རྗེ་བཙུན་སྒྲོལ་མའི་ལས་བྱང་བསྡུས་པ་ཡིད་བཞིན་དབང་སྔོན་རྒྱལ་པོ།
ཡང་གསང་ཌཱཀྐིའི་ཐུགས་ཐིག་ལས༔ རྗེ་བཙུན་སྒྲོལ་མའི་ལས་བྱང་བསྡུས་པ་ཡིད་བཞིན་དབང་སྔོན་རྒྱལ་པོ་བཞུགས་སོ༔
ན་མོ་ཨརྱ་ཏཱ་རེ་མ༔ རང་བྱུང་ཡེ་ཤེས་སྙིང་པོ་ལ༔ རང་བབ་ལྟ་བ་མཇལ་ཕྱག་འཚལ༔ ཨོ་རྒྱན་མཚོ་སྐྱེས་རྡོ་རྗེ་ཡིས༔ དགོངས་པ་སྐལ་ལྡན་བུ་ལ་གཏད༔ རིག་རྩལ་ཀློང་ནས་མཁའ་འགྲོའི་བརྡ༔ རྒྱུད་དང་སྒྲུབ་ཐབས་བསམ་མི་ཁྱབ༔ འགྲོ་བའི་ཁམས་བཞིན་ཐེག་གསུམ་སྟོན༔ ཁྲིགས་སུ་བཅད་པ་མེད་པའི་གཏེར༔ ཡེ་ཤེས་མཚོ་རྒྱལ་གསང་ཡེ་མའི༔ ཐུགས་བཅུད་ཏཱ་རེའི་སྒྲུབ་ཐབས་འབྲི༔ དཀྱིལ་འཁོར་ཡོ་བྱད་སྤྲོས་པ་བསྐྱུང་༔ རང་བཞིན་གཞི་རྫོགས་ཨ་ལ་ལ༔ ལྟ་བ་ཡོངས་སུ་དག་པའི་ངང་༔ ཨཱ༔ རིག་སྟོང་ཀ་དག་རྗེ་བཙུན་མར༔ སྤང་བླང་བྲལ་བས་སྐྱབས་སུ་མཆི༔ ཁམས་གསུམ་སེམས་ཅན་དབྱིངས་སྒྲོལ་ཕྱིར༔ རང་བཞིན་མཉམ་པར་སེམས་བསྐྱེད་དོ༔ ཡན་ལག་བདུན་པ་གཞན་དུ་ཤེས༔ ཧཱུྃ་ཏྲཱྃ༔ ང་ནི་ཡེ་ནས་རྡོ་རྗེ་འཛིན༔ མ་རྟོགས་གཉིས་འཛིན་མཁའ་ལ་དེངས༔ བསྲུང་བྱ་སྲུང་བྱེད་བྲལ་བའི་གཤིས༔ ཁྱབ་བདལ་ཐིག་ལེའི་སྦུབས་སུ་རྒྱ༔ རང་བཞིན་སྐུ་གསུམ་ཞིང་ཁམས་ནས༔ རྩ་གསུམ་སྲུང་མས་བྱིན་ཆེན་ཕོབ༔ སྣོད་བཅུད་དངོས་ཞེན་འཁྲུལ་བའི་སྐྱོན༔ འབྲུ་གསུམ་ཡི་གེས་སྦྱང་སྤེལ་བསྒྱུར༔ ཨོཾ་ཨཱ༔ཧཱུྃ་སརྦ་པཱུ་ཛ་མེ་གྷ་ཨཱཿཧཱུྃ༔ དེ་ཡིས་སྔོན་འགྲོའི་ལས་རིམ་རྫོགས༔ དངོས་གཞི་ལྷ་ཡི་བསྐྱེད་རིམ་ནི༔ ཨཱ༔ འཁོར་འདས་མི་དམིགས་སྟོང་པའི་ངང་༔ མ་རྟོགས་འགྲོ་ལ་རྗེས་ཆགས་སེམས༔ རྩལ་ལས་ཏཱཾ་ཡིག་ལྗང་འོད་འབར༔ དེ་ལས་འོད་ཟེར་རྣམ་ལྔ་འཕྲོས༔ འཕགས་མཆོད་འགྲོ་བའི་ལས་སྒྲིབ་སྦྱངས༔ ཚུར་འདུས་འོད་ཞུ་རྗེ་བཙུན་མ༔ མརྒད་མདངས་འཛིན་ལྷ་ཡི་གོས༔ ཞལ་གཅིག་འཛུམ་མདངས་སྤྱན་དཀྱུས་རིང་༔ ཕྱག་གཉིས་གཡས་པས་མཆོག་སྦྱིན་རྒྱ༔ པུས་སྟེང་ཨུཏྤལ་ཡུ་བ་འཛིན༔ ཕྱག་གཡོན་དཀོན་མཆོག་གསུམ་མཚོན་པའི༔ ཕྱག་རྒྱས་ཨུཏྤལ་ཐུགས་ཀར་ནི༔ འཁོར་ལོས་མཚན་པའི་སྡོང་བུ་བསྣམས༔ ཞབས་གཉིས་པདྨ་ཟླ་བའི་སྟེང༔ སེམས་མའི་སྐྱིལ་ཀྲུང་པཉྩའི་གོས༔ ལེགས་སྤྲས་སྐུ་སྟོད་དར་དཔྱང་ཀླུབ༔ རིན་ཆེན་པྲོག་ཞུ་དབང་སྔོན་རྔམ༔ གནས་གསུམ་འབྲུ་གསུམ་གསལ་བ་ལས༔ འོད་འཕྲོས་དབང་ལྷ་སྤྱན་དྲངས་ཏེ༔ དབང་བསྐུར་སྒྲིབ་དག་སྐུ་གང་བས༔ ཆུ་ལྷག་གྱེན་ལུད་རིགས་ཀྱི་བདག༔ དོན་ཡོད་གྲུབ་པས་དབུ་བརྒྱན་ཅིང༔ དབྱིངས་ནས་རང་བྱུང་འཕགས་མའི་ལྷ༔ སྤྱན་དྲངས་དམ་ཡེ་དབྱེར་མེད་གྱུར༔ རིན་ཆེན་མཛེས་པའི་གཞལ་མེད་ཁང༔ པད་ཟླ་བཻཌཱུར་ཁྲི་ལ་བཞུགས༔ འཕྲུལ་དགའི་ལྷ་ཡིས་གུས་ཕྱག་འཚལ༔ ཕྱི་མཆོད་མེ་ཏོག་བདུག་སྤོས་དང༔ མར་མེ་དྲི་ཆབ་རོ་བརྒྱའི་ཟས༔ ནང་མཆོད་དབང་པོའི་མེ་ཏོག་དང༔ ཡུལ་ལྔ་རྣམ་པར་དག་པའི་རྫས༔ གསང་མཆོད་སྦྱོར་སྒྲོལ་སྟོང་པའི་གཤིས༔ འཁོར་གསུམ་ཡོངས་གྲོལ་མཆོད་པ་བཞེས༔ བདག་གཞན་ཞེན་པ་ཡོངས་སུ་གྲོལ༔ ཚོགས་དྲུག་རང་གྲོལ་དངོས་གྲུབ་སྩོལ༔ སརྦ་མ་ཧཱ་པཱུ་ཛ་ཁ་ཧཱི༔ ཨེ་མ་ཧོ༔ བསྐལ་པ་བཟང་པོའི་སངས་རྒྱས་བསྔགས་པར་འོས༔ མཆོད་བསྟོད་བསྟེན་ཅིང་བསྙེན་པའི་ཕྲིན་ལས་ལྷ༔ འཇིགས་པ་མཐའ་དག་མཚན་ཙམ་དྲན་པས་སྐྱོབ༔ རྒྱལ་ཡུམ་ཏཱ་རེ་ལྷ་མོར་གུས་པས་འདུད༔ མཚན་དཔེའི་ལང་ཚོ་སུས་ཀྱང་འགྲན་ཟླ་བྲལ༔ བསྙེན་ཅིང་སྒྲུབ་པས་མཆོག་ཐུན་དངོས་གྲུབ་སྩོལ༔ གསོལ་བ་འདེབས་ཚེ་འཁོར་བའི་གཡུལ་ངོ་འཇོམས༔ འཇིགས་བརྒྱད་དཔུང་འཇོམས་མྱུར་མ་དཔའ་མོར་བསྟོད༔ གང་སྐུ་ཨིནྡྲ་ནཱི་ལའི་རྡུལ་བྲལ་ངོས༔ གང་གསུང་དྲི་ཟའི་རྒྱུད་མང་ཚངས་པའི་དབྱངས༔ གང་ཐུགས་ཡེ་ཤེས་རྒྱ་མཚོའི་བདག་ཉིད་རྗེ༔ རྗེ་བཙུན་འཕགས་མའི་གསང་གསུམ་བསྟོད་པར་བགྱི༔ ཀྱཻ་ཧོ་དགོངས་ཤིག་སྐྱབས་གནས་དཀོན་མཆོག་གསུམ༔ རྩ་གསུམ་སྲུང་མ་རང་སྣང་རིག་པའི་ལྷ༔ རྒྱལ་ཡུམ་སྒྲོལ་མ་གནས་མཆོག་གང་ན་བཞུགས༔ བདག་གིས་གདུང་ཤུགས་དྲག་པོས་གསོལ་འདེབས་ཚེ༔ འཕོ་མེད་ཐུགས་རྗེས་བདག་ལ་ཉེ་བར་དགོངས༔ སྐྱབས་མགོན་རེ་ལྟོས་གཞན་ལ་མི་འཆའ་བར༔ འདི་ཕྱིའི་བདེ་སྡུག་འཕགས་མ་ཁྱེད་རང་མཁྱེན༔ གསོལ་བ་སྙིང་ནས་འདེབས་སོ་རྗེ་བཙུན་མ༔ བྱིན་རླབས་ཐུགས་ཀྱིས་ཕོབ་ཅིག་ཏཱ་རེ་མ༔ ལྷ་མོ་ཁྱེད་ཀྱི་གསང་གསུམ་ཡོན་ཏན་དང༔ རྣལ་འབྱོར་བདག་གི་སྒོ་གསུམ་མཉམ་པར་ཤོག༔ འཕགས་མ་ཁྱེད་ཀྱི་ཐུགས་བསྐྱེད་སྨོན་ལམ་ནི༔ མ་ལུས་འགྲོ་བའི་ཁམས་ལ་བདག་གིས་སྦྱིན༔ མངོན་མཐོ་ངེས་ལེགས་ཐར་ལམ་མཆོག་བགྲོད་ཤོག༔ དེ་རྗེས་འཛབ་ཁང་བདག་མདུན་ཕྱེ༔ ཕཊ་ཛཿབདག་ལས་ལྷ་མོ་ནི༔ མར་མེ་གཅིག་ལས་གཉིས་ཆད་བཞིན༔ མདུན་དུ་ལོགས་སུ་ཕྱེ་བར་བསམ༔ འོད་དང་འོད་ཟེར་སྦྲེལ་ཏེ་འབར༔ བདག་མདུན་ཐུགས་ནི་པད་ལྗང་དབུས༔ རིག་པ་ཏཱཾ་ཡིག་བཻཌཱུར་མདངས༔ མཐའ་མར་རང་སྔགས་གཡོན་དུ་འཁོར༔ སྔགས་ཕྲེང་ལུ་གུ་རྒྱུད་དུ་བྱུང༔ བདག་གི་ཤངས་བུག་གཡས་ནས་བྱུང༔ འཕགས་མའི་ཤངས་བུག་གཡོན་དུ་ཞུགས༔ སྐུ་ཡི་དབྱིབས་ བརྒྱུད་ལྟེ་བར་ཐོན༔ བདག་གི་སྙིང་དབུས་ཐིམ་པར་བསྒོམ༔ རྒྱལ་བ་རབ་འབྱམས་གསང་གསུམ 
་གྱི༔ བྱིན་རླབས་འབྲུ་གསུམ་རྣམ་པར་བསྡུས༔ མཆོག་ཐུན་དངོས་གྲུབ་ཐོབ་པར་དམིགས༔ ཨོཾ་ཨརྱ་ཏཱ་རེ་ཏུཏྟཱ་རེ་ཏུ་རེ་དཱ་ན་ཏྲ་ཡ་སྭཱཧཱ༔ སླར་ཡང་ཐུགས་ཀའི་སྔགས་ཕྲེང་ལས༔ འོད་འཕྲོས་མདུན་བསྐྱེད་ཐུགས་རྒྱུད་བསྐུལ༔ དེ་ལས་བསྲུང་བྱའི་གྲངས་མཉམ་པའི༔ སྒྲོལ་མ་དཀར་སེར་དམར་ལྗང་འཕྲོས༔ ཕྱག་གཡས་སྐྱབས་སྦྱིན་མཛད་པའི་འོག༔ རང་དང་བསྲུང་བྱ་ཐམས་ཅད་ཚུད༔ འཇིགས་པ་མཐའ་དག་སྐྱོབ་པར་བསམ༔ རྩ་སྔགས་ཤམ་དུ་རང་བསྲུང་སྔགས༔ བཏགས་པ་ཚད་དུ་ལོང་བར་བཟླ༔ སླར་ཡང་འོད་ཟེར་ཕྱོགས་བཅུར་འཕྲོས༔ ཕྱི་སྣོད་འཇིག་རྟེན་གཡུ་ལོ་བཀོད༔ ནང་བཅུད་སྒྲོལ་མ་རིགས་ལྔར་གྱུར༔ ལྷ་སྔགས་ཡེ་ཤེས་རོལ་པར་བསམ༔ རྩ་སྔགས་ཤམ་དུ་འདོད་གསོལ་ནི༔ པཎ་ཆེན་ཞལ་གསུང་ཇི་བཞིན་འདོན༔ བསྲུང་དམིགས་གུད་དུ་སྦས་པ་ནི༔ བསྲུང་བ་རྡོ་རྗེའི་གུར་ཁང་སྟོན༔ རང་ཉིད་རྗེ་བཙུན་འཕགས་མ་སྒྲོལ་མ་ནི༔ སྐུ་མདོག་མར་གད་རི་རྒྱལ་ལྷུན་པོ་བཞིན༔ ཐུགས་དབུས་གསེར་གྱི་མཆོད་རྟེན་འོད་དམར་ནང༔ བུམ་པའི་དབུས་སུ་ཐུགས་སྲོག་ཏཱཾ་ཡིག་ལྗང༔ ཏཱཾ་གྱི་ཐིག་ལེའི་དཀྱིལ་དུ་སློབ་དཔོན་གསལ༔ ཏཱཾ་གྱི་དཀྱིལ་དུ་རང་དང་བསྲུང་བྱ་ཚུད༔ གཡས་སུ་ཕོ་དང་གཡོན་དུ་མོ་རིགས་དང༔ འ་ཁོག་ནོར་རྫས་བ་སྤུའི་རྣམ་པར་གསལ༔ ཕྱི་རོལ་གནམ་ལྕགས་ཕ་ལམ་རྡོ་རྗེའི་གུར༔ རིམ་བདུན་མི་ཤིགས་བསྲུང་བའི་གུར་དུ་དམིགས༔ ཨོཾ་ཨཱརྱ་ཏཱ་རེ་ཏུཏྟ་རེ་ཏུ་རེ་དཱ་ན་ཏྲ་ཡ་སྭཱ་ཧཱ། སུརྱ་ཙནྡྲ་བཛྲ་རཀྵ་རཀྵ་ཧཾ༔ མ་མ་ཀཱ་ཡ་ཝཀྐ་ཙིཏྟ་རཀྵ་ཀུ་རུ་བྷྲུཾ་སྭཱ་ཧཱ༔ སྔགས་རིང་དེ་ལ་ཁྲིའམ་སྟོང༔ བཟླས་པས་རྡོ་རྗེའི་རྫོངས་སུ་ཚུད༔ འཇིགས་མེད་རྡོ་རྗེའི་གུར་དུ་འགྱུར༔ འདོད་ལྷའི་གླགས་ལྟས་ཚུགས་མི་འགྱུར༔ ཕལ་པའི་གདོན་ལ་སྨོས་ཅི་དགོས༔ འབྲིང་པོའི་གཟུངས་སྔགས་བཟླ་འདོད་ན༔ ཨོཾ་ཏཱ་རེ་ཏཱཾ་སྭཱ་ཧཱ༔ མ་མ་བ་སུ་རཏྣ་ཀཱ་ཡ་ཝཀྐ་ཙིཏྟ་བཛྲ་རཀྵ་ཀུ་རུ་བྷྲུཾ༔ ཤིན་ཏུ་བསྡུས་པའི་སྲུང་སྔགས་ནི༔ ཨོཾ་ཏཱ་རེ་ཏཱཾ་ཆེ་གེ་སྲུངས་ཤིག་སྭཱ་ཧཱ༔ སྐབས་དང་བསྟུན་ཏེ་ཅི་འགྲུབ་བཟླ༔ རྗེས་སུ་ཕྱག་འཚལ་ཉེར་གཅིག་ནི༔ གཉིས་གསུམ་བདུན་སོགས་འདོན་པར་བྱ༔ ས་མ་ཡཱ༔ རྒྱ་རྒྱ་རྒྱ༔ ཞེས་པའི་སྒྲོལ་མའི་ཆོ་ག་འདི་སྔ་མོ་ནས་དག་སྣང་དུ་བབ་པ་ཡོད་ཀྱང༔ ཅི་མི་སྙམ་པའི་ངང་དུ་བཞག་པ་མཐར་བཙུན་པ་ཀུན་བཟང་ནས་བསྐུལ་བ་གཞི་བྱས་ལྷ་གྲོགས་སྙིང་གི་དྭངས་མ་ཀུན་དགའ་བརྩོན་འགྲུས་ནས་བསྐུལ་ངོར༔ དག་སྣང་གི་ཆོས་སྡེ་ལས་བྱུང་བ་བཞིན་ས་ར་ཧི་ཏས་སྨྲས་པ་དགེ་ལེགས་འཕེལ༔