སངས་རྒྱས་ཀྱི་སྐྱེས་རབས་བརྒྱ་རྩའི་ཕྲེང་བ་ལ་མདོར་བསྡུས་སུ་བསྔགས་པ་རིན་པོ་ཆེ་གསེར་གྱི་མཆོད་སྡོང་།
༄༅། །གུཎསཱགརགྷནརཱཤིནཱམཛནཔཱདཏྱནྟགཏཱསརྦཔྲཏིཝརྞྞསྟུཏིཡུཀྟབརྒྒབིཧརཏིསྨ། །
སངས་རྒྱས་ཀྱི་སྐྱེས་རབས་བརྒྱ་རྩའི་ཕྲེང་བ་ལ་མདོར་བསྡུས་སུ་བསྔགས་པ་རིན་པོ་ཆེ་གསེར་གྱི་མཆོད་སྡོང་ཞེས་བྱ་བ།
འཕགས་པ་སྤྱན་རས་གཟིགས་དབང་ཕྱུག་བརྩེ་བ་ཆེན་པོ་དང་ལྡན་པ་དེ་ལ་ཕྱག་འཚལ་ལོ། །དཔག་མེད་ཡོན་ཏན་ཀུན་ནས་ཡོངས་གང་རྫོགས་ལྡན་ནོར་བུའི་སྤྲིན་ཆེན་ལས། །དགེ་ལེགས་འདོད་དགུ་ཕན་བདེའི་གྲུ་ཆར་ཕྱོགས་ཀྱི་ཕ་མཐར་རྟག་ཁྱབ་པས། །ས་གསུམ་སྐྱེ་དགུའི་རེ་བ་རྫོགས་མཛད་མཚུངས་མེད་དཔལ་ལྡན་ཤཱཀྱའི་སྲས། །དེ་ཡི་རྗེས་འཇུག་འཕགས་པའི་ཚོགས་བཅས་ཕྱག་འོས་ཀུན་ལ་དང་བས་འདུད། ༡ །གང་ཞིག་མཐོང་དང་ཐོས་པ་ཙམ་གྱིས་དད་བརྒྱའི་ཆུ་གཏེར་འཕེལ་བྱེད་ཅིང་། །དྲན་པ་ཡིས་ཀྱང་དཀར་ཆོས་རིགས་ཀྱི་མྱུ་གུ་མཐའ་དག་བསྐྱེད་ནུས་པའི། །ཐུབ་པའི་སྐྱེས་རབས་ཤིན་ཏུ་རྒྱ་ཆེ་ཟབ་མོ་འཕགས་པའི་སྤྱོད་ཡུལ་མཆོག །འཕགས་བོད་མཁས་པའི་ལེགས་བཤད་རྗེས་འབྲང་དད་པའི་ངག་གིས་ཅུང་ཟད་བརྗོད། ༢ །དབང་ཕྱུག་ཡོན་ཏན་རིན་ཆེན་བྱེ་བས་ཡོངས་གཏམས་སྔོན་མེད་གྲུ་གཟིངས་མཆོག །ཤེས་རབ་སྙིང་བརྩེའི་བ་དན་དང་འགྲོགས་ཚོགས་གཉིས་རླུང་ཤུགས་ཀྱིས་བསྐྱོད་པས། །དོན་མཐུན་མགྲོན་རྣམས་རྣམ་གྲོལ་གྲོང་ཁྱེར་མཆོག་ལ་སྦྱོར་ནུས་མཁས་པ་དེས། །བཀྲེས་པས་ཟིལ་ནོན་ཡི་དྭགས་གཟུགས་ཅན་སྟག་མོར་སྐུ་ལུས་གཏོང་ལ་འདུད། ༣ །དམ་པ་རྣམས་ནི་གཞོན་ནུར་གྱུར་ཀྱང་རྒན་པོའི་བློ་གྲོས་མཆོག་ལ་གནས། །ལང་ཚོའི་དཔལ་གྱིས་ཀུན་ནས་དྲེགས་ཀྱང་དུལ་བའི་བརྟུལ་ཞུགས་ཉམས་པ་མེད། །མཐོན་པོར་གྱུར་ཀྱང་དམན་ལ་རྗེས་བརྩེའི་གཟིགས་པ་རབ་བཙའ་ཤི་པི་བདག །པདྨ་རྒྱས་འདྲའི་སྤྱན་ཡངས་བྲམ་ཟེ་ལོང་བར་སྩོལ་བར་མཛད་དེར་འདུད། ༤ །གང་ཞིག་ཕྱོགས་ཀྱི་རྒྱལ་ཕྲན་ཆེ་དགུ་དུ་མའི་གཙུག་གི་ནོར་བུ་ཡི། །འོད་ཀྱིས་རྐང་རྟེན་མཛེས་བྱས་དཔལ་ལྡན་ཀོ་ས་ལ་ཡི་མི་བདག་གི། །ཞིང་བསམ་དག་པའི་དངོས་པོ་ཆུང་ངུའང་འབྲས་བུ་ཆེན་པོའི་ཚུལ་གཟིགས་ནས། །སྔོན་རབས་གཏམ་གྱིས་སྐྱེ་དགུ་དགའ་སྐྱེད་སྦྱིན་པའི་སྒོ་འཕར་ཕྱེས་ལ་འདུད། ༥ །མི་བཟོད་དམྱལ་བའི་མེ་མདག་གཤིན་རྗེའི་ཁ་བཞིན་མདུན་ན་ཉེར་གནས་ཤིང་། །ལྷ་བུའི་བདུད་ཀྱིས་ཕན་པར་འདོམ་བཞིན་སྣ་ཚོགས་སྒྱུ་ཡིས་ཟློག་བྱེད་ཀྱང་། །སྦྱིན་ལ་དཔའ་བའི་སྙིང་སྟོབས་དམ་བཅའི་གོ་ཆ་ཆ་ཙམ་དབྲལ་མིན་ཚེ། །ལེགས་བྱས་བསོད་ནམས་འབྲས་བུ་ངོམ་བཞིན་སྟེང་འཐུང་ཀེེ་སར་རྒོད་ལ་འདུད། ༦ །སུ་ཞིག་འཇིག་རྟེན་བཀྲེན་ལྡན་སློང་བ་རྣམས་ཀྱི་འདོད་འཇོའི་གཏེར་གཅིག་པུ། །ལྷ་ཡི་དཔག་བསམ་རྐང་འཐུང་མཆོག་ལས་བརྒྱ་ཕྲག་ཡོན་གྱིས་ཆེས་མཐོ་བའི། །ཟིལ་གྱིས་མི་གནོན་ཚོང་དཔོན་མཆོག་དེ་ནོར་མེད་གྱུར་ཀྱང་ཞུམ་མིན་པར། །སྦྱིན་ལ་ལྷག་པར་སྤྲོ་བའི་བརྩོན་འགྲུས་ལྷ་ཡི་དབང་པོས་བསྔགས་ལ་འདུད། ༧ །དམ་པ་རྣམས་ནི་དམན་པར་སྐྱེས་ཀྱང་རྟག་པར་གཞན་ཕན་གོམས་པའི་ཤུགས། །མ་རྨས་ཀུན་ནས་དགེ་བའི་བློ་གྲོས་ངང་གིས་དར་བ་ཆོས་ཉིད་ཕྱིར། །མགྲོན་ལ་སྙིང་བརྩེ་ཁོ་ནས་རྗེས་དགོངས་རབ་འབར་བྱིན་ཟའི་ཚང་ཚིང་དུ། །ལྷ་ཡི་དགའ་ཚལ་བཞིན་དུ་ཞུགས་མཛད་བློ་ལྡན་རི་བོང་མཆོག་དེར་འདུད། ༨ །སྐྱེ་རྒ་ན་འཆིའི་སྡུག་བསྔལ་རྦ་རླབས་ཅ་ཅོ་སྒྲོགས་པ་སྲིད་པའི་མཚོར། །མངོན་པར་ཡིད་སྐྱོ་ཞི་བའི་དགོན་པར་དཀའ་ཐུབ་གྲུབ་པ་ཨ་གསྟི། །རང་སྲོག་ལྟོས་མེད་སྦྱིན་ལ་ཆེས་དཔའ་ལེགས་བཤད་གཏམ་གྱི་མིག་སྟོང་ཅན། །དད་བྱས་འབྱོར་བས་བརྒྱ་ཕྲག་འཕགས་ཚོགས་ཀུན་ནས་བསྙེན་བཀུར་མཛད་ལ་འདུད། ༩། ཁོང་ནས་མེ་འབར་ལྟས་ངན་སྒྲར་བཅས་མི་རྣམས་གསོན་པོར་ཟ་བྱེད་པའི། །མི་བསྲུན་འབྱུང་པོ་གདུག་པའི་ཁ་ཡང་གང་གི་མཐུ་ཡིས་ཟུམ་ནུས་པའི། །དཔལ་རྒྱས་ས་བདག་བྱམས་པའི་སྟོབས་ཀྱིས་རང་གི་ཤ་དང་ཁྲག་དག་གིས། །གནོད་སྦྱིན་ལྔ་ཕྲག་རེ་བ་ཡོང་སྐོང་མཐར་ཐུག་སྲིད་ལས་བསྒྲལ་ལ་འདུད། ༡༠ །རིགས་གཟུགས་དབང་ཐང་ཐོས་པས་ཕྱུག་ཀྱང་རྒྱགས་དང་དྲེགས་པའི་ སེམས་མི་མངའ། །རྒུད་པར 
་གྱུར་ཀྱང་ཞུམ་དང་སྒྱིད་ལུག་ལེ་ལོ་མ་མཆིས་རྒྱལ་སྲས་མཆོག །རྟ་དང་གླང་པོ་བུ་དང་བུ་མོ་དེ་བཞིན་ཆུང་མ་དག་ཀྱང་གཏོང་། །ལེགས་བྲིས་གཙོ་སོགས་ཆེ་དགུས་ཕྱག་བྱས་ས་བདག་ཐམས་ཅད་སྒྲོལ་ལ་འདུད། ༡༡ །བསྒྲང་ཡས་བསྐལ་པར་གོམས་པའི་མ་རྨད་བློ་གྲོས་དགེ་བའི་སྤོབས་པ་ཅན། །ས་བདག་མཆོག་དེ་བསླུ་བྱེད་ཞི་བའི་ཚིག་གིས་གཡོ་བར་ནུས་མིན་པར། །ཐབས་མཁས་མཐུ་ཡིས་འགྲོ་བ་ཡོངས་སྐྱོབ་རྫོགས་ལྡན་གསར་དུ་འབོད་པའི་གཉེན། །མཆོད་སྦྱིན་བྱེད་གྱུར་སྦྱིན་པའི་ཕར་ཕྱིན་ཡོངས་རྫོགས་མཛད་པ་དེ་ལ་འདུད། ༡༢ །སྦྱིན་པའི་ཕ་རོལ་ཏུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་དང་པོའོ། །ཉི་མ་ལས་ནི་མུན་པའི་དངོས་དང་དེ་བཞིན་ཟླ་བའི་ཟེར་ལས་དུག །དེ་བཞིན་བློ་ཆེན་འཕགས་པའི་མདུན་སར་གཞན་གནོད་བསམ་སྦྱོར་གནས་མིན་ཕྱིར། །ལེགས་བྲིས་གཙོ་བོ་མཆོག་དེས་འདབ་བཟང་ཕྲུ་གུ་ཉམས་ཉེས་གྱུར་གཟིགས་ནས། །དཔལ་འབྱོར་ལུས་སྲོག་ལའང་ལྟོས་མེད་སྡོམ་པའི་ཚུལ་ཁྲིམས་བརྟན་ལ་འདུད། ༡༣ །ཤེས་རབ་སྙིང་བརྩེ་ཟབ་ཅིང་བརླིང་བའི་ལང་ཚོའི་ཁུར་གྱིས་རྣམ་པར་དུད། །དྲི་མེད་ངོ་ཚ་ཤེས་གྱུར་བག་ཡོད་དར་གོས་རིན་ཆེན་རྒྱན་གྱིས་སྒེག །ལེགས་བཤད་གཏམ་གྱི་ཟུར་མིག་གཡོ་བས་མཁན་པོའི་ཡིད་སྐྱེས་གཞོན་ནུ་ཡང་། །དབང་མེད་འགུགས་པ་བྲམ་ཟེ་གཞོན་ནུ་ལྷ་ཡི་མེ་ན་ཀ་དེར་འདུད། ༡༤ །གང་ཞིག་མཐོང་ན་ཐུབ་པ་དྲང་སྲོང་རྣམས་ཀྱི་ཡིད་ཀྱང་བསླུ་ནུས་པའི། །མི་ཡི་བུ་མོ་བདེ་སོགས་དཔལ་འཛིན་མྱོས་བྱེད་འདོད་ལྷའི་མདའ་རྣོན་གྱིས། །དྲན་དབང་གཟས་པའི་ཚོར་བ་མི་བཟད་གཟུགས་ཅན་བཞིན་དུ་མངོན་རྒྱུ་ཞིང་། །གྲོགས་ཀྱིས་བསྐུལ་ཡང་བློ་ཆེན་ས་བདག་ཚུལ་ཁྲིམས་བཏང་བ་མེད་དེར་འདུད། ༡༥ །ས་འདི་རིར་བཅས་མཁའ་ལ་འགྲོ་དང་ཉི་ཟླ་སྐར་ཕྲེང་ལྷུང་སྲིད་ཀྱང་། །འཕགས་པའི་བདེན་ཚིག་ནམ་ཡང་གཞན་དུ་འགྱུར་བ་མི་སྲིད་ཆོས་ཉིད་ཕྱིར། །ལེགས་པར་ཕ་རོལ་ཕྱིན་གྱུར་འཚེ་བ་རྣམ་སྤངས་བདེན་ཚིག་གསོལ་ཙམ་གྱིས། །རྒྱ་མཚོའི་ཀློང་འཁོར་ཆུ་སྲིན་ཁར་ཆུད་གྲུ་ཡང་བདེ་བར་འཁོར་ལ་འདུད། ༡༦། ཤིན་ཏུ་མི་བཟད་ཀུན་ནས་འབར་ཞིང་འཁྲུག་པ་ཉི་མའི་ཟེར་དག་གིས། །མཚོ་རྫིང་ལྟེང་ཀ་བཀོད་མའི་ཆུ་རྣམས་ཉིན་བཞིན་འཐུང་བ་བཞིན་གྱུར་པའི། །མྱ་ངན་ཐང་ལ་འཚོ་བ་མཐར་བྱེད་ཉ་ཚོགས་སྐྱབ་སླད་གསེར་མིག་དབང་། །ཚུལ་ཁྲིམས་བདེན་པས་ཡོངས་སུ་འབྱོར་མཛད་རྡོ་རྗེ་ཅན་གྱིས་བཏུད་ལ་འདུད། ༡༧ །མི་བཟད་དུ་མའི་དཔུང་ཚོགས་གཤིན་རྗེ་ཁྲོས་པའི་གདོང་བཞིན་ཆེར་རྔམས་ཤིང་། །མེ་ལྕེའི་ཕྲེང་བ་ལག་པ་གཡོ་བའི་གར་སྟབས་དང་འགྲོགས་བརྟན་གཡོའི་བཅུད། །ཀུན་ནས་ཟ་བར་ཆས་གང་བརྩེ་བྲལ་རླུང་དམར་འཁྲུགས་པས་ཉེར་བསྐུལ་ཀྱང་། །འཕགས་པའི་ཚུལ་ཁྲིམས་མཐུ་ཡིས་སྲེག་ཕྲུག་བཀའ་ལས་འགོང་བ་མེད་དེར་འདུད། ༡༨ །གང་ཞིག་བཏུང་ན་མདངས་དང་གཟི་བརྗིད་དཔལ་དང་གྲགས་པ་རྣམ་དཔྱོད་བློ། །ཀུན་ནས་ཉམས་བྱེད་བག་མེད་མྱོས་འགྱུར་མི་ཡི་བདག་པོའི་དྲི་མའི་དཔུང་། །ཚུལ་གནས་བློ་གྲོས་བུམ་བཟང་ལས་འོངས་ལེགས་བཤད་བདུད་རྩིས་འཁྲུད་མཁས་པའི། །ལྷ་ཡི་དབང་པོ་སྔོན་མེད་དྲང་སྲོང་མི་ནུབ་གྲགས་འབར་དེ་ལ་འདུད། ༡༩ །སྲིད་པ་སྲིན་མོའི་གླིང་འདྲ་མི་བརྟན་གཡོ་བ་སྒྱུ་མའི་གར་མཁན་ལྟའི། །ངང་ཚུལ་ལེགས་རྟོགས་ཞི་བའི་ནགས་སུ་དབེན་གསུམ་བདུད་རྩིར་སྤྱོད་པ་ལས། །གཡོན་ཅན་གྲོགས་ཀྱི་བསླུ་བྲིད་བརྒྱ་ཡིས་ཡུད་ཙམ་གཡོ་བའི་སྐབས་བྲལ་བའི། །རྒྱལ་རིགས་ཕྱུག་པོར་འཁྲུངས་གྱུར་ཚུལ་ཁྲིམས་རིན་ཆེན་རྒྱན་གྱིས་སྒེག་ལ་འདུད། ༢༠ །ཇི་ལྟར་སྦྲུལ་དུག་གདུག་པས་ཟིན་ཡང་སྨན་དང་སྔགས་ཀྱིས་བཅོས་རུང་མོད། །འདོད་པའི་དུག་གིས་ཟིན་རྣམས་ནམ་ཡང་དེ་ལྟ་མིན་པའི་ཚུལ་རིགས་ནས། །ཆོག་ཤེས་པད་རྩའི་འཚོ་བར་རྟེན་གྱུར་ལེགས་བཤད་བདུད་བརྩིའི་དགའ་སྟོན་གྱིས། །མཆོད་སྦྱིན་བརྒྱ་བ་ཀུན་ནས་དད་མཛད་བྲམ་ཟེའི་དྲང་སྲོང་མཆོག་ལ་འདུད། ༢༡ །མིག་གི་ཡལ་འདབ་མཆི་མས་བརླན་ལྡན་མཛའ་བཤེས་སྟོང་གི་ལམ་འགེགས་ཀྱང་། །བསྐལ་མང་གོམས་པའི་ལེགས་བྱས་བསོད་ནམས་མཐུན་པའི་རླུང་ཤུགས་ཀྱིས་བསྐུལ་བས། །ཞི་བའི་ནགས་འདབས་རིན་ཆེན་གླིང་དུ་ཐོགས་མེད་བགྲོད་པའི་ཚོང་དཔོན་མཆོག །སེམས་ཅན་ཀུན་དོན་བྱེད་པའི་ཚུལ་ཁྲིམས་ཕ་རོལ་ཕྱིན་རྫོགས་མཛད་ལ་འདུད། ༢༢ །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་གཉིས་པའོ། །ཟླ་བ་མར་གྱི་ངོ་བཞིན་ཕུན་ཚོགས་དཔལ་ཀུན་ཟད་བྱེད་ཁྲོ་བོའི་དགྲ། །བྱམས་པ་ཆེ་དང་སོ་སོར་བརྟགས་པའི་མཚོན་གྱིས་མིང་མཐར་བྱས་ཟིན་པས། །གཙུག་ཕུད་བྱང་ཆུབ་ཆུང་མ་འཕྲོག་དང་མི་སྙན་ཚིག་གིས་སྤྱོས་གྱུར་ཀྱང་། །གཡོ་མེད་སྙན་པའི་ཚིག་གིས་ས་བདག་དད་པའི་གནས་ལ་སྦྱར་དེར་འདུད། ༢༣ །དམ་པ་རྣམས་ནི་དུད་འགྲོར་སྐྱེས་ཀྱང་དྲངས་ཤིང་བཟོད་ལྡན་ཕན་པ་སྒྲུབ། །མ་རབས་སྐྱེ་བོའི་ཚོགས་རྣམས་ཕན་པར་སྨྲ་ཡང་ཕ་རོལ་བསླུ་བྱེད་ཉིད། །ངང་པའི་རྒྱལ་པོ་གཡོན་ཅན་རྒྱ་ཡིས་བཅིངས་ཀྱང་འཁྲུགས་མེད་ལེགས་བཤད་ཀྱིས། །མི་ཡི་བདག་པོ་ཉོན་མོངས་རྙི་ལས་འགྲོལ་མཛད་གྲགས་པའི་གཏེར་ལ་འདུད། ༢༤ །འཁོན་དུ་གྱུར་ཀྱང་བརྩེ་བ་འདོར་མིན་དྲིན་བཟོའི་ལེགས་བཤད་འོད་སྟོང་གིས། །མུ་ཅོར་སྨྲ་བའི་བློན་ཚོགས་འབྱུང་བྱའི་བློ་གྲོས་བླུན་པོའི་མིག་ཟུམ་ནས། །ཡང་དག་ལྟ་བའི་ལམ་བཟང་སྣང་བྱས་ཐར་གྲོལ་པད་ཚལ་ཆེར་བཞད་པའི། །བྱང་ཆུབ་ཆེན་པོ་ཡོན་ཏན་ཡོངས་གང་སྔོན་མེད་ནམ་མཁའི་ནོར་བུར་འདུད། ༢༥ །མི་བཟད་གཡང་ས་གཤིན་རྗེ་གདུག་པའི་ཁ་དང་འདྲ་བར་ཆུད་གྱུར་པའི། །མི་དག་བློ་ཆེན་བརྩོན་པའི་ཕྲག་པས་འཚོ་བ་ཕྱིར་བསྣུར་བདེར་བཀོད་ཀྱང་། །མི་བརྟན་འཁྱོགས་པོའི་བློ་ནི་རྨོངས་པས་ཟིལ་ནོན་སླར་ལ་འཚེ་བྱེད་པར། །མི་འཁྲུགས་བཟོད་ལྡན་བྱམས་པའི་མ་ལྟར་ཕན་འདོགས་སྤྲེའུ་མཆོག་དེར་འདུད། ༢༦། ཡིད་ནི་འདོད་པའི་ཆང་གི་ཆེར་མྱོས་ས་བདག་གླང་ཆེན་ཁྲོས་པའི་སྣར། །མ་རུངས་དུག་མདའི་མཚོན་འཁོར་བསྐྱོད་བཞིན་བདག་སྲོག་འཕྲོག་ལ་ཆས་གྱུར་གང་། །ཤིན་ཏུ་མི་བཟད་གཡང་ས་དུག་སྦྲུལ་གདུག་པའི་གྲེེ་བར་ཉམས་ཉེས་པའང་། །འཁོན་སྤངས་བྱམས་པས་བདེ་བར་ངལ་གསོ་སྦྱིན་མཛད་ཤ་རྭ་བྷ་དེར་འདུད། ༢༧ །གསེར་གྱི་མཆོད་སྡོང་སྣ་ཚོགས་རིན་ཆེན་བྱེ་བའི་ཕྲ་ཡིས་སྤུད་པ་བཞིན། །ལྷར་བཅས་སྐྱེ་དགུའི་མིག་གི་བདུད་རྩི་བལྟ་ན་རབ་དགའི་རུ་རུ་མཆོག །མི་བསྲུན་སྐྱེ་བོས་ཕན་བཏགས་ལན་དུ་གཙེས་པའང་བཟོད་པས་སྐྱབས་མཛད་ནས། །མི་སྐྱོང་འཁོར་བཅས་ཐེག་ཆེན་ལམ་གྱི་ཤིང་རྟ་ཆེན་པོར་བཀོད་ལ་འདུད། ༢༨ །ས་བདག་ཁྲོས་པའི་དཔུང་གི་ང་རོས་གནམ་དབྲལ་ས་གཞི་གྲུམ་པ་བཞིན། །རྡུལ་འཚུབ་གཡོ་བས་ཉི་ཟླའི་མིག་ཟུམ་མདའ་མཚོན་སྐར་མདའ་འཁྲུག་པ་ལྟའི། །སྐད་ཅིག་གཉིས་པར་མི་གནས་ཕྱི་མའི་ལྟད་མོར་ཆས་གྱུར་ཉམ་ཐག་འཁོར། །འཚེ་བ་སྲིང་སླད་རང་སྲོག་ཡོངས་གཏོར་སྤྲེའུ་རྒྱལ་པོ་མཆོག་ལ་འདུད། ༢༩། གང་གིས་ཉེས་པ་འགའ་ཡང་མ་བྱས་བདེན་དང་དུལ་བར་གནས་བཞིན་དུ། །ས་བདག་སྡིག་པའི་རང་བཞིན་བབས་ཅོལ་སྤྱོད་པ་གཤིན་རྗེའི་ཕོ་ཉ་བཞིན། །དཀའ་ཐུབ་གནས་བཅོམ་རྐང་ལག་རྣ་བ་སྣར་བཅས་དུམ་བུར་གཏུབས་བྱས་ཀྱང་། །བྱང་ཆུབ་
སེམས་དཔའི་ཐུགས་ནི་ཀུན་ཏུ་འཁྲུགས་མིན་བཟོད་པར ་སྨྲ་ལ་འདུད། ༣༠ །ཏིང་འཛིན་མཐུ་ཡིས་བསྐལ་པར་གནས་བཅས་འོད་དང་གཟི་བརྗིད་རྨད་བྱུང་བའི། །ཚངས་ཉིད་ཆགས་བྲལ་བདེ་བ་ཐོབ་ཀྱང་བག་མེད་མ་གྱུར་དམན་དག་ལ། །ལྷག་པར་བརྩེ་བའི་ཐུགས་ཀྱིས་ཉེར་དགོངས་འདོད་པ་ཁམས་ཀྱི་སྡིག་ལྟའི་མུན། །ལེགས་བཤད་འོད་སྟོང་ཟེར་གྱིས་སེལ་མཛད་ཚངས་པའི་དྲང་སྲོང་མཆོག་ལ་འདུད། ༣༡ །རང་བཞིན་ཡོན་ཏན་ཤིན་ཏུ་རྒྱ་ཆེ་ས་སྲུང་ས་ལ་འོང་བ་ལྟའི། །ནགས་ཀྱི་གླང་པོ་མཆོག་གི་རྟོག་ཅན་བདུན་བརྒྱའི་དུབ་པ་སེལ་སླད་དུ། །སྤྲིན་དཀར་སར་པའི་ཕུང་པོ་འཁྲིགས་འདྲའི་སྐུ་ལུས་གཏོང་ཡང་བཟོད་པ་ཡིས། །སེམས་ཅན་ཀུན་དོན་བྱེད་པའི་བཟོད་པའི་ཕར་ཕྱིན་ཡོངས་རྫོགས་མཛད་ལ་འདུད། ༣༢། བཟོད་པའི་ཕ་རོལ་དུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་གསུམ་པའོ། །གང་ཞིག་ཐོས་ན་རྒྱལ་རིགས་རྣམས་ཀྱི་ཅོད་པཎ་ས་ལ་བསྙིལ་བྱེད་ཅིང་། །བུད་མེད་སྦྲུམ་མ་རྣམས་ཀྱི་བསོད་ནམས་དཔུང་བཅས་མངལ་གནས་ལྷུང་བྱེད་པའི། །མི་ཡི་སྲིན་པོ་རྐང་ཁྲའི་སྡིག་ལྟའི་མུན་པ་མི་བཟད་དྲི་མའི་དཔུང་། །སྙིང་སྟོབས་བརྩོན་པའི་ལེགས་བཤད་བདུད་རྩིས་འཁྲུད་མཁས་ས་བདག་ཟླ་བར་འདུད། ༣༣ །འགྲོ་བ་མགོན་མེད་རྒ་ན་འཆི་སོགས་མི་བཟད་སྡུག་བསྔལ་གྱིས་གཙེས་པར། །མངོན་པར་ཡིད་འབྱུང་བསྐལ་མང་གོམས་པའི་སྙིང་རྗེའི་ཤུགས་ཀྱིས་ཉེར་དྲངས་པའི། །ལྕགས་ཀྱི་ཁྱིམ་གནས་རྒྱལ་སྲས་མཆོག་དེས་སྲིད་འབྱོར་དཔལ་ལ་དོགས་མེད་པར། །གཅིག་པུར་ཞི་བའི་ནགས་སུ་བརྩོན་པས་ཚངས་སྤྱོད་བརྟུལ་ཞུགས་བརྟན་ལ་འདུད། ༣༤ །གནམ་ལྕགས་རྡོ་རྗེའི་རྭ་ཡིས་གདོང་ལྔའི་ཚོགས་ཀྱང་སྐྲག་ནས་བྱེར་བྱེད་ཅིང་། །ནགས་ཀྱི་གླང་ཆེན་ཁྲོས་པའི་ཁྱུ་ཡང་སྟོབས་ཀྱིས་དཔའ་བཀོང་བཟོད་པ་ཡི། །ཁྱུ་མཆོག་ཡིད་ནི་སྙིང་རྗེ་ཆེན་པོའི་ཟིལ་གྱིས་ལན་བརྒྱར་གནོན་པའི་རྒྱུས། །མི་བསྲུན་འཚེ་ལ་མངོན་གོམས་སྤྲེའུས་ལོག་སྦྱོར་བརྩོན་པས་བཟོད་ལ་འདུན། ༣༥ །བུ་ཡིས་ཉེས་པར་སྤྱད་པ་མཐོང་ཚེ་མ་དག་ལྷག་པར་བརྩེ་བ་བཞིན། །དམ་པ་རྣམས་ནི་དམན་པའི་འགྲོ་ལ་ཀུན་ཏུ་བརྩེ་བ་ཆོས་ཉིད་ཕྱིར། །རྣོ་ལྡན་རུས་པའི་མཚོན་གྱིས་ཉམས་ཉེས་ལྔ་པར་ཕྱོགས་གྱུར་ཁ་ལྔ་པ། །བསྐྱབས་དེས་བྱས་པ་མི་གཟོར་གྱུར་ཀྱང་འཁྲུགས་མིན་ཤིང་རྟ་མོ་དེར་འདུད། ༣༦ །གསེར་སྦྱངས་བཞུས་པའི་ཁུ་བས་བྱེད་པོས་ལན་སྟོང་བྱུག་ལ་ཅོ་འདྲི་བའི། །བལྟ་ན་རབ་དགའི་གཅན་གཟན་རྒྱལ་པོ་ཚངས་པའི་དྲང་སྲོང་གཞོན་ནུ་བཞིན། །བདེན་དང་དུལ་བ་མི་འཚེར་སྦྱོར་ཞིང་ངུར་སྨྲིག་རྟགས་ཙམ་འཆང་བ་ལའང་། །སྲོག་གི་ཕྱིར་ཡང་གནོད་པ་ཡོངས་སྤངས་གོ་ཆའི་བརྩོན་འགྲུས་བརྟན་དེར་འདུད། ༣༧། འཇིག་རྟེན་སྐྱེ་བོ་རྣམས་ནི་བདག་ཉིད་སྲུང་ཕྱིར་གཞན་གྱི་སྲོག་ལ་རྔམས། །ཡ་རབས་དམ་པ་རྣམས་ཀྱིས་རང་གི་སྲོག་གིས་གཞན་དག་སྲུང་བར་བྱེད། །རྒྱ་མཚོར་གྲུ་གཟིངས་ཞིག་གྱུར་ཉམ་ཐག་ལྔ་བརྒྱ་འཚོ་བ་ཕྱིར་བསྣུར་ཆེད། །བདག་སྲོག་ཡོངས་གཏོང་དེད་དཔོན་བརྩོན་འགྲུས་ཆེར་གྱུར་སྙིང་སྟོབས་ལྡན་ལ་འདུད། ༣༨ །ལྷ་བཞིན་འབྱོར་ཡང་ཁེངས་དྲེགས་མི་མངའ་བདོག་པ་འགྲོ་ལ་ཐུན་མོང་ཉིད། །ཡི་དྭགས་བཞིན་དུ་རྒུད་ཀྱང་ཞུམ་མིན་སྲོག་གི་གསོས་གྱུར་འཚོ་ལྷག་ཀྱང་། །འཕགས་ལ་མཆོད་པའི་བརྩོན་པ་ལྷུར་ལེན་དགེ་མཚན་བསོད་ནམས་སྤྲིན་ཆེན་ལས། །འདོད་དགུའི་ཆར་གྱིས་འགྲོ་ཚོགས་རེ་སྐོང་ས་བདག་གསེར་གྱི་མདོག་ལ་འདུད། ༣༩ །སྲིད་པ་བརྟན་གཡོའི་མཛེས་ཆོས་དྭངས་མ་གཅིག་ཏུ་བསྡོམས་ལས་འཕྲུལ་ལམ་ཅི། །ཚངས་པའི་དྲང་སྲོང་མཆོག་གཅིག་ས་ལ་འོངས་སམ་འདི་ནི་ཅི་ཞིག་ཅེས། །བློ་ཆེན་ཕུར་བུའི་ཡིད་ཀྱང་ཐེ་ཚོམ་ཁྱོགས་ལ་འཕྱང་བྱས་ཀུན་དྷ་ཡིས། །རང་གི་པགས་པ་མཆོག་ཀྱང་སྩོལ་ལ་མི་འགོང་བརྩོན་འགྲུས་བརྟན་ལ་འདུད། ༤༠ །བརྩོན་འགྲུས་སྟོབས་ཀྱིས་རྨུ་རྒོད་སྙིགས་མའི་འགྲོ་བ་མ་ལུས་ཆོས་ལ་བཀོད། །བསོད་ནམས་སྟོབས་ཀྱིས་རྩོད་དུས་ཕྱིར་བསྙིལ་རྫོགས་ལྡན་དགའ་སྟོན་མགྲོན་དུ་ཁུག །སྨོན་ལམ་སྟོབས་ཀྱིས་རང་གི་མིག་དང་པགས་པ་དག་ཀྱང་གཏོང་བར་ནུས། །ཡེ་ཤེས་སྟོབས་ཀྱིས་ལྷར་བཅས་སྐྱེ་དགུའི་མཆོད་སྡོང་གཅིག་པུར་གྱུར་ལ་འདུད། ༤༡ །ཡེ་ཤེས་མེ་ཡིས་ཉོན་མོངས་བུད་ཤིང་སྐམ་པོ་མ་ལུས་བསྲེགས་པ་དང་། །ཆབས་ཅིག་རྣམ་སྨིན་ལུས་ཀྱང་འགྲོ་བ་མ་རིག་མུན་པ་སེལ་སླད་དུ། །ཏིལ་མར་བཙོས་པའི་རས་བཟང་གིས་དཀྲིས་སྲས་བཅས་རྒྱལ་བའི་སྤྱན་ལམ་ན། །མཆོད་པའི་སྤྲིན་ཆེན་གཏིབས་པས་བརྩོན་འགྲུས་མཐར་ཕྱིན་གྲགས་པའི་འོད་ལ་འདུད། ༤༢ །བརྩོན་འགྲུས་ཀྱི་ཕ་རོལ་དུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་བཞི་པའོ། །སེམས་གཙང་དགེ་བའི་སྤྲིན་གྱིས་ལེགས་བསྐུལ་ཁྱིམ་བདག་རྨ་བྱའི་བུ་མོ་ནི། །རྒྱལ་བའི་ཐུགས་རྗེའི་གློག་ཕྲེང་གིས་དྲངས་ལེགས་གསུང་དབྱར་གྱི་རྔ་གསང་གིས། །ཟག་མེད་ཞི་བའི་དགའ་བས་ཆེར་མྱོས་དཔག་མེད་ཏིང་འཛིན་ཟློས་གར་གྱིས། །ས་གསུམ་སྐྱེ་དགུའི་ཚོགས་རྣམས་དགའ་མཛད་དབེན་པ་འདོད་པར་འཁྲུངས་ལ་འདུད། ༤༣ །ཟླ་བའི་འོད་ཀྱི་ཐིལ་གྱིས་གནོན་པའི་ས་ཆེན་རིར་བཅས་ཡོངས་བཏང་ནས། །ཞི་བའི་ནགས་སུ་ཟག་མེད་ཏིང་འཛིན་བདུད་རྩི་མཆོག་ལ་སྤྱོད་བཞིན་དུ། །མྱ་ངན་མགྲོན་རྣམས་དབུགས་འབྱིན་ཏིལ་མར་གྱིས་དཀྲིས་ཕྱག་གི་སྒྲོན་མེ་ཡིས། །ལམ་བཟང་སྣང་མཛད་མཚན་གྱི་གྲགས་པ་ཀུན་ནས་དོན་ལྡན་མཛད་ལ་འདུད། ༤༤། གང་ཞིག་ཚངས་རྐུད་འཆིང་མིན་དབྱུག་རིལ་མི་ལྡན་ནའང་དྲང་སྲོང་མཆོག །ངུར་སྨྲིག་གོས་ཀྱིས་ཀླུབ་པ་མེད་ཀྱང་ཡིད་ནི་དུལ་བའི་དགེ་སྦྱོང་དངོས། །དུད་འགྲོའི་གཟུགས་སུ་སྣང་ཡང་འཕགས་པའི་བློ་གྲོས་ཉམས་པ་མི་མངའ་བས། །གྲོགས་ཀྱི་དཀའ་ཐུབ་སྲུང་སླད་རང་ལུས་གཏོང་བཟོད་རི་བོང་མཆོག་དེར་འདུད། ༤༥། འཕྱོར་ཞིང་གཡེངས་རྣམས་དཔག་ཚད་དུ་མའི་དགོན་པར་གནས་ཀྱང་དབེན་མི་འགྱུར། །ནང་དུ་ཉོན་མོངས་དགྲ་བོ་ཆོམ་རྣམས་གྲོང་དུ་སྡོད་ཀྱང་དབེན་པ་སྟེ། །ཡིད་འོང་བཙུན་མོ་བརྒྱད་ཁྲིའི་དབུས་སུ་ཏིང་འཛིན་དམ་པ་མཆོག་གྲུབ་ནས། །འབངས་འཁོར་མཐའ་དག་ཚངས་ཐེག་ལ་སྦྱར་ཀུན་ཏུ་གོ་བྱེད་མཆོག་ལ་འདུད། ༤༦། ལྷག་པའི་བསམ་པས་ལེགས་པར་འདོམས་པ་ཚངས་པའི་རྔ་ཆེན་གསར་འབར་བས། །ས་བདག་འཁོར་བཅས་བག་མེད་གཉིད་ལ་ཡོལ་ལས་ཉེ་བར་སད་བྱས་ནས། །བསླུ་ཚིག་དུག་ཆུས་མྱོས་པའི་བློ་གྲོས་བླུན་པོའི་དཔུང་གིས་བརྫི་མིན་པར། །ཟག་མེད་ཞི་བའི་ཏིང་འཛིན་མཆོག་གྲུབ་ཁྱེའུ་ཟུང་དུ་གྱུར་ལ་འདུད། ༤༧། བདེ་གཤེགས་གཟི་བརྗིད་ཚོགས་ཀྱི་རྒྱལ་པོའི་ཐུགས་རྗེའི་ཉི་ཟེར་གྱིས་ཕྱེ་བའི། །ཛམ་བུའི་རྒྱལ་མཚན་མཛེས་པའི་ཏོག་གྱུར་ས་བདག་འབངས་འཁོར་པདྨོའི་ཚལ། །བསླབ་གསུམ་ཀེེ་སར་རྒོད་པའི་དྲི་ལ་རྣམ་སད་རྐང་དྲུག་ཚོགས་འདུ་ཞིང་། །ཆོས་མཐུན་ཡོ་བྱད་མྱུ་གུ་གསར་འཁྲུངས་འཕྲུལ་དགའི་ཞིང་བཞིན་འབྱོར་ལ་འདུད། ༤༨ །གང་གིས་ཆོས་ཀུན་སྐྱེ་སོགས་སྤྲོས་པའི་མཚན་མ་ལས་འདས་འོད་གསལ་དབྱིངས། །ཟབ་མོ་འཕགས་པའི་སྤྱོད་ཡུལ་མངོན་གཟིགས་འདུ་ཤེས་མཚན་མ་རབ་ཞི་བས། །རྣམ་དག་ལག་པའི་སྒྲོན་མ་སྦར་བའི་མཆོད་པའི་སྤྲིན་གྱིས་མཛེས་བྱས་ཤིང་། །ལྷ་དབང་མི་བདག་འཁོར་བཅས་རྣམ་པར་གྲོལ་མཛད་བདེ་བ་སྦྱིན་ལ་འདུད། ༤༩། དུག་ལྔའི་རང་གཟུགས་འབར་བའི་སྡང་མིག་བསྒྱུར་བཞིན་མི་སྙན་དྲག་པོའི་སྒྲ། །འབྲུག་སྟོང་ལྡིར་འདྲ་མཚོན་ཆའི་ཆད་པ་མི་བཟད་སེར་ཆེན་ལྟར་འཁྲུགས་ཀྱང་། །ཏིང་འཛིན་མཐུ་ཡིས་མེ་ཏོག་ཆར་པ་སྤོས་ཆུ་དང་འདྲེས་བབས་གྱུར་པས། །ས་གསུམ་སྐྱེ་དགུས་ཕྱག་བྱས་འགྲོ་ཀུན་སྒྲོལ་མཛད་སྙན་པའི་འོད་ལ་འདུད། ༥༠ །གང་ཞིག་གཅན་གཟན་རྒྱལ་པོ་རྣམས་ནི་མི་གཙང་ཁྲོད་ན་གནས་མི་འགྱུར། །དེ་བཞིན་དམ་པ་རྣམས་ནི་ཁྱིམ་གྱི་འདུ་འཛིའི་གནས་ལ་དགའ་བ་མིན། །ལྐུགས་འཕྱེའི་ཚུལ་སོགས་སྣ་ཚོགས་ཐབས་ཀྱིས་རྒྱལ་སྲིད་འབྱོར་པ་རིང་བཏང་ནས། །གཞོན་ནུ་ཆུ་སྐྱེས་ལྔ་བརྒྱའི་འཁོར་བཅས་མངོན་ཤེས་ཏིང་འཛིན་གྲུབ་ལ་འདུད། ༥༡ །གང་གི་དཔལ་གྱིས་བདེ་སོགས་བདག་པོའི་སྟོབས་ཀྱང་ལན་བརྒྱར་ཟིལ་ག ནོན་པའི། །ས་གཞི་སྐྱོང་བ་འཇིག་རྟེན་མངོན་དགའ་ངེས་འབྱུང་ཤིང་རྟས་ཡིད་དྲངས་པས། །དཀའ་ཐུབ་ནགས་སུ་ཟག་མེད་ཏིང་འཛིན་མཆོག་གྲུབ་འགྲོ་ལ་སྙིང་བརྩེ་ཡིས། །བདུད་རྩིའི་བགོ་སྐལ་མཆོག་སྩོལ་བསམ་གཏན་ཕ་རོལ་ཕྱིན་རྫོགས་མཛད་ལ་འདུད། ༥༢ །བསམ་གཏན་གྱི་ཕ་རོལ་དུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་ལྔ་པའོ། །ཤིན་ཏུ་མི་སྡུག་འཇིགས་གཟུགས་གྱོང་པོའི་ཚུལ་ཅན་གནོད་སྦྱིན་དག་ལས་ཀྱང་། །སྔོན་གྱི་རྒྱལ་བའི་བདེན་གསུང་ཚིགས་སུ་བཅད་པ་གཅིག་ཙམ་མཉན་སླད་དུ། །བུ་དང་ཆུང་མ་དེ་བཞིན་རང་གིས་ལུས་ཀྱང་བཏང་ལ་མི་ངལ་བའི། །ས་བདག་ཚངས་བྱིན་ལེགས་བཤད་མཐུ་ཡིས་བརྒྱ་བྱིན་ཁེངས་པ་བསྙིལ་ལ་འདུད། ༥༣ །ཇི་ལྟར་རྒྱ་མཚོ་ཆེ་ལ་ཆུ་ཕྲན་ཇི་ཙམ་འདུ་ཡང་ངོམས་པ་ཅི། །དེ་བཞིན་བློ་ཆེན་འཕགས་པའི་ཚོགས་རྣམས་ཐོས་པའི་ནོར་གྱིས་ངོམས་མི་འགྱུར། །རྒྱ་ཆེན་ཐོས་པའི་གཏེར་མངའ་ཆོས་འཚོལ་ལེགས་བཤད་ཚིགས་བཅད་གཅིག་གི་ཕྱིར། །དཔག་ཚད་དུ་མའི་གཡང་ས་ལའང་ཉམ་ང་མེད་པར་འཇུག་ལ་འདུད། ༥༤ །འགྲོ་བ་མ་རིག་མུན་པར་འཐོམས་ལ་བླང་དོར་ལམ་བཟང་སྣང་མཛད་པའི། །དམ་ཆོས་རིན་ཆེན་སྒྲོན་མེ་འདེགས་མཁས་སྲིད་ན་འབྱུང་དཀོན་ཨུ་དུམྦཱ། །མ་རུངས་ཟུམ་ལ་ཕྱོགས་ལས་གསོ་ཕྱིར་རང་གི་ཤ་དང་ཁྲག་དག་གིས། །ཀུན་ནས་བསྙེན་བཀུར་སྟོབས་མཛད་ས་བདག་སྲས་མོ་ཡེ་ཤེས་ལྡན་ལ་འདུད། ༥༥ །འགྲོ་བ་སྡུག་བསྔལ་ནད་ཀྱི་ཟུག་རྔུ་མཐའ་དག་གཞི ལ་ནུས་ཚོང་དཔོན་བུ། །གཞོན་ནུ་ཆུ་འབེབས་སྙིང་རྗེའི་སྤྲིན་ལས་བྱུང་བའི་ཆུ་བོ་ཇི་སྙེད་ཀྱིས། །གནས་སྐབས་ཉ་ཚོགས་དུབ་པ་ཡོངས་བསལ་ཆོས་ཀྱི་སྦྱིན་པ་ཚངས་པའི་རྔས། །ངན་འགྲོའི་ལམ་བཅད་མཐོ་རིས་སྒོ་ཕྱེས་རྣམ་གྲོལ་འབྲས་བུར་སྦྱོར་ལ་འདུད། ༥༦ །ཕུལ་བྱུང་མཁྱེན་དཔྱོད་ཀུན་ནས་དྲི་བྲལ་བཻ་ཌཱུར་གཙང་མའི་ས་གཞི་ལ། །གཙུག་ལག་བྱེ་བའི་གཟུགས་བརྙན་རབ་བཀྲ་བློ་ཆེན་ཚངས་པའི་ཁེངས་པ་འཕྲོག །སྣ་ཚོགས་ཐབས་ཀྱིས་ཆབ་འབངས་མཐའ་དག་རྩོད་དང་རྒུད་པའི་གདུང་བ་ཀུན། །དྲུང་ནས་འབྱིན་ལ་ཆེས་དཔའ་དཔལ་རྒྱས་ས་བདག་མེ་ལོང་གདོང་ལ་འདུད། ༥༧ །ཤེས་རབ་ཆེན་པོའི་མཐུ་ཡིས་འཛམ་གླིང་སྐྱེ་དགུ་མ་ལུས་བདེ་ལ་བཀོད། །སྙིང་རྗེ་ཆེན་པོའི་མཐུ་ཡིས་ཚངས་པའི་རྒྱལ་པོ་མཆོག་ཀྱང་དབང་དུ་བྱས། །ངེས་འབྱུང་ཆེན་པོའི་མཐུ་ཡིས་སྲིད་ལ་མ་ཆགས་ཞི་བའི་ཏིང་འཛིན་སྒྲུབ། །བྲམ་ཟེ་ཆེན་པོའི་མཐུ་ཡིས་འགྲོ་མང་བདེ་ལེགས་མཆོག་ཏུ་མཛད་ལ་འདུད། ༥༨ །ཞི་བའི་བློ་གྲོས་གཏིང་དཔག་དཀའ་བའི་སྔོན་མེད་རིན་ཆེན་འབྱུང་གནས་ལས། །ལེགས་བཤད་ལྦུ་བ་དཀར་པོའི་འཛུམ་ཕྲེང་གྲོལ་བས་བློ་ལྡན་ཡིད་དབང་འཕྲོག །རྒྱལ་གསུང་མཆོག་ཏུ་ཟབ་ཅིང་རྒྱ་ཆེའི་དགོས་འབྱུང་ནོར་བུའི་གཏེར་ཆེན་གྱིས། །མཐའ་ཀླས་སྐྱེ་དགུའི་སྲིད་པའི་དབུལ་བ་ཀུན་ནས་ཟད་པར་མཛད་ལ་འདུད། ༥༩ །ཡོན་ཏན་རྒྱ་མཚོའི་དབུས་ན་གནས་བཅས་ཤེས་རབ་ཟབ་མོའི་གདེངས་ཀ་འཕྱོ། །སྙིང་རྗེའི་སྤྲིན་གཏིབས་ཕུལ་བྱུང་ལེགས་བཤད་ཆར་གྱི་རྒྱུན་བཟང་འཇོ་བ་ཡིས། །ཁྲོ་བའི་མེ་མདག་ཆིལ་ཆིལ་བསད་བྱས་སྐྱེ་དགུའི་ཡིད་ཀྱི་ཐ་བ་བརླན། །དཀར་ཆོས་རིགས་ཀྱི་མྱུ་གུ་བསྐྱེད་མཛད་ལག་འགྲོའི་དབང་པོ་རྔ་ལ་འདུད། ༦༠། གང་ལ་ཤེས་རབ་ལྡན་ན་ཉམ་ཆུང་གྱུར་ཀྱང་གཞན་དག་སྲུང་བར་ནུས། །བློ་གྲོས་སྣང་བ་བྲལ་དག་ཆེན་པོ་ཡིན་ཡང་བདག་ཉིད་སྲུང་ནུས་ཅི། །ལེགས་པར་བརྟགས་ཤིང་ཕན་པར་སྨྲ་བའི་གཏམ་གྱིས་མ་རུངས་{རུང }བསྐྲད་བྱས་ནས། །ཆུར་རྩེན་ཚོགས་རྣམས་བདེ་བར་ངལ་འཚོ་སྦྱིན་མཛད་གཉིས་སྐྱེས་གཙོ་ལ་འདུད། ༦༡། སྙིང་རྗེའི་ཆུ་གཏེར་བསྲུབས་ལས་ཉེར་ཐོན་ཤེས་རབ་ཆ་ཤས་རྫོགས་པའི་ཟླ། །ཏིང་འཛིན་ཟག་མེད་ཞི་བའི་མཁར་གནས་ཐུགས་རྗེའི་བསིལ་ཟེར་འབུམ་ཕྲག་གིས། །དམྱལ་བའི་ཚད་གདུང་མི་བཟད་རབ་གཞིལ་ལོག་ལྟའི་མུན་པ་གཏན་བཅོམ་ནས། །ཐར་གྲོལ་ཀུ་མུཏ་བཞད་མཛད་དྲང་སྲོང་ཤེས་རབ་ཕ་རོལ་ཕྱིན་ལ་འདུད། ༦༢ །ཤེས་རབ་ཀྱི་ཕ་རོལ་དུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་དྲུག་པའོ། །མ་རིག་མུན་པའི་དྲྭ་བས་མིག་སྒྲིབ་འདོད་པའི་ཆང་གི་མྱོས་གྱུར་པས། །ཤིན་ཏུ་མི་བཟད་མནར་མེད་གཡང་སར་གོམ་པ་འཁྱོལ་བའི་མདུང་ཤིང་ཅན། །སྙིང་རྗེ་ཆེན་པོའི་མཚོན་གྱིས་བསྒྲལ་བས་བསྐལ་པ་བརྒྱད་ཁྲིའི་ཚོགས་ཀྱང་འདུམ། །དཔའ་བོ་དེད་དཔོན་མཚུངས་མེད་ཐབས་ལ་མཁས་པའི་མཛད་པ་བསྟན་ལ་འདུད། ༦༣། ཐབས་མཆོག་སྙིང་རྗེ་ཤེས་རབ་ཟབ་མོའི་འོད་དང་གཟི་བརྗིད་དཔལ་འབར་བའི། །ཆགས་བྲལ་རྒྱལ་སྲས་ཚངས་པ་ཆེན་པོས་ཐེག་ཆེན་ཆོས་ཀྱི་རྔ་བརྡུང་བས། །གླིང་བཞིའི་འགྲོ་བ་ལྷ་ཕྲུག་ཚོགས་རྣམས་བག་མེད་གཉིད་ལས་སད་མཛད་ནས། །རྣམ་གྲོལ་གསུམ་གྱི་བདུད་རྩིའི་དགའ་སྟོན་ཡོངས་ལ་འགྱེད་མཁས་མཆོག་དེར་འདུད། ༦༤ །སྙིང་རྗེའི་བརླན་དང་བྲལ་ལ་བྱང་ཆུབ་མྱུ་གུ་ནམ་ཡང་འཁྲུངས་མིན་ཞིང་། །བདག་ཉིད་ཉམས་ཀྱིས་དོགས་པའི་ཚངས་པར་སྤྱོད་པའང་དམ་པའི་ཚུལ་མིན་ཕྱིར། །སྲེད་ལྡན་ན་ཆུང་འཆི་བ་བཟློག་ཕྱིར་སྙིང་རྗེ་ཆེན་པོས་རྗེས་དགོངས་ནས། །ཐབས་མཁས་མཛད་པས་བསྐལ་མང་ཚོགས་གཉིས་འདུམ་མཛད་ཁྱེའུ་ཀརྨར་འདུད། ༦༥ །གང་དག་ཆོས་མིན་སྤྱོད་རྣམས་གསོན་པོར་ཟོས་པའི་ཁྲག་གིས་ཆེར་མྱོས་པའི། །འཇིགས་རུང་གད་མོའི་སྒྲ་ཡིས་གཡོ་བྱེད་དུས་མེ་ལྟར་འབར་མཆེ་བ་རྔམས། །ཤིན་ཏུ་མི་བཟད་སྲིན་པོའི་གཟུགས་ཀྱིས་སྐྱེ་བོའི་ཚོགས་རྣམས་ཆེར་སྔངས་པའི། །ཐབས་མཁས་མཛད་པས་དགེ་བཅུའི་ལམ་ལ་སྦྱོར་མཛད་ལེགས་བྲིས་གཙོ་བོར་འདུད། ༦༦། འདོད་པའི་མེ་ཡིས་ཀུན་ནས་བསྲེགས་གྱུར་རྣམ་གཡེང་ཐ་བ་མི་བཟད་ལ། །རིགས་དང་མངོན་ཤེས་ཏིང་འཛིན་མྱུ་གུ་ནམ་ཡང་འཁྲུངས་པར་མི་འགྱུར་ཕྱིར། །སྣ་ཚོགས་ཐབས་མཁས་སྤྲིན་གྱི་མེ་ཏོག་ཀུན་ནས་བཀྲམ་པས་དུལ་བྱས་པའི། །བྲམ་ཟེའི་ཁྱེའུ་ལྔ་བརྒྱའི་ཞིང་སར་ཡོན་ཏན་སྙེ་མ་བསྐྲུན་ལ་འདུད། ༦༧ །གང་ཞིག་མཐོང་ན་སྐྱེ་བོ་རྣམས་ཀྱི་སྙིང་ལ་ཉལ་བའི་ལུས་མེ་དཔུང་། །སྦྲོན་བྱེད་གར་མཁན་བུ་མོ་ཐིག་ལེ་མཆོག་མའི་འཇོ་སྒེག་ཟློས་གར་གྱིས། །དབང་བྱས་དཔག་མེད་འགྲོ་ལ་ཐེག་མཆོག་བདུད་རྩིའི་དགའ་སྟོན་སྟོབ་པ་ཡིས། །རྣམ་གྲོལ་གསུམ་གྱི་ལུས་ཟུང་འཕེལ་མཛད་འགྲོ་བའི་དཔལ་མོ་མཆོག་ལ་འདུད། ༦༨ །དཔག་མེད་བསོད་ནམས་སྤྱི་བོ་ལས་སྐྱེས་རང་བཞིན་དགེ་བའི་གསེར་སྦྱངས་ཁམས། །ཕུལ་བྱུང་ཡོན་ཏན་རྩིབས་སྟོང་རྣམ་བཀྲ་ལྷར་བཅས་སྐྱེ་དགུའི་མཁའ་ལ་འཕགས། །ཅི་འདོད་ལོངས་སྤྱོད་ཆར་དུ་བསྙིལ་བས་འགྲོ་བའི་རྒུད་པ་རིང་དུ་བསྐྲད། །སླར་ཡང་འདོད་ལ་སྐམ་པའི་ཉེས་པ་མི་བཟད་འགྲོ་ལ་འདོམས་དེར་འདུད། །ངེད་ཀྱི་བསོད་ནམས་ཕུང་པོ་འདི་ཞེས་འཇིག་རྟེན་སྐྱོང་བ་གཞན་དག་ལ། ༦༩ །ངོམས་པ་བཞིན་དུ་འཛད་མེད་གཏེར་གྱི་སྒོ་འཕར་བསམ་ཡས་ཕྱེས་གྱུར་པས། །སྡུག་བསྔལ་རྩོད་བཅས་མྱ་ངན་གཞིར་གྱུར་འདོད་པའི་གདུང་བས་དུབ་པའི་འགྲོ། །རྣམ་གྲོལ་གསུམ་གྱི་ངལ་སྟེགས་མཆོག་ལ་སྦྱོར་མཛད་ལག་འགྲོའི་དབང་པོར་འདུད། ༧༠ །སྙིང་རྗེ་ཆེན་པོའི་ཚངས་རྐུད་ལེགས་བཅིང་བག་ཡོད་དགེ་བའི་ཤིང་ཤུན་གྱོན། །འགྲོ་བ་སྐྱོབ་པའི་སྲེག་བླུགས་དང་བཅས་ཐབས་མཁས་ཐུགས་རྗེའི་རིགས་སྔགས་བསྒྲངས། །གཅན་གཟན་རྒྱལ་པོ་སྔོན་མེད་དྲང་སྲོང་མཆོག་གིས་གསོད་སྲེད་གཏུམ་པོའི་ཁ། །འཆི་བདག་གདུག་པའི་གྲེ་བར་ཆུད་གྱུར་སྤྲེའུ་ཕྲུག་བདེ་བར་ཕྱུང་ལ་འདུད། ༧༡ །བསོད་ནམས་ཚོགས་ཆེན་ཐབས་ཀྱི་ཕ་རོལ་ཕྱིན་གྱུར་བྲམ་ཟེའི་ཁྱེའུ་སྤྲིན། །དད་པའི་རླུང་གིས་ཉེར་བསྐུལ་རལ་པའི་ནགས་ཀླུང་རྩེ་མོར་བདེ་གཤེགས་ཀྱི། །ཞབས་སེན་འཆར་ཀའི་ཟླ་གཞོན་མཛེས་བྱས་བྱང་ཆུབ་ལུང་བསྟན་བསིལ་ཟེར་གྱིས། །དཔག་མེད་ཏིང་འཛིན་གེ་སར་རྒོད་པའི་བསླབ་གསུམ་ཀུ་མུཏ་བཞད་ལ་འདུད། ༧༢ །ཐབས་ཀྱི་ཕ་རོལ་ཏུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་བདུན་པའོ། །འདོད་པའི་ཞགས་པས་དྲངས་པའི་ཡིད་ནི་ལྕགས་ཀྱུའི་དབང་དུ་མ་གྱུར་ཕྱིར། །མི་བསྲུན་གླང་པོས་ནགས་སུ་གཡེངས་པས་འཁྲུག་གྱུར་འོད་ལྡན་བདག་པོ་ཡི། །བདེ་གཤེགས་མཚན་གྱི་སྤྲིང་ཡིག་ཐོས་པས་རབ་དགའ་ལྷག་པའི་བསམ་པ་ཡིས། །སྦྱིན་པའི་སྒོ་འཕར་བརྒྱ་ཕྲག་ཕྱེས་ནས་བྱང་ཆུབ་འབྲས་བུར་སྨོན་ལམ་འདུད། ༧༣ །བློ་ཆེན་ཚངས་པའི་བློ་ཡིས་དཔོག་མིན་ཕུལ་བྱུང་མཆོད་པའི་སྤྲིན་ཆེན་གྱིས། །ཀུན་ལ་ཕན་མཛད་ཀུན་མཁྱེན་འགྲོ་བའི་བླ་མ་མཆོག་ལ་བསྙེན་བྱས་ནས། །ཡོན་གནས་དམ་པའི་ཡོན་ཏན་རྒྱ་ཆེར་རྗེས་བསྔགས་གཏམ་གྱི་གླིང་བུ་ཡིས། །ལེགས་མཆོད་སྨོན་ལམ་སྟོབས་ཀྱིས་འགྲོ་མང་སྨིན་མཛད་གྲགས་ལྡན་བྲམ་ཟེར་འདུད། ༧༤ །དམ་པ་བག་མེད་དབང་གིས་རྒུད་ཀྱང་རིང་པོར་མི་ཐོགས་འབྱོར་པས་མཛེས། །ཟླ་བ་སྤྲིན་གྱིས་མནོན་ཡང་མྱུར་དུ་གྲོལ་འགྱུར་འདི་ལ་སུ་ཡིས་བསྙོན། །སྦྱིན་པའི་ས་བོན་སྨོན་ལམ་སྟོབས་ཆེན་དྲོད་གཤེར་མཐུ་ཡིས་བསྐྱེད་པ་ཡིས། །ལེགས་བྱས་སྙེ་མ་ཚེ་འདིར་མངོན་འཁྲུངས་འགྲོ་བ་དད་མཛད་རྒྱལ་བར་འདུད།༧༥ །སྨོན་ལམ་མཐུ་ཡིས་འགྲོ་བའི་ནད་རྣམས་ཅིག་ཅར་གཞིལ་ནུས་སྨན་གྱི་མཆོག །ཇི་ཙམ་བཅད་ཀྱང་འཛད་མེད་གཏེར་གྱུར་རང་གི་ཤ་ཡི་སྦྱིན་པ་ཡིས། །སྐྱེ་བོ་ཀུན་གྱི་རྒུད་པ་རིང་བསལ་ཕན་པར་འདོམས་པའི་བདུད་རྩི་ཡིས། །ཐར་གྲོལ་ལུས་སྟོབས་བསྐྱེད་མཛད་ལྷ་དབང་མིག་བཟང་ངེས་པར་འཕྲུལ་ལ་འདུད། ༧༦ །སྲིད་ན་དཀར་བའི་དངོས་པོ་མ་ལུས་གཅིག་ཏུ་བསྡོམས་ལ་ཅོ་འདྲི་བའི། །ཀུན་ནས་མཛེས་པའི་མཆེ་བ་དྲུག་ལྡན་གཉིས་འཐུང་ཡོངས་ཀྱི་རྗེ་བོ་ནི། །གཡོན་ཅན་དུག་མདས་སྙིང་ཕུག་གྱུར་ཀྱང་བློ་གྲོས་ཉམས་པ་མི་མངའ་ཕྱིར། །སྨོན་ལམ་མཐུ་བསྟན་ཕན་བདེ་སྦྱིན་པས་སྔོན་ཡང་འདུམ་པར་མཛད་ལ་འདུད།༧༧ །གྲོང་ཁྱེར་དྲུག་གི་ཁྲི་མུན་སྟུག་པོར་ལས་ཉོན་ལྕགས་སྒྲོག་དམ་པོ་ཡིས། འཆིང་གྱུར་སྡུག་བསྔལ་གསུམ་གྱི་ཆད་པས་མནར་ལ་རྗེས་བརྩེའི་སྨོན་ལམ་མཐུས། །གང་ལ་གང་འདུལ་དེ་དེར་སྣང་བའི་རྫུ་འཕྲུལ་མངོན་ཤེས་དཔག་ཡས་ཀྱིས། །འགྲོ་རྣམས་རིམ་གྱིས་བྱང་ཆུབ་ལམ་ལ་འགོད་མཛད་ཀུན་རྒྱུ་འཆར་ཀར་འདུད། ༧༨ །ཆུ་གཏེར་བཞི་ཡི་སྐ་ར གས་ལེགས་བཅིང་ནོར་འཛིན་དགའ་མའི་བདག་གྱུར་པའི། །ནོར་ཅན་མཐུ་ཡིས་སྐྱེ་དགུ་ཕལ་ཆེར་ཐེག་པ་གསུམ་དུ་བཀོད་ནས་སླར། །ངེས་འབྱུང་ཚངས་པར་སྤྱོད་ལྡན་གཞན་ཕན་སྨོན་ལམ་སྟོབས་ཀྱིས་མི་ལོ་ཁྲིར། །ལུས་ཀྱི་སྦྱིན་པས་ཕོངས་གྱུར་འགྲོ་བ་མཐའ་དག་རེ་སྐོང་མཛད་ལ་འདུད། ༧༩ །བྲམ་ཟེ་ཟླ་དགའི་དད་བསོད་ལྷ་རྫས་པཉྩ་ལི་ཀའི་གོས་བཟང་རྩེར། །མྱ་ངན་ཐམས་ཅད་བྲལ་གྱུར་བདེ་གཤེགས་ཞབས་སེན་ནོར་བུའི་ཏོག་མཛེས་པས། །འགྲོ་མང་བྱང་ཆུབ་མཆོག་ཏུ་ལུང་བསྟན་སྲིད་པའི་དགྲ་ཡིས་བརྫི་མིན་པའི། །དགའ་སྟོན་རྒྱལ་མཚན་དམ་པ་ལྷར་བཅས་སྐྱེ་དགུའི་དབུས་སུ་སྒྲེང་ལ་འདུད། ༨༠ །འགྲོ་ལ་སྙིང་བརྩེ་ཁོ་ནས་རྗེས་དགོངས་བུ་དང་ཆུང་མ་རྒྱལ་སྲིད་དང་། །རང་གི་རྐང་པ་མིག་དང་རྣ་བ་དེ་བཞིན་མཚན་མ་ལག་པ་སོགས། །ཀུན་ནས་ཡོངས་གཏོང་སྨོན་ལམ་མཐུ་ཡིས་ལོ་སྟོང་བར་དུ་ཤ་ཁྲག་གིས། །དུར་ཁྲོད་གནས་པའི་ཕོངས་གྱུར་འགྲོ་རྣམས་རེ་སྐོང་ས་བདག་ནམ་མཁར་འདུད། ༨༡ །ཆེན་པོ་རྣམས་ཀྱི་རླབས་ཆེན་གཞན་དོན་སྤྱོད་པ་བསམ་གྱིས་མི་ཁྱབ་ཅིང་། །དེ་བཞིན་སྨོན་ལམ་སྟོབས་ཀྱང་ཚུར་མཐོང་བྱིས་བློའི་ཡུལ་དུ་མ་གྱུར་ཕྱིར། །དཔལ་གྱི་སྡེར་གྱུར་ས་བདག་སྐུ་སྨད་ཉམ་ཐག་བྲམ་ཟེར་རྩལ་མཛད་ཀྱང་། །བདག་ཉིད་ཉམས་པ་མི་མངའ་མཐོ་རིས་གྲོང་ཁྱེར་འབྱོར་བྱེད་མཆོག་ལ་འདུད། ༨༢ །སྨོན་ལམ་གྱི་ཕ་རོལ་དུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་བརྒྱད་པའོ། །དཔའ་བོ་སྙིང་རྗེའི་སྟོབས་མངའ་བདུད་ཚོགས་བྱེ་བས་གསད་པར་ནུས་མིན་པའི། །བསོད་ནམས་དཔལ་གྱིས་མཛེས་པའི་རྒྱལ་སྲས་སྐུ་ལུས་སྟག་མོར་སྩོལ་མཛད་པའི། །ངོ་མཚར་རྨད་བྱུང་སྐབས་གསུམ་དབང་པོར་སྦྲོན་{སྒྲོན}སླད་ས་ཆེན་རི་དང་བཅས། །རྣམ་དྲུག་གཡོ་བའི་གར་སྟབས་བསྒྱུར་བཞིན་མེ་ཏོག་ཆར་གྱིས་སྤུད་ལ་འདུད། ༨༣ །སྦྱིན་པའི་སྟོབས་ཀྱིས་འབྱོར་པ་མི་ཟད་ལུས་ཀྱི་གཟི་ཡིས་དཔག་ཚད་ཚུན། །མུན་པའི་དཔུང་བཅོམ་ཟླ་བའི་འོད་ལྡན་གཏན་པ་མེད་པའི་མཆོད་སྦྱིན་གྱིས། །ས་སྟེང་དབུལ་བ་མ་ལུས་ཟད་བྱས་བསོད་ནམས་མཐུ་ཡིས་བསྐྲུན་པའི་དབུ། །དམ་པ་མིན་གྱུར་དྲག་པོའི་མིག་ལ་དགའ་བས་རྗེས་སུ་གཏོང་ལ་འདུད། ༨༤ །ཡོན་ཏན་ཡར་ངོའི་ཟླ་ལྟར་རྒྱས་པས་ཉེས་པའི་མུན་པ་ཟད་བྱེད་ཅིང་། །ཁྲོ་དང་རྣམ་འཚེའི་ཚད་གདུང་མཐའ་དག་དྲུང་ནས་འབྱིན་པའི་སྟོབས་མངའ་བའི། །ཤི་པི་བདག་པོ་མཆོག་གིས་འདུ་བ་འཁྲུག་པའི་དཔུང་གིས་འཆི་བདག་ཁར། །གཟས་གྱུར་དམན་པའི་འགྲོ་བ་རང་གི་ཁྲག་གིས་སྐྱོབ་པར་མཛད་ལ་འདུད། ༨༥ །ངེས་འབྱུང་ས་སྲུང་སྟེང་ན་མངོན་བརླིང་ཚུལ་ཁྲིམས་རིན་ཆེན་རྒྱན་གྱིས་སྤྲས། །ཤེས་རབ་སྤྱན་སྟོང་རྣམ་བཀྲ་ལེགས་བཤད་རྩེ་བརྒྱ་འབར་བའི་མཚོན་རྣོན་གྱིས། །ཉེས་པའི་དགྲ་ཚོགས་ཀུན་ནས་བཅོམ་བྱས་ཆོས་ཀྱི་རྒྱལ་སྲིད་སྐྱོང་བའི་གཉེན། །སྙིང་རྗེའི་བདེ་སོགས་བདག་གྱུར་སྟོན་པ་རྩིབས་ཀྱི་མུ་ཁྱུད་མཆོག་ལ་འདུད།༨༦ །ཇི་ལྟར་སྦྲུལ་ལ་འོ་མ་བླུད་པ་ནམ་ཡང་ཞི་བར་མི་འགྱུར་བཞིན། །མ་རབས་རྣམས་ནི་ཕན་པར་འདོམས་པས་ཀུན་ཏུ་འཁྲུགས་གྱུར་ཆོས་ཉིད་ཕྱིར། །སྙིགས་མའི་སྐྱེ་བོ་རྣམས་ཀྱིས་སྤྱོས་ཤིང་བོང་དབྱིག་མཚོན་གྱིས་བརྡེགས་གྱུར་ཀྱང་། །བཟོད་པའི་སྟོབས་ལ་བརྫི་མིན་ཆོས་ཀྱི་གཏེར་རྙེད་ཀུན་ཏུ་བརྙེས་ལ་འདུད། ༨༧ །མི་བསྲུན་སྦྲུལ་ནག་ཁྲོས་པའི་ཞགས་པ་དམ་པོས་ཀུན་ནས་བཅིངས་གྱུར་ཏེ། །འཆི་བདག་གཏུམ་པའི་ཁ་སྒོར་གནས་པའི་ཚོང་པ་ལྔ་བརྒྱ་སྐྱོབ་སླད་དུ། །མཁས་པ་སྙིང་རྗེའི་རང་བཞིན་བདག་གི་སྲོག་ལའང་ཆགས་མིན་རི་དྭགས་རྒྱལ། །གནམ་ལྕགས་རྡོ་རྗེའི་སྡེར་མོས་མ་རུངས་ཀླད་རྒྱ་དབྲལ་བར་བརྩོན་ལ་འདུད། ༨༨ །ཉི་མ་གཅིག་པུས་ས་སྟེང་མུན་པ་མི་བཟད་དཔུང་ཚོགས་འཇོམས་པར་ནུས། །དེ་བཞིན་སངས་རྒྱས་གཅིག་གིས་དཔག་མེད་འགྲོ་བའི་ཁ་ལོ་བསྒྱུར་བ་བཞིན། །བརྩོན་འགྲུས་སྟོབས་ཀྱིས་རྒྱ་མཚོའི་ཆུ་བོ་ཇི་སྙེད་སྐེམ་ལ་དཀའ་མིན་ཕྱིར། །དེད་དཔོན་བློ་ལྡན་རྙེད་པའི་ནོར་གྱིས་འགྲོ་བའི་དབུལ་བ་བསལ་ལ་འདུད། ༨༩ །ཤུགས་དྲག་རླུང་གིས་བརྡབས་པའི་ནགས་ལ་མེ་ཆེན་མཆེད་པས་མཚོན་མིན་པའི། །གཞོན་ནུ་ནོར་བཟང་རྣམ་དཔྱོད་བློ་གྲོས་བརྩོན་པའི་སྟོབས་ཀྱི་ཁྱད་པར་གྱིས། །མིའམ་ཅི་ཡི་དབང་པོ་ཀུན་ནས་མགུ་བྱས་ཡིད་འཕྲོག་ལྷ་མོ་དང་། །ལྷན་ཅིག་དགེ་བཅུའི་རྒྱལ་ཐབས་མཆོག་གིས་འགྲོ་བའི་རྒུད་པ་བསལ་ལ་འདུད། ༩༠ །ཤུལ་རིང་བགྲོད་དཀའི་དགོན་པའི་ནགས་སུ་འཚོ་བས་ཕོངས་གྱུར་ཡབ་ཡུམ་ལ། །རང་གི་ཤ་ཡི་བསྙེན་བཀུར་སྟོབས་ལ་ཆེས་དཔའ་རྒྱལ་སྲས་སུ་ཤ་དྷེ། །རྫོགས་བྱང་དོན་གཉེར་བདེན་པའི་མཐུ་ཡིས་རང་ལུས་ཉམས་པའང་གསོ་མཛད་པས། །བདེ་སོགས་བདག་པོའི་ཁེངས་པའི་གཙུག་ནོར་ཞབས་ཀྱི་རྡུལ་འོག་ལྷུང་ལ་འདུད། ༩༡ །བསོད་ནམས་མཐུ་ཡིས་ལྷ་དབང་ཀླུ་བདག་མི་མཆོག་གྲགས་ལྡན་ཡོངས་ཀྱིས་བཏུད། །སྙིང་རྗེ་ཆེན་པོས་ཉམ་ཐག་འགྲོ་བ་ཡན་ལག་སྦྱིན་པས་བདེ་བར་མཛད། །སྨོན་ལམ་བཙན་པོས་ཕོངས་གྱུར་འགྲོ་ལ་གང་འདོད་ལོངས་སྤྱོད་ཆར་དུ་ཕབ། །ཡོན་ཏན་མཆོག་གིས་སྐྱེ་དགུ་སྲུང་མཛད་རྒྱལ་བུ་བསོད་ནམས་སྟོབས་ལ་འདུད། ༩༢ །སྟོབས་ཀྱི་ཕ་རོལ་དུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་དགུ་པའོ། །མཁྱེན་བཟང་མཁའ་ལ་སྙིང་རྗེའི་སྤྲིན་འཁྲིགས་དཔག་མེད་ཏིང་འཛིན་གློག་ཕྲེང་གིས། །ཆེས་ཆེར་མཛེས་བྱས་དྲང་སྲོང་ཀུན་རིག་ལེགས་པར་འདོམས་པ་དབྱར་གྱི་རྔས། །ལྷག་བསམ་གཙུག་སྒྲོས་ཀུན་ནས་སྒེག་པའི་འོད་བཟང་རྨ་བྱའི་བུ་མོའི་སྙིང་། །ཡེ་ཤེས་མཐོང་བའི་དགའ་བས་ཆེར་མྱོས་ཕན་བདེའི་ཟློས་གར་སྒྱུར་ལ་འདུད། ༩༣ །སྒྲ་མེད་མི་གཡོ་ཞི་བའི་ནགས་སུ་ནང་དུ་ཡང་དག་འཇོག་པ་ཡིས། །འཕགས་པའི་ཡེ་ཤེས་མངོན་བྱས་ཆོས་ཀྱི་རྒྱལ་སྲིད་མཆོག་ལ་རྟག་རོལ་བའི། །དྲང་སྲོང་བཀའ་ལུང་གསེར་གྱི་ཐུར་མས་བདག་ལྟའི་ལིང་ཐོག་རབ་བསལ་ནས། །འགྲོ་ལ་ཆོས་ཉིད་མཐོང་བ་རྣམ་དག་མིག་བཟང་སྩལ་བར་མཛད་ལ་འདུད། ༩༤ །རླབས་ཆེན་ཐུགས་བསྐྱེད་བརྩོན་པའི་རྟ་བདུན་གྱིས་དྲངས་ས་བདག་ཉིན་བྱེད་ཀྱིས། །ཆོས་ཀྱི་སྡོམ་བཞི་དྲི་མ་མེད་གྱུར་དཔག་ཡས་འོད་ཟེར་དྲྭ་བ་ཡིས། །བདག་ལྟའི་མུན་པ་མི་བཟད་དྲུང་བཅིལ་ས་གསུམ་སྐྱེ་དགུའི་ཚོགས་རྣམས་ལ། །བླ་མེད་བྱང་ཆུབ་ལམ་བཟང་སྣང་མཛད་ཏོག་གི་བློ་གྲོས་མཆོག་ལ་འདུད། ༩༥ །དྲང་སྲོང་གྲུབ་པའི་ཏིང་འཛིན་མཐུ་ཡིས་བཅུ་གཉིས་ལོ་དང་བདུན་ཕྲག་ཞག །རབ་ཏུ་འབད་དེ་ངལ་བས་བསྒྲངས་པའི་གྲངས་ཀྱི་ཁྱད་པར་ཇི་སྙེད་པ། །ཡེ་ཤེས་ཟབ་མོའི་སྟོབས་ཀྱིས་སྐད་ཅིག་ཉིད་ལ་རྟོགས་གྱུར་ངོ་མཚར་གྱིས། །ཁེངས་ལྡན་ལག་པའི་པདྨོ་ཟུམ་བྱེད་བྲམ་ཟེ་སྔོ་བ སངས་གྱུར་ལ་འདུད། ༩༦ །ཡེ་ཤེས་ཆེན་པོའི་སྟོབས་ཀྱིས་ཚངས་དང་བརྒྱ་བྱིན་འཇིག་རྟེན་སྐྱོང་རྣམས་དང་། །ལྷ་མའི་དྲང་སྲོང་གྲུབ་པ་གྲགས་ལྡན་མཁས་པའི་ཚོགས་རྣམས་དབང་བྱས་ནས། །འགྲོ་བ་མི་བཟད་ནད་དང་ལྟ་ངན་འཐིབས་པོས་རྒུད་པའི་ཉམ་ཐག་པ། །རབ་བསལ་ཐེག་གསུམ་བདེ་བའི་ལམ་ལ་འགོད་མཛད་ཉེ་ཕྲེང་སྤངས་ལ་འདུད། ༩༧ །ཚངས་དབང་ལྷ་ཀླུ་གནོད་སྦྱིན་གྲུལ་བུམ་འཇིག་རྟེན་གཙོ་བོས་ཕྱག་བྱས་པའི། །རང་བཞིན་བརྩོན་ལྡན་སྙིང་རྗེའི་བདག་ཉིད་ཤེས་རབ་ཆེར་གྱུར་དྲང་སྲོང་མཆོག །ཀུན་རྫོབ་རྟེན་ཅིང་འབྲེལ་འབྱུང་ཚུལ་ལ་རྨོངས་གྱུར་ཉམ་ཐག་འགྲོ་ རྣམས་ལ། །བླང་དོར་གསལ་བའི་གཙུག་ལག་ལམ་བཟང་སྣང་མཛད་རྔ་བོ་མཆོག་ལ་འདུད། ༩༨ །རྒྱ་ཆེན་ཆོས་ཀྱི་དེ་ཉིད་ལེགས་གཟིགས་རྡུལ་བྲལ་རིན་ཆེན་སྙིང་པོའི་ཁམས། །བསྡུ་བཞིའི་བང་རིམ་ལེགས་མཛེས་ཡོན་ཏན་གསེར་རིའི་ཕྲེང་བའི་དབུས་ན་བརྗིད། །ཐབས་མཁས་མཛད་པ་ཉི་ཟླའི་འགྲོས་མཛེས་སྙིང་རྗེའི་བླ་ན་མངོན་མཐོ་བ། །ལྷ་མིའི་སྐྱེ་བོ་ཡོངས་ཀྱིས་བཏུད་བྱས་ས་བདག་མུ་ཁྱུད་ལྷུན་པོར་འདུད། ༩༩ །བཟོད་པའི་གོ་ཆ་སྲ་ལྡན་བརྩོན་འགྲུས་ཆེན་པོའི་དཔུང་གིས་ཡོངས་བསྐོར་ཞིང་། །དཔག་ཡས་སྙིང་རྗེ་ཆེན་པོའི་གཞུ་ལ་ཆོ་འཕྲུལ་གསུམ་གྱི་མདའ་བཞག་ནས། །སྐྱེ་བོ་ཀུན་གྱི་སྙིང་གི་མུན་པར་ཉལ་བའི་ལུས་མེད་སྡེ་དང་བཅས། །ཅིག་ཅར་གཞོམ་ནུས་དགེ་སློང་ཨུཏྤལ་སྔོན་མེད་དམག་དཔོན་མཆོག་ལ་འདུད། ༡༠༠ །གང་གི་ཐུགས་ལ་ཁྲོ་བ་མེད་ཀྱང་བདུད་ཀྱི་དཔལ་འབྱོར་ཉམས་པར་མཛད། །ཆགས་སོགས་ཉོན་མོངས་དྲི་མ་བྲལ་ཡང་ལྷ་མོ་རྣམས་ལ་རྩེ་ཚུལ་བསྟན། །རྟག་ཏུ་ཞི་བའི་ས་ལ་བཞུགས་ཀྱང་ཀུན་ནས་འབར་བའི་བརྩོན་འགྲུས་ཀྱིས། །འདོད་པའི་བདག་པོ་འདོད་ལས་གྲོལ་མཛད་གྲགས་མཆོག་དཔའ་བོའི་སྟོབས་ལ་འདུད། ༡༠༡ །དཔག་ཡས་རྒྱ་མཚོའི་རྡུལ་གྱི་གྲངས་སྙེད་སངས་རྒྱས་ཞིང་ཁམས་རབ་འབྱམས་ན། །མཐའ་ཡས་མོས་ལྡན་འགྲོ་བའི་མདུན་སར་དེ་སྙེད་སངས་རྒྱས་སྐུར་སྤྲུལ་ནས། །ཟབ་ཞི་སྤྲོས་བྲལ་འོད་གསལ་སྙིང་པོའི་བདུད་རྩིའི་དགའ་སྟོན་བྲིམ་པ་ཡིས། །བྱང་ཆུབ་མཆོག་གི་ལུས་སྟོབས་རྒྱས་མཛད་དཔའ་ཆེན་གཟི་བརྗིད་དྲག་པོར་འདུད། ༡༠༢ །ཡེ་ཤེས་ཀྱི་ཕ་རོལ་དུ་ཕྱིན་པ་དང་རྗེས་སུ་འབྲེལ་བའི་སྐབས་ཏེ་བཅུ་ཚན་བཅུ་པའོ། །བྱང་ཆུབ་ཐུགས་བསྐྱེད་བརྩོན་པས་ཕ་རོལ་ཕྱིན་བཅུའི་ས་རྣམས་ཡོངས་རྫོགས་པས། །རྩོད་པའི་དུས་འདིར་རྡོ་རྗེ་གདན་དྲུང་བདུད་བཅོམ་ཡང་དག་སངས་རྒྱས་ནས། །རིམ་གསུམ་ཆོས་ཆར་བསིལ་པོས་གདུལ་བྱའི་ཀུན་དཀྲིས་མེ་ཚོགས་རབ་བཅིལ་ཏེ། །རྣམ་གྲོལ་གསུམ་གྱི་ལམ་ལ་སྦྱར་མཛད་དཔལ་ལྡན་ཤཱཀྱ་སེང་གེར་འདུད། ༡༠༣། འགྲོ་བའི་བླ་མ་ས་གསུམ་སྐྱེ་དགུ་ཆོས་ཀྱིས་སྐྱོང་མཛད་འཕགས་པའི་ཡབ། །བདུད་ཀྱི་དཔུང་བཅོམ་རྒོལ་བ་ཚར་གཅོད་ལྷ་ཡི་ཡང་ལྷ་དགེ་སྦྱོང་ཆེའི། །སྐྱེས་རབས་རིན་ཆེན་ཕྲེང་བར་དད་པའི་ངག་གིས་ཅུང་ཟད་བསྔགས་པ་ཡི། །བསོད་ནམས་ཉུང་ཟད་དེ་རིང་བསགས་འདིས་འགྲོ་རྣམས་ཀུན་མཁྱེན་ཉིད་གྱུར་ཅིག ༡༠༤ །བདག་ཀྱང་སྐྱེ་ཀུན་རྣམ་གཡེང་འདུ་འཛིའི་དགྲ་བོ་མ་ལུས་ཕམ་བྱས་ཏེ། །ཚུལ་གནས་ཐོས་དང་བསམ་པ་ལ་བརྟེན་སྒོམ་པའི་བློ་གྲོས་རྩལ་རྫོགས་ནས། །སྙིང་རྗེ་ཆེན་པོས་གཞན་ཕན་སྒྲུབ་ལ་དཀའ་བ་མེད་པའི་མཐུ་ཐོབ་སྟེ། །མ་ལུས་འགྲོ་རྣམས་སྲིད་མཚོ་ལས་བསྒྲལ་རྣམ་མཁྱེན་གྲོང་ཁྱེར་མཛེས་བྱེད་ཤོག ༡༠༥ །རྒྱལ་བ་ཉི་མའི་དམ་ཆོས་འོད་སྟོང་གདུལ་བྱའི་ཞིང་ལ་རྟག་འཆར་བས། །ས་གསུམ་རྒུད་པའི་མུན་པ་མཐར་བསྐྲད་ཕན་བདེའི་འདབ་བརྒྱ་རྒོོད་པ་ཡིས། །དཀར་ཕྱོགས་ལྷ་ཀླུ་བུང་བ་དགའ་བའི་མྱོས་གླུས་རྫོགས་ལྡན་མགྲོན་འགུགས་པ། །ས་འདི་དགའ་བ་བརྒྱ་ལྡན་གྲོང་བཞིན་ཀུན་ནས་འབྱོར་པའི་བཀྲ་ཤིས་ཤོག ༡༠༦ །ཅེས་བདེ་བར་གཤེགས་པའི་སྐྱེས་རབས་ཀྱི་ཕྲེང་བ་ལ་མདོ་ཙམ་བསྔགས་པ་རིན་པོ་ཆེ་གསེར་གྱི་མཆོད་སྡོང་ཞེས་བྱ་བ་འདི་ནི། མཁས་པ་དགའ་བ་བསྐྱེད་པའི་ཚིག་གི་སྦྱོར་བ་སྤྲོ་བའི་ནུས་པ་དབེན་ནའང་། རང་ཉིད་ཀྱི་དད་པའི་གསོས་ཙམ་དུ། སྙན་ངག་སྨྲ་བ་རྣམས་ཀྱི་གཙུག་གི་ནོར་བུར་གྱུར་པ་མཁས་མཆོག་དཔའ་བོ་དང་རང་བྱུང་རྒྱལ་བ་གཉིས་པའི་གསུང་གི་རྗེས་སུ་འབྲངས་ནས། ཤཱཀྱའི་སྲས་པོའི་རྗེས་འཇུག་གི་རྟགས་ཙམ་འཛིན་པ་རྨོངས་རྟུལ་འགྱུར་མེད་པདྨ་རྣམ་རྒྱལ་ལམ་མིང་གཞན་འཇམ་དབྱངས་མཁས་གྲུབ་རྒྱ་མཚོ་དབྱངས་ཅན་དགྱེས་པའི་སྡེ་འབོད་པས། རང་གནས་དཔལ་ཟེ་ཆེན་བསྟན་གཉིས་དར་རྒྱས་གླིང་གི་ཆོས་གྲྭར་ཉིས་བྲིས་སོགས་ཀྱི་སྤྲོས་པ་དོར་ཏེ་གར་དྲན་ཤར་མར་སུག་ལས་སུ་བསྟར་པ་སྟེ། འདིས་ཀྱང་འགྲོ་ཀུན་ཐེག་པ་མཆོག་གི་ལམ་ལ་ཞུགས་ནས་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་དུས་མྱུར་བ་ཉིད་དུ་ཐོབ་པའི་རྒྱུར་གྱུར་ཅིག། །།