ཀློང་ཆེན་སྙིང་གི་ཐིག་ལེ་ལསཿ ཆེ་མཆོག་བདུད་རྩི་འཁྱིལ་བ་ཡོན་ཏན་འདུས་པའི་དཀྱིལ་འཁོར།
༂ ཀློང་ཆེན་སྙིང་གི་ཐིག་ལེ་ལསཿ ཆེ་མཆོག་བདུད་རྩི་འཁྱིལ་བ་ཡོན་ཏན་འདུས་པའི་དཀྱིལ་འཁོར་བཞུགསཿ
སྲིད་གསུམ་གདོད་ནས་བདུད་རྩི་ལྔཿ མ་བཅོས་རང་བཞིན་ལྷུན་གྲུབ་དངཿ དེ་ཉིད་རྒྱལ་བའི་སྐུ་གསུང་ཐུགསཿ འབད་རྩོལ་མེད་པར་ཡེ་སངས་རྒྱསཿ འཇིག་རྟེན་ལོག་རྟོག་ཅན་རྣམས་དངཿ ཐེག་དམན་སྐལ་པ་ཆུང་རྣམས་ནིཿ ང་དང་བདག་ཏུ་འཛིན་པས་འཁྲུལཿ གཙང་དང་དམེ་བའི་རྟོག་པས་བཅིངསཿ རྡོ་རྗེ་འཆང་གི་ཐབས་ཚུལ་ནིཿ སྒྱུ་མ་མཁན་གྱི་བདེ་བླག་བཞིནཿ འདུལ་བའི་ཕྲིན་ལས་ཚད་མེད་པསཿ གཉིས་སུ་འཛིན་པའི་རྣམ་རྟོག་བདུདཿ ཡེ་ཤེས་རྩི་ཡིས་འཇོམས་པའི་ཐབསཿ རྨད་དུ་བྱུང་བ་འདི་བསྟན་ཏོཿ ས་མ་ཡཿ དབང་ཐོབ་དམ་ཚིག་མཆོག་ལ་གནསཿ བསྙེན་རྫོགས་ཏིང་འཛིན་དྲོད་ཚད་བརྙེསཿ དེ་ལས་གཞན་གྱི་བདུད་རྩི་དངཿ བམ་གྱི་སྒྲུབ་པ་མ་ཡིན་ནོཿ དེ་ལ་བྱ་བའི་རིམ་པ་ནིཿ སྒྲུབ་པ་ཆེན་པོ་ཁོག་ནས་དབྱུངཿ དཀྱིལ་འཁོར་ཆེན་པའི་ཕྱོགས་དང་དབུསཿ མཚན་ལྡན་ཐོད་
པ་ཁ་སྦྱར་ལྔཿ འཁོར་ལོ་རྩིབས་བཞི་མུ་ཁྱུད་ལྡནཿ བཅུད་ནི་སྔོན་ཚེ་དཔལ་ཆེན་པོསཿ ཛྭ་ལ་རཀྴ་བསྒྲལ་བ་ལསཿ བྱུང་བའི་རྩ་བརྒྱད་ཡན་ལག་སྟོངཿ མངོན་པ་ཕྱི་དང་སྦས་པ་ནངཿ རྒྱལ་བློན་སྐྱོབ་དང་བཅས་པ་ཡིཿ གྲངས་དང་དབྱེ་བ་བསམ་ཡས་ཀྱངཿ འདི་ནི་རྒྱ་གར་རིག་འཛིན་ལུགསཿ དྲི་ཆེན་དྲི་ཆུ་རཀྟ་དངཿ མཱཾ་ས་བྱང་སེམས་ཆང་དང་ཆུཿ འོ་མ་རྣམ་པ་བརྒྱད་དག་ལཿ སྒྲོན་མ་ལྔ་ཡི་སྐྱོབ་སྦྱར་ཏེཿ ཡན་ལག་སྟོང་གིས་བུངས་བསྐྱེད་དོཿ དྲི་ཆེན་གླང་ཤ་ཛཱ་ཏི་ཤརཿ ཤ་ཆེན་རྟ་ཤ་ཀ་ཀོ་བྷོཿ རྔུལ་དང་རྨ་བྱ་ལི་ཤི་ནུབཿ དྲི་ཆུ་ཁྱུང་ཤ་གུར་གུམ་བྱངཿ བྱང་སེམས་སེང་ཤ་བཟང་དྲུག་དབུསཿ བདེ་གཤེགས་རྣམས་ཀྱི་བྱིན་རླབས་ལསཿ ས་གཞི་ཡུམ་གྱི་རང་བཞིན་ལཿ བྱང་ཆུབ་སེམས་ཀྱི་ཆར་བབ་པསཿ རྩི་དང་བཅུད་དུ་སྨིན་པར་བྱསཿ ཆུ་བོ་བཅུ་ལས་གྱེས་པ་ཡིསཿ
བདུད་རྩིར་གྱུར་ཏེ་རང་བཞིན་རྒྱསཿ རྩ་བ་སྡོང་བུ་ཡལ་ག་དངཿ ལོ་མ་མེ་ཏོག་ཤུན་པ་དངཿ ཁུ་བ་འབྲས་བུ་སྙིང་པོར་བཅསཿ རོ་ནུས་དྲི་དང་ཁ་དོག་བཅསཿ རྩ་བ་གཅིག་ལ་ཡིན་ལག་བརྒྱདཿ ཡོན་ཏན་སྟོང་དང་བཅས་པ་ཡིསཿ བཞི་བརྒྱ་རྩ་བཞིའི་ནད་སེལ་ཞིངཿ འགྲོ་བ་ཀུན་གྱི་གསོས་སུ་འགྱུརཿ དེ་ཡི་ཕྱིར་ན་སྣང་སྲིད་ཀྱིཿ རྩི་དང་བཅུད་དང་རིན་པོ་ཆེཿ མ་ལུས་ལུས་པ་མེད་པ་ཀུནཿ དུག་ལྔ་སྨན་དུ་བསྒྱུར་བས་ནཿ དགག་བྱ་གང་ཡང་ཡོད་མ་ཡིནཿམཐུན་པའི་རིགས་ཀྱི་སོ་སོར་དབྱེཿ སྨན་གྱི་རྒྱལ་པོ་ཨ་རུ་རཿ གཙོ་གྱུར་འབྲས་བུ་གསུམ་དང་ནིཿ ཙན་དན་དཀར་དམར་ཨ་ཀ་རུཿ མུ་ལ་པ་ཏི་བ་ལེ་ཀཿ ག་བུར་ཐང་ཆུ་ཤིང་ཚྭ་དངཿ གྷནྡྷ་པ་ཏྲ་ལིག་དུརཿ དུ་རུ་ཀ་དང་ཞོ་ཤ་གསུམཿ སྟར་བུ་རྒུན་འབྲུ་ཐལ་ཀ་རྡོཿ རུ་རྟ་ཉེ་ཤིང་བུ་རམ་དངཿ སྦྲང་རྩི་སེང་སྡེང་སེ་འབྲུ་སོགསཿ རོ་དང་ནུས་པ་ཁ་དོག་གིསཿ སྐྱོན་དུ་མི་འགྱུར་དུག་བྲལ་སྨནཿ རྙེད་ཚད་ཀུན་གྱིས་གཅེར་ཞིང་གཏམསཿ ཚེ་དང་ཡོན་ཏན་རྒྱས་སྦུབ་ཕྱིརཿ ཡུང་བ་ཆུ་རྩ་ལུག་རུ་སེརཿ གི་ཝང་དྲི་བཟང་བུངས་ཆེར་བསྐྱེདཿ ཀུན་ལ་བདུད་རྩི་འཁྱིལ་བའམཿ རྨེ་བརྩེགས་ལ་བརྟེན་སྤྱངས་ཁྲུས་གཅེསཿ སྟེང་ནས་དར་ཚོན་སྣ་ལྔས་དགབཿ ཚོན་སྐུད་རྒྱུས་བཅིངས་གཟུངས་ཐག་དྲངསཿ ལས་གཞུང་སྤངས་ལ་བཟླས་པ་བྱཿ དེ་ནས་ ཁྲོལ་བུ 
་སྦྱངས་བའི་ཕྱིརཿ སྤྲོས་པ་ཅན་ལ་རིགས་བརྒྱད་དངཿ རིགས་ལྔ་སོགས་སུ་བསྟན་པ་ཡངཿ གང་ལ་བརྟེན་པའི་དཀྱིལ་འཁོར་དེའིཿ ཞི་ཁྲོའི་རྣམ་པ་མ་ལུས་པཿ ཡོངས་སུ་རྫོགས་པར་བྱ་ཕྱིར་དངཿ
གཟུང་འཛིན་རྟོག་ཚོགས་བརྒྱ་ཕྲག་གིཿ གཉེན་པོར་དམ་པ་རིགས་བརྒྱ་དངཿ རྟོག་ཚོགས་དེ་དག་ཉོན་མོངས་ལྔཿ དེ་ཉིད་རིགས་ལྔས་སྦྱོང་བ་དངཿ རིགས་ལ་ཐ་དད་ཞེན་པ་ཡིཿགཉེན་པོར་གསང་ཆེན་རིགས་གཅིག་གིསཿ སྦྱོང་བར་བསྟན་མོད་དེ་ལས་འདིརཿ ལྷར་འཛིན་རྣམ་པ་ཐ་དད་དངཿ སྨན་གྱི་དངོས་པོ་རང་རྒྱུད་པརཿ འཛིན་པའི་རྟོག་པ་བསམ་ཡས་ཀུནཿ བདུད་རྩི་ཡོན་ཏན་དཀྱིལ་འཁོར་འདིརཿ དུ་མར་སྣང་ཡང་གཅིག་ཏུ་བརྟགཿ ཨཱཿ རང་བྱུང་སྤྲུལ་པའི་ཕོ་བྲང་དབུསཿ ཡཾ་ལས་རླུང་གི་དཀྱིལ་འཁོར་ནིཿ འགྱུ་བྱེད་སྟོབས་ལྡན་གཞུ་ཡི་དབྱིབསཿ དེ་སྟེང་རཾ་ལས་བསྐལ་པའི་མེཿ གྲུ་གསུམ་རྣམ་ཐར་གསུམ་དུ་འབརཿ ཀཾ་ལས་མི་མགོའི་སྒྱེད་པུ་ནིཿ སྐུ་གསུམ་མཚོན་པའི་སྟེང་ཉིད་དུཿ ཨ་ལས་བྷནྡྷའི་ཕོ་བྲང་ཆེཿ ཕྱི་དཀར་བྱང་ཆུབ་སེམས་ཉིད་མདངསཿ ནང་དམར་བདེ་སྟོང་ཡེ་ཤེས་མཚོནཿ དེ་ནང་རང་བྱུང་ལྷུན་གྲུབ་རྫསཿ གྷོ་ཀུ་དྷ་ཧ་ན་ལས་ཤཿ བི་མུ་མ་ར་ཤུ་ལས་སྒྲོནཿ ཧཱུྃ་ཨཱོཾ་སྭཱ་ཨཱཾ་ཧཱ་དང་ནིཿ མཱུ་ལཱཾ་མཱཾ་པཱཾ་ཏཱཾ་ཡིག་མཚནཿ འོག་ནས་རླུང་གཡོས་མེ་སྦར་བསཿ གདོད་ནས་དག་པའི་བདུད་རྩིར་གྱུརཿ དེ་དབུས་རིགས་རྣམས་ཀུན་བདག་ཉིདཿ ཆེ་མཆོག་བདུད་རྩི་འཁྱིལ་བའི་སྐུཿ ལྗང་སེར་ཞལ་གཅིག་ཕྱག་གཉིས་པཿ ཡུམ་ལ་འཁྱུད་ནས་ཐལ་མོ་བཟདཿ
བདུད་རྩིས་བཀང་བའི་བུམ་པ་འཛིནཿ རྫས་དང་སྨན་གྱི་རྟོག་པ་སྦྱངསཿ བྱང་ཆུབ་སེམས་ཀྱི་སྤྲིན་ཚོགས་ལསཿ བདེ་གཤེགས་མཆོད་ཅིང་གནས་ངན་སྤྱངསཿ འཁོར་འདས་ཀུན་གྱི་དྭངས་མའི་བཅུདཿ བྷནྡྷའི་ནང་དུ་རོ་གཅིག་འཁྱིལཿ གདོད་ནས་དམ་ཡེ་དབྱེར་མེད་དུཿ གནས་པ་དེ་ལྟར་ཞལ་བསྒྱུར་རྗེསཿ དྲང་སྲོང་སྨན་སྲུང་སྤྱན་ཡང་དྲོངསཿ ཧཱུྃཿ ཚངས་པ་དག་གི་གཙོ་བོ་མཆོགཿ དུང་གི་ཐོར་ཚུགས་ཁོང་སེང་ཅནཿ ཚངས་པ་ཀུན་སྒྲོལ་ཆེན་པོ་དངཿ དྲང་སྲོང་ཆེན་པོ་ལྗང་སྔོན་དངཿ ཙ་ར་ཀ་དང་ནབས་སོ་སྐྱེསཿ ཐ་སྐར་བུ་དང་ལྷ་སྐྱབས་དངཿ རྒྱུན་ཤེས་དང་ནི་གཡོན་ཕྱོགས་ལྷཿ ཐང་ལ་གནས་དང་མེ་བཞིན་འཇུགཿ རྐང་གཉིས་སྤྱོད་དང་ཀ་ཡ་ནཿ ཤིང་ཁྱེར་དང་ནི་ལྗང་སྔོན་བུཿ ཉི་མ་ཟླ་བ་ཀླུ་རུ་བཅསཿ བྲམ་ཟེ་གཞོན་ནུ་སྤྲིན་དང་ནིཿ རིན་པོ་ཆེ་དང་གྷོ་ཏ་ཤནཿགཞོན་ནུ་སྲེད་དང་མགྲོན་སྐྱབས་དངཿ རྩིབས་ཀྱི་མུ་ཁྱུད་འཛིན་ལ་སོགསཿ ཁྱེད་ཅག་འཁོར་དང་བཅས་པ་ཡིསཿ སྔོན་ཆད་བསྒྲུབས་ནས་གྲུབ་པ་བཞིནཿ འདིར་སྤྱོན་བདུད་རྩིའི་དངོས་གྲུབ་སྩོལཿ དེ་དག་གཙང་སྦྲ་ལ་གནས་པས་རྟོག་པ་བསལ་བའི་ཆོས་བཤད་ནིཿ ནང་མཆོད་འཐོར་ཞིངཿ ཀྱཻཿ སྟོང་གསུམ་འཇིག་རྟེན་ཁམས་འདི་ནཿ ཚངས་དང་དྲང་སྲོང་གཙང་མ་ཟཿ དེ་དག་གྲོལ་བར་ངས་མ་
བཤདཿ ཀླུ་དང་བྲམ་ཟེ་གཙང་མ་སྤྱོདཿ དེ་དག་གྲོལ་བར་ངས་མ་བཤདཿ བྱོལ་སོང་རྩྭ་མཆོག་ཟ་བ་ཡངཿ ཇི་སྲིད་འཚོ་ཡི་བར་དུ་སྤྱོདཿ དེ་དག་གྲོལ་བར་ངས་མ་བཤདཿ རྒྱུ་དང་འབྲས་བུ་འཁྲུལ་པའི་སྒྲཿ ཐམས་ཅད་བདུད་རྩིའི་རང་བཞིན་ཏེཿ དོན་དམ་ངེས་པའི་ལུང་འདི་ཉོནཿ ཐབས་དང་ལྡན་པས་རིག་ཅིང་རྟོགསཿ ཆོས་ཉིད་གཅིག་ལ་ཐ་དད་པསཿ རིགས་ལྔའི་མཚན་ཉིད་ཡོན་ཏན་རྫོགསཿ འདི་ལྟར་རྟོགས་ན་གྲོལ་བར་འགྱུརཿ རང་བཞིན་གདོད་ནས་དག་པ་ཡིཿ མཉམ་ཉིད་དབྱིངས་སུ་རབ་རྟོགས་ཤིངཿ གཉིས་མེད་དོན་གྱིས་ཟིན་པ་ནཿཇི་ལྟར་དམིགས་པ་བཞིན་དུ་འགྲུབཿ གཙང་དང་མི་གཙང་རྟོག་པ་ཡིནཿ མཁས་པས་གཉིས་སུ་བྱ་མི་སྤྱོདཿ སྐུ་ལྔ་ཡེ་ཤེས་རྫོགས་པའི་ཕྱིརཿདྲི་ཆེན་གསེར་མདོག་རྣམ་སྣང་མཛདཿ མངོན་འབྱུང་སྤྲུལ་པ་ཆོས་ཀྱི་སྐུཿ བྱང་ཆུབ་སེམས་ནི་དཀར་པོའི་མདོགཿ དྲི་མ་དག་པའི་ཡེ་ཤེས་སྐུཿ མཾ་ས་ཡིད་བཞིན་རིན་ཆེན་འབྱུངཿ སྣ་ཚོགས་འབྱུང་ལྡན་མཉམ་ཉིད་སྐུཿ རཀྟ་ཆགས་མེད་དམར་བ་ནིཿ དྲི་མེད་རྣམ་དག་པདྨའི་སྐུཿ དྲི་ཆེན་དག་བྱེད་ལྗང་ཁུའི་མདོགཿ ཀུན་ཏུ་དོན་གྲུབ་ལས་རབས་སྐུཿ སྐུ་ལྔ་ལྷུན་གྲུབ་བདུད་རྩི་ལྔཿ རང་གི་ལུས་ལ་ངང་
གི་གནསཿ དྲི་ཆེན་དྲི་ཆུ་རཀྟ་དངཿ མཱཾ་ས་བྱང་ཆུབ་སེམས་འདི་རྣམསཿ སེམས་ཅན་རྟོག་པ་ལྡོག་པའི་ཕྱིརཿ གཙོ་བོར་དང་དུ་བླང་ཞིང་སྒྲུབཿ མ་རྟོག་གཙང་དམེ་མེད་པར་སྤྱོདཿ ཅེས་བརྗོད་སྣོད་བཅུད་ལ་དབང་བའིཿ སྨན་གྱི་དྲང་སྲོང་རིག་འཛིན་སོགསཿ གཙང་དམེའི་གཉིས་འཛིན་ཀུན་སྤངས་ནསཿ ཕོ་བྲང་དབྱིངས་ལ་བཞུགས་པ་དེསཿ འདོད་པའི་དངོས་གྲུབ་སྩོལ་བར་བསམཿ དེ་ནས་སྨན་གྱི་འཛབ་ལ་འཇུགཿ བདག་ཉིད་རང་བཞིན་དཀྱིལ་འཁོར་ནསཿ སྔགས་ཀྱི་འོད་ཟེར་གཟུངས་ཐག་ལཿ འཁྲིལ་ཏེ་མདུན་བསྐྱེད་ཐུགས་ཀར་ཞུགསཿ དེ་ལས་འོད་འཕྲོས་འཁོར་འདས་ཀྱིཿ དྭངས་བཅུད་ཕྱག་གི་བུམ་པར་འཁྱིལཿ ཁོལ་ཞིང་ལུད་ནས་ཞལ་དུ་ཞུགསཿ བྱང་ཆུབ་སེམས་ཀྱི་ངོ་བོར་ཞུབསཿཡབ་ཡུམ་བདེ་རོལ་སྦྱོར་མཚམས་ནསཿ བདུད་རྩིའི་ཆར་རྒྱུན་འབེབས་པར་གྱུརཿ ཨོཾ་ཨཱཿཧཱུྃ་སརྦ་པཉྩ་ཨ་མྲི་ཏ་ཀུན་དྷ་ལི་ར་ས་ཡ་ན་ཏ་ན་ཛ་ཡ་གུ་ཧྱ་སིད་དྷི་ཧཱུྃ་ཧྲཱིཿཋཱཿ སྟོང་མཆོད་དབལ་གྱི་ཕོ་ཉ་བསྐུལཿ བུན་གྱིས་བརྡེག་ཅིང་བྲོ་ཡིས་གཟིརཿ བར་གཅོད་ཉུལ་ལེ་བཟློག་ལ་བརྩོནཿ དུར་ཁྲོད་བརྒྱད་ཀྱི་བྱིན་འབེབས་བྱཿ ཚོགས་ཀྱི་འཁོར་ལོས་དགྱེས་པ་སྐོངཿ ཁྲོལ་གུ་ཞག་གསུམ་ཚར་བའི་རྗེསཿ ལྷ་ཡང་འོད་ཞུ་བདུད་རྩིར་བསྟིམཿ ཐམས་ཅད་མཉམ་པ་ཉིད་དུ་སྦྱངསཿ སྨན་ལ་ཆེ་བའི་ཡོན་ཏན་བརྗོདཿ མཚན་དོན་སྦྱར་ནས་
མཆོད་པ་ནིཿ ལས་གཞུང་བཞིན་དུ་ཤེས་པར་བྱཿ དེ་ནས་དངོས་གྲུབ་བསྡུ་བ་ནིཿ ཡུམ་གྱི་སྨན་གཞོང་ཁྱོགས་ལས་བཏེགཿ ཨེ་མ་ཐབས་ཆེན་ཁྱད་པར་ཆེཿ ཨེ་མ་ཐབས་ཆེན་བླ་ན་མེདཿ ཨེ་མ་ངོ་མཚར་རྨད་དུ་བྱུངཿ ལྟ་བ་རྨད་བྱུང་ངོ་མཚར་ཆེཿ སྤྱོད་པ་རྨད་བྱུང་ངོ་མཚར་ཆེཿཉོན་མོངས་མ་སྤངས་ངོ་མཚར་ཆེཿ ཡེ་ཤེས་ལྔ་རྫོགས་ངོ་མཚར་ཆེཿ སྐུ་ལྔ་ལྷུན་གྲུབ་ངོ་མཚར་ཆེཿ ཆོས་སྐུ་གཅིག་ལ་ཐ་དད་པཿ རིགས་ལྔའི་དངོས་གྲུབ་འདི་ཐོབ་བོཿ ཡང་དག་འཆི་མེད་དོན་བརྙེས་སོཿ ཞེས་བརྗོད་རྡོ་རྗེ་རྒྱལ་པོ་ཡིསཿ ཨེ་མ་ཧོཿ དམ་རྫས་བདུད་རྩིའི་བཅུད་འདི་ནིཿ མཐོང་ངམ་ཐོས་སམ་རེག་པས་ཀྱངཿ ཐམས་ཅད་དབང་ཕྱུག་བདག་གིས་ཐོབཿ ཐེ་ཚོམ་མི་འཚལ་ཨ་ལ་ལཿ ཞེས་བརྗོད་གུ་ཧྱ་ལག་གིས་བླངཿ སྒྲུབ་དཀྱིལ་ཤར་དུ་ཞིང་ལྤགས་སྟེངཿ ཐབས་ཤེས་མཚོན་པའི་སྟན་གཏུན་བཞགཿ ཡབ་ཡུམ་བདུད་རྩི་འཁྱིལ་བ་ནིཿ ཞལ་གཅིག་ཕྱག་གཉིས་སྐུ་མདོག་དཀརཿ རྡོ་རྗེ་ཐོད་པ་གཡས་གཡོན་བསྣམསཿ ཟུང་འཇུག་སྦྱོར་བའི་མཁའ་ཀློང་དུཿ སྒྲོལ་བ་ཞེ་སྡང་རྡོ་རྗེའི་ལསཿ གནས་ངན་སྦྱངས་ཤིང་ས་ལ་བཀོདཿ ཨོཾ་ཨཱཿཧཱུྃ་སརྦ་པཉྩ་ཨ་མྲི་ཏ་ཀུན་དྷ་ལི་ཧ་ན་ཧ་ན་རཾཿ ཞེས་འཐག་ངོ་བོ་བདེ་བའི་སྨནཿ དཀར་དམར་བྱང་ཆུབ་སེམས་ཀྱི་སྤྲིནཿ ཉལ་ཉལ་ལྷུད་ལྷུད་འབབ་པར་བསམཿ ལྷོ་ཡི་ཕྱོགས་
སུ་བཙགས་བྱ་སྟེཿ རིག་པ་ཡེ་གྲོལ་རྡོ་རྗེ་དངཿ རྟོག་ཚོགས་ཐ་དད་དབྱེ་བར་བསམཿ ཨོཾ་ཨཱཿཧཱུྃ་སརྦ་པཉྩ་ཨ་མྲི་ཏ་མུ་ས་ལ་ཀྲི་ཧ་ན་ཨ་པ་ན་ཧོ་ས་མ་ཡ་ཧཱུྃ་ཕཊཿ ནུབ་ཏུ་གཉིས་སུ་འཛིན་པའི་སེམསཿ ཐ་དད་མེད་པ་མཚོན་ཕྱིར་སྦྱརཿ ཆང་ཆུ་འོ་མ་རིན་ཆེན་སྦྲེངཿ ཨོཾ་ཨ་མྲྀ་ཏ་ཛ་གད་བྱི་ཏ་བ་ཤྭོ་དྷ་ཡ་རཏྣ་ཙིཏྟ་བི་ཤུངྔྷེ་ཀུནྡྷ་ལི་སྭཱ་ཧཱཿ དབྱིངས་དང་ཡེ་ཤེས་གཅིག་ཏུ་མཚོནཿ མཉམ་པ་ཉིད་དུ་འདྲེས་པར་སྩལཿ ཨོཾ་ཨཱཿཧཱུྃ་སརྦ་པཉྩ་ཨ་མྲི་ཏ་མུ་ས་ལ་ཧཱུྃ་ཧྲཱིཿཋཿ བྱང་དུ་ཆོས་མ་རྡོ་རྗེ་ཡིསཿ དངོས་གྲུབ་སྤེལ་ཕྱིར་ཕབས་ཀྱིས་བྲནཿ མཆོག་ཆེན་རྐང་གིས་དཀྲུགས་ཤིང་བཅལཿཨོཾ་ཨཱཿཧཱུྃ་སརྦ་པཉྩ་ཨ་མྲི་ཏ་ཧ་ཡ་གྷྲི་ཝ་ཧུ་ལུ་ཧུ་ལུ་ཧཱུྃ་ཧྲཱིཿཋཿ རང་བཞིན་བདེ་བ་ཆེན་པོའི་སྣོདཿ ལྷ་རྫས་དམར་པོའི་སྣོད་དུ་སྩལཿ བྷནྡྷའི་བར་བཅུག་རྒྱ་ཆིངས་གདབཿ དྲོད་ཀྱི་ཐབས་ལ་མཁས་བྱས་ཏེཿ སྣ་ཚོགས་དར་གྱི་ན་བཟའ་བཀླུབསཿ དབུ་བརྒྱན་བཅིངས་ཤིང་རྡོ་དྲིལ་བསྣོལཿ ཕོ་བྲང་ཆེན་པོར་མངའ་གསོལ་བྱཿ སྟེང་ནས་གཟུངས་ཐག་དྲང་བྱ་ཞིངཿ འོག་ཏུ་དྲོད་འབེབས་མར་མེ་སྦརཿ དེ་ཡང་དུར་ཁྲོད་རྫས་ལའོཿ དེ་ནས་མཆོད་པ་བཟང་དུ་བཤམསཿ བདག་དང་མདུན་བསྐྱེད་སྒྲུབ་རྫས་གསུམཿ རོལ་པ་གཅིག་ཏུ་ཤེས་པ་ཡིཿ དཔལ་ཆེན་འདུས་པའི་ལས་གཞུང་བསྲངཿ རྩ་བའི་བཟླས་པ་ཐོན་པ་དངཿ འཛབ་ཁང་དབྱེ་སྟེ་མདུན་བསྐྱེད་ནིཿ དཀྱིལ་འཁོར་དྲུག་དང་སྦྱོར་བ་བརྒྱདཿ འདུས་པའི་རྣམ་པ་ཞལ་སྒྱུར་ནིཿ ཕཊ་ཛཿ གཞལ་ཡས་ཕོ་བྲང་ཆེན་པོའི་དབུསཿ ཡཾ་ལས་རླུང་དཀྱིལ་
གཞུ་དབྱིབས་ཅནཿ རཾ་ལས་མེ་དཀྱིལ་གྲུ་གསུམ་འབརཿ ཨ་ལས་ནོར་བུ་རིན་པོ་ཆེཿ སྲུབས་མེད་བྷནྡྷ་འབར་བའི་སྣོདཿ བདུད་རྩི་རང་བྱུང་གཞལ་ཡས་ཁངཿ རྒྱ་ཁྱོན་ཆོས་ཀྱི་དབྱིངས་དང་མཉམཿ དེ་དབུས་པདྨོའི་གེ་སར་ལཿ བདེ་སྟོང་ཐབས་ཤེས་ཉི་ཟླའི་གདནཿ འོད་ཟེར་ཀུན་ནས་འབར་བའི་སྟེངཿ དངོས་གྲུབ་ཆེན་པོའི་རང་བཞིན་ནིཿཤ་ལྔ་བདུད་རྩི་ཡི་སྟེངཿ ཧཱུྃ་ཨོཾ་སྭཱ་ཨཱཾ་ཧཱ་ལས་ནིཿ རྡོ་རྗེ་འཁོར་ལོ་རིན་པོ་ཆེཿ པདྨ་རྒྱ་གྲམ་ཡིག་འབྲུ་ལྔསཿ མཚན་པ་ཡོངས་གྱུར་སངས་རྒྱས་ལྔཿ ཡབ་ཡུམ་མཉམ་སྦྱོར་བདུད་རྩིར་ཞུཿ དེ་སྟེང་དཔའ་བོ་འབྲུ་ལྔས་མཚནཿ བདུད་རྩི་རང་བྱུང་དཀྱིལ་འཁོར་ནིཿ སྣང་ལ་རང་བཞིན་མེད་པར་གསལཿ ཨོཾ་ཨཱཿཧཱུྃ་སྭཱ་ཧཱཿ དཀྱིལ་འཁོར་བདག་པོ་ཡབ་ཡུམ་གྱིཿ བྱང་ཆུབ་སེམས་ཀྱི་སྤྲིན་ཚོགས་ལསཿ སྟོང་གསུམ་འཇིག་རྟེན་ཁྲོ་བཅུས་གངཿ བགེགས་རྣམས་སྟོངས་ཤིང་ཟད་སར་བསྒྲལཿ སླར་འདུས་བདུད་རྩིའི་ཕོ་བྲང་གིཿ ཕྱོགས་མཚམས་སྟེང་འོག་བཅུར་བཞུགས་ནསཿ བགེགས་འདུལ་བསྲུང་བའི་ལས་མཛད་གྱུརཿ ཨོཾ་བཛྲ་ཀྲོ་དྷ་ཧཱུྃ་ཀཱ་ར་ཧཱུྃཿ ཞེས་ཕོ་བྲང་གི་ནམ་མཁར་ཧཱུྃ་མཛད་དངཿ དེ་བཞིན་དུཿ བི་ཛ་ཡཿ ནཱི་ལ་དནྟཿ ཡ་མཱནྟ་ཀཿ ཨཱརྱ་
ཨ་ཙ་ལཿ ཧྱ་གྷྲི་ཝཿཨ་མྲྀ་ཏ་ཀུནྜ་ལིཿ ཏྲཻ་ལོཀྱ་བཱི་ཛ་ཡཿ མ་ཧཱ་བཱ་ལ་ཧཱུྃཿ ཞེས་འོག་གི་མེ་དཀྱིལ་ཀློང་ན་སྟོབས་པོ་ཆེ་བཞུགས་པར་གསལ་ལོཿ རང་བྱུང་བདུད་རྩིའི་ཕོ་བྲང་སྟེངཿ འགྲོ་འདུལ་ཁྲོ་བོའི་དཀྱིལ་འཁོར་གྱིསཿབསྟེན་པའི་ཚུལ་དུ་ཁྲག་འཐུང་བཞིཿ ཞལ་གཅིག་ཕྱག་གཉིས་ཡུམ་དང་འཁྲིལཿ ལས་མདོག་རང་རྟགས་ཐོད་པ་བསྣམསཿ གཡས་གཡོན་ཞབས་ཀྱིས་ཕྱོགས་མཚམས་ཀྱིཿ ཏ་ཀྲིཏ་བརྒྱད་པོའི་དབུ་ནས་བརྫིསཿཁྲོ་བོ་བཞི་ཡི་སྟེང་ཉིད་དུཿ བཛྲ་ཧེ་རུ་ཀ་ཡབ་ཡུམཿམཐིང་ནག་ཞལ་གསུམ་ཕྱག་དྲུག་པཿ གཡས་གསུམ་རྩེ་དགུ་རྩེ་ལྔ་ཞིངཿ གཡོན་གསུམ་དྲིལ་བྷན་ཁ་ཊཱཾ་བསྣམསཿ ཞབས་བཞིས་རིགས་བཞིའི་ཁྲག་འཐུང་མནནཿ སྐུ་གདོང་འབར་བའི་དཀྱིལ་འཁོར་ནིཿ བདེ་ཆེན་ངང་དུ་དགྱེས་པར་བཞུགསཿ དེ་སྟེང་དབྱིངས་མ་བདེ་རོལ་ཉམསཿ གེལ་པའི་འདུག་སྟངས་ཞབས་བརྒྱད་ཀྱིསཿ བཛྲ་ཁྲག་འཐུང་དབུ་གཉིས་བརྫིསཿ རྩ་ཞལ་ཡུམ་གྱི་མཁའ་ལ་རྫོགསཿ ཡེ་ཤེས་སྤྱན་གྱི་ཕྱེད་ནུབ་ཚུལཿ ནམ་མཁའི་མདོག་ཅན་བཅོ་བརྒྱད་ཕྱགཿ རྩ་ཕྱག་རྡོར་དྲིལ་ཐུགས་ཀར་བསྣོལཿ གཡས་བརྒྱད་གནས་ཀྱི་མ་མོ་བརྒྱདཿ གཡོན་བརྒྱད་
ཡུལ་གྱི་ཕྲ་མེན་བརྒྱདཿ ཕྱོགས་མཚམས་བརྒྱད་དུ་གཟིགས་པའི་ཞལཿ བདེ་བའི་ཉམས་བརྒྱད་ཀུན་ཏུ་མཚོནཿ དབུ་མའི་ཞལ་ལ་གསང་མཆོད་རྫོགསཿ མཁའ་མཉམ་ཀློང་གི་དཀྱིལ་འཁོར་ནིཿ གསལ་ལ་མ་འདྲེས་ལྷུན་གྱིས་གྲུབཿ མ་མ་ཀྲོ་ཏི་ཤྭཱ་རི་སྟྭཾཿ དེ་སྟེང་ཆེ་མཆོག་ཧེ་རུ་ཀཿ སྐུ་ནི་སྨུག་ནག་དབུ་ཉེར་གཅིགཿ བཞི་བཅུ་རྩ་གཉིས་ཕྱག་མཐིལ་ནཿ ཐབས་ཤེས་ཞི་བའི་ལྷ་ཚོགས་བསྣམསཿ ཞབས་བརྒྱད་ཡུམ་གྱི་དབུ་བརྒྱད་སྦྱོརཿ ཡུམ་ཞལ་དབུ་མའི་སྨིན་མཚམས་མཁརཿ རྡོ་རྗེ་ནོར་བུའི་སྦྱོར་བ་རྫོགསཿ རྩ་ཞལ་ལྗགས་སྟེང་ཉི་ཟླའི་སྟེངཿསྲས་མཆོག་ས་ནུ་ཧེ་རུ་ཀཿ མདོག་དཀར་གསང་བ་ཡུམ་དང་བཅསཿ ཞལ་གཅིག་ཕྱག་གཉིས་ཚོན་གང་བཿ ཕྱག་གཉིས་ཉི་ཟླའི་གའུ་སྦྱོརཿ ལྗགས་སྟེང་འབྲུ་དགུའི་སྔགས་ཀྱིས་བསྐོརཿ འཆི་མེད་རྡོ་རྗེ་དཀྱིལ་འཁོར་ནིཿ གསལ་བརྟན་གཟི་བྱེད་འོད་དུ་འབརཿ ཨོཾ་ཨཱཿཧཱུྃ་སརྦ་པཉྩ་ཨ་མྲི་ཏ་ཧཱུྃ་ཧྲཱིཿཋཱཿ སྐུ་གདུང་འབར་བའི་ལྡིང་གུར་འོགཿབདུད་རྩི་རང་བྱུང་དཀྱིལ་འཁོར་དབུསཿ རྒྱ་གྲམ་འབར་བའི་ལྟེ་བ་རུཿ ཧྲཱིཿལས་དབང་ཆེན་རྟ་གདོང་ཞལཿ མདོག་དམར་ཞལ་གསུམ་ཕྱག་བཞི་པཿ གཡས་གཉིས་པདྨ་བྷཉྫ་དངཿ གཡོན་གཉིས་རྒྱ་
གྲམ་སྡིགས་མཛུབ་མཛདཿ གྲྭ་བཞིའི་ཡུམ་གྱི་མགུལ་ནས་འཁྱུདཿ མི་ཕམ་ཁྲོ་གཉེར་རལ་གཅིག་མཿ རོ་ལངས་མ་བཞི་ལས་མདོག་ཅནཿ སྐུ་སྨད་བདུད་རྩིའི་ནང་དུ་ནུབཿ གྲི་གུག་ཐོད་འཛིན་བདེ་སྟོང་ཕྱགཿ ཡབ་ཀྱི་བརླ་བཞིར་དགྱེས་པར་འཁྲིལཿ ལྷུམས་དང་ཞབས་བཞི་མཉམ་པར་སྦྱོརཿ ཀུན་ཀྱང་བདེ་བ་ཆེན་པོའི་ཉམསཿ སྦྱོར་བ་བརྒྱད་དུ་འབར་བ་ཡིཿ སྒྲ་དང་འོད་ཀྱི་བརྟུལ་ཞུགས་ཀྱིསཿ བདེ་གཤེགས་མ་ལུས་སྤྱན་དྲངས་ནསཿ ཡེ་ཤེས་ལྔ་ཡི་དབང་བསྐུར་ཞིངཿ རྡོ་རྗེ་གསུམ་དུ་རྒྱས་གདབ་བོཿ ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾཿ དེ་བཞིན་དུཿ ཝཱཀྐ་བཛྲཿ ཙིཏྟཿ ཨ་ནུ་ར་གཿ ཀརྨ་བཛྲཿ ཞེས་སྦྱརཿ སྤྱན་འདྲེན་མཆོད་བསྟོད་རྣམས་ཡེ་ཤེས་སྐུ་མཆོག་མའི་ཚིག་ཕྱིར་སེམས་གཞོལ་ཏེཿ མཉམ་ཉིད་བྱང་ཆུབ་སེམས་ལ་རྟག་ཏུ་འདུདཿ ཀྱི་བར་བརྗོདཿ སྨན་སྲུང་སྤྱན་དྲངས་རྟོག་པ་བསལཿཛ྄བ་བསྐུལ་དམིགས་པའི་ཏིང་འཛིན་ནིཿ མེ་དང་འདྲ་ལ་བཟླས་བརྗོད་ཀྱིཿ རླུང་གིས་བར་མཚམས་མེད་པར་བསྐུལཿ དཀྱིལ་འཁོར་བདག་པོ་ཧེ་རུ་ཀའིཿ ཐུགས་ཀར་ཉི་དཀྱིལ་ཨ་ཡིག་ལཿ དགུ་པའི་སྔགས་ཕྲེང་གཡས་སུ་འཁོརཿ དེ་ལས་འཕྲོས་པའི་འོད་ཟེར་གྱིསཿ རླུང་གཡོས་མེ་སྦར་བདུད་རྩི་ཁོལཿ སྒྲ་དང་བཅས་པའི་ཟེགས་རླངས་ལསཿ བྱང་ཆུབ་སེམས་ཀྱི་འོད་ཟེར་འཕྲོསཿ ཆེ་
མཆོག་རྩ་བའི་དཀྱིལ་འཁོར་ལྔཿ མཉེས་བྱས་ཐུགས་དམ་གནད་ནས་བསྐུལཿ ཡོངས་རྫོགས་སྐུ་ཡི་དབྱིབས་བརྒྱུད་དེཿ སྲས་མཆོག་ས་ནུ་ཧེ་རུ་ཀའིཿ ལྗགས་ཀྱི་སྔགས་འཁོར་རབ་ཏུ་བསྐུལཿ དེ་ཡི་འོད་ཀྱིས་ཞིང་ཀུན་གཡོསཿ བདེ་གཤེགས་མ་ལུས་མཆོད་པས་མཉེསཿ མཁྱེན་བརྩེ་ནུས་པའི་ཡོན་ཏན་དངཿ ཡེ་ཤེས་ལྔ་ཡི་བདུད་རྩིའི་བཅུདཿ འོད་ཀྱི་རྣམ་པར་ཚུར་བསྡུས་ནསཿ ལྗགས་ཀྱི་འཁོར་ལོ་ལ་བརྒྱུད་དེཿ དཀྱིལ་འཁོར་ལྔ་ཡི་སྐུའི་དབྱིབས་བརྒྱུདཿ སྦྱོར་བའི་ལམ་ནས་བདུད་རྩིར་བབསཿ དབང་བསྐུར་བྱིན་བརླབས་གསལ་བརྟན་འབརཿ སྦྱོར་བ་བརྒྱད་དུ་རྣམ་པར་རོལཿ ས་མ་ཡ་ཧོཿ ས་མ་ཡ་སྟྭཾཿ རཱ་ག་ཧོཿ རཱ་ག་ཡཱ་མིཿ ཨ་ལ་ལ་ཧོཿ བྷོ་དྷི་ཙིཏྟ་སྥ་ར་ཎ་ཕཊཿ བརྡ་དང་བརྡ་ལན་གྱིས་བསྐུལ་ཏེཿ སྟོང་པ་ཤིན་ཏུ་ཡོད་མེད་མཐུསཿ སྲིད་པའི་འདོད་པ་རྣམ་དག་པཿ བདེ་མཆོག་བདེ་བའི་རོལ་མོར་འཁྲོལཿསྦྱོར་མཚམས་བརྒྱད་ནས་བྱང་ཆུབ་སེམསཿ ཞིང་ཁམས་ཀུན་ཏུ་ཁྱབ་པར་འཕྲོསཿ འཕགས་པ་མཆོད་ཅིང་གཞན་དོན་བྱསཿ སྐུ་གསུང་ཐུགས་ཀྱི་དངོས་གྲུབ་དབྱིགཿ འབྱུང་བས་བསྡུས་པའི་དྭངས་མའི་བཅུདཿ ཀུན་ཀྱང་བདུད་རྩིའི་རང་བཞིན་ཏེཿ མུ་ཏིག་དཀར་པོ་
དྲི་མེད་ལྟརཿ རང་བཞིན་དཀྱིལ་འཁོར་ལ་ཐིམ་ཞིངཿ སྤྲུལ་པའི་འཁོར་ལོར་འཁྱིལ་བར་གྱུརཿ ཨོཾ་ཨཱཿཧཱུྃ་སརྦ་པཉྩ་ཨ་མྲི་ཏ་ཧཱུྃ་ཧྲཱིཿཋཱཿ ཆིག་སྒྲིལ་བརྩོན་ཞིང་སྟོང་ཚིག་བརྗོདཿ ཁོར་ཡུག་གསུང་མི་ཆད་དུ་བཟླཿ ཉུལ་ལེ་འོང་བའི་དུས་དྲུག་ལཿ ཕོ་ཉ་བསྐུལ་ཞིང་གཉེན་པོས་བསྐྲདཿ སྤོས་རོལ་དང་བཅས་བྱིན་ཡང་དབབཿ བཞིའམ་དྲུག་ཏུ་ཚོགས་འཁོར་བསྐོརཿ ཐེ་ཚོམ་མེད་ན་ངེས་པར་འགྲུབཿ བསྐྱེད་རིམ་གསལ་ལས་ལྷ་མོར་སྟོནཿ བཟླས་བརྗོད་དག་པས་ཡ་མཚན་སྒྲཿ ཏིང་འཛིན་གསལ་ལ་འོད་དུ་འབརཿ སྨན་ཆ་སྙོམས་ལས་དྲི་དང་རླངསཿདམ་ཚིག་དག་ལས་མང་དུ་འཕེལཿ རྟགས་ལ་རློམ་སེམས་མི་བསྐྱེད་ཅིངཿ མ་གྲུབ་སྤོགས་པའི་ཆོ་ག་བྱཿ གཡེལ་དང་ཞུད་པ་དམ་པོས་བཅདཿ ཉམས་དང་འདྲེས་པ་ཐབས་ཀྱིས་བསལཿ ཞིག་རལ་གསོ་བ་ཤིན་ཏུ་གཅེསཿ དེ་ནས་གནད་བསྐུལ་སྔགས་ཀྱི་སྒོཿ ཨ་ར་ལི་དང་ཕཻཾ་རྒྱ་མདེའུཿ སྒྲུབ་པའི་སྔགས་ཀྱི་མདའ་ལ་བསྐྱོནཿ སྐལ་པ་རབ་ཀྱིས་ཐང་དང་ཞགཿ འབྲིང་གིས་བདུན་ལ་ཐ་མས་ཀྱངཿ ཉི་ཤུ་གཅིག་ལ་རྟགས་མཚན་རྣམསཿ མཐོང་འགྱུར་འདི་ལ་ཐེ་ཚོམ་མེདཿ དེ་ལྟར་མཐོང་ནས་ཨཱ་བེ་ཤསཿ སྦྱོར་བ་བསྐུལ་ཏེ་བྱང་སེམས་དབབཿ པྲ་བེ་ཤ་ཡིས་གསང་སྒོ་དབྱེཿ ཀུནྡྷ་ལི་ཡིས་སྣོད་དུ་བསྐྱིལཿ ཧོཿ ཆེ་མཆོག་བདུད་རྩིའི་དཀྱིལ་འཁོར་འདིརཿ ཡབ་ཡུམ་སྦྱོར་བའི་སྐུའི་དབྱིངས་ལསཿ གཉིས་མེད་བྱང་ཆུབ་སེམས་ཀྱི་སྤྲིནཿ མུ་ཏིག་འཇུ་བའི་
ཟིལ་པ་བཞིནཿ འཕོ་ཞིང་གཡོ་བར་འབབ་པ་ཡངཿ འཛག་བདེའི་སྲིད་པ་རྣམ་དག་པསཿ རང་བཞིན་མེད་པར་འཁྱིལ་ཞིང་གནསཿ ཨེ་མ་ཧོཿ འདི་ནི་རྡོ་རྗེའི་དམ་ཚིག་སྟེཿ སྣང་སྲིད་བདུད་རྩིར་སྨིན་པའི་ཕྱིརཿ པདྨོ་ནོར་བུའི་གྲོང་ཁྱེར་ལསཿ དངུལ་ཆུ་བཞིན་དུ་འདར་འཕྲིག་བཅསཿ སྲིད་གསུམ་བྷནྡྷའི་སྣོད་དུ་བསྐྱིལཿ ཆགས་པ་ཀུན་བྲལ་སྐྱེ་མེད་དབྱིངསཿ གཉིས་མེད་དོན་ལ་སྣ་ཚོགས་སྟོནཿ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཨཱ་བེ་ཤ་ཡཿ པྲ་བེ་ཤ་ཡ་ཕཻཾ་ཕཻཾཿ ཀུནྡྷ་ལི་ཧཱུྃ་ཧྲཱིཿཋཱཿ ཞེས་བཟླ་སྐབས་སུ་འདི་ལྟར་བསྐུལཿ ཧཱུྃཿ ང་ནི་དཀྱིལ་འཁོར་ཀུན་བདག་ཉིདཿ རྒྱལ་ཀུན་གསང་བའི་གཏེར་ལ་དབངཿ ཁྲག་འཐུང་དཀྱིལ་འཁོར་ལྷ་ཚོགས་རྣམསཿ ཐུགས་དམ་དབང་གིས་སྤྱན་འདྲེན་གཤེགསཿ བླ་ན་མེད་པ་རྡོ་རྗེ་ཡིཿ དམ་ཚིག་མཆོག་དེ་བདག་བསྒྲུབ་ནཿ ཐུགས་ཀྱི་དགོངས་པར་མི་མཛད་ཅིངཿ སྒྲུབ་པའི་འབྲས་བུ་གང་ཡིན་པཿ འདི་རུ་སྩོལ་བར་མི་མཛད་ནཿ རྡོ་རྗེ་ཕྱག་རྒྱ་གང་དུ་གཉནཿ སྐུ་གསུང་ཐུགས་ཀྱི་ཡལ་གམ་ལཿ དགོངས་ནས་མཆོག་དང་ཐུན་མོང་གིཿ དངོས་གྲུབ་མ་ལུས་སྩལ་དུ་གསོལཿ ཅེས་པས་གནད་དབབ་སྦྱར་སྤོས་སྲེགཿ དེ་ནས་བདུད་རྩི་དབང་དུ་བྱཿ ལྷ་
སྔགས་ཏིང་འཛིན་ནུས་པས་བསྡུཿ ཧཱུྃཿ རྟ་མགྲིན་དབང་གི་དཀྱིལ་འཁོར་ནསཿ རིགས་ཀྱི་ལྷ་མོ་བཞི་དང་བཅསཿ བདུད་རྩི་ལྔ་དང་འབྱུང་ལྔའི་བཅུདཿ མཉམ་སྦྱོར་བྱང་ཆུབ་སེམས་སུ་སྡུདཿ དེ་ཉིད་སྨན་དང་རོ་གཅིག་པཿ འཆི་མེད་བདུད་རྩིའི་དངོས་པོ་ཅནཿ དྭངས་མ་འོད་ཟེར་ལྔའི་རྣམ་པསཿ བདག་གི་སྙིང་དབུས་ཞུགས་པར་གྱུརཿ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧ་ཡ་གྷྲི་ཝ་ཧུ་ལུ་ཧུ་ལུ་བྷནྡྷ་བྷནྡྷ་ཧཱུྃ་ཧྲཱིཿཋཱཿ བརྒྱ་རྩ་བརྒྱད་བཟླ་དངོས་གྲུབ་ནིཿ གཞན་གྱིས་མི་འཕྲོག་བདག་ཐོབ་བསམཿ དེ་ལྟར་སྒྲུབ་པ་ཐོན་པ་ཡིཿ ནངས་པར་ཚོགས་འཁོར་བཟང་དུ་བཤམསཿ ཆོ་ག་ལ་སོགས་དངོས་གྲུབ་རྫསཿ ཇི་ལྟར་ཚོགས་པ་བཞིན་དུ་བསྡུཿ ཕྲིན་ལས་གཞུང་བསྲང་བཟླས་པའི་རྗེསཿ དངོས་གྲུབ་བསྐུལ་བའི་འཛབ་ལ་འཇུགཿ རྡོ་རྗེ་སློབ་མར་བཅས་པ་ཡིསཿ ཞུན་ཆེན་མར་མེ་ལག་ཏུ་བཏེགཿ ཧཱུྃཿ བདག་ཅག་རིག་འཛིན་སྒྲུབ་པ་པོསཿ ལོངས་སྤྱོད་དུར་ཁྲོད་རྫས་ལ་བརྟེནཿ སྡོང་བུ་དུར་ཁྲོད་རས་ལ་གཏམསཿ ཚིལ་ཆེན་མར་མེ་སྐར་ལྟར་བཀྲཿ བསྐྱེད་རིམ་བཟླས་བརྗོད་རྒྱུན་མ་བཅདཿ གདུང་བ་དྲག་པོའི་ངར་དང་ལྡནཿ དཔལ་ཆེན་ལྷ་ཚོགས་ཐུགས་དམ་བསྐངསཿ དམ་ཅན་རྣམས་ཀྱང་དམ་ལ་འདུཿ རྡོ་རྗེའི་དམ་ཚིག་ཆེན་པོ་འདིའིཿ བཀའ་ཡི་སྡུད་པོ་འཇམ་དཔལ་དངཿ ས་ཡི་སྙིང་པོ་ལ་སོགས་ཀྱངཿ ཐུགས་དམ་བསྐུལ་ལོ་བརྟུལ་
ཞུགས་བསྐྱེདཿ དངོས་གྲུབ་བསྐུལ་བའི་དུས་ལ་བབཿ སྐུ་གསུང་ཐུགས་དང་ཡོན་ཏན་དངཿ ཕྲིན་ལས་འདུས་པའི་དབྱིག་ཆེན་པོཿ བདུད་རྩིའི་རྫས་ལ་བརྟེན་ནས་སྩོལཿ ཨོཾ་ཨཿཧཱུྃཿ སརྦ་པཉྩ་ཨ་མྲྀ་ཏ་མཉྫུ་ཤྲི་བྷྱཱ་བ་ལོ་ཀི་ཏེ་ཧཱུྃ་ཧྲཱིཿཋཱཿ ཨ་ཧོ་སུ་ཁ་དྷརྨཱ་ཀཱ་ཡ་ན་ཨ་མྲྀ་ཏ་སིདྡྷི་ཧཱུྃ་ཧྲཱིཿཋཿ བརྒྱ་རྩ་བཟླས་ཏེ་དངོས་གྲུབ་བསྐུལཿ ཚོགས་འཁོར་བསྐོར་ཞིང་བྲོ་བཤགས་བྱཿ དེ་ནས་དངོས་གྲུབ་བླང་བ་ནིཿ དཀྱིལ་འཁོར་བསྐོར་ཞིང་སློབ་དཔོན་གྱིསཿ གཡོན་པའི་མཐེབ་སྲིན་སྦྱར་བྱས་པའིཿ སྙིམ་པ་བདུད་རྩིའི་སྟེང་ནས་དགབཿ ཧོཿ དཔལ་ཆེན་དཀྱིལ་འཁོར་ལྷ་ཚོགས་དགོངས་སུ་གསོལཿ བདུད་རྩི་སྒྲུབ་པའི་ཞག་གྲངས་ད་ནངས་ཐེམཿ བདུད་རྩི་སྒྲུབ་པའི་དམ་ཚིག་དེ་རིང་རྫོགསཿ རྡོ་རྗེའི་ནམ་ལངས་དངོས་གྲུབ་ཉི་ཟླ་ཤརཿ ཐུགས་དམ་དུས་ལ་བབ་པོ་ཐུགས་རྗེ་བསྐྱེདཿ སྐུ་གསུང་ཐུགས་དང་ཡོན་ཏན་ཕྲིན་ལས་ལྔའིཿ གསང་བ་བསམ་གྱིས་མི་ཁྱབ་བདུད་རྩིའི་ཆོསཿ སྐྱེ་འཆི་མེད་པའི་དངོས་གྲུབ་ཆེན་པོའི་དབྱིགཿ རིག་འཛིན་སྒྲུབ་པའི་རྫས་ལ་བརྟེན་ནས་སྩོལཿ གྲུབ་ཆེན་བརྒྱད་དང་ཕྲིན་ལས་རྣམ་པ་བཞིཿ འདུ་བ་གསུམ་དང་འབར་བ་རྣམ་པ་གསུམཿ དཔལ་བཅུའི་ཡོན་ཏན་མངོན་ཤེས་རྫུ་འཕྲུལ་སྟོབསཿ མི་བརྗེད་གཟུངས་དང་གཡུང་དྲུང་ལྟ་བུའི་ཚེཿ རིག་འཛིན་
བཞི་དང་སྐུ་ལྔ་ལྷུན་རྫོགས་པཿ མ་ལུས་ལུས་པ་མེད་པའི་དངོས་གྲུབ་ཀུནཿ ད་ལྟ་ཉིད་དུ་བདག་ལ་སྩལ་དུ་གསོལཿ ཅེས་བརྗོད་བདུད་རྩིའི་ཕོ་བྲང་ལཿ དངོས་སུ་སྤྱད་ཕྱིར་གསང་སྔགས་འདིསཿ རིག་པའི་མེ་ཏོག་དོར་བར་བྱཿ ཨོཾ་བྷོ་དྷི་ཙིཏྟ་ཀཱ་ཡ་ཝཱཀྐ་ཙིཏྟ་མ་ཧཱ་ས་མ་ཡ་ཧོཿ དེ་ནས་བདུད་རྩིའི་ཕོ་བྲང་དེཿ དངོས་གྲུབ་རིག་མ་རྟེན་གྱིས་སྤྱན་དྲངས་ལཿ རྡོ་རྗེའི་བདེ་ཆེན་རྒྱལ་པོའི་སྤྱི་གཙུག་གནས་སུ་བཀོདཿ བདག་ཉིད་རང་བཞིན་དཀྱིལ་འཁོར་ལཿ སྤྲུལ་པའི་དཀྱིལ་འཁོར་མདུན་བསྐྱེད་ཐིམ་པར་བསམཿ བདུད་རྩི་དཀྱིལ་འཁོར་ལྷ་ཚོགས་རྣམསཿ བདག་ཉིད་རང་བཞིན་འཁོར་ལོ་ལཿ ཆུ་ལ་ཆུ་བཞག་ལྟ་བུའི་ངངཿ གཉིས་མེད་ཡེ་ཤེས་རང་དབང་བསྐུརཿ དབང་གི་ནང་ནས་དབང་ཆེན་པོཿ སྒོ་གསུམ་སྐུ་གསུམ་ཐུགས་དང་འདྲེསཿ བསྐུར་ཐོབ་གཉིས་མེད་བདེ་ཆེན་ངངཿ རང་རིག་དཔལ་ཆེན་རོལ་པར་རྫོགསཿ ཨོཾ་ཨཿཧཱུཾཿ སརྦ་པཉྩ་ཨ་མྲྀ་ཏ་ཀཱ་ཡ་ཝཱཀྐ་ཙིཏྟ་ཨཱ་ཡུ་སིདྡྷི་ཕ་ལ་ཨ་བྷི་ཥིཉྩ་ཏུ་མཱཾཿ ཞེས་ནོད་དཀྱིལ་འཁོར་གཙོ་མཆོག་དངཿ གཉིས་སུ་མེད་པའི་ཐིག་ལེར་བསྒོམསཿ དེ་ནས་བདུད་རྩིའི་ཕོ་བྲང་དབངཿ སློབ་མའི་སྤྱི་བོར་བཞག་སྟེ་བསྐུརཿ ཧཱུྃཿ སྣང་སྲིད་རྣམ་དག་དུང་ཆེན་སྣོདཿ རྒྱུ་གཉིས་རྐྱེན་གསུམ་ལས་བྱུང་བའིཿ སྐུ་གསུང་ཐུགས་ཀྱི་དངོས་གྲུབ་འདིཿ བདེ་ཆེན་མཉམ་ཉིད་ཐུགས་ཀྱི་ངངཿ ཆགས་འཛིན་རྣམ་དག་ཤེས་རབ་
སྐུཿ གཉིས་མེད་དོན་ལ་སྣ་ཚོགས་སྟོནཿའདི་ནི་དོན་གྱི་བདུད་རྩིའོཿ མ་སྐྱེས་ཀུན་བཟང་ཆེ་བའི་མཆོགཿ བདེ་ཆེན་ཀློང་ན་དབྱིངས་ཕྱུག་མཿ ཉོན་མོངས་རྣམ་དག་རིགས་ཀྱི་གཙོཿ ཡེ་ཤེས་ལྔར་རྫོགས་སྐུ་ལྔར་གྲུབཿ དུག་ལྔའི་རྟག་པ་རང་སར་གྲོལཿ འདི་ནི་མིང་གི་བདུད་རྩིའོཿ ཕྱི་སྣོད་ནང་བཅུད་ཐམས་ཅད་ཀུནཿ བདུད་རྩི་རྣམ་པ་ལྔ་ཉིད་དེཿ སོ་སོར་རང་རིག་རྩ་བ་བརྒྱདཿ དབྱིབས་དང་ཁ་དོག་ཕྱི་དང་ནངཿ ཐབས་དང་ཤེས་རབ་རོ་དང་མཐུཿ སྐུ་དང་གསུང་དང་ཐུགས་ཉིད་དངཿ ཡོན་ཏན་ཕྲིན་ལས་ཡན་ལག་སྟོངཿ རང་དང་རང་བཞིན་བདག་ཉིད་སྐུཿ དུས་གསུམ་དེ་ཉིད་ཤེས་པ་སྤྱོདཿ དབང་གི་ནང་ནས་ཆེ་བའི་མཆོགཿ སྐལ་ལྡན་བུ་ལ་སྦྱིན་པ་ཡིསཿ བདུད་བཞི་ཉོན་མོངས་ནད་འཇོམས་སེལཿ ལྟ་སྤྱོད་ཕྲིན་ལས་དམ་ཚིག་དངཿ ཡེ་ཤེས་དཀྱིལ་འཁོར་སྒྲུབ་པའི་ལུངཿ འཁོར་འདས་ཆོས་དང་གཙང་མི་གཙངཿ ལོག་རྟོག་སྤང་ལེན་སེམས་སུ་རྫོགསཿ དུག་ལྔ་མ་སྤངས་ཡེ་ཤེས་ལྔཿ སྐུ་ལྔ་མ་བསྒྲུབས་རང་བཞིན་དངཿ སྐྱེ་འཆི་མེད་པའི་གནས་ཐོབ་ཤོགཿ ཨོཾ་ཨཱཿཧཱུྃ་མ་ཧཱ་ཤྲཱི་ཧེ་རུ་ཀ་ཀྲོ་ཏི་ཤྭ་རཱི་སྟྭཾཿ སརྦ་པཉྩ་ཨ་མྲྀ་ཏ་ཨ་བྷི་ཥིཉྩ་ཨཱ་བེ་ཤ་ཡ་ཨ་ཨཱཿ ཞེས་བསྐུར་དེ་ནས་དཀྱིལ་འཁོར་པསཿ སྡུད་པོ་འཇམ་དཔལ་རྣོན་པོ་ལཿ གནང་བ་སྩལ་ཏེ་གཏད་
པར་བསམཿ ཡུམ་དང་ལས་ཀྱི་རྡོ་རྗེ་ཡིསཿ སྔར་བཞིན་ཕོ་བྲང་ཡབ་ལ་དབུལཿ ངེས་ཀྱང་རིངས་པའི་ཚུལ་གྱིས་བླངསཿ ཨ་ཧོ་མ་ཧཱ་སུ་ཁ་ཧོཿ དམ་རྫས་བདུད་རྩིའི་བཅུད་འདི་ནིཿ ལོགས་ཀྱི་བརྡ་ལན་སྔར་བཞིན་གདབཿ རྒྱ་རྣམས་བཀྲོལ་ཞིང་འདི་སྐད་བརྗོདཿ མཁའ་དབྱིངས་ཕྱག་རྒྱ་གཉན་པོ་མཆོགཿ དཔལ་གྱི་ཐ་ཚིག་དམ་པར་དགྲོལཿ པདྨ་ས་མ་ཡ་པྲ་བེ་ཤ་ཡ་ཕཊཿ སྣོད་ཞལ་ཕྱེ་བའི་དེ་མ་ཐགཿ བདུད་རྩི་སྨན་གྱི་དྭངས་མ་ནིཿ དཀར་དམར་སྔོ་བའི་འོད་ཟེར་གྱིཿ རྣམ་པས་བདག་གིས་གནས་གསུམ་དུཿ ཐིམ་པར་བསམ་ཞིང་འདི་སྐད་དོཿ སྲོག་གི་རྒྱུན་གསུམ་ངོ་བོ་གཅིགཿ གནས་གསུམ་བྱང་ཆུབ་སེམས་ལ་ཐིམཿ དོན་དམ་གཉིས་མེད་ཐིག་ལེ་ལསཿ སྐུ་གསུངས་ཐུགས་ཀྱི་རྡོ་རྗེར་གྱུརཿ མ་ཧཱ་གུ་ཧྱ་ཀཱ་ཡ་ཝཱཀྐ་ཙིཏྟ་སིད་དྷི་ཧྲཱིཿཧ་ཧཱུྃཿ འདི་ནི་སངས་རྒྱས་ཐམས་ཅད་ཀྱིཿ དབང་བསྐུར་སྦྱོང་ཡུལ་དམ་པའོཿ ས་ནས་སུ་རུ་འཕར་བར་མཆོདཿ སྨན་གྱི་འཕེར་རྟགས་དྲིལ་བུར་གཞལཿ བདེ་སྐྱོང་མ་ཧཱ་ན་ཡིས་བཀངཿ དེ་ལ་བདུད་རྩིའི་ཕུར་མ་ཟདཿ གཞུང་བཞིན་མཚན་དོན་སྦྱར་བས་མཆོདཿ ལྕེ་ཡི་དམ་ཚིག་རྡོ་རྗེས་མྱངཿ དབང་པོའི་སྒོ་དང་ཡན་ལག་ལའངཿ མཐེ་སྲིན་སྦྱར་བས་ཐིག་ལེ་བྱཿ དེ་ནས་བདུད་རྩིའི་ཆ་ཤས་ནིཿ རཏྣའི་གའུར་གཏེར་དུ་སྩལཿ ཆེ་མཆོག་བདུད་རྩི་འཁྱིལ་བའི་སྐུཿ ཕོ་བྲང་ནང་དུ་བཞུགས་པར་བསྒོམསཿ སྤྱི་བོའི་གཙུག་གམ་མགུལ་དུ་གདགསཿ རྩ་གསུམ་དམ་ཅན་སྤྲིན་བཞིན་འདུཿ ཀུན་གྱིས་བསྐུར་ཞིང་
གང་འབྲེལ་འཆོངསཿ སྨན་ནི་ཆ་གསུམ་དག་ཏུ་བཅདཿ དང་པོ་རྩ་གསུམ་ལྷ་ལ་བསྔོཿ དེ་ནས་གཉན་གྱི་དོན་ཡང་བྱཿ གཉིས་པ་དཔའ་བོ་རྡོ་རྗེས་བཟུངཿ ཐ་མ་འདུས་པའི་ཚོམ་བུར་སྤེལཿ ཐུན་བཞི་ཀུན་ལ་རྟག་ཏུ་མྱོངཿ མ་གྲུབ་ནངས་པར་རེ་རེ་བཞིནཿ ཐ་མའང་དུས་བཟང་ཚོགས་འཁོར་དངཿ བཟླ་བའི་དུས་ན་ངེས་པར་སྤྱདཿ ཚེ་རིང་ནད་མེད་བདེ་བ་དངཿ ལང་ཚོ་ཁ་དོག་སྟོབས་གཟི་བརྗིདཿ འཕེལ་ཞིང་དབང་པོ་རྣམ་རིག་གསལཿ མཁའ་ལ་འགྲོ་ཞིང་སྦྱོར་ངན་གྱིཿ ནུས་པའི་མི་ཚུགས་ཏིང་འཛིན་གསལཿ ཁྱད་པར་ཡོན་ཏན་བསམ་མི་ཁྱབཿ ལུས་ལ་གནས་པའི་བདུད་རྩི་ལྔཿ དྭངས་མར་གྱུར་ནས་འཆི་མེད་འགྲུབཿ འདུ་བའི་ནད་སེལ་བདུད་བཞི་འཇོམསཿ བཅུད་ལེན་ཀུན་གྱི་རྒྱལ་པོ་ཡིནཿ སྤངས་རྟོགས་ཡོན་ཏན་ངང་གི་འཕེལཿ འདི་སྒྲུབ་རྒྱལ་བའི་སྲས་སུ་དགོངསཿ རྟོག་ལ་ཡེ་ཤེས་སྨན་སྦྱར་བསཿདུག་ལྔ་ཡེ་ཤེས་ལྔ་རུ་རྫོགསཿ གང་དུ་སྒྲུབ་པའི་གནས་མཆོག་དེཿ ཉི་ཤུ་རྩ་བཞིའི་ཡུལ་དང་མཉམཿ དཔའ་བོ་མཁའ་འགྲོ་ཤུགས་ལ་འདུཿ བཀྲ་ཤིས་བྱིན་ཆགས་ཏིང་འཛིན་འཕེལཿ ས་དགྲ་ཞི་ཞིང་ཆར་ཆུ་འབེབསཿ ལྷ་ཀླུ་དགའ་བས་སྣོད་བཅུད་རྒྱསཿ རྩི་དང་ལོ་ཏོག་ཕུན་སུམ་ཚོགསཿ དེ་བས་རྣལ་འབྱོར་ཆེ་རྣམས་ཀྱིསཿ སེམས་བསྐྱེད་ཏིང་འཛིན་དངོས་རྫས་ཀྱིཿ ཆོ་གར་ལྡན་པ་འདི་སྒྲུབས་ཤིགཿ དེ་ཡི་བསོད་ནམས་བརྗོད་མི་ལངསཿ རྡོ་རྗེའི་དམ་ཚིག་གནས་ལ་ཡངཿ རང་བཞིན་སྤྱོད་པའི་ཡོན་ཏན་ལསཿ བསྒྲུབས་པའི་ཡོན་ཏན་
དེ་ལྟའོཿ རྗེས་ཀྱི་ལས་ཁྲིགས་སྒྲུབ་ཆེན་བཞིནཿ ས་མ་ཡཿ ཀླུ་དང་བྲམ་ཟེ་དྲང་སྲོང་རིགསཿ གཙང་སྦྲ་དཀའ་ཐུབ་བརྟུལ་ཞུགས་ཀྱིཿ རྟོགས་པས་ཀུན་ནས་གཟིར་བ་རྣམསཿ འོག་མིན་གནས་སུ་ཧེ་རུ་ཀསཿ རྡོ་རྗེའི་དམ་ཚིག་ཆེན་པོ་གནསཿ ལགས་པར་བསྟན་པའི་བདུད་རྩིས་བརྟུལཿ དེ་བཞིན་ཀུན་དཀྲིས་ཉོན་མོངས་ཅནཿ རྡོ་རྗེའི་ལམ་དང་བྲལ་གྱི་དོགསཿ ཕུན་སུམ་ཚོགས་པ་ལྔའི་ཡན་ལགཿ ལྡན་པའི་ལུས་ཀྱི་སྣང་སྲིད་ཀུནཿ ར་ས་ཡ་ནའི་འཁོར་ལོ་རུཿ སྦྱངས་རྟོགས་སྤར་བའི་མན་ངག་བཅུདཿ འཇམ་དཔལ་རྣོན་པོས་རྒྱུད་དུ་བསྡུསཿ དེ་ཡི་བྱ་བའི་རང་བཞིན་རྣམསཿ རྣམ་ཤེས་བྲལ་བའི་སེང་གེ་བཞིནཿ འདྲ་མིན་འཆོལ་བར་དར་བའི་ཚེཿ འཇམ་དཔལ་རྣོན་པོའི་ཐུགས་བསྐྱེད་དངཿ བདག་ཉིད་ཆེན་པོ་པདྨ་ཡིསཿ ཀློང་བྱང་ཌཱཀྐིའི་བརྡ་རིས་ཀྱིསཿ རྒྱུད་དོན་ཇི་བཞིན་གཏན་ལ་འབེབསཿ རྟེན་འབྲེལ་གསུམ་གྱི་འཁོར་ལོ་ལསཿ ཚིག་བརྒྱུད་རྡོ་རྗེའི་རོལ་མོར་འཁྲོལཿ ས་མ་ཡཿ རྒྱ་རྒྱ་རྒྱཿ ཿ