སངས་རྒྱས་ཐམས་ཅད་དང་མཉམ་པར་སྦྱོར་བ་དཔལ་ཡང་དག་ཟླ་གམ་དགུ་པའི་འཕྲིན་ལས་ཀྱི་རིམ་པ་རྒྱུད་དོན་སྣང་བྱེད།
སངས་རྒྱས་ཐམས་ཅད་དང་མཉམ་པར་སྦྱོར་བ་དཔལ་ཡང་དག་ཟླ་གམ་དགུ་པའི་འཕྲིན་ལས་ཀྱི་རིམ་པ་རྒྱུད་དོན་སྣང་བྱེད་བཞུགས་སོ།།
ན་མཿཤྲཱི་སམྦཛྲ་ཧེ་རུ་ཀ་སྱ་དེ་ཝཱ་ཡ། སངས་རྒྱས་ཐམས་ཅད་དང་མཉམ་པར་སྦྱོར་བ་དཔལ་ཡང་དག་ཟླ་གམ་དགུ་པའི་འཕྲིན་ལས་ཀྱི་རིམ་པ་རྒྱུད་དོན་སྣང་བྱེད་ཅེས་བྱ་བ། དཀྱིལ་འཁོར་རྒྱ་མཚོའི་ཁྱབ་བདག་དྲིན་ཅན་རྩ་བའི་བླ་མ་རིན་ཅེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོ་དང་རྡོ་རྗེ་ཁྲག་འཐུང་དབྱེར་མ་མཆིས་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་བཟུང་དུ་གསོལ། ཀུན་ཁྱབ་ཀུན་གྱི་རང་བཞིན་གདོད་ནས་དྲི་བྲལ་སེམས་ཉིད་ཆོས་ཀྱི་སྐུ། །འོག་མིན་ཞིང་གི་གཙོ་བོར་ཡན་ལག་བདུན་ལྡན་མཚན་དཔེ་རབ་རྒྱས་ལོངས་སྤྱོད་རྫོགས། །གྲངས་མེད་དཀྱིལ་འཁོར་རྒྱ་མཚོའི་དབང་ཕྱུག་རྡོ་རྗེ་ཁྲག་འཐུང་སྤྲུལ་པའི་གར། །རང་རིག་དོན་གྱི་ཡང་དག་རང་ངོ་མ་འཕྲོད་དེ་སྲིད་བསྒྲུབ་བྱའི་ཡུལ། །འཇིགས་མེད་ཧཱུཾ་སྒྲ་སེང་གེའི་ང་རོ་ཡིས། །ཡིད་སྲུབས་གླང་ཆེན་སྤྱི་བོ་འགེམས་མཛད་པ། །འཕགས་ཡུལ་གྲུབ་པའི་འཁོར་སྒྱུར་ཞབས་སེན་ཟླས། །བདག་ཡིད་ཀུནྡ་བཞད་པའི་དགའ་སྟོན་སྩོལ། །བདེ་(༢ན)
ལྡན་ཞིང་གི་མགོན་པོ་གར་གྱི་དབང་། །འཛམ་བུའི་གླིང་ན་ཆེ་བའི་རིག་སྔགས་ཀྱི། །བརྟུལ་ཞུགས་སྤྱོད་པས་སྣང་སྲིད་ཟིལ་གནོན་པ། །པདྨ་ཐོད་འཕྲེང་བསླུ་མེད་གཏན་གྱི་སྐྱབས། །གང་གི་ཞལ་ལུང་དངར་པོར་འཐུལ་བའི་རོ། །བཏུངས་པས་ལམ་འདིའི་སྒོ་ནས་གྲུབ་བརྙེས་པ། །འཁོན་སྟོན་རིམ་པར་བྱོན་དང་སྨིན་གྲོལ་གྱི། །བཀའ་བབས་བརྒྱུད་ལྡན་བླ་མའི་ཚོགས་རྣམས་རྒྱལ། བསྙེན་སྒྲུབ་སྒྲུབ་ཆེན་དབང་འཁྲིད་ལས་སྦྱོར་སོགས། །ཀུན་གྱི་ཐོག་མར་ང་རྒྱལ་སེམས་འཛིན་པའི། །བསྐྱེད་པའི་རིམ་པ་གསལ་བར་བྱེད་པའི་སྒོ། །ལས་བྱང་སྔོན་བྱོན་དམ་པའི་ལུགས་བཞིན་འགོད། །དེ་ལ་འདིར་འཕགས་ཡུལ་གྲུབ་པའི་དབང་ཕྱུག་སློབ་དཔོན་ཆེན་པོ་ཧཱུཾ་ཀཱ་རའི་བཞེད་སྲོལ་དཔལ་ཡང་དག་མར་མེ་དགུ་པའི་འཕྲིན་ལས་ཀྱི་རིམ་པ་འདྲི་བ་ལ། སྔོན་འགྲོ་དངོས་གཞི་རྗེས་གསུམ་ལས། །དང་པོར་སྐྱབས་སེམས་ཚོགས་ཞིང་མཚམས། །བཤགས་པ་བརྡ་སྒོ་དབྱེ་ཕྱག་འཚལ། །དམ་བྱིན་མཆོད་བརླབ་བཅུ་ཡི་ཁྲིགས། །དེ་ཡང་རྒྱུད་དང་(༢བ)
དམ་པའི་ཞལ་ལུང་ལས་བྱུང་བའི་མཚན་ཉིད་དང་ལྡན་པའི་གནས་བཀྲ་ཤིས་ཤིང་ཡིད་དུ་འོང་བར་ཆུ་གཉིས་སྔོན་དུ་འགྲོ་བའི་ཕྱི་ནང་གི་ཉེར་སྤྱོད་རོལ་མོ་སྨན་རཀ་གཏོར་བདག་ཆེན་སྔགས་འཆང་ཆེན་པོ་ཀུན་དགའ་རིན་ཅེན་པས་གཏོར་མ་ཟླུམ་པོ་སྟོད་སུམ་གཉིས་ལ་དཔལ་བཏོད་པ་ཞེས་གསུང་པ་ཏནྟྲ་ཧེ་རུ་ཀ་གལ་པོའི་རྒྱུད་ལས། གཏོར་མ་དཀར་པོ་ཟླུམ་པོ་ནི། །འདི་ནི་ཞི་བའི་གཏོར་མ་ལ། །གཏོར་མ་གྲུ་བཞི་སེར་པོ་ནི། །རྒྱས་པའི་གཏོར་མ་ཡིན་པར་བཤད། །གཏོར་མ་དམར་པོ་ཟླ་གམ་ནི། །དབང་གི་གཏོར་མ་ཡིན་པར་བཤད། །གཏོར་མ་ནག་པོ་གྲུ་གསུམ་ནི།། དྲག་པོའི་ལས་ལ་རབ་ཏུ་ཤིས་ཞེས་ལས་སྒྲུབ་ཚུལ་གྱི་དབང་གིས་གཏོར་མ་ལ་མཐའ་གཅིག་ཏུ་ངེས་པ་མེད་ཅིང་དྲག་པོ་ལ་ཡང་གྲུ་གསུམ་དང་སྙིང་བཟོ་སོགས་རྣམ་གྲངས་མང་བའི་གསང་སྔགས་རྙིང་མར་དཔལ་བཤོས་དྲེགས་བཤོས་རྩ་བས་འབྱེད་ཅེས་ཡང་ཕུར་སོགས་སྒྲུབ་སྡེ་བརྒྱད་ཀྱི་གཏོར་མ་རྣམས་དཔལ་བཤོས་སུ་མཛད་པ་ཡོངས་སུ་གྲགས་པས་གཏོར་ཟླུམ་ལ་དཔལ་འདོན་ལུགས་ཀྱི་གཏི་ཐུག་ཁྲིགས་དེ་འདྲ་ཅི་དགོས། དེ་ལྟར་ན་སྣོད་ཀྱི་ནང་དུ་ཕྱེ་ལ་ཆུ་ལྡུགས་ལུགས་སོགས་ཀྱང་དགོས་པ་འདྲ། རཀྟ་ལ་གྲི་ཁྲག་དང་རང་བྱུང་གི་ཁྲག་སོགས་དགོས་པར་བཤད་མོད། ཆང་ལ་ཤ་བཏབ་པའི་རཀྟ་དེ་འདྲ་གསང་སྔགས་རྙིང་མ་རྣམས་ལ་ནི་མ་གྲགས་ཤིང་གསར་མ་ཕྱོགས་ལ་དེ་འདྲའི་རྣམ་གཞག་འོང་དོན་ཡང་མེད་པས་འཇམ་དཔལ་འཁོན་གྱི་གདུང་བརྒྱུད་དྲི་མ་མེད་པ་རྣམས་ཀྱི་ཞབས་ལ་ཐག་པ་མི་འདོགས་པ་ཞུ། གསུམ་སོགས་མཁོ་བའི་ཡོ་བྱད་རྣམས་མངོན་པར་འདུ་བྱས། དང་པོ་དཀོན་ཅོག་སྐྱབས་འགྲོ་བ། །བཀླགས་པས་དོན་གྲུབ་ལས། བདག་དང་འགྲོ་བ་ཁམས་གསུམ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་ཀྱི་ངོ་བོ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག་རྩ་བ་དང་བརྒྱུད་པར་བཅས་པའི་དཔལ་ལྡན་(༣ན)
བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ལན་གསུམ་སོགས་ལོང་སྐབས་དང་བསྟུན་ཏེ་ཇི་ལྟར་རིགས་པ་བརྗོད་ནས་སྐྱབས་ཡུལ་རྣམས་རང་ལ་བསྡུས་ཏེ་སྤྲོས་བྲལ་གཉིས་མེད་ཀ་དག་གི་ཀློང་དུ་རང་བབས་སུ་བཞག་གོ །གཉིས་པ་སྨན་འཇུག་སེམས་བསྐྱེད་པ། །དཔལ་ཁྲག་འཐུང་གལ་པོ་ཆེའི་རྒྱུད་ལས། །བདེ་གཤེགས་སེམས་ཀྱི་སྙིང་པོ་ལས། །མ་རྟོགས་འཁོར་བའི་སེམས་ཅན་རྣམས། །སངས་རྒྱས་ས་ལ་འགོད་པའི་ཕྱིར། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་པ་ཅི་རིགས་པ་བརྗོད་ཅིང་དེ་དོན་ཡིད་ལ་ནན་ཏན་དུ་བསམ། གསུམ་པ་བསོད་ནམས་ཚོགས་གསོག་པ། །རང་ཉིད་རྡོ་རྗེ་ཁྲག་འཐུང་དུ་གསལ་བའི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་རྩ་བའི་བླ་མ་བཛྲ་ཧེ་རུ་ཀའི་རྣམ་པ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་མ་ཚང་བ་མེད་པས་བསྐོར་ཏེ་མཁའ་ཁྱབ་ཀྱི་འཁོར་ལོར་བཞུགས་པ་ཐམས་ཅད་ཨོཾ་བཛྲ་རྡོ་རྗེ་བསྡུ་བའི་ཕྱག་རྒྱ་དང་བཅས་ས་མཱ་ཛཿས་སྤྱན་དྲངས། རྙིང་མ་བཀའ་མར་གྲགས་ཆེ་བའི་མཐར་བཀླགས་པས་དོན་གྲུབ་ཏུ་ཚད་མེད་ཚིགས་བཅད་བཏགས་པ་ནི། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་རྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་(༣བ)
པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་བྱང་ཆུབ་སེམས་དཔའ་ལ། །དགོས་པ་གསུམ་གྱི་ལུས་དབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །སེམས་ཅན་བདེ་དང་ལྡན་གྱུར་ཅིག །སྡུག་བསྔལ་དག་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་བདུན་རྣམ་དག་དང་ཚད་མེད་བཞི་བསྒོམ། །བཞི་པ་མཚམས་གཅོད་བསྲུང་བའི་གུར། །སྔགས་དང་ཚིགས་བཅད་རྣམས་རྒྱུད་དང་ལྷུག་པ་དང་ཕྱག་རྒྱ་བཀླགས་པས་དོན་གྲུབ་ཀྱི་དོན་འཁྱེར་བདེར་སྦྱར་བ་ནི། ཨོཾ་བཀླགས་པས་དོན་གྲུབ་ཏུ་ཡེ་ཤེས་ཚོགས་གསོག་དང་མཚམས་གཅོད་གཉིས་ས་བཅད་སོ་སོར་མཛད་ཀྱང་མཚམས་གཅོད་ཀྱི་ཁོངས་སུ་བསྡུས་པ་འཇུག་པ་བདེ། མ་ཧཱ་ཤུ་ནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། འཁོར་འདས་ཀྱིས་བསྡུས་པའི་ཆོས་ཐམས་ཅད་མི་དམིགས་པ་སྟོང་པ་ཉིད་དུ་བསམ། སྟོང་པའི་ངང་ལས་པདྨ་ཉི་ཟླ་དབང་ཕྱུག་ཆུང་མ་དང་བཅས་པའི་གདན་གྱི་སྟེང་དུ་རང་གི་རྣམ་པར་ཤེས་པ་ཧཱུཾ་སྔོན་པོ། སྥ་ར་ཎ་ཕཊ། འོད་ཟེར་ཕར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སཾ་ཧ་ར་ཎ་ཧཱུཾ། ཚུར་འདུས་ཡོངས་སུ་གྱུར་པ་ལས་རྡོ་རྗེ་སྔོན་པོ་རྩེ་དགུ་པ་ལྟེ་བ་ལ་ཧཱུཾ་གིས་མཚན་པ་འོད་དུ་ཞུ་བ་ལས། དཔལ་ཆེན་པོ་བཛྲ་ཧེ་རུ་ཀཿམཐིང་ནག་ཞལ་གསུམ་ཕྱག་དྲུག་ཞབས་བཞི་བགྲང་པ། དུར་ཁྲོད་དང་དཔལ་གྱི་ཆས་རྣམས་ཀྱིས་བརྒྱན་པ། ཡུམ་ཀྲོ་དྷཱི་ཤྭ་རཱི་མ་དང་མཉམ་པར་སྦྱོར་བའི་སྐུ་ཅན་དུ་བསམ། མ་སཱུརྱ་མཎྜ་ལ། རང་གི་ལག་མཐིལ་གཡས་སུ་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ཨ་ཙནྡྲ་མཎྜ་ལ། གཡོན་པའི་མཐིལ་དུ་(༤ན)
ཟླ་བའི་དཀྱིལ་འཁོར་གྱི་སྟེང་དུ་ཨ་ལས་པདྨ་ཨས་མཚན་པ། གཡས་ཀྱི་སོར་མོ་ལྔ་ཨོཾ་ཧཱུཾ་སྭཱ་ཨཾ་ཧཱས་རིགས་ལྔ་ཡབ་ལྔ་དང་། གཡོན་གྱི་སོར་མོ་ལྔ་མུཾ་མཾ་ལཾ་པཾ་ཏཾ་ལས་ཡུམ་ལྔར་བསམ། ས་མ་ཡ་སྟྭཾ། མཉམ་པའི་ཐལ་མོ་སྦྱར་བས་སྙོམ་འཇུག་ལ་བསྐུལ། བཛྲ་ཨཉྩ་ལི་ཧཱུཾ། རྡོ་རྗེ་ཐལ་མོ་རྗེས་སུ་ཞུགས། བཛྲ་བནྡྷ་བཛྲ་སཉྫ་ལི་ཛཿ རྡོ་རྗེ་བསྡམས་པས་ཕན་ཚུན་རོ་གཅིག་ཏུ་བསམ། རིགས་ལྔའི་སྦྱོར་མཚམས་ནས་སྤྲོས་པའི་ཁྲོ་བོའི་ཚོགས་བྱུང་བ་ལག་མཐིལ་གྱི་ཧཱུཾ་དང་ཨ་ལ་ཐིམ། ཕཊ། རྡོ་རྗེ་ཐལ་མོ། ཁྲོ་བོ་སྤྲིན་རབ་འབྱམས་འཕྲོ་བར་བསམས་ལ། རོལ་མོ་དབྱངས་དང་བཅས་ཏེ་བཀའ་བསྒོ་བ་ནི། དཔལ་ཁྲག་འཐུང་གལ་པོ་ཆེའི་རྒྱུད་ལས། ཧཱུཾ། ཡང་དག་དོན་ལ་མི་བརྩོན་ཞིང་། །བྱང་ཆུབ་དོན་ལ་མི་གནས་པའི། །མི་དང་མི་མིན་གང་ཡང་རུང་། །ཐམས་ཅད་གཅིག་ཏུ་བསྡུས་ནས་ནི། །རྡུལ་ཕྲན་བཞིན་དུ་བརླག་པ་དང་། །སེམས་ཉིད་ཐེག་པ་ཆེན་པོ་ཡི། །རྣམ་ཐར་དག་ལ་འགོད་པ་ནི། །ཡེ་ཤེས་འཕྲིན་ལས་ཅན་གྱིས་མཛོད། །བཛྲ་ས་མ་ཡ་ཛཿཛཿ རྣལ་འབྱོར་ཆེན་པོའི་དཀྱིལ་འཁོར་འདིར། །གསང་བའི་དམ་ཅན་སོ་སོ་ནས། །ཐམས་ཅད་ཐུགས་རྗེས་བསྐྱངས་ཟིན་གྱིས། །ད་ལྟ་ཉིད་དུ་སོ་སོར་དེངས། །ཅི་སྟེ་མི་འགྲོ་འདུག་གྱུར་ན། །རྡོ་རྗེ་འཛིན་རྒྱལ་ཁྲོས་ནས་ཀྱང་། །དེ་མ་ཐག་ཏུ་བཀས་ནས་ནི། །བདུན་བརྒྱུད་རིགས་ཀྱང་བརླག་པར་འགྱུར། །ཨོཾ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་གརྫ་གརྫ་ཧཱུཾ་ཕཊ། ཨོཾ་བཛྲ་ཀྲོ་དྷ་བི་ཛ་ཡ་ཧཱུཾ་ཕཊ་ཧ་ན་ཧ་ན་ཧཱུཾ་ཕཊ། ཨོཾ་བཛྲ་ཀྲོ་དྷ་ནཱི་ལ་དཎྜ་ཧཱུཾ་ད་ཧ་ད་ཧ་ཧཱུཾ་ཕཊ། ཨོཾ་བཛྲ་ཀྲོ་དྷ་ཡ་མཱནྟ་ཀ་ཧཱུཾ་པ་ཙ་པ་ཙ་ཧཱུཾ་ཕཊ། ཨོཾ་བཛྲ་ཀྲོ་དྷ་ཨཱཪྻ་ཨ་ཙ་ལ་ཧཱུཾ་བྷནྡྷ་བྷནྡྷ་ཧཱུཾ་ཕཊ། ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧཱུཾ་ཧུ་ལུ་ཧུ་ལུ་ཧཱུཾ་ཕཊ། ཨོཾ་བཛྲ་ཀྲོ་དྷ་ཨ་པ་ར་ཛི་ཏ་ཧཱུཾ་ཏིཥྛ་ཏིཥྛ་ཧཱུཾ་ཕཊ། (༤བ)
ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུཾ་ཚིནྡྷ་ཚིནྡྷ་ཧཱུཾ་ཕཊ། ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུཾ་བིནྡྷ་བིནྡྷ་ཧཱུཾ་ཕཊ། ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུཾ་སྥོ་ཊ་སྥོ་ཊ་ཧཱུཾ་ཕཊ། ཨོཾ་བྲུཾ་ཧཱུཾ་བྲུཾ་ཏྲཾ་བྲུཾ་ཧྲིཿབྲུཾ་ཨཿབྲུཾ་ཨོཾ་ཛྭ་ལ་བཛྲ་མནྡྷ་སུམྦྷ་ནི་མནྡྷ་ཛྭ་ལ་བཛྲ། བཛྲ་ཛྭ་ལ་བཛྲ་ཧཱུཾ་ཕཊ། ཅེས་མཚམས་བཅད་དོ། །ཧཱུཾ། ཁྲོ་བོ་རྣམས་རང་གི་ཐུགས་ཀར་ཐིམ་པར་བསམ། ཡང་ཐུགས་ཀའི་ཧཱུཾ་ལས་མཚོན་ཆ་སྣ་ཚོགས་པ་འཕྲོས་པ་སྣ་བུག་ནས་འཐོན། གཡས་བསྐོར་གྱིས་བགེགས་ཀྱི་ཚོགས་བསྐྲད་ཅིང་ས་ཞིང་བརྟན་པའི་བསྲུང་བའི་གུར་དུ་བསམས་རྡོ་རྗེ་ཁུ་ཚུར་གཉིས་རྒྱབ་སྦྱར། མཐེའུ་ཆུང་སྦྲེལ། གུང་མཛུབ་བརྐྱང་བའི་ཕྱག་རྒྱ་བསྐོར་ཞིང་། ལ། ཧཱུཾ་ང་ཡི་དཀྱིལ་འཁོར་བརྟན་བྱའི་ཕྱིར། ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆ་རྣམ་པ་སྣ་ཚོགས་ཀྱིས། །དཀྱིལ་འཁོར་རིམ་པ་ཚུལ་བཞིན་སྲུངས། །ཨོཾ་བཛྲ་ཨཱ་ཡུརྡྷ་རཀྵ་ཧཱུཾ་ཕཊ། ཡང་ཕྱག་རྒྱ་གོང་བཞིན་བཅས། གཡོན་དུ་བསྐོར་ཞིང་། ཧཱུཾ། ང་ཡི་དཀྱིལ་འཁོར་ནས་བཟུང་རཀྵ་ཧཱུཾ་གི་བར་བརྗོད། ཧཱུཾ། སྟེང་ཡང་རྡོ་རྗེ་བསྡམས་པའི་མཐེ་བོང་མཐེའུ་ཆུང་གུང་མོ་གསུམ་མཉམ་སྟེ་སྒྲེང་། མཛུབ་མོ་བཀུག་པའི་རྩེ་མོ་གཉིས་གུང་མོའི་ཚིགས་གསུམ་པར་བཙུགས་པའི་ཕྱག་རྒྱ། རྡོ་རྗེའི་བླ་རེ་ལ། །འོག་ཀྱང་རྡོ་རྗེའི་ས་གཞི་སྟེ། །ཕྱོགས་མཚམས་རྡོ་རྗེ་འབར་བས་གཏམས། །རྡོ་རྗེའི་མཚམས་ལས་མ་འདའ་ཞིག །བཛྲ་བཛྲ་རཀྵ་ཧཱུཾ། སྟེང་ཡང་འཁོར་ལོ་སོགས་འདོན་པ་བསྒྱུར། ཨོཾ་ཛྙཱ་ན་ཙཀྲ་རཀྵ། སྟེང་ཡང་ལག་གཉིས་མཐེ་བོས་མཛུབ་མོ་བཀུག་ནས་མནན་པའི་ཕྱག་རྒྱ། རལ་གྲི་སོགས་ཀྱི་མཐར། ཨོཾ་ཏཱིཀྵྞ་ཚིནྡྷ་རཀྵ། སྟེང་ཡང་སོར་མོའི་རྩེ་མོ་རྣམས་བཀུག་སྟེ་མགོ་བོ་ལྟ་བུའི་ཕྱག་རྒྱ། དབྱུག་ཏོ་སོགས་ཀྱི་མཐར། ཨཱ་ཀོ་ཊ་ཡ་མངྒ་ར་རཀྵ། སྟེང་ཡང་རྡོ་རྗེ་བསྡམས་པ་ལས་གུང་མོ་གཉིས་གཤིབས་ཏེ་བརྐྱང་བ། ཕུར་པ་སོགས་ཀྱི་མཐར། ཀཱི་ལི་ཀཱི་ལཱ་ཡ་རཀྵ། (༥ན)
སྟེང་ཡང་ཐལ་མོ་ནང་བསྡམས་ཕྱེ་བ་ལས་མཐེ་བོང་དང་མཛུབ་མོ་སོ་སོར་རྩེ་སྤྲད། མེ་ཡི་སོགས་ཀྱི་མཐར། ཨགྣེ་ཛྭ་ལ་རཾ་རཀྵ།ཧཱུཾ། མཚམས་བཅད་ནང་འདི་ཚུན་ཆད་དུ། །སུ་ཡང་འདའ་བར་མ་བྱེད་ཅིག །ཅི་སྟེ་བཀའ་ལས་འདས་གྱུར་ན། །ཐོ་བ་ལྕགས་ཀྱུ་འབར་བ་ཡིས། །སྙིང་ནས་དྲངས་ཤིང་བརྡུང་བར་བྱོས། །ཞེས་གདུག་པ་ཅན་རྣམས་ཕྱིར་བསྐྲད་དེ་བསྲུང་བའི་ས་མ་དྷི་ལ་གནས་པར་བྱའོ། །ལྔ་པ་སྡིག་ལྟུང་ཚོགས་བཤགས་པ། །རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་བླ་མ་རིགས་འཛིན་ཁྲག་འཐུང་ལྷ་དགུ་དམ་ཅན་སྲུང་མར་བཅས་པ་ཨོཾ་རྡོ་རྗེ་བསྡུ་བའི་ཕྱག་རྒྱས། བཛྲ་ས་མ་ཛཿས་སྤྱན་དྲངས། ན་མོ་གུ་རུ་བྷྱཿ ན་མཿཤྲཱི་བཛྲ་ཧེ་རུ་ཀ་མཎྜལ་ས་པ་རི་ཝཱ་རེ་བྷྱཿ ཞེས་བླ་མ་དང་ལྷ་ལ་ཕྱག་བྱ། དྲི་མེད་བཤགས་བདག་ཆེན་སྔགས་འཆང་པས་འདིར་གུར་ལས་བྱུང་བའི་རྒྱུན་བཤགས་ལེན་པར་མཛད་པ་འཇམ་དབྱངས་ཨ་ར་པ་ཙ་ནའི་རྗེས་གནང་གི་ཡི་གེ་ས་ལོས་མཛད་པ་དེ་ཐུགས་ལ་ཡོད་པའི་ཉམས་ཀྱི་རྣམ་དཔྱོད་ཆེ་བར་བྱུང་ལགས། རྒྱུད་ལས། ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། ཐུགས་རྗེས་ཉི་གསལ་འོད་བཞིན་སྙོམས་མཛད་པ། །འདིར་གཤེགས་བཞུགས་ཤིང་བདག་ལ་དགོངས་སུ་གསོལ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་རོལ་བ་ཡི། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེན་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན། །འདུ་འབྲལ་(༥བ)
མེད་པའི་ངང་དུ་རོ་གཅིག་པར། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བས་བཀོད་པའི་དཀྱིལ་འཁོར་འདིར། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །བྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །གསང་ཆེན་རབ་དགྱེས་གཟུགས་ཆེན་བདག་ཉིད་མ། །མཁའ་དབྱིངས་ཀློང་ཡངས་པདྨར་འཁྱིལ་བའི་སྐུ། །གཉིས་མེད་ཐིག་ལེ་ཆེན་པོར་འོད་གསལ་ཞིང་། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །འདུ་འབྲལ་མེད་པ་གསང་བའི་དཀྱིལ་འཁོར་འདིར། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །རྡོ་རྗེ་ལྷ་མོ་ཚོགས་ཆེན་ཚོགས་ཀྱི་བདག །རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ། །གནས་དང་ཡུམ་གྱི་ཕྱག་རྒྱ་སྒོ་མ་བཞི། །ཡེ་ཤེས་སྤྲུལ་པའི་ལྷ་ཚོགས་མང་པོ་དང་། །མ་ལྟར་བྱམས་ཤིང་སྲིང་ལྟར་གདུང་ལ་སོགས། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཐུགས་རྗེ་གདུང་འཚོབ་རྡོ་རྗེ་བདག་ཅག་གི །འགྲོ་བའི་དོན་དུ་བྱང་ཆུབ་སེམས་བསྐྱེད་དེ། །བླ་མེད་གོ་འཕང་བགྲོད་པར་བྱ་བའི་ཕྱིར། །བསྟན་པ་རྒྱ་མཚོ་སོ་སོའི་འདུལ་ཁྲིམས་དང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག །རྡོ་རྗེ་འདའ་ཀ་དམ་ཚིག་གཏན་གྱི་གཉེར། །སྤྱི་དང་ཁྱད་པར་ལྷག་པའི་དམ་ཚིག་ལས། །(༦ན)
སྔ་ཕྱིར་ནོངས་ཤིང་གཉེར་དུ་སྨྲའོ་འཚལ། །ཡུན་དུ་མི་གཏོང་འདའ་བར་མི་བགྱིད་ལ། །དོན་ལ་གོལ་ཞིང་ལྡོག་སེམས་མ་མཆིས་ཀྱང་། །བཟོད་བྱ་ལོང་ཡོད་སྙམ་པའི་ལེ་ལོ་ཡིས། །གློང་དུ་མ་གྱུར་བཙལ་ཤུགས་ཆུངས་པ་དང་། །ཤེས་བཞིན་མི་ལྡན་བག་མེད་དབང་གྱུར་ཏེ། །སྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས། །ཚོར་དང་མ་ཚོར་མ་རིག་དབང་གིས་ན། །སྟོན་པའི་བཀའ་དང་དམ་ལས་འགལ་གྱུར་ཏེ། །རྣལ་འབྱོར་གང་ཞིག་དམ་ཚིག་ཉམས་པ་དང་། །སྐད་ཅིག་ཙམ་ཡང་ཕྲད་པར་མི་བྱ་ཞེས། །བཀའ་ལས་འབྱུང་ཡང་དེ་ལྟར་མ་རྟོགས་ཏེ། །གསང་སྒོ་འཆོལ་བས་དབྱེ་གསལ་དཀའ་བ་དང་། །མངོན་ཤེས་མེད་པས་སྐྱོན་ཅན་མ་རྟོགས་ཏེ། །ཉམས་དང་ཚོགས་འདྲེས་ཉམས་པ་བཀང་བ་དང་། །ཉམས་དང་སྣོད་མིན་རྣམས་ལ་ཆོས་བཤད་དང་། །ཉམས་ལ་མི་འཛེམ་ཉམས་པའི་སྐྱོན་ལ་སོགས། །ཉམས་དང་འགྲོགས་ཤིང་ཉམས་པ་དེ་དག་ཀུན། །ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཡུན་གྱི་བསྒྲིབས་གྱུར་ཏེ། །རབ་ནོངས་འགྱོད་པའི་སེམས་ཀྱིས་མཐོལ་ལོ་བཤགས། །བྱམས་པའི་ཐུགས་རྗེས་བདག་ལ་དགོངས་ནས་ཀྱང་། །གཉིས་མེད་དབྱིངས་ལས་མི་འགྱུར་བདག་བཀོད་དེ། །མི་དམིགས་བཏང་སྙོམས་ངང་དུ་བཞུགས་ནས་ཀྱང་། །གཉིས་མེད་དོན་གྱི་ཚངས་པ་སྩལ་དུ་གསོལ། །དོན་དམ་གཉིས་མེད་སྤྲོས་ལས་འདས་པ་ལ། །རྣམ་རྟོག་གང་ཡང་དམིགས་པར་མི་འགྱུར་ཏེ། །ཀུན་རྫོབ་སྒྱུ་མ་ཙམ་གྱི་དབང་གིས་ན། །ནོངས་པ་མཆིས་ན་རབ་ནོངས་བཟོད་པར་གསོལ། །གཞན་ཡང་བཀླགས་པས་དོན་གྲུབ་ལས། །སྡོམ་གསུམ་སྐུ་གསུང་ཐུགས་ཀྱི་དམ་ཚིག་དང་། །རྩ་བ་ཡན་ལག་ཉེས་བྱས་ཕྲ་མོ་(༦བ)
དང་། དམ་ཚིག་ཆེ་ཆུང་ཚོར་དང་མ་ཚོར་དང་། །ཟླ་དང་ཞོར་གྱིས་དམ་ཚིག་ཉམས་པ་དང་། ཁས་ལེན་ཆེ་ལ་ཉམས་ལེན་ཆུང་བ་དང་། བཀའ་ལྟར་མ་བགྱིས་གཞུང་ལྟར་མ་བསྲུངས་དང་། །ཏིང་འཛིན་གློད་གྱུར་འཛབ་བཟླས་ཉུང་བ་དང་། །ཡི་དམ་ལྷ་ཡི་སྒོམ་པ་གཡེལ་ལ་སོགས། །ཉམས་གྲིབ་ཉེས་པའི་ཚོགས་རྣམས་མ་ལུས་ཀུན། །ཕྱོགས་བཅུར་བཞུགས་པའི་སངས་རྒྱས་བྱང་སེམས་དང་། །བླ་མ་དཔའ་བོ་མཁའ་འགྲོ་རྣལ་འབྱོར་མ། །དཔལ་ཆེན་ཡང་དག་དཀྱིལ་འཁོར་ལྷ་ཚོགས་དང་། །དུར་ཁྲོད་བརྒྱད་གནས་དམ་ཅན་མཁའ་འགྲོ་ལ། །སྔར་བྱས་འགྱོད་དང་ཕྱིན་ཆད་སྡོམ་སེམས་ཀྱིས། །སྒྱུ་མ་ལྟ་བུའི་ངང་དུ་བཤགས་པར་བགྱི། །མཐོལ་བཤགས་ཚངས་པའི་དངོས་གྲུབ་སྩལ་དུ་གསོལ། །ཞེས་སྟོབས་བཞི་དང་ལྡན་པའི་སྒོ་ནས་བཤགས་ཏེ་ལྷ་ཚོགས་རྣམས་རང་གི་སྙིང་གར་ཐིམ་པར་མོས། དྲུག་པ་བརྡ་ཡི་སྒོ་དབྱེ་བ། དཔལ་ཁྲག་འཐུང་གལ་པོ་ཆེའི་རྒྱུད་ལས། ཨེ་མ་ཧོ། དུར་ཁྲོད་གསང་བ་ཆེན་པོ་ཡི། །རྨད་བྱུང་ཞིང་ཁམས་དགའ་ཚལ་འདིར། །སྐལ་ལྡན་དབང་ཕྱུག་རྒྱལ་བའི་སྲས། །འདུས་པ་ཚོགས་པའི་རིགས་འཛིན་རྣམས། །ཨེ་མ་ཧོ་དགའ་མཆོག་བདེ་ཆེན་གྲོགས། །དམ་ཚིག་སྲོག་གི་ལུ་གུ་རྒྱུད། །སྤྲུལ་པའི་གཤོག་དྲུག་གྲ་རྒྱས་པ། །ཆོས་ཉིད་མཁའ་ལ་ལྡིང་བར་རིགས། །དེ་རིང་ཚུན་ཆད་རྒྱལ་བའི་སྲས། །དབང་ཕྱུག་ཡིན་པས་ཅི་བདེར་སྤྱོད། །རྣལ་འབྱོར་གསང་བའི་བརྡ་སྒོ་རྣམས། །བྱ་བའི་ལས་རྣམས་ཐམས་ཅད་ཀུན། །བརྡ་ཡིས་སྨྲ་ཞིང་བརྡ་བར་བྱ། །དེ་ཕྱིར་དོན་དམ་ཆོས་དབྱིངས་ཀྱི། །གསང་མཆོག་ལྷུན་གྲུབ་དཀྱིལ་འཁོར་ལ། །ཚད་མེད་བཞི་ཡི་སྒོ་ཕྱེ་ཞིག །བྷྲུཾ་པྲ་བེ་ཤ་ཡ་ཕཊ། བདུན་པ་བརྡ་ཡི་ཕྱག་འཚལ་བ། །དེ་ཉིད་ལས། ཧཱུཾ། རིགས་ལྔའི་(༧ན)
སངས་རྒྱས་བཅོམ་ལྡན་འདས། །ཞི་ཞིང་ཕྲ་ལ་བརྟག་དཀའ་སྟེ། །དབང་ཕྱུག་ཆེན་པོ་མཆོག་གི་ལྷ། །རྫོགས་པའི་སྐུ་ལ་ཕྱག་འཚལ་ལོ། །མ་ཧཱ་ཡོ་གི་ནི་ཨ་ཏི་པུ་ཧོ༔ པྲ་ཏཱིཙྪ་ཧོ། ཨ་ལ་ལ་ཧོ༔ བརྒྱད་པ་མི་གཡོ་དམ་བཅའ་བ། །དེ་ཉིད་ལས། ཧཱུྃ། རིགས་འདུས་པ་ཡི་རྣལ་འབྱོར་རྣམས། །ཡང་དག་སྒྲུབ་པར་དམ་བཅས་དང་། །ཏིང་འཛིན་ས་ལ་གནས་འགྱུར་བས། །ཕྱག་རྒྱ་ཆེན་པོར་བདག་གྱུར་ཅིག །བྷོ་དྷི་ཙིཏྟ་ས་མ་ཡ་སྟྭཾ། དགུ་པ་བྱིན་ཆེན་འདི་ལྟར་དབབ། །རྐང་གླིང་ཐོད་རྔ་སོགས་སྣ་ཚོགས་རོལ་མོའི་ཤུག་གླུ་གཡབ་དར་སྤོས་སྦྱོར་དབྱངས་དང་བཅས་ཏེ། ཁྲག་འཐུང་གལ་པོ་ལས། ཧཱུཾ། ཡང་དག་ཁྲག་འཐུང་སྐུ་དང་གསུང་། །ཐུགས་ཀྱི་འོད་ཟེར་འཕྲིན་ལས་མཆོག །སྟོང་གསུམ་ཕྱོགས་བཞིའི་འཇིག་རྟེན་ན། །འབྲུ་བརྒྱད་ཡོན་ཏན་བསམ་མི་ཁྱབ། །དཔལ་ཆེན་ཡབ་ཡུམ་འཁོར་དང་བཅས། །ཡུན་རིང་དུས་ནས་བསྙེན་བསྙེན་པ། །ཉེ་བའི་དུས་སུ་མཆོད་མཆོད་པ། །བསྙེན་མཆོད་འབྲས་བུ་མཆིས་པར་མཛོད། །དཀྱིལ་འཁོར་འདི་ལ་བྱིན་ཕོབ་ལ། །བདག་ཅག་རྣམས་ལ་དངོས་གྲུབ་སྩོལ། །སྒྲུབ་རྫས་གནས་ལ་བྱིན་ཕོབ་ལ། །རེ་བའི་འབྲས་བུ་མ་ལུས་སྩོལ། །ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཨོཾ་བཛྲ་མ་ཧཱ་ཀྲོ་དྷ་ཤྲཱི་ཧེ་རུ་ཀ་དེ་ཝ་ག་ན་ཨ་དྷིཥྛ་ན་ཨ་བེ་ཤ་ཡ་ཨ་ཨཱཿ བཅུ་པ་མཆོད་རྫས་བྱིན་བརླབ་པ། སུམྦྷས་བསངས། ཤུ་ནྱཱ་ཏས་སྦྱངས། སྟོང་པའི་ངང་ལས་རང་ཉིད་དཔལ་ཆེན་པོར་གསལ་བའི་ཐུགས་ཀའི་ཧཱུྃ་ལས་ཨཾ་པཾ་པུཾ་དྷུཾ་ཨཱཾ་ཀཾ་ནཻཾ་ཤཾ་རྣམས་སྥ་ར་ཎ་ཕཊ་ཀྱིས་སྤྲོས་པས་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོའི་ཚོགས། སཾ་ཧ་ར་ཎ་ཧཱུཾ། ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱཧཱ། ཨོཾ་ཤྲཱི་བཛྲ་རཱ་ག་ཨརྒྷཾ་ཨ། པཱ་(༧བ)
དྱཾ་པཱ། པུཥྤེ་པུ། དྷཱུ་པེ་དྷཱུ། ཨཱ་ལོ་ཀེ་ཨཱ། གནྡྷེ་ག །ནཻ་ཝི་དྱ་ནཻ། ཤཔྡ་ཤ །མཆོད་ཡོན་མ་ལ་སོགས་པའི་མཆོད་པའི་ལྷ་མོ་ཁ་དོག་སྣ་ཚོགས་པ་རིན་པོ་ཆེའི་རྒྱན་དང་ལྷ་རྫས་ཀྱི་ན་བཟའ་ཅན། ཁྲུས་གཞོང་དང་མེ་ཏོག་གི་སྣོད་སོགས་ཐོགས་པ་དཔལ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ཕུང་ནམ་མཁའི་མཐའ་ཀླས་པར་བསམ། ཁྲག་འཐུང་གལ་པོ་ལས་བྱུང་བའི་སྔགས་ནི། ཨོཾ་ཨ་ནུཏྟ་ར་པཱུ་ཛ་མེ་གྷ་སྥ་ར་ཎ་ཨི་མཾ་ག་ག་ན་ཁཾ་ཧཱུཾ་ཕཊ་སྭཱ་ཧཱ། བསངས་སྦྱངས་སྟོང་པའི་ངང་ལས་ཨ་ལས་བྱུང་བའི་བྷནྡྷ་ལྕང་ལོར་བཅས་པའི་ནང་དུ་ཨ་སུ་དྷཱུ་ཨཱ་ག་ནཻ་ཤ་རྣམས་འོད་དུ་ཞུ་བ་རྣམ་པ་དུར་ཁྲོད་ཀྱི་རྫས་ལས་བྱུང་བའི་ཁྲག་གི་མཆོད་ཡོན། དབང་པོའི་མེ་ཏོག །ཤ་ཆེན་གྱི་བདུག་སྤོས། ཞུན་ཆེན་གྱི་མར་མེ། མཁྲིས་པའི་དྲི་ཆབ། ཤ་རུས་ཀྱི་ཞལ་ཟས། གཞན་ཡང་རྐང་གླིང་ཐོད་རྔ་གསང་བའི་རྔེའུ་ཆུང་སོགས་ཀྱིས་ས་གཞི་བར་སྣང་ནམ་མཁའི་ཁྱོན་ཐམས་ཅད་ཡོངས་སུ་གང་བར་བསམ། ཨོཾ་བཛྲ་ཨརྒྷཾ་ཨཱཿཧཱུཾ། པུཥྤེ་ནས་ཤཔྟའི་བར་བརྗོད། སྨན་གཏོར་རཀྟ་གསུམ་བྱིན་བརླབ་བཀླགས་པས་དོན་གྲུབ་ལས། སུམྦྷས་བསངས། རང་གི་ཐུགས་ཀ་ནས་རཾ་དམར་པོ་སྤྲོས་པའི་མེས་བདུད་རྩིའི་སྣོད་སྨན་གཏོར་རཀྟ་མཆོད་རྫས་ཀྱི། ལ་རེག་པས་མི་གཙང་བ་བསྲེགས། ཡཾ་སྤྲོས་པའི་རླུང་གིས་གཏོར། ཁཾ་སྤྲོས་པའི་ཆུས་བཀྲུས་ཏེ་དག་པར་བྱས། བྷྲུཾ་སྤྲོས་པས་བྷནྡྷ་འབར་བའི་སྣོད་ཆེན་པོར་གྱུར། ཨོཾ་སྤྲོས་པས་མཆོད་རྫས་རྣམས་འདོད་པའི་ཡོན་ཏན་བསམ་གྱིས་མི་ཁྱབ་པས་གང་བར་བསམ། ཕུད་དང་གཏོར་མ་སྭ་བྷཱ་ཝས་སྟོང་པར་སྦྱངས་པའི་ངང་ལས་ཡཾ་ལས་རླུང་། རཾ་ལས་མེའི་སྟེང་དུ། ཀཾ་ལས་མི་མགོའི་སྒྱིད་བུ་གསུམ་གྱི་སྟེང་དུ། ཨ་ལས་བྱུང་(༨ན)
བའི་ཐོད་པ་ཡངས་པར་ཧཱུཾ་ཨོཾ་སྭཱ་ཨ་ཧཱ་ལས་ཤ་ལྔ་བདུད་རྩི་ལྔ་ཡེ་ཤེས་ལྔའི་ངོ་བོར་བསྐྱེད། རླུང་གཡོས་མེ་སྦར་རྫས་རྣམས་འོད་དུ་ཞུ་བའི་རླང་པ་ཧཱུཾ་ཨོཾ་སྭཱ་ཨ་ཧཱ་ལས་ཕྱག་མཚན་ལྔར་གྱུར་པ། ཧཱུཾ་བཛྲ་དྷྲྀ་ཀ །ཨོཾ་ཛི་ན་ཛིཀ །སྭཱ་རཏྣ་དྷྲྀཀ །ཨ་ཨ་རོ་ལིཀ །ཧཱ་པྲཛྙཱ་དྷྲྀཀ །ཅེས་བརྗོད་པས་ཧེ་རུ་ཀ་ཡབ་ཡུམ་བཅུར་གྱུར། ས་མ་ཡ་ཧོཿཞེས་བརྗོད་པས་སྦྱོར་བའི་མེས་འོད་དུ་ཞུ་ཨོཾ་ཨཱཿཧཱུཾ་དུ་གྱུར། དེ་ལས་འོད་འཕྲོས་པས་འཇིག་རྟེན་དང་འཇིག་རྟེན་ལས་འདས་པའི་བདུད་རྩི་བཀུག་ནས་ཐིམ། འོག་གི་བདུད་རྩི་དང་འདྲེས་པས་ཁ་དོག་དྲི་རོ་ནུས་མཐུ་ཕུན་སུམ་ཚོགས་པར་བསམ་ཞིང་། ཨོཾ་ཨཱཿཧཱུཾ་སརྦ་པནྩ་ཨ་མྲྀ་ཏ་ཧཱུཾ་ཧྲིཿཋ་ཞེས་བརྒྱ་རྩ་བརྒྱད་དང་། ཨོཾ་ཨཱཿཧཱུཾ་ཏེ་ཛོ་བ་ལིཾ་ཏ་བ་ལ་བ་ཏི་གུ་ཧྱ་སིདྡྷི་ས་མ་ཡ་ཧཱུཾ་ཧྲིཿཋ་ཞེས་པ་བདུན་གྱིས་བྱིན་གྱིས་བརླབ། རཏྐའི་སྣོད་ཨ་ལས་ཐོད་པ་ཡངས་པར་རཾ་ལས་དགྲ་བགེགས་བསྒྲལ་བའི་ཁྲག་ལས་བྱུང་བའི་བདུད་རྩིར་བྱིན་གྱིས་བརླབས་ལ། མ་སཱུརྱ་མཎྜ་ལ། ར་སྥ་ར་ཎ་ཕཊ། སཾ་ཧ་ར་ཎ་ཧཱུཾ། ཨོཾ་ཨཱཿཧཱུཾ། མཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲིཿཐ། ཞེས་པས་བྱིན་གྱིས་བརླབ་བོ། །གཉིས་པ་དངོས་གཞི་ཏིང་འཛིན་གསུམ། །འབྱུང་རིམ་ཞིར་བསྙེན་ཁྲོ་རྟེན་གདན། །བརྟེན་སྙན་འདྲེན་བཞུགས་དམ་བརླབ་དབང་། །བསྟིམ་ཕྱག་ཕྱི་མཆོད་སྨན་གཏོར་རཀ །དུག་གསུམ་མདངས་སྐོངས་སྦྱོར་སྒྲོལ་མཆོད། །གླུ་གར་བསྟོད་པ་བསྐུལ་ཞིང་འཛབ། །སྟོང་ཚིགས་མཆོད་པ་ཉེར་བརྒྱད་ཁྲིགས། །ཏིང་འཛིན་རྣམ་གསུམ་རྒྱུད་དང་སློབ་དཔོན་ཧཱུཾ་ཀཱ་རས་མཛད་པའི་ཁྲག་འཐུང་ལྔ་བཅུ་རྩ་བརྒྱད་ཀྱི་སྒྲུབ་ཐབས་རྒྱ་གར་གྱི་མཁན་པོ་བྷི་དྷ་ཀ་ར་སིངྷ་དང་ལོ་ཙཱ་བ་བནྡེ་ལྷ་རིན་པོ་ཆེས་བསྒྱུར་བ། དེས་མཛད་པའི་ཡང་དག་གི་རྩ་བ་སོ་དྷརྨ་(༨བ)
སྙིང་པོས་མཆན་བུར་བཀྲོལ་བ་རྣམས་ཀྱི་དགོངས་དོན་བརྗོད་བདེར་བཀོད་པར། དང་པོ་དེ་བཞིན་ཉིད་ཏིང་འཛིན། །ཧཱུཾ། ཆོས་རྣམས་ཐམས་ཅད་རང་གི་སེམས་ཉིད་དེ། །གདོད་ནས་སྐྱེ་འགག་གནས་གསུམ་དང་བྲལ་བ། །མ་བཅོས་སྤྲོས་པ་མེད་པ་ཀ་ནས་དག །ཆོས་སྐུ་དེ་བཞིན་ཉིད་ཀྱི་ཏིང་ངེ་འཛིན། །ཨོཾ་མ་ཧཱ་ཤུ་ནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། གཉིས་པ་ཀུན་སྣང་ཏིང་ངེ་འཛིན། །ཧཱུཾ། དེ་ལྟར་མ་རྟོགས་མ་རིག་འཁྲུལ་པ་ཡི། །རྒྱུད་དྲུག་འགྲོ་བ་མི་བཟོད་སྡུག་བསྔལ་རྒྱུ། གཅོད་འདོད་སྙིང་རྗེ་ཆེན་པོས་ཡོངས་ཁྱབ་པ། །ལོངས་སྐུ་ཀུན་ཏུ་སྣང་བའི་ཏིང་ངེ་འཛིན། །ཨོཾ་དྷརྨཱ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། གསུམ་པ་རྒྱུ་ཡི་ཏིང་འཛིན་ནི། །ཧཱུཾ། སྟོང་པ་ཉིད་དང་བརྩེ་བའི་སྙིང་རྗེ་ཆེ། །ཟུང་འཇུག་ནམ་མཁའི་དབྱིངས་ལས་མ་འགགས་གདངས། །རང་གི་རིག་པ་ཡི་གེ་ཨ་དཀར་པོར། །པདྨ་ཐོད་འཕྲེང་གི་བཞེད་པ། གསལ་བ་སྤྲུལ་སྐུ་རྒྱུ་ཡི་ཏིང་ངེ་འཛིན། །ཙིཏྟ་བཛྲ་ས་མ་དྷི་ཧཱུཾ། ཧཱུཾ་ཀཱ་རའི་སྒྲུབ་ཐབས་སུ་སྔགས་འདི་མ་བྱུང་ཡང་བཀའ་མ་གཞན་ནས་ཁ་བསྐངས། བཞི་པ་འབྱུང་བ་རིམས་བསྐྱེད་པ། །དཔལ་ཧེ་རུ་ཀཿ ཐུགས་ཀྱི་གལ་པོའི་རྒྱུད་ཀྱི་ལེའུ་གསུམ་པ་དང་ཁྲག་འཐུང་གལ་པོའི་རྒྱུད་ཀྱི་བརྟག་པ་བཅུ་གཉིས་པར་སྙིང་པོ་ཙམ་གསུངས་པ་དང་སོ་ལུགས་ཀྱི་རྩ་མཆན་གྱི་དོན་ལེགས་པར་བཀྲལ་ཏེ། ཧཱུཾ། རྒྱུ་ཡིག་དཀར་པོ་རྡུལ་བྲལ་ཟླ་བའི་མདོག །ནམ་མཁའི་དབྱིངས་སུ་འོད་ཟེར་འབར་བ་ལས། ཨོཾ་ཨཱ་ཀཱ་ཤ་མཎྜ་ལ། གཏི་མུག་རྣམ་དག་མཐིང་སྐྱ་ཨེ་ཆད་པ། །ཆོས་དབྱིངས་ཀུན་བཟང་ནམ་མཁའ་ཆོས་འབྱུང་དབྱིབས། །ཡཾ་ཀརྨ་རཀྴ་ཧཾ། དེ་ནང་ཕྲག་དོག་རྣམ་དག་ཡཾ་ལྗང་གུ །བྱ་གྲུབ་སྒྲོལ་མ་རླུང་དཀྱིལ་རྒྱ་གྲམ་གཟུགས། །ར་རཀྟ་ཛྭ་ལ་ས་མུ་དྲ། དེ་སྟེང་འདོད་ཆགས་རྣམ་དག་ར་དམར་པོ། །སོར་རྟོག་མཱ་ཀཱི་རཀྟའི་རྒྱ་མཚོ་ཟླུམ། །བཾ་སྨིནྟ་ཛྭ་ལ་མཎྜ་ལ། དེ་སྟེང་(༩ན)
གཏི་མུག་རྣམ་དག་བཾ་སེར་ནག །མཉམ་ཉིད་སྤྱན་མ་ཞིང་ས་གྲུ་བཞིར་ཆགས། །ཀེཾ་ནྲི་ཏི་ཛྭ་ལ་མཎྜ་ལ། དེ་སྟེང་ང་རྒྱལ་རྣམ་དག་ཀེཾ་དཀར་པོ། །མཉམ་ཉིད་སྤྱན་མ་ཀེཾ་རུས་རི་རབ་བརྗིད། །རཾ་ཛྭ་ལ་མཎྜ་ལ། དེ་སྟེང་ཞེ་སྡང་རྣམ་དག་རཾ་དམར་པོ། མེ་ལོང་ཡེ་ཤེས་གོས་དཀར་མེ་དཔུང་འབར། །འབྱུང་བཞིའི་དཀྱིལ་འཁོར་བཀླགས་པས་དོན་གྲུབ་ཏུ་ཆུ་དཀྱིལ་ལོགས་སུ་གསུངས་པ། གཞུང་ལུགས་སྤྱི་དང་མཐུན་ཞིང་འདི་གའི་སྒྲུབ་ཐབས་སུ་ཡང་དེ་དང་མཐུན་པར་བྱུང་བ་མི་འཐད་པ་མ་ཡིན་ཀྱང་གསང་ཆེན་རྙིང་མའི་རང་སྐད་གཙོ་བོར་བྱས་ཤིང་ས་དཀྱིལ་གྱི་ས་བོན་བཾ་གྱི་བྱེད་པའང་རྒྱུད་དང་སོ་མཆན་དུ་དམིགས་ཀྱིས་བཀར་རོ། །དེ་ཡང་སངས་རྒྱས་མཉམ་སྦྱོར་ཧེ་རུ་ཀཿ རིགས་བསྡུས་པའི་དཀྱིལ་འཁོར་སློབ་དཔོན་སངས་རྒྱས་གསང་བས་པཎ་ཆེན་བི་མཱ་ལར་གནང་བ་རྨ་རིན་ཅེན་མཆོག་ལས་ཉེ་བར་བརྒྱུད་དེ་དིང་སང་ས་ཞལ་ལ་དར་རྒྱས་ཆེ་བའི་དབུས་ཧེ་རུ་ཀཿཤར་རྣམ་སྣང་། ལྷོ་རྡོ་རྗེ་ཉི་མ། ནུབ་པདྨ་གར་དབང་། བྱང་རྟ་མཆོག་རོལ་པ། བྱང་ཤར་རྡོ་རྗེ་སེམས་དཔའ་སྟེ་དཀྱིལ་འཁོར་དྲུག་གའི་རྒྱུ་རྡོ་རྗེ་སེམས་དཔར་བསྐྱེད་ནས། འབྲས་བུ་སོ་སོའི་གཙོ་བོར་བསྐྱེད་པར་གསུངས་པ་དང་སྒྲུབ་ཐབས་སུ་རྡོ་རྗེ་སེམས་དཔའ་རྗེས་ཆགས་ཀྱིས་འོད་དུ་ཞུ་བར་ལྷ་མོ་བཞིས་བསྐུལ་བ་ལ་བརྟེན་ནས་ཁྲོ་བོའི་སྐུར་བཞེངས་པར་གསུངས་པ་ཞུ་བསྐུལ་ཙམ་མ་གཏོགས་དབྱིབས་མཚུངས་ཤིངས་། དཔལ་མཆོག་དང་པོ་གནས་འགྱུར་ནས། སྤྲུལ་པའི་ཏིང་འཛིན་ལ་གནས་མཛད། །ཅེས་དང་། འོད་ཟེར་ལྔ་ཡི་འཕྲོ་འདུ་ཡིས། །དཀྱིལ་འཁོར་དྲུག་གི་ལས་མཛད་ནས། །ཞེས་པའང་རིགས་བསྡུས་དང་ཕྱོགས་འདྲ་བྱུང་། སློབ་དཔོན་སངས་རྒྱས་གཉིས་པ་པདྨ་འབྱུང་གནས་ཀྱིས་གནུབས་ནམ་མཁའི་སྙིང་པོར་གནང་བ་དཔལ་མོ་བྱ་མངས་ཕུག་ནས་སྤྲུལ་པའི་གཏེར་སྟོན་(༩བ)
བྱང་ཆུབ་གླིང་པ་དཔལ་རྒྱལ་མཚན་གྱིས་སྤྱན་དྲངས་པའི་ཀུན་བཟང་ཐུགས་གཏེར་གྱི་ཞི་ཁྲོའི་སྒྲུབ་ཐབས་དང་ལས་བྱང་གི་དགོངས་དོན་རྒྱུ་རྡོ་རྗེ་འཛིན་པ་ཁོ་ནའི་དབང་དུ་མ་བྱས་པར་ཐོག་མར་ཞི་བར་བསྐྱེད་ཅིང་བསྒྲུབས་ནས་སླར་ཁྲོ་བོར་བསྒྱུར་བར་གསུངས་ཤིང་དབང་ཆོག་དངོས་གྲུབ་རྒྱུན་འབྱུང་དུའང་དཀྱིལ་འཁོར་གཅིག་པུ་དེ་གའི་སྟེང་ནས་ཐོག་མར་ཞི་བའི་རྟེན་བརྟེན་པར་བསྒྲུབས་ཏེ་དབང་བསྐུར། སླར་ཁྲོ་བོའི་རྟེན་བརྟེན་པར་གནས་བསྒྱུར་ཏེ་ཁྲག་འཐུང་གི་དབང་བསྐུར་བར་གསུངས། རྩ་མཆན་དུ་བསྙེན་པའི་དོན་དུ་ཞི་བའི་དཀྱིལ་འཁོར་བསྐྱེད་ནས་དངོས་གྲུབ་ལེན་པའི་བར་སོང་རྗེས་ཁྲོ་བོར་བསྒྲུབ་པ་བསྟན་པ་ལྟར་ན་ཁྲག་འཐུང་གལ་པོའི་བརྟག་པ་དགུ་པར་ཞི་བའི་སྒྲུབ་པ་བཤད་པའི་མཐར། ཚོགས་དང་བསྐང་བཤགས་གུང་ཚོགས་མཆོད། སྨོན་ལམ་ཡོངས་སུ་གདབ་པར་བྱ། །ཞེས་ཞི་བའི་སྒྲུབ་པ་སྦྱོར་དངོས་རྗེས་ཚང་ནས་བརྟག་པ་བཅུ་པར་ཁྲོ་བོའི་སྒྲུབ་པ་གསུངས་པས་དྲིལ་སྒྲུབ་དང་སྒོས་སྒྲུབ་གཉིས་ཀའི་ཁུངས་སུ་འགྲོ་ལ། འཕགས་པ་རྡོ་རྗེ་རྣོན་པོས་བཀྲལ་བའི་མཉམ་སྦྱོར་མཁའ་འགྲོ་སྒྱུ་མ་བདེ་བ་མཆོག་གི་སྙིང་པོ་ལྷ་དགུའི་དཀྱིལ་འཁོར་ཧཱུཾ་ཀཱ་རས་གཉགས་ལ་གནང་ཞིང་དེ་ནས་གནུབས་ཆེན་བརྒྱུད་དེ་ཁུ་ལུང་པས་ཟུར་པོ་ཆེར་སྩལ་བ་དང་མཁའ་འགྲོ་རྒྱུན་གཏོར་དུ་གྲགས་པ་སློབ་དཔོན་ཧཱུཾ་མཛད་ལ་གནུབས་ནམ་མཁའི་སྙིང་པོས་ཞུས་ཤིང་དེ་ནས་ཇོ་མོ་འཚོ་རྒྱལ་སོགས་ལ་བརྒྱུད་པར་ཁྲོ་རྐྱང་གི་སྒྲུབ་པ་བཤད་པས་མཐའ་གཅིག་ཏུ་མ་ངེས་ནའང་ནམ་མཁའི་སྙིང་པོས་གྲི་གུས་ཐུགས་ཀ་གཤགས་ཏེ་ཁ་ཕྱེ་ནས་ཞི་བའི་ལྷ་ཚོགས་བཞི་བཅུ་རྩ་གཉིས་བསྟན་པ་སོགས་སྒྲུབ་ཐབས་དང་ལོ་རྒྱུས་ཕལ་ཆེར་ལ་ཞི་བར་བསྙེན་ཅིང་ཁྲོ་བོར་སྒྲུབ་པ་ཧཱུཾ་ཀཱ་ར་དང་པདྨ་ཐོད་འཕྲེང་གི་དགོངས་པའི་གཙོ་བོར་སྣང་བ་ནས་དེ་དོན་ལྟར་མདོར་བསྡུས་ཙམ་བཀོད་(༡༠ན)
པ་འཐད་པས། ལྔ་པ་ཞི་བར་བསྙེན་པ་ནི། །དེ་སྟེང་ཁ་དོག་ལྔ་ལྡན་བྷྲཱུཾ་ཡིག་བབས། བྷྲཱུཾ་བི་ཤྭ་བི་ཤུདྡྷེ་བཛྲ་བྷཉྫ་ཛྙཱ་ན་མཎྜ་ལ་བྷྲཱུཾ། བྷྲཱུཾ་ཡིག་འོད་ཞུ་ཡེ་ཤེས་ལྔའི་རང་བཞིན། །རིན་ཅེན་ལྔ་ལས་གྲུབ་པའི་གཞལ་མེད་ཁང་། །གྲུ་བཞི་སྒོ་བཞི་མཚན་ཉིད་ཀུན་ལྡན་དབུས། །པད་ཟླའི་གདན་སྟེང་རྒྱུ་ཡིག་བབས་པ་དེ། །ཡོངས་གྱུར་ཨཱ་ལི་ཕྲག་གཉིས་ལས་གྲུབ་པའི། །ཟླ་བའི་དཀྱིལ་འཁོར་དཀར་བསིལ་ཉ་གང་བ། །ཡ་ར་ལ་ཝ་ཌ་ཌྷས་ལྷག་པ་ཡི། །གསལ་བྱེད་ཕྲག་གཉིས་ཞུ་བ་ཉི་དཀྱིལ་བར། །རྩེ་ལྔ་རྡོ་རྗེ་དཀར་པོ་ལྟེ་བར་ཧཱུཾ། །དེ་ལས་འོད་ཟེར་སྣ་ལྔའི་འཕྲོ་འདུ་ཡིས། །དཀྱིལ་འཁོར་དྲུག་གི་འཕྲིན་ལས་ཡོངས་མཛད་ནས། །དབྱེར་མེད་འདྲེས་ལས་མངོན་བྱང་ལྔའི་བདག་ཉིད། །རྡོ་རྗེ་སེམས་དཔའ་ཟླ་བའི་མདོག་ལྟ་བུ། །ཞལ་གཅིག་ཕྱག་གཉིས་རྡོ་རྗེ་དྲིལ་འཛིན་པ། །རང་སྣང་ཡུམ་དང་མཉམ་སྦྱོར་ཟུང་འཇུག་སྐུ། །ཞི་བའི་ན་བཟའ་རྒྱན་ཚུལ་མ་ལུས་རྫོགས། །དཀྱིལ་འཁོར་དྲུག་དང་ཞེ་གཉིས་སྐུ་ལ་ཤར། །གནས་གསུམ་ཡི་གེ་གསུམ་གྱིས་མཚན་པ་ཡི། །ཧཱུཾ་ལས་འོད་འཕྲོས་ཞི་བའི་ལྷ་ཚོགས་རྣམས། །ཆོས་ཀྱི་དབྱིངས་ལས་གཟུགས་ཀྱི་སྐུར་བཞེངས་ཏེ། །ཐོགས་པ་མེད་པར་བཛྲ་ས་མཱ་ཛཿ། ཁྲག་འཐུང་གལ་པོ་ལས། ཧཱུཾ། དམིགས་མེད་མཁའ་ལྟར་དག་པས་ཁྱབ་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུ་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །ཨོཾ་བཛྲ་སཏྭ་ཨེ་ཧྲེ་ཧི་ཛཿཧཱུཾ་བཾ་ཧོཿས་གཉིས་སུ་མེད་པར་ཐིམ་པར་བསམ། ཁྲག་འཐུང་གལ་པོ་ལས། ཧཱུཾ། ཆོས་སྐུ་སྐྱེ་བ་མེད་པའི་རང་བཞིན་ལས། །གཟུགས་སྐུ་སྒྱུ་མར་སྐྱེ་བའི་སྐུར་བསྟན་ནས། །ཐུགས་རྗེས་ཀུན་(༡༠བ)
ལ་ཁྱབ་པའི་དོན་བྱེད་པ། །རྒྱལ་བ་བཞི་བཅུ་རྩ་གཉིས་ལ་ཕྱག་འཚལ། །ཨརྒྷཾ་རྩ་བར། ཞི་བའི་མཆོད་པས་མཉེས་པ་དག །ཅེས་པར་སོ་མཆན་དུ་ལུས་ངག་ཡིད་གསུམ་གུས་པ་ཕྱག་གི་མཆོད་པ་དང་ཕྱག་རྒྱ་གར་དང་སྣ་ཚོགས་ཀུན་ཏུ་བཟང་པོའི་ཕྱི་ནང་གསང་བ་གསུམ་གྱི་དང་བདུད་རྩི་སྨན་དང་ཁྱད་པར་རྨད་དུ་བྱུང་བ་གཏོར་མ་དང་བསྟོད་པ་གླུ་དང་ཕན་པ་སྨོན་ལམ་གྱི་མཆོད་པ་དང་བརྒྱད་དོ། །མེ་ཏོག་བདུག་སྤོས་དང་། །མར་མེ་དྲི་ཆབ་བཤོས་དང་སྒྲ། །ཕྱི་ནང་གསང་བར་སྦྱར་བ་རྣམས། །བདག་དང་མཉམ་པའི་ཚོགས་ལ་འབུལ། །ཚོགས་གཏོར་པཉྩ་ཨ་མྲྀ་ཏ། །ཏ་གན་ལ་སོགས་ཅི་འབྱོར་པ། །ཏིང་འཛིན་ཡིད་ཀྱི་མཆོད་པ་འདི། །རྒྱལ་བ་རྒྱ་མཚོས་བཞེས་སུ་གསོལ། །ཨོཾ་བཛྲ་སཏྭ་ས་པ་རི་ཝཱ་ར་ཨི་དཾ། ཨརྒྷཾ། པུཥྤེ། དྷཱུ་པེ། དཱི་པེ། གནྡྷེ། བ་ལིཾ་ཏ་པྲ་ཏཱིཙྪ་ཧོཿ ཤྲཱི་པཉྩ། ཁ་ཁ། ཁཱ་ཧི། ཁཱ་ཧི། ཛཿཧཱུཾ་བཾ་ཧོཿ མཧཱ་པཉྩ་ཨ་མྲྀ་ཏ། བ་ལིཾ་གྲྀཧྞ་ཧོ་ཁཱ་ཧི་ཁཱ་ཧི། པི་བ་ཧོ། ཨ་ལ་ལ་ཧོ། ཨ་མྲྀ་ཏ་ཁཱ་ཧི། སྒྲུབ་ཐབས་ལས། ཧཱུཾ་བདེ་བར་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱིས་བྱིན་གྱིས་རློབས། ཨོཾ་རྡོ་རྗེ་རྩེ་ལྔའི་ཕྱག་རྒྱ་གནས་ལྔར་རེག་ལ། སརྦ་ཏ་ཐཱ་ག་ཏ་ས་མ་ཡ་ཀཱ་ཡ་ཝཱཀ་ཙིཏྟ་གུ་ཎ་ཀརྨ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་འཛབ་ནི། ཨོཾ་བོ་དྷི་ཙིཏྟ་མཧཱ་སུ་ཁ་ཛྙཱ་ན་དྷཱ་ཏུ་ཨཱཿཞེས་ཅི་རིགས་པའི་བསྙེན་པ་བྱ། ཧཱུཾ་ལས་ཡབ་ཀྱི་གསང་གནས་རྡོ་རྗེ་དང་། །ཨ་ལས་ཡུམ་གྱི་མཁའ་གསང་པདྨ་ཡི། །ནོར་བུ་ཟེའུ་འབྲུ་རྩེ་མོར་ཕཊ་ཀྱིས་མཚན། །ས་མ་ཡ་ཧོཿ ས་མ་ཡ་སྟྭཾ། རཱ་ཧོ་ཧཾ། རཱ་ག་ཡ་མི། ཛཿཧཱུཾ་བཾ་ཧོཿ ས་མ་ཡ་མུ་དྲ་པྲ་བེ་ཤ་ཡ་ཕཊ། ཨོཾ་ཨོཾ་ཨོཾ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། སྥ་ར་ཎ་ཕཊ། བདེ་ཆེན་འབར་བའི་འོད་ཟེར་ཕྱོགས་བཅུར་འཕྲོས། །རྒྱལ་བ་སྲས་བཅས་མཉེས་པའི་མཆོད་པ་ཕུལ། །འགྲོ་བའི་སྒྲིབ་སྦྱངས་རྡོར་སེམས་གོ་འཕང་བཀོད། །སླར་འདུས་བ་སྤུའི་བུ་ག་ཀུན་ནས་ཐིམ། །(༡༡ན)
ཐུགས་ཀར་འདོད་ཆགས་ཆེན་པོའི་མེ་ཡིས་ཞུ། །རྡོ་རྗེའི་ལམ་ནས་ཡུམ་གྱི་མཁར་བབས་པས། །ཡབ་ཡུམ་བདེ་ཆེན་འོད་ཀྱི་ཐིག་ལེར་བསམ། །སྤྲུལ་པའི་ལྷ་མོ་བཞིས་བསྐུལ་བར་བསམས་ཏེ། སྒྲུབ་ཐབས་ལས། སྟོང་པ་ཤིན་ཏུ་རྣལ་འབྱོར་མེད། །མཁའ་ཉིད་དམ་ཚིག་ཉེ་བར་གནས། །བདེ་བར་གཤེགས་པ་བཞེངས་སུ་གསོལ། །རྡོ་རྗེ་སེམས་དཔའ་སྐལ་བཟང་བཞེངས། །ཡེ་ཤེས་གསང་བའི་རྒྱུད་བསྐུལ་ནས། །ཐུགས་རྗེས་འགྲོ་ལ་གཟིགས་པར་མཛོད། །ཅེས་གླུས་བསྐུལ་བའི་རྐྱེན་གྱིས་བཞེངས་པར་བསམ་པའི་དོན། རྩ་བར། སྔ་མ་དག་གི་གནས་བསྒྱུར་ཏེ། །བསྐལ་པའི་མེ་དཔུང་འཁྲིགས་པ་བཞིན། །འབར་བའི་ཚོགས་ནི་རྣམ་པར་བསམ། །ཞེས་པར་སོ་མཆན་དུ་གཙོ་བོ་བསྐྱེད། འཁོར་བསྐྱེད། ད་ལྟའི་དཀྱིལ་འཁོར་གསལ་གདབ། ཅེས་བྱུང་བས་ཞི་སྒྲུབ་ལས་ཁྲོ་བོར་བསྒྱུར་བ་བསྟན་པས། དྲུག་པ་ཁྲོ་སྒྲུབ་གཞལ་ཡས་ཁང་། །བསྐུལ་བས་ཐིག་ལེ་མཐིང་ནག་འོད་དུ་འབར། །ཞི་བའི་དཀྱིལ་འཁོར་སྐད་ཅིག་གནས་འགྱུར་ཏེ། ཁྲག་འཐུང་གཞལ་ཡས་ཡེ་ཤེས་ལྔ་ཡི་གདངས། །སྣ་ཚོགས་རིན་ཅེན་ལས་གྲུབ་ཕོ་བྲང་ཆེ། །གྲུ་བཞི་སྒོ་བཞི་སྒོ་འཁྱུད་གློ་འབུར་ཚུལ། །བྷཉྫ་བསྐམ་རློན་རྙིད་པ་བསྒྲིགས་པ་ལ། །ཚེས་ལྔ་རིན་པོ་ཆེས་ཁྲག་མཚོ་ཐོད་པའི་རྩིག་པ་སོགས་རྙིང་མ་བ་ཚོས་གང་དྲན་དྲན་གྱི་འཇིགས་འཇིགས་བྱས་ཞེས་བསྟིང་ཚིག་དང་བཅས་ཆོས་རྗེའི་གསུང་བཙན་པར་བྱ་གསུང་བ་བླ་མ་དམ་པ་བསོད་ནམས་རྒྱལ་མཚན་ལྟ་བུའི་ཐམས་ཅད་མཁྱེན་པ་ལ་འཁྲུལ་པ་ག་ལ་སྲིད། རིན་པོ་ཆེའི་གཞལ་ཡས་ཁང་སྔ་འགྱུར་མང་པོར་བཤད་ཅིང་རྭ་བའི་འཇིགས་བྱེད་ཀྱི་དཀྱིལ་འཁོར་དབུས་སུ་ཐོད་རྭ་དང་ཁྲག་མཚོ་ཡོད་པས་གསར་མ་ལའང་མཐའ་ཅི་བཀའ། ས་ཆེན་གྱིས་ཕུར་པའི་མངོན་རྟོགས་ལས་ཞི་བའི་ཕོ་བྲང་དུ་བསྐྱེད་དེ་གསུངས་པའི་ཤུགས་ལ་དྲག་པོ་ཡོད་པ་དོན་གྱིས་འཐོན་པར་སྣང་། རྩེ་ལུགས་ལས་བྱུང་(༡༡བ)
གི་ཁུངས་སུ་མཛད་པའི་དཔྱལ་ཕུར་དུ་དུར་ཁྲོད་ཆེན་པོ་འབར་བའི་གཞལ་ཡས་ཁང་། ཞེས་སོགས་རྒྱས་པར་ཡོད་པ་འགོ་མཇུག་ཚང་མར་སྤྱན་ཟུར་ལྷུངས་ལ་ཆེ། འོན་ཀྱང་འཕྲིན་ལས་རྒྱ་མཚོའི་ཟུར་ཟ་དེ་ལྟར་ན་ཡང་ཕུར་གྱི་རྒྱུད་ཕལ་ཆེར་ལ་ལོག་རྟོག་ཏུ་སོང་བས་རྒྱུད་མི་འདོད་པར་དེ་ནས་བཤད་པའི་ལྷ་ཡི་དམ་དུ་བསྟེན་པའང་ཕག་གྲུས་ས་ཆེན་གྱི་དམ་ཚིག་དང་འགལ་བའི་རིགས་བརྒྱུད་སྔ་མའི་རྗེས་སུ་འབྲང་མི་འཚལ་ལོ། །གནམ་ལྕགས་ཨུར་མོའི་གཟེར་གྱིས་འགྱུར་མེད་གདམས། །ཕ་གུ་སེར་པོ་རབ་ཏུ་བསྒྲིགས་པའི་སྟེང་། །ཐོད་པའི་བྲེ་ཕུལ་བརྩེགས་མར་རོ་སྐྲ་ཡི། །སྐེ་རགས་ལ་བརྒྱུས་རྒྱུ་མའི་དྲ་བ་དང་། །དྲ་ཕྱེད་ལ་འཕྱང་མགོ་བོ་དབང་པོ་ལྔ། །ཡན་ལག་སྐྲ་ཡི་རྒྱན་དང་དར་དཔྱངས་གཡོ། །གསལ་བྱེད་མེ་ལོང་དྲིལ་བུ་གཡེར་ཁ་འཁྲོལ། །ནང་དུ་ཀླུ་ཆེན་བརྒྱད་ཀྱི་ཀ་གདན་སྟེང་། །ལྷ་ཆེན་བརྒྱད་ཀྱི་ཀ་བ་བཙུགས་པ་ལ། །གཟའ་ཆེན་བརྒྱད་ཀྱི་ཀ་གཞུ་བཀལ་བའི་སྟེང་། །ཞིང་ཆེན་བཅུ་དྲུག་གདུང་མ་ཕྱོགས་བཅུར་བྲིས། །གཟའ་སྐར་དྲལ་ལྕམ་རུ་དྲའི་པགས་ཐོག་ཕུབ། །མ་རིག་མུན་སེལ་ཉི་ཟླའི་མཐོངས་ཁུང་ཤར། །དམ་རྫས་བདུད་རྩི་ལྔ་ཡི་ཞལ་བ་བྱས། །རྐང་ལག་ལྷུ་དུམ་མདའ་ཡབ་ཤར་བུ་ཅན། །རུས་པའི་པུ་ཤུ་མཆོད་རྟེན་རྣམ་པས་བསྐོར། །མཆོག་ཆེན་རུས་པའི་རྒྱ་ཕིབས་འདིའི་ཚབ་མཆོད་རྟེན་གྱིས་བྱེད་པ་དང་མི་བྱེད་པའི་ལུགས་བཀའ་གཏེར་ཚོར་རྣམ་གྲངས་མང་ནའང་འདིར་རྒྱ་ཕིབས་གཙོ་ཆེ་བར་བྱས། རྩེ་མོ་རུ། །མི་སྙིང་ཁྲོ་བོའི་རྡོ་རྗེའི་ཏོག་གིས་མཛེས། །སྒོ་བཞིར་རྟ་བབས་རུས་པའི་དྲ་བ་དང་། །ཆུ་སྲིན་རྒྱན་དང་སྟེང་ན་ཆོས་འཁོར་ལོ། ཁྲག་སྒྲུབ་ཐབས་སུ། རིན་ཅེན་ཐོད་པ་སྣ་ཚོགས་དང་ཞེས་དང་། ཞིང་འཕྲུལ་ཚངས་པའི་གཡང་གཞི་སོགས། །དུར་ཁྲོད་རྒྱན་གྱིས་འཇིགས་པར་བརྒྱན། །ཞེས་གཞལ་ཡས་ཁང་དུར་ཁྲོད་ལས་གྲུབ་པར་རྒྱུད་ཀྱི་དགོངས་པ་བཞིན་མཛད་ཅིང་། རྩ་བར། འོད་ཟེར་དེ་དག་འདུས་བྱས་ཀྱང་། །དུར་ཁྲོད་ས་རུ་བརྟག་པར་བྱ། །ཞེས་པར་སོ་མཆན་དུ་དུར་ཁྲོད་ཀྱི་རྒྱན་རྣམས་དང་གཞལ་ཡས་ཁང་གི་ཆེ་བའི་ཡོན་ཏན་ཞེས་བཤད་ལ་གནུབས་ཀྱང་དེ་དང་མཐུན། འཛག་མི་(༡༢ན)
ལྤགས་རློན་པའི་བ་དན་གདུགས། །རྒྱལ་མཚན་ལ་སོགས་རྒྱན་གྱི་བཀོད་པས་བརྗིད། །ཐབས་ཤེས་ཟུང་འཇུག་ཟླ་ཕྱེད་རྡོ་རྗེས་མཚན། །རྩིག་པའི་རྩ་བར་འདོད་སྣམ་དམར་པོ་ལ། །ཕྱི་ནང་གསང་མཆོད་ལྷ་མོ་ཟློས་གར་བསྒྱུར། །དེ་བཞིན་གཤེགས་པ་བཞི་འོད་ཁ་དོག་གིས། །ཕྱོགས་རྣམས་རབ་མཛེས་ཡེ་ཤེས་རང་སྣང་ཞིང་། །དབུས་དང་ཕྱོགས་མཚམས་བརྒྱད་དུ་གནམ་གནུབས་ལུགས་སུ་ཟླ་གམ་སྒོ་གཅིག་གི་ནང་དུ་འཁོར་ལོ་རྩིབས་བརྒྱད་དང་རྒྱུད་ཚོར་ཡང་རྩིབས་བཤད་དོ། །སྒོ་ཅན། །ཟླ་གམ་ཐབས་ཤེས་ཟུང་དུ་བཅུག་པའི་གདངས། །དཀར་དམར་མདངས་འོད་འདྲེས་པའི་ཕོ་བྲང་ཆེ། །དུར་ཁྲོད་ནི་བཀླགས་པས་དོན་གྲུབ་ལས། ཕྱི་རོལ་དུར་ཁྲོད་ཕྱོགས་སྐྱོང་ཞིང་སྐྱོང་ཀླུ། །ཤིང་མེ་མཆོད་རྟེན་ཆུ་བོ་གྲུབ་པོ་བརྒྱད། །དཔའ་བོ་མཁའ་འགྲོ་གནོད་སྦྱིན་སྲིན་པོ་དང་། །ཤ་ཟ་སྨྱོ་བྱེད་བརྗེད་བྱེད་རོ་ལངས་དང་། །མདུང་དང་གསལ་ཤིང་རྩེ་ཡིས་ཕུག་པའི་རོ། །རོ་དུམ་ཐོད་ཚལ་ཤ་ཁྲག་རུས་པས་དཀྲིགས། །ཝ་དང་ཅེ་སྤྱང་ཁྭ་འུག་བྱ་རྒོད་དང་། །ཀཾ་ཀ་ལ་སོགས་ཕེཾ་སྒྲ་སྒྲོགས་པས་གང་། །སྲ་སྒྲུབ་ཐབས་སུ། རྡོ་རྗེའི་རྒྱ་གྲམ་ས་གཞི་ལ་ཞེས་སོགས་ཀྱི་དོན། ཞིང་བརྟན་པ་རྡོ་རྗེའི་གུར་ཁང་གི །ཕྱི་རོལ་ཁ་དོག་སྣ་ལྔའི་མེ་དཔུང་འབར། །བདུན་པ་གདན་རྣམས་གསལ་འདེབས་པ། །པེ་པདྨ་མཎྜ་ལ། དབུས་དང་ཕྱོགས་བཞི་མཚམས་བཞིའི་ཟླ་གམ་ནང་། །པཾ་གནུབས་ལུགས་སུ། རུ་དྲ་ཕོ་མོ་བསྣོལ་བ་ལ། ཉི་ཟླ་པདྨ་བརྩེགས་པའི་གདན། །ཞེས་ལས་མར་བསྒོམ་ཚུལ་གསལ་བར་བསྟན། ཆད་སྣ་ཚོགས་པདྨ་འདབ་བརྒྱད་སྟེང་། །ཨ་ཙནྡྲ་མཎྜལ། དབུས་ཀྱི་པདྨའི་སྟེང་དུ་ཨ་ཆད་པས། །ཟླ་བའི་དཀྱིལ་འཁོར་དཀར་བསིལ་ཉ་གང་བ། །མ་སཱུཪྻ་མཎྜལ། དབུས་ཀྱི་ཟླ་དང་ཕྱོགས་མཚམས་པདྨའི་སྟེང་། །མ་ཆད་ཉི་མའི་དཀྱིལ་འཁོར་ཚ་ཟེར་འབར། །ཛཿདམར་(༡༢བ)
འཕྲོས་ལས་ལྕགས་ཀྱུ་ལྟ་བུ་ཡིས། །དྲག་པོ་འཇིགས་བྱེད་ཆུང་མར་བཅས་པ་བཀུག །མ་ཧཱ་དེ་ཝ་ཛཿ ཨུ་མ་དེ་ཝཱི་ཛཿ དབུས་ཀྱི་དཀྱིལ་འཁོར་གདན་གསུམ་བརྩེགས་པའི་སྟེང་། །ལྷ་ཆེན་དབང་ཕྱུག་ཡབ་ཡུམ་བྱི་ཆིངས་བསྣོལ། །མ་ཏྲཾ་ཛཿ ཕྱོགས་དང་མཚམས་ཀྱི་ཉི་མའི་དཀྱིལ་འཁོར་སྟེང་། །བམ་ཆེན་སྒྱེལ་བའི་གདན་དང་བཅས་པར་བསམ། །བརྒྱད་པ་ཁྲག་འཐུང་ལྷ་བསྐྱེད་པ། །དཀྱིལ་འཁོར་དབུས་ཀྱི་མཁའ་ལ་ཧཱུཾ་མཐིང་ནག །ཟླ་གམ་དབུས་མའི་གདན་གྱི་སྟེང་དུ་བབས། །སྥ་ར་ཎ་ཕཊ། འོད་འཕྲོས་བདེ་གཤེགས་ཀུན་གྱི་ཐུགས་རྒྱུད་བསྐུལ། །སེམས་ཅན་རྣམས་ཀྱི་སྒྲིབ་གཉིས་མ་ལུས་སྦྱངས། །སཾ་ཧ་ར་ཎ་ཧཱུཾ། སངས་རྒྱས་བྱིན་རླབས་ཚུར་འདུས་ཧཱུཾ་ཡིག་ལ། །ཐིམ་པ་འོད་ཀྱི་གོང་བུར་ཡོངས་གྱུར་ལས། །བཛྲ་ཧཱུཾ། དེ་ཉིད་རྡོ་རྗེ་སྔོན་པོ་རྩེ་དགུར་གསལ། །འོད་ཟེར་འཕྲོ་འདུས་གཅིག་ཏུ་གྱུར་པ་ལས། །ཚོགས་གཉིས་ཡོངས་སུ་རྫོགས་པའི་དཔལ་ཆེན་པོ། ཁྲག་འཐུང་བཛྲ་ཧེ་རུ་ཀ་རུ་བསམ། །ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། དཔལ་ཧེ་རུ་ཀཿཐུགས་ཀྱི་གལ་པོའི་རྒྱུད་ཀྱི་ལེའུ་བདུན་པ་དང་། ཏནྟྲ་ཧེ་རུ་ཀཿགལ་པོའི་ལེའུ་བཅུ་བཞི་པ་ནས་གཙོ་འཁོར་གྱི་མངོན་རྟོགས་སྙིང་པོ་ཙམ་བསྟན་པ་བཞིན། ཧཱུཾ། དཔལ་ཆེན་ཡང་དག་བཛྲ་ཧེ་རུ་ཀཿ། །མུན་པའི་མདོག་ཅན་དབུ་གསུམ་ཁྲག་འཐུང་གལ་པོའི་བརྟག་པ་བཅུ་གཅིག་པར་ཞལ་བཞི་ཕྱག་བརྒྱད་པ། ཞལ་བརྒྱད་ཕྱག་བཅུ་དྲུག་པ་སོགས་གདུལ་བྱའི་སྣང་ངོར་རྣམ་འགྱུར་སྣ་ཚོགས་བཤད། ཕྱག་དྲུག་པ། །ཞབས་བཞི་གཡས་བསྐུམ་གཡོན་བརྐྱངས་དོར་སྟབས་བགྲད། །རྩ་ཞལ་མཐིང་ནག་ཁྲོ་ཞིང་གཏུམ་ལ་རྔམས། །གཡས་དཀར་ཅུང་ཟད་བཞད་པ་ཞི་བའི་ཉམས། །གཡོན་དམར་གཤེ་བ་འགྲོ་ལ་རྗེས་ཆགས་བརྩེ། །དུས་ཀྱི་མེ་ལྟར་འབར་བའི་སྤྱན་དགུ་བགྲད། །(༡༣ན)
སྨིན་མ་སྨ་ར་གློག་འཁྱུག་ཤངས་བུག་ནས། །ཧཱུཾ་འབྱིན་ཞལ་གདངས་མཆེ་བ་ཟུར་གསུམ་གཙིགས། །ཕཊ་ཕཊ་འཇིགས་པའི་གད་རྒྱངས་ཕྱོགས་བཅུར་དགོད། །ཉི་ཁྲི་ཆིག་སྟོང་དམར་སེར་དབུ་སྐྲ་བརྫེས། །རྡོ་རྗེའི་བ་སྤུ་བྱེ་བ་ཐེར་འབུམ་གཏམས། །ཕྱག་དྲུག་གཡས་གསུམ་རྡོ་རྗེ་རྩེ་དགུ་དང་། ཁ་ཊྭཱཾ་རྩེ་གསུམ་རྡེའུ་ཆུང་སྒྲ་དབྱངས་སྒྲོགས། །གཡོན་གསུམ་དྲིལ་ཁྲག་འཐུང་གལ་པོའི་བརྟག་པ་བཅུ་གཅིག་པར་འདི་དང་མཐུན་ཡང་ཧེ་རུ་ཀཿཐུགས་ཀྱི་གལ་པོར། དུང་དམར་རྒྱུ་ཞགས་ཀྱུང་ཁྲ་གཡོན། ཞེས་བཤད། བུ་དུང་དམར་རྒྱུ་ཞགས་འཛིན། །ཐོད་བསྐམ་དབུ་རྒྱན་ཁྲག་འཐུང་རིགས་ལྔ་བཞུགས། །བསྐམ་རློན་རྙིད་པའི་དོ་ཤལ་ཚར་གསུམ་འཕྱང་། །གླང་ཆེན་སྒྲུབ་ཐབས་སུ། ལྷ་ཆེན་དཔའ་བོའི་གཡང་གཞི་དང་། ཞེས་བྱུང་། མི་ལྤགས་གཡང་གཞི་སྟོད་དུ་གསོལ། །སྟག་ལྤགས་ཤམ་ཐབས་རཀྟའི་རྩ་བར། ལྷག་པར་རྟགས་ཀྱིས་ཀུན་མཚན་ནས། ཞེས་པར་སོ་མཆན་དུ་དགོས་ཆེད་གསུམ་ཡོད་པས་ཀྲྀ་ཡོག་མན་ཆད་ལ་མི་དགོས་པའི་དོན་གྱིས་ལྷག་པ་བྱུག་རྫས་གསུམ་ལ་ངོས་བཟུང་། ཐིག་ལེ་དང་། །ཞག་གི་སོར་རིས་ཐལ་ཆེན་ཚོམ་བུ་བྱུགས། །རུས་པའི་རྒྱན་དྲུག་རིན་ཅེན་གདུ་བུ་དང་། །སྦྲུལ་སྔགས་གསར་མའི་ཕྱོགས་ལ་རུས་རྒྱན་དང་སྦྲུལ་རྒྱན་ལྷན་ཅིག་ཏུ་མི་འཐད་པའི་དཔྱད་པ་མཛད་མཁན་མང་ནའང་མི་ཐུབ་ཟླ་བའི་སྒྲུབ་ཐབས་བདུད་རྩི་འཛག་པ་དང་མངོན་བརྗོད་འབྲོག་མི་དང་ལོ་ཆུང་གི་འགྱུར། ལྭ་བ་པའི་བདེ་མཆོག་རྒྱུད་འགྲེལ་སོགས་མང་པོར་རྒྱན་གཉིས་ཀ་བཤད་པས་མཐའ་གཅིག་ཏུ་མ་ངས་ལ་ཁྱད་པར་གསང་སྔགས་རྙིང་མ་ལ་དཔལ་གྱི་ཆས་བརྒྱད་དམ་དགུར་བཤད་པས་སོམ་ཉི་ཙམ་ཡང་བགྱིད་མི་འཚལ་ལོ། །ཆུན་མཐིང་ནག་དར་གྱི་ཅོད་པན་འཕུར། །རྡོ་རྗེ་ཁྱུང་གཤོག་བསྐལ་པའི་མེ་དཔུང་སོགས། །དཔལ་གྱི་ཆས་བརྒྱད་མ་ལུས་སྐུ་ལ་རྫོགས། །གར་དགུའི་ཉམས་ལྡན་རྡོ་རྗེ་ཁྲག་འཐུང་སྐུར། །ཨོཾ་བཛྲ་ཀྲོ་དྷཱི་ཤྭ་རཱི་ཧཱུཾ། གཉིས་མེད་མཉམ་སྦྱོར་ཀྲོ་དྷཱི་ཤྭ་རཱི་ནི། སྐུ་མདོག་(༡༣བ)
སྔོ་སྐྱ་ཞལ་གཅིག་ཕྱག་གཉིས་མ། ཁྲོ་ཞིང་སྒེག་ཉམས་གཡས་པ་ཁྲག་འཐུང་གལ་པོའི་བརྟག་པ་བཅུ་གཅིག་པ་དང་ཐུགས་ཀྱི་གལ་པོའི་ལེའུ་བདུན་པར། གཡས་པ་ཤེས་རབ་ཐབས་ལ་བརྟེན། ཞེས་པ་ཙམ་ལས་ཕྱག་མཚན་མི་གསལ་ཞིང་། དོང་སྤྲུག་ཏུ་གཡས་དྲིལ་བུར་ཡང་བཤད། ཏནྟྲ་ཧེ་རུ་ཀའི་ལེའུ་བཅུ་བཞི་པར། གཡས་པ་རྡོ་རྗེ་རྩེ་གསུམ་བསྣམས་པ་ཇི་ལྟར་ལགས། ཞེས་པའི་ལན་དུ། ཡུམ་གྱི་ཁ་ཊྭཱཾ་སྐུ་གསུང་ཐུགས་ལྡན་ཞིང་། ཞེས་བྱུང་བ་བདེ་འདུས་གསང་རྫོགས་སོགས་དང་མཐུན་ལ། སྒྲུབ་ཐབས་སུ་རྡོ་རྗེ་བྱུང་བ་རྩེ་གསུམ་ལ་དེའི་སྒྲས་བཏགས་པར་མངོན་ཞིང་ས་ལོའི་མེ་གཅིག་གི་སྒྲུབ་ཐབས་སུ་བཤད་པའང་དེ་དང་དགོངས་པ་གཅིག་གམ་སྙམ། རྩེ་གསུམ་འཛིན། །བྷན་དམར་ཁྲག་བཀང་གཡོན་གྱིས་ཡབ་ལ་སྟོབ། །སྤྱན་གསུམ་ཞལ་བགྲད་མཆེ་གཙིགས་སྨ་ར་དང་། །སྨིན་མ་དབུ་སྐྲ་དམར་སེར་རབ་ཏུ་འབར། །ཕྱག་རྒྱ་ལྔ་དང་ཐོད་འཕྲེང་གཟིག་ཤམ་སྒྲུབ་ཐབས་སུ་མི་གསལ་ཡང་དོང་སྤྲུག་སོགས་སུ་གཟིག་ཤམ་བཤད། སྦྲུལ། ཁྲོ་མོའི་ཆས་རྫོགས་གཡས་བརྐྱངས་གཡོན་པའི་ཞབས། །ཡབ་ཀྱི་རྐེད་འཁྲིལ་བདེ་སྟོང་གློང་དཀྱིལ་བཞུགས། །གཙོ་བོའི་ཐུགས་དབྱིབས་མཆོང་སྨུག་ཟླུམ་པོའི་གུར། །ཉི་མའི་གདན་ལ་རང་འདྲའི་ཡེ་ཤེས་སེམས། །ཐུགས་གསང་དཔལ་བེའུ་རིན་ཅེན་ཟུར་བརྒྱད་སྟེང་། །རྡོ་རྗེ་རྩེ་དགུའི་ལྟེ་བར་ཧཱུཾ་ཡིག་འབར། །ཟུར་བརྒྱད་སྟེང་ན་སྲོག་གི་སྙིང་པོ་ནི། །ཡི་གེ་འབྲུ་བརྒྱད་འོད་ཟེར་གསེར་ཞུན་གྱི། །འཕྲོ་འདུ་བ་ཐག་གཟིངས་བ་ལྟ་བུར་གསལ། །དཔལ་ཁྲག་འཐུང་གལ་པོའི་རྒྱུད་ཀྱི་བརྟག་པ་བཅུ་གཅིག་སྒྲུབ་ཐབས་ལས། ཡབ་ཡུམ་མཁའ་གསང་ཧཱུཾ་དང་ཨ། རྡོ་རྗེ་པདྨ་བསྐྱེད་བྱ་སྟེ། ཞེས་བྱུང་བ་དང་དོན་གཅིག་ཀྱང་རྒྱས་བསྡུས་ཅུང་ཟད་བྱུང་བ་རྒྱུད་ཀྱི་རྗེས་སུ་འབྲངས། པ་ནས་བྱུང་བའི་དགོངས་དོན་བསྡེབས་པ་ནི། ཧཱུཾ་ཏིཥྛ་རཏྣ་སཱུཪྻ་ཨོཾ། ཡབ་ཀྱི་གསང་བར་ཉི་མའི་དཀྱིལ་འཁོར་སྟེང་། །རྡོ་རྗེ་རིན་ཅེན་ལྟེ་བར་ཨོཾ་དཀར་མཚན། །བྷྲཱུཾ་བི་ཤྭ་བི་ཤུདྡྷེ་པདྨ་དྷ་ར་ཨ། ཡུམ་གྱི་གསང་གནས་པདྨ་འདབ་བརྒྱད་སྟེང་། །(༡༤ན)
ཨེ་དབྱིངས་གྲུ་གསུམ་ཨཾ་ཡིག་དམར་པོས་མཚན། །ཡུམ་གྱིས་ས་མ་ཡ་ཧོས་བསྐུལ་བ་ལས། །ཡབ་ཀྱིས་ས་མ་ཡ་སྟྭཾ་རྗེས་སུ་གནང་། །རཱ་ཧོ་ཧཾ་ལན་རཱ་ག་ཡ་མིས་བཀང་། ཛཿཧཱུཾ་བཾ་ཧོཿས་ལྷ་མོ་བཞི་སྤྲོས་ཏེ། །འགུགས་འཆིང་སྡོམ་ཞིང་མྱོས་པའི་ཕྱག་རྒྱ་ཡིས། །གསང་བའི་གནས་གཉིས་སྤྲད་སྦྱར་བསྡམས་ཤིང་བསྐུལ། །ས་མ་ཡ་མུ་དྲ་པྲ་བེ་ཤ་ཡ་ཕཊ། དམ་ཚིག་དབང་གིས་དགྱེས་པར་ལོངས་སྤྱད་པས། །ཨོཾ་ཨོཾ་ཨོཾ་གྱིས་བྱང་སེམས་ཧཾ་ལས་ཕབ། །ཧཱུཾ་ཧཱུཾ་ཧཱུཾ་གིས་དྷཱུ་ཏཱིའི་ལམ་ནས་བརྒྱུད། །ཕཊ་ཕཊ་ཕཊ་ཀྱིས་ཡུམ་གྱི་པདྨར་འཕང་། །སྥ་ར་ཎ་ཕཊ་བྱང་སེམས་དཀར་དམར་འདྲེས། །གསང་གནས་ཧྲཱིཿཡིག་ཡོངས་གྱུར་ཧེ་རུ་ཀའི། །ཐུགས་ཀའི་ཧཱུཾ་ལས་ཆུ་ལས་ཆུ་ལྦུར་བཞིན། །སྲས་ས་ཕུར་གྱི་ཁྲོ་བཅུ་ཕྲ་ཕྱག་རྣམས་ཐུགས་ཀ་ནས་སྤྲོ་བའི་ལུགས་བཞིན་བདག་པོ་སྔགས་འཆང་པས་འདིར་ཡང་དེ་ཁའི་གཡག་མགོ་ཤོ་བཞག་ཏུ་སོང་འདུག་པ་གདོང་ཁ་བ་དང་རྩེ་བསྟུན་ནས་འདར་ཕྱོགས་སུ་དཔུང་འཇུག་གི་ཐུགས་བྲེལ་དང་བཅས་རྒྱུད་ཁུངས་གཟིགས་ལོང་མ་བྱུང་བ་ཐུགས་མད་ཅིང་སྒྲུབ་ཐབས་སུ་ཡབ་ཡུམ་མཁའ་གསང་ཧཱུཾ་དང་ཨ་ཞེས་སོགས་བྱུང་བའང་མ་གཟིགས་པར་མཆིས་སོ། །ཀྱི་ས་བོན་གཾ་ཙཾ་པྲཾ་བཾ་པཾ། །གྷཾ་སྨཾ་ཙཾ་བརྒྱད་སོ་སོའི་གདན་སྟེང་དུ། །ཆད་པ་གནས་འགྱུར་ཡོངས་སུ་གསལ་བ་ནི། །ཨོཾ་བཛྲ་གཽ་རཱི་ཧཿ ཤར་དུ་གཽ་རཱི་སྔོན་རིགས་བསྡུས་སུ་དམར་སེར་ཞལ་བཞི་ཕྱག་བརྒྱད་མ། གནུབས་ལུགས་ལྷ་དགུར་དཀར་མོ་མདའ་གཞུ་འཛིན་པ། སྒྲུབ་ཐབས་སུ་སྔོན་མོ་མདའ་གཞུ་འཛིན་པ་བྱུང་བ་ཟླ་གམ་དགུ་པའི་སྒྲུབ་ཐབས་མིན་པས་གཅིག་ཏུ་རྒྱས་མ་ཁེབས་ཤིང་ཁྲག་འཐུང་གལ་པོའི་བརྟག་པ་བཅུ་གཅིག་པ་དང་ཧེ་རུ་ཀཿཐུགས་ཀྱི་གལ་པོའི་ལེའུ་བདུན་པར་བྱུང་བ་ལྷ་མོ་བརྒྱད་ཀྱི་ཕྱག་མཚན་དང་ཕྱོགས་མཚམས་ལས་བྱང་དང་ཞུས་དག་ལམ་ཙམ་ཕེར། མོ་ཕྱག་གཡས་ཀྱིས། །འཁོར་བའི་སྡུག་བསྔལ་མཐར་བྱེད་ཞིང་དབྱུག་འཕྱར། །དེ་བཞིན་ཉིད་རྟོགས་རཀྟ་སྤྲོས་(༡༤བ)
བྲལ་གྱི། །དུང་ཆེན་སྣོད་དུ་བསྐྱིལ་ནས་ཐུགས་ཀར་འཛིན། །ཨོཾ་བཛྲ་ཙཽ་རཱི་ཧཿ ལྷོ་རུ་ཙཽ་རཱི་སེར་མོ་ཕྱག་རིགས་བསྡུས་སུ་དམར་སེར་གཡས་འཁོར་ལོ་དང་ཁ་ཊྭཱཾ་ག་གཡོན་ལྕགས་ཀྱུ། གནུབས་ལུགས་སུ་དམར་སེར་གཡས་འཁོར་ལོ་དང་གཡོན་ཁ་ཊྭཱཾ། སྒྲུབ་ཐབས་སུ་དམར་སེར་གཡས་འཁོར་ལོ་དང་གཡོན་ལྕགས་ཀྱུར་བཤད། གཉིས་ཀྱིས། །ཨེ་ཝཾ་ཟུང་དུ་འཇུག་པའི་མདའ་དང་གཞུ། །རྣ་བའི་བར་དུ་བཀང་སྟེ་འཁྲུལ་པའི་ཚོགས། །མ་ལུས་སྟོང་ཆེན་ཆོས་ཀྱི་དབྱིངས་སུ་འབིགས། །ཨོཾ་བཛྲ་པྲ་མོ་ཧེ་ཧཿ ནུབ་ཏུ་པྲ་མོ་རིགས་བསྡུས་སུ་དམར་ནག་ཕྱག་བཞི། གནུབས་ལུགས་དང་སྒྲུབ་ཐབས་སུ་དམར་མོ་ཕག་ཞལ་སྟེང་ཅན། གཡས་རྡོ་རྗེ་དང་གཡོན་ཐོད་ཁྲག་འཛིན་པར་བཤད། ཧ་དམར་ཕྱག་གཡས་ཀྱིས། །བདུད་བཞི་བཅོམ་རྟགས་ཆུ་སྲིན་རྒྱལ་མཚན་འཕྱར། །གཡོན་པ་འདོད་ཆགས་དག་པ་རཀྟའི་རྒྱུན། །དུང་ཆེན་སྣོད་ནང་བཀང་བ་ཞལ་དུ་གསོལ། །ཨོཾ་བཛྲ་བཻ་ཏྟ་ལི་ཧཿ བྱང་དུ་བཻཏྟ་ལཱི་རིགས་བསྡུས་སུ་དཀར་མོ་གཡས་རྡོ་རྗེ་དང་གཡོན་བ་དན་གྱི་ཕྱག་རྒྱ། གནུབས་ལུགས་དང་སྒྲུབ་ཐབས་སུ་དཀར་ལྗང་གཡས་ཐོད་པ་དང་གཡོན་བ་དན་འཛིན་པར་བཤད། ནག་ཕྱག་གཡས་ཀྱིས། །ཡེ་ཤེས་དགུ་ལྡན་རྡོ་རྗེ་མཁའ་ལ་གདེངས། །གཡོན་པའི་ཕྱག་གིས་བྱིས་པའི་བམ་བཟུང་ནས། །བཟང་ངན་རྟོག་ཚོགས་དང་བྲལ་མགོ་བོ་ཟ། །ཨོཾ་བཛྲ་པུཀྐ་སཱི་ཧཿ ཤར་ལྷོར་པུཀྐ་དམར་སེར་འཁོར་བའི་འདམ། །ཆུད་རྣམས་འདྲེན་ཕྱིར་གཡོན་པས་ཞིང་ཆུང་གི །རྒྱུ་མ་བཟུང་བ་གཡས་པས་འདོམ་འཇལ་དུ། །སྒྲུབ་ཐབས་གསུམ་དུ་སྣ་ཚོགས་མདོག་ཅན་གཡས་རྡོ་རྗེ་དང་གཡོན་དཔག་བསམ་གྱི་ཤིང་འཛིན་པར་བཤད། དྲངས་པའི་ཚུལ་གྱིས་རོ་བཅུད་ཞལ་དུ་གསོལ། །ཨོཾ་བཛྲ་གྷསྨ་རཱི་ཧཿ ལྷོ་ནུབ་གྷསྨ་རཱི་རིགས་བསྡུས་དང་སྒྲུབ་ཐབས་སུ་སེར་ནག་གཡས་རལ་གྲི་དང་གཡོན་མེ་ཐབ་འཛིན་ཅིང་ཕྱོགས་ཀྱང་ནུབ་བྱང་། གནུབས་ལུགས་སུ་ལྗང་གུ་ཕྱག་མཚན་གོང་འདྲ་ལྷོ་ནུབ་ཏུ་གནས་པར་བཤད། ལྗང་བྷནྡྷ་རུ། །འཁོར་བ་ཆོས་ཀྱི་དབྱིངས་སུ་(༡༥ན)
དག་པའི་ཁྲག །འཁྱིལ་བ་གཡོན་པས་ལེགས་བཏེག་ཕྱག་གཡས་ཀྱིས། །རྡོ་རྗེས་དཀྲུགས་ནས་རྗེས་ཆགས་གདངས་ཀྱིས་འཐུང་། །ཨོཾ་བཛྲ་སྨ་ཤ་ནཱི་ཧཿ ནུབ་བྱང་སྨ་རིགས་བསྡུས་སུ་མཐིང་ནག་ཕྱག་བཞི་མ། གནུབས་ལུགས་དང་སྒྲུབ་ཐབས་སུ་མཐིང་ནག་གཡས་རྡོ་རྗེ་དང་གཡོན་ཐོད་ཁྲག་འཛིན་ཅིང་གསུམ་ག་བྱང་ཤར། བདག་པོ་སྔགས་འཆང་པའི་དེར་དཔག་བསམ་གྱི་ཤིང་ཟེར་བ་གོང་མ་གསུམ་གྱི་པུཀྐ་སཱིའི་ཕྱག་མཚན་དང་འཁྲུལ་གཞི་བྱུང་བ་འདྲ། ས་ལོའི་ཟིན་བྲིས་ལ་ཁུངས་བཅོལ་འདུག་ཀྱང་དེ་ལ་མཛད་བྱང་མི་འདུག་ཅིང་ས་ཆེན་གྱི་ཕུར་པའི་ལས་བྱང་དུའང་དཔག་བསམ་གྱི་ཤིང་སོགས་མེད་ཕྱིར་མ་མཐུན་པས་མི་མཁས་པ་ཞིག་གིས་ཁ་གཡར་བ་འདྲ་བས་ཡིད་བརྟན་དཀའོ། །ཤ་མཐིང་ནག་ཡེ་དག་པ། །འགྱུར་མེད་ཆོས་དབྱིངས་ཐུགས་སུ་ཆུད་མཚོན་པའི། །བྱིས་རོ་རངས་པོའི་མགོ་རྐང་ནས་བཟུང་སྟེ། །དོན་སྙིང་དམར་པོ་ཧུབ་ཀྱིས་དྲངས་ནས་ཟ། །ཨོཾ་བཛྲ་ཙཎྜ་ལི་ཧཿ བྱང་ཤར་ཙཎྜི་རིགས་བསྡུས་སུ་སྔོ་ནག་གཡས་མདུང་དང་གཡོན་ཏྲི་ཤུལ་འཛིན་ཅིང་ལྷོ་ནུབ། གནུབས་ལུགས་སུ་ནག་མོ་གཡས་རྩེ་གསུམ་དང་གཡོན་བྱིས་རླིད་ནུབ་བྱང་། སྒྲུབ་ཐབས་སུ་ནག་མོ་གཡས་རྡོ་རྗེ་དང་གཡོན་རྩེ་གསུམ། ལྷོ་ནུབ་མར་བཤད་ཅིང་རྩེ་གསུམ་རྒྱུད་དང་བཀའ་བརྒྱད་ཚོར་མི་གསལ་ཡང་གོང་དུ་སྒྲུབ་ཐབས་གསུམ་གར་བྱུང་ཞིང་ཁྱད་པར་གནུབས་ལུགས་དང་ཤིན་ཏུ་མཐུན་ནོ། །སེར་སྐྱ་དུག་གསུམ་ཚོགས། །འབིགས་པའི་རྩེ་གསུམ་གཡས་པས་འཛིན་པ་དང་། །ལྷན་ཅིག་དམིགས་མེད་རང་བཞིན་བམ་སྟོད་སྨད། །འབྲལ་བའི་སྟང་ཀ་དང་བཅས་སྟེང་དུ་འཕྱར། །ཀུན་ཀྱང་ཞལ་གཅིག་ཕྱག་གཉིས་ཁྲོ་མོའི་ལ། །སྤྱན་གསུམ་ཞལ་གདངས་མཆེ་གཙིགས་སྨིན་མ་དང་། །སྨ་ར་དབུ་སྐྲ་དམར་སེར་མེ་ལྟར་འབར། །ཕྱག་རྒྱ་ལྔ་དང་ཐོད་འཕྲེང་རྒྱན་གྱིས་བརྒྱན། །མི་ལྤགས་ལྡིང་སྟབས་སྟག་ལྤགས་ཤམ་ཐབས་དཀྲིས། །ཡེ་ཤེས་མེ་དཔུང་འབར་(༡༥བ)
བའི་ཀློང་དཀྱིལ་ན། །ཞབས་གཉིས་གཡོན་བརྐྱངས་རོལ་པའི་ཚུལ་གྱིས་འགྱིང་། །སྒྲུབ་ཐབས་སུ། དཀྱིལ་འཁོར་ལྷ་ཚོགས་ཐམས་ཅད་ཀྱི། །མིག་ལ་རྣམ་པར་སྣང་མཛད་དོ། །ཞེས་སོགས་ཀྱི་དགོངས་དོན་ལྟར། ལྷ་ཚོགས་རྣམས་ཀྱི་མིག་ཏུ་ཁཾ་ཡིག་ལས། །སྣང་མཛད་དཀར་པོ་དཀར་སེར་ལྗང་རྒྱབ་དམར། །ཕྱག་བཞིའི་དང་པོ་ཆོས་གོས་ལྷུང་བཟེད་དང་། །འོག་མ་གཉིས་ཀྱིས་འཁར་གསིལ་གླེགས་བམ་འཛིན། །འཁོར་སྒྱུར་ཆ་ལུགས་རང་འོད་སངས་རྒྱས་སྤྱན། །འཁོར་ལོ་ཐོད་པ་འཛིན་དང་ཐབས་ཤེས་འཁྲིལ། །ཞི་རྒྱན་དང་བཅས་པད་ཟླར་གར་གྱིས་འགྱིང་། །རྣ་བར་ཏྲཾ་ལས་རྡོ་རྗེ་ཉི་མ་སེར། །ཞལ་བཞི་ཕྱག་བཞི་གཡས་ན་མདའ་དང་གྲི །གཡོན་པ་གཞུ་དང་རྡོ་རྗེ་ཉི་མ་འཛིན། །དམར་མདངས་འོད་ཟེར་ཁ་དོག་སྣ་ལྔས་བསྐོར། །འཛུམ་བཅས་སྤྱན་གཡོན་གྱེན་བཏེག་ཞབས་གཉིས་པོ། །པད་ཟླར་སྐྱིལ་ཀྲུང་མཱ་ཀི་མཐིང་ཞུན་མདོག །རིན་ཅེན་ཐོད་འཛིན་གྱིས་འཁྱུད་རྒྱན་གོས་མཛེས། ཁ་ལ་ཧྲཱིཿལས་པདྨ་གར་གྱི་དབང་། །དཀར་དམར་བཞད་ཆགས་ཞལ་མང་བརྒྱ་ཕྱེད་ཕྱག །གཡས་རྣམས་པདྨ་རྡོ་རྗེ་འཁོར་ལོ་དང་། །རིན་ཅེན་དབྱུག་སོགས་གཡོན་རྣམས་པད་སྡོང་འཛིན། །སྣ་ཚོགས་པད་ཟླར་བཀྲ་ཤིས་སྐྱིལ་ཀྲུང་མཛད། །གོས་དཀར་དཀར་མོ་པད་ཐོད་བཟུང་སྟེ་འཁྱུད། །གཉི་གའང་དར་དང་རིན་ཅེན་མཚན་དཔེས་སྤྲས། །སྣ་ལ་ཧཱ་ལས་རྟ་མཆོག་རོལ་པ་ལྗང་། །དབུས་དམར་གཡས་ནག་གཡོན་དཀར་རྟ་ཞལ་སྟེང་། །དམར་བའི་ཕྱག་བརྒྱད་གཡས་བཞི་བ་དན་དང་། །སྣ་ཚོགས་རྡོ་རྗེ་རལ་གྲི་མདའ་འཛིན་ཅིང་། །གཡོན་པ་ཁུ་ཚུར་སྣ་ཚོགས་པདྨ་མདུང་། །དབྱུག་པ་གཞུ་འཛིན་ནག་པོའི་ཞབས་བཞི་ཡི། །གཡས་ཀྱི་དང་པོས་གྲོལ་དཀའ་དཔལ་མོ་དང་། །གཉིས་(༡༦ན)
པས་གྲོལ་མ་དགའ་མ་ཉེ་བར་མནན། །གཡོན་གྱི་དང་པོས་མིག་གསུམ་ཁྱབ་འཇུག་དང་། །གཉིས་པས་ཚངས་པ་རབ་དགའ་རྣམ་པར་གནོན། ཁྲོ་རྟགས་རེ་གཅིག་འབར་བའི་རྒྱན་གྱིས་བརྗིད། །དམ་ཚིག་སྒྲོལ་མ་ལྗང་སེར་འཇོ་སྒེག་ཅན། །སྣ་ཚོགས་རྡོ་རྗེ་ཐོད་པ་ཐོགས་པས་འཁྲིལ། །ལུས་ལ་ཧི་ལས་ཁྲག་འཐུང་མཐིང་ནག་མདོག །ཞལ་བཞི་ནག་དཀར་སེར་དང་རྒྱབ་ཞལ་དམར། ཁྲོ་ཞིང་གཏུམ་ལ་གར་དགུའི་ཉམས་དང་ལྡན། །དང་པོའི་ཕྱག་གཉིས་རྡོ་རྗེ་ཁ་ཊྭཱཾ་དྲིལ། །འཛིན་པས་ཡུམ་འཁྱུད་གཉིས་པས་འཇིགས་བྱེད་ཀྱི། །པགས་རློན་གོས་གྱོན་གསུམ་པས་མདའ་དང་གཞུ། །བཞི་པས་ཁྲག་སྙིང་གིས་གང་དུང་ཆེན་བསྣམས། །པདྨ་དྲག་པོའི་སྟེང་ན་བརྐྱངས་བསྐུམས་བཞུགས། །དུར་ཁྲོད་ཆས་རྫོགས་ཁྲོ་མོའི་དབང་ཕྱུག་མ། །ཐོད་པ་བ་དན་གསུམ་པའི་ཕྱག་རྒྱས་འཁྲིལ། ཁ་ཊྭཱཾ་གར་བརྟེན་རིན་པོ་ཆེ་ཡིས་བརྒྱན། །ཡིག་ལ་ཧཱུཾ་ལས་རྡོར་སེམས་དཀར་དམར་མདངས། །དཀར་མཐིང་གསེར་མཆོག་དམར་བའི་ཞལ་བཞི་པ། །ཕྱག་བཞིའི་གཡས་ཀྱི་དང་པོས་ཐུགས་ཀ་རུ། །བསྙེམས་པ་དང་བཅས་རྡོ་རྗེ་རྩེ་ལྔ་འཛིན། །གཡོན་པ་ཁ་ཊྭཱཾ་ག་ངོས་དྲིལ་བུ་ནི། །བ་དན་བཅས་འཁྲོལ་མཐའ་གཉིས་མདའ་གཞུ་བསྣམས། །མཚན་དཔེས་སྤྲས་ཤིང་ཞི་བའི་རྒྱན་དགུ་ལྡན། །ལྷ་མོ་བདེ་མཆོག་དཀར་མོ་མདའ་གཞུ་དང་། །བཅས་ཏེ་ཡབ་འཁྱུད་པད་དཀར་རོལ་རྩེད་བཞུགས། །ཟླ་གམ་གཅིག་པའི་སྒྲུབ་ཐབས་སུ་ལུས་དཀྱིལ་ཞིག་འདུག་པ་འཇམ་དབྱངས་ས་ལོས་བདག་ཆེན་རྡོ་རྗེ་འཆང་གི་སྙན་བརྒྱུད་ཀྱི་བསྟན་པ་མ་ཟིན་ཡང་གནས་ལྔ་རིག་པ་མཁྱེན་པའི་ཚད་ཐུབ་ཀྱི་མཁས་པ་ཡིན་པས་ཁུངས་མི་བཙུན་པ་མིན་ནའང་རྒྱུད་སྒྲུབ་ཐབས་རྩ་མཆན་སོགས་སུ་ཟིན་སོ་གསལ་བར་མ་རྙེད་པས་བཏང་སྙོམས་སུ་བཞག་གོ །དགུ་པ་སྙན་གསན་(༡༦བ)
དབབ་པ་ནི། །སྒྲུབ་ཐབས་ལས། །ཧཱུཾ་ཡེ་ཤེས་སྤྱན་གྱི་སྤྱོད་ཡུལ་ནས། ཁྲག་འཐུང་གལ་པོ་དང་སྔགས་མ་གཏོགས་ཕལ་ཆེར་ཞུས་དག་ཕེར་ཞིང་། སྒྲུབ་ཐབས་སུ་གསུམ་པོ་འདི་སྤྱན་འདྲེན་དུ་མཛད་ནས་སྐུ་གསུམ་དང་སྦྱར་བའི་ངོ་བོ་ཆོས་སྐུ། དཔལ་ཆེན་ཁྲག་འཐུང་འཁོར་དང་བཅས། །སེམས་ཅན་དོན་སླད་དམ་ཚིག་དགོངས། །གནས་འདིར་བརྩེ་ཕྱིར་གཤེགས་སུ་གསོལ་ཞེས་པ་འདིར་འདོན་པ་བསྒྱུར་གྱིས། རྩ་བར་ཡེ་ཤེས་དཀྱིལ་འཁོར་སྤྱན་དྲངས་ཏེ། ཞེས་པར་སོ་མཆན་དུ་སྙན་གསན་དབབ་པ་དང་ཞེས་བྱུང་བས་གསལ་བྱེད་དུ་སོང་། བཞེངས་སུ་གསོལ། །ཕེཾ་མཐེ་བོང་དང་གུང་མོ་སོ་སོར་རྩེ་སྤྲད་མཛུབ་མོ་བསྣོལ་ལྷག་མ་རྣམས་བརྐྱངས་ཏེ་འབར་བའི་ཕྱག་རྒྱ་སྨིན་མཚམས་སུ་གཡོན་དུ་བསྐོར། ཛཿཧཱུཾ་བཾ་ཧོཿཤྲཱི་ཧེ་རུ་ཀ་མཧཱ་བཛྲ། ཨ་གྷཊྚཱ་ཡ་ཨ་བྷཊྚཱ་ཡ། པྲ་བེ་ཤཱ་ཡ་པྲ་བེ་ཤཱ་ཡ། བྷནྡྷཱ་ཡ་བྷནྡྷཱ་ཡ། ཏོ་ཤཱ་ཡ་ཏོ་ཤཱ་ཡ། བཛྲ་ཌཱ་ཀི་ནི། ཧྲི་ད་ཡ་ཧཱུཾ་ཧཱུཾ་ཕཊ། ཨོཾ་ཤྲཱི་ཧེ་རུ་ཀ་མཧཱ་བཛྲ་སརྦ་དུཥྚཱཾ་ས་མ་ཡ་མུ་དྲ་པྲ་བན་ཙཀྲ་ཧཱུཾ་ཕཊ། ཅེས་གང་འདུལ་གྱི་མོས་པའི་དབང་གིས་སད་པར་བསམ། བཅུ་པ་ལྷ་ཚོགས་སྤྱན་དྲང་བ། །དེ་ཉིད་ལས། ཧཱུཾ། དད་པ་དང་རང་བཞིན་ལོངས་སྐུ། ནི་དམ་ཚིག་གིས། །ཚུར་སྤྱོན་ཚུར་སྤྱོན་ཧེ་རུ་ཀཿ། །ཆོས་སྐུ་ཞི་བའི་ངང་ལས་ཀྱང་། །གཟུགས་སྐུ་འཇིགས་ཚུལ་བསྟན་དུ་གསོལ། །ཐུགས་རྗེ་ཆེན་པོ་ཐབས་མཁས་པས། །གདུག་པ་འདུལ་ཕྱིར་གཤེགས་སུ་གསོལ། །ཚོགས་རྗེ་ཚོགས་བདག་དབང་དང་ལྡན། །ཚོགས་ཀྱི་སློབ་དཔོན་ཚོགས་ཀྱི་བདག །ཡེ་ཤེས་རྟོགས་པའི་ཁྱད་པར་ལས། །སྤྲུལ་པ་མང་པོའི་ཚོགས་བཅས་གཤེགས། །ཨོཾ་ཨེ་ཧྱེ་ཧི་བྷ་ག་ཝ་ན། པདྨའི་ཕྱག་རྒྱ་གཡས་སུ་བསྐོར་ཏེ་གར་དང་བཅས་ཐལ་མོ་ལན་གསུམ་བརྡབ། ཛཿཧཱུཾ་བཾ་ཧོཿ རུ་ལུ་རུ་ལུ། ཛཿཧཱུཾ་བཾ་ཧོཿ ཨེ་ཧྱེ་ཧི་ཏྲི་ཤ་ཧོ། ས་མ་ཡ་ཧོ། ས་མ་ཡ་སྟྭཾ། ཨོཾ་ཨེ་ཨ་ར་ལི་ཧོ། ཧྲིཾ་ཧྲིཾ་ཧྲིཾ། བདེ་གཤེགས་ཕོ་བྲང་དཀྱིལ་འཁོར་འདིར། ཐུགས་རྗེ་སྤྲུལ་སྐུ། འགྲོ་བ་མ་ལུས་དོན་(༡༧ན)
གྱི་ཕྱིར། །སེམས་ཅན་དོན་དུ་དགོངས་ནས་ཀྱང་། །འཁོར་བཅས་མ་ལུས་གཤེགས་སུ་གསོལ། །ཨོཾ་རྡོ་རྗེ་རྩེ་ལྔའི་ཕྱག་རྒྱ་དཔུང་པ་གཡོན་ནས་གཡས་སུ་བསྐོར་བ་ཐོད་འཕྲེང་གི་རྒྱ་བཅའ། ཤྲཱི་ཧེ་རུ་ཀ་མཧཱ་བཛྲ་སརྦ་དུཥྚཱཾ། ས་མ་ཡ་མུ་དྲ། པྲ་བེ་ཤཱ་ཡ་ཤྲཱི་ཧེ་རུ་ཀཿཧཱུཾ་ཕཊ། ཛཿཧཱུཾ་བཾ་ཧོཿཤྲཱི་ཧེ་རུ་ཀཿམཧཱ་བཛྲ། སརྦ་དུཥྚཱཾ། ས་མ་ཡ་མུ་དྲ། པྲ་བན་ཙཀྲ་ཤྲཱི་ཧེ་རུ་ཀཿཛཿ གསང་བ་མེ་དཔུང་ཐུགས་ཀྱི་རྒྱུད་ལས། སྙིང་ནི་དུར་ཁྲོད་བསིལ་པའི་ཚལ། །རྒྱ་གར་ཡུལ་ནས་གྲུབ་པ་མོ། །མ་མོ་ཆེན་མོ་གཽ་རཱི་མ། །རོལ་པའི་སྟབས་ཀྱིས་གཤེགས་སུ་གསོལ། །ལག་གཡས་ལི་ཡུལ་གྲུབ་པའི་ཚལ། །ལི་ཡི་ཡུལ་ནས་གྲུབ་པ་མོ། །མ་མོ་ཆེན་མོ་ཙཽ་རཱི་མ། །རོལ་པའི་སྟབས་ཀྱིས་བཞུགས་སུ་གསོལ། །ལག་གཡོན་བལ་ཡུལ་གྲུབ་པའི་ཚལ། །བལ་པོའི་ཡུལ་ནས་གཤེགས་སུ་གསོལ། །མ་མོ་ཆེན་མོ་པྲ་མོ་ཧ། །རོལ་པའི་སྟབས་ཀྱིས་གཤེགས་སུ་གསོལ། །རྐང་གཡས་ཐོ་གར་དུར་ཁྲོད་ཚལ། །ཐོ་གར་ཡུལ་ནས་གཤེགས་སུ་གསོལ། །མ་མོ་ཆེན་མོ་བཻཏྟ་ལཱི། །རོལ་པའི་སྟབས་ཀྱིས་གཤེགས་སུ་གསོལ། །རྐང་གཡོན་ཟ་ཧོར་གྲུབ་པའི་ཚལ། །ཟ་ཧོར་ཡུལ་ནས་གཤེགས་སུ་གསོལ། །མ་མོ་ཆེན་མོ་པུཀྐ་སཱི། །རོལ་པའི་སྟབས་ཀྱིས་གཤེགས་སུ་གསོལ། །ལྟེ་བ་ཨྱོན་གྲུབ་པའི་ཚལ། །ཨྱོན་ཡུལ་ནས་གཤེགས་སུ་གསོལ། །མ་མོ་ཆེན་མོ་གྷསྨ་རཱི། །རོལ་པའི་སྟབས་ཀྱིས་གཤེགས་སུ་གསོལ། །ཕོ་མཚན་སིངྷ་གྲུབ་པའི་ཚལ། །སིངྷའི་ཡུལ་ནས་གཤེགས་སུ་གསོལ། །མ་མོ་ཆེན་མོ་སྨ་ཤ་ནཱི། །རོལ་པའི་སྟབས་ཀྱིས་གཤེགས་སུ་གསོལ། །མཁལ་མ་དུར་ཁྲོད་གླིང་དགུའི་ཚལ། །གླིང་དགུའི་ཡུལ་ནས་གཤེགས་སུ་གསོལ། །མ་མོ་ཆེན་མོ་ཙཎྜ་ལཱི། །རོལ་པའི་སྟབས་ཀྱིས་གཤེགས་སུ་གསོལ། །(༡༧བ)
རུ་ལུ་འབྲུ་བརྒྱད་ཀྱི་རྗེས་སུ་ཨོཾ་ཨེ་ཧྱེ་ཧི་བྷ་ག་ཝ་ན་ས་མ་ཡ་ཛཿཛཿ ཞེས་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་བཞུགས་པར་བསམ། བཅུ་གཅིག་བཞུགས་སུ་གསོལ་གདབ་པ། སྒྲུབ་ཐབས་ལས། ཧཱུཾ་སེམས་ཅན་དོན་ཕྱིར་ནན་ཏན་མཆོག་བསྐྱེད་ཅིང་། ཡེ་ཤེས་ཐུགས་རྗེས་བདག་ལ་དགོངས་ནས་ཀྱང་། །མི་གནས་དོན་ཕྱིར་དངོས་གྲུབ་མཆོག་གི་གནས། །བདག་ལ་སྩལ་ཞིང་བརྟན་པར་བཞུགས་སུ་གསོལ། །ཨོཾ་ཤྲཱི་རྡོར་ཐལ་བསྐྱོད་པའི་ཚུལ་བྱ། ཧེ་རུ་ཀ་མཧཱ་བཛྲ། ས་མ་ཡ་ཧི། སརྦ་དུཥྚཱཾ། ས་མ་ཡ་མུ་དྲ་པྲ་བན་ཙཀྲ་ཧཱུཾ། ཀཱ་ཡ་ཝཱཀ་ཙིཏྟ་ཏིཥྛ་བཛྲ། བཅུ་གཉིས་དམ་བསྒྲག་ཟིལ་གནོན་པ། རྩ་མཆན་ལས། སངས་རྒྱས་ནས་སེམས་ཅན་གྱི་དོན་མཛད་པའི་དམ་ཚིག་དང་འགལ་ལོ་ཞེས་དམ་བདར་ཞིང་འཁོར་བཀའ་ལ་མི་ཉན་པ་རྣམས་ཟིལ་གྱིས་གནོན་པར་གསུངས་པའི་དོན་བཞིན། སྒྲུབ་ཐབས་ལས། ཧཱུཾ། ཆེ་མཆོག་མཉམ་སྦྱོར་འབར་བའི་གློང་དཀྱིལ་ནས། །ཐུགས་རྗེ་ཁྲོས་པས་གདུག་པ་འདུལ་མཛད་པ། །གསང་སྔགས་རྨད་བྱུང་དྲག་པོའི་འཕྲིན་ལས་རྣམས། །ལྷུན་གྱིས་གྲུབ་པར་བྱིན་གྱིས་བརླབ་ཏུ་གསོལ། །ཨོཾ་ཤྲཱི་རྡོ་རྗེ་ཁུ་ཚུར་བཅིངས་པ་ལས་མཐེ་བོང་དང་མཐེའུ་ཆུང་སོ་སོར་བསྒྲེང་། ཧེ་རུ་ཀཿ མཧཱ་བཛྲ་སརྦ་དུཥྚཱཾ། ཡཾ་ཡ་དཾཥྚ། ཨ་པཥྚ་ས་མ་ཡ་ཧཱུཾ་ཕཊ། དམ་ཚིག་པ་ལས་བཞེངས་པ་ཡིན། །དཔལ་ཆེན་ཁྲག་འཐུང་འཁོར་དང་བཅས། །དམ་ཚིག་ཚུལ་བཞིན་གནས་པ་ལ། །གྲུབ་པའི་མཆོག་དག་སྩལ་དུ་གསོལ། །སྐུ་གསུང་ཐུགས་དང་ཅི་འགལ་བ། །ཞིག་པར་འགྱུར་བ་གདོན་མི་ཟ། །ཨོཾ་བཛྲ་གུ་ཧྱ་ཧཱི་ཤ །མཉམ་པའི་ཐལ་མོ་ལས་མཛུབ་སྲིན་བསྣོལ་བ། མཉམ་པའི་ཐལ་མོ་ཁ་ཕྱེ་བ་ལས་མཐེ་བོང་དང་མཐེའུ་ཆུང་སོ་སོར་སྦྱར། མཉམ་པའི་ཐལ་མོ་ལས་མཛུབ་སྲིན་གྱི་རྩེ་ཅུང་ཟད་བསྣོལ་བའི་དམ་རྒྱ་གསུམ་བཅའ། ས་མ་ཡ་སྟྭཾ། ཨོཾ་བཛྲ་གུ་ཧྱ་ཧྲཱིཿས་མ་(༡༨ན)
ཡ་ཕཊ། སྐུ་གསུང་ཐུགས་སུ་བདག་སྦྱོར་བས། །ཕོ་བྲང་དཀྱིལ་འཁོར་རང་ལས་སྦྲུལ། །བདག་ནི་ཁྲག་འཐུང་རྒྱལ་པོ་ཡིན། །མཁའ་འགྲོའི་ཚོགས་བཅས་ངས་བསྡུའོ། །ཛཿཧཱུཾ་བཾ་ཧོཿཤྲཱི་ཧེ་རུ་ཀ་མཧཱ་བཛྲ། སརྦ་དུཥྚཱཾ། ས་མ་ཡ་མུ་དྲ། པྲ་བན་ཙཀྲ། བ་ག་ཤཱ་ཡ་བ་ག་ཤཱ་ཡ། བྷི་ཏཾ་པཱ་ཡ་བྷི་ཏཾ་པཱ་ཡ། ཧེ་བྷ་ག་ཝ་ན། བུ་ཏཀྵ་ཏི་པྲ་ཏིཥྚཾ་ས་མ་ཡ་ཧཱུཾ་ཕཊ། བཅུ་གསུམ་གནས་སྒྲུབ་ཐབས་སུ། ཆེ་མཆོག་མཉམ་སྦྱོར་འབར་བའི་གློང་དཀྱིལ་ནས། །ཞེས་པ་ནས། མཁའ་འགྲོའི་ཚོགས་བཅས་ངས་བསྡུའོ། །ཞེས་པའི་བར་ཕྱོགས་འདྲ་བསྟན་ཀྱང་རྒྱུད་དང་ཡང་ཕུར་གཞན་གྱི་ལུགས་འཇུག་པ་བདེ་བར་མངོན། གསུམ་བྱིན་བརླབ་པ། །ཟིལ་གནོན་གསུང་བཞིན་བསྡིགས་པའི་ཕྱིར། །ལས་ཀྱི་ཕྱག་རྒྱ་རྣམ་གསུམ་འཆིང་། །ཞེས་པ་ལྟར་འཁོར་ལོ་དང་རྡོ་རྗེའི་རྒྱ་སྲུང་འཁོར་ལྟར་དང་པད་རྒྱ་གང་བཞིན་བཅའ། ཏིང་ངེ་འཛིན་གྱི་དཀྱིལ་འཁོར་ལྷ་ཚོགས་ཐམས་ཅད་ཀྱི་དཔྲལ་བར་ཨོཾ་ལས་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ཨོཾ་གྱིས་མཚན་པ་ཡོངས་སུ་གྱུར་པ་ལས་སྐུ་རྡོ་རྗེ་དཀར་པོ་འཁོར་ལོ་དང་དེས་ཡུ་བ་བྱས་པའི་དྲིལ་བུ་འཛིན་པ། མགྲིན་པར་ཨཱཿལས་པདྨ་དམར་པོ་འདབ་མ་བརྒྱད་པའི་ལྟེ་བར་ཨཱཿས་མཚན་པ་ཡོངས་སུ་གྱུར་པ་ལས་གསུང་རྡོ་རྗེ་དམར་པོ་པདྨ་དང་དེས་ཡུ་བ་བྱས་པའི་དྲིལ་བུ་འཛིན་པ། ཐུགས་ཀར་ཧཱུཾ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བར་ཧཱུཾ་གིས་མཚན་པ་ཡོངས་སུ་གྱུར་པ་ལས་ཐུགས་རྡོ་རྗེ་སྔོན་པོ་རྡོ་རྗེ་དང་དེས་ཡུ་བ་བྱས་པའི་དྲིལ་བུ་འཛིན་པ། གསུམ་གའང་དུར་ཁྲོད་ཀྱི་ཆས་ཀྱིས་བརྒྱན་པ། རང་འདྲའི་ཡུམ་ལ་འཁྱུད་ཅིང་གཡོན་བརྐྱང་གི་སྟབས་ཀྱིས་བཞུགས་པར་བསམ། དཔལ་སྙིང་རྗེ་རོལ་པའི་རྒྱུད་ལས། ཨོཾ། དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་དང་ལྡན། །དེང་བདག་སངས་རྒྱས་སྐུ་འཛིན་པ། །བྱིན་གྱིས་བརླབ་པའི་གནས་མཛོད་ཅིག །ཨོཾ་སརྦ་ཏ་ཐཱ་(༡༨བ)
ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨཱཿ དཔལ་ལྡན་སངས་རྒྱས་གསུང་འཆང་བ། །རྡོ་རྗེ་མི་ཕྱེད་གསུམ་དང་ལྡན། །དེང་བདག་སངས་རྒྱས་གསུང་འཛིན་པ། །བྱིན་གྱིས་བརླབ་པར་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཧཱུཾ། དཔལ་ལྡན་སངས་རྒྱས་ཐུགས་འཆང་བ། །རྡོ་རྗེ་མི་ཕྱེད་གསུམ་དང་ལྡན། །དེང་བདག་སངས་རྒྱས་ཐུགས་འཛིན་པ། །བྱིན་གྱིས་བརླབ་པར་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་ལུས་ངག་ཡིད་གསུམ་བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེའི་རང་བཞིན་དུ་གྱུར་པར་མོས། །བཅུ་བཞི་དབང་བསྐུར་རྒྱས་གདབ་པ། །ནམ་མཁར་བཞུགས་པའི་ཡེ་ཤེས་ཀྱི་ལྷ་ཚོགས་ལ་དམིགས་ཏེ། རྩ་དུམ་ལས། ཧཱུཾ། ཐབས་ཀྱི་སྤྱོད་པས་སེམས་ཅན་དོན། །བྱམས་དང་སྙིང་རྗེས་གང་འདུལ་བ། །སངས་རྒྱས་འཕྲིན་ལས་རྫོགས་པར་མཛོད། །དབང་དང་བྱིན་རླབས་འདིར་སྩོལ་ཅིག །ཅེས་གསོལ་བ་བཏབ་པས། ཧཱུཾ་ཨོཾ་ཏྲཾ་ཧྲཱི༔ཨཿ ཀཱ་ཡ་ཝཱཀ་ཙིཏྟ་གུ་ཎ་ཀརྨྨ་སིདྡྷིཿཨ་བྷི་ཥིཉྩ་ཧཱུཾ། ཞེས་ཡེ་ཤེས་ཀྱི་ཆུས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་སྤྱི་སྔ་འགྱུར་ལ་ལར་སྤྱན་འདྲེན་གྱི་གོང་དུ་དབང་བསྐུར་ཞིང་རིགས་ཀྱི་མཚན་མ་བྱ་བ་ཡོད་ཀྱང་སྒྲུབ་ཐབས་སུ། རང་གསལ་དཀྱིལ་འཁོར་སྤྱན་དྲངས་ནས། དབང་བསྐུར་རིགས་ཀྱི་མཚན་མ་བསམ། །ཞེས་པ་དང་དགོངས་པ་མཐུན། བོར་ཧཱུཾ་ལས་བཛྲ་ཧེ་རུ་ཀཿསྔོན་པོ་གཡས་རྡོ་རྗེ་འཛིན་པ། དཔྲལ་བར་ཨོཾ་ལས་བུདྡྷ་ཧེ་རུ་ཀཿདཀར་པོ་གཡས་འཁོར་ལོ་འཛིན་པ། རྣ་གོང་གཡས་སུ་ཏྲཾ་ལས་རཏྣ་ཧེ་རུ་ཀཿསེར་པོ་གཡས་རིན་པོ་ཆེ་འཛིན་པ། ལྟག་པར་ཧྲཱིཿལས་པདྨ་ཧེ་རུ་ཀཿདམར་པོ་གཡས་པདྨ་འཛིན་པ། རྣ་གོང་གཡོན་དུ་ཨཿལས་ཀརྨ་ཧེ་རུ་ཀཿ ལྗང་གུ་རྒྱ་གྲམ་འཛིན་པ། གཡོན་པ་ཐམས་(༡༩ན)
ཅད་རང་རྟགས་ཀྱིས་ཡུམ་བྱས་པའི་དྲིལ་བུ་བསྣམས་པ། རང་སྣང་གི་ཡུམ་དང་མཉམ་པར་སྦྱོར་བ། དུར་ཁྲོད་ཀྱི་ཆས་ཀྱིས་སྤྲས་ཤིང་ཞབས་གཉིས་གཡས་བསྐུམ་གཡོན་བརྐྱང་བའི་གར་གྱིས་བཞུགས་པར་བསམ། ཨོཾ་བཛྲ་ཤྲཱི་ཧེ་རུ་ཀཿབཛྲ་ཀྲོ་དྷཱི་ཤྭ་རཱི་ཧཱུཾ། ཨོཾ་བུདྡྷ་ཤྲཱི་ཧེ་རུ་ཀཿབུདྡྷ་ཀྲོ་དྷཱི་ཤྭ་རཱི་ཨོཾ། ཨོཾ་རཏྣ་ཤྲཱི་ཧེ་རུ་ཀཿརཏྣ་ཀྲོ་དྷཱི་ཤྭ་རཱི་ཏྲཾ། ཨོཾ་པདྨ་ཤྲཱི་ཧེ་རུ་ཀཿཔདྨ་ཀྲོ་དྷཱི་ཤྭ་རཱི་ཧྲཱིཿ ཨོཾ་ཀརྨ་ཤྲཱི་ཧེ་རུ་ཀཿཀརྨ་ཀྲོ་དྷཱི་ཤྭ་རཱི་ཨཿ ཞེས་བརྗོད། བཅོ་ལྔ་ཡེ་ཤེས་ལྷ་བསྟིམ་པ། ཁྲག་འཐུང་གལ་པོ་ལས། ཧཱུཾ། ཐུགས་རྗེའི་ལྕགས་ཀྱུས་རྒྱུད་བསྐུལ་ཞིང་། །བྱམས་པའི་ཞགས་པས་སྤྱན་ཡང་འདྲེན། །བཀའ་ཡི་ལྕགས་སྒྲོག་ཕོ་ཉས་བཏབ། །བདེ་གཤེགས་དྲིལ་བུས་དགྱེས་པ་བསྐྱེད། །རང་སྣང་དབྱེར་མེད་དཀྱིལ་འཁོར་ལ། །ཐུགས་རྗེའི་མགོན་གྱུར་མ་ལུས་རྣམས། །མི་ཕྱེད་དབྱིངས་ལ་འགོད་མཛད་པ། །བདག་ལ་དགྱེས་ཤིང་ཐིམ་པར་བཞུགས། །ཨོཾ་བཛྲ་ཨཾ་ཀུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་གྷཎྜ་ཧོཿ ཞེས་དགུག་གཞུག་བཅིང་མཉེས་བྱ། བཅུ་དྲུག་སྒོ་གསུམ་ཕྱག་བྱ་བ། ཁྲག་འཐུང་གལ་པོའི་རྒྱུད་ལས། ཧཱུཾ། དབྱིངས་ཀུན་རང་བཞིན་རྣམ་པར་དག་པ་ལས། ཐུགས་རྗེའི་དབང་གིས་སྤྲུལ་པའི་སྐུར་བཞེངས་པ། །དཔལ་ཆེན་ཁྲག་འཐུང་གོ་རཱི་མ་བརྒྱད་སོགས། །རང་སྣང་ལྷ་ཚོགས་རྣམས་ལ་ཕྱག་འཚལ་ལོ། །སྒྲུབ་ཐབས་ལས། ཨོཾ་ཤྲཱི་པ་ར་མུ་ཁ། ཤཱ་ར་ཎཱ་ཡཿ ཨོཾ་ཤྲཱི་ད་ག་ས་མ་ལཱ་ཡ་ན་མཿ ཨོཾ་ཤྲཱི་བཛྲ་ཁ་ཊྭཱཾ་ག་པྲ་ཛ་ལཱ་ཡ་ན་མཿ ཨོཾ་ཤྲཱི་བཛྲ་གྷནྜེ་པྲ་ཛ་ལཱ་ཡ་ན་མཿ ཨ་ཏི་པུ་ཧོཿ སརྦ་ཏ་ཐཱ་ག་ཏ། བནྡྷ་ནཾ་ཀ་རོ་མི། མ་ཧཱ་ཡོ་གི་ནི། ཨ་ལ་ལ་ཧོ། བཀླགས་པས་དོན་གྲུབ་ཏུ་བདག་མདུན་གཉིས་ཀ་མཆོད་པར་བཞེད་ཅེས་མཆོད་ཡུལ་སྤྱན་འདྲེན་པ་སྔ་འགྱུར་བཀའ་གཏེར་ཕལ་ཆེར་ལ་མི་སྣང་(༡༩བ)
ཡང་འཁོན་སྟོན་སྔགས་འཆང་རྣམས་ཀྱི་ཕྱག་ལེན་ཟུར་པ་ཞིག་ལས་འོས་མ་མཆིས། ཡང་དག་གི་རྒྱུད་རྒྱ་བོད་ཀྱི་གཞུང་བཀའ་གཏེར་གང་དུའང་མི་འདུག་པར་བདག་པོ་སྔགས་འཆང་པས་ཕུར་པ་ལ་དཔེ་བླངས་ནས་བྲིས་པ་རྗེ་བཙུན་གོང་མའི་བཞེད་པར་མ་སོང་མོད། འོན་ཀྱང་ཕུག་རོན་འཕོངས་ནས་ཨ་ཀོར་འབྱུང་། རྣ་ཆ་འདོགས་མཁན་རྣམས་ལ་མི་ཕན་ཀྱང་། ཕུག་རོན་ཁོ་རའི་བྱེད་ལུགས་ཨ་རེ་སྡུག་གི་དཔེར་གདའོ། །བཅུ་བདུན་ཕྱི་སྒྲུབ་ཐབས་སུ། རྡོ་རྗེ་ཐལ་མོ་གྱེན་དུ་དབྱེ། ཞེས་སོགས་ཕྱི་ནང་གསང་མཆོད་དང་། རྩ་མཆན་དུ་ཕྱག་དུག་སྨན་རག་སྦྱོར་སྒྲོལ་སོགས་རགས་རིམ་བསྟན་ནོ། །མཆོད་རིམ་འབུལ་བ། ཁྲག་འཐུང་གལ་པོ་ལས། ཧཱུཾ། བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །སྲིད་རྩ་དབྱིངས་སུ་ཤར་བའི་མཆོད་རྫས་དེ། །དེ་ཉིད་མ་བཅོས་ཡུམ་གྱི་ཐིག་ལེར་ཤར། །ཆགས་ཡུལ་བདེ་བའི་འོད་ཕུང་དམར་ལ་འཁྱིལ། །ཉོན་མོངས་དབྱིངས་སུ་བསྟིམ་ཕྱིར་ཨརྒྷཾ་བཞེས། །འབྱུང་བ་ལྔ་ཉིད་ཡེ་ཤེས་བཅུད་ཤར་བ། །སྣང་སྲིད་མདངས་ལྡན་རང་རིག་མེ་ཏོག་གསལ། །གཉིས་མེད་ངང་ལས་ཁ་དོག་ཅིར་ཡང་གསལ། །འབྲས་བུ་བཅུད་ལྡན་མེ་ཏོག་འོད་ཕུང་འབར། །མ་བཅོས་རང་བྱུང་དམ་རྫས་སྤོས་མཆོག་འདི། ཁ་དོག་དབྱིབས་གསལ་དབང་པོ་ཚིམ་བྱེད་པ། །སྟོང་གསུམ་དྲི་བསུང་དར་བའི་བདུད་རྩི་འདི། །འབར་བའི་ཤངས་ལ་མཆོད་པས་མཉེས་གྱུར་ཅིག །སྣོད་བཅུད་དབྱེར་མེད་ཡབ་ཡུམ་དག་པ་ལ། །འབྲས་བུ་རང་བྱུང་ཡེ་ཤེས་མི་ཤར་གནས། །མཐའ་དབུས་མེད་པར་གསལ་བའི་འོད་འབར་འདི། །འཁོར་བའི་མུན་ཁང་གཞོམ་ཕྱིར་བཞེས་སུ་གསོལ། །གཉིས་མེད་མཁའ་དབྱིངས་དག་པའི་ཕོ་བྲང་དུ། །ཉོན་མོངས་སྐྱོན་བྲལ་དག་(༢༠ན)
པ་བྱང་ཆུབ་སེམས། །ཅིར་ཡང་འཆར་ཕྱིར་དྲི་ཡི་འོད་ཕུང་འབུལ། །ཞལ་གྱི་དབྱིངས་སུ་ཐིམ་ནས་མཉེས་གྱུར་ཅིག །ནམ་མཁའ་ཀུན་བཟང་དབྱིངས་ནས་ཅིར་ཡང་འབྱུང་། །འབྱུང་བའི་འབྲས་བུ་འདོད་པའི་ཡོན་ཏན་ལྔ། །ལྷ་བཤོས་རིན་ཆེན་ཡིད་བཞིན་ལོངས་སྤྱོད་འདི། །སྐུ་གསུང་ཐུགས་ཀྱི་ངང་དུ་ཐིམ་པར་བཞེས། །སྒྲ་ཡི་དངོས་པོར་སྣང་བ་ཡང་། །ཡོད་པ་མ་ཡིན་ཤིན་ཏུ་གྲག །སྒྲ་ཡིས་རབ་ཏུ་ཚིམ་གྱུར་ཀྱང་། །སྒྲ་ཉིད་རང་བཞིན་གང་ཡང་མེད། །སྒྲར་འབྱུང་རང་བཞིན་མཆོད་པར་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཨོཾ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧཱུཾ། ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཧོ། ཤྲཱི་བཛྲ་པུཥྤེ་པུ། །ཤྲཱི་བཛྲ་བྷཱུ་པེ་དྷཱུ། ཤྲཱི་བཛྲ་ཨཱ་ལོ་ཀེ་ཧྲཱིཿ ཤྲཱི་བཛྲ་གནྡྷེ་གན། ཤྲཱི་བཛྲ་ནཻ་ཝི་དྱ་ནཻ། ཁ་ཁ་ཁཱ་ཧི། ཁཱ་ཧི། ཤྲཱི་བཛྲ་གཱིརྟི་ཧྲཱིཿ ཨོཾ། འདོད་ཡོན་ལྔ་ཡི་ཏིང་འཛིན་ལྷ་མོ་ནི། །གཟུགས་སྒྲ་དྲི་རོ་རེག་བྱ་ཆོས་ལ་སོགས། །བླ་མེད་མཆོག་གི་མཆོད་པ་སྦྱར་བ་འདི། །ཉོན་མོངས་དུག་སེལ་ཡིད་བཞིན་བདུད་རྩིའི་མཆོག །ཆོས་ཉིད་དག་པས་རིགས་ལྔའི་དམ་ཚིག་ལྔ། །ཡེ་ཤེས་ལྔ་ཡི་འོད་ཟེར་རྣམ་པར་འགྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་པ། །ཐུགས་དམ་བཞིན་དུ་ཅི་བདེར་བཞེས་སུ་གསོལ། །ཨོཾ་རཱུ་པ་ཤཔྟ་གནྡྷེ་རཱ་ས་སྤཪྴ་ཧཱུཾ། སྒྲུབ་ཐབས་ལས། སྒེག་པ་དཔའ་བ་འཇིགས་སུ་རུང་བ་དང་། རྒོད་དང་གཤེ་དང་འཇིགས་པར་བྱེད་པ་དང་། །སྙིང་རྗེ་རྔམས་དང་ཞི་བ་ལ་སོགས་པའི། །སྐུ་ཡི་དངོས་པོ་ཤིན་ཏུ་བསྒྱུར་བ་ཡིན། །གར་བྱས་སྒྲུབ་པོ་རྣལ་འབྱོར་པ། །གར་གྱི་དབང་ཕྱུག་གཙོ་བོ་ཆེ། །ཟླ་བ་ལ་སོགས་སྙིང་པོ་ཅན། །མཾ་ས་ལ་སོགས་བྲོ་མཆོག་སྩོལ། །མེ་ཏོག་(༢༠བ)
ལ་སོགས་ཙན་དན་འཕྲེང་། །བཟང་དགུ་དབུལ་ལོ་ཞེས་སུ་གསོལ། །ཨོཾ་སརྦ་བི་ཤྭ་པཱུ་ཛ་ཧོ། །ཞེས་ཀུན་ཏུ་བཟང་པོའི་མཆོད་པས་མཉེས་པར་བསམ། བཅོ་བརྒྱད་བདུད་རྩི་སྨན་འབུལ་བ། ཁྲག་འཐུང་གལ་པོ་ལས། ཧཱུཾ་རང་བྱུང་གདོད་ནས་དག་པའི་རྫས། །རྩ་བརྒྱད་སྟོང་ལས་སྦྱར་བའི་སྨན། །རཱ་ས་ཡ་ན་ལ་སོགས་རྫས། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་དྲུག་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་འདི། །བླ་མ་ཁྲག་འཐུང་ལྷ་དགུ་དང་། །མཁའ་འགྲོ་དམ་ཅན་འཁོར་བཅས་ལ། །རྣམ་དག་བདུད་རྩི་མཉེས་མཆོད་འབུལ། །ཐུགས་རྗེས་བཞེས་ཏེ་དགྱེས་མཛོད་ལ། །ཚངས་པ་འཕྲུལ་གྱི་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁཱ་ཧི། ཧཱུཾ། ཆོས་སྐུ་ཀུན་བཟང་དཔལ་ཆེན་ཧེ་རུ་ཀཿ། །རྡོ་རྗེ་སེམས་དཔའ་དགའ་རབ་རྡོ་རྗེ་དང་། །འཇམ་དཔལ་བཤེས་གཉེན་རོ་ལངས་བདེ་བ་ལ། །སྨན་མཆོད་འབུལ་གྱི་དབང་དང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁཱ་ཧི། བུདྡྷ་གུ་ཧྱ་སློབ་དཔོན་ཧཱུཾ་ཀཱ་ར། །པདྨ་ཐོད་འཕྲེང་བི་མཱ་ལ་མི་ཏྲ། །ཤཱི་ལ་མཉྫུ་རྡོ་རྗེ་འདུད་འཇོམས་ལ། །སྨན་མཆོད་འབུལ་ལོ་དབང་དང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁཱ་ཧི། གཉགས་ཆེན་ཛྙཱ་ན་འཁོན་སྟོན་ཀླུ་དབང་སྲུང་། །འདིས་སློབ་དཔོན་པདྨ་ལ་དངོས་སུ་གསན་པའི་ཉེ་བརྒྱུད་ཡིན་ཞིང་འཁོན་རྡོ་རྗེ་རིན་ཅེན་གྱིས་གཉགས་དང་ཀླུ་དབང་སྲུང་གཉིས་ཀར་གསན་པས་འདིར་བཅུག་པ་ཡིན་ནོ། །རྡོ་རྗེ་རིན་ཅེན་ཡོན་ཏན་ཀུན་མཁྱེན་རྡོ་རྗེ་གདན་པ་དང་ཐམས་ཅད་མཁྱེན་པ་མཁྱེན་བརྩེའི་གསན་ཡིག་ན་ཤེས་རབ་ཡོན་ཏན་གྱི་ཚབ་ལ་འདི་བཞིན་བྱུང་བའི་རྗེས་སུ་འབྲངས། འབྱུང་གནས་དང་། །ཚུལ་ཁྲིམས་རྒྱལ་པོ་གཙུག་ཏོར་ཤེས་རབ་ལ། །སྨན་མཆོད་འབུལ་ལོ་དབང་དང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏཱ་ཁཱ་ཧི། (༢༡ན)
འཁོན་རིགས་དགེ་སྐྱབས་འཁོན་སྟོན་རྡོ་རྗེ་གདན་པ་དང་རྗེ་མཁྱེན་བརྩེའི་གསན་ཡིག་ན་བལ་པོ་སྔོན་དུ་བྱུང་བའི་རྗེས་སུ་འབྲངས། བལ་པོ་དང་། །འཁོན་རིགས་དགེ་མཐོང་ཤཱཀྱ་བློ་གྲོས་ཞབས། །ཤེས་རབ་ཚུལ་ཁྲིམས་དཀོན་ཅོག་རྒྱལ་པོ་ལ། །སྨན་མཆོད་འབུལ་ལོ་དབང་དང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁཱ་ཧི། བརྩེ་བ་ཆེན་པོ་སློབ་དཔོན་རིན་པོ་ཆེ། །རྗེ་བཙུན་གྲགས་པ་ཆོས་རྗེ་པཎྜི་ཏ། །ཆོས་རྒྱལ་འཕགས་པ་འོད་ལྡན་ཁའུ་པར། །སྨན་མཆོད་འབུལ་ལོ་དབང་དང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁཱ་ཧི། བུ་ལུང་ཀུན་རྡོར་ལོ་ཆེན་མཆོག་ལྡན་པ། །དགའ་ལྡན་ཀུན་བསོད་གན་པ་རིན་རྒྱལ་རྗེ། །བསོད་ནམས་རྒྱལ་མཚན་ཤེས་རབ་རྡོ་རྗེ་ལ། །སྨན་མཆོད་འབུལ་ལོ་དབང་དང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁཱ་ཧི། ཆོས་དཔལ་ཤེས་རབ་སེང་གེ་རྒྱལ་མཚན་དང་། །ཀླུ་པ་བསོད་དར་དམར་སྟོན་རྒྱལ་མཚན་འོད། །ནམ་མཁའ་བློ་གྲོས་ཆག་ལོ་གསུམ་པ་ལ། །སྨན་མཆོད་འབུལ་ལོ་དབང་དང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁཱ་ཧི། ས་ལོ་འཇམ་རྡོར་རྗེ་བཙུན་ཀུན་དགའ་ལགས། །མཁྱེན་བརྩེའི་ཞབས་དང་དབང་ཕྱུག་རབ་བརྟན་དཔལ། །ས་ཆེན་ཀུན་བསོད་འཇམ་དཔལ་རྡོ་རྗེ་ལ། །སྨན་མཆོད་འབུལ་ལོ་དབང་དང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁཱ་ཧི། དཀྱིལ་འཁོར་ཀུན་གྱི་ཁྱབ་བདག་རྡོ་རྗེ་འཛིན། །རིན་ཅེན་བསོད་ནམས་མཆོག་གྲུབ་དཔལ་བཟང་པོ། །བཀའ་དྲིན་མཉམ་མེད་རྩ་བའི་བླ་མ་ལ། །སྨན་མཆོད་འབུལ་ལོ་དབང་དང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁཱ་ཧི། རྡོ་རྗེ་ཁྲག་འཐུང་ཁྲོ་མོ་དབང་ཕྱུག་ཡུམ། །གཽ་རཱི་ལ་སོགས་འཁོར་གྱི་མ་མོ་བརྒྱད། །དཀྱིལ་འཁོར་ལྷ་ཚོགས་དམ་ཅན་སྲུང་མ་(༢༡བ)
ལ། །སྨན་མཆོད་འབུལ་ལོ་དབང་དང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁཱ་ཧི། སྨན་ཕུད་ཕུལ་བས་ལྷ་རྣམས་བདེ་བ་ཆེན་པོའི་རོས་མཉེས་པར་བསམས་ནས་བདུད་རྩི་གནས་གསུམ་དུ་རེག་ལ། ཁྲག་འཐུང་གལ་པོ་ལས། ཧཱུཾ། ལྕེ་ཡི་རྡོ་རྗེ་དམ་ཚིག་ལ། །རྡོ་རྗེ་ཅན་གྱིས་ཧཱུཾ་བསྒོམས་ཏེ། །མཐེ་བོང་དང་ནི་སྲིན་ལག་རྩེས། །ཐབས་དང་ཤེས་རབ་འབྲེལ་བ་ཡི། །བདུད་རྩི་རྣམ་ལྔར་སྦྱར་བ་ལ། །མྱང་ན་བྱང་ཆུབ་སེམས་ཐོབ་འགྱུར། །ཀཱ་ཡ་སིདྡྷི་ཨོཾ། ཝཱ་ཀ་སིདྡྷི་ཨཱཿཙིཏྟ་སིདྡྷི་ཧཱུཾ། ཞེས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ། །བཅུ་དགུ་གཏོར་མས་དགྱེས་བྱེད་པ། ཁྲག་འཐུང་གལ་པོ་ལས། ཧཱུཾ། རྨད་དུ་བྱུང་བའི་གཏོར་མ་དང་། །འདོད་པའི་ཡོན་ཏན་རྣམ་པ་ལྔ། །ཆོས་ཉིད་སྐྱེ་བ་མེད་དབྱིངས་ལས། །ཇི་ལྟར་དམིགས་པ་བཞིན་དུ་འབུལ། །མ་ཧཱ་བ་ལིནྟ་ཁ་རཾ་ཁཱ་ཧི། འདོད་ཡོན་ལྔའི་ལོངས་སྤྱོད་ཀྱིས་ཐུགས་དམ་སྐོང་བར་བསམ། ཉི་ཤུ་དམར་ཆེན་རཀྟ་སྦྲེང་། །ཧཱུཾ། ལྕང་ལོར་བཅས་པའི་དུང་ཆེན་སྣོད་ནང་དུ། །ཉོན་མོངས་རྩ་བ་བཅད་པའི་ཁྲག་རྒྱུན་གྱིས། །གཏམས་ནས་དཔལ་ཆེན་ལྷ་ཚོགས་ཞལ་དུ་འབུལ། ཁམས་གསུམ་འཁོར་བ་དབྱིངས་སུ་དག་པར་མཛོད། །མ་ཧཱ་རཀྟ་ཁ་རཾ་ཁཱ་ཧི། དམར་ཆེན་གྱི་རཀྟ་ཕུལ་བས་འཁོར་བ་གནས་སུ་སྟོངས་པར་བསམ། ཉེར་གཅིག་དུག་གསུམ་མཆོད་པ་ནི། །ཏནྟྲ་ཧེ་རུ་ཀའི་གལ་པོའི་རྒྱུད་ཀྱི་ལེའུ་གསུམ་པ་ནས་བཤད་པའི་དོན་བཞིན། ལོ་ཆེན་བསོད་ནམས་རྒྱ་མཚོས་མཛད་པའི་ཕུར་པ་སྤུ་གྲིའི་ལས་བྱང་ལས། ཧཱུཾ། གཏི་མུག་ཤ་ཆེན་ཕུངས་སེ་ཕུང་། །འདོད་ཆགས་ཁྲག་མཚོ་མེར་རེ་རེ། །ཞེ་སྡང་རུས་གྲམ་ཉིལ་ལི་ལི། །དཔལ་ཆེན་མཁའ་འགྲོའི་ཚོགས་ལ་འབུལ། །མཧཱ་མཾ་ས་རཀྟ་ཀེཾ་ནྲི་ཏི་ཁ་རཾ་ཁཱ་ཧི། །(༢༢ན)
དུག་གསུམ་རང་གནས་སུ་དག་པར་བསམ། ཉེར་གཉིས་མདངས་ཀྱིས་དམ་བཀང་པ། ཁྲག་འཐུང་གལ་པོ་ལས། ཧཱུཾ། དབྱིངས་དང་ཡེ་ཤེས་ཏིང་འཛིན་ནི། །ཀོང་བུ་ཆོས་དབྱིངས་ཡུམ་གྱི་མཁའ། །མར་མེ་ཡེ་ཤེས་ཡབ་ཀྱི་འོད། །སྐུ་གསུམ་འགྲོ་བའི་དོན་ཡང་མཛད། །ཆོས་ཀྱི་དབྱིངས་ཀྱི་གཞལ་ཡས་ནས། །ཡེ་ཤེས་ཆེན་པོ་སྐུ་གསུམ་གྱིས། །འཁོར་བའི་མ་རིག་མུན་བསལ་ནས། །འཁོར་ལོ་ཚོགས་ཆེན་གསལ་ལེར་གསལ། །ཨོཾ་ཨཱ་ལོ་ཀེ་ཛྭ་ལ་དཱི་པ་ཧཱུཾ་ཧཱུཾ། ཐབས་ཤེས་ཟུང་འཇུག་གི་མར་མེ་སྦར་བས་མ་རིག་པའི་མུན་པ་སེལ་བར་བསམ། ཉེར་གསུམ་སྦྱོར་མཆོད་བདེ་བསྐྱེད་པ། ཁྲག་འཐུང་གལ་པོ་ལས། ཧཱུཾ། སྦྱོར་བ་གནས་ཀྱི་ཏིང་འཛིན་ནི། །གླིང་བཞི་ཕྱི་ཡི་སྦྱོར་བ་དང་། །སྒོ་བཞི་ནང་གི་སྦྱོར་བ་དང་། །དཀྱིལ་འཁོར་བཞི་ནི་གསང་བ་ལ། །བདེ་བ་བཞི་ནི་དེ་ཁོ་ན། །མ་ལུས་ཐམས་ཅད་བདེ་སྟོང་གཅིག །ཤིན་ཏུ་བསྒྱིངས་པའི་དཔའ་བོ་སྒེག་པ་དང་། །བཀྲ་ཤིས་མཚན་ལྡན་མི་མོས་བརྒྱན་པ་གཉིས། །དཔའ་བོ་དགྱེས་པའི་སྦྱོར་མཆོད་བདེ་བ་ཡང་། །སྐལ་ལྡན་རྣམས་ལ་འབུལ་ལོ་རབ་སྤྲུལ་ཅིག །ཤེས་རབ་དབྱིངས་མ་ཡུམ་གྱི་གཞལ་ཡས་སུ། །རྒྱལ་བའི་དཀྱིལ་འཁོར་མ་ལུས་མཆོག་བཀོད་དེ། །ཐབས་དང་ཤེས་རབ་ལྡན་པའི་སྦྱོར་མཆོད་ཀྱིས། །འཕགས་པ་ཐམས་ཅད་མཉེས་པའི་མཆོད་པ་འབུལ། །མཉམ་ཉིད་དབྱིངས་སུ་རྟོགས་པའི་ཡེ་ཤེས་ཀྱི། །བདེ་མཆོག་ལོངས་སྤྱོད་རྫོགས་པ་སྐུ་ཡི་རྒྱན། །འདོད་རྒུ་ཡོན་ཏན་མཛེས་པས་རབ་བརྒྱན་པ། །རྣལ་འབྱོར་ཡེ་ཤེས་རྒྱན་དུ་བཞེས་སུ་གསོལ། །ཨོཾ་ཨ་ནུ་རཱ་ག་ཎ་པཱུ་ཛ་མེ་གྷ་སྥ་ར་ཎ་ཨི་མཾ་ག་ག་ན་ཁཾ་ཧཱུཾ་ཕཊ་སྭཱ་ཧཱ། མཉམ་པར་སྦྱོར་བའི་མཆོད་པས་དགའ་བཞིའི་ཡེ་ཤེས་(༢༢བ)
འཁྲུངས་པར་བསམ། ཉེར་བཞི་ཉོན་རྩ་བར། དམ་ཚིག་མཆོག་གི་མཆོད་པ་དང་། ཞེས་པར་སོ་མཆན་དུ་སྦྱོར་སྒྲོལ་གྱི་རྟེན་དུ་བདུད་རྩི་སྦྱོར་བ་དང་རཀྟ་བཤོམ་པ་དེ་གཉིས་བསྲེས་པ་ཞེས་བྱུང་བ་ཕུར་པ་ལ་བདུད་རྩི་དང་ཁྲག་བསྲེས་པར་བསྒྲལ་བའི་དམིགས་རྟེན་བྱེད་པར་བཤད་པ་དང་མཐུན་ནམ་སྙམ། སྔགས་རྙིང་མའི་གཞུང་ལ་ལར་ལིངྒར་བདུད་རྩི་འཐོར་མི་རུང་བར་བཤད་པས་སྔགས་རྒན་རལ་པ་ཅན་རྣམས་ཀྱི་ས་དཔྱད་དོ། །མོངས་སྒྲོལ་མཆོད་པ། ཁྲག་འཐུང་གལ་པོ་ལས། ཧཱུཾ། སྒྲོལ་བ་གནས་ཀྱི་ཏིང་འཛིན་ཆེན་པོ་ནི། །དཔའ་བོ་འབྲུ་ལྔ་རླུང་ལྷའི་རྟ་ལ་ཞོན། །ཨ་ནྲྀ་སུ་ཏྲི་པྲེ་དུ་དྲུག་རྣམས་བསྲེགས། །གནས་སྦྱོར་ཏིང་འཛིན་རྒྱུ་རྣམས་བྱིན་གྱིས་བརླབས། །སྡུག་བསྔལ་མང་པོས་གཟིར་བའི་འགྲོ་བ་ལ། །སྙིང་རྗེས་ཤུགས་ཀྱིས་སྡུག་བསྔལ་བཟློག་པའི་ཕྱིར། །ཉོན་མོངས་ཀུན་བསལ་རྒྱུད་དྲུག་ལམ་བཀག་ནས། །བྱང་ཆུབ་བགྲོད་ཕྱིར་འཕགས་ལམ་རྣམ་ཐར་བསྟན། །དམ་རྫས་བདུད་རྩི་ལྔ་དང་ཞལ་ཟས་ལྔ། །སྐུ་ལྔ་ཆོས་ལྔ་དབྱེར་མེད་རང་བཞིན་གཅིག །དེ་ཕྱིར་དག་པས་དག་པ་ཉིད་མཆོད་དེ། །ཆོས་ཉིད་ལ་ཡང་ཆོས་ཉིད་ཐིམ་པར་མཆོད། །དཀྱིལ་འཁོར་ལ་ཡང་དཀྱིལ་འཁོར་ཐིམ་པར་མཆོད། །དམ་ཚིག་མཆོག་གི་མཆོད་པ་དམ་པ་འདིས། །རྒྱལ་བ་སྲས་བཅས་རིགས་ཀྱི་ཡུམ་རྣམས་དང་། །ཕྱག་བརྙན་གཏུམ་ཆེན་རྔམས་པའི་ཚོགས་ལ་སོགས། །རྣལ་འབྱོར་གྲུབ་པའི་ཚོགས་དང་རིག་འཛིན་དང་། །རྣལ་འབྱོར་རྣམ་ལྔའི་ཚོགས་ལ་མཆོད་པ་འབུལ། །ཨོཾ་ག་ཎ་ཙཀྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། འཁོར་བར་སྐྱེ་བའི་རྒྱུའི་ཉོན་མོངས་ས་བོན་བག་ཆགས་དང་བཅས་པ་བསྒྲལ་ནས་འདོད་ཡོན་དུ་དམིགས་ཏེ་རོ་གཅིག་པར་ཕུལ་བས་མྱ་ངན་ལས་འདས་པའི་ས་ལ་སྦྱོར་བར་བསམ། ཉེར་ལྔ་གླུ་གར་གྱིས་མཆོད་པ། ཁྲག་འཐུང་གལ་པོ་ལས། (༢༣ན)
ཧཱུཾ། ཤིན་ཏུ་སྒེག་པའི་གཟི་བརྗིད་འབར། །ཡིད་བཞིན་རིན་ཅེན་འཕྲེང་བ་འཕྲོ། །དབྱངས་སྙན་ཡིད་འཕྲོག་གཟི་ལྡན་འབར། །གཟུགས་མཛེས་བསྐྱོད་པས་ཕྱོགས་བཅུར་གཡོ། །ཧཱུཾ་ཏྲཾ་ཧྲཱི། ཨ་ས་མ་ཡ་ཧཱུཾ། ཀུན་ཏུ་ཚིམ་བྱེད་བྲོ་གསུང་ཐིམ། །ལྷ་མཛེས་རིན་ཅེན་ཕུང་པོ་འཕྲོ། །འོད་གསལ་འཚེར་བས་ཀུན་ཏུ་གསལ། །བདུད་རྩི་བསིལ་དྲོ་འཇམ་པའི་དབྱངས། །དུ་བུ་ཨ་ག་ས་མ་ཡ་ཧཱུཾ་ཧོ། རིག་པའི་རླབས་ལས་བྱུང་བ་ཡི། །ལྷ་མོའི་ཚོགས་ཀྱི་མཆོད་པ་ནི། །གར་དང་དབྱངས་སུ་བྱས་ནས་ཀྱང་། །གཟུགས་དང་དབྱིབས་སུ་འབུལ་ལགས་ཀྱིས། །སྦྱོར་ཆེན་ཚུལ་དུ་བཞེས་སུ་གསོལ། །གཞན་ཡང་ཐབས་ཚུལ་མཐའ་ཡས་པའི། །མཆོད་སྤྲིན་བླ་མེད་ཕྱོགས་བཅུར་འབུལ། །ནམ་མཁའ་མཛོད་ཀྱི་གཏེར་ལ་སོགས། །བླ་མེད་མཆོད་སྤྲིན་རབ་འབྱམས་རྣམས། །དད་པས་དམིགས་ཏེ་འབུལ་ལགས་ཀྱིས། །སྔོན་གྱི་ཐུགས་དམ་རྗེས་དགོངས་ཏེ། །དཀྱིལ་འཁོར་རྒྱན་དུ་བཞེས་སུ་གསོལ། །ཨོཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཡེ་ཧཱུཾ། ཧཱུཾ། སྟོང་པ་ཉིད་དང་སྙིང་རྗེའི་བདག་ཉིད་ནི། །ཞི་གནས་དང་ནི་ལྷག་མཐོང་ཟུང་དུ་འབྲེལ། །བདེ་བ་ལས་འཁྲུངས་རྡོ་རྗེ་འཆང་བ་ཡི། །དངོས་པོ་དངོས་མེད་འབྱུང་གནས་ཆེན་པོར་མཁྱེན། །གསུང་སྙན་ཡི་གེས་ཀུན་ལ་ཁྱབ་པ་ཡིས། །སྤྲོས་མེད་གསུང་དུ་འཇིག་རྟེན་དབང་ཕྱུག་བཞུགས། །མི་གསུང་ལྷ་མོར་དམ་བཅས་འདུལ་མཛད་པ། །སྒྱུ་འཕྲུལ་ཚུལ་མངའ་ལྡན་པ་འགའ་མ་མཆིས། །གང་དུ་བདེ་ཆེན་རང་བཞིན་རྗེས་ཆགས་པའི། །ན་ཆུང་དག་དང་ལྷན་ཅིག་བཞད་མཛད་དེ། །གཡས་ཀྱི་ཕྱག་གིས་རྡོ་རྗེ་གསོར་ནས་ཀྱང་། །གཡོན་པ་ཡིས་ནི་དྲིལ་བུའི་སྒྲ་སྙན་འཁྲོལ། །(༢༣བ)
ལྷ་མོ་མཐའ་དག་བཙུན་མོར་གྱུར་པ་ཡིས། །དམ་ཚིག་རྣམས་ཀྱི་བྱ་བ་བྱས་པར་འགྱུར། །གཅིག་གི་ལག་པས་ཀུན་ལ་འཁྱུད་པ་སྟེ། །གཉིས་པས་རྗེས་སུ་ཆགས་ཕྱིར་བདེ་བའི་མཐུ། །གསུམ་པ་མི་ཟད་མེ་ཏོག་འཕྲེང་བ་འཐོར། །བཞི་པ་བདེ་བ་ཡི་ནི་མདའ་ཡང་འཕེན། །གང་ཞིག་གླུ་ནི་ལེན་པར་བྱེད་པ་དེ། །བདེ་བ་རྡོ་རྗེ་ཅན་དང་མཉམ་པར་འགྱུར། །རྡོ་རྗེ་གསོར་བ་སྙིང་རྗེ་ཆེན་པོ་ཡིན། །དྲིལ་བུ་གསིལ་པ་ཤེས་རབ་སྟོང་པ་ཉིད། །གར་གྱིས་ཞི་གནས་ལྷག་མཐོང་ཟུང་དུ་འབྲེལ། །བདེ་ཆེན་རོལ་པ་ཆེ་ལ་དགོངས་སུ་གསོལ། །ཨོཾ་བཛྲ་དྷཱ་ཏུ་ཧོ། མཆོད་པའི་སྤྲིན་ཕུང་ཟད་མི་ཤེས་པས་ཞི་ལྷག་ཟུང་འབྲེལ་གྱིས་མཉེས་པར་བསམ། ཉེར་དྲུག་ལྷ་ཚོགས་ལ་བསྟོད་པ། ཁྲག་འཐུང་གལ་པོ་ལས། ཧཱུཾ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེ་དགྲ་ཟིན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །མི་གནས་མི་དམིགས་ཆོས་སྐུ་དག་པ་ལས། །བདུད་འདུལ་ཁྲོ་བོ་མཆོག་གི་སྐུར་སྤྲུལ་པ། །ཐུགས་རྗེའི་གཟི་ལྡན་གདུག་པ་ཐབས་ཀྱིས་འདུལ། །བཅོམ་ལྡན་ཁྲོ་རྒྱལ་ལ་ཡང་ཕྱག་འཚལ་ལོ། ཁྲོ་མོ་དབང་ཕྱུག་སྐུ་ལ་ཉེར་གནས་ཤིང་། །ཐབས་དང་ཤེས་རབ་འབྲེལ་བའི་དཀྱིལ་འཁོར་འདིར། །མཁའ་འགྲོ་མི་བཟད་འབར་བའི་སྤྲིན་འཕྲོ་བ། །གདུག་པ་འདུལ་མཛད་ཡུམ་ལ་ཕྱག་འཚལ་ལོ། །གསང་བ་མེ་དཔུང་གི་རྒྱུད་ལས། །ཧཱུཾ། ལོག་ཏོག་འཁོར་བ་རྡུལ་དུ་བརླག་སླད་དུ། །དུར་ཁྲོད་ཞིང་གི་དབྱུག་པ་ཕྱག་ན་བསྣམས། །སྲིད་གསུམ་དབང་མཛད་སྔོན་མོ་གཽ་རཱི་མ། །བསིལ་བའི་ཚལ་གྱི་མ་མོ་ལ་ཕྱག་འཚལ། །ལོག་རྟོག་ལས་ཀྱི་སྐྱོན་རྣམས་འབུགས་སླད་དུ། །ཐབས་དང་ཤེས་རབ་(༢༤ན)
ལྡན་པའི་མདའ་ འཕེན 
་ཅིང་། །དབྱིངས་ཀྱི་ངང་སྦྱོར་སེར་མོ་ཙཽ་རཱི་མ། །ལི་ཡུལ་ཚལ་གྱི་མ་མོ་ལ་ཕྱག་འཚལ། ཁོར་བ་མང་པོ་ཐུགས་རྗེས་བསྒྲལ་སླད་དུ། །མི་ནུབ་ཆུ་སྲིན་རྒྱལ་མཚན་ཕྱག་ན་བསྣམས། །སངས་རྒྱས་སྲིད་གཙོ་དམར་མོ་པྲ་མོ་ཧ། །བལ་ཡུལ་ཚལ་གྱི་མ་མོ་ལ་ཕྱག་འཚལ། །ས་དགུའི་རྟོག་འཇོམས་རྡོ་རྗེ་རྩེ་དགུ་འཕྱར། །རུ་དྲ་སྒྲོལ་མཛད་ཡེ་ཤེས་དབྱིངས་ལ་སྦྱོར། །ནག་མོ་འཇིགས་ཚུལ་སྟོན་མཛད་བཻཏྟ་ལཱཾ། །ཐོ་གར་ཚལ་གྱི་མ་མོ་ལ་ཕྱག་འཚལ། །རྒྱུད་དྲུག་འཁོར་བ་གནས་ནས་དྲང་སླད་དུ། །དུར་ཁྲོད་ཞིང་གི་རྒྱུ་ཞགས་ཕྱག་ན་བསྣམས། །ཆོས་ཀྱི་དབྱིངས་སྦྱོར་དམར་སེར་པུཀྐ་སཱི། །ཟ་ཧོར་ཚལ་གྱི་མ་མོ་ལ་ཕྱག་འཚལ། །ཡེ་ཤེས་ལྔ་དང་ལྡན་པ་མཛད་སླད་དུ། །དབང་ལྔའི་ཐོད་ཁྲག་ཡེ་ཤེས་རྡོ་རྗེས་དཀྲུག །ཐུགས་རྗེ་ཐབས་མཁས་སྔོ་ལྗང་གྷསྨ་རཱི། །ཨྱོན་ཚལ་གྱི་མ་མོ་ལ་ཕྱག་འཚལ། །ཞེ་སྡང་ཆེན་པོ་གཏན་ནས་འཇོམས་སླད་དུ། །ཞིང་མཆོག་ཙིཏྟ་དམར་པོ་ཚེམས་ཀྱིས་འདྲེན། །ང་རྒྱལ་སེར་སྣ་སྦྱོང་མཐིང་སྨ་ཤ་ནཱི། །སིངྒཱའི་ཚལ་གྱི་མ་མོ་ལ་ཕྱག་འཚལ། །ལོག་རྟོག་སྐྱོན་རྣམས་སོ་སོར་བསྒྲལསླད་དུ། །ཐུགས་རྗེ་ཐབས་ཀྱིས་མགོ་ལུས་སོ་སོར་འབྲལ། །སེར་སྐྱ་འཇིགས་པའི་ཚུལ་ཅན་ཙཎྜ་ལཱི། །གླིང་དགུའི་ཚལ་གྱི་མ་མོ་ལ་ཕྱག་འཚལ། ཁྲག་འཐུང་གལ་པོ་ལས། ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་ལོ། །ཨོཾ་དྷརྨ་ཀཱ་ཡ་ན་མོ། སམྦྷོ་ཀཱ་ཡ་ན་མོ། ནིརྨཱ་ཎ་ཀཱ་ཡ་ན་མོ། ཛྙཱ་ན་པཉྩ་ཀཱ་ཡ་ན་མོ། ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཧྲི་ད་ཡ་ན་མཿསརྦ་ཏ་ཐཱ་ག་ཏ་ན་མོ་ན་མ༔ དཀྱིལ་འཁོར་གྱི་(༢༤བ)
ལྷ་ཚོགས་ལ་བདག་ལས་མི་གཞན་པར་བསྟོད་དོ། །ཉེར་བདུན་བསྐུལ་ཞིང་འཛབ་བཟླ་བ། ཁྲག་འཐུང་གལ་པོ་ལས། ཧཱུཾ། དུར་ཁྲོད་ཆེན་པོའི་གཞལ་ཡས་སུ། །དྲེགས་པ་ཁྱོ་ཤུག་ཕོ་མོ་དང་། །ཞིང་ཆེན་བསྣོལ་དང་བརྐྱངས་པའི་སྟེང་། །དཔལ་ཆེན་བཛྲ་ཧེ་རུ་ཀའི། །དུང་ཁང་དཀར་པོའི་གཞལ་ཡས་ཁང་། །མགྲིན་པ་པདྨའི་གསང་ཆེན་དང་། །ཐུགས་ཀ་གསང་བའི་དཀྱིལ་འཁོར་དུ། །རང་སེམས་བྱང་ཆུབ་འབྲུ་བརྒྱད་ཉིད། །རུ་ལུ་གསེར་འཕྲེང་རིན་པོ་ཆེ། །གཅིག་ལས་མ་སྤྲོས་དགུ་རུ་ལྡན། །བསམ་འཕེལ་འབྲུ་བརྒྱད་རིན་པོ་ཆེ། །རྒྱལ་བ་ཀུན་གྱི་ཐུགས་ཀྱི་དབྱིག །གདོད་ནས་ཡེ་ཤེས་སྙིང་པོ་བས། །བྱིན་རླབས་འབྲུ་བརྒྱད་ཕྱག་རྒྱར་གསལ། །དྲོད་ཚད་རྟགས་དང་ལྡན་པ་ཡིས། །དེ་བཞིན་ཉིད་དུ་ཤེས་པར་བྱ། །འབྲུ་བརྒྱད་ཡེ་ཤེས་མཁའ་ལ་སྤོས། །སྐུ་གསུམ་འབར་བའི་རྒྱ་མཚོ་ནི། །སྲོག་གི་སྙིང་པོ་འབྲུ་བརྒྱད་གསལ། །གཉིས་མེད་སྐུ་གསུང་ཐུགས་ཀྱི་ངང་། །དཔལ་ཆེན་རིན་ཅེན་ཟུར་བརྒྱད་ལ། །རུ་ལུ་འབྲུ་བརྒྱད་འཕྲོ་འདུ་སྤྲོ། །གསེར་གྱི་བ་ཐག་གཟིངས་པ་བཞིན། །ཕར་འཕྲོས་པས་ནི་ཐུགས་དམ་བསྐུལ། །ཚུར་འདུས་པས་ནི་དཔལ་བེའུ་གང་། །དཔལ་བེའུ་རིན་ཅེན་ཟུར་བརྒྱད་ལས། །རུ་ལུ་རིན་ཅེན་འབྲུ་བརྒྱད་འཕྲོ། །མགལ་མེ་ཀླད་ལ་བསྐོར་བ་བཞིན། །ཕར་འཕྲོས་པས་ནི་སྐུ་ལ་ཐིམ། །སླར་འདུས་པས་ནི་འབྲུ་བརྒྱད་གང་། །ཡིད་བཞིན་རིན་ཆེན་ཟུར་བརྒྱད་ལས། །རུ་ལུ་རིན་ཅེན་འབྲུ་བརྒྱད་འཕྲོ། །ལྕགས་ཀྱི་ཚ་ཚ་གཏམས་པ་ཡིས། །ཕར་འཕྲོས་པས་ནི་ལྗགས་ལ་ཐིམ། །སླར་འདུས་པས་ནི་དཔལ་བེའུ་གང་། །ཀུན་གཞིའི་རྣམ་ཤེས་ཡུལ་སྐུར་གསལ། །ཡབ་ཡུམ་གཉིས་མེད་སྐུ་གསུང་ཐུགས། །ཐུགས་ཀྱི་ཡོན་ཏན་འབྱུང་བའི་(༢༥ན)
གཏེར། །ཐུགས་མཆོག་ཧེ་རུ་ཀ་ཡབ་ཡུམ། །ཐུགས་ནི་རིན་ཅེན་ཟུར་བརྒྱད་ལ། །རུ་ལུ་འབྲུ་བརྒྱད་འཕྲོ་ཞིང་འདུ། །ཕར་འཕྲོས་པས་ནི་ཐུགས་དམ་བསྐུལ། །ཡེ་ཤེས་ལྷ་ལ་བསྙེན་པ་འབུལ། །སླར་འདུས་ཐུགས་ཀྱི་དཔལ་བེའུ་གང་། །རྣམ་ཤེས་ཁྲོ་མོའི་སྐུར་སྣང་བ། །ཕྱག་རྒྱ་ཆ་ལུགས་མ་ངེས་ཀྱང་། །གདུལ་བྱའི་དབང་གིས་ཅིར་ཡང་སྤྲུལ། །གཽ་རཱི་ལ་སོགས་བརྒྱད་རྣམས་ལ། །དཔལ་བེའུ་རིན་ཅེན་ཟུར་བརྒྱད་སྟེང་། །རུ་ལུ་འབྲུ་བརྒྱད་འཕྲོ་ཞིང་འདུ། །ཕར་འཕྲོས་པས་ནི་ཐུགས་དམ་བསྐུལ། །ཡེ་ཤེས་ལྷ་ལ་བསྙེན་པ་འབུལ། །སླར་འདུས་ཐུགས་ཀྱི་དཔལ་བེའུ་གང་། །དངོས་གྲུབ་མཆོག་གི་གཏེར་དུ་བསམ། །ཞེས་པའི་དོན་ལྟར་དམིགས་པའི་འཕྲོ་འདུ་དང་བཅས། ཨོཾ་རྩ་བ་ལས། སྒོམ་དབྱངས་ཡི་གེ་འབྲུ་བརྒྱད་བསྟན། ཞེས་གསུངས། རུ་ལུ་རུ་ལུ་ཧཱུཾ་བྷྱོ་ཧཱུཾ། ཨོཾ་བཛྲ་ཀྲོ་དྷཱི་ཤྭ་རཱི་ཧཱུཾ་ཕཊ། ཁྱད་པར་ཅན་གྱི་སྙིང་པོ་རྩ་བའི་སྔགས་ཉེར་དྲུག་པ་སྒྲུབ་ཐབས་ལས་བྱུང་བ། ཨོཾ་ཤྲཱི་ཧེ་རུ་ཀ་བཛྲ་ས་མ་ཡ་ཧི། ཀྲོ་དྷི་སརྦ་དུཥྚཱཾ་ས་མ་ཡ་མཱུ་དྲ། པྲ་སཾ་ཛཀ་ཧཱུཾ་ཕཊ། ཨོཾ་བཛྲ་གཽ་རཱི་ཧཿཧཱུཾ་ཕཊ། ཨོཾ་བཛྲ་ཙཽ་རཱི་ཧཿཧཱུཾ་ཕཊ། ཨོཾ་བཛྲ་པྲ་མོ་ཧེ་ཧཿཧཱུཾ་ཕཊ། ཨོཾ་བཛྲ་བཻཏྟ་ལཱི་ཧཿཧཱུཾ་ཕཊ། ཨོཾ་བཛྲ་པུཀྐ་སཱི་ཧཿཧཱུཾ་ཕཊ། ཨོཾ་བཛྲ་གྷསྨ་རཱི་ཧཿཧཱུཾ་ཕཊ། ཨོཾ་བཛྲ་སྨ་ཤ་ནཱི་ཧཿཧཱུཾ་ཕཊ། ཨོཾ་བཛྲ་ཙཎྜ་ལཱི་ཧཿཧཱུཾ་ཕཊ། ཅེས་གཙོ་བོ་ཡབ་ཡུམ་དང་འཁོར་བརྒྱད་ཀྱི་སྔགས་ཅི་ནུས་བཟླ། ཉེར་བརྒྱད་མཆོད་ཅིང་དངོས་གྲུབ་བླང་། ཁྲག་འཐུང་གལ་པོ་ལས། ཧཱུཾ། ཏིང་ངེ་འཛིན་གྱིས་སྤྲོས་པས་མཆོད་པའི་གཏེར། མེ་ཏོག་བདུག་སྤོས་ལྷ་བཤོས་མར་མེ་བཅས། །བླ་བྲེ་རྒྱལ་མཚན་ན་བཟའ་འཕན་དང་གདུགས། །སིལ་སྙན་རྔ་དུང་ནོར་བུ་མུ་ཏིག་(༢༥བ)
འཕྲེང་། །གཟུགས་སྒྲ་དྲི་རོ་རེག་སོགས་ལྷ་མོའི་ཚོགས། །བདེ་ཆེན་བྱང་ཆུབ་སེམས་ཀྱི་མཆོད་སྤྲིན་རྣམས། །དངོས་སུ་བཤམས་ཤིང་ཡིད་ཀྱིས་མངོན་སྤྲུལ་ནས། །ཡེ་ཤེས་རང་སྣང་ཞི་ཁྲོའི་དཀྱིལ་འཁོར་ལ། །འབྲུ་བརྒྱད་འཕྲོ་འདུས་འབུལ་ནི་མཆོད་པར་བཞེས། །སྐུ་མཆོག་གང་འདོད་གཟུགས་སུ་དེ་བཞིན་སྣང་། །གསུང་མཆོག་རྣམ་པ་སྔགས་ཀྱི་ཡིག་འབྲུར་གསལ། །ཐུགས་མཆོག་ཡེ་ཤེས་དམ་ཚིག་ཕྱག་རྒྱར་གནས། །ཡོན་ཏན་རིན་ཅེན་བདག་གཞན་དགོས་འདོད་སྐོང་། །འཕྲིན་ལས་རྣམ་བཞིས་འགྲོ་དྲུག་རྣམ་པར་སྒྲོལ། །ལེགས་པ་མཆོག་རྣམས་ཡོན་ཏན་མངའ་མཛད་ལ། །དང་བས་རབ་བསྟོད་འབྲུ་བརྒྱད་དག་པས་མཆོད། །ཅེས་འཛབ་སྟོང་ཕྲག་རེའི་མཚམས་སུ་དངོས་འབྱོར་ཡིད་སྤྲུལ་གང་རུང་གི་མཆོད་པ་འབུལ་བ་ཁྲོ་བོ་པུཎྜ་རཱི་ཀ་ལས་ལྷ་རེ་རེ་ལ་བསྙེན་པ་སྟོང་རྩ་བརྒྱད་དབུལ་ལོ། །འཛབ་རྫོགས་པ་དང་སྟོང་ཚིགས་ཀྱི་མཆོད་པ་འབུལ། ཞེས་རྒྱུད་ཀྱི་དགོངས་པ་ཡིན་ཞིང་ཞར་བྱུང་དངོས་གྲུབ་ཀྱང་ལེན་པར་བཤད་པས་ཁྲག་འཐུང་གལ་པོ་ལས། ཧཱུཾ། བྱམས་མགོན་ཐུགས་ལ་བྱ་རྩོལ་མི་མངའ་ཡང་། །བདག་ཅག་རེ་སྨོན་གྲུབ་པར་མཛད་སླད་དུ། །འཕྲིན་ལས་རྣམ་བཞིའི་འདུལ་ཐབས་ཇི་བཞིན་པས། །གདུལ་བྱ་རབ་འབྲིང་ཐ་མར་གྱུར་པ་རྣམས། །བཟང་ངན་ཕན་གནོད་རྩེ་གཅིག་སེམས་དཔའ་ཡི། །ལྷ་བགེགས་ལེགས་ཉེས་བྱད་པ་གང་ཡང་རུང་། །སྦྱོར་བ་ངན་པའི་བག་ཆགས་གཏན་སྤངས་ནས། །བྱང་ཆུབ་སེམས་མཆོག་སྐྱེ་བར་སྒྲུབ་པ་དང་། །ཐུགས་རྗེའི་ཞིང་གྱུར་འགྲོ་དྲུག་སེམས་ཅན་རྣམས། །འཁོར་བའི་མཐའ་རིང་མཚོ་ལས་བསྒྲལ་སླད་དུ། །བཟླས་བརྗོད་འཕྲོ་འདུས་བསྐུལ་ན་འཕྲིན་ལས་མཛོད། །སྐྱེ་(༢༦ན)
ཤི་མེད་པ་ཚེ་ཡི་དངོས་གྲུབ་དང་། །འདུ་འབྲལ་མེད་པ་གཟུངས་ཀྱི་དངོས་གྲུབ་དང་། །འཕོ་འགྱུར་མེད་པ་གནས་ཀྱི་དངོས་གྲུབ་སྩོལ། །ཞེས་བརྗོད། ཁྲག་འཐུང་གལ་པོ་ལས། རྡོ་རྗེའི་བཟླས་དང་སེམས་ལ་དམིགས། །བདག་བྱིན་བརླབ་དང་འོད་གསལ་དང་། །ཟུང་དུ་འཇུག་དང་འདི་ལྔ་ལ། །རེ་རེ་ལ་ཡང་གསུམ་གསུམ་ཡིན། །ཞེས་རིམ་པ་ལྔའི་རྫོགས་རིམ་གྱི་རྣལ་འབྱོར་ཉམས་སུ་བླང་བ་ནི་ལོགས་སུ་ཤེས་པར་བྱའོ། །གསུམ་པ་མཇུག་ཆོག་ཚོགས་བརླབ་དྲང་། །རྟོག་བསལ་སྤྱིར་འབུལ་ཐོག་མ་དང་། །བར་མཐའ་ལྷག་མ་སྒོ་དབྱེ་དཔང་། །བསྟན་སྐྱོང་ཆད་མཐོ་ཟོར་
འཕེན ་བྲོ། །དངོས་གྲུབ་གཏད་གསོལ་བསྡུ་དང་བསྲུང་། །སྨོན་ལམ་ཤིས་བརྗོད་བཅུ་དགུའི་ཁྲིགས། །དང་པོ་ཚོགས་རྫས་བྱིན་བརླབ་ནི། །སྟེགས་ཀྱི་ཁར་གཅན་གཟན་གྱི་པགས་པ་ལྟ་བུའི་གདན་ལ། མཾ་ས་དང་མ་དན་གཙོ་བོར་གྱུར་པའི་བཟའ་བཅའི་རིམ་པ་རྣམས་བཀོད་པ་ལ་དམིགས་ཏེ། ཁྲག་འཐུང་གལ་པོ་ལས། ཨོཾ་དབང་གཞུང་དུ་ཀྲོ་དྷཱི་ཤྭ་རཱི་མས་བྱིན་གྱིས་བརླབས་པའི་དྲིས་བསང་བར་བཤད་པ་དང་དགོངས་པ་མཐུན། ཀྲོ་དྷཱི་ཤྭ་རི་སརྦ་དྲ་བྱཾ་ཤོ་དྷཱ་ཡ་ཧཱུཾ་ཕཊ། ཨཱཿཡིས་རང་བཞིན་བདུད་རྩི་ཆུ། །རྫས་ལ་སྤྲོས་ཏེ་ཐིམ་པས་ནི། །གཟུང་འཛིན་མཚན་མ་ཐམས་ཅད་ཀུན། །ཆོས་ཀྱི་དབྱིངས་སུ་རྣམ་པར་དག །རཾ་གྱིས་རྟོག་པ་མེ་ཡིས་བསྲེགས། །ཡེ་ཤེས་རླུང་གིས་གཏོར་བྱས་ནས། །ཆུ་ཡིས་རྣམ་པར་དག་པ་ནི། །རཾ་ཡཾ་ཁཾ་གི་མཐུ་ལས་བྱུང་། །རིན་ཅེན་གཞོང་པ་ཧྲཱིཿལས་གྲུབ། །ཏྲཾ་ལས་ཞལ་ཟས་རིན་པོ་ཆེ། །ཨོཾ་ཏྲཾ་རཏྣ་ཏྲེ་ལོཀྱ་སྥ་ར་ཎ་ཕཊ། །ཧཱུཾ་གི་འཕྲོ་འདུས་དག་པར་སྦྱངས། །ཨཱཿལས་བདུད་རྩི་དྲི་མ་མེད། །ཨོཾ་ལས་འདོད་ཡོན་ལྷ་མོ་ཡིས། །ནམ་མཁའི་(༢༦བ)
ཁམས་ཀུན་གང་བར་བསམ། །ཨོཾ་ཨཱཿཧཱུཾ། ཞེས་བརྗོད། གཉིས་པ་མཆོད་ཡུལ་སྤྱན་དྲང་བ། ཧཱུཾ། དཔལ་ཆེན་ཡང་དག་ཧེ་རུ་ཀཿ། །གཽ་རཱི་ལ་སོགས་ལྷ་མོ་བརྒྱད། །ཟླ་གམ་དགུ་པའི་དཀྱིལ་འཁོར་པ། །མ་ལུས་ཚོགས་ལ་སྤྱན་འདྲེན་གཤེགས། །རུ་ལུ་སོགས་སྤྱན་འདྲེན་དུས་ཀྱི་སྔགས་དང་བཅས་སྤྱན་དྲངས། སྒྲུབ་གཏོར་ལ་བསྟིམ་པ་སྔ་འགྱུར་སྤྱི་སྐད་དང་མཐུན། གསུམ་པ་རྣམ་རྟོག་བསལ་བ་ནི། །མཾ་ས་དང་མ་ད་ན་སོགས་བཏེག་ལ། ཁྲག་འཐུང་གལ་པོ་ལས། ཧཱུཾ། གཟིགས་ཤིག་མཛེས་པ་དམ་པའི་ཆོས། །འདི་ལ་ཐེ་ཚོམ་བྱར་མི་རུང་། །བྲམ་ཟེ་ཁྱི་དང་གདོལ་པ་གསུམ། །རང་བཞིན་གཅིག་ཏུ་དགོངས་ལ་གསོལ། །ཞེས་དྲངས། ཨ་ལ་ལ་ཧོཿ ཧཱུཾ། བདེ་བར་གཤེགས་སོ་ཆོས་ཀྱི་མཆོག །གཟུང་འཛིན་དྲི་མ་མེད་པ་ཡི། །འདོད་ཆགས་དྲི་མ་དང་བྲལ་བ། །དེ་ཁོ་ན་ཉིད་བདག་ཅག་འཚལ། །ཨ་ཧོ་མཧཱ་སུ་ཁ་ཧོཿ བཞི་པ་རྩ་གསུམ་སྤྱིར་མཆོད་པ། ཁྲག་འཐུང་གལ་པོ་ལས། ཧཱུཾ། སྤོས་དང་མེ་ཏོག་མར་མེ་དྲི། །ཡེ་ཤེས་བཞི་ལས་ཤར་བ་ཡི། །མེ་ལོང་འཕྲེང་བ་གླིང་བུ་གར། །གཟུགས་ནི་རྣམ་སྣང་མཛད་ལ་འབུལ། །དྲི་ནི་རིན་ཅེན་འབྱུང་ལྡན་ལ། །སྒྲ་ནི་སྣང་བ་མཐའ་ཡས་ཉིད། །རོ་ནི་དོན་ཡོད་གྲུབ་པ་སྟེ། རེག་ནི་རྡོ་རྗེ་སེམས་དཔར་འབུལ། །ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། སརྦ་ཏ་ཐཱ་ག་ཏཱ་ནཱཾ། རཱུ་པ། ཤཔྟ། གནྡྷེ། རཱ་ས། སྤཪྴ། དྷརྨ་ག་ཎ་ཙཀྲ་པཱུ་ཛ་མེ་གྷ་པྲ་ཏཱིཙྪ་ཧོཿ ཞེས་སྤྱིར་མཆོད་པའི་ཞར་ལ། ཚོགས་ཀྱི་ཡོ་བྱད་ཐུན་མོང་དུ་བཏེག་ལ། ཧཱུཾ། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །བླ་མ་ཡི་དམ་ལྷ་ཚོགས་རྣམས་ལ་འབུལ། །ཨོཾ་གུ་རུ་དེ་ཝ་ཌཱ་ཀི་ནཱི་ག་ཎ་ཙཀྲ་ཁཱ་ཧི། ཞེས་བརྗོད།(༢༧ན)
ལྔ་པ་ཕུད་གསུམ་ཐོག་མ་ནི། ཧཱུཾ། ནམ་མཁའ་མཛོད་ཀྱི་སྒོ་ཕྱེ་མཆོད་པའི་སྤྲིན། །ས་དང་བར་སྣང་ནམ་མཁའི་ཁྱོན་བཀང་སྟེ། །ཡང་དག་ཐུགས་ཀྱི་དཀྱིལ་འཁོར་ལྷ་ཚོགས་དང་། །དམ་ཅན་བཀའ་སྡོད་སྲུང་མའི་ཚོགས་ལ་འབུལ། །ཨོཾ་བཛྲ་ཀྲོ་དྷ་ཤྲཱི་ཧེ་རུ་ཀ་ས་པ་རི་ཝཱ་ར་ག་ཎ་ཙཀྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མཱ་ཡ་ཤྲི་ཡེ་ཧཱུཾ། ཞེས་ཡབ་ཀྱི་གཡོན་ཞལ་གཙོ་བོར་བྱས་ཏེ་ལྷ་ཚོགས་ཐམས་ཅད་ལ་ཕུལ་བས་དགྱེས་པ་ཆེན་པོས་མཉེས་ནས་བདག་ལ་དངོས་གྲུབ་རྣམ་གཉིས་སྩོལ་བར་བསམ། དྲུག་པ་བར་པ་བཤགས་པ་ནི། ཁྲག་འཐུང་གལ་པོ་ལས། ཧཱུཾ། ཀུན་གཞིའི་གློང་ནས་རང་བྱུང་ཡེ་ཤེས་ཤར། །ཇི་ལྟར་སྣང་བ་ལྷ་ཡི་དཀྱིལ་འཁོར་དུ། །ནོངས་པའི་ལས་སུ་གྱུར་པ་ཐམས་ཅད་ཀུན། །གཉིས་སུ་མེད་པའི་ངང་དུ་བཤགས་པར་བགྱི། །ཡིག་བརྒྱ་བརྗོད། བདུན་པ་ཐ་མ་ཉ་བོ་བསྒྲལ། ཁྲག་འཐུང་གལ་པོའི་རྒྱུད་ཀྱི་བརྟག་པ་བཅུ་གསུམ་པ་ནས་བསྒྲལ་ལས་མདོ་ཙམ་གསུངས་པའི་དོན་བཞིན་འབྲུབ་ཁུང་ཕུར་པ་སྒྲོལ་གྲི་སོགས་འདུ་བྱས། སྭ་བྷཱ་ཝས་སྦྱངས། སྟོང་པའི་ངང་ལས། ཨེ་ལས་གནམ་ལྕགས་ཀྱི་ཁང་སྒྲོམ་ནག་པོ་ཁ་དོག་ཅིང་མཐིལ་ཡངས་པ་འཇིགས་སུ་རུང་བའི་ནང་དུ་ནྲྀ་དང་ཏྲི་ལས་གནོད་བྱེད་དགྲ་བགེགས་ཀྱི་ཚོགས་རྣམས་ཡན་ལག་ལྕགས་སྒྲོག་གིས་བསྡམས་ཤིང་ཉམ་ཐག་མྱ་ངན་གྱི་འདུག་སྟངས་ཅན་དུ་བསམས་ལ། དགུག་པ་གཞུག་བཀླགས་པས་དོན་གྲུབ་ལས། འདོད་རྒྱལ་གྱི་ཕྱག་རྒྱ་བཅས་ལ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་དང་ཆོས་དང་དགེ་འདུན་གྱི་བཀའ་བདེན་པ་དང་། འཇམ་དཔལ་སྐུ། པདྨ་(༢༧བ)
གསུང་། ཡང་དག་ཐུགས། བདུད་རྩི་ཡོན་ཏན། ཕུར་པ་འཕྲིན་ལས། མ་མོ་རྦོད་གཏོང་། དམོད་པ་དྲག་སྔགས། འཇིག་རྟེན་མཆོད་བསྟོད། འདུས་པ་མདོ། སྒྱུ་འཕྲུལ་རྒྱན། འཆི་མེད་ཚེ། ལྷུན་གྲུབ་རིགས་འཛིན། སྙིང་པོ་ཕྱག་རྒྱ། གསང་སྔགས། རིག་སྔགས། གཟུངས་སྔགས་ཀྱི་ལྷ་ཚོགས་རྣམས་ཀྱི་བཀའ་བདེན་པ་དང་། བཀའ་སྡོད་ཆོས་སྐྱོང་། མ་མོ་མཁའ་འགྲོ། དམ་ཅན་རྒྱ་མཚོ། རིགས་འཛིན་རྣལ་འབྱོར། ཆོས་ཉིད་རྣམ་པར་དག་པའི་བཀའ་བདེན་པ་དང་། བདེན་པ་ཡང་དག་པ་དང་། བདེན་པ་ཆེན་པོའི་བྱིན་གྱིས་བརླབས་ཀྱིས། བླ་མའི་སྐུ་དགྲ། བསྟན་པ་ཡོངས་དགྲ། དམ་ཚིག་ཅན་གྱི་སྡང་དགྲ། སེམས་ཅན་ཡོངས་ལ་འཚེ་བའི་གནོད་བྱེད། གདུག་པ་ཅན་གང་ཅི་མཆིས་པ་དེ་དག་ཐམས་ཅད་བཛྲ་ཨངྐུ་ཤ་ཛཿ བཛྲ་པཱ་ཤ་ཧཱུཾ། བཛྲ་སྥོ་ཊ་བཾ། བཛྲ་གྷཎྜ་ཧོཿ བཛྲ་ཨ་བེ་ཤ་ཡ། སརྦ་ཤ་ཏྲཱུཾ་ནཱ་ཤ་ཡ། ཛམྦྷ་ཡ། སྟཾ་བྷ་ཡ། མོ་ཧ་ཡ། བྷནྡྷ་ཡ། མཱ་ར་ཡ། ཞེས་ཅི་རིགས་པ་བརྗོད་རྗེས། བསྐུལ་བ་ནི། ཁྲག་འཐུང་གལ་པོ་ལས། ཧཱུཾ། རཀྟའི་རྒྱ་མཚོ་ཆེན་པོ་འཁྱིལ་བའི་དབུས། །ཀེང་རུས་ཆེན་པོའི་རི་རབ་བརྩིགས་པའི་སྟེང་། །རྡོ་རྗེ་བྲག་ཆེན་གཏམས་པའི་ས་གཞི་ལ། །རབ་འཇིགས་རྡོ་རྗེ་འབར་བའི་གཞལ་ཡས་ཁང་། །བསྐལ་པའི་མེ་ལྟར་འབར་བའི་ཀློང་དཀྱིལ་ན། །དཔལ་ཆེན་འཁོར་ཚོགས་མཐའ་ཡས་བཞུགས་པ་ནི། །ཡེ་ཤེས་ཚད་མེད་སྤྲུལ་པའི་ཐབས་མངའ་བས། །གང་མོས་དག་ལ་དེ་བཞིན་སྐུར་སྣང་ཞིང་། །ཅི་ལ་ཅི་འདུལ་བཞིན་དུ་ཆ་ལུགས་སྟོན། །ཐུགས་མཚན་སྣ་ཚོགས་མཚོན་ཆའི་ཆར་འབེབས་ཤིང་། །རུ་ལུའི་སྔགས་ཀྱི་སྒྲ་སྒྲོགས་འབྲུག་སྟོང་ལྡིར། །གཟི་བརྗིད་སྤྱན་ལྡོག་མེ་སྟག་ཚ་ཚ་འཕྲོ། །ཞལ་གདངས་མཆེ་གཙིགས་དུག་གསུམ་ཞལ་དུ་རྔུབ། །མངགས་པའི་ཕོ་ཉ་མགྱོགས་(༢༨ན)
བྱེད་གློག་སྟོང་འགྱུ། །བདུད་རྩི་དམར་གྱི་ཨརྒྷཾ་རྒྱུན་གྱིས་མཆོད། །འཛབ་དབྱངས་སྔགས་ཀྱི་འཕྲེང་བས་རྒྱུད་བསྐུལ་ན། །འདུལ་འོས་བསྒྲལ་བའི་ཞིང་དུ་གྱུར་ཏོ་འཚལ། །བྱིན་རླབས་ཚམ་རྔམ་དྲག་པོས་གདུག་པ་སྒྲོལ། །རུ་ལུའི་མཐར། ཨོཾ་ལཾ་ཧཱུཾ་ལཾ། སྟམྦྷ་ནཾ། མོ་ཧ་གྷ་ཏ་ཡ། བྷ་ག་ཝཱ་ན། ཧྲཱིཿཥྚྲཱི་ཝི་ཀྲི་བཛྲ་ཧཱུཾ་ཀཱ་ར་ཧཱུཾ། བཛྲ་ཀཱི་ལི་ཀཱི་ལཱ་ཡ། ཛཿཧཱུཾ་བཾ་ཧོཿ སརྦ་བིགྷྣཱན་བཛྲ་ཀཱི་ལི་ཀཱི་ལཱ་ཡ་ཧཱུཾ་ཕཊ། ཅེས་ཕུར་པ་བསྒྲིལ་ཞིང་སྙིང་དཀར་ནག་གི་མཚམས་སུ་བཏབ་སྟེ་རྣམ་ཤེས་མི་བསྐྱོད་པའི་ཞིང་དུ་སྤར། ཚེ་ལྷག་ཚུར་བསྡུས་པས་ཚེ་ལ་དབང་བའི་རིགས་འཛིན་བརྙེས་པར་བསམ། སླར་ཡང་སྔགས་དང་བཅས་རྐང་པ་གཡས་པ་ནས་རིམ་བཞིན་གཏུབས་ཏེ་སྨན་རཀ་སྦྲན་ཞིང་སྟོབ་པ་ནི། ཁྲག་འཐུང་གལ་པོ་ལས། ཧཱུཾ། དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་བཅས་བཞེས། །ཨོཾ་བཛྲ་ཡཀྵ་ཀྲོ་དྷ་ཁ་ཁ། ཁཱ་ཧི་ཁཱ་ཧི། ཞེས་དགྲ་བགེགས་ཀྱི་ཤ་ཁྲག་ཞལ་དུ་བསྟབས་པས། ཧཱུཾ། ང་ནི་ཟ་བྱེད་ཆེན་པོ་སྟེ། ཁམས་གསུམ་མ་ལུས་བསྒྲལ་བ་དང་། །གདུལ་དཀའ་མ་ལུས་འདུལ་བའི་ཕྱིར། །ཤ་རུས་ལ་སོགས་བཟའ་བར་བྱ། །ཞེས་གསོལ་བས་དགྱེས་པ་ཆེན་པོས་ཚིམ་པར་བསམས་ལ། རྣལ་འབྱོར་པ་རྣམས་སྲེད་པ་སོགས་གསོག་འཇོག་དང་བྲལ་ཞིང་འདོད་ཡོན་ལམ་དུ་བྱེད་པའི་མོས་པས་ཚོགས་ལ་རོལ། བརྒྱད་པ་ལྷག་མ་གཏོང་བ་ནི། །ལྷག་མ་རྣམས་བསྡུས་ལ་ཅུང་ཟད་སྤགས། །ལྷག་ཕུད་སོ་སོར་སྨན་རཀ་སྦྲན། ནམ་མཁའ་མཛོད་ཀྱི་ཕྱག་རྒྱ་བཅས་ལ། ཨོཾ་གུ་རུ་ཀྲོ་དྷཱ་རཏྣ་ས་མ་ཡ་པི་ཤ་པུརྦ་བུདྡྷ་ཀྵེ་ཏྲ་པཱ་ལ་ཀྵ་བྷ་ཀཱ་ར་ཧཱུཾ་ཕཊ། (༢༨བ)
ཅེས་འདོད་ཡོན་ལྔའི་བདུད་རྩིར་བྱིན་གྱིས་བརླབས། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་ལྷག་ཕུད་ལ་དབང་བའི་ཌཱ་ཀི་རྣམས་སྤྱན་དྲངས་པར་བསམས་ལ། འཕྲིན་ལས་རྒྱ་མཚོ་ལས། ལས་ཀྱི་རྡོ་རྗེ་བྱེད་པར་དབང་བསྐུར་བའི། །དབང་ཕྱུག་མཁའ་འགྲོ་རྡོ་རྗེ་གིང་གི་ཚོགས། །སྔོན་གྱི་ཐུགས་དམ་དམ་ཚིག་རྗེས་དགོངས་ལ། །དམ་ཅན་ལྷག་མའི་ལྷ་ཚོགས་འདིར་འདུས་ཤིག །ཨེ་ཨ་ར་ལི་ཧྲིཾ་ཧྲིཾ། ཞེས་བརྗོད་པས་བྱོན། ཁྲག་འཐུང་གལ་པོ་ལས། ཧཱུཾ་ཧ་ཧེ་ཕཊ་བྷྱོ། དབྱིངས་ནས་རྣམ་པར་བསྐུལ་བ་དང་། །བྱིན་གྱིས་ཡང་དག་བརླབས་པ་དང་། །ཐབས་ཆེན་ཡབ་ཏུ་བསྟན་པ་དང་། །ཤེས་རབ་ཡུམ་དུ་གནས་པ་དང་། ཁྲོ་མོ་གཽ་རཱི་བརྒྱད་རྣམས་དང་། །ཡུལ་གྱི་ཕྲ་མེན་ཆེན་མོ་དང་། །ཡེ་ཤེས་སྒོ་མ་བཞི་པོ་རྣམས། །ཡར་གྱི་གནས་བདུན་དཀྱིལ་འཁོར་མཆོད། །ཨོཾ་བཛྲ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལིན་ཧཱུཾ། ཨོཾ་བུདྡྷ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལིན་ཨོཾ། ཨོཾ་རཏྣ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལིན་ཏྲཾ། ཨོཾ་པདྨ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལིན་ཧྲཱིཿ ཨོཾ་ཀརྨ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལིན་ཨཿ ཞེས་འབུལ། བཀླགས་པས་དོན་གྲུབ་པས། ཧཱུཾ། དང་པོར་ཕུད་ཀྱིས་མི་མཆོད་དུ། །ཧེ་རུ་ཀ་ནི་ཕུད་ཀྱི་བདག །བར་དུ་ཚོགས་ལ་མི་རོལ་དུ། །མ་ཚོགས་དབང་ཕྱུག་ཚོགས་ཀྱི་བདག །བཀའ་ཡི་ཕམ་ཕབས་མི་གསོལ་དུ། ཁྱེད་རྣམས་ངེད་ཀྱི་བྲན་དང་གཡོག །ལྷག་མ་ཁ་ཕྲུས་མི་བཏབ་ཏུ། །རྗེ་དང་འབངས་སུ་ཁྱད་པར་ཆེ། །རྣམ་གསུམ་གཅིག་ཏུ་མི་བསྲེ་རུ། །ལྷག་མའི་གནས་སུ་ཁྱད་པར་མེད། །ཡེ་ཤེས་སྒྱུ་མའི་སངས་རྒྱས་དང་། །ལོག་རྟོག་སྒྱུ་མའི་སེམས་ཅན་རྣམས། །ཡེ་ཤེས་ལོག་རྟོག་ཁྱད་ཆེ་ཡང་། །སྒྱུ་མར་སངས་རྒྱས་སེམས་ཅན་མཉམ། །ཞེས་བརྗོད། ཨོཾ་ཨུཙྪིཥྚ་བ་ལིཾ་ཏ་བྷཀྵ་སི་སྭཱཧཱ། (༢༩ན)
ཞེས་ལྷག་མ་ལ་ཁ་ཆུས་བྲན། རུ་ལུ་འབྲུ་བརྒྱད་དང་ཁྱུང་གཤོག་གི་ཕྱག་རྒྱས་ཟིལ་གྱིས་མནན། ཁྲག་འཐུང་གལ་པོ་ལས། ཧཱུཾ། རྫུ་འཕྲུལ་མཁའ་ལ་འགྲོ་བའི་སུམ་ཅུ་གཉིས། །སྦྱོར་དང་སྒྲོལ་ལ་དགའ་བའི་གིང་ཆེན་བརྒྱད། །ལངྐ་ཚར་གསུམ་རྟོགས་ཚད་འབུལ་བ་དང་། །ལུས་ངག་ཡིད་ཀྱིས་གནོད་པའི་འབར་མ་བརྒྱད། །བདུད་སྲིན་མ་མ་བདུན་དང་སྲིང་མོ་བཞི། །དྲུག་ཅུ་རྩ་བཞི་དག་གི་ཕོ་ཉ་རྣམས། །ལྷག་མ་དག་ལ་དབང་བའི་གནས་དྲུག་ཡིན། །ཉི་ཤུ་རྩ་བརྒྱད་ཕུད་ལྷག་དག་ལ་དབང་། །མར་གྱི་གནས་བདུན་སོ་སོའི་གཏོར་མ་ལོང་། །བཅོལ་བའི་འཕྲིན་ལས་མ་ལུས་སྒྲུབ་པར་མཛོད། །ཙོད་ཏོར་ཙོད་ཏོར། །ཤེ་ས་ཤེ་ས། པར་པ་ཏི་པར་པ་ཏི། རེ་མ་མ་ར། ཏྲ་མ་མུ་ཏི་ཧཱུཾ། ཁཱ་ཧི་ཁཱ་ཧི། ཀིང་ཀ་ར་ཀིང་ཀ་ར། པ་ཏྲ་པ་ཏྲ། ཤུ་ལ་ཤུ་ལ། ཀརྨ་རག་ཤ །པི་བྷྱོ། བྷྱོ་བྷྱོ་བྷྱོ་བྷྱོ་མ་མ་བྷྱོ་ཛ། ཏྲག་རཀྴ་སེ་ཏ་ཙ་ར་ས་མ་ཡ་བྷྱོ་ཏྲག་རཀྴ་ཏྲག་རཀྴ་མ་མ་བྷྱོ་མ་མ་རུ་ལུ་ཧཱུཾ་བྷྱོ་ཧཱུཾ། ཛྭ་ལ་ཛྭ་ལ་ས་མ་ཡ་རུ་ལུ་བྷྱོ། དུ་ནེ་དུ་ནེ་ས་མ་ཡ་རུ་ལུ་རུ་ལུ་བྷྱོ། མཧཱ་པཉྩ་ཨ་མྲྀ་ཏ་ཨརྒྷཾ་པྲ་ཏཱིཙྪ་ཧོ། ཞེས་བརྗོད། དགུ་པ་སྒོ་དབྱེ་ལམ་བསྟན་པ། །ཧཱུཾ་དཀྱིལ་འཁོར་ཕྱོགས་མཚམས་བསྲུང་བ་ཡི། །ཕྲ་མན་སྣ་ཚོགས་མཚོན་ཆ་འཛིན། །ཤར་ཕྱོགས་རྒྱལ་པོ་ཡུལ་འཁོར་སྲུང་། །ལྷོ་ཕྱོགས་རྒྱལ་པོ་འཕགས་སྐྱེས་པོ། །ནུབ་ཕྱོགས་རྒྱལ་པོ་སྤྱན་མི་བཟང་། །བྱང་ཕྱོགས་རྒྱལ་པོ་རྣམ་ཐོས་སྲས། །རང་རང་སྡེ་དཔུང་འཁོར་དང་བཅས། །སྒོ་འཕྲང་ལམ་གྱི་ལྷ་ཀླུ་རྣམས། །གཞན་དུ་སྐུ་གཟུགས་གཏོར་མ་ཕྱེ། །དྲག་པོ་ཟོར་གྱི་དམག་སྣ་དྲོངས། །དགྲ་དང་བགེགས་ཀྱི་དཔུང་ཚོགས་སྟེང་། །མངོན་སྤྱོད་འཕྲིན་ལས་སྒྲུབ་པར་མཛོད། །ཅེས་བརྗོད། བཅུ་པ་དཔང་དང་གཟུ་གསོལ་བ། །ཧཱུཾ། རྩ་བ་བརྒྱུད་པའི་(༢༩བ)
རིགས་འཛིན་བླ་མ་དང་། །སྒྲུབ་པ་སྡེ་བརྒྱད་ཡི་དམ་དཀྱིལ་འཁོར་ལྷ། ཁྱད་པར་ཁྲག་འཐུང་ཡང་དག་ལྷ་ཚོགས་རྣམས། །སྒྲིབ་བྲལ་ཡེ་ཤེས་སྤྱན་གྱིས་ཉེ་བར་དགོངས། །བསྒྲལ་བའི་ཡུལ་གྱུར་དམ་ཉམས་དགྲ་བགེགས་འདི། །འགྲོ་ལ་བདེ་སྐྱིད་འབྱུང་བའི་ཕན་བདེའི་སྒོ། །སངས་རྒྱས་བསྟན་པ་འཇིག་པའི་རྩ་བ་བྱས། །བྱེ་བྲག་ངེས་གསང་རྡོ་རྗེ་ཐེག་པ་ཡི། །གཙུག་ལག་ཆོས་འཁོར་ཐོས་བསམ་སྒོམ་གྲྭ་གཏོར། །མཚན་ལྡན་རྡོ་རྗེའི་སློབ་དཔོན་སྐུ་ལ་བསྔོས། །དཀོན་ཅོག་གསུམ་གྱི་དབུ་འཕང་གཉན་པོ་སྨད། །རིགས་འཛིན་སྒྲུབ་པ་པོ་རྣམས་ཡོངས་ལ་བརྙས། །ཡི་དམ་ཆོས་སྐྱོང་སྲུང་མ་ཁྱད་དུ་བསད། །འདིས་ནི་འགྲོ་བ་མང་པོ་འཕུང་དུ་བཅུག །མཚམས་མེད་ལྔ་དང་ཉེ་བའི་ལས་མང་བསགས། །ཞིང་བཅུ་ཚང་བའི་མི་བསྲུན་གདུག་ཅན་འདི། །རིང་པོར་འཚོ་ན་རང་གཞན་མཐའ་དག་འཕུང་། །དེ་ཕྱིར་འདི་ཡི་ཚེ་བསྟུངས་སྲོག་རྩ་ཆོད། །རྣམ་ཤེས་ཡབ་ཡུམ་མཁར་འཕངས་སྲས་སུ་བསྐྲུན། །ཤ་ཁྲག་རུས་པ་ནང་ཁྲོལ་ཚོགས་རོལ་ནས། །རྣལ་འབྱོར་བདག་གི་མགོན་སྐྱབས་དཔུང་གཉེན་ཆེད། །དཔལ་ཆེན་ཁྲག་འཐུང་ཐུགས་རྗེ་རྒྱང་མ་རིང་། །ཆོས་སྐྱོང་སྡེ་བརྒྱད་ཚོགས་རྣམས་རྩལ་མ་ཞན། །དགྲ་བོ་མི་ནོར་སྡེ་བཅས་ལྷ་སྲུང་དང་། །ཕྲོལ་ལ་གནོད་བྱེད་གཤེད་མའི་ལག་ཏུ་སྤྲོད། །ལོ་ཟླར་མ་འཇོག་དྲག་པོའི་ལས་ཀྱིས་སྒྲོལ། །བཅུ་གཅིག་བསྟན་རྙིང་མ་ཕལ་ཆེར་ལ་གཏོར་མ་ཆད་མཐོས་བསྐུལ་ནས་འཕངས་ཟིན་པའི་བཤལ་ཆུས་བསྟན་མ་སྐྱོང་བ་དང་ལ་ལར་བསྟན་སྐྱོང་གི་གཏོར་མ་ཟུར་དུ་བྱེད་པ་མང་ནའང་བཀླགས་པས་དོན་གྲུབ་དང་འཕྲིན་ལས་རྒྱ་མཚོ་ཁ་སྐོང་དང་བཅས་པའི་རྗེས་སུ་འབྲངས་ནས་བཀོད་པ་ཡིན། སྐྱོང་ཆད་མཐོ་བསྒྲག །གཏོར་མ་རྣམས་ཐེབས་ཕྱོགས་སུ་བཏེག །བཀླགས་པས་དོན་གྲུབ་ལས། ཧོ། བོད་ཁམས་སྐྱོང་བའི་བསྟན་མ་བཅུ་གཉིས་དཔལ་ཆེན་པོའི་ཕམ་ཕབས་ལས་མནོས་ཏེ། རྣལ་(༣༠ན)
འབྱོར་པའི་སྟོང་གྲོགས་ལ། ནག་མོ་བཞིན་མི་སྡུག་གི་བུ་མོ་བདུད་མོ་ཆེན་མོ་བཞི་དང་། དམར་མོ་ཁྲོ་གཉེར་ཅན་གྱི་བུ་མོ་གནོད་སྦྱིན་ཆེན་མོ་བཞི་དང་། དཀར་ཤམ་བཞིན་བཟང་གི་བུ་མོ་སྨན་བཙུན་མ་ཆེན་པོ་བཞི་རྣམས་སྔོན་གྱི་ཐུགས་དམ་ལས་མ་འདའ་བར་འདིར་གཤེགས་ཤིག །ཛཿཧཱུཾ་བཾ་ཧོཿ ཌཱ་ཀི་ནི་ཧཱུཾ་ཛཿ ཨེ་ཨ་ར་ལི། ཧྲིཾ་ཧྲིཾ། ཞེས་པས་དགུག །ཁྱུང་གཤོག་གི་ཕྱག་རྒྱས་ཟིལ་གྱིས་མནན་ལ། ཧཱུཾ། བཀའ་ཡི་བྲན་གཡོག་ཚོགས་དང་བཅས་ཉིད་དུ། །དཔལ་ལྡན་ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་བསྟན་པ་སྐྱོང་བ་རྣམས། །སྔོན་གྱི་ཐུགས་དམ་དམ་ཚིག་རྗེས་དགོངས་ལ། །འདིར་གཤེགས་དམ་དགོངས་མཆོད་སྦྱིན་གཏོར་མ་བཞེས། །རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད། །བདག་ཉིད་ཆེན་མོ་རྡོ་རྗེ་ཀུན་གྲགས་མ། །དཔལ་ལྡན་ཧ་རི་རྡོ་རྗེ་གཡའ་མ་སྐྱོང་། །གངས་ཀྱི་ཡུམ་ཆེན་རྡོ་རྗེ་ཀུན་ཏུ་བཟང་། །འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ། །བདུད་ཀྱི་བུ་མོ་ཆེན་མོ་ཁྱེད་བཞི་ཡང་། །སྔོན་གྱི་ཐུགས་དམ་དམ་ཚིག་རྗེས་དགོངས་ལ། བྲན་དང་གཡོག་འཁོར་མང་པོའི་ཚོགས་དང་བཅས། །ལྷབ་ལྷུབ་རིན་ཅེན་མང་པོའི་རྒྱན་དང་བཅས། །འདིར་གཤེགས་དམ་དགོངས་མཆོད་སྦྱིན་གཏོར་མ་བཞེས། །རྣལ་འབྱོར་བཅོལ་བའི་ལས་རྣམས་གྲུབ་པར་མཛོད། །གངས་དཀར་ཤ་མེད་རྡོ་རྗེ་གཡུ་བུན་མ། ཁ་རག་ཁྱུང་བཙུན་རྡོ་རྗེ་དཔལ་གྱི་ཡུམ། །གསེར་ཆེན་མཁའ་རྒྱུ་རྡོ་རྗེ་རླུང་མོ་དང་། །སྨ་རི་རབ་འབྱམས་རྡོ་རྗེ་དྲག་མོ་རྒྱལ། །གནོད་སྦྱིན་བུ་མོ་ཆེན་མོ་ཁྱེད་བཞི་ཡང་། །སྔོན་གྱི་སོགས་(༣༠བ)
གོང་བཞིན་སྦྱར། །ཀོང་བཙུན་དེ་མོ་རྡོ་རྗེ་བོད་ཁམས་སྐྱོང་། །བཙན་ལ་ལ་རོ་རྡོ་རྗེ་སྨན་གཅིག་མ། །སྨན་བཙུན་ཨུག་ཆོས་རྡོ་རྗེ་གཡར་མོ་བསིལ། །གཡུ་ཡི་དྲིལ་བུ་རྡོ་རྗེ་གཟུགས་ལེགས་མ། །སྨན་བཙུན་བུ་མོ་ཆེན་མོ་ཁྱེད་བཞི་ཡང་། །སྔོན་སོགས་སྦྱར། ཆེ་ཞེས་ཆེན་མོ་ཁྱེད་རྣམས་ཀྱང་། །རྡོ་རྗེ་ཐོད་འཕྲེང་སྤྱན་སྔ་རུ། །ཞིང་ཆེན་ཚོགས་ཀྱིས་མཆོད་བཀྲམ་ནས། །རྣམ་ལྔ་བདུད་རྩིའི་ལོངས་སྤྱོད་ཀྱིས། །དབང་བསྐུར་མིང་བཏགས་དམ་མནོས་ཏེ། །ཐར་པ་ཐོབ་པའི་མིང་བཏགས་ནས། །ལག་ཏུ་རྡོ་རྗེ་བྱིན་ནས་ནི། །རྡོ་རྗེ་འཆང་གི་གྲལ་དུ་བཞག །ཇི་ལྟར་ཁས་བླངས་དམ་བཅས་བཞིན། །རྣལ་འབྱོར་སྒྲུབ་པའི་གྲོགས་བྱོས་ཤིག །དགྲ་བགེགས་ཐམས་ཅད་འདུལ་བ་དང་། །ནད་རྣམས་ཐམས་ཅད་བཟློག་པ་དང་། །བསམ་པ་ཐམས་ཅད་བསྒྲུབ་བྱའི་ཕྱིར། །བཀའ་ཡི་གཏོར་མ་འདི་ལོང་ལ། །བཅོལ་བའི་ལས་རྣམས་སྒྲུབ་པར་མཛོད། །དམ་ཚིག་འདི་ལས་མ་འདའ་ཞིག །དམ་ཚིག་འདི་ལས་འདས་གྱུར་ན། །རྡོ་རྗེ་ཡཀྵ་ཁྲོས་པ་ཡིས། །སྙིང་གི་དཀྱིལ་ནས་ཁྲག་དྲངས་ནས། །འོ་དོད་འབོད་པར་གདོན་མི་ཟ། །དེ་བས་བདག་གིས་བཅོལ་བ་ཡི། །འཕྲིན་ལས་ཐམས་ཅད་གྲུབ་པར་མཛོད། །ཅེས་བསྟན་མ་དང་ཆད་མཐོ་ནི། །ཧཱུཾ། སློབ་དཔོན་ཆེན་པོ་ཧཱུཾ་ཆེན་ཀཱ་ར་དང་། །སངས་རྒྱས་གཉིས་པ་པདྨ་ཐོད་འཕྲེང་སོགས། །རིགས་འཛིན་གྲུབ་བརྙེས་སྤྱན་སྔར་ཞལ་བཞེས་པའི། །གནས་ཀྱི་མ་མོ་ཡུལ་གྱི་ཕྲ་མེན་བརྒྱད། །མགོན་པོ་བདུན་ཅུ་མཁའ་འགྲོ་སུམ་ཅུ་གཉིས། །མ་བདུན་སྲིང་བཞི་དབང་ཕྱུག་ཉི་ཤུ་བརྒྱད། །བསྟན་མ་བཅུ་གཉིས་ལ་སོགས་ཧེ་རུ་ཀའི། །ཕམ་ཕབས་གཏོགས་(༣༡ན)
རྣམས་བཛྲ་ས་མཱ་ཛཿ ཞེས་སྤྱན་དྲངས་ནས་རྩེ་ལུགས་ཁ་སྐོང་ཧུ་ལུན་ཏའི་ཆུ་རྒྱུན་དུ་བྱང་ཆུབ་ལམ་སྒྲོན་ནས་བླངས་པ་ཚིག་རིང་ཐུང་ཡོད་པ་རྣམས་ཅུང་ཟད་བཅོས་པ་འདི་ལྟར། བྷྱོ། སྔོན་གྱི་བསྐལ་པ་དང་པོའི་དུས་ཉིད་ན། །འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ། །དཔལ་ཆེན་གར་གྱི་དབང་ཕྱུག་ཆེན་པོ་དེས། །སྲིད་པའི་མ་མོ་དམ་ལ་བཏགས་པའི་ཚེ། །གཽ་རཱི་ལ་སོགས་གནས་ཀྱི་མ་མོ་བརྒྱད། །སིངྷ་ལ་སོགས་ཡུལ་གྱི་ཕྲ་མེན་བརྒྱད། །རྟ་གདོང་ལ་སོགས་ཡེ་ཤེས་སྒོ་མ་བཞི། །སོ་སོའི་གཟུགས་མཆོག་དམ་པ་བསྟན་ནས་ཀྱང་། །བཀའ་ཡི་གཏོར་མ་ལེན་པར་མ་ཆད་དམ། །བཅོལ་བའི་འཕྲིན་ལས་སྒྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །འདིར་སྤྱོན་རྨད་བྱུང་བཀའ་ཡི་གཏོར་མ་ལོང་། །རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད། །བྷྱོ། དུས་སྐབས་དེ་ཉིད་འདས་པའི་འོག་རོལ་ཏུ། །རྒྱ་གར་རྡོ་རྗེ་གདན་གྱི་གཙུག་ལག་ཏུ། །སློབ་དཔོན་ཆེན་པོ་དགའ་རབ་རྡོ་རྗེ་ཡིས། །རྡོ་རྗེ་དབྱིངས་ཀྱི་དཀྱིལ་འཁོར་ཞལ་ཕྱེ་ཚེ། །མགོན་པོ་ཆེན་པོ་བདུན་ཅུ་རྩ་གཉིས་དང་། །མཁའ་འགྲོ་ཆེན་མོ་སུམ་ཅུ་རྩ་གཉིས་ཀྱིས། །སོ་སོའི་གཟུགས་མཆོག་དམ་པ་བསྟན་ནས་ཀྱང་། །བཀའ་ཡི་གཏོར་མ་ལེན་པར་མ་ཆད་དམ། །བཅོལ་བའི་འཕྲིན་ལས་སྒྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །འདིར་སྤྱོན་རྨད་བྱུང་བཀའ་ཡི་གཏོར་མ་ལོང་། །རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད། །བྷྱོ། དུས་སྐབས་དེ་ཉིད་འདས་པའི་འོག་རོལ་ཏུ། །ལྷོ་བྲག་མཁར་ཆུ་དཔལ་གྱི་དབེན་གནས་སུ། །སློབ་དཔོན་(༣༡བ)
ཆེན་པོ་ནམ་མཁའི་སྙིང་པོ་ཡིས། །རྡོ་རྗེ་ཕུར་པའི་དཀྱིལ་འཁོར་ཞལ་ཕྱེ་ཚེ། །གནམ་ལྕགས་ཕུར་པ་བྲག་ལ་བཏབ་ནས་ཀྱང་། །མ་བདུན་སྲིང་བཞི་འཁོར་དང་བཅས་རྣམས་ཀྱིས། །སོ་སོའི་གཟུགས་མཆོག་དམ་ལ་བསྟན་ནས་ཀྱང་། །བཀའ་ཡི་གཏོར་མ་ལེན་པར་མ་ཆད་དམ། །བཅོལ་བའི་འཕྲིན་ལས་སྒྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །འདིར་སྤྱོན་རྨད་བྱུང་བཀའ་ཡི་གཏོར་མ་ལོང་། །རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད། །བྷྱོ། དུས་སྐབས་དེ་ཉིད་འདས་པའི་འོག་རོལ་ཏུ། །སྤ་གྲོ་སྟག་ཚང་སེང་གེའི་བྲག་ཕུག་ཏུ། །སློབ་དཔོན་ཆེན་པོ་དཔལ་གྱི་སེང་གེ་ཡིས། །ཡང་དག་ལྷ་དགུའི་དཀྱིལ་འཁོར་ཞལ་ཕྱེ་ཚེ། །དབང་ཕྱུག་ཆེན་མོ་ཉི་ཤུ་རྩ་བརྒྱད་ཀྱིས། །སོ་སོའི་གཟུགས་མཆོག་དམ་པ་བསྟན་ནས་ཀྱང་། །བཀའ་ཡི་གཏོར་མ་ལེན་པར་མ་ཆད་དམ། །བཅོལ་བའི་འཕྲིན་ལས་གྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །འདིར་སྤྱོན་རྨད་བྱུང་བཀའ་ཡི་གཏོར་མ་ལོང་། །རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད། །བྷྱོ། དུས་སྐབས་དེ་ཉིད་འདས་པའི་འོག་རོལ་ཏུ། །གཡོ་རུ་ཡར་ཀླུངས་གད་ཀྱི་ཕུགས་རིང་དེར། །སློབ་དཔོན་ཆེན་པོ་ཛྙཱ་ན་ཀུ་མཱ་རས། །ཕུན་སུམ་ཚོགས་པའི་དཀྱིལ་འཁོར་ཞལ་ཕྱེ་ཚེ། །ཅེ་སྤྱང་མ་སོགས་འཁོར་དང་བཅས་རྣམས་ཀྱིས། །སོ་སོའི་གཟུགས་མཆོག་དམ་པ་བསྟན་ནས་ཀྱང་། །བཀའ་ཡི་གཏོར་མ་ལེན་པར་མ་ཆད་དམ། །བཅོལ་བའི་འཕྲིན་ལས་སྒྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །འདིར་སྤྱོན་རྨད་བྱུང་བཀའ་ཡི་གཏོར་མ་(༣༢ན)
ལོང་། །རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད། །བྷྱོ། དུས་སྐབས་དེ་ཉིད་འདས་པའི་འོག་རོལ་ཏུ། །བྲག་དམར་བསམ་ཡས་ཆུ་རྒྱུན་ནེའུ་གསིང་དུ། །སློབ་དཔོན་ཆེན་པོ་པདྨ་འབྱུང་གནས་ཀྱིས། །མན་ངག་ལྟ་བའི་རྫོང་འཕྲེང་བཤད་པའི་ཚེ། །དམ་སྲི་རྣམ་གསུམ་རྡུལ་དུ་བརླག་ནས་ཀྱང་། །བོད་ཁམས་སྐྱོང་བའི་བསྟན་མ་བཅུ་གཉིས་ཀྱིས། །སོ་སོའི་གཟུགས་མཆོག་དམ་པ་བསྟན་ནས་ཀྱང་། །རང་རང་སྲོག་གི་སྙིང་པོ་ཕུལ་ནས་སུ། །བཀའ་ཡི་གཏོར་མ་ལེན་པར་མ་ཆད་དམ། །བཅོལ་བའི་འཕྲིན་ལས་སྒྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །འདིར་སྤྱོན་རྨད་བྱུང་བཀའ་ཡི་གཏོར་མ་ལོང་། །རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད། །མཧཱ་པཉྩ་ཁཱ་ཧི། མཧཱ་རཀྟ་ཁཱ་ཧི། མཧཱ་བ་ལིནྟ་ཁཱ་ཧི། ཞེས་འཕྲིན་ལས་བཅོལ། བཅུ་གཉིས་ཟོར་གྱི་ལས་སྦྱོར་ནི། བཀླགས་པས་དོན་གྲུབ་ལས་ཅུང་ཟད་ཁ་བསྒྱུར་བ། འཇམ་དཔལ་སྐུ་ཡི་ལྷ་ཚོགས་ཀྱིས། །དོ་ནུབ་ཟོར་གྱི་ལས་མཛོད་ཅིག །དེ་བཞིན་དུ། པདྨ་གསུང་གི་ལྷ། ཡང་དག་ཐུགས་ཀྱི་ལྷ། བདུད་རྩི་ཡོན་ཏན། ཕུར་པ་འཕྲིན་ལས། མ་མོ་རྦོད་གཏོང་། རིགས་འཛིན་སློབ་དཔོན། འཇིག་རྟེན་མཆོད་བསྟོད། དམོད་པ་དྲག་སྔགས། ཁྱད་པར་ཁྲག་འཐུང་ཧེ་རུ་ཀས། །ཡུམ་ཆེན་ཀྲོ་དྷཱི་ཤྭ་རཱི་མས། །འཁོར་གྱི་མ་མོ་བརྒྱད་རྣམས་ཀྱིས། །དབང་ཕྱུག་ཉི་ཤུ་རྩ་བརྒྱད་ཀྱིས། །སྤྲུལ་པ་ཡང་སྤྲུལ་ཕོ་ཉ་ཡིས། །ཆོས་སྐྱོང་སྲུང་མའི་ཚོགས་རྣམས་ཀྱིས། །རིགས་འཛིན་རྩལ་ཅན་འཁོར་བཅས་ཀྱིས། །དོ་ནུབ་ཟོར་གྱི་ལས་མཛོད་ཅིག །(༣༢བ)
དོ་ནུབ་ཟོར་ཁ་གཉན་པོ་འདི། །སྟེང་གི་ལྷ་ལ་མི་ཟོར་རོ། །ལྷ་གཤེགས་གངས་དཀར་རྩེ་ལ་གཤེགས། །ཟོར་ལམ་གཉན་པོ་ད་ཕྱེ་ཞིག །དེ་བཞིན་དུ་འདོན་པ་བསྒྱུར་ཏེ། དོ་ནུབ། བར་གྱི་བཙན་ལ། བཙན་གཤེགས་བྲག་དམར་ངོས་ལ། དོ་ནུབ་༝། །འོག་གི་ཀླུ་ལ༝། །རྒྱ་མཚོའི་གཏིང་དུ༝། །དོ་ནུབ་ཟོར་ཁ་གཉན་པོ་འདི། །ཡས་ཀྱི་བདུད་གཡོས་ཤིག་ལ་ཟོར། །དེ་བཞིན་དུ། མས་ཀྱི་སྲི་ལངས་། ཕ་ཚན་རྒྱ་འདྲེ་ཅན་། མ་བུའི་བྱུར་འདྲེ་ཅན་། ཡུལ་མི་གདོང་འདྲེ་ཅན་ལ། སྡང་དགྲ་གནོད་པའི་བགེགས། ཕུང་སྲིའི་སྙིང་གི་དཀྱིལ་དུ། བྱུར་སྲིའི་ཀླད་པའི་དཀྱིལ་དུ། ཉམས་པའི་སྙིང་གི་དཀྱིལ་དུ། རྨི་ལམ་ངན་སྡིགས་བྱེད་ལ་ཟོར། །མོ་ངན་མཐུ་སྡིགས་བྱེད་ལ་ཟོར། །ཞེས་བསྐུལ་བས་གཏོར་མ་དུག་ཐུན་དུ་བསམས་ཏེ་དགྲའི་རྣམ་ཤེས་མར་མེ་ལྟ་བུ་ལ་ཕོག་པས་བསད་ཅིང་བསྒྲལ་བར་བསམས་ལ། ཐེབས་ཕྱོགས་དང་བསྟུན་ནས་གཏོར་མ་འཕང་། བསྒྲལ་མཆོད་ཀྱི་སྔགས་སྦྱོར། བཅུ་གསུམ་སོ་མཆན་དུ་ཁམས་གསུམ་ཡོངས་སུ་བསྒྲལ་ཞིང་སྲིད་གསུམ་དབང་དུ་བསྡུ་བའི་ཕྱིར་ན་གླུ་བྲོ་བརྡུང་ཞེས་འབྱུང་། པ་བྲོ་བརྡུང་བྱ་བ་ནི། གཏོར་སྣོད་ཁ་སྤུབ་སྟེ། ཁྲག་འཐུང་གལ་པོའི་བརྟག་པ་བཅུ་པར་ཡོད་པ་དང་ཕུར་པའི་བྲོ་འདྲ་མིན་འདུག་པ་བརྗོད་བདེ་ཁྱད་ནས་བཀླགས་པས་དོན་གྲུབ་ལས། ཧཱུཾ། དང་པོ་གཏི་མུག་ཉིད་ལས་བྱུང་། །བར་དུ་གཏི་མུག་ཉིད་ཀྱིས་འཁོར། །ཐ་མར་གཏི་མུག་ཉིད་ཀྱིས་འདུལ། །གཏི་མུག་རྡོ་རྗེ་འཁོར་བཅས་ཀྱིས། །དངུལ་ལམ་དཀར་པོའི་ཤིང་དག་ལ། །མགོ་བོ་རྒྱ་མདུད་རྩེ་མོ་ཟླུམ། །ལོགས་ལ་ཞི་བའི་ལྷ་བསྒོམས་ཏེ། ཁོང་སྟོང་བྱང་ཆུབ་སེམས་(༣༣ན)
ལུང་བསྟན། །རྩེ་མོ་ཟླུམ་པོ་བཏབ་པ་ཡིས། །ཐམས་ཅད་མ་ལུས་ཞི་བར་འགྱུར། །ཞི་བར་མ་གྱུར་གང་ཡང་མེད། །ཞི་མཛད་ལྷ་ལ་ཕྱག་འཚལ་ལོ། །ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ་ཤཱནྟིཾ་ཀུ་རུ་སྭཱ་ཧཱ། དེ་བཞིན་དུ་འདོན་པ་བསྒྱུར་ལ། དང་པོ་ང་རྒྱལ། བར་དུ། ཐ་མ། ང་རྒྱལ་རྡོ་རྗེ། གསེར་རམ་སེར་པོའི། མགོ་བོ་རྒྱ་མདུད་རྩེ་ཟུར་བཞི། ལོགས་ལ་རྒྱས། ཁོང་སྟོང་། རྩེ་མོ་ཟུར་བཞི། ཐམས་ཅད་མ་ལུས། རྒྱས་པར། རྒྱས་མཛད། རུ་ལུའི་མཇུག་ཏུ་ཨཱ་ཡུ་ཥེ་པུཥྚིཾ་ཀུ་རུ་ཨོཾ། དང་པོ་འདོད་ཆགས། བར་དུ། ཐ་མ། འདོད་ཆགས་རྡོ་རྗེ། ཟངས་སམ་དམར་པོའི། མགོ་བོ་རྒྱ་མདུད་རྩེ་ཟླ་གམ། ལོགས་ལ་དབང་གི །ཁོང་སྟོང་། རྩེ་མོ་ཟླ་གམ། ཐམས་ཅད། དབང་དུ། དབང་སྡུད་ལྷ་ལ། རུ་ལུའི་མཇུག་ཏུ་ཏྲཻ་དྷཱ་ཏུ་ཝ་ཤཾ་ཀུ་རུ་ཧོ། དང་པོ་ཞེ་སྡང་། བར་དུ། ཐ་མ། ཞེ་སྡང་རྡོ་རྗེ། ལྕགས་སམ་ནག་པོའི། མགོ་བོ་རྒྱ་མདུད་རྩེ་ཟུར་གསུམ། ལོགས་ལ་དྲག་པོའི། ཁོང་སྟོང་། རྩེ་མོ་ཟུར་གསུམ། ཐམས་ཅད་མ་ལུས་བརླག་པར་འགྱུར། བརླག་པར་མ་གྱུར། དྲག་པོའི་ལྷ་ལ། རུ་ལུའི་མཇུག་ཏུ་ཤ་ཏྲཱུཾ་མཱ་ར་ཡ་ཧཱུཾ་ཕཊ། ཅེས་ལས་བཞིའི་བྲོ་བརྡུང་ངོ་། །བཅུ་བཞི་ཚེ་འགུགས་དངོས་གྲུབ་བླང་། །ཁྲག་འཐུང་གལ་པོ་ལས། ཧཱུཾ། ཡེ་ཤེས་ལྷ་དང་རིགས་འཛིན་མཁའ་འགྲོའི་ཚོགས། །ད་ནི་སྒྲུབ་པའི་ཞག་གྲངས་ཚང་ལགས་སོ། །ད་ནི་སྒྲུབ་པའི་ནམ་ཡང་ལངས་ལགས་སོ། །བཟླས་བརྗོད་བསྙེན་པའི་གྲངས་ཀྱང་ཚང་ལགས་སོ། །ཕྱི་ནང་མཆོད་པའི་གྲངས་ཀྱང་ཚང་ལགས་སོ། །ཞག་གྲངས་དམ་བཅས་བསྙེན་པ་མཐར་དབྱུང་སྟེ། །ཡེ་ཤེས་འོད་ཟེར་འཁྲུགས་(༣༣བ)
ཚུལ་མཆོག་བསྣོལ་ནས། །བཟླས་བརྗོད་བསྙེན་པའི་གྲངས་ནི་ཁྱེད་ལ་འབུལ། །དམིགས་བསམ་འགྲུབ་པའི་དངོས་གྲུབ་བདག་ལ་སྩོལ། །མཁས་རྟོགས་ཆོས་ཀྱི་དངོས་གྲུབ་བདག་ལ་སྩོལ། །གཡུང་དྲུང་ཚེ་ཡི་དངོས་གྲུབ་བདག་ལ་སྩོལ། །དབང་ཐང་བུ་ཚའི་དངོས་གྲུབ་བདག་ལ་སྩོལ། །མཛོད་ལྡན་ནོར་གྱི་དངོས་གྲུབ་བདག་ལ་སྩོལ། །རྒྱ་མཚོའི་ཀླུ་ཡི་དངོས་གྲུབ་བདག་ལ་སྩོལ། །མཐུ་དང་རྩལ་གྱི་དངོས་གྲུབ་བདག་ལ་སྩོལ། །སྤྲུལ་པ་འགྱེད་པའི་དངོས་གྲུབ་བདག་ལ་སྩོལ། །འཕྲིན་ལས་རྣམ་བཞིའི་དངོས་གྲུབ་བདག་ལ་སྩོལ། །དཔལ་ཆེན་སྐུ་དང་གསུང་དང་ཐུགས་དང་གསུམ། །ཆོས་ཀྱི་སྐུ་དང་ལོངས་སྐུ་སྤྲུལ་པའི་སྐུ། །ངོ་བོ་ཉིད་སྐུའི་དངོས་གྲུབ་བདག་ལ་སྩོལ། །སིདྡྷི་ཕ་ལ་ཨ་ལ་ལ་ཧོ། ཞེས་སྒྲུབ་ཆེན་གྱི་ཚེ་དངོས་གྲུབ་ཀྱི་རྫས་རྣམས་བཅས། རྒྱས་པར་ལེན་པ་དཀྱིལ་ཆོག་གི་མཇུག་གི་ས་བཅད་གཉིས་པས་མ་སྤྲོས་ཤིང་འདིར་ཉེ་བར་མཁོ་བ་ནི་ཚེ་རྫས་ཙམ་དང་བཅས་ཚེ་འགུགས་ཀྱི་ཚུལ་དུ་ལེན་པ་སྔགས་རྙིང་མ་ལ་དྲག་ལས་ཀྱི་མཇུག་ཏུ་ཚེ་འགུགས་པར་བཤད་པས་འགྲེལ་ཆགས། བཅོ་ལྔ་གཏང་རག་བཟོད་གསོལ་བ། །ཧཱུཾ། ཡང་དག་ཁྲག་འཐུང་ལྷ་དགུའི་ཚོགས་རྣམས་ལ། །ཕྱི་ནང་ཉེར་སྤྱོད་སྨན་གཏོར་རཀྟ་སོགས། །དངོས་བཤམས་ཡིད་ཀྱིས་སྤྲུལ་པའི་མཆོད་པ་འབུལ། །བརྩེ་བས་བཞེས་ཏེ་དངོས་གྲུབ་རྣམ་གཉིས་སྩོལ། །ཨོཾ་བཛྲ་ཀྲོ་དྷ་ཤྲཱི་ཧེ་རུ་ཀ་ས་པ་རི་ཝཱ་ར་ཨརྒྷཾ་ནས་ཤཔྟ་པྲ་ཏཱིཙྪ་སྭཱ་ཧཱའི་བར་དང་། མཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མ་ཧཱ་བ་ལིནྟ་ཁ་རཾ་ཁཱ་ཧི། མ་ཧཱ་རཀྟ་ཁ་རཾ་ཁཱ་ཧི། ཞེས་དང་། དེ་རྗེས་བཀླག་པས་དོན་གྲུབ་ལས་བྱུང་བ་ལྟར། ཡིག་བརྒྱའི་མཐར། མ་འབྱོར་བ་དང་ནས། བཟོད་(༣༤ན)
པར་མཛོད། ཁྱེད་ཀྱིས་སེམས་ཅན་གྱི་ཁམས་ལ་རྗེས་སུ་བརྩེ་བས་བཀའ་སྩལ་ཞིང་དཀྱིལ་འཁོར་བྱིན་གྱིས་བརླབས་ཏེ། སེམས་ཅན་གྱི་དོན་མཛད་ན་སོ་སོ་སྐྱེ་བོ་རྣལ་འབྱོར་ལ་དབང་མ་ཐོབ་པ་རྣམས་བསྐྱུད་ངེས་པའམ། ཡོ་བྱད་མ་ཚང་བ་ལ་སོགས་པ་ཉེས་པ་གང་ཅུང་ཟད་ཅི་མཆིས་པ་དེ་དག་བཟོད་པར་མཛད་དུ་གསོལ། ཅེས་བརྗོད་དོ། །བཅུ་དྲུག་དཀྱིལ་འཁོར་ཉེར་བསྡུ་ནི། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །ཅེས་སོགས་ཀྱི་མཐར་སརྦ་ས་མ་ཡ་ས་པ་རི་ཝཱ་ར་གཙྪ་ཞེས་གཏོར་མགྲོན་དུ་སྤྱན་དྲངས་པ་སོགས་དམ་ཅན་རྣམས་གཤེགས་སུ་གསོལ། གསང་བ་མེ་དཔུང་འབར་བའི་ལེའུ་བཅོ་བརྒྱད་པར། དཀྱིལ་འཁོར་བསྡུ་ཆོག་རྒྱས་པར་གསུངས་པ་ཧ་ཅང་མང་དྲགས་པས་དོན་གྱི་སྙིང་པོ་བརྗོད་བདེ་བ། བཀླགས་པས་དོན་གྲུབ་ལས། རང་གི་ཐུགས་ཀའི་ཧཱུཾ་ལས་འོད་འཕྲོས་པ་སྣོད་བཅུད་ཐམས་ཅད་ལ་ཕོག་པས་འོད་ཀྱི་རྣམ་པར་འདུས། སྲུང་འཁོར་དུར་ཁྲོད་གཞལ་ཡས་ཁང་ལ། དེ་དག་དཀྱིལ་འཁོར་གྱི་ལྷ་ལ། དེ་གཙོ་བོ་ཡབ་ཡུམ་ལ། ཡུམ་ཡབ་ལ་བསྡུས་པས། རང་གཙོ་བོའི་ང་རྒྱལ་གྱིས་སྤྱོད་ལམ་ཐམས་ཅད་རྗེས་སུ་སྤྱད་པར་བྱའོ། །བཅུ་བདུན་བདག་ཉིད་ལུས་བསྲུང་བ། སྔགས་ཅུང་ཟད་ཁ་བསྒྱུར་བའི་དངོས་གཞི་བཀླགས་པས་དོན་གྲུབ་ལས། ཨོཾ་ཤྲཱི་བཛྲ་ཧེ་རུ་ཀ་ཀྲོ་དྷ་རཀྵ་ཧཱུཾ་ཕཊ། ཅེས་བརྗོད་པས། རང་གཟི་བརྗིད་དང་ལྡན་པར་གྱུར། ཨོཾ་བཛྲ་ཀ་པ་ཙ་ཧཱུཾ་ཕཊ། ཅེས་ལུས་ལ་རྡོ་རྗེའི་གོ་གྱོན་པས་བར་ཆད་ཀྱིས་མི་ཚུགས་པར་བསམ། དེ་ནས། རང་བཞིན་སེམས་ཀྱི་ཆོས་ཉིད་ནི། །མ་བཅོས་ལྷུག་པར་གནས་པའི་དོན། །རྟག་ཆད་ངོ་བོ་མཐའ་སྤངས་ཤིང་། །བརྗོད་བྲལ་(༣༤བ)
མུ་བཞི་ལས་འདས་པ། །རྩོལ་མེད་གནས་པའི་ཆོས་ཉིད་དེ། །ངོ་བོ་ཉིད་ཀྱིས་མཚོན་པའོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨྨཱ་ཎཱི་ཨཱདྱ་ནུདྤནྣ་ཏྭཱཏ། ཅེས་པས་ཆོས་ཐམས་ཅད་གདོད་ནས་མ་སྐྱེས་པའི་དེ་ཁོ་ན་ཉིད། བདག་མེད་རྟོགས་པའི་ལྟ་བས་རྒྱས་གདབ་བོ། །བཅོ་བརྒྱད་སྨོན་ལམ་གདབ་པ་ནི། །ཐེག་མཆོག་རྣལ་འབྱོར་ཟབ་མོ་ཉམས་བླངས་པས། །ཚེ་འདིར་རླུང་སེམས་དག་པའི་རྡོ་རྗེ་སེམས། ཁ་སྦྱོར་བདུན་ལྡན་ཟུང་འཇུག་ཧེ་རུ་ཀར། །མངོན་འཚང་རྒྱས་ནས་འགྲོ་ཀུན་འདྲེན་པར་ཤོག །བཅུ་དགུ་ཕུན་ཚོགས་ཤིས་པ་བརྗོད། །ཆོས་ལོངས་སྤྲུལ་གསུམ་ཧཱུཾ་ཆེན་ཀཱ་ར་དང་། །པདྨ་ཐོད་འཕྲེང་གཉགས་ཆེན་ཛྙཱ་ནའི་ཞབས། །ཀླུ་དབང་སྲུང་སོགས་འཁོན་སྟོན་གསང་སྔགས་འཆང་། །རིགས་འཛིན་བརྒྱུད་པ་རྣམས་ཀྱི་བཀྲ་ཤིས་ཤོག །དྲན་པ་ཙམ་གྱིས་སྲིད་ཞིའི་གདུང་སེལ་ཞིང་། །མཆོག་དང་ཐུན་མོང་དངོས་གྲུབ་ཆར་འབེབས་པ། །དཔལ་ཆེན་ཡང་དག་ཁྲག་འཐུང་ལྷ་དགུ་ཡི། །དཀྱིལ་འཁོར་ལྷ་ཚོགས་རྣམས་ཀྱི་བཀྲ་ཤིས་ཤོག །དགའ་རབ་དབང་ཕྱུག་སྡེ་བཅས་མ་ལུས་པ། །ཕྱེ་མར་འཐག་མཛད་གནམ་ལྕགས་རྡོ་རྗེའི་ཐོག །ཕྲ་མེན་མ་སྲིང་དབང་ཕྱུག་ཉེར་བརྒྱད་སོགས། །བཀའ་སྲུང་དམ་ཅན་རྒྱ་མཚོའི་བཀྲ་ཤིས་ཤོག །གཞན་ཡང་ཤིས་བརྗོད་ཀྱི་རིམ་པ་ཅི་རིགས་པ་བྱའོ། །སྒྲུབ་སྡེ་བརྒྱད་ལས་ཐུགས་མཆོག་ཧེ་རུ་ཀཿ། །དཔལ་ཆེན་ཡང་དག་ཉམས་བསྟར་འཕྲིན་ལས་གཞུང་། །ཧཱུཾ་ཆེན་ཀཱ་ར་པདྨ་ཐོད་འཕྲེང་སོགས། །འཕགས་ཡུལ་གྲུབ་དབང་བཞེད་སྲོལ་ཕ་མཐའ་ཡས། །ལྗོངས་འདིར་རྒྱ་ཆེ་བཀའ་དང་ཟབ་མོའི་གཏེར། །དར་ལས་འཁོན་སྟོན་རིག་སྔགས་འཆང་བའི་ལུགས། །ས་སྐྱའི་འཇམ་མགོན་རིམ་བྱོན་ཡི་དམ་དུ། །མཛད་པ་མཁས་རྣམས་ཡིད་ཆེས་དགའ་(༣༥ན)
བསྐྱེད་གནས། །འོན་ཏེ་རྒྱུད་འགྲེལ་མན་ངག་ནམ་མཁའི་མཐའ། །མཁྱེན་པའི་ཕ་ཝང་གཤོག་པས་མ་ཆོད་པར། །ཕུར་བའི་ལྷ་སྔགས་འབྱིན་འཇུག་མུན་ཁུང་ལ། །སྐྱབས་སུ་བསྟེན་ཏེ་རང་མཚང་ངོམས་པ་བཞིན། །གོང་མའི་སྙན་བརྒྱུད་རྒྱལ་པོའི་ཁྲི་མ་ནོན། །ངོར་རྫོང་ཞང་བློན་དྲ་མའི་ཤུལ་བོར་ནས། །སྣ་བོའི་ཡབ་ཆོས་ཡང་ཕུར་མཁན་པོ་རུ། །རློམ་ཡང་སྔ་འགྱུར་བརྡ་ལ་མ་འདྲིས་ནོངས། །འཇམ་དབྱངས་རིགས་ཀྱི་ཐིག་ལེ་སྣུམ་པོའི་ས། །ངན་སྤྱོད་རྡུལ་གྱིས་སྐྱ་བོར་སྒྱུར་བྱེད་པའི། །སྔགས་འཆང་ཆེན་པོར་བསྙེམས་དེ་བཞི་ཐོག་ཁྲིར། །ཕུད་བཞེས་སྨར་ཞིང་ཅི་བདེར་གཟིམས་འཇམ་མཛོད། །དགའ་ལྡན་བསྟན་ལ་ཚུལ་འདི་གྲགས་ཆུང་ཞིང་། །ཟ་ཧོར་བརྒྱུད་པའི་ཕ་ཆོས་མ་ཡིན་ཀྱང་། །བཀའ་གཏེར་རིང་ལུགས་ལ་ལྟའི་མིག་ཡངས་པས། །རྒྱུད་དོན་སྣང་བའི་ཉིན་བྱེད་འདི་ན་ཤར། །གསང་ཆེན་རྙིང་མར་མཁས་ཤིང་གྲུབ་བརྙེས་པའི། །བཤེས་གཉེན་དུ་མའི་ཞབས་རྡུལ་གཙུག་ཏོར་རྩེར། །བསྟེན་པས་གསར་མའི་ལྷན་པར་མི་རེ་བའི། །སྔ་འགྱུར་རང་སྐད་གཙང་མའི་གོས་འདི་བཙེམས། །དགེ་འདིས་ཐུགས་ཀྱི་རྡོ་རྗེ་ཧེ་རུ་ཀའི། །བསྐྱེད་རྫོགས་རྫོགས་ཆེན་ནོར་བུའི་ཐེམ་སྐས་ལ། །འཛེགས་ནས་བླ་མེད་སྐུ་བཞིའི་གྲོང་ཁྱེར་ཆེར། །མྱུར་ཞུགས་ལུས་ཅན་མཐའ་དག་འདྲེན་པར་ཤོག །གང་སྣང་ཁྲག་འཐུང་ལྷ་དགུའི་གཟུགས་སུ་ཤར། །སྒྲ་ཀུན་རུ་ལུ་གསེར་འཕྲེང་གདངས་སུ་སྒྲོགས། །དྲན་རྟོག་བདེ་ཆེན་ཟུང་འཇུག་རྣམ་པར་རོལ། །གསང་གསུམ་རྒྱན་གྱི་འཁོར་ལོའི་བཀྲ་ཤིས་ཤོག །སྒྲུབ་སྡེ་ཆེན་པོ་བརྒྱད་ལས་ཡང་དག་ཐུགས་ཀྱི་རྒྱུད་མན་ངག་ལ་བརྟེན་ནས་མཆོག་གི་དངོས་གྲུབ་བརྙེས་པ་སློབ་དཔོན་ཆེན་པོ་ཧཱུཾ་ཀཱ་ར་དང་སངས་རྒྱས་གཉིས་པ་པདྨ་འབྱུང་གནས་གཉིས་ཀྱི་བཞེད་སྲོལ་གནུབས་ནམ་མཁའི་སྙིང་པོ། སྣ་ནམ་རྡོ་རྗེ་བདུད་(༣༥བ)
འཇོམས། གཉགས་ཛྙཱ་ན་ཀུ་མཱ་ར་སོགས་རིག་པ་འཛིན་པ་དུ་མས་དར་བར་མཛད་པའི་བཀའ་གཏེར་གྱི་ལུགས་སྲོལ་མཐའ་ཡས་པའི་ནང་ནས་འཁོན་སྟོན་རིག་སྔགས་འཆང་བ་རྣམས་ལས་བརྒྱུད་དེ་ས་སྐྱའི་རྗེ་བཙུན་གོང་མ་རྡོ་རྗེ་འཆང་ཞལ་གཉིས་པ་རྣམས་ཀྱི་ཐུགས་དམ་ཀྱི་གཙོ་བོར་མཛད་ནའང་སྒྲུབ་མཆོད་སོགས་ཀྱི་སྲོལ་རྒྱས་པ་མི་སྣང་བས་བསྟན་པ་རིན་པོ་ཆེའི་བཙས་སུ་རྒྱུད་སྡེ་བཞིའི་སྨིན་གྲོལ་གར་ཐིག་དབྱངས་རོལ་སོགས་ཀྱི་འབྱུང་གནས་གོང་དཀར་རྡོ་རྗེ་གདན་གྱི་ཆོས་གྲྭ་ཆེན་པོར་སྒྲུབ་མཆོད་འཛུགས་པའི་མཐུན་རྐྱེན་དུ་བྱང་ཐང་སེར་གྲོལ་དགོན་རྟེན་གསུམ། མཆོད་རྫས། ཐབ་གདན་ཆས། ལག་འབབ་ཉིས་བརྒྱ་སྐོར། སྤྱིལ་འཛིན་ཐེམ་ཆུང་ལྔ་དང་བཅས་ས་སྤྲེལ་སྦྱོར་འཇགས་བྱས་རྗེས་དཔལ་ཡང་དག་ཟླ་གམ་དགུ་པའི་འཕྲིན་ལས་ཀྱི་རིམ་པ་རྒྱུད་དོན་སྣང་བྱེད་ཅེས་པ་འདི་ནི་ཆོས་སྡེའི་བླ་སྤྱི། ཟུར་འཆང་པ། གྲྭ་དམངས་སོགས་སྤྱི་ཚོགས་ཀྱིས་འབད་པ་ཆེན་པོས་བསྐུལ་བ་ལ་བརྟེན་ནས་གོ་རིམ་རྙིང་མ་བཀའ་གཏེར་གྱི་ལུགས་སྲོལ་སོར་བཞག་ལ། ཅུང་ཟད་གསར་རྩོམ་དགོས་པ་ཚོར་ཁུངས་མ་སྨོས་ཤིང་དེ་ཕྱིན་ཁུངས་བཙུན་པ་དང་བྱིན་རླབས་ཀྱི་མཚན་ཁ་ཆེ་བའི་སླད་དུ་ཡང་དག་བཀའ་མའི་རྒྱུད་རྣམས་ལ་གཙོ་བོར་བཟུང་ངོས་ཚེག་བར་དང་ཤད་བར་ཐེངས་སོ་རྣམས་ཀྱི་ཟུར་ཅུང་ཟད་བཟོས། ཧཱུཾ་མཛད་སྒྲུབ་ཐབས་དང་རྩ་བ་སོ་མཆན་གཉིས་ཀྱི་དགོངས་པ་བླངས། རྗེ་བཙུན་བརྩེ་བ་ཆེན་པོ་ནས་ས་ལོ་ཐམས་ཅད་མཁྱེན་པའི་བར་གྱི་གདུང་བརྒྱུད་རྗེས་འབྲངས་དང་བཅས་པའི་ཡིག་ཆ་ཡིན་ངེས་དཀོན་ཞིང་བདག་པོ་སྔགས་འཆང་བའི་མངོན་རྟོགས་དེར་ས་ལོའི་ཟླ་གམ་གཅིག་པའི་སྒྲུབ་ཐབས་དང་ལྷ་མོ་བརྒྱད་ཀྱི་མངོན་རྟོགས་སོགས་ཐོར་བུ་ཡོད་ཚུལ་ཙམ་ལས་གཞན་རྣམས་ལ་ཁུངས་སྐྱེལ་རྒྱུ་མི་འདུག་པའི་ཟླ་གམ་(༣༦ན)
གཅིག་པ་མ་གཏོགས་གཞན་མི་ཤེས་པ་ཞིག་གིས་ས་ལོར་ཁ་གཡར་བ་འདྲ་སྙམ་ཡིད་ཆེས་ཀྱི་གནས་སུ་མ་གྱུར་པ་ནས། ཁ་ཅུང་ཟད་འགེངས་དགོས་རྣམས་འཇུག་པ་བདེ་ཕྱིར་ཐམས་ཅད་མཁྱེན་པ་བསོད་ནམས་རྒྱལ་མཚན་ལ་འཁྲུལ་པ་མི་མངའ་བས་བཀླགས་པས་དོན་གྲུབ་དང་རྩེ་ལུགས་ཀྱི་ཕུར་པའི་ལས་བྱང་མ་བུ་སོགས་ཁུངས་སྨོས་པ་རྣམས་ཀྱིས་བརྒྱན་ཏེ་ཁྱབ་བདག་མཁན་ཆེན་ཞ་ལུ་པ་ཆེན་པོ་རིན་ཅེན་བསོད་ནམས་མཆོག་གྲུབ་ཀྱིས་དཀྱིལ་འཁོར་འདི་ཉིད་དུ་ལེགས་པར་སྨིན་པར་མཛད་ཅིང་ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་སོགས་ཡོངས་འཛིན་རྡོ་རྗེ་འཆང་ཆོས་བཞིན་དུ་སྤྱོད་པ་དུ་མའི་བཀའ་དྲིན་ལས་གསང་སྔགས་སྔ་འགྱུར་གྱི་དགོངས་དོན་ཕྱོགས་ཙམ་རིག་པའི་ཟ་ཧོར་གྱི་སྔགས་འཆང་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་བག་ཡོད་ཀྱི་ལོ་གྲོ་བཞིན་ཅན་གྱི་དཀར་ཆའི་བཟང་པོ་གཉིས་པའི་ཚེས་ལ་རང་བྱུང་འཕགས་པའི་གཙུག་ལག་དམར་པོ་རིར་སྦྱར་བའི་ཡི་གེ་པ་ནི་རིགས་འཛིན་གྱི་བཙུན་པ་འཇམ་དབྱངས་གྲགས་པའོ། །མངྒ་ལཾ།།