སྡོམ་པ་གསུམ་གྱི་རབ་ཏུ་དབྱེ་བའི་རྣམ་བཤད་རྒྱལ་བའི་གསུང་རབ་ཀྱི་དགོངས་པ་གསལ་བ།

སྡོམ་པ་གསུམ་གྱི་རབ་ཏུ་དབྱེ་བའི་རྣམ་བཤད་རྒྱལ་བའི་གསུང་རབ་ཀྱི་དགོངས་པ་གསལ་བ་ཞེས་བྱ་བ་བཞུགས་སོ།། སྡོམ་པ་གསུམ་གྱི་རབ་ཏུ་དབྱེ་བའི་རྣམ་བཤད་རྒྱལ་བའི་གསུང་རབ་ཀྱི་དགོངས་པ་གསལ་བ་ཞེས་བྱ་བ། བླ་མ་དང་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །སྣ་ཚོགས་ཐེག་པའི་རིགས་ཀྱི་བློ་གྲོས་ཁམས། །ནུས་ལྡན་ཐབས་མཁས་རྩི་ཡིས་ཟིན་པ་ཡིས། །སྡོམ་གསུམ་གསེར་གྱི་ཕུང་པོར་བསྒྱུར་མཛད་པའི། །ཤཱཀྱའི་དབང་པོ་བཟོ་སྦྱངས་མཁས་པ་རྒྱལ། །རབ་མཛེས་པདྨའི་ལྟེ་བར་ཟླ་གདན་ལ། །གུར་གུམ་གཞོན་ནུའི་མདངས་འཕྲོག་འཛུམ་པའི་བཞིན། །དྲན་པ་ཙམ་གྱིས་ཡིད་ཀྱི་མུན་སེལ་བ། །ལྷ་མཆོག་འཇམ་པའི་དབྱངས་ལ་གུས་ཕྱག་འཚལ། །ཐུགས་རྗེའི་གཏེར་ཆེན་ལག་ན་པདྨོ་ཡིས། །གྲངས་མེད་འགྲོ་ལ་ཕན་བདེ་བསྐྲུན་སླད་དུ། །གངས་རིའི་ཁྲོད་འདིར་མི་ཡི་གཟུགས་འཛིན་ལ། །རྗེ་བཙུན་ས་སྐྱ་པ་ལ་མགོས་ཕྱག་འཚལ། །དེ་སྲས་འཇམ་དབྱངས་འཁོན་སྟོན་ཀུན་དགའ་འབར། །བསོད་ནམས་ཡེ་ཤེས་རྩེ་མོར་རབ་སོན་དང་། །རབ་སྙན་གྲགས་པའི་རྒྱལ་མཚན་འཛིན་པའི་དཔལ། །དཔལ་འབྱོར་ཆེན་པོའི་འོད་ཟེར་སྟོང་ལྡན་དང་། །ཡོངས་རྫོགས་བསྟན་པའི་མངའ་བདག་པཎྜི་ཏ། །རྣམ་དཔྱོད་བློ་ལྡན་བསོད་ནམས་རྒྱལ་མཚན་ཞབས། །འགྲོ་བའི་བླ་མ་ཆོས་ཀྱི་རྒྱལ་པོ་སྟེ། །རིམ་པར་བྱོན་པའི་འཇམ་དབྱངས་བདུན་ལ་འདུད། །ཁྱད་པར་ཟབ་གསལ་མཁྱེན་པའི་དཀྱིལ་འཁོར་འཆད་རྩོད་རྩོམ་པའི་འོད་ཟེར་སྟོང་འཕྲོ་བ། །དམིགས་མེད་ཐུགས་རྗེའི་རྟ་བདུན་གྱིས་དྲངས་རབ་འབྱམས་ཤེས་བྱའི་མཁའ་ལ་ཐོགས་མེད་རྒྱུ། །བདེ་གཤེགས་གསུང་རབ་པད་ཚལ་རྒྱས་ཤིང་སྐལ་ལྡན་བུང་བའི་དགའ་སྟོན་སྤེལ་མཛད་པ། །འཇམ་དབྱངས་བླ་མ་སྔོན་མེད་ནམ་མཁའི་ནོར་བུ་འགྲོ་བའི་གཙུག་ན་རྒྱལ་གྱུར་ཅིག །གཞན་ཡང་སྤྲུལ་སྐུ་ཕྱག་ན་རྡོ་རྗེ་སོགས། །དྲི་མེད་འཁོན་གྱི་རིགས་སུ་སྐུ་འཁྲུངས་པ། །ཐུབ་པའི་རྒྱལ་ཚབ་སྐྱེས་ཆེན་མཆོག་རྣམས་ལ། །དྭང་བས་ཐལ་སྦྱར་རྟག་ཏུ་སྐྱབས་སུ་མཆི། །སྡོམ་གསུམ་བཀའ་དྲིན་སྩོལ་མཛད་འདྲེན་མཆོག་བཟང་པོའི་ཞབས། །དུས་གསུམ་རྒྱལ་བའི་ལམ་སྟོན་དཀོན་མཆོག་རྒྱལ་མཚན་དཔལ། །ཐེག་གསུམ་བསྟན་པ་རྒྱས་མཛད་ཀུན་མཁྱེན་སངས་རྒྱས་འཕེལ། །གནས་གསུམ་ཤེས་རབ་བཟང་པོས་ལེགས་རྟོགས་རྣམས་ལ་འདུད། །འགྲོ་བའི་བླ་མ་ས་སྐྱ་ཎྜི་ཏས། །ཆོས་དང་ཆོས་མིན་རྣམ་འབྱེད་བསྟན་བཅོས་ཀྱིས། །གངས་ཅན་ཆོས་མིན་མུན་པ་མཐར་མཛད་ནས། །ཡང་དག་ལམ་བཟང་སྣང་བ་གསལ་བར་མཛད། །འོན་ཀྱང་ལ་ལ་བློ་མིག་ཉམ་ཆུང་བས། །གཞུང་གི་དགོངས་པ་ཇི་བཞིན་མ་རྟོགས་ཤིང་། །ཁ་ཅིག་ལོག་པར་རྟོག་པའི་གླིང་དུ་འཁྱམས། །གཞན་དག་ཕྲག་དོག་གིས་གཟིར་འགོག་ལ་བརྩོན། །འགའ་ཞིག་རང་འདོད་གྲུབ་མཐའི་ཕྱོགས་སུ་ཁྱེར། །དེ་དག་དྲང་ཕྱིར་འཇམ་དབྱངས་བླ་མ་ཡི། །དགོངས་པ་ཇི་བཞིན་དམ་པའི་མན་ངག་དང་། །བློ་གྲོས་གསལ་བའི་འོད་ཀྱིས་དབྱེ་བར་བྱ། །འདིར་ཆོས་དང་ཆོས་མ་ཡིན་པ་རྣམ་པར་འབྱེད་པའི་བསྟན་བཅོས་རྒྱལ་བའི་གསུང་རབ་ཀྱི་བཀའ་བསྡུ་བ་བཞི་པ། མདོ་རྒྱུད་མ་ལུས་པ་གསལ་བར་བྱེད་པའི་སྒྲོན་མེ། དད་ལྡན་གྱི་དགོས་འདོད་མ་ལུས་པ་འབྱུང་བའི་ནོར་བུ། ལོག་སྨྲའི་ཚང་ཚིང་སྲེག་པར་བྱེད་པའི་ཉི་མ། ལེགས་པར་བཤད་པའི་ཆུ་བོ་འདུས་པའི་རྒྱ་མཚོ། སྡོམ་པ་གསུམ་གྱི་རབ་ཏུ་དབྱེ་བ་ཞེས་བྱ་བའི་བསྟན་བཅོས་འདི་འཆད་པ་ལ་དོན་གསུམ་སྟེ། བསྟན་བཅོས་རྩོམ་པ་པོའི་ཆེ་བའི་ཡོན་ཏན། དེས་བསྟན་བཅོས་ཇི་ལྟར་བརྩམས་པའི་ཚུལ། བརྩམ་བྱ་བསྟན་བཅོས་ཀྱི་བརྗོད་བྱ་གཏན་ལ་དབབ་པའོ། །དང་པོ་ལ་བཅུ་སྟེ། རིགས་ཁྱད་པར་ཅན་དུ་འཁྲུངས་པའི་ཡོན་ཏན། གཞི་ཚུལ་ཁྲིམས་ལ་གནས་པའི་ཡོན་ཏན། ཐོས་བསམ་བསྒོམ་པས་རྒྱུད་སྦྱངས་པའི་ཡོན་ཏན། འཆད་རྩོད་རྩོམ་པས་བསྟན་པ་སྤེལ་བའི་ཡོན་ཏན། བླ་མ་ལྷ་ཡིས་རྗེས་སུ་བཟུང་བའི་ཡོན་ཏན། ཆགས་ཐོགས་མེད་པའི་མངོན་ཤེས་མངའ་བའི་ཡོན་ཏན། འཛམ་གླིང་ཆེ་དགུས་ཞབས་ལ་གཏུགས་པའི་ཡོན་ཏན། རྨད་དུ་བྱུང་བའི་ལུང་བསྟན་བརྙེས་པའི་ཡོན་ཏན། སྐུ་གསུང་ཐུགས་ཀྱི་རྟེན་མཆོག་སྤྲུལ་པའི་ཡོན་ཏན། བསྟན་པའི་གསལ་བྱེད་སློབ་མ་བསྐྲུན་པའི་ཡོན་ཏན་ནོ། །དང་པོ་ལ་ལྔ་སྟེ། གནམ་ལྷའི་རྒྱུད་པ་ཇི་ལྟར་བྱུང་ཚུལ། དེ་ལས་འཁོན་གྱི་རིགས་བྱུང་ཚུལ། དེ་ལས་ས་སྐྱ་པ་བྱུང་ཚུལ། དེ་ལས་བླ་མ་ཉིད་སྐུ་འཁྲུངས་ཚུལ། འཁྲུངས་ནས་འཇིག་རྟེན་གྱི་སྤྱོད་པ་ལས་འདས་ཚུལ་ལོ། །དང་པོ་ནི། གདུང་བརྒྱུད་རིན་པོ་ཆེ་འདི་ཉིད་ཐོག་མར་ལྷ་ལས་ཆད་པ་ཡིན་ཏེ། དེའང་གནམ་ལྷ་སྤྱི་རིངས། གཡུ་རིངས། དབུ་སེ་དང་གསུམ་བྱུང་། དེ་དག་ལ་མིའི་རྗེ་ཞུས་པས། ཆུང་བས་མིའི་རྗེ་མཛད། དེ་ལ་སྲས་བཞི་བྱུང་བ་ལ་སི་བྱི་ལི་སྤུན་བཞིར་གྲགས། དེ་དག་ལྡོང་རུས་ཆེན་བཅོ་བརྒྱད་དང་འཐབས། དེའི་གྲོགས་ལ། ཁུ་བོ་གནམ་ལྷ་གཡུ་རིངས་བྱོན། ལྡོང་རུས་ཆེན་བཅོ་བརྒྱད་བཏུལ་ནས་བྲན་དུ་བྱས་སོ། །གཡུ་རིངས་ཀྱིས་དམུའི་བུ་མོ་དམུ་བཟའ་ལྡེམ་བུ་ཁབ་ཏུ་བཞེས། སྲས་བདུན་བྱུང་བ་ལ་མ་སངས་སྤུན་བདུན་དུ་གྲགས་སོ། །གཅེན་དྲུག་ཡབ་དང་བདུན་ལྷ་ཡུལ་དུ་གཤེགས་སོ། །ཆུང་བས་ཐོག་ལ་འོད་ཆེན་གྱི་བུ་མོ་ཐོག་ལྕམ་འུར་མ་ཁབ་ཏུ་བཞེས་པའི་སྲས་ཐོག་ཚ་དཔའ་བོ་སྟག་ཡིན། དེས་ཀླུའི་བུ་མོ་ཀླུ་ལྕམ་བྲ་མ་ཁབ་ཏུ་བཞེས་པའི་སྲས་ཀླུ་ཚ་རྟ་སོ་འོད་ཆེན་ཡིན། དེས་མོན་བཟའ་མཚོ་མོ་རྒྱལ་ཁབ་ཏུ་བཞེས་པའི་སྲས་གཡའ་དང་སྤང་གིས་མཚམས་སུ་སྐྱེས་པ་གཡའ་སྤང་སྐྱེས་སུ་མིང་བཏགས་སོ། །གཉིས་པ་ནི། གཡའ་སྤང་སྐྱེས་ཀྱིས་སྲིན་པོ་སྐྱ་རིང་ཁྲག་མེད་བསད་ནས། གཡའ་འབྲུག་སི་ལི་མ་འཕྲོགས་ཏེ། ཁབ་ཏུ་བཞེས་པའི་སྲས་སྲིན་པོ་དང་འཁོན་པའི་བར་དུ་སྐྱེས་པ་འཁོན་བར་སྐྱེས་སུ་མིང་བཏགས་ཏེ། འཁོན་ཞེས་བྱ་བ་དེ་ནས་གྲགས་སོ། །དེས་བཙན་བཟའ་ལྕམ་བུ་ཁབ་ཏུ་བཞེས་པའི་སྲས་མཐུ་དང་རྫུ་འཕྲུལ་ཆེ་བ་གཟུགས་བཟང་ཞིང་བཞིན་ཤིན་ཏུ་ལེགས་པ། མཐོང་བ་རྣམས་ཀྱི་ཡིད་འཕྲོགས་པ་ཤིན་ཏུ་མཛེས་པ་གཅིག་བྱུང་བ་ལ། འདི་འདྲ་མི་ཡུལ་དུ་དཀོན་ཟེར་བས། དཀོན་པ་རྗེ་གུང་སྟག་ཏུ་བཏགས་སོ། །ཁྱེའུ་གཞོན་ནུ་དེ་ཡབ་ཀྱིས་ཡུལ་བཟང་ངན་བལྟ་རུ་བཏང་བས་གཉན་རྩ་ཐར་གྱི་ཡ་ཆངས་ལ་ཡུལ་གྱི་དགེ་བརྒྱད་ཚང་བར་མཐོང་སྟེ། དེ་ཡང་མཚོ་རྗེ་མཚོ་མ་ནི་ཞིང་ཆུ་དང་བཏུང་ཆུར་བཟང་། ཞིང་ཐང་ཆེན་ཐང་ཆུང་ནི་ཁང་ས་དང་། ཞིང་སར་བཟང་། ཐར་གྱི་ཡ་ཆངས་ནི་གམ་འབྲོག་དང་། རྒྱང་འབྲོག་ཏུ་བཟང་། ནགས་རྒུན་བུ་རྒུན་མུག་ནི་ཁང་ཤིང་དང་། བུད་ཤིང་དུ་བཟང་བར་གཟིགས་ཏེ་ཡུལ་དེ་བཟུང་ངོ་། །དེའི་དུས་ན་རྒྱལ་པོ་ཁྲི་སྲོང་ལྡེའུ་བཙན་གྱི་སྐུ་རིང་ལ། དཀོན་པ་རྗེ་གུང་སྟག་འདི་བློ་ཆེ་ཞིང་འཇིག་རྟེན་གྱི་བྱ་བ་ལ་མཁས་པ་ཞིག་བྱུང་བས། རྒྱལ་པོའི་ནང་རྗེ་བ་ཡུན་རིང་དུ་བྱས་ཤིང་། དེ་ལ་འཁོན་དཔའ་བོ་ཆེ་ཞེས་ཀྱང་གྲགས་སོ། །འཁོན་དཔའ་བོ་ཆེ་ལ། སྲས་གཉིས་བྱུང་བའི་གཅེན་པོ་དབའ་ཡེ་ཤེས་དབང་པོ་དང་། ཞང་པོའི་ཐད་དུ་རབ་ཏུ་བྱུང་བའི་མཚན་འཁོན་ཀླུའི་དབང་པོ་སྲུང་བ་ཞེས་བྱ་སྟེ། སད་མི་མི་བདུན་གྱི་ནང་ནས་མཁས་ཤོས་གཅིག་ཡིན་ནོ། །དེ་ནས་འཁོན་ལ་གྲགས་པ་ཆེ་བ་བྱུང་སྐད་དོ། །དེའི་གཅུང་འཁོན་རྡོ་རྗེ་རིན་པོ་ཆེ་ཡིན་ནོ། །ཞེས་ལྷོ་པ་ཐམས་ཅད་མཁྱེན་པ་དང་། བདེ་བ་ཅན་པ་ཡེ་ཤེས་མགོན་གསུངས་ལ། བླ་མ་དམ་པ་ནི། འཁོན་དཔའ་བོ་ཆེ་ལ་སྲས་ཁྲི་མཛེས་ལྷ་ལེགས། ཚེ་ལ་དབང་ཕྱུག ཀླུའི་དབང་པོ་སྲུང་བ། ཚེ་འཛིན་དང་བཞི་བྱུང་བའི་ཚེ་འཛིན་གྱི་སྲས་རྡོ་རྗེ་རིན་པོ་ཆེ་ཡིན་གསུང་ངོ་། །འཁོན་རྡོ་རྗེ་རིན་པོ་ཆེ་ལ་སྲས་བདུན་བྱུང་། ཐ་སྟག་གྲོམ་པར་བྱོན་པ་དེ་འཁོན་ཤེས་རབ་ཡོན་ཏན། དེའི་སྲས་ཡོན་ཏན་འབྱུང་གནས། དེ་ལ་སྲས་གཉིས་བྱུང་བའི་ཆེ་བ་འཁོན་ཚུལ་ཁྲིམས་རྒྱལ་པོ། ཆུང་བ་ཁབ་སོ་སྟག་ཐོག་ཏུ་བྱོན་པས། འཁོན་ཅི་རིགས་པ་འཕེལ། དེ་ནས་གཡས་རུ་བྱང་དུ་གྱེས་པས། འཁོན་ཚོའི་སྡེ་པ་མང་དུ་ཡོད། འཁོན་ཚུལ་ཁྲིམས་རྒྱལ་པོ་ལ་སྲས་གསུམ་བྱུང་བའི་བར་པ་གང་ལ་ཆ་ཚང་དུ་བྱོན། ཆེ་ཆུང་གཉིས་གཡའ་ལུང་དུ་བཞུགས་པའི་ཆེ་བ་འཁོན་གཙུག་ཏོར་ཤེས་རབ། དེ་ལ་སྲས་བདུན་བྱུང་བ། ཁུ་བོ་ཆུང་བ་དང་བཅས་པ་ལ། འཁོན་ཚོ་བརྒྱད་དུ་གྲགས་པ་གཡའ་ལུང་ན་ཡོད། སྲས་བདུན་གྱི་ལྔ་པ་འཁོན་དགེ་སྐྱབས། དེ་ཤབ་ཏུ་བྱོན། དེ་ལ་སྲས་གཉིས་བྱུང་བའི་ཆེ་བ་དགེ་མཐོང་། ཆུང་བ་ལས་ཤབ་སྟོད་ཀྱི་འཁོན་གྱེས་པ་ཡིན། དགེ་མཐོང་གི་སྲས་འཁོན་སྟོན་བལ་པོ། དེའི་སྲས་འཁོན་སྟོན་ཤཱཀྱ་བློ་གྲོས། དེ་ལ་སྲས་གཉིས་བྱུང་བའི་ཆེ་བ་འཁོན་རོག་ཤེས་རབ་ཚུལ་ཁྲིམས། ཆུང་བ་འཁོན་དཀོན་མཆོག་རྒྱལ་པོ་ཡིན། གཅེན་ཡན་ཆད་རྡོ་རྗེ་ཕུར་པ་ལ་གྲུབ་པ་བརྙེས་པ་སྔགས་སྔ་འགྱུར་ལ་མཁས་པ་མང་དུ་བྱོན། ཆོས་སྐྱོང་དཀར་མོ་ཉི་ཟླ་ལྕམ་སྲིང་ལ་བྱེད་དོ། །དེའི་དུས་ན་འབྲོའི་ལུང་དུ་སྟོན་མོ་ཆེན་པོ་གཅིག་བྱུང་བའི་ཚེ་ལྟད་མོའི་བྱེ་བྲག་མང་དུ་བྱུང་བའི་ནང་ནས་སྔགས་པ་འགའ་ཞིག དབང་ཕྱུག་མ་ཉི་ཤུ་རྩ་བརྒྱད་ཀྱི་མགོ་བརྙན་རྣམས་གྱོན། ཕྱག་མཚན་སོ་སོར་ཐོགས། མ་མོ་རལ་པ་དང་བཅས་པའི་རྔམ་སྟབས་དང་བཅས་ཏེ། འཆམ་བྱས་པས་དེ་ག་ལྟད་མོ་ཆེ་ནས། དེས་ཁྲོམ་ཐོག་ཆོད། འཁོན་དཀོན་མཆོག་རྒྱལ་པོས་ཀྱང་དེ་དག་གཟིགས་ནས། གཅེན་ལ་འདི་ལྟ་བུ་གདའ་ཞུས་པས། ད་གསང་སྔགས་འཆོལ་བ་བྱ་བ་བྱུང་བ་ཡིན། གྲུབ་ཐོབ་མི་འོང་། རང་རེ་ལ་ཡོད་པའི་དཔེ་ཆ་ལྷ་རྟེན། སྔགས་ཀྱི་ལག་ཆ་ཀུན་གཏེར་དུ་སྦ། ང་ནི་རྒས། ཁྱོད་གཞོན་པ་ཡིན་པས། མང་མཁར་ན་འབྲོག་མི་ལོ་ཙཱ་བ་གསང་སྔགས་གསར་འགྱུར་ཟབ་མོ་ལ་མཁས་པར་ཡོད་འདུག་པས། དེ་ལ་སློབས་ཤིག་གསུངས་རྙིང་མ་ཐམས་ཅད་གཏེར་དུ་སྦས་སོ། །དེར་ཆོས་སྐྱོང་གི་ཆོ་འཕྲུལ་བྱུང་ནས། ཕུར་པའི་མངོན་རྟོགས་བསྡུས་པ་གཅིག་དང་། གཏོར་མའི་ཆོ་ག་དང་། སེང་ལྡེང་གི་ཕུར་པ་བཅོ་ལྔ་པ་ཆ་གཉིས་དང་། དཀར་མོ་ཉིད་ཀྱིས་འཁོན་རོག་ཤེས་རབ་ཚུལ་ཁྲིམས་ལ་ཞལ་དངོས་སུ་བསྟན་ནས་མཛད་པའི་དཀར་མོ་ཉི་ཟླའི་གཏོར་མ་རྣམས་གཅུང་ལའང་གནང་། གདུང་བརྒྱུད་ཀྱིས་དུས་གཏོར་མ་ཆག་པར་མཛད་དོ། །དེ་ནས་འཁོན་དཀོན་མཆོག་རྒྱལ་པོས། གཡའ་ལུང་དུར་ཁྲོད་ན་འབྲོག་མིའི་སློབ་མ་འཁྱིན་ལོ་ཙཱ་བ་ཞེས་བྱ་བ་ལ། བརྟག་གཉིས་གསན་ནས་ཚར་ལ་ཁད་པ་ན། དེ་སྐུ་གཤེགས་པའི་ཞལ་ཆེམས་ལ། ད་ཁྱོད་ཀྱིས་ཆོས་འཕྲོ་དེ་མང་མཁར་དུ་འབྲོག་མི་ལོ་ཙཱ་བ་ལ་ཞུས་ཤིག་གསུང་ངོ་། །དེ་ནས་མང་མཁར་དུ་བྱོན། འབྲོག་མིའི་དྲུང་དུ། རྒྱུད་གསུམ་དང་། ལམ་སྐོར་ཕྱི་མ་རྣམས་གསན། མཁས་པར་མཁྱེན་ནས་དེའི་རྣམ་གཞག་བྱ་བ་དང་གདམས་ངག་ཞུ་བར་དགོངས་ཏེ། གཡའ་ལུང་འཇག་གཤོངས་ཀྱི་ཞིང་བཙང་བར་འོས་པ་ཀུན་བཙོངས། ལྷག་མ་དགེ་འདུན་འཕྲད་པ་ལ་ཕུལ་ནས། རིན་ལ་རྟ་བཅུ་བདུན་གྱི་ཁལ་དང་བཅས་པ་ཁྱེར་ནས་འོངས་ཏེ། བླ་ཆེན་ལ་ཕུལ། གསུང་ངག་ཞུས་ཀྱང་མ་གནང་། གཞུང་གི་སྐོར་ཐམས་ཅད་ཚང་བར་མཛད། བསམ་མི་ཁྱབ་དང་གཏུམ་མོའི་དམིགས་པ་ཉི་ཤུ་རྩ་བཞི་ལ་སོགས་པའི་གདམས་ངག་ཅི་རིགས་པ་གནང་ངོ་། །གཞན་ཡང་འགོས་ཁུག་པ་ལ། འདུས་པ་ལ་སོགས་པ་གསན། ཨུ་རྒྱན་གྱི་པཎྜི་ཏ་ཤེས་རབ་གསང་བ་ལ་ཐིག་ལེ་སྐོར་ལྔ་ལ་སོགས་པ་གསན། མལ་ལོ་ཙཱ་བ་ལ། བདེ་མཆོག་རྩ་རྒྱུད་དང་། གྲུབ་སྙིང་གི་སྐོར་རྣམས་གསན། གཞན་ཡང་བ་རི་ལོ་ཙཱ་བ། བླ་མ་སྒྱི་ཆུ་བ། པུ་ཧྲངས་ལོ་ཙཱ་བ། གནམ་ཁའུ་པ་སྐུ་མཆེད། སྐྱུ་ར་ཨ་སྐྱབས་ལ་སོགས་པ་ལས་ཆོས་མང་དུ་གསན་ཏེ་ཆོས་ཀྱི་མངའ་བདག་ཏུ་གྱུར་ཏོ། །དེ་ནས་དུས་ཕྱིས་འཇག་ཤོངས་སུ་ཡབ་དང་གཅེན་གྱི་སྐུ་འབུམ་བཞེངས། གཅེན་གྱི་སྐུ་འབུམ་ན་ཕུར་པ་བྱིན་རླབས་ཅན་དུ་གྲགས་པ་ཆ་གཅིག་ཀྱང་བཞུགས། ཕུར་པ་ཆ་གཅིག་ཐུགས་དམ་དུ་གང་གཤེགས་སར་བསྣམས་ཏེ་ཕྱིས་ས་སྐྱ་ན་ཡོད་དོ། །འཁོན་དཀོན་མཆོག་རྒྱལ་པོ་གཡའ་ལུང་ཆུ་སྐྱར་ཅི་རིགས་པར་བཞུགས། བྲ་བོ་ལུང་པར་དགོན་ཆུང་གཅིག་བཏབ་སྟེ། དེར་ཡང་ལོ་འགའ་བཞུགས་སོ། །གསུམ་པ་ལ་བཞི་སྟེ། ས་སྐྱའི་གཞི་འདིངས་ཚུལ། སྤྱན་རས་གཟིགས་ཀྱི་རྣམ་འཕྲུལ་བྱུང་ཚུལ། འཇམ་དབྱངས་ཀྱི་རྣམ་འཕྲུལ་བྱུང་ཚུལ། ཕྱག་རྡོར་གྱི་རྣམ་འཕྲུལ་སོགས་བྱུང་ཚུལ་ལོ། །དང་པོ་ནི། དཀོན་མཆོག་རྒྱལ་པོ་བྲ་བོ་ལུང་པར་བཞུགས་དུས། དགོན་པ་དེའི་རི་རྩེ་ནས་གཟིགས་པས། རི་དཔོན་པོ་རིའི་ངོས་འགྲམ་ན་ས་དཀར་ཞིང་སྣུམ་ལ་ཆུ་གཡས་སུ་འབབ་པ་སོགས་བཀྲ་ཤིས་པའི་དགེ་མཚན་མང་དུ་གཟིགས་ནས། དགོན་པ་གཅིག་བཏབ་ན་སངས་རྒྱས་ཀྱི་བསྟན་པ་དང་། འགྲོ་བ་དུ་མ་ལ་ཕན་པར་དགོངས་ཏེ། ཇོ་བོ་ལ་ཞུས་པས་གནང་། སའི་བདག་པོ་ཞང་ཞུང་བ་དང་། བནྡེ་གྲོང་བཞི་ལ་འདིར་དགོན་ཆུང་ཞིག་བྱས་ན། ཁྱེད་ལ་འགལ་བ་མེད་ན། རིན་ཞིག་འཇལ་བྱས་པས། ཁོང་རྣམས་ན་རེ། རིན་ཡེ་མི་འཚལ། དགོན་པ་མཛད་པར་ཞུ་ཟེར་བ་ལ། འོན་ཀྱང་ཕྱིན་ཆད་ལ་འདི་འཐད་གསུངས་ནས། རྒོད་མ་དཀར་པོ་གཅིག ཡོལ་བ་གཅིག མོ་གོས་གཅིག ནོར་བུའི་ཕྲེང་བ་གཅིག ཁྲབ་གཅིག་དེ་རྣམས་ཀྱིས་མགོ་བྱས་པའི་རིན་འཇལ་ནས། མོན་འགོ་གྲོག་པོ་ནས། འབལ་མོ་གྲོག་པོའི་བར་གདུང་བརྒྱུད་ལ་དབང་བར་བྱས་སོ། །བླ་མ་འདི་ཤིང་ཕོ་བྱི་ལོ་ལ་སྐུ་འཁྲུངས་ནས། དགུང་ལོ་བཞི་བཅུ་བཞེས་པ་ཆུ་མོ་གླང་གི་ལོ་ལ་ས་སྐྱ་བཟུང་སྟེ། ལོ་སུམ་ཅུའི་བར་དུ་སྒྲུབ་པ་དང་། བཤད་ཉན་ལ་སོགས་པའི་སྒོ་ནས་བསྟན་པའི་བྱ་བ་མཛད་ནས། དྲུག་ཅུ་རེ་དགུ་པ་ཆུ་ཕོ་རྟའི་ལོ་དབྱུ་གུའི་ཟླ་བའི་ཚེས་བཅུ་བཞི་ལ་སྐུ་གཤེགས་སོ། །གཉིས་པ་ནི། བླ་མ་དཀོན་མཆོག་རྒྱལ་པོ་དགུང་ལོ་ལྔ་བཅུ་ང་དགུ་བཞེས་པ་ཆུ་ཕོ་སྤྲེའུའི་ལོ་ལ་མ་གཅིག་ཞང་མོ་ལ་སྲས་གཅིག་འཁྲུངས་པ་བླ་མ་ཀུན་དགའ་སྙིང་པོ་སྟེ། འདི་ཉིད་དང་པོ་ནས་འགྲོ་བ་ཐམས་ཅད་ཀྱི་ཡིད་དུ་འོང་ཞིང་མཛེས་པ་དང་། ཞི་ཞིང་དུལ་བ་དང་། ཡིད་གཞུངས་པ་དང་། ཤེས་རབ་དང་སྙིང་རྗེ་ལ་སོགས་པ་རང་བཞིན་གྱི་ཡོན་ཏན་དུ་མ་དང་ལྡན་ཞིང་། རྟ་དང་ནོར་བུ་བརྟག་པ་དང་། སྐྱེས་པ་དང་བུད་མེད་བརྟག་པ་དང་། སྙན་ངག་དང་། སྡེབ་སྦྱོར་དང་། སྨན་དཔྱད་དང་བཟོའི་གནས་ལ་སོགས་པ་ཐ་སྙད་ཀྱི་གཙུག་ལག་རྣམས་ལ་ཐུགས་བྱང་བར་གྱུར་པ་ཞིག་གོ །དེ་ནས་གསུང་རབ་ལ་གསན་སྦྱོང་མཛད་པའི་ཚུལ་ནི། ཐོག་མར་ཡབ་ལས་ཀྱེའི་རྡོ་རྗེའི་དབང་བསྐུར་ཞུས་ནས་དེའི་ཆོས་ཅི་རིགས་པ་ཞུས་སོ། །དགུང་ལོ་བཅུ་གཅིག་ལོན་པའི་ཚེ་ཡབ་སྐུ་གཤེགས་ཏེ། རྩིས་བྱས་པས་ཕྱི་རྟེན་གྱི་འགྲམ་འདིངས་པ། གཤེགས་རྫོང་བྱེད་པ། གདན་ས་ཚུགས་པ་རྣམས་ཉི་མ་གཅིག་ལ་གྲུབ་ན། ཤུལ་དུ་ཕུན་སུམ་ཚོགས་པ་འོང་ཟེར་བས། འཕྲང་བྲག་དམར་བ་གཉིས་བསགས་ནས་ཆོས་འཁོར་བྱེད་པ། ཕྱི་རྟེན་གྱི་འགྲམ་འདིངས་པ། བ་རི་བ་གདན་སར་བཏོན་པ་རྣམས་ཉིན་གཅིག་ལ་བྱས་ཏེ། བ་རི་བས་ལོ་བརྒྱད་གདན་ས་བྱས་སོ། །དེ་ནས་བ་རི་བའི་དྲུང་དུ་འཇམ་དབྱངས་ཀྱི་སྒྲུབ་ཐབས་ཞུས་ཏེ། བསྒྲུབས་པས་ཟླ་བ་དྲུག་ན་ཞལ་གཟིགས་ཏེ། ཞེན་པ་བཞི་བྲལ་ལ་སོགས་པའི་ཟབ་པ་དང་། རྒྱ་ཆེ་བའི་ཆོས་ཀྱི་སྒོ་དཔག་ཏུ་མེད་པ་གསན་ཅིང་། མི་བརྗེད་པའི་གཟུངས་དང་། རྣམ་དཔྱོད་ཀྱི་བློ་གྲོས་མཚུངས་པ་མེད་པ་བརྙེས་པར་གྱུར་ཏོ། །དགུང་ལོ་བཅུ་གཉིས་བཞེས་པའི་ཚེ། རོང་ངུར་སྨྲིག་ཏུ་བྱོན་ཏེ། བྲང་ཏི་དར་མ་སྙིང་པོ་ལས་མངོན་པ་ཀུན་ལས་བཏུས་གསན་ཅིང་། དེའི་ཚེ་རྡོ་ལ་ཕྱག་རྗེས་བཞག་པ་ད་ལྟའང་ཡོད་དོ། །བྲང་ཏི་སྐུ་གཤེགས་ནས་ཟུར་ཆོས་པ་དགེ་བའི་བཤེས་གཉེན་ཁྱུང་ལས་ས་སྡེ་ལྔ་དང་། སྡོམ་རྣམ་གཉིས་གསན། ཉང་སྟོད་དུ་ཁྱུང་རིན་ཆེན་གྲགས་དང་། ཟུར་ཆོས་པ་མེ་དིག་པ་ལས་ཚད་མ་ལ་སོགས་པ་གསན། སླར་ཡང་ས་སྐྱར་བྱོན་ཏེ། བ་རི་ལོ་ཙཱ་བའི་དྲུང་དུ་དཀོན་བརྩེགས་དང་། ཕལ་ཆེན་ལ་སོགས་པ་ཕ་རོལ་ཏུ་ཕྱིན་པའི་གཞུང་ལུགས་དང་། བྱ་བ་དང་སྤྱོད་པའི་རྒྱུད་ཉིས་བརྒྱ་ཙམ་དང་། རྣལ་འབྱོར་ཆེན་པོ་ལ་གསང་བ་འདུས་པ་ལུགས་གཉིས་དང་། གཤིན་རྗེའི་གཤེད་དགྲ་ནག་གི་རྒྱུད། ཀྱེའི་རྡོ་རྗེའི་རྒྱུད་གསུམ། འཁོར་ལོ་བདེ་མཆོག་རྩ་བཤད་ཆ་ལག་དང་བཅས་པ་དང་སྒྲུབ་པའི་ཐབས་བསྡུས་པ་ལ་སོགས་པ་བ་རི་བའི་ཆོས་སྐོར་ཡོངས་སུ་རྫོགས་པ་གསན་ཅིང་ཐུགས་སུ་ཆུད་པར་མཛད་དོ། །དེ་ནས་གྲོམ་པ་གཡུ་རྩེར་དགེ་བཤེས་མེ་ལྷང་ཚེར་བ་ལས་ཚད་མ་རྣམ་ངེས་དང་། རིགས་ཐིགས་དང་། དབུ་མ་རང་རྒྱུད་ཤར་གསུམ་ལ་སོགས་པ་གསན། དེ་ནས་ཕ་ཆོས་རྩད་བཅད་པར་བཞེད་ནས་འཁོན་སྒྱི་ཆུ་བའི་དྲུང་དུ་བྱོན་ནས། དབང་བསྐུར་ཞུས་པའི་སྟ་གོན་གྱི་ནུབ་མོར་སྲིད་པའི་རྒྱ་མཚོ་ཡིན་ཟེར་བའི་ཆུ་བོ་དམར་མེར་བ་གཅིག་ལ་ཟམ་པ་གསུམ་འདུག་པའི་ཆུ་འགྲམ་ན་བསྒྲལ་རྒྱུ་མང་དུ་འདུག་པས། ང་སྒྲོལ་བར་ཞུ། ང་སྒྲོལ་བར་ཞུ་ཟེར་བ་ལ། ཟམ་པ་ཕྱི་མ་ལ་གསུམ། བར་པ་ལ་བདུན། ཉེ་ཤོས་ལ་མང་པོ་བསྒྲལ་བའི་རྨི་ལམ་བྱུང་ངོ་། །དེ་ནས་བླ་མ་དེའི་དྲུང་དུ་ཌོམྦི་བའི་ལུགས་ཀྱི་ཀྱེ་རྡོ་རྗེའི་རྒྱུད་གསུམ་དང་། གྲུབ་པ་སྡེ་བཅོ་བརྒྱད་ལ་སོགས་པ་སྡེ་སྣོད་དང་རྒྱུད་སྡེའི་ཆོས་མང་དུ་གསན་ནོ། །དེའི་ཚེ་སྒྱི་ཆུ་བའི་སློབ་མ་བན་ཆུང་འགའ་དང་འགྲོགས་ཏེ། མདོགས་སྟོད་དུ་བླ་མ་སེ་ཆོས་འཁོར་གཅིག་ལ་བྱོན་པའི་རྩར་ལྟད་མོ་ལ་བྱོན། རྒྱུ་མཚན་ཞིབ་ཏུ་བསྙད་པས། བླ་མ་དཀོན་མཆོག་རྒྱལ་པོའི་སྲས་པོ་ཡིན་པར་རྟོགས་ནས། བླ་མ་སེས་བླ་ཆེན་པང་དུ་བཞེས་ཏེ་མི་གསོན་གཤིན་ཕྲད་པའི་དུས་བྱུང་། རྒད་པོ་གོག་པོ་འདིའི་ནང་ན་ཆོས་ཡོད་པས་ཁྱོད་ལ་སྟེར་བ་ཡིན། མྱུར་དུ་ཤོག གུ་ལེ་ཡོང་སྙམ་ན། སང་ཕོད་ང་འཆི་བ་ཡིན་གསུངས་ནས་བླ་ཆེན་དེར་ཞག་གཅིག་བཞུགས་ཏེ། དེའི་བར་ལ་བླ་མས་ལམ་འབྲས་བུ་དང་བཅས་པ་འདི་ལ་དཀྱུས་སུ་གསུངས་པ་འདི་ཙམ། དེ་ལས་འཕྲོས་པ་འདི་ཙམ་གྱི་རྐང་གྲངས་ལམ་མེ་བ་ཞིག་གསུངས་སོ། །དེ་ནས་ཡར་བྱོན་ནས་བླ་མ་སེའི་དྲུང་དུ་བཞུད་པར་དགོངས་ཏེ། འཁོན་སྒྱི་ཆུ་བ་ལ་ཞུས་པས་མ་གནང་ནས་སང་ཕོད་འགྲོ་སྙམ་ཙ་ན། སེ་གསུངས་པ་དེ་བདེན་ཏེ་སྐུ་གཤེགས་སོ། །དེ་ནས་བླ་མ་གནམ་ཁའུ་པའི་དྲུང་དུ་བྱོན་ཏེ། རྒྱུད་སྡེ་བཞིའི་རྒྱུད་དང་འགྲེལ་པ་མན་ངག སྒྲུབ་ཐབས་ལས་ཚོགས་དང་བཅས་པ་བསམ་གྱིས་མི་ཁྱབ་པ་གསན་ཅིང་། ཁྱད་པར་དུ་རྣལ་འབྱོར་གྱི་རྒྱུད་འགྲེལ་པ་དང་བཅས་པ་ཡོངས་སུ་རྫོགས་པར་གསན་ནོ། །དགེ་བཤེས་རྔོག་ལས་ཉི་ཁྲི་སྣང་བ། བརྒྱད་སྟོང་འགྲེལ་ཆེན། མདོ་སྡུད་པ། མངོན་རྟོགས་རྒྱན་རྩ་འགྲེལ་ལ་སོགས་པ་གསན། དེ་ནས་དུས་རིང་ཞིག་ན་བླ་མ་སྒྱི་ཆུ་བ་བསྙུངས་པས་བླ་ཆེན་ལ་ཤོག་གསུངས་ཏེ་བྱོན་པས་མ་སླེབས། བླ་མས་ཁྱོད་རབ་ཏུ་བྱུང་ལ་འཁོན་ཚོའི་སྡེ་པ་འདི་སྐྱོངས་གསུངས་པའི་གསུང་བཞག་ནས་སྐུ་གཤེགས་སོ། །དེའི་རྗེས་ཀྱི་བྱ་བ་རྣམས་ཚར་ནས་ས་སྐྱར་བྱོན་ཏེ། རབ་ཏུ་བྱུང་བའི་ཆས་བསྒྲུབས་པ་ན་བླ་མ་གནམ་ཁའུ་པས་གསན་ནས་རབ་ཏུ་མ་བྱུང་ན་ཕན་ཆེ་བར་འོང་གསུངས་ནས་མ་གནང་། འོན་ཀྱང་འཁོན་ཚོའི་དབོན་ནི་མཛད། དེ་ནས་བླ་མ་སྒྱི་ཆུ་བ་བླ་མ་མལ་གྱི་སློབ་མ་ཡིན་པས་དེའི་བདེ་མཆོག་གི་ཕྱག་དཔེ་རྣམས་བསྣམས་ནས་གུང་ཐང་ན་ལ་རྩེ་གནས་གསར་དུ་བྱོན་ཏེ། བླ་མ་མལ་ལས་བདེ་མཆོག་རྩ་རྒྱུད་ཆ་ལག་དང་བཅས་པ་དང་། དགྲ་ནག་འཇིགས་སྐོར་གསུམ། ནཱ་རོ་པའི་མན་ངག་རྣམས་ཚང་བར་གསན་ནོ། །དེ་ནས་གཡས་རུ་ན་མར་བྱོན། གསེར་སྲང་བཅུ་བདུན་གྱི་འབུལ་བ་བསྐུར་བས་བླ་མ་ཐུགས་དགྱེས་ཏེ། དམ་ཚིག་པ་ཆེན་པོར་དགོངས་ནས་ཆོས་ཀྱི་ལྷག་མ་ད་དུང་ཡོད་པས་ཤོག་གསུངས། བླ་ཆེན་གྱིས་བྱོན་པས་སྦྱོང་རྒྱུད་ལ་སོགས་པའི་ཆོས་མང་པོ་གནང་། ཁྱད་པར་དུ་མགོན་པོའི་སྒྲུབ་ཐབས་རྗེས་གནང་དང་བཅས་པ་གནང་ནས། དེའི་རྟེན་དར་ནག་དང་ལྕགས་ཀྱི་རྡོ་རྗེ་རྩེ་དགུ་པ་དང་སྐུ་འབག་རྣམས་བརྫངས་ཏེ། མགོན་པོ་ལ་ཁྱོད་འཁོན་ས་སྐྱ་པའི་རྗེས་སུ་སོང་ཞེས་གསུང་ངོ་། །དེ་ནས་མར་བྱོན་ནས་ལ་སྟོད་དུ་རྗེ་བཙུན་པུ་ཧྲངས་ལོ་ཆུང་ལས་བདེ་མཆོག་གི་ཆོས་སྐོར་ལ་སོགས་པ་གསན། གཞན་ཡང་སྐྱུ་ར་ཨ་སྐྱབས། བལ་པོའི་པཎྜི་ཏ་པདྨ་ཤྲཱི། རྒྱ་གར་གྱི་རྣལ་འབྱོར་པ་བྷོ་ཏ་རཱ་ཧུ་ལ། བལ་པོའི་པཎྜི་ཏ་ཛྙཱ་ན་བཛྲ་རྣམས་ལས་ཆོས་མང་དུ་གསན་ནོ། །དེ་ནས་གསུང་ངག་གསན་པར་བཞེད་ནས། སག་ཐང་དིང་དུ་བྱོན་ཏེ། རྗེ་ཞང་དགོན་པ་བའི་དྲུང་དུ་ལམ་འབྲས་བུ་དང་བཅས་པའི་མན་ངག་ཆ་ལག་དང་བཅས་པ་གསན་ཅིང་ཐུགས་ཉམས་སུ་བཞེས་ཏེ། ལམ་བསྡུས་ཏེ་སྒྲུབ་པ་ལུང་སྦྱིན་པ་མཛད་ནས་ལོ་བཅོ་བརྒྱད་ཀྱི་བར་དུ་བཀའ་རྒྱས་བཏབ་ཅིང་། དེ་ནས་ཆོས་ཀྱི་བདག་པོར་དབང་བསྐུར། སྤྱིར་ཁྱོད་ཀྱིས་སྒྲུབ་པ་གཙོར་བྱས་ན་ཚེ་འདི་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། བཤད་ཉན་བྱས་ན་གདུལ་བྱ་དཔག་ཏུ་མེད་པའི་དོན་དུ་འགྱུར་ཞིང་། ཁྱད་པར་དུ་ལུས་མ་སྤངས་པར་ཕྱག་རྒྱ་ཆེན་པོ་གྲུབ་པའི་སློབ་མ་གསུམ། བཟོད་པ་ཐོབ་པ་བདུན། རྟོགས་པ་དང་ལྡན་པའི་རྣལ་འབྱོར་པ་བརྒྱད་ཅུ་ཙམ་འབྱུང་ཞེས་ལུང་བསྟན་ནོ། །དེ་ནས་རྗེ་ཞང་དགོན་པ་བ་གཤེགས་པའི་རྗེས་ཀྱི་བྱ་བ་རྣམས་ཚར་ནས། གུང་ཐང་དུ་བྱོན་པའི་ཚེ་དུག་བྱུང་བ་ལས་དུས་ཕྱིས་དུག་རོ་ལངས་ནས་ཟླ་བ་གཉིས་ཙམ་བསྙུངས་ནས་ཆོས་ཐམས་ཅད་བརྗེད་འདུག་པས། བྲང་ཁང་རྙིང་པར་སྐུ་མཚམས་བཅད་དེ་བླ་མ་ལ་གསོལ་བ་བཏབ་པས་ཚིག་རེ་དྲན་པ་བྱུང་། དེ་ནས་རྗེ་དགོན་པ་བ་མནལ་ལམ་དུ་བྱོན་ནས་ཆོས་གསུངས་པས་མ་ལུས་པ་དྲན་པ་བྱུང་། དེ་ནས་རྣལ་འབྱོར་དབང་ཕྱུག་དངོས་སུ་བྱོན་ནས་ཟླ་བ་གཅིག་གི་བར་དུ་ཉིན་མཚན་མེད་པར་རྒྱུད་སྡེ་བདུན་ཅུ་རྩ་གཉིས། ལྕགས་རིའི་ཁོངས་ལས་མི་འདའ་བའི་ཆོས་བཞི་ལ་སོགས་པ་ཆོས་མང་དུ་གསུངས་ཤིང་བྱིན་གྱིས་བརླབས་པ་ཡིན་ནོ། །གཞན་ཡང་ཚར་ཁང་སྒོམ་ཆེན་སུམ་ཅུ་ཙམ་ལ་ཁྲིད་སྐྱོང་བ། ས་སྐྱར་བཞུགས་ནས་ལམ་འབྲས་གསུང་བ། གུང་ཐང་དུ་མལ་གྱི་ཉེ་གནས་མཛད་པ། ལྕམ་ལྷ་ཁང་དུ་ནམ་མཁའ་དྲི་མེད་ཀྱི་དཀྱིལ་འཁོར་བཞེངས་ནས་རབ་གནས་མཛད་པ། ཟངས་སྡོང་འབྲོག་པའི་གསེབ་ཏུ་ཆོས་གསུང་བ། ཤབ་སྒོ་ལྔར་ཆོས་འཁོར་བསྐོར་བ་སྟེ། སྐུའི་བཀོད་པ་དྲུག་དུས་ཅིག་ཅར་ལ་བསྟན་པ་ལ་སོགས་པའི་ཡོན་ཏན་བསམ་གྱིས་མི་ཁྱབ་པ་མངའ་འོ། །དེ་ལྟ་བུའི་བླ་མ་དེ་རིམ་གཉིས་ཟབ་མོ་ལས་སྐད་ཅིག་ཀྱང་གཡེལ་བ་མེད་པའི་ངང་ནས་བསྡུ་བ་བཞིས་གཞན་དོན་ལོ་དྲུག་ཅུ་རྩ་བདུན་གྱི་བར་དུ་མཛད་དེ། ས་ཕོ་སྟག་གི་ལོ་ཐ་སྐར་གྱི་ཟླ་བའི་ཚེས་བཅུ་བཞི་ལ་གཡས་རུ་བྱང་གི་སྐྱ་བོ་ཁ་གདངས་ནས་བདེ་བ་ཅན་དུ་གཤེགས་སོ། །དེའི་ཚེ་སྐུའི་བཀོད་པ་བཞིར་བསྟན་ཏེ། གཅིག་ནི་བདེ་བ་ཅན། གཉིས་པ་ནི་པོ་ཏ་ལ། གསུམ་པ་ནི་ཨུཌྱན། བཞི་པ་ནི་བྱང་ཕྱོགས་ཀྱི་འཇིག་རྟེན་གྱི་ཁམས་གསེར་མདོག་ཅན་དུ་གཤེགས་སོ། །ཞེས་སྤྱན་སྔ་ན་གནས་པ་ཕལ་ཆེ་བས་གསལ་བར་རྟོགས་པ་ཡིན་ནོ། །སྤུར་ཞུགས་ལ་ཕུལ་བའི་ཚེ་སྤྱན་སྔ་ན་བཞུགས་པ་ཐམས་ཅད་ལ་ཡིད་མི་བདེ་བ་མེད་པར་ཏིང་ངེ་འཛིན་དང་ལྡན་ཞིང་། ཞལ་བཞི་པར་ནི་ཐམས་ཅད་ཀྱིས་མཐོང་ལ། ཁ་ཅིག་གིས་ནི་ཞལ་བརྒྱད་པར་མཐོང་ངོ་། །དེ་ལྟ་བུའི་བླ་མ་དེ་ལ་སློབ་མའི་མཆོག་ཇི་ལྟར་བྱུང་ན། སྒྱི་ཆུ་བ་ལས་དབང་ཞུས་པའི་སྟ་གོན་གྱི་མནལ་ལམ་དང་། རྗེ་དགོན་པ་བས་ལུང་བསྟན་པ་དང་མཐུན་པར། ལུས་མ་སྤངས་པར་གྲུབ་པ་ཐོབ་པ་གསུམ་ནི། སིདྒ་ལའི་གླིང་ནས་འོངས་པའི་ཨ་ཙ་ར། བྱང་ཆུབ་སེམས་དཔའ་སྟག སྒོམ་པ་ཀྱི་འབར་དང་གསུམ་མོ། །བཟོད་པ་ཐོབ་པ་བདུན་ནི། རྗེ་བཙུན་ཆེན་པོ། ཞུས་བྱས་དངོས་གྲུབ། རྒ་སྟོན་རྡོ་རྗེ་གྲགས། ནགས་སྒོམ་བསོད་ནམས་རྒྱལ་མཚན། འཚར་ཁའི་རྣལ་འབྱོར་པ། སྒོམ་པ་འོད་གྲགས། ཨ་ཅེ་མང་ཆུང་མའོ། །བླ་མ་ཆ་གན་གྱི་གསུང་གིས། བཟོད་ཐོབ་བཅུ་གཅིག་ནི། རྗེ་པ། ཞུས་བྱས། སྒོམ་ཆེན་རྟ་རྒན། བྱང་སེམས་ཟླ་རྒྱལ། ཨ་ཇོ་ཕག་སྟོན། ཇོ་མོ་ཉང་ཆུང་མ། མ་ཇོ་བྱང་རྒྱན། ལྡན་མ་ཇོ་གདན། བདེ་གཤེགས་ཁམས་པ་རྡོར་རྒྱལ། ཞང་གསུམ་ཐོག་པ། གཤེན་སྒོམ་རྡོ་རྗེ་སེང་གེའོ། །དྲོད་ཆེན་པོ་ལ་གནས་པ་རྗེ་བཙུན་རྩེ་མོ་ལ་སོགས་པ་བཅོ་ལྔ། དྲོད་འབྲིང་ལ་གནས་པ་སྐྱུ་ར་ཨ་སྐྱབས། དྲིལ་ཆེན་གྱི་ཇོ་མོ་ཞང་མོ་ལ་སོགས་པ་སུམ་ཅུ་སོ་གཅིག དྲོད་ཆུང་ངུ་ལ་གནས་པ་ཁམས་པ་ཨ་སེང་། ནེ་ཚོ་སྦལ་སྟོན། མངའ་རིས་པ་གྲགས་སེང་། ཇོ་མོ་མང་ཆུང་མ་ལ་སོགས་པ་མང་དུ་བྱུང་གསུང་ངོ་། །གཞན་ཡང་དཔལ་ཆེན་འོད་པོ། གཉེན་གཙུག་ཏོར་རྒྱལ་པོ། རྒྱ་སྒོམ་ཚུལ་ཁྲིམས་གྲགས། མི་ཉག་པྲ་ཛྙཱ་ཛྭ་ལ། ཁམས་པ་རྒྭ་ལོ་ལ་སོགས་པ་མཁས་ཤིང་གྲུབ་པ་བརྙེས་པ་བསམ་གྱིས་མི་ཁྱབ་པ་བྱུང་ངོ་། །གསུམ་པ་ནི། བླ་མ་ཆེན་པོ་དེ་ལ་རིགས་ཀྱི་སྲས་བཞི་འཁྲུངས་ཏེ། དང་པོར་ཇོ་མོ་ཆུང་ཤོས་ཇོ་ལྕམ་ཕུར་མོ་བྱ་བ་ལ་གཅེན་ཀུན་དགའ་འབར་འཁྲུངས་ཏེ། གཞོན་ནུ་ལ་རྒྱ་གར་དུ་བྱོན། རིགས་པའི་གནས་ལྔ་ལ་མཁས་པར་གྱུར་ནས། བོད་དུ་འབྱོན་གྲབ་བྱས་པའི་ཐོག་ཏུ་ཚད་པ་བྱུང་སྟེ། དགུང་ལོ་ཉི་ཤུ་རྩ་གཉིས་པ་ལ་མ་ག་དྷར་སྐུ་གཤེགས་སོ། །ཇོ་མོ་ཆེ་བ་ཚ་མོ་རོང་པའི་མ་གཅིག་འོད་སྒྲོན་བྱ་བ་ལ་སྲས་གསུམ་འཁྲུངས་པའི་ཆེ་བ་སློབ་དཔོན་རིན་པོ་ཆེ་བསོད་ནམས་རྩེ་མོ་སྟེ། དེ་ཉིད་ཡབ་དགུང་ལོ་ང་གཅིག་བཞེས་པ་ཆུ་ཕོ་ཁྱིའི་ལོ་ལ་སྐུ་འཁྲུངས་ནས། ཡུམ་ལས་བཙས་མ་ཁད་སཾ་ཀྲྀ་ཏའི་སྐད་དང་། བདག་ནི་བྱིས་པའི་སྤྱོད་པ་ལས་འདས་པའོ། །ཞེས་ལན་གཉིས་སུ་བཏུད་ནས་གསུངས་ཤིང་དུས་ཀུན་ཏུ་སྐྱིལ་མོ་ཀྲུང་བཅས་པས་ཡ་མཚན་དུ་གྱུར་ཏོ། །དགུང་ལོ་གསུམ་པ་ལ་ཀྱེ་རྡོར། འཇམ་དཔལ། སྒྲོལ་མ། མི་གཡོ་བ་རྣམས་ཞལ་གཟིགས། རྒྱུད་གསུམ། བདེ་མཆོག་རྩ་རྒྱུད། ཀུན་ལས་བཏུས་དང་ལྔ་ཐུགས་ལ་གསུངས། རྒྱ་གར་དུ་མི་ཐུབ་ཟླ་བ་ལ་སོགས་པ་པཎྜི་ཏ་བཅུ་གཅིག་ཏུ་བརྒྱུད་ནས་སྐྱེ་བ་བཞེས་པ་དྲན་ནོ། །དགུང་ལོ་བཅུ་བདུན་བཞེས་པའི་ཚེ། རྒྱུད་སྡེ་བཞི་བཅུ་ཐུགས་ལ་གསུངས་ཤིང་། རྡོ་རྗེ་ཐེག་པ་མཐའ་དག་ལ་མཁས་པར་རྒྱ་བོད་ཀུན་ལ་གྲགས། རྡོ་རྗེ་གདན་གྱི་ཡ་ཐེམ་ལ་འཇམ་དཔལ་གྱི་སྤྲུལ་པ་བསོད་ནམས་རྩེ་མོ་རྡོ་རྗེས་ཐེག་པ་མཐའ་དག་གི་དབང་ཕྱུག་དམ་པ་ས་སྐྱར་སྐྱེས་སོ། །ཟེར་བའི་ཡི་གེ་མཁའ་འགྲོ་མས་བྲིས་པ་ཀོའུ་ཤཾ་བྷིའི་པཎྜི་ཏ་དེ་ཝ་མ་ཏིས་ཕྱོགས་ཀུན་ཏུ་བསྒྲགས་པས་བོད་ཉིད་ནས་རྩད་ཆོད་ཟེར་རོ། །མདོར་ན་དེ་ཡན་ཆད་དུ་ཡབ་ལས་རྡོ་རྗེ་ཐེག་པས་བསྡུས་པའི་རྒྱུད་འགྲེལ་པ། དཀྱིལ་ཆོག་སྒྲུབ་ཐབས་དབང་བྱིན་རླབས་མན་ངག་ཕྱག་ལེན། ཁྲིད་དང་བཅས་པ་ཞུས་ནས་ཐུགས་སུ་ཆུད་པར་མཛད་དོ། །དེ་ཉིད་ཀྱི་ལོར་ཡབ་གཤེགས་ནས་དེའི་ཕྱི་ལོར་རྗེ་པ་ལ་གདན་ས་གཏད་ནས། གསང་ཕུར་ཕྱ་བ་ཆེན་པོའི་དྲུང་དུ་བྱོན་ཏེ། སྒྲ་ཚད་ཕ་རོལ་ཏུ་ཕྱིན་པ་འདུལ་བ་མངོན་པ་ལ་སོགས་པའི་སྡེ་སྣོད་མ་ལུས་པ་གསན་ཏེ། སྔ་ཕྱིར་ལོ་བཅུ་གཅིག་ཙམ་བཞུགས། ཡུམ་རྒྱས་པ་དང་། གསེར་གྱི་གན་ཇི་རྭ་ལ་སོགས་པའི་ཆོས་དང་ཟང་ཟིང་གི་འབུལ་བ་མང་པོས་བསྙེན་བཀུར་བར་མཛད་དོ། །ཡང་དབུ་རྩེ་རྙིང་མར་གསུང་ངག་གི་ལྟ་བའི་སྐབས་སུ་ནམ་མཁར་མཆོད་པའི་ཚོགས་ཀྱི་དབུས་སུ། རྗེ་པ། ཞུ་བྱས། རྨོག་སྟོན་གསུམ་ལ་འཇམ་དཔལ། བིརྺ་པ། སྤྱན་རས་གཟིགས་ཀྱི་རྣམ་འཕྲུལ་གསུམ་བསྟན་ནས། ཆོས་ཉན་བཅུ་དགུ་དག་པའི་སྣང་བ་ལ་བཀོད་པར་མཛད་དོ། །གཞན་ཡང་རྗེ་པས་མཛད་པའི་བསྟོད་པ་ལས། མནལ་ཚེ་འོད་གསལ་དག་གི་མཉམ་པར་འཇོག །མཐུ་སྟོབས་དབང་ཕྱུག་ཡི་དམ་གང་རུང་ལ། །ཉིན་མཚན་གང་ཡང་ཐེ་ཚོམ་གཅོད་མཛད་པས། །རིག་པའི་གནས་ལྔ་མཐའ་རུ་ཕྱིན་ལ་འདུད། །གང་གི་ཀུན་སྤྱོད་ཉེས་པའི་དྲི་མ་བྲལ། །ལོག་སྨྲའི་མཐའ་སྤངས་བདེན་དོན་གསུང་བ་པོ། །སྤྲོས་པ་མེད་ཐུགས་སྟོང་ཉིད་སྙིང་པོ་ཅན། །ས་གསུམ་སྙན་པར་གྲགས་པ་ཁྱོད་ལ་འདུད། །སྒྲ་ཚད་ཕ་རོལ་ཕྱིན་དང་གསང་སྔགས་སོགས། །གཟིགས་པ་ཙམ་གྱིས་ཚིག་དང་དོན་བཅས་པར། །ལེགས་དགོངས་གཞན་ལ་ཕན་པ་ལྷུར་ལེན་པའི། །མཁྱེན་པའི་སྤྱན་རས་གསལ་བ་ཁྱོད་ལ་འདུད། །གཡེང་བ་མེད་པར་འཆད་རྩོད་རྩོམ་པ་དང་། །རིམ་གཉིས་རྣལ་འབྱོར་རྒྱུན་ཆད་མེད་པ་ཡིས། །རྗེས་ཐོབ་སྒྱུ་མར་མཁྱེན་ནས་སེམས་ཅན་ལ། །སྦྱིན་པ་རྣམ་བཞིས་ཚིམ་མཛད་ཁྱོད་ལ་འདུད། །བླ་ཆེན་འདོད་ལྷ་ཀུན་ལས་ཆོས་རྣམས་ནོད། །དབུས་གཙང་མཁས་རྣམས་བསྟེན་ནས་སྦྱང་ཚུལ་བསྟན། །བསྟན་པའི་སྲོག་ཤིང་ཆེན་པོར་རྩ་བདུན་ལ། །འཛམ་གླིང་ཡོངས་སུ་གྲགས་པ་ཁྱོད་ལ་འདུད། །པོ་ཏ་ལ་དང་དཔལ་རི་ཨུཌྱན་དུ། །ཉིན་ཕྱེད་ཙམ་གྱིས་ལེགས་འཁོར་མཁའ་འགྲོ་དང་། །དཔའ་བོའི་ཚོགས་དང་སྤྱོད་པའི་བརྟུལ་ཞུགས་སྤྱད། །རྣམ་འཕྲུལ་དུ་མས་ཉེར་གནས་ཡི་རང་འདུད། །དབང་འདུས་དཀྱིལ་འཁོར་གཙོ་དང་དབྱེར་མེད་པས། །ཟབ་མོའི་དོན་གསུངས་གནས་དང་མཁའ་ཀུན་ལ། །འོད་དང་འོད་ཟེར་རོལ་མོའི་སྒྲ་སྒྲོགས་པས། །བདག་ཡིད་ཏིང་འཛིན་སྒོ་མང་ཕྱེ་ལ་འདུད། །ཅེས་གསུངས་པ་ལྟར་ཤེས་པར་བྱའོ། །དེ་ལྟ་བུའི་བླ་མ་དེས་ཡང་དག་པར་སྦྱོར་བའི་རྒྱུད་ཀྱི་འགྲེལ་པ་དང་། བྱང་ཆུབ་སེམས་དཔའི་སྤྱོད་པ་ལ་འཇུག་པའི་འགྲེལ་པ་དང་། ཆོས་ལ་འཇུག་པའི་སྒོ་ལ་སོགས་པ་བསྟན་བཅོས་མང་དུ་མཛད་ནས། སྐལ་ལྡན་གྱི་འགྲོ་བ་མང་པོ་སྨིན་གྲོལ་གྱི་ལམ་ལ་བཀོད་པར་མཛད་དེ། དགུང་ལོ་ཞེ་གཅིག་པ་ཆུ་ཕོ་སྟག་གི་ལོ་སྨལ་པོ་ཟླ་བའི་ཚེས་བཅུ་གཅིག་ལ་ལུས་མ་སྤངས་པར་བདེ་བ་ཅན་གྱི་འཇིག་རྟེན་གྱི་ཁམས་སུ་གཤེགས་པར་གྱུར་ཏོ། །དེའི་སློབ་མ་ནི་ཕལ་ཆེར་བླ་ཆེན་དང་ཐུན་མོང་བ་ཡིན་པས་ལོགས་སུ་མ་སྨོས་སོ། །སྲས་བར་པ་རྗེ་བཙུན་རིན་པོ་ཆེ་གྲགས་པ་རྒྱལ་མཚན་ནི། ཡབ་དགུང་ལོ་ང་དྲུག་བཞེས་པ། མེ་མོ་ཡོས་ཀྱི་ལོ་ལ་བཀྲ་ཤིས་པའི་ལྟས་དང་བཅས་ཏེ་བལྟམས་ཤིང་། སྨྲ་ཤེས་ནས་དབེན་པ་ལ་དགའ་བ་དང་། བརྐམ་ཆགས་མེད་པ་དང་། ཡོན་ཏན་བསྒྲུབ་པ་ལ་བརྩོན་པ་དང་། བྱིས་པའི་སྤྱོད་པ་ལས་འདས་པར་གྱུར་ཏོ། །དགུང་ལོ་བརྒྱད་པ་ལ་བྱང་སེམས་ཟླ་བ་རྒྱལ་མཚན་ལ་ཚངས་པར་སྤྱོད་པའི་དགེ་བསྙེན་གྱི་སྡོམ་པ་མནོས་ཏེ། དེ་ཕྱིན་ཆད་རབ་ཏུ་བྱུང་བ་བས་ཀྱང་བཙུན་པར་མཛད་ཅིང་། ཚོགས་མཆོད་ཀྱི་དུས་སུ་དམ་ཚིག་གི་རྫས་ཙམ་མ་གཏོགས་པ་ཐ་མལ་དུ་ཤ་ཆང་ཞལ་དུ་མི་རེག་སྐད་དོ། །དགུང་ལོ་བཅུ་པ་ལ་སྡོམ་པ་ཉི་ཤུ་པ། སྒྲུབ་ཐབས་མཚོ་སྐྱེས་གསུངས། བཅུ་གཉིས་པ་ལ་ཀྱེ་རྡོར་རྒྱུད་གསུམ་གྱི་པོ་ཏི་གསོལ་བའི་རྨི་ལམ་བྱུང་བ་དང་། ཆོས་ཐམས་ཅད་ཀྱི་དེ་ཁོ་ན་ཉིད་ཐུགས་སུ་ཆུད་པར་གྱུར་ཏོ། །དེའི་ཚེ་ས་ཆེན་གཤེགས་ནས་ཆོས་འཁོར་ཆེན་པོ་མཛད་དེ། རང་གི་སློབ་མ་ལ་བརྟག་གཉིས་གསུངས་པས་ངོ་མཚར་དུ་གྱུར་ཏོ། །དེ་ཡན་ཆད་དུ་ཡབ་ལས་རྡོ་རྗེ་ཐེག་པས་བསྡུས་པའི་ཆོས་སྐོར་མང་དུ་གསན་ནས། ལོ་བཅུ་གསུམ་པ་ལ་གདན་ས་བཟུང་སྟེ། སླར་ཡང་སློབ་དཔོན་རིན་པོ་ཆེ། གཉན་གཙུག་ཏོར་རྒྱལ་པོ། ཞང་ཚུལ་ཁྲིམས་གྲགས། གཉག་དབང་རྒྱལ། བལ་པོ་ཛ་ཡ་སེ་ན། ལོ་ཙཱ་བ་དཔལ་མཆོག་དང་པོའི་རྡོ་རྗེ་ལ་སོགས་པ་ལ་རྒྱུད་སྡེ་བཞི་དང་། སྡེ་སྣོད་གསུམ་གྱིས་བསྡུས་པའི་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་གསན་ཅིང་ཐུགས་སུ་ཆུད་པར་མཛད། ནང་དུ་རིམ་གཉིས་ཀྱི་ཏིང་ངེ་འཛིན་རྒྱུན་མི་ཆད་པར་མཛད་དེ། ཆོས་གསུང་བ་ལ་འབྱོན་པའི་ཚེའང་། ཀྱེ་རྡོར་སྒོམ་ཞིང་བྱོན་ནས་ཁྲི་ཐོག་ཏུ་ཕེབས་པ་དང་དབུ་རྒྱན་ལ་རིགས་བདག་ཚར། ཆོས་གཏོར་ལ་རྒྱུན་གཏོར་གྱི་ཚབ་མཛད། ཆོས་གསུང་བ་ལ་བཟླས་པའི་དོད་མཛད་ནས་ཡར་བྱོན་པ་དང་བདེ་མཆོག་སྒོམ་ཞིང་བྱོན། མདོར་ན་ཉིན་ཞག་ཕྲུགས་རེ་ལ་དཀྱིལ་འཁོར་བདུན་ཅུ་རེའི་ཐུགས་དམ་མཛད། གསུང་ངག་ཀྱང་བླ་མའི་བཀའ་རྒྱ་ལོ་དགུ་མཛད་པ་ལ། ལོ་བཅུ་གསུམ་གྱི་བར་དུ་མ་གསུངས་ཤིང་། དེ་ནས་གསུང་ངག་གི་སྒོ་ནས་སྐལ་ལྡན་མང་པོ་རྣམ་པར་གྲོལ་བ་མཆོག་ལ་བཀོད་པར་མཛད་དོ། །གཞན་ཡང་འཆད་རྩོད་རྩོམ་གསུམ་གྱི་སྒོ་ནས་ཐུབ་པའི་བསྟན་པ་ཆེས་ཆེར་གསལ་བར་མཛད་ཅིང་། ཆོས་དང་ཟང་ཟིང་གི་སྒོ་ནས་མགོན་མེད་པའི་གདུལ་བྱ་རྣམས་ཀྱི་མགོན་མཛད་པ་ཞིག་གོ །མནལ་ལམ་དུ་སྐྱེ་བ་དྲན་པ་དང་། ལུང་བསྟན་བརྙེས་པའི་ཚུལ་ནི། ལོ་བཅོ་བརྒྱད་པ་ནས་མཚན་བརྗོད་སྔར་བཟུང་བ་མེད་པར་སྐྱེ་བ་སྔ་མ་ལ་བཟུང་བ་ཡིན་བྱས་ནས་ཚར་ཕྱེད་ཙམ་བཏོན་པ་རྨིས་པ་དང་། བཅུ་དགུ་པ་ན་ཚར་གཅིག་བཏོན་པ་རྨིས་པ་དང་། ཉི་ཤུ་པ་ན་རྒྱ་གར་ཤར་ཕྱོགས་བྷ་ལེནྡྲ་ན་དགེ་བསྙེན་སྔགས་པ་པཎྜི་ཏ་གཅིག་ཏུ་སྐྱེ་བ་བཞེས། དེ་ནས་བྱ་རྒོད་ཕུང་པོའི་རིའི་བྱང་ཕྱོགས་ན་བཙུན་པ་པཎྜི་ཏ་གཅིག་ཏུ་སྐྱེ་བ་བཞེས། དེ་ནས་ཨུཌྱན་གྱི་བྱང་ངོས་ན་བཙུན་པ་པཎྜི་ཏ་གཅིག་ཏུ་སྐྱེ་བ་བཞེས། དེ་ནས་བོད་ཅུང་པའི་ཡུལ་ན་ལྡོག་སྟོན་གཅུ་གུ་བར་སྐྱེ་བ་བཞེས་ཏེ། མཚན་བརྗོད་མང་དུ་བཤད་ཅིང་། བླ་ཆེན་ཡང་སློབ་མར་འདུག་པ་རྨིས་པ་དང་། སུམ་ཅུ་སོ་བདུན་པ་ན་ཐོ་རངས་མནལ་དུ་སོང་བའི་ཚེ། སློབ་དཔོན་རིན་པོ་ཆེ་སྐུ་གཤེགས་ནས་རིང་པོར་མ་ལོན་པའི་གདུང་གི་གསེབ་ནས་སྦྲང་པོ་ཆེའི་སྐད་ལྟ་བུའི་སྒྲ་གཅིག་བར་སྣང་ལ་འཐོན་ནས། ཁྱོད་འདི་ནས་བྱང་ཕྱོགས་སུ་འཇིག་རྟེན་གྱི་ཁམས་དུ་མ་འདས་པ་ན་འཇིག་རྟེན་གྱི་ཁམས་གསེར་མདོག་ཅན་ཞེས་བྱ་བར་དེ་བཞིན་གཤེགས་པ་གསེར་འོད་རྣམ་པར་རྩེན་པའི་རྒྱལ་པོ་ཞེས་བྱ་བའི་བསྟན་པ་ལ་ད་ལྟ་འཁོར་ལོས་སྒྱུར་བའི་རྒྱལ་པོ་བསོད་ནམས་མཐའ་ཡས་ཞེས་བྱ་བའི་སྲས་འཁོར་ལོས་སྒྱུར་བའི་རྒྱལ་པོ་ཡོན་ཏན་མཐའ་ཡས་ཞེས་བྱ་བར་འགྱུར་རོ་ཞེས་སྒྲ་གྲག་གོ་ཞེས་གསུངས་སོ། །ཞེ་དགུ་པའི་དུས་ན་རུ་མཚམས་སུ་བྱོན་པའི་མནལ་ལམ་དུ། བླ་མ་ཡབ་སྲས་དང་མཇལ་ནས་དབང་བཞི་པའི་ལམ་བསྟན། རང་ཉིད་ཀྱིས་ཀྱང་ཆོས་འབྲེལ་ཙམ་བྱས་པའི་འགྲོ་བ་མང་པོ་དང་། དབང་བསྐུར་ཙམ་བྱས་པ་མང་པོ་དང་། ལམ་ལ་འབད་རྩོལ་ཅུང་ཟད་བྱས་པ་རྣམས་ཐར་ལམ་ལ་དྲོང་བའི་མཚན་མ་མཐོང་བ་དང་། རྟོགས་པ་ཅུང་ཟད་དང་ལྡན་པ་བདུན་ཅུ་ཙམ་དང་། དེ་ལས་རྟོགས་པ་ཆེ་བ་སུམ་ཅུ་ཙམ་དང་། ཕ་རོལ་ཏུ་ཕྱིན་པ་ནས་བཤད་པའི་བཟོད་པ་ཐོབ་པ་ལྔ་དྲུག་ཙམ་གྱི་སློབ་མ་འབྱུང་བ་དང་། རང་ཉིད་ཀྱང་དེ་དང་མཉམ་པར་འབྱུང་བའི་མཚན་མ་མཐོང་བ་དང་། ང་དྲུག་ལོན་པ་ན་མནལ་ལམ་དུ་བླ་ཆེན་དང་མཇལ་ནས། སྔར་གནང་བའི་གསུང་ངག་ཐམས་ཅད་ཀྱི་བརྡ་སྟོན་པའི་རྡོ་དཀར་ལ་འཇམ་པ་མཚན་མ་དང་བཅས་པ་དང་། མན་ངག་གི་ཚིགས་སུ་བཅད་པ་ཡང་གནང་བ་དང་། དྲུག་ཅུ་རེ་གཅིག་ལོན་པ་ན་མཁའ་འགྲོ་མས་མཁའ་སྤྱོད་དུ་གདན་འདྲེན་པའི་ཚེ། ད་དུང་འདི་ན་དོན་ཆེ་བས་འདིར་སྡོད་གསུངས་པ་དང་། ཡང་ནེའུ་གསིང་གཅིག་གི་སྟེང་ན་གསེར་གྱི་ཀོར་ཀོར་འཕང་ལོ་ཙམ་འདུག་པ་ལ། འདི་ལ་གདན་ཐིང་ལ་བཞུགས་ཤིག བཏེག་ནས་མཁའ་སྤྱོད་དུ་འགྲོ་བ་ཡིན་ཟེར་བ་ལ། སྔར་བཞིན་གསུངས་པ་དང་། རེ་བདུན་ལོན་པ་ན་བླ་ཆེན་དང་མཇལ་ནས་ཆོས་ཀྱི་སྒྲོ་འདོགས་མང་དུ་བཅད་དེ། བླ་མའི་གཡས་ཕྱོགས་ན་ཀྱེ་རྡོར་ལྷ་དགུ། གཡོན་ཕྱོགས་ན་ཤཱཀྱ་ཐུབ་པ་ཉན་ཐོས་ཆེན་པོ་བརྒྱད་ཀྱིས་བསྐོར་བ་བསྟན་ནས་ཁྱོད་སྡོམ་པ་ལེན་ན་གང་ལས་ལེན། དབང་བསྐུར་ཞུ་ན་གང་ལ་ཞུ་གསུང་བ་སྙམ་བྱེད་ནས། བདག་བཙུན་པ་བྱེད་ན་མཁན་པོར་གྱུར་པ་དང་། དབང་བསྐུར་ཞུ་བའི་བླ་མར་གྱུར་པ་ནི་བླ་ཆེན་ཉིད་ལགས་སོ་ཞེས་ཞུས་པས་དེ་དེ་བཞིན་ནོ། །ཞེས་གསུངས་ནས་བླ་ཆེན་ཉིད་ལ་འཁོར་བྱང་སེམས་ཉེ་བའི་སྲས་བརྒྱད་འདུག་པ་སྙམ་བྱེད་པ་དང་། དེ་ལ་གཡས་གཡོན་གྱི་ལོངས་སྐུ་ལྷ་དགུ་དང་། སྤྲུལ་སྐུ་ལྷ་དགུ་བླ་མ་ལ་ཐིམ་པར་མཐོང་། བླ་མས་ཆོས་ཀྱི་སྒྲོ་འདོགས་མང་དུ་གཅད་ནས་རིགས་ཀྱི་བུ་ཆོས་ཐམས་ཅད་ཀྱི་དེ་ཁོ་ན་ཉིད་འདི་ལྟར་ཡིན་མོད་གསུངས་ནས། མི་སྣང་བར་གྱུར་པ་དང་མནལ་སད་དོ། །རེ་བརྒྱད་པའི་ཚེ་བདེ་བ་ཅན་དུ་སྤྱན་འདྲེན་པའི་ཕོ་ཉ་མང་པོ་ཕྱིར་ཟློག རེ་དགུ་པ་ལ་ལྷ་མང་པོ་ལྷགས་ནས་མི་མཇེད་ཀྱི་མི་བསྔགས་པ་དང་། བདེ་བ་ཅན་གྱི་བསྔགས་པ་བརྗོད་པ་ན་ཁོ་བོ་ཞིང་བཟང་པོ་ལ་དགའ་བ་མེད་ལ་ཞིང་སྦྱོང་བ་ལ་ཞིང་དམན་པ་ཁྱད་པར་དུ་འཕགས་ཤིང་། བདག་ལ་ལྟོས་པའི་མགོན་མེད་པ་འགའ་ཡོད་པས་མི་འགྲོ་གསུངས་ནས་བཟློག དེ་ནས་ཞག་བདུན་ཅུ་འདས་པ་ན་ཅི་ནས་ཀྱང་གཤེགས་སོ་ཟེར་ནས་དེའི་ཚེ་བདེ་བ་ཅན་གྱི་བཀོད་པ་ཡང་གཟིགས་སོ། །བདུན་ཅུ་པའི་ཐོ་རངས་ཆོས་རྗེ་པ་ཙོག་ཙོག་འདུག་སྟེ། ཅུང་ཟད་མནལ་བ་ན་བདེ་བ་ཅན་ནས་འོངས་པའི་ལྷ་ཚོགས་ནམ་མཁའ་གང་བས་སེང་གེའི་ཁྲི་རྒྱན་དུ་མས་སྤྲས་པ་དང་། མཆོད་པའི་བཀོད་པ་དུ་མ་དང་བཅས་པས། རྗེ་པ་སྤྱན་འདྲེན་པ་ཡིན་ཟེར་བ་ལ་གསོལ་བ་བཏབ་པས། རེ་ཤིག་ཅང་མི་སྨྲ་བར་འཁོད་དོ། །རྗེ་ཉིད་ལ་གསོལ་བ་བཏབ་པས་གཤེགས་པར་སྤྲོ་བར་གཟིགས་ནས། ཁྱོད་ཀྱང་བདེ་བ་ཅན་གྱི་བཀོད་པ་ལ་ལྟོས་ཤིག་གསུངས་ཏེ། ཕྱག་གིས་བརྡ་མཛད་པས་བདེ་བ་ཅན་གྱི་བཀོད་པ་ཡིད་འཕྲོག་པ་གཟིགས་སོ། །དེར་དང་པོ་གསེར་མདོག་ཅན་དུ་གཤེགས་གསུངས་པ་དང་མི་འགལ་ལམ་ཞུས་པས། བླ་མ་ཡབ་སྲས་ཀྱི་དྲུང་དུ་སྐྱེ་བར་གྱུར་ཅིག་ཅེས་པའི་སྨོན་ལམ་གྱི་སྟོབས་ལས་རེ་ཤིག་བདེ་བ་ཅན་དུ་འགྲོ་དེར་ཡུན་མི་རིང་བ་ཤིག་བསྡད་ནས། གསེར་མདོག་ཅན་དུ་འཁོར་ལོས་སྒྱུར་བའི་ཆ་བྱད་དུ་བྱས་ཏེ་སངས་རྒྱས་ཀྱི་ཞིང་སྦྱོང་ཞིང་། སྐྱེ་བ་གསུམ་པའི་ལུས་དེ་མ་སྤངས་པར་ཕྱག་ཆེན་མཆོག་གི་དངོས་གྲུབ་ཐོབ་ཏུ་རེ་བ་ཡིན་གསུངས་ནས། ཟབ་མོའི་ཏིང་ངེ་འཛིན་ལ་རྩེ་གཅིག་ཏུ་མཛད་དོ། །དེ་ལྟར་དགུང་ལོ་བདུན་ཅུའི་བར་དུ་གདུལ་བྱ་དཔག་ཏུ་མེད་པའི་དོན་མཛད་ནས། མེ་ཕོ་བྱི་བའི་ལོ་ཁྲའི་ཟླ་བའི་ཚེས་བཅུ་གཉིས་ལ་བདེ་བ་ཅན་དུ་གཤེགས་སོ། །དེ་ལ་སློབ་མ་ཇི་ལྟར་བྱུང་བའི་ཚུལ་ནི། བླ་མ་ཡབ་སྲས་ཀྱི་སློབ་མ་ཕལ་ཆེ་བ་རྗེ་འདི་ཉིད་ཀྱི་ཡང་སློབ་མ་ཡིན་ཅིང་། ཁྱད་པར་དུ་གྲགས་པའི་མཐའ་ཅན་གྱི་བུ་ཆེན་བཞི་ནི་དཀར་ཤཱཀྱ་གྲགས། ནུབ་པ་རིག་འཛིན་གྲགས། གསལ་བ་དབང་ཕྱུག་གྲགས། ལྡེ་སྟོན་དཀོན་མཆོག་གྲགས་སོ། །ཐུགས་སྲས་གཉིས་ནི་ཆོས་རྗེ་བ་སྐུ་མཆེད་དོ། །གུར་རྒྱན་ཞུས་པའི་མི་བཞི་ནི། མུ་ཚུ་བྱང་ཆུབ་གྲགས། ཅང་སྟོན་བརྩོན་འགྲུས་གྲགས། ལྷ་ཐོག་ཡོན་ཏན་བཟུང་། རིགས་ལྡན་ཤེས་རབ་རིན་ཆེན། གཞན་ཡང་ཇོ་སྲས་ལྕགས་ཀྱི་རྡོ་རྗེ། བྲ་སྟོན་ཡེ་ཤེས་སེང་གེ ཞང་རྒྱལ་བ་དཔལ་བཟང་པོ། ལྷོ་པ་རིན་ཆེན་དཔལ་བཟང་པོ་ལ་སོགས་པ་མཐའ་ཡས་སོ། །སྲས་ཆུང་བ་དཔལ་ཆེན་འོད་པོ་ནི། ཡབ་ང་དགུ་བཞེས་པ་ལྕགས་ཕོ་རྟ་ལོ་ལ་འཁྲུངས་ནས་ཡབ་མེས་ཀྱི་ཆོས་རྣམས་ལ་ལེགས་པར་སྦྱངས་ཤིང་། ཁྱད་པར་དུ་མན་ངག་མང་པོ་དང་གསོ་བ་རིགས་པ་ལ་སྦྱངས་ཏེ། བརྩེ་བའི་ཐུགས་རྗེས་འགྲོ་བ་མང་པོའི་དོན་མཛད་ནས། དགུང་ལོ་ང་བཞི་པ་ཆུ་མོ་ཕག་གི་ལོ་ལ་བདེ་བར་གཤེགས་སོ། །དེ་ལ་སྲས་གཉིས་ལས་ཆེ་བ་བླ་མ་ཆོས་རྗེ་པའི་རྣམ་པར་ཐར་པ་འོག་ཏུ་འཆད་དོ། །གཅུང་བསོད་ནམས་རྒྱལ་མཚན་ནི། ཡབ་དགུང་ལོ་སོ་ལྔ་བཞེས་པའི་ཚེ། ཤིང་ཕོ་འབྲུག་ལ་སྐུ་འཁྲུངས་ནས། བླ་མ་རྗེ་པ་དང་། ཆོས་རྗེ་བ་གཉིས་ལ་ལུང་རིགས་མན་ངག་དུ་མ་གསན་ཅིང་ཐུགས་སུ་ཆུད་ནས་ཀྱེ་རྡོར་དང་ཕུར་པ་ལ་ཐུགས་དམ་མཛད། ནག་པོ་ཆེན་པོ་ལྕམ་དྲལ་བྲན་བཞིན་དུ་འཁོལ་བ་ཞིག་སྟེ། གདུལ་བྱ་དཔག་ཏུ་མེད་པའི་དོན་མཛད་ཅིང་། བདེ་བར་གཤེགས་ཁར་དག་པའི་སྣང་བ་མང་པོ་གཟིགས་ཤིང་། བླ་མ་དང་ཡི་དམ་དབྱེར་མི་ཕྱེད་པའི་དགོངས་པ་མཛད། སློབ་མ་རྣམས་ལ་ཁྱེད་རྣམས་བླ་མ་འདི་སངས་རྒྱས་དངོས་སུ་འདུག་པས་ཐེ་ཚོམ་མ་ཟ་བར་མོས་གུས་གྱིས་གསུངས་ཏེ། ང་ཡང་ལྷོ་ཕྱོགས་ཀྱི་རྒྱུད་དུ་སློབ་མ་འགའ་རེ་ལ་དབང་བསྐུར་ཞིང་སྦས་པའི་རྣལ་འབྱོར་གྱིས་ལམ་ཟབ་མོ་ཉམས་སུ་ལེན་པ་གཅིག་ཏུ་སྐྱེ་བ་འདུག་གསུངས་ནས། ཟབ་མོའི་ཏིང་ངེ་འཛིན་ལ་རྩེ་གཅིག་ཏུ་བཞུགས་ཏེ། དགུང་ལོ་ང་དྲུག་བཞེས་པ་ས་མོ་ཕག་གི་ལོ་རྒྱལ་གྱི་ཟླ་བའི་ཉི་ཤུ་གཉིས་ལ་སྐུ་གཤེགས་སོ། །བླ་མ་འདི་ལ་ཇོ་མོ་ལྔ་བྱུང་ཞིང་སྲས་ལྕམ་སྲིང་བརྒྱད་འཁྲུངས་པ་ལས་ཡབ་དགུང་ལོ་ང་གཉིས་བཞེས་པ་ཤིང་མོ་ལུག་གི་ལོ། མ་གཅིག་ཀུན་སྐྱིད་ལ་འགྲོ་མགོན་འཕགས་པ་འཁྲུངས་པ་ནི། སྐུ་བལྟམས་པ་ན་ལྟས་བཟང་པོ་དང་བཅས་ཤིང་། ཆུང་ངུ་ན་འབྲི་ཀློག་ལ་སོགས་པའི་རིག་པའི་གནས་འགའ་ཞིག་མ་བསླབ་པར་མཁྱེན་པ་དང་། སྤྱན་རས་གཟིགས་དང་གསུང་གླེང་མཛད་པར་གྲགས་པའི་ས་སྟོན་རི་བ་དང་། གླང་རི་བ་ལ་སོགས་པའི་སྐྱེ་བ་སྔ་མ་དུ་མ་དྲན་ཅིང་། དགུང་ལོ་གསུམ་པ་ལ་སྒྲུབ་ཐབས་མཚོ་སྐྱེས་གསུངས། བརྒྱད་པ་ལ་སྐྱེས་རབས་ཐུགས་ལ་གསུངས། དགུ་པ་ལ་ཆོས་རྗེ་པའི་སྔོན་འགྲོའི་ཆོས་འཁོར་མཛད་དུས་བརྟག་གཉིས་གསུངས། ཚོགས་ཀྱི་གཏམ་བཤད་མཛད་པས་ཐམས་ཅད་ངོ་མཚར་ཏེ། མཁས་པ་ཐམས་ཅད་ཀྱི་ང་རྒྱལ་ཆགས་ཅིང་སོ་སོའི་སྐྱེ་བོ་ལ་འདི་ལྟ་བུའི་བློ་གྲོས་འབྱུང་མི་སྲིད་འདི་ནི་ངེས་པར་འཕགས་པའོ། །ཞེས་ཀུན་གྱིས་བསྒྲགས་པས་འཕགས་པར་གྲགས་སོ། །བཅུ་པ་ལ་ཆོས་རྗེ་པའི་ཆགས་ཕྱིར་བྱོན་ནས་དབུས་སུ་ཆོས་རྗེ་པས་མཁན་པོ། ཟུལ་ཕུ་མཁན་པོ་ནམ་བཟའ་འཕྲེད་གསོལ་གྱིས་སློབ་དཔོན་མཛད་དེ་རབ་ཏུ་བྱུང་། སྐྱོར་མོ་ལུང་པ་ཤེས་རབ་དཔལ་ལས། དགེ་ཚུལ་གྱི་བསླབ་བྱ་རྣམས་གསན་ནོ། །དེ་ནས་རིམ་གྱིས་ཆོས་རྗེ་པའི་དྲུང་དུ། སྡེ་སྣོད་དང་རྒྱུད་སྡེའི་ཆོས་སྐོར་མཐའ་དག་གསན་ཅིང་ཐུགས་སུ་ཆུད་དོ། །བཅུ་བདུན་པ་ལ་ཆོས་རྗེ་པ་ལ་མངའ་བའི་ཡོན་ཏན་ཐམས་ཅད་རྫོགས་པས་ཐུགས་ཤིན་ཏུ་མཉེས་ཏེ། ཆོས་ཀྱི་དུང་དང་ལྷུང་བཟེད་ལ་སོགས་པ་གནང་། སློབ་མའི་ཚོགས་རྣམས་གཏད་ནས་བསྟན་པའི་བྱ་བ་དང་སེམས་ཅན་མང་པོའི་དོན་བྱ་བའི་དུས་ལ་བབ་པས་སྔོན་གྱི་དམ་བཅའ་དྲན་པར་གྱིས་ཤིག ཅེས་པའི་སྒོ་ནས་བསྟན་པ་གཏད་དོ། །དགུང་ལོ་བཅུ་དགུ་པ་ལ་སེ་ཆེན་གྱིས་གདན་དྲངས་ནས་རྒྱལ་པོ་ཡབ་ཡུམ་གྱིས་ཐོག་དྲངས་མི་ཉི་ཤུ་རྩ་ལྔ་ལ་ཀྱེ་རྡོ་རྗེའི་དབང་བསྐུར་ནས། ཧོར་གྱི་རྒྱལ་ཁམས་སུ་རྡོ་རྗེ་ཐེག་པའི་དབུ་བརྙེས་སོ། །དེའི་ཕྱི་ལོར་རྒྱལ་པོ་ལྗང་ཡུལ་དུ་དམག་ལ་ཕྱིན། བླ་མས་བྱང་ངོས་སུ་བྱོན་ཏེ། ཆོས་རྗེ་པའི་སྐུ་འབུམ་ལ་རབ་གནས་མཛད་ནས། ཆོས་རྗེ་པའི་གསུང་བཞིན་དུ་འུ་ཡུག་པ་ལས་བསྙེན་རྫོགས་མཛད་པ་དང་། སྔར་མ་གསན་པའི་ཆོས་མང་དུ་གསན་པར་དགོངས་ནས། ཡར་བྱོན་པ་ན་འུ་ཡུག་པ་གླང་ལོ་ལ་སྐུ་གཤེགས། ཞེས་ཐོས་ནས་ཕྱིར་ལོག་སྟེ་རྒྱལ་པོ་ཚུར་བྱོན་པ་དང་ལྷན་ཅིག་ཏུ་རྒྱ་ཡུལ་ཏུ་གཤེགས། རྒྱ་ཧོར་གྱི་མཚམས་སུ་དགུང་ལོ་ཉེར་གཅིག་པ་ཤིང་མོ་ཡོས་ཀྱི་ལོ་ལ་མཁན་པོ་གྲགས་པ་སེང་གེ ལས་སློབ་ཇོ་གདན་བྱང་ཐང་པ་བསོད་ནམས་རྒྱལ་མཚན། གསང་སྟེ་སྟོན་པ་ཡར་ལུང་པ་བྱང་ཆུབ་རྒྱལ་མཚན། དད་དགེ་ཆོས་རྗེ་པའི་བུ་སློབ་མང་པོ་སྟེ། ཉི་ཤུའི་དབུས་སུ་བསྙེན་པར་རྫོགས་ནས་མཁན་པོ་ལས། ཕར་ཕྱིན་ལ་སོགས་པ་དང་། སློབ་དཔོན་ལས་འདུལ་བ་གསན་ཏེ་དཔྱིས་ཕྱིན་པར་མཛད་དོ། །ཉེར་གསུམ་པ་ལ་ལྡོང་སྟོན་གདན་དྲངས་ནས་རི་བོ་རྩེ་ལྔར་བྱོན་ཏེ། གཤིན་རྗེའི་གཤེད་ལ་སོགས་པའི་ཆོས་སྐོར་མང་དུ་གསན། དེའི་ཚེ་ཆོས་རྗེ་པ་གསལ་བར་བྱོན་ནས་ཆོས་ཀྱི་གནད་མང་དུ་གསུངས། ཁྱོད་འདི་ནས་བཟུང་སྟེ་ལོ་འབུམ་ཕྲག་གཅིག་དང་སྟོང་འདས་པའི་རྗེས་སུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ཅེས་ལུང་བསྟན་ཅིང་། དབུགས་ཕྱུང་བའི་ངང་ཉིད་ནས། །སྲིད་པ་དུ་ཿཁ་དུ་མ་ཡིས། །ཡུན་རིང་དུས་སུ་དུབ་པ་བདག །ལེགས་པར་གསུངས་པས་དབུགས་ཕྱིན་པ། །ཐུགས་རྗེའི་དབང་ཕྱུག་མཁྱེན་པའི་གཙོ། །ཆོས་ཀྱི་རྗེ་ལ་ཕྱག་འཚལ་ལོ། །ཞེས་པའི་བསྟོད་པ་མཛད་ཅེས་གསུངས་སོ། །དེ་ནས་རྒྱལ་པོའི་ཕོ་བྲང་དུ་བྱོན་ནས། ཆོས་འཁོར་མཛད་པའི་ཚེ་ཟིན་ཤིང་གི་སྟོན་པ་བཅུ་བདུན་རིགས་པས་ཕམ་པར་མཛད་ནས། ཡང་དག་པའི་ལྟ་བ་འཛིན་དུ་བཅུག་གོ །དགུང་ལོ་སུམ་ཅུ་པ་ལ་གདན་སར་ཆགས་ཕེབས་ནས་ཆོས་འཁོར་རྒྱ་ཆེན་པོ་མཛད། གཉན་འོད་སྲུངས། གྲུབ་ཐོབ་ཡོན་ཏན་དཔལ། མཆིམས་ནམ་མཁའ་གྲགས། ཚོགས་སྒོམ་ཀུན་དགའ་དཔལ། ཁ་ཆེའི་པཎྜི་ཏ་ཏ་ཐཱ་ག་ཏ་བྷ་དྲ། ཞང་ཞུང་རྡོ་རྗེ་འོད་ཟེར། གློ་བོ་ལོ་ཙཱ་བ། རིན་པོ་ཆེ་སྐྱོབ་པ་དཔལ། སྟག་སྟོན་འོད་ཟེར་ཤེས་རབ། མངོན་པ་རིན་ཆེན་རྡོ་རྗེ། འབུམ་པ་འོད་ཟེར་ཤེས་རབ། ཐང་དཔེ་བ་གྲགས་བཟང་། མདོག་གློ་བ་ཤཱཀྱ་བྱང་ཆུབ། མཁན་པོ་སེངྒེ་ཟིལ་ནོན། སྤྱི་བོ་ལྷས་པ་ཇོ་སྲས། མངོན་པ་བ་དབང་ཕྱུག་བརྩོན་འགྲུས། རི་ལུང་ཕུག་པ་ཆོས་མགོན། སློབ་དཔོན་ལྷ་བཙུན། ལྷ་རྗེ་དར་མ་སེངྒེ། དབུས་པ་སངས་རྒྱས་འབུམ་རྣམས་ལས། ཕྱི་ནང་གི་རིག་པའི་གནས་རྣམས་དང་། བཀའ་ལུང་མན་ངག་རྒྱ་མཚོ་ལྟ་བུ་གསན་ནས་ཆོས་ཀྱི་མངའ་བདག་ཆེན་པོར་གྱུར་ཏོ། །སླར་ཡང་རྒྱལ་པོས་གདན་དྲངས་ནས་སུམ་ཅུ་སོ་གསུམ་པ་ལ་རྒྱ་ཡུལ་དུ་བྱོན། བཞི་བཅུ་ཞེ་གཉིས་པ་ལ་གདན་སར་ཆགས་ཕེབས་ཏེ། ཟང་ཟིང་གི་དངོས་པོ་རྣམ་ཐོས་ཀྱི་བུའི་དཔལ་འབྱོར་ལ་འགྲན་པར་བཟོད་པ་ཕྱག་ཏུ་བྱུང་བ་ཐམས་ཅད་རང་དོན་དུ་ཏིལ་འབྲུ་ཙམ་ཡང་མ་བཅངས་པར་ཆོས་འཁོར་ཆེན་པོ་མཛད་པ་དང་། ཆོས་གྲྭ་རྣམས་ཀྱི་གཞི་རྐྱེན་འཛུགས་པ་དང་། སྐུ་གསུང་ཐུགས་ཀྱི་རྟེན་བཞེངས་པ་དང་། ཕོངས་པ་རྣམས་ལ་སྦྱིན་པ་གཏོང་བ་ལ་སོགས་པ་བསྟན་པ་དང་སེམས་ཅན་ལ་ཕན་པ་འབའ་ཞིག་མཛད་དོ། །རྒྱ་ཧོར་བོད་ལ་སོགས་པའི་གདུལ་བྱ་དཔག་ཏུ་མེད་པ་ལ་ཆོས་ཀྱི་སྦྱིན་པ་རྒྱ་ཆེན་པོ་མཛད། རང་ཉིད་ཀྱིས་དགེ་སློང་དང་དགེ་ཚུལ་སྟོང་བཞི་བརྒྱ་ལྔ་བཅུའི་མཁན་པོ་མཛད། འདི་ཉིད་ཀྱི་སློབ་མ་འདུལ་འཛིན་ཆོས་ཀྱི་མགོན་པོ་ཞེས་བྱ་བས་ལོ་གཅིག་གི་ནང་དུ་རྒྱའི་དགེ་སློང་དང་དགེ་ཚུལ་སྟོང་བཞི་བརྒྱ་དང་བཞི་བཅུ་རྩ་བདུན་གྱི་མཁན་པོ་བྱས་ཏེ། ཚུལ་ཁྲིམས་ཀྱི་བསླབས་པ་ལ་བཀོད་དོ། །རྡོ་རྗེ་ཐེག་པའི་དབང་བསྐུར་ཡང་སྐད་རིགས་མི་གཅིག་པ་བཅུ་བཞི་ཙམ་ལ་མཛད་ཅིང་གཞན་ཡང་ལུང་མན་ངག་བྱིན་རླབས་ལ་སོགས་པའི་སྒོ་ནས་གདུལ་བྱ་དཔག་ཏུ་མེད་པ་སྨིན་གྲོལ་ལ་བཀོད་དོ། །རྩོམ་པ་ལ་ཡང་བརྗོད་བདེ་ཞིང་རྟོགས་སླ་བའི་བསྟན་བཅོས། བསྟོད་པ། གསོལ་འདེབས། བཀའ་དང་བསྟན་བཅོས་ཀྱི་འགྲེལ་པ། ཐེག་པ་ཆེ་ཆུང་གི་ཉམས་ལེན་གྱི་རིམ་པ། སྒྲུབ་ཐབས་དཀྱིལ་ཆོག་མན་ངག གསུང་རབ་ཀྱི་དཀར་ཆག དྲིས་ལན། བསྔོ་བ་བཀྲ་ཤིས་ཀྱི་སྐོར་ལ་སོགས་པ་ངོ་མཚར་བ་དུ་མ་ཞིག་མཛད་དོ། །དེ་ལྟར་དགུང་ལོ་བཞི་བཅུ་ཞེ་དྲུག་གི་བར་དུ་གཞན་དོན་མཛད་ནས་འབྲུག་ལོ་ཟླ་བ་བཅུ་པའི་ཚེས་གཅིག་ནས་ཆོས་རྗེ་པའི་དུས་མཆོད་སྔར་བསུས་ཏེ་མཆོད་པ་རྒྱ་ཆེན་པོ་དང་། ཐུགས་དམ་ལ་བརྩོན་པ་ན་ཚེས་གསུམ་གྱི་མཚན་མོ་དཔལ་གྱི་རི་ལ་འཕགས་པ་ཀླུ་སྒྲུབ་བྱང་ཆུབ་ཀྱི་ཤིང་རྒྱས་པའི་དྲུང་ན་བཞུགས་པ་ལ་དབུ་མ་རིགས་ཚོགས་ལ་སོགས་པ་ཐེག་ཆེན་གྱི་ཆོས་དུ་མ་གསན། ལྷའི་ཚོགས་ཀྱིས་མཆོད་པ་རྒྱ་ཆེན་པོ་གསལ་བར་གཟིགས་པའི་སྣང་བ་བྱུང་། དེའི་རྗེས་ལ་དྷརྨཱ་ཕ་ལ་ལ་ས་ཆེན་ལ་སོགས་པ་བླ་མ་གོང་མ་རྣམས་ཀྱི་རྣམ་ཐར་དང་། བླ་མ་ཉིད་ཀྱིས་བསྟན་པའི་བྱ་བ་མཛད་ཚུལ་ཡང་གསུངས་ཏེ། ཁྱོད་ཀྱིས་ཀྱང་དེ་བཞིན་དུ་གོ་དགོས་སོ་གསུངས་ཤིང་། ཚེས་བཅོ་བརྒྱད་ཀྱི་བར་དུ་ཚོགས་སུ་བྱོན་ནས་ཆོས་ཀྱང་གསུངས། དེ་ནས་ཞག་བཞི་གཟིམས་ཁང་དུ་བཞུགས་ནས། ཉི་ཤུ་གཉིས་ཀྱི་སྔ་དྲོ་སྐྱིལ་མོ་ཀྲུང་མཛད་རྡོ་རྗེ་དྲིལ་བུ་བསྣམས་ཏེ། སྒྲ་འོད་དང་དྲི་ཁྱད་པར་ཅན་དང་མེ་ཏོག་གི་ཆར་པ་ལ་སོགས་པའི་ལྟས་བསྟན་ཏེ་ཞི་བར་གཤེགས་སོ། །དེ་ལ་སློབ་མའི་མཆོག་ཇི་ལྟར་བྱུང་བ་ནི། སྐུའི་དབོན་པོ་དྷརྨཱ་ཕ་ལ། གཞན་ཡང་སློབ་དཔོན་ཡེ་ཤེས་འབྱུང་གནས། རིན་ཆེན་རྒྱལ་མཚན་གཉིས་ནི་གཅུང་པོ་ཡིན་ཅིང་། སློབ་མ་ལ་ཤར་པ་འཇམ་དབྱངས་རིན་ཆེན་རྒྱལ་མཚན། ཀུན་དགའ་སེང་གེ ཡེ་རྒན་དཔག་ཤི་སྟེ་གསུམ། ཉི་ཐོག་པ་ཀུན་དགའ་སྨོན་ལམ། སྲུ་ལུང་ཀུན་སྨོན། དགའ་ལྡན་པ་ཀུན་བསོད། དགའ་ལྡན་པ་བཀྲ་ཤིས་དཔལ། ཞང་དཀོན་མཆོག་དཔལ་ལ་སོགས་པ་མཁས་ཤིང་གྲུབ་པ་བརྙེས་པ་མཐའ་ཡས་པ་བྱུང་བས་བསྟན་པ་དར་རྒྱས་སུ་མཛད་དོ། །དེ་ལྟར་ས་ཆེན་གྱི་སྲས་བཞི། ཆོས་རྗེ་པ་སྐུ་མཆེད་གཉིས། བླ་ཆེན་འཕགས་པ་དང་བདུན་ལ་འཇམ་དབྱངས་བདུན་བརྒྱུད་དུ་གྲགས་སོ། །གསུམ་པ་ཕྱག་རྡོར་གྱི་རྣམ་འཕྲུལ་སོགས་བྱུང་ཚུལ་ནི། སློབ་དཔོན་ཟང་ཚ་བསོད་ནམས་རྒྱལ་མཚན་ང་དྲུག་བཞེས་པ། ས་མོ་ཕག་གི་ལོ་ལ་འགྲོ་མགོན་ཕྱག་ན་འཁྲུངས་ཏེ། སྐྱེས་སྟོབས་ཀྱི་ཤེས་རབ་ཕུལ་དུ་བྱུང་ཞིང་བརྩེ་བའི་སྙིང་རྗེས་འགྲོ་བ་མང་པོ་ལ་ཕན་པའི་ཕྱིར་དུ་མཐུ་སྟོབས་ཀྱི་སྒོ་ནས་བརྟུལ་ཞུགས་ཀྱི་སྤྱོད་པ་གཙོ་བོར་མཛད་པ་ཞིག་སྟེ། དགུང་ལོ་ཉི་ཤུ་རྩ་དགུ་བཞུགས་སོ། །དེ་ལ་སྲས་དྷརྨ་ཕ་ལ་རཀྵི་ཏ་སྐུ་འཁྲུངས་ཏེ་དགུང་ལོ་ཉི་ཤུ་བཞུགས་སོ། །ཡང་ཟང་ཚའི་ཇོ་མོ་མ་གཅིག་ཇོ་འབྲོ་ལ་སློབ་དཔོན་རིན་ཆེན་རྒྱལ་མཚན་ཡབ་ང་ལྔ་བཞེས་པའི་ཚེ་འཁྲུངས་སོ། །ཡང་དེ་ཉིད་ཀྱི་ལོར་མ་གཅིག་རྡོ་རྗེ་ལྡན་ལ་སློབ་དཔོན་ཡེ་ཤེས་འབྱུང་གནས་འཁྲུངས་སོ། །དེའི་སྲས་བདག་ཉིད་ཆེན་པོ་བཟང་པོ་དཔལ་ཆུ་ཕོ་ཁྱི་ལོ་ལ་བོ་དོང་དུ་སྐུ་འཁྲུངས་ཤིང་། དེ་ལ་ཏི་ཤྲཱི་ཀུན་བློ་ལ་སོགས་པ་རིགས་ཀྱི་སྲས་བཅུ་གཉིས་འཁྲུངས་ཏེ། དེང་སང་གི་བར་དུ་གདུང་བརྒྱུད་རྣམ་པར་དག་པའི་ཕྲེང་བ་རྒྱུན་མ་ཆད་པར་བྱུང་ཞིང་བསྟན་པའི་བྱ་བ་རྒྱ་ཆེན་པོ་མཛད་དོ།། །།བཞི་པ་དེ་ལས་བླ་མ་ཉིད་སྐུ་འཁྲུངས་པའི་ཚུལ་ནི། ཡབ་དཔལ་ཆེན་འོད་པོ་དང་། ཡུམ་མང་མཁར་བ་ཉི་ཁྲི་ལྕམ་ལ་ཆོས་རྗེ་ཉིད་སྐུ་འཁྲུངས་ཏེ་ཐོག་མར་ཡུམ་ལ་བལྟམས་པའི་ཚེ། ཡུམ་གྱི་རྨི་ལམ་དུ་ཀླུའི་རྒྱལ་པོ་གནས་གཡོར་དུ་བྱུང་བ་རྨིས་ཏེ། ལུས་སེམས་ཟག་པ་མེད་པའི་དགའ་བདེས་ཁྱབ་པར་གྱུར་ཏེ། ཆུ་ཕོ་སྟག་གི་ལོ་དཔྱིད་ཟླ་ར་བའི་ཉི་ཤུ་དྲུག་གི་ཉིན་པར་ལུང་པ་འོད་ཀྱིས་གང་བ་དང་། མཁའ་འགྲོ་མ་མང་པོ་འདུ་བ་དང་། མེ་ཏོག་གི་ཆར་ལ་སོགས་པ་ལྟས་ཁྱད་པར་ཅན་དང་བཅས་ནས་བཙས་སོ། །ལྔ་པ་འཁྲུངས་ནས་འཇིག་རྟེན་གྱི་སྤྱོད་པ་ལས་འདས་པའི་ཚུལ་ནི། གོག་པོ་གོག་པའི་དུས་སུ་ས་ལ་རྒྱ་གར་གྱི་ཡི་གེ་བྲི་བ་དང་། སཾ་སྐྲྀ་ཏའི་སྐད་དུ་ཀློག་པ་མཛད། ཡི་གེའི་རི་མོ་དེ་ལས་མི་འགོམ་པར་ཕྱག་གིས་བསུབས་ནས་འཇོག་པ་ཡུམ་གྱིས་གཟིགས་ཏེ། རྗེ་བཙུན་ཆེན་པོ་སྤྱན་དྲངས་ནས་ཞུས་པས། ལཉྫ་དང་བྷ་ཌུའི་ཨཱ་ལི་ཀཱ་ལི་ཚར་རེ་བྲིས་ནས། དེ་བཀླགས་ཏེ་འགོམ་ཡུགས་སོང་དོགས་ནས་བསུབས་པ་ཡིན་པར་དགོངས་ནས་ཤིན་ཏུ་དགྱེས་སོ། །ཆོས་རྗེ་ཉིད་ཀྱི་གསུང་ལས་ཀྱང་རྒྱ་ཀློག་དང་བོད་ཀློག་མ་བསླབས་པར་སྔ་མོ་ནས་ཤེས་འདུག་སྟེ་སྔོན་ལ་གང་ཤེས་མི་དྲན་ནོ་གསུངས། གཉིས་པ་གཞི་ཚུལ་ཁྲིམས་ལ་གནས་པའི་ཡོན་ཏན་ནི། ཐོག་མར་རྗེ་བཙུན་ཆེན་པོའི་དྲུང་དུ། ཚངས་པར་སྤྱོད་པའི་དགེ་བསྙེན་གྱི་སྡོམ་པ་ཞུས་ཏེ། མཚན་ནི་ཀུན་དགའ་རྒྱལ་མཚན་དུ་བཏགས་སོ། །དེ་ནས་བྱང་སེམས་ཀྱི་སྡོམ་པ་ལུགས་གཉིས་དང་། རྣལ་འབྱོར་ཆེན་པོའི་དབང་བཞི་ཡོངས་སུ་རྫོགས་པ་དང་། ཡབ་ལས་ཀྱང་ཀྱེའི་རྡོ་རྗེའི་དབང་མནོས་ཏེ་སྡོམ་པ་གསུམ་ལྡན་དུ་མཛད་དོ། །དགུང་ལོ་ཉི་ཤུ་རྩ་བདུན་བཞེས་པའི་ཚེ་ལོ་སྟོན་རྡོ་རྗེ་དབང་ཕྱུག་གིས་བཞེངས་པའི་ཉང་སྨད་རྒྱན་གོང་ཞེས་བྱ་བའི་གཙུག་ལག་ཁང་དུ་མཁན་པོ་ཁ་ཆེའི་བསོད་སྙོམས་པ་ཆེན་པོ་ཤཱཀྱ་ཤྲཱི་བྷ་དྲ། ལས་ཀྱི་སློབ་དཔོན་སྤྱི་བོ་ལྷས་པ་བྱང་ཆུབ་འོད། གསང་སྟེ་སྟོན་པ་ཞུ་དོན་མོ་རི་བ་ལ་སོགས་པའི་དབུས་སུ་རབ་ཏུ་བྱུང་ཞིང་བསྙེན་པ་རྫོགས་པར་མཛད་དེ། སྔར་གྱི་མཚན་ལ་མཁན་པོའི་མཚན་གྱི་མཐའ་ཅན་དུ་བྱས་ཏེ་ཀུན་དགའ་རྒྱལ་མཚན་དཔལ་བཟང་པོ་ཞེས་བྱ་བར་བརྟགས་སོ། །གསུམ་པ་ཐོས་བསམ་སྒོམ་པས་རྒྱུད་སྦྱངས་པའི་ཡོན་ཏན་ནི། རིག་པའི་གནས་ལྔ་ལས། བཟོ་རིག་པ་མཁྱེན་པའི་ཚུལ་ཡང་། རྗེ་བཙུན་ཆེན་པོའི་ནང་རྟེན་འཇམ་པའི་དབྱངས་ཀྱི་གསེར་སྐུ་དང་། དཔལ་བསམ་ཡས་ཀྱི་གཙུག་ལག་ཁང་གི་འཁོར་སའི་ངོས་ན་འཕགས་པ་འཇམ་དཔལ་གྱི་སྐུ་རི་མོར་བྲིས་པ་རྣམས་དེང་སང་གི་ལྷ་བཟོ་བ་ཤིན་ཏུ་མཁས་པ་དག་གིས་ཀྱང་འགྲན་པར་བཟོད་པ་མ་ཡིན་ནོ། །གསོ་བ་རིག་པ་མཁྱེན་པའི་ཚུལ་ཡང་། ཡན་ལག་བརྒྱད་པ་རྩ་འགྲེལ་དང་། འཕགས་པ་ཀླུ་སྒྲུབ་ཀྱིས་མཛད་པའི་སྨན་གྱི་མདོ་ལྔ་དང་། དཔྱད་གཞུང་བཅུ་ལ་སོགས་པ་དང་། ཨ་ཙ་རའི་གདམས་པའི་རྒྱུན་ལ་སོགས་པ་གསན་ཅིང་མཁྱེན་ནས་སྨན་ཡན་ལག་བརྒྱད་པའི་བསྡུས་དོན་ལ་སོགས་པ་མཛད་དོ། །སྒྲ་རིག་པ་མཁྱེན་པའི་ཚུལ་ཡང་། བལ་པོའི་པཎྜི་ཏ་སཾ་ག་ཤྲཱི་ལ། སྒྲའི་བསྟན་བཅོས་ཀ་ལཱ་པ་དང་། ཙཎྜ་པའི་བྱེད་པའི་ཚིགས་བསྒྲུབ་པ་པྲ་ཏི་ཡ་ལ་སོགས་པ་གསན། གཞན་ཡང་སྙན་ངག་གི་བསྟན་བཅོས་གཞོན་ནུ་འབྱུང་བ་དང་། དབྱངས་ཅན་གྱི་མགུལ་རྒྱན་སྟོང་ཕྲག་བཞི་པ་དང་། དཱཎྜི་དང་། སྡེབ་སྦྱོར་གྱི་བསྟན་བཅོས་འཕགས་པ་འཇམ་དཔལ་གྱི་བསྟོད་པ་ལ་གཞི་བྱས་པ་བྷྲི་ཏ་མ་ལ་ཞེས་བྱ་བ་དང་བཅས་པ་གསན། པཎྜི་ཏ་དཱ་ན་ཤྲཱི་ལ་ལ། མངོན་བརྗོད་ཀྱི་བསྟན་བཅོས་ཨ་མཱ་ར་ཀོ་ཥའི་ལེའུ་དང་པོ་ཡན་ཆོད་ཀྱི་འགྲེལ་པ་གསན། པཎྜི་ཏ་སུ་ག་ཏ་ཤྲཱི་ལས། སྒྲ་ཀ་ལཱ་པ་འགྲེལ་པ་སྟོང་ཕྲག་དྲུག་འགྲེལ་པ་དང་བཅས་པ་དང་། དེའི་མིང་སྒྲུབ་པ་སུ་ཝནྟི་དང་། བྱིངས་སྒྲུབ་པ་ཏི་དན་ཏི་དང་བཅས་པ་དང་། སྙན་ངག་གི་བསྟན་བཅོས་ཆེན་པོ་གསུམ་དང་། ཆུང་ངུ་གསུམ་དང་། སྡེབ་སྦྱོར་རིན་ཆེན་འབྱུང་གནས་དང་། རྒྱན་གྱི་བསྟན་བཅོས་དབྱངས་ཅན་གྱི་མགུལ་རྒྱན་སྟོང་ཕྲག་བརྒྱད་པའི་ཕྱེད་མན་ཆད་མིང་གི་མངོན་བརྗོད་ཨ་མཱ་ར་ཀོ་ཥའི་རྩ་བ་རྫོགས་པ་དང་། སྣ་ཚོགས་གསལ་བའི་ཕྱེད་ལྷག་དང་། ཟློས་གར་གྱི་བསྟན་བཅོས་གཟུགས་ཀྱི་ཉི་མ་ལ་སོགས་པ་གསན། ཁ་ཆེ་མཁན་པོའི་དྲུང་དུ་སྒྲའི་བསྟན་བཅོས་སྙིང་པོ་བསྡུ་བ་ཞེས་བྱ་བ་གསན་ཅིང་ཐུགས་སུ་ཆུད་པར་མཛད་དོ། །སྙན་ངག་དང་མིང་གི་མངོན་བརྗོད་ལ་སོགས་པ་རྣམས་རིགས་པའི་གནས་ཆུང་བ་ཡིན་པས་སྒྲ་རིག་པ་མཁྱེན་པའི་སྐབས་འདིར་སྨོས་སོ། །ཚད་མ་རིག་པ་མཁྱེན་པའི་ཚུལ་ཡང་། ཐོག་མར་རྐྱང་འདུར་བ་གཞོན་ནུ་སེང་གེའི་དྲུང་དུ། ཚད་མ་རྣམ་པར་ངེས་པ་གསན། ཁ་ཆེ་པཎ་ཆེན་ཤཱཀྱ་ཤྲཱིའི་དྲུང་དུ། ཚད་མ་རྣམ་འགྲེལ་ལེའུ་གསུམ་ཡིད་ཀྱི་ཤིང་རྟ་ལ་དགའ་བའི་རྗེས་སུ་འབྲང་བ་དང་། ལྷ་དབང་བློའི་འགྲེལ་པ་དང་། ཀུན་ལས་བཏུས་དང་སྦྱར་བའི་རྣམ་འགྲེལ་གྱི་བཤད་པ་དང་། རིགས་ཐིགས་དང་དེའི་ཕྱོགས་སྔ་མདོར་བསྡུས་ཀ་མ་ལ་ཤཱི་ལས་མཛད་པ་དང་། རྒྱུད་གཞན་གྲུབ་པ་དང་། རྣམ་འགྲེལ་གྱི་རྒྱན་སྟོང་ཕྲག་བཅོ་བརྒྱད་པ་དང་། ཆོས་མཆོག་གིས་མཛད་པའི་ཚད་མ་གྲུབ་པའི་རབ་ཏུ་བྱེད་པ་དང་། བྲམ་ཟེའི་ཚད་མ་གྲུབ་པའི་རབ་ཏུ་བྱེད་པ་དང་། ཕྱོགས་གླང་གིས་མཛད་པའི་དམིགས་པ་བརྟགས་པ་རྩ་འགྲེལ་དང་། རླུང་གི་རབ་བྱེད་རྩ་འགྲེལ་ལ་སོགས་པ་གསན་ནོ། །པཎྜི་ཏ་དཱ་ན་ཤཱི་ལ་ལས། འགྲེལ་པ་བརྟག་པ་དང་། རྩོད་པའི་རིགས་པ་འགྲེལ་པ་དང་བཅས་པ་དང་། སློབ་དཔོན་དགྲ་ལས་རྣམ་རྒྱལ་གྱིས་བྱས་པའི་བྱིས་པ་འཇུག་པའི་རབ་ཏུ་བྱེད་པ་དང་། ལྷན་ཅིག་དམིགས་ངེས་ལ་སོགས་པ་གསན། པཎྜི་ཏ་སཾ་ག་ཤྲཱི་ལས། ལེའུ་དང་པོའི་འགྲེལ་པ་དང་། ཡོད་ཀྱི་ཤིང་རྟའི་བཤད་པ་ཀུན་ལས་བཏུས་དང་སྦྱར་བ་དང་། བྲམ་ཟེའི་འགྲེལ་པ་དང་བཅས་པ་གསན་ནས་བསྒྱུར། ཡན་ལག་གི་བསྟན་བཅོས་རྩོད་རིགས་དང་གཏན་ཚིགས་ཐིགས་པ་འགྲེལ་པ་དང་བཅས་པ་གསན་ནོ། །པཎྜི་ཏ་སུ་ག་ཏ་ཤྲཱི་ལས། རྣམ་འགྲེལ་ལེའུ་དང་པོའི་འགྲེལ་པ་སྟོང་ཕྲག་ཕྱེད་དང་བཞི་པ་དང་། ཐར་པ་འབྱུང་གནས་ཀྱིས་མཛད་པའི་རྟོག་གེའི་སྐད་དང་། དྲང་སྲོང་གཟེག་ཟན་གྱིས་སྦྱར་བའི་རྟོག་གེའི་བསྟན་བཅོས་ལ་སོགས་པ་མང་དུ་གསན་ནོ། །ནང་དོན་རིགས་པ་མཁྱེན་པའི་ཚུལ་ལ། དཔལ་ལྡན་ས་སྐྱའི་འཇམ་དབྱངས་རྗེ་བཙུན་ཆེན་པོ་གྲགས་པ་རྒྱལ་མཚན་གྱི་དྲུང་དུ། ཕ་རོལ་ཏུ་ཕྱིན་པ་ལ་སོགས་པའི་སྡེ་སྣོད་ཀྱི་སྐོར་མ་ལུས་པ་གསན་ཅིང་། རྒྱུད་སྡེ་ལ་བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་གྱི་རྒྱུད་མཐའ་དག་གསན་ཅིང་། རྣལ་འབྱོར་ཆེན་པོའི་རྒྱུད་ལ་གསང་བ་འདུས་པ། འཕགས་སྐོར་ཡན་ལག་དང་བཅས་པ་དང་། ཡེ་ཤེས་ཞབས་ལུགས་ལ། རྒྱན་ལྗོན་ཤིང་སྙིམ་པའི་མེ་ཏོག་སྟེ་འགྲེལ་པ་གསུམ་ཡན་ལག་དང་བཅས་པ་གསན། གཤིན་རྗེའི་གཤེད་ཀྱི་རྒྱུད་གསུམ་བདེ་མཆོག་རྩ་རྒྱུད། བཤད་པའི་རྒྱུད་རྡོ་རྗེ་མཁའ་འགྲོ། མཁའ་འགྲོ་རྒྱ་མཚོ། མངོན་བརྗོད་བླ་མ། ཧེ་རུ་ཀ་མངོན་བྱུང་། ཀུན་ཏུ་སྤྱོད་པ། རྣལ་འབྱོར་མ་བཞིའི་ཁ་སྦྱོར། རྡོ་རྗེ་ཕག་མོ་མངོན་པར་འབྱུང་བ། ཀྱེ་རྡོ་རྗེའི་རྒྱུད་གསུམ། ཕྱག་རྒྱ་ཆེན་པོ་ཐིག་ལེ་ལ་སོགས་པ་ཐིག་ལེའི་སྐོར་ཚོ། རྟོག་པ་མེད་པ་ལ་སོགས་པ་ཨ་ར་ལིའི་རྒྱུད་གསུམ། མགོན་པོ་མངོན་པར་འབྱུང་བ། དུས་ཀྱི་འཁོར་ལོ་ཡན་ལག་དང་བཅས་པ་གསན། མན་ངག་གི་སྐོར་ལ་རྣལ་འབྱོར་དབང་ཕྱུག་བིརྺ་པ་ནས་བརྒྱུད་པའི་སྙན་བརྒྱུད་ཚད་མ་བཞི་ལྡན། རྗེ་ཞང་དགོན་པ་བ་ནས་བརྒྱུད་པ་དང་། རྗེ་བཙུན་ས་སྐྱ་པ་ཆེན་པོ་ལ་དངོས་སུ་གནང་བའི་མན་ངག་གི་སྐོར་ལ་སོགས་པ་རིང་བརྒྱུད་དང་ཉེ་བརྒྱུད་མཐའ་ཡས་པ་གསན་ནོ། །རྗེ་བཙུན་ནཱ་རོ་ཏ་པ་ནས། ཕམ་མཐིང་པ་སྐུ་མཆེད་ལ་བརྒྱུད་པའི་འཁོར་ལོ་བདེ་མཆོག གསང་མཐའི་ལུགས་ཀྱི་བསྐྱེད་རིམ་དང་རྫོགས་རིམ་གྱི་མན་ངག་ཡོངས་སུ་རྫོགས་པ་གསན། ཡང་རྗེ་བཙུན་ནཱ་རོ་ཏ་པའི་ལུགས་ཀྱི་རྡོ་རྗེ་འཇིགས་བྱེད་ཀྱི་མན་ངག་གི་བཤད་པ་དང་། ཇོ་བོ་རིན་ཆེན་བཟང་པོ་ནས་བརྒྱུད་པའི་ངན་སོང་སྦྱོང་བའི་རྒྱུད་ཀྱི་མན་ངག་གི་བཤད་པ་དང་། རྩ་བའི་དཀྱིལ་འཁོར་གྱི་དབང་དང་བཅས་པ་གསན་ནོ། །མཁན་པོ་ཆོས་རྗེ་པའི་དྲུང་དུ། གསང་བ་འདུས་པའི་འགྲེལ་པ་སྒྲོན་མ་གསལ་བ་དང་། རྫོགས་རིམ་རིམ་པ་ལྔ་དང་། དཀྱིལ་འཁོར་གྱི་ཆོ་ག་གཉིས་ལ་སོགས་པ་དང་། གསང་འདུས་ཡེ་ཤེས་ཞབས་ལུགས། སྒྲུབ་ཐབས་ཀུན་བཟང་དང་བཅས་པ་དང་། འཁོར་ལོ་བདེ་མཆོག་གི་ཆོས་སྐོར་མང་པོ་དང་། བརྟག་གཉིས་ཀྱི་འགྲེལ་པ་རྡོ་རྗེ་སྙིང་པོས་མཛད་པ་ལ་སོགས་པ་མང་དུ་གསན་ནོ། །གཞན་མང་ཡབ་དཔལ་ཆེན་འོད་པོ་དང་། ལས་ཀྱི་སློབ་དཔོན་སྤྱི་བོ་ལྷས་པ་དང་། པཎྜི་ཏ་དཱ་ན་ཤཱི་ལ། སཾ་ག་ཤྲཱི་དང་། སུ་ག་ཏ་ཤྲཱི་ལ་སོགས་པ་རྣམས་ལས་མདོ་སྡེ་དང་རྒྱུད་སྡེ་འགྲེལ་པ་དང་བཅས་པ་གསན་པའི་ཚུལ་རྒྱས་པར་གསན་ཡིག་ལས་ཤེས་པར་བྱའོ། །གཞན་ཡང་མནལ་ལམ་དུ་ཆོས་གསན་པའི་ཚུལ་ནི། ས་སྐྱའི་ལྟག་གི་ཨ་ཕྱིའི་མཆོད་རྟེན་གྱི་དྲུང་དུ་དབྱིག་གཉེན་ཡིན་ཟེར་བའི་པཎྜི་ཏ་སྔོ་སང་སྐུ་ཤ་ཧ་ཅང་ཞུམ་པ་མ་ཡིན་པ་ཞིག་ལ་ཆོས་མངོན་པ་མཛོད་ཟླ་བ་གཅིག་གི་བར་དུ་ཉན་པ་རྨིས་ཤིང་མནལ་སད་པ་དང་མངོན་པ་མཛོད་ཀྱི་ཚིག་དོན་མ་ལུས་པ་ཐུགས་སུ་ཆུད་དེ། ཕྱིས་ཁ་ཆེ་པཎ་ཆེན་ལས་གསན་དུས་སྔར་བས་ཁྱད་མ་བྱུང་གསུངས་སོ། །ཡང་ནུབ་གཅིག་སློབ་དཔོན་ཕྱོགས་ཀྱི་གླང་པོའི་གདན་སར་བསྐོ་བས་གཤེགས་པར་ཞུ་ཟེར་བ་དང་། དེའི་བྲག་ཕུག་སྒོ་གླེགས་དང་བཅས་པའི་ངོས་རྣམས་ལ་གླེགས་བམ་མང་པོ་ཡོད་པ་ཞིག་གི་ལྡེ་མིག་གཏད། སློབ་དཔོན་གྱིས་གདམས་པ་དང་རྗེས་སུ་གདམས་པ་ཡང་གནང་བ་རྨིས་ཏེ། དེ་ནས་ཚད་མ་ལ་སོགས་པའི་ཆོས་འབད་མ་དགོས་པར་མཁྱེན་ཏོ་ཞེས་གསུངས། དེ་ལྟར་གསན་པ་དེ་དག་བསམ་བྱུང་གི་རིགས་པས་ཚུལ་བཞིན་དུ་དཔྱད་ཅིང་། བསྒོམ་བྱུང་གི་རིགས་པས་ཉམས་སུ་བླངས་པ་ལ་བརྟེན་ནས། མཐར་ཕྱིན་པའི་རྟགས་མངོན་ཤེས་ཐོགས་མེད་དུ་འཆར་བ་དང་། ལུས་ལ་སྐྲ་དཀར་བ་དང་གཉེར་མ་མེད་པ་དང་། ཏིང་འཛིན་བརྟན་པ་ལ་སོགས་པ་ཡོན་ཏན་དཔག་ཏུ་མེད་པ་བརྙེས་ཏེ། ཆོས་རྗེ་ཉིད་ཀྱི་གསུང་ནས་ཀྱང་མི་མང་པོའི་གསེབ་ཏུ་སྡོད་ཀྱང་གཡེང་བར་མི་ནུས་པའི་ཏིང་ངེ་འཛིན་ཡོད་གསུངས་སོ། །བཞི་པ་འཆད་རྩོད་རྩོམ་པས་བསྟན་པ་སྤེལ་བའི་ཡོན་ཏན་ལ་གསུམ་ལས། དང་པོ་འཆད་པས་བསྟན་པ་སྤེལ་ཚུལ་ནི་རིག་པའི་གནས་ལྔས་བསྡུས་པའི་ཕྱི་ནང་གི་བདེ་བར་གཤེགས་པའི་གསུང་རབ་མཐའ་དག་ལ་གདུལ་བྱ་སོ་སོའི་བློ་གྲོས་དང་འཚམས་པར་རྗོད་བྱེད་ཀྱི་ཚིག་གོ་བདེ་ཞིང་། བརྗོད་བྱའི་དོན་ཕྱིན་ཅི་མ་ལོག་པར་བསྟན་པ་ལས་འོག་ཏུ་འཆད་པ་ལྟར་གྱི་སློབ་མའི་ཚོགས་རྣམས་བསྐྲུན་པར་མཛད་དེ། དེ་ཡང་དགུང་ལོ་དགུ་པར་སྒྲུབ་ཐབས་མཚོ་སྐྱེས། བཅུ་གཅིག་པའི་དུས་སུ་བརྟག་གཉིས། སངས་རྒྱས་མཉམ་སྦྱོར། བཅུ་གཉིས་པའི་དུས་སུ། གུར་དང་སཾ་བུ་ཊ་གསུངས་པ་ནས། དགུང་ལོ་བདུན་ཅུའི་བར་དུ་བཤད་པ་རྒྱུན་མ་ཆད་པར་མཛད་དོ། །གཉིས་པ་རྩོད་པས་བསྟན་པ་སྤེལ་བའི་ཚུལ་ནི། འགྲོ་བའི་བླ་མ་འདི་ཉིད་ཀྱི་སྙན་པའི་གྲགས་པས་རྒྱ་གར་ཤར་ནུབ་ཀུན་ཏུ་ཁྱབ་པའི་ཚེ། རྒྱ་གར་ལྷོ་ཕྱོགས་པ་འཕྲོག་བྱེད་དགའ་བོ་ལ་སོགས་པ་ཕྱི་རོལ་པའི་སྟོན་པ་དྲུག་གིས་རྩོད་པར་བརྩོམས་ཏེ། མང་ཡུལ་སྐྱིད་གྲོང་གི་འཕགས་པ་ཝ་ཏིའི་གཙུག་ལག་ཁང་དང་། འདབས་འབྱོར་བའི་ཚོང་དུས་ན་བཞུགས་པའི་ཚེ། སྟོན་པ་དྲུག་པོ་དག་ལྷགས་པ་ན། ཐམས་ཅད་ཆོས་རྗེ་ཉིད་དང་བདེ་བར་གཤེགས་པའི་རྟེན་ལ་ཕྱག་མི་འཚལ་བར་བདེ་ལེགས་དང་། བསྔགས་པར་འོས་པའི་ཚིགས་སུ་བཅད་པ་རེ་རེ་ཙམ་བཏོན་ནས་གྲལ་ལ་འཁོད་དེ། ངེད་ཀྱི་རིགས་ཐམས་ཅད་ནི་བླ་མ་ཚངས་པ་ནས་བརྩམས་ཏེ་དེང་སང་གི་བར་དུ་གོའུ་ཏ་མའི་བསྟན་པ་ལ་མི་ལྟོས། དཀོན་མཆོག་གསུམ་ལ་སྐྱབས་སུ་འགྲོ་མ་མྱོང་བས་དྲང་སྲོང་གི་རིགས་རྣམ་པར་དག་པའོ་ཞེས་སྨྲ་བར་བྱེད་དོ། །དེའི་ཚེ་ཆོས་རྗེ་འདིས་ཅི་ཚངས་པ་དེ་ནི་སྟོན་པ་ལ་ཤིན་ཏུ་གུས་པ་ཡིན་ནོ། །འོན་ཀྱང་དེ་གཏི་མུག་ཆེ་བས་གཉིད་ཀྱིས་ནོན་པ་མ་ཡིན་ནམ། ཅི་སྐད་དུ་རབ་མཆོག་ལག་པ་བཞི་པ་ཞེས་སོགས་ཀྱི་ཚིགས་བཅད་གསུངས་པས། དེ་དག་ཤིན་ཏུ་མ་བཟོད་ཅིང་མ་རངས་པས་འབེལ་བའི་གཏམ་གྱི་སྐབས་རྙེད་དེ། རྒོལ་བ་ངན་པ་དེ་ཐམས་ཅད་རེ་རེ་ནས་སུན་ཕྱུང་ཤིང་ཕམ་པར་མཛད་དེ། མི་སྨྲ་བའི་བརྟུལ་ཞུགས་ལ་བཀོད་ནས། སླར་ཡང་དེ་ཐམས་ཅད་ཀྱི་ལྟ་བ་ངན་པས་སྙེམས་པའི་དྲི་མ་མེད་པར་མཛད་དེ། རལ་པའི་ཁུར་བྲེགས་ནས་ཉིད་ཀྱི་ཐད་དུ་རབ་ཏུ་བྱུང་སྟེ། ངེས་པར་འབྱུང་བ་རིན་པོ་ཆེའི་འབྱོར་པ་དང་ལྡན་པའི་སྐབས་སུ་ཤཱཀྱའི་རྒྱལ་པོ་དེའི་བསྟན་པ་ལ་རྨ་འབྱིན་པ་གང་དག་བྱུང་བ་ན་སླར་ཡང་དེ་བཞིན་དུ་གདུལ་བར་བྱའོ་ཞེས་དགོངས་ཏེ་འདི་གསུངས་པ། རྒྱ་མཚོའི་གོས་ཅན་རྒྱ་མཚོའི་མཐའ་ཀླས་ས་ཆེན་འདི་ན་ལྷ་ཆེན་པོ། །འཕྲོག་བྱེད་བྲན་བྱེད་དེ་དག་ལྷར་བྱེད་ཐུབ་པ་དྲང་སྲོང་སྐར་དགའ་སོགས། །རྒྱས་པ་གྲོག་མཁར་བ་དང་གཟེག་གཟན་རྐང་མིག་སེར་སྐྱའི་རྗེས་འཇུག་པ། །ཐོར་ཚུགས་ཤིང་ཤུན་ལོ་མའི་གོས་ཅན་ཐལ་བ་དབྱུ་གུ་ཀུ་ཤ་ཐོགས། །རལ་པའི་ཁུར་འཛིན་མུ་ཛས་ལེགས་དཀྲིས་རི་དྭགས་གཡང་གཞིའི་སྟོད་གཡོགས་ཅན། །སོ་རིས་གསུམ་མཚན་རྩེ་མོ་ཅན་མཆོད་ཚངས་སྐུད་མཆོད་ཕྱིར་ཐོགས་པ་འཆང་། །རིག་བྱེད་ཀུན་སྦྱངས་ངེས་བརྗོད་འདོན་མཁས་སྒྲ་དང་སྡེབ་སྦྱོར་མཐར་སོན་པ། །བདག་ཏུ་ལྟ་བའི་ལྟ་བ་ལ་ལྟ་རྒྱུན་དུ་དཀའ་སྤྱོད་ང་རྒྱལ་ཅན། །དེ་ལྟའི་ཚུལ་ཅན་མུ་སྟེགས་གླང་ཆེན་རབ་ཏུ་མྱོས་པའི་ཀླད་འགེམས་པ། །དཔལ་ལྡན་སྨྲ་བའི་སེང་གེ་བློ་གྲོས་སྟོབས་ལྡན་རིགས་པའི་མཆེ་བ་ཅན། །བརྡ་སྤྲོད་བྱེད་གཞུང་ཡན་ལག་རབ་རྫོགས་བདེ་གཤེགས་བསྟན་པའི་རལ་པས་བརྗིད། །ལེགས་སྦྱར་ང་རོ་གཏན་ཚིགས་གད་རྒྱངས་ལྟག་བརྗོད་སུན་འབྱིན་མིག་བསྒྲད་པ། །དེ་ལྟའི་རི་དྭགས་རྒྱལ་པོ་དེ། །དཔལ་ལྡན་ས་སྐྱའི་གངས་རིར་གནས། །བློ་གསལ་རྣམས་ཀྱི་རི་དྭགས་སྐྱོང་། །རྒོལ་བ་ངན་པའི་ཝ་ཚོགས་འཇོམས། །ད་དུང་དུ་ཡང་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་བྱས་ནས། །བདེ་བར་གཤེགས་པའི་བསྟན་པའི་ཚུལ། །ཀུན་དགའི་རྒྱལ་མཚན་འཛིན་པར་ཤོག །ཅེས་གསུངས་ཏེ་དེའི་རལ་པའི་ཁུར་བྲེགས་ནས་རབ་ཏུ་བྱུང་སྟེ། རལ་པ་རྣམས་དཔལ་ལྡན་ས་སྐྱའི་གཙུག་ལག་ཁང་ན་ད་ལྟ་ཡང་ཡོད་དོ། །གསུམ་པ་རྩོམ་པས་བསྟན་པ་སྤེལ་པའི་ཚུལ་ནི། སྐྱེ་བ་གཞན་དུ་སྦྱངས་པ་དང་། །མཁས་པ་དུ་མ་བསྟེན་པ་དང་། །རྣམ་པར་དཔྱོད་པའི་བློ་གྲོས་ཀྱིས། །ཤེས་བྱ་ཀུན་ལ་འཇིགས་མེད་ཐོབ། །ཞེས་པ་ལྟར་ཤེས་བྱ་མཐའ་དག་ལ་མི་འཇིགས་པའི་སྤོབས་པ་བརྙེས་ནས། མ་འོངས་པའི་གདུལ་བྱ་ལ་ཐར་པའི་ལམ་སྟོན་པའི་ཆེད་དུ་བདེ་བར་གཤེགས་པའི་གསུང་རབ་ཀྱི་དགོངས་པ་འགྲེལ་པའི་བསྟན་བཅོས་ཀྱང་མང་དུ་མཛད་དེ། སྒྲའི་བསྟན་བཅོས་མཁས་པ་ལ་འཇུག་པའི་སྒོ་དང་། སྒྲ་ཉེ་བར་བསྡུ་བ་ལ་སོགས་པ་དང་། སྡེབ་སྦྱོར་གྱི་བསྟན་བཅོས་མེ་ཏོག་གི་ཆུན་པོ་དང་། མིང་གི་མངོན་བརྗོད་ཚིག་གི་གཏེར་དང་། ཟློས་གར་གྱི་བསྟན་བཅོས་རབ་དགའི་འཇུག་པ་དང་། ནང་རིག་པ་ལ་ཐེག་པ་ཆེན་པོ་ཕ་རོལ་ཏུ་ཕྱིན་པའི་ཉམས་ལེན་ཐུབ་པའི་དགོངས་པ་གསལ་བ་དང་། རྡོ་རྗེ་ཐེག་པ་ལ་བདག་མེད་མའི་བསྟོད་འགྲེལ་ལ་སོགས་པ་དུ་མ་དང་། གསུང་རབ་སྤྱི་ལ་ལོག་པར་རྟོག་པའི་དྲི་མ་སེལ་བར་བྱེད་པ་སྡོམ་པ་གསུམ་གྱི་རབ་ཏུ་དབྱེ་བ་དང་། དེ་དག་གི་དཀའ་བའི་གནས་ཀྱི་དྲིས་ལན་མང་པོ་དང་། དེ་ཐམས་ཅད་ཀྱི་སྙིང་པོ་བསྡུས་པ་ཕྱོགས་བཅུའི་སངས་རྒྱས་ཀྱི་ཕྲིན་ཡིག་ལ་སོགས་པ་ངོ་མཚར་བ་དུ་མ་མཛད་དོ། །ལྔ་པ་བླ་མ་ལྷ་ཡིས་རྗེས་སུ་བཟུང་བའི་ཡོན་ཏན་ནི། རྗེ་བཙུན་ཆེན་པོ་ལ་ལམ་ཟབ་མོ་བླ་མའི་རྣལ་འབྱོར་ཞུས་པའི་དུས་སུ་སངས་རྒྱས་ཐམས་ཅད་ཀྱི་ངོ་བོ་འཇམ་པའི་དབྱངས་སུ་གཟིགས་པས། ཆོས་ཐམས་ཅད་ཀྱི་གནད་ཕྱིན་ཅི་མ་ལོག་པར་གོ་བ་དང་། ཏིང་ངེ་འཛིན་དང་རྟོགས་པ་བསམ་གྱིས་མི་ཁྱབ་པ་བརྙེས་པ་དང་། རྒྱ་བོད་ཀྱི་རྒྱལ་པོ་དྲེགས་པ་ཅན་རྣམས་ཀྱང་འདུད་པ་ལ་སོགས་པ་ཆོས་དང་འཇིག་རྟེན་གྱི་དགེ་ལེགས་ཐམས་ཅད་ལྷུན་གྱིས་གྲུབ་ཅེས་གསུངས་པ་དང་། གཞན་ཡང་དེའི་ཚེ་རྒྱ་གར་ཤར་ནུབ་ན་མཁས་པར་གྲགས་པའི་ཁ་ཆེ་པཎ་ཆེན་དང་། དཱ་ན་ཤཱི་ལ་དང་། སཾ་ག་ཤྲཱི་དང་། སུ་ག་ཏ་ཤྲཱི་ལ་སོགས་པ་རྣམས་སྤྱན་དྲངས་པ་བཞིན་ཉིད་ཀྱི་དྲུང་དུ་བྱོན་ནས་རིག་པའི་གནས་མཐའ་དག་སྟེར་བར་མཛད་དོ། །ལྷག་པའི་ལྷས་རྗེས་སུ་བཟུང་བའི་ཚུལ་ཡང་གདུལ་བྱའི་དོན་དུ་བསྙུང་བའི་ཚུལ་བསྟན་པའི་ཚེ། ཞི་བ་ལྷས་འཁོར་བ་རྒྱུ་འབྲས་ཀྱི་ཆོས་གསུངས་པ་དང་། འཕགས་པ་ཀླུ་སྒྲུབ་ཀྱིས་ཆོས་ཀྱི་སྡོམ་བཞི་དང་། སྒྱུ་མའི་དཔེ་བརྒྱད་གསུངས་པ་དང་། འཇམ་པའི་དབྱངས་ཀྱིས་སྐྱེ་བ་ཐམས་ཅད་དུ་ལྷག་པའི་ལྷར་ཞལ་གྱིས་བཞེས་པ་དང་། སྤྱན་རས་གཟིགས་ཀྱིས་ཕྱག་གིས་སྐུ་ལ་བྱུགས་པ་དང་། རྗེ་བཙུན་སྒྲོལ་མས་འཁོར་བ་ལས་སྒྲོལ་ཞེས་གསུངས་པ་དང་། བྱམས་པ་མགོན་པོས་ཏིང་ངེ་འཛིན་བརྒྱ་ཕྲག་གི་སྒོ་དབྱེ་བ་དང་། མི་གཡོ་མགོན་པོས་བདུད་བཞིའི་བར་ཆོད་བསལ་བར་ཞལ་གྱིས་བཞེས་པ་དང་། ཐ་སྐར་ཟླ་བའི་ཉི་ཤུ་དགུའི་ནམ་ཕྱེད་ན་དེ་བཞིན་གཤེགས་པ་སྒྲ་དབྱངས་མི་ཟད་པ་སྒྲོགས་པའི་རྒྱལ་པོ་མངོན་སུམ་དུ་གཟིགས་ནས། རྒྱས་འབྲིང་བསྡུས་གསུམ་གྱིས་སྦས་དོན་ཞུས་པ་དང་། དེའི་ཐོ་རངས་སྤྱན་རས་གཟིགས་ལ་ཐེག་པ་ཆེན་པོའི་སེམས་བསྐྱེད་ཞུས་པ་དང་། ཉི་མ་འཆར་ཁར་འཇམ་པའི་དབྱངས་ཀྱི་དྲུང་དུ། ཐེ་ཚོམ་གྱི་དྲྭ་བ་བཅད་པ་དང་། སྨིན་དྲུག་ཟླ་བའི་ཚེས་བཅུ་གསུམ་གྱི་ཉིན་པར་སངས་རྒྱས་བཅོམ་ལྡན་འདས་ཉན་ཐོས་དགྲ་བཅོམ་པའི་འཁོར་གྱི་ནང་དུ་བཞུགས་ནས། བདེན་བཞིའི་ཆོས་འཁོར་བསྐོར་བ་ལ་སཾ་སྐྲྀ་ཏའི་སྐད་དུ་བཟང་པོ་སྤྱོད་པའི་སྨོན་ལམ་བཏབ་པ་དང་། བཅུ་བཞིའི་ཉིན་པར་ཀྱེ་རྡོ་རྗེའི་དཀྱིལ་འཁོར་ལ་དབང་བསྐུར་ཞུས་པ་དང་། བཅོ་ལྔའི་ཉིན་པར་སྒྲོལ་མའི་ཞལ་ལན་གསུམ་གཟིགས་ཤིང་གཞན་ཡང་འཁོར་ལོ་བདེ་མཆོག་ལ་སོགས་པ་དཀྱིལ་འཁོར་བཅུ་གསུམ་ཞལ་གཟིགས་སོ། །དྲུག་པ་ཆགས་ཐོགས་མེད་པའི་མངོན་ཤེས་མངའ་བའི་ཡོན་ཏན་ནི། མདོ་བསྲིངས་སུ་མི་གཅིག་གིས་དར་ནག་པོ་གཅིག་ལ་གསེར་གྱི་ཐིག་ལེ་མང་དུ་བྱས་པ་གཅིག་ཕྱག་རྟེན་ལ་བྱུང་སྟེ། ལྷ་རྗེ་བི་ཇི་ལ་གནང་ནས་ཁྱེད་རང་ཚགས་གྱིས་ནམ་མཁའ་དྭངས་པ་ལ་སྐར་མ་བཀྲ་བ་ལྟ་བུའི་བསྟན་པ་གཅིག་འུ་ཅག་ལ་ཡོང་བ་ཡིན། ས་སྐྱ་པས་རིང་བསྲེལ་བཀག་ཟེར་བ་ཡོད་ཀྱང་། རིང་བསྲེལ་ཕལ་ཆེར་གདོན་ལས་བྱུང་། །དཀར་པོའི་ཕྱོགས་ཀྱིས་བྱས་པའང་སྲིད། །འབྱུང་བཞི་དག་གིས་བསྐྱེད་པའང་ཡོད། །འཕགས་པ་གསུམ་གྱི་རིང་བསྲེལ་ནི། །ཡོན་ཏན་སྟོབས་ཀྱིས་བྱུང་བ་སྟེ། །འབྱུང་ཁུངས་ནས་བྱུང་རིང་བསྲེལ་ཡིན། །དེ་ལ་གྲངས་ནི་བརྩི་རུ་མེད། །མི་འགྲིབ་འཕེལ་བའི་རིང་བསྲེལ་ཡིན། །ཞེས་བྱ་བ་ཡིན་པས་ང་ལ་རྟེན་འབྱོན་ན་གྲངས་བརྩི་རུ་མེད་པ་འབྱོན་པ་ཡིན་པས། དར་འདིས་དེའི་ནམ་བཟའ་གྱིས་གསུང་། གཞན་ཡང་ཤིང་མོ་སྦྲུལ་གྱི་དབྱར་ཟླ་འབྲིང་པོ་དང་། །ལྕགས་ཕོ་ཁྱི་ཡི་སྟོན་ཟླ་ཐ་ཆུང་ཚེ། །ལྕགས་མོ་ཕག་ལ་གཞན་དོན་འགྲོ་ཞེས་གསུངས། །ཞེས་བྱ་བ་ལ་སོགས་པ་ཇི་བཞིན་ཐོག་ཏུ་བབས་སོ། །བདུན་པ་འཛམ་གླིང་ཆེ་དགུས་ཞབས་ལ་གཏུགས་པའི་ཡོན་ཏན་ལ་གསུམ་སྟེ། མིའི་རྒྱལ་པོས་ཞབས་ལ་གཏུགས་པ། ཀླུའི་རྒྱལ་པོས་ཞབས་ལ་གཏུགས་པ། འབྱུང་པོའི་རྒྱལ་པོས་ཞབས་ལ་གཏུགས་པའོ། །དང་པོ་ནི། ཆོས་རྗེ་འདི་ཉིད་ཀྱི་སྙན་པའི་གྲགས་པས་འཛམ་གླིང་ཀུན་ཁྱབ་པའི་ཚེ། བྱང་ཆུབ་སེམས་དཔའི་སྤྲུལ་པ་རྒྱལ་པོ་གོ་དན་གྱིས་གདན་འདྲེན་པ་བཏང་བ་ན། སྔར་རྗེ་བཙུན་ཆེན་པོས། ཁྱེད་ཀྱི་ཚེ་གཞུག་ཏུ་ཞྭ་དང་ལྷྭམ་དང་ཆ་ལུགས་འདི་འདྲ་བས་གདན་འདྲེན་པ་འོང་བས། དེའི་ཚེ་ཐེ་ཚོམ་མ་བྱེད་པར་སོང་ཤིག་དང་། སངས་རྒྱས་ཀྱི་བསྟན་པ་དང་སེམས་ཅན་མང་པོ་ལ་ཕན་པ་འབྱུང་ངོ་། །ཞེས་ལུང་བསྟན་པ་དྲན་ནས། དགུང་ལོ་རེ་གསུམ་པ་ཤིང་ཕོ་འབྲུག་གི་ལོ་དཔལ་ལྡན་ས་སྐྱ་ནས་དབོན་པོ་གཉིས་དང་བཅས་པ་བཏེག་སྟེ། མེ་ཕོ་རྟའི་ལོ་ལ་ཕོ་བྲང་ལིང་ཆུ་རྩེར་ཕེབས། དེའི་ཚེ་རྒྱལ་པོ་གོ་དན་གོ་ཡུག་གན་རྒྱལ་སར་བཏོན་པ་ལ་ཧོར་ཡུལ་དུ་སོང་བ་ཚུར་བྱོན་པ་དང་། ལུག་ལོ་ཟླ་བ་དང་པོ་ལ་མཇལ། ཆོས་དང་འཇིག་རྟེན་གྱི་གསུང་གླེང་མང་པོ་མཛད་པས། རྒྱལ་པོ་ཤིན་ཏུ་མཉེས་ནས། སྔར་ཨརྐེ་འུན་དང་ཧོར་གྱི་ལྷ་ཝ་ཚོ་བན་དེའི་གྲལ་མགོར་སྡོད་པ་ཡིན་པ་ལ། ད་ཕྱིན་ཆད་ཐམས་ཅད་ཀྱི་གྲལ་མགོར་བླ་མ་ཆོས་རྗེ་པ་བཞུགས་ལ་སྔོན་ལ་སྨོན་ལམ་ཐོབ་གསུངས་པའི་ལུང་བྱོན་ནས་རབ་ཏུ་བྱུང་བའི་དབུ་དཔངས་བསྟོད་དོ། །དེ་ནས་རྒྱལ་པོས་ཐེག་པ་ཆེན་པོའི་སེམས་བསྐྱེད་ལ་སོགས་པ་ཟབ་པ་དང་རྒྱ་ཆེ་བའི་ཆོས་མང་པོ་ཞུས་ནས་ཧོར་གྱི་རྒྱལ་ཁམས་དཀོན་མཆོག་མཆོད་པ་དང་། སེམས་ཅན་ལ་ཕན་པ་བསྒྲུབ་པ་དང་། མི་དགེ་བའི་ལས་ལམ་ཆ་ཤས་ཀྱིས་སྤངས་ནས། སངས་རྒྱས་ཀྱི་བསྟན་པ་ལ་འཇུག་པར་མཛད་དོ། །གཉིས་པ་ནི་ལུག་ལོ་ཟླ་བ་གསུམ་པའི་ཚེས་བཅུ་གཅིག་གི་ཐོ་རངས་མནལ་ལམ་དུ། མི་འཐིང་པོ་ལུས་ལ་རྨ་དང་ཤུ་བས་གང་བ་གཅིག་བྱུང་བ་ན་རེ། ཡུལ་ཕྱོགས་འདི་རྣམས་སུས་ཀྱང་མ་བཟུང་བའི་དུས་སུ་ངའི་དཔོན་དེས་བདག་པོ་བྱས་པ་ཡིན། དེའི་ཚེ་གོ་དན་འདི་ཤཱཀྱ་མུ་ནེ་ལ་བསོད་ནམས་བསགས་པའི་རྒྱལ་པོ་གཅིག་ཏུ་སྐྱེས། དེ་ནས་ཚེ་འཕོས་ནས། མི་ཉག་གི་རྒྱལ་པོ་གཅིག་ཏུ་སྐྱེས། རྒྱལ་པོ་དེས་ངའི་ཁང་པའི་སྟེང་དུ་མཁར་ལས་བྱས་པས་ངེད་དཔོན་གཡོག་རིས་ནོན་པ་བཞིན་སོང་། དེ་ནས་བྱང་ངོས་འདིར་འོངས་ནས་ཡུལ་བཟུང་། དེར་ཡང་རྒྱལ་པོ་འདི་འོངས་ནས། གནོད་པ་མང་པོ་བྱས་པས་སྡོད་ས་མ་བྱུང་། དེ་ནས་ངའི་དཔོན་དེ་ཁྲོས་ནས་ཡུལ་ཕྱོགས་ཀྱི་ལྷ་འདྲེ་རྣམས་བསྡུས་ཏེ། འདི་ལ་གནོད་པ་བྱེད་པའི་གྲོགས་གྱིས་བྱས་ཀྱང་རྒྱལ་པོ་འདི་ཤཱཀྱ་མུ་ནེ་ལ་བསོད་ནམས་བསགས་པ་ཡིན་པས་རེ་ཤིག་མི་ཐུབ་ཟེར། དེ་ནས་རྒྱལ་པོ་དེས་རྒྱལ་པོ་སྔ་མས་བནྡེ་ལ་རྒྱུགས་བྱིན་པ་ཆེས་ཟེར་ནས་ཕྲི། ཤཱཀྱ་མུ་ནེ་འདི་གསེར་ཡིན་ནམ་ལྟ་ཟེར་ཏེ། གཟོང་གིས་བརྐོས་པས་བསོད་ནམས་ཟད་ནས་ལྷ་འདྲེ་རྣམས་འདུས་ཏེ། ནང་བློན་དང་ཕྲ་མ་བཅུག་པས་བློན་པོས་རྒྱལ་པོ་བསད། རྒྱལ་པོས་འཆི་ཁར་རྒྱལ་པོ་གཅིག་གི་བུར་སྐྱེས་ནས་ཁྱེད་རྣམས་ལ་གནོད་པ་སྐྱེལ་ཞིང་། བྲན་བཞིན་དུ་འཁོལ་བར་ཤོག་ཅིག་ཅེས་སྨོན་ལམ་བཏབ་པས་ཇིན་གིར་གྱི་ཚ་བོར་སྐྱེས་ཏེ་གོ་དན་འདི་ཡིན། དེས་བྱང་ངོས་འདིར་འོངས་ནས་ངེད་ཀྱི་སྡོད་སའི་སྟེང་དུ་རྟ་རྒྱུགས། རྟ་བསད། རྟ་ཁྲག་གར་སོང་སར་ངེད་ལ་ལ་ན། ལ་ལ་ཤི་ཟེར་ནས་ལུས་ལ་སྦལ་པ་དང་། ལྗོང་མོ་ཕྱེད་སྐམས་པ་ཤི་ལ་ཁད་ཡོད་པ་ལ། ྎ སྔར་བནྡེ་རྣམས་ཀྱིས་སྨོན་ལམ་འདེབས་ཀྱང་ངེད་ཀླུ་ལ་ཕན་པ་མ་བྱུང་། ཁྱེད་ས་སྐྱ་པས་བཟའ་རྒྱུ་དང་སྨན་བྱིན་པས་ཕན་པ་བྱུང་། ངའི་དཔོན་དེ་ཤི་ན་གོ་དན་ཡང་འཆི། དཔོན་སོས་ན་གོ་དན་ཡང་སོས་པས་ཁྱེད་ཀྱང་བཟང་པོར་འགྲོ་བས་འབད་པ་ཆེན་པོ་གྱིས་ཟེར་ནས། ཆོས་རྗེ་པས་རྒྱལ་པོའི་དོན་དུ་སེང་གེ་སྒྲའི་ཆོ་ག་མཛད་པས་རྒྱལ་པོ་ནད་ལས་ཐར་རོ། །གསུམ་པ་ནི་ཆོས་རྗེ་པ་སྲིན་པོ་རིར་བཞུགས་པའི་ཚེ། ཐོ་རངས་མནལ་ལམ་དུ་མི་སྐྱ་ཤར་བ་ཚན་གཅིག་བྱུང་ནས། ཕྱག་འཚལ་ཕྱག་རྟེན་ཕུལ་ནས་སེམས་ཅན་ཐམས་ཅད་སྐྱེ་རྒ་ན་འཆིའི་ཆུ་བོ་བཞིས་ཉམ་ཐག་པ་མི་གདའ་ལགས་སམ་ཟེར་བ་ལ། དེ་ཙུག་གདའ་གསུངས་པས། འདི་ལས་ཐར་བའི་གསོལ་འདེབས་གཅིག་ཐུགས་ལ་འདོགས་པར་ཞུས་ཟེར་བ་ལ། སྐྱེ་བ་སྐྱེ་བ་མེད་པའི་ཚུལ་རྟོགས་ཀྱང་། །ད་དུང་སྐྱེ་བའི་གཟེབ་ལས་བདག་མ་གྲོལ། །སྐྱེ་བ་ཀུན་ཏུ་སྐྱེ་བར་སྐྱེ་འགྱུར་བའི། །སྐྱེ་ངན་སྐྱེ་བ་དག་ལས་བསྐྱབ་ཏུ་གསོལ། །ཟེར་བ་གྱིས་ལ་གསོལ་བ་ཐོབ་གསུངས་པས། འོ་ན་རྒས་པ་ལ་སོགས་པ་གཞན་གསུམ་ལ་ཡང་དེ་སྦྱར་དུ་རུང་ངམ་ཞུས་པ་ལ་རུང་ཞེས་གསུངས་པས་རིགས་འགྲེ་བྱས་ནས་མཇུག་ཏུ། དཔལ་ལྡན་བླ་མ་ཀུན་མཁྱེན་ཆོས་ཀྱི་རྗེ། །སྐྱེ་བ་འདི་དང་སྲིད་པ་ཐམས་ཅད་དུ། །བླ་མ་ཁྱེད་ཀྱི་བཀའ་དྲིན་རྗེས་བཟུང་ནས། །སྐྱེ་རྒ་ན་འཆིའི་སྡུག་བསྔལ་བསྐྱབ་ཏུ་གསོལ། །ཞེས་ཟེར་ཞིང་ཕྱག་འཚལ་ནས། བཀའ་དྲིན་ཆེའོ་ཞེས་སོང་བ་རྨིས་ཤིང་། མནལ་སད་པ་ན་དེ་གཙུག་ལག་ཁང་གི་བཀའ་སྲུང་རྒྱལ་པོ་དེ་ཡིན་པར་འདུག་སྙམ་དུ་དགོངས་སོ། །བརྒྱད་པ་རྨད་དུ་བྱུང་བའི་ལུང་བསྟན་བརྙེས་པའི་ཡོན་ཏན་ནི། ས་སྐྱར་ཆོས་གསུངས་པའི་ཚེ། ནམ་མཁར་རྗེ་བཙུན་གྲགས་པ་རྒྱལ་མཚན་གྱིས་ཁྱོད་ཀྱི་སྐྱེ་བ་ཉི་ཤུ་རྩ་བདུན་གྱི་བར་གྱི་བླ་མ་ང་ཡིན་ཅིང་། དེ་ལས་གཞན་སུས་ཀྱང་ཁྱོད་འདུལ་བར་འོས་པ་མ་ཡིན་ནོ། །ཞེས་པའི་སྒྲ་གྲག་པ་དང་། ཡང་སྐྱ་བོ་ཁ་གདངས་སུ་སྐྱེ་བ་ཉི་ཤུ་རྩ་ལྔའི་བར་གྱི་བླ་མ་ཡིན་ནོ། །ཞེས་པའི་སྒྲ་གྲག་པས་སྔར་གྱི་དེ་དྲན་གསུང་ངོ་། །ལིང་ཆུ་རྩེར་ནད་པ་ནད་གཡོག་མེད་པ་གཅིག་གི་རྒྱུ་མཚན་ཞུས་པས། སྙིང་རྗེ་ཚད་མེད་པ་སྐྱེས་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་འདི་འདྲ་ལ་མི་གཟིགས་པ་ཐུགས་རྗེ་རེ་ཆུང་སྙམ་དུ་དགོངས་པའི་ཚེ། ཐོ་རངས་དབུས་སུ་རྗེ་བཙུན་ཆེན་པོ། གཡས་སུ་བིརྺ་པ། གཡོན་དུ་ནག་པོ་པ་དངོས་སུ་བྱོན་ནས་ཁྱོད་དེ་ལ་ཡི་ཆད་མ་བྱེད། ཟག་བཅས་ལུས་འདི་ལ་སྐྱེ་རྒས་ན་འཆིའི་ཆུ་བོ་ཡོད་པ་ཆོས་ཉིད་ཡིན་གསུངས། བིརྺ་པས་ཐོད་པའི་བདུད་རྩི་ལ་སྲིན་ལག་གིས་རེག་ནས་ཁྱོད་ཀྱི་ལྗགས་སྐྱོངས་གསུངས་ནས། ལྗགས་ལ་ཐིག་ལེ་བྱས་པའི་སྣང་བ་བྱུང་། དེའི་དུས་སུ་རྟོག་པ་དང་རྟོག་མེད་ཀྱི་མཐའ་ལས་འདས་པ། བདེ་གསལ་མི་རྟོག་པ་རྒྱལ་བ་རྣམས་ཀྱི་ཐུགས་ལའང་འདི་ལས་ལྷག་པ་མེད་སྙམ་པའི་སྣང་བ་བྱུང་གསུངས། དེ་ནས་བླ་མ་རྗེ་བཙུན་པས། ཁྱོད་འདི་ནས་གཞན་དོན་ལ་འགྲོ་བའི་དུས་སུ། ཤར་ཕྱོགས་ཀྱི་འཇིག་རྟེན་གྱི་ཁམས་དུ་མ་བརྒལ་བའི་ཕ་རོལ་ཏུ་མཁའ་ལ་གནས་པའི་རིག་པ་འཛིན་པར་གྱུར་ནས། དེ་བཞིན་གཤེགས་པ་དུ་མ་མཉེས་པར་བྱས་ཤིང་ས་ལམ་ཕལ་ཆེར་བགྲོད་དེ། རྒྱ་གར་ཤར་ཕྱོགས་མུ་མུ་ནི་ཞེས་བྱ་བར་རྒྱལ་པོ་ཉི་མའི་སྟོབས་འཕེལ་གྱི་བུར་སྐྱེས་ནས། དད་ལྡན་གྱི་འགྲོ་བ་འབུམ་ཕྲག་དུ་མ་གྲོལ་བར་བྱས་ནས། དེ་ནས་སྐྱེ་བ་གསུམ་པ་ལ་སངས་རྒྱས་དྲི་མ་མེད་པའི་དཔལ་ཞེས་བྱ་བར་འགྱུར་རོ་ཞེས་གསུངས། རྗེ་བཙུན་པས་སློབ་དཔོན་བིརྺ་པ་ལ་དེ་ལྟར་ལགས་སམ་གསུངས། སློབ་དཔོན་གྱིས་དེ་ཡིན་གསུངས། ནག་པོ་པས་ཀྱང་རྗེས་སུ་ཡི་རང་བའི་འཛུམ་པ་མཛད་དོ། །དེ་ཉིད་ཀྱི་ཚེ་གསང་བའི་གནས་སྦུབས་སུ་ནུབ་པ་དང་། དབུའི་གཙུག་ཏོར་གསལ་པོར་འཕགས་པ་ལ་སོགས་པའི་མཚན་དཔེའི་ཡོན་ཏན་རྣམས་ཀྱང་བརྙེས་པར་གྱུར་ཏོ། །དགུ་པ་སྐུ་གསུང་ཐུགས་ཀྱི་རྟེན་མཆོག་སྤྲུལ་པའི་ཡོན་ཏན་ནི་དེ་ལྟར་དགུང་ལོ་བདུན་ཅུའི་བར་དུ་གཞན་དོན་དཔག་ཏུ་མེད་པ་མཛད་ནས། ལྕགས་མོ་ཕག་གི་ལོ་སྨལ་པོ་ཟླ་བའི་ཚེས་བཅུ་བཞིའི་ཐོ་རངས་ཀྱི་ཆ་ལ། ཆོས་རྒྱལ་འཕགས་པའི་སྤྱི་བོར་ཕྱག་བཞག་ནས། སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་བླ་མའི་རྣལ་འབྱོར་ལ་ཉམས་ལེན་གྱིས་ཤིག་ཅེས་སོགས་ཀྱི་ཞལ་ཏ་གནང་སྟེ་རྡོ་རྗེ་སྐྱིལ་ཀྲུང་བཅས་རྡོ་རྗེ་དྲིལ་བུ་ཐུགས་ཀར་བསྣོལ་ཏེ་མྱ་ངན་ལས་འདས་པའི་ཚུལ་བསྟན་ཏོ། །དེ་ནས་ཞག་གསུམ་གྱི་བར་དུ་གཟི་བརྗིད་མདངས་དང་ལྡན་པར་བཞུགས་ནས། བཅོ་བརྒྱད་ཀྱི་སྔ་དྲོ་སྐུ་གདུང་རིན་པོ་ཆེའི་སྒྲོམ་བུར་བསྡུས་ནས། ཉེར་ལྔའི་ཉིན་བར་ཞུགས་ལ་འབུལ་བའི་ཚེ། མེ་ཏོག་དང་ཙན་དན་གྱི་དྲི་ལ་སོགས་པའི་ལྷ་རྫས་ཀྱི་མཆོད་པས་ས་དང་བར་སྣང་གང་ཞིང་། དུ་བ་དང་འཇའ་གུར་སྤུངས་པའི་སྤྲིན་གྱི་གསེབ་ནས་ལྷ་བུ་གཞོན་ནུ་གདུགས་དང་རྒྱལ་མཚན་ཐོགས་པས་བཀྲ་ཤིས་ཀྱི་གླུ་དབྱངས་དང་། རོལ་མོའི་སྒྲ་དུ་མ་བསྒྲགས་པ་དང་། དུ་བའི་རྩེ་མོར་རྡོ་རྗེ་དང་རལ་གྲི་དང་། ཨུཏྤལ་སོགས་ཀྱི་རི་མོ་ཀུན་གྱིས་མཐོང་བར་གྱུར་ཏོ། །དེའི་ཚེ་རྒྱའི་མི་གཉིས་དང་། མི་ཉག་གཅིག་ལ་ཞག་གསུམ་གྱི་བར་དུ་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་བསམ་གྱིས་མི་ཁྱབ་པ་སྐྱེས་སོ། །ཐོ་རངས་ཀྱི་ཆ་ལ་བི་ཇི་རིན་ཆེན་གྲགས་ཀྱིས་སྐུ་གདུང་རྣམས་རིན་པོ་ཆེའི་སྒྲོམ་བུར་བསྡུས་ཏེ། ཕྱིས་གོ་དན་རྒྱལ་པོའི་དྲུང་དུ་བུ་སློབ་ཚོགས་ཀྱིས་བལྟས་པའི་ཚེ། སྐུ་གསུང་ཐུགས་ཀྱི་རྟེན་མཆོག་བྱོན་པའི་ཚུལ་ནི། གཙུག་ཏོར་དབུས་སུ་ཀྱེ་ཡི་རྡོ་རྗེ་དང་། །འཇམ་པའི་དབྱངས་སྐུ་དྲི་མེད་གསལ་བར་བྱོན། །དཔྲལ་བའི་ཆ་ལ་འཁོར་ལོ་སྡོམ་པའི་སྐུ། །ལྟག་པའི་ཆ་ལ་སངས་རྒྱས་བཅོམ་ལྡན་འདས། །ཕྲག་པའི་གདུང་ལ་ཁ་སརྤཱ་ཎི་དང་། །རྐང་པའི་སྦུབས་ལ་སྤྱན་རས་གཟིགས་དབང་བྱོན། །སྒེལ་བུའི་ཆ་ལ་གསང་བའི་ཡུམ་བཞི་བྱོན། །སྒྲོལ་མ་མི་གཡོ་པུས་བཙུགས་རྣམ་པ་གཉིས། །ཕྱག་སོར་གཡས་པ་ཀླུ་ཤིང་ལྗོན་པའི་སྟེང་། །བྱམས་པ་ཆོས་ཀྱི་འཁོར་ལོའི་ཕྱག་རྒྱ་ཅན། །སྤྲུལ་པ་རྣམ་བཅུ་སྐུ་ཡི་རྟེན་དུ་བྱོན། །ཚངས་པའི་གསུང་དབྱངས་སྟོང་ཉིད་སེང་གེའི་སྒྲ། །སྐྱེ་མེད་དོན་མཚོན་ཨ་ཡིག་འབུར་དུ་དོད། །སྙན་གོང་གཉིས་ལ་རྣམ་རྒྱལ་མཆོད་རྟེན་རེ། །ཐུགས་དགོངས་རྣམ་དག་རང་བྱུང་ཆོས་སྐུར་ཤར། །དམ་ཚིག་རྡོ་རྗེ་ལྟེ་བར་ཧཱུྃ་གིས་མཚན། །ཞེས་བཤད་པ་ལྟར་ཤེས་པར་བྱའོ། །བཅུ་པ་བསྟན་པའི་གསལ་བྱེད་སློབ་མ་བསྐྲུན་པའི་ཡོན་ཏན་ནི། བདག་ཉིད་ཆེན་པོ་འདིས་དགུང་ལོ་དགུ་པར་མཚོ་སྐྱེས་གསུངས་པ་ནས། བདུན་ཅུ་པའི་བར་ལ་རྒྱ་ཧོར་བོད་གསུམ་དུ་འཆད་པ་ཉི་མའི་འོད་ཟེར་གྱིས་ཟབ་དོན་གྱི་པདྨོ་ཁ་ཕྱེ་སྟེ། ལེགས་བཤད་དར་དིར་སྒྲོགས་པའི་བློ་གསལ་བུང་བའི་ཚོགས་ཀྱིས་ཐུབ་བསྟན་པད་མཚོ་ཀུན་ཏུ་ཁྱབ་པར་མཛད་པ་ལས། གཙོ་བོར་གྱུར་པ་ནི། གཅུང་སློབ་དཔོན་བསོད་ནམས་རྒྱལ་མཚན། སྐུའི་དབོན་པོ་འཕགས་པ་སྐུ་མཆེད་གཉིས། རྟོགས་པའི་བརྒྱུད་འཛིན་གྲུབ་ཚོགས་རྣམ་གཉིས། མན་ངག་གི་བརྒྱུད་འཛིན་ལྷོ་དམར་གཉིས། སྒྲུབ་པའི་བརྒྱུད་འཛིན་རྒྱལ་བ་ཡང་དགོན་པ། བཤད་པའི་བརྒྱུད་འཛིན་ལ་ཤར་ནུབ་གུང་གསུམ་དུ་གྲགས་པ་ལ་ཤར་པ་ཤེས་རབ་འབྱུང་གནས། གཅུང་རྡོ་རྗེ་འོད་ཟེར། གུང་པ་སྐྱོ་སྟོན་དྲི་མེད། ནུབ་པ་ལ་ཐོག་མར་འུ་ཡུག་པ་རིག་པའི་སེང་གེ དེའི་གདན་ས་འཇམ་དབྱངས་ཉི་ཐོག་པ། དེའི་བཀའ་ཆེན་བཞི་ནི། ཁང་སྟོན་འོད་ཟེར་རྒྱལ་མཚན། གཉན་དར་མ་སེང་གེ ཞང་མདོ་སྡེ་དཔལ་བཟང་པོ་སྡེ། ཁང་གཉན་ཞང་གསུམ་དུ་གྲགས་པ་དང་། ཟུར་ཁང་བ་ཤཱཀྱ་གྲགས་སོ། །སྡོམ་ཕྲུག་བགྲེས་པ་དཔལ་བཟང་པོ་བཅུ་གསུམ་ནི། ཚོགས་སྒོམ་ཀུན་དགའ་དཔལ་བཟང་པོ། གྲུབ་ཐོབ་ཡོན་ཏན་དཔལ་བཟང་པོ། རིན་པོ་ཆེ་སྐྱོབ་པ་དཔལ་བཟང་པོ། ལྷོ་པ་ཀུན་མཁྱེན་རིན་ཆེན་དཔལ་བཟང་པོ། ཞང་རྒྱལ་བ་དཔལ་བཟང་པོ། ཞང་མདོ་སྡེ་དཔལ་བཟང་པོ། ཕྱ་རུ་བ་སེང་གེ་དཔལ་བཟང་པོ། གྲུབ་སྙིང་པ་རྡོ་རྗེ་དཔལ་བཟང་པོ། ལྡོང་སྟོན་ཤེས་རབ་དཔལ་བཟང་པོ། ཇོ་གདན་བྱང་ཆུབ་དཔལ་བཟང་པོ། ཁའུ་པ་འོད་ལྡན་དཔལ་བཟང་པོ། སྐྱོ་སྟོན་དྲི་མེད་འོད་དཔལ་བཟང་པོ་རྣམས་སོ། །གཞོན་པ་རྒྱལ་མཚན་གྱི་མཐའ་ཅན་བདུན་ནི། ཤར་པ་ཡེ་ཤེས་རྒྱལ་མཚན། ཁང་སྟོན་འོད་ཟེར་རྒྱལ་མཚན། དགའ་ལྡན་པ་ཆོས་ཀྱི་རྒྱལ་མཚན། གསོལ་བྱ་བ་འདུལ་བ་རྒྱལ་མཚན། འུ་ཡུག་པ་དཔལ་གྱི་རྒྱལ་མཚན། ཡར་ལུངས་པ་ཤཱཀྱ་རྒྱལ་མཚན། ཡར་ལུངས་པ་བྱང་ཆུབ་རྒྱལ་མཚན་རྣམས་སོ། །གཞན་ཡང་འཇམ་དབྱངས་གཙང་ནགས་ཕུག་པ་ཤེས་རབ་འོད་ཟེར། ཏེར་བ་བྱམས་མགོན། ལྷ་རྗེ་བི་ཇི། གློ་བོ་ལོ་ཙཱ་བ་ཤེས་རབ་རིན་ཆེན། མཁན་པོ་གྲགས་པ་སེང་གེ བླ་མ་འོད་ཟེར་ཤཱཀྱ་ལ་སོགས་པའི་སྐྱེས་ཆེན་མང་དུ་བྱུང་ངོ་། །མཚན་དཔེའི་དཔལ་གྱིས་བརྗིད་པའི་སྐུ་མངའ་ཞིང་། །ལེགས་བཤད་སྒྲ་སྒྲོགས་མུ་སྟེགས་སྟོན་པ་བཏུལ། །མི་དབང་ས་ཡི་བདག་པོས་གུས་བཏུད་པ། །ཐུབ་དབང་གཉིས་པ་ས་སྐྱ་པ་ལ་འདུད། །གང་གི་གསུང་ལས་སྐྱེས་པའི་སྲས་ཀྱི་མཆོག །བཤད་སྒྲུབ་མན་ངག་མི་ནུབ་རྒྱལ་མཚན་འཛིན། །ངོ་མཚར་སྐྱེས་ཆེན་རྣམས་ལའང་གུས་ཕྱག་འཚལ། །ཟབ་དོན་རྟོགས་པའི་བློ་གྲོས་བསྐྱེད་དུ་གསོལ། །བསྟན་བཅོས་རྩོམ་པ་པོའི་ཆེ་བའི་ཡོན་ཏན་བསྟན་ཟིན་ཏོ།། །།གཉིས་པ་དེས་བསྟན་བཅོས་ཇི་ལྟར་བརྩམས་པའི་ཚུལ་ལ་གཉིས་ཏེ། དངོས་དང་ཞར་ལ་གཞུང་ཇི་ལྟར་འཆད་པའི་ཚུལ་ལོ། །དང་པོ་ནི། འཕགས་པའི་ཡུལ་དུ་ཉན་ཐོས་ཀྱི་བསྟན་པ་ལ་བཀའ་བསྡུ་བ་རིམ་པ་གསུམ་བྱུང་ཚུལ། ཐེག་པ་ཆེན་པོའི་བསྟན་པ་ལ་འཕེལ་འགྲིབ་བྱུང་ཚུལ། དེ་ནས་གངས་རིའི་ཁྲོད་དུ་བསྒྱུར་བའི་ཚུལ། བསྟན་པ་སྔ་དར་དང་། ཕྱི་དར་གྱི་སྐབས་སུ་ཆོས་ལོག་བྱུང་བ་རྣམས་དམ་པ་རྣམས་ཀྱིས་སུན་ཕྱུང་བའི་ཚུལ་རྣམས་འདིར་བཤད་པར་བྱ་བ་ཡིན་མོད་ཀྱི། རྒྱས་པར་འོག་གཞུང་དོན་གྱི་སྐབས་སུ་འབྱུང་ཞིང་མདོར་བསྡུས་པ་ཙམ་ཞིག་ཁོ་བོས་བྱས་པའི་སྤྱི་དོན་དུ་བསྟན་ཟིན་པས་དེར་ལྟ་བར་བྱའོ། །དེ་ནས་ཆོས་རྗེ་ས་སྐྱ་པ་འདས་པའི་རྗེས་སུ། སེམས་བསྐྱེད་རྨི་ལམ་མ་ལ་སོགས་པའི་ཆོས་ལོག་དུ་མ་འཕེལ་པ་རྣམས་དགག་པར་བཞེད་ནས། བསྟན་བཅོས་འདི་བརྩམས་ཏེ་ཕྱེད་ཙམ་ཚར་བ་ན། བོད་ཀྱི་ཆོས་པ་རྣམས་ཀྱིས་ཆགས་སྡང་གི་དབང་གིས་བརྩམས་འདུག་ཟེར་ནས་ཆོས་ཉན་དུ་འོང་བ་རྣམས་ཀྱི་གེགས་སུ་སོང་བའི་གཏམ་ཟངས་ཚ་བསོད་ནམས་རྒྱལ་མཚན་ལ་སོགས་པ་རྣམས་ཀྱིས་ཐོས་པས། ཆོས་རྗེའི་དྲུང་དུ་ཆགས་སྡང་ཅན་ཟེར་བའི་གཏམ་འདིས་འོ་སྐོལ་གྱི་ཕྲིན་ལས་ལ་གནོད་པར་གདའ་ལགས་པས། མི་རྩོམ་པར་ཞུ་ཞེས་ཞུ་བ་ཕུལ་བས། ཆོས་འདི་ལོ་འདོད་དམ། ང་རྒྱལ་གྱིས་བྱས་པ་མ་ཡིན། སངས་རྒྱས་ཀྱི་བསྟན་པ་ལ་བསམས་པ་ཡིན་ཏེ། ཐམས་ཅད་མ་དགའ་བར་འདུག་པས། བཞག་པ་ལས་མི་ཤེས་གསུངས་ནས་ཞལ་གྱི་བཞེས་སོ། །དེའི་མཚན་མོ་མནལ་ལམ་དུ་སངས་རྒྱས་ཀྱི་སྐུ་ཤིན་ཏུ་མཚར་བ་གཅིག་མི་གཙང་བའི་ཁྲོད་ན་འདུག་པ་བྱི་དོར་མཛད་པས། མི་མང་པོ་མི་མགུ་བའི་རྣམ་འགྱུར་བྱེད་ཀྱིན་འདུག་པས་བཞག་པ་དང་། སླར་ཡང་སྐུ་དེ་ལ་མི་མང་པོས་མི་གཙང་བ་བསྐུ་བ་རྨིས་པ་དང་། འཕགས་པ་འཇམ་དཔལ་གྱི་སྐུ་རྒྱབ་བསྟན་པ་རྨིས་པ་དང་། འཕགས་པ་ཀླུ་སྒྲུབ་བྱང་ཆུབ་ཀྱི་ཤིང་སྐམ་པོ་ལ་རྒྱབ་བརྟེན་ནས་བསྙུང་བའི་ཚུལ་དུ་བཞུགས་པ་ལ་སོགས་པ་རྨིས་ནས་མནལ་སད་པ་དང་། བསྟན་བཅོས་འདི་བརྩམས་ན་མི་མི་དགའ་བར་འདུག་ཀྱང་མ་བརྩམས་ན་ལྷ་མི་དགའ་བ་འདུག་པས་བརྩམ་དགོས་གསུང་སྟེ། སྔར་མི་རྩོམ་པར་ཞལ་གྱིས་བཞེས་པའི་ཉེས་པ་བླ་མ་དང་དཀོན་མཆོག་ལ་བཟོད་པར་གསོལ་ཏེ། ཡོངས་སུ་རྫོགས་པར་བརྩམས་པ་ཡིན་ནོ། །གཉིས་པ་ནི་བསྟན་བཅོས་འདི་འཆད་པ་ལ་ཐོག་མར་བསྟན་པའི་ཉམས་ལེན་ཐམས་ཅད་སྡོམ་པ་གསུམ་གྱིས་བསྡུས་པའི་ཚུལ། དེ་གཞུང་འདིས་ཇི་ལྟར་བསྟན་པའི་ཚུལ། བསྟན་བྱ་སྡོམ་གསུམ་གྱི་མཐའ་དཔྱད་པའི་སྒོ་ནས་སྤྱིའི་དོན་གཏན་ལ་དབབ་དགོས་པ་ནི་སྤྱི་དོན་དུ་བལྟ་བར་བྱའོ། །དེ་ནས་གཞུང་ལ་འཇུག་པ་ནི་རྣམ་བཤད་འདིར་ནི། དཀྱུས་ཀྱི་ས་བཅད་པ། ཁ་འཕངས་པའི་ལུང་དྲང་པ། དཀའ་གནས་ཀྱི་དོགས་པ་དཔྱད་པ་གསུམ་གཙོ་བོར་སྟོན་ཅིང་གཞུང་གི་འབྲུ་ཕལ་ཆེར་ནི་སླ་བས་འདིར་མི་འབྲི་ལ། ཅུང་ཟད་དཀའ་བ་རྣམས་དང་། ལུང་གི་འབྲུ་རྣམས་དང་། ཕྱོགས་སྔའི་དོན་རྣམས་ནི་ཇི་ལྟར་འཚམས་པར་བཤད་པར་བྱའོ། །ས་ཁོངས་ཀྱི་ཚིགས་བཅད་ཀྱི་གྲངས་རྣམས་ནི་ཤླཽ་ཀའི་གྲངས་ཡིན་ལ་དམིགས་གསལ་མེད་པའི་གྲངས་རྣམས་རྐང་པའི་གྲངས་ཡིན་པར་ཤེས་པར་བྱའོ། །གསུམ་པ་བརྩམ་བྱ་བསྟན་བཅོས་ཀྱི་བརྗོད་བྱ་གཏན་ལ་དབབ་པ་ལ་གསུམ་སྟེ། བརྗོད་བྱ་བདེ་བླག་ཏུ་རྟོགས་པའི་ཆེད་དུ་མཚན་གྱི་དོན། བསྟན་པ་རྣམ་དག་ཏུ་བསྒྲུབ་པའི་ཆེད་དུ་གཞུང་གི་དོན། བྱས་ཤེས་དྲིན་བཟོ་བསྐྱེད་པའི་ཆེད་དུ་མཛད་བྱང་སྨོས་པའོ། །དང་པོ་ནི། སྡོམ་པ་གསུམ་གྱི་རབ་ཏུ་དབྱེ་བ་ཞེས་བྱ་བ་ཞེས་པ་སྟེ། སྡོམ་པ་གསུམ་ནི་རྡོ་རྗེ་རྩེ་མོར། སོ་སོ་ཐར་དང་བྱང་ཆུབ་སེམས། །རིག་འཛིན་རང་གི་ངོ་བོའོ། །ཞེས་པ་ལྟར་ཡིན་ལ། རབ་ཏུ་དབྱེ་བ་ནི་གསུམ་པོ་དེ་དག་གི་ནང་སེལ་གྱི་དབྱེ་བ་ཙམ་སྟོན་པ་མ་ཡིན་པར། དང་པོར་ལེན་པའི་ཆོ་ག བར་དུ་བསྲུང་བའི་བསླབ་བྱ། མཐར་འབྲས་བུ་འབྱིན་པའི་ཚུལ་རྣམས་ལ་སངས་རྒྱས་ཀྱི་གསུང་དང་མི་མཐུན་པའི་ལོག་པར་རྟོག་པ་མཐའ་དག་བཀག་ནས། ཉམས་ལེན་ཐམས་ཅད་སངས་རྒྱས་ཀྱི་དགོངས་པ་ཇི་ལྟ་བ་བཞིན་སྟོན་པས་ན་དེ་སྐད་ཅེས་བྱའོ། །གཉིས་པ་ལ་གསུམ་སྟེ། བཤད་པ་ལ་འཇུག་པའི་ཡན་ལག བཤད་པ་རང་གི་ངོ་བོ། བཤད་པ་ཡོངས་སུ་རྫོགས་པའི་བྱ་བའོ། །དང་པོ་ལ་གཉིས་ཏེ། མཆོད་པར་བརྗོད་པ་དང་། རྩམ་པར་དམ་བཅའ་བའོ། །དང་པོ་ལ་གསུམ་སྟེ། བླ་མ་དམ་པ་སྤྱི་ལ་མཆོད་པར་བརྗོད་པ། སྡོམ་གསུམ་སྟེར་བའི་རྩ་བའི་བླ་མ་ལ་མཆོད་པར་བརྗོད་པ། སྡོམ་གསུམ་གྱི་བསླབ་པ་འཆའ་བ་པོ་སངས་རྒྱས་ལ་མཆོད་པར་བརྗོད་པའོ། །དང་པོ་ནི། བླ་མ་དམ་པའི་ཞབས་ལ་གུས་པར་ཕྱག་འཚལ་ལོ། །ཞེས་པ་སྟེ་བླ་མ་དམ་པའི་དོན་ནི་སྐབས་གསུམ་པར་འཆད་དོ། །གཉིས་པ་ནི་བདེ་གཤེགས་ཞེས་སོགས་ཚིགས་བཅད་གཅིག་སྟེ། ཚིག་རྐང་དང་པོ་གཉིས་ཀྱིས་ནི་གཞན་གྱི་ལོག་རྟོག་ཐམས་ཅད་ཀྱང་སངས་རྒྱས་ཀྱི་གསུང་རབ་ལ་བརྟེན་པའི་སྒྲུབ་པ་དང་སུན་འབྱིན་གྱིས་འགོག་ཅིང་། ཚིག་རྐང་གསུམ་པས་ནི་རང་གི་ཉམས་ལེན་ཐམས་ཅད་སངས་རྒྱས་ཀྱི་གསུང་བཞིན་དུ་བསྒྲུབ་ཅེས་པ་སྟེ། བསྟན་བཅོས་ལུས་ཀྱི་བརྗོད་བྱ་དང་མཐུན་པའི་ཡོན་ཏན་བརྗོད་པའོ། །ཚིག་རྐང་བཞི་པས་ནི་རྒྱུ་མཚན་དེའི་ཕྱིར་ན་གཞན་དང་མཚུངས་པ་མེད་པའི་བླ་མ་རྗེ་བཙུན་གྲགས་པ་རྒྱལ་མཚན་དེ་ལ་རྩོམ་པ་པོ་བདག་ཉིད་དྭང་བའི་དད་པ་རྙོག་པ་མེད་པས་འདུད་ཅེས་པ་སྟེ། འདི་ལྟ་བུའི་བླང་དོར་གྱི་མིག་ཕྱེད་པ་ནི་བླ་མ་དེ་ཉིད་ཀྱི་བཀའ་དྲིན་ཡིན་པས་སོ་སྙམ་དུ་དགོངས་སོ། །གསུམ་པ་ནི་སྒྲིབ་གཉིས་བག་ཆགས་དང་བཅས་པའི་སྐྱོན་མེད་པ་ནི་སྤངས་པ་ཕུན་ཚོགས་ཡིན་ལ་ཐུན་མོང་དང་ཐུན་མོང་མ་ཡིན་པའི་ཡོན་ཏན་ཀུན་གྱི་མཛོད་མངའ་བ་ནི་རྟོགས་པ་ཕུན་ཚོགས་ཡིན་ཅིང་། དངོས་སམ་བརྒྱུད་པའི་སྒོ་ནས་གདུལ་བྱ་རྣམས་སྐལ་བ་ཇི་ལྟ་བ་བཞིན་དུ་སྡོམ་པ་གསུམ་གྱི་ཉམས་ལེན་ལ་འགོད་པར་མཛད་པས་འགྲོ་བའི་བླ་མར་གྱུར་པ་ནི་ཕྲིན་ལས་ཕུན་སུམ་ཚོགས་པ་སྟེ། དེ་ལྟ་བུའི་ཡོན་ཏན་དང་ལྡན་པའི་སྟོན་པ་སངས་རྒྱས་ཀྱི་ཞབས་ལ་ཕྱག་འཚལ་ལོ། །ནས་ཞེས་པ་ནི་ལྷག་མ་འདྲེན་པའི་ཚིག་སྟེ་འོག་གི་བཤད་ཅེས་པ་དང་འབྲེལ་ལོ། །གཉིས་པ་ནི་བཤད་ཅེས་པ་དྲངས་ལ། འདི་ལ་ལྔ་ལས་ཡུལ་གང་ལ་ན། འཕགས་པ་ལྷས། འདུན་དང་ཞེ་སྡང་འཇིགས་པ་དང་། །རྨོངས་པས་གང་ཞིག་ཆོས་མི་འདའ། །དེ་ནི་དད་པ་ཅན་ཞེས་བྱ། །ཞེས་གསུངས་པ་ལྟར། འགྲོ་བ་བཞི་ཡིས་ཆོས་ལས་མི་ཕྱེད་པའི་དད་པ་དང་ལྡན་པས་ཉམས་ལེན་སངས་རྒྱས་ཀྱི་གསུང་བཞིན་དུ་བསྒྲུབ་པར་འདོད་ཀྱང་རང་ཉིད་ཀྱི་ཇི་ལྟ་བ་བཞིན་མི་ཤེས་པ་དེ་ལའོ། །ངོ་བོ་གང་ཞེ་ན་སྡོམ་པ་གསུམ་གྱི་དབྱེ་བའོ། །གང་ཟག་གང་གིས་ན་ས་སྐྱ་པཎྜི་ཏ་བདག་གིས་སོ། །ཚིག་སྦྱོར་གི་སྦྱོར་བ་ཅི་ལྟ་བུས་ན་མཁས་རྣམས་སོགས་སོ། །དགོས་པ་གང་གི་ཆེད་དུ་ན་བདག་ནི་སོགས་ཏེ། རྒྱུ་མཚན་དེའི་ཕྱིར་ན་བསྟན་པ་ལ་འཁྲུལ་པར་སྤྱད་པ་རྣམས་བཀག་ནས། བཤད་སྒྲུབ་སངས་རྒྱས་ཀྱི་གསུང་བཞིན་དུ་ཤེས་པའི་ཆེད་དུའོ། །གཉིས་པ་ལ་གཉིས་ཏེ། དོན་ལ་འཁྲུལ་པ་དགག་པ་དང་། ཚིག་ལ་འཁྲུལ་པ་དགག་པའོ། །དང་པོ་ལ་གསུམ་སྟེ། བརྗོད་བྱའི་གཙོ་བོ་ངོས་བཟུང་བའི་སྒོ་ནས་ལུས་མདོར་བསྟན། སྡོམ་གསུམ་གྱི་ཉམས་ལེན་ཞིབ་ཏུ་བསྟན་པའི་སྒོ་ནས་ཡན་ལག་རྒྱས་པར་བཤད། གནད་མ་འཁྲུལ་བར་བསྒྲུབ་པར་གདམས་པའི་སྒོ་ནས་མཇུག་བསྡུ་བའོ། །དང་པོ་ནི། སོ་སོར་ཐར་པའི་སྡོམ་པ་དང་། བྱང་ཆུབ་སེམས་པའི་སེམས་བསྐྱེད་དང་། གསང་སྔགས་ཀྱི་ནི་དབང་བསྐུར་དང་གསུམ་ནི། བརྗོད་བྱའི་གཙོ་བོ་ཡིན་པས་སྐབས་གསུམ་དུ་རིམ་པ་བཞིན་དུ་སྟོན་ཏོ། །དེ་དག་གི་ལེན་པའི་ཆོ་ག་དང་། སོ་སོའི་བསླབ་པར་བྱ་བ་ནི། སྐབས་གསུམ་དུ་སོ་སོར་སྟོན་ནོ། །སེམས་བསྐྱེད་པའི་གནད་བདག་གཞན་བརྗེ་བའི་བྱང་ཆུབ་ཀྱི་སེམས་ནི་སྐབས་གཉིས་པར་སྟོན་ཏོ། །སྟོང་ཉིད་སྙིང་རྗེའི་སྙིང་པོ་ནི་སྐབས་གསུམ་ཆར་དུ་ཅི་རིགས་པར་སྟོན་ནོ། །རིམ་པ་གཉིས་ཀྱི་གསང་ཚིག་ལ། རིམ་གཉིས་མི་དགོས་པར་འདོད་པའི་ལོག་རྟོག་འགོག་པ་ནི། ཁ་ཅིག་འཁྲུལ་དང་མ་འཁྲུལ་མེད། །ཅེས་སོགས་སུ་སྟོན་ཅིང་གསང་ཚིག་དངོས་ནི་གཞུང་འདིར་མི་སྟོན་ནོ། །ཡེ་ཤེས་ཕྱག་རྒྱ་ཆེན་པོ་དང་། །ཕྱི་དང་ནང་གི་རྟེན་འབྲེལ་དང་། །ས་དང་ལམ་གྱི་རྣམ་བཞག་གསུམ་ནི་སྐབས་གསུམ་པར་སྟོན་ནོ། །བཅུ་གཅིག་པོ་འདི་དག་ནི་བརྗོད་བྱའི་གཙོ་བོ་བསྡུས་པ་ཡིན་ཅིང་། དེ་དག་གི་ཡན་ལག་དང་བཅས་པ་ལ་འཁྲུལ་པ་འགོག་ཅིང་མ་འཁྲུལ་པ་བསྒྲུབ་པའི་རྣམ་པར་དབྱེ་བ་བཤད་ཀྱིས་ཉོན། ཅེས་མདོར་བསྟན་པའོ། །གཉིས་པ་ལ་གཉིས་ཏེ། དངོས་དང་དེ་ལ་རྩོད་པ་སྤང་བའོ། །དང་པོ་ལ་གསུམ་སྟེ། སོ་ཐར་བྱང་སེམས་སྔགས་སྡོམ་གྱི་ཉམས་ལེན་བཤད་པའོ། །དང་པོ་ལ་གསུམ་སྟེ། བརྗོད་བྱའི་གཙོ་བོ་སོ་ཐར་གྱི་རྣམ་བཞག བསླབ་བྱའི་རང་བཞིན་ལས་འབྲས་ཀྱི་རྣམ་བཞག ཐོས་བསམ་སྒོམ་གསུམ་མ་ནོར་བས་མཇུག་བསྡུ་བའོ། །དང་པོ་ལ་གསུམ་སྟེ། དབྱེ་བའི་སྒོ་ནས་མདོར་བསྟན། སོ་སོའི་རང་བཞིན་རྒྱས་པར་བཤད། གདམས་པའི་སྒོ་ནས་མཇུག་བསྡུ་བའོ། །དང་པོ་ནི་སོ་སོར་ཞེས་སོགས་ཚིག་རྐང་གཉིས་སོ། །གཉིས་པ་ལ་གཉིས་ཏེ། ཉན་ཐོས་ཀྱི་སོ་ཐར། ཐེག་ཆེན་གྱི་སོ་ཐར་རོ། །དང་པོ་ལ་གཉིས་ཏེ། རིས་བདུན་གྱི་དུས་ཀྱི་རྣམ་བཞག བསྙེན་གནས་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། རྣམ་བཞག་སྤྱིར་བསྟན། དུས་ལ་ལོག་རྟོག་དགག་པའོ། །དང་པོ་ལ་གཉིས་ཏེ། དམ་བཅའ་འགོད་པ་དང་། སྒྲུབ་བྱེད་བཤད་པའོ། །དང་པོ་ནི། ཉན་ཐོས་རྣམས་ཀྱི་ཞེས་སོགས་ཚིགས་བཅད་གཉིས་ཏེ། ཚིགས་བཅད་དང་པོས་ནི་ཉན་ཐོས་ཀྱི་སོ་ཐར་རིས་བདུན་འཆི་འཕོ་བའི་ཚེ་གཏང་བའི་དམ་བཅའ་བསྟན་ལ། དེ་ནས་ཚིག་རྐང་གཉིས་ཀྱིས་ནི་དེ་ལྟར་ན་བསྲུང་བ་ལ་དགོས་པ་མེད་པར་འགྱུར་རོ་སྙམ་ན། དེའི་དགོས་པ་བསྟན་ནོ། །དེ་ནས་གཉིས་ཀྱིས་དམ་བཅའ་ངེས་པའི་ཡན་ལག་ཏུ་ཐེག་པ་ཆེ་ཆུང་གི་སྡེ་སྣོད་ཀྱི་རྣམ་དབྱེ་བསྟན་ནོ། །གཉིས་པ་ལ་གཉིས་ཏེ། རིས་བདུན་འཆི་འཕོ་བའི་ཚེ་གཏོང་བའི་སྒྲུབ་བྱེད། དེའི་ཡན་ལག་ཏུ་སྡེ་སྣོད་ཀྱི་རྣམ་དབྱེ་བསྟན་པའོ། །དང་པོ་ནི། དེ་དག་ཞེས་སོགས་བཅུ་གཅིག་སྟེ། ཉན་ཐོས་སྡེ་པའི་ལུགས་ཀྱི་སོ་སོར་ཐར་པའི་སྡོམ་པ་ནི། རྣམ་པར་རིག་བྱེད་མ་ཡིན་པའི་གཟུགས་གཙོ་བོ་ཡིན་ཅིང་། རིག་བྱེད་ཀྱི་གཟུགས་དང་གཉིས་སུ་འདོད་དེ། རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མན་དང་གཞན། །སྡོམ་པ་སོ་སོ་ཐར་ཅེས་བྱ། །དེ་བཞིན་ཟག་མེད་བསམ་གཏན་སྐྱེས། །ཞེས་དང་། འཆལ་བའི་ཚུལ་ཁྲིམས་མི་དགེའི་གཟུགས། དེ་སྤང་ཚུལ་ཁྲིམས་རྣམ་གཉིས་སོ། །ཞེས་གསུངས་སོ། །ངོ་བོ་བསྒྲུབ་བྱའི་ལུས་ངག་གི་ལས་ཀྱི་ངོ་བོར་སྐྱེ་ཞིང་། གཟུགས་ཅན་ཡིན་པའི་ཕྱིར་ན། འཆི་འཕོ་བའི་ཚེ་གཏོང་བར་འདོད་དེ། རྟེན་མེད་པའི་ཕྱིར། དེ་སྐད་དུ་ཡང་མཛོད་ལས། བསླབ་པ་ཕུལ་དང་ཤི་འཕོས་དང་། ཕོ་མོའི་མཚན་གཉིས་ཅིག་ཅར་བྱུང་བ་དང་། ལོག་ལྟས་དགེ་རྩ་ཆད་པ་དང་། མཚན་མོ་འདས་པའི་ཚེ་སོ་སོ་ཐར་པའི་འདུལ་བ་གཏོང་བར་གསུངས་པ་ནི། ཉན་ཐོས་ཀྱི་ལུགས་འདི་ལ་སྒྲུབ་བྱེད་ཚད་མ་ཡིན་པའི་ཕྱིར། དེ་ལ་དང་པོ་བཞི་ནི། རིས་བརྒྱད་ཆར་གྱི་གཏོང་རྒྱུ་ཡིན་ལ། ཕྱི་མ་ནི་བསྙེན་གནས་ཁོ་ནའི་གཏོང་རྒྱུ་ཡིན་ནོ། །གཉིས་པ་ནི་བྱང་ཆུབ་སེམས་དཔའ་ཞེས་སོགས་དྲུག་སྟེ། བྱང་སེམས་ཀྱི་སྡོམ་པ་ནི་བསྲུང་བའི་འཕེན་སེམས་མ་ཉམས་པའམ། རྩ་ལྟུང་སོགས་མི་མཐུན་ཕྱོགས་ཀྱིས་མ་ཉམས་པ་དེ་སྲིད་དུ་ཡོད་དེ། བྱང་ཆུབ་མ་ཐོབ་ཀྱི་བར་ལ་སོགས་པ་འཕེན་སེམས་ཇི་ལྟར་འདོད་པ་ལས་སྐྱེས་པའི་ཕྱིར། དེ་ལྟ་ན་ཡང་འཆི་འཕོ་བའི་ཚེ་གཏོང་སྟེ། གཟུགས་ཅན་ཡིན་པས་དེའི་ཚེ་རྟེན་མེད་པའི་ཕྱིར་རོ་སྙམ་ན་མི་འཐད་དེ། གཟུགས་ཅན་མ་ཡིན་པའི་ཕྱིར་རོ། །མདོ་རྒྱུད་ཐམས་ཅད་ཀྱི་དགོངས་པ་ཡང་དེ་ཉིད་ཡིན་ཏེ། ཞིང་གི་ཡོན་ཏན་བཀོད་པ་ལས། བདག་ནི་བྱང་ཆུབ་རིངས་ཚུལ་དུ། །འཚང་རྒྱར་མོས་ཤིང་སྤྲོ་བ་མེད། །ཕྱི་མཐར་ཐུག་པའི་བར་དུ་ཡང་། །སེམས་ཅན་གཅིག་ཕྱིར་སྤྱད་པར་བགྱིའོ། །ཞེས་པ་དང་། ནོར་བུ་ཐིག་ལེའི་རྒྱུད་དུ། བདག་ཆེ་གེ་མོ་ཞེས་བྱ་བ་དུས་འདི་ནས་ཇི་སྲིད་བྱང་ཆུབ་སྙིང་པོ་ལ་ཐུག་གི་བར་དུ་ཞེས་པ་དང་། བྷུ་རི་པས། བདག་ཀྱང་དེང་ནས་བྱང་ཆུབ་བར། །ལུས་དང་སྲོག་ལ་ལྟོས་མེད་པར། །བསླབ་རྣམས་མགོན་བཞིན་བསྲུང་ལ་གནས། །ཡེ་ཤེས་ཐུགས་ཀྱིས་དགོངས་སུ་གསོལ། །ཞེས་པ་དང་། སྤྱོད་འཇུག་ལས། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་གསུངས་སོ། །འདིར་བྱང་སེམས་ཀྱི་སྡོམ་པ་འཆི་འཕོ་བའི་ཚེ་མི་གཏོང་བའི་དམ་བཅའ་དང་། སྒྲུབ་བྱེད་གཉིས་འབྱུང་བ་ནི་འོག་གི་ཕྱོགས་སྔ་སྨྲ་བ་པོས། སོ་ཐར་རིས་བདུན་སེམས་ཇི་སྲིད་འཚོའི་བར་དུ་ལེན་པ་སེམས་བསྐྱེད་རྐུ་ཐབས་མར་འདོད་པ་ལ་དེ་ནི་སྡེ་སྣོད་ཀྱི་རྣམ་དབྱེ་མ་ཤེས་པའི་ཉེས་པ་ཡིན་ཏེ། སྲོག་ཇི་སྲིད་འཚོའི་བར་དུ་ལེན་པ་ཉན་ཐོས་ཀྱི་ལུགས་དང་། བྱང་ཆུབ་མ་ཐོབ་ཀྱི་བར་དུ་ལེན་པ་བྱང་སེམས་ཀྱི་སྡེ་སྣོད་ཀྱི་ལུགས་ཡིན་པའི་ཕྱིར་ཞེས་བསྟན་པའི་དོན་དུ་ཡིན་ཏེ། འོག་ཏུ་སྡེ་སྣོད་རྣམ་དབྱེ་མེད་པར་ཟད། ཅེས་འབྱུང་བ་དང་དོན་གཅིག་གོ །དོན་འདི་མ་རྟོགས་པར། ཁ་ཅིག་བྱང་སེམས་དང་། སོ་ཐར་གཉིས་ཀའི་དུས་བསྟན་པ་སྐབས་སུ་བབ་ཅེས་པ་དང་། ཁ་ཅིག་བྱང་སེམས་ཞར་བྱུང་ཙམ་ཡིན་ནོ་ཞེས་སྨྲ་བ་ནི། གཞུང་དོན་རྟོགས་པའི་བློ་གྲོས་མེད་པར་ཟད་དོ། །གཉིས་པ་ལ་གཉིས་ཏེ། ཕྱོགས་སྔ་མ་བརྗོད་པ་དང་། དེ་དགག་པའོ། །དང་པོ་ནི་ཁ་ཅིག་ཅེས་སོགས་གཉིས་ཏེ། འབྲི་ཁུང་པ་རྣམས་ན་རེ། ཇི་སྲིད་འཚོའི་སྒྲ། ལུས་ཇི་སྲིད་འཚོ་བ་དང་། སེམས་ཇི་སྲིད་འཚོ་བ་གཉིས་ལ་འཇུག་པ་ལས་སོ་ཐར་རིས་བདུན་ཇི་སྲིད་འཚོའི་བར་དུ་ལེན་པ་ནི། སེམས་ལ་དགོངས་པ་ཡིན་ཏེ། འདི་ནི་སེམས་བསྐྱེད་རྐུ་ཐབས་མ་ཡིན་ནོ། །ཞེས་སྨྲའོ། །གཉིས་པ་ལ་གསུམ་སྟེ། སྒྲུབ་བྱེད་མེད་པས་མདོར་བསྟན། གནོད་བྱེད་ཡོད་པས་རྒྱས་པར་བཤད། སྨད་པའི་གནས་སུ་བསྟན་པས་མཇུག་བསྡུ་བའོ། །དང་པོ་ནི་དེ་འདྲ་ཞེས་སོགས་གཉིས་ཏེ། རིས་བདུན་བྱང་ཆུབ་མ་ཐོབ་ཀྱི་བར་དུ་ལེན་པ་ནི་སངས་རྒྱས་ཀྱི་མདོ་རྒྱུད་ལས་མ་བཤད་ཅིང་། རྒྱན་དྲུག་མཆོག་གཉིས་ལ་སོགས་པ་མཁས་པའི་གཞུང་ལས་ཀྱང་མ་བཤད་པས་མི་འཐད་དོ། །གཉིས་པ་ལ་གཉིས་ཏེ། གནོད་བྱེད་ཀྱི་རིགས་པ་དངོས། དེའི་ཉེས་སྤོང་གི་ལན་དགག་པའོ། །དང་པོ་ནི། དེ་ལྟ་ཡིན་ཞེས་སོགས་བཅུ་སྟེ། ཐེག་པ་ཆེ་ཆུང་གི་སྡོམ་པ་དུས་ཀྱི་སྒོ་ནས་ཁྱད་པར་མི་འབྱེད་ན། ཁྱད་པར་གཞན་གྱི་སྒོ་ནས་ཀྱང་མི་འབྱེད་པར་མཚུངས་ཤིང་། ཤི་འཕོས་པ་གཏོང་རྒྱུ་མིན་ན། གཏོང་རྒྱུ་གཞན་རྣམས་ཀྱང་གཏོང་རྒྱུ་མ་ཡིན་པར་མཚུངས་པའོ། །གཉིས་པ་ལ་གཉིས་ཏེ། ཉེས་སྤོང་བརྗོད་པ་དང་། དེ་དགག་པའོ། །དང་པོ་ནི་དེ་ལ་ཞེས་སོགས་ལྔའོ། །གཉིས་པ་ལ་བཞི་སྟེ། གཏོང་རྒྱུ་གཞན་ཡང་མཚུངས་པར་ཐལ་བ། འདོད་པ་ལ་གནོད་པ་བསྟན་པ། རྩ་བའི་ཉེས་སྤང་ལ་གནོད་པ་བསྟན་པ། བསྙེན་གནས་ལའང་མཚུངས་པར་ཐལ་བའོ། །དང་པོ་ནི། འོ་ན་སེམས་བསྐྱེད་སོགས་ལྔའོ། །གཉིས་པ་ནི་དེ་ལྟ་ཡིན་ན་ཅེས་སོགས་གསུམ་མོ། །གསུམ་པ་ནི་ཤི་འཕོས་ནས་ཀྱང་ཞེས་སོགས་བཅུ་གཅིག་སྟེ། ལྷའི་དགེ་སློང་འདུལ་བ་ནས་བཀག་པ་ནི་མདོ་རྩར་མི་མ་ཡིན་པའི་འགྲོ་བ་པ་ནི་སྡོམ་པའི་ཞིང་ཉིད་མ་ཡིན་ནོ་ཞེས་གསུངས་སོ། །བྱིས་པའི་དགེ་སློང་བཀག་པ་ནི་ལས་ཀྱི་གཞིར་ལོ་ཉི་ཤུ་མ་ལོན་པ་མ་ཡིན་ནམ་ཞེས་གསུངས་སོ། །བཞི་པ་ནི། སེམས་བསྐྱེད་ལྡན་པའི་ཞེས་སོགས་དྲུག་གོ །གསུམ་པ་ནི་དེས་ན་སོ་སོར་ཞེས་སོགས་བཞི་སྟེ། ཉན་ཐོས་ཀྱི་སོ་ཐར་རིས་བདུན་ཤི་ཡང་ཡོད་པར་སྨྲ་བ་ལ། སྡེ་སྣོད་ཀྱི་རྣམ་དབྱེ་མེད་པའི་སྐྱོན་བསྟན་པ་ཡིན་ཏེ། དེ་འགོག་པའི་སྐབས་ཡིན་པའི་ཕྱིར་རོ། །སོ་ཐར་ཙམ་ལ་ནི་མ་ཡིན་ཏེ། རྗེ་བཙུན་རྩེ་མོས་བྱང་སེམས་ཀྱི་སྡོམ་པ་ལ་སོ་ཐར་གྱིས་ཁྱབ་པར་གསུངས་ཤིང་རྩ་ལྟུང་འཁྲུལ་སྤོང་དུ་དབང་བསྐུར་གྱི་ཆོ་ག་གཅིག་པུ་ལ་བརྟེན་ནས་སྡོམ་པ་གསུམ་ཀ་ཐོབ་པར་གསུངས་པ་དང་། འདིར་ཡང་དབང་བཞི་བླངས། དེ་ཡིས་སྡོམ་པ་གསུམ་ལྡན་འགྱུར། །ཞེས་གསུངས་པས། དེ་ལྟ་བུའི་སོ་ཐར་ནི་སྡོམ་པ་གཞན་གཉིས་པོ་མ་བཏང་བའི་བར་དུ་ཡོད་པའི་ཕྱིར་རོ། །གཉིས་པ་བསྙེན་གནས་བྱེ་བྲག་ཏུ་བཤད་པ་ལ་གཉིས་ཏེ། རྣམ་གཞག་སྤྱིར་བསྟན་པ་དང་། ལོག་རྟོག་བྱེ་བྲག་ཏུ་དགག་པའོ། །དང་པོ་ལ་གཉིས་ཏེ། ཉན་ཐོས་སྡེ་གཉིས་ཀྱི་བསྙེན་གནས་ཀྱི་ཁྱད་པར། ཐེག་པ་ཆེ་ཆུང་གི་བསྙེན་གནས་ཀྱི་ཁྱད་པར་རོ། །དང་པོ་ནི་བྱེ་བྲག་སྨྲ་བའི་ཞེས་སོགས་བརྒྱད་དེ། བྱེ་བྲག་ཏུ་སྨྲ་བའི་ལུགས་ལ་རིས་བདུན་དུ་མ་ཟད། བསྙེན་གནས་ཀྱང་དགེ་སློང་ལས་ལེན་ཏེ། འདུལ་བ་ལས་བསྙེན་པར་མ་རྫོགས་པ་དག་ནི། བསྙེན་པར་རྫོགས་པའི་དགེ་འདུན་གྱིས་ཡོངས་སུ་བཟུང་བ་ཙམ་མོ་ཞེས་གསུངས་པ་ལྟར། བསྙེན་པར་མ་རྫོགས་པ་དག་གིས་གཞན་ལ་སྡོམ་པ་འབོགས་པ་མི་དབང་བའི་ཕྱིར་རོ། །རྟེན་གྱི་གང་ཟག་ཀྱང་གླིང་གསུམ་གྱི་སྐྱེས་པ་དང་། བུད་མེད་ལས་གཞན་ལ་སྡོམ་པ་བཀག་སྟེ། མཛོད་ལས། ཟ་མ་མ་ནིང་སྒྲ་མི་སྙན། །མཚན་གཉིས་མ་གཏོགས་མི་རྣམས་ལ། །སྡོམ་མིན་སྡོམ་པའང་དེ་བཞིན་ལ། །ཞེས་གསུངས་སོ། །མདོ་སྡེ་པ་ནི་འགྲོ་བ་གཞན་ལའང་སྐྱེ་བར་འདོད་དེ་ཀླུ་གཞོན་ནུ་ཙམ་པ་ཞེས་བྱ་བ་དུས་བཟང་ལ་ཡན་ལག་བརྒྱད་ཀྱི་བསྙེན་གནས་བསྲུང་བ་དང་། རྒྱ་མཚོའི་ཀླུ་རྣམས་དུས་བཟང་ལ་རྒྱ་མཚོ་ནས་བྱུང་སྟེ། གསོ་སྦྱོང་ལེན་པ་ལ་སོགས་གསུངས་པ་རྣམས་སྒྲ་ཇི་བཞིན་དུ་འཆད་པའི་ཕྱིར་རོ། །ཡུལ་ཡང་དགེ་སློང་ཁོ་ན་ལས་ལེན་པའི་ངེས་པ་མེད་དེ། དྲང་སྲོང་གནས་འཇོག་གིས་ཞུས་པའི་མདོ་ལས། དགེ་སྦྱོང་ངམ་བྲམ་ཟེའམ། རབ་ཏུ་བྱུང་བ་ཆོ་ག་ཤེས་པ་གཅིག་གི་གམ་དུ་སོང་སྟེ། ཞེས་བཤད་པ་དང་། ཁྱིམ་བདག་མགོན་མེད་ཟས་སྦྱིན་གྱིས། རང་གི་འཁོར་འབངས་རྣམས་བསྙེན་གནས་ལ་བཀོད་པར་གསུངས་པ་རྣམས་སྒྲ་ཇི་བཞིན་དུ་འཆད་པའི་ཕྱིར་རོ། །གཉིས་པ་ནི་ཉན་ཐོས་རྣམས་ནི། ཞེས་སོགས་དྲུག་སྟེ། ཉན་ཐོས་ཀྱི་བསྙེན་གནས་དང་། ཐེག་ཆེན་གྱི་བསྙེན་གནས་ལ་ཆོ་གའི་ཁྱད་པར་ཡོད་དེ། ཉན་ཐོས་ཀྱི་བསྙེན་གནས་ནི་སྐྱབས་འགྲོ་རྩོམ་བྱེད་དུ་བྱས་ནས། གང་ཟག་གཞན་གྱིས་འབོགས་ལ་དོན་ཡོད་ཞགས་པའི་རྟོགས་པ་ནས་གསུངས་པའི་བསྙེན་གནས་ནི་རྟེན་གྱི་དྲུང་དུ་རང་ཉིད་ཀྱིས་ལེན་པའི་ཆོ་ག ཐེག་ཆེན་སེམས་བསྐྱེད་དང་འདྲ་བར་གསུངས་པའི་ཕྱིར་རོ། །གཉིས་པ་ལ་གསུམ་སྟེ། བསྙེན་གནས་འབུལ་བ་དགག་པ། བཅོལ་བ་དགག་པ། ལྷ་སྒོམ་ཐ་དད་དགག་པའོ། །དང་པོ་ནི། ལ་ལ་བསྙེན་གནས་ཞེས་སོགས་དགུ་སྟེ། བཀའ་གདམས་པ་ལ་ལ་ན་རེ། བསྙེན་གནས་ཉིན་བར་བསྲུང་བའི་སང་ནངས་པར་འབུལ་དགོས་ཏེ། མ་ཕུལ་ན་དེ་དང་འགལ་བའི་ཉེས་པ་བྱས་ན་ཉམས་པར་འགྱུར་བའི་ཕྱིར་ཞེས་ཟེར་རོ། །དེ་ནི་མི་འཐད་དེ། མཚན་མོ་འདས་པ་ན་གཏོང་བའི་ཕྱིར་རོ། །མདོ་སྡེ་པའི་ལུགས་ཀྱི་ཇི་ལྟར་འདོད་པའི་ཚེ་སྲུང་བ་ནི། མཛོད་འགྲེལ་ལས། གང་གིས་ཚེས་བརྒྱད་ལ་རྟག་ཏུ་བསྙེན་གནས་ལ་གནས་པར་བྱའོ། །ཞེས་སྔོན་ཡང་དག་པར་བླངས་པ་དེས་ནི་ཟན་ཟོས་ཀྱང་ནོད་པར་བྱའོ། །ཞེས་དང་། རྒྱལ་པོའི་སྲས་ཀྱིས་སྡོམ་པ་ནི་སྤང་བར་བྱེད་པ་ཡང་དག་པར་ལེན་པར་ངེས་པའི་སེམས་ཡིན་པའི་ཕྱིར། ཉི་མ་འཆར་བའི་ཚེ་ཁོ་ན་སྐྱེའོ། །ཟན་ཟོས་ནས་ནོད་པ་ནི་བསལ་བའི་ཕྱིར་རོ། །ཞེས་གསུངས་པ་ལྟར་ཟླ་བ་བྱུང་ངོ་ཅོག་གི་ཚེས་བརྒྱད་ལ་བསྙེན་གནས་བསྲུང་བར་ལན་གཅིག་བླངས་པ་ཡིན་ལ། འདི་ལ་ཡང་ནམ་བསྲུང་བ་དེའི་ནངས་པར་ཕན་ཆད་སོགས་སོ། །གཉིས་པ་ནི་ལ་ལ་ཞེས་སོགས་གཉིས་ཏེ། ཆོས་རྒྱུས་ཆུང་བ་ལ་ལ་ན་རེ། བསྙེན་གནས་བསྲུང་ནས་སླར་ཡང་བསྲུང་འདོད་ན། ནང་པར་གཞན་ལ་བཅོལ་དགོས་ཏེ། གཞན་དུ་ན་སླར་ལེན་དུ་མེད་པའི་ཕྱིར་རོ། །ཞེས་ཟེར་རོ། །དེ་ནི་མ་ཡིན་ཏེ། དེ་འདྲ་གང་ནས་ཀྱང་མ་བཤད་པའི་ཕྱིར་རོ། །གསུམ་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ཁ་ཅིག་བསྙེན་གནས་ཞེས་སོགས་བཞི་སྟེ། བཀའ་གདམས་བྱ་ཡུལ་བ་ན་རེ། བསྙེན་གནས་བསྲུང་བའི་ཚེ། ཉ་དང་གནམ་སྟོང་ཚེས་བརྒྱད་གསུམ་ལ་ཤཱཀྱ་ཐུབ་པ། སྣང་བ་མཐའ་ཡས། སྨན་བླ་གསུམ་གྱི་ལྷ་བསྒོམ་པ་དང་སྔགས་བཟླས་པ་ཐ་དད་དུ་མ་བྱས་ན་བསྲུང་དུ་མི་རུང་ཞེས་ཟེར་རོ། །གཉིས་པ་ནི་འདི་ཡང་རེ་ཤིག་ཅེས་སོགས་བཅུ་སྟེ། གཞན་རྣམས་ནི་རྟོགས་པར་སླ་ལ། འོན་ཀྱང་ཞེས་སོགས་ཀྱི་དོན་ནི། བསྙེན་གནས་སྲུང་བ་པོ་དེ་གསང་སྔགས་ཀྱི་ཏིང་ངེ་འཛིན་གཙོ་བོར་བྱེད་པ་ཡིན་ན་དེའི་ཚེ་ཡི་དམ་བསྒོམ་པ་བསོད་ནམས་ཆེ་སྟེ་སྡོམ་པ་དང་ལྡན་པའི་རྟེན་ལ་དགེ་བ་བསྒྲུབ་པ་ཡིན་པའི་ཕྱིར་རོ། །གཉིས་པ་ཐེག་ཆེན་སོ་ཐར་ལ་གཉིས་ཏེ། ཉན་པར་གདམས་པ་དང་། དོན་དངོས་སོ། །དང་པོ་ནི་ཐེག་པ་ཆེན་པོ་ཞེས་སོགས་གཉིས་སོ། །གཉིས་པ་ལ་གསུམ་སྟེ། ལེན་པའི་ཆོ་ག བསླབ་བྱའི་ཁྱད་པར། གཏོང་བའི་ཚུལ་ལོ། །དང་པོ་ལ་གཉིས་ཏེ། ཆོ་ག་ཐུན་མོང་མ་ཡིན་པ་དང་། ཆོ་ག་ཐུན་མོང་བའོ། །དང་པོ་ལ་གཉིས་ཏེ། ད་ལྟར་གྱི་ཆོ་ག་དང་། སྔོན་གྱི་ཆོ་གའོ། །དང་པོ་ལ་གཉིས་ཏེ། ཆོ་ག་ནུབ་པ་དང་། ཆོ་ག་མ་ནུབ་པའོ། །དང་པོ་ནི་བྱང་ཆུབ་སེམས་དཔའ་ཞེས་སོགས་བཞི་སྟེ། ཉན་ཐོས་ཀྱི་སྡེ་སྣོད་ལ་མ་ལྟོས་པར་བྱང་ཆུབ་སེམས་དཔའི་སྡེ་སྣོད་ཉིད་ལ། སོ་ཐར་འབོགས་པའི་ཆོ་ག་འགའ་ཞིག་ཡོད་དེ། ཆོ་འཕྲུལ་བསྟན་པའི་མདོར་སྔོན་བསྐལ་པ་མངོན་པར་དགའ་བ་ལ། འཇིག་རྟེན་གྱི་ཁམས་བདེ་བ་ཞེས་བྱ་བར་རྒྱལ་བ་རི་རབ་ལྟ་བུ་ལ། འཁོར་ལོས་སྒྱུར་རྒྱལ་དགེ་བའི་བཀོད་པས་རྗེས་སུ་མཐུན་པའི་བཟོད་པ་ཐོབ་ནས་རབ་ཏུ་བྱུང་ཞིང་སྲས་སྙིང་རྗེ་ཆེར་སེམས་རྒྱལ་སར་བསྐོས་པས་དེ་ཉིད་ཀྱང་། རབ་བྱུང་ཡོན་ཏན་དུ་མ་བསགས་པ་ཞེས། །དེ་བཞིན་གཤེགས་པ་རྣམས་ཀྱིས་གསུངས་མོད་ཀྱི། །དེ་ལྟར་ལགས་ཀྱང་སྙིང་རྗེར་གྱུར་པ་ན། །འགྲོ་ལ་ཕན་ཕྱིར་རྒྱལ་སྲིད་བདག་གིས་བསྒྲུབ། །ཇི་སྲིད་འཚོ་བར་བདག་ནི་ཚངས་སྤྱོད་ཅིང་། །གསོ་སྦྱོང་ཡན་ལག་བརྒྱད་པ་བླང་བར་བྱ། །ཞེས་གསུངས་པ་དང་། རྣམ་པར་གཏན་ལ་དབབ་པ་བསྡུ་བ་ལས། དགེ་སློང་གི་སྡོམ་པ་མ་གཏོགས་པའི་སོ་ཐར་གཞན་རྣམས་རང་ཉིད་ཀྱིས་ལེན་པའི་རྣམ་གཞག་གསུངས་པ་ལྟ་བུའོ། །འོན་ཀྱང་དེ་དག་ནི་དེང་སང་ནུབ་བོ། །ཕལ་ཆེར་གྱི་སྒྲ་ནི་འོག་མ་འདྲེན་ནོ། །གཉིས་པ་ནི། གསོ་སྦྱོང་ཞེས་སོགས་གཉིས་ཏེ། དེང་སང་ལག་ལེན་ཡོད་པ་ནི། དོན་ཡོད་ཞགས་པའི་རྟོགས་པ་ནས་བཤད་པའི་གསོ་སྦྱོང་རང་གིས་བླང་བའི་ཆོ་ག་དང་སོགས་ཀྱིས་བསྟན་པ་དབུ་མ་ལུགས་ཀྱི་སེམས་བསྐྱེད་ཀྱི་སྔོན་དུ་སྐྱབས་འགྲོའི་སྡོམ་པ་ལེན་པ་ལྟ་བུ་སྟེ། འདི་ནི་སྐྱབས་འགྲོའི་སྡོམ་པ་ཡིན་པས། སོ་ཐར་གྱི་ལྡོག་པ་ནས་བསྟན་ལ། བྱང་ཆུབ་མ་ཐོབ་ཀྱི་བར་དུ་ལེན་པ་ཡིན་པས། ཐེག་ཆེན་ཐུན་མོང་མ་ཡིན་པར་ཡང་འཐད་པའི་ཕྱིར་རོ། །ཁ་ཅིག་འདིའི་སོགས་ཁོངས་ནས་འོག་གི་རྒྱལ་སྲས་བྱམས་པ་འཇམ་དབྱངས་སོགས་ཀྱིས་འགྲོ་བ་མང་པོ་ལ་བསྙེན་རྫོགས་མཛད་ཚུལ་འདྲེན་པ་ནི། སྨྲ་བ་པོ་དེ་ཉིད་ལ་སེམས་མེད་པ་གསལ་བར་བྱས་ཏེ། གཞན་དུ་ན། ད་ལྟའི་ཆོ་གའི་ལག་ལེན་ཡོད་པའི་མཚན་གཞིར། ཆོ་ག་མདོ་ལས་གསུངས་པ་ཙམ་ཡང་མ་མཐོང་བ་བཟུང་བ་ནི། སུ་ཞིག་གིས་སྨྲ་བར་ནུས། དེས་ན་འཆད་ཚུལ་འདི་ལྟ་བུའི་རིགས་ཅན་ལ་ཡིད་བརྟན་པར་མི་བྱའོ། །གཉིས་པ་ནི། རྒྱལ་སྲས་བྱམས་པ་ཞེས་སོགས་དགུ་སྟེ། ཁྱིམ་པ་དྲག་ཤུལ་ཅན་གྱིས་ཞུས་པར། རྒྱལ་སྲས་བྱམས་པས་ཁྱིམ་བདག་དགུ་སྟོང་དང་། རྒྱལ་སྲས་སྤྱོད་པ་རྣམ་དག་སྟེ་འཇམ་པའི་དབྱངས་ཀྱིས་ཁྱིམ་བདག་བདུན་སྟོང་རབ་ཏུ་བྱུང་ཞིང་། བསྙེན་པར་རྫོགས་པར་མཛད་དོ། །ཞེས་པའི་ཚིག་འབྲུ་ཙམ་ཞིག་གསུངས་མོད་ཀྱི་ཆོ་ག་ཅི་ལྟ་བུས་མཛད་པ་མདོ་སྡེ་ལས་མ་གསུངས་ཤིང་། ཁྱིམ་པའི་ཆ་ལུགས་ཅན་གྱིས་བསྒྲུབ་བྱ་ཁྱིམ་པའི་རྟགས་མ་སྤངས་པའི་བསྙེན་རྫོགས་མཛད་ཚུལ་འདི་འདྲ་བ་ནི། འཕགས་པ་ཁོ་ནའི་སྤྱོད་ཡུལ་ཡིན་པས། སོ་སོའི་སྐྱེ་བོས་བྱར་མི་རུང་ངོ་། །གཉིས་པ་ནི་དེས་ན་ད་ལྟའི་ཞེས་སོགས་ལྔ་སྟེ། བསྙེན་གནས་ལས་མ་གཏོགས་པའི་བྱང་སེམས་རང་ལུགས་ཀྱི་སོ་ཐར་ལེན་པའི་ཆོ་ག་ད་ལྟ་མེད་པ་དེས་ན། ད་ལྟ་ཐེག་ཆེན་སོ་ཐར་ལེན་པའི་ཆོ་ག་ནི། བསམ་པ་ཐེག་ཆེན་སེམས་བསྐྱེད་ཀྱིས་ཟིན་པའི་ཆོ་ག་ཉན་ཐོས་ཇི་ལྟ་བ་བཞིན་དུ་གྱིས་ཏེ། ཆོ་ག་དེ་ལ་བརྟེན་ནས་སོ་ཐར་གྱི་སྡོམ་པ་ཐོབ་ཅིང་ཀུན་སློང་གི་སྒོ་ནས་ཐེག་པ་ཆེན་པོའི་སྡོམ་པར་འགྱུར་བའི་ཕྱིར་རོ། །འདི་ལྟ་བུ་ནི་བྱང་སེམས་ཀྱི་སྡོམ་པ་ཡང་ཡིན་ཏེ། བྱང་སར་བྱང་སེམས་ཀྱི་སྡོམ་པའི་ངོ་བོ་ཉེས་སྤྱོད་སྤོང་བ་དང་། དགེ་བ་ཆོས་སྡུད་དང་། སེམས་ཅན་དོན་བྱེད་གསུམ་དུ་བསྡུས་ནས། ཉེས་སྤྱོད་སྤོང་བའི་ཚུལ་ཁྲིམས་ནི། སོ་སོ་ཐར་པ་རིས་བདུན་ལ་བཤད་པའི་ཕྱིར་རོ། །གཉིས་པ་ལ་གཉིས་ཏེ། ཉན་པར་གདམས་པ། ཁྱད་པར་སོ་སོར་བཤད་པའོ། །དང་པོ་ནི་དེ་ནས་ཞེས་སོགས་གསུམ་མོ། །གཉིས་པ་ནི། འདི་ལ་སྡིག་ཏོ་ཞེས་སོགས་ཚིགས་བཅད་བཞི་སྟེ། ཐེག་ཆེན་གྱི་སོ་ཐར་འདི་ལ། སྡིག་ཏོ་མི་དགེ་བའི་ཕྱོགས། རང་བཞིན་གྱིས་ཁ་ན་མ་ཐོ་བ་འདི་ནི། ཉན་ཐོས་ཀྱི་ལུགས་བཞིན་དུ་བསྲུང་དགོས་ཏེ། ཉེས་སྤྱོད་སྤང་བའི་ཚུལ་ཁྲིམས་དང་དོན་གཅིག་གོ །རང་འདོད་ཀྱི་དབེན་པའི་ལྟུང་བ་འགའ་ཞིག་ནི། བྱང་ཆུབ་སེམས་དཔའི་ལུགས་བཞིན་དུ་བསྲུང་དགོས་ཏེ། གཞན་དོན་དུ་འགྱུར་ན་ལུས་ངག་གི་བཅས་པ་ཐམས་ཅད་གནང་བའི་ཕྱིར་རོ། །འཇིག་རྟེན་ལས་འདས་པའི་སྤྱོད་པ་ཐེག་པ་ཆེ་ཆུང་མཐུན་པ་ནི་འབད་པས་བསྲུང་དགོས་ཏེ། སྤྱོད་འཇུག་ལས། འཇིག་རྟེན་མ་དད་གྱུར་པའི་ཆ། །མཐོང་དང་དྲིས་ཏེ་སྤང་བར་བྱ། །ཞེས་གསུངས་སོ། །འཇིག་རྟེན་འཇུག་པའི་རྒྱུར་འགྱུར་ན། །ཐེག་ཆེན་སོ་ཐར་ལ་གནང་སྟེ། །དེ་ཉིད་ལས། ཐུགས་རྗེ་མངའ་བ་རིང་གཟིགས་པས། །བཀག་པ་རྣམས་ཀྱང་དེ་ལ་གནང་། །ཞེས་གསུངས་སོ། །དཔེར་ན་ཉན་ཐོས་ལ་གསེར་དངུལ་ལེན་པ་སྤང་ལྟུང་དུ་བཅས་ཤིང་། སྡོམ་པ་ཉི་ཤུ་པར། གསེར་ལ་སོགས་པ་ལེན་མི་བྱེད། །ཅེས་གཞན་དོན་དུ་གསེར་དངུལ་མི་ལེན་པ་ལྟུང་བར་བཅས་པ་དང་། ཉན་ཐོས་ལ་འདོད་ཆེན་པོ་སྟེ་མངོན་ཚན་ཅན་ཉོ་ཚོང་ལ་སྤང་ལྟུང་དུ་བཅས་ཤིང་། ཚུལ་ཁྲིམས་ལེའུར་གཞན་གྱི་དོན་དུ་འགྱུར་ན། གོས་བརྒྱ་སྟོང་རྙེད་ཀྱང་ཉེ་དུར་མི་འོང་བའི་བྲམ་ཟེ་དང་། ཁྱིམ་བདག་ལས་བཙལ་བར་བྱའོ། །སྐབས་འབྱེད་པ་ཡོད་ན། ཆོག་གམ་མི་ཆོག་བརྟགས་ནས་ཇི་ཙམ་དགོས་པ་བླང་བར་བྱ། ལྷུང་བཟེད་བཙལ་བ་དང་། ཐགས་ཀྱི་རྒྱུ་སྐུད་པ་བླང་བ་དང་། འཐག་ཏུ་གཞུག་པ་དང་། གཞན་དོན་དུ་མོན་དར་གྱི་གདིང་བ་དང་། མལ་སྟན་བརྒྱ་རྙེད་ཀྱང་བསྟབ་པར་བྱ། གསེར་དངུལ་སྲང་བྱེ་བ་འབུམ་ཕྲག་ལས་ལྷག་པ་ཡང་བདག་གིར་བྱའོ། །ཞེས་གསུངས་པ་ལྟ་བུའོ། །འོ་ན་འདི་དག་ཉན་ཐོས་ཀྱི་དགེ་སློང་ལ། གཞན་དོན་ཡིན་ཀྱང་ལྟུང་བར་འགྱུར་བ་དང་། བྱང་ཆུབ་སེམས་དཔའི་དགེ་སློང་ལ་གཞན་དོན་དུ་ལྟུང་བར་མི་འགྱུར་བའི་ཁྱད་པར་གང་ཡིན་ཞེ་ན། ཉན་ཐོས་ནི་གཙོ་བོར་རང་དོན་སྒྲུབ་པ་ཡིན་པས། འདི་དག་གི་བསྒྲུབ་བྱའི་གཙོ་བོ་ལ་གནོད་པའི་ཕྱིར་དང་། བྱང་ཆུབ་སེམས་དཔའ་ནི་གཞན་དོན་གཙོ་བོར་བསྒྲུབ་པ་ཡིན་པས། དོན་དུ་གཉེར་བྱའི་གཙོ་བོ་ལ་ཕན་འདོགས་པའི་ཕྱིར། གསུམ་པ་ནི་ཐེག་ཆེན་སོ་སོ་ཐར་ཞེས་སོགས་ལྔ་སྟེ། བསམ་པ་སེམས་བསྐྱེད་ཀྱིས་ཟིན་པའི་སོ་ཐར་རིས་བརྒྱད་པོ་ལ་སྡོམ་པའི་ལྡོག་པ་དང་། ཀུན་སློང་བྱང་ཆུབ་སེམས་ཀྱི་ལྡོག་པ་གཉིས་ལས། དང་པོ་ནི། ཤི་འཕོས་པའི་ཚེ་གཏོང་སྟེ། ཇི་སྲིད་འཚོའམ་ཉིན་ཞག་གི་མཐའ་ཅན་གྱི་སྡོམ་པ་ཡིན་པའི་ཕྱིར་རོ། །ཕྱི་མ་སྡོམ་པའི་འབྲས་བུ་ནི། ཤི་འཕོས་ནས་ཀྱང་འབྱུང་སྟེ། གཏོང་རྒྱུ་མ་བྱུང་བའི་ཕྱིར་རོ། །འདི་དག་གི་རྣམ་གཞག་རྒྱས་པར་ནི་སྤྱི་དོན་དུ་བལྟ་བར་བྱའོ། །ཁ་ཅིག་འདི་ལ། དགེ་སློང་གི་སྡོམ་པའི་ལྡོག་པ་དང་བྱང་སེམས་ཀྱི་སྡོམ་པའི་ལྡོག་པ་གཉིས་ལས། སྔ་མ་བཏང་ཞིང་། ཕྱི་མ་མི་གཏོང་བར་སྨྲ་བ་ནི་མི་འཐད་དེ། བྱང་ཆུབ་སེམས་ཀྱིས་ཟིན་པའི་དགེ་སློང་ལ་སོགས་པའི་དགེ་སློང་གི་སྡོམ་པ་འཆད་པའི་སྐབས་ཡིན་ཅིང་། དེ་ལ་ཤི་འཕོས་པའི་ཚེ་མི་གཏོང་རྒྱུའི་སྡོམ་པ་མེད་པའི་ཕྱིར་དང་། གཞུང་ལས་ཀྱང་བྱང་ཆུབ་སེམས་ཀྱི་ལྡོག་པ་ཞེས་བཤད་ཀྱི། བྱང་སེམས་ཀྱི་སྡོམ་པའི་ལྡོག་པ་ཞེས་མ་བཤད་པའི་ཕྱིར་རོ། །གཞན་དག་དགེ་སློང་གི་སྡོམ་པའི་ལྡོག་པ་གཏོང་། ངོ་བོ་མི་གཏོང་བར་འདོད་པ་ལ་ནི། ཤི་ཡང་དགེ་སློང་མི་འདོར་ན། །ཞེས་སོགས་ཀྱི་གནོད་པ་མཐའ་དག་འབབ་པར་འགྱུར་བས་བག་ཡོད་པར་གྱིས་ཤིག གསུམ་པ་གདམས་པའི་སྒོ་ནས་མཇུག་བསྡུ་བ་ནི། གོང་གི་སོ་སོར་ཐར་པ་ཞེས་སོགས་གཉིས་སོ། །གསུམ་པ་བསླབ་བྱའི་རང་བཞིན་ལས་འབྲས་ཀྱི་རྣམ་བཞག་ལ་གཉིས་ཏེ། ལས་འབྲས་ཀྱི་རྣམ་གཞག་སྤྱིར་བསྟན། འཁྲུལ་པ་དགག་པ་རྒྱས་པར་བཤད་པའོ། །དང་པོ་ལ་གསུམ་སྟེ། ཉན་པར་གདམས་པ། དབྱེ་བ་དངོས། མཇུག་བསྡུ་བའོ། །དང་པོ་ནི། དེ་ནས་ཞེས་སོགས་གཉིས་སོ། །གཉིས་པ་ལ་ལྔ་སྟེ། གསུམ་དུ་དབྱེ་བ། གཉིས་སུ་དབྱེ་བ། བཞིར་དབྱེ་བ། གཉིས་སུ་དབྱེ་བ་གཞན་བསྟན་པ། གསུམ་དུ་དབྱེ་བ་གཞན་བསྟན་པའོ། །དང་པོ་ལ་གཉིས་ཏེ། དབྱེ་བ་དངོས་དང་། དབྱེ་བའི་དགོས་པའོ། །དང་པོ་ནི། ལས་ལ་དགེ་སྡིག་ཞེས་སོགས་ཚིགས་བཅད་གཉིས་སོ། །གཉིས་པ་ནི་འདི་དག་ཞེས་སོགས་ཚིགས་བཅད་གཅིག་སྟེ། ཆོས་དབྱིངས་ནི་དགེ་བ་དང་སྡིག་པ་མ་ཡིན་ཏེ། དགེ་སྡིག་ཡིན་ན་རྩོལ་བས་བྱས་པའི་འདུས་བྱས་ཡིན་དགོས་པ་ལས། ཆོས་དབྱིངས་འདུས་མ་བྱས་ཡིན་པའི་ཕྱིར། འདིར་དབྱེ་སྒོ་དང་པོ་གཉིས་ཀྱི་སྐབས་སུ། ཆོས་དབྱིངས་དགེ་སྡིག་ལས་གྲོལ་བར་བསྟན་པའི་གཞུང་འབྱུང་བ་ནི། གཞན་གསུམ་ལ་མཚོན་ནས་ཤེས་པར་བྱ་སྟེ། ཆོས་དབྱིངས་དགེ་བར་འདོད་པའི་ལོག་རྟོག་དགག་པའི་ཆེད་དུ། ཐོག་མར་ལས་འབྲས་ཀྱི་རྣམ་བཞག་སྟོན་པ་ཡིན་པའི་ཕྱིར་རོ། །འཁྲུལ་པ་དགག་པའི་སྔོན་དུ་དེ་དང་དེའི་རྣམ་གཞག་སྤྱིར་བསྟན་པ་ནི། གོང་འོག་ཀུན་ཏུ་ཤེས་པར་བྱའོ། །གཉིས་པ་ལ་ནི་ལས་ལ་ཐུབ་པས་ཞེས་སོགས་དྲུག་སྟེ། སེམས་པའི་ལས་ནི་ཡིད་ལས་དང་། བསམས་པའི་ལས་ལུས་ངག་གི་རྣམ་པར་རིག་བྱེད་ལ་འདོད་པ་ནི། བྱེ་བྲག་ཏུ་སྨྲ་བའི་ལུགས་ཏེ། མཛོད་ལས། སེམས་པ་ཡིད་ཀྱི་ལས་ཡིན་ནོ། །དེས་བསྐྱེད་ལུས་དང་ངག་གི་ལས། །ཞེས་དང་། ལུས་རྣམ་རིག་བྱེད་དབྱིབས་སུ་འདོད། །ཅེས་པས། ལུས་ཀྱི་རྣམ་པར་རིག་བྱེད་ཀྱི་ལས་ངོས་བཟུང་ཞིང་། ངག་རྣམ་རིག་བྱེད་ནི་ངག་སྒྲ་ཞེས་པས། ངག་གི་རྣམ་པར་རིག་བྱེད་ཀྱི་ལས་ངོས་བཟུང་བའི་ཕྱིར་རོ། །མདོ་སྡེ་པ་ཡན་ཆད་ནི། སེམས་པའི་ལས་རྒྱུ་དུས་ཀྱི་ཀུན་སློང་ལ་འདོད་ལ། དེ་ལ་བསོད་ནམས་དང་། བསོད་ནམས་མ་ཡིན་པ་དང་། མི་གཡོ་བའི་ལས་གསུམ་ཡོད་ཅིང་། བསམ་པའི་ལས་ནི། དེ་དུས་ཀྱི་ཀུན་སློང་ལ་འདོད་ལ། དེ་ལ་ལུས་ངག་ཡིད་གསུམ་གྱི་ལས་གསུམ་ཡོད་པར་འདོད་དེ། མངོན་པ་ཀུན་ལས་བཏུས་སུ། དེ་གཉིས་ཀྱི་དབྱེ་བ་དེ་ལྟར་དུ་གསུངས་ཤིང་། མཛོད་འགྲེལ་ལས། མདོ་སྡེ་པའི་འདོད་པ་བརྗོད་པའི་སྐབས་སུ་ལུས་ལ་བརྟེན་པའི་ལས་ནི། ལུས་ཀྱི་ལས་ཏེ། དེ་དང་དེས་ལུས་འཇུག་པར་བྱེད་པའི་སེམས་པ་གང་ཡིན་པའོ། །དེ་བཞིན་དུ་ངག་དང་ཡིད་ཀྱི་ལས་དག་ལ་ཡང་ཅི་རིགས་པར་རིག་པར་བྱའོ། །འོ་ན་གང་སེམས་པ་དང་བསམ་པའི་ལས་སོ་ཞེས་གསུངས་ཞེ་ན། འདི་དང་འདི་ལྟ་བུ་ཞིག་བྱའོ་སྙམ་པའི་ཀུན་ཏུ་རྟོག་པ་ནི་སྔར་བྱུང་ལ། དེ་ལྟར་བསམས་ནས་དེའི་འོག་ཏུ་གང་གིས་ལུས་འཇུག་པར་བྱེད་པ་བྱ་བའི་སེམས་སྐྱེ་བར་འགྱུར་ཏེ། དེ་ནི་བསམ་པའི་ལས་ཞེས་བྱའོ་ཞེས་གསུངས་སོ། །གསུམ་པ་ནི་ལས་དཀར་རྣམ་སྨིན་ཞེས་སོགས་ཚིགས་བཅད་གསུམ་སྟེ། རྣམ་སྨིན་དཀར་ནག་ནི་རྒྱུ་དུས་དང་། དེ་དུས་ཀྱི་ཀུན་སློང་གི་སེམས་པ་དཀར་ནག་ཡིན་ལ། ལས་དཀར་ནག་ནི་སྦྱོར་བ་དགེ་བར་སྣང་བ་དང་། མི་དགེ་བར་སྣང་བའི་ཁྱད་པར་རོ། །བཞི་པ་ནི། གཞན་ཡང་ལས་ལ་ཞེས་སོགས་ཚིགས་བཅད་དྲུག་དང་། ཚིག་རྐང་གཅིག་སྟེ། འཕེན་བྱེད་ཀྱི་ལས་ནི་རྣམ་སྨིན་གྱི་འབྲས་བུ་གཙོ་བོར་གྱུར་པ་ཡིན་ལ། རྫོགས་བྱེད་ཀྱི་ལས་ནི་སྐྱེས་བུ་བྱེད་པ་དང་། རྒྱུ་མཐུན་དང་། བདག་པོའི་འབྲས་བུ་གཙོ་བོར་གྱུར་པ་ཡིན་ནོ། །དེ་ལ་དགེ་མི་དགེའི་རྣམ་སྨིན་གྱི་འབྲས་བུ་ནི། བདེ་འགྲོ་དང་ངན་འགྲོ་སོ་སོར་ངེས་པ་ཡིན་ཅིང་། འབྲས་བུ་གཞན་གསུམ་ནི་སོ་སོར་མ་ངེས་ཏེ། རིན་ཆེན་ཕྲེང་བར། མི་དགེ་བ་བཅུའི་བདག་འབྲས་སོགས་བདེ་འགྲོའི་རྟེན་ལའང་འབྱུང་བར་གསུངས་ཤིང་། ངན་འགྲོའི་རྟེན་ལ་བདེ་བ་འབྱུང་བ་རྣམས་ཀྱང་། དགེ་བའི་འབྲས་བུ་ཡིན་པའི་ཕྱིར་རོ། །ལྔ་པ་ནི་གཞན་ཡང་ཞེས་སོགས་བདུན་ཏེ། ཀུན་བཏུས་ལས། གནག་ལ་རྣམ་པར་སྨིན་པ་གནག་པའི་ལས་གང་ཞེ་ན་གང་མི་དགེ་བའོ། །དཀར་ལ་རྣམ་པར་སྨིན་པ་དཀར་བའི་ལས་གང་ཞེ་ན། གང་ཁམས་གསུམ་པའི་དགེ་བའོ། །དཀར་གནག་ཏུ་གྱུར་ལ་རྣམ་པར་སྨིན་པ་དཀར་གནག་ཏུ་གྱུར་པ་གང་ཞེ་ན། འདོད་པ་དང་རབ་ཏུ་ལྡན་པ་འདྲེན་མ་སྟེ། བསམ་པས་གནག་ལ་སྦྱོར་བས་དཀར་བའམ། སྦྱོར་བས་གནག་ལ་བསམ་པས་དཀར་བའོ། །མི་གནག་ཅིང་དཀར་ལ། རྣམ་པར་སྨིན་པར་མི་འགྱུར་ཅིང་། ལས་ཟད་པར་འགྱུར་བའི་ལས་གང་ཞེ་ན། སྦྱོར་བ་དང་བར་ཆད་མེད་པའི་ལམ་རྣམས་ལ་ཟག་པ་མེད་པའི་ལས་སོ། །ཞེས་གསུངས་ཤིང་། འདིར་ནི་མདོ་ལས། གཅིག་ཏུ་དཀར་བའི་ལས་ནི། གཅིག་ཏུ་དཀར་བར་འགྱུར་རོ། །གཅིག་ཏུ་གནག་པའི་ལས་ནི་གཅིག་ཏུ་གནག་པར་འགྱུར་རོ། །འདྲེན་མ་རྣམས་ཀྱང་འདྲེན་མར་འགྱུར་རོ། །ཞེས་གསུངས་པ་ལྟར་གསུམ་དུ་མཛད་དོ། །འདྲེན་མའི་དོན་བསམ་སྦྱོར་གང་རུང་གཅིག་དཀར་ཞིང་གཅིག་གནག་པ་ལ་གསུངས་ཤིང་། དེས་བདེ་སྡུག་འདྲེན་མར་སྐྱེད་པ་དང་། གོང་དུ་བཞིར་དབྱེ་བའི་སྐབས་སུ། བསམ་པས་གནག་ཅིང་སྦྱོར་བས་དཀར་བ། སྡུག་བསྔལ་གྱི་རྒྱུ་དང་། སྦྱོར་བ་གནག་ཅིང་བསམ་པ་དཀར་བ་བདེ་བའི་རྒྱུར་གསུངས་པ་དང་འགལ་ལོ་སྙམ་ན། གོང་དུ་རྒྱུ་དུས་དང་དེ་དུས་ཀྱི་ཀུན་སློང་གཉིས་ཀ་དཀར་བ་ལ་བསམ་པ་དཀར་བར་མཛད་ཅིང་། འདིར་རྒྱུ་དུས་ཀྱི་ཀུན་སློང་ལ་བསམ་པ་དང་། དེ་དུས་ཀྱི་ཀུན་སློང་ལ་སྦྱོར་བར་དགོངས་པས་མི་འགལ་ལོ། །གསུམ་པ་ནི། འདི་འདྲའི་ཞེས་སོགས་བཞིའོ། །གཉིས་པ་ལོག་རྟོག་བྱེ་བྲག་ཏུ་དགག་པ་ལ་བཞི་སྟེ། བསྔོ་བའི་གནད་ལ་འཁྲུལ་པ་དགག་པ། འབྲས་བུ་དཀར་ནག་ཟང་ཐལ་དགག་པ། ཉམས་ལེན་ཡེ་བཀག་ཡེ་གནང་དགག་པ། འཕྲལ་གྱི་ལག་ལེན་འཁྲུལ་པ་དགག་པའོ། །དང་པོ་ལ་བཞི་སྟེ། བསྔོ་རྒྱུའི་དགེ་རྩ་ལ་འཁྲུལ་པ་དགག་པ། བསྔོ་ཚུལ་གྱི་ལག་ལེན་ལ་འཁྲུལ་པ་དགག་པ། བསྔོ་བའི་འབྲས་བུ་ལ་འཁྲུལ་པ་དགག་པ། དོན་བསྡུས་ཏེ་ལས་འབྲས་ཀྱི་གནད་བསྟན་པའོ། །དང་པོ་ལ་གཉིས་ཏེ་ཕྱོགས་སྔ་མ་བརྗོད་པ། དེ་དགག་པའོ། །དང་པོ་ནི་མུ་སྟེགས་ཞེས་སོགས་ཚིགས་བཅད་གསུམ་སྟེ། གྲངས་ཅན་པ་རྣམས་ནི། ཤེས་བྱ་ཉི་ཤུ་རྩ་ལྔར་གྲངས་ངེས་པར་འདོད་དེ། བདེ་སྡུག་བཏང་སྙོམས་གསུམ་མམ། རྡུལ་མུན་སྙིང་སྟོབས་གསུམ་ཆ་མཉམ་པའི་རྫས། རྟག་པ་གཅིག་པུ་གདོད་མ་ནས་གྲུབ་པ་ནི་གཙོ་བོ་དང་རང་བཞིན་ཞེས་བྱ་ལ། དེ་ལས་རྣམ་འགྱུར་ཉེར་གསུམ་འབྱུང་ཚུལ་ནི། ཡོན་ཏན་གསུམ་མི་མཉམ་པའི་གནས་སྐབས་ནི་ཆེན་པོ་དང་བློ་ཞེས་བྱ། དེ་ལས་བདག་ཏུ་རློམ་པའི་ང་རྒྱལ་འབྱུང་ངོ་། །དེ་ལ་རྡུལ་མུན་སྙིང་སྟོབས་ཤས་ཆེ་བའི་ང་རྒྱལ་རིགས་གསུམ་ལས། དང་པོ་ལས། མིག རྣ་བ། སྣ། ལྕེ། ལུས་ཏེ་བློའི་དབང་པོ་ལྔ་དང་། ཁ། ལག་པ། རྐང་པ། འདོམས། བཤང་ཁུང་སྟེ། ལས་ཀྱི་དབང་པོ་ལྔ་དང་། ཐུན་མོང་བ་ཡིད་དབང་དང་བཅུ་གཅིག་འབྱུང་ངོ་། །གཉིས་པ་ལས། གཟུགས་སྒྲ་དྲི་རོ་རེག་བྱ་འབྱུང་ཞིང་དེ་ལྔ་ལས་རིམ་པ་བཞིན་དུ་མེ་ནམ་མཁའ་ས་ཆུ་རླུང་སྟེ། འབྱུང་བ་ལྔ་སྐྱེ་ལ། གསུམ་པས་ནི་དེ་རྣམས་བསྐྱེད་པའི་གྲོགས་བྱེད་ཀྱི། འབྲས་བུ་གུད་ན་མེད་དོ། །དེ་ལ་རང་བཞིན་དོན་དམ་པ་ཡིན་ལ། རྣམ་འགྱུར་ཉེར་གསུམ་ནི་ཀུན་རྫོབ་པ་ཡིན་ཅིང་། དེ་ཐམས་ཅད་ཀྱང་བེམ་པོར་འདོད་དོ། །བདག་ཤེས་རིག་གི་སྐྱེས་བུ་ནི། རྟག་པ་གཅིག་བུ་རྣམ་འགྱུར་ལ་ལོངས་སྤྱོད་པ་པོ། བཅིངས་གྲོལ་གྱི་གཞིར་གྱུར་པ་ཡིན་ལ། འཆིང་བའི་ཚུལ་ནི། བློ་མེ་ལོང་ངོས་གཉིས་པ་ལྟ་བུའི་ཕྱོགས་གཅིག་ལ། རྣམ་འགྱུར་ཉེར་གསུམ་གྱི་གཟུགས་བརྙན་སྣང་ཞིང་། ཕྱོགས་གཅིག་ནས་ཤེས་རིག་གསལ་བར་ཤར་བ་གཅིག་ཏུ་འདྲེས་ནས། ལོག་པར་བཟུང་བའི་ཚུལ་གྱིས་འཁོར་བར་འཁྱམས་པ་ཡིན་ནོ། །གྲོལ་བའི་ཚུལ་ནི། རྣམ་འགྱུར་ཉེར་གསུམ་གཙོ་བོས་སྤྲུལ་པར་ནམ་ཞིག་ཤེས་པའི་ཚེ། གཙོ་བོ་ངོ་ཚ་བར་གྱུར་ཏེ། མི་གསལ་བར་བསྡུས་པ་བདག་གཅིག་པུར་གནས་པའི་ཚེ་གྲོལ་བར་འདོད་དོ། །དེས་ན་དགེ་སྡིག་གཙོ་བོའི་གཤིས་ལ་ཡོད་ཅིང་། འབྲས་བུ་ཐམས་ཅད་ཀྱང་རྒྱུ་དུས་ན་ཡོད་པ་ཁོ་ན་སྐྱེ་བར་འདོད་དེ། གྲངས་ཅན་གྱི་གཞུང་དུ། དགེ་དང་སྡིག་པ་ཇི་སྙེད་དང་། །འཁོར་བ་དང་ནི་གྲོལ་བ་དག །གཙོ་བོའི་ནང་ན་གདོད་ནས་ཡོད། །འོན་ཀྱང་ཐབས་ཀྱིས་གསལ་བར་འབྱིན། །འོ་མའི་དུས་ན་ཞོ་གང་དང་། །ཞོ་ཡི་དུས་ན་མར་ཉིང་གང་། །དྲག་པོ་ལེན་གྱིས་བཤད་པ་སྟེ། །འབིགས་བྱེད་གནས་པའང་དེ་སྐད་སྨྲ། །ཞེས་བཤད་དོ། །དེ་བཞིན་དུ་བོད་ཀྱི་ཞང་གཡུ་བྲག་པའི་ལམ་མཆོག་མཐར་ཐུག་ལས། པ་ན་སེ་ཡི་འབྲས་བུ་བཞིན། །རྒྱུ་དང་འབྲས་བུ་དུས་མཚུངས་ཡིན། །ལས་འཕྲོ་ཅན་གྱིས་རྟོགས་པར་འགྱུར། །ཞེས་རྒྱུའི་དུས་ན་འབྲས་བུ་ཡོད་པར་འདོད་ཅིང་། སངས་རྒྱས་ཕལ་པོ་ཆེ་ལས་གསུངས་པའི། རྡོ་རྗེ་རྒྱལ་མཚན་གྱི་བསྔོ་བའི་མདོ་དོན་འཆད་པ་ལ། གྲངས་ཅན་གཙོ་བོ་དང་རང་བཞིན་གཅིག་པའི་དགེ་བ་ཡོད་པར་འདོད་པ་བཞིན་ཇི་སྙེད་ཡོད་པ་དང་། ཞེས་པའི་དོན། སེམས་ཅན་རྣམས་ལ་གདོད་མ་ནས་རང་བྱུང་དུ་ཡོད་པའི་དགེ་བར་འདོད་ཅིང་། དེ་ཉིད་བདེར་གཤེགས་སྙིང་པོ་ཡང་ཡིན་ནོ། །ཞེས་ཟེར་ཞིང་། དེ་བཞིན་དུ་འབྲི་ཁུང་པ་ཡོད་པའི་དགེ་བ་དང་། རྒོད་ཚང་པ་གནས་པའི་དགེ་བ་དང་། སྟག་ལུང་པ་ལ་སོགས་པར་རང་བཞིན་གྱི་དགེ་བ་ཞེས་འཆད་དོ། །གཉིས་པ་ལ་ལྔ་སྟེ། ཆོས་དབྱིངས་བསྔོ་རྒྱུའི་སྙིང་པོར་འདོད་པ་དགག་པ། ཆོས་དབྱིངས་ལས་གཞན་པའི་ཁམས་བསྔོ་རྒྱུའི་སྙིང་པོར་འདོད་པ་དགག་པ། ཆོས་དབྱིངས་ལ་བསྔོ་རྒྱུའི་སྙིང་པོ་ཡིན་མིན་གྱི་དབྱེ་བ་ཡོད་པ་དགག་པ། དེས་ན་སྤྲོས་བྲལ་ལ་སྙིང་པོར་འཇོག་པའི་འཐད་པ། སྙིང་པོ་བསྒྲུབ་པའི་ཚུལ་གྱིས་ཡོད་པ་དྲང་དོན་དུ་བསྟན་པའོ། །དང་པོ་ལ་གསུམ་སྟེ། ལུང་རིགས་གཉིས་ཀྱིས་དགག དེའི་ཉེས་སྤོང་གི་ལན་དགག ལུང་ཚིགས་སྔ་ཕྱི་འགལ་བས་དགག་པའོ། །དང་པོ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། གྲངས་ཅན་ཞེས་སོགས་ཏེ། གྲངས་ཅན་གྱི་ལུགས་དང་མཚུངས་པའི་བསྔོ་རྒྱུའི་དགེ་བ་རྒྱུས་མ་བསྐྱེད་པར་དངོས་པོའི་གཤིས་ལ་ཡོད་པ་འདི་དགག་པར་བྱ། ཞེས་པའི་དོན་ཡིན་གྱི། ཁ་ཅིག་གྲངས་ཅན་འགོག་པ་ལ་སྦྱོར་བ་ནི། སྐབས་ཀྱི་དོན་མ་ཡིན་ཏེ། གྲངས་ཅན་ལུང་གིས་དགག་མི་ནུས་ཤིང་། འོག་ཏུ་མུ་སྟེགས་བྱེད་ཀྱི་ལུགས་འདིར་མི་འགོག་པར་གསུངས་པ་དང་འགལ་བའི་ཕྱིར་རོ། །གཉིས་པ་ལ་གཉིས་ཏེ། ཡིད་ཆེས་པའི་ལུང་གིས་དགག་པ། དངོས་སྟོབས་ཀྱི་རིགས་པས་དགག་པའོ། །དང་པོ་ལ་གསུམ་སྟེ། ཆོས་དབྱིངས་བསྔོ་རྒྱུའི་དགེ་བར་མི་འཐད་པའི་ལུང་དྲངས་པ། དེ་བཞིན་ཉིད་ལ་དགེ་བར་གསུངས་པའི་ལུང་དོན་བཤད་པ། འཁྲུལ་གཞིའི་ལུང་དོན་ཇི་ལྟར་འཆད་པའི་ཚུལ་ལོ། །དང་པོ་ལ་གསུམ་སྟེ། ཆོས་དབྱིངས་བསྔོ་བས་མི་འགྱུར་བའི་ལུང་། ཆོས་དབྱིངས་ལ་དགེ་སྡིག་མེད་པའི་ལུང་། ཞར་ལ་སྙིང་པོའི་སྦྱོང་བྱེད་སྙིང་པོར་འདོད་པ་དགག་པའོ། །དང་པོ་ནི་དེ་སྐད་དུ་ཡང་ཞེས་སོགས་བཅུ་བདུན་ཏེ། གཞུང་ཁ་ཅིག་ལས། བདེར་གཤེགས་སྙིང་པོ་ཞེས་བྱ་བ། །ཆོས་དབྱིངས་འགྱུར་མེད་ཉིད་ལ་གསུངས། །དེ་སྐད་དུ་ཡང་རྒྱུད་བླ་ལས། ཞེས་འབྱུང་བ་ལྟར་ན། རང་བྱུང་དུ་གྲུབ་པའི་བསྔོ་རྒྱུའི་དགེ་རྩ་དེ་བདེར་གཤེགས་སྙིང་པོར་མི་འཐད་དེ། བདེར་གཤེགས་སྙིང་པོ་ནི་སེམས་ཀྱི་ཆོས་དབྱིངས་སྤྲོས་པ་དང་བྲལ་བ་ལ་གསུངས་ཤིང་། དེ་ནི་བསྔོ་བས་གཞན་དུ་མི་འགྱུར་བའི་ཕྱིར་ཏེ། རྒྱུད་བླ་དང་། དཔལ་ཕྲེང་གི་མདོ་དང་། རྩ་བ་ཤེས་རབ་དང་། ཤེར་ཕྱིན་གྱི་མདོ་བཞི་ལས། དེ་ལྟར་དུ་གསུངས་པའི་ཕྱིར་རོ། །ལུང་དང་པོ་ནི། སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཡང་དག་མིན་རྟོག་ལས་བྱུང་འདོད་ཆགས་སོགས། །གློ་བུར་དྲི་མས་དེ་ཉོན་མོངས་མི་འགྱུར། །ཞེས་སོ། །ལུང་གཉིས་པ་ནི། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ལ་ནི། སྐྱེ་བའམ་འགུམ་པའམ་འཕོ་བའམ། འབྱུང་བ་ཡང་མ་མཆིས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི། འདུས་བྱས་ཀྱི་མཚན་ཉིད་ཀྱི་ཡུལ་ལས་འདས་པ་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་རྟག་པ་དང་། བརྟན་པ་དང་། ཐེར་ཟུག་པ་ལགས་སོ། །ཞེས་གསུངས་སོ། །ལུང་གསུམ་པའི་དོན་ནི། སེམས་ཅན་གྱི་ཆོས་ཉིད་སངས་རྒྱས་པའི་ཚེ་ན་ཡང་གཞན་དུ་མི་འགྱུར་བས་ཆོས་དབྱིངས་གཞན་དུ་མི་འགྱུར་བར་གྲུབ་པ་སྟེ། རྒྱུད་བླར། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པ་ཆོས་ཉིད་དོ། །ཞེས་གསུངས་པ་དང་མཐུན་ནོ། །ལུང་བཞི་པ་ནི། བརྒྱད་སྟོང་པ་ལས། འདི་ལྟར་ཆོས་ཐམས་ཅད་ཀྱི་ཆོས་ཉིད་གང་ཡིན་པ་དེ་ནི་འདས་པ་ཡང་མ་ཡིན་མ་འོངས་པ་ཡང་མ་ཡིན་ད་ལྟར་བྱུང་བ་ཡང་མ་ཡིན། གང་འདས་པ་དང་མ་འོངས་པ་དང་། ད་ལྟར་བྱུང་བ་ཡང་མ་ཡིན་པ་དེ་ནི་དུས་གསུམ་ལས་རྣམ་པར་གྲོལ་བའོ། །གང་དུས་གསུམ་ལས་རྣམ་པར་གྲོལ་བ་དེ་ནི་ཡོངས་སུ་བསྔོ་བར་བྱ་མི་ནུས་ཤིང་། དེ་བཞིན་དམིགས་པ་དང་རྟོག་པ་དང་རྣམ་པར་ཤེས་པར་བྱ་བ་མ་ཡིན་ནོ། །ཞེས་གསུངས་སོ། །གཉིས་པ་ནི། ཡང་དག་པར་སྦྱོར་བའི་ཞེས་སོགས་བཅུ་དགུ་སྟེ། ཆོས་དབྱིངས་རང་གི་ངོ་བོ་དགེ་སྡིག་གང་དུ་ཡང་མ་གྲུབ་སྟེ། སམྦུ་ཊ་དང་། རིན་ཆེན་ཕྲེང་བར་དེ་ལྟར་དུ་གསུངས་པའི་ཕྱིར་རོ། །ལུང་དང་པོའི་དོན་ནི། སྡིག་པ་དང་བསོད་ནམས་ཀྱི་ཆ་གཉིས་སྤྲོས་པའི་རྣམ་རྟོག་ལས་མ་འདས་པས། མཁས་པས་གནས་ལུགས་ཀྱི་དོན་བསྒོམ་པའི་ཚེ། སྤྲོས་པའི་མཐའ་འདི་གཉིས་རྣམ་པར་སྤངས་ཞེས་པའི་དོན་ནོ། །དེ་བཞིན་དུ་གསང་འདུས་རྩ་རྒྱུད་དུ། ཆོས་ཐམས་ཅད་ནམ་མཁའི་རྡོ་རྗེའི་དམ་ཚིག་ཏུ་མཚུངས་པའི་ཕྱིར། གཟུགས་ཀྱི་ཕུང་པོ་མ་ཡིན་ནོ། །ཞེས་པ་ནས། འདོད་ཆགས་ཞེ་སྡང་གཏི་མུག་མ་ཡིན། ཆོས་མ་ཡིན། ཆོས་མིན་པའང་མིན། ཞེས་པ་དང་། ཀྱེ་རྡོ་རྗེར། བསྒོམ་མེད་སྒོམ་པ་པོ་ཡང་མེད། །ལྷ་མེད་སྔགས་ཀྱང་ཡོད་མ་ཡིན། །ཞེས་དང་། ཕྱག་རྡོར་དབང་བསྐུར་བའི་རྒྱུད་ལས། ཡོད་ཅེས་བྱ་བའམ་མེད་ཅེས་བྱ་བའམ་བསོད་ནམས་ཞེས་བྱ་བའམ། བསོད་ནམས་མ་ཡིན་པ་ཞེས་བྱ་བའམ། མྱ་ངན་ལས་འདས་པ་ཞེས་བྱ་བའམ་ཐ་དད་པ་ཞེས་བྱ་བ་མེད་དོ། །ཞེས་གསུངས་སོ། །ལུང་གཉིས་པའི་དོན་ནི། ཟབ་མོ་སྟོང་པ་ཉིད་ནི་སྡིག་པ་དང་བསོད་ནམས་ཀྱི་བྱ་བ་ལས་འདས་ཤིང་། སོ་སོ་སྐྱེ་བོས་ཚིག་ཙམ་གྱིས་བགྲོལ་བའི་དོན་དང་ལྡན་ཞིང་། གཞན་མུ་སྟེགས་བྱེད་དང་། རང་ཉིད་ཀྱི་ཉན་ཐོས་དང་རང་སངས་རྒྱས་ཀྱིས་ཀྱང་སྐྲག་པའི་སྒོ་ནས་མྱངས་པའི་གནས་མ་ཡིན་པ་ཞེས་དང་། སྟོང་ཉིད་རྟོགས་པའི་ཤེས་པས་ཡོད་འཛིན་དང་མེད་འཛིན་ཞི་བའི་ཕྱིར་ན། སྡིག་པ་དང་བསོད་ནམས་ཀྱི་རྣམ་རྟོག་ལས་འདས་པའི་བློ་དེ་ཡིས་བདེ་འགྲོ་དང་ངན་འགྲོ་ལས་ཐར་བའི་ཐར་པ་དམ་པ་ཐོབ་པར་བཞེད་ཞེས་པའི་དོན་ནོ། །གསུམ་པ་ནི། ཁ་ཅིག་ཞེས་སོགས་བཅུ་གཅིག་སྟེ། སྟོད་ལུང་རྒྱ་དམར་ནི། སྟོང་ཉིད་སྙིང་རྗེའི་སྙིང་པོ་བདེར་གཤེགས་སྙིང་པོ་ཡིན་ཅིང་། དེ་ཉིད་བསྔོ་རྒྱུའི་དགེ་རྩ་ཡིན་ནོ་ཞེས་འདོད་དོ། །དེའི་ལན་རྣམས་ནི་གོ་སླ་ལ། མདོ་རྒྱུད་ཀུན་ལས་གསུངས་པ་ནི། བློ་གྲོས་རྒྱ་མཚོས་ཞུས་པའི་མདོ་ལས། རིན་པོ་ཆེའི་དཔེས་དྲི་མ་འདག་པ་དང་འདྲ་བར། རྒྱས་འགྱུར་གྱི་རིགས་ཀྱིས་རང་བཞིན་གནས་རིགས་ཀྱི་དྲི་མ་སྦྱོང་བར་གསུངས་པ་དང་། གུར་ལས། སྟོང་ཉིད་སྙིང་རྗེ་ཐ་དད་མེད། །གང་དུ་སེམས་ནི་རྣམ་བསྒོམས་པ། །དེ་ནི་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །ཞེས་གསུངས་སོ། །གཞན་ཡང་སེམས་ཀྱི་སྒྲིབ་སྦྱོང་ལས། དངུལ་ཆུས་རེག་པའི་ཟངས་ལ་ནི། །ཇི་ལྟར་སྐྱོན་མེད་གསེར་དུ་འགྱུར། །དེ་བཞིན་ཡང་དག་ཡེ་ཤེས་ཀྱིས། །སྦྱངས་པས་ཉོན་མོངས་ཟད་པར་བྱེད། །ཞེས་གསུངས་སོ། །གཉིས་པ་ལ་ལྔ་སྟེ། ལུང་ལས་ཇི་ལྟར་བཤད་པའི་ཚུལ། དེའི་དགོངས་པ་བཤད་པ། དེ་ཉིད་དཔེའི་སྒོ་ནས་བསྒྲུབ་པ། གཞན་དུ་རྟོགས་ན་ཧ་ཅང་ཐལ་བ། ཞར་ལ་གཤིས་ཀྱི་དགེ་བ་གཞན་དགག་པའོ། །དང་པོ་ནི། མངོན་པའི་གཞུང་ལས་ཞེས་སོགས་དགུ་སྟེ། ཀུན་ལས་བཏུས་ལས། ངོ་བོ་ཉིད་ཀྱི་དགེ་བ་གང་ཞེ་ན་དད་པ་ལ་སོགས་པ་སེམས་ལས་བྱུང་བའི་ཆོས་བཅུ་གཅིག་གོ །ཞེས་དང་། དོན་དམ་པའི་དགེ་བ་གང་ཞེ་ན་དེ་བཞིན་ཉིད་དོ་ཞེས་དང་། དོན་དམ་པར་མི་དགེ་བ་གང་ཞེ་ན་འཁོར་བ་ཐམས་ཅད་དོ་ཞེས་དང་། དོན་དམ་པར་ལུང་དུ་མ་བསྟན་པ་གང་ཞེ་ན། ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པའོ། །ཞེས་གསུངས་སོ། །འདིར་ཀུན་ལས་བཏུས་ཉན་ཐོས་ཀྱི་གཞུང་དུ་མཛད་པ་ནི། མངོན་རྟོགས་ལྗོན་ཤིང་ལས། མདོ་སྡེ་པའི་གྲུབ་མཐའ་སྟོན་བྱེད་ཡིན་པར་བཤད་པ་ལྟར་བཞེད་པ་ཡིན་གྱི། མཛོད་ལ་འཁྲུལ་པར་མི་བྱ་སྟེ། དེར་དགེ་བ་བཅུ་གཅིག་གི་ཐ་སྙད་མ་གསུངས་ཤིང་། ངོ་བོ་ཉིད་ཀྱི་དགེ་བ་ནི། དགེ་བའི་རྩ་བ་གསུམ་དང་། ངོ་ཚ་ཤེས་པ་དང་ཁྲེལ་ཡོད་པ་གཉིས་ལ་གསུངས་པའི་ཕྱིར་རོ། །གཉིས་པ་ནི། དེ་བཞིན་ཉིད་ལ་ཅེས་སོགས་བཅུ་གསུམ་སྟེ། ཀུན་ལས་བཏུས་ལས། དེ་བཞིན་ཉིད་ལ་དགེ་བའི་མིང་གིས་གསུངས་པ་བཏགས་པ་བར་འཆད་པ་སྟེ་གོ་སླའོ། །གསུམ་པ་ནི། གཞན་ཡང་ཞེས་སོགས་དགུ་སྟེ། ཀུན་བཏུས་སུ། ཟས་ཀྱིས་འགྲངས་ནས་རེ་ཞིག་ཟས་ལ་མི་འཕྲོད་པར་འཛིན་པ། ཉེ་བར་བརྟེན་པས་འདོད་ཆགས་དང་བྲལ་བ་དང་། འཁྲིག་པ་སྤྱད་གྲགས་ནས་རེ་ཤིག་མི་འཕྲོད་པར་འཛིན་པ། གནོད་པས་འདོད་ཆགས་དང་བྲལ་བ་སོགས་གསུངས་ཀྱང་། ཆགས་བྲལ་མཚན་ཉིད་པ་མ་ཡིན་པ་དེ་བཞིན་དུ་ཆོས་ཀྱི་དབྱིངས་ལ་སོགས་སོ། །བཞི་པ་ནི། ཅི་ནས་ཞེས་སོགས་བདུན་ནོ། །ལྔ་པ་ནི། ལ་ལ་བྱམས་དང་ཞེས་སོགས་བདུན་ཏེ། བཀའ་གདམས་པ་ལ་ལ་བྱམས་པ་དང་སྙིང་རྗེ་ཡང་། ཐབས་མཁས་ལ་མ་ལྟོས་པར་གཤིས་ཀྱི་དགེ་བ་ཡིན་ནོ་ཞེས་ཟེར་རོ། །དེ་ཡང་དེ་ལྟར་མ་ངེས་ཏེ། མཛངས་བླུན་ལས། ཞལ་ཏ་བས་དགེ་འདུན་དབྱར་གནས་པའི་མཐུན་རྐྱེན་གྱི་རིན་པོ་ཆེ་མང་པོ་སྦྱིན་བདག་གིས་ཕུལ་བ་རྣམས། རང་གི་ཉེ་དུ་དང་། ཡིད་མཐུན་པ་རྣམས་ལ་ཕན་འདོགས་པའི་བློས་བྱིན་པས། ཞལ་ཏ་བ་ནི་ལྗོན་ཤིང་ལྟ་བུའི་སེམས་ཅན་དམྱལ་བར་གྱུར་ཏོ། །གཞན་རྣམས་ཤིང་གི་སྲིན་འབུར་གྱུར་ནས་ཟ་ཞིང་ཐམས་ཅད་དམྱལ་བའི་མེས་བསྲེག་པར་གྱུར་པར་བཤད་དོ། །གསུམ་པ་ལ་གསུམ་སྟེ། འཆད་ཚུལ་མདོར་བསྟན། གཞན་གྱི་འཆད་ཚུལ་དགག རང་ཉིད་ཇི་ལྟར་འཆད་པའི་ཚུལ་ལོ། །དང་པོ་ནི། ཆོས་དབྱིངས་བསྔོ་བས་མི་འགྱུར་བར་བསྒྲུབས་ཟིན་པ་དེས་ན་འགྲོ་བ་ཞེས་སོགས་ཚིགས་བཅད་གཅིག་གོ །གཉིས་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། གལ་ཏེ་དེ་ལྟ་མ་ཡིན་པར། །འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་པའི་དོན། ཆོས་དབྱིངས་ཡིན་ན་ཞེས་སོགས་གསུམ་མོ། །གཉིས་པ་ལ་གསུམ་སྟེ། ཇི་སྙེད་ཀྱི་སྒྲ་མི་འཐད་པར་ཐལ་བ། ཡོད་ཅེས་བྱ་བའི་སྒྲ་མི་འཐད་པར་ཐལ་བ། འགྲོ་ཀུན་གྱི་སྒྲ་མི་འཐད་པར་ཐལ་བའོ། །དང་པོ་ནི་དེ་ཡི་རྒྱུ་མཚན་ཞེས་སོགས་ཚིགས་བཅད་གཅིག་སྟེ། བསྔོ་རྒྱུའི་དགེ་བ་དེ་ལ་ཇི་སྙེད་ཀྱི་སྒྲ་མི་འཇུག་པར་འགྱུར་ཏེ། ཇི་སྙེད་ཀྱི་སྒྲ་ནི་མང་པོའི་སྒྲ་ཡིན་ཅིང་། ཆོས་དབྱིངས་ལ་མང་ཉུང་མེད་པའི་ཕྱིར་ཏེ། མང་ཉུང་གི་སྤྲོས་པ་དང་བྲལ་བའི་ཕྱིར་རོ། །གཉིས་པ་ནི། ཆོས་དབྱིངས་ཡོད་པའང་ཞེས་སོགས་ཚིགས་བཅད་བརྒྱད་དེ། ཆོས་དབྱིངས་རང་གི་ངོ་བོ་ཡོད་པའང་མ་ཡིན་ཏེ། རང་གི་ངོ་བོ་ཡོད་ཙམ་ལ་མི་རྟག་པས་ཁྱབ་པར་ཆོས་ཀྱི་གྲགས་པས་གསུངས་པའི་ཕྱིར་ཏེ། རྣམ་འགྲེལ་ལས། འཇིག་ལ་འབྲས་དང་ཡོད་ཉིད་བཞིན། །ཅེས་དང་། འཇིག་པ་ཡོད་ཙམ་འབྲེལ་པ་ཅན། །ཉིད་ཕྱིར་སྒྲ་ནི་མི་རྟག་ཉིད། །ཅེས་གསུངས་པའི་ཕྱིར་རོ། །རྩ་བ་ཤེས་རབ་ཀྱི་ལུང་བཞི་ལས། དང་པོ་ནི། ཡོད་པ་དང་དངོས་པོ་དོན་གཅིག་ཏུ་བྱས་ནས། དེ་ལ་འདུས་བྱས་ཀྱིས་ཁྱབ་པས་ན། ཆོས་དབྱིངས་ཡོད་པ་མ་ཡིན་པར་བསྟན་ཏོ། །དེ་ཡང་སྤྱིར་ཡོད་པ་ལ་ཆོས་གཞན་བསལ་བའི་སྒོ་ནས་ཡོད་པར་བློས་འཇོག་པ་གཞན་སེལ་གྱི་ཡོད་པ་དང་། ཆོས་གཞན་བསལ་བ་ལ་མ་ལྟོས་པར་རང་གི་ངོ་བོ་ཡོད་པ་གཉིས་ལས། ཕྱི་མ་ལ་མི་རྟག་པས་ཁྱབ་པ་ནི། མདོ་སྡེ་པས་ཀྱང་འདོད་དེ། ཡེ་ཤེས་སྙིང་པོ་ཀུན་ལས་བཏུས་ལས། མདོ་སྡེ་པའི་གྲུབ་མཐའ་འཆད་པའི་སྐབས་སུ། ནམ་མཁའ་མོ་གཤམ་བུ་འདྲ་ལ། །ཞེས་དང་། དེའི་འགྲེལ་པར། འདུས་མ་བྱས་བཏགས་པའི་ཡོད་པར་བསྟན་ཏེ། བཏགས་པའི་ཡོད་པ་ནི་མིང་ཙམ་སྟེ། ཞེས་གསུངས་སོ། །ལུང་ཕྱི་མ་གསུམ་གྱིས་ནི། ཆོས་དབྱིངས་ཡོད་མེད་སོགས་མཐའ་བཞི་གང་དུ་བཟུང་ན་ཡང་། མཐར་འཛིན་གྱི་སྤྲོས་པ་ལས་མ་འདས་པས། སངས་རྒྱས་ཀྱི་བསྟན་པའི་སྙིང་པོ་སྤྲོས་བྲལ་གྱི་ལྟ་བ་ལ་གུས་པར་བྱེད་ན། མཐའ་བཞི་གང་དུ་ཡང་མ་བཟུང་ཞིག་ཅེས་པའོ། །དེང་སང་མཐར་འཛིན་གྱི་ལྟ་བ་གཅིག་ལ་མ་སླེབ་ཀྱི་བར་དུ་དབུ་མའི་ལྟ་བ་འཇོག་མི་ཤེས་པའི་བོད་རྣམས་ཀྱི་ནི་ཇི་སྐད་བཤད་པའི་ལུང་རྣམས་དང་། གཞན་ཡང་རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱུང་བར་གསུངས། །གང་དག་སྟོང་པ་ཉིད་ལྟ་བ། །དེ་དག་བསྒྲུབ་ཏུ་མེད་པར་གསུངས། །ཞེས་དང་དཀོན་མཆོག་བརྩེགས་པ་ལས་ཡོད་ཅེས་བྱ་བ་ནི་མཐའ་གཅིག་གོ །མེད་ཅེས་བྱ་བ་ནི་མཐའ་གཉིས་པའོ། །ཞེས་དང་། ཡེ་ཤེས་སྙིང་པོ་ཀུན་ལས་བཏུས་ལས། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཀྱང་མིན་པས། །མཐའ་བཞི་ལས་གྲོལ་དབུ་མ་པ། །མཁས་པ་རྣམས་ཀྱི་དེ་ཁོ་ནའོ། །ཞེས་དང་། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་བརྗོད། །ཞེས་སོགས་སྤྲོས་བྲལ་གྱི་ལྟ་བ་སྟོན་པའི་དབུ་མའི་གཞུང་ཆེན་པོ་རྣམས་ཀྱི་དོན། བློར་མ་ཆུད་པར་བརྗོད་མེད་ལ་བརྗོད་པ་དང་། སྤྲོས་མེད་ལ་སྤྲོས་པ་དང་། ནོར་མེད་ལ་ནོར་དུ་བཟུང་བ་ཡིན་པས་དུག་གི་མེ་ཏོག་ལྟར་རྒྱང་རིང་དུ་སྤང་བར་བྱའོ། །དེས་ན་བསྟན་པར་བྱ་བའི་སྤྲོས་བྲལ་ལ། རིགས་མི་འདྲ་བའི་དབྱེ་བ་མེད་ཀྱང་། གདུལ་བྱའི་བློ་དང་འཚམས་པར་གྲུབ་མཐའ་བཞི་ལ་ལྟ་བའི་རིམ་པ་ཇི་ལྟར་བསྟན་པའི་ཚུལ་དང་། མཐར་ཐུག་སྤྲོས་བྲལ་གྱི་ལྟ་བ་ལ་ཇི་ལྟར་སྦྱོར་བའི་ཚུལ། སྙིགས་དུས་ཀྱི་རྡོ་རྗེ་འཆང་ཆེན་པོ་གྲགས་པ་རྒྱལ་མཚན་གྱིས། མངོན་པར་རྟོགས་པ་རིན་པོ་ཆེའི་ལྗོན་ཤིང་ལས་གསུངས་པ་རྣམས་བླ་མ་དམ་པའི་དྲུང་དུ་ཉན་པར་བྱའོ། །ཆོས་དབྱིངས་ཡོད་པ་མ་ཡིན་པར་རིགས་པས་བསྒྲུབ་པ་ནི། རིགས་པས་ཀྱང་ནི་ཞེས་སོགས་སོ། །གསུམ་པ་ནི། གཞན་ཡང་ཡོད་པའི་ཞེས་སོགས་དྲུག་སྟེ། འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་པའི་དགེ་བ་དེ་ཆོས་དབྱིངས་ཡིན་ན་འགྲོ་ཀུན་དགེ་བ་ཞེས་དམིགས་ཀྱིས་བསལ་མི་དགོས་པར་འགྱུར་ཏེ། བེམ་པོ་དང་འཕགས་པའི་ཆོས་དབྱིངས་ཀྱང་བསྔོ་རྒྱུ་ཡིན་པའི་ཕྱིར་རོ། །གསུམ་པ་ལ་གསུམ་སྟེ། ལུང་དོན་ཕྱིན་ཅི་མ་ལོག་པར་བཤད་པ། དེ་ཉིད་དཔེའི་སྒོ་ནས་བསྒྲུབ་པ། ལུང་གི་སྒོ་ནས་བསྒྲུབ་པའོ། །དང་པོ་ནི། དེས་ན་གཞུང་དེའི་ཞེས་སོགས་བཅུ་གསུམ་སྟེ། སྤྱིར་བཏང་དམིགས་བསལ་ལ་སྦྱར་བ་དང་། རང་གཞན་ལ་སྦྱར་བ་དང་། མདོར་བསྟན་རྒྱས་བཤད་ལ་སྦྱར་བ་གསུམ་སྟེ་གོ་སླའོ། །གཉིས་པ་ནི། དཔེར་ན་འགྲོ་བ་ཞེས་སོགས་དགུ་སྟེ། འདི་ནི་བསྔོ་རྒྱུའི་དགེ་བ་དང་བཤགས་པར་བྱ་རྒྱུའི་སྡིག་པ་གཉིས་ག་ཡང་། སྐྱེས་བུས་རྩོལ་བས་བསྒྲུབ་པར་མཚུངས་པར་སྟོན་པའི་ཆེད་དུ་གསུངས་པ་ཡིན་གྱི། བཤགས་པ་བྱེད་ཚུལ་འདི་ལྟ་བུ་ཡོད་པ་ནི་མ་ཡིན་ཏེ། བཤགས་པ་རྣམ་དག་ལ་ཕྱིན་ཆད་སྡིག་པ་མི་བྱེད་པའི་སྡོམ་སེམས་དགོས་པའི་ཕྱིར་རོ། །གསུམ་པ་ནི། རྡོ་རྗེ་ཞེས་སོགས་གཉིས་ཏེ། རྡོ་རྗེ་རྒྱལ་མཚན་གྱི་བསྔོ་བའི་ཆོ་ག་ལས། ཕྱོགས་བཅུའི་འཇིག་རྟེན་ཁམས་ན་ཡོད་པ་ཡི། །དགེ་བ་དེ་དག་ཡང་དག་བསྒྲུབ་པས་ན། །འགྲོ་བ་ཀུན་ལ་ཕན་དང་བདེ་སེམས་ཀྱིས། །ཡེ་ཤེས་མཁས་པ་དེ་དག་ཡོངས་སུ་བསྔོ། །ཞེས་གསུངས་སོ། །གཉིས་པ་དངོས་སྟོབས་ཀྱི་རིགས་པས་དགག་པ་ནི་ཆོས་དབྱིངས་དགེ་བར་ཞེས་སོགས་ཚིགས་བཅད་ཕྱེད་དང་དྲུག་སྟེ། མདོ་ལས་དེ་བཞིན་གཤེགས་པ་རྣམས་འཇིག་རྟེན་དུ་བྱོན་ཡང་རུང་། མ་བྱོན་ཡང་རུང་། ཆོས་རྣམས་ཀྱི་ཆོས་ཉིད་འདི་ནི་གནས་པ་ཡིན་ནོ། །ཞེས་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ནི། བསྟན་ཀྱང་མི་འཕེལ་མ་བསྟན་ཀྱང་མི་འགྲིབ་བོ་ཞེས་གསུངས་སོ། །རྩ་བ་ཤེས་རབ་ཀྱི་ལུང་དང་པོའི་དོན་ནི། རང་བཞིན་དང་ཆོས་དབྱིངས་གཅིག་ཏུ་བྱས་ནས། དེ་རྒྱུ་རྐྱེན་ལས་བྱུང་བ་ཡིན་ན་གློ་བུར་དུ་བྱས་པ་ཅན་དུ་འགྱུར་ཞིང་། དེ་ཡང་མི་རུང་སྟེ། རང་བཞིན་གྱི་དོན་ནི་མ་བཅོས་པ་དང་། གཞན་ལ་ལྟོས་པ་མེད་པ་ཡིན་པའི་ཕྱིར་རོ། །རྒྱུ་མཚན་དེས་ན་རང་བཞིན་བསྔོ་བས་བསྒྱུར་དུ་མི་རུང་ངོ་། །ལུང་གཉིས་པའི་དོན་ནི། རང་བཞིན་གཞན་དུ་འགྱུར་བ་མི་སྲིད་དེ། རང་བཞིན་གྱིས་ཡོད་ན་ཕྱིས་མེད་པ་ཉིད་དུ་མི་འགྱུར་བའི་ཕྱིར་རོ། །དེས་ན་རང་བཞིན་བསྔོ་རྒྱུར་མི་རུང་ངོ་། །གསུམ་པ་དོན་བསྡུ་བ་ནི། དེ་ལ་སོགས་པའི་ཞེས་སོགས་གཉིས་སོ། །གཉིས་པ་དེའི་ཉེས་སྤོང་གི་ལན་དགག་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི་གལ་ཏེ་ཆོས་ཉིད་ཞེས་སོགས་བཞི་སྟེ། ཆོས་ཉིད་དེ་བཞིན་ཉིད་བསྔོ་བས་བསྒྱུར་དུ་མི་རུང་ཡང་། དེ་སངས་རྒྱས་ཐོབ་པའི་རྒྱུར་གྱུར་ཅིག་སྙམ་པའི་བསམ་པས་བསྒྱུར་ན་བྱང་ཆུབ་སེམས་དཔའི་བློ་སྦྱོང་དུ་འགྱུར་བས་ཉེས་པ་མེད་དོ་སྙམ་ན། གཉིས་པ་ལ་བཞི་སྟེ། དམིགས་བཅས་ཀྱི་བསྔོ་བ་དུག་ཅན་དུ་བསྟན་པ། དམིགས་མེད་ཀྱི་བསྔོ་བ་བློ་སྦྱོང་དུ་བསྟན་པ། དམིགས་བཅས་ཀྱི་བསྔོ་བ་བློ་སྦྱོང་དུ་མི་རུང་བའི་རྒྱུ་མཚན། དམིགས་མེད་དམིགས་པར་བྱས་ན་ཧ་ཅང་ཐལ་བའོ། །དང་པོ་ནི་མ་ཡིན་འདི་ལ་ཞེས་སོགས་དྲུག་སྟེ། ཆོས་དབྱིངས་བློས་དགེ་རྩར་བསྒྱུར་ན་དམིགས་པའི་འདུ་ཤེས་ཅན་དུ་འགྱུར་ཏེ། མཐའ་བཞིའི་སྤྲོས་པ་མཐའ་དག་མ་བཀག་ན་ཆོས་དབྱིངས་ཀྱི་དོན་མེད་ལ། དེ་བཀག་པ་བྱང་ཆུབ་ཀྱི་རྒྱུར་གྱུར་ཅིག་སྙམ་དུ་དམིགས་ན། དམིགས་མེད་དམིགས་པར་བཟུང་བ་ཡིན་པས། འདུས་བྱས་ཀྱི་དགེ་རྩ་བསྔོས་པའི་བསྔོ་བ་ཐམས་ཅད་ཀྱང་དེས་དྲི་མ་ཅན་ཏུ་བསྒྱུར་ཏེ། དཔེར་ན་ཁྲོན་པའི་ནང་གི་སྦལ་པ་གཅིག་ལ་རྨ་བྱུང་ན་དེའི་རྨ་རུལ་བས་སྦལ་པ་གཞན་རྣམས་ཀྱང་རུལ་བར་བྱེད་པ་བཞིན་ནོ། །གཉིས་པ་ནི། ཆོས་ཉིད་སྤྲོས་བྲལ་ཞེས་སོགས་ལྔ་སྟེ། ཚིག་རྐང་དང་པོས་བསྔོ་བའི་རྣམ་པ་བསྟན། གཉིས་པས་བསྔོ་རྒྱུའི་དགེ་རྩ་བསྟན། གསུམ་པ་དང་བཞི་པས་དགོས་ཆེད་བསྟན། ཁྱད་ཆོས་དེ་ལྟ་བུ་དང་ལྡན་པ་ནི་བསྔོ་བ་རྣམ་དག་གོ །བསྔོ་བའི་ཚིག་ནི་བདག་ཉིད་ཆེན་པོ་འདིས། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་འདེབས། །སྐྱབས་སུ་འགྲོ་ཞིང་བྱང་ཆུབ་སེམས་བསྐྱེད་ཀྱི། །བདག་དང་གཞན་གྱི་དགེ་བ་ཅི་མཆིས་པ། །འཁོར་གསུམ་ཡོངས་སུ་དག་པའི་ཤེས་རབ་ཀྱིས། །ཡོད་མེད་ལ་སོགས་དམིགས་པའི་དུག་སྤངས་ནས། །འཁོར་དང་མྱ་ངན་འདས་ལ་མི་སྨོན་པར། །འགྲོ་བའི་དོན་དུ་སངས་རྒྱས་མྱུར་ཐོབ་ཤོག །ཅེས་གསུངས་པ་ལྟར་བྱའོ། །གསུམ་པ་ནི། ཆོས་ཉིད་བསྔོ་རྒྱུར་ཞེས་སོགས་བཅུ་བདུན་ཏེ། མདོ་སྡུད་པར། གལ་ཏེ་མཚན་མར་བྱེད་ན་དེ་ནི་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲ་རྒྱལ་བས་གསུངས། །ཞེས་དང་མངོན་རྟོགས་རྒྱན་ལས་ཀྱང་། ཉན་རང་ལས་ཁྱད་པར་དུ་འཕགས་པ་ཅན་གྱི་ཡོངས་སུ་བསྔོ་བ་ནི་མི་དམིགས་པ་དང་ཕྱིན་ཅི་མ་ལོག་པ་དང་། རང་བཞིན་གྱི་དོན་བྱེད་པའི་མཚན་ཉིད་གསུམ་དང་ལྡན་པར་གསུངས་ཤིང་། བརྒྱད་སྟོང་པར་དམིགས་པའི་འདུ་ཤེས་ཅན་ལ་ཡོངས་སུ་བསྔོ་བ་མེད་དོ། །དེ་ཅིའི་ཕྱིར་ཞེ་ན་དམིགས་པ་ནི་དུག་དང་བཅས་པའོ། །ཞེས་པ་དང་། རྒྱུད་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །མི་རྟོག་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་འགྱུར། །ཞེས་གསུངས་པ་ཐམས་ཅད་དམིགས་པ་དང་བཅས་པའི་བསྔོ་བ་རྣམ་དག་ཏུ་མི་རུང་བའི་ལུང་དུ་མཐུན་ནོ། །བཞི་པ་ནི། གང་དག་དམིགས་པ་ཞེས་སོགས་བདུན་ནོ། །གསུམ་པ་ལུང་ཚིག་སྔ་ཕྱི་འགལ་བས་དགག་པ་ནི། གཞན་ཡང་ཆོས་ཉིད་ཞེས་སོགས་ལྔ་སྟེ། མདོ་དེ་ཉིད་དུ་ཆོས་ཉིད་མི་འགྱུར་བདེན་པའི་བྱིན་རླབས་དང་། ཞེས་ཆོས་ཉིད་མི་འགྱུར་བར་བཤད་པ་དང་། ཁྱོད་ཀྱིས་ཆོས་ཉིད་དེ་བསྔོ་བས་བསྒྱུར་བ། འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་པའི་ལུང་གི་དོན་དུ་འདོད་པས་གོང་འོག་འགལ་བར་འགྱུར་རོ། །གཉིས་པ་ཆོས་དབྱིངས་ལས་གཞན་པའི་ཁམས་བསྔོ་རྒྱུའི་དགེ་བར་འདོད་པ་དགག་པ་ལ་གཉིས་ཏེ། བདེ་གཤེགས་སྙིང་པོའི་རྣམ་བཞག་གཏན་ལ་དབབ་པ། གཞུང་གི་འབྲུ་ལ་སྦྱར་བའོ། །དང་པོ་ལ་བཞི་སྟེ། བཀའ་དང་བསྟན་བཅོས་ལས་ཇི་ལྟར་བཤད་པའི་ཚུལ། བདེར་གཤེགས་སྙིང་པོ་རང་གི་ངོ་བོ་ངོས་བཟུང་བ། དེ་ཉིད་གྲུབ་མཐའི་རིམ་པ་དང་སྦྱར་བ། བདག་ཉིད་ཆེན་པོའི་དགོངས་པ་དཔྱད་པའོ། །དང་པོ་ནི་སྤྱིར་བདེ་བར་གཤེགས་པའི་གསུང་རབ་རྣམས་ལས་སེམས་ཅན་གྱི་ཁམས། སངས་རྒྱས་ཀྱི་ཁམས། སངས་རྒྱས་ཀྱི་རིགས། བདེ་བར་གཤེགས་པའི་སྙིང་པོ། རང་བཞིན་དུ་གནས་པའི་རིགས། ཞེས་འབྱུང་བ་རྣམས་མིང་གི་རྣམ་གྲངས་ཡིན་ལ། དེ་ཉིད་སྐབས་འགའ་ཞིག་ཏུ་སེམས་ཅན་གྱི་ཆོས་དབྱིངས་དང་། སངས་རྒྱས་ཀྱི་ཆོས་དབྱིངས་དབྱེར་མེད་པ་ལ་བཤད་པ་ཡང་ཡོད་དེ། མདོ་ལས་ཤཱ་རིའི་བུ་སེམས་ཅན་གྱི་ཁམས་ཞེས་བྱ་བ་ནི་དེ་བཞིན་གཤེགས་པའི་སྙིང་པོའི་ཚིག་བླ་དྭགས་སོ། །ཤཱ་རིའི་བུ་དེ་བཞིན་གཤེགས་པ་ཞེས་བྱ་བ་འདི་ནི་ཆོས་ཀྱི་སྐུའི་ཚིག་བླ་དྭགས་སོ། །ཞེས་པ་དང་། ཤཱ་རིའི་བུ་དེའི་ཕྱིར་ན་སེམས་ཅན་གྱི་ཁམས་ཀྱང་གཞན་ལ་ཆོས་ཀྱི་སྐུ་ཡང་གཞན་པ་ནི་མ་ཡིན་ཏེ། སེམས་ཅན་གྱི་ཁམས་ཉིད་ཆོས་ཀྱི་སྐུ་ཆོས་ཀྱི་སྐུ་ཉིད་སེམས་ཅན་གྱི་ཁམས་ཏེ། འདི་ནི་དོན་གྱིས་གཉིས་སུ་མེད་པ་དེ་ཡི་གེ་ཐ་དད་པ་ཡིན་ནོ། །ཞེས་པ་དང་། རྒྱལ་ཚབ་བྱམས་པས། དེ་བཞིན་ཉིད་འདི་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་གསུངས་སོ། །ཡང་དེ་ཉིད་ཆོས་དབྱིངས་དེ་བཞིན་ཉིད་ལ་བཤད་པ་ཡང་ཡོད་དེ། ཤེར་ཕྱིན་གྱི་མདོ་ལས། ནམ་མཁའ་ལ་བྱའི་རྗེས་མེད་ཅིང་མི་དམིགས་སོ། །དེ་བཞིན་དུ་བྱང་ཆུབ་སེམས་དཔའི་ཚིག་གི་དོན་མེད་ཅིང་མི་དམིགས་སོ། །ཞེས་གསུངས་ཤིང་དེའི་དོན་མགོན་པོ་བྱམས་པས། སྒྲུབ་པ་ཡི་ནི་རྟེན་གྱུར་པ། །ཆོས་ཀྱི་དབྱིངས་ཀྱི་རང་བཞིན་དང་། །ཞེས་གསུངས་པ་དང་། ཀླུ་སྒྲུབ་ཞབས་ཀྱིས་ཀྱང་། གང་ཞིག་ཀུན་ཏུ་མ་ཤེས་པས། །སྲིད་པ་གསུམ་ན་རྣམ་འཁོར་ཞིང་། །སེམས་ཅན་རྣམས་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་འདུད། །ཞེས་གསུངས་སོ། །ཡང་དེ་ཉིད་སེམས་ཅན་ནས་སངས་རྒྱས་ཀྱི་སའི་བར་དུ་རྒྱུན་མི་ཆད་པའི་སེམས་གསལ་བ་ཙམ་ལ་གསུངས་པ་ཡང་ཡོད་དེ། མདོ་སྡེ་དགོངས་པ་ངེས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་ཞེས། །དེ་ནི་བྱིས་པ་རྣམས་ལ་ངས་མ་བསྟན། །ཞེས་པ་དང་། མགོན་པོ་ཀླུ་སྒྲུབ་ཀྱིས། ཇི་ལྟར་སོས་ཀའི་དུས་སུ་ཆུ། །དྲོ་འོ་ཞེས་ནི་བརྗོད་པར་བྱེད། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་བརྗོད་པ་ཡིན། །ཉོན་མོངས་དྲྭ་བས་གཡོགས་པ་ན། །སེམས་ཞེས་བྱ་བར་བརྗོད་པ་ཡིན། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱ། །ཞེས་གསུངས་སོ། །ཡང་དེ་ཉིད་ཀུན་གཞིའི་རྣམ་པར་ཤེས་པ་ལ་བཤད་པ་ཡང་ཡོད་དེ། ལང་ཀར་གཤེགས་པ་ལས་ཀྱང་། དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་ཞེས་བསྒྲགས་པ་རྣམ་པར་སྦྱང་བར་བྱའོ། །བློ་གྲོས་ཆེན་པོ་གལ་ཏེ་ཀུན་གཞིའི་རྣམ་པར་ཤེས་པ་བསྒྲགས་པ། དེ་བཞིན་གཤེགས་པའི་སྙིང་པོ་མེད་དུ་ཟིན་ན་དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་ཞེས་བསྒྲགས་པ་མེད་པས། འཇུག་པ་ཡང་མེད་ལྡོག་པ་ཡང་མེད་པར་འགྱུར་ན་བློ་གྲོས་ཆེན་པོ་བྱིས་པ་དང་འཕགས་པ་རྣམས་ལ་འཇུག་པ་དང་། ལྡོག་པ་ཡང་ཡོད་དེ། རྣལ་འབྱོར་ཆེན་པོ་བརྩོན་པ་མི་འདོར་བ་རྣམས་བདག་གིས་སོ་སོ་རང་རིག་པ་ཚེ་འདི་ལ་བདེ་བར་སྤྱོད་པས་གནས་སོ་ཞེས་པ་ནས། དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་ནི། དེ་བཞིན་གཤེགས་པའི་ཡུལ་ཏེ་ཁྱོད་ལྟ་བུར་ཞིབ་ཅིང་མཁས་པའི་མོས་པ་དང་། བློ་རབ་ཏུ་འབྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ། དོན་ལ་རྟོན་པ་རྣམས་ཀྱི་ཡང་ཡུལ་ཏེ། ཞེས་སོགས་དང་། དེ་བཞིན་གཤེགས་པའི་སྙིང་པོ་ནི། །རྣམ་ཤེས་བདུན་དང་ལྡན་པར་ཡང་། །འཛིན་པ་གཉིས་ཀྱིས་རབ་འཇུག་སྟེ། །ཡོངས་སུ་ཤེས་པས་ལྡོག་པར་འགྱུར། །ཞེས་པ་དང་། མདོ་གཞན་ལས། ས་རྣམས་སྣ་ཚོགས་ཀུན་གཞི་སྟེ། །བདེར་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་གསུངས་པར་ཟད། །སྙིང་པོ་ཀུན་གཞིར་བསྟན་པ་ཡང་། །བློ་ཆུང་རྣམས་ཀྱི་མི་ཤེས་སོ། །ཞེས་པ་དང་། སེམས་ཀྱི་རང་བཞིན་འོད་གསལ་བ། །དེ་བཞིན་གཤེགས་པའི་སྙིང་པོ་དགེ །ཞེས་གསུངས་སོ། །ཡང་དེ་ཉིད་ལ་ཡིད་ཀྱི་རྣམ་པར་ཤེས་པར་བཤད་པ་ཡང་ཡོད་དེ། སོར་མོའི་ཕྲེང་བའི་མདོར། ཉན་ཐོས་རྣམས་ཀྱི་ཐེག་པར་ཡིད་ཅེས་བསྟན་པ་ཡང་། དེ་བཞིན་གཤེགས་པའི་སྙིང་པོ་ཞེས་གསུངས་པའི་དོན་ཏེ། ཡིད་རང་བཞིན་གྱིས་རྣམ་པར་དག་པ་ཞེས་བྱ་བ་གང་ཡིན་པ་དེ་བཞིན་གཤེགས་པའི་སྙིང་པོའོ། །ཞེས་གསུངས་སོ། །ཡང་དེ་ཉིད་ལ་ཆོས་ཀྱི་སྐུ་ཞེས་བཤད་པ་ཡང་ཡོད་དེ། ཤཱ་རིའི་བུ་ཆོས་ཀྱི་སྐུ་དེ་ཉིད་ཉོན་མོངས་པའི་སྦུབས་བྱེ་བ་མཐའ་ཡས་པས་བཏུམས་པ། འཁོར་བའི་རྒྱུན་གྱིས་ཁྱེར་བ། ཐོག་མ་དང་ཐ་མ་མེད་པའི་འཁོར་བའི་འགྲོ་བར་འཆི་བ་དང་སྐྱེ་བ་དག་ཏུ་འཁོར་བ་ནི་སེམས་ཅན་གྱི་ཁམས་ཞེས་བརྗོད་དོ། །ཞེས་གསུངས་སོ། །གཉིས་པ་ནི། དེ་ལྟར་བཀའ་དང་བསྟན་བཅོས་རྣམས་ལས། ཐ་སྙད་མི་འདྲ་བ་དུ་མའི་སྒོ་ནས་བསྟན་ཀྱང་བདེར་གཤེགས་སྙིང་པོ་རང་གི་ངོ་བོ་ནི། ཐོག་མ་མེད་པའི་དུས་ནས་སངས་རྒྱས་ཀྱི་སའི་བར་དུ་རྒྱུན་མ་ཆད་པ། དགེ་མི་དགེ་ལ་སོགས་པའི་རིས་སམ་ཕྱོགས་སུ་མ་ཆད་པ། ཐབས་ཀྱི་ཟིན་མ་ཟིན་གྱི་བྱེ་བྲག་གིས་འཆིང་གྲོལ་ཀུན་གྱི་གཞིར་གྱུར་པ། ཐབས་ཀུན་རྫོབ་ཀྱི་མཚན་ཉིད་གསལ་ཙམ་མ་འགག་པ་དོན་དམ་དཔྱོད་བྱེད་ཀྱི་རིགས་པས་རང་གི་ངོ་བོ་ལ་བཏགས་ན་ཡོད་མེད་དང་རྟག་ཆད་ལ་སོགས་པའི་མཐའ་གང་དུའང་མ་གྲུབ་པའི་སྤྲོས་བྲལ་ལས་མ་འདས་པའི་གསལ་སྟོང་ཟུང་འཇུག་གམ། རིག་སྟོང་ཟུང་འཇུག་འདི་ཉིད་ཡིན་ནོ། །དེས་ན་བདེར་གཤེགས་སྙིང་པོ་ནི་གསལ་སྟོང་ཟུང་འཇུག་ལ་འཇོག་པ་ཡིན་གྱི་གསལ་བ་སྤངས་པའི་སྟོང་པ་ཙམ་ནི་མ་ཡིན་ཏེ། དེ་ནི་འཆིང་གྲོལ་གྱི་གཞིར་མི་རུང་བའི་ཕྱིར་རོ། །སྟོང་པ་སྤངས་པའི་གསལ་བ་ཙམ་ཡང་མ་ཡིན་ཏེ། དེ་ནི་འདུས་བྱས་ཀྱི་ཆ་ཡིན་ལ། བདེར་གཤེགས་སྙིང་པོ་འདུས་མ་བྱས་སུ་གསུངས་པའི་ཕྱིར་རོ། །ཟུང་འཇུག་དེ་ཉིད་ཐབས་ཀྱིས་མ་ཟིན་ན་འཁོར་བའི་ཆོས་རྣམས་ཀྱི་གཞི་ཡིན་ཏེ། ཟུང་འཇུག་ལས་རྣམ་རྟོག་སྐྱེ། དེ་ལས་ཉོན་མོངས་པ། དེ་ལས་ལས་བསགས། དེ་ལས་འཁོར་བས་བསྡུས་པའི་ཕུང་ཁམས་སྐྱེ་མཆེད་ཀུན་འབྱུང་བའི་ཕྱིར་ཏེ། རྒྱུད་བླར། ས་ནི་ཆུ་ལ་ཆུ་རླུང་ལ། །རླུང་ནི་མཁའ་ལ་རབ་ཏུ་གནས། །མཁའ་ནི་རླུང་དང་ཆུ་དག་དང་། །ས་ཡི་ཁམས་ལ་གནས་མ་ཡིན། །དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་ལ་གནས། །ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་ལ་རྟག་ཏུ་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །སེམས་ཀྱི་རང་བཞིན་ཆོས་རྣམས་ནི། །ཐམས་ཅད་ལ་ཡང་གནས་མ་ཡིན། །ཞེས་དང་། ཀླུ་སྒྲུབ་ཀྱིས། ལས་དང་ཉོན་མོངས་ཟད་པས་ཐར། །ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་གསུངས་སོ། །དེ་ཉིད་ཐབས་ཀྱིས་ཟིན་ན་ལམ་གྱི་ཆོས་ཐམས་ཅད་ཀྱི་གཞི་ཡིན་ཏེ། འཁྲུལ་པའི་དབང་གིས་འབྱུང་བའི་སེམས་འདི་དགེ་རྩ་སད་པར་བྱས་ཏེ། སེམས་རང་གི་གནས་ཚུལ་སྙེགས་པའི་ཚེ། འཁོར་བ་ལ་སྤོང་འདོད་དང་། མྱ་ངན་ལས་འདས་པ་ལ་དོན་གཉེར་གྱི་འདུན་པ་འབྱུང་ཞིང་། དེ་ལས་དེ་དག་གི་སྒྲུབ་པ་འབྱུང་བའི་ཕྱིར་ཏེ། རྒྱུད་བླར། སྲིད་དང་མྱ་ངན་འདས་ལ་དེའི། །སྡུག་བདེའི་སྐྱོན་ཡིན་མཐོང་བ་ནི། །རིགས་ཡོད་ལས་ཡིན་གང་ཕྱིར་ཏེ། །རིགས་མེད་དག་ལ་མེད་ཕྱིར་རོ། །ཞེས་དང་། མངོན་རྟོགས་རྒྱན་ལས། སྒྲུབ་པ་ཡི་ནི་རྟེན་གྱུར་པ། །ཆོས་ཀྱི་དབྱིངས་ཀྱི་རང་བཞིན་དང་། །ཞེས་དང་། རྒྱས་བཤད་དུ། སྒྲུབ་པ་བཅུ་གསུམ་བཤད་ནས། རྟེན་ལ་རིགས་ཞེས་བྱ་ཞེས་གསུངས་སོ། །དེ་ཉིད་ལམ་བསྒོམས་པའི་སྟོབས་ཀྱིས་གློ་བུར་གྱི་དྲི་མ་མཐའ་དག་དང་བྲལ་བ་ན། སྟོབས་ལ་སོགས་པ་རང་དོན་གྱི་ཡོན་ཏན་དང་། གཟུགས་སྐུ་གཉིས་ལ་སོགས་པ་གཞན་དོན་གྱི་ཡོན་ཏན་ཐམས་ཅད་ཀྱི་གཞི་ཡིན་ཏེ། དག་པ་གཉིས་ལྡན་གྱི་ཆོས་དབྱིངས་ལ་སྟོབས་སོགས་ཟག་མེད་ཀྱི་ཡོན་ཏན་དབྱེར་མེད་དུ་ལྡན་ཞིང་། དེ་ཉིད་གདུལ་བྱ་དག་མ་དག་གི་རིམ་པ་ལ། གཟུགས་སྐུ་གཉིས་ནས། རི་བོང་སྟག་དང་སེང་གེ་དང་། ལྗོན་ཤིང་དང་། ཟམ་པ་ལ་སོགས་པར་ཡང་སྣང་བའི་ཕྱིར་ཏེ། ཐོགས་མེད་ཞབས་ཀྱིས་དྲི་མ་མེད་པའི་སངས་རྒྱས་ཀྱི་ཡོན་ཏན་ནི་གནས་གྱུར་པའི་དེ་བཞིན་གཤེགས་པའི་ཆོས་ཀྱི་སྐུ་དེ་ཉིད་ལ་ཡོད་པ་འཇིག་རྟེན་ལས་འདས་པ་སྟོབས་བཅུ་ལ་སོགས་པ་སངས་རྒྱས་ཀྱི་ཆོས་གང་དག་ཡིན་པའོ། །ཞེས་དང་། རྒྱུད་བླར། འདིར་ནི་དང་པོ་ཆོས་སྐུ་སྟེ། །ཕྱི་མ་དག་ནི་གཟུགས་ཀྱི་སྐུ། །ནམ་མཁའ་ལ་ནི་གཟུགས་གནས་བཞིན། །དང་པོ་ལ་ནི་ཐ་མ་གནས། །ཞེས་གསུངས་སོ། །གསུམ་པ་ནི། མདོ་སྡེ་འགའ་ཞིག་ལས། ཉན་ཐོས་ཀྱི་ཐེག་པར་ཡིད་ཅེས་བསྟན་པ། དེ་བཞིན་གཤེགས་པའི་སྙིང་པོ་ཡིན་པར་གསུངས་པའི་དོན་ནི། ཉན་ཐོས་པ་རྣམས་བདེར་གཤེགས་སྙིང་པོ་ལ་བརྟེན་ནས་སྒྲུབ་པ་ལ་འཇུག་པའི་ཆེད་དུ་དེ་དག་གི་གྲུབ་མཐའ་དང་སྒོ་བསྟུན་ནས་གསུངས་པ་སྟེ། དེ་དག་ནི་སེམས་སྟོང་པར་མི་འདོད་པས། སྟོང་པའི་ཆ་དང་། གསལ་སྟོང་ཟུང་འཇུག་ལ། བདེར་གཤེགས་སྙིང་པོ་བཞག་ཏུ་མེད་ཅིང་། གསལ་བ་ལ་ཡང་། རྣམ་ཤེས་ཚོགས་དྲུག་ལས་མི་འདོད་ཅིང་། སྒོ་ལྔའི་རྣམ་ཤེས་ནི་འཆིང་གྲོལ་གྱི་གཞིར་མི་རུང་བས་ཡིད་ཤེས་ལ་འཇོག་པ་སྟེ། མཛོད་ལས། སེམས་བྱུང་མ་ཆགས་པའི་རང་བཞིན། འདོད་པ་ཆུང་ཞིང་ཆོག་ཤེས་པ་ལ་རིགས་སུ་འཇོག་པ་དོན་གཅིག་སྟེ། དེ་ལྟ་བུའི་སེམས་བྱུང་ནི། ཡིད་ཀྱི་རྣམ་ཤེས་ཁོ་ནའི་འཁོར་ཡིན་པའི་ཕྱིར་རོ། །མདོ་ཁ་ཅིག་ལས། ཀུན་གཞིའི་རྣམ་པར་ཤེས་པ་ལ་བཤད་པ་ནི། སེམས་ཙམ་པ་རྣམས་བདེར་གཤེགས་སྙིང་པོ་ལ་བརྟེན་ནས་སྒྲུབ་པ་ལ་འཇུག་པའི་ཆེད་དུ། དེའི་གྲུབ་མཐའ་དང་སྒོ་བསྟུན་ནས་གསུངས་པ་སྟེ། དེ་དག་ནི་སྟོང་པ་དང་ཟུང་འཇུག་མི་འདོད་པ་སྔར་དང་འདྲ་ལ། གསལ་བ་ལ་རྣམ་ཤེས་ཚོགས་བརྒྱད་ལས། ཚོགས་བདུན་ནི་འཁོར་འདས་ཀྱི་ཆོས་ཐམས་ཅད་ཀྱི་ས་བོན་འཇོག་པའི་གཞིར་མི་རུང་བའི་ཕྱིར་རོ། །འོན་ཀྱང་སེམས་ཙམ་པའི་འདོད་པ་ལྟར་གྱི་ཀུན་གཞི་བདེར་གཤེགས་སྙིང་པོར་སྨྲ་བ་ནི་མ་ཡིན་ཏེ། དེ་དག་གིས་བཤད་པའི་མཚན་ཉིད་དང་ལྡན་པའི་ཀུན་གཞི་ཡོད་པར་མི་འགྲུབ་པའི་ཕྱིར་རོ། །དེས་ན་སྔར་གྱི་ཟུང་འཇུག་གི་གསལ་བའི་ཆ་དེ་ཉིད་ལ་དགོངས་ནས་གསུངས་སོ། །དབུ་མའི་གཞུང་ལས། ཆོས་ཅན་གསལ་བའི་ལྡོག་པ་ནས་གསུངས་པ་དང་། ཆོས་ཉིད་སྟོང་པའི་ལྡོག་པ་ནས་གསུངས་པ་དང་། ཆོས་སྐུའི་ལྡོག་པ་ནས་གསུངས་པ་དང་། དེ་གསུམ་ཅར་གྱི་སྒོ་ནས་གསུངས་པ་བཞི་ལས་དང་པོ་ནི་འཁོར་འདས་ཀྱི་བྱེད་པ་པོ་སེམས་ཡིན་པར་ཤེས་པའི་ཆེད་དུ། སེམས་ལ་གསུངས་ཏེ། རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དོན་ནམ། །ཕྱི་རོལ་གྱུར་པ་ཅུང་ཟད་མེད། །ཅེས་དང་། སམྦུ་ཊ་ལས། ཀུན་རྟོག་མང་པོའི་མུན་པས་བསྒྲིབས་གྱུར་ཅིང་། །རབ་ཏུ་འཇོམས་པས་སྨྱོ་ཞིང་གློག་འདྲ་ལ། །ཆགས་སོགས་དགག་དཀའ་དྲི་མས་གོས་གྱུར་པའི། །སེམས་ནི་རྡོ་རྗེ་ཅན་གྱིས་འཁོར་བར་གསུངས། །ཞེས་དང་། ས་ར་ཧས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་གསུངས་པ་ལྟར་རོ། །གཉིས་པ་ནི། སེམས་དེ་ཡང་བདེན་པར་གྲུབ་ན། གཉེན་པོ་བསྐྱེད་པ་དང་། སྒྲིབ་པ་སྤོང་དུ་མི་རུང་བས། བདེན་པས་སྟོང་པའི་ཕྱིར་ན། འཆིང་གྲོལ་ཀུན་གྱི་གཞིར་རུང་བ་ཤེས་པའི་ཆེད་དུ། སེམས་ཀྱི་སྟོང་ཉིད་ལ་གསུངས་ཏེ། བཀའ་དང་བསྟན་བཅོས་ཕལ་ཆེར་ལས་དེ་ལྟར་དུ་གསུངས་ཤིང་། གང་ལ་སྟོང་པ་ཉིད་རུང་བ། །ཞེས་སོགས་ཀྱི་ལུང་། གཞུང་འདིར་བདེར་གཤེགས་སྙིང་པོའི་ཤེས་བྱེད་དུ་དྲངས་པ་དང་དོན་གཅིག་གོ །གསུམ་པ་ནི་གསལ་སྟོང་ཟུང་འཇུག་དེ་ཉིད་ལ་གློ་བུར་གྱི་དྲི་མ་སྦྱངས་པ་ལས། འབྲས་བུ་ཆོས་སྐུ་འབྱུང་གི་ལོགས་ན་བཙལ་རྒྱུ་མེད་དོ། །ཞེས་བསྟན་པས། སེམས་ཞུམ་པ་ལ་སོགས་པའི་སྐྱོན་ལྔ་སྤོང་བའི་ཆེད་དུ་གསུངས་ཏེ། དཔལ་ཕྲེང་གི་མདོ་ལས། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་འདི་ཉིད། ཉོན་མོངས་པའི་སྦུབས་ལས་མ་གྲོལ་བ་ནི་དེ་བཞིན་གཤེགས་པའི་སྙིང་པོ་ཞེས་བགྱིའོ། །ཞེས་དང་། དེ་བཞིན་གཤེགས་པའི་སྙིང་པོའི་མདོ་ལས། རིགས་ཀྱི་བུ་དག་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། དེ་བཞིན་གཤེགས་པའི་མིག་ཡོངས་སུ་དག་པས་སེམས་ཅན་ཐམས་ཅད་དེ་ལྟར་མཐོང་ནས་དེ་བཞིན་གཤེགས་པའི་ཡེ་ཤེས་སྟོབས་དང་། མི་འཇིགས་པ་དང་སངས་རྒྱས་ཀྱི་ཆོས་མ་འདྲེས་པའི་མཛོད་ཡོངས་སུ་སྦྱོང་བའི་ཕྱིར་བྱང་ཆུབ་སེམས་དཔའ་རྣམས་ལ་ཆོས་སྟོན་ཏོ། །ཞེས་གསུངས་པ་ལྟར་རོ། །བཞི་པ་ནི། རྒྱུད་བླར། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་ལུས་ཅན་ལ་སངས་རྒྱས་ཀྱི་སྙིང་པོ་ཡོད་པའི་སྒྲུབ་བྱེད་གསུམ་གསུངས་ཤིང་། གསུམ་པོ་དེ་དག་ཀྱང་དེའི་འོག་ཏུ་འདི་ཡི་རང་བཞིན་ཆོས་སྐུ་དང་། དེ་བཞིན་ཉིད་དང་རིགས་ཀྱང་སྟེ། །དེ་ནི་དཔེ་གསུམ་གཅིག་དང་ནི། །ལྔ་རྣམས་ཀྱིས་ནི་ཤེས་པར་བྱ། །ཞེས་དོན་རྣམ་པ་དགུར་ཕྱེ་ནས་དཔེ་དགུས་མཚོན་པར་གསུངས་སོ། །དོན་དགུ་ནི། ཆོས་སྐུ་ལ་གློ་བུར་དྲི་བྲལ་གྱི་དབྱིངས་དང་། ཟབ་མོ་སྟོང་ཉིད་སྟོན་པའི་གསུང་རབ་དང་། བརྗོད་བྱ་སྣ་ཚོགས་སྟོན་པའི་གསུང་རབ་སྟེ་གསུམ་ཏུ་ཕྱེ་ཞིང་། དེ་བཞིན་ཉིད་ནི་རང་བཞིན་རྣམ་དག་གི་ཆོས་དབྱིངས་ཡིན་ལ། རིགས་ལ་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས། དེ་གཉིས་ཀྱི་འབྲས་བུ་སྐུ་གསུམ་དང་ལྔར་ཕྱེ་བ་སྟེ། ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང་། །དེ་ཡི་རྒྱུ་མཐུན་ཟབ་པ་དང་། །སྣ་ཚོགས་ཚུལ་ནི་སྟོན་པའོ། །ཞེས་དང་། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླངས་པ་མཆོག་ཉིད་དོ། །རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་སྟེ། །དང་པོའི་སྐུ་ནི་དང་པོ་སྟེ། །གཉིས་པ་ཡི་ནི་ཕྱི་མ་གཉིས། །ཞེས་གསུངས་སོ། །དེ་དག་དཔེ་དགུས་མཚོན་ནས་སེམས་ཅན་གྱི་རྒྱུད་ལ་ཡོད་པར་བསྟན་བཅོས་རྒྱུད་བླ་འདིར་དངོས་སུ་བསྟན་པ་ནི། གཞུང་འདིར་དྲང་དོན་དུ་གཏན་ལ་དབབ་པ་སྟེ། གོས་ཧྲུལ་ནང་ན་རིན་ཆེན་ལྟར། །ཞེས་དང་། དངོས་ལ་གནོད་བྱེད་ཀྱི་སྐབས་སུ་དེ་འདྲའི་ཞེས་པའི་ཚིག་གི་ཁྱད་པར་གསུངས་ཤིང་། དེའི་དོན་ཡང་རྟེན་དང་བརྟེན་པ་གོས་ཧྲུལ་གྱི་ནང་ན་རིན་ཆེན་ཡོད་པ་སོགས་དཔེ་དགུས་མཚོན་པ་དེ་འདྲ་བ་ངེས་དོན་ཡིན་ན། ཞེས་པའི་དོན་ཡིན་པའི་ཕྱིར་དང་། དགོངས་གཞི་སོགས་གསུམ་པོ་ཡང་འདི་ལ་གནས་པའི་ཕྱིར་རོ། །དེ་དག་ནི་དཔེ་དགུ་པོ་སོ་སོས་དོན་སོ་སོ་མཚོན་པའི་དབང་དུ་བྱས་ལ། དཔེ་དགུ་ཆར་གྱིས་དོན་གཅིག་མཚོན་པའི་དབང་དུ་བྱས་ན་ཡང་དྲང་དོན་དུ་གཏན་ལ་དབབ་པ་སྔ་མ་དང་འདྲ་སྟེ། དེ་ནི་འོག་གཞུང་དོན་གྱི་སྐབས་སུ་འཆད་དོ། །གསུམ་ལས་ཕྱེ་བའི་དོན་རྣམ་པ་དགུ་པོ། ས་བོན་དང་། འཇུག་ཏུ་རུང་བ་དང་། རང་གི་ངོ་བོ་ཅི་རིགས་པའི་སྒོ་ནས་ཚང་བའི་ཟུང་འཇུག་ལ་བདེར་གཤེགས་སྙིང་པོར་བཞག་པ་ནི། དྲང་དོན་དུ་བསྟན་པ་མ་ཡིན་ཏེ། དངོས་ལ་གནོད་བྱེད་མེད་པའི་ཕྱིར་རོ། །ཇི་ལྟར་ཚང་བའི་ཚུལ་ལ། ཁ་ཅིག་སྟོབས་སོགས་དང་མཚན་དཔེ་སོགས་ཀྱི་བརྒྱན་པའི་སངས་རྒྱས་ད་ལྟ་ཉིད་ནས་ཡོད་པར་འདོད་པ་ནི་དྲང་དོན་གྱི་མདོ་ལ། སྒྲ་ཇི་བཞིན་དུ་འཁྲུལ་པ་སྟེ། མྱང་འདས་ཆེན་པོར་རིགས་ཀྱི་བུ་སེམས་ཅན་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱིར། སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དོ་ཞེས་གསུངས་ཏེ། སེམས་ཅན་ཐམས་ཅད་ལ་ཡང་དག་པར་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་མེད་པས་དོན་དེའི་ཕྱིར་ངས་མདོ་སྡེ་འདི་ལས་ཚིགས་སུ་བཅད་པ་འདི་གསུངས་སོ། །ཐོག་མ་ཡོད་ལ་ད་ལྟ་མེད། །ཐོག་མ་མེད་ལ་ད་ལྟར་ཡོད། །དུས་གསུམ་སྲིད་པའི་ཆོས་ཐམས་ཅད། །དེ་ལྟ་བུ་ཡི་གནས་མེད་དོ། །རིགས་ཀྱི་བུ་སྲིད་པ་ཞེས་བྱ་བ་ལ་གནས་གསུམ་སྟེ། མ་འོངས་པའི་སྲིད་པ་དང་། ད་ལྟར་བའི་སྲིད་པ་དང་། འདས་པའི་སྲིད་པའོ། །དེ་ལ་སེམས་ཅན་ཐམས་ཅད་མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོད་པའི་ཕྱིར་སངས་རྒྱས་ཀྱི་རང་བཞིན་ཞེས་བྱའོ། །སེམས་ཅན་ཐམས་ཅད་ལ་ད་ལྟར་ཉོན་མོངས་པ་རྣམས་ཡོད་པས། དེའི་ཕྱིར་ད་ལྟར་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་མེད་དོ། །ཞེས་པ་དང་། རིགས་ཀྱི་བུ་ངས་འོ་མའི་ནང་ན་ཞོ་ཡོད་དོ། །ཞེས་མ་གསུངས་ཀྱི་འོ་མ་ལས་ཞོ་འབྱུང་བའི་ཕྱིར་ཞོ་ཡོད་ཅེས་བྱས་སོ། །རིགས་ཀྱི་བུ་འོ་མའི་ཚེ་ན་ཞོ་མེད། མར་དང་ཞུན་མར་དང་། ཉིང་ཁུ་ཡང་མེད་དེ། དྲོད་དང་དྲི་མ་ལ་སོགས་པའི་རྐྱེན་གྱིས་འོ་མ་ལས་ཞོ་འབྱུང་བའི་ཕྱིར། འོ་མ་ལ་ཞོའི་རང་བཞིན་ཡོད་དོ་ཞེས་སྨྲས་སོ། །དེ་བཞིན་དུ་རྒོད་མ་ལས་རྟེའུ་དང་། མ་ལས་བུ་དང་། ཤིང་ཨ་མྲའི་ས་བོན་ལས་ལོ་མ་དང་འབྲས་བུ་ལ་སོགས་པའི་དཔེ་ཤིན་ཏུ་མང་པོ་གསུངས་སོ། །དེས་ན་ཆོས་སྐུ་ལ་གསུམ་དུ་ཕྱེ་བའི་དང་པོ་ཐོབ་རུང་དང་། ཕྱི་མ་གཉིས་འཇུག་རུང་གི་ཚུལ་དུ་ཚང་། དེ་བཞིན་ཉིད་དང་རང་བཞིན་གནས་རིགས་ངོ་བོའི་སྒོ་ནས་ཚང་། རྒྱས་འགྱུར་གྱི་རིགས་ནུས་མཐུའི་སྒོ་ནས་ཚང་། སྐུ་གསུམ་ས་བོན་གྱི་སྒོ་ནས་ཚང་སྟེ། འདི་ཡི་རང་བཞིན་ཆོས་སྐུ་དང་ཞེས་པའི་འགྲེལ་པར། སངས་རྒྱས་རྣམས་ཀྱི་ཆོས་ཀྱི་སྐུ་ནི་རྣམ་པ་གཉིས་སུ་རྟོགས་པར་བྱའོ། །ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ནི་རྣམ་པར་དག་པའི་སྤྱོད་ཡུལ་གྱི་ཡུལ་ལོ། །དེ་ཡང་དེ་བཞིན་གཤེགས་པ་རྣམས་ཀྱི་སོ་སོ་རང་གིས་རིག་པར་བྱ་བའི་ཆོས་ཀྱི་དབང་དུ་བྱས་ཏེ་རྟོགས་པར་བྱའོ། །དེ་ཐོབ་པའི་རྒྱུ་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་རྒྱུ་མཐུན་པ་ནི་གདུལ་བྱ་ཇི་ལྟ་བར་སེམས་ཅན་གཞན་ལ་རྣམ་པ་རིག་པ་འབྱུང་ངོ་། །དེ་ཡང་བསྟན་པའི་ཆོས་ཀྱི་དབང་དུ་བྱས་པར་རིག་པར་བྱའོ། །ཞེས་དང་། རང་བཞིན་འགྱུར་བ་མེད་པ་དང་། །ཞེས་པའི་འགྲེལ་པར་གསེར་བཟང་པོ་བཞིན་དུ་གཞན་དུ་མི་འགྱུར་བའི་དོན་གྱིས་དེ་བཞིན་ཉིད་ཞེས་བརྗོད་དོ་ཞེས་དང་། གཏེར་དང་འབྲས་བུའི་ཤིང་བཞིན་དུ་ཞེས་སོགས་ཀྱི་འགྲེལ་པར་དཔེ་ལྷག་མ་ལྔ་པོ་འདི་དག་གིས་ནི་སངས་རྒྱས་ཀྱི་སྐུ་རྣམ་པ་གསུམ་བསྐྱེད་པའི་རིགས་ཡོད་པའི་དབང་དུ་བྱས་ཏེ། དེ་བཞིན་གཤེགས་པའི་ཁམས་སེམས་ཅན་འདི་དག་ཐམས་ཅད་ཀྱི་སྙིང་པོར་བསྟན་པ་ཡིན་ནོ། །ཞེས་གསུངས་པས་སོ། །མདོར་ན་ཟུང་འཇུག་དེ་ཉིད་ལ་ཁ་ཅིག་ལས། ཆོས་ཅན་གསལ་བ་དང་། ཁ་ཅིག་ལས་ཆོས་ཉིད་སྟོང་པ་དང་། ཁ་ཅིག་ལས་འབྲས་བུ་ཆོས་སྐུ་དང་། ཁ་ཅིག་ལས་རྒྱུ་རིགས་ཀྱི་སྒོ་ནས་བསྟན་ཅིང་། རྒྱུད་བླ་མ་འདིར་ནི། མཚན་ཉིད་ཡོངས་སུ་རྫོགས་པའི་སྒོ་ནས་བསྟན་པར་ཤེས་པར་བྱའོ། །གཞན་ཡང་ཟབ་ཅིང་གཏིང་དཔག་དཀའ་བའི་གནས་འདི་ལ་ནི་ཁོ་བོའི་བློ་གྲོས་དབྱར་གྱི་མཚོ་བཞིན་དུ་གྱུར་མོད་ཀྱི། ཤེས་པར་འདོད་ན་ངག་ལས་དྲི་བར་བྱའོ། །བཞི་པ་ནི། བདག་ཉིད་ཆེན་པོ་འདིས་ཀྱང་ཟུང་འཇུག་ལ་བདེར་གཤེགས་སྙིང་པོར་བཞེད་དེ། སྙེ་མོ་སྒོམ་ཆེན་གྱི་དྲིས་ལན་ལས། བཅུ་པ་སེམས་རྟོགས་པ་ལ་སྡེ་སྣོད་གསུམ་དང་། རྒྱུད་སྡེ་བཞིར་བརྩིར་བཏུབ་བམ་མི་བཏུབ་ཟེར་བ་ལ། སེམས་སྟོང་པར་རྟོགས་པ་དང་། ཟུང་འཇུག་ཏུ་རྟོགས་པ་གཉིས་ཡོད། སྟོང་པར་རྟོགས་པ་ལ་སྡེ་སྣོད་གསུམ་པོ་དང་། རྒྱུད་སྡེ་བཞིའི་དོན་བརྩིར་མི་བཏུབ། གལ་ཏེ་བཏུབ་ན་ཉན་ཐོས་ཀྱི་འགོག་པ་ལའང་བརྩིར་བཏུབ་པར་འགྱུར་བ་ལས། འགོག་པ་དེ་སྟོང་པ་རྐྱང་པའི་མཐར་ལྟུང་བས་དེ་ཐེག་པ་ཆེན་པོའི་བརྗོད་བྱའི་དོན་མི་བཏུབ་པར་ཐེག་པ་ཆེན་པོའི་མདོ་རྒྱུད་ཐམས་ཅད་ལས་འབྱུང་བ་ཡིན། ཟུང་འཇུག་རྟོགས་པ་ལ་བརྩིར་བཏུབ་སྟེ། ཉེས་བྱས་ཕྲ་མོས་མ་གོས་པས་ཚུལ་ཁྲིམས་ཀྱི་གཞི་འདུལ་བའི་སྡེ་སྣོད། དཔའ་བར་འགྲོ་བ་ལ་སོགས་པའི་ཏིང་ངེ་འཛིན་ཐམས་ཅད་དེ་ལས་འབྱུང་བས་མདོ་སྡེའི་སྡེ་སྣོད། གཟུགས་ནས་རྣམ་པ་ཐམས་ཅད་མཁྱེན་པའི་བར་གྱི་ཇི་སྙེད་པའི་ཤེས་བྱ་ཐམས་ཅད་ཤེས་པས་མངོན་པའི་སྡེ་སྣོད། ཕྱི་ནང་གི་རྟེན་འབྲེལ་ཁྱད་པར་ཅན་རྣམས་རྟོགས་པའི་སྒོ་ནས་རྒྱུད་སྡེ་བཞི་ཚང་བ་ཡིན། བཅུ་གཅིག་པ་རང་སེམས་ཀྱི་སྟེང་དུ་དཀོན་མཆོག་གསུམ་ཚང་ངམ་མི་ཚང་ཟེར་བ་ལ། སེམས་སྟོང་པའི་ཆ་རྐྱང་པ་དང་། སྟོང་པར་ངོ་འཕྲོད་པའི་ཆ་ལ་དཀོན་མཆོག་གསུམ་ཚང་དུ་མི་བཏུབ། སེམས་རིག་སྟོང་ཟུང་འཇུག་ལ་དཀོན་མཆོག་གསུམ་གྱི་ས་བོན་ཚང་ཞིང་། ཟུང་འཇུག་གི་དོན་ལེགས་པར་རྟོགས་པ་ལ་མངོན་གྱུར་ཉིད་དུ་ཚང་བ་ཡིན་ཞེས་གསུངས་སོ། །གཉིས་པ་གཞུང་གི་འབྲུ་ལ་སྦྱར་བ་ལ་ལྔ་སྟེ། ཕྱོགས་སྔ་མ་བཀོད་པ། དེ་མཐའ་གསུམ་དུ་བརྟགས་པ། དང་པོ་རྣམ་པར་བརྟགས་ནས་དགག་པ། གཉིས་པ་ཁས་བླངས་འགལ་བས་དགག་པ། གསུམ་པ་ལྟར་ན་འདོད་པ་གྲུབ་པའོ། །དང་པོ་ནི། ལ་ལ་ཞེས་སོགས་གསུམ་སྟེ། བོད་ཁ་ཅིག་བདེར་གཤེགས་སྙིང་པོའི་སྒྲ་ཆོས་དབྱིངས་ཟུང་འཇུག་ལ་མི་ཟེར་བར། དེ་ལས་གཞན་པའི་སེམས་ཅན་གྱི་ཁམས་ལ་འཇུག་པར་འདོད་ཅིང་། དེ་ཉིད་འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་པའི་སྐབས་ནས་བསྟན་པའི་བསྔོ་རྒྱུའི་དགེ་བ་ཡིན་ནོ་ཞེས་ཟེར་རོ། །གཉིས་པ་ནི་སེམས་ཅན་ཁམས་དེ་ཞེས་སོགས་ཚིགས་བཅད་གཅིག་གོ །གསུམ་པ་ནི། དངོས་པོ་ཡིན་ན་ཞེས་སོགས་ཚིགས་བཅད་ལྔ་དང་རྐང་པ་གཅིག་སྟེ། དངོས་པོ་ལ་བེམ་རིག་གཉིས་སུ་ཁ་ཚོན་ཆོད་པ་ནི་རྫས་ཀྱི་དབང་དུ་བྱས་པ་སྟེ། ལྡན་མིན་འདུ་བྱེད་ནི་དེ་གཉིས་ཀྱི་གནས་སྐབས་ལ་བཏགས་པའི་བཏགས་ཡོད་ཡིན་པའི་ཕྱིར་རོ། །ཡང་ན་བདེར་གཤེགས་སྙིང་པོ་དངོས་པོར་འདོད་ན་དེ་གཉིས་སུ་ཁ་ཚོན་ཆོད་ཅེས་པའོ། །བེམ་པོ་སེམས་ཅན་གྱི་ཁམས་སུ་འདོད་པ་མུ་སྟེགས་འགའི་ལུགས་ཡིན་པ་ནི་རྒྱང་འཕེན་པས་སོགས་འབྱུང་བ་དང་གྲུབ་བདེ་རྫས་གཅིག་པའི་རྣམ་པར་ཤེས་པ་ཡོད་པར་འདོད་པ་དང་། གཅེར་བུ་པ་ཤིང་སེམས་ལྡན་དུ་འདོད་པ་ལ་སོགས་པའོ། །རིག་པ་རྣམ་ཤེས་ཚོགས་བརྒྱད་ལས་མ་འདས་པ་ནི་འཁོར་དང་བཅས་པའི་དབང་དུ་བྱས་པའམ། ཡང་ན་བདེར་གཤེགས་སྙིང་པོ་ཤེས་པར་འདོད་ན་སེམས་བྱུང་དུ་འདོད་པ་ནི་མི་འཐད་པས་བརྒྱད་པོ་གང་རུང་དུ་འདོད་དགོས་པའོ། །མདོ་ལས། བདེར་གཤེགས་སྙིང་པོ་འདུས་མ་བྱས་སུ་གསུངས་པ་ནི། དཔལ་ཕྲེང་གི་མདོ་ལས། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ལ་ནི། སྐྱེ་བའམ་འགུམ་པའམ་འཕོ་བའམ་འབྱུང་བ་ཡང་མ་མཆིས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་འདུས་བྱས་ཀྱི་མཚན་ཉིད་ཀྱི་ཡུལ་ལས་འདས་པ་ལགས་སོ། །ཞེས་གསུངས་སོ། །འགའ་ལས་ཟག་མེད་སེམས་རྒྱུད་ཅེས་གསུངས་པ་ནི། མདོ་ལས། བདེར་གཤེགས་སྙིང་པོ་འགྲོ་ཀུན་ཡོངས་ལ་ཁྱབ། །དྲི་མ་མེད་པའི་ཡིད་ལ་རྣམ་པར་བརྟེན། །ཞེས་པ་སྟེ། དེ་ནི་ཀུན་གཞིའི་གསལ་ཆ་ལ་དགོངས་ལ་ཀུན་གཞིའི་གསལ་ཆ་ནི་མ་བསྒྲིབས་ལུང་མ་བསྟན་ཡིན་པས་བསྔོ་རྒྱུའི་དགེ་བར་འདོད་པ་དང་འགལ་ལོ། །གལ་ཏེ་ཚོགས་བརྒྱད་ལས་གཞན་པའི་ཟག་པ་མེད་པའི་སེམས་ཞེས་པའི་རྣམ་ཤེས་ཡོད་ན་རྣམ་ཤེས་ཚོགས་དགུར་འགྱུར་ལ་དེ་ཡང་འདོད་ན། ལང་ཀར་གཤེགས་པ་ལས། ཆོས་ལྔ་དང་ནི་རང་བཞིན་གསུམ། །རྣམ་པར་ཤེས་པ་བརྒྱད་ཉིད་དང་། །བདག་མེད་གཉིས་ཀྱི་ནང་དུ་ནི། །ཐེག་ཆེན་མཐའ་དག་འདུས་པར་ཟད། །ཞེས་གསུངས་པ་དང་འགལ་ལོ། །བཞི་པ་ནི་དངོས་མེད་ཅེས་སོགས་གཉིས་ཏེ། དངོས་མེད་ཡིན་ན་དགེ་སྡིག་མེད་པས་བསྔོ་རྒྱུའི་དགེ་བར་འདོད་པ་དང་འགལ་ལོ། །ལྔ་པ་ནི་གལ་ཏེ་སེམས་ཅན་ཞེས་སོགས་དྲུག་སྟེ། སེམས་ཅན་གྱི་ཁམས་དེ་དངོས་པོར་ཡོད་མེད་ཀྱི་སྤྲོས་པ་དང་བྲལ་བ་ཡིན་ན། སྔར་ཀླུ་སྒྲུབ་ཀྱི་ལུང་དྲངས་ནས་བཤད་པའི་ཡོད་མེད་ལས་འདས་པའི་ཆོས་དབྱིངས་ལས་འདའ་བ་མེད་ལ། དེ་ནི་བསྔོ་རྒྱུའི་དགེ་བ་མིན་པར་བཤད་ཟིན་ཏོ། །གསུམ་པ་ཆོས་དབྱིངས་ལ་བསྔོ་རྒྱུའི་སྙིང་པོ་ཡིན་མིན་གྱི་དབྱེ་བ་ཡོད་པར་འདོད་པ་དགག་པ་ནི། གལ་ཏེ་བེམ་པོའི་ཞེས་སོགས་བདུན་ཏེ། བེམ་པོའི་ཆོས་དབྱིངས་བསྔོ་རྒྱུའི་དགེ་བར་གྱུར་པའི་བདེར་གཤེགས་སྙིང་པོ་མ་ཡིན་ཡང་སེམས་ཅན་གྱི་ཆོས་དབྱིངས་བསྔོ་རྒྱུའི་དགེ་བར་གྱུར་པའི་བདེར་གཤེགས་སྙིང་པོ་ཡིན་ནོ་སྙམ་ན་མ་ཡིན་ཏེ། ཆོས་དབྱིངས་ལ་སྙིང་པོ་ཡིན་མིན་གྱི་དབྱེ་བ་ཡོད་ན་ངོ་བོ་མི་འདྲ་བའི་དབྱེ་བ་ཡོད་དགོས་པ་ལས། དེ་མེད་པར་རྒྱལ་བས་གསུངས་ཤིང་རིགས་པས་ཀྱང་འགྲུབ་པའི་ཕྱིར་རོ། །དེ་ལྟར་ཡང་ཡུམ་གྱི་མདོ་ལས། རིགས་ཀྱི་བུ་ཆོས་འདི་དག་གི་དེ་བཞིན་ཉིད་གང་ཡིན་པ་དང་། དེ་བཞིན་གཤེགས་པའི་དེ་བཞིན་ཉིད་གང་ཡིན་པ་དེ་ནི། དེ་བཞིན་ཉིད་གཅིག་སྟེ། རིགས་ཀྱི་བུ་དེ་བཞིན་ཉིད་ལ་གཉིས་སུ་བྱར་མེད་དོ། །ཞེས་གསུངས་སོ། །དེ་ཡང་ངོ་བོའི་སྒོ་ནས་དབྱེ་བ་མེད་པ་ཡིན་གྱི། ཆོས་ཅན་གྱི་སྒོ་ནས་སྟོང་ཉིད་བཞི་དང་། བཅུ་དྲུག་དང་། ཉི་ཤུར་དབྱེ་བ་དང་། རྟེན་ཆོས་བསྒྲུབ་པའི་སྒོ་ནས་དབྱེ་བ་གསུམ་དང་། བཅུ་གསུམ་དུ་དབྱེ་བ་ཡང་ཡོད་དོ། །བཞི་པ་དེས་ན་སྤྲོས་བྲལ་ལ་སྙིང་པོར་འཇོག་པའི་འཐད་པ་ལ་གཉིས་ཏེ། འཐད་པ་དངོས་དང་། ཤེས་བྱེད་ཀྱི་ལུང་ངོ་། །དང་པོ་ནི། དེས་ན་དེ་བཞིན་ཞེས་སོགས་བཞི་སྟེ། སེམས་ཀྱི་རང་བཞིན་སྤྲོས་བྲལ་ཟུང་འཇུག་ལ་སྙིང་པོར་འཇོག་པའི་ཕྱིར་ན། སེམས་ཅན་རྣམས་ལ་སོགས་ཏེ། ཐབས་ཀྱིས་མ་ཟིན་ན་འཁོར་བ་དང་། ཐབས་ཀྱིས་ཟིན་ན་སངས་རྒྱས་འབྱུང་བའི་ཕྱིར་རོ། །གཉིས་པ་ལ་གསུམ་སྟེ། ཀླུ་སྒྲུབ་ཀྱི་ལུང་། བྱམས་པའི་ལུང་། བརྒྱད་སྟོང་པའི་ལུང་ཁུངས་འགོད་པའོ། །དང་པོ་ནི། འཕགས་པ་ཀླུ་སྒྲུབ་ཞེས་སོགས་དྲུག་སྟེ། སེམས་བདེན་པར་གྲུབ་ན་འཆིང་གྲོལ་མི་རུང་ཞིང་། བདེན་པས་སྟོང་པའི་ཕྱིར་ན་འཆིང་གྲོལ་རུང་ཞེས་པའོ། །གཉིས་པ་ནི། ཐེག་པ་ཆེན་པོ་ཞེས་སོགས་བཅུ་གསུམ་སྟེ། ལུང་གི་དོན་བཤད་པ་ནི་ཉེ་བར་ལེན་པའི་ཞེས་སོགས་ཀྱིས་སྟོན་ནོ། །དེའི་དོན་ཡང་རིགས་སད་པའི་ཚེ་སྡུག་བསྔལ་ལ་སྤོང་འདོད་དང་། མྱ་ངན་ལས་འདས་པ་ལ་དོན་གཉེར་གྱི་བློ་སྐྱེ་བ་གཉིས་ནི་སེམས་ཅན་ལ་བདེ་བར་གཤེགས་པའི་ཁམས་སེམས་ཀྱི་རང་བཞིན་སྤྲོས་བྲལ་ཡོད་པའི་སྒྲུབ་བྱེད་དུ་འཐད་དོ། །དེས་ན་སེམས་ཀྱི་རང་བཞིན་སྤྲོས་བྲལ་ཡོད་དེ། སྤྲོས་བྲལ་རྟོགས་པ་ལ་དོན་གཉེར་གྱི་བློ་སྐྱེ་ཞིང་། སྤྲོས་པ་ལ་སྐྱོ་བ་སྐྱེ་བའི་ཕྱིར་ཞེས་པ་འདི་ནི། མེ་ཡོད་པའི་སྒྲུབ་བྱེད་དུ་ཚ་བ་བཀོད་པ་ལྟར་རོ། །གསུམ་པ་ནི་འདི་དོན་ཞེས་སོགས་ཏེ། བརྒྱད་སྟོང་པའི་ཆོས་འཕགས་ཀྱི་ལེའུ་ལས། རིགས་ཀྱི་བུ་སྟོང་པ་ཉིད་ལ་འོང་བའམ་འགྲོ་བ་མེད་དེ། སྟོང་པ་ཉིད་གང་ཡིན་པ་དེ་ནི་དེ་བཞིན་གཤེགས་པའོ། །རིགས་ཀྱི་བུ་ཇི་ལྟ་བ་བཞིན་ལ་འགྲོ་བའམ་འོང་བ་མེད་དེ་ཇི་ལྟ་བ་བཞིན་གང་ཡིན་པ་དེ་ནི་དེ་བཞིན་གཤེགས་པའོ། །རིགས་ཀྱི་བུ་འདོད་ཆགས་དང་བྲལ་བ་ལ་ནི་འོང་བའམ་འགྲོ་བ་མེད་དེ། འདོད་ཆགས་དང་བྲལ་བ་གང་ཡིན་པ་དེ་ནི་དེ་བཞིན་གཤེགས་པའོ་ཞེས་པ་དང་། འཕགས་པ་ཆོས་འཕགས་ལ་བྱང་ཆུབ་སེམས་དཔའ་རྟག་ཏུ་ངུས་དེ་བཞིན་གཤེགས་པ་དེ་དག་གང་ནས་བྱོན་གང་དུ་བཞུད་ཅེས་དྲིས་པས་ལན་དུ་དེ་བཞིན་གཤེགས་པ་དེ་དག་གང་ནས་ཀྱང་མ་བྱོན་གང་དུ་ཡང་མ་བཞུད། དེ་བཞིན་ཉིད་ལས་མ་གཡོས་དེ་བཞིན་ཉིད་གང་ཡིན་པ་དེ་ནི་དེ་བཞིན་གཤེགས་པའོ་ཞེས་པ་དང་། སྨིག་རྒྱུ་གཡོ་བ་མཐོང་ན་སྨིག་རྒྱུའི་ཆུ་དེ་གང་ནས་འོངས་གང་དུ་སོང་། ཆུ་མེད་པ་ལ་ཆུར་འདུ་ཤེས་པ་དེ་བཞིན་དུ་དེ་བཞིན་གཤེགས་པ་ལ་གཟུགས་དང་སྒྲར་མངོན་པར་ཞེན་ནས་བྱོན་པ་དང་བཞུད་པར་རྟོག་པ་དེ་ནི་བྱིས་པ་ཤེས་རབ་འཆལ་བའོ། །ཞེས་གསུངས་སོ། །ལྔ་པ་སྙིང་པོ་བསྒྲུབ་པའི་ཚུལ་གྱིས་ཡོད་པ་དྲང་དོན་དུ་བསྟན་པ་ལ་གཉིས་ཏེ། ཆོས་གསུམ་གྱི་སྒོ་ནས་དྲང་དོན་དུ་གཏན་ལ་དབབ་པ། ཤེས་བྱེད་ཀྱི་ལུང་ཁུངས་འགོད་པའོ། །དང་པོ་ནི། འོན་ཀྱང་མདོ་སྡེ་ཞེས་སོགས་བཅུ་བཞི་སྟེ། སེམས་ཀྱི་རང་བཞིན་སྤྲོས་བྲལ་ལས་གཞན་པའི་བདེ་བར་གཤེགས་པའི་སྙིང་པོ་མེད་ལ་འོན་ཀྱང་དེ་བཞིན་གཤེགས་པའི་སྙིང་པོའི་མདོ་དང་། དཔལ་ཕྲེང་གི་མདོ་དང་། སོར་མོའི་ཕྲེང་བ་ལ་ཕན་པའི་མདོ་དང་། མྱང་འདས་ཆེན་པོ་ལ་སོགས་པའི་མདོ་སྡེ་འགའ་ཞིག་དང་། རྒྱུད་བླར། གོས་ངན་ནང་ན་རིན་པོ་ཆེ་གསེར་གྱི་སངས་རྒྱས་ཀྱི་སྐུ་གཟུགས་ཡོད་པ་ལྟར་སེམས་ཅན་རྣམས་ལ་མཚན་དཔེས་བརྒྱན་པའི་སངས་རྒྱས་ཀྱི་སྙིང་པོ་ཡོད་པར་གསུངས་པ་ནི་དགོངས་པ་ཡིན་པར་སོགས་ཏེ། ཇི་ལྟར་གསུངས་ན་མདོ་དང་པོ་ལས། རིགས་ཀྱི་བུ་དག་དེ་བཞིན་དུ་སེམས་ཅན་ཐམས་ཅད་ཀྱིས་མངོན་པར་ཞེན་པའི་ཡིད་ལ་བྱེད་པའི་ཁྱིམ་ལྟ་བུར་གྱུར་པའི་འོག་ན་དེ་བཞིན་གཤེགས་པའི་སྙིང་པོ་སྟོབས་དང་མི་འཇིགས་པ་དང་མ་འདྲེས་པ་དང་། སངས་རྒྱས་ཀྱི་ཆོས་ཐམས་ཅད་ཀྱི་མཛོད་དང་། གཏེར་ཆེན་པོ་ཡོད་ཀྱང་སེམས་ཅན་དེ་དག་གཟུགས་དང་སྒྲ་དང་དྲི་དང་རོ་དང་རེག་པ་ལ་ཆགས་པས་སྡུག་བསྔལ་ཞིང་། འཁོར་བ་ན་འཁོར་ཏེ་ཆོས་ཀྱི་གཏེར་ཆེན་པོ་དེ་མ་ཐོས་པས་ཐོབ་པར་མ་གྱུར་ཅིང་ཡོངས་སུ་སྦྱང་བའི་ཕྱིར་བརྩོན་པར་ཡང་མི་བྱེད་དོ། །རིགས་ཀྱི་བུ་དག་དེ་ནས་དེ་བཞིན་གཤེགས་པ་འཇིག་རྟེན་དུ་བྱུང་སྟེ། བྱང་ཆུབ་སེམས་དཔའི་ནང་དུ་འདི་ལྟ་བུའི་ཆོས་ཀྱི་གཏེར་ཆེན་པོ་ཡང་དག་པར་རབ་ཏུ་སྟོན་ཏོ་ཞེས་གསུངས་སོ། །མདོ་གཉིས་པ་ལས། རྣམ་པར་དབྱེར་མེད་པ་བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གངྒཱའི་ཀླུང་གི་བྱེ་མ་ལས་འདས་པ་དང་ལྡན་པ་དེ་བཞིན་གཤེགས་པའི་ཆོས་ཀྱི་སྐུར་བསྟན་པ་སྟེ། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་འདི་ཉིད་ཉོན་མོངས་པའི་སྦུབས་ལས་མ་གྲོལ་བ་ནི་དེ་བཞིན་གཤེགས་པའི་སྙིང་པོ་ཞེས་བགྱིའོ། །ཞེས་གསུངས་སོ། །མདོ་གསུམ་པ་ལས། སངས་རྒྱས་ཐམས་ཅད་ཀྱིས་ཤིན་ཏུ་ནན་ཏན་དུ་བཙལ་ཡང་དེ་བཞིན་གཤེགས་པའི་སྙིང་པོ་འཇིག་པ་མ་རྙེད། མི་འཇིག་པའི་དབྱིངས་སངས་རྒྱས་ཀྱི་དབྱིངས་སེམས་ཅན་ཐམས་ཅད་ལ་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །ཞེས་གསུངས་སོ། །མདོ་བཞི་པ་ལས། རིགས་ཀྱི་བུ་སངས་རྒྱས་ཀྱི་རང་བཞིན་ནི་འདི་ལྟ་སྟེ་སྟོབས་བཅུ་དང་མི་འཇིགས་པ་བཞི་དང་། སྙིང་རྗེ་ཆེན་པོ་དང་། དྲན་པ་ཉེ་བར་གཞག་པ་གསུམ་སྟེ། སེམས་ཅན་ཐམས་ཅད་ལ་རྣམ་པ་གསུམ་ཡོད་པ་ཡང་ཉོན་མོངས་པ་ཡོངས་སུ་བཅོམ་ན་གདོད་མཐོང་བར་འགྱུར་རོ། །ལོག་སྲེད་ཅན་དག་ནི་ལོག་སྲེད་ཡོངས་སུ་བཅོམ་ནས་གདོད་སྟོབས་བཅུ་དང་། མི་འཇིགས་པ་བཞི་དང་། སྙིང་རྗེ་ཆེན་པོ་དང་། དྲན་པ་ཉེ་བར་བཞག་པ་གསུམ་ཐོབ་པར་འགྱུར་རོ། །དོན་དེ་ལྟ་བུས་ན་ངས་རྟག་ཏུ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དོ་ཞེས་གསུངས་སོ། །རྒྱུད་བླར། དེ་བཞིན་རྒྱལ་བས་ཉོན་མོངས་མི་གཙང་ཆེན་པོར་ལྷུང་གྱུར་རྫོགས་སངས་རིན་པོ་ཆེ། །སེམས་ཅན་རྣམས་ལ་གཟིགས་ནས་དེ་དག་བྱ་ཕྱིར་ལུས་ཅན་རྣམས་ལ་ཆོས་སྟོན་ཏོ། །ཞེས་དང་། ཉོན་མོངས་ཀྱིས་བཏུམས་བདེར་གཤེགས་དངོས་པོ་ཉིད། །དུད་འགྲོ་ལ་ཡང་གཟིགས་ནས་དེ་བཞིན་ཏེ། །ཞེས་གསུངས་པའི་ཕྱིར། དགོས་པ་སྐྱོན་ལྔ་སྤང་ཕྱིར་གསུངས་པ་ནི། རྒྱུད་བླར། སེམས་ཞུམ་སེམས་ཅན་དམན་ལ་བརྙས་པ་དང་། །ཡང་དག་མིན་འཛིན་ཡང་དག་ཆོས་ལ་སྐུར། །བདག་ཆགས་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤོང་དོན་དུ་གསུངས། །ཞེས་གསུངས་པ་ལྟར་རོ། །དངོས་ལ་གནོད་བྱེད་ཀྱི་སྐབས་སུ་མུ་སྟེགས་བདག་དང་མཚུངས་པ་ནི། གྲངས་ཅན་པ་ཤེས་རིག་ཀུན་ལ་ཁྱབ་པའི་རྟག་པ་གཅིག་པུ་དང་། དབང་ཕྱུག་པ་གསལ་ལ་དྭངས་པའི་རྟག་པ་གཅིག་པུ་དང་། ཁྱབ་འཇུག་པ་ཀུན་ཁྱབ་ཀྱི་བློ་གཅིག་པུ་དང་། གཅེར་བུ་པ་རང་བཞིན་རྟག་ལ་གནས་སྐབས་མི་རྟག་པ་རང་གི་ལུས་ཀྱི་ཚད་ཙམ་དང་། རིག་པ་ཅན་པ་དཀར་ལ་འཚེར་བ། སྣུམ་ལ་འགྲིལ་བ། རྡུལ་ཕྲན་ཙམ་ཞིག་རང་རང་གི་སྙིང་ལ་གནས་པར་འདོད་པ་སོགས་དང་མཚུངས་པའོ། །ངེས་དོན་གྱི་མདོ་སྡེ་དང་འགལ་བ་ནི། ངེས་དོན་གྱི་མདོ་སྡེ་རྣམས་ལས། ཆོས་ཐམས་ཅད་སྟོང་པ་ཉིད་དུ་གསུངས་པ་དང་འགལ་བའོ། །འདིར་གོས་ཧྲུལ་ནང་ན་རིན་ཆེན་ལྟར། །ཞེས་གསུངས་པའི་དོན། རྒྱུད་བླའི་དཔེ་བདུན་པ་ནས་བཟུང་བ་མིན་གྱི། འོག་ནས་འཆད་པ་ལྟར་ལང་གཤེགས་ནས་དཔེ་དེ་གཅིག་པུ་གསུངས་པ་དངོས་སུ་སྨོས་ནས། རྒྱུད་བླའི་དཔེ་དགུ་ཆར་མཚོན་པ་ཡིན་ཏེ། དཔེ་དགུས་མཚོན་པ་ལྟར། རྟེན་དང་བརྟེན་པའི་ཚུལ་གྱིས་ཡོད་པ་དྲང་དོན་ཡིན་པ་དང་། སྙིང་པོ་རང་གི་ངོ་བོ་ངེས་དོན་ཡིན་པའི་ཕྱིར་རོ། །གཉིས་པ་ནི་འདི་དོན་ཞེས་སོགས་དྲུག་སྟེ། སྙིང་པོའི་མདོ་ལས། འདི་ལྟ་སྟེ་གཏེར་ཆེན་པོ་ནི། སེམས་ཀྱི་ངོ་བོ་ཉིད་ཀྱིས་སེམས་ཅན་མ་ཡིན་པའོ། །ཞེས་དང་། རྒྱུད་བླའི་འགྲེལ་པར། དོན་གྱི་གནས་གསུམ་པོ་འདི་དག་ཀྱང་དེ་བཞིན་གཤེགས་པའི་སྙིང་པོའི་མདོའི་རྗེས་སུ་འབྲངས་ཏེ། འོག་ནས་སྟོན་པར་འགྱུར་རོ་ཞེས་གསུངས་ཤིང་། འོག་ནས་ཇི་ལྟར་སྟོན་ཅེ་ན། འདི་ཡི་རང་བཞིན་ཆོས་སྐུ་དང་། །ཞེས་སོགས་ཀྱི་འགྲེལ་པར་དཔེ་དགུ་དོན་དགུ་སྦྱར་ནས་སེམས་ཀྱི་ཆོས་དབྱིངས་ཟུང་འཇུག་ལ་སངས་རྒྱས་ཀྱི་སྐུ་གསུམ་བསྐྱེད་པའི་རིགས་ཡོད་པ་ལ་དགོངས་ནས་བདེར་གཤེགས་སྙིང་པོར་གསུངས་སོ། །ཟླ་བ་གྲགས་པའི་འཇུག་འགྲེལ་ལས། མདོ་སྡེ་གང་ལས་ཕྱི་རོལ་སྣང་ཡོད་མིན། །ཞེས་སོགས་ཀྱི་ཐད་དུ། དེ་བཞིན་དུ་བཅོམ་ལྡན་འདས་ཀྱིས་མདོ་བརྗོད་པ་ལས་དེ་བཞིན་གཤེགས་པའི་སྙིང་པོ་གསུངས་པ་དེ་བཅོམ་ལྡན་འདས་ཀྱིས་རང་བཞིན་འོད་གསལ་བ་རྣམ་པར་དག་པས། ཐོག་མ་ནས་རྣམ་པར་དག་པ་ཉིད་མཚན་སུམ་ཅུ་རྩ་གཉིས་དང་ལྡན་པ་སེམས་ཅན་ཐམས་ཅད་ཀྱི་ལུས་ཀྱི་ནང་ན་མཆིས་པར་བརྗོད་དེ། བཅོམ་ལྡན་འདས་ཀྱིས་རིན་པོ་ཆེ་རིན་ཐང་ཆེན་པོ་གོས་དྲི་མ་ཅན་གྱིས་ཡོངས་སུ་བཀྲིས་པ་ལྟར་ཕུང་པོ་དང་ཁམས་དང་སྐྱེ་མཆེད་ཀྱི་གོས་ཀྱིས་ཡོངས་སུ་དཀྲིས་པ་འདོད་ཆགས་དང་ཞེ་སྡང་དང་གཏི་མུག་གིས་ཟིལ་གྱིས་ནོན་པ་ཡོངས་སུ་རྟོག་པའི་རྟོག་པས་དྲི་མ་ཅན་དུ་གྱུར་པ་རྟག་པ་བརྟན་པ་ཐེར་ཟུག་པར་ནི་བརྗོད་ན་བཅོམ་ལྡན་འདས་དེ་བཞིན་གཤེགས་པའི་སྙིང་པོར་སྨྲ་བ་འདི་ནི་མུ་སྟེགས་བྱེད་ཀྱི་བདག་ཏུ་སྨྲ་བ་དང་ཇི་ལྟར་འདྲ་བ་མ་ལགས། བཅོམ་ལྡན་འདས་མུ་སྟེགས་བྱེད་རྣམས་ཀྱང་རྟག་པ་བྱེད་པ་པོ་ཡོན་ཏན་མེད་པ་ཁྱབ་པ་མི་འཇིག་པའོ། །ཞེས་བདག་ཏུ་སྨྲ་བ་སྟོན་པར་བྱེད་དོ། །བཅོམ་ལྡན་འདས་ཀྱིས་བཀའ་སྩལ་པ་བློ་གྲོས་ཆེན་པོ་ང་ཡིས་དེ་བཞིན་གཤེགས་པའི་སྙིང་པོ་བསྟན་པ་ནི་མུ་སྟེགས་བྱེད་ཀྱི་བདག་སྨྲ་བ་དང་མཚུངས་པ་མ་ཡིན་ཏེ། བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྟོང་པ་ཉིད་ཡང་དག་པའི་མཐའ་དང་། མྱ་ངན་ལས་འདས་པ་དང་མ་སྐྱེས་པ་དང་མཚན་མ་མེད་པ་དང་སྨོན་པ་མེད་པ་ལ་སོགས་པའི་ཚིག་གི་དོན་རྣམས་ལ་དེ་བཞིན་གཤེགས་པའི་སྙིང་པོར་བསྟན་པར་བྱས་ནས་བྱིས་པ་རྣམས་བདག་མེད་པས་འཇིགས་པར་འགྱུར་བའི་གནས་རྣམ་པར་སྤང་བའི་དོན་དུ་དེ་བཞིན་གཤེགས་པའི་སྒོ་བསྟན་པས་རྣམ་པར་མི་རྟོག་པའི་གནས་སྣང་བ་མེད་པའི་སྤྱོད་ཡུལ་སྟོན་ཏེ་བློ་གྲོས་ཆེན་པོ་མ་འོངས་པ་དང་ད་ལྟར་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བདག་ལ་མངོན་པར་བརྟེན་པར་མི་བྱ། བློ་གྲོས་ཆེན་པོ་དཔེར་ན་རྫ་མཁན་ནི་འཇིམ་པའི་རྡུལ་གྱི་ཕུང་པོ་གཅིག་ལ། ལག་པ་དང་བཟོ་དང་ལག་གཟུངས་དང་ཆུ་དང་སྲད་བུ་དང་ནན་ཏན་དང་ལྡན་པ་ལས་སྣོད་རྣམ་པ་སྣ་ཚོགས་བྱེད་དོ། །བློ་གྲོས་ཆེན་པོ་དེ་བཞིན་དུ་དེ་བཞིན་གཤེགས་པ་རྣམས་ཀྱང་། ཆོས་ལ་བདག་མེད་པ་རྣམ་པར་རྟོག་པའི་བདག་ཉིད་རྣམ་པར་ལོག་པ་དེ་ཉིད། ཤེས་རབ་དང་ཐབས་ལ་མཁས་པ་དང་ལྡན་པ་རྣམ་པ་སྣ་ཚོགས་ཀྱིས་དེ་བཞིན་གཤེགས་པའི་སྙིང་པོ་བསྟན་པའམ་བདག་མེད་པ་བསྟན་པས་ཀྱང་རུང་སྟེ། རྫ་མཁན་བཞིན་དུ་ཚིག་དང་ཡི་གེའི་རྣམ་གྲངས་རྣམ་པ་སྣ་ཚོགས་ཀྱིས་སྟོན་ནོ། །དེ་ལྟར་དེའི་ཕྱིར་བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་བསྟན་པས་མུ་སྟེགས་བྱེད་ཀྱིས་བདག་ཏུ་བསྟན་པ་དང་མི་འདྲའོ། །བློ་གྲོས་ཆེན་པོ་དེ་ལྟར་དེ་བཞིན་གཤེགས་པ་རྣམས་ཀྱིས་མུ་སྟེགས་བྱེད་བདག་ཏུ་སྨྲ་བ་ལ་མངོན་པ་ཞེན་པ་རྣམས་དྲང་བའི་ཕྱིར། དེ་བཞིན་གཤེགས་པའི་སྙིང་པོ་བསྟན་པས་དེ་བཞིན་གཤེགས་པའི་སྙིང་པོ་སྟོན་ཏེ། ཡང་དག་པའི་བདག་ཏུ་རྣམ་པར་རྟོག་པའི་ལྟ་བར་ལྟུང་བའི་བསམ་པ་ཅན་དག་རྣམ་པར་ཐར་པ་གསུམ་གྱི་སྤྱོད་ཡུལ་ལ་གནས་པའི་བསམ་པ་དང་ལྡན་ཞིང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཇི་ལྟར་འགྱུར་ཞེས་པའི་མདོ་དྲངས་ནས་སྟོབས་སོགས་ཀྱིས་བརྒྱན་པའི་བདེར་གཤེགས་སྙིང་པོ་དྲང་དོན་དུ་བཤད་དོ། །གཉིས་པ་བསྔོ་ཚུལ་གྱི་ལག་ལེན་ལ་འཁྲུལ་པ་དགག་པ་ནི། འགའ་ཞིག་བསྔོ་བའི་ཞེས་སོགས་དྲུག་སྟེ། འདུལ་བ་སྟོད་ལུགས་པ་དང་། བལ་པོའི་འདུལ་འཛིན་ཁ་ཅིག་བསྔོ་བ་བྱེད་པའི་ཚེ་རིལ་པ་སྤྱི་བླུགས་ཀྱིས་ཆུ་བསྒྲེང་བའི་ལག་ལེན་བྱེད་དོ། །ཞེས་གྲགས་པ་འདི་ནི་མུ་སྟེགས་སོགས་སོ། །སྐྱེས་རབས་ལས་རྒྱལ་པོ་ཐམས་ཅད་སྒྲོལ་གྱིས་བྲམ་ཟེ་སློང་མོ་བ་ལ་གླང་པོ་ཆེ་དང་། བུ་དང་བུ་མོ་བྱིན་པ་དང་། བརྒྱ་བྱིན་ལ་བཙུན་མོ་བྱིན་པའི་ཚེ། གསེར་གྱི་རིལ་བས་བཏུད་དེ་བཞེས་སུ་གསོལ་ཞེས་མདུན་དུ་འཁོད་པ་དང་། བྲམ་ཟེའི་ལག་པ་རྐྱོང་བ་ལ་རིལ་བ་སྤྱི་བླུགས་ཀྱིས་བཏུད་དོ། །དེ་ཡི་སྦྱིན་པའི་མཐུ་དག་གིས། །རིལ་བ་ལས་ནི་ཆུ་བྱུང་ནས། །མིག་ནི་པད་མོ་འདྲ་བ་ལས། །མ་བསྒྲིམས་པར་ཡང་མཆི་མ་བྱུང་། །ཞེས་པ་དང་། དེ་ནས་རྒྱལ་བུས་སྲས་གཉིས་ལག་པ་བཅིངས། །བྲམ་ཟེའི་ལག་པར་ཆུ་བླུགས་དེ་ལ་བྱིན། །དེའི་ཚེ་ས་གཡོས་འདོད་ལྷ་སྡིག་ཅན་གྱི། །སྙིང་ནི་མྱ་ངན་མེ་ཡིས་བསྲེགས་པར་གྱུར། །ཞེས་བཤད་པ་རྣམས། དེའི་ཚེ་ཡུལ་དེ་ན་མུ་སྟེགས་རིག་བྱེད་པའི་ལག་ལེན་དར་བས་དེའི་ལུགས་སུ་མཛད་པའོ། །གསུམ་པ་བསྔོ་བའི་འབྲས་བུ་ལ་འཁྲུལ་པ་དགག་པ་ནི། བསྔོ་བ་དེ་ཡང་ཞེས་སོགས་བརྒྱད་དེ། བསྔོ་རྒྱུའི་དགེ་རྩ་སྐྱེས་བུའི་རྩོལ་བས་གསར་དུ་བསགས་པ་དགོས་ན་བསྔོ་བ་རྣམ་དག་ལ་བསྔོ་བའི་འབྲས་བུ་ངེས་པར་འགྲུབ་པ་གཅིག་དགོས་སམ་སྙམ་ན་མ་ཡིན་ཏེ། བསྔོ་བ་རྣམ་དག་དེ་ཡང་མདོར་བསྡུས་ན་འབྲས་བུ་འགྲུབ་ཏུ་རུང་བ་གནས་ཀྱི་བསྔོ་བ་དང་། བསྔོས་ཀྱང་མི་འགྲུབ་པ་གནས་མིན་གྱི་བསྔོ་བ་དང་གཉིས་སུ་མདོ་ལས་གསུངས་པའི་ཕྱིར་ཏེ། དང་པོ་ནི་འཇམ་དཔལ་སོགས་སོ། །གཉིས་པ་ནི། དཀོན་མཆོག་བརྩེགས་པར། བུ་མོ་དྲི་མེད་བྱིན་གྱིས་ཞུས་པའི་མདོ་ལས། ཆོས་རྣམས་སོགས་ཏེ། མདོ་དེ་ཉིད་ལས། བུ་མོས་སྨྲས་པ་རིགས་ཀྱི་བུ་ཆོས་རྣམས་ཀྱི་ཆོས་ཉིད་ནི་སྨོན་ལམ་གྱི་དབང་གིས་བསྒྱུར་བར་མི་ནུས་སོ། །གལ་ཏེ་ནུས་པར་གྱུར་ན་དེ་བཞིན་གཤེགས་པ་རེ་རེའི་དགོངས་པ་དེ་སྨོན་ལམ་གྱི་དབང་གིས་ཇི་ལྟར་མི་འགྲུབ་སྟེ། རྣམ་གྲངས་འདིས་ནི་སྨོན་ལམ་གྱི་དབང་གིས་བསྒྱུར་བར་མི་ནུས་པར་རིག་པར་བྱའོ། །ཞེས་གསུངས་པ་དེའི་དོན་འཁོར་བའི་ཕྱི་མཐའ་མེད་པ་སོགས་ཆོས་རྣམས་ཀྱི་རྟེན་འབྲེལ་གྱི་ཆོས་ཉིད་དུ་གྲུབ་པ་ནི་སྨོན་ལམ་གྱི་དབང་གིས་གཞན་དུ་བསྒྱུར་བར་མི་ནུས་ཏེ། གལ་ཏེ་ནུས་ན་སྔོན་གྱི་སངས་རྒྱས་རེ་རེས་ཀྱང་འཁོར་བ་སྟོངས་པར་གྱུར་ཅིག ཅེས་པའི་སྨོན་ལམ་ཅིས་མི་འགྲུབ་ཅེས་པའི་དོན་ནོ། །བཞི་པ་དོན་བསྡུས་ཏེ་ལས་འབྲས་ཀྱི་གནད་བསྟན་པ་ལ་གཉིས་ཏེ། ལས་འབྲས་སྤྱིའི་གནད་བསྟན་པ། ཐེག་པ་ཆེ་ཆུང་གི་ལས་འབྲས་ཀྱི་གནད་བསྟན་པའོ། །དང་པོ་ནི། དེས་ན་བསྔོ་རྒྱུའི་ཞེས་སོགས་བཅུ་གཅིག་སྟེ། ཆོས་དབྱིངས་དགེ་སྡིག་གཉིས་ཀར་མིན་པ་ལུང་རིགས་གཉིས་ཀྱིས་བསྒྲུབས་ཟིན་པ་དེས་ན་ཞེས་སོགས་ཏེ། རིན་ཆེན་ཕྲེང་བ་ལས། འདོད་ཆགས་ཞེ་སྡང་སོགས་སོ། །གཉིས་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། ཉན་ཐོས་དགེ་བ་ཞེས་སོགས་ཚིགས་བཅད་གཅིག་གོ །གཉིས་པ་ནི་བསྐལ་པ་དུ་མར་ཞེས་སོགས་ཚིགས་བཅད་བཞི་སྟེ། ཚིགས་བཅད་དང་པོའི་དོན་ནི། མདོ་སྡུད་པ་ལས། གལ་ཏེ་བསྐལ་པ་དུ་མར་དགེ་བའི་ལས་ལམ་བཅུ། །སྤྱོད་ཀྱང་ཉན་ཐོས་རང་རྒྱལ་བྱང་ཆུབ་འདོད་སྐྱེད་ན། །དེ་ནི་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་གསུངས། ཚིགས་བཅད་གཉིས་པའི་དོན་ནི། མདོ་སྡུད་པ་ལས། གལ་ཏེ་བྱང་ཆུབ་སེམས་དཔའ་འདོད་ཡོན་ལྔ་སྤྱོད་ཀྱང་། །སངས་རྒྱས་ཆོས་དང་འཕགས་པའི་དགེ་འདུན་སྐྱབས་སོང་སྟེ། །སངས་རྒྱས་བསྒྲུབ་བྱ་སྙམ་དུ་ཀུན་མཁྱེན་ཡིད་བྱེད་ན། །མཁས་པ་ཚུལ་ཁྲིམས་ཕ་རོལ་ཕྱིན་གནས་རིག་པར་བྱ། །ཞེས་པ་སྟེ། དཔེར་ན་བྲམ་ཟེའི་ཁྱེའུ་སྐར་མས། ལོ་དུ་མར་ཚངས་སྤྱོད་བསྲུངས་ཀྱང་། ཚོང་དཔོན་གྱི་བུ་མོ་ལ་སྙིང་བརྩེ་བས་བསླབ་པ་ཕུལ་ཏེ། ལོ་བཅུ་གཉིས་ཁྱིམ་ཐབས་བྱས་པས་བསྐལ་པ་དགུ་ཁྲིའི་འཁོར་བ་ཕྱིར་བསྙིལ་བ་ལྟ་བུའོ། །ཚིགས་བཅད་གསུམ་པའི་དོན་ནི། ཐབས་ལ་མཁས་པའི་མདོ་ལས། དེ་ཡང་རིགས་ཀྱི་བུ་ཡོངས་སུ་བརྟག་པ་བཟུང་ན་གལ་ཏེ་རབ་ཏུ་བྱུང་བའི་བྱང་སེམས་ལྟུང་བའི་རྩ་བ་བཞི་པོ་ཐམས་ཅད་ལས་འདས་པར་གྱུར་ཀྱང་ཐབས་མཁས་པ་འདིས་སྦྱོང་བར་བྱེད་ན་བྱང་ཆུབ་སེམས་དཔའི་ལྟུང་བར་མི་འགྱུར་བར་ངས་བཤད་དོ། །ཞེས་གསུངས་སོ། །ཚིགས་བཅད་བཞི་པའི་དོན་ནི་ཉེ་བ་འཁོར་གྱིས་ཞུས་པའི་མདོ་ལས། ཉེ་བ་འཁོར་ཉན་ཐོས་ཀྱི་ཐེག་པ་པ་རྣམས་ཀྱིས་སྦྱོར་བ་ཡང་གཞན། ལྷག་པའི་བསམ་པ་ཡང་གཞན་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ཀྱི་སྦྱོར་བ་ཡང་གཞན་ལྷག་པའི་བསམ་པ་ཡང་གཞན་པའི་ཕྱིར་རོ། །ཉེ་བ་འཁོར་དེ་ལ་ཉན་ཐོས་ཀྱི་ཐེག་པ་པའི་ཚུལ་ཁྲིམས་ཡོངས་སུ་དག་པ་གང་ཡིན་པ་དེ་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་མ་དག་པ་ཉིད་དང་། ཤིན་ཏུ་འཆལ་བའི་ཚུལ་ཁྲིམས་ཉིད་ཡིན་ལ། ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཉིད་གང་ཡིན་པ་དེ་ནི་ཉན་ཐོས་ཀྱི་ཐེག་པའི་ཚུལ་ཁྲིམས་ཡོངས་སུ་མ་དག་པ་ཉིད་དང་། ཤིན་ཏུ་འཆལ་བའི་ཚུལ་ཁྲིམས་ཉིད་ཡིན་ནོ། །དེ་ཅིའི་ཕྱིར་ཞེ་ན་ཉེ་བ་འཁོར་འདི་ལ་ཉན་ཐོས་ཀྱི་ཐེག་པ་པ་ནི་སྐད་ཅིག་ཙམ་ཡང་སྲིད་པར་སྐྱེ་བ་ལེན་པར་མི་བྱེད་དོ། །དེ་ནི་ཉན་ཐོས་ཀྱི་ཐེག་པ་པའི་ཚུལ་ཁྲིམས་ཡོངས་སུ་དག་པ་ཉིད་ཡིན་ལ། དེ་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་ཚུལ་ཁྲིམས་ཡོངས་སུ་མ་དག་པ་ཉིད་དང་ཤིན་ཏུ་འཆལ་བའི་ཚུལ་ཁྲིམས་ཉིད་ཡིན་པའི་ཕྱིར་རོ། །ཉེ་བ་འཁོར་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཉིད་གང་ཡིན་པ་དེ་ནི། ཉན་ཐོས་ཀྱི་ཐེག་པའི་ཚུལ་ཁྲིམས་ཡོངས་སུ་མ་དག་པ་ཉིད་དང་ཤིན་ཏུ་འཆལ་བའི་ཚུལ་ཁྲིམས་ཉིད་དུ་འགྱུར་བ་གང་ཞེ་ན། ཉེ་བ་འཁོར་འདི་ལ་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་བསྐལ་པ་ཚད་མེད་གྲངས་མེད་པར་སྲིད་པར་སྐྱེ་བ་ལེན་ཀྱང་སེམས་ཡོངས་སུ་མི་སྐྱོ་ཞིང་ཡིད་མི་ཞུམ་པ་དེ་ནི། ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཉིད་ཡིན་ལ་དེ་ནི་ཉན་ཐོས་ཀྱི་ཐེག་པའི་ཚུལ་ཁྲིམས་ཡོངས་སུ་མ་དག་པ་ཉིད་དང་། ཤིན་ཏུ་འཆལ་བའི་ཚུལ་ཁྲིམས་ཉིད་ཡིན་ནོ་ཞེས་གསུངས་སོ། །གཉིས་པ་འབྲས་བུ་དཀར་ནག་ཟང་ཐལ་དགག་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། དཀར་གནག་ཞེས་སོགས་གཉིས་ཏེ། འབྲི་ཁུང་པ་ཁ་ཅིག དཀར་ནག་ཟང་ཐལ་ཞེས་བྱ་བ། ནག་པོ་ཟང་ཐལ་གྱི་རྣམ་སྨིན་སངས་རྒྱས་ཀྱིས་ཀྱང་མྱོང་དགོས་ཏེ། དགོངས་གཅིག་ཏུ་རྡོ་རྗེའི་གསུང་ལས། ཤཱཀྱ་ཐུབ་པ་ལ་ལྷ་བྱིན་གྱིས་སྒྱོགས་རྡོ་འཕང་པས་ཞབས་ལ་རྨ་བྱུང་སྟེ། ཞལ་སྔ་ནས། གང་དུ་གནས་ཀྱང་ལས་ཀྱིས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ན་མེད་རྒྱ་མཚོའི་གཏིང་ན་མེད། །རིའམ་ཕུག་ན་ཡོད་པ་མ་ཡིན་ནོ། །ཞེས་སོགས་འབྱུང་བས་སོ། །དེ་བཞིན་དུ་འདུལ་བ་ལུང་ལས། སྟོན་པ་ལ་ཡང་སྐུ་ཚེ་སྔ་མའི་ལས་ངན་སྨིན་པར་གསུངས་པ་ཐམས་ཅད་ངེས་དོན་ཡིན་པས། ལས་དཀར་གནག་སངས་རྒྱས་ཀྱི་སའི་བར་དུ་ཟང་ཐལ་དུ་འགྲོའོ། །ཞེས་པའི་ཆོས་སྐད་ངོ་མཚར་བ་གྲག་གོ །གཉིས་པ་ལ་གསུམ་སྟེ། དཀར་ནག་ཟང་ཐལ་དྲང་དོན་དུ་བསྒྲུབ་པ། ངེས་དོན་ཡིན་པ་ལ་གནོད་བྱེད་བསྟན་པ། ཤེས་བྱེད་ཀྱི་ལུང་རིགས་དང་སྦྱར་བའོ། །དང་པོ་ནི། དེ་དག་གིས་ནི་ཞེས་སོགས་ཚིགས་བཅད་བཞི་སྟེ། སྟོན་པ་ལ་ལས་ངན་སྨིན་པར་འདོད་པའི་འབྲི་ཁུང་པ་དེ་དག་གིས་ནི། འདུལ་བ་ལུང་ལས་དྲང་དོན་དུ་གསུངས་པ་ལ་ངེས་པའི་དོན་དུ་འཁྲུལ་པར་ཟད་དོ། །ཇི་ལྟར་དྲང་དོན་ཡིན་སྙམ་ན་སེང་ལྡེང་ཚལ་པ་ཟུག་པ་དང་། ཞེས་སོགས་ཀྱི་ཚིག་རྐང་ལྔ་པོ་རེ་རེ་ལ་ཐུབ་པའི་སྐུ་ཚེ་སྔ་མ་ཡི། ཞེས་སོགས་ཚིག་རྐང་བདུན་གསལ་བྱེད་དུ་སྦྱར་ནས་དོན་ཚན་ལྔར་བྱས་ཏེ། འདུལ་བ་ལུང་ལས། ལས་ངན་སྨིན་པར་གསུངས་ཚུལ། དེ་ཉིད་གསང་ཆེན་ཐབས་ལ་མཁས་པའི་མདོ་ལས། དྲང་དོན་དུ་གཏན་ལ་ཕབ་པའི་ཚུལ་གཉིས་གཉིས་ཀྱི་སྒོ་ནས་བཤད་པར་བྱའོ། །དང་པོ་ནི། འདུལ་བ་ལུང་ལས། སྔོན་ཚོང་པ་ནོར་འདོད་པ་ལྔ་བརྒྱ་ཙམ་ཞིག་རྒྱ་མཚོ་ཆེན་པོར་ཞུགས་པ་ན་དེ་དག་གི་ནང་ནས་མི་སྡིག་པའི་ལས་བྱེད་པ་གཞན་གྱི་ནོར་འཕྲོག་པའི་ཆོམ་རྐུན་པ་ཞིག་འདི་སྙམ་དུ་སེམས་ཏེ། ཚོང་པ་འདི་ཐམས་ཅད་སྲོག་དང་ཕྲལ་ལ་རྫས་ཀྱི་རྣམ་པ་འདི་དག་ཐམས་ཅད་ཁྱེར་ཏེ། འཛམ་བུའི་གླིང་དུ་འགྲོ་བར་བྱའོ་སྙམ་མོ། །དེའི་ཚེ་ཚོང་པ་དེའི་དེད་དཔོན་སྙིང་རྗེ་ཆེན་པོ་དང་ལྡན་པ་དེ་ལ་རྒྱ་མཚོར་གནས་པའི་ལྷས་རྨི་ལམ་དུ་མི་ནག་པོས་ཇི་ལྟར་བསམ་པ་ཐམས་ཅད་ལུང་བསྟན་པ་དང་། དེད་དཔོན་གྱི་བསམ་པ་ལ་ཚོང་པ་ལྔ་བརྒྱ་པོ་འདི་དག་བྱང་ཆུབ་ལས་ཕྱིར་མི་ལྡོག་པ་ཤ་སྟག་ཡིན་པ་ལས་མི་འདིས་བསད་པར་གྱུར་ན། དེའི་ལས་ཀྱི་སྒྲིབ་པས་སེམས་ཅན་དམྱལ་བ་རྣམས་སུ་ཡུན་རིང་དུ་བསྲེག་པར་འགྱུར་བས། ཚོང་པ་འདི་དག་བསད་པར་མི་འགྱུར་ཞིང་། མི་འདི་ཡང་དམྱལ་བ་ཆེན་པོ་རྣམས་སུ་འགྲོ་བར་མི་འགྱུར་བའི་ཐབས་ཅི་ཡོད་སྙམ་དུ་ཞག་བདུན་གྱི་བར་དུ་སེམས་སོ། །དེ་ནས་ཐབས་འདི་ཉིད་ཡིན་ནོ་སྙམ་སྟེ། ཆོམ་རྐུན་པ་དེ་ལ་རང་ཉིད་ཀྱིས་མདུང་བསྣུན་ཏེ། སྲོག་དང་ཕྲལ་ནས་མགྲོན་པོ་ཐམས་ཅད་དོན་གྲུབ་ཅིང་རང་རང་གི་གྲོང་ཁྱེར་དུ་ཕྱིན་པར་གྱུར་ཏོ། །དེའི་དུས་ཀྱི་དེད་དཔོན་ནི་སྟོན་པ་རང་ཉིད་ཡིན་ཅིང་། ཚོང་པ་ལྔ་བརྒྱ་ནི་བསྐལ་པ་བཟང་པོ་འདི་ལ་འཚང་རྒྱ་བའི་བྱང་ཆུབ་སེམས་དཔའ་ལྔ་བརྒྱ་ཡིན་ནོ། །དེ་ལྟར་ཆོམ་རྐུན་པ་བསད་པའི་ལས་ཀྱི་ཉེས་པས་དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་སྟེ། ཁྲག་གི་རྒྱུན་བབས་པར་གསུངས་སོ། །དེ་ཉིད་ཐབས་ལ་མཁས་པའི་མདོ་ལས། དྲང་དོན་དུ་བསྟན་པ་ནི། དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་པ་དེ་ཡང་རྫོགས་པའི་སངས་རྒྱས་ཀྱི་ཐབས་ལ་མཁས་པ་ཡིན་ཏེ། འདི་ལྟར་ཡངས་ཅན་གྱི་གྲོང་ཁྱེར་ཆེན་པོ་འདི་ཉིད་ན་སྲིད་པ་ཐ་མ་པའི་མི་ཉི་ཤུ་དང་། དེ་དག་གི་དགྲ་བོ་ཉི་ཤུ་ཞིག་ཀྱང་ཡོད་པར་གྱུར་ཏེ། དགྲ་བོ་དེ་དག་གིས་མི་ཉི་ཤུ་པོ་དེ་དག་བསད་པར་བྱ་བའི་ཕྱིར་དུ་མི་དེ་དག་གི་ཁྱིམ་དུ་ཞུགས་སོ། །དེ་ནས་མི་བཞི་བཅུ་པོ་དེ་དག་སངས་རྒྱས་ཀྱི་མཐུས། སངས་རྒྱས་ག་ལ་བ་དེར་འདོང་ངོ་། །དེ་ནས་དེ་དག་འདུལ་བའི་ཆེད་དུ་སྟོན་པས་མོའུ་འགལ་གྱི་བུ་ལ། ས་ཕྱོགས་འདིར་སེང་ལྡེང་གི་ཚལ་པ་ཞིག་བྱུང་ནས་སྟོན་པའི་ཞབས་ལ་ཟུག་པར་གྱུར་ཏོ་ཞེས་བཀའ་བསྩལ་ཏོ། །དེ་མ་ཐག་ཏུ་སེང་ལྡེང་ཚལ་པ་བྱུང་ནས་སྟོན་པ་རྒྱལ་ཆེན་བཞིའི་རིས་དང་། སུམ་ཅུ་རྩ་གསུམ་ནས་བཟུང་སྟེ་ཚངས་པའི་འཇིག་རྟེན་གྱི་བར་དུ་གཤེགས་ཀྱང་སེང་ལྡེང་གི་ཚལ་པ་དེ་ཡང་ཚངས་པའི་འཇིག་རྟེན་གྱི་བར་དུ་འོངས་སོ། །ཚངས་པའི་འཇིག་རྟེན་ནས་བབས་ཏེ་གདན་ལ་བཞུགས་པ་ན་སེང་ལྡེང་གི་ཚལ་པ་དེ་ཡང་མདུན་དུ་འཁོད་དོ། །དེ་ནས་བཅོམ་ལྡན་འདས་ཀྱི་ཞབས་གཡས་པ་སེང་ལྡེང་གི་ཚལ་པའི་སྟེང་དུ་བཞག་མ་ཐག་ཏུ་སྟོང་གསུམ་གྱི་འཇིག་རྟེན་གཡོས་པར་གྱུར་ཏོ། །དེ་ནས་ཀུན་དགའ་བོས་འདི་ཅི་ལས་གྱུར་ཞེས་ཞུས་པས་ཚོང་པ་གཡོ་ཅན་བསད་པའི་ལས་ཀྱི་ལྷག་མ་ཡིན་ནོ། །ཞེས་གསུངས་པས། མི་ཉི་ཤུ་པོ་གསོད་པར་འདོད་པའི་དགྲ་བོ་ཉི་ཤུ་པོ་དེ་དག་གིས་མི་ཉི་ཤུ་པོ་གསོད་པར་འདོད་པའི་སེམས་བསྐྱེད་པའི་ཉེས་པ་བཅོམ་ལྡན་འདས་ཀྱི་སྤྱན་སྔར་བཤགས་སོ། །དེས་ན་དོན་དེ་ལ་དགོངས་ནས་སེང་ལྡེང་གི་ཚལ་པ་ཟུག་པར་བསྟན་པ་ནི་དེ་བཞིན་གཤེགས་པའི་ཐབས་ལ་མཁས་པ་ཡིན་པར་གསུངས་སོ། །གཉིས་པ་ནི་འདུལ་བ་ལུང་ལས། སྔོན་སངས་རྒྱས་འོད་སྲུངས་ཀྱི་བསྟན་པ་ལ་རྫ་མཁན་དགའ་སྐྱོང་ཞེས་བྱ་བ་དང་། དེའི་ནེའུ་ཟླ་བྲམ་ཟེའེ་ཁྱེའུ་བླ་མ་ཞེས་བྱ་བ་གཉིས་ཡོད་པ་ལས། བླ་མས་དགའ་སྐྱོང་ལ་སྨྲས་པ། དེ་བཞིན་གཤེགས་པ་འོད་སྲུང་ལ་བསྙེན་བཀུར་བྱེད་པ་ཐོང་ཤིག དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད། བྱང་ཆུབ་ནི་མཆོག་ཏུ་དཀའ་བ་ཡིན་ནོ། །ཞེས་ལན་གསུམ་གྱི་བར་དུ་སྨྲས་ཀྱང་མ་བཟློག་པར་དགའ་སྐྱོང་གིས་བླ་མའི་ཐོར་ཏོ་ནས་བཟུང་སྟེ། དེས་པ་བླ་མ་ཁྱོད་སངས་རྒྱས་འོད་སྲུང་ལ་བསྙེན་བཀུར་གྱིས་ཤིག དེ་ནས་བླ་མས་སངས་རྒྱས་ནི་མཆོག་མ་ཡིན་ཞིང་ཆོས་བསྟན་པ་ནི་མཆོག་མ་ཡིན་ནོ། །ཞེས་སྨྲས་པའི་ལས་ཀྱི་རྣམ་པར་སྨིན་པས་ད་ལྟ་ཡང་ལོ་དྲུག་གི་བར་དུ་དཀའ་བ་སྤྱད་དགོས་བྱུང་ངོ་། །ཞེས་གསུངས། ཐབས་ལ་མཁས་པའི་མདོ་ལས། གཞན་འདྲ་བ་ལ་བྲམ་ཟེའི་ཁྱེའུ་འོད་ཕྲེང་དང་རྫ་མཁན་བུམ་བྱེད་ཅེས་གསུངས་སོ། །དེ་ཉིད་གསང་ཆེན་ཐབས་ལ་མཁས་པའི་མདོ་ལས། དྲང་དོན་དུ་གཏན་ལ་ཕབ་པ་སྟེ། བྲམ་ཟེའི་ཁྱེའུ་འོད་ཟེར་ཕྲེང་དེ་ལ་ནེའུ་ཟླ་བྲམ་ཟེའི་ཁྱེའུ་རིགས་ཤིང་སཱ་ལ་ཆེན་པོ་ལྟ་བུ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ལྔ་ཞིག་ཡོད་པ་དེ་དག་སྡིག་པའི་གྲོགས་པོའི་དབང་གིས་བྱང་ཆུབ་ཀྱི་སེམས་བརྗེད་ནས་མུ་སྟེགས་བྱེད་ཀྱི་བརྟུལ་ཞུགས་སྤྱོད་ཅིང་སངས་རྒྱས་ལ་མི་མོས་པར་གྱུར་ཏོ། །འོད་ཟེར་ཕྲེང་གི་དེ་དག་སྣོད་ཡིན་པར་རིག་ནས་མུ་སྟེགས་བྱེད་ལས་བཟློག་པར་འདོད་པས་རྫ་མཁན་བུམ་བྱེད་ལ་འདི་སྐད་ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད། ཅེས་སྨྲས་ཏེ། དུས་གཞན་ཞིག་ན་འོད་ཟེར་ཕྲེང་ནེའུ་ཟླ་ལྔ་པོ་དང་ལྷན་ཅིག་ཏུ་ཆུ་འགྲམ་ཞིག་ཏུ་འཁོད་པར་གྱུར་པ་དང་རྫ་མཁན་བུམ་བྱེད་ཀྱིས་འོད་ཟེར་ཕྲེང་ལ་འདི་སྐད་ཅེས་སྨྲས་སོ། །ཀྱེ་འོད་ཟེར་ཕྲེང་སངས་རྒྱས་འོད་སྲུང་ལ་ལྟ་བ་དང་། ཕྱག་བྱ་བ་དང་བསྙེན་བཀུར་བྱ་བའི་ཕྱིར་འདོང་ངོ་། །འོད་ཟེར་ཕྲེང་གིས་སྔར་བཞིན་དུ་སྨྲས་པས་རྫ་མཁན་བུམ་བྱེད་ཀྱིས་འོད་ཟེར་ཕྲེང་གི་ཐོར་ཏོ་ནས་བཟུང་སྟེ། སངས་རྒྱས་འོད་སྲུང་གི་དྲུང་དུ་བྲམ་ཟེའི་ཁྱེའུ་ལྔ་པོ་དང་ལྷན་ཅིག་ཏུ་འདོང་ངོ་། །དེ་ནས་བྲམ་ཟེའི་ཁྱེའུ་ལྔ་པོ་དེ་དག་གིས་འོད་ཟེར་ཕྲེང་སངས་རྒྱས་འོད་སྲུང་གི་དྲུང་དུ་འགྲོ་བའི་ཕྱིར་རྫ་མཁན་བུམ་བྱེད་འདིས་བདག་ཉིད་ཀྱི་སྲོག་ཡོངས་སུ་བཏང་སྟེ། སངས་རྒྱས་ཀྱི་དྲུང་དུ་འཁྲིད་པར་འགྱུར་བའི་སངས་རྒྱས་དེ་ནི་ཅི་འདྲ་བ་ཞིག་ཡིན་སྙམ་དུ་སེམས་ནས་དད་པ་ཐོབ་པར་གྱུར་ཏེ། དེ་དག་ལ་སངས་རྒྱས་འོད་སྲུང་གིས་ཆོས་བསྟན་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེས་ན་རིགས་ཀྱི་བུ་ལྔ་པོ་དེ་དག་སྨིན་པར་བྱ་བའི་ཕྱིར། འོད་ཟེར་ཕྲེང་གིས་ཚིག་དེ་སྐད་ཅེས་སྨྲ་ཞིང་གཞན་ཡང་སེམས་ཅན་མི་ཤེས་པར་སྤྱོད་པ་དག་གིས་དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པ་དག་ལ་ལྐོག་ཏུ་ཚིག་རྩུབ་པོ་སྨྲས་པ་ལ་ལས་ཀྱི་བྱ་བ་བསྟན་པའི་ཕྱིར་དང་། སེམས་ཅན་གང་དག་དགེ་སློང་དང་བྲམ་ཟེ་ཚུལ་ཁྲིམས་དང་ལྡན་པ་དག་ལ་ཚིག་རྩུབ་མོ་སྨྲས་ན་བདག་ཅག་ལ་ཐར་པའི་སྐལ་བ་མེད་དོ་སྙམ་སྟེ་འགྱོད་པ་ལ་གནས་ཤིང་ཕྱིན་ཆད་རྩོལ་བ་མི་བྱེད་པ་དག་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔས་སངས་རྒྱས་འོད་སྲུང་གི་གསུངས་རབ་ལ་ཚིག་དེ་སྐད་སྨྲས་པ་ཡང་རྣམ་པར་གྲོལ་བའི་སྐལ་བ་ཡོད་ན་བདག་མི་ཤེས་པ་རྣམས་ལྟ་སྨོས་ཀྱང་ཅི་དགོས་སྙམ་དུ་སེམས་ཤིང་ལས་ཀྱི་ཉེས་པ་འཆགས་པར་བྱ་བའི་ཕྱིར་དང་། མུ་སྟེགས་ཅན་དག་རྒྱ་ཤུག་དང་། ཏིལ་དང་འབྲས་བུ་གཅིག་ཙམ་ཟ་ཞིང་ཟས་གཞན་མི་ཟ་བས་རྣམ་པར་དག་པར་འགྱུར་བར་འདོད་པ་དག་ཚར་བཅད་པའི་ཕྱིར་ལོ་དྲུག་ཏུ་དཀའ་བ་སྤྱད་པ་ཐབས་མཁས་པར་བསྟན་པ་ཡིན་གྱི་ལས་ཀྱི་རྣམ་པར་སྨིན་པས་མ་ཡིན་པར་གསུངས་སོ། །གསུམ་པ་ནི་ལུང་ལས། ཉོན་མོངས་མེད་པའི་ལྗོངས་སུ་རྒྱལ་པོ་མེས་སྦྱིན་གྱིས་སྟོན་པ་འཁོར་ལྔ་བརྒྱར་གཉིས་ཀྱིས་མ་ཚང་བ། དབྱར་ཟླ་བ་གསུམ་གནས་པར་ཞུས་པའི་ཚེ། བློན་པོ་ཕྲག་དོག་ཅན་གྱིས་སྨྲས་པ་ལ་བརྟེན་ནས་རྒྱལ་པོ་མི་སྣང་བའི་ཕྱོགས་སུ་མཚམས་བྱས། སྟོན་པ་འཁོར་དང་བཅས་པ་ལ་ཞབས་ཏོག་སུས་བྱས་པ་ལ་ཆད་པས་གཅོད་བྱས་པ་ལ་བརྟེན་ནས། ཟླ་བ་གསུམ་དུ་རྟ་ལྔ་བརྒྱ་འཚོང་བའི་ཚོང་པས་རྟ་རྣམས་ནས་དང་ཚོང་བྱས་ནས་ཕུལ། ནས་རུལ་པ་གསོལ་ཞིང་མཆོག་ཟུང་གཅིག་གནས་གཞན་ལ་བདུད་རྩི་གསོལ་བའི་རྒྱུ་རྐྱེན་ཞུས་པས། སྔོན་སྐྱེ་རྒུ་རྣམས་ཀྱིས་ཚེ་ལོ་བརྒྱད་ཁྲི་ཐུབ་པ་ན། སངས་རྒྱས་རྣམ་གཟིགས་ཉན་ཐོས་ཀྱི་དགེ་འདུན་དང་བཅས་པ་ཕོ་བྲང་ཉེ་ལྡན་ཞེས་བྱ་བར་གཞན་གྱིས་བསོད་སྙོམས་ཕུན་སུམ་ཚོགས་པ་ཕུལ་བ་ལ་བྲམ་ཟེ་རིག་བྱེད་སློབ་པའི་འཁོར་ལྔ་བརྒྱ་དང་བཅས་པའི་ནང་ནས་བྲམ་ཟེའི་ཁྱེའུ་བཟང་པོ་དད་པ་ཅན་གཉིས་མ་གཏོགས་པ་ཐམས་ཅད་ཕྲག་དོག་ནས་དགེ་སྦྱོང་མགོ་རེག་འདི་དག་ནི་ནས་རུལ་བ་ཟ་བར་འོས་པ་ཡིན་ནོ། །ཞེས་སྨྲས་སོ། །བྲམ་ཟེ་འཁོར་ལྔ་བརྒྱར་གཉིས་ཀྱིས་མ་ཚང་བ་ནི། ད་ལྟ་ང་འཁོར་ལྔ་བརྒྱར་གཉིས་ཀྱིས་མ་ཚང་བ་འདི་ཡིན་ནོ། །བྲམ་ཟེའི་ཁྱེའུ་དད་པ་ཅན་གཉིས་ནི་མཆོག་ཟུང་གཅིག་ལྷའི་བདུད་རྩི་གསོལ་བ་འདི་ཡིན་ནོ། །ཞེས་གསུངས་སོ། །དེ་ཉིད་ཐབས་ལ་མཁས་པའི་མདོ་ལས། རྟ་ལྔ་བརྒྱ་པོ་དེ་དག་བྱང་ཆུབ་སེམས་དཔའི་ཐེག་པ་ལ་ཞུགས་པ་སྔོན་གྱི་རྒྱལ་བ་ལ་བྱ་བ་བྱས་པ་ཤ་སྟག་ཡིན་ཀྱང་སྡིག་གྲོགས་ཀྱི་དབང་གིས་སྡིག་པའི་ལས་བྱས་པས་དུད་འགྲོའི་སྐྱེ་གནས་སུ་སྐྱེས་ཤིང་། དེ་དག་གི་ནང་ནས་རྟ་ཅང་ཤེས་གཅིག་ཡོད་པ་ནི། བྱང་ཆུབ་སེམས་དཔའ་ཉི་མའི་སྙིང་པོ་ཞེས་བྱ་བ་ཡིན་ལ་དེ་དག་ཡོངས་སུ་ཐར་བར་བྱ་བའི་ཕྱིར་སྨོན་ལམ་གྱི་དབང་གིས་དེར་སྐྱེས་སོ། །དེ་བཞིན་གཤེགས་པས་རྟ་དེ་དག་གི་དོན་དུ་དབྱར་གནས་པར་ཞལ་གྱིས་བཞེས་ཏེ། རྟ་ལྔ་བརྒྱ་པོ་དེ་དག་གི་རྟ་ཆས་ཀྱི་ནས་ཕྱེད་ཕྱེད་དག་ནི། དགེ་སློང་དག་ལ་འབུལ། ཕྱེད་ཕྱེད་ནི་རྟ་དེ་ཉིད་ཟའོ། །རྟ་ཅང་ཤེས་ཀྱི་རྟ་ཆས་ཕྱེད་དེ་བཞིན་གཤེགས་པ་ལ་དབུལ། ཕྱེད་ཅང་ཤེས་དེ་ཉིད་ཟ་ཞིང་། རྟ་ལྔ་བརྒྱ་པོ་དེ་དག་རྟའི་སྐད་ཀྱིས་སྡིག་པ་བཤགས་པ་དང་། སངས་རྒྱས་འཁོར་བཅས་ལ་ཕྱག་འཚལ་དུ་ཡང་བཅུག་གོ །དེ་ནས་རྟ་དེ་དག་གིས་དེ་ལྟར་བྱས་པས་དུས་གཞན་ཞིག་ན་ཤི་འཕོས་ཏེ་དགའ་ལྡན་གྱི་ལྷར་སྐྱེས་ནས་སངས་རྒྱས་ལ་བཀུར་བསྟི་བྱས་སོ། །དེས་ན་རྟ་དེ་དག་འདུལ་བར་བྱ་བའི་ཕྱིར་དང་། སེམས་ཅན་གང་དག་དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པ་དག་མགྲོན་དུ་གཉེར་ནས་སེམས་རྣམ་པར་གཡེང་བས་རི་མོ་མི་བྱེད་པ་དེ་དག་ལ་ལས་ཀྱི་ཉེས་པ་བསྟན་པའི་ཕྱིར་དང་། དགེ་སློང་ལྔ་བརྒྱ་དེ་དག་ལས་བཞི་བཅུ་འདོད་ཆགས་དང་སྡུག་པའི་མཚན་མ་སྤྱོད་པ་ཡིན་པས་དེ་དག་གིས་ཟས་ངན་པ་ཟོས་པས་འདོད་ཆགས་ཀྱིས་ཀུན་ནས་ལྡང་བ་རྣམ་པར་བསལ་ནས། ཟླ་བ་གསུམ་པོ་དེའི་འོག་ཏུ་ཞག་བདུན་གྱིས་དགྲ་བཅོམ་པ་ཉིད་ཐོབ་པས་དགོས་པ་དེ་དག་གི་ཆེད་དུ་ཐབས་མཁས་པས་ཟླ་བ་གསུམ་དུ་རྟ་ཆས་རུལ་བ་གསོལ་བར་བསྟན་གྱི། ལས་ཀྱི་རྣམ་པར་སྨིན་པས་ནི་མ་ཡིན་པར་གསུངས་སོ། །བཞི་པ་ནི་ལུང་ལས། ཡུལ་གྲུ་འཛིན་དུ་སྨད་འཚོང་མ་བཟང་མོ་ཞེས་བྱ་བ་སྐྱེས་བུ་གཡོ་ཅན་པད་མའི་རྩ་ལག་གིས་བསད་ནས་རལ་གྲི་ཁྲག་ཅན་དྲང་སྲོང་མདོག་ནག་གི་དྲུང་དུ་བོར་ནས་སོང་ངོ་། །དེའི་རྣམ་པར་སྨིན་པས་ང་ལོ་མང་པོར་དམྱལ་བར་སྐྱེས་ལས་ཀྱི་ལྷག་མས་ད་ལྟ་ཡང་བྲམ་ཟེའི་བུ་མོ་དྲེགས་མས་གཞོང་བུ་ལྟོ་བར་བཅིངས་ཏེ། དགེ་སྦྱོང་ཁྱོད་ཀྱིས་ཁོ་མོ་སྦྲུམ་པར་བྱས་ཀྱི། ཁོ་མོ་ལ་ཟས་དང་གོས་བྱིན་ཅིག་ཅེས་སྐུར་པ་བཏབ་པར་གྱུར་ཏོ། །ཞེས་གསུངས་སོ། །དེ་ཉིད་ཐབས་ལ་མཁས་པའི་མདོ་ལས། ཕྱི་མའི་དུས་ན་བསྟན་པ་འདི་ལ་རབ་ཏུ་བྱུང་བའི་དགེ་སློང་གང་ལ་ཡང་དག་པ་མ་ཡིན་པའི་སྐུར་པ་བཏབ་པས་དེ་དག་འགྱོད་པ་དང་། སེམས་ཞུམ་པར་འགྱུར་ཅིང་། ཉམས་པ་ལ་འཇུག་པར་འགྱུར་བ་དེ་དག་འདི་སྐད་དུ། དེ་བཞིན་གཤེགས་པ་དཀར་པོའི་ཆོས་ཐམས་ཅད་དང་ལྡན་པ་དེ་དག་གིས་ཀྱང་བསྐུར་པ་བརྙེས་པར་གྱུར་ན། བདག་ལྟ་སྨོས་ཀྱང་ཅི་དགོས་ཞེས་དེ་བཞིན་གཤེགས་པ་རྗེས་སུ་དྲན་པར་བྱེད་ཅིང་། སྐུར་པ་དེ་ཟིལ་གྱིས་མནན་ནས་ཚངས་པར་སྤྱོད་པ་ཡོངས་སུ་དག་པ་ཡོངས་སུ་བྱང་བ་སྤྱོད་པར་འགྱུར་བ་དང་། སྡོམ་པ་ལ་སྤྱོད་པར་འགྱུར་བར་བྱ་བའི་ཕྱིར། ཐབས་ལ་མཁས་པས་སྐུར་པ་བརྙེས་པར་བསྟན་གྱི་ལས་ཀྱི་རྣམ་པར་སྨིན་པས་མ་ཡིན་པར་གསུངས་སོ། །ལྔ་པ་ནི་ལུང་ལས། སྔོན་རིག་བྱེད་སྨྲ་བའི་དྲང་སྲོང་འཁོར་བྲམ་ཟེ་མང་པོ་དང་ལྡན་པ་ཞིག་ཡོད་པ་ལ། དྲང་སྲོང་ཅིག་གིས་གཅིག་ཤོས་ཀྱི་འཁོར་རྣམས་རིམ་གྱིས་ཁ་དྲངས་ཏེ། ལན་དུ་མར་བཟློགས་ཀྱང་མ་ཉན་པས་ཅིག་ཤོས་ཁྲོས་པར་གྱུར་ཏེ། ངས་ཀྱང་ཁྱོད་བྱང་ཆུབ་ཐོབ་པའི་ཚེ་འཁོར་རྣམས་ཁ་དྲང་བར་བྱའོ། །ཞེས་སྨོན་ལམ་བཏབ་པས། ད་ལྟ་ལྷས་བྱིན་གྱིས་དགེ་འདུན་འཁོར་ལོའི་དབྱེན་བྱས་པ་ཡིན་ནོ། །ཞེས་གསུངས་སོ། །དེ་ཉིད་དྲང་བའི་དོན་ཏེ་ཕན་ཚུན་དབྱེན་བྱེད་པ་དང་། གཞན་འཁོར་ཁ་དྲང་བ་རྣམས་ལ་ཉེས་དམིགས་བསྟན་པའི་ཆེད་དུ་ཐབས་མཁས་པ་དེ་ལྟར་བསྟན་གྱི། ལས་ཀྱི་རྣམ་པར་སྨིན་པས་ནི་མ་ཡིན་ནོ། །གཞན་ཡང་ལུང་ལས། སྔོན་སྨན་པ་ཞིག་གིས་ཁྱིམ་བདག་གཅིག་གི་བུའི་ནད་ལན་གསུམ་གྱི་བར་དུ་སོས་པར་བྱས་ཀྱང་། རྔན་པ་མ་བྱིན་པས་ཞེ་སྡང་དྲག་པོས་བུ་འདི་ན་ན་སྨན་མ་ཡིན་པ་བྱིན་ནས་ནང་ ཁྲོལ་རྣམས་དུམ་བུ ་དུམ་བུར་འཛག་པར་བྱའོ་སྙམ་ནས། དེ་ལྟར་བྱས་པའི་ལས་ཀྱི་ལྷག་མས་ད་ལྟ་ཡང་བཅོམ་ལྡན་འདས་འཁྲུ་བའི་ནད་ཀྱིས་ཐེབས་སོ་ཞེས་དང་། ཡང་ཉ་པའི་བུ་གཅིག་གིས་ཉ་བསད་པ་ལ་དགའ་བ་བསྐྱེད་པའི་ལས་ཀྱི་རྣམ་པར་སྨིན་པས་ལོ་མང་པོར་ཀླད་ནད་ཅན་དུ་གྱུར་ནས་ད་ལྟ་ཡང་ལས་ཀྱི་ལྷག་མས། འཕགས་སྐྱེས་པོས་ཤཱཀྱ་རྣམས་བསད་པ་ན། བཅོམ་ལྡན་འདས་ཀླད་ནད་དྲག་པོས་ཐེབས་པར་གྱུར་ཏོ། །ཞེས་སོགས་ཐུབ་པའི་སྐུ་ཚེ་སྔ་མ་ཡི་སོགས་སོ། །དྲང་བའི་དོན་ལ་ཡིད་མ་རྟོན་ཞེས་པ་ནི། དཀོན་བརྩེགས་ཀྱི་བྱང་ཆུབ་སེམས་དཔའི་སྡེ་སྣོད་ལས། དེ་ལ་བྱང་ཆུབ་སེམས་དཔའི་རྟོན་པ་མཁས་པ་གང་ཞེ་ན། བྱང་ཆུབ་སེམས་དཔའི་རྟོན་པ་འདི་བཞི་སྟེ། བཞི་གང་ཞེ་ན་འདི་ལྟ་སྟེ། དོན་ལ་རྟོན་གྱི་ཚིག་འབྲུ་ལ་མ་ཡིན་པ་དང་། ཡེ་ཤེས་ལ་རྟོན་གྱི་རྣམ་ཤེས་ལ་མ་ཡིན་པ་དང་། ངེས་པའི་དོན་གྱི་མདོ་སྡེ་ལ་རྟོན་གྱི་དྲང་བའི་དོན་རྣམས་ལ་མིན་པ་དང་། ཆོས་ལ་རྟོན་གྱི་གང་ཟག་ལ་མ་ཡིན་པའོ་ཞེས་གསུངས་སོ། །དེ་ལ་ཡེ་ཤེས་དང་རྣམ་ཤེས་ནི་འཇིག་རྟེན་ལས་འདས་མ་འདས་དང་། ཚིག་འབྲུ་ནི་སྒྲ་ཇི་བཞིན་པ་དང་། དོན་ནི་རིགས་པས་གྲུབ་པ་དང་། གང་ཟག་ནི་གནས་བརྟན་རྒན་རབས་སོགས་དང་། ཆོས་ནི་གསུང་རབ་ཅེས་ཨ་བྷ་ཡ་ཀ་རས་བཤད་དོ། །གཉིས་པ་ལ་གཉིས་ཏེ། ཐལ་བ་གསུམ་དགོད་པ། ཕྱི་མ་རྒྱས་པར་བཤད་པའོ། །དང་པོ་ནི། གལ་ཏེ་རྫོགས་པའི་ཞེས་སོགས་ལྔ་སྟེ། སངས་རྒྱས་ལ་ལས་ངན་སྨིན་པར་བཤད་པ་བདེན་པ་ངེས་དོན་ཡིན་ན་བསོད་ནམས་ཀྱི་ཚོགས་ཀྱིས་ཡོན་ཏན་མཐའ་དག་རྫོགས་ཤིང་། ཡེ་ཤེས་ཀྱི་ཚོགས་ཀྱིས་སྒྲིབ་གཉིས་བག་ཆགས་དང་བཅས་པ་སྤངས་པ་དོན་མེད་པར་འགྱུར་ཞིང་། སྤྱོད་འཇུག་ལས། ཉོན་མོངས་མེད་ཀྱང་དེ་དག་ལ། །ལས་ཀྱི་ནུས་པ་མཐོང་བ་ཡིན། །ཞེས་པ་ལྟར་ལྷག་བཅས་མྱང་འདས་ལ་གནས་པའི་དགྲ་བཅོམ་པ་དང་འདྲ་བར་འགྱུར་ལ། སྐུ་གསུམ་གྱི་རྣམ་བཞག་ཀྱང་མི་རུང་བར་འགྱུར་རོ། །གཉིས་པ་ལ་བཞི་སྟེ། སྤྲུལ་གཞི་ངོས་བཟུང་བ། སྤྲུལ་པ་ངོས་བཟུང་བ། ཇི་ལྟར་སྤྲུལ་པའི་ཚུལ། སྐབས་ཀྱི་དོན་ལ་སྦྱར་བའོ། །དང་པོ་ནི། དེ་ཡི་འཐད་པ་ཞེས་སོགས་ཚིགས་བཅད་གཅིག་སྟེ། ལས་ངན་གྱི་འབྲས་བུ་སྤྲུལ་པའི་སྐུ་ལ་སྨིན་ན་སྐུ་གསུམ་གྱི་རྣམ་གཞག་མི་རུང་བར་འགྱུར་ཏེ། དེ་ལྟར་ན་སྤྲུལ་སྐུའི་སྤྲུལ་གཞིར་གྱུར་པའི་ལོངས་སྐུ་མེད་དགོས་པའི་ཕྱིར་རོ། །དེ་ཡི་འཐད་པ་བཤད་ཀྱིས་ཉོན་སོགས་ཏེ། སྟུག་པོ་བཀོད་པ་ནི། འོག་མིན་སྟུག་པོ་ཉམས་དགའ་འདི། །སྟུག་པོའི་ཞིང་ཁམས་འཇིག་མེད་པ། །དེ་ན་སངས་རྒྱས་རྣམས་ཀྱི་ཆོས། །རྫོགས་པར་ལོངས་སྤྱོད་ཚུལ་འདི་འབྱུང་། །ཞེས་གསུངས་པ་ལྟར། རྒྱུན་མི་འཇིག་པའི་གནས་ཡིན་པར་རྗེ་བཙུན་རྩེ་མོས་བཤད་དོ། །གཉིས་པ་ནི་དེ་ཡི་སྤྲུལ་པའི་ཞེས་སོགས་གསུམ་མོ། །གསུམ་པ་ནི་འདི་ནི་གདུལ་བྱ་ཞེས་སོགས་བཅུ་གསུམ་སྟེ། ཤཱཀྱ་སེངྒེ་འདི་ནི་གདུལ་བྱའི་རྒྱུད་སྒྲིབ་པ་སྤང་རུང་དང་གཉེན་པོ་སྐྱེ་རུང་དུ་སྨིན་པར་བྱ་བའི་ཕྱིར། བྱ་རྒོད་ཕུང་པོ་སོགས་སུ་གཤེགས་པ་དང་། དྲི་གཙང་ཁང་གི་ནང་དུ་ཏིང་ངེ་འཛིན་ལ་བཞུགས་པ་དང་། འོད་སྲུང་ལ་སོགས་པ་ལ་ཁྱོད་ཀྱི་ཆོས་སྟོན་ཅིག་གསུངས་ནས་སྐུ་མཉེལ་ཏེ་མནལ་གཟིམས་པ་དང་། མུ་གེ་བྱུང་བའི་ཚེ་གྲོང་དུ་བསོད་སྙོམས་ལ་གཤེགས་པ་ན། གྲོང་དཔོན་གྱི་བུ་གཅེར་བུ་པ་རལ་གྲི་ཐོགས་པ་ཞིག་གིས། ལོ་ཉེས་འདི་ལྟ་བུ་ལ་གོའུ་ཏ་མ་ཁྱོད་འཁོར་མང་པོ་དང་ལྡན་པ་གྲོང་ཁྱེར་དུ་འོངས་ནས། ཁྱིམ་རྣམ་ཕུང་བར་བྱེད་པ་ཡིན་ནམ་ཞེས་ཟེར་ཞིང་བཀག་པར་གྱུར་པ་ན། ངས་བསྐལ་པ་དགུ་བཅུ་རྩ་གཅིག་ཚུན་ཆད་དྲན་ཏེ། ཟས་སྨིན་པ་སྟེར་དུ་གཞུག་པའི་ཕྱིར་ཁྱིམ་འགའ་ཞིག་ལའང་གནོད་པའི་ལས་མི་མཁྱེན་ནོ། །ཞེས་གསུངས་པ་དང་། སཱ་ལའི་གྲོང་ཁྱེར་དུ་བསོད་སྙོམས་མ་རྙེད་པར་ལྷུང་བཟེད་སྟོང་པར་བྱོན་པ་དང་། རྒྱལ་བུ་རྒྱལ་བྱེད་ཀྱི་ཚལ་ཁྱིམ་བདག་མགོན་མེད་ཟས་སྦྱིན་གྱི་ཀུན་དགའ་རྭ་བ་སོགས་སུ་བསོད་སྙོམས་མང་དུ་རྙེད་པ་དང་། ལྷས་བྱིན་སོགས་དགྲ་དང་། སྲས་སྒྲ་གཅན་ཟིན་སོགས་ཉེ་དུའི་འབྲེལ་བ་དང་། འབྲོག་གནས་སུ་ལག་བརྒྱུད་འབྲོག་གནས་འདུལ་བའི་ཕྱིར་བྱོན་པའི་ཚེ། ས་གཞི་བ་གླང་མང་པོའི་རྨིག་པས་རད་རོད་དུ་གྱུར་པ་དང་། འཕགས་སྐྱེས་པོས་ཤཱཀྱ་མང་པོ་བསད་པའི་ཚེ། ས་ཕྱོགས་ཉམས་མི་དགའ་བ་རྡོ་བའི་རད་རོད་ཅན་དུ་ལོ་འདབ་མེད་པའི་ཤིང་སྐམ་པོ་ལ་བརྟེན་ཏེ། འོ་རྒྱལ་པོར་གཟིམས་པ་དང་། ཀླུའི་རྒྱལ་པོ་མ་དྲོས་པས་གདན་དྲངས་པའི་དུས་ལྟ་བུ་རེས་འགའ་བསྙུང་བར་གཤེགས་པ་དང་། གྲོང་ཁྱེར་བཟང་བྱེད་ན་གནས་པའི་མུ་སྟེགས་བྱེད་རྣམས་ཀྱིས། དགེ་སྦྱོང་གོའུ་ཏ་མ་འཁོར་དང་བཅས་པ་ལ་ལར་སྤུ་གྲིའི་སེར་བ་དག་འབེབས་ཤིང་འོངས་ནས། ཁྱེད་ཅག་ལ་འགའ་ཞིག་ནི་བུ་མེད་པར་བྱེད། འགའ་ཞིག་ནི་ཁྱོ་མེད་པར་བྱེད་དོ་ཞེས་པ་དང་། དགེ་སྦྱོང་གོའུ་ཏ་མ་སྐྱེས་ནས་ཞག་བདུན་ནས་མ་ཤི་བར་གྱུར། ཕ་ཡི་ངག་བཅག་སྟེ་ཡིད་མི་བདེ་བར་གྱུར་པས་ཕ་མ་ལ་བྱས་པ་མི་གཟོ་བ་ཡིན་ནོ་ཞེས་པ་དང་། དགེ་སྦྱོང་གོའུ་ཏ་མས་སྒྱུ་མ་བསླབས་ཏེ་འཇིག་རྟེན་གྱི་ཁམས་བསླུས་སོ། །ཞེས་པ་ལ་སོགས་གཞན་གྱིས་སྐུར་པ་སྣ་ཚོགས་འདེབས་པ་དང་། མཉན་དུ་ཡོད་པར་ཆོ་འཕྲུལ་ཆེན་པོ་བསྟན་པ་དང་། སེར་སྐྱར་ཡབ་སྲས་མཇལ་བ་དང་། གསལ་ལྡན་དུ་ལྷ་ལས་བབས་པ་དང་། ལྟེང་རྒྱས་འོད་སྲུང་འཁོར་དང་བཅས་པ་བཏུལ་བ་དང་། སོར་མོའི་ཕྲེང་བ་དང་། རྒྱལ་པོ་ཀ་པི་ན་འཁོར་བཅས་བཏུལ་བ་ལ་སོགས་པ་རེས་འགའ་སྙན་པའི་བ་དན་འཇིག་རྟེན་གསུམ་དུ་གྲགས་པ་དང་། རེས་འགའ་སྐུ་བདེ་བ་དང་། ཐུགས་དགྱེས་པར་སྤྱོད་པ་དང་། བར་མར་བཞུགས་པ་སོགས་མཛད་པ་རྣམ་པ་སྣ་ཚོགས་སྟོན་པ་ནི་སྤྲུལ་པ་ཙམ་ཡིན་གྱི་སྤྲུལ་གཞིའི་གཟུགས་སྐུ་རང་རྒྱུད་པ་མིན་ནོ། །བཞི་པ་ནི་གལ་ཏེ་སངས་རྒྱས་ཞེས་སོགས་བཅུ་སྟེ། སངས་རྒྱས་དངོས་ལ་ལས་ངན་སྨིན་ན་ལོངས་སྤྱོད་རྫོགས་པའི་སྐུ་ལ་སྨིན་པར་རིགས་ཏེ། ཚོགས་གཉིས་རྫོགས་པའི་རྣམ་སྨིན་གྱི་འབྲས་བུར་གྱུར་པའི་སངས་རྒྱས་རང་རྒྱུད་པ་ཡིན་པའི་ཕྱིར་རོ། །ཤཱཀ་ཐུབ་སོགས་ལ་སྨིན་པར་འདོད་པ་མུན་སྤྲུལ་ཡིན་ཏེ། སངས་རྒྱས་རང་རྒྱུད་པ་དེའི་སྤྲུལ་པ་ཙམ་ཡིན་པའི་ཕྱིར་རོ། །དཔེར་ན་སྒྱུ་མའི་སོགས་ཏེ། དེས་ན་འདུལ་བ་ལུང་ལས། ལས་ངན་སྨིན་པར་གསུངས་པའི་དགོངས་པ་དྲང་དོན་ཡིན་པར་ཤེས་དགོས་སོ། །མངོན་རྟོགས་རྒྱན་ལས། དེ་མཐའ་དེ་ཡི་རྣམ་སྨིན་ནི་ཞེས་སྐུ་གསུམ་ཀ་སྦྱོར་བཞི་བསྒོམས་པའི་རྣམ་སྨིན་གྱི་འབྲས་བུར་བཤད་པ་ནི། ཆོས་སྐུའི་ངང་ལས་ལོངས་སྐུ་སྟོན་ཅིང་། དེ་ལས་སྤྲུལ་པ་སྣ་ཚོགས་འགྱེད་པ་ལ་སྦྱོར་བཞི་བསྒོམས་པ་སྔོན་དུ་སོང་བ་དགོས་སོ་ཞེས་པའི་དོན་ཏེ། དཔེར་ན་སྒྱུ་མ་མཁན་གྱིས་སྒྱུ་མ་སྤྲུལ་པ་ལ་སྤྲུལ་པ་པོ་ལས་ལས་སྐྱེས་པ་དགོས་པ་བཞིན་ནོ། །གསུམ་པ་ནི་འདི་ཡི་ལུང་དང་ཞེས་སོགས་གསུམ་སྟེ། སངས་རྒྱས་ལ་ལས་ངན་སྨིན་པར་གསུངས་པ་དྲང་དོན་ཡིན་པ་དང་། དྲང་དོན་གྱི་མདོ་སྒྲ་ཇི་བཞིན་དུ་ཁས་ལེན་དུ་མི་རུང་བ་འདི་ཡི་ལུང་དང་རིགས་པ་རྣམས་དབྱིག་གཉེན་གྱི་རྣམ་བཤད་རིགས་པ་དང་། ལེགས་ལྡན་བྱེད་ཀྱི་རྟོག་གེ་འབར་བ་སོགས་མཁས་པའི་གཞུང་བཞིན་དུ་ཤེས་པར་བྱ་སྟེ། རྣམ་བཤད་རིགས་པ་ལས་ཀུན་ཏུ་སྣང་བའི་མདོ་ལས་ཀྱང་སྒྲ་ཇི་བཞིན་དུ་འཛིན་ན་ཉེས་པ་ལྔ་ཡོད་དེ། ལྔ་གང་ཞེ་ན། མི་མོས་པའི་གནས་སུ་འགྱུར་བའི་ཉེས་པ་དང་། རྩ་བ་ཉམས་པའི་ཉེས་པ་དང་། གཞན་ལ་བསླུ་བར་བྱེད་པའི་ཉེས་པ་དང་། སྟོན་པ་ལ་སྐུར་པ་འདེབས་པའི་ཉེས་པ་དང་། ཆོས་སྤོང་བར་བྱེད་པའི་ཉེས་པའོ། །ཞེས་རང་གི་སྒྲས་བསྟན་པ་ཡིན་ནོ་ཞེས་དང་། རྟོག་གེ་འབར་བ་ལས། ཚིག་ལྷུག་པར་འབྱུང་བ་ཚིགས་བཅད་དུ་བསྡེབས་པ་ནི། ཞིང་འདིར་ཐུབ་པའི་མཛད་པ་དག །གལ་ཏེ་སྤྲུལ་པ་མ་ཡིན་ཞིང་། །མདོ་སོགས་སྒྲ་ནི་ཇི་བཞིན་དུ། །ཁས་ལེན་པ་ལ་འགལ་བ་ནི། །རྒྱལ་སྲས་སྲིད་པ་ཐ་མ་པ། །འདོད་པ་བསྟེན་ན་ཚུལ་ཁྲིམས་འཆལ། །དེས་ན་སྦྱིན་པ་སོགས་ཀྱང་མེད། །ཅེས་པ་དང་། གནས་བརྟན་ཆེན་པོ་བ་ཀུ་ལས། །ཁོ་བོ་བསྙེན་པར་རྫོགས་ནས་ལོ། །བརྒྱད་ཅུ་ལོན་ཡང་མགོ་བོ་ཙམ། །ན་བར་མི་དྲན་གང་ཡིན་པ། །ཨ་རུ་ར་གཅིག་ནད་པ་ལ། །སྦྱིན་པའི་འབྲས་བུ་ཉིད་ཡིན་ན། །སངས་རྒྱས་སྦྱིན་པའི་མཐར་སོན་པ། །སྐུ་ལ་ལས་ངན་ལས་བྱུང་བའི། །སྙུན་གྱིས་བཏབ་པའང་ཤིན་ཏུ་འགལ། །ཞེས་དང་། གཞུང་དེ་གཉིས་ཀ་ལས། དགའ་ལྡན་གནས་ནས་འཕོ་བ་ན། །ལྷ་རིས་དྲུག་ལ་བཀའ་བསྩལ་ནས། །ཉོན་མོངས་དབང་གིས་སྐྱེ་བ་དང་། །སྙོམས་འཇུག་དག་ལ་དབང་ཐོབ་འགལ། །རྒ་ནད་འཆི་བ་མ་མཁྱེན་དང་། །མུ་སྟེགས་བྱེད་ལས་ཐར་ལམ་ཚོལ། །དཀའ་ཐུབ་དྲག་པོས་གདུང་བྱེད་པ། །ཇི་ལྟ་བུར་ནི་འགལ་མི་འགྱུར། །ཞེས་གསུངས་སོ། །མདོ་སྡེ་རྒྱན་ལས། དོན་སྒྲ་ཇི་བཞིན་ཡོངས་རྟོག་ན། །བདག་ཉིད་སྙེམས་ཤིང་བློ་ཉམས་འགྱུར། །ལེགས་པར་གསུངས་པའང་སྤངས་པས་ན། །བརླག་འགྱུར་ཆོས་ལ་ཁོང་ཁྲོས་སྒྲིབ། །ཞེས་དང་། དཀོན་བརྩེགས་ཀྱི་ཆོས་བཅུ་པའི་ལེའུ་ལས། རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་དགོངས་ཏེ་གསུངས་པ་རྟོགས་པར་བྱ་བ་ལ་མཁས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔས་དེ་བཞིན་གཤེགས་པས་དགོངས་ཏེ་གསུངས་པའི་མདོ་སྡེ་ཟབ་མོ་གང་དག་ཡིན་པ་དེ་དག་ལ་སྒྲ་ཇི་བཞིན་ཁོ་ནར་མངོན་པར་ཞེན་པར་མི་བྱེད་པ་ཡིན་ཏེ། དེ་ལ་དེ་བས་དགོངས་ཏེ་གསུངས་པ་དེ་དག་ཀྱང་གང་ཞེ་ན། འདི་ལྟ་སྟེ་དེ་བཞིན་གཤེགས་པས་ཉན་ཐོས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །ཞེས་གསུངས་པ་ནི་དེ་ལྟར་མི་ལྟའོ། །ཀུན་དགའ་བོ་ང་ནི་རོ་རྒྱབ་ནའོ་གསུངས་པ་ཡང་དེ་ལྟར་མི་ལྟའོ། །ང་ནི་རྒས་འཁོགས་པ་ཡིན་གྱི་ངའི་བསྙེན་བཀུར་བ་ཚོལ་ཅིག་ཅེས་གསུངས་པ་ཡང་དེ་ལྟར་མི་ལྟའོ། །མོའུ་འགལ་གྱི་བུ་ཁྱོད་སོང་ལ་སྨན་པའི་རྒྱལ་པོ་འཚོ་བྱེད་ཀྱི་གན་ནས་སྨན་ལོང་ཞིག་དང་། བཟའ་བར་བྱའོ་ཞེས་གསུངས་པ་ཡང་དེ་ལྟར་མི་ལྟའོ། །དེ་བཞིན་གཤེགས་པ་ནི་གཞན་མུ་སྟེགས་ཅན་ཀུན་ཏུ་རྒྱུ་བ་དག་དང་ལྷན་ཅིག་ཏུ་ཚིག་གིས་རྩོད་པར་བྱེད་དོ། །ཞེས་གསུངས་པ་ཡང་དེ་ལྟར་མི་ལྟའོ། །དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་གོ་ཞེས་གསུངས་པ་ཡང་དེ་ལྟར་མི་ལྟའོ། །སྐྱེས་བུ་དམ་པ་མིན་པ་ལྷས་བྱིན་ནི་ཡུན་རིང་པོ་ནས། དེ་བཞིན་གཤེགས་པའི་གཤེད་མ་དང་གཅུགས་ཅན་དང་ཕྱིར་རྒོལ་བ་དགྲ་བོར་གྱུར་པ་ཡིན་ནོ་ཞེས་གསུངས་པ་ཡང་དེ་ལྟར་མི་ལྟའོ། །དེ་བཞིན་གཤེགས་པ་བསོད་སྙོམས་ཀྱི་ཕྱིར་བྲམ་ཟེའི་གྲོང་སཱ་ལ་ཅན་དུ་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་ཕྱུང་ངོ་ཞེས་གསུངས་པ་ཡང་དེ་ལྟར་མི་ལྟའོ། །བྲམ་ཟེའི་བུ་མོ་དྲེགས་མས་ཤིང་གི་གཞོང་བུ་ལྟོ་བར་བཅིངས་ཏེ། དེ་བཞིན་གཤེགས་པ་ལ་སྐུར་པ་བཏབ་བོ་ཞེས་གསུངས་པ་ཡང་དེ་ལྟར་མི་ལྟའོ། །དེ་བཞིན་གཤེགས་པ་ཉོན་མོངས་མེད་ཀྱི་ལྗོངས་སུ་དབྱར་གནས་པར་ཞལ་གྱིས་བཞེས་པ་ན་ཟླ་བ་གསུམ་དུ་རྟ་ཆས་ཀྱི་ནས་གསོལ་ལོ་ཞེས་གསུངས་པ་ཡང་དེ་ལྟར་མི་ལྟའོ། །ཞེས་གསུངས་སོ། །གསུམ་པ་ཉམས་ལེན་ཡེ་བཀག་ཡེ་གནང་ཡིན་པ་དགག་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། འབྲི་ཁུང་པ་ཁ་ཅིག ཐེག་པ་ཆེ་ཆུང་གི་བསླབ་བྱ་ལ་གཅིག་ལ་བཀག་པ་ཐམས་ཅད་ལ་ཡེ་ནས་བཀག་པ་ཡིན་ཅིང་། གཅིག་ལ་གནང་བ་ཐམས་ཅད་ལ་ཡེ་ནས་གནང་བ་ཡིན་པར་འདོད་དེ། དགོངས་གཅིག་ཏུ་རྡོ་རྗེའི་གསུང་སྤྱིར་བཀག་པ་ཐམས་ཅད་ཡེ་བཀག གནང་བ་ཐམས་ཅད་ཡེ་གནང་བྱ་བ་འདི་བཞུགས་དེ་ལ་བོད་རྒན་རྣམས་ནད་པ་ལ་ཆང་མ་གཏོགས་པ་བཅས་པ་མཐའ་དག་གིས་སྐྱོང་ཞེས་གསུངས་པ་དང་། བུད་མེད་ལ་རེག་པ་བཀག་པ་ལ་བུད་མེད་ཆུས་ཁྱེར་བ་ན་བོང་བའི་འདུ་ཤེས་ཀྱིས་རེག་པས་དག་པར་གསུངས་པས་གནང་བཀག་གཅིག་ཏུ་མ་ངེས་ཞེས་ཟེར་བ་ལ། འདིར་ཞལ་སྔ་ནས། སྤྱིར་འཁོར་འདས་ཀྱི་གཤིས་ལ་དགེ་མེད་དགེ་གཉིས་ཡོད་པ་ལས་ཆོས་ཐམས་ཅད་གནས་དང་གནས་མ་ཡིན་པ་མཁྱེན་པའི་ཡེ་ཤེས་ལས་མི་འདའ་བ་དང་གཅིག མི་དགེ་བ་དང་འབྲེལ་བའི་ལས་ལས་སྡུག་བསྔལ་འབྱུང་བར་ངེས་པ་དང་གཉིས། བཅོམ་ལྡན་འདས་སེམས་ཅན་ལ་བུ་གཅིག་པ་བཞིན་བརྩེ་བར་དགོངས་ཀྱང་འཇུག་ལྡོག་གི་ཚུལ་ཁྲིམས་ལ་མ་ཞུགས་ན་སྐྱོན་སྤང་བ་དང་ཡོན་ཏན་སྒྲུབ་པའི་ཐབས་གཞན་མེད་པ་དང་གསུམ་པོ་འདིའི་གནད་ཀྱིས་ཡེ་བཀག་ཡེ་གནང་དུ་མི་འོང་ཁ་མེད་ཡིན། དང་པོ་གནང་བ་དེ་ཕྱིས་ཀྱང་གནང་སྟེ་བཀག་པ་མེད། དང་པོ་བཀག་པ་དེ་ཕྱིས་ཀྱང་བཀག་སྟེ་གནང་བ་མེད། དཔེར་ན་ནད་པས་ཕྱི་དྲོའི་ཁ་ཟས་ལ་མ་ཆགས་པར་ནད་གསོ་བའི་མཐུན་རྐྱེན་དུ་འགྲོ་ཞིང་སྨན་ལྟ་བུའི་འདུ་ཤེས་ཡོད་ན་བཀག་པ་མེད་ལ་དེ་ལྟ་བུའི་བསམ་པ་མེད་ན་གནང་བ་མེད་དོ། །ཡུལ་བུད་མེད་ལ་ཆགས་སེམས་ཀྱིས་རེག་པ་དང་པོ་ནས་གནང་བ་མེད་ལ་ཕྱིས་ཀྱང་གནང་བ་མེད། ས་དང་བོང་བའི་འདུ་ཤེས་ཀྱིས་རེག་པ་དང་པོ་ནས་བཀག་པ་མེད་ཅིང་ཕྱིས་ཀྱང་བཀག་པ་མེད་པས་གནང་བཀག་གི་བྱེ་བྲག་གི་ཚུལ་དེ་དང་འདྲའོ་ཞེས་ཟེར་རོ། །གཉིས་པ་ལ་གསུམ་སྟེ། གནང་བཀག་ཐ་དད་དུ་བསྟན་པ། དེ་ལ་གནོད་པ་སྤང་བ། མ་འཁྲུལ་བའི་གནང་བཀག་ཇི་ལྟར་བསྒྲུབ་པའི་ཚུལ་ལོ། །དང་པོ་ལ་གསུམ་སྟེ། དམ་བཅའི་སྒོ་ནས་མདོར་བསྟན། འཐད་པའི་སྒོ་ནས་རྒྱས་པར་བཤད། དཔེའི་སྒོ་ནས་ནས་དོན་བསྡུ་བའོ། །དང་པོ་ནི་ཡེ་བཀག་ཞེས་སོགས་དྲུག་སྟེ། ཐེག་པ་ཆེ་ཆུང་གི་བསླབ་བྱ་བཀག་པ་ཐམས་ཅད་ཡེ་བཀག་དང་། གནང་བ་ཐམས་ཅད་ཡེ་གནང་ཞེས་བྱ་བའི་ལུགས་འདི་ཡང་སངས་རྒྱས་ཀྱི་བསྟན་པ་དང་མཐུན་པ་མ་ཡིན་ཏེ། ཉན་ཐོས་དང་ནི་སོགས་སོ། །གཉིས་པ་ལ་བཞི་སྟེ། ཉན་ཐོས་ནང་ཕན་ཚུན་གནང་བཀག་ཐ་དད་དུ་བསྟན་པ། ཁྱིམ་པ་དང་རབ་བྱུང་གནང་བཀག་ཐ་དད་དུ་བསྟན་པ། ཐེག་པ་ཆེ་ཆུང་གནང་བཀག་ཐ་དད་དུ་བསྟན་པ། ཐེག་ཆེན་ནང་ཕན་ཚུན་གནང་བཀག་ཐ་དད་དུ་བསྟན་པའོ། །དང་པོ་ལ་གསུམ་སྟེ། ཐ་དད་དུ་བསྟན་པ་དངོས། དེའི་ཉེས་སྤོང་གི་ལན་དགག གཅིག་པ་ལ་གནོད་བྱེད་བསྟན་པའོ། །དང་པོ་ནི། དེ་ཡི་འཐད་པ་ཞེས་སོགས་བཅོ་ལྔ་སྟེ། ཐེག་པ་ཆེ་ཆུང་དང་། ཉན་ཐོས་ནང་ཕན་ཚུན་གནང་བཀག་གཅིག་ཏུ་མེད་པ་དེའི་འཐད་པ་འོག་ནས་བཤད་པ་འདི་ལྟར་ཡིན་པས་དཔྱད་གསུམ་གྱིས་རྣམ་པར་དག་པའི་ལུང་བཞིན་དུ་བཤད་ཀྱིས་ཉོན་ཅིག དེ་ཡང་ཉན་ཐོས་རྩ་བའི་སྡེ་བཞི་དང་གྱེས་པ་བཅོ་བརྒྱད་པོ་གཅིག་གིས་བཀག་པ་གཅིག་ལ་གནང་བས་གནང་བཀག་གཅིག་ཏུ་མེད་དེ། ཉན་ཐོས་རྩ་བའི་སྡེ་བཞི་ལ། འདུལ་བ་མི་འདྲ་བ་རྣམ་པ་བཞི། དེ་བཞིན་དུ་སྐད་མི་འདྲ་བ་རྣམ་པ་བཞི། མཁན་པོ་མི་འདྲ་བ་རྣམ་པ་བཞི། སྣམ་སྦྱར་གྱི་རྣམ་ཕྲན་གྱི་གྲངས་དང་། གྲྭའི་རྟགས་མི་འདྲ་བ་རྣམ་པ་བཞི་ལ་སོགས་པ་ཡོད་ཅིང་། གྱེས་པ་བཅོ་བརྒྱད་ལ་ཡང་། དང་པོ་སྡོམ་པ་ལེན་པ་དང་། བར་དུ་བསྲུང་བ་དང་། ཉམས་ན་ཕྱིར་བཅོས་པ་དང་། གསོ་སྦྱོང་གི་ཚེ་སོ་སོ་ཐར་པ་འདོན་པའི་ཚུལ་དང་། ཐ་མ་སྡོམ་པ་གཏོང་བའི་ཚུལ་ལ་སོགས་པ་ཕལ་ཆེར་མི་མཚུངས་པའི་ཕྱིར་རོ། །དེ་ཡང་ཁ་ཆེ་པཎ་ཆེན་གྱི་གསུང་སྒྲོས་ལས། ཐམས་ཅད་ཡོད་སྨྲའི་མཁན་པོ་རྒྱལ་རིགས་སྒྲ་གཅན་ཟིན། སྐད་སཾ་སྐྲྀ་ཏའི་སྐད། སྣམ་སྦྱར་སྣམ་ཕྲན་ཉི་ཤུ་རྩ་ལྔ་མན་ཆད། དགུ་ཡན་ཆད། གྲྭའི་རྟགས་པདྨ་དང་། ཨཏྤལ་ལ་སོགས་པ། ཕལ་ཆེན་པའི་མཁན་པོ་བྲམ་ཟེའི་རིགས་འོད་སྲུང་ཆེན་པོ། སྐད་པྲ་ཀྲི་ཏའི་སྐད། སྣམ་ཕྲན་ཉེར་གསུམ་པ་ནས་བདུན་ཡན་ཆད། རྟགས་དུང་། མང་པོས་བཀུར་བའི་མཁན་པོ། འབྲེག་མཁན་གྱི་རིགས་ཉེ་བ་འཁོར། སྐད་ཟུར་ཆག་གི་སྐད། སྣམ་ཕྲན་ཉེར་གཅིག་པ་ནས་ལྔ་ཡན་ཆད། རྟགས་མེ་ཏོག་སོར་ཙི་ཀ གནས་བརྟན་པའི་མཁན་པོ་མཐའ་འཁོབ་འདུལ་བ་ཀ་ཏ་ཡ་ན། སྐད་པི་ཤ་ཙིའི་སྐད། སྣམ་ཕྲན་དང་། གྲྭའི་རྟགས་མང་པོས་བཀུར་བ་དང་འདྲ་བར་གསུངས་སོ། །གྱེས་པ་བཅོ་བརྒྱད་ཀྱི་དབྱེ་བ་ནི་འོག་ནས་འཆད་དོ། །གཉིས་པ་ལ་གཉིས་ཏེ། གྱེས་པ་བཅོ་བརྒྱད་ལ་བདེན་བརྫུན་གྱི་དབྱེ་བ་ཡོད་པའི་ལན་དགག བསླབ་པ་ཤེས་ན་གནང་བཀག་གཅིག་ཏུ་འགྱུར་བའི་ལན་དགག་པའོ། །དང་པོ་ནི། གལ་ཏེ་སྡེ་པ་ཞེས་སོགས་བདུན་ཏེ། ཉན་ཐོས་རྩ་བའི་སྡེ་བཞི་དང་། གྱེས་པ་བཅོ་བརྒྱད་ལ་གནང་བཀག་ཐ་དད་ཡོད་པས། གནང་བཀག་ཐ་དད་པར་མི་འགྲུབ་སྟེ། སྡེ་པ་གཅིག་ཁོ་ནའི་གནང་བཀག་བདེན་པ་ཡིན་གྱི། དེ་ལས་གཞན་བརྫུན་པའི་ཕྱིར་རོ་ཞེ་ན་མ་ཡིན་ཏེ། རྒྱལ་པོ་ཀྲི་ཀྲིའི་རྨི་ལམ་ལྟར་སྡེ་པ་བཅོ་བརྒྱད་པོ་ཐམས་ཅད་ཀྱི་གནང་བཀག་བདེན་པར་གསུངས་པའི་ཕྱིར་རོ། །རྒྱལ་པོ་ཀྲི་ཀྲིའི་རྨི་ལམ་ལ། སྙན་ངག་དཔག་བསམ་འཁྲི་ཤིང་དང་། མཛོད་ཀྱི་འགྲེལ་བཤད་ལས་བཅུ་བཤད་ཅིང་བསྟན་པ་སྔ་དར་གྱི་དུས་སུ་བྱུང་བའི་ཆོས་ཀྱི་བརྗེད་བྱང་ཞེས་བྱ་བ་ལས་བརྒྱད་དེ་བཅོ་བརྒྱད་འབྱུང་བ་རིམ་པ་བཞིན་བསྡུས་ན། གླང་ཆེན་མཇུག་མ་དཀར་ཁུང་ཐོགས་པ་དང་། །ཁྲོན་པས་མི་སྙེགས་ཕྱེ་དང་མུ་ཏིག་བརྗེ། །ངན་པའི་ཤིང་དང་ཙནྡན་མཉམ་དུ་བྱེད། །གླང་གི་ཕྲུ་གུས་གླང་ཆེན་གནས་ནས་སྐྲོད། །མི་གཙང་སྤྲེའུས་མི་གཙང་གཞན་ལ་བྱུག །སྤྲེའུ་མང་པོས་སྤྲེ་ངན་རྒྱལ་པོར་བཀུར། །བཅོ་བརྒྱད་མི་ཡིས་རས་ཡུག་སོ་སོར་དྲས། །རྭ་བའི་མེ་ཏོག་འབྲས་བུ་རྐུན་པོས་ཁྱེར། །འཐབ་པར་མི་འོས་སྡེ་རིགས་ཕན་ཚུན་འཐབ། །མེ་ཏོག་དག་ནི་ཆོད་ཅིག་ཅེས་ནི་བསྒུལ། །རྫིང་བུ་གསུམ་གྱི་བར་མ་སྟོང་པར་མཐོང་། །རྒན་པོ་སྤྱི་ཐེར་དུ་ནི་གནས་པ་དང་། །རྟ་ཡི་ཁ་འཕོངས་གཉིས་ཀས་ཟ་བ་དང་། །ཆེ་བའི་ཁྱི་བས་ཆུང་བ་ཁ་ནི་དྲག །བེའུ་སྐྱེས་མ་ཐག་ཏུ་བ་ལ་ནུ། །སྔ་དྲོ་གཞོན་ནུའི་མི་ནི་ཕྱི་དྲོ་རྒས། །སེངྒེའི་རོ་ནི་རང་གི་སྲིན་འབུས་ཟོས། །བཅོ་བརྒྱད་རྨིས་པ་འོད་སྲུང་ལ་ཞུས་པས། །བྲམ་ཟེའི་ཁྱེའུ་བླ་མ་མ་འོངས་པར། །སངས་རྒྱས་ཤཱཀ་ཐུབ་ཅེས་བྱར་གྱུར་པའི་ཚེ། །བསྟན་པའི་མཇུག་ཏུ་འདི་འདྲ་འབྱུང་བའི་ལྟས། །ཞེས་སོ། །སྡེ་པ་བཅོ་བརྒྱད་ཀྱི་གནང་བཀག་ལ་བདེན་བརྫུན་གྱི་དབྱེ་བ་མེད་པ་དང་། བཅོ་བརྒྱད་ཇི་ལྟར་གྱེས་པའི་ཚུལ་འདིའི་དོན་རྒྱས་པར་བཙུན་པ་དབྱིག་བཤེས་ཀྱིས་མཛད་པའི་སྡེ་པ་ཐ་དད་ཀླག་པའི་འཁོར་ལོ་ཞེས་བྱ་བའི་དོན་བསྡུས་ནས་སློབ་དཔོན་དུལ་བ་ལྷས། སྡེ་པ་ཐ་དད་བསྟན་པ་བསྡུས་པ་ཞེས་བྱ་བ་དང་། འདུལ་བ་འོད་ལྡན་དང་། དགེ་ཚུལ་གྱི་ལོ་དྲི་བ་སོགས་ལ་ལྟོས་ཏེ་སྡེ་པ་ཐ་དད་བསྟན་པ་བསྡུས་པ་ལས། ཡུལ་དོན་སློབ་དཔོན་བྱེ་བྲག་གིས། །ཐ་དད་རྣམ་པ་བཅོ་བརྒྱད་འདོད། །ཅེས་དང་། འོད་ལྡན་ལས། དེ་ལྟ་བས་ན་སྡེ་པ་གཞན་འདོན་པ་དག་ཀྱང་སངས་རྒྱས་ཀྱི་གསུང་ནི་ཡིན་པར་ཐེ་ཚོམ་མེད་པ་ཡིན་ནོ་ཞེས་དང་། དགེ་ཚུལ་གྱི་ལོ་དྲི་བ་ལས། དེ་ལྟར་བྱེ་བྲག་བཅོ་བརྒྱད་དུ། །ཤཱཀྱ་སེང་གེའི་བསྟན་པ་ནི། །གྱུར་ཏེ་འགྲོ་བའི་བླ་མ་དེའི། །སྔོན་གྱི་ཕྲིན་ལས་དབང་གིས་ཡིན། །ཞེས་གསུངས་སོ། །བཅོ་བརྒྱད་ཇི་ལྟར་གྱེས་པའི་ཚུལ་ནི། འོད་ལྡན་ལས། ཐམས་ཅད་ཡོད་སྨྲ་གཅིག་པུ་ལས། གཞན་རྣམས་གྱེས་པར་གསུངས་ཏེ། ཇི་སྐད་དུ་སྔོན་ཐམས་ཅད་ཡོད་པར་སྨྲ་བ་འདི་གཅིག་པུ་ཡོད་པ་ལས་བཅོམ་ལྡན་འདས་མྱ་ངན་ལས་འདས་པ་དང་། དེ་ལ་བརྟེན་ནས་སྡེ་པ་གཞན་དག་འབྱུང་བས་དེ་དག་གི་གཞིར་གྱུར་པའི་ཕྱིར་གཞི་ཐམས་ཅད་ཡོད་པར་སྨྲ་བ་ཞེས་བྱ་བ་དང་། དེ་ལྟ་བས་ན་ཐམས་ཅད་ཡོད་པར་སྨྲ་བ་ནི་གཞི་ཞེས་བྱའི། སྡེ་པ་གཞན་དག་ནི་མ་ཡིན་ཏེ། ཐ་མལ་པ་དང་། ཟུར་ཆག་པ་དང་། འབྲིང་དུ་འདོན་པའི་ཚིག་གི་ཐ་སྙད་བརྗོད་པའི་ཕྱིར་རོ། །ཞེས་སོ། །སྡེ་པ་ཐ་དད་བསྟན་པ་བསྡུས་པ་དང་། དགེ་ཚུལ་གྱི་ལོ་དྲི་བ་ལས། རྩ་བའི་སྡེ་པ་བཞི་ལས། བཅོ་བརྒྱད་དུ་གྱེས་པར་འདོད་དེ། གཞུང་དང་པོ་ལས། ཤར་དང་ནུབ་དང་གངས་རིར་གནས། །འཇིག་རྟེན་འདས་པར་སྨྲ་བའི་སྡེ། །རྟག་པར་སྨྲ་བའི་སྡེ་པ་དང་། །ལྔ་ཚན་དགེ་འདུན་ཕལ་ཆེན་པ། །གཞི་ཀུན་པ་དང་འོད་སྲུང་སྡེ། །ས་སྟོན་སྡེ་དང་ཆོས་སྲུང་སྡེ། །མང་ཐོས་གོས་དམར་སློབ་མ་དང་། །རྣམ་པར་ཕྱེ་སྟེ་སྨྲ་བའི་སྡེ། །ཐམས་ཅད་ཡོད་པར་སྨྲ་བ་ཡིན། །རྒྱལ་བྱེད་ཚལ་གནས་འཇིགས་མེད་གནས། །གཙུག་ལག་ཁང་ཆེན་གནས་བརྟན་པ། །ས་སྒྲོགས་རི་དང་བསྲུང་བ་པ། །གནས་མ་བུ་ཡི་སྡེ་རྣམས་ནི། །ཀུན་གྱི་བཀུར་བ་རྣམ་པ་གསུམ། །ཡུལ་དོན་སློབ་དཔོན་བྱེ་བྲག་གིས། །ཐ་དད་རྣམ་པ་བཅོ་བརྒྱད་གསུངས། །ཞེས་དང་། གཞུང་གཉིས་པ་ལས། འོད་སྲུང་ཞེས་བྱ་ས་སྲུང་དང་། །ཆོས་སྲུང་ཞེས་ནི་བྱ་བ་དང་། །གཞི་ཀུན་ཡོད་པར་སྨྲ་བ་སྟེ། །ལྟ་བའི་བྱེ་བྲག་འགའ་ཞིག་གིས། །རྒྱུ་ཡིས་འདི་དག་ཐ་དད་བྱས། །སྟོན་པ་ཐ་དད་ཡོད་མ་ཡིན། །དགེ་འདུན་ཕལ་ཆེན་དབྱེ་བ་ནི། །དྲུག་སྟེ་ཤར་གྱི་རི་བོ་དང་། །དེ་བཞིན་ནུབ་རི་ཞེས་བྱ་དང་། །གངས་གནས་ཞེས་བྱ་དེ་ལས་གཞན། །རྣམ་པར་ཕྱེ་སྟེ་སྨྲ་བ་དང་། །གཞན་ནི་དེ་བཞིན་བརྟགས་པར་སྨྲ། །འཇིག་རྟེན་འདས་སྨྲ་ཞེས་བྱ་བ། །དེ་དག་ཏུ་ནི་ཡང་དག་སྨྲ། །མང་པོས་བཀུར་བའི་བྱེ་བྲག་ནི། །རྣམ་པ་ལྔར་ནི་མཁས་པས་བསྒྲགས། །གོས་དམར་བ་དང་ས་སྲུང་དང་། །ཀུ་རུ་ཀུལླེ་དེ་ལས་གཞན། །མང་དུ་ཐོས་པ་ཞེས་བྱ་དང་། །གནས་མ་བུ་ཡི་སྡེ་ཞེས་དང་། །རྒྱལ་བྱེད་ཚལ་ན་གནས་པ་དང་། །འཇིགས་མེད་རི་ལ་གནས་པ་དང་། །གཙུག་ལག་ཁང་ཆེན་ལ་གནས་པ། །གནས་བརྟན་དབྱེ་བ་གསུམ་དུ་འདོད། །དེ་ལྟར་བྱེ་བྲག་བཅོ་བརྒྱད་དུ། །ཞེས་སོགས་གསུངས་སོ། །རྟོག་གེ་འབར་བ་ལས། རྩ་བའི་སྡེ་པ། དགེ་འདུན་ཕལ་ཆེན་པ་དང་། གནས་བརྟན་པ་གཉིས་ལས། དང་པོ་ལས་བརྒྱད། ཕྱི་མ་ལས་བཅུར་གྱེས་པར་གསུངས་ཏེ། ཇི་སྐད་དུ། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ལོ་བརྒྱ་དང་བཅུ་དྲུག་ལོན་པ་ན། གྲོང་ཁྱེར་མེ་ཏོག་གིས་རྒྱས་པ་ཞེས་བྱ་བར་རྒྱལ་པོ་དྷརྨཱ་ཨ་ཤྭ་ཀ་ཞེས་བྱ་བ་རྒྱལ་སྲིད་བྱེད་པའི་ཚེ། རྩོད་པ་འགའི་དབང་གིས་དགེ་འདུན་གྱི་དབྱེན་ཆེན་པོར་གྱུར་ཏོ། །དེ་ནས་རེ་ཤིག་དང་པོར་སྡེ་པ་གཉིས་སུ་ཆད་ནས་གནས་ཏེ། དགེ་འདུན་ཕལ་ཆེན་པ་དང་གནས་བརྟན་པའོ། །དགེ་འདུན་ཕལ་ཆེན་པའི་སྡེ་པ་ཡང་རིམ་གྱིས་བྱེ་བར་གྱུར་པ་ན། རྣམ་པ་བརྒྱད་དུ་གནས་ཏེ། འདི་ལྟ་སྟེ་དགེ་འདུན་ཕལ་ཆེན་སྡེ་པ་དང་། ཐ་སྙད་གཅིག་པ་དང་། འཇིག་རྟེན་ལས་འདས་པར་སྨྲ་བ་ད་ང་། མང་དུ་ཐོས་པ་དང་། རྟག་པར་སྨྲ་བ་དང་། མཆོད་རྟེན་པ་དང་། ཤར་གྱི་རི་བོ་པ་དང་། ནུབ་ཀྱི་རི་བོ་པའོ། །གནས་བརྟན་པ་ཡང་རིམ་གྱིས་བྱེ་བར་གྱུར་པ་ན། རྣམ་པ་བཅུར་འགྱུར་ཏེ། འདི་ལྟ་སྟེ་གནས་བརྟན་པ་ཉིད་ལ། གངས་རི་པ་ཞེས་བརྗོད་པ་དང་། ཐམས་ཅད་ཡོད་པར་སྨྲ་བ་ཉིད་ལ་རྣམ་པར་ཕྱེ་སྟེ་སྨྲ་བ་དང་། རྒྱུར་སྨྲ་བ་དང་། ཁ་ཅིག་མུ་རན་ཏ་ཀ་པ་ཞེས་ཟེར་བ་དང་། གནས་མའི་བུ་ལ་ཆོས་མཆོག་དང་། བཟང་པོའི་ལམ་པ་དང་། ཀུན་གྱིས་བཀུར་བ་ལ་ཁ་ཅིག་ཨ་ནན་ཏ་ཀ་པ་ཞེས་ཟེར། ཁ་ཅིག་ནི་ཀུ་རུ་ཀུལླེ་ཞེས་ཀྱང་ཟེར་བ་དང་། མང་སྟོན་པ་དང་། ཆོས་སྦས་པ་དང་། ཆར་བཟངས་འབེབས་པ་ཞེས་བྱ་བ་ལ་ཁ་ཅིག་ནི་འོད་སྲུང་པ་ཞེས་ཟེར་བ་དང་། བླ་མ་ལ་ཁ་ཅིག་ནི་འཕོ་བར་སྨྲ་བ་ཞེས་ཟེར་བ་སྟེ། སྡེ་པ་བཅོ་བརྒྱད་ནི་དེ་དག་གོ་ཞེས་སོ། །གཉིས་པ་ནི། སྡེ་པ་ཀུན་གྱི་ཞེས་སོགས་ཚིགས་བཅད་དྲུག་དང་ཚིག་རྐང་གཅིག་སྟེ་སྡེ་པ་བཅོ་བརྒྱད་པོ་ཀུན་གྱི་བསླབ་པ་ཤེས་ན། གནང་བཀག་གཅིག་ཏུ་འགྱུར་ཞེ་ན། ཤེས་ཀྱང་ཕལ་ཆེར་སོགས་ཏེ་བུ་རམ་ཕྱི་དྲོ་ལྟུང་བ་མེད་པ་དང་། བྱིན་ལེན་ལག་པ་བཀན་པ་དང་། མིར་ཆགས་པ་བསད་པ་ལ་ཕམ་པ་དང་། གླེང་གཞིའི་ཚིགས་བཅད་རིང་ཐུང་གཞན་དུ་ཡོད་པ་ནི་ཐམས་ཅད་ཡོད་སྨྲའོ། །གསོལ་བཞིའི་ཆོ་གས་སྡོམ་པ་འཇིག་པ་དང་། སྨིན་མའི་སྤུ་མ་བཞར་ན་ལྟུང་བ་དང་། ལྷུང་བཟེད་བྱིན་ལེན་བྱེད་པ་རྣམས་ནི་ཕལ་ཆེན་པའོ། །བུ་རམ་ཕྱི་དྲོ་འགོག་པ་དང་། བྱིན་ལེན་ལག་པ་བཀན་པ་ལས་གཞན་སྐྱུར་ཐབས་སུ་བྱེད་པ་ནི་གནས་བརྟན་པའོ། །གསུམ་པ་ནི་མདོར་ན་ཕམ་པ་ཞེས་སོགས་བཅུ་བདུན་ཏེ། སྡེ་པ་ཐམས་ཅད་གནང་བཀག་གཅིག་པ་མི་འཐད་དེ། ཕམ་པ་བཞི་པོ་ནས་བརྩམས་ཏེ། བསླབ་པར་བྱ་བ་ཐམས་ཅད་མི་མཐུན་པས་ཐམས་ཅད་ཡོད་སྨྲ་ལྟ་བུ་གང་ཞིག་གི་བཀག་པ་ལ་གནས་བརྟན་པ་ལྟ་བུ་གང་ཞིག་ལ་གནང་བར་གྱུར་པ་ཡོད་པའི་ཕྱིར། དེ་ལྟ་མིན་པར་གཅིག་ན་གནོད་བྱེད་ནི་དཔེར་ན་བུ་རམ་སོགས་སོ། །བུ་རམ་ཕྱི་དྲོ་ཟ་བ་དང་། བྱིན་ལེན་ལ། ཡེ་བཀག་ཡེ་གནང་བརྟགས་པ་དེ་བཞིན་དུ། སྨིན་མའི་སྤུ་བཞར་བ་སོགས་ཀུན་ལ་སྦྱར་ནས་བརྟག་པར་བྱ་སྟེ། དེ་ལྟར་བརྟགས་ན་ཡེ་བཀག་ཡེ་གནང་འཇིག་གོ །གཉིས་པ་ཁྱིམ་པ་དང་རབ་བྱུང་གནང་བཀག་ཐ་དད་དུ་བསྟན་པ་ལ་གཉིས་ཏེ། ཁས་བླངས་བརྗོད་པ་དང་། དེ་དགག་པའོ། །དང་པོ་ནི། ཁ་ཅིག་རབ་ཏུ་ཞེས་སོགས་ལྔ་སྟེ། འབྲི་ཁུང་པ་ཁ་ཅིག་དགོངས་གཅིག་ཏུ་རྡོ་རྗེའི་གསུང་། བཅས་པ་དང་རང་བཞིན་གྱི་ཁ་ན་མ་ཐོ་བ་གཅིག་པ་ཡིན་ཞེས་བྱ་བ་འདི་བཞུགས་པས་དེ་གཉིས་གཅིག་པ་ཡིན་ནོ། །འོ་ན་དུད་འགྲོ་ལ་བཅས་པ་མཛད་པ་མེད་པས་བཅས་འགལ་གྱི་ཉེས་པ་མི་འབྱུང་ངམ་སྙམ་ན། དུད་འགྲོ་ལ་ཡང་བཅས་པ་ཡོད་དེ། ཡང་རྡོ་རྗེའི་གསུང་། ཁམས་གསུམ་ཆོས་ཀྱི་རྒྱལ་པོས་འགྲོ་བ་སྤྱི་ལ་བཅས་བྱ་བ་བཞུགས། དེ་ལ་སངས་རྒྱས་བཅོམ་ལྡན་འདས་དང་པོ་ཐུགས་བསྐྱེད། བར་དུ་ཚོགས་བསགས། ཐ་མར་ཆོས་འཁོར་བསྐོར་བ་དེ་ཡང་། རྗེས་འབྲང་གི་སྲས་ཁོ་ནའི་དོན་དུ་མ་ཡིན་འགྲོ་བ་ཐམས་ཅད་ཀྱི་དོན་དུ་ཡིན་པ་དང་གཅིག དེ་ལ་གང་ཟག་རེ་རེ་ལུང་སྟོན་པའི་ཚེ་ཞལ་ནས་འོད་ཟེར་ཁ་དོག་སྣ་ཚོགས་བཀྱེ་སྟེ། འོག་མིན་གྱི་བར་སྣང་བར་བྱས་ནས། བརྩམ་པར་བྱ་ཞིང་དབྱུང་བར་བྱ། །ཞེས་སོགས་ཚིགས་བཅད་གཉིས་པོ་སེམས་ཅན་གྱི་རིས་ཐམས་ཅད་དུ་འབྱུང་བའི་གནད་དང་གཉིས། འཁོར་ལོ་དང་པོ་འདུལ་བ་ཡིན་ལ། དེ་བསྡུས་པའི་སྙིང་པོ་ནི། སྡིག་པ་ཅི་ཡང་མི་བྱ་སྟེ། །ཞེས་སོགས་གསུངས་པའི་གནད་འདི་དང་གསུམ་གྱིས་བཅས་པ་ཐམས་ཅད་སྤྱི་ལ་དགག་སྒྲུབ་ཀྱི་ཚུལ་དང་བཅས་པ་བཤད་པ་ཡིན་ཞེས་ཟེར་རོ། །གཉིས་པ་ནི། འདི་ནི་སངས་རྒྱས་ཞེས་སོགས་བཅུ་གཅིག་སྟེ། རབ་བྱུང་ལ་བཅས་པ་ཐམས་ཅད་ཁྱིམ་པ་ནས་དམྱལ་བའི་བར་ལ་མཚུངས་པར་འབྱུང་ཟེར་བ་འདི་ནི་སངས་རྒྱས་ཀྱི་དགོངས་པ་མ་ཡིན་ཏེ། ཅིའི་ཕྱིར་ཞེ་ན་སོགས་སོ། །དེས་ན་ཐུབ་པས་དྲུག་སྡེ་ཟས་མཆོད་རྟེན་འདྲ་བར་བྱས་ཏེ་གཞོམ་པ་སོགས་མ་བཅས་པའི་གོང་གི་ལས་དང་པོ་པས་ཉེས་པ་བྱས་ཀྱང་ལྟུང་བ་མེད་པར་གསུངས་སོ། །དེ་ལྟ་མ་ཡིན་པར་བཅས་མ་བཅས་ཐམས་ཅད་ལ་ལྟུང་བ་ཀུན་འབྱུང་ན་འགྲོ་ཀུན་སོགས་སོ། །གསུམ་པ་ཐེག་པ་ཆེ་ཆུང་གནང་བཀག་ཐ་དད་པར་བསྟན་པ་ནི། ཉན་ཐོས་རྣམ་གསུམ་ཞེས་སོགས་ལྔ་སྟེ། འདི་ལ་ཉན་ཐོས་ལ་རྣམ་གསུམ་དག་པའི་ཤ་གནང་ཚུལ། ཐེག་པ་ཆེན་པོ་ལས་ཤ་ཐམས་ཅད་བཀག་ཚུལ། དེ་དག་གི་དགོངས་པ་དཔྱད་པ། གཞུང་གི་འབྲུ་གཉེར་བས་སྐབས་ཀྱི་དོན་ལ་སྦྱར་བ་དང་བཞི་ལས། དང་པོ་ནི་འདུལ་བ་ལུང་སྨན་གྱི་གཞི་ལས། བཅོམ་ལྡན་འདས་ཀྱིས་བཀའ་བསྩལ་པ། གནས་གསུམ་གྱིས་རུང་བ་མ་ཡིན་པའི་ཤ་བཟའ་བར་མི་བྱའོ། །ཞེས་གསུངས་པའི་གསུམ་གང་ཞེ་ན། བདག་གི་ཆེད་དུ་བྱས་པ་མངོན་སུམ་དུ་མཐོང་བ་དང་། ཡིད་ཆེས་པ་ལས་ཁྱོད་ཀྱི་ཆེད་དུ་བྱས་པ་ཡིན་ནོ་ཞེས་ཐོས་པ་དང་། རང་ཉིད་ཀྱི་བློ་ལ་རྣམ་པར་རྟོག་པ་སྐྱེས་པ་ཚུལཾ་གསུམཾ་ལསཾ། འདི་ནི་བདག་གི་ཆེད་དུ་བྱས་པ་ཡིན་ནོ་སྙམ་པའོ། །ཞེས་དངོས་སུ་རྣམ་གསུམ་མ་དག་པའི་ཤ་བཀག་ཅིང་། ཤུགས་ལ་རྣམ་གསུམ་དག་པའི་ཤ་གནང་བ་དང་། ཡང་ལུང་ལས། ཡ་རབས་རྣམས་ལ་གནང་བའི་ཉ་དང་། ཤ་ལ་སོགས་པ་ལྷུང་བཟེད་དུ་འོངས་པ་དག་ལ་མི་ཤ་ལ་སོགས་པ་མ་ཡིན་ནམ་སྙམ་དུ་བརྟགས་ཏེ། མ་ཡིན་ན་བཟའོ་ཞེས་དང་། རྟོག་གེ་འབར་བ་ལས། ཉན་ཐོས་ཐེག་པའི་གཞུང་ལས་ནི། །རྣམ་གསུམ་དག་པའི་ཤ་གང་དག །ཟོས་ཀྱང་སྡིག་པར་མི་འགྱུར་ཏེ། །དྭངས་མ་སོགས་སུ་འགྱུར་བའི་ཕྱིར། །སློང་མོའི་ཟས་ལ་སྡིག་མེད་བཞིན། །ཞེས་གསུངས་སོ། །གཉིས་པ་ནི་ལང་ཀར་གཤེགས་པ་ལས། བློ་གྲོས་ཆེན་པོ་ཚེ་འདི་ཉིད་ལ་ཡང་། ཁྱིམ་བདུན་པོའི་ནང་ན་ཤ་ལ་ཤིན་ཏུ་བརྐམ་ཞིང་མ་འོངས་པར་བརྟེན་ན་མི་ཤ་ཟ་བའི་མཁའ་འགྲོ་དང་། མཁའ་འགྲོ་མ་མ་རུངས་པ་དག་ཏུ་སྐྱེའོ། །བློ་གྲོས་ཆེན་པོ་དེ་དག་ཚེ་བརྗེས་ནས་ཀྱང་ཤའི་རོ་ལ་ཆགས་པ་དེ་ཉིད་ཀྱིས་སེང་གེ་དང་། སྟག་དང་། གཟིག་དང་། སྤྱང་ཀི་དང་། འཕར་བ་དང་། བྱི་ལ་དང་། ཝ་དང་། འུག་པ་དང་། ཤ་མང་པོ་ཟ་བའི་སྐྱེ་གནས་དང་། ཤ་མང་དུ་ཟ་བའི་སྲིན་འབུ་ལ་སོགས་པ་ཤིན་ཏུ་གཏུམ་པའི་སྐྱེ་གནས་སུའང་ལྟུང་བར་བྱེད་དོ། །དེར་ལྟུང་བ་རྣམས་མིའི་སྐྱེ་གནས་ཀྱང་འཐོབ་པར་དཀའ་ན་མྱ་ངན་ལས་འདས་པ་ལྟ་ཅི་སྨོས་ཏེ། བློ་གྲོས་ཆེན་པོ་ཤ་ཟ་བའི་ཉེས་པ་ཡང་དེ་དག་ལ་སོགས་པ་ཡིན་ན་བསྙེན་པ་རྣམས་ལྟ་སྨོས་ཀྱང་སྐྱེཾ་མོཾད། ཕྱིར་མི་ལྡོག་པས་ན་ཡོན་ཏན་ཤིན་ཏུ་མང་ན་བློ་གྲོས་ཆེན་པཾོ་རྣམས་ཀྱིས་ཡོན་ཏན་དང་ཉེས་པ་འདི་དག་དང་གཞན་ཡང་ཁོང་དུ་མི་ཆུད་ཞེས་རྒྱས་པར་གསུངས་ཤིང་། གླང་པོའི་རྩལ་དང་སྤྲིན་ཆེན་དང་། །མྱ་ངན་འདས་དང་སོར་ཕྲེང་དང་། །ལང་ཀར་གཤེགས་པའི་མདོ་ལས་ཀྱང་། །ངས་ནི་ཤ་ཡང་རྣམ་པར་སྨད། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རྣམས་ཀྱང་སྨད་པ་ལས། །ངོ་མི་ཚ་བར་ཟ་བ་ནི། །རྟག་ཏུ་སྨྱོན་པར་སྐྱེ་བར་འགྱུར། །ཞེས་དང་། འཇམ་དཔལ་གྱིས་རང་གི་ལྟ་བའི་འདོད་པ་མདོར་བསྟན་པར། གསོད་པོ་ནོར་ལ་སྲེད་པ་དག །བསྐལ་པ་འབུམ་དུ་འཚེད་པ་སྟེ། །ཟ་པོ་ཤ་ལ་སྲེད་པ་དག །བསྐལ་པ་བྱེ་བར་འཚེད་པ་ཡིན། །ཞེས་དང་། ཤ་ཟ་བ་ཡི་མི་གང་ཞིག །དང་པོ་ཡི་དྭགས་འགྲོ་བ་སྟེ། །ཕྱིས་ནས་ངུ་འབོད་འགྲོ་བ་ཡིན། །ཞེས་དང་། དཔུང་བཟང་གིས་ཞུས་པའི་རྒྱུད་ལས། ཤ་ཆང་ཀེ་འུ་བཙོང་དང་སྒོག་རྡོག་དང་། །འབྲུ་མར་ཏིལ་དང་ལ་ཕུག་སུ་ར་ཎ། །འབྱུང་པོའི་ཟས་དང་ལྷ་བཤོས་གཏོར་མ་དང་། །གུ་ལང་མཆོད་བྱས་གཏོར་མ་མི་ཟའོ། །ཞེས་གསུངས་སོ། །གསུམ་པ་ནི་འདུལ་བའི་དངོས་བསྟན་ལ། ཉན་ཐོས་རྣམ་གསུམ་དག་པའི་ཤ་གནང་བར་གསུངས་པ་དེ་དག་དྲང་དོན་ཡིན་ནམ་ངེས་དོན་ཡིན་སྙམ་ན། སློབ་དཔོན་ཡོན་ཤཱཀ་གཉིས་ཀྱིས་ནི་དངོས་བསྟན་སྒྲ་ཇི་བཞིན་དུ་འགྲེལ་ཏེ། མདོ་རྩར། ཤ་བསྔོས་པར་ཤེས་ན་བཟའ་བར་མི་བྱའོ། །སྟག་གི་གོད་མ་མི་ཟའོ། །གླང་པོ་ཆེ་དང་། རྟ་དང་། ཀླུ་རྣམས་ཀྱི་མི་ཟའོ། །ཞེས་དང་། ཤའི་བྱིན་ལེན་སྟོབ་པ་ལ། བཅད་པ་ལས་བྱུང་བ་ཉིད་མ་ཡིན་ནམ། ཞེས་དྲི་བར་བྱའོ། །དུ་མ་ཉིད་ན་དང་པོས་སོ། །ཉམས་ན་འོག་མས་སོ་ཞེས་དང་། སུམ་བརྒྱ་པ་ལས། ཡ་རབས་རྣམས་ལ་ཉ་དང་ཤ་གནང་གང་། །གནོད་དང་བརྩེ་མེད་རོ་སོགས་ལ་ཆགས་དང་། །ཡོངས་སུ་བཙལ་བའི་སེམས་ནི་སྤངས་ནས་ནི། །ལྷུང་བཟེད་འོངས་པ་དེ་ལ་བརྟགས་ཏེ་བཟའ། །ཞེས་གནང་བའི་ཤ་བཟའ་བར་གསུངས་ལ། དེ་ཡང་རྣམ་གསུམ་དག་པའི་ཤའོ། །རྣམ་གསུམ་དག་པ་ནི་ཁ་ཅིག རང་གི་ཆེད་དུ་མཐོང་ཐོས་དོགས་གསུམ་དང་བྲལ་བ་ཡིན་གྱི། སྤྱིར་ཤའི་ཆེད་དུ་མ་ཡིན་ནོ་ཞེས་ཟེར་བ་མི་འཐད་དེ། འོད་ལྡན་ལས། ཆེད་དུ་བྱས་པའི་ཤ་དང་ཉ་ཤ་དག་བཟའ་བར་མི་བྱའོ། །གལ་ཏེ་བྱས་པ་དང་བྱེད་དུ་བཅུག་པ་དང་། རྗེས་སུ་ཡི་རང་བ་འཁོར་གསུམ་ཡོངས་སུ་དག་པ་ཡིན་དུ་ཟིན་ཀྱང་ཆེད་དུ་བྱས་པ་རྣམས་ལས་སྙིང་བརྩེ་བ་མེད་པ་སྐྱེ་བའི་ཕྱིར་དང་ཆ་མ་ཡིན་པའི་ཕྱིར་བཀག་གོ །དེ་ལས་གཞན་པ་ནི་མ་བཀག་པའོ། །ཞེས་གསུངས་པས་སོ། །ཁ་ཅིག་ལང་ཀར་གཤེགས་པར། རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བླངས་པ། །མ་བསྐུལ་བ་ཡང་སྤོང་མེད་པས། །དེས་ན་ཤ་ནི་མི་ཟའོ། །ཞེས་གསུངས་པ་རྣམས་ལ་འཆད་པ་ནི་ཤིན་ཏུ་ནོར་ཏེ། དེ་ནི་ཉན་ཐོས་ཀྱི་ཐེག་པར་གསུངས་པའི་རྣམ་གསུམ་དག་པའི་ཤ་དེ་ཡང་འདིར་རྣམ་པ་གསུམ་མ་དག་པ་ཡིན་པས་བཟར་མི་རུང་ཞེས་པའི་དོན་ཡིན་གྱི། ཉན་ཐོས་ཀྱི་ཐེག་པའི་རྣམ་གསུམ་དག་ཚུལ་སྟོན་པ་ནི་མ་ཡིན་པའི་ཕྱིར་རོ། །དེས་ན་འདུལ་བ་ཚིག་ལེའུར་བྱས་པ་ལས། གང་ཕྱིར་ཆེད་དུ་བྱས་པའི་ཤ །མཐོང་ངམ་ཐོས་སམ་དོགས་པ་ནི། །དེ་ནི་བཟའ་བར་བྱ་མིན་པར། །འགྲོ་ཀུན་ཕན་པར་བཞེད་པས་གསུངས། །ཞེས་པ་ལྟར། ཤའི་ཆེད་དུ་མཐོང་ཐོས་དོགས་གསུམ་དང་བྲལ་བའོ། །སྔར་དྲངས་པའི་སྨན་གྱི་གཞི་ལས་བདག་གི་ཆེད་དུ་ཞེས་གསུངས་པ་ནི་ནད་པའི་དབང་དུ་མཛད་པའོ། །སློབ་དཔོན་ཞི་བ་ལྷས་ནི་འདུལ་བར་རྣམ་གསུམ་དག་པའི་ཤ་གནང་བ་དྲང་དོན་དུ་གཏན་པ་ཕབ་པ་སྟེ། བསླབ་པ་ཀུན་ལས་བཏུས་པར། འདུལ་བ་ལས། དེ་ལ་རྣམ་གསུམ་ཡོངས་སུ་དག་པའི་ཤ་ཟོས་ན་སྤོང་བའི་བར་ཆད་དུ་མི་འགྱུར་རོ། །ཞེས་གང་གནང་བ་ནི་དེ་ཡོངས་སུ་སྤངས་པས་དག་པར་ལྟ་བ་རྣམས་ཀྱི་མངོན་པའི་ང་རྒྱལ་བསལ་བ་དང་། སྐལ་བ་ཡོད་ཀྱང་དེ་ལ་ཆགས་པས་བསྟན་པ་ལ་མི་འཇུག་པ་སྤང་བའི་ཕྱིར་རོ། །དེ་སྐད་དུ་ལང་ཀར་གཤེགས་པའི་མདོ་ལས་ཀྱང་། བསྟན་པར་བརྗོད་པ་དེ་དང་། དེ་ལས་བསླབ་པའི་གཞི་རིམ་པར་བཅའ་བ་སྐས་ཀྱི་གདང་བུ་བྲེ་བའི་ཚུལ་དུ་རྣམ་པ་གསུམ་བཅས་ནས། དེའི་འོག་ཏུ་ཆེད་དུ་བྱས་པ་རྣམས་ཀྱང་བཀག་སྟེ། དེ་ནས་རང་ཤི་བ་བཅུའི་ཤ་ཡང་བཀག་གོ །ཞེས་གསུངས་སོ། །ཞེས་ལུང་འདྲེན་དང་བཅས་པ་གསལ་བར་བཤད་པའི་ཕྱིར་རོ། །དེ་ལ་དགོངས་གཞི་ནི་དགེ་སློང་ནད་པས་སྨན་གྱི་ཆེད་དུ་བསྟེན་པ་དང་། མདོ་ཏིང་འཛིན་རྒྱལ་པོ་ལས། དགེ་སློང་འདི་ནི་འཆི་བའི་དུས་བགྱིས་ན། འཛམ་བུའི་གླིང་དུ་ཏིང་འཛིན་སྒྲ་རྣམས་ནི། །སེམས་ཅན་རྣམས་ལ་རྟག་ཏུ་ནུབ་པར་འགྱུར། །འདི་སོས་པས་ནི་ཏིང་འཛིན་རྣམས་ཀྱང་ཐོབ། །ཅེས་གསུངས་པ་ལྟར། །དགེ་སློང་ཡང་དག་བློ་གྲོས་ལྟ་བུ་ཤའི་སྨན་མ་བསྟེན་ན་འཆི་བའི་དུས་བྱེད་པར་འགྱུར་ལ། དེ་འདས་ན་འཛམ་བུའི་གླིང་དུ་ཏིང་ངེ་འཛིན་ནུབ་པར་འགྱུར་བས། འདི་ལྟ་བུའི་གང་ཟག་གིས་བཟར་རུང་བ་ལ་དགོངས་སོ། །དགོས་པ་ནི་ལྷས་བྱིན་ལ་སོགས་པ་ཤ་སྤངས་པ་ཙམ་གྱིས་དག་པར་ལྟ་བ་དང་། རྒྱལ་པོ་རྐང་ཁྲ་ལྟ་བུ་ཤའི་རོ་ལ་ཆགས་པས་བསྟན་པ་ལ་མི་འཇུག་པ་རྣམས་རྗེས་སུ་བཟུང་བའི་ཕྱིར་ཡིན་ནོ། །དངོས་ལ་གནོད་བྱེད་ནི་ལང་གཤེགས་ལས། བློ་གྲོས་ཆེན་པོ་རབ་ཏུ་བྱུང་བ་རྣམས་ལ་ཤའི་ཟས་ནི་མི་རུང་བར་བཤད་དོ། །བློ་གྲོས་ཆེན་པོ་གང་ང་ལ་དེ་བཞིན་གཤེགས་པས་ཀྱང་གསོལ་ཏོ་ཞེས་སྐུར་པ་འདེབས་པ་དེ་ཡང་བློ་གྲོས་ཆེན་པོ། སྐྱེས་བུ་བླུན་པོ་རང་གི་ལས་ཀྱི་ཉེས་པའི་སྒྲིབ་པ་ལ་གནས་པ་དེ་དག་ལ་ཡུན་རིང་པོར་དོན་མེད་པ་དང་། གནོད་པ་དང་མི་བདེ་བ་སྒྲུབ་པར་འགྱུར་རོ། །བློ་གྲོས་ཆེན་པོ་ངའི་འཕགས་པ་ཉན་ཐོས་རྣམས་ནི་ཁ་ཟས་ཐ་མལ་པ་ཡང་མི་ཟ་ན་ཤ་དང་ཁྲག་གི་ཟས་མི་རུང་བ་ལྟ་ཅི་སྨོས་ཞེས་དང་། མྱང་འདས་ཆེན་པོར་བཅོམ་ལྡན་འདས། འོ་ན་ཇི་ལྟར་མུ་གསུམ་ཡོངས་སུ་དག་པའི་ཤ་ཟ་བར་གནང་ལགས། བཀའ་བསྩལ་པ། མུ་གསུམ་ཡོངས་སུ་དག་པ་ངས་རིམ་གྱིས་བསླབ་པའི་གཞི་བསྡམས་པའི་ཕྱིར། དེ་ཡང་ངས་དང་པོར་ཞེས་དང་། རིགས་ཀྱི་བུ་ད་ཕྱིན་ཆད་ངའི་ཉན་ཐོས་རྣམས་ཤ་བཟར་མི་རུང་ངོ་། །ཡུལ་འཁོར་གྱི་བསོད་སྙོམས་ནི་བུའི་ཤ་དང་འདྲ་བར་བྱ་ན་ཤ་ཟ་བར་ངས་ཇི་ལྟར་གནང་ཞེས་གསུངས་སོ། །བདག་གི་བླ་མ་ཡང་འདི་ཁོ་ན་བཞིན་དུ་བཞེད་དེ། སྤྲིང་ཡིག་སློབ་ཕན་དུ་ལྟ་བར་བྱའོ། །ཁོ་བོའི་རྟོག་པ་ལ་ནི། འདུལ་བ་ལས་དང་པོར་བསླབ་པའི་གཞི་རིམ་གྱིས་འཆའ་བའི་དུས་སུ་ཤ་གནང་ཞིང་། ཕྱིས་བསླབ་གཞི་ཡོངས་སུ་རྫོགས་ནས། ལང་གཤེགས་དང་། མྱང་འདས་ཆེན་པོ་གསུངས་པ་ཕྱིན་ཆད་ནས། ཉན་ཐོས་རྣམས་ལ་ཡང་བཀག་སྟེ། སྔར་དྲངས་པའི་མྱང་འདས་ཆེན་པོར། ངས་རིམ་གྱིས་བསླབ་པའི་གཞི་བསྡམས་པའི་ཕྱིར་དེ་ཡང་ངས་དང་པོར་ཞེས་དང་། ད་ཕྱིན་ཆད་ངའི་ཉན་ཐོས་རྣམས་ཞེས་པའི་ཚིག་གི་ཁྱད་པར་གསུངས་པའི་ཕྱིར་རོ་སྙམ་དུ་སེམས་ཏེ་གོང་མ་དང་ཕུགས་ཀྱི་དགོངས་པ་གཅིག་གོ །བཞི་པ་ནི་ཐེག་པ་ཆེ་ཆུང་ཡང་གནང་བཀག་ཐ་དད་དེ། འདུལ་བ་ལས་ཉན་ཐོས་རྣམས་ལ། དང་པོར་བསླབ་པའི་གཞི་འཆའ་བའི་དུས་སུ། རྣམ་གསུམ་དག་པའི་ཤ་བཟའ་རུ་རུང་བར་གནང་ཞིང་། གལ་ཏེ་དེའི་ཚེ་ཡང་མ་གནང་ངོ་སྙམ་ནས་མི་ཟ་ན། ལྷ་སྦྱིན་གྱི་བརྟུལ་ཞུགས་སུ་གྱུར་པའི་ཕྱིར་དང་། ཐེག་པ་ཆེན་པོ་ལས། དང་པོ་ཉིད་ནས་རྣམ་གསུམ་དག་པ་དང་། མ་དག་པའི་ཤ་རྣམས་ཐམས་ཅད་བཀག་ཅིང་། ཟོས་ན་ངན་འགྲོའི་རྒྱུར་གསུངས་པའི་ཕྱིར་རོ། །ལྷ་སྦྱིན་གྱི་བརྟུལ་ཞུགས་སུ་འགྱུར་བའི་ཚུལ་ལ་ཊཱི་ཀ་བྱེད་པ་དག ཁ་ཅིག་ཤ་མི་ཟ་བའི་བརྟུལ་ཞུགས་ཙམ་གྱིས་དག་གྲོལ་དུ་འཛིན་ན་བརྟུལ་ཞུགས་སུ་འགྱུར་ཞེས་འཆད་པ་མི་འཐད་དེ། ལྷ་སྦྱིན་ཡང་བརྟུལ་ཞུགས་གཅིག་ཙམ་གྱིས་ཆོག་པར་མི་འཛིན་ཅིང་། གཞན་བཞི་ཡང་བཅའ་བ་བྱས་པའི་ཕྱིར། ཞེས་བཀག་ནས་རང་ལུགས་ལ་སྟོན་པ་སངས་རྒྱས་ཀྱི་བཅས་པ་དེ་མི་འཐད། ལྷ་སྦྱིན་གྱི་བཅས་པ་འཐད་ཟེར་ནས། ཤ་མི་ཟ་ན་ལྷ་སྦྱིན་གྱི་བརྟུལ་ཞུགས་སུ་འགྱུར་ཞེས་སྨྲ་བ་ནི་ཤིན་ཏུ་མི་འཐད་དེ། གཞུང་འདི་ཐེག་པ་ཆེ་ཆུང་གནང་བཀག་ཐ་དད་པ་སྟོན་བྱེད་ཡིན་པས་ཉན་ཐོས་ལ་ལྷ་སྦྱིན་གྱི་བརྟུལ་ཞུགས་སུ་འགྱུར། ཐེག་པ་ཆེན་པོ་ལ་མི་འགྱུར་བ་ཞིག་དགོས་པ་ལས། དེ་ནི་ཐེག་པ་ཆེན་པོ་ལ་ཡང་། ལྷ་སྦྱིན་གྱི་བརྟུལ་ཞུགས་སུ་འགྱུར་བའི་ཕྱིར་རོ། །ལྷ་སྦྱིན་གྱི་བརྟུལ་ཞུགས་གང་ཞེ་ན། རྟོགས་བརྗོད་བརྒྱ་པ་ལས། དགེ་སྦྱོང་གོའུ་ཏ་མ་དགོན་པར་གནས་ན་ནི་བདག་ཅག་གྲོང་འདབ་ན་གནས་པར་བྱའོ། །དེ་ཅིའི་ཕྱིར་ན་དགེ་སློང་དག་དགོན་པར་གནས་པ་ལ་ནི་ཉེས་དམིགས་མང་བའི་ཕྱིར་རོ། །དགེ་སྦྱོང་གོའུ་ཏ་མས་ཤ་བཟའ་བར་གནང་ན་ནི། བདག་ཅག་གིས་བཟའ་བར་མི་བྱའོ། །དེ་ཅིའི་ཕྱིར་ཞེ་ན་གཞི་དེ་ལས་སེམས་ཅན་རྣམས་གསོད་པར་འགྱུར་བའི་ཕྱིར་རོ། །དགེ་སྦྱོང་གོའུ་ཏ་མ་ལན་ཚྭ་ཟ་ན་ནི་བདག་ཅག་གིས་བཟའ་བར་མི་བྱའོ། །དེ་ཅིའི་ཕྱིར་ཞེ་ན་ཁུ་ཆུ་ལས་བྱུང་བའི་ཕྱིར་རོ། །དགེ་སྦྱོང་གོའུ་ཏ་མས་འོ་མ་འཐུང་ན་ནི་བདག་ཅག་གིས་བཏུང་བར་མི་བྱའོ། །དེ་ཅིའི་ཕྱིར་ཞེ་ན་གཞི་དེ་ལས་བེའུ་རྣམས་ཉོན་མོངས་པར་འགྱུར་བའི་ཕྱིར་རོ། །དགེ་སྦྱོང་གོའུ་ཏ་མ་ཆོས་གོས་དྲས་པ་གྱོན་ན་ནི་བདག་ཅག་གིས་བགོ་བར་མི་བྱའོ། །དེ་ཅིའི་ཕྱིར་ཞེ་ན་མི་རྣམས་ཀྱིས་ཞོ་ཤས་བསྒྲུབས་པ་ཆུད་ཟོས་པར་འགྱུར་བའི་ཕྱིར་རོ། །ཞེས་གསུངས་སོ། །བཞི་པ་ཐེག་ཆེན་ནང་ཕན་ཚུན་གནང་བཀག་ཐ་དད་པ་ནི། དེ་བཞིན་ཕ་རོལ་ཞེས་སོགས་ལྔ་སྟེ། ཐེག་པ་ཆེ་ཆུང་ལ། གནང་བཀག་ཐ་དད་དུ་ཡོད་པ་དེ་བཞིན་དུ་ཐེག་པ་ཆེན་པོ་ལ་ཡང་ཕ་རོལ་ཏུ་ཕྱིན་པ་དང་། གསང་སྔགས་ཀྱི་ལྟུང་བ་ལ་གནང་བཀག་འགའ་ཞིག་ཐ་དད་དུ་ཡོད་དེ། རྩ་ལྟུང་བརྒྱད་པ་དང་། བཅུ་གསུམ་པ་དང་། བཅུ་བཞི་པ་སོགས་གསང་སྔགས་ལ་ལྟུང་བར་བཅས་ཤིང་། ཕ་རོལ་ཏུ་ཕྱིན་པ་ལ་མ་བཅས་པའི་ཕྱིར་རོ། །དེས་ན་དེ་འདྲའི་འགལ་བ་སོགས་སོ། །གསུམ་པ་དཔེའི་སྒོ་ནས་དོན་བསྡུ་བ་ནི། དེས་ན་ཡེ་བཀག་ཞེས་སོགས་ཚིགས་བཅད་བཞི་སྟེ། ཉན་ཐོས་རྩ་བའི་སྡེ་བཞི་དང་། རབ་ཏུ་བྱུང་མ་བྱུང་དང་། ཐེག་པ་ཆེ་ཆུང་དང་། ཐེག་ཆེན་ཕན་ཚུན་ཐམས་ཅད་གནང་བཀག་ཐ་དད་པ་དེས་ན་ཡེ་བཀག་ཡེ་གནང་གི་རྣམ་གཞག་སོགས་སོ། །གཉིས་པ་དེ་ལ་གནོད་པ་སྤོང་བ་ལ་གཉིས་ཏེ། ཐུབ་པས་རབ་བྱུང་ལ་སྙིང་ནད་བྱས་པར་ཐལ་བ་སྤང་བ། བདེ་སྡུག་གི་བྱེད་པོ་སངས་རྒྱས་ཡིན་པར་ཐལ་བ་སྤོང་བའོ། །དང་པོ་ལ་རྩོད་པ་དང་། ལན་གཉིས་ལས། དང་པོ་ནི་གལ་ཏེ་སྡོམ་པ་ཞེས་སོགས་ཚིགས་བཅད་གཉིས་ཏེ། འབྲི་ཁུང་པ་ཁ་ཅིག་དགོངས་ཅིག་ཏུ་རྡོ་རྗེའི་གསུང་། འགྲོ་དྲུག་གིས་བསྲུངས་ཀྱང་ཕན་ཡོན་འབྱུང་བྱ་བ་འདི་བཞུགས་དེ་ཡང་བཅས་པ་འགྲོ་བ་སྤྱི་ལ་བཅས་པ་དང་གཅིག རྒྱུ་འབྲས་རྟེན་འབྲེལ་གྱི་གཤིས་ལ་མི་བསླུ་བ་དང་གཉིས། འགྲོ་དྲུག་གིས་བཅས་པ་ལས་འདས་ཀྱང་ཉེས་པ་འབྱུང་བ་དང་རྒྱུ་མཚན་གསུམ་གྱིས་འགྲོ་དྲུག་གིས་བསྲུང་ཀྱང་ཕན་ཡོན་འབྱུང་། དཔེར་ན་རྫ་མཁན་དགའ་སྐྱོང་ས་མི་རྐོ་བར་གཞན་གྱིས་བརྐོས་པ་དང་། གད་པ་ཆད་པའི་ས་ལ་རྫ་མ་བྱེད། དེའི་རིན་གྱིས་ཕ་གསོ། བཅོམ་ལྡན་འདས་འོད་སྲུང་ལ་ཡང་དུས་དུས་སུ་བསྙེན་བཀུར་བྱེད་པས་འོད་སྲུང་དེ་ལ་ཐུགས་དགྱེས་པའང་བཅས་པ་བསྲུངས་པའི་གནས་སྐབས་ཀྱི་འབྲས་བུ་ཡིན། ཀ་ཤིའི་ནགས་ཁྲོད་དུ་གོང་མ་སྲེག་སོགས་བཞིས་ཁྲིམས་བསྲུངས་པས། ཡུལ་དུ་དགེ་ལེགས་དཔག་མེད་འབྱུང་བ་བཞིན། དེ་ལྟ་མིན་པར་སྤྱིར་རྗེས་འབྲང་གི་སྲས་དང་བྱེ་བྲག་ཏུ་དགེ་སློང་ཁོ་ན་ལ་བཅས་ན་བཅོམ་ལྡན་འདས་ཕྱ་དང་དབང་ཕྱུག་ལྟར་བདེ་སྡུག་གི་བྱེད་པ་པོར་འགྱུར་ཏེ། མ་བཅས་ན་སྡིག་པ་མེད་པ་ཡིན་པ་ལ་བཅས་ནས་དེ་བསྒྲུབ་མ་ནུས་ན་སྡིག་པ་ལྷག་པ་གཅིག་འབྱུང་བའི་ཕྱིར་དང་། ཉེ་ཕུང་དུ་ཡང་འགྱུར་ཏེ། ཚུལ་ཉེ་བའི་དགེ་སློང་རྣམས་ལ་རང་བཞིན་རྒྱབ་ཁལ་གྱི་སྟེང་དུ་བཅས་པའི་གོང་རྫས་བཀལ་བས་མཛོ་རྒན་སྐེད་པ་ཆག་ནས་ཤི་བ་དང་འདྲ་བར་རང་བཞིན་གྱི་སྡིག་པའི་སྟེང་དུ་བཅས་འགལ་གྱི་ཉེས་པ་འབྱུང་བས་ངན་སོང་གསུམ་དུ་ལྟུང་བའི་ཕྱིར་རོ་ཞེས་ཟེར་རོ། །དེའི་དོན་བསྡུས་པ་ནི་འདིར་བཀོད་པ་སྟེ། གལ་ཏེ་རབ་བྱུང་གི་སྡོམ་པ་མ་བླངས་ན་བཅས་པ་དང་འགལ་བ་ལ་ལྟུང་བའི་ཐ་སྙད་མི་ཐོབ་ཀྱང་རབ་བྱུང་ལ་བཅས་པའི་སྡིག་པ་ཁྱིམ་པ་ལ་ཡང་འབྱུང་སྟེ། དེ་ལྟ་མ་ཡིན་པར་རབ་བྱུང་ཁོ་ན་ལ་འབྱུང་ན་རབ་བྱུང་ལ་ཆེད་དུ་གཉེར་ནས་སྡིག་པ་བསྒོས་པར་འགྱུར་ལ། དེ་ཡང་འདོད་ན་ཐུབ་པས་སོགས་སོ། །གཉིས་པ་ལ་གཉིས་ཏེ། བཅས་ལྟུང་ལ་རང་བཞིན་གྱི་མི་དགེ་བ་ཡོད་པ་དགག་པ། བརྟུལ་ཞུགས་ལ་རང་བཞིན་གྱི་དགེ་བ་ཡོད་པ་དགག་པའོ། །དང་པོ་ལ་གསུམ་སྟེ། མགོ་མཚུངས་ཀྱི་རིགས་པས་དགག དངོས་སྟོབས་ཀྱི་རིགས་པས་དགག ཧ་ཅང་ཐལ་བས་དགག་པའོ། །དང་པོ་ནི་འདི་འདྲའི་རིགས་པ་ཞེས་སོགས་བཅུ་གསུམ་མོ། །གཉིས་པ་ནི་དེས་ན་མདོ་དང་ཞེས་སོགས་ཚིགས་བཅད་གཉིས་ཏེ། ཁ་ན་མ་ཐོ་བ་ཡིན་ན་རང་བཞིན་གྱི་ཁ་ན་མ་ཐོ་བ་ཡིན་དགོས་པར་ཐལ། ཁ་ན་མ་ཐོ་བ་ཡིན་ན། བཅས་མ་བཅས་ཀྱི་སེམས་ཅན་ཀུན་ལ་སྡིག་པར་འགྱུར་བས་ཁྱབ་པའི་ཕྱིར། འདོད་མི་ནུས་ཏེ། མ་བཅས་པ་ལ་བཅས་ལྟུང་མེད་པ་དེས་ན་མདོ་དང་བསྟན་བཅོས་སོགས་སོ། །སྔ་མ་ལ་ཁྱབ་པ་ཡོད་དེ། རང་བཞིན་ཁ་ན་མ་ཐོ་བ་སོགས་སོ། །གསུམ་པ་ལ་ལྔ་སྟེ། རྒྱལ་བ་སྲས་བཅས་ལྟུང་བ་ཅན་ཏུ་འགྱུར་བ། གྲུབ་ཐོབ་བརྟུལ་ཞུགས་བོར་བ་ལྟུང་བ་ཅན་དུ་ཐལ་བ། ལྷས་ལྟས་ཀྱི་དགེ་སློང་ལྟུང་བ་ཅན་དུ་ཐལ་བ། དགེ་བསྙེན་དགེ་ཚུལ་ལྟུང་མེད་མི་སྲིད་པར་ཐལ་བ། རྩ་བརྒྱུད་ཀྱི་བླ་མ་སྨད་པར་ཐལ་བའོ། །དང་པོ་ནི། དེ་ལྟ་མིན་པར་ཞེས་སོགས་བཅུ་གཉིས་ཏེ། བཅས་པའི་ཁ་ན་མ་ཐོ་བ། བཅས་པ་ལ་ལྟོས་པ་དེ་ལྟ་མ་ཡིན་པར། མ་བཅས་ཀྱང་ཅི་ནས་སྡིག་པར་འགྱུར་ན། རྒྱལ་བ་རིགས་ལྔ་སོགས་ཚིག་རྐང་བཞི་ཆོས་ཅན། གཤིས་ཀྱི་མི་དགེ་བ་ཅན་དུ་འགྱུར་ཏེ། ཡེ་བཀག་པ་ལ་སྤྱོད་པའི་ཕྱིར། རྟགས་ཁས་བླངས་ཏེ། དབུ་སྐྲ་རིང་ཞིང་སོགས་ཚིག་རྐང་གསུམ་གང་ཞིག དེ་དག་ཡེ་བཀག་ཡིན་པའི་ཕྱིར་རོ། །གཉིས་པ་ནི་རྣལ་འབྱོར་དབང་ཕྱུག་ཞེས་སོགས་ཚིགས་བཅད་གཅིག་གོ །གསུམ་པ་ནི་ཙནྡན་སྤོས་ཀྱི་ཞེས་སོགས་ཚིགས་བཅད་གཅིག་སྟེ། དཀོན་བརྩེགས་ཀྱི་གཙུག་ན་རིན་པོ་ཆེས་ཞུས་པའི་མདོ་ལས། སྔོན་བྱུང་བ་འདས་པའི་དུས་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ་ཡངས་པ་ཚད་མེད་པ་བསམ་གྱིས་མི་ཁྱབ་པར་གྱུར་པ་དེའི་ཚེ་དེའི་དུས་ན། བསྐལ་པ་དགའ་བར་གྱུར་པ་ཞེས་བྱ་བ་ལ་འཇིག་རྟེན་གྱི་ཁམས་ལྷས་རྣམ་པར་ལྟས་པ་ཞེས་བྱ་བར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་ཐམས་ཅད་མངོན་པར་དགའ་བ་ཞེས་བྱ་བ་འཇིག་རྟེན་དུ་བྱུང་ངོ་། །ཞེས་པ་ནས་གང་འཇིག་རྟེན་གྱི་ཁམས་དེའི་མི་དེ་དག་ཐམས་ཅད་ཀྱང་གསེར་གྱི་ཅོད་པཎ་ཐོགས་ཤིང་། དཔུང་རྒྱན་དང་། རྣ་ཆས་བརྒྱན་པ། ལྷའི་ཁ་དོག་དང་གཟུགས་དང་ལྡན་པར་གྱུར་པ་དག་གོ །གང་ཉོན་མོངས་པ་དང་བྲལ་བར་གྱུར་པ་ཤ་སྟག་གོ །གང་ཉོན་མོངས་པ་དང་བྲལ་བར་གྱུར་པ་དེ་ཉིད་དེ་དག་གི་རབ་ཏུ་བྱུང་བ་ཡིན་ཏེ། བཅོམ་ལྡན་འདས་དེ་བཞིན་གཤེགས་པ་དེས་བྱང་ཆུབ་སེམས་དཔའ་དག་ལ་གོས་ངུར་སྨྲིག་ཏུ་བགོས་པ་ཡང་མེད་དེ། འདི་ལྟར་སེམས་ལ་རྙོག་པ་མེད་པའི་ཕྱིར་རོ། །ཞེས་གསུངས་སོ། །བཞི་པ་དགེ་བསྙེན་དགེ་ཚུལ་ཞེས་སོགས་ཚིགས་བཅད་གཅིག ལྔ་པ་ནི་འདི་འདྲ་གང་དག་ཞེས་སོགས་ཚིགས་བཅད་གཉིས་ཏེ། མ་བཅས་པ་ལ་བཅས་པའི་སྡིག་པ་འབྱུང་བ་འདི་འདྲ་གང་དག་སོགས་སོ། །གཉིས་པ་ལ་གསུམ་སྟེ། དངོས་ཀྱི་དོན། ཤེས་བྱེད་ཀྱི་ལུང་། རིགས་པས་གྲུབ་པའི་ཚུལ་ལོ། །དང་པོ་ནི། དེས་ན་མདོ་ལས་ཞེས་སོགས་ཚིགས་བཅད་གཉིས་ཏེ། མདོ་ལས་རབ་ཏུ་བྱུང་བའི་བརྟུལ་ཞུགས་ལ། བཅས་པ་ལ་མ་ལྟོས་པར་དགེ་བ་དང་སྡིག་པ་གཉིས་ཀ་མེད་པར་གསུངས་པའི་རྒྱུ་མཚན་ཡོད་དེ། རྒྱལ་བ་རིགས་ལྔ་དང་། ཉེ་བའི་སྲས་བརྒྱད་ལ་སོགས་པ་གོང་དུ་སྨོས་པ་རྣམས་ལ་རབ་བྱུང་གི་བརྟུལ་ཞུགས་མེད་ཀྱང་སྡིག་པ་མེད་ཅིང་། ཚུལ་འཆལ་རྣམས་ཀྱིས་བརྟུལ་ཞུགས་བཟུང་ཡང་དགེ་བ་མེད་པ་དེས་ནའོ། །འོ་ན་བརྟུལ་ཞུགས་ལ་དགོས་པ་མེད་པར་འགྱུར་རོ་ཞེ་ན། ཞིང་གི་དྲྭ་བ་བཞིན་སྡོམ་པའི་ཚུལ་ཁྲིམས་ལ་གུས་པའི་རྒྱུ་རུ་གསུངས་པར་ཟད་དེ། འདུལ་བ་ལ་བསྟོད་པ་ལས། རྭ་བ་མཚམས་ཀྱི་འོབས་དང་འདྲ་བ་ཡི། །ཟག་པ་ཀུན་གྱི་ཆུ་ལོན་འདུལ་བ་ཡིན། །ཞེས་གསུངས་པའི་ཕྱིར། ཁ་ན་མ་ཐོ་བ་གཉིས་ཡོད་པ་དེས་ན་འདོད་པས་དབེན་པ་བཅས་ལྟུང་སྤོང་བ་དང་། སྡིག་ཏོ་མི་དགེ་བའི་ཆོས་ཀྱིས་དབེན་པ་རང་བཞིན་གྱིས་སྡིག་པ་སྤོང་བ་རྣམ་པ་གཉིས་གསུངས་པའི་ཐུབ་པའི་དགོངས་པ་ཇི་ལྟ་བ་བཞིན་དུ་ཟུངས་ཏེ་གཞན་དུ་ན་དབེན་པ་ཡང་གཅིག་ཁོ་ནར་ཐལ་བའི་ཕྱིར་རོ། །གཉིས་པ་ནི་བུ་མོ་གསེར་མཆོག་ཞེས་སོགས་བཅུ་གསུམ་སྟེ། མདོ་ལས་བུ་མོ་གསེར་མཆོག་འོད་དཔལ་བྱ་བ་ཤིན་ཏུ་མཛེས་པ་གཅིག་དང་། ཚོང་དཔོན་གྱི་ཁྱེའུ་གཉིས་ལྡུམ་རྭར་འཇིག་རྟེན་པའི་བདེ་བ་ལ་ལོངས་སྤྱོད་ཅིང་ཡོད་པའི་དུས་སུ། འཇམ་དཔལ་གྱིས་འདུལ་བའི་དུས་ལ་བབ་པར་ཤེས་ནས། ཚོང་དཔོན་གྱི་ཁྱེའུ་དེ་ཤི་བའི་ཚུལ་དང་། དབང་པོའི་ལམ་རྣམས་ནས་མི་གཙང་བ་འཛག་པར་སྤྲུལ། ཁྱེའུ་དེའི་འཁོར་རྣམས་ཀྱིས་བུ་མོ་ལ་ཉེས་པ་གཅད་ཀྱིས་དོགས་པ་དང་། འཁོར་བ་ལ་ཅུང་ཟད་སྐྱོ་བ་སྐྱེས་ནས་འཇམ་དཔལ་ལ་བདག་རབ་ཏུ་བྱུང་བར་ཞུ་ཞེས་གསོལ་པས། ལུས་རབ་ཏུ་བྱུང་ཡང་འཇིགས་པ་ལས་མི་སྐྱོབ། སེམས་རབ་ཏུ་བྱུང་གསུངས་སོ་ཞེས་པ་དང་། འཇམ་དཔལ་རྣམ་པར་རོལ་པའི་མདོ་ལས། སྨད་འཚོང་མ་གསེར་མཆོག་འོད་དཔལ་ཚོང་དཔོན་གྱི་ཁྱེའུ་འཇིགས་མེད་དང་། ལྷའི་རིན་པོ་ཆེས་བརྒྱན་པའི་ཤིང་རྟར་ཞུགས་ཏེ། གྲོང་ཁྱེར་གྱི་སྐྱེས་པ་ཐམས་ཅད་སྙིང་བསྐུལ་བར་བྱེད་པའི་ཚེ་འཕགས་པ་འཇམ་དཔལ་གྱིས་སྐུ་ལུས་ཤིན་ཏུ་མཛེས་པར་བསྟན་ནས་བུ་མོ་བཏུལ་ཏེ་ཆོས་བསྟན་པས། དེས་བཟོད་པ་ཐོབ་ནས་འཇམ་དཔལ་གྱི་རྐང་པ་ལ་གཏུགས་ཏེ། རབ་ཏུ་བྱུང་བར་གསོལ་བ་བཏབ་པས། འཇམ་དཔལ་གྱིས་སྨྲས་པ། སྲིང་མོ་འདི་ལྟ་སྟེ་མགོའི་སྐྲ་བྲེགས་པ་དེ་ནི་བྱང་ཆུབ་སེམས་དཔའི་རབ་ཏུ་བྱུང་བ་མ་ཡིན་ནོ། །དེ་ཅིའི་ཕྱིར་ཞེ་ན་བུ་མོ་གང་སེམས་ཅན་ཐམས་ཅད་ཀྱི་ཉོན་མོངས་པ་གཅད་པའི་ཕྱིར་བརྩོན་པ་དེ་ནི་བྱང་ཆུབ་སེམས་དཔའི་རབ་ཏུ་བྱུང་བ་ཡིན་པའི་ཕྱིར་རོ། །བུ་མོ་གང་གོས་ངུར་སྨྲིག་འཆང་བ་དེ་ནི་བྱང་ཆུབ་སེམས་དཔའི་རབ་ཏུ་བྱུང་བ་མ་ཡིན་གྱི། བུ་མོ་གང་བདག་ཉིད་ཀྱིས་བསླབ་པ་དང་། ཚུལ་ཁྲིམས་ཡང་དག་པར་བླངས་ལ། ཚུལ་ཁྲིམས་འཆལ་བའི་སེམས་ཅན་རྣམས་ཀྱང་ཚུལ་ཁྲིམས་ཀྱི་སྡོམ་པ་དང་བརྟུལ་ཞུགས་ལ་ཡང་དག་པར་སྦྱོར་བར་བྱེད་པ་དེ་ནི་བྱང་ཆུབ་སེམས་དཔའི་རབ་ཏུ་བྱུང་བ་ཡིན་ནོ། །ཞེས་གསུངས་སོ། །དཀོན་བརྩེགས་ཀྱི་འོད་སྲུངས་ཀྱིས་ཞུས་པའི་མདོ་ལས། བསྟན་པ་འདི་བཤད་པ་ན་དགེ་སློང་རྣལ་འབྱོར་སྤྱོད་པ་ལྔ་བརྒྱས་བདག་ཅག་གིས་ཚུལ་ཁྲིམས་ཡོངས་སུ་མ་དག་བཞིན་དུ་དད་པས་བྱིན་པ་སྤྱད་པར་གྱུར་ན་མི་རུང་ཞེས་ཉམས་པར་བྱས་ཏེ། སླར་ཁྱིམ་དུ་དོང་ངོ་། །དེ་ལ་དགེ་སློང་གཞན་དག་གཅིག་འདི་སྐད་དུ་དགེ་སློང་ཆེ་བའི་བདག་ཉིད་ཅན་རྣལ་འབྱོར་སྤྱོད་པ་འདི་དག་བསྟན་པ་ལས་ཉམས་པ་ནི་ཤིན་ཏུ་མ་ལེགས་སོ། །ཞེས་འཕྱའོ། །བཅོམ་ལྡན་འདས་ཀྱིས་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་འདི་སྐད་དུ་དགེ་སློང་ཆེ་བའི་བདག་ཉིད་ཅན་འདི་དག་འདི་ལྟར་བསྟན་པ་ལས་ཤིན་ཏུ་ཉམས་པ་འདི་ནི་ཤིན་ཏུ་མ་ལེགས་སོ། །ཞེས་མ་སྨྲ་ཤིག དེ་ཅིའི་ཕྱིར་ཞེ་ན་དགེ་སློང་དག་མངོན་པར་མ་དགའ་ནས། ཁྱིམ་ན་གནས་པ་འདི་ནི་དད་པ་ཅན་རྣམས་ཀྱི་ཆོས་ཡིན་གྱི། དགེ་སློང་དད་པ་དང་མོས་པ་མང་བ་འགྱོད་པ་དང་ལྡན་པ་འདི་དག་གིས་བསྟན་པ་འདི་ཐོས་ནས་བདག་ཅག་ཚུལ་ཁྲིམས་ཡོངས་སུ་མ་དག་བཞིན་དུ་དད་པས་བྱིན་པ་ཡོངས་སུ་སྤྱད་ན་མི་རུང་ངོ་ཞེས་ཉམས་པར་གྱུར་ཏོ། །འོད་སྲུང་ངས་ལུང་བསྟན་ཏེ་དགེ་སློང་འདི་དག་ནི་འདི་ནས་ཤི་འཕོས་ནས་དགའ་ལྡན་གྱི་ལྷའི་རིས་སུ་སྐྱེ་བར་འགྱུར་ཏེ། དེ་དག་དེ་བཞིན་གཤེགས་པ་བྱམས་པའི་ཉན་ཐོས་ཐོག་མར་འདུས་པའི་གྲངས་སུ་ཆུད་པར་འགྱུར་རོ་ཞེས་པ་དང་། བྱམས་པ་སེང་གེའི་སྒྲས་ཞུས་པའི་མདོ་ལས་ཀྱང་བྱམས་པས་ཡོ་བྱད་བསྙུངས་པའི་སེང་གེའི་སྒྲ་བསྒྲགས་པས་འཁོར་དེ་ནས་དགེ་སློང་ལྔ་བརྒྱ་རང་ཉིད་ལ་ཡོ་བྱད་བསྙུངས་པའི་ཡོན་ཏན་མེད་ཅིང་། དད་པས་བྱིན་པ་སྤྱད་དཀའ་བར་རྟོགས་ནས་ཁྱིམ་དུ་དོང་ངོ་། །དེ་དག་ལ་འཇམ་དཔལ་གྱིས་ལེགས་སོ་བྱིན་ནས། གང་དག་དད་པས་སྦྱིན་པ་ལོངས་སྤྱོད་པར་མི་སྤྲོ་བ་དེ་དག་གིས་ནི་དེ་ལྟར་འཛེམ་པ་དང་ལྡན་པ་དང་འགྱོད་པ་དང་ལྡན་པར་བྱ་སྟེ། ཞེས་སོགས་ཀྱི་ཆོས་བསྟན་པས་དགེ་སློང་ལྔ་བརྒྱ་པོ་དེ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །ཞེས་སོ། །གསུམ་པ་ནི་དེས་ན་སྡོམ་པ་ཞེས་སོགས་ཚིགས་བཅད་གཉིས་ཏེ། དེས་ན་སྡོམ་པའི་ཚུལ་ཁྲིམས་དེ་ཉིད་དགེ་བ་ཡིན་གྱི། དེ་བསྲུང་བའི་ཐབས་སུ་གྱུར་པའི་རབ་ཏུ་བྱུང་བའི་ཆ་ལུགས་ཙམ་ལ་བཅས་པ་ལ་མ་ལྟོས་པར་རང་བཞིན་གྱི་དགེ་བ་མེད་དེ། སྡོམ་པ་མེད་པའི་ཆ་ལུགས་ཀུན་མདོ་དང་བསྟན་བཅོས་རྣམས་ལས་བཀག་པའི་ཕྱིར་རོ། །དེ་ཡང་འོད་སྲུང་གིས་ཞུས་པའི་ལེའུ་ལས། འོད་སྲུང་འདི་ལྟ་སྟེ་དཔེར་ན་མི་རོའི་མགོ་ལ་གསེར་གྱི་ཕྲེང་བ་བཏགས་པ་དེ་བཞིན་དུ་ཚུལ་ཁྲིམས་འཆལ་བ་ངུར་སྨྲིག་གྱོན་པར་ལྟའོ། །དེ་ལ་འདི་སྐད་ཅེས་བྱ་སྟེ། དཔེར་ན་མི་རོའི་མགོ་ལ་གསེར་ཕྲེང་ངམ། །ཡང་ན་མེ་ཏོག་ཕྲེང་བ་གདགས་བྱས་པ། །དེ་བཞིན་ཁྲིམས་མེད་ངུར་སྨྲིག་གྱོན་པ་སྤང་། །མཐོང་ནས་དེ་ལ་ཡིད་ནི་དད་མི་འགྱུར། །ཞེས་པ་དང་། རྟོག་གེ་འབར་བར་མདོ་དྲངས་པ་ལས། གང་ཞིག་ངུར་སྨྲིག་བགོས་ཀྱང་སེམས་ཀྱི་སྐྱོན་མ་སྤངས། །ལག་ཏུ་ལྷུང་བཟེད་ཐོགས་ཀྱང་ཡོན་ཏན་སྣོད་མ་གྱུར། །སྐྲ་དང་ཁ་སྤུ་བྲེགས་ཀྱང་དགེ་སྦྱོང་ཚུལ་མ་ཞུགས། །རབ་ཏུ་བྱུང་ཡང་དངོས་པོ་ཀུན་ལས་ངེས་མ་བྱུང་། །དགེ་སྦྱོང་དེ་ནི་དགེ་སྦྱོང་མ་ཡིན་ཁྱིམ་པའང་མིན། །དེ་ནི་ཆུ་མེད་ཁྲོན་པ་རི་མོའི་མར་མེ་བཞིན། །ཞེས་པ་དང་། དགེ་སློང་ལ་རབ་ཏུ་གཅེས་པའི་མདོར། ཇི་ལྟར་སྡོང་པོ་བཟང་པོ་ལ། །ཡུན་རིང་ཡལ་ག་འཕེལ་བ་ལྟར། །རྟགས་ཙམ་འཛིན་པ་ཡུན་རིང་ན། །ཁ་ན་མ་ཐོའི་གཏམ་རྣམས་དང་། །སྡིག་པ་དག་ནི་འཕེལ་བར་བཤད། །ཅེས་པ་དང་། ཆེད་དུ་བརྗོད་པའི་ཚོམས་ལས། བདེར་གཤེགས་རྒྱལ་མཚན་འཆང་བ་བས། །གཟུགས་བོར་ཁྱིམ་པར་གནས་པ་བཟང་། །ཞེས་གསུངས་སོ། །དེ་ལྟ་མིན་པར་བརྟུལ་ཞུགས་ལ། གཤིས་ལ་དགེ་བ་ཡོད་ན་ནི། གོང་དུ་བཤད་པའི་དགེ་སློང་ལྔ་བརྒྱ་པོ་དེ་དག་གིས་སྡོམ་པ་མེད་ཀྱང་རབ་བྱུང་གི་སོགས་སོ། །འདིར་བརྟུལ་ཞུགས་ལ་དགེ་བ་མེད་པར་གསུངས་པ་ནི། སྲོག་གཅོད་སྤངས་པ་ལྟ་བུ་བཅས་པ་ལ་མ་ལྟོས་པར་སུས་སྤྱད་ཀྱང་དགེ་བ་འབྱུང་བ་མིན། ཞེས་པའི་དོན་ཡིན་གྱི། བཅས་པ་དང་ལྡན་པ་ལ་དགེ་བ་མེད་པ་མ་ཡིན་ཏེ། དཔེར་ན་བཅས་ལྟུང་ལ་རང་བཞིན་གྱི་མི་དགེ་བ་མེད་ཀྱང་། བཅས་ལྡན་ལ་འབྱུང་བ་བཞིན་ནོ། །གཉིས་པ་བདེ་སྡུག་གི་བྱེད་པོ་སངས་རྒྱས་སུ་ཐལ་བ་སྤོང་བ་ལ་གཉིས་ཏེ། ཕྱོགས་སྔ་མ་བརྗོད་པ་དང་། དེ་དགག་པའོ། །དང་པོ་ནི་དེ་ལ་ཁ་ཅིག་ཞེས་སོགས་དྲུག་སྟེ། ཕྱོགས་སྔ་གོང་མའི་ནང་དུ་བཤད་ཟིན་ཏོ། །གཉིས་པ་ལ་གཉིས་ཏེ། མགོ་བསྒྲེའི་ལན་དང་། རྣལ་མའི་ལན་ནོ། །དང་པོ་ནི་འདི་ཡི་ལན་ལ་ཞེས་སོགས་ལྔ་སྟེ། ཁྱེད་ཀྱང་མུ་སྟེགས་གྲངས་ཅན་པ་འགའ་ཞིག་ལྟར། ངོ་བོ་ཉིད་གཙོ་བོ་རྒྱུར་སྨྲ་བར་འགྱུར་ཏེ། གཤིས་ལ་དགེ་སྡིག་ཡོད་པར་འདོད་པའི་ཕྱིར་རོ། །གཉིས་པ་ལ་གསུམ་སྟེ། སྤྱིར་བསླབ་པ་འཆའ་བའི་རྒྱུ་མཚན། བསླབ་པ་མི་འདྲ་བ་འཆའ་བའི་རྒྱུ་མཚན། དེས་གྲུབ་པའི་དོན་ནོ། །དང་པོ་ནི། གཉིས་པ་དངོས་པོའི་ཞེས་སོགས་བཅུ་གསུམ་སྟེ། རྫོགས་པའི་སངས་རྒྱས་ཉག་གཅིག་གིས་བསླབ་པ་འཆའ་བར་བྱེད་པའི་རྒྱུ་མཚན་ཡོད་དེ། གཤིས་ལ་དགེ་བ་དང་སྡིག་པ་མེད་ཀྱང་བདེ་སྡུག་ལས་ཀྱིས་བྱས་པ་ཡིན་ཅིང་། ལས་ཀྱི་བྱེད་པ་པོ་སེམས་ཉིད་ཡིན་ལ། སེམས་བཟང་ངན་དེ་དག་བླང་དོར་བྱེད་པའི་ཐབས་ནི་སྡོམ་པའི་ཚུལ་ཁྲིམས་ཡིན། བཅས་པའི་བརྟུལ་ཞུགས་ནི་སྡོམ་པའི་ཚུལ་ཁྲིམས་བསྲུང་བའི་ཐབས་ཡིན་པས་སྡོམ་པའི་ཚུལ་ཁྲིམས་དེ་ལ་བརྟུལ་ཞུགས་གང་ལ་གང་དགོས་པ་རྫོགས་པའི་སངས་རྒྱས་ཁོ་ནས་མཁྱེན་པའི་ཕྱིར་རོ། །བདེ་སྡུག་ལས་ཀྱིས་བྱས་པ་དང་། ལས་ཀྱི་བྱེད་པོ་སེམས་ཉིད་ཡིན་པར་གྲུབ་སྟེ། སེམས་དགེ་བ་དང་མི་དགེ་བའི་སྟོབས་ཀྱིས་ལས་ལ་བཟང་ངན་འབྱུང་། ལས་ལ་བཟང་ངན་དེ་ལས་འབྲས་བུ་བདེ་སྡུག་འབྱུང་བའི་ཕྱིར་རོ། །གཉིས་པ་ནི་དེས་ན་བསམ་པའི་ཞེས་སོགས་ལྔ་སྟེ། རྫོགས་པའི་སངས་རྒྱས་ཀྱིས་རབ་ཏུ་བྱུང་བ་སྡེ་ལྔ་པོ་ལ་བཅས་པ་མི་འདྲ་བ་སོ་སོར་མཛད་པའི་རྒྱུ་མཚན་ཡོད་དེ། བསམ་པ་བཟང་ངན་བླང་དོར་བྱེད་པའི་ཐབས་སྡོམ་པའི་ཚུལ་ཁྲིམས་ཡིན་པ་དེས་ན་བསམ་པ་ཉོན་མོངས་པའི་ཁྱད་པར་གྱིས་དེ་དག་གི་གཉེན་པོ་སྡོམ་པའི་ཚུལ་ཁྲིམས་ཀྱི་བྱེ་བྲག་དགེ་ཚུལ་དང་དགེ་སློང་གི་སྡོམ་པ་ལ་སོགས་པ་དུ་མ་ཡོད་ལ། དེ་དག་བསྲུང་བའི་ཐབས་སུ་བརྟུལ་ཞུགས་དང་། འདུལ་བའི་བཅས་པ་མི་འདྲ་བའི་རྒྱུ་མཚན་དེ་ལྟར་ཡིན་པའི་ཕྱིར་རོ། །གསུམ་པ་ནི་དེས་ན་བདེ་དང་ཞེས་སོགས་ཚིགས་བཅད་གཅིག་སྟེ་བདེ་སྡུག་གི་བྱེད་པ་པོ་སངས་རྒྱས་མ་ཡིན་ཡང་བསླབ་པ་འཆའ་བ་དང་། སྔགས་སྦྱོར་བའི་བྱེད་པ་པོ་སངས་རྒྱས་ཡིན་པར་གསུངས་ཏེ། བདེ་སྡུག་སེམས་ལས་བྱུང་ཞིང་སེམས་ཀྱི་ཁྱད་པར་གྱིས་ཚུལ་ཁྲིམས་མི་འདྲ་བ་དུ་མ་ཡོད། དེ་སྲུང་བ་ལ་བཅས་པ་མི་འདྲ་བ་དུ་མ་དགོས་ཤིང་དེ་ནི་སངས་རྒྱས་ཁོ་ནས་མཁྱེན་པའི་ཕྱིར་རོ། །གསུམ་པ་མ་འཁྲུལ་བའི་གནང་བཀག་ཇི་ལྟར་བསྒྲུབ་པའི་ཚུལ་ནི། སྦུ་གུ་ཅན་དང་ཞེས་སོགས་ཚིགས་བཅད་བརྒྱད་དང་རྐང་པ་གཉིས་ཏེ། གཞན་རྣམས་ནི་གོ་སླ་ལ། ལག་ཉ་ནི་བྱིན་ལེན་མ་བྱས་པའི་ཟས་ལ་དགེ་སློང་རང་ངམ་གཞན་གྱིས་རེག་པ་ཟོས་ན་ལྟུང་བར་འགྱུར་བའོ། །ནུབ་ཚང་ནི་བསྙེན་པར་མ་རྫོགས་པ་དང་ཆོས་དྲུག་གིས་གཅིག་པའི་གནས་སུ་གཉིད་ལོག་པས་ཉལ་ན་མཚན་མོ་གསུམ་པའི་མཐར་ལྟུང་བྱེད་དུ་འགྱུར་བའོ། །བཞི་པ་ཕྲལ་གྱི་ལག་ལེན་འཁྲུལ་པ་དགག་པ་ལ་གསུམ་སྟེ། མ་འཁྲུལ་པའི་ལག་ལེན་བསྒྲུབ་པར་གདམས་པ། འཁྲུལ་པའི་ལག་ལེན་བྱུང་བའི་ཚུལ། དེ་ལ་གནོད་བྱེད་བསྟན་པའོ། །དང་པོ་ནི། མདོ་བསྐུལ་ཞེས་སོགས་གཉིས་ཏེ། དགེ་འདུན་གྱི་དབུས་སུ་མདོ་བསྐུལ་བ་དང་། ཉི་མའི་གྲངས་བརྗོད་པ་ལ་སོགས་པའི་ཕྲལ་གྱི་བྱ་བ་ཀུན། འདུལ་བའི་གཞུང་དང་མཐུན་པར་གྱིས་ཏེ། འདུལ་བ་ནས་གསུངས་པའི་ལག་ལེན་ཡིན་པའི་ཕྱིར་རོ། །དེ་ཡང་མདོ་རྩ་བ་ལས། དགེ་འདུན་གྱི་གནས་བརྟན་གྱིས་སྨྲིག་མའི་ཐུར་མ་སྐུད་པ་ལ་རྒྱུས་པ་སྤོ་བས་ཉི་མ་བགྲང་བར་བྱའོ། །དགེ་སྐོས་ཀྱིས་དེ་ལ་བརྟགས་ཏེ་དགེ་འདུན་ལ་བརྗོད་པར་བྱའོ། །བྱེ་བྲག་ཏུ་བྱས་པའི་འོ། །ངོའི་དབྱེ་བས་སོ། །གཙུག་ལག་ཁང་གི་བདག་པོ་དང་། ལྷའི་ཕྱིར་ཚིགས་སུ་བཅད་པ་གདོན་པའི་དགེ་སློང་རྣམས་ལ་བསྐུལ་བའི་ཚིག་ཀྱང་བྱའོ། །མོད་ལའོ། །དེང་ནི་ཡར་གྱི་ངོའི་ཚེས་གཅིག་ལགས་ཏེ། གཙུག་ལག་ཁང་གིས་བདག་པོ་དང་། གཙུག་ལག་ཁང་གི་ལྷ་རྣམས་ཀྱི་སླད་དུ་ཚིགས་སུ་བཅད་པ་རེ་རེ་བཀླག་ཏུ་གསོལ། ཞེས་གསུངས་སོ། །གཉིས་པ་ནི། མདོ་བསྐུལ་རིང་མོ་ཞེས་སོགས་གཉིས་ཏེ། བཀའ་གདམས་པ་ཁ་ཅིག མདོ་བསྐུལ་རིང་མོ་ཞེས་བྱ་བ་དཀའ་ལས་ཆེ་བ། ངོ་བོ་ནོར་བ་བྱེད་པ་མཐོང་སྟེ། འདི་ལྟར་ཀྱེ་གསོན་ཅིག་དགེ་འདུན་བཙུན་པ་རྣམས། ཚངས་པ་བརྒྱ་བྱིན་རྒྱལ་ཆེན་རྣམས། །ཆོས་སྐྱོང་གཙུག་ལག་སྲུང་མ་དང་། །ལྷ་ཀླུ་ལ་སོགས་སྡེ་བརྒྱད་དང་། །ཆོས་རྒྱལ་རྗེ་བློན་ཡོན་བདག་དང་། །ཕ་མ་མཁན་པོ་སློབ་དཔོན་དང་། །མཐའ་ཡས་སེམས་ཅན་དོན་སླད་དུ། །ཞལ་ནས་གསུངས་པའི་མདོ་བརྗོད་ཞུ། །ཞེས་པའི་མཇུག་ཏུ་ཨཱུ་ཧཱུྃ་ལགས་ཟེར་རོ། །ཊཱི་ཀ་བྱེད་པ་ཁ་ཅིག་འདི་འོག་ཏུ་དཀའ་ཡང་འབད་ནས་བྱེད་པ་མཚར། ཞེས་པ་དང་དོན་གཅིག་པ་མ་གཏོགས་པར་སངས་རྒྱས་ཀྱི་བཀའ་བརྩམ་པར་བྱ་ཞིང་འབྱུང་བར་བྱ། ཞེས་སོགས་འདོན་རྒྱུ་ཡིན་པ་ལ་རང་བཟོའི་ནོར་བ་བྱེད་པ་མཐོང་། ཞེས་པའི་འབྲུ་གཉེར་བ་ནི་ནོར་ཏེ། མདོ་བསྐུལ་རིང་མོ་བྱེད་པས་ཀྱང་བསྐུལ་བའི་ཚིག་ནོར་བ་ཡིན་གྱི་འདོན་པའི་ཚེ་སངས་རྒྱས་ཀྱི་བཀའ་འདོན་པར་འདོད་པའི་ཕྱིར་ཏེ། ཞལ་ནས་གསུངས་པའི་མདོ་བརྗོད་ཞུ་ཞེས་བཤད་པས་སོ། །གསུམ་པ་ལ་བཞི་སྟེ། ཤེས་བྱེད་མེད་པར་བསྟན་པ། ཉེས་དམིགས་ཆེ་བར་བསྟན་པ། སྨད་པའི་གནས་སུ་བསྟན་པ། འཁྲུལ་པ་གཞན་ལའང་མཚུངས་པར་བསྟན་པའོ། །དང་པོ་ནི། མདོ་རྒྱུད་ཞེས་སོགས་གཅིག་གོ །གཉིས་པ་ནི་འདི་འདྲའི་ཞེས་སོགས་གཉིས་ཏེ། བསྟན་པའི་རྩ་བ་ནི་འདུལ་བའོ། །གསུམ་པ་ནི་སངས་རྒྱས་གསུངས་པའི་ཞེས་སོགས་ཚིགས་བཅད་གཅིག་གོ །བཞི་པ་ནི་སངས་རྒྱས་གསུང་དང་ཞེས་སོགས་ཚིགས་བཅད་གསུམ་སྟེ། སངས་རྒྱས་ཀྱི་གསུང་དང་མི་མཐུན་ཡང་མདོ་བསྐུལ་རིང་མོ་འདི་འདྲ་བདེན་པར་འདོད་ན་ནི། སྡོམ་པ་ཐག་རྒྱ་མ་དང་། ལས་ཆོག་མགོ་ལ་བཞག་པས་དགེ་སློང་དུ་འགྱུར་ཞེས་ཟེར་བ་སོགས་ཀྱི་ལག་ལེན་ཕྱིན་ཅི་ལོག་གཞན་ཡང་འཁྲུལ་ཞེས་བརྗོད་པར་མི་ནུས་ཏེ། དེ་དང་མདོ་བསྐུལ་རིང་མོ་ལུང་དང་འགལ་བའི་སོགས་སོ། །གཞན་ཡང་མུ་སྟེགས་བྱེད་ཀྱིས་སྲོག་གི་མཆོད་སྦྱིན་བྱས་པས་ཐར་པ་ཐོབ་པ་སོགས་ཀྱི་ཆོས་ལོག་ཀྱང་སུན་དབྱུང་བར་མི་ནུས་ཏེ། དེ་དང་མདོ་བསྐུལ་རིང་མོ་ལུང་རིགས་མེད་པར་སོགས་སོ། །གསུམ་པ་ཐོས་བསམ་སྒོམ་གསུམ་མ་ནོར་བས་མཇུག་བསྡུ་བ་ལ་གཉིས་ཏེ། ནོར་བ་སྤོང་བར་གདམས། མ་ནོར་བ་བསྒྲུབ་པར་གདམས་པའོ། །དང་པོ་ལ་གཉིས་ཏེ། སྤང་བྱ་ངོས་བཟུང་། སྤང་དགོས་པའི་འཐད་པའོ། །དང་པོ་ནི། ལ་ལ་རྫོགས་པའི་ཞེས་སོགས་ཚིགས་བཅད་གསུམ་སྟེ། ཞང་མཚལ་པ་དང་། བཀའ་ཕྱག་པ་ལ་ལ། རྫོགས་པའི་སངས་རྒྱས་ཀྱི་གསུང་རབ་སྡེ་སྣོད་གསུམ་དང་། རྒྱུད་སྡེ་བཞིས་བསྡུས་པའི་ཚིག་དོན་ཟབ་མོ་རྣམས་དང་། དེ་དག་གི་དགོངས་འགྲེལ་གྲུབ་ཐོབ་རྣམས་ཀྱིས་ལེགས་པར་བཤད་པའི་གྲུབ་པ་སྡེ་བདུན་དང་། སྙིང་པོ་སྐོར་དྲུག་ལ་སོགས་པ་རྣམས་དང་། མཁས་པ་རྒྱན་དྲུག་ལ་སོགས་པ་རྣམས་ཀྱིས་ཤིན་ཏུ་ལེགས་པར་བཤད་པའི་ཆོས་ས་སྡེ་དང་། རིགས་ཚོགས་ལ་སོགས་པ་རྣམས་ནི་ཚིག་གི་ན་ཡ་སོགས་སོ། །གཉིས་པ་ནི་བླུན་པོ་དགའ་བ་ཞེས་སོགས་ལྔ་སྟེ། བཀའ་དང་བསྟན་བཅོས་རྣམ་དག་གི་ཐོས་བསམ་སྤངས་ནས་བླུན་པོའི་ཚིག་ལ་ཐོས་བསམ་བྱེད་པ་ནི། བློ་གྲོས་དང་ལྡན་པ་རྣམས་ཀྱིས་དོར་བར་བྱ་སྟེ། དེ་ལྟ་བུས་ནི་བླུན་པོ་དགའ་བ་བསྐྱེད་ནུས་ཀྱི་མཁས་པ་རྣམས་དགའ་བ་བསྐྱེད་མི་ནུས་པའི་ཕྱིར་དང་། དུས་དང་བློ་གྲོས་གཉིས་ཀ་གྲོན་དུ་འགྱུར་བའི་ཕྱིར་རོ། །ཀྱེ་མ་ཞེས་སྙིང་བརྩེ་བའི་ཚིག་གིས་བོས་ནས་སངས་རྒྱས་ཀྱི་བསྟན་པ་ནི་གཟུགས་བརྙན་འདི་ལྟར་གྱུར་པ་ད་གཟོད་གོ །ཞེས་པའོ། །གཉིས་པ་ནི། དེས་ན་སངས་རྒྱས་ཞེས་སོགས་བཅུ་སྟེ། དེས་ན་སངས་རྒྱས་ཀྱི་གསུང་རབ། སྡེ་སྣོད་གསུམ་དང་། རྒྱུད་སྡེ་བཞི་དང་། དེ་དག་གི་དགོངས་འགྲེལ་གྲུབ་ཐོབ་རྣམས་ཀྱིས་བཤད་པའི་བསྟན་བཅོས་ཀྱི་ཚིག་ཐོས་ཤིང་འཛིན་པ་ལ་བྱིན་རླབས་ཡོད་དེ། བློ་གྲོས་རྒྱ་མཚོས་ཞུས་པའི་མདོ་ལས། །དེ་བཞིན་གཤེགས་པའི་དམ་པའི་ཆོས་འཛིན་པ། །རྒྱལ་བ་རྣམས་ཀྱིས་ཡོངས་སུ་བཟུང་བར་འགྱུར། །ལྷ་དང་ཀླུ་དང་མིའམ་ཅི་རྣམས་དང་། །བསོད་ནམས་ཡེ་ཤེས་ཀྱིས་ནི་ཡོངས་སུ་བཟུང་། །དེ་བཞིན་གཤེགས་པའི་དམ་པའི་ཆོས་འཛིན་པ། །དྲན་ལྡན་བློ་གྲོས་ལྡན་ཅིང་བློ་ལྡན་འགྱུར། །ཤེས་རབ་རྒྱ་ཆེན་ཀུན་ནས་ཡེ་ཤེས་ལྡན། །མཁས་པས་བག་ཆགས་བཅས་པའི་ཉོན་མོངས་སྤོང་། །ཞེས་དང་། སྐྱེས་རབས་ལས། ཐོས་ཆུང་དམུས་ལོང་བསྒོམ་པའི་ཚུལ་མི་ཤེས། །ཤེས་རབ་རྒྱས་བྱེད་པ་ནི་ཐོས་པ་ཡིན། །ཐོས་པ་གཏི་མུག་མུན་སེལ་སྒྲོན་མ་ཡིན། །ཡ་རབས་རྣམས་དང་ཕྲད་ན་སྐྱེས་ཀྱི་མཆོག །རྐུན་པོས་འཕྲོག་ཏུ་མེད་པ་ནོར་གྱི་མཆོག །ཅེས་པ་དང་། བྱང་ཆུབ་སེམས་དཔའི་སྡེ་སྣོད་ལས། ཐོས་པས་ཆོས་རྣམས་ཤེས་པར་བྱེད། །ཐོས་པས་སྡིག་ལས་ལྡོག་པར་བྱེད། །ཐོས་པས་དོན་མ་ཡིན་པ་སྤོང་། །ཐོས་པས་མྱ་ངན་འདས་པ་ཐོབ། །ཅེས་པ་དང་། ལུང་རྣམ་འབྱེད་ལས། མང་དུ་ཐོས་པ་ལ་ཕན་ཡོན་ལྔ་ཡོད་དེ། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། དེའི་གདམས་ངག་དང་རྗེས་སུ་བསྟན་པ་གཞན་ལ་རག་མ་ལས་པ་ཡིན་ནོ་ཞེས་སོ། །དོན་ཡིད་ལ་སེམས་ཤིང་ཉམས་སུ་ལེན་པ་ལ་ཡང་བྱིན་རླབས་ཡོད་དེ། ཡབ་སྲས་མཇལ་བའི་མདོ་ལས། གང་གིས་བསྐལ་པ་བཅུའི་བར་དུ་མཉན་ཏེ། གཞན་ལ་བསྟན་པ་བས། གང་གིས་སེ་གོལ་གཏོགས་པ་ཙམ་དུ་འདི་བསྒོམས་ན། དེ་ཉིད་དེ་བས་བསོད་ནམས་ཆེས་མང་དུ་འཕེལ་ལོ། །ཞེས་པ་དང་། ཐར་པ་ཆེན་པོ་ཕྱོགས་སུ་རྒྱས་པ་ཞེས་བྱ་བའི་མདོ་ལས། རྒྱལ་བའི་དྲིན་ལན་བླན་འདོད་པ། །སྐད་ཅིག་ཡུད་ཙམ་སྒོམ་བྱེད་པ། །སྟོང་ཁམས་གང་བའི་སེམས་ཅན་གྱིས། །སྲོག་གི་སྦྱིན་པ་བྱིན་པ་བས། །བསམ་གཏན་བསྒོམས་པ་ཡོན་ཏན་ཆེ། །ཞེས་གསུངས་སོ། །འདི་འདྲའི་བཀའ་དང་བསྟན་བཅོས་རྣམ་དག་ཉན་བཤད་བྱེད་པ་ལ། ཐོས་པ་ཞེས་བརྗོད་པ་ཡིན་ཅིང་། དེའི་དོན་ཚུལ་བཞིན་དུ་དཔྱོད་པ་བསམ་པ་ཡིན་ལ་ནན་ཏན་གྱིས་དེ་བསྒྲུབ་པ་སྒོམ་པ་ཡིན་པར་ཤེས་པར་བྱས་ནས། ཐོས་བསམ་སྒོམ་གསུམ་དེ་ལྟར་གྱིས་ཏེ། དེ་ལྟ་བུའི་ཐོས་བསམ་སྒོམ་གསུམ་འདི་ནི་སངས་རྒྱས་ཀྱི་བསྟན་པ་རྣམ་པར་དག་པ་ཡིན་པའི་ཕྱིར་རོ། །དེ་ཡང་ཐུབ་པ་དགོངས་གསལ་ལས། མདོར་ན་སངས་རྒྱས་ཀྱིས་གསུངས། སྡུད་པ་པོས་བསྡུས། གྲུབ་ཐོབ་ཀྱིས་བསྒོམ། པཎྜི་ཏས་བཤད། ལོ་ཙཱབས་བསྒྱུར། མཁས་པ་རྣམས་ལ་གྲགས་པ་ཅིག་སངས་རྒྱས་ཀྱི་བསྟན་པ་ཡིན་པས་དེ་ལ་ཉན་བཤད་སྒོམ་བསྒྲུབ་བྱེད་དགོས་སོ་ཞེས་གསུངས་པ་ལྟར་རོ། །སོ་སོར་ཐར་པའི་སྡོམ་པའི་སྐབས་ཏེ་དང་པོའོ།། །།གཉིས་པ་བྱང་སེམས་ཀྱི་སྡོམ་པའི་ཉམས་ལེན་ལ་གསུམ་སྟེ། སེམས་བསྐྱེད་ཀྱི་དབྱེ་བ་སྤྱིར་བསྟན། ཐེག་ཆེན་སེམས་བསྐྱེད་བྱེ་བྲག་ཏུ་བཤད། བསྟན་པ་རྣམ་པར་དག་པས་མཇུག་བསྡུ་བའོ། །དང་པོ་ནི། སེམས་བསྐྱེད་ལ་ནི་ཞེས་སོགས་ཚིགས་བཅད་གསུམ་སྟེ། བྱང་ཆུབ་ཏུ་སེམས་བསྐྱེད་པ་ཙམ་གྱི་སེམས་བསྐྱེད་ལ། ཉན་ཐོས་པའི་ལུགས་དང་། ཐེག་པ་ཆེན་པོའི་ལུགས་རྣམ་པ་གཉིས་ཡོད་དེ། ཉན་ཐོས་སྡེ་གཉིས་ཀྱི་ལུང་ནས་བཤད་པ་དང་། ཐེག་པ་ཆེན་པོ་དབུ་སེམས་ཀྱི་གཞུང་ནས་བཤད་པ་གཉིས་ཡོད་པའི་ཕྱིར་རོ། །ཉན་ཐོས་རྣམས་ཀྱི་གཞུང་ནས་བཤད་པའི་སེམས་བསྐྱེད་ལ་ཡང་། ཐོབ་བྱ་བྱང་ཆུབ་ཀྱི་སྒོ་ནས་རྣམ་པ་གསུམ་ཡོད་དེ། ཉན་ཐོས་དགྲ་བཅོམ་དང་། རང་རྒྱལ་དང་། རྫོགས་པའི་སངས་རྒྱས་སུ་སེམས་བསྐྱེད་པ་གསུམ་ཡོད་པའི་ཕྱིར་ཏེ། འདུལ་བ་ལུང་ལས། ཁ་ཅིག་ནི་ཉན་ཐོས་སུ་སེམས་བསྐྱེད་དོ། །ཁ་ཅིག་ནི་རང་རྒྱལ་དུ་སེམས་བསྐྱེད་དོ། །ཁ་ཅིག་ནི་སངས་རྒྱས་སུ་སེམས་བསྐྱེད་དོ་ཞེས་བཤད་དོ། །འོན་ཀྱང་གསུམ་པོ་དེ་དག་གི་ཆོ་ག་སྤྱོད་པ་དེང་སང་ཉུང་སྟེ། ཉན་ཐོས་ཀྱི་བསྟན་པ་འབྲས་བུའི་དུས་ལྔ་བརྒྱ་པ་ཕྲག་གསུམ། སྒྲུབ་པའི་དུས་ལྔ་བརྒྱ་བ་ཕྲག་གསུམ་ནུབ་ནས། ལུང་གི་དུས་ཡིན་པའི་ཕྱིར་རོ། །ཁ་ཅིག་སྟོན་པ་འདས་ནས་ལོ་དགུ་བརྒྱ་ལོན་པ་ན་སློབ་དཔོན་དབྱིག་གཉེན་བྱུང་བའི་དུས་སུ་ཡང་མཛོད་ལས་དེ་ལྟར་ཐུབ་པ་དག་གི་བསྟན་པ་ནི། ལྐོག་མར་སྲོག་ཕྱིན་འདྲ་དག་ཞེས་ཉམས་པར་བཤད་ན་དེང་སང་སྐྱོན་མེད་ཉམས་པ་སྨོས་ཅི་དགོས་ཟེར་བ་ནི་མི་འཐད་དེ། དེའི་དུས་སུ་འབྲས་བུའི་དུས་ཡིན་པའི་ཕྱིར་རོ། །དེས་ན་སྒྲུབ་པའི་དུས་ཉམས་ནས་ཉམས་སུ་ལེན་པའི་ཆེད་དུ་སེམས་བསྐྱེད་ཀྱི་ཆོ་ག་མི་བསྟེན་པ་ལ་དགོངས་སོ། །ཐེག་པ་ཆེན་པོའི་སེམས་བསྐྱེད་ལ་དབུ་མ་ལུགས་དང་སེམས་ཙམ་ལུགས་རྣམ་པ་གཉིས་ཡོད་ཅིང་། དེ་གཉིས་ཀ་ཡང་བླ་མེད་བྱང་ཆུབ་ཏུ་སེམས་བསྐྱེད་པ་ཁོ་ན་ཡིན་གྱི། བྱང་ཆུབ་གསུམ་དུ་སེམས་བསྐྱེད་པའི་ཚུལ་ནི་མེད་དོ། །དེ་གཉིས་ལ། མ་ཐོབ་པ་ཐོབ་པར་བྱེད་པའི་ཆོ་ག་ཡང་ཐ་དད་དུ་ཡོད་དེ། སྦྱོར་བའི་སྐབས་སུ་དབུ་མ་པ་རྣམས་ཀྱིས་ཡན་ལག་བདུན་པ་ཚང་བར་མཛད། སེམས་ཙམ་པ་རྣམས་ཀྱིས་ཕྱག་འཚལ་བ་དང་། མཆོད་པ་འབུལ་བ་གཅིག་ཙམ་མཛད། གཞན་ཡང་དབུ་མ་པས་བར་ཆད་དྲི་བ་མི་མཛད། སེམས་ཙམ་པས་བར་ཆད་དྲི་བ་མཛད། དངོས་གཞིའི་སྐབས་སུ་དབུ་མ་པས་སྨོན་འཇུག་གཉིས་པོ་སྟབས་གཅིག་ཏུ་སློབ་དཔོན་གྱི་རྗེས་ཟློས་ལན་གསུམ་བྱས་པའི་ཚུལ་གྱིས་ལེན། སེམས་ཙམ་པས་ཐོག་མར་སྨོན་པ་སེམས་བསྐྱེད་ལེན། དེ་ནས་བྱང་ཆུབ་སེམས་དཔའི་སྡེ་སྣོད་བསླབས་ནས་བསླབ་བྱ་རྣམས་ཉམས་འོག་ཏུ་ཚུད་པར་བྱས་ཏེ། དེའི་རྗེས་སུ་འཇུག་པ་སེམས་བསྐྱེད་ལེན། ཆོ་གའི་ཚིག་ཀྱང་སློབ་དཔོན་གྱིས་བརྗོད་པ་སློབ་མས་ཉན་པ་ཡིན་གྱི་རྗེས་ཟློས་མི་བྱེད། མཇུག་གི་ཆོ་ག་ལ་དབུ་མ་པས་རང་དགའ་བ་བསྒོམས་པ་དང་། གཞན་དགའ་བ་བསྒོམ་དུ་གཞུག་པ་གཉིས་མཛད། སེམས་ཙམ་པས་མཁྱེན་པར་གསོལ་བ་མཛད་པའི་ཕྱིར་རོ། །རྩ་བའི་ལྟུང་བ་ཡང་ཐ་དད་དུ་ཡོད་དེ། དབུ་མ་པས་ནམ་མཁའི་སྙིང་པོའི་མདོ་ལས་འབྱུང་བ་ལྟར། རྩ་ལྟུང་བཅུ་བཞི་དང་། སེམས་ཙམ་པས་སྡོམ་པ་ཉི་ཤུ་པ་ལྟར་རྩ་ལྟུང་བཞི་གསུངས་པའི་ཕྱིར་རོ། །ཕྱིར་བཅོས་ཀྱི་ཚུལ་ཡང་སོ་སོར་ཡོད་དེ། དབུ་མ་པས་སྐྱ་རེངས་ལ་གསོལ་བ་བཏབ་ནས་ནམ་མཁའི་སྙིང་པོ་རྨི་ལམ་དུ་བྱུང་བ་ལ་རྩ་བའི་ལྟུང་བ་བཤགས། སེམས་ཙམ་པས་སྡོམ་པ་ཉི་ཤུ་པར། སྡོམ་པ་སླར་ཡང་བླང་བར་བྱ། །ཟག་པ་འབྲིང་ནི་གསུམ་ལ་བཤགས། །གཅིག་གི་མདུན་དུ་ལྷག་མ་རྣམས། །ཉོན་མོངས་མི་མོངས་བདག་སེམས་བཞིན། །ཞེས་བཤད་པ་ལྟར་མཛད་པའི་ཕྱིར་རོ། །བསླབ་པར་བྱ་བའང་སོ་སོར་ཡོད་དེ། དབུ་མ་པས་སྤྱོད་འཇུག་ལས། རྐང་པ་སྐྱོང་སྟེ་མི་འདུག་ཅིང་། །ཅེས་སོགས་བཤད་ལ། སེམས་ཙམ་པས་སྡོམ་པ་ཉི་ཤུ་པ་ལྟར། ཉེས་བྱས་བཞི་བཅུ་ཞེ་གཉིསཾ་བཤད་པའི་ཕྱིར་རོ། །དེ་ལྟར་ཆོ་ག་ནས་བསླབ་བྱའི་བར་ཐ་དད་པ་དེ་ཡང་། དབུ་སེམས་གཉིས་པོ་ལྟ་བ་མཐོ་དམན་ཐ་དད་པས་ལྟ་བ་དེ་དང་འཚམས་པའི་སེམས་བསྐྱེད་ཀྱི་ལུགས་གཉིས་རྫོགས་པའི་སངས་རྒྱས་ཀྱིས་གསུངས་པ་ཡིན་གྱི། རྗེས་འཇུག་གི་གདུལ་བྱས་གཉིས་ཀ་ཉམས་སུ་ལེན་པ་ལ་འགལ་བ་མེད་དེ། དཔེར་ན་ཉན་ཐོས་ལ་སོ་སོར་ཐར་པ་རིས་བདུན་དང་། ཐེག་པ་ཆེན་པོ་ལ་སེམས་བསྐྱེད་ཀྱི་སྡོམ་པ་མ་ཐོབ་པ་ཐོབ་པར་བྱེད་པའི་ཆོ་ག་སོགས་སོ་སོར་གསུངས་ཀྱང་། གང་ཟག་གཅིག་གིས་གཉིས་ཀ་ཉམས་སུ་ལེན་པ་ལ་འགལ་བ་མེད་པ་བཞིན་ནོ། །འདིར་ནི་གཞུང་གི་འབྲུ་གནོན་པ་ཙམ་ཞིག་བྲིས་པ་ཡིན་ལ། འདི་གཉིས་ཀྱི་རྣམ་དབྱེ་ཞིབ་པར་ཁོ་བོའི་སྤྱི་དོན་དུ་ལྟ་བར་བྱ་ཞིང་། ཆོ་ག་ནི་དབུ་མ་ལུགས་ཆོས་རྗེ་པའི་སེམས་བསྐྱེད་ཀྱི་ཆོ་ག་དང་། སེམས་ཙམ་ལུགས་རྗེ་བཙུན་ཆེན་པོའི་སྡོམ་པ་ཉི་ཤུ་པའི་ཌཱི་ཀར་བལྟ་བར་བྱའོ། །གཉིས་པ་ལ་གསུམ་སྟེ། མ་ཐོབ་པ་ཐོབ་པར་བྱེད་པའི་ཆོ་ག ཐོབ་པ་མི་ཉམས་པར་བསྲུང་བའི་བསླབ་བྱ། དེ་དག་དང་འབྲེལ་བའི་ཐབས་ལམ་རྣམ་དག་ཏུ་བསྒྲུབ་པའོ། །དང་པོ་ལ་གཉིས་ཏེ། ཀུན་རྫོབ་སེམས་བསྐྱེད་སྐྱེ་བའི་ཆོ་ག་བཤད། དོན་དམ་སེམས་བསྐྱེད་ཆོ་གས་སྐྱེ་བ་དགག་པའོ། །དང་པོ་ལ་བཞི་སྟེ། ལུགས་གཉིས་རྟེན་གྱི་ཁྱད་པར་ལུང་གིས་བསྒྲུབ། དེ་ཉིད་དཔེ་ཡི་སྒོ་ནས་གསལ་བར་བཤད། ལུང་གི་དོན་ལ་ལོག་པར་རྟོག་པ་དགག ལུགས་གཉིས་ཆོ་གའི་ཁྱད་པར་སོ་སོར་བཤད་པའོ། །དང་པོ་ལ་གཉིས་ཏེ། སེམས་ཙམ་ལུགས་ཀྱི་སེམས་བསྐྱེད་སྐྱེ་བའི་ཡུལ་ངེས་པར་བསྟན། དབུ་མ་ལུགས་ཀྱི་སེམས་བསྐྱེད་ཀུན་ལ་སྐྱེ་བར་བསྟན་པའོ། །དང་པོ་ལ་གསུམ་སྟེ། དངོས་ཀྱི་དོན། དེ་ལ་ལོག་པར་རྟོག་པའི་ཚུལ་བརྗོད་པ། དེ་ཉིད་ལུང་དང་རིགས་པས་དགག་པའོ། །དང་པོ་ནི། སེམས་ཙམ་པ་ཡི་ཞེས་སོགས་ཚིགས་བཅད་གཅིག་གོ །གཉིས་པ་ནི་ལ་ལ་སྐྱེ་བོ་ཞེས་སོགས་གསུམ་སྟེ། དགེ་བཤེས་ཕྱག་སོར་བ་ལ་སོགས་པའི་སྐྱེ་བོ་འགའ་ཞིག་གི་རྨི་ལམ་དུ་བྱམས་པ་མགོན་པོ་ཁྲི་མཐོན་པོ་ལ་བཞུགས་ནས་ཁྲོམ་ཆེན་པོ་ལ་སེམས་བསྐྱེད་མཛད་པར་རྨིས་པའི་རྗེས་སུ་འབྲངས་ནས། སོ་ཐར་གྱི་སྡོམ་པ་ཐོབ་པ་དང་མ་ཐོབ་པའི་སེམས་ཅན་ཀུན་ལ་སེམས་ཙམ་ལུགས་ཀྱི་སེམས་བསྐྱེད་འབོགས་པར་བྱེད་དོ། །གསུམ་པ་ནི། རྨི་ལམ་བདུད་ཀྱིས་ཞེས་སོགས་ཚིགས་བཅད་བཞི་སྟེ། རྨི་ལམ་གྱི་རྗེས་སུ་འབྲངས་ནས་སྐྱེ་བོ་ཀུན་ལ་སེམས་ཙམ་ལུགས་ཀྱི་སེམས་བསྐྱེད་བྱེད་པའི་ལུགས་དེ་སངས་རྒྱས་ཀྱི་བསྟན་པ་མ་ཡིན་ཏེ། རྨི་ལམ་བདུད་ཀྱིས་མིན་ན་དེ་ལྟར་རུང་ཡང་། སངས་རྒྱས་ཀྱི་གསུང་དང་མི་མཐུན་པའི་ཐབས་ལམ་སྟོན་པའི་རྨི་ལམ་བདུད་ཀྱི་བྱིན་བརླབས་ཡིན་པའི་ཕྱིར་དང་། བྱང་སའི་ཚུལ་ཁྲིམས་ལེའུར། རིགས་ཀྱི་བུ་ཁྱོད་བྱང་ཆུབ་སེམས་དཔའ་ཡིན་ནམ། བྱང་ཆུབ་ཏུ་སྨོན་ལམ་བཏབ་བམ་ཞེས་དང་། མར་མེ་མཛད་ཀྱིས། སོ་སོར་ཐར་པ་རིས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཞེས་བྱང་ཆུབ་སེམས་དཔའི་སྡེ་སྣོད་མི་ཤེས་པ་དང་། སོ་ཐར་གྱི་སྡོམ་པ་མེད་པ་ལ་སེམས་ཙམ་ལུགས་ཀྱི་སེམས་བསྐྱེད་བཀག་པའི་ཕྱིར་དང་། ཆོ་ག་ལས་ཀྱང་དེ་ལྟར་དུ་གསལ་བའི་ཕྱིར། དེ་ལ་བཀའ་གདམས་པ་ཁ་ཅིག སེམས་ཙམ་ལུགས་ཀྱི་སེམས་བསྐྱེད་བྱེད་པ་ལ། བྱང་ཆུབ་སེམས་དཔའི་སྡེ་སྣོད་ཤེས་པ་དང་། སོ་ཐར་གྱི་སྡོམ་པས་བསྡམས་པ་དགོས་ཀྱང་། སྐྱེ་བོ་ཀུན་ལ་བྱེད་པ་མི་འགལ་ཏེ། བླུན་པོ་སྡིག་པ་ཅན་ཡིན་ཡང་། སེམས་ཙམ་ལུགས་ཀྱི་སེམས་བསྐྱེད་ཀྱི་གྲལ་དེར་ཚོགས་པ་ཐམས་ཅད་ནི་སོ་སོ་ཐར་པའི་སོགས་སོ། ྎ །གཉིས་པ་ནི། དབུ་མའི་ལུགས་ཀྱི་ཞེས་སོགས་བཅུ་གཅིག་སྟེ། དབུ་མ་ལུགས་ཀྱི་སེམས་བསྐྱེད་འདི་བརྡ་ཕྲད་ཅིང་ལེན་འདོད་ཡོད་པའི་སེམས་ཅན་ཀུན་ཀྱིས་ལེགས་པར་ཐོབ་ན་རྫོགས་པའི་སངས་རྒྱས་ཀྱི་རྒྱུར་འགྱུར་ཞེས་མདོ་དང་བསྟན་བཅོས་རྣམས་ལས་གསུངས་ཏེ། དེ་ཡང་སྡོང་པོ་བཀོད་པའི་མདོ་ལས། འཕགས་པ་འཇམ་དཔལ་གྱིས། གྲོང་ཁྱེར་སྐྱིད་པའི་འབྱུང་གནས་ཀྱི་ཤར་ཕྱོགས་ནགས་ཚལ་སཱ་ལ་སྣ་ཚོགས་ཀྱི་རྒྱལ་མཚན་ཞེས་བྱ་བར། ཆོས་ཀྱི་དབྱིངས་ཀྱི་ཚུལ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་བསྟན་པས། རྒྱ་མཚོའི་ཀླུ་སྟོང་ཕྲག་བཅུ་བླ་ན་མེད་པའི་བྱང་ཆུབ་ཏུ་ངེས་པར་གྱུར་ཏོ། །ཞེས་པ་དང་། བསྐལ་པ་བཟང་པོ་ལས། རྒྱལ་བ་ཕན་བཞེད་གྲོང་དཔོན་གྱུར་པའི་ཚེ། །དེ་བཞིན་གཤེགས་པ་བསོད་ནམས་འོད་དེ་ལ། །ཉིན་གཅིག་སྲོག་གཅོད་སྡོམ་པ་བླངས་ནས་ཀྱང་། །དང་པོ་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་པ་དང་། ནམ་མཁའི་སྙིང་པོའི་མདོ་ལས། བྱང་ཆུབ་སེམས་དཔའ་རྒྱལ་པོ་ལ་ལྔ་དང་། བློན་པོ་ལ་ལྔ་དང་། ལས་དང་པོ་པ་ལ་བརྒྱད་དེ། རང་སར་འབྱུང་ཉེ་བས་རྟེན་གྱི་སྒོ་ནས་དབྱེ་བ་བཅོ་བརྒྱད་གསུངས་པ་དང་། དཀོན་མཆོག་བརྩེགས་པའི་གཙུག་ན་རིན་པོ་ཆེས་ཞུས་པའི་མདོ་ལས། ཤེས་རབ་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་འདི་བསྟན་པ་ན། འཁོར་དེའི་ནང་ནས་ལྷ་དང་། མིའི་སྲོག་ཆགས་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཞེས་པ་དང་། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་འདི་ལྟར་ཁྱོད་ནི་བྱ་བ་མང་བ་བྱེད་པ་མང་བ་སྟེ། ཞེས་པ་ནས་ཁྱོད་རྫོགས་པའི་བྱང་ཆུབ་འདོད་པ་དང་། དད་པ་དང་། དོན་དུ་གཉེར་བ་དང་། སྨོན་པས་འགྲོ་ཡང་རུང་ཞེས་པ་ནས། རྒྱལ་པོའི་བྱ་བ་ཡང་ཉམས་པར་མི་འགྱུར་ཅིང་། བྱང་ཆུབ་ཀྱི་ཚོགས་ཀྱང་ཡོངས་སུ་རྫོགས་པར་འགྱུར་རོ། །ཞེས་པ་དང་། ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས། ཀླུ་ཁྲི་ཉིས་སྟོང་གིས་བྱང་ཆུབ་ཏུ་སེམས་བསྐྱེད་ཅེས་པ་དང་། འཕགས་པ་སྤྱན་རས་གཟིགས་དབང་ཕྱུག་གིས་ངན་སོང་གི་གནས་རྣམས་སུ་བྱོན་ཏེ། ངན་སོང་བ་དེ་དག་བདེན་པ་མཐོང་བ་ལ་བཀོད་ཅེས་སོགས་རྒྱ་ཆེར་གསུངས་སོ། །བསྟན་བཅོས་ལས་གསུངས་ཚུལ་ནི། འཕགས་པ་ཀླུ་སྒྲུབ་ཀྱིས་རིན་ཆེན་ཕྲེང་བར། སེམས་ཅན་ཐམས་ཅད་བྱང་ཆུབ་ཏུ། །སེམས་བསྐྱེད་བཅུག་ཅིང་བརྟན་བྱས་ནས། །རི་དབང་རྒྱལ་པོ་ལྟར་བརྟན་པའི། །བྱང་ཆུབ་སེམས་དང་རྟག་ལྡན་འགྱུར། །ཞེས་པ་དང་། ཞི་བ་ལྷས། བསླབ་བཏུས་སུ། དཔའ་བར་འགྲོ་བའི་མདོ་དྲངས་ཏེ། གཡོ་རྒྱུས་སེམས་བསྐྱེད་པ་ཡང་། སངས་རྒྱས་ཀྱི་རྒྱུར་གསུངས་ན་དགེ་བ་སྣ་འགའ་བྱས་ཏེ། སེམས་ཅན་སེམས་བསྐྱེད་པ་ལྟ་ཅི་སྨོས། ཞེས་གསུངས་སོ། །གཉིས་པ་ནི། ཇི་ལྟར་འབྲས་ཀྱི་ཞེས་སོགས་ཚིགས་བཅད་གཉིས་སོ། །གསུམ་པ་ནི། གལ་ཏེ་མདོ་ལས་ཞེས་སོགས་བཅུ་གཅིག་སྟེ། སྔར་དྲངས་པའི་མདོ་དང་། བསྟན་བཅོས་རྣམས་ལས། སེམས་ཅན་ཐམས་ཅད་ལ་སེམས་བསྐྱེད་སྐྱེ་བར་བཤད་པའི་གཞུང་དེ་སེམས་ཙམ་པའི་ལུགས་ཀྱི་ཡང་སེམས་བསྐྱེད་སྐྱེ་བར་ཅི་འགལ་སྙམ་ན། དེ་ནི་འཁྲུལ་པ་ཡིན་ཏེ། སེམས་ཙམ་ལུགས་ཀྱི་སེམས་བསྐྱེད་སྐྱེ་བ་ལ་སོ་ཐར་རིས་བདུན་གང་རུང་དང་ལྡན་པ་ཅིག་དགོས་ཤིང་། རྒྱལ་བ་ཕན་བཞེད་ཉིན་གཅིག་གི་སྲོག་གཅོད་སྡོམ་པ་བླངས་པ་ལ། བྱང་ཆུབ་སེམས་བསྐྱེད་མཛད་པར་བསྐལ་བཟང་ལས་གསུངས་ལ། ཉིན་གཅིག་གི་སྲོག་གཅོད་སྡོམ་པ་བླངས་པ་དེ་ནི་སོ་སོ་ཐར་པ་རིས་བདུན་གང་ཡང་མ་ཡིན་པའི་ཕྱིར་རོ། །དེ་ལ་སོགས་པ་རིས་བདུན་གྱི་རྟེན་དུ་མི་རུང་བའི་ལྷ་དང་ཀླུ་ལ་སོགས་པ་ལ། སེམས་བསྐྱེད་མཛད་པའི་འཐད་པ་རྣམས་དབུ་མའི་ལུགས་ལ་སོགས་སོ། །བཞི་པ་ནི། དེས་ན་སེམས་ཙམ་ཞེས་སོགས་བཅུ་སྟེ། སེམས་ཙམ་ལུགས་ཀྱི་སེམས་བསྐྱེད་སྐྱེ་བའི་ཡུལ་ངེས་པ་དེས་ན། སེམས་བསྐྱེད་དེ་ལེན་པར་འདོད་ན་ཐོག་མར་སོ་སོ་ཐར་པ་རིས་བདུན་གང་ཡང་རུང་བ་ལོངས། དེ་ནས་བྱང་ཆུབ་སེམས་དཔའི་སྡེ་སྣོད་བྱང་ས་ལྟ་བུར་སློབས། དེའི་བསླབ་བྱ་ལ་དད་ཅིང་བསྒྲུབ་པར་ནུས་པར་གྱུར་ན། ཕྱིས་ནས་འཇུག་པ་སེམས་བསྐྱེད་ཀྱི་སྡོམ་པ་ལོངས་ཏེ། བྱང་སའི་ཚུལ་ཁྲིམས་ལེའུ་དང་། གནས་བརྟན་བྱང་བཟང་སོགས་ཀྱིས་ལེན་ཚུལ་གྱི་རིམ་པ་དེ་ལྟར་དུ་བཤད་པའི་ཕྱིར་རོ། །ཅི་སྟེ་སེམས་ཅན་ཐམས་ཅད་ལ་སངས་རྒྱས་ཀྱི་ས་བོན་ཐེག་ཆེན་སེམས་བསྐྱེད་འཇོག་པར་འདོད་ན། སྦྱོར་དངོས་རྗེས་གསུམ་གྱི་ཆོ་ག་འཁྲུལ་པ་མེད་པའི་སྒོ་ནས། དབུ་མ་པའི་གཞུང་སྤྱོད་འཇུག་དང་། ཡི་དམ་བླང་བའི་ཆོ་ག་བཞིན་དུ་གྱིས་ཏེ། བརྡ་ཕྲད་ཅིང་ལེན་འདོད་ཡོད་པའི་སེམས་ཅན་ཀུན་ལ་སྐྱེ་བའི་ཕྱིར་རོ། །གཉིས་པ་དོན་དམ་སེམས་བསྐྱེད་ཆོ་གས་སྐྱེ་བ་དགག་པ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། དོན་དམ་སེམས་བསྐྱེད་ཞེས་སོགས་གསུམ་སྟེ། ཕ་རོལ་ཏུ་ཕྱིན་པའི་གཞུང་ལས་བཤད་པའི་དོན་དམ་སེམས་བསྐྱེད་ཞེས་བྱ་བ་ནི། ཚོགས་སྦྱོར་གྱི་གནས་སྐབས་སུ་བསོད་ནམས་དང་ཡེ་ཤེས་ཀྱི་ཚོགས་བསྐལ་པ་གྲངས་མེད་གཅིག་ཏུ་བསྒོམས་པའི་སྟོབས་ཀྱིས། ས་དང་པོར་རྣམ་པར་མི་རྟོག་པའི་ཡེ་ཤེས་རང་གི་ངང་གིས་སྐྱེ་བ་ལ་འཇོག་པ་ཡིན་ཏེ། མདོ་སྡེ་རྒྱན་ལས། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཅེས་གསུངས་པའི་ཕྱིར་རོ། །དེ་ལྟ་མོད་ཀྱི་ཆོ་གའི་སྒོ་ནས་འདི་མི་སྐྱེ་སྟེ། འོག་ནས་འཆད་པའི་ལུང་རིགས་ཀྱིས་གནོད་པའི་ཕྱིར་རོ། །གཉིས་པ་ལ་བཞི་སྟེ། ཆོ་གས་སྐྱེ་བ་ལ་གནོད་བྱེད་བསྟན། ཆོ་གས་སྐྱེ་བའི་སྒྲུབ་བྱེད་མེད། ཆོ་གས་མི་སྐྱེ་བ་དཔེའི་སྒོ་ནས་བསྒྲུབ། དེ་ལ་ལུང་དང་འགལ་བ་སྤང་བའོ། །དང་པོ་ནི། གལ་ཏེ་ཆོ་གས་ཞེས་སོགས་ཚིགས་བཅད་གཅིག་སྟེ། དོན་དམ་སེམས་བསྐྱེད་ཆོ་གས་སྐྱེ་ན་དེ་བརྡ་ལས་བྱུང་བའི་སེམས་བསྐྱེད་དུ་འགྱུར་ཅིང་། འདོད་ན་མི་འཐད་དེ། དོན་དམ་སེམས་བསྐྱེད་ཉིད་ནི། དོན་དམ་ཆོས་ཉིད་ཀྱི་ས་ཐོབ་པའི་སེམས་བསྐྱེད་ཡིན་པའི་ཕྱིར་རོ། །གཉིས་པ་ནི་འདི་ལ་སྦྱོར་དངོས་ཞེས་སོགས་དྲུག་གོ །གསུམ་པ་ནི། དཔེར་ན་ཆུ་ལུད་ཞེས་སོགས་ཚིགས་བཅད་གསུམ་སྟེ། དཔེར་ན་ཆུ་ལུད་དང་ས་བོན་འདེབས་པ་སོགས་སོ་ནམ་ཞིང་པས་དངོས་སུ་བྱར་ནུས་པ་དེ་བཞིན། ཀུན་རྫོབ་བྱང་ཆུབ་ཀྱི་སེམས་ཀྱང་ཆོ་གའི་སྒོ་ནས་དངོས་སུ་བསྐྱེད་ནུས་ཀྱི། མྱུ་གུ་དང་། སྡོང་བུ་དང་། སྙེ་མ་སོགས་ཞིང་ལས་དངོས་སུ་འབྱུང་གི་མི་ལས་དངོས་སུ་མི་འབྱུང་བ་དེ་བཞིན་དུ། དོན་དམ་བྱང་ཆུབ་ཀྱི་སེམས་དང་། ཟག་པ་མེད་པའི་སྡོམ་པ་དང་། བསམ་གཏན་གྱི་སྡོམ་པ་སོགས་བསྒོམས་པའི་སྟོབས་ཀྱིས་ངང་གིས་སྐྱེ་ཡི། ཆོ་གའི་སྒོ་ནས་མ་ཡིན་ཏེ། ཚུལ་འདི་དག་འཐད་པ་དང་བཅས་པ་མདོ་དང་བསྟན་བཅོས་ཀུན་ནས་འབྱུང་བའི་ཕྱིར་རོ། །དེ་ཡང་ཀ་མ་ལ་ཤཱི་ལའི་བསྒོམ་རིམ་དུ་དགོངས་པ་ངེས་འགྲེལ་གྱི་མདོ་དྲངས་པ་ལས། དོན་དམ་པའི་བྱང་ཆུབ་ཀྱི་སེམས་དེ་ནི་འཇིག་རྟེན་ལས་འདས་པ། སྤྲོས་པ་མཐའ་དག་དང་བྲལ་བ་ཤིན་ཏུ་གསལ་བ། དོན་དམ་པའི་སྤྱོད་ཡུལ་དྲི་མ་མེད་པ། མི་གཡོ་བ་རླུང་མེད་པའི་མར་མེའི་རྒྱུན་བཞིན་དུ་མི་གཡོ་བའོ། །དེ་འགྲུབ་པ་ནི་རྟག་ཏུ་གུས་པས་ཞི་གནས་དང་ལྷག་མཐོང་གི་རྣལ་འབྱོར་གོམས་པ་ལས་འགྱུར་རོ། །ཞེས་གསུངས་སོ། །བཞི་པ་ནི་དོན་དམ་སེམས་བསྐྱེད་སོགས་བཅུ་གཅིག་སྟེ། རྣམ་སྣང་མངོན་བྱང་ལས། ཡན་ལག་བདུན་པའི་སྐབས་སུ་དོན་དམ་སེམས་བསྐྱེད་ཀྱི་ཚིག་ལན་གསུམ་གསུངས་པ་ལྟ་བུ་དང་། སྤང་སྐོང་ཕྱག་བརྒྱ་པ་ལས། དོན་དམ་པའི་བྱང་ཆུབ་ཀྱི་མཆོག་ཏུ་སེམས་བསྐྱེད་པར་བྱའོ། །ཞེས་གསུངས་པ་སྲིད་ན་ཡང་། དེ་ནི་དམ་བཅའ་ཙམ་ཡིན་གྱི་ཆོ་གའི་སྒོ་ནས་བསྐྱེད་པ་མ་ཡིན་ཏེ། དཔེར་ན་སྦྱིན་པ་སོགས་སོ། །དེ་དག་ཀྱང་ཆོ་ག་ཡིན་ན། གནས་ག་གེ་མོ་ཞིག་ཏུ་འགྲོ་བར་བྱའོ། །ཞེས་སོགས་ཀྱང་ཆོ་གར་ཧ་ཅང་ཐལ་བར་འགྱུར་ཅིང་། ཆོ་ག་ཡང་ཐུག་མེད་དུ་འགྱུར་རོ། །གསུམ་པ་ནི། ཀྱེ་མ་འཇིག་རྟེན་ཞེས་སོགས་ཚིགས་བཅད་གཅིག་སྟེ། འཇིག་རྟེན་བླུན་པོ་འདིས་རྒྱལ་བས་གསུངས་པའི་སྡོམ་གསུམ་གྱི་ཆོ་ག་རྣམ་པར་དག་པ་ཀུན་བོར་ནས། མ་གསུངས་པའི་དོན་དམ་སེམས་བསྐྱེད་ལ་ཆོ་ག་ནན་གྱིས་འཚང་བ་འདི་འདྲ་བདེ་འགྲོ་དང་ངན་འགྲོ་ཅིར་འགྱུར་བརྟག་དགོས་སོ། །གཉིས་པ་ཐོབ་པ་མི་ཉམས་པར་བསྲུང་བའི་བསླབ་བྱ་ལ་གཉིས་ཏེ། ལྟུང་བའི་རྣམ་བཞག་མུ་བཞི་བསྟན་པ། བསླབ་བྱའི་གཙོ་བོ་ལ་ལོག་རྟོག་དགག་པའོ། །དང་པོ་ལ་གཉིས་ཏེ། མུ་བཞིར་དབྱེ་བ། བཞིར་འགྱུར་བའི་འཐད་པའོ། །དང་པོ་ནི། དེ་ལྟར་སེམས་ཙམ་ཞེས་སོགས་བཅོ་ལྔ་སྟེ། སྔར་བཤད་པ་དེ་ལྟར་སེམས་ཙམ་དབུ་མ་གཉིས་ལེན་པའི་ཆོ་ག་སོགས་ཀྱི་རྣམ་བཞག་ཐ་དད་དུ་ཡོད་མོད་ཀྱི། འོན་ཀྱང་ཐེག་ཆེན་དབུ་སེམས་ཀུན་མཐུན་པར་ལྟུང་བའི་རྣམ་གཞག་མུ་བཞི་གསུངས་ཏེ། ལྟུང་མེད་དང་། ལྟུང་བ་དང་། ལྟུང་བའི་གཟུགས་བརྙན་དང་། ལྟུང་བ་མེད་པའི་གཟུགས་བརྙན་རྣམ་བཞིར་གསུངས་པའི་ཕྱིར་རོ། །བཞི་པོ་གང་ཞེ་ན་བསམ་པ་དག་པའི་སོགས་སོ། །གཉིས་པ་ནི་མདོར་ན་སེམས་ཀྱི་ཞེས་སོགས་དགུ་སྟེ། ཀུན་སློང་དང་ལུས་ངག་གི་སྦྱོར་བ་གཉིས་ཀ་གནག་པ་ལྟུང་བ་དང་། དཀར་བ་ལྟུང་མེད་དང་། ཀུན་སློང་དཀར་ན་སྦྱོར་བ་གནག་ཀྱང་ལྟུང་བའི་གཟུགས་བརྙན་ཡིན་གྱི་དོན་ལ་ལྟུང་མེད་ཡིན་པ་དང་། ཀུན་སློང་གནག་ན་སྦྱོར་བ་དཀར་ཡང་ལྟུང་བ་མེད་པའི་གཟུགས་བརྙན་ཡིན་གྱི། དོན་ལ་ལྟུང་བ་ཡིན་པའི་རྒྱུ་མཚན་མདོར་བསྡུ་ན་སེམས་ཀྱི་འཕེན་པ་ལས་གཞན་པའི་ཐེག་པ་ཆེན་པོའི་དགེ་སྡིག་ཡོད་པ་མ་ཡིན་པའི་ཕྱིར་ཏེ། འཕགས་པ་ལྷའི་བཞི་བརྒྱ་པར། བསམ་པའི་སྒོ་ནས་བྱང་ཆུབ་སེམས་དཔའི་ལུས་ངག་གི་དགེ་བའམ། མི་དགེ་བར་སྣང་བ་ཐམས་ཅད་དགེ་བ་ཉིད་དུ་འགྱུར་ཏེ། གང་གི་ཕྱིར་ན་བྱང་ཆུབ་སེམས་དཔའི་དགེ་སྡིག་ལ་སེམས་དེ་གཙོ་བའི་ཕྱིར་ཞེས་གསུངས་པ་དང་། མདོ་རྒྱུད་བསྟན་བཅོས་གཞན་རྣམས་ལས་ཀྱང་དགེ་སྡིག་གི་རྣམ་གཞག་སེམས་ལ་རག་ལས་པ་དེ་ལྟར་གསུངས་ཏེ། དཀོན་མཆོག་སྤྲིན་ལས། དགེ་བའམ་འོན་ཏེ་མི་དགེ་བའི། །ལས་ནི་སེམས་ཀྱིས་བསགས་པ་ཡིན། །ཞེས་དང་། ཆོས་ཡང་དག་པར་སྡུད་པ་ལས། ཆོས་ཐམས་ཅད་སེམས་ལ་རག་ལས་པ་ཡིན་ནོ། །ཞེས་པ་དང་། སློབ་དཔོན་ནག་པོ་པས། དགྲ་ནག་གི་འགྲེལ་པར་རྒྱུད་ཀྱི་ལུང་དྲངས་པ་ལས། མཆོག་གསུམ་ཡོན་ཏན་རིག་པར་འགྱུར། །བདུད་རྩི་ཡིད་འོང་འཁོར་བས་བརྒལ། །འབྲས་བུ་ངེས་པར་ལེགས་པར་ཐོབ། །དེ་ཕྱིར་དམ་པའི་ཞལ་ལས་ནི། །གསུངས་པའི་བྱ་བ་སྡིག་ཀྱང་བྱ། །དམ་པའི་ཞལ་ལས་མ་གསུངས་པའི། །དགེ་བའང་མཁས་པས་སྤང་བར་བྱ། །ཞེས་གསུངས་པ་དང་། སེམས་ཀྱི་སྒྲིབ་སྦྱོང་ལས་ཀྱང་། དགེ་སློང་རང་གི་ཕ་རྒན་ལ། །མྱུར་འདོང་ཞེས་ནི་བསྐུལ་གྱུར་ནས། །འཕུལ་པས་དེ་ནི་ཤི་གྱུར་ཀྱང་། །མཚམས་མེད་སྦྱོར་བ་མ་ཡིན་ནོ། །བསམ་པ་བཟང་པོས་མཆིལ་ལྷྭམ་གཉིས། །ཐུབ་པའི་དབུ་ལ་བཞག་པ་དང་། །དེ་ནི་གཞན་གྱིས་བསལ་བྱས་པ། །གཉིས་ཀས་རྒྱལ་སྲིད་ཐོབ་པར་འགྱུར། །དེ་ཕྱིར་བསམ་པའི་རྩ་བ་ལ། །བསོད་ནམས་སྡིག་པ་རྣམ་པར་གནས། །ཞེས་དང་། མཁས་མཆོག་དབྱིག་གཉེན་གྱིས་ཀྱང་། ལས་གྲུབ་པར། ལུས་ངག་གི་ལས་རྣམ་པ་རིག་བྱེད་དང་། རིག་བྱེད་མ་ཡིན་པ་གཟུགས་ཅན་ནི་དགེ་བ་དང་། མི་དགེ་བ་མཚན་ཉིད་པ་མ་ཡིན་ཏེ། ལུས་བོར་ནས་ཚེ་ཕྱི་མ་ལ་འབྲས་བུ་ཡིད་དུ་འོང་བ་དང་། མི་འོང་བ་འགྲུབ་པ་དེ་དགེ་བ་དང་མི་དགེ་བ་ཡིན་པར་འཆད་པའི་ཕྱིར་རོ། །ལས་ནི་སེམས་པའི་ཁྱད་པར་ཡིན་ནོ་ཞེས་སོགས་སོ། །གཉིས་པ་ལ་གསུམ་སྟེ། བསླབ་བྱའི་གཙོ་བོ་འགོག་པའི་ལོག་རྟོག་བརྗོད། དེ་ཉིད་རིགས་པས་རྣམ་པར་བརྟགས་ནས་དགག བསླབ་བྱའི་གཙོ་བོ་ཡིན་པའི་སྒྲུབ་བྱེད་འགོད་པའོ། །དང་པོ་ནི། བྱང་ཆུབ་སེམས་ཀྱི་ཞེས་སོགས་ཚིགས་བཅད་གསུམ་སྟེ། བྱང་ཆུབ་སེམས་ཀྱི་བསླབ་པ་ལ་བདག་གཞན་མཉམ་པ་དང་། བརྗེ་བ་བསྒོམ་པའི་ཚུལ་གཉིས་གསུངས་ཏེ། སྤྱོད་འཇུག་ལས། བདག་དང་གཞན་དུ་མཉམ་པ་ནི། །དང་པོ་ཉིད་དུ་འབད་དེ་བསྒོམ། །བདེ་དང་སྡུག་བསྔལ་མཉམ་པས་ན། །ཐམས་ཅད་བདག་བཞིན་བསྲུང་བར་བྱ། །ཞེས་དང་། གང་ཕྱིར་བདག་དང་གཞན་གཉིས་ཀ །མྱུར་དུ་སྐྱོབ་པར་འདོད་པ་དེས། །བདག་དང་གཞན་དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། །ཞེས་གསུངས་སོ། །དེ་ལ་འབྲི་ཁུང་པ་ཁ་ཅིག དགོངས་གཅིག་ཏུ་རྡོ་རྗེའི་གསུང་། རང་གཞན་བརྗེས་པས། ཉེས་པར་འགྱུར་བའི་སྐབས་ཡོད་བྱ་བ་བཞུགས། དེས་ན་རང་གཞན་བརྗེ་བ་བླ་མ་དམ་པའི་ཐུགས་དགོངས་མ་ཡིན་ཏེ། རྗེ་རིན་པོ་ཆེ་རྟག་པར་ཞབས་སྙུང་ཞིང་མི་བདེ་བ་ཅི་ལགས། ཞེས་འཇིག་རྟེན་མགོན་པོས་ཞུས་པས། ཁོ་བོ་སྔོན་དད་པ་ནི་ཆེ་ཤེས་རབ་ནི་ཆུང་བས། རྟག་པར་གཞན་གྱི་སྡུག་བསྔལ་བདག་ལ་སྨིན་པར་གྱུར་ཅིག ཅེས་སྨོན་ལམ་བཏབ་པ་དེ་མཐའ་བཙན་པས་ད་ལྟ་རྟག་པར་ཞབས་སྙུང་བ་དེས་ལན། ཞེས་གསུང་། འོན་ཀྱང་བདག་ཅག་ལས་རྒྱུད་ཚོད་ཅུང་ཟད་མཐོ་བས་བཟོད་དམ་སྙམ་ན། འཕགས་པ་ཤཱ་རིའི་བུ་ས་དྲུག་པ་བ་ཅིག་ཡིན་པ་ལ་དུས་ལ་མ་བབ་པར་མིག་སྦྱིན་པར་བཏང་བས་ཉན་ཐོས་ཀྱི་སར་ལྟུང་བའི་རྐྱེན་དུ་གྱུར་པའི་ཕྱིར། དེས་ན་བདག་གཞན་བརྗེ་བའི་བྱང་ཆུབ་ཀྱི་སེམས་བསྒོམ་མི་རུང་ཞེས་སྨྲའོ། །དེའི་རྒྱུ་མཚན་དྲིས་པས་འདི་སྐད་ལོ་སོགས་སོ། །གཉིས་པ་ལ་གཉིས་ཏེ། བསྒྲུབ་བྱ་ལ་བརྟགས་ནས་དགག་པ། སྒྲུབ་བྱེད་ལ་བརྟགས་ནས་དགག་པའོ། །དང་པོ་ནི། དེ་དོན་འདི་ལྟར་ཞེས་སོགས་དགུའོ། །གཉིས་པ་ནི། བྱང་ཆུབ་སེམས་དཔའི་ཞེས་སོགས་བཅུ་གསུམ་སྟེ། སྨོན་ལམ་ཐམས་ཅད་མཐའ་བཙན་པའི་གཏན་ཚིགས་མི་འགྲུབ་སྟེ། བྱང་ཆུབ་སེམས་དཔའ་བློ་སྦྱོང་བའི་སྨོན་ལམ་འགའ་ཞིག་མཐའ་མི་བཙན་པའི་ཕྱིར་རོ། །གལ་ཏེ་བཙན་ན་དེད་དཔོན་མཛའ་བོའི་བུ་རྒྱུན་དུ་ཀླད་ནད་ཅན་དུ་འགྱུར་ཏེ། སེམས་ཅན་ཐམས་ཅད་ཀྱི་ཀླད་ནད་བདག་ལ་སྨིན་པར་སྨོན་ལམ་བཏབ་པའི་ཕྱིར་རོ། །དེ་ཡང་མདོ་དྲིན་ལན་བསབ་པ་ལས། སྔོན་ཝཱ་ར་ནཱ་སཱིར་དེད་དཔོན་མཛའ་བོ་ཞེས་པའི་བུ་བྱུང་ངོ་ཅོག་ཤི་ནས་ཕྱིས་གཅིག་སྐྱེས་པ་ལ་མཛའ་བོའི་བུ་མོར་མིང་བཏགས་ཏེ། ཕ་རྒྱ་མཚོར་ནོར་བུ་ལེན་དུ་ཕྱིན་པས་ཤི་ནས་ཆེར་སྐྱེས་པ་ན། ཕའི་ལས་གང་ཡིན་དྲིས་པ་ལས། དྲང་པོར་སྨྲས་ན་རྒྱ་མཚོར་ཤིར་དོགས་ནས་འབྲུ་འཚོང་བ་ཡིན་ཞེས་སྨྲས་པས་ཀར་ཤ་པ་ཎི་བཞི་རྙེད། དེ་བཞིན་དུ་སྤོས་བཙོངས་པས་བརྒྱད་དང་། གོས་ཀྱིས་བཅུ་དྲུག་དང་། གསེར་དངུལ་བཙོངས་པས་སོ་གཉིས་རྙེད་པ་ཐམས་ཅད་མ་ལ་ཕུལ། དེ་ནས་ཚོང་པ་དེའི་རིགས་ཅན་རྣམས་ཀྱིས། ཁྱོད་ཀྱི་ཕ་རྒྱ་མཚོར་ནོར་བུ་ལེན་པའི་རིགས་ཅན་ཡིན་ནོ་ཞེས་སྨྲས་པས། དྲིལ་བསྒྲགས་ཏེ་ཚོང་པ་ལྔ་བརྒྱ་དང་ལྷན་ཅིག་ཆས་པ་ལ། མས་མ་བཟོད་པར་སྒོ་འཕྲེད་ལ་གཅད་དེ་ཉལ་བས་མའི་མགོ་ལ་རྡོག་པས་བསྣུན་ནས་སོང་ངོ་། །དེ་ནས་རྒྱ་མཚོར་ཞུགས་པས་གྲུ་བོ་ཆེ་ཆུ་སྲིན་ཉ་མིད་ཀྱིས་བཅོམ་ནས་ཞིག མཛའ་བོའི་བུ་མོས་གྲུའི་ཤིང་ཚལ་ལ་འཇུས་ནས་མཐར་གྱིས་ཕྱིན་པས། གྲོང་ཁྱེར་མྱོས་བྱེད་དུ་ལྷའི་བུ་མོ་བཞི་དང་། རྟག་མྱོས་སུ་བརྒྱད། དགའ་བྱེད་དུ་བཅུ་དྲུག ཚངས་པའི་བླ་མར་སོ་གཉིས་དང་ཕྲད་དེ། ལོ་གྲངས་དུ་མར་དགའ་བདེ་མྱོང་ངོ་། །ཡང་ལྷོ་ཕྱོགས་སུ་སོང་བ་དང་། ལྕགས་ཀྱི་ཁང་པ་ཆེན་པོ་ཞིག་མཐོང་སྟེ། འགྲོ་འདོད་པར་གྱུར་ནས་ནང་དུ་ཕྱིན་པ་དང་སྒོ་རང་འགྲིག་ཏུ་སོང་ངོ་། །ནང་ན་མི་ཞིག་ལྕགས་ཀྱི་འཁོར་ལོ་མེ་འབར་བ་མགོ་ལ་འཁོར་བ་ཞིག་མཐོང་ནས་དྲིས་པས། མའི་མགོ་ལ་རྡོག་པས་བསྣུན་པའི་རྣམ་སྨིན་ནོ་ཟེར་བ་དང་། རང་གི་དེ་དྲན་ཏེ། ང་ཡང་ལས་ཀྱིས་འདིར་ཁྲིད་དོ་སྙམ་པ་དང་། ནམ་མཁའ་ལས་གང་མ་བཅིངས་པ་དེ་དག་ནི་ཆིངས་ཤིག བཅིངས་པ་དེ་དག་གྲོལ་ཤིག ཞེས་པའི་སྒྲ་ཐོས་པས་འཁོར་ལོ་དེ་རང་གི་མགོ་ལ་འཁོར་བར་གྱུར་ཏོ། །འདིར་གཞན་ཡང་ཡོད་མེད་དྲིས་པས་གང་མའི་མགོ་ལ་རྡོག་པས་བསྣུན་པ་ཐམས་ཅད་འདིར་འོངས་སོ་ཞེས་ཟེར་བ་དང་། གཞན་གཅེས་འཛིན་གྱི་སྙིང་རྗེ་ཚད་མེད་པ་སྐྱེས་ཏེ། འདི་ལྟ་བུའི་མྱོང་ངེས་ཀྱི་ལས་བསགས་པ་ཐམས་ཅད་བདག་ལ་སྨིན་པར་གྱུར་ཅིག གཞན་སུ་ཡང་འདིར་འོང་བར་མ་གྱུར་ཅིག ཅེས་བརྗོད་མ་ཐག་སྙིང་རྗེའི་སྟོབས་ཀྱིས། མཛའ་བོའི་བུ་མོའི་མགོ་ལ་འཁོར་བའི་འཁོར་ལོ་དེ། ཤིང་ཏ་ལ་བདུན་སྲིད་ཙམ་དུ་འཕགས་ནས་ཚེའི་དུས་བྱས་ཏེ། དགའ་ལྡན་དུ་སྐྱེས་སོ་ཞེས་གསུངས་སོ། །གཞན་ཡང་དུས་གསུམ་སངས་རྒྱས་སོགས་ཚིག་རྐང་གསུམ་སྟེ། བློ་སྦྱོང་གི་སྨོན་ལམ་མཐའ་བཙན་པའི་ཕྱིར་རོ། །བརྗེས་པའི་ཡུལ་གྱི་སེམས་ཅན་དེ་དག་ཀུན། སྡུག་བསྔལ་འབྱུང་བ་མི་སྲིད་པར་འགྱུར་ཏེ། སངས་རྒྱས་དང་བྱང་སེམས་ཀྱི་བདེ་བ་ལ་ལོངས་སྤྱོད་པའི་ཕྱིར་རོ། །དེས་ན་བརྗེ་བའི་བྱང་ཆུབ་ཀྱི་སེམས་བསྒོམ་དུ་མི་རུང་བ་འདི་འདྲའི་གསང་ཚིག་ནི་བདུད་ཀྱིས་ཡིན་པ་ཕལ་ཆེར་གྱིས་མི་ཤེས་པས་ཤེས་ནས་སྤང་བར་བྱའོ། །ཐབས་ཕྱིན་ཅི་ལོག་ཏུ་སྟོན་པ་ཐབས་ལ་བསླུ་བའི་བདུད། ཅེས་རྒྱལ་བས་གསུངས་པའང་དྲན་པར་བྱ་སྟེ། མདོ་སྡེ་རྒྱན་ལས། ཐབས་དང་སྐྱབས་དང་དག་པ་དང་། །ཐེག་ཆེན་ངེས་པར་འབྱུང་བ་ལས། །སེམས་ཅན་རྣམས་ནི་རབ་བསླུ་བའི། །བདུད་འཇོམས་ཁྱོད་ལ་ཕྱག་འཚལ་ལོ། །ཞེས་གསུངས་པ་ལྟར་རོ། །གསུམ་པ་ལ་བཞི་སྟེ། ཡིད་ཆེས་པའི་ལུང་གིས་བསྒྲུབ། བསྒོམ་པའི་ཕན་ཡོན་གྱིས་བསྒྲུབ། མ་བསྒོམས་པའི་ཉེས་དམིགས་ཀྱིས་བསྒྲུབ། དེས་གྲུབ་པའི་དོན་བསྟན་པའོ། །དང་པོ་ལ་གསུམ་སྟེ། ཀླུ་སྒྲུབ་ཀྱི་ལུང་གིས་བསྒྲུབ། ཞི་བ་ལྷའི་ལུང་གིས་བསྒྲུབ། མདོ་དང་བསྟན་བཅོས་གཞན་གྱི་ལུང་གིས་བསྒྲུབ་པའོ། །དང་པོ་ནི་བདག་གཞན་བརྗེ་བ་ཞེས་སོགས་བཅུ་བདུན་ཏེ། འདི་ནི་བཅོམ་ལྡན་འདས་ཀྱིས་གསུངས་ཞེས་པ་ནི། དཔལ་སྦྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་ལས་ལྷག་པར་འགྱུར། །ཞེས་གསུངས་སོ། །གཏན་ཚིགས་ཀྱང་ནི་འདི་ལ་སྣང་། །ཞེས་པ་ནི་རིན་ཆེན་ཕྲེང་བར། ཕྱོགས་རྣམས་ཀུན་ཏུ་ནམ་མཁའ་དང་། །ས་དང་ཆུ་དང་མེ་དང་རླུང་། །ཇི་ལྟར་མཐའ་ཡས་དེ་བཞིན་དུ། །སྡུག་བསྔལ་སེམས་ཅན་མཐའ་ཡས་འདོད། །སེམས་ཅན་མཐའ་ཡས་དེ་དག་ནི། །བྱང་ཆུབ་སེམས་དཔའ་སྙིང་རྗེ་བས། །སྡུག་བསྔལ་དག་ལས་དྲངས་བྱས་ཏེ། །སངས་རྒྱས་ཉིད་ལ་དགོད་པར་ངེས། །དེ་ལྟར་བརྟན་པར་གནས་དེ་ནི། །མི་ཉལ་བའམ་ཉལ་ཡང་རུང་། །ཡན་ལག་བླངས་པ་ནས་བཟུང་སྟེ། །བག་མེད་གྱུར་ཀྱང་སེམས་ཅན་རྣམས། །མཐའ་ཡས་ཕྱིར་ན་སེམས་ཅན་བཞིན། །བསོད་ནམས་མཐའ་ཡས་རྟག་གསོག་འགྱུར། །མཐའ་ཡས་དེས་ན་སངས་རྒྱས་ཉིད། །མཐའ་ཡས་ཐོབ་མི་དཀའ་ཞེས་བྱ། །ཞེས་གསུངས་པ་ལྟར་རོ། །གཉིས་པ་ནི། སྤྱོད་འཇུག་ལས་ཀྱང་། ཞེས་སོགས་དྲུག་གོ །གསུམ་པ་ནི། མདོ་དང་བསྟན་བཅོས་ཞེས་སོགས་གཉིས་ཏེ། གསང་ཆེན་ཐབས་ལ་མཁས་པའི་མདོ་ལས། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ནི། ཞེས་པ་ནས་འདི་ལྟར་སེམས་ཅན་དེ་དག་གི་སྡུག་བསྔལ་གྱི་ཚོར་བ་གང་ཡིན་པ་དེ་དག་ཐམས་ཅད་བདག་གི་ལུས་ལ་འབབ་པར་གྱུར་ཅིག སེམས་ཅན་དེ་དག་བདེ་བར་གྱུར་ཅིག ཅེས་པ་དང་། རྡོ་རྗེ་རྩེ་མོ་ལས། འཁོར་བ་མཐར་ཐུག་བར་དུ་ནི། །བདག་འཚང་རྒྱ་བར་མ་གྱུར་ཅིག །འགྲོ་བའི་སྡུག་བསྔལ་གང་ཅིའང་རུང་། །དེ་ཀུན་བདག་ལ་སྨིན་གྱུར་ཅིག །བྱང་ཆུབ་སེམས་དཔའི་དགེ་བ་ཡིས། །འགྲོ་བ་དེ་ལ་སྤྱོད་པར་ཤོག །ཅེས་དང་། བྱང་ཆུབ་སེམས་འགྲེལ་ལས། བསམ་གཏན་བདེ་བ་བོར་ནས་ཀྱང་། །མནར་མེད་པར་ཡང་འཇུག་པར་བྱེད། །འདི་ནི་ངོ་མཚར་བསྔགས་འོས་སོ། །འདི་ནི་དམ་པའི་ཚུལ་ལུགས་མཆོག །ཅེས་གསུངས་སོ། །གཉིས་པ་ནི་དེས་ན་བདག་གཞན་ཞེས་སོགས་ཚིགས་བཅད་གཅིག་སྟེ། སྤྱོད་འཇུག་ལས། མང་དུ་བཤད་ལྟ་ཅི་ཞིག་དགོས། །བྱིས་པ་རང་གི་དོན་བྱེད་དང་། །ཐུབ་པ་གཞན་གྱི་དོན་མཛད་པ། །འདི་གཉིས་ཀྱི་ནི་ཁྱད་པར་ལྟོས། །ཞེས་གསུངས་པ་ལྟར་རོ། །གསུམ་པ་ནི། བྱང་ཆུབ་སེམས་ཀྱི་ཞེས་སོགས་བཅོ་བརྒྱད་དེ། བདག་གཞན་བརྗེ་བ་བྱང་ཆུབ་ཀྱི་སེམས་ཀྱི་གནད་འཆུགས་ན་ཆོས་གཞན་གྱིས་འཚང་མི་རྒྱ་སྟེ། ཐབས་མཁས་དང་བྲལ་བའི་སྟོང་ཉིད་ཉན་ཐོས་རྣམས་ཀྱིས་བསྒོམ་ཀྱང་། དེའི་འབྲས་བུ་འགོག་པ་ཙམ་ཐོབ་པའི་ཕྱིར་དང་། སོ་སོ་ཐར་པའི་མདོ་ལས། སོ་སོ་ཐར་པ་བཏོན་པ་ཡི། །བསོད་ནམས་གྲུབ་པ་གང་ཡོད་པ། །དེ་ཡིས་འཇིག་རྟེན་མ་ལུས་པ། །ཐུབ་དབང་གོ་འཕང་ཐོབ་པར་ཤོག །ཞེས་གསུངས་པ་བཞིན་དུ་བསྔོ་བ་ཉན་ཐོས་རྣམས་བྱེད་ཀྱང་། རྫོགས་པའི་བྱང་ཆུབ་བསྒྲུབ་པར་མི་ནུས་པའི་ཕྱིར་རོ། །སྟོང་ཉིད་ཉན་ཐོས་རྣམས་བསྒོམ་པའི་སྒྲུབ་བྱེད་ནི་འདུལ་བ་ལུང་དང་། མདོ་སྡེ་ལས་གསུངས་པ་དང་། གང་པོའི་རྟོགས་བརྗོད་ལས། ཉན་ཐོས་ཀྱི་དགྲ་བཅོམ་པ་ཐོབ་པའི་ཚེ་སྟོང་པ་ཉིད་དང་། སྐྱེ་བ་མེད་པ་དང་ནམ་མཁའ་དང་ལག་མཐིལ་དུ་མཉམ་པ་དང་། གསེར་དང་བོང་བར་མཚུངས་པ་སོགས་ཆོས་ཀུན་མཉམ་ཉིད་དུ་རྟོགས་པར་གསུངས་སོ། །འོ་ན་ཆོས་ཀུན་མཉམ་པ་ཉིད་དུ་རྟོགས་པ་རྫོགས་པའི་སངས་རྒྱས་ཀྱི་ཐུན་མོང་མ་ཡིན་པའི་ལམ་མ་ཡིན་ནམ་སྙམ་ན། འདི་ལ་གང་ཟག་གི་བདག་དང་། གཟུང་བ་ཆོས་ཀྱི་བདག་དང་། འཛིན་པ་ཆོས་ཀྱི་བདག་གིས་སྟོང་པའི་མཉམ་པ་ཉིད་གསུམ་ལས། དང་པོ་གཉིས་ཉན་ཐོས་དང་། རང་སངས་རྒྱས་ཀྱིས་རིམ་པ་བཞིན་རྟོགས་པའི་དབང་དུ་བྱས་པར་མངོན་རྟོགས་རྒྱན་ལས་བཤད་དེ། དེ་ནས་གསུངས་པའི་ཆོས་ཀྱི་བདག་འཛིན་ནི་འཁོར་འདས་ལ་བླང་དོར་གྱི་མཚན་མར་འཛིན་པ་དང་། ཕུང་པོ་སྟོང་པ་ཉིད་དུ་འཛིན་པ་དང་། དུས་གསུམ་གྱི་ཆོས་ལ་དེར་འཛིན་པ་དང་། བྱང་ཕྱོགས་སོ་བདུན་ལ་ཐར་ལམ་དུ་འཛིན་པ་དང་། རྫོགས་པའི་སངས་རྒྱས་ལ་སྐྱབས་གནས་སུ་འཛིན་པ་སོགས་བླང་དོར་ཐ་དད་དུ་འཛིན་པའི་ཆགས་པ་ཕྲ་མོ་ཡིན་ལ། དེ་ནི་ཉན་ཐོས་ཀྱི་ལམ་དུ་ཅུང་ཟད་ཙམ་ཡང་སྤོང་བར་མི་ནུས་ཏེ། དེ་དག་ནི་འཁོར་བ་ལ་སྤང་བྱ་དང་། མྱང་འདས་ལ་བླང་བྱར་བྱས་ནས་ལམ་བསྒྲུབ་པའི་ཕྱིར་རོ། །སོ་སོ་ཐར་པའི་མདོ་བཞིན་དུ་བསྔོ་བ་ཉན་ཐོས་རྣམ་ཀྱང་བྱེད་པའི་སྒྲུབ་བྱེད་ནི། ཐམས་ཅད་སྒྲོལ་གྱི་སྐྱེས་རབས་ལས། །བདག་གིས་བྲམ་ཟེ་འདོད་པ་ལ། །ཞེས་སོགས་དང་། དཔལ་གྱི་སྡེའི་རྟོགས་བརྗོད་ལས། བྲམ་ཟེ་དམ་པ་གཟུགས་བཟང་བ། །སྡུག་པའི་ཆུང་མ་འདི་ལོང་ཤིག །སྦྱིན་པ་འདི་ཡིས་མྱུར་དུ་ནི། །བྱང་ཆུབ་དམ་པ་ཐོབ་པར་འགྱུར། །ཞེས་གསུངས་སོ། །འོན་ཀྱང་ཐབས་ལ་མཁས་པའི་ཁྱད་པར་འགའ་ཞིག་མ་གསུངས་པས་རྫོགས་པའི་བྱང་ཆུབ་བསྒྲུབ་པར་མི་ནུས་ཏེ། མདོ་སྡུད་པ་ལས། ཐབས་མེད་ཤེས་རབ་བྲལ་བས་ཉན་ཐོས་ཉིད་དུ་ལྟུང་། །ཞེས་དང་། རིན་ཆེན་ཕྲེང་བ་ལས། ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་སྨོན་ལམ་དང་། །སྤྱོད་པ་ཡོངས་བསྔོ་མ་བཤད་དེས། །བྱང་ཆུབ་སེམས་དཔར་ག་ལ་འགྱུར། །ཞེས་གསུངས་སོ། །བཞི་པ་ནི། དེ་ཕྱིར་ཐབས་མཁས་ཞེས་སོགས་གཉིས་ཏེ། བྱང་ཆུབ་སེམས་ཀྱི་གནད་འཆུགས་ན་སངས་མི་རྒྱ་བ་དེའི་ཕྱིར་ཀུན་རྫོབ་བྱང་ཆུབ་སེམས་ཀྱི་ཐབས་མཁས་པ་དང་། སྤྲོས་བྲལ་རྟོགས་པའི་ཤེས་རབ་ཉིད་སངས་རྒྱས་ཀྱི་རྒྱུའི་གཙོ་བོ་ཡིན་ཏེ། ལི་ཙ་བྱིས་ཞུས་པའི་མདོ་ལས། བྱང་ཆུབ་སེམས་དཔའ་རྣམ་དག་གི །ཡབ་ནི་ཐབས་ལ་མཁས་པ་སྟེ། །ཡུམ་ནི་ཤེས་རབ་ཕ་རོལ་ཕྱིན། །འདྲེན་པ་རྣམས་ནི་དེ་ལས་སྐྱེས། །ཞེས་གསུངས་སོ། །གསུམ་པ་དེ་དང་འབྲེལ་བའི་ཐབས་ལམ་རྣམ་དག་ཏུ་བསྒྲུབ་པ་ལ་གཉིས་ཏེ། སྤང་བྱ་མ་དག་པའི་ལྟ་སྤྱོད་ངོས་བཟུང་། དེ་ཤེས་ནས་སྤོང་བར་གདམས་པའོ། །དང་པོ་ལ་བསྟན་བཤད་གཉིས་ལས། དང་པོ་ནི། སངས་རྒྱས་དགོངས་པ་ཞེས་སོགས་ཚིགས་བཅད་གཅིག་གོ །གཉིས་པ་ལ་བཅུ་གཅིག་ལས། དང་པོ་མ་དག་པའི་སྦྱིན་པ་ནི། ཆང་དང་དུག་དང་ཞེས་སོགས་དྲུག་སྟེ། སྟེར་སོགས་ཞེས་པའི་སོགས་ཀྱི་སྒྲས་བསྡུས་པའི་སྦྱིན་པ་རྣམས་ནི། དྲང་སྲོང་རྒྱས་པས་ཞུས་པའི་མདོ་དང་བྱང་ཆུབ་སེམས་དཔའི་སོ་སོ་ཐར་པ་ཆོས་བཞི་བསྒྲུབ་པའི་མདོ་ལས་བཀག་པ་རྣམས་མ་དག་པའི་སྦྱིན་པ་ཡིན་ནོ། །མདོ་དང་པོ་ལས་སུམ་ཅུ་རྩ་གཉིས་གསུངས་པ། ཐུབ་པ་དགོངས་གསལ་ལས། སྡོམ་གྱི་ཚིགས་སུ་བཅད་པ་ནི། ལོག་ལྟ་མ་དད་ཕན་གདགས་ལན། །མེ་ཆུ་རྒྱལ་སྟེར་འཕགས་ཕྱིར་སྟེར། །དུག་མཚོན་བསད་ཤ་བག་མེད་ཆང་། །བསྡུ་ཕྱིར་སྟོང་ཕྱིར་རོལ་མོ་མཁན། །སྐར་མཁན་གཞན་ནོར་མཛའ་ལ་སྟེར། །གཞན་གྱི་འབྲུ་སྙོང་བཟོ་བོ་དང་། །ནོར་ཕྱིར་སྨན་པ་བཅོས་ནས་སྟེར། །རྣམ་སྨིན་ཐེ་ཚོམ་བྱིན་རྗེས་འགྱོད། །འདི་ཡིས་ཕྱི་མར་བདག་ལ་སྦྱིན། །རྣམ་སྨིན་རང་ཉིད་ལང་ཚོ་རྒས། །ན་དང་འཆི་ཚེ་བསྐུལ་ནས་མཆོད། །ཡུལ་གཞན་གྲགས་ཕྱིར་ཕོད་བསྟན་ཕྱིར། །བུད་མེད་ཕྱིར་སྟེར་བུད་མེད་ཕྱིར། །ཕྱི་མ་རྙེད་ཕྱིར་དམན་པ་རྣམས། །བོར་ནས་ཕྱུག་པོ་རྣམས་ལ་སྟེར། །མ་དག་སྦྱིན་པ་སུམ་ཅུ་གཉིས། །རྒྱས་པ་མདོ་ལས་གསུངས་ཕྱིར་སྤང་། །ཞེས་གསུངས་སོ། །ཚུལ་ཇི་ལྟར་མ་དག་ཞེ་ན། དང་པོ་དྲུག་དང་བཅུ་གསུམ་པ། །བཅུ་བཞི་པ་དང་བཅོ་ལྔ་པ། །བཅུ་བདུན་པ་དང་བཅོ་བརྒྱད་པ། །ཐ་མ་གཅིག་སྟེ་བཅུ་གཉིས་པོ། །ཞིང་ནི་མ་དག་པ་ཡིན་ནོ། །བདུན་པ་བརྒྱད་པ་དགུ་པ་དང་། །བཅུ་པ་དང་ནི་བཅུ་དྲུག་པ། །ལྔ་ནི་དངོས་པོ་མ་དག་པའོ། །བསམ་པ་མ་དག་ལྷག་བཅོ་ལྔ། །ཞེས་པ་ལྟར་ཤེས་པར་བྱའོ། །མདོ་གཉིས་པ་ལས། ཤཱ་རིའི་བུ་གང་ཡང་བྱང་ཆུབ་སེམས་དཔའ་མཁས་པས་སྨད་པའི་སྦྱིན་པ་འདི་རྣམས་ལས་རབ་ཏུ་བཟློག་པ་ཡིན་ཏེ། འདི་ལྟ་སྟེ། དུས་སུ་ལེན་པའི་སྦྱིན་པ་དང་། ཆང་གི་སྦྱིན་པ་དང་། དུག་གི་སྦྱིན་པ་དང་། གནོད་པའི་སྦྱིན་པ་དང་། འགྱོད་པའི་སྦྱིན་པ་དང་། མཚོན་ཆའི་སྦྱིན་པ་དང་། འཕྲོག་པའི་སྦྱིན་པ་དང་། བརྙས་པའི་སྦྱིན་པ་དང་། རང་གི་ལག་གིས་སྨིན་པའི་སྦྱིན་པ་དང་། རྒྱབ་ཀྱིས་ཕྱོགས་པའི་སྦྱིན་པ་དང་། འདོད་པ་ལ་བརྟེན་པའི་སྦྱིན་པ་དང་། མི་མཐུན་པའི་སྦྱིན་པ་དང་། དམ་པ་མ་ཡིན་པའི་སྦྱིན་པ་དང་། སྨད་པའི་སྦྱིན་པ་དང་། དུག་དང་མཚོན་སྦྱིན་པའི་སྦྱིན་པ་དང་། སོ་སོར་གནོད་པའི་སྦྱིན་པ་དང་། རྙེད་པའི་ཕྱིར་སྦྱིན་པ་དང་། རྟག་ཏུ་འཇིགས་པ་བསྐྱེད་པའི་སྦྱིན་པ་དང་། །བྱང་ཆུབ་ཡོངས་སུ་ཉམས་པར་བྱེད་པའི་སྦྱིན་པ་དང་། འཆི་བའི་ཞགས་པའི་སྦྱིན་པ་དང་། བསྟེན་པའི་ཕྱིར་སྦྱིན་པ་དང་། འཇིགས་པའི་སྦྱིན་པ་དག་ལས་བཟློག་པར་འགྱུར་རོ། །ཞེས་གསུངས་སོ། །སྦྱིན་པ་རྣམ་པར་དག་པ་ནི། ཉེ་བ་འཁོར་གྱིས་ཞུས་པའི་མདོ་ལས། བྱང་ཆུབ་སེམས་དཔའ་ཁྱིམ་པ་དང་། རབ་ཏུ་བྱུང་བ་དང་། མི་སྐྱེ་བའི་ཆོས་ལ་བཟོད་པ་ཐོབ་པའི་སྦྱིན་པ་གསུམ་ལས། དང་པོ་ལ་ཆོས་དང་ཟང་ཟིང་གི་སྦྱིན་པ་གཉིས་དང་། གཉིས་པ་ལ་སྨྱུ་གུ་དང་། སྣག་ཚ་དང་། གླེགས་བམ་དང་། ཆོས་སྦྱིན་པ་བཞི་དང་། གསུམ་པ་ལ་རྒྱལ་སྲིད་ཡོངས་སུ་གཏོང་བ་དང་། ཆུང་མ་དང་། བུ་དང་བུ་མོ་ཡོངས་སུ་གཏོང་བ་གཏོང་བ་ཆེན་པོ་དང་། མགོ་དང་རྐང་ལག་ལ་སོགས་པ་ཡོངས་སུ་གཏོང་བ་ཤིན་ཏུ་གཏོང་བ་སྟེ་གསུམ་གསུངས་སོ། །གཉིས་པ་མ་དག་པའི་ཚུལ་ཁྲིམས་ནི། ཉན་ཐོས་ཀྱི་ནི་ཞེས་སོགས་ཚིགས་བཅད་གཉིས་ཏེ། རིས་བདུན་སེམས་ཇི་སྲིད་འཚོའི་བར་དུ་ལེན་པ་ཉན་ཐོས་ཀྱི་སྡོམ་པ་ཐེག་པ་ཆེན་པོར་འཆོས་པ་དང་། དེ་བཞིན་དུ་ཐེག་པ་ཆེན་པོའི་ཚུལ་ཁྲིམས་བསྲུངས་ནས། ཉན་ཐོས་དང་རང་སངས་རྒྱས་ལ་དམིགས་པ་ཐེག་ཆེན་ཉན་ཐོས་སུ་འཆོས་པའི་ཚུལ་ཁྲིམས་མ་དག་པ་ཡིན་ཏེ། མདོ་སྡུད་པ་ལས། གལ་ཏེ་དགྲ་བཅོམ་རང་རྒྱལ་བྱང་ཆུབ་རེག་འདོད་ན། །ཚུལ་ཁྲིམས་འཆལ་ཅིང་མི་མཁས་དེ་བཞིན་སྤྱོད་པ་ཉམས། །ཞེས་གསུངས་སོ། །རང་ཉིད་ཚུལ་ཁྲིམས་བསྲུང་ན་ཡང་། །ཞེས་སོགས་ཀྱང་མདོ་དེ་ཉིད་ལས། སེམས་ཅན་འདི་དག་ཁྲིམས་ལྡན་འདི་དག་ཁྲིམས་འཆལ་ཞེས། །སྣ་ཚོགས་འདུ་ཤེས་ཞུགས་པ་ཤིན་ཏུ་ཁྲིམས་འཆལ་ཞེས་གསུངས་པའི་དོན་ནོ། །གསུམ་པ་མ་དག་པའི་བཟོད་པ་ནི། དཀོན་མཆོག་གསུམ་དང་ཞེས་སོགས་ཚིགས་བཅད་གཅིག་སྟེ། སྦྱོང་རྒྱུད་ལས། དཀོན་མཆོག་གསུམ་ལ་སྨོད་བྱེད་ལ། །བཟོད་པ་བསྒོམ་པར་མི་བྱ་སྟེ། །བླ་མ་སྨོད་བརྩོན་མ་རུངས་དང་། །དམ་ཚིག་ལས་ནི་འདའ་བ་དང་། །དེ་སོགས་བྱེད་པ་ཚར་བཅད་ན། །འགྲུབ་འགྱུར་ཞེས་ནི་ཀུན་རིག་གསུངས། །ཞེས་གསུངས་སོ། །བཞི་པ་མ་དག་པའི་བརྩོན་འགྲུས་ནི། ལོག་པའི་ཆོས་ལ་ཞེས་སོགས་ཚིགས་བཅད་གཅིག་སྟེ། དེ་དག་མ་དག་པའི་བརྩོན་འགྲུས་ཡིན་པའི་རྒྱུ་མཚན། བྱ་བ་ངན་ཞེན་གྱི་ལེ་ལོ་ཡིན་པའི་ཕྱིར་རོ། །ཇི་སྐད་དུ་ཐོགས་མེད་ཀྱིས་ཆོས་འདི་པ་དག་ལས་གཞན་པའི་མུ་སྟེགས་བྱེད་ཀྱི་བརྩོན་འགྲུས་ནི། ལེ་ལོ་ཉིད་དོ། །ཞེས་དང་། སྤྱོད་འཇུག་ལས། ལེ་ལོ་ངན་ལ་ཞེན་པ་དང་། །ཞེས་གསུངས་སོ། །ལྔ་པ་མ་དག་པའི་བསམ་གཏན་ནི། མི་མཁས་སྟོང་ཉིད་ཞེས་སོགས་བདུན་ཏེ། མི་མཁས་སྟོང་ཉིད་བསྒོམ་པ་ནི། རིན་ཆེན་ཕྲེང་བ་ལས། ཆོས་འདི་ལོག་པར་ཤེས་གྱུར་ན། །མི་མཁས་དེ་ནི་ཆུད་ཀྱང་འཛའ། །འདི་ལྟར་མེད་པར་བལྟ་བ་ཡི། །མི་གཙང་དེར་ནི་བྱིང་བར་འགྱུར། །ཞེས་བཤད་པས། དད་པ་ཆེན་པོས་བསྒོམ་ན་ཡང་སོགས་སོ། །གཞན་ཡང་རྩ་རླུང་ཐིག་ལེའི་གནད་འཆུགས་པའི་ཐར་ལམ་སོགས། རྣམ་རྟོག་རགས་པ་འགའ་ཞིག་འཇིག་པ་དང་། སེམས་གནས་པའི་ཏིང་ངེ་འཛིན་ཕྲ་མོ་སྐྱེ་བའི་ཐབས་སུ་གྱུར་པ་དད་པ་ཆེན་པོས་སོགས་སོ། །དྲུག་པ་མ་དག་པའི་ཤེས་རབ་ནི། སངས་རྒྱས་གསུང་དང་། ཞེས་སོགས་ཚིགས་བཅད་གཅིག་སྟེ། འོད་ཟེར་བཀྱེ་བའི་མདོ་ལས། ཡང་དག་ཆོས་ནི་སྤོང་བྱེད་ཅིང་། །ཆོས་མ་ཡིན་པ་སྤྱོད་པར་བྱེད། །དེ་ལྟ་བས་ནི་རྨོངས་པ་ཡི། །སྐྱེས་བུ་དམན་པ་སྤོང་བར་བྱེད། །ཞེས་གསུངས་པ་ལྟར་རོ། །བདུན་པ་མ་དག་པའི་དད་པ་ནི། བླ་མ་ངན་ལ་ཞེས་སོགས་ཚིགས་བཅད་གཅིག་སྟེ། སློབ་དཔོན་ཤཱནྟི་པས། དད་པ་མེད་པ་གཙོ་བོའི་དགྲ། །ལྷག་དད་ཤིན་ཏུ་གོལ་བའི་གནས། །ཞེས་གསུངས་པ་ལྟར་རོ། །བརྒྱད་པ་མ་དག་པའི་སྙིང་རྗེ་ནི། ནད་པ་དགའ་བའི་ཞེས་སོགས་ཚིགས་བཅད་གཉིས་ཏེ། མ་དག་པའི་སྙིང་རྗེ་བཞི་ལས། དང་པོ་ནི། འདུལ་བ་ལུང་ལས། བྲན་མོ་སྐྱོང་མས་ཁྱིམ་བདག་ནད་པའི་མགོ་ལ་སྡོང་དུམ་གཞུག་པ་ལྟ་བུ་དང་། གཉིས་པ་ནི་རྡོ་རྗེ་གུར་ལས། གདུག་ལ་བྱམས་པར་མི་བྱ་ཞིང་། །ཞེས་པ་ལྟ་བུ་དང་། གསུམ་པ་ནི་རྩ་ལྟུང་བཅུ་བཞི་པ་ལས། ཡོངས་སུ་མ་སྨིན་སེམས་ཅན་ལ། །གསང་བ་བསྒྲོགས་པ་བདུན་པ་ཡིན། །ཞེས་པ་ལྟ་བུ་དང་། བཞི་པ་ནི་བསླབ་བཏུས་ལས། བློ་སྦྱང་མ་བྱས་སེམས་ཅན་ལ། །སྟོང་པ་ཉིད་ནི་སྟོན་པ་དང་། །ཞེས་པ་ལྟ་བུ་སྟེ། སྤྱིར་སྣོད་མ་ཡིན་པ་ནི། རྣམ་བཤད་རིགས་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་བསྡུ། །སྐྱོ་བས་ཉན་པ་དྲི་མ་ཡིན། །ཞེས་པ་ལྟར་རོ། །དགུ་པ་མ་དག་པའི་བྱམས་པ་ནི། གདུག་པ་ཅན་ལ་ཞེས་སོགས་དྲུག་སྟེ། དང་པོ་ནི་རྩ་ལྟུང་བཅུ་བཞི་པ་ལས། གདུག་ལ་རྟག་ཏུ་བྱམས་ལྡན་པ། །བྱེད་པ་དེ་ནི་བཅུ་པར་འདོད། །ཅེས་པ་ལྟ་བུའོ། །གཉིས་པ་ནི་རྡོ་རྗེ་གུར་ལས། རྟག་ཏུ་སློབ་མ་བསྡུ་བྱ་ཞིང་། །ཞེས་དང་། འདུལ་བ་ལས། མཁན་པོས་མཁན་བུ་ལ། བུའི་འདུ་ཤེས་བསྐྱེད་པར་གསུངས་པ་དང་། གསུམ་པ་ནི་བརྟག་གཉིས་ལས། རྡོ་རྗེ་དེ་ཉིད་ཀྱིས་ནི་རྭ་བ་དང་། །གུར་བཅིང་བ་ཡང་རྣམ་པར་བསྒོམ་པ་ཉིད། །ཅེས་དང་། བཞི་པ་ནི་རྡོ་རྗེ་རྣམ་འཇོམས་ལས། རྡོ་རྗེ་ཁྲོ་བོ་ལས་བྱུང་བ། །ཞེས་པ་དང་། གདོན་ཐམས་ཅད་བརླག་པར་བྱེད་པ་ཞེས་པ་ལྟ་བུ་སྟེ། དེ་དག་འགོག་ན་རྒྱུད་སྡེ་དེ་དག་དང་འགལ་ལོ། །བཅུ་པ་མ་དག་པའི་ཐབས་ལམ་ནི། མདོ་རྒྱུད་ཀུན་ལས་ཞེས་སོགས་ཚིགས་བཅད་གཉིས་ཏེ། ཐབས་ལམ་སྟོན་པའི་མདོ་རྒྱུད་ཀུན་ལས་མ་གསུངས་ཤིང་། རིགས་པས་བསྒྲུབ་པར་མི་ནུས་པའི་དྲོད་དང་བདེ་བ་དང་། མི་རྟོག་པ་ལྟར་སྣང་སྐྱེ་བ་སོགས་མ་དག་པའི་ཐབས་ལམ་ཡིན་ཏེ། ནད་གདོན་ཅུང་ཟད་སེལ་བའི་སྒོ་ནས། བླུན་པོ་དགའ་བ་བསྐྱེད་ན་ཡང་། ཐབས་ལམ་དེ་ལྟ་བུ་ནི་མུ་སྟེགས་བྱེད་ལ་ཡང་ཡོད་པའི་ཕྱིར་རོ། །བཅུ་གཅིག་པ་མ་དག་པའི་སྨོན་ལམ་ནི། བདག་ལྟའི་རྩ་བ་ཞེས་སོགས་དྲུག་གོ །གཉིས་པ་དེ་ཤེས་ནས་སྤོང་བར་གདམས་པ་ནི། དེ་ལ་སོགས་པ་ཞེས་སོགས་ཚིགས་བཅད་གཅིག་སྟེ། གོང་དུ་བཤད་པའི་བཅུ་གཅིག་པོ་དེ་དག་ལ་སོགས་པ་མཐའ་ཡས་པ་ཐེག་པ་ཆེན་པོའི་ཕ་རོལ་ཏུ་ཕྱིན་པ་དང་། གསང་སྔགས་ཀྱི་སངས་རྒྱས་ཀྱི་གསུང་གི་གནད་འཆུགས་པས་ཐེག་པ་ཆེན་པོའི་དགེ་བ་བྱེད་པར་སྣང་ན་ཡང་མ་དག་པར་ཤེས་པར་བྱས་ནས་སྤང་བར་བགྱི་སྟེ། ཐུབ་པ་དགོངས་གསལ་ལས། དགེ་བའི་རྩ་བ་འགའ་ཞིག་མཐོ་རིས་ལྷ་དང་མིའི་ཕུན་སུམ་ཚོགས་པར་འགྲོ། འགའ་ཞིག་ཉན་ཐོས་དང་རང་སངས་རྒྱས་ཀྱི་རྒྱུར་འགྲོ་བས། དེ་བཟློག་པའི་དོན་དུ་ཐབས་ཀྱིས་མྱ་ངན་ལས་འདས་པའི་མཐའ་མནན། ཤེས་རབ་ཀྱིས་འཁོར་བའི་མཐའ་མནན། བརྩོན་འགྲུས་ཀྱི་སྟོབས་ཀྱིས་དེ་གཉིས་མྱུར་དུ་མཐར་ཕྱིན་པར་བྱས་ནས་སྦྱིན་པས་མཚོན་པའི་དགེ་བ་ཅུང་ཟད་བྱས་པ་ཐམས་ཅད་མྱུར་དུ་མངོན་པར་རྫོགས་པར་འཚང་རྒྱ་བའི་རྒྱུར་འགྱུར་བ་ལ་བསླབ་སྟེ། མདོ་ལས། གང་ཟག་རྒྱལ་བ་རྣམ་འདྲེན་ལ། །བྱེད་པ་ཆུང་ངུའང་བྱེད་འགྱུར་བ། །དེ་དག་མཐོ་རིས་སྣ་ཚོགས་པར། །བགྲོད་ནས་འཆི་མེད་གནས་ཐོབ་བོ། །ཞེས་གསུངས་སོ། །གསུམ་པ་བསྟན་པ་རྣམ་པར་དག་པས་མཇུག་བསྡུ་བ་ནི། མདོར་ན་སངས་རྒྱས་ཞེས་སོགས་ཚིགས་བཅད་གཅིག་སྟེ། མཛོད་ལས། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར། །ཞེས་གསུངས་པ་ལྟར་གཞི་ཚུལ་ཁྲིམས་ལ་གནས་ནས་ཐོས་བསམ་སྒོམ་གསུམ་བསྒྲུབ་པ་ནི་སངས་རྒྱས་ཀྱི་བསྟན་པའི་དངོས་གཞི་ཡིན་ཅིང་། ཐོས་བསམ་སྒོམ་གསུམ་དེ་སངས་རྒྱས་ཀྱི་གསུང་རབ་དང་མཐུན་པ་ཇི་ལྟར་བསྒྲུབ་པའི་ཚུལ་གོང་དུ་སོ་སོ་ཐར་པའི་སྐབས་སུ་བཤད་པ་ལྟར་ཤེས་པར་བྱའོ། །བྱང་ཆུབ་སེམས་དཔའི་སྡོམ་པའི་སྐབས་ཏེ་གཉིས་པའི་རྣམ་པར་བཤད་པའོ།། །།གསུམ་པ་སྔགས་སྡོམ་ཉམས་སུ་ལེན་པའི་ཚུལ་ལ་གཉིས་ཏེ། སྤྱིའི་རྣམ་པར་བཞག་པ་དང་། གཞུང་གི་དོན་ལ་འཇུག་པའོ། །དང་པོ་ལ་གཉིས་ཏེ། རྗོད་བྱེད་རྒྱུད་སྡེའི་རྣམ་གཞག བརྗོད་བྱ་ཉམས་ལེན་གྱི་རིམ་པའོ། །དང་པོ་ལ་བཞི་སྟེ། ཕ་རོལ་ཏུ་ཕྱིན་པའི་ཐེག་པ་ལས་རྡོ་རྗེ་ཐེག་པ་ཁྱད་པར་དུ་འཕགས་པའི་ཚུལ། ཁྱད་པར་འཕགས་པའི་རྒྱུད་སྡེའི་དབྱེ་བ། དབྱེ་བ་དེ་ལྡན་གྱི་གྲངས་དང་གོ་རིམ་ངེས་པ། གྲངས་ངེས་པའི་རྒྱུད་ཀྱི་སྒྲ་བཤད་པའོ། །དང་པོ་ནི། སློབ་དཔོན་ཛྙཱ་ན་ཤྲཱིས། གསང་སྔགས་ཀྱི་ཐེག་པ་འདི་ཐེག་པ་ཆེན་པོ་དབུ་མ་ལས་ཁྱད་པར་ཅི་ཞིག་ཡོད་པ་བསྟན་ཅེ་ན། དམིགས་པ་དང་། བསྒྲུབ་པ་དང་། ཡེ་ཤེས་དང་། བརྩོན་འགྲུས་དང་། གདུལ་བྱ་མ་ལུས་པ་རྗེས་སུ་འཛིན་ནུས་པ་དང་། ཉོན་མོངས་བྱིན་གྱིས་རློབ་པ་དང་། བྱིན་གྱིས་རློབ་པ་མྱུར་བ་དང་། མྱུར་དུ་འབྱུང་བ་དང་། ཉོན་མོངས་པ་སྤོང་བ་དང་། བསམ་པ་དང་། སྤྱོད་པ་བླ་ན་མེད་པའི་ཐབས་མཁས་པ་སྟེ། རྣམ་པ་བཅུ་གཅིག་གིས་ཁྱད་པར་དུ་འཕགས་སོ། །ཞེས་པའི་དང་པོ་ནི། དགྱེས་པ་རྡོ་རྗེ་ལ་སོགས་པའི་རྒྱུད་སྡེ་བསམ་གྱིས་མི་ཁྱབ་པ་ལ་དམིགས་པའོ། །གཉིས་པ་ནི། བསྐྱེད་པའི་རིམ་པ་ལ་བརྟེན་ནས་ལུས་ཀྱི་བཀོད་པ་སྣ་ཚོགས་པ་དང་། ཏིང་ངེ་འཛིན་གྱི་སྟོབས་ཀྱིས་ཀྱང་སྟོན་ནུས་པའོ། །གསུམ་པ་ནི། རྒྱུ་དང་། ངོ་བོ་དང་། ལས་དག་པ་ཡེ་ཤེས་མྱུར་དུ་འགྲུབ་པའོ། །བཞི་པ་ནི། དམ་ཚིག་རྣམ་པར་དག་པའི་དབང་གིས་བརྩོན་འགྲུས་ཆེན་པོ་མྱུར་དུ་བརྩམ་པའོ། །ལྔ་པ་ནི། མཚམས་མེད་པ་ལྔ་བྱེད་པ་ལ་སོགས་པ་ཐེག་པ་གཞན་དུ་སྤངས་པ་རྣམས་ཀྱང་འདིར་འགྲུབ་པར་འགྱུར་བའོ། །དྲུག་པ་ནི། ལྷ་མཆོད་པའི་ཚུལ་དང་བདེ་བ་ལ་བརྟེན་པའི་རྫོགས་རིམ་ལ་སོགས་པའོ། །བདུན་པ་ནི། ད་ལྟ་ཉིད་ནས་སངས་རྒྱས་ཀྱིས་དབང་བསྐུར་ཞིང་བྱིན་གྱིས་བརླབ་པའོ། །བརྒྱད་པ་ནི། །ཚེ་འདི་དང་སྐྱེ་བ་བདུན་ནམ། བཅུ་དྲུག་ན་ངེས་པར་འཚང་རྒྱ་བའོ། །དགུ་པ་ནི། དབྱིབས་དང་ཁ་དོག་གི་དམ་ཚིག་གིས་ཉོན་མོངས་པ་རང་བཞིན་གྱིས་གྲོལ་བའོ། །བཅུ་པ་ནི་བསྐྱེད་རིམ་གྱི་དམིགས་པས་ཐ་མལ་གྱི་སྣང་བ་འགགས། གསང་སྔགས་བཟླས་པས་ངག་རྒྱལ་བའི་བཀར་འགྱུར། ཐུགས་ཀྱི་རྣལ་འབྱོར་གྱིས་ཆོས་ཐམས་ཅད་སྒྱུ་མ་ལྟ་བུར་ཤེས་ཤིང་ཉོན་མོངས་པ་ཚད་མེད་པ་སྤོང་བའོ། །བཅུ་གཅིག་པ་ནི། དཀའ་ཐུབ་སྡོམ་པ་མི་བཟད་པ། །བསྟེན་པས་འགྲུབ་པར་མི་འགྱུར་གྱི། །འདོད་པའི་ལོངས་སྤྱོད་ཐམས་ཅད་ལ། །བརྟེན་ན་མྱུར་དུ་འགྲུབ་པར་འགྱུར། །ཞེས་པ་ལྟར་འདོད་པའི་ལོངས་སྤྱོད་ཐམས་ཅད་ལ་རྣམ་པར་རྟོག་པ་སྤངས་ནས་སྤྱོད་པའོ། །སློབ་དཔོན་ཤཱནྟི་པས། ཕ་རོལ་ཏུ་ཕྱིན་པ་དང་སྔགས་ཀྱི་ཐེག་པ་ལ་དོན་དམ་པའི་བདེན་པ་ཁྱད་པར་མེད་ཀྱང་། ཀུན་རྫོབ་ཀྱི་བདེན་པའི་ཁྱད་པར་ལ་སྣང་བའི་དམིགས་པ་རྣམས་ལྷར་བསྒོམས་པས་དམིགས་པ་རྒྱ་ཆེ་བ་དང་། དུས་གསུམ་གྱི་སངས་རྒྱས་ཀྱི་བདེན་པའི་དམ་ཚིག་རྣམས་ཡིད་བཞིན་དུ་བཟུང་བས་བྱིན་རླབས་ཁྱད་པར་ཅན་སྐྱེ་བས་གྲོགས་རྒྱ་ཆེ་བ་དང་། འགྲོ་བའི་དོན་དང་ཞིང་ཡོངས་སུ་དག་པ་ད་ལྟ་ཉིད་ནས་སྦྱོང་བས་སྤྱོད་པ་རྒྱ་ཆེ་བ་སྟེ། གསུམ་པོ་འདིས་རྡོ་རྗེ་ཐེག་པ་ཁྱད་པར་དུ་འཕགས་པར་བཞེད་དོ། །རྗེ་བཙུན་ས་སྐྱ་པ་རྣམས་ཀྱིས་ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པ་ལྟར་བཞེད་དེ། རྒྱུད་སྡེ་སྤྱིའི་རྣམ་གཞག་ཏུ་བལྟ་བར་བྱའོ། །གཉིས་པ་ལ་ལྔ་སྟེ། གཉིས་སུ་དབྱེ་བ། གསུམ་དུ། བཞི་རུ། ལྔ་རུ། དྲུག་ཏུ་དབྱེ་བའོ། །དང་པོ་ནི། རྡོ་རྗེ་རྩེ་མོར། ཕྱི་དང་གསང་བ་ཐེག་པ་གསུམ། །ཞེས་ཕྱིའི་རྒྱུད་དང་གསང་བའི་རྒྱུད་གཉིས་སུ་གསུངས་སོ། །འཇིག་རྟེན་གསུམ་རྒྱལ་གྱི་རྟོག་པའི་འགྲེལ་པ་ལས། གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་ལམ་ཡང་། སངས་རྒྱས་བཅོམ་ལྡན་འདས་ཀྱིས་རྣམ་པ་གཉིས་སུ་གསུངས་ཏེ། སེམས་ཅན་རྟོག་པ་མང་བ་རྣམས་ཀྱི་དོན་དུ་བྱ་བའི་རྒྱུད་རྣམས་གསུངས་སོ། །གཅིག་ཁོ་ནར་རྣལ་འབྱོར་གྱིས་བསྒྲུབ་པར་འདོད་པ་རྣམས་ལ་རྣལ་འབྱོར་གྱི་རྒྱུད་རྣམས་བཤད་དོ། །ཞེས་བྱ་བའི་རྒྱུད་དང་རྣལ་འབྱོར་གྱི་རྒྱུད་གཉིས་སུ་གསུངས་སོ། །གཉིས་པ་ནི་སྔགས་དོན་རྣམ་གཟིགས་ལས། རྣལ་འབྱོར་སྤྱོད་དང་བྱ་བའི་རྒྱུད། །དེ་བཞིན་ཕ་རོལ་ཏུ་ཕྱིན་པའི་ཚུལ། །ཞེས་དང་། སངས་རྒྱས་གསང་བས། རྣལ་འབྱོར་སྤྱོད་དང་བྱ་དབྱེ་བས། །ཞེས་བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་གྱི་རྒྱུད་གསུམ་དུ་གསུངས་སོ། །ཐམས་ཅད་གསང་བའི་རྒྱུད་ལས། བྱ་སྤྱོད་གཉིས་ཀ་རྣལ་འབྱོར་རྒྱུད། །ཞེས་གསུམ་དུ་གསུངས། གསུམ་པ་ནི་གཉིཾས་ཏེཾ། གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་མཆོག །རྣལ་འབྱོར་བླ་མེད་དེ་ལྟག་ལ། །ཞེས་རྒྱུད་སྡེ་བཞིར་གསུངས་སོ། །བཞི་པ་ནི། མཁའ་འགྲོ་རྒྱ་མཚོར། བྷ་ག་རྣམས་སུ་རྒྱུད་རྣམས་ལྔ། །བྱ་བ་ལ་སོགས་བླ་མེད་མཐར། །ཞེས་ལྔ་དང་། ཤཱནྟི་པས། བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་རྒྱུད། རྣལ་འབྱོར་ཆེན་པོའི་རྒྱུད། རྣལ་འབྱོར་བླ་ན་མེད་པའི་རྒྱུད་སྡེ་ལྔར་གསུངས་སོ། །རྒྱ་གར་ཕྱག་ན་རྡོ་རྗེས་སྔ་མ་གསུམ་གྱི་སྟེང་དུ་བླ་ན་མེད་པ་དང་། གོང་ན་མེད་པའི་རྒྱུད་ལྔ་ཞེས་དང་། རབ་ཏུ་སྒྲོན་གསལ་ལས། སྔ་མ་གསུམ་གྱི་སྟེང་དུ་རྣལ་འབྱོར་བླ་མ་དང་། རྣལ་འབྱོར་མའི་རྒྱུད་དང་ལྔ་ཞེས་དང་། སློབ་དཔོན་བྷ་བའི་ལྷ་ལ་སོགས་པས་ཀྱེ་རྡོ་རྗེ་ལས། དགོད་དང་བལྟ་བ་དག་གིས་དང་། །འཁྱུད་དང་དེ་བཞིན་གཉིས་གཉིས་ཀྱིས། །རྒྱུད་ཀྱང་རྣམ་པ་བཞི་རྣམས་ཀྱི། །དགོངས་པའི་སྐད་ནི་མ་བསྒྲགས་པ། །ཞེས་བཞིར་མ་བསྒྲགས་པ་ཞེས་པའི་ཤུགས་ཀྱིས། ལྔ་སྟོན་ཞེས་གསུངས་སོ། །ལྔ་པ་ནི་བདེ་མཆོག་རྩ་རྒྱུད་ལས། ཇི་སྲིད་མདོ་བྱ་སྤྱོད་པ་དང་། །རྣལ་འབྱོར་གསང་མཐའི་དབྱེ་བ་ཡིས། །སེམས་ཅན་མོས་པ་སྣ་ཚོགས་པ། །དེ་དང་དེ་ལ་དགའ་བ་ཡིན། །ཞེས་མདོ་སྡེ་རྟོག་པའི་རྒྱུད་དང་། བྱ་བ། སྤྱོད་པ། རྣལ་འབྱོར། རྣལ་འབྱོར་གསང་བ། གསང་བའི་མཐའ་སྟེ་དྲུག་ཏུ་གསུངས་སོ། །གསུམ་པ་ལ་གསུམ་སྟེ། གྲངས་ངེས་པ། དེ་ལ་རྩོད་པ་སྤང་བ། གོ་རིམ་ངེས་པའོ། །དང་པོ་ནི། དེ་ལྟར་དབྱེ་སྒོ་དུ་མ་གསུངས་ཀྱང་། རྒྱུད་སྡེ་རྣམ་པ་བཞིར་གྲངས་ངེས་ཏེ། ཕྱི་རོལ་མུ་སྟེགས་ཀྱི་ལོག་པའི་སྤྱོད་པ་རྣམ་པ་བཞི་སྨྲ་བ་རྗེས་སུ་གཟུང་བའི་ཕྱིར་དུ་རྒྱུད་སྡེ་བཞི་གསུངས། སངས་རྒྱས་པའི་གྲུབ་མཐའ་བཞི་དང་ལུང་སྒོ་བསྟུན་གྱི་དབང་དུ་བྱས་ནས་རྒྱུད་སྡེ་བཞིའི་བསྐྱེད་ཆོག་བཞི་གསུངས། འདོད་པ་ཁམས་ཀྱི་འདོད་ཆགས་རིགས་བཞི་མ་སྤངས་ཀྱང་བྱང་ཆུབ་བསྒྲུབ་པའི་ཕྱིར་དུ་རྒྱུད་སྡེ་བཞིའི་བདེ་བ་བཞི་གསུངས་པའི་ཕྱིར་ཏེ། དང་པོ་ནི། འདོད་ཆགས་ཅན་ལྷ་ཆེན་པོའི་རྗེས་སུ་འབྲངས་ནས་འདོད་ཆགས་ཆོས་སུ་སྨྲ་བ་རྗེས་སུ་གཟུང་བའི་ཕྱིར་དུ་བླ་མེད་ཀྱི་རྒྱུད་གསུངས་ཏེ། གསང་བ་འདུས་པ་ལས། ཕྱག་ཆེན་ཡེ་ཤེས་འདོད་པ་ཡིས། །རྟག་ཏུ་འདོད་ཡོན་ལྔ་རྣམས་བསྟེན། །ཞེས་དང་། བདེ་མཆོག་ལས། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཞེས་སོ། །ཞེ་སྡང་ཅན་ཁྱབ་འཇུག་གི་རྗེས་སུ་འབྲངས་ནས་འཚེ་བ་ཆོས་སུ་སྨྲ་བ་རྣམས་རྗེས་སུ་གཟུང་བའི་ཕྱིར་དུ་སྤྱོད་པའི་རྒྱུད་གསུངས་ཏེ། ཁྲོ་བོ་ཁམས་གསུམ་རྣམ་རྒྱལ་གྱི་རྟོག་པ་ལས། བཅོམ་ལྡན་འཇམ་པའི་དབྱངས་ཉིད་ནི། །ཁྲོ་བོའི་མིང་ནི་གཤིན་རྗེའི་གཤེད། །དེ་མཐོང་བས་ནི་ཁྲོ་བོ་གཞན། །ཐམས་ཅད་ཐམས་ཅད་ལག་ཆ་ཤོར། །ཞེས་དང་། ཡང་དེ་ཉིད་ལས། དེ་ནས་འདིར་ནི་གསད་བྱ་བ། །ཇི་ལྟར་ཡང་དག་སྦྱོར་ལྡན་པས། །དོགས་པ་མེད་པར་འགྲུབ་པར་འགྱུར། །གསོད་བའི་མཆོག་ནི་བཤད་པར་བྱ། །ཞེས་སོ། །གཏི་མུག་ཅན་ཚངས་བའི་རྗེས་སུ་འབྲངས་ནས་གཙང་སྦྲ་ཆོས་སུ་སྨྲ་བ་རྣམས་རྗེས་སུ་བཟུང་བའི་ཕྱིར་དུ་བྱ་བའི་རྒྱུད་གསུངས་ཏེ། ལེགས་གྲུབ་ལས། ཤ་ཆང་ཀེ་འུ་ཙོང་དང་སྒོག་རྡོག་དང་། །འབྲུ་མར་ཏིལ་དང་ལ་ཕུག་སུ་ར་ཎ། །འབྱུང་པོའི་ཤ་དང་ལྷ་བཤོས་གཏོར་མ་དང་། །གུ་ལང་མཆོད་བྱས་གཏོར་མ་མི་ཟའོ། །ངས་ནི་སྔགས་པས་ཁ་ཟས་དཀར་གསུམ་དང་། །རྩ་བ་སྡོང་བུ་འབྲས་བུ་ཚོད་མ་དང་། །འབྲུ་མར་ཚིགས་མ་དར་བ་འོ་བསྐོལ་དང་། །ཐུག་པ་རྣམས་ནི་བཟའ་བཏུང་ཡིན་པར་གསུངས། །ཞེས་སོ། །རྐྱེན་མཉམ་པ་སྐབས་ཐོབ་ཀྱིས་གསུམ་ཀའི་རྗེས་སུ་འབྲངས་ནས་གསུམ་ཀ་ཆོས་སུ་སྨྲ་བ་རྣམས་རྗེས་སུ་གཟུང་བའི་ཕྱིར་དུ་རྣལ་འབྱོར་གྱི་རྒྱུད་གསུངས་ཏེ། དེ་ཉིད་འདུས་པའི་དུམ་བུ་དང་པོར། འདོད་ཆགས་ཅན་རྗེས་སུ་གཟུང་བའི་ཕྱིར་དུ་ལྷ་ཐམས་ཅད་ཆགས་པའི་ཉམས་ཅན། གཉིས་པར་ཞེ་སྡང་ཅན་རྗེས་སུ་གཟུང་བའི་ཕྱིར་དུ་ཁྲོ་བོའི་ཉམས་ཅན། གསུམ་པར་གཏི་མུག་ཅན་རྗེས་སུ་གཟུང་བའི་ཕྱིར་དུ་ཞི་བའི་ཉམས་ཅན་དང་། བཞི་པར་མ་ངེས་པ་རྗེས་སུ་གཟུང་བའི་ཕྱིར་དུ་སྐུ་མདོག་དང་ཉམས་སྣ་ཚོགས་པར་གསུངས་སོ། །འདི་ནི་དེ་ཉིད་འདུས་པའི་རྒྱུད་ཀྱི་རྗེས་སུ་འབྲངས་ནས་རབ་འབྱོར་བསྐྱངས་དང་ཀུན་དགའ་སྙིང་པོ་ལ་སོགས་པར་བཞེད་པར་གྲག་གོ །ཞེས་རྗེ་བཙུན་རྩེ་མོས་གསུངས་སོ། །དེ་ལ་ཕྱིས་ཀྱི་བླ་མ་ཁ་ཅིག གང་ཟག་དེ་དག་རྒྱུད་སྡེ་དེ་དང་དེས་འདུལ་སྲིད་པ་ལ་བྱེད་ན་ནི། དེས་མི་འདྲ་བའི་ཁྱད་པར་ངོས་མི་ཟིན་ཏེ། རྒྱུད་སྡེ་རེ་རེས་ཀྱང་གང་ཟག་བཞི་ཀ་འདུལ་སྲིད་པའི་ཕྱིར་རོ། །གདུལ་བྱའི་གཙོ་བོ་ལ་དེ་དག་དགོས་པར་འདོད་ན་ནི། ཤིན་ཏུ་མི་རིགས་ཏེ། སྔགས་ཀྱི་ཐེག་པའི་གདུལ་བྱའི་གཙོ་བོ་རྣམས་ནི་རྒྱལ་བའི་བསྟན་པ་ལ་འཇུག་པའི་གདུལ་བྱ་མཆོག་ཡིན་པས། དེ་ལ་སྔོན་དུ་ལྟ་བ་ལོག་པ་ལ་ཞུགས་པ་ཅིག་མི་དགོས་པའི་ཕྱིར་དང་། དང་པོ་ནས་ཡང་དག་པའི་གྲུབ་མཐའ་ལ་ཞུགས་པ་རྣམས་རྒྱུད་དེ་དག་གི་གདུལ་བྱའི་གཙོ་བོར་མི་འགྱུར་བའི་སྐྱོན་ཡོད་པའི་ཕྱིར་རོ། །ཀུན་སྙིང་གི་བཞེད་པ་ཡང་མིན་ཏེ། དེས་མཛད་པའི་གསང་འདུས་ཀྱི་འགྲེལ་པ་ལས། ཁྱབ་འཇུག་ལ་སོགས་པའི་རྒྱུད་ལ་དགའ་བ་ལ། བླ་མེད་ཀྱི་འདོད་ཆགས་ཀྱི་ཀུན་སྤྱོད་རྣམས་བསྟན་པར་གསུངས་པའི་ཕྱིར་རོ། །དེས་ན་དེ་ཉིད་འདུས་པའི་དུམ་བུ་བཞི་འདོད་ཆགས་དང་། ཁྲོ་བ་ལ་སོགས་པའི་ཉོན་མོངས་པ་ཅན་ལ་གསུངས་པ་ལ་དཔགས་ནས་སྦྱར་བ་ཙམ་དུ་སྣང་བས་ཤེས་བྱེད་མི་སྣང་ངོ་ཞེས་ཟེར་རོ། །འོ་ན་ཁྱབ་འཇུག་ལ་སོགས་པ་ལ་བླ་མེད་ཀྱི་འདོད་ཆགས་ཀྱི་ཀུན་སྤྱོད་བསྟན་པར་གསུངས་པ་དེ་ཡང་འདུལ་སྲིད་པ་ཙམ་ལ་དགོངས་པ་ཡིན་ནམ། གདུལ་བྱའི་གཙོ་བོ་ལ་དེ་དག་དགོས་པ་ཡིན་བརྟགས་ན་སྔ་མ་ཇི་ལྟ་བ་བཞིན་དུ་མཚུངས་ཤིང་། དེ་ཉིད་འདུས་པའི་དུམ་བུ་བཞི་འདོད་ཆགས་དང་ཁོང་ཁྲོ་བ་ལ་སོགས་པའི་ཉོན་མོངས་ཅན་ལ་གསུངས་པ་ཡང་བརྟགས་ན་སྔ་མ་བཞིན་དུ་མཚུངས་སོ། །དེ་བཞིན་དུ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་གསུངས་པ་དང་། འདོད་ཆགས་ཞེ་སྡང་གཏི་མུག་གིས། །རྒྱུད་ཀྱང་རྣམ་པ་གསུམ་དུ་འགྱུར། །ཞེས་པ་རྒྱུད་སྡེ་གསུམ་དུག་གསུམ་གྱི་གཉེན་པོར་གསུངས་པ་སོགས་སྤང་བྱ་གང་སྤོང་བའི་ཆེད་དུ་ཆོས་ཀྱི་ཕུང་པོ་གང་གསུངས་པ་མཐའ་དག་ལ་མཚུངས་པས། རྒྱལ་བའི་བསྟན་པ་སུན་འབྱིན་པའི་དགག་སྒྲུབ་འབའ་ཞིག་ཏུ་སྣང་ངོ་། །ཁྱབ་འཇུག་གི་ཞེ་སྡང་འདུལ་བའི་ཆེད་དུ་བླ་མེད་གསུངས་པ་དང་། དེའི་འདོད་ཆགས་འདུལ་བའི་ཆེད་དུ་བླ་མེད་གསུངས་པ་འགལ་བར་འདོད་པ་ཡང་དོན་མ་རྟོགས་པ་སྟེ། ཁྱབ་འཇུག་ལ་འདོད་ཆགས་དང་། ཞེ་སྡང་གཉིས་ཀ་ཤས་ཆེན་པོར་ཡོད་ཅིང་། བླ་མེད་ལས་ཀྱང་འདོད་ཆགས་དང་ཞེ་སྡང་གི་ཀུན་སྤྱོད་གཉིས་ཀ་གསུངས་པའི་ཕྱིར་རོ། །གཉིས་པ་ནི། སངས་རྒྱས་པའི་མཚན་ཉིད་ཀྱི་ཐེག་པའི་གྲུབ་མཐའ་ལ་བརྗོད་དུ་མེད་པའི་གང་ཟག་གི་བདག་ཁས་ལེན་པ་དང་། དེ་ཁས་མི་ལེན་ཀྱང་རྡུལ་ཕྲན་དང་ཤེས་པ་སྐད་ཅིག་ཆ་མེད་བདེན་པར་ཁས་ལེན་པ་དང་། གཟུང་བྱའི་ཡུལ་བདེན་པར་མེད་ཀྱང་འཛིན་པའི་ཤེས་པ་སྐད་ཅིག་མ་ཡོད་པར་ཁས་ལེན་པ་དང་། གཟུང་འཛིན་གཉིས་ཀ་བདེན་པར་མེད་པར་ཁས་ལེན་པ་དང་བཞི་ཡོད་པས་དེ་དང་ལུང་སྒོ་བསྟུན་གྱི་དབང་དུ་བྱས་ནས། བྱ་རྒྱུད་ལ་མདུན་དུ་ཡེ་ཤེས་སེམས་དཔའ་སྤྱན་དྲངས་ཤིང་། བདག་ཉིད་ཐ་མལ་དུ་གནས་པ་དང་། སྤྱོད་རྒྱུད་ལ་བདག་ཉིད་ཀྱང་ལྷར་བསྐྱེད་ནས་མདུན་དུ་ཡེ་ཤེས་སེམས་དཔའ་སྤྱན་དྲངས་ནས་བདག་ལ་བསྟིམ་པ་དང་། རྣལ་འབྱོར་གྱི་རྒྱུད་དུ་བདག་དམ་ཚིག་པར་བསྐྱེད་ནས། དེ་ལ་ཡེ་ཤེས་པ་བཅུག་པ་དང་། བླ་མེད་དུ་ཐུན་མཚམས་ཀྱི་གནས་སྐབས་སུ་ཡང་ཡེ་ཤེས་སེམས་དཔའ་གཤེགས་པར་མི་འདོད་པ་སྟེ། བསྐྱེད་ཆོག་བཞི་རིམ་པ་བཞིན་དུ་གསུངས་སོ། །དེ་ལ་ཕྱིས་ཀྱི་བླ་མ་ཁ་ཅིག་སངས་རྒྱས་པའི་གྲུབ་མཐའ་སྨྲ་བ་བཞི་དང་སྒོ་བསྟུན་ནས་ལྷའི་བསྐྱེད་ཆོག་མི་འདྲ་བ་བཞིའི་སྒོ་ནས་རྒྱུད་སྡེ་བཞིར་འཇོག་པ་ལ་ཤེས་བྱེད་ཅི་ཡང་མི་སྣང་ཞིང་། རང་སངས་རྒྱས་དང་། རྣལ་འབྱོར་རྒྱུད་ཀྱི་བསྐྱེད་ཆོག་སྦྱར་ཡང་། རང་རྒྱལ་གྲུབ་མཐའ་སྨྲ་བ་བཞིའི་ཡ་གྱལ་མ་ཡིན་པའི་ཕྱིར་མི་འཐད་དོ། །འདིར་འཕགས་པ་ཡབ་སྲས་ཀྱི་བཞེད་པར་འདོད་པ་ཡང་། ཡེ་ཤེས་རྡོ་རྗེས་ཀུན་ལས་བཏུས་ལས། བྱ་རྒྱུད་ཀྱི་སྐབས་སུ་རང་ཉིད་ལྷའི་སྙེམས་པ་མེད་པ་དང་། ཡེ་ཤེས་སེམས་དཔའི་བདེ་བ་མེད་པར་བཤད་པ་ཙམ་ལ་དཔགས་པར་སྣང་ཡང་། བྱ་རྒྱུད་ལ་བདག་བསྐྱེད་མེད་པ་ཡེ་ཤེས་རྡོ་རྗེས་ཀུན་ལས་བཏུས་པའི་ལུང་དོན་མ་ཡིན་པ་འཆད་པར་འགྱུར་རོ། །ཞེས་ཟེར་རོ། །འདི་ནི་ཕྱོགས་སྔའི་དོན་མ་རྟོགས་བཞིན་དུ་དགག་པ་བྱེད་པ་སྟེ། མཚན་ཉིད་ཐེག་པ་ལ་གྲུབ་མཐའ་མི་འདྲ་བ་བཞི་ཡོད་པས་དེ་དང་ལུང་སྒོ་བསྟུན་གྱི་དབང་དུ་བྱས་ནས་བསྐྱེད་ཆོག་བཞི་གསུངས་པར་སྨྲས་ཀྱི་གྲུབ་མཐའ་སྨྲ་བ་བཞིའི་སྒོ་ནས་རྒྱུད་སྡེ་བཞིར་འཇོག་པ་མ་སྨྲས་པའི་ཕྱིར་རོ། །དེས་ན་རང་སངས་རྒྱས་གྲུབ་མཐའ་སྨྲ་བ་བཞིའི་ཡ་གྱལ་མ་ཡིན་ཞེས་པ་ཡང་དོན་མ་རྟོགས་པ་ཁོ་ནའོ། །ཡེ་ཤེས་རྡོ་རྗེ་ཀུན་ལས་བཏུས་ལས། བྱ་རྒྱུད་ལ་བདག་བསྐྱེད་མེད་པར་བཤད་ཀྱང་། བྱ་རྒྱུད་ལ་བདག་བསྐྱེད་མེད་པ་དེའི་ལུང་དོན་མ་ཡིན་པ་འཆད་པར་འགྱུར་བ་ནི་ཤིན་ཏུ་ངོ་མཚར་ཏེ། འདི་འདྲ་ཅིར་འགྱུར་བརྟག་དགོས་སོ། །གསུམ་པ་ནི། འདོད་ཁམས་ཀྱི་གཞན་སྤྲུལ་དབང་བྱེད་པ་བལྟས་པ་ཙམ་གྱིས་ཆགས་པ་ཚིམ་ལ། དེ་ཙམ་གྱི་བདེ་བ་སྣང་བ་ནི་བྱ་བའི་རྒྱུད། འཕྲུལ་དགའ་བ་ནི་དགོད་པ་ཙམ་གྱིས་ཆགས་པ་ཚིམ་ལ། དེ་ཙམ་གྱི་བདེ་བ་སྣང་བ་ནི་སྤྱོད་པའི་རྒྱུད། དགའ་ལྡན་པ་དང་མཐའ་བྲལ་པ་ལག་བཅངས་དང་འཁྱུད་པ་ཙམ་གྱིས་ཆགས་པ་ཚིམ་ལ། དེ་ཙམ་གྱི་བདེ་བ་སྣང་བ་ནི་རྣལ་འབྱོར་གྱི་རྒྱུད། སུམ་ཅུ་རྩ་གསུམ་པ་དང་། རྒྱལ་ཆེན་རིས་བཞི་པ་དང་། མི་ལ་སོགས་པ་རྣམས་དབང་པོ་གཉིས་སྦྱོར་གྱིས་ཆགས་པ་ཚིམ་ལ། དེ་ཙམ་གྱི་བདེ་བ་སྣང་བ་ནི་བླ་མེད་ཀྱི་རྒྱུད་དོ། །གཉིས་པ་དེ་ལ་རྩོད་པ་སྤོང་བ་ནི། དེ་ལྟར་རྒྱུད་སྡེ་བཞིར་གྲངས་ངེས་ན་གཉིས་ལ་སོགས་པ་ནས་དྲུག་གི་བར་དུ་གསུངས་པ་དང་འགལ་ལོ་སྙམ་ན་སྐྱོན་མེད་དེ། གཉིས་སུ་གསུངས་པ་ནི་རྒྱུད་དེ་འོག་མ་གཉིས་ཕྱི་ལུས་ངག་གི་བྱ་བ་སྟོན་པར་མཚུངས་པས་བྱ་བའི་རྒྱུད་དུ་བསྡུས་ཤིང་། གོང་མ་གཉིས་ཏིང་ངེ་འཛིན་གཙོ་ཆེ་བར་མཚུངས་པས་རྣལ་འབྱོར་གྱི་རྒྱུད་དམ་གསང་བའི་རྒྱུད་དུ་བསྡུས་པ་ཡིན་ལ། གསུམ་དུ་བཤད་པ་ལ་ཡང་རྒྱུ་མཚན་ཕྱི་མ་འདི་ཉིད་མཚུངས་སོ། །ལྔར་དབྱེ་བ་ནི་བླ་མེད་ལ་རྣལ་འབྱོར་ཕ་མའི་དབྱེ་བ་ཤེས་པར་བྱ་བའི་ཕྱིར་དུ་གཉིས་སུ་ཕྱེ་བ་ཙམ་ཡིན་ཅིང་། དྲུག་ཏུ་གསུངས་པ་ནི། བྱ་རྒྱུད་ཀྱི་ནང་ཚན་ལས་ཚོགས་གཙོ་བོར་སྟོན་པ་ལ་རྟོག་པའི་རྒྱུད་ཅེས་ལོགས་སུ་བཞག་ཅིང་། ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས། རྒྱུད་སྡེ་ལྔར་ཕྱེ་བ་ལ་ཡང་རྒྱུ་མཚན་འདི་ཉིད་ཡིན་ལ། བླ་མེད་ཀྱི་ནང་ཚན་འཁོར་ལོ་བདེ་མཆོག་ཟབ་ཅིང་རྟོགས་པར་དཀའ་བ་དང་། རྒྱུད་འདིའི་ལུགས་ཀྱིས་སྤྲུལ་པའི་སྐུ་ད་ལྟ་འཛམ་བུའི་གླིང་ན་དངོས་སུ་བཞུགས་པས་བྱིན་རླབས་མྱུར་བ་ལ་དགོངས་ནས། གསང་བའི་མཐའ་ཞེས་ལོགས་སུ་ཕྱེའོ། །གསུམ་པ་གོ་རིམ་ངེས་པ་ནི། གང་ཟག་དབང་པོ་དང་། སྦྱངས་པ་ཆེ་འབྲིང་བཞི་ལ་དགོངས་ནས་རྒྱུད་སྡེ་བཞི་རིམ་པ་བཞིན་དུ་བཞག་སྟེ། བློ་དམན་པ་ཕྱིའི་བྱ་བ་ཁྲུས་ལ་སོགས་པ་ལ་དགའ་བ་ལ་བྱ་བའི་རྒྱུད། དེ་བས་མཆོག་ཕྱི་ལུས་ངག་དང་། ནང་ཏིང་ངེ་འཛིན་གཉིས་ཀ་ལ་སྤྱོད་པ་ལ་སྤྱོད་པའི་རྒྱུད། དེ་བས་ཀྱང་མཆོག་ཏིང་ངེ་འཛིན་ཁོ་ན་ལ་གཙོ་བོར་སྤྱོད་པ་ལ་རྣལ་འབྱོར་གྱི་རྒྱུད། དེ་བས་ཀྱང་མཆོག་ཏིང་ངེ་འཛིན་གྱི་ཁྱད་པར་གོང་ན་མེད་པ་ལ་སྤྱོད་པ་ལ་རྣལ་འབྱོར་བླ་ན་མེད་པའི་རྒྱུད་གསུངས་སོ། །བཞི་པ་སྒྲ་བཤད་པ་ནི། ཅིའི་ཕྱིར་བྱ་བའི་རྒྱུད་ཅེས་བྱ་ཞེ་ན། ཕྱི་ལུས་ངག་གི་བྱ་བ་གཙོ་བོར་སྟོན་པའི་ཕྱིར་ཏེ། བསམ་གཏན་ཕྱི་མའི་འགྲེལ་པ་ལས། རྒྱུད་འདི་ནི་ཕྱི་ལུས་ངག་གི་བྱ་བ་གཙོ་བོར་སྟོན་པས་བྱ་བའི་རྒྱུད་ཅེས་གསུངས་པས་སོ། །ཅིའི་ཕྱིར་སྤྱོད་པའི་རྒྱུད་ཅེས་བྱ་ཞེ་ན། ལུས་ངག་གི་བྱ་བ་དང་ཏིང་ངེ་འཛིན་ཆ་མཉམ་པར་སྤྱོད་པ་སྟེ། རྣམ་སྣང་མངོན་བྱང་གི་དོན་བསྡུས་པ་ལས། རྒྱུད་འདི་ནི་གཙང་སྦྲ་ལ་སོགས་པ་ལ་སྨད་པ་འཇིག་རྟེན་དང་འགལ་པར་སྤྱོད་པས་གཉིས་ཀ་ལ་སྤྱོད་པས་སྤྱོད་པའི་རྒྱུད་ཅེས་གསུངས་སོ། །ཅིའི་ཕྱིར་རྣལ་འབྱོར་གྱི་རྒྱུད་ཅེས་བྱ་ཞེ་ན། ཏིང་ངེ་འཛིན་གཙོ་བོར་བྱེད་པ་སྟེ། དེ་ཁོ་ན་ཉིད་སྣང་བའི་དོན་བསྡུས་པ་ལས། རྒྱུད་འདི་ནི་ཏིང་ངེ་འཛིན་གཙོ་བོར་སྟོན་པས་རྣལ་འབྱོར་གྱི་རྒྱུད་དོ། །ཞེས་གསུངས་པས་སོ། །ཅིའི་ཕྱིར་རྣལ་འབྱོར་བླ་ན་མེད་པའི་རྒྱུད་ཅེས་བྱ་ཞེ་ན་ཏིང་ངེ་འཛིན་གྱི་ཁྱད་པར་གང་ན་མེད་པ་སྟོན་པའི་ཕྱིར་ཏེ། སཾ་བུ་ཊི་ལས། གསང་བའི་ཡེ་ཤེས་བླ་ན་མེད། །སྙིང་པོ་བཅོམ་ལྡན་བཤད་དུ་གསོལ། །ཞེས་པ་དང་། གསང་བ་འདུས་པ་ལས་ཀྱང་། སྐུ་དང་གསུང་དང་ཐུགས་ཀྱི་མཆོག །དེ་བཞིན་གཤེགས་པ་ཀུན་གྱིས་ཀྱང་། །བྱང་ཆུབ་སེམས་ནི་བླ་ན་མེད། །སྙིང་པོ་བཅོམ་ལྡན་བཤད་དུ་གསོལ། །ཞེས་སོ། །གཉིས་པ་བརྗོད་བྱ་ཉམས་ལེན་གྱི་རིམ་པ་ལ་བཞི་ལས། དང་པོ་བྱ་རྒྱུད་ཀྱི་ཉམས་ལེན་ལ་གསུམ་སྟེ། འཇུག་པའི་སྤྱོད་པ། སྦྱོར་བའི་སྤྱོད་པ། བསྒྲུབ་པའི་སྤྱོད་པའོ། །དང་པོ་ནི། གསང་བ་སྤྱི་རྒྱུད་ལས་བཤད་པ་ལྟར་གྱི་སའི་ཆོ་ག སྟ་གོན་གྱི་ཆོ་ག འཇུག་པ་རྣམས་སྔོན་དུ་སོང་ནས་ཆུ་དང་ཅོད་པཎ་གྱི་དབང་གིས་སློབ་མ་སྣོད་རུང་དུ་བྱེད་པའོ། །གཉིས་པ་ལ་སྦྱོར་དངོས་རྗེས་གསུམ་ལས། སྦྱོར་བའི་ཆོ་ག་ལ་ལས་སུ་བྱ་བའི་རིམ་པ་ལྔ་རྣལ་འབྱོར་གྱི་སྔོན་འགྲོ་གསུམ་རྣམས་སྔོན་དུ་སོང་ནས། དངོས་གཞི་ལ་བདག་གི་རྣལ་འབྱོར། ལྷའི་རྣལ་འབྱོར། སྔགས་ཀྱི་རྣལ་འབྱོར་གསུམ་ལས། བདག་གི་རྣལ་འབྱོར་ལ་ཆོས་ཐམས་ཅད་སྟོང་པ་ཉིད་དུ་གཏན་ལ་དབབ་པ་དོན་དམ་པའི་རྣལ་འབྱོར་བསྒོམས་ནས་དེའི་ངང་ལས་རང་གི་སེམས་ཉིད་ཟླ་བའི་དཀྱིལ་འཁོར་གྱི་རྣམ་པར་བལྟས་ནས་དེ་ལ་བཟླ་བྱའི་སྔགས་རྣམས་བཀོད་ནས། འོད་ཟེར་སྤྲོས་པས་འཕགས་པ་མཆོད་པ་ལ་སོགས་པ་བྱས་ནས་ཟླ་བའི་དཀྱིལ་འཁོར་ལ་ཐིམ་པར་བསམས་པ་ཀུན་རྫོབ་པའི་རྣལ་འབྱོར་ཡིན་ལ། དེ་ནས་དམ་ཚིག་གི་ཕྱག་རྒྱ་བཅས་ནས། སྙིང་ཁ་ལ་སོགས་པ་བྱིན་གྱིས་བརླབས་པ་བྱིན་གྱིས་བརླབས་པའི་རྣལ་འབྱོར་ཏེ་གསུམ་མོ། །དེ་ནས་ལྷའི་རྣལ་འབྱོར་བསྒོམ་པ་ནི། མདུན་གྱི་བྲིས་སྐུ་ལ་སོགས་པའི་རྗེས་སུ་གཞལ་ཡས་ཁང་ལྷ་དང་བཅས་པའམ། གཞལ་ཡས་ཁང་བསྐྱེད་ནས་བརྟེན་པ་ལྷ་སྤྱན་དྲང་བ་གང་རུང་བྱས་ཏེ། ཞལ་ཕྱག་གསལ་བཏབ་ནས་དམ་ཚིག་གི་ཕྱག་རྒྱ་བསྟན། དེ་ལ་མཆོད་བསྟོད་བྱས་ཏེ། སྡིག་པ་བཤགས་པའི་རྒྱུན་བཤགས་བྱས་ནས་ཚད་མེད་པ་བཞི་བསྒོམ་པའོ། །དེ་ནས་སྔགས་ཀྱི་རྣལ་འབྱོར་ནི། བགྲང་ཕྲེང་མཚན་ཉིད་དང་ལྡན་པ་འདུས་བྱས་ནས། ལེགས་གྲུབ་ལས་གསུངས་པ་ལྟར་གྱི་གཙང་སྦྲ་ལ་སོགས་པའི་ཀུན་སྤྱོད་དང་། བརྟུལ་ཞུགས་ལ་གནས་པར་བྱས་ནས། རང་དང་མདུན་གྱི་ལྷའི་སྙིང་ཁར་ཟླ་བའི་དཀྱིལ་འཁོར་ལ་དབུས་སུ་ས་བོན་དང་། མཐའ་སྐོར་དུ་བཟླ་བྱའི་སྔགས་རྣམས་གཡས་སྐོར་དུ་བཀོད་དེ། རྡོ་རྗེའི་ཚིག་གི་བཟླས་པ་དང་། ཤུབ་བུའི་བཟླས་པ་གཉིས་བྱའོ། །གསུམ་པ་རྗེས་ནི། ནོངས་པ་བཟོད་པར་གསོལ་ཏེ། སྤྱན་དྲངས་པའི་ལྷ་གཤེགས་སུ་གསོལ་ནས་རྡོ་རྗེའི་རྭ་གུར་དགྲོལ། དེ་ནས་ཐུན་མཚམས་ཀྱི་བྱ་བ་ལ་གནས་པའོ། །དེ་ལྟར་སྦྱོར་བའི་སྤྱོད་པ་སྔོན་དུ་སོང་ནས། དངོས་གྲུབ་སྒྲུབ་པ་ན་སྔོན་དུ་བསྙེན་པ་བྱས་ནས་དེ་ནས་ལས་ལ་སྦྱར་བར་བྱའོ། །གསུམ་པ་སྒྲུབ་པའི་སྤྱོད་པ་ལ་གསུམ་སྟེ། མེ་གནས་ཀྱི་དེ་ཉིད། སྒྲ་གནས་ཀྱི་དེ་ཉིད། སྒྲ་མཐའི་དེ་ཉིད་དོ། །དང་པོ་ནི། བདག་གི་དེ་ཁོ་ན་ཉིད་སྟོང་ཉིད་བསྒོམ་པ་སྔོན་དུ་སོང་ནས། དེ་ལས་ལངས་ཏེ་རང་གི་ལྷའི་གསང་སྔགས་དྲིལ་བུའི་སྒྲ་བཞིན་དུ་རྒྱུན་མ་ཆད་པར་འབྱུང་བ་ལ་བདེན་ཞེན་མེད་པར་བསམ་གཏན་དུ་བྱའོ། །དེ་ནས་སྙིང་ཁར་མར་མེའི་མེ་ལྕེ་ལྟ་བུའི་མེ་འབར་བར་བསམས་ལ། དེའི་ནང་དུ་སྔར་བཤད་པའི་སྒྲའི་ཕྲེང་བ་གནས་པར་སྲོག་རྩོལ་བཀག་ནས་བསྒོམ་པར་བྱའོ། །གཉིས་པ་ནི། རང་གི་སྙིང་ཁར་ཟླ་བའི་དཀྱིལ་འཁོར་ཤིན་ཏུ་ཕྲ་བའི་ནང་དུ་མེ་ལྕེ་འོད་བཟང་པོ་འབར་བ་བསྒོམས་ནས། དེ་ལ་སྔགས་ཀྱི་ཡི་གེ་བཞག་ནས། ལུས་སེམས་བདེ་བར་འདུག་སྟེ་བསྒོམ་མོ། །གསུམ་པ་ནི། དེ་ལ་སྒྲ་མཐའ་ཞེས་པ་སྔགས་ཀྱི་སྒྲ་ཙམ་ལ་སེམས་གནས་པ་ཡོངས་སུ་བཏང་བའི་མཐའ་གཉིས་སུ་མེད་པའི་དེ་ཉིད་ཡིན་ལ། ཇི་ལྟར་བཏང་བའི་ཚུལ་ནི། གསང་སྔགས་ཡན་ལག་ཏུ་གྱུར་པར་སྣང་བ་དང་། སྒྲ་དང་། ཡིད་དང་། ཚིག་རྣམ་པར་དག་པའི་གནས་སྐབས་རྣམས་བཏང་དགོས་པས། དང་པོ་ནི་མདུན་གྱི་ལྷའི་སྐུར་སྣང་བའོ། །གཉིས་པ་ནི། ཤུབ་བུའི་བཟླས་བརྗོད་བྱེད་པའི་གནས་སྐབས་སོ། །གསུམ་པ་ནི། ཡིད་ཀྱི་བཟླས་བརྗོད་བྱེད་པའི་གནས་སྐབས་སོ། །བཞི་པ་ནི། དེ་གཉིས་ཀྱི་ཚིག་རྣམ་པར་དག་པའི་མེར་གནས་དང་། སྒྲ་གནས་ཀྱི་གནས་སྐབས་སོ། །དེ་དག་ཇི་ལྟར་བཏང་བའི་རིམ་པ་ནི། སྔ་མ་སྔ་མ་ལ་དམིགས་པ་བཏང་ནས་ཕྱི་མ་ཕྱི་མ་ལ་འཕོས་ཏེ། མཐར་སྒྲ་གནས་ཀྱང་བཏང་ནས་ཆོས་སྐུའི་ཏིང་ངེ་འཛིན་ལ་ནན་ཏན་དུ་བྱེད་པའོ། །གཉིས་པ་སྤྱོད་རྒྱུད་ཀྱི་ཉམས་ལེན་ནི། སྤྱོད་པ་གསུམ་པོ་ཕལ་ཆེར་བྱ་རྒྱུད་དང་འདྲ་བ་ལས། ཁྱད་པར་ནི་འཇུག་པའི་སྤྱོད་པའི་སྐབས་སུ་ཆུ་དང་ཅོད་པཎ་གྱི་དབང་གཉིས་ཀྱི་སྟེང་དུ་རྡོ་རྗེ་དང་། དྲིལ་བུ་དང་། མིང་གི་དབང་གསུམ་སྟེ། ལྔ་ཡོད་པར་རྒྱུད་སྡེ་གོང་མ་ལས་གསུངས་སོ། །སྦྱོར་བའི་སྤྱོད་པའི་སྐབས་སུ། རྣམ་སྣང་མངོན་བྱང་ལས། ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལས་གཞིར་གྱུར་པ། །ཤིན་ཏུ་བསྡམས་པས་ཡིད་ལས་ནི། །བཟླས་བརྗོད་འབུམ་ཕྲག་གཅིག་བྱའོ། །ཡི་གེ་བྱང་ཆུབ་སེམས་ཡིན་ཏེ། །གཉིས་པ་སྒྲ་ཞེས་བྱ་བ་ཡིན། །གཞི་ནི་རང་གི་ལྷར་བཞག་པ། །རང་གི་ལུས་ཀྱི་གནས་ལ་བྱ། །གཞི་གཉིས་པ་ནི་རྫོགས་སངས་རྒྱས། །རྐང་གཉིས་མཆོག་ཏུ་ཤེས་པར་བྱ། །ཞེས་ཏེ། ཡི་གེ་དང་པོ་བྱང་ཆུབ་ཀྱི་སེམས་སྟོང་པ་ཉིད་བསྒོམ་ནས། དེའི་རྗེས་ལ་ཡི་གེ་གཉིས་པ་སྔགས་ཀྱི་སྒྲར་ལྡང་། དེ་ལས་གཞི་དང་པོར་རང་ཉིད་སངས་རྒྱས་ཀྱི་སྐུར་བསྐྱེད་ལ། དེ་སྔགས་དང་ཕྱག་རྒྱ་ལ་སོགས་པས་བྱིན་གྱིས་བརླབས། དེ་ནས་གཞི་གཉིས་པ་རང་གི་མདུན་དུ་སངས་རྒྱས་ཀྱི་སྐུ་བསྐྱེད་པའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་བཟླས་པར་བྱ་བའི་སྔགས་ཀྱི་ཕྲེང་བ་བཀོད་ནས། དེ་ལ་ཏིང་ངེ་འཛིན་བརྟན་པར་བྱེད་པའོ། །སྒྲུབ་པའི་སྤྱོད་པའི་སྐབས་སུ་མེ་གནས་ལ་སོགས་པའི་ཏིང་ངེ་འཛིན་གསུམ་ཀ་ཡང་རང་ཉིད་ལྷའི་རྣལ་འབྱོར་ལ་གནས་ནས་བསྒོམ་པའོ། །གསུམ་པ་རྣལ་འབྱོར་རྒྱུད་ཀྱི་ཉམས་ལེན་ནི། རྡོ་རྗེ་རྩེ་མོ་ལས། སྨིན་པ་དང་ནི་གྲོལ་བའི་ལམ། །སངས་རྒྱས་བྱང་ཆུབ་བསྟན་པའི་མཆོག །ཅེས་པ་ལྟར་སྨིན་གྲོལ་གཉིས་ལས། སྨིན་བྱེད་ཀྱི་དབང་ལ་ཡང་། རྡོ་རྗེ་སློབ་མའི་དབང་དང་། སློབ་དཔོན་གྱི་དབང་གཉིས་སོ། །དེ་ཡང་འདིར་འཇུག་པའི་གང་ཟག་ལ། རྒྱུད་སྦྱང་བ་མ་བྱས་པ་རྣམས་སམ། སྦྱང་བ་བྱས་ཀྱང་ཐེག་པ་ཆེན་པོ་བློའི་སྤོབས་པ་ཞན་པས་གཞན་གྱི་དོན་ལ་ད་ལྟ་ནས་འཇུག་པར་མི་ནུས་པ་རྡོ་རྗེ་སློབ་མའི་རིགས་དང་། སྙིང་རྗེ་དང་ཤེས་རབ་ཀྱི་རྩལ་ཆེ་བས་གཞན་དོན་གྱི་ཁུར་ད་ལྟ་ཉིད་ནས་ཁྱེར་བ་རྡོ་རྗེ་སློབ་དཔོན་གྱི་རིགས་གཉིས་ལས། དང་པོ་ལ། སྨིན་བྱེད་ཀྱི་དུས་སུ་རིག་པའི་དབང་ཙམ་སྟེར་ནས། དེ་དང་འབྲེལ་བའི་ལམ་ནི། དེ་ཉིད་འདུས་པའི་སྟོད་འགྲེལ་ལས་དེ་ལ་སློབ་མའི་དབང་དུ་བྱས་པ་ནི། བདག་ལ་བྱིན་གྱིས་བརླབས་པ་ལ་སོགས་པ་འདི་ལྟར་ཤེས་པར་བྱ་སྟེ། བདག་བསྲུང་བ་དང་། ཆུའི་ཁྲུས་དང་། ཡང་བདག་བསྲུང་བ་དང་། གནས་བསྲུང་བ་ཡང་བྱས་ནས། རང་གི་ལྷ་མདུན་དུ་བཞུགས་སུ་གསོལ་ཏེ། ཕྱག་བྱ་བ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསྐུལ་བ་དང་། གསོལ་བ་དང་། ཡོངས་སུ་བསྔོ་བ་དང་། བྱང་ཆུབ་ཏུ་སེམས་བསྐྱེད་པ་དང་། གསུམ་ལ་སྐྱབས་སུ་འགྲོ་བ་ལ་སོགས་པ་རྗེས་སུ་སྤྱད་ལ། རྡོ་རྗེ་ཐལ་མོ་དང་། རྡོ་རྗེ་བསྡམས་པ་བཅིངས་ཏེ། རྡོ་རྗེ་ཐལ་མོ་སྙིང་ཁར་དྲལ་བ། རྡོ་རྗེ་དབབ་པ་བརྟན་པར་བྱས་ནས། བདག་མེད་པར་བསྒོམས་པ་དང་། ཟླ་བའི་དཀྱིལ་འཁོར་ལ་སོགས་པ་སྔ་མ་བཞིན་དུ་བསྒོམས་ཏེ། རང་གི་ལྷའི་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིང་བར་བྱའོ། །ཡེ་ཤེས་སེམས་དཔའ་ཇི་ལྟ་བ་བཞིན་བཅུག་སྟེ། ཕྱག་རྒྱ་ཆེན་པོ་བསྒྲུབ་པར་བྱས་ནས། ཛཿཧཱུྃ་བཾ་ཧོཿཞེས་བརྗོད་དེ། ཡིད་ཀྱིས་ལེགས་པའི་སྦྱོར་བས། དེ་བཞིན་གཤེགས་པ་ཐམས་ཅད་རང་གི་ལུས་ལ་བཅུག་སྟེ། རང་གི་དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབས་ནས། རང་གི་ལྷ་དང་དེ་བཞིན་གཤེགས་པ་ཐམས་ཅད་དང་། ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ། རིགས་ཀྱི་དམ་ཚིག་གིས་བདག་ཉིད་བྱིན་གྱིས་བརླབས་ཏེ། རང་གི་རིགས་ཀྱི་དབང་བསྐུར་ནས་སྒེག་མོ་ལ་སོགས་པ་གསང་བའི་མཆོད་པ་བཞིས་ཡང་དག་པར་མཆོད་ལ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། རང་གིས་ཕྱག་རྒྱ་ཆེན་པོ་ལེགས་པར་བསྒོམས་ལ། བཛྲ་ས་ཏྭ་ཞེས་བྱ་བ་ལ་སོགས་པ་རང་གི་ལྷའི་སྔགས་ཟློས་ཤིང་། ལོ་གཅིག་གི་བར་དུ་ཉིན་རེ་བཞིན་ཐུན་བཞིར་བསྒོམ་པར་བྱའོ། །ཞེས་པ་ལྟར་བསླབ་བོ། །གང་ཟག་གཉིས་པ་ལ་དེ་ཡི་སྟེང་དུ་རྡོ་རྗེ་སློབ་དཔོན་གྱི་དབང་བསྐུར་ཞིང་། དེ་ནས་དེ་དང་རྗེས་སུ་འབྲེལ་བའི་དམ་ཚིག་ལ་བསླབ་པ་དང་། དཀྱིལ་འཁོར་དང་། ལྷའི་དེ་ཁོ་ན་ཉིད་བཅུ་ལ་བསླབ་པ་དང་། སློབ་མ་གཞུག་པ་ལ་སོགས་པ་སློབ་དཔོན་གྱི་ལས་ཐམས་ཅད་དང་། དངོས་གྲུབ་ཀྱི་ཡེ་ཤེས་དང་། ཕྱག་རྒྱའི་ཡེ་ཤེས་དང་། རྩ་བའི་རྒྱུད་ཀྱི་སྒྲུབ་པ་ལ་སོགས་པའི་ཚུལ་ཐམས་ཅད་ལ་བསླབ་བོ། ཾ །བཞི་པ་བླ་མེད་ཀྱི་ཉམས་ལེན་ནི། གསང་བ་འདུས་པའི་རྒྱུད་ཕྱི་མའི་རྗེས་སུ་འབྲངས་ནས། སྤྱིར་རྒྱུད་ཅེས་བྱ་བ་ནི་སེམས་གསལ་བ་ཙམ་འཁོར་འདས་ཀྱི་གནས་སྐབས་ཐམས་ཅད་དུ་རྒྱུན་མི་ཆད་པར་འབྱུང་བ་འདི་ཡིན་ལ། དེ་ལ་རྒྱུ་རྒྱུད། ཐབས་རྒྱུད། འབྲས་བུའི་རྒྱུད་གསུམ་ལས། དང་པོ་ནི། སེམས་ཉིད་ལྷན་ཅིག་སྐྱེས་པའི་ཡེ་ཤེས་ཐོག་མ་མེད་པ་ནས་ད་ལྟའི་བར་དུ་རྒྱུན་མ་ཆད་ཅིང་བག་ཆགས་ཀྱི་དབང་གིས་ཡེ་ཤེས་དེ་ཉིད་འཁོར་བའི་སྣང་བ་སྣ་ཚོགས་སུ་ཤར་བ་དང་བཅས་པ་འདིའོ། །ཐབས་རྒྱུད་ནི་དེ་ཉིད་ལ་གློ་བུར་གྱི་དྲི་མ་སྦྱང་བའི་ཆེད་དུ་བླ་མ་དམ་པའི་མན་ངག་ལ་བརྟེན་ནས་བསྐྱེད་རྫོགས་ཀྱི་ཏིང་ངེ་འཛིན་ཉམས་སུ་ལེན་པའི་ཚུལ་འབྲས་བུ་མངོན་དུ་མ་གྱུར་པའི་བར་དུ་རྒྱུན་མི་ཆད་དུ་འབྱུང་བའོ། །འབྲས་བུའི་རྒྱུད་ནི། དེ་ཉིད་ལ་གློ་བུར་གྱི་དྲི་མ་དང་བྲལ་བས་ཡོན་ཏན་བསམ་ལས་འདས་པ་རྒྱུའི་གནས་སྐབས་སུ་རང་རང་གི་རྒྱུ་ལྷུན་གྲུབ་ཀྱི་ཚུལ་དུ་ཡོད་པ་འབྲས་བུའི་དུས་སུ་མངོན་དུ་གྱུར་ནས་དག་པའི་སྣང་བ་དང་བཅས་པའི་ཡེ་ཤེས་ནམ་མཁའ་གནས་ཀྱི་བར་དུ་རྒྱུན་མི་ཆད་དུ་འབྱུང་བའོ། །དེ་ལ་རྒྱུ་རྒྱུད་ཀྱི་ཉམས་ལེན་ནི། ཀྱཻ་རྡོ་རྗེ་ལས། སྐལ་དམན་སེམས་ཅན་གདུལ་དཀའ་བ། །གང་གིས་འདུལ་བར་འགྱུར་བ་ལགས། །ཞེས་ཞུས་པའི་ལན་དུ། དང་པོར་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་སྦྱིན། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་ནས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །སྔགས་ཀྱི་རིམ་པ་ཀུན་ཤེས་ནས། །ཞེས་པ་ལྟར། དང་པོར་ཉིན་ཞག་གཅིག་པའི་གསོ་སྦྱོང་ནས་བཟུང་སྟེ། དེ་ནས་གཏན་ཁྲིམས་བདུན་པོ་གང་ཡང་རུང་བ་དང་། ཐེག་པ་ཆེན་པོའི་སེམས་བསྐྱེད་ཀྱི་བར་དུ་སྤྱོད་པ་རིམ་པ་ཅན་ལ་བསླབས་ཏེ། དེ་ནས་གྲུབ་མཐའ་བཞི་དང་རྒྱུད་སྡེ་འོག་མ་རྣམས་ལ་རིམ་པ་བཞིན་དུ་སྦྱངས་པའི་ལྟ་བ་རིམ་པ་ཅན་ལ་བསླབ་པའོ། །དེ་ནས་སྨིན་བྱེད་ཀྱི་དབང་བཞི་བསྐུར་ཏེ་ལམ་བསྒོམ་པའི་སྣོད་རུང་དུ་བྱེད་པ་སྟེ། འདི་ནི་སྐལ་དམན་རིམ་འཇུག་པའི་དབང་དུ་བྱས་པའོ། །ཐུན་མོང་གི་བྱ་བ་ལ་མ་ལྟོས་པར་དང་པོ་ཉིད་ནས་རྡོ་རྗེ་ཐེག་པའི་སྣོད་དུ་རུང་བ་རྣམས་ལ་ནི་སྐལ་ལྡན་ཅིག་ཅར་བ་ཞེས་བྱ་སྟེ། དང་པོ་ནས་དབང་བསྐུར་བར་བྱའོ། །སྨིན་བྱེད་ཀྱི་དབང་འདི་ཐབས་རྒྱུད་ལ་སྨིན་ལམ་གཉིས་སུ་ཕྱེ་བའི་དབང་དུ་བྱས་ན། ཐབས་རྒྱུད་དུ་ཡང་འགྲོ་སྟེ་འོག་ཏུ་འཆད་དོ། །གཉིས་པ་ཐབས་རྒྱུད་ཀྱི་ཉམས་ལེན་ལ་སྨིན་གྲོལ་གཉིས་ལས་དང་པོ་ལ། བུམ་པ། གསང་བ། ཤེས་རབ་ཡེ་ཤེས། དབང་བཞི་པ་སྟེ། བཞི་ཡོད་པར་བླ་མེད་ཀྱི་རྒྱུད་སྡེ་ཕལ་ཆེར་ནས་གསུངས་ཤིང་། བཞིར་ངེས་པའི་རྒྱུ་མཚན་ཡང་རྟེན་དཀྱིལ་འཁོར་བཞི་ཡིན་པ་དང་། སྦྱང་བྱ་དྲི་མ་བཞི་ཡིན་པ་དང་། སྦྱོང་བྱེད་ལམ་བཞི་ཡིན་པ་དང་། སྦྱངས་འབྲས་སྐུ་བཞི་ཡིན་པ་སོགས་མང་དུ་གསུངས་མོད་ཀྱི་འདིར་མ་སྤྲོས་སོ། །གྲོལ་བྱེད་ཀྱི་ལམ་ནི་ཇི་སྙེད་གསུངས་པ་ཐམས་ཅད་རིམ་པ་གཉིས་སུ་འདུས་ཏེ། ཀྱཻ་རྡོ་རྗེ་ལས། བསྐྱེད་པའི་རིམ་པ་ཉིད་དང་ནི། །རྫོགས་པ་ཡི་ཡང་རིམ་པ་ཉིད། །རིམ་གཉིས་མཉམ་པར་གནས་ནས་ནི། །རྡོ་རྗེ་ཅན་གྱི་ཆོས་འཆད་དོ། །ཞེས་དང་། འདུས་པའི་རྒྱུད་ཕྱི་མ་ལས། སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པ་ཡི་ནི་རིམ་པ་དང་། །དེ་བཞིན་རྫོགས་པའི་རིམ་ཉིད་དོ། །ཞེས་སོ། །འདི་དག་གི་རྣམ་གཞག་ལ་རྒྱུད་སྡེ་སོ་སོའི་དགོངས་པ་གྲུབ་པའི་དབང་ཕྱུག་རྣམས་ཀྱིས་བཀྲལ་བའི་ཚུལ་ཅུང་ཟད་མི་འདྲ་བ་མང་དུ་ཡོད་པ་ལས། འདིར་ཀྱཻ་རྡོ་རྗེའི་རྒྱུད་གསུམ་གྱི་དགོངས་པ་རྣལ་འབྱོར་གྱི་དབང་ཕྱུག་བིརྺ་པས་བཀྲལ་བའི་ཚུལ་བརྗོད་ན། དབང་བསྐུར་གྱི་རྗེས་ལ་དབང་གི་ཡེ་ཤེས་དེ་ཉིད་ལྷན་ཅིག་སྐྱེས་པའི་ཡེ་ཤེས་སུ་ངོ་སྤྲོད་ཅིང་། འོག་ཏུ་འབྱུང་བའི་བསྐྱེད་རྫོགས་ཀྱི་ཉམས་ལེན་ཐམས་ཅད་དེ་དང་དེའི་རྣམ་པར་སྣང་ཡང་། རང་གི་ངོ་བོ་ལྷན་ཅིག་སྐྱེས་པའི་ཡེ་ཤེས་སུ་རྟོགས་པར་བྱ་བའི་ཕྱིར་ལྟ་བ་འཁོར་འདས་དབྱེར་མེད་བསྒོམ་པར་བྱ་སྟེ། ཀྱཻ་རྡོ་རྗེ་ལས། ཕྱི་ནས་དེ་ཉིད་ཡང་དག་བཤད། །རྣམ་དག་ཡེ་ཤེས་གཟུགས་ཅན་དང་། །འཁོར་བ་རྣམ་པར་རྟོག་པ་ལ། །ཁྱད་པར་ཅུང་ཟད་ཡོད་མ་ཡིན། །ཞེས་སོ། །དེ་ནས་རྫོགས་རིམ་གྱི་རྟེན་བསྐྱེད་པའི་རིམ་པ་བསྒོམས་ཏེ། དེ་ཡང་རྒྱུ་རྒྱུད་བག་ཆགས་ཀྱི་དབང་གིས་འཁོར་བའི་སྣང་བ་སྣ་ཚོགས་སུ་འཆར་བ་འདི་ད་ལྟ་ཉིད་ནས་དག་པའི་སྣང་བར་སྒྱུར་བར་བྱེད་པའོ། །དེས་ན་འཁོར་བའི་ཆོས་ཀྱི་གཙོ་བོ་སྐྱེ་གནས་བཞི་ཡིན་པས་དེའི་གཉེན་པོར་མངོན་པར་བྱང་ཆུབ་པ་ལྔ་ལ་སོགས་པའི་བསྐྱེད་ཆཾོག་རྣམས་གསུངས། སྐྱེ་བ་བླངས་པ་ལ་བརྟེན་ནས་སྣོད་བཅུད་རང་གཞན་ལ་སོགས་པའི་སྣང་བ་སྣ་ཚོགས་འཆར་བ་དེའི་གཉེན་པོར་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་གསུངས་ཏེ། མདོར་ན་བླ་མེད་ཀྱི་དཀྱིལ་འཁོར་གཅིག་གི་སྟེང་དུ་རྒྱུ་ལས་དང་། ཉོན་མོངས་པ་དང་། འབྲས་བུ་འཁོར་བའི་སྡུག་བསྔལ་གྱིས་བསྡུས་པའི་མ་དག་པའི་སྣང་བ་ཐམས་ཅད་དག་པའི་སྣང་བར་བསྒྱུར་བའི་ཉམས་ལེན་ཡོད་པར་ཤེས་པར་བྱའོ། །དེ་ནས་བསྐྱེད་རིམ་གྱི་ལྷ་བདེ་ཆེན་གྱི་ཡེ་ཤེས་སུ་རྟོགས་པར་བྱ་བའི་ཕྱིར་དུ་རྫོགས་པའི་རིམ་པ་བསྒོམ་སྟེ། དེ་ཡང་ལུས་ཐམས་ཅད་ལ་རྩས་ཁྱབ། དེ་ལ་བྱང་ཆུབ་ཀྱི་སེམས་དང་རླུང་གིས་ཁྱབ། དེ་དང་སེམས་ཉིད་ལྷན་ཅིག་སྐྱེས་པའི་ཡེ་ཤེས་འདི་དབྱེར་མེད་དུ་གནས་པ་ལ་རྟེན་རྩ་ཐིག་ལེ་རླུང་གསུམ་ལ་གནད་དུ་བསྣུན་ནས། སེམས་ཉིད་ལྷན་ཅིག་སྐྱེས་པའི་ཡེ་ཤེས་མངོན་དུ་བྱས་ཏེ། སྣང་བ་ཐམས་ཅད་ཟུང་འཇུག་གི་ངོ་བོར་བསྒྱུར་བའོ། །དེ་ལྟར་རིམ་པ་གཉིས་ལ་བརྟན་པ་ཐོབ་ནས་དྲོད་ཆུང་ངུ་ཞེས་བྱ་བ་མཉམ་གཞག་ཏུ་འཇིག་རྟེན་ཆོས་བརྒྱད་མགོ་སྙོམས་པ་སྙམ་བྱེད་པའི་ཚེ་ཀུན་འདར་གསང་ནས་སྤྱོད། དེ་ནས་དྲོད་འབྲིང་པོ་ཚར་གཅོད་དང་། རྗེས་གཟུང་གང་རུང་གཅིག་ནུས་པའི་ཚེ་ཀུན་འདར་འཇིག་རྟེན་པའི་མངོན་དུ་སྤྱོད། དེ་ནས་དྲོད་ཆེན་པོ་ཚར་གཅོད་དང་རྗེས་གཟུང་གཉིས་ཀ་ནུས་པ་ཟག་པ་མེད་པའི་ཡེ་ཤེས་དང་པོ་སྐྱེས་པའི་ཚེ་གཞན་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་བྱ་སྟེ། ས་རྣམས་བསྐྱེད་པར་བྱའོ། །དེ་ཡང་ཕྱི་རོལ་གནས་དང་ཉེ་བའི་གནས་སོགས་ན་གནས་པའི་མཁའ་འགྲོ་མ་རྣམས་དབང་དུ་འདུས་པས་ནང་གི་སྤྱི་བོ་ལ་སོགས་པའི་རྩ་རྣམས་ཀྱི་རླུང་སེམས་དབུ་མར་ཞུགས་ནས། ས་དང་པོ་ནས་བཅུ་པའི་བར་གྱི་རྟོགས་པ་སྐྱེ་བའི་ཐབས་ལ་སྤྱོད་པ་ཞེས་བྱའོ། །དེ་ནས་ས་བརྒྱད་པའམ་བཅུ་པ་ཐོབ་པའི་ཚེ་ཉེ་རྒྱུའི་སྤྱོད་པ་བྱ་སྟེ། ས་ལྷག་པ་རྣམས་བགྲོད་ནས་བཅུ་གསུམ་རྡོ་རྗེ་འཛིན་པའི་ས་མངོན་དུ་བྱའོ། །དེ་ལྟར་ལྟ་བ། བསྐྱེད་རིམ། རྫོགས་རིམ། སྤྱོད་པ། ཉེ་རྒྱུ་སྟེ། ལྔ་ནི་གཙོ་བོར་མཆོག་གི་དངོས་གྲུབ་བསྒྲུབ་པའི་མངོན་པར་རྟོགས་པ་ཡིན་ཅིང་། གང་ཟག་གཙོ་བོར་ནང་ལ་གཞོལ་བས་ཉམས་སུ་བླང་བར་བྱ་བ་ཡིན་ནོ། །འཇིག་རྟེན་ལས་འདས་པའི་དངོས་གྲུབ་མཐའ་དག་སྒྲུབ་པ་དང་། གང་ཟག་གཙོ་བོར་ཕྱི་ལ་གཞོལ་བས་ཉམས་སུ་བླང་བར་བྱ་བ་ནི། སྔགས་ཀྱི་བཟླས་པ་དང་། གཏོར་མ་དང་། རབ་གནས་དང་། སྦྱིན་སྲེག་དང་། ལས་ཀྱི་ཚོགས་རབ་འབྱམས་དང་ལྔའོ། །དེ་གཉིས་ཀ་ལ་ཡང་གྲོགས་དམ་ཚིག་དང་། སྡོམ་པ་དགོས་པས་བཟའ་བའི་དམ་ཚིག་དང་། བསྲུང་བའི་དམ་ཚིག་གཉིས་དགོས་སོ། །གསུམ་པ་འབྲས་བུའི་རྒྱུད་ནི། དེ་ལྟར་ཐབས་རྒྱུད་ཉམས་སུ་བླངས་པས་རྒྱུ་རྒྱུད་ཀྱི་དྲི་མ་དག་ནས་སྐུ་གསུམ་ཡན་ལག་བདུན་ལྡན་མངོན་དུ་གྱུར་པའོ། །འདི་ལ་དབང་དང་ལམ་བཞི་ཡོད་པས་འབྲས་བུ་སྐུ་བཞིར་བཞག་པའམ། རྒྱུ་ལ་རྟེན་དཀྱིལ་འཁོར་བཞི། བརྟེན་པ་ཡིད་དང་ལྔ་ཡོད་པས་འབྲས་བུ་སྐུ་བཞི་དང་། ཤིན་ཏུ་རྣམ་པར་དག་པའི་ངོ་བོ་ཉིད་ཀྱི་སྐུ་སྟེ། ལྔར་བཞག་པ་སོགས་མང་དུ་ཡོད་མོད་ཀྱི་དམ་པའི་ཞལ་ལས་དྲི་བར་བྱའོ། །གཞན་ཡང་རིམ་པ་གཉིས་པོ་དེ་ཉིད་ཉམས་སུ་ལེན་པའི་ཚུལ་ལ། དུས་ཀྱི་འཁོར་ལོ་དང་། གསང་བ་འདུས་པ་དང་། བདེ་མཆོག་སོགས་ནས་གསུངས་པའི་ལམ་གྱི་རིམ་པ་ཚུལ་ཅུང་ཟད་མི་འདྲ་བ་མང་དུ་ཡོད་མོད་ཀྱི། གཞུང་འདིར་ཉེ་བར་མཁོ་བ་ནི་སྔ་མ་ཉིད་ཡིན་པས་དེ་ཙམ་ཞིག་སྨོས་སོ། །དེ་ལྟར་རྒྱུད་སྡེ་བཞི་ལ་སྨིན་བྱེད་ཀྱི་དབང་དང་། གྲོལ་བྱེད་ཀྱི་ལམ་མི་འདྲ་བ་བཞི་ཡོད་ན་གཞུང་འདིར་གང་ཞིག་བསྟན་པ་ཡིན་སྙམ་ན། འདིར་ནི་བླ་མེད་ཀྱི་ལམ་གྱི་རྣམ་པར་གཞག་པ་གཙོ་བོར་སྟོན་ཏེ། གསང་སྔགས་ཞེས་དང་། རྡོ་རྗེ་ཐེག་པ་ཞེས་སྤྱིར་བཏང་བ་ལས་སྨིན་བྱེད་ཀྱི་སྐབས་སུ་དབང་བཞི་དང་། གྲོལ་བྱེད་ཀྱི་སྐབས་སུ་རིམ་པ་གཉིས་དགོས་པར་གསུངས་ཤིང་། དེ་དག་རྒྱུད་སྡེ་འོག་མ་ལ་མེད་པའི་ཕྱིར་དང་། འདི་ནས་གསུངས་པའི་ལམ་གྱི་རྣམ་གཞག་སྨིན་གྲོལ་གཉིས་ལས། ཕྱག་ཆེན་གྱི་ཡེ་ཤེས་སྐྱེ་ཞིང་ཕྱག་ཆེན་གོམས་པས་སྤྱོད་པ་དང་། དེ་ལས་འབྲས་བུ་སྐུ་བཞི་འགྲུབ་པའི་ཚུལ་རྣམས་བླ་མེད་ཁོ་ནའི་ལམ་གྱི་རྣམ་གཞག་ཏུ་སྣང་བའི་ཕྱིར་རོ། །ཅིའི་ཕྱིར་དེ་ལྟར་སྟོན་སྙམ་ན་གཞུང་འདིར་ནི་ལོག་རྟོག་འགོག་པ་གཙོ་བོ་ཡིན་ལ། བླ་མེད་ཀྱི་ལམ་ལ་ལོག་རྟོག་ཞུགས་པ་གཙོ་ཆེ་བར་སྣང་བའི་ཕྱིར་རོ། །ཞར་ལ་རྒྱུད་སྡེ་འོག་མའི་རྣམ་གཞག་ཀྱང་ཅུང་ཟད་སྟོན་ཏེ། དེ་དག་ལ་ཡང་སྨིན་བྱེད་ཀྱི་སྐབས་སུ་དབང་བཞི་དང་། གྲོལ་བྱེད་ཀྱི་སྐབས་སུ་རིམ་པ་གཉིས་ཡོད་པར་འདོད་པ་དང་། བྱ་རྒྱུད་ལ་བདག་བསྐྱེད་ཡོད་པར་འདོད་པ་སོགས་ལོག་རྟོག་འགའ་ཞིག་སྣང་བའི་ཕྱིར་རོ། །གཉིས་པ་གཞུང་གི་དོན་ལ་འཇུག་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། རྡོ་རྗེ་ཐེག་པའི་ཞེས་སོགས་གསུམ་སྟེ། སྐལ་དམན་རིམ་འཇུག་པ་ལྟར་ན། སྡོམ་པ་གཉིས་ཀྱི་སྦྱང་བ་སྔོན་དུ་སོང་ནས་རྡོ་རྗེ་ཐེག་པའི་སོགས་སོ། །སྐལ་ལྡན་ཅིག་ཅར་བ་ལྟར་ན། ཐུན་མོང་གི་སྦྱང་བ་ལ་མ་ལྟོས་པར་དང་པོ་ཉིད་ནས་རྡོ་རྗེ་ཐེག་པའི་སོགས་སོ། །གཉིས་པ་ལ་ལྔ་སྟེ། སྨིན་བྱེད་ནོར་བ་མེད་པའི་དབང་བཞི། གྲོལ་བྱེད་འཁྲུལ་བ་མེད་པའི་རིམ་པ་གཉིས། དབང་དང་རིམ་གཉིས་ལས་བྱུང་བའི་ཡེ་ཤེས་ཕྱག་རྒྱ་ཆེན་པོ། ཕྱག་ཆེན་གོམས་པ་ལས་འཁོར་འདས་བསྲེ་བའི་སྤྱོད་པ་སྤྱད་པ། དེ་ལ་བརྟེན་ནས་ས་ལམ་བགྲོད་དེ་འབྲས་བུ་མངོན་དུ་བྱེད་པའི་ཚུལ་ལོ། །དང་པོ་ལ་གསུམ་སྟེ། མ་འཁྲུལ་བའི་སྨིན་བྱེད་བསྒྲུབ་པར་གདམས། འཁྲུལ་པའི་སྨིན་བྱེད་དོར་བར་གདམས། དབང་ལས་ཐོབ་པའི་དམ་ཚིག་ལ་འཁྲུལ་པ་དགག་པའོ། །དང་པོ་ནི། སྨིན་པར་བྱེད་པའི་ཞེས་སོགས་ཚིགས་བཅད་གཉིས་ཏེ། སྨིན་གྲོལ་གཉིས་ལ་འབད་པར་བྱ། །ཞེས་པའི་སྨིན་པར་བྱེད་པ་དེ་ཡང་རྡོ་རྗེ་འཆང་ནས་རྩ་བའི་བླ་མའི་བར་དུ་བླ་མ་བརྒྱུད་པ་མ་ཉམས་ཤིང་། སྦྱོར་དངོས་རྗེས་གསུམ་གྱི་ཆོ་ག་འཁྲུགས་པར་མ་གྱུར་པ་དང་། ཕྱི་དང་ནང་གི་རྟེན་འབྲེལ་བསྒྲིག་མཁྱེན་ཅིང་སློབ་མའི་ཕུང་ཁམས་སྐྱེ་མཆེད་ལ་སྐུ་བཞིའི་ས་བོན་ཐེབས་ནུས་པ་སྟེ། མདོར་ན་སངས་རྒྱས་ཀྱིས་རྒྱུད་སྡེ་ནས་གསུངས་པ་བཞིན་མཛད་པའི་བླ་མ་བཙལ་ལ་དབང་བཞི་བླང་བར་བྱ་སྟེ། དེ་ཡིས་རྟེན་གྱི་གང་ཟག་དེ་སྡོམ་པ་གསུམ་ལྡན་དུ་འགྱུར་རོ། །དེའང་སྔར་སྡོམ་པ་འོག་མ་གཉིས་པོ་བླངས་པ་ཡིན་ན་དབང་བསྐུར་གྱི་ཚེ་སྔགས་སྡོམ་དུ་གནས་འགྱུར་ལ། སྔར་མ་བླངས་ན་སྟ་གོན་གྱི་ཚེ་སོ་ཐར་དང་བྱང་སེམས་ཐོབ་པར་རྗེ་བཙུན་གྱིས་གསུངས་པ་ལ་ཚད་མར་བྱའོ། །གཉིས་པ་ལ་བཞི་སྟེ། སྨིན་བྱེད་མ་ཡིན་པ་སྨིན་བྱེད་དུ་འདོད་པ་དགག་པ། སྨིན་བྱེད་ཀྱི་དབང་མི་དགོས་པར་འདོད་པ་དགག་པ། དགོས་ཀྱང་འཁྲུལ་པར་སྤྱོད་པ་དགག་པ། དབང་བསྐུར་མུ་བཞི་འདོད་པ་དགག་པའོ། །དང་པོ་ལ་བཞི་སྟེ། བྱིན་རླབས་སྨིན་བྱེད་ཡིན་པ་དགག་པ། གྲངས་ངེས་མེད་པའི་དབང་བསྐུར་སྨིན་བྱེད་ཡིན་པ་དགག་པ། དཀྱིལ་འཁོར་མ་དག་པའི་དབང་བསྐུར་སྨིན་བྱེད་ཡིན་པ་དགག་པ། ཆོ་ག་མ་དག་པའི་དབང་བསྐུར་སྨིན་བྱེད་ཡིན་པ་དགག་པའོ། །དང་པོ་ལ་གཉིས་ཏེ། ཕྱོགས་སྔ་མ་བརྗོད་པ་དང་། དེ་དགག་པའོ། །དང་པོ་ནི། དེང་སང་རྡོ་རྗེ་ཞེས་སོགས་ཚིགས་བཅད་གཅིག་སྟེ། ཕག་མོས་ཆོས་སྒོ་འབྱེད་པ་ནི་དྭགས་པོ་ལྷ་རྗེའི་དུས་སུ་བྱུང་སྟེ། བླ་མ་གཞན་ལ་སློབ་མ་རྣམས་དབང་ཞུ་བ་ལ་བཏང་ནས། དེར་བསྡད་ནས་ཕལ་ཆེར་ལོག་མ་བྱུང་བས་རང་རེ་ཚང་ལ་ཡང་དབང་བྱེད་མཁན་རེ་དགོས་པར་འདུག་གསུངས་པས། ཀོང་ནེ་རུ་པས་ངས་ཕག་མགོའི་དབང་རེ་བྱས་ན་ཞུས་པས་དེས་ཆོག་གསུངས་ནས་ཕག་མོའི་བྱིན་རླབས་རེ་བྱས། དེ་ནས་བླ་མས་ནཱ་རོ་ཆོས་དྲུག་ཕྱག་ཆེན་སོགས་བསྟན་པས་དེ་ནས་བཟུང་སྟེ། ཆོས་སྒོ་བ་ལ་དབང་ཞུས་བླ་མས་ཁྲིད་གསུངས་པས་བདེ་མཆོག་གི་དབང་མ་ཐོབ་ཀྱང་། རྡོ་རྗེ་ཕག་མོའི་བྱིན་རླབས་ཙམ་གྱིས་ཆོས་དྲུག་གི་ཆོས་སྒོ་འབྱེད་པ་བྱུང་ངོ་། །གཉིས་པ་ལ་གསུམ་སྟེ། བྱིན་རླབས་སྨིན་བྱེད་ཡིན་པ་ལ་གནོད་བྱེད་བསྟན། བྱིན་རླབས་སྨིན་བྱེད་ཡིན་པའི་སྒྲུབ་བྱེད་དགག བྱིན་རླབས་ཆོས་སྒོར་བྱེད་ན་ཧ་ཅང་ཐལ་བའོ། །དང་པོ་ལ་བཞི་སྟེ། ཤེས་བྱེད་མེད་པ། ཉེས་དམིགས་ཆེ་བ། ཕན་ཡོན་མེད་པ། ལུང་དང་འགལ་བའོ། །དང་པོ་ནི། འདི་འདྲ་རྒྱུད་སྡེ་ཞེས་སོགས་གཉིས་ཏེ། དབང་མ་བསྐུར་བར་བྱིན་རླབས་ཀྱིས་ཆོས་སྒོ་ཕྱེ་ནས་རྫོགས་རིམ་བསྒོམ་པ་འདི་འདྲ་སོགས་སོ། །གཉིས་པ་ནི། རྡོ་རྗེ་ཕག་མོ་ཞེས་སོགས་ཚིགས་བཅད་གསུམ་སྟེ། ཇོ་བོ་རྗེས་མཛད་པའི་རྡོ་རྗེ་ཕག་མོ་ཉིད་ཀྱི་གཞུང་རྗེ་བཙུན་མ་རིན་ཆེན་རྒྱན་གྱི་སྒྲུབ་ཐབས་ལས་ཀྱང་། འདི་ལྟར་རྣལ་འབྱོར་པ་དབང་བསྐུར་བ་ཐམས་ཅད་ཡོངས་སུ་རྫོགས་པས་ཡིད་དང་རྗེས་སུ་མཐུན་པའི་གནས་སུ་ཞེས་པ་དང་། སྔོན་གྱི་བླ་མའི་མན་ངག་གི་དབང་བསྐུར་བའི་རིམ་པས་དེའི་དོན་ལ་དམིགས་ན་རྡོ་རྗེ་རྣལ་འབྱོར་མར་བསམ་པར་བྱའོ། །ཞེས་གསུངས་པ་འདི་འགྲེལ་བྱེད་ཕལ་ཆེར་གྱིས་དྲངས་པར་སྣང་ཡང་། རྗེ་བཙུན་གྱི་རྣལ་འབྱོར་པ་བྱང་སེང་གི་དྲིས་ལན་ལས། དེའང་རྗེ་བཙུན་མ་རྡོ་རྗེ་རྣལ་འབྱོར་མའི་གཞུང་ལས། བྱིན་རླབས་ཕྲ་མོ་བཤད་པ་དེ་དག་གང་ཞེ་ན། དབང་ཐོབ་ཟིན་པའི་གང་ཟག་ལ་ཏིང་ངེ་འཛིན་གྱི་ཁྱད་པར་འགའ་ཞིག་རྒྱུད་ལ་སྐྱེ་བར་བྱ་བའི་ཕྱིར། བྱིན་རླབས་ཀྱི་རྒྱུན་བསྒོམ་དུ་གཞུག་པ་ཞེས་བྱ་བའི་གདམས་ངག་ཡིན་གྱི་དབང་མ་ཐོབ་པ་རྣམས་ལ་རྡོ་རྗེ་རྣལ་འབྱོར་མའི་གསང་བ་བསྟན་དུ་ག་ལ་རུང་། དེའང་རྡོ་རྗེ་རྣལ་འབྱོར་མ་རྣམས་ཀྱི་རྩ་བ་ལྟ་བུ། རྒྱལ་པོ་ཨིནྡྲ་བྷཱུ་ཏིས་མཛད་པ་ཞལ་གཉིས་མ་ཆུང་བ་ཞེས་བྱ་བ་ལས། སྔགས་པས་ཐོག་མར་བླ་མ་དང་། སངས་རྒྱས་ལ་སེམས་མངོན་པར་དྭང་བའི་ཡིད་ཅན་གྱིས་བྱང་ཆུབ་ཀྱི་སེམས་བརྟན་པར་བཟུང་སྟེ་དབང་བསྐུར་བ་ཡང་དག་པར་ཐོབ་ནས་ཞེས་འབྱུང་བ་ཡིན་ནོ། །ཞེས་པ་འདི་ཉིད་ཡིན་ཏེ། ལུང་འདིར་རྡོ་རྗེ་རྣལ་འབྱོར་མ་རྣམས་ཀྱི་རྩ་བ་ལྟ་བུ་ཞེས་དང་། རྩ་བར། རྡོ་རྗེ་ཕག་མོ་ཉིད་ལས་ཀྱང་། །ཞེས་གསུངས་པ་ནི་དོན་གཅིག་གོ །དེས་ན་སྨིན་བྱེད་ཀྱི་དབང་བསྐུར་མེད་པ་ལ་བྱིན་རླབས་བྱེད་པ་བཀག་སྟེ། དཔེར་ན་མུ་ཟིའི་སོགས་སོ། །གསུམ་པ་ནི་རྡོ་རྗེ་ཕག་མོའི་ཞེས་སོགས་དྲུག་སྟེ། སྨིན་བྱེད་ཀྱི་དོན་འདི་རྣམས་མ་ཚང་བ་སྨིན་བྱེད་དུ་མི་རུང་བའོ། །བཞི་པ་ནི། དེས་ན་ཐུབ་པས་ཞེས་སོགས་ཚིགས་བཅད་གཅིག་སྟེ། དེ་ཉིད་བསྡུས་པ་ལས། དཀྱིལ་འཁོར་ཆེན་པོ་མ་མཐོང་བ་རྣམས་ཀྱི་མདུན་དུ་མ་སྨྲ་ཞིག་སྨྲས་ན་དམ་ཚིག་ཉམས་པར་འགྱུར་རོ། །ཞེས་གསུངས་སོ། །གཉིས་པ་ལ་གཉིས་ཏེ། ལག་ལེན་གྱི་བསྒྲུབ་བྱེད་དགག་པ། རང་བཟོའི་སྒྲུབ་བྱེད་དགག་པའོ། །དང་པོ་ནི། འགའ་ཞིག་འདི་ལའང་ཞེས་སོགས་དྲུག་སྟེ། ཕྱག་རྒྱ་བ་འགའ་ཞིག་ཕག་མོའི་བྱིན་རླབས་འདི་ལའང་། ཕག་མགོ་དང་། གྲི་གུག་དང་། མདའ་གཞུ་དང་། ཆང་དང་ཐོད་པ་གཏོད་པ་ལ་སོགས་པའི་དབང་བསྐུར་ཡོད་ཅེས་ཟེར་བ་མི་འཐད་དེ། དེ་འདྲ་དབང་བསྐུར་སོགས་སོ། །ཆག་ལོའི་དྲི་བར། བརྒྱ་ལ་ཕག་མགོའི་དབང་ལ་སོགས་པ་གསུངས་ན་དབང་ཞེས་བརྗོད་པ་ལ་འགལ་བ་ཅི་མཆིས་ཞུས་པའི་ལན་དུ། དེ་འདྲ་རྒྱུད་སྡེ་གང་ནས་ཀྱང་གསུངས་པ་མི་གདའ། བརྟགས་པ་མཐའ་བཟུང་གིས་གསུངས་པ་སྲིད་ན་དབང་བཏགས་པ་བ་ཡིན་ཏེ། དབང་བསྐུར་ལ་སྦྱོར་དངོས་རྗེས་གསུམ་གྱི་ཆོ་ག་མང་དུ་ཡོད་ནའང་དངོས་གཞི་དེ་དབང་ཡིན། གཞན་རྣམས་ཆ་ལག་ཡིན། དགེ་སློང་གི་སྡོམ་པ་འབོགས་པའི་ཆོ་ག་ལ་མང་པོ་ཡོད་ནའང་། གསོལ་གཞིའི་ལས་དེ་ཆོ་ག་དངོས་ཡིན། བུམ་དབང་བཅུ་གཅིག་ཟེར་ཀྱང་ཡན་ལག་ལ་མིང་བཏགས་པ་ཡིན། སམྦུ་ཊི་ལས་ཀྱང་། དབང་དང་རྗེས་གནང་ཐོབ་པ་ཡིས། །བྱ་བ་བྱས་པར་རབ་འཛུམ་ཞིང་། །འགྲོ་ཀུན་དགའ་བར་བྱེད་པ་ཡིས། །ཤིན་ཏུ་སྙན་པའི་ཚིག་གིས་བརྗོད། །ཅེས་ཐ་དད་དུ་གསུངས་ལ། དབང་གི་མིང་བཏགས་ཚད་དེ་དབང་ཡིན་ན། འདུལ་བ་སུམ་བརྒྱ་པར། རྫོགས་པའི་སངས་རྒྱས་དཔལ་ནོད་དབང་བསྐུར་ཡིན། །ཞེས་པ་དང་། མདོ་ལས། དབང་ཐོབ་པའི་བྱང་སེམས་ཞེས་པ་དང་། རྒྱལ་རིགས་སྤྱི་བོ་ནས་དབང་བསྐུར་བ་ཞེས་སོགས་ཀྱང་གསུངས། དེས་ན་མདའ་གཞུ་གཏོད་པ་སོགས་ཀྱང་རྗེས་གནང་ཡིན་གྱི་དབང་མ་ཡིན། ཕག་མགོའི་དབང་བསྐུར་ཡང་གསུངས་འདུག་ན་འདི་འདྲར་བསྡུ་དགོས་ཏེ། བརྫུན་འབའ་ཞིག་ཡིན་གྱིས་གསུངས་པ་ཅིས་ཀྱང་མེད་ཅེས་པའི་ལན་མཛད་དོ། །གཉིས་པ་ནི། ལ་ལ་རྡོ་རྗེ་ཞེས་སོགས་བཅོ་བརྒྱད་དེ། ཞང་ཚལ་པ་ལ་སོགས་པ་ལ་ལ་ཕག་མོའི་བྱིན་རླབས་ལ་སྨིན་བྱེད་ཡོད་པར་བསྒྲུབ་འདོད་ནས། སྡོམ་པ་འབོགས་པའི་སོགས་ཏེ། ཆོ་ག་ཅུང་ཟད་ཉམས་པ་ལ་འཆགས་པར་མ་གསུངས་པ་ནི། འདུལ་བ་ལས། བསྒྲུབ་བྱ་དང་། མཁན་པོ་དང་། དགེ་འདུན་གྱི་མིང་མ་བརྗོད་ན་ཡང་ཆོ་གའི་ཚིག་ཟུར་ཉམས་པས་དགེ་སློང་གི་སྡོམ་པ་མི་སྐྱེ་བར་གསུངས་པ་ལྟ་བུའོ། །ཆོ་ག་ནོར་བར་གྱུར་ན་གྲུབ་པ་མེད་པར་གསུངས་པ་ནི། གསང་བ་སྤྱི་རྒྱུད་ལས་ཁྱད་པར་ཅན་གྱི་ལས་རྣམས་ལ། ལྷ་དུས་བྱ་བ་དུས་བཞིན་སྤྱད། །གཞན་དུ་ཆོ་ག་ཉམས་པའི་ཕྱིར། །གྲུབ་པ་ནམ་ཡང་ཡོད་མ་ཡིན། །ཞེས་གསུངས་སོ། །གསུམ་པ་ནི། གཞན་ཡང་ཕག་མོའི་ཞེས་སོགས་བཅུ་གཅིག་སྟེ། ཕག་མོའི་བྱིན་རླབས་ལ་གསང་སྔགས་ཀྱི་ཆོས་སྒོར་བཤད་པ་མེད་ཀྱང་བྱེད་པ་བས། དགེ་སློང་བྱེད་པ་ལ་རང་བྱུང་གི་བསྙེན་རྫོགས་སོགས་བླང་བར་རིགས་པར་འགྱུར་ཏེ། དེ་གཉིས་ད་ལྟ་འཁྲུལ་པ་མཉམ་པོ་ལ་འདི་རྣམས་སྔོན་གྱི་ཆོ་གར་བཤད་པའི་ཕྱིར་རོ། །དེ་ཡང་ལུང་ལས། སངས་རྒྱས་དང་རང་སངས་རྒྱས་རང་བྱུང་གིས་བསྙེན་རྫོགས་དང་། ལྔ་སྡེ་བཟང་པོ་ཡེ་ཤེས་ཁོང་དུ་ཆུད་པ་དང་། མཆོད་སྦྱིན་མ་ཕྲིན་གྱིས་དང་། འོད་སྲུང་ཆེན་པོ་སྟོན་པར་ཁས་བླངས་པ་དང་། གྲགས་པ་ལ་སོགས་པ་ཚུར་ཤོག་དང་། སྐྱེ་དགུའི་བདག་མོ་ལྕི་བའི་ཆོས་བརྒྱད་ཁས་བླངས་པ་དང་། བྲམ་ཟེ་པོ་ཏ་ཡ་ནའི་བུས་དྲིས་པའི་ལན་ལྡོན་པ་དང་། བཟང་སྡེའི་ཚོགས་དྲུག་ཅུ་སྐྱབས་གསུམ་ཁས་བླངས་པ་དང་། གསོལ་གཞིའི་ལས་ཀྱི་རབ་ཏུ་བྱུང་ཞིང་བསྙེན་པར་རྫོགས་པ་རྣམས་སྔོན་གྱི་ཆོ་གར་གསུངས་སོ། །གཉིས་པ་གྲངས་ངེས་མེད་པའི་དབང་བསྐུར་སྨིན་བྱེད་ཡིན་པ་དགག་པ་ལ་བཞི་སྟེ། གྲངས་ངེས་མེད་པ་གསང་སྔགས་ནུབ་པའི་དཔེར་བསྟན་པ། དེ་ཉིད་རྒྱུད་ལས་བཀག་པའི་ཚུལ། རྒྱུད་དེའི་དོན་བཤད་པ། གཞན་གྱི་དོགས་པ་སྤང་བའོ། །དང་པོ་ནི། དེས་ན་ཉན་ཐོས་ཞེས་སོགས་ཚིགས་བཅད་གསུམ་མོ། །གཉིས་པ་ནི། འདི་ནི་རྡོ་རྗེ་ཞེས་སོགས་བཅུ་གསུམ་སྟེ། སློབ་མ་ལ་གྲངས་ངེས་མེད་པར་དབང་བསྐུར་བྱེད་པ་འདི་ནི། རྡོ་རྗེ་འཆང་གིས་བཀག་སྟེ། སྤྱོད་རྒྱུད་ཀྱི་དབང་བསྐུར་ལ་སློབ་མ་གྲངས་ངེས་མེད་པར་གསུངས་ཤིང་། ལྷག་མ་དམིགས་བསལ་མཛད་པའི་རྒྱུད་སྡེ་གསུམ་གྱི་སློབ་མ་ལ་གྲངས་ངེས་ཡོད་པའི་ཕྱིར་ཏེ། འདི་ནི་གསང་བ་སོགས་སོ། །སྤྱོད་རྒྱུད་ལ་གྲངས་ངེས་མེད་པར་གསུངས་པ་ནི། རྣམ་སྣང་མངོན་བྱང་ལས། གཅིག་གཉིས་བཞི་ལས་ལྷག་ཀྱང་རུང་། །དཔྱད་མི་དགོས་པས་གཟུང་བར་བྱ། །ཞེས་དང་། དེས་བྱང་ཆུབ་ཀྱི་སེམས་ཀྱི་རྒྱུར་འགྱུར་བར་བྱ་བའི་ཕྱིར་སེམས་ཅན་ཚད་མེད་པ་ཡོངས་སུ་གཟུང་བར་བྱའོ། །ཞེས་གསུངས་སོ། །གསུམ་པ་ནི། དེ་བས་ལྷག་པའི་ཞེས་སོགས་བཅུ་སྟེ། རྒྱུད་སྡེ་གསུམ་པོ་ལ་ཉི་ཤུ་རྩ་ལྔ་ལས་ལྷག་པའི་སློབ་མ་ནུབ་གཅིག་ལ་གཟུང་དུ་མི་རུང་བ་གསང་བ་སྤྱི་རྒྱུད་དང་སྦྱར་ནས་བཤད་པའོ། །བཞི་པ་ནི། འདི་ནི་བྱ་བའི་ཞེས་སོགས་བཅུ་སྟེ། ཉི་ཤུ་རྩ་ལྔར་གྲངས་ངེས་པར་གསུངས་པའི་གསང་བ་སྤྱི་རྒྱུད་འདི་ནི་བྱ་བའི་རྒྱུད་ཡིན་པས་རྒྱུད་སྡེ་གཞན་གྱི་ཆོ་ག་ལ་སྦྱར་བར་བྱ་བ་མ་ཡིན་ནོ་སྙམ་ན། གཞན་རྣམས་སོགས་ཏེ། རྒྱུད་གང་དུ་དབང་བསྐུར་བ་ལ་སོགས་པའི་ལས་ཡོད་པར་གྱུར་ལ། ལས་ཀྱི་ཆོ་ག་རྣམས་གསལ་པོ་མེད་པ་དེར་ནི་སྤྱི་ཡི་རྒྱུད་དག་ལས་སོགས་སོ། །གསུམ་པ་དཀྱིལ་འཁོར་མ་དག་པའི་དབང་བསྐུར་སྨིན་བྱེད་ཡིན་པ་དགག་པ་ནི། དེང་སང་བྱིན་རླབས་ཞེས་སོགས་བཅུ་གསུམ་སྟེ། དཀྱིལ་འཁོར་དེ་དག་ཏུ་དབང་བསྐུར་ཀྱང་སྔགས་སྡོམ་མི་ཐོབ་པའི་རྒྱུ་མཚན་ནི། ཕྱི་ལུས་ལ་འདོམ་གང་གྲུ་བཞི་ཡོད་པ་དང་། ནང་སེམས་ལ་བྱང་ཕྱོགས་སོ་བདུན་ཡོད་པའི་རྟེན་འབྲེལ་གྱི་སྟོབས་ཀྱིས་དཀྱིལ་འཁོར་གྲུ་བཞི་སྒོ་བཞི་སོགས་འབྱུང་བ་ཡིན་ཅིང་། གཡུང་དྲུང་རིས་སོགས་འདི་ལ་ཕྱི་ནང་གི་རྟེན་འབྲེལ་བསྒྲིག་མི་ནུས་པ་དེས་ན་སངས་རྒྱས་རྣམས་ཀྱིས་བཀག་གོ །བཞི་པ་ཆོ་ག་མ་དག་པའི་དབང་བསྐུར་སྨིན་བྱེད་ཡིན་པ་དགག་པ་ལ་གསུམ་སྟེ། མ་དག་པའི་དབང་བསྐུར་བྱུང་ཚུལ་བརྗོད། དེ་ཡི་བྱིན་རླབས་བགེགས་ཀྱིས་ཡིན་པར་བསྟན། ཆོ་ག་དག་པའི་བྱིན་རླབས་རྣམ་དག་ཏུ་བསྟན་པའོ། །དང་པོ་ནི། དབང་བསྐུར་བྱེད་པ་ཞེས་སོགས་བདུན་ནོ། །གཉིས་པ་ནི། དེ་ཡི་ལུས་ངག་ཞེས་སོགས་དྲུག་སྟེ། དེ་ལྟ་བུའི་དབང་བསྐུར་བྱེད་པའི་དུས་སུ། སློབ་མའི་ལུས་ངག་ཡིད་གསུམ་གྱི་རྣམ་པ་གདོན་གྱིས་བསྒྱུར་ནས། འཕར་གཡོ་སོགས་བྱུང་བ་ལ་ཡི་དམ་གྱི་བྱིན་རླབས་ཡིན་པར་འཁྲུལ་བ་མང་ཡང་དཔལ་ལྡན་སོགས་སོ། །གསུམ་པ་ནི། ཆོ་ག་དག་པར་ཞེས་སོགས་གཉིས་ཏེ། རྒྱུད་ལས། དབང་དང་རྗེས་གནང་ཐོབ་ནས་ནི། །མ་བསྙེན་པར་ཡང་དེ་ལ་ནི། །ལྷ་ནི་འགོ་ཞིང་དེ་ལ་གནས། །ཞེས་སོ། །གཉིས་པ་སྨིན་བྱེད་ཀྱི་དབང་མི་དགོས་པར་འདོད་པ་དགག་པ་ལ་བཞི་སྟེ། དབང་བསྐུར་མེད་པར་ཟབ་ལམ་བསྒོམ་པ་དགག དབང་བསྐུར་མེད་པ་དབང་རབ་སྨིན་པ་དགག སེམས་བསྐྱེད་ཙམ་གྱིས་གསང་སྔགས་བསྒོམ་པ་དགག ཞར་ལ་སྨིན་བྱེད་ནོར་བ་གཞན་ཡང་དགག་པའོ། །དང་པོ་ནི་དབང་བསྐུར་མེད་ཀྱང་ཞེས་སོགས་བཅོ་ལྔ་སྟེ། རྒྱུད་སྡེ་གཞན་ལས་ཀྱང་དེ་ལྟར་གསུངས་པ་ནི། དམ་པ་དང་པོ་ལས། དབང་བསྐུར་མེད་པར་སྔགས་འཆད་དང་། །ཟབ་མོའི་དེ་ཉིད་སྒོམ་བྱེད་པ། །དེ་དོན་ལེགས་པར་ཤེས་ན་ཡང་། །དམྱལ་བར་འགྱུར་གྱི་གྲོལ་བ་མེད། །ཅེས་པ་དང་། བཤད་རྒྱུད་རྡོ་རྗེ་ཕྲེང་བ་ལས། དབང་བསྐུར་མེད་པར་རྒྱུད་འཆད་པ། །སྒྲུབ་པོས་སྔགས་ཀྱི་དོན་ཤེས་ཀྱང་། །སློབ་དཔོན་སློབ་མ་མཚུངས་པར་ནི། །ཤི་ནས་ངུ་འབོད་ཆེན་པོར་ལྟུང་། །ཞེས་སོགས་གསུངས་སོ། །གཉིས་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ཁ་ཅིག་གང་ཟག་ཞེས་སོགས་ཚིགས་བཅད་གཅིག་སྟེ། ཕྱག་རྒྱ་བ་ཁ་ཅིག གང་ཟག་དབང་པོ་རབ་སྨིན་བྱེད་ཕག་མོའི་བྱིན་རླབས་ཡིན་པས་དབང་བསྐུར་མི་དགོས་ལ་འབྲིང་དང་སོགས་སོ། །གཉིས་པ་ནི། གང་ཟག་རབ་འབྲིང་ཞེས་སོགས་བཅུ་གཅིག་སྟེ། འཕགས་པའི་གང་ཟག་དབང་པོ་རབ་ཨིནྡྲ་བྷཱུ་ཏི་དང་། ཟླ་བ་བཟང་པོ་སོགས་སྤྲུལ་པའི་དཀྱིལ་འཁོར་དུ་དབང་བསྐུར་བར་གསུངས་པ་ནི། སྔོན་ཆོག་འཕགས་པའི་སྤྱོད་ཡུལ་ཡིན་གྱི་དེང་སང་གང་ཟག་སོགས་ཏེ། རྒྱུད་སྡེ་རྣམས་ལས། རྣམ་སྤྱད་དང་པོ་ས་གཞི་གཟུང་། །གཉིས་པ་ལ་ནི་སྟ་གོན་ཏེ། །ནུབ་གསུམ་པ་ལ་འཇུག་པ་ཤིས། །ཞེས་པས་བསྡུས་པའི་ཆོ་ག ཐོག་མར་བསྙེན་པ་ཇི་ལྟར་བྱ་བ་དང་། སའི་ཆོ་ག་དང་། སྟ་གོན་དང་དཀྱིལ་འཁོར་ཇི་ལྟར་བྲི་བའི་ཚུལ་དང་། བདག་ཉིད་འཇུག་ཅིང་དབང་བླང་བ་དང་། སློབ་མ་འཇུག་ཅིང་དབང་བསྐུར་བར་གསུངས་པ་རྣམས་ནི། སོ་སོ་སྐྱེ་བོའི་རྡོ་རྗེ་སློབ་དཔོན་གྱིས་སོ་སོ་སྐྱེ་བོའི་སློབ་མ་སྨིན་པ་འབའ་ཞིག་གི་དབང་དུ་བྱས་ནས་གསུངས་པའི་ཕྱིར་རོ། །འོ་ན་ད་ལྟའི་སྨིན་བྱེད་ལ་རྡུལ་ཚོན་གྱི་དཀྱིལ་འཁོར་ཁོ་ན་དགོས་སམ། རས་བྲིས་ཀྱང་རུང་སྙམ་ན། འདིའི་དཔྱད་པ་ནི་སྤྱི་དོན་དུ་བསྟན་ཟིན་ཏོ། །གསུམ་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ལ་ལ་སེམས་བསྐྱེད་ཞེས་སོགས་གསུམ་སྟེ། གསང་འདུས་སྟོད་ལུགས་པའི་འདོད་པའོ། །གཉིས་པ་ལ་གསུམ་སྟེ། བྱ་རྒྱུད་ལ་རྣམ་པར་ཕྱེ་སྟེ་ལན་བཏབ་པ། ལྷག་མ་གསུམ་ལ་མགོ་གཅིག་ཏུ་ལན་བཏབ་པ། སྒྲུབ་བྱེད་ཀྱི་སྒོ་ནས་མཇུག་བསྡུ་བའོ། །དང་པོ་ནི། འདི་ཡང་ཕྱེ་སྟེ་ཞེས་སོགས་བཅུ་བདུན་ཏེ། བྱ་རྒྱུད་ལ་རྣམ་པ་གསུམ་ལས། དོན་ཞགས་དང་། བཅུ་གཅིག་ཞལ་ལ་སོགས་པ་རྣམས་ལ་དབང་བསྐུར་དང་སེམས་བསྐྱེད་གཉིས་ཀ་མ་ཐོབ་ཀྱང་སྨྱུང་གནས་སོགས་བྱེད་ནུས་ན་ཀུན་གྱིས་བསྒྲུབ་པར་གསུངས་སོ། །དམ་ཚིག་གསུམ་བཀོད་སོགས་ལས། འཇུག་པ་སེམས་བསྐྱེད་ཐོབ་ནས་དབང་བསྐུར་མ་ཐོབ་ཀྱང་ཕྲིན་ལས་འགའ་ཞིག་སྒྲུབ་པའི་ཕྱིར་ཆོ་ག་ཤེས་ན་བསྒྲུབ་པར་གསུངས་སོ། །ལེགས་གྲུབ་དང་དཔུང་བཟང་ཡན་ཆད་དུ་རང་དང་རང་གི་དཀྱིལ་འཁོར་དེའི་དབང་བསྐུར་མ་ཐོབ་ན་སོགས་སོ། །དེ་ལྟར་ལུགས་གསུམ་ལས། དང་པོའི་ལུང་ནི། ཆོ་ག་ཞིབ་མོ་ལས། སེམས་ཅན་ཐམས་ཅད་ལ་ནུས་སམ་མི་ནུས་དྲིས་ཏེ་སྦྱིན་པར་བྱའོ། །ཞེས་དང་། དུད་འགྲོའི་རྣ་ལམ་དུ་ཡང་སྒྲོགས་ཤིག་ཅེས་སོགས་གསུངས་སོ། །གཉིས་པའི་ལུང་ནི། གང་ཞིག་བྱང་ཆུབ་སེམས་བརྟན་ཅིང་། །བློ་གྲོས་ཆགས་པ་མེད་པ་དང་། །ཐམས་ཅད་དག་ཀྱང་མི་བྱེད་པ། །དེས་འདི་ངེས་པར་འགྲུབ་པར་འགྱུར། །ཞེས་སོ། །གསུམ་པའི་སོགས་ཀྱིས་སྒྲས་བསྡུས་པ་དཔུང་བཟང་ལས། གང་དག་རིགས་དང་དབང་བསྐུར་ཆོ་ག་མེད། །གང་དག་དཀྱིལ་འཁོར་དུ་ནི་མ་ཞུགས་དང་། །གང་དག་བྱང་ཆུབ་སེམས་ནི་མ་སྐྱེས་པ། །ང་ཡི་གསང་སྔགས་བཟླས་ན་ཕུང་བར་འགྱུར། །ཞེས་སོ། །གཉིས་པ་ནི། ལྷག་མ་རྒྱུད་སྡེ་ཞེས་སོགས་ཚིགས་བཅད་གཅིག་སྟེ། ལུང་རྣམས་ནི་སྤྱི་དོན་དུ་བསྟན་ཟིན་ཏོ། །གསུམ་པ་ནི་དབང་བསྐུར་ནང་གི་ཞེས་སོགས་དྲུག་སྟེ། ལེགས་གྲུབ་ཡན་ཆད་དུ། དབང་བསྐུར་མེད་ན་བསྒོམ་དུ་མི་རུང་བའི་རྒྱུ་མཚན་བསྟན་ནོ། །བཞི་པ་ནི། གཏོར་མའི་དབང་བསྐུར་ཞེས་སོགས་ཚིགས་བཅད་གཅིག་སྟེ། འདིའི་ཏིང་ངེ་འཛིན་གྱི་དབང་བསྐུར་ནི། ཆོ་ག་མེད་པར་དམིགས་པ་གཏད་པ་ཙམ་ལ་དགོངས་པ་ཡིན་གྱི་ཏིང་ངེ་འཛིན་གྱི་དཀྱིལ་འཁོར་སྤྲུལ་ནས་སློབ་མ་ལ་སྟོན་ནུས་པའི་དབང་བསྐུར་སྨིན་བྱེད་ཡིན་པ་དགག་པ་ནི་མ་ཡིན་ནོ། །གསུམ་པ་དབང་བསྐུར་དགོས་ཀྱང་འཁྲུལ་པར་སྤྱོད་པ་དགག་པ་ལ་ལྔ་སྟེ། དབང་བསྐུར་བའི་དུས་ལ་འཁྲུལ་པ་དགག་པ། སློབ་མའི་རྒྱུད་ལ་འཁྲུལ་པ་དགག་པ། སྐུར་བྱེད་ཀྱི་དཀྱིལ་འཁོར་ལ་འཁྲུལ་པ་དགག་པ། རྒྱུད་སྡེའི་ཁྱད་པར་ལ་འཁྲུལ་པ་དགག་པ། ཆོས་སྒོའི་མིང་ལ་འཁྲུལ་པ་དགག་པའོ། །དང་པོ་ནི། འགའ་ཞིག་གསང་སྔགས་ཞེས་སོགས་བཅུ་སྟེ། གསང་འདུས་སྟོད་ལུགས་པ་འགའ་དང་། རྣམ་དབྱེ་ཆུང་བའི་སྔགས་པར་ཁས་འཆེ་བ་འགའ་ཞིག གསང་སྔགས་ད་ལྟ་དབང་མ་ཐོབ་པར་སྤྱོད་ཅིང་། དབང་བསྐུར་ཕྱིས་ནས་སོགས་ཏེ། སློབ་དཔོན་ལྟུང་བ་ཅན་དུ་འགྱུར་བ་ནི། ཡོངས་སུ་མ་སྨིན་སེམས་ཅན་ལ། །གསང་བ་སྒྲོགས་པ་བདུན་པ་ཡིན། །ཞེས་དང་། སློབ་མའང་སྔོན་དུ་ཉམས་པར་འགྱུར་བ་ནི། དེ་ཉིད་བསྡུས་པ་ལས། དེ་ནི་འདི་ལྟར་དཀྱིལ་འཁོར་ཆེན་པོ་མ་མཐོང་བའི། སེམས་ཅན་དེ་དག་གིས་ཕྱག་རྒྱ་བཅིང་བར་བྱས་ནས། དེའི་ཚེ་དེ་དག་དེ་ལྟར་འགྲུབ་པར་མི་འགྱུར་རོ། །དེ་ནས་དེ་དག་ཐེ་ཚོམ་དུ་འགྱུར་ཏེ། གནོད་པ་མ་སྤངས་པས་མྱུར་བ་ཉིད་དུ་དུས་བྱས་ནས་དམྱལ་བ་ཆེན་པོ་མནར་མེད་པ་ཞེས་བྱ་བར་ལྟུང་བར་གྱུར་ཏོ། །ཁྱོད་ཉིད་ཀྱང་ངན་སོང་དུ་ལྟུང་བར་འགྱུར་རོ། །ཞེས་དང་། བཞི་བརྒྱ་པ་ལས། ཉམས་པར་གྱུར་པ་དམ་ཆོས་ཀྱི། །སྣོད་ནི་ཅིས་ཀྱང་མ་ཡིན་ནོ། །ཞེས་སོ། །གཉིས་པ་ནི། གཅོད་ཡུལ་བ་ལ་ལ་སེམས་ཉིད་ཞེས་སོགས་བཅུ་དགུའོ། །གསུམ་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ཁ་ཅིག་ཆོ་ག་ཞེས་སོགས་གསུམ་སྟེ། ཕྱག་རྒྱ་བ་ཁ་ཅིག ཆོ་གའི་རྣམ་གཞག་མེད་བཞིན་དུ། བླ་མའི་ལུས་དཀྱིལ་ལས་དབང་བཞི་རྫོགས་པར་ལེན་པར་འདོད་དེ། ལུས་བཙུན་མོ་ལྟ་བུར་སྐུ་ལ་འཁྲིལ། །སྙིང་ལ་སྙིང་སྤྲད་དཔྲལ་བ་གཏུགས། །དུས་དེར་དབང་རྫོགས་སེམས་ལ་བསྐུར། །ཆོས་རྫོགས་དོན་གྱི་ངོ་བོ་མཐོང་། །ཞེས་ཟེར་རོ། །གཉིས་པ་ལ་གསུམ་སྟེ། ཆོ་ག་མེད་པ་ལ་གནོད་བྱེད་བསྟན། ཆོ་ག་ཡོད་པའི་སྒྲུབ་བྱེད་བརྗོད། བདེན་གཉིས་ཀྱི་སྒོ་ནས་ཆོ་ག་ཐམས་ཅད་མཚུངས་པར་བསྟན་པའོ། །དང་པོ་ནི། འོ་ན་དགེ་ཚུལ་ཞེས་སོགས་ཚིགས་བཅད་གསུམ་སྟེ། རྒྱུ་མཚན་དེའི་ཕྱིར་ན་དབང་བསྐུར་དུ་མ་ཟད་སངས་རྒྱས་ཀྱིས་གསུངས་པའི་སྡོམ་གསུམ་གྱི་ཆོ་ག་ཐམས་ཅད་སྤོང་བར་རིགས་པར་ཐལ་ལོ། །གཉིས་པ་ནི། གལ་ཏེ་ཆོ་ག་ཞེས་སོགས་ཚིགས་བཅད་གསུམ་སྟེ། རྐང་པ་དང་པོ་ལྔས་ཆོ་ག་མེད་པའི་ཉེས་དམིགས་བསྟན། དེ་ནས་གཉིས་ཀྱིས་དབང་བསྐུར་ལ་ཆོ་ག་དགོས་པར་བསྟན། ལྷག་མ་གཉིས་ཀྱིས་དབང་བསྐུར་གྱི་ཆོ་ག་སྤོང་མི་རིགས་པར་བསྟན་ནོ། །འདི་དག་ཀྱང་སྨིན་བྱེད་ཀྱི་དབང་བླ་མའི་ལུས་དཀྱིལ་ལས་ལེན་པ་དགག་པ་ཡིན་གྱི་སྤྱིར་དབང་ལེན་པ་ཙམ་དགག་པ་ནི་མ་ཡིན་པར་ཤེས་པར་བྱའོ། །གསུམ་པ་ནི། དེ་ཕྱིར་དམ་པའི་ཞེས་སོགས་ཉེར་གསུམ་སྟེ། ཀུན་རྫོབ་ཏུ་སྡོམ་པ་གསུམ་ཅར་གྱི་ཆོ་ག་ཐམས་ཅད་ཡོད་མཚུངས་ཡིན་ཅིང་། དོན་དམ་དུ་མེད་མཚུངས་ཡིན་ཏེ། ལང་གཤེགས་ལས། ཀུན་རྫོབ་དུ་ནི་ཐམས་ཅད་ཡོད། །དམ་པའི་དོན་དུ་ཡོད་མ་ཡིན། །དེས་ན་དངོས་པོ་གཅིག་ཉིད་ལ། །ཡོད་དང་མེད་པ་ཇི་ལྟར་འགལ། །ཞེས་གསུངས་སོ། །དེས་ན་སོ་ཐར་ལ་སོགས་པའི་ཆོ་ག་ལ་ལ་དགོས་བཞིན་དུ། སྨིན་བྱེད་ལ་ལའི་ཆོ་ག་མི་དགོས་ཞེས་སྨྲ་བ་སོགས་ཏེ། མདོ་སྡུད་པ་ལས། ཆོས་བཏང་ནས་ནི་ཆོས་མིན་བྱ་བ་སྤྱོད་འགྱུར་བ། །ལམ་བོར་ལམ་གོལ་འགྲོ་བ་འདི་ནི་བདུད་ཀྱི་ལས། །ཞེས་སོགས་སོ། །བཞི་པ་ལ་གཉིས་ཏེ། ཕྱོགས་སྔ་མ་བརྗོད་པ་དང་། དེ་དགག་པའོ། །དང་པོ་ནི། ཁ་ཅིག་བྱ་བའི་ཞེས་སོགས་ཚིགས་བཅད་གཅིག་སྟེ། སྔོན་གྱི་དོན་ཞགས་པ་དང་། ཕྱག་རྒྱ་པ་ཁ་ཅིག་འདོད་པའོ། །འདུལ་བ་སེང་གེས་འདི་པཎྜི་ཏ་ཨ་བྷ་ཡ་ཀ་རའི་འདོད་པ་ལ་སྦྱོར་བ་ནི། འདི་བོད་ཀྱི་འདོད་པ་འགོག་པའི་སྐབས་ཡིན་ཅིང་། བྱ་རྒྱུད་ལ་དབང་བཞི་སྦྱར་བ་པཎྜི་ཏ་དེའི་དགོངས་པ་མ་ཡིན་པས་མི་འཐད་དམ་སྙམ་དུ་སེམས་སོ། །གཉིས་པ་ནི། འདི་ཡང་སངས་རྒྱས་ཞེས་སོགས་བཅུ་བདུན་ཏེ། རྒྱུད་སྡེ་རང་གི་ངོས་ནས་འོག་མ་གསུམ་ལ་སྨིན་བྱེད་ཀྱི་དུས་སུ་དབང་བཞི་ཡང་མེད་ཅིང་། གྲོལ་བྱེད་ཀྱི་དུས་སུ་རིམ་པ་གཉིས་ཀྱང་མེད་པས། གཞུང་འདི་དག་སྒྲ་ཇི་བཞིན་དུ་བཤད་པར་བྱའོ། །ཁ་ཅིག་ཕྱོགས་བཅུའི་སངས་རྒྱས་ཀྱི་ཕྲིན་ཡིག་ལས། བཅོམ་ལྡན་ཁྱོད་ཀྱིས་གསང་སྔགས་ལམ། །རིམ་པ་གཉིས་སུ་བསྡུས་ཏེ་གསུངས། །ཞེས་སོགས་ལ་འཁྲུལ་ནས་རྒྱུད་སྡེ་འོག་མ་ལ་རིམ་གཉིས་ཡོད་པར་བསམས་ཏེ། དབང་བཞི་མེད་པས་དེ་ལ་ལྟོས་པའི་རིམ་གཉིས་མེད་པ་ཡིན་གྱི། སྤྱིར་རིམ་གཉིས་ཡོད་དོ་ཞེས་སྨྲ་བ་རྣམས་སྤྱི་དོན་དུ་བཀག་ཟིན་པས་དེར་བལྟ་བར་བྱའོ། །རྒྱུད་སྡེ་བཞི་ལ་དབང་མི་འདྲ་བ་རྣམ་པ་བཞི་ཡོད་པ་ནི། ཡེ་ཤེས་ཐིག་ལེའི་རྒྱུད་ལས། ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལས་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་ལས་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་གསལ་བར་ཕྱེ། །དེ་ནི་དྲུག་གི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ལྟར་དེ་བཞིན་ནོ། །ཞེས་གསུངས་པ་ལྟར་ཡིན་ལ། ལམ་གྱི་དབྱེ་བ་མི་འདྲ་བ་བཞི་ནི་གོང་དུ་བཤད་ཟིན་ཏོ། །ལྔ་པ་ལ་གསུམ་སྟེ། མོས་པ་ཆོས་སྒོ་ཡིན་པ་དགག དབང་ལས་གསང་སྔགས་ལོགས་ན་ཡོད་པ་དགག དབང་ལས་གསང་སྔགས་ལོགས་ན་མེད་པའི་རྒྱུ་མཚན་ནོ། །དང་པོ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ལ་ལ་དབང་བསྐུར་ཞེས་སོགས་ཚིགས་བཅད་གཅིག་སྟེ། ཕྱག་རྒྱ་བ་ཁ་ཅིག་འདོད་པའོ། །གཉིས་པ་ནི། འོ་ན་སྡོམ་པ་ཞེས་སོགས་བཅུ་བཞིའོ། །གཉིས་པ་ནི། དེས་ན་ཆོས་སྒོ་ཞེས་སོགས་བཅུ་བཞི་སྟེ། ཆོས་སྒོ་ཞེས་བྱ་བ་རྒྱུད་སྡེའི་ཐ་སྙད་ལ་མེད་ཀྱང་གསར་དུ་བཟོས་པའི་མིང་གིས་འཁྲུལ་གཞི་བྱས་ནས་དབང་བསྐུར་ཆོས་སྒོ་སོགས་སོ། །གསུམ་པ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། དེས་ན་སྙིང་གཏམ་ཞེས་སོགས་ཚིགས་བཅད་གཅིག་གོ །གཉིས་པ་ནི། ཕུང་པོ་ཁམས་དང་ཞེས་སོགས་བཅོ་ལྔ་སྟེ། འོ་ན་རྟེན་འབྲེལ་བསྒྲིག་པའི་ཚུལ་ཇི་ལྟར་ཡིན་སྙམ་ན། སྦྱང་གཞི་སློབ་མའི་ཕུང་ཁམས་སྐྱེ་མཆེད་རྣམས་ལ། རྡོ་རྗེ་སློབ་དཔོན་དག་བྱ་དག་བྱེད་ངོ་སྤྲོད་ཤེས་པས་གདན་གསུམ་ཚང་བའི་སངས་རྒྱས་ཀྱི་ས་བོན་བཏབ་ནས། ཚེ་འདིར་སངས་རྒྱས་བྱེད་པའི་ཐབས་ལ་དབང་བསྐུར་ཞེས་སུ་བཏགས་པ་ཡིན་ནོ། །དེས་ན་གང་ཟག་དབང་པོ་རབ་ཨིནྡྲ་བྷཱུ་ཏི་ལྟ་བུ་དབང་བསྐུར་ཉིད་ཀྱིས་གྲོལ་བར་གསུངས་པ་ཡང་། དབང་བསྐུར་གསང་སྔགས་ཀྱི་ལམ་གྱི་གཙོ་བོ་ཡིན་པའི་རྒྱུ་མཚན་གྱིས་གྲོལ་བ་ཡིན་གྱི། དབང་བསྐུར་ཆོས་སྒོ་ཙམ་དུ་བྱས་ནས་གསང་སྔགས་ལོགས་ན་བསྒོམ་རྒྱུ་ཡོད་ན། དབང་བསྐུར་ཁོ་ནས་ཇི་ལྟར་གྲོལ་ལེགས་པར་སེམས་ལ་སྨྲོས་ཤིག དབང་གིས་གྲོལ་བར་མི་ནུས་པའི་གང་ཟག་གཞན་འབྲིང་དང་ཐ་མ་དག་ལ་བསྒོམ་དགོས་ཀྱང་། སྔར་དབང་བསྐུར་ཐོབ་པ་དེ་བསྲུང་ཞིང་འཕེལ་བར་བྱེད་པ་ལ་བསྒོམ་པ་ཞེས་སུ་བཏགས་པ་ཡིན་ཏེ། བསྐྱེད་རིམ་བསྒོམ་པ་ནི་བུམ་དབང་གི་དུས་སུ་ཕུང་ཁམས་སྐྱེ་མཆེད་ལྷར་བསྐྱེད་པ་དེ་བསྒོམ་པ་ཡིན་ཅིང་། རྫོགས་རིམ་བསྒོམ་པ་ནི་དབང་གོང་མ་གསུམ་གྱི་དུས་སུ་ངག་ལ་ལོངས་སྤྱོད་རྫོགས་སྐུ་དང་། ཡིད་ལ་ཆོས་སྐུ་དང་། གསུམ་ཀ་ལ་ངོ་བོ་ཉིད་སྐུའི་ས་བོན་བཏབ་པ་དེ་བསྲུང་ཞིང་འཕེལ་བར་བྱེད་པ་ཡིན་པའི་ཕྱིར་རོ། །དེས་ན་རྡོ་རྗེ་ཐེག་པ་བླ་མེད་ཀྱི་སྒོར་ཞུགས་ནས། དབང་བསྐུར་བ་རྣམ་པ་བཞི་ལས་གཞན་པའི་ཆོས་མེད་དེ། སྦྱང་གཞིའི་ལུས་ཀྱང་དབང་བཞིའི་ཚུལ་དུ་གནས། དེ་ལ་རྡོ་རྗེ་སློབ་དཔོན་གྱིས་དབང་བཞི་བསྐུར། དེ་ཉིད་ལམ་གྱི་དུས་སུ་ཡང་དབང་བཞིའི་ཚུལ་དུ་བསྒོམ། འབྲས་བུའི་དུས་སུ་ཡང་དབང་བཞིའི་ཚུལ་དུ་སངས་རྒྱ་བ་ཡིན་པས། རྒྱུ་ལ་འབྲས་བུའི་རྒྱས་གདབ་ཅིང་། འབྲས་བུ་ལ་རྒྱུའི་རྒྱས་གདབ་པའི་གནད་དམ་པ་རྣམས་འདིའི་སྐབས་སུ་ཤེས་པར་བྱ་དགོས་སོ། །དབང་བསྐུར་ལས་གཞན་པའི་གསང་སྔགས་ཀྱི་ཉམས་ལེན་མེད་པའི་དཔེ་ནི། ཐེག་པ་ཆེན་པོ་ཕ་རོལ་ཏུ་ཕྱིན་པ་ལ་སེམས་བསྐྱེད་མ་ཡིན་པའི་ཆོས་གཞན་མེད་པ་བཞིན་ཏེ། དེ་ལ་ཡང་ཐོག་མར་སེམས་བསྐྱེད་བླངས་པའི་ཚེ། སངས་རྒྱས་སྒྲུབ་པའི་ཐབས་ཁྱད་པར་ཅན་གྱི་ས་བོན་སེམས་ལ་བཏབ་པ་ཡིན་ཅིང་། དེའི་ཚེ་ཉེས་སྤྱོད་སྤོང་བ་དང་། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱིས་བསྡུས་པའི་བྱང་ཆུབ་སེམས་དཔའི་སྤྱོད་པ་རླབས་པོ་ཆེའི་ས་བོན་སེམས་ལ་བཏབ་པ་དེ་ཉིད་བསྲུང་ཞིང་འཕེལ་བར་བྱེད་པ་ལས་གཞན་པའི་ཐེག་པ་ཆེན་པོའི་ཆོས་ཅུང་ཟད་ཀྱང་མེད་པའི་ཕྱིར་རོ། །གནད་འདི་དག་ནི་ཁོ་བོ་འབའ་ཞིག་གི་སྤྱོད་ཡུལ་ཡིན་ནོ། །གསུམ་པ་ནི། དེས་ན་ཐུབ་པས་ཞེས་སོགས་ཚིགས་བཅད་གཅིག་སྟེ། རྒྱུད་སྡེ་རྣམས་དང་། མཁས་གྲུབ་ཀྱི་གཞུང་རྣམས་ལས་དབང་བསྐུར་བའི་ཕན་ཡོན་དང་། མ་བསྐུར་བའི་ཉེས་དམིགས་དཔག་ཏུ་མེད་པ་གསུངས་པའི་སྒོ་ནས་དབང་བསྐུར་ཁོ་ན་ལ་བསྔགས་པ་ནི། དབང་བསྐུར་གསང་སྔགས་ཀྱི་ལམ་གྱི་རྩ་བ་ཡིན་པ་དེས་ནའོ། །ལུང་རྣམས་ནི་སྤྱི་དོན་དུ་བལྟ་བར་བྱའོ། །བཞི་པ་དབང་བསྐུར་མུ་བཞིར་འདོད་པ་དགག་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ལ་ལ་དབང་བསྐུར་ཞེས་སོགས་ལྔ་སྟེ། ཏི་ཕུ་པ་དང་། རས་ཆུང་པ་སོགས་ཀྱི་འདོད་པའོ། །གཉིས་པ་ལ་བཞི་སྟེ། མུ་བཞི་སྒྲུབ་བྱེད་ཀྱི་ལུང་མེད་པ། རིགས་པས་སྒྲུབ་ན་ཀུན་ལ་མཚུངས་པ། མུ་བཞི་ཡོད་ཀྱང་ཤེས་པར་མི་ནུས་པ། ནུས་ན་དབང་བསྐུར་དགོས་པར་གྲུབ་པའོ། །དང་པོ་ནི། འདི་འདྲར་གང་ནའང་ཞེས་སོགས་གཉིས་སོ། །གཉིས་པ་ནི། འོན་ཀྱང་འདི་ཡང་ཞེས་སོགས་བཅུ་གཅིག་གོ །གསུམ་པ་ནི། གལ་ཏེ་མུ་བཞི་ཞེས་སོགས་དྲུག་གོ །བཞི་པ་ནི། གལ་ཏེ་མུ་བཞི་བདེན་ཞེས་སོགས་བཅུའོ། །གསུམ་པ་དབང་ལས་ཐོབ་པའི་དམ་ཚིག་ལ་འཁྲུལ་པ་དགག་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ཁ་ཅིག་གསང་སྔགས་ཞེས་སོགས་གསུམ་སྟེ། རྙིང་མ་བ་ཁ་ཅིག་གསང་སྔགས་སྤྱིར་གསང་བར་བྱ་བ་ཡིན་པ་ལ་འོན་ཀྱང་ཡེ་གསང་ཞེས་བྱ་བའི་ཐབས་ཀྱིས་ཆོད་པའི་ཕྱིར་ན། དབང་གིས་མ་སྨིན་པའི་སེམས་ཅན་ལ་གསང་བ་བསྒྲགས་པ་ལ་ལྟུང་བ་མེད་དོ། །ཞེས་ཟེར་རོ། །གཉིས་པ་ནི། འདི་ཡང་ཅུང་ཟད་ཞེས་སོགས་བཅོ་ལྔ་སྟེ། ཡེ་གསང་གི་དོན་གསང་སྔགས་ཀྱི་ཚིག་དོན་གོ་བ་མེད་པ་ལ་ཡེ་ནས་གསང་བ་ཡིན་ཟེར་ན། འོ་ན་གོ་བའི་སོགས་ཏེ། རྒྱུད་རྡོ་རྗེ་ཕྲེང་བ་སོགས་ལས། དབང་མ་བསྐུར་བ་ལ་གསང་སྔགས་བཤད་པའི་ཉེས་དམིགས་མང་དུ་གསུངས་པ་དང་། གཞན་ཡང་དགྲ་ནག་གི་རྒྱུད་དང་། རྡོ་རྗེ་གུར་དང་། དེ་ཉིད་བསྡུས་པ་དང་། རྡོ་རྗེ་སྙིང་པོ་རྒྱན་ལ་སོགས་པ་རྣམས་ལས། དབང་མ་བསྐུར་བའི་སེམས་ཅན་ལ་གསང་སྔགས་སྒྲོགས་པ་ལ་ལྟུང་བ་འབྱུང་བར་གསུངས་པའི་ཕྱིར་དང་། ཕ་རོལ་ཏུ་ཕྱིན་པའི་སྡེ་སྣོད་ལས་ཀྱང་། བློ་སྦྱངས་མ་བྱས་སེམས་ཅན་ལ། །སྟོང་པ་ཉིད་ནི་བརྗོད་པ་དང་། །ཞེས་ལྟུང་བར་གསུངས་པའི་ཕྱིར་རོ། །དེས་ན་སྨིན་བྱེད་ཀྱི་སྐབས་སུ་ཆོས་སྒོ་ཞེས་བྱ་བ་དང་། དམ་ཚིག་གི་སྐབས་སུ་ཡེ་གསང་ཞེས་བྱ་བའི་ཐ་སྙད་རྣམས་ནི་བསྟན་པ་ལ་གནོད་པའི་ཚིག་ཡིན་པས་ཐ་སྙད་ཙམ་ཡང་སྤངས་ཏེ། སྨིན་བྱེད་ཀྱི་དབང་བླ་མ་ཚད་ལྡན་ལས་རྒྱུད་སྡེ་ལས་ཇི་ལྟར་གསུངས་པ་བཞིན་བླངས་ནས་དམ་ཚིག་དང་། སྡོམ་པ་ཚུལ་བཞིན་དུ་བསྲུང་བ་ལ་འབད་པར་བྱའོ། །གཉིས་པ་གྲོལ་བྱེད་འཁྲུལ་པ་མེད་པའི་རིམ་གཉིས་ལ་བཞི་སྟེ། ལམ་གྱི་གཙོ་བོ་མི་དགོས་པར་འདོད་པ་དགག ལམ་གྱི་གཙོ་བོ་ངོས་བཟུང་བ། སངས་རྒྱས་ཐོབ་པར་འདོད་པས་དེ་ལ་བསླབ་པར་གདམས་པ། དེ་དག་དང་མ་འབྲེལ་བའི་ཆོས་ལུགས་དགག་པའོ། །དང་པོ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ཁ་ཅིག་འཁྲུལ་དང་ཞེས་སོགས་ཚིགས་བཅད་བཞི་སྟེ། ཕྱག་རྒྱ་བ་ཁ་ཅིག་ན་རེ། སངས་རྒྱས་སྒྲུབ་པའི་ཐབས་ལམ་ལ་འཁྲུལ་པ་དང་མ་འཁྲུལ་པའི་དབྱེ་བ་མེད་ཅིང་། མཐའ་གཅིག་ཏུ་ངེས་པ་ཡང་མ་ཡིན་ཏེ། རླུང་དང་གཏུམ་མོ་ལ་སོགས་པའི་ཐབས་ལམ་ཕྱོགས་རེ་བས་གྲུབ་པ་ཐོབ་པ་ཡོད་པའི་ཕྱིར་ཏེ། དཔེར་ན་ལྟ་བ་རྟོགས་པས་ཞེས་སོགས་སོ། །གོ་རཀྵ་བ་ལང་བསྲུང་བའོ། །ཨིནྡྲ་བྷཱུ་ཏི་འདོད་ཡོན་གྱིས་ཞེས་པ་ནི། བཙུན་མོའི་ཚོགས་དང་ལྷན་ཅིག་རོལ་ཞིང་། རྒྱལ་སྲིད་ཀྱི་འདོད་ཡོན་ལ་ལོངས་སྤྱོད་པའོ། །རྒྱུ་རྐྱེན་གྱི་རྟེན་འབྲེལ་ཐམས་ཅད་ཚོགས་པ་ལས། བིརྺ་པ་ལ་གྲུབ་ཐོབ་འབྱུང་བས། འདི་འདྲའི་ཐབས་ལམ་སྣ་ཚོགས་ཀྱིས་སངས་རྒྱ་བ་ལ་བསྐུར་པ་གདབ་ཏུ་མི་རུང་ངོ་ཞེས་ཟེར་རོ། །གཉིས་པ་ལ་ལྔ་སྟེ། ཕྱོགས་རེའི་ཐབས་ཀྱིས་གྲོལ་བ་དགག རིམ་གཉིས་ཐབས་ཀྱི་གཙོ་བོར་བསྟན། གཙོ་བོ་ཡིན་པའི་སྒྲུབ་བྱེད་དགོད། ཕྱོགས་རེའི་ཐབས་ཀྱི་དགོས་པ་བསྟན། སྒྲོ་སྐུར་སྤངས་ནས་གཙོ་བོར་བསྒྲུབ་པར་བསྟན་པའོ། །དང་པོ་ནི། འདི་ཡང་ལེགས་པར་ཞེས་སོགས་བདུན་ཏེ། ཐབས་དང་ཤེས་རབ་གཉིས་ལས་གཞན་པའི་སངས་རྒྱས་སྒྲུབ་པའི་ཐབས་མེད་པས། གོང་དུ་བཤད་པའི་གྲུབ་ཐོབ་རྣམས་ཀྱང་། རླུང་དང་གཏུམ་མོ་ལ་སོགས་པ་ཐབས་ལམ་ཕྱོགས་རེ་བས་གྲོལ་བ་མ་ཡིན་གྱི། དབང་དང་རིམ་གཉིས་ལས་བྱུང་བའི་ཐབས་ཤེས་ཟུང་འཇུག་གི་ཡེ་ཤེས་སྐྱེས་པས་གྲོལ་བ་ཡིན་ནོ། །གཉིས་པ་ནི། ལྟ་བ་དང་ནི་ཞེས་སོགས་དྲུག་སྟེ། སྟོང་ཉིད་རྟོགས་པའི་ལྟ་བ་རྐྱང་པ་དང་། བསྐྱེད་རིམ་རྐྱང་པ་སོགས་ཀྱིས་གྲོལ་བ་མ་ཡིན་ཏེ། སངས་རྒྱས་སྒྲུབ་པ་ལ་ཐབས་ཤེས་རབ་གཉིས་ཅར་དགོས་པའི་ཕྱིར་རོ། །འོ་ན་གྲོལ་བྱེད་ཀྱི་ལམ་གྱི་གཙོ་བོ་གང་ཞེ་ན་དབང་བསྐུར་བའི་ཞེས་སོགས་སོ། །གསུམ་པ་ནི། བསྐྱེད་རིམ་རླུང་དང་ཞེས་སོགས་བཅུ་གསུམ་སྟེ། རིམ་པ་གཉིས་པོ་སངས་རྒྱས་སྒྲུབ་པའི་ལམ་གྱི་གཙོ་བོ་ཡིན་པའི་རྒྱུ་མཚན་གང་ཡིན་ཞེ་ན། གོང་དུ་བཤད་པའི་གྲུབ་ཐོབ་རྣམས་ཀྱི་ཡེ་ཤེས་སྐྱེ་བའི་སྣ་འདྲེན་ཐམས་ཅད་འདིར་འདུས་ཤིང་། འདི་གཉིས་ཡོད་ན་ཐབས་ལམ་ཕྱོགས་རེ་བ་འགའ་ཞིག་མ་ཚང་ཡང་སངས་རྒྱས་བསྒྲུབ་པར་ནུས་ལ། གཙོ་བོ་འདི་གཉིས་མ་ཚང་ན་ཐབས་ལམ་ཕྱོགས་རེ་བས་གྲོལ་བ་མི་སྲིད་པའི་ཕྱིར་རོ། །གོང་དུ་བཤད་པའི་ཐབས་ལམ་ཕྱོགས་རེ་བ་རྣམས་འདིར་འདུས་པའི་རྒྱུ་མཚན་ནི། བསྐྱེད་རིམ་ནི་བསྐྱེད་རིམ་དངོས་ཡིན་ལ། རླུང་ཞི་དྲག་དང་། གཏུམ་མོའི་དམིགས་པ་སོགས་ནི་རྫོགས་རིམ་དངོས་ཡིན་པས། དེ་གཉིས་ལས་ཐ་དད་མ་ཡིན་ཞིང་། བྱིན་རླབས་ནི་རིམ་གཉིས་དེ་ལས་བྱུང་བ་ཡིན། ལྟ་བ་ནི་དེ་གཉིས་དག་པར་བྱེད་པའི་ཐབས་ཡིན་ལ། ཕྱག་རྒྱ་ཆེན་པོ་ནི་དེ་ལས་སྐྱེས་པའི་ཡེ་ཤེས་ཡིན། རིམ་གཉིས་བོགས་དབྱུང་བར་བྱེད་པ་ནི་སྤྱོད་པ་ཡིན་ཅིང་། དེ་ལ་སྤྲོས་བཅས། སྤྲོས་མེད། ཤིན་ཏུ་སྤྲོས་མེད་ཀྱི་སྤྱོད་པ་གསུམ་ལས། ཨིནྡྲ་བྷཱུ་ཏིས་མཛད་པ་ནི་དང་པོ་ཡིན་ལ། ཞི་བ་ལྷས་མཛད་པ་ནི་གཉིས་པ་ཡིན་ཅིང་། དེ་ལ་བྷུ་སུ་ཀུ་ཞེས་ཀྱང་གསུངས། རིམ་གཉིས་བརྟན་པར་བྱ་བའི་ཕྱིར་བིརྺ་པ་ལ་སོགས་པའི་གྲུབ་ཐོབ་རྣམས་ཀྱིས་མཛད་པ་ནི་གསུམ་པ་ཡིན་ཅིང་། དེ་ལ་ཀུན་ཏུ་བཟང་པོའི་སྤྱོད་པར་ཡང་བཤད་དོ། །བཞི་པ་ནི། དེས་ན་རྒྱུ་རྐྱེན་ཞེས་སོགས་བཅུ་སྟེ། ཐབས་ཤེས་རབ་གཉིས་ཀྱི་རྒྱུ་རྐྱེན་མཐའ་དག་མ་ཚང་བར་སངས་རྒྱས་མི་འབྱུང་བས། རླུང་དང་གཏུམ་མོ་ཕྱོགས་རེའི་ཐབས་ཀྱིས་གྲོལ་བ་མ་ཡིན་མོད། འོན་ཀྱང་དེ་དག་ལ་དགོས་པ་མེད་པ་ཡང་མ་ཡིན་ཏེ། ཚེ་སྔ་མའི་ལས་འཕྲོའི་བྱེ་བྲག་དང་། ནང་གི་རྩ་ཁམས་ལ་སོགས་པའི་རྟེན་འབྲེལ་གྱི་ཁྱད་པར་གྱིས་ཟུང་འཇུག་གི་ཡེ་ཤེས་སྐྱེ་བའི་སྣ་འདྲེན་ཐབས་ལམ་རེ་རེ་བདག་གིས་ཀྱང་བྱེད་པར་གསུངས་པའི་ཕྱིར་རོ། །དཔེར་ན་ནད་པའི་ལུས་རྟས་པ་བཟའ་བཏུང་གིས་བྱེད་ཀྱང་། དེའི་ཡི་ག་འབྱེད་པ་ནི། བད་ཀན་ལ་སོགས་པའི་ཁམས་ཀྱི་བྱེ་བྲག་གིས་ཟས་ཀྱི་ཁྱད་པར་སེའུ་འབྲུ་ལ་སོགས་པས་བྱེད་པ་བཞིན་ནོ། །ལྔ་པ་ནི། དེ་ཕྱིར་ཐབས་ཀྱི་ཞེས་སོགས་དྲུག་སྟེ། ཐབས་ལམ་རེ་རེ་བའི་དགོས་པ་དང་། ཐབས་ལམ་གྱི་གཙོ་བོའི་དགོས་པ་སོ་སོར་ཤེས་པར་བྱས་ནས། རེ་རེ་བས་ཕན་པར་མི་འཛིན་པར་ལམ་གྱི་གཙོ་བོ་སྨིན་གྲོལ་གཉིས་ལ་འབད་པར་བྱའོ། །གཉིས་པ་ལ་གཉིས་ཏེ། དཔེའི་སྒོ་ནས་འབྲས་བུ་འགྲུབ་པའི་དུས་བསྟན་པ། ཉམས་ལེན་གྱི་སྒོ་ནས་ལམ་བགྲོད་ཚུལ་སོ་སོར་བཤད་པའོ། །དང་པོ་ནི། སོ་ནམ་ཚུལ་བཞིན་ཞེས་སོགས་ཚིགས་བཅད་གཉིས་ཏེ་གོ་སླའོ། །གཉིས་པ་ལ་གཉིས་ཏེ། ཕ་རོལ་ཏུ་ཕྱིན་པའི་ལམ་གྱི་བགྲོད་ཚུལ། རྡོ་རྗེ་ཐེག་པའི་ལམ་གྱི་བགྲོད་ཚུལ་ལོ། །དང་པོ་ནི། སྟོང་ཉིད་སྙིང་རྗེ་ཞེས་སོགས་ཉི་ཤུ་རྩ་གཉིས་ཏེ། སྟོང་ཉིད་སྙིང་རྗེའི་སྙིང་པོ་ཅན་གཙོ་བོར་བསྒོམ་པ་ནི། ཕ་རོལ་ཏུ་ཕྱིན་པའི་ལམ་བགྲོད་ཚུལ་ཡིན་ལ། དེས་གང་ཟག་དབང་པོ་རྣོ་བ་དང་། བརྩོན་འགྲུས་མྱུར་བ་ཡིན་ན་ཡང་། བསྐལ་པ་གྲངས་མེད་གསུམ་གྱིས་དཀའ་བ་སྤྱད་དགོས་ཤིང་། ཐེག་པ་ཆེན་པོའི་སྡེ་སྣོད་ཀུན་ལས་བཤད་པའི་སངས་རྒྱས་བསྒྲུབ་པའི་ལམ་པོ་ཆེ་ལམ་ཡིན་མིན་གྱི་རྩོད་པ་ཀུན་ལས་གྲོལ་བའི་ཆོས་ཡིན་པས་ཐེག་པ་ཆེན་པོའི་མཁས་པ་ཀུན་གྱིས་ཀྱང་གུས་པས་བསྟེན་པ་ཡིན་ནོ། །འདི་བཞིན་དུ་བསྒྲུབ་པར་འདོད་ན། རྡོ་རྗེ་ཕག་མོའི་བྱིན་རླབས་ལ་སོགས་པ་རྣམས་མི་དགོས་ཀྱི། འོན་ཀྱང་ཐེག་པ་ཆེན་པོ་ཕ་རོལ་ཏུ་ཕྱིན་པའི་སྡེ་སྣོད་རྣམས་ལས་འབྱུང་བ་བཞིན་བྱང་ཆུབ་མཆོག་ཏུ་སོགས་སོ། །གཉིས་པ་ནི། ཕ་རོལ་ཕྱིན་གཞུང་ཞེས་སོགས་བཅོ་ལྔ་སྟེ། ཕ་རོལ་ཏུ་ཕྱིན་པའི་གཞུང་ལས་བཤད་པའི་བསྐལ་པ་གྲངས་མེད་གསུམ་གྱིས་དཀའ་སྤྱད་མི་ནུས་པར། སེམས་ཅན་གྱི་སྡུག་བསྔལ་ལ་དམིགས་པའི་སྙིང་རྗེ་ཤིན་ཏུ་ལྷག་པར་གྱུར་པས། གསང་སྔགས་རྡོ་རྗེ་ཐེག་པའི་ལམ་ལ་བརྟེན་ནས་ཚེ་འདིའམ། བར་དོ་ལ་སོགས་སུ་སངས་རྒྱས་བསྒྲུབ་པར་འདོད་ན། ཐོག་མར་སྨིན་བྱེད་ནོར་བ་མེད་པའི་དབང་བཞི་བླང་དགོས་ཏེ། དེ་ནི་གསང་སྔགས་རྡོ་རྗེ་ཐེག་པའི་ལམ་གྱི་རྩ་བ་ཡིན་པའི་ཕྱིར་རོ། །དབང་པོ་ཤིན་ཏུ་རྣོ་ཞིང་བསོད་ནམས་བསགས་པ་རྣམས་ནི། དེ་ཙམ་གྱིས་གྲོལ་བ་ཡང་སྲིད་མོད་ཀྱི། གལ་ཏེ་མ་གྲོལ་ན་དབང་བསྐུར་དེ་ཉིད་འཕེལ་ཞིང་རྒྱས་པར་བྱེད་པ་ལ་ཐ་མལ་གྱི་སྣང་བ་དག་པའི་སྣང་བར་བསྒྱུར་བར་བྱེད་པའི་བསྐྱེད་རིམ་དང་། དེ་ཉིད་བདེ་ཆེན་གྱི་ཡེ་ཤེས་སུ་བསྒྱུར་བར་བྱེད་པའི་རྫོགས་རིམ་རྒྱུད་སྡེ་ལས་ཇི་ལྟར་བཤད་པ་བཞིན་འཁྲུལ་པ་མེད་པར་བསྒོམ་པར་བྱའོ། །དབང་དང་རིམ་གཉིས་ལས་བྱུང་བའི་མཚོན་བྱེད་དཔེའི་ཡེ་ཤེས་ཕྱག་རྒྱ་ཆེན་པོ་ནམ་ཞིག་སྐྱེས་པའི་ཚེ། དེ་ཉིད་ཡང་ནས་ཡང་དུ་གོམས་པར་བྱས་ཏེ། དྲོད་ཐོབ་པའི་རྟགས་མཉམ་གཞག་ཏུ་འཇིག་རྟེན་ཆོས་བརྒྱད་མགོ་སྙོམས་པ་སྙམ་བྱེད་པའི་ཚེ། འཁོར་འདས་ལ་བླང་དོར་ཐ་དད་དུ་མི་འཛིན་པར་རོ་མཉམ་དུ་བསྲེ་བའི་ཕྱིར་ཀུན་འདར་གྱི་སྤྱོད་པ་ལ་སོགས་པ་རིམ་གཉིས་བོགས་དབྱུང་བར་བྱེད་པའི་སྤྱོད་པ་རྣམས་སྤྱོད། དེ་ལྟར་སྤྱད་པས་ཕྱི་རོལ་པུ་ལི་ར་མ་ལ་ཡ་ལ་སོགས་པའི་ཡུལ་སུམ་ཅུ་སོ་བདུན་དབང་དུ་འདུས་པ་ན། ནང་ལུས་ཀྱི་སྤྱི་བོ་ལ་སོགས་པའི་ཡུལ་སོ་བདུན་གྱི་རླུང་སེམས་དབུ་མར་ཞུགས་ཏེ། ས་ལམ་བགྲོད་ནས་རྡོ་རྗེ་འཛིན་པའི་ས་བཅུ་གསུམ་པ་ཐོབ་པར་འགྱུར་རོ། །ལམ་གྱི་བགྲོད་ཚུལ་འདི་ལྟ་བུ་འདི་ནི། དུས་གསུམ་སངས་རྒྱས་ཞེས་སོགས་སོ། །རྡོ་རྗེ་ཐེག་པའི་སའི་རྣམ་པར་གཞག་པ་ནི་བརྟག་གཉིས་སུ། གནས་དང་ཉེ་བའི་གནས་དང་ནི། །ཞིང་དང་ཉེ་བའི་ཞིང་ཉིད་དང་། །ཚནྡྷོ་ཉེ་བའི་ཚནྡྷོ་དང་། །དེ་བཞིན་འདུ་བ་ཉེ་འདུ་བ། །འཐུང་གཅོད་ཉེ་བའི་འཐུང་གཅོད་ཉིད། །དུར་ཁྲོད་ཉེ་བའི་དུར་ཁྲོད་ཉིད། །འདི་རྣམས་ས་ནི་བཅུ་གཉིས་ཏེ། །ས་བཅུའི་དབང་ཕྱུག་མགོན་པོ་ཉིད། །ཅེས་གསུངས་ཤིང་། བདེ་མཆོག་རྩ་རྒྱུད་དང་། སམྦུ་ཊིར། གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་ཅན། །ཚནྡྷོ་མངོན་དུ་གྱུར་པ་སྟེ། །ཉེ་བའི་ཚནྡྷོ་སྦྱང་དཀའ་བ། །འདུ་བ་རིང་དུ་སོང་བ་སྟེ། །ཉེ་བའི་འདུ་བ་མི་གཡོ་བ། །དུར་ཁྲོད་ལེགས་པའི་བློ་གྲོས་ཏེ། །ཉེ་བའི་དུར་ཁྲོད་ཆོས་ཀྱི་སྤྲིན། །ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །ཅེས་འཐུང་གཅོད་ཉེ་བའི་འཐུང་གཅོད་མ་གཏོགས་པ་གཞན་བཅུ་པོ་ཕ་རོལ་ཏུ་ཕྱིན་པའི་ས་བཅུ་དང་སྦྱར་ཞིང་། འགྲེལ་པ་ཀུ་མུ་ཏིར་རྒྱུད་རྒྱས་པའི་ལུང་དྲངས་པར། འཐུང་གཅོད་དཔེ་མེད་ཡེ་ཤེས་ཏེ། །ཉེ་བའི་འཐུང་གཅོད་ཡེ་ཤེས་ཆེ། །ཞེས་དང་རྒྱུད་གཞན་ལས། རྡོ་རྗེའི་ས་ནི་བཅུ་གསུམ་པ། །ཞེས་པ་ཡང་ཡོད་དོ། །འདི་དག་གི་དོན་ལ། རྗེ་བཙུན་ས་སྐྱ་པ་ཡབ་སྲས་རྣམས་ཀྱི་བཞེད་པས། ས་ལྷག་མ་གསུམ་པོ་རྡོ་རྗེ་ཐེག་པའི་ལམ་ཁོ་ནས་བགྲོད་པར་བྱ་བ་ཡིན་པས། ཕ་རོལ་ཏུ་ཕྱིན་པའི་ལམ་གྱིས་བགྲོད་མི་ནུས་པ་ཡིན་ནོ། །ཕར་ཕྱིན་ཐེག་པ་ནས་ས་བཅུ་གཅིག་པ་སངས་རྒྱས་སུ་བཤད་པ་དང་། རྡོ་རྗེ་ཐེག་པ་ནས་ས་བཅུ་གསུམ་པ་སངས་རྒྱས་སུ་བཤད་པ་ནི། མཚན་གཞི་ལ་མི་མཐུན་པ་ཡིན་པས་རང་རང་གི་ལམ་དེ་ཉིད་ཀྱིས་བགྲོད་པར་བྱ་བ་མཐར་ཐུག་པ་དེ་ལ་དེ་དང་དེར་རྫོགས་པའི་སངས་རྒྱས་སུ་གསུངས་སོ། །འོན་ཀྱང་ས་བཅུ་གཅིག་པ་ནི་སངས་རྒྱས་མཚན་ཉིད་པ་མ་ཡིན་ཏེ། སློབ་ལམ་གྱི་གནས་སྐབས་ཡིན་པའི་ཕྱིར་རོ། །འོ་ན་ཕར་ཕྱིན་ཐེག་པར་ཡང་སློབ་ལམ་དུ་ཅིའི་ཕྱིར་མ་བཤད་ཅེ་ན། དེར་ནི་ཐེག་པ་རང་ལུགས་ལ་དེ་ལས་ལྷག་པའི་ལམ་བགྲོད་པའི་ནུས་པ་མེད་པས་འབྲས་བུའི་ལྡོག་པ་ནས་བཤད་པ་ཡིན་ནོ། །དེའི་གོང་དུ་ཡང་ས་གཉིས་བགྲོད་དུ་ཡོད་པའི་རྒྱུ་མཚན་ནི། ཡུལ་སུམ་ཅུ་སོ་བདུན་གྱི་རླུང་སེམས་དབུ་མར་མ་ཞུགས་པར་རྫོགས་པའི་སངས་རྒྱས་མི་ཐོབ་ལ། ཡུལ་ཉི་ཤུ་རྩ་བཞིའི་རླུང་སེམས་དབུ་མར་ཞུགས་པས་ནི། ས་བཅུ་པ་མན་ཆད་ཀྱི་རྟོགས་པ་ལས་མི་བསྐྱེད་པར་གོང་དུ་དྲངས་པའི་བདེ་མཆོག་རྩ་རྒྱུད་དང་། སམྦུ་ཊིའི་ལུང་གཉིས་ཀྱིས་གྲུབ་ལ། ལྷག་མ་སྙིང་ཁའི་ཕྱི་སྐོར་གྱི་རྩ་འདབ་བརྒྱད་དང་། སྦས་པའི་རྩ་ལྔའི་རླུང་སེམས་དབུ་མར་ཞུགས་པས་བསྐྱེད་པར་བྱ་བའི་ས་ལྷག་མ་གསུམ་ངེས་པར་ཡོད་པའི་ཕྱིར་རོ། །ཁ་ཅིག་ས་སྐྱ་པའི་བཞེད་པ་ལ། ས་བཅུ་གཅིག་པ་དང་བཅུ་གཉིས་པ་ཕ་རོལ་ཏུ་ཕྱིན་པའི་ས་བཅུའི་ཁོངས་སུ་བསྡུ་བ་གོང་དུ་དྲངས་པའི་བརྟག་གཉིས་དང་། སམྦུ་ཊིའི་དགོངས་པར་འཆད་པ་ནི་ཤིན་ཏུ་འཁྲུལ་ཏེ། བརྟག་གཉིས་ཀྱི་ལུང་གི་དོན་ནི་ས་བཅུ་གཉིས་པོ་དེ་དག་ཕ་རོལ་ཏུ་ཕྱིན་པའི་ས་བཅུ་ཡིན་ཞེས་པའི་དོན་མ་ཡིན་གྱི། ས་བཅུ་གཉིས་པོ་དེ་དག་ཕ་རོལ་ཏུ་ཕྱིན་པའི་ཐེག་པ་ལས་ས་བཅུ་མན་ཆད་ལ་སློབ་ལམ་དུ་བཞག་པ་ལྟར། རྡོ་རྗེ་ཐེག་པ་འདིར་ཡང་སློབ་ལམ་ཡིན་པའི་དོན་དུ་མངོན་རྟོགས་ལྗོན་ཤིང་ལས་བཤད་པར་མ་མཐོང་བར་ཟད་པའི་ཕྱིར་དང་། སམྦུ་ཊིར། འཐུང་གཅོད་དང་། ཉེ་བའི་འཐུང་གཅོད་མ་གཏོགས་པའི་ཡུལ་ཉི་ཤུ་རྩ་བཞི་དང་། ཕ་རོལ་ཏུ་ཕྱིན་པའི་ས་བཅུ་སྦྱར་བ་ལ་བློ་ཁ་མ་ཕྱོགས་པར། རྡོ་རྗེ་ཐེག་པའི་ས་ཐམས་ཅད་ཕ་རོལ་ཏུ་ཕྱིན་པའི་ས་བཅུའི་ཁོངས་སུ་འདུས་སྙམ་དུ་མོས་སྒོམ་བྱེད་པ་ཙམ་དུ་ཟད་པའི་ཕྱིར་རོ། །འོ་ན་ཕར་ཕྱིན་ཐེག་པ་ནས་སྐུ་གསུམ་གྱི་རྣམ་གཞག་བཤད་པའི་རྫོགས་པའི་སངས་རྒྱས་དེ་སློབ་ལམ་གྱི་གནས་སྐབས་ཡིན་ནམ། ས་བཅུ་གསུམ་པ་ཐོབ་ཟིན་པ་ཞིག་ཡིན་སྙམ་ན། དེ་ནི་ས་བཅུ་གསུམ་པ་ཐོབ་ཟིན་པ་ཡིན་ཀྱང་། དེར་ནི་དེའི་ཐ་སྙད་མ་གསུངས་ཏེ། ས་བཅུ་གཅིག་པ་ལ་རྫོགས་པའི་སངས་རྒྱས་ཀྱི་རྣམ་གཞག་བྱེད་པའི་སྐབས་ཡིན་པའི་ཕྱིར་རོ། །འོ་ན་ཕར་ཕྱིན་ཐེག་པའི་ལམ་དེ་ཉམས་སུ་བླངས་ཀྱང་དེ་ནས་བཤད་པའི་རྫོགས་པའི་སངས་རྒྱས་དེ་མི་ཐོབ་པར་འགྱུར་ལ། དེ་ཡང་འདོད་ན། ལམ་ཉམས་སུ་བླངས་པ་ལ་དགོས་པ་མེད་པར་འགྱུར་ཅིང་། སྐད་ཅིག་མ་གཅིག་པའི་མངོན་པར་རྫོགས་པ་བྱང་ཆུབ་པ་རྣམ་པར་བསྒོམས་པའི་སྐད་ཅིག་མ་གཉིས་པ་ལ་ཆོས་ཀྱི་སྐུ་མངོན་པར་རྫོགས་པར་བྱང་ཆུབ་པ་ཡིན་ཏེ། ཞེས་པ་དང་ཡང་འགལ་བར་འགྱུར་རོ་སྙམ་ན། ལམ་ཉམས་སུ་བླངས་པ་དོན་མེད་པར་མི་འགྱུར་ཏེ། ས་བཅུ་པའི་བར་ཐོབ་ནས་སྔགས་ལམ་ལ་མི་མཇུག་པ་མི་སྲིད་པས། ཕར་ཕྱིན་ཐེག་པའི་ལམ་མཐར་ཕྱིན་ནས་སྔགས་ལམ་གྱིས་འབད་རྩོལ་ཆུང་ངུས་རྡོ་རྗེ་འཛིན་པའི་ས་ཐོབ་པར་འགྱུར་བའི་ཕྱིར་རོ། །གཞན་དུ་ན་སེམས་ཙམ་པའི་གཞུང་ནས་བཤད་པའི་སྐུ་གསུམ་པོ་དེ་སངས་རྒྱས་མ་ཡིན་ན་ཧ་ཅང་ཐལ་ཞིང་། གལ་ཏེ་ཡིན་ན། སེམས་ཙམ་པའི་ལམ་ཁོ་ན་ལ་བརྟེན་ནས་དེ་ཐོབ་ན། དབུ་མའི་ལྟ་བ་ལ་མ་བརྟེན་པར་སངས་རྒྱས་ཐོབ་པ་ཡོད་པར་འགྱུར་ཞིང་། གལ་ཏེ་མི་ཐོབ་ན་སེམས་ཙམ་པའི་གཞུང་ནས་བཤད་པའི་ལམ་ཉམས་སུ་བླངས་པ་ལ་དགོས་པ་མེད་པར་ཁྱེད་ལ་མཚུངས་པར་འགྱུར་རོ། །གལ་ཏེ་མི་མཚུངས་ཏེ། སེམས་ཙམ་པ་རང་གི་དེ་ནས་བཤད་པའི་ལམ་གྱིས་འབྲས་བུ་དེ་ཐོབ་པར་འདོད་ཀྱང་། དབུ་མའི་ལུགས་ལ་དེ་མི་འདོད་པ་ནི་གྲུབ་མཐའི་ཁྱད་པར་ཡིན་པས་སོ་སྙམ་ན། དེ་ནི་ཤིན་ཏུ་བདེན་མོད། དེ་ལྟར་ན་ཕ་རོལ་ཏུ་ཕྱིན་པའི་ཐེག་པ་དང་། རྡོ་རྗེ་ཐེག་པའི་ཁྱད་པར་རྒྱུད་སྡེ་རྣམས་དང་། གྲུབ་ཐོབ་ཀྱི་གསུང་རྣམས་ནས་བཤད་པ་རྣམས་ཡིད་ལ་བཞག་ནས་སེམས་རྣལ་དུ་གནས་པར་བྱའོ། །འགྲེལ་བ་དོན་གསལ་གྱི་ལུང་གིས། རྡོ་རྗེ་ཐེག་པའི་ས་ལམ་གྱི་རྣམ་བཞག་ལ་མི་གནོད་པ་ཡང་ཚུལ་འདིས་རྟོགས་པར་བྱའོ། །འོ་ན་ཕར་ཕྱིན་ཐེག་པ་དང་། རྡོ་རྗེ་ཐེག་པ་གཉིས་རྫོགས་པའི་སངས་རྒྱས་ཀྱི་མཚན་ཉིད་ལ་མཐུན་ཀྱང་མཚན་གཞི་ལ་མི་མཐུན་པ་གང་ནས་བཤད་སྙམ་ན། སམྦུ་ཊིར། གང་དག་བསམ་གྱིས་མི་ཁྱབ་པའི་གནས་མངོན་དུ་མ་བྱས་པ་དེ་ནི་བདེ་བར་གཤེགས་པ་སྟེ་སངས་རྒྱས་ཡིན་ལ། མཚན་གཞི་མཚོན་པ་ནི་རྡོ་རྗེ་འཛིན་པ་ཡང་དག་པའོ། །ཞེས་པའི་དོན་རྗེ་བཙུན་རྩེ་མོའི་འགྲེལ་པར་ཞིབ་ཏུ་ཕྱེ་བ་ལས་ཤེས་པར་བྱའོ། །འདི་དག་ནི་དོན་འདི་ལ་བློའི་མོས་པ་ཡོད་ཀྱང་། བཤེས་གཉེན་གྱི་འཁར་བ་ངན་ཞིང་རྣམ་དཔྱོད་ཀྱི་མིག་མི་གསལ་བས་ཇི་ལྟ་བ་བཞིན་རྟོགས་པར་མ་ནུས་པའི་དད་ལྡན་རྣམས་ལ་སྙིང་བརྩེ་བའི་བསམ་པས། རྗེ་བཙུན་བླ་མ་མུས་པ་ཆེན་པོའི་གསུང་ལས་ཇི་ལྟར་འབྱུང་བ་བཞིན་མ་སྦས་པར་བྲིས་པའོ། །གསུམ་པ་ནི། གང་ཞིག་སངས་རྒྱས་ཞེས་སོགས་ཚིགས་བཅད་གཉིས་ཏེ། དང་པོ་དྲུག་ནི་གོང་དུ་བཤད་པའི་ལམ་གཉིས་པོ་བློ་དང་འཚམས་པར་བསྒྲུབ་པར་གདམས་པ་ཡིན་ལ། ཐ་མ་གཉིས་ཀྱིས་ནི་དེའི་སྒྲུབ་བྱེད་སྟོན་ནོ། །བཞི་པ་ལ་བདུན་ཏེ། བསྟན་པ་དང་མ་འབྲེལ་བའི་ཆོས་པ་དགག་པ། སྡོམ་པ་དང་མ་འབྲེལ་བའི་ཐར་ལམ་དགག་པ། ངེས་འབྱུང་དང་མ་འབྲེལ་བའི་སོ་ཐར་དགག་པ། སྡེ་སྣོད་དང་མ་འབྲེལ་བའི་སེམས་བསྐྱེད་དགག་པ། རྒྱུད་སྡེ་དང་མ་འབྲེལ་བའི་གསང་སྔགས་དགག་པ། དབང་བསྐུར་དང་མ་འབྲེལ་བའི་བླ་མ་དགག་པ། དམ་ཆོས་དང་མ་འབྲེལ་བའི་ཆོས་པ་དགག་པའོ། །དང་པོ་ནི། ད་ལྟའི་ཆོས་པ་ཞེས་སོགས་བཅུ་བདུན་ཏེ། སངས་རྒྱས་ཀྱི་བསྟན་པའི་སྒོར་ཞུགས་ན། ཉན་ཐོས་ཀྱི་ཆོས་ལུགས་དང་། ཕ་རོལ་ཏུ་ཕྱིན་པའི་ཆོས་ལུགས་དང་། རྡོ་རྗེ་ཐེག་པའི་ཆོས་ལུགས་གསུམ་པོ་གང་རུང་ལ་འཇུག་དགོས་ཞིང་། དེ་ཡང་རང་རང་གི་གཞུང་ལུགས་ཁུངས་མ་ལྟར་ཉམས་སུ་བླངས་པ་ལ་འཇུག་དགོས་ཀྱི་གཞན་དུ་དེས་ཀྱང་འཚང་རྒྱ་བར་མི་ནུས་སོ། །གཉིས་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ལ་གཉིས་ཏེ། སྨད་པའི་ཆེད་དུ་མུ་སྟེགས་ཀྱི་དཔེ་བརྗོད་པ། བོད་བླུན་གྱི་འདོད་པའི་དོན་ལ་སྦྱར་བའོ། །དང་པོ་ནི། མུ་སྟེགས་ཞེས་སོགས་དྲུག་སྟེ། སྔོན་དགེ་སློང་མང་པོས་རྒྱལ་པོའི་ཁབ་ཏུ་བསོད་སྙོམས་ལ་ཕྱིན་པས་མུ་སྟེགས་ཀྱི་བྲམ་ཟེ་རྣམས་ཀྱིས། ཁྱེད་དགེ་སྦྱོང་གོའུ་ཏ་མའི་ཆོས་ལུགས་ལའང་སྡིག་པ་སྤོང་ཞིང་དགེ་བ་སྒྲུབ་པ་ཡིན་པ་ལས། ངེད་བྲམ་ཟེ་རྣམས་ཀྱི་རིག་བྱེད་ལས་ཀྱང་དེ་བཞིན་དུ་སྟོན་པས་ཁྱེད་ཀྱི་ཆོས་ལུགས་བཟང་ལ། ངེད་ཀྱི་ཆོས་ལུགས་ངན་པའི་རྒྱུ་མཚན་ཅི་ཡོད་ཅེས་ཟེར་བས། དགེ་སློང་དེ་རྣམས་གསར་བུ་ཐོས་པ་ཆུང་བས་སྤ་གོང་སྟེ། ལན་གདབ་པར་མ་ནུས་ནས་སླར་ལོག་སྟེ། འཕགས་པ་ཤཱ་རིའི་བུ་ལ་བསྙད་པས། ང་དང་མ་ཕྲད་པས་ཉེས་པ་ཡིན། ཆོས་དང་མཐུན་པར་ཚར་གཅོད་པ་ཡིན་ཏེ། ཞེས་གསུངས་སོ། །གཉིས་པ་ནི། དེ་བཞིན་འདི་ནའང་ཞེས་སོགས་ཚིགས་བཅད་གཉིས་ཏེ། མུ་སྟེགས་བྱེད་ཀྱི་འདོད་པ་དེ་བཞིན་དུ་གངས་ཅན་འདི་ནའང་ཆོས་ཀྱི་གནད་མི་ཤེས་པའི་བླུན་པོ་འགའ་ཞིག་དཀོན་མཆོག་ལ་དད་པ་དང་། སེམས་ཅན་ལ་སྙིང་རྗེ་དང་། སྦྱིན་སོགས་ཀྱི་དགེ་བ་སྤྱད་ན་མདོ་རྒྱུད་ཀྱི་ཚིག་དོན་དང་མི་མཐུན་ཡང་སྐྱོན་མེད། དེ་དག་མེད་ན་མདོ་རྒྱུད་དང་མཐུན་ཡང་ཕན་པ་མེད་ཅེས་ཟེར་རོ། །གཉིས་པ་ལ་གཉིས་ཏེ། སྡོམ་གསུམ་གྱིས་དབེན་པའི་དགེ་བས་སངས་རྒྱས་མི་འགྲུབ་པར་བསྟན་པ། སྡོམ་གསུམ་གྱི་དགེ་བས་སངས་རྒྱས་འགྲུབ་པར་བསྟན་པའོ། །དང་པོ་ལ་གཉིས་ཏེ། དཔེ་བསྒྲུབ་པ་དང་། དོན་ལ་སྦྱར་བའོ། །དང་པོ་ནི། དེ་ཡང་ཞེས་སོགས་ལྔའོ། །གཉིས་པ་ནི། དེ་བཞིན་ཞེས་སོགས་ཚིགས་བཅད་གཉིས་ཏེ། སྡོམ་པ་ལས་མ་བྱུང་བའི་དགེ་བ་བར་མ་ཡིན་པ་དེ་བཞིན་དུ་དབང་བསྐུར་མ་ཐོབ་ན། རིག་འཛིན་སྔགས་ཀྱི་སྡོམ་པ་མེད་ལ། སྔགས་སྡོམ་མེད་པས་དགེ་བ་ཅི་སྤྱད་ཀྱང་སྔགས་སྡོམ་ལ་ལྟོས་ཏེ་བར་མ་ཡིན་གྱི་སྔགས་སྡོམ་ལས་བྱུང་བའི་དགེ་བར་མི་འགྱུར། སྔགས་སྡོམ་ལས་བྱུང་བའི་དགེ་བ་མ་ཡིན་ན་གསང་སྔགས་ཐབས་ལམ་ཟབ་ཀྱང་འཚང་མི་རྒྱ་བར་རྫོགས་པའི་སངས་རྒྱས་ཀྱིས་གསུངས་ཏེ། རྡོ་རྗེ་རྩེ་མོར། སྡོམ་པ་གསུམ་ལ་གནས་པ་ནི། །དང་པོའི་ཁྲུས་སུ་བཤད་པ་ཡིན། །ཞེས་གསུངས་པ་ལྟར་རོ། །གཉིས་པ་ནི། སྡོམ་པ་གསུམ་དང་ཞེས་སོགས་དྲུག་སྟེ། དབང་བསྐུར་གྱི་སྒོ་ནས་སྡོམ་གསུམ་དང་ལྡན་པར་བྱ་སྟེ། རིམ་གཉིས་ཟབ་མོའི་གནད་ཤེས་ནས་བསྒོམ་ན་དེ་ནི་ཚེ་འདིའམ་ཞེས་སོགས་ཏེ། དེའི་ཕྱིར་ན། དབང་བསྐུར་གྱིས་སྡོམ་གསུམ་དང་ལྡན་པར་བྱེད་པ་འདི་ལ་མཁས་པ་རྣམས་གུས་པ་ཡིན་ནོ། །དེ་ཡང་སམྦུ་ཊིར། གཞན་དུ་བསྐལ་པ་བྱེ་བར་ནི། །གྲངས་མེད་པས་ནི་གང་ཐོབ་པ། །གང་དུ་དམ་པའི་བདེ་བས་ཁྱོད། །སྐྱེ་བ་འདིར་ནི་འགྲུབ་པར་འགྱུར། །ཞེས་པ་དང་། གསང་འདུས་ལས། འདི་ཡིས་ཆོས་ཀྱི་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བའི། །ཡེ་ཤེས་རྒྱ་མཚོས་རྣམ་བརྒྱན་པ། །ཚེ་འདི་ཉིད་ལ་འགྲུབ་པར་འགྱུར། །ཅེས་དང་། ཡེ་ཤེས་ཐིག་ལེར། ཡང་ན་ལུས་འདི་སྤངས་མ་ཐག །བརྩོན་པ་མི་ལྡན་པས་ཀྱང་འགྲུབ། །ཅེས་དང་། གསང་བའི་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ལ་ནི། །མ་བསྒོམས་པར་ཡང་དངོས་གྲུབ་ཐོབ། །ཅེས་དང་། རྡོ་རྗེ་རྩེ་མོར། ཕ་རོལ་ཕྱིན་པའི་འབྱུང་བས་ནི། །བསྐལ་པ་གྲངས་མེད་མི་འཐོབ་པ། །གལ་ཏེ་རྣལ་འབྱོར་པ་དེ་བརྩོན། །ཚེ་འདི་ཉིད་ལ་མྱ་ངན་འདའ། །ཡང་ན་མཐོང་བ་ཙམ་གྱིས་ནི། །སྐྱེ་བ་བཅུ་དྲུག་དག་ནས་འགྲུབ། །སོ་སོ་སྐྱེ་བོས་སངས་རྒྱས་ཉིད། །འགྲུབ་པར་འགྱུར་གྱི་གཞན་དུ་མིན། །ཞེས་དང་། དམ་ཚིག་ལྔ་པ་ལས། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ན་འགྲུབ། །ཅེས་གསུངས་སོ། །གསུམ་པ་ནི། གང་དག་རབ་ཏུ་ཞེས་སོགས་ཚིགས་བཅད་གཅིག་སྟེ། འཁོར་བ་ལས་ངེས་པར་འབྱུང་བའི་བསམ་པས་མ་ཟིན་ན། རབ་བྱུང་གི་སྡོམ་པ་བླངས་ཀྱང་སོ་སོ་ཐར་པར་མི་འགྱུར་ཏེ། ཀུན་དགའ་བོའི་ཚ་བོ་གཉིས་དང་། གཅུང་མཛེས་པའི་དགའ་བོའི་རྣམ་ཐར་བཞིན་ནོ། །བཞི་པ་ནི། སེམས་བསྐྱེད་བྱེད་པ་ཞེས་སོགས་ཚིགས་བཅད་གཅིག་སྟེ། དབུ་སེམས་ཀྱིས་བསྟན་པའི་ལུགས་སོ་སོར་མི་ཕྱེད་པར། ཐོས་པ་ཆུང་བ་རྣམས་ཀྱི་མགོ་བོ་བསྐོར་ནས། བླུན་པོ་དགའ་བར་བྱ་བའི་ཕྱིར་དུ། རང་བཟོའི་ཆོ་ག་བྱེད་པ་བཀག་པའོ། །ལྔ་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། གསང་སྔགས་ཞེས་སོགས་ཚིགས་བཅད་གཅིག་གོ །གཉིས་པ་ལ་བཞི་སྟེ། རྒྱུད་སྡེ་དང་མ་འབྲེལ་བའི་དབང་བསྐུར་དགག་པ། སྦྱང་གཞི་མི་སྦྱོང་བའི་བསྐྱེད་རིམ་དགག་པ། རྟེན་འབྲེལ་མི་ཤེས་པའི་རྫོགས་རིམ་དགག་པ། སྤང་བྱ་དང་མི་ཕྱེད་པའི་ཡེ་ཤེས་དགག་པའོ། །དང་པོ་ནི། གལ་ཏེ་ཞེས་སོགས་ཚིགས་བཅད་གཅིག་སྟེ། དབང་བསྐུར་བྱེད་པ་དག་ཀྱང་རྒྱུད་སྡེའི་དགོངས་པ་གྲུབ་ཐོབ་རྣམས་ཀྱིས་བཀྲལ་བའི་བཟང་པོའི་གཞུང་ལུགས་ཀུན་དོར་ནས། བརྫུན་གྱིས་བསླད་པའི་རང་བཟོའི་ཆོ་ག་གུས་པས་ལེན་པར་སྣང་ངོ་། །གཉིས་པ་ནི། བརྒྱ་ལ་ཞེས་སོགས་ཚིགས་བཅད་གཅིག་སྟེ། བསྐྱེད་རིམ་བསྒོམ་པ་དག་ཀྱང་སྦྱང་གཞི་སྦྱོང་བར་བྱེད་པའི་ཆོ་གའི་ཡན་ལག་མངོན་བྱང་ལྔ་དང་། རྡོ་རྗེ་ཆོ་ག་གསུམ་བསྐྱེད་དང་སྒྲ་ཚུལ་གྱི་རྟེན་འབྲེལ་དང་། ཏིང་ངེ་འཛིན་གསུམ་དང་། རྣལ་འབྱོར་བཞི་ལ་སོགས་པ་ཀུན་བོར་ནས་རང་བཟོའི་དཀྲོང་བསྐྱེད་བསྒོམ་པ་ལ་བསྐྱེད་རིམ་དུ་མིང་བཏགས་པར་ཟད་དོ། །འདི་ཡང་ལས་དང་པོ་པའི་དུས་ནས་བསྐྱེད་རིམ་གཞན་ལ་མ་སྦྱངས་པར། དཀྲོང་བསྐྱེད་བསྒོམ་པ་བཀག་པ་ཡིན་གྱི། བསྐྱེད་རིམ་ལ་དཀྲོང་བསྐྱེད་གཏན་མེད་པར་བཞེད་པ་ནི་མ་ཡིན་ཏེ། བརྟན་པ་ཐོབ་པའི་དུས་ཀྱི་བསྐྱེད་རིམ་དཀྲོང་བསྐྱེད་འབའ་ཞིག་ཡིན་པའི་ཕྱིར་རོ། །གསུམ་པ་ནི། གཏུམ་མོ་ཞེས་སོགས་ཚིགས་བཅད་གཅིག་སྟེ། བོད་ཀྱི་གཏུམ་མོ་བསྒོམ་པ་ཕལ་ཆེར་ཡང་ལུས་ཐམས་ཅད་ལ་རྩས་ཁྱབ། དེ་ལ་བྱང་ཆུབ་ཀྱི་སེམས་ཀྱིས་ཁྱབ། དེ་ལ་རླུང་གིས་ཁྱབ། དེ་ལ་རྣམ་པར་ཤེས་པས་ཁྱབ། དེ་ལ་ཆོས་ཀྱི་དབྱིངས་ཀྱིས་ཁྱབ་ནས་གནས་པ་དེ། ཐོག་མར་རླུང་ལ་དབང་ཐོབ་པར་བྱས་ནས་གཏུམ་མོའི་མེ་སྤར་ཏེ། རྟེན་བྱང་སེམས་བཞུས་པས་བརྟེན་པ་རིག་སྟོང་དབྱེར་མེད་མངོན་དུ་བྱེད་པའི་ནང་གི་རྟེན་འབྲེལ་མི་ཤེས་པར། ལུས་ལ་དྲོད་ཙམ་སྐྱེས་ནས་རས་གོས་རྐྱང་པ་ཙམ་གྱིས་ཆོག་པར་འཛིན་པར་སྣང་ཡང་། དེ་ལྟ་བུ་ནི་མུ་སྟེགས་བྱེད་ལ་ཡང་ཡོད་པས། ཡང་དག་པའི་ཡེ་ཤེས་སྐྱེ་བའི་རྒྱུ་མ་ཡིན་ནོ། །བཞི་པ་ནི། ཡེ་ཤེས་ཞེས་སོགས་ཚིགས་བཅད་གཅིག་སྟེ། རིམ་གཉིས་བསྒོམས་པས་རང་བྱུང་གི་ཡེ་ཤེས་ཅུང་ཟད་སྐྱེས་ན་ཡང་ནང་གི་རྩ་ཁམས་ཀྱི་རྟེན་འབྲེལ་གྱིས་ཉོན་མོངས་རང་བྱུང་། རྣམ་རྟོག་རང་བྱུང་། སྣྲེལ་ཞི་རང་བྱུང་། མི་རྟོག་རང་བྱུང་བཞི་སྐྱེ་བ་སོ་སོར་འབྱེད་པའི་མན་ངག་ལམ་འབྲས་ལྟ་བུ་མེད་པས་རྫོགས་པའི་སངས་རྒྱས་ཀྱི་ལམ་དུ་མི་འགྱུར་རོ། །དྲུག་པ་ལ་གསུམ་སྟེ། དབང་མ་བསྐུར་བ་ལ་བླ་མ་དམ་པ་མི་འབྱུང་བར་བསྟན། དམ་པ་མ་ཡིན་པས་སངས་རྒྱས་སྦྱིན་མི་ནུས་པར་བསྟན། མདོ་སྔགས་ཀྱི་བླ་མའི་ཁྱད་པར་བསྟན་པའོ། །དང་པོ་ནི། བླ་མ་ཞེས་སོགས་ཚིགས་བཅད་གཉིས་ཏེ། དབང་མ་བསྐུར་བར་དྲོད་ཙམ་སྐྱེ་བའི་གཏུམ་མོའི་དམིགས་པ་སྟོན་པའི་བླ་མ་དེ་ནི་བླ་མ་དམ་པ་མ་ཡིན་ཏེ། དབང་བསྐུར་གྱི་སྒོ་ནས་གསང་སྔགས་ཀྱི་སྡོམ་ལྡན་དུ་མ་བྱས་པའི་ཕྱིར་རོ། །དཔེར་ན་རབ་བྱུང་མ་བྱས་ན་མཁན་པོའི་ཐ་སྙད་འཇུག་པའི་གཞི་མེད་པ་བཞིན་དུ་དབང་མ་བསྐུར་ན། བླ་མ་དམ་པའི་ཐ་སྙད་འཇུག་པའི་གཞི་མི་འབྱུང་ངོ་། །བླ་མའི་ཐ་སྙད་ཙམ་དབང་མ་བསྐུར་བ་ལ་མེད་པ་མ་ཡིན་ཏེ། འདུལ་བ་སུམ་བརྒྱ་པ་ལས། ཚུལ་ཁྲིམས་ལྡན་ཅིང་འདུལ་བའི་ཆོ་ག་ཤེས། །ནད་པར་སྙིང་བརྩེ་འཁོར་ནི་དག་པ་དང་། །ཆོས་དང་ཟང་ཟིང་ཕན་འདོགས་ཀྱིས་བརྩོན་པ། །དུས་སུ་འདོམས་པ་དེ་ནི་བླ་མར་བསྔགས། །ཞེས་དང་། ཕ་རོལ་ཏུ་ཕྱིན་པའི་ལུགས་ལ་བླ་མ་སངས་རྒྱས་ལྟ་བུར་ལྟ་བར་བདག་ཉིད་ཆེན་པོ་འདིས་གསུངས་པའི་ཕྱིར་རོ། །དེ་དག་ནི་བླ་མ་ཙམ་ཡིན་གྱི། བླ་མ་དམ་པ་ནི་མ་ཡིན་ཏེ། བླ་མ་དམ་པར་འགྱུར་བ་ལ་རྟེན་གྱི་གང་ཟག་དེ་ལ་དབང་བསྐུར་བའི་སྒོ་ནས་གསང་སྔགས་ཀྱི་སྡོམ་ལྡན་དུ་བྱས་ཏེ། གང་ཟག་དེས་རྩེ་གཅིག་ཏུ་གསོལ་བ་བཏབ་ན། ཚེ་འདིའམ་བར་དོ་སོགས་ལ་སངས་རྒྱས་སྦྱིན་ནུས་པ་ཅིག་དགོས་པའི་ཕྱིར་རོ། །གཉིས་པ་ནི། གསང་སྔགས་ཞེས་སོགས་དྲུག་སྟེ། དབང་བསྐུར་གྱི་སྒོ་ནས་གསང་སྔགས་ཀྱི་སྡོམ་ལྡན་དུ་བྱས་པ་མ་ཡིན་པའི་བླ་མ་ལ་མོས་པ་བྱས་ཀྱང་ཚེ་འདིའི་བདེ་སྐྱིད་ཙམ་མམ། སྐྱེ་བ་ཕྱི་མ་ལ་དལ་འབྱོར་གྱི་ལུས་ཐོབ་ཅིང་སངས་རྒྱས་ཀྱི་བསྟན་པ་དང་མཇལ་བ་སོགས་རིམ་གྱིས་འགྲུབ་པའི་རྒྱུར་འགྱུར་བ་སྲིད་ཀྱི་དེ་ནི་ཚེ་འདི་ལ་སོགས་སོ། །གསུམ་པ་ནི། ཕ་རོལ་ཕྱིན་པའི་ཞེས་སོགས་ཚིགས་བཅད་གཉིས་ཏེ། འདུལ་བ་ལས། ལྷན་ཅིག་གནས་པ་དང་། ཉེ་གནས་ཀྱིས་མཁན་པོ་དང་སློབ་དཔོན་ལ་སྟོན་པའི་འདུ་ཤེས་བསྐྱེད་པར་བྱའོ། །ཞེས་པ་དང་། འཇམ་དཔལ་རྣམ་པར་འཕྲུལ་པ་ལས། འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་དེ་བཞིན་གཤེགས་པ་ལ་ཇི་ལྟར་གུས་པར་བྱ་བ་ལཾ་དེ་བཞིན་དུ་དགེ་བའི་བཤེས་གཉེན་རྣམས་ལའང་བསྟེན་པར་བྱའོ། ཞེས་བྱ་བ་ལ་སོགས་པ་གསུངས་སོ། །འདུས་པའི་རྒྱུད་ལས། དབང་བསྐུར་བའི་རྡོ་རྗེ་སློབ་དཔོན་ལ་ཇི་ལྟར་བལྟ་བར་བགྱི་ཞུས་པའི་ལན་དུ། སངས་རྒྱས་ཀུན་གྱི་རང་བཞིན་སྐུ། །ཡན་ལག་བྱང་ཆུབ་སེམས་དཔའ་སྟེ། །བ་སྤུ་རྣམས་ནི་དགྲ་བཅོམ་ཉིད། །སྤྱི་གཙུག་རིགས་ལྔའི་སངས་རྒྱས་ཏེ། །འཇིག་རྟེན་པ་ནི་ཞབས་ཀྱིས་མནན། །འོད་ཟེར་གནོད་སྦྱིན་གསང་བའོ། །རྣལ་འབྱོར་ཅན་གྱིས་རྟག་ཏུ་བལྟ། །ཞེས་དང་། དབང་ཐོབ་པའི་རྡོ་རྗེ་སློབ་དཔོན་ལ་ཇི་ལྟར་བལྟ་བར་བྱ། བཅོམ་ལྡན་འདས་ཀྱིས་བཀའ་སྩལ་པ། དུས་གསུམ་གྱི་སངས་རྒྱས་ཐམས་ཅད་བླ་མའི་བ་སྤུ་གཅིག་ལ་མཐོང་ནས། དུས་གསུམ་གྱི་སངས་རྒྱས་ཐམས་ཅད་བླ་མ་ལ་མཆོད་པ་བྱེད་པར་མཐོང་ངོ་། །ཞེས་བྱ་བ་ལ་སོགས་པ་དང་། བཤད་རྒྱུད་རྡོ་རྗེ་ཕྲེང་བ་ལས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །འདི་ཡི་གཟུགས་ཀྱི་ཕུང་པོ་ནི། །བཅོམ་ལྡན་སངས་རྒྱས་རྣམ་སྣང་མཛད། །ཅེས་པ་ནས་རྐང་མཐིལ་གནོད་མཛེས་ཀྱི་བར་གདན་གསུམ་ཚང་བའི་ལྷ་ཚོགས་སུ་གསུངས་པ་དང་། རྡོ་རྗེ་གུར་ལས། དཔལ་ཀྱཻ་རྡོ་རྗེའི་དཀྱིལ་འཁོར་དུ་དབང་བསྐུར་བའི་སློབ་དཔོན་ལ་ཇི་ལྟར་བལྟ་བར་བགྱི། དེ་བཞིན་གཤེགས་པས་བཀའ་སྩལ་པ། སློབ་དཔོན་སྟོན་པར་གྱུར་པ་ནི། །སངས་རྒྱས་ཀུན་གྱིས་ཕྱག་མཛད་པ། །བདག་ཅག་ཀུན་གྱི་ཕ་དང་མ། །འདི་ཉིད་ཡིད་ལ་བསམ་པར་བྱ། །ཞེས་བྱ་བ་དང་། གང་ཕྱིར་ཡེ་ཤེས་རྡོ་རྗེ་ནི། །མཉེས་པས་དངོས་གྲུབ་ཐོབ་པར་འགྱུར། །དེ་ཕྱིར་སློབ་དཔོན་དྲུང་གཤེགས་ཏེ། །དེ་བཞིན་གཤེགས་རྣམས་ཕྱག་མཛད་དོ། །རྡོ་རྗེ་སེམས་དཔའ་ལྟ་བུ་ཡིས། །དེ་ལྟར་སློབ་དཔོན་གཟུགས་འཛིན་ཏེ། །སེམས་ཅན་རྗེས་སུ་བཟུང་དམིགས་ནས། །ཕལ་པའི་གཟུགས་སུ་གནས་པའོ། །ཞེས་བྱ་བ་དང་། བླ་མ་ལྔ་བཅུ་པ་ལས། །དབང་བསྐུར་མཆོག་ཐོབ་རྡོ་རྗེ་ཡི། །སློབ་དཔོན་ལ་ནི་དེ་བཞིན་གཤེགས། །ཕྱོགས་བཅུའི་འཇིག་རྟེན་ཁམས་བཞུགས་པས། །དུས་གསུམ་དུ་ནི་མངོན་ཕྱག་འཚལ། །ཞེས་པ་དང་། བདེ་མཆོག་རྩ་རྒྱུད་ལས། དེ་ནས་སྒྲུབ་པོས་དངོས་ཀུན་གྱིས། །དང་པོ་སློབ་དཔོན་མཉེས་པར་བྱ། །བསྒྲུབ་འདོད་ཀུན་ཏུ་མཉམ་བཞག་པས། །ཅི་ནུས་པས་ནི་བླ་མ་མཆོད། །ཅེས་གསུངས་སོ། །དབང་བསྐུར་བའི་སྒོ་ནས་སྔགས་སྡོམ་གྱིས་མ་སྦྲེལ་ན། ཆོས་གཞན་སྟོན་པའི་བླ་མ་བཟང་ཡང་། ཕ་རོལ་ཏུ་ཕྱིན་པའི་ལུགས་ལྟར་རིམ་གྱིས་གྲུབ་པའི་རྒྱུ་སྲིད་ཀྱི་ཚེ་འདིའམ་བར་དོ་སོགས་སུ་སངས་རྒྱས་སྦྱིན་པར་མི་ནུས་སོ། །བདུན་པ་ནི། རབ་བྱུང་མིན་ལ་ཞེས་སོགས་ཚིགས་བཅད་གཉིས་ཏེ། རབ་ཏུ་བྱུང་བར་བྱེད་པ་པོ་མ་ཡིན་པ་ལ་མཁན་པོ་མཚན་ཉིད་པ་མེད། དབང་མ་བསྐུར་བ་ལ་སངས་རྒྱས་དངོས་སུ་ལྟ་བའི་བླ་མ་མཚན་ཉིད་པ་མེད། སྡོམ་པ་མེད་པ་ལ་སྤོང་སེམས་ཀྱི་དགེ་བ་རྒྱུན་ཆགས་པ་མེད། སྐྱབས་འགྲོ་མེད་ན་ཆོས་འདི་པའི་ཁོངས་སུ་མི་ཆུད་པས་ན། སྡོམ་པ་མེད་པར་དགེ་སྦྱོང་དུ་ཁས་ལེན་པ་དང་། སེམས་བསྐྱེད་མ་ཐོབ་པར་རྒྱལ་སྲས་སུ་ཁས་འཆེ་བ་དང་། དབང་བསྐུར་མ་ཐོབ་པར་སྔགས་པར་ཁས་འཆེ་བ་གསུམ་ནི་སངས་རྒྱས་ཀྱི་བསྟན་པ་འདུལ་བ་དང་། ཕ་རོལ་ཏུ་ཕྱིན་པ་དང་། རྡོ་རྗེ་ཐེག་པ་གསུམ་གྱི་ཆོམ་རྐུན་ཡིན་པས་ཤེས་ནས་སྤང་བར་བྱའོ། །གསུམ་པ་དབང་དང་རིམ་གཉིས་ལས་བྱུང་བའི་ཡེ་ཤེས་ཕྱག་རྒྱ་ཆེན་པོ་ལ་གཉིས་ཏེ། རྟོགས་བྱེད་ཕྱག་ཆེན་གྱི་ཡེ་ཤེས་ལ་འཁྲུལ་པ་དགག་པ། རྟོག་བྱ་སྤྲོས་བྲལ་གྱི་ལྟ་བ་ལ་འཁྲུལ་པ་དགག་པའོ། །དང་པོ་ལ་གསུམ་སྟེ། །མཚོན་བྱེད་དཔེའི་ཕྱག་ཆེན་ལ་འཁྲུལ་པ་དགག་པ། མཚོན་བྱ་དོན་གྱི་ཕྱག་ཆེན་ལ་འཁྲུལ་པ་དགག་པ། ཞར་ལ་ཐེག་པ་གསུམ་གྱི་ལག་ལེན་ལ་འཁྲུལ་པ་དགག་པའོ། །དང་པོ་ལ་གསུམ་སྟེ། སྟོང་རྐྱང་དུ་ལྟ་བའི་ལྷག་མཐོང་ལྟར་སྣང་ལ་ཕྱག་ཆེན་དུ་འདོད་པ་དགག་པ། མོས་གུས་ཀྱིས་སེམས་བསྒྱུར་བའི་ཞི་གནས་ལྟར་སྣང་ལ་ཕྱག་ཆེན་དུ་འདོད་པ་དགག་པ། ཞར་ལ་ཕྱག་ཆེན་གྱི་རྒྱུ་ལ་ལོག་རྟོག་དགག་པའོ། །དང་པོ་ལ་བཞི་སྟེ། གཞན་ལུགས་ཀྱི་ཕྱག་ཆེན་དགག་པ་དངོས། རང་ལུགས་ཀྱི་ཕྱག་ཆེན་ངོས་བཟུང་བ། གཞན་ལུགས་ཀྱི་ཕྱག་ཆེན་རྒྱ་ནག་ལུགས་སུ་བསྟན་པ། རང་ལུགས་ཀྱི་ཕྱག་ཆེན་རྒྱ་གར་གྱི་ལུགས་སུ་བསྟན་པའོ། །དང་པོ་ནི། ཕྱག་རྒྱ་ཆེན་པོ་ཞེས་སོགས་ཚིགས་བཅད་བཞི་སྟེ། དེང་སང་གི་ཕྱག་ཆེན་བསྒོམ་པ་ཕལ་ཆེར་དབང་དང་ཡེ་ཤེས་ལས་བྱུང་བའི་རང་བྱུང་གི་ཡེ་ཤེས་ལ་ཕྱག་ཆེན་དུ་རྣལ་འབྱོར་ཆེན་པོའི་རྒྱུད་སྡེ་ནས་བཤད་པའི་དོན་མི་ཤེས་པར། མདོ་ལས། གང་ཡིད་ལ་བྱེད་པ་དེ་ནི་མི་དགེ་བའོ། །གང་ཡིད་ལ་མི་བྱེད་པ་དེ་ནི་དགེ་བའོ། །ཞེས་དང་། ཆོས་ཐམས་ཅད་ནི་དྲན་པ་མེད་ཅིང་ཡིད་ལ་བྱར་མེད་པའོ། །ཞེས་པའི་དོན་སྒྲ་ཇི་བཞིན་དུ་བཟུང་ནས། རྣམ་པར་རྟོག་པ་ཕྱི་རོལ་ཡུལ་ལ་འཕྲོ་བ་བཀག་ནས་སྟོང་པ་ཧ་དེར་འཇོག་པའི་རྟོག་པ་ཁ་ཚོམ་པ་ཉིད་བསྒོམ་པར་བྱེད་དོ། །འདི་ལ་རྣམ་པར་བརྟགས་ན། ཚོགས་དྲུག་གི་རྒྱུ་བ་བཀག་ནས་དྲན་རིག་ཙམ་ཡང་གསལ་བ་མེད་པར་བསྒོམས་ན་ཉེ་བའི་ཉོན་མོངས་པ་རྨུགས་པའི་ཁོངས་སུ་གཏོགས་པ་དུད་འགྲོའི་རྒྱུ་རུ་གསུངས་ལ། གཟུགས་ཀྱི་སྣང་བ་མཐའ་དག་བཀག་ནས། གཟུགས་ལ་འདོད་ཆགས་དང་བྲལ་བར་བྱས་ཏེ་ནམ་མཁའ་ལ་དམིགས་པ་དང་། དེ་ཡང་བཀག་སྟེ་ཡུལ་ཅན་གྱི་རྣམ་པར་ཤེས་པ་ལ་དམིགས་པ་དང་། དེ་ཡང་བཀག་སྟེ་གཟུང་བྱ་ཅི་ཡང་མེད་པ་ལ་དམིགས་པ་དང་། དེ་ལས་འདས་ཏེ་འདུ་ཤེས་རགས་པ་མེད་ཅིང་ཕྲ་བ་མེད་པ་མ་ཡིན་ནོ་སྙམ་དུ་དམིགས་པ་རྣམས་ནི་རིམ་པ་ལྟར། གཟུགས་མེད་སྐྱེ་མཆེད་མུ་བཞིར་སྐྱེ་བའི་རྒྱུར་འགྱུར་རོ། །དེ་ལས་བསྒོམ་ལེགས་ཏེ། གང་ཟག་གི་བདག་འཛིན་བཀག་ནས། འཁོར་བ་ལ་ངེས་པར་འབྱུང་བའི་བློས་རྩེ་གཅིག་ཏུ་བསྒོམ་པར་བྱས་ན། ཉན་ཐོས་ཀྱི་མྱང་འདས་ཐོབ་པར་འགྱུར་རོ། །དེ་ལ་ཁ་ཅིག་ཉན་ཐོས་འགོག་པ་འདུ་ཤེས་མེད་པའི་སེམས་ཅན་ལ་འདོད་པ་ནི། ཆོས་མངོན་པའི་དོན་ལ་བློ་གྲོས་ཞིབ་མོས་མ་དཔྱད་པར་གསལ་ཏེ། འདུ་ཤེས་མེད་པའི་སེམས་ཅན་ལ་ཉན་ཐོས་འགོག་པར་གང་ནས་ཀྱང་བཤད་པ་མེད་པའི་ཕྱིར་དང་། ཁྱེད་རང་གིས་ཀྱང་འདི་འགོག་པའི་སྙོམས་འཇུག་མ་ཡིན་པའི་ཤེས་བྱེད་དུ་འདི་ལ་བསམ་གཏན་དང་། གཟུགས་མེད་ཀྱི་ཏིང་ངེ་འཛིན་གོ་ཆོད་མེད་པ་བཀོད་པས་ནང་འགལ་བ་ཡིན་ནོ། །འདུ་ཤེས་མེད་པའི་སེམས་ཅན་ནི་བསམ་གཏན་བཞི་པའི་གནས་ཀྱི་བྱེ་བྲག་གྲོང་ལས་དགོན་པའི་ཚུལ་དུ་འཕགས་པ་ཞིག་ཡིན་པར་མངོན་པ་ལས་བཤད་ལ། བསམ་གཏན་གྱི་ཏིང་ངེ་འཛིན་གོ་ཆོད་མེད་པར་བསམ་གཏན་བཞི་པར་སྐྱེ་བ་བཞད་གད་ཀྱི་གནས་ཡིན་པའི་ཕྱིར་རོ། །གལ་ཏེ་དེ་ནི་བསྒོམ་ལེགས་ཀྱང་སོ་སོར་རྟོག་པའི་ཤེས་རབ་ཀྱིས་ཡོད་མེད་ལ་སོགས་པ་གཉིས་འཛིན་གྱི་སྤྲོས་པ་མཐའ་དག་བཅད་ནས་སྙིང་རྗེ་ཆེན་པོ་དང་ཟུང་འཇུག་ཏུ་བྱས་ཏེ་བསྒོམས་ན། དབུ་མའི་བསྒོམ་དུ་འགྱུར་པ་ཡིན་མོད་ཀྱི། འོན་ཀྱང་དེ་འགྲུབ་པ་ལ་ཡུན་རིང་དུ་འགོར་ཏེ་ཇི་སྲིད་ཚོགས་གཉིས་སོགས་སོ། །དེ་ཡང་མདོ་སྡུད་པ་ལས། དེ་དག་དགེ་བའི་རྩ་བ་ཇི་སྲིད་མ་རྫོགས་བར། །དེ་སྲིད་སྟོང་ཉིད་དམ་པ་དེ་ནི་ཐོབ་མི་བྱེད། །ཅེས་གསུངས་སོ། །མདོར་ན་དབང་དང་རིམ་གཉིས་ལས་བྱུང་བའི་རང་བྱུང་གི་ཡེ་ཤེས་མ་རྟོགས་པར་སྟོང་པར་ལྟ་བའི་བསྒོམ་ཐམས་ཅད་གོང་དུ་བཤད་པའི་བསྒོམ་བཞི་པོ་དེར་མ་འདུས་པ་མེད་ཅིང་། བཞི་པོ་དེ་དག་ནི་ཕྱག་ཆེན་མ་ཡིན་པས། མ་བཅོས་མ་བཅོས་བློ་མ་བཅོས། །བཅོས་མའི་ཆོས་ཀྱི་འཚང་མི་རྒྱ། །ཞེས་དང་། དམ་ཆོས་ཕྱག་རྒྱ་ཆེན་པོ་འདི་ལ། །བསྒོམ་ནས་བསྒོམ་རྒྱུ་ཅི་ཡང་མེད་དོ། །ཐ་མལ་ཤེས་པ་རང་སོར་ཞོག་ཅིག །རང་སར་མི་སྡོད་འཕྲོ་བའི་ཚེ་ན། །འཕྲོ་མཁན་གང་ཡིན་ཙིར་དེ་ཟུང་ཞིག །ཞེས་སོགས་ཀྱི་སྒོ་ནས་རྟོག་པ་བཀག་ཙམ་གྱི་བསྒོམ་ཐམས་ཅད་ཕྱག་ཆེན་ཡིན་པ་སངས་རྒྱས་ཀྱི་གསུང་ལ་བརྟེན་པའི་མཁས་པ་རྣམས་ཀྱིས་སྤང་བར་བྱའོ། །གཉིས་པ་ནི་ངེད་ཀྱི་ཞེས་སོགས་བཅུ་སྟེ། ཚིག་རྐང་དང་པོ་གསུམ་གྱིས་རྒྱུ་བསྟན། བཞི་པས་རང་གི་ངོ་བོ་བསྟན། དེ་ནས་གཉིས་ཀྱིས་འགྲུབ་པའི་དུས་བསྟན་ནོ། །དེ་ནས་གཉིས་ཀྱིས་གཞན་དུ་རྟོག་པ་དགག དེ་ནས་གཉིས་ཀྱིས་ཕྱག་ཆེན་བསྒྲུབ་པར་འདོད་པས་གང་ལ་འཇུག་པའི་ལུང་བསྟན་ནོ། །འདི་དག་གི་དོན་ཞིབ་ཏུ་རྟོགས་པར་འདོད་ན་རྣལ་འབྱོར་ཆེན་པོའི་རྒྱུད་སྡེ་རྣམས་ཀྱི་དགོངས་པ་མཐར་ཐུག་པ་གྲུབ་པ་ཐོབ་པའི་སློབ་དཔོན་རྣམས་ཀྱིས་མཛད་པའི་གྲུབ་པ་སྡེ་བདུན་ལས་ཤེས་པར་བྱའོ། །གསུམ་པ་ནི། ད་ལྟའི་ཕྱག་རྒྱ་ཞེས་སོགས་ཚིགས་བཅད་ཕྱེད་དང་བཅུ་སྟེ། རྒྱ་ནག་ཧྭ་ཤང་གི་ཆོས་ནོར་བ་འདི་འདྲ་འབྱུང་བ་ཡང་མཁན་བོ་དྷི་ས་ཏྭ་སྟེ། བྱང་ཆུབ་སེམས་དཔའ་ཞི་བ་འཚོས། རྒྱལ་པོ་ཁྲི་སྲོང་ལྡེའུ་བཙན་ལ་ལུང་བསྟན་གྱི་ཞལ་ཆེམས་མཛད་པ་ཐོག་ཏུ་བབ་པ་ཡིན་ནོ། །དེ་ཡང་ཆོས་རྒྱལ་སྲོང་བཙན་སྒམ་པོས། ད་ནས་རྒྱལ་རབས་ལྔ་ནས་རྒྱལ་པོ་ལྡེའི་མིང་ཅན་གཅིག་འབྱུང་སྟེ། དེས་སངས་རྒྱས་ཀྱི་བསྟན་པའི་རྩ་བ་རབ་ཏུ་བྱུང་བ། ངུར་སྨྲིག་གི་གོས་འཛིན་པའི་སྡེ་འཛུག་པར་འགྱུར་རོ། །དེ་ལ་ངའི་དབོན་སྲས་འབངས་དང་བཅས་པ་རྣམས་ཀྱིས་མཆོད་པ་དང་བཀུར་སྟི་ཆེན་པོ་གྱིས་ཤིག ཚེ་འདི་དང་ཕྱི་མའི་བདེ་ལེགས་རྣམས་འབྱུང་བར་འགྱུར་རོ། །ཞེས་ལུང་བསྟན་པ་བློན་པོ་འགར་གྱིས་ཟངས་མའི་གླེགས་བམ་ལ་ཡི་གེ་བྲིས་པ་དེ་དཀོར་མཛོད་དུ་བཅུག་གོ །ལུང་བསྟན་པ་བཞིན་དུ་ཁྲི་སྲོང་ལྡེའུ་བཙན་ལྕགས་ཕོ་རྟའི་ལོ་ལ་འཁྲུངས་ཏེ། དགུང་ལོ་བཅུ་གསུམ་ལོན་པ་ཆུ་ཕོ་རྟའི་ལོ་ལ་རྒྱལ་སར་བྱོན་ནས་བློན་པོ་སྦ་གསལ་སྣང་མཁན་པོ་སྤྱན་འདྲེན་པ་ལ་མངགས་ཏེ། མང་ཡུལ་སྐྱིད་གྲོང་དུ་མཁན་པོ་བྱོན་པ་དང་མཇལ་ཅིང་སྤྱན་དྲངས་ནས་བསུ་བ་རྒྱ་ཆེན་པོ་མཛད་དེ། ཆོས་རྒྱལ་དང་ཞལ་འཛོམ་པའི་ཚེ་སྔོན་སྨོན་ལམ་བཏབ་པ་དྲན་ནམ། ཞེས་ལན་གསུམ་གྱི་བར་དུ་གསུངས་པས། རྗེས་ལ་འོལ་སྤྱིར་དྲན་ལགས་ཏེ། བསྒོམ་ཡུན་ཐུངས་པས་མི་གསལ་ཞེས་ཞུས་སོ། །མཁན་པོའི་ཞལ་སྔ་ནས་ཆུ་བོ་གངྒཱའི་འགྲམ་ན་མཆོད་རྟེན་ཆེན་པོ་ཞིག་བཞུགས་པ་ལ་དད་པས་ཞིག་གསོས་དང་། ཕྱག་དང་བསྐོར་བ་བྱས་ཤིང་། རྒྱལ་པོ་ཁྱོད་ཀྱིས་ཡུལ་མཐའ་འཁོབ་དམ་པའི་ཆོས་མ་དར་བའི་ཕྱོགས་སུ་རྒྱལ་པོར་གྱུར་ཏེ། སངས་རྒྱས་ཀྱི་བསྟན་པ་སྤེལ་བར་གྱུར་ཅིག་ཅེས་སྨོན་ལམ་བཏབ་བོ། །ཁོ་བོ་ནི་དེའི་ཚེ་མཁན་པོར་གྱུར་ཅིག་ཅེས་བྱས་སོ། །ཞེས་པ་འདི་ཙམ་སྦ་བཞེད་ལས་བྱུང་ཞིང་། ཡིག་ཚང་འགའ་ཞིག་ཏུ་སློབ་དཔོན་པདྨས་གདུག་པ་ཅན་འདུལ་བའི་སྔགས་འཆང་དུ་གྱུར་ཅིག་ཅེས་པ་དང་། ཡེ་ཤེས་དབང་པོས་སྤྱན་འདྲེན་པའི་ཕོ་ཉ་བར་གྱུར་ཅིག ཅེས་སྨོན་ལམ་བཏབ་ཟེར་རོ། །དེའི་ཚེ་བོད་ཀྱི་མི་འགའ་ཞིག་མཐའ་མིས་ངན་སྔགས་བྱས་དོགས་ཡོད་ཟེར་ཏེ། ཁ་ཆེ་ཨཱ་ནནྡས། ལོ་ཙཱ་བྱས་ཤིང་ལེགས་པར་བརྟགས་པས། བྱང་ཆུབ་སེམས་དཔའ་བཟང་པོ་ཞིག་ལགས་ཏེ། ཐུགས་འཁྲིག་མི་འཚལ་ལོ་ཟེར་བས་བོ་དྷི་ས་ཏྭར་གྲགས་སོ། །སྡོམ་བརྩོན་ཆེན་པོ་འདི་ནི་ཤར་ཕྱོགས་ཟ་ཧོར་གྱི་རྒྱལ་པོའི་སྲས་སུ་འཁྲུངས་ནས། ནཱ་ལེནྡྲར་མཁན་པོ་ཡེ་ཤེས་སྙིང་པོ་ཡོད་སྨྲའི་སྡེ་པའི་བསླབ་རྒྱུད་ལས་རབ་ཏུ་བྱུང་ཞིང་། རིགས་པའི་གནས་མཐའ་དག་ལ་མཁས་པར་གྱུར་ཏོ། །ནཱ་ལེནྡྲར་མཁན་པོ་མཛད་ཅིང་རྒོལ་བ་ངན་པ་ཐམས་ཅན་ཚར་གཅད་པས་མཁས་པའི་གྲགས་པས་འཛམ་བུའི་གླིང་ཐམས་ཅད་ཁྱབ་པར་གྱུར་ཏེ། ལྷོ་ཕྱོགས་ནས་བྲམ་ཟེའི་བུ་མུ་སྟེགས་ཀྱི་རིག་བྱེད་ལ་ཤིན་ཏུ་མཁས་པ་ཞིག་གིས། ཕྱི་ནང་གི་རྒོལ་བ་རྣམས་ཕམ་པར་བྱས་ཏེ། སྙན་པའི་གྲགས་པས་ཁེངས་ཤིང་ནཱ་ལེནྡྲར་སོང་ནས་མཁན་པོ་ཕམ་པར་བྱས་ན་འགྲན་ཟླ་དང་བྲལ་བར་འགྱུར་སྙམ་དུ་སེམས་སོ། །དེ་ནས་མཁན་པོའི་བཞུགས་སར་རིམ་གྱིས་ཕྱིན་ཏེ། བལྟས་པས་མཁན་པོ་མི་སྣང་ཞིང་། འཇམ་པའི་དབྱངས་ཀྱི་སྐུ་གསེར་བཙོ་མའི་མདོག་ལྟར་འབར་ཞིང་བཞུགས་པར་མཐོང་ངོ་། །ཕྱིར་འོངས་ནས་གཞན་དག་ལ་དྲིས་པས་མཁན་པོ་དེ་ཉིད་ན་བཞུགས་ཡོད་དོ་ཞེས་ཟེར་རོ། །སླར་ལོག་ཏེ་བལྟས་པས་མཁན་པོའི་ཞལ་མཐོང་མ་ཐག་ཤིན་ཏུ་དད་པར་གྱུར་ཏེ། རྩོད་པའི་བསམ་པ་དོར་ནས་གུས་པས་ཞབས་སྤྱི་བོར་བླངས་ཤིང་བསྟན་པའི་སྒོར་ཞུགས་སོ། །མདོར་ན་འཇམ་པའི་དབྱངས་གྲུབ་པའི་སྡོམ་བརྩོན་དམ་པ་འདིས་ནཱ་ལེནྡྲར་ཡུན་རིང་དུ་བཞུགས་ཤིང་། རྒྱ་གར་ཤར་ཕྱོགས་དང་། རྒྱ་ནག་ལ་སོགས་པར་དགུང་ལོ་བདུན་བརྒྱའི་བར་དུ་སངས་རྒྱས་ཀྱི་བསྟན་པ་ལེགས་པར་བསྐྱངས་ནས། སླར་བོད་ཡུལ་དུ་སྔོན་གྱི་སྨོན་ལམ་གྱི་མཐུས་བྱོན་ཏེ། ཆོས་རྒྱལ་ཆེན་པོའི་བཞེད་པ་བསྒྲུབས་ནས་སྐུ་གཤེགས་ཁར་རྒྱལ་པོ་ཁྱོད་ཀྱི་མངའ་འོག་ཏུ་རབ་ཏུ་བྱུང་བ་མང་བར་འདོད་ན། ངའི་ལུས་འདི་ཧས་པོ་རིའི་ཤར་དུ་ཁ་ཤར་ཕྱོགས་སུ་སྟོན་ལ་ཞོག་ཅིག རབ་བྱུང་རྣམ་དག་ཉུང་ཤས་ཅིག་འདོད་ན། ནུབ་ཕྱོགས་སུ་ཞོག་ཅིག རྒྱལ་པོ་ཁྱོད་ཀྱི་ཡུལ་ཁམས་སུ་ཕྱི་རོལ་མུ་སྟེགས་པ་མི་འབྱུང་སྟེ། སྔགས་འཆང་པདྨ་འབྱུང་གནས་ཀྱིས་མ་མོའི་སྡེ་དཔོན་བརྟན་མ་བཅུ་གཉིས་ལ་བསྟན་པ་གཏད་ཅིང་སྐྱོང་བར་དམ་བཅས་པ་ཡིན་པས་སོ། །སློབ་དཔོན་པདྨ་འབྱུང་གནས་བོད་ཡུལ་དུ་བྱོན་པའི་ཚུལ་ནི། མཁན་པོ་བོ་དྷི་ས་ཏྭས་ཆོས་རྒྱལ་རྗེ་བློན་རྣམས་ལ། དགེ་བ་བཅུའི་ཆོས་གསུངས་ཤིང་མི་དགེ་བ་སྤོང་བའི་སྲོལ་བཏོད་པས་བོད་ཡུལ་གྱི་མི་མ་ཡིན་རྣམས་འཁྲུགས་ཏེ། ཡར་ལུང་འཕང་ཐང་ན། མེས་ཨག་ཚོམ་གྱིས་བཞེངས་པའི་ལྷ་ཁང་ཡོད་པ་ལ། ཤམ་པོས་ཆུ་ཐོག་ཕབ་ནས་བཤིག དམར་པོ་རིའི་རྩེ་ལ་ཡབ་མེས་ཀྱི་སྐུ་མཁར་ཡོད་པ་ལ། ཐང་ལྷས་ཐོག་ཕབ་ནས་བསྒྱེལ། བརྟན་མ་བཅུ་གཉིས་ཀྱིས་སད་དང་སེར་བ་དང་། མི་ནད་ཕྱུགས་ནད་ལ་སོགས་ཡམས་དྲག་པོ་གསོར་མི་རུང་བ་བཏང་བས་བོད་འབངས་རྣམས། རྒྱ་གར་གྱི་ཨ་ཙ་རའི་ཕྱིར་འདྲེ་སྲིན་གདུག་པ་ཅན་མང་པོ་འོངས་ནས་བཀྲ་མི་ཤིས་པ་བྱུང་ངོ་། །ཞེས་གླེང་ཞིང་མཁན་པོ་རྒྱ་གར་དུ་རྫོང་བར་ཆད་དོ། །དེའི་ཚེ་ཁྱོད་རེ་ཤིག་བལ་ཡུལ་དུ་བཞུགས་ཤིག སླར་ཡང་སྤྱན་འདྲེན་གཏོང་བས་འབྱོན་པར་ཞུ་བྱས་པས། ཁོ་བོ་སྨོན་ལམ་རྫོགས་པར་བྱེད་པས་སླར་ཡང་འོང་གིས། བོད་ཀྱི་ལྷ་སྲིན་མ་རུངས་པ་འདུལ་བ་ལ་ཨུ་རྒྱན་གྱི་སྔགས་འཆང་པདྨ་འབྱུང་གནས་ཞེས་བྱ་བ་ཡོད་ཀྱི། བལ་ཡུལ་དུ་ཁོ་བོས་སྤྱན་དྲང་བར་བྱ། དེ་ནས་ཁྱེད་ཀྱིས་སྤྱན་འདྲེན་ཐོང་ལ། མི་མ་ཡིན་པ་རྣམས་ཐུལ་ཅིག སླར་ཁོ་བོས་རབ་ཏུ་བྱུང་བའི་སྡེའི་མཁན་པོ་བྱའོ། །ཞེས་ཡོན་མཆོད་ལྐོག་ཏུ་གླེང་ནས་མཁན་པོ་བལ་ཡུལ་དུ་བརྫངས་སོ། །དེ་ནས་སྦ་ཡེ་ཤེས་དབང་པོ་སློབ་དཔོན་སྤྱན་འདྲེན་དུ་བཏང་བས་མང་ཡུལ་སྐྱིད་གྲོང་དུ་མཇལ་ཏེ། ལོ་རྒྱུས་བསྙད་པས་ཁོ་བོ་དོན་དེ་ཁོ་ནའི་ཕྱིར་འོངས་པ་ཡིན་ནོ་ཞེས་གསུངས་ཏེ། ལམ་ན་ཡོད་པའི་མི་མ་ཡིན་རྣམས་འདུལ་ཞིང་རིམ་གྱིས་གནམ་ཆུ་ཚན་ཁར་ཕེབས་པའི་ཚེ། ཉི་ཚེ་བའི་སེམས་ཅན་དམྱལ་བའི་ཆུ་ཁོལ་བ་ཡིན་ཏེ། ཁོ་བོས་ཅུང་ཟད་ཕན་པར་བྱའོ། །ཞེས་གསུངས་ནས་ཐུགས་དམ་མཛད་པས་ཆུ་ཁོལ་བ་ཆད་དེ་གྲང་མོར་གྱུར་ཏོ། །ཐུགས་དམ་གྲོལ་ནས་བཞེངས་པའི་ཚེ་སྔར་བཞིན་གྱུར་པས། རྣལ་འབྱོར་པའི་ཏིང་ངེ་འཛིན་གྱི་རྒྱུ་མཐུན་གྱི་འབྲས་བུ་ཅུང་ཟད་འགྲུབ་པ་ཡིན། སེམས་ཅན་གྱི་སྡིག་པ་སྟོབས་ཅན་གྱི་རྣམ་སྨིན་གྱི་འབྲས་བུ་འགོག་པར་མི་ནུས་གསུངས། དེ་ནས་རིམ་གྱིས་སྟོད་ལུང་གི་མདའི་ལྷ་ཆུ་ཁར་ཕེབས་ནས་འདི་ན་ཆུ་མི་འདུག་གསུངས་ཏེ། གསེག་ཤང་ས་ལ་ལན་བདུན་བཙུགས་པས་ཆུ་བདུན་བྱུང་སྟེ་ལྷ་ཆུ་ཁར་གྲགས་སོ། །དེ་ནས་མཁར་ནག་འདུལ་བའི་ཕྱིར་བྱོན་ནས། བྲག་ལ་རྡོ་རྗེ་སེམས་དཔའི་སྐུ་བཞེངས་སོ། །དེ་ནས་རིམ་གྱིས་ཟུར་མཁར་གྱི་མདར་ཕེབས་ནས་ལྷ་བཙན་པོ་དང་མཇལ་བའི་སར། རྡོའི་མཆོད་རྟེན་ལྔ་བཞེངས་སོ། །དེ་ནས་བྲག་དམར་གྱི་ལྷ་ཁང་དུ་ཕེབས་ཏེ་ལྷ་སྲིན་འདུལ་བར་ཞུས་ཤིང་། ཁྱེའུ་དང་བུ་མོ་གཙང་མ་ལ་པྲ་འབེབས་པའི་ཆོ་ག་མཛད། འཇིག་རྟེན་སྐྱོང་བ་བཞི་ལ་གདུག་པ་ཅན་ཐམས་ཅད་ཁུག་ཅིག་ཅེས་བཀའ་བསྒོས་ཏེ། བཀའ་ནན་དྲག་པོ་སྩལ་བས་མི་མ་ཡིན་རྣམས་ཀྱིས་རང་གི་ཉེས་པ་ཁས་བླངས་ཤིང་ཕྱིན་ཆད་མི་བྱེད་པར་དམ་བཅས་སོ། །སླར་ཡང་མཆིམས་ཕུའི་དབེན་གནས་སུ་མི་མ་ཡིན་རྣམས་ལ་བཀའ་བསྒོ་ཞིང་། བསྟན་པ་བསྲུང་བར་དམ་བཅས་སོ། །དེ་ནས་སློབ་དཔོན་གྱིས་བྱེ་མ་ནེའུ་གསིང་དུ་བསྒྱུར་བ་དང་། བར་སྣང་ནས་ལྷ་རྫས་ཀྱི་ཆུས་གང་བའི་བུམ་པ་ལེན་པ་ལ་སོགས་པའི་ཆོ་འཕྲུལ་བསྟན་པས། བསམ་སྦྱོར་ངན་པར་བྱེད་པའི་བློན་པོ་ངན་པ་རྣམས་འཁུ་འཁྲིག་ཟོས་ཏེ། སློབ་དཔོན་བཀྲོང་བར་ཆད་པས། ལྷ་བཙན་པོ་ཐུགས་མ་བདེ་བར། དམག་མང་པོ་དང་བཅས་ཏེ། བོད་དང་མོན་གྱི་མཚམས་སུ་བསྐྱལ་ལོ། །སློབ་དཔོན་བཀྲོང་བའི་གཤེད་མ་མཚོན་ཆ་གཟུང་བ་རྣམས་རེངས་པར་གྱུར་ཏོ། །སློབ་དཔོན་གྱི་ཞལ་ནས་བོད་ཀྱི་ལྷ་སྲིན་སྡེ་བརྒྱད་ལན་གསུམ་དམ་ལ་བཏགས་དགོས་ཏེ། ད་དུང་ལན་གཅིག་མ་གྲུབ་པས་རྒྱལ་བརྒྱུད་དང་ཆོས་བྱེད་པའི་ཚེ་སྲོག་དང་དམ་པའི་ཆོས་ལ་བར་ཆད་འགའ་རེ་འབྱུང་བར་འདུག་པས་ཅུང་ཟད་ཡིད་འཕྲེང་། ངའི་དངོས་ཀྱི་གདུལ་བྱ་བོད་ཡུལ་ན་མེད་སྲིན་པོ་འདུལ་དུ་འགྲོ་གསུངས་ནས་བླ་གོས་པུ་རེ། གསེག་ཤང་སིལ་ལེ། སྲིན་པོའི་ཡུལ་དུ་བཞུད་དོ། །བོད་ཡུལ་དུ་ཟླ་བ་བཅོ་བརྒྱད་བཞུགས་པ་ཡིན་བྱ་བ་སྦ་བཞེད་ན་སྣང་ཞིང་། དེ་བས་ལྷག་པའི་ལོ་རྒྱུས་མང་པོ་ནི་མི་སྣང་ངོ་། །མཁན་པོས་རྒྱལ་པོ་ལ་ཁྱོད་ཀྱི་བོད་ཡུལ་འདིར་མུ་སྟེགས་མི་འབྱུང་ཡང་ཡར་ངོ་མར་ངོ་གཉིས་ལ་སོགས་རྟེན་འབྲེལ་འགའ་ཡི་རྒྱུས་ཆོས་ལུགས་དག་མ་དག་གཉིས་སུ་འགྲོ་བར་འགྱུར་ཏེ། དེ་ཡང་ཐོག་མར་ང་འདས་ནས་རྒྱ་ནག་དགེ་སློང་ཞེས་བྱ་བས། བྱ་བྱེད་ཀྱི་ཆོས་ཀྱིས་འཚང་མི་རྒྱ་བས་རྣམ་པར་མི་རྟོག་པ་བསྒོམ་པས་སེམས་རྟོགས་པ་འབའ་ཞིག་གིས་འཚང་རྒྱ་བའི་ཆོས་སྟོན་པར་འགྱུར་རོ། །དེའི་ཚེ་ངའི་སློབ་མ་ཀཱ་མ་ལ་ཤཱི་ལ་སྤྱན་དྲོངས་ལ་དེས་སུན་འབྱིན་པར་ནུས་སོ། །དེ་ནས་དད་ལྡན་རྣམས་ཀྱིས་སློབ་དཔོན་གྱི་ཆོས་ལུགས་བཞིན་དུ་ཉམས་སུ་ལོང་ཅིག་གསུང་། དེ་བདག་ཅག་གིས་གདན་འདྲོང་བ་མི་སྲིད་པས་ཕྱག་ཡིག་ཅིག་བཞག་པར་ཞུ་ཞུས་པས། ཀཱ་མ་ལ་ཤཱི་ལ་ཁྱེད་ལ་མ་འོངས་པའི་དུས་སུ་བོད་ཀྱི་རྒྱལ་པོས་གདན་འདྲེན་པ་བྱུང་ན་ཅིས་ཀྱང་འབྱོན་དགོས་སོ། །གལ་ཏེ་མ་འོངས་ན་དཔོན་སློབ་ལ་དམ་ཚིག་མེད་དོ། །ཞེས་པའི་ཕྱག་ཡིག་བཞག་སྐད། དེའི་རྗེས་སུ་ལུང་བསྟན་པ་དེ་བཞིན་ཐོག་ཏུ་བབས་ཏེ། མཁན་པོ་གཤེགས་ནས། སྦ་ཡེ་ཤེས་དབང་པོ་རྒྱལ་ཚབ་ཏུ་བསྐོས་ཏེ་བསྟན་པ་འཛིན་པའི་ཚེ། ཉང་ཏིང་འཛིན་བཟང་པོ་དང་། ཉང་ཤ་མི་ལ་སོགས་པ་མི་གུས་པ་དང་སྐུར་པ་བཏབ་པས་ཐུགས་སྐྱོ་ནས་མཁར་ཆུར་བསྒོམ་དུ་བཞུད་དོ། །དེའི་ཚེ་རྒྱ་ནག་མཁན་པོ་བྱུང་ནས་ཁོ་རང་གི་ཆོས་ལུགས་བསྟན་པས། ཆོས་འདི་བྱ་སླ་ཞིང་ཕན་ཡོན་ཆེའོ། །ཞེས་ཟེར་ཞིང་། བོད་རིལ་གྱིས་ཁོའི་ཆོས་ལུགས་བྱེད། དཀོན་མཆོག་ལ་མཆོད་པ་དང་། སྡེ་སྣོད་ལ་ཐོས་བསམ་དང་། ལུས་ངག་གི་དགེ་སྦྱོར་འཕྲོ་གཅད་དོ། །དཔལ་དབྱངས་དང་། སྦ་རཏྣ་ལ་སོགས་པ་ཉུང་ཤས་ཤིག་མཁན་པོའི་ཆོས་ལུགས་བྱེད་དོ། །བཙན་པོས་རྒྱའི་སྟོན་པའི་ལུགས་འདི་ཆོས་རང་མིན་པ་འདྲ་གསུངས་པས་སྟོན་མིན་པར་གྲགས་སོ། །དྲང་སྲོང་བཟོད་པས་མཆིམས་ཕུར་རང་གི་ལུས་ལ་མེ་སྤར་ཏེ། དཀོན་མཆོག་ལ་ཕུལ་བས། སེམས་ཅན་གྱི་དོན་དུ་རང་ལ་བརྩེ་བ་མེད་པ་འདི་ལྟ་བུའི་ཚོགས་བསགས་པ་གལ་ཆེ་བྱས་པས་བརྩེན་མིན་པར་གྲགས་སོ། །བཙན་པོས་ལྟ་སྤྱོད་འཛོམ་པའི་ཆོས་བརྩེན་མིན་པའི་ལྟར་བྱ་རྒྱུ་ཡིན་གསུངས་པས་སྟོན་མིན་པ་རྣམས་ཡི་ཆད་དེ། ཧྭ་ཤང་གིས་རང་གི་མགོ་ལ་མེ་སྦར་བས་རྒྱ་མེ་མགོ་བར་གྲགས་སོ། །དེ་ནས་རྒྱལ་པོ་ཐུགས་མ་བདེ་ནས། སྦ་ཡེ་ཤེས་དབང་པོ་སྤྱན་འདྲེན་པ་བཏང་བས་ཁུགས་ཏེ། བཙན་པོའི་སྤྱན་སྔར་མཇལ་ཞིང་གླེང་བས། མཁན་པོའི་ཞལ་ཆེམས་དཀོར་མཛོད་དུ་ཟངས་མའི་གླེགས་བུ་ལ་བྲིས་པ་བཏོན་ནས་ཕུལ་པས། ཀཱ་མ་ལ་ཤཱི་ལ་སྤྱན་འདྲེན་པ་བཏང་སྟེ། བསམ་ཡས་སུ་ཕེབས་ནས་བྱང་ཆུབ་གླིང་དུ་ཁྲི་བཤམས་ཏེ། བཙན་པོ་གུང་ལ་བཞུགས། ཧྭ་ཤང་གཡས་སུ་འཁོད། འཁོར་བནྡྷེ་ལན་ཀ་དང་། ཇོ་མོ་བྱང་ཆུབ་ལ་སོགས་པ་གྲལ་རིང་པོ་བྱུང་ངོ་། །སློབ་དཔོན་ཀཱ་མ་ལ་ཤཱི་ལ་གཡོན་དུ་འཁོད། འཁོར་བཻ་རོ་ཙ་ན་ལ་སོགས་པ་ཉུང་ཤས་ཤིག་བྱུང་། ལྷ་བཙན་པོས་མེ་ཏོག་དཀར་པོའི་ཕྲེང་བ་རེ་གཏད་ནས། གང་རྩོད་པ་རྒྱལ་བ་ལ་ཕམ་པ་དེས་མེ་ཏོག་ཕུལ་ཅིག ངའི་མངའ་རིས་བོད་ཡུལ་འདིར་ནག་པོ་ལ་དགའ་བའི་དུས་སུ་ཟ་ཧོར་རྒྱལ་པོའི་སྲས་བོ་དྷི་ས་ཏྭ་སྤྱན་དྲངས་ནས། བོད་ཉུང་ཤས་ཤིག་དམ་པའི་ཆོས་ལ་བཀོད། དད་པ་ཅན་རབ་ཏུ་བྱུང་ཞིང་། དཀོན་མཆོག་གསུམ་གྱི་རྟེན་རྣམས་བཙུགས་ནས་མཆོད་པ་བྱེད་པའི་དུས་སུ། རྒྱ་ནག་ཧྭ་ཤང་མ་ཧཱ་ཡ་ན་བྱུང་སྟེ། བོད་ཀྱི་བཙུན་པ་ཕལ་ཆེར་ཀྱང་དེའི་སློབ་མར་གྱུར་ཏེ། བོ་དྷི་ས་ཏྭའི་སློབ་མ་ཉུང་ཤས་ཤིག་གིས། སློབ་ཏུ་མ་བཏུབ་པས་སྟོན་བརྩེན་གཉིས་སུ་ཆད་དེ་རྩོད་པར་གྱུར་ཏོ། །ཀཱ་མ་ལ་ཤཱི་ལ་བོ་དྷི་ས་ཏྭའི་ཆོས་ལུགས་སྐྱོང་བའི་སློབ་མ་ཡིན་པས། ཁྱེད་གཉིས་ང་རྒྱལ་མི་བྱ་བར་ཆོས་ལུགས་སུ་བཟང་བ་ལ་ངན་པ་དེས་གུས་པར་གྱིས་ཤིག ཅེས་བཀའ་སྩལ་པ་དང་། ཧྭ་ཤང་ན་རེ། གཞི་ལ་ཡོད་པ་སྔ་བ་ཡིན་པས། དྲིའམ་ལན་གདབ་ཅེས་ཟེར་རོ། །སློབ་དཔོན་ཀཱ་མ་ལས། ཁྱེད་ཀྱི་དགོངས་པ་ལྟར་དུ་ཤགས་གསུངས་ཤིག ཅེས་བྱས་པས་ཧྭ་ཤང་ན་རེ། ལས་དགེ་མི་དགེའི་དབང་གིས་མཐོ་རིས་དང་ངན་སོང་གི་འབྲས་བུ་མྱོང་ཞིང་འཁོར་བར་འཁོར་བ་ཐམས་ཅད། སེམས་ཀྱི་རྣམ་པར་རྟོག་པས་བསྐྱེད་པ་ཡིན། གང་ཅི་ཡང་མི་སེམས་ཤིང་། ཅི་ཡང་མི་བྱེད་པ་དེ་འཁོར་བ་ལས་ཐར་བར་འགྱུར་རོ། །དེ་ལྟ་བས་ན་ཅི་ཡང་བསམ་པར་མི་བྱའོ། །སྦྱིན་པ་ལ་སོགས་དཀར་པོའི་ཆོས་སྤྱོད་པ་ནི། སྐྱེ་བོ་བློ་ཞན་པ་དཀར་པོའི་ལས་འཕྲོ་མེད་པའི་དབང་པོ་རྟུལ་པོ་རྣམས་ལ་བསྟན་པ་ཡིན་ཏེ། སྔོན་བློ་སྦྱངས་པའི་དབང་པོ་རྣོན་པོ་རྣམས་སྤྲིན་དཀར་ནག་གང་གིས་ཀྱང་ཉི་མ་བསྒྲིབས་པ་ལྟར་ལས་དགེ་སྡིག་གཉིས་ཀས་བསྒྲིབས་པས་ཅི་ཡང་མི་སེམས། ཅི་ཡང་མི་རྟོག གང་ཡང་མི་སྤྱོད་པ་དེ་ནི་མ་དམིགས་པ་ཞེས་བྱ། དེ་ནི་ཅིག་ཅར་འཇུག་པའི་ལམ་ས་བཅུ་པ་དང་འདྲའོ། །དེས་ན་ཁྱེད་ཀྱི་ཆོས་ལུགས་ནི་སྤྲེའུ་ཤིང་རྩེར་འཛེགས་པ་དང་འདྲ་བས་རིམ་གྱིས་པ་ཞེས་བྱ། ངེད་ཀྱི་ཆོས་ལུགས་འདི་ཁྱུང་ནམ་མཁའ་ནས་ཤིང་རྩེར་བབས་པ་དང་འདྲ་བས། ཡས་འབབ་དང་ཅིག་ཅར་ཞེས་བྱའོ། །ཞེས་ཟེར་རོ། །དེ་ལ་སློབ་དཔོན་གྱིས་དཔེ་དོན་ལ་དགག་པ་མཛད་དེ། དང་པོ་དཔེ་དགག་པ་ལ་ཁྱོད་ཀྱི་དཔེ་མི་འཐད་དེ། ཁྱུང་ནམ་མཁའ་ལས་གློ་བུར་དུ་འདབ་གཤོག་རྫོགས་པར་སྐྱེས་ནས་ཤིང་རྩེར་འབབ་བམ། འོན་ཏེ་བྲག་ལ་ཚང་བཅས་ནས་རིམ་གྱིས་འདབ་གཤོག་རྒྱས་ཏེ་ཤིང་རྩེར་འབབ། དང་པོ་མི་སྲིད་ལ། ཕྱི་མ་ལྟར་ན་རིམ་གྱིས་པའི་དཔེར་འགྱུར་གྱི། ཅིག་ཅར་བའི་དཔེར་མི་རུང་ངོ་། །དེར་མཁན་པོས་དཔེ་ལ་ལན་མ་ཐེབས་པ་དང་དོན་བཀག་སྟེ། ཁྱོད་ཀྱི་དཔེ་ནོར་བར་མ་ཟད་དོན་ཡང་འཁྲུལ་ཏེ། རྣམ་པར་མི་རྟོག་པ་བསྒོམ་པ་དེ་ནི་རྣམ་རྟོག་ཕྱོགས་གཅིག་བཀག་པ་ཙམ་ཡིན་ནམ། མཐའ་དག་བཀག་པ་ཡིན། དང་པོ་ལྟར་ན། གཉིད་དང་བརྒྱལ་བ་ལ་སོགས་པའང་མི་རྟོག་པ་བསྒོམ་པ་ཡིན་པར་ཐལ། རྟོག་པ་ཕྱོགས་གཅིག་བཀག་པ་ཙམ་ཡིན་པའི་ཕྱིར། རྣམ་རྟོག་མཐའ་དག་དགག་དགོས་ན། ཁྱོད་མི་རྟོག་པ་བསྒོམ་པའི་ཚེ་མི་རྟོག་པ་བསྒོམ་སྙམ་པའི་བློ་སྔོན་དུ་བཏང་དགོས་སམ་མི་དགོས། དགོས་ན་དེ་ཉིད་རྟོག་པ་ཡིན་པས་མི་རྟོག་པ་བསྒོམ་པའི་དམ་བཅའ་ཉམས་སོ། །མི་དགོས་ན་ཁམས་གསུམ་གྱི་སེམས་ཅན་ཐམས་ཅད་ལ་བསྒོམ་སྐྱེ་བར་ཐལ། བསྒོམ་སྙམ་པའི་རྟོག་པ་སྔོན་དུ་མ་བཏང་ཡང་སྐྱེ་བའི་ཕྱིར་རོ། །ཞེས་བྱ་བ་ལ་སོགས་པ་ལུང་དང་རིགས་པས་སུན་ཕྱུང་བས། རྒྱ་ནག་མཁན་པོ་སྤོབས་པ་མེད་པར་གྱུར་ཏོ། །རྒྱལ་པོས་སྨྲས་པ་ལན་ཡོད་ན་ད་ལྟ་གསུངས་ཤིག མཁན་པོས་སྨྲས་པ་མགོར་ཐོག་རྒྱབ་པ་ལྟར་ལན་མི་ཤེས་སོ། །དེ་ནས་རྒྱལ་པོས་དེ་ལྟར་ན་སློབ་དཔོན་ལ་མེ་ཏོག་ཕུལ། བཟོད་པར་གསོལ་ལ་ལུང་རིགས་དང་མི་འགལ་བར་རྒྱ་གར་གྱི་ཆོས་ལུགས་བཞིན་གྱིས་ཤིག རྒྱ་ནག་མཁན་པོའི་ལུགས་བྱེད་ན་ཆད་པས་གཅད་དོ། །ཞེས་བཀའ་ནན་དྲག་ཏུ་མཛད་ནས་བཀའ་ཡིག་གསུམ་མཛད་ཅིང་། མདོ་ཁམས་དང་། བོད་དང་། དཀོར་མཛོད་དུ་བཞག་གོ །རྒྱ་ནག་ཧྭ་ཤང་གིས་ཐོག་མར་པཎྜི་ཏ་སྤྱན་འདྲེན་བཏང་བ་ཐོས་ནས། སློབ་མ་བསྡུས་ཏེ། ཤགས་འདེབས་པ་བསླབ་པའི་ཚེ། ཅི་ཡང་ཡིད་ལ་མི་སེམས་པར་ཉལ་བས་ཆོག་གོ །ཞེས་པའི་བསྒོམ་ཡིག་བསམ་གཏན་ཉལ་ཆོག་གི་འཁོར་ལོ། དེའི་གནད་སྟོན་པ་ལ་བསམ་གཏན་གྱི་ལོན། གེགས་སེལ་བ་ལ་བསམ་གཏན་གྱི་ཡང་ལོན། རིགས་པས་བསྒྲུབ་པ་ལ་ལྟ་བའི་རྒྱབ་ཤ ལུང་གིས་སྒྲུབ་པ་ལ་མདོ་སྡེ་བརྒྱད་བཅུའི་ཁུངས་ཞེས་བྱ་བའི་གཞུང་ལྔ་བརྩམས་སོ། །དེ་རྣམས་གཏེར་དུ་སྦས་པ་རིམ་གྱིས་མཆོད་པར་གྱུར་ཏེ། བོད་ཀྱི་མན་ངག་ཆོས་རྒྱུས་ཆུང་བས་རང་བཟོར་བྱས་པ་རྣམས་ལ་འདྲེས་པ་ཡིན་ནོ། །རྒྱ་ནག་མཁན་པོའི་ལྷྭམ་རྩོད་པའི་གྲྭར་ལུས་པས་བོད་ཀྱི་བསྟན་པའི་མཇུག་ཏུ་ངའི་ཆོས་ལུགས་འབྱུང་ངོ་ཞེས་པ་དང་། རྒྱ་ནག་ཏུ་འགྲོ་བའི་ཚེ་ལྷྭམ་ལུས་པ་དང་། ད་རུང་བོད་ཡུལ་དུ་ངའི་ཆོས་ལུགས་འབྱུང་ཞེས་ཟེར་རོ། །ལྷ་བཙན་པོས་སློབ་དཔོན་ལ་ཐོས་བསམ་གྱིས་གཏན་ལ་ཕབ་པའི་ཆོས་དེའི་གནས་ལུགས་ཇི་ལྟར་ཡིན་པའི་བསྟན་བཅོས་མཛད་པར་ཞུས་པས། བསྒོམ་རིམ་དང་པོ་བརྩམས། སྟན་ཐོག་གཅིག་ཏུ་བསྒོམ་ཚུལ་ཞུས་པས། བསྒོམ་རིམ་བར་པ་མཛད། དེ་ལས་འབྲས་བུ་གང་འབྱུང་ཞུས་པས། བསྒོམ་རིམ་ཐ་མ་བརྩམས། དེ་ལ་རྒོལ་བ་བཟློག་པའི་ཕྱིར། ལུང་དང་རིགས་པས་སྒྲུབ་པའི་དབུ་མ་སྣང་བ་བརྩམས་ཏེ་གནང་ངོ་། །དེ་ལྟར་རྒྱ་གར་གྱི་ལུགས་ཀྱི་རིམ་གྱིས་པའི་ཆོས་ལུགས་དར་བའི་ཚེ། རྒྱལ་པོ་གླང་དར་མ་བློན་པོ་ངན་པ་དང་གྲོས་ངན་བཤམས་ཏེ། མངའ་བདག་རལ་པ་ཅན་བཀྲོངས་ནས་བོད་ཡུལ་གྱི་ཆོས་ཁྲིམས་དང་། རྒྱལ་ཁྲིམས་གཉིས་ཀ་བཤིག གླང་དར་མའང་ལྷ་ལུང་དཔལ་གྱི་རྡོ་རྗེས་བསད། དེ་རྗེས་སུ་ཡུམ་བརྟན་དང་། འོད་སྲུང་འཁྲུགས་ནས་བོད་ཡུལ་ཕུང་བར་གྱུར་པའི་ཚེ་ཧྭ་ཤང་གི་ཆོས་ལུགས་ཡི་གེར་བཀོད་པ་གཏེར་ནས་འཐོན་པ་ལ་བརྟེན་ནས། བླུན་པོ་ཆོས་དད་ཅན་གདམས་ངག་འབོགས་པ་ལ་སྤྲོ་བས་ཡས་འབབ་དང་ཅིག་ཅར་བའི་མིང་འདོགས་གསང་ནས། ཕྱག་རྒྱ་ཆེན་པོར་མིང་བཏགས་ཏེ་བཤད་དོ། །དེ་ལ་ཡང་ཆོས་ཐམས་ཅད་སེམས་སུ་ངོ་སྤྲོད། སེམས་ནམ་མཁར་ངོ་སྤྲོད། ནམ་མཁའ་ཅི་ཡང་མེད་པའི་སྟོང་ཉིད་དུ་ངོ་སྤྲོད་པའི་ཕྱག་རྒྱ་ཆེན་པོ་ངོ་སྤྲོད་གསུམ་པར་གྲགས་པ་དང་། ཡང་སེམས་བདེ་བ་དང་། གསལ་བ་དང་། མི་རྟོག་པར་ཞེན་པའི་གོལ་ས་གསུམ་བཅད་དེ། གཤིས་ལ་ཤོར་བ་དང་། སྒོམ་དུ་ཤོར་བ་དང་། ལམ་དུ་ཤོར་བ་དང་། རྒྱས་འདེབས་སུ་ཤོར་བ་སྟེ། ཤོར་ས་བཞི་སྤངས་ནས། སོ་མ། མ་བཅོས་པ། ལྷུག་པ། འབོལ་ལེ། ཤིག་གེར་འཇོག་པ་ཉམས་སུ་ལེན་པ་སྟེ། འཇུར་པོས་བཅིངས་པའི་སེམས་ཉིད་འདི། །གློད་ན་གྲོལ་བར་ཐེ་ཚོམ་མེད། །བྲམ་ཟེ་སྐུད་པ་འཁལ་བ་ལྟར། །སོ་མ་མ་བཅོས་ལྷུག་བར་ཞོག །ཅེས་བྲམ་ཟེ་ཆེན་པོས་གསུངས་སོ། །ཞེས་ཟེར་བའི་དེང་སང་གི་ཕྱག་རྒྱ་ཆེན་པོ་ཐམས་ཅད་ཀྱང་། རྒྱ་ནག་གི་ལུགས་ཀྱི་རྫོགས་ཆེན་ལས་མ་འདས་སོ། །གཞུང་དེའི་ཚིག་རྐང་དང་པོ་གཉིས་བྲམ་ཟེའི་གསུང་ཡིན་ཀྱང་། ཕྱི་མ་གཉིས་ནི་བརྫུས་མ་ཁོ་ནའོ། །འདི་ལ་ཕྱོགས་བཅུའི་སངས་རྒྱས་ཀྱི་ཕྲིན་ཡིག་ལས། ཁ་ཅིག་དཀར་པོ་ཆིག་ཐུབ་ལ། །ཕྱག་རྒྱ་ཆེན་པོ་ངོ་སྤྲོད་བྱེད། །ཤོར་ས་བཞི་དང་གོལ་ས་གསུམ། །སྤོངས་ལ་གཉུག་མར་བསྒོམ་པར་བྱ། །བྲམ་ཟེ་སྐུད་པ་འཁལ་བ་ལྟར། །སོ་མ་མ་བཅོས་ལྷུག་པར་བཞག །འདི་ལ་ཕྱག་རྒྱ་ཆེན་པོ་ཟེར། །འདི་དོན་བརྟགས་ན་འདི་ལྟར་མཐོང་། །སོ་མར་བཞག་ན་བལ་ཉིད་ཡིན། །སྐུད་པར་བྱས་ན་བཅོས་པར་གྱུར། །དེ་ཕྱིར་འདི་ལ་དཔེ་སྐྱོན་ཡོད། །དོན་གྱི་སྐྱོན་ཡང་འདི་ལྟར་མཐོང་། །གོལ་ས་གསུམ་པོ་གཅད་ཙམ་གྱིས། །ཕྱག་རྒྱ་ཆེན་པོར་འགྱུར་ན་ནི། །ཉན་ཐོས་འགོག་པའང་དེར་འགྱུར་རོ། །ཤོར་ས་བཞི་པོ་སྤང་སྙམ་པའི། །རྣམ་རྟོག་ཕྱག་རྒྱ་ཆེན་པོ་མིན། །རྟོག་པ་མེད་ན་སྤོང་མི་ནུས། །རྟོག་པ་མེད་ཀྱང་སྤོང་ནུས་ན། །སེམས་ཅན་ཀུན་ལ་འབད་མེད་པར། །ཕྱག་རྒྱ་ཆེན་པོ་ཅིས་མི་སྐྱེ། །དེས་ན་ཕྱག་རྒྱ་ཆེན་པོ་ཉིད། །ཡིན་ན་ཤོར་ས་གོལ་ས་མེད། །ཡོད་ན་ཕྱག་རྒྱ་ཆེན་པོ་མིན། །ཞེས་སོགས་ཀྱི་སྒོ་ནས་རྒྱས་པར་བཀག་གོ །བཞི་པ་ལ་བཞི་སྟེ། ནཱ་རོ་དང་མཻ་ཏྲི་བའི་ལུགས་དང་མཐུན་པ། འཕགས་པ་ཀླུ་སྒྲུབ་ཀྱི་ལུགས་དང་མཐུན་པ། རྒྱུད་དང་བསྟན་བཅོས་གཞན་དང་མཐུན་པ། དེ་ལྟ་བུའི་ཕྱག་ཆེན་རྟོགས་པའི་ཕན་ཡོན་ནོ། །དང་པོ་ནི། ནཱ་རོ་དང་ནི་ཞེས་སོགས་དྲུག་སྟེ། གྲུབ་ཆེན་དེ་གཉིས་ཀྱིས་བཞེད་པའི་ཕྱག་རྒྱ་ཆེན་པོ་ནི། སམྦུ་ཊི་ལས། ཨེ་ཝཾ་མ་ཡ་བཞི་དང་། འཁོར་ལོ་བཞི་ལ་སོགས་པ་བཞི་ཚན་གྱི་ཆོས་བཅུ་ལ་ཕྱག་རྒྱ་བཞི་སྦྱོར་བའི་ཚུལ་དེ་ཉིད་ཡིན་ནོ། །དེ་ཡང་ཏི་ལོ་པས་ནཱ་རོ་པ་ལ་གནང་བའི་ཕྱག་རྒྱ་ཆེན་པོ་གཾ་ག་མ་ལས། སྔགས་སུ་སྨྲ་དང་ཕ་རོལ་ཕྱིན་པར་སྨྲ། །འདུལ་བའི་སྡེ་སྣོད་ལ་སོགས་ཆོས་རྣམས་དང་། །རང་རང་གཞུང་དང་གྲུབ་པའི་མཐའ་ཡིས་ཀྱང་། །འོད་གསལ་ཕྱག་རྒྱ་ཆེན་པོ་མཐོང་མི་འགྱུར། །ཡིད་ལ་མི་བྱེད་ཞེ་འདོད་ཀུན་དང་བྲལ། །ཞེས་དང་། མཻ་ཏྲི་པའི་ཕྱག་རྒྱ་ཆེན་པོ་ཚིག་ཏུ་བསྡུས་པ་ལས། སྣང་བ་རང་གྲོལ་ཆོས་ཀྱི་དབྱིངས། །རྟོག་པ་རང་གྲོལ་ཡེ་ཤེས་ཆེ། །གཉིས་མེད་མཉམ་པ་ཆོས་ཀྱི་སྐུ། །ཆུ་བོ་ཆེན་པོའི་རྒྱུན་ལྟར་འབབ། །ཅེས་པ་དང་། དེ་ཉིད་ཉི་ཤུ་པ་ལས། ལས་དང་དམ་ཚིག་ཕྱག་རྒྱ་གཉིས། །འཁོར་ལོ་རྫོགས་པར་བསྒོམ་པ་ཉིད། །ཐ་མའི་བྱང་ཆུབ་བསྒོམ་པ་ནི། །དག་པའི་དེ་ཉིད་ཕྱིར་ཕྱོགས་པའོ། །ཡེ་ཤེས་ཕྱག་རྒྱ་མཉམ་སྦྱོར་བས། །འཇམ་པའི་རྡོ་རྗེ་ལ་སོགས་གཙོ། །བདེན་མིན་བརྫུན་མིན་རྣམ་པར་ནི། །བདག་ཉིད་བསྒོམ་པ་འབྲིང་པོའོ། །ཞེས་པ་དང་། ཐེག་ཆེན་ཉི་ཤུ་པ་ལས། ཟུང་འཇུག་གོ་འཕང་སྐྱོང་བ་པོའི། །རྣམ་པ་ཀུན་གྱི་མཆོག་ལྡན་པ། །མཚན་ཉིད་མེད་ཉིད་འདུས་མ་བྱས། །གཉུག་མའི་ཚུལ་ལ་བདག་ཕྱག་འཚལ། །ཞེས་གསུངས་སོ། །ནཱ་རོ་པའི་ལུགས་ཀྱི་ཕྱག་ཆེན་ནི། ཆོས་དྲུག་རྡོ་རྗེའི་ཚིག་རྐང་ལས། ཕྱག་ནི་གཉིས་མེད་ཡེ་ཤེས་དེ་ཡིས་བཟུང་། །རྒྱ་ནི་འཁོར་བའི་མདུད་པ་དྲལ་བ་སྟེ། །ཆེན་པོ་ཟུང་འཇུག་སྒྲོན་མ་བལྟམས་པ་ལགས། །གཞན་གྱིས་མ་རྟོགས་རང་གྲོལ་ཆོས་སྐུའོ། །ཞེས་པའི་ལུང་དྲངས་ནས་འཆད་པ་ནི། རྒྱ་གར་གྱི་ཕྱག་རྒྱ་ཆེན་པོའི་སྐད་དོད་ལ། ཕྱག་གི་སྐད་དོད་མེད་ཅིང་འོག་ཏུ་ཕྱག་རྒྱ་ཆེན་པོའི་བཤད་པ་ལ། ལག་པའི་སྒྲ་དོན་འཆད་པ་དང་། །ཞེས་འཁྲུལ་པར་བཤད་པ་དང་འགལ་བས་ཐེ་ཚོམ་གྱི་གཞིའོ། །དེས་ན་འདིའི་ལུགས་ཀྱི་ཕྱག་རྒྱ་བཞི་ནི། འཁོར་ལོ་བདེ་མཆོག་གི་རྫོགས་རིམ་ཕྱག་རྒྱ་བཞི་ལ་སྦྱོར་བའི་ཚུལ་ཡོད་པ་ལ་དགོངས་ཏེ་འདིར་མ་སྤྲོས་སོ། །གཉིས་པ་ནི། འཕགས་པ་ཀླུ་སྒྲུབ་ཞེས་སོགས་དྲུག་སྟེ། ཕྱག་རྒྱ་བཞི་པར། ལས་ཀྱི་ཕྱག་རྒྱ་ལ་བརྟེན་ནས་རྒྱུ་མཐུན་པའི་འབྲས་བུ་སྐྱེ་བར་བྱེད་དོ། །འདྲ་བར་འབྱུང་བས་རྒྱུ་མཐུན་པའོ། །ཇི་ལྟར་མེ་ལོང་ལ་བརྟེན་ནས་བཞིན་གྱི་གཟུགས་བརྙན་འབྱུང་བ་དེ་བཞིན་དུ་མི་འབྱུང་བར་མི་འགྱུར་རོ། །སྔོན་དུ་ཡང་མ་གྲུབ་པ་ལ་ད་ལྟར་ཡང་མ་གྲུབ་པའི་ཕྱིར། དེ་ལྟར་བཞིན་གྱི་གཟུགས་བརྙན་ནི་འདྲ་བ་ཙམ་དུ་རྟོགས་པར་ཟད་དོ། །དེ་ལྟར་ན་འཇིག་རྟེན་པ་རྣམས་རང་གིས་རང་གི་བཞིན་མཐོང་ངོ་། །ཞེས་འཁྲུལ་པས་དགའ་བར་འགྱུར་རོ། །དེ་བཞིན་དུ་སློབ་དཔོན་དམན་པས་སློབ་མ་དམན་པ་རྣམས་ཤེས་རབ་ཡེ་ཤེས་བསྒྲུབས་ནས་དེ་ཁོ་ན་ཉམས་སུ་མྱོང་ངོ་། །ཞེས་དགའ་བ་སྐྱེ་བར་འགྱུར་ཏེ། །དེ་ལ་དགའ་ཞིང་མགུ་བས་ཆོས་ཀྱི་ཕྱག་རྒྱའི་གཏམ་ཡང་མི་ཤེས་སོ། །ཞེས་བཤད་དོ། །གསུམ་པ་ནི། རྒྱུད་ཀྱི་རྒྱལ་པོ་ཞེས་སོགས་ཚིགས་བཅད་གཅིག་སྟེ། བརྟག་གཉིས་སོགས་རྒྱུད་ཀྱི་རྒྱལ་པོ་དང་། གྲུབ་པ་སྡེ་བདུན་དང་། སྙིང་པོ་སྐོར་དྲུག་སོགས་བསྟན་བཅོས་ཆེན་པོ་གཞན་ལས་ཀྱང་། བླ་མེད་ཀྱི་དབང་བསྐུར་བ་བཞི་པོ་དག་དང་མ་འབྲེལ་བ་དེ་ལ་ཕྱག་རྒྱ་ཆེན་པོ་བཀག་སྟེ། བརྟག་གཉིས་ལས། དེ་ནས་རྣལ་འབྱོར་མས་ཞུས་པ། །ཕྱག་རྒྱ་ཆེན་པོ་ཇི་ལྟ་བུ། །ཀུན་རྫོབ་རྣམ་པའི་གཟུགས་ཀྱིས་ནི། །བདེ་བ་སྦྱིན་པས་བཤད་དུ་གསོལ། །ཞེས་པའི་ལན་དུ། གཞན་གྱི་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟན་པ་དང་། །བདག་གི་བསོད་ནམས་ལས་ཤེས་བྱ། །ཞེས་པ་དང་། སམྦུ་ཊི་ལས། ནང་གི་དབྱེ་བ་འདི་ཉིད་ནི། །བླ་མའི་ཞལ་ལས་རྙེད་པར་འགྱུར། །ཞེས་པ་དང་། གསང་བ་མཛོད་ཀྱི་མདོ་ལས་ཀྱང་། རྡོ་རྗེ་སེམས་དཔའ་ཉོན་ཅིག་དང་། གསང་སྔགས་ཀྱི་ཐེག་པ་མཆོག་གི་དབང་བསྐུར་བ་གསང་བ་ཆེན་པོ་འདིས་སངས་རྒྱས་ཐོབ་པར་ནུས་ཀྱི། ཐེག་པ་གཞན་གྱིས་ནི་བསྐལ་པ་བྱེ་བས་ཀྱང་སངས་རྒྱས་འཐོབ་པར་མི་འགྱུར་རོ། །ཞེས་པ་དང་། ཡེ་ཤེས་གྲུབ་པ་ལས། རྟོག་པ་ཐམས་ཅད་རྣམ་སྤངས་པའི། །ཡེ་ཤེས་མཆོག་བཟང་ཐོབ་པ་ཡིས། །རྡོ་རྗེ་ཡེ་ཤེས་དབང་བསྐུར་བས། །དངོས་གྲུབ་མཆོག་ནི་བསྒྲུབ་པར་བྱ། །ཞེས་པ་དང་། སློབ་དཔོན་ཨཱརྻ་དེ་ཝས། དེ་ནི་དཔེ་ཡིས་ཉེར་མཚོན་ནས། །བླ་མའི་ཞལ་གྱིས་དྲིན་གྱིས་སོ། །ཞེས་པ་དང་། ཐབས་དང་ཤེས་རབ་རྣམ་པར་གཏན་ལ་དབབ་པ་གྲུབ་པ་ལས། བདེར་གཤེགས་གནས་ཀྱི་དཀྱིལ་འཁོར་དུ། །རྒྱུད་ཀྱི་ལམ་གྱི་རྗེས་འབྲངས་ནས། །མཁས་པ་གང་ཚེ་དབང་བསྐུར་ན། །སངས་རྒྱས་ཐམས་ཅད་མངོན་སུམ་ཡིན། །དཔག་མེད་འཇིག་རྟེན་ཁམས་དབང་ཕྱུག །བདག་བྱིན་བརླབ་པའི་རིམ་ཐོབ་པ། །ཞེས་གསུངས་སོ། །ཁ་ཅིག་འདིར། ཕྱག་ཆེན་མཆོག་གི་དངོས་གྲུབ་ཐོབ་པ་ནི། ཕར་ཕྱིན་ཐེག་པ་བ་ལྟར་ན། མཐོང་སྤང་གི་སྒྲིབ་པ་སྤངས་པ་དང་། གསང་སྔགས་པ་ལྟར་ན་རྩ་དབུ་མའི་མདུད་པ་གྲོལ་བ་ལ་ཟེར་ཞེས་སྨྲ་བ་ནི་བབ་ཆོལ་ཏེ། གོང་དུ་དྲངས་པའི་ལུང་རྣམས་དང་། འདིར་དབང་བསྐུར་དག་དང་མ་འབྲེལ་བ། །དེ་ལ་ཕྱག་རྒྱ་ཆེན་པོ་བཀག །ཞེས་ཕར་ཕྱིན་ཐེག་པ་ལ་ཕྱག་རྒྱ་ཆེན་པོ་མེད་པར་བཤད་པ་དང་དངོས་སུ་འགལ་བའི་ཕྱིར་རོ། །བཞི་པ་ནི་དབང་བསྐུར་བ་ལ་ཞེས་སོགས་ཚིགས་བཅད་གཅིག་སྟེ། དབང་དང་རིམ་གཉིས་ལས་བྱུང་བའི་མཚོན་བྱ་དོན་གྱི་ཡེ་ཤེས་མཐོང་ལམ་གྱི་ཕྱག་རྒྱ་ཆེན་པོ་མངོན་སུམ་དུ་རྟོག་ན་ད་གཟོད་སོགས་ཏེ། དེའི་ཚེ་འཁོར་ལོ་བསྐོར་བ་འཇིག་རྟེན་ལས་འདས་པའི་ལམ་ཐོབ་པའི་ཕྱིར་རོ། །གཉིས་པ་མོས་གུས་ཀྱིས་སེམས་བསྒྱུར་བའི་ཞི་གནས་ལྟར་སྣང་ལ་ཕྱག་ཆེན་དུ་འདོད་པ་དགག་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། །དེང་སང་འགའ་ཞིག་ཞེས་སོགས་ཚིགས་བཅད་གཅིག་གོ །གཉིས་པ་ནི། དེ་འདྲ་བདུད་ཀྱི་ཞེས་སོགས་ཚིགས་བཅད་གསུམ་སྟེ། བླ་མའི་མོས་གུས་ཀྱིས་སེམས་བསྒྱུར་ནས་རྟོག་པ་ཅུང་ཟད་འགགས་པ་ལ་ཕྱག་རྒྱ་ཆེན་པོའི་ངོ་སྤྲོད་བྱེད་པ་མི་འཐད་དེ། དེ་འདྲ་བདུད་ཀྱི་བྱིན་བརླབས་ཡིན་པ་ཡང་སྲིད་ཅིང་ཡང་ན་རྣལ་འབྱོར་པ་ཁམས་འདུས་པ་འགའ་ལ་ཡང་འབྱུང་བའི་ཕྱིར་རོ། །དཔེར་ན་ཀ་རུ་འཛིན་སོགས་ཏེ། རྟོགས་ལྡན་གྱི་ཡུལ་དཔལ་མོ་དཔལ་ཐང་གི་ལྷ་མཚོ་ཁར་ཀ་རུ་འཛིན་ཞེས་བྱ་བ་དེས་གྲུབ་ཐོབ་ཏུ་ཁས་བླངས་ཏེ། ཁ་སྐོར་དུ་པགས་པ་ནག་པོས་སྨ་ར་བྱས། ཉིན་མོ་མཚམས་གཅད་མཚན་མོ་ལོ་ཙཱ་བཅུག་ནས་ཆོས་ལྟར་བཅོས་པ་འགའ་རེ་སྟོན། གཞན་ཡང་གཡོ་རྒྱུའི་སྤྱོད་པ་སྣ་ཚོགས་བསྟན་པས་འཁོར་མང་པོ་འདུས་ཤིང་། དེའི་དགོན་པ་མཐོང་བ་ཙམ་གྱིས་འགའ་ལ་ཏིང་ངེ་འཛིན་སྐྱེས་ཞེས་ཟེར། ཕྱིས་ནས་ཐེ་ཚོམ་དུ་གྱུར་ཏེ། རྟོགས་ལྡན་གྱིས་མི་མང་པོའི་དཀྱིལ་དུ་དེའི་སྨ་ར་བཤུས། སྨ་ཕབ་པས་གྲུབ་ཐོབ་ཞིག་ཅིང་། དེ་ནས་ཏིང་ངེ་འཛིན་གྱི་རྒྱུན་ཆད་པར་གྱུར་རོ། །ཞེས་འདུལ་བ་སེང་གེའི་ཕྱོགས་སྔ་མདོར་བསྡུས་ལས་བཤད་ལ། ཁ་ཅིག་སྔར་གྱི་མི་དེས་ཞྭ་དཀར་པོ་རྙེད་པ་གོན་པས་དེ་ལྟར་གྱུར་ཅིང་། ཕྱིས་ནས་ཞྭ་དཀར་པོ་ཕུད་པས་གྲུབ་ཐོབ་ཞིག་ཅེས་འཆད་དོ། །མདོར་ན་སངས་རྒྱས་ཀྱི་གསུང་བཞིན་མ་བསྒྲུབས་པའི་གློ་བུར་གྱི་ཏིང་ངེ་འཛིན་བདུད་རིགས་ཀྱིས་བྱེད་པར་གསུངས་ལ། སངས་རྒྱས་ཀྱི་གསུང་བཞིན་བསྒྲུབ་པ་ལས་བྱུང་བའི་ཏིང་ངེ་འཛིན་སངས་རྒྱས་རྣམས་ཀྱི་བྱིན་བརླབས་ཡིན་པར་གསུངས་སོ། །གསུམ་པ་ཞར་ལ་ཕྱག་ཆེན་གྱི་རྒྱུ་ལ་ལོག་རྟོག་དགག་པ་ལ་གསུམ་སྟེ། ཁས་བླངས་བརྗོད། མགོ་མཚུངས་ཀྱིས་དགག སྨད་པའི་གནས་སུ་བསྟན་པའོ། །དང་པོ་ནི། ཁ་ཅིག་སྐྱེ་བ་ཞེས་སོགས་དྲུག་སྟེ། གོ་སླ་ཞིང་། དེང་སང་ཡང་འདི་བཞིན་དུ་སྨྲ་བ་མང་བར་སྣང་ངོ་། །གཉིས་པ་ནི། འོ་ན་སོ་སོར་ཞེས་སོགས་དགུ་སྟེ། སོ་ཐར་དང་བྱང་སེམས་ལ་ཡང་མཚུངས་བཞིན་དུ་དབང་བསྐུར་ཁོ་ན་ལ་འདི་བཞིན་དུ་སྨྲ་བ་ནི། ཐབས་ལ་བསླུ་བའི་བདུད་དུ་བསྟན་པའོ། །གསུམ་པ་ནི། སངས་རྒྱས་ཆོས་ལ་ཞེས་སོགས་དྲུག་སྟེ། དབང་བསྐུར་འགོག་པ་ནི་མདོ་རྒྱུད་ཀྱི་བཤད་ཉན་གྱི་དོན་འགོག་པ་ཡིན་པས་དེ་སྐད་དུ་གསུངས་པའོ། །གཉིས་པ་མཚོན་བྱ་དོན་གྱི་ཕྱག་ཆེན་ལ་འཁྲུལ་པ་དགག་པ་ལ་གསུམ་སྟེ། ཡོན་ཏན་མེད་པའི་མཐོང་ལམ་དགག དེ་ལ་ལུང་དང་འགལ་བ་སྤང་། དེས་ན་འཕགས་པའི་མཁྱེན་པར་གྲུབ་པའོ། །དང་པོ་ལ་གསུམ་སྟེ། ཕྱོགས་སྔ་མ་བརྗོད། དེ་དགག ཉེས་སྤོང་གི་ལན་དགག་པའོ། །དང་པོ་ནི། ལ་ལ་ཞི་གནས་ཞེས་སོགས་ཚིགས་བཅད་གཉིས་ཏེ། བོད་ལ་ལ་དབང་དང་། རིམ་གཉིས་ལས་བྱུང་བའམ། མ་བྱུང་བ་ཡིན་ཡང་རུང་། སེམས་གནས་པའི་ཞི་གནས་ཅུང་ཟད་ཙམ་དང་། སྣང་སྟོང་གི་རྟོག་པ་ཕྲ་མོ་ལ་མཐོང་ལམ་དུ་ངོ་སྤྲོད་བྱེད་ཅིང་། འོ་ན་ཡོན་ཏན་བརྒྱ་ཕྲག་བཅུ་གཉིས་འབྱུང་བར་འགྱུར་རོ་སྙམ་ན། ཁྱུང་གི་ཕྲུ་གུ་སྒོ་ངའི་རྒྱས་བཅིངས་ནས་འཕུར་མི་ནུས་པ་བཞིན་དུ་རྣམ་སྨིན་གྱི་ལུས་ཀྱི་རྒྱས་བཅིངས་པས་ན། ད་ལྟ་ཡོན་ཏན་བརྒྱ་ཕྲག་བཅུ་གཉིས་མི་འབྱུང་བས། རྣམ་སྨིན་གྱི་ལུས་རྒྱ་ཞིག་པའི་ཤི་མ་ཐག་ཡོན་ཏན་བརྒྱ་ཕྲག་བཅུ་གཉིས་འབྱུང་བ་ཡིན་ཞེས་ཟེར་རོ། །འདིའི་ཕྱོགས་སྔ་མ་ནི། རྗེ་བཙུན་གྱིས་མངོན་རྟོགས་ལྗོན་ཤིང་ལས། ཡེ་ཤེས་ལ་ལོག་རྟོག་དགག་པ་ལ། ལོག་པར་རྟོག་པ་དང་། དེ་དགག་པ་གཉིས་སུ་བྱས་ནས། དང་པོ་ལ་བྱང་ཆུབ་ཀྱི་སེམས་རྡོ་རྗེ་ནོར་བུའི་དཀྱིལ་དུ་གནས་པའི་ཚེ། ལྷན་སྐྱེས་སྐྱེ་བ་དང་། བྱང་ཆུབ་ཀྱི་སེམས་རྡོ་རྗེ་ནོར་བུ་དང་བྲལ་ནས་ཡུམ་གྱི་པདྨར་ལྷུང་བའི་ཚེ། ལྷན་སྐྱེས་སྐྱེ་བ་གནས་ལ་ལོག་པར་རྟོག་པ། དབང་གསུམ་པའི་ཡེ་ཤེས་མཐོང་ལམ་ཡིན་པར་འདོད་པ་ངོ་བོ་ལ་ལོག་པར་རྟོག་པ་དང་། ལྷན་སྐྱེས་དགའ་བ་གསུམ་པར་སྐྱེ་བ་གོ་རིམ་ལ་ལོག་པར་རྟོག་པ་གསུམ་དུ་མཛད་པའི་བར་པ་དེ་ཉིད་ཡིན་ཅིང་། དེ་ཡང་རིན་ཆེན་རྒྱན་འདྲ་ནས་འབྱུང་བའི་རྔོག་གཞུང་པའི་དགེ་བའི་བཤེས་གཉེན་རྣམས་ཀྱི་བཞེད་པའོ། །ཁ་ཅིག་འདི་མ་མཐོང་བར་ཕྱག་རྒྱ་བ་ལ་ལ་ཞེས་སྨྲ་བ་ནི་མཛོ་ཁལ་གླང་ལ་སྦྱོར་བའོ། །གཉིས་པ་ནི། ཐེག་པ་ཆེན་ཞེས་སོགས་ཚིགས་བཅད་གཅིག་སྟེ། ཚིག་རྐང་དང་པོ་གཉིས་ཀྱིས་ལུང་གི་ཤེས་བྱེད་མེད་པར་བསྟན་ཅིང་། ཕྱི་མ་གཉིས་ཀྱིས་དཔེའི་སྒོ་ནས་རིགས་པའི་གནོད་བྱེད་བསྟན་ནོ། །འདི་ལ་མངོན་རྟོགས་ལྗོན་ཤིང་ལས། མི་མཁས་པ་ཁ་ཅིག དབང་གསུམ་པའི་ཡེ་ཤེས་ཉིད་དོན་གྱི་ཡེ་ཤེས་ཡིན་ནོ། །ཞེས་འདོད་དོ། །དེ་ལ་འདི་སྐད་ཅེས་འདྲི་སྟེ། དོན་གྱི་ཡེ་ཤེས་ཞེས་བྱ་བ་དེ་རྣམ་པར་རྟོག་པ་ནུབ་ཅིང་བརྗོད་དུ་མེད་པ་ཅུང་ཟད་གསལ་བར་བྱས་པ་མཐོང་ལམ་གྱི་ཡེ་ཤེས་དང་འདྲ་བ་ཡིན་ནམ། མཐོང་བའི་ལམ་ཉིད་སྐད་ཅིག་ཙམ་སྐྱེས་པ་ཡིན། དང་པོ་ལྟར་ན་དོན་གྱི་ཡེ་ཤེས་སུ་འདོད་ཀྱང་དཔེ་རུ་ཐལ་ལོ། །གཉིས་པ་ལྟར་ན། མུ་སྟེགས་ཀྱི་ཡེ་ཤེས་དང་མཐུན་པར་འགྱུར་ཏེ། རིག་བྱེད་ཀྱི་མཐའ་གསང་བར་སྨྲ་བའི་གཞུང་ལས། ནུས་དང་ཕྲད་ཅིང་སྦྱོར་བ་ལས། །ནུས་པ་ཆགས་འགྱུར་མཐར་འགྱུར་བ། །ཚངས་པའི་དེ་ཉིད་བདེ་བ་གང་། །བདེ་དེས་མངོན་སུམ་གྲོལ་བར་འགྱུར། །སྦྱོར་བས་བདེ་བ་རྒྱུན་མི་ཆད། །སྡུག་བསྔལ་འབྱུང་བ་མེད་པ་ཡིས། །ཀུན་ཏུ་དགའ་བ་ཚངས་པའི་གཟུགས། །བདེ་བ་ཐར་པ་ཞེས་བརྗོད་དོ། །ཞེས་བཤད་པས་སོ། །རྩ་རྒྱུད་དང་པོའི་བརྒྱད་པ་ལས། ཀུན་མཁྱེན་ཡེ་ཤེས་དེ་ལྟ་བུ་ཞེས་དཔེར་བཤད་པ་དང་། བཅུ་པ་ལས། གང་ཕྱིར་འབྱུང་བ་ཆེ་བདེ་བ། །དེ་ཕྱིར་བདེ་བ་དེ་ཉིད་མིན། །ཞེས་འབྱུང་བ་ལ་རྟེན་ནས། དོན་གྱི་ཡེ་ཤེས་སྐྱེ་བར་མི་འགྱུར་རོ། །ཞེས་བཤད་པས་སོ། །རིགས་པས་ཀྱང་གནོད་དེ། དོན་གྱི་ཡེ་ཤེས་སྐྱེས་ནས་འགགས་པའི་ཕྱིར། མཐོང་ལམ་གྱི་ཡེ་ཤེས་དང་། སངས་རྒྱས་ཀྱི་ས་ཐོབ་ཀྱང་ཉམས་པར་འགྱུར་རོ། །དེ་འདོད་ན། འབད་པ་དོན་མེད་པར་ཐལ་ལོ། །ཡང་མཐོང་ལམ་ནི། མ་མཐོང་བ་མཐོང་བས་མཐོང་ལམ་ཞེས་བྱ་བ་ཡིན་པས། སྔར་དབང་གི་སྐབས་སུ་མཐོང་ཟིན་པའི་ཕྱིར་མཐོང་ལམ་ཡང་མཐོང་ལམ་མ་ཡིན་པར་འགྱུར་རོ། །ཡང་དེ་དག་གི་སྐྱོན་སྤོང་ཡང་། སྐད་ཅིག་ཙམ་མཐོང་ལམ་སྐྱེ་བ་ནི་གསང་སྔགས་ཀྱི་ལུགས་ཡིན་ནོ། །ཞེས་སྨྲ་ན་སྐད་ཅིག་ཙམ་མཐོང་བའི་ཚེ་ན། གླིང་བཞི་པ་བརྒྱ་བསྒུལ་བ་ལ་སོགས་པའི་རྫུ་འཕྲུལ་སྟོན་ཅིག དེ་ལྟར་མི་ནུས་ཀྱང་མཐོང་ལམ་དུ་འདོད་ན་སྨྱོན་པའི་ཚིག་བཞིན་བཞད་གད་ཀྱི་གནས་སོ། །ལོག་རྟོག་རྣམས་ལས་ནི་འདི་དམན་ནོ། །ཞེས་བཤད་དོ། །གསུམ་པ་ནི། ཁ་ཅིག་ཕ་རོལ་ཞེས་སོགས་ཚིགས་བཅད་ལྔ་སྟེ། དེའི་སྐྱོན་སྤོང་བར་འདོད་པ་ཁ་ཅིག་ཕ་རོལ་ཏུ་ཕྱིན་པའི་མཐོང་ལམ་ཡོན་ཏན་བརྒྱ་ཕྲག་བཅུ་གཉིས་ཀྱི་རྒྱན་ཅན་དང་། གསང་སྔགས་ཀྱི་མཐོང་ལམ་རྒྱན་མེད་པ་ཡིན་པས་གསང་སྔགས་ཀྱི་མཐོང་ལམ་ཐོབ་ཀྱང་ཡོན་ཏན་བརྒྱ་ཕྲག་བཅུ་གཉིས་མེད་པ་མི་འགལ་ལོ། །ཞེས་ཟེར་རོ། །དེ་ལྟ་ཡིན་ན་ཕ་རོལ་ཏུ་ཕྱིན་པ་དང་། གསང་སྔགས་ཀྱི་སངས་རྒྱས་ཀྱང་རྒྱན་ཅན་རྒྱན་མེད་གཉིས་སུ་འགྱུར་ཏེ། རྒྱུ་མཚན་མཚུངས་པའི་ཕྱིར་རོ། །ཉན་ཐོས་རྣམས་ཀྱི་དགྲ་བཅོམ་ལ་འགོག་པའི་སྙོམས་འཇུག་ཐོབ་པའི་རྒྱན་ཅན་དང་། མ་ཐོབ་པའི་རྒྱན་མེད་གཉིས་འཐད་དེ། མཛོད་ལས། འགོག་ཐོབ་གཉིས་ཀ་ལས་རྣམ་གྲོལ། །ཤེས་རབ་ཀྱི་ནི་ཅིག་ཤོས་སོ། །ཞེས་གསུངས་སོ། །ཐེག་པ་ཆེན་པོ་འཕགས་པ་ལ་རྒྱན་ཅན་རྒྱན་མེད་གཉིས་མི་སྲིད་དེ། མདོ་སྡེ་རྒྱན་ལས། རྒྱལ་སྲས་བྱང་ཆུབ་ཕྱོགས་མཐུན་པ། །རྣམ་པ་སྣ་ཚོགས་ཐམས་ཅད་ནི། །རྟག་ཏུ་མཐོང་བའི་ལམ་དེ་དང་། །ལྷན་ཅིག་ཏུ་ནི་ཐོབ་པར་འདོད། །ཅེས་དང་། མདོ་སྡེ་ས་བཅུ་པའི་དོན་དབུ་མ་འཇུག་པ་ལས། དེ་ཚེ་འདིས་ནི་སངས་རྒྱས་བརྒྱ་མཐོང་ཞིང་། །དེ་དག་བྱིན་གྱིས་བརླབས་ཀྱང་འདི་ཡིས་རྟོགས། །དེ་ཉིད་ཚེ་ན་བསྐལ་པ་བརྒྱར་གནས་ཤིང་། །སྔོན་དང་ཕྱི་མའི་མཐར་ཡང་ཡང་དག་འཇུག །བློ་ལྡན་ཏིང་འཛིན་བརྒྱ་ཕྲག་སྙོམས་པར་འཇུག་ཅིང་གཏོང་བྱེད་དེ། །འཇིག་རྟེན་ཁམས་བརྒྱ་འདི་ཡིས་ཀུན་ནས་གཡོ་ཞིང་སྣང་བར་ནུས། །དེ་བཞིན་རྫུ་འཕྲུལ་གྱིས་དེ་སེམས་ཅན་བརྒྱ་ཕྲག་སྨིན་བྱེད་ཅིང་། །བརྒྱ་ཕྲག་གྲངས་དང་རྗེས་འབྲེལ་ཞིང་དག་ཏུ་ཡང་འགྲོ་བར་འགྱུར། །དེས་ནི་ཆོས་ཀྱི་སྒོ་རྣམས་ཡང་དག་འབྱེད་བྱེད་ཐུབ་དབང་སྲས། །རང་གི་ལུས་ལ་ལུས་རྣམས་ཀུན་ནས་སྟོན་པར་བྱེད་པའང་ཡིན། །རང་གི་འཁོར་དང་བཅས་པས་མཛེས་འབྱོར་ལུས་ནི་རེ་རེ་ཞིང་། །རྒྱལ་བའི་སྲས་པོ་བརྒྱ་ཕྲག་དག་དང་རྗེས་སུ་འབྲེལ་པའང་སྟོན། །ཞེས་ཐེག་པ་ཆེན་པོའི་མཐོང་ལམ་ཐོབ་པ་དེ་ཉིད་ཀྱི་ཚེ། །ཡོན་ཏན་དེ་དག་ཅིག་ཅར་དུ་ཐོབ་པར་བཤད་པའི་ཕྱིར། དེ་ནི་གསང་སྔགས་ཀྱི་མཐོང་ལམ་ཡོན་ཏན་དང་ལྡན་པའི་ལུང་དུ་མི་འགྲོའོ་སྙམ་ན། སམྦུ་ཊི་ལས། གནས་ནི་རབ་ཏུ་དགའ་བའི་ས། །ཞེས་དང་། ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡིས་ཀླ་ཀློའི་སྐད། །ཞེས་ཕར་ཕྱིན་ཐེག་པའི་རབ་དགའ་སོགས་ཀྱི་ཐ་སྙད་ལ། རྡོ་རྗེ་ཐེག་པ་ནས་གནས་དང་ཉེ་བའི་གནས་སོགས་ཀྱི་ཐ་སྙད་བརྡའི་སྐད་ཀྱིས་གསུངས་པར་བཤད་པས་ཤིན་ཏུ་ཡང་འཐད་དོ། །ཉན་ཐོས་རྣམས་ལ་ཞོགས་མའི་མེ་སྟག་གནམ་དུ་ཡར་མ་ཁད་ཡལ་བ་དང་། ལྕགས་ཀྱི་ཚྭ་ཚྭ་གནམ་དུ་སོང་ནས་འབབ་པར་མ་བརྩམས་པ་ལ་ཡལ་བ་དང་། འབབ་པར་བརྩམས་ནས་ས་ལ་མ་ལྷུང་ཙམ་དུ་ཡལ་བའི་དཔེས། ཚེ་འདི་མྱ་ངན་ལས་མ་འདས་པ་བར་དོར་མྱུར་བ་དང་མྱུར་བ་མ་ཡིན་པ་དང་། ཆེས་ཡུན་རིང་པོ་ཞིག་ནས་འདའ་བར་གསུངས་པ་དེ་བཞིན་དུ་གསང་སྔགས་བསྒོམ་པ་ལས་ཚེ་འདིར་མཐོང་ལམ་མ་ཐོབ་པ། བར་དོར་ཐོབ་པར་གསུངས་མོད་ཀྱི་ཚེ་འདིར་མཐོང་ལམ་ཐོབ་པ་ལ་ཡོན་ཏན་ཤི་ནས་འབྱུང་བ་ནི། བླུན་པོ་རྣམས་ཀྱིས་མཐོང་ལམ་ཐོབ་པར་ཁས་བླངས་ཀྱང་ཡོན་ཏན་སྟོན་རྒྱུ་མེད་པའི་བརྫུན་རིབ་ཡིན་ནོ། །དེས་ན་མདོ་རྒྱུད་སོགས་སོ། །གཉིས་པ་ལ་གཉིས་ཏེ། ནཱ་རོ་པའི་ལུང་དང་འགལ་བ་སྤང་བ། འཕགས་པ་ལྷའི་ལུང་དང་འགལ་བ་སྤང་བའོ། །དང་པོ་ནི་ཇོ་བོ་ནཱ་རོ་ཞེས་སོགས་བདུན་ཏེ། དབང་བསྐུར་གྱི་དུས་སུ་སྐྱེས་པའི་མཚོན་བྱེད་དཔེའི་ཡེ་ཤེས་ལ་མཐོང་ལམ་གྱི་མིང་གིས་བཏགས་པར་ཟད་ཀྱི། མཐོང་ལམ་མཚན་ཉིད་པ་མ་ཡིན་ཏེ། གཞན་དུ་ནི་ཆོས་མཆོག་གི་རྗེས་ཀྱི་མཐོང་ལམ་དེ་མཐོང་ལམ་མ་ཡིན་པར་ཐལ་བའི་ཕྱིར་རོ། །གཉིས་པ་ནི། འཕགས་པ་ལྷ་ཡི་ཞེས་སོགས་ལྔ་སྟེ། སྤྱོད་བསྡུས་སུ་བདེན་པ་མཐོང་ཡང་ཞིང་ལས་དང་། ཚོང་ལས་ཀྱི་མཐའ་ལ་ཆགས་པར་གསུངས་པ་ནི། མཚོན་བྱེད་དཔེའི་ཡེ་ཤེས་རྫོགས་རིམ་གྱི་རང་བྱུང་གི་ཡེ་ཤེས་རྟོགས་པ་ལ་དགོངས་ཏེ། འཕགས་པ་ལྷ་ཉིད་ཀྱིས་ཀྱང་། དེ་ནི་དཔེ་ཡིས་ཉེར་མཚོན་ནས། །བླ་མའི་དྲིན་གྱིས་རྟོགས་པར་འགྱུར། །ཞེས་གསུངས་སོ། །སྤྱོད་བསྡུས་ལས། ཇི་ལྟར་གསུངས་ན། རྡོ་རྗེ་སློབ་མས་གསོལ་པ། གལ་ཏེ་སྒྲུབ་པ་པོ་བདེན་པ་མཐོང་ཡང་། སྔོན་གྱི་བག་ཆགས་གོམས་པའི་སྟོབས་ཀྱིས་ཞིང་ལས་དང་། ཚོང་དང་བསྙེན་བཀུར་ལ་སོགས་པས་གཡེང་བས་སྤྱོད་པ་རྣམ་པ་གསུམ་སྤྱོད་པར་མི་བྱེད་པ་དང་། སྒྲུབ་པ་པོ་གཞན་དག་འབྱོར་པ་མ་ཚང་བས་རྒྱུད་ལས་ཇི་སྐད་གསུངས་པའི་ཆོ་ག་རྫོགས་པར་བྱེད་མི་ནུས་པའི་ཕྱིར། མི་སྤྱོད་པ་དེ་དག་འཆི་བའི་དུས་བྱས་ནས་ཡང་སྲིད་པ་གཞན་དུ་འགྲོ་བར་འགྱུར་རམ། ཡང་ན་རྡོ་རྗེ་འཆང་ཉིད་ཐོབ་པར་འགྱུར། ཞེས་དྲིས་པའི་ལན་དུ་དེ་བས་ན་དེ་ཁོ་ན་ཉིད་ཤེས་པའི་རྐྱེན་མ་ཚང་བ་ནི། ཇི་སྐད་དུ་བཤད་པའི་སྤྱོད་པ་གལ་ཏེ་མ་སྤྱད་དུ་ཟིན་ཀྱང་ལྟ་བ་ཐམས་ཅད་རྣམ་པར་སྤངས་ནས། འཆི་བར་འགྱུར་བ་ནི་དོན་དམ་པའི་བདེན་པ་ཡིན་ལ། སྐྱེ་བ་ནི་ཀུན་རྫོབ་ཀྱི་བདེན་པ་ཡང་དག་པར་མངོན་པར་རྫོགས་ནས། བརྒྱ་ལམ་ན་འོད་གསལ་བར་ཞུགས་ནས། ཐ་མལ་པའི་ཕུང་པོ་བོར་ནས་བདག་ལ་བྱིན་གྱིས་བརླབ་པའི་རིམ་གྱིས་ལྡང་བར་བྱའོ། །ཞེས་བསྟན་པའི་སྐྱེ་མཆེད་དེ་ཡིད་ལ་བྱེད་པས་གནས་པར་བྱེད་ན། དེ་སྐྱེ་བ་གཞན་དུ་ཡིད་ལ་བྱེད་པ་དེ་འདོར་བར་མི་འགྱུར་ཏེ། དེ་བས་ན་ཐམས་ཅད་མཁྱེན་པར་འགྱུར་རོ། །ཞེས་གསུངས་སོ། །གསུམ་པ་ནི། དེ་དང་ལམ་འབྲས་ཞེས་སོགས་ཚིགས་བཅད་གཅིག་སྟེ། ངེད་ཀྱི་ལུགས་ལ། འཕགས་པ་མ་ཡིན་པ་ལ་མཐོང་ལམ་མཚན་ཉིད་པ་འབྱུང་མི་སྲིད་དེ། གྲུབ་ཐོབ་གཉིས་ཀྱིས་དབང་དང་རིམ་གཉིས་ཡེ་ཤེས་ལ་མཐོང་ལམ་དུ་བཤད་པ་བཏགས་པར་བཞེད་པ་དེ་དང་། ལམ་འབྲས་ལས་ཀྱང་། རིམ་གཉིས་བསྒོམ་པའི་ཉམས་མྱོང་འགའ་ཞིག་ལ། ཆོས་སྐུའི་ཉམས་ལ་སོགས་པ་བཤད་པ་ཡོད་ཀྱང་། མཐོང་ལམ་མཚན་ཉིད་པ་གྲུབ་མཐའ་དང་པོ་ནས་འཇོག་པ་ལ་སོགས་པ་གྲུབ་ཐོབ་རྣམས་ཀྱི་དགོངས་པ་མཐུན་པ་དེས་ནའོ། །གསུམ་པ་ཞར་ལ་ཐེག་པ་གསུམ་གྱི་ལག་ལེན་འཁྲུལ་པ་དགག་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ཐེག་པ་གསུམ་གྱི་ཞེས་སོགས་ཚིགས་བཅད་གཅིག་གོ །གཉིས་པ་ལ་ལྔ་སྟེ། ལམ་གྱི་རྩ་བ་བླ་མ་བསྟེན་ཚུལ། ལམ་གྱི་གོ་རིམ་ཐོད་རྒལ་དུ་སྤྱོད་པ་དགག་པ། ལམ་གྱི་ཡན་ལག་མཆོད་གཏོར་གྱི་ཚུལ། ལམ་གྱི་དམིགས་རྟེན་སྐུ་གཟུགས་བཞེངས་ཚུལ། ལམ་གྱི་ངོ་བོ་མདོ་སྔགས་འཆོལ་བ་དགག་པའོ། །དང་པོ་ལ་གཉིས་ཏེ། བླ་མའི་མཚན་ཉིད། གསོལ་བ་བཏབ་པའི་ཚུལ་ལོ། །དང་པོ་ནི། ཉན་ཐོས་རྣམས་ཀྱི་ཞེས་སོགས་ཚིགས་བཅད་བཞི་སྟེ། ཉན་ཐོས་ཀྱི་བླ་མ་དེ་བཟང་བ་མཆོག་གི་སྤྲུལ་སྐུ་ལྟ་བུ་ཡིན་ཀྱང་གང་ཟག་ཁོ་ནར་བས་ཀྱི་དགེ་འདུན་དུ་ཡང་མི་འགྱུར་ཏེ། འདིའི་ལུགས་ཀྱི་དགེ་འདུན་དུ་འགྱུར་བ་ལ་དགེ་སློང་བཞི་ཚོགས་དགོས་པའི་ཕྱིར་རོ། །ཐེག་པ་ཆེན་པོ་ཕ་རོལ་ཏུ་ཕྱིན་པའི་བླ་མ་ནི་བཟང་ན་དགེ་འདུན་དཀོན་མཆོག་ཡིན་ཏེ། མཆོག་གི་སྤྲུལ་སྐུ་ལྟ་བུ་ཡང་མཐར་ཐུག་གི་དགེ་འདུན་དཀོན་མཆོག་གི་ཁོངས་སུ་འདུ་ཞིང་། བྱང་སེམས་འཕགས་པ་ཡིན་ན་རྒྱུད་བླ་མ་ནས་བཤད་པའི་དགེ་འདུན་དཀོན་མཆོག་ཡིན་དགོས་པའི་ཕྱིར། འོ་ན་ཉན་ཐོས་པའི་ལུགས་ལ་ཡང་ཐེག་དམན་འཕགས་པ་སློབ་མི་སློབ་ཀྱི་གང་ཟག་རེ་རེ་བ་ཡང་དགེ་འདུན་དཀོན་མཆོག་ཏུ་མི་འགྱུར་རམ་སྙམ་ན། མི་འགྱུར་ཏེ། དགེ་འདུན་དུ་བྱེད་པའི་ཆོས་སློབ་མི་སློབ་ཀྱི་ལམ་བདེན་གཉིས་དགེ་འདུན་དཀོན་མཆོག་ཏུ་འདོད་པའི་ཕྱིར། མཛོད་ལས། གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་དགེ་བདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་བཤད་པའི་ཕྱིར་རོ། །ཁ་ཅིག་འདིར། རྒྱུད་བླར་སངས་རྒྱས་ཆོས་ཚོགས། ཞེས་དང་། མངོན་རྟོགས་རྒྱན་ལས། སློབ་པ་ཕྱིར་མི་ལྡོག་པའི་ཚོགས། །ཞེས་པའི་ཚོགས་ལ་ཡང་། གང་ཟག་བཞི་ཚོགས་དགོས་པར་འདོད་པ་ནི་ཤིན་ཏུ་འཁྲུལ་ཏེ། རིག་གྲོལ་གཉིས་དང་ལྡན་པའི་རྒྱལ་སྲས་འཕགས་པ་ཡིན་ན་རྒྱུད་བླ་ནས་བཤད་པའི་དགེ་འདུན་དཀོན་མཆོག་ཡིན་པས་མ་ཁྱབ་པར་ཐལ་བ་དང་། ཕྱིར་མི་ལྡོག་པའི་རྟགས་ཐོབ་པའི་བྱང་སེམས་འཕགས་པ་ཡིན་ན། སློབ་པ་ཕྱིར་མི་ལྡོག་པའི་ཚོགས་ཞེས་པའི་སྐབས་ཀྱི་དགེ་འདུན་ཡིན་པས་མ་ཁྱབ་པར་ཐལ་བའི་སྐྱོན་ཡོད་པའི་ཕྱིར། དེས་ན་དགེ་འདུན་གྱི་སྐད་དོད་སྡེབ་སྦྱོར་གྱི་དབང་གིས་ཚོགས་ལ་འཇུག་པའི་དོན་མ་རྟོགས་པར་ཚོགས་ཞེས་པའི་ཚིག་ཙམ་ལ་འཁྲུལ་པར་ཟད་དོ། །གསང་སྔགས་པ་ཡི་བླ་མ་མཆོག དབང་བཞི་རྫོགས་པར་བསྐུར་བ་དེ་ནི་དཀོན་མཆོག་གསུམ་དང་དབྱེར་མེད་ཡིན་ཏེ། ཧེ་རུ་ཀ་མངོན་འབྱུང་གི་རྒྱུད་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་ཧེ་རུ་ཀ །ཀུན་གྱི་བྱེད་པོ་བླ་མ་ཡིན། །ཞེས་སོ། །དེ་ལ་གསོལ་བ་བཏབ་པས། དཀོན་མཆོག་གསུམ་པོ་ཚེ་འདིར་འགྲུབ་སྟེ། སློབ་དཔོན་རྡོ་རྗེ་དྲིལ་བུ་པས། བླ་མའི་བྱིན་རླབས་ཙམ་གྱིས་ནི། །སྐད་ཅིག་ཉིད་ལ་འབྱུང་གང་ཡིན། །ཞེས་གསུངས་སོ། །ད་ལྟའི་སོ་སོ་སྐྱེ་བོའི་རྡོ་རྗེ་སློབ་དཔོན་ལ་ནི། ཐེག་པ་གསུམ་པོ་སོ་སོའི་གཞུང་ནས་འབྱུང་བའི་བླ་མའི་མཚན་ཉིད་གསུམ་ཀ་དང་ལྡན་པ་ཅིག་དགོས་ཀྱི་དེ་དང་མི་ལྡན་ན་བླ་མ་ཙམ་ཡིན་ཀྱང་བླ་མ་དམ་པ་མ་ཡིན་ཏེ། གསོལ་བ་བཏབ་པས། ཚེ་འདིའམ་བར་དོ་སོགས་སུ་སངས་རྒྱས་ཉིད་སྦྱིན་པར་མི་ནུས་པའི་ཕྱིར་རོ། །ཐེག་པ་གསུམ་པོ་སོ་སོའི་གཞུང་ནས་ཇི་ལྟར་བཤད་ན། ཉན་ཐོས་ཀྱི་ཐེག་པ་ལས། ཚུལ་ཁྲིམས་ལྡན་ཅིང་འདུལ་བའི་ཆོ་ག་ཤེས། །ཞེས་སོགས་སུམ་བརྒྱ་པའི་ལུང་སྔར་དྲངས་པ་དང་། ཕ་རོལ་ཏུ་ཕྱིན་པའི་ཐེག་པ་ལས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏང་ངོ་། །ཞེས་སྤྱོད་འཇུག་ལས་བཤད་པ་དང་། རྡོ་རྗེ་ཐེག་པ་ལས། བརྟན་ཅིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །སྙིང་རྗེར་ལྡན་ཞིང་བསྟན་བཅོས་མཁས། །དེ་ཉིད་བཅུ་ནི་ཡོངས་སུ་ཤེས། །དཀྱིལ་འཁོར་བྲི་བའི་ལས་ལ་མཁས། །སྔགས་བཤད་པ་ཡི་སྦྱོར་བ་ཤེས། །རབ་ཏུ་དང་ཞིང་དབང་པོ་དུལ། །ཞེས་བླ་མ་ལྔ་བཅུ་པ་ལས་བཤད་པ་རྣམས་སོ། །མདོར་ན་ད་ལྟའི་བླ་མ་དམ་པ་ལ། ཐེག་པ་གསུམ་ནས་བཤད་པའི་སྡོམ་པ་གསུམ་དང་ལྡན་པ་དགོས་ཞེས་པའི་དོན་ཏེ། བཤད་རྒྱུད་རྡོ་རྗེ་ཕྲེང་བ་ལས། ཕྱི་རུ་ཉན་ཐོས་སྤྱོད་པ་བསྲུང་། །ནང་དུ་འདུས་པའི་དོན་ལ་དགའ། །ཞེས་དང་། རྡོ་རྗེ་གུར་ལས། ཉན་ཐོས་སྤྱོད་པ་སྲུང་བ་པོ། །ཞེས་དང་། སློབ་དཔོན་འཇམ་དཔལ་གྲགས་པས། སྡོམ་གསུམ་ཆོ་གར་མི་ལྡན་པས། །སྔགས་པའི་བདག་ཉིད་མི་འགྱུར་ཏེ། །ཞེས་གསུངས་པ་ལྟར་རོ། །གཉིས་པ་ནི། དེས་ན་དབང་བསྐུར་ཞེས་སོགས་ཚིགས་བཅད་གསུམ་སྟེ། དབང་བསྐུར་ཐོབ་པའི་བླ་མ་ལ། དཀོན་མཆོག་གསུམ་འདུས་པའི་དོན་ནི། བཤད་རྒྱུད་རྡོ་རྗེ་ཕྲེང་བ་ལས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །ཞེས་སོགས་ཀྱི་དོན་ནི། རྒྱུད་སྡེའི་སྟེང་དུ་རྟོགས་པར་བྱའོ། །དབང་བསྐུར་མ་ཐོབ་པའི་བླ་མ་དཀོན་མཆོག་གསུམ་ལ་ཕར་བསྡུ་བའི་ཚུལ་ནི། མཆོག་གི་སྤྲུལ་སྐུ་ལྟ་བུ་སངས་རྒྱས་དཀོན་མཆོག་དང་། བྱང་སེམས་འཕགས་པ་ལྟ་བུ་དགེ་འདུན་དཀོན་མཆོག་དང་། དེ་དག་གི་ཐུགས་རྒྱུད་ཀྱི་སྤངས་རྟོགས་ཆོས་དཀོན་མཆོག་ཏུ་བསྡུ་ཞིང་། སོ་སོ་སྐྱེ་བོའི་བླ་མ་ལ་ནི། དཀོན་མཆོག་གསུམ་གྱི་རྗེས་སུ་སྐྱབས་སུ་འགྲོ་བའི་ཚུལ་སྐྱེས་རབས་ལས་བཤད་དོ། །གཉིས་པ་ནི། དབང་བསྐུར་དང་པོ་ཞེས་སོགས་ཚིགས་བཅད་བཞི་སྟེ། དབང་བཞི་པོ་མ་ཐོབ་པར་དེ་དག་གི་ལམ་བཞི་པོ་བསྒོམ་པ་དང་། དགེ་སློང་གི་སྡོམ་པ་མ་ཐོབ་པར་གཞན་གྱི་མཁན་སློབ་སོགས་བྱེད་པ་ནི་གསང་སྔགས་མེད་པར་སོགས་སོ། །གསུམ་པ་ལ་གསུམ་སྟེ། གཏོར་མའི་མཚན་སྔགས་ལ་འཁྲུལ་པ་དགག ཆུ་སྦྱིན་གྱི་རྫས་ལ་འཁྲུལ་པ་དགག ཕུད་མཆོད་ཀྱི་དབྱིབས་ལ་འཁྲུལ་པ་དགག་པའོ། །དང་པོ་ནི། གཞན་ཡང་གངས་རིའི་ཞེས་སོགས་གཉིས་ཏེ། ཁ་འབར་མའི་གཏོར་མ་ལ་དེ་བཞིན་གཤེགས་པ་བཞིའི་མཚན་སྔགས་སྔོན་ལ་བརྗོད་ནས། དེའི་རྗེས་སུ་སྔགས་བཟླས་པའི་ལག་ལེན་བོད་འགའ་ཞིག་གིས་བྱེད་པ་ནི། མདོ་དང་མཐུན་པ་མ་ཡིན་ཏེ། མདོ་ལས་སྔོན་ལ་སོགས་སོ། །ཇི་ལྟར་གསུངས་ན་ཁ་འབར་མའི་གཏོར་མའི་མདོ་ལས། རྒྱ་ཆེན་ཤུགས་ལྡན་འོད་ཀྱི་སྔགས་ནི། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀེ་ཏེ། ཨོཾ་སཾ་བྷ་ར་སཾ་བྷ་ར་ཧཱུྃ། ཞེས་པ་འདི། འཕགས་པ་ལ་མཆོད་པ་འབུལ་ན་ལན་ཉི་ཤུ་རྩ་གཅིག་བཟླས་ནས་འབུལ། ཡི་དྭགས་ལ་ལན་བདུན་བཟླས་པའི་རྗེས་སུ་དེ་བཞིན་གཤེགས་པ་རིན་ཆེན་མང་དང་། གཟུགས་དམ་པ་དང་། སྐུ་འབྱམས་ཀླས་དང་། འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །ཞེས་བརྗོད་པར་གསུངས་སོ། །གཉིས་པ་ནི། འགའ་ཞིག་ཆུ་སྦྱིན་ཞེས་སོགས་བདུན་ཏེ། དགེ་བའི་བཤེས་གཉེན་སྤྱན་སྔ་བས་ཆུ་སྦྱིན་མང་དུ་མཛད་པས། མནལ་ལམ་དུ་ཡི་དྭགས་བྱུང་ནས་ཆུ་སྦྱིན་གྱི་ནང་དུ་ཟན་བཅུག་ན་བདག་ཅག་རྣམས་ལ་ཕན་པ་ཡོད་ཅེས་ཟེར་བ་ལ་བརྟེན་ནས། དེའི་ལག་ལེན་བྱེད་པ་ཐོས་པ་ནི་མི་འཐད་དེ། འཇུར་འགེགས་ཅན་གྱི་སོགས་སོ། །དེས་ན་ཆུ་སྦྱིན་གྱི་ནང་དུ་ཟན་འདེབས་པ་ནི། ཆུ་སྦྱིན་གྱི་ཆོ་ག་ཉམས་པ་ཡིན་ནོ། །གསུམ་པ་ལ་བཞི་སྟེ། ཕུད་མཆོད་གསུངས་པའི་ཚུལ། དེའི་ལག་ལེན་འཁྲུལ་ཚུལ། དེ་ཉིད་འཁྲུལ་བར་བསྟན་པ། མ་འཁྲུལ་བར་བསྒྲུབ་པར་གདམས་པའོ། །དང་པོ་ནི། ཟན་གྱི་ཕུད་ལ་ཞེས་སོགས་དགུ་སྟེ། ཟན་གྱི་ཕུད་ལ་ལྷ་ལ་འབུལ་བའི་ལྷ་བཤོས་དང་། འབྱུང་པོ་ལ་སྦྱིན་པའི་ཆང་བུ་བྱ་བར་སངས་རྒྱས་ཀྱིས་གསུངས་ཏེ། བརྟག་གཉིས་ལས། ཨོཾ་དྷཱཾ་དྷཱཾ་སྭཱ་ཧཱ། ལྷ་བཤོས་ཀྱི་སྔགས་སོ། །ཞེས་དང་། རྡོ་རྗེ་རྩེ་མོའི་རྒྱུད་ལས། དེ་ནས་ཟན་གྱི་དུས་སུ་ནི། །རྣམ་པ་ཀུན་ཏུ་ཆང་བུ་སྦྱིན། །ཞེས་དང་། འཕྲོག་མའི་མདོ་ལས། ང་ལ་སྟོན་པར་ཁས་འཆེ་བའི་ཉན་ཐོས་རྣམས་ཀྱིས་འཕྲོག་མ་བུ་དང་བཅས་པ་ལ་ཆང་བུ་སྦྱིན་པར་བྱའོ། །ཞེས་གསུངས་ལ། ཇི་ལྟར་སྦྱིན་པ་དེ་ཡི་ཆོ་ག་ནི། མཻ་ཏྲི་པའི་ལྟ་བ་ངན་སེལ་དང་། རྗེ་བཙུན་གྱིས་ལས་དང་པོ་པའི་བྱ་བ་དང་། ཆོས་རྗེ་པའི་ཐུབ་པ་དགོངས་གསལ་སོགས་ལ་ལྟོས་ཤིག གཉིས་པ་ནི། འགའ་ཞིག་ཞེས་སོགས་ཚིགས་བཅད་གཅིག་སྟེ། འབྲང་རྒྱས་བྱེད་པ་ནི་སྣར་ཐང་པ་དང་། གྲུ་གསུམ་བྱེད་པ་ནི་འབྲི་ཁུང་པའོ། །གསུམ་པ་ནི། གསང་སྔགས་རྙིང་མ་ཞེས་སོགས་བཅུའོ། །བཞི་པ་ནི། ལག་ལེན་ཐམས་ཅད་ཞེས་སོགས་ཚིགས་བཅད་གཅིག་གོ །བཞི་པ་ལ་གཉིས་ཏེ། ཕྱག་མཚན་ལ་འཁྲུལ་བ་དགག་པ། ཁ་དོག་ལ་འཁྲུལ་བ་དགག་པའོ། །དང་པོ་ནི། སངས་རྒྱས་རབ་ཏུ་ཞེས་སོགས་ལྔ་སྟེ། བོད་ཁ་ཅིག་སངས་རྒྱས་སུམ་ཅུ་སོ་ལྔ་རབ་ཏུ་བྱུང་བའི་ཆ་ལུགས་ཅན་གྱི་ཕྱག་ཏུ་ཕུབ་དང་། རལ་གྲི་ལ་སོགས་པའི་མཚོན་ཆ་བསྐུར་བ་མཐོང་བ་ནི་མི་འཐད་དེ། སངས་རྒྱས་ཁྱིམ་པའི་ཆ་ལུགས་ཅན་ལ་རིན་པོ་ཆེ་ལ་སོགས་པའི་རྒྱན་དག་དང་ཕྱག་མཚན་མཚོན་ཆ་སོགས་འཛིན་པ་སྲིད་ཀྱི། རབ་བྱུང་གི་ཆ་ལུགས་ཅན་ལ་དེ་མི་སྲིད་དེ། ཁྱད་པར་འཕགས་བསྟོད་ལས། འཁོར་ལོ་མདུང་ཐུང་ཅན་དག་གིས། །བདུད་དཔུང་དེ་ལས་རྒྱལ་མི་ནུས། །ཁྱོད་ནི་འཁོར་ལོ་མདུང་མེད་པར། །བྱམས་པའི་མཚོན་གང་ལགས་པས་རྒྱལ། །ཞེས་གསུངས་སོ། །ཁ་ཅིག་འདིའི་སྒྲུབ་ཐབས་ཀླུ་སྒྲུབ་ཀྱིས་མཛད་པ་ཡིན་ནོ། །ཞེས་ཟེར་བ་དང་། ཁ་ཅིག་གཟིགས་སྣང་ཡིན་ནོ་ཞེས་ཟེར་ཞིང་། དེ་ཉིད་མདོ་སྡེ་ན་ཇི་ལྟ་བ་བཞིན་སྣང་ངོ་། །ཞེས་སྨྲ་བ་ནི་རྫོགས་པའི་སངས་རྒྱས་ཉན་ཐོས་ཀྱི་ཆ་ལུགས་ཀྱིས་འདུལ་བ་ལ་དེ་དང་མཐུན་པར་སྟོན་ཅིང་། ཁྱིམ་པའི་ཆ་ལུགས་ཀྱིས་འདུལ་བ་ལ་དེ་དང་མཐུན་པར་སྟོན་པའི་དོན་མ་རྟོགས་པར་མདོ་སྔོན་མ་མཐོང་བཞིན་དུ་བརྫུན་སྨྲས་པའོ། །གཉིས་པ་ལ་གཉིས་ཏེ། དངོས་དང་། ལུང་འགལ་སྤང་བའོ། །དང་པོ་ནི། བྱང་ཆུབ་མཆོག་གི་ཞེས་སོགས་ཚིགས་བཅད་བཞི་སྟེ། བྱང་ཆུབ་མཆོག་གི་ཕྱག་རྒྱ་དང་། ས་གནོན་དང་། མཆོག་སྦྱིན་དང་། མཉམ་བཞག་དང་། སྐྱབས་སྦྱིན་གྱི་ཕྱག་རྒྱ་སོ་སོར་མཛད་པའི་རིགས་ལྔ་ཁ་དོག་སེར་འབྱམས་སུ་བྱེད་པ་མཐོང་ཞིང་མདོ་ལུགས་ཡིན་ནོ། །ཞེས་བཀའ་གདམས་པ་ལ་ལ་སྨྲ་ལ། ཁ་ཅིག་ཇོ་བོ་རྗེའི་ཞལ་གཟིགས་ཡིན་ནོ། །ཞེས་སྨྲའོ། །འདི་ནི་མི་འཐད་དེ། མདོ་ནས་རིགས་ལྔ་འདི་འདྲ་གསུངས་པ་མེད་ཅིང་། གསང་སྔགས་རྒྱུད་སྡེ་བཞིའི་ལུགས་ཀྱང་མ་ཡིན་པའི་ཕྱིར་རོ། །དེ་ཡང་བྱ་སྤྱོད་གཉིས་ཀྱི་ལུགས་མ་ཡིན་ཏེ། དེ་ལ་སངས་རྒྱས་རྡོ་རྗེའི་རིགས། པདྨའི་རིགས། དེ་བཞིན་གཤེགས་པའི་རིགས་ཏེ་གསུམ་དུ་བསྡུས་པ་མ་གཏོགས་པ་རིགས་ལྔར་བསྡུས་པ་མེད་པའི་ཕྱིར། རྣལ་འབྱོར་རྒྱུད་ཀྱི་ལུགས་ཀྱང་མ་ཡིན་ཏེ། དེ་ཉིད་འདུས་པ་སོགས་ནས་གསུངས་པའི་རིགས་ལྔ་ཁ་དོག་དཀར་པོ་དང་ནག་པོ་སོགས་ཐ་དད་ཅིང་། ཕྱག་རྒྱ་བྱང་ཆུབ་མཆོག་གི་ཕྱག་རྒྱ་སོགས་ཐ་དད་དུ་གསུངས་པའི་ཕྱིར། རྣལ་འབྱོར་གྱི་རྒྱུད་འདིའི་ལུགས་ཀྱི་རིགས་ལྔ་སྐུ་མདོག་ཐ་དད་པ་དང་། ཕྱག་རྒྱ་ཐ་དད་པ་ནི་ཡེ་ཤེས་ལྔ་མཚོན་པར་བྱེད་པའི་རྟེན་ཅིང་འབྲེལ་བར་འབྱུང་བའི་སྐུ་ཡིན་པས་ཐ་དད་དུ་འཐད་པ་ཡིན་གྱི། སེར་འབྱམས་ཀྱིས་ནི་དེ་དག་མཚོན་པར་མི་ནུས་སོ། །བླ་མེད་ཀྱི་ལུགས་ཀྱང་མ་ཡིན་ཏེ། དུས་ཀྱི་འཁོར་ལོ་སོགས་ལས་རིགས་ལྔའི་ཁ་དོག་རྣལ་འབྱོར་རྒྱུད་ལས་གཞན་དུ་མི་བསྐྱོད་པ་ལྗང་ཁུ། དོན་གྲུབ་ནག་པོ། རིན་འབྱུང་དམར་པོ། སྣང་མཐའ་དཀར་པོ། རྣམ་སྣང་སེར་པོ་གསུངས་པ་ནི། རིམ་པ་བཞིན་དུ་འབྱུང་བ་ནམ་མཁའ། རླུང་། མེ། ཆུ། ས་རྣམ་པ་ལྔ་སྦྱོང་བའི་རྟེན་ཅིང་འབྲེལ་འབྱུང་གི་སྐུ་ཡིན་ཅིང་། སེར་འབྱམས་ཀྱིས་ནི་དེ་དག་སྦྱོང་བར་མི་ནུས་པའི་ཕྱིར་རོ། །གཉིས་པ་ནི། སངས་རྒྱས་གསེར་མདོག་ཅེས་སོགས་ལྔ་སྟེ། རིགས་ལྔ་སེར་འབྱམས་མི་འཐད་ན་སངས་རྒྱས་ལ། པགས་པ་གསེར་མདོག་པགས་པ་སྲབ་པ་དང་། །ཞེས་གསུངས་པ་དང་འགལ་ལོ་ཞེ་ན། དེ་ནི་དྲི་མ་མེད་ཅིང་དྭངས་པའི་དཔེར་གསེར་མདོག་ཅེས་གསུངས་པའམ། སྤྲུལ་སྐུ་ཕལ་ཆེ་བ་ལ་དགོངས་ཏེ་གསུངས་པ་ཡིན་གྱི། གཞན་དུ་ཐམས་ཅད་སེར་པོར་མ་ངེས་ཏེ། སངས་རྒྱས་སྨན་བླ་ནམ་མཁའི་མདོག་སྔོན་པོ་ཉིད་དུ་མདོ་ལས་གསུངས་པའི་ཕྱིར་རོ། །འོ་ན་གསེར་འོད་དམ་པ་ལས། སངས་རྒྱས་ཐམས་ཅད་ཁ་དོག་མཚུངས། །འདི་ནི་སངས་རྒྱས་ཆོས་ཉིད་ཡིན། །ཞེས་པའི་དོན་ཇི་ལྟར་འཆད་ཅེ་ན། ཁ་དོག་གང་གིས་འདུལ་བའི་གདུལ་བྱ་དེ་ལ་ཁ་དོག་དེ་ཉིད་སངས་རྒྱས་ཐམས་ཅད་ཀྱིས་སྟོན་ཞེས་པའི་དོན་ཡིན་གྱི་ཐམས་ཅད་ཁ་དོག་སེར་པོར་སྟོན་པའི་ལུང་མ་ཡིན་ནོ། །ལྔ་པ་ལ་གསུམ་སྟེ། རང་བསྒོམ་པའི་ཡན་ལག་འཆོལ་བ་དགག་པ། གཞན་རྗེས་སུ་འཛིན་པའི་ཡན་ལག་འཆོལ་བ་དགག་པ། དེ་གཉིས་ཀ་འཆོལ་བ་དགག་པའོ། །དང་པོ་ནི། ཡི་དམ་ལྷ་ཡི་ཞེས་སོགས་ཚིགས་བཅད་གཉིས་ཏེ། དེང་སང་བཀའ་གདམས་པ་ལ་ལ་གསང་སྔགས་ལ་མི་མོས་པར་ཡི་དམ་གྱི་ལྷ་བསྒོམ་པ་དང་། སྔགས་བཟླ་བ་སོགས་བྱེད་པ་ཡང་། སངས་རྒྱས་ཀྱི་བསྟན་པ་དང་མཐུན་པ་མ་ཡིན་ཏེ། དེ་དག་མདོ་སྡེ་ལས་གསུངས་པ་མེད་ཅིང་། གསང་སྔགས་ཀྱི་རྒྱུད་སྡེའི་ལུགས་ཁོ་ན་ཡིན་པའི་ཕྱིར་རོ། །གཉིས་པ་ནི། གཞན་ཡང་སྦྱིན་སྲེག་ཞེས་སོགས་བཅུ་གཅིག་སྟེ། བཀའ་གདམས་པ་ལ་ལ། སྤྱིན་སྲེག་དང་། རོ་སྲེག་སོགས་གསང་སྔགས་ཀྱི་ལུགས་བོར་ནས་མདོ་སྡེ་ནས་གསུངས་པའི་དཀོན་མཆོག་མཆོད་པ་ཙམ་ལ་བརྟེན་པའི་ཆོ་གའི་རྣམ་གཞག་བྱེད་པ་ཡོད་པ་ཡང་མི་འཐད་དེ། ཕ་རོལ་ཏུ་ཕྱིན་པའི་མདོ་དང་སོགས་སོ། །ངན་སོང་སྦྱོང་རྒྱུད་ལས་ཅི་ལྟར་གསུངས་ན། དྲི་ཡིས་བསྐུས་པའི་ཡམ་ཤིང་གིས། །ཆོ་ག་བཞིན་དུ་སྦྱིན་སྲེག་བྱ། །ཞེས་པ་དང་། རོ་ལ་སྔགས་ཀྱིས་བཏབ་ནས་ཀྱང་། །ཆུ་མཆོག་གིས་ནི་བཀྲུས་ནས་ཀྱང་། །ཞེས་པ་དང་། དེ་ཡི་གཟུགས་བརྙན་བྲི་བའམ། །གུར་གུམ་གྱིས་ནི་མིང་ཡང་བྲི། །ངན་སོང་གསུམ་གྱི་འཇིག་རྟེན་ལས། །སེམས་ཅན་རྣམས་ནི་གྲོལ་བའི་ཕྱིར། །སྔགས་མཁན་གཞན་ལ་ཕན་བརྩོན་ཞིང་། །སྙིང་རྗེ་ཅན་གྱིས་དབང་བསྐུར་རོ། །དེ་ནས་རྣལ་འབྱོར་ཅན་གྱིས་ནི། །སྔགས་དང་ཕྱག་རྒྱས་དེ་དབང་བསྐུར། །ལྷ་ཡི་གཟུགས་སུ་བརྟགས་ནས་ཀྱང་། །མཆོད་རྟེན་དབུས་སུ་གཞག་པར་བྱ། །རང་གི་ལྷའམ་ལྷ་གཞན་གྱི། །སྙིང་པོ་སྙིང་ཁར་བྲིས་ནས་ཀྱང་། །ལྷ་འདྲ་བར་ནི་སེམས་བསྐྱེད་དེ། །ཁྱིམ་གྱི་ནང་དུ་གཞག་པར་བྱ། །དེ་ཡི་མིང་ནས་སྨོས་ནས་སུ། །གུར་གུམ་བཟང་པོས་སྔགས་བྲིས་ལ། །རིམ་གྱིས་འབུམ་ནི་ཚང་ཙམ་དུ། །མཆོད་རྟེན་ལས་ནི་རབ་ཏུ་བྱ། །སྡིག་ཅན་སྡིག་ནི་ཟད་བྱའི་ཕྱིར། །བྱེ་བ་སྙེད་ནི་ཚང་བར་བྱ། །དེ་ནི་ངེས་པར་དམྱལ་བ་ནས། །འདི་བྱས་པས་ནི་གྲོལ་བར་འགྱུར། །ཞེས་གསུངས་སོ། །གཞན་ཡང་ནག་པོ་དམ་ཚིག་རྡོ་རྗེའི་ཀྱེའི་རྡོ་རྗེའི་སྦྱིན་སྲེག་དང་། རོ་སྲེག་གི་ཆོ་ག་དང་། སློབ་དཔོན་དཔའ་བོ་རྡོ་རྗེའི་རིན་ཆེན་འབར་བ་སོགས་ལས་གསུངས་པ་ཡིན་གྱི། མདོ་སྡེ་རྣམས་ནས་བཤད་པ་མེད་དོ། །གསུམ་པ་ལ་གསུམ་སྟེ། འཁྲུལ་བ་བརྗོད། དེ་དགག མ་འཆོལ་བ་བསྒྲུབ་པར་གདམས་པའོ། །དང་པོ་ནི། དེ་བཞིན་རབ་གནས་ཞེས་སོགས་ཚིགས་བཅད་གཅིག་གོ །གཉིས་པ་ལ་གསུམ་སྟེ། རབ་གནས་མདོ་ལུགས་དགག ཕྱག་རྡོར་མདོ་ལུགས་དགག ལྟུང་བཤགས་སྔགས་ལུགས་དགག་པའོ། །དང་པོ་ལ་བཞི་སྟེ། མདོར་བསྟན་པ། ཞར་ལས་བྱུང་བ། རྒྱས་པར་བཤད་པ། དོན་བསྡུ་བའོ། །དང་པོ་ནི། འདི་ཡང་བརྟག་པར་ཞེས་སོགས་བཅོ་བརྒྱད་དེ། མདོ་སྡེ་ནས་རབ་གནས་མཚན་ཉིད་པ་བཤད་པ་མེད་ཅིང་། འོན་ཀྱང་རྟེན་དེ་ལ་མཆོད་པ་དང་། བསྟོད་པ་དང་། བཀྲ་ཤིས་ལ་སོགས་པའི་སྒོ་ནས་རྒྱལ་པོ་རྒྱལ་སར་བཏོན་པའི་མངའ་དབུལ་ལྟ་བུ་ལ། རབ་གནས་ཡིན་ཞེས་སྨྲ་ན་སྨྲོས་ཏེ། དེ་ནི་མིང་དུ་བཏགས་པ་ཙམ་མོ། །དེས་ན་རབ་གནས་མཚན་ཉིད་པ་ལ་སྟ་གོན་གྱི་སྐབས་སུ། ཡི་དམ་གྱི་ལྷ་བསྒོམ་ཞིང་སྔགས་བཟླ་བ་དང་། བུམ་པ་སྟ་གོན་དང་། གང་གིས་རབ་ཏུ་གནས་པར་བྱེད་པའི་ལྷ་སྟ་གོན་དང་། རབ་ཏུ་གནས་བྱའི་རྟེན་བསྐྱེད་ནས་ཡེ་ཤེས་པ་བཅུག་སྟེ། སྙན་གསན་དབབ་པ་ལ་སོགས་པའི་ཆོས་བཅུ་གསུམ་དང་། དངོས་གཞིའི་སྐབས་སུ་རྟེན་གྱི་དམ་ཚིག་པ་བསྐྱེད་པ་ལ། ཡེ་ཤེས་ཀྱི་འཁོར་ལོ་དགུག་གཞུག་བྱས་ནས། སྤྱན་དབྱེ་བ་དང་། བརྟན་པར་བཞུགས་པ་དང་། སྔགས་ཀྱིས་བྱིན་གྱིས་བརླབས་པའི་མེ་ཏོག་དོར་ནས། གསོལ་བ་བཏབ་པ་དང་། མཆོད་པ་རྒྱས་པས་ལེགས་པར་མཆོད་པ་ལ་སོགས་པའི་ཆོས་བཅུ་གསུམ་དང་། རྗེས་བཀྲ་ཤིས་རྒྱས་པར་བྱེད་པ་ལ་སོགས་པའི་ཆོས་བཅུ་གསུམ་ཚང་བ་ཞིག་དགོས་ཤིང་། དེ་ལྟ་བུའི་ཆོ་ག་ནི་རབ་གནས་ཀྱི་རྒྱུད་ལ་སོགས་པ་གསང་སྔགས་ཀྱི་རྒྱུད་སྡེ་ལས་གསུངས་ཀྱི། ཕ་རོལ་ཏུ་ཕྱིན་པ་ལས་གསུངས་པ་མ་ཡིན་པས། རབ་གནས་མདོ་ལུགས་མི་འཐད་དོ། །དེ་ལ་བཀའ་གདམས་པ་ལ་ལ་ཇོ་བོ་རྗེའི་གདམས་ངག་ཡིན་ནོ་ཞེས་སྨྲའོ། །འོ་ན་ཇོ་བོ་རྗེས་མདོ་སྡེ་གང་ལ་བརྟེན་པ་ཡིན་པ་སྨྲ་དགོས་ཏེ། མདོ་ལུགས་ཀྱི་མན་ངག་མདོ་ལ་བརྟེན་དགོས་པའི་ཕྱིར་རོ། །རབ་གནས་ཀྱི་སྦྱོར་དངོས་རྗེས་གསུམ་གྱི་ཆོས་བཅུ་གསུམ་པོ་དེ་དག་ཉམས་སུ་ལེན་པའི་ཚུལ་ཞིབ་པར་ནི། ཇོ་བོ་རིན་ཆེན་བཟང་པོའི་སྡོམ་ཚིག་གི་སྟེང་དུ་རྗེ་བཙུན་རིན་པོ་ཆེས། དོན་གསལ་དུ་རྒྱས་པར་བཤད་པས་དེར་བལྟ་བར་བྱའོ། །གཉིས་པ་ནི། དེང་སང་གསང་བ་ཞེས་སོགས་ཚིགས་བཅད་གཉིས་ཏེ། བཀའ་ཕྱག་པ་འགའ་ཞིག་གསང་བ་འདུས་པའི་ལྷ་བསྒོམ་ནས་སོགས་སོ། །གསུམ་པ་ནི། ལྷ་ལ་རབ་ཏུ་ཞེས་སོགས་ཚིགས་བཅད་དྲུག་དང་ཚིག་རྐང་གཅིག་སྟེ། ཚིག་རྐང་དང་པོ་དྲུག་གིས། རྡོ་རྗེ་སློབ་དཔོན་གྱི་དབང་བསྐུར་མ་ཐོབ་ན། རྡོ་རྗེ་སློབ་མའི་དབང་བསྐུར་བ་ཐོབ་པས་ཀྱང་རབ་གནས་བྱར་མི་རུང་བར་བསྟན་པས་རབ་གནས་མདོ་ལུགས་མི་འཐད་པར་བསྟན། དེ་ནས་བཅུས་ནི་རྡོ་རྗེ་སློབ་མས་ཅི་ཙམ་བྱར་རུང་བའི་རང་དོན་དང་། གཞན་དོན་གྱི་བསྒྲུབ་ཚུལ་བསྟན། དེ་ནས་དགུས་ནི་རྡོ་རྗེ་སློབ་དཔོན་གྱི་ཐུན་མོང་མ་ཡིན་པའི་རང་དོན་དང་། གཞན་དོན་བསྒྲུབ་ཚུལ་བསྟན་ནོ། །དེ་དག་གི་དོན་ནི་རབ་གནས་མདོ་ལུགས་མི་འཐད་དེ། གཞན་དོན་དུ་ལྷ་ལ་རབ་ཏུ་གནས་པ་དང་། མི་ལ་དབང་བསྐུར་བྱ་བ་དང་། རང་དོན་དུ་རྟེན་དང་བརྟེན་པའི་རྣམ་དག་བསྒོམ་པ་སོགས་རྡོ་རྗེ་སློབ་མའི་དབང་བསྐུར་བ་ཐོབ་པས་ཀྱང་བྱ་བར་མ་གསུངས་ན། དབང་བསྐུར་གཏན་ནས་མ་ཐོབ་པའི་གང་ཟག་རྣམས་ཀྱིས་ལྟ་སྨོས་ཀྱང་ཅི་དགོས་པའི་ཕྱིར་རོ། །འོ་ན་རྡོ་རྗེ་སློབ་མའི་དབང་བསྐུར་ཙམ་ཐོབ་ནས་ཅི་ཞིག་དབང་བ་ཡིན་ཞེ་ན། རང་དོན་ཏུ་མེ་ཏོག་གང་ལ་ཕོག་པའི་ལྷ་བསྒོམ་པ་དང་དེའི་སྔགས་བཟླ་བ་དང་། དེའི་བཅུ་ཆའི་སྦྱིན་སྲེག་དང་། དེ་ལ་བརྟེན་ནས་ཞི་རྒྱས་ལ་སོགས་པའི་ལས་ཚོགས་འགའ་ཞིག་དང་། རིལ་བུ་དང་མིག་སྨན་ལ་སོགས་པའི་ཐུན་མོང་གི་དངོས་གྲུབ་བསྒྲུབ་པ་དང་། ཕྱག་རྒྱའི་ཡེ་ཤེས་བསྒྲུབ་པའི་ཆོ་ག་བསྟན་པ་དང་། གསང་སྔགས་རྒྱུད་སྡེ་འོག་མ་འགའ་ཞིག་ཉན་པ་ལ་དབང་བ་ཡིན་གྱི། རྒྱུད་མཐའ་དག་འཆད་པ་དང་དབང་བསྐུར་དང་། རབ་གནས་སོགས་སློབ་དཔོན་གྱི་ཕྲིན་ལས་རྣམས་ནི་བྱར་མི་རུང་སྟེ། དེ་དག་སློབ་དཔོན་ཁོ་ནའི་ལས་ཡིན་པའི་ཕྱིར་རོ། །འོ་ན་རྡོ་རྗེ་སློབ་དཔོན་གྱི་དབང་ཐོབ་ནས་བྱ་དགོས་པའི་ཐུན་མོང་མ་ཡིན་པ་རྣམས་གང་ཞེ་ན། དཀྱིལ་འཁོར་གྱི་འཁོར་ལོ་བྱང་ཕྱོགས་སོ་བདུན་དང་སྦྱར་བ་འཁོར་ལོའི་དེ་ཉིད་དང་། དཀྱིལ་འཁོར་གྱི་ལྷ་རྣམས་ཕུང་ཁམས་སྐྱེ་མཆེད་དང་སྦྱར་བ་ལྷའི་དེ་ཉིད་ལ་སོགས་པ། སྦྱང་གཞི་སྦྱོང་བྱེད་ཀྱི་རྣམ་དག་སྦྱར་བའི་རྟེན་དང་བརྟེན་པར་བཅས་པའི་དཀྱིལ་འཁོར་བསྒོམ་པ་དང་། དབང་བསྐུར་དང་རབ་གནས་ལ་སོགས་པའི་གཞན་དོན་དང་། སངས་རྒྱས་ཀུན་གྱི་དམ་ཚིག་གི་རྡོ་རྗེ་དྲིལ་བུ་ཕྱག་རྒྱ་གསུམ་དང་། ཐེག་པ་བླ་ན་མེད་པའི་སྔགས་ཀྱི་སྡོམ་པ་ཡོངས་རྫོགས་རྡོ་རྗེ་སློབ་དཔོན་ཁོ་ནའི་ལས་ཡིན་གྱི། གཞན་སློབ་མའི་དབང་ཙམ་ཐོབ་པ་དང་། དབང་བསྐུར་གཏན་མ་ཐོབ་པ་རྣམས་ཀྱིས་བྱར་མི་རུང་སྟེ། རྡོ་རྗེ་སློབ་དཔོན་གྱི་དབང་གི་གསོལ་བ་གདབ་པའི་སྐབས་སུ། འཁོར་ལོ་ལྷ་ཡི་དེ་ཉིད་དང་། །སློབ་དཔོན་ཕྲིན་ལས་ཡོངས་སུ་གསུངས། །སངས་རྒྱས་ཀུན་གྱི་དམ་ཚིག་དང་། །སྡོམ་པའང་བླ་ན་མེད་པ་སྩོལ། །ཞེས་གསུངས་པའི་ཕྱིར་རྡོ་རྗེ་སློབ་དཔོན་གྱི་ལས་འདི་དག་ནི། གཙོ་བོར་བླ་མེད་ཀྱི་དབང་དུ་བྱས་པ་ཡིན་གྱི། རྒྱུད་སྡེ་འོག་མའི་རྡོ་རྗེ་སློབ་དཔོན་གྱི་དབང་ཐོབ་པ་ཙམ་གྱིས། འདི་དག་ཐམས་ཅད་བྱར་རུང་བའི་ངེས་པ་མེད་དོ། །འོན་ཀྱང་དེ་དག་ལ་དབང་བསྐུར་དང་། རབ་གནས་དང་། རྒྱུད་འཆད་པ་རྣམས་ནི་རུང་ངོ་། །བཞི་པ་ནི། དེང་སང་རབ་གནས་ཞེས་སོགས་དྲུག་གོ །གཉིས་པ་ནི། ཕྱག་ན་རྡོ་རྗེའི་ཞེས་སོགས་ཚིགས་བཅད་གཅིག་སྟེ། གྲུ་གོ་ཆེའི་རྗེས་འབྲང་ཁ་ཅིག ཕྱག་ན་རྡོ་རྗེ་མདོ་ལུགས་བྱེད་པ་ནི་མི་འཐད་དེ། ཕྱག་ན་རྡོ་རྗེའི་བསྒོམ་བཟླས་ཀྱང་མདོ་སྡེ་རྣམས་སོགས་སོ། །གསུམ་པ་ནི། ལྟུང་བཤགས་སངས་རྒྱས་ཞེས་སོགས་གསུམ་མོ། །གསུམ་པ་ནི། མདོ་དང་རྒྱུད་ཀྱི་ཞེས་སོགས་ཚིགས་བཅད་གཅིག་སྟེ། མདོ་དང་རྒྱུད་ཀྱི་ཁྱད་པར་ནི། རང་དོན་དུ་ལྷ་བསྒོམ་པ་དང་། སྔགས་བཟླ་བ་དང་། གཞན་དོན་དུ་དབང་བསྐུར་བ་དང་། རབ་གནས་སོགས་ཀྱི་ཆོ་གའི་བྱ་བ་ཡོད་མེད་ཡིན་པ་དེ་ལྟར་ཤེས་ནས་མདོ་སྡེ་དང་། སྔགས་ཀྱི་ལུགས་རྣམས་མ་འདྲེས་པར་སྤྱོད་དེ་སོ་སོར་སྨྲོས་ཤིག གཉིས་པ་རྟོགས་བྱ་སྤྲོས་བྲལ་གྱི་ལྟ་བ་ལ་འཁྲུལ་བ་དགག་པ་ལ་དངོས་དང་། ཞར་ལ་རྒྱུད་སྡེ་བཞིའི་སྒྲུབ་པ་ལ་འཁྲུལ་བ་དགག་པ་གཉིས་ལས། དང་པོ་ལ་བཞི་སྟེ། ཐེག་པ་རིམ་དགུ་ལ་ལྟ་བ་ཐ་དད་ཡོད་པ་དགག རྒྱུད་སྡེ་བཞི་ལ་ལྟ་བ་ཐ་དད་ཡོད་པ་དགག རྣལ་འབྱོར་བཞི་ཐེག་པའི་རིམ་པར་འདོད་པ་དགག དེས་ན་དབུ་མ་ཡན་ཆད་ལྟ་བ་གཅིག་ཏུ་བསྟན་པའོ། །དང་པོ་ནི། ལ་ལ་ཐེག་པ་ཞེས་སོགས་བཅུ་བཞི་སྟེ། གསང་སྔགས་རྙིང་མ་བ་ལ་ལ། ཉན་ཐོས། རང་རྒྱལ། བྱང་སེམས་ཏེ། ཕྱི་མཚན་ཉིད་ཀྱི་ཐེག་པ་གསུམ། ཀྲི་ཡ་ཨུ་པ་ཡོ་ག་སྟེ། ནང་སྔགས་ཀྱི་ཐེག་པ་གསུམ། མ་ཧཱ་ཨ་ནུ་ཨ་ཏི་སྟེ། གསང་བ་མཐར་ཐུག་པའི་ཐེག་པ་གསུམ་སྟེ། དེ་ལྟར་ཐེག་པ་རིམ་དགུ་ལ་ལྟ་བ་ཐ་དད་པ་དགུ་ཡོད་ཅེས་ཟེར་རོ། །དེ་ནི་མི་འཐད་དེ། ཐེག་པ་གསུམ་དུ་བྱས་པའི་ཉན་ཐོས་དང་། ཐེག་ཆེན་ལ་སྤྲོས་བྲལ་རྟོགས་པ་དང་། མ་རྟོགས་པའི་བྱེ་བྲག་གིས་ལྟ་བའི་རིམ་པ་ཡོད་མོད་ཀྱི། ཐེག་པ་ཆེན་པོ་ཕ་རོལ་ཏུ་ཕྱིན་པ་དང་། གསང་སྔགས་ལ་ཐོས་བསམ་གྱིས་གཏན་ལ་ཕབ་པའི་ལྟ་བའི་དབྱེ་བ་བཤད་པ་མེད་པའི་ཕྱིར་རོ། །གལ་ཏེ་ཕ་རོལ་ཏུ་ཕྱིན་པས་གཏན་ལ་ཕབ་པའི་སྤྲོས་བྲལ་ལས་ལྷག་པའི་རྡོ་རྗེ་ཐེག་པའི་ལྟ་བ་ཡོད་ན་ལྟ་བ་དེ་སྤྲོས་པ་ཅན་དུ་འགྱུར་ཏེ། སྤྲོས་བྲལ་ལས་འདས་པའི་ལྟ་བ་ཡིན་པའི་ཕྱིར། རྡོ་རྗེ་ཐེག་པའི་ལྟ་བ་དེ་སྤྲོས་བྲལ་ཡིན་ན་ནི། ཕ་རོལ་ཏུ་ཕྱིན་པས་གཏན་ལ་ཕབ་པའི་ལྟ་བ་དང་། ཁྱད་པར་མེད་པ་དེས་ན་བཤད་པས་གོ་བའི་ཐོས་པའི་ལྟ་བ་གཅིག་ཉིད་ཡིན་ནོ། །འོན་ཀྱང་སྤྲོས་བྲལ་དེ་རྟོགས་པའི་ཐབས་ལ་གསང་སྔགས་ཁྱད་པར་འཕགས་ཏེ། རྒྱུད་སྡེ་བཞིའི་ཉམས་ལེན་གྱི་རིམ་པ་ཐམས་ཅད་སྤྲོས་བྲལ་རྟོགས་པའི་ཐབས་ཡིན་པའི་ཕྱིར་དང་། ཕར་ཕྱིན་ཐེག་པ་ལ་སོ་སོ་སྐྱེ་བོའི་དུས་སུ་རྟགས་ལ་བརྟེན་པའི་རིགས་ཤེས་རྗེས་དཔག་གི་རྒྱུན་བསྒོམ་པ་ལས་གཞན་མེད་ཅིང་། རྡོ་རྗེ་ཐེག་པ་ལ་དབང་དང་རིམ་གཉིས་ལས་བྱུང་བའི་མཚོན་བྱེད་དཔེའི་ཡེ་ཤེས་དང་། མཐོང་ལམ་ཐོབ་པའི་ཚེ་རླུང་སེམས་དབུ་མར་ཞུགས་པས་བདེ་བས་བརྒྱན་པའི་ཚུལ་གྱིས་རྟོགས་པ་ཡོད་པའི་ཕྱིར་རོ། །གཞུང་འདི་དག་གི་དོན་ལ་གཅེས་པའི་མན་ངག་བཤད་པར་བྱ་སྟེ། སྤྱིར་ལྟ་བ་ལ་རྟོགས་བྱེད་ཀྱི་ཡེ་ཤེས་ལ་ལྟ་བར་བྱས་པ་དང་། རྟོགས་བྱའི་ཡུལ་ལ་ལྟ་བར་བྱས་པ་གཉིས་ལས་འདི་ཕྱི་མ་ཡིན་ཅིང་། དེ་ཡང་གྲུབ་མཐའ་རང་རང་གི་ལུགས་ཀྱི་རིགས་པ་ཡང་དག་གིས་དཔྱད་པའི་ཚེ། བློ་དེའི་ངོར་གནོད་པ་མེད་པར་གྲུབ་པ་ལ་ལྟ་བར་འཇོག་པ་ཡིན་པས། ཕྱི་རོལ་པ་རྣམས་ཀྱིས་ནི་རིགས་པས་དཔྱད་པའི་ཚེ། གང་ཟག་གི་བདག་གྲུབ་པ་ལ་གནོད་པ་མ་མཐོང་། ཉན་ཐོས་སྡེ་གཉིས་ཀྱིས་ནི། རྡུལ་ཕྲན་དང་ཤེས་པ་སྐད་ཅིག་མ་གྲུབ་པ་ལ་གནོད་པ་མ་མཐོང་ལ། སེམས་ཙམ་པ་རྣམས་ཀྱིས་ནི་གཟུང་འཛིན་གཉིས་མེད་ཀྱི་ཤེས་པ་གསལ་རིག་ཙམ་གྲུབ་པ་ལ་གནོད་པ་མ་མཐོང་བས། དེ་དག་གྲུབ་མཐའ་དེ་དང་དེ་དག་གི་ལྟ་བར་འཇོག་གོ །དབུ་མ་པས་ནི་གཅིག་དུ་བྲལ་ལ་སོགས་པའི་རིགས་པ་ཡང་དག་གིས་དཔྱད་པའི་ཚེ་དངོས་པོར་གྲུབ་པའི་ཆོས་ཅུང་ཟད་ཙམ་ཡང་མི་རྙེད་ཅིང་། དེ་བཀག་པའི་དངོས་མེད་ཀྱང་མི་རྙེད་དེ། དགག་བྱ་དངོས་པོ་མེད་པའི་ཕྱིར་རོ། །གཉིས་ཀའང་མི་རྙེད་དེ། རེ་རེ་བ་མེད་པའི་ཕྱིར་རོ། །གཉིས་ཀ་མ་ཡིན་པ་ཡང་མི་རྙེད་དེ། བློས་བཏགས་པའི་མཐའ་ནི་དེ་གཉིས་སུ་ཟད་པའི་ཕྱིར་རོ། །དེས་ན་མཐའ་བཞིའི་སྤྲོས་པ་གང་ཡང་མ་རྙེད་པ་ལ་སྤྲོས་བྲལ་དང་། བརྗོད་བྲལ་དང་། ཟུང་འཇུག་གི་ཐ་སྙད་བཏགས་པ་ཙམ་མོ། །འོ་ན་རིགས་པ་ཡང་དག་གི་ངོར་གནོད་པ་མེད་པར་གྲུབ་པ་ལ་ལྟ་བར་འཇོག་པ་དང་འགལ་ཏེ། དེའི་ངོར་ཅུང་ཟད་ཙམ་ཡང་གྲུབ་པ་མེད་པའི་ཕྱིར་རོ་སྙམ་ན། འདི་ལ་དགོངས་ནས་རྗེ་བཙུན་གྱིས་མངོན་རྟོགས་ལྗོན་ཤིང་ལས། དབུ་མ་པ་ལ་གནས་ལུགས་དང་ལྟ་བ་མེད་པར་གསུངས་པས་དེ་དག་གི་མིང་གིས་བཏགས་པ་ཙམ་མོ། །དེས་ན་ཐོས་པའི་ལྟ་བ་ཕ་རོལ་ཏུ་ཕྱིན་པའི་དབུ་མ་ལས་ལྷག་པ་གཞན་མེད་པའི་དོན་ཡང་། མཐའ་བཞིའི་སྤྲོས་བྲལ་དུ་གཏན་ལ་ཕབ་ན་དབུ་མའི་ལྟ་བ་དེ་ཉིད་ཡིན་ཅིང་། སྤྲོས་བྲལ་དུ་གཏན་ལ་མ་ཕབ་ན་མཐའ་བཞི་གང་རུང་ལས་མ་འདས་པས་དབུ་མ་ལས་དམན་པའོ། །དེས་ན་སྤྲོས་བྲལ་དུ་གཏན་ལ་ཕབ་པའི་ཆ་ལ་ཁྱད་པར་མེད་པ་ཡིན་གྱི། ཉམས་མྱོང་ལ་ཁྱད་པར་ཡོད་པ་ནི་བཤད་ཟིན་ཏོ། །ལྟ་བའི་འཇོག་ཚུལ་འདི་བཞིན་དུ་ཤེས་ན་གོང་དུ་བཤད་པའི་མདོ་སྔགས་ཀྱི་ཐོས་པའི་ལྟ་བ་ལ་ཁྱད་པར་མེད་པ་དང་། འོག་ཏུ་རིགས་གསུམ། རིགས་ལྔ་ལ་སོགས་པའི་ཁྱད་པར་བསྒོམ་པ་ཡིན་གྱི་ལྟ་བ་མ་ཡིན་པར་གསུངས་པ་དང་། ཀུན་རྫོབ་ལྟ་བར་འཁྲུལ་དུ་མི་རུང་བར་གསུངས་པའི་དོན་རྣམས་ཀྱང་བདེ་བླག་ཏུ་རྟོགས་པར་འགྱུར་རོ། །གཉིས་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ཁ་ཅིག་དབུ་མའི་ཞེས་སོགས་བཅུ་གཅིག་སྟེ། རྙིང་མ་པ་ཁ་ཅིག དབུ་མ་ནས་རྣལ་འབྱོར་ཆེན་པོའི་བར་ལ་དོན་དམ་དང་ཀུན་རྫོབ་ཀྱི་ལྟ་བ་གཉིས་སུ་བྱས་ནས་དོན་དམ་གྱི་ལྟ་བ་སྤྲོས་བྲལ་ཡིན་པ་ཐམས་ཅད་མཐུན་ཅིང་། ཀུན་རྫོབ་ཀྱི་ལྟ་བ་ལ་དབུ་མ་པ་ཇི་ལྟར་སྣང་བ་བཞིན་ཡིན་པ་དང་། བྱ་རྒྱུད་ཀྱི་ཀུན་རྫོབ་རིགས་གསུམ་གྱི་དཀྱིལ་འཁོར་དང་། སྤྱོད་རྒྱུད་དང་རྣལ་འབྱོར་རྒྱུད་ཀྱི་ཀུན་རྫོབ་རིགས་ལྔའི་རྒྱལ་བ་དང་། རྣལ་འབྱོར་ཆེན་པོའི་ཀུན་རྫོབ་དམ་པ་རིགས་བརྒྱ་ཡིན་པས་ཀུན་རྫོབ་ཀྱི་ལྟ་བ་ལ་བཟང་ངན་གྱི་རིམ་པ་ཡོད་པ་ཡིན་ནོ་ཞེས་ཟེར་རོ། །གཉིས་པ་ལ་གསུམ་སྟེ། ལྟ་སྒོམ་གྱི་ཁྱད་པར་སྤྱིར་བསྟན། བསྒོམ་པའི་ཁྱད་པར་བྱེ་བྲག་ཏུ་བཤད། དེས་ན་ཀུན་རྫོབ་ལྟ་བར་མི་འཐད་པའོ། །དང་པོ་ནི། ལྟ་སྒོམ་ཞེས་སོགས་ཚིགས་བཅད་གཉིས་ཏེ། ཤེས་རབ་ཀྱིས་གནས་ལུགས་རྟོགས་པ་ལྟ་བ་དང་། དེ་རྟོགས་པའི་ཐབས་དམིགས་པའི་བྱེ་བྲག་རྣམས་བསྒོམ་པ་ཡིན་པའི་ཁྱད་པར་མ་ཕྱེད་པས་ཀུན་རྫོབ་ལྟ་བར་འདོད་ཅིང་། དེ་ལ་བཟང་ངན་འདི་འདྲའི་དབྱེ་བ་འཁྲུལ་པ་ཡིན་ཏེ། རིགས་གསུམ་སོགས་སུ་བསྒོམ་པ་ནི་སྒོམ་པ་ཡིན་གྱི་ལྟ་བ་མ་ཡིན་ཅིང་། སྒོམ་པ་ལ་ཡང་བྱ་སྤྱོད་རྣལ་འབྱོར་གྱི་རྒྱུད་གསུམ་ལས་སྣང་བ་ལྷ་རུ་བསྒོམ་པ་གསུངས་པ་མེད་པའི་ཕྱིར་རོ། །གཉིས་པ་ལ་གཉིས་ཏེ། སྒོམ་ཚུལ་དམིགས་པའི་ཁྱད་པར། བསྒོམ་གཞི་ཀུན་རྫོབ་ཀྱི་ཁྱད་པར་རོ། །དང་པོ་ནི། འོན་ཀྱང་བྱ་བའི་ཞེས་སོགས་ཉེར་གཉིས་ཏེ། ལུང་སྦྱོར་ཡི་གེ་མང་གིས་དོགས་པས་བཞག་པ་ནི། རྡོ་རྗེ་གུར་གྱི་འགྲེལ་པ་ལས། བྱ་བའི་རྒྱུད་ཅེས་བྱ་བ་ནི། ཕྱི་རོལ་རྔཾ་རྡུང་མ་ལ་སོགས་པའི་ལྷར་དམིགས་པ་དང་། གཙང་སྦྲ་དང་སྡོམ་པ་ལ་སོགས་པ་ལྷུར་ལེན་པའོ། །བྱ་བའི་སྦྱོར་བ་ཞེས་བྱ་བ་ནི། བདག་ལས་ཕྱི་རོལ་ཏུ་དམིགས་པའོ། །ཞེས་པ་དང་། དགྲ་ནག་གི་འགྲེལ་པ་ལས། བྱ་བ་དང་སྤྱོད་པའི་རྒྱུད་ལའང་བསྒྲུབ་བྱ་དང་སྒྲུབ་པའི་ཐབས་དུས་ཡུན་རིང་པོར་རྗེས་སུ་མི་འཇུག་སྟེ་དེ་དག་ནི་བཏགས་པ་ལས་བྱུང་བ་ཉིད་ཡིན་ཏེ། དེས་ནི་འདི་ལྟར་རས་བྲིས་ལ་སོགས་པར་རྟོགས་པའི་ལྷའི་སྟོབས་ཀྱིས་དངོས་གྲུབ་རྫོགས་པར་བྱེད་པའི་ཕྱིར་རོ། །རྣལ་འབྱོར་གྱི་རྒྱུད་དུ་ནི་ཁྱད་པར་འདི་ཡོད་དེ། རང་གི་ལྷའི་རྣལ་འབྱོར་གྱིས་རས་བྲིས་ལ་སོགས་པར་རྟོགས་པའི་ལྷ་ལ་དམིགས་ནས་མཐུན་པར་བསྒྲུབ་པའི་དངོས་གྲུབ་སྒྲུབ་པར་བྱེད་དོ། །ཞེས་པ་དང་། འོད་ཟེར་ཅན་གྱི་རྟོག་པ་ལས། བདག་ཉིད་རྣམ་པར་སྣང་མཛད་ཀྱི་གཟུགས་པདྨའི་ལྟེ་བར་སེངྒེའི་ཁྲི་ལ་རྡོ་རྗེ་སྐྱིལ་ཀྲུང་གིས་བཞུགས་པ་གསེར་གྱི་མདོག་ཅན། བྱང་ཆུབ་མཆོག་གི་ཕྱག་རྒྱ་ཅན་ཏིང་ངེ་འཛིན་ལ་སྙོམས་པར་བཞུགས་པ། རལ་པའི་དབུ་རྒྱན་འཆང་ཞིང་ཞི་བ། ཡི་གེ་མྃ་ཉིད་ཀྱིས་བརྗོད་པའི་རྣམ་པར་བསམ་པར་བྱའོ། །དེ་ནས་མདུན་དུ་ཟླ་བའི་གཟུགས་ལས་རྣམ་པར་སྣང་མཛད་ལས་བྱུང་བའི་འོད་ཟེར་ཅན་ནི། ཨོཾ་མ་རཱི་ཙྱཻ་སྭཱ་ཧཱ། ཞེས་བྱ་བས་གསེར་གྱི་མདོག་ཅན་སྐུད་པ་དང་བཅས་པའི་ཁབ་འཛིན་པའི་ཕྱག་གིས་གདུག་པ་ཅན་གྱི་ཁ་དང་། མིག་ཡང་དག་པར་དྲུབས་པ་མདུན་དུ་རྣམ་པར་བསམ་པར་བྱའོ། །ཞེས་དང་། དཱ་ན་ཤཱི་ལས། ལྷག་པའི་ལྷ་མཆོག་དེ་ཡི་མདུན་དུ་ཡང་། །བདག་ཉིད་ཇི་ལྟའི་ཁྲོ་རྒྱལ་བསམ་བྱ་སྟེ། །ཞེས་དང་། དེ་ཉིད་སྣང་བ་ལས། ཕྱག་རྒྱ་གང་དང་གང་ནས་འབྱུང་བ་དེ་དང་དེ་ཉིད་དུ་བཀྲོལ་ཏེ། ཡེ་ཤེས་པ་གཤེགས་སུ་གསོལ་ལོ། །གཞན་དུ་ན་ལྷ་ལ་བརྙས་པར་འགྱུར་ཞེས་སོགས་གསུངས་སོ། །རྣལ་འབྱོར་ཆེན་པོའི་རྒྱུད་དུ་ནི། དེ་བཞིན་ཉིད་ཀྱི་དག་པ་ཆོས་ཐམས་ཅད་རང་བཞིན་གྱིས་སྟོང་པ་ཉིད་ཡིན་པ་དང་། ལྷ་སོ་སོའི་དག་པ་ཀུན་རྫོབ་ཀྱི་སྣང་བ་ཐམས་ཅད་ལྷར་བསྒོམ་པ་དང་། རང་རིག་པའི་དག་པ་དེ་ཐམས་ཅད་བདེ་ཆེན་གྱི་ཡེ་ཤེས་སུ་བསྒྱུར་བ་སྟེ། དག་པ་གསུམ་གྱི་རང་བཞིན་བཤད་དེ། ཀྱཻ་རྡོ་རྗེ་ལས། ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ། །ཞེས་དང་། རང་རིག་བདག་ཉིད་དག་པ་ཉིད། དག་པ་གཞན་གྱིས་རྣམ་གྲོལ་མིན། །ཞེས་གསུངས་སོ། །གཉིས་པ་ལ་གཉིས་ཏེ། རྒྱུད་སྡེ་འོག་མར་ཀུན་རྫོབ་ལྷར་མི་བསྒོམ་པ། རྣལ་འབྱོར་ཆེན་པོར་ཀུན་རྫོབ་ལྷར་བསྒོམ་པའོ། །དང་པོ་ནི། གལ་ཏེ་བྱ་བའི་ཞེས་སོགས་ཉེར་གཉིས་ཏེ། བྱ་རྒྱུད་ཀྱི་ཡང་ཀུན་རྫོབ་ལྷ་རུ་གནས་ན། ཟས་གཅོད་པ་ལ་སོགས་པའི་དཀའ་ཐུབ་དང་། ཁྲུས་ལ་སོགས་པའི་གཙང་སྦྲ་ག་ལ་འཐད་དེ། ལྷ་ལ་གཙང་དང་སོགས་སོ། །ཁ་ཅིག་སྤྱོད་རྒྱུད་ཀྱི་ཡང་ཀུན་རྫོབ་ཀྱི་ལྟ་བ་རྣལ་འབྱོར་གྱི་རྒྱུད་དང་མཐུན་པས་རིགས་ལྔ་ཡིན་ཅིང་། སྤྱོད་པ་བྱ་བའི་རྒྱུད་བཞིན་དུ་གཙང་སྦྲ་བྱེད་དོ། །ཞེས་ཟེར་བ་འདི་ཡང་དེ་ལྟར་ངེས་པ་མེད་དེ། སྤྱོད་རྒྱུད་འདི་ནི་ཕྱིའི་བྱ་བ་དང་། ནང་ཏིང་ངེ་འཛིན་གཉིས་ཀ་སྟོན་པའི་རྒྱུད་ཡིན་པས། ལས་ཚོགས་བསྒྲུབ་པ་སོགས་གཙང་སྦྲ་སྤྱོད་མོད་ཀྱི། ཕལ་ཆེར་བདག་ཉིད་ལྷར་བསྒོམས་ནས། རང་ཉིད་ཅི་བདེར་སྤྱོད་པར་གསུངས་པའི་ཕྱིར་རོ། །སྤྱོད་པའི་རྒྱུད་ཀྱི་ཀུན་རྫོབ་ལྷར་བསྒོམ་པ་ཉིད་ཀྱང་མེད་ཅིང་། བསྒོམ་བྱའི་ལྷ་ལ་རིགས་ལྔའི་དོན་གྲུབ་ཡང་ཐ་སྙད་མེད་ལ། ཕྱག་རྒྱ་དང་། སྐུ་མདོག་དང་། ཡེ་ཤེས་ལྔ་དང་སྦྱར་བའི་རྣམ་གཞག་ཀྱང་། རྣལ་འབྱོར་གྱི་རྒྱུད་དེ་ཉིད་བསྡུས་པ་བཞིན་དུ་དེར་མ་གསུངས་པས་རིགས་ལྔ་མེད་དོ། །འདིའི་མཚན་གཞི་ནི་ཨ་ར་པ་ཙ་ན་ལྷ་ལྔ་མ་དང་། མི་འཁྲུགས་པ་ལྷ་དགུ་མ་ལྟ་བུ་ཡིན་པར་སེམས་སོ། །ཁ་ཅིག་སྦྱོང་རྒྱུད་ལ་སྤྱོད་རྒྱུད་དུ་བྱས་ནས་རིགས་ལྔའི་ཐ་སྙད་མེད་པ་དང་། ཕྱག་རྒྱ་དང་། སྐུ་མདོག་དང་། རྣམ་གཞག་རྣལ་འབྱོར་གྱི་རྒྱུད་བཞིན་མ་གསུངས་པ་ནི་སྦྱོང་རྒྱལ་དང་། རྒྱ་མཆོག་རིན་ཆེན་སོགས་ཀྱི་ཐ་སྙད་དང་། སྦྱོང་རྒྱལ་དཀར་པོ་སོགས་ཀྱི་ཁ་དོག་དང་། རྒྱལ་མཆོག་རིན་ཆེན་མཆོག་སྦྱིན་དང་། ས་གནོན་སོགས་ཀྱི་ཕྱག་རྒྱ་མཛད་པ་ལ་འཆད་པ་ནི་མི་འཐད་དེ། རྗེ་བཙུན་གྱིས་གཞན་ཕན་སྤྱི་ཆིངས་སུ་སྦྱོང་རྒྱུད་རྣལ་འབྱོར་གྱི་རྒྱུད་དུ་གསུངས་པའི་ཕྱིར་དང་། རྒྱུད་ཉིད་ལས་ཀྱང་། ཛཿཧཱུྃ་བཾ་ཧོཿཐུགས་རྗེའི་བདག །ཚུར་གཤེགས་ཞེས་ནི་བརྗོད་ནས་ཀྱང་། །གསང་བའི་བཅིང་བ་བཅིངས་ནས་ནི། །མཛུབ་གཉིས་ལྕགས་ཀྱུའི་ཚུལ་དུ་བྱ། །ཞེས་སོགས་ཡེ་ཤེས་པ་གཞུག་པ་བཤད་པའི་ཕྱིར་དང་། རྒྱལ་མཆོག་རིན་ཆེན་སོགས་ཀྱི་སྐུ་མདོག་དང་ཕྱག་རྒྱ་སྦྱོང་རྒྱུད་ཀྱི་དངོས་བསྟན་ལ་མེད་པའི་ཕྱིར་དང་། རྗེས་འཇུག་གིས་བཀྲལ་བའི་དབང་དུ་བྱས་ན་པཎྜི་ཏ་སྨྲྀ་ཏི་ཛྙཱ་ནས་ཡེ་ཤེས་ལྔའི་རྣམ་གཞག་དང་ཡང་སྦྱར་བའི་ཕྱིར་རོ། །ཀུན་རྫོབ་ལྷ་རུ་གནས་ན་དཀའ་ཐུབ་དང་གཙང་སྦྲ་མེད་ཅིང་། སྦྱང་གཞི་སྦྱོང་བྱེད་སྦྱར་བ་རྣལ་འབྱོར་ཆེན་པོའི་ཁྱད་ཆོས་ཡིན་པ་དེས་ན་རྣལ་འབྱོར་རྒྱུད་ཡན་ཆད་སོགས་སོ། །གཉིས་པ་ནི། རྣལ་འབྱོར་ཆེན་པོའི་ཞེས་སོགས་དྲུག་སྟེ། རྣལ་འབྱོར་ཆེན་པོའི་རྒྱུད་སྡེ་ལས། ཀུན་རྫོབ་སྣང་བ་འདི་ཇི་ལྟར་སྣང་བ་བཞིན་དུ་བས་པ་མ་ཡིན་པའི་ཕྱིར། བསྐྱེད་རིམ་གྱི་ཐབས་ལ་མཁས་པའི་ཁྱད་པར་གྱིས། སྦྱང་གཞི་མ་དག་པ་སྣང་བ་རྣམས། སྦྱོང་བྱེད་ཡེ་ཤེས་ལྔར་སྤྲོད་པ་དེའི་ཚེ། དམ་པ་རིགས་བརྒྱ་དང་། འབུམ་ལ་སོགས་པའི་དབྱེ་བ་རྒྱལ་བས་གསུངས་ཏེ། ཟླ་གསང་ཐིག་ལེ་ལས། རིགས་ནི་རྣམ་པ་བརྒྱར་བསྟན་དང་། །མདོ་རུ་བསྡུ་ན་རྣམ་པ་ལྔ། །ལུས་དང་ངག་དང་ཡིད་སྦྱོར་བས། །གསུམ་དུ་ཡང་ནི་འགྱུར་བ་ཡིན། །ཞེས་དང་། ཀྱཻ་རྡོ་རྗེ་ལས། རྒྱས་པར་རབ་ཏུ་ཕྱེ་བ་ལས། །རིགས་ནི་རྣམ་པ་དྲུག་ཏུ་བརྗོད། །རྣམ་གསུམ་རྣམ་པ་ལྔ་ཉིད་ཀྱང་། །ཞེས་དང་། རིགས་ཀྱི་ཚོགས་ལ་རིགས་ནི་དུ་མ་རྣམས། །དེ་རྣམས་རིགས་ལ་རིགས་ནི་རྣམ་པ་བརྒྱ། །དེ་རྣམས་ལ་ཡང་འབུམ་ཕྲག་རིགས་ཆེན་རྣམས། །བྱེ་བའི་རིགས་ལ་གྲངས་ནི་མེད་པར་འགྱུར། །ཞེས་སོ། །དེ་ལ་དམ་པ་རིགས་བརྒྱ་ལ་ཀྱཻ་རྡོ་རྗེའི་དགོངས་པ་ནི། སྦྱང་གཞི་འབྱུང་བ་ལྔ་པོ་རེ་རེ་ལ་སྦྱང་བྱ་ཉོན་མོངས་པ་ལྔ་ལྔ་གནས་པས་ཉེར་ལྔ། དེ་རེ་རེ་ཡང་ནང་སེལ་གྱིས་ཕྱེ་ན་ཤ་ཆེན་སྤྱི་ཁྱབ་ཏུ་བཏང་བའི་བདུད་རྩི་བཞི་བཞི་སྟེ་བརྒྱའོ། །སྦྱོང་བྱེད་ལམ་ལ་སྦྱར་ན་བསྐྱེད་རིམ་གྱི་རིགས་བརྒྱ་ནི། རིགས་ལྔ་པོ་རེ་རེ་ལ་མངོན་བྱང་ཡེ་ཤེས་ལྔ་ལྔས་ཕྱེ་བས་ཉེར་ལྔ། དེ་ལ་འཁོར་ཡུམ་བཞི་བཞི་དང་ལྡན་པས་བརྒྱའོ། །རྫོགས་རིམ་གྱི་རིགས་བརྒྱ་ནི། འདིར་ཐིག་ལེ་ལ་སྦྱར་ན་ཐིག་ལེ་ཕྲ་མོ་གཅིག་ཀྱང་འབྱུང་བ་ལྔ་དང་ལྡན་པ། དེ་རེ་རེ་ཡང་བདུད་རྩི་བཞི་བཞིས་ཕྱེ་བས་ཉི་ཤུ། རྟེན་ཐིག་ལེ་གཅིག་ལ་ཡང་མཚོན་བྱེད་དཔེའི་ཡེ་ཤེས་ལྔ་ལྔ་དང་ལྡན་པས་བརྒྱའོ། །འབྲས་བུའི་དམ་པ་རིགས་བརྒྱ་ནི། སྤྲུལ་པའི་སྐུ་རིགས་ལྔ་པོ་རེ་རེ་ལ་ཡེ་ཤེས་ལྔ་ལྔས་ཕྱེ་བས་ཉེར་ལྔ། དེ་ཚད་མེད་པའམ་ལྷ་མོ་བཞི་བཞི་དང་ལྡན་པས་བརྒྱའོ། །གསང་འདུས་ཀྱི་དགོངས་པ་ནི། སྤྱོད་བསྡུས་ལས། དེ་བཞིན་གཤེགས་པ་རིགས་ལྔའམ་ཡུམ་བཞི། ས་སྙིང་། ཕྱག་རྡོར། ནམ་སྙིང་། འཇིག་རྟེན་དབང་ཕྱུག སྒྲིབ་པ་རྣམས་སེལ་ཏེ་ལྔ། གཟུགས་རྡོ་རྗེ་མ་སོགས་ལྷ་མོ་ལྔ་སྟེ། བཅུ་དགུ་པོ་རེ་རེ་ལ་རིགས་ལྔ་ལྔར་ཕྱེ་བས་དགུ་བཅུ་རྩ་ལྔ་དང་། ཡེ་ཤེས་ལྔ་སྟེ་བརྒྱ་ལ་བཤད་དོ། །རྙིང་མ་པ་རྣམས་ཀྱིས་ནི་བུདྡྷ་བཞི་བཅུ་ཞེ་གཉིས། ཁྲག་འཐུང་ལྔ་བཅུ་རྩ་བརྒྱད་ལ་དམ་པ་རིགས་བརྒྱར་འདོད་དོ། །གསུམ་པ་ནི། དེས་ན་ཀུན་རྫོབ་ཞེས་སོགས་ཚིགས་བཅད་གཅིག་སྟེ། རྒྱུད་སྡེ་འོག་མ་གསུམ་ལ་ཀུན་རྫོབ་ལྷར་བསྒོམ་པ་མེད་ཅིང་། བླ་མེད་ལ་ཀུན་རྫོབ་ལྷར་བསྒོམ་པ་ཡོད་ཀྱང་ཐབས་ཀྱི་ཁྱད་པར་ཡིན་གྱི། ལྟ་བ་མ་ཡིན་པ་དེས་ན་ཀུན་རྫོབ་སྣང་བའི་ལྡོག་པ་དང་། ལྷར་བསྒོམ་པ་མ་ཕྱེད་པས་གསང་སྔགས་རྙིང་མ་པ་རྣམས་ཀྱིས། རྒྱུད་སྡེ་བཞིའི་ཀུན་རྫོབ་ཀུན་ལྟར་བསྒོམ་ནས་དེ་ལྟ་བ་དང་འཁྲུལ་ཏེ། དེའི་བཟང་ངན་གྱི་རིམ་པ་ལ་ལྟ་བ་བཟང་ངན་གྱི་རིམ་པར་འཇོག་པའི་རྒྱུ་མཚན་དེ་ལྟར་ཡིན་ནོ། །གསུམ་པ་ལ་བཞི་སྟེ། སྔ་འགྱུར་གྱི་ལུགས་བརྗོད། ཕྱི་འགྱུར་གྱི་ལུགས་བརྗོད། ཕྱི་འགྱུར་བའི་ལུགས་འཐད་པར་སྒྲུབ། དེས་སྔ་འགྱུར་བའི་ལུགས་མི་འཐད་པར་གྲུབ་པའོ། །དང་པོ་ནི། གསང་སྔགས་སྔ་འགྱུར་ཞེས་སོགས་དྲུག་སྟེ། སྔ་འགྱུར་བ་རྣམས་ནི་རྣལ་འབྱོར་ཡོ་ག་དང་། རྣལ་འབྱོར་ཆེན་པོ་མ་ཧཱ་ཡོ་ག་དང་། རྗེས་སུ་རྣལ་འབྱོར་ཨ་ནུ་ཡོ་ག་དང་། ཤིན་ཏུ་རྣལ་འབྱོར་ཨ་ཏི་ཡོ་ག་ཞེས་བྱ་བ་རྣམ་པ་བཞི་ཐེག་པའི་རིམ་པ་ཡིན་ཞེས་ཟེར་ཞིང་། ཤིན་ཏུ་རྣལ་འབྱོར་ཐེག་པ་རིམ་དགུའི་ཡང་རྩེ་ཡིན་པས་བཟང་བར་འདོད་དོ། །གཉིས་པ་ནི། གསང་སྔགས་ཕྱི་འགྱུར་ཞེས་སོགས་ལྔ་སྟེ། དེ་དག་གི་རྣལ་འབྱོར་བཞིའི་གོ་རིམ་ཡང་སྔ་མ་དང་མི་འདྲ་ཞིང་། ངོ་བོ་ཡང་བསྐྱེད་རྫོགས་ཀྱི་ཏིང་ངེ་འཛིན་གྱི་རིམ་པ་ཡིན་གྱི། རྒྱུད་སྡེའི་རིམ་པར་མི་བཞེད་དེ། དགྲ་ནག་གི་རྒྱུད་ལེའུ་བཅུ་བདུན་པ་ལས། རྡོ་རྗེ་སེམས་དཔའ་རྫོགས་པ་ནི། །རྣལ་འབྱོར་ཡིན་པར་འདི་ལྟར་འདོད། །དེ་ཡི་རྒྱུ་མཐུན་ལྷ་ཡི་སྐུ། །རྗེས་ཀྱི་རྣལ་འབྱོར་ཡིན་པར་གྲགས། །འཁོར་ལོ་ཐམས་ཅད་ཡོངས་རྫོགས་པར། །ཤིན་ཏུ་རྣལ་འབྱོར་ཡིན་པར་གྲགས། །སྐུ་དང་གསུང་དང་ཐུགས་རྣམས་དང་། །ལྷ་ཡི་མིག་སོགས་བྱིན་བརླབ་དང་། །ཡེ་ཤེས་འཁོར་ལོ་གཞུག་པ་དང་། །བདུད་རྩི་མྱང་བ་དག་དང་ནི། །མཆོད་དང་བསྟོད་པ་ཆེན་པོ་དག །རྣལ་འབྱོར་ཆེན་པོ་ཞེས་བྱའོ། །ཞེས་དང་། དཔལ་མཆོག་གི་འགྲེལ་པ་ལས། དེ་ལ་དེ་ཁོ་ན་ཉིད་རྣམ་པ་ལྔ་བསྒོམས་པས། བདག་ཉིད་རང་གི་ལྷའི་ངོ་བོ་ཉིད་དུ་བསྐྱེད་པ་བསྒོམ་པའི་རྣལ་འབྱོར་ཞེས་བྱའོ། །ཡེ་ཤེས་སེམས་དཔའ་བཅུག་ནས་དེ་དང་ལྷན་ཅིག་ཏུ་གྱུར་པར་ལྷག་པར་མོས་པ་ནི་རྗེས་སུ་རྣལ་འབྱོར་ཞེས་བྱའོ། །རྒྱུ་བ་དང་མི་རྒྱུ་བ་ཐམས་ཅད་ཀྱི་ངོ་བོ་ཉིད་ཀྱི་རང་བཞིན་དུ་བདག་ཉིད་བསྒོམ་པ་ནི་ཐམས་ཅད་ཀྱི་རྣལ་འབྱོར་ཞེས་བྱའོ། །རྣལ་འབྱོར་དང་རྗེས་སུ་རྣལ་འབྱོར་དང་། ཐམས་ཅད་ཀྱི་རྣལ་འབྱོར་རྣམ་པར་བསྒོམས་པས་སེམས་རྩེ་གཅིག་ཏུ་གྱུར་པ་གང་ཡིན་པ་དེ་ནི་ཤིན་ཏུ་རྣལ་འབྱོར་ཞེས་བྱའོ། །ཞེས་དང་། བཤད་རྒྱུད་རྡོ་རྗེ་ཕྲེང་བའི་དགོངས་པ་སློབ་དཔོན་འཕགས་པ་ཀླུ་སྒྲུབ་ཀྱིས། གསང་བ་འདུས་པའི་བསྐྱེད་པའི་རིམ་པ་ལ་རྣལ་འབྱོར་བཞི་སྦྱོར་བར་མཛད་པ་རྣམས་ཏིང་ངེ་འཛིན་གྱི་རིམ་པ་ཁོ་ནའོ། །གསུམ་པ་ནི། དེས་ན་རྒྱུད་སྡེ་ཞེས་སོགས་ཚིགས་བཅད་བཞི་སྟེ། རྣལ་འབྱོར་བཞི་དང་། རྒྱུད་སྡེ་བཞི་ཐ་དད་དུ་ཡོད་པ་དེས་ན། རྒྱུད་སྡེ་བཞིའི་རྣལ་འབྱོར་དང་། རྣལ་འབྱོར་ཆེན་པོ་དང་། རྣལ་འབྱོར་བཞིའི་རྣལ་འབྱོར་དང་། རྣལ་འབྱོར་ཆེན་པོ་དོན་མི་གཅིག་སྟེ། སྔ་མ་རྒྱུད་སྡེའི་རིམ་པ་ཡིན་ཅིང་། ཕྱི་མ་ཏིང་ངེ་འཛིན་གྱི་རིམ་པ་ཡིན་པའི་ཕྱིར། དཔེར་ན་ཀླུ་ཆེན་སོགས་སོ། །དེས་ན་གསང་སྔགས་གསར་མ་ལ་རྣལ་འབྱོར་ཆེན་པོའི་ལྟག་ན་དེ་ལས་ལྷག་པའི་རྒྱུད་སྡེ་མེད་ཅིང་། རྣལ་འབྱོར་བཞིར་བྱས་པའི་རྣལ་འབྱོར་ཆེན་པོའི་གོང་ན་བསྒོམ་པའི་དམིགས་པ་ཉིད་ཀྱང་མེད་པས། རྣལ་འབྱོར་ཆེན་པོ་ལས་བཟང་བའི་ཤིན་ཏུ་རྣལ་འབྱོར་མི་འཐད་དོ། །རྣལ་འབྱོར་ཆེན་པོ་དེ་ལས་སྐྱེས་པའི་ཡེ་ཤེས་ནི་སྤྲོས་པ་མེད་ཅིང་། བརྗོད་པ་དང་བྲལ་བ་ཡིན་པས་ལྟ་བ་ཡིན་གྱི་ཐེག་པའི་རིམ་པར་མི་བཞེད་དེ། ཐེག་པའི་རིམ་པ་ནི་ལྟ་བ་རྟོགས་བྱེད་ཀྱི་ཐབས་ཀྱི་ཁྱད་པར་ཡིན་པའི་ཕྱིར་རོ། །བཞི་པ་ནི། ལུགས་འདི་ལེགས་པར་ཞེས་སོགས་ལྔ་སྟེ། རྣལ་འབྱོར་བཞི་ཏིང་ངེ་འཛིན་གྱི་རིམ་པ་ཡིན་པ་དང་། དེ་ལས་སྐྱེས་པའི་ཡེ་ཤེས་ལྟ་བ་ཡིན་པའི་ལུགས་འདི་ལེགས་པར་ཤེས་པར་གྱུར་ན། ཨ་ཏི་ཡོ་གའི་ལྟ་བ་ཤིན་ཏུ་རྣལ་འབྱོར་ཡང་བརྗོད་བྲལ་གྱི་ཡེ་ཤེས་ཡིན་གྱི། ཐེག་པའི་རིམ་པ་མ་ཡིན་པས་བརྗོད་བྲལ་གྱི་ཡེ་ཤེས་ལ་བརྗོད་བྱ་ཐེག་པར་བྱས་པ་ནི་སོགས་སོ། །བཞི་པ་ནི། དེས་ན་ཐོས་པའི་ཞེས་སོགས་དྲུག་སྟེ། དབུ་མ་ནས་རྣལ་འབྱོར་ཆེན་པོའི་བར་ལ་རྟོགས་བྱའི་ལྟ་བ་བཟང་ངན་མེད་པ་དེས་ན་ཐོས་བསམ་གྱིས་གཏན་ལ་ཕབ་པའི་ལྟ་བ་ནི་དབུ་མ་ཡན་ཆད་མཐུན་ཏེ། རྒྱུ་མཚན་དེའི་ཕྱིར་ན་རྡོ་རྗེ་མཁའ་འགྲོའི་འགྲེལ་པར་མདོ་སྡེ་ས་བཅུ་པ་དང་། དབྱིག་གཉེན་གྱིས་ཉི་ཤུ་པའི་ལུང་ཁུངས་སུ་མཛད་ནས། སྣང་བ་སེམས་སུ་བསྒྲུབ་པ་དང་། སྤྱོད་བསྡུས་སྒྲོན་མེར་བརྒྱད་སྟོང་པ་དང་། ལས་ཀྱི་སྒྲིབ་པ་ཐམས་ཅད་རྣམ་པར་དག་པའི་མདོ་དྲངས་ནས་ཆོས་ཐམས་ཅད་སྐྱེ་མེད་དུ་གཏན་ལ་ཕབ་པ་སོགས་སོ། །རྡོ་རྗེ་ཐེག་པའི་སྐབས་སུ་ཡང་ལྟ་བའི་ལུང་སྦྱོར་ཀུན། ཕ་རོལ་ཏུ་ཕྱིན་པ་བཞིན་ཐམས་ཅད་ཀྱིས་མཛད་པའི་ཕྱིར་རོ། །འོན་ཀྱང་ལྟ་བ་དེ་རྟོགས་པའི་ཐབས་སོགས་ནི་བཤད་ཟིན་ཏོ། །གཉིས་པ་ཞར་ལ་རྒྱུད་སྡེ་བཞིའི་སྒྲུབ་པ་ལ་འཁྲུལ་པ་དགག་པ་ལ་གསུམ་སྟེ། འཁྲུལ་པ་དགག་པ་མདོར་བསྟན། མ་འཁྲུལ་པའི་སྒྲུབ་པ་རྒྱས་པར་བཤད། །དེ་དག་དཀྲུགས་པ་སྨད་པས་དོན་བསྡུ་བའོ། །དང་པོ་ནི། རྒྱུད་སྡེ་བཞི་ཡི་ཞེས་སོགས་གཉིས་སོ། །གཉིས་པ་ལ་གསུམ་སྟེ། བྱ་བའི་རྒྱུད་ཀྱི་སྒྲུབ་པ། རྒྱུད་སྡེ་བར་པ་གཉིས་ཀྱི་སྒྲུབ་པ། རྣལ་འབྱོར་ཆེན་པོའི་སྒྲུབ་པ་བཤད་པའོ། །དང་པོ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་ལྔ་སྟེ། རྒྱུད་ལས་ཇི་ལྟར་གསུངས་པའི་ཚུལ། དེ་ཉིད་གྲུབ་ཆེན་རྣམས་ཀྱིས་བཀྲལ་བའི་ཚུལ། དེ་ལས་ས་སྐྱ་པའི་བཞེད་པ་ངོས་གཟུང་བ། རྟོག་པས་བརྟགས་པའི་ལུགས་དགག གནད་ཀྱི་དོན་བསྡུས་ཏེ་བསྟན་པའོ། །དང་པོ་ནི། སྤྱོད་པ་གསུམ་ཀ་མདོར་བསྡུས་ཏེ་བསྟན་པ་དཔུང་བཟངས། འཇུག་པའི་སྤྱོད་པ་གསལ་བར་སྟོན་པ་གསང་བ་སྤྱི་རྒྱུད། སྦྱོར་བའི་སྤྱོད་པ་གསལ་བར་སྟོན་པ་ལེགས་གྲུབ། སྒྲུབ་པའི་སྤྱོད་པ་གསལ་བར་སྟོན་པ་བསམ་གཏན་ཕྱི་མ་སྟེ། བྱ་བ་སྤྱིའི་རྒྱུད་ཆེན་བཞི་དང་། དམ་ཚིག་གསུམ་བཀོད་ལ་སོགས་པ་སོ་སོའི་རྒྱུད་སུམ་བརྒྱ་དང་དྲུག་ཅུ་ལྷག་ཙམ་ད་ལྟ་བོད་ན་བཞུགས་པ་འདི་རྣམས་ལས་བདག་བསྐྱེད་དངོས་སུ་མ་བསྟན་ཅིང་། དེར་མ་ཟད་རྒྱུད་སྡེ་གོང་མར་བྱ་རྒྱུད་ལ་བདག་བསྐྱེད་དང་། ཡེ་ཤེས་པ་གཞུག་པ་མེད་པར་གསལ་བར་བཤད་དེ། ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས། འཇིགས་པར་དམིགས་ཤིང་ཤིན་ཏུ་གཙང་སྦྲ་བྱེད་པ་དང་། ཡེ་ཤེས་སེམས་དཔའི་བདེ་བ་དམ་པ་མེད་པ་དང་། བདག་ཉིད་ལྷའི་སྙེམས་པ་མེད་པ་དང་། རྨད་དུ་བྱུང་བའི་སྤྱོད་ཡུལ་མ་ཡིན་པ་དང་། སྐྱོན་གྱི་རྒྱུ་རྟོག་པ་རབ་ཏུ་སྦྱོང་བས་སྒྲུབ་པར་བྱེད་པ་ནི་བྱ་བའི་རྒྱུད་ལ་གནས་སོ། །ཞེས་གསུངས་སོ། །གཉིས་པ་ལ་བཞི་སྟེ། བྱ་རྒྱུད་བླ་མེད་ལྟར་བཀྲལ་བ། རྣལ་འབྱོར་རྒྱུད་ལྟར་བཀྲལ་བ། སྤྱོད་རྒྱུད་ལྟར་བཀྲལ་བ། བྱ་རྒྱུད་རང་ལུགས་ལྟར་བཀྲལ་བའོ། །དང་པོ་ནི། འཕགས་པ་ཀླུ་སྒྲུབ་ཀྱིས་མཛད་པའི་སྤྱན་རས་གཟིགས་ཕྱག་སྟོང་པའི་སྒྲུབ་ཐབས་ལས། སྤྱན་རས་གཟིགས་འཁོར་བཅས་ཡན་ལག་བཞི་རྫོགས་སུ་བསྐྱེད་པའི་བསྐྱེད་རིམ་བཤད་ནས་དེའི་འོག་ཏུ། དེ་ནས་རྫོགས་པའི་རིམ་པ་བསྒོམ་པར་བྱ་སྟེ། ཟབ་པ་དང་ཕྲ་བའི་རྫོགས་རིམ་ནི་བླ་མའི་མན་ངག་ལས་ཤེས་པར་བྱའོ། །ཞེས་འབྱུང་བ་ལྟ་བུ་སྟེ། བསྐྱེད་རྫོགས་གཉིས་ནི་བླ་མེད་ཀྱི་ཁྱད་ཆོས་ཡིན་པའི་ཕྱིར་རོ། །དེ་བཞིན་དུ་སྒྲུབ་ཐབས་རྒྱ་མཚོ་དང་། ཕྱེད་དང་ཉིས་བརྒྱ་པ་དང་། བརྒྱ་རྩ་རྣམས་སུ་བཤད་པའི་བྱ་རྒྱུད་ཀྱི་ལྷའི་སྒྲུབ་ཐབས་རྣམས་དང་། ཛེ་ཏ་རིའི་གྲྭ་ལྔའི་སྒྲུབ་ཐབས་སོགས་གཞུང་ཆུང་ཕལ་ཆེ་བ་རྣམས་བླ་མེད་ལྟར་བཀྲལ་བ་ཡིན་ནོ། །ཞེས་རྗེ་བཙུན་བླ་མ་གསུང་ངོ་། །གཉིས་པ་ནི། དེ་ཉིད་བསྡུས་པའི་འགྲེལ་པར་སློབ་དཔོན་ཀུན་སྙིང་གིས། བྱ་བ་དང་། སྤྱོད་པ་དང་། གཉིས་ཀའི་རྒྱུད་ལ་སོགས་པའི་ཆོ་ག་ལ་མངོན་པར་ཞེན་པ་རྣམས་ཀྱིས་ཀྱང་ཆོ་ག་དེ་འདི་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ། །ཞེས་དོན་དེ་བཤད་པར་བྱ་བའི་ཕྱིར། སྙིང་པོ་ཕྱག་རྒྱས་སྔགས་རིང་རྣམས། །ཇི་ལྟར་འདོད་པའི་ཚུལ་གྱིས་ནི། །ཞེས་པ་ལ་སོགས་པའི་ཚུལ་གྱིས་སྟོན་ནོ། །ཞེས་གསུངས་ཤིང་དེའི་དོན་རྣལ་འབྱོར་རྒྱུད་ལས་གསུངས་པའི་ཆོ་ག་བྱ་སྤྱོད་ཀྱི་རྒྱུད་ལ་སྦྱར་ན་རུང་ཞེས་པ་ཡིན་ལ། ཇི་ལྟར་སྦྱོར་ཚུལ་ནི། རྣམ་སྣང་སྒྱུ་དྲྭར། རྣལ་འབྱོར་རྣམ་གསུམ་ཤེས་བྱ་སྟེ། །བྱིན་གྱིས་བརླབ་དང་ཡོངས་བརྟག་དང་། །གཟུགས་ཉིད་རྫོགས་པར་གྱུར་པ་ནི། །རྣལ་འབྱོར་ཡིན་ཞེས་སངས་རྒྱས་གསུང་། །ཞེས་སོགས་རྣལ་འབྱོར་གསུམ་གསུངས་པའི་དང་པོ་བྱ་རྒྱུད་ལ་སྦྱོར་བ་ཡིན་པར། དེའི་འགྲེལ་པར་སློབ་དཔོན་ཀུན་སྙིང་གིས་གསུངས་པ་ལྟར་ཡིན་གྱི། ཏིང་ངེ་འཛིན་གསུམ་ལ་སོགས་པ་རྣལ་འབྱོར་རྒྱུད་ལས་ཇི་ལྟར་གསུངས་པ་ལྟར་སྦྱོར་བ་ནི་མ་ཡིན་ནོ། །ཚུལ་འདི་དང་མཐུན་པའི་སྒྲུབ་ཐབས་ཟུར་དུ་བྱེད་པ་ནི་མ་མཐོང་ངོ་། །ཞེས་རྗེ་བླ་མས་གསུངས་སོ། །ཁོ་བོའི་རྟོག་པ་ལ་ནི་སྒྲུབ་ཐབས་རྒྱ་མཚོ་དང་། བརྒྱ་རྩ་སོགས་ནས་བཤད་པའི་བྱ་རྒྱུད་ཀྱི་ལྷའི་སྒྲུབ་ཐབས་རྣམས་རྣལ་འབྱོར་རྒྱུད་ཀྱི་དབང་དུ་བྱས་པ་བདག་ཉིད་ཆེན་པོ་འདིའི་དགོངས་པ་ཡིན་ནམ་སྙམ་སྟེ། གཞུང་འདིར་ཡང་བདག་བསྐྱེད་སྒྲུབ་ཐབས་ཡོད་པ་ནི། རྣལ་འབྱོར་རྒྱུད་ཀྱི་རྗེས་འབྲངས་ནས། །དེ་ཡི་ལུགས་བཞིན་མཛད་པ་ཡིན། །ཞེས་དང་། འཆད་ཁ་བ་ནམ་མཁའ་འབུམ་གྱི་དྲིས་ལན་ལས། དོན་ཞགས་ལ་སོགས་པའི་རྒྱུད་ལ་བརྟེན་ནས་བདག་ལྷར་བསྐྱེད་པར་བཤད་པ་དེ་རྣལ་འབྱོར་གྱི་རྒྱུད་ཀྱི་ལུགས་སུ་བགྱིས་པར་གདའ། ཞེས་གསུངས་ཤིང་སྒྲུབ་ཐབས་དེ་དག་ལ། བདག་བསྐྱེད་དང་ཡེ་ཤེས་པ་གཞུག་པ་ཙམ་བཤད་པ་ནི། རྣལ་འབྱོར་གྱི་རྒྱུད་ལ་ཡང་མི་འགལ་ཞིང་། དེ་ལས་གཞན་པའི་བླ་མེད་ཀྱི་ཉམས་ལེན་མ་བཤད་པའི་ཕྱིར་རོ་སྙམ་དུ་སེམས་སོ། །གསུམ་པ་ནི། སློབ་དཔོན་སངས་རྒྱས་གསང་བས་བྱ་སྤྱོད་གཉིས་ཀ་གཅིག་ཏུ་བསྡུས་ནས་ཉམས་ལེན་གྱི་ཚུལ་འདྲ་བར་བཞེད་ཅིང་། བདག་བསྐྱེད་ཡོད་པའི་ཤེས་བྱེད་དུ་སྤྱོད་རྒྱུད་རྣམས་དྲངས་པར་མཛད་དེ། བསམ་གཏན་ཕྱི་མའི་འགྲེལ་པར་འདི་ཡང་གསང་སྔགས་བཟླས་བརྗོད་བྱེད་པའི་བསམ་གཏན་གྱི་ཆ་ནི་བྱ་བར། བྱ་བའི་རྒྱུད་ཐམས་ཅད་ཀྱི་སྤྱིའི་ཆོ་ག་བསྡུས་པའི་རྒྱུད་འཕགས་པ་རབ་ཏུ་གྲུབ་པར་བྱེད་པ་དང་། དཔུང་བཟངས་དང་། དཔལ་རྟོགས་པ་བསྡུས་པ་ལ་སོགས་པ་དང་། བྱེ་བྲག་གི་རྒྱུད་འཕགས་པ་རྣམ་པར་སྣང་མཛད་མངོན་པར་རྫོགས་པ་བྱང་ཆུབ་རྣམ་པར་འཕྲུལ་པའི་བྱིན་གྱིས་རློབ་པ་དང་། འཕགས་པ་ལག་ན་རྡོ་རྗེ་མངོན་པར་དབང་བསྐུར་བ་དང་། བྱང་ཆུབ་ཀྱི་སྙིང་པོ་དང་། རིག་འཛིན་གྱི་སྡེ་སྣོད་ལ་སོགས་པ་ལས་གསུངས་ཏེ། ཁ་ཅིག་ཏུ་ནི་མི་མངོན་པའི་ཚུལ་དུ་བཤད། ཁ་ཅིག་ཏུ་གསལ་བར་བཤད་དེ། འདི་ལྟར་ཞེས་སོགས་གསུངས་ཤིང་། དེས་མཛད་པའི་རྣམ་འཇོམས་ཀྱི་སྒྲུབ་ཐབས་དང་། བྱང་ཆུབ་སྙིང་པོའི་རྣམ་འཇོམས་ཀྱི་སྒྲུབ་ཐབས་དང་། ཤུ་རངྒ་ཝརྨའི་རྣམ་འཇོམས་ཀྱི་དཀྱིལ་ཆོག་དང་། ཛེ་ཏ་རི་དང་། ཇོ་བོ་རྗེའི་མི་འཁྲུགས་པའི་སྒྲུབ་ཐབས་དང་། ཀེ་ལ་དྷ་རིའི་དམ་ཚིག་གསུམ་བཀོད་ཀྱི་སྒྲུབ་ཐབས་རྣམས་ཀྱང་བྱ་རྒྱུད་སྤྱོད་རྒྱུད་དང་མཐུན་པར་བཀྲལ་བའི་སྲོལ་ཡིན་ནོ། །བཞི་པ་ནི། སློབ་དཔོན་བྱང་ཆུབ་མཆོག་གིས། དེ་བས་ན་འདི་ལྟར་ཁམས་གསུམ་པོ་འདི་དག་ནི་རྣམ་པར་ཤེས་པ་ཙམ་མོ། །ཞེས་རྣམ་པར་དཔྱད་དེ། མཐའ་དག་ནམ་མཁའ་ལྟ་བུར་བསམས་ནས། རང་གི་སེམས་ཀྱི་རྣམ་པ་ཟླ་བའི་དཀྱིལ་འཁོར་ལྟ་བུར་གནས་པ་འདི་ནི་བྱང་ཆུབ་ཀྱི་སེམས་བསྒོམ་པ་ཡིན་ནོ། །དེ་ལ་བཟླས་པའི་གསང་སྔགས་རྣམས་གོ་རིམ་བཞིན་དུ་བཀོད་པས་དེ་དག་ལས་འོད་ཟེར་སྣ་ཚོགས་རྣམ་པར་འབྱུང་ཞིང་། སེམས་ཅན་རྣམས་ཚིམ་པར་བྱས་ནས། ཡང་དེ་བཞིན་གཤེགས་པ་ཐམས་ཅད་ཀྱི་གཟུགས་དང་བཅས་པར་འོད་ཟེར་སླར་ལོག་ནས། རང་གི་སེམས་ཟླ་བའི་དཀྱིལ་འཁོར་ལ་ཞུགས་པར་བསམ་མོ། །ཞེས་ཐོག་མར་བྱང་ཆུབ་ཀྱི་སེམས་བསྒོམ་པ། དེ་ཟླ་བའི་དཀྱིལ་འཁོར་དུ་བསྒྱུར་བ། དེ་ལ་གསང་སྔགས་བཀོད་པ། དེ་ལས་ལྷ་ཡི་སྐུ་སྤྲོས་ནས་སེམས་ཅན་གྱི་དོན་བྱས་ཏེ། སླར་བསྡུས་ནས་ཟླ་བའི་དཀྱིལ་འཁོར་དུ་ཞུགས་པར་བསམ་པ་རྣམས་བཤད་ཀྱི། རང་ལྷའི་སྐུར་བསྒོམ་པ་མ་བཤད་པ་དང་། སློབ་དཔོན་པདྨ་འབྱུང་གནས་ཀྱིས་མཛད་པའི་རྣམ་འཇོམས་ཀྱི་འགྲེལ་པར་དཀྱིལ་འཁོར་བྲིས་ནས་རྒྱན་དགྲམ་པའི་འོག་ཏུ་གཞལ་ཡས་ཁང་བསྐྱེད་དེ། ལྷ་སྤྱན་དྲངས་ནས་མཆོད་བསྟོད་བྱས་ཏེ། བཟླས་བརྗོད་བྱ་བར་གསུངས་ཀྱི། བདག་ཉིད་ལྷར་བསྐྱེད་པར་མ་གསུངས་པ་དང་། སུ་མ་ཏི་ཀིརྟིས། བྱ་རྒྱུད་ཀྱི་རབ་གནས་ཀྱི་སྐབས་སུ། རྟེན་དང་པོར་ལྷར་མི་བསྐྱེད་པར་ལྷ་སྤྱན་དྲངས་པ་ཉིད་ཐིམ་པས་སོ་སོའི་སྐུར་བསྒོམ་པར་བཤད་པ་རྣམས་སོ། །གསུམ་པ་ནི། དེ་ལྟར་བྱ་རྒྱུད་ལ་རྒྱུད་སྡེ་གོང་མའི་དབང་དུ་བྱས་པའི་འགྲེལ་ལུགས་གསུམ་དང་། བྱ་རྒྱུད་རང་ལུགས་ལྟར་འགྲེལ་པ་དང་བཞི་ཡོད་པ་ལས། རྗེ་བཙུན་ས་སྐྱ་པ་རྣམས་ནི། ལུགས་ཕྱི་མ་འདི་ཉིད་བཞེད་དེ། བླ་ཆེན་ས་སྐྱ་པའི་རྒྱུད་སྡེ་སྤྱི་རྣམ་དང་། དེའི་གསུང་སྒྲོས་གཉན་ཕུལ་བྱུང་བས་བྲིས་པའི་བདེ་མཆོག་གི་ཊཱི་ཀ་དང་། རྗེ་བཙུན་རྩེ་མོའི་རྒྱུད་སྡེ་སྤྱི་རྣམ་དང་། རྗེ་བཙུན་གྲགས་པ་རྒྱལ་མཚན་གྱི་མངོན་རྟོགས་ལྗོན་ཤིང་དང་། ས་པཎ་གྱི་གཞུང་འདི་རྣམས་ལས། བྱ་རྒྱུད་ལ་བདག་བསྐྱེད་མེད་པའི་ལུགས་དེ་ཉིད་གསལ་བར་འབྱུང་བའི་ཕྱིར་རོ། །དེ་ལྟར་བཞེད་པའི་རྒྱུ་མཚན་ཡང་བདག་ཉིད་ཆེན་པོ་འདི་རྣམས་ཀྱིས་སྡེ་སྣོད་དང་། རྒྱུད་སྡེའི་རིམ་པ་ཐམས་ཅད་རང་རང་གི་ལུགས་བཞིན་དུ་སྤྱོད་པ་སངས་རྒྱས་ཀྱི་བསྟན་པ་རྣམ་དག་ཡིན་པར་དགོངས་ཤིང་། བྱ་རྒྱུད་ལ་རྒྱུད་རང་ངོས་ནས་བདག་བསྐྱེད་བཤད་པ་མེད་ཅིང་། དེར་མ་ཟད་རྒྱུད་སྡེ་གོང་མར་བྱ་རྒྱུད་ལ་བདག་བསྐྱེད་མེད་པར་གསལ་བར་བཤད་པས་སོ། །ལུང་དེ་ཉིད་ནི་སྔར་དྲངས་ཟིན་ལ་དོན་ནི་རང་ལྷའི་སྐུར་བསྒོམ་པ་སོགས་ནང་གི་བྱ་བས་འཇིགས་པར་དམིགས་ཤིང་ཤིན་ཏུ་ཁྲུས་དང་གཙང་སྦྲ་བྱེད་པ་དང་། ཡེ་ཤེས་སེམས་དཔའ་རང་ལ་འཇུག་པའི་བདེ་བ་དམ་པ་མེད་པ་དང་། འདི་ལྷའི་སྐུ་ཞལ་ཕྱག་གི་རྣམ་པ་ཅན་གྱི་སྙེམས་པ་སྟེ་ང་རྒྱལ་མེད་པ་དང་། རྒྱུད་སྡེ་གོང་མར་བཤད་པ་ལྟར་གྱི་རྨད་དུ་བྱུང་བའི་སྤྱོད་ཡུལ་མིན་པ་དང་། འཁོར་བའི་སྡུག་བསྔལ་གྱི་སྐྱོན་དང་། དེའི་རྒྱུ་བདེན་འཛིན་གྱི་རྟོག་པ་རབ་ཏུ་གཅོད་པ་སོ་སོར་རྟོག་པའི་ཤེས་རབ་བསྒོམ་པ་སྟེ། དེ་ལྟ་བུའི་ལམ་གྱིས་སངས་རྒྱས་སྒྲུབ་པར་བྱེད་པ་ནི་བྱ་བའི་རྒྱུད་ལ་བཞུགས་སོ། །ཞེས་བྱ་བ་ཡིན་ནོ། །གཞན་ཡང་རིགས་པ་ནི་རྡོ་རྗེ་གུར་ལ་སོགས་པའི་རྒྱུད་སྡེ་རྣམས་ལས་རྒྱུད་སྡེ་བཞིར་གྲངས་ངེས་པར་གསུངས་པ་ལྟར་དུ་འདོད་དགོས་ལ། དེའི་ཚེ་བྱ་རྒྱུད་ལ་བདག་བསྐྱེད་ཡོད་ན་དེ་དང་། སྤྱོད་རྒྱུད་ལ་ཁྱད་པར་འབྱེད་བྱེད་གཞན་མེད་པས་རྒྱུད་སྡེ་གཅིག་ཏུ་འགྱུར་བའི་སྐྱོན་ཡོད་དོ། །འདི་བཞིན་དུ་དཔལ་འཛིན་གྱི་དགྲ་ནག་གི་འགྲེལ་པ་དང་། ལྷའི་རིགས་ཀྱི་བློ་གྲོས་ཀྱི་གུར་གྱི་འགྲེལ་པ་དང་། ཨིནྡྲ་བྷཱུ་ཏིའི་བདེ་མཆོག་གི་འགྲེལ་པ་རྣམས་ལས་ཀྱང་། བྱ་རྒྱུད་ལ་བདག་བསྐྱེད་མེད་པའི་ལུགས་དེ་ཉིད་གསལ་བར་འབྱུང་ཞིང་། དང་པོ་གཉིས་ཀྱི་ལུང་ནི་སྔར་དྲངས་ཟིན་ལ། ཕྱི་མ་ནི་གསང་བ་རྡོ་རྗེ་ཐེག་པ་ལ་གནས་པ། བྱ་བ་དང་སྤྱོད་པའི་སྒོ་ནས་ཀྱང་རིག་སྔགས་ཀྱི་རྗེས་སུ་གནང་བ་ཙམ་ལ་བརྟེན་ནས། བདག་དང་ལྷ་ཐ་དད་དུ་ལྟ་བ་ཅན་ཡོངས་སུ་བརྟགས་པ་མཚན་བཅས་དམིགས་པ་ལས་གྲུབ་པའི་དོན་མངོན་དུ་བྱེད་པར་འདོད་པའོ། །ཞེས་ཟེར་རོ། །བཞི་པ་ནི། ཕྱིས་ཀྱི་མཁས་པ་ཁ་ཅིག ཡེ་ཤེས་རྡོ་རྗེ་ཀུན་ལས་བཏུས་ལས། བདག་ཉིད་ལྷའི་སྙེམས་པ་མེད་པ་དང་། ཡེ་ཤེས་སེམས་དཔའི་བདེ་བ་དམ་པ་མེད་པ་དང་། ཞེས་བྱ་རྒྱུད་ལ་བདག་བསྐྱེད་མེད་པར་བཤད་པ་ནི། དུས་ཐམས་ཅད་དུ་ལྷའི་སྙེམས་པ་མེད་པ་ལ་དགོངས་པ་ཡིན་གྱི། བདག་ལྷའི་སྐུར་བསྐྱེད་པ་གཏན་ནས་མེད་པ་མ་ཡིན་ཏེ། སློབ་དཔོན་བྱང་ཆུབ་མཆོག་གི་ལེགས་གྲུབ་ཀྱི་མངོན་རྟོགས་དང་། སངས་རྒྱས་གསང་བའི་བསམ་གཏན་ཕྱི་མའི་འགྲེལ་པ་དང་། རྣམ་འཇོམས་ཀྱི་འགྲེལ་པ་རྣམས་སུ། ལྷ་དྲུག་གི་སྒོ་ནས་ལྷའི་སྐུར་བསྒོམ་པ་བསྟན་པའི་ཕྱིར་རོ། །ཞེས་གསུངས་སོ། །དེ་ལ་སངས་རྒྱས་གསང་བའི་ལུང་གི་བྱ་རྒྱུད་ལ་བདག་བསྐྱེད་ཡོད་པར་འདོད་ཅིང་། དུས་ཐམས་ཅད་དུ་ལྷའི་སྙེམས་པ་མེད་པར་འདོད་པ་ནང་འགལ་ཏེ། སློབ་དཔོན་དེས་མཛད་པའི་རྣམ་འཇོམས་ཀྱི་འགྲེལ་པ་ལས། དགེ་བའི་རྩ་བ་ཡང་རྒྱ་ཆེར་བསྔོ། འཕགས་པ་རྣམས་ལ་ཡང་མཆོད་པའི་ཕྱིར་བདག་ལས་ཀྱི་རྡོ་རྗེ་སེམས་དཔར་བྱིན་གྱིས་བརླབ་པ་ནི། ཞེས་སྒྲུབ་ཐབས་རྫོགས་པའི་རྗེས་ལ་རང་ལས་ཀྱི་རྡོ་རྗེ་སེམས་དཔར་བྱིན་གྱིས་བརླབས་ནས་ཐུན་མཚམས་ཀྱི་བྱ་བ་རྣམས་བྱེད་པར་བཤད་པའི་ཕྱིར་དང་། སློབ་དཔོན་དེས་བྱ་རྒྱུད་ལ་བདག་བསྐྱེད་ཡོད་པའི་ཤེས་བྱེད་དུ་ཕྱག་རྡོར་དབང་བསྐུར་སོགས་འདྲེན་པ་ཡིན་ལ། དེ་ལས་བདག་ཉིད་རང་གི་ལྷའི་གཟུགས་སུ་བྱས་ལ་ཐེ་ཚོམ་མེད་པའི་ཡིད་ཀྱིས་ང་རྒྱལ་བསྐྱེད་ཅིང་འགྲོ་ཡང་རུང་། འགྲེང་ཡང་རུང་། འདུག་ཀྱང་རུང་། རྟག་ཏུ་དུས་ཐམས་ཅད་དུ་བསྐྱོད་ཀྱང་མི་གཡོ་བ་དེའི་ཚེ་ཞེས་གསུངས་པ་དང་འགལ་བའི་ཕྱིར་རོ། །དེས་ན་སངས་རྒྱས་གསང་བས་བྱ་རྒྱུད་ལ་བདག་བསྐྱེད་ཡོད་པར་བཤད་ཀྱང་། བྱ་རྒྱུད་རང་ངོས་ནས་བདག་བསྐྱེད་ཡོད་པར་མི་འགྲུབ་སྟེ། དེས་བྱ་རྒྱུད་ལ་བདག་བསྐྱེད་ཡོད་པའི་ཤེས་བྱེད་དུ་སྤྱོད་རྒྱུད་རྣམས་དྲངས་པའི་ཕྱིར་དང་། རྣམ་སྣང་མངོན་བྱང་སོགས་སྤྱོད་རྒྱུད་རྣམས་ལ་ཡང་བྱ་རྒྱུད་ཅེས་པའི་ཐ་སྙད་མཛད་པའི་ཕྱིར་ན། བྱ་སྤྱོད་གཉིས་རྒྱུད་སྡེ་གཅིག་ཏུ་བསྲེས་པའི་ལུགས་ཡིན་པའི་ཕྱིར་རོ། །ཡང་ཕྱིས་ཀྱི་བླ་མ་ཁ་ཅིག བྱ་རྒྱུད་ལ་བདག་བསྐྱེད་མེད་པར་བཤད་པའི་དོན་ནི། ཤས་ཆེར་བའི་མི་སྲོག་རྩོལ་ལ་སོགས་པ་བསམ་གཏན་གྱི་ཡན་ལག་རྣམས་བསྒོམ་མི་ནུས་པའི་གང་ཟག་ལ་དགོངས་པ་ཡིན་ལ། རང་གི་ངོ་བོ་བདག་བསྐྱེད་ཡོད་པ་ཁོ་ནར་སློབ་དཔོན་སངས་རྒྱས་གསང་བས་བཤད་པས། ཡན་ལག་བཞི་ལ་སོགས་པའི་ལྷའི་རྣལ་འབྱོར་ལ་བྱ་སྤྱོད་གཉིས་འདྲ་ལ་རྣམ་སྣང་མངོན་བྱང་ལྟ་བུ་གདུལ་བྱའི་དབང་གིས་བྱ་རྒྱུད་དུའང་གསུངས་པས། བྱ་སྤྱོད་གཉིས་གདུལ་བྱའི་དབང་གིས་འབྱེད་པ་མ་གཏོགས་པ། རྒྱུད་རང་གི་ངོ་བོའི་སྒོ་ནས་མི་འབྱེད་པས་སྤྱོད་རྒྱུད་ལ་བདག་བསྐྱེད་ཡོད་པ་ལྟར་བྱ་རྒྱུད་ལ་ཡང་ཡོད་དེ། ཕྱག་རྡོར་དབང་བསྐུར་བ་དང་། རྣམ་སྣང་མངོན་བྱང་ལས། རང་ཉིད་ལྷར་བསྒོམ་པར་གསུངས་པའི་ཕྱིར་དང་། ལེགས་སྒྲུབ་ཀྱི་མངོན་རྟོགས་ལས། བྱ་བའི་རྒྱུད་ལས་ལྷ་བསྒྲུབ་པའི་རྣལ་འབྱོར་གྱི་རིམ་པ་མ་བསྟན་ནོ་སྙམ་དུ་བསམ་པར་མི་བྱ་སྟེ། བཅོམ་ལྡན་འདས་ཀྱིས་ཕལ་ཆེར་མ་བསྟན་ཀྱང་ཕྱག་ན་རྡོ་རྗེ་དབང་བཀུར་བ་དང་དེ་ཁོ་ན་ཉིད་བཅུ་པ་ལ་འཇུག་པ་དག་ལས་གཙོ་བོར་བསྟན་ཏོ། །གཅིག་ཏུ་ནི་དངོས་གྲུབ་ཐམས་ཅད་ནི་གསང་སྔགས་ཀྱི་ལྷ་དང་། དེ་ཁོ་ན་ཉིད་ལ་རག་ལས་པ་ཡིན་ལ་དེ་དག་རྣམ་པར་ཉམས་ན་ཞི་བ་ལ་སོགས་པའི་ལས་རྣམས་འགྲུབ་པར་མི་འགྱུར་ལ་བླ་མ་བརྒྱུད་པ་དང་རྒྱུད་ཀྱི་ཁྱད་པར་ཅུང་ཟད་དཔྱད་པ་ལས་ཁོང་དུ་ཆུད་པར་བྱའོ། །དེ་ལྟར་རིམ་པ་འདིས་ལྷ་ཉིད་ཀྱི་སྐུ་བསྐྱེད་པར་བྱའོ། །ཞེས་གསུངས་པའི་ཕྱིར་རོ་ཞེས་དང་། ཡང་བསམ་གཏན་ཕྱི་མར། སྒྲ་དང་སེམས་དང་བཞི་ལ་གཞོལ། །ཞེས་པའི་འགྲེལ་པར། གཞི་ནི་དེ་བཞིན་གཤེགས་པའི་སྐུའི་རང་བཞིན་ནོ། །གཞི་གཉིས་པ་ནི་རང་གི་ལྷའི་གཟུགས་སོ་ཞེས་དང་། འདིའི་གཞིའི་ཚིག་དོན་རང་ལྷར་བསྐྱེད་པའི་གཞི་ལ་བྱར་མི་རུང་ན། རྣམ་སྣང་མངོན་བྱང་གི་གཞི་ནི། ཞེས་པ་རྐང་པ་གཉིས་ཀྱིས་ཀྱང་བདག་ཉིད་ལྷར་བསྐྱེད་པ་མ་བསྟན་པར་འགྱུར་ཏེ། ཁྱད་པར་མེད་པའི་ཕྱིར་རོ། །བྱ་རྒྱུད་ལ་བདག་བསྐྱེད་མེད་ན། རྒྱུད་སྡེ་གོང་མར་ལྷ་ཕོ་མོ་ཕན་ཚུན་བལྟས་པའི་བདེ་བ་ལམ་དུ་བྱེད་པ་ཡོད་པར་གསུངས་པ་དང་འགལ་ཏེ། རྣམ་སྣང་དང་། སྤྱན་མ་སོགས་ཀྱི་ལྷ་ལ་ཆགས་པ་མི་སྲིད་པས་ལྷ་དེའི་ང་རྒྱལ་འཆང་བའི་སྒྲུབ་པ་པོ་ལ་བྱ་བ་སྐབས་ཀྱི་དོན་ཡིན་པའི་ཕྱིར་རོ། །ཞེས་བྱ་བ་བྲིས་པ་དེ་རྣམས་རིམ་པ་བཞིན་མི་འཐད་པར་སྟོན་པ་ནི། འོ་ན་བྱ་རྒྱུད་ཤས་ཆེར་ལ་བལྟས་པའི་བདེ་བ་ལམ་བྱེད་མེད་པར་འགྱུར་ཏེ། བྱ་རྒྱུད་ཤས་ཆེར་ལ་བདག་བསྐྱེད་མེད་པའི་ཕྱིར་རོ། །སྲོག་རྩོལ་ལ་སོགས་པ་བསམ་གཏན་གྱི་ཡན་ལག་བསྒོམ་མི་ནུས་པའི་གང་ཟག་དེ་བྱ་རྒྱུད་ཀྱི་གདུལ་བྱའི་གཙོ་བོ་ཡིན་ནམ་མ་ཡིན། དང་པོ་ལྟར་ན་གདུལ་བྱའི་གཙོ་བོ་ལ་བསྟན་པའི་ལམ་དེ་བྱ་རྒྱུད་ཀྱི་ལམ་རྣམ་དག་མ་ཡིན་པར་འགྱུར་ཏེ། བྱ་རྒྱུད་ཀྱི་ལམ་རྣམ་དག་ལ་བདག་བསྐྱེད་དགོས་ཤིང་། བསམ་གཏན་གྱི་ཡན་ལག་བསྒོམ་མི་ནུས་པ་དེ་ལ་བདག་བསྐྱེད་མ་བསྟན་པའི་ཕྱིར་རོ། །གཉིས་པ་ལྟར་ན། བྱ་རྒྱུད་ཤས་ཆེ་བ་རྒྱུད་རང་གི་གདུལ་བྱའི་གཙོ་བོ་མ་ཡིན་པ་ལ་བསྟན་པར་འགྱུར་ཏེ། བྱ་རྒྱུད་ཤས་ཆེར་ལ་བདག་བསྐྱེད་མེད་ཅིང་། བདག་བསྐྱེད་མེད་པ་རྣམས་བསམ་གཏན་གྱི་ཡན་ལག་བསྒོམ་མི་ནུས་པ་དེ་ལ་བསྟན་པའི་ཕྱིར་རོ། །སངས་རྒྱས་གསང་བའི་ལུང་གིས་བྱ་རྒྱུད་ལ་བདག་བསྐྱེད་ཡོད་པར་མི་འགྲུབ་པ་ནི་གོང་དུ་བཤད་ཟིན་ཅིང་། གཞན་ཡང་སློབ་དཔོན་དེས་བསམ་གཏན་ཕྱི་མའི་འགྲེལ་པར། བྱ་རྒྱུད་ལ་བདག་བསྐྱེད་ཡོད་པའི་ཤེས་བྱེད་དུ་དྲངས་པའི་ལེགས་གྲུབ་དང་། དཔུང་བཟང་གཉིས་ལས་ནི་བདག་བསྐྱེད་བསྟན་པ་མི་སྣང་ལ། རིག་སྔགས་འཆང་བའི་སྡེ་སྣོད་ཀྱི་ལུང་ནི། རི་མོ་ལ་གནས་པའི་བསམ་གཏན་བྱ་བའི་ལུང་དུ་སྣང་ངོ་། །རྟོག་བསྡུས་ནི་བོད་ན་མི་བཞུགས་ཀྱང་ཡོ་གའི་འགྲེལ་པ་ཨ་ཝ་ཏ་རར། རྟོག་པ་ཐམས་ཅད་བསྡུས་པ་རྣལ་འབྱོར་གྱི་རྒྱུད་ཐམས་ཅད་ཀྱི་དགོངས་པ་འགྲེལ་པ་ལས་ཀྱང་། ཞེས་རྣལ་འབྱོར་གྱི་རྒྱུད་དུ་བཤད་ཅིང་། རྣམ་སྣང་མངོན་བྱང་དང་། ཕྱག་རྡོར་དབང་བསྐུར་བ་གཉིས་ནི། སྤྱོད་རྒྱུད་ཡིན་པས་དེ་གསུམ་གྱི་ལུང་གིས་བྱ་རྒྱུད་རང་ངོས་ནས་བདག་བསྐྱེད་ཡོད་པར་མི་འགྲུབ་བོ། །ཡང་རྣམ་སྣང་མངོན་བྱང་ལྟ་བུ་གདུལ་བྱའི་དབང་གིས་བྱ་རྒྱུད་དུ་གསུངས་པའི་དོན། བྱ་རྒྱུད་དུ་འགྲེལ་བའི་གང་ཟག་ཡོད་པ་ལ་བྱེད་དམ། བྱ་རྒྱུད་ཀྱི་གདུལ་བྱས་ཉམས་སུ་ལེན་དུ་རུང་བ་ལ་བྱེད། དང་པོ་ལྟར་ན། གསང་བ་འདུས་པ་ཡང་ཡོ་གར་འགྱུར་ཏེ། གྲུབ་ཆེན་ཀུན་སྙིང་གིས་བཀྲལ་བའི་ཕྱིར་རོ། །གཉིས་པ་ལྟར་ན་རྒྱུད་སྡེ་གོང་མ་གསུམ་ཀ་ཡང་བྱ་རྒྱུད་དུ་འགྱུར་ཅིང་དེ་གཉིས་ཀ་ལ་འདོད་ན། རྒྱུད་སྡེ་བཞི་ཀ་གདུལ་བྱའི་དབང་གིས་འབྱེད་པ་མ་གཏོགས་པ་རྒྱུད་རང་གི་ངོ་བོའི་སྒོ་ནས་མི་འབྱེད་པར་མཚུངས་སོ། །བྱ་སྤྱོད་གཉིས་གདུལ་བྱའི་དབང་གིས་འབྱེད་ཀྱི་རང་གི་ངོ་བོའི་སྒོ་ནས་མི་འབྱེད་པ་ལ་དཔྱད་ན་རྣམ་སྣང་མངོན་བྱང་ལྟ་བུ་གདུལ་བྱའི་དབང་གིས་སྤྱོད་རྒྱུད་ཡིན་གྱི་བྱ་རྒྱུད་མ་ཡིན་ཞེས་སྨྲའམ། གདུལ་བྱའི་དབང་གིས་བྱ་རྒྱུད་ཡིན་གྱི་སྤྱོད་རྒྱུད་མ་ཡིན་ནོ་ཞེས་སྨྲའམ། གདུལ་བྱའི་དབང་གིས་གཉིས་ཀ་ཡིན་ཞེས་སྨྲ། དང་པོ་ལྟར་ན་དེ་གདུལ་བྱའི་དབང་གིས་བྱ་རྒྱུད་དུ་གསུངས་པར་ཁས་བླངས་པ་དང་དངོས་སུ་འགལ་ལོ། །གཉིས་པ་ལྟར་ན་དེ་སྤྱོད་རྒྱུད་གཏན་མ་ཡིན་པར་འགྱུར་ཏེ། གདུལ་བྱའི་དབང་གིས་བྱ་རྒྱུད་ཁོ་ན་ཡིན་ཅིང་རང་གི་ངོ་བོའི་སྒོ་ནས་བྱ་སྤྱོད་གཉིས་ལ་ཁྱད་པར་མེད་པའི་ཕྱིར་རོ། །གསུམ་པ་ལྟར་ན་བྱ་སྤྱོད་གཉིས་གདུལ་བྱའི་དབང་གིས་འབྱེད་པར་ཁས་བླངས་པ་དང་འགལ་ལོ། །ཡང་བྱ་སྤྱོད་གཉིས་ཀ་གདུལ་བྱའི་དབང་གིས་འབྱེད་པའི་ཤེས་བྱེད་དུ་རྣམ་སྣང་མངོན་བྱང་གདུལ་བྱའི་དབང་གིས་བྱ་རྒྱུད་དུ་གསུངས་པའི་ཕྱིར། ཞེས་བཀོད་པ་ནི་གདུལ་བྱའི་དབང་གིས་སོ་སོར་འབྱེད་དེ། གདུལ་བྱའི་དབང་གིས་སྤྱོད་རྒྱུད་ཀྱང་བྱ་རྒྱུད་ཡིན་པའི་ཕྱིར། ཞེས་པར་སོང་བས་འདི་ལ་ལྷ་དང་བཅས་པའི་འཇིག་རྟེན་གྱིས་ཁྲེལ་བར་མི་འགྱུར་རམ། གཞན་ཡང་རྣམ་སྣང་མངོན་བྱང་ལ་སོགས་པའི་སྤྱོད་རྒྱུད་རྣམས་བྱ་རྒྱུད་དུ་ཁས་ལེན་ནམ། བྱ་རྒྱུད་མ་ཡིན་པར་སྤྱོད་རྒྱུད་དུ་ཁས་ལེན། དང་པོ་ལྟར་ན་རྒྱུད་འགྲེལ་ཚད་ལྡན་རྣམས་ལས་རྒྱུད་སྡེ་བཞིར་གསུངས་ཤིང་། ཁྱེད་རང་གིས་ཀྱང་ཁས་བླངས་པ་དང་འགལ་ལོ། །གཉིས་པ་ལྟར་ན་གདུལ་བྱའི་དབང་གིས་དེ་ལྟར་དུ་ཁས་ལེན་ནམ། རང་གི་ངོ་བོའི་སྒོ་ནས་ཁས་ལེན། དང་པོ་ལྟར་ན་དེ་གདུལ་བྱའི་དབང་གིས་བྱ་རྒྱུད་དུ་གསུངས་པར་ཁས་བླངས་པ་དང་དངོས་སུ་འགལ། ཕྱི་མ་ལྟར་ན་བྱ་སྤྱོད་གཉིས་རང་གི་ངོ་བོའི་སྒོ་ནས་མི་འབྱེད་པར་ཁས་བླངས་པ་དང་འགལ་ལོ། །འདིའི་རྗེས་འབྲངས་གངས་རིའི་ཁྲོད་ན་གནས་པ་རྣམས་ཀྱིས་ཉིན་མཚན་བརྒྱར་འབད་པས་སོམས་ལ་ལན་སྨྲོས་ཤིག ཡང་འདི་དང་ཕྱོགས་སྔ་གོང་མ་གཉིས་ཀས་ལེགས་གྲུབ་ཀྱི་མངོན་རྟོགས་ལས་བདག་བསྐྱེད་བསྟན་པར་འདོད་པ་ནི་ཤིན་ཏུ་འཁྲུལ་ཏེ། དེ་ལས་རིམ་པ་འདིས་ལྷ་ཉིད་ཀྱི་སྐུ་བསྐྱེད་པར་བྱའོ། །ཞེས་པའི་མཇུག་ཏུ་མདུན་བསྐྱེད་བསྒྲུབ་ཚུལ་བསྟན་གྱི། སྒྲུབ་ཐབས་དེའི་དབུ་ཞབས་གང་དུ་ཡང་བདག་ཉིད་ལྷར་བསྐྱེད་པ་མ་གསུངས་པའི་ཕྱིར་རོ། །འོ་ན་སྔར་དྲངས་པའི་ལུང་དེའི་དོན་ཇི་ལྟར་ཡིན་སྙམ་ན། བྱ་བའི་རྒྱུད་ལས། མདུན་དུ་ལྷ་བསྒྲུབ་པའི་རྣལ་འབྱོར་གྱི་རིམ་པ་མ་བསྟན་ནོ་སྙམ་དུ་བསམ་པར་མི་བྱ་སྟེ། བཅོམ་ལྡན་འདས་ཀྱིས་བྱ་བ་སོ་སོའི་རྒྱུད་ཕལ་ཆེར་ལས་མ་བསྟན་ཀྱང་། ཕྱག་རྡོར་དབང་བསྐུར་སོགས་ནས་བསྟན་ཞེས་པའི་དོན་ནོ། །འོ་ན་ཕྱག་རྡོར་དབང་བསྐུར་སོགས་ནས་བདག་བསྐྱེད་ཀྱང་གསུངས་སོ་སྙམ་ན་སྐྱོན་མེད་དེ། སློབ་དཔོན་འདིས་བྱ་སྤྱོད་གཉིས་ཀ་ལ་བྱ་རྒྱུད་ཀྱི་ཉམས་ལེན་སྦྱར་ནས་བདག་བསྐྱེད་མེད་པར་འདོད་པའི་ཕྱིར་རོ། །བསམ་གཏན་ཕྱི་མའི་གཞི་ཡི་ཚིག་དོན་རང་ལྷར་བསྐྱེད་པ་ལ་བྱར་མི་རུང་ན། རྣམ་སྣང་མངོན་བྱང་གི་གཞི་ནི་ཞེས་པ་རྐང་པ་གཉིས་ཀྱིས་ཀྱང་བདག་ཉིད་ལྷར་བསྐྱེད་པ་མ་བསྟན་པར་འགྱུར་རོ། །ཞེས་སྨྲ་བ་ནི་རྣམ་པར་མ་བརྟགས་པ་སྟེ། འོ་ན་རྣམ་སྣང་མངོན་བྱང་ལས་གཞི་གཉིས་མ་གསུངས་པར་འགྱུར་ཏེ། བསམ་གཏན་ཕྱི་མར་སྒྲ་དང་སེམས་དང་གཞི་ལ་གཞོལ། །ཞེས་གཞི་གཅིག་ལས་མ་གསུངས་པའི་ཕྱིར་རོ། །ཁྱབ་པ་ཁས་བླངས་སོ། །དེས་ན་བསམ་གཏན་ཕྱི་མའི་གཞིའི་ཚིག་དོན་རང་ལྷར་བསྐྱེད་པ་ལ་བཤད་ན། དེའི་དོན་མདུན་དུ་ལྷ་བསྐྱེད་པ་ལ་བཤད་དུ་མི་རུང་བར་འགྱུར་ཏེ། གཞི་གཅིག་ལས་མེད་པའི་ཕྱིར་རོ། །འདོད་ན་རྣམ་སྣང་མངོན་བྱང་གི་གཞི་གཉིས་པ་ནི་ཞེས་པའི་རྐང་པ་གཉིས་ཀྱིས་མདུན་དུ་ལྷ་བསྐྱེད་པ་མ་བསྟན་པར་འགྱུར་ཅིང་། ཁྱབ་པ་ཁས་བླངས་སོ། །འོ་ན་བསམ་གཏན་ཕྱི་མའི་འགྲེལ་པར་གཞི་གཉིས་གསུངས་པ་དང་འགལ་ལོ་སྙམ་ན། སློབ་དཔོན་དེས་བྱ་སྤྱོད་གཉིས་ཀ་ལ་སྤྱོད་རྒྱུད་ཀྱི་ཉམས་ལེན་སྦྱར་བར་བཞེད་ནས་བསམ་གཏན་ཕྱི་མའི་གཞི་གཅིག་པོ་དེ་ཉིད་ལ་རྣམ་སྣང་མངོན་བྱང་གི་གཞི་གཉིས་ཀའི་དོན་བཤད་པ་ཡིན་པས་སྐྱོན་མེད་དོ། །དེས་ན་རྣམ་སྣང་མངོན་བྱང་ལས་གཞི་གཉིས་གསུངས་ཤིང་། བསམ་གཏན་ཕྱི་མར་གཅིག་ལས་མ་གསུངས་པས་ཀྱང་། བྱ་རྒྱུད་ལ་བདག་བསྐྱེད་མེད་པར་གྲུབ་བོ། །འདི་ནི་ཁོ་བོ་འབའ་ཞིག་གིས་རྟོགས་པས་ལུགས་འདི་ལ་མོས་པ་ཡོད་པ་རྣམས་ཀྱིས་དགའ་བ་སྒོམས་ཤིག བལྟས་པའི་བདེ་བ་ལམ་བྱེད་ཡོད་ན། ལྷ་དེའི་ང་རྒྱལ་བསྒོམ་པའི་སྒོ་ནས་བལྟས་པའི་བདེ་བ་བསྒོམ་པར་འདོད་པ་ནི་དོན་མ་རྟོགས་པ་སྟེ། རང་ཉིད་ཐ་མལ་དུ་གནས་ནས་མདུན་གྱི་ལྷ་ལ་བལྟས་པས་བལྟས་པའི་བདེ་བ་འདྲེན་ནུས་པའི་ཕྱིར་རོ། །ལྔ་པ་ནི་དེ་ལྟར་བྱ་རྒྱུད་ཀྱི་ལྷ་ལ་རྒྱུད་སྡེ་གོང་མའི་ཉམས་ལེན་སྦྱར་བ་དང་། བྱ་བ་སྤྱིའི་རྒྱུད་ཆེན་བཞི་ནས་བཤད་པའི་ཉམས་ལེན་སྦྱར་བ་གཉིས་ལས། དང་པོ་ལ་སྤྱོད་རྒྱུད་ཀྱི་ཉམས་ལེན་སྦྱར་ན་བདག་བསྐྱེད་ཡོད་ཅིང་། རྣལ་འབྱོར་རྒྱུད་ཀྱི་ཉམས་ལེན་སྦྱར་ན་ཡེ་ཤེས་པ་གཞུག་པ་ཡང་ཡོད་ལ། བླ་མེད་ཀྱི་ཉམས་ལེན་སྦྱར་ན་རིམ་གཉིས་ཀྱང་ཡོད་དོ། །དེ་དག་གིས་བྱ་རྒྱུད་རང་ངོས་ནས་བདག་བསྐྱེད་ཡོད་པ་མི་འགྲུབ་སྟེ། དཔེར་ན་སེམས་ཙམ་པའི་གཞུང་ནས་བཤད་པའི་བྱང་སེམས་ཀྱི་སྤྱོད་པ་ལ་དབུ་མའི་ལྟ་བ་སྦྱར་ནས་ཉམས་སུ་ལེན་པའི་ཚེ། སེམས་ཙམ་པ་རང་ངོས་ནས་དབུ་མའི་ལྟ་བ་ཡོད་པར་མི་འགྲུབ་པ་བཞིན་ནོ། །གཉིས་པ་ནི། བདག་བསྐྱེད་སོགས་གཏན་ནས་མེད་དེ། སྤྱི་རྒྱུད་བཞི་དང་། སོ་སོའི་རྒྱུད་རྣམས་ནས་བདག་བསྐྱེད་མ་གསུངས་ཤིང་། བདག་བསྐྱེད་མེད་པར་རྒྱུད་སྡེ་གོང་མ་ནས་དངོས་སུ་གསུངས་པའི་ཕྱིར་རོ། །གནད་འདི་དག་ནི་འགྲན་ཟླ་ཀུན་དང་བྲལ་བའི་རྗེ་བཙུན་བླ་མའི་བཀའ་དྲིན་ལས། ཁོ་བོས་ཀྱང་ཇི་ལྟ་བ་བཞིན་སྨྲ་བར་ནུས་པ་ཡིན་ནོ། །གཉིས་པ་གཞུང་གི་དོན་ནི། བྱ་བའི་རྒྱུད་ལ་ཞེས་སོགས་ཉེར་གཉིས་ཏེ། བདག་བསྐྱེད་ཡོད་པའི་དེ་ལྟར་བྱེད་ན། སྨྱུང་གནས་མེད་དེ་བདག་ཉིད་སོགས་སོ། །གལ་ཏེ་སྨྱུང་གནས་བྱེད་འདོད་ན། རང་ཉིད་ཐ་མལ་སོགས་ཏེ་གཞུང་ལྷག་མ་རྣམས་ཀྱིས་ནི། དཔུང་བཟང་དང་ལེགས་གྲུབ་ནས་བཤད་པའི་བྱ་རྒྱུད་དང་འབྲེལ་བའི་ཀུན་དུ་སྤྱོད་པ་སྟོན་ནོ། །གཉིས་པ་ནི། སྤྱོད་དང་རྣལ་འབྱོར་ཞེས་སོགས་བཅུ་གསུམ་སྟེ། རྒྱུད་སྡེ་དེ་གཉིས་ལས་ལས་ཚོགས་བསྒྲུབ་པ་འགའ་ཞིག་ལ་གཙང་སྦྲ་བཤད་པ་ཡོད་དེ། ཕྱག་རྡོར་དབང་བསྐུར་བའི་རྒྱུད་ལས། དེས་ཟས་མི་འཚལ་བར་ལག་ན་རྡོ་རྗེ་ལ་བལྟ་ཞིང་ལན་གསུམ་བཟླས་བརྗོད་བགྱིས་ན་རྒྱལ་སྲིད་ཐོབ་པར་འགྱུར། ཞེས་དང་། རྡོ་རྗེ་ས་འོག་གི་རྒྱུད་དུ། བཅོམ་ལྡན་འདས་ཕྱག་ན་རྡོ་རྗེ་དང་། གནོད་སྦྱིན་རྣམས་ལ་དཀར་གསུམ་གྱིས་མཆོད་པར་བྱའོ། །ཆང་ནི་ཀུན་ཏུ་སྤང་བར་བགྱིའོ། །ཤ་རྣམས་ནི་འོས་པ་དང་ཤིས་པ་དྲང་བར་བྱའོ་ཞེས་སོ། །རབ་ཏུ་གནས་པའི་རྒྱུད་ལས། བདེར་གཤེགས་ལྷག་མ་འདི་དག་ནི། །ཟོ་ཤིག་སྡིག་པ་དག་པར་འགྱུར། །ཞེས་གསུངས་ལ། འབྱུང་པོའི་གཏོར་མ་ནི་འདིར་ཡང་མི་ཟ་སྟེ། རྒྱུད་སྡེ་འོག་མ་གསུམ་ལ་སྣང་བ་ཐམས་ཅད་ལྷར་བསྒོམ་པ་མེད་པའི་ཕྱིར། གསུམ་པ་ནི། རྣལ་འབྱོར་ཆེན་པོའི་ཞེས་སོགས་བདུན་ཏེ། རྒྱུད་དེ་ལས་ཨ་ཝ་དྷཱུ་ཏཱི་གཉིས་སྤངས་ཀྱི་སྤྱོད་པ་སོགས་ལ་འབྱུང་པོའི་གཏོར་མ་ཟ་བའང་གནང་སྟེ། ཀྱཻ་རྡོ་རྗེ་ལས། བཟའ་བཅའ་དེ་ཉིད་བཏུང་བ་ཉིད། །ཇི་ལྟར་རྙེད་པ་རབ་ཏུ་བཟའ། །ཡིད་འོང་མི་འོང་རྣམ་རྟོག་ཕྱིར། །ཞེན་པ་ཙམ་དུའང་མི་བྱའོ། །ཞེས་སོ། །དཀའ་ཐུབ་ལ་སོགས་པའི་བརྟུན་ཞུགས་འགོག་སྟེ། གསང་བ་འདུས་པ་ལས། དཀའ་ཐུབ་དཀའ་སྤྱད་མི་བཟོད་པ། །བསྟེན་ན་འགྲུབ་པར་མི་འགྱུར་ཅིང་། །ཞེས་སོ། །འཇུག་པ་བདེ་བའི་རྣལ་འབྱོར་ནི། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བསྟེན་བཞིན་དུ། །ཞེས་པ་ལྟར་བླ་མེད་དུ་འཇུག་པ་བདེ་བའི་རྣལ་འབྱོར་འདི་དག་རྒྱས་པར་སོགས་སོ། །གསུམ་པ་ནི། གྲུབ་མཐའི་རྣམ་དབྱེ་ཞེས་སོགས་ཚིགས་བཅས་གཅིག་གོ །བཞི་པ་ཕྱག་ཆེན་གོམས་པས་འཁོར་འདས་བསྲེ་བའི་སྤྱོད་པ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གཉིས་ཏེ། སྤྱོད་པའི་སྔོན་དུ་འགྲོ་བ་དྲོད་དང་། དྲོད་ཐོབ་པས་སྤྱད་པའི་སྤྱོད་པ་དངོས་སོ། །དང་པོ་ལ་དྲུག་སྟེ། ངོ་བོ། དབྱེ་བ། སོ་སོའི་མཚན་ཉིད། མ་ཐོབ་པ་ཐོབ་པར་བྱེད་པའི་ཐབས། ཐོབ་པ་བརྟན་པར་བྱེད་པའི་དུས། དྲོད་དང་སྤྱོད་པ་མཚམས་སྦྱོར་བའོ། །དང་པོ་ནི། ཏིང་ངེ་འཛིན་ལས་སྐྱེས་པའི་ལུས་ངག་ཡིད་གསུམ་གྱི་མཐུའམ། ནུས་པའི་ཁྱད་པར་ལ་དྲོད་ཅེས་བྱའོ། །གཉིས་པ་ནི། དྲོད་ཆུང་འབྲིང་ཆེན་པོ་གསུམ་མོ། །གསུམ་པ་ལ་དྲོད་ཆུང་བ་ནི། མཉམ་གཞག་ཏུ་འཇིག་རྟེན་གྱི་ཆོས་བརྒྱད་མགོ་སྙོམས་པ་སྙམ་བྱེད། ཉོན་མོངས་པ་གློ་བུར་བ་ཟློག་པ་སྙམ་བྱེད་པའོ། །དྲོད་འབྲིང་པོ་ནི་ཚར་གཅད་དང་རྗེས་གཟུང་གི་ལས་གང་རུང་ཞིག་ནུས་པའོ། །དྲོད་ཆེན་པོ་ནི། ཚར་གཅད་དང་རྗེས་གཟུང་གི་ལས་གཉིས་ཀ་ནུས་པ་སྟེ། རྣམ་ཤེས་དང་ཡེ་ཤེས་ཀྱི་ལས་ཆ་མཉམ་པ་ཞེས་བྱའོ། །བཞི་པ་ནི། དྲོད་ཆུང་ངུ་མ་ཐོབ་པ་ཐོབ་པར་བྱེད་པའི་ཐབས་རིམ་པ་གཉིས་བསྒོམ་པ་ཉིད་ཡིན་ལ། འབྲིང་མ་ཐོབ་པ་ཐོབ་པར་བྱེད་པ་ནི་ཀུན་འདར་གྱི་གསང་སྤྱོད་ཡིན་ཅིང་། ཆེན་པོ་མ་ཐོབ་པ་ཐོབ་པར་བྱེད་པ་ནི་དྲག་ཤུལ་གྱི་ལས་སོ། །ལྔ་པ་ནི། ཟླ་བ་ཕྱེད་དུ་སྔར་གྱི་དེ་ལ་གོམས་པར་བྱེད་ཅིང་གནས་པར་བྱེད་པའོ། །དྲུག་པ་ནི་དྲོད་ཆུང་ངུ་ཐོབ་ནས་ཀུན་འདར་གསང་ནས་སྤྱོད་ལ། འབྲིང་ཐོབ་ནས་འཇིག་རྟེན་པའི་མངོན་དུ་སྤྱོད་ཅིང་། ཆེན་པོ་ཐོབ་ནས་ཀུན་ཏུ་བཟང་པོ་སྤྱོད་དོ། །གཉིས་པ་ལ་དྲུག་སྟེ། ངོ་བོ། དབྱེ་བ། མཚན་ཉིད། སྤྱད་པའི་དུས། རྟེན་གྱི་གང་ཟག སྤྱད་པའི་དགོས་པའོ། །དང་པོ་ནི། ནང་དུ་དེ་ཁོ་ན་ཉིད་ཀྱི་རྟོགས་པས་ཀུན་ནས་བསླངས་པའི་ཕྱི་རོལ་ཏུ་ལུས་ངག་གཡོ་ཞིང་རྒྱུ་བ་ཅི་འདོད་བྱེད་པའི་ཁྱད་པར་ལ་སྤྱོད་པ་ཞེས་བྱ་སྟེ། ལུས་དང་། བཟའ་བ་དང་། བཏུང་བ་དང་། རྒྱན་ཆ་དང་། གནས་དང་། སྣོད་དང་། སྤྱོད་པ་བྱེད་པའི་དུས་དང་། གྲོགས་ལ་སོགས་པ་རྣམས་ལ། བཟང་ངན་གྱི་བླང་དོར་མེད་པར་ཅི་དགའ་སྤྱོད་པའོ། །གཉིས་པ་ལ་ཀུན་འདར་གྱི་སྤྱོད་པ་དང་། ཀུན་ཏུ་བཟང་པོའི་སྤྱོད་པ་གཉིས་ལས། དང་པོ་ལ་མིང་གི་རྣམ་གྲངས། སྨྱོན་པ་བརྟུལ་ཞུགས་ཀྱི་སྤྱོད་པ་དང་། རྒྱལ་བུ་གཞོན་ནུའི་སྤྱོད་པ་དང་། གསང་སྤྱོད་ཅེས་བྱའོ། །གཉིས་པ་ལ་མིང་གི་རྣམ་གྲངས། ཕྱོགས་ལས་རྣམ་པར་རྒྱལ་བའི་སྤྱོད་པ་དང་། རྒྱལ་ཚབ་ཆེན་པོའི་སྤྱོད་པ་དང་། འཇིག་རྟེན་པའི་མངོན་དུ་སྤྱོད་པ་ཞེས་བྱའོ། །གསུམ་པ་ནི་ཅིའི་ཕྱིར་མིང་དེ་སྐད་དུ་བརྗོད་ཅེ་ན། འཇིག་རྟེན་པ་རྣམས་འཇིགས་ཤིང་འདར་བས་ཀུན་འདར་རམ། ཀུན་འདར་གྱི་སྒྲ་ཨ་ཝ་དྷཱུ་ཏཱི་ཞེས་པ་གཉིས་སྤངས་ཞེས་བྱ་བར་ཡང་འགྱུར་བས་ན། བཟའ་བྱ་དང་བཟའ་བྱ་མ་ཡིན་པ་སོགས་བླང་དོར་གཉིས་སུ་མེད་པར་སྤྱོད་པས་ན་གཉིས་སྤངས། སྨྱོན་པར་བརྫུས་ཏེ་རིགས་ལ་སོགས་པ་གསང་ནས་སྤྱོད་པས་ན་སྨྱོན་པ་བརྟུལ་ཞུགས་ཀྱི་སྤྱོད་པ་དང་། རྒྱལ་ཚབ་ཆེན་པོ་དྲོད་ཆེན་པོ་མ་ཐོབ་པས་ན་རྒྱལ་བུ་གཞོན་ནུའི་སྤྱོད་པ་དང་། རྣལ་འབྱོར་པར་ཁས་མི་ལེན་པར་གསང་སྟེ་སྤྱོད་པས་ན་གསང་སྤྱོད་ཅེས་བྱའོ། །གཉིས་པ་ལ་སྣང་བ་ཐམས་ཅད་རང་གི་རྟོགས་པའི་ཡེ་ཤེས་ཀྱི་ངོ་བོར་ཀུན་ཏུ་བཟང་པོར་རྟོགས་པས་ན་ཀུན་ཏུ་བཟང་པོ་དང་། རྣམ་ཤེས་དང་ཡེ་ཤེས་ཆ་མཉམ་པས་གཞན་དོན་ཐོགས་མེད་དུ་ནུས་པས་ན་རྒྱལ་ཚབ་ཆེན་པོ་དང་། འཇིག་རྟེན་པའི་མངོན་དུ་སྤྱོད་པས་ན་མངོན་སྤྱོད་ཅེས་བྱའོ། །བཞི་པ་ནི་དྲོད་ཆུང་ངུ་ཐོབ་ནས་ཀུན་འདར་གསང་སྟེ་སྤྱོད་པ་ཞེས་བྱ་བ་མཚན་མོའི་དུས་བཟའ་བྱ་དང་། བཟའ་བྱ་མ་ཡིན་པ་གཉིས་སུ་མེད་པ་ལ་སོགས་པ་སྤྱོད་ལ། ཉིན་མོ་རང་གི་རིགས་དང་མཐུན་པར་སྤྱོད་དོ། །དེས་དྲོད་འབྲིང་པོ་སྐྱེས་པ་ན་ཀུན་འདར་མངོན་དུ་སྤྱོད་པ་ཞེས་བྱ་བ་རང་གི་ཡུལ་འཁོར་སྤངས་ཏེ། རིགས་ལ་སོགས་པ་གསང་ནས་སྤྱོད་པ་ཞེས་བྱ་བ་སྨྱོན་པར་བརྫུས་ཏེ་སྤྱོད་པ་ཡིན་ནོ། །དེས་དྲོད་ཆེན་པོ་འཇིག་རྟེན་ལས་འདས་པའི་ཟག་པ་མེད་པའི་ཡེ་ཤེས་ཐོབ་པ་ན། ཀུན་ཏུ་བཟང་པོའི་སྤྱོད་པ་སྤྱད་དོ། །ལྔ་པ་ནི་དྲོད་ཐོབ་ཅིང་སེམས་ཅན་གྱི་དོན་དུ་ཚེ་འདི་ཉིད་ལ་མཆོག་གི་དངོས་གྲུབ་འདོད་པའི་ཆོས་གཉིས་དང་ལྡན་པ་གཅིག་གིས་སྤྱོད་པ་སྤྱད་པ་ཡིན་གྱི། གང་ཡང་རུང་བ་གཅིག་མ་ཚང་ན་ནི་མ་ཡིན་ནོ། །དྲུག་པ་ལ་གསུམ་ལས། ཀུན་འདར་གསང་ནས་སྤྱོད་པའི་དགོས་པ་ནི། རང་གི་སེམས་ཀྱི་བརྟན་གཡོ་བརྟགས་པའི་ཆེད་ཡིན་ལ། ཀུན་འདར་མངོན་དུ་སྤྱོད་པའི་དགོས་པ་ནི། གྲུབ་པའི་ས་དང་གྲོགས་དབང་དུ་བྱ་བའི་ཆེད་ཡིན་ཅིང་། ཀུན་ཏུ་བཟང་པོའི་སྤྱོད་པའི་དགོས་པ་ནི། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཡིན་ནོ། །དེ་ལྟར་སྤྱོད་པ་གཉིས་ལས། གཞུང་འདིར་ཀུན་འདར་གྱི་སྤྱོད་པ་སྟོན་པ་ཡིན་ཅིང་། དེ་ལ་ཡང་གསང་སྤྱོད་དང་། མངོན་སྤྱོད་གཉིས་ལས། ཕྱི་མ་སྟོན་ཏེ། གང་ཟག་དང་གནས་ལ་ལོག་པར་རྟོག་པའི་གཞི་ནི་དེ་ཉིད་ཡིན་པའི་ཕྱིར་རོ། །གཉིས་པ་གཞུང་གི་དོན་ལ་གཉིས་ཏེ། སྤྱོད་པའི་རྣམ་གཞག་སྤྱིར་བསྟན་པ། ལོག་རྟོག་དགག་པ་བྱེ་བྲག་ཏུ་བཤད་པའོ། །དང་པོ་ནི། དབང་བཞི་ཡོངས་སུ་ཞེས་སོགས་བཅོ་ལྔ་སྟེ། དབང་བཞི་རྫོགས་པར་ཐོབ་ཅིང་། རིམ་གཉིས་ཤེས་པའི་གང་ཟག་དེས། དང་པོར་བར་ཆད་ཉུང་བས་རང་གི་ཁྱིམ་དུ་བསྒོམ། བརྟན་པ་ཅུང་ཟད་ཐོབ་ནས་བརྩོན་འགྲུས་རྩོམ་པས་དུར་ཁྲོད་སོགས་སུ་བསྒོམ། བརྟན་པ་ཆེན་པོ་དྲོད་འབྲིང་གི་རྟོགས་པ་ཐོབ་ནས། གང་ཞིག་སོར་མོ་གཅིག་སྟོན་དང་། །གཉིས་ཀྱིས་ལེགས་པར་འོངས་པ་ཡིན། །ཞེས་སོགས་ལུས་བརྡ་དང་། མ་ད་ན་ཆང་། བ་ལ་ཤ་ཞེས་སོགས་ངག་གི་བརྡ་རྣམས་ལ་ལེགས་པར་སྦྱངས་ཞིང་། བླང་དོར་གཉིས་སུ་མེད་པའི་དེ་ཉིད་རྟོགས་པའི་གང་ཟག་དེས་སྤྱོད་པ་སྤྱད་དོ། །དགོས་པ་ནི་ནང་གི་ས་རྣམས་བགྲོད་པར་བྱ་བ་དང་། ཕྱི་ནང་གི་པུ་ལི་ར་མ་ལ་ཡ་ལ་སོགས་པའི་ཡུལ་རྣམས་དབང་དུ་བསྡུ་བའི་ཕྱིར་ཡིན་ཏེ། དེ་ཡང་ཕྱི་རོལ་པུ་ལི་ར་མ་ལ་ཡ་ལ་སོགས་པའི་ཡུལ་བཞིན། ས་དང་པོ་ཐོབ་པའི་ཚུལ་བཟུང་བའི་མཁའ་འགྲོ་མ་གནས་པ་རྣམས་དབང་དུ་འདུས་པས། ནང་དུ་སྤྱི་བོ་ལ་སོགས་པའི་ཡུལ་བཞིའི་རླུང་སེམས་དབུ་མར་འདུས་པས། ས་དང་པོའི་རྟོགས་པ་སྐྱེ་བ་ལ་སོགས་པའོ། །གནས་གང་དུ་སྤྱོད་པ་སྤྱད་ན། གནས་དང་ཉེ་བའི་གནས་ལ་སོགས་པ་བཅུ་གཉིས་ལས་ཕྱེ་བའི་ཡུལ་སུམ་ཅུ་སོ་གཉིས་དང་། གླིང་བཞི་དང་། གླིང་བཞི་གཅིག་ཏུ་སྡོམ་པ་སྟེ་སུམ་ཅུ་སོ་བདུན་དུའོ། །ངོ་བོ་ནི་རིག་པ་བརྟུལ་ཞུགས་ཀྱི་སྤྱོད་པའོ། །གང་ལས་གསུངས་ན་ལུགས་འདི་སོགས་སོ། །མཐར་ཐུག་གི་དགོས་པ་ནི། འདི་འདྲའི་སོགས་སོ། །གཉིས་པ་ལ་གསུམ་སྟེ། གང་གིས་རྒྱུ་བའི་གང་ཟག་ལ་འཁྲུལ་པ་དགག་པ། གང་དུ་རྒྱུ་བའི་གནས་ལ་འཁྲུལ་པ་དགག་པ། དེ་གཉིས་ཀའི་མཇུག་བསྡུའོ། །དང་པོ་ལ་གསུམ་སྟེ། མཚན་ཉིད་དང་མི་ལྡན་པའི་གང་ཟག་སྤྱོད་པ་སྤྱད་པ་དགག་པ། མཚན་ཉིད་དང་ལྡན་པའི་གང་ཟག་སྤྱོད་པ་སྤྱད་པའི་དགོས་པ། དེས་གྲུབ་པའི་དོན་བསྟན་པའོ། །དང་པོ་ནི། དེང་སང་གསང་སྔགས་ཞེས་སོགས་ཚིགས་བཅད་ལྔ་སྟེ། དེང་སང་རིམ་གཉིས་མི་བསྒོམ་པར། ཡུལ་ཆེན་སུམ་ཅུ་སོ་བདུན་དུ་སྤྱོད་པའི་ཆེད་དུ་འགྲོ་བ་ནི་སངས་རྒྱས་ཀྱིས་མ་གསུངས་ཏེ། རིམ་པ་གཉིས་པོ་མི་སྒོམ་པའི་སྒོམ་ཆེན་བཟང་ཡང་ས་དང་པོ་ཡན་ཆད་ཀྱི་རྟོགས་པ་བསྐྱེད་ནུས་པ་ཡང་ཕ་རོལ་ཏུ་ཕྱིན་པའི་ལུགས་ཀྱི་སེམས་ལ་གནད་དུ་བསྣུན་པའི་བསྒོམ་ཆེན་ལས་མ་འདས་ལ། མདོ་ལས། ས་ལམ་གྱི་རྟོགས་པ་བསྐྱེད་པའི་ཆེད་དུ་ཡུལ་ཆེན་དེ་དག་ཏུ་འགྲོ་བའི་ཆོ་ག་བཤད་པ་མེད་པའི་ཕྱིར། ཡུལ་ཆེན་བགྲོད་ནས་ས་ལམ་གྱི་རྟོགས་པ་བསྐྱེད་པ་ནི། ནང་ལུས་ཀྱི་གནས་དེ་དང་། དེ་དག་གི་རླུང་སེམས་དབུ་མར་ཞུགས་པའི་ཆེད་ཡིན་པའི་ཕྱིར། འདིར་ཁ་ཅིག་རིམ་གཉིས་མི་བསྒོམ་པའི་ཉམས་ལེན་ཐམས་ཅད་ཕ་རོལ་ཏུ་ཕྱིན་པའི་ཉམས་ལེན་དུ་བྱས་ནས། རྒྱུད་སྡེ་བཞི་ཀ་ལ་རིམ་གཉིས་ཡོད་པར་འདོད་པ་ནི་སྐབས་ཀྱི་དོན་མ་རྟོགས་པ་སྟེ། འདི་ལ་བླ་མེད་ཀྱི་ཉམས་ལེན་མེད་པས་སྤྱོད་པ་བྱེད་པ་དགག་པའི་སྐབས་ཡིན་པས། རྒྱུད་སྡེ་འོག་མ་གསུམ་གྱི་ཉམས་ལེན་བྱེད་པ་ལ་ཡང་སྤྱོད་པ་སྤྱད་པ་མེད་པར་འཆད་དགོས་པའི་ཕྱིར་རོ། །ཁ་ཅིག་ཕ་རོལ་ཏུ་ཕྱིན་པའི་སྒོམ་ཆེན་བདག་འཛིན་སྤོང་བ་དང་། སྙིང་རྗེ་ཆེན་པོ་བསྒོམ་པ་ཙམ་ལ་འཆད་པ་ནི། རྒྱུད་སྡེ་འོག་མ་གསུམ་གྱི་ཉམས་ལེན་བྱེད་པ་ལ་ཡང་དེ་ཙམ་ལས་མེད་པའམ། རིམ་གཉིས་ཡོད་པར་འདོད་དགོས་པས་མི་འཐད་དོ། །དེས་ན་སྐབས་ཀྱི་དོན་ནི་སྒོམ་ཆེན་བཟང་པོ་ཞེས་པ་ས་དང་པོ་ཡན་ཆད་ཀྱི་རྟོགས་པ་སྐྱེས་པ་ཡིན་ལ། དེ་ལ་སེམས་ལ་གནད་དུ་བསྣུན་ནས་སྐྱེས་པ་དང་། ལུས་ལ་གནད་དུ་བསྣུན་ནས་སྐྱེས་པ་གཉིས་ལས། རིམ་གཉིས་མ་བསྒོམ་པར་སྐྱེས་པ་ནི་སེམས་ལ་གནད་དུ་བསྣུན་ནས་སྐྱེས་པ་ཡིན་པས། རྒྱུད་སྡེ་འོག་མ་གསུམ་གྱི་ས་ལམ་གྱི་རྟོགས་པ་བསྐྱེད་པའི་ཚུལ་ཡང་། སེམས་ལ་གནད་དུ་བསྣུན་པ་ལས་མ་འདས་པའི་ཕྱིར་ན། ཕ་རོལ་ཏུ་ཕྱིན་པའི་ལུགས་ཀྱི་ས་ལམ་གྱི་རྟོགས་པ་བསྐྱེད་པའི་ལུགས་སུ་སྟོན་པ་ཡིན་གྱི། ཉམས་ལེན་ཐམས་ཅད་ཕ་རོལ་ཏུ་ཕྱིན་པའི་ཉམས་ལེན་དུ་འདུས་པ་ནི་མ་ཡིན་ནོ། །ཚུལ་འདི་ཇི་ལྟ་བ་བཞིན་རྟོགས་པ་ནི་དམ་པའི་མགོན་གྱིས་ཟིན་པ་ཁོ་བོ་འབའ་ཞིག་གོ །གལ་ཏེ་གསང་སྔགས་མི་བསྒོམ་ཞིང་རྟོགས་པ་ཡོད་པར་རློམ་པ་ཡིས་ཡུལ་དེར་ཕྱིན་ན་བར་ཆད་འབྱུང་ཞིང་། རློམ་པ་དང་། རྟོགས་པ་ཅི་ཡང་མེད་པའི་སྒོམ་ཆེན་གྱིས་ཕྱི་ན་ཡང་ཕན་གནོད་གང་ཡང་མེད་དེ་དཔེར་ན་ཨོ་རྒྱན་སོགས་སོ། །གཉིས་པ་ནི། གསང་སྔགས་བསྒོམ་པའི་ཞེས་སོགས་དྲུག་སྟེ། མཚན་ཉིད་དེ་དག་དང་ལྡན་པའི་གང་ཟག་ལ་ཡུལ་དེར་གནས་པའི་མཁའ་འགྲོ་མ་ས་དང་པོ་སོགས་ཐོབ་པའི་ཚུལ་བཟུང་བ་རྣམས་ཀྱིས་བྱིན་གྱིས་བརླབས་ནས། ནང་དུ་ས་རྣམས་བགྲོད་པ་འདིའི་དོན་སོགས་སོ། །གསུམ་པ་ནི། དེས་ན་གསང་སྔགས་ཞེས་སོགས་གཉིས་སོ། །གཉིས་པ་ལ་གཉིས་ཏེ། ཏི་སེ་གངས་ཅན་དུ་འདོད་པ་དགག་པ། ཙཱ་རི་གནས་ཆེན་དུ་འདོད་པ་དགག་པའོ། །དང་པོ་ལ་གསུམ་སྟེ། དགག་པ་སྤྱིར་བསྟན། ལུང་འགལ་བྱེ་བྲག་ཏུ་བཤད། ཉེས་སྤོང་གི་ལན་དགག་པའོ། །དང་པོ་ནི། དཔལ་ལྡན་དུས་ཀྱི་ཞེས་སོགས་བཅུ་གཅིག་སྟེ། དུས་འཁོར་གྱི་འཇིག་རྟེན་ཁམས་ལེ་ལས་གསུངས་པའི་རི་བོ་གངས་ཅན་དང་། མངོན་པའི་གཞུང་ལས་གསུངས་པའི་རི་བོ་སྤོས་ངད་ལྡན་གྱི་བྱང་ན། བྲག་རི་གསེར་གྱི་བྱ་སྐྱིབས་ལྷ་མ་ཡིན་གྱི་ཕུག ཆུ་ཞེང་དཔག་ཚད་ལྔ་བཅུ། དཔངས་དཔག་ཚད་ཕྱེད་དང་བཞི་པ། བྲག་ཕྲན་ལྔ་བརྒྱས་བསྐོར་བ། དེའི་བྱང་ན་ཤིང་སཱ་ལའི་རྒྱལ་པོ་རབ་བརྟན་ཤིང་ཕྲན་ལྔ་བརྒྱས་བསྐོར་བ། དེའི་ཤར་ན་རྫིང་བུ་དལ་འབབ་མཚོ་མ་དྲོས་པ་དང་མཉམ་པ་རྫིང་བུ་ལྔ་བརྒྱས་བསྐོར་བ་ཡོད། དེར་གླང་པོ་ཆེ་རབ་བརྟན་འཁོར་ལྔ་བརྒྱས་བསྐོར་བ་གནས་ཤིང་། དབྱར་ཟླ་བ་བཞི་སཱ་ལའི་ཚལ་དུ་འགྲོ། དགུན་ཟླ་བ་བཞི་གསེར་གྱི་བྱ་སྐྱིབས་སུ་སྡོད། རི་སྤོས་ངད་ལྡན་པའི་ཚུ་རོལ་ན་མཚོ་མ་དྲོས་པ་ཡོད་ལ། དེའི་ཚུ་རོལ་ན་རི་བོ་གངས་ཅན་ཡོད་པར་གསུངས་ཤིང་། མཚོ་མ་དྲོས་པ་བཅོམ་ལྡན་འདས་དགྲ་བཅོམ་ལྔ་བརྒྱ་དང་བཅས་པ། རང་རང་གི་ལས་ཀྱི་རྒྱུ་བ་ལུང་སྟོན་པར་མཛད་པའི་གནས་ཡིན་པར་གསུངས་པའི་རི་བོ་གངས་ཅན་དེ་ནི་མངའ་རིས་ཀྱི་ཏི་སེ་འདི་མ་ཡིན་ཅིང་། མ་དྲོས་པའི་རྒྱ་མཚོ་ཡང་མ་ཕམ་གཡུ་མཚོ་མ་ཡིན་ཏེ། གླང་པོ་རྣམས་ཀྱང་སོགས་སོ། །གཉིས་པ་ལ་ལྔ་སྟེ། དུས་ཀྱི་འཁོར་ལོའི་དང་། མངོན་པའི་དང་། མུ་སྟེགས་བྱེད་ཀྱི་དང་། རྨ་བྱ་ཆེན་མོའི་མདོའི་དང་། ཕལ་པོ་ཆེའི་ལུང་དང་འགལ་བའོ། །དང་པོ་ནི། དཔལ་ལྡན་དུས་ཀྱིས་ཞེས་སོགས་ཉེར་གཉིས་ཏེ། ད་ལྟའི་ཏི་སེ་འདི་དུས་ཀྱི་འཁོར་ལོ་ནས་བཤད་པའི་རི་བོ་གངས་ཅན་མ་ཡིན་ཏེ། དེའི་འགྲམ་ན་ཤམ་བྷ་ལ་མེད་པའི་ཕྱིར་དང་། རྫུ་འཕྲུལ་དང་མི་ལྡན་པས་ཀྱང་བགྲོད་ནུས་པའི་ཕྱིར། ཁྱབ་པ་ཡོད་དེ། དཔལ་ལྡན་དུས་ཀྱི་འཁོར་ལོ་ལས་སོགས་སོ། །དེ་ལྟར་ཡང་བསྡུས་རྒྱུད་ལས། ལན་ཚྭ་ཆང་དང་ཆུ་དང་འོ་མ་ཞོ་དང་མར་དང་སྦྲང་རྩིའི་རྒྱ་མཚོ་རྣམས་དང་རི་བདུན་ནི། །འོད་སྔོན་པོ་དང་མནྡ་རྭ་བའི་རི་སྟེ་རྩུབ་ལྡན་ནོར་འོད་ཚད་ལྡན་གྲང་བའི་རི་རྡོ་རྗེ། །གླིང་རྣམས་ཟླ་བ་དང་ནི་རབ་དཀར་རབ་མཆོག་ཀུ་ཤ་མིའམ་ཅི་སྟེ་ཁྲུང་ཁྲུང་དྲག་པོ་རྣམས། །ལོངས་སྤྱོད་པ་རྣམས་ཉིད་དེ་འཛམ་གླིང་བདུན་པ་ལས་ཀྱི་ས་རྣམས་ལ་ནི་མི་རྣམས་གནས་པའོ། །ཞེས་རི་རབ་ལ་མཚོ་བདུན་དང་། རི་བདུན་དང་། གླིང་བདུན་གྱིས་ཁོར་ཡུག་དུ་བསྐོར་ནས་ཡོད་པའི་གླིང་ཕྱི་མ་འཛམ་གླིང་ཆེན་པོ་ཡིན་ཅིང་། དེ་ལ་དུམ་བུ་བཅུ་གཉིས་སུ་བྱས་པའི་ལྷོའི་ཆ་ནི་འཛམ་གླིང་ཆུང་ངུ་ཡིན་པ། དེའི་ཆུ་ཞེང་ཆེ་བ་ལ་སི་ཏ་ཡོད། དེའི་བྱང་ན་རི་བོ་གངས་ཅན་ཡོད་ཅིང་། རི་བོ་གངས་ཅན་གྱིས་བསྐོར་བའི་དབུས་ན་ཤམ་བྷ་ལའི་ཡུལ། ས་པདྨ་འདབ་བརྒྱད་ཀྱི་རྣམ་པར་གནས་པ་དབུས་ཀྱི་སུམ་ཆ་ལྟེ་བར་བྱས་པ་ལ་ཀེ་ལ་ཤའི་རི་བོར་གྲགས་ཤིང་། དེ་ལ་རྒྱལ་པོའི་ཕོ་བྲང་ཀཱ་ལ་པ་དང་། དུས་ཀྱི་འཁོར་ལོའི་གཞལ་ཡས་ཁང་དང་། མ་ལ་ཡའི་སྐྱེད་མོས་ཚལ་ཡོད་ལ། འདབ་མ་བརྒྱད་པོ་རེ་རེ་ལ་གྲོང་ཁྱེར་བྱེ་བ་བཅུ་གཉིས་རེ་ཡོད་ཅིང་། བྱེ་བ་ཕྲག་རེ་ལ་རྒྱལ་པོ་རེ་ཡོད་པས་རྒྱལ་ཕྲན་དགུ་བཅུ་རྩ་དྲུག་ཡོད་དེ། དེ་ལྟར་ཡང་། གངས་རི་མཆོག་གི་ཕྱོགས་རྣམས་མ་ལུས་ཀུན་ནས་ཡང་དག་བསྐོར་བ་དེ་དག་དབུས་སུ་ཀེ་ལ་ཤ །ས་ལ་ཀེ་ལ་ཤ་ཡ་དུམ་བུར་གངས་རི་ལྡན་པ་དེ་ཡི་སུམ་ཆ་ཀུན་ནས་ཤེས་བྱ་སྟེ། །ཕྱི་རོལ་དུ་ཡང་ཡུལ་རྣམས་ཉིན་བྱེད་འདབ་མ་རེ་རེའི་གླིང་རྣམས་ཀུན་གྱིས་བརྒྱན་པར་བརྗོད་པ་སྟེ། །གཡས་ཀྱི་ཕྱེད་དུ་ཐུབ་མཆོག་གནས་གྲོང་ཤམ་བྷ་ལ་ཞེས་བྱ་བ་གྲོང་ཁྱེར་བྱེ་བ་ཡང་དག་གནས། །ཞེས་སོགས་སོ། །དེར་རྒྱལ་པོ་ཉི་མའི་འོད་ཅེས་བྱ་བ་བྱུང་བའི་སྲས་ཟླ་བ་བཟང་པོ་ལ་སྟོན་པས་འབྲས་སྤུངས་སུ་དཔལ་ལྡན་རྒྱུ་སྐར་གྱི་དཀྱིལ་འཁོར་སྤྲུལ་ནས་དུས་ཀྱི་འཁོར་ལོའི་རྩ་རྒྱུད་གསུངས་སོ། །དེས་ཤམ་བྷ་ལར་རྩ་རྒྱུད་ལོ་གཅིག་གསུངས། དེའི་བརྒྱུད་པ་ལྷ་དབང་། གཟི་བརྗིད་ཅན། ཟླ་བས་བྱིན། ལྷའི་དབང་ཕྱུག སྣ་ཚོགས་གཟུགས། ལྷའི་དབང་ལྡན་རྣམས་ཀྱིས་ལོ་བརྒྱ་བརྒྱ་རྩ་རྒྱུད་གསུངས་སོ། །དེ་ནས་འཇམ་དབྱངས་གྲགས་པས་ལོ་བརྒྱར་རྩ་རྒྱུད་གསུངས་ནས་བསྡུས་རྒྱུད་མཛད། དེ་ནས་པདྨ་དཀར་པོས་བསྡུས་རྒྱུད་ཀྱི་འགྲེལ་པ་དྲི་མེད་འོད་མཛད་དོ། །དེ་ནས་བཟང་པོ་རྣམ་རྒྱལ། བཤེས་གཉེན་བཟང་པོ་ལ་སོགས་པ་རིགས་ལྡན་གྱི་རྒྱལ་པོ་མང་དུ་བྱུང་ངོ་། །སྙིགས་མའི་དུས་རྟགས་ཙམ་འཛིན་པར་གྱུར་པ་ན། ཧོར་ཡུལ་གྱི་བྱང་ཕྱོགས་དག་སྦྱིན་ཅེས་བྱ་བར་ལྷ་མ་ཡིན་གྱི་སྤྲུལ་པ་ཀླ་ཀློའི་རྒྱལ་པོ་སྟོབས་ཅན་ཞིག་བྱུང་སྟེ། ཡུལ་དབུས་དང་། བོད་རྣམས་འཇོམས་ཤིང་། འཛམ་གླིང་ཆུང་ངུའི་ཕྱེད་དབང་དུ་བསྡུས་ཏེ། འཁོར་རྒྱལ་ཕྲན་དགུ་བཅུ་རྩ་དྲུག་ཡོད་པས་སྟོབས་ཀྱིས་དྲེགས་ནས་ཤམ་བྷ་ལར་དམག་འདྲེན་པར་རྩོམ་མོ། །དེའི་ཚེ་འཇམ་དཔལ་གྱི་སྤྲུལ་པ་དྲག་པོ་འཁོར་ལོ་ཅན་ཞེས་བྱ་བའི་རྒྱལ་པོ་སོགས་སོ། །གཉིས་པ་ནི། མངོན་པ་ལས་ཞེས་སོགས་བཅུ་སྟེ། ད་ལྟའི་མ་ཕམ་འདི་མ་དྲོས་པར་འདོད་པ་མངོན་པའི་གཞུང་དང་འགལ་ཏེ། མངོན་པ་ལས་ཡུལ་དབུས་འདི་ནས་བྱང་དུ་རི་ནག་པོ་དགུ་འདས་པ་ན་རི་བོ་གངས་ཅན་ཡོད་ལ། དེ་ནས་རི་སྤོས་ངད་ལྡན་པ་ཡོད་པའི་ཚུ་རོལ་དཔག་ཚད་བཅུ་འོངས་པ་ན། མཚོ་མ་དྲོས་པ་ཆུ་ཞེང་དང་ཟབས་སུ་དཔག་ཚད་ལྔ་བཅུ་ལྔ་བཅུ་ཡོད་པ་ཡན་ལག་བརྒྱད་ལྡན་གྱི་ཆུས་གང་བ་ཡོད་ལ། དེའི་གཡས་རོལ་ན་ཤིང་འཛམ་བུ་ཞེས་བྱ་བ་འབྲས་བུ་རྫ་མ་ཙམ་རོ་སྦྲང་རྩི་འདྲ་བ་ཆུ་ནང་དུ་ལྷུང་བ་ཉ་རྣམས་ཀྱིས་ཟོས་པའི་ལྷག་མ་འཛམ་བུ་ཆུ་བོའི་གསེར་དུ་འགྱུར་བ་ཡོད་དོ། །ཞེས་སོགས་ཀྱི་མཚན་ཉིད་རྒྱས་པར་གསུངས་པའི་ཕྱིར་དང་། མཛོད་འགྲེལ་ལས། དེར་ནི་རྫུ་འཕྲུལ་དང་མི་ལྡན་པའི་མིས་བགྲོད་པར་དཀའ་འོ། །ཞེས་བཤད་ཅིང་ད་ལྟའི་ཏི་སེ་སོགས་སོ། །གསུམ་པ་ནི། མུ་སྟེགས་བྱེད་པའི་ཞེས་སོགས་བཅུ་བཞི་སྟེ། རྒྱས་པའི་བསྟན་བཅོས་གཞོན་ནུ་འབྱུང་བ་དང་། བྷ་ར་ཏ་ཀ་ལས། གླིང་འདིའི་ཤར་ནུབ་གཉིས་ཀྱི་རྒྱ་མཚོ་ལ་ཐུག་གི་བར་རི་བོ་གངས་ཅན་གྱིས་ཁྱབ་པར་བཤད་པ་དང་། སྔོན་རྒྱལ་པོ་ཤིང་རྟ་བཅུ་པའི་བུ་དགའ་བྱེད་ཀྱི་ཆུང་མ་རོལ་རྙེད་མ་ལང་ཀ་མགྲིན་བཅུས་ཕྲོགས་ནས་དེ་ལ་དམག་དྲངས་ཏེ། སྲིན་པོ་ཕལ་ཆེར་བསད་པའི་ཚེ་མགྲིན་བཅུའི་སྤུན་ཟླ་བསམ་གཏན་བསྒོམ་པ་ཞིག་གིས་རླུང་དྲག་པོ་བརྔུབས་པས་དགའ་བྱེད་དང་། ཧ་ནུ་མནྡྷ་མ་གཏོགས་དམག་དཔུང་ཐམས་ཅད་ཀེང་རུས་སུ་སོང་ནས་དེ་གསོ་བའི་ཕྱིར་རི་བོ་གངས་ཅན་བླངས་ནས་དེ་ལ་ཡོད་པའི་བདུད་རྩི་གཏོར་བས་སོས་པར་གྱུར་ཏེ་སྤྲེའུ་ཧ་ནུ་མནྡྷས་སླར་ཡང་གངས་རི་རང་གནས་སུ་འཕངས་པའི་དུམ་བུ་ཞིག་ལམ་དུ་ཆད་པ་དེ་ཏི་སེ་ཡིན་ཞེས་གྲོག་མཁར་བ་སྨྲ་བ་དེས་ན། ཕྱི་ནང་གང་གི་ལུགས་ལ་ཡང་དབང་ཕྱུག་ཆེན་པོའི་གནས་སོགས་སོ། །གླང་པོ་ཆེ་ས་སྲུང་གི་བུས་བསྟེན་པ་ནི་འདུལ་བ་ལུང་ལས་བཤད་ལ། གདགས་པ་ལས་ནི་རབ་བརྟན་གྱིས་བསྟེན་པར་བཤད་དོ། །བཞི་པ་ནི། རྨ་བྱ་ཆེན་མོའི་ཞེས་སོགས་གཉིས་ཏེ། མདོ་དེ་ལས་ཀྱང་རིའི་རྒྱལ་པོ་གངས་ཅན་དང་། རིའི་རྒྱལ་པོ་ཏི་སེ་དང་ཞེས་ཐ་དད་དུ་གསུངས་པ་དང་འགལ་ལོ། །ལྔ་པ་ནི། ཕལ་པོ་ཆེ་ཡི་ཞེས་སོགས་ཚིགས་བཅད་བདུན་ཏེ། ད་ལྟའི་མ་ཕམ་འདི་ལ་ནི། ཕལ་པོ་ཆེ་ནས་གསུངས་པ་ཡི། མཚན་ཉིད་འདི་དག་གང་ཡང་མེད་པས་མ་དྲོས་པ་ཡིན་པར་འགལ་ལོ། །གསུམ་པ་ལ་གཉིས་ཏེ། ཉེས་སྤོང་བརྗོད་པ། དེ་དགག་པའོ། །དང་པོ་ནི། དེ་ལ་ཁ་ཅིག་ཞེས་སོགས་ལྔ་སྟེ། སྔར་བཤད་པ་དེ་དག་ལ་སྐྱོན་སྤོང་བར་འདོད་པ་ཁ་ཅིག ད་ལྟ་མཚན་ཉིད་དེ་དག་དང་མི་ལྡན་ཡང་གངས་ཅན་དང་། མ་དྲོས་པ་མ་ཡིན་པར་མི་འགྱུར་ཏེ། བྱ་རྒོད་ཕུང་པོའི་རི་ལ་ཡང་དཀོན་བརྩེགས་ཀྱི་སྡོམ་གསུམ་བསྟན་པའི་གླིང་གཞིར་མཐོ་བ་དང་། ཟླུམ་པ་དང་། ཤིང་ལྗོན་པ་སྣ་ཚོགས་དང་། འདབ་ཆགས་མཛེས་ཤིང་ཡིད་དུ་འོང་བ་དུ་མ་སྐད་སྙན་པ་སྒྲོག་པ་དང་། ལྷ་རྫས་ཀྱི་མེ་ཏོག་དྲི་བསུང་ཕུན་སུམ་ཚོགས་པས་ཁྱབ་པར་བཤད་པ་རྣམས་ད་ལྟ་མེད་པས། དུས་སྙེགས་པའི་སྟོབས་ཀྱིས་ཡུལ་ཀུན་ཀྱང་རྣམ་པར་འགྱུར་བར་སྣང་བའི་ཕྱིར་ཞེས་སོ། །གཉིས་པ་ལ་གཉིས་ཏེ། འཆད་ཚུལ་གཉིས་ཀྱི་རང་བཞིན་བཤད། དེ་ཉིད་སྐབས་ཀྱི་ལན་ལ་སྦྱར་བའོ། །དང་པོ་ལ་གཉིས་ཏེ། སྒྲོ་སྐུར་སྐྱོན་དུ་འགྱུར་མི་འགྱུར་དཔྱད། དེ་ཡི་དཔེར་བརྗོད་སོ་སོར་བཤད་པའོ། །དང་པོ་ནི་འདི་ཡང་ཕྱེ་སྟེ་ཞེས་སོགས་བཅུ་བཞི་སྟེ། སྤྱིར་འཆད་ཚུལ་ལ་དངོས་པོའི་གནས་ལུགས་འཆད་པ་དང་སྐྱོན་ཡོན་བསྔགས་པའི་སྐབས་གཉིས་ཡོད་པ་ལས། དང་པོ་ལ་སྒྲོ་སྐུར་བརྗོད་ན་གནས་ལུགས་ངོས་མི་ཟིན་པས་སྐྱོན་དུ་འགྱུར་ལ། ཕྱི་མ་ལ་སྒྲོ་སྐུར་སྐྱོན་དུ་མི་འགྱུར་ཏེ། ཡོན་ཏན་བསྔགས་པའི་སྐབས་ཡིན་གྱི་གནས་ལུགས་འཆད་པའི་སྐབས་མ་ཡིན་པའི་ཕྱིར་རོ། །གཉིས་པ་ནི། དཔེར་ན་བ་གླང་ཞེས་སོགས་ཉེར་གཉིས་ཏེ། འཆད་ཚུལ་གཉིས་པོ་ལ་སྒྲོ་སྐུར་སྐྱོན་དུ་འགྱུར་མི་འགྱུར་དཔེའི་སྒོ་ནས་བཤད་པའོ། །གཉིས་པ་ནི། དེས་ན་བྱ་རྒོད་ཞེས་སོགས་ཚིགས་བཅད་གཉིས་ཏེ། བྱ་རྒོད་ཕུང་པོ་སོགས་ཀྱི་ཡོན་ཏན་བཤད་པ་ད་ལྟ་མེད་པ་དང་། གངས་ཅན་དང་། མ་དྲོས་པ་སོགས་ཀྱི་མཚན་ཉིད་བཤད་པ་ད་ལྟ་མེད་པ་མི་མཚུངས་ཏེ། སྔ་མ་ནི་མདོ་སྡེ་དེ་ལ་ངེས་པ་བསྐྱེད་པའི་ཆེད་དུ་སྔོན་ཕུན་སུམ་ཚོགས་པ་ལྔ་འཛོམ་པའི་དུས་སུ་མདོ་སྡེ་འདི་འབྱུང་ངོ་ཞེས་སྙན་དངགས་ཀྱི་གཞུང་བཞིན་དུ་ཡོན་ཏན་བསྔགས་པའི་སྐབས་ཡིན་པའི་ཕྱིར་དང་། རྣམ་པ་གཞན་དུ་ཐེག་ཆེན་གྱི་མདོ་སྡེ་གསུངས་པའི་ཚེ། བཅོམ་ལྡན་འདས་ཀྱིས་ས་ཕྱོགས་བྱིན་གྱིས་བརླབས་པས་འཁོར་ཐམས་ཅད་ཀྱིས་དེ་ལྟར་མཐོང་བ་ཡིན་ཏེ། མདོ་སྡེ་གཞན་ལས་ཀྱང་མི་མཇེད་ཀྱི་འཇིག་རྟེན་གྱི་ས་ཕྱོགས་ལག་མཐིལ་ལྟར་མཉམ་པ། སྡོང་དུམ་དང་། ཚེར་མ་དང་། མི་གཙང་བའི་ལྗན་ལྗིན་དང་། རི་ནག་པོ་མེད་པར་གྱུར་ཏོ་ཞེས་གསུངས་པ་དང་མཐུན་པའི་ཕྱིར་དང་། ཕྱི་མ་ནི་ཆོས་རྣམས་ཀྱི་རང་སྤྱིའི་མཚན་ཉིད་འཆད་པའི་སྐབས་ཡིན་པས་དངོས་པོའི་གནས་ལུགས་འཆད་པ་ཡིན་ཅིང་། དེ་ལ་འཁྲུལ་ན་སོགས་སོ། །གཉིས་པ་ནི། ཙཱ་རི་ཏྲ་ཞེས་སོགས་བཅུ་གཅིག་སྟེ། གནས་འཐུང་གཅོད་ཀྱི་བྱེ་བྲག་ཙཱ་རི་ཏྲ་ནི། ལྷོ་ཕྱོགས་རྒྱ་མཚོའི་འགྲམ་ན་ཡོད་པར་གསུངས་པས། ཀོང་ཡུལ་གྱི་ཙཱ་རི་ཙཱ་གོང་ནི་དེ་མ་ཡིན་ནོ། །ཁ་ཅིག་གནས་ཞིང་གི་བྱེ་བྲག་དེ་ཝཱི་ཀོ་ཊ་ལ་གཉིས་ཡོད་པའི་ཆེ་ཤོས་རྒྱ་གར་ལྷོ་ཕྱོགས་ན་ཡོད། ཆུང་བ་གཞན་ཞིག་ཀོང་ཡུལ་གྱི་ཙཱ་རི་ཡིན་ཞེས་ལ་ལ་སྨྲ་བ་ནི། དེའི་ཕྱོགས་ན་བྷ་ཏྲའི་ཤིང་ཡོད་ན་ཡུལ་དེ་དེ་ཝཱི་ཀོ་ཊ་ཡིན་པ་ལ་སྐྱོན་མེད་དེ། རྡོ་རྗེ་མཁའ་འགྲོའི་རྒྱུད་ལས་སོགས་སོ། །དེ་ཡང་རྒྱུད་དུ། གྱེན་དུ་འབར་ཊ་ཞེས་བྱ་བ། །ཀྵེ་ཊ་པ་ལ་གཙིགས་པ་ཆེ། །དེ་ཝཱི་ཀོ་ཊ་སྣ་ཆེན་མོ། །སྟོབས་པོ་ཆེ་ནི་སྐྱེ་གནས་བྱུང་། །ལྷ་མོ་ལག་ན་མདུང་ཅན་ཏེ། །རྣལ་འབྱོར་དབང་ཕྱུག་ཀུན་གྱི་མཆོག །གནས་དེར་ལྷ་མོ་དྲག་ཆེན་མོ། །བྷ་ཏྲའི་ཤིང་ལ་བརྟེན་ཏེ་གནས། །བོད་ཡུལ་དུ་ནི་ལྷན་སྐྱེས་ཏེ། །རང་བྱུང་གི་ནི་སྐྱེ་གནས་བྱུང་། །ཆུ་སྲིན་རྒྱལ་མཚན་ལག་ན་ཐོགས། །ཞི་ཞིང་གསལ་བའི་གཟུགས་ཅན་ཏེ། །ཡུལ་དེར་གནས་པའི་ལྷ་མོ་དེ། །བྲག་གི་ཁྱིམ་ལ་བརྟེན་ཏེ་གནས། །ཞེས་སོ། །གསུམ་པ་ནི། ཏི་སེ་དང་ནི་ཞེས་སོགས་དགུའོ། །ལྔ་པ་དེ་ལ་བརྟེན་ནས་ས་ལམ་བགྲོད་དེ་འབྲས་བུ་མངོན་དུ་བྱེད་པའི་ཚུལ་ལ་གཉིས་ཏེ། མཐར་ཐུག་གི་འབྲས་བུ་ལ་འཁྲུལ་པ་དགག་པ། གནས་སྐབས་ཀྱི་འབྲས་བུ་ལ་འཁྲུལ་པ་དགག་པའོ། །དང་པོ་ལ་ལྔ་སྟེ། རྒྱུ་འབྲས་རིགས་མི་མཐུན་དགག་པ། རྒྱུ་འབྲས་ཕྱིན་ཅི་ལོག་དགག་པ། རྒྱུ་མེད་པར་འབྲས་བུ་འབྱུང་བ་དགག་པ། རྒྱུ་མ་ཚང་བར་འབྲས་བུ་འབྱུང་བ་དགག་པ། འབྲས་བུའི་ངོ་བོ་ལ་འཁྲུལ་པ་དགག་པའོ། །དང་པོ་ལ་གཉིས་ཏེ། ཆིག་ཐུབ་ལས་སྐུ་གསུམ་འབྱུང་བ་དགག་པ། ཆིག་ཐུབ་རང་གི་ངོ་བོ་དགག་པའོ། །དང་པོ་ནི། ཁ་ཅིག་དཀར་པོ་ཞེས་སོགས་དྲུག་སྟེ། ཞང་འཚལ་པ་ལ་སོགས་པ་ཁ་ཅིག དཀར་པོ་ཆིག་ཐུབ་ཞེས་བྱ་བ། སྟོང་ཉིད་ཁོ་ན་བསྒོམ་པ་ལས་འབྲས་བུ་སྐུ་གསུམ་འབྱུང་ཞེས་ཟེར་བ་མི་འཐད་དེ། གཅིག་ལ་སོགས་སོ། །དེ་ཡང་སྤྱོད་འཇུག་ཏུ། རྐྱེན་གཅིག་གིས་ནི་ཀུན་ནུས་པ། །གང་ན་ཡང་ནི་ཡོད་མ་ཡིན། །སྣ་ཚོགས་རྐྱེན་ལས་བྱུང་བ་ཡི། །སྒྱུ་མ་དེ་ཡང་སྣ་ཚོགས་ཉིད། །ཅེས་སོ། །གཉིས་པ་ལ་བཞི་སྟེ། ཆིག་ཐུབ་ཐབས་དང་བཅས་ན་ཁས་བླངས་འགལ་བ། ཐབས་དང་བྲལ་ན་ལུང་རིགས་གཉིས་དང་འགལ་བ། དེས་ན་ཐབས་མཁས་ལམ་གྱི་གཙོ་བོར་བསྒྲུབ་པ། སྟོང་ཉིད་ཁོ་ན་བསྒོམ་པའི་ཉེས་དམིགས་བསྟན་པའོ། །དང་པོ་ལ་གཉིས་ཏེ། དངོས་དང་། ལུང་འགལ་སྤོང་བའོ། །དང་པོ་ནི་འགའ་ཞིག་ཆིག་ཐུབ་ཞེས་སོགས་ཚིགས་བཅད་གཉིས་ཏེ། དྭགས་པོ་ལྷ་རྗེ་ལ་སོགས་པ་འགའ་ཞིག་ཆིག་ཐུབ་བསྒོམ་པའི་རྗེས་ལ་བསྔོ་བ་བྱ་དགོས་ཟེར་བ་མི་འཐད་དེ། འོ་ན་ཆིག་ཐུབ་སོགས་སོ། དེས་ན་ཆིག་ཐུབ་འདི་འདྲའི་ལུགས་སངས་རྒྱས་ཀྱིས་གསུངས་པ་མི་འཐད་དེ། ཐབས་གཞན་དང་བཅས་ན་ཆིག་ཐུབ་མ་ཡིན་ཅིང་། ཐབས་དང་བྲལ་ན་ཐམས་ཅད་མཁྱེན་པའི་ཡེ་ཤེས་ནི་སྙིང་རྗེའི་རྩ་བ་ཅན། བྱང་ཆུབ་སེམས་ཀྱི་རྒྱུ་ལས་བྱུང་བ་ཐབས་ཀྱིས་མཐར་ཕྱིན་པ་ཡིན་ནོ་ཞེས་གསུངས་པ་དང་འགལ་བའི་ཕྱིར་རོ། །གཉིས་པ་ནི། ཐུབ་པས་སྟོང་ཉིད་ཞེས་སོགས་བཅུ་སྟེ། འོ་ན་གསང་བ་བསམ་གྱིས་མི་ཁྱབ་པའི་མདོ་ལས། དམ་པའི་ཆོས་ནི་འཛིན་པ་དང་། །བྱང་ཆུབ་སེམས་ཀྱི་བསོད་ནམས་དེས། །སྟོང་པ་ཉིད་ལ་མོས་པ་ཡི། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་པ་དང་འགལ་ལོ་སྙམ་ན་མི་འགལ་ཏེ། སྟོང་ཉིད་ལ་བསྔགས་པ་ནི། དངོས་པོར་འཛིན་པ་བཟློག་པའི་ཕྱིར་ཡིན་གྱི། དེ་ཁོ་ནས་ཐོབ་པ་ནི་མ་ཡིན་ཏེ། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱུང་བར་གསུངས། །ཞེས་གསུངས་པ་བཞིན་ནོ། །དཔེར་ན་སངས་རྒྱས་ཕྱག་འཚལ་སོགས་སོ། །དམ་ཆོས་པད་དཀར་ལས། མཆོད་རྟེན་དེ་ལ་གང་གིས་ཐལ་མོ་སྦྱོར། །ཡོངས་སུ་ཚང་ངམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །དེ་བཞིན་ལུས་ཀྱང་ལན་གཅིག་བཏུད་པ་དང་། །གང་གིས་རིང་བསྲེལ་གནས་པ་དེ་དག་ལ། །གཡེང་བའི་སེམས་ཀྱིས་སངས་རྒྱས་ཕྱག་འཚལ་ཞེས། །ཚིག་གཅིག་ལན་འགའ་བརྗོད་པར་བྱེད་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་ཐོབ། །ཞེས་དང་། མཆོད་རྟེན་བསྐོར་བའི་གཟུངས་ལས། གཟུངས་འདི་ལན་གཅིག་བརྗོད་པས། ཕྱོགས་བཅུ་དུས་གསུམ་གྱི་དཀོན་མཆོག་གསུམ་ལ་ཕྱག་འཚལ་ཞིང་བསྐོར་བ་བྱས་པར་འགྱུར་རོ། །ཐོག་མ་མེད་པ་ནས་བསགས་པའི་སྡིག་པ་ཐམས་ཅད་དག་པར་འགྱུར་རོ། །དགེ་བ་སྣ་གཅིག་བྱས་པ་ཡང་བྱེ་བ་ཕྲག་ཏུ་འགྱུར་རོ་ཞེས་གསུངས། རྟེན་འབྲེལ་སྙིང་པོའི་གཟུངས་ལས། སྙིང་པོ་འདི་ལན་གཅིག་བརྗོད་པས་སྡིག་པ་ཐམས་ཅད་བྱང་བར་འགྱུར་རོ། །མི་མཐུན་པའི་ཕྱོགས་ཐམས་ཅད་ཞི་ཞིང་བཟློག་པར་འགྱུར་རོ་ཞེས་དང་། དོན་ཞགས་དང་། ཚེ་དཔག་མེད་དང་། སྦྱོང་རྒྱུད་ནས་གསུངས་པའི་སྔགས་འབྲུ་འགའ་ཞིག་དྲན་པ་ཙམ་གྱིས་སྡིག་པ་ཀུན་ལས་གྲོལ་བར་འགྱུར་རོ། །ཞེས་གསུངས་པའི་དགོངས་པ་མི་ཤེས་པར་ཚིག་འབྲུ་སྒྲ་ཇི་བཞིན་པ་ཙམ་ལ་བརྟེན་པར་མི་བྱའོ། །གཉིས་པ་ལ་གཉིས་ཏེ། རིགས་པ་དང་འགལ་བ། ལུང་དང་འགལ་བའོ། །དང་པོ་ནི། མདའ་རྐྱང་ལ་ནི་ཞེས་སོགས་བདུན་ནོ། །གཉིས་པ་ནི། རྡོ་རྗེ་གུར་ལས་ཞེས་སོགས་ཚིགས་བཅད་དགུ་སྟེ། ཐབས་དང་བྲལ་བའི་སྟོང་ཉིད་ཁོ་ན་བསྒོམས་པས་སངས་རྒྱས་འབྱུང་བར་འདོད་པ་མི་འཐད་དེ། རྡོ་རྗེ་གུར་དང་། རྣམ་སྣང་མངོན་བྱང་དང་། རྣམ་འགྲེལ་གྱི་ལུང་གསུམ་དང་འགལ་བའི་ཕྱིར་རོ། །ལུང་དང་པོའི་དོན་ནི། གལ་ཏེ་སྟོང་པ་ཉིད་དུ་ལྟ་བ་ཁོ་ན་སངས་རྒྱས་ཐོབ་པའི་ཐབས་ཡིན་ན། དེའི་ཚེ་སངས་རྒྱས་ཉིད་མི་འབྱུང་སྟེ། འབྲས་བུའི་འདྲ་བ་ནི་རྒྱུའི་འདྲ་བ་ལས། གཞན་མ་ཡིན་པའི་ཕྱིར་རོ། །དེས་ན་ཐབས་ནི་སྟོང་པ་ཉིད་དུ་ལྟ་བ་མ་ཡིན་པའི་ཕྱིར་རོ། །འོན་ཀྱང་སྟོང་ཉིད་ལ་བསྔགས་པ་གསུངས་པའི་དགོས་པ་ནི། བདེན་འཛིན་གྱི་ལྟ་བ་རྣམས་ལས་བཟློག་པ་དང་། མུ་སྟེགས་བྱེད་བདག་ཏུ་ལྟ་བ་རྣམས་ཀྱིས་བདག་ཏུ་ཞེན་པའི་བསམ་པ་བཟློག་པའི་ཕྱིར་དུ། སྟོང་ཉིད་ཀྱི་ལྟ་བ་རྒྱལ་བ་རྣམས་ཀྱིས་གསུངས་པ་ཡིན་ནོ། །སྟོང་ཉིད་ཁོ་ནས་སངས་རྒྱས་ཐོབ་པ་མ་ཡིན་ཅིང་སྟོང་ཉིད་བསྒོམ་པ་དགོས་པ་ཡོད་པ་དེའི་ཕྱིར་ན། ཐབས་ཤེས་ཟུང་འཇུག་གིས་སངས་རྒྱས་འགྲུབ་སྟེ། དཀྱིལ་འཁོར་གྱི་འཁོར་ལོ་ཞེས་བྱ་བའི་རྫོགས་རིམ་གྱི་ཐབས་ནི་བདེ་བའི་སྡོམ་པ་སྟེ་ཤེས་རབ་ཡིན་ལ། སངས་རྒྱས་ང་རྒྱལ་རྣལ་འབྱོར་ནི་བསྐྱེད་རིམ་སྟེ། ཐབས་ཡིན་པས་དེ་གཉིས་ཀྱིས་སངས་རྒྱས་ཉིད་དུ་ངེས་པར་འགྲུབ་ཅེས་པའི་དོན་ནོ། །ལུང་གཉིས་པ་ལ། ཚིགས་བཅད་དང་པོས་ནི་ཐབས་དང་བྲལ་བའི་ཤེས་རབ་ཀྱིས་ཉན་ཐོས་ཀྱི་བྱང་ཆུབ་ཐོབ་པར་སྟོན་ཅིང་། ཕྱི་མས་ནི་རྫོགས་པའི་བྱང་ཆུབ་བསྒྲུབ་པ་ལ་ཐབས་ཤེས་ཟུང་འཇུག་དགོས་པར་བསྟན་ནོ། །ལུང་གསུམ་པའི་ཚིགས་བཅད་དང་པོ་ནི། ཐབས་མང་པོས་ཡུན་རིང་དུ་གོམས་པས་སྐྱོན་ཡོན་གྱི་གནས་ཚུལ་རབ་ཏུ་གསལ་བ་ཐོབ་པ་བསྟན། དེ་ནས་ཚིག་རྐང་གཉིས་ཀྱིས་དེ་ཐོབ་པ་སྒྲིབ་གཉིས་ཀྱི་རྒྱུའི་བག་ཆགས་སྤངས་པར་བསྟན། དེ་ནས་གཉིས་ཀྱིས་གཞན་དོན་ལ་འཇུག་པ་ཅན་གྱི་ཐུབ་པ་ཆེན་པོ་ཉན་རང་ལས་ཁྱད་པར་དུ་འཕགས་པར་བསྟན། དེ་ནས་གཉིས་ཀྱིས་དེ་ཉིད་ཀྱི་ཕྱིར་ན་རྒྱུའི་དུས་སུ་ཐབས་གོམས་པ་དེ་ཉིད་འབྲས་བུའི་དུས་ཀྱི་སྟོན་པའི་རྒྱུ་ཡིན་པས། ཚད་མ་མདོར་སྟོན་པ་ཞེས་པའི་མིང་གིས་བཏགས་པར་བཞེད། ཅེས་བསྟན་ནོ། །གསུམ་པ་ལ་གསུམ་སྟེ། རྣམ་གྲོལ་བཟང་ངན་ཐབས་ཀྱིས་བྱེད་པར་བསྟན། དེ་ལ་ཡིད་ཆེས་ལུང་གི་སྒྲུབ་བྱེད་འགོད། རྣམ་གྲོལ་བཟང་པོ་འདོད་པས་ཐབས་ལ་འབད་པར་གདམས་པའོ། །དང་པོ་ནི། དེས་ན་ཐབས་ཞེས་སོགས་བཅོ་ལྔ་སྟེ། རྫོགས་པའི་བྱང་ཆུབ་བསྒྲུབ་པའི་རྒྱུ་ཐུན་མོང་མ་ཡིན་པ་ནི་ཐབས་ལ་མཁས་པ་ཡིན་ཏེ། བྱང་ཆུབ་གསུམ་ཀ་ཡང་སྟོང་ཉིད་བསྒོམ་པས་རྣམ་པར་གྲོལ་བ་ཐོབ་པར་མཚུངས་ན་ཡང་། གཞན་དོན་འབད་མེད་ལྷུན་གྲུབ་ཏུ་བྱེད་པའི་བྱང་ཆུབ་ནི་ཐབས་མཁས་ཁོ་ན་ལས་བྱུང་བའི་ཕྱིར་རོ། །གཉིས་པ་ལ་གཉིས་ཏེ། བྱམས་པའི་ལུང་། དཔའ་བོའི་ལུང་ངོ་། །དང་པོ་ནི། དེ་ཡང་མདོ་སྡེ་ཞེས་སོགས་དྲུག་སྟེ། དཔེ་ཇི་ལྟར་ན་མདུད་པའི་བྱེ་བྲག་གིས་གོས་ལ་ཚོན་བཀྲ་བ་དང་། མི་བཀྲ་བ་དེ་བཞིན་དུ་སེམས་བསྐྱེད་དང་སྨོན་ལམ་གྱི་འཕེན་པའི་དབང་གིས་ཐེག་པ་གསུམ་ལ་གྲོལ་བའི་དབང་གིས་ཡེ་ཤེས་བཀྲ་མི་བཀྲ་འབྱུང་ངོ་ཞེས་དེ་སྐད་གསུངས་པ་ཡང་འབྲས་བུའི་བཟང་ངན་ཐབས་ཀྱིས་བྱེད་པའི་ཞེས་གསུངས་པ་ཡང་དོན་འདི་ཉིད་ཡིན་ནོ། །གཉིས་པ་ནི། སློབ་དཔོན་མ་ཏི་ཞེས་སོགས་དྲུག་སྟེ། བསྟོད་པ་བརྒྱ་ལྔ་བཅུ་པ་ལས། བསེ་རུའི་རྭ་དང་འདྲ་བའི་རང་སངས་རྒྱས་དང་། སྟོན་པ་ཁྱེད་ཀྱི་རྗེས་སུ་འགྲོ་ཞིང་སློབ་པའི་ཉན་ཐོས་ཉོན་མོངས་ཞི་བ་ཙམ་གྱིས་ཁྱེད་དང་མཚུངས་ཀྱང་རང་དོན་སྟོབས་སོགས་ཀྱི་ཡོན་ཏན་དང་། གཞན་དོན་འབད་མེད་ལྷུན་གྲུབ་ཏུ་བྱུང་བ་ལ་སོགས་པའི་བསམ་ཡས་ཡོན་ཏན་གྱི་ཚོགས་ཀྱིས་མ་ཡིན་ཞེས་གསུངས་པ་ཡང་དོན་འདི་ཉིད་ཡིན་ནོ། །གསུམ་པ་ནི། དེས་ན་སངས་རྒྱས་ཞེས་སོགས་དྲུག་སྟེ། བརྒྱད་སྟོང་པར་རབ་འབྱོར་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ལ་རྟོག་མོད་ཀྱི་མངོན་སུམ་དུ་བྱའོ་སྙམ་དུ་མི་རྟོག་གོ །ཡོངས་སུ་འདྲིས་པར་བྱའོ་སྙམ་དུ་མི་རྟོག་གོ །མངོན་སུམ་དུ་བྱ་བའི་དུས་འདི་ཡིན་ནོ་སྙམ་དུ་མི་རྟོག་གོ་ཞེས་སོ། །བཞི་པ་ནི། སྟོང་ཉིད་རྐྱང་པ་ཞེས་སོགས་བཅུ་གསུམ་སྟེ། སྟོང་ཉིད་རྐྱང་པ་བསྒོམས་ན་ཆད་ལྟར་འགྱུར་བས་སྟོང་ཉིད་ཀྱང་རྟོགས་མི་ནུས་ཤིང་། གལ་ཏེ་སྟོང་ཉིད་རྟོགས་ན་ཡང་ཉན་ཐོས་ཀྱི་འགོག་པར་ལྟུང་སྟེ། འཕགས་པ་དཀོན་མཆོག་སོགས་སོ། །གཉིས་པ་ནི། ལ་ལ་སྟོང་ཉིད་ཞེས་སོགས་དྲུག་གོ །གསུམ་པ་ནི། ཁ་ཅིག་ས་ལམ་ཞེས་སོགས་བཅུ་བཞི་སྟེ། ཞང་འཚལ་པ་ལ་སོགས་པ་ཁ་ཅིག ཕྱག་རྒྱ་ཆེན་པོ་ཆིག་ཆོད་ལ། །ས་ལམ་བརྩི་བའི་རྨོངས་པ་འཁྲུལ། །ཞེས་ས་ལམ་མི་བགྲོད་པར་འཚང་རྒྱ་བར་འདོད་པ་དང་། ཏི་སེ་ལ་སོགས་པ་སྐོར་བ་དང་མཉམ་དུ། རྩ་མདུད་མེད་པ་སོགས་འདོད་པ་ཡང་རྒྱུད་སྡེའི་དགོངས་པ་མ་ཤེས་པ་ཤིན་ཏུ་འགལ་བ་ཡིན་ཏེ། ཕྱི་རུ་ཡུལ་ཉི་ཤུ་རྩ་བཞི་པོ་རྣམས་བགྲོད་པ་དང་། ནང་དུ་རྩ་མདུད་གྲོལ་བ་ནི། རྣལ་འབྱོར་པས་ས་བཅུ་ལ་སོགས་བགྲོད་པའི་རྟེན་འབྲེལ་ཉིད་ཀྱིས་འབྱུང་བ་ཡིན་པའི་ཕྱིར་རོ། །འདི་དོན་རྣལ་འབྱོར་ཆེན་པོའི་སོགས་ཏེ། སམྦུ་ཊི་ལས། གནས་དང་ཉེ་བའི་གནས་སོགས་བཅུ། རབ་དགའ་ལ་སོགས་པའི་ས་བཅུ་ལ་སྦྱར་བ་དང་། ཀྱཻ་རྡོ་རྗེ་ལས། གནས་དང་ཉེ་བའི་གནས་དང་ནི། །ཞེས་སོགས་ཀྱི་མཇུག་ཏུ། འདི་རྣམས་ས་ནི་བཅུ་གཉིས་ཏེ། །ཞེས་ཕྱི་ནང་གི་གནས་རྣམས་དང་རབ་དགའ་ལ་སོགས་པའི་ས་རྣམས་སྦྱོར་བ་བླ་མེད་ཀྱི་དགོངས་པ་ཡིན་ནོ། །བཞི་པ་ནི། ལ་ལ་དབང་བཞི་ཞེས་སོགས་དྲུག་སྟེ། ཕ་རོལ་ཏུ་ཕྱིན་པའི་ཐེག་པར་སྐུ་གསུམ་གྱི་རྣམ་གཞག་མཛད་ཅིང་། རྡོ་རྗེ་ཐེག་པར་སྐུ་བཞིའི་རྣམ་གཞག་མཛད་པའི་རྒྱུ་མཚན་ཡང་འབྲས་བུ་སྐུ་བཞི་ལ་རྒྱུ་སྨིན་བྱེད་ཀྱི་དབང་བཞི་དང་། གྲོལ་བྱེད་ཀྱི་ལམ་བཞི་དགོས་པའི་ཕྱིར་རོ། །ལྔ་པ་ནི། ཁ་ཅིག་འབྲས་བུའི་ཞེས་སོགས་དྲུག་སྟེ། གསང་འདུས་པ་ཁ་ཅིག་འབྲས་བུའི་མཐར་ཐུག་ནི། འོད་གསལ་སྟོང་ཉིད་ཡིན། ཞེས་སྨྲ་བ་ཐོས་པ་འདི་ནི་འཕགས་པ་ཡབ་སྲས་ཀྱི་དགོངས་པ་མ་ཡིན་ཏེ། རིམ་ལྔ་དང་ནི་སོགས་སོ། །དེ་ཡང་རིམ་ལྔ་ལས། ཡང་དག་མཐའ་ལས་ལངས་ནས་ནི། །གཉིས་མེད་ཡེ་ཤེས་ཐོབ་པར་འགྱུར། །ཟུང་འཇུག་ཏིང་འཛིན་ལ་གནས་ནས། །སླར་ཞིང་གང་ལའང་མི་སློབ་བོ། །འདི་ནི་རྫོགས་པའི་རྣལ་འབྱོར་པ། །རྡོ་རྗེ་འཛིན་པ་ཆེན་པོའང་དེ། །རྣམ་པ་ཀུན་གྱི་མཆོག་ལྡན་པའི། །ཐམས་ཅད་མཁྱེན་པ་དེ་ནས་འགྱུར། །ཞེས་དང་། སྤྱོད་བསྡུས་ལས། བྱང་ཆུབ་ཀྱི་ཤིང་དྲུང་ལ་བཞུགས་ནས་མཚན་ཕྱེད་ཀྱི་དུས་སུ་འོད་གསལ་མངོན་དུ་མཛད་དེ། སྒྱུ་མ་ལྟ་བུའི་ཏིང་ངེ་འཛིན་ལས་བཞེངས་ནས། འགྲོ་བ་རྣམས་ལ་སྟོན་པར་མཛད་པ་ཡིན་ནོ་ཞེས་སོ། །གཉིས་པ་གནས་སྐབས་ཀྱི་འབྲས་བུ་ལ་འཁྲུལ་པ་དགག་པ་ལ་གསུམ་སྟེ། གྲུབ་ཐོབ་ལས་རྟོགས་ལྡན་བཟང་བ་དགག་པ། ཉམས་ལས་གོ་རྟོགས་བཟང་བ་དགག་པ། རྣལ་འབྱོར་བཞི་པོ་འཕགས་པའི་ས་ལ་སྦྱར་བ་དགག་པའོ། །དང་པོ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ཕྱག་རྒྱ་བ་ལ་ལ་གྲུབ་ཐོབ་ཞེས་སོགས་ཚིགས་བཅད་གཅིག་གོ །གཉིས་པ་ནི། འདི་འདྲ་འཕགས་པའི་ཞེས་སོགས་ཉེར་གཉིས་ཏེ། ཐེག་ཆེན་འཕགས་པ་མ་ཡིན་པ་ལ་གྲུབ་ཐོབ་མེད་པའི་རྒྱུ་མཚན། མདོ་སྡེ་རྒྱན་ལས། ས་རྣམས་ཐམས་ཅད་མ་གྲུབ་དང་། །གྲུབ་པ་དག་ཏུ་ཤེས་པར་བྱ། །གྲུབ་པ་དག་ཀྱང་མ་གྲུབ་དང་། །གྲུབ་པ་དག་ཏུ་ཡང་འདོད་དོ། །ཞེས་མོས་སྤྱོད་ཀྱི་ས་མ་གྲུབ་པ་དང་། ས་དང་པོ་ཡན་ཆད་གྲུབ་པ་ཡིན་ཅིང་། དེ་ལ་ཡང་ས་བདུན་པ་མན་ཆད་མ་གྲུབ་པ་དང་། ས་བརྒྱད་པ་ཡན་ཆད་གྲུབ་པ་ཡིན་ནོ་ཞེས་སོགས་གསུངས་པ་ཡང་། གྲུབ་ཐོབ་ས་དང་པོ་ཡན་ཆད་ལ་འཇོག་པའི་དགོངས་པ་དེ་ཉིད་ཡིན་ནོ། །ལམ་འབྲས་ལས་ཀྱང་། གྲུབ་མཐའ་བཞི་པོ་ས་དང་པོ་ཡན་ཆད་ལ་འཇོག་པས། ངེད་ཀྱི་ལུགས་ཀྱི་གྲུབ་ཐོབ་དེ་འདྲ་ཡིན་ཅིང་། གྲུབ་ཐོབ་ལས་བཟང་བའམ་རྟོགས་ལྡན་གྱི་མཚན་ཉིད་འདི་ཡིན་ནོ་ཞེས་མདོ་རྒྱུད་ལས་གསུངས་པ་མེད་པས། གྲུབ་ཐོབ་ལས་བཟང་བའི་རྟོགས་ལྡན་བླུན་པོ་ལ་སོགས་སོ། །གཉིས་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། གླིང་རས་ལ་སོགས་པ་ལ་ལ་ཉམས་དང་ཞེས་སོགས་ཚིགས་བཅད་གཅིག་གོ །གཉིས་པ་ནི། འདི་ཡང་རེ་ཞིག ཞེས་སོགས་ཚིགས་བཅད་དྲུག་སྟེ། ཉམས་ཞེས་བྱ་བ་དེ། འདིར་བརྟགས་པའི་མཐའ་གསུམ་པོ་གང་ཡིན་ནའང་། དེ་ལས་གོ་རྟོགས་བཟང་བ་མི་འགྲུབ་སྟེ། གོ་རྟོགས་གཉིས་པོ་ཡང་དེའི་ནང་དུ་འདུས་པ་ཡིན་པའི་ཕྱིར་རོ། །གོ་བ་དང་རྟོགས་པ་གཉིས་ནི། རྣམ་གྲངས་ཡིན་གྱི་ངོ་བོ་ཐ་དད་མ་ཡིན་ཏེ། ག་ཏ་ཞེས་པ་དང་། ས་མ་ཡ་ཞེས་པ་སྐབས་ཐོབ་ཀྱིས་གཉིས་ཀ་ཡང་གོ་བ་དང་། རྟོགས་པ་གཉིས་ཀ་ལ་འཇུག་པའི་ཕྱིར་རོ། །ལམ་འབྲས་ལ་སོགས་པའི་གཞུང་ལུགས་འགའ་ལས་བསྒོམ་པའི་ཏིང་ངེ་འཛིན་ལ་ཉམས་ཀྱི་སྣང་བ་དང་། རྫོགས་པའི་སངས་རྒྱས་ཀྱི་ཡེ་ཤེས་ལ་དག་པའི་སྣང་བར་བཤད་པ་ཡོད་ཅིང་། བསྒོམ་ཉམས་སྐྱོན་ཡོད་མེད་ཕྱེད་པས་ས་བཅུ་གསུམ་པའོ་ཞེས་སངས་རྒྱས་ཀྱི་ས་ལ་བཤད་པ་ཡང་མཐོང་བས་དེ་འདྲའི་ཉམས་དང་སོགས་སོ། །གསུམ་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི། རྩེ་གཅིག་དང་ནི་ཞེས་སོགས་དྲུག་སྟེ། ཕྱག་རྒྱ་བ་རྣམས་ལ་གྲགས་པའི་བསྒོམ་རྣལ་འབྱོར་བཞི་ཞེས་བྱ་བ་འདི་མར་པའི་སློབ་མ་རྣམས་ལ་མེད་ཅིང་། དུས་ཕྱིས། ཀོང་ནེ་རུ་བ་ལ། དྭགས་པོ་ལྷ་རྗེས་རྩད་ཆོད་ནས་ཕྱག་རྒྱ་ཆེན་པོ་ལ་སྦྱར་བ་ཡིན་ལ། ངོ་སྤྲོད་པའི་ཚེ་ན། མཐོང་ལམ་སོགས་སུ་སྤྲོད་དོ། །གཉིས་པ་ལ་གཉིས་ཏེ། སོ་སྐྱེ་ལ་ཆོས་མཐུན་བརྩི་ན་དཔྱད་པར་བྱ་བ། འཕགས་པའི་ས་ལ་སྦྱར་ན་མདོ་རྒྱུད་དང་འགལ་བའོ། །དང་པོ་ནི། འདི་ཡང་ཕྱེ་སྟེ། ཞེས་སོགས་ཉེར་དགུ་སྟེ། རྣལ་འབྱོར་བཞི་པོ་ས་བཅུ་གཅིག་ལ་སྦྱོར་བའི་ས་བཅུ་གཅིག་པོ་འདི་སོ་སྐྱེའི་ས་ལ་ཆོས་མཐུན་ཙམ་བརྩིའམ། འཕགས་པའི་ས་ཁོ་ན་ལ་སྦྱོར། དང་པོ་ལྟར་ན། ཆོས་ནས་གསུངས་ན་བརྩི་ཡང་འགའ་ཡང་འགལ་བ་མེད་དེ། དཔེར་ན་དཀོན་མཆོག་བརྩེགས་པའི་རྨི་ལམ་ངེས་བསྟན་གྱི་ལེའུ་ལས། ཐུབ་པའི་མཆོད་རྟེན་སོགས་སོ། །འདི་དག་ཀྱང་ཚོགས་ལམ་དང་སྦྱོར་ལམ་དང་པོ་གསུམ་པོ་རེ་རེ་ལ་ཡང་གསུམ་གསུམ་སྟེ། མོས་པས་སྤྱོད་པའི་ས་ལ་ས་བཅུར་བྱས་ནས་སྦྱར་བ་ཡིན་གྱི། འཕགས་པའི་མིན་པ་དེ་བཞིན་དུ་རྩེ་གཅིག་སོགས་ལའང་སོགས་སོ། །གཉིས་པ་ནི། ཅི་སྟེ་འཕགས་པའི་ཞེས་སོགས་གཉིས་སོ། །དེ་རྣམས་ཀྱིས་སྡོམ་གསུམ་སོ་སོའི་དོན་རྣམས་ཞིབ་ཏུ་བཤད་ཟིན་ཏོ། །གཉིས་པ་རྩོད་པ་སྤོང་བ་ལ་གཉིས་ཏེ། རྩོད་པ་དང་། ལན་ནོ། །དང་པོ་ནི། ཁ་ཅིག་ཐེག་པ་ཞེས་སོགས་གཉིས་ཏེ། དམ་པ་ཕྱར་ཆུང་བ་ལ་སོགས་པ་ཁ་ཅིག ཐེག་པ་ཆེ་ཆུང་གི་ལྟ་སྒོམ་སྤྱོད་འབྲས་ཐམས་ཅད་རང་རང་གི་གཞུང་ལུགས་ནས་བཤད་པ་བཞིན་རང་ས་ན་བདེན་པ་ཡིན་པས། མདོ་རྒྱུད་ནས་མ་བཤད་པས་དེ་དག་སུན་ཕྱུང་བར་མི་ནུས་སོ། །ཞེས་ཀུན་ལ་སྒྲོགས་པར་བྱེད་དོ། །གཉིས་པ་ལ་བཞི་སྟེ། སྨྲས་ཚད་བདེན་པ་དགག་པ། གྲུབ་མཐའ་ཐམས་ཅད་བདེན་པ་དགག་པ། གྲངས་ངེས་ཐམས་ཅད་བདེན་པ་དགག་པ། དེ་ལ་རྩོད་པ་སྤོང་བའོ། །དང་པོ་ནི། གལ་ཏེ་སྨྲས་ཚད་ཞེས་སོགས་གཉིས་ཏེ། ཐེག་པ་རང་ས་ནས་བདེན་པའི་དོན་སྨྲས་ཚད་བདེན་པ་ལ་བྱེད་དམ། གྲུབ་མཐའ་ཀུན་བདེན་པ་ལ་བྱེད་དམ། སངས་རྒྱས་པའི་ཐེག་པ་ཀུན་བདེན་པ་ལ་བྱེད། ཅེས་བརྟགས་ནས་དང་པོ་འདིས་འགོག་ཅིང་། ཕྱི་མ་གཉིས་འོག་ཏུ་འགོག་གོ །གཉིས་པ་ནི། འོན་ཏེ་གྲུབ་མཐའ་ཞེས་སོགས་བཅོ་ལྔ་སྟེ། བརྟག་པ་གཉིས་པ་ལྟར་ན། དབང་ཕྱུག་པ་སྲོག་གི་མཆོད་སྦྱིན་བྱས་པས་ཐར་པ་ཐོབ་ཞེས་འཚེ་བ་ཆོས་སུ་སྨྲ་བ་དང་། རྒྱང་འཕེན་པ་འཇིག་རྟེན་ཕ་རོལ་མེད་པར་སྨྲ་བ་སོགས་ལོག་ལྟ་ཐམས་ཅད་བདེན་པར་འགྱུར་རོ། །གལ་ཏེ་མུ་སྟེགས་སོགས་ནས། རང་ས་ནས་ནི་བདེན་སྙམ་ན། སྦྱིན་སོགས་ཕལ་ཆེར་བདེན་མོད་ཀྱང་། དཀོན་མཆོག་ལ་སྐྱབས་སུ་མི་འགྲོ་བས་སྐྱབས་གནས་ཀྱི་གནད་དང་། རྟག་ཆད་གང་རུང་དུ་འཛིན་པས་ལྟ་བའི་གནད། མེ་ལྔ་བསྟེན་པ་སོགས་ཐར་ལམ་དུ་འདོད་པས་ཐབས་ཀྱི་གནད་རྣམས་འཁྲུལ་པས་ན། སྦྱིན་སོགས་ཀྱི་ཆོས་གཞན་བཟང་ཡང་འཁོར་བ་ལས་སྐྱོབ་པར་མི་ནུས་སོ། །གསུམ་པ་ལ་གཉིས་ཏེ། སངས་རྒྱས་ཀྱི་གསུང་ལ་གཉིས་སུ་ཕྱེ་བ། དེ་དག་ཇི་ལྟར་ལེན་པའི་ཚུལ་ལོ། །དང་པོ་ནི། ཅི་སྟེ་སངས་རྒྱས་ཞེས་སོགས་བཅོ་བརྒྱད་དེ། བརྟག་པ་གསུམ་པ་ལྟར་ན། སྤྱིར་སངས་རྒྱས་ཀྱི་གསུང་ལ་བརྗོད་བྱའི་སྒོ་ནས་དྲང་དོན་དང་། ངེས་དོན་གཉིས་སུ་ཡོད་དེ། བློ་གྲོས་མི་ཟད་པའི་མདོ་ལས། མདོ་གང་ལས་ཀུན་རྫོབ་ཀྱི་བདེན་པ་གསུངས་པ་འདི་ནི་དྲང་བའི་དོན་ཡིན་ནོ། །མདོ་གང་ལས་ངེས་པའི་དོན་མངོན་སུམ་དུ་བྱ་བའི་ཕྱིར་གསུངས་པ་འདི་ནི་ངེས་པའི་དོན་ཏོ་ཞེས་དང་། ཏིང་ངེ་འཛིན་རྒྱལ་པོ་ལས། སྟོང་པ་བདེ་བར་གཤེགས་པས་བསྟན་པ་ལྟར། །ངེས་དོན་མདོ་སྡེ་དག་གི་བྱེ་བྲག་ཤེས། །གང་ལས་སེམས་ཅན་སྐྱེས་བུ་གང་ཟག་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། །ཞེས་གསུངས་པའོ། །རྗོད་བྱེད་ཀྱི་སྒོ་ནས་སྒྲ་ཇི་བཞིན་པ་དང་། ཇི་བཞིན་མ་ཡིན་པ་གཉིས་སུ་གསུངས་ཏེ། སྒྲ་ཇི་བཞིན་པ་ལ་ཚད་མས་གནོད་པ་འབབ་པ་དང་། མི་འབབ་པ་གཉིས་ཡོད་པའི་ཕྱིར་རོ། །ཐེག་པའི་སྒོ་ནས་འཇིག་རྟེན་པ་དང་། འཇིག་རྟེན་ལས་འདས་པ་གཉིས་སུ་གནས་ཏེ། འཇིག་རྟེན་པ་རྣམས་བསྟན་པ་ལ་འཇུག་པའི་ཆེད་དུ་གསུངས་པ་དང་། བསྟན་པ་ལ་ཞུགས་པ་རྣམས་བྱང་ཆུབ་ཐོབ་པའི་ཆེད་དུ་གསུངས་པ་རྣམ་པ་གཉིས་སུ་ཡོད་པའི་ཕྱིར། བཤད་ཚུལ་གྱི་སྒོ་ནས་དགོངས་པ་དང་། ལྡེམ་པོར་དགོངས་པ་དང་། དྲང་པོར་དགོངས་པ་དང་གསུམ་ཡོད་དེ། ཉེས་པ་བརྒྱད་ཀྱི་གཉེན་པོར་དགོངས་པ་ཅན་རྣམ་པ་བཞི་གསུངས་པ་དང་། དགོངས་གཞིའི་ཆེད་དུ་ལྡེམ་དགོངས་བཞི་གསུངས་པ་དང་། སྒྲ་ཇི་བཞིན་གྱི་དོན་ཉམས་སུ་ལེན་པའི་ཆེད་དུ་དྲང་པོར་གསུངས་པ་རྣམས་སུ་ཡོད་པའི་ཕྱིར་རོ། །དེ་ལ་དགོངས་པ་བཞི་ནི། སངས་རྒྱས་ལ་བརྙས་པའི་གཉེན་པོར་ང་ཉིད་སངས་རྒྱས་རྣམ་གཟིགས་སུ་གྱུར་ཏོ། །ཞེས་མཉམ་པ་ཉིད་ལ་དགོངས་པ་དང་། ཆོས་ལ་བརྙས་པའི་གཉེན་པོར། སངས་རྒྱས་བྱེ་བ་ཕྲག་དཔག་ཏུ་མེད་པ་ལ་བསྙེན་བཀུར་བྱས་ན་ཆོས་དེ་རྟོགས་པར་འགྱུར་རོ་ཞེས་དོན་གཞན་མངོན་སུམ་དུ་རྟོགས་པ་ལ་དགོངས་པ་དང་། ལེ་ལོའི་གཉེན་པོར་བདེ་བ་ཅན་དུ་སྐྱེ་བར་སྨོན་ལམ་འདེབས་ན་དེར་སྐྱེའོ་ཞེས་དུས་གཞན་ལ་དགོངས་པ་དང་། དགེ་བ་ཅུང་ཟད་ཙམ་གྱིས་ཆོག་པར་འཛིན་པའི་གཉེན་པོར། དགེ་བ་འདི་ལྟ་བུ་ནི་དམན་ལ་གཞན་ནི་མཆོག་གོ་ཞེས་གང་ཟག་གི་བསམ་པ་ལ་དགོངས་པའོ། །གཞན་ཡང་ང་རྒྱལ་དང་། འདོད་ཆགས་དང་། འགྱོད་པ་དང་། མ་ངེས་པ་ལྡོག་པའི་གཉེན་པོར་སངས་རྒྱས་ཀྱི་སྐུ་ལ་བསྔགས་པ་དང་། དག་པའི་ཞིང་ལ་བསྔགས་པ་དང་། མཚམས་མེད་བྱས་པ་ཡང་མཐོ་རིས་སུ་སྐྱེ་བར་གསུངས་པ་དང་། ཉན་ཐོས་དགྲ་བཅོམ་པ་སངས་རྒྱས་སུ་ལུང་བསྟན་པ་རྣམས་ཀྱང་དགོངས་པ་ཅན་ནོ། །ལྡེམ་དགོངས་བཞི་ནི། ཉན་ཐོས་པ་རྣམས་ཐེག་པ་ཆེན་པོ་ལ་གཞུག་པའི་ཕྱིར། གཟུགས་སོགས་ཡོད་པར་གསུངས་པ་གཞུག་པ་ལྡེམ་པོར་དགོངས་པ་དང་། ངོ་བོ་ཉིད་གསུམ་ལ་དགོངས་ནས་ཆོས་རྣམས་ངོ་བོ་ཉིད་ཀྱིས་ཡོད་པ་མ་ཡིན་པར་གསུངས་པ་མཚན་ཉིད་ལྡེམ་དགོངས་དང་། སྔར་གྱི་དགོངས་པ་ཅན་བཞི་པོ་གཉེན་པོར་ལྡེམ་དགོངས་དང་། བརྗོད་བྱ་ཟབ་མོ་སྒྲ་ཇི་བཞིན་པ་མ་ཡིན་པར་གསུངས་པ་བསྒྱུར་བ་ལྡེམ་དགོངས་རྣམས་སོ། །སངས་རྒྱས་ཀྱི་གསུང་ལ་བཤད་ཚུལ་དེ་ལྟར་འབྱུང་བའི་དཔེ་ནི། དེ་ལ་འཇིག་རྟེན་མཐུན་འཇུག་སོགས་སོ། །གཉིས་པ་ནི། དེས་ན་དྲང་བའི་ཞེས་སོགས་བཅུ་སྟེ་སངས་རྒྱས་ཀྱི་གསུངས་ལ་དྲང་དོན་དང་། ངེས་དོན་སོགས་ཀྱི་དབྱེ་བ་མང་དུ་ཡོད་པ་དེས་ན་དྲང་དོན་སོགས་དེ་ལྟར་བདེན་པར་མི་གཟུང་ཞིང་། ངེས་དོན་སོགས་ཇི་ལྟར་གསུངས་པ་བཞིན་བདེན་པར་གཟུང་དགོས་པའི་ཕྱིར་ན། དྲང་ངེས་ཤེས་པའི་སྒོ་ནས་སངས་རྒྱས་ཀྱི་གསུང་ལེན་པར་བྱའི། ཐམས་ཅད་རང་ས་ན་བདེན་པས་བླང་བར་བྱ་བ་ནི་མ་ཡིན་ནོ། །བཞི་པ་ལ་གཉིས་ཏེ། རྩོད་པ་དང་། ལན་ནོ། །དང་པོ་ནི། གལ་ཏེ་མུ་སྟེགས་ཞེས་སོགས་དགུའོ། །གཉིས་པ་ནི། སངས་རྒྱས་དྲང་དོན་ཞེས་སོགས་བཅུ་བཞི་སྟེ། སངས་རྒྱས་ཀྱི་གསུང་ལ་དྲང་ངེས་གཉིས་ཡོད་ཀྱང་། དྲང་དོན་ནི་ངེས་དོན་ལ་འཁྲིད་པའི་ཆེད་ཡིན་ཅིང་། མུ་སྟེགས་ལ་བདེན་པ་སྲིད་ཀྱང་དེས་བརྫུན་པ་ཉིད་ལ་སྦྱོར་བར་བྱེད་པ་དེས་ན་སོགས་སོ། །དེ་བཞིན་དུ་གངས་ཅན་འདི་ན་ཡང་། ལུས་ངག་གི་རྣམ་ཐར་བཟང་པོ་བསྟན་ནས། དཀར་པོ་ཆིག་ཐུབ་ལ་སོགས་པའི་ལོག་པའི་ཆོས་ལ་སྦྱར་བ་མཐོང་ནས། མུ་སྟེགས་བྱེད་ཀྱི་ཆོས་བཞིན་དུ་ངེད་ཀྱིས་སྤོང་ཞིང་། སློབ་མའི་བློ་དང་འཚམ་པར་ཐོག་མར་ཐེག་པ་སྣ་ཚོགས་ཀྱི་ཚུལ་བསྟན་ནས། སངས་རྒྱས་སྒྲུབ་པའི་ཐབས་ཤེས་ཟུང་འཇུག་དང་། རིམ་གཉིས་ཀྱི་གནད་རྣམས་སངས་རྒྱས་ཀྱི་གསུང་བཞིན་དུ་ཡང་དག་པར་སྟོན་པར་མཛད་པའི་བླ་མ་དེ་སངས་རྒྱས་ཉིད་དུ་བདག་གིས་གཟུང་ངོ་། །གསུམ་པ་གནད་མ་འཁྲུལ་པར་བསྒྲུབ་པར་གདམས་པའི་སྒོ་ནས་མཇུག་བསྡུ་བ་ལ་གསུམ་སྟེ། མ་འཁྲུལ་བའི་གནད་བསྒྲུབ་པར་གདམས། འཁྲུལ་བའི་གྲུབ་མཐའ་སུན་དབྱུང་བར་གདམས། གློ་བུར་གྱི་ཆོས་ལ་བརྟག་དཔྱད་བྱ་བར་གདམས་པའོ། །དང་པོ་ལ་གཉིས་ཏེ། གནད་བཅོས་པ་ཉེས་དམིགས་ཆེ་བས་སྤང་བར་གདམས། གནད་བཅོས་པའི་བདུད་ཤེས་ནས་སྤང་བར་གདམས་པའོ། །དང་པོ་ལ་གསུམ་སྟེ། ཚིག་གི་གནད་བཅོས་པ་ལ་སྔོན་བྱུང་གི་དཔེ་དང་སྦྱར། དོན་གྱི་གནད་བཅོས་པ་ད་ལྟར་གྱི་གྲུབ་མཐའ་དང་སྦྱར། དེས་ན་ཉེས་དམིགས་ཆེ་བས་སྤང་བར་གདམས་པའོ། །དང་པོ་ནི། ཆོས་གཞན་ལེགས་པར་ཞེས་སོགས་ཚིགས་བཅད་བརྒྱད་དེ། སྔར་བཤད་པ་དེ་ལྟར། སྡོམ་པ་གསུམ་གྱི་ཉམས་ལེན་གྱི་གནད་རྣམས་སངས་རྒྱས་ཀྱི་གསུང་བཞིན་དུ་མ་འཆུགས་པར་བསྒྲུབ་དགོས་པའི་རྒྱུ་མཚན་ནི། ཡན་ལག་གི་ཆོས་གཞན་ལེགས་པར་སྟོན་ན་ཡང་། ཆོས་ཀྱི་གནད་རྣམས་སོགས་སོ། །དཔེ་ནི་འདས་པའི་དུས་ན་སོགས་ཏེ། ད་དུང་སྔར་གྱི་དངོས་གྲུབ་དེ་མ་ཡིན་པ་ཞེས་གནད་བཅོས་པའི་ཚིག་འདི་ཡིས་སྔར་གྱི་ས་ཡ་ཕྲག་ཕྱེད་དང་བཅུ་གསུམ་ཐུབ་པའི་དངོས་གྲུབ་ཐམས་ཅད་ཡལ་ནས། ས་ཡ་ཕྲག་ཕྱེད་ལས་མི་ཐུབ་པར་གྱུར་ཏོ། །གསེར་ཅན་གྱིས་ཞེས་སོགས་ཀྱི་དོན་ཡང་ལྷ་མ་ཡིན་གྱི་དབང་པོ་གསེར་ཅན་གྱིས། དབང་ཕྱུག་ཆེན་པོ་ལྷའི་ལོ་འབུམ་ཕྲག་བཅུ་དྲུག་བསྒྲུབས་པས་གྲུབ་སྟེ། དངོས་གྲུབ་གང་འདོད་པ་སློངས་ཤིག་ཟེར་རོ། །གསེར་ཅན་གྱིས་བདག་ཁང་པའི་ནང་དང་ཕྱི་དང་ས་དང་ནམ་མཁའ་མི་གསོད་པ་དུག་དང་། མཚོན་དང་། མི་དང་། མི་མ་ཡིན་པ་གང་གིས་ཀྱང་མི་གསོད་པའི་དངོས་གྲུབ་ཞུ་བྱས་པས་དེ་བཞིན་དུ་བྱིན་ནོ། །དེ་ནས་གསེར་ཅན་གྱི་བུ་ཐ་ཆུང་ཡུལ་གཞན་དུ་འཁྱམས་པ་ལ་ཁྱབ་འཇུག་གིས་ཁྱོད་རང་ཕའི་གམ་དུ་སོང་ལ། ཐེམ་པའི་སྟེང་དུ་ཁྲི་བརྩིགས་ལ་ཕ་ཞོག དེའི་མདུན་དུ་བསྟོད་པ་འདི་སྨྲོས་ཤིག རི་བོ་རི་བོ་ལ་ནི་ཐུབ་པ་བཞུགས། །ཆུ་བོ་ཆུ་བོ་ལ་ནི་ཆུ་ལྷ་གནས། །གཞི་མདོ་གཞི་མདོ་ལ་ནི་ཞི་བ་སྟེ། །ཀུན་ཏུ་ཀུན་ལ་དབང་བྱེད་ཁྱབ་འཇུག་ཡིན། །ཞེས་བསླབས་སོ། །བུས་དེ་བཞིན་དུ་བྱས་པས་ཕ་ཁྲོས་ནས། ཐམས་ཅད་ལ་ཁྱབ་འཇུག་གནས་ན། འདི་ལ་ཡང་ཡོད་དམ། ཞེས་ཐེམ་པ་ལ་ཁུ་ཚུར་བསྣུན་པས། དེ་ནས་ཁྱབ་འཇུག་ལུས་པོ་མི། མགོ་བོ་སེང་གེ སྡེར་མོ་ལྕགས་ལས་བྱས་པ་ཞིག་བྱུང་སྟེ། གསེར་ཅན་པང་དུ་བཞག་སྟེ། སྡེར་མོས་ལྟོ་བ་ཧྲལ་ཏེ་བསད་དོ། །ཞེས་ཐོས་སོ། །དེས་ན་དེང་སང་གི་སྔགས་ལ་ཡང་། ཨོྃ་མེད་པ་ཡི་སོགས་ཏེ། གཞན་ཡང་མིང་གི་སྤེལ་ཚིག་འཇུག་པའི་མཚམས་སུ་བདག་གཞན་གྱི་མིང་འགོད་ཚུལ་ནོར་བ་དང་། ཆར་འབེབས་པ་དང་། གཅོད་པའི་སྔགས་ཤན་འབྱེད་མ་ཤེས་པ་དང་། ཞི་བ་ཤཱིནྟཾ་ཀུ་རུ་ཞེས་བྱས་པས། ཞི་བ་ཞི་བར་གྱིས་ཤིག །ཅེས་པ་དང་། མཱ་ར་ཡ་སོད་བྱས་པས། གསོད་བྱེད་སོད། ཅེས་བྱ་བར་འགྱུར་བས་སྔགས་ཀྱི་གནད་རྣམས་ལ་གཡོན་ཅན་རྣམས་ཀྱིས་བཅོས་པ་ཡི་སོགས་སོ། །གཉིས་པ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ནི། དེ་བཞིན་ཆོས་ཀྱི་ཞེས་སོགས་བཅུ་བདུན་ཏེ། ཚིག་གི་གནད་བཅོས་ན་དངོས་གྲུབ་ཉམས་ཤིང་འགྱངས་པ་དེ་བཞིན་དུ། ཆོས་ཀྱི་དོན་གྱི་གནད་རྣམས་ཀྱང་། ཅུང་ཟད་ཅུང་ཟད་བཅོས་པ་ལ་སོགས་སོ། །གཉིས་པ་ནི། དེ་ཡང་མདོ་ཙམ། ཞེས་སོགས་ཚིགས་བཅད་བཅུ་གསུམ་སྟེ། འདིར་གནད་བཅོས་པར་དོགས་པའི་གཞི་དགུ་ངོས་བཟུང་བ་དང་། ལུས་རྣམ་གཞག་ཏུ་ཡང་བརྗོད་བྱའི་གཙོ་བོ་རྣམས་ངོས་བཟུང་བ་ནི། ཡན་ལག་གཞན་འཁྲུལ་ཡང་གནད་འདི་རྣམས་མ་འཁྲུལ་པར་བྱས་ན་བསྒྲུབ་ནུས་ཤིང་། གནད་འདི་རྣམས་འཁྲུལ་ན་ཡན་ལག་གཞན་རྣམས་མ་འཁྲུལ་ཡང་བསྒྲུབ་པར་མི་ནུས་སོ། །ཞེས་པའི་དོན་ཡིན་ལ། རྒྱས་བཤད་ཀྱི་སྐབས་སུ་འཁྲུལ་བ་ཕྲན་ཚེགས་ནས་འགོག་པ་ནི། ཡན་ལག་ཕྲན་ཚེགས་རྣམས་ཀྱང་མ་འཁྲུལ་ན་བསྒྲུབ་ཉེ་ཞིང་འཁྲུལ་ན་གནད་རྣམས་ཀྱང་རིམ་པ་བཞིན་དུ་འཁྲུལ་བར་འགྱུར་བས། ཕྲན་ཚེགས་ཀྱང་མ་འཁྲུལ་བར་བསྒྲུབ་དགོས་སོ། །ཞེས་པའི་དོན་ནོ། །གཞུང་གི་དོན་ལ་གཞན་རྣམས་ནི་གོ་སླ་ལ། གལ་ཏེ་འདི་ནི་འཁྲུལ་འགྱུར་ན། །ཞེས་སོགས་ཀྱི་དོན་ནི། ཀྱཻ་རྡོ་རྗེ་ལས། རིགས་འཆོལ་བསྒོམ་པའི་སྦྱོར་བ་ཡིས། །དངོས་གྲུབ་མེད་ཅིང་སྒྲུབ་པོའང་མེད། །ཅེས་སོ། །བླ་མ་སྤྱི་བོར་བསྒོམ་བྱ་མ་ཡིན་ཞེས་པ་ནི། འབྲི་ཁུང་པ་རྣམས་སོ་སོ་སྐྱེ་བོའི་བླ་མ་སྤྱི་བོར་བསྒོམས་ན་ཚེ་ལ་གནོད་ཟེར་རོ། །གསུམ་པ་ནི། གནད་རྣམས་མིན་པའི་ཞེས་སོགས་བཅུ་བདུན་ཏེ། ཚིག་རྐང་དང་པོ་དྲུག་གིས་གནད་བཅོས་པ་ཉེས་དམིགས་ཆེ་བར་བསྟན། དེ་ནས་དགུས་དེའི་དཔེ་བསྟན། ཐ་མ་གཉིས་ཀྱིས་གནད་མ་འཁྲུལ་བར་བསྒྲུབ་དགོས་པར་བསྟན་ནོ། །གཉིས་པ་ལ་གསུམ་སྟེ། གནད་འཆོས་པའི་བདུད་ཇི་ལྟར་བྱུང་བའི་ཚུལ། དེས་གནད་ཇི་ལྟར་བཅོས་པའི་ཚུལ། དེ་ཤེས་ནས་སྤང་བར་གདམས་པའོ། །དང་པོ་ལ་གསུམ་སྟེ། རྣམ་པ་ཇི་ལྟར་སྟོན་པ། ཐབས་གང་གིས་བསླུ་བ། སྔོན་བྱུང་གི་དཔེ་དང་སྦྱར་བའོ། །དང་པོ་ནི། དེ་ལ་གནད་རྣམས། ཞེས་སོགས་དྲུག་སྟེ། ཆ་ལུགས་འདི་བཞིན་དུ་འབྱུང་བ་ཤེར་ཕྱིན་གྱི་མདོ་ལས་བཤད་དོ། །གཉིས་པ་ནི། འགའ་ཞིག་རྩུབ་མོར། ཞེས་སོགས་ཚིགས་བཅད་བདུན་དང་། རྐང་པ་གསུམ་སྟེ། དེ་ལྟར་བསླུ་བ་དེ་དག་བདུད་ཡིན་པའི་རྒྱུ་མཚན་ནི། མདོར་ན་སངས་རྒྱས་གསུང་རབ་དང་སོགས་སོ། །གསུམ་པ་ནི། འདི་དག་ཇི་ལྟར། ཞེས་སོགས་ཚིགས་བཅད་ཕྱེད་དང་བརྒྱད་དེ། མངའ་རིས་མང་ཡུལ་དུ་བྱུང་བའི་སངས་རྒྱས་སྐར་རྒྱལ་དུ་མིང་བཏགས་པ་དེ་ལ་འཇིག་རྟེན་ཐམས་ཅད་གུས་པས། དེ་ཚེ་རིན་ཆེན་བཟང་པོ་ཡིས་སོགས་ཏེ། སྐྱེས་བུ་དམ་པ་དེས་ཡི་དམ་ལྷ་ཡི་ལྟ་སྟངས་ཀྱིས་གཟིགས་པས་ས་ལ་ལྷུང་ནས་དྲན་པ་ཉམས་ཤིང་བརྒྱལ་བར་གྱུར་ཏོ། །དེ་ནས་ལོ་ཙཱ་བ་ཆེན་པོའི་བླ་གོས་ཀྱིས་ཁོའི་མགུལ་པ་བཅིངས། བཀའ་བསྒོ་དྲག་པོ་མཛད་པས། ཁོ་ན་རེ། མང་ཡུལ་གུ་མའི་མཚོ་ལ་གནས་པའི་ཀླུ་ཡིན། ངས་བསྟན་པའི་ཆོས་རྣམས་བོད་ཡུལ་ཐམས་ཅད་དུ་ཁྱབ་ཡོད། གཞུང་དང་གདམས་ངག་མང་པོ་ལ་ཆུ་ལ་ཚྭ་བཏབ་པ་ལྟར་དབྱེར་མེད་དུ་འདྲེས་པས་ཕྱོགས་གཅིག་ཏུ་སྡུད་མི་ཐུབ། ད་ཕྱིན་ཆད་ཆོས་ལོག་མི་སྟོན་པར་ཞུ། ཞེས་ཟེར་རོ། །གཉིས་པ་ནི། འདི་འདྲའི་རིགས་ཀྱིས་ཞེས་སོགས་ཉེར་གཉིས་ཏེ། ཆོས་གཞན་ཕལ་ཆེར་བཟང་པོར་སྟོན་ཅིང་། གནད་རྣམས་ཕྱིན་ཅི་ལོག་ཏུ་བསྟན་པས་ཕ་རོལ་བསླུ་ནུས་པ་དཔེ་དང་བཅས་པ་བཤད་པའོ། །གསུམ་པ་ནི། འདི་འདྲ་ཤེས་པར་ཞེས་སོགས་བཅུ་བདུན་ཏེ། གནད་ཇི་ལྟར་བཅོས་པའི་ཚུལ་དང་། གནད་བཅོས་པའི་བདུད་འདི་འདྲ་ཤེས་པར་བྱས་ནས་ནི་སོགས་སོ། །མགོན་པོ་བྱམས་པས་རྒྱུད་བླར་གསུངས་པ་ནི། གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པ། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུག །ཐུབ་ཚུལ་བཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར། །ཉོན་མོངས་རྨོངས་བདག་རྣམས་ཀྱིས་འཕགས་ལ་སྐུར་བ་དང་། །དེས་གསུངས་ཆོས་ལ་བརྙས་གང་དེ་ཀུན་ཞེན་ལྟས་བྱས། །དེས་ན་ཞེན་ལྟའི་དྲི་ཅན་དེ་ལ་བློ་མི་སྦྱར། །གོས་གཙང་ཚོན་གྱིས་རྣམ་བསྒྱུར་སྣུམ་གྱིས་གོས་པ་བཞིན། །ཞེས་སོ། །གཉིས་པ་འཁྲུལ་པའི་གྲུབ་མཐའ་སུན་འབྱིན་པའི་ཚུལ་ལ་གསུམ་སྟེ། སྔོན་བྱུང་མཁས་པས་འཁྲུལ་པའི་གྲུབ་མཐའ་སུན་འབྱིན་པའི་ཚུལ། རྗེས་འཇུག་མཁས་པས་འཁྲུལ་བའི་གྲུབ་མཐའ་སུན་དབྱུང་བའི་ཚུལ། དགག་སྒྲུབ་ཀྱི་ལུང་སྦྱོར་ཇི་ལྟར་བྱ་བའི་ཚུལ་ལོ། །དང་པོ་ནི། འཁྲུལ་པའི་གྲུབ་མཐའ། ཞེས་སོགས་ཚིགས་བཅད་བརྒྱད་དང་། རྐང་པ་གཅིག་སྟེ། ཁོ་རང་གི་ཆོས་ལུགས་ལ་ཡང་། དང་པོ་ནས་མེད་པའི་རང་བཟོ་དེ་འདྲ་དེ་ནི་ལུང་རིགས་གཞན་མི་དགོས་པར་འདི་རང་བཟོ་ཡིན་ནོ། །ཞེས་ཀུན་ལ་སྒྲོགས་པས་སུན་འབྱིན་པར་བྱའོ། །གཉིས་པ་ལ་གསུམ་སྟེ། ལུང་རིགས་ཀྱིས་གནོད་ཚུལ་སྤྱིར་བསྟན། ལུང་གིས་གནོད་ཚུལ་བྱེ་བྲག་ཏུ་བཤད། ལུང་ཁས་མི་ལེན་པ་ལ་ཇི་ལྟར་བྱ་བའོ། །དང་པོ་ནི། གལ་ཏེ་མུ་སྟེགས། ཞེས་སོགས་ཚིགས་བཅད་ཕྱེད་དང་དྲུག་སྟེ། གདོད་མ་ནས་གྲུབ་པའི་ཆོས་ལོག་ལ་ནི། རང་བཟོ་ཡིན་ཞེས་བྱར་མི་རུང་བར་རིགས་པ་གཞན་གྱིས་སུན་དབྱུང་བར་བྱ་དགོས་ལ། རིགས་པ་དང་འགལ་བ་ནི་རིགས་པས་སུན་ཕྱུང་ཞིང་། ལུང་དང་འགལ་བ་ལ་ཐུན་མོང་གི་ལུང་དང་འགལ་ན་ནི་དེ་ཉིད་ཀྱིས་སུན་ཕྱུང་ཞིང་། ཁོ་རང་གི་ལུང་དང་འགལ་ན་དེས་སུན་ཕྱུང་བར་བྱའོ། །གཉིས་པ་ལ་བཞི་སྟེ། གཞན་གྱི་ལུང་གི་འགོག་མི་ནུས་པ། རང་གི་ལུང་གིས་འགོག་ནུས་པ། དེའི་དཔེར་བརྗོད་གསལ་བར་བཤད་པ། དེས་རིགས་ཅན་གཞན་ཡང་མཚོན་པའོ། །དང་པོ་ནི། དཔེར་ན་ཕ་རོལ་ཞེས་སོགས་བཅུ་གཅིག་སྟེ། ལུང་ཁས་མི་ལེན་པ་ལུང་གཞན་གྱིས་འགོག་པར་མི་ནུས་པའོ། །གཉིས་པ་ནི། ཉན་ཐོས་གཞུང་ལུགས་ཞེས་སོགས་བཅུ་བདུན་ཏེ། རང་ཉིད་ཀྱིས་ལུང་དེ་ལུང་ཚད་མར་ཁས་བླངས་ནས། སྐབས་དེར་ལུང་དེ་དང་འགལ་བ་སྤྱོད་ན་དེས་གནོད་པའོ། །གསུམ་པ་ནི། དེ་ཡི་དཔེར་བརྗོད་ཞེས་སོགས་ཚིགས་བཅད་བཅུ་སྟེ། གཞན་རྣམས་ནི་གོ་སླ་ལ། རྡོ་རྗེ་ཕག་མོའི་བྱིན་རླབས་ཀྱིས་ཆོས་སྒོ་འབྱེད་པ་ནི། ཀོང་ནེ་རུ་པ་ནས་བརྒྱུད་པ་ཡིན་གྱི། དེ་ཡན་ཆད་ལ་མེད་པས། མར་པ་ལ་བརྒྱུད་པ་འདོད་པ་དང་འགལ་ལོ། །ནཱ་རོ་ཆོས་དྲུག་ཞེས་བྱ་བའི་ཁྲིད་ནི་མི་ལ་རས་པ་ཡན་ཆད་དུ་བྱིན་རླབས་དང་འབྲེལ་བའི་ཆོས་དྲུག་དེ་ལས་མེད་པ་ལས། ཕྱིས་བྱིན་རླབས་དང་འབྲེལ་བའི་ཆོས་དྲུག་བོར་ནས། ཀོ་བྲག་པ་དང་། ཡང་དགོན་པ་སོགས་ལམ་འབྲས་དང་ཕྱག་ཆེན་ལ་སོགས་པ་གཞན་གྱི་གདམས་ངག་བསྒོམ་པ་དང་། དྭགས་པོ་ལྷ་རྗེ་རྒྱུདཾ་དང་འབྲེལ་བའི་ཆོས་དྲུག་བསྒོམ་བཞིན་དུ། ནཱ་རོ་པ་ལ་བརྒྱུད་པ་འདེད་པར་བྱེད་པ་གཞན་དང་སོགས་སོ། །གཏེར་ནས་བྱུང་བའི་གླེགས་བམ་སོགས་རྡོ་རྗེ་འཆང་ལ་བརྒྱུད་པ་སྙེག་ཅིང་། དེ་ལའང་གཞན་དག་ལུང་ལེན་པ་རང་ཚིག་དང་འགལ་བ་ནི། གཏེར་ནས་བྱུང་བ་སོགས་ཀྱིས་རྡོ་རྗེ་འཆང་ནས་མ་བརྒྱུད་ཅིང་། གཞན་ལ་ལུང་ལེན་མི་དགོས་པར་བསྟན་པའི་ཕྱིར་རོ། །བཞི་པ་ནི། གལ་ཏེ་འདི་འདྲའི་ཞེས་སོགས་དྲུག་གོ །གསུམ་པ་ལ་གཉིས་ཏེ། ལུང་ཁས་མི་ལེན་པ་གདོད་མ་ནས་ཡོད་པ་ལ་ཇི་ལྟར་བྱ་བ། ལུང་ཁས་མི་ལེན་པ་གློ་བུར་དུ་བྱས་པ་ལ་ཇི་ལྟར་བྱ་བའོ། །དང་པོ་ནི། གལ་ཏེ་མུ་སྟེགས། ཞེས་སོགས་བཅུའོ། །གཉིས་པ་ནི། གལ་ཏེ་གདོད་ནས། ཞེས་སོགས་ཚིགས་བཅད་བཅུ་གསུམ་སྟེ། མཁས་པ་ཛྙཱ་ན་ཤྲཱིས་མུ་སྟེགས་དབྱངས་ཅན་དགའ་བའི་གྲུབ་མཐའ་སུན་འབྱིན་པ་བཞིན་ནོ། །ངེད་ལའང་དེ་འདྲ་ཞེས་སོགས་ནི། ཕྱོགས་ལྷུང་མེད་པའི་བདེན་ཚིག་སྨྲས་པའོ། །གསུམ་པ་དགག་སྒྲུབ་ཀྱི་ལུང་སྦྱོར་བའི་ཚུལ་ལ་བཞི་སྟེ། སྐབས་མ་ཕྱེད་པའི་ལུང་སྦྱོར་བླུན་པོའི་ལུགས་སུ་བསྟན་པ། སྐབས་ཕྱེད་པའི་ལུང་སྦྱོར་གྱི་དཔེ་བརྗོད་དགོད་པ། དེ་གཉིས་ཀའི་དོན་བསྡུ་བ། མཁས་རྨོངས་ཀྱི་འཁྲུལ་པའི་ཁྱད་པར་དཔེས་བསྟན་པའོ། །དང་པོ་ནི། བླུན་པོ་མཁས་པར། ཞེས་སོགས་ལྔའོ། །གཉིས་པ་ལ་གཉིས་ཏེ། ལྟ་སྒོམ་སྤྱོད་པའི་ལུང་སྦྱོར། འཇིག་རྟེན་ལས་འདས་མ་འདས་ཀྱི་ལུང་སྦྱོར་རོ། །དང་པོ་ནི། དཔེར་ན་ཕྱག་དང་། ཞེས་སོགས་ཚིགས་བཅད་ཕྱེད་དང་ལྔ་སྟེ། ཀྱཻ་རྡོ་རྗེ་ལས། བསྒོམ་མེད་སྒོམ་པ་པོའང་མེད། །ཅེས་དང་། དབུ་མ་ཤེས་རབ་ལ་འཇུག་པ་ལས། ཀུན་རྫོབ་མེད་ན་དོན་དམ་མེད། །སངས་རྒྱས་མེད་ན་སེམས་ཅན་མེད། །ལྟ་བ་མེད་ཅིང་སྒོམ་པ་མེད། །འབྲས་བུ་མེད་ཅིང་སྤྱོད་པ་མེད། །ཅེས་སོགས་གསུངས་པ་ནི། ལྟ་བའི་ལུང་ཡིན་གྱི། སྒོམ་པ་དང་སྤྱོད་པ་གཉིས་ཀྱི་ལུང་མིན་ནོ། །ཕྱག་ཆེན་ཐིག་ལེ་ལས། དབང་མེད་པ་ལ་དངོས་གྲུབ་མེད་པར་གསུངས་པ་དང་། འདུལ་བ་ལས། ཆོ་ག་འཁྲུག་ན་ལས་མི་འཆགས་པར་གསུངས་པ་དང་། སྡོམ་པ་གསུམ་གྱི་བསླབ་པ་ལས་ལོག་པར་སྤྱད་ན་ལྟུང་བ་འབྱུང་བར་བཤད་པ་དང་། རྒྱུད་སྡེ་བཞི་ཡི་ལྟ་སྒོམ་འཁྲུགས་ན་བྱིན་གྱིས་མི་རློབ་པར་གསུངས་པ་དང་། རྡོ་རྗེ་སྙིང་པོ་རྒྱན་གྱི་རྒྱུད་ལས། དག་པའི་ཆོས་ལ་སོམ་ཉི་བྱེད། །ཅེས་ལྟུང་བར་གསུངས་པ་དེས་ན་ཆོ་ག་ཅི་བྱས་ཀྱང་སོགས་སོ། །གཉིས་པ་ནི། གཞན་ཡང་ལུང་སྦྱོར་ཞེས་སོགས་བཅུ་གསུམ་སྟེ། སྡོམ་པ་གསུམ་གྱི་དམ་ཚིག་རྣམས་འབད་ནས་བསྲུང་བར་གསུངས་པ་དང་། དགེ་སྡིག་ལ་བླང་དོར་ཚུལ་བཞིན་དུ་བྱེད་པར་གསུངས་པ་ནི། འཇིག་རྟེན་པ་སོ་སོ་སྐྱེ་བོ་ལ་གསུངས་པ་ཡིན་ལ། ཀྱཻ་རྡོ་རྗེ་ལས། བསླབ་དང་དབང་ལས་རྣམ་པར་གྲོལ། །ཞེས་སོགས་གསུངས་པ་རྣམས་ནི། འཁོར་བའི་རྒྱ་མཚོ་ལས་བརྒལ་བའི་འཕགས་པ་ལ་གསུངས་པ་ཡིན་ནོ། །གསུམ་པ་ནི། དེ་འདྲའི་གནས་སྐབས་ཞེས་སོགས་ཚིགས་བཅད་གཅིག་གོ །བཞི་པ་ནི། མིག་ལྡན་ཇི་ལྟར། ཞེས་སོགས་ཚིགས་བཅད་ཕྱེད་དང་དྲུག་གོ །སྔར་བཤད་པ་དེ་ལྟ་བུའི་རྣམ་དབྱེ་ཤེས་ན་ལུང་སྦྱོར་འཁྲུལ་ཡང་འཁྲུལ་བ་ཕྲན་ཚེགས་ཙམ་འབྱུང་ལ། དེ་འདྲའི་རྣམ་དབྱེ་མི་ཤེས་པར་ལུང་སྦྱོར་བྱས་ན་ལྟ་བའི་ལུང་སྤྱོད་པ་ལ་སྦྱར་ནས་དགེ་སྡིག་གི་བླང་དོར་མི་ཕྱེད་པའམ། སྤྱོད་པའི་ལུང་ལྟ་བ་ལ་སྦྱར་ནས་ཐམས་ཅད་བདེན་པར་ལྟ་བར་འགྱུར་བས། རྣམ་དབྱེ་ཕྱེད་པ་ལ་འབད་པར་བྱའོ། །གསུམ་པ་གློ་བུར་གྱི་ཆོས་ལ་བརྟག་དཔྱད་བྱ་བར་གདམས་པ་ལ་བཞི་སྟེ། གློ་བུར་གྱི་མན་ངག་ལ་བརྟག་དཔྱད་བྱ་བ། གློ་བུར་གྱི་མདོ་རྒྱུད་ལ་བརྟག་དཔྱད་བྱ་བ། གློ་བུར་གྱི་རྟེན་ལ་བརྟག་དཔྱད་བྱ་བ། གློ་བུར་གྱི་ལྟས་ལ་བརྟག་དཔྱད་བྱ་བའོ། །དང་པོ་ནི། སྙན་བརྒྱུད་དང་ནི། ཞེས་སོགས་ཚིགས་བཅད་ཕྱེད་དང་དྲུག་སྟེ། སྙན་བརྒྱུད་དང་། ཆིག་བརྒྱུད་དང་། རྨི་ལམ་གྱི་ཆོས་ལུགས་དང་། ཞལ་མཐོང་གི་ཡི་དམ་དང་། ལུང་སྟོན་པའི་སངས་རྒྱས་དང་། བླ་མའི་གསུང་སྒྲོས་རྣམས་བརྟགས་དཔྱད་བྱས་ནས། མདོ་རྒྱུད་དང་མཐུན་ན་བླང་དུ་རུང་སྟེ། སངས་རྒྱས་ཀྱི་བྱིན་བརླབས་ལས། དེ་འདྲ་འབྱུང་བ་ཡང་ཡོད་པའི་ཕྱིར་རོ། །མདོ་རྒྱུད་དང་མི་མཐུན་ན་བླང་དུ་མི་རུང་སྟེ། བདུད་ཀྱི་བྱིན་བརླབས་ལས། དེ་འདྲ་འབྱུང་བར་རྒྱལ་བས་གསུངས་པའི་ཕྱིར་རོ། །མདོ་སྡུད་པ་ལས། མིང་གི་གཞི་ལས་བདུད་ནི་ཉེ་བར་འོངས་གྱུར་ནས། །འདི་སྐད་སྨྲ་སྟེ་འདི་ནི་ཁྱེད་དང་ཕ་མ་དང་། །ཁྱོད་ཀྱི་བདུན་མེས་བརྒྱུད་ཀྱི་བར་གྱི་མིང་ཡིན་ཞིང་། །གང་ཚེ་ཁྱོད་ནི་སངས་རྒྱས་འགྱུར་བའི་མིང་འདི་ཡིན། །སྦྱངས་སྡོམ་རྣལ་འབྱོར་ལྡན་པ་ཅི་འདྲ་འབྱུང་འགྱུར་ལ། །ཁྱོད་སྔོན་ཡོན་ཏན་ཚུལ་ཡང་འདི་འདྲའོ་ཞེས་བརྗོད་དེ། །དེ་སྐད་གང་ཐོས་རློམ་སེམས་བྱང་ཆུབ་སེམས་དཔའ་ནི། །བདུད་ཀྱིས་ཡོངས་སུ་བླངས་ཤིང་བློ་ཆུང་རིག་པར་བྱ། །ཞེས་གསུངས་སོ། །གཉིས་པ་ནི། དེས་ན་སངས་རྒྱས། ཞེས་སོགས་ཚིགས་བཅད་བདུན་ཏེ། གློ་བུར་གྱི་ཆོས་ལ་བརྟག་དཔྱད་མ་བྱས་པར་བཟུང་དུ་མི་རུང་བ་དེས་ན། སངས་རྒྱས་བསྟན་པ་སོགས་ཏེ། སྐྱེས་བུ་རྫུན་མས་སྦྱར་བའི་མདོ་རྒྱུད་གང་ཞེ་ན། ཀོའུ་ཤི་ཀའི་མདོ་སོགས་སོ། །གཞན་ཡང་གསང་སྔགས་གསར་མ་ལ་དབང་བསྐུར་རྒྱལ་པོ་དང་། ལམ་ལྔ་བཀོལ་བ་དང་། དུས་འབྱུང་དང་། ཕྱག་ན་རྡོ་རྗེ་མཁའ་འགྲོ་དང་། ར་ལི་ཉི་ཤུ་རྩ་བཞི་དང་། གཉིས་མེད་རྣམ་རྒྱལ་སོགས་དང་། རྙིང་མ་ལའང་། ཀུན་བྱེད་རྒྱལ་པོ་དང་། མདོ་དགོངས་འདུས་དང་། ཞི་ཁྲོ་སྒྱུ་འཕྲུལ་དང་། ལྷ་མོའི་སྐྱེས་རྒྱུད་དང་། བམ་རིལ་ཐོད་མཁར་ལ་སོགས་པ་བོད་ཀྱིས་སྦྱར་བའི་རྒྱུད་སྡེ་མང་པོ་ཡོད་ཅིང་། སྣང་བརྒྱད་དང་། ལས་དགེ་སྡིག་བསྟན་པ་ལ་སོགས་རྒྱ་ནག་པས་བྱས་པ་ཡིན་ནོ། །གཙུག་ཏོར་ནག་མོ་དང་། བྱ་ཁྱུང་བསམ་ཡས་མ་ལ་སོགས་པ་བོད་ཀྱི་ལྷ་འདྲེས་སྦྱར་བ་ཡིན་ཅིང་། ལྷ་མོ་གནས་མཁར་དང་། ནམ་མཁའ་ལྡིང་གི་རྟོགས་པ་ལ་སོགས་པ་མུ་སྟེགས་བྱེད་ཀྱིས་བྱས་པའི་རྒྱུད་སྡེའང་ཡོད་དོ། །དེ་དག་ལ་ནད་གདོན་ཞི་བ་སོགས་བདེན་པ་ཅུང་ཟད་ཡོད་ཀྱང་ཚད་མར་བྱར་མི་རུང་སྟེ། དེའི་འཐད་པ་རྒྱུད་བླ་མར་མགོན་པོ་བྱམས་པ་སོགས་སོ། །ལུང་འདི་ད་ལྟའི་རྒྱུད་བླ་རྩ་འགྲེལ་ན་མེད་ཀྱང་ཕྱ་བའི་ཊཱི་ཀར་འདིའི་འབྲུ་མནན་བྱུང་བས། རྔོག་འགྱུར་ན་ཡོད་པར་གསལ་ཞིང་། མར་པ་སྨོན་འགྲོ་བའི་འགྱུར་དུ་དེ་ཡང་དྲང་སྲོང་བཀའ་བཞིན་སྤྱི་བོས་བླང་ཞེས་པའི་མཇུག་ཏུ། མ་རིག་མདོངས་རྣམས་ཀྱིས་ཀྱང་སྲིན་བུའི་ཡིག་འདྲ་མུ་སྟེགས་བསྟན་བཅོས་སུའང་། །དོན་ལྡན་ཆོས་ལྡན་ཁམས་གསུམ་ཉོན་མོངས་ཟད་བྱེད་བརྗོད་གྱུར་གང་ཡིན་དང་། །འཇིག་རྟེན་སོ་སོའི་ལེགས་བཤད་གང་དེའང་བློ་ལྡན་དྲང་སྲོང་བཞིན་འཛིན་ན། །གསུང་གང་ཟག་མེད་བློ་མངའ་རྣམས་ཀྱིས་ཞལ་ནས་འབྱུང་བ་སྨོས་ཅི་དགོས། །ཞེས་འབྱུང་ངོ་། །དེའི་དོན་ནི། རྐང་པ་དང་པོས་སྲིན་བུའི་ཡི་གེ་དང་འདྲ་བའི་བདེན་པ་ཅུང་ཟད་ཡོད་པའི་མུ་སྟེགས་བྱེད་ཀྱི་བསྟན་བཅོས་དང་། གཉིས་པས་རྒྱལ་བའི་བཀའ་དང་། གསུམ་པས་སོ་སྐྱེས་བྱས་པའི་བསྟན་བཅོས་རྣམས་ཀྱང་དྲང་སྲོང་བཞིན་དུ་གུས་པས་འཛིན་ན་ཞེས་བསྟན་ཅིང་། བཞི་པས་འཕགས་པ་རྣམས་ཀྱིས་བྱས་པའི་བསྟན་བཅོས་ལྟ་སྨོས་ཀྱང་ཅི་དགོས་ཞེས་པའོ། །ཡང་ན་རྐང་པ་དང་པོ་དང་གསུམ་པ་སྦྱར་ཞིང་། གཉིས་པ་དང་བཞི་པ་སྦྱར་ཏེ། རྒྱལ་བའི་བཀའ་དང་། འཕགས་པས་མཛད་པའི་བསྟན་བཅོས་དྲང་སྲོང་བཞིན་དུ་འཛིན་པ་ལྟ་སྨོས་ཀྱང་ཅི་དགོས་ཞེས་པའོ། །ཁ་ཅིག་འདིར་ས་པཎ་གྱིས་མེད་བཞིན་དུ་བྲིས་ཞེས་སྨྲས་པ་དང་། གཞན་དག་འདུལ་བ་ལུང་ལས། མགོན་པོ་བྱམས་པ་ཁྱོད་ཀྱིས་ནི། །བདག་ནི་ཚོང་པ་རྙེད་ལྡན་ལྟར། །ཞེས་པས་མགོན་པོ་བྱམས་པ་སངས་རྒྱས་ལ་བྱས། སྔར་ནི་དེ་ལྟར་རྣམ་གཞག་ནས། །སླར་ཡང་བླ་མའི་རྒྱུད་འདིར་ནི། །ཞེས་པས་རྒྱུད་བླ་མ་བཀའ་ཐ་མ་ལ་བྱས་ཏེ། མྱང་འདས་ཀྱི་མདོ་ལྷའི་ཟླ་བས་བསྒྱུར་བ་ལས། དཔེར་ན་ཤིང་ངམ་རྩིག་པ་ལ་སྲིན་བུས་བརྐོས་ཏེ། ཡི་གེའི་འབྲུ་འདྲ་བར་གྱུར་པ་མཐོང་ཡང་མཁས་པ་རྣམས་ཀྱིས། སྲིན་བུས་ཡི་གེ་ཤེས་སོ། །ཞེས་བརྗོད་པར་མི་བགྱིད། ཞེས་པ་དང་། མུ་སྟེགས་པ་རྣམས་ཀྱིས་བདག་བསྟན་པ་ནི། སྲིན་བུས་བརྐོས་པའི་ཡི་གེ་དང་འདྲ་སྟེ། དེའི་ཕྱིར་སེམས་ཅན་ཐམས་ཅད་ལ་བདག་མེད་དོ། །ཞེས་བསྟན་པ་སྟོན་པ་མཛད་དོ། །བདག་མེད་པ་ནི་སངས་རྒྱས་ཀྱི་ཚིག་ཡིན་ནོ། །ཞེས་གསུངས་པའི་དོན་གཞུང་དུ་བྱས་པ་ཡིན་གྱི། བསྟན་བཅོས་རྒྱུད་བླ་ལ་བྱས་པ་མ་ཡིན་ནོ། །ཞེས་སྨྲའོ། །དེ་ལ་དང་པོ་ནི་རང་ཉིད་ཀྱིས་མ་མཐོང་བཞིན་དུ་གཞན་ལ་སྨྲ་བར་འདོད་པ་ཙམ་ཡིན་ལ། ཕྱི་མ་ནི་ཤིན་ཏུ་མི་འཚམས་པའི་བཤད་པ་སྟེ། སྔར་མགོན་པོ་བྱམས་པས་རྒྱུད་བླར་གསུངས་ཞེས་པའི་བསྟན་བཅོས་རྒྱུད་བླ་མ་ལ་བྱས་ནས། འདིར་མགོན་པོ་བྱམས་པ་སྟོན་པ་དང་། རྒྱུད་བླ་བཀའ་ཐ་མ་ལ་བྱས་ན་གདུལ་བྱ་མགོ་རྨོངས་པར་འགྱུར་བའི་ཕྱིར་དང་། ཡོངས་སུ་གྲགས་པའི་ཐ་སྙད་བོར་ནས་ཡོངས་སུ་མ་གྲགས་པའི་བསྟན་བཅོས་ཀྱི་ནང་དུ་འཇུག་པ་ནི་རྩོམ་པ་པོ་མི་མཁས་པའི་ཚུལ་ཡིན་པའི་ཕྱིར་དང་། བཀའ་ཐ་མ་ན་ཚིགས་བཅད་དེ་ཡོད་པ་ཉིད་ཀྱིས་ཀྱང་དེའི་དགོངས་འགྲེལ་གྱི་བསྟན་བཅོས་ན་གཞུང་དེ་ཡོད་པ་མི་འགལ་བའི་ཕྱིར་རོ། །གསུམ་པ་ནི། རིང་བསྲེལ་དང་ནི། ཞེས་སོགས་ཉེར་གཅིག་སྟེ། སྤྱིར་རིང་བསྲེལ་ལ་བདེན་པ་མཐོང་བའི་ཡོན་ཏན་གྱི་སྟོབས་ཀྱིས་བྱུང་བ་དང་། སྡིག་པོ་ཆེ་ལས་འབྲས་ལ་ཡིད་མི་ཆེས་པར་བྱ་བའི་ཕྱིར་རམ། གདོན་གྱིས་བྱས་པ་དང་། འབྱུང་བཞིའི་ནུས་པ་རུས་པའི་ནང་དུ་འཁྱིམས་པ་དང་། བསྟན་པ་ལ་དགའ་བའི་ལྷས་གང་ཟག་དེ་ལ་རྗེས་འཇུག་དད་པར་བྱ་བའི་ཕྱིར་སྤྲུལ་པ་དང་བཞི་ཡོད་ཅིང་། དེ་ལས་གཞན་པ་ནི་སྐྱེས་བུ་བརྫུན་མས་གསར་དུ་བྱས་པ་ཡིན་ནོ། །ཡོན་ཏན་གྱི་སྟོབས་ཀྱིས་བྱུང་བ་ལ་ཡང་འཕགས་པ་གསུམ་ལས། སངས་རྒྱས་འཕགས་པ་ལ་འབྱུང་བ་ནི། མདོ་སྡེ་བསྐལ་བཟང་ལས། སྐུ་གདུང་རྒྱས་པ་དང་། རིལ་པོ་གཅིག་ཏུ་འདུག་པ་གཉིས་གསུངས་པ་དང་། རང་སངས་རྒྱས་ལ་འབྱུང་བ་ཡང་། སྔོན་ཝཱ་ར་ནཱ་སཱིར་སངས་རྒྱས་འབྱུང་བ་ཐོས་ནས་རང་སངས་རྒྱས་རྣམས་ཀྱིས་ལུས་མེ་ལ་སྦར་ཏེ། རིང་བསྲེལ་སྤྲུལ་པར་བཤད་པ་དང་། དེ་བཞིན་དུ་ཉན་ཐོས་དགྲ་བཅོམ་པ་འགའ་ཞིག་གིས་ཀྱང་རིང་བསྲེལ་སྤྲུལ་པར་བཤད་དོ། །ཐུགས་ལྗགས་མ་ཚིག་པར་འབྱུང་བ་དང་། སྐུ་གཟུགས་སོགས་རུས་པ་ལས་འབྱུང་བ་ཆོས་ནས་སོགས་སོ། །འོ་ན་དཀོན་བརྩེགས་ཀྱི་ཡབ་སྲས་མཇལ་བ་ལས། གྲགས་པ་མ་སྨད་དེ་དག་ནི། །རིང་བསྲེལ་དག་ཀྱང་རྒྱས་པར་འགྱུར། །དེ་དག་རྣམས་ཀྱི་རིང་བསྲེལ་ལའང་། །རྒྱལ་བའི་སྐུ་ལྔ་འབྱུང་བར་འགྱུར། །ཞེས་པ་དང་འགལ་ལོ་ཞེ་ན། དེ་ནི་མ་འོངས་པ་ན། རིང་བསྲེལ་ལ་བརྟེན་པའི་སྐུ་གཟུགས་བཞེངས་པ་འབྱུང་བ་ལ་དགོངས་པས་སྐྱོན་མེད་དོ། །བཞི་པ་ནི། ཉི་མ་དུ་མ། ཞེས་སོགས་ཚིགས་བཅད་ཕྱེད་དང་དྲུག་སྟེ། མིག་བཅུ་གཉིས་པ་ཞེས་བྱ་བའི་མདོ་ལས། གཙུག་ལག་ཁང་གི་སྐུ་གཟུགས་འཕོས་སམ། སྤྱན་ནས་མཆི་མ་བྱུང་ན་ཡུལ་ཁམས་དེའི་མི་དཔའ་བོ་གཅེས་པ་བུ་མང་པོ་དང་བཅས་པ་ཡུལ་ཕུད་པར་འགྱུར་ཞེས་པ་དང་། འཇིག་རྟེན་པའི་ལྷ་མཆོད་པའི་ཚེ་ལྷ་སྨྲའམ། འཛུམ་ན་རྒྱལ་པོ་ལ་བགེགས་དང་། གནོད་པ་འབྱུང་ཅེས་པ་དང་། ཐུབ་པ་ཆེན་པོ་དྲང་སྲོང་ག་རྒས་ལྟས་ཀྱི་རྣམ་པ་བསྟན་པ་ཞེས་བྱ་བའི་གཙུག་ལག་ལས། གལ་ཏེ་གང་དུ་འཇིག་རྟེན་པའི་ལྷའི་གཟུགས་གར་བྱེད་པ་རབ་ཏུ་གཡོ་བར་གྱུར་པ་དང་། སྨྲ་བར་གྱུར་པ་དང་། མིག་མཆི་མས་གང་བ་དང་། རྔུལ་བར་གྱུར་པ་དང་། གས་པར་གྱུར་པ་དང་། དུམ་བུར་གྱུར་པ་དང་། ཐམས་ཅད་ཞིག་པར་གྱུར་པ་ལ་སོགས་པས་ནི་འཇིགས་པ་རྣམ་པ་དུ་མ་འབྱུང་བ་རིག་པར་བྱའོ། །དེ་ལ་ཡང་གར་གྱིས་ནི་དམག་མང་པོ་འབྱུང་ངོ་། །ཞེས་པ་དང་། གོམ་པ་འདོར་བས་ནི་ཡུལ་བོར་ཏེ་འགྲོ་བར་འགྱུར། ཞེས་སོ། །གཉིས་པ་ཚིག་ལ་འཁྲུལ་པ་དགག་པ་ལ་གཉིས་ཏེ། དོར་བྱ་ནོར་བའི་བཤད་པ་དགག་པ། བླང་བྱ་མ་ནོར་བའི་བཤད་པ་བསྒྲུབ་པའོ། །དང་པོ་ལ་གཉིས་ཏེ། བོད་སྐད་ལ་བཤད་པ་ནོར་ཚུལ། རྒྱ་སྐད་ལ་བཤད་པ་ནོར་ཚུལ་ལོ། །དང་པོ་ནི། དེ་དག་དོན་ལ་ཞེས་སོགས་ཚིགས་བཅད་ཕྱེད་དང་དྲུག་སྟེ། བཅོམ་ལྡན་འདས་ཀྱིས་བཤད་པ་ལ། བདུད་བཞི་བཅོམ་པས་ན་བཅོམ། སྐལ་བ་དྲུག་དང་ལྡན་པས་ན་ལྡན། འཁོར་བའི་ཆོས་ལས་འདས་པས་ན་འདས། ཞེས་འཆད་པ་ནོར་ཏེ། བྷ་ག་ཝཱན་ཞེས་པའི་བྷ་ག་ནི་བཅོམ་པ་དང་། སྐལ་བ་དང་། ལེགས་པ་སོགས་ལ་འཇུག་ལ། ཝཱན་ཞེས་པ་ལྡན་པའི་དོན་ཡིན་པས། སྔ་མ་གསུམ་ཆར་ལ་སྦྱར་བར་བྱ་བ་ཡིན་པའི་ཕྱིར་དང་། འདས་པ་ལ་སྐད་དོད་མེད་པའི་ཕྱིར་དང་། གླེགས་བམ་གྱི་བཤད་པ་ལ། གླེགས་ཤིང་གི་བར་དུ་གླེགས་ཐག་གི་བམ་པོར་བསྡམས་པས་ན་གླེགས་བམ་ཞེས་བཤད་པ་ནོར་ཏེ། གླེགས་ཤིང་གླེགས་ཐག་ཀྱང་གླེགས་བམ་ལ་ལྟོས་པའི་ཐ་སྙད་ཡིན་པའི་ཕྱིར་རོ། །ལག་པའི་སྒྲ་དོན་འཆད་པ་ནོར་བ་ནི། མུ་དྲ་ཞེས་པ་རྒྱ་ལ་འཇུག་གི ལག་པའི་སྐད་དོད་གསར་དུ་བསྣན་པ་ཡིན་པའི་ཕྱིར་རོ། །གདོད་མའི་ཤེས་པར་འཆད་པ་ནོར་བ་ནི། ཛྙཱ་ན་ཞེས་པ་རྟོགས་པའམ་ཁོང་དུ་ཆུད་པ་ལ་འཇུག་གི་གདོད་མའི་སྐད་དོད་མེད་པའི་ཕྱིར་རོ། །རྣལ་འབྱོར་གྱི་བཤད་པ་ནོར་བ་ནི། ཡོ་ག་ཅེས་པ་སྦྱོར་བ་ལ་འཇུག་གི རྣལ་གྱི་སྐད་དོད་མེད་པའི་ཕྱིར་རོ། །འོ་ན་འདས་དང་རྒྱ་དང་ཡ་དང་། རྣལ་གྱི་སྒྲ་བསྣན་པའི་རྒྱུ་མཚན་ཅི་ཞེ་ན། དེ་དག་མ་བསྣན་ན་འཇིག་རྟེན་གྱི་ལེགས་ལྡན་དང་། འཇིག་རྟེན་གྱི་རྒྱ་དང་རྟོགས་པ་ཙམ་དང་། གཉིས་ཟུང་དུ་འཇུག་པ་ཙམ་ལ་འཁྲུལ་བར་འགྱུར་བས་ལོ་ཙཱ་བས་ཐབས་མཁས་ཀྱིས་བསྣན་པའོ། །དམག་གི་དཔུང་དུ་འཆད་པ་ནོར་བ་ནི། དེའི་སྐད་དོད་མེད་པའི་ཕྱིར་རོ། །གཏུམ་མོའི་སྒྲ་བཤད་ནོར་བ་ནི། ཙཎྜ་ལཱི་ཞེས་པ་རྣམ་རྟོག་གསོད་པའི་ཤན་པ་ལ་འཇུག་པའི་ཕྱིར་རོ། །ཀླུ་དང་རི་རབ་ནི་ཡི་གེ་ཉིད་མཐོང་བས་གསལ་ལོ། །གཉིས་པ་ནི། ཤཱཀྱའི་བུ་མོ། ཞེས་སོགས་ཚིགས་བཅད་ཉེར་གཉིས་ཏེ། དེ་དག་ལས་འགའ་ཞིག་ནི། རྒྱ་སྐད་བོད་སྐད་དུ་བསྒྱུར་མ་ཤེས་པས་ནོར་ལ། ཕལ་ཆེར་ནི་རྒྱ་སྐད་ཡིན་པར་མ་ཤེས་པར་དེ་ལ་བོད་སྐད་ཀྱི་སྒྲ་བྱས་པས་ནོར་བ་སྟེ། གཞུང་ཉིད་མཐོང་བས་རྟོགས་པར་འགྱུར་རོ། །གཉིས་པ་ནི། དེ་བཞིན་གཤེགས་པའི་ཞེས་སོགས་བཅུ་བཞི་སྟེ། དེ་བཞིན་གཤེགས་པའི་སྒྲ་བཤད་ལ། དེ་ཁོ་ན་ཉིད་རྟོགས་པར་འཆད་པ་སོགས་སཾ་ཀྲྀ་ཏའི་སྐད་ལ་འཐད་པའི་རྒྱུ་མཚན་ནི། ཏ་ཐཱ་ག་ཏ་ཞེས་པ་དེ་ཁོ་ན་ཉིད་རྟོགས་པ་ལ་འཇུག་པ་དང་། ཨརྷ་ཏ་ཅེས་པ་ལྷ་མི་ཀུན་གྱིས་མཆོད་པར་འོས་པ་ལ་འཇུག་པ་དང་། རཱ་ཛ་ཅེས་པ་གཟི་བརྗིད་ཆེ་བ་དང་། མཛེས་པ་དང་། གསལ་བ་ལ་འཇུག་པ་དང་། ཀྵནྟེ་ཞེས་པ་རྐྱེན་ངན་པས་མི་ཕྱེད་པ་ལ་འཇུག་པ་དང་། ཀནྡྷ་ཞེས་པ་འཁུར་ཁྱེར་བས་ཕྲག་པ་ལ་འཇུག་པ་དང་། ཧེ་ཏུ་ཞེས་པ་དབྱིངས་དང་། རྒྱུ་དང་། ཁམས་གསུམ་ཀ་ལ་འཇུག་པ་དང་། བྷ་ག་ཞེས་པ་སྐལ་བ་ལ་འཇུག་པ་དང་། པུ་དུ་ར་ཛ་ཡ་ཞེས་པ་ཤིན་ཏུ་ངན་ཅིང་། ཐུབ་པར་དཀའ་བ་ལ་འཇུག་པ་དང་། ཨ་ནུ་ཤ་ཡ་ཅེས་པ་ཆོས་མངོན་དུ་འགྱུར་བའི་གནས་ལ་འཇུག་པ་དང་། ཤཱཀྱ་ནི་རྒྱ་སྐད་སོར་བཞག་པ་ཡིན་ལ། བོད་སྐད་དུ་བསྒྱུར་ན་ཕོད་པར་འཇུག་པའི་ཕྱིར་རོ། །འདི་དག་ནི་དགྲ་བཅོམ་དང་། རྒྱལ་པོ་སོགས་ཀྱི་ཚིག་ཇི་བཞིན་དུ་འཆད་པ་མ་ཡིན་པས་བོད་སྐད་ལ་ཅུང་ཟད་མི་བདེ་ཡང་ལེགས་པར་སྦྱར་བའི་སྒྲ་དག་པ་ཤིན་ཏུ་འཐད་པའི་ཕྱིར་ན་མཁས་པས་བླང་བར་བྱ་བ་ཡིན་ནོ། །གསུམ་པ་བཤད་པ་ཡོངས་སུ་རྫོགས་པའི་བྱ་བ་ལ་ལྔ་སྟེ། བསྟན་བཅོས་བརྩམ་པའི་རྒྱུ་ངོས་གཟུང་། འབྲས་བུ་བསྟན་བཅོས་གཟུང་བར་གདམས། གཟུང་བྱའི་ཆོས་ཀྱི་ཆེ་བ་བརྗོད། བརྩམས་པའི་དགེ་བ་གཞན་དོན་དུ་བསྔོ། བཀའ་དྲིན་རྗེས་སུ་དྲན་པའི་ཕྱག་གོ །དང་པོ་ལ་གསུམ་སྟེ། དམིགས་རྐྱེན་བསྟན་པའི་འཕེལ་འགྲིབ་བྱུང་ཚུལ། ཀུན་སློང་ཟང་ཟིང་མེད་པའི་བྱམས་པ། བདག་རྐྱེན་ཕྱོགས་ལྷུང་མེད་པའི་ཤེས་རབ་བོ། །དང་པོ་ལ་བཞི་སྟེ། འཕགས་པའི་ཡུལ་དུ་འཕེལ་འགྲིབ་བྱུང་ཚུལ། བོད་ཀྱི་ཡུལ་དུ་འཕེལ་འགྲིབ་བྱུང་ཚུལ། དེས་ན་ཆོས་ལོག་སུན་དབྱུང་དགོས་པ། གཏན་གྱི་བྱ་བ་བརྟགས་ནས་བླང་བའོ། །དང་པོ་ལ་གཉིས་ཏེ། ཉན་ཐོས་ཀྱི་བསྟན་པ་ལ་བཀའ་བསྡུ་བྱུང་ཚུལ། ཐེག་ཆེན་གྱི་བསྟན་པ་ལ་འཕེལ་འགྲིབ་བྱུང་ཚུལ་ལོ། །དང་པོ་ལ་གསུམ་སྟེ། བཀའ་བསྡུ་དང་པོ། གཉིས་པ། གསུམ་པ་བྱུང་ཚུལ་ལོ། །དང་པོ་ནི། སངས་རྒྱས་བསྟན་པ་དྲི་མ་མེད། །བསྡུ་བ་དང་པོ་བྱས། ཞེས་པ་སྟེ། སྟོན་པ་མེ་མོ་ཡོས་ལ་ལྷུམས་སུ་ཞུགས་ནས་ས་ཕོ་འབྲུག་ལ་སྐུ་བལྟམས་ཤིང་། ཆུ་ཕོ་སྟག་ལ་སངས་རྒྱས་ཏེ། མེ་མོ་ཕག་གི་དཔྱིད་ཟླ་ཐ་ཆུང་ས་གས་ཉ་བའི་ཚེ། མྱ་ངན་ལས་འདའ་བའི་ཚུལ་བསྟན་ཏོ། །དེའི་ལོ་ཕྱི་མ་ལ་རྒྱལ་པོའི་ཁབ་ཀྱི་ནགས་ཁྲོད་བྲི་ཛིའི་ལྗོངས་སུ་རྒྱལ་པོ་མ་སྐྱེས་དགྲས་སྦྱིན་བདག་བྱས་ཏེ། འོད་སྲུང་ཆེན་པོ་ལ་སོགས་པ་དགྲ་བཅོམ་པ་ལྔ་བརྒྱ་འདུས་ནས་བཀའ་བསྡུ་བ་མཛད་དེ། གང་པོས་རྫུ་འཕྲུལ་གྱི་གཎྜི་བརྡུངས་པས། དགྲ་བཅོམ་པ་ལྔ་བརྒྱར་གཅིག་གིས་མ་ཚང་ནས། བ་ལང་བདག་སུམ་ཅུ་རྩ་གསུམ་ན་ཡོད་པ་སྤྱན་དྲངས་པས་མ་བྱོན་ཏེ། མྱ་ངན་ལས་འདས་སོ། །དེ་ནས་འོད་སྲུང་ཆེན་པོས་དགྲ་བཅོམ་པ་རྣམས་རེ་ཤིག་མྱ་ངན་ལས་མི་འདའ་བར་དམ་ཚིག་བཅས་ནས་ཀུན་དགའ་བོ་ལ་སྐྱོན་བཏགས་ཏེ་བསྐྲད་པས་རིང་པོར་མ་ཐོགས་པར་དགྲ་བཅོམ་པར་གྱུར་ཏོ། །དེ་ནས་ཐོག་མར་དགྲ་བཅོམ་པ་རྣམས་ཀྱི་སྣམ་སྦྱར་བཏིང་བ་ལ། འཕགས་པ་ཀུན་དགའ་བོ་བཞུགས་ཏེ་མདོ་སྡེ་བསྡུ་བ་མཛད། དེ་བཞིན་དུ་ཉེ་བ་འཁོར་གྱི་འདུལ་བའི་སྡེ་སྣོད་དང་། འོད་སྲུང་ཆེན་པོས་མངོན་པའི་སྡེ་སྣོད་བསྡུས་ཏེ། ཀུན་དགའ་བོ་ལ་བསྟན་པ་གཏད་ནས། རི་བྱ་རྐང་ཅན་དུ་ཕྱག་དར་ཁྲོད་ཀྱི་སྣམ་སྦྱར་གྱིས་སྐུ་གདུང་དྲིལ་ནས་བྱམས་པ་མ་བྱོན་གྱི་བར་དུ་མི་ཉམས་པར་བྱིན་གྱིས་བརླབས་ཏེ་མྱ་ངན་ལས་འདས་སོ། །ཀུན་དགའ་བོས་ལོ་བཞི་བཅུའི་བར་དུ་བསྟན་པ་བསྐྱངས་ནས་ཤ་ནའི་གོས་ཅན་ལ་བསྟན་པ་གཏད། དེ་ནས་རིམ་པ་བཞིན་ཉེ་སྦས་དང་། དྷི་དྷི་ཀ་དང་། ནག་པོ་དང་། ལེགས་མཐོང་ལ་གཏད་དེ། བསྟན་པའི་གཏད་རབས་བདུན་ནོ། །གཉིས་པ་ནི། དེའི་རྗེས་བསྟན་པ་དག་པར། ཞེས་སོགས་བདུན་ཏེ། སངས་རྒྱས་མྱ་ངན་ལས་འདས་ནས་ལོ་བརྒྱ་དང་བཅུ་ལོན་པ་ན། ཡངས་པ་ཅན་གྱི་དགེ་སློང་གིས། ཧུ་ལུ་ཧུ་ལུ་ཡི་རང་དང་། །ཀུན་སྤྱོད་སྣོད་དང་ལན་ཚྭ་དང་། །ལམ་དང་སོར་གཉིས་དཀྲུགས་དང་གདིང་། །གསེར་གྱི་རུང་བ་ཞེས་བྱ་སྟེ། །འདི་དག་རུང་མིན་གཞི་བཅུ་ཡིན། །ཞེས་མི་རུང་བའི་གཞི་བཅུ་བྱས་ཏེ། དེ་ཡང་ཆོས་མིན་གྱི་ལས་ཆོས་ཀྱི་ལས་སུ་བྱས་ཏེ། ཧུ་ལུ་ཧུ་ལུ་ཞེས་བརྗོད་པས་རུང་བར་བྱེད་པ་དང་། སྔར་བཞིན་དུ་ལས་བྱས་ནས་དགེ་སློང་ཐམས་ཅད་ཀྱིས་རྗེས་སུ་ཡི་རང་ངོ་ཞེས་བརྗོད་ནས་རུང་བར་བྱེད་པ་དང་། རང་གི་ལག་པའི་ཀུན་སྤྱོད་ཀྱིས་ས་བརྐོས་ནས་རུང་བར་བྱེད་པ་དང་། ཇི་སྲིད་འཚོའི་བར་དུ་སྤྱོད་པའི་ལན་ཚྭ་དུས་རུང་ལ་བསྲེས་ནས་དུས་མིན་དུ་ཟ་བ་དང་། ལམ་དཔག་ཚད་ཕྱེད་ཙམ་དུ་ཕྱིན་ནས་འདུས་ཤིང་ཟ་བ་དང་། ལྷག་པོར་མ་བྱས་པའི་ཟས་ཐོག་མར་སོར་མོ་གཉིས་ཀྱིས་བཅད་ནས་ཟ་བ་དང་། ཆང་བླུག་པའི་སྣོད་ནས་ནད་པས་སྲིན་འབུ་པད་མས་ཁྲག་གཞིབས་པ་ལྟར་ཆང་གཞིབས་ཏེ་འཐུང་བ་དང་། འོ་མ་དང་ཞོ་བསྲེས་ནས་དཀྲུགས་ཏེ། དུས་མིན་དུ་ལོངས་སྤྱོད་པ་དང་། གདིང་བ་རྙིང་པ་ལས་མཐོ་གང་གིས་མ་གླན་པར་གསར་པ་ལ་སྤྱོད་པ་དང་། དྲི་ཞིམ་པོས་བྱུགས་པའི་ལྷུང་བཟེད་ཁྲི་སྟན་དང་བཅས་པ་དགེ་ཚུལ་གྱི་མགོ་བོར་བཞག་ནས། ལམ་གྱི་གཞི་མདོར་ལྷུང་བཟེད་འདིར་གསེར་དངུལ་དང་། རིན་པོ་ཆེ་བྱིན་ཅིག་ཅེས་རུང་བར་བྱེད་པའོ། །དེའི་ཚེ་གྲོང་ཁྱེར་ནོར་ཅན་ནས། དགྲ་བཅོམ་པ་གྲགས་པ་འཁོར་ལྔ་བརྒྱ་དང་བཅས་པ། ཡངས་པ་ཅན་དུ་འོངས་པས་མི་རུང་བའི་གཞི་བཅུ་བྱས་པར་རིག་ནས། དགྲ་བཅོམ་པ་ཐམས་ཅད་འདོད་ཀྱི་དྲུང་ན་གླེང་སྟེ། དམར་བུ་ཅན་གྱི་ཟླ་རྒུར་ལ་སོགས་པའི་ཕྱོགས་བཙལ་ནས། དགྲ་བཅོམ་པ་བདུན་བརྒྱ་འདུས་ཏེ། གནས་ཡངས་པ་ཅན་གྱི་ཀུསྨ་པུ་རིའི་གཙུག་ལག་ཁང་དུ། ཆོས་རྒྱལ་མྱ་ངན་མེད་ཀྱིས་སྦྱིན་བདག་བྱས་ནས་རུང་བ་མ་ཡིན་པའི་གཞི་བཅུ་སུན་ཕྱུང་སྟེ། བཀའ་བསྡུ་བ་གཉིས་པ་བྱས་སོ། །གསུམ་པ་ནི། དེ་ལྟར་དག་པར། ཞེས་སོགས་ཚིགས་བཅད་བཅུ་གཅིག་དང་། རྐང་པ་གཅིག་སྟེ། དེ་ཡང་རྒྱ་གར་ལྷོ་ཕྱོགས་ན་དེད་དཔོན་ཞིག་ཡོད་པའི་ཆུང་མ་ལ་བུ་བཙས་པ་དང་། ལྷ་ཆེན་པོར་མིང་བཏགས་ནས་ཕ་དེ་རྒྱ་མཚོར་རིན་པོ་ཆེ་ལེན་དུ་སོང་། དེའི་ཚེ་བུ་ཆེར་སྐྱེས་ཏེ་མ་དང་ལྷན་ཅིག་འདུས་ཕ་འོངས་པའི་གཏམ་ཐོས་ཏེ། ལམ་གོལ་བར་སོང་སྟེ་ཕ་བསད། མ་ཡང་སྐྱེས་པ་གཞན་དང་ཉལ་པོ་བྱེད་པར་ཤེས་ནས་ཁྲོས་ཏེ་བསད། རང་གི་སློབ་དཔོན་དགྲ་བཅོམ་པ་ཞིག་གིས་སྡིག་པའི་རྣམ་སྨིན་བཤད་པས། འདིས་ཁོ་བོའི་བྱ་བ་དེ་དག་ཤེས་སོ་སྙམ་ནས་བཀྲོངས་ཏེ། མཚམས་མེད་ཀྱི་ལས་གསུམ་བྱས་ནས་ཕྱིས་དགོན་པར་བསྡད་དེ། ཆོས་ལོག་མང་དུ་བསྟན། ཐོ་རངས་རང་སྡིག་དྲན་ཏེ། ཀྱེ་མ་སྡུག་བསྔལ་ལོ། །ཞེས་བསྒྲགས་པས་འཁོར་གྱི་རྒྱུ་མཚན་ཞུས་པས། འཕགས་པའི་བདེན་པ་བཞི་བསྒོམས་པས་སྡུག་བསྔལ་བདེན་པ་མངོན་སུམ་དུ་མཐོང་ནས་བོས་པ་ཡིན་ནོ་ཞེས་ཟེར་རོ། །དེའི་ཚེ་འཁོར་རྣམས་ཀྱིས་དཀོན་མཆོག་གསུམ་དང་། བྱང་ཆུབ་ཀྱི་ཕྱོགས་ཀྱི་ཆོས་ལ་སོགས་པ་དྲིས་པས། ཁོ་བོས་དགྲ་བཅོམ་པར་ཁས་བླངས་ཀྱི་སྟོན་པ་ཡིན་པར་མ་སྨྲས་སོ། །དེ་དག་ལུང་སྟོན་པ་ནི། ཐེ་ཚོམ་དང་། སོམ་ཉི་ལས་བརྒལ་བའི་སངས་རྒྱས་འབའ་ཞིག་གོ །ཞེས་པ་ལ་སོགས་པའི་བརྫུན་ཚིག་གིས་ཚོགས་པ་རྣམས་ཀྱི་མགོ་བོ་བསྐོར་ནས། ལོག་འཚོ་མང་དུ་ཟོས་པས་ཤི་ནས་སེམས་ཅན་དམྱལ་བར་འགྱུར་ཞེས་གྲག་གོ །ཆོས་ལོག་དེ་དག་དགྲ་བཅོམ་རྣམས་ཀྱིས་སུན་ཕྱུང་ནས། བཀའ་བསྡུ་གསུམ་པ་བྱས་ཞེས་ཐོས་སོ། །འོན་ཀྱང་དེའི་ལེ་ལན་གྱིས་སྡེ་པ་བཅོ་བརྒྱད་པོ་རྣམས་ལ་ཡང་། འཇིག་རྟེན་འདས་པར་སྨྲ་བའི་སྡེ་པས། དགྲ་བཅོམ་ལ་ཐེ་ཚོམ་དང་། སོམ་ཉི་ཡོད་པར་འདོད་པ་དང་། ཐམས་ཅད་ཡོད་པར་སྨྲ་བས། དགྲ་བཅོམ་འབྲས་བུ་ལས་ཉམས་པ་ཡོད་པར་འདོད་པ་སོགས་ཅུང་ཟད་བསླད་པ་ཡོད་ཅེས་ཟེར་ཞིང་། དབྱིག་གཉེན་གྱི་རྣམ་བཤད་རིག་པ་ལས། བླ་མ་ཀུན་དགའ་འོད་ཙེལ་དང་། །སྡུག་བསྔལ་ཕུང་སྟོན་ས་སྟོན་དང་། །འཆར་ཁ་སྟོང་ཉིད་ཆུ་ལས་སྐྱེས། །གང་པོ་ས་མཚོ་ཆུ་ཤིང་དང་། །མྱ་ངན་འདས་དང་ཡུལ་འཁོར་སྐྱོང་། །འགྲོ་བ་མདོ་དང་དེ་བཞིན་གཞན། །ཡང་དག་བསྡུས་པའི་གཞི་ཉམས་ཕྱིར། །མཐའ་དག་མིན་པར་རྟོགས་པ་ཡིན། །ཞེས་མདོ་དེ་རྣམས་འགའ་ཞིག་མ་ཚང་བ་དང་། ལུང་ཉམས་པ་རྣམས་བཀའ་བསྡུ་ཉམས་པའི་དབང་གིས་བྱུང་བ་ཡིན། ཞེས་དགོངས་སོ། །བཀའ་བསྡུ་གསུམ་པ་འདི་འདུལ་བ་ལུང་ལས་གསལ་བར་མ་བཤད་པས། འདོད་པ་མི་མཐུན་པ་དུ་མ་ཡོད་པ་ལས། རྟོག་གེ་འབར་བར་ལུགས་གཉིས་གསུངས་པ་ལས། དང་པོ་ནི། སྟོན་པ་མྱ་ངན་ལས་འདས་ནས་ལོ་བརྒྱ་དང་དྲུག་ཅུ་ན། གྲོང་ཁྱེར་མེ་ཏོག་གིས་བརྒྱན་པར་རྒྱལ་པོ་མྱ་ངན་མེད་བྱུང་སྟེ། དགྲ་བཅོམ་པ་རྣམས་ཀྱིས་སྐད་རིགས་མི་གཅིག་པ་བཞི་སོ་སོར་བཀླགས་པས། སློབ་མ་རྣམས་གྲུབ་མཐའ་སྣ་ཚོགས་སུ་གྱུར། དེ་ནས་དགྲ་བཅོམ་པ་དང་། སོ་སོ་སྐྱེ་བོའི་མཁས་པ་རྣམས་ཛཱ་ལནྡྷ་རའི་དགོན་པར་འདུས་ནས་བསྟན་པ་བསྡུས་སོ། །དེའི་ཚེ་སྟོན་པ་མྱ་ངན་ལས་འདས་ནས། ལོ་སུམ་བརྒྱ་སོང་ཞེས་ཟེར་ཞིང་། འོད་ལྡན་ལས་ཀྱང་དེ་དང་མཐུན་པར་གསུངས་སོ། །ལུགས་གཉིས་པ་ནི། སྟོན་པ་མྱ་ངན་ལས་འདས་ནས་ལོ་བརྒྱ་དང་སུམ་ཅུ་སོ་བདུན་ན། བདུད་སྡིག་ཅན་བཟང་པོ་ཞེས་བྱ་བས་བསྟན་པ་དཀྲུགས་ནས་སོ་སོར་གྱེས། དེ་ནས་ལོ་དྲུག་ཅུ་རྩ་གསུམ་ནས་གནས་བརྟན་གནས་མའི་བུས་བསྡུ་བ་གསུམ་པ་བྱས་ཞེས་ཟེར་རོ། །གཉིས་པ་ལ་གསུམ་སྟེ། འགྲིབ་པའི་ཚུལ། དར་བའི་ཚུལ། དེའི་རྗེས་སུ་བྱུང་ཚུལ་ལོ། །དང་པོ་ནི། ཐེག་པ་ཆེན་པོའི། ཞེས་སོགས་བདུན་ཏེ། ཐེག་པ་ཆེན་པོའི་བསྟན་པ་མཐའ་དག་ཀུན་དགའ་བོས་བསྡུས་པར། སློབ་དཔོན་སེང་གེ་བཟང་པོས་བཞེད་ཅིང་། རྟོག་གེ་འབར་བར་ཀུན་ཏུ་བཟང་པོ་དང་། འཇམ་དཔལ་དང་། གསང་བའི་བདག་པོ་དང་། བྱམས་པ་ལ་སོགས་པ་རྣམས་རྩ་བའི་སྡུད་པ་པོ་ཡིན་པར་བཞེད་དོ། །འོན་ཀྱང་ཕྱག་ན་རྡོ་རྗེ་ཀུན་ཏུ་བཟང་པོ་ཀུན་དགའ་བོ་རྣམས་ནི་ངོ་བོ་གཅིག་པར་ཐུན་མོང་མ་ཡིན་པའི་གསང་བ་དང་། ཕྱག་རྡོར་དབང་བསྐུར་བར་གསུངས་པས་གང་གིས་བསྡུས་ཀྱང་འགལ་བ་མེད་ལ། ངེས་པའི་དོན་དུ་ན། འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པ་ང་། །ཞེས་པ་ལྟར་འཁོར་དང་སྟོན་པ་ཐ་མི་དད་པ་ཡིན་ཀྱང་གདུལ་བྱའི་ངོར་སོ་སོར་སྣང་བའོ། །དེ་ཡང་ཕ་རོལ་ཏུ་ཕྱིན་པའི་སྡེ་སྣོད་ཕལ་ཆེར་དང་། བྱ་རྒྱུད་འགའ་ཞིག་ཀུན་དགའ་བོས་བསྡུས་ཤིང་། སྤྱོད་རྒྱུད་དང་། རྣལ་འབྱོར་རྒྱུད་འགའ་ཞིག་ཕྱག་ན་རྡོ་རྗེས་བསྡུས་པར་བཤད། བླ་མེད་ཀྱི་རྒྱུད་ཕལ་ཆེར་ནི་རང་རང་གི་ཞུ་བ་པོས་བསྡུས་ཏེ། བསྟན་པ་ཤིན་ཏུ་དར་བར་གྱུར་ནས་ཅུང་ཟད་ཉམས་དམས་པའི་ཚེ། སྟོན་པ་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་འཕགས་པ་ཀླུ་སྒྲུབ་བྱོན་ཏེ། སའི་སྟེང་དུ་སེང་གེའི་སྒྲ་ལན་གསུམ་དུ་བསྒྲགས་ནས་ཤིན་ཏུ་དར་བར་གྱུར་ཏོ། །དེ་ནས་རེ་ཞིག་ན་ཆོས་མངོན་པ་ལ་དགྲ་ལན་གསུམ་དར་ཏེ། སངས་རྒྱས་པའི་གཎྜིའི་སྒྲ་ལ་བརྟགས་པས་མུ་སྟེགས་པ་ལ་གནོད་པར་རིག་ནས། དམག་དཔུང་བསྡུས་ཏེ་གཙུག་ལག་ཁང་མང་དུ་བཤིག་གོ །ཡང་ཡུལ་དབུས་ཀྱི་ཆོས་རྒྱལ་གྱིས་མཐའ་འཁོབ་སྟག་གཟིག་གི་རྒྱལ་པོ་ལ་གོས་སྲུབས་མེད་པ་རི་མོ་ཤིན་ཏུ་བཀྲ་བ་ཞིག་སྐྱེས་སུ་བསྐུར་ནས། སྙིང་གར་རྐང་རྗེས་ལྟ་བུ་བྲིས་པ་འདི་ངན་བྱས་པ་ཡིན་ཞེས་ཟེར་ནས། ཡུལ་དབུས་སུ་དམག་དྲངས་ཏེ་བཅོམ་ནས། གཙུག་ལག་ཁང་དང་། དགེ་འདུན་གྱི་སྡེ་མང་པོ་བརླགས་པར་བྱས་སོ། །ཡང་མུ་སྟེགས་བྱེད་ཀྱི་སྤྲང་པོ་ཞིག་གིས་དགེ་འདུན་གྱི་སྡེ་རྣམས་སུ་ཟས་སློང་བ་ལ་དགེ་ཚུལ་གཞོན་ནུ་རྣམས་ཀྱིས་ཐོ་འཚམས་པས་ཁྲོས་ཏེ། ས་འོག་ཏུ་ཞུགས་ནས་ཉི་མ་བསྒྲུབས་པས་གྲུབ་ནས་བལྟས་པ་ཙམ་གྱིས་ནང་པའི་གཙུག་ལག་ཁང་རྣམས་བསྲེགས་པའི་ཚེ། དམ་ཆོས་མངོན་པ་ལ་སོགས་པའི་སྡེ་སྣོད་ཕལ་ཆེར་བསྲེགས་ཞེས་གྲག་གོ །གཉིས་པ་ནི། དེས་ན་འཕགས་པ་ཞེས་སོགས་གསུམ་སྟེ། སངས་རྒྱས་མྱ་ངན་ལས་འདས་ནས་ལོ་དགུ་བརྒྱ་ལ་ཉེ་བ་ན་ཐོགས་མེད་སྐུ་མཆེད་བྱོན་ཏེ། གཅེན་གྱིས་བྱམས་པ་བསྒྲུབས་པས་གྲུབ་སྟེ། དགའ་ལྡན་དུ་བྱོན་ནས་ཆོས་མངོན་པ་སྟོང་ཕྲག་བརྒྱ་པ་དང་། བྱམས་པའི་ཆོས་ལྔ་ལ་སོགས་པ་གསན་ནས་འཛམ་བུ་གླིང་དུ་བྱོན་ཏེ། ཤིན་ཏུ་དར་བར་མཛད་དོ། །གསུམ་པ་ནི། དེ་ཡི་རྗེས་ལ། ཞེས་སོགས་གསུམ་སྟེ། ཐོགས་མེད་ཀྱིས་དབྱིག་གཉེན་ལ་བཤད། དེས་ཊ་ཀ་ར་ཎ་སྡེ་བརྒྱད་ལ་སོགས་པའི་བསྟན་བཅོས་མང་དུ་མཛད་དེ། ཐེག་པ་ཆེན་པོའི་ཆོས་བཤད་པས་སློབ་མ་ལ་འདུལ་བ་འཛིན་པ་ཡོན་ཏན་འོད། མངོན་པ་འཛིན་པ་ཁ་ཆེ་བློ་བརྟན། རིགས་པ་སྨྲ་བ་ཕྱོགས་ཀྱི་གླང་པོ། ཕ་རོལ་ཏུ་ཕྱིན་པའི་སྡེ་སྣོད་འཛིན་པ་འཕགས་པ་གྲོལ་སྡེ་ལ་སོགས་པ་མང་དུ་བྱོན་ནོ། །གཉིས་པ་ལ་གསུམ་སྟེ། བསྟན་པ་སྔ་དར་གྱི་བྱུང་ཚུལ། ཕྱི་དར་གྱི་བྱུང་ཚུལ། སྐབས་ཀྱི་དགག་བྱའི་ཆོས་ལོག་བྱུང་ཚུལ་ལོ། །དང་པོ་ནི། ཕྱི་ནས་གངས་རིའི་ཞེས་སོགས་ཚིགས་བཅད་གཅིག་སྟེ། དེ་ལ་རྒྱལ་པོའི་ཐོག་མ་གཉའ་ཁྲི་བཙན་པོ་ནི། རྒྱ་གར་གྱི་རྒྱལ་བརྒྱུད་ཞིག་རིམ་གྱིས་བོད་དུ་འཆུགས་པ་ཡིན་ལ། དེ་ནས་གནམ་ལ་ཁྲི་བདུན། ས་ལ་ལེགས་དྲུག བར་གྱི་ལྡེ་བརྒྱད་རྣམས་རིམ་གྱིས་བྱུང་ཞིང་། དེ་ནས་བཙན་ལྔ་བྱུང་བའི་ཐ་མ་ལྷ་ཐོ་ཐོ་རི་གཉན་བཙན་གྱི་རིང་ལ་དམ་པ་ཆོས་ཀྱི་དབུ་བརྙེས། དེ་ནས་རྒྱལ་རབས་ལྔ་ན་སྲོང་བཙན་སྒོམ་པོ་བྱུང་བའི་དུས་སུ། ལྷ་མོ་དྲི་མ་མེད་པའི་འོད་ཀྱིས་ཞུས་པ་ལས། ང་མྱ་ངན་ལས་འདས་ནས་ལོ་ཉིས་སྟོང་དང་ལྔ་བརྒྱ་འདས་པའི་འོག་ཏུ་གདོང་དམར་ཅན་གྱི་ཡུལ་དུ་དམ་པའི་ཆོས་འབྱུང་ངོ་། །ཞེས་ལུང་བསྟན་པ་དང་མཐུན་པར་དམ་པ་ཆོས་ཀྱི་སྲོལ་བཏོད། ར་ས་འཕྲུལ་ནང་གི་གཙུག་ལག་ཁང་བརྩེགས། ལོ་ཙཱ་བ་ཐོན་མི་སཾ་བྷོ་ཊས་དཀོན་མཆོག་སྤྲིན་ལ་སོགས་པའི་ཆོས་མང་དུ་བསྒྱུར་རོ། །དེ་ནས་རྒྱལ་རབས་ལྔ་ན་ཁྲི་སྲོང་ལྡེ་བཙན་གྱིས་སྐུ་རིང་ལ་དམ་པའི་ཆོས་དར་ཞིང་རྒྱས་པར་མཛད་དོ། །བསམ་ཡས་ཀྱི་གཙུག་ལག་ཁང་བརྩིགས། མཁན་པོ་བོ་དྷི་ས་ཏྭ་དང་། སྔགས་འཆང་པདྨ་འབྱུང་གནས་སྤྱན་དྲངས་ནས། རྣམ་དག་ཁྲིམས་ཁང་གླིང་དུ་ཁྲིམས་ཕོག་སྟེ། ལོ་ཙཱ་བ་སད་མི་མི་བདུན་ལ་སོགས་པ་རྣམས་རབ་ཏུ་བྱུང་། དགའ་ལྡན་སེམས་བསྐྱེད་གླིང་དུ་ཐེག་ཆེན་སེམས་བསྐྱེད་ཀྱི་སྡོམ་པ་འབོགས། བདུད་འདུལ་སྔགས་པ་གླིང་དུ་སྔགས་ཀྱི་དབང་བསྐུར་ཏེ། སྡོམ་པ་གསུམ་གྱི་ལག་ལེན་དར་བར་མཛད། གཞན་ཡང་པཎྜི་ཏ་མང་དུ་སྤྱན་དྲངས་ཏེ། བཀའ་དང་བསྟན་བཅོས་ཀྱི་ཆོས་མང་དུ་བསྒྱུར་ཏེ། རྒྱལ་པོ་དེའི་སྲས་མུ་ནེ་བཙན་པོ། དེའི་སྲས་སད་ན་ལེགས་འཇིང་ཡོན། དེ་ལ་སྲས་གཙང་མ། དར་མ། རལ་པ་ཅན་གསུམ་ལས། རལ་པ་ཅན་གྱི་རིང་ལ། འུ་ཤང་རྡོའི་གཙུག་ལག་ཁང་བཞེངས། ཆོས་སྔར་མ་འགྱུར་བ་མང་དུ་བསྒྱུར། བསྟན་པ་དར་རྒྱས་སུ་མཛད། དེ་ནས་གླང་དར་མས་བློན་པོ་ངན་པ་དང་གྲོས་ངན་བཤམས་ཏེ་བཀྲོངས་ནས། དར་མས་རྒྱལ་སྲིད་ལོ་ལྔ་བཟུང་ནས། རབ་བྱུང་ལ་ལ་འབེབས། ལ་ལ་གསོད། དཀོན་མཆོག་གི་མཆོད་པ་རྒྱུན་གཅོད། ལོ་པཎ་གྱི་འགྱུར་གྲྭ་རྣམས་བཤིག མི་དགེ་བའི་ཁྲིམས་བཅའ་བ་ལ་སོགས་པ་བྱས་ཏེ། སངས་རྒྱས་ཀྱི་བསྟན་པ་རྣམས་བཤིག་གོ །དེ་ནས་ལྷ་ལུང་དཔལ་གྱི་རྡོ་རྗེས། གླང་དར་མ་བཀྲོངས་སོ། །དེའི་ཚེ། གཡོ་དགེ་འབྱུང་། གཙང་རབ་གསལ། དམར་ཤཱཀྱ་མུ་ནེ་གསུམ་མདོ་ཁམས་སུ་བྲོས་ཏེ། དེ་གསུམ་གྱི་སྡོམ་ཕྲུག་ལ། བླ་ཆེན་དགོངས་པ་རབ་གསལ་བྱུང་བ་ལ། དུས་ཕྱིས་ཀྱི་མཁས་པ་མི་བཅུས་སྡོམ་པ་བླངས་ཏེ། རབ་བྱུང་གི་སྡེ་བཙུགས་པ་ལ་བསྟན་པ་བར་དར་དུ་སྔོན་གྱི་མཁས་པ་ཁ་ཅིག་བཞེད་ཅིང་། ཕྱིས་ཀྱི་མཁས་པ་ཁ་ཅིག་བསྟན་པ་སྔ་དར་དང་ཕྱི་དར་གཉིས་སུ་བྱས་ནས་དེ་ཕྱི་དར་ཡིན་ཞེས་ཟེར་རོ། །གཉིས་པ་ནི། དེ་ཚེ་བླ་མ་ཞེས་སོགས་ཉེར་གཅིག་སྟེ། དར་མ་ལ་སྲས་ཡུམ་བརྟན་དང་། འོད་སྲུང་གཉིས་ལས། འོད་སྲུང་གི་སྲས། རྗེ་དཔལ་འཁོར་བཙན། དེ་ལ་སྲས་བཀྲ་ཤིས་བརྩེགས་པ་དཔལ་དང་། ཉི་མ་མགོན་གཉིས་ལས། ཕྱི་མ་པུ་ཧྲངས་སུ་བྱོན་ཏེ། སྲས་གསུམ་བྱུང་བའི་ཆེ་ཤོས་དཔལ་ལྡེ་རིག་པ་མགོན་གྱིས་མང་ཡུལ་བཟུང་། བར་པ་བཀྲ་ཤིས་ལྡེ་མགོན་གྱིས། པུ་ཧྲངས་བཟུང་། ཆུང་བ་ལྡེ་ཙུག་མགོན་གྱིས་གུ་གེ་བཟུང་། དེ་ལ་སྲས་གཉིས་བྱུང་བས། ཆེ་ཤོས་ཁོར་རེ་རབ་ཏུ་བྱུང་བའི་མཚན་ཡེ་ཤེས་འོད་དུ་བཏགས། གཅུང་པོ་སྲོང་དེའི་སྲས་ལྷ་ལྡེ། དེའི་སྲས་འོད་ལྡེ། ཞི་བ་འོད། ལྷ་བཙུན་བྱང་ཆུབ་འོད་གསུམ་མོ། །ལྷ་བླ་མ་ཡེ་ཤེས་འོད་ཀྱིས། ལོ་ཙཱ་བ་རིན་ཆེན་བཟང་པོ་ལ་སོགས་པ། ཉི་ཤུ་རྩ་གཅིག་ཁ་ཆེར་བརྫངས་ཏེ། ཕྱིས་ལོ་ཆེན་དང་། ལོ་ཆུང་ལེགས་པའི་ཤེས་རབ་གཉིས་ཀྱིས། བོད་དུ་བྱོན་ནས་བསྟན་པ་དར་རྒྱས་སུ་མཛད། ལོ་ཆེན་གྱིས། ཆོས་དང་། ཆོས་མ་ཡིན་པ་རྣམ་པར་འབྱེད་པའི་བསྟན་བཅོས་མཛད་ནས། ཆོས་ལོག་ཐམས་ཅད་ནུབ་པར་མཛད། དེའི་སློབ་མ་རྒྱལ་པོའི་སྲས་ཞི་བ་འོད་ཀྱིས། སྔགས་ལོག་སུན་འབྱིན་མཛད། འགོས་ལོ་ཙཱ་བས་ཆོས་ལོག་སུན་འབྱིན་མཛད་པ་ནས་བཟུང་སྟེ། དུས་ཕྱིས་ཆོས་རྗེ་ས་སྐྱ་པ་བཞུགས་པ་ཡན་ཆད་དུ་ཆོས་ལོག་སྤྱོད་པ་ཉུང་ཞེས་ཐོས་སོ། །གསུམ་པ་ནི། ཕྱི་ནས་ཕག་མོའི་ཞེས་སོགས་ཚིགས་བཅད་གསུམ་སྟེ། བླ་མ་ས་ཆེན་འདས་པའི་རྗེས་ནས། ཕག་མོའི་བྱིན་རླབས་ཀྱིས་ཆོས་སྒོ་འབྱེད་པ་སོགས། སངས་རྒྱས་ཀྱི་བསྟན་པ་དང་འགལ་བའི་ཆོས་ལོག་དུ་མ་འཕེལ་ཞིང་། དེའི་རྗེས་སུ་བླུན་པོ་རྣམས་འབྲང་བ་ལྟ་སྨོས་ཀྱང་ཅི་དགོས། མཁས་པ་སྦྱངས་པར་རློམ་པ་རྣམས་ཀྱང་འཇུག་པར་བྱེད་དོ། །གསུམ་པ་ལ་བཞི་སྟེ། ཕྱོགས་ཆོས་བསྒྲུབ་པ། ཁྱབ་པ་བསྒྲུབ་པ། རྟགས་འགོད་པ། དོན་བསྡུ་བའོ། །དང་པོ་ནི། འདི་འདྲའི་རིགས་ཅན་ཞེས་སོགས་དགུ་སྟེ། ཆོས་ལོག་དེ་དག་གིས་བསྟན་པ་ལ་གནོད་པར་ལྡོག་པ་དང་། རྗེས་འགྲོ་གཉིས་ཀྱི་སྒོ་ནས་བསྒྲུབ་པའོ། །གཉིས་པ་ནི། གནོད་ཀྱང་སུན་འབྱིན་ནམ་ཞེས་སོགས་ལྔ་སྟེ། བསྟན་པ་ལ་གནོད་ན་སུན་འབྱིན་དགོས་པའི་ཁྱབ་པ་བསྒྲུབ་པའོ། །གསུམ་པ་ནི། བསྟན་ལ་གནོད་པའི་ཞེས་སོགས་གཉིས་ཏེ། ཆོས་ལོག་ཀྱང་ཞེས་པ་ནི་ཆོས་ཅན་ནོ། །བསྟན་ལ་གནོད་པ་ཞེས་པ་ནི་རྟགས་སོ། །ཚིག་རྐང་ཕྱི་མ་ནི་བསྒྲུབ་བྱའི་ཆོས་སོ། །བཞི་པ་ནི། ཅི་སླད་ཞེ་ན། ཞེས་སོགས་ཚིགས་བཅད་གཅིག་གོ །བཞི་པ་ལ་གཉིས་ཏེ། གཏན་གྱི་ཉམས་ལེན་བརྟགས་ནས་བླང་བ། གཏན་གྱི་སྐྱབས་གནས་བརྟགས་ནས་བླང་བའོ། །དང་པོ་ནི། ཉི་མ་གཅིག་གི་ཞེས་སོགས་ཚིགས་བཅད་བཞི་སྟེ། དམ་པའི་ཆོས་ལ་བརྟག་དཔྱད་བྱ་དགོས་པ་དཔེའི་སྒོ་ནས་བསྟན་པའོ། །གཉིས་པ་ནི། ཉིན་གཅིག་གི་ནི། ཞེས་སོགས་བཅུ་གསུམ་སྟེ། ཆོས་སྟོན་པའི་བླ་མ་ལ་བརྟགས་དཔྱད་བྱ་དགོས་པ་དཔེའི་སྒོ་ནས་བསྟན་པའོ། །གཉིས་པ་ཀུན་སློང་ཟང་ཟིང་མེད་པའི་བྱམས་པ་ལ་གསུམ་སྟེ། ཕན་པར་བསམ་པས་ཟང་ཟིང་མེད་པ། བྱ་བ་འོས་པས་ཟང་ཟིང་མེད་པ། གཞན་ལ་བསྐུལ་བས་ཟང་ཟིང་མེད་པའོ། །དང་པོ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། བདག་ནི་སེམས་ཅན། ཞེས་སོགས་ཚིགས་བཅད་གཉིས་ཏེ། དེ་ལྟར་བསྟན་པའི་དགག་སྒྲུབ་བྱེད་པ་ཐམས་ཅད་ཀྱང་། གཞན་ལ་སྡང་སེམས་དང་། རང་ཉིད་ཀྱིས་གྲགས་པ་བསྒྲགས་པའི་ཆེད་དུ་མ་ཡིན་གྱི། ཀུན་སློང་འདི་ལྟ་བུ་ཁོ་ནས་བྱས་སོ་ཞེས་པའོ། །གཉིས་པ་ལ་གསུམ་སྟེ། ཕན་པ་སྡང་སེམས་ཡིན་ན་ཧ་ཅང་ཐལ། བདུད་རིགས་ཕམ་པ་སྡང་སེམས་མིན་པར་བསྟན་པ། ཀུན་སློང་ཟང་ཟིང་མེད་པར་བསྟན་པ་དངོས་སོ། །དང་པོ་ལ་ལྔ་སྟེ། བསྟན་འཛིན་ལ་ཧ་ཅང་ཐལ་བ། སྟོན་པ་ལ་ཧ་ཅང་ཐལ་བ། ལོང་འཁྲིད་ལ་ཧ་ཅང་ཐལ་བ། སྨན་པ་ལ་ཧ་ཅང་ཐལ་བ། དོན་བསྡུ་བའོ། །དང་པོ་ནི། ཀླུ་སྒྲུབ་དང་ནི། ཞེས་སོགས་ལྔ་སྟེ། གཞན་གྱི་ཆོས་ལོག་སུན་ཕྱུང་བ། གཞན་ལ་སྡང་བ་ཡིན་ན། འོག་ནས་འཆད་པ་འདི་དག་ཐམས་ཅད་ཀྱིས་གཞན་ལ་སྡང་བར་འགྱུར་ཞེས་པའོ། །གཉིས་པ་ནི། རྫོགས་པའི་སངས་རྒྱས། ཞེས་སོགས་གསུམ་མོ། །གསུམ་པ་ནི། མཁས་རྣམས་བླུན་པོའི། ཞེས་སོགས་དགུའོ། །བཞི་པ་ནི། ནད་པ་ལ་ནི། ཞེས་སོགས་ལྔའོ། །ལྔ་པ་ནི། ཆོས་ལོག་པ་དང་། ཞེས་སོགས་ལྔའོ། །གཉིས་པ་ནི། སངས་རྒྱས་འཇིག་རྟེན། ཞེས་སོགས་བཅུ་བདུན་ཏེ། མཁས་པ་རྣམས་ཀྱིས་བཤད་པ་བྱས་པས་ཆོས་ལོག་སྤྱོད་པ་དང་། བདུད་རིགས་ཕམ་པ་དེའི་སྐྱོན་མ་ཡིན་ཏེ། སངས་རྒྱས་འཇིག་རྟེན་དུ་བྱོན་པ་དང་། མཁས་པ་རྣམས་ཀྱིས་བཤད་པ་བྱེད་པ། ཆོས་ལོག་སྤྱོད་པ་ཕམ་པ་ལ་སོགས་པའི་འབྲས་བུ་རྣམས་འབྱུང་བ་འདི་རྟེན་འབྲེལ་གྱི་ཆོས་ཉིད་ཡིན་པའི་ཕྱིར་ཏེ། མ་ཁོལ་གྱིས་ཀྱང་བསྟོད་པ་བརྒྱ་ལྔ་བཅུ་པ་ལས་སོགས་སོ། །དེས་ན་འབྲས་བུ་གསུམ་དང་ལྡན་པའི་བཤད་པ་འདི་འདྲས་བསྟན་པ་སོགས་སོ། །གསུམ་པ་ནི། བདག་ཀྱང་རྡོ་རྗེ། ཞེས་སོགས་ཚིགས་བཅད་ལྔ་སྟེ། ས་སྐྱ་པཎྜི་ཏ་བདག་གིས་ཀྱང་། ཕག་མོའི་བྱིན་རླབས་ཙམ་རེ་བྱས་པ་ལ། དཀར་པོ་ཆིག་ཐུབ་བསྟན་པ་སོགས་བྱས་ན་འཁོར་དང་། ཟང་ཟིང་འབྱུང་བར་ཤེས་མོད་ཀྱིས། འོན་ཀྱང་སངས་རྒྱས་ཀྱི་བསྟན་པ་ལ་ཕན་པར་བསམས་ནས། ཆོས་ལོག་སྤྱོད་པ་བཀག་ནས་བསྟན་པ་རྣམ་དག་བཤད་པ་ཡིན་ཏེ། འཁོར་དང་ཟང་ཟིང་བསྒྲུབ་པའི་ཆེད་དུ་སེམས་ཅན་བསྡུས་པ་མ་ཡིན་ཞིང་། སངས་རྒྱས་ཀྱི་བསྟན་པ་ཇི་ལྟ་བ་བཞིན་བསྒྲུབས་ན། སངས་རྒྱས་ཀྱི་བསྟན་པ་ལ་ཕན་པར་བསམས་པའི་ཕྱིར་རོ། །གཉིས་པ་ནི། མུ་སྟེགས་བྱེད་དང་། ཞེས་སོགས་ཚིགས་བཅད་ལྔ་སྟེ། ཚིགས་བཅད་དང་པོས་ནི། འཕགས་ཡུལ་གྱི་འཁྲུལ་པ་རྣམས་འདིར་མི་འགོག་པར་སྟོན། དེ་ནས་གཅིག་གིས། བོད་དུ་སྐབས་སུ་བབ་པའི་འཁྲུལ་པ་རྣམས་འགོག་པར་སྟོན། དེ་ནས་རྐང་པ་ལྔས་སྐབས་སུ་བབ་པ་དེ་ལ་ཡང་བཤད་དུ་མི་རུང་བ་རྣམས་འདིར་མི་འགོག་པར་སྟོན། དེ་ནས་ཚིགས་བཅད་གཅིག་གིས་བཤད་དུ་རུང་བ་རྣམས་འགོག་དགོས་པའི་རྒྱུ་མཚན་སྟོན། དེ་ནས་རྐང་པ་གསུམ་གྱིས་གཞུང་འཚམས་པར་སྟོན་ཏེ། དེ་ལྟར་ན་དགག་པར་འོས་པ་རྣམས་འགོག་ཅིང་། མི་འོས་པ་རྣམས་བཞག་པས་ན་ཀུན་སློང་རྣམ་པར་དག་པའོ། །གསུམ་པ་ནི། གལ་ཏེ་ལུང་དང་། ཞེས་སོགས་བདུན་ཏེ། ལུང་རིགས་ཀྱི་གནད་ཤེས་པའི་རྗེས་འཇུག་གིས་མཁས་པ་རྣམས་ཀྱིས་ཀྱང་དགག་སྒྲུབ་ཚུལ་བཞིན་དུ་གྱིས་ཏེ། རྒྱུ་མཚན་ནི། སངས་རྒྱས་བསྟན་དང་། སོགས་སོ། །གསུམ་པ་བདག་རྐྱེན་ཕྱོགས་ལྷུང་མེད་པའི་ཤེས་རབ་ལ་བཞི་སྟེ། ཐ་སྙད་མང་དུ་ཐོས་པ། མདོ་སྡེ་མང་དུ་ཐོས་པ། རྒྱུད་སྡེ་མང་དུ་ཐོས་པ། མན་ངག་མང་དུ་ཐོས་པའོ། །དང་པོ་ནི། བདག་གིས་སྒྲ་དང་། ཞེས་སོགས་གསུམ་སྟེ། དེ་ལ་སྒྲ་ནི་བརྡ་སྤྲོད་པར་བྱེད་པའི་བསྟན་བཅོས་ཡིན་ལ། དེའི་གཙུག་གི་ནོར་བུ་ལྟ་བུ་ཀ་ལཱ་པ་དང་། ཙཎྜ་པ་དང་། དེ་དག་གི་མིང་གི་སྒྲ་བསྒྲུབ་པ་དང་། སྒྲའི་བྱིངས་བསྒྲུབ་པ་དང་། བྱེད་པའི་ཚིག་སྒྲུབ་པ་ལ་སོགས་པ་སྒྲའི་བསྟན་བཅོས་ཡན་ལག་དང་བཅས་པ་ཐོས་པ་ཡིན་ནོ། །ཚད་མ་ནི་དོན་གྱི་འགལ་འགྲེལ་གཅོད་པའི་བསྟན་བཅོས་ཡིན་ལ། དེའི་གཙུག་གི་ནོར་བུ་ལྟ་བུ་ཚད་མ་ཀུན་ལས་བཏུས་པ་དང་། དེའི་ཚིག་དོན་གཏན་ལ་འབེབས་པ་རབ་ཏུ་བྱེད་པ་སྡེ་བདུན་ཡན་ལག་དང་བཅས་པ་ཐོས་པ་ཡིན་ནོ། །སྡེབ་སྦྱོར་ལ་རྒྱུད་འཕེལ་དང་། སྐྱེད་པ་གཉིས་ལས། དང་པོ་ལ་མཉམ་པ་དང་། ཕྱེད་མཉམ་པ་དང་། མི་མཉམ་པ་དང་གསུམ། ཕྱི་མ་ལ་འཕགས་པ་དང་། རོ་ལངས་དང་། ཕྱི་མོ་མཉམ་པ་གསུམ་སྟེ། དེ་དག་སོ་སོའི་རྣམ་པར་བཞག་པ་དང་བཅས་པ་ཐོས་སོ། །རྒྱན་ལ་སྙན་ངག་གིས་མཚན་ཉིད་སྟོན་པར་བྱེད་པ་དང་། དེ་དང་མི་འགལ་བར་སྟོན་པར་བྱེད་པ་གཉིས་ལས། དང་པོ་ལ་དབྱངས་ཅན་གྱི་མགུལ་རྒྱན་ལ་སོགས་པ་དང་། གཉིས་པ་ལ་སྐྱེས་རབས་ལ་སོགས་པ་རྣམས་ཐོས་སོ། །མིང་གི་མངོན་བརྗོད་ནི་སོ་སོ་ཡང་དག་རིག་པའི་རྒྱུར་འགྱུར་བའི་མིང་གི་རྣམ་གྲངས། དེ་ལ་ཡང་འཆི་མེད་མཛོད་དང་། སྣ་ཚོགས་གསལ་བ་ལ་སོགས་པ་ཐོས་སོ། །གཉིས་པ་ནི། འདུལ་བ་དང་ནི་ཞེས་སོགས་གཉིས་ཏེ། ཁ་ཆེ་པཎ་ཆེན་ལས། འདུལ་བ་ལུང་དང་། སོ་སོ་ཐར་པ་དང་། མདོ་རྩ་དང་། འོད་ལྡན་དང་། མེ་ཏོག་ཕྲེང་རྒྱུད་དང་། མངོན་པ་མཛོད་དང་། ཐེག་བསྡུས། རྣམ་བཤད་རིགས་པ། ཉི་ཤུ་པ། སུམ་ཅུ་པ། ཕུང་པོ་ལྔའི་རབ་བྱེད། མངོན་རྟོགས་རྒྱན་རྩ་འགྲེལ། ཤེར་ཕྱིན་བདུན་བརྒྱ་པ། བརྒྱད་སྟོང་དོན་བསྡུས་རྣམས་གསན་ཅིང་། ཞུ་དོན་ལས། མངོན་རྟོགས་རྒྱན་མ་གཏོགས་པའི་བྱམས་ཆོས་རྩ་འགྲེལ། བསླབ་པ་ཀུན་ལས་བཏུས་པའི་འགྲེལ་བཤད། དབུ་མ་བདེན་གཉིས་ཆེ་བ། དབུ་མ་རྒྱན། རིགས་ཚོགས་རྣམས་གསན་ནོ། །གསུམ་པ་ནི། གསང་སྔགས་རྒྱུད་སྡེ་ཞེས་སོགས་ཚིགས་བཅད་གཅིག་སྟེ། དེ་དག་ཐོས་པའི་ཚུལ་རྣམ་ཐར་དུ་བཤད་ཟིན་ཅིང་། ཐོས་པ་དེ་དག་མིང་རྐྱང་ཙམ་མ་ཡིན་པར། བསམ་བྱུང་གི་རིགས་པས་དཔྱད་པས་དོན་གྱི་གནད་ཇི་ལྟ་བ་བཞིན་རྟོགས་པ་ཡིན་ཏེ། ཆོས་རྗེ་ཉིད་ཀྱི་ཞལ་ནས། སྦྲང་རྩི་འཛིན་པ་སྦྲང་རྩིའི་བརྟུལ་ཞུགས་ཅན། །སྦྲང་བུ་མིན་པས་སྦྲང་རྩིའི་བཅུད་མ་རྙེད། །སྡེ་སྣོད་འཛིན་པ་ཀུན་དགའ་རྒྱལ་མཚན་དཔལ། །བཟང་པོ་མིན་པས་ཤེས་བྱའི་བཅུད་མ་རྙེད། །ཞེས་སོ། །བཞི་པ་ནི། བྱེ་བྲག་སྨྲ་དང་། ཞེས་སོགས་ཚིགས་བཅད་བརྒྱད་དེ། གྲུབ་མཐའ་སྨྲ་བ་བཞིའི་གདམས་ངག་བོད་དུ་འགྱུར་བ་ཕལ་ཆེ་བ་དང་། ཕ་དམ་པའི་ཞི་བྱེད་བརྒྱུད་པ་གསུམ་དང་། ཨ་རོའི་རྫོགས་ཆེན་དང་། ཨ་མ་ལབས་ཀྱི་སྒྲོན་མའི་གཅོད་དང་། མངོན་རྟོགས་རྒྱན་གྱི་སྐབས་བརྒྱད་ཀྱི་དོན་ཅིག་ཅར་དུ་བསྒོམ་པ་ཇོ་བོ་ནས་བརྒྱུད་པ་དང་། ཕ་རོལ་ཏུ་ཕྱིན་པའི་བློ་སྦྱོང་དོན་བདུན་མ་ལ་སོགས་པ་དང་། བཀའ་གདམས་གཞུང་པ་དང་། གདམས་ངག་གི་ལུགས་གཉིས་དང་། ས་ར་ཧའི་དོ་ཧྭ་མཛོད་ཀྱི་གླུ་ལ་སོགས་པ་སྙིང་པོ་སྐོར་དྲུག་དང་། གྲུབ་པ་སྡེ་བདུན་རྣམས་ཀྱང་ཐོས་སོ། །དེ་ལ་སྙིང་པོ་སྐོར་དྲུག་ནི། མཛོད་ཀྱི་གླུ་དང་། ཏོག་རྩེ་བའི་བསམ་མི་ཁྱབ། ལྷན་སྐྱེས་རྡོ་རྗེའི་གནས་པ་བསྡུས་པ་དང་། ཨཱརྻ་དེ་ཝའི་སེམས་ཀྱི་སྒྲིབ་སྦྱོང་དང་། དེ་ཝ་ཙནྡྲའི་ཤེས་རབ་ཡེ་ཤེས་གསལ་བ་དང་། འཕགས་པ་ཀླུ་སྒྲུབ་ཀྱིས་མཛད་པའི་ཕྱག་རྒྱ་བཞི་པ་དང་དྲུག་གོ །གྲུབ་པ་སྡེ་བདུན་ནི། ཨིནྡྲ་བྷཱུ་ཏིས་མཛད་པའི་ཡེ་ཤེས་གྲུབ་པ་དང་། ཡན་ལག་མེད་པའི་རྡོ་རྗེས་མཛད་པའི་ཐབས་ཤེས་གྲུབ་པ་དང་། པདྨ་བཛྲའི་གསང་བ་གྲུབ་པ་དང་། ཌོཾ་བྷི་ཝའི་ལྷན་ཅིག་སྐྱེས་པ་གྲུབ་པ་དང་། དཔལ་ཆེན་མོའི་གཉིས་སུ་མེད་པ་གྲུབ་པ་དང་། ཧ་རི་ཀ་པའི་གསང་བའི་དེ་ཁོ་ན་ཉིད་གྲུབ་པ་དང་། རྣལ་འབྱོར་མ་ཙི་ཏོས་མཛད་པའི་དངོས་པོ་གསལ་བའི་དེ་ཁོ་ན་ཉིད་གྲུབ་པ་དང་བདུན་ནོ། །ཏི་ལོ་པ་དང་། ནག་པོ་སྤྱོད་པའི་རྡོ་རྗེའི་རྟོགས་པ་གླུར་བླངས་པའི་དོ་ཧྭ་དང་། རྣལ་འབྱོར་དབང་ཕྱུག་བིརྺ་པའི་དོ་ཧྭ་སེངྒེ་ཞེས་བྱ་བ་དང་། མཻ་ཏྲི་པ་དང་། ཐ་ག་པ་སོགས་ཀྱི་དོ་ཧྭའི་བྱེ་བྲག་དུ་མ་ཐོས་སོ། །འཁོན་སྟོན་གད་པ་ཀིརྟི་ནས་བརྒྱུད་པའི་རིམ་ལྔ་སྟན་ཐོག་གཅིག་པ་དང་། མར་པའི་སློབ་མ་མེས་སྟོན་ཆེན་པོ་དང་། དྭགས་པོའི་སློབ་མ་རྩང་བཞེར་དང་། རས་ཆུང་བའི་སློབ་མ་བུར་སྒོམ་པ་ལས་ཐོས་པའི་རྨོག་ཅོག་པ་ནས་བརྒྱུད་པའི་ནཱ་རོ་ཆོས་དྲུག་ལུགས་གསུམ་དང་། གསང་བ་འདུས་པ་ཡེ་ཤེས་ཞབས་ལུགས་ཡན་ལག་དང་བཅས་པ་དང་། འཕགས་སྐོར་གྱི་གདམས་ངག་འགོས་དང་། ཁ་ཆེ་པཎ་ཆེན་ནས་བརྒྱུད་པ་རྣམས་དང་། དགེས་པ་རྡོ་རྗེའི་རྒྱུད་གསུམ་ཐིག་ལེའི་སྐོར་དང་བཅས་པ་རྣམས་དང་། གཤིན་རྗེའི་གཤེད་དམར་པོ་དང་། དགྲ་ནག་དང་། གདོང་དྲུག་དང་། འཇིགས་བྱེད་ལ་སོགས་པ་རྣམས་དང་། དེའི་གདམས་ངག་རྣམས་དང་། རྙིང་མ་པའི་གཤིན་རྗེ་ཚེ་བདག་དང་། ཁ་ཐུན་སོགས་ཀྱི་གདམས་ངག་དང་། འཁོར་ལོ་སྡོམ་པའི་གདམས་ངག་གསང་མཐའི་ལུགས་རྣམས་དང་། དུས་ཀྱི་འཁོར་ལོའི་སྦྱོར་དྲུག་ལ་སོགས་པ་སྦྱོར་དྲུག་གི་བྱེ་བྲག་མང་པོ་དང་། མཚན་བརྗོད་ཀྱི་བཤད་པ་སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་འགྲེལ་པ་ཆེ་ཆུང་གཉིས་དང་། སྒེག་པའི་རྡོ་རྗེས་མཛད་པའི་སྔགས་དོན་རྣམ་གཟིགས་དང་། དབུ་མ་ལ་དགའ་བས་བྱས་པའི་ཡེ་ཤེས་ཞབས་ལུགས་སུ་འགྲེལ་པ་དང་། ལམ་འབྲས་ཀྱི་ལུགས་དང་། དུས་འཁོར་གྱི་ལུགས་ཏེ་དྲུག་དང་། བིརྺ་པའི་འཆི་མེད་གྲུབ་པའི་གདམས་ངག་དང་། བརྟག་གཉིས་ལ་བརྟེན་པའི་བིརྺ་པས་ལམ་འབྲས་བུ་དང་བཅས་པས་ལམ་ཡོངས་སུ་རྫོགས་པའི་གདམས་ངག་དང་། མཚོ་སྐྱེས་ཀྱིས་བསྐྱེད་རིམ་ཟབ་པའི་ཚུལ་དགུ་རྫོགས་རིམ་མར་མེའི་རྩེ་མོ་ལྟ་བུའི་གདམས་ངག་དང་། སམྦུ་ཊི་ལ་བརྟེན་ནས་ཏོག་རྩེ་པས་བསམ་མི་ཁྱབ་ཀྱི་གདམས་ངག་དང་། བདུད་རྩི་འོད་ལ་བརྟེན་ནས་ངག་དབང་གྲགས་པས་ཕྱག་རྒྱ་ཆེན་པོ་ཡི་གེ་མེད་པ་དང་། འཁོར་ལོ་བདེ་མཆོག་ལ་བརྟེན་ནས་ནག་པོ་སྤྱོད་པས་གཏུམ་མོ་ལམ་རྫོགས་དང་། ཡོན་པོ་བསྲང་བ་གཉིས་དང་། གསང་བ་འདུས་པ་ལ་བརྟེན་ནས་སློབ་དཔོན་ཀླུ་སྒྲུབ་ཀྱིས་མཆོད་རྟེན་གྱི་དྲུང་དུ་སེམས་ཐག་བཅད་པ་དང་། དབང་ཡོན་ཏན་རིམ་པ་ལ་བརྟེན་ནས་རྒྱལ་པོ་ཨིནྡྲ་བྷཱུ་ཏིས་ཕྱག་རྒྱས་ལམ་ཡོངས་སུ་རྫོགས་པ་དང་། བརྟག་གཉིས་ལ་བརྟེན་ནས་ཌོཾ་བྷི་ཧེ་རུ་ཀས་ལྷན་ཅིག་སྐྱེས་གྲུབ་སྟེ་ལམ་སྐོར་དགུ་དང་། དེ་ལས་འཕྲོས་པའི་ལམ་སྦས་བཤད་དང་། གྲུབ་ཆེན་བཅུ་དང་། ཕྲ་མོ་བརྒྱད་ལ་སོགས་པ་དུ་མ་དང་། གཞན་ཡང་དེང་སང་བོད་ན་གྲགས་པའི་ཁ་རག་སྐོར་གསུམ་ལ་སོགས་པ་དང་། རྒྱ་གར་ན་གྲགས་པའི་འབྲོག་མི་ལོ་ཙཱ་བས་མཁས་པ་སྒོ་དྲུག་ལས་གསན་པའི་གདམས་པ་ལ་སོགས་པ་འབད་དེ་ལེགས་པར་མཉན་ཅིང་། བསླབས་པ་དེ་དག་ཀྱང་མིང་ཙམ་མིན་པར་སོ་སོའི་གནད་ཇི་ལྟ་བ་བཞིན་དུ་རྟོགས་པ་དེའི་ཕྱིར་ན། རྒྱ་བོད་ཀྱི་ཆོས་རྣམས་ཕལ་ཆེར་ཐོས་ཤིང་ཇི་ལྟ་བ་བཞིན་དུ་རྟོགས་པ་ཡིན་ནོ། །དེས་ན་ས་སྐྱ་པཎྜི་ཏ་བདག་ལ། རང་གིས་ཤེས་པ་སྒྲུབ་པར་འདོད་ཅིང་། མི་ཤེས་པ་འགོག་པར་འདོད་པའི་ཕྱོགས་ལྷུང་ཡང་མེད། ཤེས་པ་རྣམས་ལ་ཡང་མ་དག་པ་ནི་རང་གཞན་སུ་ལ་འདུག་ཀྱང་དོར་ཞིང་། དག་པ་ནི་སུ་ལ་འདུག་ཀྱང་བསྒྲུབ་པ་ཡིན་པས། བསྟན་བཅོས་འདིའི་དགག་སྒྲུབ་ལ་ཕྱོགས་ལྷུང་མེད་དོ་ཞེས་དགོངས་སོ། །གཉིས་པ་འབྲས་བུ་བསྟན་བཅོས་གཟུང་བར་གདམས་པ་ནི། དེ་ཕྱིར་གཟུ་བོས་ཞེས་སོགས་གཉིས་ཏེ། ལེགས་པར་ཤེས་ཤིང་གཟུ་བོས་དཔྱད་པའི་ཕྱིར་ན། བློ་ལྡན་རྣམས་ཀྱིས་འདི་ནས་བཤད་པ་ལྟར་ཟུང་ཞེས་པའོ། །གསུམ་པ་གཟུང་བྱའི་ཆོས་ཀྱི་ཆེ་བ་བསྟན་པ་ནི། ཐུབ་པའི་བསྟན་པ་ཞེས་སོགས་ཚིགས་བཅད་གཉིས་ཏེ། དེ་ལྟ་བུའི་བསྟན་བཅོས་འདི་ནི་ཁྱད་པར་གྱི་ཆོས་དྲུག་དང་ལྡན་ཏེ་ཐུབ་པའི་བསྟན་པ་གཞིར་བྱས་པ་དང་། ལོག་ལྟའི་མུན་པ་བསལ་བ་དང་། བློ་གསལ་གྱི་བློ་གྲོས་བསྐྱེད་པ་དང་། ཀུན་སློང་དག་པས་བཤད་པ་དང་། མཁས་པ་ཀུན་གྱི་དགོངས་པ་ཕྱོགས་གཅིག་པ་ཡིན་པ་དང་། བླུན་པོས་རྟོགས་པར་དཀའ་བའོ། །དང་པོ་གསུམ་པོ་ཉི་མའི་དཔེས་སྟོན་པ་ནི་ཚིགས་བཅད་དང་པོས་སྟོན་ནོ། །དེ་ནས་རྐང་པ་གཉིས་ཀྱིས་བཞི་པ་སྟོན་ནོ། །དེ་ནས་གཉིས་ཀྱིས་ལྷག་མ་གཉིས་སྟོན་ནོ། །བཞི་པ་བརྩམས་པའི་དགེ་བ་གཞན་དོན་དུ་བསྔོ་བ་ནི། ཀུན་དགའི་ཉི་མས་ཞེས་སོགས་ཚིགས་བཅད་གཅིག་སྟེ། གཟུགས་ཅན་གྱི་རྒྱན་གྱི་སྒོ་ནས་བསྟན་བཅོས་ཀྱི་བརྗོད་བྱ་གཞན་གྱི་ཕན་བདེའི་རྒྱུར་བསྔོ་བའོ། །ལྔ་པ་བཀའ་དྲིན་རྗེས་སུ་དྲན་པའི་ཕྱག་ནི། གང་གིཾས་ཐུགས་བརྩེས་ཞེས་སོགས་ཚིགས་བཅད་གཅིག་སྟེ། དེ་ལྟར་ལོག་པའི་ཆོས་རྣམས་སྤངས་ནས་སངས་རྒྱས་ཀྱི་བསྟན་པ་རྣམ་པར་དག་པ་དང་ལེགས་པར་སྤྲད་པ་ནི་གང་གིཾས་ཐུགས་བརྩེས་ཉེ་བར་བཟུང་བའི་བཀའ་དྲིན་ཡིན་པས་འཇམ་མགོན་བླ་མ་རྗེ་བཙུན་གྲགས་པ་རྒྱལ་མཚན་དེ་ལ་འདུད་ཅེས་པའོ། །གསུམ་པ་བྱས་ཤེས་དྲིན་གཟོ་བསྐྱེད་པའི་ཆེད་དུ་མཛད་བྱང་སྨྲོས་པ་ནི། སྡོམ་པ་གསུམ་གྱི་རབ་ཏུ་དབྱེ་བ་ཞེས་བྱ་བ་སོགས་སོ། །དེ་ལྟར་ན་རྣམ་བཤད་འདི་ནི་དཀྱུས་ཀྱི་ས་བཅད་པས་བརྗོད་བྱའི་བབས་རྟོགས་པ་དང་། དཀའ་བའི་གནས་བཤད་པས་ཐེ་ཚོམ་གྱི་མདུད་པ་གྲོལ་བ་དང་། ཤེས་བྱེད་ཀྱི་ལུང་དྲངས་པས་དོན་ལ་ངེས་ཤེས་བསྐྱེད་པ་དང་། གཞུང་མཐོང་བས་གོ་བ་རྣམས་མ་བཤད་པས་ཡི་གེ་ཉུང་བ་དང་། དམ་པའི་གསུང་ལ་བརྟེན་པས་ཡིད་ཆེས་པའི་གནས་སུ་གྱུར་པ་སྟེ་ལྔ་པོ་འདིས། རྣམ་བཤད་གཞན་ལས་ཁྱད་པར་དུ་འཕགས་པ་ཡིན་ལ། གཞུང་གི་ཚིག་སྦྱོར་རྣམས་ནི་ཇི་ལྟར་བདེ་བར་བཤད་པའི་སྒོ་ནས་གདུལ་བྱ་ལ་ཕན་གདགས་པར་བྱའོ། །སངས་རྒྱས་ཞལ་གྱི་བདུད་རྩི་རྫོགས་ལྡན་རྒྱུན། །དགྲ་བཅོམ་ཡིད་ཀྱི་ས་གཞིར་ལེགས་བསྡུས་ནས། །འཕགས་ཡུལ་མཁས་གྲུབ་ཀླུ་དབང་བསྟི་བའི་གནས། །གསུང་རབ་ཡན་ལག་བརྒྱད་ལྡན་གངས་ཆེན་མཚོ། །ལོ་པཎ་བློ་ཡི་མ་དྲོས་ལས་འཐོན་ཏེ། །ལུང་རིགས་མན་ངག་དྲི་མེད་གངྒཱའི་རྒྱུན། །གངས་ཅན་སྐྱེ་བོའི་ཡིད་ཀྱི་གདུང་སེལ་ཞིང་། །དགེ་ལེགས་ལོ་ཐོག་སྤེལ་བའི་དཔལ་དུ་འབབ། །དེ་ཚེ་ངན་རྟོག་རླུང་གིས་སྨྲ་ངན་གྱི། །ས་རྡུལ་གཡོས་པས་རྙོག་མར་བྱས་པ་གང་། །ས་སྐྱ་པ་ཞེས་ས་གསུམ་གྲགས་པ་ཡིས། སྒྲུབ་དང་སུམ་འབྱིན་ནོར་བུས་འདངས་པར་མཛད། །སོ་སོ་ཐར་དང་བྱང་སེམས་གསང་སྔགས་ཀྱི། །ཇི་བཞིན་ཉམས་ལེན་སོ་སོའི་གཞུང་ན་གསལ། །འདིར་ནི་ལོག་རྟོག་འགོག་པ་གཙོ་བོ་སྟེ། །བློ་མིག་དག་པས་ཉམས་ལེན་དོན་ཀྱང་མཐོང་། །རིས་བདུན་དུས་དང་བསྙེན་གནས་ཆོ་ག་དང་། །བསྔོ་བའི་གནད་དང་ལས་ཀྱི་འབྲས་བུ་དང་། །བསླབ་བྱའི་གནང་བཀག་ཕྲལ་གྱི་ལག་ལེན་ལ། །འཁྲུལ་བ་འགོག་པ་སོ་ཐར་སྡོམ་པའི་སྐབས། །བྱང་སེམས་ཆོ་ག་དོན་དམ་སེམས་བསྐྱེད་དང་། །བསླབ་བྱའི་གཙོ་བོ་བདག་གཞན་བརྗེ་བའི་སེམས། །དེ་དང་འབྲེལ་བའི་ཐབས་ལམ་སྣ་ཚོགས་ལ། །འཁྲུལ་བ་འགོག་པ་བྱང་སེམས་སྡོམ་པའི་སྐབས། །དབང་དང་དམ་ཚིག་རིམ་གཉིས་ཕྱག་ཆེན་དང་། །ཐེག་གསུམ་ལག་ལེན་རྟོགས་བྱའི་ལྟ་བ་དང་། །རྒྱུད་སྡེའི་སྒྲུབ་པ་སྤྱོད་པ་འབྲས་བུ་ལ། །འཁྲུལ་པ་འགོག་པ་རིག་འཛིན་སྡོམ་པའི་སྐབས། །སོ་སོ་ཐར་པ་ལེགས་གསུང་འདུལ་བ་བཞིན། །བྱང་སེམས་སྡོམ་པ་ཐེག་ཆེན་མདོ་སྡེའི་ལུགས། །གསང་སྔགས་རྒྱུད་སྡེའི་དགོངས་པ་བཞིན་སྟོན་པ། །བསྟན་བཅོས་འདི་ཡི་བརྗོད་བྱར་མཁས་པས་རྟོགས། །དེ་སླད་ཐོས་བསམ་སྒོམ་པས་གསོལ་བཏབ་ན། །དགོས་འདོད་ཀུན་འབྱུང་བསྟན་བཅོས་ཡིད་བཞིན་ནོར། །ལེགས་པར་བཤད་པའི་རྒྱལ་མཚན་རྩེར་མཆོད་ནས། །དོན་གཉེར་བློ་ཡི་རེ་བ་བསྐང་བར་བྱས། །འདི་དོན་འབྱེད་པར་རློམ་པ་མང་ན་ཡང་། །དམ་པའི་གསུང་དང་རྣམ་དཔྱོད་ཉི་འོད་ཀྱིས། །ཚིག་གི་འདབ་མ་ཕྱེ་ནས་ཟབ་དོན་གྱི། །གེ་སར་སྟོན་པ་དེང་སང་ཁོ་བོ་ཙམ། །ཀུན་གཞི་དག་པའི་ངོས་ལ་གསུང་རབ་ཚོན། །ཡོངས་འཛིན་མཁས་པའི་ཕྱག་གི་འདུ་བྱེད་དང་། །རྣམ་དཔྱོད་བརྩོན་པའི་པིར་གྱིས་བྲིས་པ་ལ། །སྣ་ཚོགས་ཤེས་བྱའི་རི་མོ་མི་འཆར་མེད། །དེ་སླད་བཀའ་དྲིན་དྲན་པས་ཡིད་གཡོས་ཏེ། །དམ་ཆོས་འོ་མས་རྣམ་དཔྱོད་ལུས་སྐྱོང་བའི། །ཡོངས་འཛིན་མ་མའི་ཚོགས་ལ་གུས་ཕྱག་འཚལ། །ད་དུང་བྱང་ཆུབ་བར་དུ་བསྐྱོང་དུ་གསོལ། །གསུང་རབ་དགོངས་གསལ་ལེགས་བཤད་འོད་སྟོང་གིས། །བསྟན་བཅོས་ཆེན་པོའི་དེ་ཉིད་གསལ་བྱས་ཏེ། །དགེ་བ་གང་དེས་བདག་གཞན་འགྲོ་བ་ཀུན། །ཐམས་ཅད་མཁྱེན་པའི་ས་ལ་གནས་པར་ཤོག །གོ་འཕང་མཆོག་དེ་མ་ཐོབ་དེ་སྲིད་དུ། །ཀུན་མཁྱེན་བླ་མའི་དྲུང་དུ་བདག་སྐྱེ་ཞིང་། །དགའ་དང་སྤྲོ་བའི་སྤུ་ལོང་ཆེར་གཡོས་ཏེ། །མཁྱེན་བརྩེ་བཟང་པོས་རྟག་ཏུ་སྐྱོང་བར་ཤོག །སྐྱེས་ཆེན་དམ་པའི་ཚོགས་རྣམས་མཉེས་བྱས་ནས། །སྡོམ་གསུམ་བཀའ་དྲིན་ཚོགས་རྣམས་ལེགས་མནོས་ཏེ། །སོ་སོའི་དམ་ཚིག་ཚོགས་རྣམས་མ་ལུས་ལ། །ཉེས་ལྟུང་དྲི་མའི་ཚོགས་རྣམས་དག་གྱུར་ཅིག །གཞན་ལ་གནོད་པའི་བསམ་སྦྱོར་རིང་དུ་སྤངས། །གཞན་ཕན་བྱང་ཆུབ་མཆོག་ཏུ་སེམས་བསྐྱེད་ནས། །དེ་ཡང་ལྷ་དང་བདེ་བའི་ཡེ་ཤེས་སུ། །བྱིན་གྱིས་བརླབས་པའི་ཉམས་ལེན་མཐར་ཕྱིན་ཤོག །གནས་སྐབས་ཀུན་ཏུ་རྗེ་བཙུན་ས་སྐྱ་པའི། །བཤད་སྒྲུབ་ཉི་ཟླའི་སྣང་བ་འཛིན་པ་ཡིས། །རྒྱ་ཆེན་ཤེས་བྱའི་མཁའ་ལ་རབ་བགྲོད་དེ། །ཐུབ་བསྟན་གླིང་བཞི་ཀུན་ཏུ་གསལ་བར་ཤོག །སྡོམ་པ་གསུམ་གྱི་རབ་ཏུ་དབྱེ་བའི་རྣམ་བཤད་རྒྱལ་བའི་གསུང་རབ་ཀྱི་དགོངས་པ་གསལ་བ་ཞེས་བྱ་བ་འདི་ནི་བདེ་བར་གཤེགས་པའི་རིང་ལུགས་པ་མཐའ་དག་གི་གཙུག་གི་ནོར་བུར་གྱུར་པ་འཇམ་དབྱངས་བླ་མ་ཀུན་དགའ་བཟང་པོ་དང་། ལྷར་བཅས་འགྲོ་བའི་འདྲེན་པ་དམ་པ་རྗེ་བཙུན་དཀོན་མཆོག་རྒྱལ་མཚན་དང་། ལུང་རིགས་སྨྲ་བའི་དབང་པོ་ཀུན་མཁྱེན་སངས་རྒྱས་འཕེལ་དང་། མཐའ་ཡས་རྒྱུད་སྡེའི་མངའ་བདག་ཤེས་རབ་བཟང་པོ་ལ་སོགས་པ་མཁས་གྲུབ་དུ་མའི་ཞབས་རྡུལ་སྤྱི་བོས་བླངས་ནས་སྡེ་སྣོད་དང་རྒྱུད་སྡེའི་དོན་ལ་སྦྱངས་ཤིང་། རྗེ་བཙུན་ས་སྐྱ་པ་ཡབ་སྲས་ཀྱི་གསུང་རབ་ལ་འདྲིས་པར་བྱས་ཏེ། བྱེ་བྲག་ཏུ་བསྟན་བཅོས་འདིའི་ཚིག་དོན་ཞིབ་ཏུ་མཉན་ནས། ཟབ་དོན་ལ་བློ་ཁ་ཕྱོགས་པར་གྱུར་པ་དགེ་སློང་བསོད་ནམས་སེང་གེས། ཆུ་མོ་ལུག་གི་ལོ་ནག་པ་ཟླ་བའི་ཚེས་ལ་འབྲས་ཡུལ་རྫོང་དཀར་གྱི་སྐྱེད་མོས་ཚལ་ལེགས་བཤད་སྒྲོགས་པའི་གཙུག་ལག་ཁང་དུ་སྦྱར་བའི་ཡི་གེ་པ་ནི་གཞོན་ནུ་བློ་ལྡན་ནོ། །འདིས་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག། །།འདི་བསྒྲུབས་པ་ལས་བྱུང་བ་ཡི། །དགེ་བའི་རྩ་བ་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་བུ། །བདེ་བ་ཐམས་ཅད་འབྱུང་བའི་གནས། །བརྟེན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།