ཕྱི་ནས་མཁའ་འགྲོ་བསུན་མའི་ཞུ་བ།
ཕྱི་ནས་མཁའ་འགྲོ་བསུན་མའི་ཞུ་བ་བཞུགས་སོ། །
ཨྱོན་སྤྲུལ་པའི་སྐུ་ལ་ཕྱག་འཚལ་ལོ༔ བསུན་བཟློག་རྒྱས་པའི་མདོས་ཐབས་སུ་བཅས་པ་ལ༔ བསུན་མའི་མགྲོན་རྣམས་ཀྱིས། སྔ་མ་སྔགས་སྟོན། སྐྱེས་བུ་རིགས་བཟང་དང་། བུད་མེད་རིགས་བཟང་གང་ཡིན་པ་ལ། ནུབ་ཕྱོགས་བདེ་བ་ཅན་དུ་བཞུད་དགོས་ཟེར་ནས། བྲོད་པ་འདིང་ཞིང་གདན་འདྲེན་པ་འདི་སྐད་དོ༔ ༼ཀ༽ཀྱེ། རིགས་བཟང་ལྷ་ཡི་སྐྱེས་བུ་ཁྱེད༔ ངེད་མཁའ་འགྲོ་རྣམས་ལ་ཚུར་གསོན་དང་༔ ཁྱེད་བོད་ཀྱི་ཡུལ་ལས་སྡུག་པ་མེད༔ ངེད་མཁའ་འགྲོའི་ཡུལ་ལས་སྐྱིད་པ་མེད༔ ངེད་མཁའ་འགྲོའི་ཡུལ་ལས་དགའ་བ་མེད༔ ཡེ་ཤེས་དབྱིངས་ཀྱི་ཕོ་བྲང་ན༔ འཇའ་ཚོན་གུར་ཕུབ་ཁྱིལ་ལི་ལི༔ གཉིས་མེད་མཁའ་ལྟར་དག་པའི་ཕོ་བྲང་ནས༔ མེ་ཏོག་ཆར་བབ་སིལ་ལི་ལི༔ མི་མངོན་དབྱིངས་ཀྱི་ཕོ་བྲང་ན༔ གསེར་གྱི་ལྡིང་ཁང་ལྡིངས་སེ་ལྡིང་༔ མཁའ་སྤྱོད་ཉམས་དགའི་ཕོ་བྲང་ན༔ མཁའ་འགྲོའི་ཚོགས་རྣམས་སྤུངས་སེ་སྤུང་༔ ངེད་མཁའ་འགྲོའི་ཡུལ་ལས་སྐྱིད་པ་མེད༔ ཁྱེད་བོད་ཀྱི་ཡུལ་ལས་སྡུག་པ་མེད༔ བྲེལ་ཕོངས་ལས་ལ་ཟིན་དུས་མེད༔ (༢ན)
ཡིད་ཀྱི་ལས་ལ་དལ་དུས་མེད༔ རིགས་བཟང་ལྷ་ཡི་སྐྱེས་བུ་ཁྱེད༔ ངེད་མཁའ་འགྲོའི་ཡུལ་དེར་ད་གཤེགས་ཤིག༔ ༼ཁ༽ཀྱེ། རིགས་བཟང་ལྷ་ཡི་སྐྱེས་བུ་ཁྱེད༔ ངེད་མཁའ་འགྲོའི་ཡུལ་དེར་ད་གཤེགས་ཤིག༔ མཁའ་འགྲོའི་ཡུལ་ལས་དགའ་བ་མེད༔ མཁའ་འགྲོའི་ཡུལ་ལས་སྐྱིད་པ་མེད༔ འདོད་དགུ་འབྱུང་བའི་ཕོ་བྲང་ན༔ ཅི་འདོད་གཏེར་གྱི་དངོས་གྲུབ་ཡོད༔ དྲག་པོ་ཨེ་ཡི་གཞལ་ཡས་ན༔ ཐོད་པའི་སྐུ་མཁར་ལྡེམ་པ་ཡོད༔ མི་ལྤགས་གཡང་གཞི་རྒྱངས་སེ་རྒྱང་༔ ཚིལ་ཆེན་མར་མེ་ཏལ་ལ་ལ༔ ཤ་ཁྲག་གཏོར་མ་སྤུངས་སེ་སྤུང་༔ རཀྟའི་རྒྱ་མཚོ་ཁྱིལ་ལི་ལི༔ རུས་པའི་རྒྱན་ཆ་ ཁྲོལ་ལོ་ལོ༔ ཚིལ་ཆེན་སྤོས་དུད་ཐུལ་ལུ་ལུ༔ མི་རྐང་གླིང་བུ 
་སྐད་རེ་བཟང་༔ ངེད་མཁའ་འགྲོའི་ཡུལ་ལས་བྲོད་པ་མེད༔ གནས་དེར་འདེངས་དང་དགའ་སྐྱིད་འཛོམ༔ རིགས་བཟང་ལྷ་ཡི་སྐྱེས་བུ་ཁྱེད༔ རྣ་བའི་དབང་པོ་ཚུར་གསོན་དང༔ ངེད་མཁའ་འགྲོའི་ཡུལ་ལས་དགའ་བ་མེད༔ ཁྱེད་བོད་ཀྱི་ཡུལ་ལས་སྡུག་པ་མེད༔ ཆགས་སེམས་ཆེ་ལ་གྲོལ་རྒྱུ་མེད༔ དེ་བས་ཨྱོན་(༢བ)
གནས་དེར་འདེངས༔ ༼ག༽ གཤེགས་ཀྱང་ཟེར། ཀྱེ། རིགས་བཟང་ལྷ་ཡི་སྐྱེས་བུ་ཁྱེད༔ རྣ་བའི་དབང་པོ་ཚུར་གསོན་དང་༔ ངེད་མཁའ་འགྲོའི་གནས་དེ་ཉམས་རེ་དགའ༔ དུར་ཁྲོད་ཆེན་པོའི་གནས་མཆོག་ན༔ དཔའ་བོའི་གར་བྱེད་ཁྱུགས་སེ་ཁྱུག༔ དཔའ་མོའི་བྲོ་བརྡུང་ཆེམས་སེ་ཆེམ༔ བྱ་ངང་བའི་སྐད་སྙན་སངས་སེ་སང་༔ ངུར་པའི་སྐད་སྙན་ཙེར་རེ་རེ༔ མཁའ་འགྲོའི་གླུ་ལེན་ཀྱུར་རུ་རུ༔ དར་དཀར་རྒྱལ་མཚན་པུར་རུ་རུ༔ དར་ནག་རུ་མཚོན་ལྷབས་སེ་ལྷབ༔ རྐང་གླིང་སྨྱུག་གླིང་སྐྱུར་རུ་རུ༔ གསེར་གྱི་ཉི་མ་ཁྱིལ་ལི་ལི༔ དུང་གི་ཟླ་བ་ཏལ་ལ་ལ༔ སྐར་ཕྲན་ཚོམ་བུ་ཤིགས་སེ་ཤིག༔ གནས་དེར་འདེངས་དང་གནས་དེར་སྐྱིད༔ ཉམས་དགའི་གནས་དེར་གཤེགས་སུ་གསོལ༔ ༼ང༽ཀྱེ། རིགས་བཟང་ལྷ་ཡི་སྐྱེས་བུ་ཁྱེད༔ ངེད་བསུན་མ་རྣམས་ལ་ཚུར་གསོན་དང་༔ ཁྱེད་བོད་ཀྱི་ཡུལ་ལས་སྡུག་པ་མེད༔ བོད་ཀྱི་ཡུལ་ལས་ངན་པ་མེད༔ བོད་ཀྱི་ཡུལ་དེ་གནས་རེ་ཆུང་༔ བདུད་རྩིའི་ཆུ་ལ་འཐུང་རྒྱུ་མེད༔ ཡེ་ཤེས་དབྱིངས་ལ་གཞག་ས་མེད༔ མེ་ཏོག་གླིང་ལ་བལྟ་ས་མེད༔ མཛེས་པའི་ཡིད་ལ་གདུངས་རྒྱུ་མེད༔ དེ་བས་བོད་ཀྱི་ཡུལ་འདི་སྡུག༔ རིགས་བཟང་ལྷ་ཡི་སྐྱེས་བུ་ཁྱེད༔ ད་ནི་མཁའ་འགྲོའི་ཡུལ་དེར་གཤེགས༔ མཁའ་འགྲོའི་ཡུལ་དེ་གནས་རེ་བཟང་༔ རིན་ཆེན་གསེར་གྱི་ལྡིང་ཁང་དེ༔ ཁ་པད་གཡུ་ལ་བྱས་པ་ཡོད༔ རིན་ཆེན་དངུལ་གྱི་སྐུ་མཁར་དེ༔ ཁ་པད་ལྕགས་ལ་བྱས་པ་ཡོད༔ རིན་ཆེན་ཟངས་ཀྱི་སྐུ་མཁར་དེ༔ ཁ་པད་བྱུ་རུར་བྱས་པ་ཡོད༔ རིན་ཆེན་ལྕགས་ཀྱི་སྐུ་མཁར་དེ༔ ཁ་པད་(༣ན)
མཆོང་ལ་བྱས་པ་ཡོད༔ དེ་འདྲའི་གཞལ་ཡས་ཉམས་རེ་དགའ༔ དེ་འདྲའི་གནས་མཆོག་དང་རེ་སྤྲོ༔ གནས་མཆོག་དེ་རུ་ད་བཞུད་འཚལ༔ ༼ཅ༽ཀྱེ། རིགས་བཟང་ལྷ་ཡི་སྐྱེས་བུ་ཁྱེད༔ ངེད་མཁའ་འགྲོ་རྣམས་ལ་ཚུར་གསོན་དང་༔ ཨྱོན་ཡུལ་དེར་འགྲོ་རེ་རན༔ ཁྱེད་མི་འགྲོ་བའི་དབང་ཡང་མེད༔ བྱ་རྣམས་སྐད་སྙན་ཙེར་རེ་རེ༔ གཅན་གཟན་ངར་སྐད་དུར་རུ་རུ་༔ རྒྱན་ཆ་མང་པོ་པུར་རུ་རུ་༔ ཐོད་པ་ལྟག་སྤྲོད་ཁྲོལ་ལོ་ལོ༔ སིལ་སྙན་མང་པོ་སིལ་ལི་ལི༔ ཨ་ལ་ལ་སྟེ་ཉམས་རེ་དགའ༔ སྐལ་ལྡན་རིགས་བཟང་དགྱེས་པར་མཛོད༔ ཨྱོན་ཡུལ་དེར་ཁྲིད་ནས་འགྲོ༔ དཔའ་བོ་རྣམས་ལ་ཕོ་ཉར་བཀོད༔ དཔའ་མོའི་ཚོགས་ལ་འཕྲིན་ལས་བཅོལ༔ གསེར་གྱི་གདུ་
བུ་ཁྲོལ ་ལོ་ལོ༔ དངུལ་གྱི་མགུལ་ཨོང་སྤོངས་སེ་སྤོང་༔ ད་ནི་མཁའ་འགྲོའི་ཡུལ་དེར་གཤེགས༔ ༼ཆ༽ཀྱེ། རིགས་བཟང་དམ་ཚིག་ལྡན་པའི་རྣལ་འབྱོར་ཁྱེད༔ རིགས་བཟང་ལྷ་ཡི་སྐྱེས་བུ་འདི༔ ངེད་མཁའ་འགྲོའི་ཡུལ་དེར་མི་གཏོང་ན༔ རིགས་བཟང་དཔའ་བོ་དེའི་གླུད་ཚུར་ཐོང་ཞིག༔ ཤ་ཁྲག་རུས་པའི་གླུད་ཚུར་ཐོང་ཞིག༔ སྐྲ་དང་སེན་མོའི་གླུད་ཚུར་ཐིང་ཞིག༔ མགོ་ལུས་པགས་པའི་གླུད་ཚུལ་ཐོང་ཞིག༔ ངེད་མཁའ་འགྲོ་རྣམས་མི་སྡོད་ལོག་ནས་འགྲོ༔ ཨྠྀི༔ རྒྱ་རྒྱ་རྒྱ༔ ས་མ་ཡ༔ མཁའ་འགྲོ་རྣམས་ཀྱིས་གནང་བ་སྦྱིན་པ་འདི་སྐད་དོ༔ ༼ཇ༽ཀྱེ། ཁྱེད་ནི་བྱང་ཆུབ་སེམས་དཔའ་སྟེ༔ རང་དོན་དྲི་མས་ཁྱེད་མ་གོས༔ མཁའ་ཉམས་འགྲོ་ལ་ཁྱེད་སེམས་བརྩེ༔ ཁྱེད་ནི་དཔའ་བོ་ཆེན་པོ་སྟེ༔ བདུད་དང་མུ་སྟེགས་ཟིལ་གྱིས་གནོན༔ (༣བ)
ཁྱེད་ནི་ཡེ་ཤེས་སེམས་དཔའ་སྟེ༔ འཁོར་བའི་སྐྱོན་གྱིས་ཡོངས་མ་གོས༔ བསྟན་པ་ཡུན་རིང་བསྲུང་པའི་ཕྱིར༔ ཁྱེད་ཀྱི་བཀའ་བཞིན་སྒྲུབ་པར་བགྱི༔ ངེད་རྣམས་སོ་སོའི་གནས་སུ་འགྲོ༔ ཁྱེད་རྣམས་སྐུ་ཁམས་བཟང་བར་མཛོད༔ མཁའ་འགྲོ་བསུན་མ་རྣམས་ཀྱིས་གནང་བ་སྦྱིན་པར་བྱའོ༔ འབྱོན་བཞུད་ཀྱི་ཞུ་ལན་ཚོར༔ བླ་མ་ལ་འདི་སྐད་དོ༔ ཀྱེ། སེམས་ཅན་རྣམས་ཀྱི་མགོན་གྱུར་བླ་མ་རྗེ༔ ཁྱེད་ཨྱོན་ཡུལ་དུ་མི་བཞུད་པར༔ འགྲོ་བ་སེམས་ཅན་དོན་དུ་བོད་ཡུལ་དབུས་སུ་བཞུགས་པར་ཞུ༔ བུ་སློབ་རྣམས་དང་འགྲོ་བ་སེམས་ཅན་ལ༔ སྨིན་ཅིང་གྲོལ་བར་མཛད་དུ་གསོལ༔ ཅེས་ཆས་རྣམས་དབུལ་ལོ༔ སྔགས་པ་ཡིན་ན༔ ཀྱེ། ཐུགས་རྗེའི་མངའ་བདག་སྔགས་འཆང་ཁྱེད༔ ཨྱོན་མཁའ་འགྲོའི་གནས་སུ་མ་བཞུད་པར་བཞུགས་པར་ཞུ༔ ཞེས་མཁའ་འགྲོ་རྣམས་ཀྱིས་ཞུ་བ་བྱའོཿ མངྒ་ལཾ།། །