ཐུབ་བསྟན་ཆོས་ཀྱི་རྡོ་རྗེའི་རྣམ་ཐར་མདོར་བསྡུས།།

གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེ་བསྟན་འཛིན་འཇིགས་མེད་དབང་པོ་མཆོག་ནི། རྩོད་བྲལ་སྤྲུལ་བའི་གཏེར་ཆེན་མཆོག་གྱུར་བདེ་ཆེན་གླིང་པས་སྤྱན་དྲངས་པའི་ཨོ་རྒྱན་ཆེན་པོའི་གསང་བའི་བརྡ་ལུང་གིས་བསྟན་པ་ཉིད། བཀའ་བབ་བདུན་ལྡན་མཁྱེན་བརྩེའི་དབང་པོའི་ཞལ་སྔ་ནས་གསལ་བར་བྱས་པ་ལས། བཱི་མ་མི་ཏྲ་ཁམས་ཀྱི་ལྷོ་ཕྱོགས་སུ༔ སྤྲེལ་ལོ་དྷརྨ་བཛྲའི་མིང་ཅན་འབྱུང༔ བར་ཆད་བདུད་ཀྱི་གཡུལ་ལས་རྒྱལ་གྱུར་ན༔ སྙིང་པོའི་བསྟན་ལ་བྱ་བ་མཆོག་ཏུ་བྱེད༔ ཅེས་དང་། ལྐོག་ཡིག་སྙིང་བྱང་ཐུགས་ཀྱི་ཆ་ལག་ལས། སྤྲེལ་ལོར་དྷརྨ་བཛྲ་ཞེས་བྱ་འབྱུང༔ རུ་དམ་ལུང་ལ་བསྟན་པའི་སྲོག་ཤིང་བཙུགས༔ བཤད་དང་སྒྲུབ་པའི་བསྟན་པ་རྒྱ་ཆེར་སྤེལཿ ཞེས་སོགས་སྒྲིབ་བྲལ་ཡེ་ཤེས་ཀྱི་གཟིགས་པ་མངའ་བའི་ལྷ་བླའི་བརྟག་ལུང་ཐམས་ཅད་གཅིག་ཏུ་མཐུན་པར། སྤྱི་ལོ་༡༨༧༢པ་སྟེ་རབ་བྱུང་བཅོ་ལྔ་པའི་ལྕགས་སྤྲེལ་ལོར། སྐུ་ཕྲེང་དང་པོའི་འཁྲུངས་ཡུལ་དང་གཅིག་པར་ཁམས་ཀྱི་རི་བོ་ཆེའི་ཕྱོགས་སུ་ཡབ་མགོན་པོ་རྒྱལ་དང་། ཡུམ་བསོད་ནམས་གཡང་མཚོ་གཉིས་ཀྱི་སྲས་སུ་བཀྲ་ཤིས་ངོ་མཚར་གྱི་མཚན་མ་བརྒྱ་ཕྲག་དང་བཅས་མཚན་དཔེའི་འདབ་སྟོང་གསར་དུ་གྲོལ། ཐོག་མ་ཉིད་ནས་བྱང་ཆུབ་ཀྱི་སེམས་དང་སྐྱེས་ནས་ཐོབ་པའི་ཤེས་རབ་སོགས་རྒྱལ་བའི་སྲས་ཀྱི་མངོན་རྟགས་མཐའ་ཡས་པ་མེ་ཏོག་དང་དྲི་བསུང་བཞིན་ལྷན་སྐྱེས་སུ་མངའ། དགུང་གྲངས་བཞི་ལ་སོན་པ་འཛིན་བྱེད་ན་ཚོད་ལྡན་ཞེས་པ་ཤིང་མོ་ཕག་གི་ལོའི། སྟོན་པ་ཐུབ་པའི་དབང་པོས་རྫུ་འཕྲུལ་གྱི་ཆོ་འཕྲུལ་ཆེན་པོས་མུ་སྟེགས་ཀྱི་སྡེ་ཚོགས་ཕམ་པར་མཛད་པའི་བཀྲ་ཤིས་ཀྱི་ཟླ་བ། ཨོ་རྒྱན་ཆེན་པོས་དཔལ་གྱི་བསམ་ཡས་མཆིམས་ཕུར་ལྷ་སྲིན་དབང་དུ་བསྡུས་ནས་ཟབ་མོ་གཏེར་གྱི་གཉེར་བྱང་གཏད་ཅིང་བོད་ཡུལ་གཏེར་གྱིས་བཀང་བའི་དུས་ཆེན་ཡར་ངོའི་ཚེས་བཅུའི་སྔ་ཆར། ཀུན་ཕན་ཉིན་བྱེད་ཀྱི་དཀྱིལ་འཁོར་ཤར་རིའི་རྩེ་མོར་མངོན་པར་འཕགས་པ་དང་མཉམ་དུ་ཞབས་ཟུང་རྩིབས་སྟོང་གི་འཁོར་ལོ་རུ་དམ་གདན་ས་ཆེན་མོར་ཐོག་མར་བཀོད་ཅིང་། དེ་ན་གནས་པའི་སྐྱེ་བོའི་རུ་ཚོགས་ཕྲེང་བསྒྲིགས་ཤིང་གདུགས་དང་། རྒྱལ་མཚན། འཕན་འཕུར་བཅས་སྣ་ཚོགས་པའི་དར་དང་། རྒྱལ་སྲིད་རིན་པོ་ཆེ་སྣ་བདུན། བཀྲ་ཤིས་པའི་རྫས་རྟགས་བརྒྱད་སོགས་མཆོད་པའི་ཡོ་བྱད་མཐའ་ཡས་པ་མ་ཚང་བ་མེད་པ་ཐོགས་ཏེ་གཙུག་ལག་ཁང་ཆེན་མོ་ཐུབ་བསྟན་ཡོངས་སུ་འདུས་པའི་དགའ་ཚལ་དུ་སྤྱན་དྲངས། དཔོན་སློབ་སྐུ་རབས་བཞི་པ་འཇིགས་མེད་ཆོས་དབྱིངས་འོད་གསལ་དང་། མཁན་ཆེན་པདྨ་བཛྲ། ཞེ་ཆེན་པདྨ་འགྱུར་མེད་རྒྱ་མཚོ། རྒྱ་རོང་མཆོག་སྤྲུལ་ཀུན་བཟང་ཐེག་མཆོག་རྡོ་རྗེ་སོགས་བསྟན་པ་འཛིན་པའི་སྐྱེས་ཆེན་རྣམས་དང་། སྡེ་དགེ་ཆོས་རྒྱལ་ཆེན་མོའི་གཉེར་ཆེན་དཔོན་འཁོར། ཆབ་མདོ་རྒྱལ་བ་མཆོག་གི་ཞལ་སྔ་ནས་དྲུང་འཁོར་ལྷན་རྒྱས་གཙོས་ལྷ་མིའི་སྡེ་ཚོགས་ཀུན་ཀྱིས་འཇིགས་མེད་གསེར་གྱི་ཁྲི་འཕང་མཐོན་པོར་མངའ་གསོལ། ལྔ་རིག་མཁས་པའི་དབང་ཕྱུག་སྡེ་སྣོད་འཛིན་པ་མང་པོས་ཕུན་སུམ་ཚོགས་པ་ལྔ་དང་འབྲེལ་བའི་མནྜལ་གྱི་རྣམ་བཤད་དང་། མདོ་རྒྱུད་གཞུང་ལུགས་ཀྱི་ཚོགས་གཏམ་སྣ་ཚོགས་སྤེལ་ཏེ་མཁས་པའི་བསླབ་གྲལ་མཛེས་པར་བྱས་པ་དང་། དེ་མཚུངས་མང་འགྱེད་དངོས་འབུལ་སོགས་ཕུན་སུམ་ཚོགས་པའི་གཏོང་བའི་སྒོ་འཕར་ཡངས་པོར་ཕྱེས་ཏེ། སྡེ་འབངས་དགྱེས་པའི་སྟོན་ཆེན་ཉིན་འགར་བཤམས་ནས་ཐམས་ཅད་སྤྲོ་དགའི་དཔལ་ལ་བཀོད། དེ་ནས་རིམ་པར་ཡོངས་འཛིན་དགེ་བའི་བཤེས་གཉེན་ཆེན་པོ་དཔལ་སྤྲུལ་འཇིགས་མེད་ཆོས་ཀྱི་དབང་པོ་ལས་བྱང་སེམས་སྤྱོད་འཇུག་ཆེན་མོ་ནས་སྒྱུ་འཕྲུལ་གསང་བ་སྙིང་པོའི་མཚོན་ཟབ་ཆོས་མང་དུ་བཞེས། མཁན་ཆེན་པདྨ་བཛྲ་ལས་རྗེ་གོང་མ་དང་རྒྱལ་སྲས་གཞན་ཕན་པའི་ཞལ་སྔ་ནས་བརྒྱུད་པའི་སྔ་འགྱུར་བཀའ་མ་གཙོ་གྱུར་དབང་དང་རྒྱུད་བཤད་དུ་མ། འཇམ་མགོན་བློ་གྲོས་མཐའ་ཡས་ལས་རིན་ཆེན་གཏེར་མཛོད་ཆེན་མོ། ཨ་འཛོམས་འབྲུག་རྒན་འགྲོ་འདུལ་དཔའ་བོ་རྡོ་རྗེ་ལས་མན་ངག་གསང་བ་སྙིང་ཐིག་གི་ཟབ་ཁྲིད། རྒྱ་རོང་ཀུན་བཟང་ཐེག་མཆོག་རྡོ་རྗེ་ལས་རྗེ་གོང་མ་ནས་བརྒྱུད་པའི་བཀའ་གཏེར་གསར་རྙིང་གི་དབང་ཁྲིད་གསན་པ་སོགས་མདོར་ན་ཐུན་མོང་གི་གཙུག་ལག་སྒྲ་ཚད་བཟོ་གསོ་ནས། ཐུན་མིན་སྡེ་སྣོད་ གསུམ་དང་རྒྱུད ་སྡེ་བཞི་དྲུག་གི་འགྲེལ་ཊཱིཀ་སྟོང་ཐུན་དང་བཅས་པ་གསན་བཞེས་མཛད། རྗེ་གོང་མའི་ཐུགས་རིག་གསལ་བས་བརྩོན་པ་ཆེན་པོའི་སྦྱང་པ་ལ་མ་ལྟོས་པར་རྟོགས་པའི་ཀློང་བརྡོལ་བས་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ཆེན་མོར་མངའ་དབང་མཛད། ཁྱད་པར་འཇམ་དབྱངས་མཁྱེན་བརྩེའི་དབང་པོ་གཙུག་གི་རྒྱན་གཅིག་ཏུ་བསྟེན་ནས་སྨིན་གྲོལ་ཉམས་ཁྲིད་ཀྱི་ཟབ་ཆོས་སྤྱི་དང་། བྱེ་བྲག་འོད་གསལ་རྫོགས་པ་ཆེན་པོ་སྙིང་ཐིག་གོང་འོག་གི་གདམས་གནད་ཐམས་ཅད་ཆིག་རྫོགས་སུ་བསྩལ་བས་ཡིད་དཔྱོད་རྩོལ་བཅས་ཀྱི་ལམ་ལ་མ་ལྟོས་པར་ས་ལམ་གདན་ཐོག་གཅིག་ཏུ་གཅོད་པའི་གྲུབ་བརྙེས་ཡིད་བཞིན་གྱི་རྒྱལ་སར་ཕེབས་པས་འབྱུང་འགྱུར་གྱི་ཆོས་སྣ་ཚོགས་པ་ཆགས་ཐོག་མེད་པར་མཁྱེན་པ་དང་། ནམ་མཁར་བྱ་བཞིན་འཕུར་བ། སྒྲུབ་གཏོར་འོད་དུ་ཞུ་ནས་བདུད་རྩིར་གྱུར་པ། ཐོད་སྣོད་ལས་སྨན་རཀ་ཁོལ་བ། ཉི་མ་རྟོད་ལ་མནན་པ། བུམ་པ་བར་སྣང་དུ་བཞག་པ། བུམ་ཆུ་ཟད་མེད་དུ་བསྒྱུར་བ། ཞབས་རྗེས་རྡོ་ལ་མངོན་པ། སྐུ་གཟན་ཉི་ཟེར་ལ་འགེལ་བ། མྱ་ངམ་གྱི་ཐང་ལས་ཆུ་གཏེར་བཏོན་པ། ཤང་ཁྲག་རས་དཀར་དུ་བྱུགས་ནས་དྲིལ་ཏེ་གནང་བ་ཕྱིས་ཞལ་ཕྱེས་ཚེ་ཨོ་རྒྱན་ཆེན་པོའི་ཐང་སྐུར་གྱུར་ཅིང་རིང་བསྲེལ་གྱིས་གང་བ་སོགས། ངོ་མཚར་གྲུབ་རྟགས་ཀྱི་མཛད་པ་ཕལ་པའི་བློའི་ཡུལ་ལས་རྣམ་པར་འགོང་པ་སྣ་ཚོགས་པ་མཐུན་སྣང་མཐོང་ཆོས་སུ་བསྟན་པ་དང་། དངོས་ཉམས་འོད་གསལ་གྱི་སྣང་ཆར་དཔལ་རི་པདྨ་འོད་གླིང་དུ་རིག་འཛིན་འདུས་པའི་ཚོགས་གྲལ་དུ་ལན་གཉིས་སུ་ཕེབས་པ་སོགས་དག་པའི་སྣང་ཆ་འབའ་ཞིག་འབྱམས་སུ་ཀླས། ཀུན་གཟིགས་བླ་མ་འཇམ་དབྱངས་མཁྱེན་བརྩེའི་དབང་པོས་རྡོ་རྗེ་སློབ་དཔོན་བཀའ་རབ་འབྱམས་ཀྱི་སྨིན་དབང་བསྩལ་ཞིང་འབོར་གདན་དགུ་བརྩེགས་ཀྱི་ཁྲི་ལ་བཞུགས་སུ་གསོལ་ཏེ་ཕྱིན་ཆད་མདོ་ཁམས་སྟོད་སྨད་ཀྱི་ཡང་སྲིད་སྤྲུལ་པའི་སྐུ་ཐམས་ཅད་ཉིད་ནས་ངོས་འཛིན་མཛད་དགོས་པའི་བཀའ་བསྩལ་གཟེངས་བསྟོད་མཛད་པས། ཕྱི་དུས་སུ་ས་བཀའ་རྙིང་གསུམ་གྱི་བསྟན་འཛིན་ཕལ་མོ་ཆེའི་ཡང་སྲིད་རྗེ་འདིས་ངོས་འཛིན་མཛད་པ་བརྒྱ་ཕྲག་ལྷག་ཏུ་བརྒལ་བར་གྲགས་ཤིང་། འཁྲུངས་ཡུལ་དང་ཡབ་ཡུམ་མཚན་སྒྲ་སོགས་ལྐོག་གྱུར་གྱི་ཆོས་ཀུན་སྒྲིབ་མེད་དུ་གཟིགས་པ་རྡོ་རྗེའི་ལུང་གིས་བསྟན་པས་ཐམས་ཅད་ངོ་མཚར་བའི་གནས་ལ་བཀོད་ཅིང་། རྗེ་འདི་ཉིད་ཀྱིས་ངོས་འཛིན་མཛད་པའི་སྐྱེས་ཆེན་དག་ནི་གངས་ལྗོངས་རྒྱལ་བསྟན་སླར་གསོ་ལ་མཛད་རྗེས་ཕྲིན་ལས་གཞན་མཚུངས་དང་བྲལ་བ་རྨད་དུ་བྱུང་བ་ཤ་སྟག་བྱུང་། རང་དགོན་དུ་བདེ་ཀོང་མཁྱེན་གསུམ་སོགས་སར་གནས་འཕགས་ཆེན་མང་པོའི་སྐྱེ་སྲིད་ངོས་འཛིན་སྐུ་བདག་མཛད་པས་རྫོགས་ཆེན་སྤྲུལ་བརྒྱ་མ་ཞེས་ཡོངས་སུ་གྲགས་པ་བྱུང་། གཞན་ཕན་ཕྲིན་ལས་ཀྱི་མཛད་པ་རྒྱ་ཆེ་བ་དུས་སྐབས་དེའི་བསྟན་འཛིན་སྐྱེས་ཆེན་ཀུན་ལས་ཆེས་ཁྱད་དུ་འཕགས་པ་སྟེ། འཇམ་མགོན་མི་ཕམ་རིན་པོ་ཆེས། འཕྲིན་ལས་དོན་ཡོད་ཞགས་པས་བསྟན་འགྲོའི་དགེ་མཚན་རླབས་པོ་ཆེ་ངང་གིས་བསྡུད་པ་རྫོགས་ཆེན་མཆོག་སྤྲུལ་རིན་པོ་ཆེ་ཞེས་བསྔགས་བརྗོད་མཛད། དབུས་འགྱུར་ཆོས་ཀྱི་ཞིང་སར་སྔ་ཕྱིར་ལན་གཉིས་ཕེབས་ཤིང་དེ་དག་གི་སྐབས་སུ་རིས་མེད་ཆོས་སྡེ་ཀུན་ལ་མཆོད་འབུལ་མང་འགྱེད་སོགས་ཟང་ཟིང་གི་དངོས་པོའི་མཆོད་སྦྱིན་རྒྱ་ཆེར་སྤེལ་ཞིང་། དཔལ་གྱི་བསམ་ཡས་སུ་ཕེབས་སྐབས་ཆོས་རྒྱལ་ཆེན་པོའི་སྐུ་རྟེན་པ་ལ་ཆོས་སྐྱོང་ཐོག་བབ་ཀྱིས་ཅི་བཅོལ་ཕྲིན་ལས་སྒྲུབ་པའི་གཡར་དམ་བཅས་ཤིང་རོལ་ཆེན་པེ་ཧར་དགྱེས་གླུ་རྟེན་སྐལ་དུ་ཕུལ། གཞུང་ས་དགའ་ལྡན་ཕོ་བྲང་ནས་མ་ཧཱ་པན་ཊི་ཏ་ཧོ་ཐོག་ཐུ་ཞེས་པའི་ཆབ་ཤོག་དང་གསེར་ཐམ་སོགས་ཆེན་པོར་འོས་པའི་ཡོ་བྱད་སྣ་ཚོགས་པའི་གནང་སྐྱེས་རྨད་དུ་བྱུང་བ་མཛད། དེ་བཞིན་བཤད་སྒྲུབ་ལས་གསུམ་གྱི་ཕྲིན་ལས་ཀྱི་སྣང་བས་ཕྱོགས་ཀྱི་ཐ་གྲུ་ཀུན་ཏུ་ཁྱབ་པར་སྤེལ་བ་སྟེ། གདན་ས་ཆེན་མོ་གང་དུ་སྔར་ཡོད་ཀྱི་སྒྲུབ་སྡེ་པ་བཅུ་གསུམ་དེ་བཅུ་ཕྲག་གསུམ་གྱི་གྲངས་སུ་སྤེལ། སྐྱལ་གྱི་བྲག་དཀར་ལ་ཚེ་སྒྲུབ་རྒྱུན་མཚམས་པ་བཅུ་གསུམ་ཡོད་པའི་སྒྲུབ་སྡེ་གསར་དུ་བཏབ། ཤྲཱི་སེང་གི་ཆོས་གྲྭར་རྒྱུན་བཞུགས་ཀྱི་བཤད་གྲྭ་བ་སྔར་ཡོད་ཀྱི་སྟེང་བཅུ་ཕྲག་ལྔ་རུ་སྤེལ་བ་དང་། གང་གི་ཐུགས་བསྐྱེད་ཀྱི་མཐུས་བསྐུལ་ཏེ་མཁན་ཆེན་གཞན་དགའ་རིན་པོ་ཆེས་གཞུང་ཆེན་བཅུ་གསུམ་རྒྱ་མཆན་གྱིས་འགྲེལ་པ་དང་། འཇམ་མགོན་མི་ཕམ་རིན་པོ་ཆེས་རང་ལུགས་དྲི་མ་མེད་པ་གཙོར་འདོན་གྱིས་དགོངས་འགྲེལ་བསྟན་བཅོས་སྣ་ཚོགས་པ་ལྗགས་རྩོམ་མཛད་ཅིང་དེ་དག་པར་དུ་བསྐྲུན་པ་སོགས་དགོན་ཡར་མར་གཉིས་སུ་པར་ལྡེབ་ཁྲི་ཕྲག་བཅུ་ལས་མི་ཉུང་བ་གསར་བཞེངས་མཛད། བཤད་སྒྲུབ་ལུང་རྟོགས་ཀྱི་བསྟན་པ་དར་བར་མཛད་པའི་མཐུ་ལས་ཕྱོགས་ཀྱི་བུ་དགོན་སུམ་བརྒྱ་ལྷག་ཏུ་འཕེལ་ཞིང་། གཉུག་མར་གནས་པའི་འདུས་སྡེ་ཞལ་གྲངས་སྟོང་ཕྲག་ལས་བརྒལ་བར་གྱུར། གཞན་ཡང་སྟོང་མཆོད་ཀུན་བཟང་མཆོད་སྤྲིན་དང་། མགོན་ཁང་དབང་དྲག་རོལ་པ། ལྷ་གསར་ཐོག་བརྩེགས་ལྔ་པ་སོགས་རྟེན་བརྟེན་པ་དང་བཅས་པ་གསར་དུ་བཞེངས། དེ་མཚུངས་ལོ་དར་གྱི་དུས་མཆོད་བཀའ་གཏེར་ཆུ་བོ་ཟུང་འབྲེལ་གྱི་མཆོད་ཁག་བརྒྱད་ཅུ་ཐམ་པ་དང་། ཚེ་སྒྲུབ་བདུད་བཞི་རྣམ་རྒྱལ་ཚེ་གཡང་ཁ་སྤྲོད་དུ་སྒྲུབ་པ་ལས་ཀྱི་ཁ་ཚར་དང་བཅས་པ། ཕུར་ཆེན་དགྲ་བགེགས་ཀུན་སྒྲོལ་སྨད་ལས་གར་འཆམ་དང་བཅས་པ། འཛམ་གླིང་གེ་སར་རྒྱལ་པོ་དཔའ་ཐུལ་ཕུ་ནུའི་འཁོར་ཚོགས་དགྲ་བླ་རླུང་རྟའི་ལྷ་ཚོགས་དང་བཅས་པའི་གར་འཆམ་གསར་བཙུགས་མཛད་པས་མཐའ་དམག་གི་གཡུལ་ངོ་ལན་གཅིག་ལ་བཟློག་པར་གྲགས། གསོལ་ཁ་གྲ་ཚང་བརྒྱད་ཅུས་སྔ་དགོང་རྒྱུན་ཆགས་སུ་སྐོང་གསོལ་ཆད་མེད་དང་། མར་མེ་ཚེ་འབར་གྲངས་མེད་རྒྱུན་འཛུགས་གནང་བ་སོགས་རྣམ་དཀར་དགེ་བའི་སྒོ་འཕར་རྒྱ་ཆེ་བ་མང་པོ་གསར་དུ་ཕྱེས། དམ་པ་གང་གི་གསུང་གི་བདུད་རྩིས་དབུགས་དབྱུང་ཐོབ་པའི་ཞལ་སློབ་གྲུབ་པའི་ས་མཐོར་གཤེགས་ཤིང་མཁས་པའི་ཡང་རྩེར་སོན་པ་གྲངས་ལས་འདས་པ་བྱོན་ཞིང་གཙོ་བོའི་མཚན་ཙམ་སྨོས་ན། ཉི་སྤྲུལ་དྲུག་པ་རིན་པོ་ཆེ། རབ་འབྱམས་དྲུག་པ་སྣང་མཛད་གྲུབ་པའི་རྡོ་རྗེ། མདོ་རིན་པོ་ཆེ་ཟིལ་གནོན་དགྱེས་པ་རྡོ་རྗེ། རྫོང་སར་མཁྱེན་སྤྲུལ་ཆོས་ཀྱི་བློ་གྲོས། གླིང་སྤྲུལ་ཐུབ་བསྟན་ཕྲིན་ལས་རྒྱ་མཚོ། རྫོགས་ཆེན་འབྲུག་པ་སྐུ་ཆེན། རྒྱ་རོང་ནམ་སྤྲུལ། མཁན་ཆེན་གཞན་ཕན་སྣང་བ། གླག་བླ་བསོད་ནམས་ཆོས་འགྲུབ། མཁན་པོ་ཀུན་དཔལ། ལྕང་མའི་ཐུབ་དགའ། སྨྱོ་ཤུལ་མཁན་པོ་ངག་ཆུང་། ཡིད་ལྷུང་འཇའ་ལུས་པ་བསོད་ནམས་རྣམ་རྒྱལ། བོད་སྤྲུལ་མདོ་སྔགས་བསྟན་པའི་ཉི་མ། རྨེ་བ་མཁན་ཆེན་ཚེ་དབང་རིག་འཛིན་དང་ནོར་བུ་བསྟན་འཛིན། མི་ཕམ་མཆོག་སྤྲུལ་དགུ་རོང་རྒྱལ་སྲས། མུ་ར་པདྨ་ནོར་བུ། རྡོ་གྲུབ་བཞི་པ་ཐུབ་བསྟན་ཕྲིན་ལས་དཔལ་བཟང་། སྤྲུལ་སྐུ་དྲི་མེད། ཞེ་ཆེན་རྒྱལ་ཚབ། བདེ་ཀོང་མཁྱེན་གསུམ་གྱི་ཡང་སྲིད་དང་། བདག་ཅག་གི་བླ་མ་དམ་པ་འབྲུག་སྤྲུལ་ཐུབ་བསྟན་ཉི་མ་སོགས་རང་དགོན་གྱི་མཁན་སྤྲུལ་བརྒྱད་ཅུ་ལྷག་བཅས་བསྟན་པ་འཛིན་པའི་སྐྱེས་ཆེན། རྟོགས་པ་བརྙེས་པའི་གྲུབ་མཆོག གཞུང་ལུགས་འཆད་པའི་མཁན་པོ་སོགས་གྲངས་ལས་འདས་པ་བྱོན་ཞིང་དེ་དག་རེ་རེས་ཀྱང་བུ་སློབ་ནམ་མཁའི་སྐར་ཚོགས་ལྟར་བསྐྱངས་པས་འཛམ་གླིང་ཆོས་ལྡན་གྱི་ཡུལ་གྲུ་མང་པོར་གང་གི་ཕྲིན་ལས་ཀྱི་གདུགས་དཀར་ཡངས་པོས་ཁྱབ་པར་གྱུར། མཐར་དགུང་གྲངས་དྲུག་ཅུ་རེ་གཅིག་བཞེས་པ་རབ་བྱུང་བཅུ་དྲུག་པའི་ཤིང་ཕག་ལོར་རྟག་འཛིན་ཅན་གྱི་སྐྱེ་བོ་དག་མཐའ་བཞིའི་བསྡུས་པའི་ཆོས་ལ་ངེས་པ་འབྱུང་ཕྱིར་སྐུ་ཚེ་དེའི་འགྲོ་དོན་མཐའ་རུ་ཕྱིན་ཏེ་རེ་ཞིག་ཞི་བར་གཤེགས་པའི་ཚུལ་བསྟན་ཏོ། རྗེ་ཉིད་སྡེ་བརྒྱད་བྲན་བཀོལ་དྲེགས་པའི་བཀའ་བབ་ཆེན་མོར་བྱོན་པས་བསང་མཆོད་གསོལ་ཀའི་ཆོས་ཚན་དག་སྣང་དགོངས་གཏེར་གྱི་ཚུལ་དུ་བབ་པ་མང་དུ་བཞུགས་པ་དང་། གཞན་གསུང་ཚན་ཐོར་བུའི་རིགས་བཅས་ཕྱོགས་ཀུན་ནས་འཚོལ་བསྡུ་དག་སྒྲིག་བྱུང་བས་རྗེ་གང་གི་གསུང་གི་ཕྲིན་ལས་རྒྱུན་མི་ཆད་པར་སྲི་ཞུ་ལེགས་གྲུབ་བྱུང་བའི་སྤྲོ་བ་དང་བསྟུན། རྫོགས་ཆེན་ཆོས་འབྱུང་ཆེན་མོར་བྲིས་པའི་རྣམ་ཐར་ལ་ཡང་དུ་དག་ཞུས་དང་བཅས། མཁྱེན་གཟིགས་དམ་པ་དག་གི་ཞལ་སྔ་ནས་གྲུབ་དབང་རྫོགས་ཆེན་པའི་མཚན་གྱི་ཅོད་པན་གྱི་བྱིན་གྱིས་བརླབས་པ་བསྟན་འཛིན་ལུང་རྟོགས་ཉི་མས་མེ་སྤྲེལ་ས་ཟླའི་ཡར་ཚེས་ལ་བྲིས་པ་དགེ།