པར་དུ་བསྐྲུན་པའི་ཕན་ཡོན་བརྗོད་པས་མཇུག་བསྡུ་བ།
གསུམ་པ་པར་དུ་བསྐྲུན་པའི་ཕན་ཡོན་བརྗོད་པས་མཇུག་བསྡུ་བ་ནི། ཀརྨ་པ་མཁའ་ཁྱབ་རྡོ་རྗེས། སྙིགས་མའི་ཡང་མཐའ་འདིར་དམ་པའི་ཆོས་ཡོངས་སུ་འཛིན་པ་ནི་རྒྱལ་བ་དགྱེས་པའི་མཆོད་པ་མཆོག་དང་། འགྲོ་ཁམས་ཡོངས་ལ་སྨན་པའི་རྩ་བ་དེ་ལས་ཆེ་ཞིང་ཁྱད་པར་འཕགས་པ་གཞན་མ་དམིགས་ཤིང་། དེ་ཡང་ལུང་རྟོགས་ཀྱི་བསྟན་པ་རིན་པོ་ཆེ་ནི་འཆད་ཉན་སྒོམ་སྒྲུབ་ཀྱི་སྒོ་ནས་འཛིན་པ་ཡིན་མོད་ཀྱང་། འདིར་འདུས་བྱས་ཀྱི་དགེ་བའི་རྩ་བ་གསུང་རབ་རིན་པོ་ཆེ་གཅིག་ལས་དུ་མར་འཇོ་བའི་སྤར་དུ་བཞེངས་པ་འདི་ནི་དགོས་པ་མཆོག་དང་ལྡན་ཏེ། རང་རེ་རྣམས་ཀྱི་གཉེར་བྱའི་མཐར་ཐུག་ནི་རྫོགས་པའི་སངས་རྒྱས་ཀྱི་གོ་འཕང་ཡིན་ལ། དེ་ཉིད་སྒྲུབ་པའི་ཐབས་ནི་ལུང་དང་རྟོགས་པའི་རང་བཞིན་ཅན་གྱི་དམ་པའི་ཆོས་སྒྲུབ་པ་ཁོ་ན་ལ་རགས་ལས་ཤིང་། དེའང་ཡི་གེའི་ཕྱི་མོ་ཉིད་ལ་གནས་པ་དང་། གསུང་རབ་ལ་ཐོས་བསམ་བགྱི་བ་དང་། ཡི་གེར་འབྲི་བ། གླེགས་བམ་སྦྱིན་པ་སོགས་ཀྱང་དམ་པའི་ཆོས་ཡོངས་སུ་བཟུང་བར་འགྱུར་ཞིང་། གསུང་རྡོ་རྗེ་གཟུགས་བརྙན་དུ་འཕོས་པའི་ཡི་གེའི་འབྲུ་རེ་རེའང་བདེ་བར་གཤེགས་པའི་དཀྱིལ་འཁོར་གྱི་འཁོར་ལོ་ཇི་སྙེད་པ་རྣམས་ཡོངས་སུ་རྫོགས་པའི་བདག་ཉིད་ཅན་ཡིན་པས། དེ་ཉིད་བསྐྲུན་པ་ནི་གཟུགས་སྐུ་བཞེངས་པའི་མཆོག་ཏུ་འགྱུར་བ་དང་། གླེགས་བམ་ཡི་གེར་འབྲི་བ་ལས་ཀྱང་སྤར་དུ་བཞེངས་པ་ནི་སྒོ་དུ་མ་ནས་ཁྱད་དུ་འཕགས་པ་དངོས་སྟོབས་ཀྱི་རིག་པས་འགྲུབ་ལ། ཞེས་གསུངས་པ་ལྟར། རྒྱལ་དབང་ཨོ་རྒྱན་ཆེན་པོས་གསང་སྔགས་ཀྱི་རྒྱུད་སྡེ་རྣམས་ཀྱི་དགོངས་པའི་ཡང་ཞུན་བཅུད་དུ་ དྲིལ་ནས་རྗེ་འབངས་སྙིང་གི་བུ 
་མཆོག་རྣམས་ལ་སྨོན་ལམ་གྱི་གཏད་རྒྱ་དང་བཅས་ཏེ་སྙིགས་མའི་རྒུད་པ་འཇོམས་པའི་ཕྱིར་གཏེར་དུ་སྦས་པའི་ཟབ་ཆོས་བླ་ན་མེད་པ་རྣམས་རྟེན་འབྲེལ་དུས་སུ་སྨིན་པའི་ཚེ་ངོ་མཚར་སྤྲུལ་པའི་གཏེར་སྟོན་རྣམས་ཀྱིས་གཏེར་ནས་སྤྱན་དྲངས་པའི་དུས་བབས་ཀྱི་ཟབ་ཆོས། རྒྱུད་ལུང་མན་ངག་གི་བཅུད་ཕུར། བསྐྱེད་རྫོགས་རྫོགས་ཆེན་གྱི་གནད་གསང་། ཡེ་ཤེས་མཁའ་འགྲོའི་སྙིང་ཁྲག་དྭངས་མ་འདི་དག་འཇིག་རྟེན་གྱི་ཁམས་སུ་དར་ཞིང་རྒྱས་ལ་ཡུན་དུ་གནས་པའི་སླད་དུ་འཐོར་བ་བསྡུས་ཤིང་གླེགས་བམ་དུ་བསྐྲུན་ནས་ཕྱོགས་སུ་སྤེལ་བའི་མཛད་པ་ནི་རྒྱལ་བ་དགྱེས་པའི་མཆོད་སྤྲིན། བསྟན་ལ་བྱ་བ་བྱས་ཤིང་བླ་མའི་སྲི་ཞུ་བསྒྲུབ་པ་བླ་ན་མེད་པ་ཡིན་ཏེ། དེ་བཞིན་གཤེགས་པའི་སྙིང་པོ་ཞེས་བྱ་བའི་མདོ་ལས། ཀུན་དགའ་བོ་བྱང་ཆུབ་སེམས་དཔའ་གང་ཆོས་ཀྱི་རྣམ་གྲངས་འདི་འཆང་བ་དང་། ཀློག་པ་དང་། གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་པ་དང་། གླེགས་བམ་དུ་བྱས་ཏེ་འཆང་བ་དེས་འདི་སྙམ་དུ། བདག་གིས་དེང་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་དུ་སེམས་བསྐྱེད་པར་བྱའོ་ཞེས་དང་། ནམ་མཁའི་མཐའ་དང་མཉམ་པའི་རྒྱུད་ལས། རིན་ཆེན་སྣ་བདུན་ལ་སོགས་པས། །རྒྱལ་བ་ཀུན་གྱི་རང་བཞིན་ཅན། །མ་ལུས་བསྡུས་པའི་ངོ་བོ་ཉིད། །སྐུ་གསུང་ཐུགས་ཉིད་བྲིས་པ་ཡིན། །ཞེས་དང་། གུ་རུའི་ཞལ་གདམས་སྙིང་བྱང་ཡིད་བཞིན་ནོར་བུ་ལས། གླེགས་བམ་ཙམ་ཞིག་བཞུགས་པ་ཡི༔ ས་ཕྱོགས་དེ་དག་ཐམས་ཅད་ཀྱང༔ རྡོ་རྗེའི་འོག་མིན་ཉིད་དང་མཚུངས༔ སངས་རྒྱས་བྱང་ཆུབ་སེམས་དཔའ་དང༔ རིག་འཛིན་བརྒྱུད་པས་བྱིན་གྱིས་རློབས༔ དཔའ་བོ་དྷཱ་ཀི་སྤྲིན་བཞིན་འདུ༔ ཆོས་སྐྱོང་སྲུང་མས་བྲན་ལྟར་བྱེད༔ ཞེས་སོགས་མདོ་རྒྱུད་རྣམས་ནས་ཕན་ཡོན་རྒྱ་ཆེར་གསུངས་པ་ལྟར་འཆད་ཉན་སྒོམ་སྒྲུབ་ཀྱི་སྒོ་ནས་རྒྱལ་བའི་བསྟན་ལ་བྱ་བ་བྱེད་པ་ལྟ་ཅི། བཀའ་གཏེར་གསུང་རབ་རྣམས་ཀྱི་ཕྱི་མོ་དང་། དེ་ཉིད་གཅིག་ལས་དུ་མར་འཕྲུལ་བའི་གླེགས་བམ་རྣམས་གང་དང་གང་དུ་བཞུགས་པ་དེ་དང་དེར་མི་མཐུན་པའི་ཕྱོགས་ཀུན་ཞི་ཞིང་སྲིད་དང་ཞི་བའི་ལེགས་ཚོགས་ཐམས་ཅད་རང་བཞིན་འདུ་བར་འགྱུར་བར་གསུངས་པའི་ཕྱིར་ན་བསོད་ནམས་ཚད་མེད་པ་བསགས་པ་ཡིན་ནོ།། སླར་སྨྲས་པ། བཀའ་གཏེར་གླེགས་བམ་ལྷུན་པོའི་གཏོས་མཉམ་པ། །མཆོད་སྟེགས་དྲ་མིག་ནང་དུ་གཟིམ་པ་ལས། །གླེགས་ཐག་དཀྲོལ་བའི་གོ་སྐབས་དཀོན་དུས་འདིར། །འདི་ཀོ་ངལ་བས་བྱས་པ་དོན་ཆུང་མོད། །ཀུན་བཟང་ཧེ་རུ་ཀ་དཔལ་ཐུགས་ཀྱི་གཏེར། །མ་ཚོགས་མཁའ་འགྲོའི་སྙིང་གི་དྭངས་མའི་བཅུད། །སྐལ་དམན་སྐྱེ་བོར་གསང་བའི་རྡོ་རྗེའི་རྒྱ། །རང་གར་འཐོར་ལ་མི་ཕངས་སུ་ཞིག་ཡོད། །གར་གྱི་དབང་པོ་འཇིགས་མེད་རྣམ་རྒྱལ་གྱི། །དག་སྣང་སྐུ་གསུམ་དགོངས་མཛོད་ཀྱིས་མཚོན་པའི། །གསུང་ཆོས་གང་ཟིན་འབད་པས་རབ་བསྡུས་ནས། །གཅིག་ལས་དུ་མར་བསྐྲུན་པའི་སྐལ་བཟང་མངོན། །འདིའི་མཚོན་དུས་གསུམ་ལེགས་བྱས་ཆབ་ཀྱི་རྒྱུན། །དམིགས་བྲལ་འཁོར་གསུམ་དག་པའི་རྒྱས་བཏབ་སྟེ། །དཔའ་ཆེན་རྣམས་ཀྱི་ཚོགས་གཉིས་རྒྱ་མཚོ་ཆེར། །གཅིག་ཏུ་འདྲེས་ནས་མི་ཟད་འཕེལ་གྱུར་ཅིག །སྙིགས་མའི་སྐྱབས་གཅིག་ཨོ་རྒྱན་ཆེན་པོ་ཡི། །རིང་ལུགས་ཉེ་བརྒྱུད་དག་སྣང་ཟབ་ཆོས་འདི། །ནོར་འཛིན་ཡངས་པའི་ཁྱོན་དུ་རབ་དར་ཞིང་། །ནད་མུག་མཚོན་གྱི་བསྐལ་ངན་ཞི་གྱུར་ཅིག །ལུས་ཅན་ཡིད་མཁར་བྱིན་རླབས་སྤྲིན་ཕུང་འཁྲིགས། །སྨིན་གྲོལ་ཆར་གྱིས་རིགས་ཁམས་ནོར་འཛིན་བརླན། །སྐུ་བཞིའི་སྙེ་མས་དོན་གཉིས་བང་མཛོད་གཏམས། །འགྲོ་ལ་ཕན་བདེའི་དགའ་སྟོན་རྟག་འཇོ་ཤོག །ཞེས་གར་གྱི་དབང་པོ་འཇིགས་མེད་རྣམ་རྒྱལ་གྱི་དགོངས་གཏེར་ཆོས་སྡེའི་དཀར་ཆག་མུ་ཏིག་ཕྲེང་བ་ཞེས་བྱ་བ་འདི་ཡང་དམ་པ་གང་གི་རིགས་དབོན་དུ་སྐྱེས་པའི་གདོལ་སྤྱོད་མཁན་ཡི་དམ་རྡོ་རྗེར་འབོད་པས་གསུང་ཆོས་གང་རྙེད་རྩིས་འཕྲུལ་དུ་ཕབ་བསྡུ་ཞུ་དག་བཅས་གཅིག་ལྕོགས་སུ་བགྱི་བའི་ཞོར་དུ་བྲིས་ནས་ལྕགས་གླང་ཐ་སྐར་ཟླ་བའི་དཀར་ཕྱོགས་དགའ་བ་དང་པོའི་ཉིན་མཇུག་གྲུབ་པར་བགྱིས་པ་དགེ་ཞིང་བཀྲ་ཤིས་པར་གྱུར་ཅིག ། དགེའོ།། དགེའོ༎ དགེའོ༎