པ་བཞི། །ཞེས་བཤད་པའི་ཕྱིར་རོ། །ཐམས་ཅད་འདུས་བྱས་མཚན་ཉིད་དང༌། །ཞེས་འབྱུང་བའི་ཕྱིར། མཚན་ཉིད་རྣམས་ཀྱིས་སེམས་ཅན་དང་སེམས་ཅན་མ་ཡིན་པར་སྟོན་པ་དང་ཁམས་གསུམ་པ་དང་མི་ལྡན་པ་བཤད་དོ། །སེམས་ཀྱི་རྗེས་འཇུག་དུས་དང་ནི། །འབྲས་སོགས་དགེ་ལ་སོགས་པས་སོ། །ཞེས་བྱ་བ་ནི་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ཉིད་དོ། །འདུ་ཤེས་མེད་པའི་སྙོམས་འཇུག །བསམ་གཏན་ཐ་མར་ཞེས་བྱ་བ་དང༌། དགེ་བའོ་ཞེས་འབྱུང་བའི་ཕྱིར་གཟུགས་ཀྱི་ཁམས་དང་ལྡན་པ་དང་དགེ་བ་བཤད་དོ། །དེ་ཉིད་ཀྱི་ཕྱིར། སེམས་ཅན་དུ་སྟོན་པ་ཡང་ཡིན་ཏེ། སྐྱེས་ནས་མྱོང་འགྱུར་ཉིད་ཅེས་བཤད་པའི་ཕྱིར་རོ། །འགོག་པའི་སྙོམས་པར་འཇུག་པ་ཡང་སྲིད་རྩེ་སྐྱེ་ཞེས་བྱ་བ་དང༌། དགེ་བའོ་ཞེས་བྱ་བ་འབྱུང་བའི་ཕྱིར་གཟུགས་མེད་པར་གཏོགས་པ་དང་དགེ་བ་ཡིན་པར་བཤད་དོ། །དེ་ཉིད་ཀྱི་ཕྱིར་སེམས་ཅན་དུ་སྟོན་པ་ཡང་ཡིན་ཏེ། འདུས་བྱས་ཡིན་པའི་ཕྱིར་རོ། །མི་ལྡན་པ་ཁམས་གསུམ་པ་ཁོ་ན་སྟེ། འདོད་སོགས་གཏོགས་དང་དྲི་མེད་ཀྱིའང༌། །ཞེས་བཤད་པའི་ཕྱིར་རོ། །མ་ཐོབ་པ་ནི་སེམས་ཅན་དུ་སྟོན་པ་ཡིན་ཏེ། རང་རྒྱུད་དུ་གཏོགས་པ་རྣམས་ཀྱིའོ་ཞེས་བཤད་པའི་ཕྱིར་རོ། །མ་བསྒྲིབས་ལ་ལུང་དུ་མ་བསྟན་པ་ཡང་ཡིན་ཏེ། མ་ཐོབ་མ་བསྒྲིབས་ལུང་མ་བསྟན། །ཞེས་བཤད་པའི་
ཕྱིར་རོ། །འདུ་ཤེས་མེད་པ་པ་ནི་གཟུགས་སུ་གཏོགས་པ་དང༌། སེམས་ཅན་དུ་སྟོན་པ་དང༌། ལུང་དུ་མ་བསྟན་པ་དང༌། རྣམ་པར་སྨིན་པ་བཤད་དེ། རྣམ་སྨིན་དེ་འབྲས་ཆེ་ཞེས་འབྱུང་བའི་ཕྱིར་རོ། །སྲོག་ནི་ཁམས་གསུམ་པ་སྟེ། སྲོག་གི་དབང་པོ་གང་ཞེ་ན། ཁམས་གསུམ་པའི་ཚེ་ཡིན་ནོ་ཞེས་འབྱུང་བའི་ཕྱིར་རོ། །རྣམ་པར་སྨིན་པ་ལས་སྐྱེས་པ་དང༌། སེམས་ཅན་དུ་སྟོན་པ་དང༌། ལུང་དུ་མ་བསྟན་པ་ཡང་མ་ཡིན་ཏེ། སྲོག་ནི་རྣམ་སྨིན་ཞེས་བཤད་པའི་ཕྱིར་རོ། །ལྡན་པ་མ་ཡིན་པ་རྣམས་བཤད་ཟིན་ཏོ་ཞེས་བྱ་བ་ལ། མཚན་ཉིད་དང༌། རབ་ཏུ་དབྱེ་བ་དང༌། རྣམ་པར་དཔྱད་པའི་སྒོ་ནས་ཏེ། ལྡན་པ་མ་ཡིན་པ་རྣམས་བཤད་ཟིན་ཏོ།། །།རྒྱུ་དང༌། རྐྱེན་དང་སྦྲེལ་བར་བྱ་བའི་ཕྱིར། རྒྱུ་དང་རྐྱེན་དག་མེད་པར་ནི། །ཞེས་བྱ་བ་ལ་སོགས་པ་སྨོས་སོ། །གང་བཤད་པ། རྒྱུ་རྣམས་ནི་གང༌། རྐྱེན་རྣམས་ནི་གང་ཞེ་ན་ཞེས་བྱེ་བྲག་ཏུ་འདྲི་བ། རྒྱུ་རྣམས་ལས་རྐྱེན་རྣམས་ལ་ཁྱད་པར་ཅི་ཡོད་ཅེ་ན། ཁ་ཅིག་ན་རེ་ཅི་ཡང་མེད་དེ། འདི་སྐད་དུ། བཅོམ་ལྡན་འདས་ཀྱིས་ཡང་དག་པའི་ལྟ་བ་སྐྱེད་པ་ལ་གཉིས་དང༌། རྐྱེན་གཉིས་ཏེ། གཞན་གྱི་སྒྲ་དང་ནང་གི་ཚུལ་བཞིན་ཡིད་ལ་བྱེད་པའོ་ཞེས་གསུངས་སོ། །དེའི་ཕྱིར་རྒྱུ་དང་རྐྱེན་དག་དང༌། བྱེད་རྒྱུ་དང་རྒྱུ་མཚན་ཞེས་བྱ་བ་ནི་རྣམ་གྲངས་དག་གོ་ཞེས་ཟེར་རོ། །གལ་ཏེ་ཁྱད་པར་མེད་ན་ཅིའི་ཕྱིར་བྱེ་བྲག་ཏུ་བསྟན་ཅེ་ན། གདུལ་བྱ་ལ་བལྟོས་ནས་ཏེ་ཁམས་དང་སྐྱེ་མཆེད་བཞིན་ནོ། །འདི་ལྟར་རྐྱེན་ཁྱད་པར་མེད་པར་བསྟེན་ལ། རྒྱུ་ནི་ཁྱད་པར་དུ་བསྟན་ཏོ། །བྱེད་རྒྱུ་ལྷན་ཅིག་འབྱུང་བ་དང༌། །ཞེས་རྒྱ་ཆེར་འབྱུང་བ་ལ། དང་ཞེས་བྱ་བ་དང་ཉིད་ཅེས་བྱ་བའི་ཚིག་ཕྲད་གཉིས་ནི་གོ་རིམས་བཞིན་དུ་ཀུན་སྡུད་པ་དང་ངེས་པར་གཟུང་བ་སྟེ། བྱེད་རྒྱུ་དང་ལྷན་ཅིག་འབྱུང་བ་གཉིས་ཁོ་ན་འདུས་བྱས་ཐམས་ཅད་ལ་ཁྱབ་པ་ཉིད་དུ་ངེས་པར་འཛིན་པར་བྱེད་དོ། །གང་དག་བསྟན་བཅོས་འདིར་ཐ་སྙད་དུ་བྱེད་པ་དྲུག་པོ་འདི་རྣམས་རྒྱུ་ཡིན་ནོ། །འཐོབ་པར་བྱེད་པས་ན་རྒྱུ་སྟེ། དངོས་པོས་སྐྱེ་བ་ཐོབ་པར་བྱེད་དུ་འཇུག་ཅེས་བྱ་བའི་དོན་ནོ། །བྱེད་པ་ཉིད་རྒྱུ་ཡིན་པ་ནི་རྒྱུའོ། །ལྷན་ཅིག་འབྱུང་བ་ཡང་དེ་ཡིན་ལ། རྒྱུ་ཡང་ཡིན་པས་སམ། ལྷན་ཅིག་འབྱུང་བ་རྣམས་ཀྱི་རྒྱུ་ནི་ལྷན་ཅིག་འབྱུང་བའི་
རྒྱུའོ། །སྐལ་བ་མཉམ་པའི་རྒྱུ་ནི་སྐལ་བ་མཉམ་པའི་རྒྱུའོ། །མཚུངས་པར་ལྡན་པ་རྣམས་ཀྱི་རྒྱུ་ནི་མཚུངས་པར་ལྡན་པའི་རྒྱུའོ། །ཀུན་ཏུ་འགྲོ་བ་ཡང་དེ་ཡིན་ལ། རྒྱུ་ཡང་ཡིན་པས་ན་ཀུན་ཏུ་འགྲོ་བའི་རྒྱུའོ། །རྣམ་པར་སྨིན་པའི་རྒྱུ་ནི་རྣམ་པར་སྨིན་པའི་རྒྱུའོ། །ཡང་ཅི་ལྟར་བཅོམ་ལྡན་འདས་ཀྱིས་མ་བསྟན་པའི་རྒྱུ་རྣམས་ཀྱིས་བསྟན་བཅོས་སུ་ཐ་སྙད་བྱེད་ཅེ་ན། བྱེ་བྲག་ཏུ་སྨྲ་བ་རྣམས་ན་རེ། དེ་ནི་དེ་ལྟ་མ་ཡིན་ཏེ། བཅོམ་ལྡན་འདས་ཀྱིས་མ་བསྟན་པ་ནི་འགའ་ཡང་ཆོས་མངོན་པར་སྤྲོས་པ་ཡོད་པ་མ་ཡིན་ནོ། །གལ་ཏེ་ཡང་ནུབ་པའི་ཕྱིར་རང་གི་ངོ་བོས་དམིགས་པ་མེད་མོད་ཀྱི། འོན་ཀྱང་གདུལ་བྱའི་དབང་གིས་ལ་ལས་རྣམ་པ་གཞན་གྱི་སྒོ་ནས་ཉེ་བར་ལན་པའི་ས་བོན་ཙམ་མཐོང་བས་ཡོད་པ་ཉིད་དུ་དམིགས་ནས་ཆོས་མངོན་པར་གསལ་བར་མཛད་པ་ཡིན་ནོ། །འདི་ལྟར་མདོ་སྡེ་དེ་དང་དེར་རྒྱུ་འདི་རྣམས་སྦྱོར་བར་སྣང་སྟེ། དཔེར་ན་མིག་དང་གཟུགས་ལ་སོགས་པ་ལ་བརྟེན་ནས་མིག་གི་རྣམ་པར་ཤེས་པ་སྐྱེའོ་ཞེས་བྱ་བ་ནི་བྱེད་རྒྱུའོ། །འདི་ནི་སྐྱེད་པར་བྱེད་པ་དང་གེགས་མི་བྱེད་པའི་ངོ་བོར་རྣམ་པར་གཞག་གོ །ལམ་གྱི་ཡན་ལག་གསུམ་པོ་འདི་དག་ནི་ཡང་དག་པའི་ལྟ་བའི་རྗེས་སུ་འབྲང་བ་ཡིན་ཏེ། ལྷན་ཅིག་སྐྱེས་པའི་ཚོར་བ་དང་འདུ་ཤེས་དང་སེམས་པའོ་ཞེས་བྱ་བ་ནི་ལྷན་ཅིག་འབྱུང་བའི་རྒྱུ་སྟེ། འདི་ནི་ཕན་ཚུན་རྗེས་སུ་འབྲང་བ་དང་བྱ་བ་གཅིག་པའི་དོན་གྱིས་རྣམ་པར་གཞག་གོ །སྐྱེས་བུ་གང་ཟག་འདི་ནི་ཆོས་དགེ་བ་རྣམས་དང་ཡང་ལྡན་ལ། མི་དགེ་བ་རྣམས་དང་ཡང་ལྡན་ཞེས་བྱ་བ་ནས་འདི་ལ་དགེ་བའི་རྩ་བ་ཀུན་ཏུ་མ་ཆད་པ་གང་ལས་འདིའི་དགེ་བའི་རྩ་བ་གཞན་སྐྱེ་བར་འགྱུར་བ་ཆུང་ངུ་དང་ལྷན་ཅིག་པར་གྱུར་པ་ཡོད་ན་དེ་ལྟ་ན་སྐྱེས་བུ་གང་ཟག་འདི་ཕྱིས་རྣམ་པར་དག་པའི་ཆོས་ཅན་དུ་འགྱུར་རོ་ཞེས་འབྱུང་བ་འདི་ནི་སྐལ་བ་མཉམ་པའི་རྒྱུ་ཡིན་ཏེ། འདི་ནི་འདས་པ་དང་ད་ལྟར་བྱུང་བའི་ཆོས་རྣམས་ཀྱི་འབྲས་བུ་འདྲ་བར་འགྲུབ་པའི་དོན་གྱིས་རྣམ་པར་གཞག་གོ ། འདི་བརྗོད་པར་བྱ་སྟེ། རྟོགས་ནས་ཤེས་པ་དང་མཚུངས་པར་ལྡན་པ་འདི་ནི་མཐོང་བའི་གཞི་ཅན་གྱི་དད་པའོ་ཞེས་བྱ་བ་འདི་མཚུངས་པར་ལྡན་པའི་རྒྱུ་ཡིན་ཏེ། འདི་ནི་དམིགས་པ་གཅིག་པའི་དོན་གྱིས་རྣམ་པར་གཞག་གོ །ལྟ་བར་གྱུར་པ་གང་ཅུང་ཟད་ཅིག་འབྱུང་བ་དེ་ཐམས་ཅད་ནི་
འཇིག་ཚོགས་ལ་ལྟ་བའི་རྩ་བ་ཅན་ནོ། །གང་དག་ལྟ་བ་ཐམས་ཅད་བཟོད་པ་ཉིད་འདི་ནི་ལྟ་བ་སྟེ། ཀུན་ནས་ཆགས་པ་དང་ཀུན་ནས་སྡང་བ་དང་ཀུན་ནས་རྨོངས་པས་སོ་ཞེས་བྱ་བ་འདི་ནི་ཀུན་ཏུ་འགྲོ་བའི་རྒྱུའོ། །འདི་ཡང་སྐལ་པ་མཉམ་པ་དང་སྐལ་པ་མི་མཉམ་པའི་ཉོན་མོངས་པ་ཅན་གྱི་ཆོས་ཀྱི་རྒྱུན་སྐྱེད་པར་བྱེད་པའི་དོན་གྱིས་རྣམ་པར་གཞག་གོ །ཨེ་ཀཱ་ནཻ་ཀཱ་པི་ཀ་སྱ་སརྦ་ཏྲ་ག་ཧེ་ཏོཿ་པཉྩ་ནཻ་ཀཱ་ཡི་ཀཾ་ཕ་ལ་མུརྦྷ་བ་ཏི། འདི་ན་ལས་དགེ་བ་དང་མི་དགེ་བ་ཟག་པ་དང་བཅས་པ་དང་བསྒོམ་པ་ལས་བྱུང་བའི་རྣམ་པར་སྨིན་པ་དེར་སྐྱེས་པ་རྣམས་ཀྱིས་སོ་སོར་ཡང་དག་པར་མྱོང་བར་འགྱུར་རོ། །ཆེད་དུ་བསམས་པའི་ལས་བྱས་ཤིང་བསགས་པའི་རྣམ་པར་སྨིན་པ་སོ་སོ་ཡང་དག་པར་མྱོང་བར་འགྱུར་རོ་ཞེས་བྱ་བ་ནི་རྣམ་པར་སྨིན་པའི་རྒྱུ་ཡིན་ཏེ། འདི་ནི་འབྲས་བུ་མི་འདྲ་བའི་འཕེན་པ་ཉིད་ཀྱིས་རྣམ་པར་གཞག་གོ །དེ་ལྟར་ན་རྒྱུ་དེ་དག་སྟོན་པ་སངས་རྒྱས་ཀྱིས་ཉེ་བར་བསྟན་མོད་ཀྱི། །མདོ་སྡེ་པ་རྣམས་ཀྱིས་ནི་རབ་ཏུ་སྤང་བས་མ་མཐོང་ངོ༌། །རྒྱུ་རྣམས་ནི་དྲུག་གོ་ཞེས་གྲངས་དྲུག་ཏུ་ཡོངས་སུ་ཆད་པའི་མདོ་ནི། གཅིག་ལས་འཕྲོས་པའི་ལུང་དུ་ཉམས་མོད་ཀྱི། དེ་གནས་བརྟན་ཀཱ་ཏྱཱ་ཡ་ནཱའི་བུ་ལ་ལྷས་ཉེ་བར་གཏད་པ་ཡིན་ནོ། །མདོ་སྡེ་པ་རྣམས་ཤེས་བྱེད་འདི་དག་ལ་བརྟེན་ནས་དམིགས་པ་དང་བདག་པོའི་རྐྱེན་གྱི་དབང་བྱས་ཏེ་བྱེད་པའི་རྒྱུ་གསུངས་སོ། །དེ་ལྟ་མ་ཡིན་ན་མིག་གི་རྣམ་པར་ཤེས་པ་སྐྱེད་པར་བྱེད་པའི་ཆོས་ཐམས་ཅད་སྒྲིབ་པ་མེད་པའི་ངོ་བོས་དོན་གྱི་གནས་གཉིས་ཁོ་ན་མངོན་པར་བརྗོད་པ་མི་རུང་བར་མཚུངས་སོ་ཞེས་ཟེར་རོ། །ལམ་གྱི་ཡན་ལག་གསུམ་པོ་འདི་དག་ནི་ཞེས་བྱ་བ་འདིར་ཡོན་ཏན་གཙོ་བོར་གྱུར་པས་ཕན་ཚུན་ཡོངས་སུ་བཏང་བར་རྟོགས་པར་བྱ་སྟེ། རྒྱུ་དང་འབྲས་བུར་གྱུར་པ་ནི་མ་ཡིན་ནོ། །དགེ་བའི་རྩ་བ་ཆུང་ངུ་དང་ལྷན་ཅིག་ཏུ་གྱུར་པ་ཡོད་ན་ཞེས་བྱ་བ་འདིར་ཡང་ས་བོན་གྱི་གནས་སྐབས་བརྗོད་པ་སྟེ། རང་བཞིན་གྱི་གནས་སྐབས་འདས་པ་དག་ཡོད་པ་མ་ཡིན་པའི་ཕྱིར་རོ། །རྟོགས་ནས་ཤེས་པ་དང་མཚུངས་པར་ལྡན་པ་ཞེས་བྱ་བ་འདིར་ཡང་མཚུངས་པར་ལྡན་པ་ཙམ་རྟོགས་པར་བྱའི། །རྒྱུ་དང་འབྲས་བུར་གྱུར་པ་ནི་མ་ཡིན་ནོ། །དེ་བཞིན་དུ་གཞན་ལ་ཡང་ཇི་ལྟར་བརྟེན་
པ་བརྗོད་པར་བྱ་སྟེ། འདིར་ནི་གཞུང་མངས་པའི་འཇིགས་པས་རྣམ་པར་དཔྱད་པ་མ་བྱས་སོ། །རང་ལས་གཞན་པ་བྱེད་རྒྱུའི་རྒྱུ། །ཞེས་བྱ་བ་ལ་བདག་ཉིད་ལ་བྱེད་པ་མི་སྲིད་པའི་ཕྱིར། རང་ལས་གཞན་པ་ཞེས་བྱ་བ་སྨོས་སོ། །གཞན་དག་ན་རེ་རང་གི་ངོ་བོའི་བྱེད་པའི་རྒྱུ་མི་སྲིད་པའི་ཕྱིར་ཞེས་ཟེར་རོ། །སྒྲིབ་པ་མེད་པའི་དོན་གྱིས་ན་བྱེད་པའི་རྒྱུའོ། །དངོས་པོ་ཡང་རང་བཞིན་གྱིས་རྟག་ཏུ་མི་བསྒྲིབས་པས་སོ། །གཞན་དག་ན་རེ་རང་གི་ངོ་བོ་རང་གི་ངོ་བོའི་བྱེད་རྒྱུར་གྱུར་ནི་མ་རིག་པ་ལ་སོགས་པ་རྣམས་སྐད་ཅིག་མ་ཉིད་ཀྱི་ཕྱིར་འདི་ཡོད་པས་འདི་འབྱུང༌། འདི་སྐྱེས་པའི་ཕྱིར་འདི་སྐྱེ་ཞེས་གསུངས་པས་དེ་རྟེན་ཅིང་འབྲེལ་པར་འབྱུང་བའི་ཆོས་ཉིད་དང་འགལ་ལོ་ཞེས་ཟེར་རོ། །བྱེད་རྒྱུའི་རྒྱུ་ཞེས་བྱ་བ་ནི། གཟུགས་ཀྱི་སྐྱེ་མཆེད་ཀྱི་ལྷན་ཅིག་འབྱུང་བའི་རྒྱུ་ལ་སོགས་པའི་ཁྱད་པར་རྣམས་ཀྱིས་ཁྱད་པར་དུ་བྱས་པ་མེད་པའོ། །ཆོས་ཐམས་ཅད་ཅེས་བྱ་བ་ནི་འདུས་བྱས་དང་འདུས་མ་བྱས་རྣམས་སོ། །མྱ་ངན་ལས་འདས་པ་ནི་འཇུག་པ་དང་འགལ་བའི་ཕྱིར་ལ། ལམ་ནི་ཉོན་མོངས་པ་སྐྱེ་བ་དང་འགལ་བའི་ཕྱིར་ཇི་ལྟར་ཆོས་ཐམས་ཅད་བྱེད་རྒྱུ་ཉིད་ཡིན་ཞེ་ན། སྐྱེ་བ་ལ་གེགས་མི་བྱེད་པའི་ངོ་བོར་གནས་པའི་ཕྱིར་རོ། །འབྲས་བུ་མི་སྐྱེ་བ་ནི་རྣམ་པ་གཉིས་ཏེ། རྒྱུ་མེད་པའི་ཕྱིར་དང། གེགས་བྱེད་པ་ཡོད་པའི་ཕྱིར་རོ། །བཟློག་སྟེ་རྒྱུ་ཡོད་པའི་ཕྱིར་དང༌། གེགས་བྱེད་པ་མེད་པའི་ཕྱིར་ནི་སྐྱེ་བ་ཡིན་པས་གེགས་མི་བྱེད་པའི་ངོ་བོར་གནས་པ་ལས་རང་ལས་གཞན་པ་བྱེད་རྒྱུའི་རྒྱུ་ཡིན་པར་གྲུབ་པོ། །རྒྱུ་དང་རྐྱེན་རྣམས་ཚོགས་ན་སྐད་ཅིག་མས་བར་ཆོད་པ་མེད་པས་འབྱུང་བའི་ཆོས་ལ་ནི་སྐྱེ་བཞིན་པ་ཞེས་བརྗོད་དོ། །ཟག་པ་གང་དག་མི་ཤེས་པ། །ཞེས་རྒྱས་པར་འབྱུང་བ་ལ། མི་ཤེས་པ་ནི་ཟག་པ་སྐྱེ་བ་གཙོ་བའི་རྒྱུ་ཡིན་ཏེ། དེའི་ཕྱིར་ཟག་པ་གང་དག་མི་ཤེས་པ་དེ་ལ་སྐྱེ་བ་དེ་དག་ནི་ཤེས་པ་དེ་ལ་མི་སྐྱེ་སྟེ། ཤེས་པས་དེ་དག་གི་རྒྱུ་མི་ཤེས་པ་སྤང་བའི་ཕྱིར་རོ། །ཉི་མའི་འོད་ཀྱིས་ཀྱང་སྐར་མ་ཟིལ་གྱིས་གནོན་པ་དེའི་ཕྱིར་མིག་གི་ཡུལ་དུ་འགྱུར་བ་མ་ཡིན་ཏེ། དེའི་ཕྱིར་འདི་ལས་མཐོང་བ་མི་འབྱུང་བ་ཡིན་ན་ཇི་ལྟར་རང་ལས་གཞན་པ་བྱེད་རྒྱུའི་རྒྱུ་ཡིན་ཞེ་ན། བཤད་པ་སྐྱེ་བཞིན་པ་མ་ཡིན་པ་ལ་གེགས་མི་བྱེད་པའི་ངོ་བོར་གནས་པའི་ཕྱིར་བྱེད་རྒྱུ་ཞེས་མི་བྱ་སྟེ། འོ་ན་ཅི་ཞེ་ན། སྐྱེ་
བཞིན་པ་ལ་ཞེས་བྱ་བ་རྒྱས་པར་འབྱུང་ངོ༌། །རྒྱུ་དང་རྐྱེན་རྣམས་ཚོགས་ན་བར་མེད་པར་འབྱུང་བའི་ཆོས་ནི་སྐྱེ་བཞིན་པ་ཞེས་བྱ་སྟེ། སྐྱེ་བཞིན་པ་སྐྱེ་བའི་བྱ་བ་ལ་བལྟོས་ཏེ་དེ་བསྐྱེད་པ་ལ་ཆོས་ཐམས་ཅད་གེགས་མེ་བྱེད་པའི་ངོ་བོས་གནས་པ་ཡིན་ནོ། །དེ་ཉིད་ཀྱི་ཕྱིར་མ་འོངས་པ་ཉིད་དུ་མཚུངས་བཞིན་དུ་ད་ལྟར་བའི་ངོ་བོར་བྱ་བ་ལ་གེགས་བྱེད་པ་མེད་པའི་ཕྱིར་གནས་སྐབས་དེ་ལ་སྐྱེ་བཞིན་པ་ཞེས་བྱའོ། །ད་ལྟར་བའི་དངོས་པོ་ལ་གེགས་ཡོད་པ་ནི་སྐྱེ་བཞིན་པ་ཞེས་མི་བྱའོ། །གེགས་བྱེད་ནུས་རྣམས་ནི་ཞེས་བྱ་བ་ནི་དཔེར་ན་ཟག་པ་སྐྱེ་བ་ལ་ཤེས་པ་དང༌། སྐར་མ་རྣམས་མཐོང་བ་བསྐྱེད་བ་ལ་ཉི་མའི་འོད་ལྟ་བུའོ། །དཔེར་ན་ཆོས་ཐམས་ཅད་སྐྱེ་བ་ལ་མྱ་ངན་ལས་འདས་པ་དང་ཞེས་རྒྱས་པར་འབྱུང་སྟེ། མྱ་ངན་ལས་འདས་པ་དང་མི་སྐྱེ་བའི་ཆོས་ཅན་རྣམས་ལ་ནི་འདུ་བྱེད་སྐྱེ་བའི་གེགས་བྱེད་པར་ནུས་པ་མེད་དེ་དངོས་པོ་མེད་པའི་ཕྱིར་རོ། །དམྱལ་བ་ལ་སོགས་པ་དག་ཅེས་བྱ་བ་ནི་དམྱལ་བ་དང་ཡི་དགས་དང་དུད་འགྲོ་རྣམས་སོ། །སོགས་པ་སྨོས་པ་ནི་མི་ལ་སོགས་བས་རེས་འགའ་གེགས་བྱེད་ནུས་པར་ཡང་འགྱུར་བའོ། །མྱ་ངན་ལས་འདས་པ་ལ་སོགས་པ་དེ་དག་མེད་ཀྱང་ཡོད་པ་ཇི་ལྟ་བ་དེ་ཁོ་ན་བཞིན་དུ་གེགས་བྱེད་མི་ནུས་པར་འགྱུར་རོ། །ཡོད་དམ་མེད་ཀྱང་རུང་སྟེ། གེགས་བྱེད་པར་ནུས་བ་གེགས་མི་བྱེད་པ་དང༌། བྱེད་པར་མི་ནུས་པ་མི་བྱེད་པའི་ངོ་བོར་ཁྱད་པར་འགའ་ཡང་མེད་དེ། གཉིས་ཀ་ཡང་དེ་ལ་བྱེད་པ་མཚུངས་པའི་ཕྱིར་རོ། །གཞན་དག་ན་རེ་ཆོས་ཐམས་ཅད་ཕན་ཚུན་གེགས་བྱེད་པའི་ནུས་བ་ཡོད་པ་ཉིད་དོ་ཞེས་ཟེར་རོ། །གང་དུ་གཅིག་ཡོད་པ་དེར་གཉིས་པའི་སྐབས་མེད་པ་ཉིད་དོ། །གལ་ཏེ་གཞན་དུ་ཡང་སྲིད་ན་དེར་ཡང་ཕན་ཚུན་གོ་སྐབས་སུ་མི་འགྱུར་རོ། །དེ་ལྟར་ཆོས་ཐམས་ཅད་ཕན་ཚུན་ངེས་པར་བཟུང་བས་བྱེད་རྒྱུའི་དངོས་པོར་གྲུབ་པ་ཡིན་ནོ། །གཟུགས་མེད་པ་རྣམས་ལ་ཡང་དུས་དང་རྟེན་ལ་སོགས་པ་ངེས་པར་ཤབྡཱ་ནྡཱ་ནུ་པྲ་ད་ན་ཡོ་གེ་ན་བཱ། འདིར་སྤྱིར་བསྟན་པ་ཡིན་གྱི་ཞེས་བྱ་བ་ལ། གང་ཞིག་བྱེད་རྒྱུའི་གཙོ་བོ་དང༌། གང་ཞིག་བྱེད་རྒྱུའི་གཙོ་བོ་མ་ཡིན་པ་ཐམས་ཅད་ཀྱི་དབང་དུ་བྱས་ནས། རང་ལས་གཞན་པ་བྱེད་རྒྱུའི་རྒྱུ་ཞེས་བྱ་བ་བཤད་པའོ། །བྱེད་རྒྱུའི་གཙོ་པོ་གང་ཡིན་པ་དེ་ནི་ཞེས་བྱ་བ་རྒྱས་
པར་འབྱུང་སྟེ། དེ་ཉིད་ཀྱི་ཕྱིར་བྱེད་རྒྱུའི་རྒྱུ་ཞེས་བྱའོ། །བྱེད་རྒྱུ་ཉིད་ལ་བརྟེན་ནས་རྒྱུ་ཡིན་ཏེ། སྐྱེད་པར་བྱེད་པའི་ངོ་བོས་བྱེད་པ་དང་ལྡན་པའི་ཕྱིར་ཡིན་གྱི། གེགས་མི་བྱེད་པའི་ངོ་བོ་ཙམ་དུ་གནས་པའི་ཕྱིར་ནི་མ་ཡིན་ནོ། །དཔེར་ན་མིག་གི་རྣམ་པར་ཤེས་པ་ལས། མིག་དང་གཟུགས་དག་དང་ཞེས་བྱ་བ་ལ། དེ་ལ་མིག་ནི་ངེས་པའི་རྒྱུའོ། །གཟུགས་ནི་རྟེན་གྱི་རྒྱུའོ། །མིག་གི་རྣམ་པར་ཤེས་པ་ལ་སོགས་པས་རྗེས་སུ་གཅོད་དོ། །རྒྱུ་ནི་ས་བོན་གྱི་ཆོས་ཀྱི་ཚུལ་གྱིས་མཚུངས་པར་ལྡན་པས་རྗེས་སུ་འཛིན་པའི་རྒྱུའོ། །ལྷན་ཅིག་འབྱུང་བ་ནི་གྲོགས་ཀྱི་རྒྱུའོ། །རྣ་བ་ལ་སོགས་པའི་ཡང་རྟེན་དང་གནས་ཀྱི་རྒྱུ་ཞེས་བྱ་བ་དེ་ལྟ་བུ་ལ་སོགས་པའོ། །སློབ་དཔོན་གྱིས་ནི་རྟེན་དང་གནས་ཀྱི་རྒྱུ་ཙམ་གསུངས་ལ། མདོ་ལས་ཕྱོགས་ཙམ་གསུངས་པའི་ཕྱིར་རོ། །ལུས་ལ་ཟས་དང་ཞེས་བྱ་བ་ལ་ཡང་ཅི་ཞེ་ན། བསྐྱེད་པར་བྱ་བ་ལ་ནུས་པ་ཡོད་དེ་ཞེས་བྱ་བར་སྦྱར་ཏེ། ཟས་ཀུན་འབྱུང་བ་ལས་རོལ་སོགས་པའི་ཡོངས་སུ་འགྱུར་བ་ལས་ཟས་ཀུན་འབྱུང་ངོ་ཞེས་འབྱུང་བའི་ཕྱིར་རོ། །ས་བོན་ལ་སོགས་པ་ལས་མྱུ་གུ་ལ་སོགས་པ་བཞིན་ནོ་ཞེས་བྱ་བ་ལ། ས་བོན་དང་མྱུ་གུ་དང་ལོ་མ་དང་ཚིགས་འཆས་པ་ལ་སོགས་པ་ནི་མྱུ་གུ་དང་ལོ་མ་དང་ཚིགས་འཆས་པ་ལ་སོགས་པའོ། །ཡང་ན་སོགས་པའི་སྒྲས་གཟུགས་ཀྱི་ཁམས་ལ་སོགས་པ་གསུང་ངོ༌། །ཡང་མིག་ལ་སོགས་པ་རྣམས་མིག་གི་རྣམ་པར་ཤེས་པ་ལ་སོགས་པ་རྣམས་ལ་སྒྲིབ་པ་མེད་པར་གྱུར་པས་བྱེད་རྒྱུའི་ངོ་བོར་བརྗོད་པ་ཅི་ཞེན་གཉིས་གའི་བྱེད་པ་ཉིད་ཀྱིས་ཏེ། ལྷན་ཅིག་འབྱུང་བའི་རྒྱུ་ལ་སོགས་པ་བཞིན་ནོ། །གལ་ཏེ་སྒྲིབ་པ་མེད་པའི་ངོ་བོས་མ་ཡིན་ན་འོ་ན་བྱེད་རྒྱུའི་གཙོ་བོ་དེ་སྐྱེད་པ་ལ་ནུས་པ་ཅན་གང་ཡིན་པ་བརྗོད་དགོས་སོ། །ཅི་སྟེ་བྱེད་པ་པོའི་ངོ་བོས་ཤེན། འོ་ན་འདི་བརྗོད་པར་མི་བྱ་སྟེ། གེགས་མེད་པའི་ངོ་བོས་གནས་པའི་ཕྱིར་རོ། །དེའི་མིག་ལ་སོགས་པ་རྣམས་རྣམ་པར་ཤེས་པ་སྐྱེད་པ་པོ་ཉིད་ཡིན་ཏེ། བདུན་པའི་རྒྱུ་གཞན་བརྗོད་པར་བྱའོ། །ལྷན་ཅིག་འབྱུང་བའི་རྒྱུ་ལ་སོགས་པ་རྣམས་ཀྱང་བྱེད་པའི་རྒྱུ་ཉིད་དུ་ཐལ་བར་འགྱུར་རོ་ཞེ་ན། དེ་ལ་འདི་ནི་ཀླན་ཀར་མི་རུང་སྟེ་ཞེས་བྱ་བ་རྒྱ་ཆེར་འབྱུང་སྟེ། འགལ་བའི་རྐྱེན་ཡོད་པ་ཉིད་ཀྱིས་ཆོས་རྣམས་ལ་སྐྱེ་བ་དང་དེ་མེད་པའི་ཕྱིར་ཅིག་ཅར་སྐྱེ་བར་ཀུན་བརྟགས་པ་ཡང་མ་ཡིན་ནོ། །
འོ་ན་རྒྱུ་གཉིས་ཀྱིས་ཆོས་རྣམས་མི་སྐྱེ་སྟེ་རྒྱུ་མ་ཚང་བའི་ཕྱིར་དང་འགལ་བའི་ཆོས་ཡོད་པའི་ཕྱིར་ཞེས་བྱ་བ་ཅི་ཞེ་ན། དེ་ལ་མ་ངེས་པ་ནི་རང་གི་རྒྱུའི་རྐྱེན་གྱིས་ཆོས་གཞན་དུ་འཇུག་པ་ཙམ་ཡིན་ལ་འགལ་བའི་ཕྱིར་བདག་པོའི་རྐྱེན་ནོ། །གང་དག་སྐྱེད་པར་བྱེད་པའི་རྒྱུ་རྣམས་ལ་ཡང་གེགས་བྱེད་པ་ཡོད་པ་མ་ཡིན་པ་ནི་རྒྱུའི་ངོ་བོས་སྐྱེའོ། །ཆོས་ཐམས་ཅད་སྒྲིབ་པ་མེད་པའི་ངོ་བོས་གེགས་བྱེད་པ་མེད་པ་ནི་རྒྱུ་རྣམས་སུ་འདོད་དོ། །བྱེད་པ་པོའི་ངོ་བོས་ནི་མ་ཡིན་པ་སྟེ། དེའི་ཕྱིར་འདི་ཀླན་ཀ་མ་ཡིན་ནོ། །གཞན་དག་ན་རེ་གེགས་མི་བྱེད་པའི་ངོ་བོ་ཉིད་དུ་གནས་པ་འབའ་ཞིག་ཏུ་མ་ཟད་ཀྱི། ཐམས་ཅད་སྐྱེ་བ་ལ་བྱེད་རྒྱུ་ཐམས་ཅད་ནུས་པ་ཡོད་དོ་ཞེས་ཟེར་རོ། །དགེ་བ་དང་མི་དགེ་བ་ཞེས་བྱ་བ་ལ། ཡང་དག་པའི་ལྟ་བ་དང་མཚུངས་བར་ལྡན་པ་ནི་དགེ་བའོ། །ལོག་པའི་ལྟ་བ་ལ་སོགས་པ་དང་མཚུངས་པར་ལྡན་པ་ནི་མི་དགེ་བའོ། །དེ་བཞིན་དུ་གཞན་ལ་ཡང་རྟོགས་པར་བྱ་སྟེ་ཞེས་བྱ་བ་ལ། ཐལ་བའི་སྨན་དང་ཚེར་མ་ལ་སོགས་པ་དང་ཕྲད་པ་ལང་ཚོར་བ་མེད་པའི་རྒྱུ་ཡིན་ཏེ། དེ་ནི་བདེ་བའི་དངོས་ཀྱི་རྒྱུ་ཡིན་ལ། སྡུག་བསྔལ་གྱི་ནི་བརྒྱུད་བའི་སྒོ་ནས་རྒྱུ་ཡིན་ནོ། །དེ་བཞིན་དུ་ཆོས་འདས་པ་རྣམས་མ་འོངས་པ་དང་ད་ལྟར་བྱུང་བའི་རྣམས་ཀྱི་བྱེད་རྒྱུ་སྟེ། དེ་ཡང་འདས་བ་རྣམས་ཀྱི་འབྲས་བུ་ནི་མ་འོངས་པ་དང་ད་ལྟར་བྱུང་བ་རྣམས་ལ་སྒྲིབ་པ་མེད་པའི་ངོ་བོས་བྱེད་རྒྱུ་ཡིན་ནོ། །ད་ལྟར་བྱུང་བ་རྣམས་འདས་པ་རྣམས་ཀྱི་བྱེད་རྒྱུ་སྟེ། དེ་རྣམས་མ་འོངས་བའི་འབྲས་བུ་ཉིད་ནི་མ་ཡིན་ནོ། །འདུས་བྱས་དང་འདུས་མ་བྱས་རྣམས་ཀྱིས་གཉི་ག་སྟེ་འདུས་མ་བྱས་རྣམས་ཀྱི་དེས་གཉི་གཉིད་འདུས་བྱས་དང་འདུས་མ་བྱས་རྣམས་ཏེ། དེ་ནི་འདུས་བྱས་རྣམས་ཀྱི་བྱེད་བའི་རྒྱུའོ། །འདུས་བྱས་རྣམས་དེའི་འབྲས་བུ་ནི་མ་ཡིན་ནོ། །དེ་ཉིད་ཀྱི་ཕྱིར་བརྗོད་བར་བྱ་སྟེ། བྱེད་རྒྱུར་གྱུར་བ་ལས་དེའི་འབྲས་བུ་མ་ཡིན་ཏེ། ཆོས་ཐམས་ཅད་བྱེད་རྒྱུ་ཡིན་ལ། དེའི་འབྲས་བུ་ནི་འདུས་བྱས་ཁོ་ནའོ། །དེ་བཞིན་དུ་དམྱལ་བ་ལ་སོགས་པ་རྣམས་ཀྱང་གཟུགས་མེད་པའི་ཕུང་པོ་སྐྱེད་པ་ལ་ནུས་པ་ཡོད་དོ། །འདི་ལྟར་ཀྱེ་མ་དམྱལ་བ་དང་ཡི་དགས་ལ་སོགས་པ་འདི་རྣམས་ནི་མཆོག་ཏུ་སྡུག་བསྔལ་བའོ་སྙམ་ནས་དམྱལ་བ་ལ་སོགས་པ་ལ་དམིགས་པའི་ཡིད་ཀྱིས་རྣམ་པར་ཤེས་པ་དགེ་བ་སྐྱེ་ལ།
དེ་ལས་རིམ་གྱིས་ཚུལ་ཁྲིམས་ལ་གནས་པ་དང༌། བསྒོམ་པ་ལ་རབ་ཏུ་སྦྱོར་བས་གཟུགས་མེད་པའི་སྙོམས་པར་འཇུག་པ་སྐྱེ་བར་འགྱུར་བའི་ཕྱིར་རོ། །བྱེད་པའི་རྒྱུ་བཤད་ཟིན་ཏོ།། །།ལྷན་ཅིག་འབྱུང་གང་ཕན་ཚུན་འབྲས། རྒྱུ་ཞེས་བྱ་བར་སྦྱར་རོ། །འདི་ལ་ཁ་ཅིག་ནི་ལྷན་ཅིག་འབྱུང་བའི་རྒྱུ་ནི་ཆོས་ཕན་ཚུན་འབྲས་བུར་གྱུར་པ་དག་ཁོ་ན་ཡིན་ནོ་ཞེས་ངེས་བར་འཛིན་པར་བྱེད་དོ། །དེ་ལྟར་ན་ཕན་ཚུན་འབྲས་བུ་མ་ཡིན་པ་རྣམས་ལྷན་ཅིག་འབྱུང་བའི་རྒྱུ་ཡིན་པ་བསམ་བར་འགྱུར་ཏེ། དེའི་ཕྱིར་ཆོས་མཐུན་བའི་མཚན་ཉིད་རྣམས་ཀྱི་ལྷན་ཅིག་འབྱུང་བར་མི་འགྱུར་རོ། །དེའི་ཕྱིར་ཕན་ཚུན་འབྲས་བུ་ཡིན་པར་གྱུར་ན་ལྷན་ཅིག་འབྱུང་བ་ཉིད་ཡིན་གྱི་གཞན་ནི་མ་ཡིན་ནོ་ཞེས་ངེས་པར་གཟུང་བར་བྱའོ། །དེ་ལྟ་ཡིན་དང་ལྷན་ཅིག་འབྱུང་བ་ཐམས་ཅད་ལྷན་ཅིག་འབྱུང་བའི་རྒྱུ་ཉིད་དུ་ཉེ་བར་གཟུང་བར་འགྱུར་རོ། །དེ་ཉིད་ཀྱི་ཕྱིར་གང་དག་ཕན་ཚུན་གྱི་འབྲས་བུ་ཡིན་པ་ཞེས་བཤད་དེ། ཕན་ཚུན་གྱི་རྒྱུ་ཡིན་པའི་ཕྱིར། འབྲས་བུ་དང་ལྷན་ཅིག་འབྱུང་བས་ན་ལྷན་ཅིག་འབྱུང་བའི་རྒྱུའོ། །ལྷན་ཅིག་འབྱུང་བ་ཡང་འདི་ཡིན་ལ་རྒྱུ་ཡང་ཡིན་པས་ན་ལྷན་ཅིག་འབྱུང་བའི་རྒྱུའོ། །ཡང་ན་ལྷན་ཅིག་འབྱུང་བ་རྣམས་ཀྱི་རྒྱུ་ཡིན་པས་ན་ལྷན་ཅིག་འབྱུང་བའི་རྒྱུའོ། །དེ་ཉིད་ཀྱི་ཕྱིར་དེ་དག་ནི་ཕན་ཚུན་ལྷན་ཅིག་འབྱུང་བའི་རྒྱུའོ་ཞེས་བྱ་བ་སྨོས་སོ། །འདི་དཔེ་མེད་པར་རྟོགས་པར་མི་ནུས་བས་འདྲི་བར་བྱེད་པ་ནི། དཔེར་ན་ཅི་ལྟ་བུ་ཞེས་བྱའོ། །འདིར་རྒོལ་བའི་ཚིག་ནི། འདྲི་བའི་དོན་ནི་ཡོད་པ་མ་ཡིན་ཏེ། ཐམས་ཅད་དཔེར་བརྗོད་པའི་ཕྱིར་རོ་ཞེ་ན། འདིར་ཐམས་ཅད་དཔེར་བརྗོད་པ་མ་ཡིན་གྱི། འོན་ཀྱང་གང་ཞིག་བཞིན་ནོ་ཞེས་བྱ་བས་ཉེ་བར་སྟོན་པ་དཔེར་མ་བརྗོད་པ་ཡང་ཡོད་དོ། དེ་ཡང་གང་ཞེ་ན། སེམས་ཀྱི་རྗེས་སུ་འཇུག་པ་ཕན་ཚུན་དང༌། མཚན་ཉིད་རྣམས་ཕན་ཚུན་ནོ། །འབྱུང་བ་ཆེན་པོ་བཞི་དག་ནི། །ཞེས་བྱ་བ་ལ། རྫས་ལྷག་མ་ཡོད་ཀྱང་གསུམ་གཅིག་གིས་ཡིན་ཏེ། རང་གི་ངོ་བོ་ལ་མི་ལྟོས་པའི་ཕྱིར་དང༌། རྫས་སྐལ་བ་མཉམ་པ་ལ་མི་ལྟོས་པ་མ་ཡིན་ནོ། །གཞན་རྣམས་རེ་རེ་གསུམ་ལ་ལྟོས་ཤིང༌། བཞི་འདུས་པ་རྣམས་རྒྱུར་བྱས་པའི་གཟུགས་ཀྱི་རྗེས་སུ་འཇུག་ནུས་པའི་ཕྱིར། རང་གི་མཚན་ཉིད་ལྷག་མ་ཉིད་མ་གཏོགས་པ་གཞན་རྫས་ལྷག་མ་ཉིད་ཡོད་པས་ན་འདི་དཔྱད་
བར་བྱའོ། །དེ་ལྟར་འདུས་བྱས་ཐམས་ཅད་ཅས་གང་བཤད་པ་ཧ་ཅང་ཐལ་བ་དང༌། ཅི་རིགས་བར་ཞེས་བྱ་བ་སྨོས་སོ། །འདི་སྐད་བསྟན་པར་འགྱུར་ཏེ། ཐམས་ཅད་ལྷན་ཅིག་འབྱུང་བའི་རྒྱུ་ཡིན་གྱི་ཐམས་ཅད་ཀྱིས་ནི་མ་ཡིན་ཏེ། འོ་ན་ཅི་ཞེ་ན། ཕན་ཚུན་འབྲས་བུ་ཉིད་ཡིན་པ་ན་སེམས་ཀྱི་རྗེས་སུ་འབྲང་བ་དག་ཀྱང་ཕན་ཚུན་མཚན་ཉིད་ཅན་རྣམས་ཀྱང་ངོ་ཞེས་བརྗོད་པར་བྱའོ། །འདི་ཡང་རྩོད་པའི་ཚིག་གི་ལན་ཉིད་ཀྱིས་བཤད་དོ། །ཕན་ཚུན་འབྲས་བུ་ཉིད་མེད་བཞིན་དུ་ཆོས་ནི་ཞེས་བྱ་བ་རྒྱས་པར་འབྱུང་བ་ལ། ཆོས་ནི་གཙོ་བོ་ཡིན་པའི་ཕྱིར་མཐུན་པའི་མཚན་ཉིད་རྣམས་ཀྱི་ཡིན་གྱི། དེ་དག་ནི་དེའི་མ་ཡིན་ཏེ་རིང་བའི་ཕྱིར་རོ། །ཁ་བསྐང་བར་བྱའོ་ཞེས་བྱ་བ་ནི་ཉེ་བར་ཁ་བསྐང་བར་བྱའོ་ཞེས་བྱ་བའོ། །ཅིའི་ཕྱིར་དེ་ལྟར་མཚན་ཉིད་མ་ཁྱབ་པ་བྱས་ཤེ་ན། ལྷན་ཅིག་འབྱུང་བའི་རྒྱུ་ནི་འདུས་བྱས་ཀྱི་ཆོས་འབྲས་བུ་གཅིག་པ་རྣམས་ཀྱིའོ་ཞེས་བསྟན་བཅོས་ལས་དེ་སྐད་འདོན་པའི་ཕྱིར་རོ། །བསྟན་བཅོས་ལས་སེམས་ཀྱི་རྗེས་སུ་འཇུག་པའི་གཟུགས་སེམས་ཀྱི་ལྷན་ཅིག་འབྱུང་བའི་རྒྱུར་མ་བཤད་དོ། །འདི་ལ་སློབ་དཔོན་འདུས་བཟང་གིས་ལན་སྨྲས་པ། མཚན་ཉིད་བྷཱཾ་བྱཾ་ཏཱུ་ན་ཏཱ་ཡཱཾ་ཙ་ཡེ་སེམས་ཐམས་ཅད་དང་ལྷན་ཅིག་སྐྱེ་བར་ངེས་པར་གྱུར་པ་རྣམས་སེམས་ལ་བལྟོས་པས་འཇུག་སྟེ། དེ་དག་ཉིད་སེམས་དང་ཕན་ཚུན་ལྷན་ཅིག་ཡིན་པས་ལྷན་ཅིག་འབྱུང་བའི་རྒྱུར་བཤད་དོ། །སེམས་དང་ལྷན་ཅིག་སྐྱེ་བར་མ་ངེས་པ་འགའ་ཞིག་ནི་མང་བ་དང་ཉུང་བར་དམིགས་སོ། །ལུས་རང་བཞིན་ནི་དམན་པ་མ་ཡིན་པའི་ཚོགས་དང་ངག་གི་ལས་ནི་སེམས་ཐམས་ཅད་དང་ལྷན་ཅིག་པར་མི་འགྱུར་ཏེ། མཉམ་པར་མ་བཞག་པ་ལ་དེ་དག་མེད་བའི་ཕྱིར་རོ། །སྐྱེ་བ་ལ་སོགས་པ་འདི་དག་ཐམས་ཅད་ནི་སེམས་ལ་ལྟོས་ནས་འཇུག་པས་ཕན་ཚུན་བལྟོས་པ་མ་ཡིན་ཏེ། དྷརྨཱ་མུ་ཁཻ་ནཻ་པི་ཧི་ཛཱ་ཏིཿསྠི་ཏྱཱ་དཱི་ནཱ་མུ་པ་ཀུ་རུ་ཏེ། སྐྱེ་བའི་གནས་པ་ལ་སོགས་པ་དང་ཞེས་བྱ་བ་ནི། དེ་དག་ཕན་ཚུན་ལྷན་ཅིག་འབྱུང་བའི་རྒྱུར་མ་བཤད་པའོ། །ལུས་དང་ངག་གི་ལས་སེམས་དང་བཅས་པའི་རྗེས་སུ་འཇུག་པ་རྣམས་སེམས་ལ་རག་ལས་པ་ཉིད་རྣམ་པར་རིག་བྱེད་མ་ཡིན་པ་ལ་རག་གང་གི་ཕྱིར་སྐྱེ་བ་དང་གནས་པ་ལ་སོགས་པ་རྣམས་ནི་ཆོས་གཙོ་བོར་གྱུར་བ་ཉིད་ཀྱིས་ཉེ་བར་བྱེད་དོ། །ལས་པ་ཉིད་ཅེས་རྣམ་པར་བཤད་པ་ཅི་ལྟར་ཡིན་ཞེ་ན། དེ་ལྟར་
མཚན་ཉིད་བཤད་པ་ལ་དོན་མ་ཚང་བ་ཉིད་བསྟན་བཅོས་ཀྱི་སྐྱོན་དུ་ཐལ་བར་འགྱུར་རོ། །གནས་བརྟན་གྱིས་ཀྱང་གལ་ཏེ་སྐྱེ་བ་ལས་གཅིག་པ་ལ་སོགས་པ་སྨོས་པ་ཉིད་ཀྱིས་དུས་གཅིག་གཏོགས་བ་ཉིད་ཀྱང་ཆུད་པ་ཉིད་མ་ཡིན་ནམ། དུས་གཅིག་ཏུ་གཏོགས་པ་ཉིད་ཀྱིས་སོ། །ཞེས་ཡང་ཅིའི་ཕྱིར་སྨོས་ཤེ་ན། འདས་པ་དང་མ་འོངས་པ་ཉིད་ཀྱིས་ཞེས་བྱ་སྟེ། འདས་པ་དང་མ་འོངས་པའི་དུས་དག་དང་མ་བྲལ་བར་ཤེས་བར་བྱ་བའི་ཕྱིར་རམ། མི་སྐྱེ་བའི་ཆོས་ཅན་ཤེས་པར་བྱ་བའི་ཕྱིར་རོ། །དེ་ལྟ་ན་འོན་དུས་གཅིག་ཏུ་གཏོགས་པ་ཉིད་ཡིན་ལ་རག་མོད་ཅེ་ན། དེ་ལྟ་ན་ཡང་དུས་གཅིག་པ་ཁོ་ན་རྟོགས་པར་འགྱུར་རོ། །འབྲས་བུ་སྨོས་པས་ནི་སྐྱེས་བུ་བྱེད་པ་དང༌། བྲལ་བའི་འབྲས་བུར་བསྡུའོ། །གལ་ཏེ་རྒྱུ་མཐུན་པ་དང༌། རྣམ་པར་སྨིན་པའི་འབྲས་བུ་གཉིས་ཀྱང་འབྲས་བུའི་རང་བཞིན་ཉིད་མ་ཡིན་ནམ། དེ་དག་ལོགས་སུ་ཅིའི་ཕྱིར་སྨོས་ཤེ་ན། སྐྱེས་བུ་བྱེད་པའི་འབྲས་བུ་ནི་རྣམ་པ་བཞི་སྟེ། ལྷན་ཅིག་དང༌། མཇུག་ཐོགས་དང༌། དུས་གཞན་དུ་སྐྱེ་བ་དང་མི་སྐྱེ་བའོ། །དེ་ལ་འདིར་རྒྱུ་ལྷན་ཅིག་ཏུ་མ་གྱུར་བའི་འབྲས་བུ་བསྟན་པས་ཚོགས་པ་རྣམས་དང་ལྷན་ཅིག་སྐྱེས་བ་སྐྱེས་བུ་བྱེད་པའི་འབྲས་བུ་ཡིན་པ་བསལ་ལོ། །རང་གི་ངོ་བོ་རང་གི་ངོ་བོའི་འབྲས་བུ་མ་ཡིན་པས་ཕན་ཚུན་འབྲས་བུ་ཡིན་པའི་ཕྱིར་རོ། །ཚོགས་པ་ལྷན་ཅིག་སྐྱེ་བ་མ་ཡིན་ཞིང་སྐྱེས་བུ་བྱེད་པའི་འབྲས་བུ་ཡང་གཅིག་མ་ཡིན་པས། དེའི་ཕྱིར་འདི་ཉིད་གསུངས་སོ་ཞེས་སློབ་དཔོན་འདུས་བཟང་ཟེར་རོ། །གཅིག་ཉིད་དང་ཐ་དད་པས་ཀྱང་མངོན་པར་བརྗོད་བ་རྟོགས་བར་བྱ་སྟེ་ལྷན་ཅིག་པས་མ་ཡིན་ནོ། །སྐྱེས་བུ་བྱེད་པའི་འབྲས་བུ་དང༌། འདི་དག་འབྲས་བུ་གཅིག་པ་ཉིད་ཡོད་པ་མ་ཡིན་ནོ། །རང་གི་ངོ་བོའི་འབྲས་བུ་མ་ཡིན་པ་དེའི་ཕྱིར་འདིར་འབྲས་བུ་སྨོས་པས་སྐྱེས་བུ་བྱེད་པའི་འབྲས་བུ་ཉིད་གཟུང་ངོ༌། །བྲལ་བའི་འབྲས་བུ་ཡང་དེའི་ཁྱད་པར་ཉིད་ཀྱི་ཕྱིར། གང་ཞིག་འདི་དག་ཐམས་ཅད་ཀྱི་དུས་གཞན་དང་མཇུག་ཐོགས་སུ་གཟུང་ངོ༌། །དེ་ཉིད་ཀྱི་ཕྱིར་འདིར་བདག་པོའི་འབྲས་བུ་མི་གཟུང་བ་དེ་ནི་ཆོས་ཐམས་ཅད་ཀྱི་འབྲས་བུ་ཡིན་གྱི་དེ་དག་གི་རྗེས་སུ་འཇུག་པ་ཁོ་ནའི་མ་ཡིན་པས་སོ། །གཞན་དག་ན་རེ་འདི་དག་འབྲས་བུའི་ཉེ་བའི་མཚན་ཉིད་རྣམས་མ་ཡིན་པས་བདག་པོའི་འབྲས་བུ་ཡང་
འདིས་འབྲས་བུའི་སྒྲས་གཟུང་ངོ་ཞེས་ཟེར་རོ། །སེམས་དང་སེམས་ལས་བྱུང་བ་རྣམས་ཀྱིས་ཐུན་མོང་བའི་མཚན་ཉིད་དུ་མ་གྱུར་པ་ཉིད་ཅེས་སོ། །གཅིག་ཅེས་བྱ་བའི་སྒྲ་སྔ་མ་ནི་ལྷན་ཅིག་པའི་དོན་དུ་བསྡུ་བར་བྱ་སྟེ། སྐྱེ་བ་དང་གནས་པ་དང་འགག་པ་གཅིག་པ་ཉིད་དང་ཞེས་བྱ་བ་དེའི་སྒྲ་གང་ཡིན་པ་དེ་ནི་སྔ་མའོ། །གཅིག་ཅེས་བྱ་བའི་སྒྲ་ཕྱི་མ་ནི་ཐུན་མོང་པའི་དོན་དུ་རིག་པར་བྱའོ། །དེ་ལྟ་ན་རྒྱུ་བཅུས་ཞེས་བྱ་བ་ལ། དུས་ལས་བཞི་དང༌། འབྲས་བུ་ལས་གསུམ་དང༌། དགེ་བ་ལ་སོགས་པ་གསུམ་གྱིས་སོ། །འདིར་ནི་མ་ཉམ་པའི་རྣམ་པ་ཅི་རིགས་པར་ཡོངས་སུ་བགྲང་གི །ཐམས་ཅད་ལ་ཐམས་ཅད་ནི་མ་ཡིན་ནོ། །དེ་ལ་དགེ་བ་ལ་སོགས་པ་རྣམས་ནི་ཕན་ཚུན་དུ་བདག་ཉིད་ཀྱི་རང་གི་ངོ་བོ་མེད་པའི་ཕྱིར་རོ། །དེ་བཞིན་དུ་བར་ཆད་མེད་པའི་ལམ་གྱིས་བསྡུས་པ་ཟག་པ་མེད་པ་རྣམས་ལ་ནི་རྣམ་པར་སྨིན་པའི་འབྲས་བུ་མེད་ལ། གཞན་རྣམས་ལ་ནི་བྲལ་བའི་འབྲས་བུ་ཡོད་དོ། །དགེ་བ་ཟག་པ་དང་བཅས་པ་བར་ཆད་མེད་པའི་ལམ་གྱིས་བསྡུས་པ་རྣམས་ལ་ནི་འབྲས་བུ་ཐམས་ཅད་ཡོད་དོ། །གཞན་རྣམས་ལ་ནི་དགེ་བ་དང་མི་དགེ་བ་དང་བྲལ་བའི་འབྲས་བུམ་གཏོགས་པའོ། །ལུང་དུ་མ་བསྟན་པ་རྣམས་ལ་ནི་རྣམ་པར་སྨིན་པ་དང་བྲལ་བའི་འབྲས་བུ་མ་གཏོགས་པའོ། །དེ་ལྟར་ན་ཁ་ཅིག་ནི་རྒྱུ་ལྔ་ཡིས་དང༌། ཁ་ཅིག་ནི་བརྒྱད་ཀྱིས་སེམས་ཀྱི་རྗེས་སུ་འཇུག་པ་ཡིན་ནོ། །སེམས་ནང་ན་ཉུང་བ་ནི་བསམ་གཏན་གཉིས་པ་ལ་སོགས་བ་དག་དང་གཟུགས་མེད་པ་རྣམས་སུ་གལ་ཏེ་མ་བསྒྲིབས་ལ་ལུང་དུ་མ་བསྟན་པ་ནི་འཁོར་ཉུང་བའི་ཕྱིར་ཉུང་བ་ཞེས་བྱའོ། །རང་གི་མཐུན་པའི་མཚན་ཉིད་རྣམས་མ་གཏོགས་པ་རྣམས་སོ་ཞེས་བྱ་བ་ལ། དེ་དག་ཅིའི་ཕྱིར་སེམས་ཀྱི་ལྷན་ཅིག་འབྱུང་བའི་རྒྱུ་མ་ཡིན་ཞེ་ན། དེའི་མཚན་ཉིད་རྣམས་ཁོ་ནལ་བྱེད་པ་དང་ལྡན་པའི་ཕྱིར་རོ། །གཞན་དག་ན་རེ་བཅུ་བཞི་ཡིན་ཏེ། མཐུན་པའི་མཚན་ཉིད་བཞིན་དུས་མང་པོ་བའི་མཚན་ཉིད་རྣམས་ཀྱང་སེམས་ལ་བྱེད་པ་དང་མི་ལྡན་པའི་ཕྱིར་ལྷན་ཅིག་འབྱུང་བའི་རྒྱུ་ཉིད་མ་ཡིན་ནོ་ཞེས་ཟེར་རོ། །དེ་ལྟན་རབ་ཏུ་བྱེད་པའི་གཞུང་ཞེས་བྱ་བ་ལ། གལ་ཏེ་ས་མང་པོ་དག་གི་མཚན་ཉིད་རྣམས་སེམས་ཀྱི་ལྷན་ཅིག་འབྱུང་བའི་རྒྱུ་མ་ཡིན་ནའོ། །སྡུག་བསྔལ་གྱི་བདེན་པ་ལ་འཇིག་ཆོགས་ལ་ལྟ་བའི་
རྒྱུ་ཅན་ཡིན་ལ་ཞེས་བྱ་བ་རྒྱས་པར་འབྱུང་ངོ༌། །སྡུག་བསྔལ་གྱི་བདེན་པ་ལ་འཇིག་ཚོགས་ལ་ལྟ་བའི་རྒྱུ་ཅན་ཡིན་ལ། འཇིག་ཚོགས་ལ་ལྟ་བའི་རྒྱུ་མ་ཡིན་པ་ཡང་ཡོད་དོ། །འཇིག་ཚོགས་ལ་ལྟ་བའི་རྒྱུ་ཡིན་ལ། འཇིག་ཚོགས་ལ་ལྟ་བའི་རྒྱུ་ཅན་མ་ཡིན་པ་ཡང་ཡོད་དོ། །འཇིག་ཆོགས་ལ་ལྟ་བའི་རྒྱུ་ཅན་ཡང་ཡིན་ལ། འཇིག་ཚོགས་ལ་ལྟ་བའི་རྒྱུ་ཡང་མ་ཡིན་པ་ཡོད་དམ་ཞེ་ན། དེ་ལ་བདེན་པ་བཞི་མཐོང་བ་དང༌། བསྒོམ་པས་སྤང་བར་བྱ་བའི་ཕྲ་རྒྱས་རྣམས་དང༌། དེ་དག་དང་མཚུངས་པར་ལྡན་པ་ཚོར་བ་ལ་སོགས་པ་ཐམས་ཅད་ལ་སྡུག་བསྔལ་གྱི་བདེན་པ་ཞེས་བྱ་སྟེ་དེ་དག་ལ་འདི་བསམ་པར་བྱའོ། །དེ་ལ་འཇིག་ཚོགས་ལ་ལྟ་བའི་རྒྱུ་ཅན་ཡིན་ལ། འཇིག་ཚོགས་ལ་ལྟ་བའི་རྒྱུ་མ་ཡིན་པ་ནི་སྡུག་བསྔལ་མཐོང་བས་སྤང་བར་བྱ་བའི་ཕྲ་རྒྱས་འདས་པ་དང༌། ད་ལྟར་བྱུང་བ་རྣམས་དང༌། དེ་དག་དང་མཚུངས་པར་ལྡན་པའི་སྡུག་བསྔལ་གྱི་བདེན་པ་མ་གཏོགས་པ་དང༌། ཀུན་འབྱུང་བ་མཐོང་བས་སྤང་བར་བྱ་བའི་ཕྲ་རྒྱས་ཀུན་ཏུ་འགྲོ་བ་འདས་པ་དང༌། ད་ལྟར་བྱུང་བ་རྣམས་དང༌། དེ་དག་དང་ལྷན་ཅིག་འབྱུང་བའི་སྡུག་བསྔལ་གྱི་བདེན་པ་མ་གཏོགས་པ་དང༌། འཇིག་ཚོགས་ལ་ལྟ་བ་མ་འོངས་པ་དང༌། དེ་དང་མཚུངས་པར་ལྡན་པའི་སྡུག་བསྔལ་གྱི་བདེན་པ་མ་གཏོགས་པ་དང༌། འཇིག་ཚོགས་ལ་ལྟ་བ་དང༌། དེ་དང་མཚུངས་པར་ལྡན་པའི་ཆོས་རྣམས་ཀྱི་སྐྱེ་བ་དང༌། རྒ་བ་དང༌། གནས་པ་དང༌། མི་རྟག་པ་དག་མ་གཏོགས་པ་དེ་དག་ལས་གཞན་པའི་སྡུག་བསྔལ་གྱི་བདེན་པ་ཉོན་མོངས་བ་ཅན་གང་ཡིན་པའོ། །དེ་ནི་སྡུག་བསྔལ་མཐོང་བས་སྤང་བར་བྱ་བའི་ཕྲ་རྒྱས་མ་འོངས་བ་རྣམས་དང༌། དེ་དག་དང་མཚུངས་པར་ལྡན་པ་ཚོར་བ་ལ་སོགས་པ་རྣམས་དང༌། ཀུན་འབྱུང་བ་མཐོང་བས་སྤང་བར་བྱ་བ་ཀུན་ཏུ་འགྲོ་བ་མ་ཡིན་པ་དུས་གསུམ་པ་རྣམས་དང༌། ཀུན་ཏུ་འགྲོ་བ་མ་འོངས་པ་རྣམས་དང༌། དེ་དག་དང་མཚུངས་བར་ལྡན་པ་ཚོར་བ་ལ་སོགས་པ་རྣམས་དང༌། འགོག་བ་དང་ལམ་མཐོང་བ་དང་བསྒོམ་པས་སྤང་བར་བྱ་བ་དུས་གསུམ་བ་རྣམས་དང༌། དེ་དག་དང་མཚུངས་པར་ལྡན་པའི་ཚོར་བ་ལ་སོགས་པ་རྣམས་ཏེ། དེ་དག་ནི་འཇིག་ཚོགས་ལ་ལྟ་བའི་རྒྱུ་ཅན་ཡིན་ལ། འཇིག་ཚོགས་ལ་ལྟ་བའི་རྒྱུ་མ་ཡིན་པའོ། །དེ་ལྟར་སྔར་སྐྱས་པའི་འཇིག་ཚོགས་ལ་ལྟ་བ་ནི་འདི་
དག་གི་ཀུན་ཏུ་འགྲོ་བའི་རྒྱུས་རྒྱུ་ཡིན་གྱི། དེ་དག་ནི་འཇིག་ཚོགས་ལ་ལྟ་བའི་རྒྱུ་མ་ཡིན་ཏེ། ཅིའི་ཕྱིར་ཞེ་ན། ཀུན་ཏུ་འགྲོ་བའི་རྒྱུ་མ་ཡིན་པའི་ཕྱིར་རོ། །སྐྱེས་པའི་རྒྱུ་མཐུན་པའི་འབྲས་བུ་སྔར་སྐྱེས་བ་ནི་ཀུན་ཏུ་འགྲོ་བའི་རྒྱུའི་རྒྱུའོ། །མུ་གཉིས་པ་ན་མེད་དོ། །འཇིག་ཚོགས་ལ་ལྟ་བའི་རྒྱུ་ཅན་ཡང་ཡིན་ལ། འཇིག་ཚོགས་ལ་ལྟ་བའི་རྒྱུ་ཡང་ཡིན་པ་གང་ཞེ་ན། དེའི་ཕྱིར་མ་གཏོགས་པ་གང་ཡིན་པའོ་ཞེས་བྱ་བ་སྨོས་སོ། །མ་གཏོགས་པ་ཡང་འཇིག་ཚོགས་ལ་ལྟ་བ་དང་མཚུངས་པར་ལྡན་པའི་ཆོས་རྣམས་ཀྱི་སྐྱེ་བ་ལ་སོགས་པ་དག་སྟེ། དེ་དག་སྔར་སྐྱེས་པ་ནི་འཇིག་ཚོགས་ལ་ལྟ་བའི་ཀུན་ཏུ་འགྲོ་བའི་རྒྱུས་སྐྱེད་པ་ཡིན་ལ། ད་ལྟར་བྱུང་བ་ནི་ལྷན་ཅིག་འབྱུང་བའི་རྒྱུས་བསྐྱེད་པ་ཡིན་ནོ། །དེ་དག་གིས་ཀྱང་ལྷན་ཅིག་འབྱུང་བའི་རྒྱུས་འཇིག་ཚོགས་ལ་ལྟ་བ་ད་ལྟར་བྱུང་བ་བསྐྱེད་པ་ཡིན་ནོ། །དེའི་ཕྱིར་ལྷན་ཅིག་འབྱུང་བའི་རྒྱུ་ནི་ཆོས་ལྔ་བཅུ་རྩ་བཞི་སྟེ། ཞེས་བྱ་བ་གནས་པ་ཡིན་ནོ། །འཇིག་ཚོགས་ལ་ལྟ་བའི་རྒྱུ་ཅན་མ་ཡིན་ལ། འཇིག་ཚོགས་ལ་ལྟ་བའི་རྒྱུ་ཡང་མ་ཡིན་པ་ནི་སྡུག་བསྔལ་གྱི་བདེན་པ་ཉོན་མོངས་པ་ཅན་མ་ཡིན་པ་སྟེ། དེ་ནི་ཀུན་ཏུ་འགྲོ་བའི་རྒྱུའམ་སྐལ་བ་མཉམ་པའི་རྒྱུའམ། ལྷན་ཅིག་འབྱུང་བའི་རྒྱུས་འཇིག་ཚོགས་ལ་ལྟ་བའི་རྒྱུ་མ་ཡིན་ལ། འཇིག་ཚོགས་ལ་ལྟ་བ་ཡང་དེའི་མ་ཡིན་ནོ། །མ་གཏོགས་བ་གང་ཡིན་པའོ་ཞེས་བྱ་བ་འདིར་ཁོ་བོ་ཅག་གིས་ནི་སྐྱེ་བ་ལ་སོགས་བ་ཁོ་ན་བཤད་དེ། དེ་དག་གི་དོན་དུ་འདིར་ཉེ་བར་བཀོད་པའི་ཕྱིར་རོ། །མ་གཏོགས་པ་གཞན་གང་ཡིན་པ་དེ་ཡང་འཇིག་ཚོགས་ལ་ལྟ་བའི་རྒྱུ་ཅན་ཡིན་ལ། འཇིག་ཚོགས་ལ་ལྟ་བའི་རྒྱུ་ཡང་ཡིན་པར་བརྗོད་པར་བྱའོ། །ཁ་ཆེ་བ་རྣམས་ན་རེ་ཞེས་བྱ་བ་ལ་སོགས་པ་རྒྱ་ཆེར་འབྱུང་བ་ལ། འོ་ན་ཇི་ལྟར་འདོན་ཞེན་འཇིག་ཚོགས་ལ་ལྟ་བའི་སྐྱེ་བ་དང༌། རྒ་བ་དང༌། གནས་པ་དང༌། མི་རྟག་པ་དག་མ་གཏོགས་པ་ཞེས་དེ་སྐད་དུ་འདོན་ཏེ། འདི་ལྟར་འདི་དག་གི་སྐྱེ་བ་ལ་སོགས་པའི་སྟོབས་ཀྱིས་ནི་སེམས་མི་སྐྱེད་དེ་རང་གི་མཐུན་པའི་མཚན་ཉིད་བཞིན་ནོ། །དེའི་ཕྱིར་དེ་དང་མཚུངས་བར་ལྡན་པའི་ཆོས་རྣམས་ཀྱི་ཞེས་དེ་སྐད་དུ་མི་འདོན་ཏོ། །ཁ་ཆེ་བ་རྣམས་ན་རེ་ཞེས་བྱ་བ་སྨོས་པ་ནི་དེ་དག་གིས་ཀྱང་དེ་སྐད་དུ་འདོན་པར་བྱ་བའམ་ཞེས་བྱ་བ་འདི་ལ་རྒྱུ་
ཅུང་ཟད་ཀྱང་ཡོད་པ་མ་ཡིན་ནོ་དེས་ཤེས་པར་བྱ་བའི་ཕྱིར་རོ། །གཞན་དག་ན་རོ་ཚོགས་འདི་དག་ཐམས་ཅད་ཕན་ཚུན་ལྷན་ཅིག་འབྱུང་བའི་རྒྱུའོ་ཞེས་ཟེར་རོ། །ཆོས་གཞན་གནས་པའི་ཕྱིར་འདི་དག་ཐམས་ཅད་མི་འཐད་པར་སྤང་ཉིད་དུ་བཤད་དོ། །ཅིག་ཅར་སྐྱེས་པ་རྣམས་ལ་ཡང་རབ་ཏུ་འཇུག་པ་ཉིད་སེམས་ཀྱི་རྗེས་སུ་འཇུག་པ་ཉིད་དོ། །གཟུགས་དང་སེམས་དང་ལྡན་བ་མ་ཡིན་པའི་འདུ་བྱེད་དང་སེམས་ལས་བྱུང་བ་རྣམས་རབ་ཏུ་འཇུག་པ་དང་རྗེས་སུ་འཇུག་བ་ཡང་ཡིན་ཏེ། སེམས་ཀྱི་རྗེས་སུ་འཇུག་པའི་ཕྱིར་དང༌། སེམས་དང་མཚུངས་བར་ལྡན་བའི་འདུ་བྱེད་རབ་ཏུ་འཇུག་པ་ཉིད་ཀྱི་ཕྱིར་རོ། །གཉི་ག་མ་གཏོགས་པ་ནི་རྣམ་པ་དེ་དག་མ་གཏོགས་པ་སྟེ། ཆོས་ཀྱི་མཐུན་པའི་མཚན་ཉིད་རྣམས་སོ། །དེ་དག་ཕན་ཚུན་དང་ཞེས་བྱ་བ་རྒྱ་ཆེར་འབྱུང་བ་ལ། གང་ལས་ཆོས་ཕན་ཚུན་ལྷན་ཅིག་འབྱུང་བའི་རྒྱུ་ཡིན་ཞེ་ན། དེའི་སྟོབས་ཀྱིས་མ་བསྐྱེད་པའི་ཕྱིར་དང༌། དེ་དག་ཀྱང་འབྲས་བུ་དུ་མ་ཉིད་ཡིན་པའི་ཕྱིར་ཆོས་ཆེས་མང་བ་དེ་དག་དེའི་ཚོགས་ཀྱི་འབྲས་བུ་མ་ཡིན་ནོ། །དེ་ཉིད་ཀྱི་ཕྱིར་དེ་རྣམས་སེམས་ཀྱི་རྗེས་སུ་འཇུག་པ་ཞེས་མི་བྱའོ། །འོ་ན་ཅི་ལྟར་དེ་དག་སེམས་ཀྱི་ལྷན་ཅིག་འབྱུང་བའི་རྒྱུ་ཡིན་ཞེ་ན། སེམས་སྐྱེ་བ་ལ་སོགས་པ་རྣམས་ལ་དེ་རབ་ཏུ་འཇུག་པའི་ཕྱིར་རོ། །འབྱུང་བ་རྣམས་ཀྱི་འབྱུང་བའི་སྐྱེ་བ་ལ་བསོགས་པ་རྣམས་ཀྱང་ཕན་ཚུན་འབྲས་བུ་མི་སྐྱེད་བས་འདི་ལ་སྐྱོན་མེད་དོ། །ཕན་ཚུན་ལྷན་ཅིག་འབྱུང་བའི་རྒྱུ་ནི་མ་ཡིན་ཏེ་ཆོས་གཅིག་ལ་འཇུག་པའི་ཕྱིར་རོ། །སེམས་ཀྱི་རྗེས་སུ་འཇུག་པ་ནི་སེམས་ལས་བྱུང་བ་རྣམས་དང་བསམ་གཏན་དང་ཟག་པ་མེད་པའི་སྡོམ་པ་དག་སྟེ། དེ་དག་གི་མཚན་ཉིད་དང་སྐྱེ་བ་ཉིད་ལ་སོགས་པ་རྣམས་ཀྱི་མཚན་ཉིད་གང་དག་ཡིན་པ་དང༌། སྐྱེ་བའི་སྐྱེ་བ་ལ་སོགས་པ་རྣམས་དང་མཐུན་པའི་མཚན་ཉིད་དེ་རྣམས་ནི་བྱ་བ་བསྐལ་བའི་ཕྱིར་སེམས་ཀྱི་ལྷན་ཅིག་འབྱུང་བའི་རྒྱུ་མ་ཡིན་ལ། ཕན་ཚུན་དུ་ཡང་མ་ཡིན་ཏེ། ཆོས་གཅིག་ལ་འཇུག་པའི་ཕྱིར་རོ། །རྒྱུར་བྱས་པའི་གཟུགས་ཐོགས་བ་དང་བཅས་པ་ཕན་ཚུན་དང་ཞེས་བྱ་བ་ལ། རྡུལ་ཕྲ་རབ་རྫས་བརྒྱད་པ་ལ་སོགས་པ་དག་གི་རྒྱུར་བྱས་པའི་གཟུགས་དང༌། ཆོས་གཞན་པ་ཡོད་པ་མ་ཡིན་ཡང་གཟུགས་ཀྱི་ཁམས་ལ་སོགས་པ་བཞིན་དུ་དྲི་དང་
རོ་དག་མེད་པའི་ཕྱིར་རོ། །ཐོགས་པ་མེད་པ་ཅུང་ཟད་དང༌། །ཞེས་བྱ་བ་ནི་སོ་སོར་ཐར་བའི་སྡོམ་པ་སྟེ། རྒྱུར་བྱས་པའི་གཟུགས་ཐོགས་པ་མེད་པ་བསམ་གཏན་དང༌། ཟག་པ་མེད་པའི་སྡོམ་པས་བསྡུས་པ་རྣམ་པ་བདུན་ནི་ཕན་ཚུན་ལྷན་ཅིག་འབྱུང་བའི་རྒྱུས་རྒྱུ་ཡིན་ཏེ་སེམས་ཀྱི་རྗེས་སུ་འཇུག་པའི་ཕྱིར་རོ། །ཐམས་ཅད་འབྱུང་བ་དག་དང་ཞེས་བྱ་བ་ལ། ཐོགས་པ་དང་བཅས་པའམ་ཐོགས་པ་མེད་ཀྱང་རུང་ལྷན་ཅིག་འབྱུང་བ་ཡིན་གྱི། ལྷན་ཅིག་འབྱུང་བའི་རྒྱུས་རྒྱུ་ནི་མ་ཡིན་ནོ། །འབྱུང་བ་རྣམས་དང་འབྱུང་བ་ལས་གྱུར་པ་གཉིས་ཀ་ཡང་ལྷན་ཅིག་འབྱུང་གི །ལྷན་ཅིག་འབྱུང་བའི་རྒྱུས་རྒྱུ་ནི་མ་ཡིན་ཏེ། ཐོབ་པ་དང་ལྡན་པའི་འབྲས་བུ་དུ་མ་ཉིད་ཀྱི་ཕྱིར་རོ། །འབྲས་བུ་དང་རྣམ་པར་སྨིན་པ་དང་རྒྱུ་མཐུན་པ་དུ་མ་ཡིན་པའི་ཕྱིར་རོ་ཞེས་བྱ་བས་ནི་ལྷན་ཅིག་འབྱུང་བའི་རྒྱུ་དང་ཆོས་མི་མཐུན་པའམ། སེམས་ཀྱི་རྗེས་སུ་འཇུག་པ་དང་ཆོས་མི་མཐུན་པ་སྟོན་པའོ། །འདི་ལྟར་ཐོབ་པ་རྣམས་ཀྱིས་ནི་སྐྱེས་བུ་བྱེད་པའི་འབྲས་བུ་ཁོན་ཡིན་ལ། སེམས་ཀྱིས་ནི་བྲལ་པའི་འབྲས་བུ་ཡང་ཡིན་ནོ། །ཐོབ་པ་རྣམས་ཀྱི་རྒྱུ་མཐུན་པའི་འབྲས་བུ་ནི་ཐོབ་པ་རྣམས་ཁོ་ན་ཡིན་ལ་སེམས་ཀྱིས་ནི་སེམས་སོ། །སེམས་གཞན་གྱི་རྣམ་པར་སྨིན་པ་ནི་གཞན་ཡིན་ཏེ། ཐོབ་པ་རྣམས་འཕེན་པར་བྱེད་པ་དང་ཡོངས་སུ་རྫོགས་པར་བྱེད་པ་ཡིན་པའི་ཕྱིར་རོ། །དེ་དག་ནི་སེམས་དང་ལྷན་ཅིག་སྤྱོད་པའི་ངང་ཚུལ་ཅན་ཡང་མ་ཡིན་ཏེ་ཞེས་བྱ་བ་ནི། ལྷན་ཅིག་སྐྱེས་པ་རྣམས་ཀྱང་དེའི་ངང་ཚུལ་ཅན་མ་ཡིན་བར་སྟོན་པར་བྱེད་པའོ། །འབྱུང་བ་རྣམས་ཅི་ལྟར་ན་ཕན་ཚུན་ལྷན་ཅིག་འབྱུང་བའི་རྒྱུས་རྒྱུ་ཡིན་ཞེ་ན། ལྷན་ཅིག་ཏུ་སྐྱེ་བ་དང་གནས་པ་དང་འགག་པ་ཉིད་ཀྱིས་སོ། །འབྲས་བུ་གཅིག་ནི་ནྡ་ཏ་ཡཱ་ཙ། འདི་ལྟར་འབྱུང་བ་ཆེན་པོ་བཞི་པོ་རྣམས་རྒྱུར་བྱས་བས་རྒྱུར་བྱས་པའི་གཟུགས་གཅིག་ཏུ་འགྱུར་ཏེ། སྔར་སྐྱེས་པའི་འབྱུང་བ་ཆེན་པོ་རྣམས་དང༌། ཕྱིས་སྐྱེས་པའི་འབྱུང་བ་ཆེན་པོ་རྣམས་སྐལ་པ་མཉམ་པའི་རྒྱུས་རྒྱུ་ཡིན་ནོ། །རྒྱུ་མཐུན་པའི་འབྲས་བུས་ཀྱང་སྐལ་བ་མཉམ་པའི་རྒྱུའོ། །འབྲས་བུ་དང་བཅས་པ་རྒྱུར་བྱས་པའི་གཟུགས་ནི་འབྱུང་བ་ཆེན་པོ་རྣམས་སོ། །དེའི་ཕྱིར་ལྷན་ཅིག་འབྱུང་བའི་རྒྱུས་རྒྱུ་མ་ཡིན་ཏེ། རྣམ་པར་སྨིན་པ་དང་རྒྱུ་མཐུན་པའི་འབྲས་བུ་
དུ་མ་ཉིད་ཡིན་པའི་ཕྱིར་རོ། །དགེ་བ་དང་མི་དགེ་བའི་རྒྱུ་མཐུན་པ་དང་རྣམ་པར་སྨིན་པའི་འབྲས་བུ་ཡང་འབྱུང་བ་རྣམས་རྒྱུར་བྱས་པའི་གཟུགས་སྐྱེས་བུ་བྱེད་པའི་འབྲས་བུ་ནི་མ་ཡིན་ལ། རྒྱུར་བྱས་པའི་གཟུགས་ཀྱི་རང་གི་རང་བཞིན་ཁོ་ན་སྐྱེས་བུ་བྱེད་པའི་འབྲས་བུ་ནི་མ་ཡིན་ནོ། །འབྱུང་བ་ཆེན་པོ་རྣམས་རྒྱུར་བྱས་པའི་གཟུགས་འགའ་ཞིག་ནི་ལྷན་ཅིག་འབྱུང་བའི་རྒྱུ་ཉིད་དུ་སེམས་ཏེ། སྐྱེད་པ་པོ་ལ་སོགས་པ་ཡོད་པའི་ཕྱིར་རོ། །དེ་དག་ཐམས་ཅད་ཀྱང་རུང་མོད་ཀྱི་ཞེས་བྱ་བ་ནི། རེ་ཞིག་ལྷན་ཅིག་འབྱུང་བའི་རྒྱུས་རྒྱུ་ཡིན་པ་དེ་ནི་ལྷན་ཅིག་འབྱུང་བ་ཡིན་ནོ་ཞེས་བྱ་བ་རྒྱས་པར་གང་སྨྲས་པའོ། །ས་བོན་ལ་སོགས་པ་རྣམས་ཞེས་བྱ་བ་ལ། ས་བོན་དང༌། མྱུ་གུ་དང༌། འོ་མ་དང༌། སྦུབས་འཕྱིས་པ་དང༌། སྡོང་བུ་ལ་སོགས་པ་རྣམས་སམ། ཡང་ན་ས་བོན་དང༌། འོ་མ་དང༌། བརྡབས་པ་ལ་སོགས་པ་རྣམས་ལའོ། །དེ་ལ་ས་བོན་ནི་སྔ་ལ། མྱུ་གུ་ནི་འཕྱི་ཞིང་འམ་ནི་སྔ་ལ་ཞོ་ནི་འཕྱིའོ། །བརྡབས་པ་ནི་སྔ་ལ་སྒྲ་ནི་འཕྱིའོ། །ཚུལ་འདི་མི་སྣང་བས་ཞེས་བྱ་བ་ནི་རྒྱུ་དང་འབྲས་བུ་དག་ལྷན་ཅིག་འབྱུང་བ་དང༌། ཕན་ཚུན་རྒྱུ་དང་འབྲས་བུའི་དངོས་པོའོ། །ཇི་ལྟར་ལྷན་ཅིག་འབྱུང་བའི་ཞེས་བྱ་བ་རྒྱས་པར་འབྱུང་བ་ལ། སྐྱེས་པ་དང་མ་སྐྱེས་པའི་གནས་སྐབས་སུ་དག་ལྷན་ཅིག་འབྱུང་བ་རྣམས་རྒྱུ་དང་དངོས་པོར་འབྱུང་བ་མི་རིགས་ཏེ། བདག་ཉིད་དེར་གྲུབ་པའི་ཕྱིར་དང་ཡོད་པ་མ་ཡིན་པའི་ཕྱིར་རོ། དེའི་ཕྱིར་དེ་བརྗོད་པར་བྱའོ་ཞེས་བྱ་བ་སྨོས་སོ། །ལྷན་ཅིག་འབྱུང་བ་ལ་ཡང་རྒྱུ་དང་འབྲས་བུའི་དངོས་པོ་མཐོང་བ་ཡིན་ནོ་ཞེས་བསྟན་པའི་ཕྱིར་དཔེར་ན་ཞེས་བྱ་བ་རྒྱས་པར་སྨོས་སོ། །འོད་མར་མེའི་རྒྱུ་ཅན་ཡིན་ནོ་ཞེས་བྱ་བ་འདི་ཇི་ལྟར་རྟོགས་པར་བྱ་ཞེ་ན། འདི་ནི་མར་མེའི་འཕེལ་བ་དང་འགྲིབ་པ་དང་འགྲོ་བ་དང་གནས་པའི་རྗེས་སུ་བྱེད་པའི་ཕྱིར་ལ། འོད་དོན་དུ་གཉེར་བ་རྣམས་མར་མེ་ཉེ་བར་ལེན་པའི་ཕྱིར་དང༌། དེ་ལ་སྡང་བ་རྣམས་མར་མེ་གསོད་པར་འཇུག་པའི་ཕྱིར་རོ། །རེ་ཞིག་ཅི་མར་མེ་འོད་ཀྱི་རྒྱུ་ཡིན་ནམ་ཞེས་བྱ་བ་རྒྱས་པར་འབྱུང་བ་ལ་འདི་སྐད་དུ། གཉི་ག་ལས་གྲུབ་པ་ནི་ཤེས་པར་བྱེད་པ་ཡིན་ན་འདིས་ནི་ལྷན་ཅིག་འབྱུང་བ་རྣམས་རྒྱུ་དང༌། རྒྱུ་དང་ལྡན་པའི་དངོས་པོར་ཤེས་པར་ནུས་པ་མ་ཡིན་ཏེ་དཔྱད་པའི་ཕྱིར་རོ་ཞེས་སྟོན་པར་བྱེད་དོ། །ཚོགས་པ་སྔར་བྱུང་བ་ནི་
འབྲུ་མར་དང་སྡོང་བུ་དང༌། མེ་ལ་སོགས་པ་ཕྲད་པའོ། །དེ་ལ་ཇི་ལྟར་འོད་དང་བཅས་པའི་སྐད་ཅིག་མ་དང་པོའི་རྒྱུ་འབྲུ་མར་དང༌། སྡོང་བུ་དང་མེ་ཡིན་པ་དེ་བཞིན་དུ་འོད་དང་བཅས་པའི་མར་མེའི་སྐད་ཅིག་མ་གཉིས་པ་ལ་སོགས་པ་རྣམས་ཀྱི་རྒྱུ་ཡང་འབྲུ་མར་དང་སྡོང་བུ་དང། མེ་དང་ཕྲད་བ་ཁོ་ན་ཡིན་གྱི་འོད་ཀྱི་རྒྱུ་མར་མེ་ནི་མ་ཡིན་ནོ། །དེ་བཞིན་དུ་ཚོགས་པ་སྔར་བྱུང་བ་ཁོ་ན་གྲིབ་མ་དང་བཅས་པའི་མྱུ་གུའི་རྒྱུ་ཡིན་གྱི། གྲིབ་མའི་མྱུ་གུ་ནི་མ་ཡིན་ནོ། །དེ་ལ་གྲིབ་མ་དང་བཅས་པའི་མྱུ་གུ་དང་པོའི་རྒྱུ་ཞིང་དང་ས་བོན་ལ་སོགས་པའི་ཚོགས་གང་ཡིན་པ་དེ་བཞིན་དུ་གཉིས་པ་ལ་སོགས་པ་རྣམས་ཀྱི་ཡང་ཡིན་པར་བརྗོད་པར་བྱའོ། །གལ་ཏེ་དེ་ལྟར་ལྷན་ཅིག་འབྱུང་བ་རྣམས་རྒྱུ་དང༌། རྒྱུ་དང་ལྡན་པའི་དངོས་པོ་མ་ཡིན་ན། འོ་ན་ནི་ཞེས་བྱ་བ་རྒྱས་པར་འབྱུང་ངོ༌། །དེ་དག་དང་ལྡན་པ་དེའི་ཕྱིར་ཞེས་བྱ་བ་ལ། ཡོད་པ་དང་མེད་པ་དེ་དག་འབྲས་བུ་གང་ཡོད་པ་དེ་ནི་དེ་དག་དང་ལྡན་པ་ཡིན་ནོ། །དེ་དག་དང་ལྡན་པའི་དངོས་པོ་ནི་དེ་དག་དང་ལྡན་པ་ཉིད་དོ། །རེ་ཞིག་མིག་དང༌། གཟུགས་དང༌། མིག་གི་རྣམ་པར་ཤེས་པ་དང༌། མར་མེ་དང༌། མྱུ་གུ་དང༌། གྲིབ་མ་བཞིན་ལྷན་ཅིག་འབྱུང་བ་རྣམས་རྒྱུ་དང་འབྲས་བུའི་དངོས་པོར་མི་རུང་ན་ཕན་ཚུན་ནི་གོ་ཅི་ལྟར་རུང་སྟེ་ཡོད་པ་མ་ཡིན་ནོ་སྙམ་དུ་བསམས་པའོ། །དེའི་ཕྱིར་སེམས་ཀྱི་རྗེས་སུ་འཇུག་པ་རྣམས་ནི་སེམས་ཀྱི་ལྷན་ཅིག་འབྱུང་བའི་རྒྱུ་ཡིན་ལ། མཚན་ཉིད་རྣམས་ཀྱང་མཚན་གཞིའི་ཡིན་ནོ་ཞེས་བྱ་བར་མི་རུང་ངོ༌། །དེ་ཉིད་ཀྱི་ཕྱིར་རོ་ཞེས་བྱ་བ་ལ། ཕན་ཚུན་དག་ཡོད་པ་དང་མེད་པ་ཡོད་པ་དང་མེད་པའི་ཕྱིར་རོ་ཞེས་བྱ་བའི་དོན་ནོ། །དེ་ལྟ་ན་འོ་ན་ནི་ཞེས་བྱ་བ་ལ་སོགས་པ་ལ། རྒྱུར་བྱས་པའི་གཟུགས་དང༌། དྲི་དང༌། རོ་དང༌། རེག་བྱའི་ནི་ཕན་ཚུན་མེད་ན་མི་འབྱུང་བས་མེད་ན་མི་འབྱུང་བ་ཡིན་ཏེ། དེ་ནི་ཕན་ཚུན་དག་ཡོད་པ་དང༌། མེད་ན་དེ་དང་ལྡན་པའི་ཕྱིར་ཕན་ཚུན་རྒྱུ་དང་འབྲས་བུའི་དངོས་པོར་ཐལ་བར་འགྱུར་རོ། །འབྱུང་བ་རྣམས་དང་རྒྱུར་བྱས་པའི་གཟུགས་ཀྱང་ཕན་ཚུན་རྒྱུ་དང་འབྲས་བུའི་དངོས་པོར་ཐལ་བར་འགྱུར་ཏེ། ཕན་ཚུན་དག་ཡོད་པའམ། མེད་ན་ཡོད་པ་དང་མེད་པ་ཉིད་ཀྱི་ཕྱིར་རོ། །སེམས་ཀྱི་མཐུན་པའི་མཚན་ཉིད་ལ་སོགས་པ་རྣམས་ཀྱང་ཞེས་བྱ་
བ་རྒྱས་པར་འབྱུང་བ་ལ། ཕན་ཚུན་ཐལ་བར་འགྱུར་རོ་ཞེས་བྱ་བར་སྦྱར་ཏེ། སེམས་ཀྱི་མཐུན་པའི་མཚན་ཉིད་ལ་སོགས་པ་རྣམས་མེད་པར་ནི་སེམས་ལ་སོགས་པ་རྣམས་འབྱུང་བ་མེད་དོ། །སོགས་པ་ཞེས་བྱ་བའི་སྒྲས་ནི་སེམས་ཀྱི་རྗེས་སུ་འཇུག་པའི་མཐུན་པའི་མཚན་ཉིད་རྣམས་དང༌། ཐོབ་པ་ལྷན་ཅིག་སྐྱེས་པ་རྣམས་བསྡུའོ། །སེམས་ལ་སོགས་པ་དང་ཞེས་བྱ་བ་འདིར་ཡང་སོགས་པའི་སྒྲའི་རྗེས་སུ་འཇུག་པ་རྣམས་ཐོབ་བ་དང་ལྡན་པ་གཟུང་ངོ༌། །འདིར་དེའི་མཚན་ཉིད་ལ་འཁྲུལ་པ་མེད་པའི་ཕྱིར་རྒྱུ་དང་འབྲས་བུ་དག་སྔ་ཕྱིར་འབྱུང་བ་དག་ཁོ་ན་ལ་རིགས་ཀྱི། འཁྲུལ་བའི་ཕྱིར་ལྷན་ཅིག་འབྱུང་བ་དག་ལ་ནི་མ་ཡིན་ནོ་ཞེས་བསྟན་པར་འགྱུར་རོ། །འོ་ན་ནི་དབྱུ་གུ་གསུམ་ཞེས་བྱ་བ་ལ་སོགས་པ་ལ། ཇི་ལྟར་དབྱུ་གུ་གསུམ་ཕན་ཚུན་སྟོབས་ཀྱིས་གནས་པ་དེ་བཞིན་དུ་ལྷན་ཅིག་འབྱུང་བ་གང་དག་ཕན་ཚུན་སྟོབས་ཀྱིས་གནས་པ་དེ་དག་ཕན་ཚུན་འབྲས་བུ་ཡིན་པའི་ཕྱིར། ལྷན་ཅིག་འབྱུང་བའི་རྒྱུ་ཡིན་ནོ། །རྒྱུར་བྱས་པའི་གཟུགས་ནི་ཕན་ཚུན་སྟོབས་དང་འབྱུང་བའི་སྟོབས་ཀྱིས་གནས་པ་མ་ཡིན་ཏེ། འོ་ན་ཅི་ཞེ་ན། རང་གི་མཚན་ཉིད་ཀྱི་སྟོབས་ཀྱིས་ཡིན་ནོ། །དེ་བཞིན་དུ་གཞན་ལ་ཡང་བརྗོད་པར་བྱའོ། །རེ་ཞིག་ཅི་འདི་དག་ཅེས་བྱ་བ་རྒྱས་བར་འབྱུང་བ་ལ། དབྱུ་གུ་གསུམ་ནི་སྐད་ཅིག་མ་ཡིན་པའི་ཕྱིར་གནས་པ་མ་ཡིན་ཏེ། འོ་ན་ཅི་ཞེ་ན། ཇི་སྲིད་དེ་ལྟར་སྐྱེས་པ་དང༌། འགལ་བའི་རྐྱེན་མེད་ཀྱི་བར་དུ་དེ་ལྟར་གནས་པའི་སྐད་ཅིག་མ་སྔ་མ་སྔ་མའི་རྒྱུ་ཅན་སྐད་ཅིག་མ་ཕྱི་མ་ཕྱི་མའི་མངོན་པར་ཚོགས་ཏེ་གནས་པ་སྐྱེ་བ་ཡིན་ནོ། །ཕན་ཚུན་གྱི་སྟོབས་ཁོ་ནས་དེ་ན་གནས་པ་ནི་མ་ཡིན་ཏེ། འོ་ན་ཅི་ཞེ་ན། དེ་ལ་གཞན་ཡང་ཞེས་བྱ་བརྒྱས་བར་འབྱུང་ངོ༌། །དེ་ལྟ་ན་དཔེ་དོན་དང་མི་མཚུངས་སོ། །དེ་དག་ལ་ཡང་ཞེས་བྱ་བ་འདིས་ནི་མཚུངས་པར་སྟོན་པར་བྱེད་དེ། སོགས་པ་སྨོས་པས་ནི་སྐལ་བ་མཉམ་པ་དང་ཀུན་ཏུ་འགྲོ་བ་དང་རྣམ་པར་སྨིན་པ་དང་བྱེད་རྒྱུའི་རྒྱུ་ལ་སོགས་པ་གཟུང་གི་མཚུངས་པར་ལྡན་པའི་རྒྱུ་ནི་མ་ཡིན་ནོ། །ལྷན་ཅིག་འབྱུང་བའི་རྒྱུ་ནི་བྱེ་བྲག་ཏུ་བྱས་བ་ལས་ཕན་ཚུན་གནས་སྐབས་ཀྱི་རྒྱུ་ལྷན་ཅིག་འབྱུང་བའི་རྒྱུར་མི་འདོད་དོ། །འོ་ན་ཅི་ཞེ་ན། གང་ཞིག་འབྲས་བུ་གཅིག་པའམ། ཕན་ཚུན་གྱི་འབྲས་བུ་ཅན་ནོ། །གང་ཞིག་
གང་གི་སྟོབས་ཀྱིས་བསྐྱེད་པ་དེ་དང་དེ་ནི་ལྷན་ཅིག་འབྱུང་བའི་རྒྱུ་ཞེས་བསྟན་ཏེ། ལྷན་ཅིག་འབྱུང་བའི་རྒྱུ་བཤད་ཟིན་ཏོ།། །།སྐལ་མཉམ་རྒྱུ་ནི་འདྲ་བའོ། །ཞེས་བྱ་བ་ལ། སྐལ་བ་མཉམ་པའི་རྒྱུ་ནི་འདྲ་བ་ཁོ་ན་ཡིན་ཏེ། ཀུན་ཏུ་འགྲོ་བའི་རྒྱུ་ཡང་འདྲ་བ་ཡིན་པའི་ཕྱིར་རོ། །སྐལ་བ་མཉམ་པའི་འབྲས་བུ་ཉེ་བ་དང་རིང་བར་སྐྱེད་པ་དང་གསོས་འདེབས་པར་བྱེད་པའི་ཕྱིར་ན་སྐལ་བ་མཉམ་པའི་རྒྱུ་ཡིན་ལ། འདྲ་བའི་ཆོས་དེ་དག་ཀྱང་ཕན་ཚུན་ཆོས་འདྲ་བ་རྣམས་ཀྱི་ཡིན་ཏེ། དག་བའི་གཟུགས་ནི་ལྔ་པོ་དག་ཁོ་ནའི་ཡིན་པ་ནས་དགེ་བའི་རྣམ་པར་ཤེས་པ་ནི་ལྔ་པོ་དག་གི་བར་དུ་ཡིན་ནོ། །ཉོན་མོངས་པ་ཅན་ནི་ཕན་ཚུན་དུ་ཉོན་མོངས་བ་ཅན་རྣམས་ཀྱི་ཡིན་ལ། ལུང་དུ་མ་བསྟན་པ་ནི་ཕན་ཚུན་དུ་ལུང་དུ་མ་བསྟན་པ་རྣམས་ཀྱི་ཡིན་ནོ་ཞེས་བྱ་བར་སྦྱར་རོ། །གཞན་དག་ན་རི་ལུང་དུ་མ་བསྟན་པའི་གཟུགས་ནི་ཞེས་བྱ་བ་རྒྱས་པར་འབྱུང་བ་ལ། དམིགས་པ་དང་བཅས་བའི་ཕྱིར་ཚོར་བ་ལ་སོགས་པ་རྣམས་ནི་གསལ་བ་ཡིན་གྱི་གཟུགས་ནི་མ་ཡིན་ལ། མི་གསལ་བ་ནི་གསལ་བའི་འབྲས་བུར་མི་རུང་ངོ༌། །དམན་པའི་རྒྱུ་མངོན་པར་འདུ་བྱེད་པ་ཅན་གྱི་འབྲས་བུ་ཡིན་པ་བཀག་གི །གསལ་བ་མི་གསལ་བ་ཡིན་པ་ནི་མ་བཀག་སྟེ། དེ་ལྟ་མ་ཡིན་ན་རྣམ་པར་ཤེས་བའི་ཡང་གསུམ་པོ་ཡིན་པར་མི་འགྱུར་ཏེ། དངོས་པོ་ཙམ་ལ་ལྟ་བ་ཉིད་ཀྱིས་སོ། །གཞན་དག་ན་རེ་ཅིག་ཤོས་གསལ་བའི་ཕྱིར་རོ་ཞེས་ཟེར་རོ། །གཟུགས་ལུང་དུ་མ་བསྟན་པ་ནི་དགེ་བ་དང་མི་དགེ་བའི་ལུས་དང་ངག་གི་རྣམ་པར་རིག་བྱེད་དང་རིག་བྱེད་མ་ཡིན་པ་མ་གཏོགས་པ་ལྷག་མ་ཐམས་ཅད་དོ། །ནུར་ནུར་པོ་ནི་ནུར་ནུར་པོ་ལ་སོགས་པ་གནས་སྐབས་བཅུ་པོ་དག་གི་ཡིན་ནོ་ཞེས་བྱ་བ་རྒྱས་པར་འབྱུང་བ་ལ། ནུར་ནུར་བོ་དང༌། མེར་མེར་པོ་དང༌། གོར་གོར་པོ་དང༌། མཁྲང་འགྱུར་དང༌། རྐང་ལག་འགྱུས་པའི་གནས་སྐབས་རྣམས་ནི་མངལ་གྱི་གནས་སྐབས་ལྔའོ། །བྱིས་པ་དང༌། གཞོན་ནུ་དང༌། ལང་ཚོ་དང༌། བར་མ་དང༌། རྒན་པོའི་གནས་སྐབས་རྣམས་ཞིང་ཙས་པའི་གནས་སྐབས་ལྔའོ། །དེ་ལ་ནུར་ནུར་པོའི་གནས་སྐབས་འཕེལ་བ་ཡིད་པའི་ཕྱིར་སྔར་སྐྱེས་པ་ཕྱིས་སྐྱེ་བའི་གནས་སྐབས་ཀྱི་སྐལ་བ་མཉམ་པའི་རྒྱུ་ཡིན་པས་གནས་སྐབས་བཅུ་ཆར་དག་གི་ཡང་རྒྱུ་ཡིན་ནོ། །དེ་བཞིན་དུ་མེར་མེར་པོ་
ལ་སོགས་པ་རྣམས་ཀྱང༌། མེར་མེར་པོ་ལ་སོགས་པ་དག་གི་ཡིན་ནོ་ཞེས་ཐམས་ཅད་ལ་བརྗོད་པར་བྱའོ། །རེ་རེ་ཕྲི་ནས་ཞེས་བྱ་བ་ལ། འདིར་སྐལ་བ་མཉམ་པའི་རྒྱུའི་འབྲས་བུ་ནི་སྔ་མའམ། ལྷན་ཅིག་པ་ཡིན་པ་རྣམ་བར་གཞག་པར་བྱ་བ་མ་ཡིན་པས་རེ་རེ་ཕྲི་ནས་ཞེས་བྱ་བར་བཤད་དོ། །གནས་སྐབས་སྔ་མ་དགུ་རྣམས་ནི་ཕྱི་མའི་རྐྱེན་དུ་འགྱུར་ཏེ། བཅུ་པ་རྒན་བའི་གནས་སྐབས་ཀྱི་བར་དུ་རྐྱེན་ཏེ་རྒྱུ་ཉིད་མ་ཡིན་ནོ། །གལ་ཏེ་དེ་ལྟ་ཡིན་ན་འབྲས་བུ་དང་བཅས་པ་ཉིད་དུ་ཐལ་བར་འགྱུར་རོ་ཞེ་ན། དེའི་ཕྱིར་རིས་མཐུན་གཅིག་ལ་ཞེས་བྱ་བ་སྨོས་ཏེ། སྐྱེ་བ་གཅིག་ལ་ཞེས་བྱ་བའི་ཐ་ཚིག་གོ །རྣམ་པ་མཐུན་པ་གཞན་དུ་ནི་ཞེས་བྱ་བ་ལ། དཔེར་ན་སྔར་སྐྱེས་པའི་མིའི་རིས་མཐུན་པས་བསྡུས་པའི་གནས་སྐབས་བཅུ་པོ་དག་ནི་ཕྱིས་སྐྱེས་པའི་མིའི་རིས་མཐུན་པས་བསྡུས་པའི་གནས་སྐབས་བཅུ་ཆར་གྱི་ཡང་སྐལ་བ་མཉམ་པའི་རྒྱུ་ཡིན་ཏེ་འདྲ་བའི་ཡིན་པའི་ཕྱིར་དང༌། སྔར་སྐྱེས་པ་ཡིན་པའི་ཕྱིར་ཏེ། ནུར་ནུར་པོའི་གཟུགས་ནི་རྒྱུ་ཉིད་དང་ཐ་མ་རྒན་པོའི་གཟུགས་ནི་འབྲས་བུ་ཉིད་དོ། །ཕྱིའི་དག་ལ་ཡང་ཞེས་བྱ་བ་ལ་ནས་དང་སཱ་ལུ་ལ་སོགས་པ་དག་ལ་ཡང་ཚུལ་འདི་ཉིད་ཀྱིས་ཅི་རིགས་པར་བརྗོད་པར་བྱའོ། །མདོ་སྡེ་པ་ཁ་ཅིག་ན་རེ་གཟུགས་ལ་སྐལ་བ་མཉམ་པའི་རྒྱུ་མེད་ཀྱི་དེ་ནི་རྐྱེན་ལ་རག་ལས་ཏེ་སྐྱེ་བ་ཡིན་ཏེ། ཁྲོད་པའི་གཏིང་ནས་དྲངས་པའི་ས་ལས་མྱུ་གུ་སྐྱེ་བའི་ཕྱིར་རོ། །འདི་ལྟར་དེ་ལ་དེའི་ས་བོན་ཡོད་པ་ནི་མ་ཡིན་ནོ་ཞེས་ཟེར་བ་དེ་དག་གི་དབང་དུ་བྱས་ནས་གང་དག་གཟུགས་ཀྱི་ཞེས་བྱ་བ་རྒྱས་པར་སྨོས་སོ། །རྒྱུ་དང་བདག་པོ་ཞེས་བྱ་བ་ནི་རྒྱུའི་རྐྱེན་དང་བདག་པོའི་རྐྱེན་ནོ་ཞེས་བྱ་བའི་དོན་གང་ཡིན་པའོ། །དེ་ལ་སྐྱེས་ཟིན་བའི་ཕྱིར་དང་མ་བསྒྲིབས་ལ་ལུང་དུ་མ་བསྟན་པའི་གཟུགས་ཡིན་པའི་ཕྱིར། འདས་པའི་འབྱུང་བ་ཆེན་པོ་རྣམས་ནི་མ་འོངས་པའི་འབྱུང་བ་ཆེན་པོ་རྣམས་ཀྱི་ལྷན་ཅིག་འབྱུང་བ་དང༌། རྣམ་པར་སྨིན་པ་དང་ཀུན་ཏུ་འགྲོ་བ་དང་མཚུངས་བར་ལྡན་པའི་རྒྱུ་མ་ཡིན་ཏེ། འོ་ན་ཅི་ཞེ་ན། འདྲ་བའི་ཕྱིར་དང་སྔར་སྐྱེས་པའི་ཕྱིར་སྐལ་བ་མཉམ་པའི་རྒྱུ་ཡིན་ཞིང་རྐྱེན་རྣམས་ལས་བདག་པོའི་རྐྱེན་ཡིན་པར་རྟོགས་པར་བྱ་བ་ཡིན་པས་འགལ་བ་མེད་དེ། འདིར་ཉེ་བ་ནི་བདག་པོའི་རྐྱེན་དང་རྒྱུར་བཤད་དོ།
རིང་བའི་རྐྱེན་ཞེས་བྱ་བ་རིགས་པ་དང་འགལ་བས་འདི་གཞུང་གི་ཚུལ་དུ་མི་གཟུང་ངོ༌། །ན་དྷཱ་ཏུ་ཡུགྟི་བྷཱིཪྻ་ཏེ་ཁྲོན་པའི་གཏིང་ནས་བཏོན་པའི་ས་ལ་ཡང་མྱུ་གུ་སྐྱེས་པའི་སྔ་རོལ་ནས་བོན་ཡོད་ཀྱང་རྐྱེན་དང་བྲལ་བའི་ཕྱིར་མྱུ་གུ་མི་སྐྱེའོ། །དེ་ལྟ་མ་ཡིན་ཏེ་སྐལ་བ་མཉམ་པའི་རྒྱུ་མེད་ན་ནི་ཐམས་ཅད་དེ་ལས་སྐྱེ་བའོ། །ཡང་ན་ཅུང་ཟད་ཀྱང་མི་སྐྱེ་སྟེ། ངེས་པའི་རྒྱུ་མེད་པའི་ཕྱིར་རོ། །འདྲ་བ་ཉིད་ངེས་པར་མ་དཔྱད་པའི་ཕྱིར་ཐམས་ཅད་ཐམས་ཅད་ཀྱི་སྐལ་བ་མཉམ་པའི་རྒྱུ་ཡིན་ན་དེ་ལྟ་ན་ས་དགུ་པ་རྣམས་དང༌། རིས་ལྔ་པ་རྣམས་ཕན་ཚུན་སྐལ་བ་མཉམ་པའི་རྒྱུར་ཐལ་བར་འགྱུར་ན་རིགས་པ་མ་ཡིན་པས་འདྲ་བ་ཉིད་ངེས་པར་དཔྱད་པར་བྱ་བའི་ཕྱིར་འདྲི་བ་ནི། ཅི་འདྲ་བ་ཐམས་ཅད་ཅེས་བྱ་བ་རྒྱས་པར་འབྱུང་བའོ། །དེ་ལྟ་ན་ཡང་ཕྱིས་སྐྱེ་བ་ཡང་སྔར་སྐྱེས་པའི་སྐལ་བ་མཉམ་བའི་རྒྱུ་ཡིན་ཞིང༌། ལྷན་ཅིག་སྐྱེས་པ་ཡང་ལྷན་ཅིག་སྐྱེས་པ་ཡིན་ལ། མ་སྐྱེས་པ་ཡང་སྐྱེས་པ་ཡིན་པར་འགྱུར་རོ་ཞེ་ན། དེའི་ཕྱིར་དེ་དག་ཀྱང་ཐམས་ཅད་ནི་མ་ཡིན་ནོ། །འོ་ན་ཅི་ཞེ་ན། སྔར་སྐྱེས་རྣམས་ཞེས་བྱ་བ་སྨོས་སོ། །སྔར་སྐྱེས་པ་ཉིད་ཀྱིས་འདས་པ་དང་ད་ལྟར་བྱུང་བ་གཟུང་ངོ༌། །དེ་ལྟར་ན་སྐལ་བ་མཉམ་པའི་རྒྱུའི་མཚན་ཉིད་ཡོངས་སུ་རྫོགས་པ་ཡིན་ནོ། །དེ་ལྟ་མ་ཡིན་པར་སྔར་སྐྱེས་པ་དང་ཕྱིས་སྐྱེས་པ་རྣམས་སོ་ཞེས་བརྗོད་ན་འབྲས་བུ་མ་སྐྱེས་པ་སྐལ་བ་མཉམ་པའི་རྒྱུར་མ་བཤད་པར་འགྱུར་ལ། འདས་པ་དང་མ་འོངས་པ་དང་ད་ལྟར་བྱུང་བ་རྣམས་ཞེས་བརྗོད་ན། འབྲས་བུ་འདས་པ་མ་བཤད་པར་འགྱུར་བའི་ཕྱིར་རོ། །དེ་ལྟར་བཤད་ན་འདས་པ་རྣམས་ནི་འདས་པ་དང༌། མ་འོངས་པ་དང༌། ད་ལྟར་བྱུང་བ་རྣམས་ཀྱི་སྐལ་བ་མཉམ་པའི་རྒྱུ་ཡིན་ལ། ད་ལྟར་བྱུང་བ་ནི་མ་འོངས་པ་རྣམས་ཀྱི་ཡིན་གྱི། མ་འོངས་པ་རྣམས་ནི་སྐལ་བ་མཉམ་པའི་རྒྱུ་མ་ཡིན་པ་ཁོ་ནའོ་ཞེས་བྱ་བ་བསྟན་པར་འགྱུར་རོ། །འདི་གང་ལས་ཞེས་བྱ་ནི་ཅི་ལུང་ངམ་འོན་ཏེ་རིགས་པ་ལས་ཡིན་ཞེས་བྱའོ། །མ་འོངས་པ་ནི་སྐལ་བ་མཉམ་པའི་རྒྱུ་མ་ཡིན་ནོ་སྙམ་དུ་བསམས་པའོ། །བསྟན་བཅོས་ལས་ཏེ་ཞེས་བྱ་བས་ནི་ལུང་སྟོན་པར་བྱེད་དེ། སྐལ་བ་མཉམ་པའི་རྒྱུ་གང་ཞེ་ན་དགེ་བའི་རྩ་བ་སྔར་བྱུང་བ་
རྣམས་ནི་ཞེས་བྱ་བ་རྒྱ་ཆེར་འབྱུང་བ་ལ། ཨ་ཡི་མ་ཏཱི་ཏ་ཝརྞཱ་སཱ་ནཱ་དྷཱ་བྷེ་དེ་ན་གྲནྠཿ་དེ་ལྟར་ན་འདས་པ་རྣམས་ནི་འདས་པ་དང་ད་ལྟར་བྱུང་བ་རྣམས་ཀྱི་ཡིན་ནོ་ཞེས་བྱ་བ་ནི་དུས་ཀྱི་དབྱེ་བས་སོ། །དེ་དག་དང་མཚུངས་པར་ལྡན་པའི་ཆོས་རྣམས་ཀྱི་ཞེས་བྱ་བ་ནི་ཚོར་བ་ལ་སོགས་བ་རྣམས་ཀྱིའོ། །དེའི་ཕྱིར་སྐལ་བ་མཉམ་བའི་རྒྱུ་མ་འོངས་འདིས་འདས་པ་ནུས་པས་བསྒྲིབས་པས་ལམ་ཐ་དང་པ་བརྒྱུད་པ་མེད་དོ་ཞེས་བཤད་དོ། །ཇི་ལྟར་འདས་པ་དང་ད་ལྟར་བྱུང་བ་རྣམས་ཤེ་ན། མ་འོངས་པ་རྣམས་སྐལ་བ་མཉམ་པའི་རྒྱུ་ཉིད་དུ་མ་བཤད་པའི་ཕྱིར་རོ། །གལ་ཏེ་བསྟན་བཅོས་ཚད་མར་བྱེད་ན་གང་སྐལ་པ་མཉམ་པའི་རྒྱུ་དུས་གསུམ་པ་ཉིད་དུ་སྟོན་པ་འདི་ཡང་བསྟན་བཅོས་ཡིན་ནོ། །སྨྲས་པ་ནམ་ཡང་མ་ཡིན་ནོ་ཞེས་བྱ་བ་ལ། སྐབས་སུ་བབ་པའི་ཕྱིར་རྒྱུ་མ་ཡིན་ནོ་ཞེས་སྦྱར་ཏེ། དུས་གསུམ་ཀར་ཡང་རྒྱུ་ཡིན་ནོ་ཞེས་བྱ་བའི་ཐ་ཚིག་གོ །འདིས་ནི་སྐལ་བ་མཉམ་པའི་རྒྱུ་མ་འོངས་པ་ཡོད་དོ་ཞེས་སྟོན་པར་བྱེད་དོ། །དེས་ནི་ཉེས་པ་མེད་དོ་ཞེས་བྱ་བ་ནི་ནམ་ཡང་མ་ཡིན་ནོ་ཞེས་བསྟན་བཅོས་ལས་འབྱུང་བའི་ཕྱིར་སྐལ་བ་མཉམ་པའི་རྒྱུ་མ་འོངས་བ་བཞིན་དུ་ཡང་བཀག་པས་བསྟན་བཅོས་དང་འགལ་བའི་ཉེས་པ་གང་ཡིན་པ་སྟེ། ཕལ་ཆེ་བའི་ཚུལ་ལ་བརྟེན་ནས་ལྷན་ཅིག་འབྱུང་བའི་རྒྱུ་ལ་སོགས་པ་ལ་དགོངས་ཏེ་གསུངས་བའི་ཕྱིར་རོ། །འདི་ལྟར་དེ་དག་གི་སྔ་ཕྱིའི་རིམ་པ་མེད་པའི་ཕྱིར་དང༌། རྒྱུ་དང་འབྲས་བུ་དག་མི་འདྲ་བའི་ཕྱིར་མ་འོངས་པ་ཡང་ཡིན་པར་འདོད་དོ། །གང་ཞིག་ཆོས་མ་འོངས་པ་དེ་ཡང་ཞེས་བྱ་བ་རྒྱས་པར་འབྱུང་བ་ལ། སྐྱེ་བ་ལ་མངོན་དུ་ཕྱོགས་པ་ནི་གེགས་ཐམས་ཅད་ལོག་པ་ཡིན་པའི་ཕྱིར་སྐལ་པ་མཉམ་པའི་རྒྱུ་ཉིད་དུ་ངེས་ཏེ། སྔ་ཕྱིའི་རིམ་པ་གནས་པ་དེའི་ཕྱིར་མ་འོངས་པའི་གནས་སྐབས་ཐ་མ་ལ་དགོངས་ནས། ནམ་ཡང་རྒྱུ་མ་ཡིན་པ་མ་ཡིན་ཞེས་གསུངས་པས་མ་འོངས་པ་ཡང་སྐལ་པ་མཉམ་པའི་རྒྱུ་ཡིན་པའི་ཕྱིར་བསྟན་བཅོས་ལ་འགལ་བ་མེད་དོ། །དེའི་དེ་ནི་ལན་དུ་མི་རུང་སྟེ་ཞེས་བྱ་བ་རྒྱས་བར་འབྱུང་བ་ལ། ཐ་མའི་གནས་ལ་དགོངས་པ་ཡིན་ཞེ་ན་ནི་སྔ་ན་མེད་པའི་ཕྱིར་སྐྱེ་བཞིན་པའི་གནས་སྐབས་ནི་མ་བྱུང་བ་ལས་བྱུང་བ་ཡིན་པ་དེའི་ཕྱིར་ནམ་ཡང་རྒྱུ་མ་ཡིན་ནོ། །ཞེས་བྱ་བ་
འདི་འགལ་ཏེ། གནས་སྐབས་ཐམས་ཅད་ཀྱི་རྒྱུའི་དངོས་པོ་གསལ་བར་བྱས་པའི་ཕྱིར་རོ། །གཞན་དག་ན་རེ་ཐ་མའི་གནས་སྐབས་ཀྱང་མ་བྱུང་བ་ལས་ད་ལྟར་བྱུང་བའི་དུས་ཉིད་དུ་འགྱུར་ཏེ། ཚོགས་པ་ནི་གནས་སྐབས་ཀྱི་འབྲས་བུའོ་ཞེས་ཟེར་རོ། །མ་འོངས་པ་ནི་སྔ་ཕྱིའི་རིམ་པ་མ་ངེས་པས་སྐྱེ་བ་ལ་མངོན་དུ་ཕྱོགས་པའི་གནས་སྐབས་ཀྱང་ཕྱིས་དངོས་པོ་ལ་མངོན་པར་འཇུག་གོ །དུས་ངེས་པས་ནི་འདས་པ་སྔ་པ་དང༌། མ་འོངས་པས་འཕྱི་བ་དང་ད་ལྟར་བ་སྔ་ཕྱི་མེད་པ་མ་ཡིན་ནོ། །དེ་ལ་ཡང་སྐྱེ་བ་དང་སྐྱེ་བ་ཞེས་བྱ་བ་མ་འོངས་པ་དང་ཕྱིས་བྱས་པ་ཡིན་པས། དེའི་ཚེ་དེ་འབྲས་བུ་ལ་ཉེ་པ་ཡིན་ནོ། །མཚུངས་པ་དེ་མ་ཐག་བ་ཞེས་བྱ་བ་ནི་མཚུངས་པ་དེ་མ་ཐག་པའི་རྐྱེན་ཞེས་བྱ་བའི་དོན་ཏོ། །རྟོག་པ་འདི་ཞེས་བྱ་བ་ནི་སྐལ་བ་མཉམ་བའི་རྒྱུ་ལ་བྱས་པ་གང་ཡིན་པ་སྟེ། ཆོས་མ་སྐྱེས་བའི་ཚེའི་གནས་སྐབས་ན་གེགས་ཐམས་ཅད་བསལ་བ་ཡིན་པའི་ཕྱིར་མཚུངས་པ་དེ་མ་ཐག་པའི་དངོས་པོར་ངེས་པས་ནམ་ཡང་མཚུངས་པ་དེ་མ་ཐག་པ་མ་ཡིན་པ་མ་ཡིན་ནོ་ཞེས་བྱ་བ་ཡིན་བཞིན་དུ་ཅིའི་ཕྱིར་འདི་སྐད་དུ་གལ་ཏེ་ཞེས་བྱ་བ་རྒྱ་ཆེར་སྨྲས་སོ། །གནས་བརྟན་འདུས་བཟང་ནི་འདི་ལ་སྐྱོན་མེད་དོ་ཞེས་ཟེར་རོ། །གོ་སྐབས་བཞིན་པས་རབ་ཏུ་ཕྱེ་བས་མཚུངས་པ་དེ་མ་ཐག་པའི་རྐྱེན་ནོ། །སྐྱེ་བའི་གོ་སྐབས་འབྱིན་པ་ཡིན་གྱི་སྐྱེས་པ་ནི་མ་ཡིན་ལ། ས་བོན་གྱི་ཆོས་ཀྱི་ཚུལ་གྱི་རྒྱུ་ལས་སྐྱེ་བ་འབྱིན་པ་ཉིད་ས་བོན་གྱི་ཆོས་སུ་གནས་པ་ཡིན་ནོ། །དེ་ལྟར་མཚུངས་པ་དེ་མ་ཐག་པའི་རྐྱེན་དང་རྒྱུ་མེད་པར་མཚུངས་པས་ད་ལྟར་བ་རྣམས་འབྲས་བུ་ལྔ་འཛིན་པར་བྱེད་དོ། །ཞེས་གསུངས་པའི་ཕྱིར་རོ། །ད་ལྟར་བ་ཉིད་འགག་པ་ལ་མངོན་དུ་ཕྱོགས་པའི་ཕྱིར་འགག་བཞིན་པ་ཞེས་བྱ་སྟེ། དེ་ལྟར་རྒྱུ་དང་རྐྱེན་དག་ཁྱད་པར་མེད་དོ། །རྒྱུའི་དངོས་པོ་མེད་པར་ས་བོན་གྱི་ཆོས་དག་ཡོད་པ་མ་ཡིན་པས་གང་དུ་སྐྱེ་བ་ཉིད་རྒྱུར་ཀུན་ཏུ་གནས་སོ། །དེ་ལྟ་མ་ཡིན་ན་མི་སྐྱེ་བའི་ཆོས་ཅན་མ་གཏོགས་པ་མ་འོངས་པ་ཐམས་ཅད་སྐལ་བ་མཉམ་པའི་རྒྱུར་འགྱུར་རོ། །སྔོན་ཉིད་དུ་སྐྱེ་བའི་གནས་སྐབས་རྣམས་སྐལ་བ་མཉམ་པའི་རྒྱུར་མ་ངེས་པའི་ཕྱིར་རོ། །དེར་ཇི་ལྟ་བ་བཞིན་དུ་འདིར་ཡང་བརྗོད་པར་བྱ་བ་ལ་ཞེས་བྱ་བ་རྒྱས་པར་འབྱུང་བ་ལ། ཇི་ལྟར་དེ་ནམ་ཡང་རྒྱུ་མ་ཡིན་པ་མ་
ཡིན་ནོ་ཞེས་བྱ་བ་ཡིན་པ་དེ་བཞིན་དུ་འདིར་ཡང་ནམ་ཡང་མཚུངས་པ་དེ་མ་ཐག་པ་མ་ཡིན་པ་མ་ཡིན་ནོ་ཞེས་བརྗོད་པར་བྱ་བ་ཡིན་ལ། ཇི་ལྟར་འདིར་གལ་ཏེ་ཆོས་མ་སྐྱེས་པ་ཡིན་ནའོ་ཞེས་བྱ་བ་ཡིན་པ་དེ་བཞིན་དུ་དེར་ཡང་གལ་ཏེ་ཆོས་མ་སྐྱེས་པར་འགྱུར་ནའོ་ཞེས་བྱ་བ་ཡིན་ནོ། །དེ་ལྟར་ན་འདིར་བསྟན་བཅོས་བྱེད་པ་མི་མཁས་པ་ཞེས་བྱ་བ་ལ། གང་གི་ཕྱིར་ནམ་ཡང་མ་ཡིན་ནོ་ཞེས་སྨྲས་པས་ཐ་མའི་གནས་སྐབས་ཀྱི་དབང་དུ་བྱས་ནས་གོ་སྐབས་མ་ཕྱེ་བ་ཡིན་པས་གལ་ཏེ་ཆོས་དེ་ལ་སྐྱེས་པར་གྱུར་ན་མཚུངས་པ་དེ་མ་ཐག་པ་མ་ཡིན་ནོ་ཞེས་བྱ་བས་ཐ་མའི་གནས་སྐབས་ཀྱི་དབང་དུ་བྱས་ནས་བརྗོད་པར་བྱ་སྟེ། ནམ་ཡང་མ་ཡིན་པ་མ་ཡིན་ནོ་ཞེས་བྱའོ། །དེ་ལྟ་བས་ན་སྔ་མ་ཞེས་བྱ་བ་ལ་སོགས་པ་ལ་ལྷན་ཅིག་འབྱུང་བ་དང་མཚུངས་པར་ལྡན་པ་དང་རྣམ་པར་སྨིན་པའི་རྒྱུའི་དབང་དུ་བྱས་ནས་ཞེས་བྱའོ། །མ་གཏོགས་པ་གང་ཡིན་པ་དེ་ནི་འཇིག་ཚོགས་ལ་ལྟ་བའི་རྒྱུ་ལས་བྱུང་བ་ཡང་ཡིན་ལ། འཇིག་ཚོགས་ལ་ལྟ་བའི་རྒྱུ་ཡང་ཡིན་ནོ་ཞེས་བྱ་བ་ལ། འདི་ནི་འདིར་མ་འོངས་པ་ལ་སྐལ་པ་མཉམ་པའི་རྒྱུ་ཡོད་དོ་ཞེས་བྱ་བའི་ཁུངས་ཡིན་ནོ། །འཇིག་ཚོགས་ལ་ལྟ་བ་མ་འོངས་པ་དང༌། དེ་དང་མཚུངས་པར་ལྡན་པའི་སྡུག་བསྔལ་གྱི་བདེན་བ་མ་གཏོགས་པ་ཞེས་འབྱུང་བའི་ཕྱིར། འཇིག་ཚོགས་ལ་ལྟ་བ་མ་འོངས་པར་བཞག་པ་ཡིན་ནོ། །གང་ལས་འཇིག་ཚོགས་ལ་ལྟ་བ་འཇིག་ཚོགས་ལ་ལྟ་བའི་ལྷན་ཅིག་འབྱུང་བའི་རྒྱུའམ། མཚུངས་པར་ལྡན་པའི་རྒྱུ་ཉིད་དུ་རྣམ་པར་འཇོག་པར་འགྱུར་བ། ཚོགས་པ་དེ་ལ་འཇིག་ཚོགས་ལ་ལྟ་བ་གཞན་ཡོད་པ་མ་ཡིན་ཏེ། མ་བསྒྲིབས་ལ་ལུང་དུ་མ་བསྟན་པ་ཡིན་པའི་ཕྱིར་རྣམ་པར་སྨིན་བའི་རྒྱུ་ནི་མི་སྲིད་ལ། དེའི་ཕྱིར་འདིར་སྐལ་བ་མཉམ་པའི་རྒྱུ་ཁོ་ན་བཞེད་པས་ལྷན་ཅིག་འབྱུང་བ་དང་མཚུངས་པར་ལྡན་པ་དང་རྣམ་པར་སྨིན་པའི་རྒྱུ་ལ་དགོངས་པ་མ་ཡིན་ནོ། །དེས་ན་ལན་སྔ་མ་ཁོ་ན་ལེགས་པ་ཡིན་ནོ་ཞེས་བརྗོད་བར་མི་བྱའོ་ཞེ་ན། འདི་སྐད་དུ་འཇིག་ཚོགས་ལ་ལྟ་བ་མ་འོངས་པ་དང་མཚུངས་པར་ལྡན་པའི་ཕྱིར་བྱ་བ་རྒྱས་པར་འབྱུང་བ་ལ། དེ་སྐད་དུ་འདོན་པའི་ཁྱད་པར་གྱིས་ནི་སྐལ་བ་མཉམ་པའི་རྒྱུ་སྤངས་པར་འགྱུར་ལ། ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་རྙེད་པར་
འགྱུར་རོ། །དོན་གྱིས་ནི་དེ་ལྟར་གོ་བར་བྱའོ་ཞེས་བྱ་བ་ལ། གལ་ཏེ་རབ་ཏུ་གྲགས་པའི་ཕྱིར་འདོན་པ་གཞན་དུ་བྱ་བ་མ་ཡིན་ནོ་སྙམ་པའི་སེམས་ནི། མ་འོངས་པའི་དུས་ན་སྔ་ཕྱི་རིམ་པ་མེད་པའི་ཕྱིར་མ་སྐྱེས་པ་ལ་སྐལ་བ་མཉམ་པའི་རྒྱུ་ཉིད་དང་ཀུན་ཏུ་འགྲོ་བའི་རྒྱུ་ཉིད་མི་སྲིད་དོ་ཞེས་དོན་གྱིས་ན་དེ་ལྟར་ཁོང་དུ་ཆུད་པར་བྱའོ། །བཞི་ཚན་དུ་ངེས་པ་ཡིན་ཏེ་ཞེས་བྱ་བ་ལ། ཆོས་གང་ཞིག་ཆོས་གང་གི་རྒྱུ་ཡིན་པ་ནམ་ཡང་རྒྱུ་མ་ཡིན་པ་མ་ཡིན་ཏེ། དུས་གསུམ་དག་ཏུ་ཡང་རྒྱུ་ཉིད་དེ་འབྲས་བུ་དང་རྟེན་དང་དམིགས་བར་ཡང་བརྗོད་པར་བྱའོ། །དེའི་ཕྱིར་རྒྱུ་རྣམས་ནི་འབྲས་བུ་ལ་སོགས་པ་ལྟར་གནས་སྐབས་ཐམས་ཅད་དུ་ངེས་པ་ཁོ་ན་ཡིན་པས་སྐལ་པ་མཉམ་པའི་རྒྱུ་མ་འོངས་པ་ཡོད་དོ། །འདིར་རྒྱུ་ནི་མཚུངས་པར་ལྡན་པའི་རྒྱུ་དང་ཞེས་བྱ་བ་རྒྱས་པར་འབྱུང་བ་ལ། འདིར་ཐམས་ཅད་ཅེས་བྱ་བའི་སྒྲ་ནི་ཆོས་འདུས་བྱས་སམ། སེམས་དང་སེམས་ལས་བྱུང་བ་ཡོངས་སུ་གཟུང་ངོ༌། །ཐམས་ཅད་ལ་རྣམ་པར་སྨིན་པའི་འབྲས་བུ་ཡོད་པ་ཡང་མ་ཡིན་ཏེ། དེའི་ཕྱིར་རྣམ་པར་སྨིན་པའི་རྒྱུ་མ་ཡིན་ལ། བྱེ་བྲག་མེད་པར་འཇུག་པའི་ཕྱིར་བྱེད་རྒྱུ་ཡང་མ་ཡིན་ནོ། །མ་འོངས་པའི་དུས་ན་སྔ་ཕྱིའི་རིམ་པ་མེད་པའི་ཕྱིར་སྐལ་པ་མཉམ་པ་དང༌། ཀུན་ཏུ་འགྲོ་བའི་རྒྱུ་ཡང་མ་ཡིན་ནོ། །ཆོས་ཐམས་ཅད་ལ་ཡོད་པའི་ཕྱིར་སྐྱེས་བུ་བྱེད་པ་དང༌། བདག་པོའི་བྲས་བུ་དག་ཁོ་ན་ཡོངས་སུ་གཟུང་གི་གཞན་དག་ནི་མ་ཡིན་ཏེ། ཆོས་ཐམས་ཅད་ལ་མེད་པའི་ཕྱིར་རོ། །སྐལ་པ་མཉམ་པའི་རྒྱུ་མ་འོངས་པ་ཡིན་པར་ཁས་མི་ལེན་པ་ལ་ཡང་ཉེས་པ་དེ་ཡིན་ནོ་ཞེས་བསྟན་པའི་ཕྱིར་དེ་ལྟ་ན་ཞེས་བྱ་བ་རྒྱས་བར་སྨོས་སོ། །སྐལ་བ་མཉམ་པའི་རྒྱུད་ལྟར་བ་ཁོ་ན་ཡིན་གྱི། མ་འོངས་པ་མ་ཡིན་ན་དེ་ལྟ་ན་སྐལ་བ་མཉམ་པའི་རྒྱུ་མ་ཡིན་པ་ལས་ཡིན་པར་གྱུར་ཏོ་ཞེས་བྱ་བར་འགྱུར་རོ། །དེའི་ཕྱིར་དུས་ཐམས་ཅད་ཀྱི་ཚེ་ཡོད་བ་ཉིད་དུ་དམ་བཅའ་བ་དང་འགལ་ལོ། །གནས་སྐབས་ལ་ནི་འདོད་པ་ཁོ་ན་ཡིན་གྱི་ཞེས་བྱ་བ་རྒྱས་བར་འབྱུང་བ་ལ། འདིས་ནི་རྫས་ཐམས་ཅད་ཀྱི་ཚེ་ཡོད་པ་ཉིད་དུ་དམ་འཆའི་གནས་སྐབས་རྣམས་ནི་མ་ཡིན་པས་འགལ་བ་མེད་པར་སྟོན་ཏོ། །ཆོས་ནི་ཚོགས་པའི་དབང་གིས་གནས་
སྐབས་གཞན་དུ་འགྱུར་གྱི། མེད་པ་ནི་ཆོས་གཞན་དུ་འགྱུར་བར་མི་འཐད་དོ། །དེའི་ཕྱིར་ཚོགས་པ་ནི་གནས་སྐབས་ཀྱི་འབྲས་བུ་ཅན་ཁོ་ན་ཡིན་གྱི། རྫས་ཀྱི་འབྲས་བུ་ཅན་མ་ཡིན་པས་ཉེས་པ་འདི་མེད་དོ། །གལ་ཏེ་རྣམ་པར་སྨིན་པའི་རྒྱུ་བཞིན་དུ་ཞེས་བྱ་བ་རྒྱས་པར་འབྱུང་ངོ༌། །ཅིར་འགྱུར་ཞེས་བྱ་བ་ལ་སྐྱོན་ཅིར་འགྱུར་ཞེ་ན། གལ་ཏེ་རྣམ་པར་སྨིན་པའི་རྒྱུ་བཞིན་དུ་མ་འོངས་པ་ཡིན་པར་འགྱུར་ན་ནི། བསྟན་བཅོས་ལས་དེ་ཡང་སྨོས་པར་འགྱུར་ན། སྨོས་པ་ནི་ཡོད་པ་ཡང་མ་ཡིན་ནོ། །དེ་ལས་ནི་དགེ་བའི་རྩ་བ་མ་འོངས་པ་རྣམས་ནི་དགེ་བའི་རྩ་བ་མ་འོངས་པ་རྣམས་ཀྱི་སྐལ་བ་མཉམ་པའི་རྒྱུ་ཡིན་ནོ་ཞེས་གསུངས་ཏེ། དེའི་ཕྱིར་སྐལ་བ་མཉམ་པའི་རྒྱུ་མ་འོངས་པར་རྟོགས་ན་བསྟན་བཅོས་དང་འགལ་བར་འགྱུར་རོ། །འབྲས་བུ་འབྱིན་པ་དང་ཞེས་བྱ་བ་རྒྱས་པར་འབྱུང་སྟེ། འདིས་ནི་བསྟན་བཅོས་དང་འགལ་བ་སྤོང་ངོ༌། །འབྲས་བུ་འབྱིན་པར་ནུས་པ་ནི་འདས་པ་ཡིན་ལ། འབྲས་བུ་འཛིན་པར་ནུས་པ་ནི་ད་ལྟར་བ་ཡིན་ཞིང༌། འགའ་ཞིག་འབྱིན་པ་ཡང་ཡིན་ན་མ་འོངས་པ་དེ་ལྟར་འབྲས་བུ་འབྱིན་པ་དང༌། འཛིན་པར་བྱེད་ནུས་པ་མ་ཡིན་པས་བསྟན་བཅོས་ལས་མ་སྨོས་ཀྱི། མེད་པའི་ཕྱིར་ནི་མ་ཡིན་ནོ། །དེའི་ཕྱིར་བསྟན་བཅོས་དང་འགལ་བ་མེད་དོ། །དེ་ནི་མ་ཡིན་ཏེ་ཞེས་བྱ་བ་ལ། མ་འོངས་པ་འབྲས་བུ་འབྱིན་པ་དང་འཛིན་པར་མི་ནུས་པའི་ཕྱིར་མ་སྨོས་པ་ནི་མ་ཡིན་ཏེ། འོ་ན་ཅི་ཞེ་ན་མེད་པ་ཁོ་ནའི་ཕྱིར་རོ། །འདི་ཇི་ལྟར་ཤེས་ཤེན་ན། དེའི་ཕྱིར་སྐལ་པ་མཉམ་པའི་རྒྱུ་ནི་ཞེས་བྱ་བ་རྒྱས་པར་སྨོས་སོ། །རྒྱུ་མཐུན་པ་ནི་རྒྱུ་དང་འབྲས་བུ་འདྲ་བ་ཡིན་ལ། སྐལ་པ་མཉམ་པའི་རྒྱུ་ཡང༌། རྒྱུ་མཐུན་སྐལ་མཉམ་ཀུན་འགྲོ་བའི་ཞེས་འབྱུང་བ་དེས་འབྲས་བུ་དང་བཅས་པ་ཡིན་ན་དེ་ནི་མ་འོངས་པ་ལ་རིགས་པ་མ་ཡིན་ཏེ་སྔ་ཕྱི་མེད་པའི་ཕྱིར་རོ། །ཕན་ཚུན་རྒྱུ་དང་འབྲས་བུའི་དངོས་པོར་ཐལ་བའི་ཕྱིར་ཕན་ཚུན་འབྲས་བུ་ཉིད་རུང་བ་མ་ཡིན་ནོ། །ཅིའི་ཕྱིར་འདི་ལྟར་སྐྱེ་བ་མ་འོངས་པའི་རྒྱུ་མཐུན་བར་འགྱུར་བ་མི་རུང་ཞེ་ན། ཇི་ལྟར་འདས་པ་ད་ལྟར་བྱུང་བའི་རྒྱུ་མཐུན་པའི་འདྲས་བུ་མ་ཡིན་པ་བཞིན་དང་རྒྱུ་དང་འབྲས་བུ་དག་སྔ་མ་དང་ཕྱི་མའི་དངོས་པོ་ཉིད་ཀྱི་ཕྱིར་མ་ཡིན་ནོ། །རྒྱུ་བས་འབྲས་བུ་སྔ་ན་རྒྱུ་དོན་མེད་པར་ཐལ་བའི་ཕྱིར་དང་རྒྱུ་དང་འབྲས་བུ་དག་
མཚན་ཉིད་ཐ་དད་པའི་ཕྱིར་རོ། །རྣམ་པར་སྨིན་པའི་རྒྱུའི་མཚན་ཉིད་དེའི་འབྲས་བུ་ལས་ཐ་དད་དེ། རྣམ་སྨིན་རྒྱུ་ནི་མི་དགེ་དང༌། དགེ་བ་ཟག་བཅས་རྣམས་ཁོ་ན། །ཞེས་འབྱུང་ངོ༌། །རྣམ་པར་སྨིན་པའི་འབྲས་བུ་ཡང་རང་གི་རྒྱུ་ལས་མཚན་ཉིད་ཐ་དད་དེ། རྣམ་སྨིན་ལུང་དུམ་བསྟན་ཞེས་སོ། །དེའི་ཕྱིར་འདིར་སྔ་ཕྱི་མེད་ཅིང་ཕན་ཚུན་འབྲས་བུ་མེད་དོ། །མཚུངས་པར་ལྡན་པ་དང་སྐལ་པ་མཉམ་པའི་རྒྱུ་དག་ནི་འདིར་རྒྱུ་དང་འབྲས་བུ་དག་རང་བཞིན་ཐ་དད་པས་ཐ་དད་པ་མ་ཡིན་ནོ།།འོ་ན་ཅི་ཞེ་ན་དུས་སྔ་ཕྱིར་འབྱུང་བ་ཉིད་ཀྱི་ཕྱིར་རོ། །དེའི་ཕྱིར་སྔ་ཕྱི་མེད་ན་སྐལ་བ་མཉམ་པའི་རྒྱུ་ཁོ་ན་ཕན་ཚུན་འབྲས་བུ་ཉིད་དུ་འགྱུར་གྱི། རྣམ་པར་སྨིན་པའི་རྒྱུ་ནི་མ་ཡིན་ནོ། །གནས་སྐབས་ལས་རྣམ་པར་གནས་པ་ཞེས་བྱ་བ་ལ། སྔ་མ་དང་ཕྱི་མའི་རིམ་པ་རྒྱུ་དང་འབྲས་བུ་ངེས་པའི་ཕྱིར་སྐལ་བ་མཉམ་པའི་རྒྱུ་ནི་འདས་པ་དང༌། ད་ལྟར་བའི་གནས་སྐབས་ཁོ་ན་ཡིན་གྱི་མ་འོངས་པའི་གནས་སྐབས་ནི་མ་ཡིན་ནོ། །རྣམ་སྨིན་རྒྱུ་ནི་མི་དགེ་དང༌། དགེ་བ་ཟག་བཅས་རྣམས་ཁོ་ན་ཞེས་མཚན་ཉིད་ལས་རྣམ་པར་གནས་པ་ཡིན་ལ། མཚན་ཉིད་ཀྱང་དུས་གསུམ་དུ་འཁྲུལ་བ་མེད་པས་མ་འོངས་པ་ཡང་མི་བཟློག་གོ །ས་དགུའི་ལམ་ནི་ཕན་ཚུན་དུ། །མཉམ་དང་ཁྱད་པར་ཅན་གྱི་ཡིན། །ཞེས་རྒྱ་ཆེར་འབྱུང་སྟེ། ས་དགུ་ལ་བརྟེན་ནས་རྟོགས་པའི་ཕྱིར་ས་དགུའི་ཞེས་བརྗོད་དོ། །ཟག་པ་དང་བཅས་པའི་ལམ་དེ་ནི་སས་བསྡུས་པས་ལམ་ཡང་ས་ཐ་དད་པར་མཚུངས་བཞིན་དུས་དགུའི་ལམ་ཁོ་ན་ཕན་ཚུན་སྐལ་པ་མཉམ་པའི་རྒྱུ་ཡིན་གྱི། ཟག་པ་དང་བཅས་པ་ནི་མ་ཡིན་ནོ་ཞེས་བྱ་བ་འདི་ལ་རྒྱུ་ཅི་ཡོད་ཅེ་ན། དེའི་ཕྱིར་རྒྱུ་སྨྲས་པ་ནི་འདི་ནི་ས་དེ་དག་ཏུ་གློ་བུར་དུ་འོངས་པ་ཡིན་ལ་ཞེས་བྱ་བ་རྒྱས་པར་འབྱུང་སྟེ། ཟག་པ་དང་བཅས་པ་ལྟར་འདོད་པ་དང་གཟུགས་དང་གཟུགས་མེད་པས་མ་བསྡུས་པས་ས་དག་གློ་བུར་དུ་འོངས་པ་ཡིན་ལ། ས་དགུ་པ་ལ་བརྟེན་ནས་འཐོབ་པའི་ཕྱིར་ས་དགུ་ལ་ཞེས་བྱའོ། །ཡང་ཇི་ལྟར་ས་དེ་དག་ཏུ་གཏོགས་པ་མ་ཡིན་པར་ཤེས་ཤེ་ན། དེའི་ཕྱིར་ས་དེ་པའི་སྲིད་པ་བདག་གིས་བདག་གིར་མ་བྱས་པའི་ཕྱིར་ཞེས་བྱ་བ་སྨོས་ཏེ། སྲེད་པས་བདག་གིར་བྱས་པས་ཡོངས་
སུ་བཅད་པས་ཁམས་དང་ས་རྣམས་ཡོངས་སུ་གཅོད་པ་ཡིན་ལ་བདག་གིར་བྱས་པ་ཡང་དམིགས་པ་དང་མཚུངས་པར་ལྡན་པའི་སྒོ་ནས་རྒྱས་པ་ཡིན་ན། ཟག་པ་མེད་པའི་ཆོས་ནི་འདོད་པ་དང་གཟུགས་དང་གཟུགས་མེད་པའི་སྲེད་པས་བདག་གིར་བྱས་པ་མ་ཡིན་ཏེ་དེའི་གཉེན་པོ་ཡིན་པའི་ཕྱིར་རོ། །འོ་ན་ཅི་ལྟར་ལམ་དོན་དུ་གཉེར་བར་བྱེད་ཅེ་ན། དེ་ནི་ཆོས་ལ་འདུན་པ་དགེ་བ་ཞིག་ཡིན་ཏེ། འདོད་ཆགས་མིན་ཏེ་སྤང་བྱའི་ཕྱིར། །ཞེས་འབྱུང་བའི་ཕྱིར་རོ། །དེ་ལྟར་ལམ་གློ་བུར་བ་ཡིན་པའི་ཕྱིར་རིས་མཐུན་པ་གཞན་གྱིས་པའི་སྐལ་བ་མཉམ་པའི་རྒྱུ་ཡིན་པས་ཐམས་ཅད་ཀྱི་རྒྱུ་ཉིད་དུ་ཐལ་བ་ཡིན་ཀྱང༌། མཉམ་དང་ཁྱད་པར་ཅན་གྱི་ཡིན། །ཞེས་བྱ་བ་སྨོས་ཏེ། གོང་དང་འོག་དང་རང་གིས་པ་མཉམ་པ་དང་ཁྱད་པར་ཅན་གཉིས་ཀྱི་ཡིན་གྱི། ཆུང་ངུའི་ནི་མ་ཡིན་ནོ། །འདི་ལྟ་སྟེ། སྡུག་བསྔལ་ལ་ཆོས་ཤེས་པའི་བཟོད་པ་ནི་ཞེས་བྱ་བ་ལ་སོགས་པ་ལ། སྡུག་བསྔལ་ལ་ཆོས་ཤེས་པའི་བཟོད་པ་ནི་ལན་ཅིག་ཁོ་ན་སྐྱེའི་ཡང་དང་ཡང་དུ་ནི་མ་ཡིན་ནོ་ཞེ་ན། དེའི་ཕྱིར་དེ་ཉིད་མ་འོངས་པ་དང་ཞེས་བྱ་བ་སྨོས་ཏེ། དེ་ལྟ་ཡང་དབང་པོ་རྟུལ་པོའི་ལམ་གྱིས་བསྡུས་པ་ནི་དབང་པོ་རྟུལ་པོ་དང༌། རྣོན་པོའི་ལམ་གྱིས་བསྡུས་པ་ནི་དབང་པོ་རྣོན་པོའི་ལམ་གྱིས་བསྡུས་པ་ཁོ་ནའི་ཡིན་ནོ། །གང་ལས་རྒྱུ་མ་ཚང་བ་ལས་འབྲས་བུར་མི་འགྱུར་བ་ཇི་སྲིད་མི་སྐྱེ་བ་ཤེས་པའི་བར་དུའོ། །སྡུག་བསྔལ་ལ་ཆོས་ཤེས་པའི་བཟོད་པའི་མཇུག་ཐོགས་ཀྱི་སྡུག་བསྔལ་ལ་རྗེས་སུ་ཤེས་པ་ནི་མ་འོངས་པའི་ཡང་སྐལ་བ་མཉམ་པའི་རྒྱུ་ཡིན་ནོ། །དེ་ལ་དབང་པོ་རྟུལ་པོས་བསྡུས་པ་རྣམས་ནི་ཕྱི་མ་མ་ཡིན་པ་དབང་པོ་རྟུལ་པོས་བསྡུས་པ་ཁོ་ནའི་འོ། །མ་འོངས་པའི་ནི་རྣམ་པ་གཉིས་ཏེ་དབང་པོ་རྣོན་པོས་བསྡུས་བ་ཉིད་དང་མཇུག་ཐོགས་ཀྱི་མ་འོངས་པ་ཡང་དབང་པོ་རྣོན་པོས་བསྡུས་པ་ཁོ་ནའི་ཡིན་ནོ། །དེ་བཞིན་དུ་སྡུག་བསྔལ་ལ་རྗེས་སུ་ཤེས་པའི་བཟོད་པ་དང་ཤེས་པ་དང་ཀུན་འབྱུང་བ་དང་འགག་བ་དང་ལམ་རྣམས་ལ་བཟོད་པ་དང་ཤེས་པ་རྣམས་སོ། །བསྒོམ་པའི་ལམ་ལ་ཡང་བར་ཆད་མེད་པ་དང་རྣམ་པར་གྲོལ་བའི་ལམ་རྒྱ་ཆེར་བརྗོད་པར་བྱའོ། །མི་སློབ་པའི་ལམ་ལ་ནི་ཟད་པ་ཤེས་པ་དང༌། ཟད་པ་དང་མི་སྐྱེ་བ་ཤེས་པ་དག་གོ །མི་སྐྱེ་བ་ཤེས་པ་ནི་མི་སྐྱེ་བ་ཤེས་པ་ཁོ་ནའི་
ཡིན་གྱི་གཞན་གྱི་མ་ཡིན་ནོ། །དེ་ཉིད་ལ་རྒྱུ་སྨྲས་པ་ནི་ཁྱད་པར་ཅན་གཞན་མེད་པའི་ཕྱིར་རོ་ཞེས་བྱ་བ་སྟེ། སྡུག་བསྔལ་ལ་ཆོས་ཤེས་པའི་བཟོད་པ་ནི་སྡུག་བསྔལ་ལ་ཆོས་ཤེས་པའི་བཟོད་པ་དང་མཉམ་མོ། །དབང་པོ་འགའ་ཞིག་ལས་ཁྱད་པར་དུ་འཕགས་སོ། །སྡུག་བསྔལ་ལ་ཆོས་ཤེས་པ་ལ་སོགས་པ་བཞིན་མི་སྐྱེ་བ་ཤེས་པའོ། །རྒྱུས་བྱས་པ་ལས་བྱུང་བའི་སྒོ་ནས་ནི་དབང་པོ་འགའ་ཞིག་ལས་ཀྱང་ཁྱད་པར་དུ་འཕགས་སོ། །མི་སྐྱེ་བ་ཤེས་པ་ལས་གཞན་པའི་ཤེས་པ་རྒྱུས་རྒྱས་བ་ལས་བྱུང་བའི་སྒོ་ནས་ཁྱད་པར་དུ་འཕགས་པ་མེད་དོ། །གང་ཞིག་དེའི་རྒྱུ་ཉིད་ཡོངས་སུ་མི་རྟོགས་ཤེ་ན། མི་སྐྱེ་བ་ཤེས་པ་ལས་མི་སྐྱེ་བ་ཤེས་པར་གྱུར་པ་ནི་རབ་ཏུ་གྱུར་བའི་ཕྱིར་དང༌། རྒྱུས་རྒྱུས་པ་ལས་བྱུང་བའི་སྒོ་ནས་དང་དབང་པོའི་སྒོ་ནས་ཀྱང་ཁྱད་པར་དུ་འཕགས་སོ། །དེ་བཞིན་དུ་སྡུག་བསྔལ་ལ་ཆོས་ཤེས་པ་མ་འོངས་པ་ནི་སྡུག་བསྔལ་ལ་ཆོས་ཤེས་པ་ཁྱད་པར་ཅན་གྱི་ཡིན་པ་ནས་མི་སྐྱེ་བ་ཤེས་པའི་བར་གྱིས་ཡིན་ནོ། །སྡུག་བསྔལ་ལ་ཆོས་ཤེས་པའི་བཟོད་པའི་ནི་མ་ཡིན་ནོ། །རྒྱུ་ལས་སྔར་རམ་འབྲས་བུ་དམན་པ་ནི་མི་རུང་ངོ༌། །དེ་བཞིན་དུ་གཞན་ལ་ཡང་རྒྱ་ཆེར་བརྗོད་པར་བྱའོ། །མཐོང་བའི་ལམ་ལས་བསྒོམ་པ་དང་མི་སློབ་པའི་ལམ་དག་དང༌། བསྒོམ་པའི་ལམ་ལས་ཀྱང་མི་སློབ་པའི་ལམ་ནི་རྒྱུས་རྒྱས་པའི་ཕྱིར་ཁྱད་པར་དུ་འཕགས་སོ། །མཐོང་བའི་ལམ་ནི་མཉམ་པའི་སྟེ། དེའི་ཕྱིར་མཐོང་བའི་ལམ་མོ། །མཉམ་དང་ཁྱད་པར་ཅན་གྱི་རྒྱུ་ནི་བཞི་པ་རྣམས་ཀྱང་སྟེ། བསྒོམ་པའི་ལམ་གྱིས་མཉམ་དང་ཁྱད་པར་ཅན་གཉིས་ཉིད་དོ། །མཐོང་བའི་ལམ་གྱིས་ནི་མ་ཡིན་ཏེ་དམན་པའི་ཕྱིར་རོ། །མི་སློབ་པའི་ལམ་ནི་མཉམ་པའི་ཕྱིར་མི་སློབ་པའི་ལམ་ཁོ་ནའི་ཡིན་གྱི། མཐོང་བ་དང་བསྒོམ་པའི་ལམ་དག་གི་མ་ཡིན་ཏེ་དམན་པའི་ཕྱིར་རོ། །དེ་ལྟར་ཐུན་མོང་གི་དབང་དུ་བྱས་ནས་མཐོང་བའི་ལམ་ལ་སོགས་པ་བཤད་དེ། སྐད་ཅིག་ཐ་དད་པས་དབང་པོ་ཐ་དད་པ་ཡན་ལག་ཏུ་བྱས་ཏེ། དབང་པོ་རེ་རེ་བ་དང་རྒྱུའི་སྒོ་ནས་ཀྱང་ཁྱད་པར་དུ་འགྱུར་པ་ཉིད་མ་དཔྱད་དེ། །དེ་ཉིད་ཀྱི་ཕྱིར་དེ་ལ་ཡང་དབང་པོ་རྟུལ་པོའི་ལམ་ནི་ཞེས་བྱ་བ་རྒྱས་པར་འབྱུང་ངོ༌། །འདི་ནི་མདོར་
བསྡུས་ན་དབང་པོའི་སྒོ་ནས་ཁྱད་པར་དུ་གྱུར་པ་ན་རྒྱུས་རྒྱས་པའམ་མཉམ་པའི་རྒྱུར་འགྱུར་རོ། །དབང་པོའི་སྒོ་ནས་དམན་པ་དང་རྒྱུས་རྒྱས་པའི་མ་ཡིན་ནོ། །དབང་པོའི་སྒོ་ནས་དམན་པའི་རྒྱུ་མ་ཡིན་ནོ། །དབང་པོའི་སྒོ་ནས་དམན་པ་དང་ཁྱད་པར་ཅན་གྱིས་ཡང་རྒྱུ་མ་ཡིན་ཏེ། དབང་པོ་ལས་དམན་པའི་ཞེས་སྔར་བཤད་པ་ཉིད་དོ། །ས་འོག་མ་དམན་པའི་ཕྱིར་འདྲི་བ་ནི། ཡང་ཇི་ལྟར་ས་གོང་མ་པ་ཞེས་རྒྱ་ཆེར་འབྱུང་བའོ། །དེ་ལ་དད་པས་རྗེས་སུ་འབྲང་བའི་ས་གོང་མ་བའི་ལམ་ནི་ས་འོག་མ་པའི་དད་བས་རྗེས་སུ་འབྲང་བའི་ལམ་དང་མཉམ་སྟེ། གཉི་ག་ཡང་དབང་པོ་རྟུལ་པོ་ཡིན་པའི་ཕྱིར་རོ། །ཆོས་ཀྱི་རྗེས་སུ་འབྲང་བའི་ལམ་ནི་ཁྱད་པར་ཅན་ཏ་དབང་པོ་རྣོན་པོ་ཡིན་པའི་ཕྱིར་རོ། །དེ་བཞིན་དུ་ས་གོང་མ་པའི་ཆོས་ཀྱི་རྗེས་སུ་འབྲང་བའི་ལམ་དང་ནི། །ཆོས་ཀྱི་རྗེས་སུ་འབྲང་བ་ས་འོག་མ་པ་མཉམ་པ་ཡིན་ཏེ། གཉི་ག་ཡང་དབང་པོ་རྣོན་པོ་ཡིན་པའི་ཕྱིར་རོ། །དེ་བཞིན་དུ་དབང་པོའི་སྒོ་ནས་ས་གོང་མ་པའི་དད་པ་དང་ཆོས་ཀྱི་རྗེས་སུ་འབྲང་བའི་ལམ་ནི། ས་འོག་མ་པའི་དད་པས་མོས་པ་དང༌། མཐོང་བས་ཐོབ་པ་དང༌། དུས་དང་སྦྱོར་བ་དང༌། དུས་དང་མི་སྦྱོར་བར་རྣམ་པར་གྲོལ་བའི་ལམ་རྣམས་དང་མཉམ་པ་དང་ཁྱད་པར་ཅན་ཡིན་པ་ཡང་བརྗོད་པར་བྱའོ། །དེ་བཞིན་དུ་ས་གོང་མ་པའི་བསྒོམ་པ་དང་མི་སློབ་པའི་ལམ་དབང་པོ་རྟུལ་པོ་དང་རྣོན་པོས་བསྡུས་པ་དག་ནི་ས་འོག་མ་པའི་མཐོང་བ་དང་བསྒོམ་པ་དང་མི་སློབ་པའི་ལམ་དབང་པོ་རྟུལ་པོ་དང་རྣོན་པོའི་དབྱེ་བས་ཐ་དད་པ་རྣམས་དང་དབང་པོའི་སྒོ་ནས་མཉམ་པ་དང་ཁྱད་པར་ཅན་ཡིན་པ་ཡང་བརྗོད་པར་བྱའོ། །དེ་བཞིན་དུ་རྒྱུས་རྒྱས་པའི་སྒོ་ནས་ཀྱང་ཡིན་ཏེ། ས་འོག་མ་པའི་བསྒོམ་པ་དང་མི་སློབ་པའི་ལམ་དག་ནི་ས་གོང་མའི་མཐོང་བའི་ལམ་ལས་རྒྱུས་རྒྱས་པའི་སྒོ་ནས་ཁྱད་པར་ཅན་ཡིན་ནོ། །དེ་བཞིན་དུས་གོང་མ་པའི་བསྒོམ་པའི་ལམ་ལས་ས་འོག་མ་པའི་མི་སློབ་པའི་ལམ་ཁྱད་པར་ཅན་ཡིན་ནོ། །ཆུང་ངུའི་ཆུང་ངུ་ལ་སོགས་པ་ཞེས་བྱ་བ་ལ་ཆུང་ངུའི་ཆུང་ངུ་ལས་ཆུང་ངུའི་འབྲིང་རྒྱུས་རྒྱས་པའི་སྒོ་ནས་ཁྱད་པར་ཅན་ཡིན་ལ་ཆུང་ངུ་དང་ནི་མཉམ་མོ། །དེ་བཞིན་དུ་ཆུང་ངུའི་འབྲིང་ལས་ཆུང་ངུའི་ཆེན་པོ་ཁྱད་པར་ཅན་ཡིན་པ་ནས་ཆེན་པོའི་འབྲིང་ལས་ཆེན་པོའི་ཆེན་པོའི་བར་དུ་ཡིན་ནོ། །ཆེན་པོའི་ཆེན་པོ་ལས་ཁྱད་པར་དུ་གྱུར་པ་ནི་མེད་དོ། །
ས་གོང་མ་ནི་ས་འོག་མ་དང་དབང་པོ་མཚུངས་ཀྱང་རྒྱུས་རྒྱས་པའི་སྒོ་ནས་ཁྱད་པར་ཅན་ཡིན་ནོ། །དད་པས་རྗེས་སུ་འབྲང་བའི་ལམ་ནི་དྲུག་རྣམས་ཀྱི་སྐལ་པ་མཉམ་པའི་རྒྱུ་ཡིན་ནོ་ཞེས་སྨྲས་ན། དད་པས་རྗེས་སུ་འབྲང་བ་དང༌། ཆོས་ཀྱིས་རྗེས་སུ་འབྲང་བའི་ལམ་དག་ནི་རྒྱུན་གཅིག་ལ་སྐྱེ་བ་མི་སྲིད་དོ་ཞེས་བྱ་བའི་ཕྱོགས་སྔ་མ་ཁོང་ན་ཡོད་པ་བསལ་བར་བྱ་བའི་ཕྱིར་རྒྱུད་གཅིག་ལ་ཞེས་བྱ་བ་ལ་སོགས་པ་སྨོས་ཏེ། དད་པས་རྗེས་སུ་འབྲང་བའི་ལམ་བྱུང་བ་ནི་དད་པས་མོས་པའི་ལམ་མམ་དུས་ཀྱིས་རྣམ་པར་གྲོལ་བའི་ལམ་མོ། །མ་སྐྱེས་པ་ནི་ཆོས་ཀྱི་རྗེས་སུ་འབྲང་བའི་ལམ་སྟེ། མཐོང་བས་ཐོབ་པའམ་དུས་དང་མི་སྦྱོར་པར་རྣམ་པར་གྲོལ་བའི་ལམ་གྱི་ཡང་རྒྱུའོ། །གང་ཞིག་དབང་པོ་འཕོས་པ་ནི་དབང་པོ་རྣོན་པོས་བསྡུས་པའི་ལམ་མངོན་དུ་གྱུར་པའོ། །དད་པས་རྗེས་སུ་འབྲང་བའི་ལམ་སྔར་སྐྱེས་པ་དེ་ནི། །འབྲས་བུའི་ངོ་བོས་ཟིན་པ་ཉིད་ཀྱིས་མི་སྐྱེ་བའི་ཆོས་ཅན་གྱི་ཡང་རྒྱུའི་ངོ་བོར་འགྱུར་མོད་ཀྱི། དེ་མི་སྐྱེ་བ་ནི་རྐྱེན་མ་ཚང་བ་ལས་ཡིན་ནོ། །ཡང་གཞན་དག་ནི་མི་ལྕོགས་པ་མེད་པ་འབའ་ཞིག་ཐོབ་པ་ལ་རག་ལས་པ་ནི་མི་ལྕོགས་པ་མེད་པ་ལ་བརྟེན་ནོ། །ས་ཐམས་ཅད་པ་ནི་ཇི་ལྟར་སྲིད་པ་བཞིན་སྐལ་བ་མཉམ་པའི་རྒྱུའོ། །བསམ་གཏན་གྱི་དངོས་གཞི་ཐོབ་པ་ལ་རག་ལས་པ་ནི་དེ་ལ་བརྟེན་པ་ཁོ་ན་ཡིན་ལ་མི་ལྕོགས་པ་མེད་པ་ཐོབ་པ་རག་ལས་པ་འབའ་ཞིག་ནི་མ་གཏོགས་སོ། །དེ་བཞིན་དུ་བསམ་གཏན་གཉིས་པ་ལ་སོགས་པ་ཐོབ་བ་ལ་རག་ལས་པ་ལ་སོགས་པ་ཡང་ངོ༌། །ས་འོག་མ་ཐོབ་པ་ལ་རག་ལས་པ་རྣམས་ཀྱི་རྒྱུ་མ་ཡིན་ནོ། །དེ་བཞིན་དུ་བསམ་གཏན་དང་པོའི་ས་པའི་ལམ་ལ་ཡོད་པ་ནི་བསམ་གཏན་དང་པོ་ལ་རག་ལས་པ་ཡོད་པ་ནས་ཅི་ཡང་མེད་པའི་སྐྱེ་མཆེད་ལ་རག་ལས་པའི་བར་རོ། །བསམ་གཏན་གཉིས་བ་ནི་རང་གི་གོང་མའི་ས་ལ་རག་ལས་པ་ཡོད་ལ་ས་འོག་མ་ལ་རག་ལས་པ་ནི་མེད་དོ། །དེ་བཞིན་དུ་བསམ་གཏན་གསུམ་པའི་ས་པ་ལ་ཡང་བརྗོད་པར་བྱའོ། །དེ་ལ་བསམ་གཏན་དང་པོ་ལ་རག་ལས་པ་ནི་རང་གིས་པ་ཐམས་ཅད་དང་ས་གོང་མའི་ཡང་སྐལ་བ་མཉམ་པའི་རྒྱུའོ། །དེའི་ནི་བསམ་གཏན་དང་པོ་ཐོབ་པའིའོ། །དེ་བཞིན་དུ་བསམ་གཏན་གཉིས་པ་ལ་རག་
ལས་པ་ནི་བསམ་གཏན་དང་པོ་ལ་རག་ལས་པ་མ་གཏོགས་པ་ལྷག་མའི་སྐལ་བ་མཉམ་པའི་རྒྱུའོ། །དེའི་ནི་བསམ་གཏན་དང་པོ་དང་གཉིས་པ་ལ་རག་ལས་པ་ཁོ་ནའི་སྟེ་གཞན་མ་ཡིན་ནོ། །དེ་བཞིན་དུ་ཐམས་ཅད་ལ་རྒྱ་ཆེར་བརྗོད་པར་བྱའོ་ཞེས་བཤད་དོ། །གཞན་དག་བསྒོམ་པའི་ལམ་ནི་མཐོང་བའི་ལམ་གྱི་སྐལ་པ་མཉམ་པའི་རྒྱུ་མ་ཡིན་གྱི་མི་སློབ་པའི་ལམ་ངང་སྒོམ་པའི་ལམ་གྱི་ཡིན་ནོ་ཞེས་སེམས་སོ། །འདི་ལྟར་དབང་པོ་རྟུལ་པོའི་རིགས་ཅན་གྱིས་བསྒོམ་པའི་ལམ་མ་འོངས་པ་མི་སྐྱེ་བའི་ཆོས་ཅན་རང་རྒྱུད་པ་ནི་དབང་པོ་རྣོན་པོའི་རིགས་ཅན་གྱི་མཐོང་བའི་ལམ་གྱི་སྐལ་པ་མཉམ་པའི་རྒྱུར་འགལ་བ་མེད་དོ། །མི་སློབ་པའི་ལམ་སྐྱེ་བའི་ཆོས་ཅན་ཡང་བསྒོམ་པའི་ལམ་གྱི་སྐལ་པ་མཉམ་པའི་རྒྱུ་སྟེ། དབང་པོ་ཡོངས་སུ་ཉམས་པ་རྣོན་པོར་བྱེད་པ་སྲིད་པའི་ཕྱིར་རོ། །དེ་ལྟ་ན་འོ་ན་ཉན་ཐོས་ལ་སོགས་པའི་ལམ་རྣམས་ཀྱང་ཕན་ཚུན་རྒྱུ་ཉིད་དུ་ཐལ་བར་འགྱུར་རོ་ཞེ་ན་དེ་ནི་དེ་ལྟ་མ་ཡིན་ཏེ་གང་གི་ཕྱིར་དབང་པོ་རྟུལ་པོ་དབང་པོ་རྣོན་པོར་འགྱུར་བ་ཡོད་ཀྱང༌། ཉན་ཐོས་ཀྱི་རྒྱུད་ལ་རང་སངས་རྒྱས་ཀྱི་ལམ་ནི་མི་སྲིད་པ་ཉིད་དོ། །དེ་ལྟ་ན་འོ་ན་དད་པས་རྗེས་སུ་འབྲང་བའི་རྒྱུད་ལ་ཆོས་ཀྱི་རྗེས་སུ་འབྲང་བའི་ལམ་སྲིད་པའི་ཕྱིར་བསྒོམ་པའི་ལམ་མ་ཡིན་ཞིང་མཐོང་པའི་ལམ་གྱི་རྒྱུ་མ་ཡིན་ནོ་ཞེ་ན་སྦྱོར་བྱུང་ཞེས་བྱ་བ་སྟེ། སྦྱོར་བ་ལས་བྱུང་བ་སྨོས་པ་ནི་སྐྱེས་ནས་ཐོབ་པ་འགག་པར་བྱ་བའི་ཕྱིར་རོ། །སྦྱོར་པ་ལས་བྱུང་བ་ནི་སྦྱོར་བ་ལས་སྐྱེས་པའོ། །ཐོས་པ་ལས་བྱུང་བ་ནི་གང་དག་སངས་རྒྱས་ཀྱི་གསུང་རབ་ཐོས་པ་ལས་སྐྱེས་པ་ཡིན་ནོ། །བསམ་པ་ལས་བྱུང་བ་ནི་བསམ་པ་ལས་བྱུང་བ་ཉིད་དེ་དམན་པའི་མ་ཡིན་ནོ། །རྒྱུ་ལས་འབྲས་བུ་དམན་པ་མི་རིགས་སོ། །འདོད་པའི་ཁམས་ན་མཉམ་པར་མ་བཞག་པ་ཡིན་པའི་ཕྱིར་བསྒོམ་པ་ལས་བྱུང་བ་མེད་དོ། །བསམ་པ་ལས་བྱུང་བ་མེད་པའི་ཕྱིར་རོ་ཞེས་བྱ་བ་ལ། །གཟུགས་ན་སྤྱོད་པ་རྣམས་ནི་རྒྱུད་ཞི་གནས་ཀྱིས་བརླན་པའི་ཕྱིར་གང་གི་ཚེ་སེམས་བར་རྩོམ་པ་དེའི་ཚེ་དེ་དག་ཏིང་ངེ་འཛིན་ལ་ཉེ་པར་གནས་པར་འགྱུར་རོ། །གཞན་དག་ན་རེ། མ་ཡིན་ཏེ་གཟུགས་ཀྱི་ཁམས་ན་བསམ་པ་ལས་བྱུང་བ་ཡོད་པའི་བསམ་པ་ལས་བྱུང་བ་ཡང་བསྒོམ་པ་ལས་བྱུང་བ་རྣམས་སོ་ཞེས་ཟེར་རོ། །དེ་ནི་ཐབས་ཀྱིས་ཡོངས་སུ་ཟིན་པའི་བསམ་པ་ལས་བྱུང་བ་
སྟེ། དགེ་བའི་རྩ་བ་རྣམས་ཀྱིས་རབ་ཏུ་ཞི་བ་ཉིད་ཀྱི་ཕྱིར་བསྒོམ་པ་ལས་བྱུང་བ་རྣམས་དང་འདྲ་བས་བསྒོམ་པ་ལས་བྱུང་བ་ཞེས་བྱའོ། །དེ་དག་གི་བསྒོམ་པ་ལས་བྱུང་བ་རྣམས་བསམ་པ་ལས་བྱུང་བའི་རྒྱུའོ། །གཞན་དག་ན་རེ་ཟད་པ་ཤེས་པ་ཐོབ་པ་འདོད་པ་ན་སྤྱོད་པ་རྣམས་ནི་དགྲ་བཅོམ་པ་རྣམས་ཀྱིས་བསྒོམ་པའི་འབྲས་བུ་ཡིན་པའི་ཕྱིར་བསྒོམ་པ་ལས་བྱུང་བ་དང་མཚུངས་སོ་ཞེས་ཟེར་རོ། །དེ་དག་གི་བསམ་པ་ལས་བྱུང་བ་དེ་རྣམས་ནི་དོན་དམ་པའི་སྒོ་ནས་བསྒོམ་པ་ལས་བྱུང་བའི་རྒྱུའོ། །བསམ་པ་ལས་བྱུང་བ་རྣམས་ཁོ་ན་བསྒོམ་པ་ལས་བྱུང་བ་མ་ཡིན་ཏེ། བསྒོམ་པ་ལས་བྱུང་བ་ནི་དེ་དག་གིས་བཏགས་པ་ཡིན་ལ་བསམ་པ་ལས་བྱུང་བ་ནི་མ་ཡིན་པས་བསྒོམ་པ་ལས་བྱུང་བ་རྣམས་ཀྱི་རྒྱུའོ། །ཐོས་པ་དང་བསམ་པ་དང་བསྒོམ་པ་ལས་བྱུང་བདེ་དག་གྱང་ཆུང་ངུའི་ཆུང་དུ་ལ་སོགས་པའི་དབྱེ་བས་སོ་སོར་རྣམ་པ་དགུའོ། །ཆུང་ངུའི་ཆུང་དུ་ནི་རྣམ་པ་དགུ་པོ་ཐམས་ཅད་ཀྱི་ཡིན་ལ། ཆུང་ངུའི་འབྲིང་པོ་དག་ནི་བརྒྱད་ཀྱི་ཡིན་ཏེ། རྣམ་པ་སྔ་མ་ཆུང་ངུའི་ཆུང་དུ་མ་གཏོགས་པའིའོ། །ལུགས་ནི་དེ་ལྟའོ་ཞེས་བྱ་བ་ནི། ཇི་ལྟར་ཆུང་ངུ་དང་འབྲིང་སྔ་མ་བྲི་ཞིང་ཕྱི་མ་དེ་དག་གི་རྒྱུ་ཡིན་པ་དེ་བཞིན་དུ། ཆུང་ངུའི་ཆེན་པོ་ལ་སོགས་པ་སྔ་མ་བྲི་ཞིང་ཕྱི་མ་དེ་དག་གི་རྒྱུ་ཡིན་པ་ནས་ཆེན་བོའི་ཆེན་པོའི་བར་དུ་དེ་དག་ཁོ་ནའི་ཡིན་ནོ། །སྐྱེ་བས་ཐོབ་པ་ནི་སྐྱེས་ནས་ཐོབ་པ་སྟེ། དེ་འདི་ལ་ཡོད་པས་ན་སྐྱེས་ནས་ཐོབ་པ་ཅན་ནོ། །སྐལ་པ་མཉམ་པའི་རྒྱུ་ཡིན་ཏེ་ཆུང་ངུའི་ཆུང་དུ་དག་གི་ཡིན་པ་ནས་ཆེན་པོའི་ཆེན་པོ་དག་ཏུ་ཆུང་ངུའི་ཆུང་དུ་དག་གི་བར་ཡིན་ནོ། །ཅི་ལྟར་ཡང་ཁྱད་པར་ཅན་དམན་པའི་རྒྱུར་འགྱུར་ཞེ་ན། སྐལ་བ་མཉམ་པའི་རྒྱུ་མངོན་པར་འདུ་བྱེད་པ་ཅན་གྱི་འབྲས་བུ་ནི་དམན་པ་ཡིན་པར་མི་འདོད་ཀྱི། རྒྱབ་ཀྱིས་ཕྱོགས་པ་སྲིད་པའི་ཕྱིར་ཕན་ཚུན་ཐམས་ཅད་ཀྱི་མ་ཡིན་ནོ། །ཁ་ཅིག་ན་རེ་ཕན་ཚུན་གྱི་རྒྱུ་ཞེས་ཟེར་རོ། །གཞན་དག་ན་རེ་ཐམས་ཅད་སེམས་གཅིག་གིས་དམིགས་སོ་ཞེས་ཟེར་རོ། །རྣམ་པར་སྨིན་པ་ཀུན་ཏུ་སྤྱོད་པ་རྣམ་པ་དགུ་ནི་རྣམ་པ་འདི་དགུ་ཉིད་དུ་མངོན་ནོ། །ཉོན་མོངས་པ་ཅན་རྣམས་ཀྱང་ཚུལ་འདི་ཉིད་ཀྱིས་ཏེ་རྣམ་པ་དགུ་པོ་ཐམས་ཅད་ཕན་ཚུན་སྐལ་བ་མཉམ་པའི་རྒྱུའོ། །ཉོན་མོངས་པ་རྣམས་ལ་ནི་གཉེན་པོ་རྣམ་པ་དགུ་ཉིད་ཀྱིས་ཀྱང་
རྣམ་པ་དགུར་མངོན་ནོ། །བཞི་པ་གསུམ་དང་གཉིས་དང༌། གཅིག་གི་ཞེས་བྱ་བ་ལ། རྣམ་པར་སྨིན་པ་ལས་སྐྱེས་པ་ནི་བཞི་རྣམས་ཀྱི་སྐལ་པ་མཉམ་པའི་རྒྱུ་ཡིན་ནོ། །སྤྱོད་ལམ་པ་ནི་གསུམ་གྱི་ཡིན་གྱི། རྣམ་པར་སྨིན་པ་ལས་སྐྱེས་པ་རྣམས་ཀྱིས་ནི་མ་ཡིན་ཏེ། དེ་དག་ནི་མངོན་པར་འདུ་བྱེད་པ་མ་ཡིན་པ་ཉིད་ཀྱིས་དམན་པའི་ཕྱིར་རོ་།བཟོའི་གནས་པ་ནི་གཉིས་དག་གིས་ཡིན་ཏེ། བཟོའི་གནས་པ་དང་སྤྲུལ་པ་པ་དག་གིའོ། །སྤྲུལ་པ་ནི་སྤྲུལ་པ་པ་རྣམས་ཁོ་ནའི་ཡིན་གྱི། ཅིག་ཤོས་ཀྱི་མ་ཡིན་ཏེ་དམན་པའི་ཕྱིར་རོ། །གཞན་དག་ན་རེ་རྒྱུ་གཞན་དག་ནི་ཕན་ཚུན་འཆིང་བས་བཅིངས་པའི་ཕྱིར་རོ་ཞེས་ཟེར་རོ། །ཨེ་ཏཙྪན་ཝརྞྱ་ཏེ་མ་བྷཱུཏ་བསམ་གཏན་དང་པོའི་ས་པ་རྣམས་དང་དྲོ་བ་ལ་སོགས་པ་ཕན་ཚུན་རྒྱུ་ཅན་ཉིད་དུ་ཐལ་བར་འགྱུར་ཞེས་ཟེར་རོ། །སྤྲུལ་པའི་སེམས་བསམ་གཏན་བཞིའི་འབྲས་བུ་འདོད་པ་ན་སྤྱོད་པ་ཡང་ཡིན་ཞེས་བྱ་བ་ལ། དེ་ཡང་རིམ་པ་བཞིན་དུ་བཞི་དང་གསུམ་དང་གཉིས་དང་གཅིག་དག་གི་འདི་ཡང་མ་ཡིན་བརྗོད་མ་གྱུར། སྐལ་པ་མཉམ་པའི་རྒྱུ་ཡིན་ནོ། །ཇི་ལྟར་ཞེ་ན། དེའི་ཕྱིར་དེ་ལ་བསམ་གཏན་གོང་མའི་འབྲས་བུ་ནི་ཞེས་བྱ་བ་རྒྱས་པར་སྨོས་སོ། །དེ་ཉིད་ལ་རྒྱུ་སྨྲས་པ་ནི་འབད་པ་འབྲས་བུ་མེད་པར་འགྱུར་དུ་འོང་བའི་ཕྱིར་ཞེས་བྱ་བ་རྒྱས་པར་འབྱུང་བའོ། །མངོན་པར་འདུ་བྱེད་པས་བསྐྱེད་པ་ནི་མངོན་པར་འདུ་བྱེད་པ་ཅན་ཏེ། དེ་དག་རྣམ་པ་བཞི་ཆར་ཡང་མངོན་པར་འདུ་བྱེད་པ་ཅན་ཡིན་ནོ། །བསམ་གཏན་གོང་མའི་འབྲས་བུ་ནི་བསམ་གཏན་འོག་མའི་འབྲས་བུ་བས་ཆེས་ཁྱད་པར་དུ་འཕགས་པ་ཡིན་པས་དེ་དེ་དག་གི་སྐལ་བ་མཉམ་པའི་རྒྱུ་ཡིན་གྱི། ལྷག་མ་རྣམས་ནི་དེའི་ཡིན་ཏེ་དམན་པའི་ཕྱིར་དང་སྔར་སྐྱེས་པའི་ཕྱིར་རོ། །དེ་ཉིད་ལ་དཔེ་ནི་སཱ་ལུ་དང་ནས་ལ་སོགས་པ་ལྟ་བུའོ་ཞེས་བྱ་བའོ། །དེ་དག་གི་འབྲས་བུ་ནི་མཉམ་པའམ་ལྷག་པ་ཡིན་ཏེ། སཱ་ལུའི་ས་བོན་གཅིག་ལས་འབྲས་བུ་གཅིག་གམ་དུ་མ་འབྱུང་གི་དམན་པ་ནི་མ་ཡིན་ནོ། །དེ་ཉིད་ཀྱི་ཕྱིར་ཞེས་བྱ་བ་ནི། གང་གི་ཕྱིར་སྐལ་བ་མཉམ་པའི་རྒྱུ་མངོན་པར་འདུ་བྱེད་པ་ཅན་གྱི་འབྲས་བུ་དམན་པ་མ་ཡིན་པའི་ཕྱིར་རོ། །ཟག་པ་མེད་པ་སྐྱེས་པ་ཞེས་བྱ་བ་རྒྱས་པར་འབྱུང་བ་ལ། སྡུག་བསྔལ་ལ་ཆོས་ཤེས་པ་ནི་སྐྱེས་ཀྱང་སྡུག་བསྔལ་ལ་ཆོས་ཤེས་པའི་བཟོད་པ་རང་གི་རིགས་ཅན་མ་འོངས་པ་རྣམས་ཀྱི་རྒྱུ་མ་
ཡིན་ཏེ་དམན་པའི་ཕྱིར་རོ། །སྡུག་བསྔལ་ལ་ཆོས་ཤེས་པ་ནི་སྡུག་བསྔལ་ལ་ཆོས་ཤེས་པའི་བཟོད་པ་རྣམས་ལས་ཁྱད་པར་ཅན་ཉིད་ཡིན་ཏེ། ཉོན་མོངས་པའི་བྲལ་བའི་ཐོབ་པ་དང་ལྷན་ཅིག་སྐྱེས་པའི་ཕྱིར་རོ། །དེ་བཞིན་དུ་ཇི་སྲིད་རྡོ་རྗེ་ལྟ་བུའི་གཞིའི་བར་དུ་རང་གི་རིགས་ཅན་ཁོ་ནའི་ཡིན་གྱི་ཐམས་ཅད་ཀྱི་རྒྱུ་མ་ཡིན་ནོ། །གང་གི་ཕྱིར་འདྲ་བ་འམ་འབྲས་བུ་ལྷག་པར་གྱུར་པས་རང་གི་རིགས་ཅན་ཁོ་ནའི་ཡིན་གྱི་དམན་པའི་རྒྱུར་མི་འགྱུར་ན་འོ་ན་ཅི་གཞན་གྱི་རིགས་ཅན་གྱི་ཡང་དམན་པ་ནི་དམན་པ་དང་ལྷག་པ་ཉིད་དབང་པོའི་སྒོ་དང་རྒྱུའི་སྒོ་ནས་འདོད་དེ། དེ་རྒྱུ་འབའ་ཞིག་གི་སྒོ་ནས་མ་ཡིན་པ་ཉིད་དོ། །རྒྱུད་གཅིག་ལ་ངེས་པ་ཞེས་བྱ་བ་རྒྱས་པར་འབྱུང་བ་ལ། སྡུག་བསྔལ་ལ་ཆོས་ཤེས་པའི་བཟོད་པ་མ་འོངས་པ་དག་ནི་སྡུག་བསྔལ་ལ་ཆོས་ཤེས་པ་མ་སྐྱེས་པའི་སྔར་སྡུག་བསྔལ་ལ་ཆོས་ཤེས་པའི་བཟོད་པའི་དུས་ཁོ་ནར་ཐོབ་པས་སྡུག་བསྔལ་ལ་ཆོས་ཤེས་པའི་སྔོན་དུ་ཐོབ་པ་ཡིན་ནོ། །སྡུག་བསྔལ་ལ་ཆོས་ཤེས་པ་དེ་དག་ཐོབ་ནས་གཟོད་སྐྱེ་བས་དེ་དག་ཐོབ་པ་བས་ཕྱིས་སྐྱེས་པ་ཡིན་ནོ། །སྡུག་བསྔལ་ལ་ཆོས་ཤེས་པའི་བཟོད་པ་སྔར་སྐྱེས་པ་གང་ཡིན་པ་དེ་ནི་དེའི་སྐལ་བ་མཉམ་པའི་རྒྱུར་འགྱུར་བ་ཁོ་ན་ཡིན་ཏེ། དེ་ཉིད་ཀྱི་ཕྱིར་སྔར་ཐོབ་པ་ཞེས་སྨོས་ཀྱི་སྔར་སྐྱེས་པ་ཞེས་ནི་མ་ཡིན་ནོ། །དེ་ཉིད་ལ་རྒྱུ་བཤད་པ་ནི་འདི་འབྲས་བུ་སྔ་བ་དང་ཞེས་བྱ་བ་རྒྱས་པར་འབྱུང་བ་སྟེ། གལ་ཏེ་འབྲས་བུ་ཆེས་སྔ་བར་གྱུར་ན་ནི་རྒྱུ་དོན་མེད་པར་འགྱུར་ལ། སྐལ་པ་མཉམ་པའི་རྒྱུ་མ་འོངས་པ་ན་ཡང་སྔ་ཕྱི་མེད་པའི་ཕྱིར་རྒྱུ་དང་འབྲས་བུ་དག་འཆོལ་བར་འགྱུར་རོ་ཞེས་སྔར་བཤད་ཟིན་ཏོ། །ཟག་པ་མེད་པའི་ཆོས་སྔར་སྐྱེས་བ་ཞེས་བྱ་བ་རྒྱས་པར་འབྱུང་བ་ལ། འདིས་ནི་འབྲས་བུ་སྔར་སྐྱེས་པ་ཉིད་དང༌། སྐལ་པ་མཉམ་པའི་རྒྱུ་མ་འོངས་པ་ཉིད་ཡོད་པ་མ་ཡིན་ནོ་སྙམ་སྟེ་དྲིས་པའོ། །འདི་ལྟ་སྟེ། འབྲས་བུ་གོང་མ་ལས་ཡོངས་སུ་ཉམས་ཞེས་བྱ་བ་ལ། འབྲས་བུ་གོང་མ་ནི་དགྲ་བཅོམ་པ་ཉིད་དམ། ཕྱིར་མི་འོང་བའི་འབྲས་བུའམ་ལན་ཅིག་ཕྱིར་འོང་བའི་འབྲས་བུའོ། །འབྲས་བུ་འོག་མ་མངོན་དུ་བྱེད་པའི་ཚེ་ཞེས་བྱ་བ་ལ་འོག་མ་ནི་ཕྱིར་མི་འོང་བའི་འབྲས་བུའམ། ལན་ཅིག་གཅིག་ཕྱིར་འོང་བའི་འབྲས་བུ་འམ། རྒྱུན་ཏུ་ཞུགས་པའི་འབྲས་བུའོ། །དེ་ལ་འབྲས་བུ་གོང་མ་
ལས་ཡོངས་སུ་ཉམས་པ་འབྲས་བུ་འོག་མ་མངོན་དུ་བྱེད་པའི་ཚེ་འབྲས་བུ་འོག་མའི་ལམ་སྔར་སྐྱེས་པ་ཡིན་ཡང་འབྲས་བུ་འོག་མས་བསྡུས་པའི་ལམ་ཕྱིས་སྐྱེས་པའི་སྐལ་པ་མཉམ་པའི་རྒྱུ་མ་ཡིན་པ་ལྟ་བུ་སྟེ། དེ་ནི་དམན་པའི་ཕྱིར་རོ། །སློབ་དཔོན་འདུས་བཟང་ན་རེ། འདི་ལ་ཡོངས་སུ་ཉམས་སྲིད་པ་ཡོད་དེ། དབང་པོ་བཀག་པའི་ཕྱིར་དང་ཟག་པ་མེད་པའི་ཆོས་མངོན་སུམ་དུ་བྱས་པའི་ཕྱིར་རོ་ཞེས་ཟེར་རོ། །བྱེ་བྲག་ཏུ་བྱས་པ་སྟེ་བརྗོད་པར་བྱའོ་ཞེས་བྱ་བ་ནི་དབང་པོའི་སྒོ་ནས་ཁྱད་པར་དུ་གྱུར་ཀྱང་འབྲས་བུ་ཕྱི་མའི་ལམ་དམན་པ་ཉིད་དོ། །གཞན་དུ་ན་འབྲས་བུ་སྔ་ཕྱིའི་ལམ་རྣམས་སྤང་བྱ་ཁྱད་པར་མེད་པར་འགྱུར་རོ། །དེའི་ཕྱིར་འབྲས་བུ་ཕྱི་མའི་ལམ་ནི་དབང་པོའི་སྒོ་ནས་ཁྱད་པར་དུ་གྱུར་ཀྱང་འབྲས་བུ་ཕྱི་མའི་ལམ་གྱི་སྐལ་བ་མཉམ་པའི་རྒྱུ་མ་ཡིན་ནོ། །སྡུག་བསྔལ་ལ་ཆོས་ཤེས་པའི་ཐོབ་པ་ཞེས་བྱ་བ་རྒྱས་པར་འབྱུང་བ་ལ་དེ་ཐོབ་པའི་སྡུག་བསྔལ་ལ་ཆོས་ཤེས་པ་དང་ལྷན་ཅིག་སྐྱེས་པ་སྟེ། དེ་ནི་སྡུག་བསྔལ་ལ་ཆོས་ཤེས་པའི་བཟོད་པའི་ཐོབ་པ། སྡུག་བསྔལ་ལ་རྗེས་སུ་ཤེས་པའི་བཟོད་པ་ལ་སོགས་པ་དང༌། ལྷན་ཅིག་སྐྱེས་པ་ཐམས་ཅད་ཀྱི་རྒྱུ་མ་ཡིན་པ་ལྟ་བུ་སྟེ་དེ་དག་ནི་ཕྱིས་སྐྱེས་མོད་ཀྱི། སྡུག་བསྔལ་ལ་ཆོས་ཤེས་པའི་ཐོབ་བབས་དམན་པ་ཁོ་ན་ཡིན་ནོ། །དེ་བཞིན་དུ་སྐད་ཅིག་མ་གོང་མ་གོང་མ་དང་ལྷན་ཅིག་སྐྱེས་པ་དག་ལ་ཡང་བརྗོད་པར་བྱའོ། །དེ་བཞིན་དུ་འཕགས་པའི་ལམ་ཐམས་ཅད་ལ་རིག་པར་བྱའོ། །འདིར་ཡང་འདི་སྐད་བསྟན་པར་འགྱུར་ཏེ། སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པ་རྣམས་ཆོས་མང་པོ་ཡིན་མོད་ཀྱི། སྐལ་བ་མཉམ་པ་ནི་རྒྱུས་རྒྱས་པ་ལས་བྱུང་བའི་ཕྱིར་རྒྱུས་ཆེས་ཆེར་རྒྱས་པ་དེ་ལྟ་ན་ཡང་དམན་པ་ཉིད་ཁོ་ནའོ། །དེ་ལྟ་ན་འོ་ན་རྒྱུས་རྒྱས་པའི་སྒོ་ནས་ཁྱད་པར་ཅན་ཉིད་དུ་བརྗོད་པར་མི་བྱའོ་ཞེ་ན། རྒྱུས་ཆེས་ཆེར་རྒྱས་པ་ཉིད་ནི་ཁྱད་པར་དུ་འཕགས་པ་ཉིད་དེ། ཀཱ་ཤཱ་དི་ཏི། ཐོབ་པ་རྣམས་ནི་ཆོས་ཀྱི་དབང་གིས་བཞག་གེ། །ཆོས་ཤེས་པའི་བཟོད་པ་ཡང་སྐལ་པ་མཉམ་པའི་རྒྱུ་མེད་པར་སྐྱེ་བས་སྡུག་བསྔལ་ལ་ཆོས་ཤེས་པ་དམན་པ་མ་ཡིན་པ་ཉིད་དེ། དེའི་ཐོབ་པ་སྡུག་བསྔལ་ལ་ཆོས་ཤེས་པའི་ཐོབ་པ་ལས་དམན་པས་སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པའི་སྐལ་བ་མཉམ་
བའི་རྒྱུ་མ་ཡིན་ནོ། །སྡུག་བསྔལ་ལ་ཆོས་ཤེས་པའི་བཟོད་བ་མ་འོངས་པ་ཡང་སྡུག་བསྔལ་ལ་ཆོས་ཤེས་པ་མ་འོངས་པ་ལས་དམན་བ་མ་ཡིན་ནོ། །དེ་ལྟ་ན་མ་འོངས་པའི་སྡུག་བསྔལ་ལ་ཆོས་ཤེས་པའི་བཟོད་པ་རྣམས་སྡུག་བསྔལ་ལ་ཆོས་ཤེས་པའི་བཟོད་པ་ཁོ་ནའི་སྐལ་པ་མཉམ་པའི་རྒྱུའོ། །སྡུག་བསྔལ་ལ་ཆོས་ཤེས་པའི་ནི་སྡུག་བསྔལ་ལ་ཆོས་ཤེས་པའི་བཟོད་པ་དང༌། སྡུག་བསྔལ་ལ་ཆོས་ཤེས་པ་ཡང་མ་ཡིན་ནོ། །སྐལ་བ་མཉམ་པའི་རྒྱུ་འདི་ནི་འབྲས་བུ་ཨན་བ་སི་ཏ་འབྱིན་པར་ནུས་ཏེ། རྣམ་པར་སྨིན་པའི་རྒྱུ་ལྟར་འབྲས་བུ་འབྱིན་པ་སོ་སོར་བསྟན་པ་མ་ཡིན་ནོ། །སྐལ་བ་མཉམ་པའི་རྒྱུ་འབྲས་བུ་ལ་ཉེ་བར་མི་སྦྱོར་བ་ན་དགྲ་བཅོམ་པ་རྣམས་ཡོངས་སུ་མྱ་ངན་ལས་འདའོ། །སྐལ་བ་མཉམ་པའི་རྒྱུ་ཡོད་པས་ངེས་པར་དེ་འབྲས་བུ་སྐྱེད་པ་མ་ཡིན་ཏེ། སྐལ་པ་མཉམ་པའི་རྒྱུ་འགའ་ཞིག་ཡོད་ཀྱང་གེགས་ཀྱིས་དུས་གཞན་ནམ་འབྲས་བུ་གཏན་མི་སྐྱེ་བ་ཡང་ཡོད་དོ། །སྐལ་པ་མཉམ་པའི་རྒྱུ་བཤད་ཟིན་ཏོ།། །།མཚུངས་ལྡན་རྒྱུ་ནི་སེམས་དག་དང༌། །སེམས་བྱུང་ཞེས་བྱ་བ་ལ། ནི་ཞེས་བྱ་བའི་སྒྲ་ནི་མཚུངས་པར་ལྡན་པའི་རྒྱུ་ནི་སེམས་དང་སེམས་ལས་བྱུང་བ་ཁོ་ནའོ་ཞེས་ངེས་པར་གཟུང་བ་སྟེ། རྣམ་པ་གཞན་དུ་ངེས་པར་གཟུང་བ་ནི་སེམས་དང་སེམས་ལས་བྱུང་བ་རྣམས་ལ་ལྷན་ཅིག་འབྱུང་བའི་རྒྱུ་ལ་སོགས་པ་བཀག་བ་མི་འདོད་པར་ཐལ་བར་འགྱུར་རོ། །དེ་ལྟ་ན་ནི་དུས་དང་རྒྱུ་ཐ་དད་པ་ལས་སྐྱེས་བ་རྣམས་ཞེས་བྱ་བ་རྒྱས་པར་འབྱུང་ངོ༌། །འོ་ན་ནི་དམིགས་པ་གཅིག་པ་དག་ཡིན་ནོ་ཞེས་བྱ་བ་ལ། དེ་ལྟ་ན་དུས་དང་རྒྱུད་ཐ་དད་པ་ལ་སྐྱེས་བ་རྣམས་རྣམ་པ་ཐ་དད་པ་དང་དམིགས་པ་ཐ་དད་པའི་ཕྱིར་མཚུངས་པར་ལྡན་པའི་རྒྱུ་ཉིད་དུ་ཐལ་བར་འགྱུར་བ་ལྡོག་པ་ཡིན་ནོ། །དེ་ལྟ་ན་ཡང་དེ་ཉིད་དུ་ཐལ་བར་འགྱུར་རོ་ཞེས་བྱ་བ་ནི་རྒྱུ་དང་དུས་ཐ་དད་པ་ལས་སྐྱེས་པ་རྣམས་ཞེས་བྱ་བ་ལ་སོགས་པ་གང་སྔར་སྨྲས་པའོ། །འདི་ལྟར་དུས་དང་རྒྱུ་ཐ་དད་པ་ལས་སྐྱེས་བ་ནི་རྣམ་པ་དང་དམིགས་པ་གཅིག་པ་དང༌། དམིགས་པ་དང་རྣམ་པ་ཐ་དད་པ་དག་གོ །དེ་ལ་རྣམ་པ་དང་དམིགས་པ་གཅིག་པ་དག་ཅེས་བྱ་བ་སྨོས་པས་ནི་རྣམ་པ་དང་དམིགས་པ་ཐ་དད་པ་བཀག་གོ །ཅིག་ཤོས་ནི་མ་བཀག་པས་ཐལ་བ་དེ་ཉིད་དུ་འགྱུར་རོ། །
འོ་ན་ནི་དུས་གཅིག་པ་དག་ཡིན་ནོ་ཞེས་བྱ་བ་འབྱུང་ངོ༌། །དེ་ལྟ་ན་ཡང་རྒྱུད་ཐ་དད་པ་ལས་སྐྱེས་ཤིང་དུས་ཐ་མི་དད་པ་རྣམས་ལ་ཡང་ཐལ་བར་འགྱུར་ཏེ། མང་པོ་རྣམས་ཟླ་བ་ཚེས་བ་ལ་སོགས་བ་ལ་ལྟ་བ་དག་གི་ལྟ་བུ་རྒྱུད་ཐ་དད་བ་ལས་སྐྱེས་པ། དུས་གཅིག་ཅིང་རྣམ་པ་དང་དམིགས་པ་གཅིག་པ་དག་ལ་ཡང་ཐལ་བར་འགྱུར་རོ། །གང་གི་ཕྱིར་ཁྱད་པར་དེ་དག་གིས་ནི་གཞན་དུ་ཐལ་བར་འགྱུར་བ་དེ་ལྟ་བས་ན་རྟེན་མཚུངས་ཅན་རྣམས་སོ། །རྒྱུད་ཐ་དད་པ་རྣམས་ཀྱང་རིགས་ཀྱི་སྒོ་ནས་རྟེན་མིག་ལ་སོགས་པ་མཚུངས་པ་ཅན་ཡིན་པས་དེ་ལས་ཁྱད་དུ་བྱ་བའི་ཕྱིར་མཚུངས་པ་ཞེས་བྱ་བ་ནི་ཐ་མི་དད་པ་སྟེ་ཞེས་བྱ་བ་སྨོས་ཏེ། འདིས་ནི་སྐད་ཅིག་མའི་དབང་དུ་བྱས་ནས་མཚུངས་པ་ཉིད་དུ་འདོད་ཀྱི། རིགས་ཀྱི་དབང་དུ་བྱས་ནས་ནི་མ་ཡིན་ནོ་ཞེས་སྟོན་ཏེ། དེ་ཉིད་ཀྱི་ཕྱིར་འདི་ལྟ་སྟེ་ཞེས་བྱ་བ་རྒྱས་པར་འབྱུང་ངོ༌། །སློབ་དཔོན་འདུས་བཟང་ན་རེ། རྟེན་མཚུངས་པ་ཞེས་བྱ་བ་ལ་འདི་སྐད་ཅིག་གཅིག་གིས་རྟེན་མཚུངས་པ་དང༌། ཡང་རྣམ་པ་གཅིག་གིས་རྟེན་མཚུངས་པ་ཞེས་བྱ་བ་འདི་ཅི་ལྟར་ཤེས་བར་བྱ། གལ་ཏེ་དེ་རྣམས་རྣམ་པར་བཤད་དོ་ཞེ་ན། སྔར་མདོ་ཉིད་དུ། མཚུངས་ལྡན་རྒྱུ་ནི་སེམས་དག་དང༌། སེམས་བྱུང་ཞེས་མཚུངས་ལྡན་གསུངས་པའི་ཕྱིར་འདི་ཉིད་དུ་ཐལ་བར་འགྱུར་བ་མེད་དོ། །དུས་དང་རྒྱུད་ཐ་དད་དུ་སྐྱེས་པ་རྣམས་ལ་མཚུངས་པར་ལྡན་པ་ཡོད་བ་མ་ཡིན་ནོ་ཞེ་ན། རྟེན་མཚུངས་པ་ཞེས་བྱ་བ་གང་དག་གི་རྟེན་ཁོ་ན་མཚུངས་ཤིང་ཐ་དད་པ་ཡང་མ་ཡིན་པ་དེ་དག་རྟེན་མཚུངས་རྣམས་སོ། །རྣམ་པ་སྨོས་ནི་རྫས་ཀྱི་སྒོ་ནས་ཐ་དད་པ་ཡང་སྟེ། འདི་རྣམས་ཀྱི་རྟེན་ཡིན་པས་རྣམ་པ་ཡོངས་སུ་མི་གཟུང་ངོ༌། །མཚུངས་ལྡན་རྒྱུ་ནི་སེམས་དགེ་དང༌། །སེམས་བྱུང་ཞེས་བྱ་བའི་མཚན་ཉིད་དེ་ཡང་ཁྱད་པར་ཅན་མེད་བར་ཁྱད་པར་བཞག་པར་མི་ནུས་པས་རྟེན་མཚུངས་ཞེས་བརྗོད་དོ། །རིགས་མཚུངས་པ་ནི་རྫས་མཉམ་པར་འཛིན་པ་སོ་སོར་འཇོག་པ་སྟེ། སེམས་དང་སེམས་ལས་བྱུང་བ་མཚུངས་པར་ལྡན་པའི་རྒྱུ་སྟེ། འདིར་ཡང་ཁྱད་པར་ནི་རྟེན་མཚུངས་པ་ཉིད་ཀྱིས་རྟོགས་བར་བྱའི་རྣམ་པ་གཞན་དུ་མ་ཡིན་ནོ་ཞེས་ཟེར་རོ། །ཡང་མཚུངས་པར་ལྡན་པ་དང༌། ལྷན་ཅིག་འབྱུང་བའི་རྒྱུ་ལ་ཐ་དད་དུ་བྱ་བ་ཅི་ཡོད་ཅེས་ཁོང་ན་ཡོད་པའི་དྲི་བ་གཏན་ལ་དབབ་པར་བྱ་བའི་ཕྱིར། མཚུངས་པར་ལྡན་
པའི་རྒྱུ་གང་ཡིན་པ་དེ་ནི་ལྷན་ཅིག་འབྱུང་བའི་རྒྱུ་ཡང་ཡིན་ནོ་ཞེས་བྱ་བ་སྨོས་སོ། །ལྷན་ཅིག་འབྱུང་བའི་རྒྱུ་ནི། མཚུངས་པར་ལྡན་པའི་རྒྱུ་མ་ཡིན་པ་ཡོད་དེ། སེམས་ཀྱི་རྗེས་སུ་འཇུག་པའི་གཟུགས་དང༌། སྐྱེ་བ་ལ་སོགས་པ་དག་དང་འབྱུང་བ་ཆེན་པོ་རྣམས་སོ། །མཚུངས་པར་ལྡན་པའི་རྒྱུ་གང་ཡིན་པ་ཁོ་ན་ལྷན་ཅིག་འབྱུང་བའི་རྒྱུ་ཡིན་ནོ། །དེ་ལ་རྫས་ཁྱད་པར་མེད་པས་འདྲི་བ་ནི་ཡང་དོན་གང་གིས་ཞེས་བྱ་བ་ལ་སོགས་པའོ། །ཕན་ཚུན་འབྲས་བུའི་དོན་གྱིས་ན་ཞེས་བྱ་བ་རྒྱས་པར་འབྱུང་བ་ལ། ཇི་ལྟར་འགྲོན་པོ་རྣམས་ཕན་ཚུན་གྱི་སྟོབས་ཀྱིས་ལྷན་ཅིག་ལམ་དུ་འགྲོ་བ་དེ་བཞིན་དུ། སེམས་དང་སེམས་ལས་བྱུང་བ་རྣམས་ཀྱང་ཕན་ཚུན་གྱི་སྟོབས་ཀྱིས་སྐྱེ་བའི་ཕྱིར་ཕན་ཚུན་འབྲས་བུ་ཉིད་དུ་འདོད་ལ། ཕན་ཚུན་འབྲས་བུ་ཉིད་ཀྱིས་ཀྱང་ལྷན་ཅིག་འབྱུང་བའི་རྒྱུར་འདོད་དོ། །མཚུངས་པ་ལྔས་ཞེས་བྱ་བ་ནི་རྟེན་དང༌། དམིགས་དང༌། རྣམ་པ་དང༌། དུས་དང༌། རྫས་མཚུངས་པའི་རྣམ་པ་དག་གིས་སོ། །མཚུངས་པར་ལྡན་པའི་དོན་གྱིས་ཞེས་བྱ་བ་ནི་མཚུངས་པར་འཇུག་པའི་དོན་གྱིས་ཏེ། ཇི་ལྟར་འགྲོན་པོ་ཕན་ཚུན་གྱི་སྟོབས་ཀྱིས་ལམ་དུ་འགྲོ་བ་དེ་དག་ཟས་དང༌། བཏུང་བ་དང༌། ཁྲུས་དང༌། མལ་དང༌། སྟན་ལ་སོགས་པ་ཡོངས་སུ་ལོངས་སྤྱོད་པའི་བྱ་བ་ལ་འདྲ་བར་སྤྱོད་པ་དེ་བཞིན་དུ་སེམས་དང་སེམས་ལས་བྱུང་བ་རྣམས་ཀྱང་མ་འོངས་པའི་དུས་ནས་ད་ལྟ་བའི་དུས་སུ་འོང་བ་གཅིག་མེད་ན་ཡང་ཐམས་ཅད་མཚུངས་པར་མི་ལྡན་པས་འདི་ནི་དེ་དག་གི་རྒྱུའི་དངོས་པོ་ཡིན་ཏེ་དེ་ཡོད་ན་ཡོད་པའི་ཕྱིར་རོ། །གཞན་དག་ན་རེ། དངོས་བོ་མི་ལྡན་པ་མེད་པའི་ཕྱིར་མཚུངས་པར་ལྡན་པའི་འབྲས་བུ་གཅིག་པའི་དོན་གྱིས་ལྷན་ཅིག་འབྱུང་བའི་རྒྱུ་དང་ཕན་ཚུན་འབྲས་བུ་བསྐྱེད་པས་རབ་ཏུ་ཕྱེ་བའམ། ལྷན་ཅིག་འབྱུང་བའི་རྒྱུ་དང་དམིགས་པ་གཅིག་པར་སྦྱོར་བས་རབ་ཏུ་ཕྱེ་བ་ནི་མཚུངས་པར་ལྡན་པའི་རྒྱུའོ་ཞེས་ཟེར་རོ། །མཚུངས་པར་ལྡན་བའི་རྒྱུ་བཤད་ཟིན་ཏོ།། །།ཀུན་འགྲོ་ཞེས་བྱ་ཉོན་མོངས་ཅན། །རྣམས་ཀྱི་ཞེས་བྱ་བ་ལ། ཉོན་མོངས་པ་སྨོས་པ་ནི་སྐལ་པ་མཉམ་པའི་རྒྱུ་ལས་ཁྱད་པར་དུ་བྱ་བའི་ཕྱིར་ཏེ། དེ་ནི་ཉོན་མོངས་པ་ཅན་རྣམས་དང་ཉོན་མོངས་པ་ཅན་མ་ཡིན་པ་རྣམས་ཀྱི་ཡིན་གྱི་འདི་ནི་ཉོན་མོངས་
པ་ཅན་ཁོ་ནའི་ཡིན་ནོ། །དེ་ལྟ་ཡིན་ན་གཞན་གྱི་ས་པ་དང༌། མ་འོངས་པ་དང༌། ཕྱིས་སྐྱེས་པ་དང༌། ལྷན་ཅིག་སྐྱེས་པ་ཡང་ཀུན་ཏུ་འགྲོ་བའི་རྒྱུར་ཐལ་བར་འགྱུར་རོ། །ཉོན་མོངས་པ་ཅན་རྣམས་ཀྱི་ཞེས་ཁྱད་པར་གྱི་ཚིག་མེད་པ་དེའི་ཕྱིར། རང་ས་ཀུན་འགྲོ་སྔ་ཞེས་བྱ་བ་སྨོས་སོ། །འདི་སྐལ་བ་མཉམ་པའི་རྒྱུ་བཞིན་དུ་རང་གི་རིས་སྨོས་པ་ནི་མ་བྱས་ཏེ། འདི་ལྟར་འདི་ནི་ཉོན་མོངས་པ་ཅན་གྱི་ཐུན་མོང་པའི་རྒྱུ་ཡིན་པ་ཉིད་ཀྱིས་སྐལ་བ་མཉམ་པའི་རྒྱུ་ལས་ཁྱད་པར་དུ་གྱུར་པའི་ཕྱིར་རོ། །དེ་དག་ཀྱང་འོག་ནས་ཞེས་བྱ་བ་རྒྱས་པར་འབྱུང་བ་ལ། དེ་དག་ཀྱང༌། སྡུག་བསྔལ་རྒྱུ་མཐོང་སྤང་བྱ་བ། ལྟ་དང་དེ་བཞིན་ཐེ་ཚོམ་མེད། །གང་དེ་ལྷན་ཅིག་མ་འདྲེས་པའི། །མ་རིག་གང་ཡིན་ཀུན་ཏུ་འགྲོ། །ཞེས་བྱ་བ་སྟེ། དངོས་པོ་རིས་ལྔ་པོ་ཐམས་ཅད་ཀྱང་དམིགས་པར་འགྱུར་བའམ། ཉོན་མོངས་པའི་ཚོགས་ཐམས་ཅད་ཀྱི་རྒྱུའི་དངོས་པོར་འགྱུར་བས་ན་ཀུན་ཏུ་འགྲོ་བ་རྣམས་སོ། །དེ་ཉིད་ཀྱི་ཕྱིར་འདི་ནི་ཉོན་མོངས་པ་ཅན་གྱི་ཆོས་ཀྱི་ཐུན་མོང་གི་རྒྱུ་ཉིད་ཡིན་པས་སྐལ་པ་མཉམ་པའི་རྒྱུ་ལས་ལོགས་ཤིག་ཏུ་རྣམ་པར་གཞག་གོ །རིས་གཞན་དག་གི་ཡང་ཞེས་བྱ་བ་འདིས་ནི་འདི་ཉོན་མོངས་པ་ཅན་གྱི་ཆོས་ཀྱི་ཐུན་མོང་གི་རྒྱུ་ཉིད་དུ་རྟོགས་པར་བྱེད་དོ། །དེ་ལ་ཀུན་འབྱུང་དང། འགོག་པ་དང༌། ལམ་མཐོང་བ་དང༌། བསྒོམ་པས་སྤང་བར་བྱ་བ་རྣམས་ནི་ཀུན་ཏུ་འགྲོ་བའི་རྒྱུ་སྡུག་བསྔལ་མཐོང་བས་སྤང་བར་བྱ་བ་རིས་མཐུན་གཞན་ཡིན་ལ། དེ་བཞིན་དུ་གང་དག་ཀུན་འབྱུང་མཐོང་བས་སྤང་བར་བྱ་བ་ལས་གཞན་པ་དེ་དག་ཀྱང་རིས་གཞན་ཡིན་ནོ། །དེའི་ཕྱིར་རིས་གཞན་པ་དེ་དག་གི་ཡང་རྒྱུ་ཡིན་པའི་ཕྱིར་ཏེ། ཡང་ཞེས་བྱ་བའི་སྒྲས་ནི་རང་གི་རིས་པ་རྣམས་ཀྱི་ཡང་ཡིན་ནོ་ཞེས་བྱ་བར་རྟོགས་སོ། །ཀུན་ཏུ་འགྲོ་བའི་རྒྱུ་སྔར་སྐྱེས་པ་ནི་རིས་ལྔ་ཆར་གྱི་ཉོན་མོངས་པ་ཅན་མ་སྐྱེས་པ་ཡང་རྒྱུ་མཐུན་པའི་འབྲས་བུ་ཉིད་དུ་ཡོངས་སུ་འཛིན་ཏེ། དེའི་ཕྱིར་དེ་དག་གི་མཐུན་ནི་ཞེས་བྱ་བ་རྒྱས་བར་འབྱུང་ངོ༌། །དེ་ལྟ་བས་ན་བཅོམ་ལྡན་འདས་ཀྱིས་ཀྱང་ཉོན་མོངས་པ་ཐམས་ཅད་ནི་འཇིག་ཚོགས་ལ་ལྟ་བའི་རྩ་བ་ཅན་ནོ། །འཇིག་ཚོགས་ལ་ལྟ་བ་ལས་སྐྱེས་པའོ། །འཇིག་ཚོགས་ལ་ལྟ་བའི་ཀུན་འབྱུང་བ་ཅན་ནོ་ཞེས་གསུངས་སོ། །གཞན་དག་ན་རེ། ལྷན་ཅིག་འབྱུང་
བའི་རྒྱུའི་ཕྱོགས་གཅིག་དང་མཚུངས་པར་ལྡན་པ་དང་སྐལ་པ་མཉམ་པའི་རྒྱུའི་ཕྱོགས་གཅིག་ནི་ཀུན་ཏུ་འགྲོ་བའི་རྒྱུའོ་ཞེས་ཟེར་རོ། །དེ་དག་གིས་ནི་འདི་སྐད་བཤད་པར་འགྱུར་ཏེ། ཀུན་ཏུ་འགྲོ་བའི་རྒྱུ་གང་ཡིན་པ་དེ་སྐལ་བ་མཉམ་པའི་རྒྱུ་ཡང་ཡིན་ནོ་ཞེས་བྱ་བའོ། །དེ་ནི་དེ་ལྟར་མ་ཡིན་ཏེ། ཧེ་ཏུ་སཾ་བྷེ་ད་པྲ་སཾ་གཱ་དཱ་སཾ་བྷིནྣ་པྲ་ཀཱ་རཱ་ཤྩ་ཧེ་ཏ་བཿ། ས་ཏྱ་པི་དྲ་བྱ་སཾ་བྷེ་དེ། འདི་ལྟར་རང་གི་རིགས་ཀྱི་སྲེད་པ་དང་འཇིག་ཚོགས་ལ་ལྟ་བ་དག་ཕན་ཚུན་རབ་ཏུ་འཇུག་པར་བྱེད་པ་ཉིད་ཡིན་ཀྱང་སྐལ་པ་མཉམ་པ་དང་ཀུན་ཏུ་འགྲོ་བའི་རྒྱུ་དག་ལ་བྱེ་བྲག་ཡོད་དོ། །སྲེད་པ་མཐའ་དག་མིགས་བའི་ཡུལ་ཡིན་པའི་རྒྱུ་འཆོལ་བ་ཐལ་བའི་ཕྱིར་མ་འདྲེས་རྣམ་པ་རྣམས་ཀྱང་རྒྱུ་རྣམས་ཡོད་ཀྱང་རྫས་འཆོལ་པ་ལ། ཕྱིར་ཨཱཏྨཱ་བྷི་ནི་བེ་ཤཿ་སྲེད་པ་རབ་ཏུ་འཇིག་ཅིང་ཐེ་ཚོམ་དུ་བྱེད་ཅིང་སྲིད་པ་ཉིད་འཇིག་ཚོགས་ལ་ལྟ་བ་མཐའ་དག་གི་དམིགས་པའི་ཡུལ་ཡིན་པས་བརྟན་པོར་བྱེད་པ་ལ་བདག་ཏུ་ལྟ་བ་དང་ཐེ་ཚོམ་དུ་བྱེད་དོ། །དེས་ན་ཀུན་ཏུ་འགྲོ་བ་རྣམས་ནི་ཉོན་མོངས་པ་ཐམས་ཅད་ཀྱི་དམིགས་པའི་ཡུལ་ཡིན་པའི་ཕྱིར་དང༌། བདག་མངོན་པར་ཞུགས་ཉོན་མོངས་པ་རྣམས་ཀྱི་རྒྱུ་བ་ཤིན་ཏུ་སྤངས་པར་གཏོད་པའི་ཕྱིར་རོ། །འཕགས་པ་རྣམས་ཀྱི་ཀུན་ཏུ་འགྲོ་བའི་རྒྱུ་སྤང་བའི་ཕྱིར་ལ། སྤང་བ་ཡང་རྒྱུའི་དངོས་པོར་མི་སྲིད་དོ་སྙམ་དུ་འདྲི་བ་ནི། ཅི་འཕགས་པའི་གང་ཟག་གི་ཞེས་བྱ་བ་རྒྱས་པར་སྨོས་སོ། །འཕགས་པའི་གང་ཟག་ནི་རྒྱུན་ཏུ་ཞུགས་པ་དང༌། ལན་ཅིག་ཕྱིར་འོང་པ་དང༌། ཕྱིར་མི་འོང་བ་རྣམས་ལ་མངོན་པར་འདོད་དོ། །དེ་དག་ལ་ཉོན་མོངས་པ་ཀུན་ཏུ་སྤྱོད་པ་སྲིད་པའི་ཕྱིར་རོ། །ཁ་ཆེ་བ་རྣམས་ན་རེ། ཉོན་མོངས་པ་ཅན་ཐམས་ཅད་ཀྱི་ཞེས་བྱ་བ་རྒྱས་པར་འབྱུང་སྟེ། དེ་དག་ནི་སྤངས་ཟིན་པའི་འཕགས་པའི་གནས་སྐབས་ནི་རྒྱུའི་དངོས་པོར་འགྱུར་བ་མི་རུང་སྟེ། འོ་ན་ཅི་ཞེ་ན། དེ་དག་ནི་སོ་སོ་སྐྱེ་བོའི་གནས་སྐབས་ཁོ་ནར་རྒྱུའི་དངོས་པོར་རྣམ་པར་གནས་པ་ཡིན་ཏེ། གང་ཞིག་གང་གི་རྒྱུ་ཡིན་པ་དེ་ནི་ནམ་ཡང་དེའི་རྒྱུ་མ་ཡིན་པ་མ་ཡིན་ནོ་ཞེས་བྱ་བས་དེ་དག་ནི་སྤངས་ཀྱང༌། དེ་དག་ནི་ཉོན་མོངས་པ་ཅན་གྱི་ཆོས་རྣམས་ཀྱི་རྒྱུ་ཉིད་དུ་བསྙད་དོ། །འདིར་ཀུན་ཏུ་འགྲོ་བའི་རྒྱུ་ཉོན་མོངས་པ་ཅན་གྱི་ཆོས་ཀྱི་ཐུན་མོང་གི་རྒྱུ་ཉིད་ཡིན་པའི་ཁུངས་ནི་འདི་ཡིན་ཏེ། འདིར་འཕགས་པའམ། སོ་སོ་སྐྱེ་བོའི་ཉོན་མོངས་
པ་ཅན་ཞེས་བྱ་བར་ཁྱད་པར་དུ་མ་བྱས་བ་དེའི་ཕྱིར་ན་འཕགས་པའི་ཡང་ཡིན་ནོ་ཞེས་བྱ་བར་རྟོགས་སོ། །མཐོང་བས་སྤང་བར་བྱ་བའི་རྒྱུ་ལས་བྱུང་བ་ཞེས་ཁྱད་པར་མེད་པ་ཡིན་ཡང་ཀུན་ཏུ་འགྲོ་བ་རྣམས་ཁོ་ན་གཟུང་ངོ༌། །དེ་བཞིན་དུ་རྣམ་པར་སྨིན་པས་ཁྱད་པར་མེད་པར་བརྗོད་དུ་ཟིན་ཀྱང་མི་དགེ་པ་རྣམས་ཁོ་ནའི་ཡིན་གྱི་ལུང་དུ་མ་བསྟན་པ་རྣམས་ཀྱི་ནི་མ་ཡིན་ནོ། །ལུང་དུ་མ་བསྟན་པའི་རྒྱུ་ལས་བྱུང་བའི་ཆོས་རྣམས་ཞེས་བྱ་བ་རྒྱས་པར་འབྱུང་བ་ལ། འདིར་ཡང་མི་དགེ་བ་རྣམས་སོ་ཞེས་བྱ་བ་འདི་ཁུངས་ཡིན་ནོ། །ལུང་དུ་མ་བསྟན་པ་ནི་འཇིག་ཚོགས་ལ་ལྟ་བ་དང་མཐར་འཛིན་པར་ལྟ་བ་གཉིས་ཏེ། དེ་དག་ཀྱང་ཁྱད་པར་མེད་པར་མི་དགེ་བའི་ཆོས་རྣམས་ཀྱི་རྒྱུའི་དངོས་པོར་བསྟན་པས་འཕགས་པའི་མི་དགེ་བའི་ཆོས་རྣམས་ཀྱང་འཇིག་ཚོགས་ལ་ལྟ་བ་དང་མཐར་འཛིན་པར་ལྟ་བའི་རྒྱུ་ལས་བྱུང་བ་ཡིན་ནོ་ཞེས་བྱ་བར་ངེས་པ་ཡིན་ནོ། །གཞན་ལུང་མ་བསྟན་མ་ཡིན་པའི་ཆོས་རྣམས་ནི་བྱེད་རྒྱུ་མ་གཏོགས་པར་རྒྱུ་གཞན་གྱིས་དགེ་བའི་ཆོས་རྣམས་ཀྱི་རྒྱུ་ཉིད་བྱེད་དེ་བྱེད་རྒྱུ་ཉིད་ཀྱང་ལུང་མ་བསྟན་གྱི་ཆོས་རྣམས་ནཱ་ནེ་བྷྱོ་བཱ་ཉི་ཤ་ཡཿལུང་དུ་མ་བསྟན་པའི་ཆོས་འདུས་བྱས་རྣམས་ཞེས་བྱ་བ་ལ། འདུས་བྱས་སྨོས་པ་ནི་ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་རྣམ་པར་གཅད་པར་བྱ་བའི་ཕྱིར་རོ། །ལུང་དུ་མ་བསྟན་པ་རྣམས་དང་ལུང་དུ་མ་བསྟན་པ་རྣམས་ཀྱི་ལྷན་ཅིག་འབྱུང་བ་དང་མཚུངས་པར་ལྡན་པ་དང་སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུ་རྣམས་ཀྱི་ཇི་ལྟར་སྲིད་པའི་རྒྱུར་འགྱུར་རོ། །ཀུན་ཏུ་འགྲོ་བའི་རྒྱུ་ནི་མ་ཡིན་ནོ། སྡུག་བསྔལ་གྱི་བདེན་པའི་འཇིག་ཚོགས་ལ་ལྟ་བའི་རྒྱུ་ཅན་ཡིན་ལ། འཇིག་ཚོགས་ལ་ལྟ་བའི་རྒྱུ་མ་ཡིན་པ་ཡང་ཡོད་དེ་ཞེས་བྱ་བ་ནས་རྒྱས་པར་འཇིག་ཚོགས་ལ་ལྟ་བ་དང་ཞེས་བྱ་བ་ལ་སོགས་པ་འབྱུང་བ་ལ། འདིར་རྒྱས་པར་ཞེས་བྱ་བ་སྨོས་པ་ནི་སྡུག་བསྔལ་གྱི་བདེན་པ་འཇིག་ཚོགས་ལ་ལྟ་བའི་རྒྱུ་ཅན་ཡིན་ལ། འཇིག་ཚོགས་ལ་ལྟ་བའི་རྒྱུས་ཡིན་པ་ཡང་ཡོད་དོ། །འཇིག་ཚོགས་ལ་ལྟ་བའི་རྒྱུ་ཡིན་ལ། འཇིག་ཚོགས་ལ་ལྟ་བའི་རྒྱུ་ཅན་མ་ཡིན་པ་ཡང་ཡོད། འཇིག་ཚོགས་ལ་ལྟ་བའི་རྒྱུ་ཅན་མ་ཡིན་ལ། འཇིག་ཚོགས་ལ་ལྟ་བའི་རྒྱུ་ཡང་ཡིན་པ་ཡོད་དོ། །འཇིག་ཚོགས་ལ་ལྟ་བའི་རྒྱུ་ཅན་མ་ཡིན་
ལ། འཇིག་ཚོགས་ལ་ལྟ་བའི་རྒྱུ་ཡང་མ་ཡིན་པ་ཡོད་དམ་ཞེ་ན། དེ་ལ་མུ་དང་པོ་ནི་སྡུག་བསྔལ་མཐོང་བས་སྤང་བར་བྱ་བའི་ཕྲ་རྒྱས་འདས་བ་དང་ད་ལྟར་བྱུང་བ་རྣམས་དང༌། དེ་དག་དང་མཚུངས་པར་ལྡན་པའི་སྡུག་བསྔལ་གྱི་བདེན་པ་མ་གཏོགས་པ་དང༌། ཀུན་འབྱུང་བ་མཐོང་བས་སྤང་བར་བྱ་བའི་ཕྲ་རྒྱས་ཀུན་ཏུ་འགྲོ་བ་འདས་པ་དང༌། ད་ལྟར་བྱུང་བ་རྣམས་དང༌། དེ་དག་དང་མཚུངས་པར་ལྡན་པའི་སྡུག་བསྔལ་གྱི་བདེན་པ་མ་གཏོགས་པ་དང༌། འཇིག་ཚོགས་ལ་ལྟ་བ་མ་འོངས་པ་དང༌། དེ་དག་དང་མཚུངས་པར་ལྡན་པའི་སྡུག་བསྔལ་གྱི་བདེན་པ་མ་གཏོགས་པ་དང༌། འཇིག་ཚོགས་ལ་ལྟ་བ་དེ་དང་མཚུངས་པར་ལྡན་པའི་ཆོས་སྐྱེ་བ་དང་རྒ་བ་དང་གནས་པ་དང་མི་རྟག་པ་དང་ཞེས་བྱ་བའི་གཞུང་འདི་འཕེན་པ་ཡིན་ནོ། །མ་གཏོགས་པ་དག་ལས་གཞན་པ་དེ་དག་གང་ཞེ་ན། ཀུན་འབྱུང་མཐོང་བས་སྤང་བར་བྱ་བ་མ་འོངས་པ་མཚུངས་པར་ལྡན་པ་དང་བཅས་པ་རྣམས་དང༌། སྡུག་བསྔལ་མཐོང་བས་སྤང་བར་བྱ་བ་མ་འོངས་པ་རྣམས་དང༌། ཀུན་འབྱུང་མཐོང་བས་སྤང་བར་བྱ་བ་ཀུན་ཏུ་འགྲོ་བ་མ་འོངས་པ་རྣམས་དང༌། འགོག་པ་དང་ལམ་མཐོང་བ་དང༌། བསྒོམ་པས་སྤང་བར་བྱ་བ་ཐམས་ཅད་ཁོ་ན་སྟེ། དེ་ནི་སྡུག་བསྔལ་གྱི་བདེན་པ་འཇིག་ཚོགས་ལ་ལྟ་བའི་རྒྱུ་ཅན་ཡིན་ལ། འཇིག་ཚོགས་ལ་ལྟ་བའི་རྒྱུ་མ་ཡིན་ནའོ། །དེ་ལ་འདིར་གསུམ་པའི་ཁུངས་འཕགས་པའི་གང་ཟག་གི་ཡང་ཉོན་མོངས་པ་ཅན་གྱི་ཆོས་ཀུན་ཏུ་འགྲོ་བའི་རྒྱུ་ཅན་ནོ་ཞེས་བསྒོམ་པས་སྤང་བར་བྱ་བ་རྣམས་ཁྱད་པར་དུ་མ་བྱས་ཏེ། འཇིག་ཚོགས་ལ་ལྟ་བའི་རྒྱུ་ཅན་ཉིད་དུ་བསྟན་པའི་ཕྱིར་རོ། །གལ་ཏེ་འཕགས་པའི་གང་ཟག་གི་ཉོན་མོངས་པ་ཅན་གྱི་ཆོས་རྣམས་ཀྱི་ཀུན་ཏུ་འགྲོ་བའི་རྒྱུ་ཅན་ཡིན་ན། འོ་ན་བཏགས་པའི་བཤད་པ་འདི་ཇི་ལྟར་དྲང་ཞེས་བྱ་བ་ནི་བསྟན་བཅོས་དང་འགལ་བར་སྟོན་ཏོ། །གལ་ཏེ་འཕགས་པའི་ཉོན་མོངས་པ་ཅན་གྱི་ཆོས་རྣམས་ཀྱང་ཀུན་ཏུ་འགྲོ་བའི་རྒྱུ་ལས་བྱུང་བ་ཡིན་ནའོ། །འདྲི་བའི་བསམ་པ་ནི་མི་དགེ་བ་ནི་མི་དགེ་བའི་རྒྱུ་ལས་བྱུང་བ་ཁོ་ནའོ་ཞེས་ངེས་པར་གཟུང་བའི་ཕྱིར་ན། ལུང་དུ་མ་བསྟན་པའི་རྒྱུ་ཅན་ནི་མ་ཡིན་ནོ་སྙམ་བའོ། །ཡོད་དེ་འཕགས་པའི་གང་ཟག་འདོད་པའི་འདོད་ཆགས་དང་བྲལ་བ་ལས་ཞེས་བྱ་བ་ལ་སོགས་པ་ལ་སེམས་པ་
དེའི་རྒྱུ་ནི་མི་དགེ་བ་འབའ་ཞིག་ཏུ་མ་ཟད་ཀྱི། འཇིག་ཚོགས་ལ་ལྟ་བ་དང་མཐར་འཛིན་པའི་ལྟ་བའི་བདག་ཉིད་ཅན་ལུང་དུ་མ་བསྟན་པ་ཡང་ཡིན་ནོ། །དེ་ནི་མི་དགེ་བ་དང་ལུང་དུ་མ་བསྟན་པའི་རྒྱུ་ཅན་ཉིད་ཀྱང་ཡིན་མོད་ཀྱང༌། དེ་ནི་རྒྱུ་མ་སྤངས་པ་ལ་དགོངས་ནས་གསུངས་པ་ཡིན་ནོ། །དེའི་རྒྱུ་ལུང་དུ་མ་བསྟན་པ་ཡང་སྤང་བ་ཡིན་ནོ། །མཐོང་བས་སྤང་བར་བྱ་བ་ཡོངས་སུ་གཏུགས་ཏེ་སྤང་བའི་ཕྱིར་ལ། མཐོང་བའི་ལམ་ལས་ཡོངས་སུ་ཉམས་པ་ཡང་མེད་པའི་ཕྱིར་རོ། །དེ་ནི་ཚུལ་བཞིན་མ་ཡིན་པ་ཡིད་ལ་བྱེད་པ་ལས་སྐྱེ་བ་ཡིན་ཏེ། དེའི་ཕྱིར་མི་དགེ་བ་འདོད་ཆགས་ལ་སོགས་པའི་བསྒོམ་པས་སྤང་བར་བྱ་བ་མ་སྤངས་པ་ལ་དགོངས་ནས་གསུངས་པ་ཡིན་ནོ། །དེ་ཇི་ལྟར་མ་སྤངས་ཤེ་ན། དེ་སྤངས་པ་ལས་ཡོངས་སུ་ཉམས་པའི་ཕྱིར་ཏེ། ལྷན་ཅིག་འབྱུང་བ་དང༌། མཚུངས་བར་ལྡན་པའི་རྒྱུས་བསྡུས་པའི་རྒྱུ་མི་དགེ་བ་ལ་དགོངས་ནས་དེ་སྐད་དུ་གསུངས་བས་བསྟན་བཅོས་དང་འགལ་བ་མེད་དོ། །ཀུན་ཏུ་འགྲོ་བའི་རྒྱུ་བཤད་ཟིན་ཏོ།། །།རྣམ་སྨིན་རྒྱུ་ནི་མི་དགེ་དང༌། །ཞེས་བྱ་བ་རྒྱས་པར་འབྱུང་བ་ལ། རྣམ་པར་སྨིན་པའི་རྒྱུ་ནི་དེ་དག་ཁོ་ན་ཡིན་ནོ་ཞེས་བྱ་བར་ངེས་བར་གཟུང་སྟེ། དེ་དག་རྣམ་པར་སྨིན་པའི་རྒྱུ་ཁོ་ནའོ་ཞེས་བྱ་བར་ནི་མ་ཡིན་ནོ། །ཟག་པ་དང་བཅས་པ་སྨོས་པ་ནི་ཟག་པ་མེད་པ་བསལ་བར་བྱ་བའི་ཕྱིར་རོ། །མི་དགེ་བ་ནི་ཟག་པ་དང་བཅས་པ་ཁོ་ན་ཡིན་པས་དེ་ལས་ཁྱད་པར་དུ་མ་བྱས་སོ། །ཡང་འདིར་རྒྱུའི་དོན་ཅི་ཞེ་ན། ཇི་ལྟར་ལས་ཉེ་བར་སོན་པས་སེམས་ཅན་རྣམས་ལས་ཀྱི་རྣམ་པར་འབྱེད་དེ། སེམས་ཅན་དམན་པ་རྣམས་ལ་དམན་པ་དང་བཟང་པོ་རྣམས་ལ་གྱ་ནོམ་པའོ་ཞེས་པ་ལྟ་བུའོ། །དང་གི་སྒྲ་ནི་རྒྱུ་ཐ་དད་ཀྱང་འབྲས་བུ་ཐ་མི་དད་པར་ཤེས་པར་བྱེད་པའི་ཕྱིར་རོ། །ངེས་པར་གཟུང་བ་ནི་ཐལ་བར་གྱུར་པ་ལས་རྣམ་པར་སྨིན་པའི་རྒྱུ་བཟློག་པར་བྱ་བའི་ཕྱིར་རོ། །ཁ་ཅིག་ནི་ཐམས་ཅད་རྣམ་པར་སྨིན་པ་ཞེས་སེམས་ཏེ། སྣང་བ་རྒྱ་ཆེན་པོ་ཅན་རྣམ་པར་སྨིན་པ་ཞེས་གསུངས་པའི་ཕྱིར། སྲེད་པའི་རྣམ་པར་སྨིན་པ་ཚོར་བའོ་ཞེ་ན། ཚིག་དེ་དེ་བཞིན་གཤེགས་པའི་གསུང་མ་ཡིན་ཏེ། གང་རྣམ་པར་སྨིན་པར་འགྱུར་བ་དེ་ཐམས་ཅད་ཀྱི་རྒྱུ་རྣམ་པར་སྨིན་པའི་རྒྱུ་ཞེས་བྱ་བར་འགྱུར་རོ། །སཱ་མཱ་སྟ་དྱ་ཏེ་ཨེ་ཏེ།
ཨཽ་བ་མྱ་ཏཱ་མིན་ནོ། །རྣམ་པར་སྨིན་པའི་སྒྲ་ཞེས་བྱ་བ་གང་ལས་ཀྱང་འདི་ཉིད་རྣམ་པར་སྨིན་པའི་རྒྱུ་གཞན་མ་ཡིན་ཞེས་བྱ། དེ་ཉིད་ཀྱི་ཕྱིར་རྣམ་པར་སྨིན་པའི་ཆོས་ཡིན་པའི་ཕྱིར་ཞེས་ཏེ། རྣམ་པར་སྨིན་པའི་སྐབས་ཡིན་པའི་ཕྱིར་ཞེས་བྱ་བའི་དོན་ཏོ། །གཞན་དག་རྣམ་པར་སྨིན་པའི་ཆོས་ཅན་འདི་མ་ཡིན་པར་བསྟན་པའི་ཕྱིར་དྲི་བ་ནི། ཅིའི་ཕྱིར་ལུང་དུ་མ་བསྟན་པའི་ཞེས་བྱ་བ་རྒྱས་པར་འབྱུང་བའོ། །ཇི་ལྟར་ས་བོན་རུལ་བ་དག་ནི་མངོན་པར་བརླན་ཡང་སྟོབས་ཆུང་བའི་ཕྱིར་མྱུ་གུའི་རྒྱུ་མ་ཡིན་པ་དེ་བཞིན་དུ་ལུང་དུ་མ་བསྟན་པ་ཡང་ཟག་པ་དང་བཅས་པའི་ཕྱིར། སྲེད་པས་མངོན་པར་བརླན་ཡང་སྟོབས་ཆུང་བའི་ཕྱིར་རྣམ་པར་སྨིན་པའི་རྒྱུ་མ་ཡིན་ནོ། །ཡང་ཇི་ལྟར་ས་བོན་གྲུང་པོ་ཆུ་དག་གིས་མངོན་པར་མ་བརླན་པ་མྱུ་གུའི་རྒྱུ་མ་ཡིན་པ་དེ་བཞིན་དུ་ཟག་པ་མེད་པ་རྣམས་ཀྱང་དགེ་བ་ཡིན་པའི་ཕྱིར། གྲུང་ཡང་སྲེད་པས་མངོན་པར་མ་བརླན་པའི་ཕྱིར་རྣམ་པར་སྨིན་པའི་རྒྱུ་མ་ཡིན་ནོ། །གཅིག་ནི་རང་གི་ནུས་པ་དང་བྲལ་བའི་ཕྱིར་རྣམ་པར་སྨིན་པའི་རྒྱུ་མ་ཡིན་ལ། ཅིག་ཤོས་ནི་ལྷན་ཅིག་སྐྱེས་པའི་རྐྱེན་མ་ཚང་བའི་ཕྱིར་རྣམ་པར་སྨིན་པའི་རྒྱུ་མ་ཡིན་ནོ། །ལྡན་པ་མ་ཡིན་པ་རྣམས་ཞེས་བྱ་བ་རྒྱས་པར་འབྱུང་བ་ལ། རྣམ་པར་སྨིན་པ་ནི་འདོད་པའི་ཁམས་ལ་སོགས་པའི་ཆོས་ཅན་ཡིན་པའི་ཕྱིར། གདོན་མི་ཟ་བར་འདོད་པའི་ཁམས་ལ་སོགས་པ་དང་ལྡན་པར་འགྱུར་ན། ལྡན་པ་མ་ཡིན་པ་ནི་རྣམ་པར་སྨིན་པ་དང་ལྡན་པའི་རྒྱུར་མི་རུང་སྟེ། ངེས་པའི་རྒྱུ་མེད་པའི་ཕྱིར་རོ། །ལྷག་མ་རྣམས་ཞེས་བྱ་བ་ནི་མི་དགེ་བ་དང་དགེ་བ་ཟག་པ་དང་བཅས་པ་དག་གོ །རྣམ་པ་གཉིས་ཀ་ཡིན་པའི་ཕྱིར་ཞེས་བྱ་བ་ལ། དགེ་བ་དང་མི་དགེ་བ་ཉིད་ཀྱིས་གྲུང་པོ་ཡིན་པའི་ཕྱིར། རང་གི་ནུས་པ་དང་ལྡན་ལ། སྲེད་པས་མངོན་པར་བརླན་པའི་ཕྱིར་ལྷན་ཅིག་བྱེད་པའི་རྐྱེན་དང་ལྡན་པ་ཡིན་ནོ། །གཉིས་ཀ་ལྟར་ཡང་རུང་ངོ་ཞེས་སྔར་བཤད་ཟིན་ཏོ་ཞེས་བྱ་བ་ལ། རྣམ་པར་སྨིན་པའི་རྒྱུ་ནི་རྣམ་པར་སྨིན་པའོ་ཞེས་ཚིག་བསྡུ་ན་ནི། རྒྱུའི་སྒྲ་མི་མངོན་པར་བྱས་པས་མིག་རྣམ་པར་སྨིན་པ་ལས་སྐྱེས་པ་ཡིན་ནོ་ཞེས་བྱ་བ་དང་མི་འགལ་ལོ། །ཡང་ན་རྣམ་པར་སྨིན་པ་ཉིད་རྒྱུ་ཡིན་པས་རྣམ་པར་སྨིན་པའི་རྒྱུ་ཡིན་ནོ་ཞེས་ཚིག་བསྡུ་ན་ཡང་འབྲས་བུའི་དུས་སུ་ཕྱིན་པའི་ལས་ལ་རྣམ་པར་སྨིན་
པར་འགྱུར་བས་ན། རྣམ་པར་སྨིན་པ་ཞེས་བྱ་སྟེ། དེ་ལྟ་ན་ལས་ཀྱི་རྣམ་པར་སྨིན་པ་ཞེས་བྱ་བ་དང་མི་འགལ་ལོ། །འབྲས་བུ་ནི་རྣམ་པར་སྨིན་པ་ཡིན་པས་རྣམ་པར་སྨིན་པ་ཞེས་བྱའི། རྣམ་པར་སྨིན་པར་འགྱུར་བས་ནི་མ་ཡིན་ནོ། །མི་འདྲ་བར་སྨིན་བ་ནི་ཞེས་བྱ་བ་ལ་རྣམ་པར་སྨིན་པའི་འབྲས་བུ་ནི་རྒྱུ་དང་མི་འདྲ་བའི་འབྲས་བུ་ཡིན་ནོ་ཞེས་བྱ་བའི་ཐ་ཚིག་གོ །འདི་ལྟར་རྒྱུ་ནི་མི་དགེ་བ་དང་དགེ་བ་ཐག་པ་དང་བཅས་པ་དག་ཡིན་ལ་འབྲས་བུ་ནི་ལུང་དུ་མ་བསྟན་པ་ཡིན་པས་རྒྱུ་དང་མི་འདྲ་བ་ཡིན་ནོ། །ལྷན་ཅིག་འབྱུང་བ་དང་མཚུངས་པར་ལྡན་པ་དང་སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུ་རྣམས་ལ་མི་འདྲ་བར་རྣམ་པར་སྨིན་པ་མེད་དོ། །བྱེད་པའི་རྒྱུ་ལ་ནི་འདྲ་བ་དང་མི་འདྲ་བ་གཉི་ག་ཅི་རིགས་པའོ། །རྣམ་པར་སྨིན་པའི་རྒྱུ་བཤད་པའི་སྒོ་ནས་འདོད་པའི་ཁམས་ན་རྣམ་པར་སྨིན་པའི་རྒྱུ་ཕུང་པོ་གཅིག་ལ་ཞེས་བྱ་བ་རྒྱས་པར་འབྱུང་བ་འདི་ཡང་བསྟན་པར་བྱའོ། །ཐོབ་པ་རྣམས་དང་དེ་དག་གི་སྐྱེ་བ་ལ་སོགས་པ་རྣམས་ནི་འདུ་བྱེད་ཀྱི་ཕུང་པོས་བསྡུས་པའི་ཕྱིར་ན་ཕུང་པོ་གཅིག་གོ །ཐོབ་པ་རྣམས་ཀྱི་འབྲས་བུ་གང་ཡིན་པ་དེ་ཉིད་དེ་དག་གི་སྐྱེ་བ་ལ་སོགས་པ་རྣམས་ཀྱི་ཡང་ཡིན་པས་འབྲས་བུ་གཅིག་གོ །ཐོབ་པ་རྣམས་ནི་ཐོབ་བ་དང་ལྡན་པ་དང་འབྲས་བུ་ཐ་དད་ཀྱི། མཚན་ཉིད་རྣམས་ནི་མ་ཡིན་ཏེ། མཚན་གཞི་དང༌། གཉིས་ལྷན་ཅིག་འབྱུང་བའི་རྒྱུ་ཡིན་པའི་ཕྱིར་རོ། །ཕུང་པོ་གཉིས་ལ་ཞེས་བྱ་བ་ལ། ལུས་དང་ངག་གི་ལས་དགེ་བ་དང་མི་དགེ་བ་ནི་གཟུགས་ཀྱི་ཕུང་པོ་ཡིན་ནོ། །དེ་དག་གི་སྐྱེ་བ་ལ་སོགས་པ་རྣམས་ནི་འདུ་བྱེད་ཀྱི་ཕུང་པོ་ཡིན་ནོ། །ལྷན་ཅིག་འབྱུང་བའི་རྒྱུ་ཡིན་པའི་ཕྱིར་ལུས་དང་ངག་གི་ལས་དང༌། དེ་དག་གི་སྐྱེ་བ་ལ་སོགས་པ་རྣམས་ཀྱི་རྣམ་པར་སྨིན་པའི་འབྲས་བུ་ནི་གཅིག་ཁོ་ན་ཡིན་ཏེ། འབྲས་བུ་ཐ་དད་ནི་ལྷན་ཅིག་འབྱུང་བའི་རྒྱུ་ཉིད་དུ་འགལ་བའི་ཕྱིར་རོ། །ཕུང་པོ་གསུམ་པ་ནི་ཁམས་གསུམ་ཀ་ན་ཡང་མེད་དེ། སེམས་དང་སེམས་ལས་བྱུང་བ་རྣམས་གདོན་མི་ཟ་བར་འབྲས་བུ་གཅིག་པ་ཡིན་པའི་ཕྱིར་རོ། །ཕུང་པོ་བཞི་ལ་ཞེས་བྱ་བ་ལ། སེམས་དང་སེམས་ལས་བྱུང་བ་དགེ་བ་དང་མི་དགེ་བ་དག་ནི་ཅི་རིགས་བར་ཕུང་པོ་བཞིས་བསྡུས་པ་ཡིན་ལ། དེ་དག་གི་སྐྱེ་བ་ལ་སོགས་པ་རྣམས་ནི་འདུ་བྱེད་ཀྱི་ཕུང་པོས་བསྡུས་
པ་ཡིན་ནོ། །འདོད་པའི་ཁམས་ན་མཉམ་པར་གཞག་པའི་སེམས་མེད་པས་རྗེས་སུ་འཇུག་པའི་སེམས་གཟུགས་མི་སྲིད་པའི་ཕྱིར་ཕུང་པོ་ལྔ་པོ་ནི་ཡོད་པ་མ་ཡིན་ནོ། །ཕུང་པོ་བཞི་པོ་བཞི་ཆར་གྱི་ཡང་རྣམ་པར་སྨིན་པའི་འབྲས་བུ་ནི་གཅིག་ཁོ་ནའི་ཡིན་གྱི་ཐ་དད་པ་ནི་མ་ཡིན་ནོ། །ལྷན་ཅིག་འབྱུང་བའི་རྒྱུ་མ་ཡིན་པའི་ཕྱིར་རོ། །གཞན་དག་ན་རེ་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་དག་གི་དེའི་སྐད་ཅིག་དང་དེའི་ཀུན་སློང་གི་སེམས་དང་སེམས་ལས་བྱུང་བ་རྣམས་འབྲས་བུ་གཅིག་གོ་ཞེས་ཟེར་རོ། །འདོད་པའི་ཁམས་ན་ཕུང་པོ་ལྔ་ཡང་ཡོད་པ་དེའི་ལྷན་ཅིག་འབྱུང་བའི་རྒྱུ་མ་ཡིན་པ་མེད་པའི་ཕྱིར་གཞན་ཉིད་དོ། །གང་གི་ཕྱིར་ལུས་དང་ངག་གི་ལས་རྣམ་པར་སྨིན་པ་ལས་གཞན་པ་དང༌། དེའི་ཀུན་ནས་སློང་བའི་སེམས་དང་སེམས་ལས་བྱུང་བ་རྣམས་སྐད་ཅིག་མ་རེ་རེ་བ་དག་ཁོ་ནའོ། །རེ་ཞིག་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་དག་འབྲས་བུ་ཐ་དད་དེ། རྣམ་པར་རིག་བྱེད་ཀྱི་ནི་རྡུལ་ཕྲ་རབ་རྣམས་སོ། །རྣམ་པར་རིག་བྱེད་མ་ཡིན་པའི་སྲོག་ཆགས་གསོད་པ་ལ་སོགས་པའི་རྫས་རྣམས་སོ། །སེམས་དང་སེམས་ལས་བྱུང་བ་རྣམས་ཀྱི་ནི་སྔར་བཤད་པ་ཉིད་དོ། །འདོད་པའི་ཁམས་རྣམ་པར་སྨིན་པའི་རྒྱུ་ཕུང་པོ་ལྔ་པ་མེད་དོ། །གཟུགས་ཀྱི་ཁམས་ན་ཞེས་བྱ་བ་རྒྱས་པར་འབྱུང་བ་ལ། ཐོབ་པ་སྐྱེ་བ་ལ་སོགས་པ་དང་བཅས་པ་དང་འདུ་ཤེས་མེད་པའི་སྙོམས་པར་འཇུག་པ་སྐྱེ་བ་ལ་སོགས་པ་དང་བཅས་པ་སྟེ། ཐོབ་པ་དང་འདུ་ཤེས་མེད་པའི་སྙོམས་པར་འཇུག་པ་གཉིས་དང༌། དེ་དག་གི་སྐྱེ་བ་ལ་སོགས་པ་རྣམས་ནི་འདུ་བྱེད་ཀྱི་ཕུང་པོས་བསྡུས་པའི་ཕྱིར་ཕུང་པོ་གཅིག་ཡིན་ལ། མཚན་ཉིད་དང་མཚན་གཞི་གཉིས་འབྲས་བུ་ཐ་མི་དད་པ་ཡིན་པའི་ཕྱིར་འབྲས་བུ་གཅིག་པ་ཡིན་ནོ། །ཕུང་པོ་གཉིས་པ་ནི་ཞེས་བྱ་བ་ལ། བསམ་གཏན་དང་པོ་ཁོ་ནའི་རྣམ་པར་རིག་བྱེད་དགེ་བ་ཡིན་གྱི། བསམ་གཏན་གཉིས་པ་ལ་སོགས་པ་དག་གི་ནི་མ་ཡིན་ཏེ། དེའི་ས་པའི་རྟོག་པ་དང་དཔྱོད་པ་མེད་པའི་ཕྱིར་ལ། ས་འོག་མ་པའི་མ་བསྒྲིབས་ལ་ལུང་དུ་མ་བསྟན་པ་རྣམས་ཁོ་ན་དེར་མངོན་དུ་བྱེད་པའི་ཕྱིར་རྣམ་པར་སྨིན་པ་མེད་དོ། །རྣམ་པར་རིག་བྱེད་ནི་
གཟུགས་ཀྱི་ཕུང་པོའོ། །དེའི་ཕྱིར་སྐྱེ་བ་ལ་སོགས་པ་དག་ནི་འདུ་བྱེད་ཀྱི་ཕུང་པོའོ། །མཉམ་པར་མ་བཞག་པ་ཞེས་བྱ་བ་ལ། དེ་ལ་རྗེས་སུ་འཇུག་པའི་ཕུང་པོ་བཞི་པའོ། །མཉམ་པར་གཞག་པ་ཞེས་བྱ་བ་ལ། དེ་ལ་རྗེས་སུ་འཇུག་པའི་གཟུགས་ཡོད་པའི་ཕྱིར་ཕུང་པོ་ལྔ་པའོ། །གཟུགས་མེད་པའི་ཁམས་ན་ཞེས་བྱ་བ་རྒྱས་པར་འབྱུང་བ་ལ། དེ་ན་གཟུགས་ཐམས་ཅད་མེད་པས་ཕུང་པོ་གཅིག་པ་འམ་བཞི་པ་ཡིན་གྱི་ཕུང་པོ་གཉིས་པ་ནི་མ་ཡིན་ནོ། །རྣམ་པར་སྨིན་པའི་རྒྱུ་དེ་ནི་རྣམ་པ་དགུ་ཡིན་ཏེ། ཁམས་གསུམ་ན་རིམ་བཞིན་དུ་རྣམ་པར་གསུམ་དང༌། བཞི་དང༌། གཉིས་ཡིན་པའི་ཕྱིར་རོ། །གང་གི་རྣམ་པར་སྨིན་པའི་ཆོས་ཀྱི་སྐྱེ་མཆེད་གཅིག་ཁོ་ན་ཞེས་བྱ་བ་རྒྱས་པར་འབྱུང་བ་ལ། ཁ་ཅིག་ན་རེ་རིས་མཐུན་པ་དང་སྲོག་གི་དབང་པོ་ནི་འཕེན་པར་བྱེད་པའི་ཕྱིར་ལས་ཀྱི་འབྲས་བུ་ཁོ་ན་ཡིན་ལ། གཞན་དག་ན་རེ་གདོན་མི་ཟ་བར་འཕེན་པར་བྱེད་པའི་ཡིན་པ་ཁོ་ནར་མ་ཟད་ཀྱི། རྫོགས་པར་བྱེད་པའི་ཡང་ཡིན་ཏེ། དེ་བས་ན་སྲོག་གི་དབང་པོ་གང་གི་རྣམ་པར་སྨིན་པ་ཡིན་པ་དེའི་ནི་རིས་མཐུན་པ་དང༌། དེའི་སྐྱེ་བལ་སོགས་པ་ཡང་ཡིན་པས་དེའི་རྣམ་པར་སྨིན་པ་ནི་ཆོས་ཀྱི་སྐྱེ་མཆེད་ཁོ་ན་ཡིན་ནོ་ཞེས་ཟེར་རོ། །གཞན་དག་ན་རེ་གཟུགས་མེད་པའི་ཁམས་སུ་སྐྱེས་པ་དགེ་བ་དང་ཉོན་མོངས་པ་ཅན་གྱི་སེམས་ཀུན་ཏུ་སྤྱོད་པའི་གནས་སུ་གྱུར་པའི་སྲོག་གི་དབང་པོ་མངོན་པར་འདོད་དེ། འདོད་པ་དང་གཟུགས་ཀྱི་ཁམས་དག་ན་ནི་གནས་སྐབས་ཐམས་ཅད་དུ་སྐྱེ་མཆེད་གཞན་དང་གཞན་ཡང་ཡོད་དོ་ཞེས་ཟེར་རོ། །གང་གི་ཡིད་ཀྱི་སྐྱེ་མཆེད་ཡིན་པ་དེའི་ནི་གཉིས་ཏེ་ཞེས་བྱ་བ་འབྱུང་སྟེ། དེ་ལ་རྣམ་པར་ཤེས་པ་ནི་ཡིད་ཀྱི་སྐྱེ་མཆེད་དོ། །ཚོར་བ་ལ་སོགས་པ་དང༌། དེ་དག་གི་སྐྱེ་བ་ལ་སོགས་པ་རྣམས་ཆོས་ཀྱི་སྐྱེ་མཆེད་དོ། །གང་གི་རེག་བྱའི་སྐྱེ་མཆེད་ཡིན་པ་ཡང་དེ་དང་འདྲའོ་ཞེས་བྱ་བ་ལ། རེག་བྱའི་སྐྱེ་མཆེད་དང༌། ཆོས་ཀྱི་སྐྱེ་མཆེད་དོ། །དེའི་སྐྱེ་བ་ལ་སོགས་པ་རྣམས་ཆོས་ཀྱི་སྐྱེ་མཆེད་ཀྱིས་བསྡུས་པའི་ཕྱིར་རོ། །འདིར་རེག་བྱའི་སྐྱེ་མཆེད་ནི་སེམས་ཅན་དུ་བགྲང་བ་ལ་རིག་པར་བྱའོ། །གང་གི་ཕྱིར་ལུས་ཀྱི་སྐྱེ་མཆེད་ཡིན་པ་དེའི་གསུམ་སྟེ། ལུས་ཀྱི་སྐྱེ་མཆེད་ནི་འབྱུང་བ་ལས་གྱུར་པ་ཡིན་ལ། དེ་ཡང་འབྱུང་བ་ལ་བལྟོས་པའི་ཕྱིར།
ལུས་ཀྱི་སྐྱེ་མཆེད་ནི་རེག་བྱའི་སྐྱེ་མཆེད་འབྱུང་བའི་བདག་ཉིད་ཅན་ལ་མི་ལྟོས་པ་མི་སྲིད་དོ། །དེའི་སྐྱེ་བ་ལ་སོགས་པ་རྣམས་ནི་ཆོས་ཀྱི་སྐྱེ་མཆེད་དོ། །གཞན་དག་ན་རེ་གཟུགས་ཀྱི་སྐྱེ་མཆེད་ཀྱང་ཡིན་ནོ་ཞེས་ཟེར་རོ། །གཞན་དག་ན་རེ་ལུས་ཀྱི་སྐྱེ་མཆེད་ནི་དེ་ལ་མི་འཁྲུལ་པའི་ཕྱིར་དང་འབྱུང་བབ་ནི་ཚན་ལ་བརྟེན་པའི་ཕྱིར་མ་ཡིན་ནོ་ཞེས་ཟེར་རོ། །གང་གི་གཟུགས་དང་དྲི་དང་རོའི་སྐྱེ་མཆེད་དག་ཡིན་པ་ཡང་དེ་དང་འདྲའོ་ཞེས་ཟེར་རོ། གཟུགས་ལ་སོགས་པ་རྣམས་ལས་ནི་གང་རུང་བ་ཞིག་གོ །དེ་དག་གི་རྟེན་འབྱུང་བ་ཆེན་པོ་དག་ནི་རེག་བྱའི་སྐྱེ་མཆེད་དོ། །དེ་དག་གི་སྐྱེ་བ་ལ་སོགས་པ་དག་ནི་ཆོས་ཀྱི་སྐྱེ་མཆེད་དོ། །མིག་ནི་ལུས་ལ་མི་འཁྲུལ་བའི་ཕྱིར་དང༌། སྐྱེ་བ་ལ་སོགས་པ་མཚན་ཉིད་ལ་མི་འཁྲུལ་བའི་ཕྱིར་ན། གང་གི་རྣམ་པར་སྨིན་པ་མིག་གི་སྐྱེ་མཆེད་ཡིན་པའི་ཕྱིར་དེའི་སྐྱེ་མཆེད་བཞི་ཡིན་ནོ། །གཞན་དག་ནི་གཟུགས་ཀྱི་སྐྱེ་མཆེད་ཀྱང་ངོ་ཞེས་ཟེར་རོ། །གཞན་དག་ནི་སྐྱེ་མཆེད་གཅིག་བཞིན་དུ་མི་འཁྲུལ་བའི་ཕྱིར་དང་འབྱུང་བ་བཞི་ཚན་གཞན་ལ་བརྟེན་པའི་གཟུགས་ཀྱི་སྐྱེ་མཆེད་མ་ཡིན་ནོ་ཞེས་ཟེར་རོ། །དེ་ལྟ་ན་ལུས་ཀྱི་སྐྱེ་མཆེད་ལ་ཡང་ཐལ་བར་འགྱུར་རོ་ཞེ་ན། དེ་ནི་མ་ཡིན་ཏེ་མིག་གི་སྐྱེ་མཆེད་ནི་ལུས་ཀྱི་སྐྱེ་མཆེད་ལ་རག་ལས་ཏེ་འཇུག་པའི་ཕྱིར་རོ། །གང་གི་རྣ་བ་དང་སྣ་དང་ལྕེའི་སྐྱེ་མཆེད་དག་ཡིན་པ་ཡང་དེ་འདྲའོ་ཞེས་བྱ་བ་ལ། དེ་དག་གི་ཚུལ་ཡང་མིག་གི་དབང་པོ་དང་འདྲ་སྟེ། དེ་དག་ཀྱང་འབྱུང་བ་ཆེན་པོ་ལ་བརྟེན་པའི་ཕྱིར་དང༌། སྐྱེ་བ་ལ་སོགས་པ་དང་ལྡན་པའི་ཕྱིར་དང། ལུས་ཀྱི་སྐྱེ་མཆེད་ལ་རག་ལས་ཏེ་འཇུག་པའི་ཕྱིར་རོ། །སྐྱེ་མཆེད་བཅུ་གཅིག་ནི་རྣམ་པར་སྨིན་པ་ཡིན་ལ། སྒྲ་ནི་མ་གཏོགས་ཏེ་དེ་རྣམ་པར་སྨིན་པ་མ་ཡིན་པའི་ཕྱིར་རོ། །ཡང་ལས་འགའ་ཞིག་གི་རྣམ་པར་སྨིན་པ་སྐྱེ་མཆེད་གཅིག་རྣམ་པར་སྨིན་པར་འགྱུར་ལ། འགའ་ཞིག་གིས་བཅུ་གཅིག་རྣམ་པར་སྨིན་པར་འགྱུར་བ་གང་ཡིན་པ་ལ་རྒྱུ་ཅི་ཡོད་ཅེ་ན། དེའི་ཕྱིར་ལས་ཀྱི་འབྲས་བུ་སྣ་ཚོགས་པ་དང་སྣ་ཚོགས་པ་མ་ཡིན་པའི་ཕྱིར་ཞེས་བྱ་བ་སྨོས་ཏེ། ཕྱིའི་ས་བོན་ལྟར་ནང་གི་ལས་ཀྱི་ས་བོན་ཡང་བལྟ་བར་བྱའོ། །འདི་ལྟར་པདྨའི་ས་བོན་རྣམས་རྩ་བ་དང༌། མྱུ་
གུ་དང་ལོ་མ་དང་སྡོང་བུ་དང་གེ་སར་དང་ཟེའུ་འབྲུ་དང་ལྟེ་བ་སྣ་ཚོགས་ཡིན་པ་དེ་བཞིན་དུ་ནས་དང་གྲོལ་སོགས་པ་དག་ནི་མ་ཡིན་ནོ། །ལས་དུས་གཅིག་པའི་ཞེས་བྱ་བ་རྒྱས་པར་འབྱུང་བ་ལ། ལས་འདས་པའི་རྣམ་པར་སྨིན་པ་འདས་བ་དང་མ་འོངས་པ་དང་ད་ལྟར་བྱུང་བ་ཡིན་ནོ། །ལས་དུས་གཉིས་པའི་ཞེས་བྱ་བ་ལ། འདས་པ་དང་ད་ལྟར་བའི་མ་འོངས་པ་མ་ཡིན་ནོ། །དེ་ཉིད་ལ་རྒྱུ་སྨྲས་བ་ནི། རྒྱུ་བས་འབྲས་བུ་ཧ་ཅང་ཉུང་བར་འགྱུར་བར་འོང་བའི་ཕྱིར་རོ་ཞེས་བྱ་བའོ། །བཟློག་བ་ནི་མ་ཡིན་ནོ་ཞེས་བྱ་བ་ལ། ལས་སྐད་ཅིག་མ་དུ་མའི་རྣམ་པར་སྨིན་པའི་སྐད་ཅིག་གཅིག་ནི་མ་ཡིན་ཏེ། རྒྱུ་བས་འབྲས་བུ་ཧ་ཅང་ཉུང་བར་འགྱུར་དུ་འོང་བའི་ཕྱིར་རོ། །རྣམ་པར་སྨིན་པ་ནི་ལས་དང་ལྷན་ཅིག་ཏུ་རྣམ་པར་སྨིན་པ་མ་ཡིན་ཏེ། ལྷན་ཅིག་སྐྱེས་པ་ལ་ནི་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་གཉིས་བྱེད་པ་དང་ལྡན་པའི་ཕྱིར་རོ། །རྣམ་པར་སྨིན་པའི་རྒྱུ་ནི་མི་འདྲ་བར་སྨིན་པ་ལ་བལྟོས་ཏེ། རྣམ་པར་གཞག་ན། དགེ་བ་དང་མི་དགེ་བའི་ཚོགས་པས་བསྡུས་པ་ནི་མི་འདྲ་བར་སྨིན་པ་ཡོད་པ་ཡང་མ་ཡིན་ནོ། །མིག་ལ་སོགས་པ་ནི་སྔོན་གྱི་ལས་ཀྱི་རྣམ་པར་སྨིན་པ་ཡིན་པའི་ཕྱིར་ལུང་དུ་མ་བསྟན་པ་སྟེ། སེམས་ཀྱང་དེའི་རྗེས་སུ་འཇུག་གོ །མཇུག་ཐོགས་སུ་ཡང་མ་ཡིན་ཏེ་ཞེས་བྱ་བ་ལ། རྣམ་པར་སྨིན་པ་རྣམ་པར་སྨིན་པ་མ་ཡིན་ཏེ་ཞེས་བྱ་བར་སྐབས་དང་སྦྱར་རོ། །ཅིའི་ཕྱིར་ཞེ་ན། མཚུངས་པ་དེ་མ་ཐག་པའི་རྐྱེན་གྱིས་དྲངས་པའི་ཕྱིར་རོ། །གང་གི་ཕྱིར་རྣམ་པར་སྨིན་པའི་རྒྱུའི་མཇུག་ཐོགས་ཀྱི་སྐད་ཅིག་མ་ནི་མཚུངས་བདེ་མ་ཐག་པའི་རྐྱེན་ཉིད་ཀྱིས་དྲངས་པ་ཡིན་གྱི། རྣམ་པར་སྨིན་པའི་རྒྱུ་ཉིད་ཀྱིས་ནི་མ་ཡིན་ཏེ། དེ་མཇུག་ཐོགས་སུ་དགེ་བ་དང་མི་དགེ་བ་སྐྱེ་བའི་ཕྱིར་རོ། །རྣམ་པར་སྨིན་པའི་རྒྱུ་ལས་ཞེས་བྱ་བ་ལ། གང་གི་ཕྱིར་རྣམ་པར་སྨིན་པ་ནི་དེ་ལྷན་ཅིག་ཏུ་སྨིན་པ་མ་ཡིན་ཞིང༌། མཇུག་ཐོགས་སུ་ཡང་མ་ཡིན་ཏེ། རྒྱུད་ཡོངས་སུ་འགྱུར་བའི་ཁྱད་པར་ལས་སྐྱེས་པའི་ཕྱིར་དང༌། རྣམ་པར་སྨིན་བདག་དུས་ཡོངས་སུ་ཆད་པ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་རྣམ་པར་སྨིན་པའི་འབྲས་བུ་སྟེ། གཞན་དག་ནི་རྒྱུད་ཡོངས་སུ་འགྱུར་བའི་ཁྱད་པར་ལས་སྐྱེས་པ་མེད་པའི་ཕྱིར་དང་འཁོར་བ་ཇི་སྲིད་པའི་འབྲས་བུ་མ་
ཡིན་པའི་ཕྱིར་རྣམ་པར་སྨིན་པར་ཐལ་བ་མེད་དོ། །འདི་དག་གི་དུས་ངེས་པ་དོན་གྱིས་ནི་བཤད་མོད་ཀྱི་ཞེས་བྱ་བ་ལ། ལྷན་ཅིག་འབྱུང་གང་ཕན་ཚུན་འབྲས་ཞེས་བྱེ་བྲག་མེད་པར་བརྗོད་པས་དེ་ནི་དུས་གསུམ་པ་ཡིན་ནོ་ཞེས་བྱ་བར་དོན་གྱིས་བཤད་དོ། །སྔར་སྐྱེས་རྣམས་ཞེས་བརྗོད་པས་སྐལ་པ་མཉམ་པའི་རྒྱུ་འདས་པ་དང་ད་ལྟར་བྱུང་བ་ཡིན་ནོ་ཞེས་བྱ་བར་བཤད་དོ། །སེམས་དང་སེམས་བྱུང་རྟེན་མཚུངས་རྣམས་ཞེས་བྱེ་བྲག་མེད་པར་བརྗོད་པ་དུས་གསུམ་པ་ཡིན་ནོ་ཞེས་བཤད་དོ། །ཀུན་འགྲོ་ལྔ་ཞེས་བརྗོད་པས་འདས་པ་དང་ད་ལྟར་བྱུང་བ་ཡིན་ནོ་ཞེས་བྱ་བར་བཤད་དོ། །མི་དགེ་བ་དང་དགེ་བ་ཟག་བཅས་རྣམས་ཁོ་ན་ཞེས་བྱེ་བྲག་མེད་པར་བརྗོད་པས་དེ་ནི་དུས་གསུམ་པ་མ་ཡིན་ནོ་ཞེས་བྱ་བར་དོན་གྱིས་བཤད་པ་ཡིན་ནོ། །རང་ལས་གཞན་བ་བྱེད་རྒྱུའི་རྒྱུ་ཞེས་བྱེ་བྲག་མེད་པར་བརྗོད་པས་བྱེད་རྒྱུ་དུས་གསུམ་པ་དང༌། དུས་ལས་རྣམ་པར་གྲོལ་བ་ཡིན་པར་དོན་གྱིས་བཤད་དོ། །འདིར་གཏན་ཚིགས་ནི་བཤད་ཟིན་ཏོ་ཞེས་བྱ་བ་ལ། གང་ཞིག་ཅེ་ན། རྒྱུ་མཐུན་པའི་འབྲས་བུས་འབྲས་བུ་དང་བཅས་པའི་ཕྱིར་ལ། དེ་ལ་མ་འོངས་པ་མེད་དོ། །རྒྱུ་དང་འབྲས་བུ་དག་ཕན་ཚུན་བལྟོས་ཏེ་འཇུག་པའི་ཕྱིར་འདྲི་བ་ནི། རྒྱུ་དེ་དག་གང་གི་ཡིན་པའི་ཞེས་བྱ་བ་རྒྱས་པར་འབྱུང་ངོ༌། །འདུས་བྱས་བྲལ་བཅས་འབྲས་བུ་ཡིན་ཞེས་བྱ་བ་ལ། ནམ་མཁའ་དང༌། སོ་སོར་བརྟགས་པ་མ་ཡིན་པས་འགོག་པ་མ་གཏོགས་པ། འདུས་བྱས་དང་འདུས་མ་བྱས་གཞན་ཐམས་ཅད་ནི་འབྲས་བུ་ཡིན་ནོ་ཞེས་བསྟན་པར་འགྱུར་རོ། །ནམ་མཁའ་བྱ་བ་མ་ཡིན་པའི་ཕྱིར་དང༌། འཐོབ་པ་མ་ཡིན་པའི་ཕྱིར་འབྲས་བུ་མ་ཡིན་ལ། རྐྱེན་མ་ཚང་བས་ཐོབ་པར་བྱ་བ་ཡིན་པའི་ཕྱིར་སོ་སོར་བརྟགས་པ་མ་ཡིན་པས་འགོག་པ་ཡང་འབྲས་བུ་མ་ཡིན་ཏེ། སོ་སོར་བརྟགས་པས་འགོག་པ་ལྟར་ལམ་གྱིས་ཐོབ་པ་མ་ཡིན་ཏེ་དེ་བསྒྲུབ་པར་བྱ་བའི་ཕྱིར་བསྟན་བཅོས་སྨོས་པ་ནི་བསྟན་བཅོས་ལས་འབྲས་བུའི་ཆོས་རྣམས་གང་ཞེ་ན་ཞེས་བྱ་བ་རྒྱས་པར་འབྱུང་བའོ། །དེ་ལྟ་ན་འོ་ན་ནི་ཞེས་བྱ་བ་ལ་སོགས་པ་རྒྱས་པར་འབྱུང་བ་ལ། འབྲས་བུ་མེད་པའི་རྒྱུ་འམ། རྒྱུ་མེད་པའི་འབྲས་བུ་མེད་དེ། རྒྱུ་དང་འབྲས་བུ་དག་ནི་ཕན་ཚུན་བལྟོས་པའི་ཕྱིར་རོ། །དེའི་ཕྱིར་འདུས་མ་བྱས་
རྒྱུ་ཡིན་པའི་ཕྱིར་དེ་གང་གི་རྒྱུ་ཡིན་པའི་འབྲས་བུར་ཡང་འགྱུར་ལ། འབྲས་བུ་ཡིན་པའི་ཕྱིར་དེ་གང་གི་འབྲས་བུ་ཡིན་པའི་རྒྱུར་ཡང་འགྱུར་རོ། །མི་འགྱུར་ཏེ་འདི་ལྟར་འདུས་བྱས་ཁོ་ན་ལ་ཞེས་བྱ་བ་རྒྱས་པར་འབྱུང་ངོ༌། །རྒྱུ་དང་འབྲས་བུའི་དངོས་པོར་མཚུངས་བཞིན་དུ་འདུས་བྱས་ཁོ་ན་ལ་རྒྱུ་དང་འབྲས་བུ་དག་ཡོད་ཀྱི། འདུས་མ་བྱས་ལ་ནི་མ་ཡིན་ནོ་ཞེས་བྱ་བ་དེ་ལ་རྒྱུ་ཅི་ཡོད་ཅེ་ན། དེ་ལ་རག་ལས་པའི་རྒྱུ་མི་སྲིད་པའི་ཕྱིར་ཞེས་རྒྱས་པར་འབྱུང་བས་རྒྱུ་གསུངས་ཏེ། འབྱུང་བ་དང་འགལ་བའི་ཕྱིར་རྒྱུ་རྣམ་པ་དྲུག་མི་སྲིད་དེ། འདི་ལ་རྒྱུ་རྣམ་པ་དྲུག་མེད་ལ། འདི་ལ་འབྲས་བུ་ཡང་མེད་དེ། འདུས་མ་བྱས་ཡིན་པའི་ཕྱིར་དང༌། འབྱུང་བར་འགལ་བའི་ཕྱིར་རོ། །འདི་ལ་རྒྱུ་དང་འབྲས་བུའི་མཚན་ཉིད་མི་རིག་བརྒྱས་པར་བརྗོད་པར་བྱ་སྟེ། དེ་ལ་བྱེད་རྒྱུའི་རྒྱུ་ཡང་མི་སྲིད་དེ། དེ་ནི་སྐྱེ་བཞིན་བ་ལ་གེགས་མི་བྱེད་པའི་ངོ་བོར་བཞག་ན་འདུས་མ་བྱས་ལ་ནི་སྐྱེ་བ་ཡོད་པ་མ་ཡིན་ནོ། །སྐྱེ་བ་དང་ལྡན་པ་ཕན་ཚུན་རྒྱུ་དང་འབྲས་བུའི་དངོས་པོ་ཡིན་པའི་ཕྱིར་ལྷན་ཅིག་འབྱུང་བའི་རྒྱུ་ཡང་མི་སྲིད་དོ། །འདུས་མ་བྱས་ནི་སྐྱེ་བ་དང་མི་ལྡན་པའི་ཕྱིར་སྔར་སྐྱེས་པ་མེད་པས་སྐལ་པ་མཉམ་པའི་རྒྱུ་ཡང་མི་སྲིད་དོ། །སེམས་དང་སེམས་ལས་བྱུང་བའི་རང་བཞིན་མ་ཡིན་པའི་ཕྱིར་མཚུངས་པར་ལྡན་པའི་རྒྱུ་ཡང་མེད་དོ། །སྡུག་བསྔལ་ལ་སོགས་པ་མཐོང་བས་སྤང་བར་བྱ་བ་མ་ཡིན་པའི་ཕྱིར་ཀུན་ཏུ་འགྲོ་བའི་རྒྱུ་ཡང་མེད་དོ། །འདི་ལ་རྣམ་པར་སྨིན་པའི་རྒྱུ་ཡང་མི་སྲིད་དེ། ལྡན་པ་མ་ཡིན་པའི་ཕྱིར་དང་རྟག་པའི་ཕྱིར་རོ། །གཞན་ཡང་རྣམ་པར་སྨིན་པ་ནི་ལུང་དུ་མ་བསྟན་པ་ཡིན་ལ། བྲལ་བ་ནི་དགེ་བ་ཡིན་པས་འདི་ལ་རྣམ་པར་སྨིན་པའི་རྒྱུ་མེད་དོ། །དེ་ལྟར་ན་རྒྱུ་རྣམ་པ་དྲུག་མི་སྲིད་པའི་ཕྱིར་འདུས་མ་བྱས་འབྲས་བུ་མ་ཡིན་ནོ། །འབྲས་བུ་རྣམ་པ་ལྔ་མི་སྲིད་པའི་ཕྱིར་ཡང་འདུས་མ་བྱས་ལ་འབྲས་བུ་མེད་དོ་ཞེས་སྟོན་ཏོ། །འདི་ལྟར་འདུས་མ་བྱས་ལ་བདག་པོའི་འབྲས་བུ་ནི་མི་སྲིད་དེ། བདག་པོའི་འབྲས་བུ་ནི། སྔོན་བྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་བདག་པོའི་འབྲས། །ཞེས་ལྷན་ཅིག་འབྱུང་བ་དང་ཕྱིས་འབྱུང་བར་འདོད་ན། དེ་ནི་སྐྱེ་བ་དང་ལྡན་པ་ཡང་མ་ཡིན་ནོ། །རྒྱུ་མཐུན་པའི་འབྲས་བུ་ཡང་མི་སྲིད་དེ། རྒྱུ་མཐུན་རྒྱུ་དང་འདྲ་བའོ། །
ཞེས་བྱ་བ་ཡིན་ན། འདུས་མ་བྱས་ནི་སྐྱེ་བ་དང་ལྡན་པ་ཡང་མ་ཡིན་ནོ། །དེ་ཉིད་ཀྱི་ཕྱིར་སྐྱེས་བུ་བྱེད་པའི་འབྲས་བུ་འང་མི་སྲིད་དོ། །འདུས་མ་བྱས་ནི་སྐྱེ་བ་དང་མི་ལྡན་པའི་ཕྱིར་སྐྱེས་བུའི་རྩལ་མེད་པའི་ཕྱིར་རོ། །འདི་རྣམ་པར་སྨིན་པའི་འབྲས་བུར་ཡང་མི་རུང་སྟེ། རྣམ་པར་སྨིན་པའི་འབྲས་བུ་ནི་མི་དགེ་བ་དང༌། དགེ་བ་ཟག་བ་དང་བཅས་པས་བསྐྱེད་པར་བྱ་བ་ཡིན་པའི་ཕྱིར་རོ། །ལམ་གྱི་རང་བཞིན་མ་ཡིན་པའི་ཕྱིར་ན་འདི་ལ་བྲལ་བའི་འབྲས་བུ་ཡང་མི་སྲིད་དེ། དེ་ནི་བར་ཆད་མེད་པའི་ལམ་རྣམས་ཀྱི་འབྲས་བུ་ཡིན་ནོ། །གཞན་ཡང་དུས་ལས་གྲོལ་བ་ལ་འབྲས་བུ་འཛིན་པ་དང་འབྱིན་པའི་མཐུ་མེད་པའི་ཕྱིར་ཡང་འབྲས་བུ་མེད་དེ། ཇི་སྐད་དུ། ལྔ་ནི་ད་ལྟར་འབྲས་བུ་འཛིན། །ཞེས་རྒྱས་པར་གསུངས་པ་ལྟ་བུའོ། །ཡང་ན་རྒྱུ་རྣམ་པ་ལྔ་དང་ཆོས་མི་མཐུན་པས་འདུས་མ་བྱས་ལ་རྒྱུ་རྣམ་པ་ལྔ་མི་སྲིད་པས་སོ། །ཅིའི་ཕྱིར་ལམ་ཞེས་བྱ་བ་རྒྱས་པར་འབྱུང་སྟེ། དེ་ནི་དངོས་པོ་འབྱུང་བ་ལ་བྱེད་པ་དང་བྲལ་བ་ཁོ་ན་ཡིན་པར་འདོད་དོ་སྙམ་པ་ན་འདྲི་བའི་བསམ་བའོ། །འདི་ལྟར་དེ་ནི་སྐྱེ་བ་ལ་གེགས་མི་བྱེད་པའི་ངོ་བོར་ཞེས་བྱ་བ་ལ། གང་ཞིག་སྐྱེ་བཞིན་པ་གང་ཞིག་ལ་གེགས་མི་བྱེད་པའི་ངོ་བོར་གནས་པ་དེ་ནི་དེའི་བྱེད་རྒྱུའི་རྒྱུ་ཡིན་ན། འདུས་མ་བྱས་ནི་སྐྱེ་བ་དང་ལྡན་པ་མ་ཡིན་ཏེ། དེའི་ཕྱིར་ལམ་འདིའི་བྱེད་རྒྱུའི་རྒྱུ་མ་ཡིན་ནོ། །འདུས་བྱས་བྲལ་བཅས་འབྲས་བུ་ཡིན། །ཞེས་བྱ་བ་འདིར་བྲལ་པ་འབྲས་བུའི་ངོ་བོར་གྲགས་པས་དེའི་ཕྱིར་དེ་ནི་དེ་གང་གིའམ་ཞེས་བྱ་བ་སྨྲས་ཏེ། གལ་ཏེ་ལམ་འདིའི་བྱེད་རྒྱུའི་རྒྱུར་མི་འདོད་ནའོ། །ཡང་ན་དེའི་རྒྱུར་མི་འདོད་ན་ཇི་ལྟར་དེ་འབྲས་བུ་ཡིན་ཞེ་ན། དེ་གང་གི་འབྲས་བུ་ཡིན་ཞེས་གང་སྨྲས་པ་དེའི་ལན་ནི་ལམ་གྱི་འབྲས་བུ་ཡིན་ཏེ་ཞེས་བྱ་བའོ། །ཡང་ཇི་ལྟར་ན་འབྲས་བུ་ཡིན་ཞེས་བྱ་བ་དེའི་ལན་ནི་དེའི་སྟོབས་ཀྱིས་ཐོབ་བའི་ཕྱིར་རོ་ཞེས་བྱ་བ་སྟེ། གང་གི་ཕྱིར། འདུས་མ་བྱས་ལམ་གྱི་སྟོབས་ཀྱིས་འཐོབ་པ་དེའི་ཕྱིར་འདུས་མ་བྱས་ལམ་གྱི་འབྲས་བུ་ཡིན་ཏེ། དེ་ལྟར་ན་ལམ་བྱེད་རྒྱུའི་རྒྱུ་ཉིད་མ་ཡིན་ནོ། །འོ་ན་ནི་དེ་ལམ་གྱི་སྟོབས་ཀྱིས་སྐྱེ་བའི་ཕྱིར་ལམ་དེ་འཐོབ་པ་དེ་ཁོ་ན་ལ་ནུས་པའི་ཕྱིར་ཐོབ་པ་ཁོ་ན་ལམ་གྱི་འབྲས་བུ་ཡིན་གྱི། བྲལ་བ་ནི་ལམ་གྱི་འབྲས་བུ་མ་ཡིན་ཏེ་དེ་ལ་ནུས་པ་
མེད་པའི་ཕྱིར་རོ། །ཐོབ་པ་ཡང་འདོད་པ་མ་ཡིན་ནམ་ཞེས་ན། སྐྱེས་བུ་བྱེད་པའི་འབྲས་བུ་དང་བདག་པོའི་འབྲས་བུ་དེ་བསྐྱེད་པ་དང་བྲལ་བས་བྲལ་བའི་འབྲས་བུ་ཉིད་འདིར་མི་འདོད་ཀྱང་གདགས་པར་བྱའོ། །ཡང་ན་ལམ་མྱ་ངན་ལས་འདས་པ་ལ་བྱེད་པ་མེད་པའི་ཕྱིར་དང་བདག་ཉིད་ཐམས་ཅད་ཀྱིས་འབྲས་བུ་མ་ཡིན་པ་ཉིད་དགག་པའི་ཕྱིར་ཐོབ་པ་ཁོ་ན་འབྲས་བུར་བརྗོད་དོ། །ཡང་ཐོབ་པ་འབྲས་བུ་ཉིད་དུ་བྱེད་པའི་ཕྱིར་མ་ཡིན་གྱི་མྱ་ངན་ལས་འདས་པ་ལ་ཡང་ནུས་པ་ཡོད་དོ་ཞེས་བསྟན་པའི་ཕྱིར་ཐོབ་པ་ལ་ཡང་ནུས་པ་གཞན་ལ་ཞེས་བྱ་བ་རྒྱས་པར་སྨོས་ཏེ། ཐོབ་པ་ལ་ནི་བྱེད་པ་བོ་ཉིད་ཀྱིས་ནུས་པ་ཡིན་ཏེ། སྐལ་བ་མཉམ་པའི་རྒྱུ་ཁ་ཅིག་དང་ལྷན་ཅིག་འབྱུང་བའི་རྒྱུའོ། །བྲལ་བ་ལ་ནི་ཐོབ་པར་བྱེད་པ་ཉིད་ཀྱིས་ནུས་པ་ཡིན་ཏེ་ལམ་མེད་པར་ནི་བྲལ་བ་མི་འཐོབ་བོ། །དེ་ལྟ་བས་ན་རེ་ཞིག་ཅེས་བྱ་བ་རྒྱས་པར་འབྱུང་བ་ལ། རྒྱུ་རྣམས་ནི་དངོས་པོ་འབྱུང་བའི་རྒྱུ་མཚན་ཡིན་པའི་ཕྱིར་ལམ་ནི་ཇི་ལྟར་ཡང་བྲལ་བའི་རྒྱུ་མ་ཡིན་གྱི་བྲལ་པ་ནི་དེའི་འབྲས་བུ་ཡིན་ནོ། །ཡང་མྱ་ངན་ལས་འདས་པ་རྒྱུ་མེད་པ་འབྲས་བུར་ཇི་ལྟར་འགྱུར་ཞེ་ན། འཇིག་རྟེན་ན་མངོན་པར་འདོད་པའི་དོན་ནུས་པས་ཐོབ་པ་དག་ལ་འབྲས་བུ་ཞེས་གྲགས་ལ། མྲྀཏྱུ་ཤྱ་ནཱ་མ་བ་རཿརུ་ཥཿསྱནྣཱརྠཿ་ཏསྨཱནྣ་སརྦཱ་བྷིམཏཿཔུརུཥཱརྠོ། །མྱ་ངན་ལས་འདས་པ་དེ་ཡང་འཕགས་པའི་ལམ་གྱི་ནུས་པས་འཐོབ་པས་དེའི་འབྲས་བུ་ཞེས་བྱ་བ་ལ་རྒྱུ་མེད་པ་ཉིད་ནི་དེ་ཐོབ་པར་བྱ་བ་འཕགས་པའི་ལམ་རྒྱུ་དྲུག་པོ་ཉིད་མ་ཡིན་པའི་ཕྱིར་རོ། །མྱ་ངན་ལས་འདས་པ་འཆི་བ་རང་མིང་ངམ་ཞེས་བྱ་བ་གཞན། སྐྱེས་བུ། འགྱུར། དོན་མ་ཡིན། དེའི་ཕྱིར་མ་ཡིན། ཐམས་ཅད་མངོན་པར་འདོད། སྐྱེས་བུའི་དོན། ཁོ་ན་ཡིད་ལ་བཞག་ནས་ལམ་བསྒོམ་པ་ལ་འཇུག་གི །དེའི་ཐོབ་པ་ཡིད་ལ་བཞག་ནས་ནི་མ་ཡིན་ཏེ། དེ་ཉིད་ཀྱི་ཕྱིར་དེ་ཉིད་གཙོར་ལམ་གྱི་འབྲས་བུ་ཡིན་གྱི་དེའི་ཐོབ་པ་ནི་མ་ཡིན་ཏེ། ལམ་ན་དེ་འཐོབ་པར་བྱ་བའི་ཕྱིར་ཞུགས་པ་མ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་སྤངས་པ་ཁོ་ན་དགེ་སྦྱོང་གི་འབྲས་བུར་གསུངས་ཀྱི་ལམ་ནི་མ་ཡིན་ནོ། །ཡང་བདག་པོའི་འབྲས་བུ་ཡང་མེད་ན་གོ་ཞེས་བྱ་བ་རྒྱས་པར་འབྱུང་བ་ལ། འདི་སྐད་བསྟན་པར་འགྱུར་ཏེ། བྱེད་རྒྱུའི་རྒྱུ་ཡིན་པའི་ཕྱིར་འདི་ལ་བདག་
པོའི་འབྲས་བུ་ཁས་བླང་བར་བྱ་སྟེ། དེ་ཁས་མི་ལན་ན་བྱེད་རྒྱུའི་རྒྱུ་ཉིད་དུ་ཁས་བླངས་པ་དང་འགལ་ལོ། །འགལ་བ་མེད་དེ་སྐྱེ་བ་ལ་གེགས་མི་བྱེད་པའི་ངོ་བོས་བྱེད་རྒྱུའི་རྒྱུ་ཡིན་པའི་ཕྱིར་ལ། འདས་པ་དང་ད་ལྟར་བྱུང་བ་ལ་འབྲས་བུ་འབྱིན་པ་དང་འཛིན་པ་ངེས་པའི་ཕྱིར། མ་འོངས་པ་ལྟར་དུས་དང་བྲལ་བ་ལ་དེའི་ནུས་པ་མེད་པས་འདི་ལ་འབྲས་བུ་མི་འདོད་དོ། །འདི་ལ་འབྲས་བུ་ཡོད་པ་ནི་མ་ཡིན་ཏེ་ཞེས་བྱ་བ་རྒྱས་པར་འབྱུང་བ་ལ། ལྔ་པོ་དེ་ལྟར་འབྲས་བུ་འཛིན། །གཉིས་ནི་འབྱིན་བར་བྱེད་པ་ཡིན། །ཞེས་དུས་ཀྱིས་བསྡུས་བ་དོན་ལ་འབྲས་བུ་འཛིན་པ་དང་འབྱིན་པ་བཤད་ན། འདུས་མ་བྱས་ལ་ནི་ད་ལྟར་བྱུང་བ་ཉིད་མེད་པའི་ཕྱིར། འབྲས་བུ་འཛིན་པ་མི་སྲིད་ལ། འདས་པ་ད་ལྟར་བྱུང་བ་ཉིད་མེད་པའི་ཕྱིར་འབྲས་བུ་འབྱིན་པ་མི་སྲིད་དོ། །དེའི་ཕྱིར་འདི་ལ་དངོས་ཀྱི་རྟོགས་པས་རྒྱུ་དང་འབྲས་བུ་དག་མེད་ཀྱི། འོན་ཀྱང་བཏགས་པའི་རྟོགས་པས་རྒྱུ་ཉིད་དང་འབྲས་བུ་ཉིད་དུ་བསྙད་དོ། །རྒྱུ་མ་ཡིན་ནོ་ཞེས་ནི་རྣམ་གྲངས་ཀྱིས་གསུངས་སོ་ཞེས་བྱ་བ་ལ། དོན་གྱིས་གསུངས་ཀྱི་སྒྲས་ནི་མ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་ཞེ་ན། རྒྱུ་གང་དག་ཡིན་པ་དང་རྐྱེན་གང་དག་ཡིན་པ་ཞེས་འདིར་གཟུགས་ལ་སོགས་པ་རྣམས་ཀྱི་རྒྱུ་དང་རྐྱེན་མ་ལུས་པར་སྨོས་པའི་ཕྱིར་དང༌། དེ་དག་ཀྱང་ཁྱད་པར་མེད་པའི་མི་རྟག་པ་ཉིད་དུ་བསྒྲུབ་པའི་ཕྱིར་རྒྱུ་རྟག་པ་མེད་དོ་ཞེས་གསུངས་པར་འགྱུར་རོ། །དེ་ལྟ་ན་འོ་ན་ནི་ཞེས་ཟེར་བ་ནི་ཆོས་མངོན་པ་བ་སྟེ། བྱེད་རྒྱུའི་རྒྱུར་མི་འགྱུར་བ་འབའ་ཞིག་ཏུ་མ་ཟད་ཀྱི། རྣམ་པར་ཤེས་པའི་དམིགས་པའི་རྐྱེན་དུ་འང་མི་འགྱུར་ཏེ། རྒྱུ་དང་རྐྱེན་རྣམས་བྱེ་བྲག་མེད་པར་མི་རྟག་པ་ཉིད་དུ་བསྒྲུབ་པའི་ཕྱིར་རོ་ཞེས་ཟེར་རོ། །མདོ་སྡེ་བ་ན་རེ་སྐྱེད་བའི་ཞེས་བཀར་བའི་ཕྱིར་འགྱུར་ཏེ། གང་དག་རྣམ་པར་ཤེས་པའི་དམིགས་པ་ཙམ་ཡིན་ལ། སྐྱེད་བར་བྱེད་བ་མ་ཡིན་པ་དེ་དག་རྟག་པ་ཉིད་ནི་མི་དགག་གོ་ཞེས་ཟེར་རོ། །གཞན་དག་ན་རེ་དམིགས་པའི་རྐྱེན་རྣམ་པར་ཤེས་པའི་སྐྱེད་པར་བྱེད་པ་མ་ཡིན་པ་ཉིད་འགག་བ་ལ་བྱེད་པའི་རྒྱུ་ད་ལྟར་བ་མ་ཡིན་ཏེ་རྣམ་པར་ཤེས་པ་སྨོས་པའི་ཕྱིར་རོ་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་ན་རེ་རྒྱུ་རྣམས་ཀྱང་དེ་ཁོ་ན་ལྟར་ཡིན་ཏེ། བྱེད་རྒྱུའི་རྒྱུ་རྣམས་ཐམས་ཅད་ནི་སྐྱེད་པར་བྱེད་པ་མ་ཡིན་ནོ་ཞེས་སྔར་བསྟན་ཟིན་ཏོ་ཞེས་
ཟེར་རོ། །རྐྱེན་ནི་བཞི་པོ་ཞེས་བྱ་བའི་མདོ་སྡེ་ལས་དམིགས་པའི་རྐྱེན་ཡིན་པར་གསུངས་ཀྱི། མ་བསྒྲིབས་པའི་རྒྱུ་ཡིན་པར་ནི་མདོ་ལས་ཀྱང་མ་གསུངས་སོ། །ཡང་ན་མདོ་ལས་འདུས་མ་བྱས་དམིགས་པའི་རྐྱེན་ཡིན་པར་གསུངས་ཀྱི། མ་བསྒྲིབས་པའི་རྒྱུ་ཡིན་པར་ནི་མ་གསུངས་སོ་ཞེས་བྱ་སྟེ། དེའི་ཕྱིར་མདོ་ལས་འདུས་མ་བྱས་རྒྱུའི་དངོས་པོར་མི་འགྲུབ་པོ། །མདོ་རྣམས་ཀྱང་ཕལ་ཆེར་ནུབ་ན་ཞེས་བྱ་བ་ལ། རྩ་བའི་བསྡུ་བ་ཉམས་པ་སེམས་ལ་བཞག་ནས་དེ་སྐད་དུ་སྨྲས་པ་ཡིན་ནོ། །མདོ་ནུབ་ཀྱང་བཀག་བའི་ཕྱིར་མདོ་གཞན་ལས་མ་གསུངས་པར་ཤེས་ལ་མ་བཀག་ཀྱང་མདོ་མ་ལུས་པར་རྗེས་སུ་འཇུག་པའི་ཕྱིར་མ་གསུངས་སོ་ཞེས་བྱ་བར་རྟོགས་པར་ནུས་ཀྱི་གཞན་དུ་ནི་མ་ཡིན་ཏེ། དེ་ལྟ་བས་ན་མ་བཀག་པའི་ཕྱིར་དང་རྩ་བའི་བསྡུ་བ་ཉམས་པའི་ཕྱིར་མ་གསུངས་སོ་ཞེས་ངེས་པར་གཟུང་བར་མི་ནུས་སོ། །གཞན་དག་ན་རེ་སྐྱེད་པར་བྱེད་པའི་ཞེས་འབྱུང་བའི་ཕྱིར་འདི་ལས་བཅོམ་ལྡན་འདས་ཀྱིས་འདུས་མ་བྱས་རྒྱུ་ཉིད་དང་རྐྱེན་ཉིད་དུ་མཚོན་པ་ཡིན་ཏེ། དེ་ལྟ་མ་ཡིན་ན་འདི་སྐད་དུ་གཟུགས་ཀྱི་རྒྱུ་གང་དག་ཡིན་པ་དང༌། རྐྱེན་གང་དག་ཡིན་པ་དེ་དག་ཀྱང་མི་རྟག་པ་ཡིན་ན་ཞེས་གསུངས་པར་འགྱུར་བ་ཞིག་གོ །དེའི་ཕྱིར་འདུས་མ་བྱས་རྒྱུར་གྱུར་པ་ཡོད་ཅིང་རྐྱེན་དུ་གྱུར་པ་ཡོད་ཀྱི། འགའ་ཞིག་སྐྱེད་པར་བྱེད་པ་ནི་མ་ཡིན་ནོ། །རྒྱུ་ནི་རྣམ་པ་གཉིས་ཏེ། སྐྱེད་པར་བྱེད་པ་དང༌། འགལ་བར་མི་བྱེད་པའོ་ཞེས་འདི་ནི་བྱེད་རྒྱུའི་རྒྱུ་བསལ་བར་བཤད་ཟིན་ཏོ། །ཡང་བྲལ་བ་ཞེས་བྱ་བ་འདི་ཅི་ཞེས་བྱ་བ་རྒྱས་བར་འབྱུང་བ་ལ། རབ་ཏུ་གྲགས་པའི་དོན་གྱིས་མ་གྲགས་པའི་དོན་ངེས་པར་བྱེད་པ་ཡིན་ན། འདིར་གཉིས་ཀ་ཡང་དོན་མ་གྲགས་པ་ཡིན་པས་ཕན་ཚུན་བརྟེན་པར་འགྱུར་ཏེ་རྟ་དང་བྲེས་བཞིན་ནོ། །མདོ་སྡེ་པ་རྣམས་ན་རེ་སོ་སོར་བརྟགས་པས་འགོག་པ་འབའ་ཞིག་ཏུ་མ་ཟད་ཀྱི། འདུས་མ་བྱས་ཐམས་ཅད་རྫས་སུ་མེད་དོ་ཞེས་ཟེར་རོ། །གཟུགས་དང་ཚོར་བ་ལ་སོགས་པ་བཞིན་དུ་ཞེས་བྱ་བ་ལ། ཇི་ལྟར་གཟུགས་ནི་ཚོར་བ་ལ་སོགས་པ་དག་ལས་དངོས་པོ་གཞན་ཡིན་ཞིང༌། ཚོར་བ་ལ་སོགས་པ་དག་ཀྱང་གཟུགས་ལས་གཞན་ཡིན་པ་དེ་བཞིན་དུ་འདུས་མ་བྱས་ནི་འདུས་བྱས་སམ་ཕན་ཚུན་
ལས་དངོས་པོ་གཞན་མ་ཡིན་ཏེ་དེའི་ཕྱིར་རྫས་སུ་མེད་དོ། །འོ་ན་ཅི་ཞེ་ན་རེག་བྱ་མེད་བ་ཙམ་ནི་ནམ་མཁའ་ཡིན་ཏེ་ཞེས་བྱ་བ་ལ། ཙམ་ཞེས་བྱ་བའི་སྒྲ་ནི་དངོས་པོ་གཞན་དང་གཞན་དགག་པར་བྱ་བའི་ཕྱིར་ཏེ་རེག་བྱ་སྔ་ན་མེད་པའམ་ཞིག་ནས་མེད་པ་ལ་ནམ་མཁའ་ཞེས་བྱ་བར་གདགས་སོ། །འདི་ལྟར་མུན་པའི་ནང་དག་ན་ཞེས་བྱ་བས་ནི་དེ་གཞུང་འཛུགས་པར་བྱེད་དོ། །མ་རྙེད་ན་ཞེས་བྱ་བ་ལ་མ་ཕྲད་ནའོ་ཞེས་འཛེར་ཏོ། །སློབ་དཔོན་འདུས་བཟང་ནི་གཏན་ཚིགས་མ་བསྟན་པར་འདུས་མ་བྱས་རྫས་སུ་མེད་དོ་ཞེས་སྒྲུབ་པར་མི་ནུས་སོ་ཞེས་ཟེར་རོ། །ཕྲ་རྒྱས་དང་སྐྱེ་བ་སྐྱེས་པ་རྣམས་འགགས་ནས་རྐྱེན་གཞན་མ་ཚང་བས་ཀྱང་མི་སྐྱེ་བས་དེའི་ཕྱིར་སོ་སོར་བརྟགས་པའི་སྟོབས་ཀྱིས་ཞེས་བྱ་བ་སྨོས་ཏེ། ཕྲ་རྒྱས་དང་སྐྱེ་བ་གཞན་མི་སྐྱེ་བའི་སོ་སོར་བརྟགས་པས་འགོག་པ་ཞེས་བྱའོ། །དེའི་ཕྱིར་དེ་ལྟ་ན་ཕུང་པོ་ལྷག་མ་དང་བཅས་པ་དང༌། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ནི་སོ་སོར་བརྟགས་པའི་འགོག་པ་ཡིན་ནོ་ཞེས་བྱ་བར་བསྟན་པར་འགྱུར་ཏེ། འདི་ལྟར་བདེན་པ་གཉིས་འགགས་པ་ནི་སོ་སོར་བརྟགས་བའི་འགོག་པ་ཡིན་ནོ། །དེ་ལ་ཕྲ་རྒྱས་ནི་ཀུན་འབྱུང་གི་བདེན་པ་ཡིན་ལ་སྐྱེ་བ་སྡུག་བསྔལ་གྱི་བདེན་པའོ། །འདིར་ཉོན་མོངས་པ་འདོད་ཆགས་ལ་སོགས་པའི་ས་བོན་ཕྲ་རྒྱས་ད་ལྟར་བ་དེ་འགགས་ནས་སོ་སོར་བརྟགས་པའི་སྟོབས་ཀྱིས་ཉོན་མོངས་པ་སྐྱེ་བ་དང་འགལ་བའི་རྟེན་ཐོབ་པས་ཉོན་མོངས་པ་ཕྲ་རྒྱས་འདོད་ཆགས་ལ་སོགས་པ་མ་འོངས་པ་མི་སྐྱེ་བ་ནི་ས་བོན་མེད་པའི་ཕྱིར་ཉོན་མོངས་པ་འགོག་པ་ཡིན་ནོ། །དེ་བཞིན་དུ་སྐྱེ་བ་ད་ལྟར་བ་འགགས་པ་དང་སོ་སོར་བརྟགས་པའི་སྟོབས་ཉིད་ཀྱིས་ཡང་སྲིད་པའི་སྐྱེ་བར་མཚམས་མི་སྦྱོར་ཞིང་མི་སྐྱེ་བ་ནི་སྐྱེ་བ་འགོག་པ་ཡིན་ནོ། །དཔེར་ན་ཞེས་བྱ་བ་རྒྱས་པར་འབྱུང་བ་ལ་སོ་སོར་བརྟགས་པ་མེད་པ་ཁོ་ནར་རྐྱེན་ཟས་ལ་སོགས་པ་མ་ཚང་བས་བར་མདོར་འཆི་བའི་རིས་མཐུན་པ་ལྷག་མ་མི་སྐྱེ་བ་ནི་སོ་སོར་བརྟགས་པ་མ་ཡིན་པས་འགོག་པ་ཡིན་ནོ། །སྡེ་བ་གཞན་དག་ན་རེ་ཞེས་བྱ་བ་ལ། ཉོན་མོངས་པའི་བག་ཆགས་དང་རྗེས་སུ་འབྲེལ་བའི་རྟེན་སྐྱེ་བ་དང་འགལ་བའི་ཕྱིར་ཉོན་མོངས་པ་སྐྱེ་བ་དང་འགལ་བའི་ཕྱིར་བསྐྱེད་བ་དང་རྗེས་སུ་མཐུན་པས་ན་ཕྲ་རྒྱས་རྣམས་མི་སྐྱེ་བ་ལ་ཤེས་རབ་ཀྱི་ནུས་པ་ཡོད་
དེ་དེའི་ཕྱིར་དེ་ནི་སོ་སོར་བརྟགས་པས་འགོག་པ་ཡིན་ནོ། །སྡུག་བསྔལ་མི་སྐྱེ་བ་གང་ཡིན་པ་དེ་ལ་ནི་ཤེས་རབ་ཀྱི་བྱེད་པ་མེད་པའི་ཕྱིར་སོ་སོར་བརྟགས་པས་འགོག་པ་མ་ཡིན་ཏེ། དེ་ནི་སྡུག་བསྔལ་སྐྱེ་བའི་རྒྱུ་ཉོན་མོངས་པ་མ་ཚང་བས་ཐོབ་པས་འདིར་སོ་སོར་བརྟགས་པས་འགོག་པ་མ་ཡིན་ནོ་ཞེས་ཟེར་རོ། །དེ་ཡང་སོ་སོར་བརྟགས་པ་མེད་པར་ཞེས་བྱ་བ་ལ་སྡུག་བསྔལ་མི་སྐྱེ་བ་དེ་ཡང་སྟེ། རྒྱུ་མ་ཚང་པ་ནི་སོ་སོར་བརྟགས་པ་སྔོན་དུ་འགྲོ་བ་ཡིན་པའི་ཕྱིར་སོ་སོར་བརྟགས་པ་མེད་བར་མི་འགྲུབ་པས་སོ་སོར་བརྟགས་པས་འགོག་པ་ཁོ་ན་ཡིན་ནོ། །རང་གི་ངང་གིས་འགག་པའི་ཕྱིར་ཞེས་བྱ་བ་ནི་ཤེས་རབ་མེད་པར་འགག་པའི་ཕྱིར་ཞེས་བྱ་བའི་དོན་ཏོ། །དེ་ལྟ་ན་ནི་སོ་སོར་བརྟགས་པས་འགོག་པ་ནི་མི་རྟག་པས་འགོག་པ་ཁོ་ན་ཡིན་ནོ་ཞེས་སྨྲ་བར་འགྱུར་རོ། །གེགས་མ་བྱས་པ་རྣམས་སྐྱེ་བ་ལ་ཞེས་བྱ་བ་ལ། གང་དག་ལ་སྐྱེ་བ་ལ་གེགས་མ་བྱས་པ་ཡོད་པས་ན་སྐྱེ་བ་ལ་གེགས་མ་བྱས་པ་སྟེ། དེ་དག་སྐྱེ་བ་ལ་གེགས་བྱེད་པའི་དངོས་པོ་གང་ཡིན་པ་དེ་ནི་སོ་སོར་བརྟགས་པས་ནུས་པ་ཡིན་ནོ། །གང་གི་ཕྱིར་རྒྱུ་དང་རྐྱེན་ལ་བལྟོས་ཏེ་རེས་འགའ་སྐྱེ་བར་འགྱུར་བ་ལས་ཤེས་རབ་ཀྱིས་སྐྱེས་པས་དེ་དག་སྐྱེ་བ་ལ་གེགས་བྱེད་པའི་དངོས་པོ་ཡིན་གྱི། ཤེས་རབ་ཀྱིས་མི་སྐྱེ་བ་སྔ་ནས་ཡོད་པ་མ་ཡིན་པ་སྐྱེད་པ་ནི་མ་ཡིན་ནོ། །དེའི་ཕྱིར་སོ་སོར་བརྟགས་པས་འགོག་པ་མི་རྟག་པ་ཉིད་མེད་ལ། དེ་ལ་ཤེས་རབ་ཀྱིས་ནུས་པ་མེད་པ་ཡང་མ་ཡིན་ནོ། །གལ་ཏེ་མི་སྐྱེ་བ་ཁོ་ན་མྱ་ངན་ལས་འདས་པ་ཡིན་གྱི། ཆོས་མངོན་པ་བ་རྣམས་ཀྱི་ལྟར་རྫས་གཞན་ཞིག་མ་ཡིན་ན། དེ་ལྟ་ན་འོ་ན་འདས་པ་དང་ད་ལྟར་བྱུང་བའི་སྡུག་བསྔལ་དག་སྐྱེས་ཟིན་པ་ཉིད་ཀྱིས་མི་སྐྱེ་བ་མེད་པའི་ཕྱིར་མདོའི་ཚིག་འདི་ཇི་ལྟར་དྲང༌། མྱ་ངན་ལས་འདས་པ་རྫས་སུ་གྱུར་པར་ཁས་བླངས་པར་འདི་དྲང་བར་མི་ནུས་སོ་སྙམ་དུ་བསམས་པའོ། །དབང་པོ་ལྔ་ནི་དད་པ་ལ་སོགས་པ་དག་གོ །དེ་ལ་དམིགས་པའི་ཉོན་མོངས་པ་སྤངས་པ་ཞེས་བྱ་བ་ལ། སྡུག་བསྔལ་ལ་ནི་རང་གི་ངོ་བོས་སྤངས་པ་ཡོད་པ་མ་ཡིན་ཞེས་སྟོན་པར་བྱེད་དོ། །འདུན་པ་དང་འདོད་ཆགས་ཞེས་བྱ་བ་ལ། འདུན་པ་ནི་འདོད་པའོ། །འདོད་ཆགས་ནི་མངོན་པར་ཞེན་པའོ། །དེ་ལྟར་
དེ་ལ་དམིགས་པའི་ཉོན་མོངས་པ་སྤངས་པས་སྡུག་བསྔལ་སྤངས་པ་ཡིན་ཡང་མྱ་ངན་ལས་འདས་པ་རྫས་སུ་ཡོད་པར་བཏགས་པ་མེད་བཞིན་དུ་དུས་གསུམ་པའི་སྡུག་བསྔལ་སྤངས་བར་རུང་ངོ༌། །ཇི་ལྟར་ཞེ་ན་སོ་སོར་བརྟགས་པའི་སྟོབས་ཀྱིས་འདས་པ་དང༌། མ་འོངས་པ་དང༌། ད་ལྟར་བྱུང་བའི་སྡུག་བསྔལ་ལ་དམིགས་པའི་ཉོན་མོངས་པ་ཕྲ་རྒྱས་གཏན་མི་སྐྱེ་བའི་ཕྱིར་རོ། །དེར་ཡང་ཞེས་བྱ་བའི་ནི་འདོན་པའི་བྱེ་བྲག་ལའོ། །ཚུལ་ནི་འདི་ཁོ་ན་ཡིན་ནོ་ཞེས་བྱ་བ་ནི་དེ་ལ་དམིགས་པའི་ཉོན་མོངས་པ་སྤངས་པ་ཁོ་ནས་དེ་སྤངས་པ་ཡིན་ཏེ། སོ་སོར་བརྟགས་པའི་སྟོབས་ཀྱིས་འདས་པ་དང་མ་འོངས་པ་དང༌། ད་ལྟར་བྱུང་བ་ཉོན་མོངས་པ་ལ་དམིགས་པའི་ཕྲ་རྒྱས་གཏན་མི་སྐྱེ་བའི་ཕྱིར་རོ། །ཡང་ན་དགོས་པ་ནི་ཞེས་བྱ་བ་ནི་འདོན་པའི་བྱེ་བྲག་ཉིད་ལ་སླར་ཡང་དགོངས་པ་འཆད་པའོ། །སྐྱེ་བ་སྔ་མ་ལ་འབྱུང་བ་ནི་ཚོ་རབས་སྔ་མའོ། །སྐྱེ་བ་འདི་ལ་བྱུང་བ་ནི་ཚེ་འདི་ལའོ། །ཇི་ལྟར་བཤད་ན་འདས་པ་དང༌། ད་ལྟར་བྱུང་བའི་ཉོན་མོངས་པ་སྐད་ཅིག་མ་ཡིན་པ་བསལ་བར་འགྱུར་རོ། །འདི་ཉིད་ལ་ཤེས་བྱེད་ནི། ཇི་ལྟར་སྲེད་པ་རྣམ་པར་སྤྱོད་པ་དག་ལ་ཞེས་བྱ་བ་སྨོས་སོ། །སྲེད་པ་རྣམ་པར་སྤྱོད་པ་དག་ནི་ཐེ་ཚོམ་ཟ་བར་འགྱུར་བ་དག་སྟེ། གཡོ་བར་གྱུར་པ་དག་ཅེས་བྱ་བའི་དོན་ཏོ། །འདས་པ་དང་མ་འོངས་པའི་དུས་ཀྱི་སྐད་ཅིག་མ་གཅིག་གི་དབང་དུ་མཛད་ནས་ཡིན་པར་ནི་མི་རུང་ཞེས་འདས་པ་དང༌། ད་ལྟར་བའི་ཚེ་རབས་ཀྱི་དབང་དུ་མཛད་ནས་གསུངས་སོ་ཞེས་བྱ་བར་ཤེས་ཏེ། དེ་བཞིན་དུ་འདིར་ཡང་ཚེ་རབས་སྔ་མ་པ་དང། ཚེ་འདི་པའི་ཉོན་མོངས་པའི་རྒྱུན་མཐའ་དག་དང་སྦྱར་གྱི། །སྐད་ཅིག་མ་གཅིག་དང་ནི་མ་ཡིན་ནོ། །སྲེད་པ་རྣམ་པར་སྤྱད་པ་བཅོ་བརྒྱད་པོ་དེ་དག་ནི་དགེ་སློང་དག་ངའོ་སྙམ་པ་ཡོད་ན་ང་འདི་ལྟ་བུའོ་སྙམ་པ་འབྱུང་བར་འགྱུར་ཞིང༌། ང་འདི་འདྲའོ་སྙམ་པ་དང༌། ང་དེ་ལྟ་མ་ཡིན་ནོ་སྙམ་པ་དང༌། ང་བཟང་ངོ་སྙམ་པ་དང༌། ང་ངན་ནོ་སྙམ་པ་འབྱུང་བར་འགྱུར་རོ། །དེ་ལ་འབྱུང་བར་འགྱུར་རོ་སྙམ་པར་འབྱུང་བར་འགྱུར་ཞིང༌། དེ་ལ་འབྱུང་བར་མི་འགྱུར་རོ་སྙམ་པ་དང༌། འདི་ལྟ་བུར་འབྱུང་བར་འགྱུར་རོ་སྙམ་པ་དང༌། འདི་འདྲ་བར་འབྱུང་བར་འགྱུར་རོ་སྙམ་པ་དང༌། དེ་ལྟ་མ་ཡིན་པར་འབྱུང་བར་འགྱུར་
རོ། །དེ་ལ་གྱུར་ཅིག་སྙམ་པར་འབྱུང་བར་འགྱུར་ཞིང༌། དེ་ལ་འདི་ལྟ་བུར་གྱུར་ཅིག་སྙམ་པ་དང༌། འདི་འདྲ་བར་གྱུར་ཅིག་སྙམ་པ་དང༌། དེ་ལྟ་མ་ཡིན་པར་གྱུར་ཅིག་སྙམ་པ་དང༌། འགྱུར་ཀྱང་ཅི་མ་རུང་སྙམ་པ་དང༌། འདི་ལྟ་བུར་གྱུར་ཀྱང་ཅི་མ་རུང་སྙམ་པ་དང༌། དེ་འདྲ་བར་གྱུར་ཀྱང་ཅི་མ་རུང་སྙམ་པ་དང༌། དེ་ལྟ་མ་ཡིན་པར་གྱུར་ཀྱང་ཅི་མ་རུང་སྙམ་པ་འབྱུང་བར་འགྱུར་རོ་ཞེས་བྱ་བ་སྟེ། དེ་དག་གི་ཁྱད་པར་ནི་འོག་ཏུ་བཤད་པར་བྱའོ། །ཉོན་མོངས་པ་གཉིས་པོ་དེས་ཀྱང་ཞེས་བྱ་བ་ནི་ཚེ་རབས་སྔ་མ་པ་དང་ཚེ་འདི་པ་པས་སོ། །རྒྱུད་འདི་ལ་ཞེས་བྱ་བ་ད་ལྟར་བྱུང་བ་ལའོ། །ས་བོན་གྱི་དངོས་པོ་ནི་ནུས་པའོ། །འདི་ལྟར་ཉོན་མོངས་པ་གཉིས་པོ་དེས་ཀྱང་རྒྱུད་ཉོན་མོངས་པ་མ་འོངས་པ་བསྐྱེད་པར་ནུས་པར་བྱས་པ་དེས་འདི་ལ་ས་བོན་གྱི་དངོས་པོ་གཞག་ལ་ཞེས་བྱ་སྟེ། ས་བོན་གྱི་དངོས་པོ་དེ་སྤངས་པས་ཚེ་རབས་སྔ་མ་བ་དང༌། ཚེ་འདི་པའི་ཉོན་མོངས་པ་གཉིས་པོ་དེ་ཡང་སྤངས་པ་ཡིན་ནོ། །ཇི་སྲིད་དུ་དེས་བཞག་པའི་ས་བོན་གནས་པ་དེ་སྲིད་དུ་ནི་ཉོན་མོངས་པ་འགགས་ཀྱང་སྤངས་པ་མ་ཡིན་ལ། དེས་བཞག་པའི་ས་བོན་གྱི་དངོས་པོ་སྤངས་ན་ནི་དེ་ཡང་སྤངས་པར་རྣམ་པར་གཞག་གོ །དཔེར་ན་རྣམ་པར་སྨིན་པ་ཟད་པས་ཞེས་བྱ་བ་ལ། ལས་སྔར་འགགས་ཀྱང་ཇི་སྲིད་དུ་དེས་བཞག་པའི་རྣམ་པར་སྨིན་པའི་འབྲས་བུ་མ་ཟད་བ་དེ་སྲིད་དུ་ཟད་དོ་ཞེས་མི་བྱ་བ་ལ། དེ་ཟད་ན་ནི་ལས་དེ་ཟད་པར་འགྱུར་བ་ལྟ་བུའོ། །དེས་བཞག་པའི་ས་བོན་མེད་པས་མ་འོངས་པའི་སྡུག་བསྔལ་ལམ་ཉོན་མོངས་པ་ཇི་ལྟར་སྤངས་ཤེ་ན། དེའི་ཕྱིར་མ་འོངས་པའི་ཇི་ལྟར་སྡུག་བསྔལ་ལམ་ཉོན་མོངས་བ་ནི་ཞེས་བྱ་བ་རྒྱས་པར་སྨོས་སོ། །ས་བོན་སྐྱེ་བ་མི་སྲིད་ཅིང༌། བོན་མེད་པའི་ཕྱིར་གཏན་མི་སྐྱེ་བ་ལ། ས་བོན་མེད་པ་ཡང་སོ་སོར་བརྟགས་པའི་སྟོབས་ཁོ་ནས་ཡིན་ཏེ། དེ་ལྟར་ན་དུས་གསུམ་གྱི་སྡུག་བསྔལ་ལ་མ་ཉོན་མོངས་པ་སྤངས་པར་བཞག་གོ །འགོག་པ་ལ་མངོན་དུ་ཕྱོགས་པའི་ད་ལྟར་བ་སྟེ་དེ་མ་ཐག་ཏུ་འཇིག་པའི་ཕྱིར་རོ། །སློབ་དཔོན་འདུས་བཟང་ན་རེ་སོ་སོར་བརྟགས་པའི་འགོག་པ་དང་སོ་སོར་བརྟགས་པ་མ་ཡིན་པའི་འགོག་པ་དག་ཁྱད་པར་མེད་པར་ཐལ་བའི་ཕྱིར། འདི་ནི་ཡོད་པ་མ་ཡིན་ཏེ། སོ་སོར་བརྟགས་པའི་སྟོབས་ཀྱིས་རྐྱེན་མ་ཚང་བའི་ཕྱིར་
དང། ཨ་ཀྲྀ་ཏོཏྦཏྟི་པྲ་ཏི་བནྡྷ་ནཱ་མུཏྤ་ཏྟི་པྲ་ཏི་བནྡྷ་ད་ནུ་ཏྤཱ་དཿ་སོ་སོར་བརྟགས་པའི་འགོག་པ་ཞེས་བརྗོད་དོ། །ཡང་ན་ས་བོན་མ་ཚང་བའི་ཕྱིར་སོ་སོར་བརྟགས་པའི་འགོག་པ་དང་རྐྱེན་མ་ཚང་བའི་ཕྱིར་སོ་སོར་བརྟགས་པ་མ་ཡིན་པའི་འགོག་པ་ཞེས་བྱ་བའི་ཁྱད་པར་ཡོད་དོ། །སོ་སོར་བརྟགས་པའི་མ་བྱས་པ་སྐྱེ་བ་གེགས། སྐྱེ་བའི་གེགས། མི་སྐྱེ་བ། སྟོབས་ཀྱིས་རྐྱེན་ནི་མ་ཚང་བས་སམ་སྐྱེ་བ་མེད་བ་ལ་ནི་ཁྱད་པར་ཕྲ་མོ་ཡང་ཡོད་པ་མ་ཡིན་ནོ། །དེ་ནི་ད་ལྟར་མ་ཡིན་ཏེ། རང་བཞིན་ཐ་དད་པ་མེད་ཀྱང་བུམ་པ་དང་སྣམ་བུ་ལ་སོགས་པ་བཞིན་ཐ་དད་པའི་ཐ་སྙད་མ་འཆོལ་བར་གནས་པའོ། །བུམ་པ་དང་སྣམ་བུ་ནི་ནམ་ཡང་བུམ་པ་དང་སྣམ་བུ་མ་ཡིན་པར་མི་འགྱུར་བ་དེ་བཞིན་དུ་འདིར་ཡང་རྐྱེན་མ་ཚང་བས་མི་སྐྱེ་བ་ནི་ནམ་ཡང་སོ་སོར་བརྟགས་པས་འགོག་པ་ཞེས་མི་བྱའོ། །སོ་སོར་བརྟགས་པའི་སྟོབས་ཀྱིས་མི་སྐྱེ་བས་སོ་སོར་བརྟགས་པས་འགོག་པ་ཞེས་བྱ་སྟེ། གང་ཡང་དུས་གསུམ་པའི་སྡུག་བསྔལ་འགོག་པས་རབ་ཏུ་ཕྱེ་བ་ནི་སོ་སོར་བརྟགས་པས་འགོག་པ་ཞེས་བཤད་དོ། །འདུ་བྱེད་མ་འོངས་པ་མི་སྐྱེ་བས་རབ་ཏུ་ཕྱེ་བ་ནི་སོ་སོར་བརྟགས་པ་མ་ཡིན་པའི་འགོག་པ་ཞེས་བྱ་སྟེ། ཆོས་མངོན་པ་ལས་མ་འཆོལ་བར་རྣམ་པར་གཞག་གོ །འདི་ལ་ཡང་ལན་ནི་བཤད་ཟིན་པ་ཉིད་དོ། །འགགས་ཟིན་པ་དང་འགག་པ་ལ་མངོན་དུ་ཕྱོགས་བ་ནི་འབད་པ་དོན་དང་བཅས་པར་མི་འགྱུར་རོ་སྙམ་པའོ། །སྡུག་བསྔལ་གྱི་རང་བཞིན་སྤངས་པར་མི་འདོད་ན་འོ་ན་ཅི་དེ་ལ་དམིགས་པའི་ཉོན་མོངས་པ་སྤངས་ཤེ་ན། དེ་ཡང་མ་འོངས་པ་ནི་དེ་ལ་དམིགས་པའི་ཉོན་མོངས་པ་སྐྱེ་བའི་གེགས་སུ་གྱུར་པ་ལས་འདོད་དེ། ཉོན་མོངས་པ་མི་སྐྱེ་བ་ནི་སོ་སོར་བརྟགས་པའི་སོ་སོར་བརྟགས་པ་མ་ཡིན་པའི་འགོག་པ་ལས་རྣམ་པ་གཞན་དུ་མ་ཡིན་ནོ། །དེ་ལ་དམིགས་པར་བྱས་པའི་ཐོབ་པ་ཡོངས་སུ་རྟོགས་པ་ལས་ཀྱང་མི་རིགས་ཏེ་བཀག་པའི་ཕྱིར་རོ། །གང་བཤད་པ། ཉོན་མོངས་པ་སྤངས་པའི་དུས་སུ་འདས་པ་དང་ད་ལྟར་བྱུང་བའི་སྡུག་བསྔལ་ལ་དམིགས་པའི་ཉོན་མོངས་པ་གང་ཡིན་པ་མེད་དེ་སྤངས་པའི་ཕྱིར་འདས་པ་དང་ད་ལྟར་བྱུང་བའི་སྡུག་བསྔལ་སྤངས་པ་ཞེས་བྱའོ། །དེ་བཞིན་དུ་ད་ལྟར་བྱུང་བ་སྨོས་པ་ཅི་ཞེ་ན། ཉོན་མོངས་པ་
སྤོང་བ་ཞེས་བྱའོ། །འོ་ན་འདས་པ་དང་མ་འོངས་པས་དེ་ལ་བཞག་པའི་ས་བོན་སྤངས་པ་ཅི་ཞེ་ན། ས་བོན་སྤངས་པ་ནི་ལམ་གྱི་སྟོབས་ཀྱིས་གནས་གྱུར་པའོ། །གང་ཡང་མ་འོངས་པ་ནམ་མཁའི་མེ་ཏོག་དང་མཚུངས་པའི་ཕྱིར་དེ་ལ་དམིགས་པའི་འཇུག་པ་མེད་པ་ཉིད་དུ་བཤད་དོ། །དེ་ལ་གཞན་འདས་པ་དང་མ་འོངས་པ་སྡུག་བསྔལ་ལ་དམིགས་པ་གང་ཞེ་ན། ཉོན་མོངས་པ་སྤངས་པ་གང་ཡིན་པ་ལས་སྡུག་བསྔལ་སྤངས་པར་བརྗོད་ཀྱི། མ་འོངས་པ་ལ་དམིགས་པ་ཉིད་ནི་མ་ཡིན་ཞེས་བྱའོ། །འོ་ན་ཅི་ས་བོན་ཡོད་པས་དེ་ལ་དམིགས་པ་སྐྱེ་ཞེ་ན། ཇི་སྲིད་འདི་སྐྱེ་བ་སྲིད་པ་དེ་སྲིད་འདི་མ་སྤངས་ལ། དེ་མ་སྤངས་པའི་ཕྱིར་དེ་ལ་དམིགས་ཀྱང་སྤངས་པར་མི་བརྗོད་དོ། །གང་གི་ཚེ་འདི་གནས་གྱུར་པས། ས་བོན་སྤངས་པར་གྱུར་པ་དེའི་ཚེ་གཏན་མི་སྐྱེ་བའི་ཕྱིར་སྤངས་པ་ཞེས་བྱའོ། །དེ་སྤངས་པའི་ཕྱིར་དེ་ལ་དམིགས་ཀྱང་སྡུག་བསྔལ་སྤངས་པ་ཞེས་བརྗོད་དོ། །གང་བཤད་པ་མ་འོངས་པ་ཉིད་མེད་པའི་ཕྱིར་དེ་ཇི་ལྟར་མི་སྐྱེ་བར་རུང་ཞེ་ན། དངོས་པོ་སྔ་མ་ཅན་གྱི་ཕྱིར་མེད་པ་ཞེས་བྱའོ། །དེ་ནི་དེ་ལྟ་མ་ཡིན་ཏེ། གང་ཡོད་བ་ནི་རྒྱུ་ལས་འགྱུར་བས། དེ་སེམས་ལ་བཞག་ནས་མ་འོངས་པ་མི་སྐྱེ་བར་བརྗོད་དོ། །དངོས་པོ་སྔ་མ་ཅན་གྱི་ཕྱིར་མེད་པ་ཞེས་བྱ་བ་འདི་ངེས་པ་ཡང་མ་ཡིན་ཏེ། དེ་ལྟ་ན་ཞིག་པ་ནི་གཅིག་ལ་གཅིག་མེད་པ་ཁོ་ནར་འགྱུར་རོ། །གཏན་མེད་པ་དང་སྔ་ན་མེད་པ་དག་མ་ཡིན་པ་དེའི་ཕྱིར་འདི་ལ་ངེས་པ་མེད་དོ། །འདི་ངེས་པར་ཁས་བླང་བར་བྱ་ན་མ་སྐྱེས་པ་ཉིད་མི་སྐྱེ་བ་ཡིན་གྱི་སྐྱེ་བ་ནི་མ་ཡིན་པས་མ་འོངས་པ་ཡོད་པ་ཉིད་ལ་ཡང་སྐྱེ་བ་དང་འཇིག་པའི་དངོས་པོ་ཡིན་པ་ལས་དུས་སུ་གཏོགས་པར་ཐལ་བར་འགྱུར་རོ། །གང་ཡང་དམིགས་པ་ཐ་དད་པའི་དབང་པོ་ལྔ་རྣམས་སྤང་བའི་ཕྱིར་འཇུག་པ་ཞེས་བཤད་པ་རབ་ཏུ་ཞེན་པས་མ་བརྗོད་པའི་ཕྱིར་སྡུག་བསྔལ་སྤོང་བ་དོན་དུ་གཉེར་བའི་གདུལ་བྱ་རྣམས་ལ་དེ་ལྟར་གསུངས་ཏེ། འདིར་ཉོན་མོངས་པ་སྤོང་བ་དགག་པ་བྱ་བ་ནི་མ་ཡིན་ནོ། །དཔེར་ན་ཐོགས་པ་ལ་སོགས་པའི་ཡུལ་རྣམས་ཀྱང་སྟེ། གཟུགས་ལ་སོགས་པའི་ཡུལ་འཆིང་བ་ལ་ཆགས་པ་དང་བྲལ་བའི་ཕྱིར་དང་ཡང་ཡང་ཀུན་ཏུ་རྒྱུ་བའི་འདུན་པའི་འདོད་ཆགས་སྤངས་པས་གཟུགས་ལ་སོགས་པ་
སྤངས་པ་ཞེས་བཤད་པ་ནི། དེ་སྤོང་བ་ལ་གུས་པར་སྦྱར་བའི་ཕྱིར་ཡིན་གྱི། འདི་གཞན་རྣམས་སྤང་བ་ལ་གཟུགས་ལ་སོགས་པ་མ་སྤངས་པ་ཞེས་བྱ་བ་ནི་མ་ཡིན་ནོ་ཞེས་རྟོགས་པར་བྱའོ། །འགོག་པ་དེ་རྣམས་ཀྱི་མཆོག་ཏུ་བཤད་དོ་ཞེས་བྱ་སྟེ། རྟག་པའི་ཕྱིར་འདུས་བྱས་དག་པས་མཆོག་ཡིན་ལ། དགེ་བ་འདུས་མ་བྱས་དག་པས་མཆོག་ཡིན་པར་བཤད། དེ་ལྟར་ན་མྱ་ངན་ལས་འདས་པ་འདུས་བྱས་དང་འདུས་མ་བྱས་ཀྱི་ཆོས་ཀྱི་མཆོག་ཀྱང་ཡིན་ལ་དངོས་པོ་མེད་པ་ཡང་ཡིན་ནོ་ཞེས་བྱ་བ་ནི་མདོ་དང་འགལ་ལོ། །འདི་ལྟར་དངོས་པོ་མེད་པ་ནི་མཚན་ཉིད་མེད་པས་ཆོས་ཉིད་མ་ཡིན་ལ། བརྗོད་དུ་མེད་པ་ནི་བརྗོད་དུ་མེད་པ་དག་པས་མཆོག་ཉིད་ཀྱང་མ་ཡིན་ཏེ་ཁྱད་པར་མེད་པའི་ཕྱིར་རོ། །དེའི་ཕྱིར་གང་ཞིག་རང་གི་མཚན་ཉིད་འཛིན་པས་ཆོས་ཞེས་བྱ་ཞིང༌། ཆོས་གཞན་དག་པས་ཁྱད་པར་དུ་འཕགས་པ་གང་ཡིན་པ་དེ་ནི་དོན་གཞན་དུ་གྱུར་པ་ཅུང་ཟད་ཅིག་ཡིན་ནོ། །འདུས་མ་བྱས་ནི་མེད་པ་ཁོ་ནའོ་ཞེས་ཀྱང་མི་སྨྲ་སྟེ་དེས་ན་མདོ་དང་འགལ་བ་མེད་དོ། །གལ་ཏེ་ཡོད་ལ་རྫས་སུ་ཡོད་པ་མ་ཡིན་པ་དེས་ན། དེ་ཇི་ལྟ་བུ་ཞིག་ཡིན་པར་བརྗོད་པར་བྱའོ། །དེ་ནི་ཁོ་བོ་ཅག་གིས་ཇི་སྐད་དུ་བཤད་པ་དེ་ལྟ་བུ་ཡིན་ནོ་ཞེས་བྱ་བ་ལ། རེག་བྱ་མེད་པ་ཙམ་ནི་ནམ་མཁའ་ཡིན་ལ། ཕྲ་རྒྱས་དང་སྐྱེ་བ་སྐྱེས་པ་འགགས་ནས་སོ་སོར་བརྟགས་པའི་སྟོབས་ཀྱིས་གཞན་མི་སྐྱེ་བ་ནི་སོ་སོར་བརྟགས་པས་འགོག་པ་ཡིན་ཞིང༌། སོ་སོར་བརྟགས་པས་མེད་པ་ཁོ་ནར་རྐྱེན་མ་ཚང་བ་མི་སྐྱེ་བ་ནི་སོ་སོར་བརྟགས་པ་མ་ཡིན་པས་འགོག་པ་སྟེ་ཞེས་བྱ་བ་ལྟ་བུའོ། །ཇི་ལྟར་ཡོད་པ་མ་ཡིན་པའི་བདག་ཉིད་ལ་ཡོད་ཅེས་བྱ་ཞེ་ན། དཔེར་ན་སྒྲ་ལ་སྔ་ན་མེད་པ་ཡང་ཡོད། ཕྱིས་མེད་པ་ཡང་ཡོད་ཅེས་བྱ་མོད་ཀྱི། འོན་ཀྱང་དངོས་པོ་མེད་པ་ཡོད་དོ་ཞེས་བྱ་བའི་སྒྲ་སྦྱར་བས་ཡོད་པར་མི་འགྲུབ་སྟེ། ཡོད་དོ་ཞེས་བྱ་བའི་སྒྲ་ནི་ཚིག་ཕྲད་ཡིན་པའི་ཕྱིར་རོ། །འདུས་མ་བྱས་ཀྱང་དེ་བཞིན་དུ་བལྟ་བར་བྱའོ་ཞེས་བྱ་བ་ནི། ཡོད་དོ་ཞེས་ཀྱང་བྱ་བ་ལ་ཡོད་པ་ཡང་མ་ཡིན་པ་ཞེས་བྱ་བའོ། །ཇི་ལྟར་མེད་པ་རྣམས་ཀྱི་མཆོག་མེད་པ་ཡིན་པར་འོས་ཞེས་གང་སྨྲས་པ་དེའི་ལན་ནི་མེད་པ་ཡང་ཁ་ཅིག་ཅེས་བྱ་བ་རྒྱས་པར་འབྱུང་
བའོ། །དེ་ཅི་འདྲ་བ་ཞིག་ཅེ་ན། གང་གནོད་པ་ཐམས་ཅད་དང་གཏན་བྲལ་བ་དེ་ནི་ཞེས་བྱ་བ་སྨོས་ཏེ་ནད་མེད་པ་བཞིན་ནོ། །ཅིའི་ཕྱིར་འདི་བསྔགས་པ་ཐོབ་པ་འོས་ཤེ་ན། གདུལ་བྱ་རྣམས་དེ་ལ་འདུན་པར་བྱ་བའི་ཕྱིར་ཏེ། གདུལ་བྱ་བདག་ལ་ཆགས་པ་དང་ལྡན་པ་རྣམས་དེ་ལ་སྐྲག་པར་འགྱུར་རོ། །ནམ་མཁའ་ནི་ཐམས་ཅད་མེད་པ་མ་ཡིན་ཏེ། རེག་བྱ་མེད་པ་ཙམ་གྱི་མཚན་ཉིད་ཅན་ཡིན་པའི་ཕྱིར་རོ། །སོ་སོར་བརྟགས་པས་མ་ཡིན་པའི་འགོག་པ་ནི་གཏན་བྲལ་བ་ཡིན་མོད་ཀྱི། གནོད་པ་ཐམས་ཅད་དང་ནི་མ་ཡིན་ཏེ་སྐྱེ་བ་དང་མི་ལྡན་པ་རྣམས་ཁོ་ནའོ། །དེ་རྙེད་པའི་ཕྱིར་རོ། །དེ་ལྟར་ན་གཞན་དག་པས་དེ་མཆོག་ཡིན་པས་བསྔགས་པ་ཐོབ་བར་འོས་སོ། །རང་གི་མཚན་ཉིད་མེད་ཀྱང་འདས་པ་དང་མ་འོངས་པ་ལྟར་ཆོས་ཀྱི་ཐ་སྙད་ཀྱང་ཅིའི་ཕྱིར་མི་འདོད། འདི་ལ་བཤད་ཟིན་ཏོ། །ཇི་སྐད་བཤད་ཅེ་ན། གདུལ་བ་རྣམས་དེ་ལ་འདུན་པར་བྱ་བའི་ཕྱིར་ཞེས་བྱ་བར་ཏེ། བརྗོད་དུ་མེད་པ་ཉིད་ཡིན་ཡང་སྔ་ན་མེད་པ་ལ་སོགས་པ་ལྟར་དེ་དག་ཕན་ཚུན་ཁྱད་པར་དུ་འགྱུར་རོ། །མི་འགྲུབ་སྟེ་སྔ་ན་མེད་པ་དང་བརྗོད་དུ་མེད་པ་ཞེས་བྱ་བ་ལ། ཞིག་ནས་མེད་པ་དང་གཏན་མེད་པ་དང་གཅིག་ལ་གཅིག་མེད་པ་རྣམས་ལས་གང་ཡང་རུང་བར་འགྱུར་རོ། །དེ་བཞིན་དུ་ཅིག་ཤོས་ལ་ཡང་བརྗོད་པར་བྱའོ། །སློབ་དཔོན་འདུས་བཟང་ན་རེ་རྫས་དང་བཏགས་པར་ཡོད་པ་ལས་གཞན་པའི་ཡོད་པའི་རྣམ་པ་མ་བཤད་པའི་ཕྱིར་དེ་ལྟར་སྨྲས་ན་མྱ་ངན་ལས་འདས་པ་ཡོད་པ་མ་ཡིན་པར་ཁས་བླངས་པར་འགྱུར་རོ། །གང་ཡང་ཡོད་པའི་སྒྲ་ནི་སྔ་ན་མེད་པ་དང་ཕྱིས་མེད་པ་ལ་ཡང་ཡོད་པས་དཔྱད་དེ། རེ་ཞིག་འདི་ཅི་ཞེ་ན་གཏན་མེད་པ་ཉིད་ནི་རྣམ་པ་གཞན་དགག་པ་ཤེས་པར་བྱེད་པའི་དོན་ཏོ། །ཡོད་པ་ནི་བཅས་པའི་སྒྲ་སྟེ། སྔ་མ་དང་ཕྱི་མར་ཡང་རྣམ་པ་ཁ་ཅིག་དགག་པ་ལས་འདི་དང་འདི་མེད་དོ་ཞེས་སྦྱར་བ་དེ་ལ་ཅིག་ཤོས་ལ་ཅིག་ཤོས་མེད་པ་ནི་དངོས་པོ་ཉིད་དོ། །གཏན་མེད་པ་ནི་དངོས་པོའི་ཐ་སྙད་དོ། །ཅི་ལྟར་མི་འགལ་བར་འགྱུར་ཞེ་ན། དེ་ཡོད་པ་གང་ལ་སྡུག་བསྔལ་གྱི་དངོས་པོ་དགག་པ་མེད་དེ། འདི་དང་འདི་མེད་དོ་ཞེས་དཔེ་བསྟན་པར་མི་ནུས་སོ། །ཀུན་རྫོབ་ཀྱི་ཐ་སྙད་ཀྱི་སྒྲ་ཙམ་ནི་གཉི་ག་ལ་ཇི་ལྟ་བར་རུང་སྟེ། འདུས་མ་བྱས་ལ་བཏགས་པར་ཡོད་པ་མི་འགལ་ལོ། །གལ་
ཏེ་བཏགས་པ་ཉེ་བར་ལེན་པ་མེད་པའི་ཕྱིར་འགལ་ལོ་ཞེ་ན། འདི་ལ་ཇི་སྐད་བཤད་པའི་བཏགས་པ་ཉེ་བར་ལེན་པ་ཡོད་དེ། དཔེར་ན་ནགས་ཚལ་གྱི་ཤིང་དང༌། དམག་གི་གླང་པོ་དང་རྟ་ལ་སོགས་པ་ལྟ་བུའོ། །གང་བཤད་པའི་སྒྲ་སྔ་མ་དང་ཕྱི་མ་ཁས་བླངས་པ་ལ་དཔེ་མ་གྲུབ་པོ་ཞེ་ན་དེ་ཡང་མི་རིགས་ཏེ། ཅིའི་ཕྱིར་ཞེ་ན། གལ་ཏེ་ད་ལྟར་བ་བཞིན་སྔ་མ་དང་ཕྱི་མ་ལས་གཟུགས་ཀྱང་ཡོད་ན་དེ་ལྟར་ཡོད་པ་དེའི་རང་བཞིན་ནི་རྟག་པའི་ཕྱིར་ཅི་ལས་སྔ་མ་དང་ཕྱི་མ་ཞེས་ཤེས་པར་མི་བྱེད། གལ་ཏེ་བྱེད་པ་ལས་སོ་ཞེ་ན། བྱེད་པ་དེ་ཡང་རྫས་སམ་བཏགས་པ་ཅི་ཞིག་ཏུ་བརྗོད་པར་བྱེད། གལ་ཏེ་རྫས་ཀྱི་སྒོ་ནས་དེ་ལྟར་ཡོད་ན་སྔ་མ་དང་ཕྱི་མར་ཡང་བྱེད་པ་མེད་པར་ཁས་བླང་པའི་ཕྱིར་རྫས་ཀྱི་སྒོ་ནས་དུས་ཐམས་ཅད་དུ་ཡོད་པར་ཁྱས་བླངས་པ་ལ་གནོད་དོ། །རྫས་སུ་ཡོད་པར་མཚུངས་པ་ལ་ཡང་གཟུགས་ལ་སོགས་པ་ལ་དུས་ཐམས་ཅད་དུ་ཡོད་ལ་བྱེད་པ་ནི་མ་ཡིན་ནོ་ཞེས་བྱ་བ་ནི་རང་གི་རྣམ་པར་རྟོག་པ་འབའ་ཞིག་གོ །ཅི་སྟེ་བཏགས་པ་ཙམ་དུ་ཡོད་ན་དེ་ལྟར་ན་ཉུང་དུར་ཡོད་པ་ཞེས་བརྗོད་དེ། ད་ལྟར་བ་ཡང་དོན་དམ་པའི་སྒོ་ནས་ཡོད་པའི་ཕྱིར་རོ། །ད་ནི་དུས་ཐམས་ཅད་དུ་ཡོད་ན་སྔ་མ་དང་ཕྱི་མ་ཞེས་བྱ་བའི་རྣམ་པར་གཞག་པ་ཅི་ལྟར་འགྲུབ་ཅེ་ན། འོན་ཀྱང་བྱེད་པ་མེད་པ་དང་དོན་གཞན་མེད་པས་བཏགས་པར་ཡོད་པ་དེ་ལྟ་ན་ཡང་ཡོད་པ་ལས་གཞན་མ་ཡིན་པའི་ཕྱིར་དངོས་པོའི་རང་བཞིན་གྱི་བྱེད་པ་ཡང་རྟག་པའི་བྱེད་པ་བཞིན་ནམ། དངོས་པོ་ཡང་མི་རྟག་པ་ཞེས་བྱ་བར་ཐལ་བར་འགྱུར་རོ། །དེ་ལྟར་ན་གཉི་ག་ལྟར་ཡང་སྔ་མ་དང་ཕྱི་མ་ཞེས་བྱ་བའི་ཐ་སྙད་མེད་པའི་ཕྱིར་དུས་གསུམ་མེད་དོ། །གང་བཤད་པ་ཡོད་པ་ནི་ཞེས་བྱ་བ་དེ་ལྟ་བུ་ལ་སོགས་པ་དེ་ཡང་མི་རིགས་ཏེ་ཅིའི་ཕྱིར་ཞེ་ན། གལ་ཏེ་ད་ལྟར་བ་ཉིད་སྔ་མ་དང་ཕྱི་མར་ཡང་ཡོད་པ་ནི་ཁོ་ནའི་སྒྲ་ཡིས་འགྲུབ་བོ། །དེ་ལྟར་ཡོད་པ་ད་ལྟར་བ་ཉིད་ལྟར་སྒྲ་ཡང་དགག་པར་འགྱུར་རོ། །ད་ལྟར་བ་ཉིད་ཡིན་པའི་ཕྱིར་གཞན་མ་ཡིན་པར་བྱས་པ་དེ་ལྟ་ན་ཡང་འདས་པའི་སྒྲ་གཞན་ལ་ད་ལྟ་བ་ཡང་གཞན་ལ་མ་འོངས་པ་ཡང་གཞན་ནོ་ཞེས་བྱ་བར་ཐལ་བར་འགྱུར་རོ། །གཞན་མ་ཡིན་པ་ལ་ནི་ཁོ་ནའི་སྒྲ་འདས་པ་མ་ཡིན་མ་འོངས་པ་
མ་ཡིན་ད་ལྟར་འབྱུང་བ་མ་ཡིན་པར་འགྱུར་ཏེ། གཅིག་ལ་མ་སྐྱེས་པ་དང་སྐྱེས་པ་འཇིག་པ་ཉིད་དང་མ་སྐྱེས་པ་མི་འཇིག་པ་ཉིད་ཀྱང་མི་རུང་ངོ༌། །འདིར་གཞན་དང་གཞན་མེད་པ་མི་རུང་བས་དེ་ཉིད་དེར་བཀག་པའི་ཕྱིར། དེ་ལྟར་དེའི་རང་བཞིན་མེད་པ་ཉིད་དུ་ཤེས་པར་བྱའོ། །འགོག་པ་འཕགས་པའི་བདེན་པ་ཡིན་པར་མི་འགྱུར་ཏེ་ཞེས་བྱ་བ་ལ། གང་ཞིག་ཅི་ཡང་མ་ཡིན་པ་དེ་ནི་ཇི་ལྟར་དེའི་བདེན་པའམ་བརྫུན་པ་ཞེས་བྱ། རེ་ཞིག་འགོག་པའི་བདེན་པའི་དོན་འདི་གང་ཡིན། ཅི་རྫས་ཀྱི་དོན་ཡིན་ནམ་འོན་ཏེ་ཕྱིན་ཅི་ལོག་པའི་དོན་ཡིན། གལ་ཏེ་རྫས་ཀྱི་དོན་ཡིན་ན་ནི། དེ་ལྟ་ན་ཀུན་རྫོབ་ཀྱི་བདེན་པ་མེད་པར་ཐལ་བར་འགྱུར་ཏེ། དེའི་ཕྱིར་ཕྱིན་ཅི་མ་ལོག་པའི་དོན་ཁས་བླང་བར་བྱ་དགོས་ལ། དེ་ལྟ་ན་སྡུག་བསྔལ་ལྟར་སྡུག་བསྔལ་འགོག་པ་ཡང་བདེན་པ་ཉིད་དུ་མི་འགལ་ལོ། །དེ་ཉིད་བསྟན་པའི་ཕྱིར་འཕགས་པ་རྣམས་ཞེས་བྱ་བ་རྒྱས་པར་སྨོས་ཏེ། ཇི་ལྟར་འཕགས་པ་རྣམས་ཀྱིས་སྡུག་བསྔལ་ལ་སྡུག་བསྔལ་ཉིད་དུ་གཟིགས་ཀྱི། བདེ་བ་ཞེས་བྱ་བ་མ་ཡིན་པས་སྡུག་བསྔལ་འཕགས་པའི་བདེན་པར་བརྗོད་པ་དེ་བཞིན་དུ་སྡུག་བསྔལ་འགོག་པ་ཡང་འཕགས་པ་རྣམས་ཀྱིས་སྡུག་བསྔལ་མེད་པའི་མཚན་ཉིད་ཁོ་ནར་གཟིགས་པ་ལ་སྡུག་བསྔལ་འགོག་པ་འཕགས་པའི་བདེན་པ་ཞེས་བརྗོད་དོ། །ཇི་ལྟར་མེད་པ་ནི་ཅི་ཡང་མ་ཡིན་པའི་ཕྱིར་གསུམ་པ་ཉིད་དུ་འགྱུར་ཞེ་ན། གཉིས་པའི་འོག་ཏུ་མཐོང་བ་དང་བསྟན་པས་ན་གསུམ་པ་ཡིན་ཏེ། བདེན་པ་མངོན་པར་རྟོགས་པའི་ཚེ་གཉིས་པ་ཀུན་འབྱུང་གི་བདེན་པའི་འོག་ཏུ་རང་གི་ཤེས་རབ་ཀྱིས་མཐོང་བ་དང༌། སྟོན་པའི་ཚེ་གཞན་གཉིས་ཀྱི་འོག་ཏུ་བསྟན་པས་གསུམ་པ་ཞེས་བྱའོ། །ཡུལ་མེད་པར་ཤེས་པ་མེད་དོ། །དེ་སྤྱོད་པ་རྣམས་ལ་རྟོགས་པར་བྱེད་ཅེས་བྱ་བ་ནི་ཆེར་འགལ་བ་སྟེ། མེད་པ་ཞེས་བྱ་བ་ཤེས་པ་དེ་ཅི་ལ་དམིགས་པའོ། །གལ་ཏེ་དངོས་པོ་མེད་ན་མེད་ཅེས་བྱ་བས་དངོས་པོ་ཁོ་ན་བཀག་པ་ཡིན་ནོ་ཞེ་ན། དངོས་པོ་བཀག་པ་མི་རིགས་སོ། །འོན་ཏེ་དངོས་པོ་མེད་པ་ཅི་ལྟར་ཞེན་དངོས་པོ་མེད་པ་ལ་དམིགས་པའི་ཤེས་པ་མེད་དོ། །དེ་བཞིན་དུ་གཙོ་བོ་དང་སྐྱེས་བུ་དང་དབང་ཕྱུག་ལ་
སོགས་པ་ལ་དམིགས་པའི་ཤེས་པ་རྣམས་ལ་ཡང་བརྗོད་པར་བྱའོ། །ཅིར་འགྱུར་ཞེས་བྱ་བ་ནི་སྐྱོན་ཅིར་འགྱུར་ཞེས་བྱའོ། །ཅི་ཞིག་ཏུ་ཡང་འགྱུར་ཞེས་བྱ་བ་ནི་ཡོན་ཏན་ཅི་ཞིག་ཏུ་འགྱུར་ཞེས་བྱ་བའོ། །བྱེ་བྲག་ཏུ་སྨྲ་བའི་ཕྱོགས་བསྐྱང་བར་འགྱུར་རོ་ཞེས་བྱ་བ་ནི་ཡོན་ཏན་འདིར་འགྱུར་རོ་ཞེས་བྱ་བའོ། །ཡང་དག་པ་མ་ཡིན་པ་ཀུན་བརྟགས་པར་འགྱུར་ཞེས་བྱ་བ་ནི་སྐྱོན་ཅིར་འགྱུར་ཞེས་སྨྲས་པ་དེའི་ལན་ཏེ། ཡང་དག་པ་མ་ཡིན་པ་ཀུན་བརྟགས་པའི་སྐྱོན་དུ་འགྱུར་རོ། །ཅིའི་ཕྱིར་ཞེ་ན་ཞེས་བྱ་བ་ནི་ཚིག་ཙམ་གྱིས་འདི་སྒྲུབ་པར་མི་ནུས་སོ་ཞེས་རྒྱུ་དྲིས་པའོ། །གཟུགས་དང་ཚོར་བ་ལ་སོགས་པ་བཞིན་དུ་ཞེས་བྱ་བ་རྒྱས་པར་འབྱུང་བ་ལ། གང་ཞིག་དངོས་པོ་ཡིན་པ་དེ་ནི་གཟུགས་དང་ཚོར་བ་ལ་སོགས་པ་བཞིན་དུ་རང་གི་ངོ་བོས་མངོན་སུམ་གྱིས་དམིགས་པ་ཡིན་ལ། ཡང་ན་མིག་ལ་སོགས་པ་ལྟར་འབྲས་བུའི་སྒོ་ནས་རྗེས་སུ་དཔག་པས་དམིགས་པ་ཡིན་ན། འདི་ལ་གཉིས་ག་ཡང་མེད་པས་འདུས་མ་བྱས་དངོས་པོ་མ་ཡིན་ནོ་ཞེས་བྱ་བ་གཟུང་སྟེ་འདི་ནི་ལན་གཅིག་མ་ཡིན་པར་བཤད་ཟིན་ཏོ། །དངོས་པོ་ཆེ་གེ་མོ་ཞིག་གི་ཞེས་བྱ་བ་ནི་འདོད་ཆགས་ལ་སོགས་པའི་དངོས་པོའིའོ། །རྒྱུ་དང་འབྲས་བུ་ལ་སོགས་པའི་དངོས་པོ་མི་སྲིད་པའི་ཕྱིར་རོ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་ནོར་དང༌། བདག་པོ་དང༌། ཡན་ལག་དང༌། ཡན་ལག་ཅན་དང༌། ཡོན་ཏན་དང་ཡོན་ཏན་ཅན་གྱི་འབྲེལ་པ་རྣམས་ལ་སོགས་པ་རྣམས་གཟུང་སྟེ། འགོག་པ་ནི་དངོས་པོའི་འབྲས་བུ་མ་ཡིན་ཞིང་རྒྱུ་མ་ཡིན་ལ། ནོར་དང་བདག་པོ་ཡང་མ་ཡིན་ནོ། །དེ་བཞིན་དུ་གཞན་ལ་ཡང་བརྗོད་པར་བྱའོ། །བཀག་བ་ཙམ་དུ་ནི་ངའོ་ཞེས་བྱ་བ་ནི། ཆོས་དང་ཆོས་ཅན་གྱི་འབྲེལ་པའི་དབང་དུ་བྱས་ནས་བཤད་པ་སྟེ་སྒྲ་དང་མི་རྟག་པ་ཉིད་བཞིན་ནོ། །དེ་ནི་དེའི་གནས་སྐབས་ཡིན་གྱི་གཞན་གྱི་ནི་མ་ཡིན་ནོ། །དངོས་པོ་གཞན་ཉིད་ཡིན་ན་ཡང་ཉོན་མོངས་པ་གང་གི་ཞེས་བྱ་བ་རྒྱས་པར་འབྱུང་བ་ལ། འདིར་སེམས་གཉིས་ལ་འགོག་པ་གཉིས་བ་ལྟ་བར་བྱ་སྟེ། བར་ཆད་མེད་པའི་ལམ་དང༌། ལྷན་ཅིག་ཏུ་ཉོན་མོངས་པའི་ཐོབ་པ་འགལ་ལ། རྣམ་པར་གྲོལ་བའི་ལམ་དང་ལྷན་ཅིག་ཏུ་སོ་སོར་བརྟགས་པའི་འགོག་པ་འཐོབ་པོ། །ཉོན་
མོངས་པའི་ཐོབ་པ་མ་འགགས་པར་ནི་བྲལ་བའི་ཐོབ་པ་མི་འཐོབ་སྟེ། དེ་ལྟར་ན་ཉོན་མོངས་པ་གང་གི་ཐོབ་པ་འགགས་ནས་འགོག་པ་གང་ཐོབ་པ་དེ་ནི་དེའི་ཡིན་ནོ་ཞེས་ཐ་སྙད་འདོགས་སོ། །འདི་ལ་ཡང་རྒྱུ་དང་འབྲས་བུ་ལ་སོགས་པའི་འབྲེལ་བ་མེད་པའི་ཕྱིར་འདྲི་བ་ནི། འོ་ན་དེ་འཐོབ་བར་ངེས་པའི་རྒྱུ་གང་ཞིག་ཡིན་ཞེས་བྱ་བའོ། །ཉོན་མོངས་པ་འདིའི་ཐོབ་པ་ཆད་པས་འགོག་པ་འདི་ཁོ་ན་འཐོབ་ཀྱི་གཞན་ནི་མ་ཡིན་ནོ་ཞེས་བྱ་བ་འདི་ལ་ངེས་པའི་རྒྱུ་འགའ་ཡང་མེད་དེ། སྔར་བཤད་པའི་འབྲེལ་པ་རྣམས་མི་སྲིད་པའི་ཕྱིར་རོ། །ཡང་ན་འདི་ནི་འདོད་ཆགས་ཀྱི་བྲལ་བའི་ཐོབ་པ་ཡིན་གྱི། གཞན་གྱི་བྲལ་བའི་ནི་མ་ཡིན་ནོ། །ཞེས་ངེས་པའི་རྒྱུ་མེད་དེ་འདོད་ཆགས་ཀྱི་ཐོབ་པ་ཆད་པ་རྒྱུ་མ་ཡིན་པའི་ཕྱིར་དང་ལམ་ལ་ཁྱད་པར་མེད་པའི་ཕྱིར་རོ། །ཆེ་གེ་མོ་ཞིག་གིས་མེད་པའོ་ཞེས་དགག་པ་ཙམ་དུ་ནི་རུང་ངོ་ཞེས་གང་སྨྲས་པ་དེ་ལ་ལུང་དང་འགལ་བ་བསྟན་པའི་ཕྱིར། མདོ་ལས་མཐོང་བའི་ཆོས་ལ་མྱ་ངན་ལས་འདས་པ་ཐོབ་པའི་ཞེས་བྱ་བ་ལ་སོགས་པ་སྨོས་ཏེ། ད་ལྟར་བའི་སྐྱེ་བ་ལ་མྱ་ངན་ལས་འདས་པ་ཐོབ་པ་ནི་ཕུང་པོ་ལྷག་མ་དང་བཅས་པའི་དབྱིངས་ཀྱི་གནས་སྐབས་ན་ཡིན་ཏེ། དེས་ན་མེད་པ་ནི་བརྗོད་དུ་མེད་པ་ཡིན་པའི་ཕྱིར་ན་ཇི་ལྟར་འཐོབ་པར་འགྱུར། དེའི་ཕྱིར་མདོ་ལས་ཐོབ་པར་གསུངས་པའི་ཕྱིར་མྱ་ངན་ལས་འདས་པ་ཡོད་པ་ཁོ་ན་ཡིན་པར་བརྗོད་དོ། །མེད་པ་ཡིན་ཡང་ཐོབ་པ་མི་འགལ་ལོ་ཞེས་བསྟན་པའི་ཕྱིར་གཉེན་པོ་ཐོབ་པས་ཞེས་བྱ་བ་རྒྱས་པར་སྨོས་སོ། །ཉོན་མོངས་པ་དང་ཡང་སྲིད་པ་ནི་ཉོན་མོངས་པ་དང་ཡང་སྲིད་པ་དག་སྟེ། དེ་དག་གི་སྐྱེ་བ་ནི་ཉོན་མོངས་པ་ཡང་སྲིད་པའི་སྐྱེ་བའོ། །ཉོན་མོངས་པ་དང་ཡང་སྲིད་པའི་ཉོན་མོངས་པ་ཡང་སྲིད་དེ་དག་ཏུ་སྐྱེ་བ་ཤིན་ཏུ་འགལ་བའི་རྟེན་ཏེ་དེ་འཐོབ་པའི་ཕྱིར་སླར་ཡང་ཉོན་མོངས་པ་སྐྱེ་བའམ་སྐྱེད་པ་མ་ཡིན་པས་མྱ་ངན་ལས་འདས་པ་ཐོབ་པ་ཞེས་བྱའོ། །གཉེན་པོ་ནི་བར་ཆད་མེད་པའི་ལམ་མོ། །དེ་ཐོབ་པ་ནི་མངོན་དུ་བྱེད་པའོ། །འདི་ལྟར་དེ་ནི་དེས་སྤང་བར་བྱ་བའི་ཉོན་མོངས་པའི་ས་བོན་དང་རྗེས་སུ་འབྲེལ་བའི་རྟེན་སྐྱེ་བ་དང་འགལ་བས། དེའི་མཇུག་ཐོགས་སུ་ཉོན་མོངས་པའི་ས་བོན་རྟོགས་པའི་རྟེན་སྐྱེ་བར་འགྱུར་ཏེ་ལམ་གྱིས་དེ་བསྒྱུར་བའི་ཕྱིར་
རོ། །དེ་ལྟར་ན་གཉེན་པོས་ཉོན་མོངས་པ་སྐྱེ་བ་དང་ཤིན་ཏུ་འགལ་བའི་རྟེན་འཐོབ་བོ། །ཉོན་མོངས་པ་མ་ལུས་པ་སྐྱེ་བ་དང་འགལ་བའི་རྟེན་ཐོབ་ན་ཡང་སྐྱེ་བ་མི་འབྱུང་སྟེ། དེ་ལྟར་ན་དེ་སྐྱེ་བ་འབྱུང་བ་དང་འགལ་བར་ཡང་འགྱུར་རོ། །འདི་ལྟར་ཉོན་མོངས་པའི་ས་བོན་མི་འགལ་ན་ནི་ཉོན་མོངས་པ་སྐྱེ་བ་དང་ཤིན་ཏུ་འགལ་བའི་རྟེན་མི་འཐོབ་ལ། གཉེན་པོ་མ་སྐྱེས་ན་ནི་ཉོན་མོངས་པའི་ས་བོན་མི་འགག་གོ །ལུང་ལས་ཀྱང་ཞེས་བྱ་བ་རྒྱས་པར་འབྱུང་ལ། འདིར་དཔེར་བརྗོད་པ་ནི་འབྱུང་བ་མེད་པ་ཞེས་བྱ་བ་འདི་ལྟ་སྟེ་མི་སྐྱེ་བའི་རྣམ་གྲངས་ཡིན་པའི་ཕྱིར་རོ། །སློབ་དཔོན་གྱིས་འབྱུང་བ་འགག་པ་ཙམ་གྱི་དབང་དུ་བྱས་ནས་འབྱུང་བ་མེད་པ་ཞེས་ཁུངས་སུ་བཤད་པ། དེའི་ཕྱིར་འདི་ཡིན་ན་ཞེས་བྱ་བ་རྒྱས་པར་སྨྲས་ཏེ། འདི་ནི་མི་འབྱུང་བས་ཁྱད་པར་དུ་གྱུར་པའི་དངོས་པོ་ཉིད་བསྟན་གྱི་འབྱུང་བ་བཀག་པ་ཙམ་ནི་མ་ཡིན་པས་འདི་ན་མྱ་ངན་ལས་འདས་པ་མི་སྐྱེ་བ་ཙམ་དུ་ཤེས་པར་བྱ་བ་ལ་ཁུངས་མ་ཡིན་ནོ་ཞེ་ན། བདུན་པ་འདི་ནི་ནུས་པ་མེད་པར་བ་ལྟའོ་ཞེས་བྱ་བ་རྒྱས་པར་འབྱུང་སྟེ། མངོན་པར་འདོད་པའི་དོན་བསྒྲུབ་པར་བྱ་བ་ལ་ཞེས་བྱ་བར་སྦྱར་རོ། །འདིར་ཡིན་ན་འབྱུང་བར་འགྱུར་རོ་ཞེས་བྱ་བ་ཇི་སྐད་དུ་བཤད་པ་ཡིན་ཞེས་བྱ་བ་འབྱུང་སྟེ། རྟེན་གྱི་དོན་མི་སྲིད་པས་ན་གཞན་དུ་ཉེ་བར་བཀོད་དོ། །གང་ཁོ་ནས་ཞེས་བྱ་བ་ནི་ལམ་གྱིས་སོ། །དེ་ཐོབ་པར་བྱ་བ་ནི་མྱ་ངན་ལས་འདས་པ་ཐོབ་བར་རོ། །དེ་ཉིད་ཡོད་དམ་ཞེས་བྱ་བ་ནི་མངོན་དུ་གྱུར་པ་ནའོ། །ཐོབ་ན་ཞེས་བྱ་བ་ནི་རྙེད་ན་སྟེ་ལམ་དང་སྦྱར་རོ། །སྡུག་བསྔལ་མི་འབྱུང་བར་འདོད་པར་གྱིས་ཤིག་ཅེས་བྱ་བ་ནི་གཞན་མྱ་ངན་ལས་འདས་པ་དོན་མེད་པར་བརྟགས་པ་ཅི་ཞིག་བྱ་ཞེས་བྱའོ། །ངེས་པར་སྤངས་པ་ནི་ངེས་པར་བོར་བ་སྟེ། འདིར་ཞེས་པ་ཕུང་པོ་ཐམས་ཅད་སྤངས་པ་ནི་སྤངས་པ་ཞེས་བྱ་བར་འགལ་བ་མེད་དོ། །དེ་ལ་ཡང་བདུན་པ་འདི་ནི་ནུས་པ་མེད་པར་བལྟའོ་ཞེས་བྱ་བ་ཐམས་ཅད་རྒྱ་ཆེར་བརྗོད་པར་བྱའོ། །དེའི་སེམས་ཀྱིས་རྣམ་པར་ཐལ་ཞེས་བྱ་བ་ཕུང་པོ་ལྷག་མ་མེད་པའི་ཕྱིར་མྱ་ངན་ལས་འདས་པའི་གནས་སྐབས་ནའོ། །སློབ་དཔོན་འདུས་བཟང་ན་རེ། ཆོས་མངོན་པ་བ་རྣམས་ནི་སྡུག་བསྔལ་འགོག་པ་རྣམ་པ་གཉིས་སུ་འཆད་དེ། སྡུག་
བསྔལ་ལས་དོན་གཞན་མ་ཡིན་པ་དང་སྡུག་བསྔལ་ལས་དོན་གཞན་པའོ། །དེ་ཉིད་ནི་བཅོམ་ལྡན་འདས་ཀྱིས་གདུལ་བྱའི་བསམ་པའི་བྱེ་བྲག་གིས་རྣམ་པ་གཉིས་སུ་ཉེ་བར་བསྟན་ཏོ། །འགའ་ཞིག་དོན་གཞན་མ་ཡིན་པ་ནི་ཇི་ལྟར་ཡོད་པ་ལས་མ་སྐྱེས་པ་དང་ཡོད་པ་ལས་ངེས་པར་འབྱུང་བ་ཞེས་བྱ་བ་ལ་སོགས་པ་སྨོས་པ་ལྟ་བུའོ། །དེའི་ཕྱིར་ལུང་དང་འགལ་བ་མེད་དེ། མྱ་ངན་ལས་འདས་པ་མི་རྟག་པར་བསྟན་པ་དེ་ཡང་དངོས་པོ་ཉིད་དོ་ཞེས་བྱ་བ་དེ་ལ་འགལ་བ་ཅི་ཞིག །མྱ་ངན་ལས་འདས་པ་བསྟན་པ་ཡང་ཡོད་པ་དོན་གཞན་དུ་གྱུར་པ། འདུ་བྱེད་ཐམས་ཅད་མི་རྟག་པའི་བདག་ཉིད་ཀྱི་ཕྱིར་དེ་ལ་དགོངས་པས་སྐྱོན་མེད་དོ། །སྡུག་བསྔལ་ལས་དོན་གཞན་མ་ཡིན་པ་འགོག་པ་ཞེས་བྱ་བ་ཆོས་མངོན་པ་བ་རྣམས་ཀྱི་ཁས་བླངས་འགལ་བ་སྟེ། སྡུག་བསྔལ་ལས་དོན་གཞན་མ་ཡིན་པ་སྡུག་བསྔལ་ཉིད་སྡུག་བསྔལ་འགོག་པར་མི་རུང་ངོ༌། །གང་ཡང་འདི་ནི་དོན་གཞན་གྱི་འགོག་པ་རྟོགས་པར་བྱ་བའི་ཕྱིར་ལུང་དུ་གསུངས་ཏེ། དེ་ཡང་ཡོད་པའི་སྒྲ་ནི་སྔ་ན་མེད་པ་དང་ཞིག་ནས་མེད་པ་ལ་ཡང་ཡོད་དོ་ཞེས་བྱ་བ་འདིས་སླར་ཡང་བཤད་དོ། །མྱ་ངན་ལས་འདས་པ་མི་རྟག་པར་བསྟན་པ་དེ་ཡང་དངོས་པོ་ཞེས་བྱ་བ་འདིས་ནི་སརྦ། མ། ལི་ཀྲྀ། ཏནྣ་ཧི། དངོས་པོའི་ངོ་བོ་མི་རྟག་པ་ཉིད་ནི་མར་མེ་ལྟ་བུ་སྟེ་རེས་འགའ་མེད་པས་ན་བཅོམ་ལྡན་འདས་ཀྱིས་མར་མེ་བཞིན་མྱ་ངན་ལས་འདས་པ་ཡང་རྟོགས་ཞེས་སེམས་ཀྱི་རྣམ་པར་ཐར་པ་གང་ཡིན་པ་རྟག་པ་ཉིད་ཁོ་ནར་བསྟན་པར་འགྱུར་རོ། །གཞན་དུ་བྲིས་པ་གང་ཡིན་པ་ཐམས་ཅད། མཆོག །བྱས། དེ་མ་ཡིན། ཉིད་རྣམ་པར་བཤད་པ་འདི་ལས་བཀག་པར་རྟོགས་པར་བྱ་སྟེ། གཞུང་མངས་པའི་འཇིགས་པས་དངོས་སུ་མ་བཀག་གོ །སློབ་དཔོན་འདུས་བཟང་ན་རེ། མདོ་བྱེད་པ་སོ་སོར་བརྟགས་པ་མ་ཡིན་པས་འགོག་པའི་མཚན་ཉིད་གསུངས་ཏེ། སོ་སོར་བརྟགས་པ་དང་བྲལ་བ་ཁོ་ནར་རྐྱེན་མ་ཚང་བས་མི་སྐྱེ་བ་སོ་སོར་བརྟགས་པ་མ་ཡིན་པས་འགོག་པ་ཞེས་བྱའོ། །རྐྱེན་མ་ཚང་བ་ཞེས་བྱ་བ་འདི་ཅི་ཞེ་ན། རྐྱེན་རྣམས་མ་ཚོགས་པ་དང་ཉེ་བར་མ་གྱུར་པ་ཞེས་གང་བཤད་པ་ཡིན་ནོ། །གང་མེད་པ་ནི་དངོས་པོ་སྐྱེ་བའི་གེགས་ནུས་པ་མ་ཡིན་པས་དེའི་རྐྱེན་མ་ཚང་བ་ཙམ་
སོ་སོར་བརྟགས་པ་མ་ཡིན་པས་འགོག་པ་མ་ཡིན་ནོ། །རྐྱེན་མ་ཚང་བ་ལས་ཆོས་ཁ་ཅིག་དམིགས་ཏེ་གང་ནུས་པ་ལས་སྐྱེ་བའི་ཆོས་ཅན་ཡང་མི་སྐྱེ་བ་ཡིན་ནོ། །དེ་ལྟ་མ་ཡིན་ན་རྐྱེན་མ་ཚང་བ་ཙམ་ལས་མི་སྐྱེ་བར་ཁས་ལེན་པར་བྱེད་ན། ཡང་དེའི་རིགས་ཅན་གྱི་རྐྱེན་དང་ཉེ་བ་ལས་ཆོས་དེ་སྐྱེ་བར་ཐལ་བར་འགྱུར་རོ། །སོ་སོར་བརྟགས་པའི་འགོག་པ་རྐྱེན་མ་ཚང་བ་མ་ཡིན་ནོ། །འོ་ན་རྐྱེན་མ་ཚང་བ་ལས་དངོས་པོ་རྣམས་མི་སྐྱེ་བ་ཅི་ཞེ་ན། གང་གི་ཕྱིར་རྐྱེན་ལ་ནི་སྐྱེ་བ་དེ་མེད་པའི་ཕྱིར་དེ་ཉིད་ཁོ་ན་མ་ཡིན་ཏེ། ཆོས་གཞན་གྱི་དངོས་པོ་མི་སྐྱེ་བ་བྱ་བ་མ་མཐོང་བ་དེའི་ཕྱིར་སྐྱེ་བའི་གེགས་ཀྱི་ཕྱིར་རྒྱུ་མེད་པའི་ཆོས་གཞན་ཀུན་ཏུ་རྟོགས་པས་བརྟགས་ནས་ཆོས་གཞན་སྐྱེད་པའི་གེགས་ནུས་པས་རྟག་ཏུ་སྐྱེ་བ་ལ་གེགས་སུ་ཐལ་བར་འགྱུར་རོ། །འོ་ན་ཅི་དེའི་ཐོབ་པ་ལ་རྐྱེན་མ་ཚང་བ་ཞེས་བྱ་བ་ཅི་ཡང་ཡོད་པ་མ་ཡིན་ན་གང་དེའི་ཐོབ་བརྟག་པ་ཉིད་དུ་རྟོག་པར་མི་བྱེད་ཅེ་ན། གང་གི་ཕྱིར་རྐྱེན་མ་ཚང་བ་ཁོ་ན་མ་ཡིན་ཏེ་དེའི་ཐོབ་པའི་རྒྱུ་འདོད་དོ། །གང་ལ་རྐྱེན་མ་ཚང་བ་རྣམས་ཁོ་ན་ལ་སེམས་གནས་པ་སོ་སོར་ཐོབ་པས་དེ་ཉིད་དེའི་རྒྱུའོ། །དེ་ལྟ་ན་འོ་ན་རྐྱེན་མ་ཚང་བ་ཉིད་ལས་དངོས་པོ་རྣམས་མི་སྐྱེ་བར་འགྱུར་རོ། །བཅོམ་ལྡན་འདས་ཀྱིས་སོ་སོར་བརྟགས་པ་མ་ཡིན་པའི་འགོག་པའི་ཐོབ་པ་ཡོངས་སུ་བརྟགས་པས་གསུངས་པ་ཡང་ཅི་ཞེ་ན། འདི་ལ་ཡོད་པ་མ་ཡིན་པ་འདིར་མི་འགྱུར་ཞེས་བྱ་སྟེ། རྒྱུ་ལ་ཡོད་པ་མ་ཡིན་པ་འབྲས་བུར་མི་འགྱུར་ཞེས་བྱ་བའི་དོན་ཏོ། །གལ་ཏེ་ཡང་སོ་སོར་བརྟགས་པ་མ་ཡིན་པའི་འགོག་པ་ལས་མ་བྱུང་བའི་དངོས་པོ་རྣམས་ཉིད་བརྗོད་པར་བྱ་ན། འདི་ལ་ཡོད་པའམ་མ་ཐོབ་པ་འདིར་མི་འགྱུར་ཞེས་སོ། །གང་བཤད་པ། སླར་ཡང་དེའི་རིགས་ཅན་གྱི་རྐྱེན་ཉེ་བ་ལས་ཆོས་དེ་སྐྱེ་བར་ཐལ་བར་འགྱུར་རོ། །དེ་ཡང་མི་རིགས་ཏེ་དེའི་རིགས་ཅན་ཁོ་ནའི་འབྲས་བུར་འགྱུར་གྱི། གང་གི་རྐྱེན་མ་ཚང་བ་དེ་ཉིད་ཀྱིས་ནི་མ་ཡིན་ཏེ་དེ་ནི་དེའི་རྐྱེན་གྱི་རིགས་ཅན་ཡིན་ནོ། །རྐྱེན་རྣམས་ཀྱིས་རྐྱེན་གཞན་དང་གཞན་སྐྱེད་པར་འགྱུར་བ་མ་ཡིན་ནམ་ཞེ་ན། དེ་ནི་མ་ཡིན་ཏེ། རྐྱེན་རྣམས་ནི་སླར་ཡང་འབྲས་བུ་དང་བཅས་པ་ཡོད་པ་གང་ལས་སླར་ཡང་སྐྱེ་བ་དེའི་རྐྱེན་དུ་འགྱུར་བ་དེའི་
ཕྱིར་རྐྱེན་མ་ཚང་བ་ལས་མ་འོངས་པ་ན་གཏན་མི་སྐྱེ་བ་སོ་སོར་བརྟགས་པ་མ་ཡིན་པའི་འགོག་པ་ཞེས་གནས་སོ། །གང་ཡང་གཞན་ལས་མང་དུ་བཤད་པ་དེ་ཡང་རྣམ་པར་བཤད་པ་འདིས་བཀག་པར་བལྟ་སྟེ་དངོས་སུ་དགག་པ་མ་བྱས་སོ། །ཆོས་མངོན་པ་ལས་ཀྱང་ཞེས་བྱ་བ་རྒྱས་པར་འབྱུང་ངོ༌། །བྱེ་བྲག་ཏུ་སྨྲ་བ་རྣམས་ན་རེ་འདིའི་དོན་ནི་འདི་མ་ཡིན་ནོ་ཞེས་བྱ་བ་ནི། དངོས་པོ་མེད་པ་ནི་ལུས་མེད་པ་དང་རང་གི་ངོ་བོ་མེད་པ་མ་ཡིན་པའོ། །ཅིའི་ཕྱིར་ཞེ་ན་དངོས་པོའི་སྒྲའི་དོན་དུ་མ་བརྗོད་པ་ཡིན་པའི་ཕྱིར་རོ། །གལ་ཏེ་འདི་དོན་མ་ཡིན་པའི་ཕྱིར་རོ། །འོ་ན་གང་ཡིན་ཞེ་ན་དངོས་པོ་ནི་རྣམ་པ་ལྔའོ། །རང་བཞིན་གྱི་དངོས་པོ་ནི་ཞེས་བྱ་བ་ནི་རང་བཞིན་ཉིད་དངོས་པོའོ། །དངོས་པོ་ཇི་ལྟ་བ་བཞིན་དུ་ཞེས་བྱ་བ་ནི་དམིགས་པ་ཇི་ལྟ་བ་བཞིན་དུ་ཞེས་བྱ་བའི་དོན་ཏོ། །དམིགས་པ་ཉིད་དངོས་པོ་ཡིན་པ་འདི་དམིགས་པའི་དངོས་པོའོ། །ལྡན་པའི་དངོས་པོ་ཞེས་བྱ་བ་ལ། ལྡན་པའི་དངོས་པོ་ནི་ལྡན་པའི་དངོས་པོའོ། །རྒྱུའི་དངོས་པོ་ནི་ཞེས་བྱ་བ་ནི་རྒྱུ་ཉིད་དངོས་པོ་ཡིན་པ་ནི་རྒྱུའི་དངོས་པོའོ། །ཡོངས་སུ་གཟུང་བའི་དངོས་པོ་ཞེས་བྱ་བ་ལ། ཡོངས་སུ་གཟུང་བ་འམ་ཡོངས་སུ་འཛིན་པའི་དངོས་པོ་ནི་ཡོངས་སུ་གཟུང་བའི་དངོས་པོ་སྟེ། ཡོངས་སུ་འཛིན་པ་ནི་འདིར་བདག་གིར་བྱེད་པའོ། །དེའི་ཕྱིར་འདིར་རྒྱུ་དངོས་པོའི་སྒྲར་གསུངས་ཀྱི་རང་གི་ངོ་བོ་ནི་མ་ཡིན་ནོ་ཞེས་སྟོན་ཏེ། གང་གི་ཕྱིར་ཆོས་མངོན་པ་ལས་འདུས་མ་བྱས་རྣམས་རྒྱུ་མེད་པ་ཉིད་དུ་གྲུབ་ཀྱི་རང་གི་ངོ་བོ་མེད་པ་ནི་མ་ཡིན་ནོ་ཞེས་སྟོན་ཏོ། །ཡང་འབྲས་བུ་འདི་དག་ལས་ཞེས་བྱ་བ་རྒྱས་པར་འབྱུང་བ་ལ། འཆད་པར་འགྱུར་བའི་མཚན་ཉིད་ཅན་རྣམ་པར་སྨིན་པ་དང༌། བདག་པོ་དང༌། རྒྱུ་མཐུན་པ་དང༌། སྐྱེས་བུ་བྱེད་པ་དང༌། བྲལ་བའི་འབྲས་བུ་ཞེས་བྱ་བ་ལྔ་པོ་གང་དག་ཡིན་པ་དེ་དག་ལས་འབྲས་བུ་གང་ཞིག་རྒྱུ་དྲུག་པོ་དེ་ལས་རྒྱུ་གང་གི་ཞེ་ན། དེ་ལ་རེ་ཞིག་བྲལ་བའི་འབྲས་བུ་ནི་རྒྱུ་གང་གི་ཡང་མ་ཡིན་ནོ་ཞེས་བཤད་ཟིན་ཏོ། །རྣམ་སྨིན་འབྲས་བུ་ཐ་མའི་ཡིན། །ཞེས་བྱ་བ་ལ་རྣམ་པར་སྨིན་པ་ལས་རྣམ་པར་སྨིན་པའི་རྒྱུ་མཐུན་པ་སྟེ། རྣམ་པར་སྨིན་པ་ལས་རྣམ་པར་སྨིན་པ་ནི་མ་ཡིན་ཏེ། དགེ་བ་དང་མི་དགེ་བ་ཉིད་རྣམ་པར་སྨིན་པ་དང་
བཅས་པས་སོ། །འདིར་རྣམ་པར་སྨིན་པའི་འབྲས་བུ་ནི་རྣམ་པར་སྨིན་པའི་རྒྱུ་ཁོ་ནའི་ཡིན་ནོ་ཞེས་ངེས་པར་གཟུང་གི །རྣམ་པར་སྨིན་པ་ནི་འབྲས་བུ་ཁོ་ན་ཞེས་བྱ་བར་ནི་མ་ཡིན་ཏེ་བདག་པོའི་འབྲས་བུ་མ་བཀག་པའི་ཕྱིར་རོ། །བདག་པོའི་འབྲས་བུ་དང་པོའི་ཡིན་ཞེས་བྱ་བ་ལ། འདི་བདག་པོའི་ཡིན་པ་ནི་བདག་པོའིའོ། །འདིར་ངེས་པར་གཟུང་བ་གཉིས་ཀ་ཡང་ངེས་པར་གཟུང་བར་བྱ་སྟེ། འདི་ལྟར་བྱེད་རྒྱུའི་རྒྱུ་འགའ་ཞིག་ལ་སྐྱེས་བུ་བྱེད་པའི་འབྲས་བུ་ཡང་ཡོད་ལ། གཞན་དག་ལ་ཡང་བདག་པོའི་འབྲས་བུ་ཡོད་པ་མ་ཡིན་ནོ། །དེ་ལྟ་ན་ནི་འོ་ན་བདག་པོའི་འབྲས་བུ་དང་པོའི་ཡིན་ཞེས་བྱ་བའི་ངག་འབྲས་བུ་མེད་པར་ཐལ་བར་འགྱུར་རོ་ཞེ་ན། སྐྱེས་བུ་བྱེད་པའི་འབྲས་བུ་ནི་བདག་པོའི་འབྲས་བུ་ལྟར་ཐམས་ཅད་ཀྱི་མ་ཡིན་ནོ་ཞེས་ཤེས་པར་བྱ་བའི་དོན་དུ་ཡིན་པའི་ཕྱིར་འབྲས་བུ་མེད་པ་མ་ཡིན་ན། །དེ་ཉིད་དབང་བྱེད་པ་ཡིན་ནོ་ཞེས་བྱ་བ་ནི་མི་སྒྲིབ་པའི་ངོ་བོར་གནས་པ་གང་ཡིན་པ་ཁོ་ནའོ། །བྱེད་རྒྱུའི་རྒྱུ་ལས་སྐྱེས་པའི་དངོས་པོ་ཡང་ཡོད་དེ་ཞེས་བྱ་བ་ནི་སྐྱེད་པར་བྱེད་པའི་དངོས་པོ་ཡང་ངོ༌། །འདིས་ནི་འདུས་མ་བྱས་མ་གཏོགས་པ་བྱེད་རྒྱུ་བྱེད་པ་པོ་དང་བཏང་སྙོམས་པ་དང་རྣམ་པ་གཉིས་ཀ་ལ་ཡང་བདག་པོའི་འབྲས་བུ་ཡོད་དོ་ཞེས་བྱ་བར་ཤེས་པར་བྱ་བར་འགྱུར་ཏེ། དེ་སྐད་དུ། སྔོན་བྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་བདག་པོའི་འབྲས། །ཞེས་འཆད་དོ། །འདི་ལྟ་སྟེ། རྣམ་པར་ཤེས་པའི་ཚོགས་ལྔ་པོ་དག་ལ་ཞེས་བྱ་བ་ལ། མིག་ལ་སོགས་པའི་སྐྱེ་མཆེད་བཅུ་ནི་མིག་ལ་སོགས་པའི་རྣམ་པར་ཤེས་པ་རྣམས་ཀྱི་བྱེད་རྒྱུའི་རྒྱུ་ལས་གཞན་མ་ཡིན་པའི་ཕྱིར་རྣམ་པར་སྨིན་པ་དང་བཅས་པའི་རྒྱུ་སྲིད་དོ། །ཡིད་དང་ཆོས་ཀྱང་ཡིད་ཀྱི་རྣམ་པར་ཤེས་པའི་སྐལ་བ་མཉམ་པ་དང་ཀུན་ཏུ་འགྲོ་བ་དང་མཚུངས་པར་ལྡན་པའི་རྒྱུ་དག་ཀྱང་ཡིན་ཏེ་དེ་གཟུང་བ་ནི་མ་ཡིན་ནོ། །སྣོད་ཀྱི་འཇིག་རྟེན་ལ་ཞེས་བྱ་བ་ལ། སྣོད་ཀྱི་འཇིག་རྟེན་ནི་ལུང་དུ་མ་བསྟན་པ་དང༌། འདོད་དགུར་མི་འཇུག་པ་དང༌། དགེ་བ་དང་མི་དགེ་བའི་ལས་ཀྱིས་སྐྱེད་པ་ཡིན་ཡང་རྣམ་པར་སྨིན་པའི་འབྲས་བུ་མ་ཡིན་ཏེ། རྣམ་པར་སྨིན་པ་ནི་ཐུན་མོང་མ་ཡིན་པའི་ཕྱིར་ལ། །སེམས་ཅན་བརྗོད་ཅེས་
མཚན་ཉིད་བྱས་པའི་ཕྱིར་རོ། །དེ་ལས་གཞན་པའི་རྒྱུ་མི་སྲིད་པ་ལས་ནི་བྱེད་རྒྱུའི་རྒྱུ་ཁོ་ན་ཡིན་ནོ། །དེ་ལྟ་བུ་ལ་སོགས་པ་སྦྱར་བར་བྱ་སྟེ། དགེ་བའི་ཆོས་རྣམས་ཀྱི་རྣམ་པར་སྨིན་པ་ཡིད་དུ་འོང་བ་དང་མི་དགེ་བ་རྣམས་ནི་བཟློག་པའོ་ཞེས་བྱ་བ་དེ་ལྟ་བུ་ལ་སོགས་པའོ། །སྐལ་མཉམ་ཀུན་ཏུ་འགྲོ་བ་ཡི། །ཞེས་བྱ་བ་ལ་རྒྱུ་མཐུན་པའི་འབྲས་བུ་ནི་རྒྱུ་དང་འདྲ་བ་ཡིན་ཏེ། དེའི་ཕྱིར་རྒྱུ་མཐུན་པའི་འབྲས་བུ་ནི་སྐལ་བ་མཉམ་པ་དང་ཀུན་འགྲོ་བདག་ཁོ་ནའི་ཡིན་ནོ་ཞེས་བྱ་བར་ངེས་པར་གཟུང་གི་རྒྱུ་མཐུན་པ་ཁོ་ན་ནི་མ་ཡིན་ཏེ། སྐྱེས་བུ་བྱེད་པ་དང་བདག་པོའི་འབྲས་བུ་ཡང་དེ་དག་གི་ཡིན་པའི་ཕྱིར་རོ། །སྐྱེས་བུ་བ་ནི་གཉིས་ཀྱི་ཡིན། །ཞེས་བྱ་བ་ལ་སྐྱེས་བུ་བྱེད་པའི་འབྲས་བུ་ཁོ་ན་གཉིས་ཀྱི་ཡིན་ཏེ། འདི་ལྟར་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་ནི་ལྷན་ཅིག་འབྱུང་བའི་འབྲས་བུ་ཁོ་ན་ལ་བྱེད་པ་དང་ལྡན་པའི་ཕྱིར་རོ། །བདག་པོའི་འབྲས་བུ་ཡང་དེ་དག་གི་དེར་འགྱུར་མོད་ཀྱི། དེ་ནི་བྱེད་པ་པོའི་མ་ཡིན་པའི་ཡང་འདིར་བརྗོད་པར་མི་འདོད་དོ། །ཚིག་ལེའུར་བྱས་པས་སྦྱར་བའི་ཕྱིར་སྐྱེས་བུ་པ་ཞེས་བྱ་བའི་སྒྲ་བྱེ་བྲག་ཏུ་བཤད་པའི་ཕྱིར་སྐྱེས་བུའི་ངོ་བོ་ལས་མི་གཞན་པའི་ཕྱིར་ཞེས་བྱ་བ་རྒྱས་པར་སྨོས་སོ། །སྐྱེས་བུའི་བྱེད་པ་ནི་བྱ་བ་དང་ལས་དང་བྱ་རྒྱུ་དང་གཡོ་བ་ཞེས་བྱ་བ་ལས་དོན་གཞན་མ་ཡིན་ལ། བྱ་བ་ཡང་བྱ་བ་དང་ལྡན་པ་དག་ལས་གཞན་མ་ཡིན་པས་སྐྱེས་བུ་ཉིད་སྐྱེས་བུའི་བྱེད་པ་ཡིན་པར་བཤད་ཅིང༌། དེའི་འབྲས་བུ་ནི་སྐྱེས་བུ་པར་བཤད་དོ། །ནང་གི་བྱེད་པའི་སྐྱེས་བུ་མེད་པས་སྐྱེས་བུ་བྱེད་པ་ཞེས་བྱ་བ་འདི་ཅི་ཞིག་ཅེ་ན། ཆོས་གང་གི་བྱེད་པ་གང་ཡིན་པ་དེ་ནི་དེའི་སྐྱེས་བུ་བྱེད་པའོ། །གལ་ཏེ་དེ་ལྟ་ན་ཆོས་ཀྱི་བྱེད་པ་ཞེས་བརྗོད་པར་བྱའི་སྐྱེས་བུ་བྱེད་པ་ཞེས་ཇི་ལྟར་བརྗོད་ཅེ་ན། འཇིག་རྟེན་ན་གྲགས་པའི་སྐྱེས་བུའི་བྱེད་པ་ལ་སྐྱེས་བུ་བྱེད་པ་ཞེས་གྲགས་པས་དེའི་ཕྱིར་འདིར་ཡང་སྐྱེས་བུའི་བྱེད་པ་ནི་སྐྱེས་བུའི་བྱེད་པ་དང་འདྲ་བས་སྐྱེས་བུའི་བྱེད་པའོ། །ཕྱི་རོལ་ཏུ་ཡོངས་སུ་བརྟགས་པའི་སྐྱེས་བུ་དཔེར་བྱས་ནས་སྐྱེས་བུ་བྱེད་པ་ཞེས་བྱ་སྟེ། དཔེར་ན་བྱ་རོག་གི་རྐང་པ་དང་འདྲ་བ་ལ་བྱ་རོག་རྐང་དང༌། གླང་པོ་ཆེ་མྱོས་པ་དང་འདྲ་བ་ལ་གླང་པོ་ཆེ་མྱོས་པ་ཞེས་བྱ་བ་ལྟ་བུའོ། །སློབ་དཔོན་འདུས་བཟང་ན་རེ།
སྐྱེས་བུའི་བྱེད་པ་ནི་ནུས་པ་པའི་ཆོས་ཏེ། བྱེད་པ་གང་ཡིན་པའི་སྐྱེས་བུའི་བྱེད་པར་སེམས་སོ་ཞེས་ཟར་རོ། །དེས་ནི་སྐྱེས་བུ་བྱེད་པ་ནི་འབྲས་བུ་འཕེན་པའོ་ཞེས་བཤད་པ་ཡིན་ནོ། །དེ་ལྟར་ན་བར་མ་ཆད་དུ་སྐྱེ་བ་དང་དུས་གཞན་དུ་སྐྱེ་བ་ལ་ཡང་སྐྱེས་བུ་བྱེད་པ་རུང་ལ། ལྷན་ཅིག་སྐྱེ་བ་ལ་ནི་མ་ཡིན་ནོ། །ལྷན་ཅིག་སྐྱེ་བ་ལ་ཐམས་ཅད་གཅིག་པའི་སྐྱེས་བུ་བྱེད་པའི་འབྲས་བུ་ཡོད་པ་མ་ཡིན་ཏེ། རང་བཞིན་གྱི་འབྲས་བུས་རང་བཞིན་མི་སྐྱེད་པའི་ཕྱིར་དང་མ་སྤངས་པ་རྣམས་འབྲས་བུ་འཕེན་ན་འབྲས་བུ་དུ་མར་ཐལ་བའི་ཕྱིར་རོ། །ནུས་པའི་ཆོས་ནི་རྒྱུའི་དངོས་པོའོ། །རྒྱུའི་དངོས་པོའི་གནས་སྐབས་ཁོ་ནས་འབྲས་བུ་འཕེན་ནོ་ཞེས་བྱ་བ་འདིས་ཁྱད་པར་མཚོན་པར་བྱེད་པ་མ་ཡིན་ནོ། །དེའི་ཕྱིར་གཉི་ག་ལ་ཡང་ཐལ་བར་འགྱུར་པ་མཚུངས་སོ། །ཅི་གཞན་དག་ལ་ཡང་ཞེས་བྱ་བ་རྒྱས་པར་འབྱུང་སྟེ། སྐལ་བ་མཉམ་པ་དང༌། ཀུན་འགྲོ་བ་དང༌། རྣམ་པར་སྨིན་པ་དང༌། བྱེད་རྒྱུའི་རྣམས་ལ་ཡང་ཡོད་དམ། འོན་ཏེ་ལྷན་ཅིག་འབྱུང་བ་དང་མཚུངས་པར་ལྡན་པ་གཉིས་ཁོ་ནའི་ཡིན་ཞེ་ན། གཞན་དག་ལ་ཡང་ཞེས་བྱ་བ་རྒྱས་པར་འབྱུང་བ་ལ། སྐལ་བ་མཉམ་པའི་རྒྱུ་ལ་སོགས་པ་དག་ལ་ཡང་སྟེ། སྐལ་བ་མཉམ་པ་དང༌། ཀུན་ཏུ་འགྲོ་བའི་རྒྱུ་དག་ལ་ཡང་དེ་མ་ཐག་ཏུ་འབྱུང་བའི་སྐྱེས་བུ་བྱེད་པའི་འབྲས་བུ་ཡོད་ཀྱི་རྒྱུ་མཐུན་པའི་འབྲས་བུ་ནི་མ་ཡིན་ནོ། །ཅིའི་ཕྱིར་སྐྱེས་བུ་བྱེད་པའི་འབྲས་བུ་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་ཁོ་ནའི་ཡིན་པར་བརྗོད་ཅེ་ན། ལྷན་ཅིག་དང་དེ་མ་ཐག་ཏུ་འབྱུང་བ་དེ་ནི་དེ་གཉིས་ཁོ་ནའི་ཡིན་གྱི་སྔ་མ་དག་གི་ནི་མ་ཡིན་ཏེ། འབྲས་བུ་གང་ཡིན་པ་རྒྱུ་དང་འདྲ་བ་དག་ཏུ་རྣམ་པར་གཞག་གོ །རྒྱུ་མཐུན་པ་དང་སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུ་དག་གིས་ནི་འདྲ་བ་དང༌། ལྷན་ཅིག་སྐྱེས་པ་ནི་ཅིག་ཤོས་སྐྱེས་བུ་བྱེད་པའི་འབྲས་བུ་དག་གི་ཡིན་པས་དེ་ལྟར་བཤད་དོ། །སྐལ་བ་མཉམ་པའི་རྒྱུ་ཐམས་ཅད་ལ་ཡང་དེ་མ་ཐག་ཏུ་འབྱུང་བའི་སྐྱེས་བུ་བྱེད་པའི་འབྲས་བུ་ཡོད་པ་མ་ཡིན་ཏེ། དགྲ་བཅོམ་པའི་འཆི་ཀ་མ་མི་འཐད་པའི་ཕྱིར་རོ། །ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་ལ་ནི་གདོན་མི་ཟའོ། །བྱེད་རྒྱུའི་རྒྱུ་ཡང་ཁ་ཅིག་ལ་སྐྱེས་བུ་བྱེད་པའི་
འདྲས་བུ་ཡོད་ཀྱི་ཐམས་ཅད་ལ་ནི་མ་ཡིན་ནོ། །རྣམ་པར་སྨིན་པའི་རྒྱུ་མ་གཏོགས་པ་ཞེས་བྱ་བ་འབྱུང་ངོ༌། །ཅིའི་ཕྱིར་ཞེ་ན། སྐྱེས་བུ་བྱེད་པའི་འབྲས་བུ་ནི་ལྷན་ཅིག་འབྱུང་བའམ་དེ་མ་ཐག་ཏུ་འབྱུང་བ་ཡིན་ན། རྣམ་པར་སྨིན་པ་ནི་དེ་ལྟ་མ་ཡིན་ནོ། །དེ་ནི་རྒྱུད་ལ་བལྟོས་པ་ཁོ་ན་ཡིན་གྱི། དེ་མ་ཐག་པའམ་དུས་གཅིག་པ་མ་ཡིན་ནོ། །གཞན་དག་ན་རེ། དེ་ལ་ཡང་ཞེས་བྱ་བ་རྒྱས་པར་འབྱུང་བ་ལ། འདི་ལྟར་ཞིང་ལ་སོགས་པའི་བྱ་བ་མཚུངས་ཤིང་འབྱོར་པར་མཚུངས་པ་ལ་ཁ་ཅིག་ལ་འབྲུ་ལ་སོགས་པ་འབྱོར་པར་གྱུར་ལ་ཁ་ཅིག་གིས་ནི་མ་ཡིན་པ་ལྟ་བུའོ། །གང་ཞིག་རྣམ་པར་སྨིན་པའི་རྒྱུ་ལས་སྐྱེས་བུ་བྱེད་པའི་འབྲས་བུ་མི་འདོད་པ་དེ་དག་གི་ལྟར་ན་དེ་སྔོན་གྱི་ལས་ཀྱི་འཕེན་པ་ལས་མ་ཡིན་ཞེས་དཔེར་བརྗོད་དོ། །དེའི་ཕྱིར་ལྷན་ཅིག་འབྱུང་བ་དང་དེ་མ་ཐག་ཏུ་འབྱུང་བ་འབའ་ཞིག་ཏུ་མ་ཟད་ཀྱི། སྐྱེས་བུ་བྱེད་པའི་འབྲས་བུའི་སྐལ་བ་ཡང་ཡོད་པ་ཡིན་ནོ། །དེ་ལ་དཔེར་བརྗོད་པ་འདི་ལ་རྣམ་པར་དཔྱད་པ་མེད་དོ། །སྐལ་པ་མཉམ་པ་དང་ཀུན་ཏུ་འགྲོ་བའི་རྒྱུ་རྣམས་ཀྱིས་དེ་མ་ཐག་ཏུ་སྐྱེ་བ་སྐྱེས་བུ་བྱེད་པའི་འབྲས་བུར་གསུངས་སོ། །དེ་ཉིད་གཅིག་པུ་སྐྱེས་བུ་བྱེད་པའི་འབྲས་བུ་མ་ཡིན་གྱི་རྒྱུ་མཐུན་པའི་འབྲས་བུ་དང་བདག་པོའི་འབྲས་བུར་ཡང་རུང་ངོ། །ཇི་ལྟར་དེ་རྒྱུ་མཐུན་པའི་འབྲས་བུ་མེད་པ་དེ་ལྟར་སྐྱེས་བུ་བྱེད་པའི་འབྲས་བུའམ་བདག་པོའི་འབྲས་བུ་སྟེ། དེ་བཞིན་དུ་ཅིག་ཤོས་ལ་ཡང་བརྗོད་པར་བྱའོ། །རྒྱུ་དང་འདྲ་བའི་ཕྱིར་རྒྱུ་མཐུན་པའི་འབྲས་བུ་དང་དེའི་སྟོབས་ཀྱིས་བསྐྱེད་བའི་ཕྱིར་སྐྱེས་བུ་བྱེད་པའི་འབྲས་བུ་དང་དེ་བསྐྱེད་པ་ལ་གེགས་མེད་པའི་ངོ་བོར་གནས་པས་བདག་པོའི་འབྲས་བུ་ཞེས་བྱ་སྟེ་འཆོལ་བ་མེད་དོ། །རྒྱུ་དང་འབྲས་བུའི་ངེས་པ་བཤད་ཟིན་ཏོ།། །།ད་ནི་འབྲས་བུ་རྣམས་ཀྱི་མཚན་ཉིད་བརྗོད་པར་བྱ་བ་ཡིན་པས། དེའི་ཕྱིར་རྣམ་བར་སྨིན་པའི་འབྲས་བུ་ཞེས་བྱ་བ་འདི་ཅི་ཡིན་ཞེས་བྱ་བ་ལ་སོགས་པ་སྨོས་སོ། །རྣམ་སྨིན་ལུང་དུ་མ་བསྟན་ཆོས། །ཞེས་བྱ་བ་ལ། རྣམ་པར་སྨིན་པ་ནི་ལུང་དུ་མ་བསྟན་པ་ཁོ་ན་ཡིན་ཞིང༌། སེམས་ཅན་དུ་བརྗོད་པ་ཁོ་ན་ཡིན་ནོ་ཞེས་ངེས་པར་གཟུང་གི །རྣམ་པར་སྨིན་པ་ཁོ་ན་སེམས་ཅན་དུ་བརྗོད་པ་ནི་མ་ཡིན་ནོ། །དེ་ཉིད་ཀྱི་ཕྱིར་རྒྱུ་མཐུན་པ་ལས་བྱུང་བ་དང༌། རྒྱས་པ་ལས་བྱུང་བ་བསལ་བར་བྱ་བའི་ཕྱིར་ལུང་
བསྟན་ཕྱིས་འབྱུང་ཞེས་བྱ་བ་སྨོས་ཏེ། ལུང་བསྟན་པའི་ཕྱི་ནས་འབྱུང་བས་ན་ལུང་བསྟན་ཕྱིས་འབྱུང་བའོ། །མ་བསྒྲིབས་ལ་ལུང་དུ་མ་བསྟན་པ་སྨོས་པ་ནི་འཇིག་ཚོགས་ལ་ལྟ་བ་དང༌། མཐར་འཛིན་བར་ལྟ་བ་བསལ་བར་བྱ་བའི་ཕྱིར་རོ། །ལྟ་བ་དེ་གཉིས་ནི་སེམས་ཅན་དུ་སྟོན་པ་དང༌། ལུང་བསྟན་ཕྱིས་འབྱུང་མ་ཡིན་མོད་ཀྱི། མ་བསྒྲིབས་ལ་ལུང་དུ་མ་བསྟན་པ་ནི་མ་ཡིན་ལ་རྣམ་པར་སྨིན་པ་མ་ཡིན་ནོ། །དེ་ལྟ་ན་ནི་འོ་ན་དབང་པོའི་འབྱུང་བ་ཆེན་པོ་རྒྱས་པ་བསམ་གཏན་གྱི་ཁྱད་པར་ལ་སྙོམས་པར་ཞུགས་པའི་རྒྱུ་ཅན་ཡང་ལུང་དུ་བསྟན་པའི་ཕྱིས་འབྱུང་བ་ཡིན་པའི་ཕྱིར་དང༌། མ་བསྒྲིབས་ལ་ལུང་དུ་མ་བསྟན་པའི་ཕྱིར་དང༌། སེམས་ཅན་དུ་བརྗོད་པའི་ཕྱིར་རྣམ་པར་སྨིན་པར་འགྱུར་ལ། དེ་ལྟ་ན་རྒྱས་པ་ལས་བྱུང་བ་དང༌། རྣམ་པར་སྨིན་པའི་རྣམ་པར་གཞག་པ་འདྲེས་པར་འགྱུར་རོ་ཞེ་ན་འདྲེས་པ་མེད་དེ། རྣམ་པར་སྨིན་པའི་རྒྱུ་དང་འབྲས་བུ་དག་ནི་ས་ཐ་དད་པ་ཉིད་དམ་དུས་གཅིག་པ་མ་ཡིན་ན། དབང་པོའི་འབྱུང་བ་ཆེན་པོ་རྒྱས་པ་དང༌། བསམ་གཏན་གྱི་ཁྱད་པར་ལ་སྙོམས་པར་ཞུགས་པ་དག་ནི་དུས་གཅིག་པ་དང་ས་ཐ་དད་པ་ཉིད་ཡིན་པས་དབང་པོའི་འབྱུང་བ་ཆེན་པོ་རྒྱས་པ་ལས་རྣམ་པར་སྨིན་པ་ཉིད་དུ་ཐལ་བར་འགྱུར་བ་མེད་མོད། དེ་ཉིད་ཀྱི་ཕྱིར་གང་ཞིག་དེ་ལས་དུས་ཕྱི་མ་ལས་འབྱུང་ཞིང་ཞེས་བྱ་བ་སྨོས་ཏེ། དེ་དང་ལྷན་ཅིག་ཏུ་ནི་མ་ཡིན་ནོ། །དེ་ལྟ་ན་འོ་ན་སྤྲུལ་པའི་སེམས་ལ་ཡང་ཐལ་བར་འགྱུར་ཏེ། དེ་ཡང་སྙོམས་པར་འཇུག་པའི་སེམས་དགེ་བ་ལས་འབྱུང་ཞིང༌། མ་བསྒྲིབས་ལ་ལུང་དུ་མ་བསྟན་པ་དང་སེམས་ཅན་དུ་བརྗོད་པ་ཡང་ཡིན་ནོ་ཞེ་ན། དེའི་ཕྱིར་དེ་མ་ཐག་ཏུ་མ་ཡིན་པ་ཞེས་བྱ་བ་སྨོས་སོ། །དེ་མ་ཐག་པ་ནི་མཚུངས་པ་དེ་མ་ཐག་པའི་སྟོབས་ཀྱིས་དྲངས་པའི་ཕྱིར་ལ། སྤྲུལ་པའི་སེམས་ཀྱང་སྙོམས་པར་འཇུག་པའི་སེམས་ཀྱིས་དེ་མ་ཐག་ཏུ་འབྱུང་ན། རྣམ་པར་སྨིན་པ་ནི་དེ་ལྟ་བུ་ཡང་མ་ཡིན་ནོ། །ཅིའི་ཕྱིར་སེམས་ཅན་དུ་སྟོན་པ་མ་ཡིན་པའི་དོན་ཞེས་བྱ་བ་རྒྱས་པར་འབྱུང་སྟེ། ལས་ལས་སྐྱེས་པ་ཉིད་དུ་མཚུངས་བཞིན་དུ་སེམས་ཅན་དུ་སྟོན་པ་ཁོ་ན་རྣམ་པར་སྨིན་པ་ཡིན་ལ། སེམས་ཅན་དུ་སྟོན་པ་མ་ཡིན་པ་ནི་མ་ཡིན་ནོ་ཞེས་བྱ་བ་འདི་ལ་རྒྱུ་ཅི་ཡོད་ཅེ་ན། དེའི་ཕྱིར་ཐུན་མོང་
པ་མ་ཡིན་པའི་ཕྱིར་ཏེ་ཞེས་བྱ་བ་ལ་སོགས་པ་སྨོས་སོ། །རྣམ་པར་སྨིན་པ་ནི་ཐུན་མོང་མ་ཡིན་པ་སྟེ་ཞེས་བྱ་བ་འབྱུང་སྟེ། རྒྱུད་གང་ལ་རྣམ་པར་སྨིན་པའི་རྒྱུ་ཡོད་པ་དེ་ཁོ་ན་ལས་འབྱུང་བའི་ཕྱིར་དེ་དང་འདྲ་བར་གཞན་གྱིས་མྱོང་བ་མེད་པའི་ཕྱིར་རོ། །གཞན་གྱིས་བྱས་པའི་ལས་ཀྱི་རྣམ་པར་སྨིན་པ་གཞན་གྱིས་མྱོང་བ་ནི་མ་ཡིན་ཏེ། དེ་ལྟ་ན་ནི་མ་བྱས་པ་དང་ཕྲད་པ་དང་བྱས་པ་ཆུད་ཟོས་པར་འགྱུར་རོ། །བདག་པོའི་འབྲས་བུ་སེམས་ཅན་དུ་སྟོན་པ་མ་ཡིན་པ་ཅིའི་ཕྱིར་མྱོང་ཞེ་ན་ཐུན་མོང་གི་ལས་ལས་བྱུང་བའི་ཕྱིར་ཏེ། དེ་མྱངས་ན་མ་བྱས་པ་དང་ཕྲད་པ་དང་བྱས་པ་ཆུད་ཟོས་པ་མེད་དོ། །རྒྱུ་མཐུན་རྒྱུ་དང་འདྲ་བའོ། །ཞེས་བྱ་བ་ལ། རེ་ཞིག་སྐལ་བ་མཉམ་པའི་རྒྱུའི་འབྲས་བུ་རྒྱུ་དང་དགེ་བ་དང༌། མི་དགེ་བ་དང༌། ལུང་དུ་མ་བསྟན་པར་འདྲ་བ་ནི་རིས་དང་རང་གིས་འདྲ་བ་བལྟོས་པ་ཡིན་པ་གཟུང་ལ། རང་གི་ས་པའི་ཉོན་མོངས་པ་དང་སྐལ་བ་མཉམ་པ་ཡང་ངོ༌། །ལྷན་ཅིག་སྐྱེས་པ་ཡང་སྐྱེས་བུ་བྱེད་པའི་འབྲས་བུ་དང་རྒྱུ་ལས་མ་ཡིན་ནམ་ཞེ་ན། གང་གི་ཕྱིར་འདྲ་བར་ཡོད་པ་སྐྱེས་བུ་བྱེད་པའི་འབྲས་བུ་སྟེ། རྒྱུ་གང་ཡིན་པ་དང་མི་འདྲ་བ་ནི་ཅུང་ཟད་ཀྱང་མེད་དོ། །རྒྱུ་མཐུན་པའི་འདྲས་བུ་ཡང་དེ་བཞིན་ཏེ། འདི་ལ་སྐྱོན་མེད་པས་མི་འདྲ་བ་ཡོད་པ་མ་ཡིན་ཡང་རྒྱུ་མཐུན་པ་ནི་རང་གི་རིས་ཀྱི་ཉོན་མོངས་པ་ཅན་འཇུག་པ་མཚུངས་པས་འདི་ལ་མི་འདྲ་བ་སྐྱེས་བུ་བྱེད་པའི་འབྲས་བུར་བརྗོད་དོ་ཞེས་གཞན་དག་ཟེར་རོ། །རང་གི་རྫས་འདྲ་བ་ཡང་མེད་དེ་ལྷན་ཅིག་སྐྱེས་པ་སྐྱེས་བུ་བྱེད་པའི་འབྲས་བུའོ། །དེ་ལ་ཚོར་བ་ལས་ཚོར་བ་ཉིད་འབྲས་བུར་རུང་བ་ཡིན་ཏེ། རང་གི་རྫས་འདྲ་བ་ཡང་རྒྱུ་མཐུན་པའི་འབྲས་བུ་ཞེས་དེ་ཉིད་རྒྱུ་དང་འདྲ་བར་བརྗོད་དོ། །འདི་ལྟར་དེ་ནི་ས་དང་ཉོན་མོངས་པ་ཅན་ལས་འབྲས་བུ་དང་འདྲ་བ་ཡིན་ཏེ། འདོད་པ་ན་སྤྱོད་པའི་ཀུན་ཏུ་འགྲོ་བའི་རྒྱུའི་འབྲས་བུ་ནི་འདོད་པ་ན་སྤྱོད་པའི་རྒྱུའི་ཉོན་མོངས་པ་ཅན་ཁོ་ན་ཡིན་ནོ། །སྐལ་བ་མཉམ་པའི་རྒྱུ་བཞིན་དུ་རྣམ་པ་ལས་ཀྱང་ནི་མ་ཡིན་ཏེ། རྣམ་པ་ལྔ་ཆར་ཡང་རྒྱུ་ཡིན་པའི་ཕྱིར་རོ། །སྐལ་བ་མཉམ་པའི་རྒྱུ་ནི་རྣམ་པ་ལས་ཀྱང་འབྲས་བུ་དང་འདྲ་བ་ཡིན་ནོ། །དེ་ལ་ཀུན་ཏུ་འགྲོ་བའི་རྒྱུ་གང་ཞིག་ས་དང་ཉོན་མོངས་པ་ཅན་ལས་ཡིན་པ་འབའ་ཞིག་ཏུ་མ་ཟད་ཀྱི། རྣམ་པ་ལས་ཀྱང་འདྲས་བུ་དང་འདྲ་བ་དེ་ནི་སྐལ་བ་མཉམ་
པའི་རྒྱུ་ཡིན་པར་ཁས་ལེན་པ་ཉིད་དོ། །དེ་ཉིད་ཀྱི་ཕྱིར་གང་ཞིག་གང་གི་སྐལ་བ་མཉམ་པའི་རྒྱུ་ཡིན་པ་དེ་ཞེས་བྱ་བ་རྒྱས་པར་སྨོས་སོ། །ཀུན་ཏུ་འགྲོ་བ་མ་ཡིན་པ་ནི་སྐལ་བ་མཉམ་པའི་རྒྱུ་ཁོ་ནའོ། །རིས་གཞན་པའི་ཀུན་ཏུ་འགྲོ་བ་ནི་ཀུན་ཏུ་འགྲོ་བ་ཁོ་ནའོ། །གཉིས་ཀ་ཡིན་པ་ནི་རང་གི་རིས་པའི་ཀུན་ཏུ་འགྲོ་བ་ཁོ་ནའོ། །དེ་ལྟར་ན་མུ་གསུམ་པ་ལ་བསམས་ནས། གང་ཞིག་རྣམ་པ་ལས་ཀྱང་འདྲ་བ་དེ་ནི་སྐལ་བ་མཉམ་པའི་རྒྱུ་ཡིན་པར་ཁས་ལེན་པ་ཉིད་དོ་ཞེས་བཤད་དོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ནི་མུ་གསུམ་དུ་བཤད་པའི་ཆོས་རྣམས་མ་གཏོགས་སོ་ཞེས་བྱ་བའི་དོན་ཏེ། །གང་གི་ཚེ་དགེ་བ་ལ་སོགས་པ་རྣམས་ཀྱང་མཇུག་ཐོགས་སུ་མཚན་ཉིད་མི་འདྲ་བ་སྐྱེ་བ་ནི་སྔ་མ་དེའི་སྐལ་བ་མཉམ་པའི་རྒྱུའམ་ཀུན་ཏུ་འགྲོ་བའི་རྒྱུ་མ་ཡིན་ནོ། །བྲལ་བ་བློ་ཡིས་ཟད་པའོ། །ཐོབ་བའོ་ཞེས་བྱ་བ་ནི་ཚིག་གི་ལྷག་མའོ། །འགོག་པ་སྨོས་པ་ནི་མ་ཐོབ་པ་ཙམ་བྲལ་བ་ཉིད་ཡིན་པ་དགག་པར་བྱ་བའི་དོན་ཏོ། །དེས་ན་ཞེས་བྱ་བ་ནི་གཏན་ཚིགས་བརྗོད་པ་སྟེ། གང་གི་ཕྱིར་འགོག་པ་ཤེས་རབ་ཀྱིས་ཐོབ་པར་བྱ་བ་ཡིན་པ་དེའི་ཕྱིར་བྲལ་བའི་འབྲས་བུ་སོ་སོར་བརྟགས་པས་འགོག་པ་ཡིན་ནོ་ཞེས་བཤད་པར་འགྱུར་རོ། །གང་གི་སྟོབས་ཀྱིས་གང་སྐྱེ་བའི་འབྲས་བུ་སྐྱེས་བུ་བྱེད་ལས་སྐྱེས་ཞེས་བྱ་བ་ལ་རྒྱུ་གང་གི་སྟོབས་ཀྱིས་འབྲས་བུ་གང་ཞིག་སྐྱེ་བ་དེ་ནི་དེའི་སྐྱེས་བུ་བྱེད་པའི་འབྲས་བུ་ཡིན་ནོ། །དཔེར་ན་ས་འོག་མའི་ཞེས་བྱ་བ་ལ་སོགས་པ་ལ། འདིར་རྒྱུ་དང་འབྲས་བུ་དག་ས་ཐ་དད་པའི་ཕྱིར་ཟག་པ་དང་བཅས་པ་དང༌། ཟག་པ་མེད་པ་ཡིན་པའི་ཕྱིར་དང༌། དགེ་བ་དང་ལུང་དུ་མ་བསྟན་པ་ཡིན་པའི་ཕྱིར་ཏེ། སྐྱེས་བུ་བྱེད་པའི་འབྲས་བུ་ཁོ་ན་ཡིན་གྱི་རྒྱུ་མཐུན་པའི་འབྲས་བུ་ནི་མ་ཡིན་ཏེ། དེའི་རྒྱུ་དང་འདྲ་བ་དང་རང་གིས་པ་ཡིན་པར་འདོད་དོ། །སོགས་པ་ཞེས་བྱ་བའི་སྒྲས་ནི་གཞན་ཡང་བསྡུ་སྟེ། དཔེར་ན་འདོད་པ་ན་སྤྱོད་པའི་འཆི་བའི་སེམས་དགེ་བ་དང་ལུང་དུ་མ་བསྟན་པ་ལས་གཟུགས་ན་སྤྱོད་པའི་སྲིད་པ་བར་མདོའི་སྐད་ཅིག་མ་དང་པོ་ལྟ་བུའོ། །སྐྱེས་བུ་བྱེད་པས་ཐོབ་པའི་འབྲས་བུ་ནི་སྐྱེས་བུ་བྱེད་པའི་འབྲས་བུ་ཡིན་ལ། སོ་སོར་བརྟགས་པའི་འགོག་པ་ཡང་སོ་སོར་བརྟགས་པའི་སྟོབས་ཀྱིས་ཐོབ་པས་དེ་ཡང་སྐྱེས་བུ་བྱེད་པའི་འབྲས་བུ་ཁོ་ནའོ་ཞེས་
བསྟན་པའི་ཕྱིར། སོ་སོར་བརྟགས་པས་འགོག་པ་ནི་ཞེས་བྱ་བ་རྒྱས་པར་འབྱུང་ངོ༌། །གཞན་དག་སྐྱེས་བུ་བྱེད་པའི་འབྲས་བུ་རྣམ་པ་བཞིར་སེམས་པར་བྱེད་དེ། ལྷན་ཅིག་པ་དང་བར་མ་ཆད་པ་དང༌། དུས་གཞན་དུ་སྐྱེས་པ་དང་མ་སྐྱེས་པ་རྣམས་སོ། །དེ་ལ་ལྷན་ཅིག་སྐྱེས་པ་ནི་གང་དག་ལ་ཅིག་ཅར་ཕན་ཚུན་གྱི་སྟོབས་ཀྱིས་སྐྱེས་པ་ལྟ་བུའོ། །བར་མ་ཆད་སྐྱེས་པ་ནི་དཔེར་ན་འཇིག་རྟེན་ཆོས་མཆོག་པ་རྣམས་ལ་སྡུག་བསྔལ་ལ་ཆོས་ཤེས་པའི་བཟོད་པ་ལྟ་བུའོ། །དུས་གཞན་དུ་སྐྱེས་པ་ནི། དཔེར་ན་ཞིང་བ་རྣམས་ཀྱི་ཞིང་ལས་ལྟ་བུའོ། །མ་སྐྱེས་པ་ནི་མྱ་ངན་ལས་འདས་པ་སྟེ། བར་ཆད་མེད་པའི་ལམ་དེའི་སྟོབས་ཀྱིས་དེའི་ཐོབ་པ་སྐྱེས་པ་ལྟ་བུའོ། །ཇི་ལྟར་ན་འདིར་གཟུང་བ་ཡིན། དེ་ནི་སྐྱེ་བ་མ་ཡིན་ནོ་ཞེ་ན། ངའི་ནོར་སྐྱེས་སོ་ཞེས་ཐོབ་པ་ལ་ཡང་སྐྱེས་པའི་སྒྲ་བརྗོད་པ་མཐོང་སྟེ། བདག་གིས་ནོར་ཐོབ་བོ་ཞེས་བྱ་བའི་ཐ་ཚིག་གོ །དེ་ལ་བར་ཆད་མེད་པའི་ལམ་གང་དག་གིས་ཉོན་མོངས་པ་སྤོང་བར་བྱེད་པ་དེ་དག་གིས་ནི་སྤངས་པ་དེ་བྲལ་བའི་འབྲས་བུ་ཡིན་ལ། སྐྱེས་བུ་བྱེད་པའི་འབྲས་བུ་ཡང་ཡིན་ནོ། །གང་དག་གིས་སྔར་སྤངས་པ་རྣམས་ཀྱི་བྲལ་བའི་འབྲས་བུ་འབའ་ཞིག་ཐོབ་པ་དེ་དག་གིས་ནི་སྐྱེས་བུ་བྱེད་པའི་འབྲས་བུ་ཁོ་ན་ཡིན་ཏེ། དཔེར་ན་ངེས་པ་ལ་འཇུག་པ་ན་སྡུག་བསྔལ་ལ་ཆོས་ཤེས་པའི་བཟོད་པས་ཕྲ་རྒྱས་བཅུ་པོ་དག་སྤངས་པ། འདོད་པ་ལ་འདོད་ཆགས་དང་མ་བྲལ་བའི་བྲལ་བའི་འབྲས་བུ་དང་སྐྱེས་བུ་བྱེད་པའི་འབྲས་བུ་ཡིན་ལ། འདོད་ཆགས་དང་བྲལ་བ་སྔོན་དུ་འགྲོ་བའི་སྐྱེས་བུ་བྱེད་པའི་འབྲས་བུ་ཁོ་ན་ཡིན་པ་བཞིན་ནོ། །དེ་བཞིན་དུ་སྡུག་བསྔལ་ལ་རྗེས་སུ་ཤེས་པའི་བཟོད་པ་ལ་ནི་གདོན་མི་ཟ་བར་གཉིས་ཀ་ཡིན་པ་ནས་ཇི་སྲིད་ལམ་ལ་རྗེས་སུ་ཤེས་པའི་བར་ཏེ་གཟུགས་དང་གཟུགས་མེད་པ་ན་སྤྱོད་པའི་ཕྲ་རྒྱས་བཅུ་བཞི་པོ་དག་སྤངས་པ་རྣམས་ལ་ནི་བྲལ་པ་དང་སྐྱེས་བུ་བྱེད་བའི་འབྲས་བུའོ། །མཐོང་བས་སྤང་བར་བྱ་བ་རྣམས་ཀྱི་ནི་ཁྱད་པར་དུ་སྐྱེས་བུ་བྱེད་པའི་འབྲས་བུ་ཁོ་ན་སྟེ། དེའི་སྟོབས་ཀྱིས་ཐོབ་པ་གཞན་ཐོབ་པའི་ཕྱིར་རོ། །དེ་བཞིན་དུ་བསྒོམ་པའི་ལམ་ལ་ཡང་ཇི་ལྟར་རིགས་པར་བརྗོད་པར་བྱའོ། །སྔོན་བྱུང་བ་མ་ཡིན་པའི་འདུས་བྱས་ཁོ་ན་འདུས་བྱས་ཁོ་ནའི་བདག་པོའི་འབྲས་བུ་ཡིན་གྱི་འདུས་མ་བྱས་མ་ཡིན་ཞིང་འདུས་མ་
བྱས་ཀྱི་ནི་མ་ཡིན་ནོ་ཞེས་ངས་པར་གཟུང་སྟེ་བདག་པོའི་འབྲས་བུ་ཁོ་ན་ནི་མ་ཡིན་ནོ། །སྔོན་བྱུང་བ་མ་ཡིན་པ་ཞེས་བྱ་བ་ནི་སྔོན་བྱུང་བ་ལས་གཞན་སྔོན་མ་བྱུང་བའོ། །དེ་ནི་ལྷན་ཅིག་བྱུང་བ་དང་ཕྱིས་བྱུང་བ་སྟེ། རྒྱུ་བས་སྔར་སྐྱེས་པའི་འབྲས་བུ་ནི་ཅུང་ཟད་ཀྱང་མེད་དོ། །ཅིའི་ཕྱིར་ཞེ་ན་འབྲས་བུ་སྐྱེས་པའི་མ་འོངས་པ་མེད་དོ། །བྱ་བ་བྱིས་ཟིན་པས་མི་སྐྱེ་བར་ཡང་འགྱུར་རོ། །མ་སྐྱེས་པར་ཡང་འཇིག་པ་མེད་པས་སྐྱེ་འཇིག་དང་བྲལ་བའི་ཕྱིར་འདུ་བྱེད་མི་རྟག་པར་ཐལ་བར་འགྱུར་རོ། །གལ་ཏེ་མི་སྐྱེ་བའི་ཆོས་ཅན་བཞིན་ནོ་ཞེ་ནམ་ཡིན་ཏེ་དེའི་རིགས་ཅན་གྱི་སྐྱེ་བ་དང་འཇིག་པ་མཐོང་བས་དེ་ནི་མི་རྟག་པ་ཉིད་དུ་རྟོགས་ཏེ་ཐམས་ཅད་ལས་ཆེས་སྔ་བར་འདས་པའི་བྱེད་རྒྱུ་ལས་འདས་པ་དང་ད་ལྟར་བ་དང་མ་འོངས་པའི་ཆོས་ཀྱི་བདག་པོའི་འབྲས་བུ་དང་ད་ལྟར་བའི་མ་འོངས་པ་དང་མ་འོངས་པའི་མ་འོངས་པ་ཁོ་ནའོ། །ཡང་ན་ཐམས་ཅད་ལས་ཞེས་བྱ་བ་བསྐྱེད་པ་ལ་གེགས་མེད་པའི་ངོ་བོས་གནས་པའོ། །སྐྱེས་བུ་བྱེད་པ་དང་བདག་པོའི་འབྲས་བུ་དག་ལ་ཐ་དད་དུ་བྱ་བ་ཅི་ཡོད་ཅེ་ན་ཞེས་བྱ་བ་ནི། དེ་ཉིད་དེའི་སྐྱེས་བུ་བྱེད་པའི་འབྲས་བུ་དང་བདག་པོའི་འབྲས་བུ་རྣམ་པར་གཞག་པའི་ཕྱིར་འདྲི་བའོ། །བྱེད་པ་པོ་དང་ཟབ་པོའི་དངོས་པོ་ལས་དཔེར་ན་ཞིང་པ་རྣམས་ཀྱི་ལོ་ཏོག་ལ་སོགས་པ་སྐྱེས་བུ་བྱེད་པའི་འབྲས་བུ་ཡིན་པ་ལྟ་བུའོ། །དེའི་སྟོབས་ཀྱིས་བསྐྱེད་པའི་ཕྱིར་བདག་པོའི་འབྲས་བུ་ཡང་ཡིན་ཏེ། དེ་ཉེ་བར་ལོངས་སྤྱད་པའི་ཟབ་པོའི་ངོ་བོ་ཡིན་པའི་ཕྱིར་རོ། །སྔོན་བྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་བདག་པོའི་འབྲས། །ཞེས་སོ། །གང་དག་ཉེ་བར་ལོངས་སྤྱོད་པ་ཙམ་ཡིན་པ་དེ་དག་གི་ནི་བདག་པོའི་འབྲས་བུ་ཁོ་ན་ཡིན་ནོ། །དེ་བཞིན་དུ་བཟོ་ལ་སོགས་པ་ལ་ཡང་བཟོ་བོ་རྣམས་དང་གཞན་དག་ལ་ཡང་སྦྱར་རོ། །ལྔ་པོ་ད་ལྟར་འབྲས་བུ་འཛིན་ཞེས་བྱ་བ་ལ། ད་ལྟ་ཁོ་ན་ངེས་པར་གཟུང་གི་ལྔ་པོ་ཁོ་ན་ཞེས་བྱ་བ་ནི་མ་ཡིན་ཏེ། བྱེད་རྒྱུའི་རྒྱུ་ཡང་དེ་དང་འདྲ་མོད་ཀྱི་ཞེས་འབྱུང་བའི་ཕྱིར་རོ། །འབྲས་བུ་འཛིན་པ་ཞེས་བྱ་བ་ནི་འབྲས་བུ་འཕེན་པ་སྟེ། མ་འོངས་པ་ན་བསྐྱེད་པའི་ཕྱིར་རིས་མཐུན་པའི་རྫས་ཀྱི་ས་བོན་གྱི་དངོས་པོར་ཉེ་བར་འགྲོ་བས་རིས་ཐ་དད་པ་འབྲས་བུ་གཅིག་པ་དང་སྐལ་བ་མཉམ་པ་འབྲས་བུ་དུམ་དང་ཁ་ཅིག་སྐལ་བ་མཉམ་པ་མ་ཡིན་པ་དག་ཀྱང་ངོ༌། །རང་གི་རྒྱུད་ཀྱི་སྤྱིའི་
ནི་དེ་ཉིད་ད་ལྟར་བྱུང་བ་ཉིད་ད་ལྟར་བྱུང་བ་ཉིད་དོ། །འདི་ནི་འདུས་བྱས་རྣམས་ཁོ་ནའི་བྱད་པའོ། །བྱེད་རྒྱུའི་རྒྱུ་ཡང་དེ་དང་འདྲ་མོད་ཀྱི་ཞེས་བྱ་བ་ནི་ད་ལྟར་བ་ཁོ་ན་འབྲས་བུ་འཛིན་ཞེས་བྱ་བ་སྨོས་ཏེ་འདུས་མ་བྱས་ལ་འབྲས་བུ་མེད་པའི་ཕྱིར་རོ། །གཉིས་ནི་རབ་ཏུ་འབྱིན་པར་བྱེད་ཅེས་བྱ་བ་ལ། ད་ལྟར་བ་དག་ཁོ་ན་ཞེས་བྱ་བར་ངེས་པར་གཟུང་བར་བྱ་སྟེ་གཉིས་ཁོ་ན་ཞེས་ནི་མ་ཡིན་ནོ། །དུས་མཉམ་པ་ཁོ་ན་ཡིན་ནོ་ཞེས་བྱ་བ་ལ་རྒྱུའི་དངོས་པོའི་དུས་ཁོ་ནར་འབྲས་བུ་ཕྱུང་བའི་ཕྱིར་རོ། །ད་ལྟར་གྱི་དང་འདས་པ་ཞེས་བྱ་བ་ལ། སྐབས་སུ་བབ་པའི་ཕྱིར་འབྲས་བུ་འབྱིན་པར་བྱེད་དོ་ཞེས་བྱ་བར་སྦྱར་རོ། །ད་ལྟར་བདག་རྒྱུ་མཐུན་པའི་འབྲས་བུ་འབྱིན་པ་མི་སྲིད་དོ་སྙམ་དུ་སྟེ། རེ་ཞིག་གང་འདས་པ་དག་ནི་ཞེས་དྲི་བ་རྒྱས་པར་འབྱུང་ངོ༌། །མཇུག་ཐོགས་སུ་བསྒྲུབ་པའི་ཕྱིར་ཞེས་བྱ་བ་འབྱུང་སྟེ། དེ་ལ་འབྲས་བུ་གང་ཞིག་སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུ་དག་གི་ཡིན་པར་ངེས་ཤིང་དེ་དག་གི་མཇུག་ཐོགས་སུ་སྐྱེ་བ་དེ་ནི་དེ་དག་གིས་འཛིན་པ་དང་འབྱིན་པ་ཡིན་ལ། རྒྱུ་དག་འགགས་ན་ནི་གཟུང་བ་དང་ཕྱུང་ཟིན་པ་ཡིན་ན། དེ་ཉིད་ཀྱི་ཚེ་ནི་མ་ཡིན་ཏེ། འོ་ན་ཅི་ཞེ་ན་ཕྱིས་ཀྱང་ཕྱུང་བ་ཡིན་ནོ། །མི་འབྱིན་ཞེས་བྱ་བའི་དོན་ཏོ། །འོན་ཏེ་འགགས་པ་དག་ལས་རྒྱུ་མཐུན་པའི་འབྲས་བུ་སྐྱེ་ན་ནི། དེ་ལྟ་ན་འདས་པ་དག་གིས་འབྲས་བུ་ཕྱུང་བ་ཡིན་ནོ། །བྱེད་རྒྱུའི་རྒྱུ་ཡང་ཞེས་བརྗོད་པར་བྱ་སྟེ། ཅུང་ཟད་ཅིག་ནི་བྱེད་རྒྱུ་ད་ལྟར་བྱུང་བའི་ཡང་བདག་པོའི་འབྲས་བུ་ཡིན་ཏེ། དཔེར་ན་མིག་གི་རྣམ་པར་ཤེས་པ་ལྟ་བུའོ། །ཅུང་ཟད་ཅིག་ན་ནི་དེ་མ་ཐག་ཏུ་ཡིན་ཏེ། དཔེར་ན་འཇིག་རྟེན་པའི་ཆོས་ཀྱི་མཆོག་རྣམས་ཀྱི་སྡུག་བསྔལ་ལ་ཆོས་ཤེས་པའི་བཟོད་བ་ལྟ་བུའོ། །ཅུང་ཟད་ཅིག་ནི་དུས་གཞན་གྱི་ཚེ་ཡིན་ཏེ། དཔེར་ན་ཐར་པའི་ཆ་དང་མཐུན་པའི་དགེ་བའི་རྩ་བ་རྣམས་ཀྱི་བྱང་ཆུབ་གསུམ་ལྟ་བུའོ་ཞེ་ན། འདི་མ་སྨོས་པའི་རྒྱུ་སྔར་བཤད་ཟིན་ཏོ། །དགེ་བའི་སྐལ་བ་མཉམ་པའི་རྒྱུ་ཞེས་འབྱུང་སྟེ། མི་ལྡན་པ་ལ་མངོན་པར་འདོད་པ་ཡིན་ནོ། །དམིགས་པ་དང་བཅས་པའི་ངེས་པས་མཚུངས་པར་ལྡན་པ་སྨོས་པའི་ཕྱིར། ཐམས་ཅད་ཀྱི་ཐ་མར་འདོར་པའི་ཞེས་བྱ་བ་ལ། དགེ་བའི་རྩ་བ་ཆུང་ངུའི་ཆུང་ངུ་རྣམས་ཀྱིས་ཐོབ་པ་ཐམས་ཅད་ཀྱི་ཐ་མར་འདོར་བ་དག་སྟེ་གཞན་དག་ནི་སྔར་དོར་ཟིན་པའི་
ཕྱིར་རོ། །དེ་དག་ནི་འབྲས་བུ་འཛིན་པ་ཁོ་ན་ཡིན་གྱི་འབྱིན་པ་ནི་མ་ཡིན་ཏེ། དགེ་བའི་རྩ་བ་ཀུན་ཏུ་ཆད་པའི་གནས་སྐབས་ན་དགེ་བ་མི་སྐྱེ་བའི་ཕྱིར་རོ། །གཉིས་པ་ནི་དགེ་བའི་རྩ་བདག་གིས་ཉིད་མཚམས་སྦྱོར་བས་ཞེས་བྱ་བ་ལ། འབྱིན་པ་འབའ་ཞིག་ཡིན་གྱི་འཛིན་པ་ནི་མ་ཡིན་ཏེ་སྔར་བཟུང་ཟིན་པའི་ཕྱིར་རོ། །འདི་སྐད་དུ་དེ་དག་ཉིད་ཅེས་བྱ་བ་ལ། ཐམས་ཅད་ཀྱི་དང་པོར་རྙེད་པ་ད་ལྟར་བྱུང་བ་དེ་ནི་ངེས་པར་འཛིན་ཀྱང་ས་དོ་ཥ་ཏྭཱཙྪི་ཀྵ་ཡ་ཏི། དེ་ཉིད་ཉིང་མཚམས་སྦྱར་བའི་སྔ་རོལ་ཏུ་བཟུང་ཟིན་པའི་ཕྱིར་འཛིན་པ་མ་ཡིན་ནོ། །ཆོས་རགས་པས་ད་ལྟར་བྱུང་བའི་འབྲས་བུ་ལྔ་ཞེས་གསུངས་པའི་ཕྱིར་རོ། །དེས་ན་མ་འཁྲུགས་པའི་དོན་དུ་སློབ་པར་བྱེད་དོ་ཞེས་གཞན་དག་ཟེར་རོ། །འདི་སྐད་བཤད་པར་འགྱུར་ཏེ། སྔ་ན་མེད་པ་རྙེད་ན་འབྲས་བུ་འཛིན་པ་དང༌། འབྱིན་པ་སྲིད་པའི་ཕྱིར་དེ་དག་ཉིད་ཅེས་བརྗོད་པར་བྱའོ། །གནས་སྐབས་ལྷག་མ་རྣམས་སུའོ་ཞེས་བྱ་བ་བཤད་མ་ཐག་པའི་གནས་སྐབས་གཉིས་པོ་མ་གཏོགས་པ། དགེ་བའི་རྩ་བ་ཀུན་ཏུ་མ་ཆད་པའི་གནས་སྐབས་ལྷག་མ་རྣམས་བཟུང་སྟེ། བདག་ཅག་ལ་སོགས་པ་ལྟ་བུའི་ཐོབ་པ་དག་ནི་འབྲས་བུ་འཛིན་པ་དང་འབྱིན་པ་ཡིན་ནོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ལ། དགེ་བའི་རྩ་བ་ཀུན་ཏུ་ཆད་པའི་གནས་སྐབས་ནི་སྔར་བཟུང་ཟིན་པའི་ཕྱིར་འཛིན་པ་མ་ཡིན་ལ། དགེ་བའི་རྩ་བ་ཉིང་མཚམས་སྦྱོར་བ་མེད་པའི་ཕྱིར་འབྱིན་པ་ཡང་མ་ཡིན་ནོ། །མི་དགེ་བ་ཞེས་བྱ་བ་ལ། མི་དགེ་བ་རྣམས་ཀྱི་ཐ་མར་འདོར་བ་སྟེ། ཐོབ་པ་དེ་དག་ནི་རྒྱུ་མཐུན་པའི་འབྲས་བུ་འཛིན་པ་ཁོ་ན་ཡིན་གྱི། འབྱིན་པ་ནི་མ་ཡིན་ཏེ། རྒྱུ་མཐུན་པའི་འབྲས་བུ་དེ་མ་ཐག་པ་མེད་པའི་ཕྱིར་རོ། །ཐམས་ཅད་ཀྱི་དང་པོར་ཐོབ་པའི་མི་དགེ་བའི་སྐལ་བ་མཉམ་པའི་རྒྱུ་དེ་ནི་འབྲས་བུ་འབྱིན་པ་ཡིན་གྱི་འཛིན་པ་ནི་མ་ཡིན་ཏེ། སྔར་བཟུང་ཟིན་བའི་ཕྱིར་རོ། །འདི་སྐད་དུ་དེ་དག་ཉིད་ཅེས་བྱ་བ་རྒྱས་བར་འབྱུང་བ་ལ། མི་དགེ་བའི་སྐལ་བ་མཉམ་པའི་རྒྱུ་འདི་ནི་འབྱིན་པ་ཡིན་གྱི་འཛིན་པ་ནི་མ་ཡིན་ཏེ། འདོད་ཆགས་དང་བྲལ་བའི་དུས་སུ་གཟུང་བའི་ཕྱིར་རོ། །ཐོབ་པ་གང་དག་སྔོན་མེད་པ་དང་པོར་རྙེད་པ་དེ་དག་ནི་འབྲས་བུ་འཛིན་པ་དང་འབྱིན་པ་ཡང་མ་ཡིན་ནོ། །འདི་ལ་ཡང་སློབ་དཔོན་འདུས་བཟང་གི་རྣམ་པར་བཤད་པ་ནི་སྒྲོ་བཏགས་པ་ཡིན་
པས་དེ་དགག་པ་ལ་འབད་པ་མི་བྱའོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ལ། འདོད་པ་ལས་འདོད་ཆགས་དང་བྲལ་བའི་གནས་སྐབས་ནི་སྔར་བཟུང་ཟིན་པའི་ཕྱིར་མི་འཛིན་ལ། འདོད་པའི་འདོད་ཆགས་དང་བྲལ་བའི་ལས་ཉམས་པའི་ཕྱིར་འབྱིན་པ་ཡང་མ་ཡིན་ནོ། །བསྒྲིབས་ལ་ལུང་དུ་མ་བསྟན་པའི་ཡང་དེ་བཞིན་དུ་ཞེས་བྱ་བ་རྒྱས་པར་འབྱུང་སྟེ། དྲི་བ་ལ་མུ་བཞི་དགྲ་བཅོམ་པ་ཉིད་ཐོབ་པ་དང༌། ཡོངས་སུ་ཉམས་པ་ལས་ཅི་རིགས་སུ་སྦྱར་བར་བྱའོ། །བསྒྲིབས་ལ་ལུང་དུ་མ་བསྟན་པའི་སྐལ་བ་མཉམ་པའི་རྒྱུ་ཡོད་པས་འཛིན་པ་ཡིན་ལ་མི་འབྱིན་ཞེས་བྱ་བ་སྟེ། མུ་བཞི་པ་རྒྱས་པར་བརྗོད་དེ། མུ་དང་པོ་ནི་སྲིད་པའི་རྩེ་མོའི་འདོད་ཆགས་དང་བྲལ་བ་ཐོབ་པ་ལྡན་པས་ཐམས་ཅད་ཀྱི་ཐ་མར་འདོར་བའི་ཐོབ་པ་གང་དག་ཡིན་པའོ། །གཉིས་པ་ནི་སྲིད་པའི་རྩེ་མོའི་འདོད་ཆགས་དང་བྲལ་བ་ལས་ཡོངས་སུ་ཉམས་པས་ཐམས་ཅད་ཀྱི་དང་པོར་ཐོབ་པ་གང་ཡིན་པའོ། །གསུམ་པ་ནི་སྲིད་པའི་རྩེ་མོའི་འདོད་ཆགས་དང་བྲལ་བའི་གནས་སྐབས་ལྷག་མ་རྣམས་སུའོ། །བཞི་པ་ནི་རྣམ་པ་དེ་དག་མ་གཏོགས་པ་སྟེ། སྲིད་པའི་རྩེ་མོའི་འདོད་ཆགས་དང་བྲལ་བ་ལས་མ་ཉམས་པའི་ཞེས་བྱ་བའི་ཐ་ཚིག་གོ །བསྒྲིབས་ལ་ལུང་དུ་མ་བསྟན་པ་སྨོས་པ་ནི་བསྒོམ་པས་སྤང་བར་བྱ་བའི་ཉོན་མོངས་པ་གཟུགས་དང་གཟུགས་མེད་པ་ན་སྤྱོད་པ་རྣམས་དང་སྦྱར་བར་བྱའོ། །རེ་ཞིག་འབྱིན་པ་གང་ཡིན་པ་དེ་ནི་འཛིན་པ་ཡང་ཡིན་ནོ་ཞེས་བྱ་བ་ལ། སྐལ་བ་མཉམ་པའི་རྒྱུ་མ་བསྒྲིབས་ལ་ལུང་དུ་མ་བསྟན་པ་ནི་ཡོངས་སུ་མྱ་ངན་ལས་འདས་ཀྱི་བར་དུ་ཡོད་པའི་ཕྱིར་རོ། །འཛིན་ལ་མི་འབྱིན་པ་ཡང་ཡོད་དེ། དགྲ་བཅོམ་པའི་ཕུང་པོ་ཐམ་རྣམས་ཡིན་ནོ་ཞེས་བྱ་བ་འབྱུང་སྟེ། དེའི་ཚེ་ནི་ཕུང་པོ་ཐམས་ཅད་ལས་ངེས་པར་འབྱུང་བའི་ཕྱིར་རྒྱུ་མཐུན་པའི་འབྲས་བུ་མེད་པས་འཛིན་པ་ཁོ་ན་ཡིན་གྱི་འབྱིན་པ་ནི་མ་ཡིན་ནོ། །དམིགས་པ་དང་བཅས་པའི་ངེས་པས་ནི་སྐད་ཅིག་རེ་རེ་སྟེ་ཞེས་བྱ་བ་ལ། སྔར་ནི་དམིགས་པ་མེད་པ་ཐོབ་པ་རྣམས་དང༌། རྒྱུན་ལ་སྐལ་བ་མཉམ་པའི་རྒྱུ་ཉིད་དུ་བཤད་ལ། དེ་ནི་དམིགས་པ་དང་བཅས་བའི་སེམས་དང་སེམས་ལས་བྱུང་བ་རྣམས་དང་སྐད་ཅིག་རེ་རེ་ལ་སྐལ་བ་མཉམ་པའི་རྒྱུ་ཉིད་དུ་བརྗོད་དོ། །དགེ་བའི་སེམས་ཀྱི་མཇུག་ཐོགས་སུ་ཞེས་བྱ་བ་ལ།
དགེ་བའི་སེམས་སྐྱེས་པས་དགེ་བའི་སེམས་རྒྱུ་མཐུན་པའི་འབྲས་བུ་ཉིད་དུ་གཟུང་བ་གང་ཡིན་པ་དེའི་མཇུག་ཐོགས་སུ་མི་སྐྱེ་བས་འབྲས་བུ་འཛིན་པ་ཁོ་ན་ཡིན་གྱི་འབྱིན་པ་ནི་མ་ཡིན་ནོ། །གཉིས་པ་ནི་བཟློག་པའོ་ཞེས་བྱ་བ་ལ་གང་གི་ཚེ་ཉོན་མོངས་པ་ཅན་དང་ལུང་དུ་མ་བསྟན་པའི་མཇུག་ཐོགས་སུ་དགེ་བའི་སེམས་མངོན་དུ་བྱེད་པ་དེའི་ཚེ་སྔར་འགགས་པའི་དགེ་བའི་སེམས་དེ་འབྱིན་པ་ཁོ་ན་ཡིན་གྱི་འཛིན་པ་ནི་མ་ཡིན་ཏེ། སྔར་བཟུང་ཟིན་པའི་ཕྱིར་རོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ལ། གང་གི་ཚེ་ཉོན་མོངས་པ་ཅན་ནམ་མི་དགེ་བའི་མཇུག་ཐོགས་སུ་ཉོན་མོངས་པ་ཅན་ནམ་ལུང་དུ་མ་བསྟན་པ་མངོན་དུ་བྱེད་པ་དེའི་ཚེ་དགེ་བའི་སེམས་ཀྱིས་དེས་སྔར་བཟུང་བའི་ཕྱིར་འབྲས་བུ་མི་འཛིན་ལ། རིགས་མི་མཐུན་པའི་སེམས་ཀྱིས་བར་དུ་ཆོད་པའི་ཕྱིར་འབྱིན་པ་ཡང་མ་ཡིན་ནོ། །མི་དགེ་བ་ལ་སོགས་པ་ཡང་དེ་བཞིན་དུ་སྦྱར་བར་བྱའོ་ཞེས་བྱ་བ་ལ། མུ་དང་པོ་ནི་གང་གི་ཚེ་མི་དགེ་བའི་སེམས་ཀྱི་མཇུག་ཐོགས་སུ་དགེ་བ་འམ་ལུང་དུ་མ་བསྟན་པའི་མངོན་དུ་བྱེད་པའོ། །གཉིས་པ་ནི་བཟློག་པའོ། །གསུམ་པ་ནི་གང་གི་ཚེ་མི་དགེ་བའི་སེམས་ཀྱི་མཇུག་ཐོགས་སུ་མི་དགེ་བ་ཁོ་ན་སྐྱེ་བའོ། །བཞི་པ་ནི་གང་གི་ཚེ་དགེ་བའམ་ལུང་དུ་མ་བསྟན་པའི་མཇུག་ཐོགས་སུ་དགེ་བ་འམ། ལུང་དུ་མ་བསྟན་པ་མངོན་དུ་བྱེད་པའོ། །བསྒྲིབས་ལ་ལུང་དུ་མ་བསྟན་པ་དང་མ་བསྒྲིབས་ལ་ལུང་དུ་མ་བསྟན་པའི་སྐལ་བ་མཉམ་པའི་རྒྱུ་ཡང་དེ་བཞིན་དུ་སྦྱར་བར་བྱའོ། །མ་བསྒྲིབས་པའི་སྐལ་བ་མཉམ་པའི་རྒྱུ་ནི་སྡུག་བསྔལ་མཐོང་བས་སྤང་བར་བྱ་བའི་མི་དགེ་བ་ཡང་ཡིན་ཏེ། རྒྱུ་མཐུན་པའི་འབྲས་བུ་མ་བསྒྲིབས་ལ་ལུང་དུ་མ་བསྟན་པ་འབའ་ཞིག་མ་ཡིན་ནོ། །གཅིག་ནི་འདས་པས་འབྱིན་པར་འགྱུར་ཞེས་བྱ་བ་ལ། གཅིག་ནི་འདས་པ་ཁོ་ནས་ཞེས་བྱ་བ་ཡིན་གྱི། གཅིག་ཁོ་ན་འདས་པ་ནི་མ་ཡིན་ཏེ། དེ་ཉིད་ཀྱི་ཕྱིར་རྣམ་པར་སྨིན་པའི་རྒྱུ་ནི་འདས་པ་ཁོ་ནས་འབྲས་བུ་འབྱིན་ཏེ་ཞེས་བྱ་བ་སྨོས་སོ། །ཅིའི་ཕྱིར་ཞེ་ན། འདི་ལྟར་ལྷན་ཅིག་གམ། དེ་མ་ཐག་ཏུ་རྣམ་པར་སྨིན་པ་ནི་མེད་དོ་ཞེས་བྱ་བ་སྨོས་ཏེ། རྣམ་པར་སྨིན་པའི་རྒྱུ་ནི་རྒྱུན་ལ་བལྟོས་པ་ཡིན་ནོ། །འདི་ལ་བརྟེན་པས་ན་རྟེན་ནོ། །རྟེན་གྱི་འབྲས་བུ་ནི་རྟེན་གྱི་
འབྲས་བུ་སྟེ། གང་ཞིག་གང་ལ་བརྟེན་པ་དེ་ནི་དེའི་འབྲས་བུ་ཡིན་ནོ། །སྦྱོར་བའི་འབྲས་བུ་ནི་སྦྱོར་བའི་འབྲས་བུ་སྟེ། མི་སྡུག་པའི་དྲན་པ་ཉེ་བར་གཞག་པ་ནས་བརྩམས་ཏེ་མི་སྐྱེ་བ་ཤེས་པའི་བར་ལྟ་བུའོ། །སྦྱོར་བ་གཞན་ལ་ཡང་དེ་བཞིན་དུ་སྦྱར་བར་བྱ་སྟེ། མི་སྡུག་པ་སྨོས་པ་ནི་འདིར་དཔེའི་དོན་དུ་ཡིན་ནོ། །ཚོགས་པའི་འབྲས་བུ་ནི་ཚོགས་པའི་འབྲས་བུའོ། །བསྒོམ་པའི་འབྲས་བུ་ནི་བསྒོམ་པའི་འབྲས་བུའོ། །དེ་ལ་ཁ་ཅིག་ན་རེ་ནི་རྟེན་གྱི་འབྲས་བུ་བདག་པོའི་འབྲས་བུའི་ཁོངས་སུ་འདུའོ་ཞེས་ཟེར་རོ། །གཞན་དག་ན་རེ། ཐམས་ཅད་ཀྱང་སྐྱེས་བུ་བྱེད་པ་དང་བདག་པོའི་འབྲས་བུ་དག་གི་ཁོངས་སུ་འདུའོ་ཞེས་ཟེར་རོ། །དེ་ལ་ཆོས་གང་ཞིག་ཅེས་བྱ་བ་རྒྱས་པར་འབྱུང་བ་ལ། ཆོས་མང་པོ་དག་རེ་རེ་ནས་རྒྱས་པར་བཤད་པར་མི་ནུས་པས་ཐམས་ཅད་ཕུང་པོ་བཞིར་རྣམ་པར་གཞག་གོ །དེ་ཉིད་ཀྱི་ཕྱིར་མདོར་བསྡུ་ན་ཆོས་ཀྱི་རྣམ་པ་བཞི་པོ་འདི་དག་ཁོ་ན་ཡིན་ཏེ་ཞེས་སྨོས་སོ། །ཉོན་མོངས་པ་ཅན་ཞེས་བྱ་བས་ནི་འདོད་ཆགས་ལ་སོགས་པ་མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དག་དང་དེ་དག་གི་མཚུངས་པར་ལྡན་པ་དག་གཟུང་ངོ༌། །རྣམ་པར་སྨིན་པ་ལས་སྐྱེས་པ་རྣམས་ཞེས་བྱ་བ་ནི་རྣམ་པར་སྨིན་པའི་འབྲས་བུའི་བདག་ཉིད་རྣམས་སོ། །ཟག་པ་མེད་པ་དང་པོ་རྣམས་ནི་སྡུག་བསྔལ་ལ་ཆོས་ཤེས་པའི་བཟོད་པ་དང་དེ་དང་མཚུངས་པར་ལྡན་པ་རྣམས་སོ། །རྣམ་པར་སྨིན་པ་མ་གཏོགས་པའི་ལུང་དུ་མ་བསྟན་པ་རྣམས་ཞེས་བྱ་བ་ལ། དེ་དག་ནི་སྤྱོད་ལམ་པ་དང༌། བཟོའི་གནས་པ་དང་སྤྲུལ་པ་ཐམས་ཅད་དོ། །དགེ་བ་རྣམས་སོ་ཞེས་བྱ་བ་ནི་ཟག་པ་དང་བཅས་པ་དང༌། ཟག་པ་མེད་པ་རྣམས་སོ། །ཇི་སྐད་དུ་བཤད་པ། མ་གཏོགས་པ་ལྷག་མ་རྣམས་ལས་སྐྱེ་བས་ན་ལྷག་མ་ལས་སྐྱེས་སོ། །ཆོས་ཉོན་མོངས་པ་ཅན་རྣམས་ནི་ཞེས་བྱ་བ་རྒྱས་པར་འབྱུང་བ་ལ། རྣམ་པར་སྨིན་པ་ནི་ཆོས་ཉོན་མོངས་པ་ཅན་མ་ཡིན་པའི་ཕྱིར་ཉོན་མོངས་པ་ཅན་རྣམས་བསྐྱེད་པ་ལས་རྣམ་པར་སྨིན་པའི་རྒྱུ་མ་གཏོགས་པའོ། །དེ་ལ་སེམས་ལས་བྱུང་བ་ལྷན་ཅིག་སྐྱེས་པ་རྣམས་དང་སེམས་ནི་སེམས་དང་སེམས་ལས་བྱུང་བ་རྣམས་ཀྱི་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་ཡིན་ནོ། །དེ་བཞིན་དུ་སེམས་ལས་བྱུང་བ་དག་ལ་ཡང་སོ་སོར་བརྗོད་པར་བྱའོ། །སྐལ་བ་མཉམ་པའི་
རྒྱུ་ནི་རང་གི་རིས་དངས་པའི་ཆོས་ཉོན་མོངས་པ་ཅན་སྔར་སྐྱེས་པ་རྣམས་སོ། །ཀུན་ཏུ་འགྲོ་བའི་རྒྱུ་ནི་ཀུན་ཏུ་འགྲོ་བའི་རང་གི་སར་སྔར་སྐྱེས་པ་རྣམས་སོ། །བྱེད་རྒྱུའི་རྒྱུ་ནི་ཅི་རིགས་པར་རང་མ་གཏོགས་པ་ཡིན་ནོ། །ཀུན་ཏུ་འགྲོ་བའི་རྒྱུ་མ་གཏོགས་པ་ཞེས་བྱ་བ་ལ། ཀུན་ཏུ་འགྲོ་བའི་རྒྱུ་ནི་ཉོན་མོངས་པ་ཅན་ཁོ་ནའི་ཡིན་གྱི། ཉོན་མོངས་པ་ཅན་མ་ཡིན་པ་རྣམས་ཀྱི་མ་ཡིན་ལ། རྣམ་པར་སྨིན་པ་ནི་ཉོན་མོངས་པ་ཅན་མ་ཡིན་པས་ཀུན་ཏུ་འགྲོ་བའི་རྒྱུ་དེའི་རྒྱུ་ཡིན་པ་འགོག་པ་ཡིན་ནོ། །འདིར་ཡང་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་ནི་སྔ་མ་བཞིན་ནོ། །སྐལ་པ་མཉམ་པའི་རྒྱུ་ནི་ལུང་དུ་མ་བསྟན་པ་སྔར་སྐྱེས་པ་རྣམས་སོ། །རྣམ་པར་སྨིན་པའི་རྒྱུ་ནི་དེ་དག་གང་དག་གི་རྣམ་པར་སྨིན་པའི་འབྲས་བུ་ཡིན་པ་མི་དགེ་བ་དང༌། དགེ་བ་ཟག་པ་དང་བཅས་པ་རྣམས་སོ། །བྱེད་རྒྱུའི་རྒྱུ་ནི་སྔ་མ་བཞིན་ནོ། །རྣམ་པར་སྨིན་པ་དང་ཀུན་ཏུ་འགྲོ་བའི་རྒྱུ་དེ་དག་མ་གཏོགས་པ་ཞེས་བྱ་བ་ལ། རྣམ་པར་སྨིན་པ་མ་ཡིན་པའི་ཕྱིར་རྣམ་པར་སྨིན་པའི་རྒྱུ་མ་གཏོགས་ལ། ཉོན་མོངས་ཅན་མ་ཡིན་པའི་ཕྱིར་ཀུན་ཏུ་འགྲོ་བའི་རྒྱུ་མ་གཏོགས་སོ། །ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་ནི་ལྷན་ཅིག་འབྱུང་བ་རྣམས་ཁོ་ན་ཡིན་ནོ། །སྐལ་པ་མཉམ་པའི་རྒྱུ་ནི་ཅི་རིགས་པར་བརྗོད་པར་བྱའོ། །བྱེད་རྒྱུའི་རྒྱུ་ནི་སྔ་མ་བཞིན་ནོ། །རྣམ་པར་སྨིན་པ་དང་ཀུན་ཏུ་འགྲོ་བའི་རྒྱུ་དེ་དག་དང་སྐལ་བ་མཉམ་པའི་རྒྱུ་མ་གཏོགས་པ་ཞེས་བྱ་བ་ལ་དེ་དང་འདྲ་བ་སྔར་སྐྱེས་པ་མེད་པའི་ཕྱིར་དང་དགེ་བ་ཡིན་པའི་ཕྱིར། སྐལ་བ་མཉམ་པ་དང༌། ཀུན་ཏུ་འགྲོ་བ་དང་རྣམ་པར་སྨིན་པའི་རྒྱུ་མ་གཏོགས་སོ། །འདིར་ཡང་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་ནི་ལྷན་ཅིག་འབྱུང་བ་རྣམས་ཁོ་ན་ཡིན་ནོ། །བྱེད་རྒྱུའི་རྒྱུ་ནི་སྔ་མ་བཞིན་ནོ། །འདི་ལ་ཁ་ཅིག་ན་རེ་ཉོན་མོངས་པ་ཅན་བཞི་ཁོ་ན་སྐྱེའོ་ཞེས་བརྗོད་པར་བྱ་སྟེ། ཅིའི་ཕྱིར་ཞེ་ན་ཀུན་ཏུ་འགྲོ་བའི་རྒྱུ་ལས་སྐལ་བ་མཉམ་པའི་རྒྱུ་དེ་ཐ་དད་མ་ཡིན་པའི་ཕྱིར་རོ་ཞེས་ཟེར་རོ། །དེ་ཡང་དེ་ལྟ་མ་ཡིན་ཏེ། ཀུན་ཏུ་འགྲོ་བའི་རྒྱུ་ལ་ཨ་ནུ་ཙྱ་མཱ་ནེ་ཏྱ་ནཻ་ཡ་ཡི་ཀཱ་ནཱཾ། རྒྱུ་མ་བཤད་པར་འགྱུར་རོ། །སྐལ་བ་མཉམ་པའི་རྒྱུ་ལ། ཨ་ནུ་ཙྱ་མཱ་ནེ་ཀུན་ཏུ་འགྲོ་བ་རྣམས་དང་
ཀུན་ཏུ་འགྲོ་བའི་ཐོབ་པ་རྣམས་ཀྱང་རྒྱུའི་དངོས་པོར་མ་བརྗོད་པར་འགྱུར་རོ། །འདོད་ཆགས་ཀྱི་རྒྱུ་ལས་འདོད་ཆགས་སྐྱེ་སྟེ། ཐོབ་པའི་རྒྱུའི་དངོས་པོ་ལས་ཐོབ་པ་ལྟ་བུ་སྟེ། ལྔ་རྣམས་ཁོ་ན་ལས་ཉོན་མོངས་པ་ཅན་རྣམས་སྐྱེའོ་ཞེས་བྱ་བ་ནི་རིགས་སོ། །མཚུངས་པར་ལྡན་པའི་རྒྱུ་སྨོས་པའི་ཕྱིར་རོ། །སེམས་དང་སེམས་ལས་བྱུང་བ་ཡིན་པ་ཤེས་ཏེ། དེ་ལྟ་མ་ཡིན་ན་དེ་དག་ལ་མཚུངས་པར་ལྡན་པའི་རྒྱུ་མི་སྨོས་པར་འགྱུར་རོ། །མཚུངས་པར་ལྡན་པའི་རྒྱུ་གཅིག་པུ་མ་གཏོགས་པ་ཞེས་བྱ་བ་ལ། སེམས་དང་སེམས་ལས་བྱུང་བའི་རང་བཞིན་མ་ཡིན་པའི་ཕྱིར་དེ་དག་ལ་མཚུངས་པར་ལྡན་པའི་རྒྱུ་མེད་དོ། །ཉོན་མོངས་པ་ཅན་ལ་སོགས་པ་གཞན་ཡང་ཞེས་བྱ་བ་ནི་ཉོན་མོངས་པ་ཅན་རྣམས་དང་རྣམ་པར་སྨིན་པ་ལས་སྐྱེས་པ་རྣམས་དང་ལྷག་མ་རྣམས་དང་འཕགས་པའི་དངོས་པོ་རྣམས་སོ། །དེ་ལ་ཉོན་མོངས་པ་ཅན་རྣམས་ཞེས་བྱ་བ་ལ་ཉོན་མོངས་པ་ཅན་གྱི་གཟུགས་དང་ཉོན་མོངས་པ་ཅན་གྱི་སེམས་དང་ལྡན་པ་མ་ཡིན་པའི་འདུ་བྱེད་རྣམས་ནི་མཚུངས་པར་ལྡན་པ་དང་རྣམ་པར་སྨིན་པའི་རྒྱུ་མ་གཏོགས་པ་བཞི་ལས་སོ། །རྣམ་པར་སྨིན་པ་ལས་སྐྱེས་པ་ཞེས་བྱ་བ་ལ། མཚུངས་པར་ལྡན་པ་དང་ཀུན་ཏུ་འགྲོ་བའི་རྒྱུ་མ་གཏོགས་པ་བཞི་ལས་སོ་ཞེས་བྱ་བར་སྦྱར་ཏེ། དེ་དག་ནི་རྣམ་པར་སྨིན་པ་ལས་སྐྱེས་པའི་གཟུགས་དང་རྣམ་པར་སྨིན་པ་ལས་སྐྱེས་པའི་ལྡན་པ་མ་ཡིན་པ་རྣམས་སོ། །ལྷག་མ་རྣམས་ནི་གསུམ་ལས་སོ་ཞེས་བྱ་བ་ལ་ལྷག་མའི་གཟུགས་དང་ལྡན་པ་མ་ཡིན་པ་རྣམས་ནི་རྣམ་པར་སྨིན་པ་དང་མཚུངས་པར་ལྡན་པ་དང༌། ཀུན་ཏུ་འགྲོ་བའི་རྒྱུ་དག་མ་གཏོགས་པ་ལྷག་མ་ལྷན་ཅིག་འབྱུང་བ་དང༌། སྐལ་བ་མཉམ་པ་དང༌། བྱེད་རྒྱུའི་རྒྱུ་དང་གསུམ་ལས་སྐྱེའོ། །ཟག་པ་མེད་པའི་དང་པོ་ནི་གཉིས་ལས་ཏེ་ཞེས་བྱ་བ་ལ། ཟག་པ་མེད་པའི་དང་པོ་གཟུགས་དང་ལྡན་པ་མ་ཡིན་པ་རྣམས་ནི་བྱེད་རྒྱུའི་རྒྱུ་དང་ལྷན་ཅིག་འབྱུང་བའི་རྒྱུ་དག་ལས་སོ། །རྒྱུ་གཅིག་ལས་བྱུང་བའི་ཆོས་ནི་མེད་དོ་ཞེས་བྱ་བ་ལ། ལྷན་ཅིག་འབྱུང་བ་དང་བྱེད་རྒྱུའི་རྒྱུ་དག་ཕན་ཚུན་མི་འཁྲུལ་བའི་ཕྱིར་ལ་རྒྱུ་ལྷན་ཅིག་བྱེད་པའི་རྒྱུ་ལ་མི་ལྟོས་པའི་ཕྱིར་དུས་ཐམས་ཅད་དུ་སྐྱེ་བར་ཐལ་བའི་ཕྱིར་རོ། །འདི་ལ་རྒྱུའི་ཆོས་རྣམས་ལ་རྒྱུའི་རང་བཞིན་བསམ་པ་དུ་ཞེ་ན། རྒྱུའི་རང་བཞིན་དྲུག་ཡོད་པ་
ནས་རྒྱུའི་རང་བཞིན་གཅིག་གི་བར་དུ་ཡོད་དོ། དེ་ལ་རྒྱུ་དྲུག་གི་རང་བཞིན་ནི། དཔེར་ན་འདས་པ་དང་ད་ལྟར་བྱུང་བའི་མི་དགེ་བ་རྣམས་དང༌། སེམས་དང་སེམས་ལས་བྱུང་བ་ཀུན་ཏུ་འགྲོ་བ་རྣམས་སོ། །རྒྱུ་ལྔའི་རང་བཞིན་ཡོད་དེ་འདས་པ་དང་ད་ལྟར་བྱུང་བའི་མི་དགེ་བ་རྣམས་དང་སེམས་དང་སེམས་ལས་བྱུང་བ་ཀུན་ཏུ་འགྲོ་བ་རྣམས་དང༌། ཀུན་ཏུ་འགྲོ་བ་ལུང་དུ་མ་བསྟན་པ་རྣམས་དང༌། དགེ་བ་ཟག་བ་དང་བཅས་བ་རྣམས་དང་མི་དགེ་བ་རྣམས་དང༌། མི་ལྡན་པ་ཀུན་ཏུ་འགྲོ་བ་རྣམས་སོ། །རྒྱུ་བཞིའི་རང་བཞིན་ཡོད་དེ་འདས་པ་དང་ད་ལྟར་བྱུང་བའི་མི་དགེ་བ་དང་དགེ་བ་ཟག་པ་དང་བཅས་པ་རྣམས་དང༌། མི་ལྡན་པའི་འདུ་བྱེད་རྣམས་དང་མི་དགེ་བ་ཀུན་ཏུ་འགྲོ་བ་མ་ཡིན་པ་རྣམས་དང༌། སེམས་དང་མི་ལྡན་པ་ཀུན་ཏུ་འགྲོ་བ་ལུང་དུ་མ་བསྟན་པ་རྣམས་དང༌། ཟག་པ་མེད་པའི་སེམས་དང་སེམས་ལས་བྱུང་བ་རྣམས་དང༌། མ་འོངས་པའི་དགེ་བ་རྣམས་དང་དགེ་བ་ཟག་པ་དང་བཅས་པ་རྣམས་སོ། །རྒྱུ་གསུམ་གྱི་རང་བཞིན་ཡོད་དེ། འདས་པ་དང་ད་ལྟར་བྱུང་བ་ལུང་དུ་མ་བསྟན་པའི་རང་བཞིན་དང༌། ལུང་དུ་མ་བསྟན་པ་སེམས་དང་མི་ལྡན་པ་རྣམས་དང༌། ཀུན་ཏུ་འགྲོ་བ་མ་ཡིན་པ་ཟག་པ་མེད་པ་གཟུགས་དང་མི་ལྡན་པ་རྣམས་དང་མ་འོངས་པའི་མི་དགེ་བ་དང་དགེ་བ་ཟག་པ་དང་བཅས་པ་དང༌། གཟུགས་དང༌། དགེ་བ་དང༌། མི་དགེ་བ་དང་མི་ལྡན་པ་རྣམས་དང༌། ལུང་དུ་མ་བསྟན་པ་ཟག་པ་མེད་པ་རྣམས་དང་སེམས་དང་སེམས་ལས་བྱུང་བ་རྣམས་སོ། །རྒྱུ་གཉིས་ཀྱི་རང་བཞིན་ཡོད་དེ། ལུང་མ་བསྟན་མ་འོངས་པ་ཟག་པ་མེད་པ་དང་གཟུགས་དང༌། ལུང་མ་བསྟན་ཟག་པ་མེད་པ་དང་མི་ལྡན་པ་རྣམས་སོ། །རྒྱུ་གཅིག་གི་རང་བཞིན་ཡོད་དེ་འདུས་མ་བྱས་ཀྱི་ཆོས་རྣམས་སོ། །རྒྱུ་དང་འབྲས་བུ་རྒྱས་པར་བསྟན་པ་རྫོགས་སོ།། །།སྔར་རྒྱུ་དང་རྐྱེན་དག་མེད་པར་ནི། སྐྱེ་བས་བསྐྱེད་བྱ་སྐྱེད་བྱེད་མིན། །ཞེས་བཤད་པ་དེ་ལ་རྒྱུ་རྣམས་ནི་གྲངས་དང༌། རང་གི་ངོ་བོ་དང་འབྲས་བུའི་སྒོ་ནས་བསྟན་ན། ད་ནི་རྐྱེན་རྣམས་གྲངས་དང༌། རང་གི་ངོ་བོ་དང༌། བྱེད་པའི་སྒོ་ནས་བརྗོད་པར་བྱ་དགོས་སོ་ཞེས་འདྲི་བ་ནི་རྐྱེན་རྣམས་གང་ཞེ་ན་ཞེས་བྱའོ། །རྐྱེན་ནི་བཞི་པོ་དག་ཏུ་གསུངས། །གང་ནས་གསུངས་
ཞེས་བྱ་བ་ནི་མདོ་ལས་སམ། འོན་ཏེ་ཆོས་མངོན་པ་བདག་གིས་མངོན་པ་ལས་གསུངས་ཞེས་བྱ་བའོ། །དེའི་ཕྱིར་མདོ་ལས་ཞེས་བྱ་བ་སྨོས་སོ། །འདི་སྐད་བསྟན་པར་འགྱུར་ཏེ། བཅོམ་ལྡན་འདས་ཁོ་ནས་བསྟན་གྱི། ཆོས་མངོན་པ་བདག་གིས་ནི་མ་ཡིན་ནོ། །རྐྱེན་དུ་འདྲ་བ་ནི་རྐྱེན་ཉིད་དོ། །འདིར་དངོས་པོའི་རྐྱེན་གྱིས་བསྟན་པ་ནི་འདྲ་བ་ཉེ་བར་བླངས་པའོ། །ཐམས་ཅད་རང་བཞིན་ཐ་དད་པ་ཡིན་ཡང་རྐྱེན་གྱི་དངོས་པོ་ལས་མི་འདའ་སྟེ་རྐྱེན་གྱི་རིགས་རྣམ་པ་བཞི་བརྟེན་ཏོ་སྙམ་དུ་བསམ་པའོ། །རྒྱུ་ཞེས་བྱ་བ་རྒྱུ་ལྔ་ཡིན་ཞེས་བྱ་བ་ལ་རྒྱུའི་རྐྱེན་ནི་ལྔ་ཁོ་ན་སྟེ་རྒྱུའི་རྐྱེན་ཁོ་ན་ལྔ་ནི་མ་ཡིན་ནོ། །དེ་དག་ཀྱང་མི་ཤེས་པས་བྱེད་རྒྱུའི་རྒྱུ་མ་གཏོགས་པ་ཞེས་བྱ་བ་སྨོས་སོ། །བྱེད་རྒྱུའི་རྒྱུ་རྒྱུའི་རྐྱེན་མ་ཡིན་ནོ་ཞེས་བྱ་བ་འདི་ཇི་ལྟར་ཤེས་པར་བྱ་ཞེ་ན་བསྟན་བཅོས་ལས་རྒྱུའི་རྐྱེན་གང་ཞེ་ན། འདུས་བྱས་ཀྱི་ཆོས་ཐམས་ཅད་དོ་ཞེས་གསུངས་ཏེ། ཆོས་འདུས་བྱས་སྨོས་པས་རྒྱུའི་རྐྱེན་ནི་ལྔ་པོ་དག་ཡིན་ནོ་ཞེས་བྱ་བར་རྣམ་པར་གཞག་གོ །སེམས་དང་སེམས་བྱུང་སྐྱེས་པ་རྣམས། །ཐ་མ་མིན་མཚུངས་དེ་མ་ཐག །ཅེས་བྱ་བ་ལ། སེམས་དང་སེམས་ལས་བྱུང་བ་སྨོས་པས། གཟུགས་དང་འདུས་མ་བྱས་དང་ལྡན་པ་མ་ཡིན་པ་བསལ་བའི་སྒོ་ནས་སེམས་དང་སེམས་ལས་བྱུང་བ་རྣམས་ཁོ་ན་མཚུངས་པ་དེ་མ་ཐག་པའི་རྐྱེན་ཉིད་ནི་མ་ཡིན་གྱི་མཚུངས་པ་དེ་མ་ཐག་པའི་རྐྱེན་ཉིད་ནི་མ་ཡིན་ནོ་ཞེས་ཤེས་པར་བྱ་བའི་ཕྱིར་རོ། །ཡང་ཅིའི་ཕྱིར་འདུས་མ་བྱས་རྒྱུའི་རྐྱེན་ཡིན་ཞེ་ན་མི་སྒྲིབ་པ་ཙམ་གྱིས་གནས་པའི་ཕྱིར་རོ། །གང་དག་རྒྱུ་དང་རྐྱེན་གྱི་རྣམ་པར་རྟོག་པ་རྣམས་རྒྱུ་ལྔ་དང་རྐྱེན་གསུམ་གྱིས་མ་བསྡུས་པ་ཉིད་ཨ་སཾ་སྐྲྀ་ཏ་སྟ་ཏ་སཾ་གྲ་ཧཱརྠཾ། བྱེད་རྒྱུ་དང་བདག་པོའི་རྐྱེན་རྣམ་པར་གཞག་གོ །དངོས་པོ་རྣམ་པ་སྣ་ཚོགས་པ་བཞིན་རྣམ་པར་རྟོག་པ་རྣམ་པ་དུ་མ་ཉིད་ཀྱི་ཕྱིར་བྱེད་རྒྱུ་ལས་ཞེས་པའོ། །སེམས་དང་སེམས་འབྱུང་སྐྱེས་པ་རྣམས། ཐ་མ་མིན་མཚུངས་དེ་མ་ཐག་ཅེས་བྱ་བ་ལ། འདུས་མ་བྱས་ཏེ་བསྡུས་པའི་དོན། སེམས་དང་སེམས་ལས་བྱུང་བ་སྨོས་པས་གཟུགས་དང་འདུས་མ་བྱས་དང་ལྡན་པ་མེད་པ་མ་ཡིན་པ་རྣམས་བསལ་བའི་སྒོ་ནས་སེམས་དང་སེམས་ལས་བྱུང་བ་རྣམས་ཁོ་ན་མཚུངས་པ་དེ་མ་ཐག་པའི་རྐྱེན་ནོ་ཞེས་ཤེས་པར་བྱ་བའི་ཕྱིར་རོ། །སེམས་དང་
སེམས་ལས་བྱུང་བ་དག་ནི་རྣམ་པ་གཉིས་ཏེ། ཐ་མ་དང་ཐ་མ་མ་ཡིན་པ་དག་གོ །ཐ་མ་དག་ནི་གང་དག་གི་མཇུག་ཐོགས་སུ་སེམས་དང་སེམས་ལས་བྱུང་བ་མི་འབྱུང་སྟེ། དཔེར་ན་དགྲ་བཅོམ་པ་ཡོངས་སུ་མྱ་ངན་ལས་འདའ་བའི་དུས་ཀྱི་ལྟ་བུའོ། །ཐ་མ་མ་ཡིན་པ་དག་ནི་གང་དག་གི་མཇུག་ཐོགས་སུ་སེམས་དང་སེམས་ལས་བྱུང་བ་འབྱུང་བའོ། །དེའི་ཕྱིར་ཐ་མ་བསལ་བའི་སྒོ་ནས་ཕྱི་མ་དང་བཅས་པ་རྣམས་མཚུངས་པ་དེ་མ་ཐག་པའི་རྐྱེན་ཉིད་དུ་ཤེས་པར་བྱ་བའི་ཕྱིར་ཐ་མ་མ་ཡིན་པ་སྨོས་སོ། །སྐྱེས་པ་རྣམས་ཞེས་བྱ་བས་ནི་མ་འོངས་པ་བསལ་བའི་སྒོ་ནས་འདས་པ་དང༌། ད་ལྟར་བྱུང་བ་ཡོངས་སུ་འཛིན་པ་ཡིན་ནོ། །རྐྱེན་འདི་ནི་མཚུངས་པ་ཡང་ཡིན་དེ་མ་ཐག་པ་ཡང་ཡིན་པས་ཞེས་བྱ་བ་འདིས་ནི་སེམས་དང་སེམས་ལས་བྱུང་བ་རྣམས་ཁོ་ན་མཚུངས་པ་དེ་མ་ཐག་པའི་དོན་དང་ལྡན་པ་ཉིད་ཡིན་གྱི། གཞན་དག་ནི་མ་ཡིན་པས་སེམས་དང་སེམས་ལས་བྱུང་བ་རྣམས་ལ་ནི་མཚུངས་པ་དེ་མ་ཐག་པའི་རྐྱེན་ཡིན་ནོ་ཞེས་སྟོན་ཏོ། །མཚུངས་པ་ཞེས་བྱ་བ་ནི་རྒྱུད་གཅིག་ལ་རྫས་རིགས་མཐུན་པ་གཉིས་མཚུངས་པར་ལྡན་པའི་ཕྱིར་རོ། །དེ་མ་ཐག་ཏུ་ཞེས་བྱ་བ་རྫས་རིགས་མཐུན་པས་བར་དུ་མ་ཆོད་པའི་འབྲས་བུ་ཅན་ཡིན་པའི་ཕྱིར་རོ། །གང་དག་པར་མེད་པར་འབྲེལ་པར་འབྱུང་བ་ནི་དེ་མ་ཐག་པ་ཞེས་སྨྲ་བ་དེ་དག་གི་ལྟར་ན་སྙོམས་པར་འཇུག་པ་ལས་ལྡང་བའི་སེམས་དང་སེམས་ལས་བྱུང་བ་རྣམས་དེ་མ་ཐག་པ་ཞེས་བྱ་བར་ཐལ་བར་འགྱུར་རོ། །ཐམས་ཅད་མཚུངས་པ་འམ་ཅིག་ཅར་ཁོ་ནར་སེམས་དང་སེམས་ལས་བྱུང་བའི་ཚོགས་སྔོན་དུ་འགྲོ་བ་ཉིད་དོ། །དེ་གཞན་དག་གིས་བར་མ་ཆད་པའི་རྐྱེན་ཡིན་པས་མཚུངས་པ་དེ་མ་ཐག་པའི་རྐྱེན་ནོ་ཞེས་གཞན་དག་ཟེར་རོ། །མི་མཉམ་པར་འབྱུང་བའི་ཞེས་བྱ་བ་ལ། མཚུངས་པ་དེ་མ་ཐག་པའི་དོན་མེད་པའི་ཕྱིར་མཚུངས་པ་དེ་མ་ཐག་པའི་རྐྱེན་མ་ཡིན་ནོ། །མཚུངས་པ་དེ་མ་ཐག་པའི་དོན་མེད་པ་ཉིད་བསྟན་པའི་ཕྱིར། འདི་ལྟར་འདོད་པ་ན་སྤྱོད་པའི་ཞེས་བྱ་བ་རྒྱས་པར་སྨོས་སོ། །འདོད་པ་ན་སྤྱོད་པ་ནི་སོ་སོ་ཐར་བའི་སྡོམ་པ་རྣམ་པར་རིག་བྱེད་མ་ཡིན་པའི་གཟུགས་སོ། །གཟུགས་ན་སྤྱོད་པ་ནི་བསམ་གཏན་གྱི་སྡོམ་པའི་གཟུགས་སོ། །
ཟག་པ་མེད་པ་ནི་ཟག་པ་མེད་པའི་སྡོམ་པའི་གཟུགས་སོ། །གང་གི་ཚེ་སྡོམ་པ་བླངས་པ་བསམ་གཏན་ནམ་ལམ་ལ་སྙོམས་པར་མི་འཇུག་པ་དེའི་ཚེ་ནི་འདོད་པ་ན་སྤྱོད་པའི་རྣམ་པར་རིག་བྱེད་མ་ཡིན་པའི་གཟུགས་ལས་འདོད་པ་ན་སྤྱོད་པ་ཁོ་ན་འབྱུང་ངོ༌། །གང་གི་ཚེ་བསམ་གཏན་ལ་སྙོམས་པར་འཇུག་པ་དེའི་ཚེ་ན་འདོད་པ་དང་གཟུགས་ན་སྤྱོད་པའི་རྣམ་པར་རིག་བྱེད་མ་ཡིན་པ་འབྱུང་ངོ༌། །གང་གི་ཚེ་ལམ་ལ་སྙོམས་པར་འཇུག་པ་དེའི་ཚེ་ནི་འདོད་པ་ན་སྤྱོད་པ་དང་ཟག་པ་མེད་པ་འབྱུང་བས་གཟུགས་མངོན་དུ་འགྱུར་བས་འཆོལ་བ་ཡིན་ནོ། །མཚུངས་པ་དེ་མ་ཐག་པའི་རྐྱེན་ནི་འཆོལ་བ་མ་ཡིན་ན་ཞེས་བྱ་བ་ལ། འདོད་པ་ན་སྤྱོད་པའི་སེམས་དང་སེམས་ལས་བྱུང་བ་དག་གི་མཇུག་ཐོགས་སུ་ནི་ནམ་ཡང་འདོད་པར་གཏོགས་པ་དང་གཟུགས་སུ་གཏོགས་པ་མི་འབྱུང་ངོ༌། །འདོད་པ་ན་སྤྱོད་པ་དང་ཟག་པ་མེད་པ་ཞེས་བྱ་བ་ལ། གང་དག་མཚུངས་པ་དེ་མ་ཐག་ཏུ་བྱུང་བ་དེ་དག་ནི་མཚུངས་པ་དེ་མ་ཐག་པའི་རྐྱེན་ཞེས་གཞན་དག་གོ །མཚུངས་པ་ཞེས་བྱ་བ་ནི་གང་ཞིག་ལྡན་པ་དེ་ལྡན་པ་ཉིད་དེ། ཚོར་བ་ལ་སོགས་པ་དང་ཡང་དག་པར་ལྡན་པ་ནི་ཡང་དག་པར་ལྡན་པའོ། །དེ་མ་ཐག་པ་ཞེས་བྱ་བ་ནི་ཅིག་ཅར་སེམས་ལ་ཚོར་བ་ལ་སོགས་པའི་རང་བཞིན་ནི་མ་ཡིན་གྱི། སེམས་གཅིག་ལ་འདོད་པ་དང་ལྡན་པ་དང་མི་ལྡན་པ་མངོན་དུ་གྱུར་པའོ་ཞེ་ན། འདི་མཚུངས་པ་དེ་མ་ཐག་པའི་རྐྱེན་མ་ཡིན་ནོ། །བཙུན་པ་དབྱིག་བཤེས་ན་རེ་རྒྱས་པ་ལས་བྱུང་བ་ཞེས་བྱ་བ་རྒྱས་པར་འབྱུང་བ་ལ། ཇི་ལྟར་ཟས་དང་བསམ་གཏན་ལ་སོགས་པས་རྒྱས་པར་བྱས་པ་དང༌། རྣམ་པར་སྨིན་པ་ལས་སྐྱེས་པ་མ་འགགས་པ་ཁོ་ནར་དེ་དང་རིགས་མཐུན་པ་བསམ་གཏན་དང་ཟས་ལ་སོགས་པས་རྒྱས་པ་དང༌། རྣམ་པར་སྨིན་པ་ལས་སྐྱེས་པའི་གཟུགས་གཞན་སྐྱེ་བ་དེ་བཞིན་དུ། དགེ་བ་དང་མི་དགེ་བ་དང་ལུང་དུ་མ་བསྟན་པའི་སེམས་མ་འགགས་པ་ཁོ་ནར་དགེ་བ་དང་མི་དགེ་བ་དང་ལུང་དུ་མ་བསྟན་པའི་སེམས་ནི་མི་འབྱུང་ངོ་ཞེས་ཟེར་རོ། །གཞན་དག་ན་རེ། དེ་ལྟར་འབྱུང་བ་ཆེན་པོ་བཞི་ལས་སྐྱེས་པ་རྣམས་ནི་རིགས་གཅིག་པ་མང་པོ་ཉེ་བར་བླངས་པའི་གཟུགས་ཀྱིས་རྡུལ་ཕྲ་རབ་ཀྱི་རྫས་རྣམས་སྐྱེའི། །སེམས་
དང་སེམས་ལས་བྱུང་བ་རྣམས་ནི་མ་ཡིན་པ་ཉིད་དོ་ཞེས་ཟེར་རོ། །བཙུན་པ་ཞེས་བྱ་བ་ནི་མདོ་སྡེ་པ་གནས་བརྟན་ཆོས་སྐྱོབ་བོ། །ཆེས་མང་བ་དང༌། ཉུང་དུ་བྱུང་བའི་ཕྱིར་ཏེ་ཞེས་བྱ་བ་རྒྱས་པར་འབྱུང་བ་ལ། འདི་ལྟར་ཆོས་གཟུགས་ཅན་རྣམས་ནི་རྫས་ངེས་པ་མེད་པར་འབྱུང་བར་འགལ་བ་མེད་དེ། ལ་ལར་ནི་ཆེས་ཉུང་ངུ་མང་པོར་འགྱུར་ཏེ། དཔེར་ན་ནུར་ནུར་པོ་ལ་སོགས་པ་དག་ལས་གཟུགས་ལྟ་བུའོ། །ལ་ལར་ནི་ཆེས་མང་བ་ཡང་ཉུང་དུར་འགྱུར་ཏེ། དཔེར་ན་སྟོབས་དང་ལྡན་པའི་ལུས་ལས་སྟོབས་ཆུང་དུ་འབྱུང་བ་ལྟ་བུའོ། །དེའི་ཕྱིར་འདི་མཚུངས་པ་དེ་མ་ཐག་པ་ཉིད་ཀྱི་བྱེད་པ་མེད་དོ། །སེམས་ལས་བྱུང་བ་རྣམས་ལ་ཡང་ཞེས་བྱ་བ་རྒྱས་པར་འབྱུང་བ་ལ། འདི་ལྟར་འདོད་པར་གཏོགས་པའི་དགེ་བའི་སེམས་ལ་སེམས་ལས་བྱུང་བ་ཉི་ཤུ་རྩ་གཉིས་འབྱུང་ལ་མི་དགེ་བ་མ་འདྲེས་པ་དང༌། ལྟ་བ་དང་ལྡན་པ་ལ་ཉི་ཤུའོ། །བསྒྲིབས་པ་ལ་ནི་བཅོ་བརྒྱད་དོ། །མ་བསྒྲིབས་ལ་ལུང་དུ་མ་བསྟན་པ་ལ་ནི་བཅུ་གཉིས་སོ། །རྟོག་པ་དང་དཔྱོད་པ་དང་བཅས་པའི་ཏིང་ངེ་འཛིན་བསམ་གཏན་དང་པོའོ། །རྟོག་པ་མེད་ལ་དཔྱོད་པ་ཙམ་ནི་བསམ་གཏན་ཁྱད་པར་ཅན་ནོ། །རྟོག་པ་ཡང་མེད་ལ་དཔྱོད་པ་ཡང་མེད་པ་ནི་བསམ་གཏན་གཉིས་པ་ནས་སྲིད་པའི་རྩེ་མོའི་བར་ཏེ། སེམས་དང་ཏིང་ངེ་འཛིན་དེ་དག་ཕན་ཚུན་མཚུངས་པ་དེ་མ་ཐག་པའི་རྐྱེན་གྱི་ངོ་བོར་འདོད་པ་ཡིན་ལ། སེམས་ལས་བྱུང་བ་རྣམས་ཀྱང་ཆེས་མང་བ་དང་ཉུང་དུ་འབྱུང་བས་གཟུགས་བཞིན་དུ་མཚུངས་པ་དེ་མ་ཐག་པའི་དངོས་པོར་འགལ་ལོ། །རིགས་གཞན་ལ་ནི་ཡོད་ཀྱི་ཞེས་བྱ་བ་ལ་རྟོག་པ་དང་དཔྱོད་པ་ལ་སོགས་པ་རིགས་གཞན་དུ་འགྱུར་བ་རྣམས་ནི་སེམས་འགའ་ཞིག་ལ་འབྱུང་བ་དང་མི་འབྱུང་བར་འགྱུར་ན། འདིར་ནི་གཟུགས་བཞིན་དུ་རང་གི་རིགས་ལ་ཆོས་མང་བ་དང་ཉུང་དུ་འབྱུང་བ་མེད་དོ་ཞེས་བརྗོད་དོ། །འདི་ལྟར་ཚོར་བའི་རྫས་གཅིག་གི་མཇུག་ཐོགས་སུ་ཚོར་བའི་རྫས་གཉིས་སམ་ཚོར་བ་གཉིས་ཀྱི་མཇུག་ཐོགས་སུ་གཅིག་འབྱུང་བར་མི་འགྱུར་ཏེ། དེ་ལྟར་ན་སེམས་དང་སེམས་ལས་བྱུང་བ་རྣམས་རྫས་ངེས་པར་འབྱུང་བས་འདིར་གཟུགས་དང་འདྲ་བར་ཐལ་བར་འགྱུར་བ་མེད་དོ། །
ཡང་ཅི་རང་གི་རིགས་ཁོ་ནའི་ཞེས་བྱ་བ་ནི་གང་གི་ཕྱིར་མཚུངས་པ་དེ་མ་ཐག་པའི་རྐྱེན་མི་མཉམ་པ་མི་འདོད་པས་འདྲི་པའོ། །དེ་ནི་མ་ཡིན་ཏེ་ཞེས་བྱ་བ་རྒྱས་པར་འབྱུང་བ་ལ་འདིར་ནི་གཞན་གྱི་སེམས་དང་སེམས་ལས་བྱུང་བ་རྣམས་ལ་ཡང་གཟུགས་ལྟར་ཆེས་མང་བ་དང་ཉུང་དུ་འབྱུང་བ་མ་ཡིན་ནམ་ཞེས་གང་སྨྲས་པ་དེ་ལ་བསལ་བར་བྱ་བའི་ཕྱིར་ཚོར་བ་ལ་སོགས་པ་རྫས་ཉུང་དུ་ལས་ཞེས་བྱ་བ་རྒྱས་པར་བྱུང་བ་དེ་ཙམ་ཞིག་བརྗོད་ཀྱི་རང་གི་རིགས་ཁོ་ན་མཚུངས་པ་དེ་མ་ཐག་པའི་རྐྱེན་མ་ཡིན་ནོ་ཞེས་བསྟན་པའི་ཕྱིར་ནི་མ་ཡིན་ཏེ། དེའི་ཕྱིར་ཚོགས་པ་མཐའ་དག་ཁོ་ན་ཚོགས་པ་གཞན་མཐའ་དག་གི་མཚུངས་པ་དེ་མ་ཐག་པའི་རྐྱེན་ནོ། །རྒྱུད་འདྲ་བ་དག་ནི་ཞེས་བྱ་བ་རྒྱས་པར་འབྱུང་བ་ལ། འདི་དག་ལ་རྒྱུད་འདྲ་བས་ཐ་སྙད་འདོགས་པ་ཡོད་པས་ན། དེ་དག་ནི་རྒྱུད་འདྲ་བ་དག་གོ །གལ་ཏེ་འདྲ་བ་ཁོ་ན་མཚུངས་པ་དེ་མ་ཐག་པའི་རྐྱེན་ཡིན་ན། ཇི་ལྟར་ཉོན་མོངས་པ་ཅན་མ་ཡིན་པའི་མཇུག་ཐོགས་སུ་ཉོན་མོངས་པ་ཅན་དུ་འབྱུང་ཞེ་ན། གང་གི་ཚེ་ཉོན་མོངས་པ་ཅན་མ་ཡིན་པའི་མཇུག་ཐོགས་སུ་ཞེས་བྱ་བ་རྒྱས་པར་འབྱུང་སྟེ། འདི་ལྟར་རིགས་གཞན་གྱིས་བར་མ་ཆོད་པ་མཚུངས་པ་དེ་མ་ཐག་པའི་རྐྱེན་དུ་མི་འདོད་ཀྱི། འོ་ན་ཅི་ཞེ་ན། རང་གི་རིགས་ཀྱིས་མཆོད་པའོ། །དཔེར་ན་ཞེས་བྱ་བ་ནི་དེ་ཉིད་ལ་དཔེ་རྒྱས་པར་འབྱུང་ངོ༌། །དེ་སྐད་དུ་ནི་མི་བརྗོད་དོ་ཞེས་བྱ་བ་ལ་བསྟན་བཅོས་དང་འགལ་བའི་ཕྱིར་དང༌། རིག་པ་དང་འགལ་བའི་ཕྱིར་ཏེ། སེམས་ཀྱི་མཚུངས་པ་དེ་མ་ཐག་པའི་ཆོས་རྣམས་གང་ཞེ་ན། སེམས་གང་གི་མཇུག་ཐོགས་སུ་དེ་ལས་གཞན་པའི་སེམས་དང་སེམས་ལས་བྱུང་བ་དག་ཅེས་རྒྱས་པར་འབྱུང་ངོ༌། །ཟག་པ་མེད་པའི་སེམས་མི་འབྱུང་བར་ཐལ་བའི་ཕྱིར་ན་རིག་པ་དང་ཡང་འགལ་ལོ། །སྡུག་བསྔལ་ལ་ཆོས་ཤེས་པའི་བཟོད་པའི་སྔ་རོལ་དུ་བྱུང་བའི་ཆོས་ཟག་པ་མེད་པ་ནི་འགའ་ཡང་མེད་དེ་སྔར་ལམ་མ་བསྐྱེད་པའི་ཕྱིར་རོ། །ཚོར་བ་ལ་སོགས་པ་རིགས་གཞན་དང་མཚུངས་པས་མཚུངས་པ་དེ་མ་ཐག་པའི་རྐྱེན་ཉིད་དུ་འདོད་པ་ནི་ཟག་པ་དང་བཅས་པ་དང་ཟག་པ་མེད་པ་དང་མཚུངས་པས་སོ། །དེའི་ཕྱིར་འདི་བསམ་པར་བྱ་སྟེ། ཁམས་གསུམ་པ་དང་ལྡན་པ་མ་ཡིན་པ་རྣམས་ཅིག་ཅར་
མངོན་དུ་འགྱུར་བའི་ཕྱིར་རོ་ཞེས་བྱ་བ་ལ། འདོད་པའི་ཁམས་ལ་འདོད་ཆགས་དང་བྲལ་བའི་སྐད་ཅིག་སྐད་ཅིག་ལ་འདོད་པ་ན་སྤྱོད་པའི་ཆོས་ཀྱི་ཐོབ་པའི་མཇུག་ཐོགས་སུ་འདོད་པ་དང་གཟུགས་མེད་པ་དང་ཟག་པ་མེད་པའི་ཐོབ་པ་རྣམས་མངོན་དུ་འགྱུར་ཏེ་གཟུགས་དང་གཟུགས་མེད་པ་ན་སྤྱོད་པའི་ཉོན་མོངས་པ་རྣམས་དང་ལྡན་པའི་ཕྱིར་རོ། །དེ་བཞིན་དུ་འདོད་པའི་ཁམས་ལས་འདོད་ཆགས་དང་མ་བྲལ་བ་དང༌། གཟུགས་དང་གཟུགས་མེད་པའི་སྙོམས་པར་འཇུག་པ་ཐོབ་པའི་འཕགས་པ་ལ་ཡང་ཁམས་གསུམ་པའི་ཉོན་མོངས་པ་དང༌། ཟག་པ་མེད་པའི་ཆོས་ཀྱི་ཐོབ་པ་མངོན་དུ་འགྱུར་བ་ཡིན་ནོ། །དེ་བཞིན་དུ་ཁམས་གསུམ་དང་ལྡན་པ་དང་ལྡན་པ་མ་ཡིན་པའི་དགེ་བ་རྣམས་དང༌། བསྒྲིབས་ལ་ལུང་དུ་མ་བསྟན་པ་རྣམས་ཀྱི་ཐོབ་པ་རྣམས་ཀྱང་ཅིག་ཅར་མངོན་དུ་འགྱུར་བ་ཡིན་ནོ། །འདིས་ནི་སྐྱེ་བ་ལ་སོགས་པ་རྣམས་ཅིག་ཅར་མངོན་དུ་འགྱུར་བ་ཡང་བཤད་པ་ཡིན་ནོ། །དེ་བཞིན་དུ་དགྲ་བཅོམ་པ་ཐོབ་པ་དང་ཡོངས་སུ་ཉམས་པ་དག་ལ་ཡང་ཅི་རིགས་པར་བརྗོད་པར་བྱའོ། །སྐྱེས་པ་རྣམས་མཚུངས་པ་དེ་མ་ཐག་ཅེས་བཤད་པ་འདྲི་བ་ནི། ཅིའི་ཕྱིར་མ་འོངས་པ་ཞེས་བྱ་བའོ། །མ་འོངས་པའི་དུས་འཆོལ་བ་ཉིད་དུ་བསྟན་པའི་ཕྱིར་སྔ་ཕྱི་མེད་པའི་ཕྱིར་རོ་ཞེས་བྱ་བ་སྨོས་སོ། །སྔ་ཕྱིར་འབྱུང་བ་དང་འབྲེལ་བའི་ཕྱིར་མ་འོངས་པས་ད་ལྟར་བ་སྔ་བ་དང༌། ད་ལྟར་བས་འདས་པ་སྔ་བར་འདོད་པར་ནུས་ན་མ་འོངས་པ་ལ་ནི་དེ་ལྟར་སྔ་ཕྱི་ཡོད་པ་མ་ཡིན་ཏེ་དུས་སྔ་ཕྱི་དང་འབྲེལ་པ་མེད་པའི་ཕྱིར་རོ། །དེ་ཉིད་གྱི་ཕྱིར་ད་ལྟར་བ་ད་ལྟར་བའི་མཚུངས་པ་དེ་མ་ཐག་པ་ཞེས་མི་བྱ་སྟེ་དུས་མཚུངས་པའི་ཕྱིར་རོ། །འོ་ན་བཅོམ་ལྡན་འདས་ཀྱིས་ཞེས་བྱ་བ་རྒྱས་པར་འབྱུང་སྟེ། གལ་ཏེ་མ་འོངས་པའི་དུས་ལ་སྔ་ཕྱི་མེད་ནའོ། །འདས་པས་ད་ལྟར་ལའམ། འདས་པ་དང་ད་ལྟར་བ་དག་ལ་རྗེས་སུ་དཔོག་པ་ནི་འདས་པ་དང༌། ད་ལྟར་གྱི་ལས་རྗེས་སུ་དཔག་པའོ། །རྣམ་པར་སྨིན་པ་ནི་འདི་ལྟ་བུ་ཞེས་བྱ་བ་ནི་རྣམ་པར་སྨིན་པའི་འབྲས་བུའོ། །ཆོས་ལས་སྐྱེས་ཞེས་བྱ་བ་ནི་རྒྱུ་མཐུན་པའི་འབྲས་བུའོ། །དེ་ལྟ་ན་བཅོམ་ལྡན་འདས་ཀྱིས་ཞེས་བྱ་བ་རྒྱས་པར་འབྱུང་སྟེ། གལ་ཏེ་འདས་པས་ད་ལྟར་བ་ལ་དཔོག་གོ་ཞེས་བྱ་བར་
འདོད་ནའོ། །གཞན་དག་ན་རེ་བཅོམ་ལྡན་འདས་ཀྱིས་ཇི་ལྟར་འདི་ལ་སྔོན་གྱི་མཐའ་ལ་མི་ལྟོས་བར་དེའི་རིགས་ཅན་གྱི་ལས་ཀྱི་འབྲས་བུ་མ་འོངས་པ་མངོན་སུམ་གྱིས་གཟིགས་པ་ལས་མ་འོངས་པ་ཆེ་གེ་མོ་ཞིག་གི་མཇུག་ཐོགས་སུ་འདི་ཁོ་ན་འབྱུང་བར་འགྱུར་རོ་སྙམ་དུ་ངེས་པར་འབྱུང་བར་འགྱུར་བ་དེ་ལྟར་སེམས་ཅན་གྱི་རྒྱུད་དག་ལས་འདས་པའི་ལས་དང་འབྲས་བུ་འབྲེལ་བ་རབ་ཏུ་མཁྱེན་པ་ཡིན་ཏེ། དེའི་ཕྱིར་ཉེས་པ་འདི་མེད་དོ་ཞེས་ཟེར་རོ། །འབྲས་བུའི་རྟགས་སུ་གྱུར་བ་ཞེས་བྱ་བ་ནི་འབྲས་བུའི་མཚན་མར་གྱུར་པ་དང་རྒྱུ་མཚན་དུ་གྱུར་པ་སྟེ་རྟགས་མཚན་དུ་གྱུར་པ་ཞེས་བྱ་བའི་དོན་ཏོ། །དེ་ནི་དེའི་གཟུགས་བརྙན་ལྟ་བུ་ཞིག་སྟེ། དེ་ལ་གཟིགས་ནས་བསམ་གཏན་དང་མངོན་པར་མཁྱེན་པ་མངོན་དུ་མ་མཛད་བཞིན་དུ་མ་འོངས་པ་མཁྱེན་པ་ཡིན་གྱི་མངོན་སུམ་དུ་མཛད་པས་མངོན་སུམ་དུ་གཟིགས་པ་ནི་མ་ཡིན་ནོ་ཞེས་ཟེར་རོ། །གཞན་དག་ན་རེ་དེ་ལས་གོང་དུ་མ་འོངས་པའི་འབྲས་བུའི་རྟགས་སུ་གྱུར་པ་ཞིག་མངོན་སུམ་དུ་གཟིགས་སོ་ཞེ་ན། རྟགས་སུ་གྱུར་པ་ཅུང་ཟད་ཀྱང་མེད་པར་མངོན་སུམ་དུ་གཟིགས་ནས་ལུང་དུ་སྟོན་པར་མཛད་དོ། །གལ་ཏེ་དེའི་འབྲས་བུ་བཅོམ་ལྡན་འདས་ཀྱིས་མངོན་སུམ་དུ་གཟིགས་པ་ཅིའི་ཕྱིར་མཚན་མ་ལ་ལྟོས་པར་བྱེད། འོན་ཏེ་སྐྱེའོ་ཞེ་ན། ལས་ཡོངས་སུ་མ་བཟུང་བས་འདིར་མཚན་མ་ལ་ལྟོས་པ་དེ་ལྟ་ན་ཡང་དེའི་འབྲས་བུ་འཕེན་པའི་རྟགས་སུ་གྱུར་པ་ཉིད་ལས་མི་འདའོ། །མངོན་སུམ་དུ་མ་མཛད་བཞན་དུ་ཡང་ཞེས་སྔར་ཡང་བཤད་དོ། །གང་གི་ཕྱིར་རབ་ཏུ་གྲགས་པས་སྔོན་དང་མཐའ་མི་འབྲང་ངོ༌། །མཁྱེན་པ་དེ་ནི་དུ་བ་ལས་མེ་ལྟར་རྗེས་སུ་དཔག་པ་ལས་བྱུང་བ་ཡིན་ཏེ། རྒྱུ་དང་འབྲས་བུའི་འབྲེལ་པ་མངོན་སུམ་ཉིད་ཀྱི་ཕྱིར་ནི་མ་ཡིན་ནོ། །ཇི་ལྟར་མ་འོངས་པ་ལ་མི་བལྟོས་པ་ཁོ་ནར་འདས་པ་མཁྱེན་པ་དེ་བཞིན་དུ་འདས་པ་ལ་མི་བལྟོས་པར་ཡང་མ་འོངས་པ་མཁྱེན་པ་ཡིན་ནོ། །མ་འོངས་པའི་གོ་རིམས་ངེས་པ་མེད་ན་བཅོམ་ལྡན་འདས་ཀྱིས་བཞེད་པ་ཙམ་གྱིས་མ་འོངས་པ་ཆེ་གེ་མོ་ཞིག་གི་མཇུག་ཐོགས་སུ་མ་འོངས་པ་འདི་འབྱུང་བར་འགྱུར་རོ་ཞེས་བྱ་བ་མཁྱེན་ན། འདི་ལྟར་བཅོམ་ལྡན་འདས་ཐམས་ཅད་མཁྱེན་པ་ཡིན་ཞེས་ཏེ། གཟུགས་ལ་སོགས་པ་
ཡུལ་ད་ལྟར་བ་རྣམས་མིག་གི་རྣམ་པར་ཤེས་པ་དག་གིས་ཉམས་སུ་མ་བསྟན་བར་ཡིད་ཀྱི་རྣམ་པར་ཤེས་པས་མཁྱེན་པ་ནི་མ་ཡིན་ནོ་ཞེ་ན། འདིའི་ལན་དུ་སངས་རྒྱས་རྣམས་ཀྱིས་སངས་རྒྱས་ཀྱི་ཡུལ་ནི་ཞེས་བྱ་བ་ལ་སོགས་པ་སྨོས་སོ། །མ་འོངས་པའི་གོ་རིམས་ངེས་པར་གནས་པ་མེད་ན་ཞེས་བྱ་བ་འབྱུང་སྟེ། མཚུངས་པ་དེ་མ་ཐག་པའི་རྐྱེན་ནི་ངེས་པར་གནས་པ་ཡིན་ནོ། །ཅིའི་ཕྱིར་ཆོས་ཀྱི་མཆོག་གི་མཇུག་ཐོགས་སུ་ཞེས་བྱ་བ་རྒྱས་པར་འབྱུང་བ་ལ། སྐྱེ་བ་ངེས་པའི་རྒྱུ་ནི་མཚུངས་པ་དེ་མ་ཐག་པའི་རྐྱེན་ཡིན་ན། དེ་ནི་མ་འོངས་པའི་དུས་ན་མེད་པས་ངེས་པ་མེད་པར་སྐྱེ་བར་ཐལ་བར་འགྱུར་རོ། །གང་ཞིག་གང་ལ་རག་ལས་ཏེ་སྐྱེ་བ་ཞེས་བྱ་བ་རྒྱས་པར་འབྱུང་བ་ལ། སྡུག་བསྔལ་ལ་ཆོས་ཤེས་པའི་བཟོད་པ་སྐྱེ་བ་ནི་ཆོས་ཀྱི་མཆོག་ལ་རག་ལས་པ་ཡིན་གྱི་གཞན་ལ་རག་ལས་པའམ་བཟློག་པ་ནི་མ་ཡིན་ནོ། །དེའི་ཕྱིར་ཆོས་ཀྱི་མཆོག་གི་མཇུག་ཐོགས་སུ་སྡུག་བསྔལ་ལ་ཆོས་ཤེས་པའི་བཟོད་པ་ཁོ་ན་སྐྱེའི། ཆོས་གཞན་ནི་མ་ཡིན་ནོ། །དེ་བཞིན་དུ་གཞན་ལ་ཡང་བརྗོད་པར་བྱའོ། །མཚུངས་པ་དེ་མ་ཐག་པའི་རྐྱེན་མེད་ན་དེ་ལ་རག་ལས་བ་གང་གིས་བྱས་ཤེ་ན་ནུས་པ་ཐ་དད་པའི་ཕྱིར་ཏེ། དེ་ལྟ་མ་ཡིན་ན་མཚུངས་པ་དེ་མ་ཐག་པའི་རྐྱེན་མེད་པའི་ཕྱིར་ས་བོན་ལ་སོགས་པ་རྣམས་ཀྱི་གོ་རིམས་ངེས་པ་མེད་པར་འགྱུར་ན། ས་བོན་ལ་སོགས་པ་རྣམས་ལ་གོ་རིམས་ངེས་པ་མཐོང་བ་ཡང་ཡིན་ནོ། །དེའི་ཕྱིར་ནུས་པ་ཐ་དད་པའི་ཕྱིར་གང་ཞིག་སྐྱེ་བ་གང་ལ་རག་ལས་པ་ཁོ་ན་དེའི་མཇུག་ཐོགས་སུ་སྐྱེའི་གཞན་ནི་མ་ཡིན་ནོ། །མཇུག་ཐོགས་ཀྱི་ཤེས་པ་ཡོད་ཀྱང་རུང་སྟེ། རྟེན་གྱི་དངོས་པོར་ཁྱད་པར་མེད་པའི་ཕྱིར་རོ། །དཔེར་ན་མིག་སྐྱེས་པ་ན་མིག་གི་རྣམ་པར་ཤེས་པའི་རྟེན་གྱི་དངོས་པོར་གནས་པ་བཞིན་ཏེ། གལ་ཏེ་རྒྱུ་གཞན་མཚང་བས་མིག་གི་རྣམ་པར་ཤེས་པ་མི་སྐྱེ་ན་དེར་མིག་གིས་ཅི་ཉེས། རྒྱུ་མ་ཚང་བ་ནི་དགྲ་བཅོམ་པ་ལ་ཡང་སྲིད་ཀྱི་ལས་དང་ཉོན་མོངས་པ་མེད་པའོ། །བྱེད་པས་རབ་ཏུ་ཕྱེ་བ་ཞེས་བྱ་བ་ནི་འབྲས་བུ་བསྐྱེད་པས་རབ་ཏུ་ཕྱེ་བ་སྟེ། ཡིད་ལྟར་གནས་པ་ཙམ་གྱིས་རབ་ཏུ་ཕྱེ་བ་ནི་མ་ཡིན་ནོ། །དེ་ཉིད་བསྒྲུབ་པར་བྱ་བའི་ཕྱིར་མཚུངས་པ་དེ་མ་
ཐག་པ་དེ་སྐྱེ་བ་ལ་མངོན་དུ་ཕྱོགས་པའི་ཆོས་གང་འབྲས་བུར་གཟུང་བ་དེ་ནི་ཐམས་ཅད་ཞེས་རྒྱས་པར་སྨོས་སོ། །དགྲ་བཅོམ་པའི་སེམས་དང་སེམས་ལས་བྱུང་བ་ཐ་མ་དག་གིས་ནི་འབྲས་བུ་གཟུང་བ་མ་ཡིན་ཏེ། དེའི་ཕྱིར་དེ་དག་སྐྱེས་བུའི་བྱེད་པ་མེད་པ་ཡིན་པའི་ཕྱིར་མཚུངས་པ་དེ་མ་ཐག་པའི་རྐྱེན་མ་ཡིན་ནོ། །གང་དག་ལ་སེམས་མཚུངས་པ་དེ་མ་ཐག་པའི་རྐྱེན་དུ་ཡོད་པ་དེ་དག་ནི་སེམས་ཀྱི་མཚུངས་པ་དེ་མ་ཐག་པ་ཅན་ནོ། །སྐད་ཅིག་གཞན་གྱིས་བར་མ་ཆོད་པའི་ཕྱིར་ནི། སེམས་ཀྱི་དེ་མ་ཐག་པ་ཅན་ནོ། །སེམས་མེད་པའི་སྙོམས་པར་འཇུག་པ་ལས་ཞེས་བྱ་བ་ནི་འགོག་པ་དང་འདུ་ཤེས་མེད་པའི་སྙོམས་པར་འཇུག་པ་ལས་སོ། །ལྡང་བའི་སེམས་ཞེས་བྱ་བ་ལ། དེའི་མཚུངས་པ་དེ་མ་ཐག་པའི་རྐྱེན་སྙོམས་པར་འཇུག་པའི་སེམས་ཡིན་པས་སེམས་ཀྱི་མཚུངས་པ་དེ་མ་ཐག་པ་ཅན་ཡིན་གྱི། སེམས་ཀྱི་དེ་མ་ཐག་པ་ཅན་ནི་མ་ཡིན་ཏེ། སྙོམས་པར་འཇུག་པའི་སྐད་ཅིག་མ་རྣམས་ཀྱི་ས་བར་དུ་གཅད་པའི་ཕྱིར་རོ། །སྙོམས་འཇུག་པའི་སྐད་ཅིག་མ་གཉིས་པ་དག་ཀྱང་སྙོམས་པར་འཇུག་པའི་སྐད་ཅིག་མ་དང་པོས་ཆོད་པའི་ཕྱིར་སེམས་ཀྱི་དེ་མ་ཐག་པ་ཅན་མ་ཡིན་ལ། སེམས་ཀྱི་མཚུངས་པ་དེ་མ་ཐག་པ་ཅན་ནི་ཡིན་ཏེ། སྙོམས་པར་འཇུག་པའི་སེམས་ཀྱི་མཚུངས་པ་དེ་མ་ཐག་པའི་རྐྱེན་ཅན་ཡིན་པའི་ཕྱིར་རོ། །སྙོམས་པར་འཇུག་པའི་སྐད་ཅིག་མ་དང་པོ་ཞེས་བྱ་བ་རྒྱས་པར་འབྱུང་བ་ལ། སེམས་དེ་ནི་སྐྱེ་བ་ལ་སོགས་པ་དག་གི་མཚུངས་པ་དེ་མ་ཐག་པའི་རྐྱེན་མ་ཡིན་པས་དེ་དག་སེམས་ཀྱི་མཚུངས་པ་དེ་མ་ཐག་པ་ཅན་མ་ཡིན་ལ། སེམས་ཀྱི་དེ་མ་ཐག་པ་ཅན་ནི་ཡིན་ཏེ། སྐད་ཅིག་མ་གཞན་གྱིས་བར་མ་ཆོད་པའི་ཕྱིར་རོ། །སྙོམས་པར་འཇུག་པའི་སྐད་ཅིག་མ་དང་པོ་སྟེ། དེ་ནི་སེམས་ཀྱི་མཚུངས་པ་དེ་མ་ཐག་པ་ཅན་ཡང་ཡིན་ལ། སེམས་ཀྱི་དེ་མ་ཐག་པ་ཅན་ཡང་ཡིན་ནོ། །སེམས་དང་བཅས་པའི་གནས་སྐབས་དག་ཏུ་ནི་སྐད་ཅིག་མ་སྔ་མ་སྔ་མས་བར་མ་ཆོད་པའི་ཕྱིར་སེམས་ཀྱི་དེ་མ་ཐག་པ་ཅན་ཉིད་དོ། །སེམས་ཀྱི་མཚུངས་པ་དེ་མ་ཐག་པའི་རྐྱེན་མེད་པའི་ཕྱིར། སེམས་ཀྱི་ནི་དེ་མ་ཐག་པ་ཉིད་དོ། །
གཉིས་པ་ལ་སོགས་པ་ཞེས་བྱ་བ་རྒྱས་པར་འབྱུང་བ་ལ། འདི་དག་གི་སྐྱེ་བ་ལ་སོགས་པ་དག་ནི། སེམས་ཀྱི་མཚུངས་པ་དེ་མ་ཐག་པ་ཅན་གྱི་རང་བཞིན་མ་ཡིན་པའི་ཕྱིར། སེམས་ཀྱི་མཚུངས་པ་དེ་མ་ཐག་པ་ཅན་ཡིན་ལ། སྐད་ཅིག་མ་གཞན་གྱིས་ཆོད་པའི་ཕྱིར་སེམས་ཀྱི་དེ་མ་ཐག་པ་ཅན་མ་ཡིན་ནོ། །གསུམ་པ་དང་བཞི་པ་གང་དག་ཡིན་པ་དེ་དག་ནི་དང་པོ་དང་གཉིས་པ་ཡིན་པ་དག་གོ །དང་པོ་དང་གཉིས་པ་གང་དག་ཡིན་པ་དེ་དག་ནི་གསུམ་པ་དང་བཞི་པ་དག་ཡིན་པར་བཤད་དོ་ཞེས་བྱ་བ་ལ། སྙོམས་པར་འཇུག་པའི་སྐད་ཅིག་མ་དང་པོ་དང༌། སེམས་དང་བཅས་པའི་གནས་སྐབས་དེ་ནི་དེར་མུ་གསུམ་པ་ཡིན་ལ་འདིར་ནི་དང་པོ་སྟེ། མཚུངས་པ་དེ་མ་ཐག་པའི་རྐྱེན་གྱིས་བསྐྱེད་པའི་ཕྱིར་སེམས་ཀྱི་མཚུངས་པ་ན་དེ་མ་ཐག་པ་ཅན་ཡིན་ལ་སྙོམས་པར་འཇུག་པའི་དེ་མ་ཐག་པ་ཅན་ནི་མ་ཡིན་ཏེ། དེའི་མཚུངས་པ་དེ་མ་ཐག་པའི་རྐྱེན་སྙོམས་པར་འཇུག་པའི་སྐད་ཅིག་ལས་གཞན་ཡིན་པའི་ཕྱིར་རོ། །སྙོམས་པར་འཇུག་པའི་སྐད་ཅིག་མ་གཉིས་པ་ལ་སོགས་པ་དང༌། ལྡང་བའི་སེམས་ཀྱི་སྐྱེ་བ་ལ་སོགས་པ་ནི་དེར་མུ་བཞི་པ་ཡིན་ལ་འདིར་ནི་གཉིས་པ་སྟེ། སྙོམས་པར་འཇུག་པ་དང་ཆོད་པ་མེད་པའི་ཕྱིར། སྙོམས་པར་འཇུག་པའི་དེ་མ་ཐག་པ་ཅན་ཡིན་ལ། སེམས་ཀྱི་མཚུངས་པ་དེ་མ་ཐག་པ་ཅན་མ་ཡིན་ནོ། །སྙོམས་པར་འཇུག་པའི་སེམས་ནི་དེ་དག་གི་མཚུངས་པ་དེ་མ་ཐག་པའི་རྐྱེན་མ་ཡིན་ཏེ། སེམས་ཀྱི་མཚུངས་པ་དེ་མ་ཐག་པ་ཅན་གྱི་རང་བཞིན་མ་ཡིན་པའི་ཕྱིར་རོ། །སེམས་མེད་པའི་སྙོམས་པར་འཇུག་པ་ལས་ལྡང་བའི་སེམས་དང༌། སྙོམས་པར་འཇུག་པའི་སྐད་ཅིག་མ་གཉིས་པ་ལ་སོགས་པ་དག་ནི་དེར་མུ་དང་པོ་ཡིན་ལ་འདིར་ནི་མུ་གསུམ་པ་སྟེ། སེམས་ཀྱི་མཚུངས་པ་དེ་མ་ཐག་པ་ཅན་དང༌། སྙོམས་པར་འཇུག་པ་དེ་མ་ཐག་པ་ཅན་ཡིན་ནོ། །སྙོམས་པར་འཇུག་པའི་སྐད་ཅིག་མ་དང་པོ་དང༌། སེམས་དང་བཅས་པའི་གནས་སྐབས་ཀྱི་སྐྱེ་བ་ལ་སོགས་པ་དེར་མུ་གཉིས་པ་ཡིན་ཏེ། ཆོས་དེ་དག་ནི་སེམས་ཀྱི་མཚུངས་པ་དེ་མ་ཐག་པ་ཅན་གྱི་རང་བཞིན་མ་ཡིན་པའི་ཕྱིར་དང༌། སྙོམས་པར་འཇུག་པའི་སྐད་ཅིག་མ་སྔ་མ་མེད་པའི་
ཕྱིར་སེམས་ཀྱི་མཚུངས་པ་དེ་མ་ཐག་པ་ཡང་མ་ཡིན་ལ། སྙོམས་པར་འཇུག་པའི་དེ་མ་ཐག་པ་ཅན་ཡང་མ་ཡིན་ནོ། །ད་ནི་ཇི་ལྟར་ལྡང་བའི་སེམས་ཡུན་རིང་མོ་ཞིག་ཏུ་ཆོད་པ་ཞེས་བྱ་བ་རྒྱས་པར་འབྱུང་སྟེ། དེའི་ཕྱིར་སེམས་གཞན་གྱིས་མ་ཆོད་པའི་ཕྱིར་རོ་ཞེས་བྱ་བ་སྨོས་སོ། །སེམས་ཀྱི་བར་གཅོད་པར་བྱེད་པ་ནི་སེམས་ཡིན་གྱི་ལྡན་པ་མ་ཡིན་པ་ནི་མ་ཡིན་ནོ་ཞེས་བཤད་པར་འགྱུར་རོ། །འདིར་ནི་མུ་གསུམ་པ་ཡིན་ནོ། །སྙོམས་པར་འཇུག་པའི་སྐད་ཅིག་མ་དང་པོ་དང༌། སེམས་དང་བཅས་པའི་གནས་སྐབས་ཀྱི་སྐྱེ་བ་ལ་སོགས་པ་ནི་དེར་མུ་གཅིག་པ་ཡིན་ལ་འདིར་ནི་བཞི་པའོ། །སེམས་གཞན་གྱིས་བར་མ་ཆོད་པའི་ཕྱིར་རོ་ཞེས་བྱ་བ་ནི། སེམས་ཀྱི་བར་དུ་གཅོད་པར་བྱེད་པ་ནི་སེམས་ཡིན་གྱི་ལྡན་པ་མ་ཡིན་པ་ནི་མ་ཡིན་ནོ་ཞེས་པའོ། །དེའི་ཕྱིར་ལྡང་བའི་སེམས་ནི་སྙོམས་པར་འཇུག་པའི་སེམས་ཀྱི་མཚུངས་པ་དེ་མ་ཐག་པར་བརྗོད་དོ། །འདིར་ནི་སྙོམས་པར་འཇུག་པའི་རྒྱུན་གྱི་ལྡང་བའི་སེམས་རྣམས་ཀྱང་བརྗོད་པར་བྱ་སྟེ་འབྲས་བུ་གཅིག་པའི་ཕྱིར་རོ། །རིམ་པས་སྐྱེ་བ་ལ་བྱས་པ་ཅི་ཞེ་ན། གང་ལ་གཞོལ་བའི་སྙོམས་པར་འཇུག་པའི་སེམས་དེ་སྔར་སྐྱེ་སྟེ། སྙོམས་པར་འཇུག་པའི་སེམས་ལ་གཞོལ་བ་དེ་ཡང་དེ་ཉིད་ཀྱི་མཚུངས་པ་དེ་མ་ཐག་ཏུ་སྐྱེའོ། །སྙོམས་པར་འཇུག་པ་དེ་ཡང་སྙོམས་པར་འཇུག་པའི་རྒྱུན་གྱི་རིམ་པ་ངེས་པ་ཅི་ཞིག་བྱས་ཤེ་ན། ངེས་པ་དེ་ལ་དགོས་པ་མེད་པའི་ཕྱིར་ཅིག་ཅར་མི་སྐྱེའོ། །སྙོམས་པར་འཇུག་པའི་སྐད་ཅིག་ཅིག་ཅར་སྐྱེས་པ་རྣམས་གང་གཅིག་གིས་མི་ནུས་པས་དེ་ལ་དགོས་པ་ཡོད་པ་མ་ཡིན་ནོ། །དེའི་ཕྱིར་སྔོན་གྱི་འདུ་བྱེད་ཀྱི་དབང་གིས་དུས་སྐལ་བ་རྣམས་སུ་ཡང་སྙོམས་པར་འཇུག་པའི་རྒྱུན་སྐྱེའོ། །སྙོམས་པར་འཇུག་པའི་སྐད་ཅིག་མ་དེ་ལྟ་བུ་རྣམས་ཀྱང་སྔ་མ་དང་ཕྱི་མའི་ངེས་པས་རྒྱུར་བརྗོད་པར་བྱའོ། །དམིགས་པ་ཆོས་རྣམས་ཐམས་ཅད་དོ། །ཞེས་བྱ་བ་ལ། སེམས་དང་སེམས་ལས་བྱུང་བའི་ཡུལ་ལས་གཞན་པའི་ཆོས་ནི་འགའ་ཡང་ཡོད་པ་མ་ཡིན་ནོ། །ཐམས་ཅད་དམིགས་པ་ཡིན་གྱི་ཐམས་ཅད་ནི་ཐམས་ཅད་ཀྱི་མ་ཡིན་ནོ་ཞེས་བསྟན་པའི་ཕྱིར་ཅི་རིགས་པར་ཞེས་བྱ་བ་སྨོས་སོ། །དེ་ཉིད་བསྟན་
པར་བྱ་བའི་ཕྱིར་མིག་གི་རྣམ་པར་ཤེས་པ་མཚུངས་པར་ལྡན་པ་དང་བཅས་པའི་ནི་གཟུགས་སོ་ཞེས་བྱ་བ་རྒྱས་པར་སྨོས་སོ། །དེ་ལྟ་བུའི་མཚན་ཉིད་ཡིན་པའི་ཕྱིར་ཞེས་བྱ་བ་ནི་དེ་ནི་ཡུལ་གྱི་མཚན་ཉིད་ཡིན་པའི་ཕྱིར་ཞེས་བྱ་བའི་དོན་ཏོ། །སྐྱེ་མཆེད་དང་རྫས་དང། སྐད་ཅིག་ངེས་པས་ཞེས་བྱ་བ་འབྱུང་སྟེ། དེ་ལ་སྐྱེ་མཆེད་ངེས་པ་ནི་མིག་གི་རྣམ་པར་ཤེས་པ་མཚུངས་པར་ལྡན་པ་དང་བཅས་པའི་དམིགས་པ་ནི་གཟུགས་ཀྱི་སྐྱེ་མཆེད་ཡིན་ལ། གཞན་མ་ཡིན་པའོ། །རྫས་ངེས་པ་ནི་གཟུགས་སྔོན་པོ་འཛིན་པར་བྱེད་པའི་དམིགས་པ་ནི་དེ་ཁོ་ན་ཡིན་ལ། སེར་པོ་ལ་སོགས་པ་མ་ཡིན་ནོ། །སྐད་ཅིག་མ་ངེས་པ་ནི་སྐད་ཅིག་མ་གང་ཞིག་གང་གི་དམིགས་པ་ཡིན་པ་དེ་ཁོ་ན་དེའི་དམིགས་པ་ཡིན་ལ། གཞན་མ་ཡིན་པའོ། །བདག་ཉིད་ཇི་ལྟ་བར་ཞེས་བྱ་བ་ལ་གང་གི་དམིགས་པ་གང་ཡིན་པ་ཞེས་བྱ་བའི་ཐ་ཚིག་གོ །རྣ་བ་ལ་སོགས་པའི་རྣམ་པར་ཤེས་པ་ཡང་སྒྲ་ལ་སོགས་པ་དག་ལ་དེ་དང་འདྲ་བར་སྦྱར་རོ། །སྨྲས་པ་དེ་བཞིན་ཏེ་ཞེས་བྱ་བ་འདི་ནི་དེ་ལྟར་ཡིན་ནོ་ཞེས་བྱ་བ་སྟེ། མིག་གི་རྣམ་པར་ཤེས་པ་ནི་མིག་གི་རྟེན་ཅན་ཁོ་ན་ཡིན་གྱི་གཞན་གྱི་རྟེན་ཅན་མ་ཡིན་ནོ། །འདིའི་རྫས་སུ་ངེས་པ་ཡང་སྐྱེ་མཆེད་ངེས་པ་ལྟར་ཁོང་དུ་ཆུད་པར་བྱའོ། །དེ་བཞིན་དུ་རྣ་བ་ལ་སོགས་པའི་རྣམ་པར་ཤེས་པ་ལ་ཡང་བརྗོད་པར་བྱའོ། །སྐྱེས་པ་རྣམས་ནི་རྟེན་དང་ལྷན་ཅིག་ངེས་པ་དག་ཡིན་ཏེ། དེ་སྐྱེ་བ་རྟེན་མེད་ན་མི་འབྱུང་བའི་ཕྱིར་རོ། །འདས་པ་རྣམས་ཀྱང་རྟེན་དང་ལྷན་ཅིག་པ་དག་ཡིན་ནོ་ཞེས་བྱ་བ་ནི་རྟེན་གང་དག་དང་ལྷན་ཅིག་སྐྱེས་ནས་འགགས་པ་རྣམས་ཏེ། གཞན་དུ་འདས་པའི་མིག་བརྟེན་པ་དང་བཅས་པར་བཞག་ཏུ་མེད་དོ། །སློབ་དཔོན་འདུས་བཟང་ན་རེ། དཔེ་སྟོན་པ་རྣམས་ཀྱི་དམིགས་པའི་རྐྱེན་གང་ཡིན་པ་ནི་དེའི་དམིགས་པ་མ་ཡིན་ལ། དམིགས་པ་གང་ཡིན་པ་ཡང་དམིགས་པའི་རྐྱེན་མ་ཡིན་ཏེ། གང་གི་ཕྱིར་གཟུགས་སྔར་སྐྱེས་པ་རྣམས་མིག་གི་རྣམ་པར་ཤེས་པ་སྐྱེད་པ་ལ་རྐྱེན་ནོ་ཞེས་ཟེར་རོ། །དེ་ཡང་གཟུགས་ཡོད་པའི་དུས་སུ་རྣམ་པར་ཤེས་པའི་ཕྱིར་དེ་དམིགས་པ་མ་ཡིན་ལ། ཇི་ལྟར་རྣམ་པར་ཤེས་པ་གང་ཡིན་པ་དེ་གཟུགས་རྣམས་མ་བསྡུས་པས་
མིག་གི་རྣམ་པར་ཤེས་པའི་དམིགས་པ་ཡོད་པ་མ་ཡིན་པར་ཐལ་བར་འགྱུར་རོ། །མ་ཡིན་ཏེ་མིག་གི་རྣམ་པར་ཤེས་པ་དང་མཉམ་པའི་ཡུལ་ད་ལྟར་བ་ཡུལ་ཡིན་པའི་ཕྱིར་ད་ལྟར་བ་མེད་པར་མི་རུང་ངོ༌། །གང་འདས་པ་དང་མ་འོངས་པའི་འདུས་བྱས་ལ་དམིགས་པ་དེའི་ཕྱིར་རྣམ་པར་ཤེས་པ་དེའི་དམིགས་པའི་རྐྱེན་འདས་པ་མེད་པར་ཁས་བླངས་པ་མེད་པའི་ཕྱིར་མེད་པ་མ་ཡིན་ཏེ་རྐྱེན་དུ་འགྱུར་བར་འོས་སོ་ཞེས་ཟེར་རོ། །དཔེ་སྟོན་པ་རྣམས་ན་རེ། ཆོས་མངོན་པ་བ་རྣམས་ཀྱི་དམིགས་པ་ནི་དམིགས་པའི་རྐྱེན་མ་ཡིན་ཏེ། རྣམ་པར་ཤེས་པའི་བདག་ཉིད་དུ་ཡོད་པ་ཉིད་ལས་ཐ་དད་པ་མ་ཡིན་པས་བྱ་བ་གཞན་གསུམ་ལ་བྱེད་པ་མེད་དེ་ད་ལྟར་བའི་དམིགས་པ་ལ་བྱ་བ་མེད་དོ། །གང་འདི་སྐྱེ་མཆེད་ཀྱི་རྫས་ཀྱི་མཚན་ཉིད་ངེས་པས་དམིགས་པ་ངེས་པར་འདོད་ན་དེར་མི་འགྱུར་ཏེ། དམིགས་པའི་རྒྱུ་མེད་པའི་ཕྱིར་རོ། །དམིགས་པའི་རྐྱེན་མ་ཡིན་པའི་ཚེ་རྣམ་པར་ཤེས་པ་གྲུབ་པའི་ཕྱིར་དམིགས་པའི་རྐྱེན་ད་ལྟར་བས་བྱ་བ་ཅུང་ཟད་ཀྱང་ཡོད་པ་མ་ཡིན་ནོ། །བྱ་བ་མེད་ན་ཇི་ལྟར་རྐྱེན་དུ་འགྱུར་ཞེས་ཟེར་རོ། །ཡང་འདི་ལ་སངས་རྒྱས་བཅོམ་ལྡན་འདས་རྣམས་ཀྱི་དེ་ཁོ་ན་ཉིད་མཁྱེན་པ་ཅི་ཞེ་ན། རྣམ་པར་དཔྱད་པ་འདི་ལ་ནི་བརྗོད་པར་བྱ་བ་མང་དུ་འབྱུང་བས་ཞར་ལས་བྱུང་བས་ཆོག་གོ །བྱེད་རྒྱུ་ཞེས་བྱ་བ་བདག་པོར་བཤད་ཅེས་བྱ་བ་ལ། འདིས་ནི་བདག་ཉིད་མ་གཏོགས་པའི་ཆོས་ཐམས་ཅད་ནི་བདག་པོའི་རྐྱེན་ཡིན་ནོ་ཞེས་བསྟན་པར་འགྱུར་རོ། །རྐྱེན་འདི་ནི་རྒྱུ་དང་མཚུངས་པ་དེ་མ་ཐག་པ་དང༌། དམིགས་པའི་རྐྱེན་དག་པས་ལྷག་པ་ཡིན་པས་ན་བདག་པོའི་རྐྱེན་ནོ། །འདི་ཇི་ལྟར་ལྷག་ཅེ་ན། རང་གི་ངོ་བོ་མ་གཏོགས་པའི་ཆོས་ཐམས་ཅད་བདག་པོའི་རྐྱེན་ཡིན་པ་དེ་ལྟར་རྒྱུ་དང་མཚུངས་པ་དེ་མ་ཐག་པ་དང་དམིགས་པའི་རྐྱེན་དག་ནི་མ་ཡིན་ནོ། །ཆོས་ཐམས་ཅད་ཡིན་ལ་ཞེས་བྱ་བ་ལ། ཡིད་ཀྱི་རྣམ་པར་ཤེས་པའི་དམིགས་པ་ནི་ཆོས་ཐམས་ཅད་ཡིན་ནོ་ཞེས་བྱ་བ་འབྱུང་བ་ལས། དམིགས་པའི་རྐྱེན་ཡང་ཆོས་ཐམས་ཅད་ཡིན་ཏེ། དེའི་ཕྱིར་གང་གིས་འདི་ཁོ་ན་ལྷག་པར་བརྗོད་པ་འདི་ལ་དམིགས་པའི་རྐྱེན་ལས་ཕུལ་དུ་བྱུང་བ་ཅི་ཡོད་ཅེ་ན། ཕུལ་དུ་བྱུང་བ་ཡོད་དེ། སེམས་དང་སེམས་ལས་བྱུང་བ་དག་གི་
ལྷན་ཅིག་འབྱུང་བའི་ཆོས་རྣམས་ནི་ནམ་ཡང་དམིགས་པ་མ་ཡིན་གྱི། བདག་པོའི་རྐྱེན་ནི་ཡིན་པས་ཆོས་ཐམས་ཅད་བདག་པོའི་རྐྱེན་བཞིན་དུ་དམིགས་པའི་རྐྱེན་མ་ཡིན་ནོ། །གཞན་དག་ན་རེ་ཆོས་གང་ཞིག་ཆོས་གང་གི་དམིགས་པ་དང་དམིགས་པར་བྱ་བ་མ་ཡིན་ཡང་དེ་དེའི་དམིགས་པ་སྟེ་ཡུལ་གྱི་ངོ་བོས་གནས་པའི་ཕྱིར་རོ། །དེ་ལྟར་ན་ཆོས་ཐམས་ཅད་དམིགས་པའི་རྐྱེན་ནོ་ཞེས་ཟེར་རོ། །དེ་ལྟ་ན་བདག་པོ་མི་རུང་བས་དེ་ནི་དེ་ལྟ་མ་ཡིན་ཏེ། སྐྱེ་བ་ལ་གེགས་མེད་པའི་ངོ་བོས་གནས་པ་ཡིན་པའི་ཕྱིར་ཐམས་ཅད་བདག་པོའི་རྐྱེན་ནོ། །གཞན་དག་ན་རེ། ཐམས་ཅད་ནི་དེ་ལྟ་མ་ཡིན་ཏེ་སྐྱེ་མཆེད་ཀྱི་དམིགས་པ་རྫས་སོ་སོར་ངེས་པའི་ཕྱིར་རོ། །སྐྱེ་བཞིན་པའི་བདག་པོའི་རྐྱེན་ལ། གཞན་གྱི་བདག་པོ་ཁོ་ན་ཡིན་གྱི་རྐྱེན་མ་ཡིན་ནོ། །དེ་བཞིན་དུ་དམིགས་བཞིན་པ་ཁོ་ན་དམིགས་པའི་རྐྱེན་ཡིན་ལ། དམིགས་བཞིན་པ་མ་ཡིན་པ་དམིགས་པ་ཁོ་ན་ཡིན་ཏེ། དེ་བཞིན་དུ་ལྷན་ཅིག་འབྱུང་བ་དང་མི་དམིགས་པ་ལས་དམིགས་པའི་རྐྱེན་མ་ཡིན་ནོ། །རྐྱེན་འདི་ནི་ལྷག་པ་ཡིན་པས་བདག་པོའི་རྐྱེན་ནོ། །གཞན་དག་ན་རེ། ཇི་ལྟར་རྐྱེན་གྱི་ངོ་བོ་རྣམ་པ་ཐམས་ཅད་པ་དུ་མས་དེ་ལྟར་གསུམ་རྣམས་ལ་ཞེས་བྱ་བྱ་བ་དེ་དག་ལ་རྐྱེན་གྱི་ངོ་བོ་ལྷག་པས་ཡིན་ཏེ་རྫས་ཀྱི་མ་ཡིན་ནོ་ཞེས་ཟེར་རོ། །ལྷག་པའི་ཞེས་བྱ་བ་ལ་སོགས་པ་ལ། ཐམས་ཅད་ཐམས་ཅད་ཀྱི་དམིགས་པ་ནི་མ་ཡིན་གྱི། དམིགས་པའི་རྐྱེན་ནི་སེམས་དང་སེམས་ལས་བྱུང་བ་ཐམས་ཅད་ཀྱི་ཡིན་གྱི་རང་གི་ངོ་བོའི་རང་གི་ངོ་བོ་ལྟ་བུའོ་ཞེས་བྱ་བ་ལ། རྐྱེན་གྱི་མཚན་ཉིད་ཇི་སྐད་བཤད་པ་མི་སྲིད་པའི་ཕྱིར་རོ། །འདུས་མ་བྱས་ཀྱི་འདུས་བྱས་ལྟ་བུ་དང་ཞེས་བྱ་བ་ལ་བསྐྱེད་པར་བྱ་བ་མ་ཡིན་པའི་ཕྱིར་རོ། །དེ་ལ་རྒྱུ་དང་བདག་པོའི་རྐྱེན་དག་ནི་རྒྱུ་བསྡུས་པར་བཤད་ཟིན་པས། མཚུངས་པ་དེ་མ་ཐག་པ་དང་དམིགས་པའི་རྐྱེན་དག་བརྗོད་པར་བྱའོ། །ཁ་ཅིག་ནི་སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུའི་ཕྱོགས་གཅིག་མཚུངས་པ་དེ་མ་ཐག་པའི་རྐྱེན་ནོ་ཞེས་ཟེར་རོ། །སྐྱེས་པའི་གནས་སྐབས་ཀྱི་ཁྱད་པར་ལས་འདི་མེད་པ་ནི་འབྲས་བུ་ཐ་དད་པའི་ཕྱིར་རོ། །གལ་ཏེ་ཡང་རྒྱུ་ཐམས་ཅད་
སྐྱེས་བུ་བྱེད་པའི་འབྲས་བུ་དང་ཐུན་མོང་བ་དེ་ལྟ་ན་ཡང་དེ་དག་རྒྱུ་མཐུན་པའི་འབྲས་བུ་ཁོ་ན་ཡིན་པར་མི་བརྗོད་དེ། དགེ་བ་དང་མི་དགེ་བ་དང་ཟག་པ་དང་བཅས་པ་དང་ཟག་པ་མེད་པ་དང་ཁམས་ལ་སོགས་པ་ཐ་དད་པས་འདྲ་བ་དང་མི་འདྲ་བའི་མཚུངས་པ་དེ་མ་ཐག་པའི་རྐྱེན་ནི་སྐྱེས་བུ་བྱེད་པའི་འབྲས་བུའོ། །སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུ་དག་ནི་སྐལ་བ་མཉམ་པ་ཁོ་ན་ཡིན་པས་དེ་ལ་ཐུན་མོང་པ་མེད་དོ། །དེ་ལྟ་ན་འོ་ན་སྐྱེས་པ་མཚུངས་པར་ལྡན་པའི་རྒྱུ་དང་ལྷན་ཅིག་འབྱུང་བའི་རྒྱུ་སེམས་དང་སེམས་ལས་བྱུང་བའི་རང་བཞིན་མཚུངས་པ་དེ་མ་ཐག་པའི་རྐྱེན་སྐྱེས་བུ་བྱེད་པའི་འབྲས་བུ་དང་ཁྱད་པར་མེད་པའི་ཕྱིར་རོ། །དེ་ནི་དེ་ལྟ་མ་ཡིན་ཏེ་མཚུངས་པར་ལྡན་པ་དང༌། ལྷན་ཅིག་འབྱུང་བའི་རྒྱུ་དག་དང་མཚུངས་པ་དེ་མ་ཐག་པའི་རྐྱེན་ནི་སྐྱེས་བུ་བྱེད་པའི་འབྲས་བུ་དང་ལྷན་ཅིག་སྐྱེས་པ་མཚན་ཉིད་མི་མཐུན་པའི་ཕྱིར་རོ། །གང་གི་ཕྱིར་སྐྱེས་བུ་བྱེད་པའི་འབྲས་བུ་ནི་བྱ་བ་ལ་ལྟོས་པ་ཁོ་ན་ཡིན་པས་དེ་དག་སེམས་དང་སེམས་ལས་བྱུང་བ་རྣམས་དང་ལྷན་ཅིག་མཚུངས་པར་ལྡན་པའི་རྒྱུ་རྣམས་དམིགས་སོ། །མཚུངས་པ་དེ་མ་ཐག་པར་སྐྱེས་པ་འབྲས་བུ་ལ་ལྟོས་པ་ནི། མཚུངས་པ་དེ་མ་ཐག་པའི་རྐྱེན་ཅེས་བྱ་སྟེ། ཇི་ལྟར་ལྷན་ཅིག་སྐྱེས་པ་ལ་འབྲས་བུའི་ཁྱད་པར་འགའ་ཡང་མེད་པས་གང་དང་མཚུངས་པར་ལྡན་པ་དང་ལྷན་ཅིག་འབྱུང་བའི་རྒྱུ་དག་རྫས་སཾ་བྷེ་དེ་སྱ་སཾ་བྷེ་དཿ་དེ་བཞིན་དུ་རྒྱུ་དག་གི་མཚུངས་པ་དེ་མ་ཐག་པའི་རྐྱེན་གྱི་ཡང་ཞེས་བྱ་བ་ལ། ཇི་ལྟར་དམིགས་པའི་རྐྱེན་གྱི་རྣམ་པ་གང་ཡིན་པ་དེ་བྱེད་རྒྱུའི་རྒྱུ་ཞེས་ཁ་ཅིག་གོ །རྫས་དང་འབྲས་བུ་ཐུན་མོང་བ་ལས་འབྲས་བུ་ཐུན་མོང་བ་མེད་དེ། དམིགས་པའི་རྐྱེན་ནི་སྐྱེས་བུ་ཡིན་པའི་འབྲས་བུ་ཡིན་པའི་ཕྱིར་རོ། །འགའ་ཞིག་ཏུ་བྱེད་རྒྱུའི་རྒྱུ་ཡང་སྐྱེས་བུ་བྱེད་པའི་འབྲས་བུར་ཡོད་པ་མ་ཡིན་ནམ་ཞེ་ན། ཡོད་མོད་ཀྱི་དེ་ནི་བདག་པོའི་འབྲས་བུ་ཁོ་ན་མ་ཡིན་བསམ་གཏོགས་པ་སྟེ་སྐྱེས་བུ་བྱེད་པའི་འདྲས་བུ་ནི་མ་ཡིན་ནོ། །དེའི་ཕྱིར་མཚུངས་པ་དེ་མ་ཐག་པ་དང་དམིགས་པའི་རྐྱེན་རྒྱུར་བསྡུས་པ་མཐོང་ངོ༌། །རྒྱུ་གཉིས་པོ་དག་འགག་པ་ལ། བྱ་བ་བྱེད་དོ་ཞེས་བྱ་བ་ལ། འགག་པ་ཁོ་ན་ལ་བྱ་བ་
བྱེད་དོ་ཞེས་བྱ་བ་ངེས་པར་གཟུང་ངོ༌། །སྐྱེ་བའི་དབང་དུ་བྱས་ནས་ཡིན་གྱི། འགག་པའི་དབང་དུ་བྱས་ནས་ནི་མ་ཡིན་ཏེ། བྱེད་པའི་དུས་ཁོ་ནར་འབྲས་བུ་འབྱུང་བའི་ཕྱིར་རོ། །བྱ་བ་ནི་རྣམ་པ་གསུམ་སྟེ། འབྲས་བུ་འཛིན་པ་དང༌། འབྲས་བུ་འབྱིན་པ་དང༌། ཡུལ་ཉེ་བར་ལོངས་སྤྱོད་པའོ། །དེ་གཉིས་ནི་ལྷན་ཅིག་འབྱུང་བའི་འབྲས་བུ་ལ་བྱ་བ་བྱེད་དོ་ཞེས་བྱ་བ་ལ། ཇི་ལྟར་དེ་གཉིས་དེ་ལ་བྱ་བ་བྱེད་ཅེ་ན། ཕན་ཚུན་འབྲས་བུ་འཛིན་པ་དང༌། འབྱིན་པར་ནུས་པ་ཉིད་ཀྱིས་ཏེ། ཕན་ཚུན་བྲལ་བས་ཡུལ་འཛིན་པར་མི་འཐད་པའི་ཕྱིར་རོ། །གསུམ་པོ་ནི་སྐྱེ་བ་ལའོ་ཞེས་བྱ་བ་ལ། སྐྱེ་བ་ཁོ་ན་ལའོ་ཞེས་བྱ་བར་ངེས་པར་གཟུང་ངོ༌། །གང་གི་ཕྱིར་རྣམ་པར་སྨིན་པ་དང་རྒྱུ་མཐུན་པའི་འབྲས་བུ་དག་འཕངས་པའི་དབང་གིས་སྐྱེ་བ་དེའི་ཕྱིར་སྐལ་བ་མཉམ་པའི་རྒྱུ་ལ་སོགས་པ་འདི་དག་གིས་ནི་སྐྱེ་བཞིན་པ་ལ་བྱ་བ་བྱེད་དོ། །རེ་ཤིག་སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུ་གཉིས་པོ་ནི་མཇུག་ཐོགས་སུ་རྒྱུ་མཐུན་པའི་འབྲས་བུ་ཡོད་པས་འབྲས་བུ་སྐྱེ་བཞིན་པ་ལ་བྱ་བ་བྱེད་པར་འགྱུར་ན་རྣམ་པར་སྨིན་པའི་རྒྱུ་ལས་ནི་མཇུག་ཐོགས་སུ་རྣམ་པར་སྨིན་པའི་འབྲས་བུ་མེད་ཅིང༌། འདས་པའི་བྱེད་པ་མེད་པས་སྐྱེ་བཞིན་པ་ལ་ཇི་ལྟར་བྱ་བ་བྱེད་པར་རུང་ཞེ་ན། འདིར་བྱ་བའི་སྒྲས་ནི་ནུས་པ་བརྗོད་དེ། རྒྱུ་བསྐལ་པ་དུ་མས་ཆོད་པར་འགགས་ཀྱང་དེའི་མཐུ་ཁོ་ནས་ཐུན་མོང་གི་རྒྱུ་ཉིད་ཀྱི་ཕྱིར་སྐྱེ་བ་དང༌། འཇིག་པའི་བྱེད་པ་མེད་ཀྱང་འབྲས་བུ་འབྱིན་པར་ནུས་པ་ལ་བྱ་བའི་སྒྲས་འདོགས་སོ། །མཚུངས་པ་དེ་མ་ཐག་པའི་རྐྱེན་ནི་སྐྱེ་བ་ལ་བྱ་བ་བྱེད་དེ་དྲངས་ཏེ་སྐབས་འབྱེད་པའི་ཕྱིར་རོ། །དམིགས་པའི་རྐྱེན་ནི་འགག་པ་ལ་བྱ་བ་བྱེད་དེ། ད་ལྟར་གྱི་སེམས་དང༌། སེམས་ལས་བྱུང་བ་རྣམས་ཀྱི་ཡུལ་ད་ལྟར་བ་འཛིན་པའི་ཕྱིར་རོ། །བདག་པོའི་རྐྱེན་ནི་ཞེས་བྱ་བ་ལ་འདིའི་བྱ་བ་ནི་མི་སྒྲིབ་པའི་ངོ་བོ་ཉིད་དུ་གནས་པ་ཡིན་ཏེ། དེ་ནི་སྐྱེ་བ་དང། འགག་པ་ལ་ཁྱད་པར་མེད་པས་དེ་ནི་གནས་སྐབས་ཐམས་ཅད་དུ་བྱ་བ་བྱེད་པར་བརྗོད་དོ། །གལ་ཏེ་མཚུངས་པར་ལྡན་པ་དང༌། ལྷན་ཅིག་འབྱུང་བའི་རྒྱུ་དག་ལས་དམིགས་པའི་རྐྱེན་སྐྱེ་བ་བྱ་བའི་དངོས་པོར་རྟོགས་ན། འོ་ན་དེ་དག་གི་རྒྱུ་དང་རྐྱེན་ཅི་ཡིན་པ་བརྗོད་པར་བྱ་དགོས་
སོ་ཞེ་ན། རྒྱུ་ལས་རྒྱུ་ཉིད་དང༌། རྐྱེན་ལས་རྐྱེན་ཉིད་དུ་བྱེད་པ་མ་ཡིན་ནོ། །གཞན་དུན་མ་འོངས་པའི་རྒྱུ་དང་རྐྱེན་ཉིད་འདོད་པར་མི་འགྱུར་རོ། །འོ་ན་དངོས་པོ་སྐྱེ་བའི་རྒྱུ་རྣམས་ཀྱི་དགོས་པ་ཇི་ལྟར་ཞེ་ན། རྒྱུ་མེད་པར་དངོས་པོ་སྐྱེ་བར་མི་འགྱུར་རོ་སྙམ་དུ་བསམས་པའོ། །བཞི་ཡིས་སེམས་དང་སེམས་བྱུང་རྣམས། །ཞེས་བྱ་བ་ལ་ནི་ཞེས་བྱ་བའི་སྒྲ་ནི་སེམས་དང་སེམས་ལས་བྱུང་བ་རྣམས་ནི་བཞི་ཁོ་ནས་ཡིན་ནོ་ཞེས་ངེས་པར་གཟུང་བར་བྱ་བའི་དོན་ཏོ། །གཞན་དག་ན་རེ་ནི། ནི་ཞེས་བྱ་བའི་སྒྲ་ནི་རྒྱུ་བསྟན་པའི་དོན་དུ་སྟེ། གང་གི་ཕྱིར་སེམས་དང་སེམས་ལས་བྱུང་བ་ཡིན་པ་དེའི་ཕྱིར་བཞི་དག་གིས་ཡིན་ཏེ། དམིགས་པའི་རྐྱེན་ནི་གཞན་ལ་བྱ་བ་མི་བྱེད་དོ་ཞེས་ཟེར་རོ། །དེ་ལ་འདི་དག་གི་རྒྱུའི་རྐྱེན་ནི་ཞེས་བྱ་བ་རྒྱས་པར་འབྱུང་སྟེ། རྒྱུ་ལྔ་པོ་ཐམས་ཅད་ནི་ཐམས་ཅད་ཀྱི་རྒྱུའི་རྐྱེན་མ་ཡིན་ཏེ། འོ་ན་ཅི་ཞེ་ན། ཅི་རིགས་པ་ཡིན་ནོ། །གང་ཞིག་གང་དག་གི་རྒྱུའི་རྐྱེན་ཡིན་པ་དེ་ནི་སྔར། ཉོན་མོངས་ཅན་དང་རྣམ་སྨིན་སྐྱེ། །ལྷག་དང་ཞེས་བྱ་བ་རྒྱས་པར་བཤད་ཟིན་ཏོ། །སྔ་མ་ཞེས་བྱ་བ་ནི་ཕྱིས་སྐྱེ་བ་བསལ་བར་བྱ་བའི་ཕྱིར་རོ། །དེ་ལྟ་ན་གཞན་དག་གིས་བར་དུ་ཆོད་པ་ཡང་ཡིན་པར་ཐལ་ལོ་ཞེ་ན། གཞན་གྱིས་བར་དུ་མ་ཆོད་པ་རྣམས་སོ་ཞེས་བྱ་བ་སྨོས་ཏེ། སེམས་དང་སེམས་ལས་བྱུང་བ་དག་གིས་ཤེས་པར་སྦྱར་རོ། །དེ་དག་གི་མཚུངས་པ་དེ་མ་ཐག་པའི་རྐྱེན་ནི་རང་གི་རིགས་ལྔར་སྐྱེས་པས་སྐབས་ཕྱེ་བ་ལ་རག་ལས་ཏེ། སྐྱེས་པའི་སྔ་མ་ཡིན་ཞིང་དེ་དག་ལ་གཞན་དག་གིས་བར་དུ་མ་ཆོད་པ་ཡིན་ནོ། །ཅི་རིགས་པར་ཡུལ་ལྔ་པོ་དག་དང་ཞེས་བྱ་བ་ལ། མིག་ལ་སོགས་པའི་རྣམ་པར་ཤེས་པ་མཚུངས་པར་ལྡན་པ་དང་བཅས་པ་རྣམས་ཀྱི་དམིགས་པའི་རྐྱེན་ནི་གོ་རིམས་བཞིན་དུ་གཟུགས་ལ་སོགས་པ་ཡུལ་ལྔ་པོ་དག་ཡིན་ནོ། །ཡིད་ཀྱི་རྣམ་པར་ཤེས་པ་མཚུངས་པར་ལྡན་པ་དང་བཅས་པའི་ནི་ཆོས་ཐམས་ཅད་དོ། །བདག་པོའི་རྐྱེན་ནི་བྱེད་རྒྱུའི་རྒྱུ་ཁོ་ན་ཡིན་པས་རང་གི་ངོ་བོ་མ་གཏོགས་པའི་ཐམས་ཅད་དོ་ཞེས་བྱ་བ་སྨོས་སོ། །ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་གི་དམིགས་པའི་རྐྱེན་ནི་སྐྱེ་བཞིན་པ་ལ་བྱ་བ་མེད་པའི་ཕྱིར་བརྗོད་པར་མི་བྱའོ། །རྐྱེན་
བཞི་རྣམས་ཀྱིས་སྐྱེ་བར་བྱེད་དེ་རྒྱུའི་རྐྱེན་ནི་རྒྱུ་ལྔ་པོ་རྣམས་ཀྱིའོ། །དེ་དང་བྲལ་ན་དེ་དག་སྐྱེ་བ་དང་དེ་དག་སྐྱེ་བའི་བྱ་བ་དང་སྐྱེ་བཞིན་པ་ཡང་ཡོད་པ་མ་ཡིན་ཏེ། དེའི་རྒྱུ་ཅན་ལ་དེ་དམིགས་པའི་ཕྱིར་རོ། །གང་ཞིག་གང་གི་དམིགས་པའི་རྒྱུ་ཡིན་པ་དེ་ནི་ནམ་དུ་ཡང་དེའི་དམིགས་པའི་རྒྱུ་མ་ཡིན་པ་མ་ཡིན་ནོ། །གསུམ་གྱིས་སྙོམས་པར་འཇུག་པ་གཉིས་ཞེས་བྱ་བ་ལ། གསུམ་ཁོ་ནས་ཞེས་བྱ་བར་ངེས་པར་གཟུང་ངོ༌། །དམིགས་པའི་རྐྱེན་མེད་པ་ལ་རྒྱུ་སྨྲས་པ་ནི་དེ་དག་ནི་དམིགས་པར་བྱེད་པ་མ་ཡིན་ནོ་ཞེས་བྱ་བའོ། །རྒྱུའི་རྐྱེན་ནི་རྣམ་པ་ལྔ་བཤད་ན་འདི་གཉིས་ནི་རྣམ་པར་སྨིན་པ་དང༌། ཀུན་འགྲོ་བ་དང་མཚུངས་པར་ལྡན་པའི་རྒྱུ་ནི་མི་སྲིད་པར་བསྟན་པའི་ཕྱིར། དེ་གཉིས་ཀྱི་རྒྱུའི་རྐྱེན་ནི་རྣམ་པ་གཉིས་ཏེ་ཞེས་བྱ་བ་སྨོས་སོ། །ས་མཚུངས་པའི་ཞེས་བྱ་བ་འབྱུང་སྟེ། དེ་ལ་འགོག་པའི་སྙོམས་པར་འཇུག་པའི་ས་དང་མཚུངས་པ་ནི་སྲིད་པའི་རྩེ་མོའི་དགེ་བའི་ཕུང་པོ་བཞིའོ། །འདུ་ཤེས་མེད་པའི་སྙོམས་པར་འཇུག་པའི་ནི་བསམ་གཏན་བཞི་པའི་དགེ་བའི་ཕུང་པོ་ལྔའོ། །སེམས་ཀྱི་མངོན་པར་འདུ་བྱེད་པ་ལས་སྐྱེ་བའི་ཕྱིར་ཞེས་བྱ་བ་ལ། སེམས་ཀྱི་མངོན་པར་འདུ་བྱེད་པ་ནི་རྩོལ་བའོ། །གཞན་དག་ན་རེ། གང་གི་ཕྱིར་འདི་ནི་སེམས་ཀྱི་སྟོབས་ཀྱིས་དྲངས་ཏེ། སེམས་བཞིན་དུ་སེམས་འགོག་པ་ལ་རག་ལས་ཏེ་སྐྱེ་ལ། གཟུགས་བཞིན་དུ་སེམས་མེད་པ་དང་ལྷན་ཅིག་འཇུག་པ་མ་ཡིན་ནོ། །ན་ཙཱ་ན་ཡ་དབྱཱ་ཀུ་ལཿ་སཾ་མུ་ཁཱི་བྷཱ་ཝ་པྲཱ་པྟ་དཱི་བ་ནཱ་ནྱ་བ་རི་བཱ་རོ་ཛཱ་ཏྱཱ་དི་པ་དཱ་དིཿ་སེམས་སྐྱེ་བ་ལ་གེགས་བྱེད་པའི་ཕྱིར་མཚུངས་པ་དེ་མ་ཐག་པའི་རྐྱེན་ནི་མ་ཡིན་ནོ་ཞེས་བྱ་བ་ལ། འདི་ལྟར་རྣལ་འབྱོར་པ་སེམས་དང་སེམས་ལས་བྱུང་བ་རྒྱུ་བ་ལ་སྡང་བ་རྣམས་སེམས་མེད་པའི་སྙོམས་པར་འཇུག་པ་ལ་སྙོམས་མ་ཡིན། འདི་དག །འཁྲུག་པ། མངོན་དུ་གྱུར། ཐོབ་པ་བཞིན། གཞན་མ་ཡིན། འཁོར། སྐྱེ་བ་སོགས་བཞིན། དུས་དང་པོ། པར་འཇུག་ན། གལ་ཏེ་སེམས་དང་སེམས་ལས་བྱུང་བ་འདྲེན་པར་བྱེད་པ་ཡིན་ན་ནི། རྣལ་འབྱོར་པ་རྣམས་དེ་ལ་འདོད་པ་སྐྱེ་བར་མི་འགྱུར་ཏེ། སེམས་དང་སེམས་ལས་བྱུང་བ་རྒྱུ་བ་ངེས་པར་འབྱིན་པ་ཡང་ཡིན་ལ། དེ་འདྲེན་པར་བྱེད་པ་ཡང་ཡིན་ནོ་ཞེས་བྱ་བ་འདི་ནི་འགལ་བ་ཡིན་ནོ། །འདུ་ཤེས་མེད་པ་
པ་ཡང་སེམས་ཀྱི་མཚུངས་པ་དེ་མ་ཐག་པ་ཅན་ཡིན་པའི་ཕྱིར། གསུམ་གྱིས་ཡིན་པར་རིགས་པ་མ་ཡིན་ནམ་ཞེ་ན། འདིར་བརྗོད་པར་བྱ་བ་ཡིན་མོད་ཀྱི། དེ་སེམས་ཀྱི་འདུ་བྱེད་ལས་སྐྱེས་པ་མ་ཡིན་པས། དེ་མཚུངས་པ་དེ་མ་ཐག་པ་ཞེས་མི་བརྗོད་དེ། འདི་ནི་མདོ་ཕྱི་མར་བསྡུ་བར་ཤེས་པར་བྱའོ། །གཞན་ནི་གཉིས་པོ་དག་ལས་སྐྱེ་ཞེས་བྱ་བ་ལ། གཉིས་པོ་དག་ཁོ་ན་ལས་སྐྱེའོ་ཞེས་ངེས་པར་གཟུང་བ་ལས་དམིགས་པར་བྱེད་པ་མ་ཡིན་པའི་ཕྱིར་དམིགས་པའི་རྐྱེན་ལས་མ་ཡིན་ལ། སེམས་དང་སེམས་ལས་བྱུང་བ་དང༌། སེམས་མེད་པའི་སྙོམས་པར་འཇུག་པ་དང་མཚན་ཉིད་མི་མཐུན་པའི་ཕྱིར་མཚུངས་པ་དེ་མ་ཐག་པའི་རྐྱེན་ལས་མ་ཡིན་ནོ། །དེ་ལ་རྒྱུའི་རྐྱེན་ནི་ཀུན་ཏུ་འགྲོ་བ་དང༌། མཚུངས་པར་ལྡན་པའི་རྒྱུ་མ་གཏོགས་པ་གོང་དུ་བཤད་པའི་རྗེས་སུ་འབྲངས་ཏེ་ཅི་རིགས་པར་བརྗོད་པར་བྱའོ། །དངོས་པོ་རྣམས་ཇི་སྐད་བཤད་པའི་རྒྱུ་དང་རྐྱེན་རྣམས་ཁོ་ན་ལས་སྐྱེའི་ཞེས་བྱ་བ་རྒྱས་པར་འབྱུང་སྟེ། འདི་ལྟར་རང་གི་ལུགས་སྨྲས་པ་ཙམ་གྱིས་འདོད་པ་གྲུབ་པའམ་མི་འདོད་པ་དགག་པར་ནི་མི་རུང་སྟེ། དེའི་ཕྱིར་དངོས་པོ་རྣམས་ཇི་སྐད་བཤད་པའི་རྒྱུ་དང་རྐྱེན་ཁོ་ན་ལས་སྐྱེའི། འགྲོ་བ་ཐམས་ཅད་ཀྱི་རྒྱུ་གཅིག་པུ་དབང་ཕྱུག་ལ་སོགས་པ་ནི་མེད་དོ་ཞེས་བྱ་བ་འདི་ལ་གཏན་ཚིགས་བརྗོད་པར་བྱའོ། །འགྲོ་བའི་རྒྱུ་གང་ལ་དབང་ཕྱུག་དང་སྐྱེས་བུ་དང་གཙོ་བོ་རྣམས་དང་པོར་ཡོད་པ་དེ་ནི་དེ་ཞེས་བྱའོ། །སོགས་པ་ཞེས་བྱ་བའི་སྒྲས་ནི་དུས་དང༌། ངོ་བོ་ཉིད་དང༌། རྡུལ་ཕྲ་རབ་ལ་སོགས་པ་དག་གཟུང་ངོ༌། །གལ་ཏེ་གཏན་ཚིགས་ཀྱིས་བྱས་པ་གྲུབ་པར་སེམས་ན་ནི་ཕྱོགས་དང་པོ་དང་འགལ་བར་སྟོན་ཏོ། །དངོས་པོ་རྣམས་ཇི་སྐད་བཤད་པའི་རྒྱུ་དང་རྐྱེན་རྣམས་ཁོ་ན་ལས་སྐྱེའི་འགྲོ་བ་ཐམས་ཅད་ཀྱི་རྒྱུ་གཅིག་པུ་དབང་ཕྱུག་ལ་སོགས་པ་ནི་མེད་དོ་ཞེས་བྱ་བར་གྲུབ་པར་བྱ་བའི་ཕྱིར་དབང་ཕྱུག་ལ་སོགས་པ་ལས་གཞན་པའི་རྒྱུ་ཚོལ་བའི་ཕྱིར་རོ། །དེ་ཉིད་ཀྱི་ཕྱིར་ཞེས་བྱ་བ་ནི་དབང་ཕྱུག་ལ་སོགས་པ་གཞན་པའི་རྒྱུ་ཁས་བླངས་པས་སོ། །གལ་ཏེ་ཤེས་པར་བྱེད་པ་ཡིན་པའི་ཕྱིར་ཉེས་པ་མེད་དོ་ཞེ་ན། གལ་ཏེ་དབང་ཕྱུག་ཡིན་ན་ཤེས་བྱེད་མ་ཡིན་ལ། དེ་ལྟ་ན་གྲུབ་པའི་
བྱེད་པ་པོ་མ་ཡིན་པས་ཉེས་པ་དེ་ཉིད་དུ་འགྱུར་རོ། །དབང་ཕྱུག་སོགས་མིན་རིམ་སོགས་ཕྱིར། །ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་ཡུལ་དང་དུས་དང་དངོས་པོ་ངེས་པ་རྣམས་བསྡུའོ། །དངོས་པོ་སྐྱེ་བའི་རིམ་པ་ནི་རྒྱུ་ཡོངས་སུ་འགྱུར་བ་ལ་བལྟོས་པ་འམ། ལྷན་ཅིག་བྱེད་པའི་རྐྱེན་ལ་བལྟོས་པ་ཡིན་གྲང༌། དེ་ལ་རྟག་པའི་ཕྱིར་དབང་ཕྱུག་ལ་ཡོངས་སུ་འགྱུར་བ་མེད་དོ། །དེའི་ཕྱིར་ཡོངས་སུ་འགྱུར་བ་ལ་བལྟོས་ཏེ། རིམ་པ་མི་རུང་སྟེ་ཐམས་ཅད་ཀྱི་དབང་ཕྱུག་ཁོ་ན་ཡིན་པས་ལྷན་ཅིག་བྱེད་པའི་རྐྱེན་མེད་པའི་ཕྱིར། ལྷན་ཅིག་བྱེད་པའི་རྒྱུའི་མཚན་ཉིད་ཅན་ཡང་མེད་པ་ཉིད་དེ་དེས་ན་འགྲོ་བ་ཐམས་ཅད་ཅིག་ཅར་འབྱུང་བར་འགྱུར་ཏེ། དེ་དག་གི་རྒྱུ་ལ་ཁྱད་པར་མེད་པའི་ཕྱིར་རོ། །ཕྱིའི་མྱུ་གུ་ལ་སོགས་པ་དང༌། ནང་གི་ནུར་ནུར་པོ་ལ་སོགས་པ་རྣམས་རིམ་གྱིས་འབྱུང་བར་ཡང་སྣང་ངོ༌། །གང་ཞིག་སྔར་ལྷན་ཅིག་བྱེད་པའི་རྒྱུ་ལ་མི་བལྟོས་པ་དེ་ཕྱིས་ཀྱང་དེའི་རྒྱུ་མ་ཡིན་ཏེ་ཁྱད་པར་མེད་པའི་ཕྱིར་དེའི་ངོ་བོ་བཞིན་ནོ། །དབང་ཕྱུག་ལ་སོགས་པ་འགྲོ་བའི་རྒྱུ་མ་ཡིན་ཏེ། འབྲས་བུའི་རིམ་པ་རྒྱུ་ཚོགས་པའི་རིམ་པ་སྟེ། ཡོད་ན་ཡོད་པའི་ཕྱིར་དང༌། དེ་མེད་ན་མེད་པའི་ཕྱིར་རོ། །དེ་བཞིན་དུ་ཡུལ་དང་དུས་དང་རང་བཞིན་སོ་སོར་ངེས་པ་ཡིན་པར་ཡང་མི་འགྱུར་ཏེ། དེ་དག་རྒྱུ་མ་ཡིན་པའི་ཕྱིར་དེ་ལས་གཞན་པའི་ཡུལ་ལ་སོགས་པ་བཞིན་ནོ། །དེ་ནི་འདི་ནི་ད་ལྟར་སྐྱེ་བར་གྱུར་ཅིག་ཅེས་བྱ་བ་ལ། དབང་ཕྱུག་རྒྱུ་ཉིད་ཡིན་ཡང་འདོད་པའི་དབང་གིས་དངོས་པོ་རྣམས་ཀྱི་རིམ་པ་ལ་སོགས་པ་མི་འགལ་ལོ་ཞེ་ན། འོ་ན་འདོད་པ་ཐ་དད་པའི་ཕྱིར་ཞེས་བྱ་བ་འབྱུང་སྟེ། འདོད་པ་རྣམས་ནི་དབང་ཕྱུག་དང་ཕན་ཚུན་ལས་ཐ་དད་པ་ཡིན་ཏེ། དེའི་ཕྱིར་དེ་དག་དངོས་པོ་རྣམས་རིམ་གྱིས་སྐྱེ་བ་དང༌། ཡུལ་དང་དུས་དང༌། དངོས་པོ་ངེས་པའི་རྒྱུ་ཡིན་པས་རྒྱུ་དུ་མར་གྲུབ་པོ། །དེའི་ཕྱིར་ཕྱོགས་དང་པོ་དང་འགལ་བ་དེ་ཉིད་དུ་འགྱུར་རོ། །འདོད་པ་ཐ་དད་པ་དེ་ཡང་ཞེས་བྱ་བ་ལ། འདོད་པ་རྣམས་ཀྱི་རྒྱུ་ཡང་དབང་ཕྱུག་ཁོ་ན་ཡིན་ཏེ། དེའི་ཕྱིར་དངོས་པོའི་ཁྱད་པར་ལྷག་མ་འབའ་ཞིག་ཏུ་མ་ཟད་ཀྱི་འདོད་པ་ཐ་དད་པ་ཡང་ཅིག་ཅར་འབྱུང་བར་འགྱུར་རོ། །ཅིའི་ཕྱིར་
ཞེ་ན། འདོད་པའི་རྒྱུ་དབང་ཕྱུག་དེ་ཐ་མི་དད་པའི་ཕྱིར་རོ། །འདོད་པ་རྣམས་ཅིག་ཅར་འབྱུང་ན་ཡང་འགྲོ་བ་ཐམས་ཅད་ཅིག་ཅར་འབྱུང་བར་འགྱུར་ཏེ་ཐམས་ཅད་ཀྱི་རྒྱུ་ཡིན་པའི་ཕྱིར་རོ། །རྒྱུ་གཞན་ཐ་དད་པ་ལ་བལྟོས་ན་ནི་ཞེས་བྱ་བ་ལ། འདོད་པ་དེ་རྣམས་སོ་སོ་སོ་སོར་རྒྱུ་གཞན་ལ་བལྟོས་ཏེ་དབང་ཕྱུག་ལས་སྐྱེ་ལ། རྒྱུ་གཞན་པ་དེ་དག་ཀྱང་དབང་ཕྱུག་ལྟར་རྟག་པ་མ་ཡིན་པ་དེའི་ཕྱིར་དེ་རྣམས་རིམ་གྱིས་འབྱུང་བ་མི་འགལ་ལོ་ཞེ་ན། དེ་ལྟ་ན་ཡང་དབང་ཕྱུག་ཁོ་ན་རྒྱུ་མ་ཡིན་པས་སླར་ཡང་ཕྱོགས་དང་པོ་དང་འགལ་ལོ། །དེ་རྣམས་ཀྱང་འདུན་པའི་རྒྱུ་གཞན་ཉིད་དེ། དེ་དག་གི་ཡང་དེའི་རྒྱུ་དབང་ཕྱུག་ལ་ཐ་དད་མེད་པའི་ཕྱིར་ཅིག་ཅར་སྐྱེ་བར་འགྱུར་རོ། །དེའི་ཕྱིར་འདོད་པ་ཡིན་ན་འགྲོ་བ་རྣམས་ཅིག་ཅར་སྐྱེ་བར་འགྱུར་རོ་ཞེས་སོ། །དེ་དག་ཀྱང་རིམ་གྱིས་སྐྱེ་བ་ལ་ནང་དང་ཕྱིའི་དངོས་པོའམ། འདོད་པ་དང་འདྲ་བར་རྒྱུ་གཞན་གྱི་བྱེ་བྲག་ལ་བལྟོས་པར་འགྱུར་ལ། །དེ་ལྟ་ཡིན་ན་ཡང་ཐུག་པ་མེད་པར་ཐལ་བར་འགྱུར་ཏེ། འདིར་འདོད་པའི་རྒྱུ་དབང་ཕྱུག་ལས་གཞན་མ་ཁས་བླངས་པས་ཤཱཀྱའི་སྲས་པོའི་ལུགས་ཁས་བླངས་པར་འགྱུར་རོ་ཞེས་སྟོན་པར་བྱེད་དོ། །གལ་ཏེ་དབང་ཕྱུག་གི་འདོད་པ་རྣམས་ཅིག་ཅར་ཡིན་དུ་ཟིན་ཀྱང་ཞེས་བྱ་བ་རྒྱས་པར་འབྱུང་སྟེ། དབང་ཕྱུག་གི་རྒྱུ་ཅན་ཉིད་ཡིན་ཡང་རིམ་པ་ལ་སོགས་པ་རྣམས་མི་འགལ་ལོ་སྙམ་དུ་བསམས་པའོ། །འདོད་པ་ཇི་ལྟ་བར་སྐྱེ་བའི་ཕྱིར་རོ་ཞེས་བྱ་བ་ནི་རིམ་གྱིས་སྐྱེ་བ་ལ་རྒྱུ་སྨྲས་པའོ། །འདོད་པ་ཇི་ལྟ་བར་སྐྱེ་བ་དེ་ནི་ཡོད་པ་མ་ཡིན་ཏེ། འདོད་པ་དེ་དག་ལ་ཕྱིས་ཁྱད་པར་མེད་པའི་ཕྱིར་རོ། །རྒྱུ་ཡོད་བཞིན་དུ་ལྷན་ཅིག་བྱེད་པའི་རྒྱུ་མེད་པ་འམ། འགལ་བའི་རྒྱུ་ཡོད་པ་ལས་འབྲས་བུ་མི་སྐྱེ་བར་འགྱུར་ན་འདོད་པ་རྣམས་ལ་ནི་ལྷན་ཅིག་བྱེད་པའི་རྒྱུ་ཅིག་ཅར་ཡོད་པ། ཐམས་ཅད་ཀྱི་དབང་ཕྱུག་ཡིན་ཞིང་ཐམས་ཅད་ལ་འགལ་བའི་རྒྱུ་ཡང་མེད་དོ། །འདོད་པ་དག་ལ་བདག་ཉིད་ཀྱི་ཁྱད་པར་སྔ་ན་མེད་པར་འགའ་ཞིག་ཡོད་པ་ཡང་མ་ཡིན་ཏེ་དེ་རྒྱུ་གཞན་ལ་བལྟོས་པའི་ཕྱིར་ལ་རྒྱུ་གཞན་ཡང་མེད་པའི་ཕྱིར་རོ། །དེའི་ཕྱིར་འདོད་པ་ཇི་ལྟ་བར་སྐྱེ་བ་མ་ཡིན་ཏེ། འོན་ཅི་ཞེ་ན་ཐམས་ཅད་ཅིག་ཅར་སྐྱེ་བ་ཁོ་ནར་འགྱུར་རོ། །དབང་ཕྱུག་གིས་འབྱིན་པའི་ཚོགས་འདི་སྙེད་ལ་དགོས་
པ་ཅུང་ཟད་ཅིག་ཡོད་པ་ཡང་མ་ཡིན་ནོ། །དེས་ན་རྟོག་པ་འདི་ནི་ལོག་པ་ཡིན་ནོ། །གལ་ཏེ་དགའ་བ་ཡིན་ནོ་ཞེ་ན་དགའ་བ་ཉིད་བྱེད་ལ་རག་མོད། ཡང་ན་དེ་ལ་དབང་ཕྱུག་མ་ཡིན་པར་འགྱུར་ཏེ་དེའི་ཐབས་མེད་པར་མི་བྱེད་པའི་ཕྱིར་རོ། །གཞན་ཡང་དེ་ཁོ་ན་དང་འདྲའོ་ཞེས་བྱ་བ་ལ། ཇི་ལྟར་དགའ་བ་ལ་དབང་ཕྱུག་མ་ཡིན་པ་དེ་བཞིན་དུ་ཁམས་གསུམ་ལ་ཡང་མ་ཡིན་ཏེ། ཐོགས་པ་མེད་པའི་མཚན་ཉིད་ཅན་གྱི་དབང་ཕྱུག་མ་ཡིན་པའི་ཕྱིར་རོ། །ཇི་ལྟར་ཐབས་མེད་པར་དགའ་བ་སྐྱེད་པར་མི་ནུས་པ་དེ་བཞིན་དུ་ཐབས་ཀྱང་ཐབས་གཞན་མེད་པར་མི་སྐྱེད་པས་ཐམས་ཅད་ལ་འདིའི་དབང་ཕྱུག་རྡུགས་པར་འགྱུར་རོ། །ཡང་ན་ཐབས་བཞིན་དུ་དགའ་བ་ཡང་ཐབས་ལ་མི་བལྟོས་པ་ཁོ་ནར་བྱེད་པར་འགྱུར་རོ། །གནོད་པ་མང་པོ་དང་ཞེས་བྱ་བ་འབྱུང་བ་སྟེ། གནོད་པ་ནི་ཆར་དང༌། རླུང་དང་གནམ་ལྕགས་དང༌། རིམས་དང༌། འཁྲུ་ནད་ལ་སོགས་པ་ཉེ་བར་འཚེ་བ་རྣམས་སོ། །དེ་ལས་བརྩམས་ཞེས་བྱ་བ་ནི། དྲང་སྲོང་རྒྱས་པས་དྲག་པོ་བརྒྱ་པ་ལས་སྨོས་པའོ། །གང་ཕྱིར་མ་ལུས་བསྲེག་པ་དང༌། །ཞེས་བྱ་བ་ལ། གང་ཕྱིར་མ་ལུས་པ་བསྲེག་པ་དེའི་ཕྱིར་བསྲེག་པ་དྲག་པོ་ཞེས་བྱའོ། །དེ་བཞིན་དུ་གཞན་ལ་ཡང་བརྗོད་པར་བྱའོ། །སྐྱེས་བུའི་བྱེད་པ་མངོན་སུམ་དུ་ཞེས་བྱ་བ་ནི་མྱུ་གུ་ལ་སོགས་པ་དག་ལ་ས་བོན་ལ་སོགས་པ་རྣམས་ཀྱིའོ། །རྒྱུ་རྣམས་ལས་གཞན་གྱི་བྱེད་པ་མི་སྣང་བའི་ཕྱིར་རོ་ཞེས་བྱ་བ་ལ། འདི་ལྟར་མིག་དང༌། གཟུགས་དང༌། སྣང་བ་དང༌། ཡིད་ལ་བྱེད་པ་རྣམས་ལས་མིག་གི་རྣམ་པར་ཤེས་པ་སྐྱེ་བ་ལ་དེ་རྣམས་ལས་གཞན་བའི་བྱེད་པ་མི་སྣང་ངོ༌། །ཇི་ལྟར་མིག་ལ་སོགས་པ་ཡོད་ན་རེས་འགའ་མིག་གི་རྣམ་པར་ཤེས་པ་སྐྱེ་ལ། རེས་འགའ་མི་སྐྱེ་བ་དེ་བཞིན་དུ། གལ་ཏེ་དབང་ཕྱུག་ཡོད་ན་ཡང་ཡིན་ན་ནི། དེ་ལྟ་ན་གཞན་གྱི་བྱེད་པ་རྟོགས་པར་འགྱུར་བ་ཞིག་གོ །དབང་ཕྱུག་དེ་ལྷན་ཅིག་བྱེད་པའི་རྒྱུ་དང་པོ་རྣམས་ལ་ཡང་ཞེས་བྱ་བ་རྒྱས་པར་འབྱུང་བ་ལ་དེ་དག་ནི་རང་གི་མཐུས་འབྲས་བུ་སྐྱེད་པར་བྱེད་པས་འདི་དག་ལ་དེ་དབང་ཕྱུག་ཉིད་མ་ཡིན་པར་འགྱུར་རོ། །དེ་ལ་དང་པོ་དབང་ཕྱུག་གི་རྒྱུ་ལས་བྱུང་བ་ཡིན་ནོ་ཞེས་བྱ་བ་ལ། དེ་ལྟར་ན་སྐྱེས་བུ་བྱེད་པ་མངོན་སུམ་ལ་བསྙོན་
པ་མ་བྱས་པ་དང་རྒྱུ་ལས་གཞན་གྱི་བྱེད་པ་མི་སྣང་བར་འགྱུར་བས་དབང་ཕྱུག་འཇིག་རྟེན་རྣམས་ཀྱི་རྒྱུ་ཉིད་ཡིན་ཡང་འགལ་བ་མེད་དོ། །དང་པོ་བྱུང་བ་དེ་ཡང་དབང་ཕྱུག་བཞིན་དུ་ཐོག་མ་མེད་པ་ཉིད་དུ་ཐལ་བར་འགྱུར་ཏེ། དབང་ཕྱུག་ནི་དང་པོ་འབྱུང་བར་བསྐྱེད་པར་བྱ་བ་ལ་རྒྱུ་གཞན་ལ་མི་བལྟོས་པའི་ཕྱིར་དང་པོ་བྱུང་བ་ཡང་རྒྱུ་དེ་ལས་བྱུང་བ་མ་ཡིན་ནོ། །དེ་བཞིན་དུ་གནོད་པ་ལ་ཡང་ཅི་རིགས་པར་བརྗོད་པར་བྱའོ་ཞེས་བྱ་བ་ལ། གཙོ་བོ་ནི་སེམས་པ་མེད་པ་ཡིན་པས་འདོད་པའི་རྟོགས་པ་མ་གཏོགས་པ་གཞན་ཐམས་ཅད་བརྗོད་པར་བྱའོ། །བློ་མ་སྦྱངས་པ་ནི་བསྟན་བཅོས་གཞན་ལ་བློ་མ་སྦྱངས་པའོ། །ཐམས་ཅད་ཕྱི་ལས་ནི་མ་ཡིན་ཏེ། སྐྱེས་བུའི་རྩལ་ཁོ་ན་ལས་ཡིན་ནོ་ཞེས་བསྟན་པའི་ཕྱིར་རང་རང་གི་རྣམ་པར་སྨིན་པའི་འབྲས་བུ་དང་ཞེས་བྱ་བ་རྒྱས་པར་སྨོས་སོ། །གཞན་ནི་གཉིས་པོ་དག་ལས་སྐྱེ་ཞེས་བྱ་བ་དེར་ཆོས་གཟུགས་ཅན་རྣམས་རྒྱུ་དང་བདག་པོའི་རྐྱེན་གཉིས་ལས་སྐྱེའོ་ཞེས་བཤད་པ། དེ་ལ་གཟུགས་ནི་འབྱུང་བ་དང་འབྱུང་བ་ལས་གྱུར་པ་ཡིན་པའི་ཕྱིར་འབྱུང་བ་རྣམས་དང་འབྱུང་བ་ལས་གྱུར་པའི་རྒྱུའི་རྐྱེན་ཇི་ལྟར་ཡིན་པ་དང༌། འབྱུང་བ་ལས་གྱུར་པ་འབྱུང་བ་ལས་གྱུར་པ་དང༌། འབྱུང་བ་རྣམས་ཀྱི་རྒྱུའི་རྐྱེན་ཇི་ལྟར་ཡིན་པ་འདི་བརྗོད་པར་བྱའོ། །རང་གི་ངོ་བོ་མ་གཏོགས་པའི་ཆོས་ཐམས་ཅད་དོ་ཞེས་བདག་པོའི་རྐྱེན་ནི་ཤེས་པ་ཡིན་གྱི། རྒྱུའི་རྐྱེན་ནི་རྣམ་པ་མང་པོའི་ཕྱིར་མི་ཤེས་པ་དེའི་ཕྱིར་ན། དེའི་དབང་དུ་བྱས་ནས་ཇི་ལྟར་ན་འབྱུང་བ་རྣམས་ཞེས་རྒྱས་པར་བྲིས་སོ། །སྐལ་བ་མཉམ་པ་དང་ལྷན་ཅིག་འབྱུང་བའི་རྒྱུ་དག་གིས་སོ་ཞེས་བྱ་བ་ལ། འབྱུང་བ་སྔར་སྐྱེས་པ་རྣམས་ཀྱི་སྐལ་བ་མཉམ་པའི་རྒྱུའོ། །རང་གི་ངོ་བོ་ཐ་དད་ཀྱང་བྱ་བ་གཅིག་ལ་ཞུགས་པའི་ཕན་ཚུན་མཐུན་པ་ཉིད་སྐལ་བ་མཉམ་པ་ཉིད་དོ། །ལྷན་ཅིག་འབྱུང་བའི་རྒྱུ་ནི་ལྷན་ཅིག་སྐྱེས་པ་རྣམས་ཕན་ཚུན་ཏེ། ཐམས་ཅད་ཕན་ཚུན་མེད་པར་མི་སྐྱེ་བའི་ཕྱིར་ལྷན་ཅིག་འབྱུང་བའི་རྒྱུ་ཉིད་ཡིན་ནོ། །འབྱུང་བའི་རྗེས་སུ་མཐུན་པར་བྱེད་པའི་ཕྱིར་ཏེ་ཞེས་བྱ་བ་ལ། འབྱུང་བ་རྣམ་པར་འགྱུར་ན་འབྱུང་བ་ལས་གྱུར་པ་རྣམ་པར་འགྱུར་བས་འབྱུང་བ་ལས་གྱུར་པ་འབྱུང་བའི་རྗེས་སུ་མཐུན་པར་བྱེད་དོ། །འབྱུང་བ་དང་འབྱུང་བ་ལས་གྱུར་པ་དུས་
མཉམ་དུ་སྐྱེས་པ་དག་ལས་གང་ཡང་རུང་བ་ཞིག་ཇི་ལྟར་རྗེས་སུ་མཐུན་པར་བྱེད་ཅེ་ན། མྱུ་གུ་དང་གྲིབ་མ་བཞིན་ནམ། མར་མེ་དང་སྣང་བ་བཞིན་ནོ། །དེ་ལྟར་ན་དེ་དག་ནི་ཞེས་བྱ་བརྒྱས་པར་འབྱུང་བ་ལ། འབྱུང་བ་དག་ལས་སྐྱེས་པའི་ཕྱིར་སྐྱེ་བའི་རྒྱུ་ཉིད་དོ། །རྟེན་དུ་འགྱུར་བའི་ཕྱིར་རྟེན་པའི་རྒྱུ་ཉིད་དོ། །རྗེས་སུ་མཐུན་པར་བྱེད་པའི་ཕྱིར་འགྱུར་བའི་རྒྱུ་ཉིད་དོ། །རྒྱུན་མི་འཆད་པའི་རྒྱུ་ཡིན་པའི་ཕྱིར་གནས་པའི་རྒྱུ་ཉིད་དོ། །འཕེལ་བར་བྱེད་པའི་རྒྱུ་ཡིན་པའི་ཕྱིར་འཕེལ་བའི་རྒྱུ་ཉིད་དོ། །རྣམ་པ་ལྔ་པོ་དེ་ཡང་བྱེད་རྒྱུའི་རྒྱུ་ཁོ་ན་ཡིན་ཏེ། རྒྱུ་གཞན་མི་འཐད་པའི་ཕྱིར་རོ། །འབྱུང་བ་རྣམས་འབྱུང་བ་ལས་གྱུར་པའི་ལྷན་ཅིག་འབྱུང་བའི་རྒྱུ་ནི་མ་ཡིན་ནོ། །འབྲས་བུ་ཐ་དད་པའི་ཕྱིར་རོ། །འབྱུང་བའི་རྣམ་པ་འདྲ་བས་སེམས་ཀྱི་ཉེ་བའི་མཚན་ཉིད་ལྟར་མ་ཡིན་ནོ། །གལ་ཏེ་འབྲས་བུ་གཅིག་པ་ཉིད་མ་ཡིན་ཡང་ཕན་ཚུན་འབྲས་བུ་ཉིད་ཀྱིས་ལྷན་ཅིག་འབྱུང་བའི་རྒྱུ་ཉིད་དོ་ཞེ་ན། དེ་ནི་དེ་ལྟ་མ་ཡིན་ཏེ། གལ་ཏེ་འབྱུང་བའི་རྣམ་པ་ལ་སོགས་པ་རྣམས་འབྱུང་བ་དང་འདྲ་བ་མ་ཡིན་ཞིང༌། འབྱུང་བ་ལས་གྱུར་པ་འབྲས་བུ་མ་ཡིན་པ་དེ་ལྟ་ན་ཡང་དེ་དག་གི་ཡོད་པ་ནི་དེ་ལས་ཐ་དད་པའི་འབྲས་བུ་གཅིག་པ་གཞན་ཏེ། འབྱུང་བ་ལས་གྱུར་པ་དག་གི་འབྲས་བུ་གཅིག་པ་ཅུང་ཟད་ཀྱང་ཡོད་པ་མ་ཡིན་ནོ། །འབྲས་བུ་ཐ་དད་པ་ཡིན་ཡང་ཕན་ཚུན་འབྲས་བུ་ཡིན་པའི་ཕྱིར་འབྱུང་བ་དང་འབྱུང་བ་ལས་གྱུར་པ་དག་དེ་ལྟ་མ་ཡིན་ནོ་ཞེས་བྱ་བ་འདི་མི་མཚུངས་སོ་ཞེ་ན། ཕན་ཚུན་འབྲས་བུ་ཡིན་པ་དེ་ལྟ་ན་ཡང་སེམས་ཀྱི་ཉེ་བའི་མཚན་ཉིད་མ་ཡིན་པ་རྣམས་འབྱུང་བའི་རྒྱུ་ཉིད་དུ་མི་འགལ་ལོ། །ཉེ་བའི་མཚན་ཉིད་མ་ཡིན་པ་ཕན་ཚུན་འབྲས་བུ་དང་ལྷན་ཅིག་སེམས་ཕན་ཚུན་འབྲས་བུ་ཡིན་པའི་ཕྱིར་དང༌། ཉེ་བའི་མཚན་ཉིད་མ་ཡིན་པ་དང་ལྷན་ཅིག་འབྲས་བུ་གཅིག་པའི་ཕྱིར་རོ། །འབྱུང་བ་དང་འབྱུང་བ་ལས་གྱུར་པ་དག་གཅིག་ནི་མ་ཡིན་ཞེས་བྱ་བ་ནི། འབྱུང་བ་རྣམས་འབྱུང་བ་ལས་གྱུར་པའི་ལྷན་ཅིག་འབྱུང་བའི་རྒྱུ་མ་ཡིན་པའོ། །གཞན་ཡང་འབྱུང་བ་ལས་གྱུར་པ་ནི་དགེ་བ་དང་མི་དགེ་བ་ཡིན་ལ། འབྱུང་བ་རྣམས་ནི་ལུང་དུ་མ་བསྟན་པ་ཡིན་ཏེ། ལྷན་ཅིག་འབྱུང་བའི་རྒྱུ་ནི་
དེ་ལྟ་བུ་མཚན་ཉིད་ཅན་མ་ཡིན་ནོ། །ལུང་དུ་མ་བསྟན་པ་ཡང་མེད་པར་ཐལ་བར་འགྱུར་ཏེ། དགེ་བ་དང་མི་དགེ་བ་དང་རིགས་མི་མཚུངས་པའི་ཕྱིར་རོ། །མ་འོངས་པ་དང་ད་ལྟར་གྱི་འབྱུང་བ་ལས་གྱུར་པ་ནི་འདས་པའི་འབྱུང་བ་ཆེན་པོ་རྒྱུར་བྱས་ནས་ཡིན་པར་ཡང་འདོད་དེ། དེ་བཞིན་དུ་ཁ་ཅིག་འབྱུང་བ་རྣམས་དང་མི་ལྡན་ཡང་འབྱུང་བ་ལས་གྱུར་པ་དང་ལྡན་པ་ཡིན་ན་ལྷན་ཅིག་འབྱུང་བའི་ཆོས་ཉིད་ནི་དེ་ལྟར་མ་ཡིན་པས་འབྱུང་བ་རྣམས་འབྱུང་བ་ལས་གྱུར་པའི་ལྷན་ཅིག་འབྱུང་བའི་རྒྱུ་མ་ཡིན་ནོ། །མཚུངས་པར་ལྡན་པའི་རྒྱུ་ཡང་མ་ཡིན་ཏེ། སེམས་དང་སེམས་ལས་བྱུང་བའི་རང་བཞིན་མ་ཡིན་པའི་ཕྱིར་རོ། །ཀུན་ཏུ་འགྲོ་བ་དང་རྣམ་པར་སྨིན་པའི་རྒྱུ་དག་ཀྱང་མ་ཡིན་ཏེ་མ་བསྒྲིབས་ལ་ལུང་དུ་མ་བསྟན་པ་ཡིན་པའི་ཕྱིར་རོ། །སྐལ་བ་མཉམ་པའི་རྒྱུ་ཡང་མ་ཡིན་ཏེ། ལྷན་ཅིག་འབྱུང་བའི་ཕྱིར་ལ་དུས་ཕྱིས་སྐྱེས་པ་དང་ཡང་མི་འདྲ་བའི་ཕྱིར་རོ། །གལ་ཏེ་ལུང་དུ་མ་བསྟན་པ་དང་སྐལ་བ་མ་ཉམ་པ་ཡང་རིགས་གཞན་ཉིད་ཀྱི་ཕྱིར་ཚོར་བ་དང་སེམས་བཞིན་ནོ་ཞེ་ན། རིགས་གཞན་ཉིད་ཀྱང་མ་ཡིན་ཏེ་འབྲས་བུ་གཅིག་པའི་ཕྱིར་རོ། །འབྱུང་གྱུར་རྣམ་གསུམ་ཕན་ཚུན་དུ། །ཞེས་བྱ་བ་ནི་ཅི་རིགས་པར་རོ། །ལུས་དང་ངག་གི་ལས་སེམས་ཀྱི་རྗེས་སུ་འཇུག་པ་ཞེས་བྱ་བ་ནི་བསམ་གཏན་དང་ཟག་པ་མེད་པའི་སྡོམ་པས་བསྡུས་པ་སྲོག་གཅོད་པ་ནས་ཚིག་བཀྱལ་པ་སྤོང་བའི་བར་འཆལ་པའི་ཚུལ་ཁྲིམས་རྣམ་པ་བདུན་སྤོང་བ་སྟེ། སྤོང་བ་བདུན་པོ་འདི་དག་ནི་ཕན་ཚུན་ལྷན་ཅིག་འབྱུང་བའི་རྒྱུ་ཡིན་ནོ། །སྔར་བྱུང་བ་ཐམས་ཅད་སྐལ་བ་མཉམ་པའི་རྒྱུ་ཡིན་ནོ་ཞེས་བྱ་བ་ལ། དགེ་བ་དགེ་བའི་ཡིན་པ་ནས་ལུང་དུ་མ་བསྟན་པ་ལུང་དུ་མ་བསྟན་པའི་བར་གྱི་ཡིན་ནོ། །རྒྱས་པར་བྱས་ན་ཉི་ཤུ་ཡིན་པས་མདོར་བསྡུ་ན་སེམས་བཅུ་གཉིས་སོ་ཞེས་བྱ་བ་སྨོས་སོ། །གཞན་དུ་ན་ཞེས་བྱ་བ་ནི་མ་གཏོགས་པའོ། །དགེ་བ་ནི་མ་ཆགས་པ་ལ་སོགས་པ་དང་མཚུངས་པར་ལྡན་པའོ། །བསྒྲིབས་ལ་ལུང་དུ་མ་བསྟན་པ་ནི་འཇིག་ཚོགས་ལ་ལྟ་བ་དང་མཐར་འཛིན་པར་ལྟ་བ་དང་མཚུངས་པར་ལྡན་པའོ། །མི་དགེ་བ་ནི་ཉོན་མོངས་པ་དང་ཉེ་བར་ཉོན་མོངས་པ་ལྷག་མ་དང་མཚུངས་པར་ལྡན་པའོ། །དེ་དག་ལས་གཞན་པ་མ་
བསྒྲིབས་ལ་ལུང་དུ་མ་བསྟན་པའོ། །གཟུགས་ཀྱི་ཁམས་ན་མི་དགེ་བ་མེད་དེ། དེ་དག་ནི་ཉོན་མོངས་པ་དང་ཉེ་བའི་ཉོན་མོངས་པ་རྣམས་ལ་རྣམ་པར་སྨིན་པ་མེད་པའི་ཕྱིར་བསྒྲིབས་པ་ཁོ་ན་ཡིན་གྱི་མི་དགེ་བ་ནི་མ་ཡིན་ཏེ། དེའི་ཕྱིར་དེ་དག་དང་མཚུངས་པར་ལྡན་པར་སེམས་ཐམས་ཅད་བསྒྲིབས་པ་ཁོ་ན་ཡིན་ནོ། །སློབ་པའི་ཟག་པ་མེད་པ་ནི་སློབ་པའི་སེམས་སོ། །མི་སློབ་པའི་ནི་མི་སློབ་པའི་སེམས་སོ། །སྙོམས་པར་འཇུག་པའི་ཚེ་དགེ་བ་དང་ཞེས་བྱ་བ་འབྱུང་བ་ལ། དགེ་བ་གང་གི་མཇུག་ཐོགས་སུ་དགེ་བ་གང་དང་གང་ས་གང་གིས་བསྡུས་པས་འབྱུང་ཞེ་ན། འདོད་པ་ན་སྤྱོད་པའི་དགེ་བ་སྦྱོར་བ་ལས་བྱུང་བའི་མཇུག་ཐོགས་སུ་སྦྱོར་བ་ལས་བྱུང་བ་ཁོ་ན་ཡིན་གྱི་སྐྱེས་ནས་ཐོབ་པ་ནི་མ་ཡིན་ཏེ། འདིར་སྐྱེས་པས་མངོན་དུ་བྱེད་པར་མི་ནུས་པའི་ཕྱིར་རོ། །ཁ་ཅིག་ན་རེ་ནི་མི་ལྕོགས་པ་མེད་པས་བསྡུས་པ་ཁོ་ན་འབྱུང་ངོ་ཞེས་ཟེར་རོ། །གཞན་དག་ན་རེ་བསམ་གཏན་དང་པོའི་ཡང་ངོ་ཞེས་ཟེར་རོ། །གཞན་དག་ན་རེ་ནི་བསམ་གཏན་ཁྱད་པར་ཅན་གྱི་ཡང་ངོ་ཞེས་ཟེར་རོ། །བཙུན་པ་དབྱངས་སྒྲོག་ན་རེ་ནི་བསམ་གཏན་གཉིས་པའི་ས་པའི་བར་དུ་ཡིན་ནོ་ཞེས་ཟེར་རོ། གཞན་དག་ན་རེ་ནི་མཉམ་པར་མ་བཞག་པར་ཐོད་རྒལ་གྱི་སྙོམས་པར་འཇུག་པ་ལྟར་སས་བར་དུ་ཆོད་པ་འདྲེན་པར་མི་ནུས་སོ་ཞེས་ཟེར་རོ། །ཉིང་མཚམས་སྦྱོར་བའི་ཚེ་བསྒྲིབ་པའོ་ཞེས་བྱ་བ་ལ། སྐྱེ་བའི་སྲིད་པ་ནི་ཉོན་མོངས་པ་ཐམས་ཅད་ཀྱིས་ཉོན་མོངས་པ་ཡིན་པའི་ཕྱིར་ན་སྐྱེས་ནས་ཐོབ་པའི་དགེ་བའི་མཇུག་ཐོགས་སུ་བསྒྲིབས་པ་ཡིན་གྱི། །གཟུགས་དང་གཟུགས་མེད་པ་ན་སྤྱོད་པའི་བསྒྲིབས་ལ་ལུང་དུ་མ་བསྟན་པ་དག་མངོན་དུ་འགྱུར་བ་ནི་མ་ཡིན་གྱི་རང་གི་ས་པའི་སེམས་ལ་རག་ལས་པའི་ཕྱིར་རོ། །གཟུགས་མེད་པ་རྣམས་ནི་འདོད་པའི་ཁམས་ནས་ཞེས་བྱ་བ་རྒྱས་པར་འབྱུང་བ་སྟེ། དེ་ལ་རྟེན་རིང་བ་ཉིད་ནི་འདི་ཡིན་ཏེ། ཇི་ལྟར་གཟུགས་སུ་གཏོགས་པའི་རྟེན་གྱིས་འདོད་པ་ན་སྤྱོད་པའི་སྤྲུལ་པའི་སེམས་མངོན་དུ་བྱེད་པ་ལྟར། གཟུགས་མེད་པར་གཏོགས་པའི་རྟེན་གྱིས་འདོད་པར་གཏོགས་པའི་ཆོས་མངོན་དུ་མི་བྱེད་པའོ། །དེ་ལ་རྣམ་པ་རིང་བས་རིང་བ་ཉིད་ནི་འདི་ཡིན་ཏེ། ཇི་ལྟར་འདོད་པ་
ན་སྤྱོད་པའི་རགས་པ་ལ་སོགས་པའི་རྣམ་པ་དག་ཏུ་རྣམ་པར་བྱེད་པ་ལྟར་གཟུགས་མེད་པའི་སེམས་ཀྱིས་འདོད་པའི་ཁམས་རྣམ་པར་མི་བྱེད་པའོ། །དེ་ཉིད་ཀྱི་ཕྱིར་དམིགས་པ་རིང་བ་ཉིད་ཀྱིས་ཀྱང་རིང་བ་ཡིན་ནོ། །གཟུགས་མེད་པའི་དགེ་བ་དངོས་གཞི་ཟག་པ་དང་བཅས་པའི་རྟེན་གྱི་སྤྱོད་ཡུལ་ཡིན་པས། ནམ་མཁའ་མཐའ་ཡས་ཀྱི་སྐྱེ་མཆེད་ཀྱི་ཉེར་བསྡོགས་བསམ་གཏན་བཞི་པའི་རྒྱུ་དང༌། འདི་གཟུགས་ཀྱི་ཁམས་སུ་ཡང་ཐལ་བར་མི་འགྱུར་རོ། །གཟུགས་ཀྱི་ཁམས་ཇི་ལྟ་བ་བཞིན་དུ་གཟུགས་མེད་པ་དག་འདོད་པའི་ཁམས་ཀྱི་གཉེན་པོ་ཡང་མ་ཡིན་ཏེ། དེ་ལྟར་ན་གཉེན་པོ་རིང་བ་ཉིད་ཀྱིས་ཀྱང་རིང་བ་ཡིན་ནོ། །སློབ་དང་མི་སློབ་པའོ་ཞེས་བྱ་བ་ནི་སྦྱོར་བ་ལས་བྱུང་བའི་དགེ་བའི་མཇུག་ཐོགས་སུའོ། །ཉོན་མོངས་པ་ཅན་གྱི་སྙོམས་པར་འཇུག་པས་གཟིར་བ་ནི་སྐྱབས་ཚོལ་བ་སྟེ། འདོད་པ་ན་སྤྱོད་པའི་དགེ་བའི་སེམས་ལ་བརྟེན་པའི་ཕྱིར་རོ། །གཟུགས་དང་གཟུགས་མེད་པའི་སེམས་ཐམས་ཅད་ཀྱི་ཞེས་བྱ་བ་ལ། ས་གོང་མའི་སེམས་རྣམ་པ་དྲུག་གིས་འཆི་འཕོ་བ་ལ་འདོད་པའི་ཁམས་སུ་ཉིང་མཚམས་སྦྱོར་བ་བཟློག་ཏུ་མེད་དོ། །ཟག་པ་མེད་པའི་སེམས་ཀྱི་མཇུག་ཐོགས་སུ་ཉོན་མོངས་པ་མངོན་དུ་འགྱུར་བ་ནི་ཡོད་པ་མ་ཡིན་ནོ། །དེ་ལ་ས་བཞི་སྟེ། ས་འོག་མ་པའི་ཉོན་མོངས་པའི་མཇུག་ཐོགས་སུ་ས་གོང་མ་པའི་མངོན་དུ་བྱེད་པ་མེད་ལ། ཟག་པ་མེད་པ་ཡང་མངོན་དུ་མི་བྱེད་པ་མ་ཡིན་ནོ། །གཟུགས་ན་སྤྱོད་པའི་དགེ་བའི་དགེ་བ་ལ་ཞེས་བྱ་ལ། སྤྲུལ་པའི་སེམས་ནི་བསམ་གཏན་གྱི་འབྲས་བུ་སྟེ། དེ་ནི་བསམ་གཏན་ལ་མ་ཞུགས་པར་མངོན་དུ་བྱ་བར་མི་ནུས་པའི་ཕྱིར་རོ། །ལུང་དུ་མ་བསྟན་པའི་སེམས་ཀྱིས་འཆི་བའི་ཚེ་གཟུགས་དང་གཟུགས་མེད་པའི་ཁམས་དག་ཏུ་ཉིང་མཚམས་སྦྱོར་བ་བཟློག་ཏུ་མེད་ལ། གདོན་མི་ཟ་བར་བསམ་གཏན་གྱི་འབྲས་བུའི་མཇུག་ཐོགས་སུ་ཡང་བསམ་གཏན་ལ་འཇུག་པར་བྱ་དགོས་པས་མ་བསྒྲིབས་ལ་ལུང་དུ་མ་བསྟན་པའི་མཇུག་ཐོགས་སུ་གཟུགས་ན་སྤྱོད་པའི་དགེ་བ་དང་ཉོན་མོངས་པ་ཅན་གཉིས་དང༌། གཟུགས་མེད་པ་ན་སྤྱོད་པའི་ཉོན་མོངས་པ་ཅན་ཁོ་ནའོ། །གཟུགས་ན་དགེ་ལས་བཅུ་གཅིག་
གོ་ཞེས་བྱ་བ་ལ། རང་གི་ས་པ་གསུམ་དང༌། འདོད་པ་ན་སྤྱོད་པའི་བཞི་སྟེ། ལྡང་བའི་ཚེ་དགེ་བ་དང༌། ཉིང་མཚམས་སྦྱོར་བའི་ཚེ་མི་དགེ་བ་དང༌། བསྒྲིབས་པ་དང་ལུང་དུ་མ་བསྟན་པ་སྤྲུལ་པའི་སེམས་དང༌། སྙོམས་པར་འཇུག་པའི་ཚེ་གཟུགས་མེད་པ་ན་སྤྱོད་པའི་དགེ་བ་དང༌། ཉིང་མཚམས་སྦྱོར་བའི་ཚེ་བསྒྲིབས་པ་དང༌། སྙོམས་པར་འཇུག་པའི་ཚེ་སློབ་པ་དང་མི་སློབ་པའོ། །གཟུགས་མེད་པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་མ་གཏོགས་སོ་ཞེས་བྱ་བ་ལ། རྣམ་པར་སྨིན་པའི་སེམས་ནི་རང་གི་ས་པའི་སེམས་ལ་རག་ལས་པའི་ཕྱིར་དེ་མ་གཏོགས་སོ། །དེ་ནི་དགུའི་མཇུག་ཐོགས་སུ་ཞེས་བྱ་བ་ལ། རང་གི་ས་པ་གསུམ་དང༌། འདོད་པ་ན་སྤྱོད་པ་གཉིས་ཏེ་སྙོམས་པར་འཇུག་པའི་ཚེ་དགེ་བ་དང༌། སྤྲུལ་པའི་སེམས་དང་ལྡང་བའི་ཚེ་གཟུགས་མེད་པ་ན་སྤྱོད་པའི་དགེ་བ་དང༌། ཉོན་མོངས་པ་ཅན་གྱི་སྙོམས་པར་འཇུག་པས་གཟིར་བ་ས་འོག་མ་པ་ལ་བརྟེན་པའི་ཕྱིར་ཉོན་མོངས་པ་ཅན་དང༌། ལྡང་བའི་ཚེ་སློབ་པ་དང་མི་སློབ་པ་ལས་སོ། །འདོད་པ་ན་སྤྱོད་པའི་ཉོན་མོངས་པ་ཅན་གཉིས་དང་ཞེས་བྱ་བ་རྒྱས་པར་འབྱུང་བ་ལ། ཉོན་མོངས་པ་ཅན་གྱི་སེམས་ནི་བསམ་གཏན་དང་སྙོམས་པར་འཇུག་པ་རྣམས་ཀྱི་སྦྱོར་བ་མ་ཡིན་ལ། དགེ་བའི་སེམས་ཀྱི་ཉིང་མཚམས་སྦྱོར་བ་ལ་ཡང་ཡོད་པ་མ་ཡིན་ནོ། །དེ་ལྟར་ན་གསུམ་པོ་འདི་དག་མ་གཏོགས་པའོ། །བསྒྲིབས་པ་བརྒྱད་ལས་ཞེས་བྱ་བ་ལ། རང་གི་ས་པ་གསུམ་དང༌། ཉིང་མཚམས་སྦྱོར་བའི་ཚེ་འདོད་པ་ན་སྤྱོད་པའི་དགེ་བ་དང་མ་བསྒྲིབས་ལ་ལུང་དུ་མ་བསྟན་པ་དང༌། ཉིང་མཚམས་སྦྱོར་བའི་ཚེ་གཟུགས་མེད་པ་ན་སྤྱོད་པ་གསུམ་ལས་སོ། །འདོད་པ་ན་སྤྱོད་པའི་ཉོན་མོངས་པ་ཅན་གཉིས་དང་ཞེས་བྱ་བ་ལ་འདོད་པའི་ཁམས་ལས་འདོད་ཆགས་དང་མ་བྲལ་བ་ལ་གཟུགས་ཀྱི་ཁམས་སུ་ཉིང་མཚམས་སྦྱོར་བ་མེད་ལ། སློབ་པ་དང་མི་སློབ་པའི་སེམས་ཀྱིས་འཆི་འཕོ་ཡང་ཡོད་པ་མ་ཡིན་པ་དེའི་ཕྱིར་བཞི་པོ་འདི་དག་མ་གཏོགས་སོ། །དེ་ལས་དྲུག་རང་གི་ས་པ་གསུམ་དང༌། ཉིང་མཚམས་སྦྱོར་བའི་ཚེ་ས་འོག་མ་པའི་ཉོན་མོངས་པ་ཅན་གཉིས་དང༌།
ཉོན་མོངས་པ་ཅན་གྱི་སྙོམས་པར་འཇུག་པས་གཟིར་བའི་ཚེ་དགེ་བའོ། །གང་གི་ཚེ་སྦྱོར་བའི་སེམས་ནི་བསྒྲིབས་ལ་ལུང་དུ་མ་བསྟན་པ་ཡོད་པ་མ་ཡིན་ཏེ། དེའི་ཕྱིར་དེའི་མཇུག་ཐོགས་སུ་སློབ་པ་དང་མི་སློབ་པ་དང༌། གཟུགས་མེད་པའི་དགེ་བ་མི་འབྱུང་ངོ༌། །འོག་མ་ལས་འདོད་ཆགས་དང་མ་བྲལ་བ་ལ་ནི་ས་གོང་མར་སྐྱེ་བ་ཡོད་པ་ཡང་མ་ཡིན་ཏེ། དེའི་ཕྱིར་དེའི་མཇུག་ཐོགས་སུ་གཟུགས་མེད་པར་གཏོགས་པའི་ཉོན་མོངས་པ་ཅན་མི་འབྱུང་ངོ༌། །ས་གཞན་གྱིས་མ་བསྒྲིབས་ལ་ལུང་དུ་མ་བསྟན་པ་ཡང་མ་ཡིན་ཏེ། དེ་ནི་སྐྱེ་བ་དང་སྙོམས་པར་འཇུག་པ་ན་དེའི་མཇུག་ཐོགས་སུ་མི་སྲིད་དོ། །མ་བསྒྲིབས་པ་ནི་གསུམ་ལས་སོ། །ཞེས་བྱ་བ་ལ། དེ་ནི་ཉིང་མཚམས་སྦྱོར་བའི་སེམས་སུ་མི་རུང་ཞིང༌། འདོད་པའི་ཁམས་ཀྱི་སྦྱོར་བ་ལས་བྱུང་བ་མ་ཡིན་ལ། སློབ་བ་དང་མི་སློབ་པ་དང༌། གཟུགས་མེད་པ་ན་སྤྱོད་པའི་ལྡང་བའི་སེམས་ཀྱང་མ་ཡིན་ཏེ། དེའི་ཕྱིར་རང་གི་ས་པ་གསུམ་ལས་ཡིན་ནོ། །དེ་ལས་དྲུག་སྟེ་ཞེས་བྱ་བ་ལ། ཉིང་མཚམས་སྦྱོར་བའི་ཚེ་འདོད་པ་ན་སྤྱོད་པའི་ཉོན་མོངས་པ་ཅན་དག་དང་གཟུགས་མེད་པ་ན་སྤྱོད་པའོ། །སྦྱོར་བ་ལས་བྱུང་བའི་ཕྱིར་སློབ་པ་དང་མི་སློབ་པ་གཟུགས་མེད་པ་ན་སྤྱོད་པའི་དགེ་བའི་དག་ཀྱང་དེ་ལས་མི་འབྱུང་ལ། མ་བསྒྲིབས་ལ་ལུང་དུ་མ་བསྟན་པས་གཟིར་བར་མི་བྱེད་པས་འདོད་པ་ན་སྤྱོད་པའི་དགེ་བ་ཡང་དེའི་མཇུག་ཐོགས་སུ་མི་འབྱུང་ངོ༌། །སྐྱེ་བ་དང་སྙོམས་པར་འཇུག་པ་ནི་ས་གོང་མ་དང་འོག་མ་པའི་མ་བསྒྲིབས་ལ་ལུང་དུ་མ་བསྟན་པ་ཡང་དེའི་མཇུག་ཐོགས་སུ་མི་སྲིད་དོ། །གཟུགས་མེད་པའང་དེའི་ཚུལ་ལོ་ཞེས་བྱ་བ་ལ། དེའི་སྐྱེ་བ་དང་སྙོམས་པར་འཇུག་པའི་ཚེ་ས་འོག་མ་པའི་དགེ་བ་ལ་སོགས་པ་རྣམས་ལས་སྲིད་པ་མ་ཡིན་ལ། སློབ་པ་དང་མི་སློབ་པ་དག་གི་མཇུག་ཐོགས་སུ་ཡང་མ་ཡིན་ཏེ། དེའི་ཕྱིར་རང་གི་ས་པ་གསུམ་ཁོ་ན་ལས་འབྱུང་ངོ༌། །ས་འོག་མ་པའི་ཉོན་མོངས་པ་ཅན་རྣམས་དང་ཞེས་བྱ་བ་ལ། ཉིང་མཚམས་སྦྱོར་བའི་ཚེ་འདོད་པ་དང་གཟུགས་ཀྱི་ཁམས་རྣམས་སོ། །གཟུགས་མེད་པ་ན་སྤྱོད་པའི་དགེ་བའི་སེམས་ལས་ནི་སེམས་དགུ་སྟེ། རང་གི་ས་པ་གསུམ་དང༌། ལྡང་བའི་ཚེ་གཟུགས་སུ་
གཏོགས་པའི་དགེ་བ་དང༌། ཉིང་མཚམས་སྦྱོར་བའི་ཚེ་འོག་མ་པའི་ཉོན་མོངས་པ་ཅན་རྣམས་དང༌། སྙོམས་པར་འཇུག་པའི་ཚེ་སློབ་པ་དང་མི་སློབ་པའོ། །འདོད་པ་ན་སྤྱོད་པའི་དགེ་བ་དང༌། འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་མ་གཏོགས་སོ་ཞེས་བྱ་བ་ལ། འདོད་པའི་ཁམས་ལ་གཟུགས་མེད་པའི་ཁམས་བསྐལ་པ་ཡིན་པས་དེའི་ས་པའི་དགེ་བའི་ནི་གཟུགས་མེད་པ་ན་སྤྱོད་པའི་ལྡང་བའི་སེམས་ཀྱང་མ་ཡིན་ཏེ། དེས་ན་དེའི་མཇུག་ཐོགས་སུ་མི་རིགས་སོ། །ཇི་ལྟར་འདོད་པར་གཏོགས་པའི་སྤྲུལ་པའི་སེམས་གཟུགས་ན་སྤྱོད་པའི་སྦྱོར་བས་ཐོབ་པར་བྱ་བ་ཡིན་པ་ལྟར། འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་གཟུགས་མེད་པའི་སྦྱོར་བས་ཐོབ་པར་བྱ་བ་ནི་མ་ཡིན་ཏེ། དེའི་ཕྱིར་དེ་ཡང་མ་གཏོགས་པའོ། །གཟུགས་ན་སྤྱོད་པའི་དགེ་བ་དང་ཞེས་བྱ་བ་ནི་སྙོམས་པར་འཇུག་པའི་ཚེ་ནའོ། །སློབ་པ་དང་མི་སློབ་པ་དག་ལས་སོ་ཞེས་བྱ་བ་ནི་ལྡང་བའི་ཚེ་ནའོ། །བསྒྲིབས་པ་ལས་བདུན་ཞེས་བྱ་བ་རྒྱས་པར་འབྱུང་བ་ལ། ཉོན་མོངས་པ་ཅན་གྱི་སྙོམས་པར་འཇུག་པས་གཟིར་བ་ས་འོག་མ་ལ་བསྟན་པའི་ཕྱིར་གཟུགས་ན་སྤྱོད་པའི་དགེ་བ་དང༌། ཉིང་མཚམས་སྦྱོར་བའི་ཚེ་བསྒྲིབས་པ་དང༌། ཉིང་མཚམས་སྦྱོར་བའི་ཚེ་འདོད་པ་ན་སྤྱོད་པའི་ཉོན་མོངས་པ་ཅན་གཉིས་སོ། །དེ་དེ་བཞིན་ཞེས་བྱ་བ་རྒྱས་པར་འབྱུང་ངོ༌། །འདོད་པ་དང་གཟུགས་ན་སྤྱོད་པའི་ཉོན་མོངས་པ་ཅན་རྣམས་དང་ཞེས་བྱ་བ་ལ། འདི་ལྟར་ས་འོག་མ་ལ་འདོད་ཆགས་དང་མ་བྲལ་བ་ལ་གཟུགས་མེད་པའི་ཁམས་སུ་ཉིང་མཚམས་སྦྱོར་བ་མེད་ལ། དེས་སློབ་པའམ་མི་སློབ་པའི་ཏིང་ངེ་འཛིན་ལས་ལྡང་བ་ཡང་མ་ཡིན་པས་དེ་ནི་ལྔ་ལས་མི་འབྱུང་ངོ༌། །དེ་ནི་ཉིང་མཚམས་སྦྱོར་བའི་ཚེ་ན་འདོད་པ་དང་གཟུགས་ན་སྤྱོད་པའི་དགེ་བ་དང༌། མ་བསྒྲིབས་ལ་ལུང་དུ་མ་བསྟན་པ་དག་ལས་འབྱུང་ངོ༌། །ཁམས་གསུམ་པའི་དགེ་བ་དང་ཞེས་བྱ་བ་ནི་འདོད་པ་དང་གཟུགས་དང་གཟུགས་མེད་པ་ན་སྤྱོད་པ་རྣམས་སོ། །དགེ་བ་སྨོས་པ་ནི་གཞན་བཟློག་པར་བྱ་བའི་ཕྱིར་རོ། །སློབ་པ་ལས་སོ་ཞེས་བྱ་བ་ནི་རྒྱུན་ཏུ་གཏོགས་པའི་ཕྱིར་རོ། །
སློབ་པ་ནི་ཉིང་མཚམས་སྦྱོར་བའི་སེམས་མ་ཡིན་ལ། དགེ་བ་སྦྱོར་བ་ལས་བྱུང་བ་ཡིན་པས་གཞན་གྱི་མཇུག་ཐོགས་སུ་མ་བྱུང་ངོ༌། །དེ་ལས་ལྔ་ཞེས་བྱ་བ་ལ། ལྡང་བའི་ཚེ་ཁམས་གསུམ་པའི་དགེ་བ་རྣམས་དང༌། རྒྱུན་ཏུ་གཏོགས་པའི་སློབ་པ་དང༌། རྡོ་རྗེ་ལྟ་བུའི་མཇུག་ཐོགས་སུ་མི་སློབ་པའི་ཤེས་པའོ། །བཤད་མ་ཐག་པའི་ལྔ་པོ་དེ་དག་ཉིད་ལས་སོ་ཞེས་བྱ་བ་ལ་སྙོམས་པར་འཇུག་པའི་ཚེ་ནི་ཁམས་གསུམ་པའི་དགེ་བ་རྣམས་སོ། །རྡོ་རྗེ་ལྟ་བུའི་མཇུག་ཐོགས་སུ་ནི་སློབ་པ་ལས་སོ། །ཟད་པ་ཤེས་པའི་མཇུག་ཐོགས་སུ་ནི་མི་སྐྱེ་བ་ཤེས་པའོ། །དེ་ལས་སེམས་ནི་བཞི་པོ་དག་གོ་ཞེས་བྱ་བ་ལ། ལྡང་བའི་ཚེ་ན་ཁམས་གསུམ་པའི་དགེ་བ་རྣམས་དང༌། མི་སློབ་པ་སྟེ། དཔེར་ན་ཟད་པ་ཤེས་པ་ལས་མི་སྐྱེ་བ་ཤེས་པ་བཞིན་ནོ། །མི་སློབ་པའི་མཇུག་ཐོགས་སུ་སློབ་པ་ནི་ནམ་ཡང་མི་འབྱུང་སྟེ། ཉོན་མོངས་མ་པ་ཅན་གྱི་སེམས་ཀྱིས་བར་ཆོད་པའི་ཕྱིར་ཏེ་ཉོན་མོངས་པ་ཀུན་ཏུ་སྤྱོད་པ་མེད་པར་ནི་ཡོངས་སུ་ཉམས་པ་མེད་དོ། །སྐྱེས་ནས་ཐོབ་པ་དང་སྦྱོར་བ་ལས་བྱུང་བའི་དགེ་བའི་ཞེས་བྱ་བ་འབྱུང་སྟེ། དེ་ལ་སྦྱོར་བ་ལས་བྱུང་བ་ནི་གང་སྦྱོར་བས་འཐོབ་པ་སྟེ། དེ་ནི་ཐོས་པ་དང་བསམ་པ་དང་བསྒོམ་པ་ལས་བྱུང་བའོ། །དེ་ལ་མཉམ་པར་མ་བཞག་པ་ཡིན་པའི་ཕྱིར་འདོད་པའི་ཁམས་ན་བསྒོམ་པ་ལས་བྱུང་བ་མེད་དོ། །གཟུགས་ཀྱི་ཁམས་ན་ནི་བསམ་པ་ལས་བྱུང་བ་མེད་དེ། གཞན་དེ་དག་ནི་རྒྱུད་ཞི་གནས་ཀྱིས་བརླན་པའི་ཕྱིར་སེམས་ན་ཏིང་ངེ་འཛིན་ཉིད་ཉེ་བར་གནས་པར་འགྱུར་རོ། །གཟུགས་མེད་པའི་ཁམས་ན་ནི་བསྒོམ་པ་ལས་བྱུང་བ་ཁོ་ན་སྟེ་གཞན་མེད་དོ། །སྐྱེས་ནས་ཐོབ་པའི་དགེ་བ་ནི་སེམས་སྦྱོར་བ་མེད་པར་སྐྱེས་པ་ཉིད་ཀྱིས་འཐོབ་པ་གང་ཡིན་པ་སྟེ། འདོད་པ་དང་གཟུགས་ཀྱི་ཁམས་དག་ཏུ་སྲིད་པ་བར་མར་ཉིང་མཚམས་སྦྱོར་བའི་སྐད་ཅིག་མའོ། །གཟུགས་མེད་པའི་ཁམས་སུ་ནི་སྐྱེ་བ་སྲིད་པར་གང་གི་ཐོབ་པ་དང་པོ་སྐྱེའོ། །རྣམ་པར་སྨིན་པ་ལས་སྐྱེས་པ་དང༌། སྤྱོད་ལམ་པ་དང༌། བཟོའི་གནས་པ་དང༌། སྤྲུལ་པའི་ཞེས་བྱ་བ་ལ། འདི་ནི་རྒྱུ་དང་ལས་ཀྱི་དབྱེ་བས་ཕྱེ་བ་ཡིན་ནོ། །དེ་ལ་རྣམ་པར་སྨིན་པའི་རྒྱུ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པའོ། །སྤྱོད་
ལམ་ལས་བྱུང་བ་ནི་སྤྱོད་ལམ་པའོ། །དེ་བཞིན་དུ་བཟོའི་གནས་པ་དང༌། སྤྲུལ་པ་ལས་བྱུང་བ་ནི་བཟོའི་གནས་པ་དང་སྤྲུལ་པ་པ་སྟེ་རྒྱུ་མཚན་གྱིས་བདུན་པར་བཤད་པའི་ཕྱིར་རོ། །ཡང་ན་དེ་དག་ལ་དམིགས་ནས་སྐྱེ་བའི་ཕྱིར་དེ་དག་ལས་བྱུང་བའོ། །སྤྱོད་ལམ་པ་དང༌། བཟོའི་གནས་པ་དང༌། སྤྲུལ་པ་དང༌། གསུམ་ནི་ལས་ཀྱི་དབྱེ་བས་ཕྱེ་ལ། སྔ་མ་ནི་རྒྱུའི་དབྱེ་བས་ཕྱེ་བ་ཡིན་ནོ། །གཟུགས་ན་བཟོ་མ་གཏོགས་པའོ་ཞེས་བྱ་བ་ལ། གཟུགས་ཀྱི་ཁམས་ཀྱི་གཞལ་མེད་ཁང་ལ་སོགས་པ་ཐམས་ཅད་ལས་ལས་སྐྱེས་པ་དང༌། སྤྲུལ་པ་པ་ཡིན་གྱི། མཁན་བཟོས་བྱས་པ་ནི་ཅུང་ཟད་ཀྱང་མེད་དོ། །གཟུགས་ཅན་རྣམས་ལ་འགྲོ་བ་དང་འདུག་པ་ལ་སོགས་པ་ཡོད་པའི་ཕྱིར་སྤྱོད་ལམ་པ་ཡོད་དོ། །གཟུགས་མེད་པའི་ཁམས་ན་སྤྱོད་ལམ་པ་དང༌། བཟོའི་གནས་པ་དང་སྤྲུལ་པ་པ་རྣམས་མེད་བསམ་བསྒྲིབས་ལ་ལུང་དུ་མ་བསྟན་པའི་དབྱེ་བ་མེད་དོ། །སྤྱོད་ལམ་པ་དང༌། བཟོའི་གནས་པ་དང༌། སྤྲུལ་པ་རྣམས་དེ་ན་མེད་པའི་ཕྱིར་བྷཱ་བཿཨཾ་ག་པ་རི་གྲི་ཧཱི་ཏཿས་མཱདྷྱ་བྷཱ་བ་ནཱ་མངོན་པར་ཤེས་པའི་འབྲས་བུ་ཞེས་གཞན་དག་གོ །གཟུགས་མེད་པའི་ཁམས་ན་གཟུགས་མེད་པའི་ཕྱིར་སྤྱོད་ལམ་པ་ལ་སོགས་པ་ཡང་མེད་དོ། །གཟུགས་ལ་དམིགས་པ་ནི་དེ་ན་མེད་དོ་ཞེས་བརྗོད་པར་མི་བྱ་སྟེ། ཅིའི་ཕྱིར་ཞེ་ན། དངོས་པོ་ཡན་ལག་ཡོངས་སུ་བཟུང་བ་ཏིང་ངེ་འཛིན་མེད། བསྒོམ་པ་དེའི་ནམ་མཁའི་ཉེར་བསྡོགས་ལ་དེ་ཡོད་པ་ཉིད་དུ་ཐལ་བར་འགྱུར་རོ་ཞེས་སློབ་དཔོན་འདུས་བཟང་ཟེར་རོ། །ཡང་ཅི་ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་ལ་གཟུགས་ཡོད་པ་གང་ལས་དེར་ཐལ་བར་འགྱུར་བར་བརྗོད་ཅེ་ན། དེ་དག་ལ་མི་སྲིད་པའི་ཕྱིར་དེར་ཐལ་བ་མེད་དོ། །གང་དུ་ལུང་དུ་མ་བསྟན་པའི་སྲིད་པ་དེ་དག་གཟུགས་ལ་དམིགས་པའི་ཕྱིར་དགག་པ་བྱའོ། །དེའི་ཕྱིར་རྒྱུ་མ་ཡིན་པ་ལས་ནུས་པ་མེད་དོ། །དེ་དག་གི་དམིགས་པ་ནི་གཟུགས་དང་དྲི་དང་རོ་དང་རེག་བྱ་རྣམས་ཡིན་ནོ། །དེ་ལ་སྤྱོད་ལམ་པ་ལ་སོགས་པ་རྣམས་ཀྱི་དམིགས་པ་ནི་གོ་རིམས་བཞིན་དུ་རང་གི་ལུས་དང་མ་བསྟན་ལ་སོགས་པའི་གཟུགས་ལ་སོགས་པ་དང༌། བཟོའི་གནས་ཀྱི་གཟུགས་ལ་སོགས་པ་དང༌། སྤྲུལ་པའི་གཟུགས་ལ་
སོགས་པ་རྣམས་སོ། །བཟོའི་གནས་པའི་ནི་སྒྲ་ཡང་ཡིན་ནོ་ཞེས་བྱ་བ་ལ། འདོམས་པ་པོས་གང་སྤྲུལ་པ་དེ་ལ་ཡིད་ཀྱི་རྣམ་པར་ཤེས་པས་དམིགས་ནས་སློབ་པའི་ཕྱིར་རོ། །རྣམ་པར་སྨིན་པ་ལས་སྐྱེས་པ་ལ་ངེས་པ་མ་སྨོས་པས་གཟུགས་ལ་སོགས་པ་རྣམས་དང༌། གཞན་ཡང་དམིགས་པ་ཡིན་ནོ་ཞེས་ངེས་པར་གྲུབ་པོ། །ཡིད་ཀྱི་རྣམ་པར་ཤེས་པ་དག་ཁོ་ན་ཡིན་ནོ་ཞེས་བྱ་བ་ལ། རྣམ་པར་རྟོག་པ་ལ་སོགས་པ་མངོན་པར་འདུ་བྱེད་པར་ཞུགས་པའི་ཕྱིར་རོ། །རྣམ་པར་སྨིན་པ་ལས་སྐྱེས་པ་ནི་མ་གཏོགས་ཏེ། དེ་ནི་རྣམ་པར་ཤེས་པ་དྲུག་ཅར་ཡང་ཡིན་ནོ། །རྣམ་པར་ཤེས་པའི་ཚོགས་ལྔ་ཡིན་ནོ་ཞེས་བྱ་བ་ལ། དེ་དག་གི་སྦྱོར་བའི་གནས་སྐབས་ན་འབྱུང་བའི་ཕྱིར་ན་སྦྱོར་བའོ། །ཇི་ལྟར་ཞེ་ན། མཐོང་བ་དང་རེག་པའི་བར་དུ་གྱུར་ནས་དེ་དག་སྐྱེ་བའི་ཕྱིར་རོ། །རྣམ་པར་སྨིན་པ་ལས་ནི་རང་གི་ངང་གིས་འཇུག་པའི་ཕྱིར་སྦྱོར་བ་མེད་དོ། །སྤྲུལ་པ་ནི་སྦྱོར་བ་ཡོད་མོད་ཀྱི་རྣམ་པར་ཤེས་པའི་ཚོགས་ལྔ་ནི་མ་ཡིན་ཏེ་དེ་ནི་བསམ་གཏན་གྱི་མཇུག་ཐོགས་སུ་འབྱུང་བའི་ཕྱིར་རོ། །མངོན་པར་ཤེས་པའི་འབྲས་བུ་བརྗོད་པར་འདོད་པའི་ཕྱིར་འདིར་ཡི་དགས་དང་ཤ་ཟ་ལ་སོགས་པ་ལ་སྲིད་པར་ཐལ་བར་མི་འགྱུར་རོ། །སྤྱོད་ལམ་པ་དང་ཡིད་ཀྱི་རྣམ་པར་ཤེས་པ་མངོན་བར་བསྒྲུབས་ཤིང་བསྐྱེད་པ་ཡིད་ཀྱི་རྣམ་པར་ཤེས་པ་སྐྱེ་མཆེད་བཅུ་གཉིས་ལ་དམིགས་པ་ཡོད་དོ་ཞེས་ཟེར་རོ་ཞེས་བྱ་བ་ནི་རྟེན་གྱི་དངོས་པོ་མཐའ་དག་ལ་དམིགས་པའི་ཕྱིར་རོ། །དེ་ལྟར་ན་སྤྱོད་ལམ་པ་ལ་སོགས་པ་ལས་ཐ་དད་མ་བསྒྲིབས་ལ་ལུང་དུ་མ་བསྟན་པ་མིག་གི་སྐྱེ་མཆེད་ལ་དམིགས་ནས་ཆོས་ཀྱི་སྐྱེ་མཆེད་ལ་དམིགས་པའི་བར་གཞན་ཡང་ཡོད་དོ་ཞེས་ཤེས་པར་བྱས་པར་འགྱུར་རོ། །གཞན་དག་ན་རེ་ངེས་པར་གཟུང་བ་མེད་དོ་ཞེས་ཟེར་རོ། །མངོན་པར་ཤེས་པའི་འབྲས་བུ་མ་གཏོགས་པ་ཞེས་བྱ་བ་ལ། དེ་ནི་གཟུགས་སུ་གཏོགས་བའི་སྦྱོར་བ་ལས་བྱུང་བའི་མཇུག་ཐོགས་སུ་འབྱུང་གི་འདོད་པ་ན་སྤྱོད་པའི་མཇུག་ཐོགས་སུ་ནི་མ་ཡིན་ནོ། །གཟུགས་ན་སྤྱོད་པའི་སྦྱོར་བ་ལས་བྱུང་བ་ལ། སློབ་པ་དང་མི་སློབ་པ་ནི་སྙོམས་པར་འཇུག་པའི་ཚེ་ནའོ། །དགེ་བ་སྦྱོར་བ་ལས་བྱུང་བ་ལ་གནས་པ་ལ་འཆི་འཕོ་མི་སྲིད་པའི་ཕྱིར་དེའི་མཇུག་ཐོགས་སུ་ཁམས་གོང་མའི་བསྒྲིབས་པ་
དག་མི་འབྱུང་ངོ༌། །རང་གི་དགེ་བ་དང་མི་དགེ་ཉོན་མོངས་པ་ཅན་དག་དང་ཞེས་བྱ་བ་ལ། སྐྱེས་ནས་ཐོབ་པ་དང་སྦྱོར་བ་ལས་བྱུང་བ་དང༌། བསྒྲིབས་པ་དང་མི་དགེ་བ་དང༌། ལྡང་བའི་ཚེ་གཟུགས་ན་སྤྱོད་པའི་སྦྱོར་བ་ལས་བྱུང་བ་དང༌། སློབ་པ་དང་མི་སློབ་པ་དང་ཉོན་མོངས་པ་ཅན་གྱི་སྙོམས་པར་འཇུག་པས་གཟིར་པ་ས་འོག་མ་པ་ལ་བརྟེན་པའི་ཕྱིར་གཟུགས་ན་སྤྱོད་པའི་ཉོན་མོངས་པ་ཅན་གྱི་མཇུག་ཐོགས་སུ་འབྱུང་ངོ༌། །རང་གི་ས་པ་ཡིན་ཡང་མ་བསྒྲིབས་ལ་ལུང་དུ་མ་བསྟན་པ་རྣམས་ལས་ནི་མ་ཡིན་ཏེ། སྟོབས་ཆུང་བ་དང་མངོན་པར་འདུ་བྱེད་པ་མེད་པར་འཇུག་པའི་ཕྱིར་རོ། །གཟུགས་དང་གཟུགས་མེད་པ་སྤྱོད་པའི་ཉོན་མོངས་པ་ཅན་དག་གོ་ཞེས་བྱ་བ་ནི་ཉིང་མཚམས་སྦྱོར་པའི་ཚེ་སྟེ། སྐྱེས་ནས་ཐོབ་པ་ལ་གནས་པ་ལ་འཆི་འཕོ་བ་དང་གོང་མར་མཚམས་སྦྱོར་བ་སྲིད་པའི་ཕྱིར་རོ། །དེ་ནི་མངོན་པར་འདུ་བྱེད་པ་མེད་པར་འཇུག་པའི་ཕྱིར་སློབ་པ་དང་མི་སློབ་པ་གཉིས་དང༌། གཟུགས་ན་སྤྱོད་པའི་སྦྱོར་བ་ལས་བྱུང་བའི་སྦྱོར་བ་མ་ཡིན་པས་དེ་ལས་དེ་རྣམས་མི་འབྱུང་ངོ༌། །སྔ་མ་བཞིན་དུ་ཞེས་བྱ་བ་ནི་མངོན་པར་ཤེས་པའི་འབྲས་བུ་མ་གཏོགས་པའོ། །གཟུགས་ན་སྤྱོད་པའི་སྦྱོར་བ་ལས་བྱུང་བ་དང༌། ཉོན་མོངས་པ་ཅན་དག་དང་ཞེས་བྱ་བ་ལ་སོགས་པ་ལ། མངོན་པར་འདུ་བྱེད་པ་མེད་པར་འཇུག་པ་ཡིན་ཡང་ལྡང་བའི་སེམས་སུ་མི་འགལ་ལོ། །སྦྱོར་བ་ལས་བྱུང་བ་དང་མངོན་པར་ཤེས་པའི་འབྲས་བུ་དག་མ་གཏོགས་པ་ཞེས་བྱ་བ་ནི་དེ་ལ་གནས་པ་ལ་འཆི་བ་མེད་པའི་ཕྱིར་རོ། །དེ་བཞིན་དུ་གཟུགས་མེད་པ་ན་སྤྱོད་པ་རྣམས་ལ་ཡིན་པར་ཡང་བརྗོད་པར་བྱའོ། །གཟུགས་ན་སྤྱོད་པ་བཞི་དང་ཞེས་བྱ་བ་ནི་ཉིང་མཚམས་སྦྱོར་བའི་ཚེའོ། །སྦྱོར་བ་ལས་བྱུང་བ་དང་མངོན་པར་ཤེས་པའི་འབྲས་བུ་མ་གཏོགས་པ་ཞེས་བྱ་བ་ལ་སོགས་པ་ལ། སྟོབས་ཆུང་བ་དང་མངོན་པར་འདུ་བྱེད་པ་མེད་པར་འཇུག་པའི་ཕྱིར། དེ་དག་གི་མཇུག་ཐོགས་སུ་སྦྱོར་བ་ལས་བྱུང་བ་མི་འབྱུང་ལ། གཟུགས་ན་སྤྱོད་པའི་སྦྱོར་བ་ལས་བྱུང་བ་ལ་རག་ལས་པའི་ཕྱིར་མངོན་པར་ཤེས་པའི་འབྲས་བུ་ཡང་མ་ཡིན་ནོ། །གཟུགས་དང་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དག་གོ་ཞེས་བྱ་བ་
ནི་ཉིང་མཚམས་སྦྱོར་བའི་ཚེ་ཁོ་ནར་རོ། །སྔ་མ་བཞིན་དུ་རང་གི་མདུན་ཁོ་ན་ལས་སོ་ཞེས་བྱ་བ་ནི་མངོན་པར་ཤེས་པའི་འབྲས་བུ་མ་གཏོགས་པའོ། །བཟོའི་གནས་པའི་མཇུག་ཐོགས་སུ་ནི་དྲུག་འབྱུང་སྟེ་ཞེས་བྱ་བ་ལ། འདི་ལྟར་དེ་ལ་གནས་པ་ལ་ནི་འཆི་བ་མེད་དེ། དེ་ལྟ་མ་ཡིན་ན་གཟུགས་དང་གཟུགས་མེད་པ་ན་སྤྱོད་པའི་ཉོན་མོངས་པ་ཅན་སུས་བཟློག་ཏུ་ཡོད། མངོན་པར་ཤེས་པའི་འབྲས་བུ་མ་གཏོགས་པ་ཞེས་བྱ་བ་ནི་དེ་ལས་གཟུགས་ན་སྤྱོད་པའི་སྦྱོར་བ་ལས་བྱུང་བ་ཁོ་ན་འབྱུང་བའི་ཕྱིར་རོ། །མངོན་པར་ཤེས་པའི་འབྲས་བུ་རང་ཉིད་དང་ཞེས་བྱ་བ་ནི་རྒྱུན་གྱི་སྒོ་ནས་སོ། །གཟུགས་ན་སྤྱོད་པའི་སྦྱོར་བ་ལས་བྱུང་བའོ་ཞེས་བྱ་བ་ལ། འདི་ལྟར་བསམ་གཏན་ལ་མ་ཞུགས་པར་མངོན་པར་ཤེས་པའི་འབྲས་བུ་ལས་ལྡང་བ་ཡོད་པ་མ་ཡིན་པས་མངོན་པར་ཤེས་པའི་འབྲས་བུ་ལས་གཟུགས་ན་སྤྱོད་པའི་སྦྱོར་བ་ལས་བྱུང་བ་འབྱུང་ངོ༌། །དེ་ཡང་དེ་གཉིས་ཁོ་ན་ལས་སོ་ཞེས་བྱ་བ་ནི་སྤྲུལ་པའི་སེམས་དང་གཟུགས་ན་སྤྱོད་པའི་སྦྱོར་བ་ལས་བྱུང་བ་ལས་སོ། །ད་ནི་གཟུགས་ན་སྤྱོད་པ་དྲུག་གི་ཞེས་བྱ་བ་རྒྱས་པར་འབྱུང་བ་ལ། འདོད་པ་ན་སྤྱོད་པའི་དགེ་བ་དག་ཞེས་བྱ་བ་ནི་ལྡང་བའི་ཚེ་ནའོ། །མངོན་པ་ཤེས་པའི་འབྲས་བུ་ཞེས་བྱ་བ་ནི་འདོད་པ་ན་སྤྱོད་པའི་སྤྲུལ་པའི་སེམས་སོ། །གཟུགས་མེད་པ་ན་སྤྱོད་པའི་སྦྱོར་བ་ལས་བྱུང་བ་དང༌། སློབ་པ་དང་མི་སློབ་པ་ནི་སྙོམས་པར་འཇུག་པའི་ཚེའོ། །ད་ནི་སེམས་བཅུའི་མཇུག་ཐོགས་སུ་འབྱུང་སྟེ། འདོད་པ་ན་སྤྱོད་པའི་སྦྱོར་བ་ལས་བྱུང་བའི་ལས་ནི་སྙོམས་པར་འཇུག་པའི་ཚེ་ནའོ། །སྤྲུལ་པའི་མཇུག་ཐོགས་སུ་ནི་འཇུག་པའི་ཚེ་སྟེ། བསམ་གཏན་ལ་མ་ཞུགས་པ་ནི་བསམ་གཏན་གྱི་འབྲས་བུ་ལ་གནས་པ་ལས་ལྡང་བ་ཡོད་པ་མ་ཡིན་ནོ། །སྤྱོད་ལམ་པ་ལས་རྣམ་པར་སྨིན་པ་ལས་སྐྱེས་པ་དག་གི་མཇུག་ཐོགས་སུ་ནི་མི་འབྱུང་སྟེ། སྟོབས་ཆུང་བ་དང་མངོན་པར་འདུ་བྱ་བ་མེད་པར་འཇུག་པའི་ཕྱིར་རོ། །སྤྲུལ་པའི་སེམས་ནི་མངོན་པར་འདུ་བྱེད་པ་ལས་བྱུང་བ་ཡིན་ཞིང༌། བསམ་གཏན་ལ་མ་ཞུགས་པར་དེ་ལས་ལྡང་བ་ཡོད་པ་མ་ཡིན་པས་དེའི་མཇུག་ཐོགས་སུ་འབྱུང་བ་ཡིན་ནོ། །གཟུགས་མེད་པ་ན་སྤྱོད་པའི་སྦྱོར་བ་ལས་བྱུང་བ་ལས་ནི་ལྡང་བའི་ཚེ་ནའོ། །ཉོན་
མོངས་པ་ཅན་གྱི་ཏིང་ངེ་འཛིན་གྱིས་གཟིར་བ་ས་འོག་མ་ལ་བརྟེན་པའི་ཕྱིར་ན་ཉོན་མོངས་པ་ཅན་གྱི་མཇུག་ཐོགས་སུ་འབྱུང་ངོ༌། །སློབ་པ་དང་མི་སློབ་པ་དག་ལས་ནི་ལྡང་བའི་ཚེ་ཁོ་ན་ནའོ། །སྐྱེས་ནས་ཐོབ་པའི་མཇུག་ཐོགས་སུ་ནི་བརྒྱད་དེ། འདོད་པ་ན་སྤྱོད་པའི་ཉོན་མོངས་པ་ཅན་དག་ནི་ཉིང་མཚམས་སྦྱོར་བའི་ཚེ་ནའོ། །མངོན་པར་ཤེས་པའི་འབྲས་བུ་ནི་མ་གཏོགས་ཏེ། སྦྱོར་བ་ལས་བྱུང་བ་ལ་རག་ལས་ཏེ་བདག་ཉིད་ཐོབ་བའི་ཕྱིར་རོ། །གཟུགས་མེད་པ་ན་སྤྱོད་པའི་ཉོན་མོངས་པ་ཅན་ནི་ཉིང་མཚམས་སྦྱོར་བའི་ཚེའོ། །འདོད་པ་ན་སྤྱོད་པའི་དགེ་བ་དང་ཉོན་མོངས་པ་ཅན་བཞི་དང་ཞེས་བྱ་བ་ལ་ཉོན་མོངས་པ་ཅན་དག་ནི་ཉིང་མཚམས་སྦྱོར་བའི་ཚེའོ། །ཉོན་མོངས་པ་ཅན་གྱི་ཏིང་ངེ་འཛིན་གྱིས་གཟིར་བས་ས་འོག་མ་ལ་བརྟེན་བའི་ཕྱིར་ན་དགེ་བ་དག་གོ །དེ་ནི་སེམས་བཅུ་གཅིག་གི་མཇུག་ཐོགས་སུ་འབྱུང་སྟེ་ཞེས་བྱ་བ་ལ། འདོད་པ་ན་སྤྱོད་པ་རྣམས་ལས་ནི་ཉིང་མཚམས་སྦྱོར་བའི་ཚེ་ན་སྟེ། སྦྱོར་བ་ལས་བྱུང་བ་ལས་བཟོའི་གནས་པ་དང་མངོན་པར་ཤེས་པའི་འབྲས་བུ་རྣམས་ལས་འཆི་བ་མེད་ལ། འདོད་ཆགས་དང་བྲལ་བ་མ་ཡིན་པའི་ཕྱིར་ཉོན་མོངས་པ་ཅན་གྱི་མཇུག་ཐོགས་སུ་དེར་མཚམས་སྦྱོར་བ་མེད་དེ། དེའི་ཕྱིར་གསུམ་ཁོ་ན་ལས་འབྱུང་ངོ༌། །སྦྱོར་བ་ལས་བྱུང་བ་མ་གཏོགས་པ་ཞེས་བྱ་བ་ནི་དེ་ལས་འཆི་བ་མི་སྲིད་པའི་ཕྱིར་རོ། །གཟུགས་མེད་པ་ན་སྤྱོད་པ་གསུམ་ལས་ནི་ཉིང་མཚམས་སྦྱོར་བའི་ཚེ་ཁོ་ནར་རོ། །སྤྱོད་ལམ་བའི་མཇུག་ཐོགས་སུ་ནི་བདུན་ཏེ་ཞེས་བྱ་བ་ལ། འདོད་པ་ན་སྤྱོད་པའི་ཉོན་མོངས་པ་ཅན་དག་ནི་ཉིང་མཚམས་སྦྱོར་བའི་ཚེ་ནའོ། །སྦྱོར་བ་ལས་བྱུང་བ་དང་མངོན་པར་ཤེས་པའི་འབྲས་བུམ་གཏོགས་པ་ཞེས་བྱ་བ་ལ། སྤྱོད་ལམ་པ་ནི་སྦྱོར་བའི་སེམས་ཡིན་པར་མི་རུང་སྟེ། སྟོབས་ཆུང་བ་དང་མངོན་པར་འདུ་བྱེད་པ་མེད་པར་འཇུག་བའི་ཕྱིར་དང་གཞན་ལ་སེམས་པའི་ཕྱིར་རོ། །གཟུགས་མེད་པ་ན་སྤྱོད་པའི་ཉོན་མོངས་པ་ཅན་ནི་ཉིད་མཚམས་སྦྱོར་བའི་ཚེའོ། །དེ་ནི་གཟུགས་མེད་པ་ན་སྤྱོད་པ་བཞིའི་བརྗོད་པར་བྱ་སྟེ་ཞེས་བྱ་བ་ལ། གཟུགས་ན་སྤྱོད་བའི་སྦྱོར་བ་ལས་བྱུང་བ་ནི་ལྡང་བའི་ཚེ་ནའོ། །འདོད་པ་ན་སྤྱོད་པའི་ནི་མ་ཡིན་ཏེ་བསྐལ་པའི་ཕྱིར་རོ། །སློབ་པ་དང་མི་སློབ་པ་
ནི་ལྡང་བའི་ཚེ་ནའོ། །གཟུགས་ན་སྤྱོད་པའི་སྦྱོར་བ་ལས་བྱུང་བ་ཞེས་བྱ་བ་ནི་སྙོམས་པར་འཇུག་པའི་ཚེའོ། །རྣམ་པར་སྨིན་པ་ལས་སྐྱེས་པ་མ་གཏོགས་པ་ཞེས་བྱ་བ་ལ། སྟོབས་ཆུང་བའི་ཕྱིར་དང་མངོན་པར་འདུ་བྱ་བ་མེད་པར་འཇུག་པའི་ཕྱིར་རྣམ་པར་སྨིན་པ་ལས་སྐྱེས་པ་ལས་མི་འབྱུང་ངོ༌། །སློབ་པ་དང་མི་སློབ་པ་དག་ལས་སོ་ཞེས་བྱ་བ་ནི་ལྡང་བའི་ཚེའོ། །ས་འོག་མ་པའི་ཉོན་མོངས་པ་ཅན་དག་གོ་ཞེས་བྱ་བ་ནི་འདོད་པ་ན་སྤྱོད་པ་གཉིས་དང་གཟུགས་ན་སྤྱོད་པ་སྟེ་ཉིང་མཚམས་སྦྱོར་བའི་ཚེའོ། །ཉོན་མོངས་པ་ཅན་གྱི་མཇུག་ཐོགས་སུ་ནི་བརྒྱད་དེ་ཞེས་བྱ་བ་ལ། གཟུགས་སུ་གཏོགས་པའི་དགེ་བ་ནི་ཉོན་མོངས་པ་ཅན་གྱི་ཏིང་ངེ་འཛིན་གྱིས་གཟིར་བའི་ནི་ལྡང་བའི་ཚེའོ། །འདོད་པ་ན་སྤྱོད་པའི་ཉོན་མོངས་པ་ཅན་ནི་ཉིང་མཚམས་སྦྱོར་བའི་ཚེ་ཁོ་ནར་རོ། །འདོད་པ་དང་གཟུགས་ན་སྤྱོད་པའི་ཞེས་བྱ་བ་རྒྱས་པར་འབྱུང་བ་ནི་ཉིང་མཚམས་སྦྱོར་བའི་ཚེ་ཁོ་ནར་རོ། །འོག་མའི་ཉོན་མོངས་པ་ཅན་གསུམ་མོ་ཞེས་བྱ་བ་ནི་ཉིང་མཚམས་སྦྱོར་བའི་ཚེའོ། །སློབ་པའི་མཇུག་ཐོགས་སུ་ནི་དྲུག་སྟེ་ཁམས་གསུམ་པའི་སྦྱོར་བ་ལས་བྱུང་བ་རྣམས་དང༌། འདོད་པར་གཏོགས་པའི་སྐྱེ་གནས་ཐོབ་པ་ནི་ལྡང་བའི་ཚེའོ། །སློབ་པ་ནི་རྒྱུན་ལ་བལྟོས་ནས་སོ། །མི་སློབ་པ་ནི་རྡོ་རྗེ་ལྟ་བུའི་ཏིང་ངེ་འཛིན་གྱི་མཇུག་ཐོགས་ཀྱི་ཟད་པ་ཤེས་པ་ལྟ་བུའོ། །སྦྱོར་བ་ལས་བྱུང་བ་གསུམ་ཞེས་བྱ་བ་ནི་ཁམས་གསུམ་པའོ། །སློབ་པ་ལས་སོ་ཞེས་བྱ་བ་ནི་རྒྱུན་ལ་བལྟོས་ནས་སོ། །མི་སློབ་བའི་མཇུག་ཐོགས་སུ་ནི་ལྔ་སྟེ་ཞེས་བྱ་བ་ལ་ཁམས་གསུམ་པའི་སྦྱོར་བ་ལས་བྱུང་བ་རྣམས་དང༌། འདོད་བར་གཏོགས་པའི་སྐྱེས་ནས་ཐོབ་པ་ནི་ལྡང་བའི་ཚེའོ། །མི་སློབ་པ་ནི་རྒྱུན་ལ་བལྟོས་པའོ། །སྦྱོར་བ་ལས་བྱུང་བ་གསུམ་ཞེས་བྱ་བ་ནི་ཁམས་གསུམ་པའོ། །སློབ་པ་ལས་ནི་རྡོ་རྗེ་ལྟ་བུའི་ཏིང་ངེ་འཛིན་གྱི་མཇུག་ཐོགས་སུ་ཟད་པ་ཤེས་པ་ལྟ་བུའོ། །མི་སློབ་པ་ནི་ཟད་པ་ཤེས་པའི་མཇུག་ཐོགས་སུ་མི་སྐྱེ་བ་ཤེས་པ་ལྟ་བུའོ། །གལ་ཏེ་མི་སློབ་པའི་ལས་སློབ་པ་མི་འབྱུང་ན། འོ་ན་ཇི་ལྟར་ན་མི་སློབ་པ་ལས་ཡོངས་སུ་ཉམས་པ་སློབ་པ་ཡིན་ཞེ་ན། འདི་ལྟར་ཡོངས་སུ་ཉམས་པ་མི་སློབ་པའི་ཏིང་ངེ་འཛིན་ལས་ཡོངས་སུ་ཉམས་བར་མི་འགྱུར་ཏེ། ཏིང་ངེ་འཛིན་ལ་གནས་པ་ལས་
ཡོངས་སུ་ཉམས་པ་མེད་པའི་ཕྱིར་རོ། །དེ་དག་ནི་སྤྱོད་ལམ་དང་བཟོའི་མངོན་པར་འདུ་བྱ་བ་ལ་ཞུགས་པའི་ཕྱིར་དང༌། སྟོབས་ཆུང་བའི་ཕྱིར་དང༌། མངོན་པར་འདུ་བྱ་བ་མེད་པར་འཇུག་པའི་ཕྱིར་ཞེས་བྱ་བ་ལ། སྤྱོད་ལམ་པ་ནི་འགྲོ་བ་ལ་སོགས་པ་མངོན་བར་འདུ་བྱ་བ་ལ་ཞུགས་པ་ཡིན་ལ། བཟོའི་གནས་པ་ནི་འདི་ནི་འདི་ལྟར་བྱའོ་སྙམ་དུ་བཟོ་མངོན་པར་འདུ་བྱ་བ་ལ་ཞུགས་ཏེ། དེའི་ཕྱིར་སྤྱོད་ལམ་དང་བཟོའི་མངོན་པར་འདུ་བྱ་བ་ལྷུར་བྱེད་པ་ཉིད་ཀྱིས་དེ་དག་ལ་མངོན་པར་དགའ་བའི་ཕྱིར་སྦྱོར་བ་ལས་བྱུང་བ་འདྲེན་པར་མི་ནུས་སོ། །རྣམ་པར་སྨིན་པ་ལས་སྐྱེས་པ་ནི་སྔོན་གྱི་ལས་ཀྱིས་འཕངས་པའི་ཕྱིར་རྩོལ་བ་མེད་པར་འཇུག་པས་སྟོབས་ཆུང་བ་དང་མངོན་པར་འདུ་བྱ་བ་མེད་པར་འཇུག་བ་ཞེས་བྱ་སྟེ། དེས་ན་སྦྱོར་བ་ལས་བྱུང་བ་འདྲེན་པར་མི་ནུས་སོ། །སྤྱོད་ལམ་པ་དང་བཟོའི་གནས་པ་གཉིས་ནི་ལུང་དུ་མ་བསྟན་པ་ཉིད་དུ་མཚུངས་ཀྱང་རྣམ་པར་སྨིན་པ་ལས་སྐྱེས་པ་ལས་སྟོབས་ཆེ་སྟེ་མངོན་པར་འདུ་བྱེད་པ་ཅན་ཡིན་པའི་ཕྱིར་རོ། །སྦྱོར་བ་ལས་བྱུང་བའི་རྗེས་སུ་མཐུན་པ་མ་ཡིན་ནོ་ཞེས་བྱ་བ་ནི་དེ་འདྲེན་པར་མི་ནུས་སོ་ཞེས་བྱ་བའི་ཐ་ཚིག་གོ །འབྱུང་བའི་སེམས་ནི་མངོན་པར་འདུ་བྱ་བ་མེད་པར་འཇུག་བས་ཞེས་བྱ་བ་ལ། འབྱུང་བའི་སེམས་ནི་སྦྱོར་བ་ལས་བྱུང་བའི་སེམས་རྒྱུན་ཆད་པའི་སེམས་ཏེ། དེ་ནི་མངོན་པར་འདུ་བྱ་བ་མེད་པར་འཇུག་པ་ཡིན་པ་རྒྱུན་ཆད་པ་དང་རྗེས་སུ་མཐུན་པ་ཡིན་པའི་ཕྱིར། སྦྱོར་བ་ལས་བྱུང་བའི་མཇུག་ཐོགས་སུ་འབྱུང་བར་མི་འགལ་ལོ། །དེ་ལྟ་ན་འོ་ན་ཉོན་མོངས་པ་ཅན་དག་ལས་ཀྱང་ཞེས་བྱ་བ་རྒྱས་པར་འབྱུང་བ་ལ། གལ་ཏེ་སྦྱོར་བ་ལས་བྱུང་བའི་རྗེས་སུ་མི་མཐུན་པའི་ཕྱིར་སྤྱོད་ལམ་པ་ལ་སོགས་པ་དག་ལས་མི་འབྱུང་ན། དེ་ལྟན་འོ་ན་ནི་ཡུལ་མངོན་པར་འདོད་པ་ལྷུར་ལེན་པ་ཉིད་ཀྱིས་མི་མཐུན་པའི་ཕྱིར་དང༌། སྟོབས་ཆུང་བའི་ཕྱིར་ཉོན་མོངས་པ་ཅན་དག་ལས་ཀྱང་སྦྱོར་བ་ལས་བྱུང་བ་འབྱུང་བར་མི་འགྱུར་ཏེ། ཉོན་མོངས་པ་ཅན་གྱི་ཆོས་ནི་དགེ་བའི་ཆོས་ཀྱི་རྗེས་སུ་མཐུན་པར་མི་རུང་ངོ༌། །འོན་ཀྱང་ཞེས་བྱ་བ་ནི་དེའི་རྗེས་སུ་མི་མཐུན་པ་ཡིན་མོད་ཀྱི་ཞེས་བྱ་བའོ། །ཉོན་མོངས་པ་ཀུན་ཏུ་འབྱུང་བས་ཞེས་བྱ་བ་རྒྱས་པར་འབྱུང་བ་ལ། ཉོན་མོངས་པ་ཀུན་ཏུ་འབྱུང་བར་ཡོངས་སུ་ཤེས་
པ་ཉིད་ཆོས་ལ་ངེས་པར་སེམས་པའི་བཟོད་པ་ལ་སོགས་པའི་རྣམ་པར་ཤེས་པ་ཡིན་ལ། དེ་ཡང་སྦྱོར་བ་ལས་བྱུང་བ་ཡིན་པས་ཉོན་མོངས་པ་ཅན་གྱི་མཇུག་ཐོགས་སུ་འབྱུང་བར་རིགས་སོ། །ཉོན་མོངས་པ་ཅན་ནི་སྟོབས་ཆུང་བ་ཡང་མ་ཡིན་ཏེ། ཐོག་མ་མེད་པའི་དུས་ནས་གོམས་པའི་ཕྱིར་རོ། །དེའི་ཕྱིར་དེ་ཉོན་མོངས་པ་ཅན་གྱི་མཇུག་ཐོགས་སུ་འབྱུང་བར་མི་འགལ་ལོ། །མངོན་པར་འདུ་བྱ་བ་མེད་པར་འབྱུང་བའི་ཕྱིར་ཞེས་བྱ་བ་འབྱུང་ངོ༌། །ཇི་ལྟར་མངོན་པར་འདུ་བྱ་བ་མེད་པར་འབྱུང་ཞེ་ན། སྦྱོར་བ་ལ་མི་བལྟོས་པའི་ཕྱིར་རོ། །འོ་ན་ཇི་ལྟར་དེ་གསལ་བ་ཉིད་ཡིན་ཞེ་ན། ལས་སུ་རུང་བའི་ཕྱིར་ཏེ་དེ་ནི་དགེ་བའི་རྩ་བ་ཐམས་ཅད་ཀྱི་ས་བོན་ཡིན་པའི་ཕྱིར་རོ། །གསལ་བའི་ཕྱིར་སྐྱབས་བྱེད་པར་ནུས་པས་གཟུགས་ན་སྤྱོད་པའི་ཉོན་མོངས་པ་ཅན་གྱི་མཇུག་ཐོགས་སུ་ནི་འདོད་པ་ན་སྤྱོད་བའི་སྐྱེས་ནས་ཐོབ་པ་འབྱུང་ངོ༌། །འདིའི་མཇུག་ཐོགས་སུ་ནི་འདིའོ། །འདི་ནི་འདིའི་མཇུག་ཐོགས་སུའོ། །ཞེས་སེམས་རྣམས་མཇུག་ཐོགས་ཉིད་དུ་འབྱུང་བ་བཤད་ལ། དེ་དག་ཀྱང་ཡིད་ལ་བྱེད་པའི་དབང་གིས་འབྱུང་བ་དེའི་ཕྱིར་ཡིད་ལ་བྱེད་པ་ནི་གསུམ་སྟེ་ཞེས་ཡིད་ལ་བྱེད་པ་ཉེ་བར་བཀོད་དོ། །རང་གི་མཚན་ཉིད་ཡིད་ལ་བྱེད་པ་ནི་གང་གིས་དངོས་པོ་རྣམས་ཀྱི་རང་གི་མཚན་ཉིད་ཡིད་ལ་བྱེད་པ་སྟེ། གཟུགས་ནི་གནོད་པར་བྱར་རུང་བའི་མཚན་ཉིད་ཅན་ཚོར་བ་ནི་ཉམས་སུ་མྱོང་བའི་མཚན་ཉིད་ཅན་ཞེས་བྱ་བ་ནས་རྣམ་པར་ཤེས་པ་ནི་རྣམ་པར་རིགས་པའི་མཚན་ཉིད་ཅན་ནོ་སྙམ་པ་ལ་སོགས་པའི་བར་རོ། །སྤྱིའི་མཚན་ཉིད་ཡིད་ལ་བྱེད་པ་ནི་གང་གིས་སྤྱིའི་མཚན་ཉིད་ཡིད་ལ་བྱེད་པ་སྟེ། དེ་ནི་རྣམ་པ་བཅུ་དྲུག་དང་ལྡན་ནོ། །མི་རྟག་པ་ཉིད་ལ་སོགས་པ་རྣམས་སྤྱིའི་མཚན་ཉིད་ཡིན་པའི་ཕྱིར་དེའི་རྣམ་པ་ནི་སྤྱིའི་རྣམ་པ་སྟེ། རྣམ་པ་བཅུ་དྲུག་པོ་དེ་དག་དང་ལྡན་པའི་ཡིད་ལ་བྱེད་པས་རབ་ཏུ་ཕྱེ་བའི་ཕྱིར་མོས་པ་ཡིད་ལ་བྱེད་པ་སྟ། དེ་ནི་གང་གིས་མི་སྡུག་པ་དང་ཚད་མེད་པ་ལ་སོགས་པ་དག་ལ་མོས་པ་ལས་བྱུང་བའི་དམིགས་པ་ཡིད་ལ་བྱེད་པའོ། །ཟད་པར་གྱི་སྐྱེ་མཆེད་ལ་སོགས་པ་དག་ལ་ཞེས་བྱ་བའི་སོགས་པའི་སྒྲས་ནི་རྫུ་འཕྲུལ་ལ་སོགས་པ་མངོན་པར་བསྒྲུབས་པའི་ཚེ་ཡང་བར་མོས་པ་ཡོངས་སུ་བཟུང་ངོ༌། །སེམས་མངོན་པར་འདུ་བྱེད་པའི་
དོན་གྱིས་ན་ཡིད་ལ་བྱེད་པའོ། །དེ་ལྟར་ན་ཞེས་བྱ་བ་ནི་གལ་ཏེ་ཡིད་ལ་བྱེད་པ་རྣམ་པ་གསུམ་གྱི་མཇུག་ཐོགས་སུ་འཕགས་པའི་ལམ་མངོན་དུ་བྱེད་ན་སྟེ། དེའི་ཕྱིར་མི་སྡུག་པ་དང་ལྷན་ཅིག་པའི་ཞེས་བྱ་བ་རྒྱས་བར་འབྱུང་སྟེ། རྒྱུན་གྱི་བར་དང་བཅས་པ་དང༌། བར་མེད་པར་འདྲེན་པའི་ཕྱིར་མི་སྡུག་པ་དང་ལྷན་ཅིག་པ་ཞེས་བྱའི་སེམས་གཅིག་ལ་ནི་མ་ཡིན་ཏེ་མི་སྲིད་པའི་ཕྱིར་རོ། །དྲན་པ་ཡང་དག་བྱང་ཆུབ་ཀྱི་ཡན་ལག་ནི་འཕགས་པའི་ལམ་ཡིན་ལ། དེ་ཡང་མོས་པ་ཡིད་ལ་བྱེད་པའི་མཇུག་ཐོགས་སུ་འབྱུང་ཞིང༌། རང་གི་མཚན་ཉིད་ཡིད་ལ་བྱེད་པའི་མཇུག་ཐོགས་སུ་ཡང་འབྱུང་ངོ་ཞེས་དོན་གྱིས་བཤད་པ་ཡིན་ནོ། །དེ་ལྟར་ན་ཡིད་ལ་བྱེད་པ་གསུམ་འཕགས་པའི་ལམ་གྱི་སྦྱོར་བ་ཡིན་ནོ་ཞེས་བྱ་བར་ཤེས་པར་འགྱུར་རོ། །གཞན་དག་ན་རེ་སྤྱི་ཡིད་ལ་བྱེད་པ་ཁོ་ནའི་མཇུག་ཐོགས་སུ་ཞེས་བྱ་བ་རྒྱས་པར་འབྱུང་སྟེ། མི་རྟག་བ་ལ་སོགས་པ་མཐོང་བ་ཉིད་ན་འཕགས་པའི་ལམ་སྐྱེ་བའི་ཕྱིར་དང་གཞན་གཉིས་པོ་འཕགས་པའི་ལམ་དང་མི་འདྲ་བའི་ཕྱིར་རོ། །དེ་ལས་ནི་རྣམ་པ་གསུམ་སྟེ་ཞེས་བྱ་བ་ལ་ཐམས་ཅད་ཀྱིས་ལྡང་བར་མི་འགལ་བས་འདིར་ངེས་པ་མ་བྱས་སོ། །གལ་ཏེ་མོས་པ་ཡིད་ལ་བྱེད་པའི་མཇུག་ཐོགས་སུ་འཕགས་པའི་ལམ་ལ་སྙོམས་པར་མི་འཇུག་ནའོ་ན་མི་སྡུག་པ་དང་ལྷན་ཅིག་པའི་ཞེས་རྒྱ་ཆེར་འབྱུང་བ་འདི་ཇི་ལྟར་དྲང་ཞེ་ན། དེའི་ཕྱིར་མི་སྡུག་པས་སེམས་བཏུལ་ནས་ཞེས་བྱ་བ་སྨོས་ཏེ། དེའི་ཕྱིར་དེ་ལྟར་ན་མི་སྡུག་པ་ནི་སྤྱི་ཡིད་ལ་བྱེད་པའི་སྦྱོར་བ་ཡིན་པས་བརྒྱུད་པ་ལས་གསུངས་སོ་ཞེས་ཟེར་རོ། །གལ་ཏེ་མི་ལྕོགས་པ་མེད་པ་ལ་སོགས་པ་ས་གསུམ་ལ་བརྟེན་ནས་ཞེས་བྱ་བ་རྒྱས་པར་འབྱུང་བ་ལ། ས་གསུམ་ནི་མི་ལྕོགས་པ་མེད་པ་དང་བསམ་གཏན་དང་པོ་དང་བསམ་གཏན་ཁྱད་པར་ཅན་ནོ། །མཐོང་བའི་ལམས་གསུམ་ལ་བརྟེན་པའི་མཇུག་ཐོགས་སུ་ནི་འདོད་པ་ན་སྤྱོད་བའི་ཐོས་པ་དང༌། བསམ་པ་དང༌། སྐྱེས་ནས་ཐོབ་པ་སྤྱི་ཡིད་ལ་བྱེད་པ་རྣམ་པ་བཅུ་དྲུག་དང་ལྡན་པ་མངོན་དུ་བྱེད་པར་འགྱུར་ཏེ་དེ་ནི་ཉེ་བ་ཡིན་པའི་ཕྱིར་རོ། །གལ་ཏེ་བསམ་གཏན་གཉིས་བ་ལ་སོགས་པ་ལ་བརྟེན་ནས་ཞེས་བྱ་བ་ནི་བསམ་གཏན་གཉིས་པ་དང་གསུམ་པ་དང་བཞི་པ་ལ་བརྟེན་ནས་ངེས་པ་ལ་འཇུག་ན་མཐོང་བའི་ལམ་གྱི་མཇུག་ཐོགས་སུ་འདོད་པ་ན་སྤྱོད་པའི་སྤྱི་ཡིད་
ལ་བྱེད་པ་མི་ལྕོགས་པ་མེད་པ་དང༌། བསམ་གཏན་དང་པོ་དང་བསམ་གཏན་ཁྱད་པར་ཅན་གྱིས་བར་དུ་ཆོད་པའི་ཕྱིར་བསྐལ་བ་གོ་ཇི་ལྟར་མངོན་དུ་བྱེད་པར་འགྱུར་ཞེས་བྱའོ། །གལ་ཏེ་བསམ་གཏན་གཉིས་པ་ལ་སོགས་པའི་ས་བ་ཁོ་ན་མངོན་དུ་བྱེད་པར་འགྱུར་བས་ཉེས་པ་འདི་མེད་དོ་ཞེ་ན་དེའི་ཕྱིར་ངེས་པར་འབྱེད་པའི་ཆ་དང་མཐུན་པ་མ་གཏོགས་པར་དེ་དག་གིས་པ་ཡང་མ་ཐོབ་པོ་ཞེས་བྱ་བ་སྨོས་ཏེ། འདི་ལྟར་འབྲས་བུ་དང་པོའི་སྐད་ཅིག་མ་འདི་འཇིག་རྟེན་པ་བསྒོམ་པས་མི་འཐོབ་པོ། །ཡང་གང་ཞིག་མ་ཐོབ་པ་དེ་གང་ཞེ་ན། ཉམས་པ་དང༌། གནས་བ་དང༌། ཁྱད་པར་གྱི་ཆ་དང་མཐུན་པ་དང་རྣམ་པ་གསུམ་མོ། །དེ་ལྟ་ན་འོ་ན་བསམ་གཏན་གཉིས་པ་ལ་སོགས་པའི་ས་པའི་ངེས་པར་འབྱེད་པའི་ཆ་དང་མཐུན་པ་ཁོ་ན་མངོན་དུ་བྱེད་པར་འགྱུར་རོ། །དེའི་ཕྱིར་འཕགས་པ་ནི་ངེས་པར་འབྱེད་པའི་ཆ་དང་མཐུན་པ་མངོན་དུ་མཛད་པ་ཡང་མ་ཡིན་ཏེ་ཞེས་བྱ་བ་སྨོས་སོ། །དེ་ཉིད་ལ་རྒྱུ་སྨོས་པ་ནི་འབྲས་བུ་ཐོབ་ཟིན་པ་ཞེས་བྱ་བ་རྒྱས་པར་འབྱུང་བ་སྟེ། སྦྱོར་བའི་དགོས་པ་བསྒྲུབས་ཟིན་པའི་ཕྱིར་ལ། འཕགས་པའི་ལམ་གྱི་སྦྱོར་བ་ཡང་ངེས་པར་འབྱེད་པའི་ཆ་དང་མཐུན་པ་རྣམས་ཡིན་པས། དེའི་ཕྱིར་འབྲས་བུ་གནས་པ་ངེས་པར་འབྱེད་པའི་ཆ་དང་མཐུན་པ་མངོན་དུ་བྱེད་པ་མི་རིགས་སོ། །དེས་ནི་དེ་དང་འདྲ་བ་སྤྱི་ཡིད་ལ་བྱེད་པ་ཞེས་བྱ་བ་ལ། ངེས་པར་འབྱེད་པའི་ཆ་དང་མཐུན་པ་དང་འདྲ་བ་དེ་མངོན་དུ་བྱེད་པར་འགྱུར་རོ། །དེ་ཉིད་སྟོན་པ་ནི་འདུ་བྱེད་ཐམས་ཅད་མི་རྟག་པའོ་ཞེས་བྱ་བ་ལ་སོགས་པའོ། །དེ་སྐད་དུ་ནི་མི་བརྗོད་དོ། །ཞེས་བྱ་བ་ལ། སྦྱོར་བའི་སེམས་ལ་རག་ལས་པ་རྣམས་ཀྱང་འབྲས་བུའི་གོང་དུ་མངོན་དུ་འགྱུར་བ་མི་རུང་ངོ་ཞེས་གཞན་དག་ཟེར་རོ། །ངེས་པར་འབྱེད་པའི་ཆ་དང་མཐུན་པ་དག་མངོན་དུ་གྱུར་ན་སྤྱི་ཡིད་ལ་བྱེད་པ་གཞན་བསྒོམ་པ་མེད་པ་མ་ཡིན་ཏེ། གང་གི་ཕྱིར་ངེས་པར་འབྱེད་པའི་ཆ་དང་མཐུན་པ་མངོན་དུ་གྱུར་ན་རྣམ་པ་འདྲ་བ་ཁོ་ན་སྒོམ་པར་བྱེད་ལ། འདྲ་བ་ཡང་མཐོང་བའི་ལམ་ཁོ་ན་མ་འོངས་པ་ཉིད་ཀྱིས་བསྒོམས་ན་འདི་ནི་འདུ་བྱེད་ཀྱི་ཆོས་ཐམས་ཅད་ལ་དམིགས་པའི་ཕྱིར་མི་འདྲ་བ་ཡིན་ནོ། །དེའི་ཕྱིར་འཕགས་པའི་ལམ་གྱི་མཇུག་ཐོགས་སུ་ཡིད་ལ་བྱེད་པ་རྣམ་པ་གསུམ་མངོན་དུ་བྱེད་པ་
ཡིན་ནོ། །དེའི་ས་པ་ནི་སྐལ་བ་མཉམ་པའི་ས་པ་སྟེ་ཤིན་ཏུ་གོམས་པའི་ཕྱིར་དང་དགའ་བ་ཡིན་པའི་ཕྱིར་རོ། །འདོད་པ་ན་སྤྱོད་པ་ཡིན་ནོ་ཞེས་བྱ་བ་ནི་སྐྱེས་ནས་ཐོབ་པའི་དགེ་བ་སྟེ། སྦྱོར་བ་ལ་བལྟོས་པའི་ཕྱིར་རོ། །དེ་ནི་འདིར་མི་འདོད་དེ་འབད་བས་བསྒྲུབ་པ་ཉིད་ཀྱི་ཕྱིར་རོ། །གཞན་དག་ན་རེ་འགའ་ཞིག་ཐོས་པ་དང་བསམ་པ་ལས་བྱུང་བ་ཡང་ཡིན་ནོ་ཞེས་ཟེར་རོ། །ཅི་ཡང་མེད་པའི་སྐྱེ་མཆེད་ལ་བརྟེན་ནས་ཞེས་བྱ་བ་ལ། གལ་ཏེ་སྲིད་པའི་རྩེ་མོར་སྐྱེས་བ་ཡིན་ན་ནི་ཅི་ཡང་མེད་པའི་སྐྱེ་མཆེད་ཀྱི་ས་པའི་དགེ་བ་སྦྱོར་བ་ལས་བྱུང་བ་མངོན་དུ་བྱེད་དེ། དེ་ཡང་ཆུང་བའི་ཕྱིར་སྐྱེས་ནས་ཐོབ་པ་ནི་མ་ཡིན་ནོ་ཞེས་གཞན་དག་ཟེར་རོ། །དེ་བཞིན་དུ་སྲིད་པའི་རྩེ་མོར་ཡང་སྐྱེ་བའི་སྙོམས་པར་འཇུག་པའི་དབང་གིས་དེ་དག་ཁོ་ན་ཨནྱཱ་ས་མྲྀ་ཡ་ཏཱ་བྷྱཱཾ་མངོན་དུ་བྱེད་དོ། །དེ་ལས་གཞན་པའི་ས་རྣམས་སུ་ནི་རང་གི་ས་བ་ཁོ་ན་སྟེ། སྦྱོར་བ་གཞན་གྱིས་བསྒྲུབ་པར་བྱ་བའི་ཕྱིར་ས་གཞན་ནི་མ་ཡིན་ནོ། །དེའི་ཚེ་དེ་དག་གི་ཏིང་ངེ་འཛིན་ཁོ་ན་ཉེ་བར་གནས་པ་ཡིན་ནོ་ཞེས་བྱ་བ་སྨོས་ཏེ། ཏིང་ངེ་འཛིན་ཤིན་ཏུ་གོམས་པའི་ཕྱིར་དང༌། བསམ་པ་ཁ་ནང་དུ་བལྟས་ནས་འཇུག་པའི་ཕྱིར་དེ་དག་སེམས་པ་ན་ཏིང་ངེ་འཛིན་ཁོ་ན་ཉེ་བར་གནས་པ་ཡིན་ནོ། །ཡིད་ལ་བྱེད་པ་ལྔའི་མཇུག་ཐོགས་སུ་ཞེས་བྱ་བ་ལ། འདོད་པ་ན་སྤྱོད་པའི་ཐོས་པ་ལས་བྱུང་བ་དང༌། བསམ་པ་ལས་བྱུང་བ་དང༌། གཟུགས་ན་སྤྱོད་པའི་ཐོས་པ་ལས་བྱུང་བ་དང༌། བསྒོམ་པ་ལས་བྱུང་བ་དང༌། གཟུགས་མེད་པ་ན་སྤྱོད་པའི་བསྒོམ་པ་ལས་བྱུང་བ་ཉིད་ཀྱི་མཇུག་ཐོགས་སུ་ཡིན་གྱི་སྐྱེས་ནས་ཐོབ་པ་དག་གི་མཇུག་ཐོགས་སུ་མངོན་དུ་བྱ་བ་ནི་མ་ཡིན་ནོ། །འདི་ལ་རྒྱུ་ནི་སྦྱོར་བ་ལ་རག་ལུས་པའི་ཕྱིར་རོ་ཞེས་བྱ་བའོ། །བསམ་གཏན་དང་པོའི་ས་པའི་ནི་རྣམ་པར་ཤེས་པའི་ཚོགས་གསུམ་རྣམས་ལས་སོ། །ས་གོང་མ་རྣམས་སུ་སྐྱེས་པ་གལ་ཏེ་དེ་ལ་ཆགས་པ་དང་མ་བྲལ་ན་དགེ་བ་ཉོན་མོངས་པ་ཅན་དང་ལུང་དུ་མ་བསྟན་པ་ཡིད་ལ་བྱེད་པའི་མཇུག་ཐོགས་སུ་མངོན་དུ་བྱེད་དོ། །འདོད་ཆགས་དང་བྲལ་བ་ལས་གཞན་དུ་ཉོན་མོངས་པ་ཅན་ལས་སོ། །རྣམ་པར་ཤེས་པའི་ཚོགས་ཀྱི་མཇུག་ཐོགས་སུ་ཡིད་ལ་བྱེད་པ་ལ་སོགས་པ་དེ་དག་ཁོ་ནའོ། །ཅི་སྐད་ཅིག་མ་གཅིག་ལ་དྲུག་དང་དྲུག་དང་གཉིས་རྙེད་དམ་ཞེ་ན། དེ་ནི་དེ་ལྟ་མ་ཡིན་ཏེ།
རེ་ཞིག་འདོད་པ་ན་སྤྱོད་པའི་ཉོན་མོངས་པ་ཅན་གྱི་སེམས་མངོན་དུ་གྱུར་ན་ཁམས་སུ་སླར་ལོག་པ་དང༌། དགེ་བའི་རྩ་བ་ཉིང་མཚམས་སྦྱོར་བ་དང་ཡོངས་སུ་ཉམས་པ་རྣམས་ཀྱི་ཚེ་ཅི་རིགས་པར་ཡོངས་སུ་བགྲང་སྟེ་དྲུག་རྙེད་དོ། །ཐེ་ཚོམ་གྱིས་དགེ་བའི་རྩ་བ་ཉིང་མཚམས་སྦྱོར་བ་དང་ཞེས་བྱ་བ་ལ་ཐེ་ཚོམ་ནི་ཉོན་མོངས་པ་ཅན་ཡིན་པས་དེ་དང་མཚུངས་པར་ལྡན་པའི་སེམས་ཀྱང་ཉོན་མོངས་པ་ཅན་ཡིན་ནོ། །ཉོན་མོངས་པ་ཅན་ཡིན་ན་ཇི་ལྟར་དགེ་བའི་རྩ་བ་དག་མཚམས་སྦྱོར་ཞེ་ན་རྒྱུ་དང་འབྲས་བུ་ལ་སྐུར་བ་འདེབས་པའི་ལྟ་བ་ཡོངས་སུ་གཏོང་བ་ལས་སོ། །ཁམས་སུ་སླར་ལྡོག་པ་ལས་ཞེས་བྱ་བ་ལ་གང་གི་ཚེ་གཟུགས་དང་གཟུགས་མེད་པའི་ཁམས་ནས་ཤི་འཕོ་ས་ཏེ་འདོད་པའི་ཁམས་སུ་སྐྱེ་བ་དེའི་ཚེ། འདོད་པ་ན་སྤྱོད་པའི་དགེ་བ་སྐྱེས་ནས་ཐོབ་པ་རྙེད་དོ། །དེ་ལྟར་ཐེ་ཚོམ་དང་མཚུངས་པར་ལྡན་པ་དང༌། ཉིང་མཚམས་སྦྱོར་བའི་སེམས་ནི་ཉོན་མོངས་པ་ཅན་ཡིན་པའི་ཕྱིར་རྣམ་པ་གཉིས་ལས་དགེ་བའི་སེམས་རྙེད་དོ། །མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དག་དང་ཞེས་བྱ་བ་རྒྱས་པར་འབྱུང་བ་ལ། གང་གི་ཚེ་གཟུགས་ཀྱི་ཁམས་སམ་གཟུགས་མེད་པའི་ཁམས་ནས་ཤི་འཕོས་ནས་འདོད་པའི་ཁམས་སུ་སྐྱེ་བདེའི་ཚེ་ཉིང་མཚམས་སྦྱོར་བའི་སེམས་མི་དགེ་བའམ། བསྒྲིབས་པ་མངོན་དུ་འགྱུར་ན་འདོད་པ་ན་སྤྱོད་པའི་མི་དགེ་བ་དང་བསྒྲིབས་པའི་སེམས་རྙེད་དོ། །གཟུགས་ན་སྤྱོད་པ་ཉོན་མོངས་པ་ཅན་དང་ཞེས་བྱ་བ་ལ། གང་གི་ཚེ་གཟུགས་མེད་པའི་ཁམས་ནས་ཤི་འཕོས་ནས་འདོད་པའི་ཁམས་སུ་སྐྱེ་བ་དེའི་ཚེ་གཟུགས་ན་སྤྱོད་པའི་ཉོན་མོངས་པ་ཅན་དང་ཡང་ལྡན་པ་རྙེད་དོ། །ས་འོག་མར་སྐྱེས་པས་གོང་མ་པའི་ཉོན་མོངས་པ་དང་ལྡན་པས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དང་སྔ་ནས་ལྡན་པའི་ཕྱིར་ཡང་མི་བགྲང་ངོ༌། །ཡོངས་སུ་ཉམས་པ་ལས་ཞེས་བྱ་བ་ལ། འདོད་པའི་ཁམས་ཀྱི་འདོད་ཆགས་དང་བྲལ་བ་ལས་ཡོངས་སུ་ཉམས་པ་ནས། འདོད་པར་གཏོགས་པའི་མི་དགེ་བ་དང་བསྒྲིབས་པ་རྙེད་ལ། འདོད་པར་གཏོགས་པའི་ཀུན་ནས་དཀྲིས་པས་གཟུགས་ཀྱི་འདོད་ཆགས་དང་བྲལ་བ་ལས་ཡོངས་སུ་ཉམས་པ་ན་གཟུགས་སུ་གཏོགས་པའི་བསྒྲིབས་པ་ཡང་རྙེད་དེ། དེ་ལྟར་ན་ཡོངས་སུ་ཉམས་པ་དང་ཉིང་མཚམས་སྦྱོར་པ་
རྣམ་པ་གཉིས་ལས་འདོད་པར་གཏོགས་པའི་མི་དགེ་བ་དང༌། འདོད་པར་གཏོགས་པ་དང༌། གཟུགས་སུ་གཏོགས་པའི་བསྒྲིབས་ལ་ལུང་དུ་མ་བསྟན་པ་རྙེད་དོ། །ཡོངས་སུ་ཉམས་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་སློབ་པའོ་ཞེས་བྱ་བ་ལ། འདི་གཉིས་ནི་ཡོངས་སུ་ཉམས་པ་ཁོ་ན་ལས་རྙེད་ཀྱི་ཉིང་མཚམས་སྦྱོར་བ་ལས་ནི་མ་ཡིན་ནོ། །གཟུགས་མེད་པར་གཏོགས་པའི་ཀུན་ནས་དཀྲིས་བ་དགྲ་བཅོམ་པ་ལས་ཡོངས་སུ་ཉམས་པ་ལ་གཉིས་རྙེད་དོ། །སློབ་པ་ལ་གཟུགས་མེད་པ་ན་སྤྱོད་པའི་བསྒྲིབས་པ་དང་གཟུགས་ན་སྤྱོད་པ་ཡོངས་སུ་ཉམས་པ་ལ་གསུམ་རྙེད་དོ། །གཟུགས་ན་སྤྱོད་པའི་ཉོན་མོངས་པ་ཅན་ལྷག་བ་འདོད་པ་ན་སྤྱོད་པ་ཡོངས་སུ་ཉམས་པ་ལ་འདོད་པར་གཏོགས་པའི་ཉོན་མོངས་པ་ཅན་གཉིས་ལྷག་བོར་བཅུག་པས་ལྔ་རྙེད་དོ། །དེ་ལྟ་ན་འདི་དག་ནི་གང་དག་འདོད་པ་ན་སྤྱོད་པའི་ཉོན་མོངས་པ་ཅན་གྱི་སེམས་ལ་རྙེད་པ་དྲུག་ཡིན་ཏེ། འདོད་པ་ན་སྤྱོད་པ་དགེ་བ་དང་མི་དགེ་བ་བསྒྲིབས་ལ་ལུང་དུ་མ་བསྟན་པ་དང་གསུམ་དང༌། གཟུགས་དང་གཟུགས་མེད་བར་གཏོགས་པའི་བསྒྲིབས་བདག་དང་སློབ་པའོ། །གཟུགས་ན་སྤྱོད་པའི་ཉོན་མོངས་པ་ཅན་ལ་ཡང་དྲུག་རྙེད་དེ་ཞེས་བྱ་བ་རྒྱས་པར་འབྱུང་བ་ལ། གཟུགས་ན་སྤྱོད་པ་གསུམ་སྟེ། སྐྱེས་ན་ཐོབ་པའི་དགེ་བ་དང་བསྒྲིབས་ལ་ལུང་དུ་མ་བསྟན་པ་དང་སྤྲུལ་པའི་སེམས་སོ། །འདོད་པ་ན་སྤྱོད་པའི་ནི་མ་བསྒྲིབས་ལ་ལུང་དུ་མ་བསྟན་པའི་སྤྲུལ་བའི་སེམས་ཉིད་དོ། །རྙེད་པའི་དུས་དག་མང་བའི་ཕྱིར་དུས་གང་གི་ཚེ་ཡིན་པ་མི་ཤེས་པས། ཁམས་སུ་སླར་ལོག་པ་ལས་ཞེས་བྱ་བ་སྨོས་ཏེ། གང་གི་ཚེ་འདི་གཟུགས་མེད་པའི་ཁམས་ནས་ཤི་འཕོས་ནས་གཟུགས་ཀྱི་ཁམས་སུ་སྐྱེ་བ་དེའི་ཚེ་ཉིང་མཚམས་སྦྱོར་བའི་སེམས་མངོན་དུ་གྱུར་བ་ན་སེམས་བཞི་པོ་འདི་དག་རྙེད་དོ། །གཟུགས་མེད་པ་ན་སྤྱོད་པའི་ཉོན་མོངས་པ་ཅན་དང་ཞེས་བྱ་བ་ལ་གང་གི་ཚེ་གཟུགས་ན་སྤྱོད་པའི་ཀུན་ནས་དཀྲིས་པས་དགྲ་བཅོམ་བ་ཉིད་ལས་ཡོངས་སུ་ཉམས་པ་དེའི་ཚེ་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དང་སློབ་པ་རྙེད་དོ། །གལ་ཏེ་ཡང་གནས་སྐབས་དེར་གཟུགས་ན་སྤྱོད་པའི་ཉོན་མོངས་པ་ཅན་ཡང་རྙེད་མོད་ཀྱི་དེ་ནི་སྔར་བགྲངས་ཟིན་པ་ཉིད་ཀྱི་ཕྱིར་ཡང་
མི་བགྲང་ངོ༌། །འདི་དག་ནི་སེམས་དྲུག་ཡིན་ཏེ་གཟུགས་ན་སྤྱོད་པ་གསུམ་དང་འདོད་པ་ན་སྤྱོད་པ་གཅིག་དང་གཟུགས་མེད་པ་ན་སྤྱོད་པ་གཅིག་དང་སློབ་པའོ། །གཟུགས་མེད་པ་ན་སྤྱོད་པའི་ཉོན་མོངས་པ་ཅན་ལ་ནི་གཉིས་རྙེད་དོ་ཞེས་བྱ་བ་ལ་ཁམས་གསུམ་པ་ལ་སོགས་པ་དང་བྲལ་བ་ཁོ་ན་གཟུགས་མེད་པ་ན་སྤྱོད་པའི་ཉོན་མོངས་པ་ཅན་གྱི་སེམས་དང་མི་ལྡན་པས་དེ་ཉིད་གཟུགས་མེད་པར་གཏོགས་པའི་ཀུན་ནས་དཀྲིས་པས་དགྲ་བཅོམ་པ་ཉིད་ལས་ཡོངས་སུ་ཉམས་པ་ན་སློབ་པ་དང༌། གཟུགས་མེད་པ་ན་སྤྱོད་པའི་བསྒྲིབས་ལ་ལུང་དུ་མ་བསྟན་པ་རྙེད་དོ། །འདི་གཉིས་ནི་ཡོངས་སུ་ཉམས་པ་ཁོ་ན་ལས་རྙེད་ཀྱི་ཁམས་སུ་སླར་ལོག་པ་ལས་ནི་མ་ཡིན་ཏེ་དེའི་གོང་ན་ཁམས་གཞན་མེད་པའི་ཕྱིར་རོ། །གཟུགས་སྐྱེས་དགེ་ལ་གསུམ་དག་གོ །ཞེས་བྱ་བ་ལ། སྙོམས་པར་འཇུག་པ་ལས་ཞེས་བྱའོ། །གང་གི་ཚེ་འདིས་དང་པོར་བསམ་གཏན་གྱི་དངོས་གཞི་ཐོབ་པ་དེའི་ཚེ་གསུམ་རྙེད་དོ། །དགེ་བ་དེ་ཉིད་དང་ཞེས་བྱ་བ་ནི་གང་རྙེད་པས་གསུམ་རྙེད་པར་བརྗོད་པའོ། །འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་དག་གོ་ཞེས་བྱ་བ་ནི་སྤྲུལ་པ་དག་གོ །སློབ་པ་ལ་བཞི་ཞེས་བྱ་བ་ལ་གང་ཞིག་མི་ལྕོགས་པ་མེད་པ་ལ་བརྟེན་ནས་འཕགས་པའི་ལམ་གྱིས་རྣམ་པར་གྲོལ་བའི་ལམ་དགུ་པ་ལ་འདོད་པའི་ཁམས་ལས་འདོད་ཆགས་དང་བྲལ་ཞིང་བསམ་གཏན་དང་པོའི་ས་པའི་སེམས་རྙེད་པ་དེའི་ཚེ་དེས་བསམ་གཏན་གྱི་དངོས་གཞིའི་ས་པའི་སློབ་པ་སྔོན་མ་བྱུང་བ་ཁྱད་པར་དུ་འཕགས་པ་རྙེད་པས་སློབ་པ་རྙེད་པ་ཞེས་བརྗོད་དོ། །འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་དག་ནི། སྤྲུལ་པའི་སེམས་དག་ཁོ་ནའོ། །གཟུགས་མེད་པའི་དགེ་བའོ་ཞེས་བྱ་བ་ལ། ས་དྲུག་གི་འཕགས་པའི་ལམ་གྱིས་གཟུགས་ཀྱི་ཁམས་ལས་འདོད་ཆགས་དང་བྲལ་བ་ནི་རྣམ་པར་གྲོལ་བའི་ལམ་དགུ་པ་གང་ཡིན་པ་དེར་དེ་པའི་ཏིང་ངེ་འཛིན་ཐོབ་པ་ལས་གཟུགས་མེད་པ་ན་སྤྱོད་པའི་དགེ་བའི་སེམས་རྙེད་དོ། །འཕགས་པའི་ལམ་སྨོས་པ་ནི་སློབ་པའི་སེམས་ཉེ་བར་བླང་བར་བྱ་བའི་ཕྱིར་རོ། །འདོད་པའི་ཁམས་ལས་འདོད་ཆགས་དང་བྲལ་བ་ནི་དྲོ་བར་གྱུར་པའི་གནས་སྐབས་ཁོ་ནར་གཟུགས་ན་སྤྱོད་པའི་དགེ་བ་རྙེད་པ་ཉིད་ཡིན་པས་དེས་པ་ལ་འཇུག་བའི་གནས་སྐབས་སུ་མི་བགྲང་ངོ༌། །འདོད་པ་དང་གཟུགས་
ཀྱི་ཁམས་ཀྱི་འདོད་ཆགས་དང་བྲལ་བར་བྱེད་པ་ན་ཞེས་བྱ་བ་ལ། འདོད་པའི་ཁམས་ལས་འདོད་ཆགས་དང་བྲལ་བར་བྱེད་པ་ན་ནི་གསུམ་མོ། །གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་པ་ནི་གཟུགས་མེད་པར་གཏོགས་པའི་དགེ་བའོ། །ལྷག་མ་དེ་ཞེས་བྱ་བ་འབྱུང་ངོ༌། །གཞན་དག་ན་རེ། གཟུགས་སྐྱེས་དགེ་ལ་གཞན་དག་གོ །ཞེས་བྱ་བ་སྲིད་པའི་ཕྱིར་བརྗོད་པ་སྟེ། གཟུགས་སུ་གཏོགས་པའི་དགེ་བ་འགའ་ཞིག་ཉིད་ཐོབ་པའོ། །དེ་བཞིན་དུ་སློབ་པ་ལ་ཡང་དེ་སྲིད་པའི་ཕྱིར་བཞི་རྣམས་སོ་ཞེས་བརྗོད་པར་བྱའོ་ཞེ་ན་བརྗོད་པར་མི་བྱ་སྟེ། སློབ་པས་ནི་སྔར་ཉིད་དུ་ཐོབ་ཟིན་པའི་ཕྱིར་རོ། །དགེ་བ་ཡང་སྔར་ཉིད་དུ་ཐོབ་ཟིན་པ་མ་ཡིན་ནམ་ཞེ་ན། ཐོབ་ཟིན་པ་མ་ཡིན་ཏེ། བསམ་གཏན་གྱི་དངོས་གཞིའི་ས་པའི་འཆད་པར་འདོད་པའི་ཕྱིར་རོ། །སློབ་པ་ལ་ནི་དེ་ལྟར་མི་འགྱུར་རོ། །སློབ་པ་ལ་བཞི་རྣམས་སོ་ཞེས་ངེས་པ་ཁོ་ནར་བརྗོད་པར་བྱའོ། །འགའ་ཞིག་གིས་ནི་གཟུགས་ལ་འདོད་ཆགས་དང་མ་བྲལ་བ་ཁོ་ནར་གཟུགས་མེད་པ་ན་སྤྱོད་པའི་དགེ་བའི་སེམས་རྙེད་དོ། །དེ་དག་ཐམས་ཅད་ཀྱང་སོ་སོར་བརྗོད་དེ་སློབ་པ་འགའ་ཞིག་གིས་རྙེད་པ་དེ་བཞིན་དུ་གཟུགས་ན་སྤྱོད་པའི་དགེ་བ་ཡང་དེ་ལ་སྲིད་པས་ལྔ་རྣམས་སོ་ཞེས་བརྗོད་པར་བྱའོ་ཞེ་ན་བརྗོད་པར་མི་བྱ་སྟེ་སྔར་ཉིད་དུ་དེ་ཐོབ་ཟིན་པའི་ཕྱིར་རོ། །སློབ་པ་ཡང་སྔར་ཉིད་དུ་ཐོབ་ཟིན་པ་མ་ཡིན་ནམ་ཞེ་ན་དེའི་ལྷག་མར་བྱས་པ་ཞེས་འབྱུང་ངོ༌། །ལྷག་མ་ཡང་གང་ཞིག་ཅེ་ན། ཁམས་གསུམ་གྱིས་མ་བསྒྲིབས་ལ་ལུང་དུ་མ་བསྟན་པ་དང༌། འདོད་པར་གཏོགས་པ་དང༌། གཟུགས་མེད་པར་གཏོགས་པའི་དགེ་བ་དང་མི་སློབ་པའོ། །དེ་ལ་འདོད་པར་གཏོགས་པའི་སེམས་མངོན་དུ་གྱུར་ན་འདོད་པར་གཏོགས་པའི་དགེ་བ་ཁོ་ན་རྙེད་ཀྱི། གཞན་མི་རྙེད་པའི་བར་དུ་ཡད་དེ་དང་འདྲའོ། །འདི་ལྟར་ཉོན་མོངས་པ་ཅན་གྱི་སེམས་ནི་ཡོངས་སུ་ཉམས་པ་དང་ཉིང་མཚམས་སྦྱོར་བ་དག་གི་ཚེ་རྙེད་ན། སེམས་འདི་དག་ནི་ཡོངས་སུ་ཉམས་པ་
ཉིང་མཚམས་སྦྱོར་བ་དག་གི་ཚེ་མི་སྲིད་དོ། །རྣམ་པར་སྨིན་པ་ལས་སྐྱེས་པའི་ཐོབ་པ་ཡང་སྔོན་གྱི་ལས་ཀྱིས་འཕངས་པས་ལྷན་ཅིག་སྐྱེས་པ་སྟེ། སེམས་ཀྱི་མཇུག་ཐོགས་སུ་སྟོབས་ཀྱིས་ཐོབ་པ་མ་ཡིན་ནོ། །བཟོའི་གནས་པ་དང་སྤྱོད་ལམ་པའི་ཐོབ་པ་ཡང་ཁ་ཅིག་ལྷན་ཅིག་སྐྱེས་པའོ། །ཅུང་ཟད་གོམས་པའི་ཁྱད་པར་ལས་ཐོབ་ཟིན་རྙེད་པ་སྟེ། དེའི་ཐོབ་པ་སེམས་ཀྱི་མཇུག་ཐོགས་ལ་བལྟོས་པ་མ་ཡིན་ནོ། །དེ་བཞིན་དུ་གཞན་དག་ལ་ཡང་ཇི་ལྟར་རིགས་པར་བརྗོད་པར་བྱའོ། །གཞན་དག་ན་རེ་སློབ་པ་ལ་ཡང་བཞི་རྙེད་པ་ཞེས་བྱ་བ་མི་རུང་སྟེ། གང་གི་ཕྱིར་ཁམས་གསུམ་པའི་དགེ་བའི་རྣམས་དང་ཟད་པར་ཤེས་པ་མ་འོངས་པ་རྣམས་བསྒོམ་པར་བྱ་སྟེ། སྔར་ཐོབ་ཟིན་པ་ཡོད་པ་མ་ཡིན་ནོ། །གང་གི་ཕྱིར་མ་འོངས་པ་བསྒོམ་པ་ཡོད་པས་གང་གི་ཚེ་གཟུགས་ན་སྤྱོད་པ་ལ་ཡང་སློབ་པའི་དགེ་བ་རྙེད་དོ་ཞེ་ན། དེ་ལ་དེ་ཁོ་ན་ཉིད་དོ་ཞེས་བརྗོད་པར་མི་བྱ་སྟེ། གཟུགས་ན་སྤྱོད་པ་ལ་ཡང་སློབ་པ་ལ་གསུམ་དང་བཞི་སྲིད་པ་ཁོ་ན་སྐྱེའོ་ཞེས་འདི་བསམ་པར་བྱའོ། །ཁྱད་པར་མེད་པར་ཞེས་བྱ་བ་ལ། ཁམས་ཀྱི་དབྱེ་བས་ཉོན་མོངས་པ་ཅན་དབྱེ་བ་ཁས་མ་བླངས་པར་ཉོན་མོངས་པ་ཅན་གྱི་སེམས་ལ་དགུ་རྙེད་དོ་ཞེས་ཟེར་རོ། །ཉིང་མཚམས་སྦྱོར་བའི་ཚེ་འདོད་པ་ན་སྤྱོད་པ་བཞི་པོ་དགེ་བ་དང༌། མི་དགེ་བ་དང༌། བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་དང། ཉིང་མཚམས་སྦྱོར་བའི་ཚེ་གཟུགས་ན་སྤྱོད་པ་གསུམ་པོ་དགེ་བ་དང༌། བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་ཁོ་ནའོ། །ཁམས་ཀྱི་ཁྱད་པར་ལས་སེམས་རྣམ་པར་གཞག་གི་སར་སླར་ལོག་བ་ལས་བརྩམས་པ་མ་ཡིན་ནོ་ཞེས་གྲག་གོ །དེ་ཉིད་ཀྱི་ཕྱིར་གཟུགས་མེད་པ་ན་སྤྱོད་པའི་དགེ་བའི་གོ་སྐབས་མེད་དེ་དེའི་ས་པའི་ཉོན་མོངས་པ་ཅན་གྱི་སེམས་བསྒྲིབས་ལ་ལུང་དུ་མ་བསྟན་པའོ་ཞེས་པ་དེ་ལྟར་མི་རུང་སྟེ་གཞན་དུ་ན་བཅུ་པོ་རྣམས་ཞེས་འདོན་ཏོ་ཞེས་ཟེར་རོ། །
ཁམས་ཐ་དད་པས་སེམས་རྣམ་པར་གཞག་པ་སྲིད་པས། གང་གི་ཚེ་གཟུགས་མེད་པ་ན་སྤྱོད་པའི་ཉོན་མོངས་པ་ཅན་གྱི་སེམས་སྐྱེ་བའི་ཚེ་རང་གི་ཁམས་པའི་དགེ་བ་ཉོན་མོངས་པ་ཅན་རྙེད་དོ། །དེ་སྨོས་པས་ཅིར་འགྱུར་ཞེ་ན། ཁམས་ཐ་དད་པའི་དབང་དུ་བྱས་པས་ཀྱང་ཟག་པ་མེད་པའི་སེམས་སྨོས་པ་བཞིན་ནོ། །ཡོངས་སུ་ཉམས་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དང་སློབ་པའོ། །དགེ་བའི་སེམས་ལས་དྲུག་ཡིན་ཏེ། །ཞེས་བྱ་བ་འདིར་ཡང་ཁམས་གསུམ་པ་ཁོ་ན་ཤེས་པར་བྱའོ། །དེ་ལ་དགེ་བའི་སེམས་ལ་ནི་དྲུག་སྟེ། འདོད་ཆགས་དང་བྲལ་བ་ཐོབ་པ་ལས་འདོད་པ་དང་གཟུགས་ན་སྤྱོད་པའི་སྤྲུལ་པའི་སེམས་དག་དང༌། དེ་པའི་ཏིང་ངེ་འཛིན་ཐོབ་པ་ལས་གཟུགས་དང་གཟུགས་མེད་བ་ན་སྤྱོད་པའི་དགེ་བ་དག་དང༌། ངེས་པ་ལ་འཇུག་པའི་ཚེ་སློབ་པ་དང༌། དགྲ་བཅོམ་པ་ཉིད་ཀྱི་འབྲས་བུ་ཐོབ་པའི་ཚེ་མི་སློབ་པ་སྟེ། སེམས་དྲུག་པོ་འདི་དག་ནི་དགེ་བའི་སེམས་ལ་རྙེད་དོ། །དགེ་བའི་སེམས་ལ་བདུན་པ་རྙེད། །ཅེས་བྱ་བ་འདིར་ཡང་ཁམས་གསུམ་པ་ཡང་སྲིད་དོ་ཞེས་བསྟན་པའི་ཕྱིར་རོ། །གཞན་དག་ན་རེ། གང་དུ་ཅིག་ཅར་དྲུག་རྙེད་པ་དེར་སློབ་དཔོན་གྱིས་སྨོས་པས་འདི་ལ་སྐྱོན་མེད་དོ། །ཇི་ལྟར་ཟད་པ་ཤེས་པ་ཐོབ་པ་ལས་ཁམས་གསུམ་པའི་དགེ་བ་འདོད་པ་དང་གཟུགས་ན་སྤྱོད་པ་དང༌། ལུང་དུ་མ་བསྟན་པ་དང༌། སྤྲུལ་པའི་སེམས་དང་ཟག་པ་མེད་པ་རྙེད་དོ། །དགེ་བའི་སེམས་ལ་གཞན་ཡང་འགའ་ཞིག་རྙེད་པ་སྲིད་དོ། །ཇི་ལྟར་འདི་ཉིད་ཀྱི་མཇུག་ཐོགས་མ་ཡིན་པར་བཤད་པ་དེ་ནི་ངེས་པར་མི་གཟུང་ངོ༌། །བསྡུ་བའི་ཚིགས་སུ་བཅད་པ་ཞེས་བྱ་བ་རྒྱས་པར་འབྱུང་བ་ལ། སྐྱེ་བའི་ཚེ་ཇི་ལྟར་རྙེད་ཅེ་ན། དགེ་བ་དང་ཉོན་མོངས་པ་ཅན་དང༌། མ་བསྒྲིབས་ལ་ལུང་དུ་མ་བསྟན་པ་རྣམས་ཏེ། ཁམས་སུ་སླར་ལོག་པ་ལས་དེ་དག་རྙེད་དོ། །སྙོམས་པར་འཇུག་པའི་ཚེ་ཇི་ལྟར་ཞེ་ན། གཟུགས་དང་གཟུགས་མེད་པ་ན་སྤྱོད་པའི་
དགེ་བ་དག་ནི་དེ་བའི་ཏིང་ངེ་འཛིན་ཐོབ་པ་ལས་སོ། །འདོད་ཆགས་དང་བྲལ་བའི་ཚེ་ཇི་ལྟར་ཞེ་ན། སློབ་པ་ལ་བཞི། འཕགས་པའི་ལམ་གྱིས་འདོད་པ་དང་གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་ན་སྤྲུལ་པའི་སེམས་ལ་སོགས་པ་རྣམས་རྙེད་པར་བཤད་པ་ལྟ་བུའོ། །ཡོངས་སུ་ཉམས་པའི་ཚེ། ཇི་ལྟར་ཞེ་ན། ཇི་སྐད་དུ། གཟུགས་མེད་པ་ན་སྤྱོད་པའི་ཉོན་མོངས་པ་ཅན་དང་སློབ་པའོ་ཞེས་བཤད་པ་ལྟ་བུའོ། །དགེ་བའི་རྩ་བ་ཉིང་མཚམས་སྦྱོར་བའི་ཚེ། ཇི་ལྟར་ཞེ་ན་ཐེ་ཚོམ་མམ། ཡང་དག་པའི་ལྟ་བས་དགེ་བའི་རྩ་བ་ཉིང་མཚམས་སྦྱོར་བ་ལ་དགེ་བ་ལྟ་བུའོ། །སེམས་དེ་ལྡན་པ་མིན་ལས་ཞེས་བྱ་བ་ནི། ཇི་སྐད་དུ་བཤད་པའི་སེམས་རྣམས་དང་མི་ལྡན་པ་ལས་རྙེད་ཅེས་བྱ་བའི་ཐ་ཚིག་གོ །སློབ་དཔོན་བཙུན་པ་གནས་བརྟན་བློ་གྲོས་བརྟན་པས་ཉེ་བར་སྦྱར་བ་མཛོད་ཀྱི་བཤད་པའི་དེ་ཁོ་ནའི་དོན་རྒྱ་ཆེར་འགྲེལ་པ་ལས་མཛོད་ཀྱི་གནས་གཉིས་པའོ།། །།འཇིག་རྟེན་མགོན་པོ་ལ་ཕྱག་འཚལ་ལོ། །ད་ནི་འདོད་པ་དང་གཟུགས་དང་གཟུགས་མེད་པའི་ཁམས་ཀྱི་ངེས་པས་སེམས་ལ་སོགས་པ་ཞེས་རྒྱ་ཆེར་འབྱུང་བ་ལ། སོགས་པ་ཞེས་བྱ་བའི་སྒྲས་ཁམས་དང་དབང་པོ་ལ་སོགས་པ་བསྡུ་སྟེ། དེ་ལ་སེམས་རྣམས་ནི། འདོད་ཡིད་དགེ་དང་མི་དགེ་དང༌། །བསྒྲིབས་པ་དང་ནི་ཞེས་བྱ་བ་ལ་སོགས་པས་འདོད་པའི་ཁམས་ལ་སོགས་པའི་ངེས་པས་བསྟན་ཏོ། །ཁམས་རྣམས་ཀྱང་འདོད་ཁམས་གཏོགས་པ་ཐམས་ཅད་དོ། །གཟུགས་ཀྱི་ཁམས་ན་བཅུ་བཞིའོ། །ཞེས་བྱ་བ་ལ་སོགས་པ་དང༌། དེ་བཞིན་དུ་དབང་པོ་རྣམས་ཀྱང༌། དྲི་མེད་མ་གཏོགས་འདོད་པར་གཏོགས། །ཕོ་མོའི་དབང་དང་སྡུག་བསྔལ་དག །མ་གཏོགས་གཟུགས་ཞེས་བྱ་བས་རྒྱས་པར་བཤད་ལ། ཐལ་མ་ཐག་ཏུ་ཡང་ཁམས་གསུམ་པའི་ཉོན་མོངས་པ་ཅན་ཞེས་བྱ་བ་ལ་སོགས་པ་བཤད་ན། འདོད་པ་དང་གཟུགས་དང་གཟུགས་
མེད་པ་དེ་དག་གི་མཚན་ཉིད་མ་བསྟན་པ་ཡིན་པས་འདྲི་བ་ནི། དེ་ལ་འདོད་པ་དང་གཟུགས་དང་གཟུགས་མེད་པའི་ཁམས་དེ་དག་གང་ཡིན་པ་བརྗོད་པར་བྱ་སྟེ། ཞེས་བྱ་བའོ། །རྣམ་གྲངས་མེད་པར་འཁོར་དང་བཅས་པ་བར་དང་བཅས་པའི་སྣོད་ནི་འགྲོ་བ་བཞི་བོ་རྣམས་ཀྱི་སྟེ། གཅིག་ལས་འདོད་པའི་ཁམས་བཅུ་གཅིག་སྟེ་དེ་ཡང་ལྷའི་རིས་དྲུག་གོ །དེའི་སྣོད་ཀྱི་འཇིག་རྟེན་ནི་འདོད་པའི་ཁམས་དང་ཐ་མི་དད་པས་གནས་བཅུ་སྟེ། གླིང་དབྱེ་བ་ལས་ཞེས་རྒྱ་ཆེར་འབྱུང་ངོ། །བསམ་གཏན་ས་ནི་གསུམ་པ་ཡིན། །ཞེས་བྱ་བ་རྒྱ་ཆེར་འབྱུང་བ་ལ། རེ་ཞིག་བསམ་གཏན་གསུམ་ནི་ཆུང་ངུ་དང་འབྲིང་དང་ཆེན་པོའི་དབྱེ་བས་རེ་རེ་ཞིང་ས་རྣམ་པ་གསུམ་ཡིན་ནོ། །བཞི་པ་ནི་ཆུང་དུ་དང་འབྲིང་དང་ཆེན་པོར་ཕྱེ་བའི་ཕྱིར་དང༌། ཆེན་པོ་དེ་ཡང་རྣམ་པ་ལྔར་ཕྱེ་བས་གནས་གཙང་སྐྱེ་བ་ལྔ་ཁོ་ན་ཞེས་རྣམ་པ་ལྔ་ཉིད་ཀྱི་ཕྱིར་ས་བརྒྱད་ཉིད་དོ། །གཞན་དག་ནི་གནས་བཅུ་བདུན་ནོ་ཞེས་ཟེར་རོ། །བསམ་གཏན་དང་པོས་གཉིས་དང་བཞི་པ་ན་འདུ་ཤེས་མེད་པའི་སེམས་ཅན་ལྷག་པས་ས་དགུ་སྟེ། དེ་རྣམས་གནས་བཅོ་བརྒྱད་དུ་བརྗོད་པར་བྱའོ། །ཚངས་ཆེན་པ་རྣམས་ནི་ཚངས་པ་འདུན་ན་འདོན་དགུ་པས་ཚེ་དང་ལུས་ཀྱི་ཚད་དང༌། རྟོག་པ་དང་ཚོར་བ་ལ་སོགས་པ་ཐ་དད་པའི་ཕྱིར་ཐ་དད་པ་ཉིད་དོ། །འབྲས་བུ་ཆེ་རྣམས་ལས་འདུ་ཤེས་མེད་པ་པའི་སེམས་ཅན་རྣམས་སོ་སོ་སྐྱེ་བོའི་སྐྱེ་བ་མཐའ་གཅིག་ཏུ་ཐ་དད་པའི་ཕྱིར་གཞན་གནས་བཅོ་བརྒྱད་མ་ཡིན་ནམ་ཞེ་ན། མ་ཡིན་ཏེ། དེའི་སྐྱེ་བ་ནི་འབྲས་བུ་ཆེ་བ་ལྡན་པའི་ལས་ཀྱི་འབྲས་བུ་ཡིན་པའི་ཕྱིར་རོ། །འོ་ན་འདིར་ཡང་ཚངས་པ་མདུན་ན་འདོན་དང་ལྡན་པའི་ལས་ཀྱི་འབྲས་བུ་ཉིད་ཀྱི་ཕྱིར་དེའི་སྐྱེ་བ་ལ་གཞན་མ་ཡིན་ནོ་ཞེ་ན། ཆེན་པོ་ནི་ཚངས་པ་མདུན་ན་འདོན་དང་ལྡན་པའི་ལས་ཚངས་ཆེན་གྱི་འབྲས་བུའོ། །དེ་ལ་འགའ་ཞིག་དེའི་སྐྱེ་བའི་རྒྱུར་འགྱུར་རོ་ཞེས་བྱ་བ་དེ་དག་དང་ཚེ་ལ་སོགས་པ་
མཚུངས་པས་ཡིན་ན། འོ་ན་གལ་ཏེ་ཚེ་ལ་སོགས་པ་ཐ་དད་ཀྱང་དེ་ལྟར་རྟོག་ན་འོད་ཆུང་ལ་སོགས་པ་རྣམས་ལ་ཡང་དེ་ལྟར་བརྟག་ནུས་པ་ཉིད་དུ་ཧ་ཅང་ཐལ་བར་འགྱུར་ཏེ། ལྷའི་རིས་དེ་ཡང་ཚེ་ལ་སོགས་པ་ཐ་དད་ཀྱང་ཚངས་པ་ཆེན་པོ་དང་གཅིག་མ་ཡིན་པའི་ཕྱིར་རིས་གཅིག་པ་ཉིད་མི་རུང་ངོ༌། །ཚངས་པ་མདུན་ན་འདོན་རྣམས་ཉིད་དེ་དག་དང་ལྷན་ཅིག་སེམས་ཅན་སྐལ་བ་མཉམ་པ་ཉིད་དོ། །དེ་ལྟར་འདིའོ་ད་ཆུང་ལ་སོགས་པ་རྣམས་དང་མཚུངས་པ་མ་ཡིན་ནོ། །བཙུན་པ་དཔལ་ལེན་ན་རེ། གཟུགས་ཀྱི་ཁམས་ན་གནས་བཅོ་བརྒྱད་དོ་ཞེས་ཟེར་རོ། །བསམ་གཏན་བསྒོམ་པ་ཆུང་ངུ་དང༌། འབྲིང་དང༌། ཆེན་པོ་ཉིད་ཀྱི་ཕྱིར་བསམ་གཏན་དང་པོ་ནི་རིས་གསུམ་ཉིད་དེ། ཚངས་ཆེན་ཉིད་ནི་དེ་དང་ལྷན་ཅིག་གྲོང་གི་མཐའ་ནས་དགོན་པ་བཞིན་དུ་མཆོག་ཏུ་གྱུར་པས་གནས་སོ། །འདུ་ཤེས་མེད་པའི་སྙོམས་པར་འཇུག་པ་པ་དང་བསམ་གཏན་བཞི་པའི་གནས་གཞན་བཞི་སྟེ། དེ་ལྟར་བཅོ་བརྒྱད་དུ་འགྱུར་རོ། །བྱེ་བྲག་ཏུ་སྨྲ་བ་རྣམས་ན་རེ། དེ་ཡང་དེ་ལྟར་མ་ཡིན་ཏེ། བསམ་གཏན་དང་པོའི་གནས་གཞན་བཞིར་ཐལ་བའི་ཕྱིར་རོ། །གང་ཞིག་བསམ་གཏན་བསྒོམ་པ་ཆུང་ངུ་ལ་སོགས་པའི་དབྱེ་བས་ཐ་དད་པའི་ཕྱིར་ས་རྣམ་པ་གསུམ་དུ་ཡོངས་སུ་བརྟག་པར་བྱའོ། །དེ་ལས་ཚངས་ཆེན་ཚེ་ལ་སོགས་པ་ཆེས་ཕུལ་དུ་བྱུང་བ་དང༌། རྒྱ་ཆེས་ཕུལ་དུ་བྱུང་བར་རྟོགས་པར་བྱའོ། །དེ་ལྟར་བཞི་པ་ནི་ཚངས་ཆེན་དུ་འགྱུར་རོ། །འབྲས་བུ་ཆེ་རྣམས་ལས་ཀྱང་འདུ་ཤེས་མེད་པའི་སེམས་ཅན་རྣམས་ཚེ་ལ་སོགས་པ་ཁྱད་པར་མེད་པའི་ཕྱིར་དང༌། དེའི་རྒྱུ་ལ་ཁྱད་པར་མེད་པས་དེ་དག་གི་བཞི་པ་ནི་བསམ་གཏན་བཞི་བ་ལས་གཞན་དུ་མི་རུང་སྟེ། ཚེ་ལ་སོགས་པའི་ཁྱད་པར་ཁས་བླངས་པ་ཉིད་དོ། །འོག་མིན་པ་རྣམས་ཀྱི་ཚེ་བསྐལ་པ་སྟོང་ཕྲག་སུམ་ཅུ་རྩ་གཉིས་སུ་ཐལ་བར་འགྱུར་རོ། །འདི་མཐར་ཐུག་ཡིན་པ་དེའི་ཕྱིར་བསམ་གཏན་བསྒོམ་པ་ཐ་དད་
པས་གནས་ཐ་དད་པ་མ་ཡིན་ནོ། །ཁ་ཆེ་བ་རྣམས་ན་རེ། འདི་ལྟར་ཚངས་ཆེན་གྱི་གནས་ནི་ཆེས་མཆོག་ཏུ་གྱུར་པའི་གནས་གཉིས་པ་ཞིག་སྟེ་གཟུགས་ཀྱི་ཁམས་གནས་བཅུ་དྲུག་བོ་ནའོ་ཞེས་ཟེར་རོ། །དེ་ལྟར་ན་མདོ་དང་མཐུན་པར་འགྱུར་ཏེ། རྣམ་པར་ཤེས་པའི་གནས་རྣམས་ཀྱི་མཐར་ཐུག་པ་སྨོས་པའི་ཕྱིར་འོད་གསལ་དང་དགེ་རྒྱས་དག་གོ །དེ་ལས་གཞན་ནི་ཚངས་ཆེན་ཞེས་བྱ་བ་དེ་ལྟ་བུ་ལ་སོགས་པ་འཆད་དོ། །གཟུགས་མེད་ཁམས་ན་གནས་མེད་དོ། །ཞེས་བྱ་བ་ལ། འདི་ལ་གནས་ཡོད་པ་མ་ཡིན་པས་ན་གནས་མེད་དོ། །གཟུགས་ཅན་ནི་འདས་པ་དང༌། མ་འོངས་པ་རྣམས་ཡུལ་ན་མི་གནས་པ་ཡིན་གྱི། ད་ལྟར་བ་ནི་མ་ཡིན་ནོ། །གཟུགས་ཅན་མ་ཡིན་པ་རྣམ་པར་རིག་བྱེད་མ་ཡིན་པ་དང་བཅས་པ་རྣམས་ནི་ཐོགས་པ་མེད་པའི་ཕྱིར་དུས་གསུམ་གར་ཡང་ཡུལ་ན་མི་གནས་པ་ཡིན་ལ། གཟུགས་མེད་པ་རྣམས་ཀྱང་གཟུགས་མེད་པ་མ་ཡིན་ཏེ། དེའི་ཕྱིར་ཡུལ་ན་མི་གནས་སོ། །དེ་ལྟ་ན་འོ་ན་རྣམ་པ་བཞི་ཡིན་ཞེ་ན། སྐྱེ་བ་ལས་ནི་རྣམ་པ་བཞི་ཞེས་བྱ་བ་སྨོས་སོ། །དེ་དག་ལ་ཡུལ་གྱིས་བྱས་པའི་བློ་ནི་མེད་དེ་ཞེས་བྱ་བ་ནི། ཡུལ་ན་མི་གནས་པའི་ཕྱིར་རོ། །ཏིང་ངེ་འཛིན་ཐོབ་པ་རྣམས་ཞེས་བྱ་བ་རྒྱས་པར་འབྱུང་ངོ༌། །གལ་ཏེ་དེ་ཉིད་དུ་སྐྱེ་ན་ཇི་ལྟར་ཡུལ་ན་མི་གནས་པ་ཡིན་ཞེ་ན། རྟེན་སྔ་མའི་སྒོ་ནས་དེ་ཉིད་དུ་སྐྱེའོ་ཞེས་བྱ་བར་གདགས་ཀྱི་ཡུལ་དེ་ན་གནས་པ་ཉིད་ཀྱིས་ནི་མ་ཡིན་ཏེ། གཟུགས་ཀྱི་ལུས་མེད་པའི་ཕྱིར་གཞན་དུ་ནི་མ་ཡིན་ནོ། །སྙམ་དུ་བསམས་པའོ། །འོ་ན་འཆི་འཕོ་བ་རྣམས་ཀྱི་སྲིད་པ་བར་མ་དེ་ཉིད་དུ་ཇི་ལྟར་འགྲུབ་ཅེ་ན། ཡུལ་དེའི་ལུས་ལ་ཆགས་པས་འཇུག་པ་རྙེད་པ་ལས་བག་ཡངས་སུ་རྒྱས་པས་དེ་ནས་འཆི་འཕོ་བ་རྣམས་ཀྱི་སྲིད་པ་བར་མ་ཡང་དེ་ཉིད་དུ་འགྲུབ་བས་སྐྱེ་བའི་བྱེ་བྲག་གིས་རྣམ་པ་བཞི་ཉིད་ཡིན་པར་རིགས་སོ། །གལ་ཏེ་བླ་
འོག་མེད་ན་དེ་དག་གི་གོ་རིམས་གང་གིས་བྱས་ཤེ་ན། འདོད་ཆགས་དང་བྲལ་བ་དང༌། སྙོམས་པར་འཇུག་པས་བྱས་པ་དང༌། ཚེ་དང་སྐྱེ་བས་བྱས་པ་ཞིག་སྟེ། དེ་དག་སྐྱེ་བའི་རྒྱུ་ནི་ཇི་ལྟར་འབྲས་བུ་མང་བའི་ཕྱིར་རོ། །ཇི་ལྟར་སེམས་ཅན་གཟུགས་ཅན་རྣམས་ཞེས་བྱ་བ་རྒྱས་པར་འབྱུང་བས། འདྲི་བའི་བསམ་པ་ནི་འདི་ན་འདོད་པ་དང་གཟུགས་ཀྱི་ཁམས་དག་གི་སེམས་དང་སེམས་ལས་བྱུང་བ་རྣམས་ནི་བདག་མེད་ན་གཟུགས་ལ་བརྟེན་ཏེ་འཇུག་པར་བརྟག་ན། གཟུགས་མེད་པ་དག་ན་ནི་གཟུགས་མེད་དེ། དེས་ན་དེ་ན་རྟེན་མེད་པའི་ཕྱིར་སེམས་དང་སེམས་ལས་བྱུང་བ་འཇུག་པར་མི་འགྱུར་རོ་སྙམ་པའོ། །དེའི་ཕྱིར་དེའི་རྟེན་ཁོང་དུ་ཆུད་པར་བྱ་བའི་ཕྱིར། དེར་ནི་རིས་དང་སྲོག་ལ་ཡང་ཞེས་བྱ་བ་ལ་སོགས་པ་སྨོས་སོ་ཞེས་བྱ་བའི་སྒྲ་ནི་ལྡན་པ་མ་ཡིན་པའི་འདུ་བྱེད་གཞན་བསྡུ་བར་བྱ་བའི་ཕྱིར་ཏེ། དེ་དག་ཀྱང་སོ་སོའི་སྐྱེ་བོ་ཉིད་དང༌། ཐོབ་པ་དང༌། སྐྱེ་བ་ལ་སོགས་པའོ། །དེ་དག་གི་རྟེན་ཉིད་ནི་སེམས་དང་སེམས་ལས་བྱུང་བའི་འཇུག་པའི་རྒྱུ་མཚན་གྱི་དངོས་པོར་ཉེ་བར་འགྲོ་བ་གང་ཡིན་པ་དེ་ཡིན་ཏེ། གང་ཞིག་ཡོད་པ་དང་མེད་པ་དག་ན་གང་ཞིག་འཇུག་པ་དང་ལྡོག་པ་དེ་ནི་དེའི་རྟེན་ཞེས་བྱའོ། །གང་ཞིག་འདིའི་མཚན་ཉིད་དེའི་རྣམ་པར་འགྱུར་བའི་རྗེས་སུ་བྱེད་པ་ཡང་དེའི་གནས་དང་རྟེན་ནོ། །གཟུགས་མེད་པ་རྣམས་སུ་ནི་ལྷན་ཅིག་སྐྱེས་པའི་ཕུང་པོ་གསུམ་རྟེན་ཡིན་ནོ་ཞེས་ཁ་ཅིག་ཟེར་རོ། །གལ་ཏེ་དེ་ལྟ་ན་ཅིའི་ཕྱིར་རིས་དང་སྲོག་ཏུ་བརྗོད་ཅེ་ན། མི་འཚོལ་བའི་དོན་དུའོ་ཟེར་རོ། །ས་མི་འདྲ་བའི་སེམས་མངོན་དུ་གྱུར་པ་ན་ཡང་དེའི་ས་པའི་རིས་དང་སྲོག་ཡོད་པའི་ཕྱིར་དེའི་ས་པ་ཁོ་ན་དང་འབྲེལ་པས་མི་འཆོལ་བར་འགྱུར་རོ། །གཞན་དུ་ན་རང་གིས་པའི་སྔོན་གྱི་ལས་ཀྱི་འབྲས་བུ་དང་འབྲེལ་པ་མེད་པའི་ཕྱིར་ས་གང་གི་ཕུང་པོ་བཞི་ཡིན་པ་དེ་ཁོ་ན་དེའི་སེམས་ཅན་དུ་འགྱུར་ཏེ། འདི་ནི་མི་འདོད་དོ། །སྲོག་གི་དབང་པོ་ནི་རྣམ་པར་སྨིན་པའི་ཕྱོགས་གཅིག་ཡིན་པའི་ཕྱིར་ལྷག་མ་རྣམ་པར་སྨིན་པ་དང་རྗེས་སུ་འབྲེལ་པའི་རྒྱུ་ནི་ཤིང་གི་རྩ་པ་བཞིན་ནོ། །དེ་བཞིན་དུ་སྲོག་སྔོན་མ་རྣམས་ནི་ཡལ་ག་
ལ་སོགས་པ་གནས་པ་བཞིན་དུ་བལྟའོ། །གཞན་དག་ན་རེ་རླུང་མེད་པའི་གནས་སུ་མར་མེའི་རྩེ་མོའི་ཚུལ་ལྟར་རྣམ་པར་ཤེས་པའི་འཇུག་པ་གནས་པ་ཉིད་དོ་ཞེས་ཟེར་རོ། །ཆོས་མངོན་པ་པ་ཞེས་སྨོས་པ་ནི་ལྡན་པ་མ་ཡིན་པའི་འདུ་བྱེད་རྫས་སུ་མེད་པའི་ཕྱིར་འདི་བསྟན་བཅོས་ལས་གསུངས་པ་ཉིད་དོ་ཞེས་ཤེས་པར་བྱ་བའི་ཕྱིར་རོ། །འོ་ན་ཅིའི་ཕྱིར་སེམས་ཅན་གཟུགས་ཅན་རྣམས་ཀྱི་ཞེས་བྱ་བ་རྒྱས་པར་འབྱུང་བ་ལ། ཡང་ཇི་ལྟར་གཟུགས་ཅན་དག་ན་རིས་དང་སྲོག་ལ་བརྟེན་ནས་འཇུག་པ་མ་ཡིན་པ་ཞེས་བྱ་བ་འདི་ཤེས་པར་བྱ་ཞེ་ན། ལུས་ཀྱི་དབང་པོ་མེད་ན་དེ་མེད་པའི་ཕྱིར་རོ། །གང་ཞིག་གང་གི་རྟེན་ཡིན་པ་དེ་ནི་ནམ་ཡང་དེའི་རྟེན་མ་ཡིན་པར་རིག་པ་ཡང་མ་ཡིན་ཏེ། དེའི་ཕྱིར་གཟུགས་རྣམས་ཀྱི་ཡང་དེ་གཉིས་ཁོ་ན་ལ་བརྟེན་ནས་འཇུག་པར་ཁས་བླང་བར་བྱ་དགོས་སོ། །སྟོབས་ཆུང་བའི་ཕྱིར་རོ། །ཞེས་བྱ་བ་ལ་སེམས་ཀྱི་རྒྱུད་ཞེས་ཚིག་ལྷག་མ་དང་སྦྱར་བར་བྱའོ། །དེ་སྟོབས་ཆུང་བ་ཉིད་ནི་སེམས་ཀྱི་རྒྱུད་གཟུགས་ཀྱི་འདུ་ཤེས་དང་མ་བྲལ་བའི་ཕྱིར་ཏེ། སྟོབས་ཆུང་བ་ནི་རྟེན་སྟོབས་དང་ལྡན་པ་ལ་མ་ལྟོས་པར་འབྱུང་བར་མི་ནུས་སོ། །དེའི་ཕྱིར་དེ་ནི་གཟུགས་ལ་བརྟེན་ནས་འཇུག་གོ །དེས་ན་རིས་དང་སྲོག་ཀྱང་བརྟེན་ནས་འཇུག་སྟེ། དེ་ཉིད་ཀྱང་སྟོབས་ཆུང་བའི་ཕྱིར་རོ། །དེས་ན་ཅིའི་ཕྱིར་སྟོབས་དང་ལྡན་པ་ཉིད་ཡིན་ཞེས་བྱ་བ་ནི་གཟུགས་མེད་པའི་སེམས་ཀྱི་རྒྱུད་དེ། དེའི་ཕྱིར་སྙོམས་པར་འཇུག་པའི་ཁྱད་པར་ལས་སྐྱེས་པའི་ཕྱིར་ཏེ་ཞེས་བྱ་བ་སྨོས་སོ། །སྙོམས་པར་འཇུག་པ་དེ་སྙོམས་པར་འཇུག་པ་གཞན་ལས་ཁྱད་པར་དུ་འཕགས་པ་བསྟན་པའི་ཕྱིར་སྙོམས་པར་འཇུག་པ་དེ་ནི་གཟུགས་དང་བྲལ་བའི་ཕྱིར་འདུ་ཤེས་ཅན་ཡིན་ནོ་ཞེས་བྱ་བར་སྨོས་ཏེ། གཟུགས་ཀྱི་འདུ་ཤེས་དང་བྲལ་ཞེས་བྱ་བའི་དོན་ཏོ། །དེའི་ཕྱིར་དེ་ན་གཟུགས་ལ་མི་ལྟོས་བར་རིས་དང་སྲོག་ལ་བརྟེན་ནས་འཇུག་སྟེ། དཔེར་ན་འདོད་ཆགས་དང་བྲལ་བའི་ཕྱིར་གཟུགས་ཀྱི་ཁམས་ན་ཁམ་གྱི་ཟས་མེད་པར་ལུས་གནས་ལ་དེའི་འདོད་ཆགས་མ་བྲལ་བའི་ཕྱིར་འདོད་པའི་ཁམས་ན་ནི་མ་ཡིན་པ་བཞིན་
ནོ། །འོ་ན་ནི་སྟོབས་དང་ལྡན་པས་ཏེ་སྙོམས་པར་འཇུག་པའི་ཁྱད་པར་གྱིས་བསྐྱེད་པ་དེ་ཁོ་ནས་རིས་དང་སྲོག་ལ་བལྟོས་པ་མེད་པར་འཇུག་པར་འགྱུར་གྱི་རྟེན་གཞན་གྱིས་ཅི་ཞིག་བྱ། ཇི་ལྟར་གཟུགས་ཅན་རྣམས་ཀྱི་ཞེས་བྱ་བ་རྒྱས་པར་འབྱུང་བ་ལ་ཇི་ལྟར་གཟུགས་རྣམས་ཀྱི་རིས་མཐུན་པ་དང་སྲོག་གི་དབང་པོ་གཟུགས་ལ་བརྟེན་ནས་ཡིན་པ་དེ་ལྟར་གཟུགས་ཅན་མ་ཡིན་པ་རྣམས་ཀྱི་དེ་དག་ཅི་ལ་བརྟེན་ནས་ཡིན་དེ་གཉིས་ཉིད་ཕན་ཚུན་དུའོ། །ཞེས་བྱ་བ་ལ། རིས་མཐུན་པ་ནི་སྲོག་གི་དབང་པོ་ལ་བརྟེན་ནས་འཇུག་ལ། སྲོག་གི་དབང་པོ་ཡང་རིས་མཐུན་པ་ལ་བརྟེན་ནས་སོ། །དེ་གཉིས་ཞེས་བྱ་བ་ནི་རིས་མཐུན་པ་དང་སྲོག་གི་དབང་པོ་གཉིས་སོ། །སྟོབས་ཆུང་བའི་ཕྱིར་རོ་ཞེས་བྱ་བ་ནི་དེ་དག་གི་རྒྱུ་གཟུགས་ཀྱི་འདུ་ཤེས་དང་མ་བྲལ་བའི་ཕྱིར་སྟོབས་ཆུང་བ་ཉིད་དོ། །དེ་ན་ཞེས་བྱ་བ་ནི་གཟུགས་མེད་པའི་ཁམས་ནའོ། །སྙོམས་པར་འཇུག་པའི་ཁྱད་པར་ལས་སྐྱེས་པའི་ཕྱིར་རོ་ཞེས་བྱ་བ་ནི་དེའི་རྒྱུ་གཟུགས་ཀྱི་འདུ་ཤེས་དང་བྲལ་བ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །དེ་ནི་སེམས་ཀྱི་རྒྱུད་ལ་ཡང་མཚུངས་སོ། །དེ་གང་ཞེ་ན་ཏིང་ངེ་འཛིན་གྱི་ཁྱད་པར་ལས་སྐྱེས་པའི་ཕྱིར་སྟོབས་དང་ལྡན་པ་ཉིད་དེ། དེའི་ཕྱིར་རྟེན་མེད་པ་ཁོ་ནར་སེམས་ཀྱི་རྒྱུད་འཇུག་པར་འགྱུར་རོ། །དེ་ཡང་ཕན་ཚུན་བརྟེན་ནས་འཇུག་གོ་ཞེས་གཞན་དག་ཟེར་རོ། །ཡང་ན་སྐད་ཅིག་མ་དང་པོ་ལ་བརྟེན་ནས་གཉིས་པ་ལ་འཇུག་པ་ལ་སོགས་པའོ། །སེམས་དང་སེམས་ལས་བྱུང་བ་དག་ལ་ཡང་ཞེས་བྱ་བ་ལ། གལ་ཏེ་མི་བརྟན་པའམ་འགོག་པ་ལ་བརྟེན་པར་མི་འདོད་ན། འོ་ན་ནི་དེ་དང་རིས་མཐུན་པ་དང་སྲོག་གི་དབང་པོ་གཉིས་ཕན་ཚུན་བརྟེན་ནས་འཇུག་པ་དེ་བཞིན་དུ་སེམས་ལ་བརྟེན་ནས་སེམས་ལས་བྱུང་བ་རྣམས་སམ་སེམས་ལས་བྱུང་བ་རྣམས་ལ་བརྟེན་ནས་སེམས་འཇུག་པ་དེ་ལས་གཞན་པའི་རྟེན་ཡོངས་སུ་རྟོག་པ་དགོས་པ་མེད་དོ། །གཞན་ཡང་སེམས་ཀྱི་རྒྱུན་གང་གིས་ཞེས་བྱ་བ་རྒྱས་པར་འབྱུང་བ་ལ། སེམས་ཀྱི་རྒྱུན་གྱིས་འཕེན་པའི་རྒྱུ་ནི་ལས་དང་ཉོན་མོངས་པའི་མཚན་ཉིད་དོ། །སྲེད་པ་དང་ཞེས་བྱ་བ་ནི་སྲེད་པ་དང་མི་ལྡན་ཞིང་བྲལ་བའོ། །
གང་ཞེ་ན་གཟུགས་ལ་སྟེ། སེམས་ཀྱི་རྒྱུད་དེ་ནི་གཟུགས་ལ་མི་ལྟོས་པར་འཇུག་གོ །རྒྱུ་དེ་ལ་རྒྱབ་ཀྱིས་ཕྱོགས་པའི་ཕྱིར་རོ་ཞེས་བྱ་བ་ནི་གཟུགས་ལ་རྒྱབ་ཀྱིས་ཕྱོགས་པའི་ཕྱིར་རོ། །གཞན་དག་ན་རེ་གཟུགས་ཅན་རྣམས་ལ་སེམས་དང་སེམས་ལས་བྱུང་བ་ཕྲ་བ་རྣམས་ལ་བརྟེན་ནས་འཇུག་གི་གཟུགས་ལ་བརྟེན་ནས་འཇུག་པ་མ་ཡིན་པས་གཟུགས་མེད་པ་རྣམས་སུ་ཕྲ་བའི་ཕྱིར་ཕྲ་བ་ཁོ་ན་ལ་རིས་མཐུན་པའི་སྲོག་གི་དབང་པོ་ལ་བརྟེན་ནས་འཇུག་གོ་ཞེས་ཟེར་རོ། །འདི་ཡང་ཕྲ་བ་དང་རགས་པ་ཉིད་དུ་ངེས་པར་གནས་པ་མ་ཡིན་པའི་ཕྱིར། བསམ་གཏན་དང་པོའི་ས་པ་དེ་དག་ཀྱང་ཕྲ་བས་རིས་དང་སྲོག་ལ་བརྟེན་ནས་འཇུག་པར་འགྱུར་རོ། །དེ་ལྟ་མ་ཡིན་ན་སྲིད་པའི་རྩེ་མོ་ཁོ་ན་ཕྲ་བས་དེ་དག་ཁོ་ན་རིས་དང་སྲོག་ལ་བརྟེན་ནས་འཇུག་པར་འགྱུར་གྱི་གཞན་ནི་མ་ཡིན་ནོ། །གཞན་དག་ན་རེ་འཕེན་པའི་རྒྱུའི་ནུས་པ་སེམས་ཀྱི་རྒྱུད་ལ་རྒྱུ་བ་ལ་དགེ་བ་དང་ཉོན་མོངས་ཅན་མི་བརྟེན་པར་འཇུག་པར་ཐལ་བར་འགྱུར་རོ་ཞེས་ཟེར་རོ། །ཡང་ཇི་ལྟར་གཟུགས་ཅན་རྣམས་ཀྱི་འཕེན་པའི་རྒྱུའི་ནུས་པ་ལས་སེམས་ཀྱི་རྒྱུད་དང་གཟུགས་ལྷན་ཅིག་འབྱུང་བའི་ཕྱིར་གཟུགས་ལ་བརྟེན་ནས་འཇུག་གོ ། དེ་བཞིན་དུ་སེམས་ཅན་གཟུགས་ཅན་རྣམས་འཕེན་པའི་རྒྱུའི་ནུས་པ་ལས་རིས་མཐུན་པ་དང་ལྷན་ཅིག་སྲོག་གི་དབང་པོ་འབྱུང་བ་གཟུགས་དང་སེམས་ཀྱི་རྒྱུད་ལ་མི་ལྟོས་པ་མ་ཡིན་པ་དེའི་ཕྱིར། རིས་མཐུན་པ་དང་སྲོག་ལ་བརྟེན་ནས་འཇུག་པར་འགྱུར་རོ། །ངེས་པར་གཟུགས་ཅན་རྣམས་བཞིན་དུ་གཟུགས་མེད་པ་རྣམས་ལ་ཡང་སེམས་ཀྱི་རྒྱུད་གནས་པ་ཁས་བླང་བར་བྱའོ། །འདོད་པ་དང་ལྡན་པའི་ཁམས་ནི་འདོད་པའི་ཁམས་སོ་ཞེས་བྱ་བ་ལ། གནས་ཉི་ཤུ་ནི་ཡུལ་གྱི་རྣམ་པ་གཙོ་བོ་ཡིན་པའི་ཕྱིར་འདོད་པའི་སྒྲས་བརྗོད་དོ། །དེ་དང་ལྡན་པ་ནི་དེ་དང་བྲལ་བ་མ་ཡིན་པ་སྟེ། དེའི་ཁོངས་སུ་འདུ་ཤེས་བྱ་བའི་དོན་ཏོ། །གནས་བཅུ་བདུན་ནི་གཟུགས་གཙོ་བོ་ཡིན་པའི་ཕྱིར་གཟུགས་ཀྱི་སྒྲས་བསྙད་དེ། དེ་དང་ལྡན་པའི་ཁམས་ནི་གཟུགས་ཀྱི་ཁམས་སོ། །རྡོ་རྗེའི་སོར་གདུབ་ལྟ་བུ་སྟེ། རྡོ་རྗེ་དང་ལྡན་པའི་གདུ་བུ་བཞིན་ནོ། །
གཟུགས་མེད་པའི་ཁམས་ན་གནས་མེད་པའི་ཕྱིར་གཟུགས་མེད་པའི་ངོ་བོ་ནི་གཟུགས་མེད་པ་ཞེས་སྨོས་ཏེ། དེ་ཡང་ཐོགས་པ་མེད་པ་ཉིད་དོ། །དེ་དང་ལྡན་པས་ན་ཐོགས་པ་མེད་པའི་བདག་ཉིད་ཅེས་བྱ་བའི་དོན་ཏོ། གཟུགས་དང་གཟུགས་མེད་པའི་ཁམས་དག་ཀྱང་དེ་དང་འདྲ་བར་རིག་པར་བྱའོ་ཞེས་བྱ་བ་ལ། གཟུགས་ཀྱི་ཁམས་ནི་གང་ཞིག་གཟུགས་རྣམས་འཛིན་པའོ། །གཟུགས་མེད་པའི་ཁམས་ནི་གང་ཞིག་གཟུགས་མེད་པ་རྣམས་འཛིན་པའོ། །འདོད་པ་རྣམས་ཀྱི་ཁམས་ནི་ཞེས་བྱ་བ་སྨོས་སོ། །ཁམ་གྱི་ཟས་དང་འཁྲིག་པ་དང་ལྡན་པའི་ཞེས་བྱ་བ་ནི་དེའི་རྒྱུ་མཚན་ཅན་དང། དེའི་ཡུལ་ཅན་ཞེས་བྱ་བའི་དོན་ཏོ། །ཇི་སྐད་བཤད་པའི་འདོད་ཆགས་འདོད་པ་ཡིན་ནོ་ཞེས་བྱ་བར་ཇི་ལྟར་ཤེས་པར་བྱ་ཞེ་ན། འཇིག་རྟེན་སྣ་ཚོགས་གང་དེ་འདོད་པ་མིན། །ཞེས་རྒྱ་ཆེར་འབྱུང་བའི་ལུང་ལས་སོ། །ཀུན་ཏུ་རྟོག་པས་བསྐྱེད་པའི་འདོད་ཆགས་ནི་ཀུན་རྟོག་འདོད་ཆགས་ཏེ། དེ་ན་ཚུལ་བཞིན་མ་ཡིན་པའི་རྟོག་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །དེའི་ཕྱིར་ཚིགས་སུ་བཅད་པ་འདི་ལས་ནི་ཀུན་ཏུ་རྟོག་པའི་འདོད་ཆགས་ཁོ་ན་འདོད་པ་ཡིན་ནོ་ཞེས་བྱ་བར་ཤེས་སོ། །འཕགས་པ་ཤཱ་རིའི་བུས་ཞེས་བྱ་བ་ནི། ཀུན་ཏུ་འཚོ་བྱེད་ཀྱིས་སྨྲས་པའི་ཁས་བླངས་པ་ལ་ཉེས་པ་བརྗོད་པ་སྟེ། གང་གི་ཕྱིར་འདོད་ཆགས་ཀྱི་ཀུན་ཏུ་རྟོགས་པས་བཅིངས་པའི་དགེ་སློང་ཡིད་ཀྱིས་འདོད་པ་ཉེ་བར་བསྟེན་པ་ཁས་ལན་ནོ། །མངོན་དུ་གྱུར་པ་ཙམ་ཞིག་དེ་དག་གི་ཉེ་བར་ལོངས་སྤྱོད་པ་ཡིན་པའི་ཕྱིར་རོ། །འདི་ཙམ་གྱིས་ནི་དགེ་སློང་དགེ་སློང་མ་ཡིན་པར་འགྱུར་བ་ཡང་མ་ཡིན་ཏེ། འོ་ན་ཅི་ཞེ་ན། ཕམ་པར་འགྱུར་བའི་ལྟུང་བ་དང་འབྲེལ་བ་ལས་ཡིན་ལ་དེ་ཡང་ལུས་ཁོ་ནའི་སྒོ་ནས་ཡིན་ནོ། །གཟུགས་རྣམས་མཐོང་ནས་ཡིད་དགའོ་ཞེས་བྱ་བ་ཁོ་ན་དཔེ་ཙམ་ཡིན་གྱི། དེ་བཞིན་དུ་ཇི་སྲིད་རེག་བྱ་རྣམས་རེག་ནས་ཡིད་དགའོ་ཞེས་བྱ་བའི་བར་དུ་རྟོགས་པར་ནི་མི་བྱའོ། །མཐོང་བ་དང་ཐོས་པ་དང་བསྣམས་པ་དང་མྱངས་པ་དང་རེག་པ་རྣམས་ནི་ཡུལ་གྱི་འདོད་པ་རྣམས་ཉེ་བར་ལོངས་སྤྱོད་པ་ཡིན་པས། ཁྱོད་ཀྱི་སྟོན་པ་འདོད་
ཆགས་དང་བྲལ་བ་ཡང་གཟུགས་དང་པོར་མཐོང་བ་ཉིད་ན་འདོད་པ་ཉེ་བར་སྤྱད་པར་འགྱུར་རོ། །ཁོ་བོ་ཅག་གི་ལྟར་ན་དགེ་སློང་འདོད་ཆགས་དང་མ་བྲལ་བས་འདོད་ཆགས་མ་སྤངས་པ་ནི་ཡིད་ཀྱི་སྒོ་ནས་ཡིན་ལ་ལུས་དང་ངག་གི་སྒོ་ནས་ནི་མ་ཡིན་ནོ། །གལ་ཏེ་ཡུལ་རྣམས་ལ་འདོད་ཆགས་ཁོ་ན་ཉེ་བར་ལོངས་སྤྱོད་པ་ཡིན་ན་ཉེ་བར་ལོངས་སྤྱོད་པ་སྔོན་དུ་འགྲོ་བའི་ཕྱིར་འདིའི་སྔ་རོལ་དུ་ཚོར་བ་ནི་ཡུལ་ཉེ་བར་ལོངས་སྤྱོད་པ་སྟེ་འདོད་ཆགས་ཚོར་བ་སྔོན་དུ་འགྲོ་བའོ། །འདོད་པའི་ཁམས་ན་ནི་སྙོམས་པར་འཇུག་པའི་ཚེ་གཟུགས་དང་གཟུགས་མེད་པའི་དང༌། ཟག་པ་མེད་པ་རྣམས་ཀུན་ཏུ་སྦྱོང་ལ། གཞན་གྱི་ཚེ་ནི་ཐོབ་པའོ། །གཟུགས་ཀྱི་ཁམས་ན་ནི་འདོད་པར་གཏོགས་པའི་སྤྲུལ་པའི་སེམས། གཟུགས་མེད་པ་དང༌། ཟག་པ་མེད་པའི་ཆོས་རྣམས་ཀུན་ཏུ་སྤྱོད་དོ། །གཟུགས་མེད་པའི་ཁམས་ན་ནི་ཟག་པ་པ་མེད་པ་ཁོ་ན་ཀུན་ཏུ་སྤྱོད་དོ། །དེའི་ཕྱིར་དྲི་བ་ནི་ཡང་ཅི་གང་དག་ལ་འདོད་པ་དང་གཟུགས་མེད་པའི་འདོད་ཆགས་དག་རྒྱས་པར་འགྱུར་བའོ་ཞེས་བྱ་བ་འབྱུང་སྟེ། ཅི་རིགས་བར་དམིགས་པ་འམ་མཚུངས་པར་ལྡན་པའི་སྒོ་ནས་སོ། །ད་ནི་འདི་རྟ་དང་བྲེས་ལྟ་བུ་ཡིན་ཏེ་ཞེས་བྱ་བ་ལ་འདི་རྟ་བརྟོད་སའི་ཡིན་པ་ནི་བྲེས་སོ། །གཉིས་ཀ་ཡང་མི་ཤེས་པའི་ཕྱིར་བྲེས་དང་འདྲ་བ་ནི་བྲེས་ལྟ་བུ་སྟེ། དེ་བཞིན་དུ་འདིར་ཡང་འདོད་ཆགས་དག་གིས་ཁམས་རྣམས་བསྒྲུབ་ཅིང་ཁམས་རྣམས་ཀྱིས་ཀྱང་འདོད་ཆགས་དག་ཡིན་པས་འདི་གཉིས་ཀ་ཡང་མི་འགྲུབ་བོ་ཞེ་ན་གནས་བརྟན་དེ་དག་ལ་འདོད་ཆགས་དང་མ་བྲལ་བའི་འདོད་ཆགས་གང་ཡིན་པ་དེ་ནི་འདོད་པའི་འདོད་ཆགས་ཡིན་ལ། དེ་གང་དུ་རྒྱས་པར་འགྱུར་བའི་ཆོས་དེ་ཡང་འདོད་པ་དང་ལྡན་པ་ཡིན་ནོ། །དེ་བཞིན་དུ་ཞེས་བྱ་བ་རྒྱས་པར་འབྱུང་བ་ལ། གོང་མའི་གནས་དག་བཅུ་བདུན་ནི་ཞེས་གཟུགས་ཀྱི་ཁམས་སུ་གནས་བརྟན་པའི་གནས་དེ་དག་ལ་འོག་མའི་འདོད་ཆགས་དང་བྲལ་བའི་འདོད་ཆགས་གང་ཡིན་པ་དེ་ནི་གཟུགས་ཀྱི་འདོད་ཆགས་ཡིན་ལ། དེ་གང་དུ་རྒྱས་པར་འགྱུར་བའི་ཆོས་དེ་ཡང་གཟུགས་དང་ལྡན་པ་ཡིན་ནོ། །དེ་བཞིན་དུ་གཟུགས་མེད་ཁམས་ན་གནས་མེད་དོ། །སྐྱེ་བ་ལས་ནི་དེ་རྣམ་བཞི། །
ཞེས་གཟུགས་མེད་པའི་ཁམས་སུ་སྐྱེ་བ་བསྟན་པ་དེ་དག་ལ་འདོད་ཆགས་དང་མ་བྲལ་བའི་འདོད་ཆགས་གང་ཡིན་པ་དེ་ནི་གཟུགས་མེད་པའི་འདོད་ཆགས་ཡིན་ལ། དེ་གང་དུ་རྒྱས་པར་འགྱུར་བ་དེ་ཡང་གཟུགས་མེད་པ་དང་ལྡན་པ་ཡིན་ནོ། །བསམ་གཏན་དང་གཟུགས་མེད་པར་སྐྱེ་བ་དང་སྙོམས་པར་འཇུག་པ་དག་ལ་འདོད་ཆགས་པ་ནི་གཟུགས་དང་གཟུགས་མེད་པའི་འདོད་ཆགས་སོ། །ཡང་འདི་དག་གི་ཁྱད་པར་ཅི་ཞེ་ན། ཁ་ཅིག་ན་རེ། སྔར་ནི་སྣོད་ཀྱི་འདོད་ཆགས་བཤད་ལ་ད་ནི་རྒྱུ་དང་བཅས་པས་སེམས་ཅན་གྱི་འདོད་ཆགས་ཞེས་ཟེར་རོ། །གཞན་དག་འདི་ནི་རུང་ངོ་ཞེས་ཟེར་རོ། །དེ་ཉིད་བདེ་བླག་ཏུ་ཁོང་དུ་ཆུད་པར་བྱ་བའི་ཕྱིར་རྣམ་གྲངས་གཞན་གྱིས་བསྟན་པ་ནི། འདོད་པའི་འདོད་ཆགས་བཞིན་ཞེས་སོ། །སྤྲུལ་པའི་སེམས་ལ་ཇི་ལྟར་འདོད་པའི་འདོད་ཆགས་པ་ཡིན་ཞེས་བྱ་བ་ནི་འདོད་པ་ན་སྤྱོད་པའི་སྤྲུལ་པའི་སེམས་ནི་འདོད་པའི་ཁམས་ལས་འདོད་ཆགས་དང་བྲལ་བ་རྣམས་ཁོ་ནའི་བསམ་གཏན་གྱི་འབྲས་བུ་ཡིན་ལ། འདོད་པ་ལས་འདོད་ཆགས་དང་བྲལ་བ་ལ་འདོད་པའི་འདོད་ཆགས་འབྱུང་བ་ཡང་མ་ཡིན་ཞིང༌། འདོད་པའི་འདོད་ཆགས་རྒྱས་པར་མི་འགྱུར་བ་ནི་འདོད་པར་གཏོགས་པ་ཡིན་པར་འོས་པ་ཡང་ཡིན་ནོ་ཞེས་འགལ་བར་མཐོང་བ་ཅན་གྱི་དྲི་བའོ། །ཐོས་པ་དང་ཡོངས་སུ་ཉམས་ནས་དེ་ལ་ཆགས་པའི་ཕྱིར་རོ་ཞེས་བྱ་བ་ལ་རྣལ་འབྱོར་པ་རྣམས་ནི་དེ་ལྟར་འདོད་པ་ན་སྤྱོད་པའི་སྤྲུལ་པའི་སེམས་ཀྱིས་འདོད་པ་ན་སྤྱོད་པའི་སྤྲུལ་པ་སྤྲུལ་པར་བྱེད་དོ། །ཞེས་ཐོས་ནས་དེ་ལ་དམིགས་པའི་འདོད་ཆགས་སྐྱེ་ལ། འདོད་པའི་འདོད་ཆགས་དང་བྲལ་བ་ལས་ཡོངས་སུ་ཉམས་ཏེ། རྗེས་སུ་དྲན་ནས་སྤྲུལ་པའི་སེམས་ལ་ཆགས་པར་བྱེད་དོ། །ཡང་ན་སྤྲུལ་བའི་དབང་གིས་ཞེས་བྱ་བ་རྒྱས་པར་འབྱུང་བ་ལ། འདོད་པ་ན་སྤྱོད་པའི་སྤྲུལ་པ་མཐོང་ནས་ཨ་མ་ཀྱེ་མ་བདག་ལ་ཡང་འདི་འདྲ་བའི་སེམས་ཡོད་པར་གྱུར་ཅིག་སྙམ་དུ་སྤྲུལ་བར་བྱེད་པའི་སེམས་ལ་ཡང་འདོད་པ་ཉོན་མོངས་པ་ཅན་འབྱུང་ངོ༌། །ཡང་ན་དྲི་དང་རོ་སྤྲུལ་པའི་ཕྱིར་ན་སྤྲུལ་པའི་སེམས་དེ་འདོད་པ་ན་སྤྱོད་པ་ཉིད་ཡིན་ནོ། །དེ་ཉིད་ལ་རྒྱུ་སྨྲས་པ་ནི་གཟུགས་
ན་སྤྱོད་པས་ནི་དེ་གཉིས་སྤྲུལ་པའི་ཕྱིར་རོ་ཞེས་བྱ་བ་སྟེ། དྲི་དང་རོ་དག་ནི་ཁམ་གྱི་ཟས་ཉིད་ཡིན་པའི་ཕྱིར་འདོད་པར་གཏོགས་པ་ཁོ་ནའོ། །ས་གཞན་གྱི་བསམ་གཏན་གྱི་འབྲས་བུ་ནི་ས་གཞན་གྱི་སྤྲུལ་པ་མི་འཕྲུལ་ལ། དེ་དག་ཁམ་གྱི་ཟས་ཀྱི་འདོད་ཆགས་དང་བྲལ་བའི་ཕྱིར་དྲི་དང་རོ་སྤྲུལ་པར་ཡང་མི་རིགས་སོ། གལ་ཏེ་ས་དང་ཁམས་སྐལ་བ་མི་མཉམ་པ་ལ་རྒྱས་པར་མི་འགྱུར་བའི་ཕྱིར་རང་གི་ཁམས་པའི་ཕྲ་རྒྱས་ཐམས་ཅད་ཀྱི་ཁམས་བསྟན་པར་འགལ་བ་མེད་བཞིན་དུ། ཅིའི་ཕྱིར་འདོད་ཆགས་ཁོ་ནས་བསྙད་ཅེ་ན། ཕལ་ཆེར་རྒྱས་པར་འགྱུར་བའི་ཕྱིར་ཏེ། འདི་ལྟར་སེམས་ཅན་རྣམས་ནི་ཡང་དང་ཡང་དུ་འདོད་ཆགས་ཁོ་ན་ལ་ཀུན་ཏུ་སྤྱོད་པ་ཡིན་ནོ། །གང་འདོད་པའི་ཁམས་གཅིག་ལས་འདོད་ཆགས་དང་བྲལ་བ་དེ་ནི་ཞེས་བྱ་བ་རྒྱས་པར་འབྱུང་སྟེ། དེ་ལྟ་མ་ཡིན་ན་ཁམས་གསུམ་དག་མཐའ་ཡས་པའི་ཕྱིར་གཅིག་ཏུ་གྲོལ་བ་གཞན་དུ་བཅིངས་པས་ཐར་བ་མེད་པ་ཉིད་དུ་འགྱུར་རོ། །དེ་ཁོ་ན་ཡོད་པའི་ཚངས་པའི་འཇིག་རྟེན་དུ་ཞེས་བྱ་བ་ལ་སོགས་པ་འབྱུང་སྟེ། དེ་ལྟ་མ་ཡིན་ན་སྟོན་པ་ལྟར་ཐམས་ཅད་ཀྱི་འགྲོ་བ་མཐའ་ཐུག་པ་མེད་པར་ཐལ་བར་འགྱུར་རོ། །ཁམས་བཤད་ཟིན་ཏོ།། །།ད་ནི་འགྲོ་བ་རྣམས་བརྗོད་པར་བྱ་སྟེ། འདི་དག་ཀྱང་གང་དང་གང་དུ་ན་ཡིན་པ་མི་ཤེས་ཏེ་དེའི་ཕྱིར་ཁམས་གསུམ་པོ་བཤད་པ་གང་ཡིན་པ། དེར་ནི་དམྱལ་སོགས་འགྲོ་བ་ལྔ། །རང་གིས་མིང་གིས་བསྟན་ཞེས་བྱ་བ་སྨོས་སོ། །རྟེན་དང་བརྟེན་པའི་དངོས་པོ་ནི་ཐ་དད་པ་ཉིད་དུ་མཐོང་བའི་ཕྱིར་ཏེ། དེ་ཉིད་ཀྱི་ཕྱིར་གང་གིས་ན་དེ་དག་ཁམས་དག་ཏུ་ཞེས་བྱ་བ་འདིར་རྒྱས་པར་བྲིས་སོ། །ཁམས་རྣམས་ན་འགྲོ་བ་འབའ་ཞིག་ཡིན་པར་མ་ཟད་ཀྱི་འོ་ན་ཅི་ཞེ་ན། འགྲོ་བ་མ་གཏོགས་པ་ཡང་ཡོད་དོ། །དེ་རྣམས་ནི་དགེ་བ་དང་ཉོན་མོངས་པ་ཅན་དང་ཞེས་བྱ་བ་རྒྱས་པར་འབྱུང་སྟེ། འདིར་ནི་ཁམས་འགྲོ་བ་མ་གཏོགས་པར་ཡོད་པར་བསྟན་པའི་ཕྱིར་ཁམས་དག་ཏུ་འགྲོ་བ་རྣམས་ཞེས་བཤད་དོ། །ཉོན་མོངས་ཅན་མིན་ལུང་བསྟན་མིན། །ཞེས་བྱ་བ་ལ་ཉོན་མོངས་པ་ཅན་མ་ཡིན་པ་སྨོས་པ་ནི་ཉོན་མོངས་པ་ཅན་
རྣམ་པར་བྱ་བའི་ཕྱིར་རོ། །ལུང་དུ་མ་བསྟན་པ་མ་ཡིན་པ་སྨོས་པ་ནི་དགེ་བ་བསལ་བར་བྱ་བའི་ཕྱིར་རོ། །སེམས་ཅན་ཞེས་བྱ་བ་ནི་སྣོད་ཀྱི་འཇིག་རྟེན་བསལ་བར་བྱ་བའི་ཕྱིར་རོ། །འགྲོ་བ་རྣམས་ནི་མ་བསྒྲིབས་ལ་ལུང་དུ་མ་བསྟན་པ་ཁོ་ནའོ། །ཞེས་བྱ་བ་ནི་རྣམ་པར་སྨིན་པའི་རང་བཞིན་ཡིན་པའི་ཕྱིར་རོ། །འདི་ནི་དེ་དག་སེམས་ཅན་དུ་སྟོན་པ་ཉིད་དུ་བཤད་པར་འགྱུར་ཏེ། སེམས་ཅན་དུ་སྟོན་པ་ལ་རྣམ་པར་སྨིན་པ་སྲིད་པའི་ཕྱིར་རོ། །དེ་ལྟ་མ་ཡིན་ན་འགྲོ་བ་འཆོལ་བར་འགྱུར་རོ་ཞེས་བྱ་བ་ནི་འགྲོ་བ་རྣམས་འདྲེས་པའི་ངོ་བོ་སྟེ་ཐ་མི་དད་ཅེས་བྱ་བའི་དོན་ཏོ། །གལ་ཏེ་འགྲོ་བ་དག་ལུང་མ་བསྟན་པ་ཉིད་དུ་མི་འདོད་ན་སེམས་ཅན་རྣམས་ཕལ་ཆེར་འགྲོ་བ་གཞན་གྱི་དགེ་བ་དང་ཉོན་མོངས་པ་ཅན་དག་དང་ཡང་ལྡན་ནོ། །ལུང་དུ་མ་བསྟན་པ་དག་དང་ནི་མ་ཡིན་ཏེ། དེ་དག་གི་ཐོབ་པ་ལྷན་ཅིག་སྐྱེ་བ་ཡིན་པའི་ཕྱིར་རོ། །ཡང་ན་འགྲོ་བ་ཐམས་ཅད་འགྲུབ་པར་འགྱུར་བའི་ལས་རྣམས་མི་ལ་སོགས་པའི་འགྲོ་བའི་རྒྱུ་ཡིན་ལ་དེ་རྣམས་ཀྱང་འགྲོ་བ་གཞན་དག་དེར་གཏོགས་པའི་ཕྱིར་ཏེ། དེ་ལྟ་ན་མི་ལ་སོགས་པའི་འགྲོ་བར་དམྱལ་བ་ལ་སོགས་པའི་འགྲོ་བ་ཡོད་པར་ཐལ་བར་འགྱུར་རོ། །འགྲོ་བ་རྣམས་ནི་སེམས་ཅན་དུ་སྟོན་པ་མ་ཡིན་པ་མེད་ལ་སྲིད་པ་བར་མའི་རང་བཞིན་ཡང་མ་ཡིན་ནོ་ཞེས་བྱ་བ་འདི་གོ་ག་ལས་ཤེ་ན། བསྟན་བཅོས་ལས་སོ་ཞེས་བསྟན་པའི་ཕྱིར། བཏགས་པ་ལས་ཀྱང་ཞེས་བྱ་བ་རྒྱས་པར་སྨོས་སོ། །སྐྱེ་གནས་བཞིས་ནི་འགྲོ་བ་ལྔ་བསྡུས་ཀྱི་ཞེས་འབྱུང་བ་ལས་ན། སྐྱེ་གནས་རྣམས་སེམས་ཅན་ཞེས་པ་ཁོ་ན་ཡིན་པའི་ཕྱིར། འགྲོ་བ་རྣམས་ཀྱང་སེམས་ཅན་ཞེས་བྱ་བ་ཁོ་ན་ཡིན་ནོ། །ཞེས་ཤེས་པར་འགྱུར་རོ། །འགྲོ་བ་རྣམས་སེམས་ཅན་ཞེས་བྱ་བ་མ་ཡིན་པ་ཉིད་ཡིན་ན་ནི་སྐྱེ་གནས་དག་ཏུ་འདུ་བར་མི་འགྱུར་ཏེ། དཔེར་ན་འགྲོ་བ་རྣམས་སུ་སྐྱེ་གནས་དག་མི་འདུ་བ་བཞིན་ནོ། །འགྲོ་བ་ལྔས་ནི་སྐྱེ་གནས་བཞི། ཞེས་བྱ་བ་ལ་ཅི་ཞེ་ན། མ་བསྡུས་ཏེ་སྐབས་དང་སྦྱར་རོ། །གལ་ཏེ་ཡང་སྣོད་ཀྱི་རང་བཞིན་འགྲོ་བ་རྣམས་སུ་གྱུར་ན། འགྲོ་བར་བྱེད་
པས་ན་འགྲོ་བའོ། །ལྔ་བོ་ཡང་མི་ལ་སོགས་པའོ། །སྣོད་བསྐྱེད་པའི་སྒོ་ནས་འགྲོ་བར་བྱེད་པས་འགྲོ་བ་ཡིན་ན་འཆོལ་བར་ཐལ་བར་འགྱུར་རོ། །ཅི་ཞིག་མ་བསྡུས་ཤེ་ན། སྲིད་པ་བར་མའོ་ཞེས་འབྱུང་བ་ལས་ན། དེ་བརྫུས་ཏེ་སྐྱེ་བའི་སྐྱེ་གནས་ཀྱིས་བསྡུས་ཀྱང༌། འགྲོ་བ་རྣམས་སུ་མ་འདུས་པའི་ཕྱིར་འགྲོ་བ་སྲིད་པ་བར་མ་མ་ཡིན་ནོ་ཞེས་བྱ་བར་ཤེས་པར་འགྱུར་རོ། །དེ་ལྟ་མ་ཡིན་ན་སྐྱེ་བའི་སྲིད་པ་ལ་སོགས་པ་དང་འདྲ་བར་དེ་ཡང་འགྲོ་བས་བསྡུས་པར་འགྱུར་རོ། །དེའི་ཕྱིར་སྲིད་པ་བར་མ་དེ་འགྲོ་བའི་རང་བཞིན་མ་ཡིན་ནོ། །ཡང་འགྲོ་བ་སྲིད་པ་བར་མ་མ་ཡིན་ནོ་ཞེས་བྱ་བ་ལ། བསྟན་བཅོས་གཉིས་པ་དཔེར་བརྗོད་པ་ནི་ཆོས་ཀྱི་ཕུང་པོ་ལས་ཀྱང་ཞེས་བྱ་བ་རྒྱས་པར་འབྱུང་བ་སྟེ། འདི་ལས་ནི་བསྒོམས་པ་ལས་བྱུང་བ་ལྟར་སྲིད་པ་བར་མ་པ་ཡང་དམྱལ་བ་ལ་སོགས་པའི་མིག་གི་དབང་པོ་ལས་ཐ་དད་པར་ལོགས་ཤིག་ཏུ་བསྟན་ཏེ། དེའི་ཕྱིར་དེ་ཡང་བསྒོམ་པ་ལས་བྱུང་བ་ལྟར་དམྱལ་བ་ལ་སོགས་པའི་འགྲོ་བས་བསྡུས་པ་མ་ཡིན་པས་སྲིད་པ་བར་མ་འགྲོ་བའི་རང་བཞིན་ཡིན་ནོ་ཞེས་བསྟན་པར་འགྱུར་རོ། །གཞན་དུ་ན་ནི་དམྱལ་བ་ལ་སོགས་པའི་མིག་གིས་སྲིད་པ་བར་མ་པ་ཡང་བསྟན་པས་ཡང་ཅིའི་ཕྱིར་བརྗོད། བསྟན་བཅོས་ལས་སྲིད་པ་བར་མ་འགྲོ་བ་རྣམས་ལས་ལོགས་ཤིག་ཏུ་མཛད་པ་འབའ་ཞིག་ཏུ་མ་ཟད་དེ་འོ་ན་ཅི་ཞེ་ན། མདོ་ལས་ཀྱང་སྲིད་པ་བར་མ་འགྲོ་བ་རྣམས་ལས་ལོགས་ཤིག་མཛད་དོ་ཞེས་བྱ་བ་རྒྱས་པར་འབྱུང་བ་ལ། སྲིད་པ་བར་མ་འགྲོ་བའི་རང་བཞིན་མ་ཡིན་པ་དང༌། འགྲོ་བ་རྣམས་ལུང་དུ་མ་བསྟན་པ་ཉིད་ཀྱི་ཁུངས་ནི་ལས་ཀྱི་སྲིད་པ་དང༌། སྲིད་པ་བར་མའོ་ཞེས་དམྱལ་བ་ལ་སོགས་པ་དག་ལས་ལོགས་ཤིག་ཏུ་སྨོས་པ་འདི་ཡིན་ནོ། །རྒྱུ་དང་བཅས་པ་དང་འགྲོ་བ་དང་བཅས་བར་བཤད་དོ་ཞེས་བྱ་བ་ལ་འགྲོ་བ་རྣམས་ཀྱི་རྒྱུ་ནི་ལས་ཀྱི་སྲིད་པ་ཡིན་ལ། འགྲོ་བ་ནི་སྲིད་པ་བར་མ་ཡིན་ཏེ། འདིས་འགྲོ་བར་བྱེད་པས་ན་ཞེས་བྱས་པའི་ཕྱིར་རོ། །དེ་ཉིད་ཀྱི་ཕྱིར་ཞེས་བྱ་བ་ནི་མདོའི་ཕྱིར་རོ། །དེའི་རྒྱུ་ཞེས་བྱ་བ་ནི་འགྲོ་བའི་རྒྱུ་ལས་ཀྱི་སྲིད་པ་སྟེ། འགྲོ་བ་
དག་ལས་ལོགས་ཤིན་ཏུ་མཛད་པའི་ཕྱིར་འགྲོ་བ་རྣམས་མ་བསྒྲིགས་ལ་ལུང་དུ་མ་བསྟན་པ་ཉིད་དུ་གྲུབ་པ་ཡིན་ནོ། །ལུས་དང་ངག་དང་ཡིད་ཀྱི་སྐྱོན་དང་སྙིགས་མ་དེ་དག་གིས་ཞེས་བྱ་བ་ལ་ལུས་ཀྱི་སྐྱོན་དང་ངག་གི་སྐྱོན་དང་ཡིད་ཀྱི་སྐྱོན་ནོ་ཞེས་བྱ་བ་རིག་པར་བྱའོ། །ཆོས་དེ་དག་མ་གཏོགས་པ་ཞེས་བྱ་བ་ལ། དམྱལ་བ་དག་ཏུ་གཟུགས་ལ་སོགས་པ་གང་དག་རྣམ་པར་སྨིན་པའི་བདག་ཉིད་དུ་གྲུབ་པ་དེ་དག་ཁོ་ན་དམྱལ་བ་ཡིན་གྱི་དེ་དག་ལས་གཞན་པའི་དམྱལ་བ་དགེ་བའམ་མི་དགེ་བའི་ཆོས་ནི་མི་དམིགས་སོ། །རྣམ་པར་སྨིན་པ་གྲུབ་ནས་དམྱལ་བ་ཞེས་བྱ་བའི་གྲངས་སུ་འགྲོའོ་ཞེས་འབྱུང་བའི་ཕྱིར་འགྲོ་བ་རྣམས་མ་བསྒྲིབས་ལ་ལུང་དུ་མ་བསྟན་པ་ཡིན་ཞེས་བྱ་བ་འདི་ལ་ཁུངས་ནི་འདི་ཡིན་ཏེ། རྣམ་པར་སྨིན་པའི་གནས་སྐབས་ནི་དགེ་བ་དང་ཉོན་མོངས་པ་ཅན་མ་ཡིན་ནོ། །སྲིད་པ་བར་མའི་རང་བཞིན་དམྱལ་བ་ལ་སོགས་པ་རྣམས་སོ་ཞེས་ཤེས་པར་བྱས་པར་འགྱུར་རོ། །དེ་ཉིད་ཀྱི་ཕྱིར་སེམས་ཅན་ཞེས་བྱ་བ་ཡང་གྲུབ་སྟེ། རྣམ་པར་སྨིན་པ་ནི་སེམས་ཅན་དུ་བརྗོད་པ་ཡིན་པའི་ཕྱིར་རོ། །དམྱལ་བའི་འགྲོ་བ་ནི་འདི་དཔེར་བརྗོད་པ་ཙམ་ཞིག་ཏུ་ཟད་དོ། །འོ་ན་རབ་ཏུ་བྱེད་པའི་གཞུང་ཞེས་བྱ་བ་ལ། འདིར་ཅི་ལ་ལན་གདབ་པར་བྱ། འགྲོ་བ་རྣམས་མ་བསྒྲིབས་ལ་ལུང་དུ་མ་བསྟན་པ་ཡིན་པའི་ཕྱིར་བསྒོམ་པས་སྤང་བར་བྱ་བ་ཉིད་ཡིན་ལ་བསྒོམ་པས་སྤང་བར་བྱ་བ་ལ་ཡང་བསྒོམ་པས་སྤང་བར་བྱ་བ་དང༌། ཕྲ་རྒྱས་ཀུན་ཏུ་འགྲོ་བ་རྣམས་རྒྱས་པར་འགྱུར་གྱི་གཞན་དག་ནི་མ་ཡིན་ཏེ། དེའི་ཕྱིར་ཐམས་ཅད་སྨོས་པ་ལ་ལན་གདབ་པར་བྱ་དགོས་སོ། །རྣམ་པ་ལྔ་ཉིད་ཡིན་ན་ཡང་དེ་དག་དགེ་བ་དང་ཉོན་མོངས་པ་ཅན་ཉིད་དུ་ཡང་འགྱུར་རོ། །འགྲོ་བ་རྣམས་སུ་ཉིང་མཚམས་སྦྱོར་བའི་སེམས་རྣམ་པ་ལྔ་ཡོད་དེ་ཞེས་བྱ་བ་ནི་སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བ་རྣམས་སོ། །འཇུག་པ་དང་བཅས་པའི་འགྲོ་བ་རྣམས་སྨོས་པས་ཞེས་བྱ་བ་ལ། འདིར་འགྲོ་བ་སྨོས་པས་ནི་འཇུག་པ་དང་ལྷན་ཅིག་པའི་འགྲོ་བ་གཟུང་སྟེ། འགྲོ་བའི་འཇུག་པ་ལ་འགྲོ་བ་ཉེ་བར་བཏགས་
པའི་ཕྱིར་རོ། །འགྲོ་བ་རྣམས་ཀྱི་འཇུག་པ་ཡང་ཉིང་མཚམས་སྦྱོར་བའི་སེམས་དག་ཡིན་ལ། ཉིང་མཚམས་སྦྱོར་བའི་སེམས་ཀྱི་འོག་རོལ་གྱི་མ་བསྒྲིབས་ལ་ལུང་དུ་མ་བསྟན་པའི་རྒྱུད་ལ་འགྲོ་བ་ཞེས་བརྗོད་དོ། །དེ་དག་ཀྱང་རྣམ་པ་ལྔ་ཡིན་པ་དེའི་ཕྱིར་འགྲོ་བ་དག་ལ་ཕྲ་རྒྱས་ཐམས་ཅད་རྒྱས་པར་འགྱུར་རོ། །ཞེས་གསུངས་སོ། །དེ་ཉིད་ལ་དཔེ་སྨོས་པ་ནི་གྲོང་སྨོས་ན་གྲོང་གི་ཉེ་འཁོར་ཡང་སྨོས་པ་བཞིན་ནོ་ཞེས་བྱ་བའོ། །ཇི་ལྟར་གྲོང་སྨོས་ན་གྲོང་གི་ཉེ་འཁོར་སྨོས་པ་ཡིན་ཞེ་ན། གྲོང་འདི་ན་སཱ་ལུའི་ཞིང་ཡོད་དོ། །འབྲུའི་ཞིང་ཡོད་དོ་ཞེས་སྨྲ་བའི་ཕྱིར་རོ། །དཔེར་ན་སྙིགས་མ་ལྔ་པོ་དག་ཏུ་ཞེས་བྱ་བ་རྒྱས་པར་འབྱུང་སྟེ། ཚེ་དང་སྐལ་པ་དང་ཉོན་མོངས་པ་དང་ལྟ་བ་དང་སེམས་ཅན་གྱི་སྙིགས་མ་དག་ཏུའོ། །ཉོན་མོངས་པའི་རང་བཞིན་དུ་ཁྱད་པར་མེད་ཀྱང་ཉོན་མོངས་པ་དག་ལས་ལྟ་བའི་སྙིགས་མ་དག་ཐ་དད་དུ་བཞག་པ་ནི་ཁྱིམ་པ་དང་རབ་ཏུ་བྱུང་བའི་ཕྱོགས་ཀྱི་དབང་དུ་མཛད་པའི་ཕྱིར་རོ། །འགྲོ་བའི་རྒྱུ་ཤེས་པར་བྱ་བའི་ཕྱིར་ཞེས་བྱ་བ་ལ། འགྲོ་བ་རྣམས་ཀྱི་རྒྱུ་ནི་ལས་ཀྱི་སྲིད་པ་ཡིན་ཏེ། དེའི་ཕྱིར་དེ་འགྲོ་བའི་རང་བཞིན་ཡིན་ཡང་འགྲོ་བའི་རྒྱུ་ཤེས་པར་བྱ་བའི་ཕྱིར་ཐ་དད་དུ་སྨོས་སོ། །འདི་ནི་སྲིད་པ་བར་མ་ལ་ཡང་ཐལ་བར་འགྱུར་རོ་ཞེས་བྱ་བ་ལ་ཐ་དད་པར་སྨོས་ཀྱང་འགྲོ་བ་ཡིན་པར་འགྱུར་ན་ནི་འགྲོ་བའི་རང་བཞིན་ཁོ་ནས་འགྲོ་བ་ཤེས་པར་བྱ་བའི་ཕྱིར་ཐ་དད་དུ་བསྟན་པར་འགྱུར་རོ། །སྲིད་པ་བར་མ་ཡིན་པ་ཁོ་ནའི་ཕྱིར་ཞེས་བྱ་བ་ལ་གང་ནས་འཆི་འཕོ་བ་དང་གང་དུ་འགྲོ་བར་འགྱུར་བ་དེ་གཉིས་ཀྱི་བར་དུ་འབྱུང་བའི་ཕྱིར་སྲིད་པ་བར་མ་འགྲོ་བ་མ་ཡིན་ནོ། །སྲིད་པ་བར་མ་ནི་འགྲོ་བའི་བར་མ་དོ་ཡིན་ནོ། །འགྲོ་བའི་བར་མ་དོ་ནི་འགྲོ་བར་མི་རུང་ངོ༌། །སློབ་དཔོན་འདུས་བཟང་ན་རེ། སྲིད་པ་བར་མ་ནི་བགྲོད་པར་བྱ་བ་མ་ཡིན་པས་འགྲོ་བ་མ་ཡིན་ཏེ། འཆི་འཕོ་བའི་ཡུལ་ཉིད་དུ་སྐྱེ་བའི་ཕྱིར་རོ་ཞེས་ཟེར་རོ། །མ་ཡིན་ཏེ། གཟུགས་མེད་པ་རྣམས་ཀྱང་འཆི་འཕོ་བའི་ཡུལ་ཉིད་དུ་སྐྱེ་བས་སྲིད་པ་བར་མ་བཞིན་དུ་འགྲོ་བ་མ་ཡིན་པར་ཐལ་བར་འགྱུར་རོ། །འགྲོ་བའི་རྒྱུ་ཉིད་ཀྱི་ཕྱིར་ལས་ཀྱི་སྲིད་པ་ཡང་སྲིད་པ་བར་མ་
བཞིན་འགྲོ་བ་མ་ཡིན་ནོ། །གལ་ཏེ་འགྲོ་བ་རྣམས་དགེ་བ་དང་ཉོན་མོངས་པ་ཅན་ཡང་ཡིན་ན་རྣམ་པར་སྨིན་པ་གྲུབ་ནས་ཞེས་བྱ་བ་འདི་ཇི་ལྟར་དྲང་ཞེ་ན་རྣམ་པར་སྨིན་པ་གྲུབ་ནས་དགེ་བ་དང་ཉོན་མོངས་པ་ཅན་ཡང་དམྱལ་བ་ཞེས་བྱ་བའི་གྲངས་སུ་འགྲོ་བས་འགལ་བ་མེད་དེ། འདི་ལྟར་གལ་ཏེ་འདི་རྣམ་པར་སྨིན་པ་ཁོ་ན་གྲུབ་ནས་དམྱལ་བ་ཞེས་བྱ་བའི་གྲངས་སུ་འགྲོའོ། །ཞེས་དེ་སྐད་དུ་གསུངས་ན་ནི་དེའི་ཕྱིར་ཕུང་པོ་གཞན་བཀག་པར་རྟོགས་པར་འགྱུར་བ་ཞིག་གོ །འོ་ན་ཚེ་དང་ལྡན་པ་དེ་ལ་ཞེས་བྱ་བ་རྒྱས་པར་འབྱུང་བ་ལ། འདིར་ཡང་གང་ཟག་གི་རྫས་བཀག་པ་ཡིན་གྱི་ཕུང་པོ་གཞན་མ་བཀག་པས་འགལ་བ་མེད་དོ། །གནས་བརྟན་འདུས་བཟང་ན་རེ། རྣམ་པར་སྨིན་པ་གྲུབ་པས་ཁྱད་པར་ཅན་གྱི་ཕུང་པོ་གཟུང་བའི་ཕྱིར་ཕུང་པོ་བསལ་ལོ་ཞེས་རྟོགས་པར་བྱའོ། །དེ་ལྟ་མ་ཡིན་ན་ཕུང་པོ་ཁྱད་པར་དུ་སྨོས་པ་ལ་དགོས་པ་ཅི་ཞིག །དགོས་པ་ཡོད་དེ་འགྲོ་བ་གཞན་གྱི་རྒྱུར་གྱུར་པ་རྣམས་ལ་ཡང་ལས་དང་ཉོན་མོངས་པ་རྣམས་རྣམ་པར་སྨིན་པའི་དབང་གིས་དེའི་འགྲོ་བ་བསྙད་པར་ཤེས་པ་ཉིད་ཡིན་ཏེ། འཆོལ་བ་ཡོངས་སུ་སྤངས་པའོ། །དེ་དག་ཀྱང་ཁ་ཅིག་ན་རེ་རྣམ་པར་སྨིན་པའི་རང་བཞིན་དག་ཁོ་ན་ཡིན་ནོ་ཞེས་ཟེར་རོ། །ཅིའི་ཕྱིར་ན་གང་གི་ཕྱིར་རྣམ་པར་སྨིན་པའི་ཕུང་པོ་ལས་གཞན་དུ་དམྱལ་བ་མི་དམིགས་སོ་ཞེས་གསུངས་པ་གང་གི་ཕྱིར་རྣམ་པར་སྨིན་པ་གྲུབ་ནས་དམྱལ་བ་ཞེས་བྱ་བའི་གྲངས་སུ་འགྲོའོ། །ཞེས་གསུངས་པ་དེས་ན་འགྲོ་བ་རྣམས་རྣམ་པར་སྨིན་པའི་རང་བཞིན་ཁོ་ན་ཡིན་ནོ་ཞེས་བྱ་བར་གཏོགས་སོ། །གཞན་དག་ན་རེ་རྒྱས་པ་ལས་བྱུང་བའི་རང་བཞིན་དག་ཀྱང་ཡིན་ཏེ། འདི་ལྟར་མིག་ལ་སོགས་པ་དག་ནི་རྣམ་པར་སྨིན་པ་ལས་སྐྱེས་པ་ཡང་ཡིན་ཞིང་རྒྱས་པ་ལས་བྱུང་བ་ཡང་ཡོད་ལ་དེ་དག་ཀྱང་འགྲོ་བས་བསྡུས་པ་ཡིན་ནོ་ཞེས་ཟེར་རོ། །ལུས་དང་འདུ་ཤེས་ཐ་དད་དང་ཞེས་རྒྱས་པར་འབྱུང་བ་ལ། མདོར་བསྡུ་ན་རྣམ་པར་ཤེས་པ་གནས་བདུན་གྱི་རང་བཞིན་ནི་འདོད་པ་ན་སྤྱོད་པའི་ལྷ་དང་མི་རྣམས་དང༌། བསམ་གཏན་དང་གཟུགས་མེད་པའི་སྙོམས་པར་འཇུག་པ་དང་པོ་ཞེས་བྱ་བ་འདི་ཡིན་
ལ། འདི་དག་གི་དེ་རྒྱས་པར་ནི་བརྩམ་པར་བྱའོ། །སེམས་ཅན་གཟུགས་ཅན་ཞེས་བྱ་བ་ལ་སོགས་པ་ལ། གཟུགས་ཅན་ནི་གཟུགས་དང་ལྡན་པ་དག་གོ །བསམ་གཏན་དང་པོ་པ་ཞེས་བྱ་བ་ལ་བསམ་གཏན་དང་པོ་ན་ཡོད་པ་ནི་བསམ་གཏན་དང་པོ་པ་སྟེ་ཚངས་རིས་ལ་སོགས་པ་རྣམས་སོ། །དེ་དག་ཀྱང་དང་པོར་འབྱུང་བ་རྣམས་ནི་རྣམ་པར་ཤེས་པ་གནས་པ་གཉིས་པར་བཞག་པས་དང་པོར་འབྱུང་བ་མ་གཏོགས་པ་ཞེས་བྱ་བ་སྨོས་སོ། །དེ་དག་གི་ལུས་ཐ་དད་པའི་ཕྱིར་རམ་ཞེས་བྱ་བ་རྒྱས་པར་འབྱུང་བ་ལ་ཐ་དད་པ་ནི་ཁ་དོག་དང་རྟགས་དང་དབྱིབས་མི་མཚུངས་པ་ཉིད་དོ། །ཐམས་ཅད་ནི་འདི་སྙམ་དུ་ཞེས་བྱ་བ་ལ་སོགས་པ་འབྱུང་ངོ༌། །དབྱིབས་ཀྱི་ལུས་ཞེས་བྱ་བ་ལ། དབྱིབས་ཀྱི་བདག་ཉིད་ཀྱི་ལུས་ནི་དབྱིབས་ཀྱི་ལུས་ཏེ། ཚོར་བ་ལ་སོགས་པའི་ལུས་བསལ་བར་བྱ་བའི་ཕྱིར་རོ། །དབྱིབས་ནི་དབྱིབས་སོ། །ལུས་ནི་ཁོག་པའོ། །དེ་དག་གིས་དེ་ལྟར་མཐོང་ཞེས་བྱ་བ་ནི་རྣམ་པ་གང་གིས་ཞེས་བྱ་བའི་དོན་ཏོ། །ཅི་འོད་གསལ་ན་གནས་པའམ། བསམ་གཏན་དང་པོར་སྐྱེས་པའམ། འོན་ཏེ་བསམ་གཏན་དང་པོའི་སྲིད་པ་བར་མ་དོར་ན་གནས་པ་དག་གམ། །ཅི་བསམ་གཏན་གཉིས་པའི་སྙོམས་པར་འཇུག་པ་ཐོབ་པའམ་ཅི་མ་ཐོབ་པར་ཞེས་བརྗོད་པར་བྱའོ། །ད་ནི་བསམ་གཏན་གཉིས་པ་ཞེས་བྱ་བ་རྒྱས་པར་འབྱུང་བ་ལ། ཉན་ཐོས་ཀྱི་བསམ་གཏན་གྱི་སྤྱོད་ཡུལ་ཉིད་ཀྱི་ཕྱིར་དེ་དག་བསམ་གཏན་དང་པོའི་ས་པའི་སྔོན་གྱི་བག་ཆགས་རྗེས་སུ་དྲན་པའི་ཤེས་པས་ཚངས་པའི་འཆི་འཕོ་བར་མཐོང་བར་ནུས་པ་མེད་དོ། །ཅི་སྟེ་ཇི་ལྟར་མི་འགལ་བ་དེ་ལྟར་ཡིན་ལ་རག་གོ་སྙམ་ན་དེའི་ཕྱིར་འོན་ཏེ་ཐོབ་ན་ནི་ཞེས་བྱ་བ་རྒྱས་པར་འབྱུང་ངོ༌། །གང་ཞིག་ས་གང་ལས་འདོད་ཆགས་དང་བྲལ་བ་དེ་ནི་ས་དེ་ལ་དམིགས་པའི་ཉོན་མོངས་པ་འབྱུང་བ་ཡོད་པ་མ་ཡིན་པས་དེ་དང་ཚངས་པ་ཆེན་པོ་ལ་དམིགས་པའི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལྟ་བ་ལ་མངོན་པར་ཞེན་པ་མི་རིགས་སོ། །དེ་ན་ཡང་གེགས་བྱེད་པ་མེད་པའི་ཕྱིར་ཞེས་བྱ་བ་ལ་ཁུ་བ་དང་ཁྲག་ལ་སོགས་པ་ཕྱིའི་རྒྱུ་མཚན་ལ་
བལྟོས་པ་མེད་པའི་ཕྱིར་ན་རྫུས་ཏེ་སྐྱེ་བ་རྣམས་ལ་ཁུ་བ་དང་ཁྲག་མེད་པས་གེགས་བྱེད་པ་ཡོད་པ་མ་ཡིན་ནོ། །ཡང་ཅིའི་ཕྱིར་དེ་དག་འདི་སྙམ་དུ་བདག་ཅག་ནི་འདིས་སྤྲུལ་ལོ་སྙམ་དུ་ཤེས་པར་འགྱུར་ཞེ་ན། དབྱིབས་ཀྱི་ལུས་ཀྱི་ཁྱད་པར་རྟོགས་པའི་ཕྱིར་དང༌། སྔར་སྐྱེས་པ་མཐོང་བའི་ཕྱིར་རོ། །འོ་ན་ཚངས་པ་ཆེན་པོ་འདི་སྙམ་དུ་འདི་དག་ནི་བདག་གིས་སྤྲུལ་ལོ་སྙམ་དུ་ཤེས་པར་ག་ལས་འགྱུར་ཞེ་ན། དེ་ལ་སེམས་སྐྱེས་པའི་མཐུག་ཐོགས་སུ་དེ་དག་སྐྱེས་པའི་ཕྱིར་དང༌། ལས་དང་འབྲས་བུའི་འབྲེལ་པ་ལས་ཀུན་ཏུ་རྨོངས་པའི་ཕྱིར་རོ། །ཡང་ན་ཚེ་དང་ཁ་དོག་དང་ལུས་ཀྱི་ཆུ་ཞིང་ལྷག་པའི་བདག་གི་དངོས་པོ་མཐོང་བའི་ཕྱིར་རོ། །གལ་ཏེ་བདག་ཅག་ནི་ངེས་སོ་སྙམ་པ་དང་འདི་དག་བདག་གི་སྙམ་དུ་འདུ་ཤེས་ཐ་དད་པའི་ཕྱིར་འདུ་ཤེས་གཅིག་མ་ཡིན་ནོ་སྙམ་ན་རྒྱུའི་འདུ་ཤེས་ཐ་མི་དད་པའི་ཕྱིར་འདུ་ཤེས་ཐ་དད་པ་མེད་དོ། །གཞན་དག་ན་རེ་སྤྲུལ་པའི་འདུ་ཤེས་གཅིག་པའི་ཕྱིར་ཞེས་ཟེར་རོ། །དེ་དག་ཐམས་ཅད་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལྟ་བ་ལ་ཞེན་པའི་ཕྱིར་རོ། །གཞན་དག་ན་རེ། འོད་གསལ་ན་གནས་པ་དག་ཁོ་ནས་བསམ་གཏན་དང་པོའི་ས་པའི་སྤྲུལ་པ་སྤྲུལ་ནས་ཚངས་པ་དང་ལྷན་ཅིག་བསྡད་ལ། སྤྲུལ་པའི་གནས་སྐབས་དང་ཡང་བསམ་གཏན་དང་པོར་སྐྱེས་པ་དག་ནི་དེའི་ས་པའི་མངོན་པར་ཤེས་པའི་ཡུལ་ཡིན་པས་དེ་དག་གི་སྤྲུལ་པའི་གནས་སྐབས་དྲན་པ་དེ་དག་འདི་སྙམ་དུ་བདག་ཅག་ནི་ཞེས་བྱ་བ་རྒྱས་པར་ཤེས་པར་འགྱུར་རོ་ཞེས་ཟེར་རོ། །གཞན་དག་ནི་བསམ་གཏན་གཉིས་པ་ལ་སོགས་པར་སྐྱེས་པ་རྣམས་ཀྱི་མིག་གི་རྣམ་པར་ཤེས་པ་ནི་ཚངས་པའི་འཇིག་རྟེན་པ་ཁོ་ན་ཡིན་པས་དེ་དག་ཉམས་སུ་མྱོང་བ་རྗེས་སུ་དྲན་པ་མི་སྲིད་པ་མ་ཡིན་ཏེ། དེའི་ཕྱིར་སྔར་མཐོང་བ་ཁོ་ན་རྗེས་སུ་དྲན་པ་ཡིན་ནོ་ཞེས་ཟེར་རོ། །ཁ་ཅིག་ན་རེ་སེམས་ཅན་འདི་ཡང་འདི་སྙམ་དུ་སྨོན་ལ། བདག་ཅག་ཀྱང་འདིར་སྐྱེས་སོ་སྙམ་དུ་བསྒོམ་པ་ལས་བྱུང་བའི་སྔོན་གྱི་གནས་རྗེས་སུ་དྲན་པའི་ཤེས་པའམ། གཞན་གྱི་སེམས་ཤེས་འཛིན་པ་ནི་མ་ཡིན་ཏེ། འོ་ན་ཅི་ཞེ་ན། སྐྱེ་སྣས་ཐོབ་པ་ཁོ་ནས་ཏེ་སྙམ་དུ་ཤེས་པས་འགལ་བ་མེད་དོ་ཞེས་ཟེར་རོ། །གཞན་དག་ན་རེ་རྗེས་སུ་དཔག་
པའི་ཤེས་པས་གཞན་གྱི་བསམ་པ་རྣམ་པ་དང་བཅས་པར་རྟོགས་པ་གནོད་པར་བྱེད་པ་མ་ཡིན་ནོ་ཞེས་ཟེར་རོ། །དེ་ལྟ་མ་ཡིན་ན་ཞེས་རྒྱ་ཆེར་འབྱུང་བ་ལ་འོད་ཆུང་དང་ཚད་མེད་འོད་དག་ཀྱང་རྣམ་པར་ཤེས་པའི་གནས་པ་གསུམ་པའི་མཚན་ཉིད་ཐོབ་པ་རྣམས་དེ་གང་གིས་རྣམ་པར་ཤེས་པའི་གནས་པའི་མཚན་ཉིད་ཡིན་པར་འགྱུར་ཏེ། དེའི་ཕྱིར་འདིར་དཔེར་བརྗོད་པའི་ཚུལ་གྱིས་འོད་གསལ་བ་རྣམས་ཉེ་བར་བཀོད་པའོ། །སེམས་ཅན་ལུས་གཅིག་ཅིང་འདུ་ཤེས་ཐ་དད་པ་དག་ཀྱང་ཞེས་བྱ་བ་འདི་དགེ་རྒྱས་པ་དག་ལ་ཡང་ཐལ་བར་འགྱུར་བ་མ་ཡིན་ནམ་ཞེ་ན། དེ་དག་ཀྱང་དངོས་གཞིའི་ས་ལ་བདེ་བའི་དབང་པོས་ཡོངས་སུ་སྐྱོ་ན་ཞེས་ཐམས་ཅད་རྒྱ་ཆེར་བརྗོད་པར་བྱའོ། །མ་ཡིན་ཏེ་ཞེས་བྱ་བ་རྒྱ་ཆེར་འབྱུང་སྐྱེ། དེ་དག་བསམ་གཏན་གསུམ་པའི་བདེ་བ་དེས་ཡོངས་སུ་སྐྱོ་བ་མེད་དོ། །གཞན་དག་ན་རེ་ཡིད་བདེ་བས་ཀྱང་ཡོངས་སུ་སྐྱོ་བ་ཡོད་པ་མ་ཡིན་གྱི། གཞན་དུ་ན་རྒོད་པའི་ཕྱིར་ཞེས་ཟེར་རོ། །གཞན་དག་ན་རེ། དེ་ལ་གཞན་གྱིས་ཡོངས་སུ་སྐྱོ་བ་ཅུང་ཟད་ཀྱང་མེད་པ་རྒོད་པ་ཁོ་ན་སྐྱེ་བས་ཡོངས་སུ་སྐྱེའོ་ཞེས་ཟེར་རོ། །འོང་བ་མེད་པར་འདུ་ཤེས་པའི་ཕྱིར་དང་ཞེས་བྱ་བ་རྒྱས་པར་འབྱུང་བ་ལ་སྐྱེས་ནས་ཡུན་རིང་དུ་མ་ལོན་པ་རྣམས་ནི་འོད་བར་འདུ་ཤེས་པའི་ཕྱིར་རོ། །སྐྱེས་ནས་ཡུན་རིང་དུ་ལོན་པ་རྣམས་ནི་མེད་པར་འདུ་ཤེས་པའི་ཕྱིར་རོ། །སྐྲག་པ་དང་མི་སྐྲག་པར་འདུ་ཤེས་པའི་ཕྱིར་ཞེས་བྱ་བ་ནི་དེ་དག་ཉིད་གོ་རིམས་བཞིན་ནོ། །གཏན་དག་ན་རེ་དེར་འཇིགས་པ་ཡང་བ་མ་ཡིན་ནོ་ཞེས་ཟེར་རོ། །སྐྲག་པ་སྐྱོ་བའི་བདག་ཉིད་དུ་གྱུར་པ་ཉིད་ནི་འདིར་ཡོད་པ་མ་ཡིན་ནོ། །འོ་ན་ཅི་ཞེ་ན། སྐྲག་པ་ནི་སྐྱོ་བའི་རྒྱུ་འཆི་བར་དོགས་པའི་མཚན་ཉིད་ཅན་ཏེ། བདག་ཏུ་འཛིན་པ་མ་སྤངས་པའི་ཕྱིར་དེ་དག་ལ་དེ་ཡོད་དོ། །ན་བཱ་ཪྻ་ཏ་ཨི་ཏི། དེ་ཉིད་འདིར་འཇིགས་བར་བརྗོད་དེ། འདིར་འཇིགས་པ་ནི་སྐྱོ་བ་ཉིད་དོ། །འདུ་ཤེས་གཅིག་པ་དག་ཅེས་བྱ་བ་ནི་བདེ་བར་འདུ་ཤེས་པ་དག་སྟེ། དེ་དག་ནི་བདེ་བ་གྱ་ནོམ་པ་ལ་གནས་པས་ཉེར་བསྡོགས་མངོན་དུ་མི་བྱེད་དོ། །དེ་ལ་བསམ་གཏན་དང་པོ་ན་ནི་ཉོན་མོངས་པ་ཅན་གྱི་འདུ་ཤེས་སུ་ཞེས་བྱ་བ་ལ།
རྒྱུ་མ་ཡིན་པ་ལ་རྒྱུར་མངོན་པར་ཞེན་པས་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་མཚུངས་པར་ལྡན་པའི་ཕྱིར་ན་ཉོན་མོངས་པ་ཅན་ནོ། །གཉིས་པ་ནི་དགེ་བའི་ཞེས་བྱ་བ་ནི་སྙོམས་པར་འཇུག་པའི་དབང་གིས་ཚོར་བའི་ཁྱད་པར་མངོན་དུ་བྱེད་པའི་ཕྱིར་རོ། །གསུམ་པ་ན་ནི་རྣམ་པར་སྨིན་པ་ལས་སྐྱེས་པའི་ཞེས་བྱ་བ་ནི་རྣམ་པར་སྨིན་པ་ལས་སྐྱེས་པའི་བདེ་བ་དང་མཚུངས་པར་ལྡན་པའི་ཕྱིར་ཏེ། གཞན་དུ་ན་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་འདུ་ཤེས་ཀུན་འབྱུང་བའི་ཕྱིར་དེ་ཡང་འདུ་ཤེས་ཐ་དད་པ་དག་ཏུ་འགྱུར་རོ། །རྣམ་པར་སྨིན་པ་ལས་སྐྱེས་པ་ཞེས་བྱ་བ་བཤད་པ་གཞན་ཡང་ཀུན་འབྱུང་བའམ་རྣམ་པར་སྨིན་པ་ལས་སྐྱེས་པ་ནི་འདུ་ཤེས་གཅིག་པ་ཉིད་དུ་ཞེས་བྱའོ། །གཟུགས་མེད་པ་གསུམ་ནི་ཞེས་བྱ་བ་ནི་ནམ་མཁའ་མཐའ་ཡས་དང༌། རྣམ་ཤེས་མཐའ་ཡས་དང་ཅི་ཡང་མེད་པ་ཞེས་བྱའོ། །མདོ་ལས་ཇི་སྐད་དུ་འབྱུང་བ་ལ་ཞེས་བྱ་བ་ལ། མདོ་ལས་དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་འདས་ཏེ་ཞེས་བྱ་བ་ནས་ནམ་མཁའ་མཐའ་ཡས་སོ་སྙམ་སྟེ་ནམ་མཁའ་མཐའ་ཡས་སྐྱེ་མཆེད་ཉེ་བར་བསྒྲུབས་ནས་གནས་སོ་ཞེས་བྱ་བའི་བར་དུ་རྒྱས་པར་འབྱུང་བ་ཡིན་ནོ། །གཟུགས་མེད་པ་གསུམ་གྱི་བདག་ཉིད་ཅན་དག་ཏུ་ནི་ཕུང་པོ་བཞིའོ། །ལྷག་མ་རྣམས་སུ་ནི་ལྔའོ། །གང་གི་ཕྱིར་རྒྱུ་རྣམ་པར་ཤེས་པ་གནས་པའི་དངོས་པོ་རྣམ་པར་ཤེས་པ་མངོན་པར་ཆགས་པའོ། །དངོས་པོ་བསྟན་པའི་ཕྱིར་རྣམ་པར་ཤེས་པའི་གནས་བསྟན་པ་སེམས་ཅན་དུ་སྟོན་པ་ཁོ་ནའི་དངོས་པོ་ནི་རྣམ་པར་ཤེས་པའི་གནས་རྣམས་སོ་ཞེས་གཞན་དག་ཟེར་རོ། །དེ་ལ་འདི་ལྟར་ལྷག་མ་དེ་འཇོམས་བྱེད་ལྡན་ཞེས་འབྱུང་བ་ལ་རྣམ་པར་ཤེས་པ་མངོན་པར་ཆགས་པའི་དངོས་པོ་ནི་འཇོམས་བྱེད་མ་ཡིན་པའོ། །རྣམ་པར་ཤེས་པ་མ་ཡིན་པ་ནི་འཇོམས་བྱེད་དོ། །དེ་ལ་ངན་སོང་དག་ཏུ་ནི་འཇོམས་པར་བྱེད་པ་སྡུག་བསྔལ་གྱི་ཚོར་བ་ཡིན་ཏེ་ངེས་རྣམ་པར་ཤེས་པ་ལ་གནོད་པའི་ཕྱིར་རོ། །གཞན་དག་ན་རེ་གང་དུ་སྲེད་པས་རྣམ་པར་ཤེས་པ་གཟུང་བ་དེ་དག་ནི་རྣམ་པར་ཤེས་པ་གནས་པ་ཡིན་ནོ། །ངན་འགྲོ་རྣམས་དང་གནས་གཙང་མ་དག་ན་ནི་ལས་
ཀྱིས་གཟུང་བ་ཡིན་ལ། འདུ་ཤེས་མེད་པའི་སེམས་ཅན་རྣམས་དང༌། སྲིད་པའི་རྩེ་མོར་ནི་ལྟ་བས་གཟུང་བ་ཡིན་པས། དེ་དག་རྣམ་པར་ཤེས་པ་གནས་པ་ཉིད་མ་ཡིན་ནོ། །ངན་སོང་དག་ན་ནི་གཉིས་ཀ་མེད་དོ་ཞེས་བྱ་བ་ལ། འདི་ན་གནས་པ་རྣམས་ནི་འགྲོ་བར་འདོད་པ་མ་ཡིན་ལ། དེ་ན་གནས་པ་རྣམས་ནི་བསྐྱོད་པར་མི་འདོད་པ་མ་ཡིན་ནོ། །སྲིད་པའི་རྩེ་མོར་ནི་རྒྱུ་བ་མི་གསལ་བའི་ཕྱིར་ཞེས་བྱ་བ་ལ། སེམས་དང་སེམས་ལས་བྱུང་བ་རྣམས་རྒྱུ་གཞན་པའི་ཕྱིར་ཞེས་བྱ་བའི་དོན་ཏོ། །གཞན་ཡང་ངན་སོང་པ་རྣམས་དང་འདུ་ཤེས་མེད་པའི་སེམས་ཅན་མ་གཏོགས་པའོ། །བསམ་གཏན་བཞི་པར་སྐྱེས་པ་རྣམས་དང་འདུ་ཤེས་མེད་པའི་སེམས་ཅན་གྱིས་བསྡུས་པ་འབྲས་བུ་ཆེ་རྣམས་སུའོ། །གལ་ཏེ་ཡང་འདི་ན་གནས་པ་རྣམས་འགྲོ་བར་འདོད་པ་ཡོད་མོད་ཀྱི། སོ་སོ་སྐྱེ་བོ་རྣམས་ནི་འདུ་ཤེས་མེད་པ་བར་འཇུག་པར་འདོད་པ་ཡིན་ལ། འཕགས་པ་རྣམས་ནི་སྤྲིན་མེད་དང་བསོད་ནམས་སྐྱེས་དག་ཏུ་ཡང་ངོ༌། །གནས་གཙང་མ་རྣམས་ཀྱང་གནས་གཙང་མ་དང་གཟུགས་མེད་པར་འཇུག་པར་འདོད་ལ། ཡོངས་སུ་མྱ་ངན་ལས་འདའ་བར་ཡང་འདོད་ཀྱི། དེ་ན་གནས་པའི་བློ་མེད་དེ་དེའི་ཕྱིར་སེམས་ཅན་གྱི་གནས་མ་ཡིན་ནོ། །འདི་དག་ཏུ་སེམས་ཅན་རྣམས་རང་དགའ་ས་ཀུན་ཏུ་གནས་ཏེ། སེམས་ཅན་དུ་བགྲང་བའི་ཆོས་རྣམས་ཁོ་ན་སེམས་ཅན་གྱི་གནས་ཞེས་བྱའོ། གང་གི་ཕྱིར་ལུས་ལ་སྲེད་པས་སེམས་ཅན་རྣམས་ཀྱི་གནས་ཡིན་གྱི། གནས་ལ་དགའ་བས་ནི་མ་ཡིན་ཏེ། གནས་དག་ཏུ་སེམས་ཅན་འཆོལ་བའི་ཕྱིར་དང༌། ལུ་ས་ཁོན་མ་འཆོལ་བའི་ཕྱིར་སེམས་ཅན་གྱི་གནས་ཡིན་ནོ། །གནས་མེད་པའི་ཕྱིར་སྲིད་པ་བར་མ་ཡང་སེམས་ཅན་རྣམས་མི་གནས་པས་སྲིད་པ་བར་མ་ཡང་སེམས་ཅན་གྱི་གནས་མ་ཡིན་ནོ། །བྱེ་བྲག་ཏུ་སྨྲ་བ་རྣམས་ན་རེ་འཁོར་བ་སྣ་ཚོགས་པའི་དོན་གྱིས་ན་རྣམ་པར་ཤེས་པ་གནས་པ་དག་ཡིན་ལ། གནས་པར་འདོད་པ་དག་གིས་མངོན་པར་དག་ལ་བར་བྱས་པའི་ཕྱིར་སེམས་ཅན་གྱི་གནས་དག་ཡིན་ནོ་ཞེས་བྱ་བ་ནི་དེ་དག་རྣམ་པར་བཞག་པའི་ཁྱད་པར་ཡིན་ནོ་ཞེས་ཟེར་རོ། །ས་གཞན་དུ་ནི་མ་ཡིན་ནོ་ཞེས་བྱ་བ་
ལས་གཞན་གྱི་ཕུང་པོ་རྣམས་ནི་མངོན་དུ་གྱུར་པ་ཡིན་ཡང་རྣམ་པར་ཤེས་པ་གནས་པའི་བྱ་བ་མི་བྱེད་དེ། སྲེད་པ་ཀུན་ཏུ་སྤྱོད་པའི་དབང་གིས་ན་དེ་ཉིད་རྣམ་པར་ཤེས་པ་རབ་ཏུ་གནས་པ་ཡིན་ན། དེ་དག་ལ་སྲེད་པ་ཀུན་ཏུ་སྤྱོད་པ་མེད་པའི་ཕྱིར་རོ། །རྒྱུ་གཞན་པ་དག་དང༌། སེམས་ཅན་དུ་བགྲང་བ་མ་ཡིན་པ་དག་ནི་རང་གི་ས་པ་ཡིན་ཡང་རྣམ་པར་ཤེས་བ་གནས་པ་མ་ཡིན་ནོ། །གཞན་དག་ན་རེ། དེ་དག་ཀྱང་རྣམ་པར་ཤེས་པ་གནས་པ་ཡིན་ཏེ། དེ་ལ་ཡང་རྣམ་པར་ཤེས་པ་ཉེ་བར་བརླན་པ་འཕེལ་བར་འགྱུར་བ་ཡིན་ནོ་ཞེས་ཟེར་རོ། །རྣམ་པར་ཤེས་པ་འགྲོ་བར་བྱེད་པ་ནི་འཇུག་པར་བྱེད་ཅེས་བྱ་བའི་དོན་ཏོ། །གཞན་དུ་མངོན་པར་དགའ་བ་ཡོངས་སུ་གཟུང་བས་འཇུག་པ་གཞན་ཡང་བརྗོད་པར་བྱའོ་ཞེས་ཏེ། མངོན་པར་དགའ་བ་ཡོངས་སུ་གཟུང་བ་ཡོང་པས་གང་ཞིག་ཚོར་བ་ལ་སོགས་པ་དང་འདྲེས་པའི་རྣམ་པར་ཤེས་པའི་འཇུག་པ་ཐ་དད་མེད་པའི་དུས་དེ་འདིར་འཇུག་པར་མངོན་པར་འདོད་དོ། །གྲུ་དང་མཉེན་པའི་ཚུལ་གྱིས་ཞེས་བྱ་བ་ནི་དཔེའོ། །གཞན་དུ་རྣམ་པར་ཤེས་པ་ཡང་རྣམ་པར་ཤེས་པ་ལ་གནས་ནས་འགྲོ་བར་བྱེད་པ་མ་ཡིན་ནོ། །འོ་ན་མདོ་ལས་ཞེས་བྱ་བ་འདིས་ནི་རྣམ་པར་ཤེས་པ་ཡང་རྣམ་པར་ཤེས་པ་གནས་པ་ཡིན་པར་བཤད་དོ་ཞེས་སྟོན་ཏོ། །དགའ་བ་ནི་ཡིད་བདེ་བའོ། །རྣམ་པར་ཤེས་པ་གནས་པ་བདུན་ཕུང་པོ་ལྔའི་རང་བཞིན་དག་ཡིན་ནོ་ཞེས་བྱ་བ་དེ་ཡང་ཇི་ལྟ་བུ་ཞེས་བྱ་བ་འདིས་ནི་ཡང་མདོ་དང་འགལ་བར་སྟོན་ཏེ། འདི་ལ་རྣམ་པར་ཤེས་པ་གནས་པ་གང་ཡིན་ཞེ་ན། དེ་དག་དང་ལྡན་པའི་ཕུང་པོ་ལྔ་ཡང་མ་ཡིན་ནོ་ཞེས་བཤད་ན་གལ་ཏེ་གནས་པ་ལྔ་པོ་ཡོངས་སུ་སྤངས་ནས་གནས་པ་ཞེས་བྱ་བ་ནི་དེ་ཇི་ལྟ་བུ་ཡིན། དེ་ལྟ་ན་འོ་ན་ནི་བྱེ་བྲག་མེད་པར་ཞེས་བྱ་བ་ནི་མདོ་དང་བསྟན་བཅོས་དག་དང་མི་འགལ་བར་བསྟན་པའོ། །བྱེ་བྲག་མེད་པར་ནི་ཞེས་བྱ་བ་ནི་ཁྱད་པར་མེད་པ་སྟེ། ལྔ་ཆར་ལ་ཡང་ཞེས་བྱ་བའི་དོན་གང་ཡིན་པའོ། །སྐྱེ་བའི་སྐྱེ་མཆེད་ཀྱིས་བསྡུས་པའི་ཕུང་པོ་དག་ལ་ཞེས་བྱ་བ་ནི་མི་ལ་སོགས་པའི་རིས་ཀྱིས་བསྡུས་པ་དུས་གསུམ་བདག་ལའོ། །མངོན་པར་དགའ་བ་དང་བཅས་པ་ཞེས་བྱ་བ་ལ། མངོན་པར་
དགའ་བ་ནི་ཡིད་བདེ་བ་དང་ཉོན་མོངས་པ་ཅན་ནོ། །འདིར་གནས་བརྟན་འདུས་བཟང་གིས་མང་དུ་བཤད་པ་དེ་ཡང་མངས་པའི་འཇིགས་པས་རྣམ་པར་མ་དཔྱད་དོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ནི་ངན་སོང་རྣམས་དང༌། བསམ་གཏན་བཞི་པ་དང་སྲིད་པའི་རྩེ་མོའི་རྣམ་པར་ཤེས་པ་གང་ཡིན་པ་དང༌། ཟག་པ་མེད་པའི་ཕུང་པོ་རྣམས་སོ། །འགྲོ་བ་ལ་སོགས་པའི་བྱེ་བྲག་གིས་ཐ་དད་པ་ཞེས་བྱ་བ་ལ་སོགས་པ་ཞེས་བྱ་བ་སྨོས་པས་ནི་སྣོད་དང༌། སྲིད་པ་བར་མ་དང་ས་བསྡུའོ། ཁམས་དག་སེམས་ཅན་དང་སེམས་ཅན་དུ་སྟོན་པ་ཉིད་ཡིན་པའི་ཕྱིར་རོ། སྐྱེ་གནས་དེ་དག་གང་གི་ཡིན་པ་མི་ཤེས་པས་སེམས་ཅན་ཞེས་བྱ་བ་སྨོས་ཏེ། སྐྱེ་གནས་དག་ནི་སེམས་ཅན་དུ་བགྲང་བ་མ་ཡིན་པ་ཡོད་པ་མ་ཡིན་ནོ། །དེ་དག་ཀྱང་གང་ཞེ་ན་སྒོ་ང་ལས་སྐྱེས་སོགས་ཞེས་བྱ་བ་སྨོས་ཏེ། སྐྱེ་གནས་ཞེས་བྱ་བ་ནི་སེམས་ཅན་རྣམས་ཀྱི་རིགས་ཡིན་གྱི་སྐྱེ་ས་ནི་མ་ཡིན་ནོ། །སྒོ་ང་ལས་སྐྱེས་པའི་སྐྱེ་གནས་ནི་སྒོ་ང་ལས་སྐྱེས་པའི་རིགས་ཞེས་བྱ་བའི་དོན་ཏོ། །རྫུས་ཏེ་སྐྱེས་པའི་སྐྱེ་གནས་ཀྱི་བར་དུ་ཡང་དེ་དང་འདྲའོ། །ཡང་དོན་གང་གི་རིགས་ལ་སྐྱེ་གནས་ཞེས་བརྗོད་ཅེ་ན། དེའི་ཕྱིར་འདིར་སེམས་ཅན་འཆོལ་བར་འགྱུར་ཞིང་ཞེས་བྱ་བ་སྨོས་སོ། །འཆོལ་བར་འགྱུར་ཞེས་བྱ་བའི་དོན་གང་ཡིན་ཞེ་ན། འདྲེ་བར་འགྱུར་བ་ཞེས་བྱ་བའི་དོན་འདི་ཡིན་ནོ། །འདྲེ་བར་འགྱུར་བ་ཡང་སྐྱེ་བ་ཐུན་མོང་བའི་ཕྱིར་ཏེ། སྐྱེ་བ་ཆོས་མཚུངས་པའི་ཕྱིར་ཞེས་བྱ་བའི་དོན་ཏོ། །སྒོ་ང་ལས་སྐྱེས་པ་རིགས་སུ་མི་རུང་སྟེ། སྒོ་ང་ལས་སྐྱེས་པ་ལ་སོགས་པ་རྣམས་ལས་གཞན་ངེས་པར་གཟུང་བའི་ཕྱིར། བྲམ་ཟེའི་རིགས་བཞིན་ནོ། །འདིར་སྐྱེ་བ་ཁོ་ན་ནི་མ་ཡིན་ན་རིགས་དང་ཁམས་དང་འགྲོ་བ་རྣམས་ཀྱང་སྐྱེ་གནས་ཉིད་དུ་ཐལ་བར་འགྱུར་རོ། །སེམས་ཅན་ལས་སེམས་ཅན་མཐའ་དག་ཀྱང་འདྲེས་པར་འགྱུར་བས་སྐྱེ་བའི་རྒྱུ་སྐྱེ་གནས་ཡིན་ནོ་ཞེས་སློབ་དཔོན་དཔལ་ལེན་ཟེར་རོ། །དེ་ལྟ་ན་སྒོ་ང་ལས་སྐྱེས་པ་ལ་སོགས་པ་རྣམས་ཁོ་ན་སྐྱེ་གནས་ཉིད་དུ་ཐལ་བར་འགྱུར་རོ། །མངལ་ནི་གང་གིས་མའི་ལྟོ་བར་དུ་ཉེ་བར་དཀྲིས་པའོ། །དྲོད་གཤེར་ནི་འདམ་རྫབ་ལ་
ལ་སོགས་པ་རྣམས་སུ་གཤེར་བ་ཉིད་དོ། །དབང་པོ་མཚང་བ་མ་ཡིན་པ་ཞེས་རྒྱ་ཆེར་འབྱུང་བ་ལ། དབང་པོ་མཐའ་དག་ཡོངས་སུ་རྫོགས་པ་ནི་ཡན་ལག་ཐམས་ཅད་དང་ལྡན་པ་སྟེ་མགོ་དང་ལག་པ་ལ་སོགས་པའོ། །ཉིང་ལག་དང་ལྡན་པ་ནི་མཐེབ་སོར་ལ་སོགས་པ་དང་ལྡན་པའོ། །སྔར་གྱི་རྒྱུ་ལ་མི་ལྟོས་པ་ཅིག་ཅར་དུ་སྐྱེ་བ་རྣམས་སོ་ཞེས་བྱ་བ་ལ་སྒོ་ང་ལས་སྐྱེ་བ་ལ་སོགས་པ་ལྟར་ནུར་ནུར་པོ་ལ་སོགས་པའི་རིམ་གྱིས་ནི་མ་ཡིན་ཏེ། འོ་ན་ཅི་ཞེ་ན་དང་པོ་ཉིད་ནས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་པ་ལ་སོགས་པའོ། །སྐྱེ་བ་ལ་ནི་འབྱུང་བ་ལའོ། །སྐྱེ་བ་དང་བརྫུ་བ་དང༌། འབྱུང་བ་ཞེས་བྱ་བ་ནི་དོན་གཅིག་སྟེ། དེ་ལ་མཛེས་པར་བྱེད་པའི་ཕྱིར་རྫུས་ཏེ་བྱུང་བ་རྣམས་སོ། །འདི་དག་གི་རང་བཞིན་ཡང་རྫུས་ཏེ་སྐྱེ་གནས་ནི་ཕུང་པོ་བཞི་དང་ལྔའི་རང་བཞིན་ཡིན། དེ་ལས་གཞན་རྣམས་ནི་ཕུང་པོ་ལྔའི་རང་བཞིན་ཡིན། དེ་ལས་གཞན་རྣམས་ནི་ཕུང་པོ་ལྔའི་རང་བཞིན་ཡིན། ཐམས་ཅད་ཀྱང་རྣམ་པར་སྨིན་པ་དང་རྒྱས་པའི་རྒྱུད་ཀྱི་རང་བཞིན་ནོ། །ཁ་ཅིག་ན་རེ་ཡི་དགས་རྣམས་ནི་རྫུས་ཏེ་སྐྱེ་བ་ཁོ་ན་ཡིན་ནོ་ཞེས་ཟེར་ཏེ། དེའི་ཕྱིར་ཡི་དགས་ལ་མངལ་ནས་སྐྱེ་བ་ཉིད་བསྒྲུབ་པའི་ཕྱིར་ཚེ་དང་ལྡན་པ་མཽངྒལ་གྱི་བུ་ཆེན་པོ་ལ་ཞེས་བྱ་བ་རྒྱས་པར་འབྱུང་ངོ༌། །གཞན་དག་ན་རེ་འོན་ཀྱང་བདག་ནི་ཚིམ་པ་མེད་ཅེས་འབྱུང་བའི་ཕྱིར་རྫུས་ཏེ་སྐྱེ་བ་ཉིད་དུ་གྲུབ་པར་བྱ་བའི་ཕྱིར་ཡིན་པར་ཤིན་ཏུ་ཆེས་རྟོགས་པ་མ་ཡིན་ནམ། མངལ་ནས་སྐྱེ་བ་དག་གིས་ནི་ཇི་ལྟར་བགྲངས་པར་མི་འགྱུར། མངལ་ནས་སྐྱེས་པ་ཉིད་ཡིན་ན་ནི་ཉིན་མོ་དང་མཚན་མོར་ལྔ་ལྔ་སྐྱེ་བར་ཡང་མི་རིགས་སོ། ཞེ་ན། བཀྲེས་པ་ཤིན་ཏུ་འཕེལ་བའི་ཕྱིར་ཚིམ་པ་མེད་དོ། །དེ་འདྲ་བ་དེ་ནི་སེམས་ཅན་གྱི་རང་བཞིན་ཡིན་པས་ཉིན་མཚན་དུ་ལྔ་ལྔ་སྐྱེ་བར་མི་འགལ་ལ། ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པའི་ཕྱིར་ཡང་འགལ་བ་མེད་དོ། །སྐྱེ་གནས་ཐམས་ཅད་དུ་སྐྱེས་པ་རྣམས་ལ་འཕགས་པའི་ཆོས་ཐོབ་པའི་གོ་སྐབས་ཡོད་མོད་ཀྱི། འཕགས་པའི་ཆོས་ཐོབ་ཟིན་པ་རྣམས་ནི་སྒོ་ང་ལས་སྐྱེས་པ་དང་དྲོད་གཤེར་ལས་སྐྱེ་བའི་གནས་དག་ཏུ་མི་སྐྱེའོ། །རྫུས་ཏེ་སྐྱེ་བ་ཡིན་ནོ་ཞེས་བྱ་བ་ལ་དེའི་སྐྱེ་གནས་པ་རྣམས་ནི་སྐྱེ་མཆེད་དྲུག་ཚང་བ་ཁོ་ན་འགྲུབ་པའི་ཕྱིར་སྐྱེ་
གནས་ཐམས་ཅད་ཀྱི་ནང་ན་རྫུས་ཏེ་སྐྱེ་བ་ཁོ་ན་བཟང་ངོ༌། །གལ་ཏེ་ཐམས་ཅད་ཀྱི་ནང་ན་རྫུས་ཏེ་སྐྱེ་བའི་སྐྱེ་གནས་ཁོ་ན་བཟང་ན་ཡང་ཅིའི་ཕྱིར་སྲིད་པ་ཐ་མ་པའི་བྱང་ཆུབ་སེམས་དཔའ་མངལ་ནས་སྐྱེ་བའི་སྐྱེ་གནས་ལེན། ལས་དག་གིས་ལེན་ནོ་ཞེ་ན། དེའི་ཕྱིར་སྐྱེ་བ་ལ་དབང་ཐོབ་པ་ཡང་ཞེས་བྱ་བ་སྨོས་སོ། །འཁོར་ལོས་སྒྱུར་བའི་རིགས་སུ་འཁྲུངས་པ་ནི་འཁོར་ལོས་སྒྱུར་བའི་རིགས་སོ། །གཞན་མུ་སྟེགས་ཅན་ཞེས་བྱ་བ་ནི་གཅེར་བུ་བ་གཉེན་གྱི་བུ་ལ་སོགས་པ་དག་གོ །སྒྱུ་མས་འཇིག་རྟེན་ཟའོ་ཞེས་བྱ་བ་ནི་ཉེ་བར་བསླུ་བའོ་ཞེས་བྱ་བའི་དོན་ཏོ། །ཕྱིའི་ས་བོན་མེད་པའི་ཕྱིར་ཞེས་བྱ་བ་ནི་ཕྱིའི་ཁུ་བ་དང་ཁྲག་གི་འདམ་ལ་སོགས་པ་མེད་པའི་ཕྱིར་ཞེས་བྱ་བའི་དོན་ཏོ། །བྱིན་གྱིས་བརླབས་ལས་བྱུང་བའི་ཕྱིར་ཞེས་བྱ་བ་ལ། བྱིན་གྱིས་བརླབས་ཀྱི་དགོས་པ་ཅན་ནམ། བྱིན་གྱིས་བརླབས་པ་ཡོད་པ་ནི་བྱིན་གྱིས་བརླབས་ལས་བྱུང་བའོ། །བྱིན་གྱིས་བརླབས་ནི་འདི་ནི་འདི་ལྟར་གྱུར་ཅིག་ཅེས་བྱིན་གྱིས་རློབ་པ་གང་ཡིན་པའོ། །ལན་དེ་རིགས་པ་མ་ཡིན་ནོ་ཞེས་བྱ་བ་ལ། སློབ་དཔོན་འདུས་བཟང་ན་རེ། རིགས་པ་ཉིད་དོ་ཞེས་ཟེར་ཏེ། གནས་སྐབས་སུ་འབྱུང་བ་དུས་ཆེས་རིང་པོར་འཇུག་པའི་ཕྱིར་བྱིན་གྱིས་བརླབས་པ་རིགས་སོ། །དྲི་བ་ལས་དྲི་བ་གཞན་འབྱུང་སྟེ་ཞེས་བྱ་བ་ནི་འོ་ན་ཅིའི་ཕྱིར་སྲིད་པ་ཐམ་པའི་བྱང་ཆུབ་སེམས་དཔའ་ཞེས་བྱ་བའི་དྲི་བ་དེ་ལས་དྲི་བ་འདི་བྱུང་བའོ། །གལ་ཏེ་རྫུས་ཏེ་སྐྱེ་བ་རྣམས་ཀྱི་ཞེས་བྱ་བ་རྒྱས་པར་འབྱུང་བ་ལ། ལུས་ཞིག་པ་ནི་ཤི་བའི་ལུས་གནས་པ་མེད་པའོ། །སྒོ་ང་ལས་སྐྱེ་བ་ལ་སོགས་པ་ལས་ཁྱད་དུ་བྱ་བའི་ཕྱིར་རྫུས་ཏེ་སྐྱེ་བའི་ཀླུ་བཟའ་བའི་ཕྱིར་འབྱིན་ཏོ་ཞེས་བྱ་བ་སྨོས་སོ། །ཀླུ་དང་ནམ་མཁའ་ལྡིང་དག་ནི་རྣམ་པ་བཞི་ཡིན་ཏེ། དེ་དག་གི་མཆོག་ནི་རྫུས་ཏེ་སྐྱེ་བའོ། །བར་མ་ནི་མངལ་ནས་སྐྱེ་བའོ། །ཐ་ཆད་ནི་སྒོ་ང་ལས་སྐྱེས་པའོ། །དེ་ལ་རྫུས་ཏེ་སྐྱེ་བའི་མཁའ་ལྡིང་གིས་ནི་དྲོད་གཤེར་ལས་སྐྱེས་པ་ལ་སོགས་པ་དག་ལས་སྔ་མ་སྔ་མ་ཟོས་ནས། ཀླུ་ཐམས་ཅད་བཟའ་བའི་ཕྱིར་འབྱིན་ཏོ། །ཤི་བ་དེས་ཚིམ་པར་འགྱུར་བ་ནི་མ་ཡིན་ནོ་ཞེས་བྱ་བ་ལ་
འདིས་སྔར་མ་ཤི་བར་ཟོས་པ་གང་ཡིན་པ་དེ་ཡང་ཤི་བའི་ཚོ་མི་སྣང་བར་འགྱུར་རོ། །།དེས་ནི་འགྲོ་བ་གཉིས་ཞེས་བྱ་བ་ནི་ལྷའི་འགྲོ་བ་དང༌། དམྱལ་བའི་འགྲོ་བའོ། །གསུམ་གྱི་ཕྱོགས་ཞེས་བྱ་བ་ནི་མི་དང་དུད་འགྲོ་དང་ཡི་དགས་རྣམས་ཀྱི་ཕྱོགས་སོ། །གང་ལས་སྲིད་པ་བར་མ་ཐམས་ཅད་ཡིན་ནོ་ཞེས་དེ་སྐད་དུ་བརྗོད་པ། སྲིད་པ་བར་མ་ཞེས་བྱ་བ་འདི་ཅི་ཞེ་ན། ཞེས་བྱ་བ་ལ་འདི་ལོག་པར་རྟོགས་པའི་ཕྱིར་དང༌། མཚན་ཉིད་མ་བསྟན་པའི་ཕྱིར་ཐེ་ཚོམ་ཟ་བས་དྲིས་པའོ། །འགྲོ་བའི་བར་མ་ཡིན་པའི་ཕྱིར་རོ་ཞེས་བྱ་བ་ལ་འགྲོ་བ་སྔ་མ་དང་ཕྱི་མའི་བར་ན་ཡོད་པའི་ཕྱིར་རོ། །ཞེས་བྱ་བའི་དོན་ཏོ། །ཇི་ལྟར་འདི་སྐྱེས་པ་ཡང་ཡིན་ལ། བྱུང་བ་ཡང་མ་ཡིན་ཞེ་ན། ཞེས་བྱ་བ་ལ་འདི་སྐད་དུ་འདི་ཤི་ཞིང་མངོན་པར་གྲུབ་པ་ཡང་ཡིན་ལ་བྱུང་བ་ཡང་མ་ཡིན་ནོ་ཞེས་བྱ་བ་འདི་ནི་དད་པས་རྟོགས་པར་བྱ་བ་ཡིན་ནོ་ཞེས་བསྟན་པར་འགྱུར་རོ། །དེ་ནི་ངེས་པར་ལས་ཀྱི་སྒོ་ནས་མངོན་པར་གྲུབ་པར་ཁས་བླངས་བར་བྱའི་རང་བཞིན་གྱི་སྒོ་ནས་མ་ཡིན་ཏེ་རྒྱུ་མེད་པ་ཉིད་དུ་ཐལ་བར་འགྱུར་བའི་ཕྱིར་རོ། །དེའི་ཕྱིར་གདོན་མི་ཟ་བར་སྐྱེ་བ་ཁས་བླང་བར་བྱ་སྟེ། ལས་ཀྱི་རྒྱུས་བསྐྱེད་པའི་ཕྱིར་ཞེས་འབྱུང་བའི་ཕྱིར་སོ་ན་པ་ནི་འབྱུང་བ་ཞེས་བརྗོད་དོ། །འདི་སྐད་བསྟན་པར་འགྱུར་ཏེ། བྱུང་བའི་སྒྲ་ནི་སོན་པ་ལ་འཇུག་གོ །སྲིད་པ་བར་མ་ནི་བགྲོད་པའི་ཡུལ་དུ་མ་ཕྱིན་པའི་ཕྱིར་བྱུང་བ་མ་ཡིན་ཏེ། འོ་ན་ཅི་ཞེ་ན་འབྱུང་བཞིན་པ་ཡིན་ནོ། །སོན་པ་ནི་ཞེས་བྱ་བ་འདིས་ནི་བྱུང་བའི་སྒྲ་སོན་པ་ལ་འཇུག་གོ་ཞེས་སྟོན་ཏོ། །གཞན་དག་ན་རེ། དེས་བགྲོད་པར་བྱ་བའི་ཡུལ་གང་ཡིན་པ་དེ་དང༌། ད་རུང་དུ་ཡང་དེ་མི་ལྡན་ཏེ། ཡུལ་དེ་དང་མི་ལྡན་ཞེས་བྱ་བའི་དོན་ཏོ་ཞེས་ཟེར་རོ། །དེའི་ཕྱིར་རྣམ་པར་སྨིན་པ་གཞན་གྲུབ་ཀྱང་བྱུང་བ་ཞེས་མི་བྱ་སྟེ། དེ་ཉིད་ཀྱི་ཕྱིར་སྐྱེ་བའི་སྲིད་པའི་བར་དུ་འབྱུང་བའི་ཕྱིར་སྲིད་པ་བར་མ་ཡིན་ནོ་ཞེས་བསྟན་ཏོ་ཞེས་བྱའོ། །གང་དུ་རྣམ་པར་སྨིན་པ་འཕངས་པ་ཞེས་བྱ་བ་ལ། འཕེན་པ་བྱེད་པའི་ལས་ཀྱིས་ནི་རིས་མཐུན་པ་མངོན་པར་འགྲུབ་པ་ཡིན་ལ། རྫོགས་པར་བྱེད་པ་དག་གིས་ནི་རྫོགས་པར་བྱེད་དེ། གཅིག་གིས་སྐྱེ་བ་གཅིག་འཕེན་ཏེ། ཡོངས་རྫོགས་བྱེད་པ་དུ་མ་
ཡིན་ཞེས་བྱ་བ་སྐྱེ་བ་ཐམས་ཅད་ལ་ལས་གཉིས་ཀྱིས་བྱ་བ་བྱེད་དོ། །གཞན་དག་ན་རེ་འཆི་བའི་སྲིད་བ་ཆད་པ་ཁོ་ན་ལས་ཞེས་བྱ་བ་ལ་སོགས་པ་ལ་འཆི་བའི་སྲིད་པའི་མཇུག་ཐོགས་ཁོ་ནར་ཡུལ་གཞན་དུ་སྐྱེ་བའི་སྲིད་པ་འབྱུང་གི་བར་ན་གནས་པའི་བདག་ཉིད་ཅན་རྒྱུ་མཚན་གཞན་སྔོན་དུ་འགྲོ་བ་ནི་མ་ཡིན་ནོ་ཞེས་བྱ་བའི་དོན་ཏོ། །རིགས་པ་དང་ལུང་ལས་ཏེ་ཞེས་བྱ་བ་ལ་རིགས་པ་དང་ལུང་རྐྱང་པ་དག་ཚད་མ་མ་ཡིན་པའི་ཕྱིར་གཉི་ག་ཉེ་བར་བཀོད་དོ། །འབྲུའི་རྒྱུན་དང་ཆོས་མཐུན་ཕྱིར་ཞེས་བྱ་བ་རྒྱས་པར་འབྱུང་བ་ལ་གལ་ཏེ་འཆི་བའི་སྲིད་པ་ཁོ་ན་ལས་ཡུལ་གཞན་དག་ཏུ་སྐྱེ་བའི་སྲིད་པ་འབྱུང་བར་འདོད་ན་ནི། དེ་ལྟ་ན་སྐྱེ་བའི་སྲིད་པ་མི་སྲིད་པ་ཉིད་དུ་ཐལ་བར་འགྱུར་ཏེ། རྒྱུན་གྱིས་འཇུག་པའི་ཕྱིར་རོ། །འདི་ལྟར་རྒྱུན་གྱིས་འཇུག་པའི་ཕྱིར་དངོས་པོ་རྣམས་ནི་ཆད་ནས་ཡུལ་གཞན་དག་ཏུ་འབྱུང་བར་མ་མཐོང་སྟེ། དཔེར་ན་འབྲུའི་རྒྱུན་དུ་གཏོགས་པའི་འབྲུའི་འབྲས་བུ་རྣམས་རྒྱུན་དུ་འབྲེལ་བས་རྒྱས་པ་བཞིན་ནོ། །འདི་དག་ལ་རྒྱུན་གྱིས་འཇུག་པའི་ངང་ཚུལ་ཡོད་པས་ན་རྒྱུན་གྱིས་འཇུག་པའོ། །ཡུལ་གཞན་དག་ཏུ་ཞེས་བྱ་བ་སྨོས་པའི་ཕྱིར་སེམས་ཀྱི་རྒྱུན་གྱིས་མ་ངེས་པ་ཡང་མ་ཡིན་ཏེ། འགོག་པ་དང་འདུ་ཤེས་མེད་པའི་སྙོམས་པར་འཇུག་པ་ལས་ལྡང་བའི་སེམས་ཡོད་པ་ན་དུས་གཞན་དུ་ཆད་པ་ཞེས་བྱ་སྟེ། དེ་བཞིན་དུ་གཟུགས་མེད་པའི་ཁམས་ནས་ཤི་འཕོས་པ་རྣམས་ལ་ཡང་གཟུགས་སྐྱེ་བ་ཡུལ་གཞན་དུ་ཆད་པ་མ་ཡིན་ནོ་ཞེས་བརྗོད་པར་བྱའོ། །རྒྱུའི་གཟུགས་ལས་འབྲས་བུའི་གཟུགས་ཆད་ནས་འབྱུང་བ་ཡང་མཐོང་སྟེ། དཔེར་ན་གཟུགས་ལས་གཟུགས་བརྙན་བཞིན་ཞེས་བྱ་བ་ནི་རྒྱུ་འཁྲུལ་པ་ལས་བྱུང་ཞེས་པའོ། །གཟུགས་བརྙན་མ་གྲུབ་ཕྱིར་བ་དང༌། ཞེས་བྱ་བ་འདིས་བརྗོད་པར་འདོད་པ་མེད་པའི་ཕྱིར་མ་ངེས་པ་ཉིད་དོ་ཞེས་སྟོན་པར་བྱེད་དོ། །དམིགས་པ་དང་བཅས་པའི་ཆོས་རྣམས་གང་ཞེ་ན། སེམས་དང་སེམས་ལས་བྱུང་བ་རྣམས་སོ། །དམིགས་པ་མེད་པའི་ཆོས་རྣམས་གང་ཞེ་ན། གཟུགས་དང་འདུས་མ་བྱས་དང་ལྡན་པ་མ་ཡིན་པ་རྣམས་སོ་ཞེས་བསྟན་བཅོས་ལས་འབྱུང་བས་ན་གཟུགས་བརྙན་སེམས་དང་སེམས་ལས་བྱུང་
བའི་དམིགས་པ་ཡིན་པའི་ཕྱིར་ཡོད་དོ་ཞེ་ན། འདིའི་ལན་གྱི་ཕྱིར་མི་འདྲའི་ཕྱིར་ན་དཔེ་མ་ཡིན་ཞེས་བྱ་བ་སྨོས་སོ། །ཁ་དོག་གི་ཁྱད་པར་གཞན་ཞེས་བྱ་བ་ལ། མེ་ལོང་གི་ཁ་དོག་ལས་གཞན་པ་ནི་ཁ་དོག་གི་ཁྱད་པར་གཞན་ནོ། །ཚིག་ཙམ་གྱིས་དད་བར་མི་འགྱུར་བས་འདྲི་བ་ནི་རེ་ཞིག་ཇི་ལྟར་མ་གྲུབ་ཅེ་ན་ཞེས་བྱའོ། །ཡུལ་དེ་ཉིད་ན་ཞེས་བྱ་བ་ལ་ཟུར་ན་གནས་པས་མེ་ལོང་གི་ཡུལ་དེ་ཉིད་ན་མེ་ལོང་གི་གཟུགས་མཐོང་གི་གཟུགས་བརྙན་མ་ཡིན་ལ་མདུན་ན་གནས་པས་གཟུགས་བརྙན་མཐོང་གི་མེ་ལོང་གི་གཟུགས་མ་ཡིན་ཏེ། དེ་ལྟར་བསྡོམས་པས་དེར་གཉིས་ཀ་སྣང་ངོ༌། །གཞན་དག་ན་རེ་མདུན་དུ་ཕྱོགས་པས་གཉིས་ཀ་མཐོང་ངོ་ཞེས་ཟེར་རོ། །དེའི་ཕྱིར་མེ་ལོང་གཅིག་ན་སྣང་བ་གཉིས་ལྷན་ཅིག་ཏུ་མི་སྲིད་པའི་ཕྱིར་དེ་ན་མེ་ལོང་གི་གཟུགས་ལས་གཟུགས་བརྙན་ཡོད་པ་མ་ཡིན་ནོ། །རྟེན་གྱི་འབྱུང་བ་ཐ་དད་པའི་ཕྱིར་ཞེས་བྱ་བ་ལ་དེ་གཉིས་ཀྱི་རྟེན་གྱི་འབྱུང་བ་རྣམས་ནི་ཐ་དད་པ་ཡིན་ལ། མེ་ལོང་གི་གཟུགས་ཀྱི་རྟེན་གྱི་འབྱུང་བ་རྣམས་ཀྱིས་གཟུང་བའི་ཡུལ་དེ་ན་གཟུགས་བརྙན་གྱི་གཟུགས་ཀྱི་རྟེན་གྱི་འབྱུང་བ་རྣམས་ཀྱི་གོ་ཡོད་པ་ཡང་མ་ཡིན་ཏེ། ཐོགས་པ་དང་བཅས་པའི་ཕྱིར་རོ། །དེའི་ཕྱིར་དེ་ན་རྒྱུར་བྱས་པའི་གཟུགས་གཉིས་ལྷན་ཅིག་འབྱུང་བ་ནི་མེད་དོ། །དེ་བཞིན་དུ་ཕྱོགས་གཞན་ན་གནས་པ་རྣམས་ཀྱིས་ཞེས་བྱ་བ་རྒྱས་པར་འབྱུང་བ་ལ། ཕྱོགས་ཐ་དད་པ་ན་གནས་པའི་སྐྱེས་བུ་གཅིག་གིས་རྒྱབ་ཀྱི་ཤིང་ལྗོན་པ་ལ་སོགས་པའི་གཟུགས་ཇི་ལྟར་ཡིན་པ་དེ་བཞིན་དུ་གཞན་གྱི་ཡང་དེ་ཁོ་ན་ལྟར་ཡིན་ནོ། །དེ་ལ་གཅིག་གིས་ནི་རང་གི་མདུན་རོལ་གྱི་ཡུལ་ན་གནས་པའི་ཤིང་ལྗོན་པ་ལ་སོགས་པའི་གཟུགས་ཀྱི་གཟུགས་བརྙན་དམིགས་ཀྱི། རྒྱབ་ན་གནས་པའི་མ་ཡིན་ལ། ཅིག་ཤོས་ཀྱིས་ཀྱང་མཚེའུའི་ཆུའི་ཡུལ་དེ་ཉིད་དུ་དེ་ཁོ་ན་ལྟར་དམིགས་སོ། །གལ་ཏེ་དེ་ན་ཆུའི་གཟུགས་ལྟར་གཟུགས་བརྙན་གྱི་གཟུགས་དག་ཀྱང་ཡོད་ན་ནི་གཟུགས་ཐུན་མོང་བ་ཡིན་པས་ཐམས་ཅད་ཀྱིས་ཆུའི་གཟུགས་ཅིའི་ཕྱིར་མ་དམིགས། དམིགས་པ་ཡང་མ་ཡིན་ཏེ། དེའི་ཕྱིར་འདི་ནི་འཁྲུལ་པ་ཙམ་ཞིག་ཡིན་གྱི་གཟུགས་གཞན་ནི་མ་ཡིན་ནོ། །ཡང་གྲིབ་
མ་དང་ཉི་མ་གཉིས་ཀྱང་ཞེས་བྱ་བ་ལ་སོགས་པ་འབྱུང་བ་ལ་གང་གི་ཚེ་མེ་ལོང་གྲིབ་མན་འདུག་ཅིང་བསྒྲིབས་པ་མ་ཡིན་པའི་ཚེ་དེར་ཉི་མའི་གཟུགས་བརྙན་སྣང་ལ། ཉི་མ་ལ་འདུག་པ་ལ་གྲིབ་མ་སྣང་ན། ཉི་མ་དང་གྲིབ་མ་དག་ནི་ལྷན་ཅིག་གནས་པར་འགལ་བའི་ཕྱིར་རོ། །དེར་ཡང་དེར་སྐྱེ་བཞིན་པ་དེར་དམིགས་པ་མ་ཡིན་ཏེ་མེ་ལོང་ལ་གཟུགས་བཞིན་ནོ། །གལ་ཏེ་ཅུང་ཟད་ཀྱང་མེད་ན། འོ་ན་དེ་ཇི་ལྟར་སྣང་ཞེ་ན། དེའི་ཕྱིར་གང་དེ་ལྟར་སྣང་བ་དེ་ནི་ཚོགས་པ་དེའི་མཐུ་དེ་འདྲ་བ་ཡིན་ཏེ་ཞེས་བྱ་བ་སྨོས་ཏེ། མཐུ་དང་ནུས་པ་དང་ནུས་མཐུ་ཞེས་བྱ་བ་ནི་དོན་གཅིག་གོ །ཇི་ལྟར་ཞེ་ན་ཆོས་རྣམས་ཀྱི་མཐུ་ཞེས་བྱ་བ་རྒྱས་པར་འབྱུང་སྟེ། ཇི་ལྟར་མིག་སེར་གྱིས་མིག་ཉམས་པར་བྱས་པས་ཐམས་ཅད་དུ་སེར་པོར་མཐོང་ལ། རབ་རིབ་ཅན་གྱིས་ཟླ་བ་གཉིས་སུ་མཐོང་བ་དང༌། ཇི་ལྟར་ཁབ་ལེན་ཁོ་ནས་ལྕགས་དག་འདྲེན་གྱི་གཞན་གྱིས་མ་ཡིན་པ་དང༌། ཟླ་བ་ཤར་ན་ཆུ་ཤེལ་ཁོ་ན་ལས་ཆུ་འབྱུང་གི །སོལ་བ་ལ་སོགས་པ་དག་ལས་མ་ཡིན་པ་དེ་བཞིན་དུ་གཟུགས་གཞན་མེད་ཀྱང་མིག་དང་མེ་ལོང་གི་ངོས་དང་དེའི་བཞིན་གྱི་གཟུགས་ལ་བརྟེན་ནས་དེའི་གཟུགས་བརྙན་གྱི་རྣམ་པ་ཅན་གྱི་མིག་གི་རྣམ་པར་ཤེས་པ་འབྱུང་བ་ཡིན་ནོ། །འདི་ལ་འགའ་ཞིག་ན་རེ། གཅིག་ན་ལྷན་ཅིག་གཉིས་མེད་ཕྱིར་ཞེས་བྱ་བ་ལ། ཁྱེད་ཅག་རྣམས་ཉིད་ཀྱིས་ལན་དུ་བྱས་པ་ཚོགས་པའི་མཐུ་ལས་དེ་དང་འདྲ་བར་སྣང་བ་གང་ཡིན་པ་ནི་ཡུལ་ཐ་དད་པ་དག་ཏུ་ཡང་མེ་ལོང་ལ་གཟུགས་བརྙན་གྱི་གཟུགས་དག་ཐ་མི་དད་པའི་ཡུལ་དུ་མཐོང་བར་འགྱུར་རོ། །ཕྲ་བ་དང་དྲོ་བ་དང་བསིལ་བའི་རེག་བྱ་བཞིན་ནོ། །མེ་ལོང་གི་འབྱུང་བ་ཆེན་པོ་རྣམས་གཟུགས་བརྙན་གྱི་འབྱུང་བ་ཆེན་པོ་རྣམས་ལས་ཐ་དད་པའི་ཁྱད་པར་མེ་དེ། འདུས་པ་རྣམས་པར་དང་བཅས་པའི་ཕྱིར་རོ། །གཟུགས་བརྙན་གྱི་འབྱུང་བ་ཆེན་པོ་རྣམས་ཕྲ་བའི་ཕྱིར་ཁོ་བོ་ཅག་ཀྱང་གཟུགས་གཅིག་ལ་གཉིས་སུ་མཐོང་བ་དང་ལྷན་ཅིག་མཐོང་བ་ཡིན་ནོ་ཞེས་མི་སྨྲའོ། །དེ་ལ་གཟུགས་བརྙན་རྣམས་ནི་འོག་ཏུ་ཞུགས་པ་ལ་འབྱུང་སྟེ། གང་གི་ཕྱིར་རང་གི་ཡུལ་དུ་གཟུགས་
དང་གཟུགས་བརྙན་དག་མི་སྣང་ལ། ཡུལ་གཞན་དུ་གཟུགས་བརྙན་རྣམས་ཀྱང་སྣང་བ་མཐོང་སྟེ་ཕྲ་བའི་སར་གཏོགས་པའི་ཕྱིར་རོ། །དེའི་ཕྱིར་གང་ཞིག་དམའ་བར་གྱུར་བ་ལ་གཟུགས་དང་གཟུགས་བརྙན་རྣམས་ཀྱང་སྣང་ངོ༌། །གང་བཤད་པ་གྲིབ་མ་དང་ཉི་མ་དག་ཀྱང་ལྷན་ཅིག་འབྱུང་བ་མ་མཐོང་ན་ཞེས་བྱ་བ་ལ། དེ་མ་མཐོང་བ་བདེན་ནོ། །ཡང་གྲིབ་མ་ན་འདུག་པའི་མེ་ལོང་གི་ངོས་ལ་ཞེས་བྱ་བ་ལ་སོགས་པ་ལ་དེ་མི་རིགས་ཏེ། ཅིའི་ཕྱིར་ཞེ་ན། གང་ན་སྲིབ་མ་ཡོད་པ་དེ་ན་ཉི་མ་མེད་དེ། ཉི་མའི་གཟུགས་བརྙན་གྱིས་བར་ཆོད་པའི་ཕྱིར་རོ། །གང་ན་ཉི་མའི་གཟུགས་བརྙན་ཡོད་པ་དེ་ན་གྲིབ་མ་མེད་དེ། ཉི་མའི་གཟུགས་བརྙན་གྱིས་བར་དུ་ཚོད་པའི་ཕྱིར་རོ། །འདི་ཡང་གང་གི་ཕྱིར་བཤད་ཅེ་ན། ཕྱོགས་གཞན་ཉིད་དུ་མེ་ལོང་གི་ངོས་ལ་ཞེས་རྒྱ་ཆེར་འབྱུང་སྟེ། འདི་ལ་ཁྱེད་ཅག་ཁོ་ནས་ལན་དུ་བྱས་པ་ཚོགས་པའི་མཐུ་ཁོ་ན་ལས་དེ་འདྲ་བར་སྣང་ངོ་ཞེས་བྱའོ། །གཞན་དག་ན་རེ་ནམ་མཁའི་ཁམས་ཀྱི་གཟུགས་བརྙན་གྱི་ཁྱད་པར་ལས་ཡུལ་ཐ་དད་པའི་གཟུགས་བརྙན་ཡང་སྨོས་སོ། །གཉིས་ཀ་ལས་དེར་གཟུགས་བརྙན་སྐྱེ་སྟེ། ནམ་མཁའི་དབྱིངས་ནས་ཟླ་བའི་དཀྱིལ་འཁོར་བཞིན་ནོ་ཞེས་ཟེར་རོ། །ཆོས་མངོན་བ་པ་རྣམས་ནི། གཟུགས་བརྙན་ཞེས་བྱ་བ་འབྱུང་བ་དང་འབྱུང་བ་ལས་གྱུར་པ་འདུས་པའི་ཁྱད་པར་ཞིག་ཡོད་པ་ཉིད་དོ་ཞེས་ཟེར་རོ། །གཟུགས་བརྙན་གཞན་བསྐྱེད་པའི་རྒྱུ་ཡིན་པའི་ཕྱིར་གཟུགས་བརྙན་གྱི་རྒྱུ་བཞིན་ནོ། །གཞན་ཡང་རྫས་ཀྱི་མཚན་ཉིད་དུ་ཡོད་པར་རིགས་པའི་ཕྱིར་རྣམ་པར་ཤེས་པའི་ཡུལ་དུ་གྱུར་པའི་མཚན་ཉིད་ཡོད་དོ་ཞེས་གྲག་གོ །ནམ་ཞིག་ཉེ་བར་དམིགས་པ་ན་དེ་ལས་གཞན་པའི་འདུས་བྱས་བཞིན་འདི་ཡོད་པ་ཉིད་དུ་གྲུབ་སྟེ། རྣམ་པར་མི་རྟོག་པའི་ཡེ་ཤེས་ཀྱི་ཡུལ་ཡིན་པའི་ཕྱིར་རོ། །གང་གི་ཕྱིར་རྣམ་པར་ཤེས་པའི་ཚོགས་ལྔའི་ཡུལ་དུ་གྱུར་པ་དེ་ཡོད་པས་རབ་ཏུ་གྲུབ་པས་མིག་གི་རྣམ་པར་ཤེས་པ་ལ་ཡང་འདི་ཡུལ་དུ་འགྱུར་བས་ཡོད་པ་དེ་གཟུགས་གཞན་ལ་སྒྲིབ་པར་བྱེད་པའི་ཕྱིར་རོ། །གཟུགས་གཞན་ནི་གཟུགས་བརྙན་ལ་སྒྲིབ་པར་བྱེད་དེ། རང་གི་ཡུལ་དུ་གཞན་བསྐྱེད་པའི་གེགས་བྱེད་པའི་ཕྱིར་རོ། །གལ་ཏེ་
གཅིག་མ་ཡིན་ཡང་རང་གི་ཡུལ་མ་ཡིན་པར་མང་པོ་སྐྱེ་བ་མཐོང་བས་བསྒྲིབ་པ་མ་གྲུབ་བོ་ཞེ་ན། ཉི་མའི་བྱ་བའི་གཟུགས་བཞིན་ཡུལ་ཐ་དད་པ་རྣམས་སུ་འདི་ཡུལ་མ་ཡིན་པའི་མངོན་པའི་ང་རྒྱལ་གྱིས་མེ་ལོང་ལ་ཡང་དེ་ལྟར་མ་དམིགས་སོ། །མེ་ལོང་གཅིག་ཉི་ཆེ་ལ་གཟུགས་བརྙན་གཉིས་སྐྱེ་བ་མེད་དོ། །གཞན་དུ་ན་དངོས་པོ་རྣམས་མཚུངས་པར་སྐྱེ་བའི་ཕྱིར་རོ། །གང་གི་ཕྱིར་རྟེན་ཅིང་འབྲེལ་པར་འབྱུང་བ་རྣམ་པར་ཤེས་པ་རྣམས་དང་མྱུ་གུ་ལ་སོགས་པ་རྣམས་ཡོད་པ་ཉིད་དུ་གྲུབ་པས་འདི་ཡང་རྟེན་ཅིང་འབྲེལ་པར་འབྱུང་བ་ཉིད་དུ་བལྟའོ། །གཟུགས་བརྙན་གྲུབ་ཀྱང་སྲིད་པ་བར་མ་ལ་སོགས་པ་རྣམས་ཀྱི་གཟུགས་ཆད་ནས་སྐྱེ་བ་ལ་འདི་དཔེར་ནུས་པ་མ་ཡིན་ཏེ། གཟུགས་བརྙན་དང་འབྲེལ་པ་ལས་སྐྱེ་བ་ཁས་བླངས་པའི་ཕྱིར་རོ། །བར་དུ་མིག་དང་སྣང་བ་དང༌། བཞིན་ལ་སོགས་པའི་རྒྱུ་ལས་བར་ཆད་མེད་པར་གཟུགས་བརྙན་སྐྱེ་བར་འགྱུར་ཏེ། དབུ་བ་བཞིན་ཁ་དོག་གི་རྟེན་ལ་གནས་པ་ཉིད་དུ་མཐོང་ངོ༌། །རྩིག་པ་ལ་སོགས་པ་དང་ཉེ་བ་ལས་ཟླ་བའི་འོད་ལ་སོགས་པ་མཐོང་བ་བཞིན་ནོ། །ཡང་གཟུགས་དང་འབྲེལ་པ་ཉིད་ལས་གཟུགས་བརྙན་སྐྱེའོ་ཞེས་བྱ་བ་འདི་ཇི་ལྟར་ཤེས་པར་བྱ་ཞེ་ན་བསྒྲིབས་པ་རྣམས་ལ་མི་སྐྱེའོ། །གལ་ཏེ་ཟླ་བ་ལ་སོགས་པ་ལ་གེགས་བྱེད་པ་མེད་ན་ཆུ་ལ་སོགས་པ་ལ་གཟུགས་བརྙན་སྐྱེ་བར་འགྱུར་རོ། །བསྒྲིབས་པ་རྣམས་ལ་ཡང་སྐྱེ་བར་འགྱུར་རོ། །སྲིད་པ་བར་མདོ་མེད་པ་དང་ཡུལ་མེད་པར་ཕུང་པོ་འགགས་པ་ཡུལ་གཞན་དུ་སྐྱེ་བ་ལྟ་བུ་འགྲོ་བའི་རྣམ་པ་བློ་ཧྲཱ་ས་ལ་སོགས་པའི་རྗེས་སུ་བྱེད་པའི་ཕྱིར་རོ། །དེའི་ཕྱིར་མཆོད་པར་གཟུགས་བརྙན་སྐྱེའོ་ཞེས་བྱ་བ་འདི་སྲིད་པ་བར་མའི་དཔེ་མ་ཡིན་ནོ། །བྱཱ་གྷ་ཏཱ་ཡ་སམྦརྟྟ་ཏེ་ཞེས་བྱ་བ་དེ་ལྟ་བུ་ལ་སོགས་པ་མང་དུ་བཤད་དེ། འདི་ཡང་གཞུང་མངས་པ་ཡོངས་སུ་སྤང་བའི་ཕྱིར་རྣམ་པར་མི་དཔྱད་དོ། །འདིར་རྣམ་པར་བཤད་པ་ནི་གང་དག་ལ་དོགས་པ་ཡོད་པ་རང་ཉིད་ཀྱིས་ཁས་བླངས་ཏེ་སོ་སོར་བསྒྲུབ་པར་བྱས་སོ། །རྒྱུན་མིན་ཕྱིར་ཞེས་བྱ་བ་རྒྱས་པར་འབྱུང་བ་ལ་གལ་ཏེ་གཟུགས་བརྙན་གཟུགས་ཀྱི་རྒྱུན་གྱི་ཁོངས་སུ་གཏོགས་པ་ཡིན་ན་ནི་མེ་
ལོང་གི་རྒྱུད་དང་མ་འབྲེལ་པར་གཟུགས་དང་འབྲེལ་པ་ཁོ་ནར་འབྱུང་བར་འགྱུར་ཏེ། གཞན་གྱི་རྒྱུད་དུ་གཏོགས་པ་ནི་གཞན་གྱི་རྒྱུ་དང་འབྲེལ་ཏེ་འབྱུང་བར་མི་རིགས་སོ། །ལྷན་ཅིག་འབྱུང་བའི་ཕྱིར་ཡང་གཟུགས་བརྙན་གཟུགས་ཀྱི་རྒྱུན་མ་ཡིན་ཏེ། གང་ཞིག་གང་གི་རྒྱུན་ཡིན་པ་དེ་ནི་ལྷན་ཅིག་འབྱུང་བར་མ་མཐོང་སྟེ། དཔེར་ན་ས་བོན་དང་མྱུ་གུ་བཞིན་ནོ། །ཇི་ལྟར་འཆི་བའི་སྲིད་པའི་རྒྱུན་སྐྱེ་བའི་སྲིད་པ་ལྟ་བུ་སྟེ་དེ་གཉིས་ནི་ལྷན་ཅིག་འབྱུང་བ་མ་ཡིན་ནོ། །རྒྱུན་ལ་ཞེས་བྱ་བ་རྒྱས་པར་འབྱུང་བ་ལ། རྒྱུན་གྱིས་འཇུག་པའི་འབྲུ་དཔེར་བརྗོད་པ་ལ་གཟུགས་བརྙན་རྒྱུན་དུ་གྱུར་པ་མ་ཡིན་པས་ཕྱིར་བཟློག་པས་དཔེ་མི་འདྲ་བ་ཡིན་ནོ། །གཟུགས་བརྙན་གྱི་གཙོ་བོའི་རྒྱུ་གང་ཡིན་པ་ནི་མེ་ལོང་ལ་སོགས་པ་སྟེ་དེའི་རྗེས་སུ་བྱེད་པའི་ཕྱིར་རོ། །འདི་ལྟར་གལ་ཏེ་རལ་གྲི་བསགས་ཀར་བསྙལ་ཏེ་འདུག་པ་ཡིན་ན་ནི་གཟུགས་བརྙན་ཡང་བསགས་ཀར་རིང་བར་སྣང་ལ། གལ་ཏེ་གྱེན་ལ་འགྲེང་སྟེ་འདུག་པ་ཡིན་ན་ནི་གཟུགས་བརྙན་ཡང་དེ་ལྟར་སྣང་ངོ༌། །རྒྱུ་གཉིས་པ་གཙོ་བོ་མ་ཡིན་པ་ཁུ་ཆུ་དང་ཁྲག་ལ་སོགས་པ་ཡོད་དོ་ཞེ་ན་དེའི་ཕྱིར་གཙོ་བོའི་རྒྱུ་གང་ཡང་རུང་བ་ཞིག་དང་ཞེས་བྱ་བ་སྨོས་སོ། ཅི་སྟེ་ཡང་ཁུ་ཆུ་དང་ཁྲག་ལ་སོགས་པ་ཁོ་ན་གཙོ་བོ་ཡིན་ཏེ། དེ་ལ་བརྟེན་ནས་སྐྱེ་བའི་སྲིད་པ་འགྲུབ་པའི་ཕྱིར་རོ་ཞེ་ན་དེའི་ཕྱིར་ཕྱིའི་ཁུ་ཆུ་དང་ཁྲག་ལ་སོགས་པ་ཞེས་བྱ་བ་ལ་སོགས་པ་སྨོས་སོ། །གཞན་དག་ན་རེ། མི་འདྲའི་ཕྱིར་ན་དཔེ་མ་ཡིན་ཞེས་བྱ་བ་རྒྱུའི་རྗེས་སུ་བྱེད་པས་གཟུགས་བརྙན་འཇིག་པར་འགྱུར་གྱི་འཆི་ཁ་མའི་ཕུང་པོ་འགགས་པས་སྐྱེ་བའི་ཆར་གཏོགས་པའི་ཕུང་པོ་མེད་པར་འགྱུར་བ་མ་ཡིན་ཏེ། དེ་ལྟ་མ་ཡིན་ན་སེམས་ཅན་གྱི་རྒྱུད་རྒྱུན་ཆད་པར་ཐལ་བར་འགྱུར་རོ། །གཟུགས་བརྙན་གཟུགས་དང་འདྲ་བར་འབྱུང་ན། སྐྱེ་བའི་སྲིད་པ་ནི་དེ་ལྟར་འཆི་བའི་སྲིད་པ་ལས་འབྱུང་བ་ཡང་མ་ཡིན་ནོ། །གཞན་དུ་ན་བ་ལང་ལ་སོགས་པ་ཤི་ན་བ་ལང་ལ་སོགས་པ་དག་ཁོ་ནར་སྐྱེ་བར་ཐལ་བར་འགྱུར་རོ། །རྒྱུ་ལ་བརྟེན་པའི་དབང་གིས་གཟུགས་བརྙན་འབྱུང་བ་རྒྱུ་མེ་ལོང་གཅིག་ལས་ཀྱང་ཁྱིམ་ལ་སོགས་པའི་གཟུགས་བརྙན་དུ་མི་འབྱུང་ལ། ཕུང་པོའི་རྒྱུན་གཅིག་ལས་ཅིག་ཅར་ཕུང་པོ་མང་པོའི་རྒྱུན་མི་འབྱུང་
བས་དཔེ་འདྲ་བ་ཡོད་པ་མ་ཡིན་ནོ་ཞེས་ཟེར་རོ། །མགུར་ནས་གསུངས་ཕྱིར་ཞེས་བྱ་བ་ནི་ཉིད་ཀྱི་གསུང་གིས་གསུངས་པའི་ཕྱིར་རོ་ཞེས་བྱ་བའི་དོན་ཏོ། །མདོ་འདི་དེ་དག་མི་འདོན་ཏོ་ཞེས་བྱ་བ་ལ་སོགས་པ་ལ་སྲིད་པ་བར་མ་ལ་སོགས་སྐུར་པ་འདེབས་པའི་སྡེ་པ་གཞན་དག་གིས་སྡེ་པ་གཞན་ལ་གྲགས་ཀྱང༌། སྡུད་པའི་བཞི་པོ་ཉམས་པས་ལྷག་པར་སྒྲོ་བཏགས་པར་དོགས་པས་ཚད་མར་མི་བྱེད་དེ་དེ་དག་གི་ལུང་གི་ཁོངས་སུ་མ་འདུས་པའི་ཕྱིར་རོ། །གནས་གསུམ་ཞེས་བྱ་བ་ནི་རྒྱུ་གསུམ་མོ། །བུ་ཆད་པ་ནི་འབྱུང་བའོ། །མ་རུང་ཞིང་ཞེས་བྱ་བ་ནི་བུ་འཛིན་པར་ནུས་པའོ། །ཟླ་མཚན་དང་ལྡན་པ་ཞེས་བྱ་བས་ནི་བུ་འཛིན་པར་རུང་ཡང་ཟླ་མཚན་ལ་ལྟོས་སོ་ཞེས་སྟོན་ཏོ། །ཟླ་མཚན་དང་ལྡན་ཡང་གལ་ཏེ་བུ་འཛིན་པའི་ནུས་པ་ཉམས་པ་མེད་པ་ཡིན་ན་སྟེ། འདི་ནི་གནས་དང་པོའོ། །ཕ་དང་མ་ཆགས་པར་གྱུར་ཅིང་ཕྲད་པ་དང་ཞེས་བྱ་བ་ལ། ཆགས་པར་གྱུར་ལ་མ་ཕྲད་པ་དང༌། ཕྲད་པར་གྱུར་ལ་མ་ཆགས་པ་ཡང་ཡོད་པས་གཉིས་ཀ་སྨོས་ཏེ་འདི་ནི་གནས་གཉིས་པའོ། །དྲི་ཟ་ཉེ་བར་གནས་པར་གྱུར་ནའོ་ཞེས་བྱ་བ་འདི་ནི་གནས་གསུམ་པའོ། །དྲི་ཟ་ཉེ་བར་གནས་པར་གྱུར་ནའོ། །ཞེས་བྱ་བ་འདི་ཡང་དེ་དག་མི་འདོན་པ་དེ་དག་གི་ལུང་ངག་ལས་དེ་སྐད་དུ་མི་འདོན་པའི་ཕྱིར་རོ། །འོ་ན་ཇི་ལྟར་དེ་ངག་འདོན་ཞེ་ན། ཕུང་པོ་ཞིག་པ་ཉེ་བར་གནས་པར་གྱུར་ནའོ་ཞེས་འདོད་དེ། འདིར་ཕུང་པོ་ཞིག་པ་ནི་འཆི་བའི་སྲིད་པའོ། །གལ་ཏེ་དེ་ལྟར་ན་རྟ་ལེན་གྱི་བུའི་མདོ་ཞེས་བྱ་བ་རྒྱས་པར་འབྱུང་བ་ལ། ཕུང་པོ་ཞིག་པ་ནི་འགྲོ་བ་དང་འོང་བ་དང་བྲམ་ཟེ་ལ་སོགས་པའི་ངོ་བོར་མི་འཐད་དོ། །ཁ་ཅིག་ན་རེ་བར་མདོ་ཞེས་བྱ་བའི་ལྷ་དག་ཅིག་ཡོད་དོ། གང་ཞིག་དེ་དག་ཏུ་ཡོངས་སུ་མྱ་ངན་ལས་འདའ་བ་དེ་ནི་བར་མ་དོར་ཡོངས་སུ་མྱ་ངན་ལས་འདའ་བའོ། །ཞེས་ཟེར་རོ། །དེ་ལྟ་ན་སྐྱེས་པ་ཞེས་བྱ་བ་ལ་སོགས་པ་ལ་ཡང་ཞེས་བྱ་བ་རྒྱས་པར་འབྱུང་བ་སྟེ། དེ་ལ་གང་ཞིག་སྐྱེས་པའི་ལྷ་དག་ཏུ་ཡོངས་སུ་མྱ་ངན་ལས་འདའ་བ་དེ་ནི་སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །མངོན་པར་འདུ་བྱེད་པ་མེད་པར་ཡོངས་སུ་མྱ་ངན་
ལས་འདའ་བ་དང༌། མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བ་ཡང་དེ་དང་འདྲ་བར་བརྗོད་པར་བྱའོ། །དེ་ལྟ་མ་ཡིན་ཏེ་གལ་ཏེ་སྐྱེ་བ་ལ་སོགས་པའི་ལྷ་དག་ཁས་མི་ལེན་ན་ནི་བར་མ་དོར་ཡོངས་སུ་མྱ་ངན་ལས་འདའ་བར་མི་འགྲུབ་བོ། །དེ་ཡང་བར་མ་དོའི་ལྷ་དག་ཏུ་སྐྱེས་ཏེ། སྐྱེས་ནས་ཡོངས་སུ་མྱ་ངན་ལས་འདའ་བ་དང་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་རོ། །གཞན་དག་ན་རེ་འདོད་པ་དང་གཟུགས་ཀྱི་ཁམས་དག་གི་བར་དུ་ཡོངས་སུ་མྱ་ངན་ལས་འདའ་བས་བར་མ་དོར་ཡོངས་སུ་མྱ་ངན་ལས་འདའ་བ་སྟེ། དེས་ན་སྲིད་པ་བར་མ་མེད་པར་ཁམས་གཉིས་སུ་མ་སྐྱེས་པའི་སེམས་ཅན་མེད་པས་སྲིད་པ་བར་མ་གྲུབ་པ་ཉིད་དོ་ཞེས་ཟེར་རོ། །འགྲོ་མདོ་ཞེས་བྱ་བ་ནི་མཉན་དུ་ཡོད་པར་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་སྐྱེས་བུ་དམ་པའི་འགྲོ་བ་བདུན་དང་ལན་པ་མེད་པའི་ཡོངས་སུ་མྱ་ངན་ལས་འདའ་བ་བསྟན་པར་བྱ་ཡིས་ཞེས་སྐྱེས་བུ་དམ་པའི་འགྲོ་བའི་མདོ་རྒྱས་པར་གསུངས་སོ། །མདོ་དེ་ལས་ནི་ཕྱིར་མི་འོང་བ་ལྔ་ལས་བར་མ་དོར་ཡོངས་སུ་མྱ་ངན་ལས་འདའ་བ། ཞོགས་མ་ལ་སོགས་པ་དཔེ་གསུམ་གྱི་སྒོ་ནས་རྣམ་པ་གསུམ་དུ་མཛད་ནས་སྐྱེས་བུ་དམ་པའི་འགྲོ་བ་བདུན་དུ་གསུངས་སོ། །དུས་དང་ཡུལ་གྱི་ཁྱད་པར་གྱི་བྱེ་བྲག་གིས་ཞེས་བྱ་བ་ནི་གོ་རིམས་བཞིན་དུ་དུས་ཀྱི་ཁྱད་པར་གྱི་བྱེ་བྲག་དང་ཡུལ་གྱི་ཁྱད་པར་གྱི་བྱེ་བྲག་གིས་སོ། །ཇི་ལྟར་ཞེ་ན་མངོན་པར་གྲུབ་པ་བཞིན་དུ་ཞེས་བྱ་བ་ནི་དུས་སོ། །གནམ་དུ་ཡར་པ་བཞིན་དུ་ཞེས་བྱ་བ་དང༌། ས་ལ་མ་ལྷུང་བ་ཉིད་དུ་ཞེས་བྱ་བ་ནི་ཡུལ་ལོ། །བར་མདོ་ཞེས་བྱ་བའི་ལྷ་ནི་ཞེས་བྱ་བ་རྒྱས་པར་འབྱུང་སྟེ། དེ་དག་ཏུ་སྐྱེ་བཞིན་པ་གང་ཡོད་པ་མ་ཡིན་པ་ནི་བདེན་པ་ཉིད་དེ། ཡོངས་སུ་མྱ་ངན་ལས་འདས་པ་དེའི་དབང་དུ་བྱས་ནས་དང་པོ་བལྟའོ། །དེ་ལས་གང་དུས་ཕྱི་མའི་དབང་དུ་བྱས་ནས་གཉིས་པའོ། །དེ་ལས་ཀྱང་གང་གཞན་པའི་དབང་དུ་བྱས་ནས་གསུམ་པའོ། །དུས་ཀྱི་བྱེ་བྲག་གི་ཁྱད་པར་ཤེས་པར་བྱ་བའི་ཕྱིར་འདི་དཔེར་བརྗོད་པ་ཡིན་ནོ། །ཡུལ་
གྱི་བྱེ་བྲག་གི་ཁྱད་པར་ལས་ཀྱང་ནུས་པར་རུང་སྟེ། ཁ་ཅིག་སྐྱེས་པའི་ཡུལ་ཉིད་དུ་ཡོངས་སུ་མྱ་ངན་ལས་འདའ་བར་བྱེད་དོ། །ཁ་ཅིག་ཡུལ་གཞན་དུ་སོང་ནས་སོ། །ཁ་ཅིག་དེ་ནས་ཀྱང་སོང་ནས་སོ། །དེ་བཞིན་དུ་སྐྱེས་ནས་ཡོངས་སུ་མྱ་ངན་ལས་འདའ་བ་བར་མ་དོར་ཡོངས་སུ་མྱ་ངན་ལས་འདའ་བ་ལས་ཕུལ་དུ་བྱུང་བ་འགའ་ཡང་ཡོད་པ་མ་ཡིན་པས། དེ་ཐ་དད་དུ་བསྟན་པ་དོན་མེད་པ་ཉིད་དོ། །ཚེའི་ཚད་ཀྱི་བར་དུའམ་ཞེས་བྱ་བ་ལ་ཚེའི་ཚད་ཀྱི་སྔ་རོལ་དུ་སྟེ་ཚེ་ཡོངས་སུ་མ་རྫོགས་པ་ཁོ་ནར་ཞེས་བྱ་བའི་དོན་ཏོ། །ལྷ་དང་ཉེ་བའི་བར་དུ་ཞེས་བྱ་བ་ལ། ལྷ་རྣམས་ཀྱི་དྲུང་ནི་ལྷ་དང་ཉེ་བ་སྟེ། དེའི་བར་ནི་ལྷ་དང་ཉེ་བའི་བར་རོ། །བཤད་པ་འདི་ལ་ལྕགས་ཀྱི་ཚ་ཚ་ལ་སོགས་པའི་དཔེ་རྣམ་པ་གསུམ་ཇི་ལྟར་རུང་ཞེ་ན། དེའི་ཕྱིར་ཁམས་ཀྱི་གནས་སྐབས་པའམ་ཞེས་བྱ་བ་རྒྱས་པར་སྨྲས་སོ། །སྐྱེས་པ་ཙམ་གྱིས་ཉོན་མོངས་པའི་ས་བོན་གྱི་གནས་སྐབས་ཁོ་ནར་ལམ་མངོན་དུ་གྱུར་པ་ལས་ཡོངས་སུ་མྱ་ངན་ལས་འདའ་བ་སྟེ། འདི་ནི་དབང་པོ་རྣོན་པོ་ཡིན་ནོ་ཞེས་གྲག་གོ །འདུ་ཤེས་ཀྱི་གནས་སྐབས་པའམ་ཞེས་བྱ་བ་ནི་ཡུལ་གྱི་འདུ་ཤེས་ཀུན་ཏུ་སྤྱོད་པའི་གནས་སྐབས་སུའོ། །གཞན་དག་ན་རེ་ཉོན་མོངས་པ་སྐྱེས་པ་ཡོངས་སུ་གཅོད་པར་བྱེད་པ་གང་ཡིན་པ་དེ་འདུ་ཤེས་ཀྱི་གནས་སྐབས་པ་ཡིན་ནོ་ཞེས་ཟེར་ཏེ། འདི་ནི་དབང་པོ་འབྲིང་པོའོ། །རྣམ་པར་རྟོག་པའི་གནས་སྐབས་པ་ཞེས་བྱ་བ་ནི་དེའི་ས་པའི་ཉོན་མོངས་པའི་རྣམ་པར་རྟོག་པ་ཀུན་ཏུ་སྤྱོད་པའི་གནས་སྐབས་སུའོ། །གཞན་དག་ན་རེ་རྣམ་པར་རྟོག་པ་ནི་དཔྱད་པ་ཡིན་པའི་ཕྱིར་ཤེས་རབ་ཀུན་ཏུ་སྤྱོད་པའི་གནས་སྐབས་སུ་ཡིན་ནོ། །འདིར་རྣམ་པར་རྟོག་པ་ནི་སེམས་རྩིང་བ་ལ་མི་འདོད་དེ། དེ་ནི་བསམ་གཏན་དང་པོའི་ས་པ་ཡིན་པའི་ཕྱིར་གཉིས་པ་ལ་སོགས་པ་དག་ན་བར་དུ་མྱ་ངན་ལས་འདའ་བར་མི་འགྱུར་རོ། །འདི་ནི་དབང་པོ་རྟུལ་པོ་ཡིན་ནོ། །ཡང་ན་དང་པོ་ནི་གཟུགས་ཀྱི་ཁམས་སུ་ཞེས་བྱ་བ་ལ། འདི་ལ་དཔེ་ནི་དཔེར་ན་ཞོགས་མའི་མེ་ཆུང་ངུ་ཞེས་བྱ་བ་ལ་སོགས་པའོ། །གཉིས་པ་ནི་ལྷ་རྣམས་ཀྱི་འབྱོར་པ་ཞེས་བྱ་བ་ལ། འདི་ལ་ཡང་དཔེ་ནི་དཔེར་ན་ལྕགས་ཀྱི་ཚ་ཚ་གནམ་དུ་
ཡར་བ་བཞིན་དུ་ཞེས་བྱ་བ་རྒྱས་པར་འབྱུང་བའོ། །གསུམ་པ་ནི་ལྷ་རྣམས་ཀྱི་ཆོས་ཡང་དག་པར་འགྲོ་བའི་ཞེས་བྱ་བ་ལ་འདིར་ཡང་དཔེ་ནི་དཔེར་ན་ལྕགས་ཀྱི་ཚ་ཚ་གནམ་དུ་ཡར་ནས་ཞེས་བྱ་བ་ལ་སོགས་པ་སྟེ། དེས་ན་དཔེ་གསུམ་གྱི་སྒོ་ནས་རྣམ་པ་གསུམ་ཡིན་ཏེ། དེ་ལྟ་ན་ཡང་བར་མ་དོ་དང་སྐྱེས་ནས་ཡོངས་སུ་མྱ་ངན་ལས་འདའ་བ་དག་ལས་ཁྱད་པར་མི་མངོན་པས་ཁྱད་པར་བསྟན་པའི་ཕྱིར་སྐྱེས་ནས་ཡོངས་སུ་མྱ་ངན་ལས་འདའ་བ་ནི་ཞེས་བྱ་བ་རྒྱས་པར་སྨྲས་སོ། །ཚེ་ཕལ་ཆེར་བཅོམ་ནས་ཞེས་བྱ་བ་ནི་ཚེ་ཕལ་ཆེར་ཕྱིན་ནས་སོ། །དེ་དག་ཐམས་ཅད་ཀྱང་ཞོགས་མ་ལ་སོགས་པའི་དཔེ་དག་དང་མི་འབྱོར་རོ། །ཁམས་སུ་གཏོགས་པ་དང་པོ་ནི་དཔེ་དང་པོ་དང་མ་འབྲེལ་ལ། འདུ་ཤེས་སུ་གཏོགས་པ་དང༌། རྣམ་པར་ཤེས་པར་གཏོགས་པ་ཡང་གཉིས་པ་དང་གསུམ་པ་དག་དང་ཞོགས་མ་ལ་སོགས་པའི་དཔེ་དག་དང་མ་འབྲེལ་ལོ། །གང་དག་གཟུགས་ཀྱི་ཁམས་སུ་རིས་མཐུན་པ་ཡོངས་སུ་བཟུང་ནས་ཡོངས་སུ་མྱ་ངན་འདའ་བ་དེ་ཡང་ཞོགས་མའི་དཔེ་དང་མ་འབྲེལ་ལོ། །ལྷ་གང་དག་འབྱོར་པ་ཉམས་སུ་མྱང་ནས་ལྷ་རྣམས་དང་ཆོས་ཡང་དག་པར་འགྲོ་བས་རྗེས་སུ་ཞུགས་ཏེ། མྱ་ངན་ལས་འདའ་བ་སྟེ་ལྕགས་ཀྱི་ཚ་ཚ་ལ་སོགས་པའི་དཔེ་དང་འབྲེལ་པ་མེད་དོ། །དེ་ཉིད་ལ་རྒྱུ་སྨོས་པ་ནི་ཡུལ་དུ་འགྲོ་བའི་བྱེ་བྲག་མེད་པའི་ཕྱིར་ཞེས་བྱ་བ་འབྱུང་སྟེ། ཡུལ་དུ་འགྲོ་བའི་བྱེ་བྲག་མེད་པའི་ཕྱིར་རོ། །དེ་ཇི་ལྟར་མེད་ཅེ་ན། ཡུལ་དེ་ཉིད་དུ་ཡོངས་སུ་མྱ་ངན་ལས་འདའ་པའི་ཕྱིར་རོ། །ཡང་ན་ཡུལ་གྱི་བྱེ་བྲག་མེད་པའི་ཕྱིར་དང་འགྲོ་བའི་བྱེ་བྲག་མེད་པའི་ཕྱིར་ཞེས་རེ་རེ་ལ་བྱེ་བྲག་མེད་པའི་སྒྲ་སྦྱར་རོ། །བསམ་གཏན་དག་གིས་བཅུ་ཚན་བཞི་སྟེ་ཞེས་བྱ་བ་ལ་བསམ་གཏན་རེ་རེ་ལས་གང་ཟག་བཅུ་བཅུ་དབང་དུ་བྱས་པའི་ཕྱིར་རོ། །གཟུགས་མེད་དག་གིས་བདུན་ཚན་གསུམ་ཞེས་བྱ་བ་ལ། བར་མ་དོར་ཡོངས་སུ་མྱ་ངན་ལས་འདའ་བ་དང་སྐྱེ་བ་གཉིས་མ་གཏོགས་པ་སྟེ། གཟུགས་མེད་པའི་སྲིད་པ་བར་མ་མི་སྲིད་དོ། །འདུ་ཤེས་ཀྱིས་ནི་དྲུག་ཚན་དུ་ཞེས་བྱ་བ་ལ། འདི་ལ་ནི་གོང་དུ་འཕོ་བ་ཡང་མེད་དེ། ས་གཞན་མེད་
བའི་ཕྱིར་རོ། །དེའི་ཕྱིར་འདི་དག་ཐམས་ཅད་རྟོག་པ་ཙམ་དུ་ཟད་དེ། ཡང་གི་སྒྲ་ལས་གཟུགས་བརྙན་འབའ་ཞིག་ཏུ་མ་ཟད་དོ། །གླེང་གཞི་མཉན་དུ་ཡོད་པ་ན་སྟེ། འདི་ན་དགེ་སློང་རྣམ་པ་གང་དག་དང་རྟགས་གང་དག་དང༌། མཚན་མ་གང་དག་གིས་འདོད་བདག་ལས་དབེན་པ། སྡིག་ཏོ་མི་དགེ་བའི་ཆོས་རྣམས་ལས་དབེན་པ་རྟོག་པ་དང་བཅས་ཤིང་དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ནས་གནས་སོ། །དེ་རྣམས་དེ་དག་དང་རྟགས་དེ་དག་ཡིད་ལ་མི་བྱེད་ཀྱི་འོན་ཀྱང་དེ་གཟུགས་ཀྱི་རྣམ་པའམ། ཚོར་བའི་རྣམ་པའམ། འདུ་ཤེས་ཀྱི་རྣམ་པའམ། འདུ་བྱེད་ཀྱི་རྣམ་པའམ། རྣམ་པར་ཤེས་པའི་རྣམ་པ་གང་ཞིག་དེ་ཉེ་བར་དམིགས་པའི་ཆོས་དེ་དག་ནང་དུ་ཡིད་ལ་བྱེད། འབྲས་དང་ཟུག་རྔུ་དང༌། སྡིག་པ་དང༌། མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མེད་པར་ཡིད་ལ་བྱེད་དེ་ཆོས་དེ་དག་ལ་ཡིད་བྱུང་ཞིང་སྐྲག་སྟེ་ཕྱིར་ཟློག་པར་བྱེད་དེ་ཆོས་དེ་དག་ལ་སྐྱོ་ཞིང་སྐྲག་སྟེ་ཕྱིར་བཟློག་ནས་འདི་ནི་ཞི་བའོ། །འདི་ནི་གྱ་ནོམ་པ་སྟེ། འདི་ལྟ་སྟེ། ཕུང་པོ་ཐམས་ཅད་ངེས་པར་སྤངས་པ། སྲེད་པ་ཟད་པ་འདོད་ཆགས་དང་བྲལ་བ་འགོག་པ། མྱ་ངན་ལས་འདས་པའོ་ཞེས་འཆི་བ་མེད་པའི་དབྱིངས་ལ་སེམས་གཏོད་པར་བྱེད་དོ། །མདོ་དེ་ཉིད་གསུངས་ནས་ཁྱད་པར་ནི་འདི་ཡིན་ཏེ། དེ་ལྟར་ཤེས་ཤིང་དེ་ལྟར་མཐོང་བ་དེ་འདོད་པའི་ཟག་པ་ལས་སེམས་རྣམ་པར་གྲོལ། སྲིད་པའི་ཟག་པ་དང་མ་རིག་པའི་ཟག་པ་ལས་སེམས་རྣམ་པར་གྲོལ། གྲོལ་ནས་ཀྱང་བདག་རྣམ་པར་གྲོལ་ལོ། །བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་སྙམ་དུ་ཡེ་ཤེས་མཐོང་བ་འབྱུང་ངོ༌། །མདོ་དེ་ཉིད་གསུངས་ནས་ཁྱད་པར་ནི་འདི་ཡིན་ཏེ། དེ་འདིར་རྣམ་པར་མི་སྲོལ་གྱི་ཆོས་ལ་འདུན་པ་དེ་ཉིད་དང༌། ཆོས་ལ་ཆགས་པ་དེ་ཉིད་དང༌། ཆོས་ལ་དགའ་བ་དེ་ཉིད་དང༌། ཆོས་ལ་མངོན་པར་དགའ་བ་དེ་ཉིད་ཀྱིས་བར་མ་དོར་རྣམ་བར་གྲོལ་བར་འགྱུར་རོ། །མདོ་དེ་ཉིད་གསུངས་ནས་དེ་
བར་མ་དོར་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་ཀྱང་སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །དེ་སྐྱེས་ནས་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་ཀྱང་མངོན་བར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བར་འགྱུར་རོ། །དེ་མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་ཀྱང་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་རོ། །དེ་མངོན་པར་འདུ་བྱེད་པ་མེད་པས་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་ཀྱང་གོང་དུ་འཕོ་བར་འགྱུར། དེ་གོང་དུ་འཕོ་བར་མི་འགྱུར་གྱི། འོན་ཀྱང་ཆོས་ལ་འདུན་པ་དེ་ཉིད་དང༌། ཆོས་ལ་ཆགས་པ་དེ་ཉིད་དང༌། ཆོས་ལ་དགའ་བ་དེ་ཉིད་དང༌། ཆོས་ལ་མངོན་པར་དགའ་བ་དེ་ཉིད་ཀྱིས་ཚངས་ཆེན་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་ཚངས་ཆེན་གྱི་ལྷ་རྣམས་དང་སྐལ་བ་མཉམ་པར་སྐྱེ་བ་མ་ཡིན་གྱི། ཆོས་ལ་འདུན་པ་དེ་ཉིད་དང༌། ཆོས་ལ་ཆགས་པ་དེ་ཉིད་དང༌། ཆོས་ལ་དགའ་བ་དེ་ཉིད་དང༌། ཆོས་ལ་མངོན་པར་དགའ་བ་དེ་ཉིད་ཀྱིས་ཚངས་པའི་མདུན་ན་འདོན་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་ཚངས་པའི་མདུན་ན་འདོན་གྱི་ལྷ་རྣམས་སུ་སྐྱེ་བར་མི་འགྱུར་གྱི་ཆོས་ལ་འདུན་པ་དེ་ཉིད་དང༌། ཆོས་ལ་ཆགས་པ་དེ་ཉིད་དང༌། ཆོས་ལ་དགའ་བ་དེ་ཉིད་དང༌། ཆོས་ལ་མངོན་པར་དགའ་བ་དེ་ཉིད་ཀྱིས་ཚངས་རིས་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་ལྟར་ན་རེ་ཞིག་བསམ་གཏན་དང་པོ་ལ་མདོ་བཅུའོ། །འདི་ན་དགེ་སློང་རྣམ་པ་གང་དག་དང་རྟགས་གང་དག་དང་མཚན་མ་གང་དག་གིས་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ་དང༌། དཔྱོད་པ་མེད་པ་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་རྫོགས་པར་བྱས་ཏེ་གནས་པ་ཞེས་བྱ་སྟེ་ལྷག་མ་སྔ་མ་བཞིན་ནོ། །སྐྱེ་བ་ལ་ནི་འོད་གསལ་བ་རྣམས་དང་སྐལ་བ་མཉམ་པར་སྐྱེའོ། །དེ་ནས་ཚད་མེད་འོད་པ་
རྣམས་དང་ངོ༌། །དེ་ནས་འོད་ཆུང་རྣམས་དང་ངོ༌། །དེ་ལྟར་ན་འདི་དག་ནི་བསམ་གཏན་གཉིས་པའི་མདོ་བཅུའོ། །འདི་ན་དགེ་སློང་རྣམ་པ་གང་དག་དང་ཞེས་བྱ་བ་ཐམས་ཅད་བརྗོད་ནས་དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་བ་ལ་འཕགས་པ་རྣམས་ཀྱིས་གང་དེ་དྲན་པ་ལ་གནས་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། །བསམ་གཏན་གསུམ་རྫོགས་པར་བྱས་ཏེ་གནས་སོ། །ལྷག་མ་སྔ་མ་བཞིན་ནོ། །སྐྱེ་བ་ལ་ནི་དགེ་རྒྱས་པ་རྣམས་དང་སྐལ་པ་མཉམ་པར་རོ། །དེ་ནས་ཚད་མེད་དགེ་རྣམས་དང༌། དེ་ནས་དགེ་ཆུང་རྣམས་སུ་སྟེ། དེ་དག་ནི་བསམ་གཏན་གསུམ་པའི་མདོ་བཅུའོ། །འདི་ན་དགེ་སློང་རྣམ་པ་གང་དག་དང༌། ཞེས་བྱ་བ་ཐམས་ཅད་བརྗོད་ནས་བདེ་བ་ཡང་སྤངས་ཤིང་སྔ་ནས་སྡུག་བསྔལ་ཡང་སྤངས་ཤིང༌། ཡིད་བདེ་བ་དང་ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པས་བསམ་གཏན་བཞི་པ་རྫོགས་པར་བྱས་ཏེ་གནས་སོ། །འདིར་ཡང་ལྷག་མ་སྔ་མ་བཞིན་ཏེ། སྐྱེ་བ་ལ་ནི་འབྲས་བུ་ཆེ་བ་རྣམས་དང་སྐལ་བ་མཉམ་པར་སྐྱེའོ། །དེ་ནས་བསོད་ནམས་སྐྱེས་རྣམས་དང༌། དེ་ནས་སྤྲིན་མེད་རྣམས་དང་ངོ༌། །འདི་དག་ནི་བསམ་གཏན་བཞི་པའི་མདོ་བཅུ་སྟེ། དེ་དག་ནི་བསམ་གཏན་དག་གི་བཅུ་ཚན་བཞི་རྣམས་སོ། །འདི་ན་དགེ་སློང་རྣམ་པ་གང་དག་དང་རྟགས་གང་དག་དང་མཚན་མ་གང་དག་གིས་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་འདས་ཏེ། ཐོགས་པའི་འདུ་ཤེས་རྣམས་ནུབ་པར་གྱུར་ཅིང་སྣ་ཚོགས་ཀྱི་འདུ་ཤེས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་སོ། །དེ་རྣམ་པ་དེ་དག་དང་རྟགས་དེ་དག་དང་མཚན་མ་དེ་དག་ཡིད་ལ་མི་བྱེད་ཀྱི། འོན་ཀྱང་དེ་ན་དམིགས་པའི་ཚོར་བའི་རྣམ་པའམ་འདུ་ཤེས་ཀྱི་རྣམ་པའམ། འདུ་བྱེད་ཀྱི་རྣམ་པའམ། རྣམ་པར་ཤེས་པའི་རྣམ་པའི་ཆོས་དེ་དག་ལ་ནང་དུ་ཡིད་ལ་བྱེད་ཅིང་ཞེས་བྱ་བ་ནས་བརྩམས་ཏེ།
ཕུང་པོ་ཐམས་ཅད་ངེས་པར་སྤངས་པ་སྲིད་པ་ཟད་པ་འདོད་ཆགས་དང་བྲལ་བ། འགོག་པ་མྱ་ངན་ལས་འདས་པའོ་ཞེས་བྱ་བ་ནམ་མཁའ་མངའ་ཡས་སྐྱེ་མཆེད་ཀྱི་བདུན་ཚན་གྱི་མདོ་དང་པོའོ། །མདོ་འདི་ཉིད་བརྗོད་ནས་གཉིས་པ་ལ་ནི་འདི་ཁྱད་པར་རོ། །དེ་ཉིད་ཤེས་པ་ཁོ་ནས་མཐོང་ངོ་ཞེས་བྱ་བ་ནས་བརྩམས་ཏེ་ཇི་སྲིད་སྲིད་པ་འདི་ལས་གཞན་མི་ཤེས་སོ་ཞེས་པའི་བར་རོ། །གསུམ་པ་ལ་ནི་འདི་ཁྱད་པར་ཏེ། དེ་རྣམ་པར་མི་འགྲོལ་གྱི་ཞེས་རྒྱ་ཆེར་བཤད་ནས། འོན་ཀྱང་སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །བཞི་པ་ནི་མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བར་འགྱུར་རོ། །ལྔ་པ་ནི་མངོན་པར་འདུ་བྱེད་མེད་པར་ཡོངས་སུ་མྱ་ངན་ལས་འདའ་བར་འགྱུར་རོ། །དྲུག་པ་ནི་གོང་དུ་འཕོ་བར་འགྱུར་རོ། །བདུན་པ་ནི་དེ་གོང་དུ་འཕོ་བར་མི་འགྱུར་གྱི་འོན་ཀྱང་ཆོས་ལ་འདུན་པ་དེ་ཉིད་ཀྱིས་བྱ་བ་ལ་སོགས་པ་ནས་ཇི་སྲིད་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་དང་སྐལ་པ་མཉམ་པར་སྐྱེའི་ཞེས་པའི་བར་རོ། །འདི་ན་རྣམ་པ་གང་དག་དང་རྟགས་གང་དག་དང་ཞེས་རྒྱ་ཆེར་སྦྱར་ཏེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ནས་རྣམ་པར་ཤེས་པ་མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་ཉེ་བར་བསྒྲུབས་ཏེ་གནས་སོ། །དེ་བཞིན་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅུང་ཟད་མེད་དེ་སྙམ་ནས་ཅི་ཡང་མོད་པའི་སྐྱེ་མཆེད་རྫོགས་པར་བྱས་ཏེ་གནས་སོ། །འདི་དག་ཀྱང་རྣམ་ཤེས་དང་ཅི་ཡང་མེད་པའི་སྐྱེ་མཆེད་དག་གི་མདོ་བདུན་བདུན་རྣམས་སུ་ཇི་སྐད་བཤད་པའི་ཚུལ་གྱིས་རིག་པར་བྱའོ། །ལྷག་མ་རྣམས་བརྗོད་དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱས་ཏེ་གནས་སོ་ཞེས་བྱ་བ་འདིར་ཡང་མདོ་དྲུག་གོ །གཟུགས་མེད་པ་རྣམས་སུ་དེ་དག་སྐྱོ་བའི་གཡོ་བ་ལས་དང༌། དེ་སྲིད་པ་ལས་སྲིད་པའི་རྩེ་མོ་ལས་གོང་དུ་འགྲོ་བ་ལ་བདུན་ཚན་གསུམ་མོ། །འདུ་ཤེས་ཀྱིས་ནི་དྲུག་ཚན་དུ་བྱའོ། །གལ་ཏེ་ཚེའི་ཚད་ཀྱི་བར་དུ་ཡོངས་སུ་མྱ་ངན་
ལས་འདའ་བས་བར་མ་དོར་ཡོངས་སུ་མྱ་ངན་ལས་འདའ་བ་ཡིན་ན་ནི། དེ་ལྟ་ན་འཕགས་པ་ཤཱ་རིའི་བུ་ལ་སོགས་པ་རྣམས་ཀྱང་བར་མ་དོར་ཡོངས་སུ་མྱ་ངན་ལས་འདའ་བ་ཉིད་དུ་ཐལ་བར་འགྱུར་རོ། །སེམས་ཅན་རྣམས་ནི་བྱང་ཆུབ་སེམས་དཔའ་སྲིད་པ་ཐ་མ་པ་དང་བྱང་གི་སྒྲ་མི་སྙན་པ་མ་གཏོགས་ཕལ་ཆེར་ཚེ་ཡོངས་སུ་མ་ཟད་བར་དུས་བྱེད་དོ། །དེ་ཉིད་ཀྱི་ཕྱིར་དེ་དག་ལ་ནི་ལུང་ལས་ཀྱང་ཞེས་བྱ་བ་སྨོས་ཏེ་ཀྱང་ཞེས་བྱ་བའི་སྒྲས་ནི་རིགས་པ་ལས་ཀྱང་ངོ༌། །རང་གི་ལུས་ཁོ་ནས་ཞེས་བྱ་བ་རྒྱས་པར་འབྱུང་སྟེ། གལ་ཏེ་སྲིད་པ་བར་མ་དོ་ཡོད་ན་ནི་དེ་རང་གི་ལུས་ཁོ་ནས་མནར་མེད་པར་ལྟུང་བ་མི་རིགས་ཏེ། དེའི་རང་གི་ལུས་ནི་སྔར་གྱི་ལུས་ཡིན་པའི་ཕྱིར་རོ། །དེ་ལྟ་མ་ཡིན་ན་ནི། གང་ལས་དེ་ཁོ་ན་རང་གི་ལུས་ཀྱིས་ཡིན་པར་འགྱུར་བ་དེ་ལ་གཞན་དག་པས་ཁྱད་ཅི་ཡོད་ཅེ་ན། ཁྱད་པར་ཡོད་དེ། དེ་ནི་གསོན་པོ་ཁོ་ནར་དམྱལ་བའི་མེ་དག་གིས་བསྐོར་རོ་ཞེས་ཤེས་པར་བྱ་བའི་ཕྱིར། རང་གི་ལུས་ཁོ་ནས་ཞེས་གསུངས་ཏེ། སྔར་གྱི་ལུས་ཁོ་ནས་དམྱལ་བར་འགྲོ་བ་མི་རིགས་སོ། །ལས་ཤིན་ཏུ་དྲག་པོ་རྫོགས་པ་རྣམས་ནི་ཞེས་བྱ་བ་ལ་སོགས་པ་ལ་འཇུག་པ་རྙེད་པའི་ཕྱིར་ཤིན་ཏུ་དྲག་པོ་རྣམས་སོ། །རྣམ་བར་སྨིན་པར་ངེས་པའི་ཕྱིར་ཡོངས་སུ་རྫོགས་པ་རྣམས་སོ། །ཆེ་བའི་ཕྱིར་ཤིན་ཏུ་དྲག་པོ་རྣམས་སོ། །བསགས་པའི་ཕྱིར་ཡོངས་སུ་རྫོགས་པ་རྣམས་སོ། །གསོན་པོ་ཁོ་ནར་དམྱལ་བའི་མེ་དག་གིས་བསྐོར་བ་དེའི་ཕྱིར་འདིའི་མཐོང་བའི་ཆོས་ལ་མྱོང་བར་འགྱུར་བའི་ལས་ནི་དང་པོར་སྨིན་པ་ཡིན་ནོ། །འདི་ད་ནི་ཇི་ལྟར་དྲང་ཞེས་བྱ་བ་ནི་སྲིད་པ་བར་མ་ཡོད་ན་སྙམ་དུ་བསམས་པའོ། །འདི་དེ་མ་ཐག་ཏུ་སྐྱེའོ་ཞེས་བྱ་བ་ནི་ལུས་ཀྱིས་བར་མཆོད་པར་དམྱལ་བར་སྐྱེའོ། །སྲིད་པ་བར་མ་སྐྱེ་བ་ཉིད་ཡིན་པར་ཞེས་བྱ་བ་རྒྱས་པར་འབྱུང་བ་ལ། རིས་མཐུན་པར་ཉེ་བར་འགྲོ་བ་ནི་སྐྱེ་བ་ཡིན་ལ། དེ་ལ་མངོན་དུ་ཕྱོགས་བ་ནི་སྲིད་པ་བར་མ་ཡིན་པས། འཆི་བའི་མཇུག་ཐོགས་སུ་སྲིད་པ་བར་མ་ཁོ་ནས་དམྱལ་བ་དག་ཏུ་སྐྱེ་བ་ཡིན་གྱི་སྐྱེས་པ་མ་ཡིན་ནོ། །གལ་ཏེ་དེ་མ་ཐག་ཏུ་དམྱལ་བ་དག་ཏུ་སྐྱེས་པ་ཡིན་ནོ་ཞེས་སྨྲས་ན་ནི་སྲིད་པ་བར་མ་མེད་པར་འགྱུར་བ་ཞིག་གོ །བྲམ་ཟེ་ན་
ཚོད་ཁྱེར་ཟིན་ཞེས་བྱ་བ་ལ་སོགས་པ་འབྱུང་བ་ལ། འཆི་བའི་དྲུང་དུ་འདིའི་ན་ཚོད་ཁྱེར་ཟིན་པས་ན་ན་ཚོད་ཁྱེར་ཟིན་པའོ། །འདི་ནི་འདིར་སྲིད་པ་བར་མ་མེད་པའི་ཁུངས་ཡིན་ནོ། །འདི་ལ་ཁྱོད་ཀྱིས་ཐལ་མ་ཐག་ཏུ་སྲིད་པ་བར་མ་ཡོད་པར་ཇི་སྐད་སྨྲས་པ་འདི་ནི་དགོངས་པ་ཡིན་གྱི། སྲིད་པ་བར་མ་མེད་དོ་ཞེས་ཁོ་བོ་ཅག་གིས་འདོད་པ་འདི་ནི་དགོངས་པ་མ་ཡིན་ནོ། །ཞེས་བྱ་བ་འདི་ག་ལས་ཤེ་ན། སློབ་དཔོན་གྱིས་བརྟག་པ་འདི་ཁྱོད་ལ་ཡང་མཚུངས་ཏེ། ཞེས་བྱ་བ་སྨོས་ཏེ། དྲི་བ་འདྲི་ཞེས་བྱ་བའི་དོན་ཏོ། །འདི་ལ་ཁྱོད་ཀྱིས་སྲིད་པ་བར་མ་མེད་དོ་ཞེས་དེ་སྐད་དུ་སྨྲས་པ་འདི་ནི་དགོངས་པ་ཡིན་གྱི་ཁོ་བོ་ཅག་གིས་སྲིད་པ་བར་མ་ཡོད་དོ། །ཞེས་ཇི་སྐད་སྨྲས་པ་འདི་ནི་དགོངས་པ་མ་ཡིན་ནོ་ཞེས་བྱ་བ་འདི་གོ་ག་ལས། དེ་ལྟ་བས་ན་གཉིས་ཀའི་ཕྱོགས་ལ་ཡང་ཞེས་བྱ་བ་རྒྱས་པར་འབྱུང་བ་ལ། སྲིད་པ་བར་མ་ཡོད་དོ་སྲིད་པ་བར་མ་མེད་དོ་ཞེས་བྱ་བ་གཉིས་ཀའི་ཕྱོགས་ལ་ཡང་ཁྱོད་དང་ཡང་ཇི་སྐད་བཤད་པའི་མདོ་མི་འགལ་བའི་ཕྱིར་རོ། །འདི་ནི་ཞེས་བྱ་བ་རྒྱས་པར་འབྱུང་བ་ལ། ཤེས་པར་བྱེད་པ་གཞན་དུ་ཤེས་པར་མི་བྱེད་པ་ཡིན་ནོ་ཞེས་བྱ་བ་ནི་ཁུངས་ཀྱི་དོན་ཤེས་པར་བྱེད་པ་གང་ལ་གཞན་དུ་ཤེས་པར་བྱེད་པ་མེད་པའོ། །འདི་སྐད་བསྟན་པར་འགྱུར་ཏེ། ཚིགས་སུ་བཅད་པའམ་མདོ་གང་གི་དོན་རྣམ་པ་གཞན་དུ་བཀྲི་བར་མི་ནུས་པ་དེ་ནི་ཁུངས་ཡིན་ལ། གང་གི་དོན་རྣམ་པ་གཞན་དུ་ཡང་ཡིན་པར་མི་འགལ་བ་དེས་ནི་བརྗོད་མཁན་ཉིད་སེལ་བར་བྱེད་པ་ཡིན་ནོ། །ཡང་བྱེ་བྲག་ཏུ་སྨྲ་བ་རྣམས་ཀྱི་སྲིད་པ་བར་མ་མེད་དོ་ཞེས་བྱ་བ་གང་ཡིན་པ་འདི་ནི་རྒྱུ་དང་འབྲས་བུ་ལ་ཀུན་ཏུ་རྨོངས་པ་སྔོན་དུ་འགྲོ་བའི་ལོག་བར་ལྟ་བའོ། །འདི་ནི་གང་མདོ་དེ་དང་དེ་ལས་སེམས་ཅན་རྫུས་ཏེ་སྐྱེ་བ་མེད་དོ་ཞེས་གསུངས་པ་བཞིན་ནོ། །ཡང་འགྲོ་བ་གང་དུ་འགྲོ་བར་འགྱུར་བའི་ཞེས་བྱ་བ་རྒྱ་ཆེར་འབྱུང་བ་ལ། སྐྱེ་བའི་སྲིད་པའི་ཐེ་ཚོམ་འདི་ཡང་གང་ལས་ཡིན། ལས་ཀྱི་འབྲས་བུ་གཅིག་དང་དུ་མ་ཉིད་ལས་ན་མདོ་དང་འགལ་ལོ། །གང་ལ་གང་ཟག་མངོན་པར་གྲུབ་པའི་ཀུན་ཏུ་སྦྱོར་བ་མ་སྤངས་པ་དང་སྐྱེ་བའི་ཀུན་ཏུ་སྦྱོར་བ་སྤངས་པ་དང་སྐྱེ་བའི་ཀུན་ཏུ་སྦྱོར་བ་སྤངས་པ་ཡོད་ཅེས་རྒྱས་པར་ཏེ། ཉོན་མོངས་པའི་ཀུན་སློང་དུ་གྱུར་པའི་
ལས་རྣམས་ཉོན་མོངས་པ་བཞིན་ཏེ་ཐ་དད་པར་འགྱུར་རོ། །ལས་ཐ་དད་པའི་ཕྱིར་འདི་མི་འདོད་དེ། སྔོན་དུས་སྲིད་པའི་ཤ་ཚུགས་ཞེས་ཤེས་པར་བྱའོ། །ཡང་འདི་ལས་གཅིག་གི་འབྲས་བུ་སྔ་མ་དང་ཕྱི་མ་དེའི་འབྲས་བུ་སྐྱེད་པའི་ངེས་པ་ཅི་ཞིག་བྱས། མཐོང་བའི་ཆོས་ཀྱི་འབྲས་བུ་ལ་སོགས་པའི་ལས་བསྡུས་པའི་ཕྱིར། འདི་མྱོང་པར་ངེས་པ་ཉིད་དུ་ཐལ་བར་འགྱུར་རོ། །ནག་པོའི་ལས་བྱེད་པའི་མི་ལ་སོགས་པ་རྣམས་དབྱིབས་ཐ་དད་པ་ལ་མི་བརྟེན་པར་མཐོང་ངོ༌། །དེ་ནས་ལས་ཀྱི་དབྱེ་བ་ལས་འདིར་དཔྱད་པ་འདི་འབྱུང་སྟེ། ཅི་དམྱལ་བ་ལ་སོགས་པར་འགྲོ་བ་ཐམས་ཅད་ཀྱི་སྲིད་པ་བར་མའི་ཤ་ཚུགས་གཅིག་མངོན་པར་འགྲུབ་པ་མ་འོན་ཏེ་ཤ་ཚུགས་ཐ་དད་པ་ཞིག་འབྱུང་ཞེས་རྣམ་པར་བཅད་པ་སྟེ། དེའི་ཕྱིར་དེ་ནི་འཕེན་པ་གཅིག་པའི་ཕྱིར་ཞེས་བྱ་བ་རྒྱས་པར་སྨོས་སོ། །ལས་ནི་རྣམ་པ་གཉིས་ཏེ། འཕེན་པར་བྱེད་པ་དང་ཡོངས་སུ་རྫོགས་པར་བྱེད་པའོ། །ད་ལ་དེ་དག་གི་ཡོངས་སུ་རྫོགས་པར་བྱེད་པ་ནི་དུ་མ་ཡིན་གྱི། འཕེན་བར་བྱེད་པ་ནི་གཅིག་ཡིན་ཏེ་དེའི་ཕྱིར་དེ་ནི་འཕེན་པ་གཅིག་པའི་ཕྱིར། སྔོན་དུས་སྲིད་འབྱུང་ཤ་ཚུགས་ཅན་ཞེས་བྱ་བ་སྨོས་སོ། །འདི་ལ་དུས་སྔ་མའི་སྲིད་པ་འབྱུང་བར་འགྱུར་བའི་ཤ་ཚུགས་ལྟ་བུ་ཡོད་པས་ན་སྔོན་དུས་སྲིད་འབྱུང་ཤ་ཚུགས་ཅན་ཏེ། རྒྱའི་འབུར་བཞིན་ནོ། །སྔོན་གྱི་དུས་སྨོས་པ་ནི་འཆི་བའི་སྲིད་པ་དང་སྐྱེ་བའི་སྲིད་པ་ལས་ཀྱང་ཁྱད་པར་དུ་བྱ་བའི་ཕྱིར་རོ། །མངལ་ན་གནས་པ་རྣམས་ཁོ་ན་འཆི་ན་འགྲོ་བ་ལྔ་བའི་སྲིད་པ་བར་མ་མངོན་པར་འགྲུབ་བོ། །ལྷག་པ་དག་ན་འཕིན་པ་ཞེས་བྱ་བ་ལ། ལྷག་པ་ནི་མེ་མ་མུར་ལ་སོགས་པ་རྣམས་སོ། །གཞན་དག་ནི་དམྱལ་བའི་མེ་ནི་ཉེས་པ་བྱས་པ་དག་ཁོ་ན་ལས་འབྱུང་བའི་ཕྱིར་སྐྱོན་འདི་མེད་དོ། །མ་བསགས་ཤིང་ལས་ཀྱི་འབྲས་བུ་མ་ཐོབ་པ་དམྱལ་བའི་མེས་མི་ཚིག་གོ །ཞེས་བྱ་བ་ནི་ངེས་པ་ཡིན་ནོ་ཞེས་ཟེར་རོ། །གང་གི་ཕྱིར་གཞོན་ནུ་ཐོར་བུ་ལྟ་བུ་མཚན་དང་དཔེ་བྱད་དང་བཅས་པ་མའི་མངལ་དུ་འཇུག་པའི་ཕྱིར་དེས་ཛམྦུའི་གླིང་བྱེ་བ་ཕྲག་བརྒྱ་སྣང་བར་མཛད་དེ། ལྷན་ཅིག་སྐྱེས་པའི་འོད་ཡོངས་སུ་རྫོགས་པའི་ཕྱིར་རོ། །བྱེ་བ་ཕྲག་བརྒྱ་ཞེས་བྱ་བ་ནི་སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་སོ། །གཞན་དག་ན་རེ་སྔོན་དུས་ཀྱི་ཚེ་སྲིད་པ་ཐམས་ཅད་ཀྱང་གཞོན་ནུ་ཐོར་བུའི་དབྱིབས་དང་བོང་ཚོད་དེ་ཉིད་དོ་ཞེས་ཟེར་རོ། །དེ་ནི་མཚན་མ་ཙམ་དུ་ཟད་དེ་ཞེས་བྱ་བ་འབྱུང་སྟེ། མཚན་མཁན་རྣམས་ལུང་སྟོན་པ་དང་རྗེས་སུ་མཐུན་པར་ཟད་སོ། །དུད་འགྲོའི་སྐྱེ་གནས་བཟློག་ནས་ཡུན་རིང་དུ་ལོན་པའི་ཕྱིར་ཞེས་བྱ་བ་ནི་བསྐལ་པ་བརྒྱ་ལུས་པ་ནས་ལོག་པ་ཡིན་ན། །དཔེར་ན་རྒྱལ་པོ་ཀྲྀ་ཀཱི་ས་ཞེས་བྱ་བ་ལ། ཇི་ལྟར་རྒྱལ་པོ་ཀྲྀ་ཀཱིས་འབྱུང་བར་འགྱུར་བའི་དོན་གྱི་མཚན་མ་ཙམ་དུ་རྨི་ལམ་བཅུ་མཐོང་བ་ལྟ་བུའོ། །རྒྱལ་པོ་ཀྲྀ་ཀཱིས་ནུབ་གཅིག་ལ་རྨི་ལམ་བཅུ་རྨིས་པར་གྲག་སྙ་ཏེ། འདི་ལྟ་སྟེ་གླང་པོ་ཆེ་སྐར་ཁུང་ནས་བྱུང་ནས་མཇུག་མ་ལ་འཐོགས་པ་དང༌། ཁྲོན་པ་ཆུ་ཤིན་ཏུ་དངས་ཤིང་ཞིམ་ལ་མ་རྙོག་ཅིང་མ་གཡོགས་པ་ཞིག་མ་འཐུངས་པ་ཁོ་ནར་སྐམས་པ་དང༌། ཙན་དན་གོ་ཤཱིཪྵ་དང༌། ཨེ་རཎྜའི་བུད་ཤིང་བརྗེ་བ་དང༌། མུ་ཏིག་བྲེ་གང་ཕྱེ་བྲེ་གང་དུ་འཚོང་བ་དང༌། སྐྱེ་བོའི་ཚོགས་ཆེན་པོས་སྤྲེའུ་དབང་བསྐུར་བ་དང༌། སྐྱེས་བུ་མི་གཙང་བས་གོས་པ་ཞིག་གཞན་དག་ལ་ཡང་བསྒོ་བ་དང༌། གླང་པོ་ཆེའི་ཕྲུ་གུས་གླང་པོ་ཆེ་ཆེན་པོ་ཟིལ་གྱིས་གནོན་པ་དང༌། ལྷའི་ཚལ་ནས་མེ་ཏོག་ལ་སོགས་པ་ཁྱེར་བ་དང༌། དགའ་སྟོན་ཆེན་པོ་དོར་བ་དང༌། སྐྱེས་བུ་བཅོ་བརྒྱད་ཀྱིས་རས་ཡུག་གཅིག་དྲངས་ཀྱང་མི་འདྲལ་བར་མཐོང་ལ། མཐོང་ནས་ཀྱང་སྐྲག་སྟེ། ཡང་དག་པར་རྫོགས་པའི་སངས་རྒྱས་འོད་སྲུངས་ལ་གསོལ་པ་དང༌། བཅོམ་ལྡན་འདས་དེས་དབུགས་འབྱིན་པར་མཛད་ཅིང་བཀའ་སྩལ་བ། རྒྱལ་པོ་ཆེན་པོ་མ་འཇིགས་ཤིག་འདི་དག་ཁྱོད་ཀྱི་འཆི་ལྟས་སྟོན་པར་བྱེད་པ་ནི་མ་ཡིན་ཏེ། འོ་ན་ཅི་ཞེ་ན། མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ཞིག་འབྱུང་སྟེ། དེའི་གསུང་རབ་ཉམས་པར་འགྱུར་བའི་མཚན་མར་གྱུར་པ་ཞིག་གོ །དཔེར་ན་ཇི་ལྟར་ཞེ་ན། དེའི་ཉན་ཐོས་ཆེན་པོ་ལོངས་སྤྱོད་སྤངས་ཤིང་རབ་ཏུ་བྱུང་ནས་སློང་མོ་གཟར་བུ་གང་བྱིན་པ་ཙམ་གྱིས་རྙེད་པ་དང་བཀུར་སྟི་ལ་ལྟོས་པ་སྐྱེད་དེ། གླང་པོ་ཆེ་སྐར་ཁུང་ལ་མཇུག་མ་འཐོག་པ་ལྟར་ཚུལ་མ་ཡིན་པས་ཉོན་མོངས་
པར་འགྱུར་ཞིང་ལེགས་པའི་དོན་ལ་མི་རྩོལ་བར་འགྱུར། ཁྲོན་པ་ཆུ་མ་འཐུངས་པར་སྐམས་པ་ལྷར་ཆོས་སྨྲ་བ་ཆོས་སྟོན་པ་ལ་འགའ་ཡང་ཉན་པར་མི་འགྱུར། གོ་ཤཱིཪྵ་དང་འདྲ་བའི་གཙུག་ལག་དང་དམ་པ་མ་ཡིན་པའི་བསྟན་བཅོས་དག་བརྗེ་བར་འགྱུར། ཟང་ཟིང་གི་ཕྱིར་མུ་ཏིག་བྲེ་གང་ལྟ་བུའི་ཆོས་སྟོན་པར་འགྱུར། སྤྲེའུ་ལྟ་བུའི་ཚུལ་ཁྲིམས་འཆལ་པ་མདུན་གྱིས་བདར་བར་འགྱུར། ཚུལ་ཁྲིམས་འཆལ་པ་ལ་བརྩད་པ་དང་མི་གཙང་བས་གོས་པ་ལྟར་བདག་ཁོ་ནར་མ་ཟད་དོ། །ཞེས་དད་པ་དང་ལྡན་པ་གཞན་དག་ལ་ཡང་བསྐུར་བར་འགྱུར། གླང་པོ་ཆེའི་ཕྲུ་གུ་འདྲ་བའི་གསར་བུས་གླང་པོ་ཆེ་ཆེན་པོ་དང་འདྲ་བའི་རྒན་པོ་རྣམས་ལ་སྤྱོ་བར་འགྱུར། དགེ་འདུན་ནམ་མཆོད་རྟེན་གྱི་མེ་ཏོག་དང་འབྲས་བུ་ལ་སོགས་པ་བླངས་ཏེ་ཁྱིམ་པ་དག་ལ་སྟེར་བར་འགྱུར། དགའ་སྟོན་ཆེན་པོ་དང་འདྲ་བའི་སོ་སོ་ཐར་པའི་མདོ་འདོན་པ་ལ་འདུས་ནས་རྩོད་པ་སྨྲ་བར་འགྱུར། བསྟན་པ་རྣམ་པ་བཅོ་བརྒྱད་དུ་འགྱེས་པར་འགྱུར། དེ་དག་ཀྱང་རས་ཡུག་ལྟ་བུའི་རྣམ་པར་གྲོལ་བའི་རས་ཡུག་འདྲེན་ཅིང༌། དེ་གཞན་ཉིད་དུ་ཡང་མི་འགྱུར་རོ། །སྲིད་པ་བར་མ་ནི་ལྟོ་བརྟོལ་ཏེ་འཇུག་པ་མ་ཡིན་གྱི་ཞེས་བྱ་བ་ལ་ཅིའི་ཕྱིར་ཞེ་ན། ལས་ཀྱིས་ལྟོ་བར་འཛིན་པའི་ཕྱིར་སྐྱེ་གནས་ཀྱི་སྒོ་ནས་འཇུག་གོ །གཞན་དག་ན་རེ། ཐོགས་པ་མེད་པའི་ཕྱིར་གང་འདོད་པ་ནས་འཇུག་གོ་ཞེས་ཟེར་རོ། །གཟུགས་ན་སྤྱོད་པ་ཞེས་བྱ་བ་རྒྱས་པར་འབྱུང་ངོ༌། །འོག་མིན་ན་ལུས་ཀྱི་ཚད་དཔག་ཚད་ཁྲི་དྲུག་སྟོང་པ་རྣམས་ཛམྦུའི་གླིང་དུ་མངོན་པར་འགྲུབ་པའི་གོ་སྐབས་ཡོད་པར་མི་འགྱུར་རོ་ཞེ་ན་ནམ་མཁའ་ཡངས་པའི་ཕྱིར་དང༌། རྟེན་ནོར་བུའི་འོད་ལ་སོགས་པའི་སྣང་བ་དང་འདྲ་བས་འགར་ཡང་ཐོགས་པ་མེད་པའི་ཕྱིར་རོ། །བྱང་ཆུབ་སེམས་དཔའི་ཡང་ཞེས་བྱ་བ་ལ་སོགས་པ་ལ། གཞན་དག་ན་རེ་དགེ་སློང་མ་དཀར་མོ་ཁོ་ན་ཡིན་ཏེ། དགེ་འདུན་ལ་ཆོས་གོས་ཕུལ་བའི་སྨོན་ལམ་གྱི་དབང་གིས་ཇི་སྲིད་དེའི་གདུད་ལ་བཀུར་སྟི་བྱ་བའི་ཕྱིར་མཆོད་རྟེན་བཞེངས་པ་ཡང་གོས་ཀྱིས་དཀྲིས་པའི་བར་དུ་གྱུར་ཏོ། །བྱང་ཆུབ་སེམས་དཔའ་ནི་དགེ་བའི་རྩ་བ་བརྩམས་པ་
ཐམས་ཅད་བྱང་ཆུབ་ཁོ་ནར་བསྡོས་པའི་ཕྱིར། དེའི་སྲིད་པ་བར་མ་གོས་དང་བཅས་པ་མ་ཡིན་ནོ་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་བྱང་ཆུབ་སེམས་དཔའི་ཡང་གོས་དང་བཅས་པ་ཡིན་ཏེ། ངོ་ཚ་ཤེས་པ་དང་ཁྲེལ་ཡོད་པ་ཤས་ཚེ་བའི་ཕྱིར་གཟུགས་ཀྱི་ཁམས་ཀྱི་སྲིད་པ་བར་མ་བཞིན་ནོ་ཞེས་ཟེར་རོ། །ཡང་སྲིད་པ་སྔ་མ་ཞེས་བྱ་བ་ལ་སོགས་པ་འབྱུང་ངོ༌། །སྲིད་པ་ཞེས་བྱ་བ་ནི་ཟག་པ་དང་བཅས་པའི་དངོས་པོ་ཐམས་ཅད་ཡིན་པས། སྲིད་པ་ཞེས་བྱ་བ་ནི་བྱེ་བྲག་མེད་པར་ཉེ་བར་ལེན་པའི་ཕུང་པོ་ལྔ་དག་གོ་ཞེས་བྱ་བ་སྨོས་ཏེ། འདིར་ནི་སེམས་ཅན་ཞེས་བྱ་བ་ཁོ་ན་གཟུང་ངོ༌། །དེ་ནི་རྣམ་པ་བཞིར་དབྱེ་སྟེ་ཞེས་བྱ་བ་ལ། དེ་ནི་གཅིག་ཁོ་ན་ཡིན་མོད་ཀྱི་སྐྱེ་བ་དང་གནས་སྐབས་ཀྱི་བྱེ་བྲག་གིས་རྣམ་པ་བཞིར་དབྱེའོ། །གལ་ཏེ་སེམས་ཅན་གཟུགས་ཅན་དག་གི་ནང་དུ་སྐྱེ་ན་ཞེས་བྱ་བ་ལ་གཟུགས་ཅན་སྨོས་པ་ནི། གཟུགས་མེད་པ་རྣམས་སུ་སྲིད་པ་བར་མ་མེད་པའི་ཕྱིར་རོ། །ནི་ཙི་ཥཱཾ་བྷཱ་བཱ་ནཾ་སྲིད་པ་བར་མ་ཉིད་སྔོན་ཞེས་བྱ་བ་དེ་ཉིད་དུས་སྔ་མའི་སྲིད་པར་འགྱུར་རོ་ཞེ་ན་མི་འགྱུར་ཏེ། སྲིད་པ་བར་མ་མེད་པར་སྐྱེ་བ་ལ་སོགས་པའི་སྲིད་པ་རྣམས་དེའི་འབྲས་བུ་མ་ཡིན་པའི་ཕྱིར་རོ། །དེའི་ཕྱིར་གང་གི་གནས་སྐབས་ལས་སྲིད་པ་བར་མ་རྣམས་སྲིད་པ་བར་མ་ལ་སོགས་པ་རྣམས་སུ་སྐྱེ་བ་འབྱུང་བ་དེ་འདིར་དུས་སྔ་མའི་སྲིད་པ་སྟེ། གང་གི་ཕྱིར་སྐྱེ་བ་གཞན་ལ་བལྟོས་པ་དེ་འདིའི་གནས་སྐབས་ལ་སྟེ་སྐྱེ་བ་དུ་མའི་གནས་སྐབས་གསུམ་ལ་བལྟོས་པ་མ་ཡིན་ནོ། །སྲིད་པ་བར་མ་དེ་ཡང་ལུང་དང་རིགས་པའི་ཡུལ་ཡིན་པ་འབའ་ཞིག་ཏུ་མ་ཟད་དེ། འོ་ན་ཅི་ཞེ་ན་རིས་མཐུན་ལྷ་མིག་དག་པས་མཐོང༌། རིས་མཐུན་པས་བལྟ་བར་བྱ་བ་ཡིན་ཞིང༌། ལྷ་མིག་དག་པས་བལྟ་བར་བྱ་བ་ཡིན་ནོ། །རིས་མཐུན་པའི་སྲིད་པ་བར་མ་དག་གིས་མཐོང་ངོ་ཞེས་བྱ་བ་ལ་དམྱལ་བའི་སྲིད་པ་བར་མ་ནི་དམྱལ་བའི་སྲིད་པ་བར་མ་ཁོ་ནས་མཐོང་གི །གཞན་གྱི་སྲིད་པ་བར་མ་དག་གིས་ནི་མ་ཡིན་ཏེ་གཞན་དག་ལ་ཡང་དེ་དང་འདྲ་བར་བརྗོད་པར་བྱའོ། །གང་དག་ལ་ལྷའི་མིག་རྣམ་པར་དག་པ་མངོན་པར་ཤེས་པ་ལས་བྱུང་བ་ཡོད་པ་དེ་དག་གིས་ཀྱང་འདི་མཐོང་ངོ༌། །ལྷའི་མིག་ཤིན་ཏུ་རྣམ་པར་དག་པ་ནི་སྐྱོན་བཅུ་གཅིག་དང་བྲལ་
པ་སྟེ། སྐྱོན་དེ་དག་ཀྱང་ཐེ་ཚོམ་དང་ཡིད་ལ་མི་བྱེད་པ་དང༌། ལུས་ཀྱི་གནས་ངན་ལེན་དང༌། རྨུགས་པ་དང༌། གཉིད་དང༌། རྒོད་པ་དང༌། བརྩོན་འགྲུས་བརྩམས་དྲགས་པ་དང༌། སེམས་པ་ཡོ་པོ་དང༌། བག་ཚ་བ་དང༌། འདུ་ཤེས་སྣ་ཚོགས་པ་དང་སྨྲ་བ་མངས་པ་དང༌། ཧ་ཅང་བསྒོམ་དྲགས་པ་རྣམས་སོ། །གཟུགས་རྣམས་སུ་མངོན་པར་ཤེས་པ་ལས་བྱུང་བ་ནི་མངོན་པར་ཤེས་པའི་རང་བཞིན་ཏེ། བསྒོམས་པའི་འབྲས་བུ་ཞེས་བྱ་བའི་དོན་ཏོ། །ལྷའི་མིག་སྐྱེས་ནས་ཐོབ་པས་ནི་མི་མཐོང་སྟེ། ཅིའི་ཕྱིར་ཞེ་ན། ལྷའི་མིག་ཤིན་ཏུ་རྣམ་པར་དག་པས་མཐོང་ངོ་ཞེས་འབྱུང་བའི་ཕྱིར་རོ། །འདིར་གང་ལྷའི་མིག་སྐྱེས་ནས་ཐོབ་པས་མི་མཐོང་བའི་རྒྱུ་ཅི་ཞེ་ན། ཤིན་ཏུ་དང་བའི་ཕྱིར་ཞེས་བྱ་སྟེ། སྐྱེས་ནས་ཐོབ་པའི་མིག་གི་ཡུལ་མ་ཡིན་པའི་ཕྱིར་ཞེས་བྱ་བའི་དོན་ཏོ། །གཞན་དག་ན་རེ་ལྷའི་སྲིད་བ་བར་མ་པས་ཐམས་ཅད་མཐོང་ངོ༌། །ཞེས་བྱ་བ་ནི་དེའི་མིག་ནི་འགྲོ་བ་དང་འདྲ་བར་ཁྱད་པར་དུ་འཕགས་པའི་ཕྱིར་ཏེ་གཞན་ལ་ཡང་དེ་བཞིན་དུ་བརྗོད་པར་བྱའོ། །དབང་པོ་ཀུན་ཚང་ཞེས་བྱ་བ་ལ། སྔོན་གྱི་དུས་ཀྱི་སྲིད་པའི་ཤ་ཚུགས་ཅན་ཡིན་ཡང༌། རྣམ་པར་སྨིན་པའི་སྙིང་ངོ་དང་པོ་ཡིན་པའི་ཕྱིར་དང༌། སྲིད་པ་འཚོལ་བ་ཡིན་པའི་ཕྱིར་དབང་པོ་མ་ཚང་བ་མེད་པ་ཡིན་ནོ། །འགྲོ་བ་གང་དང༌། ཁམས་དང་གནས་གང་དུ་སྐྱེ་བར་འགྱུར་བ་ནི་དེ་ལས་རྣམ་པ་ཐམས་ཅད་དུ་ཟློག་ཏུ་མེད་དོ། །མིའི་སྲིད་པ་བར་མ་མེད་པར་གྱུར་ནས་ཞེས་བྱ་བ་རྒྱས་པར་འབྱུང་སྟེ། ཁམས་དང་གནས་དག་ལ་ཡང་དེ་དང་འདྲ་བར་རིག་པར་བྱའོ། །ངེས་པ་འདིས་ཞེས་བྱ་བ་རྒྱ་ཆེར་འབྱུང་བ་ལ། ཅིའི་ཕྱིར་འགྲོ་བའི་སྲིད་པ་བར་མ་ལས་ཀྱི་འཕེན་པར་གཅིག་ཁོ་ན་ཞེ་ན། མྱོང་བར་ངེས་པའི་ལས་ཀྱིས་འཕངས་པ་དེ་འགྲོ་བ་དེ་དང་ཕྲད་པའི་དོན་དུ་འཇུག་པའི་ཕྱིར་རོ། །རྒྱུན་ཏུ་ཞུགས་བ་ལ་སོགས་པ་རྣམས་གནས་དང་ས་འཕོས་པ་ལས་བར་མ་དོར་འཆི་བ་གང་ཡིན་པ་ནི་བཟློག་པར་འགྱུར་རོ་ཞེས་བྱ་བ་རྩོད་པའི་ཚིག་གོ །འདོད་ཆགས་དང་མ་བྲལ་བའི་སློབ་པའི་སྲིད་པ་བར་མ་ལ་ནི་ས་འཕོ་བ་མེད་དེ་ལམ་ལས་རྒྱལ་བ་མ་
ཡིན་པའི་ཕྱིར་དང༌། འདོད་པའི་ཁམས་ལས་ནི་མངོན་དུ་མ་གྱུར་པའི་སྒོ་ནས་སྡུག་བསྔལ་ལས་འདས་པའི་ཕྱིར་རོ། །གང་དག་མངོན་དུ་གྱུར་པར་འདོད་པ་དེ་དག་ཀྱང་རིགས་ནས་རིགས་སུ་སྐྱེ་བ་དང༌། བར་ཆད་གཅིག་པ་དག་ས་འཕོ་བར་མི་འདོད་དོ། །ལྷ་དང་མིའི་རིགས་ནས་རིགས་སུ་སྐྱེ་བ་སོ་སོར་ངེས་པ་དག་ཀྱང་ལྷ་དང་མི་དག་ཏུ་སྐྱེ་བ་ལ་ཞུགས་པའི་ལས་མངོན་དུ་གྱུར་པའི་ཕྱིར་འགྲོ་བ་གཞན་དུ་སྐྱེ་བ་མ་ཡིན་ཏེ། དེའི་ཕྱིར་མི་བཟློག་ཅེས་བཤད་དོ། །འདོད་པ་ན་སྤྱོད་པ་སྨོད་པ་ནི་གཟུགས་ན་སྤྱོད་བའི་སྲིད་བ་བར་མ་བསལ་བར་བྱ་བའི་ཕྱིར་རོ། །དེ་ནི་ཁམ་གྱི་ཟས་ཀྱི་འདོད་ཆགས་དང་བྲལ་བ་ཡིན་ཏེ། དེའི་ཟས་ནི་རྣམ་པར་ཤེས་པ་དང་ཡིད་ལ་སེམས་པ་དང༌། རེག་པ་ཞེས་བྱ་བ་དང་རྣམ་པ་གསུམ་མོ། །དེ་ཉིད་ཀྱི་ཕྱིར་དྲི་ཟ་ཞེས་བྱའོ། །གང་གི་ཕྱིར་དེ་ལྟར་དྲི་ཟ་ཡིན་པ་དེའི་ཕྱིར་དྲི་ཟའོ། །འགྲོ་བ་མ་ཡིན་ཡང་འདི་དྲི་ཟ་ཞེས་བྱ་བར་འགྱུར་རོ། །གལ་ཏེ་འདི་འགྲོ་བའི་དོན་ཡིན་ཡང་ཟ་བའི་དོན་དུ་འགྱུར་བ་ཅི་ཞེ་ན། སྒྲའི་བྱིངས་རྣམས་དོན་དུ་མ་ཡིན་པའི་ཕྱིར་ཞེས་བྱ་སྟེ། འགྲོ་བའི་དོན་ཅན་ཡང་ཟ་བའི་དོན་ཅན་དུ་འགྱུར་བས་སྐྱོན་མེད་དེ། དེ་ལྟ་ན་གནྡྷ་དྲི་དང་ཨརྦ་ཟ་བ་ཡིན་པས་གནྡྷཱརྦ་ཞེས་པར་འགྱུར་རོ་ཞེ་ན། དེའི་ཕྱིར་ཐུང་དུ་ཉིད་ནི་ཀརྐནྡྷུ་དང་ཤ་ཀནྡྷུ་བཞིན་ནོ་ཞེས་སྨོས་ཏེ། དཔེར་ན་ཤཀཱནྡྷུ་ཞེས་ཐོབ་པ་ལ་ཤ་ཀནྡྷུ་ཞེས་པར་གྱུར་པ་བཞིན་ནོ། །དབང་ཆུང་བར་གྲགས་པ་ཞེས་བྱ་བ་ནི་མི་རིགས་པ་སྟེ། དམན་པའི་རིགས་ཅན་ཞེས་བྱ་བའི་དོན་ཏོ། །དབང་ཆུང་བ་ནི་དབང་ཐང་ཆུང་བའོ། །དབང་ཆུང་པར་གྲགས་པ་གང་ལ་ཡོད་པ་དེ་ནི་དབང་ཆུང་བར་གྲགས་པ་ཡིན་ནོ། །དབང་ཆེ་བ་ནི་དབང་ཐང་ཆེ་བ་སྟེ། དབང་ཆེ་བ་ཞེས་བྱ་བར་གྲགས་པ་གང་ལ་ཡོད་པ་དེ་ནི་དབང་ཆེ་བར་གྲགས་པ་ཡིན་ནོ། །བཙུན་པ་ན་རེ་ངེས་པ་མེད་དེ་ཞེས་བྱ་བ་ལ་བཙུན་པ་ནི་དཔེས་སྟོན་པའི་སྡེ་པ་ཆོས་སྐྱོབ་པོ། །ཇི་སྐད་དུ་སྐྱེ་བའི་ཚོགས་པ་མ་རྙེད་པ་དེ་སྲིད་ཀྱི་པར་དུ་གནས་སོ་ཞེས་བྱ་བ་འདི་ལ་རྒྱུ་སྨྲས་པ་ནི་དེའི་ཚེའི་འཕེན་པ་ལོགས་ཤིག་ན་མེད་དེ་ཞེས་བྱ་བའོ། །ཡང་དེ་ཇི་ལྟར་ཤེས་པར་བྱ་ཞེ་ན། དེའི་ཕྱིར་རིས་མཐུན་པ་གཅིག་པའི་ཕྱིར་རོ་ཞེས་བྱ་བ་སྨོས་
སོ། །དུས་སྔ་མའི་སྲིད་པ་གང་ཡིན་པ་དང༌། སྲིད་པ་བར་མ་གང་ཡིན་པ་དེ་དག་ཐོབ་པ་བྱེད་པའི་རིས་མཐུན་པ་དེ་ནི་གཅིག་པ་ཉིད་དོ། །ཚེའི་ལས་གང་གིས་དུས་སྔ་མའི་སྲིད་པའི་ཚེ་འཕེན་པ་དེ་ཉིད་ཀྱིས་སྲིད་པ་བར་མའི་ཡང་ཡིན་ཏེ། སྲིད་པ་ཚོལ་བའི་ཕྱིར་རོ། །དེ་ལྟ་མ་ཡིན་ན་ཞེས་བྱ་བ་ལ། གལ་ཏེ་རིས་མཐུན་པ་ཐ་དད་པའམ་ཚེའི་ལས་ཀྱིས་ཚེ་ལོགས་ཤིག་ཏུ་འཕེན་པར་འགྱུར་ན་ནི་དེ་ལྟ་ཡིན་དང་སྲིད་པ་བར་མ་དོའི་ཚེ་ཟད་པས་འཆི་བའི་སྲིད་པར་ཡང་འགྱུར་ཏེ། དཔེར་ན་དུས་སྔ་མའི་སྲིད་པའི་ཚེ་ཟད་པས་འཆི་བའི་སྲིད་པར་འགྱུར་བ་བཞིན་ནོ། །དེའི་ཕྱིར་ངེས་པ་མེད་དོ། །གལ་ཏེ་ཤའི་ཕུང་པོ་རི་རབ་ཙམ་དུ་ཞེས་བྱ་བ་ནི་སློབ་དཔོན་ཉིད་འདྲི་བར་མཛད་པའོ། །གཞན་དག་ན་རེ་འདི་ལ་རྒྱུ་མེད་པ་དང་རྒྱུ་དང་བཅས་པར་སྨྲ་བའི་ཚིག་གིས་གླགས་ཡོད་པ་དེའི་ཕྱིར་དེས་སྨྲས་སོ་ཞེའོ། །དེ་དག་དྲི་དེ་ཚོར་ཞིང་དེ་དང་ལྷན་ཅིག་རྒྱུ་བའི་རོ་མྱོང་བ་དྲན་ནས་དེ་དག་ལ་ཆགས་པ་སྐྱེད་པར་བྱེད་པ་དེའི་ཕྱིར་དྲི་དང་རོ་ལ་མངོན་པར་ཆགས་པ་ཞེས་བྱ་བ་སྨོས་སོ། །སད་པར་བྱས་ནས་སྲིད་པ་དེས་ཞེས་བྱ་བ་ནི་དྲི་དང་རོའི་སྲེད་པས་རྣམ་པར་སྨིན་པ་ལ་མངོན་པར་ཕྱོགས་པར་བྱས་ཏེ་སྲིད་པ་བར་མའི་རྒྱུན་གྱིས་སྲིན་བུའི་ནང་དག་ཏུ་སྐྱེ་བར་འགྱུར་རོ། །དེའི་རྐྱེན་མང་པོ་ཞེས་བྱ་བ་ནི་སྲིན་བུའི་ངོ་བོའི་རྐྱེན་མང་བའི་ཚེ་སྟེ། དེ་འཆགས་པར་འགྱུར་ཏེ། སྲིན་བུའི་སྲིད་པ་འཆགས་པར་འགྱུར་བའོ། །འཇུག་པ་རྙེད་ཅེས་བྱ་བ་ནི་རྣམ་པར་སྨིན་པ་འབྱིན་པ་ལ་མངོན་དུ་ཕྱོགས་པར་གྱུར་ཅེས་བྱ་བའི་དོན་ཏོ། །སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པོ་ཞེས་བྱ་བ་ནི་དེ་ཉིད་ལ་ཡུལ་དང་དུས་སུ་རྐྱེན་ངེས་པ་དང་མ་ངེས་པ་ཉིད་ཀྱི་ཕྱིར་རོ། །སྲིད་པ་བར་མ་ནི་སྲིད་པ་ཚོལ་བ་ཡིན་པའི་ཕྱིར་ཞེས་བྱ་བ་ནི་དེ་ནི་སྐྱེ་བའི་དགོས་པ་ཅན་ཡིན་པའི་ཕྱིར་སྲིད་པ་དོན་དུ་གཉེར་བར་བྱེད་དོ། །དེའི་ཕྱིར། ཚོགས་ཤིང་དུས་ལ་བབ་པ་ན། འབྲས་བུ་ཉིད་དུ་སྨིན་པར་འགྱུར་ཞེས་འབྱུང་བའི་ཕྱིར་རོ། །གཞན་དུ་ནི་མ་ཡིན་ཏེ་ཞེས་བྱ་བ་དེ་མང་པོ་མ་ཡིན་པའི་དུས་སོ། །གཞན་དུ་ནི་མ་ཡིན་པ་ལྟ་བུའོ་ཞེས་བྱ་བ་ནི་ཚེ་ཐུང་བ་མ་ཡིན་པ་སྟེ། འཁོར་ལོས་སྒྱུར་བ་འབྱུང་བ་ནི། སྟོང་ཕྲག་
བརྒྱད་ཅུ་ལས་མི་འཕྱི་ཞེས་འབྱུང་བའི་ཕྱིར་རོ། །དེ་ཉིད་ཀྱི་ཕྱིར་ན་གང་གི་ཕྱིར་འཁོར་ལོས་སྒྱུར་བ་ལ་སོགས་པར་འགྱུར་བའི་ལས་དག་ཡོད་དུ་ཟིན་ཀྱང༌། རེས་འགའ་ཞིག་ཁོ་ན་རྣམ་པར་སྨིན་པ་མངོན་པར་འགྲུབ་པར་བྱ་བ་ལ་འཇུག་པ་རྙེད་པར་འགྱུར་བའི་ཕྱིར་རོ། །དེ་ཉིད་དུ་ཞེས་བྱ་བ་ནི་སྲིད་པ་བར་མ་དོར་རོ། །སྲིད་པ་ཚོལ་བ་ཡིན་པའི་ཕྱིར་ཞེས་བྱ་བ་ལ་དེ་ནི་སྐྱེ་བའི་དགོས་པ་ཅན་ཡིན་པའི་ཕྱིར་སྲིད་པ་དོན་དུ་གཉེར་བར་བྱེད་དོ། །ཡང་ལས་ལས་སྐྱེ་བ་དང་ལས་ཀྱི་འབྲས་བུ་དེ་རྐྱེན་ཚོགས་པ་ལས་ཇི་ལྟར་སྐྱེ་བར་འགྱུར། ཏཌྷཱཪྻ་ཀཏྭཱཛྫ་ནྨ་ནཿསྲིད་པ་བར་མ་ལ་ནི་དེ་ལྟར་བརྒལ་བར་བྱ་བ་མ་ཡིན་ཏེ་འདི་ནི་ལས་ཀྱི་ནུས་པ་བསམ་གྱིས་མི་ཁྱབ་པ་ཉིད་དོ་ཞེས་བཤད་དོ། །འོན་ཏེ་མ་ངེས་ན་ནི་ཞེས་བྱ་བ་རྒྱས་པར་འབྱུང་བ་ལ། གང་ཞིག་དུས་དང་སྐྱེ་བ་ངེས་པས་ཡུལ་མ་ངེས་པར་འཕེན་པ་དེ་ནི་དེ་ལས་གཞན་པའི་ལུས་དང་སྐྱེ་བ་དེར་སྐྱེའོ། །དེའི་སྐྱེ་བ་འཕགས་པའི་མ་ཡིན་པའི་ཕྱིར་རོ།། གཞན་དག་ན་རེ་འདྲ་བར་སྐྱེ་བར་འགྱུར་ཏེ། སྐྱེ་བ་དེ་དང་ཡུལ་དེར་སྐྱེ་བ་མ་ངེས་ན་ནི་དེའི་ཕྱིར་དེ་དང་འདྲ་བའི་སྐྱེ་བར་སྐྱེའོ་ཞེས་ཟེར་རོ། །ཡང་ཅིའི་ཕྱིར་འདིའི་རིགས་ཉིད་ངེས་པ་དང་མ་ངེས་པ་ཉིད་དུ་བཤད་པ་ལ། དུས་སུ་ཡང་རིགས་ངེས་པ་དང་མ་ངེས་པའི་ཕྱིར་མ་ཡིན་ཏེ། དུས་སུ་ཡང་གཉི་ག་རིག་པར་བྱའོ། །ཇི་ལྟར་བ་ལང་དག་ནི་དབྱར་རྣམས་སུ་འཁྲིག་པ་མངལ་ཞེས་བྱ་བ་ལ་སོགས་པས་ངེས་པ་དང་མ་ངེས་པ་སྟེ། ཇི་ལྟར་ཞེ་ན། དུས་གཞན་ལ་བ་ལང་རྣམས་ཀྱི་ནང་དུ་སྐྱེ་བར་འགྱུར་བ་གང་ཡིན་པ་དེ་ནི་བ་མེན་རྣམས་ཀྱི་ནང་དུ་སྐྱེའོ་ཞེས་བྱ་བ་ལ་སོགས་པ་འབྱུང་ངོ༌། །ལས་ཀྱི་འཕེན་པ་གཅིག་པའི་ཕྱིར་ཞེས་བྱ་བ་ལ་ལས་གང་གིས་བ་ལང་ལ་སོགས་པའི་རིས་མཐུན་པ་འཕེན་པའི་ལས་དེ་ཉིད་ཀྱིས་དེའི་སྲིད་པ་བར་མ་འཕེན་པས་ཇི་ལྟར་རིས་མཐུན་པ་གཞན་གྱི་སྲིད་པ་བར་མས་རིས་མཐུན་པ་གཞན་སྐྱེད་པར་ནུས་ཏེ། དེ་ནི་བརྗོད་པར་བྱ་བ་མ་ཡིན་ནོ། །གཞན་དག་ན་རེ་རིས་མཐུན་པ་གཞན་དུ་སྐྱེས་པ་ཡང་དེའི་རིས་མཐུན་པར་གཏོགས་པའོ། །འོ་ན་སྲིད་པ་བར་མ་དང་ཐ་མི་དད་པའི་རིས་མཐུན་པ་ཉིད་ཅི་ཞེ་ན། ཀལྨཱ་ཥ་པཱ་ད་ལ་སོགས་པ་བཞིན་ཞེས་སོ། །འདི་ལ་བརྗོད་པར་བྱ་བ་མེད་དེ། འདིར་ནི་རིས་
མཐུན་པ་གང་དུ་སྐྱེ་བ་དེའི་རིགས་མཐུན་པར་གཏོགས་པ་ཉིད་དུ་འགྱུར་རོ་ཞེས་གཞན་གྱིས་བསམས་པའོ། །འདི་དེ་འདྲ་བ་ཞེས་གསུངས་པའི་ཕྱིར་ཅི་ལས་ཡིན། རྣམ་པ་གཞན་དུ་ན་ཁྱད་པར་ལས་བྱུང་བའི་དོན་ཅན་དེ་དགག་པའི་ཕྱིར་དེ་སྐད་བཤད་དོ། །སྲིད་པ་བར་མ་རིས་གཞན་ནི་མ་ཡིན་ནོ་ཞེས་རྒྱས་པར་འབྱུང་སྟེ། དེའི་ཕྱིར་འདི་ལ་ནི་མ་ཡིན་ནོ། །སློབ་དཔོན་འདུས་བཟང་ནི། དེའི་ལས་རིགས་གཅིག་པའི་ཕྱིར་རིས་ཐ་དད་པ་འཕེན་པ་གཅིག་པ་ཉིད་གཏོད་པ་མ་ཡིན་ནོ་ཞེས་ཟེར་རོ། །དེ་ལྟ་ན་ཡང་སྲིད་པ་བར་མའི་ལས་གང་ཡིན་པའི་འབྲས་བུ་དེ་ཉིད་ལྷག་མའི་སྐྱེ་བ་ཡིན་ནོ་ཞེ་ན། ཅི་ལྟར་ལས་ཀྱི་འཕེན་པ་གཅིག་ཉིད་འདོར་བར་བྱེད། ཅི་སྟེ་དེ་ཉིད་དེ་ཡི་འབྲས་བུའོ་ཞེ་ན། དེ་ལྟ་ན་ཡང་སྐྱེ་བ་གཅིག་འཕེན་པ་ལས་གཅིག་ཡིན་པས་འགལ་ཏེ། ལས་གཅིག་གིས་རིགས་མཐུན་པ་དུ་མ་འཕེན་པ་ཉིད་དུ་ཁས་བླང་པའི་ཕྱིར་རོ། །གཞན་དག་ན་རེ་རིས་གཞན་གྱིས་སྲིད་པ་བར་མས་ཞེས་བྱ་བ་ལ་སོགས་པས་མི་བཟློགས་ཞེས་བྱ་བ་འདི་དང་འགལ་བར་སྟོན་ཏོ་ཞེས་ཟེར་རོ། །གཞན་དག་ནི་འགྲོ་བ་གཅིག་ལ་དགོངས་ཏེ་གསུངས་པའི་ཕྱིར་སྐྱོན་མེད་དོ་ཞེས་ཟེར་ཏེ། འགྲོ་བ་གཅིག་ཏུ་རིས་མཐུན་པའི་ཕྱིར་གཞན་ཉིད་འཕེན་པ་དེ་ལ་རིགས་གཅིག་ཏུ་དགོངས་སོ་ཞེས་ཤེས་པར་བྱའོ། །བློ་ནི་ཕྱིན་ཅི་ལོག་གྱུར་པས། ཞེས་བྱ་བ་ལ་སོགས་པ་ལ་འདོད་ཆགས་དང་ཞེ་སྡང་དག་གིས་ཏེ་འདི་ལྟར་མལ་འཁྲིག་པའི་འདོད་ཆགས་ཀུན་ཏུ་སྤྱོད་པའི་ཕྱིར་བློ་ཕྱིན་ཅི་ལོག་པ་ཡིན་ལ། ཕ་ལ་ཞེ་སྡང་ཀུན་ཏུ་སྤྱོད་པའི་ཕྱིར་རོ། །ཡང་ན་ནི་བཟློག་པའོ། །ཕ་མ་ཞེས་བྱ་བ་ལ། ཕ་དང་མ་ནི་ཕ་མ་སྟེ། ཕ་མ་དེ་གཉིས་སོ། །ཉལ་པོ་བྱེད་པ་ནི་འཁྲིག་པའི་ཆོས་ལྷག་པར་སྤྱོད་པའོ། །ཕོའི་འདོད་ཆགས་ནི་ཕོའི་འོ། །མོའི་ཡང་དེ་དང་འདྲའོ། །དེ་ཉིད་ཀྱི་ཕྱིར། བུ་ནི་ལྷག་པར་མའི་ཕྱོགས་འཛིན་ལ། བུ་མོ་ནི་ཕའི་འོ། །གནས་སྐབས་དེར་ཞེས་བྱ་བ་ལ། ཕོའི་ཉལ་པོ་ལ་ནི་ཕའི་གནས་སྐབས་སུའོ། །མོའི་ཉལ་པོ་ལ་ནི་མའི་གནས་སྐབས་སུའོ། །མི་གཙང་བ་དེར་ཞེས་བྱ་བ་རྒྱས་པར་འབྱུང་བ་ལ། མི་གཙང་བ་ནི་ཁུ་ཁྲག་གོ །མངལ་གྱི་གནས་ནི་ཕོ་བ་དང་
ལོང་ཀ་དང་གཉིས་ཀྱི་བར་རོ། །ཁུ་ཆུ་དང་ཁྲག་འདི་ནི་བདག་གི་ཡིན་ནོ་སྙམ་སྟེ་དགའ་བ་སྐྱེས་ནས་མའི་མངལ་དུ་ཞུགས་ཏེ་ཁུ་ཆུ་དང་ཁྲག་ཐིགས་པ་གཅིག་གཉིས་ཀྱིས་ནུར་ནུར་པོར་གནས་ཏེ། འདབ་ཆགས་སུ་གནས་ཞེས་བྱ་བའི་དོན་ཏོ། །དེ་ནས་འདབ་ཆགས་སུ་གནས་པ་དེའི་ཕུང་པོ་འཁྲང་པར་འགྱུར་བ་ཞེས་བྱ་བ་ནི་རགས་པར་འགྱུར་བ་སྟེ། ནུར་ནུར་པོའི་ལུས་ཡིན་པའི་ཕྱིར་རོ། །སྲིད་པ་བར་མ་པའི་ཤིན་ཏུ་དང་བ་དག་ནི་འགག་པར་འགྱུར་ཏེ། འདིར་སྐྱེ་བ་དང་འགག་པ་ན་ས་བོན་དང་མྱུ་གུ་དང་འདྲ་བར་བལྟ་བར་བྱའོ། །རྒྱབ་རོལ་ཏུ་བལྟས་ཏེ་ཙོག་ཙོག་པོར་ཞེས་བྱ་བ་ནི་བདག་ཉིད་ལ་ཕའི་སྤྱོད་ལམ་ལྷག་པར་མོས་པའི་ཕྱིར་རོ། །དེ་བཞིན་དུ་ལྟོ་རོལ་དུ་ཁ་བལྟའོ་ཞེས་བྱ་བ་ཡང་བདག་ཉིད་ལ་མའི་གནས་སྐབས་སུ་ལྷག་པར་མོས་པའི་ཕྱིར་ཏེ་དེ་ལྟ་སྐྱེ་སྟེ་གཡོན་ཕྱོགས་ཀྱི་ངང་ཚུལ་ཅན་ཡིན་པའི་ཕྱིར་ལྟོའི་གཡོན་ཕྱོགས་སུ་བསྙེས་ཏེ་གནས་སོ། །ཕྱིས་ལུས་སྐྱེ་ཞིང་ཞེས་བྱ་བ་ནི་རྒྱས་པ་དང་འཕེལ་ཞིང་ཞེས་བྱ་བའི་དོན་ཏོ། །དེ་དག་ཁོ་ན་ཡིན་ཏེ་ཞེས་བྱ་བ་ནི་ཁུ་ཆུ་དང་ཁྲག་གི་འབྱུང་བ་དག་ཁོ་ནའོ། །ཇི་ལྟར་ཞེ་ན་ཁུ་ཆུ་དང་ཁྲག་དབང་པོ་མེད་པ་ནི་ཞེས་བྱ་བ་རྒྱས་པར་འབྱུང་ངོ༌། །ས་བོན་དང་མྱུ་གུ་འགག་པ་དང་སྐྱེ་བའི་ཚུལ་དུ་ཞེས་བྱ་བ་ལ། སྐད་ཅིག་མ་གཅིག་ཁོ་ན་ལས་ས་བོན་འགག་ཅིང་མྱུ་གུ་སྐྱེའོ། །ནུར་ནུར་པོ་ཞེས་བྱ་བ་གང་ཡིན་པ་ན་ཞེས་བྱ་བ་ནི་ཁུ་ཆུ་དང་ཁྲག་གི་མཇུག་ཐོགས་སུ་དང་པོར་ནུར་ནུར་པོ་ཡིན་ནོ་ནུར་ནུར་པོ་ལས་མེར་མེར་གྱི་ཞེས་བྱ་བ་ལ་སོགས་པ་འབྱུང་བའི་ཕྱིར་རོ། །དུར་ཁྲོད་བསྐྱེད་དོ་ཞེས་བྱ་བ་ལ་སོགས་པ་ལ། དུར་ཁྲོད་ནི་དུར་ཁྲོད་དེ། ཡང་དང་ཡང་དུ་ཤི་བས་འཕེལ་བར་བྱས་པའོ། །སྲིད་པ་བར་མའི་གཟུགས་ཀྱི་རྒྱུན་ལས་སྐྱེ་བའི་ཆར་གཏོགས་པའི་གཟུགས་སྐྱེ་བ་དེ་ལྟར་ནི་མ་ཡིན་ཏེ། ས་བོན་དང་མྱུ་གུའི་ཚུལ་དུ་བལྟ་བར་བྱའོ། །སེམས་ཅན་དུ་སྟོན་པ་མ་ཡིན་པ་སེམས་ཅན་དུ་སྟོན་པའི་ས་བོན་དུ་འགྱུར་བར་འོས་པ་མ་ཡིན་ཏེ། རྒྱུད་ཀྱི་དབྱེ་བ་ལས་ཅིག་ཅར་ཡང་སེམས་ཅན་དང་སེམས་ཅན་དུ་སྟོན་པ་མ་ཡིན་པའི་གཟུགས་འགག་གོ །སེམས་ཅན་དུ་སྟོན་པ་དང་སེམས་ཅན་དུ་སྟོན་པ་མ་ཡིན་པ་ལས་སྐྱེས་པ་ཡང་རིས་
ཐ་དད་པ་མ་ཡིན་པའི་སེམས་ཅན་དུ་སྟོན་པ་ལས་མ་ཡིན་ནོ། །གཞན་དག་ན་རེ། འབྱུང་བ་གཞན་དག་ཁོ་ན་ཡིན་ཏེ་ཞེས་བྱ་བ་ལ། སྲིད་པ་བར་མའི་འབྱུང་བ་ནུར་ནུར་པོའི་འབྱུང་བ་དང་འབྲེལ་པ་དག་ནི་ནུར་ནུར་པོ་དང་ལྷན་ཅིག་འགགས་ལ། དེ་དག་ཀྱང་འགག་པ་ན་ལྷན་ཅིག་བྱེད་པའི་རྐྱེན་གཞན་ནུར་ནུར་པོ་ལ་བརྟེན་ནས་སྔར་གྱི་འབྱུང་བ་དང་མཚན་ཉིད་མི་མཐུན་པའི་འབྱུང་བ་གཞན་དབང་པོ་དང་བཅས་པ་དག་གི་རྒྱུར་འགྱུར་རོ། །དཔེར་ན་ལོ་མའི་སྲིན་བུ་ལྟ་བུ་ཡིན་ལ་ཞེས་བྱ་བ་ལ། ལོ་མའི་འབྱུང་བ་དག་ལ་བརྟེན་ནས་ལས་རྣམས་ལས་བྱུང་བ་དག་སྐྱེ་བ་དེ་དག་དབང་པོའི་རྟེན་གྱི་ངོ་བོར་འགྱུར་གྱི། །ལོ་མའི་འབྱུང་བ་ཆེན་པོ་དག་ནི་སྲིན་བུའི་རྟེན་མ་ཡིན་ནོ། །ག་ལས་ཤེ་ན། ལོ་མ་དུམ་བུ་རེ་རེ་ནས་མ་དམིགས་པའི་ཕྱིར་རོ། །དེ་ལྟ་ན་འོ་ན་ཕ་དང་མའི་མི་གཙང་བ་ནུར་ནུར་པོ་ལས་བྱུང་བ་ཞེས་བྱ་བའི་མདོ་དང་འགལ་ལོ་ཞེ་ན། དེའི་ལན་དུ་མི་གཙང་བ་ལ་བརྟེན་ནས་སྐྱེ་བ་ལ་དགོངས་ཏེ་གསུངས་པའི་ཕྱིར་ཞེས་བྱ་བ་རྒྱས་པར་སྨོས་ཏེ། ཁུ་ཆུ་དང་ཁྲག་ལ་བརྟེན་ནས་དེ་དག་གི་དབང་པོའི་འབྱུང་བ་ཆེན་པོ་རྣམས་སྐྱེའོ་ཞེས་བྱ་བ་འདི་ལ་དགོངས་ཤིང་བསམས་ནས་ཕ་དང་མའི་མི་གཙང་བ་ནུར་ནུར་པོ་ལས་འབྱུང་བ་ཞེས་གསུངས་པའི་ཕྱིར་མདོ་དང་འགལ་བ་མེད་དེ། དཔེར་ན་ལོ་མ་ལ་བརྟེན་ནས་སྐྱེས་པའི་སྲིན་བུ་ནི་མིའི་སྲིན་བུ་ཡིན་པ་དེ་བཞིན་དུ་ཕ་དང་མའི་མི་གཙང་བ་ལ་བརྟེན་ནས་སྐྱེས་པའི་ནུར་ནུར་པོ་ཡང་ཕ་དང་མའི་མི་གཙང་བ་ནུར་ནུར་པོ་ཡིན་ནོ། །རེ་ཞིག་འདོད་པའི་ཁམས་སུ་སྒོ་ང་ལ་སྐྱེ་བ་དང༌། མངལ་ནས་སྐྱེ་བའི་སྐྱེ་གནས་སུ་འཇུག་པ་ནི་དེ་ལྟ་བུའོ། །གཞན་ལ་ཞེས་བྱ་བ་ནི་དྲོད་གཤེར་ལས་སྐྱེ་བ་དང་རྫུས་ཏེ་སྐྱེ་བའི་སྐྱེ་གནས་དག་ལའོ། །ཅི་རིགས་པར་ཞེས་བྱ་བ་ནི་དྲི་དང་གནས་ལ་མངོན་འདོད་གཞན་ཞེས་བྱ་བ་སྟེ། འགྲོ་བའི་ཡུལ་དུ་འགྲོའོ་ཞེས་བྱ་བར་སྦྱར་རོ། །ཇི་ལྟར་ན་དམྱལ་བ་དག་ཏུ་གནས་འདོད་ཅེ་ན་ཞེས་བྱ་བ་ནི་དམྱལ་བ་དག་འཇིགས་པའི་གནས་ཡིན་པའི་ཕྱིར་འདྲི་བའོ། །གནས་སྐབས་གང་གིས་ཞེས་བྱ་བ་ནི་ཤན་པ་ལ་སོགས་པའམ་ལིངས་པ་ལ་སོགས་པ་དག་གི་ཚེ་སྟེ། ཇི་སྐད་དུ། ཇི་ལྟར་
འགྱུར་བས་དེ་མྱོང་ལས། སྔར་བྱས་པ་ནི་རྨི་ལམ་ལྟར། །སེམས་ཅན་དེ་འདྲ་མཐོང་གྱུར་ནས། །དམྱལ་བར་རབ་ཏུ་རྒྱུག་པར་འགྱུར་ཞེས་རྣལ་འབྱོར་སྤྱོད་པའི་སྔོན་གྱི་སློབ་དཔོན་དག་གིས་བཤད་དོ། །ཡང་སྲིད་པ་བར་མ་གང་ཞིག་སྐྱེ་བའི་ཡུལ་དུ་ཇི་ལྟར་འགྲོ་ཞེ་ན། དེ་ལ་ལྷའི་སྲིད་པ་བར་མ་ནི་ཞེས་བྱ་བ་རྒྱས་པར་འབྱུང་ངོ༌། །སྟན་ལས་ལྡང་བ་བཞིན་དུ་ཞེས་བྱ་བ་ནི་གནས་གོང་མར་སྐྱེ་བའི་ཕྱིར་རོ། །མི་དང་དུད་འགྲོ་དང་ཡི་དགས་རྣམས་ཀྱི་ནི་ཞེས་བྱ་བ་ལ། མིའི་སྲིད་པ་བར་མ་ནི་མི་བཞིན་ནོ། །དུད་འགྲོའི་སྲིད་པ་བར་མ་ནི་དུད་འགྲོ་བཞིན་ནོ། །ཡི་དགས་ཀྱི་སྲིད་པ་བར་མ་ནི་ཡི་དགས་བཞིན་ཏེ། རྒྱབ་ཀྱི་འགྲོ་བས་ཡི་དགས་ཡིན་པའི་ཕྱིར་རོ། །ཡང་ཅིའི་ཕྱིར་གཟུགས་མེད་པ་རྣམས་སུ་སྲིད་པ་བར་མ་མེད་ཅེ་ན། ལས་དེའི་འཕེན་པ་དེའི་ནུས་པ་ལས་དེའི་ནུས་པ་མངོན་པར་འགྲུབ་པའི་ཀུན་ཏུ་སྦྱོར་བ་སྤངས་པའི་ཕྱིར་རོ། །ཉོན་མོངས་པས་རྒྱས་པར་བྱས་པའི་ལས་རྣམས་འབྲས་བུ་འཕེན་ནུས་པ་ལས། ཉོན་མོངས་པ་མེད་པར་འོས་པ་མ་ཡིན་ཏེ། ལས་ཡོད་ཀྱང་སྐྱེ་བ་འཕེན་པ་མེད་པའི་ཕྱིར་རོ། །རགས་པ་དང་ཕྲ་བའི་ས་ལ་དེའི་ངོ་བོའི་ལས་དང་འབྲས་བུ་ནི་ལུས་ཀྱིས་མངོན་སུམ་དུ་བྱེད་པ་དང་གཉིས་ཀའི་ཆ་ལས་རྣམ་པར་གྲོལ་བའི་སེམས་པ་ཅན་མ་ཡིན་ལ་འཇིག་རྟེན་པའི་བསྐལ་བ་མི་མཉམ་པའི་སེམས་ཅན་ཡང་མ་ཡིན་ནོ། །སྲིད་པ་བར་མའི་དབང་པོ་འཆོལ་བ་མེད་དེ། མཐོང་བའི་རྒྱུ་འདོད་པ་ན་སྤྱོད་པའི་དངོས་པོ་རྣམས་ཀྱི་སྤང་བྱ་ཕྲ་རྒྱས་རྣམས་སྤངས་པ་ཞེས་བྱ་བ་དེ་ལྟ་བུ་ལ་སོགས་པ་རྣམས་སོ། །ཅི་སྲིད་པ་བར་མ་ཐམས་ཅད་བློ་ཕྱིན་ཅི་ལོག་ཏུ་གྱུར་པས་མའི་མངལ་དུ་འཇུག་གམ་ཞེ་ན་སྨྲས་པ་མ་ཡིན་ཏེ། འོན་ཀྱང་མངལ་དུ་འཇུག་པ་ནི་བཞི་ཞེས་བྱ་བར་རྒྱས་པར་འབྱུང་ངོ༌། །མངལ་དུ་འཇུག་པ་འདི་བཞི་ཞེས་བྱ་བ་ནི་མངལ་དུ་འཇུག་པ་དང༌། གནས་པ་དང་འབྱུང་བའི་ཁྱད་པར་གཞན་མེད་དོ་སྙམ་དུ་བསམས་པའོ། །སེམས་ཉོན་མོངས་པ་ཅན་ཡིན་ཡང་འདུ་ཤེས་དང་མོས་པ་དག་ཕྱིན་ཅི་མ་ལོག་པའི་ཕྱིར་ཤེས་བཞིན་དུ་འཇུག་གོ་ཞེས་བརྗོད་དོ། །བཟློག་སྟེ་བསྟན་ཏོ་ཞེས་བྱ་བ་
ལ་མདོ་ལས་ནི་ཐམས་ཅད་ཤེས་བཞིན་པར་འགྱུར་བ་གང་ཡིན་པ་འདི་ཐོག་མར་བསྟན་ལ་གསུམ་ནི་ཇི་སྐད་བསྟན་པ་ཁོ་ན་བཞིན་ནོ། །རྨོངས་པ་དང་མ་རྨོངས་པའི་བྱེ་བྲག་འདི་ནི་མངལ་ནས་སྐྱེ་བའི་སྐྱེ་གནས་ལ་ཡིན་ཏེ། སྒོ་ང་ལས་སྐྱེས་པ་ནི་རྟག་ཏུ་ཐམས་ཅད་རྨོངས་པ་ཁོ་ནར་འགྱུར་རོ། །གང་ཞིག་སྐྱེ་བར་འགྱུར་བ་ཞེས་བྱ་བ་ནི་སྒྲའི་ཚུལ་གྱིས་དུས་གསུམ་ལ་བསྒྲུབ་པའི་ཕྱིར་རོ། །ཡང་ན་འབྱུང་བར་འགྱུར་བའི་མིང་གིས་ཞེས་བྱ་བ་འབྱུང་བར་འགྱུར་བའི་མིང་གིས་ཀྱང་སྟོན་པར་བྱེད་པའོ། །འདུས་བྱས་མངོན་པར་འདུ་བྱེད་དོ་ཞེས་བྱ་བ་ལ་བསྐྱེད་པའི་གནས་སྐབས་སུ་འདུས་བྱས་སུ་འགྱུར་གྱི་བསྐྱེད་བཞིན་པའི་གནས་སྐབས་སུ་ནི་མ་ཡིན་ལ། གཞན་དག་ན་རེ་རྒྱལ་པོ་ལྔ་ལེན་གྱི་བུ་ལྔ་བརྒྱ་སྒོ་ང་ལས་སྐྱེས་པ་ཡིན་པ་དེ་དག་གིས་ཀྱང་རང་སངས་རྒྱས་ཀྱི་བྱང་ཆུབ་རྟོགས་སོ་ཞེས་བྱ་བར་གྲགས་ཏེ། དེའི་ཕྱིར་སྒོ་ང་ལས་སྐྱེས་པ་ནི་རྟག་ཏུ་ཐམས་ཅད་རྨོངས་པ་ཁོ་ནར་འགྱུར་རོ་ཞེས་བྱ་བ་འདི་མ་ངེས་སོ་ཞེ་ན་རང་སངས་རྒྱས་པ་སེ་རུ་ལྟ་བུ་ལ་དགོངས་ནས་གསུངས་པས་ཉེས་པ་མེད་དོ། །ཡང་ཅིའི་ཕྱིར་ཤེས་བཞིན་མ་ཡིན་པར་འཇུག་པ་ཤེས་བཞིན་དུ་གནས་པ་དང་འབྱུང་བ་དག་ཏུ་མི་འགྱུར་ཞེ་ན་མི་སྲིད་པའི་ཕྱིར་ཏེ། ལུས་དང་དབང་པོ་སྟོབས་དང་ལྡན་པ་དང༌། ཚང་བ་དང༌། མ་ཉམས་པ་དང༌། གསལ་བ་གང་གིས་ཤེས་བཞིན་མ་བཞག་པ་ལུས་དང་དབང་པོ་སྟོབས་དང་མི་ལྡན་པ་དང༌། ཉམས་པ་དང་མ་ཚང་བ་དང༌། ཞན་པ་དེ་ཤེས་བཞིན་དུ་གནས་པའམ་འབྱུང་བར་འགྱུར་བ་ནི་སྲིད་པ་མ་ཡིན་ནོ། །ཤེས་བཞིན་དུ་འཇུག་པ་ཡོད་དེ་རྒྱུའི་ཤུགས་ཀྱིས་འཕེན་པའི་དབང་གིས་སོ། །ཤེས་བཞིན་དུ་གནས་པར་ཡང་འགྱུར་ཏེ། གཉིས་ཀ་རྒྱུའི་དབང་ལས་སོ། །འབྱུང་བར་ཡང་ཞེས་བྱ་སྟེ་འདི་ནི་སྲིད་དོ། །ལོག་པའི་འདུ་ཤེས་དང་མོས་པ་དག་ཅེས་བྱ་བ་ལ། འདུ་ཤེས་ནི་མཚན་མར་འཛིན་པའོ། །མོས་པ་ནི་ལྷག་པར་མོས་པའོ། །ཡང་ཇི་ལྟར་ལོག་པ་དག་ཏུ་འགྱུར་ཞེ་ན། འདི་སྙམ་དུ་རླུང་ལངས་པའམ་ཆར་འབབ་པའམ་ཞེས་བྱ་བ་རྒྱས་པར་འབྱུང་ངོ༌། །གལ་ཏེ་རྩེ་དགས་འགྲོ་པའི་ཡུལ་དུ་འགྲོའོ་ཞེས་སྔར་བསྟན་ཟིན་བ་མ་ཡིན་ནམ་རླུང་ལངས་
པའམ་ཆར་འབབ་པའམ་ཞེས་རྒྱས་པར་ཡང་ཅིའི་ཕྱིར་སྨོས་ཤེ་ན། ངེས་པ་མེད་པར་ཤེས་པར་བྱ་བའི་ཕྱིར་ཏེ། འདོད་ཆགས་དང་ཞེ་སྡང་གཉིས་ཁོ་ནས་བློ་ཕྱིན་ཅི་ལོག་ཏུ་གྱུར་པས་སྐྱེ་བའི་ཡུལ་དུ་འགྲོ་བ་མ་ཡིན་གྱི། འོ་ན་ཅི་ཞེ་ན། རྣམ་པ་གཞན་དུ་རྩྭ་ཐིབས་པོའམ་ནགས་ཐིབས་པོར་འཇུག་པའམ་ཞེས་རྒྱས་པར་འབྱུང་བ་ཡང་ཡིན་ཏེ། དེ་ལྟར་བཤད་ན། སྐྱེ་བའི་སྲིད་པ་ཉོན་མོངས་ཅན། །རང་གི་ས་པའི་ཉོན་མོངས་ཀུན། །ཞེས་བྱ་བ་འདི་ཡང་ཚང་མར་འགྱུར་རོ། །བྱེ་བྲག་ཏུ་སྨྲ་བ་རྣམས་ན་རེ། སྐྱེད་མོས་ཚལ་དུ་འཇུག་གོ་སྙམ་པས་ཀྱང་ངོ༌། །སྐྱེ་བའི་ཡུལ་དུ་བློ་ཕྱིན་ཅི་ལོག་གིས་འཇུག་གི་སྙམ་པ་ནི་ཉེ་བའི་གནས་སྐབས་སུའོ། །འདི་ནི་རིང་བའི་གནས་སྐབས་ཡིན་ཏེ་འདི་དག་གི་ཁྱད་པར་རོ་ཞེས་ཟེར་རོ། །འདི་ཡང་མ་ཡིན་ཏེ་ཉེ་བའི་གནས་སྐབས་སུ་མངོན་པར་འདོད་པ་དེར་ཡང་མངལ་གྱི་གནས་མི་གཙང་བ་དང་སྤྲད་པ་ལ་དགའ་བས་མངོན་པར་འཇུག་གོ་ཞེས་གསུངས་པའི་ཕྱིར་རོ། །ཅི་ལྟར་ན་སྐྱེ་བའི་དུས་ཀྱི་ཉོན་མོངས་པ་ཅན་གྱི་སེམས་ཤེས་བཞིན་དུ་རུང་ཞེ་ན། ཤེས་རབ་ཐམས་ཅད་དགེ་བར་འདོད་པ་མ་ཡིན་ནོ། །དེས་ན་ཉོན་མོངས་པ་ཅན་གྱི་སེམས་ཀྱང་ཤེས་བཞིན་དུ་འགལ་བ་མེད་དེ། རྣམ་པ་གཞན་དུ་ན་ཉོན་མོངས་པ་ཅན་གྱི་སེམས་ཀྱིས་རྫུན་དུ་སྨྲ་བར་མི་འགྱུར་རོ། །ཡང་ན་འདིར་རྒྱུན་གྱི་དབང་དུ་བྱས་ཀྱི་མཚམས་སྦྱོར་བའི་སྐད་ཅིག་ནི་མ་ཡིན་ནོ། །དེ་ལ་ཡང་འདི་ཕྱིར་ཞིང་ཉོན་མོངས་པའི་སེམས་ཀུན་ཏུ་སྤྱོད་པས་ཉོན་མོངས་པ་ཅན་ཞེས་བྱ་བ་ཆུང་བའི་ཕྱིར་གྲངས་སུ་ཉེ་བར་མི་འགྲོའོ། །རྟ་དཀར་པོ་དང་ནས་ཀྱི་ཕུང་པོ་བཞིན་ཞེས་བྱ་སྟེ། འདི་ནི་བདག་གི་ཕའོ་འདི་ནི་བདག་གི་མའོ་སྙམ་པ་ལས་གཞན་དུ་མི་འཁྲུལ་པའི་ཕྱིར་རམ་གུས་པ་བསྐྱེད་པའི་ཕྱིར་ཤེས་བཞིན་ཞེས་བརྗོད་དོ། །ཇི་ལྟ་བ་བཞིན་དུ་ཡང་དག་པར་རབ་ཏུ་ཤེས་པའི་ཕྱིར་འདི་ཉིད་འདིར་ཤེས་བཞིན་དུ་མངོན་པར་འདོད་དོ། །ཡང་འདིར་ཞེས་བྱ་བ་རྒྱས་པར་འབྱུང་བ་ལ། ཤེས་བཞིན་ལ་སོགས་པ་མངལ་དུ་འཇུག་པ་རྣམ་པ་བཞིན་རོ། །འདིར་ཡང་འབྱུང་བར་འགྱུར་པའི་མིང་གིས་བསྟན་ཏོ་ཞེས་བྱ་བ་ནི་དེའི་ཚེ་དེ་དག་འཁོར་ལོས་སྒྱུར་
པ་ལ་སོགས་པ་མ་ཡིན་པའི་ཕྱིར་རོ། །ཡང་ཅིའི་ཕྱིར་འཁོར་ལོས་སྒྱུར་བ་ལ་སོགས་པ་དེ་དག་དེ་ལྟར་འཇུག་སྙམ་ན། རྣམ་གྲངས་གཉིས་པའི་སྒོ་ནས་དེའི་རྒྱུ་བསྟན་པའི་ཕྱིར། ལས་སམ་ཡེ་ཤེས་སམ་གཉིས་ཀ་ཞེས་བྱ་བ་རྒྱ་ཆེར་སྨོས་སོ། །རྒྱ་ཆེའི་ཕྱིར་ཞེས་བྱ་བ་ནི་རླབས་ཆེ་བའི་ཕྱིར་ཞེས་བྱ་བའི་དོན་ཏོ། །ཐོས་པ་མང་བ་དང༌། རབ་ཏུ་འབྱེད་པ་བྱས་པ་རྣམས་ནི་ཞེས་བྱ་བ་ནི་ཐོས་པ་མང་བ་ཡང་དེ་དག་ཡིན་ལ། རབ་ཏུ་འབྱེད་པ་བྱས་པ་ཡང་ཡིན་ནོ། །འདི་སྐད་བསྟན་པར་འགྱུར་ཏེ། ཐོས་པ་དང༌། བསམ་པ་དང༌། བསྒོམ་པའི་ཤེས་པ་རྫོགས་པ་རྣམས་ཞེས་བྱ་བའི་དོན་ཏོ། །གལ་ཏེ་ཤེས་བཞིན་དང་ཤེས་བཞིན་མ་ཡིན་པར་མངལ་དུ་འཇུག་པ་ཞེས་བྱ་བ་རྣམ་པ་གཉིས་ཁོ་ན་མ་ཡིན་ནམ། ཇི་ལྟར་རྣམ་པ་བཞིན་བརྗོད་དེ། གནས་པ་དང་འབྱུང་བ་ནི་མངལ་དུ་འཇུག་པ་མ་ཡིན་པའི་ཕྱིར་རོ་ཞེ་ན་འཇུག་པ་གཙོ་བོ་ཡིན་པའི་ཕྱིར་ཉེས་པ་མེད་དེ། འདི་ལྟར་འགའ་ཡང་ཤེས་བཞིན་མ་ཡིན་པར་ཞུགས་ནས་ཤེས་བཞིན་དུ་གནས་པའམ་འབྱུང་བ་ནི་མེད་དོ། །དེའི་ཕྱིར་གང་འདི་མངལ་གྱི་གནས་ནས་འབྱུང་བ་བདག་ཉིད་ཀྱིས་རབ་ཏུ་ཤེས་པ་དེ་ནི་འཇུག་པ་ཁྱད་པར་དུ་ཡང་ཤེས་ཏེ། འཇུག་པའི་སྒྲས་གནས་པ་དང་འབྱུང་བ་ཡང་བརྗོད་དོ། །དེ་ཉིད་ཀྱི་ཕྱིར་གནས་པ་དང་འབྱུང་བ་དག་ཤེས་བཞིན་དང་ཤེས་བཞིན་མ་ཡིན་པའི་དབྱེ་བས་དྲུག་ཉིད་དུ་ཡང་ཐམ་བར་མི་འགྱུར་རོ། །འཇུག་པ་གཙོ་བོ་ཡིན་པས་རིགས་ཐ་དད་པ་དང་ཐ་མི་དད་པ་རྣམས་ལ་ཡང་འཇུག་པ་ཉིད་ངེས་པའི་ཕྱིར་ཅི་ལས་ཞེས་ཏེ། རེ་ཞིག་མངལ་གྱི་དབང་དུ་བྱས་པ་རྫོགས་སོ།། །།དེ་བཞིན་དུ་རིགས་ཐ་དད་པ་རྣམས་དང་འདི་གཉིས་རིགས་ཐ་མི་དད་པ་རྣམས་ཏེ། གཉིས་ཞེས་བྱ་བ་བཞི་ཉིད་དུ་རུང་ངོ༌། །གཞན་དག་ན་རེ། བྱང་ཆུབ་སེམས་དཔའ་ཁོ་ན་སེམས་དཔའ་ཞེས་སོ། །ཐ་མ་ལ་རིགས་མཐུན་པ་ལ་ནི་གསུམ་པ་དང་གཉིས་པ་དང་གཉིས་པ་ལའོ། །གང་ནས་ཤི་འཕོས་ནས་དགའ་ལྡན་དུ་སྐྱེས་པ་ནི་དང་པོ་དང་གསུམ་པའོ། །གང་ནས་ཤི་འཕོས་ནས་འོད་སྲུངས་ཀྱི་གསུང་རབ་ལ་སྐྱེས་པའོ། །དེ་ལས་གང་དུ་ཐ་མ་ཞེས་བྱ་བ་ནི་གྲངས་མེད་པ་གསུམ་ལས་དང་པོ་དང་གཉིས་པ་དང་
གསུམ་པ་རྣམས་ལའོ། །དེ་ལས་གོང་དུ་བཞི་བ་ཡིན་ནོ། །དེ་ནི་འདིར་ཕྱི་རོལ་ཅན་རྣམས་ཞེས་བྱ་བ་འབྱུང་སྟེ། བདག་ཏུ་སྨྲ་བ་ཡོངས་སུ་འཛིན་པའོ། །དེ་མེད་པའི་ཕྱིར་བདག་ནི་ཡོད་པ་མ་ཡིན་ལ། གལ་ཏེ་བདག་མེད་ན་འདི་སྲིད་པ་བར་མའི་སྒོ་ནས་འཇིག་རྟེན་འདི་ནས་ཕ་རོལ་དུ་འཕོ་ཞེས་ཅི་སྟེ་བརྗོད། འདི་མའི་མངལ་དུ་འཇུག་པ་དང་གནས་པ་དང་འབྱུང་བ་ཞེས་ཀྱང་ཅི་སྟེ་བརྗོད། དེའི་ཕྱིར་འདིར་གང་ཞིག་འཕོ་བ་དང་ཉེ་བར་འཕོ་བ་ཞེས་བྱ་བར་ཁས་བླང་བར་བྱ་བ་བྱེད་པའི་སྐྱེས་བུ་འགའ་ཞིག་ཡོད་པ་ཡིན་ནོ་ཞེ་ན། དེ་དགག་པར་བྱ་བའི་ཕྱིར་བདག་མེད་ཅེས་བྱ་བ་འབྱུང་ངོ༌། །གསུང་རབ་ལས་ཀྱང་ཕུང་པོ་ཙམ་ལ་བདག་གོ་ཞེས་བསྙད་པ་ཡོད་ལ་དེ་དགག་པའི་ཕྱིར་དང་པོའི་ཕྱོགས་དང་འགལ་ལོ་ཞེས་འདྲི་བ་ནི་བདག་ཇི་ལྟ་བུ་ཞིག་ཅེ་ན་ཞེས་བྱ་བ་སྟེ། ཅི་ཕུང་པོ་ཙམ་གྱི་བདག་ཉིད་ཅན་ཞིག་གམ། འོན་ཏེ་ནང་གི་བྱེད་པའི་སྐྱེས་བུ་ཞིག་ཅེས་བྱ་བའོ། །དེའི་ཕྱིར་གང་ཕུང་པོ་འདི་དག་འདོར་ཞིང་ཞེས་བྱ་བ་རྒྱས་པར་སྨོས་སོ། །ཡང་རྒྱུ་ལ་དགག་པ་བྱེད་པ་ཅི་ཞེ་ན་དེ་མེད་པའི་ཕྱིར་རོ། །དེ་གལ་ཏེ་མི་འདོར་ན་གནས་སྐབས་སུ་ཉེ་བར་འཇོམས་པས་འདོར་བའི་གནས་སྐབས་བསྐྱེད་པར་བྱེད་དོ། །ཉིང་མཚམས་མི་སྦྱོར་བའི་གནས་སྐབས་སུ་ཉེ་བར་འཇོམས་པས་ཉིད་མཚམས་སྦྱོར་བའི་གནས་སྐབས་མི་བསྐྱེད་དོ། །དེས་ན་གཞན་ཉིད་འདོར་བར་བྱེད་པས་ཉིད་མཚམས་སྦྱོར་བ་ཞེས་བྱ་བར་ཐལ་བར་མི་འགྱུར་རོ། །གནས་སྐབས་སུ་འགོག་པ་སྐྱེད་པ་དག་གིས་གནས་སྐབས་སུ་འགོག་པ་མི་བསྐྱེད་པ་ཡང་མི་རུང་སྟེ། གཞན་མ་ཡིན་པ་ཉིད་ལས་གཞན་ཉིད་སྔ་ཕྱི་མེད་པར་ཁྱད་པར་མེད་པའི་ཕྱིར་རོ། །འདིའི་འདོར་བ་ཉིད་ཉིང་མཚམས་སྦྱོར་བའི་བྱེད་པ་པོ་ཉིད་དུ་ཡང་མི་རུང་ངོ༌། །ཕུང་པོ་འདི་དག་འདོར་ཞིང་ཞེས་བྱ་བ་ནི་ད་ལྟར་བ་དག་གོ །གཞན་དག་ཏུ་ཉིད་མཚམས་སྦྱོར་ཞེས་བྱ་བ་ནི་སྲིད་པ་བར་མ་པ་དག་གམ་སྐྱེ་བའི་ཆར་གཏོགས་པ་དག་སོ། །བཅོམ་ལྡན་འདས་ཀྱིས་འདི་སྐད་དུ་ཞེས་བྱ་བས་ལུང་ལས་ཀྱང་ནང་གི་བྱེད་པའི་སྐྱེས་བུ་མེད་པར་བསྟན་ཏེ། རིགས་པ་ལས་ད་མེད་པར་ནི་དབང་ཕྱུག་སོགས་མིན་རིམ་སོགས་ཕྱིར་ཞེས་བྱ་བ་དེར་བཤད་ཟིན་ཏོ། །བྱེད་
པ་པོ་མི་དམིགས་སོ་ཞེས་བྱ་བ་ནི་གཟུགས་དང་ཚོར་བ་ལ་སོགས་པ་ལྟར་རང་གི་ངོ་བོས་སམ། མིག་ལ་སོགས་པ་ལྟར་བྱ་བའི་སྒོ་ནས་ཏེ། དེའི་ཕྱིར་རི་བོང་གི་རྭ་དང་འདྲ་བར་མེད་དོ་ཞེས་བྱ་བར་ངེས་སོ། །ཡང་ན་བྱེད་པ་པོ་རྟག་པའམ། མི་རྟག་པ་ཞིག་ཕུང་པོ་ལས་ཐ་དད་པ་མི་དམིགས་སོ། །འདི་ལྟར་རྟག་པ་སྔ་ཕྱིར་རྣམ་པར་འགྱུར་བས་སྟོང་པ་ནི་ལས་རྣམས་ཀྱི་བྱེད་པ་པོ་དང་འབྲས་བུ་རྣམས་ཀྱི་ཟ་བ་པོར་མི་རུང་ངོ༌། །དེའི་ཕྱིར་རྟག་པའི་བྱེད་པ་པོ་ཉིད་མི་འཐད་དེ། འགའ་ཡང་གཟུགས་ཅན་མ་ཡིན་པ་དང་ལུས་ཅན་མ་ཡིན་པ་དང༌། བདེ་བ་ཅན་མ་ཡིན་པ་དང་སྡུག་བསྔལ་ཅན་མ་ཡིན་པ་དང་འདུ་ཤེས་ཅན་མ་ཡིན་པ་དང་སེམས་པ་མེད་པ་དང་རྣམ་པར་ཤེས་པ་རྣམ་པར་རྟོག་པ་མེད་པར་ཡང་ཐལ་བར་འགྱུར་ཏེ། དེ་དག་དང་མ་འབྲེལ་པའི་ཕྱིར་དང་རྣམ་པར་འགྱུར་བ་མེད་པའི་ཕྱིར་རོ། །དེ་བཞིན་དུ་འཁོར་བ་དང་མྱ་ངན་ལས་འདས་པའི་གནས་སྐབས་དག་ཁྱད་པར་མེད་པའི་ཕྱིར་དང་དེའི་རྒྱུའི་འཇུག་པ་དོན་མེད་པའི་ཕྱིར་བྱེད་པ་པོ་མེད་པ་ཉིད་དོ། །མི་རྟག་པ་ཡང་མེད་དེ་བྱས་པ་ཆུང་ཟོས་པ་དང་མ་བྱས་པ་དང་ཕྲད་པའི་ཉེས་པ་ལས་སོ། །གལ་ཏེ་ཡང་ཕྱི་རོལ་པ་རྣམས་ཕུང་པོ་ལས་ཐ་དད་པའི་བདག་ཏུ་རྟོག་པར་བྱེད་པ་དེ་ལྟ་ན་ཡང༌། དེ་སངས་རྒྱས་རྣམས་ཀྱི་ཕུང་པོ་ཙམ་ཁོ་ནའི་ཡུལ་ལ་དེ་ལྟར་གསུངས་ཏེ། འདི་ན་དགེ་སྦྱོང་དང་བྲམ་ཟེ་ཁ་ཅིག་ཉེ་བར་ལེན་པའི་ཕུང་པོ་ལྔ་པོ་རྣམས་ལ་བདག་དང་བདག་གི་ཞེས་ཡང་དག་པར་རྗེས་སུ་ལྟ་ཞིང་ཡང་དག་པར་རྗེས་སུ་མཐོང་སྟེ་ཞེས་འབྱུང་ངོ༌། །དེ་དག་ནི་རང་བཞིན་ནམ་འབྲས་བུ་ལ་བདག་ཏུ་བསྙད་པ་སྟེ། རང་བཞིན་ནམ་འབྲས་བུའི་ཆོས་གང་ཡིན་པ་དེ་ལ་འདིར་དེ་དག་གིས་བདག་ཅེས་བྱ་བར་མཐོང་ངོ་ཞེས་བྱ་བར་ངེས་སོ། །གལ་ཏེ་ནང་གི་བྱེད་པའི་སྐྱེས་བུ་དགག་ན། འོ་ན་བདག་ཇི་ལྟ་བུ་མི་དགག་ཅེ་ན་ཕུང་པོ་ཙམ་ཉིད་དོ། །ཉིད་ཀྱི་སྒྲ་ནི་ངེས་པར་གཟུང་བའི་དོན་དུ་སྟེ། གསུང་རབ་ལས་ཕུང་པོ་ཙམ་ཉིད་ལ་ཐ་དད་དུ་བདག་ཅེས་ཉེ་བར་བཏགས་སོ། །ཅིའི་ཕྱིར་ཞེ་ན། དེ་ཁོ་ན་ཀུན་ནས་ཉོན་མོངས་པ་དང་རྣམ་པར་བྱང་བའི་ཕྱིར་རོ། །དེ་ལྟ་ན་འོ་ན་ཕུང་པོ་དག་ཅེས་བྱ་བ་རྒྱས་པར་འབྱུང་
སྟེ། དེ་ལྟ་ཡིན་ན་མཐོང་བ་དང་འགལ་ཞིང་ཁས་བླངས་པ་དང་འགལ་ལོ་ཞེ་ན་དེ་དག་ནི་མི་འཕོ་སྟེ། སྐད་ཅིག་མ་ཡིན་པའི་ཕྱིར་རོ། །འོ་ན་ཇི་ལྟར་ཞེ་ན། ཕུང་པོ་ཙམ་ནི་ཉོན་མོངས་པ་དང་ལས་ཀྱིས་མངོན་པར་འདུ་བྱས་ཞེས་བྱ་བ་རྒྱས་པར་འབྱུང་སྟེ། ཉོན་མོངས་པ་རྣམས་དང་ལས་རྣམས་ཀྱི་རྣམ་པར་སྨིན་པ་དང་རྒྱུ་དང་མཐུན་པའི་འབྲས་བུ་སྐྱེད་པའི་ནུས་པ་གཞག་པའི་ཕྱིར་ཡོངས་སུ་བསྒོས་པ་ཞེས་བྱ་བའོ། །ཉོན་མོངས་པ་རྣམས་དང་ལས་རྣམས་ཞེས་གཉི་ག་སྨོས་པ་ནི་གང་ཡང་རུང་བ་ཞིག་གིས་ཡོངས་སུ་བསྙོས་པས་མ་ཚང་ན་སྐྱེ་བ་འབྱུང་བ་མི་སྲིད་པའི་ཕྱིར་རོ། །ཕུང་པོ་ཙམ་ཞེས་ཙམ་གྱི་སྒྲ་ནི་བདག་དང་བདག་གི་རྫས་སྟོང་པ་ཉིད་དུ་ཤེས་པར་བྱ་བའི་ཕྱིར་རོ། །སྲིད་པ་བར་མ་ཞེས་བྱ་བའི་རྒྱུན་གྱིས་ཞེས་བྱ་བ་རྒྱས་པར་འབྱུང་སྟེ། རྒྱུ་དང་འབྲས་བུ་བར་མཚམས་མེད་པར་འབྲེལ་བ་ནི་འགྲོ་བ་དང་སྐྱེ་བ་དང་རྒྱུན་ཏེ། སྔར་གྱི་ལས་དང་ཉོན་མོངས་པས་འཕངས་པའི་ཚེ་ཉམས་སུ་མྱོང་ནས། དེའི་རྣམ་པར་སྨིན་པའི་འཕེན་པ་ཟད་པས་མཐར་འཆི་བའི་མཐའི་རྣམ་པར་ཤེས་པའི་རྟེན་དང་ལྷན་ཅིག་འགག་ཅིང་སྲིད་པ་པར་མ་པའི་རྣམ་པར་ཤེས་པའི་རྟེན་སྐྱེ་བའི་རྒྱུར་འགྱུར་ལ། སྲིད་པ་བར་མ་དག་ཀྱང་དེ་ཁོ་ན་ལྟར་རྒྱུན་ཆགས་སུ་སྔར་གྱི་ལས་དང་ཉོན་མོངས་པས་འཕེན་པའི་དབང་གིས་སྐྱེ་བའི་ཡུལ་དུ་ཕྱིན་ནས་མའི་མངལ་དུ་འགག་པ་ན་སྐྱེ་བའི་ཕུང་པོ་རྣམས་བསྐྱེད་པར་བྱ་བ་ལ་རྐྱེན་དུ་འགྱུར་ཏེ། དཔེར་ན་མར་མེ་སྐད་ཅིག་མ་ཡིན་ཡང་སྔ་མ་དང་ཕྱི་མར་རྒྱུ་དང་འབྲས་བུ་འབྲེལ་པ་བར་མེད་པས་རང་གི་རྒྱུན་གྱི་ཡུལ་གཞན་དུ་འགྲོ་བ་བཞིན་ནོ། །ཇི་ལྟར་འཕངས་བཞིན་ཞེས་བྱ་བ་རྒྱས་པར་འབྱུང་བ་ལ། རྒྱུ་ཐ་དད་པ་ལས་འབྲས་བུ་ཐ་དད་པར་འགྱུར་ལ། སེམས་ཅན་སོ་སོའི་ཚེའི་ལས་ཀྱང་ཐ་དད་དེ། དེ་ཐ་དད་པ་ལས་ཚེའི་འཕེན་པ་ཡང་ཐ་དད་དེ། ཁ་ཅིག་ནི་ཐུང་ལ། གཞན་གྱི་ནི་རིང་ངོ། །དེའི་ཕྱིར་གང་ཞིག་ཇི་སྲིད་དུ་འཕངས་པ་ཞེས་བྱ་བ་རྒྱས་པར་འབྱུང་ངོ༌། །མཚན་མ་རྣམས་ཞེས་བྱ་བ་ནི་དེ་དག་གིས་དེ་དག་མཚོན་པར་བྱེད་པས་མིག་ལ་སོགས་པའི་རྟེན་རྣམས་སོ། །ལས་ཀྱི་རྣམ་པར་སྨིན་པ་ལས་སྐྱེས་པ་ཞེས་བྱ་བ་ནི་ལས་ཀྱི་དབང་གིས་སྐྱེས་བ་སྟེ། འདིར་
ལས་ཀྱི་རྣམ་པར་སྨིན་པ་ལས་སྐྱེས་པ་ཞེས་བཤད་དོ། །གལ་ཏེ་ན་རེས་འགའ་མའི་ཟ་ས་དང་གནས་པའི་བྱ་བ་མི་མཐུན་པར་སྤྱོད་པའམ་ཞེས་བྱ་བ་ལ། ཟས་ནི་རྣོ་བ་དང་ཚ་བ་ཟོས་པ་དང༌། །གནས་པའི་བྱ་བ་མི་མཐུན་པ་ནི་མཆོང་བ་དང་རྐྱལ་ལོ། །མངལ་ཁོ་ནར་འཆི་བ་ནི་འཇིག་པར་འགྱུར་བའོ། །རྐྱག་དོང་ཞེས་བྱ་བ་རྒྱས་པར་འབྱུང་བ་ལ། དྲི་ང་བ་དང༌། མུན་ཁུང་དང༌། བཙོག་པའི་འདམ་རྫ་བ་ནི་དྲིང་པ་མུ་ན་ཁུང་བཙོག་པའི་འདམ་རྫབ་སྟེ། ལུས་ཀྱི་རྨ་འཁྱིམས་པ་ཆེན་པོ་དེར་ཞེས་ཕྱིས་འཆད་པའོ། །སྲིན་བུའི་རིགས་ཤིན་ཏུ་མང་པོ་སྟོང་ཕྲག་ནི་སྲིན་བུའི་རིགས་ཤིན་ཏུ་མང་པོ་སྟོང་ཕྲག་གོ །དེ་དག་གི་གནས་ནི་སྲིན་བུའི་རིགས་ཤིན་ཏུ་མང་པོ་སྟོང་ཕྲག་གི་གནས་ཏེ་དེའོ། །ཁུ་ཆུ་དང་ཁྲག་དང༌། ཆུ་སེར་དང༌། དྲི་མ་ནི་ཁུ་ཆུ་དང་ཁྲག་དང་ཆུ་སེར་དང་དྲི་མ་སྟེ། ཁུ་ཆུ་དང་ཁྲག་དང་ཆུ་སེར་དང་དྲི་མ་དེ་དག་གིས་ཀུན་ནས་ཁྱད་པར་དུ་མྱགས་ཤིང་ཀུན་ཏུ་མྱགས་བ། རྣམ་པར་མྱགས་པ། རུལ་པ། རྣག་པ་འདྲེད་པའོ། །དེ་སྐྱེ་བའི་རྒྱུས་དབང་པོ་རྣམས་ཡོངས་སུ་སྨིན་ནས་ཞེས་བྱ་བ་རྒྱས་པར་འབྱུང་བ་ལ། འཕེན་པའི་རྗེས་སུ་འགྲོ་བ་ལ་ཞེས་བྱ་བའི་དོན་ཏོ། །ཡང་ཉོན་མོངས་པ་ཅན་རྣམས་ཀུན་ཏུ་སྤྱོད་ཅིང་ཞེས་བྱ་བ་རྒྱས་པར་འབྱུང་བ་ལ། ནང་དང་ཕྱིའི་སྐྱེ་མཆེད་དང༌། ཚུལ་བཞིན་མ་ཡིན་པ་ཡིད་པ་བྱེད་པ་དེ་དག་གིས་རྐྱེན་ཚོགས་པ་ལ་བལྟོས་པའི་ཉོན་མོངས་པ་ཅན་རྣམས་ཀུན་ཏུ་སྤྱོད་ཅིང༌། ལས་སྣ་ཚོགས་རྣམས་ཀྱང་སོག་པར་འགྱུར་རོ། །དེ་ཉོན་མོངས་པ་དང་ལས་བསགས་པ་དེ་དག་གིས་ལུས་ཞིག་ནས་ཡང་སྔ་མ་བཞིན་དུ་ཡང་སྲིད་པ་བར་མའི་རྒྱུན་གྱིས་ལས་ཇི་ལྟ་བ་བཞིན་དུ་འཇིག་རྟེན་ཕ་རོལ་ཏུ་འགྲོ་བར་འགྱུར་ཏེ། དེ་ལྟ་ན། སྲིད་པའི་འཁོར་ལོ་ཐོག་མ་མེད་དེ་རྒྱུ་མེད་པ་ཉིད་དུ་འགྱུར་རོ་ཞེས་བྱ་བ་ནི་ཐོག་མའི་སྐྱེ་བའོ། །དེའི་ཕྱིར་དང་པོའི་སྐྱེ་བ་ལྟར་ཐམས་ཅད་རྒྱུ་མེད་པ་ཉིད་དུ་ཐལ་བར་འགྱུར་རོ། །སྐྱེས་དང་པོ་ཁོ་ན་རྒྱུ་མེད་པ་ཡིན་གྱི་ཐམས་ཅད་ནི་མ་ཡིན་ནོ་ཞེས་བྱ་བ་གང་ཡིན་པ་འདི་ལ་རྒྱུ་ཡོད་པ་ཡང་མ་ཡིན་ནོ། །དེའི་ཕྱིར་ཐམས་ཅད་ཐམས་ཅད་ཀྱི་ཚེ་ཐམས་ཅད་དུ་སྐྱེ་བར་ཐལ་བར་འགྱུར་ཏེ་སྐྱེ་བའི་
རྒྱུ་ངེས་པ་མེད་པའི་ཕྱིར་རོ། །མྱུ་གུ་ལ་སོགས་པ་དག་ལ་ས་བོན་ལ་སོགས་པ་རྣམས་ཀྱི་ནུས་པ་མཐོང་བ་ཡང་མ་ཡིན་ཏེ་དེ་ཡོད་ན་ཡོད་པའི་ཕྱིར་ལ་དེ་མེད་ན་མེད་པའི་ཕྱིར་རོ། །ཡང་འདི་ཇི་ལྟར་རྟོགས་པར་བྱ་ཞེ་ན། དེའི་ཕྱིར་ཡུལ་དང་དུས་སོ་སོར་ངེས་པ་ལས་ཞེས་བྱ་བ་སྨོས་སོ། །ཡུལ་སོ་སོར་ངེས་པ་ནི་ས་བོན་གྱི་ཡུལ་ཁོ་ནར་མྱུ་གུ་སྐྱེའི་གཞན་དུ་མ་ཡིན་པའོ། །དུས་ངེས་པ་ནི་ས་བོན་བངས་པའི་མཇུག་ཐོགས་ཁོ་ནར་མྱུ་གུ་སྐྱེའི་གཞན་གྱི་ཚེ་མ་ཡིན་པའོ། །ཡུལ་དང་དུས་སོ་སོར་ངེས་པ་ལས་ཚོས་པ་ལ་སོགས་པ་ལ་མེ་ལ་སོགས་པའི་ནུས་པ་ཡང་མཐོང་བས་ཞེས་བྱ་བར་སྦྱར་ཏེ། འདི་ལྟར་ཚོས་པ་ནི་མེ་དང་འབྲེལ་བའི་ཡུལ་ཁོ་ནར་སྐྱེའི་གཞན་དུ་ནི་མ་ཡིན་ལ་མེ་དང་འབྲེལ་པའི་ཕྱིར་མཇུག་ཐོགས་ཁོ་ནར་འབྱུང་གི་ཐམས་ཅད་ཀྱི་ཚེ་ནི་མ་ཡིན་ནོ། །ཡོ་པི་མ་ནྱ་ཏེ། ནི་ཏྱ་ཀ་ཌ་ཎཱ་པདྨུ་པ་ག་མཱ་དཱ་དི་ས་ཏྭེ་པི་པཾ་སཱ་ར་སྱ་ནཱ་ཡཾ་དོ་ཥཿ། ཏ་སྱཱ་ནུ་ཏྤཾ་ཏྟི་སཏྭཱ་དུ་ཏྤིཏྟི་མ་ཏ་ཤྩ་པཱུརྦ་ཀཱ་ར་ཎཱ་སྟི་ཏྭཱ་ཕྱུ་པ་ག་མཱ་ཏ། དེ་ཉིད་ཀྱི་ཕྱིར་རྒྱུ་རྟག་པ་ཡོད་པ་སྨྲ་བ་ནི་སྔར་ཉིད་དུ་བསལ་ཟིན་ཏོ་ཞེས་བྱ་བ་སྨོས་ཏེ། དབང་ཕྱུག་སོགས་མིན་རིམ་སོགས་ཕྱིར་ཞེས་བྱ་བ་དེར་ས་བོན་ཟད་པས་མྱུ་གུ་བཞིན་ནོ་གང་དག་སེམས་པར་བྱེད་པ་རྟག་པའི་བྱེད་པ་ཁས་བླངས་པའི་ཕྱིར་དང་པོར་ཡོད་ཀྱང་འདི་འཁོར་བའི་སྐྱོན་མ་ཡིན་ནོ། །དེའི་མི་སྐྱེད་པ་ཡོད་པ་ལས་སྐྱེད་ལ་དེའི་ཕྱིར་སྔོན་གྱི་རྒྱུ་ཡོད་པ་ཉིད་དུ་ཁས་བླངས་པའི་ཕྱིར། ཞེས་བྱ་བ་ནི་ས་བོན་ཚོགས་པའམ་རུལ་བར་གྱུར་བའམ་ཕྱེ་མར་གྱུར་པ་ལས་མྱུ་གུ་སྐྱེ་བ་མེད་པ་དེ་བཞིན་དུ་ཉོན་མོངས་པ་ལ་སོགས་པའི་རྐྱེན་མ་ཚང་བ་ལས་སྐྱེ་བ་འབྱུང་བ་མེད་དོ་ཞེས་བྱ་བའོ། །དེ་ལྟར་ན་སྐྱེ་བ་གཅིག་ནས་གཅིག་ཏུ་བརྒྱུད་པའི་ཐ་མ་ནི་མི་འགལ་ཏེ་རྒྱུ་ལ་རག་ལས་པའི་ཕྱིར་རོ། །དེ་ལྟར་ཕུང་པོའི་རྒྱུན་སྐྱེ་བའི་གནས་སྐབས་གསུམ་བསྟན་པ་ཞེས་བྱ་བ་ནི་འཇིག་རྟེན་ཕ་རོལ་ནས་འཇིག་རྟེན་འདི་དང་ཡང་འཇིག་རྟེན་ཕ་རོལ་ཞེས་བྱ་བ་དེ་ལྟ་བུའོ། །འདི་སྐད་བསྟན་པར་འགྱུར་ཏེ། སྲིད་པའི་ཡན་ལག་གྲངས་དུ་མ་དབྱེ་བ་ཐ་དད་པ་རྟེན་ཅིང་འབྲེལ་པར་འབྱུང་པ་དང་པོ་ལ་སོགས་པ་བར་མེད་པ་སྐྱེ་པ་གསུམ་དང་འབྲེལ་པའི་གནས་སྐབས་ནི་སེམས་ཅན་གྱི་རྒྱུད་དུ་ཉེ་བར་བསྟན་ཏེ་དེ་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་ཆ་གསུམ་པ་སྟེ་གཞན་ནི་མ་ཡིན་ནོ། །རྟེན་ཅིང་འབྲེལ་པར་འབྱུང་བ་ཡང་འདིར་སེམས་ཅན་དུ་སྟོན་པ་ལ་མངོན་པར་འདོད་ཀྱི་སེམས་ཅན་དུ་སྟོན་
བ་མ་ཡིན་པ་ནི་མ་ཡིན་ཏེ། དེ་འཇིག་རྟེན་ཕ་རོལ་ནས་འཕོ་བར་མི་འཐད་པའི་ཕྱིར་རོ། །རྟེན་ཅིང་འབྲེལ་པར་འབྱུང་བ་བསྟན་པ་ནི་རྒྱུ་མི་མཐུན་པ་དང་རྒྱུ་མེད་པ་དགག་པའི་ཕྱིར་ཡིན་ལ་རྟེན་ཅིང་འབྲེལ་པར་འབྱུང་བའི་དོན་ནི་འཁོར་བར་འཇུག་པའི་དོན་ཡིན་ནོ། །ཡང་ཅིའི་ཕྱིར་བསྟན་བཅོས་ལས་སེམས་ཅན་དང་སེམས་ཅན་དུ་མི་སྟོན་པ་ཡང་བསྟན་ལ་མདོ་ལས་སེམས་ཅན་དུ་སྟོན་པ་ཁོ་ན་བསྟན་ཅེ་ན། དེ་ཡང་བཅོམ་ལྡན་འདས་ཀྱིས་གདུལ་བ་དག་ལ་བསྟན་པར་བྱ་བ་ཡིན་ཏེ། སངས་རྒྱས་རྣམས་འབྱུང་བ་ནི་དེའི་དོན་ཁོ་ནར་ཡིན་པའི་ཕྱིར་རོ། །དེས་ན་དོན་ཆེན་པོ་ཡིན་པའི་ཕྱིར་མདོ་ལས་སེམས་ཅན་དུ་སྟོན་པ་ཁོ་ན་བསྟན་ཏོ། །བསྟན་བཅོས་ལས་ནི་ཆོས་ཉིད་ཀྱི་རྗེས་སུ་འབྲངས་ཏེ། སེམས་ཅན་དང་སེམས་ཅན་དུ་སྟོན་པ་མ་ཡིན་པ་ཡང་བསྟན་ཏོ། །ཡན་ལག་བཅུ་གཉིས་ཞེས་བྱ་བ་རྒྱུ་བཅུ་གཉིས་སོ། །ཆ་གསུམ་ཞེས་བྱ་བ་ནི་དུམ་བུར་ཡོངས་སུ་བཅད་པ་གསུམ་མོ། །ལྷག་མ་བརྒྱད་ནི་བར་དུའོ་ཞེས་བྱ་བ་ནི་རྣམ་པར་ཤེས་པ་དང༌། མིང་དང་གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བ་དང༌། སྲེད་པ་དང༌། ལེན་པ་དང༌། སྲིད་པ་དག་གོ །ཡང་ན་ཅི་ཐམས་ཅད་ཀྱི་ཞེས་བྱ་བ་ནི་ཁྱད་པར་མེད་པར་མངལ་དུ་འཇུག་པ་ཙམ་ལ་བརྟེན་པ་རྣམས་ཀྱི་འམ། ཁམས་གསུམ་པའི་སེམས་ཅན་རྣམས་ཀྱིའོ། །སྐྱེ་བ་འདི་ལ་ཞེས་བྱ་བ་ནི་མངལ་དུ་འཇུག་པའི་སྐྱེ་བ་ལའོ། །གང་བར་མ་དོར་འཆི་བ་ཡང་མ་ཡིན་ལ་ཞེས་བྱ་བ་ལ་གང་ཞིག་སྲིད་པའི་གནས་སྐབས་མ་ཐོབ་པར་འཆི་བ་དེ་ལ་ནི་བར་མ་དོར་འཆི་བ་ཞེས་བྱའོ། །གཟུགས་དང་གཟུགས་མེད་པ་ན་སྤྱོད་པ་ཡང་མ་ཡིན་ཏེ་ཞེས་བྱ་བ་ལ། དེ་ན་ནུར་ནུར་པོ་ལ་སོགས་པ་མེད་པའི་ཕྱིར་རོ། །གཟུགས་ན་སྤྱོད་པ་ལ་རྣམ་པར་ཤེས་པ་ལས་ཐ་དད་པའི་མིང་དང་གཟུགས་དང་སྐྱེ་མཆེད་དྲུག་མི་སྲིད་དོ། །གཟུགས་མེད་པ་ནི་སྤྱོད་པའི་ཕྱིར་དེ་དག་མེད་དོ། །གཟུགས་ན་སྤྱོད་པ་ལ་ནི་རྣམ་པར་ཤེས་པ་དང་སྐྱེ་མཆེད་དྲུག་གི་གནས་སྐབས་ལས་ཐ་དད་པའི་མིང་དང་གཟུགས་ཀྱི་གནས་སྐབས་མེད་དེ། འདི་ལྟར། མིང་དང་གཟུགས་ནི་དེ་ཕན་ཆད། །སྐྱེ་མཆེད་དྲུག་དོད་ཚུན་ཆད་དོ། །ཞེས་
འཆད་པར་འགྱུར་རོ། །དེའི་ཕྱིར་གཟུགས་ཀྱི་ཁམས་ན་ཡན་ལག་བཅུ་གཉིས་མེད་དོ། །གཟུགས་མེད་པ་ན་སྤྱོད་པ་ལ་ནི་མིང་དང་གཟུགས་ཀྱི་གནས་སྐབས་དང་སྐྱེ་མཆེད་དྲུག་གི་གནས་སྐབས་ཡོད་པ་མ་ཡིན་ཏེ། གཟུགས་མེད་པས་དེ་དག་མེད་དེ་དེའི་ཕྱིར་ཡན་ལག་བཅུ་ཡོད་ངོ། །འདི་ལྟར་གླེང་གཞི་ཆེན་པོའི་ཆོས་ཀྱི་རྣམ་གྲངས་ལས་ཞེས་བྱ་བ་རྒྱས་པར་འབྱུང་བ་ལ། ཀུན་དགའ་བོ་གལ་ཏེ་རྣམ་པར་ཤེས་པ་མའི་མངལ་དུ་ཞུགས་པར་མ་གྱུར་ན་རྣམ་པར་ཤེས་པ་དེ་འཕེལ་བ་དང༌། རྒྱས་པ་དང༌། ཡངས་པར་འགྱུར་རམ་ཞེས་འབྱུང་བའི་ཕྱིར་འདོད་པའི་ཁམས་ལས་མ་གཏོགས་པར་མའི་མངལ་དུ་འཇུག་པ་ཉིད་མི་སྲིད་དོ། །དེའི་ཕྱིར་གང་ཞིག་འདས་པའི་མ་རིག་པ་དང་འདུ་བྱེད་དག་གིས་རྒྱས་པར་བྱས་ཏེ་ད་ལྟར་བྱུང་བའི་རྣམ་པར་ཤེས་པ་དང་མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་རྣམས་འཇུག་གོ ། ཡང་དེ་ལྟར་བྱུང་བའི་སྲེད་པ་དང་ལེན་པ་དང་སྲིད་པས་རྒྱས་པར་བྱས་ཏེ། མ་འོངས་པའི་སྐྱེ་བ་དང་རྒ་ཤི་དག་འཇུག་སྟེ། རྒྱུན་གྱི་དབང་དུ་བྱས་པར་རིག་པར་བྱའོ། །དེ་ལྟར་ན་གང་ཟག་ཐམས་ཅད་ཀྱི་དབང་དུ་བྱས་ན་སྲིད་པའི་ཡན་ལག་གི་རྣམ་པར་གཞག་པ་འཁྲུགས་པར་འགྱུར་རོ། །སྔོན་དང་ཕྱི་མའི་མཐའ་འབྲས་བུ་དང་རྒྱུ་དང་བཅས་པ་དག་སྨོས་པའི་ཕྱིར་རོ་ཞེས་བྱ་བ་ལ་སྔོན་གྱི་མཐའ་འབྲས་བུ་དང་བཅས་པ་དང༌། ཕྱི་མའི་མཐའ་རྒྱུ་དང་བཅས་པ་སྨོས་པའི་ཕྱིར། རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་དང་ཆ་གསུམ་པ་དེ་ཉིད་སྔོན་གྱི་མཐའ་བ་དང་ཕྱི་མའི་མཐའ་བ་དང་རྣམ་པ་གཉིས་སུ་བརྗོད་དོ། །དེ་ལ་སྔོན་གྱི་མཐའ་བ་ནི་མ་རིག་པ་དང་འདུ་བྱེད་དོ། །དེའི་འབྲས་བུ་ནི་རྣམ་པར་ཤེས་པ་དང་མིང་དང༌། གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བའི་ཡན་ལག་རྣམས་ཏེ། དེ་ལྟར་ན་ཡན་ལག་བདུན་ནི་སྔོན་གྱི་མཐའ་པའོ། །ཕྱི་མའི་མཐའ་བ་གང་ཞེ་ན། སྐྱེ་བ་དང་རྒ་ཤིའོ། །དེའི་རྒྱུ་ནི་སྲེད་པ་དང༌། ལེན་པ་དང༌། སྲིད་པའི་ཡན་ལག་རྣམས་ཏེ། དེ་ལྟར་ན་ཡན་ལག་ལྔ་ནི་ཕྱི་མའི་མཐའ་བའོ། །ཡང་མ་རིག་པ་ལ་སོགས་པ་འདི་གང་ཞིག་ཅེ་ན་ཞེས་
བྱ་བ་ནི་ཅི་མ་རིག་པ་ནི་མི་ཤེས་པ་ཞིག་ཁོ་ནའམ། འོན་ཏེ་ཉོན་མོངས་པ་ཅན་ཐམས་ཅད་ཡིན་སྙམ་ནས་འདྲི་བ་སྟེ། དེ་བཞིན་དུ་གཞན་ལ་ཡང་བརྗོད་པར་བྱའོ། །དེའི་ཕྱིར། མ་རིག་ཉོན་མོངས་སྔོན་གནས་སྐབས། །ཞེས་བྱ་བ་སྨོས་སོ། །སྔོན་ཞེས་བྱ་བ་སྨོས་པ་ནི་ད་ལྟར་བ་སྲེད་པ་དང་ལེན་པས་བསྡུས་པའི་ཕྱིར་རོ། །ཡང་ཅིའི་ཕྱིར་ཉོན་མོངས་པ་ཐམས་ཅད་མ་རིག་པའི་སྒྲས་བརྗོད་ཅེ་ན། ཡང་སྲིད་འཕེན་པའི་འདུ་བྱེད་རྣམས་ཀྱི་རྒྱུའི་ངོ་བོར་ངེས་པའི་ཕྱིར་རོ། །གང་གི་ཕྱིར་ཉོན་མོངས་པས་རབ་ཏུ་བསྒྱུར་བའི་ལས་ནི་ཡང་སྲིད་འཕེན་པ་ལ་ནུས་པ་དང་ལྡན་པར་འགྱུར་ཏེ། ཉོན་མོངས་པ་མེད་པ་རྣམས་ལ་ལས་ཡོད་ཀྱང་ཡང་སྲིད་མེད་པའི་ཕྱིར་རོ། །ཐམས་ཅད་ཡང་སྲིད་ཅན་མ་ཡིན་ཏེ་འདུ་བྱེད་ཀྱི་འཇུག་པ་ལ་འདོད་ཆགས་ལ་སོགས་པ་ཉོན་མོངས་པ་རྣམས་ཐམས་ཅད་ཁོ་ན་བྱེད་པ་ཅན་མ་ཡིན་ནོ། །མ་རིག་པ་ནི་གདོན་མི་ཐ་བ་སྟེ། དེའི་ཕྱིར་དེའི་སྒྲས་ཉོན་མོངས་པ་ཐམས་ཅད་བརྗོད་དོ། །འདི་དག་ག་ལས་ཤེ་ན། མ་རིག་པ་གཙོ་བོ་ཡིན་པའི་ཕྱིར་དང་དེ་དང་ལྷན་ཅིག་སྤྱོད་པའི་ཕྱིར་རོ། །དེ་ཉིད་བསྟན་པའི་ཕྱིར་ལྷན་ཅིག་སྤྱོད་པའི་ཕྱིར་དང་ཞེས་བྱ་བ་སྨོས་སོ། །ཉོན་མོངས་པ་ཐམས་ཅད་ནི་མ་རིག་པ་དང་མཚུངས་པར་ལྡན་གྱི་ཕན་ཚུན་ནི་མ་ཡིན་ཏེ། དེའི་ཕྱིར་མ་རིག་པ་དང་ལྷན་ཅིག་སྤྱོད་པ་ཉིད་དོ། །དེའི་དབང་གིས་ཞེས་བྱ་བ་ནི་མ་རིག་པའི་དབང་གིས་སོ། །དེ་དག་ནི་ཉོན་མོངས་པ་དག་གོ །ཀུན་ཏུ་འབྱུང་བ་ནི་སྐྱེ་པ་སྟེ་མ་རྨོངས་པ་ལ་ཉོན་མོངས་པ་གཞན་སྐྱེ་བ་ནི་ཡོད་པ་མ་ཡིན་ནོ། །དེ་ཉིད་ལ་དཔེར་ན་རྒྱལ་པོ་གཤེགས་སོ་ཞེས་བྱ་བ་ལ་སོགས་པའོ། །ཞ་མ་འབྲིང་པ་ནི་རྒྱལ་པོ་དང་ལྷན་ཅིག་སྤྱོད་པ་རྣམས་ཏེ། དེའི་དབང་མི་འཇུག་པ་དང་ལྡོག་པའི་ཕྱིར་རྒྱལ་པོ་གཙོ་བོ་ཡིན་ནོ། །སློབ་དཔོན་འདུས་བཟང་ན་རེ། གལ་ཏེ་མ་རིག་པ་དང་ལྷན་ཅིག་སྤྱོད་པ་ཉོན་མོངས་པ་ཐམས་ཅད་དེ་བཞིན་དུ་ཡོད་པ་དེ་ལ་ཉོན་མོངས་པ་གཞན་ཉིད་གཙོ་བོ་ཡིན་པས་མ་རིག་པ་གཙོ་བོའི་ཡང་གཙོ་བོ་ལ་ལྷན་ཅིག་ཅེས་བྱ་བ་མི་འཐད་དོ། །ཅི་སྟེ་ཉོན་མོངས་པ་ཐམས་ཅད་དང་ལྷན་ཅིག་སྤྱོད་པའི་རིག་པ་ཉིད་མ་རིག་པ་ཡིན་པ་དེ་ལྟ་ན་ཡང་རེ་ཞིག་གི་སྒྲ་ཐོབ་སྟེ།
འདོད་ཆགས་ལ་སོགས་པ་དང་ལྷན་ཅིག་སྤྱོད་པའི་ཕྱིར་རོ། །ཕན་ཚུན་ལྷན་ཅིག་སྤྱོད་པ་མེད་ཀྱང་ཁྱད་པར་མེད་པ་མ་ཡིན་ནོ། །གལ་ཏེ་ཡང་རབ་ཏུ་འཇུག་བྱེད་མ་རིག་པའི་དབང་དུ་བྱས་ནས་བརྗོད་ན། འདོད་ཆགས་ལ་སོགས་པ་རྣམས་སོ། །ཀུན་ཏུ་སྤྱོད་པའི་འདོད་ཆགས་ལ་སོགས་པ་རྣམས་མ་རིག་པ་རབ་ཏུ་འཇུག་བྱེད་ཉིད་ཀྱི་ཕྱིར་བི་བརྻ་ཡཱ་པཏྟི། ཅི་སྟེ་རབ་ཏུ་འཇུག་བྱེད་མ་ཡིན་པ་དེ་ལྟ་ན་ཡང་གཞན་དང་མཚུངས་པར་ལྡན་པའི་ཕྱིར་རོ། །དབང་མ་ཡིན་པས་དེ་གཙོ་བོར་མི་རུང་ངོ༌། །གཉི་ག་ལྟར་ཡང་སྐྱོན་མེད་དོ། །འདིར་ནི་མ་རིག་པ་དང་ལྷན་ཅིག་སྤྱོད་པའི་ཕྱིར་དང་མ་རིག་པ་དང་མཚུངས་པར་ལྡན་པའི་ཕྱིར་ཉོན་མོངས་པ་ཐམས་ཅད་མ་རིག་པའི་སྒྲས་སྨོས་པ་ལ་འགལ་བ་མེད་དོ། །ཡང་གཞན་གྱི་སྒྲ་ཉོན་མོངས་པའི་སྒྲས་མ་ཡིན་ཏེ་ཕན་ཚུན་མཚུངས་པར་ལྡན་པའི་ཕྱིར་རོ། །འདི་ལ་མི་རུང་བ་ཅི་ཞེ་ན། ཉོན་མོངས་པ་ཐམས་ཅད་དང་མཚུངས་པར་ལྡན་པའི་ཕྱིར་དེར་མ་རིག་པ་གཙོ་བོར་འདོད་དོ། །རང་གི་མཚན་ཉིད་གསལ་བ་ཉིད་དེ་ལས་གཞན་པའི་ཉོན་མོངས་པ་དང་མཚུངས་པར་ལྡན་པ་དེར་ཡང་མ་རིག་པ་གཙོ་བོ་ཉིད་དོ། །རྨོངས་པ་ཉིད་ལས་འདོད་ཆགས་ལ་སོགས་པ་སྐྱེའི་མ་རྨོངས་པ་ལས་མ་ཡིན་ནོ། །ཡང་ཆགས་པ་ཉིད་ལས་རྨོངས་པ་དང་ཉོན་མོངས་པ་གཞན་ཡང་འཇུག་གོ །དེའི་ཕྱིར་ཉོན་མོངས་པ་ཐམས་ཅད་རྒྱུའི་དབང་ཉིད་ལས་ཉོན་མོངས་པ་དང་ཀུན་ཏུ་སྤྱོད་པར་གསུངས་སོ། །འདོད་ཆགས་ལ་སོགས་པ་རྣམས་མ་རིག་པའི་རྒྱུ་ཅན་ཉིད་ཡིན་ཡང་སྐྱེ་བ་སྔ་མའི་ཉོན་མོངས་པ་ཉིད་དུ་གང་བཤད་པ་ཞིག་པའི་འབྲས་བུ་འཕེན་པ་ནུས་པ་འབྱིན་པ་ཉིད་ཀྱི་ཕྱིར་དང་མི་གསལ་བསམ་རིག་པ་དང་འདྲ་བའི་ཕྱིར་མ་རིག་པའི་སྒྲས་བརྗོད་དོ། །ད་ལྟར་བ་ཡང་མ་ཞིག་པ་རང་གི་ནུས་པའི་ཤུགས་གསལ་བསམ་རིག་པའི་སྒྲས་མི་བརྗོད་དོ། །དེ་ལྟ་ན་འོ་ན་ད་ལྟར་བའི་ཚེ་རབས་ལམ་རིག་པས་ཉེ་བར་མ་བཅོམ་པའི་རང་གིས་ནུས་པའི་ཤུགས་ལས་མ་རིག་པའི་སྒྲས་བརྗོད་པར་བྱ་བ་དེ་ཀུན་ཏུ་རྒྱུ་བའི་ཕྱིར་རོ། །སཾ་ཀུན་ཏུ་རིག་པའི་ཕྱིར། བེ་དྱཏྭཱཏྭཱ་པྱ་དྭི་དྱཱ་བདྱཱ་ཏྭ་ནྣཱ་ཏི་བ་རྟ་ཏེ། དེ་ལྟ་ན་འོ་ན་མྱོང་བ་ཉིད་ཀྱི་ཕྱིར་མ་རིག་པའི་ཕྱོགས་བརྟེན་ནོ་ཞེས་བརྗོད་པར་བྱའོ། །ཞིག་པའི་ནུས་པའི་ཤུགས་ཉིད་ལས་ནི་མ་ཡིན་ཏེ། དུས་ཀྱི་
རང་བཞིན་དང་རང་གི་མཚན་ཉིད་དང༌། རྣམ་པར་འགྱུར་བ་ཡོད་པ་མ་ཡིན་པས་འདས་པའི་འདོད་ཆགས་ལ་སོགས་པ་མྱོང་བའི་ངོ་བོ་ཉིད་ནི་ཅི་ལྟར་མ་རིག་པའི་ཕྱོགས་ལ་བརྟེན་པར་བྱེད་དེ། དེའི་ཕྱིར་མདོ་མཛད་པས་གསུངས་པའི་རྒྱུ་གཉིས་ཉིད་དོ། །འདུ་བྱེད་དག་ནི་སྔོན་ལས་ཀྱི་ཞེས་བྱ་བ་འབྱུང་ངོ༌། །འདིར་མ་རིག་པ་དང་འདུ་བྱེད་འབྲས་བུ་བྱུང་ཟིན་པ་རྣམས་ཁོ་ན་ཡན་ལག་ཉིད་དུ་རྣམ་པར་གཞག་སྟེ། འབྲས་བུ་མ་བྱུང་བ་རྣམས་ལ་ནི་སྲེད་པ་དང༌། ལེན་པ་དང༌། སྲིད་པ་ཞེས་བྱའོ། །སྐྱེ་བ་གཞན་གྱི་ས་ཆོད་པ་རྣམས་ཀྱི་ཡང་འདས་པ་དང་མ་འོངས་པའི་ལས་དང་ཉོན་མོངས་པ་མང་པོ་མྱོང་བ་དེ་ལྟ་ན་ཡང་དེ་རྣམས་ཡན་ལག་ཉིད་དུ་རྣམ་པར་མ་བཞག་སྟེ་དེ་དང་ལྷན་ཅིག་རྒྱུ་དང་འབྲས་བུའི་འབྲེལ་པ་ཡོད་པས་བར་མ་ཆད་པ་ཁོ་ནར་དེར་སྐྱེ་བས་འདས་པ་དང་མ་འོངས་པ་བཟུང་བར་རིག་པར་བྱའོ། །བསོད་ནམས་ལ་སོགས་པའི་ལས་ཀྱི་གནས་སྐབས་ཞེས་བྱ་བ་ནི་བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བའི་ལས་ཀྱི་གནས་སྐབས་སོ། །རྣམ་ཤེས་མཚམས་སྦྱོར་ཕུང་པོ་ཡིན། །ཞེས་བྱ་བ་ལ། དེའི་ཚེ་རྣམ་པར་ཤེས་པ་གཙོ་བོ་ཡིན་པའི་ཕྱིར་དང༌། ལྷག་མ་རྣམས་རྣམ་པར་ཤེས་པ་དང་ལྷན་ཅིག་སྤྱོད་པའི་ཕྱིར་རྣམ་པར་ཤེས་པ་སྨོས་པས་བསྡུས་སོ། །མའི་མངལ་དུ་ཞེས་བྱ་བ་ནི་སྐྱེ་བའི་སྲིད་པར་ཉིང་མཚམས་སྦྱོར་བ་ཉིད་ན་སྟེ། སྲིད་པ་བར་མ་དོར་ཉིད་མཚམས་སྦྱོར་བའི་སྐད་ཅིག་མ་ཡིན་ནོ་ཞེས་ཤེས་པར་བྱ་བའི་ཕྱིར་རོ། །དེ་ཡང་ཡིད་ཀྱི་རྣམ་པར་ཤེས་པ་ཁོ་ན་སྟེ། དེའི་ཚེ་ལྔ་པོ་རྣམས་ལ་སྐྱེ་བའི་རྐྱེན་མེད་པའི་ཕྱིར་རོ། །འདིར་རྣམ་པར་ཤེས་པ་དང་སྐྱེ་བའི་ཡན་ལག་གཉིས་ནི་སྐད་ཅིག་མ་ཡིན་ལ། གཞན་དག་ནི་རྒྱུན་ཆགས་པ་ཡིན་པའི་ཕྱིར་སྐད་ཅིག་མ་མང་པོ་དག་ཡིན་ནོ། །མིང་དང་གཟུགས་ནི་དེ་ཕན་ཆད་ཞེས་བྱ་བ་ལ། འདི་ནི་གནས་སྐབས་ལ་བཞག་པ་ཡིན་གྱི་ཆོས་ཉིད་ལ་བཞག་པ་ནི་མ་ཡིན་ཏེ། སྐྱེ་མཆེད་བཞི་དོད་ཚུན་ཆད་དོ། །ཞེས་བརྗོད་པར་བྱ་བ་ཡིན་པ་ལས་ཞེས་བྱ་བ་འབྱུང་སྟེ། ཅིའི་ཕྱིར་དེ་སྐད་དུ་བརྗོད་པར་བྱ་བ་ཡིན་ཞེ་ན་ལུས་དང་ཡིད་ཀྱི་སྐྱེ་མཆེད་ནི་སྐྱེ་བའི་སྲིད་པ་ཁོ་ནར་དོད་
པའི་ཕྱིར་རོ། །དེའི་ཚེ་དེར་རྣམ་པར་འཇོག་པའི་ཕྱིར་རོ་ཞེས་བྱ་བ་ལ། རྣམ་པར་ཤེས་པ་དང་མིང་དང་གཟུགས་དག་ནི་དེས་རབ་ཏུ་མ་ཕྱེ་བའི་ཕྱིར་གནས་སྐབས་གང་ཞིག་སྐྱེ་མཆེད་ཀྱིས་རབ་ཏུ་ཕྱེ་བ་དེ་ཁོ་ན་ཚང་ན་དེའི་མིང་གིས་བསྙད་དོ། །ཡང་ན་དེའི་ཚེ་དེར་རྣམ་པར་འཇོག་པའི་ཕྱིར་རོ། །ཞེས་བྱ་བ་ནི་མིག་ལ་སོགས་པའི་སྐྱེ་མཆེད་ཀྱི་ཚེ་རྟེན་དང་བརྟེན་པ་ཡོངས་སུ་ཚང་བའི་སྒོ་ནས་ཡིན་ལ། ཡིད་ཀྱི་སྐྱེ་མཆེད་དང་ལུས་ཀྱི་སྐྱེ་མཆེད་ཀྱང་ཡོངས་སུ་ཚང་བ་རྣམ་པར་འཇོག་སྟེ། དེའི་ཕྱིར་སྐྱེ་མཆེད་དྲུག་ཉིད་དུ་བརྗོད་ཀྱི། སྐྱེ་མཆེད་བཞིར་ནི་མ་ཡིན་ནོ། །དེ་ནི་གསུམ་འདུས་ཚུན་ཆད་དོ། །ཞེས་བྱ་བ་ལ། ཇི་སྲིད་དུ་དབང་པོ་ལ་སོགས་པ་གསུམ་མ་འདུས་པ་དེ་སྲིད་ཀྱི་གནས་སྐབས་ཆུང་དུ་དང༌། འབྲིང་དང་ཆེན་པོའི་ཚུལ་གྱིས་རྫོགས་པར་འགྱུར་བ་དེ་ནི་སྐྱེ་མཆེད་དྲུག་ཅེས་བརྗོད་དོ། །དེ་སྲིད་ཀྱི་གནས་སྐབས་དེ་ནི་སྐྱེ་མཆེད་དྲུག་གཙོ་བོ་ཡིན་ནོ། །གཞན་དག་ན་རེ། དེ་ནི་དེ་ལྟར་མ་ཡིན་ཏེ་གནས་སྐབས་ཀྱི་ཐ་དད་པས་གཞན་ཉིད་ཡིན་པའི་ཕྱིར་དེའི་ཡིད་ནི་གཞན་ཉིད་དོ། །ལུས་ཀྱི་སྐྱེ་མཆེད་དེའི་གནས་སྐབས་ཅན་སྔར་མ་ཐོབ་པ་ཐོབ་པར་བྱེད་དོ། །གལ་ཏེ་དེའི་མིང་དང་གཟུགས་ཀྱི་རྐྱེན་གང་ཡིན་པ་ནི་སྐྱེ་མཆེད་བཞི་ལས་མི་སྐྱེ་བ་མ་ཡིན་ཞེས་ཟེར་རོ། །གཞན་དག་ན་རེ་རྐང་ལག་འགྱུས་པའི་གནས་སྐབས་ཁོ་ནར་བུད་མེད་དང་སྐྱེས་པའི་དབང་པོ་དག་ཐོབ་པས་རྣམ་པར་ཤེས་པ་དང་ལུས་ཀྱི་ཀུན་ཏུ་སྤྱོད་པ་ཐམས་ཅད་སྲིད་པས་ལུས་དང་ཡིད་ཀྱི་སྐྱེ་མཆེད་དག་དེའི་ཚེ་ཉིད་མཐའ་དག་ཐོབ་པས་ཀུན་ཏུ་སྤྱོད་པ་སྲིད་པས། སྔར་སྐྱེ་མཆེད་དྲུག་སྐྱེ་བའི་ཕྱིར་ཞེས་བྱ་བ་ཉིད་ལེགས་སོ། །དེ་ནི་གསུམ་འདུས་ཚུན་ཆད་དོ། །ཞེས་བྱ་བ་ལ། ཇི་སྲིད་དུ་དབང་པོ་ལ་སོགས་པ་གསུམ་མ་འདུས་པ་དེ་སྲིད་ཀྱི་གནས་སྐབས་སུ་ཆུང་དུ་དང་འབྲིང་དང་ཆེན་པོའི་ཚུལ་གྱིས་རྫོགས་པར་འགྱུར་བ་དེ་ནི་སྐྱེ་མཆེད་དྲུག་ཅེས་བརྗོད་དོ། །ཡང་འདིའི་གནས་སྐབས་སུ་རྣམ་པར་ཤེས་པ་ཉིད་མི་སྐྱེ་བ་ཅི་ཞེ་ན། གང་གི་ཕྱིར་འདིར་གསུམ་འདུས་པར་གྱུར་པ་ལས། ཡིད་ཀྱི་རྣམ་པར་ཤེས་པ་གནས་སྐབས་འགར་ཡང་མི་སྐྱེ་བ་མ་ཡིན་ཞིང༌། ལུས་ཀྱི་རྣམ་པར་ཤེས་པ་ནི་མིང་དང་གཟུགས་ཀྱི་གནས་སྐབས་སུ་ཡང་
འདོད་དོ། །རྣམ་པར་ཤེས་པའི་ཚེགས་ལྷག་མ་རྣམས་ཀྱང་སྐྱེ་བ་སྲིད་ཀྱི་ཐམས་ཅད་ཀྱི་ཚེ་མ་ཡིན་པས་སྐྱེ་མཆེད་དྲུག་གི་གནས་སྐབས་གཙོ་བོ་ཉིད་དོ། །འོ་ན་གལ་ཏེ་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཡིན་ན་མིང་དང་གཟུགས་ཀྱི་མཇུག་ཐོགས་ཁོ་ནར་མི་འགྱུར་བ་ཅི་ཞེ་ན། དཔེར་ན་རྣམ་པར་ཤེས་པའི་མཇུག་ཐོགས་སུ་མིང་དང་གཟུགས་ལ་བལྟོས་པའི་ཕྱིར་ཆུང་དུ་དང་འབྲིང་གིས་ཀྱང་གཟུགས་ཀྱི་གནས་སྐབས་སུ་སྐྱེ་མཆེད་དྲུག་སྐྱེས་པའི་ནུས་པ་མེད་པས་རྐྱེན་དུ་མི་འགྱུར་རོ། །དེའི་ཕྱིར་གནས་སྐབས་གང་གིས་མིང་དང་གཟུགས་སྐྱེ་མཆེད་དྲུག་སྐྱེད་པ་ལ་རྐྱེན་དུ་གྱུར་པ་དེ་ལ་བལྟོས་ནས་སྐྱེ་མཆེད་དྲུག་སྐྱེ་སྟེ། ས་བོན་ཡོངས་སུ་གྱུར་པ་ལས་མྱུ་གུ་སྐྱེ་བ་བཞིན་ནམ། མཇུག་ཐོགས་སུ་འབྱུང་བའི་ཕྱིར་སྤྲིན་ལས་ཆར་བཞིན་ནོ། །འོ་ན་མིང་དང་གཟུགས་ཀྱི་རྐྱེན་ཀྱིས་སྐྱེ་མཆེད་དྲུག་ལ་ཅི་ཞིག་ཅེ་ན། འགའ་ཞིག་ཏུ་སྐྱེ་མཆེད་ཅི་ཡང་མི་འཇུག་སྟེ། གང་གི་ཕྱིར་འདི་ནི་རྐྱེན་ཐམས་ཅད་ལ་ཡང་མཚུངས་སོ། །ཨཱ་ཀྵིཔྟ་སྱཱ་བི་པཱུརྦ་ཀ་ཀརྨ་བཻ་ཀལྦེ་ནཱ་ནུཏྤཏྟིཿ། གང་གི་ཚེ་སྔོན་གྱི་ལས་རྣམས་ཀྱི་ངེས་པར་བྱས་པ་དེའི་ཚེ་མིང་དང་གཟུགས་ཀྱི་རྐྱེན་ལས་སྐྱེ་སྟེ་དེའི་རྒྱུད་དུ་གཏོགས་པའི་ཕྱིར་རོ། །གཟུགས་ལ་སོགས་པ་རྣམས་ཀྱང་མིང་གི་རྐྱེན་ནོ། །དེ་དག་ནི་དང་པོའི་རྣམ་པར་ཤེས་པ་ནི་ཥེ་ཀ་འཕེན་པའི་རྐྱེན་སྔོན་དུ་འགྲོ་བ་ལས་ཀྱི་རྣམ་པར་རྟོག་པས་མི་སྐྱེད་དོ། །སྐད་ཅིག་ཉིད་ལ་སྐྱེ་བས་དེ་དག་མིང་དང་གཟུགས་ཀྱི་རྐྱེན་དུ་མི་བརྗོད་དོ། །དེ་དག་ཀྱང་སེམས་ཅན་དུ་སྟོན་པ་དང་སེམས་ཅན་དུ་མི་སྟོན་པ་སྟེ་འདིར་ནི་སེམས་ཅན་དུ་སྟོན་པ་ཁོ་ནའི་དབང་དུ་བྱས་སོ། །རེག་པ་བདེ་སྡུག་ལ་སོགས་ཀྱི། །རྒྱུ་ཤེས་ནུས་པ་ཚུན་ཆད་དོ། །ཞེས་བྱ་བ་ལ། རེག་པ་ནི་སྐྱེ་མཆེད་དྲུག་གི་འོག་རོལ་ཏུ་རྣམ་པར་བཞག་སྟེ། དེའི་ཚེ་རེག་པའི་རྟེན་ཡོངས་སུ་རྟོགས་པ་ཡིན་ནོ། །དེའི་ཕྱིར་རེག་པ་སྔར་ཡོད་པ་མ་ཡིན་ནོ། །ཚོར་འཁྲིག་ཚུན་ཆད་ཞེས་བྱ་བ་ལ། ཚོར་བ་གསུམ་གྱི་རྒྱུ་ཡོངས་སུ་གཅོད་པར་ནུས་པ་ཡིན་པས། ཟས་ལ་སོགས་པའི་སྲིད་པ་ཀུན་ཏུ་སྤྱད་ཀྱང༌། ཇི་སྲིད་འཁྲིག་པའི་འདོད་ཆགས་མི་འབྱུང་བའི་གནས་སྐབས་དེ་ནི་ཚོར་བ་ཞེས་མི་བྱའོ། །རེག་པའི་བྱ་བ་མ་ལུས་པ་ནི་ཚོར་བ་ལ་ཡོད་པའི་ཕྱིར་སྔ་རོལ་
དུ་ནི་མ་ཡིན་ཏེ་ཚོར་བ་མེད་པའི་ཕྱིར་རོ། །ལོངས་སྤྱོད་སྨོས་པས་ནི་འདོད་པའི་ཡོན་ཏན་གཟུགས་ལ་སོགས་པ་རྣམས་གཟུང་ངོ༌། །དེ་སྲིད་འབྲས་བུ་འབྱུང་འགྱུར་བའི་ཞེས་བྱ་བ་ལ། དེ་ཞེས་བྱ་བས་ནི་ཡོངས་སུ་རྒྱུག་པ་བསྟན་ཏོ། །ལས་གང་ལ་འབྱུང་བར་འགྱུར་བའི་སྲིད་པ་འབྲས་བུར་ཡོད་པ་ནི་དེའི་སྲིད་པའོ། །ཚོར་བའི་བར་ནི་རྒ་ཤི་ཡིན། །ཞེས་བྱ་བ་ལ། ཡང་དེར་སྲེད་པ་ལ་སོགས་པ་ཡོད་པ་མ་ཡིན་པ་ཅི་གང་གི་ཕྱིར་ཡན་ལག་ཉིད་དུ་རྣམ་པར་མ་བཞག་ཅེ་ན་སྐྱེ་བ་གསུམ་པ་ཡོད་པ་མ་ཡིན་ནོ། །དེ་དག་ཉིད་འདིར་རྟེན་ཅིང་འབྲེལ་པར་འབྱུང་བའི་སྐབས་སུ་ཞེས་བྱ་བའོ། །བཞི་པའི་རྒྱུ་ནི་འདིར་མ་བསྟན་ཏོ། །དེ་དག་ཀྱང་གང་སྐྱེ་བའི་རྒྱུར་གྱུར་པ་དེ་སོ་སོའི་ཡན་ལག་གི་རྣམ་པར་གཞག་གོ །ཉིད་ཅེས་བྱ་བ་ནི་སྐད་ཅིག་ལ་སྲིད་པས་སྐད་ཅིག་མ་སྟེ་རྒྱུ་དང་འབྲས་བུ་ལྷན་ཅིག་སྤྱོད་ཅེས་པའི་དོན་ཏོ། །རྒྱུན་ཞེས་བཤད་པ་ནི་རྒྱུན་དང་ལྡན་པ་སྟེ། རང་གི་དོན་ལ་འཕེལ་བ་བསྒྲུབ་པའི་ཕྱིར་རྒྱུན་ཆགས་པའོ། །སྐྱེ་བ་གསུམ་གྱི་གནས་སྐབས་ནི་གནས་སྐབས་པ་སྟེ། རྒྱུན་ཆགས་པ་ཞེས་བརྗོད་དོ། །གལ་ཏེ་གནས་སྐབས་པ་ཉིད་རྒྱུན་ཆགས་པ་ཡིན་ན་ཇི་ལྟར་རྣམ་པ་བཞིར་བརྗོད་ཅེ་ན། རྣམ་པ་གཞན་དུ་རྒྱུན་ཆགས་པ་དང༌། རྣམ་པ་གཞན་དུ་གནས་སྐབས་པ་ཞེས་བྱ་བར་འགྱུར་བས་རྣམ་པ་བཞི་སྟེ། དེ་རྒྱུ་དང་འབྲས་བུ་འབྲེལ་པ་ལས་གནས་སྐབས་པར་བརྗོད་ལ། དེ་ཡང་སྐལ་པ་མཉམ་པ་དང་སྐལ་པ་མཉམ་པ་མ་ཡིན་པའི་ཡན་ལག་དང་འབྲེལ་པ་ལས་འབྲེལ་པ་ཅན་དུ་བརྗོད་དོ། །གང་གི་ཚེ་མ་རིག་པའི་ཡན་ལག་རྒྱུན་དང་ལྡན་པ་ལས་མ་རིག་པའི་ཡན་ལག་ཁོ་ན་འབྱུང་བ་དེ་ནི་སྐལ་པ་མཉམ་པའི་འབྲེལ་པ་ཅན་ནོ། །གང་གི་ཚེ་མ་རིག་པའི་ཡན་ལག་ལས་འདུ་བྱེད་ཀྱི་ཡན་ལག་འབྱུང་བ་དེའི་ཚེ་སྐལ་པ་མཉམ་པ་མ་ཡིན་པའི་འབྲེལ་པ་ཅན་ཏེ། འདིར་ནི་སྐལ་པ་མི་མཉམ་པའི་འབྲེལ་བ་ཅན་ལ་མངོན་པར་འདོད་དོ། །གནས་སྐབས་ལ་ཡོད་པ་ནི་གནས་སྐབས་པའོ། །རྣམ་པར་ཤེས་པ་དང་ལྷན་ཅིག་འབྱུང་བའི་ཕུང་པོ་བཞི་ཞེས་བྱ་བ་ལ་སོགས་པ་འབྱུང་སྟེ། འདི་ལ་རྣམ་པར་རིག་བྱེད་ཀྱི་གཟུགས་དང་རྣམ་པར་རིག་བྱེད་མ་ཡིན་པའི་གཟུགས་ཀྱང་
གཟུགས་ཀྱི་ཕུང་པོའོ། །ཡེ་ན་བྲ་ཧཱ་རེ་ཎ་ཛཱི་བི་ཏཱཏ་བྱ་བ་རོ་བ་ཡོ་ཏི། གང་དུ་རྣམ་པར་རིག་བྱེད་གང་ཡིན་པ་དེ་སྐད་ཅིག་པའམ་རྣམ་པར་རིག་བྱེད་མ་ཡིན་པ་འདི་དངོས་གཞི་སྟེ་ལས་ཀྱི་ལམ་ཞེས་འབྱུང་བའི་ཕྱིར་རོ། །རྣམ་པར་བཤད་པ་འདིར་ནི་སྲིད་པ་དང་ཁྱད་པར་མེད་པར་འགྱུར་ཏེ། དེའི་ཕྱིར་ངེས་པར་དབང་པོ་དང་ལྷན་ཅིག་སྐྱེ་བ་ཁོ་ན་ལ་ནི་གཟུགས་སུ་གཟུང་ངོ་ཞེས་བྱ་བར་རྟོགས་སོ། །མིང་དང་གཟུགས་རྣམ་པར་གནས་པའི་དབང་པོ་རྣམས་ནི་ཞེས་བྱ་བ་འབྱུང་ངོ༌། །ཇི་ལྟར་མིང་ལ་དབང་པོ་རྣམས་གནས་ཤེ་ན། དེ་ལ་རག་ལས་ཏེ་འཇུག་པའི་ཕྱིར་ཏེ། འདི་ལྟར་མིང་གི་དབང་གིས་དེའི་རྟེན་འབྱུང་བ་ཆེན་པོ་གནས་ཤིང་དེ་བཏང་བས་དེ་མི་གནས་སོ། །ཡང་ན་དབང་པོ་རྣམས་ལ་བརྟེན་ནས་མིང་འབྱུང་བའི་ཕྱིར་དེ་རྣམས་རྟེན་གྱི་ངོ་བོས་མིང་ལ་རྣམ་པར་གནས་སོ། །སྐྱེ་མཆེད་དྲུག་འདུས་པ་ནི་རེག་པའོ་ཞེས་བྱ་བ་ལ་འདིར་མིག་ལ་སོགས་པ་རྣམས་རང་གི་ཡུལ་ལ་འཇུག་ཅིང་འདུས་པ་ནི་རེག་པ་ཞེས་བྱ་བ་སྟེ། ཅིག་ཅར་སྐྱེ་མཆེད་དྲུག་འདུས་པ་མི་སྲིད་པས་རེག་པ་ནི་ཇི་ལྟར་སྲིད་པའི་སྒོ་ནས་ཡིན་པར་རིག་པར་བྱའོ། །དེ་དང་མཚུངས་པར་ལྡན་པ་ནི་ཞེས་བྱ་བ་རྒྱས་པར་འབྱུང་སྟེ། ཆགས་པ་དེའམ། སྲེད་པའམ། མ་རིག་པ་དང་མཚུངས་པར་ལྡན་པའི་ངོ་ཚ་མེད་པ་དང༌། ཁྲེལ་མེད་པ་ལ་སོགས་པ་ཀུན་ནས་དཀྲིས་པ་རྣམས་ནི་ལེན་པའོ། །དེ་ནས་ཀུན་ནས་བསླང་བའི་ཞེས་བྱ་བ་ནི་ཆགས་པས་ཀུན་ནས་བསླང་བ་སྟེ་དེ་ནི་སྐབས་སུ་བབ་པ་ཡིན་པའི་ཕྱིར་རོ། །གཞན་དག་ན་རེ་ནི་མ་རིག་པའི་ཡིན་ནོ་ཞེས་ཟེར་རོ། །གཞན་དག་ནི་སེམས་པས་སོ་ཞེས་ཟེར་རོ། །ལུས་དང་ངག་གི་ལས་ཞེས་བྱ་བ་ནི་རྣམ་པར་རིག་བྱེད་དང༌། རྣམ་པར་རིག་བྱེད་མ་ཡིན་པའོ། །སྐྱེ་བ་ནི་རེག་པའོ། །ཡོངས་སུ་སྨིན་པ་ནི་སྐད་ཅིག་མ་སྔ་མ་ལ་ལྟོས་ཏེ་གཞན་དུ་གྱུར་པ་ཉིད་དོ། །བྱེ་བྲག་ཏུ་སྨྲ་བ་རྣམས་ནི་སྐད་ཅིག་གཅིག་ལ་ཡོངས་སུ་སྨིན་པ་འདོད་དེ། འཇིག་པ་དང་མཐུན་པའོ། །ཞིག་པ་ནི་ཤི་བའོ་ཞེས་བྱ་བ་ལ། འཇིག་པ་ནི་འཇིག་པ་ལ་མངོན་དུ་ཕྱོགས་པའོ། །ཁ་ཅིག་ན་རེ་སྲོག་གཅོད་པ་ནི་ཞེ་སྡང་གིས་མཐར་ཕྱིན་པར་བྱས་པ་ཡིན་ལ། ཞེ་སྡང་དང་འདོད་ཆགས་
པ་གཉིས་ཀྱང་སྐད་ཅིག་གཅིག་ལ་སྲེད་པ་ཡོད་པ་མ་ཡིན་ཏེ། དེའི་ཕྱིར་ནོར་འཕྲོག་པའི་ཞེས་བརྗོད་པར་བྱའོ་ཞེས་ཟེར་རོ། །ངེས་པ་དེ་ནི་སེམས་གཞན་མེད་པ་ལ་དེ་ཡོངས་སུ་རྫོགས་པ་ནི་ཡིན་པར་ཤེས་པར་བྱའོ། །དེ་ལྟར་བཤད་ན་མི་དགེ་བ་གཟུགས་ཅན་ཐམས་ཅད་ལ་སྐད་ཅིག་པའི་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་རྙེད་པར་འགྱུར་རོ། །ཡང་འདིར་ཅིའི་ཕྱིར་དུས་ཀྱི་ཀུན་སློང་སེམས་ཁོ་ན་ཡོངས་སུ་གཟུང་ཞེ་ན། རྒྱུའི་ཀུན་ནས་སློང་བ་ཡང་མ་ཡིན་ཏེ་འཁྲུལ་པའི་ཕྱིར་རོ། །གདོན་མི་ཟ་བར་ཆགས་པ་དང་སྡང་བ་དང༌། རྨོངས་པ་རྣམས་ལ་ལས་རྣམས་རབ་ཏུ་འཇུག་པ་མ་ཡིན་གྱི་སྲེད་པ་ཁོ་ན་རྗེས་སུ་འཇུག་བྱེད་ཡིན་ནོ། །ཇི་ལྟར་རབ་ཏུ་བྱེད་པ་དག་ལས་ཞེས་བྱ་བ་ལ། དེ་ལས་ཇི་སྐད་དུ་རྟེན་ཅིང་འབྲེལ་པར་འབྱུང་བ་གང་ཞེ་ན། འདུས་བྱས་ཀྱི་ཆོས་ཐམས་ཅད་དོ་ཞེས་བྱ་བ་སྟེ། དེ་ལ་འདུས་བྱས་ཀྱི་ཆོས་ཐམས་ཅད་རྣམས་སྐད་ཅིག་རེ་རེ་ལ་སྐྱེ་བ་དང་འགག་པ་དང་ལྡན་པའི་ཕྱིར་ན། སྐད་ཅིག་པའི་རྟེན་ཅིང་འབྲེལ་པར་འབྱུང་བའོ། །འབྲེལ་པ་ཅན་ནི་རྒྱུ་དང་འབྲས་བུར་གྱུར་པའི་སྐད་ཅིག་གཉིས་ཀ་འབྲེལ་པ་ལས་ཡིན་ནོ། །ཚེ་གསུམ་པར་ཆད་མེད་པར་འབྲེལ་པ་ལས་ཡིན་ཏེ། འདས་པ་དང་མ་འོངས་པ་དང་ད་ལྟར་བྱུང་བའི་ཚེ་གསུམ་དང་འབྲེལ་པའི་ཕྱིར་ན། དེ་ཉིད་གནས་སྐབས་པ་དང༌། རྒྱུན་ཆགས་པ་ཞེས་བྱའོ། །བར་ཆད་མེད་པ་སྨོས་པ་ནི་ཚེ་གསུམ་འགྲུབ་པར་བྱ་བའི་ཕྱིར་རོ། །འདྲ་བ་དང་མི་འདྲ་བའི་འབྲས་བུ་རྗེས་སུ་འབྲེལ་པས་འབྲེལ་པ་ཅན་ཏེ། ཇི་སྐད་དུ་མ་རིག་པའི་རྒྱུ་ལས་ཀུན་ཏུ་འདོད་ཆགས་པའི་ཕྱིར་ཞེས་རྒྱས་པར་གསུངས་སོ། །དེ་བཞིན་དུ་དགེ་བའི་སེམས་ཀྱི་མཇུག་ཐོགས་སུ་ཉོན་མོངས་པའམ་ལུང་མ་བསྟན་གྱི་སེམས་སྐྱེ་པའམ་བཟློག་པས་སོ། །གཞན་དག་ན་རེ། སྐད་ཅིག་པ་ནི་རྒྱུ་དང་འབྲས་བུ་ལྷན་ཅིག་སྤྱོད་པ་སྟེ། དཔེར་ན་མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བ་ལྟ་བུའོ། །རྒྱུན་ཆགས་པ་ནི་རྒྱུ་དང་འབྲས་བུ་ཞེས་རྒྱ་ཆེར་འབྱུང་སྟེ་ཆོས་ཀྱི་ནུས་པ་གསལ་བྱེད་དེ། གཞན་དག་ནི་ལྔ་པ་ཞེས་ཟེར་རོ། །ཌིཥྚ་ཧེ་ཏུ་ར་ཏི་ནིརྦྲྀཏྟེ་མཐོང་རྒྱུ་ཤིན་ཏུ་མྱ་ངན་ལས་འདས།། །ལས་ཀྱི་རྒྱུས་བསྐྱེད་པའི་ཕྱིར་ཞེས་བྱ་བ་
ད་ལྟ་ལ་སོགས་པའོ། །འདི་ནི་གནས་སྐབས་པར་འདོད་ལོ་ཞེས་བྱ་བ་ལ། ལོའི་སྒྲ་ནི་འདི་ནི་འདི་ལྟར་མ་ཡིན་ནམ་ཞེས་མདོ་སྡེ་པའི་བསམ་པ་གསལ་བར་བྱེད་པའོ། །གཙོ་བོའི་ཕྱིར་ན་ཡན་ལག་བསྒྲགས་ཞེས་བྱ་བ་ལ། སྔ་མའི་ཕུང་པོ་ལྔ་པོ་ཐམས་ཅད་ཅི་རིགས་པར་ཕྱི་མ་ཐམས་ཅད་ཀྱི་རྐྱེན་ཡིན་པ་དེའི་ཕྱིར་འདིར་གཙོ་བོ་ཡིན་པའི་ཕྱིར་ཡན་ལག་བསྒྲགས་པར་ཤེས་པར་བྱའི་འདི་དག་ཉིད་རྐྱེན་དང་རྐྱེན་ཅན་དུ་གྱུར་པའི་ཕྱིར་ནི་མ་ཡིན་ནོ། །རབ་ཏུ་བྱེད་པ་དག་ལས་གཞན་ཏུ་འབྱུང་ཞེས་བྱ་བ་ནི་མདོ་ལས་གསུངས་པའི་ཡན་ལག་བཅུ་གཉིས་ལས་གཞན་དུ་སྟེ། འདི་ལྟར་འདུས་བྱས་ཀྱི་ཆོས་ཐམས་ཅད་དོ་ཞེས་འབྱུང་བས་ཡན་ལག་བཅུ་གཉིས་ལས་ཐ་དད་པ་རྐྱེན་དང་རྐྱེན་ཅན་དུ་མ་ངེས་པར་གྱུར་པ་རྣམས་ཀྱང་གསུངས་སོ། །མདོ་ལས་ནི་བཟློག་པས་སོ། །དགོངས་པ་ལས་བྱུང་བ་ནི་དགོངས་པ་ཅན་ཡིན་ལ། མཚན་ཉིད་ལ་རྣམ་པར་གནས་པ་ནི་མཚན་ཉིད་པ་སྟེ། ཆོས་མངོན་པ་ལས་གསུངས་པ་ནི་མཚན་ཉིད་དང་འབྲེལ་པའི་ཕྱིར་རོ། །དེ་བཞིན་དུ་ཞེས་བྱ་བ་ནི་དེ་ལྟ་མ་ཡིན་དང་ཞེས་བྱ་བའི་དོན་ཏོ། གནས་སྐབས་པ་དང་རྒྱུན་ཆགས་པ་དང༌། སེམས་ཅན་དུ་སྟོན་པ་ནི་མདོ་ལས་གསུངས་པ་དགོངས་པ་ཅན་ནོ། །སྐད་ཅིག་པ་དང་འབྲེལ་པ་ཅན་དང་སེམས་ཅན་མ་ཡིན་པར་སྟོན་པ་ཞེས་བྱ་བ་ནི་ཆོས་མངོན་པ་ལས་གསུངས་པ་མཚན་ཉིད་པའོ། །དེ་ཉིད་ཀྱི་ཕྱིར་ཆ་གསུམ་པ་ཡིན་ནོ། །ཞེས་བྱ་བ་ནི་གང་གི་ཕྱིར་སྔོན་དང་ཕྱི་མའི་མཐའ་དང༌། བར་ལ་རྨོངས་པ་བཟློག་པའི་ཕྱིར་བསྟན་པའི་ཕྱིར་ཏེ། ཆ་ནི་ཆ་ཤས་སོ། །ཅི་བདག་ཅི་ཞིག་ཏུ་ནི་བྱུང་བར་གྱུར་ཞེས་བྱ་བ་ནི་ལྷའམ་འོན་ཏེ་མི་ཞིག་སྙམ་པའོ། །བདག་ཇི་ལྟར་བྱུང་བར་གྱུར་ཞེས་བྱ་བ་ནི་རྣམ་པ་གང་གིས་ཚུལ་གང་གིས་སོ། །ཅི་མ་འོངས་པའི་དུས་ན་འབྱུང་བར་འགྱུར་རམ་ཞེས་བྱ་བ་རྒྱས་པར་འབྱུང་བ་ནི་ཅི་མ་འོངས་པའི་དུས་ན་འབྱུང་བར་འགྱུར་རམ་འོན་ཏེ་འབྱུང་བར་མི་འགྱུར། ཅི་ཞིག་ཏུ་ནི་འབྱུང་བར་འགྱུར་ཇི་ལྟར་འབྱུང་བར་འགྱུར་ཞེས་བྱ་བའོ། །འདི་ཅི་ཞིག་ཡིན་ཞེས་བྱ་བ་ནི་ལུས་ཀྱི་རྫས་འཚོལ་བའོ། །འདི་ཇི་ལྟར་ཡིན་ཞེས་བྱ་བ་ནི་རྣམ་པ་གང་
གིས་ཚུལ་གང་ཞིག་ཏུ་ཡིན་ཞེས་བྱ་བའོ། །ལུས་ཀྱི་རྗེས་ངེས་པར་མ་ཟིན་པ་ནི། ཡོད་པ་ནི་ཅི་ཞིག་ཡིན་ཞེས་བྱ་བ་སྟེ། བདག་ཅག་ད་ལྟར་ཡོད་པ་ནི་ཅི་ཞིག་ཡིན། འགྱུར་བ་ནི་ཅི་ཞིག་ཡིན་ཞེས་དེ་ལྟར་མི་ངེས་པའོ། །མ་རིག་པ་དང་འདུ་བྱེད་རྣམས་ཞེས་བྱ་བ་ལ་ཅི་ཞེ་ན། སྔོན་གྱི་མཐའ་ལ་རྨོངས་པ་བཟློག་པར་བྱ་བའི་ཕྱིར་རོ། །སྐྱེ་བ་དང་རྒ་ཤི་ནི་ཕྱི་མའི་མཐའི་འོ། །རྣམ་པར་ཤེས་པ་ནས་སྲིད་པའི་བར་ནི་བར་ལ་རྨོངས་པ་བཟློག་པར་བྱ་བའི་ཕྱིར་རོ། །འདི་ལྟར་མདོ་ཉིད་ལས་ཞེས་བྱ་བ་རྒྱས་པར་འབྱུང་སྟེ། གང་གི་ཕྱིར་མདོ་དེ་ཉིད་ལས་སོ། །རྟེན་ཅིང་འབྲེལ་བར་འབྱུང་བ་ནི་འདི་ཡོད་པས་འདི་འབྱུང༌། འདི་སྐྱེས་པས་འདི་སྐྱེ་ཞེས་བྱ་བ་ཡན་ལག་བཅུ་གཉིས་ཀྱི་མཚན་ཉིད་ཅན་ནོ། །རྟེན་ཅིང་འབྲེལ་པར་འབྱུང་བའི་ཆོས་རྣམས་ནི་འདུ་བྱེད་ལ་སོགས་པ་དག་གོ །ཡང་དག་པའི་ཤེས་རབ་ཀྱིས་དེ་ལྟར་ཡང་དག་པ་ཇི་ལྟ་བ་བཞིན་མཐོང་ཞེས་བྱ་བ་ནི་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་རྒྱས་པར་འབྱུང་བའོ། །མ་རིག་པ་ལ་སོགས་པ་བཅུ་གཉིས་ནི་ཕུང་པོ་ལྔའི་གནས་སྐབས་སོ། །སྔོན་གྱི་མཐའ་ལ་འབྲང་བར་མི་འགྱུར་རོ་ཞེས་བྱ་བ་ལ་སོགས་པ་ནི་རྒྱུ་དང་འབྲས་བུར་འབྲེལ་བར་ཁོང་དུ་ཆུད་པའི་ཕྱིར་དང༌། ཆོས་ཙམ་དུ་ཁོང་དུ་ཆུད་པའི་ཕྱིར་རོ། །སྲེད་པ་དང་ལེན་པ་དང་སྲིད་པ་ཞེས་བྱ་བ་རྒྱས་པར་འབྱུང་བ་ལ། སྲེད་པ་ལ་སོགས་པ་འདི་དག་ནི་བར་གྱི་སྲིད་པ་ཡིན་ཡང་ཕྱི་མའི་མཐའ་ལ་རྨོངས་པ་བཟློག་པར་བྱ་བའི་ཕྱིར་ཡིན་ཏེ་དེའི་རྒྱུ་ཡིན་པའི་ཕྱིར་རོ། །བྱེ་བྲག་ཏུ་སྨྲ་བ་རྣམས་ན་རེ་དེ་དག་གིས་ནི་རྣམ་པར་ཤེས་པ་ལ་སོགས་པ། ཚོར་བ་ལ་ཐུག་པ་རྣམས་ཀྱང་དེའི་འབྲས་བུ་ཡིན་པའི་ཕྱིར་སྔོན་གྱི་མཐའ་ལ་རྨོངས་པ་བཟློག་པའི་ཕྱིར་ཡིན་པའོ། །ཡང་ན་མ་རིག་པ་དང་འདུ་བྱེད་རྣམས་ཀྱང་དེའི་རྒྱུ་ཡིན་པའི་ཕྱིར་བར་ལ་རྨོངས་པ་བཟློག་པར་བྱ་བའི་ཕྱིར་ཡིན་ནོ་ཞེས་ཁས་བླང་བར་བྱ་དགོས་ལ། དེ་ལྟར་ན་འང་འདས་པའམ་བར་གྱི་ཆ་ཡོད་པ་མ་ཡིན་པས་མདོ་དང་འགལ་ཏེ། དེ་ལྟ་བས་ན་སྔ་མ་ཉིང་ཁ་ན་མ་ཐོ་བ་མེད་དོ། །ཉོན་མོངས་པ་གསུམ་མོ་ཞེས་བྱ་བ་ལ། མ་རིག་
པ་ནི་ད་ལྟར་གྱི་སྐྱེ་བའི་རྒྱུ་ཡིན་ལ། སྲེད་པ་དང་ལེན་པ་ནི་མ་འོངས་པའི་སྐྱེ་བའི་རྒྱུ་ཡིན་ནོ། །ལས་གཉིས་སོ་ཞེས་བྱ་བ་ནི་ད་ལྟར་དང་མ་འོངས་པའི་སྐྱེ་བའི་རྒྱུ་འདུ་བྱེད་དང་སྲིད་པ་ཞེས་བྱའོ། །དེ་ཡན་ལག་བདུན་པོ་ཞེས་བྱ་བ་ལ། ད་ལྟར་བའི་སྐྱེ་བ་ལ་ནི་རྣམ་པར་ཤེས་པ་ལ་སོགས་པ་ཚོར་བའི་མཐར་ཐུག་པ་ལྔའོ། །མ་འོངས་པའི་སྐྱེ་བ་དང་རྒ་ཤི་གཉིས་སོ། །ཡང་ཅིའི་ཕྱིར་འདི་དག་གཞི་ཞེས་བྱ་ཞེ་ན། ལས་དང་ཉོན་མོངས་པའི་རྟེན་ཡིན་པའི་ཕྱིར་ཞེས་བྱ་བ་འབྱུང་སྟེ། ལས་དང་ཉོན་མོངས་པའི་རྒྱུ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ །དེ་བཞིན་དུ་འབྲས་བུ་ཡིན་ཞེས་བྱ་བ་ལ། ཡན་ལག་བདུན་ཁོ་ན་འབྲས་བུ་ཡིན་ཏེ། སྔོན་གྱི་མཐའ་བའི་རྣམ་པར་ཤེས་པ་ལ་སོགས་པ་ལྔ་དང༌། ཕྱི་མའི་མཐའ་པའི་སྐྱེ་བ་དང་རྒ་ཤིའོ། །ལྷག་མ་ལྔ་ནི་ཞེ་བ་བྱ་བ་ལ། ལས་དང་ཉོན་མོངས་པའི་རང་བཞིན་ཉིད་ཀྱིས་རྣམ་པར་སྨིན་པ་འཕེན་པའི་ཕྱིར་རོ། །གཞི་རྣམ་པ་ལྔ་ཞེས་བྱ་བ་ནི་རྣམ་པར་ཤེས་པ་དང༌། མིང་དང་གཟུགས་དང་སྐྱེ་མཆེད་དྲུག་དང༌། རེག་པ་དང༌། ཚོར་བ་ཞེས་བྱ་བ་དེ་ལྟ་བུའོ། །ཉོན་མོངས་པ་རྣམ་པ་གཉིས་ཐ་དད་པ་ཞེས་བྱ་བ་ནི་སྲེད་པ་དང༌། དེའི་རྐྱེན་གྱིས་ལེན་པ་སྟེ། དེ་ལྟར་ན་བར་དུ་རྒྱུ་དང་འབྲས་བུ་ཉིད་རྒྱས་པ་ཡིན་ནོ། །ཡང་ཇི་ལྟར་སྲེད་པ་འདི་ལེན་པ་ཡིན་བཞིན་དུ་ལོགས་ཤིག་ཏུ་རྣམ་པར་གཞག་ཅེ་ན། བྱེ་བྲག་ཏུ་སྨྲ་བ་རྣམས་ན་རེ་སྲེད་པའི་སྐད་ཅིག་མ་དང་པོ་ནི་སྲེད་པའི་སྒྲས་བརྗོད་ལ། རྒྱ་ཆེ་བ་ནི་ལེན་པའི་སྒྲས་བརྗོད་དེ། རྒྱུན་གྱི་སྒོ་ནས་ཡུལ་ཆེས་དམ་པོར་འཛིན་པའི་ཕྱིར་རོ། །དེ་ལྟར་ཡོད་པས་སྐད་ཅིག་མ་ལ་སོགས་པ་རྣམས་ཡན་ལག་གསུམ་ཉིད་དུ་ཐལ་བར་འགྱུར་བ་མ་ཡིན་ནམ་ཞེ་ན། གཉིས་སུ་ཡང་འདོད་པས་ཐལ་བར་འགྱུར་བ་འདི་མེད་དོ། །ཡུལ་སོ་སོའི་སྐད་ཅིག་ལས་སྐད་ཅིག་མ་མང་པོ་ཉིད་ཀྱི་ཕྱིར་ཉིང་མཚམས་སྦྱོར་བའི་སྐད་ཅིག་མ་ཉིད་ནི་རྣམ་པར་ཤེས་པའི་སྐྱེ་བ་ཡིན་པས་དེ་ཉིད་སྐད་ཅིག་མ་གཅིག་གོ །ཡང་ཅིའི་ཕྱིར་སྲེད་པ་ཁོ་ན་དེ་ལྟར་བསྟན་གྱི་ཉོན་མོངས་པ་གཞན་མ་ཡིན་ཞེ་ན། སྐད་ཅིག་མ་དང་རྒྱུན་གྱི་དབྱེ་བས་བསྟན་ཏེ། སྲིད་པ་མངོན་པར་འགྲུབ་པ་
ལ་སྲེད་པ་ཁོ་ན་གཙོ་བོའི་རྒྱུ་ཉིད་དོ། །དེ་ལ་དང་པོ་དགུ་མཐོང་བ་ལས་དེའི་གཉེན་པོ་ཚོལ་བ་ལ་ཀ་ཐ་ཡནྟ་བནྟཿསྱུ་རི་ཏི། གཞན་དག་ན་རེ་སྲེད་པ་ཁོ་ན་བསྟན་གྱི་ཉོན་མོངས་པ་གཞན་དག་མ་ཡིན་པ་ནི་ཡུལ་རྣམས་དང་དང་པོར་ཕྲད་པ་ནི་སྲེད་པའི་སྒྲས་བསྟན་ལ། རྒྱས་པར་ཕྲད་པ་ལ་ཉེ་བར་ལེན་པའི་སྒྲས་བསྟན་ཏོ་ཞེས་ཟེར་རོ། །འདི་ལྟར་བཅོམ་ལྡན་འདས་ཀྱིས་སྲིད་པའི་རྒྱུ་ཅན་གྱི་ལས་གསུངས་ཏེ། ཉོན་མོངས་པ་ཐམས་ཅད་ལས་ཀྱི་རྒྱུ་ཡིན་པ་དེའི་ཕྱིར་འདིར་སྲིད་པའི་སྒྲས་ཉོན་མོངས་པ་ཐམས་ཅད་གཟུང་བ་དེའི་སྐྱོན་བསྟན་པ་བསྐྱེད་པའི་ཕྱིར་དེ་ལྟར་ཤེས་སོ། །འདིར་ནི་བརྒལ་བའི་ལན་དུ་མི་སྦྱོར་རོ། །ཚེ་གསུམ་གྱི་གནས་སྐབས་ཀྱི་ཡན་ལག་ཐ་དད་པ་རྣམས་འཆད་པར་འགྱུར་བའི་ཕྱིར་རོ། །དེ་ལྟ་མ་ཡིན་ན་ཡན་ལག་བཅུ་གཉིས་ཕུང་པོ་ལྔའི་གནས་སྐབས་ཀྱིས་གནས་སྐབས་པའི་རྟེན་ཅིང་འབྲེལ་པར་འབྱུང་བ་ཞེས་བྱ་བར་འགལ་ལོ། །མ་འོངས་པའི་དུས་སུ་ཞེས་བྱ་བ་ལ་སོགས་པ་ལ་སྐྱེ་བ་དང་དེའི་རྐྱེན་གྱིས་རྒ་ཤི་སྟེ། དེ་ལྟར་ན་འབྲས་བུ་མདོར་བསྡུས་པ་ཡིན་ནོ། །ཉོན་མོངས་པ་སྒོ་གཅིག་ཏུ་བསྟན་པའི་ཕྱིར་ཞེས་བྱ་བ་ནི། མ་རིག་ཉོན་མོངས་སྔོན་གནས་སྐབས། །ཞེས་འབྱུང་བས། མ་རིག་པའི་སྒོ་གཅིག་པུས་ཉོན་མོངས་པ་ཐམས་ཅད་བསྟན་པའི་ཕྱིར་ཏེ། རྒྱུ་མདོར་བསྡུས་པ་ཡིན་ནོ་ཞེས་བྱ་བར་བསྙེགས་སོ། །ཡང་ཅིའི་ཕྱིར་ཞེས་བྱ་བ་ཡང་སྐབས་སུ་བབ་པ་ཡིན་པའི་ཕྱིར་ཐམས་ཅད་དང་སྦྱར་བར་བྱའོ། །ལས་ནི་སྔོན་གྱི་མཐའ་དང་བར་དུ་ཡང་མདོར་བསྡུས་པ་ཉིད་དུ་བསྟན་པས་རྣམ་པར་མ་དཔྱད་དོ། །ཡང་དོན་མེད་པའི་འབད་པ་མ་བྱས་སོ་ཞེས་བྱ་བ་ལ། བར་དུ་རྒྱུ་རྒྱས་པར་བསྟན་པས་སྔོན་གྱི་མཐར་ཡང་རྒྱུ་རྒྱས་པ་དང༌། འབྲས་བུ་རྒྱས་པར་བསྟན་པས་ཕྱི་མའི་མཐར་ཡང་འབྲས་བུ་རྒྱས་པར་རྟོགས་པར་ནུས་པ་ཉིད་དོ། །གང་གི་ཕྱིར་སྐྱེ་བ་ཐམས་ཅད་བལྟོས་པའི་བྱེ་བྲག་ལས་སྔོན་དང་བར་དང་ཕྱི་མ་ཡིན་ཏེ། དེའི་ཕྱིར་སྔོན་དང་ཕྱི་མའི་མཐའ་གཉིས་སུ་འབྲས་བུ་རྒྱས་པར་བརྗོད་པ་དོན་མེད་པར་འགྱུར་བས། ཡང་བརྗོད་པའི་འབད་པ་དོན་མེད་དོ། །གལ་ཏེ་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་ཁོ་ན་ཡིན་ན་ཞེས་བྱ་བ་རྒྱས་པར་སྨྲས་
པ་ལ། ཡན་ལག་ལྔ་ནི་རྒྱུ་ཡིན་ལ། བདུན་འབྲས་བུ་ཡིན་པས་དེ་ལྟར་ཡན་ལག་བཅུ་གཉིས་ཁོ་ནར་འགྱུར་ཏེ། རྒྱུ་དང་འབྲས་བུ་གཞན་མེད་པའི་ཕྱིར་རོ། །དེ་ལྟར་ན་མ་རིག་པ་ལ་རྒྱུ་མེད་པའི་ཕྱིར་འཁོར་བ་ཐོག་མ་དང་ལྡན་པར་ཐལ་བར་འགྱུར་ལ། རྒ་ཤི་ལ་འབྲས་བུ་མེད་པའི་ཕྱིར་མཐའ་དང་ལྡན་པར་འགྱུར་ཏེ། དེའི་ཕྱིར་གཉེན་པོ་མེད་པ་ཁོ་ན་སྲིད་པ་མེད་པར་ཐལ་བར་འགྱུར་རོ། །མ་རིག་པ་དང་རྒ་ཤི་གཉིས་ཀྱི་རྒྱུ་དང་འབྲས་བུ་ཁས་ལེན་ན་ཡང་ཡན་ལག་ལྷག་པས་བསྟན་པ་མ་ཚང་བ་ཉིད་དང༌། རྒྱུ་དང་འབྲས་བུ་དག་ཐུག་པ་མེད་པར་ཐལ་ལོ་ཞེ་ན། ཉོན་མོངས་པ་ལས་ཉོན་མོངས་དང༌། །བྱ་བ་ཉིད་དོ་ཞེས་བྱ་བ་རྒྱས་པར་འབྱུང་ངོ༌། །གཞི་འམ་ཉོན་མོངས་པ་ལས་ཞེས་བྱ་བ་ལ་ཚེ་འདིའི་སྲིད་པ་དང་ལེན་པ་གང་ཡིན་པ་དེ་ནི་འདས་པའི་དུས་ན་མ་རིག་པ་ཡིན་པར་བཤད་དེ། དེས་ན་མ་རིག་པ་གཞི་འམ་ཉོན་མོངས་པ་ལས་སྐྱེ་བར་འགྱུར་རོ་ཞེས་བྱ་བ་འགྲུབ་པོ། །གཞི་ལས་ཀྱང་ཉོན་མོངས་པ་འབྱུང་ངོ༌། །ཞེས་བྱ་བ་ནི་སྲིད་པ་སྟེ་འདི་ལྟར་ཚོར་བའི་རྐྱེན་གྱིས་སྲིད་པ་ཡིན་པར་བཤད་ལ། རྒ་ཤི་ཡང་ཚོར་བ་ལ་ཐུག་པ་ཡིན་ཏེ། ཚོར་བའི་བར་ནི་རྒ་ཤི་ཡིན། །ཞེས་བཤད་པའི་ཕྱིར་རོ། །དེ་ལྟར་ན་ཞེས་བྱ་བ་ནི་ཉོན་མོངས་པ་ལས་ཉོན་མོངས་དང༌། བྱ་བ་ཉིད་དོ་དེ་ལས་གཞི། །དེ་ལས་གཞི་དང་ཉོན་མོངས་སྐྱེ། །འདི་ནི་སྲིད་པའི་ཡན་ལག་ལུགས། །ཞེས་ཇི་སྐད་བཤད་པའི་ཚུལ་གྱིས་སོ། །དེ་ལྟ་མ་ཡིན་ན་སྟེ། ཉོན་མོངས་པ་ལས་ཉོན་མོངས་དང༌། །ཞེས་བྱ་བ་དེ་ལྟ་བུ་ལ་སོགས་པ་ཇི་སྐད་བཤད་པ་མི་བཞེད་པར་གྱུར་ན་ནི་གང་གིས་ན་དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་ཞེས་གསུངས་བར་འགྱུར་ལ། འདི་ནི་ནུས་པ་ཅི་ཞིག་ཡོད་པར་འགྱུར། །དེའི་ཕྱིར་ཡན་ལག་གཞན་ཁ་སྐོང་མི་དགོས་ལ་ཐུག་པ་མེད་པར་མི་འགྱུར་ཞིང་བསྟན་པ་མ་ཚང་བ་ཉིད་མ་ཡིན་ནོ། །གཞན་དག་ན་རེ་མདོ་གཞན་ལས་ཞེས་བྱ་བ་ལ་སོགས་པ་ལ། མདོ་གཞན་གང་ལས་ཤེ་ན། རྒྱུ་དང་བཅས་རྐྱེན་དང་བཅས་གཞི་དང་བཅས་པའི་མདོ་ལས་ཏེ། དགེ་སློང་དག་མ་རིག་པ་ཡང་རྒྱུ་དང་བཅས། རྐྱེན་དང་བཅས། གཞི་དང་བཅས་སོ། །མ་རིག་པའི་རྒྱུ་གང་ཡིན། རྐྱེན་གང་ཡིན།
གཞི་གང་ཡིན་ཞེ་ན། ཚུལ་བཞིན་མ་ཡིན་པ་ཡིད་ལ་བྱེད་པའོ་ཞེས་བརྗོད་པར་བྱའོ་ཞེས་གསུངས་སོ། །དེ་ལྟ་ན་ཡང་ཚུལ་བཞིན་མ་ཡིན་པ་ཡིད་ལ་བྱེད་པའི་རྐྱེན་མ་གསུངས་པའི་ཕྱིར་འཁོར་བ་ཐོག་མ་དང་ཐ་མ་དང་ལྡན་པའམ། ཡན་ལག་གཞན་ཁ་བསྐང་བར་བྱ་དགོས་པར་འགྱུར་བས། ཉེས་པ་དེ་ཉིད་དུ་འགྱུར་རོ་ཞེ་ན་དེའི་ཕྱིར་ཚུལ་བཞིན་མ་ཡིན་པ་ཡིད་ལ་བྱེད་པ་ཡང་མ་རིག་པའི་རྒྱུ་ལས་བྱུང་བ་ཡིན་ནོ་ཞེས་གསུངས་ཏེ། དེའི་ཕྱིར་འདི་ཉེས་པ་མེད་དོ། །མདོ་ལས་འདི་ལྟར་མིང་དང་གཟུགས་དང་ཚུལ་བཞིན་མ་ཡིན་པ་ཡིད་ལ་བྱེད་པ་ལ་བརྟེན་ནས་གཏི་མུག་ལས་སྐྱེས་པ་ཞེས་གསུངས་སོ། །ཅིའི་ཕྱིར་དེ་འདིར་མ་བཤད་ཅིང་ཡན་ལག་གཞན་དུ་ཡང་ཇི་ལྟར་མི་འགྱུར་ཞེ་ན། དེའི་ཕྱིར་དེ་ནི་འདིར་ཡང་ལེན་པའི་ནང་དུ་འདུ་བའི་ཕྱིར་བཤད་པ་ཡིན་ནོ་ཞེས་བྱ་བ་སྨྲས་སོ། །དེ་ཞེས་བྱ་བ་ནི་ཚུལ་བཞིན་མ་ཡིན་པ་ཡིད་ལ་བྱེད་པའོ། །འདིར་ཡང་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་མདོར་རོ། །ལེན་པ་རྣམས་ཉོན་མོངས་པ་ཐམས་ཅད་ཀྱི་བདག་ཉིད་ཡིན་པའི་ཕྱིར་ལ། ཚུལ་བཞིན་མ་ཡིན་པ་ཡིད་ལ་བྱེད་པ་ཡང་སེམས་ཀྱི་གཟོ་བ་ཉོན་མོངས་པ་ཅན་ཡིན་པའི་ཕྱིར་ལེན་པའི་ནང་དུ་འདུ་བ་ཡིན་ནོ་ཞེས་བཤད་པར་འགྱུར་རོ། །དེ་ལྟར་ན་མ་རིག་པ་རྒྱུ་མེད་པ་ཅན་ཉིད་མ་ཡིན་ཞིང༌། ཡན་ལག་གཞན་ཁ་བསྐང་བར་བྱ་དགོས་པ་ཡང་མ་ཡིན་ལ། ཐུག་པ་མེད་པ་ཐལ་བར་ཡང་མི་འགྱུར་རོ་ཞེས་ཟེར་རོ། །སློབ་དཔོན་གྱིས་ཚུལ་བཞིན་མ་ཡིན་པ་ཡིད་ལ་བྱེད་པ་ལེན་པའི་ནང་དུ་ཇི་ལྟར་འདུས་ཞེས་བྱ་བ་སྨོས་ཏེ། ཉོན་མོངས་པའི་བདག་ཉིད་མ་ཡིན་པ་བཞིན་དུ་ཞེས་བསམས་པའོ། །ལེན་པ་ནི་ཉོན་མོངས་པ་རྣམས་ཁོ་ན་ཡིན་གྱི་ཆོས་གཞན་དག་ནི་མ་ཡིན་ཏེ། ཇི་སྐད་བཤད་ཉིད་མ་རིག་བཅས། །ཉེར་ལེན་རྣམས་ཏེ་ལྟ་རྣམ་གཉིས། །ཕྱེ་བའི་ཕྱིར་རོ། །ཞེས་འབྱུང་བའི་ཕྱིར་རོ། །གལ་ཏེ་མཚུངས་པར་ལྡན་པ་ལས་ཡིན་ནོ་ཞེ་ན་ནི་ཞེས་བྱ་བ་ལ། ཉོན་མོངས་པའི་བདག་ཉིད་ཡིན་པའི་ཕྱིར་ནི་མ་ཡིན་གྱི། འོ་ན་ཅི་ཞེ་ན་ལེན་པ་དང་མཚུངས་པར་ལྡན་པའི་ཕྱིར་དེའི་ནང་དུ་འདུས་སོ། །གཞན་གྱི་བསམ་པ་གསལ་བར་བྱེད་པ་ནི། སྲེད་པ་དང་མ་རིག་པ་དག་གི་ནང་དུ་ཡང་ཞེས་བྱ་བ་སྟེ། རྟེན་ཅིང་འབྲེལ་
པར་འབྱུང་བའི་ཡན་ལག་གི་ནང་དུའོ། །དེས་ན་འདུས་པར་ཐལ་བར་འགྱུར་རོ་ཞེས་བྱ་བ་ལ། ཚུལ་བཞིན་མ་ཡིན་པ་ཡིད་ལ་བྱེད་པའོ། །ཅིའི་ཕྱིར་ཞེ་ན། དེ་ནི་ལེན་པ་ལྟར་སྲེད་པ་དང་མ་རིག་པ་གཉིས་དང་ཡང་མཚུངས་པར་ལྡན་པའི་ཕྱིར་ཏེ། དེས་ན་ལེན་པའི་ནང་དུ་འདུ་བ་འབའ་ཞིག་ཏུ་མ་ཟད་ཀྱི་སྲེད་པ་དང་ལེན་པའི་ནང་དུ་འདུས་པའི་ཕྱིར་ན་འདི་ལྟར་བཤད་པར་འགྱུར་རོ་ཞེས་བརྗོད་པར་བྱ་སྟེ། ཁྱད་པར་གྱི་རྒྱུ་མེད་པའི་ཕྱིར་རོ། །ནང་དུ་འདུས་པ་ཡིན་དུ་ཆུག་ན་ཡང་ཞེས་བྱ་བ་རྒྱས་པར་འབྱུང་བ་ལ། འདི་སྐད་བསྟན་པར་འགྱུར་ཏེ། མཚུངས་པར་ལྡན་པ་ཙམ་གྱིས་ནི་ནང་དུ་འདུ་བར་མི་རྟོགས་ཏེ་འཁྲུལ་པའི་ཕྱིར་རོ། །ནང་དུ་འདུས་པ་ཡིན་དུ་ཆུག་ན་ཡང་ཇི་ལྟར་འདི་ལས་འདི་ཞེས་བྱ་བ་ལ། མདོ་དེ་ལས་ནི་ཚུལ་བཞིན་མ་ཡིན་པ་ཡིད་ལ་བྱེད་པ་ལེན་པའི་ནང་དུ་འདུས་པའི་ཕྱིར་ལེན་པ་མ་ལུས་པ་དང་འདྲ་བར་སྲིད་པའི་རྒྱུ་ཉིད་དུ་རྟོག་པར་འགྱུར་གྱི། མ་རིག་པའི་རྒྱུ་ཉིད་དུ་ནི་མ་ཡིན་ཏེ། གང་ལས་ལེན་པའི་ནང་དུ་འདུ་བས་ཚུལ་བཞིན་མ་ཡིན་པ་ཡིད་ལ་བྱེད་པར་མ་རིག་པའི་རྐྱེན་ཉིད་དུ་རྟོག་པར་འགྱུར་བ་མདོ་འདི་ལས་ལེན་པ་མ་རིག་པའི་རྒྱུ་ཉིད་ནི་མ་བསྟན་ཏོ། །གལ་ཏེ་མདོ་ལས་མ་བསྟན་ཡང་ནང་དུ་འདུ་བ་ཁོ་ནས་རྒྱུ་དང་འབྲས་བུའི་དངོས་པོར་ཤེས་པར་འགྱུར་རོ་ཞེ་ན་འོ་ན་ནི་སྲིད་པ་དང་མ་རིག་པ་དག་ཀྱང་ཞེས་བྱ་བ་རྒྱས་པར་འབྱུང་སྟེ། མ་རིག་པ་དང་ཚུལ་བཞིན་མ་ཡིན་པ་ཡིད་ལ་བྱེད་པ་གཉིས་ལྟར་མ་བསྟན་ཡང་ལེན་པའི་ནང་དུ་འདུས་པ་ཁོ་ནས་སྲེད་པ་དང་ལེན་པ་དག་དང༌། མ་རིག་པ་དང་འདུ་བྱེད་དག་རྒྱུ་དང་འབྲས་བུའི་དངོས་པོར་ཤེས་པར་འགྱུར་ཏེ། དེའི་ཕྱིར་ཚུལ་བཞིན་མ་ཡིན་པ་ཡིད་ལ་བྱེད་པ་ལྟར་སྲིད་པ་དང་མ་རིག་པ་གཉིས་ཀྱང་ཡན་ལག་གཞན་ཉིད་དུ་མི་བྱ་བར་ནུས་ན། བྱེད་པ་ཡང་ཡིན་ཏེ། དེའི་ཕྱིར་ལེན་པའི་ནང་དུ་འདུས་པ་ཡན་ལག་གཞན་ཉིད་དུ་མི་བརྗོད་པའི་རྒྱུ་མ་ཡིན་ནོ། །གཞན་དག་ན་རེ་ཞེས་བྱ་བ་ནི་སློབ་དཔོན་དཔལ་ལེན་ནོ། །མདོ་གཞན་ལས་ཞེས་བྱ་བ་ནི་རྒྱུ་དང་བཅས་རྐྱེན་དང་བཅས་གཞི་དང་བཅས་པའི་མདོ་ལས་སོ། །དེ་ཡང་ཞེས་བྱ་བ་ནི་ཚུལ་བཞིན་མ་ཡིན་པ་ཡིད་ལ་བྱེད་པའོ། །རེག་པའི་དུས་སུ་བསྟན་པ་ཡིན་ལ། མིག་གི་རྣམ་པར་ཤེས་པ་སྐྱེ་བའི་
དུས་གང་ཡིན་པ་དེ་ཉིད་རེག་པའི་དུས་སོ། །གཏི་མུག་གིས་སྐྱེད་པར་བྱེད་པ་ཅན་ནམ། གཏི་མུག་ལས་སྐྱེས་པ་ནི་གཏི་མུག་ལས་སྐྱེས་པའོ། །ཉོན་མོངས་པས་བརྙོགས་པའི་ཕྱིར་ན་རྙོག་པའོ། །མ་རིག་པའི་འདུས་ཏེ་རེག་པ་ལས་བྱུང་བའི་ཞེས་བྱ་བ་རྒྱས་པར་འབྱུང་བ་ལ། མ་རིག་པ་དང་མཚུངས་པར་ལྡན་པའི་རེག་པ་ལས་སྐྱེས་པ་ནི་མ་རིག་པའི་འདུས་ཏེ་རེག་པ་ལས་བྱུང་བའི་ཚོར་བ་ཡིན་ལ། དེ་ཡང་གདོན་མི་ཟ་པར་མ་རིག་པ་དང་མཚུངས་པར་ལྡན་པ་ཡིན་ཏེ། མ་རིག་པ་དང་མཚུངས་པར་ལྡན་པ་མ་ཡིན་པའི་ཚོར་བ་ནི་སྲེད་པའི་རྐྱེན་མ་ཡིན་ནོ། །དེ་ལྟ་བས་ན་རེག་པའི་དུས་ན་ཡོད་པའི་ཚུལ་བཞིན་མ་ཡིན་པ་ཡིད་ལ་བྱེད་པ་ནི་ཞེས་བྱ་བ་རྒྱས་པར་འབྱུང་སྟེ། མ་རིག་པ་རྒྱུ་མེད་པ་ཉིད་ཀྱང་མ་ཡིན་ཞིང༌། ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་ལས་བྱུང་བའི་ཕྱིར་བཅུ་གཉིས་ལས་གཞན་པའི་ཡན་ལག་གཞན་གྱིས་ཁ་བསྐང་བར་ཡང་མི་བྱའོ། །ཚུལ་བཞིན་མ་ཡིན་པ་ཡིད་ལ་བྱེད་པ་རེག་པའི་ནང་དུ་འདུས་པའི་ཕྱིར་ན་ཐུག་པ་མེད་པར་ཐལ་བ་ཡང་མ་ཡིན་ཏེ། མ་རིག་པ་དང་ཚུལ་བཞིན་མ་ཡིན་པ་ཡིད་ལ་བྱེད་པ་གཉིས་ཕན་ཚུན་གྱི་རྒྱུ་ལས་བྱུང་བའི་ཕྱིར་རོ། །དེ་ཉིད་བསྟན་པའི་ཕྱིར་གཏི་མུག་ལས་སྐྱེས་པ་ཡིད་ལ་བྱེད་པ་ཞེས་བྱ་བ་རྒྱས་པར་འབྱུང་ངོ༌། །འོ་ན་ནི་དེ་ནི་ཞེས་བྱ་བ་ནི་མ་རིག་པའི་ཚུལ་བཞིན་མ་ཡིན་པ་ཡིད་ལ་བྱེད་བ་ལས་སྐྱེད་བ་ཉིད་དང༌། ཚུལ་བཞིན་མ་ཡིན་པ་ཡིད་ལ་བྱེད་པ་གཏི་མུག་ལས་སྐྱེས་པ་ཉིད་དོ། །གཞན་དུ་གསུངས་པས་ཞེས་བྱ་བ་མདོ་གཞན་དུའོ། །འདིར་བརྗོད་པར་བྱ་དགོས་སོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་མདོར་རོ། །མ་བཤད་པ་དེའི་ཕྱིར་དགོངས་པ་འདིས་མ་རིག་པའི་རྐྱེན་མ་བརྗོད་དོ་ཞེས་བྱ་བར་རྟོགས་སོ། །སློབ་དཔོན་དཔལ་ལེན་གྱིས་སྨྲས་པ། བརྗོད་པར་བྱ་མི་དགོས་སོ། །ཅིའི་ཕྱིར་ཞེ་ན། འདིར་ཡང་གོ་བ་ཞེས་བྱ་བའི་ཕྱིར་རོ། །འདིར་ཡང་གོ་པ་ཞེས་བྱ་བ་ནི་མི་སྲིད་དོ་སྙམ་ནས་འདྲི་བ་ནི། མ་བརྗོད་བཞིན་དུ་ཇི་ལྟར་གོ །ཞེས་བྱ་བའོ། །རིག་པ་ལས་སོ་ཞེས་བྱ་བ་ལ་མ་སྨྲས་པ་ཁོ་ན་གོ་བ་འབའ་ཞིག་ཏུ་མ་ཟད་ཀྱི། གང་ཞིག་རིག་པ་ལས་གོ་བ་དེ་ཡང་གོ་བ་མ་ཡིན་ནོ་སྙམ་དུ་བསམས་པའོ། །རིག་པ་གང་གིས་ཞེས་བྱ་བ་ལ། འདིར་མ་རིག་པ་དང་ཚུལ་བཞིན་
མ་ཡིན་པ་ཡིད་ལ་བྱེད་པ་གཉིས་ཕན་ཚུན་གྱི་རྒྱུ་ལས་བྱུང་བར་གོ་བར་འགྱུར་ཞེས་བྱ་བར་སྦྱར་རོ། །དགྲ་བཅོམ་པ་རྣམས་ཀྱི་ཚོར་བ་མ་རིག་པ་མེད་པ་ནི་ཞེས་བྱ་བ་འབྱུང་སྟེ། དགྲ་བཅོམ་པ་རྣམས་ཀྱི་ཚོར་བ་མ་རིག་པ་དང་མཚུངས་པར་མི་ལྡན་པ་ནི་སྲེད་པའི་རྐྱེན་མ་ཡིན་ཏེ། འདིས་ནི་ཚོར་བའི་དུས་ན་མ་རིག་པ་ཡོད་དོ་ཞེས་བསྟན་ཏོ། །ཕྱིན་ཅི་ལོག་མེད་པའི་རེག་པ་ཡང་ཞེས་བྱ་བ་ནི་ཉོན་མོངས་པ་ཅན་མ་ཡིན་པ་སྟེ། དགྲ་བཅོམ་པ་རྣམས་ཀྱི་ཉོན་མོངས་པ་ཅན་གྱི་ཚོར་བའི་རྐྱེན་མ་ཡིན་ནོ་ཞེས་སྐབས་དང་སྦྱར་རོ། །དེ་ལྟར་ན་རེག་པའི་དུས་ན་ཉོན་མོངས་པ་ཅན་གྱི་ཚོར་བའི་རྐྱེན་ཚུལ་བཞིན་མ་ཡིན་པ་ཡིད་ལ་བྱེད་པ་ཡོད་དོ། །ཞེས་བྱ་བར་ཤེས་པར་བྱས་པར་འགྱུར་རོ། །འདི་ལ་རྟེན་ཅིང་འབྲེལ་བར་འབྱུང་བའི་མདོར་ཡང་སྲེད་པའི་རྐྱེན་གྱིས་ཚོར་བ་ཉིད་དུ་བཤད། དེའི་རྐྱེན་གྱིས་ཀྱང་རེག་པའོ། །མ་རིག་པ་མེད་པར་ཚོར་པ་ཉོན་མོངས་པ་ཅན་མེད་ལ། ཚུལ་བཞིན་མ་ཡིན་པ་ཡིད་ལ་བྱེད་པ་མེད་པར་ཕྱིན་ཅི་ལོག་གི་རེག་པ་མེད་པ་དེའི་ཕྱིར་སྔར་བཤད་པའི་རིག་པས་འདིར་ཡང་ཚུལ་བཞིན་མ་ཡིན་པ་ཡིད་ལ་བྱེད་པ་ནི་མ་རིག་པའི་རྐྱེན་དུ་འགྱུར་རོ་ཞེས་བྱ་བར་གྲུབ་པོ། །མ་རིག་པ་མེད་པར་ཕྱིན་ཅི་ལོག་གི་ཡིད་ལ་བྱེད་པ་ཡོད་པ་མ་ཡིན་ཞིང་ཡིད་ལ་བྱེད་པ་དེ་ཡང་གཏི་མུག་ལས་སྐྱེས་པ་ཉིད་དུ་གྲུབ་པོ། དེ་ལྟ་ན་ནི་ཧ་ཅང་ཐལ་བར་འགྱུར་ཏེ་ཞེས་བྱ་བ་རྒྱས་པར་འབྱུང་བ་ལ། མདོ་གཞན་ལས་མ་རིག་པའི་འདུས་ཏེ་རེག་པ་ལས་བྱུང་བའི་ཚོར་བ་ལ་བརྟེན་ནས་སྲེད་པ་སྐྱེས་སོ་ཞེས་བསྟན་ལ། དགྲ་བཅོམ་པ་མ་རིག་པ་མེད་པའི་ཚོར་བ་ཡང་སྲེད་པའི་རྐྱེན་མ་ཚང་ཞིང༌། ཕྱིན་ཅི་ལོག་མེད་པའི་རིག་པ་ཡང་ཉོན་མོངས་པ་ཅན་གྱི་ཚོར་བའི་རྐྱེན་མ་ཡིན་ནོ། །ཡན་ལག་གཉིས་པོ་འདི་ཡང་རེག་པ་དང་ཚོར་བ་ཞེས་བྱ་བ་འདིར་ནུས་པ་མི་བྱེད་དོ། །མ་བརྗོད་ཀྱང་གཞན་དུ་བསྟན་པའི་ཕྱིར་འདི་གོའོ་ཞེ་ན། མདོ་གཞན་ལས་དེ་བསོད་ནམས་མངོན་པར་འདུ་བྱེད་ན་བསོད་ནམས་སུ་ཉེ་བར་འགྲོ་བའི་རྣམ་པར་ཤེས་པར་འགྱུར་རོ་ཞེས་རྒྱས་པར་གསུངས་ལ། དགྲ་བཅོམ་པ་མ་རིག་པ་མེད་པ་ལ་ནི་བསོད་ནམས་སུ་ཉེ་བར་འགྲོ་བའི་རྣམ་པར་ཤེས་པ་ཡོད་པ་ཡང་མ་ཡིན་ཏེ། དེ་ལྟར་ན་འདིར་ཡང་མ་རིག་པའི་རྐྱེན་
ཅན་གྱིས་འདུ་བྱེད་ཡོད་བཞིན་དུ་རིག་པས་འདིར་འདུ་བྱེད་ཀྱི་ཡན་ལག་ཏུ་བརྗོད་པར་མི་བྱའོ། །ཡང་ན་མ་རིག་པ་ནི་དགྲ་བཅོམ་པ་མ་རིག་པ་མེད་པ་ལ་འདུ་བྱེད་མེད་པས་འདུ་བྱེད་སྨོས་པ་ཁོ་ནས་མ་རིག་པ་བཤད་དོ་ཞེས་བྱ་བ་སྟེ། ཡན་ལག་ཐམས་ཅད་ལ་ཡང་དེ་བཞིན་དུ་བརྗོད་པར་བྱའོ། །དེ་ལྟར་ན་རྒ་ཤིའི་ཡན་ལག་བསྟན་པ་ཙམ་ཉིད་དུ་ཐལ་བར་འགྱུར་རོ། །འདི་ནི་ཀླན་ཀར་མི་རུང་བ་ཁོ་ན་ཡིན་ལ་ཞེས་བྱ་བ་ནི་མདོ་མཛད་པའི་གཞུང་ལུགས་སོ། །མཚང་བ་བསྟན་པ་ཡང་མ་ཡིན་ནོ་ཞེས་བྱ་བ་ལ། འཁོར་བ་ཐོག་མ་དང་ཐ་མ་ལྡན་པ་ཉིད་དུ་མི་འདོད་ཀྱང༌། འདིར་ཉིང་མཚམས་སྦྱོར་བ་གཉིས་བརྗོད་པར་འདོད་པའི་ཕྱིར་ལ། དེ་ཡང་དེ་ཙམ་གྱིས་བསྟན་པའི་ཕྱིར་སྙམ་དུ་བསམས་པའོ། །བསམ་པ་མ་གཏོགས་པས་འདྲི་བ་ནི། ཅིའི་ཕྱིར་ཞེ་ན་ཞེས་བྱ་བ་ལ། འདིར་ནི་འཇིག་རྟེན་ཕ་རོལ་ནས་ཞེས་བྱ་བས་ནི་རྒྱས་པར་བསམ་པ་གསལ་བར་བྱེད་པའོ། །ཡང་ཚུལ་གང་གིས་ཤེ་ན། འདི་ནི་སྔོན་དང་ཕྱི་མ་ཐལ་བར་དག་ལ་ཞེས་བྱ་བ་ལ་སོགས་པས་སྔར་བཤད་ཟིན་ཏོ། །དེ་ལ་མ་རིག་པ་དང་འདུ་བྱེད་དག་གིས་ནི་རྣམ་པར་ཤེས་པ་ལ་སོགས་པ་ཚོར་བ་ལ་ཐུག་པ་འཇིག་རྟེན་འདི་སྦྲེལ་བར་བྱེད་ལ། སྲེད་པ་དང་ལེན་པ་དང་སྲིད་པ་རྣམས་ཀྱིས་ནི་སྐྱེ་བ་དང་རྒ་ཤིའི་བདག་ཉིད་ཅན་འཇིག་རྟེན་ཕ་རོལ་སྦྲེལ་བར་བྱེད་དོ། །མ་རིག་པའི་རྒྱུ་དང་རྒ་ཤིའི་འབྲས་བུ་ནི་འཇིག་རྟེན་འདི་ཡང་མ་ཡིན་ཞིང་ངོ༌། །འཇིག་རྟེན་ཕ་རོལ་ལ་ཡང་མ་ཡིན་ལ་དེ་གཉིས་ཀྱི་རྒྱུ་ཡང་མ་ཡིན་པས་འདིར་མ་གསུངས་སོ། །སྐབས་སུ་མ་བབ་པར་བསྟན་པའི་སྐྱོན་སྤང་བའི་ཕྱིར་རོ། །གཉིས་ཀ་ཡང་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བ་དང༌། རྟེན་ཅིང་འབྲེལ་པར་འབྱུང་བའི་ཆོས་རྣམས་སོ། །འདུས་བྱས་ཀྱི་ཆོས་ཐམས་ཅད་ཅེས་བྱ་བ་ནི་དུས་གསུམ་པ་རྣམས་སོ། །ད་ནི་ཇི་ལྟར་མ་འོངས་པ་མ་བྱུང་བ་ཞེས་བྱ་བ་ལ་སོགས་པ་འབྱུང་ངོ༌། །འདས་པ་དང་ད་ལྟར་བྱུང་བ་ཁོ་ན་རྟེན་ཅིང་འབྲེལ་བར་འབྱུང་བ་རྣམས་སུ་བསྟན་བཅོས་ལས་བཤད་ཅེས་སློབ་དཔོན་འདུས་བཟང་ཟེར་རོ། །བསྟན་བཅོས་ལས་འདི་སྐད་དུ། སྐྱེས་པའི་ཆོས་རྣམས་གང་ཞེ་ན། འདས་པ་དང་ད་ལྟར་
བྱུང་བའི་ཆོས་རྣམས་སོ། །དེ་དང་བརྟེན་པ་དང་བརྟེན་པ་མ་ཡིན་པས་མ་སྐྱེས་པ་དང་སྐྱེས་པ་དང་སྐྱེ་བའི་རིགས་པ་རིམ་གྱིས་འགལ་བའི་ཕྱིར་རོ། །མ་འོངས་པ་ཡང་རྟེན་ཅིང་འབྲེལ་པར་འབྱུང་བ་ཞེས་བྱ་བར་ནི་མི་འགལ་ཏེ་དེའི་ཆོས་ཉིད་ཀྱི་ཕྱིར་རོ། །དེ་ནི་དེ་ལྟ་མ་ཡིན་ཏེ། རྟེན་ཅིང་འབྲེལ་པར་འབྱུང་བ་བཞིན་ནོ། །རྟེན་ཅིང་འབྲེལ་པར་འབྱུང་བ་རྣམས་ཀྱང་ཆོས་ཐམས་ཅད་དེ་ཞེས་ཁྱད་པར་མེད་པར་གསུངས་པའི་ཕྱིར་རོ། །གང་ཡང་འདིར་ལན་དུ་བརྗོད་པ་ཕུང་པོ་རྣམས་ཀྱིས་འདུས་བྱས་ཐམས་ཅད་བསྡུས་པའི་ཕྱིར་དང་དེ་དག་ཀྱང་འདས་པ་དང་ད་ལྟར་བྱུང་བ་ཉིད་ཡིན་པའི་ཕྱིར་འདི་ལ་སྐྱོན་མེད་དོ་ཞེས་བྱ་བ་འདི་ཡང་ཕྱེད་པར་དཀའ་བས་ལན་མ་ཡིན་པ་ཉིད་དེ་གཞན་དུ་ན་རྣམ་པར་དཔྱད་པར་བྱ་དགོས་པར་འགྱུར་ཏེ་སྤྲོས་པས་ཆོག་གོ །རེ་ཞིག་མ་འོངས་པ་མ་བྱས་པ་རྣམས་ཞེས་བྱ་བ་རྒྱས་པར་འབྱུང་སྟེ། རྒྱུ་དང་རྐྱེན་རྣམས་འདུས་ཤིང་ཚོགས་ནས་བྱས་པས་ན་འདུས་བྱས་ཡིན་ལ། མ་འོངས་པ་ནི་བྱས་པ་མ་ཡིན་མོད་ཀྱི་འོན་ཀྱང་འདུས་བྱས་སུ་བརྗོད་པ་དེ་བཞིན་དུ། མ་འོངས་པ་མ་བྱུང་བ་རྣམས་ཀྱང་རྟེན་ཅིང་འབྲེལ་པར་འབྱུང་བ་ཞེས་བྱའོ། །ཡང་དེ་དག་མ་བྱས་ན་ཇི་ལྟར་འདུས་བྱས་ཞེས་བྱ་ཞེ་ན། དེའི་ཕྱིར་མངོན་པར་འདུ་བྱེད་པའི་ཞེས་བྱ་བ་སྨོས་ཏེ། འདི་ལྟ་བུ་དང་འདི་ལྟ་བུར་གྱུར་ཅིག་སྣམ་དུ་མངོན་པར་འདུ་བྱེད་པའི་ངོ་བོ་ཅན་འབྲས་བུ་མངོན་པར་སྒྲུབ་པར་བྱེད་པའི་སེམས་པས་སོ། །བསམ་པའི་ཕྱིར་རོ་ཞེས་བྱ་བ་ནི་ལྟར་འགྱུར་བར་བྱའོ། །མིར་འགྱུར་བར་བྱའོ་སྙམ་པ་དེ་ལྟ་བུ་ལ་སོགས་པའོ། །མངོན་པར་འདུ་བྱེད་པ་པས་ཞེས་བྱ་བའི་དོན་དུ་ཞེ་ན་དེའི་བྱེད་པ་ཉེ་བར་བསྟན་པའི་དོན་ཏོ། །དེ་ལྟ་མ་ཡིན་ན་སླར་བརྗོད་པ་ལ་སེམས་པས་བསམ་པའི་ཕྱིར་དང༌། བཀའ་ལས་འབྱུང་བའི་ཕྱིར་མ་འོངས་པའི་འདུས་བྱས་ཉིད་མངོན་པར་མི་གསལ་བར་འགྱུར་རོ། །བྱེད་པ་མངོན་པར་མི་གསལ་བའི་ཕྱིར་རྣམ་པར་སྨིན་པའི་འབྲས་བུ་མངོན་པར་འདུ་བྱེད་པ་རྣམས་མངོན་པར་འདུ་མི་བྱེད་དོ། །དེ་དག་མ་འོངས་པའི་རྒྱུ་མཐུན་པའི་འབྲས་བུ་ཉིད་ཀྱི་ཕྱིར་དང་བསམ་པའི་ཕྱིར་
འདུས་མ་བྱས་ཉིད་དུ་ཐལ་བར་འགྱུར་རོ། །ཐམས་ཅད་འཚོགས་བཅས་དང་བཅས་པའི་ལུས་འདོད་པའི་ཡུལ་རྣམས་ཀྱང་དེ་ལ་བསམས་པ་ཉིད་དུ་འགྱུར་ཏེ། དེའི་ཕྱིར་ཡུལ་རྣམས་ཀྱང་འདུས་བྱས་ཉིད་དུ་མི་འགལ་ལོ་ཞེས་ཟེར་རོ། །སྲིད་པའི་གཞི་མ་ཡིན་པ་ཉིད་ཀྱིས་འཇུག་པ་དང་འགལ་བའི་ཕྱིར་འདྲི་བ་ནི། ཟག་པ་མེད་པ་རྣམས་ཇི་ལྟར་ཞེས་བྱ་བ་སྟེ། རྣམ་པར་སྨིན་པ་མ་ཡིན་པའི་ཕྱིར་རོ། །ཐོབ་པར་བྱ་བའི་ཕྱིར་ཞེས་བྱ་བ་ནི་བདག་གིས་ཟག་པ་མེད་པའི་ཆོས་རྣམས་ཐོབ་པར་གྱུར་ཅིག་སྙམ་དུའོ། །མྱ་ངན་ལས་འདའ་བ་ལ་ཡང་ཐལ་བར་འགྱུར་རོ་ཞེས་བྱ་བ་ནི་འདུས་བྱས་ཉིད་དུ་ཞེས་བྱ་བར་སྦྱར་ཏེ། དེ་ཡང་དགེ་བ་ཉིད་ཀྱིས་ཐོབ་པར་བྱ་བའི་ཕྱིར་སེམས་པས་བསམས་པ་ཡིན་ནོ། །དེ་དང་རིགས་མཐུན་པའི་ཕྱིར་ཞེས་བྱ་བ་ནི་མ་འོངས་པ་རྣམས་འདུས་བྱས་ཉིད་དང་རྟེན་ཅིང་འབྲེལ་པར་འབྱུང་བ་ཉིད་ཀྱི་དབང་དུ་བྱས་ནས་ལན་སྨྲས་པའོ། །འདུས་བྱས་དང་རིགས་མཐུན་པའི་ཕྱིར་དང་རྟེན་ཅིང་འབྲེལ་པར་འབྱུང་བ་དང་རིགས་མཐུན་པའི་ཕྱིར་མ་བྱས་པ་དང་མ་བྱུང་བ་རྣམས་ལ་ཡང་འདུས་བྱས་དང་རྟེན་ཅིང་འབྲེལ་པར་འབྱུང་བ་ཞེས་དེ་ལྟར་མཐུན་པར་བསྒྲེས་པ་ཡིན་ནོ། །འདིར་འདས་པ་དང་ད་ལྟར་བྱུང་བ་དག་ལ་ནི་འདུས་བྱས་དང་རྟེན་ཅིང་འབྲེལ་པར་འབྱུང་བའི་ཞེས་བྱ་བའི་དངོས་ཀྱི་སྒྲ་ཡིན་ལ། མ་འོངས་པ་ལ་ནི་བརྟགས་པ་ཡིན་ནོ་ཞེས་ཤེས་པར་བྱ་བར་འགྱུར་རོ། །འདི་ཉིད་ལ་དཔེ་ནི་དཔེར་ན་རེ་ཞིག་གཟུགས་སུ་མི་རུང་ཡང་ཞེས་བྱ་བ་རྒྱས་པར་འབྱུང་བ་སྟེ། གཟུགས་སུ་རུང་བ་ཞེས་བྱ་བའི་སྒྲས་ནི་བྱ་བའི་རྒྱུ་མཚན་ཅན་འདི་དེ་དང་རིགས་མཐུན་པའི་ཕྱིར་མ་འོངས་པའི་གཟུགས་རྒྱུ་མཚན་མེད་པ་ལ་ཡང་མི་འགལ་བ་དེ་བཞིན་དུ་འདིར་ཡང་མི་འགལ་ལོ་ཞེས་བྱ་བར་སྟོན་ཏོ། །དེ་ལ་འགའ་ཞིག་དཔེ་དང་དཔེ་ཅན་མཚུངས་པའི་ཕྱིར་འདི་ལན་དུ་མི་རིགས་སོ་སྙམ་ན་མ་ཡིན་ཏེ། རྟེན་ཅིང་འབྲེལ་པར་འབྱུང་བ་དེ་ཡང་རབ་ཏུ་གྲགས་པས་རབ་ཏུ་མ་གྲགས་པ་བསྒྲུབ་པའི་ཕྱིར་རོ། །ཇི་ལྟར་མ་འོངས་པ་གཟུགས་ཅན་དུ་མ་གྱུར་པ་ཉིད་རིགས་མཐུན་པའི་ཕྱིར་གཟུགས་ཞེས་བརྗོད་པ་དེ་བཞིན་དུ་མ་བྱས་པ་དང་མ་སྐྱེས་པ་རྣམས་ཀྱང་མ་
འོངས་པ་དང་རིགས་མཐུན་པའི་ཕྱིར་འདུས་བྱས་དང་རྟེན་ཅིང་འབྲེལ་པར་འབྱུང་བ་རྣམས་སུ་བརྗོད་དེ། དེ་ལྟར་ན་འདིར་རྒོལ་བའི་སྐབས་མེད་དོ། །རྒྱུ་དང་འབྲས་བུ་དག་པ་དང་བུ་བཞིན་ནོ་ཞེས་བྱ་བ་ལ་ཇི་ལྟར་ས་བོན་དེ་ཉིད་རྒྱུ་ལ་བལྟོས་ཏེ། འབྲས་བུ་ཡིན་ཞིང། འབྲས་བུ་ལ་བལྟོས་ན་རྒྱུ་ཞེས་བྱ་བར་བརྗོད་པ་དང༌། དེ་ཉིད་བུ་ལ་བལྟོས་ནས་པ་ཡིན་ལ། ཕ་ལ་བལྟོས་ནས་བུར་བརྗོད་པ་དེ་བཞིན་དུ་ཡན་ལག་དེ་ཉིད་འབྲས་བུ་ལ་བལྟོས་ནས་རྟེན་ཅིང་འབྲེལ་པར་འབྱུང་བ་ཡིན་ལ། རྒྱུ་ལ་བལྟོས་ནས་རྟེན་ཅིང་འབྲེལ་པར་འབྱུང་བ་ཞེས་བྱ་སྟེ། དེ་ལྟན་རྣམ་པར་གཞག་པ་འཇིག་པ་མེད་དོ། །གནས་བརྟན་བསམ་རྫོགས་ན་རེ་ཞེས་བྱ་བ་རྒྱས་པར་འབྱུང་སྟེ། གནས་བརྟན་བསམ་རྫོགས་ཀྱི་བསམ་པ་ནི་ཇི་ལྟར་རྒྱུ་ལས་གྲུབ་པ་དེ་ལྟར་རྟེན་ཅིང་འབྲེལ་པར་འབྱུང་བ་རྣམས་ཡིན་ལ། ཇི་ལྟར་གཞན་དག་གི་རྒྱུར་གྱུར་པ་དེ་ལྟར་རྟེན་ཅིང་འབྲེལ་པར་འབྱུང་པའོ་ཞེས་བྱ་བ་འདི་ཡིན་པར་སྣང་ངོ༌། །དེ་ལྟར་བཤད་ན་མུ་དང་པོ་ནི་ཆོས་མ་འོངས་པ་རྣམས་ཏེ་མ་སྐྱེས་པའི་ཕྱིར་ན་རྟེན་ཅིང་འབྲེལ་པར་འབྱུང་བ་ཡིན་ལ། གཞན་དག་གི་རྒྱུར་གྱུར་པའི་ཕྱིར་ན་རྟེན་ཅིང་འབྲེལ་པར་འབྱུང་པའོ། །གཉིས་པ་ནི་དགྲ་བཅོམ་པའི་ཐ་མ་རྣམས་ཏེ་སྐྱེས་པའི་ཕྱིར་རོ། །འདི་ལྟར་དགྲ་བཅོམ་པའི་ཐ་མ་འདས་པའམ། ད་ལྟར་བདག་ལས་ཆོས་གཞན་འབྱུང་བ་ནི་མ་ཡིན་ནོ། །གསུམ་པ་ནི་དེ་ལས་གཞན་པ་ཞེས་བྱ་བ་ནི་དགྲ་བཅོམ་པའི་ཐ་མ་དག་ལས་གཞན་པའི་ཆོས་འདས་པ་དང་ད་ལྟར་བྱུང་བ་རྣམས་ཏེ། དེ་དག་ནི་སྐྱེས་པའི་ཕྱིར་དང་གཞན་དག་གི་རྒྱུར་གྱུར་པའི་ཕྱིར་གཉིས་ཀ་ལྟར་ཡིན་ནོ། །བཞི་པ་ནི་ཆོས་འདུས་མ་བྱས་རྣམས་སོ་ཞེས་བྱ་བ་ལ་དེ་དག་ནི་མ་སྐྱེས་པའི་ཕྱིར་དང་རྒྱུ་མ་ཡིན་པའི་ཕྱིར་རོ། །གཉི་ག་ལྟར་ཡང་མ་ཡིན་ནོ་ཞེས་བྱ་བ་ནི་འདུས་མ་བྱས་ཀྱང་རྒྱུ་མེད་པའི་ཕྱིར་རྟེན་ཅིང་འབྲེལ་པར་འབྱུང་བ་ནི་མ་ཡིན་ཏེ། དེ་ལ་རྒྱུའི་མཚན་ཉིད་མ་ཚང་བའི་ཕྱིར་རོ། །ཡང་རྒྱུའི་མཚན་ཉིད་གང་ཞིག་ཅེ་ན། འདི་ཡོད་ན་འདི་འབྱུང༌། འདི་སྐྱེས་པས་འདི་སྐྱེ། འདི་མེད་ན་འདི་མི་འབྱུང༌། འདི་འགགས་པས་འདི་འགག་ཅེས་པའོ། །དེ་ལ་འདུས་མ་བྱས་ཡོད་
ན་དངོས་པོ་རྣམས་འབྱུང་མོད་ཀྱི། དེ་ནི་སྐྱེ་བ་མ་ཡིན་ལ། དེ་མེད་ན་དེ་མེད་པ་དང༌། དེ་འགགས་པས་འགག་པ་ཡང་མི་འཐད་དེ། སྐྱེ་བ་དང་འགག་པ་དང་བྲལ་བའི་ཕྱིར་རོ། །གྲག་གོ་ཞེས་བྱ་བའི་སྒྲ་ནི་མི་སྲིད་དོ། །དེ་བཞིན་འཆད་པར་ཅི་ལྟར་འོས་ཞེས་བྱ་བའོ། །དེའི་རང་བཞིན་ནི་རྟག་པའི་ཕྱིར་འདུས་མ་བྱས་ལ་དམིགས་པའི་ངོ་བོ་སྒྲིབ་པ་མེད་པའི་ངོ་བོས་འདུས་བྱས་རྣམས་ཀྱི་བྱེད་རྒྱུའི་རྒྱུའོ། །འདུ་བྱེད་ཀྱི་སྐྱེ་བའི་རྒྱུན་ནི་མ་ཡིན་ཏེ་རྒྱུའི་མཚན་ཉིད་མ་ཚང་བའི་ཕྱིར་རོ། །ཞེས་སློབ་དཔོན་འདུས་བཟང་ཟེར་རོ། །དེ་ལྟར་ན་འོ་ན་མི་སྐྱེ་བའི་ཆོས་ཀྱི་བྱེད་རྒྱུ་ལ་ཡང་རྒྱུའི་མཚན་ཉིད་མེད་པའི་ཕྱིར་འདུས་མ་བྱས་བཞིན་རྣམ་པ་གཉིས་ཀ་མེད་པར་ཐལ་བར་འགྱུར་བའི་ཕྱིར་མུ་བཞི་འགལ་ལོ། །གཞན་དག་ན་རེ། མ་རིག་པ་རྟེན་ཅིང་འབྲེལ་པར་འབྱུང་བ་དང་འདུ་བྱེད་རྟེན་ཅིང་འབྲེལ་པར་འབྱུང་བ་ནས་ཇི་སྲིད་རྒ་ཤི་དང་མ་རིག་པ་རྟེན་ཅིང་འབྲེལ་པར་འབྱུང་བའི་བར་ངེས་པར་འདུ་བྱེད་ཀྱི་གནས་སྐབས་ཉིད་མཚམས་སྦྱོར་བའི་ཕྱིར་རྒ་ཤི་རྟེན་ཅིང་འབྲེལ་པར་འབྱུང་བའི་ཆོས་རྣམས་སོ་ཞེས་ཟེར་རོ། །གཞན་དག་ན་རེ་ངེས་པར་རྒ་ཤིའི་གནས་སྐབས་ཉོན་མོངས་པའི་གནས་སྐབས་སྐྱེད་པར་བྱེད་པ་མ་ཡིན་ལ། ལྷག་མ་རྣམས་ནི་གཉིས་ཀ་ལྟར་ཡང་མ་ཡིན་ནོ་ཞེས་ཟེར་རོ། །ཁ་ཅིག་ནི་རྟེན་ཅིང་འབྲེལ་པར་འབྱུང་བ་ཡན་ལག་དང་པོ་ནི་རྒྱུའི་ངོ་བོས་འཆད་པར་འདོད་པའི་ཕྱིར་ལ། རྟེན་ཅིང་འབྲེལ་པར་འབྱུང་བ་གཞན་ལྷག་མ་རྣམས་ནི་གཉི་ག་ལྟར་ཡང་ཡིན་ནོ་སྙམ་དུ་སེམས་སོ། །རྣམ་པར་བཤད་པ་འདི་རྣམས་དང་མདོ་ནི་འགལ་བར་མི་གཟུང་སྟེ། གང་གི་ཕྱིར་མདོ་ལས་རྟེན་ཅིང་འབྲེལ་པར་འབྱུང་བའི་ཆོས་རྣམས་གང་ཞེ་ན་མ་རིག་པ་ནས་རྒ་ཤིའོ་ཞེས་གསུངས་སོ། །འདི་ཅི་འདི་དག་གང་ཞིག་གང་འདོད་པ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བ་གནས་སྐབས་པ་ཡིན་པ་དང༌། རྟེན་ཅིང་འབྲེལ་པར་འབྱུང་བ་ཡིན་ལ། རྟེན་ཅིང་འབྲེལ་པར་འབྱུང་བའི་ཆོས་མ་ཡིན་པ་ཡང་ཡོད་དེ་ཞེས་བྱ་བ་ལ་སོགས་པའོ། །མདོ་ལས་ནི་ཞེས་བྱ་བ་ལ། མདོ་ལས་ནི་མ་རིག་པ་གང་ཞེས་དྲི་བ་བྱས་ནས་ཕུང་པོ་ལྔའོ་ཞེས་དེ་སྐད་དུ་མ་བསྟན་ཏོ། །འོ་ན་ཅི་ཞེ་ན། གཞན་དུའོ། །
སྔོན་གྱི་མཐའ་མི་ཤེས་པ་གང་ཡིན་པའོ་ཞེས་བྱ་བ་རྒྱས་པར་འབྱུང་ངོ༌། །ངེས་པའི་དོན་གང་ཡིན་པ་ཞེས་བྱ་བ་ལ། གང་ཞིག་གི་དོན་བཅོམ་ལྡན་འདས་ཉིད་ཀྱི་རྨ་བ་མཛད་ནས་རྣམ་པར་ཕྱེ་བ་དེའི་དོན་ནི་དེ་ཉིད་ཡིན་གྱི་གཞན་མ་ཡིན་པས་དེ་ནི་ཡང་དྲང་པའི་དོན་དུ་མི་འགྱུར་རོ། །སློབ་དཔོན་འདུས་བཟང་ན་རེ། ལྷག་མ་དང་བཅས་པར་བསྟན་པར་འགྱུར་ཏེ་དཔེར་ན་ལས་གསུམ་པོ་འདི་རྒྱུ་དང་ཀུན་འབྱུང་བ་དང་ཞེས་མདོར་བསྟན་པས་གསུམ་པོ་ཁོ་ན་བསྟན་པར་བྱས་ཏེ། ཆགས་པ་དང་སྡང་བ་དང་རྨོངས་པ་རྣམས་སོ། །ང་རྒྱལ་ལ་སོགས་པ་ནི་ལས་ཀྱི་རྒྱུ་དང་ཀུན་ཏུ་འབྱུང་བ་ཆགས་པ་ལ་སོགས་པ་དང་མཚུངས་པར་ལྡན་པ་མ་ཡིན་པའི་ཕྱིར་མ་ཡིན་ནོ། །དེ་བཞིན་དུ་ཆོས་གཉིས་པོ་འདི་དག་བསྒོམ་པར་བྱ་སྟེ་ཞེས་བྱ་བར་ཡང་ཞི་གནས་དང་ལྷག་མཐོང་སྟེ། དེ་བསྟན་པ་ཀུན་ཏུ་རྟོགས་པ་ལ་སོགས་པ་བསྒོམ་པར་བྱ་བ་མ་ཡིན་ནོ། །དེ་བཞིན་དུ་འདིར་ཡང་གནས་སྐབས་གང་ཡིན་པ་དེ་གཙོ་བོར་བསྟན་པས་ཇི་སྐད་བཤད་པ་ཁོ་ན་བསྟན་ཏེ། བྱ་བ་འགལ་བ་ཅི་ཡང་མེད་དོ། །མ་རིག་པ་མ་གཏོགས་པ་གཞན་འདུ་བྱེད་ཀྱི་རྐྱེན་དུ་མི་འདོད་དེ། འོ་ན་ཅི་ཞེ་ན། མདོ་གཞན་དུ་མ་རིག་པ་ལ་སོགས་པ་རྣམས་ཉིད་དུ་འདུ་བྱེད་ལ་སོགས་པའི་རྐྱེན་དུ་བཞེད་དོ་ཞེས་བྱ་བར་རྟོགས་སོ། །ཇི་ལྟར་གཞན་ལས་བཤད་པའི་མདོ་གཉིས་པོ་དེ་ལ་ཡང་ལས་ཀྱི་རྒྱུ་དང་ཀུན་འབྱུང་བ་གཞན་དུ་བསྒོམ་པར་བྱ་སྟེ། གང་ཁོ་ན་བསྟན་པ་དེ་ཁོ་ན་བསྟན་པར་འདོད་ཀྱི་གཞན་མ་ཡིན་ནོ་ཞེས་བྱ་བར་རྟོགས་སོ། །དེ་བཞིན་དུ་འདིར་ཡང་འདི་ཤེས་བྱེད་མ་ཡིན་ཏེ། མདོ་གཉིས་ནི་བྱེ་བྲག་ཏུ་སྨྲ་བའི་དོན་དང་འགལ་བའི་ཕྱིར་རོ། །བསྟན་པའི་སྒོ་ནས་ཐམས་ཅད་ཅེས་བྱ་བ་ལ། བསྟན་པ་ནི་རྣམ་པར་ཕྱེ་བའོ། །གཙོ་བོ་ཇི་ལྟ་བར་སྟོན་པ་སྟེ། རྣམ་པར་དབྱེ་བར་ཡང་མཛད་པས་བསྟན་པ་ནི་ངེས་པའི་དོན་དུ་མི་འགྱུར་རོ། །དེ་ཉིད་ལ་དཔེ་ནི་དཔེར་ན་གླང་པོ་ཆེའི་རྗེས་ལྟ་བུ་ལས་ཞེས་བྱ་བ་ལ་སོགས་པ་སྨོས་སོ། །དེ་དག་ལ་ནི་ཞེས་བྱ་བ་རྒྱས་པར་འབྱུང་སྟེ། སྒྲ་ལ་སོགས་པ་དེ་དག་ལ་ནི་སའི་ཁམས་འབའ་ཞིག་ཏུ་མ་ཟད་ཀྱི། གཟུགས་དང་དྲི་དང་རོ་ལ་སོགས་པ་འབྱུང་བ་ལས་གྱུར་པ་ཐ་མི་དད་པར་
འཇུག་པ་གཞན་དག་ཀྱང་ཡང་དེ། དེ་ལ་འཇུག་པ་ཤས་ཆེ་བས་གཙོ་བོ་ཡིན་པའི་ཕྱིར་སྐྲ་ལ་སོགས་པ་དག་གིས་སའི་ཁམས་བསྟན་ཏོ། དེ་བཞིན་དུ་འདིར་ཡང་ཞེས་བྱ་བ་རྒྱས་པར་འབྱུང་སྟེ། བཅུ་གཉིས་དང་ལྡན་པའི་ཕུང་པོ་ལྔ་པོའི་གནས་སྐབས་དག་ཏུ་ཡང་གཙོ་བོ་གང་ཡིན་བ་དེ་བསྟན་ཏོ། །དེ་ལྟར་ན་གཟུགས་དང་ཚོར་བ་ལ་སོགས་པའི་ཆོས་གཞན་དག་ཡོད་ཀྱང༌། མ་རིག་པ་གཙོ་བོར་གྱུར་བའི་གནས་སྐབས་སུ་མ་རིག་པ་བསྟན་པར་འགྱུར་རོ། །དེ་བཞིན་དུ་འདུ་བྱེད་ལ་སོགས་པ་དག་ལ་ཡང་བརྗོད་པར་བྱའོ། །འདི་ནི་དཔེ་མ་ཡིན་ཏེ་ཞེས་བྱ་བ་ལ། དཔེ་མ་ཡིན་པ་ནི་དཔེ་དང་དོན་མཚན་ཉིད་མི་མཐུན་པའོ། །མཚན་ཉིད་མི་མཐུན་པ་ཉིད་བསྟན་པའི་ཕྱིར་དེ་ལས་ནི་ཞེས་བྱ་བ་རྒྱས་པར་སྨོས་ཏེ། གླང་པོ་ཆེའི་རྗེས་ལྟ་བུའི་མདོ་དེ་ལས་ནི། དེ་ལ་གཟུགས་ལ་སོགས་པ་གཞན་དག་ཀྱང་ཡོད་པས་གང་གིས་ན་སྐྲ་ལ་སོགས་པ་དེ་དག་མ་རྫོགས་པར་བསྟན་པར་འགྱུར་བ་སྐྲ་ལ་སོགས་པ་དག་གང་ཞེ་ན་སའི་ཁམས་སོ་ཞེས་དེ་སྐད་མ་བརྗོད་ཀྱི། འོན་ཀྱང་དེ་ལས་སའི་ཁམས་གང་ཞེ་ན། སྐྲ་དང་སྦུ་ཞེས་རྒྱས་པར་སྐྲ་ལ་སོགས་པ་དག་ཁོ་ནས་སའི་ཁམས་བསྟན་ཏོ། །གལ་ཏེ་སྔོན་གྱི་མཐའ་ལ་སོགས་པ་དག་ལ་མི་གཏོགས་པ་ཕུང་པོ་ལྔའི་གནས་སྐབས་ལ་བསྟན་པར་ནུས་པ་དང༌། གལ་ཏེ་ཕུང་པོ་ལྔའི་གནས་སྐབས་ལམ་རིག་པ་མེད་མོད་ཀྱང༌། གཟུགས་ལ་སོགས་པ་དག་ནི་ཡོད་དོ་ཞེ་ན། དེའི་ཕྱིར་རིགས་ཐ་དད་པ་ནི་ཞེས་བྱ་བ་རྒྱས་པར་སྨོས་སོ། །གཟུགས་དང་ཚོར་བ་ལ་སོགས་པ་རྣམས་ནི་མ་རིག་པ་ཉིད་དུ་མི་རིགས་སོ། །ཤེས་བྱེད་ཀྱི་དངོས་པོ་རྟོག་པས་མདོ་མཛད་པས་རིག་པ་མ་བརྗོད་པས་དེ་ཉིད་འདིར་སྨོས་པར་ཤེས་པར་བྱའོ། །སྐྲ་ལ་སོགས་པ་ཆོས་དུ་མ་ཚོགས་པའི་བདག་ཉིད་དེ་རྣམས་དང་ཆོས་དུ་མ་ཚོགས་པའི་བདག་ཉིད་རྣམས་ཀྱིས་ས་ལ་སོགས་པའི་ཁམས་ཉིད་བསྟན་པ་གང་ཡིན་པ་དེ་གཙོ་བོ་ཡིན་པའི་ཕྱིར་གཞན་བསལ་ནས་དེ་ཉིད་བསྟན་ཏོ། །དེ་བཞིན་དུ་འདིར་ཡང་ཕུང་པོ་ལྔ་པོ་རྣམས་ཀྱི་གནས་སྐབས་གང་དུ་གང་ཞིག་གཙོ་བོར་གྱུར་པ་དེ་ཉིད་བསྟན་ཏེ། དེ་ལྟར་ན་འདི་ལ་འགལ་བ་ཅི་ཞིག་ཡོད། ཡང་དེ་དག་དེར་གཙོ་བོ་ཡིན་ན་གནས་སྐབས་ཕྱི་མའི་རྒྱུ་ཉིད་ཇི་ལྟར་ཞེ་ན། གལ་ཏེ་དེ་ལྟ་ཡང་འགལ་བའི་ཤེས་བྱེད་ཉེ་བར་
བཀོད་པ་དོན་མེད་དོ། །འདིར་དེ་དག་གི་གནས་སྐབས་ལ་བསམས་ནས་གནས་སྐབས་གཞན་ལ་བསྟན་ཏེ། དཔེར་ན་སྐྲ་ལ་སོགས་པ་རྣམས་ཀྱིས་སའི་ཁམས་བཞིན་ནོ། །གནས་སྐབས་དེ་སྔོན་གྱི་མཐའ་དང་ཕྱི་མའི་མཐའ་ལ་སོགས་པ་རྣམས་སུ་ཡོད་ཀྱང་མ་བསྟན་ནོ། །ཇི་ལྟར་སྐྲ་ལ་སོགས་པ་རྣམས་ཀྱིས་གཟུགས་ལ་སོགས་པ་གཟུང་བ་ལྟ་བུ་སྟེ། རྫས་དང་བཏགས་པར་ཡོད་པ་ཐ་དད་པའི་ཕྱིར་རོ། །དེ་བཞིན་དུ་འདིར་ཡང་གནས་སྐབས་མ་སྨོས་པར་གཟུགས་ལ་དང་ཚོར་བ་ལ་སོགས་པ་གཟུང་སྟེ། རྫས་དང་བཏགས་པར་ཡོད་པ་ཐ་དད་པའི་ཕྱིར་རོ། །དེའི་ཕྱིར་རྣམ་པར་མི་གཡེང་བ་ཙམ་ཉིད་བརྗོད་དོ། །གང་ཞིག་འདིར་མི་རིགས་པ་དེ་ཡང་དོན་གྱི་སྒོ་ནས་བཀག་གོ་ཞེས་བྱ་སྟེ་དངོས་སུ་བཀག་པ་མ་ཡིན་ནོ། །གང་ཞིག་ཡོད་དམ་མེད་ན་ཞེས་བྱ་བ་རྒྱས་པར་འབྱུང་སྟེ། མ་རིག་པ་ཉིད་ཡོད་དམ་མེད་ན་འདུ་བྱེད་རྣམས་ཡོད་པ་དང་མེད་པར་ངེས་ཀྱི་ཕུང་པོ་གཞན་དག་ནི་མ་ཡིན་པས་དེ་ཉིད་ཡན་ལག་ཡིན་ནོ། །དེ་བཞིན་དུ་འདུ་བྱེད་ལ་སོགས་པ་དག་ལ་ཡང་བརྗོད་པར་བྱའོ། །འདི་ལྟར་ཕུང་པོ་ལྔ་ཡོད་ཀྱང་མ་རིག་པ་དང་བཅས་པ་རྣམས་ཁོ་ན་ལ་འདུ་བྱེད་ཡོད་ཀྱི་མ་རིག་པ་མེད་པ་རྣམས་ལ་ནི་མ་ཡིན་ཏེ། དཔེར་ན་དགྲ་བཅོམ་པ་རྣམས་ལ་ཕུང་པོ་ལྔ་ཡོད་ཀྱང༌། བསོད་ནམས་དང་བསོད་ནམས་མ་ཡིན་པ་དང་མི་གཡོ་བར་འགྲོ་བའི་རྣམ་པར་ཤེས་པ་ཡོད་པ་མ་ཡིན་པ་བཞིན་ཏེ། ཉིང་མཚམས་སྦྱོར་བའི་རྣམ་པར་ཤེས་པ་མེད་ཅེས་བྱ་བའི་དོན་ཏོ། །སྐྱེ་བར་ཉེ་བར་འགྲོ་བས་ན་ཉེ་བར་འགྲོ་བའོ། །བསོད་ནམས་ཀྱིས་ནི་བསོད་ནམས་སུ་ཉེ་བར་འགྲོ་བའོ། །བསོད་ནམས་མ་ཡིན་པ་ཉེ་བར་འགྲོ་བ་དང༌། །མི་གཡོ་བར་འགྲོ་བ་ཡང་དེ་དང་འདྲ་བར་བལྟ་བར་བྱའོ། །སྲེད་པ་ལ་སོགས་པ་ཡང་ཞེས་བྱ་བ་ལ། །མ་རིག་པ་མེད་པ་རྣམས་ལ་ཕུང་པོ་ལྔ་ཡོད་ཀྱང་ཚོར་བ་ཉོན་མོངས་པ་ཅན་མེད་པས་སྲེད་པ་མེད་ལ། དེ་མེད་པས་ལེན་པ་ལ་སོགས་པ་རྣམས་ཀྱང་མེད་དོ། །མདོའི་དོན་ཇི་སྐད་བསྟན་པ་ཁོ་ན་ཡིན་ནོ་ཞེས་བྱ་བ་ལ། མ་རིག་པ་གང་ཞེ་ན་ཞེས་བྱ་བ་ནས་བརྩམས་ཏེ། སྔོན་གྱི་མཐའ་མི་ཤེས་པ་གང་ཡིན་པའོ། །ཞེས་བྱ་བ་ལ་སོགས་པའོ། །མ་རིག་པ་ལ་ལྟོས་ནས་ཕུང་པོ་ལྔ་པོ་འདུ་བྱེད་རྣམས་
ཀྱི་རྒྱུར་འདོད་དེ། དེ་ན་མ་རིག་པ་མེད་པ་རྣམས་ལ་ཡོད་པའི་ཕུང་པོ་ལྔ་ལས་འདུ་བྱེད་དུ་མི་འགྱུར་རོ། །དེ་ནི་དེ་ལྟ་མ་ཡིན་ཏེ་མ་རིག་པ་ལྡན་པ་ནི་དེ་སྐྱ་བ་ལ་ནུས་པ་མཐོང་བའི་ཕྱིར་རོ། །དེ་བཞིན་དུ་གཞན་ལ་ཡང་བརྗོད་པར་བྱའོ། །མདོའི་དོན་ཇི་སྐད་བསྟན་པ་ཁོ་ན་ཡིན་ནོ་ཞེས་བྱ་བ་ལ། མ་རིག་པ་གང་ཞེ་ན་ཞེས་བྱ་བ་ནས་བརྩམས་ཏེ་སྔོན་གྱི་མཐའ་མི་ཤེས་པ་གང་ཡིན་པའོ་ཞེས་བྱ་བ་ལ་སོགས་པ་སྟེ། ཇི་སྐད་བསྟན་པ་ཁོ་ན་མདོའི་དོན་ནོ། །འདུ་བྱེད་གང་ཞེ་ན་ཞེས་བྱ་བ་ནས་བརྩམས་ཏེ་ཇི་སྐད་བསྟན་པ་ཁོ་ན་མདོའི་དོན་ཏེ། དེ་བཞིན་དུ་ཡན་ལག་ཐམས་ཅད་ལ་ཡང་བརྗོད་པར་བྱའོ། །གང་གི་ཕྱིར་ཇི་སྐད་བསྟན་པ་ཁོ་ན་མདོའི་དོན་ཡིན་པ་དེའི་ཕྱིར་ཕུང་པོ་གཞན་དག་ཡོད་ཀྱང་འདུ་བྱེད་ལ་སོགས་པའི་རྐྱེན་མ་ཡིན་ནོ། །དེ་ལ་ཡང་ཆོས་མ་འོངས་པ་རྣམས་ཞེས་བྱ་བ་རྒྱས་པར་འབྱུང་སྟེ། ཆོས་མ་འོངས་པ་རྣམས་ནི་རྟེན་ཅིང་འབྲེལ་བར་འབྱུང་བ་ཡིན་གྱི། རྟེན་ཅིང་འབྲེལ་པར་འབྱུང་བ་ནི་མ་ཡིན་ནོ་ཞེས་སྨྲས་པ་དེ་ལྟ་ན་ནི་མདོ་དང་འགལ་ལོ། །གཞན་དག་ན་རེ་མདོ་དང་འགལ་བ་མེད་དོ་ཞེས་ཟེར་རོ། །འདུས་བྱས་ཉིད་དུ་ཁས་བླངས་པའི་ཕྱིར་རོ། །དེ་ལྟ་ན་འོ་ན་འདས་པ་དང་མ་འོངས་པ་དང་ད་ལྟར་བྱུང་བ་ཉིད་ཀྱིས་རྣམ་པར་གཞག་པ་མེད་པའི་ཕྱིར་ཡན་ལག་རྣམས་ཆ་གསུམ་དུ་དགོད་པ་རྣམ་པར་ཉམས་པར་འགྱུར་རོ། །འཕགས་པས་སྟོན་པ་ལ་སོགས་པའི་སྡེ་པ་གཞན་དག་རྟེན་ཅིང་འབྲེལ་པར་འབྱུང་བ་འདུས་མ་བྱས་སོ་ཞེས་ཟེར་རོ། །དེ་དག་དེ་ལྟར་རྟོགས་པ་ག་ལས་ཤེ་ན། སངས་རྒྱས་ཀྱིས་མདོ་ལས་དགེ་སློང་དག་རྟེན་ཅིང་འབྲེལ་པར་འབྱུང་བ་ནི་བདག་གིས་མ་བྱས་སོ། །གཞན་གྱིས་ཀྱང་མ་བྱས་ཏེ་འོན་ཀྱང་དེ་བཞིན་གཤེགས་པ་རྣམས་བྱུང་ཡང་རུང༌། མ་བྱུང་ཡང་རུང་ཆོས་ཉིད་འདི་ནི་གནས་པ་ཁོ་ནའོ་ཞེས་རྒྱས་པར་གསུངས་པའི་ཕྱིར་རོ། །དངོས་པོ་གཞན་རྟག་པ་ཅུང་ཟད་ཅིག་ཡོད་དོ་ཞེས་བྱ་བ་ནི་མ་རིག་པ་ལ་སོགས་པ་རྣམས་ལས་སོ་སོར་བརྟགས་པ་མ་ཡིན་པའི་འགོག་པ་ལྟར་རྟོགས་པ་ཞིག་ཡོད་དོ་ཞེས་བྱ་བའོ། །འབྱུང་བ་ནི་འདུས་བྱས་ཀྱི་མཚན་ཉིད་ཡིན་པའི་ཕྱིར་རོ་ཞེས་བྱ་བ་ནི་གསུམ་པོ་འདི་དག་ནི་འདུས་བྱས་ཀྱི་མཚན་ཉིད་དེ་འདུས་བྱས་སྐྱེ་བར་ཡང་མངོན་ཞེས་རྒྱས་པར་འབྱུང་བའོ། །དངོས་པོ་གཞན་རྟག་
པ་ནི་ཞེས་བྱ་བ་ལ་སོགས་པ་ལ། གང་ཞིག་གང་མེད་པར་མི་འབྱུང་བ་དེ་ནི་དེའི་མཚན་ཉིད་ཡིན་ལ་འབྱུང་བ་ནི་རྟག་པའི་ཕྱིར་དངོས་པོ་མེད་པ་ཡང་དངོས་པོ་སྔ་ནས་མེད་པ་དང་ཞིག་ནས་མེད་པའི་གནས་སྐབས་ན་ཡོད་པ་ཡིན་པ་དེ་དངོས་པོའི་མཚན་ཉིད་དུ་མི་རུང་ངོ༌། །ཡང་ན་ནམ་མཁའ་ལ་སོགས་པ་བཞིན་དུ་དུས་སུ་མ་གཏོགས་པའི་ཕྱིར་ན་དུས་སུ་གཏོགས་པའི་མཚན་ཉིད་དུ་མི་རིགས་སོ། །ཡང་ན་རྣམ་པ་གཞན་དུ་གནས་པ་ལྟ་བུ་སྟེ། འདུས་བྱས་ཀྱི་མཚན་ཉིད་ཀྱི་ཕྱིར་སྐྱེ་བ་ནི་འདུས་མ་བྱས་ཉིད་དུ་མི་རིགས་སོ། །འབྱུང་བ་ཞེས་བྱ་བ་ནི་སྐྱེ་བ་ཡིན་པའི་ཕྱིར་ཞེས་བྱ་བ་ལ། དེ་ནི་མདོ་སྡེ་པའི་ཚུལ་དུ་མ་བྱུང་བ་ལས་བྱུང་བའི་མཚན་ཉིད་ཅན་ཡིན་ལ། དེ་ལ་ནི་ཇི་ལྟར་འགྲོ་བ་པོ་དང་འབྲས་ཆན་དང་ཚོས་པ་ལྟར་མ་རིག་པ་ལ་སོགས་པ་རྣམས་དང༌། བྱེད་པ་པོ་དང༌། བྱ་བའི་མཚན་ཉིད་ཀྱི་འབྲེལ་པ་ཡོད་པ་ཡིན་ནོ། །དེ་ལྟར་ན་མ་རིག་པ་ལ་སོགས་པ་དག་གི་འབྱུང་བ་ཞེས་འབྲེལ་པར་གྱུར་ན། རྟེན་ཅིང་འབྲེལ་པར་འབྱུང་བ་རྟག་པའི་དབང་དུ་བྱས་ཏེ། འདི་ནི་མ་རིག་པ་ལ་སོགས་པ་དང་ཅི་ཞིག་འབྲེལ་ཞེས་བྱ་བ་རྒྱས་པར་བརྗོད་དེ། བྱ་བ་དང་བྱེད་པའི་མཚན་ཉིད་ཀྱི་འབྲེལ་པ་མེད་པའི་ཕྱིར་རོ། །ཡང་ན་འབྱུང་བ་ཞེས་བྱ་བ་ནི་སྐྱེ་བ་ཡིན་པའི་ཕྱིར། གང་ལས་དེ་དག་གི་རྟེན་ཅིང་འབྲེལ་པར་འབྱུང་བ་ཞེས་བྱ་བར་བརྗོད་པར་འགྱུར་བ། ཁྱེད་ཅག་གིས་ཡོངས་སུ་བརྟགས་པའི་སྐྱེ་བ་དུས་སུམ་གཏོགས་པ་འདི་མ་རིག་པ་ལ་སོགས་བ་དུས་སུ་གཏོགས་པ་དག་དང་ཅི་ཞིག་འབྲེལ། རྟག་པ་ཞེས་ཀྱང་བྱ་ལ་ཞེས་བྱ་བ་རྒྱས་པར་འབྱུང་བ་ལ། རྐྱེན་དང་ཕྲད་ནས་འབྱུང་བ་ནི་རྟེན་ཅིང་འབྲེལ་པར་འབྱུང་བའོ་ཞེས་བྱ་བ་ནི་སྒྲ་བྱེ་བྲག་ཏུ་བཤད་པ་ཡིན་ནོ། །དེའི་ཕྱིར་ཚིག་གི་དོན་ནུས་པ་མེད་པར་འགྱུར་ཏེ། ཇི་ལྟར་ན་རྐྱེན་དང་ཕྲད་དེ་འབྱུང་བ་ཡང་ཡིན་ལ་རྟག་པ་ཡང་ཡིན། དེ་ཉིད་ཀྱི་ཕྱིར་རྟག་པ་ཞེས་ཀྱང་བྱ་ལ་རྟེན་ཅིང་འབྲེལ་པར་འབྱུང་བ་ཞེས་ཀྱང་བྱ་ཞེས་བྱ་བ་སྨོས་ཏེ་འདི་ནི་འགལ་ལོ། །གཞན་ཡང་མ་རིག་པ་ལ་སོགས་པ་དག་ལས་གཞན་ནམ་གཞན་མ་ཡིན་པའམ། དེ་དག་ལ་བརྟེན་ནས་ཡིན་གྲང་ན་རྣམ་པ་ཐམས་ཅད་དུ་མི་རིགས་ཏེ།
རང་གི་ངོ་བོ་ངེས་པར་མ་ཟིན་པའི་ཕྱིར་དང༌། དུ་མ་ཉིད་དུ་མི་རྟག་པ་ཉིད་ཀྱིས་ཉེ་བར་མཐོང་བའི་ཕྱིར་རོ། །མདོའི་དོན་སྒྲ་ཇི་བཞིན་དུ་བརྟག་ན་ནི། དགེ་སློང་དག་ངས་ལམ་རྙིང་པ་ཤུལ་རྙིང་པ། གཤེགས་ཤུལ་རྙིང་པ། སྔོན་གྱི་དྲང་སྲོང་དག་གིས་གཤེགས་ཤིང་རྗེས་སུ་གཤེགས་པ་ཐུགས་སུ་ཆུད་དོ་ཞེས་གསུངས་པའི་ཕྱིར་ལམ་ཡང་འདུས་མ་བྱས་ཉིད་དུ་ཐལ་བར་འགྱུར་ན། ཡང་དག་པའི་ལྟ་བ་ལ་སོགས་པ་ལམ་རྣམས་ནི་འདུས་མ་བྱས་ཉིད་དུ་རིགས་པ་ཡང་མ་ཡིན་ལ། དེ་དག་ལས་མ་གཏོགས་པའི་ལམ་གཞན་ཡང་མེད་དོ། །རྟེན་ཅིང་འབྲེལ་པ་ནི་ཕྲད་པའི་དོན་ཏོ་ཞེས་བྱ་བ་ལ། ཨིཎ་འགྲོ་བ་ལའོ་ཞེས་བྱ་བའི་སྒྲའི་བྱིངས་ཀྱིས་ཉེ་བར་བསྒྱུར་བ་ནི་ཕྲད་པ་ཞེས་བྱ་བའི་དོན་ཅན་ནོ། །ཉེ་བར་བསྒྱུར་བའི་དབང་གིས་ཞེས་བྱ་བ་ལ། །ཨི་ཎའི་སྐད་ཀྱིས་བྱིངས་འགྲོ་བའི་དོན་ཡིན་ཡང་འགྲོ་བའི་དོན་ཁྱད་དུ་བསད་ནས་ད་ལྟར་བྱུང་བའི་དོན་ཡོངས་སུ་གཟུང་བས་སྐད་ཀྱི་བྱིངས་ཀྱི་དོན་ཡོངས་སུ་བསྒྱུར་བ་ཡིན་ཏེ། དེའི་ཕྲད་ནས་ཞེས་བྱ་བའི་དོན་གང་ཡིན་པ་དེ་ནི་རྟེན་ཅིང་འབྲེལ་ཏེ་ཞེས་བྱ་བའི་དོན་ཡིན་ནོ། །རེ་ཞིག་འདི་ནི་རྟེན་ཅིང་འབྲེལ་ཏེ་ཞེས་བྱ་བའི་སྒྲའི་དོན་ཡིན་ནོ། །ད་ནི་འབྱུང་བའི་དོན་བྱེ་བྲག་ཏུ་བཤད་པའི་ཕྱིར། བ་ད་ནི་ཡོད་པའི་དོན་ཏོ་ཞེས་བྱ་བ་སྨོས་སོ། །པ་ད་ཡོད་པ་ལའོ་ཞེས་བྱ་བ་པ་དའི་བྱིངས་ནི་ཡོད་པའི་དོན་ཡིན་ནོ། །སམ་དང་ཨུཏ་གོང་ན་ཡོད་ན་ཞེས་བྱ་བ་ལ། སམ་གོང་ན་ཡོད་པ་དང་ཨུཏ་གོང་ན་ཡོད་པའི་པ་ད་ནི་འབྱུང་བའི་དོན་ཏེ། ཉེ་བར་བསྒྱུར་པའི་དབང་གིས་སྐད་ཀྱི་བྱིངས་ཀྱི་དོན་ཡོངས་སུ་བསྒྱུར་བའི་ཕྱིར་རོ། །དེ་ལྟར་ན་འབྱུང་བ་ནི་རབ་ཏུ་སྐྱེ་བའོ་ཞེས་བྱ་བར་བསྟན་པར་འགྱུར་རོ། །དེས་ན་ཞེས་བྱ་བ་ནི་དེའི་ཕྱིར་ཞེས་བྱ་བའི་དོན་ཏོ། །ཅི་ཞེ་ན། རྐྱེན་དང་ཕྲད་ནས་ཞེས་བྱ་བ་རྒྱས་པར་འབྱུང་ངོ༌། །གནས་བརྟན་འདུས་བཟང་ན་རེ། བྱིངས་དང་ཉེ་བར་བསྒྱུར་བ་དག་ཡོད་པའི་དོན་དུ་ཡོངས་སུ་རྟོགས་པ་ལས་ནི། ཡོད་པའི་དོན་གྱིས་ཅི་ཐོབ་པར་བྱེད་ཅེ་ན། དེ་ནི་ནམ་ཡང་ཡོད་པ་མ་ཡིན་ཞིང་སྐྱེ་བ་མ་ཡིན་ནོ། །མ་ཡིན་ཡང་འགའ་ཞིག་འབྱུང་བ་དག་ནི་ཡོད་པ་ལས་ཆེས་གཞན་པས་དོན་མ་ཡིན་ནོ། །སྐྱེ་བའི་སྒྲས་ནི་སྔར་ཡོད་པ་མ་ཡིན་པའི་བདག་ཉིད་
ཐབ་པར་བརྗོད་ལ། ཡོད་པའི་སྒྲས་ནི་ཡོད་པ་ཉིད་ཙམ་མོ་ཞེས་ཟེར་རོ། །ཅི་ལྟར་ཁམས་དང་ཉེ་བར་བསྒྱུར་བ་དག་དོན་ཁྱད་པར་མེད་པར་འགྱུར། བྱེད་པ་པོ་གཅིག་གིས་ཞེས་བྱ་བ་ལ། གཅིག་སྨོས་པ་ནི་དཔེར་ན་ལྷས་བྱིན་ཁྲུས་བྱས་ནས་མཆོད་སྦྱིན་ཟའོ་ཞེས་བྱ་བ་ལྟ་བུ་བྱེད་པ་པོ་ཐ་དད་པ་དག་གི་དུས་སྔ་མ་ལ་ཀྟྭའི་རྐྱེན་གྱིས་སྒྲུབ་པ་མི་འགྱུར་རོ་ཞེས་ཤེས་པར་བྱ་བའི་ཕྱིར་རོ། །དུས་སྔ་མ་ལ་ཞེས་བྱ་བ་ལ། ཅིའི་ཕྱིར་ཞེ་ན། དཔེར་ན་འཚེད་དོ་འགྲོའོ་ཞེས་བྱ་བ་ལྟ་བུ་དང༌། དེ་བཞིན་དུ་ཁྲུས་བྱས་ཏེ། བཟའོ་ཞེས་བྱ་བ་ནི་འདིར་ཟོས་ཏེ་ཁྲུས་བྱའོ་ཞེས་བྱ་བར་ནམ་ཡང་མི་འགྱུར་བ་ལྟར་དུས་མཚུངས་པའི་བྱ་བ་དག་དང་ཕྱི་མའི་དུས་ལ་ཀྟྭའི་རྐྱེན་གྱིས་སྒྲུབ་པ་དགག་པར་བྱ་བའི་ཕྱིར་ཡིན་ན། འདིར་ནི་འབྱུང་བའི་སྔ་རོལ་ན་འབྱུང་བ་པོ་མེད་པས་ཕྲད་པ་དང་འབྱུང་བ་དག་བྱེད་པ་པོ་མཚུངས་པ་མི་སྲིད་པས་ཀྟྭའི་རྐྱེན་གྱིས་སྒྲུབ་པ་མི་འཐད་དོ། །དེའི་ཕྱིར་རྐྱེན་དང་ཕྲད་ནས་འབྱུང་བས་ན་རྟེན་ཅིང་འབྲེལ་པར་འབྱུང་བའོ་ཞེས་བྱ་བའི་ཚིག་གི་དོན་འདི་མི་རིགས་སོ། །དེ་ཉིད་བསྟན་པའི་ཕྱིར་སྔར་ཕྲད་ནས་ཞེས་བྱ་བ་རྒྱས་པར་སྨོས་ཏེ། དེ་ལྟར་ན་རེ་ཞིག་བྱེད་པ་པོ་མཚུངས་པ་ཉིད་མི་སྲིད་པས་ཀྟྭའི་རྐྱེན་གྱིས་སྒྲུབ་པ་མི་འཐད་དོ། །ད་ནི་དུས་སྔ་མའི་བྱ་བ་མེད་པའི་ཕྱིར་ཀྟྭའི་རྐྱེན་གྱིས་སྒྲུབ་པ་མི་སྲིད་པར་བསྟན་པའི་ཕྱིར་བྱེད་པ་པོ་མེད་པའི་བྱ་བ་ཡང་མེད་དོ་ཞེས་བྱ་བ་སྨོས་ཏེ། འགྲོ་བ་པོ་མེད་པར་ནི་འགྲོ་བའི་བྱ་བ་མ་མཐོང་ངོ༌། །འདིར་སྨྲས་པ་ཞེས་བྱ་བ་ནི་སློབ་དཔོན་ཉིད་བརྡ་སྤྲོད་པའི་བརྒལ་བ་ལ་བསྡུ་བའི་ཚིགས་སུ་བཅད་པ་བྱེད་པའོ། །གལ་ཏེ་འབྱུང་སྔོན་ཕྲད་ནས་ཡིན། །ཞེས་བྱ་བ་རྒྱས་པར་འབྱུང་བ་ལ་འདི་སྐད་བསྟན་པར་འགྱུར་ཏེ། གལ་ཏེ་རེ་ཞིག་འདི་འབྱུང་བའི་སྔ་རོལ་ཏུ་རྐྱེན་དང་ཕྲད་ན་ནི་མ་སྐྱེས་པའི་ཕྱིར་ཕྲད་དོ་ཞེས་བྱ་བ་མི་རིགས་ཏེ། མ་སྐྱེས་པ་འདོན་པར་བྱེད་པའམ་འགྲོ་བར་བྱེད་པ་མེད་དོ། །ཅི་སྟེ་གང་གི་ཚེ་འབྱུང་བ་དེའི་ཚེ་ཁོ་ནར་རྐྱེན་དང་ཕྲད་ཀྱི་སྔར་ནི་མ་ཡིན་ནོ་ཞེ་ན། དེ་ལྟ་ན་ཡང་འདིར་ཏེའི་རྐྱེན་མི་སྒྲུབ་པོ། ཅིའི་ཕྱིར་ཞེ་ན། སྔོན་གྱི་དུས་སུ་བྱེད་པའི་ཕྱིར་ཏེ། བྱེད་པ་པོ་གཅིག་གིས་བྱ་བ་གཉིས་ལས་སྔོན་གྱི་དུས་ལ་ཏེའི་རྐྱེན་བྱེད་
ཀྱི་དུས་མཉམ་པ་ལ་ནི་མ་ཡིན་ནོ། །གལ་ཏེ་ད་ལྟའི་ཞིག་ཡིན་ན་ནི། སྐྱེ་བ་མེད་པར་དེ་ད་ལྟར་བ་ཉིད་དུ་རུང་སྟེ། དེ་ལྟ་མ་ཡིན་ན། མ་འོངས་པ་མེད་པར་ཐལ་བར་འགྱུར་རོ། །དེའི་ཕྱིར་ད་ལྟར་བ་ནི་སྐྱེས་པའི་སྒོ་ནས་མ་འོངས་པ་ལས་ཁྱད་པར་དུ་འཕགས་ལ། མ་འགགས་པའི་སྒོ་ནས་འདས་པ་ལས་སོ། །དེ་ཉིད་ཀྱི་ཕྱིར་གལ་ཏེ་མ་སྐྱེས་ན་ཇི་ལྟར་ད་ལྟར་ཡིན་ཞེས་སྨོས་སོ། །འོན་ཏེ་སྐྱེས་པ་ཞིག་ཅེས་བྱ་བ་རྒྱས་པར་འབྱུང་སྟེ། འདི་ནི་སྐྱེས་པས་ཡོད་པའི་བདག་ཉིད་རྙེད་པ་ཡིན་ན། འདི་ལ་གང་རྙེད་པར་བྱ་བའི་ཕྱིར་ཡང་སྐྱེ་བར་འགྱུར་བ་ཡོད་པའི་བདག་ཉིད་མ་རྙེད་པ་གཞན་ནི་ཡོད་པ་མ་ཡིན་ནོ། །དེའི་ཕྱིར་སྐྱེས་པ་ལས་ཡང་སྐྱེ་བ་མེད་དོ། །གལ་ཏེ་བདག་ཉིད་རྙེད་ཀྱང་ཡང་སྐྱེ་ན་ནི་ཐུག་པ་མེད་པར་ཐལ་བར་འགྱུར་རོ། །ཅི་སྟེ་མ་འོངས་པ་ཞིག་ཅེས་བྱ་བ་རྒྱས་པར་འབྱུང་བ་ལ། མ་འོངས་པ་ནི་བདག་ཉིད་རྙེད་པས་བརྗོད་དུ་མེད་པ་ཡིན་པའི་ཕྱིར། གཏན་མེད་པ་དང་འདྲ་བར་མེད་པ་ཡིན་ཞིང༌། ཡོད་པ་མ་ཡིན་པ་ཡང་སྐྱེ་བའི་བྱེད་པ་པོ་ཉིད་དུ་མི་རིག་ལ། བྱེད་པ་པོ་མེད་པའི་སྐྱེ་བའི་བྱ་བ་ཡང་མི་རིགས་སོ། །སྐྱེ་བ་ལ་མངོན་དུ་ཕྱོགས་པའི་ཞེས་བྱ་བ་ནི་སྐྱེ་བཞིན་པའི་ཐག་རིང་པའི་གནས་སྐབས་གསལ་བར་བྱ་བའི་ཕྱིར་རོ། །འདི་གང་གི་ཚེ་སྐྱེ་བཞིན་པ་ཡིན་ཞེ་ན། སྐད་ཅིག་གང་དུ་འདིའི་རྐྱེན་ཚོགས་པ་དང༌། གེགས་མེད་པར་འགྱུར་ཞིང་དེའི་མཇུག་ཐོགས་སུ་སྐྱེ་བར་འགྱུར་བའོ། །གནས་སྐབས་དེ་དེ་ཁོ་ན་ཞེས་བྱ་བ་རྒྱས་པར་འབྱུང་བ་ལ། ཇི་ལྟར་གནས་སྐབས་གང་གི་མཇུག་ཐོགས་སུ་འདི་སྐྱེ་བའི་གནས་སྐབས་དེར་འདི་ལ་སྐྱེ་བཞིན་པ་ཞེས་བྱ་བ་ལ། །དེ་བཞིན་དུ་གནས་སྐབས་དེ་ཉིད་ལ་རྐྱེན་དག་གིས་རྒྱུ་མཚན་དུ་གྱུར་པས་ཕྲད་ནས་ཞེས་བརྗོད་དོ། །སྐྱེ་བཞིན་པ་ཉིད་ཀྱང་ཡོད་པ་མ་ཡིན་པ་ཉིད་ཀྱི་ཕྱིར་རོ། །གང་ཞིག་སྔར་ཕྲད་ནས་དུས་ཕྱིས་སྐྱེ་བར་འགྱུར་བ། སྐྱེ་བའི་སྔ་རོལ་ན་ནི་འགའ་ཡང་ཡོད་པ་མ་ཡིན་ནོ། །འདི་ནི་བརྒལ་བའི་གནས་སྐབས་ཉིད་ཅེས་བྱ་བ་ནི། དེ་ཉིད་གནས་བརྟན་གཞན་གྱིས་མ་འོངས་པ་སྐྱེ་བ་ཁས་བླངས་པའོ། །གཞན་ལས་བཤད་པ་འདི་ཕྲད་པ་ལས་སྐྱེ་བ་བཞིན་དེའི་གནས་སྐབས་ཉིད་དུ་འགྱུར་རོ་ཞེས་བཤད་དོ། །ཐ་སྙད་རྣམས་ལ་ཀླན་ཀ་མེད་དོ་ཞེས་བྱ་བ་ལ། དོན་དམ་པ་ལ་ནི་བྱ་བ་མེད་ཅིང་བྱེད་པ་མེད་
དོ། །རྒྱུ་ཡོད་པ་ཙམ་ནི་འབྲས་བུ་ཡོད་པ་ལ་རྒྱུར་འགྱུར་བའི་ཕྱིར་རོ། །ཆོས་མངོན་པ་པའི་ཕྱོགས་ལ་ཇི་སྐད་བཤད་པའི་འདིའི་ཉེས་པ་མི་སྲིད་དེ། དེ་དག་གི་ཡོད་པ་ནི་སྔར་སྐྱེས་པ་དང་མ་སྐྱེས་པ་འགའ་ཞིག་ཡོད་པ་ཉིད་ཀྱིས་ཞེས་སོ། །གལ་ཏེ་ད་ལྟར་བྱུང་པ་བཞིན་མ་འོངས་པ་ཡང་རང་གི་མཚན་ཉིད་ཀྱིས་ཡོད་ན་ཅི་བརྗོད་པར་བྱེད། འགའ་ཞིག་ཡོད་པ་ཉིད་ཀྱིས་ཞེས་བྱ་བ་རང་གི་མཚན་ཉིད་ལས་གཞན་ཡོད་པ་ཉིད་ཡོད་པ་མ་ཡིན་ནོ། །སྒྲ་པའི་ཞེས་བྱ་བ་ལ། སྒྲ་བ་རྣམས་ཀྱི་འདི་ནི་སྒྲ་བའིའོ། །ཇི་ལྟར་རྣམ་པར་གཞག་པ་ཐ་དད་པ་མེད་ཀྱང་བྱ་བ་དང་བྱེད་པ་པོ་བསྟན་པའི་ཕྱིར་རོ། །འདི་ལ་སྐྱེའོ་ཞེས་བྱ་བའི་དོན་ལས་ཞེས་བྱ་བ་ལ། སྐྱེ་བོའི་རང་གི་ངོ་བོ་ལས་བྱུང་བ་གཞན་དམིགས་པ་ནི་མ་ཡིན་ནོ། །དེ་ལྟ་བས་ན་ཐ་སྙད་དག་ལ་སྟེ། །འབྱུང་ངོ༌། །སྐྱེའོ། བརྟེན་ནས་སོ། །ཞེས་བྱ་བ་དེ་ལྟ་བུ་དག་ལ་ཀླན་ཀ་མེད་དོ། །འདི་ལྟར་ཐ་སྙད་དག་ལ་དོན་དམ་པ་མི་བཙལ་ལོ། །འདིར་བཤད་པ་ཞེས་བྱ་བ་ནི་བརྒལ་བའི་ལེན་གྱིས་བསྡུ་བའི་ཚིགས་སུ་བཅད་པའོ། །ཇི་ལྟར་མེད་པ་སྐྱེ་བ་ལྟར་ཞེས་བྱ་བ་རྒྱས་པར་འབྱུང་སྟེ། ཇི་ལྟར་ཁྱེད་ཅག་གི་ལྟར་མ་སྐྱེས་པའི་ཕྱིར་མེད་པ་སྐྱེ་བ་དེ་བཞིན་དུ་མེད་པ་ཕྲང་པར་ཡང་ཅི་སྟེ་མི་འདོད། ཅི་སྟེ་ཡོད་པ་བདག་ཉིད་རྙེད་པ་སྐྱེ་ན། དེ་ལྟ་ན་ཡང་སྐྱེས་ཟིན་པ་སྐྱེ་བས་ཐུག་པ་མེད་པར་འགྱུར་རོ། །ཅི་སྟེ་ཡང་དེ་ཉིད་སྐྱེ་བ་ཡིན་ལ། སྐྱེས་ཟིན་པའི་ཕྱིར་དེ་ཡང་འབྱུང་བ་མ་ཡིན་པས་ཐུག་པ་མེད་པ་མེད་དོ་སྙམ་ན། དེའི་ཕྱིར་འོན་ཏེ་སྔ་ན་ཡོད་ནའང་རུང་ཞེས་བྱ་བ་སྨོས་ཏེ། འདི་ལྟར་གྲངས་ཅན་པའི་རྗེས་སུ་འབྲངས་ཏེ་དེ་ཉིད་སྐྱེའི་ཕྱིས་ནི་མ་ཡིན་ནོ་ཞེས་བྱ་བ་དེའི་དབང་དུ་བྱས་ནས་སྔ་ན་ཡོད་ན་རུང་ཞེས་སྨྲའོ། །རུང་ཞེས་བྱ་བའི་སྒྲ་ནི་རྣམ་པར་བརྟག་པའོ། །གལ་ཏེ་ཁྱེད་ཅག་ཡོད་པ་སྐྱེའོ་ཞེས་བྱ་བའི་ཕྱོགས་ལ་ནི་ཁོ་བོ་ཅག་ཀྱང་ཡོད་པ་སྐྱེའོ། །བྱེ་བྲག་ཏུ་སྨྲ་བའི་ལུགས་ལ་ཐ་དད་མི་གནས་པའི་ཕྱིར་དང༌། མདོ་སྡེ་པའི་ལུགས་ལ་སྐྱེ་བའི་ལས་ཀྱི་ས་བོན་ཡོད་པ་མ་ཡིན་པའི་ཕྱིར་དེ་འདིར་བརྗོད་པས་ཅི། དེའི་ཕྱིར་སྔར་ཕྲད་ནས་ཕྱིས་སྐྱེ་བར་འགྱུར་བ་གང་ཡིན་པ་དེ་ནི་སྐྱེ་བའི་སྔོན་རོལ་ན་འགའ་ཡང་མེད་ལ་ཞེས་བརྗོད་པར་མི་བྱའོ། །ཡང་ན་མཚམས་
སྦྱོར་གྱི་འདོན་པས་འོན་ཏེ་སྔ་ན་ཡོད་མིན་ནའང་ཞེས་བྱ་བ་འབྱུང་སྟེ། ཅི་སྟེ་ཐུག་པ་མེད་པར་འགྱུར་ན་མི་རུང་བས། ཡོད་པ་མ་ཡིན་པ་ཉིད་སྐྱེ་ན་ནི་དེའི་ཕྱིར་བྱེད་པ་པོ་མེད་པའི་བྱ་བ་ཡང་ཁས་བླངས་པས། གནས་སྐབས་གང་སྐྱེ་བའི་གནས་སྐབས་དེ་ཉིད་དང་ཕྲད་ནས་ཞེས་བྱ་བ་ཡིན་ན་ཞེས་གང་ཡིན་པའི་སྔར་གྱི་ཕྱོགས་དང་མི་འགལ་ལོ། །དེ་ལྟ་ན་དུས་དང་བྱ་བ་དག་མཉམ་པའི་ཕྱིར་ཀྟྭའི་རྐྱེན་མི་འཐད་དོ་ཞེས་བྱ་བའི་བརྒལ་བ་ཡོངས་སུ་སྤངས་པའི་ཕྱིར་ཚིགས་སུ་བཅད་པ་གཞན་ལྷན་ཅིག་པའང་ཀྟྭའི་རྐྱེན་ཡོད་དེ་ཞེས་བྱ་བ་རྒྱས་པར་འབྱུང་ངོ༌། །མུན་པ་ནི་སྔར་མར་མེ་དང་ཕྲད་ནས་ཕྱིས་མེད་པར་འགྱུར་བ་མ་ཡིན་ཏེ། མར་མེ་དང་མུན་བ་དག་ནི་ལྷན་ཅིག་མི་གནས་པའི་ཕྱིར་རོ། །ཁ་གདངས་ནས་ཉལ་བའང་དེ་བཞིན་ཏེ། སྔར་ཁ་གདངས་ཤིང་བགྲོད་པར་བྱེད་ལ། ཕྱིས་ཉལ་བ་ནི་མ་ཡིན་ནོ། ཅི་སྟེ་ཁ་གདངས་པར་བྱེད་ལ་ཕྱིས་ཉལ་ལོ་ཞེ་ན། གལ་ཏེ་དེ་ལྟ་ན་བཙུམས་པ་ལ་ཡང་ཅིའི་ཕྱིར་མ་ཡིན། གང་གི་ཚེ་སྔར་གདངས་ནས་ཕྱིས་བཙུམས་ཏེ་གཉིད་ལོག་པ་དེའི་ཚེ་ཁ་གདངས་ནས་ཉལ་ཞེས་ཅི་སྟེ་མ་བརྗོད། དེའི་ཕྱིར་ཉལ་བ་དང་ལྷན་ཅིག་ཏུ་འཇུག་པའི་ཁ་གདངས་པ་མངོན་པར་འདོད་པ་ཤེས་པར་བྱའོ། །དབྱུ་གུ་ཁྲོལ་ཟེར་ཏེ་ལྟུང་ངོ་ཞེས་ཕྱིས་ཀྱི་དུས་ལ་ཡང་ཀྟྭའི་རྐྱེན་དམིགས་སོ། །ཅུར་ཁྲོལ་ཟེར་ཏེ་ཕྱིས་ལྷུང་བ་ནི་མ་ཡིན་ཏེ། སྒྲ་ནི་མངོན་པར་བརྡབས་པའི་རྒྱུ་ལས་བྱུང་བའི་ཕྱིར་རོ། །བྱེད་པ་པོ་ཐ་དད་པ་ལ་ཡང་མཐོང་སྟེ། ཇི་སྐད་དུ། རྒྱལ་མཚན་མཐོང་བས་ཤིང་རྟ་དང་མུན་པ་ཟས་ཁ་དོག་བཟང་པོ་
འབར་བ ་བཞིན་དང་དུང་གི་སྒྲ་ཐོས་པ་ལས་གཡོ་བ་དང་རྔ་བོ་ཆེ་བརྡུངས་པ་ལས་རྗེས་སུ་བརྩེ་བ་བཞིན་ནོ་ཞེས་པ་ལྟ་བུའོ། །དེའི་ཕྱིར་བྱེད་པ་པོ་མཚུངས་པའི་དུས་སྔ་མ་ལ་ཞེས་བྱ་བ་འདི་མཐའ་གཅིག་ཏུ་མ་ཡིན་ནོ། །བཙུན་པ་པི་ལིནདའི་བུ་ན་རེ། མེད་པ་དང་ཡོད་པ་མ་བཟུང་བར་སྒྲ་འཇུག་པ་ཡོད་པ་མ་ཡིན་ལ། ཡོད་པ་ཐ་སྙད་ཀྱི་ཡན་ལག་གི་ཕྱིར་རོ། །དེས་ན་མ་འོངས་པའི་གནས་སྐབས་ལ་ཡང་འདི་ལས་གང་དུ་དེ་ཡོད་དེ་དཔེར་ན་མྱུ་གུ་སྐྱེ་བ་དང་ཤིང་རྟ་སྐྱེ་བ་བཞིན་ནོ་ཞེས་ཟེར་ཏེ་འདི་ནི་ཀླན་ཀ་མ་ཡིན་པ་ཉིད་དོ། །གཞན་དག་ནི་ཞེས་བྱ་བ་ནི་སློབ་དཔོན་དཔལ་ལན་ནོ། །རྟེན་ཅིང་
འབྲེལ་པ་ནི་བཟློས་པའི་དོན་ཏོ་ཞེས་བྱ་བ་ལ། བཟློས་པ་ནི་ཁྱབ་པར་འདོད་པ་སྟེ། སྣ་ཚོགས་ལ་ཁྱབ་པར་འདོད་པ་ནི་བཟློས་པའི་འོ། །རྟེན་བརྗོད་པ་སྣ་ཚོགས་པ་ཐམས་ཅད་ལ་བྱ་བ་དང་ཡོན་ཏན་དག་གིས་ཅིག་ཅར་ཁྱབ་པར་འདོད་པ་ནི་བཟློས་པ་སྟེ། དཔེར་ན་འདིས་གྲོང་རེ་རེ་ལ་སྐུད་པ་བྱིན་ནོ་ཞེས་བྱ་བ་ལྟ་བུའམ། གྲོང་རེ་རེ་ཞིང་ཉམས་དགའོ་ཞེས་བྱ་བ་ལྟ་བུའོ། །ཨི་ཏི་ནི་འགྲོ་བར་རུང་སྟེ་ཞེས་བྱ་བ་ནི་ཆས་པར་རོ། །ཨི་ཏི་ནི་འགྲོ་བ་ཡིན་ནོ་ཞེས་བསྟན་པའི་ཕྱིར་མི་སྡོད་པའོ་ཞེས་བྱ་བ་སྨོས་ཏེ་འཇིག་པའོ་ཞེས་བྱ་བའི་དོན་ཏོ། །ཨུད་གོང་ན་ཡོད་པའི་པ་ད་ནི་འབྱུང་བའི་དོན་ཏོ་ཞེས་བྱ་བ་ལ། སྐད་ཀྱི་བྱིངས་འགྲོ་བའི་དོན་ཡིན་ཡང༌། ཉེ་བར་བསྒྱུར་བའི་དབང་གིས་འབྱུང་བའི་དོན་དུ་ཡང་འགྱུར་རོ། །ཚོགས་པ་དེ་དང་དེ་ན་འགྲོ་བར་རུང་བ་ཞེས་བྱ་བས་ནི་རྟེན་ཅིང་འབྲེལ་པ་བཟློས་པའི་དོན་ཉིད་དུ་གསལ་བར་བྱེད་པའོ། །འདུས་ནས་སྐྱེ་བ་ནི་ཞེས་བྱ་བ་ལ། གཅིག་པུ་སྐྱེ་བ་ནི་འགའ་ཡང་མེད་དེ་ལྷན་ཅིག་སྐྱེ་བར་ངེས་པའི་ཕྱིར་རོ། །རེ་ཞིག་གཟུགས་ཅན་ནི་འདོད་ན་དབང་པོ་མེད་པ་དང༌། སྒྲ་མེད་ཕྲ་རབ་རྡུལ་རྫས་བརྒྱད། །ཅེས་བྱ་བ་དེ་ལྟ་བུ་ལ་སོགས་པའོ། །གཟུགས་ཅན་མ་ཡིན་པ་ནི། སེམས་དང་སེམས་བྱུང་ངེས་ལྷན་ཅིག །ཐམས་ཅད་འདུས་བྱས་མཚན་ཉིད་དང༌། །ལྷན་ཅིག་སྐྱེའོ་ཞེས་བྱ་བའོ། །རྟོགས་པ་འདི་ནི་ཁོ་ན་ལ་ཞེས་བྱ་བ་ལ། རྟེན་ཅིང་འབྲེལ་པར་བཟློས་པའི་དོན་དུ་མི་འགལ་བའི་ཕྱིར་དང༌། འདུས་ནས་སྐྱེ་པ་མི་འགལ་བའི་ཕྱིར་རྟེན་ཅིང་འབྲེལ་བར་འབྱུང་བ་འདིར་ནི་བརྟག་པར་རུང་ན། འདི་ལ་ནི་རྟོགས་པ་འདི་ཇི་ལྟར་བཏུབ་སྟེ། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེའོ། །ཞེས་རྟེན་ཅིང་འབྲེལ་པར་བཟློས་པ་མི་སྲིད་པའི་ཕྱིར་དང༌། འདུས་ཏེ་སྐྱེ་བ་མི་སྲིད་པའི་ཕྱིར་རོ། །འདི་ལ་ནི་མིག་དང་གཟུགས་ཕྲད་ནས་ཞེས་བྱ་བར་རྟོགས་ཀྱི་བཟློས་པའི་དོན་ནི་མ་ཡིན་ནོ། །འགྲོ་བར་རུང་བ་རྣམས་འདུས་ནས་སྐྱེའོ། །ཞེས་བྱ་བར་རྟོགས་པ་ཡང་མ་ཡིན་ཏེ། འོ་ན་ཅི་ཞེ་ན། མིག་གི་རྣམ་པར་ཤེས་པ་ཁོ་ན་ཡིན་ནོ། །དེའི་ཕྱིར་དེའི་གནས་སྐབས་ཁོ་ན་ལ་རྒོལ་བ་
ཡིན་ནོ། །གཞན་ཞེས་བྱ་བ་སྐྱེ་བའི་སྔ་རོལ་ཏུ་ཡོད་པ་ཉིད་ལ་རུང་སྟེ། གལ་ཏེ་ལྷན་ཅིག་ཀྟྭའི་རྐྱེན་མ་གྲུབ་པ་དེ་སྔ་མའི་དུས་ལ་གྲུབ་པའི་ཕྱིར་རོ། །ངེས་པར་གཟུང་བའི་དོན་ཏེ་ཞེས་བྱ་བ་ལ། གང་ཡང་རུང་བ་ཞིག་བརྗོད་ན་ནི་ངེས་པར་མ་གཟུང་བར་འགྱུར་ལ། ངེས་པར་མ་གཟུང་ན་ཡང་འདུ་བྱེད་ལ་སོགས་པ་རྣམས། མ་རིག་པ་ལ་སོགས་པ་དག་ལས་གཞན་པའི་རྐྱེན་ཅན་ཉིད་ཡིན་པ་མ་བཀག་པར་འགྱུར་ཏེ། དཔེར་ན་མིག་ཡོད་ན་མིག་གི་རྣམ་པར་ཤེས་པ་འབྱུང་ངོ༌། །ཞེས་ངེས་པར་མ་གཟུང་བས་གཟུགས་ཡོད་ན་འབྱུང་ངོ་ཞེས་བྱ་བར་རྟོགས་པ་བཞིན་ནོ། །དེའི་ཕྱིར་ངེས་པར་གཟུང་བའི་དོན་དུ། གང་ཡོད་ན་གང་འབྱུང་བ་དེ་ཉིད་སྐྱེས་པས་དེ་སྐྱེའི་གཞན་སྐྱེས་པ་ནི་མ་ཡིན་ལ། གང་སྐྱེས་པས་གང་སྐྱེ་བ་དེ་ཉིད་ཡོད་ན་དེ་འབྱུང་གི་གཞན་ཡོད་ན་ཡང་ནི་མ་ཡིན་ནོ་ཞེས་རྣམ་གྲངས་གཉིས་བརྗོད་དོ། །མདོ་གཞན་གྱིས་རྣམ་གྲངས་གཉིས་ངེས་པར་གཟུང་བའི་དོན་ཉིད་དུ་བསྟན་པའི་ཕྱིར་དཔེར་ན་གཞན་ལས་ཞེས་བྱ་བ་སྨོས་སོ། །མ་རིག་པ་ཡོད་ན་ཞེས་བྱ་བ་རྒྱས་པར་འབྱུང་སྟེ། དེ་ལྟར་བཤད་ན་མ་རིག་པ་སྐྱེས་པས་འདུ་བྱེད་རྣམས་སྐྱེའོ། །མ་རིག་པ་ཁོ་ན་ཡོད་ན་དེ་དག་འབྱུང་གི་གཞན་ཡོད་ན་ཡང་མ་ཡིན་ནོ། །དེ་བཞིན་དུ་གཞན་ལ་ཡང་བརྗོད་པར་བྱའོ། །ཡང་ན་ཡན་ལག་འདི་ཡོད་ན་འདི་འབྱུང་ངོ་ཞེས་བྱ་བ་རྒྱས་པར་འབྱུང་བ་ལ། མ་རིག་པ་ཡོད་ན་འདུ་བྱེད་དག་འབྱུང་ལ། འདུ་བྱེད་དག་སྐྱེས་པས་ཡང་རྣམ་པར་ཤེས་པ་སྐྱེའོ། །ཞེས་དེ་ལྟར་ཡན་ལག་བཅུ་གཉིས་བརྒྱུད་པར་བསྟན་ཏོ། །ཡང་ན་སྔོན་གྱི་མཐའ་ཡོད་ན་ཞེས་བྱ་བ་རྒྱས་པར་འབྱུང་བ་སྟེ། སྔོན་གྱི་མཐའ་ནས་ད་ལྟར་གྱི་མཐའ་འབྱུང་ངོ་ཞེས་བྱ་བ་འདི་བསྟན་པའི་ཕྱིར་འདི་ཡོད་ན་འདི་འབྱུང་ཞེས་བྱ་བ་གསུངས་ལ། ད་ལྟར་གྱི་མཐའ་སྐྱེས་པས་ཕྱི་མའི་མཐའ་སྐྱེའོ་ཞེས་བྱ་བ་འདི་བསྟན་པའི་ཕྱིར་འདི་སྐྱེས་པས་འདི་སྐྱེའོ་ཞེས་བྱ་བ་འདི་གསུངས་སོ། །ཡང་ན་རེས་འགའ་ནི་ཞེས་བྱ་བ་འབྱུང་སྟེ། དེ་ལ་རེ་ཞིག་དངོས་སུ་བསྟན་ན་གང་གི་ཚེ་མ་རིག་པའི་མཇུག་ཐོགས་སུ་འདུ་བྱེད་ཉོན་མོངས་པ་ཅན་སྐྱེ་བ་ནའོ། །བརྒྱུད་པས་ནི་གང་གི་ཚེ་བསོད་ནམས་དང་མི་གཡོ་བ་སྐྱེ་བ་ན་སྟེ། དེ་ལ་ནི་མ་རིག་པ་དངོས་སུ་རྒྱུའི་ངོ་བོ་མ་ཡིན་
ནོ། །གཞན་དག་ན་རེ་ལས་རང་གི་ངོ་བོས་གནས་པ་ནི་དངོས་སུ་ཡིན་ལ། བག་ཆགས་ཀྱི་གནས་ནི་བརྒྱུད་པས་ཡིན་ནོ་ཞེས་ཟེར་རོ། །འདི་ལ་མ་རིག་པས་འདུ་བྱེད་དག་ལ་ནི་དངོས་སུ་ནུས་ལ་རྣམ་པར་ཤེས་པ་ལ་སོགས་པ་དག་ལ་ནི་བརྒྱུད་པས་སོ་ཞེས་རྣམ་པར་འཆད་པ་ནི་བཤད་པ་དང་འགལ་ཏེ། འདུ་བྱེད་རྣམས་ཁོ་ན་ལ་གཉིས་ག་བསྟན་པའི་ཕྱིར་རོ། །འདི་ཡོད་ན་འདི་འབྱུང་ཞེས་བྱ་བ་འདིས་ནི་རྒྱུ་མེད་པར་སྨྲ་བ་བ་བཀག་སྟེ། རྒྱུ་མེད་ན་འབྲས་བུ་མེད་པའི་ཕྱིར་རོ། །འདི་སྐྱེས་པས་འདི་སྐྱེ་ཞེས་བྱ་བ་འདི་ས་ནི་རྒྱུ་རྟག་བ་བཀག་སྟེ། སྐྱེས་པ་ཁོ་ན་རྒྱུ་ཡིན་པའི་ཕྱིར་མ་སྐྱེས་པ་རྒྱུ་མ་ཡིན་ནོ་ཞེས་བཤད་པར་འགྱུར་ཏེ། རྟོག་པ་འདི་ལ་ནི་ཡོད་ན་འདི་འབྱུང་ཞེས་བྱ་བ་འདི་དོན་མེད་དོ། །ཅིའི་ཕྱིར་ཞེ་ན་འདི་སྐྱེས་པས་འདི་སྐྱེ་ཞེས་བྱ་བ་འདི་ཁོ་ནས་སྨྲས་པ་གཉིས་ཀ་བསལ་ཏེ། རྒྱུ་མི་རྟག་པ་ཡོངས་སུ་གཟུང་བའི་ཕྱིར་རོ། །སུན་འབྱིན་པ་འདི་སླར་ལན་གདབ་པའི་ཕྱིར། འོ་ན་ནི་གང་ལ་ལ་དག་ཅེས་བྱ་བ་རྒྱས་པར་སྨོས་སོ། །འདུ་བྱེད་ལ་སོགས་པ་རྣམས་ཞེས་བྱ་བ་ལ་སོགས་པ་ཞེས་བྱ་བའི་སྒྲ་ས་ནི་རྣམ་པར་ཤེས་པ་དང་མིང་དང་གཟུགས་ལ་སོགས་པ་རྣམས་བསྡུའོ། །རྟོག་པ་དེ་བསལ་བར་ཞེས་བྱ་བ་ནི་དགག་པར་རོ། །གང་ཞིག་སྐྱེས་པས་གང་སྐྱེ་བ་ནི་ཞེས་བྱ་བ་ནི་མ་རིག་པ་སྐྱེས་པས་འདུ་བྱེད་རྣམས་སྐྱེའོ། །དེ་ཉིད་ཡོད་པས་འདི་འབྱུང་གི་ཞེས་བྱ་བ་ནི་མ་རིག་པ་ཉིད་ཡོད་པས་འདུ་བྱེད་རྣམས་འབྱུང་གི་བདག་ལ་སོགས་པ་རྟེན་དུ་གྱུར་པ་གཞན་ཡོད་ན་ནི་མ་ཡིན་ནོ། །དེའི་ཕྱིར་རྣམ་གྲངས་སྔ་མ་དོན་མེད་པ་མ་ཡིན་ཏེ། དེ་བཞིན་དུ་གཞན་ལ་ཡང་བརྗོད་པར་བྱའོ། །ཇི་སྲིད་བདེན་པ་འགའ་ཞིག་ཉིད་ཀྱིས་ཞེས་བྱ་བ་ལ་སོགས་པ་ལ། རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་ལ་མྱ་ངན་ལ་སོགས་པ་ཡན་ལག་ཐ་དད་པ་མ་ཡིན་ནོ། །འོ་ན་ཅི་ཞེ་ན། རྒ་ཤི་དང་འབྲེལ་པས་དེ་ཉིད་དུ་འདུས་སོ། །འདི་ལྟར་དེ་དག་སེམས་ཅན་དང་སེམས་ཅན་མ་ཡིན་པར་སྟོན་པའི་ཡུལ་ལ་ཡོངས་སུ་འགྱུར་བའི་ཕྱིར་དང༌། བདག་ཉིད་ཡོངས་སུ་འགྱུར་བའི་ཕྱིར་རོ། །འབྱུང་ངོ་ཞེས་བྱ་བ་ནི་བྱ་བ་མཐའ་གཅིག་ཏུ་ངེས་པའི་ཕྱིར་རོ། །གཞན་དག་ན་རེ་འདི་དག་ཡན་ལག་བཅུ་གཉིས་ཀྱི་ནང་དུ་འདུས་པ་མ་ཡིན་པ་ཉིད་དོ་ཞེས་ཟེར་རོ། །མ་སྤངས་
པ་ལས་མ་སྤངས་པ་དང་སྐྱེ་བར་ཤེས་པར་བྱ་བའི་ཕྱིར་རྣམ་གྲངས་གཉིས་སྨོས་སོ་ཞེས་སློབ་དཔོན་སྔ་མ་དག་ཟེར་རོ། །དེ་ཉིད་བསྟན་པའི་ཕྱིར་མ་རིག་པ་མ་སྤངས་ན་ཞེས་རྒྱས་པར་འབྱུང་ངོ༌། །ལྟ་བ་མ་སྤངས་པ་ལ་མང་འཇིག་པའི་སྒྲ་རབ་ཏུ་སྦྱར་རོ། །ཀིནྟ་སནྟ་མེ་བཱ་ཧཾ་ཀཱ་མེ་ཥུ་ཀཱ་མཱ་ཙྪ་ནནྣ་པྲ་ཏི་སམྦེ་ད་ཡཱ་མྱུ་དཱ་སནྟ་མ་ཏི། གནས་པ་དང་སྐྱེ་བ་ཞེས་བྱ་བ་ལ་སོགས་པ་ལ་སློབ་དཔོན་དཔལ་ལེན་ན་རེ་གོ་རིམས་བཞིན་དུ་གནས་པ་ཡང་དག་པར་བསྟན་པའི་ཕྱིར་དང་སྐྱེ་བ་ཡང་དག་པར་བསྟན་པའི་རྣམ་གྲངས་གཉིས་གསུངས་སོ་ཞེས་ཟེར་རོ། །དེ་ཉིད་བསྟན་པའི་ངོན་ཀྱང་ཡོད་པ་ཉིད་བདག་འདོད་པ་རྣམས་ལ་འདོད་པའི་འདུན་པ་སོ་སོར་མྱང་བར་མི་བྱའོ།། ཕྱིར་རྒྱུའི་རྒྱུན་ཇི་སྲིད་པ་དེ་སྲིད་དུ་ཞེས་བྱ་བ་རྒྱས་པར་འབྱུང་ངོ༌། །འབྱུང་བའི་དབང་དུ་མཛད་པ་ཡིན་ན་ཞེས་བྱ་བ་ལ་འདིར་ནི་དགེ་སློང་དག་ཁྱེད་ལ་རྟེན་ཅིང་འབྲེལ་པར་འབྱུང་བ་བསྟན་པར་བྱའོ་ཞེས་རྒྱས་པར་རྟེན་ཅིང་འབྲེལ་པར་འབྱུང་བའི་དབང་དུ་བྱས་པ་ཡིན་ཏེ་དེར་གནས་པའི་དབང་དུ་མཛད་པའི་ཕྱིར་གནས་པའི་ཚིག་ཏུ་ཐལ་བ་ཅི་ཞིག་ཡོད། གནས་པ་ཡང་སྐྱེ་བ་ཉིད་དོ་ཞེ་ན། དེ་ནི་དེ་ལྟ་མ་ཡིན་ཏེ་འཇིག་པ་བཞིན་དུ་སྐྱེ་བ་འདུས་བྱས་ཀྱི་མཚན་ཉིད་གཞན་ཡིན་པའི་ཕྱིར་རོ། །སྐྱེ་བ་གཉིས་ལ་ཡང་རྣམ་གྲངས་གཞན་གྱི་ཁྱད་པར་བཤད་དོ། །ཅི་སྟེ་དང་པོར་སྐྱེད་པས་སྐྱེ་བ་དང་རྒྱུན་བསྐྱེད་པས་གནས་པ་ཞེས་བྱ་བའི་ཁྱད་པར་ཡོད་པ་རྣམ་གྲངས་ཀྱིས་བརྗོད་པ་དེ་ཉིད་ཀྱི་ཕྱིར་རིམ་པ་ཐ་དད་པ་ཞེས་བྱ་བ་རྒྱས་པར་འབྱུང་ལ། གནས་པ་ནི་སྐྱེ་བ་སྔོན་དུ་འགྲོ་བ་ཅན་ཡིན་ཏེ། དེའི་ཕྱིར་སྔར་ནི་འདི་སྐྱེས་བས་འདི་སྐྱེ་ཞེས་སྐྱེ་བ་ཁོ་ན་བརྗོད་པར་བྱ་བ་ལ། ཕྱིས་ནི་འདི་ཡོད་པས་འདི་འབྱུང་ཞེས་པས་བརྗོད་པར་བྱ་བ་འམ། གོ་རིམས་ལས་བརྒལ་ན་ཡང་དགོས་པ་བརྗོད་པར་བྱའོ། །ཡང་སྨྲས་པ་ཞེས་བྱ་བ་ནི་གནས་བརྟན་དེ་ཉིད་ཀྱིས་སོ། །གལ་ཏེ་མདོའི་དོན་ཡིན་པར་འགྱུར་ན་ནི་ཞེས་བྱ་བ་རྒྱས་པར་འབྱུང་བ་ལ། འདི་ཡོད་པས་ཞེས་བྱ་བ་ནི་འབྲས་བུ་ཡོད་པས་སོ། །འདི་ཞེས་བྱ་བ་ནི་རྒྱུ་སྟེ། ཐེ་ཚོམ་མེད་པའི་ཕྱིར་མི་འབྱུང་ངོ༌། །ཞེས་བྱ་བ་དེ་སྐད་དུ་བཀའ་སྩལ་པར་འགྱུར་ཏེ། བཅོམ་ལྡན་འདས་ཐེ་ཚོམས་ཟ་གསུང་བར་མི་འགྱུར་རོ། །འབྲས་བུ་ཡོད་ན་ཕྱིས་རྒྱུ་འཇིག་པར་འགྱུར་བ་མ་ཡིན་ཏེ། རྒྱུ་དང་འབྲས་བུ་གཉིས་ཅིག་
ཅར་དུ་མ་ཡིན་པར་ཁས་བླངས་པའི་ཕྱིར་རོ། །དེ་ལྟ་ན་གོ་རིམས་ལེགས་པ་ཡིན་ནོ་ཞེས་བྱ་བ་ལ་འཇིག་པ་སྐྱེ་བ་སྔོན་དུ་འགྲོ་བ་ཅན་ཡིན་པའི་ཕྱིར་དང༌། དེ་ཡང་སྔར་བསྟན་པའི་ཕྱིར་རོ། །གཞན་དུ་ན་ཞེས་བྱ་བ་ནི་གལ་ཏེ་སྔར་འཇིག་པ་བསྟན་ལ་ཕྱིས་སྐྱེ་བ་བསྟན་ན་སྟེ། དེའི་ཕྱིར་རྟེན་ཅིང་འབྲེལ་པར་འབྱུང་བ་གང་ཞེ་ན་ཞེས་དྲི་བ་མཛད་ནས་འདི་ལྟ་སྟེ། འདི་ཡོད་ན་འདི་འབྱུང་ཞེས་བྱ་བར་གང་ལས་འབྲས་བུ་ཡོད་ན་རྒྱུ་འཇིག་བར་འགྱུར་རོ་ཞེས་དེ་སྐད་འཆད་པར་འགྱུར་བ་འཇིག་པའི་ཚིག་ཏུ་ཐལ་བ་ཅི་ཞིག་ཡོད། བྱིས་པ་ནི་རྟེན་ཅིང་འབྲེལ་པར་འབྱུང་བ་ཞེས་བྱ་བ་རྒྱས་པར་འབྱུང་བ་ལ། བྱིས་པ་ཞེས་བྱ་བ་ནི་བདེན་པ་མ་མཐོང་བའོ། །འདུ་བྱེད་ཙམ་ཞེས་བྱ་བ་ཙམ་གྱི་སྒྲ་ནི་འདི་ན་འདུ་བྱེད་པ་པོ་ཡོད་པ་མ་ཡིན་ནོ་ཞེས་བསྟན་པར་བྱ་བའི་ཕྱིར་རོ། །མི་ཤེས་པ་ཞེས་བྱ་བས་ནི་མ་འདྲེས་པའི་མ་རིག་པ་སྟོན་ཏོ། །བདག་ཏུ་ལྟ་བ་དང་ངའོ་སྙམ་པའི་ང་རྒྱལ་ལ་མངོན་པར་ཞེན་ཅིང་ཞེས་བྱ་བ་ནི་བདག་ཏུ་ལྟ་བ་དང༌། ངའོ་སྙམ་པའི་ང་རྒྱལ་དག་ལ་རབ་ཏུ་གནས་ཤིང་ཞེས་བྱ་བའི་དོན་ཏེ། འདིས་ནི་བདག་ཏུ་ལྟ་བ་དང་ངའོ་སྙམ་པའི་ང་རྒྱལ་དང་མཚུངས་པར་ལྡན་པའི་མ་རིག་པ་བསྟན་ཏོ། །ལུས་ལ་སོགས་པ་དག་གིས་ལས་རྣམ་པ་གསུམ་བརྩམ་སྟེ་ཞེས་བྱ་བ་འབྱུང་ངོ༌། །བདག་ཉིད་ཅེས་བྱ་བ་ནི་གང་དུ་འདི་བདག་གོ་སྙམ་དུ་ལྟ་བ་དང༌། གང་གིས་རློམ་པ་དེའོ། །བདེ་བའི་དོན་ཏམ། སྡུག་བསྔལ་གྱི་དོན་ཏམ། ཞེས་བྱ་བ་ལ་སོགས་པ་ལ། ལུས་ལ་སོགས་པའི་གསུམ་དག་གིས་ཞེས་བྱ་སྟེ། ལུས་ཀྱི་རྣམ་པ་གསུམ་དང༌། ངག་དང་ཡིད་ཀྱི་ཡང་རྣམ་པ་གསུམ་མོ། །ཚེ་ཕྱི་མ་ལ་བདེ་བའི་དོན་དུ་ཞེས་བྱ་བ་ནི་འཇིག་རྟེན་གཞན་དུ་བདེ་བའི་དོན་དུའོ། །བསོད་ནམས་ཞེས་བྱ་བ་ནི་འདོད་པ་ན་སྤྱོད་པ་སྟེ། འདི་ལྟར་འཇིག་རྟེན་ཕ་རོལ་ཏུ་བདེ་བ་འདོད་པ་རྣམས་ནི་སྤྱིན་པ་དང་ཚུལ་ཁྲིམས་ལ་སོགས་པ་རྣམས་ལ་འཇུག་གོ །དེ་དག་ནི་ཕལ་ཆེ་བའི་སྒོ་ནས་བསྟན་པ་སྟེ། ལྟ་བ་ལོག་པས་བསླུས་པ་འགའ་ཞིག་ནི་ཕྱི་མ་ལ་བདེ་བའི་དོན་དུ་བསོད་ནམས་མ་ཡིན་པ་བརྩམ་མོ། །བདེ་བ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་དོན་དུ་མི་གཡོ་བ་ཞེས་བྱ་བ་ནི། གཟུགས་དང་གཟུགས་མེད་
པ་ན་སྤྱོད་པ་སྟེ། བསམ་གཏན་གསུམ་པའི་བར་དུ་ཚེ་ཕྱི་མ་ལ་བདེ་བའི་དོན་དང༌། དེའི་གོང་དུ་བདེ་བ་ཡང་མ་ཡིན། སྡུག་བསྔལ་ཡང་མ་ཡིན་པའི་དོན་དུའོ། །ཚེ་འདི་ལ་བདེ་བའི་དོན་དུ་ནི་བསོད་ནམས་མ་ཡིན་པ་བརྩམ་སྟེ་ཞེས་བྱ་བར་སྦྱར་ཏེ། ལུས་ཀྱི་སྒོ་ནས་སྲོག་གཅོད་པ་ལ་སོགས་པ་དང༌། དག་གིས་བརྫུན་སྨྲ་བ་ལ་སོགས་པ་དང༌། ཡིད་ཀྱིས་བརྣབ་སེམས་ལ་སོགས་པ་དག་གོ །ལས་ཀྱི་འཕེན་པའི་དབང་གིས་ཞེས་བྱ་བ་ལ། ཇི་སྐད་བསྟན་པའི་ལས་དག་གིས་འཕངས་པ་ནི་ལས་ཀྱི་འཕེན་པའོ། །དེའི་དབང་གིས་ན་དེའི་རྒྱུ་མཚན་གྱིས་ཏེ། རྒྱུ་དེས་རྣམ་པར་ཤེས་པའི་རྒྱུན་སྲིད་པ་བར་མ་དང་འབྲེལ་བས་ཐག་ཤིན་ཏུ་རིང་ཡང་འགྲོ་བ་དེ་དང་དེར་འགྲོ་བར་འགྱུར་རོ། །སྲིད་པ་བར་མ་ཡང་རྣམ་པར་ཤེས་པ་དྲུག་དང་ལྡན་པའི་ཕྱིར་དེ་ལྟར་བཤད་ན། རྣམ་པར་ཤེས་པ་གང་ཞེ་ན། རྣམ་པར་ཤེས་པའི་ཚོགས་དྲུག་གོ་ཞེས་བཤད་པ་དེ་འཐད་པ་ཡིན་ནོ་ཞེས་སྨོས་སོ། །ཇི་ལྟར་ཞེ་ན། གལ་ཏེ་རྣམ་པར་ཤེས་པའི་རྒྱུན་ལས་ཀྱིས་ཡོངས་སུ་བསྒོས་པ་ཐམས་ཅད་སྲིད་པ་བར་མར་ཉིང་མཚམས་སྦྱོར་བའི་སྐད་ཅིག་མ་ནས་བཟུང་སྟེ། སྐྱེ་བའི་སྐད་ཅིག་གི་བར་དུ་འདུ་བྱེད་ཀྱི་རྐྱེན་ཅན་རྣམ་པར་ཤེས་པའོ་ཞེས་བྱ་བ་ཡིན་ན་ནི། དེའི་རྣམ་པར་ཤེས་པ་རྣམ་པར་དབྱེ་བ་བསྟན་པའི་རྣམ་པར་ཤེས་པའི་ཚོགས་དྲུག་གོ་ཞེས་བྱ་བ་རིག་པར་འགྱུར་གྱི་གཞན་དུ་ནི་མ་ཡིན་ནོ། །གལ་ཏེ་ཉིང་མཚམས་སྦྱོར་བའི་རྣམ་པར་ཤེས་པ་ཁོ་ན་འདུ་བྱེད་ཀྱི་རྐྱེན་ཅན་ཞེས་བྱ་བ་ན་ནི་དེ་ལྟ་ན་རྣམ་པར་ཤེས་པའི་ཚོགས་དྲུག་གོ་ཞེས་རྣམ་པར་ཤེས་པ་རྣམ་པར་དབྱེ་བ་དང་འགལ་བར་འགྱུར་ཏེ། གནས་སྐབས་དེར་ཡིད་ཀྱི་རྣམ་པར་ཤེས་པ་ཁོ་ན་ཙམ་ཞིག་ཏུ་འགྱུར་གྱི། ཡིད་ཀྱི་རྣམ་པར་ཤེས་པ་ཁོ་ནས་ཉིང་མཚམས་སྦྱོར་བས་གཞན་དག་མེད་པར་འགྱུར་རོ། །དེའི་ཕྱིར་འདི་སྐད་དུ། རྣམ་པར་ཤེས་པ་གང་ཞེ་ན། ཡིད་ཀྱི་རྣམ་པར་ཤེས་པའོ་ཞེས་གསུངས་པར་འགྱུར་གྱི། རྣམ་པར་ཤེས་བའི་ཚོགས་དྲུག་གོ་ཞེས་བྱ་བ་ནི་མ་ཡིན་ནོ། །དེ་ཡང་རྣམ་པར་ཤེས་པའི་རྒྱུན་ཁོ་ན་དེའི་ཚེ་འདུ་བྱེད་ཀྱི་རྐྱེན་གྱིས་རྣམ་པར་ཤེས་པའི་ཡན་ལག་ཡིན་གྱི། གཟུགས་ལ་སོགས་པའི་ཕུང་པོའི་རྒྱུན་གང་ཡིན་པ་དེར་གྱུར་པ་ནི་མ་ཡིན་ནོ། །དེ་ལྟ་མ་ཡིན་ན་གནས་སྐབས་པ་ཁོ་ན་བཤད་
པར་འགྱུར་རོ། །བདག་ཏུ་ལྟ་བ་དང་ངའོ་སྙམ་པའི་ང་རྒྱལ་དང་མཚུངས་པར་ལྡན་པའི་མ་རིག་པ་ཁོ་ན་འདུ་བྱེད་རྣམས་ཀྱི་རྒྱུ་ཡིན་གྱི། བདག་ཏུ་ལྟ་བ་དང་ངའོ་སྙམ་པའི་ང་རྒྱལ་དག་ནི་མ་ཡིན་ནོ་ཞེས་བྱ་བ་ནི་རིག་པར་སྨྲ་བ་མ་ཡིན་ནོ། །འདིར་ལྷན་ཅིག་འབྱུང་བའི་རྒྱུའི་འབྲས་བུ་ཡིན་པའི་ཕྱིར་བདག་ཏུ་ལྟ་བ་དང་ངའོ་སྙམ་པའི་ང་རྒྱལ་མ་རིག་པ་དང་ལྷན་ཅིག་པ་དག་ནི་འདུ་བྱེད་རྣམས་ཀྱི་རྒྱུ་ཡིན་ནོ། །དེ་བཞིན་དུ་གཟུགས་ལ་སོགས་པ་འབྱུང་བར་འགྱུར་རོ་ཞེས་ཁ་ཅིག་དེ་ལ་རྒོལ་བར་བྱེད་དོ། །བདག་ཏུ་ལྟ་བ་དང་ངའོ་སྙམ་པའི་ང་རྒྱལ་དག་མ་རིག་པ་ཉིད་ཀྱི་ཕྱིར་མ་རིག་པའི་སྟོབས་ཀྱིས་འདུ་བྱེད་སྐྱེ་བ་ལ་རྒྱུར་འགྱུར་བའི་ཕྱིར་མ་རིག་པ་ཉིད་འདིར་རྐྱེན་དུ་བརྗོད་དེ་ཆོས་གཞན་ནི་མ་ཡིན་ནོ། །གཟུགས་ལ་སོགས་པ་རྣམས་ནི་འབྲེལ་པ་ཉིད་དེ། འདུ་བྱེད་བསྐྱེད་པ་ལ་བྱེད་པ་ཅི་ཡང་མེད་དོ། །མིང་དང་གཟུགས་ཕུང་པོ་ལྔ་པོ་དེར་སྐྱེ་བར་འགྱུར་ཏེ། འདིར་མིང་དང་གཟུགས་ནི་མ་ཤི་བར་དུ་ཡན་ལག་ཏུ་རིག་པར་བྱའི། ཇི་ལྟར་བྱེ་བྲག་ཏུ་སྨྲ་བ་རྣམས་ཀྱི་ལྟར། མིང་དང་གཟུགས་ནི་དེ་ཕན་ཆད་སྐྱེ་མཆེད་དྲུག་པོ་ཚུན་ཆད་དོ་ཞེས་བྱ་བ་ནི་མ་ཡིན་ནོ། །ཡང་མིང་དང་གཟུགས་ཕུང་པོ་ལྔ་པ་ཡིན་ནོ་ཞེས་བྱ་བ་འདི་ཇི་ལྟར་རྟོགས་པར་བྱ་ཞེ་ན། དེའི་ཕྱིར་རྣམ་པར་འབྱེད་པ་ལས་དེ་སྐད་བསྟན་པའི་ཕྱིར་རོ་ཞེས་བྱ་བ་སྨོས་ཏེ། མིང་དང་གཟུགས་རྣམ་པར་འབྱེད་པའི་མདོ་ལས། མིང་གང་ཞེ་ན་གཟུགས་ཅན་མ་ཡིན་པའི་ཕུང་པོ་བཞི་སྟེ། ཚོར་བའི་ཕུང་པོ་ནས་རྣམ་པར་ཤེས་པའི་ཕུང་པོའི་བར་རོ། །གཟུགས་གང་ཡིན་པ་ཅི་ཡང་རུང་སྟེ། འབྱུང་བ་ཆེན་པོ་བཞི་དང་འབྱུང་བ་ཆེན་པོ་བཞི་དག་རྒྱུར་བྱས་པ་དེ་ཐམས་ཅད་དེ། གཟུགས་དང་སྔར་གྱི་མིང་འདི་གཉིས་ནི་མིང་དང་གཟུགས་ཞེས་བྱ་བའི་གྲངས་སུ་འགྲོའོ་ཞེས་འབྱུང་ངོ༌། །མིང་དང་གཟུགས་ཡོངས་སུ་སྨིན་པ་ཞེས་བྱ་བ་ནི་ནུར་ནུར་པོ་དང༌། མེར་མེར་པོ་དང༌། ནར་ནར་པོ་དང༌། མཁྲང་འགྱུར་ལ་སོགས་པའི་ངོ་བོས་དབང་པོ་བསྐྱེད་པར་བྱ་བ་ལ་ཆེས་དང༌། ཤིན་ཏུ་ཆེས་ཉེ་བའི་ངོ་བོའི་རིམ་པས་སོ། །འདོད་པའི་སྲེད་པ་ནི་འདོད་པ་ན་སྤྱོད་པའི་སྲེད་པའོ། །བདེ་བ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལ་ནི་
གཟུགས་ཀྱི་སྲེད་པའོ་ཞེས་བྱ་བ་ལ། བསམ་གཏན་གསུམ་ན་ནི་ཚོར་བ་བདེ་བ་ལ་གཟུགས་ཀྱི་སྲེད་པ་གཟུགས་ན་སྤྱོད་པའོ། །བསམ་གཏན་བཞི་པ་ནི་བདེ་པ་ཡང་མ་ཡིན་སྡུག་བསྔལ་ཡང་མ་ཡིན་པ་ལ་གཟུགས་ཀྱི་སྲེད་པའོ། །གཟུགས་མེད་པའི་ཁམས་ན་ནི་ཚོར་བ་གཞན་མེད་པས་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལ་གཟུགས་མེད་པའི་སྲིད་པ་སྟེ། ཐམས་ཅད་ལ་སྡུག་བསྔལ་གྱིས་གཟིར་བ་ཞེས་བྱ་བར་སྦྱར་བར་བྱའོ། །འདོད་པ་ལ་སོགས་པ་ཉེ་བར་ལེན་ཏོ་ཞེས་བྱ་བ་ལ། འདོད་པ་དང༌། ལྟ་བ་དང༌། ཚུལ་ཁྲིམས་དང༌། བརྟུལ་ཞུགས་དང༌། བདག་ཏུ་སྨྲ་བ་རྣམས་ཉེ་བར་ལེན་ཏོ། །དེ་ལ་འདོད་པ་རྣམས་ནི་འདོད་པའི་ཡོན་ཏན་ལྔ་དག་གོ་ཞེས་བྱ་བ་ནི་གཟུགས་དང་སྒྲ་དང་དྲི་དང་རེག་བྱ་རྣམས་སོ། །འདོད་པར་བྱ་ཞིང་དོན་དུ་ཉེ་བར་བྱ་བས་ན་འདོད་པ་རྣམས་ཏེ། དེ་ཉིད་ཀུན་ཏུ་རྟོགས་པའི་འདོད་པས་བྱང་པས་ན་ཡོན་ཏན་ཏེ། གོམས་ཞེས་བྱ་བའི་དོན་ཏོ། །བརྟུལ་ཞུགས་ནི་ཁྱི་དང་བ་ལང་གི་བརྟུལ་ཞུགས་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྤྲས་ནི་རི་དགས་ཀྱི་བརྟུལ་ཞུགས་ལ་སོགས་པ་དག་བསྡུའོ། །ཇི་སྐད་དུ་གཅེར་བུ་པ་ལ་སོགས་པ་རྣམས་ནི་ཞེས་བྱ་བ་ལ། འདི་ཡང་བརྟུལ་ཞུགས་ཡིན་ནོ། །བྲམ་ཟེའི་བརྟུལ་ཞུགས་ནི་དབྱུ་གུ་དང་གཡང་གཞི་ཡང་དག་པར་ལེན་པའོ། །ཕྱུགས་བདག་པའི་ནི་རིལ་བ་དང་ཐལ་བའོ། །ཀུན་ཏུ་རྒྱུའི་ནི་དབྱུ་གུ་གསུམ་པ་དང་སྤྲེའོ་ཡང་དག་པར་ལེན་པའོ། །བདག་ཏུ་སྨྲ་བ་ནི་ལུས་ལ་སྟེ་ཞེས་བྱ་བ་ནི་གང་གི་ཕྱིར་འདི་ལ་བདག་ཅེས་བརྗོད་པའི་ཕྱིར་ཏེ། དེ་ལ་བདག་ཏུ་སྨྲ་བ་ཡོད་པས་ན་བདག་ཏུ་སྨྲ་བའོ་ཞེས་སྨོས་ཏེ། བཅོམ་ལྡན་འདས་ཀྱིས་དགེ་སློང་ངམ་བྲམ་ཟེ་གང་སུ་ཡང་རུང་སྟེ། བདག་གོ་ཞེས་ཡང་དག་པར་རྗེས་སུ་ལྟ་བས་ཡང་དག་པར་རྗེས་སུ་ལྟ་བ་དེ་ཐམས་ཅད་ནི་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ཞེས་བྱ་བ་རྒྱས་པར་ཇི་སྐད་དུ་གསུངས་པ་ལྟ་བུའོ། །གལ་ཏེ་ལུས་བདག་ཡིན་ན། དེ་ལྟ་ན་བདག་ཉེ་བར་ལེན་པ་ཞེས་བྱ་བ་བརྗོད་པར་བྱའོ་ཞེ་ན། དེའི་ཕྱིར་བདག་མེད་པའི་ཕྱིར་ཞེས་བྱ་བ་ལ་སོགས་པ་སྨོས་ཏེ། བདག་ཡོད་ན་ནི་བདག་ཉེ་བར་
ལེན་པ་ཞེས་བརྗོད་ན་དེ་ནི་ཡོད་པ་ཡང་མ་ཡིན་ཏེ། དེའི་ཕྱིར་དེ་མེད་པར་ཞེས་བྱ་བའི་ཕྱིར་བདག་ཏུ་སྨྲ་བ་ཉེ་བར་ལེན་པ་ཞེས་བཤད་དོ། །བྱིས་པ་ཐོས་པ་དང་མི་ལྡན་པ་སོ་སོའི་སྐྱེ་བོ་ཞེས་བྱ་བ་གོ་རིམས་བཞིན་དུ་ལྷན་ཅིག་སྐྱེས་པ་དང༌། ལུང་དང་རྟོགས་པ་ལས་སྐྱེས་པའི་ཤེས་རབ་རྣམས་མེད་པའི་ཕྱིར་ཏེ། གང་ཞིག་སྔོན་གོམས་པའི་བག་ཆགས་ལས་བྱུང་བ་སྐྱེ་བས་ཐོབ་པའི་ཤེས་རབ་མེད་པ་དེ་ནི་བྱིས་པའོ། །གང་ཞིག་ལུང་ལས་བྱུང་བ་མེད་པ་དེ་ནི་ཐོས་པ་དང་མི་ལྡན་པའོ། །གང་ཞིག་རྟོགས་པ་ལས་བྱུང་བ་བདེན་པ་མངོན་པར་རྟོགས་པ་ལས་སྐྱེས་པ་མེད་པ་དེ་ནི་སོ་སོ་སྐྱེ་བོའོ། །བདག་ཏུ་ལྟ་བ་དག་ལ་སྟེ་དེ་ལ་འདོད་པ་ལ་སོགས་པ་མ་ཐོབ་པ་དག་ལ་ནི་འདུན་པ་སྟེ་དོན་དུ་གཉེར་བའོ། །ཐོབ་པ་དག་ལ་ནི་འདོད་ཆགས་ཏེ་མངོན་པར་ཞེན་པའོ། །བདག་ཏུ་སྨྲ་བ་རྣམས་ལ་སྟེ་དེ་ལ་འདོད་པ་ལ་སོགས་པ་མ་ཐོབ་པ་དག་ལ་ནི་འདུན་པ་སྟེ་དོན་དུ་གཉེར་བའོ། །ཐོབ་པ་དག་ལ་ནི་འདོད་ཆགས་ཏེ་མངོན་པར་ཞེན་པའོ། །ཡུལ་མ་ཐོབ་པ་རྣམས་ལ་ནི་འདུན་པ་སྟེ། དོན་དུ་གཉེར་བའོ། །ཐོབ་པ་རྣམས་ལ་ནི་འདོད་ཆགས་ཏེ། འདོད་པ་ལ་སོགས་པ་དེ་རྣམས་ལ་འདུན་པ་དང་འདོད་ཆགས་གང་ཡིན་པ་དེ་ཉེ་བར་ལེན་པ་ཡིན་གྱི། ཇི་སྐད་བཤད་ཉིད་མ་རིག་བཅས། །ཉེར་ལེན་བཅས་ཏེ་ལྟ་རྣམ་གཉིས། །བྱེ་བའི་ཕྱིར་རོ་ཞེས་བྱ་བ་ནི་ཉེ་བར་ལེན་པ་མ་ཡིན་ནོ་སྙམ་དུ་བསམས་པ་ཡིན་ནོ། །ཡང་སྲིད་པའི་ཞེས་བྱ་བ་ནི་ཡང་སྲིད་པའི་འབྲས་བུ་ཅན་ཡིན་ནོ། །དེ་ནི་འདིར་སྲིད་པ་ཡིན་ནོ་ཞེས་བྱ་བ་ནི། འདི་ནི་འདིར་སྲིད་པའོ་ཞེས་བྱ་བའི་ཐ་ཚིག་གོ །གཞན་དག་ན་རེ། འདི་འདིར་སྲིད་པའི་ཚིག་བླ་དགས་སམ་མཚན་ཉིད་དོ་ཞེས་ཟེར་རོ། །རྣམ་པར་ཤེས་པ་འཇུག་པའི་ཚུལ་དུ་ཞེས་བྱ་བ་ནི་ལས་ཀྱི་འཕེན་པའི་དབང་གིས་རྣམ་པར་ཤེས་པའི་རྒྱུན་སྲིད་པ་བར་མ་དང་འབྲེལ་བའི་ཕྱིར་མེ་ འབར་བ ་འགྲོ་བའི་ཚུལ་དུ་འགྲོ་བ་དེ་དང་དེར་འགྲོ་བར་འགྱུར་ཏེ་ཞེས་སྔར་ཇི་སྐད་བཤད་པ་བཞིན་ནོ། །མདོ་དེ་ལས་ཇི་སྐད་བཤད་པ་ལྟ་བུའོ་ཞེས་བྱ་བ་ནི། རྒ་བ་གང་ཞེ་ན་སྤྱིར་ཅེར་དང་མགོ་སྐྱ་དང་གཉེར་མ་མང་བ་དང་རྙིངས་པ་དང་རྒུར་པ་དང་འཁྱོགས་པ་དང༌། གོ་བཱ་ན་སཱ་གྱོལ་པོ་དང་དབུགས་ཀྱི་སྒྲ་ངར་ངར་པོ་
འབྱུང་བ་དང༌། ལུས་མདུན་དུ་དགུ་བས་ལུས་འཁར་བ་ལ་བརྟེན་པ་དང་ལུས་སྨེ་བ་ནག་པོས་ཁྱབ་པ་དང༌། དྷ་ནུ་དྷྭ་མནད་ཏྭཾ་ཉམས་པ་དང་དབང་པོ་ཡོངས་སུ་ཉམས་པ་དང་ཡོངས་སུ་སྨིན་པ་དང་ཡོངས་སུ་བྱེ་བ་དང་འདུ་བྱེད་རྣམས་རྙིངས་བར་གྱུར་པ་དང་འཁྱོགས་པར་གྱུར་པ་གང་ཡིན་པ་འདི་ནི་རྒ་བ་ཞེས་བྱ་འོ། །འཆི་བ་གང་ཞེ་ན། སེམས་ཅན་གང་ཡིན་པ་དེ་དང་དེ་དག་སེམས་ཅན་གྱི་རིས་དེ་དང་དེ་ནས་འཆི་ཞིང་འཕོ་བ་ཉིད་དོ་ཚེ་དང་དྲོད་ཉམས་ཤིང་ཕུང་པོ་རྣམས་འདོར་ལ་སྲོག་གི་དབང་པོ་འགགས་བ་འཆི་བའི་དུས་བྱེད་པ་གང་ཡིན་པ་འདི་ནི་འཆི་བ་ཞེས་བྱ་སྟེ། འཆི་བ་འདི་དང་སྔར་གྱི་དགའ་བ་འདི་གཉིས་ནི་རྒ་ཤི་ཞེས་བྱ་བའོ། །བྱེ་བྲག་ཏུ་སྨྲ་བའི་ལུགས་ནི་སྔར་བཤད་བ་གང་ཡིན་པ་དེ་ཁོ་ན་ཡིན་ནོ་ཞེས་བྱ་བ་ནི་བཅུ་གཉིས་དང་ལྡན་པའི་ཕུང་པོ་ལྔ་པའི་གནས་སྐབས་ཀྱི་ཡན་ལག་བཅུ་གཉིས་དག་ཡིན་ནོ་ཞེས་བྱ་བའོ། །ཡི་གེ་མའི་དོན་དུ་མ་ཉིད་ཡིན་པར་མཐོང་སྟེ། འདྲི་བ་ནི་མ་རིག་པའི་དོན་གང་ཡིན་ཞེས་བྱའོ། །ཆོས་མ་ཡིན་པ་དང་དོན་མ་ཡིན་པ་དང་ཞེས་བྱ་བ་ལ། སོགས་པའི་སྒྲས་ནི་མ་རིག་པ་དང་ཐ་སྙད་མ་ཡིན་པ་དང༌། མི་མ་ཡིན་པ་ལ་སོགས་པ་རྣམས་བསྡུའོ། །ཆོས་ལ་སོགས་པའི་མི་མཐུན་པར་ཞེས་བྱ་བ་ལ། ཆོས་དང་དོན་དང་རིག་པ་དང༌། ཐ་སྙད་དང་མི་ལ་སོགས་པའི་མི་མཐུན་པའི་ཕྱོགས་སུ་གྱུར་པ་ཡིན་གྱི། ཆོས་ལ་སོགས་པ་མེད་པ་ཙམ་མ་ཡིན་ལ། ཆོས་ལ་སོགས་པ་དག་ལས་གཞན་ཡང་མ་ཡིན་པ་དེ་བཞིན་དུ་མ་རིག་པ་ཡང་མི་མཐུན་པའི་ཕྱོགས་སུ་གྱུར་པའི་ཆོས་ཡིན་གྱི། རིག་པ་ལས་གཞན་པ་མ་ཡིན་ཞིང་མེད་པ་ཙམ་མ་ཡིན་ནོ། །རྐྱེན་གྱིས་དངོས་པོར་བསྟན་པའི་ཕྱིར་རོ་ཞེས་བྱ་བ་ལ། མ་རིག་པའི་རྐྱེན་གྱིས་འདུ་བྱེད་རྣམས་ཞེས་འདུ་བྱེད་རྣམས་ཀྱི་རྐྱེན་གྱི་དངོས་པོར་བསྟན་ན། མེད་པ་ནི་བརྗོད་དུ་མེད་པའི་ཕྱིར་རྐྱེན་གྱི་དངོས་པོར་རིགས་པ་མ་ཡིན་ལ། མིག་ལ་སོགས་པ་དག་ཀྱང་འདུ་བྱེད་ཀྱི་རྐྱེན་གྱི་དངོས་པོ་མ་ཡིན་ཏེ། དགྲ་བཅོམ་པ་ལ་ཡང་འདུ་བྱེད་འཕེལ་བར་བྱེད་པ་ཐལ་བར་འགྱུར་བའི་ཕྱིར་རོ། །ཀུན་སྦྱོར་སོགས་ཚིག་ཕྱིར་ཞེས་བྱ་བ་ལ། ཀུན་ཏུ་སྦྱོར་བ་དག་ཏུ་ནི་མ་རིག་པའི་ཀུན་ཏུ་
སྦྱོར་བ་ཞེས་བཤད་ལ། ཟག་པ་དག་ཏུ་ནི་མ་རིག་པའི་ཟག་པ་འཆིང་བ་དག་ཏུ་ནི་གཏི་མུག་གི་འཆིང་བ་ཕྲ་རྒྱས་དག་ཏུ་ནི་མ་རིག་པའི་ཕྲ་རྒྱས། ཆུ་བོ་དག་ཏུ་ནི་མ་རིག་པའི་ཆུ་བོ། །སྦྱོར་བ་དག་ཏུ་ནི་མ་རིག་པའི་སྦྱོར་བ་ཞེས་བྱ་ན། མེད་པ་ཙམ་ནི་དེ་ལྟར་འགྱུར་བར་མི་འོས་ལ། མིག་ལ་སོགས་པ་དག་ཀྱང་ཀུན་ཏུ་སྦྱོར་བ་དང༌། འཆིང་བ་ལ་སོགས་པ་དག་ཏུ་མི་འགྱུར་རོ། །ཅིའི་ཕྱིར་ཞེ་ན། དགྲ་བཅོམ་པ་རྣམས་ཀྱང་མ་གྲོལ་བར་ཐལ་བར་འགྱུར་བའི་ཕྱིར་རོ། །དེའི་ཕྱིར་མ་རིག་པའི་མི་མཐུན་ཕྱོགས་སུ་གྱུར་པ་ཆོས་གཞན་ཁོ་ན་མ་རིག་པ་ཡིན་ནོ། །དེ་ཡང་ལྟ་བའི་རང་བཞིན་ཡིན་པས་ཞེས་བྱ་བ་ལ། སྨད་པའི་ཤེས་རབ་ནི་ཉོན་མོངས་པ་ཅན་ཡིན་གྱི། ཉོན་མོངས་པ་ཅན་མ་ཡིན་པས་དགེ་བ་དང་ལུང་དུ་མ་བསྟན་པ་ནི་མ་ཡིན་ལ། དེ་ཡང་འཇིག་ཚོགས་ལ་ལྟ་བ་ལ་སོགས་པ་ལྟ་བ་རྣམས་པ་ལྔ་ཡིན་ན། ལྟ་བ་ནི་མ་རིག་པར་མི་རུང་སྟེ། མ་རིག་པའི་ཕྲ་རྒྱས་ལྟ་བའི་ཕྲ་རྒྱས་ཞེས་འདོད་ཆགས་ལ་སོགས་པ་བཞིན་དུ་ལོགས་ཤིག་ཏུ་གསུངས་པའི་ཕྱིར་རོ། །འོ་ན་ནི་གང་ཉོན་མོངས་པ་ཅན་གྱི་ཤེས་རབ་ལྟ་བ་མ་ཡིན་པ་དེ་མ་རིག་པར་འགྱུར་ལ། དེ་ཡང་འདོད་ཆགས་དང་ཞེ་སྡང་དང་ང་རྒྱལ་ལ་སོགས་པའི་ཉོན་མོངས་པ་དང་མཚུངས་པར་ལྡན་པ་ཡིན་ནོ། །ལྟ་བ་དེ་དང་མཚུངས་ལྡན་ཕྱིར་ཞེས་བྱ་བ་ནི་མ་རིག་པ་དང་མཚུངས་པར་ལྡན་པའི་ཕྱིར་རོ་ཞེས་བྱ་བའི་དོན་ཏོ། །གཏི་མུག་ཉོན་མོངས་པའི་ས་མང་པོ་བར་ངེས་པས་ལྟ་བ་མ་རིག་པ་དང་མཚུངས་པར་ལྡན་ལ་ངོ་བོ་ཉིད་ནི་ངོ་བོ་ཉིད་ཀྱིས་བསྡུས་པ་ཡིན་གྱི། མཚུངས་པར་ལྡན་པ་མ་ཡིན་ནོ། །གང་ཟག་གཅིག་ལ་སེམས་གཉིས་ཡོད་པ་མ་ཡིན་ནོ། །དུས་མཚུངས་པ་ཞེས་ཆོས་མངོན་པར་བཤད་དེ། ཇི་ལྟར་སེམས་ཉིད་སེམས་ལས་བྱུང་བ་རྣམས་དང་རྟེན་དང་དམིགས་པ་དང་རྣམ་པ་དང་དུས་དང་རྫས་མཚུངས་པར་ལྡན་པའི་ཕྱིར་རོ། །དེས་ན་ཤེས་རབ་ཀྱི་རྫས་གཉིས་མཚུངས་པར་མི་ལྡན་པའི་ཕྱིར་ན་མ་རིག་པ་ཤེས་རབ་ཉིད་མ་ཡིན་ནོ་ཞེས་བྱ་བར་ངེས་སོ། །ཤེས་རབ་ཉེ་ཉོན་མོངས་སྟོན་ཕྱིར་ཞེས་བྱ་བ་འདི་ལས་ཀྱང་ཞེས་བྱ་བ་རྒྱས་པར་འབྱུང་སྟེ། ཇི་ལྟར་སེམས་ཀྱི་ཉེ་བའི་
ཉོན་མོངས་པ་སེམས་ལས་བྱུང་བ་འདོད་ཆགས་གཞན་ཉིད་ཡིན་པར་གསུངས་ཀྱི། སེམས་མ་ཡིན་པ་དེ་བཞིན་དུ། ཤེས་རབ་ཀྱི་ཉེ་བའི་ཉོན་མོངས་པ་ཡང་དེ་དང་མཚུངས་པར་ལྡན་པས་མ་རིག་པ་ཆོས་གཞན་ཡིན་པར་རིགས་ཀྱི། ཤེས་རབ་ཀྱི་ཉེ་བའི་ཉོན་མོངས་པ་ཤེས་རབ་ཉིད་ནི་མ་ཡིན་ཏེ་མཚུངས་པར་མི་ལྡན་པའི་ཕྱིར་རོ། །དེ་ཡང་གདོན་མི་ཟ་བར་འདོད་ཆགས་ཀྱིས་ཀུན་ནས་དཀྲིས་པ་ཡིན་ནམ་ཅི་ཞེས་བྱ་བ་ནི་འདོད་ཆགས་དང་མཚུངས་པར་ལྡན་ནམ་ཞེས་བྱ་བའོ། །བག་ཆགས་ཏེ་ཞེས་བྱ་བ་ནི་འདོད་ཆགས་ལ་སོགས་པ་གནས་ངན་ལེན་གྱི་བག་ཆགས་ཞེས་བྱ་བའི་དོན་ཏོ། །དེ་བཞིན་དུ་མ་རིག་པས་ཉེ་བར་ཉོན་མོངས་པ་ཅན་དུ་གྱུར་བའི་ཞེས་བྱ་བ་ལ། འདིར་མ་རིག་པའི་སྒྲས་ནི་ཤེས་རབ་ཉོན་མོངས་པ་ཅན་ཁོ་ན་རིག་པར་བྱ་སྟེ། གང་གི་ཕྱིར་ཐལ་མ་ཐག་ཏུ་ཡང་ཅིའི་ཕྱིར་ཤེས་རབ་ཉོན་མོངས་པ་ཅན་དང་ཞེས་རྒྱས་པར་འབྱུང་བའི་ཕྱིར་རོ། །མ་རིག་པས་ཉེ་བར་བཅོམ་པ་ཡང་དེ་བཞིན་དུ་རྟོགས་པར་བྱ་སྟེ། མ་རིག་པ་དང་མཚུངས་པར་ལྡན་པ་ལས་ནི་མ་ཡིན་ནོ། །དེས་ན་ཤེས་རབ་ཀྱི་རྫས་གཉིས་ཅིག་ཅར་ཡོད་པ་མ་ཡིན་ཏེ། ཛཱཏྱནྟ་ར་མེ་བཱ་བི་དྱཱ་ཝརྞཱ་ཡཾ་ཏྱ་ནཱ་ག་མི་ཀ་པ་རི་ཀལྤ་སྱ། གང་ཡང་ཞེས་བྱ་བ་ནི་སློབ་དཔོན་དཔལ་ལེན་ཏེ་དེ་ནི་ཉོན་མོངས་པ་ཐམས་ཅད་མ་རིག་པ་ཡིན་ནོ། །སྙམ་དུ་སེམས་སོ། །ཅིའི་ཕྱིར་ཞེ་ན་ཚེ་དང་ལྡན་པ་གསུས་པོ་ཆེ་དེས་རབ་ཏུ་མི་ཤེས་ཤིང་རབ་ཏུ་མི་ཤེས་པ་ནི་མ་རིག་པ་ཞེས་བྱ་བའི་མདོའི་ཕྱིར་རོ། །སྐྱེ་བ་གཞན་ཁོ་ན། མ་རིག་པ། བསྔགས་པར་བྱེད། ཕྱིར་མི་འོང་བ། ཡོངས་སུ་བརྟག་པའི། དེས་ཞེས་བྱ་བ་ནི་གང་ཡོད་ན་རིག་པ་མེད་པ་དེ་ནི་མ་རིག་པ་སྟེ། རྒྱུ་མེད་ན་ནཾ་འགའ་ཡང་ཡོད་པ་མ་ཡིན་ལ། ཉོན་མོངས་པ་ཐམས་ཅད་ཡོད་ན་ཡང་རིག་པ་མེད་པ་ཡིན་ནོ། །ཀུན་ཏུ་སྦྱོར་བ་ལ་སོགས་པའི་ནང་དུ་ལོགས་ཤིག་ཏུ་བཤད་པར་མི་འགྱུར་ཞིང་ཞེས་བྱ་བ་ནི་ཉོན་མོངས་པ་ཐམས་ཅད་མ་རིག་པ་ཡིན་པས་ཏེ། རྗེས་སུ་ཆགས་པའི་ཀུན་ཏུ་སྦྱོར་བ་ལ་སོགས་པའི་ནང་དུ་མ་རིག་པའི་ཀུན་ཏུ་སྦྱོར་བ་ལོགས་ཤིག་ཏུ་བཤད་པར་མི་འགྱུར་ཏེ། ཀུན་ཏུ་སྦྱོར་བ་ལྷག་མ་དང་ཐ་མི་དད་པའི་ཕྱིར་རོ། །དེ་བཞིན་དུ་འཆིང་བ་དག་གི་ནང་དུ་གཏི་མུག་གི་འཆིང་བ་ཞེས་བྱ་
པར་ལོགས་ཤིག་ཏུ་བཤད་པར་ཡང་མི་འགྱུར་ཏེ། འདོད་ཆགས་དང་ཞེ་སྡང་དང་ཐ་མི་དད་པའི་ཕྱིར་རོ། །ཕྲ་རྒྱས་དག་གི་ནང་དུ་མ་རིག་པའི་ཕྲ་རྒྱས་ཞེས་བྱ་བར་ཡང་མ་ཡིན་ཏེ། ཕྲ་རྒྱས་ལྷག་མ་དང་ཐ་མི་དད་པའི་ཕྱིར་རོ། །ཆུ་བོ་དག་གི་ནང་དུ་མ་རིག་པའི་ཆུ་བོ་དང༌། སྦྱོར་བ་དག་གི་ནང་དུ་མ་རིག་པའི་སྦྱོར་བ་ཞེས་བྱ་བར་ལོགས་ཤིག་ཏུ་ཡང་བཤད་པར་ཡང་མི་འགྱུར་ཏེ། ཆུ་བོ་དང་སྦྱོར་བ་ལྷག་མ་དང་ཐ་མི་དད་པའི་ཕྱིར་རོ། །ཉོན་མོངས་པ་ཐམས་ཅད་ཀྱི་བདག་ཉིད་ཡིན་པའི་ཕྱིར་དང༌། ལྟ་བ་ལ་སོགས་པ་རྣམས་ལ་རང་དང་གཞན་གྱི་བདག་ཉིད་དང་མཚུངས་པར་ལྡན་པ་མེད་པའི་ཕྱིར་ལྟ་བའམ། ཉོན་མོངས་པ་གཞན་དང་སྟེ། ཉོན་མོངས་པ་འདོད་ཆགས་ལ་སོགས་པ་དང་ཡང་མཚུངས་པར་ལྡན་པར་མི་འགྱུར་ཏེ། འདི་ལྟར་ལྟ་བ་ནི་ལྟ་བའམ། འདོད་ཆགས་དང་ཞེ་སྡང་དང་མཚུངས་པར་ལྡན་པར་མི་འགྱུར་རོ། །དེ་བཞིན་དུ་འདོད་ཆགས་ཀྱང་འདོད་ཆགས་སམ་ཉོན་མོངས་པ་གཞན་དང་མཚུངས་པར་ལྡན་པར་མི་འགྱུར་རོ་ཞེས་ཐམས་ཅད་ལ་བརྗོད་པར་བྱའོ། །སེམས་ཀྱང་ཞེས་བྱ་བ་རྒྱས་བར་འབྱུང་སྟེ། གལ་ཏེ་ཉོན་མོངས་པ་ཐམས་ཅད་ཀྱི་རང་བཞིན་མ་རིག་པ་ཡིན་ན། འདོད་ཆགས་ཀྱང་ཉོན་མོངས་པའི་རང་བཞིན་ཡིན་པས། མ་རིག་པ་ཁོ་ན་ཡིན་པའི་ཕྱིར་འདོད་ཆགས་ཀྱིས་ཉེ་བར་ཉོན་མོངས་པ་ཅན་དུ་གྱུར་བའི་སེམས་ནི་རྣམ་པར་མི་གྲོལ་ལོ་ཞེས་བཤད་པར་མི་འགྱུར་རོ། །འོ་ན་ཇི་ལྟར་བཤད་པར་བྱ་ཞེ་ན། མ་རིག་པས་ཉེ་བར་ཉོན་མོངས་པ་ཅན་དུ་གྱུར་པའི་ཞེས་བྱ་བར་རོ། །འོན་ཏེ་བྱེ་བྲག་ཏུ་བྱ་བའི་ཕྱིར་ཞེས་བྱ་བ་ལ། ཉོན་མོངས་པ་ཐམས་ཅད་མ་རིག་པའི་རང་བཞིན་ཅན་ཡིན་པའི་ཕྱིར་མ་རིག་པ་ཆེ་གེ་མོས་ཉེ་བར་ཉོན་མོངས་པ་ཅན་དུ་གྱུར་བ་མི་གྲོལ་ལོ་ཞེས་བྱ་བར་རྟོགས་པར་མི་འགྱུར་བ་དེའི་ཕྱིར་མ་རིག་པ་བྱེ་བྲག་ཏུ་བྱ་བའི་ཕྱིར་འདོད་ཆགས་ཀྱིས་ཉེ་བར་ཉོན་མོངས་པ་ཅན་དུ་གྱུར་པའི་ཞེས་བཤད་དེ། དཔེར་ན་སྐྱེ་མཆེད་བཅུ་གཉིས་པོ་དག་གཟུགས་ཀྱི་རང་བཞིན་དུ་ཁྱད་པར་མེད་ཀྱང༌། བྱེ་བྲག་ཏུ་བྱ་བའི་ཕྱིར་གཟུགས་ཀྱི་སྐྱེ་མཆེད་དང་སྒྲའི་སྐྱེ་མཆེད་ཅེས་བཤད་པ་བཞིན་ནོ། །ཤེས་
རབ་ལ་ཡང་ཞེས་བྱ་བ་རྒྱས་པར་འབྱུང་སྟེ། འོ་ན་ནི་ཤེས་རབ་ལ་ཡང་ཞེ་སྡང་གིས་ཉེ་བར་ཉོན་མོངས་པ་ཅན་དུ་གྱུར་པ་དང༌། ང་རྒྱལ་གྱིས་ཉེ་བར་ཉོན་མོངས་པ་ཅན་དུ་གྱུར་བ་དག་ལས་བྱེ་བྲག་ཏུ་བྱ་བའི་ཕྱིར་མ་རིག་པའི་བྱེ་བྲག་བསྟན་པར་བྱ་སྟེ། དེ་ལྟ་མ་ཡིན་ན་མ་རིག་པ་གང་གིས་ཉེ་བར་ཉོན་མོངས་པར་འགྱུར་བ་མི་རྟོགས་པར་འགྱུར་རོ། །འོན་ཏེ་ཉོན་མོངས་པ་ཐམས་ཅད་ཀྱིས་ཉེ་བར་ཉོན་མོངས་པ་ཅན་དུ་གྱུར་པའི་ཤེས་རབ་ནི་རྣམ་པར་མི་འདག་སྟེ། དེའི་ཕྱིར་འདིར་བྱེ་བྲག་ཉེ་བར་མི་ལེན་ནོ་ཞེ་ན་མ་ཡིན་ཏེ་སེམས་ལ་ཡང་མཚུངས་པའི་ཕྱིར་རོ། །འདི་ལྟར་འདོད་ཆགས་ཁོ་ནས་ཡིན་པ་འབའ་ཞིག་ཏུ་མ་ཟད་ཀྱི། ཉོན་མོངས་པ་གཞན་དག་གིས་ཉེ་བར་ཉོན་མོངས་པར་གྱུར་པའི་སེམས་ཀྱང་རྣམ་པར་མི་གྲོལ་བས་འདི་ནི་མཚུངས་སོ། །མི་གསལ་བའོ་ཞེས་བྱ་བ་ལ། གསལ་བ་ནི་རབ་ཏུ་ཤེས་པ་ཡིན་ལ། །མི་གསལ་བ་ནི་གསལ་བ་མ་ཡིན་པའོ། །མ་རིག་པ་ལ་ཇི་ལྟ་བ་དེ་ཁོ་ན་བཞིན་དུ་སྐྱོན་དུ་འགྱུར་རོ་ཞེས་བྱ་བ་ལ། གལ་ཏེ་གང་གསལ་བ་མ་ཡིན་པ་ཡིན་ན་ནི་མིག་ལ་སོགས་པ་དག་ལ་ཡང་ཐལ་བར་འགྱུར་རོ། །འོ་ན་ནི་གསལ་བ་མེད་པ་ཡིན་ནོ། །དེ་ལྟན་ནི་ཅི་ཡང་མ་ཡིན་པར་འགྱུར་ན། དེ་ཡང་རིག་པ་མ་ཡིན་ཏེ། རྐྱེན་གྱི་དངོས་པོར་བསྟན་པ་དེ་ལྟ་བུའི་ཕྱིར་ལ། ཀུན་ཏུ་སྦྱོར་བ་ལ་སོགས་པའི་དངོས་པོར་བསྟན་པའི་ཕྱིར་རོ། །ཇི་ལྟར་འདི་ཅི་ཞིག་ཅེས་མ་རིག་པ་མི་ཤེས་པ་དེ་བཞིན་མི་གསལ་བ་ཡང་ཡིན་ནོ་ཞེས་སྟོན་ཏེ། མ་གྲུབ་པ་ནི་མ་གྲུབ་པ་ཤེས་པར་བྱེད་པར་ནུས་པ་ཡང་མ་ཡིན་ནོ། །ཆོས་རྣམས་བསྟན་པ་དེ་ལྟ་བུ་ཡང་ཞེས་བྱ་བ་རྒྱས་པར་འབྱུང་སྟེ། དེ་ལྟ་བུ་ནི་རིགས་དེ་ལྟ་བུ་དང་ཞེས་བྱ་བའི་དོན་ཏོ། །ཆོས་རྣམས་གཏན་གདོན་མི་ཟ་བར་རང་བཞིན་གྱིས་ཕྱེ་བ་ཁོ་ནར་མ་ཟད་ཀྱི། ལས་ཀྱིས་རབ་ཏུ་ཕྱེ་བ་ཡང་ཡིན་པས། འདིར་རིག་པའི་མི་མཐུན་ཕྱོགས་ཀྱི་ལས་ཀྱིས་མ་རིག་པ་བསྟན་ཏེ། འདི་ལྟར་མ་རིག་པ་ལ་ཆགས་པ་དང་བྲལ་ཏེ་རིག་པ་སྐྱེའོ་ཞེས་གསུངས་སོ། །དེའི་ཕྱིར་དོན་འགའ་ཞིག་རིག་པའི་མི་མཐུན་ཕྱོགས་སུ་གྱུར་པ་གང་ཡིན་པ་དེ་ཡོད་པ་མ་ཡིན་ནོ། །དེ་ཉིད་ལ་དཔེ་བཤད་པ་ནི།
དཔེར་ན་ཞེས་བྱ་བ་ལ་སོགས་པ་སྟེ། དེར་ནི་ལས་མིག་གི་རྣམ་པར་ཤེས་པའི་རྟེན་ཉིད་ཀྱིས་མིག་ངེས་པར་བྱེད་ཀྱི། རང་བཞིན་གྱིས་ནི་མ་ཡིན་ནོ། །གལ་ཏེ་གཟུགས་དང་བཞེས་རང་བཞིན་གྱིས་རབ་ཏུ་ཕྱེ་བ་ཁོ་ན་ལ་མིག་གི་རྣམ་པར་ཤེས་པའི་རྟེན་ཉིད་དུ་བརྗོད་པ་མ་ཡིན་ནམ་ཞེ་ན། གཟུགས་དང་བ་དེ་ནི་རང་གི་ངོ་བོས་ངེས་པར་མི་ནུས་ཏེ། དེ་ཉིད་ཀྱི་ཕྱིར་མིག་གི་རྣམ་པར་ཤེས་པའི་རྟེན་གང་ཡིན་པའོ་ཞེས་གསུངས་སོ། །བཙུན་པ་ཆོས་སྐྱོབ་ན་རེ་ངའོ་སྙམ་དུ་སེམས་ཅན་ལ་འཇུག་པ་ནི་ཞེས་བྱ་བ་ལ་དེས་འགྲོ་བ་ཐམས་ཅད་དུ་འཇུག་པས་ན་འཇུག་པ་སྟེ་འགྲོ་ཞེས་བྱ་བའི་དོན་ཡིན་ལ། དེའི་དངོས་པོ་ནི་འཇུག་པ་ཉིད་ཡིན་ན། འདི་ནི་ངེས་པར་མ་བྱས་པ་ཞིག་སྟེ། འདི་ལྟར་གནས་བརྟན་དེས་ཀྱང་དེའི་བརྗོད་པར་བྱ་བ་ནི་དམིགས་མ་ཕྱེད་དོ། །ངའོ་སྙམ་དུ་ཞེས་བྱ་བས་ངར་འཛིན་པ་ཡང་ཡོངས་སུ་བཟུང་ལ། འདི་ཡང་ངའོ་སྙམ་པའི་ང་རྒྱལ་གྱི་བྱ་བ་ཡིན་པས་འདྲི་བ་ནི་ངའོ་སྙམ་པའི་ང་རྒྱལ་ལས་གཞན་པའི་འཇུག་པ་གང་ཞིག་ཅེ་ན་ཞེས་བྱ་བའོ། །གང་གི་ཕྱིར་ངའོ་སྙམ་པའི་ང་རྒྱལ་ལ་མངོན་པར་ཞེན་པའི་ཕྲ་རྒྱས་དག་ལས་ལོགས་ཤིག་ཏུ་འཇུག་པ་གསུངས་པ་དེའི་ཕྱིར་ངའོ་སྙམ་པའི་ང་རྒྱལ་ཉིད་འཇུག་པ་མ་ཡིན་པར་རྟོགས་སོ། །སྲེད་པ་ཐམས་ཅད་དང་ཞེས་བྱ་བ་ལ་སོགས་པ་འབྱུང་པས་འདོད་ཆགས་ལ་སོགས་པའི་རྣམ་པ་ཐམས་ཅད་ལས་ལོགས་ཤིག་ཏུ་གསུངས་པའི་ཕྱིར་འདོད་ཆགས་ལ་སོགས་པའི་ཉོན་མོངས་པ་རྣམ་པ་གཞན་མ་ཡིན་ལ། མ་རིག་པ་ནི་མ་གསུངས་པའི་ཕྱིར་འཇུག་པའི་སྒྲས་ནི་མ་རིག་པ་གསུངས་སོ་ཞེས་བྱ་བར་ཤེས་སོ། །ང་རྒྱལ་གཞན་ཡང་ཡོད་པ་མ་ཡིན་ནམ་ཞེས་བྱ་བ་ནི་མདོ་འདི་ལས་ནི་ངའོ་སྙམ་པའི་ང་རྒྱལ་ཁོ་ན་རང་གི་སྒྲས་གསུངས་ཀྱི། ང་རྒྱལ་གཞན་མ་ཡིན་པས་འཇུག་པའི་སྒྲས་ངའོ་སྙམ་པའི་ང་རྒྱལ་ལས་གཞན་པའི་ང་རྒྱལ་བསྟན་པར་འགྱུར་རོ་ཞེས་བྱ་བའོ། །སློབ་དཔོན་འདུས་བཟང་ན་རེ། དོན་དེ་ལྟ་མ་ཡིན་ཏེ། ངའོ་སྙམ་པའི་ང་རྒྱལ་བསྟན་པས་ང་རྒྱལ་ལྷག་མ་ཡང་གཟུང་བ་ཡིན་ཏེ། མད་པོའི་ཚིག་གིས་བསྟན་པའི་ཕྱིར་རོ་ཞེས་ཟེར་རོ། །འདིར་ཉོན་མོངས་པ་གཙོ་བོ་སྨོས་
པས་མཚོན་པ་བཞིན་ནོ། །ལྟ་བ་རྣམས་ལས་བདག་དང་བདག་གི་བདག་ཐ་དད་དུ་བསྟན་ཏེ། དེ་དག་ནི་ལྟ་བ་ཐམས་ཅད་ཀྱི་རྩ་བ་མ་ཡིན་པའི་ཕྱིར་གཙོ་བོ་དག་གོ །ཐ་དད་དུ་བསྟན་པ་དག་ནི་ཕྲ་རྒྱས་བརྗོད་པའི་ཕྱིར་ཡང་ངོ༌། །ཁོང་ཁྲོ་བ་དང་ཐེ་ཚོམ་གྱི་ཕྲ་རྒྱས་དག་ཀྱང་གཟུང་ངོ༌། །ད་ནི་མ་རིག་པ་ཁོ་ན་འདིར་གཙོ་བོ་སྟེ། ཉོན་མོངས་པ་རྣམས་ལས་ཁྱད་པར་དུའོ། །དེ་ཐ་དད་དུ་བསྟན་པ་མེད་པ་ཨ་ན་ཏཱ་པྲ་ས་ག་སྱཱ་དི་ཏི། དེ་ཉིད་འདིར་འཇུག་པ་ཉིད་དུ་མ་བརྗོད་དོ། །ཀུན་ནས་འགྲོ་ཞིང་ཐམས་ཅད་དུ་འགྲོ་བས་ན་འཇུག་པ་སྟེ། འགྲོ་བར་བྱེད་ཅེས་བྱ་བའི་དོན་ཏོ། །དེའི་དངོས་པོ་ནི་འཇུག་པ་ཉིད་ཅེས་བྱའོ། །འདིར་ཐམས་ཅད་ཀྱི་ཞེས་བྱ་བ་སོ་སོ་ལ་མང་པོའི་ཚིག་འགྲོ་བ་མ་ཡིན་ཏེ། བདག་དང་བདག་གི་བདག་རེ་རེ་ལ་མང་པོའི་ཚིག་ཡོད་པ་མ་ཡིན་ནོ། །སྲེད་པ་ལ་སོགས་པ་བཞིན་ནོ། །རྣམ་པ་མེད་པ་དེའི་ཕྱིར་བདག་དང་བདག་གི་བ་ལ་སོགས་པ་ཐམས་ཅད་ལ་མང་པོའི་ཚིག་སྦྱར་རོ། །ང་རྒྱལ་གྱི་སྒྲ་ཡིས་ང་རྒྱལ་གྱི་ཁྱད་པར་རེ་རེ་གཟུང་བར་མི་འགྱུར་ལ། ང་རྒྱལ་སྨོས་པ་དེ་ལ་ཁྱད་པར་མ་ཡིན་པའི་ཕྱིར་ངར་འཛིན་པ་སྨོས་པར་ཡང་ལྟ་བ་མ་ལུས་པ་སྨོས་པ་མ་ཡིན་ནོ། །ཕྲ་རྒྱས་ཀྱི་སྒྲ་ཡིས་ཀྱང་ཁོང་ཁྲོ་དང་ཐེ་ཚོམ་དག་ཁོ་ན་གཟུང་ངོ༌། །ལྟ་བ་ལ་སོགས་པ་བཞིན་དངོས་སུ་མ་ཡིན་ནོ། །རྒྱུ་ཡོད་པ་དེའི་ཕྱིར་ཕྲ་རྒྱས་ཀྱི་སྒྲ་ནི་མངོན་པར་ཞེན་པ་བཞིན་དུ་ངར་འཛིན་པ་ལ་སོགས་པ་རྣམས་ལ་ཡང་སྦྱར་རོ་ཞེས་ཤེས་སོ། །དེའི་ཕྱིར་འདིར་མ་རིག་པ་ཁོ་ན་ཁྱད་པར་དུ་མ་བྱས་ཏེ། འོ་ན་ཅི་ཞེ་ན། ཉོན་མོངས་པ་གཞན་ཡང་ངོ༌། །དེའི་ཕྱིར་འདིར་འཇུག་པའི་སྒྲ་ཡིས་ཅི་མ་རིག་པ་བཤད་དམ་འོན་ཏེ་ཉོན་མོངས་པ་གཞན་ཞེས་བྱ་བ་མི་ཤེས་སོ། །འདིར་ཡང་རྣམ་པར་དཔྱད་པ་ཞེས་བྱ་བ་ལ། ཅི་ང་རྒྱལ་གཞན་ནམ་སྟེ་མ་རིག་པ་ཡོད་པ་ལས་ཞེས་རྣམ་པར་དཔྱད་ན་བརྗོད་པར་བྱ་བ་མང་དུ་འབྱུང་བས་རྣམ་པར་དཔྱད་པའི་ཞར་ལས་བྱུང་བ་ཡིན་པའི་ཕྱིར་འདི་ནི་གཞག་གོ །གཟུགས་ནི་རྒྱ་ཆེར་བཤད་པ་ཡིན་ནོ་ཞེས་བྱ་བ་ལ། གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་ཉིད། །ཅེས་བྱ་བ་དེ་ལྟ་བུ་ལ་སོགས་པས་
རྒྱས་པར་བཤད་ཟིན་ཏོ། །མིང་དང་གཟུགས་ཅན་མིང་ཕུང་པོ་ཞེས་བྱ་བ། སྒྲ་འཇུག་པའི་རྒྱུ་མཚན་འདྲི་བ་ནི་ཅིའི་ཕྱིར་ཞེས་བྱ་བ་སྟེ། གཟུགས་ཅན་མ་ཡིན་པའི་ཕུང་པོ་བཞི་ལ་མིང་ཞེས་བརྗོད་ཅེས་བྱ་བའོ། །སྒྲ་འཇུག་པའི་རྒྱུ་མཚན་བསྟན་པའི་ཕྱིར་མིང་དང་དབང་པོ་དང་དོན་གྱི་དབང་གིས་ཞེས་བྱ་བ་རྒྱས་པར་སྨོས་སོ། །མིང་དང་དབང་པོ་དང་དོན་དང་གསུམ་གྱི་དབང་གིས་གཟུགས་ལ་སོགས་པའི་དོན་རྣམས་ལ་གཞོལ་བས་མིང་སྟེ། དམིགས་པར་འཛིན་པ་འདུད་པ་ལ་བརྟེན་ནས་བརྗོད་དོ་ཞེས་བྱ་བའི་དོན་ཏོ། །དེ་ལ་མིང་གི་དབང་གིས་ནི་གཟུགས་ལ་སོགས་པ་མངོན་སུམ་དང་མངོན་སུམ་མ་ཡིན་པ་དག་ལའོ། །དབང་པོ་དང་དོན་གྱི་དབང་གིས་ནི་མངོན་སུམ་བདག་ལ་གཞོལ་ལོ། །མིང་གང་གིས་ཞེས་བྱ་བ་ནི་གསུང་རབ་ལས་བུང་པོ་བཞིའི་མཚན་ཉིད་དམ་འབོད་མིང་གི་མཚན་ཉིད་ཅན་ལ་མིང་དུ་གྲགས་པ་དེའི་ཕྱིར་ཐེ་ཚོམ་ཟའོ། །འཇིག་རྟེན་ན་གྲགས་པ་གང་ཡིན་པ་སྟེ་ཞེས་བྱ་བ་རྒྱས་པར་འབྱུང་སྟེ། འདིར་འབོད་མིང་གི་མཚན་ཉིད་གཟུང་སྟེ། ཕུང་པོ་བཞིའི་མཚན་ཉིད་ཅན་འཇིག་རྟེན་དུ་མ་གྲགས་པའི་ཕྱིར་རོ། །དེ་ལ་བ་ལང་དང་རྟ་ཞེས་བྱ་བ་ནི་གོང་བུ་གོ་བར་བྱེད་པ་ཡིན་ནོ། །གཟུགས་དང་རོ་ཞེས་བྱ་བ་ནི་དོན་གཅིག་གོ་བར་བྱེད་པ་ཡིན་ཏེ་རྫས་གོ་བར་བྱེད་པའི་ཕྱིར་རོ། །དེ་ལྟ་ན་ནི་འོ་ན་དམིགས་པ་མེད་པའི་ཕྱིར་ལྡན་པ་མ་ཡིན་པ་རྣམས་ལ་མིང་ཉིད་མི་སྲིད་དོ་ཞེ་ན་དེ་ནི་དེ་ལྟ་མ་ཡིན་ཏེ། གཟུགས་ཅན་མ་ཡིན་པ་རྣམས་ཁོ་ན་ལ་དམིགས་པ་ལ་གཞོལ་བ་ཉིད་མི་སྲིད་པའི་ཕྱིར་གཟུགས་ཅན་མ་ཡིན་པ་རྣམས་ཁོ་ན་མིང་ཡིན་ནོ། །དེ་མེད་པས་ལྡན་པ་མ་ཡིན་པ་རྣམས་ལ་མིང་མ་ཡིན་པ་ཉིད་ཀྱང་མ་ཡིན་ཏེ་གཟུགས་བཞིན་ནོ། །དཔེར་ན་གཞིག་ཅིང་གཞོམ་དུ་རུང་བས་གཟུགས་ཡིན་ཞིང༌། ཐོགས་པ་མེད་པས་འདས་པ་དང་མ་འོངས་པ་དང་རྣམ་པར་རིག་བྱེད་མ་ཡིན་པ་དང། རྡུལ་ཕྲ་རབ་རྣམས་ལ་གཟུགས་སུ་རུང་བ་ཡོད་པ་ཡང་མ་ཡིན་ལ། དེ་དག་གཟུགས་མ་ཡིན་པ་ཉིད་ཀྱིས་མ་ཡིན་ཞིང་འདི་གཟུགས་ཁོ་ན་ལ་ཡོད་པས་གཟུགས་ཀྱི་ངེས་ཚིག་མ་ཡིན་པ་བཞིན་ནོ། །དེ་ཡང་ཞེས་བྱ་བ་ནི་གང་འཇིག་རྟེན་ན་གྲགས་པ་བ་ལང་དང་རྟ་ཞེས་བྱ་བའོ། །
ཅིའི་ཕྱིར་ཞེས་བྱ་བ་ནི་རྒྱུ་གང་གིས་མིང་ཉིད་ཡིན་ཞེས་བྱ་བའོ། །མིང་དེ་དང་དེ་ཞེས་བྱ་བ་ལ་ལྡན་པ་མ་ཡིན་པའི་འདུ་བྱེད་དེ་མིང་ཉིད་ཡིན་ཏེ་ཕུང་པོ་བཞིར་བཤད་དེ། །གཞན་དག་ན་རེ་འདིར་ལུས་བོར་ནས་ཞེས་བྱ་བ་རྒྱས་པར་འབྱུང་སྟེ། ཇི་སྐད་དུ། ཤི་ཤིང་དུས་བྱས་པ་དེའི་ལུས་རུལ་བ་དེ་ཉེ་དུ་རྣམས་ཀྱིས་མེས་བསྲེག་པའམ། ཆུར་བསྒྱུར་བའམ། སའི་འོག་ཏུ་འཇུག་པར་འགྱུར་ཞིང༌། རླུང་དང་ཉི་མ་དག་གིས་སྐམ་པ་དང༌། ཡོངས་སུ་ཟད་པ་དང་གཏུགས་པར་འགྱུར་ཏེ། སེམས་ཞེས་བྱ་བ་དང༌། ཡིད་ཅེས་བྱ་བ་དང༌། རྣམ་པར་ཤེས་པ་ཞེས་བྱ་བ་དད་པས་ཡོངས་སུ་བསྒོས་པ་དང༌། ཚུལ་ཁྲིམས་དང༌། ཐོས་པ་དང༌། གཏོང་བ་དང༌། ཤེས་རབ་ཀྱིས་ཡོངས་སུ་བསྒོས་པ་གང་ཡིན་པ་དེ་ནི་ཕྱི་མ་ལ་གོང་དུ་འགྲོ་བ་དང༌། ཁྱད་པར་དུ་འགྲོ་བ་དང༌། མཐོ་རིས་སུ་འགྲོ་བར་འགྱུར་རོ་ཞེས་གསུངས་པ་ལྟ་བུའོ། །རྣམ་པར་ཤེས་པ་གཞོལ་བ་ནི་མར་མེ་འཕོ་བའི་ཚུལ་དུ་ཡིན་པར་རིག་པར་བྱའོ། །སྐྱེ་མཆེད་དྲུག་བཤད་ཟིན་ཏོ། །གང་དུ་བཤད་ཅེ་ན། དེ་དག་རྣམས་ཀྱི་རྣམ་ཤེས་རྟེན། མིག་ལ་སོགས་གཟུགས་ཞེས་བྱ་བ་དེར་མིག་ལ་སོགས་པའི་སྐྱེ་མཆེད་ལྔ་པོ་རྣམས་སོ། །རྣམ་ཤེས་སོ་སོ་རྣམ་རིག་པ་ཞེས་བྱ་བ་དེར་ཡིད་ཀྱི་སྐྱེ་མཆེད་དོ། །རེག་དྲུག་ཅེས་བྱ་བས་རྟེན་གྱི་དབྱིབས་རེག་པའི་དབྱེ་བ་ཙམ་ཞིག་བཤད་ལ། འདུས་ཏེ་བྱུང་བ་ཡིན་ཞེས་བྱ་བ་འདིར་ཡང་རྒྱུ་བཤད་ཀྱི་ངོ་བོ་ནི་མ་ཡིན་ཏེ། འདུས་པ་ནི་ལན་ཅིག་འབྱུང་བའོ་སྙམ་དུ་བསམས་ནས་སྨྲས་པ་ནི། རེ་ཞིག་ལྷན་ཅིག་སྐྱེ་བའི་ཕྱིར་ཞེས་བྱ་བ་རྒྱས་པར་འབྱུང་བའོ། །ཡིད་དང་ཆོས་དང་ཡིད་ཀྱི་རྣམ་པར་ཤེས་པ་རྣམས་སྐྱེ་བའི་དུས་ཐ་དད་པའི་ཕྱིར་ལྷན་ཅིག་འབྱུང་བ་མི་སྲིད་དོ་སྙམ་ཞིང་ཡིད་ཀྱི་དབང་པོ་འགགས་པ་གོ་ཞེས་བྱ་བ་ལ་སོགས་པ་སྨྲས་ཏེ། དྲུག་པོ་འདས་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ་ཞེས་བྱ་བས་ཡིད་ཀྱི་རྣམ་པར་ཤེས་པ་ནི་འདས་པ་ཡིན་པའི་ཕྱིར་འགགས་པའོ། །གཟུགས་ལ་སོགས་པའི་ཆོས་ཡིད་ཀྱི་རྣམ་པར་ཤེས་པས་དམིགས་པར་བྱ་བ་རྣམས་ནི་འབྱུང་བར་འགྱུར་བ་ཡིན་པའི་ཕྱིར་མ་འོངས་པའོ། །སེམས་དང་སེམས་ལས་བྱུང་བ་ད་ལྟར་བ་རྣམས་ཁོ་ནས་དམིགས་པ་
དམིགས་པའི་ཕྱིར། ཡིད་ཀྱི་རྣམ་པར་ཤེས་པ་ནི་ད་ལྟར་གྱིའོ། །ཇི་ལྟར་འདུས་ཞེས་བྱ་བ་ནི་འདུ་བ་ཡོད་པ་མ་ཡིན་པ་དེ་ཉིད་དེ། དུས་ཐ་དད་བར་གཏོགས་པའི་ཕྱིར་རོ་སྙམ་དུ་བསམས་པའོ། །རྒྱུ་དང་འབྲས་བུའི་དངོས་པོ་གང་ཡིན་པ་ཞེས་བྱ་བ་ལ་ཡིད་ཀྱི་རྣམ་པར་ཤེས་པ་ནི་འབྲས་བུའི་དངོས་པོའོ། །ཡིད་ཀྱི་དབང་པོ་དང་ཆོས་རྣམས་ནི་རྒྱུའི་དངོས་པོའོ། །རིག་པ་བསྐྱེད་པར་བྱ་བ་ལ་མཐུན་པ་ཡིན་པའི་ཕྱིར་ཞེས་བྱ་བ་ནི་རེག་པ་བསྐྱེད་པར་བྱ་བའི་ཆེད་དུ་ཕན་ཚུན་རྗེས་སུ་མཐུན་པ་སྟེ། རེག་པ་བསྐྱེད་པ་ལ་ཐམས་ཅད་ཀྱང་རྗེས་སུ་མཐུན་པར་འགྱུར་ཞེས་བྱ་བའི་དོན་ཏོ། །འབྲས་བུ་གཅིག་པའི་དོན་ནོ་ཞེས་བྱ་བ་ནི་ཡུལ་དང་དབང་པོ་རྣམ་པར་ཤེས་པ་རྣམས་འབྲས་བུ་གཅིག་ཉིད་ལ་འདུ་བ་ཞེས་བརྗོད་དོ། །འདི་རེག་པའི་ཚོགས་ཞེས་བྱ་བ་ལ། གལ་ཏེ་ཡུལ་དང་དབང་པོ་དང༌། རྣམ་པར་ཤེས་པ་རྣམས་འདུས་པ་ཙམ་རིག་པ་ཡིན་ན་ནི་དེ་དག་ལས་དོན་གཞན་དུ་གྱུར་པ་མ་ཡིན་ལ། དེ་ལྟ་ཡིན་ན་ཡུལ་དང་དབང་པོ་དང་རྣམ་པར་ཤེས་པ་དྲུག་ཚན་ལས་ལོགས་ཤིག་ཏུ་གསུང་པར་མི་འགྱུར་ཏེ། གང་དག་ཡང་རེག་པ་སྨོས་པས་བསྟན་པར་བྱས་སོ་ཞེས་རྟོག་པ་དེ་དག་ལས་ཐ་དད་པའི་དུས་ཡུལ་དང་དབང་པོ་དང་རྣམ་པར་ཤེས་པ་དག་ཡོད་པ་ནི་མ་ཡིན་ནོ། །དེའི་ཕྱིར་སྲེད་པ་ལ་སོགས་པ་བཞིན་དུ་དེ་དག་ལས་ལོགས་ཤིག་ཏུ་བསྟན་པས་དེ་དག་འདུས་པ་ཙམ་ནི་རེག་པ་མ་ཡིན་ནོ་ཞེས་བྱ་བར་ཤེས་སོ། །ཡུལ་དང་དབང་པོ་དང༌། རྣམ་པར་ཤེས་པ་དག་ལས་ལོགས་ཤིག་ཏུ་བསྟན་པས་རེག་པ་དེ་དག་ལས་ལོགས་ཤིག་ཏུ་ཡོད་པ་ནི་མ་ཡིན་ནོ། །ཅིའི་ཕྱིར་མ་ཡིན་ཞེ་ན། ཚོར་བ་དང་སྲེད་པ་དག་ཀྱང་ཆོས་ཀྱི་སྐྱེ་མཆེད་ལས་ཞེས་བྱ་བ་རྒྱས་པར་སྨོས་སོ། །གལ་ཏེ་ལོགས་ཤིག་ཏུ་བསྟན་པས་སྲེད་པ་ལ་སོགས་པ་ལྟར་ལོགས་སུ་ཡོད་ན། །དེ་ལྟ་ན་ཆོས་ཀྱི་རྣམ་གྲངས་དྲུག་ཚན་དྲུག་པ་འདི་ཉིད་ལས་ཚོར་བ་དང་སྲེད་པ་དག་ཆོས་ཀྱི་སྐྱེ་མཆེད་ལས་ལོགས་ཤིག་ཏུ་བཤད་པས་ཆོས་ཀྱི་སྐྱེ་མཆེད་ལས་ལོགས་ཤིག་ཏུ་ཡོད་པར་ཐལ་བར་འགྱུར་ན། དེ་ནི་འདོད་པ་ཡང་མ་ཡིན་ནོ། །དེའི་ཕྱིར་ལོགས་ཤིག་ཏུ་གསུངས་པ་ནི་གཞན་ཉིད་ཀྱི་རྒྱུ་མ་ཡིན་ཏེ་འཁྲུལ་པའི་
ཕྱིར་རོ། །དེ་དག་ལས་མ་གཏོགས་པའི་ཆོས་ཀྱི་སྐྱེ་མཆེད་ཀྱང་ཞེས་བྱ་བ་ལ་སོགས་པ་ལ། གང་ཞིག་ཚོར་བ་དང་སྲེད་པ་དང་གཉིས་བསལ་ནས་ཆོས་ཀྱི་སྐྱེ་མཆེད་ཅེས་བསྟན་པ། ཚོར་བ་དང་སྲེད་པ་མ་གཏོགས་པའི་ཆོས་ཀྱི་སྐྱེ་མཆེད་འདུས་མ་བྱས་དང༌། རྣམ་པར་རིག་བྱེད་མ་ཡིན་པ་དང། འདུ་ཤེས་དང་སེམས་ལ་སོགས་པའི་མཚན་ཉིད་ཅན་ཡང་ཡོད་དེ། དེའི་ཕྱིར་གང་ཞིག་གང་ལས་ལོགས་ཤིག་ཏུ་བསྟན་པ་དེ་ནི་དེ་ལས་ཐ་དད་པ་ཁོ་ན་ཡིན་པས་ལོགས་སུ་བསྟན་པ་ལ་འཁྲུལ་པ་མེད་པ་ཉིད་དོ། །དེ་ལྟ་བུར་ནི་འདིར་ཞེས་བྱ་བ་རྒྱས་པར་འབྱུང་སྟེ། དེ་ལྟ་བུར་གང་ཞིག་མདོ་འདིར་ནང་དང་ཕྱིའི་སྐྱེ་མཆེད་སྨོས་པ་དང༌། རྣམ་པར་ཤེས་པ་སྨོས་པས་སྨོས་སུ་རུང་བ། རེག་པ་ཞེས་བྱ་བའི་རྒྱུ་དང་འབྲས་བུར་གྱུར་པ་ཡུལ་དང་དབང་པོ་དང་རྣམ་པར་ཤེས་པ་གསུམ་ལས་གཞན་གསུམ་རེག་པར་མ་གྱུར་པ་གང་ཡིན་པ་ནི་ཡོད་པ་མ་ཡིན་ནོ། །དེའི་ཕྱིར་རེག་པ་ནི་དབང་པོ་དང་ཡུལ་དང་རྣམ་པར་ཤེས་པ་རྣམས་ལས་གཞན་ཁོ་ན་ཡིན་ཏེ། ལོགས་ཤིག་ཏུ་བསྟན་པའི་ཕྱིར་རོ། །ཅི་སྟེ་དེ་དང་མཚུངས་པའི་ཡུལ་དང་དབང་པོ་དང་རྣམ་པར་ཤེས་པ་ཕན་ཚུན་བལྟོས་པ་མེད་པ་རྣམས་ཀྱི་ནང་དང་ཕྱིའི་སྐྱེ་མཆེད་དང་རྣམ་པར་ཤེས་པ་དྲུག་པོ་དག་ལོགས་ཤིག་ཏུ་བསྟན་ལ། རྟེན་པ་མཚུངས་པ་ཕན་ཚུན་བལྟོས་པ་རྣམས་ནི་རེག་པའི་ཚོགས་སྨོས་པས་སྨོས་པའི་ཕྱིར་ན་དེ་དོན་གཞན་གྱི་དངོས་པོ་མ་ཡིན་ཡང༌། ཡུལ་དང་དབང་པོ་དང་རྣམ་པར་ཤེས་པ་དག་ལས་ལོགས་ཤིག་ཏུ་བསྟན་པར་མི་འགལ་ལོ་སྙམ་ན་གལ་ཏེ་རྣམ་པར་ཤེས་པའི་ཞེས་བྱ་བ་རྒྱས་པར་འབྱུང་ངོ༌། །དོན་དང་དབང་པོ་དག་ནི་དེ་དང་མཚུངས་པ་ཡིན་པས་རྣམ་པར་ཤེས་པ་ལ་མི་ལྟོས་པར་འགྱུར་ན། རྣམ་པར་ཤེས་པ་ནི་དོན་དང་དབང་པོ་མེད་པ་མ་ཡིན་ཏེ། དེ་དག་གི་རྒྱུ་ཅན་ཡིན་པའི་ཕྱིར་རོ། །རྒྱུ་ནི་འབྲས་བུ་མེད་པར་ཡང་ཡོད་ན་འབྲས་བུ་ནི་རྒྱུ་མེད་པར་མ་ཡིན་ཏེ་དེ་ལ་རག་ལས་ཏེ་སྐྱེ་བའི་ཕྱིར་རོ། །དེའི་ཕྱིར་གང་རྣམ་པར་ཤེས་པའི་ཚོགས་དྲུག་ཅེས་ལོགས་ཤིག་ཏུ་བསྟན་པར་བྱ་བ་དོན་དང་དབང་པོ་ལྟར་རེག་པར་མ་གྱུར་པའི་རྣམ་པར་ཤེས་པ་དོན་དང་དབང་པོ་ལ་བལྟོས་པ་མེད་པ་ནི་ཅུང་ཟད་ཀྱང་མེད་དོ། །དེ་ལྟ་བས་ན་གསུམ་བསྟན་ཟིན་པས་ཞེས་བྱ་བས་ནི་ཡུལ་དང་
དབང་པོ་དང་རྣམ་པར་ཤེས་པ་དག་གོ །རེག་པ་སྨོས་པ་ནི་དོན་མེད་དོ་ཞེས་བྱ་བ་ལ། དབང་པོ་དང་དོན་དང་རྣམ་པར་ཤེས་པ་དེ་དག་ཁོ་ན་རེག་པ་ཡིན་ལ། དེ་དག་ཀྱང་བསྟན་པས་ཡང་རེག་པའི་ཚོགས་དྲུག་ཅེས་བསྟན་པ་དོན་མེད་པར་འགྱུར་ན། འདོད་པ་ཡང་མ་ཡིན་ཏེ། དེས་ན་རེག་པ་ནི་འདུས་པ་ལས་གཞན་ཁོ་ན་ཡིན་ནོ་ཞེས་བྱ་བར་ཁས་བླང་པར་བྱའོ། །གང་དག་རྒྱུ་དང་འབྲས་བུའི་དངོས་པོ་ཡིན་པ་ཞེས་བྱ་བ་ལ། མིང་དང་གཟུགས་སྔར་སྐྱེས་པ་དག་དང༌། མིག་གི་རྣམ་པར་ཤེས་པ་ཕྱིས་སྐྱེས་པ་ནི་རྒྱུ་དང་འབྲས་བུའི་དངོས་པོ་ཡིན་པས་དེ་དག་ཁོ་ན་རེག་པའི་དངོས་པོར་བཞག་ལ། མིག་ལ་སོགས་པ་གང་དག་རྒྱུ་དང་འབྲས་བུར་གྱུར་པ་དེ་དག་ནི་ནང་དང་ཕྱིའི་སྐྱེ་མཆེད་དང་རྣམ་པར་ཤེས་པའི་ཚོགས་ཉིད་དུ་བསྟན་ཏེ། དེ་དག་ཀྱང་དབང་པོ་དང་ཡུལ་དང་རྣམ་པར་ཤེས་པ་ལྷན་ཅིག་སྐྱེས་པ་རྣམས་དང༌། ཕན་ཚུན་ཆོད་པ་སྔ་ཕྱིར་སྐྱེས་པས་སོ་ཟེར་རོ་ཞེས་བྱ་བ་ནི་སློབ་དཔོན་དཔལ་ཡིན་ཏེ། འདི་ལ་ཡང་ལན་ནི་གལ་ཏེ་རྣམ་པར་ཤེས་པ་མེད་པའི་དབང་པོ་དང་དོན་དག་ཅེས་རྒྱས་པར་འབྱུང་བ་དེ་ཉིད་ཡིན་ནོ། །དེ་སྐད་དུ་མི་འདོན་ཏོ་ཞེས་བྱ་བ་ནི་དང་པོར་མི་བྱེད་ཀྱི། འོ་ན་ཅི་ཞེ་ན། ཆོས་གསུམ་པོ་འདི་དག་འབྲེལ་པ་དང༌། འདུས་པ་དང༌། ཚོགས་པ་ལས་བྱུང་བ་གང་ཡིན་པ་དེ་ནི་རེག་པའོ་ཞེས་ལྔ་པར་བྱེད་པའོ། །ཡང་ན་ནི་འདི་རྒྱུ་ལ་ཞེས་བྱ་བ་ལ་སོགས་པ་ལ། རེག་པའི་རྒྱུ་གསུམ་འདུས་པ་ནི་རེག་པར་སྨྲའོ་ཞེས་བྱ་བའི་དོན་ཏོ། །ཐོགས་པ་དང་བཅས་པའི་དབང་པོ་ལ་བརྟེན་པའི་ཕྱིར་ཞེས་བྱ་བ་ལ་མིག་ལ་སོགས་པ་དག་ནི་རང་གི་ཡུལ་དུ་གཟུགས་ཅན་གཞན་སྐྱེ་བ་ལ་གེགས་བྱེད་པས་ཐོགས་པ་དང་བཅས་པའོ། །གཞན་དག་ན་རེ་ཐོགས་པ་དང་བཅས་པའི་དབང་པོ་ལ་བརྟེན་པའི་ཕྱིར་དང༌། གཅིག་ཏུ་ཐོགས་པ་དང་བཅས་པའི་ཆོས་ཀྱི་ཡུལ་ཅན་ཡིན་པའི་ཕྱིར་ཞེས་ཟེར་རོ། །ཚིག་བླ་དགས་ཞེས་བྱ་བ་ནི་མིང་ཡིན་ནོ་ཞེས་བྱ་བ་ནི་ལྷས་བྱིན་མཆོད་སྦྱིན་ཞེས་བྱ་བ་སེམས་དང་ལྡན་པ་མ་ཡིན་པའི་འདུ་བྱེད་དེ། དེ་ནི་དྲུག་པ་ཁོ་ནའི་ཡུལ་ཡིན་གྱི་གཞན་གྱི་ནི་མ་ཡིན་ནོ། །དེ་ཉིད་རབ་ཏུ་བསྟན་པའི་ཕྱིར་དེ་ལྷག་པར་འདིའི་དམིགས་པ་ཡིན་པའི་
ཞེས་བྱ་བ་སྨོས་ཏེ། གྲག་ཅེས་བྱ་བའི་སྒྲ་ནི་སྒྲ་ལས་མ་གཏོགས་པའི་མིང་མེད་པར་ཤེས་པར་བྱ་བའི་ཕྱིར་རོ། །མིག་གི་རྣམ་པར་ཤེས་པས་ནི་སྔོན་པོ་རྣམ་པར་ཤེས་ཀྱི་ཞེས་བྱ་བ་ནི་བརྗོད་པར་བྱ་བའི་རང་གི་ངོ་བོ་རྣམ་པར་ཤེས་སོ། །སྔོན་པོའོ་ཞེས་བྱ་བར་ནི་རྣམ་པར་མི་ཤེས་སོ་ཞེས་བྱ་བ་ནི་མིང་གི་སྒོ་ནས་རྣམ་པར་མི་ཤེས་པ་སྟེ། །མིག་གི་རྣམ་པར་ཤེས་པ་ནི་རྣམ་པར་རྟོག་པ་མེད་པ་ཡིན་པའི་ཕྱིར་རོ། །ཡིད་ཀྱི་རྣམ་པར་ཤེས་པས་ནི་རང་གི་ངོ་བོ་དང་མིང་གཉིས་ཀའི་སྒོ་ནས་རྣམ་པར་ཤེས་པ་སྟེ། དེའི་མིང་དང་མིང་ཅན་གྱི་འབྲེལ་པ་འཛིན་པར་ནུས་པའི་ཕྱིར་རོ། །གཅིག་ནི་རྟེན་གྱིས་རབ་ཏུ་ཕྱེ་བ་ཡིན་ནོ་ཞེས་བྱ་བ་ནི་ཐོགས་པའི་རེག་པ་སྟེ། ཐོགས་པ་དང་བཅས་པའི་དབང་པོ་ལ་བརྟེན་པའི་ཕྱིར་རོ། །གཞན་དག་ན་རེ་རྟེན་དང་དམིགས་པ་རབ་ཏུ་ཕྱེ་བ་ཡིན་ནོ་ཞེས་ཟེར་རོ། །གཉིས་པ་ནི་དམིགས་པས་རབ་ཏུ་ཕྱེ་བ་ཡིན་ནོ་ཞེས་བྱ་བ་ནི་ཚིག་བླ་དགས་ཀྱི་རེག་པ་སྟེ། ལྷག་པར་ཚིག་བླ་དགས་ཀྱི་དམིགས་པ་ཅན་ཡིན་པའི་ཕྱིར་རོ། །ཚིག་གི་དབང་དུ་བྱས་ནས་ཞེས་བྱ་བ་ལ། ཚིག་གི་སྒོ་ནས་ཚིག་ངེས་པར་གཟུང་སྟེ། རྣམ་པར་རྟོག་པས་གཟུགས་ལ་སོགས་པའི་དོན་རྣམས་ལ་ཡིད་ཀྱི་རྣམ་པར་ཤེས་པ་རབ་ཏུ་འཇུག་གི་རྣམ་པར་ཤེས་པའི་ཚོགས་ལྔ་པོ་རྣམས་ནི་མ་ཡིན་ཏེ་རྣམ་པར་རྟོག་པ་མེད་པའི་ཕྱིར་རོ། །ཡང་ན་ཚིག་གི་དབང་དུ་བྱས་ནས་ཞེས་བྱ་བ་ནི་ཉེ་བར་བསྟན་པས་མིང་དང་མིང་ཅན་གྱི་འབྲེལ་བ་ལ་བྱང་བ་ཉིད་ཀྱིས་རྣམ་པར་ཤེས་པའི་སྒོ་ནས་བུམ་པ་དང་སྣམ་བུ་ཞེས་བྱ་བར་རྟོགས་པ་ཡིན་ནོ། །དེས་ན་ཡིད་ཀྱི་རྣམ་པར་ཤེས་པ་ཁོ་ན་ཚིག་བླ་དགས་སོ། །གཞན་དག་ན་རེ་ཀུན་ནས་སློང་བའི་ཚིག་གི་དབང་དུ་བྱས་ནས་འཇུག་པས་ཡིད་ཀྱི་རྣམ་པར་ཤེས་པ་ཁོ་ན་ཚིག་བླ་དགས་སོ་ཞེས་ཟེར་རོ། །གཉིས་པ་ནི་མཚུངས་པར་ལྡན་པས་རབ་ཏུ་ཕྱེ་བ་ཡིན་ནོ་ཞེས་བྱ་བ་ལ་ཚིག་བླ་དགས་ནི་ཡིད་ཡིན་ལ་དེ་དང་མཚུངས་པར་ལྡན་པའི་རིག་པ་ནི་ཚིག་བླ་དགས་ཀྱི་རིག་པའོ། །རིག་པ་དང་མ་རིག་པ་དག་མཚུངས་པར་ལྡན་པ་མ་ཡིན་པས་དེ་ཁྱད་པར་གྱི་ཁྱད་པར་དུ་བྱས་པའོ། །ཚོར་བ་དང་བདེ་བ་དང་མཐུན་པའི་ཕྱིར་རོ་ཞེས་བྱ་བ་ནི་ཚོར་བ་བདེ་བ་དང་རྗེས་སུ་མཐུན་པའི་ཕྱིར་རོ་ཞེས་བྱ་བ་དང༌།
ཚོར་བ་བདེ་བ་སྐྱེད་པར་བྱེད་པ་ཡིན་པའི་ཕྱིར་རོ་ཞེས་བྱ་བའི་དོན་ཏོ། གཞན་དག་ལ་ཡང་དེ་དང་འདྲ་བར་བརྗོད་པར་བྱའོ། །ཇི་ལྟར་དེ་བྱ་བའམ་བྱ་བ་ནུས་པར་བྱ་པར་འགྱུར་བ་ཡིན་པ་དེ་བཞིན་དུ་དེ་མྱང་བར་བྱ་བའམ། མྱང་བར་ནུས་པའི་ཕྱིར་མྱང་བར་འགྱུར་བའོ། །དེ་དག་ནི་རེག་པ་བཅུ་དྲུག་ཡིན་ནོ་ཞེས་བྱ་བ་ནི་མིག་གི་འདུས་ཏེ་རེག་པ་ལ་སོགས་པ་དྲུག་དང༌། ཐོགས་པ་དང་ཚིག་བླ་དགས་ཀྱི་རེག་པ་གཉིས་དང༌། རིག་པ་དང་མ་རིག་པ་དང་གཞན་གྱི་རིག་པ་གསུམ་དང༌། གནོད་སེམས་དང་རྗེས་སུ་ཆགས་པའི་རེག་པ་གཉིས་དང༌། བདེ་བ་མྱོང་བར་འགྱུར་བ་ལ་སོགས་པ་གསུམ་སྟེ། དེ་ལྟར་དེ་དག་ཐམས་ཅད་ནི་བཅུ་དྲུག་ཏུ་འགྱུར་རོ། །རེག་པ་རྣམ་པར་གཏན་ལ་དབབ་པ་དང༌། རབ་ཏུ་དབྱེ་བ་དང་བཅས་ཏེ་བཤད་ཟིན་ཏོ། །ཚོར་བ་བརྗོད་པར་བྱ་སྟེ་ཞེས་བྱ་བ་ལ། ཚོར་བ་མྱོང་བ་ཞེས་སྔར་ཚོར་བ་བཤད་ཟིན་པ་མ་ཡིན་ནམ་ཞེ་ན། བཤད་པ་བདེན་མོད་ཀྱི་དེར་ནི་རང་གི་ངོ་བོའི་སྒོ་ནས་ཡིན་གྱི་རབ་ཏུ་དབྱེ་བས་ནི་མ་ཡིན་ལ། འདིར་ནི་རབ་ཏུ་དབྱེ་བའི་སྒོ་ནས་བསྟན་པ་བརྗོད་པར་འདོད་པའི་ཕྱིར་ཟློས་པའི་སྐྱོན་མེད་དེ། དེ་ཉིད་ཀྱི་ཕྱིར་དེ་ལས་བྱུང་བ་ཚོར་བ་དྲུག་ཅེས་སྨོས་སོ། །དེ་དག་ཀྱང་མདོར་བསྡུ་ན་ཚོར་བ་གཉིས་སུ་འགྱུར་ཏེ། ལུས་ཀྱི་དང་སེམས་ཀྱིའོ། །དེ་ཉིད་ཀྱི་ཕྱིར། དེ་དག་ལས་ལྔ་ནི་ལུས་ཀྱིའོ་ཞེས་བྱ་བ་སྨོས་སོ། །སེམས་ཀྱི་ཡིན་ཡང་དབང་པོ་གཟུགས་ཅན་ལ་བརྟེན་པའི་ཕྱིར་ལུས་ཀྱི་ཞེས་བྱ་སྟེ། རྡུལ་ཕྲ་རབ་བསགས་པ་ཡིན་པའི་ཕྱིར་དང༌། ལུས་ལ་བརྟེན་པའི་ཕྱིར་ན་ལུས་ཀྱི་སྒྲ་ནི་མིག་ལ་སོགས་པ་དག་ལ་འཇུག་གོ །སེམས་ཙམ་བརྟེན་པའི་ཕྱིར་ཞེས་བྱ་བ་ལ་ཙམ་ཞེས་བྱ་བ་སྨོས་པ་ནི་དེ་ལས་ལྷག་པའི་རྟེན་བཅད་པར་བྱ་བའི་ཕྱིར་རོ། །ལུས་ཀྱི་ཡང་སེམས་ལ་བརྟེན་པ་ཡིན་མོད་ཀྱི། སེམས་ཙམ་ལ་བརྟེན་པ་ནི་མ་ཡིན་ཏེ། དེའི་རྟེན་ནི་མིག་ལ་སོགས་པ་རྣམས་ཀྱང་ཡིན་པའི་ཕྱིར་རོ། །ཡང་ཇི་ལྟར་ཚོར་བ་རེག་པའི་འོག་ཏུ་འབྱུང་བ་ཞེས་བྱ་བ་རྒྱས་པར་འབྱུང་བ་ནི། གཉིས་ཀ་ལྟར་ཡང་འགལ་བར་མཐོང་བའི་དྲི་བའོ། །བྱེ་བྲག་ཏུ་སྨྲ་བ་སྨོས་པ་ནི་ཁ་ཅིག་ན་རེ་སྐྱེད་པར་བྱེད་པའི་ཆོས་ལས་འདས་པས་མ་འོངས་པའི་དོན་དུ་
ཡིན་ནོ་ཞེས་ཟེར་རོ། །ཕན་ཚུན་ལྷན་ཅིག་འབྱུང་བའི་རྒྱུ་ཡིན་པའི་ཕྱིར་ཚོར་བ་ནི་རེག་པ་དང་དུས་མཉམ་པ་ཡིན་ཏེ། དེ་ལས་གཞན་པའི་སེམས་ལས་བྱུང་བ་བཞིན་ནོ། །ཇི་ལྟར་ལྷན་ཅིག་འབྱུང་བ་གཉིས་སྐྱེད་པར་བྱེད་པ་དང་བསྐྱེད་པར་བྱ་བའི་དངོས་པོར་གྲུབ་ཅེས་བྱ་བ་ལ། སྐྱེད་པར་བྱེད་པའི་དངོས་པོ་ནི་སྐྱེད་པར་བྱེད་པ་ཉིད་དེ། འབྲས་བུ་བསྐྱེད་པར་ནུས་པའོ། །བསྐྱེད་པར་བྱ་བའི་དངོས་པོ་ནི་བསྐྱེད་པར་བྱ་བ་ཉིད་དེ། བདག་ཉིད་དུ་མ་རེག་པ་ཞེས་བྱ་བའི་དོན་ཏོ། །དེ་ལྟ་ཡིན་དང་སྐྱེད་པར་བྱེད་པ་དང་བསྐྱེད་པར་བྱ་བའི་དངོས་པོ་ནི་སྐྱེས་པ་དང་མ་སྐྱེས་བ་དག་ལ་གྲུབ་ཀྱི་སྐྱེས་ཟིན་པ་དག་ཁོ་ན་ལ་ནི་མ་ཡིན་ནོ་སྙམ་དུ་བསམས་པའོ། །ལྷན་ཅིག་འབྱུང་བ་གཉིས་ལ་ཡང་སྐྱེད་པར་བྱེད་པ་དང་བསྐྱེད་པར་བྱ་བའི་དངོས་པོ་མི་འགལ་བར་མཐོང་སྟེ་འདྲི་བ་ནི་ཇི་ལྟར་མི་འགྲུབ་ཅེས་བྱ་བའོ། །མཐུ་མེད་པའི་ཕྱིར་ཏེ་ཞེས་བྱ་བ་ལ། སྐྱེས་ཟིན་པ་བདག་ཉིད་ཐོབ་པ་ནི་ཡང་བསྐྱེད་པར་མི་ནུས་ཏེ། དེའི་ཕྱིར་དེ་ལ་བསྐྱེད་པའི་མཐུ་ཡོད་པ་མ་ཡིན་ནོ། །དེ་ཉིད་བསྟན་པའི་ཕྱིར་ཆོས་སྐྱེས་ཟིན་པ་ལ་ནི་ཆོས་ཀྱི་ནུས་པ་མེད་དོ་ཞེས་བྱ་བ་སྨོས་སོ། །དམ་བཅས་པ་དང༌། བྱེ་བྲག་མེད་པ་ཡིན་ནོ་ཞེས་བྱ་བ་ནི་དོན་གང་ཞིག་དམ་བཅས་པས་ཉེ་བར་གཟུང་བ་དེ་ཉིད་གཏན་ཚིགས་ཀྱི་ཚིག་གིས་ཀྱང་གཟུང་བས་དམ་བཅས་པ་དང་བྱེ་བྲག་མེད་དོ། །དེ་ཉིད་བསྟན་པའི་ཕྱིར་ལྷན་ཅིག་འབྱུང་བ་གཉིས་ཞེས་རྒྱས་པར་སྨོས་ཏེ། ཕན་ཚུན་བསྒྲུབ་བྱ་སྒྲུབ་བྱེད་ཡིན་པའི་ཕྱིར་དམ་བཅའ་བ་དང་ཁྱད་པར་མེད་དེ་ཞེས་བྱ་བའོ། །གལ་ཏེ་དམ་བཅའ་བ་དང་བྱེ་བྲག་མེད་པའི་ཕྱིར་འདི་སྒྲུབ་པར་བྱེད་པ་མ་ཡིན་ན། འོ་ན་ནི་ཕན་ཚུན་སྐྱེད་པར་བྱེད་པ་ཐལ་བར་འགྱུར་བའི་ཕྱིར་རོ་ཞེས་བྱ་བ་ཡིན་ཏེ། གང་ལས་འདིར་གཅིག་ཁོ་ན་སྐྱེད་པར་བྱེད་པ་ཡིན་གྱི། གཞན་ནི་མ་ཡིན་ནོ་ཞེས་བྱ་བའི་ཁྱད་པར་གྱི་རྒྱུ་ནི་འགའ་ཡང་འདི་ལ་ཡོད་པ་མ་ཡིན་ཏེ། དེ་ལྟ་ཡིན་ན་རེག་པ་དང་ཚོར་བ་གཉིས་ཕན་ཚུན་སྐྱེད་བྱེད་ཉིད་དུ་ཐལ་བའི་ཕྱིར་རྟེན་ཅིང་འབྲེལ་པར་འབྱུང་བ་འགལ་ལོ། །དེའི་ཕྱིར་ལྷན་ཅིག་ཏུ་འབྱུང་བ་གཉིས་སྐྱེད་པར་བྱེད་པ་དང་བསྐྱེད་པར་བྱ་བའི་དངོས་པོར་མི་རིགས་སོ། །གནས་སྐབས་པ་ཉིད་ཀྱི་ཕྱིར་རྟེན་ཅིང་
འབྲེལ་པར་འབྱུང་བ་འགལ་བར་བལྟ་བའི་ཕྱིར། འདོད་པའི་ཕྱིར་ཉེས་པ་མེད་དེ་ཞེས་སྨོས་སོ། །མདོ་ལས་མི་བཞེད་དེ་ཞེས་བྱ་བ་ལ། རེག་པ་དང་ཚོར་བའི་གནས་སྐབས་དག་ཁོ་ན་ཕན་ཚུན་སྐྱེད་པར་བྱེད་པ་ཉིད་དུ་མདོ་ལས་མི་བཞེད་པ་འདི་འབའ་ཞིག་སྟོན་པར་མ་ཟད་ཀྱི། འོ་ན་ཅི་ཞེ་ན། མུ་ཁྱ་ཡོར་མི་རེག་པ་དང་ཚོར་བ་དག་ཕན་ཚུན་འབྲས་བུ་ཉིད་དུ་ཡང་མི་བཞེད་པ་སྟེ། མིག་གི་འདུས་ཏེ་རེག་པ་ཞེས་རྒྱ་ཆེར་མདོ་ལས་འབྱུང་ངོ༌། །སློབ་དཔོན་འདུས་བཟང་ན་རེ། རེག་པ་རྣམ་པ་གཉིས་ཏེ། བཏགས་པར་ཡོད་པ་དང༌། རྫས་སུ་ཡོད་པའོ། །དེ་ལ་བཏགས་པར་ཡོད་པ་ནི། ཇི་སྐད་བཤད་པ་སྟེ། གང་འདི་ཆོས་གསུམ་རྣམས་འགྲོགས་པ་དང་འདུས་པ་དང་ཚོགས་པ་ལས་འདུས་ཏེ་རེག་པའོ། །རྫས་སུ་ཡོད་པ་ནི་རྣམ་པར་ཤེས་པའི་ཚོགས་ལྔ་ཕྱི་རོལ་དང་བཅས་པའི་མིང་དང་གཟུགས་ཏེ། འདི་གཉིས་དང་གཉིས་ལ་ངེས་པར་བརྟེན་ནས་རེག་པ་མིང་དང་གཟུགས་ཀྱི་རྐྱེན་ཏེ། དེ་བཞིན་དུ་སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་བྱ་བ་དེ་ལྟ་བུ་ལ་སོགས་པའོ། །དེ་ལ་གང་འདི་བཏགས་བར་ཡོད་པ་ནི་ཚོར་བ་དང་བཅས་པའི་རྐྱེན་དུ་མི་འདོད་དོ། །ཚོར་བ་ནི་དེའི་རྐྱེན་ཉིད་དོ། །མིག་དང་གཟུགས་དང་མིག་གི་རྣམ་པར་ཤེས་པ་ཚོགས་པ་རྣམས་ཚོར་བ་ལ་བརྟེན་ནས་སྐྱེ་བ་མེད་དོ། །དེ་ལྟ་མོད་ཀྱི་ཤེས་པ་སྐྱེ་བས་མིག་གི་རྣམ་པར་ཤེས་པ་ཉིད་མིག་གི་འདུས་ཏེ་རེག་པ་མ་ཡིན་ནོ། །དེ་ལ་རྣམ་པར་ཤེས་པ་ནི་སེམས་ལས་བྱུང་བའི་རྟེན་ཡིན་པའི་ཕྱིར་མིག་དང་གཟུགས་དག་ཀྱང་ཚོར་བའི་རྒྱུའི་གཙོ་བོ་སྟེ། ཚོར་བ་སྐྱེ་བའི་རྒྱུ་ཉིད་ཀྱིས་བརྗོད་དོ། །བཏགས་པར་ཡོད་པའི་ཚོར་བ་ནི་མདོ་ལས་ཕན་ཚུན་བསྐྱེད་བྱ་དང་སྐྱེད་བྱེད་ཀྱི་ངོ་བོ་བཀག་པའི་ཕྱིར་མདོ་དང་འགལ་བ་མེད་དོ། །རྫས་སུ་ཡོད་པ་ནི་སེམས་ལས་བྱུང་བའི་རེག་པ་ཡང་དག་པར་མྱོང་བ་ལས་ཚོར་བ་དང་ལྷན་ཅིག་ཕན་ཚུན་རྐྱེན་ཡིན་ནོ། །རེག་པ་ནི་སེམས་ལས་བྱུང་བ་སྟེ་དེའི་འབྲས་བུར་གྱུར་པ་ལས་ཚོར་བ་དང་ལྷན་ཅིག་པའི་དངོས་པོར་མི་རིགས་ཏེ། ཅིའི་ཕྱིར་ཞེ་ན། སྐྱེད་པར་བྱེད་པའི་ཆོས་ལས་འདས་པའི་ཕྱིར་རོ། །སྐྱེད་པར་བྱེད་པ་དང་བསྐྱེད་པར་བྱ་བ་གཉིས་ཅིག་ཅར་ནི་མི་འགྲུབ་སྟེ། ས་བོན་དང་མྱུ་གུ་
བཞིན་ནོ། །སྔ་ཕྱིའི་དངོས་པོ་ཡིན་པ་འབའ་ཞིག་ཏུ་མ་ཟད་ཀྱང་གཟུགས་ལ་སོགས་པ་འབྱུང་བ་ལས་བྱུང་བ་རྣམས་ཀྱིས་སྐྱེད་པར་བྱེད་པ་ཡིན་ནོ། །དགག་པ་ཅི་ཞིག་ཡོད་ཅེས་བྱ་བ་ནི་འདི་ལ་རིག་པ་ཡོད་པ་མ་ཡིན་ཞིང༌། དེ་ནི་དེ་ལྟར་མ་ཡིན་ནོ་ཞེས་བྱ་བའི་ལུང་ཡོད་མོད། འོ་ན་ནི་མྱུ་གུ་དང་གྲིབ་མ་དག་དང༌། མར་མེ་དང་འོད་དག་ཇི་ལྟ་བར་ཞེས་བྱ་བ་ལ། གལ་ཏེ་སྐད་ཅིག་མ་དང་པོ་ལ་གྲིབ་མ་མེད་པ་དང་འོད་མེད་པར་འགྱུར་ན་ནི་དེ་ལྟར་ལྔ་ཕྱིའི་དངོས་པོར་རྟོགས་པར་འགྱུར་ན། འགྱུར་པ་ཡང་མ་ཡིན་ཏེ། །དེའི་ཕྱིར་མྱུ་གུ་དང་མར་མེ་ནི་གྲིབ་མ་དང་འོད་ལྷན་ཅིག་འབྱུང་བ་དག་གི་རྒྱུ་ཡིན་ནོ་ཞེས་བྱ་བར་གྲུབ་བོ། །འདིར་ཡང་རྒྱུའི་ཚོགས་པ་སྔར་བྱུང་བ་ཁོ་ནར་མར་མེ་འོད་དང་བཅས་པ་དང༌། མྱུ་གུ་གྲིབ་མ་དང་བཅས་པའི་རྒྱུར་ཅི་སྟེ་མི་འདོད། གཞན་ཡང་འགྲོ་བ་དང་གནས་པ་དང༌། རྣམ་པར་འགྱུར་པའི་རྗེས་སུ་བྱེད་པའི་ཕྱིར་དང༌། ཡོད་པ་དང་མེད་པ་དག་ཀྱང་དེ་དག་གི་རྒྱུ་ཅན་ཡིན་པའི་ཕྱིར། །མྱུ་གུ་དང་མར་མེ་དང་གྲིབ་མ་དང་འོད་གཉིས་ཀྱིས་སྐྱེད་པར་བྱེད་པ་ཡིན་ལ། འོད་མར་མེའི་ཡིན་པའམ། གྲིབ་མ་མྱུ་གུའི་ཡིན་ནོ་ཞེས་བྱ་བར་ནི་བསྒྲུབ་པར་ནུས་པ་མ་ཡིན་ནོ། །རེག་པ་དང་ཚོར་བ་དག་ལྷན་ཅིག་འབྱུང་བར་དེས་ན་ནི། གང་གིས་ན་རེག་པའི་རྐྱེན་ཁོ་ནས་ཚོར་བ་ཡིན་གྱི། ཚོར་བའི་རྐྱེན་གྱིས་རེག་པ་ནི་མ་ཡིན་ནོ་ཞེས་བྱ་བར་རྟོགས་པར་འགྱུར་བ་རྒྱུ་དེ་འདྲ་བ་ཡོད་པ་མ་ཡིན་ཏེ། དེའི་ཕྱིར་མི་མཐུན་པ་ཉེ་བར་བཀོད་པ་ཡིན་ནོ། །གཞན་དག་ན་རེ་རེག་པའི་འོག་ཏུ་ཚོར་བ་འབྱུང་སྟེ་ཞེས་ཟེར་བ་ནི་སློབ་དཔོན་དཔལ་ལེན་ཏེ། དེ་ལྟར་ན་འདུས་པ་ནི་དབང་པོ་དང་ཡུལ་དང་རྣམ་པར་ཤེས་པ་རྣམས་རྒྱུ་དང་འབྲས་བུའི་དངོས་པོ་ཡིན་གྱི་ལྷན་ཅིག་འབྱུང་བ་ནི་མ་ཡིན་ཏེ། རྒྱུ་དང་འབྲས་བུ་དག་དུས་སྔ་ཕྱིར་འབྱུང་བའི་ཕྱིར་རོ། །རྒྱུ་དང་འབྲས་བུ་ཅིག་ཅར་མ་ཡིན་པའི་ཕྱིར་དབང་པོ་དང་དོན་གཉིས་ནི་དེ་དག་གི་འབྲས་བུར་གྱུར་པའི་རྣམ་པར་ཤེས་པ་བས་སྔ་ལ། དེའི་མཇུག་ཐོགས་སུ་སྐད་ཅིག་མ་གཉིས་པ་ལ་ནི་རྣམ་པར་ཤེས་པ་སྟེ། དེ་དག་གི་འབྲས་བུ་ཡིན་པའི་ཕྱིར་རོ། །གསུམ་འདུས་པ་དེ་ནི་ཞེས་བྱ་བ་རྒྱས་པར་འབྱུང་བ་ནི་དེར་རྒྱུ་དང་འབྲས་བུའི་
དངོས་པོ་རྫོགས་པའི་ཕྱིར་རོ། །སྐད་ཅིག་མ་གསུམ་པ་ལ་ཞེས་བྱ་བ་ནི་རེག་པར་གྱུར་པའི་རྣམ་པར་ཤེས་པའི་རྐྱེན་གྱིས་ཡིན་པའི་ཕྱིར་སྐད་ཅིག་མ་གསུམ་པ་ལ་ཚོར་བའོ། །དེ་ལྟ་ན་ནི་ཞེས་བྱ་བ་ལ་སོགས་པ་ལ། གལ་ཏེ་སྐད་ཅིག་མ་གསུམ་པ་ལ་ཚོར་བ་ཡིན་ནོ། དེ་ལྟ་ན་ནི་རེག་པའི་དུས་ཚོར་ན་ཚོར་བ་མེད་པའི་ཕྱིར་རྣམ་པར་ཤེས་པ་ཐམས་ཅད་ལ་ཚོར་བ་ཡོད་པར་མི་འགྱུར་ཏེ། རེག་པར་གྱུར་པའི་རྣམ་པར་ཤེས་པ་ལ་ཚོར་བ་མེད་པའི་ཕྱིར་རོ། །རྣམ་པར་ཤེས་པ་ཐམས་ཅད་རེག་པ་ཡིན་པར་མི་འགྱུར་རོ་ཞེས་བྱ་བ་ནི་ཚོར་བའི་དུས་ན་རེག་པ་མེད་པའི་ཕྱིར་ཏེ། འདུས་པའི་འོག་རོལ་ཚོར་བའི་དུས་ན་རྣམ་པར་ཤེས་པ་གང་ཞིག་སྐྱེ་བ་དེ་རེག་པ་མ་ཡིན་པས་རྣམ་པར་ཤེས་པ་ཐམས་ཅད་རེག་པ་མ་ཡིན་པར་འགྱུར་ན། འདི་ནི་འདོད་པ་ཡང་མ་ཡིན་ཏེ། རེག་པ་དང་ཚོར་བ་དག་ནི་ས་མང་པོ་པ་ཡིན་པས་སེམས་ཐམས་ཅད་ལ་འབྱུང་བའི་ཕྱིར་དང་རྣམ་པར་ཤེས་པ་ཐམས་ཅད་རེག་པ་ཡིན་ནོ་ཞེས་ཁས་བླངས་པའི་ཕྱིར་རོ། །རེག་པ་ཕྱི་མ་ལ་ཡོད་པའི་ཚོར་བ་རེག་པ་སྔ་མའི་རྒྱུ་ལས་བྱུང་བ་ཡིན་པར་ཞེས་བྱ་བ་རྒྱས་པར་འབྱུང་བ་ནི་ཐམས་ཅད་ལ་ཚོར་བ་དང་རེག་པ་ཉིད་དུ་འདོད་པ་ཡིན་ནོ། །དེ་ནི་ལྷན་ཅིག་འབྱུང་བའི་རེག་པའི་རྐྱེན་གྱིས་ཡིན་པ་ཉིད་དུ་མི་འདོད་དོ། །འོ་ན་དེ་ག་ལས་ཡིན་ཞེ་ན། རེག་པ་སྔ་མའི་རྒྱུ་ལས་བྱུང་བ་ཡིན་ཏེ། དབང་པོ་དང་ཡུལ་སྔ་མའི་རྒྱུ་མཚན་ཅན་གྱི་རེག་པ་གང་ཡིན་པ་དེ་ལས་བྱུང་བ་ཡིན་ནོ། །གང་གི་ཕྱིར་དེ་ལྟར་ན་དབང་པོ་དང་དོན་ལས་བྱུང་བའི་རྣམ་པར་ཤེས་པ་རིག་པ་ཡིན་པས། རེག་པ་ཐམས་ཅད་ཚོར་བ་དང་བཅས་པ་ཡིན་ལ་ཤེས་པ་ཐམས་ཅད་ཀྱང་རེག་པ་ཡིན་ཏེ། དེས་ན་འགལ་བ་མེད་དོ། དམིགས་པ་ཐ་དད་པ་དག་ལས་ཞེས་བྱ་བ་ནི་གཟུགས་དང་སྒྲ་ལ་དམིགས་པ་དག་ལས་སོ། །རེག་པ་ཕྱི་མ་ལ་སྤྱོད་པའི་ཚོར་བ་ཞེས་བྱ་བ་ནི་སྒྲ་ལ་དམིགས་པའོ། །རེག་པ་སྔ་མའི་རྒྱུ་ལས་བྱུང་བ་ཡིན་ནོ་ཞེས་བྱ་བ་ནི་གཟུགས་ལ་དམིགས་པའི་རེག་པའི་རྒྱུ་ལས་བྱུང་བའོ། །ཇི་ལྟར་ན་ཞེས་བྱ་བ་ནི་ཁྲོ་བ་བསལ་བར་བྱེད་པ་སྟེ། རེག་པ་དང་ཚོར་བ་དག་དམིགས་པ་ཐ་དད་པ་དག་ཉིད་ཡིན་ན་ནི། ཕྱིས་བྱུང་བའི་ཚོར་བ་བདེ་
བའི་སྒོ་ནས་རེག་པ་སྔ་མ་ནམ་ཡང་བདེ་བ་མྱོང་བར་མི་འགྱུར་ལ། རེག་པའི་སྟོབས་ཀྱིས་དམིགས་པ་ཉམས་སུ་མྱོང་བ་ཡང་ཡིན་པའི་ཕྱིར་རེག་པ་དང་དམིགས་པ་ཐ་དད་བར་མི་རུང་སྟེ། འདི་ལྟར་བདེ་བ་མྱོང་བར་འགྱུར་བའི་རེག་པས་སྡུག་བསྔལ་ཉམས་སུ་མྱོང་བར་ཇི་ལྟར་བྱེད་ཡང་ན་སེམས་གང་དང་ཞེས་བྱ་བའི་སྒྲ་ལ་དམིགས་པ་དང༌། དེ་ལས་དམིགས་པ་གཞན་པ་ཞེས་བྱ་བ་ནི་གཟུགས་ལ་དམིགས་པ་ཞེས་བྱ་བའི་དོན་ཏོ། །འདི་ལྟ་ཡིན་ན་ཉེས་པ་ཅིར་འགྱུར་ཞེ་ན། ལྷན་ཅིག་འབྱུང་བའི་རེག་པ་ལ་སོགས་པ་དང་མཚུངས་པར་མི་ལྡན་པའི་ཉེས་པར་འགྱུར་ཏེ། དམིགས་པ་ཐ་དད་པས་མཚུངས་པ་ཉིད་ལྔས་མཚུངས་པར་མི་ལྡན་པའི་ཕྱིར་རོ། །སྡུག་བསྔལ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལ་ཡང་དེ་དང་འདྲ་བར་བརྗོད་པར་བྱའོ། །འོ་ན་དེའི་ཚེ་ཞེས་བྱ་བ་ནི་དམིགས་པ་འཕོ་བའི་ཚེ་སྟེ་མི་འཕོ་ན་ནི་ཉེས་པ་མེད་དོ། །ཇི་ལྟར་ཞེ་ན་གལ་ཏེ་གཟུགས་ལ་དམིགས་པའི་མིག་གི་རྣམ་པར་ཤེས་པའི་མཇུག་ཐོགས་སུ་མིག་གི་རྣམ་པར་ཤེས་པའམ། ཡིད་ཀྱི་རྣམ་པར་ཤེས་པ་གཟུགས་ལ་དམིགས་པ་ཁོ་ན་འབྱུང་ན་ནི་ཚོར་བ་དང་བཅས་པ་ཡིན་ནོ། །ཅིའི་ཕྱིར་ཞེ་ན། སྔར་སྐྱེས་པ་མིག་གི་རྣམ་པར་ཤེས་པ་ཡིན་པས་རིགས་གཅིག་པ་ཡིན་པའི་ཕྱིར་རོ། །དེའི་སྔོན་རོལ་གྱི་རྣམ་པར་ཤེས་པ་ཞེས་བྱ་བ་ལ་སོགས་པ་ལ། ཅིའི་ཕྱིར་དེ་རེག་པ་མ་ཡིན་ཞེ་ན། འདི་ལ་རྒྱུ་སྨོས་པ་ནི་རྐྱེན་མ་ཚང་བའི་ཕྱིར་རོ་ཞེས་བྱ་སྟེ། འདི་ལྟར་མཚུངས་པ་དེ་མ་ཐག་པའི་རྐྱེན་ཐམས་ཅད་ཀྱིས་ནི་ཚོར་བའི་རྐྱེན་གྱིས་རེག་པར་གྱུར་པ་སྐྱེད་པར་མི་ནུས་སོ། །གཞན་དག་ན་རེ་འདིར་རྐྱེན་མ་ཚང་བ་ནི་དབང་པོ་འཕོ་བ་དང༌། དེ་ལས་སྐྱེས་པའི་ཡིད་ལ་བྱེད་པ་ཡིན་ནོ་ཞེས་ཟེར་རོ། །དེ་ལྟ་ཡིན་ན་ཉེས་པ་ཅི་ཞིག་ཡོད་ཅེས་བྱ་བ་ནི་ཡོད་པ་མ་ཡིན་པའི་ཕྱིར་དམིགས་པ་ཐ་དད་པའི་ཉེས་པ་མེད་དོ་སྙམ་དུ་བསམས་པའོ། །ས་མང་པོ་པའི་ངེས་པ་ཉམས་པ་ཡིན་ནོ་ཞེས་བྱ་བ་ནི་སེམས་ཐམས་ཅད་ལ་རེག་པ་དང་ཚོར་བ་དག་མེད་པའི་ཕྱིར་ཏེ་ཉེས་པ་འདིར་འགྱུར་རོ། །ས་ནི་གསུམ་སྟེ་ཞེས་བྱ་བ་ལ་རྟོག་པ་དང་བཅས་ཤིང་དཔྱོད་པ་དང་བཅས་པའི་ས་ནི་འདོད་པའི་ཁམས་དང་བསམ་གཏན་དང་
པོའོ། །རྟོག་པ་མེད་པར་དཔྱོད་པ་ཙམ་ནི་བསམ་གཏན་ཁྱད་པར་ཅན་ནོ། །རྟོག་པ་ཡང་མེད་དཔྱོད་པ་ཡང་མེད་པ་ནི་བསམ་གཏན་གཉིས་པ་ནས། སྲིད་པའི་རྩེ་མོའི་བར་རོ། །དགེ་བའི་ས་ནི་ཆོས་དགེ་བ་རྣམས་ཏེ། མི་དགེ་བ་དང༌། ལུང་དུ་མ་བསྟན་པ་ཡང་དེ་དང་འདྲའོ། །སློབ་པའི་ས་ནི་སློབ་པའི་ཟག་པ་མེད་པའི་ཆོས་དག་གོ །མི་སློབ་པ་ནི་མི་སློབ་པའི་ཟག་པ་མེད་པའི་ཆོས་དག་གོ །སློབ་པ་ཡང་མ་ཡིན་མི་སློབ་པ་ཡང་མ་ཡིན་པའི་ནི་ཟག་པ་དང་བཅས་པའི་ཆོས་དག་གོ །འདུས་མ་བྱས་ནི་མ་བཤད་དེ། ས་རྣམས་འདུས་བྱས་ཡིན་པའི་ཕྱིར་རོ། །འདོན་པའི་ཞར་ལ་ཞེས་བྱ་བ་ནི་མདོ་འདོན་པའི་ཞར་ལ་སྟེ། མདོ་ལས་ནི་འདི་སྐད་དུ། དགེ་བ་དང་མི་དགེ་བ་དང་ལུང་དུ་མ་བསྟན་པ་ཞེས་འདོན་ཏེ། ཨ་སཾ་ཛི་ཏ། ལྷག་པར་སྒྲོ་བཏགས་པའོ། །ད་ནི་བྱེ་བྲག་ཏུ་སྨྲ་བའི་སྐྱེ་བ་ཡོད་པར་བྱས་ནས་སྔོན་ནི་མ་བཏོན་ཏོ་ཞེས་བྱ་བ་ལ། རབ་ཏུ་བྱེད་པའི་རྐང་པ་ལས། ས་མང་པོ་པ་དང༌། དགེ་བའི་ས་མང་པོ་བ་དང༌། ཉོན་མོངས་པའི་ས་མང་པོ་བ་དང༌། ཉོན་མོངས་པ་ཆུང་ངུའི་ས་མང་པོ་པ་སྟེ། རྣམ་པ་བཞི་ཁོ་ན་འདོན་གྱི་མི་དགེ་བའི་ས་མང་པོ་བ་དག་ནི་མ་ཡིན་ནོ། །ལྷན་ཅིག་སྐྱེས་པ་ཞེས་གསུངས་ཀྱི་ཞེས་བྱ་བ་རྒྱས་པར་འབྱུང་སྟེ། མདོ་དེ་ལས་ནི་ཚོར་བ་དང་འདུ་ཤེས་དང༌། སེམས་པ་ལྷན་ཅིག་སྐྱེས་ཞེས་གསུངས་ཀྱི། རེག་པ་དང་ནི་མ་ཡིན་ལ། དེ་དག་ནི་ལྷན་ཅིག་སྐྱེས་པ་སྐྱེས་པ་ཉིད་དུ་འདོད་པ་ཡང་ཡིན་པས་འདི་ལ་ལན་གདབ་ཏུ་ཅི་ཞིག་ཡོད། ཚོར་བ་ལ་སོགས་པས་རྣམས་རེག་པ་དང་ལྷན་ཅིག་པར་ཁས་བླངས་ཀྱང་ཚོར་བ་དང་རེག་པ་དང་དུས་མཉམ་དུ་སྐྱེ་བར་ཤེས་པར་མི་འགྱུར་རོ། །དེ་ཅིའི་ཕྱིར་ཞེ་ན། ལྷན་ཅིག་ཅེས་བྱ་བའི་སྒྲ་འདི་ནི་དེ་མ་ཐག་པ་ལ་ཡང་མཐོང་ངོ༌། །བྱམས་པ་དང་ལྷན་ཅིག་པར་གྱུར་པ་ཞེས་བྱ་བ་ལ། བྱམས་པ་དང་དྲན་པ་ཡང་དག་པ་བྱང་ཆུབ་ཀྱི་ཡན་ལག་གཉིས་སྐད་ཅིག་མ་གཅིག་ལ་ལྷན་ཅིག་འབྱུང་བར་ཤེས་པར་ནི་མི་འགྱུར་ཏེ། ཟག་པ་དང་བཅས་པ་དང་ཟག་པ་མེད་པ་ཡིན་པའི་ཕྱིར་རོ། །འོ་ན་ཅི་ཞེ་ན། བྱམས་པའི་མཇུག་ཐོགས་སུ་དྲན་པ་ཡང་དག་བྱང་ཆུབ་ཀྱི་ཡན་ལག་སྒོམ་པར་བྱེད་དོ་ཞེས་
བྱ་བར་རྟོགས་པར་འགྱུར་ཏེ། དེ་བཞིན་དུ་འདིར་ཡང་རེག་པའི་མཇུག་ཐོགས་སུ་ཚོར་བ་དང་འདུ་ཤེས་དང་སེམས་པ་སྐྱེའོ་ཞེས་བྱ་བར་ཤེས་པར་འགྱུར་རོ། །དེའི་ཕྱིར་འདི་ནི་རེག་པ་དང་ཚོར་བ་ལྷན་ཅིག་འབྱུང་བ་ཉིད་ཀྱི་ཁུངས་སུ་མི་རུང་ངོ༌། །ཆོས་དེ་དག་ནི་འདྲེས་པ་ཡིན་གྱི་ཞེས་བྱ་བ་ནི། འདྲེས་ཤིང་ལྷན་ཅིག་འབྱུང་བ་ལ་མཚུངས་པར་ལྡན་ཞེས་བྱ་བའི་དོན་ཏོ། །ཅི་རེ་ཞིག་འདི་དག་གི་ཞེས་བྱ་བ་རྒྱས་པར་འབྱུང་སྟེ། དམིགས་པ་ངེས་པ་ནི་དམིགས་པ་ཐ་མི་དད་པའོ། །སྐད་ཅིག་མ་ངེས་བ་ནི་སྐད་ཅིག་མ་གཅིག་ལ་འབྱུང་བ་སྟེ། ཅི་དམིགས་པ་གཅིག་པོ་དེ་རིམ་གྱིས་ཚོར་བས་མྱོང་བར་བྱེད། འདུ་ཤེས་ཀྱིས་འདུས་ཏེ་ཤེས་པར་བྱེད་དམ། འོན་ཏེ་སྐད་ཅིག་གང་ཁོ་ན་ལ་ཚོར་བས་ཚོར་བར་བྱེད་པའི་སྐད་ཅིག་དེ་ཁོ་ན་ལ་སེམས་པས་སེམས་པར་བྱེད། འདུ་ཤེས་ཀྱིས་འདུས་ཏེ་ཤེས་པར་བྱེད་ཅེས་དེ་ནི་མི་ཤེས་ཏེ་ཐེ་ཚོམ་ཟ་བའི་ཕྱིར་རོ། །དེའི་ཕྱིར་འདི་ཡང་ཁུངས་སུ་མི་རུང་ངོ༌། །ཚེ་དང་དྲོད་དག་ཅེས་བྱ་བ་རྒྱས་པར་འབྱུང་སྟེ། མདོ་དེ་ཉིད་ལས། ཚེ་དང་དྲོད་ཀྱི་ཆོས་དེ་དག་ནི་འདྲེས་པ་ཡིན་གྱི་མ་འདྲེས་པ་ནི་མ་ཡིན་ནོ་ཞེས་ལྷན་ཅིག་པ་ལ་འདྲེས་པ་ཞེས་གསུངས་པའི་ཕྱིར་ཚོར་བ་གང་ཡིན་པ་དང༌། སེམས་པ་གང་ཡིན་པ་ཞེས་བྱ་བར་དེར་ཡང་སྐད་ཅིག་མ་ངེས་པ་ཡིན་པར་གྲུབ་སྟ། ཚེ་དང་དྲོད་དག་ནི་དམིགས་པ་མེད་པ་ཡིན་པའི་ཕྱིར་རོ། །ལྷན་ཅིག་པ་ནི་ལྷན་ཅིག་པའི་དངོས་པོའོ། །དེའི་ཕྱིར་དེ་ལྟར་ན་ཚོར་བ་ནི་རེག་པ་དང་དུས་མཉམ་པའི་ཡིན་ནོ་ཞེས་རབ་ཏུ་བསྒྲུབས་པ་ཡིན་ནོ། །དེའི་སྔོན་རོལ་གྱི་རྣམ་པར་ཤེས་པ་ཚོར་བ་དང་བཅས་པ་གང་ཡིན་པ་དེ་ནི་རེག་པ་མ་ཡིན་ཏེ་རྐྱེན་མ་ཚང་བའི་ཕྱིར་རོ་ཞེས་གང་སྨྲས་པ་དེ་ལ་ཡང་ལན་བཤད་པ་ནི་གང་ཡང་མདོ་ལས་ཞེས་བྱ་བ་རྒྱས་པར་འབྱུང་སྟེ། འདི་ལྟར་རྣམ་པར་ཤེས་པ་ཡིན་ལ་དབང་པོ་དང་ཡུལ་དང་རྣམ་པར་ཤེས་པ་རྣམས་འདུས་པ་ནི་མ་ཡིན་ཏེ། རྣམ་པར་ཤེས་པ་ནི་དབང་པོ་དང་ཡུལ་མེད་པར་མེད་དོ། །དེའི་ཕྱིར་རྣམ་པར་ཤེས་པ་ཡིན་ན་གདོན་མི་ཟ་བར་དབང་པོ་དང་ཡུལ་དང་རྣམ་པར་ཤེས་པ་རྣམས་འདུས་པ་ཁས་བླང་བར་བྱའོ། །ཅི་སྟེ་འདུས་བར་འདོད་ཀྱི་རེག་པ་ནི་མ་ཡིན་ནོ་
སྙམ་ན་དེའི་ཕྱིར་འདུས་པ་ཡིན་ན་རེག་པ་མ་ཡིན་ཞེས་བྱ་བ་སྨོས་ཏེ་ཁྱོད་ཀྱི་རེག་པ་ནི་འདུས་པ་ཙམ་ཡིན་ཏེ་དེས་ན་རྣམ་པར་ཤེས་པ་སྔ་མ་རེག་པ་མ་ཡིན་ནོ་ཞེས་བྱ་བ་འདི་ནི་འགལ་ལོ། །དེའི་ཕྱིར་མདོ་དང་འགལ་བར་འགྱུར་དུ་འོང་བས་གདོན་མི་ཟ་བར་རྣམ་པར་ཤེས་པ་ཐམས་ཅད་ལ་རེག་པ་དང། ལྷན་ཅིག་སྐྱེས་པའི་ཚོར་བ་འདོད་པར་བྱའོ། །ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བ་ནི་ཞེས་སེམས་ཀྱི་ཚོར་བ་མདོར་བཤད་ཟིན་ཏོ། །བུ་ཎཿསནྡྷི་ཀ་ར་ཎཾ་ཙཱ་ཏྲེ་ཏི། མ་ན་ཨུ་པ་བི་ཙཱ་ར་ཨི་ཏི་པྲཱ་པྟ་པུ་ནཿ་སནྡྷི་ཀ་ར་ཎཱནྨ་ནོ་པ་ཙཱ་རཱ་ཨི་ཏི་བྷ་པ་ཏི། ཏདྱ་ཐཱ་སཻ་ཥ་དཱ་ཤ་ར་ཐཱི་རཱ་མཿ་སཻ་ཥ་རཱ་ཛཱ་ཡུ་ཥྠི་ར་ཨི་ཏེ། ཡིད་བདེ་བའི་ཉེ་བར་རྒྱུ་བ་དྲུག་དང་ཞེས་བྱ་བ་ནི་མིག་གིས་གཟུགས་རྣམས་མཐོང་ནས་ཡིད་བདེ་བའི་གནས་འདིར་སླར་ཡང་མཚམས་སྦྱོར་བའི་བྱེད་པས་ཞེས་བྱ་བ་ནི། ཡིད་ཀྱི་ཉེ་བར་སྤྱོད་པས་ཞེས་ཐོབ་པ་ལ་སླར་མཚམས་སྦྱོར་བའི་བྱེད་པ་ལས་ཡིད་ཉེར་སྤྱོད་ཞེས་པར་གྱུར་བ་སྟེ། དཔེར་ན་དེ་འདི་ཤིང་རྟ་བཅུ་པ་དགའ་བྱེད་ཀྱིའོ། །དེ་འདི་རྒྱལ་པོ་གཡུལ་དོར་བརྟན་པའིའོ་ཞེ་བྱ་བ་བཞིན་ནོ། །ལྟ་བུའི་གཟུགས་རྣམས་ལ་ཉེ་བར་རྒྱུའོ། །དེ་བཞིན་དུ་ཡིད་ཀྱིས་ཆོས་རྣམས་ཤེས་ནས་ཡིད་བདེ་བའི་གནས་ལྟ་བུའི་ཆོས་རྣམས་ལ་ཉེ་བར་རྒྱུའོ་ཞེས་བྱ་བའི་བར་ཏེ་ཡིད་བདེ་བ་དང་བཏང་སྙོམས་ཀྱི་གནས་ལྟ་བུ་དག་ལ་ཡང་དེ་དང་འདྲ་བར་བརྗོད་པར་བྱའོ། །དེ་ལ་ཡིད་བདེ་བ་དང་ཡིད་མི་བདེ་བ་དང་བཏང་སྙོམས་ཀྱི་ཉེ་བར་རྒྱུ་བ་དག་ནི་ཐམས་ཅད་གཅིག་ཏུ་བསྡུས་ནས་བཅོ་བརྒྱད་དུ་འགྱུར་རོ། །དེ་དག་ཇི་ལྟར་རྣམ་པར་གཞག་ཅེས་བྱ་བ་རྒྱས་པར་འབྱུང་སྟེ་ཡིད་བདེ་བ་དང་ཡིད་མི་བདེ་བ་དང་བཏང་སྙོམས་རྣམས་ཕན་ཚུན་ངོ་བོ་ཐ་དད་པའི་ཕྱིར་ཡིད་བདེ་བ་དང་ཡིད་མི་བདེ་བ་དང་བཏང་སྙོམས་ཀྱི་ཉེ་བར་རྒྱུ་བ་གསུམ་ཁོ་ནར་འགྱུར་གྱི་བཅོ་བརྒྱད་ནི་མ་ཡིན་ནོ། །མཚུངས་པར་ལྡན་པ་ལས་ནི་ཡིད་ཀྱི་ཉེ་བར་སྤྱོད་པ་གཅིག་པུ་ཁོ་ནར་འགྱུར་ཏེ་ཐམས་ཅད་ཀྱང་ཡིད་དང་མཚུངས་པར་ལྡན་པའི་ཕྱིར་རོ། །དམིགས་པ་ལས་ནི་དྲུག་ཏུ་འགྱུར་གྱི་བཅོ་བརྒྱད་ནི་མ་ཡིན་ནོ། །ཇི་ལྟར་ཞེ་ན་གཟུགས་ལ་དམིགས་པའི་ཡིད་བདེ་བ་དང་ཡིད་མི་བདེ་བ་དང་བཏང་སྙོམས་རྣམས་ནི་གཟུགས་ལ་ཉེ་བར་རྒྱུ་བ་ཉིད་ཡིད་ཡིན་ལ་དེ་བཞིན་དུ་ཆོས་ལ་དམིགས་པ་རྣམས་ནི་ཆོས་ལ་ཉེ་བར་རྒྱུ་བ་ཉིད་ཀྱི་བར་དུ་ཡིན་པས་དྲུག་ཏུ་འགྱུར་གྱི་བཅོ་བརྒྱད་ནི་མ་ཡིན་ནོ། །གསུམ་གར་ཡང་གཞག་སྟེ་ཞེས་བྱ་བ་ནི་ངོ་བོ་དང་མཚུངས་པར་ལྡན་པ་དང་དམིགས་པ་ལས་སོ། །ཇི་ལྟར་ཞེ་ན།
ཡིད་བདེ་བ་ལ་སོགས་པ་རྣམས་ངོ་བོ་ཐ་དད་པར་གྱུར་ཅིང༌། ཡིད་དང་མཚུངས་པར་ལྡན་ལ། རེ་རེ་ཡང་གཟུགས་ལ་སོགས་པ་དྲུག་གི་ཡུལ་ཅན་ཡིན་པའི་ཕྱིར་རོ། །དེ་ལྟར་ན་གསུམ་ཀར་ལས་ཀྱང་རྣམ་པར་བཞག་པས་བཅོ་བརྒྱད་དུ་འགྱུར་རོ། །དེ་ལྟ་མ་ཡིན་ན་རང་བཞིན་རྣམ་པར་བཞག་པ་ལ་ཡིད་བདེ་བ་དང་ཡིད་མི་བདེ་བ་དང་བཏང་སྙོམས་ཀྱི་ཉེ་བར་རྒྱུ་བ་ཡོད་པ་མ་ཡིན་པས་ཡིད་དང་མཚུངས་པར་ལྡན་པའི་དབང་དུ་བྱས་པར་མི་འགྱུར་རོ། །ཡིད་ཀྱི་ཉེ་བར་རྒྱུ་བ་ཞེས་བྱ་བར་མི་འགྱུར་ཏེ། དམིགས་པ་རྣམ་པར་གཞག་པ་ལ་ཡིད་བདེ་བ་ལ་སོགས་པ་ཡོད་པ་མ་ཡིན་པས་རྣམ་པ་དྲུག་ཐ་དད་པར་མི་འགྱུར་རོ། །དེའི་ཕྱིར་ཡིད་ཀྱི་ཉེ་བར་རྒྱུ་བ་བཅོ་བརྒྱད་ཅེས་བྱ་བར་མི་འགྱུར་རོ། །གཟུགས་ལ་སོགས་པའི་སོ་སོར་ངེས་པ་ལ་དམིགས་པའི་ཕྱིར་རོ་ཞེས་བྱ་བ་ལ་གཟུགས་ལ་དམིགས་པའི་ཡིད་བདེ་བ་ལ་སོགས་པ་རྣམས་ཀྱི་དམིགས་པ་ནི་གཟུགས་ཁོ་ན་ཡིན་གྱི་ཡུལ་གཞན་ནི་མ་ཡིན་ལ། རེག་བྱ་ལ་དམིགས་པ་རྣམས་ཀྱི་བར་གྱི་ཡང་དེ་བཞིན་དུ་ཡིན་ཏེ། དེའི་ཕྱིར་གཟུགས་ལ་སོགས་པ་ལ་ཉེ་བར་རྒྱུ་བ་བཅོ་ལྔ་ནི་མ་འདྲེས་པ་ལ་དམིགས་པ་ཡིན་ནོ། །ཆོས་ལ་ཉེ་བར་རྒྱུ་བ་གསུམ་ནི་རྣམ་པ་གཉིས་ཀ་ཡིན་ནོ་ཞེས་བྱ་བ་ནི་འདྲེས་པ་ལ་དམིགས་པ་ཡང་ཡིན་ལ། མ་འདྲེས་པ་ལ་དམིགས་པ་ཡང་ཡིན་ཏེ། རྣམ་པ་འཆད་པ་ལ་དམིགས་པ་ཞེས་བྱ་བའི་དོན་ཏོ། །གལ་ཏེ་གཟུགས་ལ་སོགས་པ་དག་གམ་མིག་ལ་སོགས་པ་དག་གམ། གཟུགས་ལ་སོགས་པ་ཕན་ཚུན་ཆོས་དང་ལྷན་ཅིག་དམིགས་ན་ནི་དེ་ལྟན་འདྲེས་པ་ལ་དམིགས་པའོ། །ཅི་སྟེ་ཆོས་ཀྱི་སྐྱེ་མཆེད་ཁོ་ན་ལ་དམིགས་ཀྱི་གཞན་ལ་མ་ཡིན་ན་ནི་དེ་ལྟ་ན་མ་འདྲེས་པ་ལ་དམིགས་པའོ། །ཡིད་ལ་བརྟེན་ནས་ཞེས་བྱ་བ་རྒྱས་པར་འབྱུང་སྟེ། བརྟེན་ནས་ཞེས་བྱ་བ་ནི་བརྟེན་ནས་ཞེས་བྱ་བའི་དོན་ཏོ། །ཡུལ་ལ་ཉེ་བར་རྒྱུ་བའི་ཕྱིར་རོ་ཞེས་བྱ་བ་ནི་ཡུལ་དག་ལ་ཡང་དང་ཡང་དུ་དམིགས་ཞེས་བྱ་བའི་དོན་ཏོ། །ཡང་དང་ཡང་དུ་ཞེས་བྱ་བ་ནི་ཉེ་བའི་དོན་གྱི་སྒྲ་ཡིན་པའི་ཕྱིར་རོ། །གྲག་གོ་ཞེས་བྱ་བའི་སྒྲ་ནི་གཞན་གྱི་ལུགས་གསལ་བར་བྱེད་པ་སྟེ།
དེ་ལྟ་ན་ནི་ཡིད་ལ་བརྟེན་ནས་ཡུལ་རྣམས་ལ་ཉེ་བར་རྒྱུ་བའི་ཕྱིར། །ཡིད་དང་མཚུངས་པར་ལྡན་པ་དང་མཚུངས་པར་ལྡན་པ་མ་ཡིན་པ་དག་ཀྱང་ཡིད་ཀྱི་ཉེ་བར་རྒྱུ་བར་འགྱུར་རོ། །ཡུལ་དག་ལ་ཡིད་ཉེ་བར་རྒྱུ་བར་བྱེད་པའི་ཕྱིར་ཞེས་བྱ་བ་ནི་ཡང་དང་ཡང་དུ་རབ་ཏུ་འཇུག་པར་བྱེད་ཅེས་བྱ་བའི་དོན་ཏོ། །ཡང་དང་ཡང་དུ་རྣམ་པར་རྒྱུ་བས་འཇུག་པའི་ཕྱིར་ཞེས་བྱ་བའི་དོན་ཏོ། །འདི་ཡིད་ཁོ་ན་ལ་བརྟེན་པ་ནི་མ་ཡིན་ཏེ། འོ་ན་ཅི་ཞེ་ན་མིག་ལ་སོགས་པ་དག་ལ་ཡང་ཡིན་ནོ། །ཉེ་བར་རྒྱུ་བར་བྱེད་པ་ཡང་མ་ཡིན་པས་ཞེས་བྱ་བ་ནི་ཡང་དག་པར་རྟོགས་པར་བྱེད་པ་མ་ཡིན་ཞེས་བྱ་བའི་དོན་ཏེ། རྟོགས་པ་མེད་པའི་རྣམ་པར་ཤེས་པ་དང་མཚུངས་པ་ལྡན་པའི་ཕྱིར་ལ། རྣམ་གྲངས་དང་པོའི་དབང་དུ་བྱས་པ་དང་གཉིས་པའི་དབང་དུ་བྱས་ནས་བརྗོད་དེ། ཡིད་ནི་ཡུལ་རྣམས་ལ་རབ་ཏུ་འཇུག་བྱེད་མ་ཡིན་ནོ་ཞེས་བྱ་བའི་དོན་ཏོ། །ཡིད་བདེ་བ་ལ་སོགས་པ་རྣམས་ནི་རྣམ་པར་རྟོག་པའི་ཕྱིར་དེའི་དབང་གིས་ཡུལ་དག་ལ་ཡང་དང་ཡང་དུ་འཇུག་པའི་ཕྱིར་རོ། །བསམ་གཏན་གསུམ་པའི་བདེ་བ་ཞེས་བྱ་བ་རྒྱས་པར་འབྱུང་སྟེ། གལ་ཏེ་ཡིད་ཙམ་ལ་བརྟེན་པའི་ཚོར་བ་ཡིད་ཀྱི་ཉེ་བར་རྒྱུ་བ་ཡིན་ན། འོ་ན་ནི་དེས་ན་བསམ་གཏན་གསུམ་པའི་བཏང་སྙོམས་ཀྱིས་ཉེ་བར་རྒྱུ་བ་བཞིན་བདེ་བ་ཉེ་བར་སྤྱོད་པར་ཡང་བརྗོད་པར་བྱ་སྟེ། བསམ་གཏན་གསུམ་པའི་བདེ་བ་ཡིད་ཀྱི་ས་པ་ཡིན་པའི་ཕྱིར་རོ་ཞེ་ན། དེའི་ཕྱིར་དང་པོ་འདོད་པའི་ཁམས་ན་ཞེས་བྱ་བ་སྨོས་ཏེ་དང་པོ་ནི་ཐོག་མར་རོ། །གྲག་གོ་ཞེས་བྱ་བའི་སྒྲ་ནི་ལན་དེ་ལ་སྙིང་པོ་མེད་པའི་ཕྱིར་ཏེ། གང་གི་ཕྱིར་འདོད་པའི་ཁམས་ནི་ཡིད་ཀྱི་ས་པའི་བདེ་བའི་དབང་པོ་མེད་པས་མ་བཞག་པ་དེའི་ཕྱིར། ཁམས་གོང་མ་ན་སེམས་ཀྱི་བདེ་བའི་དབང་པོ་ཡོད་ཀྱང་མི་གཞག་གོ་ཞེས་བྱ་བ་འདི་ལ་རྒྱུ་ཅི་ཞིག་ཡོད། ཡིད་ཀྱི་ཉེ་བར་རྒྱུ་བ་ནི་གདོན་མི་ཟ་བར་གཉེན་པོ་དང་བཅས་པར་འགྱུར་རོ་ཞེས་བྱ་བ་འདི་ལ་ཡང་རིགས་པ་ཅི་ཞིག་སྟེ། དེ་ལྟ་ན་བཏང་སྙོམས་ཀྱང་ཉེ་བར་རྒྱུ་བའི་མཚན་ཉིད་དུ་མི་འགྱུར་ཏེ། ཉེ་བར་རྒྱུ་བའི་གཉེན་པོ་ཉིད་མ་ཡིན་ནོ། །འོ་ན་ཅི་ཞེ་ན། ཉེ་བར་རྒྱུ་བར་བྱེད་པ་ཉིད་ཡིན་ན། གཞན་དག་
ན་རེ་བསམ་གཏན་གསུམ་པའི་བདེ་བ་ནི་བརྟན་པ་ཡིན་ལ། ཉེ་བར་རྒྱུ་བ་ནི་མི་བརྟན་པ་ཡིན་ནོ། །དེ་ཉིད་ཀྱི་ཕྱིར་ཡིད་ཀྱི་ཉེ་བར་རྒྱུ་བ་ཞེས་བྱ་སྟེ། དེ་ལྟ་ན་བསམ་གཏན་བཞི་པའི་ཉེ་བར་རྒྱུ་བ་ནི་བཏང་སྙོམས་སུ་འགྱུར་རོ། །ཡིད་བདེ་བའི་གནས་ལྟ་བུ་ཞེས་བྱ་བ་ནི་ཡིད་བདེ་བ་སྐྱེད་པར་བྱེད་པ་རྣམས་སོ། །དེ་ནི་རྣམ་པར་ཤེས་པའི་ཚོགས་ལྔས་མངོན་པར་བསྒྲུབས་པ་ཉིད་ལ་དགོངས་ཏེ་གསུངས་པར་ཟད་ཀྱི་ཞེས་བྱ་བ་ནི་དེ་དག་གིས་དྲངས་ཤིང་དེ་དག་གིས་བསྐྱེད་པ་ཉིད་སེམས་ལ་བསམས་ནས་གསུངས་པར་ཟད་དོ་ཞེས་བྱ་བའི་ཐ་ཚིག་གོ །དཔེར་ན་མི་སྡུག་པ་ལྟ་བུ་ཞེས་བྱ་བ་ལ། མིག་གིས་གཟུགས་དག་མཐོང་ནས་མི་སྡུག་པའི་རྗེས་སུ་ལྟ་ཞིང་གནས་སོ་ཞེས་གསུངས་པ་དེའི་ཕྱིར་མིག་གི་རྣམ་པར་ཤེས་པས་མངོན་པར་བསྒྲུབས་པ་ཡིན་ཏེ། སྔར་རྣམ་པར་བསྔོས་པ་ལ་སོགས་པ་མཐོང་བའི་ཕྱིར་རོ། །ཡིད་ཀྱི་ས་པ་ཡང་ཡིན་ཏེ། དེའི་མཇུག་ཏུ་དེ་འབྱུང་བའི་ཕྱིར་རོ། །གཞན་ཡང་མཐོང་ནས་ཞེས་བྱ་བ་རྒྱས་པར་འབྱུང་སྟེ། གལ་ཏེ་འདི་སྐད་དུ་མིག་གིས་ཡིད་བདེ་བའི་གནས་ལྟ་བུའི་གཟུགས་རྣམས་ཉེ་བར་རྒྱུའོ་ཞེས་བྱ་བར་གསུངས་པར་གྱུར་ན་ནི་ཀླན་ཀར་རུང་བ་ཞིག་ན། འོན་ཀྱང་མཐོང་བས་རེག་པ་དང་ཞེས་བྱ་བའི་བར་དུ་གསུངས་པའི་ཕྱིར་འདི་ནི་ཀླན་ཀར་མི་རུང་ངོ༌། །ཇི་ལྟར་མ་མཐོང་བས་ན་མ་རེག་པའི་བར་དུ་ཉེ་བར་རྒྱུ་ཞེ་ན། གཞན་ལས་ཐོས་ནས་དེའི་བརྗོད་པར་བྱ་བ་ཡིད་ཀྱིས་ཉེ་བར་རྒྱུ་བ་ཡིན་ནོ། །གཞན་དུ་ན་འདོད་པའི་ཁམས་ན་ཞེས་བྱ་བ་རྒྱས་པར་འབྱུང་སྟེ། འདོད་པར་གཏོགས་པའི་མིག་ལ་སོགས་པ་དག་གིས་ནི་གཟུགས་སུ་གཏོགས་པའི་གཟུགས་དང་སྒྲ་དང་རེག་བྱ་དག་མི་འཛིན་ནོ། །གཟུགས་ཀྱི་ཁམས་ན་འདོད་པའི་ཁམས་ལ་དམིགས་པ་དག་ཀྱང་ཞེས་བྱ་བ་ལ་གཟུགས་ཀྱི་ཁམས་སུ་སྐྱེས་པ་ནི་འདོད་པར་གཏོགས་པའི་དྲི་དང་རོ་དང་རེག་བྱ་དག་སྣོམ་པ་འམ། མྱོང་བ་དང༌། རེག་པར་མི་བྱེད་དེ། ཁམ་གྱི་ཟས་ཀྱི་འདོད་ཆགས་དང་བྲལ་བའི་ཕྱིར་རོ། །གཟུགས་དག་ལ་ལྟ་ལ་སྒྲ་ཡང་ཉན་ཏེ་ཟས་མ་ཡིན་པའི་ཕྱིར་རོ། །གལ་ཏེ་མ་མཐོང་བར་ཡང་ཉེ་བར་རྒྱུ་ན། འོ་ན་མདོ་ལས་མིག་གིས་གཟུགས་དག་མཐོང་ནས་ཞེས་ཅིའི་ཕྱིར་
གསུངས་ཤེ་ན། དེའི་ཕྱིར་ཇི་ལྟར་ཆེས་གསལ་བ་དེ་ལྟར་བཤད་ཅེས་པ་སྨོས་ཏེ། མིག་ལ་སོགས་པས་མངོན་པར་བསྒྲུབས་པས་ཆེས་སླ་བར་གཅད་དུ་རུང་བའི་ཕྱིར་རོ། །གང་ཡང་པི་ཝཾ་གི་གཟུགས་མཐོང་ནས་དེའི་སྒྲ་ལ་ཉེ་བར་རྒྱུ་བའམ། བུད་མེད་ཀྱི་སྒྲ་ཐོས་ནས་དེའི་གཟུགས་ལ་ཉེ་བར་རྒྱུ་བ་དེ་ཡང་ཡིད་ཀྱི་ཉེ་བར་རྒྱུ་བ་ཁོ་ན་ཡིན་ནོ། །དབང་པོ་དང་དོན་རྣམས་པར་ཆད་པའི་སྒོ་ནས་ཞེས་བྱ་བ་ནི་མིག་གིས་གཟུགས་དག་མཐོང་ནས་ཞེས་བྱ་བ་དང༌། རྣ་བས་སྒྲ་རྣམས་ཐོས་ནས་ཞེས་བྱ་བ་དེ་ལྟ་བུ་ལ་སོགས་པ་སྟེ། གཞན་དུ་ནི་མིག་གིས་གཟུགས་དག་མཐོང་ནས་ཡིད་བདེ་བའི་གནས་ལྟ་བུའི་སྒྲ་རྣམས་ལ་ཉེ་བར་རྒྱུའི་ཞེས་འཆོལ་བར་གསུངས་པར་འགྱུར་རོ། །རྒྱུད་ངེས་པས་ནི་ཞེས་བྱ་བ་ནི་སེམས་ཅན་གྱི་རྒྱུད་དོ། །གང་ཞིག་གཅིག་གིས་ཡིད་བདེ་བའི་གནས་ལྟ་བུ་ཁོ་ནར་འགྱུར་བ་མི་སྲིད་པ་དེ་ཡོད་དེ། དཔེར་ན་འཁོར་ལོས་སྒྱུར་བའི་བུད་མེད་རིན་པོ་ཆེ་ལྟ་བུའོ། །དམིགས་པ་ནི་མ་མིན་ནོ་ཞེས་བྱ་བ་ལ། ཅིའི་ཕྱིར་ཞེ་ན། གཟུགས་དེ་ཉིད་ཁ་ཅིག་གི་ཡིད་བདེ་བའི་གནས་ལྟ་བུ་ཡིན་ལ། ཁ་ཅིག་གི་གཞན་དུ་ཡིན་པའི་ཕྱིར་རོ། འདོད་ཆགས་དང་བྲལ་བའི་ཡང་འདྲེས་པ་ལ་དམིགས་པ་སྟེ། བཏང་སྙོམས་ཀྱི་ཉེ་བར་རྒྱུ་བ་ནི་མཐའ་གཅིག་ཏུ་ཟག་པ་དང་བཅས་པ་ཡིན་པའི་ཕྱིར་རོ། །ཉེ་བར་རྒྱུ་བ་དེ་རྣམས་ལ་གོམས་པའི་ཕྱིར་སྦྱོར་བའི་ལམ་གྱི་ནི་ཡིད་བདེ་བའི་ཉེ་བར་རྒྱུ་བར་འགྱུར་རོ། །བར་ཆད་མེད་པ་དང་རྣམ་པར་གྲོལ་བའི་ལམ་ནི་བསམ་གཏན་གྱི་དངོས་གཞིས་བསྡུས་སོ། །ཡང་འདི་དག་ལས་དུ་ཞིག་ནི་འདོད་པའི་ཁམས་དང་ལྡན་པ་ཡིན། དེ་དག་ལས་ཀྱང་དུ་ཞིག་གི་དམིགས་པ་ནི་ཅི་ཞིག་ཡིན་ཞེས་བྱ་བ་ནི། དུ་ཞིག་གི་འདོད་པ་ལ་དམིགས་པ་ཡིན། དུ་ཞིག་ནི་གཟུགས་ལ་དམིགས་པ་ཡིན། དུ་ཞིག་ནི་གཟུགས་མེད་པ་ལ་དམིགས་པ་ཡིན་ཞེས་བྱ་བའོ། །དེ་བཞིན་དུ་གཟུགས་མེད་པ་དང་ལྡན་པའི་བར་དུ་བརྗོད་པར་བྱའོ་ཞེས་བྱ་བ་ནི་གཟུགས་ཀྱི་ཁམས་དང་ལྡན་པ་ཡིན། དེ་དག་ལ་དུ་ཞིག་གི་དམིགས་པ་ནི་ཅི་ཞིག་ཡིན། དུ་ཞིག་ནི་གཟུགས་མེད་པའི་ཁམས་དང་ལྡན་པ་ཡིན། དེ་དག་
ལས་དུ་ཞིག་གི་དམིགས་པ་ནི་ཅི་ཞིག་ཡིན་ཞེས་བྱ་བའོ། །ཇི་རྣམ་པར་དཔྱད་པ་འདི་ལ་ལུས་རྣམ་པར་གཞག་པ་ཁོ་ན་ཞིག་བྱ་སྟེ། འདོད་པའི་ཁམས་ན་ནི་ཡིད་བདེ་བ་ལ་སོགས་པ་གསུམ་ཆར་དང༌། གཟུགས་ལ་སོགས་པ་ཡུལ་དྲུག་ཅར་ཡང་ཡོད་དོ། །བསམ་གཏན་དང་པོ་དང་གཉིས་པ་དག་ན་ནི་ཡིད་བདེ་བ་དང་བཏང་སྙོམས་སོ། །དེ་ཡན་ཆད་སྲིད་པའི་རྩེ་མོའི་བར་ན་ནི་བཏང་སྙོམས་སོ། །བསམ་གཏན་བཞི་ཆར་ན་དྲི་དང་རོ་དག་མེད་དོ། །གཟུགས་མེད་པའི་ཁམས་ན་ནི་གཟུགས་ལ་སོགས་པ་ལྔ་ཆར་ཡང་མེད་དོ། །དེ་ལ་འདོད་པར་གཏོགས་པ་དང་གཟུགས་སུ་གཏོགས་པའི་ཡིད་བདེ་བ་ལ་སོགས་པ་ཐམས་ཅད་ལ་ནི་ཇི་ལྟར་སྲིད་པར་ཁམས་གསུམ་པ་ལ་དམིགས་པའོ། །ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་ནི་བཏང་སྙོམས་ཏེ། བསམ་གཏན་བཞི་པའི་དམིགས་པ་དང་རང་གི་ས་ལ་དམིགས་པའོ། །གཟུགས་མེད་པའི་དངོས་གཞི་རྣམས་སུ་རང་གིས་ལས་ས་གོང་མ་ལ་དམིགས་པ་ཉིད་དེ། ས་འོག་མ་ལ་དམིགས་པ་མ་ཡིན་ནོ། །ས་འོག་མ་ལ་དམིགས་པ་དང་དགེ་བ་ཉིད་དང་ཉོན་མོངས་ཅན་རང་གི་ས་དང་ས་གོང་མ་ལ་དམིགས་པ་ནི་གཉི་ག་ཇི་ལྟ་བ་བཞིན་ནོ། །གང་དག་གི་དེ་ཞེས་བྱ་བ་ནི། སློབ་དཔོན་གང་དག་གིས་རྣམ་བར་ཆད་པ་ལ་དམིགས་པ་ཞེས་བྱ་བའོ། །སོ་སོར་དམིགས་པ་ནི་གཟུགས་དང་སྒྲ་དང་རོ་དང་རེག་བྱ་དང་ཆོས་ཀྱི་སྐྱེ་མཆེད་རྣམས་ཏེ། སོ་སོར་རིགས་པ་ལ་སོགས་པའི་རྣམ་པས་དམིགས་པའི་ཕྱིར་རོ། །བཟླུམས་ཏེ་དམིགས་པ་ནི་བསྡམས་པ་ལ་དམིགས་པའོ། །གཟུགས་མེད་པའི་ཁམས་ལ་དམིགས་སོ་ཞེས་བྱ་བ་འདིར་ཁམས་ཀྱི་སྒྲས་ཟག་པ་དང་བཅས་པ་གཟུང་ངོ༌། །འོག་ནས་ཤེས་པར་བྱའོ་ཞེས་བྱ་བ་ནི། གཟུགས་མེད་དངོས་གཞིའི་དགེ་བ་ཡི། །སྤྱོད་ཡུལ་ཟག་བཅས་འོག་མ་མིན། །ཞེས་བྱ་བའོ། །གཞན་དག་ན་རེ། ཟག་པ་མེད་པ་ལ་དམིགས་པའི་ཡིད་ཀྱི་ཉེ་བར་རྒྱུ་བ་ཡང་ཡོད་དེ། དེ་དག་འདིར་མ་བསྟན་ཏོ་ཞེས་ཟེར་རོ། །འགོག་པ་དང་ལམ་ལ་དམིགས་པ་ལོག་པར་ལྟ་བ་དང་ཐེ་ཚོམ་དང་མཚུངས་པར་ལྡན་པ་དང་དགེ་བའི་ཆོས་ལ་འདུན་པ་དང་མཚུངས་པར་ལྡན་པ།
ཨེ་མ་བདག་གིས་མྱ་ངན་ལས་འདས་པ་ཐོབ་པར་གྱུར་ཏོ་སྙམ་པའོ། །དེ་ལ་འདོད་པར་གཏོགས་པ་གསུམ་མོ། །བསམ་གཏན་དང་པོ་དང་གཉིས་པའི་ས་པ་གཉིས་སོ། །བསམ་གཏན་གསུམ་པ་དང་བཞི་པའི་ས་པ་གཅིག་གོ །གཟུགས་མེད་པར་གཏོགས་པ་གཅིག་ཁོ་ན་མཚུངས་པར་ལྡན་པ་ལ་དམིགས་པའོ་ཞེས་བཤད་དོ། །གཟུགས་ན་སྤྱོད་པའི་དགེ་བའི་སེམས་མ་ཐོབ་པ་ཞེས་བྱ་བ་ནི་མི་ལྕོགས་པ་མེད་པའི་འོ། །བསམ་གཏན་དང་པོ་དང་གཉིས་པའི་ས་པ་ནི་རང་གི་ས་ལ་དམིགས་པའི་ཉོན་མོངས་པ་བརྒྱད་ཁོ་ན་དང་ལྡན་ཏེ། ཡིད་བདེ་བ་དང་བཏང་སྙོམས་ཀྱི་ཉེ་བར་རྒྱུ་བ་གཟུགས་དང་སྒྲ་དང་ཆོས་ལ་དམིགས་པ་རྣམས་དང་ངོ༌། །འདིར་ཡང་ཇི་ལྟར་སྲིད་པ་བཞིན་བརྗོད་པར་བྱའོ། །དྲི་དང་རོ་ལ་དམིགས་པ་མ་གཏོགས་པ་ཞེས་བྱ་བ་ནི། །གཅིག་ཏུ་དགེ་བ་ཡིན་པའི་ཕྱིར་དེ་དག་མ་གཏོགས་པའོ། །ས་འོག་མར་སྐྱེས་པས་ས་གོང་མའི་སེམས་མ་ཐོབ་པའོ། །ས་གོང་མ་པའི་ཉོན་མོངས་པ་ཁོ་ན་དང་ལྡན་གྱི་དགེ་བ་དང་ནི་མ་ཡིན་ཞེས་སོ། །གཟུགས་ན་སྤྱོད་པའི་དགེ་བའི་སེམས་ཐོབ་པ་ཞེས་བྱ་བ་ནི་མི་ལྕོགས་པ་མེད་པའི་ས་པའི་ཡིན་གྱི་དངོས་གཞི་ནི་མ་ཡིན་ཏེ་འདོད་ཆགས་དང་མ་བྲལ་བའི་ཕྱིར་རོ། །འདི་ལྟར་མི་ལྕོགས་པ་མེད་པ་ཐོབ་ནས་གཟོད་འདོད་པའི་ཁམས་ལས་འདོད་ཆགས་དང་བྲལ་བར་འགྱུར་ཏེ། འདོད་པ་སྤྱོད་པ་ཐམས་ཅད་ལས་འདོད་ཆགས་དང་མ་བྲལ་བའི་ཕྱིར་རོ། །འདོད་པའི་ཁམས་པ་འདོད་ཆགས་དང་མ་བྲལ་བས་ཡིད་བདེ་བ་ཉེ་བར་རྒྱུ་བ་བསམ་གཏན་གྱི་དངོས་གཞིའི་ས་པ་ཉོན་མོངས་པ་ཅན་བཞི་ཁོ་ན་དང་ལྡན་གྱི། དགེ་བ་དང་ལུང་དུ་མ་བསྟན་པ་དག་དང་ནི་མ་ཡིན་ཏེ་སྦྱོར་བ་དང་སྐྱེ་བ་ལ་རག་ལས་པའི་ཕྱིར་རོ། །དྲི་དང་རོ་ལ་དམིགས་པ་མ་གཏོགས་པ་ཞེས་བྱ་བ་ལ། དྲི་དང་རོ་ལ་ཉེ་བར་རྒྱུ་བ་དག་གཅིག་ཏུ་དགེ་བ་ཡིན་པའི་ཕྱིར་རོ། །མི་ལྕོགས་པ་མེད་པའི་ས་ལ་དམིགས་པ་རྣམས་ཀྱིས་ཞེས་བྱ་བ་ནི་འདོད་པའི་ཁམས་ལ་དམིགས་པ་རྣམས་ཀྱིའོ། །མི་ལྕོགས་པ་མེད་པའི་ས་པའི་བཏང་སྙོམས་ཀྱི་ཉེ་བར་རྒྱུ་བ་དྲུག་དང་ལྡན་ནོ་ཞེས་བྱ་བ་ནི་མི་ལྕོགས་པ་མེད་
བའི་ས་བའི་སེམས་ཐོབ་པའི་ཕྱིར་རོ། །བསམ་གཏན་གྱི་དངོས་གཞིའི་ས་པ་བཞི་དང་མི་ལྕོགས་པ་མེད་པའི་ས་པ་དྲུག་སྟེ་དེ་ལྟར་ན་བཅུར་འགྱུར་རོ། །གལ་ཏེ་བསམ་གཏན་གྱི་དང་ས་གཞིའི་ས་པའི་བཏང་སྙོམས་ཀྱི་ཉེ་བར་རྒྱུ་བ་ཉོན་མོངས་པ་ཅན་བཞི་དང༌། མི་ལྕོགས་པ་མེད་པའི་ས་པས་གོང་འོག་ལ་དམིགས་པ་དགེ་བ་བཞི་དང་ཡང་ལྡན་པ་མ་ཡིན་ནམ་ཞེ་ན་བདེན་མོད་ཀྱི་དེ་དག་ལ་ལོགས་སུ་མི་བརྩི་སྟེ། བཏང་སྙོམས་ཀྱི་བདག་ཉིད་ཡིན་པའི་ཕྱིར་དང་ས་ཐ་མི་དད་པའི་ཕྱིར་རོ། །སྔ་མ་བཞིན་ཏེ་ཞེས་བྱ་བ་ལ་བསམ་གཏན་དག་ཏུ་དྲི་དང་རོ་མ་གཏོགས་པ་བསམ་གཏན་གཉིས་པའི་ས་པ་ནི་བརྒྱད་དང་ལྡན་ནོ། །བསམ་གཏན་གསུམ་པ་དང་བཞི་པའི་ས་པ་ནི་བཞི་དང་ལྡན་ནོ། །གཟུགས་མེད་པ་ན་སྤྱོད་པ་ནི་ཉོན་མོངས་པ་ཅན་གཅིག་ཁོ་ན་དང་ལྡན་ནོ་ཞེས་བྱ་བར་ཐམས་ཅད་ལ་ཁོང་དུ་ཆུད་པར་བྱའོ། །སྲོལ་འདིས་ཞེས་བྱ་བ་ནི་ལུགས་སམ་ཚུལ་འདིས་སོ། །འདིའི་ནི་མདོར་བསྡུས་པའོ། །ས་འོག་མར་སྐྱེས་པ་དེ་ཡང་ས་གོང་མ་པའི་ཉོན་མོངས་པ་དང་ལྡན་གྱི། དགེ་བ་དང་ལུང་དུ་མ་བསྟན་པ་དང་མ་ཡིན་ཏེ། དེའི་ས་ཐོབ་པ་དང་སྐྱེད་པ་ནི་མ་གཏོགས་སོ། །དེའི་ས་ཐོབ་པ་ལས་ནི་དགེ་བ་དང་ལྡན་པར་དམིགས་ལ། སྐྱེད་པ་ལས་ནི་ལུང་དུ་མ་བསྟན་པ་དང་ཡང་ལྡན་ནོ། །གང་གི་ཕྱིར་ས་ལས་འདོད་ཆགས་དང་བྲལ་བ་དེ་སའི་ཉོན་མོངས་པ་སྨོས་པའི་ཕྱིར། དེའི་ས་པའི་ཉོན་མོངས་པ་ཅན་རྣམས་དང་མི་ལྡན་ནོ། །ས་གོང་མར་སྐྱེས་པ་ནི་ས་འོག་མ་པའི་ཐམས་ཅད་དང་མི་ལྡན་ཏེ། མྱ་ངན་ལས་འདས་པའི་སེམས་དང་ལྷན་ཅིག་སྐྱེས་པའི་བཏང་སྙོམས་ཉེ་བར་རྒྱུ་བ་ནི་མ་གཏོགས་སོ། །འདོད་པའི་ཁམས་ལ་དམིགས་པ་ལ་བརྟེན་ནས་དངོས་གཞིའི་བསམ་གཏན་རྣམས་ཏེ། དྲུག་ཏུ་འགྱུར་ཞིང་ཇི་ལྟར་སྲིད་པ་ལྟར་བཅུ་གཉིས་སུ་ཡང་ངོ༌། །བསམ་གཏན་གཉིས་པ་ལ་སོགས་པའི་ཉེར་བསྡོགས་རྣམས་ནི་ས་འོག་མ་ལ་དམིགས་པ་རྣམས་སོ་ཞེ་ན་མ་ཡིན་ཏེ། དེར་དྲི་དང་རོ་ལ་ཉེ་བར་རྒྱུ་བ་དག་ལམ་གྱིས་སྤངས་པའི་ཕྱིར་རོ། །དེ་ལ་ཡིད་བདེ་བ་ནི་མཐའ་གཅིག་ཏུ་དགེ་བ་མ་ཡིན་ཞིང་གཟུགས་མེད་པའི་དངོས་གཞི་རྣམས་ས་འོག་མ་ལ་དམིགས་པ་མ་ཡིན་ནོ། །
མཚན་ཉིད་འདི་རྟོགས་ནས་རྒྱ་ཆེར་བརྗོད་པར་བྱའོ། །དེ་ལ་འདོད་པའི་ཁམས་སུ་སྐྱེས་པའི་གང་ཟག་གསུམ་དུ་བྱས་ནས་ཀ་ཐ་མ་ལཱ་ནི་ས་གོང་མ་པའི་སེམས་ཐོབ་པས་འདོད་ཆགས་དང་བྲལ་བ་དང་ཞེས་སོ། །དེ་ལ་གང་ཟག་ཉིད་དག་ཏུ་བཤད་པ་ཙལཱ་བྷཱི་ལཱ་བྷཱི་ཙཱ། འདོད་ཆགས་དང་བྲལ་བའོ། །གང་ཞིག་འདོད་པ་ན་སྤྱོད་པའི་འདོད་ཆགས་དང་བྲལ་བ་དེ་ཡིད་མི་བདེ་བའི་ཉེ་བར་རྒྱུ་བ་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་དང་མི་ལྡན་ནོ། །འདོད་ཆགས་དང་བྲལ་བ་ལ་ནི་ཡིད་མི་བདེ་བ་མེད་པའི་ཕྱིར་འདི་ནི་ཡིད་བདེ་བ་དང་བཏང་སྙོམས་ཀྱི་ཉེ་བར་རྒྱུ་པ་དགེ་བ་དང་ལྡན་ནོ། །བསམ་གཏན་དང་པོའི་ས་པའི་ཉོན་མོངས་པ་ཅན་མ་ཡིན་པ་བཅུ་གཉིས་དང༌། འདོད་པའི་ཁམས་ལ་དམིགས་པའི་ཉོན་མོངས་པ་དང་ཉོན་མོངས་པ་ཅན་མ་ཡིན་པ་བརྒྱད་དང་ལྡན་ནོ། །བསམ་གཏན་གཉིས་པའི་ཉེར་བསྡོགས་ཐོབ་པ་འདོད་པ་ན་སྤྱོད་པའི་ཉོན་མོངས་པ་ཅན་མ་ཡིན་པ་བཅུ་གཉིས་དང་བསམ་གཏན་དང་པོའི་ས་པའི་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་བཅུ་གཉིས་དང་བསམ་གཏན་གཉིས་པའི་ས་པའི་བཏང་སྙོམས་ཉེ་བར་རྒྱུ་བ་དགེ་བ་བཞི་དང༌། ཡིད་བདེ་བ་ཉེ་བར་རྒྱུ་བ་བསམ་གཏན་གྱི་དངོས་གཞིའི་ས་པ་ཉོན་མོངས་པ་ཅན་བཞི་དང་བཏང་སྙོམས་ཉེ་བར་རྒྱུ་བ་རྣམས་ནི་ལོགས་སུ་མི་བརྩིའོ། །སློབ་དཔོན་འདུས་བཟང་ན་རེ། བཏང་སྙོམས་ཀྱི་ཉེ་བར་རྒྱུ་བ་དགེ་བ་དྲུག་གཉིས་པའི་ཉེར་བསྡོགས་དང་ལྡན་ནོ་ཞེས་ཟེར་རོ། །དེ་ལྟ་པུ་ལ་དཔྱད་ན་གཉིས་པའི་ཉེར་བསྡོགས་འདོད་པ་ལ་དམིགས་པ་ཡོད་དོ། །བསམ་གཏན་གསུམ་པ་དང་བཞི་པའི་ས་པའི་བཏང་སྙོམས་ཉེ་བར་རྒྱུ་བ་ཉོན་མོངས་པ་ཅན་བཞི་རྣམས་དང་ལྡན་པ་ཉིད་མེད་དོ། །གཟུགས་མེད་པ་ན་སྤྱོད་པའི་ཡང་བཏང་སྙོམས་ཉེ་བར་རྒྱུ་བ་ཉོན་མོངས་པ་ཅན་བཞི་དང་ལྡན་པ་ཉིད་དེ། བསམ་གཏན་དང་པོ་ལ་ཆགས་པ་དང་བྲལ་བ་བསམ་གཏན་གསུམ་པའི་དགེ་བའི་སེམས་མ་ཐོབ་པ་ནི་འདོད་པ་ན་སྤྱོད་པའི་དགེ་བ་དང༌། ལུང་དུ་མ་བསྟན་པ་བཅུ་གཉིས་དང་ལྡན་ནོ། །བསམ་གཏན་དང་པོའི་ས་པའི་དགེ་བ་བཅུ་
གཉིས་དང་བསམ་གཏན་གཉིས་པའི་ས་པའི་དགེ་བ་བཅུ་གཉིས་དང་ས་འོག་མ་པ་ལ་དམིགས་པ་དང་རང་གི་ས་ལ་དམིགས་པ་བརྒྱད་དང་དགེ་བ་དང་ཉོན་མོངས་ཅན་དང་ས་གོང་མ་པ་རྣམས་ནི་སྔ་མ་བཞིན་ཏེ། བསམ་གཏན་གཉིས་པ་ལ་འདོད་ཆགས་དང་བྲལ་བའོ། །བསམ་གཏན་གསུམ་པའི་སེམས་ཐོབ་པ་འདོད་པ་དང༌། བསམ་གཏན་གསུམ་པའི་ས་པ་རྣམས་དང་སྔར་གྱི་བསམ་གཏན་གསུམ་པ་ནས་སྲིད་པའི་རྩེ་མོའི་བར་གྱི་དངོས་གཞི་དང་ཉེར་བསྡོགས་དག་གི་ཚོར་བ་ལ་ཁྱད་པར་མེད་དོ། །འདི་ནི་བསམ་གཏན་གསུམ་པའི་ཁྱད་པར་ཏེ། ཉེར་བསྡོགས་ལས་དགེ་བ་དང༌། དངོས་གཞི་ལས་ཉོན་མོངས་ཅན་ནོ། །བསམ་གཏན་བཞི་པ་ནས་སྲིད་པའི་རྩེ་མོའི་བར་གྱི་ཉོན་མོངས་ཅན་ཁོ་ན་བསམ་གཏན་གཉིས་པའི་འདོད་ཆགས་དང་བྲལ་བའོ། །བསམ་གཏན་བཞི་པའི་སེམས་མ་ཐོབ་བ་འདོད་པ་དང་བསམ་གཏན་དང་པོའི་ས་པ་རྣམས་དང་སྔ་མ་བཞིན་བསམ་གཏན་གཉིས་པའི་ས་པ་བཅུ་གཉིས་དང་དགེ་བའི་རྩ་བ་རྣམས་ཉིད་དང་དེ་འདོད་ཆགས་དང་བྲལ་བའི་ཕྱིར་བསམ་གཏན་གསུམ་པའི་ས་པའི་བཏང་སྙོམས་ཀྱི་ཉེ་བར་རྒྱུ་བ་དྲུག་དང་ས་འོག་མ་ལ་དམིགས་པའི་དགེ་བ་དང་རང་གི་ས་ལ་དམིགས་པ་བཞི་དང་དགེ་བ་དང་ཉོན་མོངས་པ་ཅན་རྣམས་དང༌། བསམ་གཏན་བཞི་བའི་ས་པ་ལ་སོགས་པ་སའི་ཉོན་མོངས་པ་ཅན་རྣམས་ཉིད་བསམ་གཏན་བཞི་པར་ཐོབ་བོ། འདོད་པ་དང་བསམ་གཏན་དང་པོ་དང་གཉིས་པ་དང་གསུམ་པ་རྣམས་དང་སྔ་མ་བཞིན་ལྡན་ནོ། །བསམ་གཏན་གསུམ་པའི་ས་པའི་ཉེར་བསྡོགས་ལས་དགེ་བ་དང་དངོས་གཞི་ལས་ཉོན་མོངས་ཅན་ཉིད་དེ་སྲིད་པའི་རྩེ་མོའི་བར་ལས་བསམ་གཏན་གསུམ་པ་འདོད་ཆགས་དང་བྲལ་བའོ། །ནམ་མཁའ་མཐའ་ཡས་སྐྱེ་མཆེད་ཀྱི་ས་པའི་དགེ་བའི་སེམས་མ་ཐོབ་པ་ནི། བསམ་གཏན་གསུམ་པ་ལས་དགེ་བ་ཉིད་དང་བཞི་པ་ལས་ཉོན་མོངས་ཅན་ཉིད་དེ་ལྷག་མ་སྔ་མ་བཞིན་ནོ། །དེ་ལས་གོང་མའི་སའི་སེམས་ཐོབ་པ་ནི། ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་ལས་འོག་མ་ལ་དམིགས་པ་བཞི་དགེ་བ་ཉིད་དང་དངོས་གཞི་ལས་ཉོན་མོངས་ཅན་
གཅིག་ཉིད་དང་མ་འདྲེས་པ་ལ་དམིགས་པའི་ཕྱོགས་དང་འདྲེས་པ་ལ་དམིགས་པའི་ཕྱོགས་ལ་ནི་ཉེར་བསྡོགས་ལས་ཀྱང་དགེ་བ་གཅིག་ཉིད་དང་ལྡན་ནོ། །ལྷག་མ་སྔ་མ་བཞིན་ནོ། །བསམ་གཏན་བཞི་བའི་འདོད་ཆགས་དང་བྲལ་བའོ། །བསམ་གཏན་བཞི་པའི་ས་བའི་དགེ་བ་རྣམས་དང་དགེ་བ་ཉིད་ལྡན་གྱི་ཉོན་མོང་ས་ཅན་ནི་མ་ཡིན་ནོ། །དམ་མཁའ་མཐའ་ཡས་སྐྱེ་མཆེད་ཀྱིས་བའི་ནི་དགེ་བ་ཉོན་མོངས་ཅན་དང་སྟེ་ལྷག་མ་སྔ་མ་བཞིན་ནོ། །དེ་བཞིན་དུ་དམ་ཤེས་མཐའ་ཡས་སྐྱེ་མཆེད་ཀྱིས་བའི་སེམས་ཐོབ་པའོ། །ནམ་མཁའ་མཐའ་ཡས་སྐྱེ་མཆེད་ཀྱི་འདོད་ཆགས་དང་བྲལ་པ་ཡང་རྣམ་ཤེས་མཐའ་ཡས་སྐྱེ་མཆེད་ལས་ན་གེ་བ་དང་ཉོན་མོངས་ཅན་དག་དང་ལྡན་ནོ། །དེ་བཞིན་དུ་ཅི་ཡང་མེད་པའི་སྐྱེ་མཆེད་ནས་སྲིད་པའི་རྩེ་མོའི་བར་དུ་རྒྱ་ཆེར་བརྗོད་པར་བྱའོ། །བསམ་གཏན་དུ་སྐྱེས་བ་སྨོས་པ་ནི་གཟུད་ས་མེད་པར་སྐྱེས་བ་བསལ་བའི་ཕྱིར་རོ། །གཟུགས་མེད་པར་སྐྱེས་པ་ནི་རྟག་ཏུ་རང་གི་ཁམས་དང་ལྡན་པ་ཉིད་ཀྱིས་ཁམས་འོག་མ་ལ་དམིགས་པའི་ཕྱིར་རོ། །དེ་ལྟ་མོད་ཀྱི་དེས་ཆོས་ཕྱི་སྐྱེ་མཆེད་ལ་དམིགས་པ་མ་ཡིན་ནོ། །འདི་ལྟར་གཟུགས་ལ་སོགས་པའི་སྤྱི་ལ་དམིགས་བའི་ཕྱིར་ཆོས་ལ་ཉེ་བར་རྒྱུ་བ་ཉིད་དུ་རྣམ་པར་གཞག་གོ །དེ་ལ་བསམ་གཏན་དང་པོར་སྐྱེས་པ་བསམ་གཏན་གཉིས་པའི་ས་པའི་དག་པའི་སེམས་མ་ཐོབ་པ་འམ་ཐོབ་པ་དང་འདོད་ཆགས་དང་མ་བྲལ་བ་དང་འདོད་ཆགས་དང་བྲལ་བ་སྟེ་རྣམ་པ་གསུམ་དུ་གྱུར་ཏོ། །དེ་ལ་མ་ཐོབ་པ་ནི་བསམ་གཏན་དང་པོའི་ས་པའི་ཉོན་མོངས་པ་ཅན་ཐམས་ཅད་དང་ཉོན་མོངས་པ་ཅན་མ་ཡིན་པ་དང༌། བསམ་གཏན་གཉིས་པ་ལ་སོགས་པའི་ས་བའི་ཉོན་མོངས་པ་ཅན་ཉིད་མ་ཐོབ་པའོ། །འདོད་ཆགས་དང་མ་བྲལ་མ་ནི་བསམ་གཏན་གཉིས་པའི་ས་པའི་ཡིད་བདེ་བ་ཉེ་བར་རྒྱུ་བ་བཞི་དང༌། ཉོན་མོངས་པ་ཅན་དང༌། བཏང་སྙོམས་ཉེ་བར་རྒྱུ་བ་བཞི་དང་དགེ་བ་ཉོན་མོངས་པ་ཅན་མ་ཡིན་པ་དང༌། ཉེར་བསྡོགས་ལས་དགེ་བ་ཉོན་མོངས་པ་ཅན་དང༌། ཉེར་བསྡོགས་ལས་དགེ་བའི་རྩ་བ་ཉོན་མོངས་པ་ཅན་རྣམས་དང་སྟེ་ལྷག་མ་སྔ་མ་བཞིན་ནོ། །འདོད་ཆགས་དང་བྲལ་བ་ནི་བསམ་
གཏན་དང་པོའི་ས་བའི་ཉོན་མོངས་པ་ཅན་མ་གཏོགས་པ་རྣམས་དང༌། བསམ་གཏན་གཉིས་པའི་ས་བའི་དགེ་བ་ཉོན་མོངས་ཅན་རྣམས་དང་ལྡན་ཏེ་ལྷག་མ་སྔ་མ་བཞིན་ནོ། །ཐམས་ཅད་འདོད་བར་གཏོགས་པའི་སྤྲུལ་པའི་སེམས་ལྷན་ཅིག་སྐྱེས་པ་དང་ལུང་དུ་མ་བསྟན་པ་དང་བཏང་སྙོམས་ཉེ་བར་རྒྱུ་བ་དང་ལྡན་ནོ། །བསམ་གཏན་གཉིས་པར་སྐྱེས་པ་ནི། འདོད་པར་གཏོགས་པ་བསམ་གཏན་དང་པོའི་ས་པའི་སྤྲུལ་པའི་སེམས་ལྷན་ཅིག་སྐྱེས་པ་དང་ལུང་དུ་མ་བསྟན་པ་དང་བཏང་སྙོམས་ཉེ་བར་རྒྱུ་བ་དང་ལྡན་གྱི་གཞན་དང་མ་ཡིན་ནོ། །དེ་བཞིན་དུ་བསམ་གཏན་གཏན་བཞི་བའི་བར་དུ་སྐྱེས་བ་རྣམས་ནི་བཏང་སྙོམས་ཉེ་བར་རྒྱུ་བ་དང་ས་འོག་མའི་སྤྲུལ་པའི་སེམས་ལྷན་ཅིག་སྐྱེས་པ་དང་ལྡན་གྱི་གཞན་དང་ནི་མ་ཡིན་ནོ། །བསམ་གཏན་གཉིས་པ་ལ་སོགས་པར་སྐྱེས་བའི་རྗེས་སུ་འབྲངས་ཏེ། ཉེ་བར་རྒྱུ་བ་ལྷག་མ་དང་ལྡན་པ་རྒྱ་ཆེར་བརྗོད་པར་བྱའོ། །གཟུགས་མེད་པའི་ཁམས་སུ་སྐྱེས་པ་ནི་རྟག་ཏུ་རང་གི་ཁམས་པ་གཅིག་ཉིད་དང་སྟེ། ཁམས་འོག་མ་ལ་དམིགས་པའི་ཕྱིར་རོ། །ཡིད་ཀྱི་ཉེར་བར་རྒྱུ་བའི་དོན་བྱེ་བྲག་ཏུ་སྨྲ་བ་རྣམས་ཀྱི་འདི་ལྟ་བུ་ཡང་ཡོད་མོད་ཀྱི་ཞེས་བྱ་བ་ནི། དེ་ཉིད་ཉེ་བར་བསགས་པ་ཟག་པ་དང་བཅས་པ་ཉིད་དེ་ཡིན་གྱི་ཉེ་བར་རྒྱུ་བ་དེ་ལས་བཟློག་པ་ཟག་པ་མེད་པའོ། །རྩོམ་པ་མེད་པར་འཇུག་པའི་ཕྱིར་དང་མཚན་མ་མེད་པར་གཞོལ་བའི་ཕྱིར་རྩོལ་བ་མེད་པའོ། །ཉེ་བར་སྤྱོད་པ་འགའ་ཞིག་ཟག་པ་མེད་པ་ཡིན་ནོ། །དེ་དག་ཀྱང་དགེ་བ་དང་ཉོན་མོངས་བ་ཅན་ཞེས་ཏེ། ཉེ་བར་སྤྱོད་པའི་དོན་བསྟན་པ་འདི་ནི་བྱེ་བྲག་ཏུ་སྨྲ་བ་རྣམས་ཀྱི་ཡིན་ནོ། །གཞན་ན་རེ་ཞེས་བྱ་བ་ནི་གཞན་ཡང་མ་ཡིན་གྱི་བདག་ཉིད་ཁོ་ན་ཞེས་བྱ་བའི་དོན་ཏོ། །གང་ཞིག་གང་ལས་ཞེས་བྱ་བ་རྒྱས་པར་འབྱུང་བ་ནི། གང་ཞིག་གཟུགས་ལ་སོགས་པ་དེ་ལས་འདོད་ཆགས་དང་མ་བྲལ་བ་ནི་གཟུགས་ལ་སོགས་པའི་དམིགས་པ་དེ་ལ་ཉེ་བར་རྒྱུ་བར་རིགས་པ་མ་ཡིན་ཏེ་དེའི་ས་པའི་ཉོན་མོངས་པ་སྤངས་བའི་ཕྱིར་རོ། །ཇི་ལྟར་ཉེ་བར་རྒྱུ་བར་བྱེད་ཅེ་ན། དེ་ལ་རྗེས་སུ་ཆགས་པར་བྱེད་ཁོང་ཁྲོ་བར་བྱེད། སོ་སོར་མ་བརྟགས་བར་
བཏང་སྙོམས་སུ་ཡང་བྱེད་པ་སྟེ། དེའི་ཕྱིར་ཟག་པ་མེད་པ་རྣམས་མ་ཡིན་པ་འབའ་ཞིག་ཏུ་མ་ཟད་ཀྱི། ཇི་སྐད་དུ་ཁྱོད་ཀྱིས། འདོད་ན་ཐམས་ཅད་རང་དམིགས་ཅན། །སྤྱོད་ཡུལ་གཟུགས་ཅན་བཅུ་གཉིས་སོ། །ཞེས་བྱ་བ་ལ་སོགས་པ་སྨྲས་པའི་ཟག་པ་དང་བཅས་པ་དག་ཀྱང་ཐམས་ཅད་ནི་མ་ཡིན་ནོ། །འོ་ན་ཅི་ཞེན་ཀུན་ནས་ཉོན་མོངས་པ་སྟེ། ཀུན་ནས་ཉོན་མོངས་པའི་འབྲས་བུ་ཅན་རྣམས་ཡིན་ཏེ། ཀུན་ནས་ཉོན་མོངས་པ་རྣམས་ཏེ། ཀུན་ནས་ཉོན་མོངས་བ་དང་མཐུན་པ་རྣམས་ཞེས་བྱ་བའི་ཐ་ཚིག་གོ ། ཡིད་བདེ་བ་ལ་སོགས་པ་དག་ནི་རྣམ་པ་གཉིས་ཏེ། ཡིད་ཡུལ་རྣམས་ལ་རྗེས་སུ་ཆགས་པ་དང་ཁོང་ཁྲོ་བ་ལ་སོགས་བའི་རྗེས་སུ་མཐུན་པ་དང་རྗེས་སུ་མི་མཐུན་པའོ། །དེ་ལ་གང་དག་རྗེས་སུ་ཆགས་པ་ལ་སོགས་པ་དང་མཐུན་པ་དེ་དག་ནི་ཉེ་བར་རྒྱུ་བ་ཞེས་བརྗོད་ཀྱི་གཞན་ནི་མ་ཡིན་ཏེ། དེ་ཉིད་ཀྱི་ཕྱིར་དེ་དག་གིས་ཡིད་ཡུལ་རྣམས་ལ་ཉེ་བར་རྒྱུ་བར་བྱེད་དོ་ཞེས་བྱ་བ་རྒྱས་པར་སྨོས་སོ། །ཚོར་བའི་དབང་གིས་རྗེས་སུ་ཆགས་པ་ལ་སོགས་པ་འཇུག་པའི་ཕྱིར་དེ་དག་གིས་ཡུལ་རྣམས་ལ་ཉེ་བར་རྒྱུ་བར་བྱེད་དོ་ཞེས་བརྗོད་དོ། །སོ་སོར་བརྟགས་བའི་བཏང་སྙོམས་ནི་དགེ་བ་ཡིན་པས། དེའི་ཕྱིར་སོ་སོར་མ་བརྟགས་པར་བཏང་སྙོམས་སུ་བྱེད་པ་སྟེ་ཞེས་བྱ་བ་སྨོས་ཏེ། བཏང་སྙོམས་སུ་བྱེད་ཀྱི་གཏོད་པར་མི་བྱེད་དོ་ཞེས་བྱ་བའི་དོན་གང་ཡིན་པའོ། །གང་གིས་གཉེན་པོར་རྟག་ཏུ་གནས་པ་དྲུག་ཡིན་པ་སྟེ། ན་ཧྱ་ཀླིཥྚ་སྱ་ཟག་པ་དང་བཅས་པ་དེ་ལ་དམིགས་པའི་འདུན་པའི་འདོད་ཆགས་ཀྱི་སྒོ་ནས་གཉེན་པོ་མ་གཏོགས་པ་གཞན་གཉེན་པོ་ཡོད་ཅེས་བྱ་བའོ། །རྟག་པ་ནི་གྲུབ་པའི་མཐའ་ལས་རྟག་པར་འབྱུང་བའོ། །དྲུག་ཉིད་ནི་རྣམ་པ་དྲུག་སྟེ་གཟུགས་ལ་སོགས་བ་ལམ་དམིགས་བའི་ཕྱིར་རོ། །དགྲ་བཅོམ་པ་ལ་ཡང་ཞེས་རྒྱས་བར་འབྱུང་བ་ལ། ཆོས་ལ་དམིགས་པ་ནི་ཆོས་ཉན་པ་ལ་སོགས་པ་སངས་རྒྱས་ཀྱི་ཡོན་ཏན་ལ་སོགས་པ་ལ་དམིགས་པའོ། །དེ་དགག་པ་ཡིན་པར་མངོན་ཞེས་བྱ་བ་ལ། མིག་གིས་གཟུགས་རྣམས་མཐོང་ནས་ཡིད་བདེ་བར་མི་
འགྱུར་ཞེས་རྒྱ་ཆེར་འབྱུང་སྟེ། ཀུན་ནས་ཉོན་མོངས་པ་ལས་བྱུང་བ་ཉིད་ཀྱི་ཉེ་བར་རྒྱུ་བ་ཞེས་སོ། །འདི་ལ་སློབ་དཔོན་གོ་ཆ་མཐའ་ཡས་ན་རེ། གང་བཤད་པ་དེ་མི་རིགས་ཏེ། ཅིའི་ཕྱིར་ཞེ་ན། མདོ་ལས་གཞན་དུ་བསྟན་པའི་ཕྱིར་ཏེ། དགེ་སློང་དག་དེ་ལ་ཡིད་བདེ་བའི་ཉེ་བར་རྒྱུ་བ་དྲུག་པོ་གང་ཡིན་པ་དེ་དག་ལ་བརྟེན་ཅིང་གནས་ཏེ་ཡིད་མི་བདེ་བའི་ཉེ་བར་རྒྱུ་བ་དྲུག་པོ་གང་ཡིན་པ་དེ་དག་སྤོངས་ཤིག །དགེ་སློང་དག་དེ་ལ་བཏང་སྙོམས་ཀྱི་ཉེ་བར་རྒྱུ་བ་དྲུག་པོ་གང་ཡིན་པ་དེ་དག་ལ་བརྟེན་ཅིང་གནས་ཏེ། ཡིད་བདེ་བའི་ཉེ་བར་རྒྱུ་བ་དྲུག་པོ་གང་ཡིན་བདེ་དག་སྤོངས་ཤིག །དགེ་སློང་དག་དེ་ལ་བཏང་སྙོམས་པ་ནི་གཉིས་ཏེ། ཐ་དད་པ་ཉིད་ལ་བརྟེན་པ་དང༌། གཅིག་པ་ཉིད་ལ་བརྟེན་པའོ། །དགེ་སློང་དག་དེ་ལ་གཅིག་པ་ཉིད་ལ་བརྟེན་བའི་བཏང་སྙོམས་གང་ཡིན་པ་དེ་ལ་བརྟེན་ཅིང་གནས་ཏེ་ཐ་དད་བ་ཉིད་ལ་བརྟེན་པའི་བཏང་སྙོམས་གང་ཡིན་པ་དེ་ཡང་སྤོངས་ཤིག་ཅེས་བཤད་དེ། དེ་ལྟ་བུས་ན་མདོ་འདི་ལས་ཡིད་བདེ་བ་ལ་སོགས་པའི་ཉེ་བར་རྒྱུ་བ་ནི་ཀུན་ནས་ཉོན་མོངས་པ་ཁོ་ན་མ་ཡིན་ནོ་ཞེས་བྱ་བར་ཤེས་སོ་ཞེས་ཟེར་རོ། །འདིས་ནི་རེ་ཞིག་ཡིད་བདེ་བ་དང་བཏང་སྙོམས་དག་ཀུན་ནས་ཉོན་མོངས་པ་ཉིད་ཡིན་པ་བཟློག་པ་མ་ཡིན་ཏེ། འདི་ལྟར་མདོ་ལས་ང་རྒྱལ་ལ་བརྟེན་ནས་ང་རྒྱལ་སྤང་བར་བྱའོ་ཞེས་གསུངས་ཀྱང༌། འདིས་ང་རྒྱལ་ཀུན་ན་སྙོན་མོངས་པ་ཡིན་པ་བཟློག་པ་མ་ཡིན་པ་བཞིན་ནོ། །དེའི་ཕྱིར་མདོ་ལས་ཉོན་མོངས་པ་རྣམས་ཀྱང་ལྕི་བ་དང་ཡང་པ་ལ་དགོངས་ནས་སྤང་བ་དང་བརྟེན་པར་གསུངས་པས་སྐྱོན་མེད་དོ། །དེས་ན་བཏང་སྙོམས་ཀྱི་ཉེ་བར་རྒྱུ་བ་གང་ཡིན་པ་དེ་ཉིད་བཏང་སྙོམས་ཀྱི་ཉེ་བར་རྒྱུ་བ་སྤང་བ་དང་བརྟེན་པ་ཉིད་དུ་སྟོན་པ་ཡིན་ནོ། །སྟོན་པའི་མཚན་ཉིད་སུམ་ཅུ་རྩ་དྲུག་ནི། འདི་དག་གིས་སྟོན་པ་གོ་བར་བྱེད་ཅེས་བྱ་བའི་ཐ་ཚིག་གོ །འདི་དག་གིས་སྟོན་པ་གོ་བར་བྱེད་པ་ནི་སྟོན་པས་གསུངས་སོ་ཞེས་བྱ་བར་དགོངས་པའོ། །གཞན་ལ་དེ་དག་རྣམ་པར་འབྱེད་པའི་ནུས་པ་མེད་པའི་ཕྱིར་རོ། །ཞེན་པ་ལ་བརྟེན་པ་དང་ངེས་པར་འབྱུང་བ་ཉིད་ལ་བརྟེན་པའི་བྱེ་བྲག་
གིས་ཞེས་བྱ་བ་ལ། ཞེན་པ་ནི་བརྐམ་པ་སྟེ། དོན་དུ་གཉེར་བ་དང་ཆགས་པ་དང་མངོན་པར་ཞེན་པ་དང༌། སྲིད་པ་ཞེས་བྱ་བ་ནི་རྣམ་གྲངས་དག་གོ །ངེས་པར་འབྱུང་བ་ཉིད་ནི་འདོད་ཆགས་དང་བྲལ་པའོ། །འཁོར་བའམ་ཀུན་ནས་ཉོན་མོངས་པ་འམ་སྡུག་བསྔལ་ལས་ངེས་པར་འབྱུང་བ་ནི་དེས་པར་འབྱུང་བ་ཉིད་དོ། །དེ་དག་གིས་བྱེ་བྲག་སྟོན་པས་བཀའ་སྩལ་བའི་ཕྱིར་རོ་ཞེས་བྱ་བ་ནི་བསྟན་པའི་ཕྱིར་རོ་ཞེས་བྱ་བའི་བར་དུ་སྨྲས་པར་འགྱུར་རོ། །འདི་སྐད་དུ། །མདོ་ལས་མིག་གིས་ཤེས་པར་བྱ་བའི་གཟུགས་དག་ལ་བརྟེན་ནས་ཡིད་བདེ་བ་སྐྱེ་བར་འགྱུར་ཞིང༌། དེ་ཡང་རྣམ་པ་གཉིས་སུ་རིག་པར་བྱ་སྟེ། ཞེན་པ་ཉིད་ལ་བརྟེན་པ་དང༌། ངེས་པར་འབྱུང་བ་ལ་བརྟེན་པའོ་ཞེས་བྱ་བ་རྒྱས་པར་འབྱུང་སྟེ། སྒྲ་དང་དྲི་དང་རོ་དང་རེག་བྱ་དང༌། ཆོས་དག་ལ་ཡང་དེ་བཞིན་དུ་རིག་པར་བྱ་ལ་ཡིད་མི་བདེ་བ་དང་བཏང་སྙོམས་ཀྱང་དེ་དང་འདྲའོ། །དེ་ལྟ་ན་ཚོར་བ་ཞེས་བྱ་བ་སྲིད་པའི་ཡན་ལག་འདིའི་ཞེས་བྱ་བ་ནི་ཇི་སྐད་བཤད་པའི། དེ་ལས་བྱུང་བ་ཚོར་བ་དྲུག །ལྔ་ནི་ལུས་ཀྱིའོ་སེམས་ཀྱི་གཞན། །ཞེས་བྱ་བ་རྒྱ་ཆེར་ཏེ་མ་བསྒྲིབས་ལ་ལུང་དུ་མ་བསྟན་པའི་ཚོར་བ་དགེ་བ་ཀུན་ནས་ཉོན་མོངས་པའི་ཕྱོགས་དང་རྗེས་སུ་མཐུན་པ་དང༌། དགེ་བ་ཉོན་མོངས་པ་ཅན་གྱི་ཕྱོགས་དག་ཁོ་ནར་རྟོགས་པར་བྱ་བ་ཡིན་པས་དེ་ལོགས་སུ་མ་བསྟན་ཏོ། །གལ་ཏེ་འདིར་ཡན་ལག་ཅུང་ཟད་བཤད་པ་དང་ཅུང་ཟད་འཆད་པར་འགྱུར་བ་དེ་ལྟ་བུ་ཡོད་པ་གོ་བར་ཟད་པའི་ཕྱིར་ཅིའི་དོན་དུ་མདོ་རྩོམ་ཞེ་ན། བཤད་པ་དང་འཆད་པར་འགྱུར་བ་གཞན་ཞེས་བྱ་སྟེ་གཞན་དུ་ནི་ཕྱི་མའི་དོན་དུའོ། །གང་འདིར་བཅོམ་ལྡན་འདས་ཀྱིས་འགྲེལ་པ་བཞི་རྒྱས་པར་གསུངས་པར་བྱའོ། །འདིར་ནི་ཉོན་མོངས་འདོད་ཅེས་བྱ་བ་ལ་སོགས་པ་ནི་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་པ་དང་སྦྱར་བར་བྱ་བའི་ཕྱིར་མདོ་རྩོམ་པའོ། །ཉོན་མོངས་པ་དང་ལས་དང་གཞི་རྣམས་སོ་ཞེས་བྱ་བས་ནི་སོ་སོར་ཤེས་བར་བྱས་པ་སྟེ། ཉོན་མོངས་གསུམ་མོ་ལས་གཉིས་སོ། །གཞི་བདུན་ཞེས་བྱ་བ་དེ་ལྟར་བུའི། །ཉོན་མོངས་པ་
དང་ལས་དང་གཞི་འདི་དག་གི་སོ་སོའི་བྱེད་པ་ཕྱི་རོལ་གྱི་དཔེའི་སྒོ་ནས་བསྟན་པའི་ཕྱིར། འདིར་ནི་ཉོན་མོངས་ས་བོན་བཞིན། །ཞེས་བྱ་བརྒྱས་པར་སྨོས་སོ། །ཉོན་མོངས་པའི་ཀླུ་གནས་པའི་སྐྱེ་བའི་ཆོས་ཀྱང་དེ་དང་འདྲའོ་ཞེས་བྱ་བ་ལ། ཉོན་མོངས་བ་ཡོད་ན་ལས་རྣམས་ཉེ་པར་སོག་པར་འགྱུར་ལ། དེ་ནི་དེ་ལས་སྐྱེ་བ་ཡིན་པས་ཉོན་མོངས་པ་ཡོད་ན་འགའ་ཞིག་གི་ཡང་སྐྱེ་བའི་མཚོ་སྐམས་པར་མི་འགྱུར་རོ། །ལས་རྣམས་ཀྱང་རྣམ་པར་སྨིན་པ་བསྐྱེད་པར་བྱ་བ་ལ་དེ་བཞིན་དུ་རིག་པར་བྱའོ་ཞེས་བྱ་བ་ནི་ཉེ་བའི་རྒྱུར་ཏེ། ཉོན་མོངས་པ་རྣམས་ནི་རིང་བ་ཡིན་ནོ། །ཐར་བ་ནི་མི་འགྱུར་རོ་ཞེས་བྱ་བ་ནི་དགྲ་བཅོམ་པ་ལ་ཡང་ཡང་སྲིད་ཀྱི་ཉོན་མོངས་མེད་པའི་ཕྱིར་རོ། །དེ་དག་ནི་བཤད་ཟིན་ཏོ་ཞེས་བྱ་བ་ཇི་ལྟར་ཞེ་ན། འདིར་གང་འཆི་དང་སྐྱེ་བ་ཡི། །སྲིད་བའི་བར་དུ་འབྱུང་པའོ། །ཞེས་བྱ་བས་སྲིད་བ་པར་མ་དང༌། སྐྱེ་བའི་སྲིད་པ་ནི་འགྲོ་བ་དག་ཏུ་ཉིང་མཚམས་སྦྱོར་བའི་སྐད་ཅིག་གོ་ཞེས་བྱ་བ་དང༌། དེ་ཕན་ཆད་འཆི་བའི་སྐད་ཅིག་མ་གཏོགས་པ་གཞན་ནི་དུས་སྔ་མའི་སྲིད་པའོ། །གང་གི་འོག་ཏུ་སྲིད་པ་བར་མ་འབྱུང་བ་ཐ་མའི་སྐད་ཅིག་མ་ནི་འཆི་བའི་སྲིད་པའོ། །སྐྱེ་བའི་སྲིད་བ་ཉོན་མོངས་ཅན། །ཞེས་བྱ་བ་ནི་དགེ་བ་མ་ཡིན་ཞིང་མ་བསྒྲིབས་ལ་ལུང་དུ་མ་བསྟན་པ་མ་ཡིན་པ་སྟེ་དེའི་ཕྱིར་གཅིག་ཏུ་ཞེས་བྱ་བ་སྨོས་ཏེ། ཉོན་མོངས་པ་ཅན་ཁོ་ན་ཡིན་ནོ་ཞེས་བསྟན་པར་འགྱུར་རོ། །ཉོན་མོངས་པ་དམིགས་ཀྱིས་མ་ཕྱེད་པས་འདྲ་བ་ནི་ཉོན་མོངས་པ་གང་གིས་ཞེས་བྱ་སྟེ། དེའི་ཕྱིར་ཉོན་མོངས་ཀུན་ཞེས་བྱ་བ་སྨོས་སོ། །ཅི་སྐྱེ་བའི་སྲིད་པ་ཐམས་ཅད་ཉོན་མོངས་པ་ཐམས་ཅད་ཀྱིས་ཉོན་མོངས་པ་ཅན་དུ་འགྱུར་རམ་ཞེ་ན་མ་ཡིན་ནོ། །འོ་ན་ཅི་ཞེ་ན། རང་གི་ས་པའི་ཉོན་མོངས་པ་རྣམས་ཀྱིས་ཉོན་མོངས་པ་ཁོ་ན་སྟེ། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། གཏི་མུག་དང༌། ལྟ་བ་དང་ཐེ་ཚོམ་ཞེས་བྱ་བ་དག་གིས་སོ། །ཀུན་ནས་དཀྲིས་པ་ཚིག་རྒྱ་ཐུབ་པ་རྣམས་ཀྱིས་ནི་མ་ཡིན་ནོ་ཞེས་བྱ་བ་ལ། འདོད་ཆགས་ལ་སོགས་པའི་ཉོན་མོངས་པ་དང་མཚུངས་པར་ལྡན་པས། ངོ་ཚ་མེད་པ་དང༌། ཁྲེལ་མེད་པ་དང༌།
རྨུགས་པ་དང༌། རྒོད་པ་དང༌། གཉིད་ཅེས་བྱ་བ་ཀུན་ནས་དཀྲིས་པ་རང་དབང་མ་ཡིན་པ་མེད་པས་དེའི་ཕྱིར་ཚིག་རྐྱ་ཐུབ་པ་རྣམས་ཀྱིས་ཞེས་ཁྱད་པར་དུ་བྱས་སོ། །མ་རིག་པ་ལས་གཞན་ཉོན་མོངས་པ་འདོད་ཆགས་ལ་སོགས་པ་དང་མཚུངས་པར་མི་ལྡན་པས་ན་ཆིག་རྐྱ་ཐུབ་པ་དག་ཅེས་བྱ་སྟེ། ཕྲག་དོག་དང༌། སེར་སྣ་དང༌། འགྱོད་པ་དང༌། ཁྲོ་བ་དང༌། འཚིག་པ་ཞེས་བྱ་བ་དང་ལྔ་ལ་ཆིག་རྐྱ་ཐུབ་པ་རྣམས་ཞེས་བརྗོད་དོ། །ཉོན་མོངས་པ་རྣམས་ཀྱིས་ཉིང་མཚོམས་སྦྱོར་རོ་ཞེས་འབྱུང་བ་དང༌། རང་དབང་པ་རྣམས་ནི་འདོད་ཆགས་ལ་སོགས་པའི་ཉོན་མོངས་བ་རྣམས་དང་མཚུངས་བར་མི་ལྡན་པའི་ཕྱིར་དེ་དག་གིས་ཉིད་མཚམས་སྦྱོར་བ་དགག་གོ །འདོད་ཆགས་ལ་སོགས་པ་ཉོན་མོངས་པ་དང་མཚུངས་པར་ལྡན་པས་རང་དབང་མ་ཡིན་པ་རྣམས་ཀྱིས་ནི་ཉིང་མཚམས་སྦྱོར་བ་མི་དགག་གོ །ཡང་འདིར་ཉོན་མོངས་པ་རྣམས་ཁོ་ན་ཉིང་མཚམས་སྦྱོར་བའི་རྒྱུ་ཡིན་པ་ཀུན་ནས་དཀྲིས་པ་རྣམས་མ་ཡིན་པ་ཅི་ཞེ་ན། དེ་ནི་གནས་སྐབས་སུ་དེར་འབད་པ་མེད་པས་ཞེན་པའི་ཕྱིར་དང་སོ་སོར་བརྟགས་པ་སྔོན་དུ་འགྲོ་བ་མ་ཡིན་པའི་ཕྱིར་དང༌། འཆབ་པ་དང༌། འགྱོད་པ་ལ་སོགས་པ་སྟོབས་ཆུང་པའི་ཕྱིར་རོ། །ཀུན་ནས་བཀྲིས་པའི་བག་ཆགས་རྣམས་འབད་པ་མེད་པར་ཀུན་དཀྲིས་པ་རྣམས་ལ་འཇུག་པ་དེ་མི་སྲིད་དོ། །ཉོན་མོངས་པ་རྣམས་ནི་རང་གི་ངང་གིས་འཇུག་པའི་ཕྱིར་དེའི་གནས་སྐབས་སུ་ཞན་ཡང་ཀུན་ཏུ་སྤྱོད་པར་བྱེད་དོ། །དེའི་ཕྱིར་ཉོན་མོངས་པ་རྣམས་ཁོ་ན་ཉིད་མཚམས་སྦྱོར་པའི་འཆིང་བར་འདོད་ཀྱི་ཀུན་ནས་དཀྲིས་པ་རྣམས་ནི་མ་ཡིན་ནོ། །གལ་ཏེ་གནས་སྐབས་དེ་ནི་ཞེན་པ་མ་ཡིན་ནམ། ཇི་ལྟར་དེར་ལོག་པར་ལྟ་བ་ལ་སོགས་པ་དག་ཀུན་ཏུ་འབྱུང་ཞེན་དེའི་ཕྱིར། གནས་སྐབས་དེ་ཞེན་པ་ཡིན་མོད་ཀྱི་ཞེས་བྱ་བ་རྒྱས་པར་འབྱུང་སྟེ། སེམས་དང་སེམས་ལས་བྱུང་བ་རྣམས་མི་གཡེང་བའི་ཕྱིར་གནས་སྐབས་དེ་ནི་ཞན་པ་ཡིན་ཞེས་བྱའོ། །གཞན་དག་ན་རེ་དི་ནེ་ཚོར་བ་བཏང་སྙོམས་ཁོ་ན་ཡོད་པས་དེའི་ཕྱིར་ཞན་པ་ཞེས་བརྗོད་དོ་
ཞེས་ཟེར་རོ། །གང་ཞིག་གིས་གང་ལ་ཡང་དང་ཡང་དུ་ཞེས་བྱ་བ་ནི་རྟག་ཏུ་ཞུགས་ཞེས་བྱ་བའི་དོན་ཏོ། །ཉེ་བར་ཞེས་བྱ་བ་ནི་འཆི་བ་དང་ཉེ་བ་སྟེ་སྤྱད་བ་ཞེས་བྱ་བ་དང་སྦྱར་རོ། །དེའི་ཚེ་ཞེས་བྱ་བ་ནི་སྐྱེ་བའི་སྲིད་པའི་གནས་སྐབས་ནའོ། །ཉོན་མོངས་བདེ་ཉིད་ལ་ཉེ་བར་གནས་ཞེས་བྱ་བ་ནི་ཉོན་མོངས་པ་གང་ལ་ཡང་དང་ཡང་དུ་ཉེ་བར་སྤྱད་པའོ། །སྔོན་འཕངས་པའི་ཕྱིར་རོ་ཞེས་བྱ་བ་ནི་སྔོན་གོམས་བས་དེའི་ཚེ་ཡང་རྣམ་པ་དེ་ལྟ་བུའི་ཉོན་མོངས་པ་ཁོ་ན་ཉེ་བར་གནས་པའོ། །ཡང་ན་སྔོན་དུ་ཡང་ཡང་ཉེ་བར་སྤྱོད་པ་དེས་དེའི་འཕེན་པ་སྟེ་འབྲས་བུའི་ངོ་བོས་འཕེན་པ་གང་ཡིན་པ་ཞེས་བྱ་བའི་དོན་ཏོ། །གཞན་དག་ན་རེ་ལུས་ལ་སྲེད་པ་ནི་སེམས་ཅན་རྣམས་ཀྱི་ངའོ་སྙམ་པའི་ང་རྒྱལ་ཏེ། དྷུ་བཱ་ནཾ་གི་ཎཽ་བ་ཪྻཱ་ཡེ་ན་ཏཽ་ཏ་སྱཱ་བ་སྠཱ་ཡཱཾ་སཱུ་ཀྵྨཽ་ས་མུ་དཱ་ཙ་ར་ནྟཽ་པནྟ་ཏིཾ་ན་བི་ཛ་ཧཱི་ཏཿ། དེ་དག་སྐྱེ་བའི་སྲིད་པ་ཉོན་མོངས་ཅན་དུ་འགྱུར་རོ་ཞེས་ཟེར་རོ། །དེ་ལྟན་འོ་ན་འཕགས་པ་རྣམས་ལ་དེ་ཀུན་ཏུ་སྤྱོད་པ་སྲིད་པའི་ཕྱིར་སྐྱེ་བའི་སྲིད་པར་མི་འགྱུར་རོ་ཞེ་ན། སྲེད་པ་ཆད་པ་ལ་ལུས་ཀྱི་ངེས་བའི་རྣམ་གྲངས་ཀྱིས། དེ་དག་དེ་ཡི་གནས་སྐབས་སུ། ཕྲ་བར་རྒྱུ་བ་ཉིད་ཡིན་གྱི། རྒྱུད་ལ་སྤངས་པ་ནི་མ་ཡིན་པས། རྗེས་སུ་ཐོགས་པ་སྲིད་པའི་ཕྱིར་འདི་མཐའ་གཅིག་ཏུ་མ་ཡིན་ནོ། །སྲིད་པ་བར་མར་ཉིད་མཚམས་སྦྱོར་བ་ཡང་དེ་བཞིན་དུ་ཞེས་བྱ་བ་ནི་ཡང་སྲིད་ཀྱི་མཚམས་སྦྱོར་དུ་བཤད་པ་ཇི་ལྟ་བ་བཞིན་ནོ་ཞེས་བྱ་བའི་དོན་ཏོ། །གཟུགས་མེད་གསུམ་ཞེས་བྱ་བ་ལ། །གཟུགས་མེད་པ་དང་མཚུངས་པར་ལྡན་པའི་ལས་ཀྱི་སྲིད་པ་བར་མའི་འབྲས་བུ་ཡོད་པ་མ་ཡིན་ནོ། །ཅིའི་ཕྱིར་མེད་ཅེ་ན། གཟུགས་མེད་པའི་ཁམས་ན་གནས་གཞན་དུ་ཡོངས་སུ་ཆད་པ་མེད་དེ་ཞེས་བྱ་བ་རྒྱས་པར་འབྱུང་ངོ༌། །དེ་དག་གི་ཟས་ཀྱང་མདོ་ལས་བཞི་ཁོ་ནར་བཤད་དོ། །བྱིས་པ་ཞེས་བྱ་བ་ནི་འོ་མ་དང་མར་ཟ་བའི་བར་རོ། །སོགས་པའི་སྒྲས་ནི་མངལ་ན་གནས་པ་བསྡུ་སྟེ་འདི་དག་ཡོངས་སུ་ཆད་བ་ཉིད་ཀྱིས་ལྷག་མ་རྣམས་ཀྱི་ནི་རེག་པ་ཉིད་དོ་ཞེས་བྱ་བ་གྲུབ་པོ། །ཡང་ཅི་འདི་རྣམས་ཐམས་ཅད་ཁམས་ཐམས་ཅད་ན་ཡོད་དམ་ཞེ་ན་དེའི་ཕྱིར་ཁམ་ཀྱི་ཟས་ནི་འདོད་པ་ཁོ་ན་ན་ཡོད་པ་ཡིན་ཏེ། ཁམ་གྱི་ཟས་ཀྱི་འདོད་ཆགས་དང་མ་བྲལ་བ་ནི་གཟུགས་
དང་གཟུགས་མེད་པར་མི་སྐྱེ་བའི་ཕྱིར་རོ། །འདོད་ཆགས་དང་བྲལ་བ་ནི་ཇི་སྲིད་དེ་མ་སྐྱེས་པ་དེ་སྲིད་དུ་ཟས་ཀྱིས་གནས་པ་ཉིད་ཡིན་ཏེ། དེ་ཉིད་ཀྱི་ཕྱིར་དེར་སྐྱེ་བའི་ཕྱིར་རོ་ཞེས་བྱ་བ་སྨོས་ཏེ། དེར་ནི་ལུས་གནས་པ་ཕྱི་རོལ་གྱི་རྐྱེན་ལ་རག་ལས་པ་མ་ཡིན་ནོ། །དེ་ལྟ་མོད་ཀྱི་གཟུགས་ཀྱི་ཁམས་ན་ཡོད་པའི་འབྱུང་བ་ཕན་འདོགས་པ་རྣམས་ནི་ཁམ་གྱི་རྣམ་པའི་འདོད་པའི་ཡོན་ཏན་མ་ཡིན་ཏེ། ཇི་ལྟར་གཟུགས་ཀྱི་ཁམས་ཀྱི་གཟུགས་དང་སྒྲ་དང་རེག་བྱ་རྣམས་ཡོན་ཏན་ཡིན་ཡང་འདོད་པའི་ཡོན་ཏན་མ་ཡིན་པ་བཞིན་ནོ། །འདི་ལ་ཕན་འདོགས་པའི་རེག་བྱའི་ཁྱད་པར་ཡང་དེ་བཞིན་ནོ། །འདི་ལྟར་དགའ་བ་ཡང་དེར་ཟས་ཞེས་བཤད་དེ་ཁམ་གྱི་རྣམ་བས་ཡོངས་སུ་ལོངས་སྤྱད་པ་སྲིད་པའི་ཕྱིར་ཁམ་གྱི་ཟས་སུ་འགྱུར་རོ་ཞེ་ན། འདིར་ཟས་ཞེས་བྱ་བ་བརྗོད་བ་ཟས་བཞིའི་བྱ་བ་མ་ཡིན་ཏེ། དགའ་བ་ཟ་བ་ནི་དུས་རིང་པོར་གནས་པ་སྟེ། དགའ་བ་ཟ་བའི་ལྷ་འོད་གསལ་བ་ལྟ་བུའོ་ཞེས་བྱ་བ་བཞིན་ནོ། །འོ་ན་འདོད་པའི་ཁམས་སུ་ཡང་གང་ཁའི་སྒོ་ནས་མིད་པ་དེ་ཉིད་ཁམ་གྱི་ཟས་ཡིན་གྱི་དེ་དག་གི་དེའི་དོན་དུ་སྒྲུབ་པ་ཉིད་མ་ཡིན་ནོ་ཞེན་དེ་མངོན་པར་བརྗོད་པ་མ་གྲུབ་པོ། གཟུགས་ཀྱི་ཁམས་སུ་ཅུང་ཟད་ཀྱང་མིད་པ་མེད་ལ་ཁམ་གྱི་ཟས་ནི་འདོད་ཁམས་ན་ཞེས་བཤད་པ་དེའི་ཕྱིར་འདི་ལ་ཀླན་ཀ་མེད་དོ། །དྲི་དང༌། རོ་དང༌། རེག་བྱའི་སྐྱེ་མཆེད་རྣམས་ནི་འདོད་བའི་ཁམས་ན་སྣ་དང་ལྕེས་ཁམ་དུ་བཅད་ནས་ཁམ་དུ་བྱ་སྟེ་མིད་པའི་ཕྱིར་ཁམ་གྱི་ཟས་ཞེས་བརྗོད་ན་གྲིབ་མ་ལ་སོགས་པ་དག་ནི་ཁམ་དུ་བྱས་ནས་མིད་དོ་སྙམ་དུ་ཐེ་ཚོམ་ཟ་བས་འདྲི་བ་ནི་གྲི་བ་མ་དང་ཉི་མ་དང་མེ་དང༌། འོད་དག་ལ་ཡོད་པའི་དྲི་དང་རོ་དང་རེག་བྱ་དེ་དག་ཇི་ལྟར་ཟས་ཉིད་ཡིན་ཞེས་བྱ་བའོ། །འདི་ནི་ཕལ་ཆེ་བ་ཞེས་བྱ་བ་རྒྱས་པར་འབྱུང་བ་ལ་འདོད་པ་ན་སྤྱོད་པའི་དྲི་དང་རོ་དང་རེག་བྱ་དེ་དག་ཕལ་ཆེར་ཁམ་དུ་བཅད་ནས་མིད་པ་ན་གནས་པ་འདྲེན་པ་བྱེད་མོད་ཀྱི་ཁམ་གྱི་ཟས་ཕྲ་བ་དེ་དག་ཀྱང་ཁྲུས་དང་ལུས་མཉེ་བ་བཞིན་དུ་དེའི་རིགས་ཅན་ཡིན་པའི་ཕྱིར་ཟས་ཉིད་ལས་མི་འདའ་བས་འགལ་བ་མེད་དོ། །གཞན་དག་ན་རེ།
བསྐལ་པ་དང་པོ་ཕ་སའི་བཅུད་ལ་སོགས་པ་བཅད་ཅིང་ཟ་བའི་ཕྱིར་དེ་ཡང་ཁམ་ཉིད་དུ་བརྗོད་དེ་གང་གི་ཕྱིར་གཅོད་པས་ན་ཁམ་ཞེས་བྱའོ་ཞེས་ཟེར་རོ། །གཞན་དག་ན་རེ་པཱུ་རྦཱནྟ་བི་ཀ་ལྤེ་ཥྭ་སྱཻ་བ་བྲདྷཱ་ནྱཾ་སུ་ཏ་རཱ་མ་ཤུ་ཙེནྡྲི་ཡ་མ་ཧཱ་བྷཱུ་ཏཱ་ནུ་གྲ་ཧཱ་ཡ་བྲ་བྲྀཏྟི་ར་ཏཿ། པྲཱ་དྷཱ་ནྱ་ད་ཡནྣི་རྡེ་ཤ་ཨི་ཏི། བཀྲེས་པ་དང་སྐོམ་པ་དག་ཁོ་ན་ཉེ་བར་ཞི་བར་བྱ་བའི་ཕྱིར་ཟས་ཀྱི་བྱ་བ་བྱེད་པ་མ་ཡིན་ནམ། ཇི་ལྟར་དེ་ལས་གཞན་པ་ཉིད་བརྗོད་ཅེ་ན་དབང་པོའི་འབྱུང་བ་ཆེན་པོ་རྣམས་རྒྱས་པར་བྱས་ཏེ། སྔོན་གྱི་མཐའི་རྟོག་པ་རྣམས་ལ་འདི་ཉིད་ཆེས་གཙོ་བོར་གྱུར་བས་མི་གཙང་བ་དང་པོའི་འབྱུང་བ་ཆེན་པོ་ལ་ཕན་འདོགས་པའི་ཕྱིར་འཇུག་གོ་དེའི་ཕྱིར་གཙོ་བོ་ལ་སོགས་པ་ངེས་བར་བསྟན་ནོ་ཞེས་ཟེར་རོ། དྷྱཱ་ཡཱ་མ་བི་ཤྲ་མ་བཙྩོ་པ་ཙ་ཡཾ་ཀྲྀ་ཏྭ་ནྱེ་བཱ་རོ་གཱ་ཁྱེ་ཛི་གྷཚཱ་བི་བཱ་སེ་ཙ། ཨཱ་ཧཱ་རོ་ནཱ་ནྱེ་ཨཱ་ཧཱ་རོ་ཧི་ཞེས་རྒྱས་པར་འབྱུང་སྟེ་ཟས་མིད་བར་བྱེད་ཕན་དབང་པོ་འཁོགས་པ་རྣམས་དང་དེའི་རྟེན་འབྱུང་བ་ཆེན་པོ་རྣམས་ལ་ཕན་འདོགས་ཤིང་རྒྱས་བར་བྱེད་དོ། །གཟུགས་ཀྱི་སྐྱེ་མཆེད་ནི་མིད་པའི་ཚེ་ཞེས་བྱ་བ་ནི་མིད་བསམ་པ་ངལ་བ་མིན་བ་ཉེ་བར་བསགས་པ་བྱས་ནས་བཀྲེས་པ་དང་སྐོམ་པའི་ནད་ཟས་གཞན་མིན་ཟས་ནི།པའི་དུས་ན་སྟེ་ཟས་ནི་གང་གི་ཚེ་ཁར་བཅུག་པ་དང་སོས་མན་ལ་བ་དང་མཆིལ་མས་བརླན་པ་མིད་པ་ལས་གྱུར་པ་དེའི་ཚེ་སྣ་དང་ལྕེ་དང་ལུས་ཀྱི་དབང་པོ་དག་གམ། དེ་དག་གིས་དྲི་ལ་སོགས་པ་རྣམས་འཛིན་པས་དེའི་རྟེན་འབྱུང་བ་ཆེན་པོ་རྣམས་ལ་ཕན་འདོགས་པ་དེ་བཞིན་དུ་གཟུགས་ཀྱི་སྐྱེ་མཆེད་ནི་མིད་བའི་ཚེ་མ་ཡིན་ནོ། །གཟུགས་ཀྱི་སྐྱེ་མཆེད་ནི་རང་གི་དབང་པོ་སྟེ་མིག་གི་དབང་པོ་གང་ཡིན་པའམ། དེའི་འབྱུང་བ་ཆེན་པོ་སྟེ་དབང་པོའི་རྟེན་འབྱུང་བ་ཆེན་པོ་གང་དག་ཡིན་པ་དེ་ལ་ཕན་མི་འདོགས་ན་དབང་པོ་གཞན་རྣ་བ་ལ་སོགས་པ་དག་ལ་ཕན་འདོགས་པ་ལྟ་སྨོས་ཀྱང་ཅི་དགོས། ཡུལ་མ་ཡིན་པའི་ཕྱིར་ཞེས་བྱ་བ་ནི་དབང་པོ་དེ་དག་གི་ཡུལ་གཟུགས་ལ་སོགས་པ་ཡིན་པའི་ཕྱིར་རོ། །གལ་ཏེ་མིད་པའི་ཚེ་གཟུགས་ཀྱི་སྐྱེ་མཆེད་མིག་གིས་མ་གཟུད་བས་མིག་གི་དབང་པོ་ལ་ཕན་འདོགས་ན་འོ་ན་ཟས་ཀྱི་ཚེ་མཐོང་བ་ན་ཕན་འདོགས་པར་འགྱུར་རོ་ཞེན་དེའི་ཕྱིར་གང་གི་ཚེ་མཐོང་བ་ན་ཞེས་བྱ་བ་རྒྱས་བར་སྨོས་སོ། །དེ་ལ་དམིགས་པ་ནི་མཐོང་བཞིན་པའི་གཟུགས་ལ་དམིགས་པའོ། །ཡང་དེའི་ཚེ་ཡང་དེ་ལ་དམིགས་པ་བདེ་བ་མྱོང་བར་འགྱུར་པའི་རེག་པ་ཟས་ཡིན་གྱི་གཟུགས་ནི་
མ་ཡིན་ནོ་ཞེས་བྱ་བ་འདི་ཇི་ལྟར་རྟོགས་ཤེ་ན། དེའི་ཕྱིར་གྲོལ་བའི་ཕྱིར་མི་འོང་བ་དང་དགྲ་བཅོམ་པ་ཞེས་བྱ་བ་རྒྱས་པར་སྨོས་ཏེ། ཕྱིར་མི་འོང་བ་སྨོས་པ་ནི་དེ་དག་ཀྱང་འདོད་པ་ལས་འདོད་ཆགས་དང་བྲལ་བའི་ཕྱིར་རོ། །མཐོང་པའི་གཟུགས་སུ་ཟས་ཀྱི་བྱ་བ་བྱེད་པ་ནི་ཇི་ལྟར་དྲི་དང༌། རོ་དང༌། རེག་བྱ་མིད་བཞིན་པ་དག་བཞིན་དུ་ཕྱིར་མི་འོང་བ་རྣམས་དང་དགྲ་བཅོམ་པ་ལ་ཡང་བྱེད་པར་འགྱུར་ཏེ། འདི་སྐད་དུ་ཁམ་གྱི་ཟས་ནི་ལག་ན་ཡོད་པ་འམ་སྣོད་ན་ཡོད་པས་ཟས་ཀྱི་བྱ་བ་མི་བྱེད་ཀྱི། འོན་ཀྱང་གང་གི་ཚེ་ཁར་བཅུག་པ་དང༌། སོ་ས་མནལ་བ་དང༌། མཆིལ་མས་བརླན་པ་དང༌། མིད་པ་དང༌། ཕོ་བ་ཁེངས་པར་གྱུར་བ་ཞེས་བྱ་བ་རྒྱས་བར་སྲིན་བུའི་རིགས་རྣམས་ལ་ཕན་པར་གྱུར་པ་དེའི་ཚེ་ཟས་ཉིད་ཀྱི་སྐྱེ་མཆེད་དུ་འགྱུར་རོ་ཞེས་གསུངས་པའི་ཕྱིར་ཏེ། ཟས་ཀྱི་དངོས་པོ་བྱེད་ཅེས་བྱ་བའི་དོན་ཏོ། །དེ་ནི་གོང་བུ་མཐའ་དག་ལག་པ་ལ་སོགས་པ་ན་ཡོད་པ་ན་འབྱུང་པར་འགྱུར་བའི་མིང་གིས་ཁམ་གྱི་ཟས་ཞེས་བྱ་བའོ། །གང་གི་ཚེ་ཟས་ཀྱི་བྱ་བ་བྱེད་པ་དེའི་ཚེ་དྲི་དང་རོ་དང་རེག་བྱ་ཁོ་ན་ཟས་ཀྱི་མིང་ཐོབ་སྟེ། འདི་དེའི་ཚེ་ཡུལ་དུ་འགྱུར་བས་སོ། །ཅི་སྟེ་གཟུགས་ཀྱང་ཞེས་སྨོས་ཏེ། དྲི་ལ་སོགས་པ་བཞིན་དེ་ལྟར་འདོད་ན་མི་ལྡན་པའི་འདུ་བྱེད་ཀྱི་རང་བཞིན་སྒྲ་ཡང་ཟས་སུ་འགྱུར་ཏེ། གཟུགས་ཀྱི་སྐྱེ་མཆེད་ཀྱི་མཐར་ལྟོ་པར་གནས་པས་ཕན་པར་བྱེད་པས་སོ་ཞེས་སོ། །འདི་ཇི་ལྟར་ཤེས་པར་བྱ་ཞེ་ན། དྲི་ལ་སོགས་པ་བཞིན་སོ་སོར་ནུས་པ་མཐོང་པའི་ཕྱིར་དེའི་ཚེ་ཡང་དེའི་ཡུལ་རྣམ་པར་ཤེས་པ་མི་འཐད་པའི་ཕྱིར་རོ། །དྲི་ཙམ་ཟས་ཡིན་པ་ནི་རེ་ཞིག་ཡོད་དོ་ཞེས་འགྲུབ་བོ། །གཞན་དག་ན་རེ་གཟུགས་ནི་ཟས་མ་ཡིན་ཏེ། ཕྲད་ནས་འཛིན་པའི་དབང་པོའི་ཡུལ་མ་ཡིན་པའི་ཕྱིར་སྒྲ་བཞིན་ནོ་ཞེས་ཟེར་རོ། །སློབ་དཔོན་དཔལ་ལེན་ན་རེ། གང་ཞིག་འདུས་པ་འདི་དག་ཐམས་ཅད་ཀྱིས་ཟ་བར་བྱེད་པས་ཟས་ཏེ་ཐ་དད་མེད་པར་བསྟན་པའི་ཕྱིར་རོ། །གང་གི་ཕྱིར་འདི་ཡོངས་སུ་འགྱུར་བ་ལས་བཅུད་དང་ཁྲག་དང་ཤལ་སོགས་པའི་ངོ་བོ་བསྒྲུབ་པའི་ཕྱིར་རྒྱུད་ཉེ་བར་རྟོན་
པར་བྱེད་པ་དེའི་ཕྱིར་འདི་ཐམས་ཅད་ཟས་སོ་ཞེས་ཟེར་རོ། །ཟག་པ་དང་བཅས་པ་ཁོ་ན་ཟས་ཞེས་བྱ་བ་ལ། འདི་ཉིད་དུ་ཟག་པ་དང་བཅས་པ་སྨོས་པ་ནི་དྲི་ལ་སོགས་པ་རྣམས་ལ་མ་ཡིན་ཏེ། དེ་དག་ཁོ་ན་མཐར་ཟག་པ་དང་བཅས་པ་ཡིན་པའི་ཕྱིར་རོ། །སྲིད་པ་གསོ་པར་བྱེད་པའི་དོན་ཟས་ཀྱི་དོན་ཞེས་བྱ་བ་ལ། ཇི་ལྟར་ན་དེ་དག་སྲིད་པ་གསོ་བར་བྱེད་ཅེ་ན་མ་འཕངས་པ་འཕེན་པའི་ཕྱིར་དང༌། འཕངས་པ་མངོན་པར་འགྲུབ་པར་བྱེད་པའི་ཕྱིར་ཏེ། སྲིད་པ་རྗེས་སུ་མི་སྲིད་པའི་རྒྱུ་ཉིད་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ །རེག་པ་དང་སེམས་པ་དང༌། རྣམ་པར་ཤེས་པ་ཟག་པ་མེད་པ་དེ་དག་ནི་སྲིད་པ་ཟད་པར་བྱ་བའི་ཕྱིར་སྐྱེས་པ་དག་ཡིན་ཏེ་སྲིད་པའི་གཉེན་པོ་ཡིན་པའི་ཕྱིར་རོ། །གལ་ཏེ་ཡང་སྐྱེས་ཟིན་པའི་སྲིད་པ་རྒྱས་པར་བྱེད་མོད་ཀྱི་སྲིད་པ་གཞན་སྐྱེད་པར་བྱེད་པ་ནི་མ་ཡིན་ཏེ། དེ་ཉིད་ཀྱི་ཕྱིར་དེ་དག་ཟག་པ་དང་བཅས་པ་ཡིན་ཡང་ཁམས་དང་ས་དང་སྐལ་བ་མི་མཉམ་པ་དག་ནི་ཟས་མ་ཡིན་ནོ། །སྐལ་བ་མི་མཉམ་པའི་ས་ན་ནི་རྒྱས་པའི་རྒྱུ་ཉིད་ཡིན་ན་ཡང་ཕྱི་མ་ལ་སྲིད་པ་དེ་སྦྲེལ་བའི་རྒྱུ་མ་ཡིན་པའི་ཕྱིར་ཟས་མ་ཡིན་ནོ། །ཟས་བཞི་པོ་འདི་དག་ནི་ཞེས་བྱ་བ་རྒྱས་པར་འབྱུང་སྟེ། དེ་ལ་གནས་པ་ནི་མི་འཆད་པའོ། །འཚོ་བ་ནི་རྒྱུན་ཆགས་སུ་རྗེས་སུ་འཇུག་པའོ། །ཡང་ན་ནི་སྔ་མའི་བཤད་པ་ཕྱི་མ་ཡིན་ནོ། །ཕན་པར་བྱེད་པ་ནི་ཡང་སྲིད་པ་མངོན་པར་འགྲུབ་པར་བྱེད་བའོ། །ཟག་པ་མེད་པའི་ཆོས་རྣམས་ནི་དེ་ལྟ་མ་ཡིན་པས་ཞེས་བྱ་བ་ནི་རྒྱུན་མི་འཆད་པར་རམ། ཡང་སྲིད་པ་མངོན་པར་འགྲུབ་པ་མ་ཡིན་པ་སྟེ། དེའི་ཕྱིར་རེག་པ་ལ་སོགས་པ་རྣམས་ནི་ཟག་པ་དང་བཅས་པ་ཁོ་ན་ཟས་ཡིན་གྱི་ཟག་པ་མེད་པ་ནི་མ་ཡིན་ནོ་ཞེས་བྱ་བར་མདོ་ལས་ཁོང་དུ་ཆུད་དོ། །རེ་ཞིག་བྱུང་བ་ནི་ཞེས་བྱ་བ་ལ་བྱུང་བ་ནི་སྐྱེས་པ་དང་མངོན་པར་གྲུབ་པ་ཞེས་བྱ་བའི་དོན་ཏོ། །ཡིད་ལས་སྐྱེས་པའི་ཕྱིར་ཞེས་བྱ་བ་ནི་ཡིད་ཙམ་ལས་སྐྱེས་པའི་ཕྱིར་ཏེ། དེ་ལྟར་ན་ཡིད་ཁོ་ན་སྨོས་པ་འབྲས་བུ་དང་བཅས་པར་འགྱུར་གྱི་གཞན་དུ་ནི་མ་ཡིན་ནོ། །འདི་ཉིད་བསྟན་པའི་ཕྱིར་ཕྱིའི་ཁུ་ཆུ་དང་ཁྲག་ཅེས་བྱ་བ་ལ་སོགས་པ་སྨོས་
ཏེ། །སོགས་པ་ཞེས་བྱ་བའི་སྦྲས་ནི་གཅིན་དང་ཕྱིས་དང་འདམ་རྫབ་དང་མེ་ཏོག་ལ་སོགས་པ་རྣམས་བསྡུའོ། །དྲི་ཟ་བའི་ཕྱིར་ན་ཞེས་བྱ་བ་ནི་དྲི་ཟ་བ་དང་དྲི་ཟས་སུ་ཟ་བའི་ཕྱིར་ན་ཞེས་བྱ་བའི་དོན་ཏེ་སྲིད་པ་ཚོལ་བའི་དང་ཚུལ་ཅན་ཡིན་པའི་ཕྱིར་ཞེས་བྱ་བ་ལ། མ་སྐྱེས་པས་ཕལ་ཆེར་སྐྱེ་བ་ལ་གཞོལ་བ་ནི་སྲིད་པ་ཚོལ་བའི་དང་ཚུལ་ཅན་ནོ། །སྐྱེ་བ་ལ་མངོན་དུ་ཕྱོགས་པའི་ཕྱིར་ཞེས་བྱ་བ་ལ། དེའི་དོན་དུ་མངོན་པར་གྲུབ་པའི་ཕྱིར་དང༌། དེ་མ་ཐག་ཏུ་སྐྱེ་བའི་ཕྱིར་ན་སྐྱེ་བ་ལ་མངོན་དུ་ཕྱོགས་པའོ། །གཞན་དག་ན་རེ། འཆི་བའི་མཐར་རྟེན་ཐམས་ཅད་མ་ཚང་བ་མེད་པ་མངོན་པར་གྲུབ་པའི་ཕྱིར་རོ་ཞེས་ཟེར་རོ། །གནོད་པ་དང་བཅས་པའི་ལུས་མངོན་པར་གྲུབ་ནས་ཞེས་བྱ་བ་འབྱུང་སྟེ། སྲིད་པ་བར་མ་མངོན་པར་གྲུབ་པ་ཡིན་ནོ་ཞེས་བྱ་བ་ལ། རྣམ་པར་བཤད་པ་གཉིས་སུ་ཡང་དེའི་ཁུངས་ནི་སྡུག་བསྔལ་དང་བཅས་པས་གནོད་པ་དང་བཅས་པའི་འཇིག་རྟེན་དུ་སྐྱེ་བར་འགྱུར་རོ་ཞེས་བྱ་བ་འདི་ཡིན་ཏེ། གང་གི་ཕྱིར་སྔར་མངོན་པར་གྲུབ་ནས་གནོད་བ་དང་བཅས་པའི་འཇིག་རྟེན་དུ་སྐྱེ་བའི་ཕྱིར་རོ། །མུ་བཞི་གསུངས་པའི་ཕྱིར་ཅི་ཡིན་ཞེ་ན། སྲིད་པ་བར་མ་མངོན་བར་གྲུབ་བར་བརྗོད་དོ་ཞེས་བྱ་བར་སྦྱར་རོ། །མུ་དང་པོ་ནི་ཕྱིར་མི་འོང་པ་ཁམས་གཉིས་ལས་འདོད་ཆགས་དང་བྲལ་པའོ། །གཞན་དག་ན་རེ་སོ་སོ་སྐྱེ་བོ་ཡང་ངོ་ཞེས་ཟེར་རོ། །དགེ་སློང་དག་གང་འཕགས་པའི་ཤེས་རབ་ཀྱིས་སྤངས་པ་དེ་ནི་སྤངས་བ་ཡིན་ནོ་ཞེས་འབྱུང་བའི་ཕྱིར་རོ། །གཞན་དག་ནི་སོ་སོ་སྐྱེ་བོའི་ཞེས་སོ། །གཉིས་པ་ནི་བར་མ་དོར་ཡོངས་སུ་མྱ་ངན་ལས་འདའ་བའོ། །གསུམ་པ་ནི་དགྲ་བཅོམ་པའོ། །བཞི་པ་ནི་རྒྱུན་ཏུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་གཟུགས་སུ་ཉེ་བར་འགྲོ་བ་དང༌། བདག་ཅག་ལ་སོགས་པ་རྣམས་སོ། །ཡང་ན་བྱུང་བ་ནི་དགྲ་བཅོམ་པའོ་ཞེས་བྱ་བ་ནི་བྱུང་བ་དང་སྐྱེས་ཟིན་པ་ཉིད་དོ་ཞེས་བྱ་བའི་དོན་ཏོ། །སྲིད་པ་ཚོལ་བ་ནི་མ་ཡིན་ཏེ། ཁམས་གསུམ་ལས་འདོད་ཆགས་དང་བྲལ་བའི་ཕྱིར་རོ། །སྲིད་པ་ཚོལ་བ་རྣམས་ནི་སྲེད་པ་དང་བཅས་པ་དག་གོ་ཞེས་བྱ་བ་ལ། དེ་དག་ནི་འདོད་ཆགས་དང་མ་བྲལ་བའི་
ཕྱིར་སྲིད་པ་ཚོལ་བ་ཡིན་ནོ། །ཡང་ཟས་དུ་ཞིག་ནི་སེམས་ཅན་འབྱུང་བ་རྣམས་གནས་པར་བྱེད་པ་ཡིན་ཞེས་བྱ་བ་ནི་སེམས་ཅན་སྐྱེས་པ་རྣམས་གནས་པའི་རྒྱུ་ཡིན་ཞེས་བྱ་བའི་དོན་ཏོ། །དུ་ཞིག་ནི་སྲིད་བ་ཚོལ་བ་རྣམས་ལ་ཕན་འདོགས་པར་བྱེད་པ་ཡིན་ཞེས་བྱ་བ་ནི་ཡང་སྲིད་པ་ཚོལ་བ་རྣམས་ཀྱི་ཡང་སྲིད་པ་མངོན་བར་འགྲུབ་པའི་རྒྱུ་ཡིན་ཞེས་བྱ་བའི་ཐ་ཚིག་གོ །ཐམས་ཅད་ཀྱང་གཉིས་ཀ་ཡིན་ནོ་ཞེས་བྱ་བའི་ཟས་བཞི་ཅར་སེམས་ཅན་བྱུང་བ་རྣམས་གནས་པར་བྱེད་པ་དང༌། སྲིད་པ་ཚོལ་བར་བྱེད་བ་རྣམས་ལ་ཕན་འདོགས་པར་བྱེད་པ་ཡིན་ནོ་ཞེས་བྱ་བའོ། །གནས་པའི་ཕྱིར་ཞེས་བྱ་བ་ནི་སྐྱེ་བའི་ཕྱིར་ཞེས་བྱ་བའི་དོན་ཏོ། །ཡིད་ལ་སེམས་པ་ནི་ལས་ཀྱི་རང་བཞིན་ཡིན་པའི་ཕྱིར་ལ། དེ་དང་མཚུངས་པར་ལྡན་པའི་རིག་པ་དང༌། རྣམ་པར་ཤེས་པ་ནི་དེ་དང་འབྲས་བུ་གཅིག་པའི་ཕྱིར་དང༌། དགེ་བ་དང་མི་དགེ་བ་ཡིན་པའི་ཕྱིར་སྲིད་པ་ཚོལ་བ་རྣམས་ལ་ཕན་འདོགས་ལ་རག་ན། ཁམ་གྱི་ཟས་ལས་ཀྱི་བདག་ཉིད་མ་ཡིན་ཞིང་ལུང་དུ་མ་བསྟན་པ་གོ་ཅི་ལྟར་སྲིད་པ་ཚོལ་བར་བྱེད་པ་རྣམས་ལ་ཕན་འདོགས་པར་བརྗོད་པར་བྱ་ཞེ་ན། དེའི་ཕྱིར་ཁམ་གྱི་ཟས་ཀྱང་ཞེས་བྱ་བ་རྒྱས་པར་སྨོས་སོ། །དོན་འདི་ཤེས་པར་བྱ་བའི་ཕྱིར། བཅོམ་ལྡན་འདས་ཀྱིས་ཟས་བཞི་ནི་ཞེས་བྱ་བ་ལ་སོགས་སྨོས་ཏེ། ནད་དང་འབྲས་དང༌། ཟུང་རྔུ་དང་རྒ་ཤི་རྣམས་ནི་མདོ་འདི་ལས་ཡང་བྱུང་བའི་ཉེ་བར་ལེན་པའི་ཕུང་པོ་ལྔའི་རྣམ་གྲངས་ཀྱི་ཚིག་ཏུ་གསུངས་ཏེ། ཟུང་རྔུའི་རྩ་བ་ཡིན་ནོ་ཞེས་འབྱུང་བའི་ཕྱིར་རོ། །དེ་ཡང་འབྱུང་བའི་རྒྱུ་ནི་ཟས་བཞི་སྟེ། རྩ་བ་དང་རྒྱུ་དང་བྱེད་རྒྱུ་ཞེས་བྱ་བ་ནི་དོན་གཞན་མ་ཡིན་ནོ། །དེའི་ཕྱིར་དེ་ལྟར་ན་མདོ་ལས་ཁམ་གྱི་ཟས་ཀྱང་དེ་ལ་ཆགས་པ་རྣམས་ཀྱི་ལང་འབྱུང་བར་བྱེད་པ་ཡིན་ནོ་ཞེས་བྱ་བར་གྲུབ་པོ། འདི་ལྟར་ཁམ་གྱི་ཟས་ནི་སེད་པ་འགའ་ཞིག་གི་གེགས་དང༌། ཡང་སྲིད་ཀྱི་ལས་ཀྱི་འཕེན་པར་ཡང་འགྱུར་རོ། །གཞན་དག་ནི་རྒ་ཤིའི་རྐྱེན་ཡིན་ནོ་ཞེས་བྱ་བ་འདི་ཁོ་ན་དཔེར་བརྗོད་པ་ཡིན་ཏེ། བདག་འདིའི་འོག་རོལ་དུ་རྒ་ཤི་རྣམ་པར་གཞག་པའི་ཕྱིར་རོ་སྙམ་དུ་སེམས་སོ། །འདིར་ཁམ་གྱི་ཟས་
ནི་སེམས་ཅན་བྱུང་བ་རྣམས་གནས་པར་བྱེད་པ་ཡིན་ནོ་ཞེས་བྱ་བར་མངོན་སུམ་གྱིས་མཐོང་ལ། དེ་བཞིན་དུ་བདེ་བ་མྱོང་བར་འགྱུར་བའི་རེག་པ་དང༌། དེ་དང་མཚུངས་པར་ལྡན་པའི་རྣམ་པར་ཤེས་པ་ཡང་སེམས་ཅན་བྱུང་བ་རྣམས་ལ་ཕན་འདོགས་པར་བྱེད་པ་ཡིན་ལ་རག་ན། ཡིད་ལ་སེམས་པ་ནི་ཇི་ལྟར་སེམས་ཅན་བྱུང་བ་རྣམས་གནས་པར་བྱེད་པ་ཡིན་ཞེ་ན། དེའི་ཕྱིར་ཡིད་ལ་སེམས་པ་ཡང་ཞེས་བྱ་བ་རྒྱས་པར་སྨོས་སོ། །དྲུང་དུ་སོང་ཞེས་བྱ་བ་ནི་དྲུང་དུ་རབ་ཏུ་སོན་པའོ། །འགྲོ་བའི་རྣམ་གྲངས་ལས་ཀྱང་ཞེས་བྱ་བ་ནི་ཆོས་མངོན་པའི་བསྟན་བཅོས་ཞིག་ལས་སོ། །ཆོས་མངོན་པའི་བསྟན་བཅོས་ནི་དྲུག་སྟེ། ཡེ་ཤེས་ལ་འཇུག་པ་དང༌། རབ་ཏུ་བྱེད་པའི་རྐང་པ་དང༌། རྣམ་པར་ཤེས་པའི་ཚོགས་དང༌། ཡང་དག་པར་བགྲོ་བའི་རྣམ་གྲངས་དང༌། གདགས་པའི་བསྟན་བཅོས་དང༌། ཆོས་ཀྱི་ཕུང་པོའོ། །འདི་སྐད་དུ་སྒོ་ང་གང་དག་གིས་མ་ལས་བརྩམས་ནས་དྲན་པས་མི་བརྗེད་བ་ཞེས་བྱ་བ་འབྱུང་ངོ༌། །ལུས་ནུར་ནུར་པོར་གྱུར་པ་དེ་དག་ལ་མའི་ཡུལ་ཅན་གྱི་དྲན་པ་ཡོད་དོ་ཞེས་ཇི་ལྟར་བརྗོད་པར་བྱ། དེ་ཉིད་ཀྱི་ཕྱིར་ན་བགྲོ་བའི་རྣམ་གྲངས་ལས་མ་དག་གིས་སྒོ་ང་ལས་བརྩམས་ཏེ་ཞེས་འདོན་ཏེ་སྒོ་ང་དག་ལ་དྲན་པ་མེད་པའི་ཕྱིར་རོ་ཞེན་དེའི་ཕྱིར་རེག་པའི་གནས་སྐབས་དེ་དྲན་པས་ཞེས་བྱ་བ་སྨོས་སོ། །གལ་ཏེ་ཟག་པ་དང་བཅས་པའི་ཆོས་ཐམས་ཅད་སྲིད་པའི་རྗེས་སུ་འཇུག་པར་གནས་པའི་བྱེད་རྒྱུ་ཡིན་བའི་ཕྱིར་སྲིད་པ་རྣམས་གསོ་བར་བྱེད་པ་དག་མ་ཡིན་ནམ་ཞེ་ན། གཙོ་བོར་བཤད་དེ་ཟས་བཞི་ཞེས་བྱ་བར་སྦྱར་རོ། །རྒྱུ་གཉིས་དང་རྐྱེན་གཉིས་ཀྱིས་ཡང་དག་པའི་ལྟ་བ་སྐྱེད་བར་བྱེད་དེ། ཞེས་གཙོ་བོའི་སྒོ་ནས་སྟོན་པ་ཡང་མཐོང་སྟེ། ཚུལ་ཁྲིམས་རྣམ་པར་དག་པ་ལ་སོགས་པ་དག་ཀྱང་དེ་སྐྱེ་བའི་རྒྱུ་མ་ཡིན་པ་ནི་མ་ཡིན་ནོ། །བཞི་པོ་འདི་དག་ཉིད་ད་ལྟར་བའི་སྐྱེ་བ་གསོ་བ་དང་མ་འོངས་པའི་སྐྱེ་བ་འཕེན་པ་དང་འགྲུབ་པ་དག་ལ་གཙོ་བོ་ཡིན་ཏེ། དེ་ཉིད་བསྟན་པའི་ཕྱིར་འདི་ལ་གནས་དང་ནི། བརྟེན་པ་རྒྱས་པའི་དོན་དུ་གཉིས་ཞེས་བྱ་བ་རྒྱས་པར་སྨོས་སོ། །གསོ་བར་བྱ་བ་དང་
བསྐྱེད་པར་བྱ་བའི་ཆོས་ནི་གཉིས་ཏེ་གཟུགས་དང་མིང་ངོ༌། །དེ་ལ་གཟུགས་ནི་རྟེན་ཏེ་དབང་པོ་དང་བཅས་པའི་ལུས་སོ། །མིང་ནི་བརྟེན་པ་སྟེ་སེམས་རང་སེམས་ལས་བྱུང་བའི་ཆོས་རྣམས་སོ། །དེ་ལ་རྟེན་རྒྱས་པར་བྱེད་བ་ན་ཁམ་གྱི་ཟས་ཏེ་འདོད་པ་ན་སྤྱོད་པའི་གཟུགས་ནི་དེ་ལ་བརྟེན་པའི་ཕྱིར་རོ། །བརྟེན་པ་རྒྱས་པར་བྱེད་པ་ནི་རེག་བ་སྟེ། སེམས་དང་སེམས་ལས་བྱུང་བ་རྣམས་ནི་ངེས་འཚོ་བའི་ཕྱིར་ཏ། དེ་སྐད་དུ་ཡང་ཚོར་བའི་ཕུང་པོ་དང་འདུ་ཤེས་ཀྱི་ཕུང་པོ་དང་འདུ་བྱེད་ཀྱི་ཕུང་པོ་གང་ཅི་ཡོད་པ་དེ་དག་ནི་རེག་པ་ལ་བརྟེན་ནས་ཡིན་ནོ་ཞེས་འབྱུང་བའི་ཕྱིར་རོ། །ཡིད་ལ་སེམས་པས་ནི་མིང་དང་གཟུགས་ཀྱི་བདག་ཉིད་ཀྱི་ཡང་སྲིད་འཕེན་པར་བྱེད་དེ། ཡིད་ལ་སེམས་པ་ནི་ཡང་སྲིད་པ་འཕེན་པའི་ལས་ཀྱི་རང་བཞིན་ཡིན་པའི་ཕྱིར་རོ། །ཇི་ལྟར་འཕེན་པར་བྱེད་ཅེ་ན། རྒྱུ་དེ་སྐྱེ་བ་དང་མཐུན་པར་གནས་པར་བྱེད་པའི་ཕྱིར་རོ། །ལས་ཀྱིས་ཡོངས་སུ་བསྒོས་པའི་རྣམ་པར་ཤེས་པའི་ས་བོན་ལས་ཞེས་བྱ་བ་ལ་སོགས་པ་ལ། བསྒོས་པ་ནི་ལས་ཀྱིས་འཕངས་པའི་ཡང་སྲིད་པ་བསྐྱེད་པའི་ནུས་པ་སྟེ། འདི་ལྟར་སྲིད་པས་ནི་ལས་ཀྱིས་ཡོངས་སུ་བསྒོས་པའི་རྣམ་པར་ཤེས་པའི་ས་བོན་བརླན་པར་བྱེད་ལ། དེས་ནི་མིང་དང་གཟུགས་གཞན་མངོན་པར་འགྲུབ་པར་བྱེད་དེ། བརླན་གྱིས་རྗེས་སུ་ཟིན་པའི་ས་བོན་གྱིས་མྱུ་གུ་འགྲུབ་པར་བྱེད་བ་བཞིན་ནོ། །དེ་ཉིད་ཀྱི་ཕྱིར་ལས་ནི་སྐྱེ་བའི་རྒྱུ་ཡིན་ལ། སྲེད་པ་ནི་མངོན་པར་འགྲུབ་པའི་རྒྱུ་ཡིན་ནོ་ཞེས་བཤད་དོ། །རིམ་གྱིས་འཇིག་པ་ནི་མངོན་སུམ་དུ་རྒྱུ་དང་འབྲས་བུ་བསྟན་པ་ཉིད་ཀྱིས་ཏེ། མིང་དང་གཟུགས་ཐོག་མ་མེད་བ་ཉིད་དུ་ཤེས་པར་བྱ་བའི་ཕྱིར། མཐའ་སྔ་མ་མེད་པ་དེའི་ཕྱིར་འདིར་ཡང་གྲུབ་པ་ཁོ་ན་སྐྱེ་བར་བསྟན་ཏོ། །སྔ་མ་གཉིས་ནི་ཁམ་དང་རེག་པ་དག་གོ །ཕྱི་མ་གཉིས་ནི་ཡིད་ལ་སེམས་པ་དང་རྣམ་པར་ཤེས་པའོ། །མུ་བཞི་ནི་ཁམ་ཡིན་ལ། ཟས་མ་ཡིན་པ་དང༌། ཟས་ཡིན་ལ་ཁམ་མ་ཡིན་པ་དང༌། གཉིས་ཀ་ཡིན་པ་དང་གཉིས་ཀ་མ་ཡིན་པའོ། །མུ་གཉིས་པ་ནི་ཁམ་ལས་གཞན་པའི་ཟས་གསུམ་རྣམས་སོ། །བཞི་པ་ནི་རྣམ་པ་དེ་དག་མ་གཏོགས་པའོ། །ཞེས་
བྱ་བ་ནི་སྒྲ་དང་ཚོར་བ་སྡུག་བསྔལ་དང་ལྡན་པའི་སེམས་དང་སེམས་ལས་བྱུང་བ་ཐམས་ཅད་དེ། དེ་བཞིན་དུ་རེག་པ་ལ་སོགས་པ་དག་ལ་ཡང་ཅི་རིགས་པར་མུ་བཞིར་བྱའོ་ཞེས་བྱ་བ་འབྱུང་སྟེ། ཇི་ལྟར་ཞེ་ན་གང་ལ་རེག་པ་ཡིན་པ་དེ་ཐམས་ཅད་ཟས་ཀྱང་ཡིན་ནམ། རེག་པ་ཡིན་ལ་ཟས་མ་ཡིན་པ་ཡང་ཡོད། ཟས་ཡིན་ལ་རེག་པ་མ་ཡིན་པ་ཡང་ཡོད། གཉིས་ཀ་ཡིན་པ་ཡང་ཡོད། གཉིས་ཀ་མ་ཡིན་པ་ཡང་ཡོད་དོ། །མུ་དང་པོ་ནི་རེག་པ་གང་ལ་བརྟེན་ནས་དབང་པོ་རྣམས་ཉམས་པར་འགྱུར་ལ་འབྱུང་བ་ཆེན་པོ་རྣམས་ཀྱང་ཡོངས་སུ་འཇིག་པར་འགྱུར་བའོ། །གཉིས་པ་ནི་རེག་པ་ལས་གཞན་པའི་ཟས་གསུམ་དག་གོ །གསུམ་པ་ནི་རེག་པ་གང་ལ་བརྟེན་ནས་དབང་པོ་རྣམས་རྒྱས་པར་འགྱུར་ཞིང་འབྱུང་བ་ཆེན་པོ་རྣམས་ཀྱང་འཕེལ་བར་འགྱུར་བའོ། །བཞི་པ་ནི་རྣམ་པ་དེ་དག་མ་གཏོགས་པའོ། །དེ་བཞིན་དུ་ཡིད་ལ་སེམས་པ་དང། རྣམ་པར་ཤེས་པ་ལ་མུ་བཞི་ཡང་བརྗོད་པར་བྱ་སྟེ། རེག་པ་ལ་སོགས་པ་དབང་པོ་རྒྱས་པའི་རྒྱུ་དང༌། འབྱུང་བ་ཆེན་པོ་འཕེལ་བའི་རྒྱུ་རྣམས་ཁྱད་པར་མེད་པར་ཟས་ཉིད་དུ་བཤད་པ་དེའི་ཕྱིར་རེག་པ་ལ་སོགས་པ་ལ་བརྟེན་ནས་ཞེས་བྱ་བ་རྒྱ་ཆེར་དྲིས་ཏེ། སོགས་པ་ཞེས་བྱ་བའི་སྒྲས་ནི་རྣམ་པར་ཤེས་པ་དང་སེམས་པ་གཉིས་བསྡུའོ། །ཡོད་དེ་གཞན་གྱི་ས་པ་དང་ཟག་པ་མེད་པ་རྣམས་སོ་ཞེས་བྱ་བ་ལ། འདི་སྐད་བསྟན་པར་འགྱུར་ཏེ། རེག་པ་ལ་སོགས་པ་རང་གིས་བ་རྣམས་ཁོ་ན་དབང་པོ་དང་འབྱུང་བ་ཆེན་པོ་རྒྱས་པར་བྱེད་པ་ན་ཟས་ཡིན་གྱི་གཞན་གྱིས་པ་རྣམས་ནི་མ་ཡིན་ནོ། །ཁམ་གང་ལ་བརྟེན་ནས་དབང་པོ་ཉམས་པར་འགྱུར་ལ་ཞེས་བྱ་བ་འབྱུང་བ་དེའི་ཕྱིར་གང་ཞིག་ཟོས་ནས་གནོད་པར་བྱེད་བ་དེ་ཟས་མ་ཡིན་པ་ཉིད་དུ་ཐལ་བས་དེའི་ཕྱིར་གང་ཞིག་ཟོས་ན་ཞེས་བྱ་བ་རྒྱ་ཆེར་སྨོས་སོ། །འདི་ཉིད་ལ་རྒྱུ་སྨྲས་པ་ནི་དང་པོ་ཕན་འདོགས་པའི་ཕྱིར་ཞེས་བྱ་བ་རྒྱ་ཆེར་འབྱུང་བའོ། །བྱེ་བྲག་ཏུ་སྨྲ་བ་སྨོས་པ་ནི་མུ་བཞི་ལ་གནོད་པའི་ཕྱིར་རོ། །རྒྱས་པར་འགྱུར་བའི་ཟས་ལ་དགོངས་ཏེ་གསུངས་པའི་ཕྱིར་འགལ་བ་མེད་དོ་ཞེས་བྱ་བ་ལ། རྒྱས་པར་འགྱུར་བའི་ཟས་ལ་དགོངས་པས་མུ་བཞི་བཤད་པ་དང་མི་འགལ་ལོ། །
ཉམས་པར་འགྱུར་བའི་ཟས་ནི་དམྱལ་བདག་ཏུ་ཞེས་བྱ་བ་རྒྱ་ཆེར་འབྱུང་སྟེ། བཀྲེས་པ་དང་སྐོམ་པ་འཇོམས་པར་ནུས་པ་ཉིད་ནི་ཁམ་གྱི་ཟས་ཀྱི་མཚན་ཉིད་ཡིན་ལ། དམྱལ་བ་དག་ན་ཡང་ལྕགས་ཀྱི་ཐོ་ལུམ་ འབར་བ ་དང༌། ཟངས་ཞུན་མས་བཀྲེས་བ་དང་སྐོམ་པ་དག་འཇོམས་བར་ནུས་པ་འདི་ཟས་ཉིད་དུ་མི་འགལ་ལོ། །ཇི་ལྟར་འཇོམས་ཤེ་ན། འཇོམས་སོ་ཞེས་ནི་མི་སྨྲའི་འོན་ཀྱང་འཇོམས་པར་ནུས་པ་ཡིན་ནོ། །གལ་ཏེ་འཇོམས་པར་ནུས་ན་ཇི་ལྟར་མི་འཇོམས་ཤེ་ན། གང་གིས་ན་འཇོམས་པར་མི་འགྱུར་བ་མེའི་ཁམས་ཤས་ཚེ་བའི་ཕྱིར་རམ། སེམས་ཅན་རྣམས་ཀྱི་སྐལ་བ་མཉམ་པ་དེ་དང་འདྲ་བ་ཡིན་པས་སོ། །ཁམ་གྱི་ཟས་ཀྱི་ཞར་ལ་འདི་ཡང་དཔྱད་པར་བྱ་སྟེ། བཅོམ་ལྡན་འདས་ཀྱིས་ཞེས་བྱ་བ་རྒྱ་ཆེར་འབྱུང་ངོ༌། །ཛམྦུའི་གླིང་ན་གནས་པ་ཞེས་བྱ་བ་ལ། བཅོམ་ལྡན་འདས་ཀྱིས་གང་ལ་ལ་ཛམྦུའི་ཚལ་ནས་འབབ་པ་དེ་ཐམས་ཅད་ནི་རྒྱ་མཚོར་འབབ་པ་རྒྱ་མཚོར་བབ་པའོ་ཞེས་གསུངས་ཏེ། དེའི་ཕྱིར་ཛམྦུའི་གླིང་ཉིད་ལ་ཛམྦུའི་ཚལ་ཞེས་བསྙད་དོ། །ཟས་ཀྱི་སྐབས་སུ་བབ་བའི་ཕྱིར་དེར་སྐྱེས་པ་ལྟོ་བ་དང་ལྡན་པ་དག་གོ་ཞེས་བྱ་བར་ཤེས་ཀྱི་ནུར་ནུར་པོ་ལ་སོགས་པ་དག་ནི་མ་ཡིན་ནོ། །གཞན་དག་ན་རེ་སྐྱེ་བོ་ཆུང་ངུ་རྣམས་ནི་མ་ཡིན་ནོ་ཞེས་སོ། །དེ་ནི་རིགས་པ་མ་ཡིན་ཏེ་ཞེས་བྱ་བ་ནི་རིགས་པ་དང་མ་འབྲེལ་པའོ། །ཅིའི་ཕྱིར་ཞེ་ན་གཅིག་ཅེས་གསུངས་པའི་ཕྱིར་ཏེ། གང་གིས་ཛམྦུའི་ཚལ་ན་འདུག་པའི་སོ་སོའི་སྐྱེ་བོ་གཅིག་ལ་ཞེས་བྱ་བར་རོ། །འདི་ལ་ཁྱད་པར་ཅི་ཞིག་ཡོད་ཅེས་བྱ་བ་ལ། གལ་ཏེ་འདོད་ཆགས་དང་བྲལ་བ་ཉུང་དུ་ལ་ཟས་བྱིན་ནས་བསོད་ནམས་མང་པོར་འགྱུར་ན་ནི། དེ་ལྟ་ན་ཁྱད་པར་ཡོད་པར་འགྱུར་རོ་སྙམ་དུ་དགོངས་ཏེ། མང་པོ་ལ་ཟས་བྱིན་ན་བསོད་ནམས་མང་པོར་འགྱུར་རོ་ཞེས་བྱ་བ་འདི་ལ་མཚར་བ་ཅི་ཡོད། བྱང་ཆུབ་སེམས་དཔའ་ཉེ་བ་ཡིན་ནོ་ཞེས་བྱ་བ་ནི་བྱང་ཆུབ་ལ་ཉེ་བ་ཞེས་བྱ་བའི་དོན་ཏོ། །འདི་ནི་མིང་ཡང་དོན་དང་མཐུན་པ་མ་ཡིན་ཞེས་བྱ་བ་ནི་དོན་དང་རྗེས་སུ་འབྲེལ་བ་མ་ཡིན་པའོ། །འོ་ན་འོལ་ཕྱིར་མིན་པར་འགྱུར་རོ་ཞེ་ན། དེའི་ཕྱིར་མདོའམ་བསྟན་བཅོས་གང་ལས་ཀྱང་ཛམྦུའི་ཚལ་དུ་གཏོགས་པ་ནི་ངེས་
པར་འབྱེད་པའི་ཆ་དང་མཐུན་བ་ཐོབ་པའོ་ཞེས་འོལ་ཕྱིར་མ་བཤད་པས་ཞེས་བྱ་བ་སྨོས་སོ། །འདི་ནི་བྱང་ཆུབ་སེམས་དཔའ་ཞེས་བྱ་བ་རྒྱས་པར་འབྱུང་སྟེ། ཞིང་དང་གྲོང་གཟིགས་སུ་གཤེགས་པས་ཛམྦུའི་ཤིང་གི་དྲུང་དུ་བཞུགས་བ་ནི་བྱང་ཆུབ་སེམས་དཔའ་ཁོ་ན་ཡིན་པར་རིགས་སོ། །དེ་ལ་བྱིན་ན་དགྲ་བཅོམ་པ་བྱེ་བ་ལ་བྱིན་པ་བས་བསོད་ནམས་ཆེས་མང་བའི་ཕྱིར་རོ་ཞེས་སྨྲས་པ་མ་ཡིན་ནམ་ཞེ་ན། དེའི་ཕྱིར་སོ་སོའི་སྐྱེ་བོ་དེ་ནི་འདོད་པའི་འདོད་ཆགས་དང་བྲལ་བ་དང་འབྲེལ་བས་ཞེས་བྱ་བ་སྨོས་ཏེ། མཚུངས་པའི་སྒོ་ནས་སོ་སོའི་སྐྱེ་བོ་འདོད་ཆགས་དང་བྲལ་བ་དག་ལས་ཁྱད་པར་དུ་འཕགས་པར་བསྟན་པའི་ཕྱིར་དེ་སྐད་ཅེས་གསུངས་སོ། །འོ་ན་བརྒྱ་སྨོས་པ་ཅིའི་ཕྱིར་ཞེ་ན། དེའི་ཕྱིར་བཤད་པ་གང་གི་ཕྱིར་དྲང་སྲོང་འདོད་བ་དག་ལས་འདོད་ཆགས་དང་བྲལ་བ་བརྒྱ་ལ་ཟས་བྱིན་པ་བས་ཞེས་བརྒྱ་སྨོས་ནི་དང་པོའི་དབང་དུ་བྱས་པའི་ཕྱིར་རོ། །དེ་ལྟ་བུ་དེ་ནི་གདོན་མི་ཟ་བར་དེ་ལྟ་ཡིན་པར་ཞེས་བྱ་བ་ལ་དེ་ནི་རྒྱུ་འདི་ལས་ཀྱང་དེ་ལྟར་ཡིན་ཏེ། གང་བྱང་ཆུབ་སེམས་དཔའ་ཛམྦུའི་ཚལ་ན་བཞུགས་པ་ཁོ་ནས་སོ་སོ་སྐྱེ་བོ་ཡིན་པར་དགོངས་ཀྱི། ངེས་པར་འབྱེད་པའི་ཆ་དང་མཐུན་པའི་དགེ་བའི་རྩ་བ་ཐོབ་པ་ནི་མ་ཡིན་པའོ། །འདི་ལྟར་ཛམྦུའི་ཚལ་ན་འདུག་པ་མ་གཏོགས་པའི་ཕྱི་རོལ་བ་རྣམས་ལས་ཞེས་བྱ་བ་རྒྱས་པར་འབྱུང་ངོ༌། །དེ་ལྟ་མ་ཡིན་ན་ཞེས་བྱ་བ་ལ། གལ་ཏེ་ངེས་པར་འབྱེད་པའི་ཆ་དང་མཐུན་པ་ཐོབ་པ་ཡིན་ན་ནི་གང་གིས་ཛམྦུའི་ཚལ་ན་འདུག་པ་བརྒྱ་ལ་ཟས་བྱིན་པ་བས། གང་གིས་རྒྱུན་ཏུ་ཞུགས་པའི་འབྲས་བུ་མངོན་དུ་བྱ་བའི་ཕྱིར་ཞུགས་པ་གཅིག་ལ་བྱིན་ན་སྦྱིན་པ་དེ་བས་སྦྱིན་པ་འདི་འབྲས་བུ་ཆེས་ཆེའོ་ཞེས་ཛམྦུའི་ཚལ་ན་འདུག་པ་ལས་རྒྱུན་ཏུ་ཞུགས་པའི་འབྲས་བུ་ལ་ཞུགས་པ་ཁྱད་པར་དུ་འཕགས་པ་མཛད་པར་འགྱུར་བ་ཞིག་གོ །སེམས་ཅན་རྣམས་ཀྱི་རྟེན་ཅིང་འབྲེལ་པར་འབྱུང་བ་ཇི་ལྟ་བ་ཞེས་བྱ་བ་ནི་དེ་ནི་རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ཆ་གསུམ་མོ་ཞེས་བྱ་བ་ལ་སོགས་པས་སོ། །ཇི་ལྟར་གནས་པ་ནི་འགྲོ་བ་ཟས་ཀྱིས་གནས་པ་ཡིན་ཞེས་བྱ་བས་བཤད་ཟིན་ལ།
འཆི་འཕོ་ཡང་ཚེ་ཟད་པས་འཆི་ལ་བསོད་ནམས་ཟད་པས་མ་ཡིན་པ་ཡང་ཡོད་དེ་ཞེས་རྒྱས་པར་བཤད་ཟིན་ཏོ། །ད་ནི་སེམས་གང་ལ་གནས་ཏེ་ཞེས་བྱ་བ་འབྱུང་ངོ༌། །སྲིད་པ་བར་མ་ལ་སོགས་པ་སྲིད་པ་བཞི་བཤད་བ་གང་ཡིན་པ་དེ་ལ། འཆི་བའི་སྲིད་པ་དང་སྐྱེ་བའི་སྲིད་པ་གཉིས་ཁོ་ན་སྐད་ཅིག་མ་ཡིན་བ་དེའི་ཕྱིར་རྣམ་པར་ཤེས་པ་གང་གི་སྐད་ཅིག་ལ་གནས་པ་ལ། འཆི་འཕོ་བ་དང་སྐྱེ་བར་འགྱུར་ཞེས་བྱ་བ་འདི་བརྗོད་པར་བྱའོ་ཞེ་ན། དེའི་ཕྱིར། ཚད་དང་མཚམས་སྦྱོར་འདོད་ཆགས་བྲལ། །ཉམས་དང་འཆི་འཕོ་སྐྱེ་བ་རྣམས། །ཞེས་བྱ་བ་ལ་སོགས་པ་སྨོས་སོ། །ལོག་པར་ལྟ་བས་རྩ་བ་གཅོད་ཅེས་འབྱུང་བའི་ཕྱིར་དགེ་བའི་རྩ་བ་ཡང་དག་པར་འཆད་པར་ནི་ལོག་བར་ལྟ་བས་ཡིན་ལ། ལོག་བར་ལྟ་བ་ཡང་ཡིད་ཀྱི་རྣམ་པར་ཤེས་པ་དང་མཚུངས་བར་ལྡན་བ་ཁོ་ན་ཡིན་ནོ། །རྟོག་པའི་བདག་ཉིད་ཡིན་པའི་ཕྱིར་ན་དགེ་བའི་རྩ་བ་ཉིད་མཚམས་སྦྱོར་བ་ནི་ཐེ་ཚོམ་དང་ཡང་དག་པའི་ལྟ་བས་ཡིན་ཏེ། མཚམས་ནི་ཐེ་ཚོམ་ཡོད་ལྟ་བས། །ཞེས་འཆད་པར་འགྱུར་རོ། །ཐེ་ཚོམ་ནི་ཡིད་མི་བདེ་བ་དང་མཚུངས་པར་ལྡན་པ་ཡིན་ལ། ཡིད་མི་བདེ་བ་ཡང་ཡིད་ཀྱིས་བ་ཁོ་ན་ཡིན་ནོ། །རྣམ་ཤེས་ལྔ་དང་མཚུངས་སྐྱེས་བློ། །དེས་རྟོག་མེད་ཕྱིར་ལྟ་མ་ཡིན། །ཞེས་བྱ་བས་ཡང་དག་པའི་ལྟ་བ་ཡང་ངེས་བར་རྟོག་པའི་བདག་ཉིད་ཡིན་ལ། དེ་ནི་ཡིད་ཀྱིས་པ་ཁོ་ན་ཡིན་པས་ཡིད་ཀྱི་རྣམ་པར་ཤེས་པ་ཁོ་ནར་དགེ་བའི་རྩ་བ་ཉིད་མཚམས་སྦྱོར་རོ། །ཁམས་དང་ས་ལས་འདོད་ཆགས་དང་བྲལ་བ་ནི་སེམས་མཉམ་བར་གཞག་པ་ལ་ཡོད་པ་ཡིན་ལ། རྣམ་པར་ཤེས་པའི་ཚོགས་ལྔ་ནི་ཁ་ཕྱིར་བལྟས་པའི་ཕྱིར་མཉམ་པར་མ་བཞག་པ་ཡིན་པས། དེ་ཡང་ཡིད་ཀྱི་རྣམ་ཤེས་ཁོ་ན་མ་ཡིན་ནོ། །ཉམས་པའི་ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་ཅན་ཡིན་པས་ཡིད་ཀྱི་རྣམ་ཤེས་ཁོ་ན་ལ་ཡིན་གྱི། རྣམ་པར་ཤེས་བའི་ཚོགས་ལྔ་ལ་ནི་མ་ཡིན་ཏེ། དེ་དག་ནི་རྣམ་པར་རྟོག་པ་མེད་པ་ཉིད་ཡིན་པའི་ཕྱིར་རོ། །འཆི་འཕོ་བ་ནི་དབང་པོ་ལྔའི་རྒྱུ་བ་བསྡུས་ཤིང་རྒྱུན་འཆད་པ་དང༌། རྗེས་སུ་མཐུན་པའི་རྣམ་པར་ཤེས་པ་ལ་གནས་པ་ཡོད་པ་མིན་བས་དེ་ཡང་ཡིད་ཀྱི་རྣམ་པར་ཤེས་པ་ཁོ་ན་ལ་ཡིན་ནོ། །
འཁྲུལ་པའི་སྐྱེ་བ་སྨོས་པ་ནི། སྐྱེ་བ་ཡང་ཡིད་ཀྱི་རྣམ་པར་ཤེས་པ་ཉིད་དོ། །ཡིད་ཀྱི་རྣམ་པར་ཤེས་པ་ཡང་ཚོར་བ་གསུམ་དང་མཚུངས་བར་ལྡན་པའི་ཕྱིར་ཚོར་བ་གང་ལ་གནས་པ་ལ་འཆི་འཕོ་དང་སྐྱེ་བ་ཡོད་པ་མི་ཤེས་བས་དེའི་ཕྱིར་ཚོར་བ་ལ་ནི། འཆི་འཕོ་སྐྱེ་བ་བཏང་སྙོམས་ལ། ཞེས་བྱ་བ་སྨོས་ཏེ་ཚོར་བ་གཞན་དག་ནི་གསལ་བ་ཡིན་ཏེ་ཞེས་བྱ་བ་ནི། ཡིད་བདེ་བའི་མཚན་ཉིད་ཅན་ཏེ། དེ་དག་ནི་ཀུན་བཏགས་པ་ན་སྐྱེ་བའི་ཕྱིར་ཕན་འདོགས་པ་དང་གནོད་པ་བྱེད་པ་ཉིད་ཀྱི་ཕྱིར་རོ། །གསལ་བ་ནི་སྡུག་བསྔལ་མ་ཡིན་པའི་དོན་ཏོ། །ཇི་སྐད་བཤད་པ་ལས་བཟློག་སྟེ་དཔྱོད་པ་ཉེ་བར་མཚོན་པའི་ཕྱིར་རོ། །རྣམ་པར་ཤེས་པ་གསལ་བ་ནི་འཆི་བ་དང་སྐྱེ་བར་རུང་བ་མ་ཡིན་ཏེ། གནས་སྐབས་དེ་དག་གཞན་པ་ཉིད་ཡིན་པས་དེ་ཉིད་མེད་པའི་ཕྱིར་རོ། །བསམ་གཏན་གསུམ་པ་དག་ན་སེམས་ཅན་རྣམས་ལ་ཉེར་བསྡོགས་ཁོ་ན་ལས་འཆི་འཕོ་བ་དང་སྐྱེ་བའི་སེམས་ཡོད་དེ། དངོས་གཞི་དག་ན་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་མེད་པའི་ཕྱིར་རོ། །ཁྱད་པར་མེད་པར་བརྗོད་པས་ཡིད་ཀྱི་རྣམ་པར་ཤེས་པ་ཐམས་ཅད་དུ་འཆི་འཕོ་བ་དང་སྐྱེ་བ་ཡིན་པར་འགྱུར་ཡང༌། ཡིད་ཀྱི་རྣམ་པར་ཤེས་པ་དེ་ལ་ཡང༌། རྩེ་གཅིག་སེམས་མེད་ལ་དེ་མེད། །ཅེས་བྱ་བ་སྨོས་སོ། །འདོད་པའི་ཁམས་སུ་སྐྱེ་ཤིང་མཉམ་པར་གཞག་པའི་སེམས་ལ་གནས་པ་ལ་ནི་འཆི་འཕོ་བ་དང་སྐྱེ་བ་མེད་དོ། །ཅིའི་ཕྱིར་མེད་ཅེ་ན། སྐལ་བ་མི་མཉམ་པའི་ས་པ་ཡིན་པའི་ཕྱིར་ཏེ། ས་གཞན་དུ་སྐྱེས་ཤིང་ས་གཞན་གྱི་སེམས་ལ་གནས་པ་ནི་འཆི་འཕོ་བའམ་ས་གཞན་དུ་སྐྱེ་བར་མི་འགྱུར་རོ། །འོ་ན་གང་གི་ཚེ་གཟུགས་ཀྱི་ཁམས་ཉིད་དམ། གཟུགས་མེད་པའི་ཁམས་ཉིད་དུ་འཆི་བ་དང༌། སྐྱེ་བ་དེའི་ཚེ་རང་གི་ས་པའི་སེམས་མཉམ་པར་གཞག་པ་ཡོད་དོ་ཞེ་ན། དེའི་ཕྱིར་མངོན་པར་འདུ་བྱེད་པ་ལས་བྱུང་བ་ཉིད་ཡིན་པའི་ཕྱིར་དང་ཕན་འདོགས་པར་བྱེད་པ་ཉིད་ཡིན་པའི་ཕྱིར་ཞེས་བྱ་བ་སྨོས་ཏེ། རང་གི་ས་པའི་མཉམ་པར་གཞག་པའི་སེམས་ཀྱིས་ཀྱང་འཆི་འཕོ་བ་དང་སྐྱེ་བར་མི་འགྱུར་རོ། །སྦྱོར་བ་ལས་ལྟོས་པའི་ཕྱིར་ན་མངོན་པར་འདུ་བྱེད་པ་ལས་
བྱུང་བའོ། །ཤིན་ཏུ་སྦྱངས་པ་དང་ལྡན་པའི་ཕྱིར་ན་ཕན་འདོགས་པར་བྱེད་པའོ། །མངོན་པར་འདུ་བྱེད་པ་ལས་བྱུང་བའི་སེམས་ནི་གསལ་བའི་ཕྱིར་ཆད་པ་དང་རྗེས་སུ་མཐུན་བམ་ཡིན་ལ། འཆི་བའི་སེམས་ནི་གནོད་པར་བྱེད་བ་ཡིན་ཞིང་མཉམ་པར་གཞག་པ་ནི་ཕན་འདོགས་པར་བྱེད་པ་ཡིན་ཏེ། དེའི་ཕྱིར་དེ་ལས་འཆི་འཕོ་བར་མི་རུང་ངོ༌། །གང་གི་ཕྱིར་སྐྱེ་བའི་སེམས་ནི་ཉོན་མོངས་པ་ཅན་ཡིན་ལ་མཉམ་པར་གཞག་པ་ནི་དགེ་བ་ཡིན་པས་དེས་ནི་སྐྱེ་བར་ཡང་མི་རིགས་སོ། །གནས་སྐབས་དེ་ནི་ཞན་པ་ཡིན་ལ་མཉམ་པར་གཞག་པ་ནི་མངོན་པར་འདུ་བྱེད་པ་ལས་བྱུང་བ་ཡིན་པའི་ཕྱིར་གསལ་བ་ཡིན་པས་གནས་སྐབས་དེ་ན་དེ་མེད་པའི་ཕྱིར་མཉམ་པར་གཞག་པས་སྐྱེ་བ་ག་ལ་ཡོད། སྐལ་བ་མི་མཉམ་པའི་ཉོན་མོངས་པ་ཅན་ཡང་ཕན་འདོགས་པའི་ཕྱིར་མེད་པ་དེར་གནས་ཀྱང་འཆི་འཕོའོ། །མངོན་པར་འདུ་བྱེད་བ་ལས་བྱུང་བའི་ཕྱིར་སྐྱེ་བ་མེད་དོ། །སྐལ་བ་མི་མཉམ་པའི་ཉོན་མོངས་པ་ཅན་ཨུཏྐྲྀཥྚ་ས་པ་དེ་ཇི་ལྟར་རྐྱེན་གཞན་གྱི་ས་ལ་སྐྱེ་བར་བྱེད། སེམས་མེད་པ་ལ་ཡང་མེད་དེ་ཞེས་བྱ་བ་འབྱུང་སྟེ། འཆི་འཕོ་དང་སྐྱེ་བ་གཉིས་ཞེས་བྱ་བར་སྦྱར་རོ། །སེམས་མེད་པ་ནི་འདུ་ཤེས་མེད་པ་དང༌། འགོག་པའི་སྙོམས་པར་འཇུག་པ་ལ་སྙོམས་པར་ཞུགས་བ་དང༌། འདུ་ཤེས་མེད་པ་པར་ཉེ་བར་གནས་པའོ། །གནོད་པར་བྱར་མི་ནུས་པ་ནི་དུག་དང་མཚོན་དང་རྡོ་རྗེ་ལ་སོགས་པ་རྣམས་ཀྱིས་ཏེ། དེའི་ཕྱིར་སེམས་མེད་པ་ལ་འཆི་འཕོ་བ་མེད་དོ་ཞེས་བྱ་བར་བསྟན་ཏོ། །གང་གི་ཚེ་འགོག་པ་དང་འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་པའམ། འདུ་ཤེས་མེད་པ་དང་ལྡན་པ་དེ་སྔོན་གྱི་ལས་ཀྱིས་འཕངས་པའི་ཚེ་ཟད་པས་ལུས་ཡོངས་སུ་འགྱུར་པར་བཅོམ་པ་དེའི་ཚེ་ཞེས་བྱ་བ་ནི་སྔོན་གྱི་ལས་ཀྱིས་འཕངས་པའི་རིས་མཐུན་པ་འཆད་པ་དང་མཐུན་པར་གནས་པའི་ཚེ་ཞེས་བྱ་བའི་དོན་ཏོ། །ལུས་དང་འབྲེལ་པ་ཞེས་བྱ་བ་ནི་ལུས་ལ་ས་བོན་གྱི་ངོ་བོར་གནས་ཞེས་བྱ་བའི་དོན་ནོ། །གཞན་དག་ན་རེ་ལུས་ལ་སྲེད་པ་དང་བཅས་པ་ཉིད་དུ་འབྲེལ་ལོ་ཞེའོ། །གཞན་ནི་མཚུངས་པ་དེ་མ་ཐག་པའི་རྐྱེན་མཉམ་པར་གཞག་པའི་སེམས་ཀྱིས་ལྡང་བའི་སེམས་སྐྱེ་བར་ངེས་པར་བྱས་པའི་ཕྱིར་དེའི་ཚེ་ཡང་དེ་
ལ་གདོན་མི་ཟ་བར་དོའི་ལུས་དང་འབྲེལ་པའི་སེམས་མངོན་དུ་འགྱུར་ཏེ། མཚུངས་པ་དེ་མ་ཐག་པའི་རྐྱེན་གྱིས་དྲངས་པའི་ཆོས་སྐྱེ་བ་ནི་སུས་ཀྱང་དགག་པར་མི་ནུས་སོ། །སེམས་ཅད་དེ་དག་འདུ་ཤེས་བསྐྱེད་ནས་གནས་དེ་ནས་འཆི་འཕོ་བར་འགྱུར་རོ་ཞེས་བྱ་བའི་ལུང་གིས་ཀྱང་སེམས་མེད་པ་ལ་འཆི་འཕོ་མེད་དོ་ཞེས་ཤེས་པར་བྱེད་དོ། །སེམས་འཆད་པའི་རྒྱུ་མེད་པའི་ཕྱིར་ཞེས་བྱ་བ་ལ་སེམས་འཆད་པའི་རྒྱུ་ནི་འགོག་པའི་སྙོམས་པར་འཇུག་པ་ལ་སོགས་པ་དག་ཡིན་ནོ། །དེ་དག་ནི་སྐྱེ་བའི་ཚེ་འབྱུང་བ་མེད་དོ། །གཞན་དག་ན་རེ། བསམ་གཏན་བཞི་པ་ནས་སྲིད་རྩེའི་མཐར་ཐུག་པའི་སེམས་ནི་སེམས་འཆད་པའི་རྒྱུའོ་ཞེས་ཟེར་རོ། །གནས་སྐབས་སུ་སྲིད་པ་མེད་དོ་ཞེས་བྱ་བ་ལ། སྐྱེ་བ་ཡང་གཅིག་ཏུ་ཉོན་མོངས་པ་ཅན་མ་ཡིན་ནོ། །སེམས་མེད་པར་ཡང་ཉོན་མོངས་པ་འབྱུང་བ་མེད་པས་སེམས་མེད་པ་ལ་སྐྱེ་པ་མེད་དོ། །ཀུན་དགའ་བོ་གལ་ཏེ་རྣམ་པར་ཤེས་པ་མའི་མངལ་དུ་མི་འཇུག་ན་ནི་ཞེས་རྒྱས་པར་འབྱུང་ངོ༌། །འཆི་བའི་སྲིད་པ་རྣམ་པ་གསུམ་དུ་བཤད་པ་ལ་སྟེ། གཞན་རྣམ་གསུམ་ཞེས་འབྱུང་བའི་ཕྱིར་རོ། །དགྲ་བཅོམ་པ་ལ་ནི་ཉོན་མོངས་པ་ཅན་གྱི་སེམས་ཡོད་པ་མ་ཡིན་ཏེ། འོ་ན་ཅི་ཞེ་ན། དགེ་བ་དང་ལུང་མ་བསྟན་པའོ། །དེ་ལ་ཡང༌། མྱ་ངན་འདའ་ལུང་བསྟན་མིན་གཉིས་ཏེ་འདིར་ནི་ལུང་དུ་མ་བསྟན་པ་གཉིས་ཁོ་ན་མྱ་ངན་ལས་འདའོ་ཞེས་བརྗོད་ཀྱི། དགྲ་བཅོམ་པ་ཁོ་ན་ནི་མ་ཡིན་ནོ། །ཉིང་མཚམས་སྦྱར་བ་མེད་པའི་འཆི་བ་ཁོ་ན་ལ་མྱ་ངན་ལས་འདས་པ་ཞེས་བྱའོ། །གལ་ཏེ་འདོད་པའི་ཁམས་ན་རྣམ་པར་སྨིན་པ་བཏང་སྙོམས་ཡོད་ན་ཞེས་བྱ་བ་ནི་འོག་ན་ཡང་བར་མ་ཡོད་དོ་ཞེས་ཁ་ཅིག་ཟེར་ཏེ། གང་གི་ཕྱིར། བསམ་གཏན་ཁྱད་པར་རྣམ་སྨིན་ལས། །སྔ་ཕྱི་མེད་གསུམ་སྨིན་འདོད་ཕྱིར། །ཞེས་བྱ་བའི་ཁ་ཅིག་གི་ལུགས་ཡོངས་སུ་བཟུང་ནས་སྨྲས་པའོ། །ཁ་ཅིག་ནི་བསམ་གཏན་གསུམ་པ་ཡན་ཆད་ན་ལས་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་མྱོང་བར་འགྱུར་བ་ཡོད་པར་འདོད་དེ། དེ་དག་གི་ལྟར་ན་ཇི་སྟེ་མེད་ན་ནི་སྤྱོད་ལམ་པ་ཁོ་ན་ལའོ་ཞེས་བྱ་བ་སྨོས་སོ། །
གཞན་ལ་མ་ཡིན་ཞེས་བྱ་བ་ནི་དགེ་བ་ལ་མ་ཡིན་ཞེས་བྱ་བའི་དོན་ཏེ་ཉོན་མོངས་པ་ཅན་ནི་མི་སྲིད་པའི་ཕྱིར་རོ། །དགེ་བའི་སེམས་ནི་སྟོབས་དང་ལྡན་པའི་ཕྱིང་སེམས་འཆད་པའི་རྗེས་སུ་མཐུན་པ་མ་ཡིན་ལ། ཉམ་ཆུང་བའི་ཕྱིར་ལུང་དུ་མ་བསྟན་པ་ནི་སེམས་འཆད་པའི་རྗེས་སུ་མཐུན་པ་ཡིན་ཏེ། འདིར་སེམས་འཆད་པ་ནི་སེམས་ཉིད་མཚམས་སྦྱོར་བ་མེད་པར་འགག་པའོ། །ཡིད་བདེ་བ་དང་མཚུངས་བར་ལྡན་པ་རྣམ་པར་སྨིན་པ་ལས་སྐྱེས་པའི་ཡས་ཀྱི་རྗེས་སུ་མྱ་ངན་ལས་འདའ་བར་བྱེད་དེ། ད་ནི་གསལ་བའི་ཕྱིར་རོ། །དེ་ཉིད་ཀྱི་ཕྱིར་འདིར་ངེས་པར་འཆི་འཕོ་སྐྱེ་བ་བཏང་སྙོམས་པ་ཞེས་འབྱུང་ངོ༌། །གཞན་དག་ན་རེ་དགེ་བ་ནི་རྣམ་པར་སྨིན་པ་དང་བཅས་བ་ཡིན་པའི་ཕྱིར་དང༌། དགྲ་བཅོམ་པ་རྣམས་ཀྱང་མ་འོངས་པའི་རྣམ་པར་སྨིན་པ་ལ་རྒྱབ་ཀྱིས་ཕྱོགས་པ་ཡིན་པའི་ཕྱིར་དགེ་བའི་སེམས་ལ་ཡོངས་སུ་མྱ་ངན་ལས་འདའ་བ་ཡོད་པ་མ་ཡིན་ནོ་ཞེའོ། །འདི་རྣམ་པར་སྨིན་པ་ལས་སྐྱེས་པ་ཉིད་དུ་ཡང་ཐལ་བར་འགྱུར་བ་མ་ཡིན་ནམ་ཞེ་ན་མ་ཡིན་ཏེ། དེ་ལ་ཇི་ལྟར་ཡང་ཕྱིར་ཕྱོགས་པ་མེད་པའི་ཕྱིར་རོ། །ལུས་ཀྱི་ཕྱོགས་གང་དུ་རྣམ་པར་ཤེས་པ་འགག་ཅེ་ན་ཞེས་བྱ་བ་ལ། རྣམ་པར་ཤེས་པ་བསྟན་དུ་མེད་པ་ནི་ཡུལ་ན་གནས་པར་མི་རུང་ལ་ཁྱད་པར་དུ་ཡང་ཡིད་ཀྱི་རྣམ་པར་ཤེས་པར་མི་རུང་མོད་ཀྱི། དེ་ནི་འདིར་ལུས་ཀྱི་དབང་པོ་འགག་པར་ངེས་པའི་སྒོ་ནས་བརྗོད་དོ། །མོད་ལ་འགག་པར་འགྱུར་རོ་ཞེས་བྱ་བ་ནི་ལུས་ཀྱི་དབང་པོ་དེ་ལ་རག་ལས་ཏེ། འཇུག་པའི་ཡིད་དང་བཅས་པ་མཐའ་དག་སྐད་ཅིག་ཙམ་དེ་ཉིད་ལ་འགག་པར་འགྱུར་རོ་ཞེས་བྱ་བའི་དོན་ཏོ། །གྲངས་བཞིན་དུ་ཞེས་བྱ་བ་ལ། ངན་སོང་དུ་འགྲོ་བ་རྣམས་ཀྱི་ནི་རྐང་པ་དག་ཏུའོ། །མིའི་ནང་དུ་འགྲོ་བ་རྣམས་ཀྱི་ནི་ལྟེ་བར་རོ། །ལྷའི་ནང་དུ་འགྲོ་བ་རྣམས་དང༌། དགྲ་བཅོམ་པ་རྣམས་ཀྱི་ནི་སྙིང་གར་རོ། །གཞན་དག་ན་རེ་དགྲ་བཅོམ་པ་རྣམས་ཀྱི་ནི་སྤྱི་བོར་ཏེ། ལུས་ཀྱི་དབང་པོ་དེར་འགག་པའི་ཕྱིར་དེ་དང་འབྲེལ་པའི་རྣམ་པར་ཤེས་པ་ཡང་དེར་འགག་གོ་ཞེས་ཟེར་རོ། །ཡིད་ཀྱི་རྣམ་པར་ཤེས་པ་ཇི་ལྟར་ལུས་ཀྱི་དབང་པོ་དང་འབྲེལ་ནས་འཇུག་ཅེ་ན། འདོད་པ་དང་གཟུགས་ཀྱི་ཁམས་དག་ན་
ལུས་ཀྱི་དབང་པོ་མེད་པར་མི་འབྱུང་བའི་ཕྱིར་རྐང་པ་ལ་སོགས་པ་དག་ཏུ་འགག་གོ་ཞེས་བྱ་སྟེ། རྒྱུན་གཞན་གྱི་རྒྱུའི་དངོས་པོར་མི་འགྱུར་རོ་ཞེས་བྱ་བའི་དོན་ཏོ། །ཕལ་ཆེར་ཞེས་བྱ་བ་ནི་ཐམས་ཅད་མ་ཡིན་ཏེ་དགེ་བ་བྱེད་ཅིང་གནད་དུ་སྣུན་པར་བྱེད་པ་མ་ཡིན་པ་རྣམས་ཅིག་ཅར་འཆི་བའི་གནད་གཅོད་པ་མེད་པར་འཆི་བའི་ཕྱིར་རོ། །གང་ཞིག་དེ་ཁོ་ན་ཉིད་དང་དེ་ཁོ་ན་ཉིད་མ་ཡིན་པར་སྤྱོ་བའི་ཚིག་དག་གིས་གཞན་དག་ལ་གནད་དུ་སྣུན་པར་བྱེད་པ་དེ་ནི་གནད་འཆད་པའི་ཚོར་བ་དག་གི་རེག་པར་འགྱུར་གྱི་གཞན་ནི་མ་ཡིན་ནོ་ཞེས་སྨྲའོ། །གནད་དག་གང་གིས་གཅོད་ཅིང་གནད་འཆད་པ་ཡང་གང་ཞེ་ན། དེའི་ཕྱིར་གནད་གཅོད་པ་ནི་ཆུ་སོགས་ཀྱིས་ཞེས་བྱ་བ་སྨོས་སོ། །དེ་ནི་དངོས་པོ་གཞན་འགའ་ཡང་ཡོད་པ་མ་ཡིན་ཏེ། འོ་ན་ཅི་ཞེ་ན། ལུས་ཀྱི་ཕྱོགས་འགའ་ཞིག་ཅེས་བྱ་བ་རྒྱ་ཆེར་སྨོས་སོ། །རླུང་ལ་སོགས་པ་དེ་དག་ནི་བཟློག་པའི་སྒོ་ནས་ཆུ་ལ་སོགས་པ་གཙོ་བོ་ཡིན་ལ། མི་མཐུན་པའི་རྐྱེན་ཉེ་བས་དེ་དག་རེ་རེ་འམ་མཐའ་དག་འཁྲུགས་ཤིང་ཤུགས་དང་ལྡན་པའི་རལ་གྲི་རྣོན་པོ་ལྟར་རྣ་བས་ལུས་ཀྱི་ཕྱོགས་དེ་དང་དེར་ཚོར་བ་ཤིན་ཏུ་མི་བཟད་པ་སྐྱེད་བར་བྱེད་དེ་དེ་ནི་གནད་གཅོད་པ་ཞེས་བྱའོ། །དེ་དག་ཤིང་ལྟར་གཉིས་སུ་བྱས་པས་གཅོད་པ་ནི་མ་ཡིན་གྱི། འོ་ན་ཅི་ཞེ་ན། ཚོར་བ་མི་བཟད་པ་དག་གིས་བཅད་པ་ལྟ་བུར་གཅོད་དོ། །ཡང་ན་བཅད་པ་དང་འདྲ་བར་གཡོ་བ་མེད་པས་ཞེས་བྱ་བ་ནི་ཡན་ལག་དང་ཉིང་ལག་བཅད་པ་བཞིན་དུ་མི་གཡོ་བས་ན་བཅད་པ་ཞེས་བྱའོ། །ཅི་རིགས་པར་ཞེས་བྱ་བ་ལ་བད་ཀན་གྱི་གཙོ་བོ་ནི་ཆུའོ། །མཁྲིས་པའི་གཙོ་བོ་ནི་མེའོ། །རླུང་གི་གཙོ་བོ་ནི་རླུང་ངོ༌། །སྣོད་ཀྱི་འཇིག་རྟེན་འཇིག་པ་དང་ཆོས་མཐུན་པས་སོ་ཞེས་བྱ་བས་ནི་གནས་དང་འདྲ་བར་གནས་དང་ལྡན་པ་རྣམས་ཀྱང་སྟོན་པར་བྱེད་དོ། །ཕྱི་རོལ་གྱི་དངོས་པོ་འཇིག་པའི་རྒྱུ་དང་ཆོས་མཐུན་པས་ནང་དག་ཡང་འཇིག་གོ་ཞེས་བྱ་བའི་དོན་ཏོ། །འཇིག་པ་ནི་གསུམ་སྟེ། མེས་འཇིག་པ་དང༌། ཆུས་འཇིག་པ་དང༌། རླུང་གིས་འཇིག་པའོ། །ལྷ་དག་གི་ནང་ན་ནི་གནད་འཆད་པ་མེད་མོད་ཀྱི་ཞེས་བྱ་བ་ནི་བརྫུས་ཏེ་སྐྱེ་བ་ཉིད་ཀྱིས་ཅིག་ཅར་
འཆི་བའོ། །དེ་དག་ནི་འཁྲུལ་པ་ཅན་ཡིན་ནོ་ཞེས་བྱ་བ་ནི་བཟློག་པར་ནུས་པའི་ཕྱིར་རོ། །འཆི་ལྟས་ལྔ་ལས་ནི་མི་འདའ་སྟེ་ཞེས་བྱ་བ་ནི་བཟློག་པར་མི་ནུས་པའི་ཕྱིར་རོ། །འདི་དག་ནི་ཐམས་ཅད་ལ་གདོན་མི་ཟ་བར་མི་འབྱུང་བ་ཐམས་ཅད་ཀྱང་མི་འབྱུང་མོད་ཀྱི། ལྷའི་འཆི་ལྟས་བསྡོམས་ནས་ལྔ་ཞེས་དེ་ལྟར་བརྗོད་དོ། སྔ་ལྟས་དེ་དག་ནི་ལྷའི་ཞག་ལྔ་འབྱུང་ངོ༌། སེམས་ཅན་གྱི་འཇིག་རྟེན་འདི་དེ་ལྟར་སྐྱེ་བ་ནི་མ་རིག་པ་ལ་སོགས་པའི་རིམ་གྱིས་སོ། །གནས་པ་ཞེས་བྱ་བ་ནི་ཟ་ས་བཞིས་སོ། འཆི་འཕོ་བཞེས་པ་ནི་འཆི་འཕོ་སྐྱེ་བ་བཏང་སྙོམས་པ་ཞེས་བྱ་བ་ལ་སོགས་པའོ། །ཡང་དག་པ་ཉིད་དུ་ངེས་པའི་ཚོགས་དང་ཞེས་བྱ་བ་རྒྱས་པར་འབྱུང་ངོ༌། །ཡང་དག་པ་ཉིད་གང་ཞེ་ན། གང་འདོད་ཆགས་གཏན་ནས་སྤངས་པ་དང་ཞེས་བྱ་བ་རྒྱས་པར་གསུངས་པའི་ཕྱིར་རོ། །གཏན་ནས་སྤངས་ཞེས་བྱ་བ་ནི་ཐམས་ཅད་དུ་ཞེས་བྱ་བའི་དོན་ཏོ། །ཡང་ཅིའི་ཕྱིར་འདི་ཡང་དག་པ་ཉིད་ཡིན་ཞེ་ན། དེ་ཁོ་ན་ཉིད་ཀྱི་དོན་མ་ཡིན་པ་ལ་འཇུག་པའི་ཆོས་ཟད་པའི་ཕྱིར་དང༌། རྣལ་འབྱོར་པ་རྣམས་ཀྱིས་རྟག་པ་ཉིད་དུ་བཞེད་པའི་ཕྱིར་རོ། །ལོག་པ་ཉིད་ནི་ངན་འགྲོ་རྣམས་ཏེ་ལོག་པ་ཉིད་ནི་གང་ཞེ་ན། དམྱལ་བ་རྣམས་དང་དུད་འགྲོ་དང་ཡི་དགས་རྣམས་ཏེ། འདི་དག་ནི་ལོག་པ་ཉིད་དུ་ངེས་པ་ཞེས་བྱའོ་ཞེས་འབྱུང་བའི་ཕྱིར་རོ། །འདི་ལ་ངེས་པ་ནི་སློབ་པ་དང་མི་སློབ་པ་རྣམས་དང༌། མཚམས་མེད་པའི་ལས་དང་ལྡན་པ་རྣམས་སོ་ཞེས་འདོན་ཏེ། གོ་རིམས་བཞིན་དུ་བྲལ་བ་དང་དམྱལ་བའི་འབྲས་བུ་ངེས་པའི་ཕྱིར་རོ། །དེ་ལྟར་ན་གང་དག་དང་ལྡན་པ་དེ་དག་ནི་ཡང་དག་པ་དང་ལོག་པ་ཉིད་དུ་ངེས་པ་ཞེས་བྱའོ། །དེ་དག་ཀྱང་གང་ཞེ་ན། འཕགས་དང་མཚམས་མེད་བྱེད་པ་ནི། །ཞེས་བྱ་བའོ། །སྡིག་པའི་ཆོས་ལས་རིང་དུ་སོང་བས་ན། ཞེས་བྱ་བ་རྒྱས་པར་འབྱུང་ངོ༌། །རིང་དུ་ཞེས་བྱ་བ་ནི་རྒྱང་རིང་དུ་ཞེས་བྱ་བའི་དོན་ཏོ། །ཡང་ཇི་ལྟར་རིང་དུ་སོང་ཞེ་ན། དེའི་ཕྱིར་གཏན་དུ་བྲལ་བའི་ཐོབ་པ་རྙེད་པའི་ཕྱིར་རོ་ཞེས་བྱ་བ་སྨོས་སོ། །བལ་ལའི་ཐོབ་པ་གཏན་དུ་རྙེད་པ་ནི་གང་གི་ཕྱིར་ཡང་དེ་ལས་
ཡོངས་སུ་མི་ཉམས་པའོ། །ཡང་ན་བྲལ་བ་ཐོབ་པ་གཏན་དུ་བ་སྟེ། དེ་ནི་མཐོང་བས་སྤང་བར་བྱ་བའི་ཉོན་མོངས་པའི་བྲལ་བ་ཡིན་ལ། དེ་ལས་ཡོངས་སུ་ཉམས་པ་མེད་པས་ནི་གཏན་དུའོ། །འབྲས་བུ་དང་པོ་ལ་ཞུགས་པ་ནི་འབྲས་བུ་ཐོབ་པ་མ་ཡིན་ཏེ། ཞུགས་པའི་ལམ་ཡོངས་སུ་བཏང་ཡང་འཕགས་པ་མ་ཡིན་པའི་རྒྱུན་གྱི་དབང་དུ་བྱས་ནས་གསུངས་པའི་ཕྱིར་རོ། །བི་ཧཱ་ནི་ཤྩཏ་ཏྲི་ཥྱ་ཏེ། ན་བ་རི་ཧཱ་ཎཱི་རི་ཏི། འདི་ལ་སྐྱོན་མེད་དེ། གཞན་དག་ན་རེ། ཉོན་མོངས་པ་ལས་ངེས་པར་གྲོལ་བར་བྱེད་པ་དང་གྲོལ་བར་འགྱུར་བ་ཉིད་ཀྱི་ཕྱིར་འཕགས་པ་སྟེ། འཕགས་པ་ནི་རང་དབང་དུ་གྱུར་པ་ལ་བརྗོད་དོ་ཞེས་ཟེར་རོ། །འདི་ལ་མཚམས་ཡོད་པ་མ་ཡིན་པས་ན་མཚམས་མེད་པའོ། །མཚམས་མེད་པའི་དངོས་པོ་ནི་མཚམས་མེད་པ་སྟེ། དེ་དག་དེའི་ངང་ཚུལ་གྱིས་བྱེད་པས་ན་མཚམས་མེད་པའོ། །དེ་དག་ནི་ལོག་པ་ཉིད་དུ་ངེས་པར་ཡང་འགྱུར་ལ་ཞེས་བྱ་བ་ནི་གལ་ཏེ་ཐར་པའི་ཆ་དང་མཐུན་པ་ཐོབ་པ་རྣམས་མཚམས་མེད་པ་དག་བྱེད་ནའོ། །དེ་དག་གིས་ནི་བཟོད་པ་ཐོབ་པ་རྣམས་ལྟར་མཚམས་མེད་པ་མི་བྱེད་པའི་ངེས་པ་ཐོབ་པ་མ་ཡིན་ནོ། །ཇི་ལྟར་དེ་ལྟར་ཐོགས་ན་སྲིད་པ་ལན་བདུན་པ་ལ་སོགས་པ་ཞེས་བྱ་བ་ལ། སོགས་པ་ཞེས་བྱ་བའི་སྒྲས་ནི་རིགས་ནས་རིགས་སུ་སྐྱེ་བ་དང་བར་ཆད་གཅིག་པ་དང་བར་དོར་ཡོངས་སུ་མྱ་ངན་ལས་འདའ་བ་ལ་སོགས་པ་བསྡུའོ། །རྐྱེན་ལ་ལྟོས་ནས་ཞེས་བྱ་བ་རྒྱས་པར་འབྱུང་སྟེ། ཡང་དག་པ་ཉིད་ཀྱི་རྐྱེན་གྱིས་ཐོབ་ན་ནི་ཡང་དག་པ་ཉིད་ལ་བརྟེན་ཏོ། །འོན་ཏེ་ལོག་པ་ཉིད་ཀྱི་རྐྱེན་གྱིས་ཐོབ་ན་ནི་ལོག་པ་ཉིད་ལའོ། །དེ་དག་རྐྱེན་གཉིས་ག་མེད་ན་ནི་མ་ངེས་པ་དག་ཡིན་ནོ། །དེ་ལ་སྣོད་ཀྱི་འཇིག་རྟེན་གྱི། གནས་པར་འདོད་པའི་འོག་དག་ནི། །ཞེས་བྱ་བ་རྒྱས་པར་འབྱུང་ངོ༌། །གླིང་བཞི་བྱེ་བ་ཕྲག་བརྒྱ་ཅིག་ཅར་འཇིག་ཅིང་འཆགས་ལ། སྣོད་ཀྱི་འཇིག་རྟེན་དེའི་གནས་པ་ནི་འདི་ལྟར་འདོད་དོ། །འདི་ལ་བསམ་གཏན་བསྒོམས་ཤིང་ཆོས་ཉིད་ཀྱིས་ཐོབ་པའི་ཕྱིར་བསམ་གཏན་གཉིས་པ་ལ་སོགས་པ་ལ་གནས་པའི་སེམས་ཅན་རྣམས་ཡོད་པ་ན། ཡུན་རིང་
མོ་ཞིག་འདས་ནས་འོག་ཏུ་ནམ་མཁའ་ལ་དེ་དག་གི་ལས་ཀྱི་དབང་གིས་རླུང་འཇམ་པོ་འཇམ་པོ་དག་ལྡང་ལ། རླུང་དེ་དག་ཀྱང་དེར་ཆེས་ཏེ་བོར་སོན་པ་ན་རིམ་གྱིས་རླུང་གི་དཀྱིལ་འཁོར་དུ་གྲུབ་པོ། ལས་ཀྱི་རྣམ་པར་སྨིན་པ་ནི་ཐུན་མོང་མ་ཡིན་པའི་ཕྱིར་དང༌། བདག་པོའི་འབྲས་བུ་ནི་སེམས་ཅན་ཐམས་ཅད་ཀྱིས་ཉེ་བར་ལོངས་སྤྱད་པ་ཡིན་པའི་ཕྱིར་སེམས་ཅན་རྣམས་ཀྱི་ལས་ཀྱི་དབང་གིས་ཞེས་བྱ་བ་སྨོས་སོ། །ཆུའི་དཀྱིལ་འཁོར་ནི་ཁོར་ཡུག་ཏུ་རླུང་གི་དཀྱིལ་འཁོར་དང་འདྲའོ། །རྫོང་གི་ཚུལ་དུ་ཞེས་བྱ་བ་ནི་ཀུན་ནས་ར་བ་བཞིན་དུ་འདུག་པའི་ཕྱིར་རོ། །འོ་མ་བསྐོལ་བ་སྤྲིས་མ་ཆགས་པ་ཞེས་བྱ་བ་ནི་ཞུ་བ་དང་འཐས་པའི་ངོ་བོར་འདུག་པའི་ཕྱིར་རོ། །གང་གི་ཚེ་ཆུ་དེ་གསེར་དུ་གྱུར་པ་དེའི་ཚེ་ནི་གང་དག་གི་རེ་རེའི་ཚད་ཐད་ཀར་འབུམ་ཕྲག་བཅུ་གཉིས་དང་ཞེས་བྱ་བ་ལ་སོགས་པར་བཤད་དོ། །ཆུ་དང་གསེར་གྱི་དཀྱིལ་འཁོར་བྱེ་བ་ཕྲག་བརྒྱད་གནས་སོ། །དེས་ཏེ་ཁོར་ཡུག་གིས་ཁོར་ཡུག་ཏུ་བསྐོར་ཏེ་དེ་ཉིད་ཀྱི་ཕྱིར་ཁོར་ཡུག་ཅེས་བྱའོ། །ལྕགས་ཀྱི་རང་བཞིན་ཞེས་བྱ་བ་ནི་ལྕགས་ལས་བྱས་པའོ། །ངོས་བཞི་དག་ཏུ་གྲངས་བཞིན་ནོ། །ཞེས་བྱ་བ་ནི་བྱང་གི་སྒྲ་མི་སྙན་གྱི་ངོས་ནི་གསེར་གྱི་རང་བཞིན་ནོ། །ལུས་འཕགས་པོའི་ངོས་ནི་དངུལ་གྱི་རང་བཞིན་ནོ། །འཛམ་བུའི་གླིང་གི་ངོས་ནི་བཻཌཱུཪྻའི་རང་བཞིན་ནོ། །ནུབ་ཀྱི་བ་ལང་སྤྱོད་ཀྱི་ངོས་ནི་ཤེལ་གྱི་རང་བཞིན་ཏེ། དེའི་ཕྱིར་དེ་ལྟར་ན་རི་རབ་ནི་གྲུ་བཞི་པ་ཡིན་ནོ་ཞེས་བསྟན་པར་འགྱུར་རོ། །ས་བོན་སྣ་ཚོགས་ཁོང་ན་ཡོད་པ་ཞེས་བྱ་བ་ནི་རྒྱུ་སྣ་ཚོགས་པ་དང་ལྡན་པ་ཡིན་གྱི། གོང་གི་གསེར་གྱི་ས་བོན་ཁོང་ན་ཡོད་པ་ཇི་ལྟ་བ་བཞིན་དུ་ནི་མ་ཡིན་ཏེ། དེའི་ཕྱིར་འདི་གསེར་དང་དངུལ་ལ་སོགས་པའི་རྫས་སུ་ཐ་དད་དོ་སྙམ་དུ་དགོངས་སོ། །མཐུ་རྣམ་པ་དུ་མའི་བྱེ་བྲག་དང་ལྡན་པའི་རླུང་དག་གིས་ཞེས་བྱ་བ་ནི་དེ་སྐྱེད་པ་ལ་ནུས་པ་རྣམ་པ་དུ་མ་ཐ་དད་པ་དག་གིས་ཞེས་བྱ་བའི་དོན་ཏོ། །མཐུ་ནི་ནུས་པ་དང་ནུས་མཐུ་ཞེས་བྱ་བའི་ཐ་ཚིག་གོ །རིགས་དེ་དང་དེ་དག་ཏུ་འགྱུར་རོ་ཞེས་བྱ་བ་ནི་གསེར་ལ་སོགས་པའི་མཚན་ཉིད་ཅན་ནོ། །མ་ཕྲད་པར་ཞེས་བྱ་བས་ནི་རྒྱུ་དང་འབྲས་བུ་
གཉིས་ནི་ཐ་དད་པའི་ཕྱིར་དང༌། འདུ་བྱེད་རྣམས་སྐད་ཅིག་མ་ཡིན་པའི་ཕྱིར་འབྲས་བུའི་དུས་ན་རྒྱུ་ཡོད་པ་མ་ཡིན་ནོ་ཞས་བསྟན་ཏོ། །རྐྱེན་དུ་འགྱུར་བ་ཡིན་ཞེས་བྱ་བ་ནི་རྒྱུ་འགག་བཞིན་པ་ནི་ཡོད་པ་ཙམ་གྱིས་འབྲས་བུ་སྐྱེ་བཞིན་པའི་རྒྱུར་འགྱུར་རོ་ཞེས་བྱ་བའི་དོན་ཏོ། །རྫས་གནས་པ་ལ་ཞེས་བྱ་བ་ལ། གཟུགས་དང་སྒྲ་དང་དྲི་དང་རོ་དང་རེག་བྱའི་བདག་ཉིད་ཅན་ནོ། །ཆོས་གཞན་ལོག་ན་ཞེས་བྱ་བ་ནི་འོ་མ་ཞེས་བྱ་བའི་ཆོས་གཞན་ལོག་ནའོ། །ཆོས་གཞན་འབྱུང་བ་ཞེས་བྱ་བ་ནི་ཞོ་ཞེས་བྱ་བའི་ཆོས་གཞན་འབྱུང་པའོ། །གནས་པ་གང་གི་ཞེས་བྱ་བ་ལ་དེ་ལས་ཐ་དད་པར་འོ་མ་ལ་སོགས་པ་ལ་དམིགས་པས་འོ་མ་ལ་སོགས་པའི་ཆོས་རྣམས་ཁོ་ན་གཟུགས་ལ་སོགས་པའི་ཁྱད་པར་ཚོགས་པའི་བདག་ཉིད་ཡིན་ཞིང༌། རོ་དང་ནུས་པ་དང་སྨིན་པར་བྱེད་པ་དང་མཐུ་ཐ་དད་པས་ཕན་ཚུན་ཐ་དད་པ་ཡང་ཡིན་ཏེ། དེའི་ཕྱིར་གང་གི་ཆོས་ལྡོག་ཅིང་ཆོས་གཞན་པའི་ཆོས་ཅན། ཆོས་སྐྱེ་ཞིང་འཇིག་ཀྱང་མི་སྐྱེ་ཞིང་མི་འཇིག་པ་ཡོད་པ་མ་ཡིན་ནོ། །གང་ཞིག་གནས་པའི་ཆོས་གཞན་ལྡོག་པ་དང་ཆོས་གཞན་འབྱུང་བར་ཡང་ཡོངས་སུ་རྟོགས་པར་བྱེད། ཡང་གཞན་དུ་འགྱུར་བ་ཙམ་ཞིག་འགྱུར་བ་ཡིན་ཏེ་གཟུགས་ལ་སོགས་པའོ། །འོ་མའི་ངོ་བོར་གནས་པ་དེ་དག་ཉིད་འོ་མའི་ངོ་བོ་ལོག་པ་ན་ཞོའི་ངོ་བོར་གནས་ཤིང་གཞན་དུ་གྱུར་པ་ཙམ་འགྱུར་བ་ཡིན་པར་བརྗོད་དོ་ཞེ་ན་དེ་ཉིད་འདི་ཡིན་ལ་ཞེས་འབྱུང་སྟེ། ཆོས་དང་ཆོས་ཅན་གཞན་མ་ཡིན་པས་འོ་མ་ཉིད་ཞོ་ཡིན་ནོ་ཞེས་བྱ་བའི་དོན་ཏོ། །འདི་ལྟ་བུ་ཡང་མ་ཡིན་ཏེ་ཞེས་བྱ་བ་ནི་ཞོ་འདི་འོ་མ་མ་ཡིན་ནོ་ཞེས་བྱ་བའོ། །ཚིག་གི་ཚུལ་འདི་ནི་སྔོན་མ་བྱུང་བ་ཡིན་ནོ་ཞེས་བྱ་བ་ནི་མ་འབྲེལ་བ་རྒྱུ་མེད་པ་དག་གོ་ཞེས་བྱ་བའི་དོན་ཏོ། །གང་ཞིག་ཅིག་ཤོས་གང་ཡིན་པ་དེ་ལས་གཞན་མ་ཡིན་པ་དེ་ནི་ཕན་ཚུན་ཡང་གཞན་མ་ཡིན་པར་འགྱུར་ཏེ། དེའི་ཕྱིར་འོ་མ་ཉིད་ཡིན་པས་འདི་དེ་ལྟ་བུ་ཡང་ནི་ཡིན་ནོ་ཞེས་བརྔོད་བར་མི་རིགས་སོ། །གལ་ཏེ་རྫས་དེ་དེ་ཉིད་ཡིན་ནོ། །དེ་དེ་ཁོ་ནར་གྱུར་ལ། དེ་ལྟ་མ་ཡིན་ན་གཞན་ཁོ་ན་མ་
ཡིན་པས་དེས་ན་ཁྱད་པར་མ་མཐོང་བའི་ཕྱིར་རོ། །གསེར་ལ་སོགས་པ་ཞེས་བྱ་བ་ནི། གསེར་དང་དངུལ་དང་བཻཌཱུཪྻ་དང་ཤེལ་ལ་སོགས་པ་རྣམས་སོ། །འཇམ་པ་དང་ཞེས་བྱ་བ་ནི་མཆོག་ཏུ་ཕྲ་བ་རྒྱུར་བྱས་པའི་གཟུགས་དང་ལྡན་པའི་ཕྱིར་རོ། །དེའི་ངོས་ལ་སུམ་འགྱུར་རོ་ཞེས་བྱ་བ་ནི་གཉའ་ཤིང་འཛིན་གྱི་ངོས་གཅིག་གི་དབང་དུ་བྱས་ནས་སོ། །རྡོ་རྗེ་ལྟ་བུའི་ཏིང་ངེ་འཛིན་དེ་ནི་བྱང་ཆུབ་སེམས་དཔའི་སྐུ་མ་གཏོགས་པའི་ལུས་གཞན་དང༌། རྡོ་རྗེ་གདན་གྱིས་ཕྱོགས་མ་གཏོགས་པའི་ས་ཕྱོགས་གཞན་གྱིས་བཟོད་པར་མི་ནུས་སོ། །ཡུལ་དེར་ཆུ་རྣམ་པ་གཉིས་སུ་གྱུར་པས་ན་གླིང་ངོ༌། །དེའི་བར་གྱི་གླིང་བརྒྱད་ནི་ཞེས་བྱ་བ་ལ། དེ་དག་ཐམས་ཅད་ནི་ལས་ངན་པའི་དབང་གིས་གྲུབ་པ་ཞིག་སྟེ། དེ་ཉིད་ཀྱི་ཕྱིར་དེ་ལ་གནས་པའི་མི་རྣམས་ནི་ལུས་ཆུང་བ་ཡིན་ནོ་ཞེས་བརྗོད་དོ། །གཅིག་ན་སྲིན་པོ་དག་གནས་སོ་ཞེས་བྱ་བ་ནི་རྔ་ཡབ་བོ། །ཛམྦུའི་གླིང་འདིའི་བྱང་ཕྱོགས་ན་རི་ནག་པོ་ཤིན་ཏུ་རྒྱང་རིང་བར་གནས་པ་མ་ཡིན་པ་གསུམ་ཡོད་དོ། །དེ་དག་འདས་ནས་ཡང་གསུམ་ཡོད་དོ་ཞེས་བྱ་བ་རྒྱས་པར་འབྱུང་ངོ༌། །དེའི་དབང་གིས་ཞེས་བྱ་བ་སྟེ་ཛམྦུ་དེའི་དབང་དུ་བྱས་ཤིང་ཆེད་དུ་བྱས་ནས་ཛམྦུའི་གླིང་ཞེས་བྱའོ། །ཡང་ན་དེའི་འབྲས་བུའི་དབང་གིས་ཞེས་བྱ་བ་ནི་ཛམྦུའི་ཤིང་ཏོག་གི་དབང་དུ་བྱས་ནས་སོ། །ཛམྦུའི་འདི་ཉིད་ཀྱི་ཞེས་བྱ་བ་ལ། ཡང་ཅིའི་ཕྱིར་ཛམྦུའི་གླིང་འདི་ཉིད་ཀྱི་གཞན་གྱི་མ་ཡིན་ཞེ་ན། ཛམྦུ་གླིང་ཁོ་ནར་ལས་ངན་པ་ཀུན་ཏུ་སྤྱོད་པ་སྲིད་པའི་ཕྱིར་དང༌། མཚོན་ཆར་འགྱུར་བའི་ལས་ཡོད་པའི་ཕྱིར་དང༌། དབང་པོ་རྣོན་པོ་ཡོད་པའི་ཕྱིར་རོ་ཞེས་ཟེར་རོ། །སྡུག་བསྔལ་བར་ཆད་མེད་པའི་ཕྱིར་ཞེས་བྱ་བ་ནི། དེ་ན་སྡུག་བསྔལ་རྒྱུན་ཆད་པ་ཡོད་པ་མ་ཡིན་ཏེ། མནར་མེད་པའི་སྒྲ་ནི་བར་མེད་པའི་རྣམ་གྲངས་སོ། །དེས་ན་བདེ་པའི་སྐབས་མེད་པས་ཞེས་བྱ་བ་ནི་བདེ་བ་གཞན་མེད་པ་སྟེ། བདེ་བ་ཡང་མ་ཡིན་སྡུག་བསྔལ་ཡང་ཡིན་པ་ནི་བཟློག་པར་མི་བྱའོ། །ལུགས་སྔ་མ་ལ་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་མེད་པ་ཡིན་ནོ། །དེ་ལྟ་ན་ཧ་ཅང་ཐལ་བར་འགྱུར་ཏེ།
གཅིག་ཏུ་མི་དགེ་བའི་ལས་ཀྱི་རྣམ་པར་སྨིན་པ་ཡིན་པའི་ཕྱིར་དམྱལ་བ་གཞན་དག་ན་ཡང་ཚོར་བ་བདེ་བ་མེད་པའི་ཕྱིར་མནར་མེད་པ་ཉིད་དུ་ཐལ་བར་འགྱུར་རོ་ཞེ་ན། །དེའི་ཕྱིར་གཞན་དག་ན་ཡང་ཞེས་བྱ་བ་རྒྱས་པར་སྨོས་སོ། །གཞན་དག་ན་རེ་སྣང་བའི་བུ་ག་མེད་པ་ཞེའོ། །སྙིང་སྟོབས་ཆུང་ངུས་གནས་ཀྱང་ལུས་ཆེ་བའི་ཕྱིར་ཕྱི་རོལ་གྱི་བདག་ཉིད་རང་དང་གཞན་གྱི་ལུས་ལས་བྱུང་བའི་མེའི་ཚོགས་ཀྱིས་ཕན་ཚུན་དུ་ཉེ་བར་འཇོམས་པའི་ཕྱིར་རབ་ཏུ་ཚ་བའོ། །ལུས་ཀྱི་རྗེས་སུ་སོང་བའི་མེ་དག་གིས་མཆོག་ཏུ་གདུར་བའི་ཕྱིར་ཚ་བའོ། །ཤིན་ཏུ་གཟིར་བའི་ཆོ་ངེ་འདོན་པའི་ཕྱིར་དུ་འབོད་ཆེན་པོའོ། །གཟིར་བའི་སྒྲ་མང་དུ་འདོན་པའི་ཕྱིར་དུ་འབོད་དོ། །མཉམ་པར་བསྡུས་ཏེ་ཕན་ཚུན་འཇོམས་པའི་ཕྱིར་བསྡུས་འཇོམས་སོ། །ཐིག་ནག་པོ་བཏབ་ནས་གཤེག་པའི་ཕྱིར་ཐིག་ནག་གོ །ཤི་ཞིང་ཤི་བ་རྣམས་ཀུན་ཏུ་འཚོ་བའི་ཕྱིར་ཡང་སོས་སོ། །ལྷག་བཅུ་དྲུག་ཅེས་བྱ་བ་ལ་རྒྱུ་རྣམ་པ་སྣ་ཚོགས་ཀྱིས་རླག་པར་བྱེད་པའི་ཕྱིར་ལྷག་པའོ། །གཞན་དག་ན་རེ། དམྱལ་བའི་སྡུག་བསྔལ་ལས་གོང་མར་གྱུར་པ་དག་གིས་འཇོམས་པའི་ཕྱིར་ལྷག་པའོ་ཞེས་ཟེར་རོ། །རྩིག་པ་བཞི་ཞེས་བྱ་བ་ནི་ར་བ་བཞི་ཞེས་བྱ་བའི་ཐ་ཚིག་གོ །རྣམ་ཕྱེ་ཞེས་བྱ་བ་ནི་རྣམ་པར་ཕྱེ་ནས་འདུག་པའོ། །ཇི་ལྟར་ཞེ་ན་འདི་ལྟར་རིས་སུ་ཆད་པ་ཡིན་ཞེས་བྱ་བ་སྨོས་སོ། །ལྕགས་ཀྱི་ར་བས་ཀུན་ནས་བསྐོར། །ཞེས་བྱ་བ་ནི་ལྕགས་ཀྱི་ར་བས་ཡོངས་སུ་བསྐོར་ཞེས་བྱ་བའི་ཐ་ཚིག་གོ ། ལྕགས་དག་གིས་ནི་གང་བ་ཡིན། ཞེས་བྱ་བ་ནི་ལྕགས་ཀྱིས་སྒོ་བཅད་པའོ་ཞེས་བྱ་བའི་དོན་ཏོ། །ཁྱབ་པར་གནས་ཞེས་བྱ་བ་ནི་ཁེབས་པའོ། །སྔ་མ་བཞིན་ཞེས་བྱ་བ་ནི་རྐང་པ་བཏེག་ན་ནི་པགས་པ་དང༌། ཤད་པ་ཁྲག་སླར་སྐྱེ་བའོ། །ཐག་མདུང་ཐོགས་པ་ཞེས་བྱ་བ་ལ་སོགས་པ་འབྱུང་སྟེ་དགྲ་སྟ་ཐོགས་པའོ། །གཞན་དག་ཅེས་བྱ་བ་ནི་གནས་བརྟན་ཡིད་འོང་སྟེ། དེ་ནི་རྩ་བའི་དམྱལ་བའི་སྡུག་བསྔལ་བས་འདི་ཆེས་ཞན་པའི་ཕྱིར་ལྷག་པ་ཞེས་བྱ་བའི་སྒྲ་བླ་ལྷག་པའི་དོན་ལ་མི་འདོད་དེ། འོ་ན་ཅི་ཞེ་ན། བར་མཚམས་མེད་པའི་དོན་དང་འཇོམས་
པའི་དོན་ལ་ཡང་འདོད་དོ། །དྲི་བ་ལས་དྲི་བ་གཞན་འབྱུང་སྟེ་ཞེས་བྱ་བ་ནི། དམྱལ་བ་ཕྱོགས་ནི་གོང་རོལ་ན་ཡོད་ཚད་ནི་ཇི་ཙམ་ཞེས་བྱ་བའི་དྲི་བ་འདི་ལས་ལྟ་ཅི་དམྱལ་བའི་སྲུང་མ་དེ་དག་ཅེས་བྱ་བ་དྲི་བ་གཞན་རྒྱས་པས་སྨོས་པ་འདི་འབྱུང་ངོ༌། །ད་ནི་ཇི་ལྟར་ན་དེ་དག་གཡོ་ཞེས་བྱ་བ་ནི་ཤིང་ལ་སོགས་པ་སེམས་མེད་པ་རྣམས་མི་གཡོ་བའི་ཕྱིར་ལ་དེ་ལས་བཟློག་སྟེ། སེམས་དང་བཅས་པ་ལ་གཡོ་བ་མཐོང་བའི་ཕྱིར་འདྲི་བ་སྟེ། དེ་སྐད་དུ། རང་ལུས་བློ་སྔོན་འགྲོ་བ་ཡི། བྱ་བ་མཐོང་ནས་གཞན་ལ་དེར། །འཛིན་ཕྱིར་བློ་ཡོད་གང་ན་དེ། །མེད་དེར་བློ་ནི་མེད་པར་རྟོགས། །ཞེས་བཤད་དོ། །ཆགས་པའི་རླུང་བཞིན་ནོ་ཞེས་བྱ་བ་ནི་དཔེར་ན་ཆགས་པའི་རླུང་དག་ནི་སེམས་ཅན་རྣམས་ཀྱི་ལས་ཀྱི་དབང་གིས་སྣོད་ཀྱི་འཇིག་རྟེན་འགྲུབ་པ་དང་རྗེས་སུ་མཐུན་པར་གཡོ་བ་བཞིན་ནོ། །དེ་དག་སེམས་ཅན་དུ་བགྲང་བ་ནི་མ་ཡིན་ཏེ། དམྱལ་བའི་སྣོད་ཀྱི་རྒྱུ་ཅན་གྱི་སྡུག་བསྔལ་ཉམས་སུ་མི་མྱང་བའི་ཕྱིར་རོ། །འོ་ན་བཙུན་པ་ཆོས་ལྡན་རབ་འབྱོར་གྱིས་ཞེས་བྱ་བ་རྒྱས་པར་འབྱུང་སྟེ། དེའི་རྒྱུ་ལས་དང་ཉོན་མོངས་པ་བསྟན་པའི་ཕྱིར་སེམས་ཅན་དག་ཡིན་ནོ་ཞེས་བྱ་བར་ཤེས་སོ། །གཤིན་རྗེས་བསྒོ་བ་གང་གིས་ཞེས་བྱ་བ་རྒྱས་པར་འབྱུང་ངོ༌། །གཤིན་རྗེའི་སྲིན་པོ་གང་དག་ལྷའི་ཕོ་ཉ་ལྟ་བུ་མདོ་ལས་བསྟན་པ་རྣམས་ནི་གཞན་ཉིད་ཡིན་གྱི། དམྱལ་བའི་སྲུང་མ་ནི་མ་ཡིན་པས་འགལ་བ་མེད་དོ། །སྡུག་ཅིང་སྡུག་བསྔལ་བ་རྣམས་ལ་བསོད་ནམས་མ་ཡིན་པ་མང་བས་མི་སྲིད་པར་འདྲི་བ་ནི་ད་ནི་ལས་དེ་དག་གང་དུ་རྣམ་པར་སྨིན་ཞེས་བྱ་བའོ། །དེ་དག་ཁོ་ནར་དེ་བས་ཀྱང་ཁ་ན་མ་ཐོ་བ་ཆེ་བའི་ལས་ཀྱི་རྣམ་པར་སྨིན་པའི་གོ་སྐབས་ཡོད་པར་མཐོང་ནས་གང་དག་ཏུ་ཞེས་བྱ་བ་སྨོས་ཏེ་དམྱལ་བ་དེ་དག་ཏུའོ། །མཚམས་མེད་པ་བྱེད་པ་རྣམས་ཞེས་བྱ་བ་རྒྱ་ཆེར་འབྱུང་སྟེ། མཚམས་མེད་པ་རྣམས་ལས་གཞན་པའི་ཁ་ན་མ་ཐོ་བ་ཆེན་པོ་དང་བཅས་པའི་ལས་ནི་མེད་དོ། །མེའི་ནང་ན་གནས་པ་ཇི་ལྟར་མི་འཚིག་ཅེ་ན་ཞེས་བྱ་བ་ནི་གལ་ཏེ་དེ་དག་སེམས་ཅན་ཡིན་ན་དམྱལ་བ་པ་ལྟར་མི་འཚིག་སྙམ་དུ་བསམས་པའོ། །ལས་དག་གིས་མཚམས་གཅད་པའི་ཕྱིར་རོ་ཞེས་བྱ་བ་ནི་འདི་དག་བསྲེག་
པར་མི་བྱའོ། །ཞེས་མེ་ནི་གདོན་མི་ཟ་བར་ལས་དག་གིས་དམྱལ་བའི་སྲུང་མ་རྣམས་ལས་མཚམས་གཅད་པའོ། །ཡང་ན་འབྱུང་བའི་ཁྱད་པར་གྲུབ་པ་ཞེས་བྱ་བ་ནི་གང་གིས་ན་མེའི་ནང་ན་གནས་ཀྱང་མི་འཚིག་པ་དེ་དག་གི་ལུས་ཀྱི་འབྱུང་བ་ཆེན་པོའི་ཁྱད་པར་ནི་ལས་དག་གིས་དེ་འདྲ་པར་བསྒྲུབས་སོ་ཞེས་བྱ་བའོ། །ལུས་དང་སྒྲ་འགྱུར་བ་དང་མཐུན་པ་དག་ཡིན་ཞེས་བྱ་བ་ལ། ལུས་འགྱུར་བ་དང་མཐུན་པ་ནི་ཆུ་བུར་ཅན་དང༌། ཆུ་བུར་རྡོལ་བ་དང༌། ཨུཏྤལ་ལྟར་གས་པ་དང༌། པདྨ་ལྟར་གས་པ་དང༌། པདྨ་ལྟར་ཆེར་གས་པ་དག་ཡིན་ལ། སྒྲ་འགྱུར་བ་དང་མཐུན་པ་ནི་སོ་ཐམས་ཐམས་པ་དང༌། ཨ་ཆུ་ཟེར་བ་དང༌། ཀྱི་ཧུད་ཟེར་བ་རྣམས་སོ། །ཐད་ཀ་ན་ཡོད་དོ་ཞེས་བྱ་བ་སྨོས་སོ། །དེ་ཉིད་ཀྱི་ཕྱིར། ཁ་ཅིག་ན་རེ་དེ་དག་ན་གྲང་བ་ཡོད་པ་ནི་རྒྱ་མཚོ་ཆེན་པོ་དང་ཆེས་ཉེ་བའི་ཕྱིར་རོ་ཞེས་ཟེར་རོ། །གཞན་དག་ན་རེ་ལས་ཀྱིས་བྱས་པ་ཁོ་ན་ཡིན་ཏེ། དེ་ལྟ་མ་ཡིན་ན་ཉ་རྣམས་ལ་ཡང་གྲང་བས་ཅེས་གནོད་པར་འགྱུར་རོ་ཞེས་ཟེར་རོ། །གཞན་དག་ན་རེ་གྲང་བའི་དམྱལ་བ་རྣམས་ཀྱི་གནས་ནི། ཁོར་ཡུག་གི་རི་གླིང་བཞི་ཡོངས་སུ་བསྐོར་བའི་ངོས་ན་གཅིག་ཏུ་མུན་ནག་ཏུ་གྱུར་པ་ཡིན་ནོ་ཞེས་ཟེར་རོ། །དམྱལ་བ་ཐམས་ཅད་སྟེང་ནས་སྟེང་དུ་གནས་སོ། །སྡུག་བསྔལ་གྱིས་གཟིར་བས་ན་མིང་མི་གསལ་བ་ཟུར་ཆགས་པའི་སྐད་ཀྱིས་སྨྲའི། །ཛམྦུའི་གླིང་གི་ངོས་གསུམ་ནི་སྟོང་ཕྲག་གཉིས་པ་ཡིན་པའི་ཕྱིར་དང་བཞི་པ་ལ་དཔག་ཚད་ཕྱེད་དང་བཞི་ཡིན་པའི་ཕྱིར་འོག་ན་དམྱལ་བ་རྣམས་ལ་གོ་སྐབས་མེད་པར་མཐོང་ནས། ཛམྦུའི་གླིང་འདི་ཙམ་གྱི་ཞེས་བྱ་བ་རྒྱས་པར་སྨོས་སོ། །རེ་རེ་ལ་དམྱལ་བ་ཡིན་པས་ན་ཉི་ཚེ་བའི་དམྱལ་བ་རྣམས་སོ། །ལྷའི་དཔལ་ལྟ་བུ་ཡང་ཉམས་སུ་མྱོང་གོ་ཞེས་བྱ་བ་ནི་གཤིན་རྗེ་ལ་སོགས་པ་དག་གིས་སོ། །སྐར་མའི་གཞལ་མེད་ཁང་ཞེས་བྱ་བ་ལ། གང་ཞིག་ཐམས་ཅད་ཀྱི་ནང་ན་ཆེ་བ་དེའི་ཚད་ནི་དཔག་ཚད་བཅུ་དྲུག་གོ །ཟླ་བའི་གཞལ་མེད་ཁང་ནི་ཆུ་ཤེལ་ཞེས་བྱ་བ་ནི་འོག་ཆུ་ཤེལ་གྱི་དཀྱིལ་འཁོར་དང་འབྲེལ་བའོ། །ཤེལ་ནི་རྣམ་པ་གཉིས་ཡིན་ཏེ། མེའི་ཁམས་
ཤས་ཆེ་བ་དང༌། ཆུའི་ཁམས་ཤས་ཆེ་བའོ། །སྲོག་ཆགས་རྣམས་ཀྱི་ལས་དག་གིས་ཞེས་བྱ་བ་ལ་སོགས་པ་ནི་དཀྱིལ་འཁོར་གཉིས་དང་སྦྱར་རོ། །དེ་བཞིན་དུ་གཞན་དག་ལ་ཡང་སྦྱར་བར་བྱའོ་ཞེས་བྱ་བ་ནི་གླིང་དག་ལའོ། །ཇི་ལྟར་ཞེ་ན། གང་གི་ཚེ་ཤར་གྱི་ལུས་འཕགས་སུ་ནམ་ཕྱེད་པ་དེའི་ཚེ་ཛམྦུ་གླིང་དུ་ཉི་མ་ནུབ་པོ། ནུབ་ཀྱི་བ་ལང་སྤྱོད་ན་ནི་ཉི་མ་ཕྱེད་དོ། །བྱང་གི་སྒྲ་མི་སྙན་དུ་ནི་ཉི་མ་ཤར་རོ་ཞེས་བྱ་བ་རྒྱ་ཆེར་རོ། །འདི་ནི་མདོར་བསྡུས་ན། གླིང་གང་དུ་ཉི་མ་དང་ཟླ་བ་དག་གུང་དུ་གྱུར་པ་དེ་ལས་ཕྱིས་ནུབ་པ་དང་སྔོན་དུ་ཤར་བ་སྟེ། དེའི་ཕྱིར་གསུམ་པ་ལ་ཉིན་དང། མཚན་མོ་ཕྱེད་དག་གོ །དེ་ལྟར་བྱས་ན་ཤར་ལུས་འཕགས་པོའི་གླིང་དུ་ཉི་མ་ཕྱེད་དུ་གྱུར་པ་དང༌། ནུབ་བ་ལང་སྤྱོད་དུ་ཟླ་བ་ཡང་དུས་དེར་གྱུར་པ་ན་གླིང་བཞི་སྣང་བར་འགྱུར་རོ། །ལྷོའི་མཐའི་གླིང་དག་ཏུ་ཡང་བལྟ་བར་བྱའོ། །ཛམྦུ་གླིང་དུ་ཉི་མ་ཤར་བ་དང་ནུབ་པ་དང་བྱང་གི་སྒྲ་མི་སྙན་དུ་ཟླ་བ་ཤར་བ་དང་ནུབ་པ་དག་གོ །ཤར་གྱི་ལུས་འཕགས་པོར་ཟླ་བ་དང་ཉི་མ་ཡང་དེ་བཞིན་དུ་བལྟ་སྟེ། དེ་བཞིན་དུ་ནུབ་ཀྱི་བ་ལང་སྤྱོད་དུ་ཡང་ཟླ་བ་ཉིད་དོ་ཞེས་དེ་ལྟར་གཞན་ལ་ཡང་སྦྱར་བར་བྱའོ། །ཡང་གང་གི་ཉིན་མོ་དག་རིང་བ་དང་ཐུང་བར་འགྱུར་ཞེ་ན། ཉི་མའི་འགྲོས་ཀྱི་བྱེ་བྲག་གིས་སོ། །ཉི་མ་དང་ནི་ཉེ་བ་ལས་ཞེས་བྱ་བ་རྒྱ་ཆེར་འབྱུང་སྟེ། ཉི་མའི་འོད་ཟེར་དག་ཟླ་བའི་གཞལ་མེད་ཁང་ལ་འབབ་སྟེ། དེས་ན་ཕ་རོལ་གྱི་ངོས་སུ་རང་གི་གཞལ་མེད་ཁང་གི་འོད་ལ་གནོད་པ་བྱས་པའི་གྲིབ་མ་མཐོང་བ་ལ་སྒྲིབ་པར་བྱས་པ་ན། ཟླ་བའི་དཀྱིལ་འཁོར་མ་རངས་པར་སྣང་ངོ༌། །དེ་ལྟ་བུ་དེ་ནི་འདི་ལྟར་ཡིན་ཏེ། གང་གི་ཕྱིར་དཀྱིལ་འཁོར་མཐའ་དག་མི་གསལ་བར་ཡོངས་སུ་བསྐོར་ཏེ་སྣང་བའི་ཕྱིར་རོ། །དེ་ཉིད་ཀྱི་ཕྱིར་ནུབ་ཀྱི་རི་བོ་ལ་ཉི་མ་གནས་ཤིང༌། ཤར་གྱི་རི་བོ་ལ་ཟླ་བ་གནས་པ་ན། ཟླ་བའི་དཀྱིལ་འཁོར་རངས་པར་སྣང་སྟེ། ཟླ་བ་ཤིན་ཏུ་ཐག་རིང་བར་གནས་པའི་ཕྱིར་རོ། །དེ་ལྟ་བུ་དེ་ནི་རྒྱུ་བའི་ཚུལ་ཡིན་ནོ་ཞེས་བྱ་བ་ནི། དཔེར་ན་མེ་ལོང་གི་དཀྱིལ་འཁོར་ཁད་ཀྱིས་བསྒྱུར་བ་ན་ཕྱོགས་གང་ཞིག་མཐོ་བ་དེ་ནི་དམིགས་ལ་གང་ཞིག་དམའ་བ་དེ་ནི་མི་དམིགས་པ་
བཞིན་ནོ། །ཁ་ཅིག་ན་རེ། ངེས་པ་མེད་པར་ཐལ་བར་འགྱུར་བས་དེ་ནི་དེ་ལྟར་མ་ཡིན་ཏེ། དེའི་ཕྱིར་གདོན་མི་ཟ་བར་ངས་པའི་རྒྱུ་བ་ཚང་བར་བྱའོ་ཞེས་མར་རོ། །རྒྱལ་ཆེན་བཞིའི་རིས་པའི་ལྷ་རྣམས་སོ་ཞེས་བྱ་བ་ལ། རྒྱལ་པོ་ཆེན་པོ་བཞིའི་རིས་ནི་ཚོགས་ཏེ་གླང་པོ་ཆེའི་ཚོགས་བཞིན་ནོ། །དེ་ན་ཡོད་པ་ནི་རྒྱལ་ཆེན་བཞིའི་རིས་དག་གོ །ཅི་དེ་དག་གིས་འདི་དག་ཁོ་ན་འམ་ཞེས་བྱ་བ་ནི་ཉི་མ་ལ་སོགས་པའི་གཞལ་མེད་ཁང་དག་ཁོ་ན་འམ་ཞེས་བྱ་བའོ། །རི་རབ་བང་རིམ་ལ་སོགས་པའོ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་མུ་ཁྱུད་འཛིན་ལ་སོགས་པ་བསྡུའོ། །བཞི་པ་ལ་ནེ་རྒྱལ་པོ་ཆེན་པོ་བཞི་དག་ཉིད་ཅེས་བྱ་བ་འབྱུང་སྟེ། དེ་ལ་ཤར་གྱི་ཕྱོགས་ན་ནི་ཡུལ་འཁོར་སྲུང་ངོ༌། །ལྷོ་ཕྱོགས་ན་ནི་འཕགས་སྐྱེས་པོའོ། །ནུབ་ཕྱོགས་ན་ནི་མིག་མི་བཟང་དོ། །བྱང་ཕྱོགས་ན་ནི་རྣམ་ཐོས་ཀྱི་བུའོ། །དེའི་ཕྱིར་དེ་ན་རྒྱལ་ཆེན་བཞི་བའི་ལྷ་རྣམས་བཤད་དོ་ཞེས་བྱ་བ་ནི། གང་གི་ཕྱིར་བང་རིམ་བཞི་པ་ལ་བདག་ཉིད་གནས་པའི་ཕྱིར་རོ། །དེའི་ཕྱིར་འདི་སྐད་དུ་ཚིགས་སུ་བཅད་པ་ལས། རྒྱལ་ཆེན་བཞི་པའི་ལྷ་རྣམས་ཞེས་བཤད་དེ། །རྒྱལ་པོ་ཆེན་པོ་བཞི་དག་ཡོད་པས་ན་རྒྱལ་པོ་ཆེན་པོ་བཞིའོ། །བང་རིམ་ནི་ནམ་མཁའ་ལ་འཕགས་པ་ལ་བརྗོད་དོ། །ཆེ་བ་ཡིན་ཞེས་བྱ་བ་ནི་རབ་ཏུ་མང་བ་ཡིན་གྱི་ཕུན་སུམ་ཚོགས་པ་ཆེ་བ་ནི་མ་ཡིན་ནོ། །དེ་དག་ལ་གནོད་སྦྱིན་ལག་ན་རྡོ་རྗེ་གནས་ཞེས་བྱ་བ་ནི་བག་མེད་པའི་ལྷ་བསྲུང་བར་བྱ་བའི་ཕྱིར་རོ། །ཚོན་སྣ་བརྒྱ་རྩ་གཅིག་གིས་བཀྲ་བར་བྱས་ཞེས་བྱ་བ་ནི་ཚོན་སྣ་བརྒྱ་རྩ་གཅིག་གིས་སོ། །ནེམས་ཞེས་བྱེད་ཡ་དང་སྤར་ཞེས་བྱེད་ཅེས་བྱ་བ་ནི། ནེམས་ཞེས་བྱེད་པ་དང་སྦར་ཞེས་བྱེད་པའི་ངང་ཚུལ་ལིན་ནོ་ཞེས་བྱ་བའི་ཐ་ཚིག་གོ །རིན་པོ་ནེ་དང་གནས་རྣམ་པ་དུ་མ་ཕུན་སུམ་ཚོགས་པ་ཞེས་བྱ་བ་ལ། རིན་པོ་ཆེ་དར་གནས་རྣམ་པ་དུ་མ་དེ་ཕུན་སུམ་ཚོགས་ཡ་མནེ་ནབ་སྟེ་ཆེན་པོ་ཉིད་དོ། །ངོ་ཚ་བར་བྱེད་ཅེས་བྱ་བ་ནི་ངོ་ཚ་བར་བྱེད་ཅེས་བྱ་བའི་ཐ་ཚིག་གོ །སྐྱེད་མོས་ཚལ་ཤིང་རྟ་སྣ་ཚོགས་ཅན་ཞེས་བྱ་བ་རྒྱས་
པར་འབྱུང་སྟེ། དེ་ལ་ཤིང་རྟ་སྣ་ཚོགས་ཅན་དུ་ནི་ལྷ་རྣམས་ཀྱི་དབང་ཐང་གི་མཐུས་ཤིང་རྟ་སྣ་ཚོགས་འབྱུང་བར་འགྱུར་ཏེ། རྩུབ་འགྱུར་དུ་ནི་གཡུལ་སྒྲོད་པར་འདོད་པད་དག་ལ་གོ་མཚོན་འབྱུང་བར་འགྱུར་རོ། །འདྲེས་པའི་ཚལ་དུ་ནི་དེ་དག་ཉེ་བར་ཕྲད་པ་ལས་དགའ་བ་བདེ་བར་སྐྱེའོ། །དགའ་བའི་ཚལ་དུ་ནི་ཤིན་ཏུ་འབྱོར་པ་དང་ལྡན་པར་མཐོང་བ་ན་དགའ་བར་འགྱུར་ཏེ། སྐྱེད་མོས་ཚལ་དེ་དག་ནི་གྲུ་བཞི་པ་ཡིན་ལ། དེ་དག་གེ་ངོས་རེ་རེ་ལ་ནི་དཔག་ཚད་ཕྱེད་དང་སུམ་བརྒྱའོ། །འདང་མ་དང་ལོ་མ་ཞེས་བྱ་བ་ལ་འདབ་མ་ཉིད་ལོ་མ་ཡོན་པས་ན་འདབ་མ་དང་ལོ་མའོ། །དེ་རྫི་ཕྱོགས་མ་ཡིན་པར་འགྲོ་བ་ནི་མ་ཡིན་ནོ་ཞེས་བྱ་བ་ནི་གང་དུ་སྐྱེས་པ་ཉིད་དུ་འཇིག་པའི་ཕྱིར་རོ། །ཅི་མེ་ཏོག་གི་དྲིའི་རྒྱུན་དེ་ཞེས་བྱ་བ་ནི་ཇི་ལྟར་མེ་ཏོག་དང་འབྲེལ་པ་ལས་ཏིལ་དག་ལ་དྲི་གཞན་འབྱུང་བ་དེ་བཞིན་དུ་མེ་ཏོག་དང་འབྲེལ་པ་ལས་དེའི་དྲི་རླུང་གི་ས་བདས་པ་ཞིག་འབྱུང་བ་ཞིག་གམ་ཞེས་བྱ་བ་ཡིན་ནོ། །མེ་ཏོག་དྲི་ནི་རྫི་ཕྱོགས་མིན་མི་འགྲོ། །ཞེས་བྱ་བ་རྒྱས་པར་འབྱུང་སྟེ། རྩ་བལ་ཡོད་པ་ནི་རྩབ་སྟེ། པུ་ཤེལ་ཙི་དང་གླ་སྒང་ལ་སོགས་པའི་དྲིའོ། །མཁས་རྣམས་དྲི་ནི་ཞེས་བྱ་བ་ནི་གྲགས་པ་ཞེས་བྱ་བའི་དོན་ཏོ། །བྱ་བ་དང་བྱ་བ་མ་ཡིན་པ་འགྲོ་པར་བྱེད་པ་ཞེས་བྱ་བ་ནི་ལྷ་མ་ཡིན་ཕྱིར་བཟློག་པ་ལ་སོགས་པའི་བྱ་བ་དང་བྱ་བ་མ་ཡིན་པ་འགྲོ་བར་བྱེད་ཅེས་བྱ་བའི་ཐ་ཚིག་གོ །གཞན་ཡང་ལྷ་རྩེད་མོས་དྲན་པ་བརླག་པ་ལ་སོགས་པ་དག་ཀྱང་ཡོད་པས་དེའི་ཕྱིར་མདོར་བསྡུ་ན་ཞེས་བྱ་བ་སྨོས་སོ། །འཐབ་བྲལ་ནས་འོག་མིན་དུ་ཉེ་བར་འགྲོ་བ་དང་འོག་མིན་གྱི་མཐར་ཐུག་པའི་བར་གྱི་ལྷ་རྣམས་ནི་སྤྲིན་གྱི་ཆོ་གས་ལྟར་གཞལ་མེད་ཁང་དག་ན་གནས་པ་ཡིན་ནོ། །གཞན་དག་ནི་འཐབ་བྲལ་བ་རྣམས་ས་དང་འབྲེལ་ལོ་ཞེས་ཟེར་རོ། །འོག་མིན་གྱི་མཐར་ཐུག་པའི་སེམས་ཅན་དེ་དག་ཁོ་ནའི་སྣོད་མངོན་གྱི། གཞན་དག་གི་ནི་མ་ཡིན་ཏེ་གཟུགས་ཅན་མ་ཡིན་པའི་ཕྱིར་རོ། །ལྷག་མ་རྣམས་གྱིས་ནི་མ་ཡིན་ནོ་ཞེས་བྱ་བ་ནི། ཚངས་པ་མདུན་ན་འདོན་ལ་སོགས་པ་རྣམས་ཏེ། དེ་དག་ནི་
གཉེན་པོས་འདོད་པ་ཐམས་ཅད་བཟློག་པ་ཉིད་ཀྱི་ཕྱིར་རོ། །རྒྱལ་པོ་ཆེན་པོའི་ལྷ་རྣམས་ནི་དེ་དག་ལ་སྤྱོད་པས་རྒྱལ་པོ་ཆེན་པོ་རྣམས་སོ། །སུམ་ཅུ་རྩ་གསུམ་པའི་ཚོགས་ནི་འདི་དག་ཡོངས་སུ་འགྱུར་བས་སུམ་ཅུ་རྩ་གསུམ་པའོ། །འཐབ་པ་ལ་ནི་འཐབ་པ་དང་ཕྱི་ཕྱིར་བྲལ་བས་ཨེ་མའོ་བདེའོ་ཞེས་བརྗོད་པས་འཐབ་བྲལ་ལོ། །རང་ཉིད་ཡོངས་སུ་གཟུང་བ་ལ་དགའ་བས་དགའ་ལྡན་ནོ། །འདིས་ཡུལ་སྤྲུལ་ཏེ་འདོད་པ་ལ་ཉེ་བར་སྤྱོད་པས་འཕྲུལ་དགའོ། །གཞན་གྱིས་སྤྲུལ་པ་ལ་དབང་བསྒྱུར་བས་གཞན་འཕྲུལ་དབང་བྱེད་དེ། །མི་རྣམས་ཇི་ལྟ་བ་བཞིན་ཞེས་བྱ་བ་ལ། དེ་དག་དང་འདིའི་ཁྱད་པར་ནི་མི་རྣམས་ནི་ཁུ་ཆུ་བཏང་བས་ཡོངས་སུ་གདུང་བ་དང་བྲལ་བ་དེ་དག་ནི་རླུང་བཏང་བས་དེ་ཁུ་ཆུ་མེད་པའི་ཕྱིར་རོ། །དེ་མེད་པ་ཡང་དེ་ན་གནས་པའི་ཟས་ལ་རྒྱུ་མཐུན་པ་མེད་པའི་ཕྱིར་རོ། །ཆེས་གཞན་པར་འདོད་ཆགས་པ་ཉིད་ཀྱིས་འཁྱུད་པས་དེར་འདོད་པ་དང་ལྡན་པ་རྣམས་ལ་འཁྱུད་པའི་བདེ་བ་འབྱུང་གི་འདོད་ཆགས་མེད་ན་ནི་དེ་ངག་ལ་རེག་པ་སྐྱོན་ཅན་མི་འབྱུང་སྟེ་མ་ལ་འཁྱུད་པ་བཞིན་ནོ། །དགའ་ལྡན་པ་རྣམས་ནི་ཞེས་བྱ་བ་ལ་སོགས་པ་ལ། གཉི་ག་ཆེས་གཞན་དུ་འདོད་ཆགས་པས་འཁོར་བའི་སྒྲུབ་པ་སྔ་མ་བཞིན་བརྗོད་པར་བྱའོ། །ཉེ་བར་མཁོ་བ་རྣམས་ནི་དེར་སྤྲུལ་པར་བྱེད་དོ། །ངེས་པར་གསུམ་པོ་ཁོ་ན་གཉིས་ཀྱིས་ཀུན་ཏུ་འདོད་ཆགས་པ་མི་འཐད་པར་འགྱུར་བ་མ་ཡིན་ནོ། །ཇི་ཙིམ་ཇི་ཙམ་དུ་ཞེས་བྱ་བ་ནི་གོང་ནས་གོང་དུ་ཞེས་བྱ་བའི་དོན་ཏོ། །ཡུལ་རྣམས་ཤས་ཆེ་བ་ཞེས་བྱ་བ་ནི་ཆེས་ཆེར་བདོ་བ་ཞེས་བྱ་བའི་དོན་ཏོ། །དེ་དག་ཡུལ་ཤས་ཆེ་བ་དང་ལུས་ཉམས་པ་མེད་པའི་ཕྱིར་དེ་ཡོངས་སུ་འགྱུར་བས་ཡང་དང་ཡང་འདོད་པ་བརྟེན་པར་འགྱུར་རོ། །དེ་ལྟ་མ་ཡིན་ན་ལྷ་རྣམས་ཉིད་འདོད་པའི་བདེ་བ་ཤིན་ཏུ་ཆུང་བར་འགྱུར་རོ། །ཡང་ཇི་ལྟར་རྫུས་ཏེ་སྐྱེ་བ་རྣམས་ལ་ནི་འདི་བདག་གི་པ་ཡིན་ནོ། །བུ་ཡིན་ནོ་སྙམ་པའི་འདུ་ཤེས་འབྱུང་ཞེ་ན། དེའི་ཕྱིར་ལྷ་འམ་ལྷ་མོ་གང་གི་ཞེས་བྱ་བ་རྒྱས་པར་འབྱུང་ངོ༌། །གྲངས་བཞིན་ཏེ་ཞེས་བྱ་བ་ནི་རྒྱལ་ཆེན་བཞི་པ་དག་ཏུ་ནི་ལོ་ལྔ་ལོན་པ་ལྟ་བུའོ་ཞེས་བྱ་
བ་ནས་གཞན་འཕྲུལ་དབང་བྱེད་པ་ནི་ལོ་བཅུ་ལོན་པ་ལྟ་བུའོ་ཞེས་བྱ་བའི་བར་རོ། །དེ་དག་ཀྱང་ལྷའི་རིས་བཞི་རྣམས་སོ་ཞེས་བྱ་བ་ནི་རྒྱལ་ཆེན་བཞིའི་རིས་པ་ནས་བརྩམས་ཏེ་དགའ་ལྡན་པའི་བར་རོ། །ཇི་ལྟར་བྱུང་བ་རྣམས་ལ་ལོངས་སྤྱོད་པ་ནི་ཇི་ལྟར་བྱུང་བ་ལ་ལོངས་སྤྱོད་པ་སྟེ། འདི་དག་ལ་ཡོད་པས་ན་ཇི་ལྟར་བྱུང་བ་ལ་ལོངས་སྤྱོད་པའོ། །ཇི་ལྟར་འདོད་པ་བཞིན་བདག་ཉིད་སྤྲུལ་པ་འདི་དག་ལ་དེས་ལོངས་སྤྱོད་པས་ན་དེ་དག་ནི་ཇི་ལྟར་འདོད་པ་བདག་དང་གཞན་གྱིས་སྤྲུལ་པ་ལ་ལོངས་སྤྱོད་པའོ། །ཇི་ལྟར་འདོད་པ་བཞིན་བདག་དང་གཞན་གྱིས་སྤྲུལ་པ་ནི་ཇི་ལྟར་འདོད་པ་བཞིན་བདག་དང་གཞན་གྱིས་སྤྲུལ་པ་ཡིན་ལ། དེ་ཡོངས་སུ་ལོངས་སྤྱོད་པ་ནི་ཇི་ལྟར་འདོད་པ་བཞིན་བདག་དང་གཞན་གྱིས་སྤྲུལ་པ་ལ་ཡོངས་སུ་ལོངས་སྤྱོད་པ་སྟེ། གང་ལ་དེ་ཡོད་པ་ཞེས་ཐམས་ཅད་ལ་སྦྱར་རོ། །འཕྲུལ་དགའ་བ་རྣམས་ལ་གཞན་གྱིས་སྤྲུལ་པའི་འདོད་པ་ཉེ་བར་སྤྱོད་པ་མི་འབྱོར་ཏེ། །དེ་ལྟར་ན་འཕྲུལ་དགའ་བ་རྣམས་དང་གཞན་འཕྲུལ་དབང་བྱེད་པ་རྣམས་ཀྱི་ཁྱད་པར་བཤད་པ་ཡིན་ནོ། །གཞན་དག་ན་རེ་དང་པོ་ནི་ཡུལ་ཇི་ལྟར་བྱུང་བ་ལ་ཡོངས་སུ་ལོངས་སྤྱོད་པའི་ཕྱིར་རོ། །གཉིས་པ་ནི་ཡུལ་ཇི་ལྟར་འདོད་པ་བཞིན་བདག་ཉིད་ཀྱི་སྤྲུལ་པ་ཡོངས་སུ་ལོངས་སྤྱོད་པའི་ཕྱིར་རོ། །གསུམ་པ་ནི་ཡུལ་བྱེད་པ་མེད་པ་ལ་ཡོངས་སུ་ལོངས་སྤྱོད་པའི་ཕྱིར་རོ། །ཡང་ན་གོ་རིམས་བཞིན་དུ་ཡུལ་དམན་པ་དང༌། བར་མ་དང༌། གྱ་ནོམ་པ་ལ་ཡོངས་སུ་ལོངས་སྤྱོད་པའི་ཕྱིར་རོ། །ཉེ་བར་གནས་པ་རྣམས་ནི་གནོད་པ་དང་ཁ་ན་མ་ཐོ་བ་དང་བཅས་པ་དང་འབད་པ་དང་བཅས་པར་ཉེ་བར་ལོངས་སྤྱོད་དོ། །སྤྲུལ་པ་རྣམས་ནི་ཁ་ན་མ་ཐོ་བ་མེད་པ་དང་འབད་པ་དང་བཅས་པར་རོ། །གཞན་གྱིས་སྤྲུལ་པ་རྣམས་ནི་ཁ་ན་མ་ཐོ་བ་མེད་པ་དང་འབད་པ་མེད་པར་ཉེ་བར་ལོངས་སྤྱོད་དོ། །ལྷ་དེ་དག་ཅེས་བྱ་བ་ལ། བསམ་གཏན་དང་པོའི་ས་བ་དག་ནི་དབེན་པ་ལས་སྐྱེས་པའི་དགའ་བའི་བདེ་བས་ཏེ་འདོད་པ་ལས་འདོད་ཆགས་དང་བྲལ་བའི་ཕྱིར་རོ། །བསམ་གཏན་གཉིས་པའི་ས་བ་དག་ནི་ཏིང་ངེ་འཛིན་ལས་སྐྱེས་པའི་དགའ་བའི་བདེ་བས་སོ། །བསམ་གཏན་གསུམ་པའི་ས་པ་
དག་ནི་དགའ་བ་མེད་པའི་བདེ་བས་ཏེ། དགའ་བ་ལས་འདོད་ཆགས་དང་བྲལ་བའི་ཕྱིར་རོ། །བདེ་བས་གནས་པ་ན་ཞེས་བྱ་བ་རྒྱས་པར་འབྱུང་ངོ༌། །གཞན་དག་ན་རེ་བདེ་བདེ་དག་ཀྱང་ཚོར་བ་རྣམ་པར་སྨིན་པ་བདེ་བ་མ་ཡིན་པས་དེ་དག་ཉིད་བདེ་བ་སྐྱེ་བར་བརྗོད་དོ། །ས་འོག་མའི་སྡུག་བསྔལ་ཡང་ཚོར་བ་རྣམ་པར་སྨིན་པ་ཡིན་པས་འདི་བདེ་བ་བསྐྱེད་པ་མ་ཡིན་ནོ། །གང་ཡང་འདི་དག་ནི་གསུམ་དུ་འགྱུར་ཏེ། ཏཏྶ་མཾ་གི་ནཱི། དབེན་པ་ལས་སྐྱེས་པ་དང་ཏིང་ངེ་འཛིན་ལས་སྐྱེས་པ་དང༌། དགའ་བ་མེད་པའི་བདེ་བས་གནས་པའི་ཕྱིར་རིམ་པ་བཞིན་གསུམ་དུ་འགྱུར། གཞན་དག་ན་རེ་འཇིག་པའི་དབྱེ་བས་སོ་ཞེས་ཟེར་རོ། །གཞན་དག་ན་རེ། རྟོག་པ་དང་དགའ་བ་དང་བདེ་བའི་དབང་དུ་བྱས་ནས་ཐོས་པས་སོ་ཞེས་ཟེར་རོ། །བསམ་གཏན་ཁྱད་པར་ཅན་དུ་སྐྱེས་པ་ལ་ནི་ཞེས་བྱ་བ་རྒྱས་པར་འབྱུང་སྟེ། དེ་ན་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་ཡོད་པས་བདེ་བ་སྐྱེ་བ་ཉིད་དུ་མི་རུང་ངོ༌། །བྱེ་བྲག་ཏུ་སྨྲ་བ་རྣམས་ན་རེ། འདི་ནི་ཕལ་ཆེ་བར་བསྟན་པ་ཡིན་ཏེ། དཔེར་ན་མངོན་པར་ཤེས་པ་གང་ཞེ་ན། ཤེས་རབ་དགེ་བའོ་ཞེས་བྱ་བ་བཞིན་ནོ་ཞེས་ཟེར་རོ། །གང་དག་ལྷ་རྣམས་ཀྱི་གནས་ཉི་ཤུ་རྩ་གཉིས་བཤད་པ་ཞེས་བྱ་བ་ལ། འདོད་པ་ན་སྤྱོད་པ་རྣམས་ཀྱི་གནས་ནི་དྲུག་ཡིན་ལ། གཟུགས་ན་སྤྱོད་པ་རྣམས་ཀྱི་ནི་བཅུ་དྲུག་ཡིན་ཏེ། ཚངས་པ་ཆེན་པོ་ནི་ཚངས་པའི་མདུན་ན་འདོན་དག་གི་ཁོངས་སུ་འདུ་བའི་ཕྱིར་རོ། །དཔག་ཚད་བཞི་ཁྲི་ནི་ཞེས་བྱ་བ་ནི་དེ་དག་གིས་ནི་རི་རབ་ཀྱི་ཕྱེད་མན་ཆད་དུ་ཕྱིན་ཏོ་ཞེས་འབྱུང་བའི་ཕྱིར་རོ། །བསགས་པར་གནས་པའི་གཟུགས་ཞེས་བྱ་བ་ལ་བསགས་པ་ལ་གནས་པ་ནི་བསགས་པར་གནས་པའོ། །ཡང་ན་བསགས་ཤིང་གནས་པས་ན་བསགས་པར་གནས་པ་སྟེ། ཕན་ཚུན་འབྲེལ་ཅེས་བྱ་བའི་ཐ་ཚིག་གོ །ལྷག་མ་རྣམས་ཀྱང་དེ་དང་འདྲའོ་ཞེས་བྱ་བ་རྫུ་འཕྲུལ་གྱིས་སམ་གཞན་ལ་བརྟེན་ནས་ཏེ། རྫུ་འཕྲུལ་དང་ལྡན་པའམ། དེ་ན་གནས་པའི་ལྷས་ཁྲིད་བར་གྱུར་ན་འཐབ་བྲལ་བ་རྣམས་དགའ་ལྡན་པ་དག་གི་ནང་དུ་འགྲོ་བར་འགྱུར་ཏེ།
དེ་བཞིན་དུ་དགའ་ལྡན་པ་རྣམས་འཕྲུལ་དགའ་བ་དག་གི་ནང་དུ་འགྲོའོ་ཞེས་རྒྱས་པར་ཐམས་ཅད་དུ་བརྗོད་པར་བྱའོ། །གོང་དུ་སྐྱེས་པ་འོངས་པ་མཐོང་སྟེ། འདོད་པ་ན་སྤྱོད་པའམ་ས་མཚུངས་པ་མཐོང་ངོ༌། །ཁམས་གོང་མ་པ་ཡང་མ་ཡིན་ཞེས་བྱ་བ་ནི་འདོད་པ་ན་སྤྱོད་པས་གཟུགས་ཀྱི་ཁམས་སུ་སྐྱེས་པ་མི་མཐོང་བའོ། །ས་གོང་མ་པ་ཡང་མ་ཡིན་ཏེ་ཞེས་བྱ་བ་ནི་ཁམས་མཚུངས་ཀྱང་བསམ་གཏན་དང་པོར་སྐྱེས་པས་བསམ་གཏན་གཉིས་པ་ལ་སོགས་པར་སྐྱེས་པ་མི་མཐོང་བའོ། །རེག་བྱ་རོག་པར་མི་འགྱུར་བ་བཞིན་ནོ་ཞེས་བྱ་བ་ནི་ཁམས་གོང་མ་པའམ་ས་གོང་མ་པའོ། །ཅིའི་ཕྱིར་ཞེ་ན་ཡུལ་མ་ཡིན་པའི་ཕྱིར་ཏེ། དེ་བཞིན་དུ་ཡུལ་མ་ཡིན་པའི་ཕྱིར་གཟུགས་ཀྱང་མི་མཐོང་ངོ༌། །དེའི་འདོད་པས་འདི་ན་འཁོད་པ་བཞིན་དུ་མཐོང་བར་འགྱུར་རོ་ཞེས་བྱ་བ་ལ། ཇི་ལྟར་འདོད་པ་ན་སྤྱོད་པས་འདོད་པ་ན་སྤྱོད་པ་མཐོང་བ་དེ་བཞིན་དུ། དེའི་འདོད་པས་གཟུགས་ན་སྤྱོད་པ་དང༌། ས་གོང་མར་སྐྱེས་པ་འོངས་པ་ཡང་ས་འོག་པའི་ལུས་སུ་མ་སྤྲུལ་པར་ཡང་མཐོང་བར་འགྱུར་རོ། །གཞན་དག་ན་རེ་དེ་ནི་དེ་ལྟར་མ་ཡིན་ཏེ། གཟུགས་དང་ཁམས་དང་ས་རྣམས་རྒྱུ་དང་འབྲས་བུ་ཡོངས་སུ་ཆད་པའི་ཕྱིར་རོ། །ས་འོག་མ་ལས་འདོད་ཆགས་བྲལ་བ་ནི་ས་གོང་མ་དེར་སྐྱེ་སྟེ། དེའི་ཕྱིར་ས་གོང་མའི་གཟུགས་ནི་ས་འོག་མིའམ་མིག་གི་ཡུལ་མ་མིན་ཏེ། ལས་ཀྱི་འབྲས་བུ་ཆེས་མཆོག་ཡིན་པའི་ཕྱིར་རོ། །དེའི་ཕྱིར་དེའི་འདོད་པས་ཀྱང་མི་མཐོང་ངོ༌། །སུམ་ཅུ་རྩ་གསུམ་ལ་སོགས་པ་རྣམས་ཀྱི་ཚངས་དང་འབྲེལ་པ་ནི་བཤད་ན། ཡང་འཐབ་བྲལ་ལ་སོགས་པ་རྣམས་ཀྱི་ཚད་ཇི་ཙམ་ཞེ་ན། གཞན་དག་ན་རེ། བཞི་པ་ལ་ཚད་མེད་དོ་ཞེས་ཟེར་རོ། །བསམ་གཏན་བཞི་པའི་གཞལ་མེད་ཁང་ནི་སྐར་མ་ལྟར་རྣམ་པར་ཆད་པ་ཡིན་ཏེ། མི་རྟག་དེའི་གཞལ་མེད་ཁང༌། །སེམས་ཅན་བཅས་ཏེ་འབྱུང་འཇིག་ཕྱིར། །ཞེས་འབྱུང་ངོ༌། །དེའི་ཕྱིར་དེ་ལ་ཚད་མེད་ལ། ལྷག་མ་རྣམས་ལ་ཚད་ཡོད་དེ། གཅིག་ཏུ་འབྲེལ་བའི་ཕྱིར་རོ། །ཚངས་པའི་འཇིག་རྟེན་ཞེས་བྱ་བ་སྨོས་པས་བསམ་གཏན་གཉིས་པ་ལ་སོགས་པ་
རྣམས་ནི་སྟོང་ཆུང་ངུའི་འཇིག་རྟེན་གྱི་ཁམས་ཀྱིས་བསྡུས་པ་ཡིན་ནོ། །དེ་ཉིད་ཀྱི་ཕྱིར། དེ་ལ་སྤྱི་ཕུད་ཅེས་བྱ་སྟེ། གཙུག་ཕུད་དུ་གྱུར་པའི་ཕྱིར་དང་སྤྱི་ཕུད་ཡིན་པའི་ཕྱིར་རོ། །དེ་ལྟར་བྱས་ན་དེ་དག་འཇིག་རྟེན་གྱི་ཁམས་ཀྱིས་བསྡུས་པ་ཡོད་པ་ཉིད་དོ། །ཅིའི་ཕྱིར་གང་ལས། དེ་སྟོང་ལ་ནི་སྟོང་གཉིས་པ། །ཞེས་རྒྱ་ཆེར་འབྱུང་སྟེ། མཉམ་དུ་འཇིག་ཅིང་འབྱུང་བ་ཡིན་ཞེས་བྱ་བ་ལ་འདིར་སེམས་ཅན་རྣམས་མཉམ་པོར་འཇིག་ཅིང་སྣོད་དག་མཉམ་དུ་འབྱུང་ངོ༌། །སྣོད་འབྱུང་བ་ནས་བཟུང་སྟེ། འཆགས་པའི་བསྐལ་པ་ཞེས་བྱ་སྟེ། །གང་ཕྱིས་འཇིག་པ་དེ་ནི་སྔར་ཆགས་སོ་ཞེས་ཕྱིས་བཤད་པར་བྱའོ། །ཛམྦུའི་གླིང་པ་རྣམས་ཞེས་བྱ་བ་རྒྱས་པར་འབྱུང་སྟེ། ཛམྦུའི་གླིང་པ་རྣམས་ལ་དང་པོ་དང་མཐའི་བསྐལ་པའི་རིམ་གྱིས་འཕེལ་བ་དང་འགྲིབ་པ་མཐོང་བའི་ཕྱིར་ཅི་ལྟར་འདི་ཞེས་བརྗོད། ཁྲུ་གང་ཡིན་པ་དེ་ཉིད་ཀྱང་འཕེལ་བ་དང་འགྲིབ་པར་འགྱུར་བས་སོ། །གལ་ཏེ་དེའི་མཚན་ཉིད་རྣམ་པར་གཞག་ན་རྡུལ་ཕྲ་རབ་ལ་སོགས་པ་རྣམས་དེ་ལྟ་བུ་མ་ཡིན་ནོ། །བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་ནི་གང་ཞིག་སངས་རྒྱས་ཉིད་ལ་སྐྱེ་བ་གཅིག་གིས་ཆོད་པ་སྟེ། དེ་དགའ་ལྡན་ན་གནས་ཤིང་སྐུ་ཚེ་རངས་པར་གསོན་པར་འགྱུར་རོ། །སྲིད་པ་ཐམ་པ་ཞེས་བྱ་བ་ནི་སྐྱེ་བ་ཐ་མ་པ་སྟེ། གང་གིས་ན་སྐྱེ་བ་དེ་ཉིད་ལ་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །རྒྱལ་བས་བསྟན་པ་ནི་གང་ཞིག་དེའི་ཚེ་ནི་འདི་ཙམ་མོ་ཞེས་རྒྱལ་བས་ལུང་བསྟན་པའོ། །རྒྱལ་བའི་ཕོ་ཉ་ནི་ཕོ་ཉའི་བྱ་བ་བྱས་མ་ཟིན་པའོ། །དད་པ་དང་ཆོས་ཀྱི་རྗེས་སུ་འབྲང་བ་ནི་མཐོང་བའི་ལམ་ལ་གནས་པ་དབང་པོ་རྣོན་པོ་དང་རྟུལ་པོ་དག་གོ །སོགས་པ་ཞེས་བྱ་བའི་སྒྲས་ནི། འགོག་པ་དང༌། འདུ་ཤེས་མེད་པ་དང༌། བྱམས་པའི་ཏིང་ངེ་འཛིན་ལ་སྙོམས་པར་ཞུགས་པ་རྣམས་བསྡུའོ། །དཔག་ཚད་ཀྱི་ཚད་ཀྱིས་གནས་རྣམས་དང་ལུས་རྣམས་ཀྱང་བཤད་དེ། སྟོང་ཕྲག་དག་ནི་བཅུ་དྲུག་དང༌། །བརྒྱད་དང་བཞི་དང་གཉིས་འཕགས་སོ། །ཞེས་བྱ་བ་དེ་ལྟ་བུ་ལ་སོགས་པས་ནི་དཔག་ཚད་ཀྱི་གནས་རྣམས་བཤད་དོ། །འདོད་
དང་ལྡན་པའི་ལྷ་ཡི་ལུས། །བཞི་ཆ་ནས་ནི་ཞེས་བྱ་བ་ལ་སོགས་པས་ནི་ལུས་རྣམས་བཤད་དོ། །ལོའི་ཚད་ཀྱིས་ཚེ་བཤད་པ་ནི་སྒྲ་མི་སྙན་ན་ཚེ་སྟོང་སྟེ། གཉིས་ན་ཕྱེད་ཕྱེད་སྤངས་པའོ། །ཞེས་བྱ་བའོ། །ཐམས་ཅད་ཀྱི་རྣམ་པར་གཞག་པ་ཡང་མིང་གིས་ཡིན་པ་ནི། དེ་ལ་ལག་ན་གཞོང་ཐོགས་དང༌། ཕྲེང་ཐོགས་དང་ནི་རྟག་མྱོས་དང༌། །ཞེས་བྱ་བའོ། །གཟུགས་འགྲིབ་པའི་ཞེས་བྱ་བ་ནི་འདུས་པའི་གཟུགས་ཀྱི་ཡིན་གྱི། རྫས་ཀྱི་རྡུལ་ཕྲ་རབ་ཀྱི་གཟུགས་ཀྱི་ནི་མ་ཡིན་ཏེ། ཆ་ཤས་མེད་པས་འགྲིབ་པ་མེད་པའི་ཕྱིར་རོ། །མཐའ་ནི་གང་ཞིག་ལ་དབྱེ་བར་མི་ནུས་པའོ། །དེའི་སྐད་ཅིག་ལ་སོགས་པ་དུས་ཀྱི་མཐའ་ནི་གང་ན་གཞན་དུ་དབྱེ་བ་ཡོད་པ་མ་ཡིན་པ་དེ་ནི་རྐྱེན་རྣམས་ཚོགས་པ་ན་དངོས་པོ་རྣམས་བདག་ཉིད་ཐོབ་པའི་སྐད་ཅིག་གོ །སློབ་དཔོན་འདུས་བཟང་ན་རེ། ལ་བྷོ་ཧྱ་ལབྡྷ་སྱ་བྷ་བ་ཏི། བདག་གི་དངོས་པོ་རྣམས་རྟག་པར་ཡོད་པར་བརྗོད་པར་མི་བྱ་སྟེ། རྐྱེན་རྣམས་ཚོགས་པ་ན་ཇི་ཙམ་ཆོས་ཀྱི་བདག་ཉིད་ཐོབ་པའོ། །འོ་ན་ཅི་ཡོད་པ་ཁོ་ན་རྐྱེན་རྣམས་ཚོགས་པ་ལ་འབྲས་བུ་འཕེན་པའི་དུས་སུ་འོངས་པ་སྐྱེད་ཅེས་བརྗོད་པར་བྱེད་ཅེ་ན། འབྲས་བུ་འཕངས་པ་ནི་སྐྱེས་པའོ། །འཕངས་ནས་ཡང་མི་འཕེན་པས་དེའི་ཕྱིར་མ་བསྟན་ཏེ། རྐྱེན་རྣམས་ནི་དེ་ལ་སྔར་ཡོད་པ་མ་ཡིན་པའི་བདག་ཉིད་ཀྱི་ཁྱད་པར་འགའ་ཡང་བྱེད་པ་མེད་དོ། །གང་གི་ཕྱིར་སྔར་མ་འོངས་པ་དང་འབྲས་བུ་འཕེན་པར་བྱེད། གང་ཞིག་སྔར་རྒྱུ་མེད་པ་དེ་ནི་ཕྱིས་ཀྱང་རྒྱུ་མེད་པ་ཉིད་དེ། དེ་ནི་ནམ་ཡང་རྐྱེན་མ་ཚང་པ་ཐོབ་པ་རྣམས་ལ་དུས་ཐམས་ཅད་དུ་ཡོད་པ་མ་ཡིན་པའི་ཕྱིར་དང༌། འཕེན་པའི་དངོས་པོ་ནི་འབྲས་བུ་ཡོད་པ་ཉིད་ཀྱི་ཕྱིར་ཞེས་བྱ་བ་ཞར་ལས་བྱུང་བས་ཆོག་སྟེ། འདི་ཉིད་འདས་པ་དང་མ་འོངས་པ་རྣམ་པར་ངེས་པའི་སྐབས་སུ་བབ་པས། དེ་ཉིད་དུ་རྒྱ་ཆེར་རྣམ་པར་དཔྱད་དོ། །མིང་གི་མཐའ་ནི་ཡི་གེ་སྟེ་ཡི་གེ་མེད་པའི་མིང་མེད་པའི་ཕྱིར་རོ། །དགུན་རྣམས་ཀྱི་ཟླ་བ་བཞི་ཞེས་འབྱུང་སྟེ། དགུན་སྨད་ཀྱང་གྲང་བར་འདྲ་བའི་ཕྱིར་དགུན་དུ་བཤད་དོ། །དཔྱིད་རྣམས་ཀྱི་ཟླ་བ་བཞི་ཞེས་བྱ་སྟེ། དཔྱིད་ཀྱང་དྲོ་བར་འདྲ་བར་སོས་ཀར་བཤད་
དོ། །དབྱར་ཟླ་བ་བཞི་ཞེས་བྱ་སྟེ། སྟོན་ཡང་ཆར་འབབ་པར་འདྲ་བའི་ཕྱིར་དབྱར་དུ་བཤད་དོ། །ཟླ་བ་ཕྱེད་དང་གཉིས་འདས་ནས། །ཞེས་བྱ་བ་ནི་འདི་ལ་ཕྱེད་ལྷག་པ་ཡོད་པས་ན་ཕྱེད་དང་གཉིས་སོ། །མཱ་སེ་ཞེས་ཐོབ་པ་ལ་མཱ་སི་ཞེས་བྱ་བའི་སྒྲ་སྦྱར་བ་ནི་མདོ་བཅིང་བའི་སྙན་ངག་གི་དབང་གིས་ཡིན་ནོ། །འདས་ནས་ཞེས་བྱ་བ་ནི་ཐལ་ནས་སོ། །དེ་ལྟར་སྤྱད་པས་ཟླ་བ་གཉིས་པའི་ཕྱོགས་ཕྱི་མ་ལ་ཞག་མི་ཐུབ་འདོར་བས་ལོ་ལ་ནི་ཞག་མི་ཐུབ་དྲུག་ཏུ་འགྱུར་རོ། །འགྲོ་བ་འཇིག་པ་ནི་འགྲོ་བ་ལྔ་ཅར་གཟུགས་ན་སྤྱོད་པའི་ལྷའི་འགྲོ་བ་གཅིག་ཏུ་འཇིག་པའོ། །དེའི་མཇུག་ཐོགས་སུ་ནི་ཁམས་འཇིག་སྟེ། ཁམས་འཇིག་པ་ནི་འགྲོ་བ་འཇིག་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །དེ་ལྟར་ན་སེམས་ཅན་ཞིག་མ་ཐག་ཏུ་སྣོད་འཇིག་སྟེ། སྣོད་ཀྱི་འཇིག་རྟེན་ནི་སེམས་ཅན་ཐམས་ཅད་ཀྱི་ལས་ཀྱི་དབང་གིས་གྲུབ་པའི་ཕྱིར་སེམས་ཅན་ཅིག་འདུག་ན་ཡང་སྣོད་འཇིག་པར་མི་འགྱུར་རོ། །དེ་ལས་ནི་ངེས་པར་འབྱུང་བ་ཞེས་བྱ་བ་ནི་གང་ཆགས་པའི་རྒྱུན་གནས་པ་དེ་ལས་ངེས་པར་འབྱུང་བ་སྟེ་འདའ་ཞེས་བྱ་བའི་དོན་ཏོ། །དེ་ལ་ནི་ཞུགས་པ་ཞེས་བརྗོད་པར་བྱའོ་ཞེས་བྱ་བ་ལས། དེ་ཞེས་བྱ་བ་ནི་འཇིག་པ་ལ་ཞུགས་ཞེས་བྱ་བ་སྟེ། གང་ཞིག་བརྩམས་ནས་ཆགས་པ་དང་གནས་པ་ལས་ངེས་པར་འབྱུང་བ་ཉིད་དེ། འཇིག་པ་རྩོམ་པའོ། །འཇིག་རྟེན་གཞན་དག་ཏུ་འཕེན་ཞེས་བྱ་བ་ནི། དེའི་གནས་སྐབས་སུ་ནི་སྣོད་ཀྱང་འཇིག་པར་མི་འགྱུར་བའོ། །གང་གི་ཚེ་དུད་འགྲོ་དག་ན་སེམས་ཅན་གཅིག་ཀྱང་མ་ལུས་པར་གྱུར་པ་ཞེས་བྱ་བ་ནས་བཟུང་སྟེ། འཇིག་རྟེན་གྱི་ཁམས་གཞན་དག་ཏུ་འཕེན་པར་འགྱུར་ཏེ་ཞེས་བྱ་བའི་བར་དུ་ཐམས་ཅད་བརྗོད་པར་བྱའོ། །ཡི་དགས་རྣམས་ཀྱང་དེ་དང་འདྲའོ། །མི་དང་ལྷན་ཅིག་རྒྱུ་བ་རྣམས་ཞེས་བྱ་བ་ནི་དེ་དག་ནི་མི་རྣམས་དང་ཐུན་མོང་བའི་ལོངས་སྤྱོད་དུ་འགྱུར་བའི་ལས་དག་གིས་མངོན་པར་བསྒྲུབ་པའི་ཕྱིར་རོ། །ལྷ་དང་ལྷན་ཅིག་རྒྱུ་བ་རྣམས་ལ་ཡང་དེ་བཞིན་དུ་བརྗོད་པར་བྱའོ། །ཆོས་ཉིད་ཀྱིས་ཐོབ་པ་ཞེས་བྱ་བ་ལ་ཆོས་ཉིད་ནི་དེའི་ཚེ་བསམ་གཏན་གྱི་ས་བོན་དུས་ཐོག་མ་མེད་པ་ནས་
འཇུག་པ་ཐོབ་པའོ། །གཞན་དག་ན་རེ་ཆོས་ཉིད་ནི་དགེ་བའི་རྩ་བ་ཤས་ཆེན་པོ་ཡིན་ཏེ། དེའི་ཚེ་དགེ་བའི་ཆོས་རྣམས་འཇུག་པ་ཐོབ་པར་འགྱུར་བའི་ཕྱིར་རོ་ཞེས་ཟེར་རོ། །དེ་ན་འདོད་ཆགས་དང་བྲལ་བ་མེད་པའི་ཕྱིར་རོ་ཞེས་བྱ་བ་ནི་འདོད་ཆགས་དང་བྲལ་བ་མེད་པར་ཚངས་པའི་འཇིག་རྟེན་དུ་སྐྱེ་བ་མེད་དོ་ཞེས་སྟོན་པའོ། །འདི་ཉིད་ནས་ཀུན་ནས་ཞེས་བྱ་བ་ནི་གླིང་བཞི་ཀུན་ནས་སོ། །གཞན་དག་ན་རེ་ཛམྦུའི་གླིང་ཀུན་ནས་ཏེ། ལས་ཀྱི་ལམ་ཤས་ཆེ་བའི་ཕྱིར་རོ་ཞེས་ཟེར་རོ། །དེའི་ལས་ཀྱི་འཕེན་པ་རྣམས་ཞེས་བྱ་བ་ནི། སྣོད་སྐྱེད་པར་བྱེད་པའི་ལས་རྣམས་ཟད་པའོ། །བར་དུ་བསྲེག་པར་འགྱུར་རོ་ཞེས་བྱ་བ་ནི་ཚིག་པར་འགྱུར་རོ་ཞེས་བྱ་བའི་ཐ་ཚིག་གོ །རིས་མི་མཐུན་པའི་སྐྱོན་དག་ཅེས་བྱ་བ་ནི་ཉེ་བར་འཚེ་བ་མེ་ལ་སོགས་པ་མེ་འདྲ་བ་དག་གོ་ཞེས་བྱ་བའི་དོན་ཏོ། །གལ་ཏེ་དེ་ལྟ་ཡིན་ན་ནི་འོ་ན་ཇི་ལྟར་རབ་ཏུ་ འབར་བ ་དེ་ཉིད་ལས་ཞེས་བྱ་བ་རྒྱས་པར་སྨྲས་ཏེ་ཞེ་ན། དེའི་ཕྱིར་དེ་དང་འབྲེལ་པ་ལས་བྱུང་བ་ཉིད་ཀྱི་ཕྱིར་ཞེས་བྱ་བ་རྒྱས་པར་སྨོས་ཏེ། གཟུགས་ན་སྤྱོད་པའི་མེ་ལྕེ་དེ་ནི་འདོད་པ་ན་སྤྱོད་པའི་མེ་ལྕེ་དང་འབྲེལ་ཏེ་འབྱུང་བ་ཡིན་ཏེ། དེའི་ཕྱིར་རབ་ཏུ་ འབར་བ ་དེ་ཉིད་ལས་ཞེས་དེ་སྐད་དུ་བཤད་དོ། དེ་བཞིན་དུ་འཇིག་པ་གཞན་ལ་ཡང་ཅི་རིགས་པར་བརྗོད་པར་བྱའོ་ཞེས་བྱ་བ་ནི་ཆུས་འཇིག་པ་དང༌། རླུང་གིས་འཇིག་པ་དག་ལ་སྟེ། བསམ་གཏན་དང་པོ་དང་གཉིས་པའི་ས་པ་ཁོ་ནའི་ཆུའི་ཁམས་ཡིན་གྱི། བསམ་གཏན་དང་པོ་དང་གཉིས་པ་དག་ལས་ས་གཞན་པ་ནི་མ་ཡིན་ནོ། །ཐམས་ཅད་སྐལ་བ་མི་མཉམ་པའི་མ་ཡིན་པས་དེ་ལྟར་ན་རླུང་ཡང་བསམ་གཏན་དང་པོ་དང་གཉིས་པ་དང་གསུམ་པའི་ས་པ་ཁོ་ན་ཡིན་གྱིས་གཞན་པ་ཐམས་ཅད་མ་ཡིན་པ་ཉིད་དོ། །རྣམ་པ་གཅིག་ཏུ་ན་དེ་བཞིན་དུ་འཇིག་པ་གཞན་དག་ལ་ཡང་ཞེས་བྱ་བ་ནི་ཇི་ལྟར་མེས་འཇིག་པ་དག་ཏུ་འགྲོ་བ་དང་ཁམས་དང་སེམས་ཅན་དང་སྣོད་འཇིག་པ་བཤད་པ་དེ་བཞིན་དུ་ཆུ་དང་རླུང་གིས་འཇིག་པ་དག་ལ་ཡང་ཚུལ་དེ་ཉིད་ཀྱི་སྣོད་སྟོང་པར་རང་གི་ས་པའི་ཆུའི་ཁམས་ཀྱིས་རིམ་གྱིས་སྣོད་ཀྱི་འཇིག་རྟེན་ལ་ན་ཚྭ་ལ་བྱ་བ་བཞིན་དུ་འཇུ་བར་བྱེད་ཅིང་དེ་ཉིད་དུ་མི་སྣང་བར་བྱེད་དོ་ཞེས་
བྱ་བ་དང༌། རང་གི་ས་པའི་རླུང་གི་ཁམས་ཁོ་ནས་རིམ་གྱིས་སྣོད་ཀྱི་འཇིག་རྟེན་འཐོར་བར་བྱེད་ཅིང་རྣམ་པར་འཇིག་པར་བྱེད་དེ་དེ་ཉིད་ཀྱིས་མི་སྣང་བར་བྱེད་དོ་ཞེས་བྱ་བའི་བར་བརྗོད་པར་བྱའོ་ཞེས་བྱ་བའོ། །དེ་ལས་ངེས་པར་བྱུང་བ་ཞེས་བརྗོད་པར་བྱ་བ་ནི་ཡོངས་སུ་རྫོགས་ཞེས་བྱ་བའི་དོན་ཏོ། །དེ་ནི་ཉེ་བར་འོངས་པར་བརྗོད་པར་བྱའོ་ཞེས་བྱ་བ་ནི་འཇུག་ཅེས་བྱ་བའི་ཐ་ཚིག་གོ །ཇི་སྐད་བཤད་པའི་རིམ་པ་དང་ཚུལ་དུ་ཞེས་བྱ་བ་ནི་ཇི་སྐད་བཤད་པའི་རིམ་པ་དང་ཇི་སྐད་བཤད་པའི་ཚུལ་ཞེས་བྱ་བའི་དོན་ཏོ། །དེ་ལ་ཇི་སྐད་བཤད་པའི་རིམ་པ་ནི་རླུང་གི་དཀྱིལ་འཁོར་དང༌། ཆུའི་དཀྱིལ་འཁོར་ནས་རི་རབ་ལ་སོགས་པའི་བར་རོ། །ཇི་སྐད་བཤད་པའི་ཚུལ་ནི་ཚུལ་གང་ཞིག་གང་ལ་བཤད་པ་སྲིད་དང༌། རྒྱ་དང༌། ཚད་དང༌། དབྱིབས་ཀྱི་མཚན་ཉིད་དོ། །དེའི་འོག་ཏུ་ན་འཐབ་བྲལ་བའི་བར་དུའོ་ཞེས་བྱ་བས་ནི་ནམ་མཁའ་ལ་གནས་པའི་གཞལ་མེད་ཁང་རྣམས་ཀྱིས་མཚམས་སྟོན་ཏོ། །དེ་ཙམ་གྱིས་ནི་འདི་ལྟ་སྟེ། སྣོད་ཆགས་པས་འཇིག་རྟེན་ཞེས་རྒྱ་ཆེར་འབྱུང་བ་ལ། སེམས་ཅན་གྱི་དབང་གིས་འཇིག་པ་དང་ཆགས་པ་དང་གནས་པ་མངོན་ནོ། །དེ་ལྟ་མོད་ཀྱི་གང་གི་ཚེ་སེམས་ཅན་གཅིག་ཆགས་པ་དེའི་ཚེ་སྣོད་རྣམས་ཆགས་པའོ། །བྲལ་བ་ལས་འདུས་པ་ནི་ཆགས་པའོ། །གང་གི་ཚེ་ཡང་འོད་གསལ་བ་རྣམས་ལས་སེམས་ཅན་ཞིག་འདུས་ནས་ཆགས་ཏེ་དེའི་ཚེ་སྣོད་རྣམས་ཆགས་ཏེ། ཁ་ཅིག་ཀུན་ཏུ་འཇུག་པའོ་ཞེས་ཟེར་རོ། །འདིར་སྣོད་རྣམས་འཇུག་པ་དང༌། ལྡོག་པ་དག་ནི་འཇིག་པ་དང་སྐྱེ་བ་དག་ཏུ་དགོངས་སོ་ཞེས་འདི་བསམ་པར་བྱའོ། །དེ་ནས་སེམས་ཅན་གང་ཡང་རུང་བ་ཞིག་ཅེས་བྱ་བ་ལ། འདི་ནི་ཚངས་པ་ཆེན་པོ་སྟེ། དེའི་ཕྱིར་ན་ཚངས་པ་ཆེན་པོ་ཐམས་ཅད་ནི་སོ་སོའི་སྐྱེ་བོ་ཡིན་ཏེ། འཕགས་པ་ལ་འོག་ཏུ་འགྲོ་བ་མི་སྲིད་པའི་ཕྱིར་རོ། །དེ་ཉིད་ཀྱི་ཕྱིར་གཅིག་གིས་བར་མེད་པར་སྐྱེ་བ་གཉིས་སུ་ཚངས་པ་ཆེན་པོ་ཉིད་བྱེད་པ་མ་ཡིན་ནོ། །གལ་ཏེ་ཚངས་པ་ཆེན་པོ་ཉིད་ན་ནངས་ཀྱི་ཕྱི་ནས་འཆི་འཕོའོ་ཞེས་བཤད་ལ། འོད་གསལ་བ་རྣམས་ཀྱི་ཚེ་ཡང་བསྐལ་པ་ཆེན་པོ་བརྒྱད་ཡིན་ཞིང་བར་གྱི་བསྐལ་པ་ཉི་ཤུ་
ན་ཡང་སླར་ཆགས་པས་དེའི་ཕྱིར་དེ་འོད་གསལ་བའི་ས་པའི་ཚེ་མ་ཟད་པར་དེ་ནས་འཆི་འཕོ་བར་འགྱུར་ཞེ་ན། དེ་ན་བར་ཆད་དུ་འཆི་བ་ཡོད་དེ། བསོད་ནམས་རླབས་ཆེན་པོ་ལས་སྐྱེས་པ་དག་ནི་ཚེ་ལོ་བསྐལ་པ་ཆེན་པོ་བརྒྱད་པ་ཡིན་ནོ། །གང་བར་གྱི་བསྐལ་བ་ཉི་ཤུ་ཞེས་བྱ་བ་འདི་ནི་ཆེས་ཉུང་བ་ཡིན་ནོ། །ཁ་ཅིག་ན་རེ་དེ་སྐྱེ་བ་དེ་ནི་གཞན་ཞིག་ཁོ་ན་ཡིན་ནོ་ཞེས་ཟེར་རོ། །གཞན་དག་ན་རེ་ལས་སྣ་ཚོགས་པས་འདི་ལ་ངེས་པ་མེད་དོ་ཞེས་ཟེར་རོ། །གང་མཇུག་ཏུ་འཇིག་པ་དེ་དག་དང་པོར་ཆགས་ཞེས་བྱ་བ་ནི་དཔེར་ན་མེས་འཇིག་པ་དང་ནི་ཚངས་པའི་གཞལ་མེད་ཁང་བཞིན་ནོ། །འདི་ནི་ཆོས་ཉིད་ཡིན་ནོ་ཞེས་བྱ་བ་ནི་དགེ་བའི་ལས་སྔོན་བསགས་པ་རྣམས་ཀྱི་ཡོངས་སུ་འགྱུར་བའི་ཁྱད་པར་ཡིན་ནོ་ཞེས་བྱ་བའོ། །འཇིག་རྟེན་ཆགས་པ་ན་ཞེས་བྱ་བ་ནི་གང་གི་ཚེ་ཆགས་པར་རྩོམ་པ་ན་སྟེ། སེམས་ཅན་དང་སྣོད་རྣམས་ཆགས་པ་ན་བར་གྱི་བསྐལ་པ་ཉི་ཤུར་འགྱུར་རོ། །ཚེ་དཔག་ཏུ་མེད་པ་ཉིད་ནས་འགྲིབ་པ་ནི་ཞེས་བྱ་བ་ནི་དམྱལ་བའི་སྲིད་པ་ནས་བརྩམས་ནས་སོ། །ཇི་ལྟར་ཞེ་ན། གང་གི་ཚེ་ཚེ་དཔག་ཏུ་མེད་པ་དག་ཤི་སྟེ། དམྱལ་བ་དག་ཏུ་སྐྱེ་བ་དག་ཏུ་སྐྱེ་བ་དེ་ནས་བཟུང་སྟེ་བརྩིའོ། །དེ་ལྟར་ན་འདི་ནི་ཆགས་ནས་གནས་པ་རྣམས་ཀྱི་བར་གྱི་བསྐལ་པ་དང་པོ་ཡིན་ནོ་ཞེས་བྱ་བ་འདི་མི་འགལ་ལོ། །དེ་ནས་ཡར་སྐྱེ་མར་འདྲི་བའི་ཞེས་བྱ་བ་ནི་བཅོ་བརྒྱད་པོ་དེ་དག་རེ་རེ་ཡང་ཡར་སྐྱེ་བ་དང་མར་འབྲི་བའི་རང་བཞིན་ནོ། །ཡང་ཇི་ལྟར་ཡར་སྐྱེ་བའི་རང་བཞིན་དང་མར་འབྲི་བའི་རང་བཞིན་ནི་ཡར་སྐྱེ་བ་དང་མར་འབྲི་བའི་རང་བཞིན་ཅན་གྱི་བསྐལ་པ་རྣམས་དང་དུས་མཉམ་པར་འགྱུར་ཞེ་ན། མགྱོགས་པ་དང་མགྱོགས་པ་མ་ཡིན་པར་འགྲོ་བའི་ཁྱད་པར་ལས་ཏེ། འདི་ལྟར་དང་པོ་དང་མཐའི་བསྐལ་པ་གཉིས་ནི་དལ་གྱིས་འགྲོ་ལ་བར་མ་བཅོ་བརྒྱད་ནི་མགྱོགས་པར་འགྲོ་བས་ཐམས་ཅད་དུས་མཉམ་པར་འགྱུར་རོ། །ཆགས་པ་རྣམས་ཁོ་ན་ལ་ཡར་སྐྱེ་བ་དང༌། མར་འབྲི་བ་མངོན་གྱི་གཞན་གྱི་ཚེ་ནི་མ་ཡིན་ནོ། །དེ་དག་ལ་བར་གྱི་བསྐལ་པ་རྣམ་པར་གཞག་ཅེ་ན། དེའི་ཕྱིར་གལ་ཏེ་ཡང་དེའི་ཚེ་ཡར་ཞེས་བྱ་བ་རྒྱས་པར་སྨོས་སོ། །བསྐལ་པ་ཕུང་པོ་ལྔའི་རང་བཞིན་ཡིན་ནོ་ཞེས་བྱ་བ་ནི། དེ་དག་ཉིད་དུས་གཏམ་གཞི་དང༌། །ཞེས་ཁམས་ཀྱི་མཛོད་ཉིད་ལས་བཤད་དེ་
དུས་མང་པོ་ནི་བསྐལ་པ་ཡིན་ནོ། །སིལ་བུ་ཞེས་བྱ་བ་ནི་ལུང་དག་གི་ནང་དུ་མ་འདུས་པའི་ཕྱིར་རོ། །གཞན་དག་ལ་ལྟ་བ་སྐྱེས་ཏེ་ཞེས་བྱ་བ་ནི་འདིར་ལྟ་བས་ཞེས་བྱ་བའི་སྒྲས་སྙིང་རྗེས་བཤད་ཀྱི་སྲེད་པ་ནི་མ་ཡིན་ནོ། །རིགས་གཞན་ཁོ་ན་ཞེས་བྱ་བ་ནི་སྐྱེ་མཆེད་དྲུག་གི་ཁྱད་པར་རམ་དགེ་བའི་རྩ་བ་དག་གོ །དམན་པ་དེ་དང་དེའི་ཐབས་ཀྱིས་ཞེས་བྱ་བ་རྒྱས་པར་འབྱུང་སྟེ། འདིར་ནི་སོ་སོའི་སྐྱེ་བོ་དང་འཕགས་པ་ཉན་ཐོས་དང་བྱང་ཆུབ་སེམས་དཔའ་རྣམས་ཀྱི་འཇུག་པ་བཤད་དོ། །དེའི་ཚེ་སྙིགས་མ་ལྔ་པོ་འདི་ལྟ་སྟེ་ཞེས་བྱ་བ་ནི་ཤིན་ཏུ་ལྷག་པ་ནི་ཆེས་བླ་ལྷག་པའོ། །འདིར་ཚེ་ཉིད་ཐ་ཆད་ཡིན་ཞིང༌། ངན་སྙིགས་སུ་གྱུར་པ་ནི་སྙིགས་མ་དག་གོ །དུས་ཀྱི་སྙིགས་མ་ལ་སོགས་པ་ཡང་དེ་དང་འདྲའོ། །གོ་རིམས་བཞིན་དུ་ཞེས་བྱ་བ་ནི་ཚེའི་སྙིགས་མས་ནི་སྲོག་རྒུད་པར་བྱེད་དེ་གནས་པའི་དུས་ཐུང་དུ་འཕེན་པར་བྱེད་པའི་ཕྱིར་རོ། །དུས་ཀྱི་སྙིགས་མས་ནི་ཡོ་བྱད་རྒུད་པར་བྱེད་དེ། འབྲུ་ལ་སོགས་པ་རྣམས་རོ་དང་ནུས་པ་དང་སྨིན་པ་དང་མཐུ་ཆུང་བར་འགྱུར་བའི་ཕྱིར་དང༌། དུས་ཀྱང་དེའི་བདག་ཉིད་ཡིན་པའི་ཕྱིར་རོ། །གཉིས་ཀྱིས་ནི་དགེ་བའི་ཕྱོགས་རྒུད་པར་བྱེད་དོ་ཞེས་བྱ་བ་ནི་ཉོན་མོངས་པ་དང་ལྟ་བའི་སྙིགས་མ་དག་གིས་སོ། །ཇི་ལྟར་ཞེ་ན་དེའི་ཕྱིར་འདོད་པའི་བསོད་ནམས་དང་བདག་ངལ་བ་ཞེས་སྨོས་ཏེ། འདོད་པའི་བདེ་བ་ཉིད་འདོད་པའི་བསོད་ནམས་ཏེ་དེར་ཆགས་པའི་ཕྱིར་རོ། །ཡང་ན་འདོད་པའི་བསོད་ནམས་ནི་འདོད་པའི་སྲེད་པ་སྟེ། དེས་འདོད་པའི་བདེ་བ་ལ་ཆགས་པར་བྱེད་ཅེས་བྱ་བའི་ཐ་ཚིག་གོ །བདག་ངལ་བ་ནི་བདག་ལ་ཉེ་བར་གདུང་བ་སྟེ་བདག་གཟིར་བའོ། །དེ་དག་བརྩམ་པ་ནི་བརྟེན་པ་སྟེ་དེ་དག་གོམས་པར་བྱེད་པའོ། འདི་སྐད་བཤད་པར་འགྱུར་ཏེ། གོ་རིམས་བཞིན་དུ་འདོད་པའི་བདེ་བ་དང༌། བདག་ལ་གདུང་བ་བརྟེན་པའི་དབང་དུ་བྱས་པ་སྟེ། ཆེད་དུ་བྱས་ཤིང་བརྩམས་ནས་ཉོན་མོངས་པ་དང་ལྟ་བའི་སྙིགས་མ་གཉིས་ཀྱིས་དགེ་བའི་ཕྱོགས་རྒུད་པར་བྱེད་དོ། །ཡང་ན་ཁྱིམ་པ་དང་རབ་ཏུ་བྱུང་བའི་ཕྱོགས་ཀྱི་ཞེས་བྱ་བ་ཡང་གོ་རིམས་བཞིན་ཡིན་ཏེ། དེ་གཉིས་ཀྱིས་ནི་དགེ་བའི་ཕྱོགས་
རྒུད་པར་བྱེད་དེ་ཞེས་བྱ་བ་དང་སྦྱར་རོ། །འདི་ལྟར་ཁྱིམ་པ་རྣམས་ནི་འདོད་པ་གཙོ་ཆེ་བ་ཡིན་ལ། རབ་ཏུ་བྱུང་བ་རྣམས་ནི་ལྟ་བ་གཙོ་ཆེ་བ་ཡིན་ནོ། །གཅིག་གིས་ནི་ལུས་རྒུད་པར་བྱེད་དེ་ཞེས་བྱ་བ་ནི་ལྔ་པ་སེམས་ཅན་གྱི་སྙིགས་མའི་བྱ་བ་བཤད་དོ། །གཞན་དག་ན་རེ། ཡར་སྐྱེ་བའི་བསྐལ་པ་ལ་སངས་རྒྱས་རྣམས་མི་འབྱུང་སྟེ། དེའི་ཚེ་སེམས་ཅན་རྣམས་བདེ་བ་ཤེས་ཆེ་བས་སྐྱེ་བར་དཀའ་བ་དང༌། ལེགས་པར་སྤྱད་པ་སྤྱོད་པས་ངན་སོང་དུ་གཞོལ་བར་མི་འགྱུར་བས་སོ་ཞེས་ཟེར་རོ། །ཅིའི་ཕྱིར་ཆེས་ཤིན་ཏུ་མར་འགྲིབ་པའི་དུས་སུ་མི་འབྱུང་ཞེ་ན། དེའི་དུས་སུ་སངས་རྒྱས་ཀྱི་མཛད་པ་མཐའ་དག་མི་སྤྱོད་པའི་ཕྱིར་ཏེ། སྐལ་བ་དང་དབང་དང་ཚེ་དང༌། སྤྲོ་བ་དང་ཏིང་ངེ་འཛིན་ཏེ་ལུས་འཚོ་བའི་འདུ་བྱེད་དུ་གྱུར་བ་ལྔ་པོ་ལ་རག་ལས་པའི་གདུལ་བྱ་མེད་པས་དགོས་པ་ཆུང་བའི་ཕྱིར་མི་འབྱུང་ངོ༌། །ཏཻ་ར་པི་དྲྀཥྚིཿ་འདིར་དགོས་པ་ཅི་ཞེ་ན་དེ་ལ་འདི་སྐད་བརྗོད་པར་བྱ་སྟེ། སྙིགས་མ་ལྔས་ཉེ་བར་བཅོམ་པས་དེའི་ཚེ་གདུལ་བྱ་ཤིན་ཏུ་ཉུང་ངུ་ལས་མི་གནས་ཏེ་དེས་ན་མར་འབྲི་བའི་བརྒྱ་མན་ཆད་དུ་དགོས་པ་མེད་པའི་ཕྱིར་མི་འབྱུང་ངོ༌། །རང་སངས་རྒྱས་རྣམས་ནི་ཡར་སྐྱེ་བ་ན་ཡང་འབྱུང་སྟེ་བདག་ཉིད་དེ་རྣམས་ཀྱིས་ཀྱང་མཐོང་བས། ཀྱི་དབང་དུ་བྱས་ཏེ་ཞུགས་པའི་ཕྱིར་རོ། །ཉན་ཐོས་སྔོན་དུ་འགྲོ་བ་ཞེས་བྱ་བ་ནི་གང་དག་སངས་རྒྱས་གཞན་གྱི་ཚེ་བདེན་པ་མཐོང་བ་རྣམས་སོ། །སོ་སོ་སྐྱེ་བོ་སྔོན་དུ་འགྲོ་བ་དག་ཀྱང་ཞེས་བྱ་བ་ནི་ཚོགས་ན་སྤྱོད་བ་དག་གོ །གང་དག་གཞན་དུ་ངེས་པར་འབྱེད་པའི་ཆ་དང་མཐུན་པ་རྣམས་སྐྱེད་པ་ཞེས་བྱ་བ་ནི་གང་དག་གིས་སྔར་སངས་རྒྱས་གཞན་གྱི་ཚེ་དྲོ་བར་གྱུར་པ་ལ་སོགས་པ་ངེས་པར་འབྱེད་པའི་ཆ་དང་མཐུན་པ་རྣམ་པ་གསུམ་པ་སྐྱེད་པའོ། །དེའི་སྤྱོད་ལམ་བསྟན་པས་ཞེས་བྱ་བ་ནི་རང་སངས་རྒྱས་ཀྱི་སྤྱོད་ལམ་སྐྱིལ་མོ་ཀྲུང་བཅའ་བ་ལ་སོགས་པ་བསྟན་པས་ཞེས་བྱ་བའི་དོན་ཏོ། །འཕགས་པ་དག་གཅིག་ཡིན་ན་ནི་ཞེས་བྱ་བ་རྒྱས་པར་འབྱུང་སྟེ། འཕགས་པ་རྣམས་ཀྱིས་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལྟ་བ་སྤང་པའི་ཕྱིར་རོ། །བྱང་ཆུབ་ཀྱི་ཚོགས་དག་ལ་ཞེས་བྱ་བ་ནི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དག་སྟེ། སྤྱད་པ་ནི་སྦྱོར་བ་
བྱས་པའོ། །ཆོས་སྟོན་པར་སྤྱོད་དོ་ཞེས་བྱ་བ་ནི་གལ་ཏེ་སོ་སོ་ཡང་དག་པར་རིག་པ་མ་ཐོབ་ཏུ་ཟིན་ཀྱང་སྙམ་དུ་བསམས་པའོ། །བྱ་བ་ཉུང་བ་ནི་འདོད་པ་ཆུང་བའོ། །རྣམ་པར་གཡེང་བ་དང་འདུ་འཛིས་སྐྲག་པས་འཁོར་ཡོངས་སུ་གཟུང་བར་འགྱུར་བ་སྤང་བར་བྱ་བའི་ཕྱིར་ཞེས་བྱ་བ་ལ། འཁོར་ཡོངས་སུ་གཟུང་བར་གྱུར་ན་ནི་རྣམ་པར་གཡེང་བ་དང་འདུ་འཛི་གཉིས་སྤང་བར་མི་ནུས་སོ། །དེ་དག་རྣམ་པར་གཡེང་བ་དང༌། འདུ་འཛིས་སྐྲག་པ་ནི་སྔོན་གོམས་པའི་དབང་གིས་སོ། །བསེ་རུ་ལྟ་བུ་ནི་ཁྱིམ་པ་དང་རབ་ཏུ་བྱུང་བ་རྣམས་དང་མ་འདྲེས་པར་གནས་པ་སྟེ། བསེའི་རྭ་ལྟར་གཉིས་པ་མེད་པའི་ཕྱིར་རོ། །དེ་ནི་གླིང་གཅིག་གི་བདག་པོ་ཡིན་ནོ་ཞེས་བྱ་བ་ནི་ཛམྦུའི་གླིང་གི་བདག་པོའོ། །དེ་ནི་གཉིས་ཀྱིའོ་ཞེས་བྱ་བ་ནི་ཛམྦུའི་གླིང་དང་ཤར་གྱི་ལུས་འཕགས་པོ་གཉིས་ཀྱིའོ། །དེ་ནི་གསུམ་གྱིའོ་ཞེས་བྱ་བ་ནི་བྱང་གི་སྒྲ་མི་སྙན་མ་གཏོགས་པའི་འོ། །དེ་ནི་གླིང་བཞི་ལ་ཞེས་བྱ་བ་ནི་བྱང་གི་སྒྲ་མི་སྙན་གྱི་གླིང་དང་བཅས་པ་ལའོ། །འདི་ནི་གདགས་པ་ལས་བསྟན་པ་ཡིན་ནོ་ཞེས་བྱ་བས་ནི་མདོ་ལས་མ་ཡིན་ནོ་ཞེས་སྟོན་ཏོ། །མདོ་དང་འགལ་བ་སྤང་བའི་ཕྱིར་མདོ་ལས་ནི་གཙོ་བོ་སྨོས་པའི་ཕྱིར་ཞེས་བྱ་བ་རྒྱས་པར་འབྱུང་ངོ༌། སྔ་ཕྱི་མེད་པར་ཞེས་བྱ་བ་ནི་སྔ་མ་དང་ཕྱི་མ་སྟེ། འཕྱི་བ་མ་ཡིན་གྱི། འོ་ན་ཅི་ཞེ་ན་ལྷན་ཅིག་ཅེས་བྱ་བའི་དོན་ཏོ། །གཉིས་སུ་འགྱུར་བ་གཅིག་སྐྱེའོ། །ཞེས་བརྗོད་པར་འགྱུར་རོ། །སངས་རྒྱས་ཀྱི་མཐུ་ཐོགས་པ་ཡོད་པར་འགྱུར་དུ་འོང་ངོ་ཞེས་བྱ་བ་ནི་རྒྱུ་སྨྲས་པ་སྟེ། མཐུ་ལ་ཐོགས་པ་ཡོད་ན་ནི་སངས་རྒྱས་རྣམས་ཅིག་ཅར་འབྱུང་བ་འབྲས་བུ་དང་བཅས་པར་འགྱུར་གྱི་གཞན་དུ་ནི་མ་ཡིན་ནོ། །དེ་ནི་གཞན་གྱིས་ཀྱང་མི་སྤྱོད་དོ་ཞེས་བྱ་བ་ནི་སངས་རྒྱས་རྣམས་ནུས་མཐུ་མཚུངས་པའི་ཕྱིར་རོ། །མཉམ་ཞིང་མཉམ་པ་ཞེས་བྱ་བ་ནི་སེམས་ཅན་ཐམས་ཅད་དང་མི་མཉམ་པ་དག་དང་མཉམ་པས་མཉམ་ཞིང་མཉམ་པའོ། །གཞན་དག་ན་རེ། ཤིན་ཏུ་མཉམ་པ་ནི་མཉམ་ཞིང་མཉམ་པ་སྟེ་གྲང་ཞིང་གྲང་བ་བཞིན་ནོ། །ཉོན་མོངས་པའི་སྒྲིབ་པ་དང་བྲལ་བས་མཉམ་པ་ཡོད་མོད་ཀྱི་མཉམ་ཞིང་མཉམ་པ་ནི་མ་ཡིན་ཏེ་ཤེས་བྱའི་སྒྲིབ་པ་དང་མ་བྲལ་བའི་ཕྱིར་རོ། །
སྡེ་པ་གཞན་དག་ནི་འཕགས་པ་དགེ་འདུན་ཕལ་ཆེན་པ་ལ་སོགས་པ་རྣམས་སོ། །འབྱུང་བ་ལ་གེགས་བྱེད་པ་ཡང་འགའ་ཡང་མེད་ཅེས་བྱ་བ་ནི་ཚོགས་བསགས་པ་རྣམས་འཇིག་རྟེན་གྱི་ཁམས་གཞན་དག་ཏུ་འབྱུང་བ་ལའོ། །འཇིག་རྟེན་གྱི་ཁམས་དག་ཀྱང་མཐའ་ཡས་པས་ཞེས་བྱ་བས་ནི་དེར་ནི་གཞན་གྱིས་ཀྱང་མི་སྤྱོད་དོ་ཞེས་གང་སྨྲས་པ་དེ་ཡོངས་སུ་སྤངས་པ་ཡིན་ཏེ། ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་རིམ་གྱིས་སྤྱོད། རིམ་གྱིས་འཇུག་ན་ནི་འདུལ་བའི་དུས་ལས་འདའ་བར་འགྱུར་རོ། །ཁམས་ཀྱི་རྒྱལ་ཕྲན་ནི་རྒྱལ་ཕྲན་དག་གོ ། ཕན་ཚུན་མཚོན་བརྩམས་པ་ཞེས་བྱ་བ་ནི་གཟས་པ་ཞེས་བྱ་བའི་དོན་ཏོ། །ཁྱིམ་བདག་རིན་པོ་ཆེ་ནི་མཛོད་ཀྱི་སྤྱན་ནོ། །བློན་པོ་རིན་པོ་ཆེ་ནི་དཔུང་གི་སྤྱན་ནོ། །དེ་དང་འབྲེལ་པ་ནི་འཁོར་ལོས་སྒྱུར་བ་དང་འབྲེལ་བ་སྟེ། ལས་གང་ཡིན་པ་དང་ངོ༌། ལས་དེ་ནི་དེ་དང་འབྲེལ་པར་འགྱུར་བའོ། །ཤིན་ཏུ་ཡུལ་ན་གནས་པ་ཞེས་བྱ་བ་ནི། སྐུའི་ཡུལ་གང་དང་གང་ཞིག་ཏུ་འབྱུང་བར་འགྱུར་བ་དེ་ནི་དེ་ཁོ་ནར་གནས་པའི་ཕྱིར་རོ། །ཤིན་ཏུ་གསལ་ བ་ནི་ཤིན་ཏུ་འབར ་བའི་ཕྱིར་དང་ཡིད་འཕྲོག་པའི་ཕྱིར་རོ། །ཤིན་ཏུ་རྫོགས་པ་ཞེས་བྱ་བ་ནི་གང་ཞིག་གི་དེ་སྙེད་ཡོད་པ་སྟེ། མ་ཚང་བ་མི་མངའ་བའི་ཕྱིར་རོ། །འཁོར་ལོས་སྒྱུར་བའི་ཞར་ལ་འདི་ཡང་དཔྱད་པར་བྱ་སྟེ། ཡང་ཅི་བསྐལ་པ་དང་པོ་པའི་མི་རྣམས་ཀྱང་ཞེས་བྱ་བ་རྒྱ་ཆེར་འབྱུང་ངོ༌། །གཟུགས་དང་ལྡན་པ་ནི་ཁ་དོག་དང་དབྱིབས་ལེགས་པའོ། །ཡིད་ཙམ་ལས་སྐྱེས་པའི་ཕྱིར་ཡིད་ལས་བྱུང་བའོ། །ལག་པ་དང་རྐང་པ་དང་དེ་དག་གི་སོར་མོ་ལ་སོགས་པ་དང་ལྡན་པའི་ཕྱིར་ཡན་ལག་དང་ཉིང་ལག་ཐམས་ཅད་དང་ལྡན་པའོ། །དབང་པོ་ལྔ་ཆར་ཚོགས་པའི་ཕྱིར་དབང་པོ་མ་ཚང་བ་མེད་པའོ། །ཞར་བ་དག་འཁྲུལ་པ་ལ་སོགས་པ་མེད་པའི་ཕྱིར། དབང་པོ་ངན་པ་མ་ཡིན་པའོ། །ཡིད་དུ་འཐད་པའི་ཕྱིར་དང་ནད་དང་བྲལ་བའི་ཕྱིར་མཛེས་པའོ། །རྒ་བ་མེད་པའི་ཕྱིར་ཁ་དོག་ལ་གནས་པའོ། །ཚེ་རིང་བ་ནི་གང་གི་ཕྱིར་ཡུན་རིང་པོར་གནས་པའི་ཕྱིར་རོ། །སྦྲང་རྩིའི་རོ་བྲོ་བ་ཞེས་བྱ་བ་ནི། འདི་ལ་སྦྲང་རྩི་ལྟ་བུའི་རོ་
བྲོ་བ་ཡོད་པས་སྦྲང་རྩིའི་རོ་བྲོ་བའོ། །ཚུལ་བཞིན་མ་ཡིན་པ་ཡིད་ལ་བྱེད་པ་ཉིད་ཆུ་སྲིན་གྱི་ཁ་ཡིན་པ་དེའི་ཁམ་དུ་སོང་སྟེ། དེ་ལ་རག་ལས་པས་འཇུག་པའི་ཕྱིར་དང༌། དེར་འབབ་པའི་ཕྱིར་རོ་ཞེས་བྱ་བའི་དོན་ཏོ། །འདོད་པ་ཉིད་འབྱུང་པོའི་གདོན་ཡིན་ཏེ། ཡང་དག་པ་མ་ཡིན་པའི་བྱ་བའི་རྒྱུ་ཡིན་པའི་ཕྱིར་རོ། །དེས་རློམ་པ་ནི་དམ་པ་མ་ཡིན་པའི་བྱ་བ་ལ་འཇུག་པ་ན་དེ་ལ་རག་ལས་པའི་ཕྱིར་རོ། །རྒྱལ་རིགས་ཀྱི་ཞར་ལ་འདི་ཡང་དཔྱད་པར་བྱ་སྟེ། དེ་ལ་གང་དག་ཁྱིམ་དག་ནས་ཡིད་ཕྱིར་ཕྱོགས་པ་ཞེས་བྱ་བ་རྒྱས་པར་འབྱུང་ངོ༌། །རྒྱལ་རིགས་ལ་སོགས་པའི་མི་རྣམས་ནི་ངེས་པའི་ཚིག་གི་ཚུལ་གྱིས་སོ། །བསྐལ་པ་མཚོན་དང་ནད་དང་མུ་གེ་དག་གིས་ཚར་ཕྱིན་ཅིང་ཡོངས་སུ་རྫོགས་པར་འགྱུར་ཏེ་བསྡུས་པས་ནི་མ་ཡིན་ནོ། །ཆོས་མ་ཡིན་པ་ལ་འདོད་ཆགས་ཀྱིས་ཆགས་པ་ཞེས་བྱ་བ་ནི་འདོད་པས་ལོག་པར་གཡེམ་པ་ལ་ལྷག་པར་ཞེན་པའོ། །ཡ་ང་བ་ལ་ཆགས་པས་ཟིལ་གྱིས་ནོན་པ་ནི་བརྣབ་སེམས་ཅན་ནམ། མ་བྱིན་པར་ལེན་པ་དག་གོ །ལོག་པའི་ཆོས་ཀྱིས་ཀུན་ནས་དཀྲིས་པ་ཞེས་བྱ་བ་ནི་ལོག་པའི་ཆོས་ཀུན་ཏུ་སྟོན་པར་བྱེད་པའོ། །ཉེས་པ་དེ་དག་ཉིད་ཀྱིས་ཞེས་བྱ་བས་ནི་ཆོས་མ་ཡིན་པ་ལ་འདོད་ཆགས་ལ་སོགས་པ་དག་གིས་སོ། །ཡམས་ཀྱི་ནད་གཏོང་བར་བྱེད་ཅེས་བྱ་བ་ནི་མདངས་འཕྲོག་པའམ། སྨན་རྣམས་མ་རུང་བར་བྱེད་པའོ། །མུ་གེ་ནི་རྣམ་པ་གསུམ་ཡིན་ལ། སླར་རེ་རེ་ལ་ཡང་རྣམ་པ་གཉིས་གཉིས་ཡིན་པས་རྣམ་པ་དྲུག་གོ །གླིང་གཉིས་སུ་ཞེས་བྱ་བ་ནི་བྱང་གི་སྒྲ་མི་སྙན་མ་གཏོགས་པར་རོ། །དེ་དག་དང་མཐུན་པ་ཞེས་བྱ་བ་ནི་མཚོན་དང་ནད་དང་མུ་གེ་དག་དང་སྟེ། མཚོན་དང་མཐུན་པ་ནི་གནོད་སེམས་སོ། །ནད་དང་མཐུན་པ་ནི་ཁ་དོག་ངན་པ་དང་ཉམ་ཆུང་བའོ། །མུ་གེ་དང་མཐུན་པ་ནི་བཀྲེས་པ་དང་སྐོམ་པའོ། །ལྷག་པར་འགྱུར་བ་ཡིན་ནོ་ཞེས་བྱ་བ་ནི་ཅི་རིགས་པར་ཐམས་ཅད་དང་སྦྱར་བར་བྱའོ། །ཡར་སྐྱེ་བའི་ཚེ་ནི་མི་ཚེ་ལོ་བཅུ་པ་རྣམས་ལས་བུ་ཚེ་ལོ་ཉི་ཤུ་པ་དག་སྐྱེ་ལ། ཚེ་ལོ་ཉི་ཤུ་པ་རྣམས་ལས་བུ་ཚེ་ལོ་བཞི་བཅུ་པ་རྣམས་སྐྱེའོ་ཞེས་བྱ་བ་ནས་རྒྱས་པར་ཚེ་ལོ་བརྒྱད་ཁྲི་པའི་བར་དུ་ཡིན་ནོ། །
དེ་བཞིན་དུ་འཇིག་པ་གཞན་དག་ལ་ཡང་ཞེས་བྱ་བ་ནི་མེས་འཇིག་པ་བཤད་ནས། དེ་བཞིན་དུ་འཇིག་པ་གཞན་དག་ལ་ཡང་ཞེས་བྱ་བ་སྨོས་སོ། །ཆ་ཤས་ཕྲ་མོ་ཡང་ཞེས་བྱ་བ་ནི་རྡུལ་ཕྲ་རབ་དག་ཀྱང་མི་ལུས་པར་བྱེད་པའོ། །འདི་ལ་མུ་སྟེགས་བྱེད་ཁ་ཅིག་ཅེས་བྱ་བ་ནི་གཟེགས་ཟན་ལ་སོགས་པ་དག་གོ ། རྡུལ་ཕྲ་རབ་དག་ནི་རྟག་པ་ཞེས་བྱ་བ་ནི་ཡོད་པ་རྒྱུ་དང་མི་ལྡན་པའི་ཕྱིར་རམ་འཇིག་པའི་རྒྱུ་མེད་པའི་ཕྱིར་ཏེ། དེ་མེད་ན་ནི་འདུ་བ་ཅན་མ་ཡིན་པའི་རྒྱུ་མི་སྲིད་པའི་ཕྱིར་རོ། །རྟག་པའི་ཕྱིར་ན་དེ་དག་དེའི་ཚེ་མེ་ལ་སོགས་པ་དག་གིས་མི་འཇིག་པས་དེའི་ཚེ་བསྡུས་སོ། །དེ་དག་ཅིའི་ཕྱིར་དེ་ལྟར་འདོད་ཅེས་བྱ་བ་ནི་རྡུལ་ཕྲ་རབ་རྣམས་ནི་རྟག་པ་ཡིན་པས་དེའི་ཚེ་བསྡུས་སོ་ཞེས་བྱ་བར་རོ། །གལ་ཏེ་འདིར་རྒྱུ་རྟག་པ་དང་རྒྱུ་མེད་པ་བཞིན་དེ་རྟག་པར་བཤད་པ་མ་ཡིན་ནམ་ཞེ་ན་བཤད་པ་བདེན་མོད། དེ་ནི་གཞན་གྱི་ཕྱིར་མ་གྲུབ་པ་ཡིན་པས་རྒྱུ་གཞན་སྨྲའོ། །རྒྱུ་མེད་པ་ཅན་དུ་འབྱུང་བ་ནི་མི་རུང་ངོ་ཞེས་བྱ་བ་ནི། བྱེད་རྒྱུ་མེད་པ་ཅན་ནོ། །རགས་པ་རྣམས་ཞེས་བྱ་བ་ནི་རླུང་དང་ཆུ་དང་སའི་དཀྱིལ་འཁོར་དང༌། རི་རབ་ལྷུན་པོ་ལ་སོགས་པ་ཞིག་པ་རྣམས་ཏེ། སངས་རྒྱས་པ་རྣམས་ཀྱི་ལྟར་ན་ཡང་འབྱུང་བར་འགྱུར་ན་ཞེས་བྱ་བར་བསམས་པའོ། །སངས་རྒྱས་པ་རྣམས་ཀྱིས་ནི་མ་ལུས་པར་འཇིག་པར་ཁས་བླངས་པས་རགས་པ་རྣམས་ས་བོན་མེད་པ་ཅན་དུ་འབྱུང་བར་ཁས་བླངས་པ་ཡིན་ཏེ་འདུ་བ་ཅན་གྱི་རྒྱུ་མེད་པའི་ཕྱིར་རོ་སྙམ་དུ་བསམས་པའོ། །འདི་ནི་བུམ་པ་དང་སྣམ་བུ་ལ་སོགས་པ་རགས་པ་རྣམས་རྒྱུ་མེད་པ་ཅན་དུ་འབྱུང་བ་ཡང་མ་མཐོང་བས། སངས་རྒྱས་པ་རྣམས་ཀྱིས་ཀྱང་རྒྱུ་མེད་པ་ཅན་དུ་འབྱུང་བར་མི་འདོད་པའམ། གྲུབ་པ་ལ་བསྒྲུབ་པ་ཡིན་ནོ་ཞེས་བྱ་བ་བསྟན་པའི་ཕྱིར་སེམས་ཅན་རྣམས་ཀྱི་ཞེས་བྱ་བ་ལ་སོགས་པ་རྒྱས་པར་སྨོས་སོ། །མཐུ་ཁྱད་པར་དུ་འཕགས་པའི་རླུང་རྒྱུར་བཤད་དེ། མཐུ་རྣམ་པ་སྣ་ཚོགས་པའི་བྱེ་བྲག་དང་ལྡན་པའི་རླུང་དག་གིས་བཤིགས་པ་ན་ཞེས་འབྱུང་བའི་ཕྱིར་རོ། །རླུང་དེ་ཡང་རགས་པ་ཡིན་པའི་ཕྱིར་རྒྱུ་མེད་པ་ཅན་དུ་འགྱུར་བར་མི་རིགས་སོ་ཞེ་ན། དེའི་ཕྱིར་ཡང་ན་དེའི་རྒྱུ་ནི་འཇིག་པའི་རྩེ་མོའི་རླུང་ཡིན་པར་འགྱུར་རོ་ཞེས་སྨོས་སོ། །དེ་ལ་རྒྱུ་མེད་པ་ཅན་གྱི་དོགས་པ་ནི་རིགས་ཏེ། ལས་ལས་སྐྱེས་པའི་ཞེས་
བཤད་པའི་ཕྱིར་རོ། །དེའི་ཕྱིར་འདི་ནི་ལུགས་གཞན་ལ་ལྟོས་ནས་སྨོས་སོ། །འཇིག་པའི་རྩེ་མོ་ནི་བསམ་གཏན་གཉིས་པ་ལ་སོགས་པ་བསམ་གཏན་གསུམ་ཡིན་ལ། དེའི་ས་པའི་རླུང་ནི་སྐད་ཅིག་དང་པོར་སྐྱེས་པའི་རླུང་དེའི་རྒྱུ་ཡིན་པར་འགྱུར་རོ། །ས་བོན་དག་ཁྱེར་ཏེ་འོང་ངོ་ཞེས་བྱ་བ་ལ་ས་བོན་ནི་རིགས་ལྔ་སྟེ། རྩ་བའི་ས་བོན་དང༌། ས་བོན་གྱི་ས་བོན་དང༌། འབྲས་བུའི་ས་བོན་དང༌། སྡོང་བུའི་ས་བོན་དང༌། མདོའི་ས་བོན་ནོ། །དེ་ལྟར་ཡིན་ན་ཡང་ཞེས་བྱ་བ་ནི་གལ་ཏེ་ཡང་ས་བོན་དག་ཁྱེར་ཏེ་འོང་མོད་ཀྱི། དེ་ལྟ་ན་ཡང་དངོས་པོ་རྣམས་རྒྱུ་མེད་པ་ཅན་དུ་འབྱུང་བ་ཡིན་ནོ། །འདི་ལྟར་དེ་དག་ས་བོན་ལ་སོགས་པ་དག་ལས་ཞེས་བྱ་བ་ལ་སོགས་པ་འབྱུང་སྟེ། སོགས་པ་ཞེས་བྱ་བའི་སྒྲས་ནི་མྱུ་གུ་དང་ལོ་མ་ལ་སོགས་པ་བསྡུའོ། །རང་གི་ཡན་ལག་དག་ཁོ་ན་ལས་ཞེས་བྱ་བས་ནི། མྱུ་གུ་ནི་རང་གི་ཡན་ལག་དག་ཁོ་ན་ལས་སྐྱེ་ལ། ཡན་ལག་དེ་དག་ཀྱང་རང་གི་ཡན་ལག་དག་ཁོ་ན་ལས་སྐྱེ་སྟེ། རྡུལ་ཕྲ་རབ་དག་ལས་སྐྱེ་བའི་བར་དུ་ཡང་དེ་དང་འདྲའོ། །དེ་དག་ནི་ཆ་ཤས་མེད་པའི་ཕྱིར་གང་ལས་ཀྱང་མི་སྐྱེའོ། །གལ་ཏེ་མྱུ་གུ་ལ་སོགས་པ་རྣམས་ས་བོན་ལ་སོགས་པ་དག་ལས་མི་སྐྱེ་ན། ད་ནི་གང་ལས་དེ་དོན་དུ་གཉེར་བས་དེ་དག་ཉེ་བར་ལེན་པ་དང་དེ་ཡོད་པ་དང་མེད་པ་ནི་དེ་རྣམས་ཡོད་པ་དང་མེད་པར་འགྱུར་བ་མྱུ་གུ་ལ་སོགས་པ་དག་ལ་ས་བོན་ལ་སོགས་པའི་ནུས་པ་ཅི་ཞིག་ཡོད། འདིས་ནི་མཐོང་བ་དང་འགལ་བ་དང་འཇིག་རྟེན་དང་འགལ་བར་བསྟན་ཏོ། །དེའི་རྡུལ་ཕྲ་རབ་རྣམས་ཕྲད་པ་ལམ་གཏོགས་པར་ཅུང་ཟད་ཀྱང་མེད་དོ་ཞེས་བྱ་བ་ནི་མྱུ་གུ་ལ་སོགས་པའི་རྡུལ་ཕྲ་རབ་མ་མཐོང་བས་བསྐུལ་བ་རྣམས་ས་བོན་གྱི་ཡུལ་དུ་ཉེ་བར་འདུག་སྟེ། དེ་དག་ནི་དེར་ཕན་ཚུན་ཕྲད་ནས་འབྲས་བུ་མྱུ་གུ་ལ་སོགས་པ་རྩོམ་མོ། །མྱུ་གུ་ལ་སོགས་པ་དག་ལ་ས་བོན་ལ་སོགས་པའི་ནུས་པ་ནི་དེ་ཡིན་གྱི་མྱུ་གུ་ལ་སོགས་པ་དག་ལ་ནུས་པ་ནི་མ་ཡིན་ཏེ། དེས་ན་དེ་དོན་དུ་གཉེར་བ་དག་གིས་དེ་དག་ཉེ་བར་ལེན་པས་མཐོང་བ་དང་འགལ་བ་མེད་དོ། །ཡང་ཅིའི་ཕྱིར་དེ་དག་དེ་ལྟར་འདོད་ཅེ་ན་ཞེས་བྱ་བ་ནི་རྒྱུ་མེད་པར་ས་བོན་ལ་སོགས་པ་མཐོང་བའི་རྒྱུ་ཡོངས་སུ་སྤངས་ནས་མ་མཐོང་བ་རྡུལ་ཕྲ་རབ་
ཀྱི་བདག་ཉིད་ཅན་བརྟག་པར་ནི་རིགས་པ་མ་ཡིན་ནོ་སྙམ་དུ་དགོངས་སོ། །ངེས་པ་མེད་པར་འགྱུར་རོ་ཞེས་བྱ་བ་ལ། གལ་ཏེ་རིགས་མི་མཐུན་པ་ལ་རིགས་མི་མཐུན་པ་སྐྱེ་ན་ནི་དེ་ལྟ་ན་ཐམས་ཅད་ལས་ཐམས་ཅད་སྐྱེ་བར་འགྱུར་ན་དེ་ནི་དེ་ལྟར་ན་མཐོང་བ་ཡང་མ་ཡིན་ནོ། །དེའི་ཕྱིར་མྱུ་གུ་དང་རིགས་མཐུན་པའི་ཡན་ལག་དག་ཁོ་ན་ལས་མྱུ་གུ་སྐྱེ་བར་རིགས་ཏེ། ས་བོན་ལ་སོགས་པ་དག་ལས་ནི་མ་ཡིན་ཏེ་རིགས་མི་མཐུན་པའི་ཕྱིར་རོ། །ནུས་པ་ངེས་པའི་ཕྱིར་དེ་ལྟར་མི་འགྱུར་ཏེ་ཞེས་བྱ་བ་ལ། ཇི་ལྟར་ས་བོན་ནི་ནུས་པའི་ཁྱད་པར་ལས་མྱུ་གུའི་རྡུལ་ཕྲ་རབ་དག་སྤྲོ་བར་བྱེད་ཀྱི། རྡུལ་ཕྲ་རབ་གཞན་དག་མ་ཡིན་ལ། དེ་དག་ཀྱང་གཞན་མ་ཡིན་པ་དེ་བཞིན་དུ། ས་བོན་དང་མྱུ་གུ་དང་ལོ་མ་ལ་སོགས་པ་རྣམས་སོ་སོར་ནུས་པ་ཐ་དད་པས་མྱུ་གུ་ལ་སོགས་པ་འབྲས་བུ་སོ་སོར་ངེས་པ་སྐྱེད་པར་བྱེད་པ་ཉིད་ཡིན་པས་ངེས་པ་མེད་པར་ཐལ་བ་མེད་དོ། །གདོན་མི་ཟ་བར་ནུས་པ་ཐ་དད་པ་ཁས་བླང་བར་བྱ་སྟེ། དེ་ལྟ་མ་ཡིན་ན་རྡོལ་ཡང་མྱུ་གུ་ལ་སོགས་པའི་རྡུལ་ཕྲ་རབ་རྣམས་ཕྲད་པར་ཁས་བླང་བར་བྱ་དགོས་ལ། དེར་ཕྲད་པ་རྣམས་ཀྱི་འབྲས་བུ་སྐྱེ་བར་ཡང་ཁས་བླང་བར་བྱ་དགོས་སོ། །དཔེ་ཤིན་ཏུ་གྲགས་པ་བསྟན་པའི་ཕྱིར་སྒྲ་དང་ཚོས་བྱེད་ལས་སྐྱེ་བ་འབྱུང་བ་བཞིན་ནོ་ཞེས་བྱ་བ་སྨོས་སོ། །སྒྲ་ནི་རིགས་མི་མཐུན་པ་ཕྲད་པ་དང་བྱ་བ་ལ་སོགས་པ་དག་ལས་འབྱུང་གི །དྲི་ལ་སོགས་པ་རིགས་མི་མཐུན་པ་གཞན་ལས་མི་འབྱུང་ལ། ཆོས་བྱེད་ལས་སྐྱེས་པའི་གཟུགས་ལ་སོགས་པ་དག་ཀྱང་ཚོས་པར་བྱ་བ་དང་འཚེད་པ་པོ་རྫས་རིགས་མི་མཐུན་པ་ལས་སྐྱེའི་སྒྲ་དང་བདེ་བ་ལ་སོགས་པ་མི་མཐུན་པ་གཞན་ལས་ཀྱང་མི་འབྱུང་བ་བཞིན་ནོ། །ཡོན་ཏན་གྱི་ཆོས་ནི་སྣ་ཚོགས་ཡིན་གྱི་ཞེས་བྱ་བ་ནི་དེ་ནི་རིགས་མཐུན་པ་དག་ལས་ཀྱང་སྐྱེ་བའི་ཕྱིར་རོ། །དེ་ལ་འབྲས་བུའི་ཡོན་ཏན་རྒྱུའི་ཡོན་ཏན་སྔོན་དུ་འགྲོ་བ་རྣམས་ནི་རིགས་མཐུན་པ་དག་ལས་ཡིན་ལ། སྒྲ་དང་ཚོས་བྱེད་ལས་སྐྱེས་པ་དང་བདེ་བ་ལ་སོགས་པ་དག་ནི་རིགས་ཐ་དད་པ་དག་ཡིན་ནོ། །རྫས་ཀྱི་ཆོས་ནི་དེ་ལྟར་མ་ཡིན་ཏེ། དེ་ནི་རིགས་མཐུན་པ་དག་ཁོ་ན་ལས་འབྱུང་བའི་ཕྱིར་རོ། །ཡང་འདི་ལ་རྒྱུ་ཅི་ཞིག་ཡོད། ནུས་པ་ངེས་པའོ། །ཡོན་ཏན་
རྣམས་ཇི་ལྟ་བ་བཞིན་དུ་རྫས་རྣམས་ལ་རིགས་མི་མཐུན་པ་བརྩམ་པའི་ནུས་པ་ཡོད་པ་མ་ཡིན་ནོ། །རྫས་རྣམས་ལ་རིགས་མི་མཐུན་པའི་ཡོན་ཏན་གྱི་ལས་རྩོམ་པའི་ནུས་པ་ཡོད་པ་མ་ཡིན་ནམ་ཞེ་ན། ཡོད་པ་བདེན་མོད་ཀྱི་རྫས་རྣམས་ལ་ནུས་པ་ངེས་པ་ནི་ཡོན་ཏན་གྱི་ལས་རྣམས་ཉིད་ལམ་མཐོང་བའི་ཕྱིར་རོ། །འདི་ལྟར་རིགས་མཐུན་པ་དག་ཁོ་ན་ལས་ཞེས་བྱ་བ་ལ་སོགས་པ་འབྱུང་ངོ༌། །སྐུད་པ་གཅིག་དང་ལྡན་ན་རས་ཡུག་མི་དམིགས་པའི་ཕྱིར་ཏེ་ཞེས་བྱ་བ་ལ། གལ་ཏེ་སྐུད་པ་དག་ལས་གཞན་པའི་རས་ཡུག་ཏུ་གྱུར་པ་གང་ཞིག་སྐུད་པ་སོ་སོ་ལ་འདུའོ་ཞེ་ན། མིག་དང་ཕྲད་པ་དག་ལས་སྐུད་པ་བཞིན་དུ་རས་ཡུག་ཀྱང་འཛིན་པར་ཐལ་བར་འགྱུར་རོ། །ཕྲད་པའི་ཁྱད་པར་ལས་ཀྱང་སྐུད་པ་བཞིན་དུ་རས་ཡུག་དམིགས་པ་མ་ཡིན་ནོ། །དེའི་ཕྱིར་སྐུད་པ་ལ་སོགས་པ་རྣམ་པ་དེ་དང་དེང་གནས་པ་དག་ཁོ་ན་ལ་རས་ཡུག་ལ་སོགས་པའི་མིང་དེ་དང་དེ་འཐོབ་སྟེ། དཔེར་ན་གྲོག་མ་ལ་སོགས་པ་རྣམས་ཀྱི་བཀོད་པའི་ཁྱད་པར་ལ་ཕྲེང་བ་ལ་སོགས་པར་མིང་འདོགས་ཀྱི་དེ་དག་ལས་ཐ་དད་པའི་དངོས་པོ་ལ་ནི་མ་ཡིན་པ་བཞིན་ནོ། །ཡང་མེད་པས་མི་དམིགས་པ་འབའ་ཞིག་ཏུ་མ་ཟད་ཀྱི། འོ་ན་ཅི་ཞེ་ན་མཐོང་བའི་གེགས་བྱས་པས་ཀྱང་ཡིན་ནོ་སྙམ་ན། དེའི་ཕྱིར་དེའི་ཚེ་རས་ཡུག་ཡོད་ན་ནི་ཞེས་བྱ་བ་རྒྱས་པར་སྨོས་ཏེ། དམིགས་པའི་གེགས་མེད་བཞིན་དུ་མི་འཛིན་པའི་ཞེས་ཁྱད་པར་ཉེ་བར་བཟུང་ངོ༌། །གང་ཞིག་སྐུད་པ་ཐམས་ཅད་ལ་རས་ཡུག་ཟད་པར་ཡོད་པ་ཡིན་གྱི་རེ་རེ་ལ་ནི་མ་ཡིན་ནོ། །དེའི་ཕྱིར་སྐུད་པ་གཅིག་བཟུང་བས་རས་ཡུག་འཛིན་པ་མ་ཡིན་ཏེ་སྐུད་པ་བཞིན་དེ་དང་ཕྲད་པ་མེད་པའི་ཕྱིར་རོ་སྙམ་ན། དེའི་ཕྱིར་ཟད་པར་ཡོད་པ་མ་ཡིན་ན་ནི་ཞེས་བྱ་བ་རྒྱས་པར་འབྱུང་སྟེ། གལ་ཏེ་སྐུད་པ་རེ་རེ་དག་ལ་རས་ཡུག་ཟད་པར་ཡོད་པ་མ་ཡིན་ན། དེ་ལྟར་རེ་རེ་ལ་རས་ཡུག་གི་ཆ་ཡོད་དོ་ཞེས་བྱ་བར་འགྱུར་ཏེ། དེའི་ཕྱིར་སྐུད་པ་ཐམས་ཅད་ལ་རས་ཡུག་ཡོད་པ་མ་ཡིན་ཏེ། རས་ཡུག་གི་ཆ་རྣམས་རས་ཡུག་མ་ཡིན་པའི་ཕྱིར་རོ། །འདུས་པ་ཙམ་རས་ཡུག་ཡིན་པར་ཡང་འགྱུར་གྱི། ཡན་ལག་ཅན་གྱི་རྫས་
གཅིག་ནི་མ་ཡིན་ཏེ། སྐུད་པ་རེ་རེ་ལ་འདུ་བའི་མང་པོ་དག་རས་ཡུག་ཉིད་དུ་ཁས་བླངས་པའི་ཕྱིར་རོ། །སྐུད་པ་དག་ལས་གཞན་པ་རས་ཡུག་གི་ཆ་ཡང་གང་ཞིག་ཡོད་ཅེས་བྱ་བ་ནི་དེ་དག་ལས་ཐ་དད་པའི་རས་ཡུག་གི་ཆ་མེད་པའི་ཕྱིར་ཏེ། རྩོམ་པར་བྱེད་པའི་ཡན་ལག་མ་གཏོགས་པའི་ཆ་ཁས་མ་བླངས་པའི་ཕྱིར་དང༌། རྫས་གཅིག་རྩོམ་པ་མེད་པའི་ཕྱིར་དང༌། སྐུད་པ་བཟུང་ན་དེ་མ་བཟུང་བའི་ཕྱིར་གང་ཞིག་སྐུད་པ་དག་ལ་ཡོད་པ་སྐུད་པ་དག་ལས་གཞན་པའི་རས་ཡུག་གི་ཆ་ཡོད་པ་མ་ཡིན་ནོ། །ཅི་སྟེ་ཡང་རས་ཡུག་དབང་པོ་དང་ཕྲད་པ་ལ་ལྟོས་ཏེ། རས་ཡུག་དམིགས་པའི་རྒྱུ་ཡིན་ནོ། །སྐུད་པ་གཅིག་དང་ལྡན་པའི་ཚེ་ན་ནི་རྟེན་དུ་མ་ཕྲད་པ་མེད་པས་དམིགས་པའི་ཕྱིར་རས་ཡུག་སྐུད་པ་ལ་ཡོད་བཞིན་དུ་མ་དམིགས་པས་ཁྱད་པར་མ་གྲུབ་བོ་སྙམ་ན། དེའི་ཕྱིར་རྟེན་དུ་མ་ཞིག་དང་ལྡན་པ་ལ་ལྟོས་ན་ནི་ཞེས་བྱ་བ་ལ་སོགས་པ་སྨོས་ཏེ། ཁ་ཚར་ཙམ་མཐོང་ན་རྟེན་དུ་མ་དང་ལྡན་པ་ཡོད་མོད་ཀྱི། རས་ཡུག་དམིགས་པ་ཡང་མ་ཡིན་པས། འདི་རས་ཡུག་དམིགས་པའི་རྒྱུ་མ་ཡིན་ཏེ། དེ་ཡོད་ཀྱང་རས་ཡུག་མ་དམིགས་པའི་ཕྱིར་རོ། །ཅི་སྟེ་ཡང་རས་ཡུག་དམིགས་པ་ན་རྟེན་མ་ལུས་པར་དམིགས་པ་ལ་ལྟོས་པ་ཡིན་ནོ་སྙམ་ན། དེའི་ཕྱིར་ཡང་ན་ནམ་ཡང་དམིགས་པར་མི་འགྱུར་ཏེ་ཞེས་བྱ་བ་ལ་སོགས་པ་སྨོས་སོ། །དབུས་དང་ཕ་རོལ་གྱི་ཆ་རྣམས་དབང་པོ་དང་མ་བྲལ་བའི་ཕྱིར་རྟེན་མ་ལུས་པ་དང་ཕྲད་པ་མེད་པས་ནམ་ཡང་རས་ཡུག་དམིགས་པར་མི་འགྱུར་རོ། །གལ་ཏེ་ཡང་ཡན་ལག་ཐམས་ཅད་དང་ཅིག་ཅར་ཕྲད་པ་མེད་མོད་ཀྱི། རིམ་གྱིས་ན་ཡོད་པས་རས་ཡུག་འཛིན་པར་མི་འགལ་ལོ་ཞེ་ན། དེའི་ཕྱིར་རིམ་གྱིས་ཡན་ལག་རྣམས་དང་ཕྲད་ན་ཡང་ཞེས་བྱ་བ་རྒྱས་པར་སྨོས་ཏེ། མིག་དང་རེག་པ་དག་རིམ་གྱིས་ཕྲད་ན་ཡང་ཡན་ལག་དག་ཁོ་ན་དང་ཕྲད་པ་ཡིན་གྱི། ནམ་ཡང་ཡན་ལག་ཅན་དང་མ་ཡིན་པས་མིག་དང་རེག་པས་གཟུང་བར་བྱ་བར་མི་འགྱུར་རོ། །གང་གི་ཕྱིར་དེ་ལྟར་ཅི་ནས་ཀྱང་མིག་དང་རེག་པ་དག་གི་ཡན་ལག་ཅན་དོན་གཞན་དུ་གྱུར་པ་འཛིན་པ་མ་ཡིན་པ་དེ་ལྟ་བས་ན་རིམ་གྱིས་ཡན་ལག་
ཅན་ཤེས་པའི་ཕྱིར་ཞེས་བྱ་བ་རྒྱས་པར་འབྱུང་ངོ༌། །གང་ཞིག་དངོས་པོ་ཕན་ཚུན་ཐ་དད་པ་འཛིན་པ་ལ་ལྟོས་ཏེ། རིམ་གྱིས་འཛིན་པ་དེ་ནི་དེ་དག་ལས་དོན་གཞན་མ་ཡིན་ཏེ། དཔེར་ན་མགལ་མེ་ཡུལ་གཞན་དུ་བར་ཆད་མེད་པར་མྱུར་དུ་སྐྱེ་བ་ན་རིམ་གྱིས་དམིགས་པས་ཕྱིས་འཁོར་ལོ་འོ་སྙམ་དུ་ཤེས་པར་འགྱུར་ལ། དེ་དེ་ལས་དོན་གཞན་མ་ཡིན་པ་བཞིན་ནོ། གཟུགས་དང་རིགས་དང་བྱ་བ་ཐ་དད་པའི་སྐུད་པ་དག་ལ་ཞེས་བྱ་བ་རྒྱས་པར་འབྱུང་སྟེ། གཟུགས་ཐ་དད་པ་སྔོན་པོ་དང་སེར་པོ་ལ་སོགས་པའི་གཟུགས་རྣམས་ལའོ། །རིགས་ཐ་དད་པ་ནི་སྲིན་དང་རས་བལ་དང༌། དུ་ཀཱུ་ལ་དང༌། ཀཽ་ཤེ་ཡ་ལ་སོགས་པ་རྣམས་ལའོ། །བྱ་བ་ཐ་དད་པ་ནི་ཅིག་ཅར་སྟེང་དང་ལོག་དང་ཐད་ཀར་འགྲོ་བ་སྟེ་སྐུད་པ་དག་ལའོ། །རས་ཡུག་གི་གཟུགས་ལ་སོགས་པ་མེད་པའི་ཕྱིར་ཞེས་བྱ་བ་ནི་དེའི་ཚེ་རས་ཡུག་གཟུགས་དང་རིགས་དང་བྱ་བ་གཅིག་པ་ཡིན་པར་མི་རིགས་ཏེ། སྐུད་པ་རིགས་དང་གཟུགས་དང་བྱ་བ་དུ་མ་དང་ལྡན་པ་རྣམས་དེའི་རྒྱུའི་ངོ་བོར་ཁྱད་པར་མེད་པའི་ཕྱིར་རོ། །གཟུགས་ལ་སོགས་པ་སྣ་ཚོགས་པ་ཡིན་ན་ནི་ཞེས་བྱ་བ་ལ། གལ་ཏེ་རས་ཡུག་ལ་ཡང་རྒྱུ་དང་འདྲ་བར་གཟུགས་དང་རིགས་དང་བྱ་བ་སྣ་ཚོགས་པར་འདོད་ན་ནི། དེ་ལྟར་ན་རིགས་མི་མཐུན་པ་རྩོམ་པར་ཡང་འགྱུར་ཏེ། སྐུད་པའི་གཟུགས་དང༌། རིགས་དང་བྱ་བ་རྣམས་རེ་རེ་ཞིང་སྣ་ཚོགས་པ་མ་ཡིན་པའི་ཕྱིར་རོ། །གང་ཡང་སྐུད་པ་རིས་མི་མཐུན་རྣམས་ཀྱིས་རས་ཡུག་རྩོམ་པ་ཉིད་མ་ཡིན་ནོ། །འོ་ན་ཅི་ཞེ་ན། སྐུད་པ་ཕྲད་པའི་གེགས་ཙམ་ཉིད་ཡིན་པས་དེར་རིགས་མི་མཐུན་རྩོམ་པར་ཐལ་བར་འགྱུར་བ་མེད་དོ་སྙམ་དུ་སེམས་ན། དེ་ནི་དེ་ལྟ་མ་ཡིན་ཏེ་དེར་ཡང་རས་ཡུག་གི་བྱ་བ་མཐོང་བའི་ཕྱིར་ངེས་པར་རས་ཡུག་ཁས་བླང་བར་བྱ་དགོས་སོ། །ཡང་དེ་ལྟར་གནས་པ་རྣམས་སྐུད་པ་བཞིན་དུ་བྱ་བ་ནུས་པ་ཉིད་ན། དེའི་ཚེ་ཕྲད་པའི་གེགས་དེ་ཁྱོད་ཉིད་ཀྱི་དེ་ལྟར་གནས་པ་ཐམས་ཅད་དུ་རས་ཡུག་གི་སྒྲས་བརྗོད་པར་བྱའོ་ཞེས་ཅི་སྟེ་མི་འདོད། །གཞན་ཡང་རས་ཡུག་གང་གི་ངོས་གཅིག་བཀྲ་ལ། གཉིས་པ་མི་བཀྲ་བ་ཡིན་ན། ངོས་ཅིག་ཤོས་མི་བཀྲ་བ་དེར་རས་
ཡུག་མི་མཐོང་བར་འགྱུར་ཏེ། ཅིའི་ཕྱིར་ཞེ་ན། གཟུགས་བཀྲ་བ་མ་མཐོང་བའི་ཕྱིར་རོ། །རས་ཡུག་གི་གཟུགས་མ་མཐོང་བར་ནི་རས་ཡུག་དམིགས་པར་མི་རིགས་ཏེ་གཟུགས་ནི་རྫས་དམིགས་པའི་རྒྱུ་ཡིན་པའི་ཕྱིར་རོ། །དེ་སྐད་དུ་ཆེན་པོ་ནི་དམིགས་པ་ཡིན་ཏེ། རྫས་དུ་མ་དང་ལྡན་པའི་ཕྱིར་དང༌། གཟུགས་ཡོད་པའི་ཕྱིར་རོ་ཞེས་སྨྲས་སོ། །ཁྲ་བོའི་ངོ་བོར་མཐོང་བར་འགྱུར་རོ་ཞེས་བྱ་བ་ནི་གལ་ཏེ་ངོས་གཉིས་པར་རས་ཡུག་མཐོང་ན་ནི། གདོན་མི་ཟ་བར་རས་ཡུག་དམིགས་པའི་རྒྱུ་མཚན་གཟུགས་མཐོང་བ་ཡང་ཡོད་པར་འགྱུར་རོ་ཞེས་བྱ་པར་དགོངས་སོ། །བྱ་བ་ཡང་སྣ་ཚོགས་པ་ཡིན་པས་ཤིན་ཏུ་སྣ་ཚོགས་པ་ཡིན་པར་འགྱུར་རོ་ཞེས་བྱ་བས་ནི་རང་གི་བདག་ཉིད་དུ་གྱུར་པའི་ཡན་ལག་ཅན་མེད་དོ་ཞེས་སྟོན་ཏོ། །དང་པོ་དང་བར་དང་ཐ་མ་དག་ཏུ་ཞེས་བྱ་བ་ལ། དང་པོ་དང་བར་དང་ཐ་མ་དག་ཏུ་འོད་ཀྱི་ཚ་བ་དང་སྣང་བ་ཐ་དད་པ་དག་ཏུ་མཐོང་སྟེ། དེའི་ཕྱིར་འོད་ཀྱི་ཡན་ལག་ཅན་གྱི་ཚ་བ་དང་སྣང་བ་དག་ཐ་མི་དད་དོ། །ཅིའི་ཕྱིར་ཞེ་ན། གཟུགས་དང་རེག་པ་དང་པོ་དང་བར་པ་དང༌། ཐ་མར་རྣམ་པར་གནས་ཤིང༌། ཤས་ཆེ་བ་དང༌། འབྲིང་དང༌། ཤས་ཆུང་བའི་དབྱེ་བས་ཐ་དད་པ་དག་གིས་ཅུང་ཟད་ཀྱང་གཟུགས་སམ་རེག་པ་དོན་གཞན་དུ་གྱུར་ཅིག་རྩོམ་པར་མི་ནུས་ཏེ། དེའི་ཕྱིར་འོད་ཀྱིས་གཟུགས་དང་རེག་པ་ཐ་མི་དད་དོ། །རྩོམ་ན་ཡང་གཅིག་ཡིན་པའི་ཕྱིར། དང་པོ་དང༌། བར་དང༌། ཐ་མ་དག་ཏུ་གཟུགས་དང་རེག་པ་ཐ་མི་དད་པར་འགྱུར་ན། ཐ་མི་དད་པ་ནི་ཡོད་པ་ཡང་མ་ཡིན་ཏེ། དེའི་ཕྱིར་འོད་ཀྱི་རྫས་ནི་ཡན་ལག་དག་ལས་གཞན་མ་ཡིན་ནོ་ཞེས་བྱ་བར་ངེས་སོ། །གལ་ཏེ་ཡན་ལག་དག་ལས་ཡན་ལག་ཅན་གྱི་རྫས་གཞན་མ་ཡིན་ན། དེ་ལྟ་ན་རྡུལ་ཕྲ་རབ་ཙམ་ཞིག་ལུས་པར་འགྱུར་ལ། དེ་དག་ཀྱང་མངོན་སུམ་མ་ཡིན་པས་མིག་ལ་སོགས་པའི་དབང་པོའི་སྒོ་ནས་འཛིན་པར་མི་འགྱུར་རོ་ཞེ་ན། དེའི་ཕྱིར་འདུས་པ་དག་ནི་མངོན་སུམ་ཉིད་ཡིན་ཏེ་ཞེས་བྱ་བ་སྨོས་ཏེ། གལ་ཏེ་ཡང་རེ་རེ་དག་དབང་པོ་ལས་འདས་པ་ཡིན་མོད་ཀྱི། འདུས་པ་དག་ནི་མངོན་སུམ་ཡིན་པས་མིག་ལ་སོགས་པའི་སྒོ་ནས་འཛིན་པ་
མེད་པ་མ་ཡིན་ནོ། །དེ་ཉིད་གཞུང་གཟུགས་པའི་ཕྱིར་དཔེར་ན་དེ་དག་གི་འབྲས་བུ་རྩོམ་པ་ཞེས་བྱ་བ་སྨོས་ཏེ། དཔེར་ན་རེ་རེ་ལ་འབྲས་བུ་རྩོམ་པའི་ནུས་པ་མེད་ཀྱང༌། འདུས་པ་དག་འབྲས་བུ་རྩོམ་པར་ནུས་པར་འདོད་པ་དེ་བཞིན་དུ་འདིར་ཡང་ཡིན་ནོ། །མིག་ལ་སོགས་པ་ཞེས་བྱ་བ་ནི་གཟུགས་དང་སྣང་བ་དང༌། ཡིད་ལ་བྱེད་པ་རྣམས་འདུས་པ་དག་ཁོ་ན་རྣམ་པར་ཤེས་པ་སྐྱེད་པར་བྱེད་པ་ཡིན་གྱི། རེ་རེ་མ་ཡིན་པ་དེ་བཞིན་དུ་རྡུལ་ཕྲ་རབ་དག་ཀྱང་ཡིན་ནོ། །སྐྲ་གྲམ་པའི་ཚོགས་དམིགས་པ་ལྟ་བུ་སྟེ་ཞེས་བྱ་བ་ལ། གྲམ་པ་སྨོས་པ་ནི་འདུ་བ་ཅན་གྱི་རྒྱུ་མེད་པས་རྫས་གཞན་དུ་རྟོག་པ་དགག་པར་བྱ་བའི་ཕྱིར་རོ། །རྫས་གཞན་མེད་ཀྱང་རབ་རིབ་ཅན་རྣམས་ལ་ནི་རྡུལ་ཕྲ་རབ་ལྟར་སྐྲ་ཅིག་དང་པོ་ལས་འདས་པ་ཡིན་མོད་ཀྱི། འོན་ཀྱང་ཕན་ཚུན་མ་འདྲེས་པའི་སྐྲའི་ཚོགས་དམིགས་པ་ཡིན་ནོ། །ཡན་ལག་དང་ཡན་ལག་ཅན་དུ་སྨྲ་བ་བཀག་པའི་མཇུག་ཐོགས་སུ་ཡོན་ཏན་དང་ཡོན་ཏན་དུ་སྨྲ་བ་དགག་པའི་ཕྱིར་གཟུགས་ལ་སོགས་པ་དག་ཁོ་ན་ལ་རྡུལ་ཕྲ་རབ་ཀྱི་མིང་དུ་འདོགས་པའི་ཕྱིར་ཞེས་བྱ་བ་སྨོས་སོ། །གཟུགས་ལ་སོགས་པ་ནི་འཇིག་པར་གྲུབ་སྟ། དེའི་ཕྱིར་དེ་ཞིག་ན་ཞེས་བྱ་བ་རྒྱས་པར་འབྱུང་ངོ༌། །རྫས་དང་ཡོན་ཏན་གྱི་ཚིག་གི་དོན་དག་ནི་ཐ་དད་པའི་ཕྱིར་རྡུལ་ཕྲ་རབ་ནི་གཟུགས་ལ་སོགས་པ་དག་ལས་གཞན་ཉིད་ཡིན་པས། གཟུགས་ལ་སོགས་པ་ཞིག་ན་དེ་འཇིག་པ་མ་ཡིན་ནོ་ཞེའོ། །འདི་ལྟར་སུས་ཀྱང་ཞེས་བྱ་བ་ལ། འདི་ལྟར་ཞེས་བྱ་བ་ནི་གང་གི་ཕྱིར་གྱི་དོན་ཏེ། འདི་ལྟར་ས་སྟོན་པ་ན་གཟུགས་སམ། རེག་པ་འམ། གཟུགས་ཀྱི་དབྱིབས་ཙམ་ཞིག་སྟོན་པར་བྱེད་དོ། །ཆུ་ལ་སོགས་པ་དག་ལ་ཡང་དེ་དང་འདྲའོ། །ས་ལ་སོགས་པ་དག་ནི་མིག་དང་རེག་པའི་གཟུང་བར་བྱ་བར་དམ་འཆའ་ན་མིག་དང་རེག་པ་དག་གི་ཡུལ་ནི་གཟུགས་དང་རེག་པའི་ངོ་བོ་ལས་ཐ་དད་པ་གཞན་མེད་དོ། །བལ་དང་རས་བལ་དང་ཞེས་བྱ་བ་རྒྱས་པར་འབྱུང་སྟེ། རྫས་སྨྲ་བ་རྣམས་ཀྱི་ལྟར་ན་མེ་དང་འབྲེལ་པས་གཟུགས་ལ་སོགས་པ་ཙམ་ཞིག་ལྡོག་གི །བལ་ལ་སོགས་པའི་རྫས་ནི་མ་ཡིན་པས་གལ་ཏེ་གཟུགས་ལ་སོགས་པ་དག་ལས་རྫས་གཞན་ཚིག་པ་
དག་ལ་བལ་ལ་སོགས་པའི་བློར་ཅིའི་ཕྱིར་མི་འགྱུར། དེའི་ཕྱིར་གཟུགས་ལ་སོགས་པ་དག་ཁོ་ན་ལ་དེའི་བློར་མི་འགྱུར་རོ། །གལ་ཏེ་གཟུགས་ལ་སོགས་པ་དག་ལས་རྫས་གཞན་མེད་ན་ཚོས་བྱེད་ལས་སྐྱེས་པ་བྱུང་བ་ལ་སྔར་གྱི་གཟུགས་ལ་སོགས་པ་ཞིག་པ་དང༌། བུམ་པར་ཡོངས་སུ་ཤེས་པར་ཇི་ལྟར་འགྱུར་ཞེ་ན། དེའི་ཕྱིར་ཚོས་བྱེད་ལས་སྐྱེ་འབྱུང་བ་ལ་ཞེས་བྱ་བ་རྒྱས་པར་སྨོས་སོ། །དབྱིབས་འདྲ་བའི་ཕྱིར་ཞེས་བྱ་བ་ནི་སྔར་གྱི་གཟུགས་དང་རྣམ་པ་མཚུངས་པའི་ཕྱིར་ཞེས་བྱ་བའི་དོན་ཏོ། །འདི་ལྟར་གཟུགས་ལ་སོགས་པའི་དབྱིབས་ཀྱི་ཁྱད་པར་ལ་བུམ་པར་ཤེས་ཀྱི། གཟུགས་ལ་སོགས་པ་ཙམ་ལ་ནི་མ་ཡིན་ནོ། །དཔེར་ན་པླཀྵ་ལ་སོགས་པའི་དབྱིབས་ཀྱི་ཁྱད་པར་ཚད་དུ་ཤེས་ཀྱི་པླཀྵ་ལ་སོགས་པ་ཙམ་ལ་མ་ཡིན་ཞིང༌། སྔར་གྱི་པླཀྵ་ལ་སོགས་པ་བཅད་པ་སླར་སྐྱེས་པ་དག་ལ་ཡང་མ་ཡིན་ལ། གཞན་ཉིད་ཡིན་ཡང་གྲོག་མ་རྣམས་ལ་དབྱིབས་འདྲ་བའི་ཕྱིར་ཕྲེང་བར་ཡོངས་སུ་ཤེས་པ་དེ་བཞིན་དུ་སྔར་གྱི་གཟུགས་ལ་སོགས་པ་དག་ལོག་ཀྱང་ཚོས་བྱེད་ལས་སྐྱེ་བ་འབྱུང་ལ། དབྱིབས་འདྲ་བའི་ཕྱིར་བུམ་པར་ཤེས་པར་མི་འགལ་ལོ། །ཡང་འདི་ཇི་ལྟར་ཤེས་ན། རྟགས་མ་མཐོང་བར་ཡོངས་སུ་མི་ཤེས་པའི་ཕྱིར་རོ་ཞེས་བྱ་བ་འབྱུང་སྟེ། གང་གི་ཕྱིར་གྱོ་རལ་དང་མཐོ་དམན་ལ་སོགས་པའི་རྟགས་མ་མཐོང་བར་བུམ་པ་ལ་སོགས་པར་ཡོངས་སུ་ཤེས་པར་མི་འགྱུར་བ་དེའི་ཕྱིར་རོ། །དེ་ཡི་སྐྱོན་དང་ཆོས་མཐུན་ཕྱིར། །ཞེས་བྱ་བ་ནི་མི་ལ་སོགས་པ་རྣམས་ནི་བསམ་གཏན་དང་པོ་ལ་སོགས་པའི་སྐྱོན་དང་ཆོས་མཚུངས་པའི་ཕྱིར་རོ་ཞེས་བྱ་བའི་དོན་ཏོ། །དེ་ཡང་ཤིན་ཏུ་སྦྱངས་པ་དང་ལྡན་པས་ཞེས་བྱ་བ་ལ། དེ་ཡང་ཞེས་བྱ་བ་ནི་དགའ་བ་དང་སྦྱར་རོ། །ཤིན་ཏུ་སྦྱངས་པ་དང་ལྡན་པ་ནི་ཤིན་ཏུ་སྦྱངས་པ་དང་ལྡན་པའོ། །དགའ་བ་ནི་ཤིན་ཏུ་སྦྱངས་པ་དང་ལྡན་པར་བྱེད་དེ། ཡིད་དགའ་བའི་
ལུས་ཤིན་ཏུ་སྦྱངས་པར་འགྱུར་རོ་ཞེས་འབྱུང་བའི་ཕྱིར་རོ། །ལུས་མཉེན་པར་བྱེད་ཅེས་བྱ་བ་ནི་ལས་སུ་རུང་བར་བྱེད་པའོ། །དེ་ཉིད་ཀྱི་ཕྱིར་ཞེས་བྱ་བ་ནི་ལུས་མཉེན་པར་བྱེད་པའི་ཕྱིར་ཞེས་བྱ་བའི་ཐ་ཚིག་གོ །བཞི་པ་ན་མེད་མི་གཡོ་ཕྱིར། །ཞེས་བྱ་བ་ནི་མི་མགུལ་ཞེས་བྱ་བའི་དོན་ཏོ། །ནང་གི་སྐྱོན་དང་བྲལ་བའི་ཕྱིར་ཞེས་བྱ་བ་ལ། རྟོག་དང་དཔྱོད་དང་དབུགས་དག་དང༌། །བདེ་བ་ལ་སོགས་བཞི་ཡིན་ནོ། །ཞེས་རྟོག་པ་དང་དཔྱོད་པ་ལ་སོགས་པ་རྣམས་སྐྱོན་དུ་འཆད་པར་འགྱུར་རོ། །དེ་དག་གིས་གཟུགས་མེད་པ་དག་ཏུ་འཇུག་པར་མི་ནུས་ལ་ཞེས་བྱ་བ་ནི་གནས་གཙང་མ་རྣམས་ལྷག་མཐོང་སྤྱོད་པ་ཡིན་པའི་ཕྱིར་ལ། དེ་དག་ནི་ཞི་གནས་ལྷག་པ་ཡིན་པའི་ཕྱིར་རོ། །གཞན་དུ་ཡང་འགྲོ་བར་མི་ནུས་ཏེ་ཞེས་བྱ་བ་ནི་ས་འོག་མར་ཏེ། ཕྱིར་མི་འོང་བ་རྣམས་ཁྱད་པར་དུ་འགྲོ་བ་ཡིན་པའི་ཕྱིར་རོ། །ཅིའི་ཕྱིར་དུས་ཡུན་རིང་མོ་ཞིག་ན་ཆུས་འཇིག་ལ། དེ་བས་ཀྱང་ཆེས་རིང་བ་ན་རླུང་གིས་འཇིག་ཅེ་ན། དེའི་ཕྱིར་སེམས་ཅན་དེ་དག་གི་སྙོམས་པར་འཇུག་པའི་ཁྱད་པར་ལས་ཞེས་བྱ་བ་རྒྱས་པར་སྨོས་ཏེ། སྙོམས་པར་འཇུག་པའི་ཁྱད་པར་ནི་བསམ་གཏན་གཉིས་པ་དང་གསུམ་པའི་ཁྱད་པར་རོ། །ལུས་གནས་པའི་ཁྱད་པར་ཞེས་བྱ་བ་ནི་གསོན་པོའི་རྒྱུན་གྱི་ཁྱད་པར་ཏེ། དུས་དེ་ཙམ་གྱིས་དེ་དག་གི་ཚེ་ཟད་པར་འགྱུར་རོ། །འཇིག་པ་དེ་དག་ནི་དྲུག་ཅུ་རྩ་བཞིར་འགྱུར་རོ། །འཇིག་པ་རེ་རེ་ཡང་བསྐལ་པ་ཆེན་པོ་ཡིན་ནོ། །དེ་ཉིད་ཀྱི་ཕྱིར་དེ་ལྟར་བཤད་ན། བཏགས་པའི་བཤད་པ་ཞེས་བྱ་བ་རྒྱས་པར་སྨོས་སོ། །སློབ་དཔོན་བློ་གྲོས་བརྟན་པས་ཉེ་བར་བཀོད་པ་ཆོས་མངོན་པའི་བཤད་པ་རྒྱ་ཆེར་འགྲེལ་པ་དོན་གྱི་དེ་ཉིད་ཅེས་བྱ་བ་ལས། འཇིག་རྟེན་བསྟན་པ་ཞེས་བྱ་བ་སྟེ། མཛོད་ཀྱི་གནས་གསུམ་པ་རྫོགས་སོ།། །།མངྒ་ལཾ།།