དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་པའི་ལམ་ཆེན་ལྷ་དགུའི་ནང་གསང་དྲིལ་སྒྲུབ་གསུམ་གྱི་སྟ་གོན།
དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་པའི་ལམ་ཆེན་ལས། ལྷ་དགུའི་ནང་སྒྲུབ་གསང་སྒྲུབ་དྲིལ་སྒྲུབ་གསུམ་གྱི་སྟ་གོན་བཞུགས་སོ། །
ན་མོ་གུ་རུ་ཨཱཪྱ་པ་ལོ་ཡེ། འཇིག་རྟེན་འདྲེན་པ་འཕགས་པ་སྤྱན་རས་གཟིགས། །ལྷ་དགུའི་ལྷ་ལ་ཕྱག་འཚལ་སྐྱབས་གསོལ་ནས། །ནང་སྒྲུབ་གསང་སྒྲུབ་དྲིལ་སྒྲུབ་གསུམ་པོ་ཡི། །སྟ་གོན་རིམ་པ་ལག་ཏུ་བླང་བདེར་བཀོད། །དེ་ལ་རྒྱས་འབྲིང་བསྡུས་དང་གསུམ་ཡིན་ཏེ། །རྒྱས་པར་བར་མའི་གཞུང་ནས་འབྱུང་བ་ལྟར། །ས་སློང་ས་བཟུང་སྟེགས་བུ་ཞ་ལ་དང་། །ལྷ་ཡི་སྟ་གོན་བུམ་པའི་སྟ་གོན་དང་། །ཐིག་ཚོན་བྱིན་རླབས་ཐིག་གདབ་དཀྱིལ་འཁོར་བྲི། །ཐིག་རྩ་
དང་བཅས་གཞུང་ན་གསལ་ལྟར་ཡིན། །དཀྱིལ་འཁོར་དབུས་སུ་པདྨ་འདབ་བརྒྱད་ཏེ། །ལྟེ་བ་དང་ནི་ཕྱོགས་བཞིའི་འདབ་མ་དམར། །བྱང་ཤར་སྔོ་དང་ལྷོ་ནུབ་ལྗང་གུ་བྱ། །ཤར་ལྷོ་ནུབ་བྱང་གཉིས་ནི་སེར་པོའོ། །ལྷ་རྣམས་རང་མདོག་ཐིག་ལེ་ཚོན་སྤུངས་སམ། །ཡང་ན་སོ་སོའི་ཕྱག་མཚན་པདྨ་སོགས། །ཡང་ན་ས་བོན་ཡིག་འབྲུ་རང་མདོག་སྟེ། །ཡབ་ཡུམ་ས་བོན་ཧྲཱིཿཡིག་ཁ་སྤྲོད་བྲི། །གལ་ཏེ་དཀྱིལ་འཁོར་ཐིག་རྩ་མི་ཤེས་ན། །མུ་ཁྱུད་འོད་ལྔའི་ཁ་དོག་ཟླུམ་པོར་
བསྐོར། །དེས་ཀྱང་ཆོག་པ་གསང་བ་སྤྱི་རྒྱུད་གསུངས། །འཁྱམ་གྱི་ཕྱི་རོལ་པདྨའི་རྭ་བའི་རྒྱབ། །དུར་ཁྲོད་བརྒྱད་བྲི་དེ་ཡི་ཕྱི་རོལ་ཏུ། །ནོར་བུ་བཀྲ་ཤིས་ཤིང་ལོ་སྤེལ་མར་བྲི། །དེ་ནི་ཞལ་གཟིགས་ལུགས་ཡིན་མེད་ཀྱང་ཆོག །དེ་རྒྱབ་རྡོ་ར་མེ་ནི་སྤྱི་ལྟར་ལས། །ཟུར་བཞིར་བུམ་པ་མེ་ཏོག་ཁ་རྒྱན་ཅན། །དངོས་སུ་བཤམ་རྒྱུ་མེད་ན་བྲི་སྲོལ་སྣང་། །རྟ་བུམ་ཞེས་བྱ་རྒྱན་གྱི་བུམ་པའོ། །གསུང་རབ་རྣམས་ནས་བྱ་མ་བུམ་ཞེས་བཤད། །འབྱོར་པ་རབ་དང་དབང་བོ་ཐ་མ་ལ། །རྡུལ་ཚོན་དཀྱིལ་འཁོར་འདི་ནི་གསུངས་པ་ཡིན། །རས་བྲིས་དང་ནི་ཚོམ་བུའི་དཀྱིལ་འཁོར་ལ། །ས་སློང་ལྷ་ཡི་སྟ་གོན་སོགས་མི་དགོས། །སྟེགས་ཀྱི་སྟེང་དུ་རས་བྲིས་དཀྱིལ་འཁོར་བཏིང་། །མེད་ན་ཤོག་བུར་བྲིས་བ་ཙམ་གྱིས་རུང་། །འབྱོར་པ་འབྲིང་དང་དབང་པོ་འབྲིང་རྣམས་ལ། །རས་བྲིས་དཀྱིལ་འཁོར་འདི་ནི་རྒྱལ་བས་གསུངས། །དེ་ཡང་མ་འཛོམ་སྟེགས་བུ་གཙང་མའི་
སྟེང་། །འབྲུ་ཡི་པདྨ་འདབ་བརྒྱད་བྲིས་པའི་མཐར། །འབྲུ་ཡི་མུ་ཁྱུད་ཟླུམ་པོར་བསྐོར་བར་བྱ། །དབུས་དང་འདབ་བརྒྱད་ལྷ་གྲངས་ཚོམ་བུ་བཀོད། །སྤྲོ་ན་ཚོམ་བུ་ཚོན་གྱིས་རང་མདོག་བསྒྱུར། །དབང་པོ་རབ་དང་འབྱོར་པ་ཐ་མ་ལ། །ཚོམ་བུའི་དཀྱིལ་འཁོར་འདི་ནི་རྒྱུད་ལས་གསུངས། །དེ་ནས་བུམ་པ་མགུལ་ཆིངས་དམར་པོ་ཅན། །ཆུ་གཙང་སུམ་གཉིས་བཀང་ནས་བུམ་རྫས་བཏབ། །འབྲས་བུ་ཅན་གྱི་ཤིང་གིས་ཁ་བརྒྱན་ནས། །དཀྱིལ་འཁོར་དབུས་སུ་སྣོད་གཙང་འབྲུས་བཀང་བའི། །སྟེང་དུ་བུམ་པ་དེ་ཉིད་བཞག་པའི་སྟེང་། །མཉྫིའམ་ནི་ཤིང་གི་ཁྲེའུའི་སྟེང་། །བནྦྷ་མར་གྱིས་ནང་བྱུགས་ཆང་གིས་བཀང་། །བདུད་རྩི་རིལ་བུ་བཏབ་ཏེ་བཞག་པའི་སྟེང་། །མེ་ལོང་སིནྡྷུ་ར་ཡི་དཀྱིལ་འཁོར་བཞག །མེ་ལོང་མཐོ་སྐོར་ལ་སོགས་ཆེར་ཡོད་ན། །གསལ་ངོས་སྣུམ་བྱུགས་དེ་སྟེང་ལི་ཁྲིའམ། །སིནྡྷུ་ར་བྱུགས་གསེར་གྱི་སྨྱུ་གུས་བྲིས། །མ་རྙེད་སྨྱུ་
གུར་གོས་ཆེན་གསེར་སྐུད་དཀྲི། །གལ་ཏེ་མེ་ལོང་ཆེན་པོ་མ་རྙེད་ན། །སིནྡྷུ་ར་ཡི་ཐིག་ལེ་ལྔ་ཚོམ་བྱ། །ཤོག་བུ་ཟླུམ་པོར་ལི་ཁྲིའམ་སིནྡྷུ་བྱུགས། །མཐའ་རུ་ཟླུམ་སྐོར་དེ་ནང་པད་འདབ་བརྒྱད། །དེ་ནང་ཆོས་འབྱུང་ཟུར་དྲུག་བྲིས་པ་ཡི། །ཟུར་དྲུག་ནང་དུ་དགའ་བ་འཁྱིལ་བ་རེ། །ཟུར་དྲུག་མཚམས་དྲུག་གཡུང་དྲུང་གཡས་འཁྱིལ་དྲུག ཕྱོགས་བཞིའི་འདབ་མར་ཧྲཱིཿཡིག་ཁ་སྤྲོད་རེ། །མཚམས་བཞིར་ཧ་རི་ནི་སའི་ཡིག་འབྲུ་རེ། །དབུས་ཀྱི་ལྟེ་བར་ཧྲཱིཿཡིག་ཁ་སྤྲོད་མཐར། །ཡིག་བཅུ་ནས་བཟུང་ལྷ་དགུའི་སྔགས་རིང་མཐར། །ཧ་རི་ནི་ས་ཧཱུྃ་ཕཊ་སྭཱ་ཧཱ་སྤང་། །ཨཱ་ཝེ་ཤ་ཡ་ཨཱ་ཝེ་ཤ་ཡ་ཨཱཿཨཱཿ ཞེས་པ་བྲི། །དར་དམར་སྟེང་བཞག་དེ་སྟེང་མེ་ལོང་བཞག །དེ་སྟེང་གཟུངས་ཐག་རྡོ་རྗེ་ཡོད་ན་བཞག །དེ་སྟེང་དར་རས་དམར་པོ་ཡོད་ན་བཀབ། །འོག་གི་བུམ་པའི་ཕྱོགས་བཞིར་དབང་གི་རྫས། །ཤར་དུ་རྡོ་རྗེ་ལྷོ་རུ་དབུ་རྒྱན་དང་། །མེད་ན་ཕྲེེང་བ་བཞག་ཀྱང་ཆོག་པ་
ཡིན། །ནུབ་ཏུ་ཟ་མ་ཏོག་སོགས་གླེང་བམ་མམ། །མེད་ན་སྒྲུབ་ཐབས་དཔེའམ་ཤོག་དྲིལ་བཞག །བྱང་དུ་མར་མེ་འམ་ནི་ དྲིལ་བུ 
་སྟེ། །དེ་དག་དངོས་སུ་འཛོམ་པར་མ་གྱུར་ན། །དབང་རྫས་ཡིན་ཕྱིིན་ཙཀ་ལི་བཞག་ཀྱང་ཆོག །ལྷ་གྲངས་མཉམ་པའི་མཆོད་པ་བཤམ་གསུངས་པས། །དེ་རྒྱབ་དཀྱིལ་འཁོར་ཕྱོགས་བཞི་མཚམས་བརྒྱད་དུ། །ཤར་ནས་བཟུང་སྟེ་མཆོད་ཡོན་བདུག་སྤོས་སོགས། །ཡབ་ལ་གཡས་བསྐོར་ཡུམ་ལ་གཡོན་བསྐོར་བཤམ། །རོལ་མོའི་མལ་དུ་ཏིང་ཤག་
དྲིལ་བུ ་སོགས། །མེད་ན་མཚམས་འཛིན་མེ་ཏོག་ནས་བཤམ་མོ། །དེ་རྒྱབ་ཕྱོགས་བཞིར་རིགས་བཞི་ཡབ་ཡུམ་ལ། །མཆོད་པ་ཆ་བརྒྱད་འཕྲེད་དུ་བཤམ་པ་ནི། །ཡབ་རྣམས་གཡོན་ནས་མགོ་བཟུང་གཡས་བསྐོར་ཚུལ། །ཡུམ་རྣམས་གཡས་ནས་མགོ་བཟུང་གཡོན་བསྐོར་ཚུལ། །མཚམས་བཞིར་རིགས་བཞི་མཁའ་འགྲོའི་མཆོད་པ་བཞི། །དབུས་ནས་མགོ་བཟུང་
ཕྱི་རུ་ཕྲེང་བྱས་བཤམ། །དེ་ཙམ་ཏིང་ཆ་མང་པོ་མ་འཛོམ་ན། །མེ་ཏོག་དངོས་སམ་མར་ལ་གཟུགས་བྱས་བཤམ། །བདུག་སྤོས་སྤོས་རེང་ངམ་ནི་སྤོས་ཤིང་བཛུག །དྲི་ཆབ་དུང་ཆོས་སམ་ནི་ལ་ཁྲའི་ནང་། །སྤོས་ཆུ་འམ་ནི་ཇ་རྒོད་ཤུགས་པས་འཐུས། །འཁོར་གྱི་མཆོད་པ་དཀྱིལ་འཁོར་མཐའ་ནས་ཏེ། །གཙོ་བོ་འཁོར་གྱི་མཆོད་པའི་བར་དེ་རུ། །ཕྱོགས་བཞིར་ཕྲིན་ལས་བཞིའི་གཏོར་མ་ནི། །ཤར་དུ་ཟླུམ་པོ་མེ་ཏོག་དཀར་གསུམ་བརྒྱན། །ལྷོ་རུ་གྲུ་བཞི་ནོར་བུ་ཟས་སྣ་སྤུངས། །ནུབ་ཏུ་ཟུར་གཉིས་འབྲི་མོག་ལྕགས་ཀྱུས་བརྒྱན། །བྱང་དུ་ཟུར་གསུམ་མེ་རི་ཤ་ཁྲག་བརྒྱན། །དེ་མིན་སྒྲུབ་པའི་གཏོར་མ་སྨན་རག་སོགས། །གསར་མ་ཡིན་ཕྱིར་ནང་དེར་བཤམ་མི་དགོས། །གཏོར་བསྔོས་བྱེད་ས་ཕུག་གཏོར་ཆ་ཚང་བ། །ལོགས་སུ་གཏོར་སྒམ་སོགས་སུ་ཡོད་ན་ནི། །འདི་རུ་བཤམ་མི་དགོས་ཤིང་མེད་ན་ནི། །དཀོན་མཆོག་ཆོས་སྐྱོང་གཏོར་མ་བཤམ་གསུངས་ཕྱིར། །
ཤར་ལྷོ་བླ་མ་ལྷོ་ནུབ་ཡི་དམ་དང་། །ནུབ་བྱང་མཁའ་འགྲོ་བྱང་ཤར་ཆོས་སྐྱོང་བཤམ། །གཞན་ཡང་རང་གིས་ཆགས་མེད་འདོན་དགོས་པའི། །ཆོས་སྐྱོང་ནོར་ལྷ་བཀའ་སྲུང་ཕྱི་རྒྱུད་པ། །དེ་དག་གཏོར་མའང་བར་མཚམས་རྣམས་སུ་བཤམ། །མདུན་བསྐྱེད་དཀྱིལ་འཁོར་ཕྱི་ཡི་ཁྱམ་དེ་རུ། །གཏོར་མགྲོན་ཐམས་ཅད་བསྒོམ་ནི་དགོས་ཕྱིར་རོ། །དེ་བས་འབྱོར་པ་རྒྱས་པར་ཡོད་ན་ནི། །ཚོན་སྐུད་དྲྭ་བ་རྒྱལ་མཚན་བཞི་དང་ནི། །བླ་བྲེ་ལ་སོགས་སྒྲུབ་ཆེན་རྫས་རྣམས་སྦྱོར། །གསར་མའི་རྔོག་དཀྱིལ་བདུན་ལའང་བཤད་ཕྱིར་རོ། །མེད་ཀྱང་འགལ་བ་ཅུང་ཟད་ཡོད་པ་མིན། །མཆོད་པ་དེ་དག་དམའ་ན་ཁ་གསོ་ཙམ། །དེ་མིན་རྒྱུན་དུ་བརྗེ་སོགས་མི་བྱའོ། །དཀྱིལ་འཁོར་མདུན་དུ་མཆོད་སྟེགས་ལྕོག་རྩེའི་སྟེང་། །མཆོད་ཡོན་བདུག་སྤོས་ལ་སོགས་བརྗེ་རྒྱུ་བཤམ། །དེ་ནི་དུས་བཞིར་ཐུན་བཞིར་བརྗེ་བའམ། །མ་གྲུབ་ན་ཡང་ཁ་གསོ་ངེས་པར་དགོས། །
ནང་མཆོད་ཚོགས་གཏོར་ལ་སོགས་དེ་རུ་བཤམ། །གཏོར་བསྔོས་སྐབས་སུ་ཕུག་གཏོར་གང་ཡོད་པ། །གསོ་བྲན་བྱ་ཞིང་ཚོགས་ཕུད་དེ་རུ་འབུལ། །ལྷ་བཤོས་ལ་སོགས་མཆོད་པ་རྙིང་པ་རྣམས། །སྒྲུབ་པ་མ་ཚར་བར་དུ་ཕྱིར་མི་ཕྱུང་། །སྒྲུབ་པ་ཞག་བདུན་ལས་ནི་མི་བྱེད་ན། །སྔོན་འགྲོ་འབུལ་རྒྱུ་ཅོག་རྡོག་བརྒྱད་དང་ནི། །ལྷ་བཤོས་བརྗེ་རྒྱུ་ཉི་ཤུ་རྩ་དགུ་དང་། །ཚོགས་བརྒྱད་མཐེབ་ཀྱུ་དང་བཅས་འཛོམ་པར་བྱ། །གདན་དྲོད་མ་ཡལ་ངག་མཚམས་དམ་པ་དང་། །ཁ་ཡང་མི་བཤལ་སྐྲ་སེན་མི་བྲེགས་པར། །སྒྲུབ་པ་དར་བྲག་ཡུན་ཐུང་ལམ་དུ་འགྲོ། །སྒྲུབ་རོགས་མང་པོ་ཡོད་ན་སྔགས་རྒྱུན་བྱ། །འདི་ནི་རྙིང་མའི་ལུགས་ཀྱི་སྒྲུབ་ཆེན་དང་། །གསར་མའི་ལུགས་ཀྱི་སྒྲུབ་མཆོད་དོན་གཅིག་སྟེ། །ཚོགས་དང་མར་མེ་མཆོད་པ་བློ་སྟོབས་བསྐྱེད། །གྱེར་དབྱངས་རོལ་མོ་སོགས་ཀྱང་གང་ཤེས་འབད། །ཅི་ཕྱིར་སྤྲོས་བཅས་གཙོ་བོ་ཡིན་ཕྱིར་རོ། །ལྷ་དགུ་སྒྲུབ་པའི་སྟ་
གོན་རིམ་པ་འདི། །མཐར་ཕྱིན་ཐབས་མཁས་གཉིས་ཀྱིས་བསྐུ ལ་བའི་ཕྱིར། །ལུག་ལོ་ས་གའི་ཚེས་བདུན་གྱི་ཐུན་ལ། །རཱ་ག་ཨ་སྱས་ཇི་ལྟར་སྨྲས་པ་བཞིན། བླ་མ་མཐར་ཕྱིན་ཞེས་བྱས་ཡི་གེར་བཀོད། །འགལ་འཁྲུལ་ཉེས་པའི་ཆ་མཆིས་མཐོལ་ཞིང་བཤགས། །དགེ་བས་སྤྲུལ་སྐུའི་དགོངས་པ་རྫོགས་པ་དང་། །བློ་ཆུང་རྣམས་ལ་ཕན་ཐོགས་རྒྱ་ཆེར་ཤོག །སརྦ་མངྒ་ལཾ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།