གཅོད་ཀྱི་གནད་དོན་བསྡུས་པ་ཕུང་པོ་ཟན་བསྒྱུར།
ཡང་གསང་མཁའ་འགྲོའི་སྙིང་ཐིག་ལས༔ གཅོད་ཀྱི་གནད་དོན་བསྡུས་པ་ཕུང་པོ་ཟན་བསྒྱུར་བི་ཛ་ཧ་རཾ༔
དམ་པ་མ་ཅིག་ལ་ཕྱག་འཚལ་ལོ༔ ཟབ་མོ་གཅོད་ཀྱི་དོན་བསྡུས་སྟོན༔ ཌཱ་དྲིལ་རྐང་གླིང་གཡང་གཞི་དང༔ ཅོག་པུ་མཁོ་ཆས་ལེགས་སུ་བསགས༔ མ་བཅོས་གཉུག་མ་མངོན་གྱུར་པའི༔ བརྟུལ་ཞུགས་ལམ་སློང་རྣལ་འབྱོར་པས༔ གཅོད་ལོག་སྡང་སེམས་ཆོས་བརྒྱད་ཀྱི༔ བསམ་པས་མ་བསླད་སེམས་བསྐྱེད་ཀྱི༔ འཕེན ་པ་དྲག་པོས་འདི་བཞིན་བརྗོད༔ ཕཊཿ རང་ཉིད་སྐད་ཅིག་གིས་མ་ཅིག་ཁྲོེས་མ་དམར་མོ་ལེ་བརྒན་གྱི་མདོག་ཅན་ཞལ་ཁྲོ་མོའི་ཉམས་བརྒྱ་འབར་ཞིང་མཆེ་བ་གངས་ལྟར་གཙིགས་པ༔
རལ་བ་ལྕགས་བསྲེག་གི་རང་བཞིན་མེ་ཡི་ཚྭ་ཚྭ་འཕྲོ་བ༔ སྐུ་སྟོད་སྲིད་པའི་རྩེ་ནས་འགྱིང་བ༔ ཕྱག་གཡས་པས་མི་ལྤགས་རློན་པ་ཁྲག་ཙ་རེ་བ་ནམ་མཁའི་དབྱིངས་སུ་ཕྱར་ཞིང་གཡུག་པས་ཁམས་གསུམ་དབང་དུ་སྡུད་པ༔ ཕྱག་གཡོན་པས་མི་རྐང་གི་གླིང་བུ་སེང་ལྕམ་དཀར་མོའི་ང་རོ་ལས་ལྷག་པ་བསྒྲགས་པས་གཟུགས་ཅན་དང་གཟུགས་མེད་ཀྱི་འབྱུང་པོའི་སྙིང་རྩ་ཁོལ་ཞིང་ལས་ལ་འཛུད་པ༔ སྲིད་པ་གསུམ་པོ་དབང་དུ་སྡུད་པ༔ སྐུ་སྐེད་ལ་མི་ལྤགས་ཀྱི་གཡང་གཞི་ལྡིང་སྟབས་སུ་ཀླུབས་པ༔ འདོད་ཁམས་དང་གཟུགས་ཁམས་ན་འགྱིང་ཞིང་ལྷ་འདྲེ་མི་གསུམ་དཔའ་ཟིལ་ཆགས་པ༔ ཞབས་གཉིས་རླུང་རི་ནག་པོ་རྡོ་རྗེ་རྒྱ་གྲམ་ལ་གཏུག་པ་བྲོ་ཁྲིགས་ཁྲིག་བརྡབ་པས་འོག་གདོན་ཀླུ་དང་ས་བདག་ཐམས་ཅད་འགུགས་བསྒྲལ་སྤར་བ༔ སྐུ་སྨད་ལ་སྟག་ལྤགས་ཀྱི་ཤམ་ཐབས་གསོལ་ཞིང་ང་རྒྱལ་འཇོམས་པ༔ རྣ་ལྟག་གཡས་སུ་ཕག་ཞལ་དམར་ནག་མཁའ་ལ་ངུར་བས་ས་གསུམ་གྱི་སྐྱེ་འགྲོ་སྔང་བ༔ མ་དབང་སྡུད་ཀྱི་ཕག་མོ་དེའི་ཐུགས་ཀ་ནས་གནམ་ལྕགས་ཀྱི་རྡོ་རྗེ་རི་རབ་ཙམ་སྲ་མཁྲེགས་རྔམ་བརྗིད་དང་ལྡན་པ་འཕྲོས༔ གང་ལ་དམིགས་པའི་ས་རུ་ཐོག་ལྟར་བབས་པས་དེར་གནས་ཀྱི་ལྷ་འདྲེ་ཆེ་འབྲིང་ཆུང་གསུམ་ཐམས་ཅད་ཀྱི་དཔའ་ཟིལ་ཆགས་ཏེ་འབྲོས་བསམ་པ་དང་གནོད་སེམས་ཀྱི་སྡོང་ཤོར་ནས་དབང་མེད་དུ་བརྒྱལ་བར་གྱུར༔ ཕཊཿ ཕཊཿ ཕཊཿ ཞེས་སྦྲུལ་ནག་འཁྱིལ་འགྲོས་ཀྱིས་གནས་དེར་སླེབ་པ་ན༔ རྐང་དུང་ལན་གསུམ་འབུད་ལ༔ ཕཊཿ ཕཊཿ ཕཊཿ ཧཱུྃ༔ ང་ནི་ཁྲོས་མ་ནག་མོ་སྟེ༔ མ་ཅིག་ལབ་སྒྲོན་དྲག་མོའི་སྐུ༔ ཞལ་གཅིག་ཕྱག་གཉིས་སྤྱན་གསུམ་པ༔ ཉི་ཟླ་དམར་ནག་འདྲེས་པའི་ཧུར་གྱིས་གཟིགས༔ ཕྱག་གཡས་མི་ལྤགས་གཡང་གཞི་རྡེབ༔ ཕྱག་གཡོན་མི་རྐང་གླིང་བུ་འབུད༔ མ་དབང་སྡུད་མཁའ་འགྲོ་མཐུ་མ་ཆུང༔ དབང་སྡུད་མཁའ་འགྲོ་རྩལ་མ་ཞན༔ མ་ཁམས་གསུམ་དབང་དུ་བསྡུས་ཤིང་བྱོན༔ སྲིད་གསུམ་ཟིལ་གྱིས་གནོན་ཅིང་བྱོན༔ སྟོང་གསུམ་ཕཊཿསྒྲས་གང་ཞིང་བྱོན༔ བཅོལ་པའི་ཕྲིན་ལས་འགྲུབ་པར་མཛོད༔ ཕཊཿ ཕཊཿ ཕཊཿ མ་ཕྱོགས་བཞི་དབུས་ལྔ་ནས་བཞུགས་པ་ཡི༔ རྡོ་རྗེ་རིན་ཆེན་པདྨ་ཀརྨ་དང༔ སངས་རྒྱས་མཁའ་འགྲོ་དཀར་སེར་དམར་ལྗང་མཐིང༔ མེ་ལོང་མཉམ་ཉིད་སོར་རྟོག་བྱ་བ་གྲུབ༔ ཆོས་དབྱིངས་ཡེ་ཤེས་ལྔ་ཡི་བརྟུལ་ཞུགས་ཀྱིས༔ ཞེ་སྡང་ང་རྒྱལ་འདོད་ཆགས་ཕྲག་ཏོག་དང་༔ གཏི་མུག་ལས་གྱུར་ཕོ་གདོན་རྒྱལ་འགོང་དང༔ འཆི་བདག་གཤིན་རྗེ་མོ་གདོན་བསེན་མོ་དང༔ དམ་སྲི་དམ་འགོང་ཀླུ་གདོན་ས་བདག་སྡེ༔ བཀའ་འདས་དམ་ལོག་མགོ་སྐོར་རྗེས་སྙོགས་དང༔ དངོས་གྲུབ་མི་སྟེར་རྒབ་འདྲེ་བསེ་རག་སོགས༔ འགྱུར་ལྡོག་འཕར་ལྡང་བྱེད་པའི་ལྷ་འདྲེ་རྣམས༔ ཕྱག་གཡས་མི་ལྤགས་གཡང་གཞིས་ཟིལ་གྱིས་གནོན༔ ཕྱག་གཡོན་མི་རྐང་གླིང་བུས་དབང་དུ་བསྡུས༔ སྡེ་ལྔའི་བརྟུལ་ཞུགས་གདེངས་ཀྱིས་དམ་ལ་ཐོགས༔ དཔའ་བའི་ཏིང་འཛིན་རྡོ་རྗེས་ལྡང་མེད་མཛོད༔ ཕཊཿ ཕཊཿ ཕཊཿ དེ་ནས་ཌཱ་དྲིལ་དྲག་བརྡུང་བྱས་ལ༔ ཕྱོགས་བཞི་དབུས་ལྔར་བྲོ་གར་འཁྲབ༔ ཤར་རྡོ་རྗེ་རིགས་ཀྱི་བྲོ་དཀར་ཟླུམ་ལ་འབར༔ ལྷོ་རིན་ཆེན་རིགས་ཀྱི་བྲོ་སེར་གྲུ་བཞི་ལམ༔ ནུབ་པདྨ་རིགས་ཀྱི་བྲོ་དམར་ཟླ་གམ་འཁྱིལ༔ བྱང་ལས་ཀྱི་རིགས་ཀྱི་བྲོ་ལྗང་ཟུར་གསུམ་དབལ༔ དབུས་དེ་བཞིན་རིགས་ཀྱི་བྲོ་མཐིང་དགའ་འཁྱིལ་བརྡུང༔ དུག་ལྔ་དུག་གསུམ་ལས་བསྐྲུན་ནད་གདོན་རྡུལ་དུ་བརླགས༔ ཕཊཿ ཕཊཿ ཕཊཿ ཤར་སེང་གདོང་དཀར་མོས་ཤེལ་ཕུར་འདྲིལ༔ ལྷོ་སྦྲུལ་གདོང་སེར་མོས་གསེར་ཕུར་འདྲིལ༔ ནུབ་ཁྱུང་གདོང་དམར་མོས་བྱུར་ཕུར་འདྲིལ༔ བྱང་སྦལ་གདོང་ལྗང་ཀུས་གཡུ་ཕུར་འདྲིལ༔ དབུས་རྒོད་གདོང་མཐིང་ཀས་མཆོང་ཕུར་འདྲིལ༔ བདག་འཛིན་བདུད་བཞིའི་མགོ་བོ་དང༔ ལྷུ་ཚིགས་བཞི་ལ་བཏབ་པར་བསམ༔ ཚད་མེད་བཞི་དང་བྱང་སེམས་ཀྱི༔ ཏིང་འཛིན་མཐུ་ཡིས་གནན་པར་མཛོད༔ འགུལ་སྤྱོད་བྲལ་ཏེ་གཡོ་མེད་བསམ༔ འཁོར་གསུམ་དམིགས་མེད་རྒྱས་གདབ་པོ༔ ཕཊཿ ཕཊཿ ཕཊཿ ཐུན་བཅད་སྟོང་ཉིད་བསྒོམ༔ སྣང་བ་ཐོག་བརྫིས་མི་བྱའོ༔ ས་མ་ཡཱ༔ དེ་ནས་སྐྱབས་ཡུལ་གསལ་གདབ་ནི༔ སྐྱབས་ཡུལ་མདུན་གྱི་ནམ་མཁར་ཉི་ཟླ་པདྨའི་གདན་ལ་ཆོས་སྐུ་ཡུམ་ཆེན་མོ་དང་མ་ཅིག་ལབ་ཀྱི་སྒྲོན་མ་ལ་ཟབ་མོ་གཅོད་ཡུལ་བརྒྱུད་པའི་གྲུབ་ཐོབ༔ བཀའ་བརྒྱུད་ཉམས་བརྒྱུད་ཕ་རྒྱུད་མ་རྒྱུད་བླ་མ༔ མཆོག་གསུམ་རྩ་གསུམ་རྒྱལ་བ་རྒྱ་མཚོ་དཔའ་བོ་མཁའ་འགྲོ་ཆོས་སྐྱོང་སྲུང་མ་དང་བཅས་པ་སྤྲིན་དཔུང་གཏིབ་པ་བཞིན་མངོན་སུམ་དུ་བཞུགས་པར་དམིགས་ལ༔ དེ་ནས་སྐྱབས་སུ་འགྲོ་བ་ནི༔ ཕཊཿ ན་མོ་གུ་རུ༔ གཏན་གྱི་སྐྱབས་གནས་བླ་མ་མཆོག་གསུམ་དང༔ སྐུ་གསུམ་རྩ་གསུམ་རབ་འབྱམས་རྒྱལ་སྲས་ཚོགས༔ ཀུན་འདུས་ངོ་བོ་མ་ཅིག་ཡུམ་ཆེན་མོ༔ འགྲོ་རྣམས་བྱང་ཆུབ་བར་དུ་སྐྱབས་སུ་མཆི༔ ཕཊཿ དེ་ནས་སེམས་བསྐྱེད་པ་ནི༔ བདག་གིས་སྦྱིན་སོགས་བགྱིས་པའི་བསོད་ནམས་འདིས༔ སེམས་ཅན་བདེ་ལྡན་སྡུག་བསྔལ་ཀུན་དང་བྲལ༔ ཆགས་སྡང་མེད་པའི་སྟོང་ཆེན་བློ་འདས་དབྱིངས༔ བླ་མེད་རྫོགས་པའི་བྱང་ཆུབ་ཐོབ་པར་ཤོག༔ ཕཊཿ ཚོགས་བསགས་ཡན་ལག་རིམ་པ་ནི༔ གུས་པས་ཕྱག་འཚལ་ལོངས་སྤྱོད་དགེ་ཚོགས་མཆོད༔ ཉམས་ཆགས་མཐོལ་བཤགས་དགེ་ལ་རྗེས་ཡི་རང༔ ཆོས་འཁོར་བསྐོར་བསྐུལ་མྱ་ངན་མི་འདའ་བཞུགས༔ མ་ལུས་ཕྱམ་གཅིག་བྱང་ཆུབ་ཐོབ་ཕྱིར་བསྔོ༔ ཕཊཿ མཎྚལ་འབུལ་བའི་རིམ་པ་ནི༔ ཕཊཿ རང་ལུས་མཎྚལ་སྟོང་གསུམ་ལྷུན་གྱིས་གྲུབ༔ ཕྱི་ནང་གསང་བའི་མཎྚལ་བསམ་ཡས་ཉིད༔ སྐུ་གསུམ་མཁའ་འགྲོ་གཅོད་བརྒྱུད་བླ་མར་འབུལ༔ སྒྲིབ་གཉིས་ཡོངས་དག་ཚོགས་གཉིས་མཐར་ཕྱིན་ཤོག༔ ཕཊཿ ཕཊཿ ཕཊཿ དངོས་གཞི་ལུས་སྦྱིན་དཀར་འགྱེད་ནི༔ ཕཊཿ རང་རིག་རང་ལུས་ནས་ཐོན་ཌཱཀྐི་དམར༔ ཕྱག་གཡས་གྲི་ཁུག་བམ་གྱི་ཐོད་པ་བྲེགས༔ སྐུ་གསུམ་དོན་མཚོན་ཐོད་སྒྱེད་གསུམ་གྱི་སྟེང༔ སྟོང་གསུམ་ཁྱབ་པའི་མི་མགོ་ལྕང་ལོ་ཅན༔ ནང་དུ་ཕུང་པོ་སིལ་བུར་གཏུབ་པ་ཨ་ཐུང་དང༔ ཧཾ་ཡིག་བདུད་རྩིར་ཞུ་བས་དཀར་ལྟེམས་གྱུར༔ དེ་སྟེང་འབྲུ་གསུམ་དབྱིངས་ནས་ཆར་ལྟར་བབས༔ ཟག་མེད་ཀུན་བཟང་མཆོད་སྤྲིན་རྒྱ་མཚོར་གྱུར༔ ཨོཾ་ཨཱཿཧཱུྃ༔ ཅི་མང་བརྗོད༔ ཕཊཿ མཆོད་ཡུལ་རྒྱལ་བ་སྲས་དང་སློབ་མར་བཅས༔ རྩ་གསུམ་དམ་ཅན་བགེགས་རིགས་ལན་ཆགས་ཚོགས༔ རིགས་དྲུག་སྙིང་རྗེའི་མགྲོན་གྱུར་ཐམས་ཅད་དང༔ གནས་གདོན་ལུས་གདོན་ནད་རིམས་ཡམས་ཀྱི་བདག༔ སྣང་སྲིད་མཆོད་ཡུལ་མགྲོན་གྱི་ཚོགས་རྣམས་ཀུན༔ དུར་ཁྲོད་མི་རོ་བམ་གྱི་ཚོགས་འཁོར་ལ༔ མ་ལུས་བྱ་རྒོད་ཐེད་ལ་རོལ་བ་བཞིན༔ བར་སྣང་ཁམས་ཀྱི་སྦྲང་ཆར་གཏིབ་པ་དང༔ བྱིའུ་ནག་ཆུ་ལ་རུབ་པ་ཇི་བཞིན་དུ༔ སྐད་ཅིག་ཉིད་ལ་གནས་འདིར་གཤེགས་སུ་གསོལ༔ ཕཊཿ ཕཊཿ ཕཊཿ ཕཊཿ གྲུབ་ཐོབ་གཅོད་བརྒྱུད་བླ་མ་དང༔ ཡི་དམ་རྒྱུད་སྡེ་དྲུག་གི་ལྷ༔ གནས་གསུམ་མ་མོ་མཁའ་འགྲོའི་ཚོགས༔ མ་མགོན་གཟའ་རྡོར་རྒྱལ་བཙན་བདུད༔ རྩ་གསུམ་བསྲུང་མ་ནོར་ལྷའི་མགྲོན༔ བདེ་སྟོང་འདོད་ཡོན་བདུད་རྩིས་མཆོད༔ ཐུགས་རྒྱུད་མཉེས་ཚིམ་དགའ་མགུར་ལྡན༔ མཆོག་ཐུན་ལས་བཞི་ལྷུན་གྲུབ་སྩོལ༔ ཕཊཿ ཕཊཿ ཕཊཿ ཕཊཿ རིགས་དྲུག་བགེགས་རིགས་ལན་ཆགས་མགྲོན༔ གནས་གདོན་ལུས་གདོན་ཡུལ་གྱི་གདོན༔ རྒྱལ་བསེན་གྲི་བོ་གྲི་མོ་དང༔ དམ་འགོང་བྱད་མ་ལྷ་བསྲུང་ལ༔ མི་ཟད་འདོད་དགུ་འབྱུང་བའི་གཏེར༔ བསྔོའོ་སྦྱིན་ནོ་ཚིམ་གྱུར་ཅིག༔ ཤ་འཁོན་སྒྲིབ་པ་ཡོངས་བྱང་ཞིང༔ འབྲེལ་ཐོག་སངས་རྒྱས་མྱུར་འགྲུབ་ཤོག༔ ཕཊཿ ཕཊཿ ཕཊཿ ཕཊ༔ ཁས་ཞན་དབང་ཆུང་ལྷག་མའི་མགྲོན༔ བདུད་རྩི་ལྷག་ལུས་སྟོན་མོར་འགྱེད༔ མི་ཁོམ་པ་དང་བང་བུལ་བ༔ མ་སླེབ་པ་དང་མ་ཐེམ་པ༔ ཞ་ལོང་འོན་པ་ལྐུགས་པ་དང༔ འཕྲོག་མ་མ་བུ་ལྔ་བརྒྱ་སོགས༔ ཐམས་ཅད་ངོམས་ཤིང་ཚིམ་གྱུར་ནས༔ གནོད་སེམས་གདུག་སྦྱོར་ཞི་བ་དང༔ བྱང་ཆུབ་སེམས་ལྡན་གྲོལ་བར་ཤོག༔ ཕཊཿ ཕཊཿ ཕཊཿ ཕཊཿ དེ་ནས་དགེ་སྡིག་གཏོང་ལེན་ངང༔ རང་ཉིད་བསྟན་པའི་མངའ་བདག་པོ༔ ཐུབ་པའི་དབང་པོའི་སྐུར་གསལ་བའི༔ མདུན་དུ་ལྷ་འདྲེ་གནོད་བྱེད་ཚོགས༔ ཉི་ཟེར་རྡུལ་འཁྲིགས་ལྟ་བུར་གསལ༔ ཀུན་གྱིས་དད་གུས་དུང་ངེ་ཉོན༔ ཡང་དག་ཆོས་ཀྱིས་གྲོལ་བར་མཛོད༔ ཕཊཿ ན་མོ་ཆོས་རྣམས་ཐམས་ཅད་སོགས། སྡིག་པ་ཅི་ཡང་སོགས། ཚོགས་ཀྱི་ལམ་དང་སོགས། ཐོབ་པར་ཤོག ཕཊཿ གཅོད་བྱ་འཁྲུལ་རྟོག་གཅོད་བྱེད་རིག་ཅིང་གྲོལ༔ གཉིས་མེད་མཉམ་བརྡལ་རང་བྱུང་དབྱིངས་ཀྱི་མཁའ༔ དོན་དམ་ཕྱག་རྒྱ་ཆེན་པོའི་ཀློང་དུ་གྲོལ༔ ཡུམ་དོན་ཆོས་སྐུའི་མཁའ་རུ་སངས་རྒྱས་གྱུར༔ ཨ་ཨ༔ ཕཊ་ཕཊཿ ས་མ་ཡཱ༔ རང་བྱུང་ཡེ་ཤེས་མཁའ་འགྲོའི་བརྡ༔ མ་ཅིག་ལབ་སྒྲོན་ཐུགས་ཀློང་ནས༔ སྙན་རྒྱུད་དགོངས་པ་སེམས་ལ་ཤར༔ སྐལ་ལྡན་བརྒྱུད་པ་འཛིན་ལ་གཏད༔ འདི་ནི་ཚོགས་གཉིས་བསགས་པ་དང༔ སྐྱེ་མེད་གཅིག་ཆོད་གདམས་པ་ཡིན༔ འདི་ལས་ལྷག་པ་གངས་ཅན་འདིར༔ དཀོན་ཆོས་ཡིན་ནོ་ཨ་ལ་ལ༔ འདི་ནི་གདམས་ངག་ཀུན་གྱི་བཅུད༔ ཡུམ་ཆེན་ཤེར་ཕྱིན་གདམས་པ་འདི༔ བྱ་རྒྱལ་ཁྱུང་གི་སྒོ་ང་འདྲ༔ ན་ཚོད་མཐོ་ཡང་གནམ་འཕང་གཅོད༔ ན་ཚོད་དམའ་ཡང་དེ་བཞིན་འགྱུར༔ དེ་བཞིན་གཅིག་ཆོག་གདམས་པ་འདི༔ གང་ཞིག་སུ་ཡིན་ཉམས་སུ་ལོངས༔ དབང་པོའི་རིམ་པར་མི་ལྟོས་ཤིང༔ གང་འབྲེལ་རང་སྐལ་འཚམས་པས་གྲོལ༔ དམ་པ་མ་ཅིག་ཐ་ཚིག་གོ༔ ཅེས་དང༔ ཕཊཿ ཕཊཿ ཕཊཿ སྐུ་གསུམ་ངོ་བོ་གཅོད་བརྒྱུད་བླ་མ་དང༔ ཡི་དམ་ལྷ་ཚོགས་དམ་པ་ཕག་མོ་དང༔ མ་ཅིག་ལབ་སྒྲོན་མཁའ་འགྲོ་སྡེ་ལྔ་མ༔ ཟངས་རི་བཙན་རྒོད་གཅོད་ཡུལ་བཀའ་བསྲུང་གིས༔ རང་གཞན་ཡུམ་ཆེན་དགོངས་པ་ཟང་ཐལ་དུ༔ རྣམ་གྲོལ་སྐུ་གསུམ་འབྲས་བུའི་བཀྲ་ཤིས་ཤོག༔ ཅེས་པ་འདི་ཡང་སྐྱེས་ཐོབ་རིག་པ་འཛིན༔ སུ་ཏྲ་ཞེས་བྱ་གུ་རུ་བཛྲ་གྱི༔ ཐུགས་ཟིན་བུ་སློབ་ཤྲི་ཝན་སྒྱུ་འཕྲུལ་བདག༔ བཙུན་པ་དེ་དང་བིདྱ་ལོ་ཙཱ་ནི༔ ཟུང་གིས་བསྐུལ་ངོར་བཞེད་སྐོང་ཙམ་དུ་ནི༔ ཆོས་མེད་སྤྲང་པོ་ས་ར་ཧི་ཏ་ལ༔ ཡེ་ཤེས་མཁའ་འགྲོའི་བརྡ་གླུ་སྣང་བའི་ཆོས༔ འཇའ་ཚོན་སྙིང་པོ་མི་འགྱུར་རྡོ་རྗེ་ཡི༔ གསང་གསུམ་སྒྱུ་འཕྲུལ་པདྨ་དྲག་རྩལ་གྱིས༔ གནམ་ཆོས་དབང་ལུང་མཛད་སྐབས་ཡར་ཚེས་དུས༔ དབེན་རི་རྫ་ཕུག་རོལ་མོ་གླིང་གི་ཕུར༔ རྣལ་འབྱོར་དཔའ་བོ་ས་ར་ཧི་ཏས་བྲིས༔ སྐུ་གསུམ་རང་གྲོལ་ཌཱཀྐིའི་དབང་ཐོབ་ཤོག༔ དུས་གསུམ་ཀུན་ཏུ་དགེ་ཞིང་བཀྲ་ཤིས་ཤོག༔ སརྦ་ཛ་གད་དཾ༔