ལེགས་པར་གྲུབ་པར་བྱེད་པའི་རྒྱུད་ཆེན་པོ་ལས་སྒྲུབ་པའི་ཐབས་རིམ་པར་ཕྱེ་བ།

ལེགས་པར་གྲུབ་པར་བྱེད་པའི་རྒྱུད་ཆེན་པོ་ལས་སྒྲུབ་པའི་ཐབས་རིམ་པར་ཕྱེ་བ་བཞུགས། རྒྱ་གར་སྐད་དུ། སུ་སིདྡྷི་ཀ་ར་མ་ཧཱ་ཏནྟྲ་སཱ་དྷ་ན་པཱ་ཡི་ཀ་པ་ཊ་ལ། བོད་སྐད་དུ། ལེགས་པར་གྲུབ་པར་བྱེད་པའི་རྒྱུད་ཆེན་པོ་ལས་སྒྲུབ་པའི་ཐབས་རིམ་པར་ཕྱེ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །བཅོམ་ལྡན་འདས་འཇམ་པའི་དབྱངས་ཡེ་ཤེས་ཀྱི་སྐུ་ཅན་ལ་ཕྱག་འཚལ་ལོ། །དེ་ནས་རྡོ་རྗེ་འཆང་ལ་ཡང་། །སྟོབས་ཆེན་ཁྲོ་བོ་ཆེན་པོ་ཡིས། །ཞབས་ལ་སྤྱི་བོས་ཕྱག་འཚལ་ཏེ། །ཐལ་མོ་སྦྱར་ནས་འདི་སྐད་ཞུས། །བཅོམ་ལྡན་འདས་ལ་བདག་གིས་ནི། །རིག་པའི་རྒྱལ་པོའི་དཀྱིལ་འཁོར་དང་། །མཐུ་དང་ཕ་རོལ་གནོན་པ་དང་། །འཁོར་གྱི་ཚོགས་འདི་ཐོས་ལགས་ན། །བཅོམ་ལྡན་ཇི་ལྟར་ཟློས་རྣམས་ལ། །གསང་སྔགས་དུ་མར་རྣམ་བརྟགས་པའི། །དངོས་གྲུབ་མང་པོར་ཕྱེ་བ་དག །དེ་དག་མྱུར་དུ་འགྲུབ་པར་འགྱུར། །གསང་སྔགས་མཚན་ཉིད་ཇི་འདྲ་ལགས། །སློབ་དཔོན་མཚན་ཉིད་ཇི་ལྟ་བུ། །སྒྲུབ་པ་པོ་ནི་ཅི་འདྲ་དང་། །དེ་བཞིན་དུ་ནི་སྔགས་གཡོག་གསུངས། །ཡུལ་ནི་ཇི་ལྟ་བུ་དག་བཞེད། །གནས་ནི་གང་དག་ལགས་པ་གསུངས། །གསང་སྔགས་ཟློས་པའི་འདུལ་བ་དང་། །བསྡམ་པ་དག་ཀྱང་ཇི་ལྟ་བུ། །མེ་ཏོག་གང་དག་ཤིས་པ་དང་། །དྲི་ནི་གང་དག་རབ་ཏུ་བསྒྲགས། །གཏོར་མའི་ལས་ཀྱི་ཆོ་ག་གང་། །བདུག་པ་མར་མེ་ཇི་ལྟ་བུ། །ཞི་དང་རྒྱས་དང་དྲག་སྤྱོད་པའི། །ལས་ཀྱི་དབྱེ་བ་ཅི་འདྲ་ལགས། །དངོས་གྲུབ་རབ་དང་འབྲིང་དང་ནི། །ཐ་མ་ཡང་ནི་ཇི་ལྟ་བུ། །སྤྱན་དྲང་པ་ཡི་ཆོ་ག་དང་། །མཆོད་པ་ཡང་ནི་ངེས་པ་དང་། །བསྲུང་བའི་ལས་ལ་སྦྱར་བ་དང་། །བཟླས་བརྗོད་བགྱི་བ་རྒྱ་ཆེར་གསུངས། །ཚིམ་པར་བྱ་དང་དབང་བསྐུར་དང་། །གསང་སྔགས་སྟ་གོན་གནས་པ་དང་། །ཡོངས་སུ་གཟུང་དང་བསྐང་བ་དང་། །གཟི་བྱིན་བསྐྱེད་པ་ཇི་ལྟ་བུ། །སྦྱིན་སྲེག་ལས་ཀྱི་ཆོ་ག་དང་། །སྒྲུབ་པའི་ཡན་ལག་ངེས་པ་དང་། །རྫས་ཀྱི་མཚན་ཉིད་རྒྱས་པ་དང་། །དེ་བཞིན་རྫས་ཀྱང་གཟུང་བ་དང་། །སྦྱང་བར་བགྱི་བའི་ཆོ་ག་དང་། །དེ་བཞིན་ཚད་ནི་ངེས་པ་དང་། །དེ་དག་སྒྲུབ་པའི་ཆོ་ག་རྣམས། །མ་ལུས་པར་ནི་བསྒྲགས་པ་གང་། །བདག་དང་ཟློས་ལ་ཐུགས་བརྩེའི་ཕྱིར། །དེ་ཀུན་བཅོམ་ལྡན་འདས་ཀྱིས་གསུངས། །དངོས་གྲུབ་རྫས་ཀྱི་སྲུང་བ་དང་། །ཇི་ལྟ་བུར་ཡང་བསྒོ་བ་དང་། །སྤྱད་པར་བགྱི་བའི་ཆོ་ག་ཡི། །ངེས་པ་གཙོ་བོས་བདག་ལ་གསུངས། །ཕྲོགས་པ་སླར་ཡང་དགུག་པ་དང་། །བསྲུང་ཞིང་ཕྱིར་ཡང་བཟློག་པ་དང་། །བགེགས་རྣམས་ཀྱི་ནི་སྔ་ལྟས་དང་། །རྒྱ་ཆེར་བདག་ལ་བཀའ་སྩོལ་ཅིག །དངོས་གྲུབ་ལས་ལ་དབང་བསྐུར་དང་། །དཀྱིལ་འཁོར་གང་དག་བསྒྲུབ་པ་དང་། །གཞན་ཡང་གསང་ཆེན་མ་ལུས་པ། །དེ་དག་རྒྱ་ཆེར་བཀའ་སྩོལ་ཅིག །བྱ་བའི་ཆོ་ག་འདིར་འཚལ་བའི། །ཕྱག་རྒྱ་གང་ལགས་གསང་སྔགས་དང་། །དངོས་གྲུབ་སྒྲུབ་པའི་མཚན་མ་དང་། །ཟློས་པའི་རྨི་ལམ་གང་ལགས་པ། །སེམས་ཅན་ཀུན་ལ་ཐུགས་བརྩེའི་ཕྱིར། །དེ་དག་མྱུར་དུ་བདག་ལ་གསུངས། །དེ་ནས་དཔལ་ལྡན་རྡོ་རྗེ་འཆང་། །རིག་སྔགས་འཆང་ཀུན་གྱིས་བསྟོད་པ། །བརྩོན་ཆེན་ཁྲོ་བོ་ཆེན་པོ་ལ། །གཟི་ཆེན་གྱིས་ནི་བཀའ་སྩལ་པ། །གང་ཕྱིར་ང་ལ་འདི་དྲིས་པ། །ཁྲོ་བོ་ཆེན་པོ་ལེགས་སོ་ལེགས། །དེ་ཕྱིར་རྩེ་གཅིག་ཡིད་ཀྱིས་ནི། །བཟང་པོ་ཆོ་ག་མཆོག་ཀུན་ཉོན། །རིག་པའི་རྒྱལ་པོ་བརྩོན་འགྲུས་ཆེ། །དྲག་ལ་ཅིས་ཀྱང་མི་རྫི་བ། །ལེགས་པར་གྲུབ་བྱེད་ཅེས་བྱ་བ། །གསང་སྔགས་ལས་ནི་ཐམས་ཅད་པ། །སྔགས་རྒྱུད་འདི་ནི་མ་ལུས་པ། །སྒྲུབ་ཅིང་དེ་བཞིན་སྟོན་པར་བྱེད། །འདི་དང་ལྡན་པར་གསང་སྔགས་རྣམས། །བསྙེན་ན་མྱུར་དུ་འགྲུབ་པར་འགྱུར། །འདི་ནི་རིགས་རྣམས་ཐམས་ཅད་ཀྱི། །རིག་པའི་རྒྱལ་པོ་མཐུ་ཆེན་ཡིན། །བསྲུང་དང་ཕྱིར་བཟློག་ལ་སོགས་དང་། །མཆོད་དང་ཚིམ་པར་བྱ་བ་ཡི། །ལས་ཀུན་ལ་ནི་འདི་སྦྱོར་བྱེད། །འདི་ནི་སྟོན་ཅིང་གཞན་བསྐུལ་འདེབས། །གསང་སྔགས་ཐམས་ཅད་འགྲུབ་པར་བྱེད། །ཡང་ན་དེ་ཡི་སྙིང་པོ་ནི། །ཧཱུྃ་གསུམ་དང་ནི་ལྡན་པ་ཡིས། །རྒྱུད་ལས་གསུངས་པའི་ཆོ་ག་བཞིན། །མཁས་པས་བསྲུང་ལ་སོགས་ལ་སྦྱར། །སྒྲུབ་པ་པོ་ཡིས་དངོས་གྲུབ་ཀྱང་། །རྒྱུད་རྣམས་མཐོང་ནས་ཐོག་མར་ནི། །དངོས་གྲུབ་རབ་འབྲིང་ཐ་མ་ཡི། །གསང་སྔགས་བྱེ་བྲག་རྣམས་ཤེས་བྱ། །གང་ཕྱིར་རིགས་ནི་གསུམ་པོ་ཡང་། །དཀྱིལ་འཁོར་འདིར་ནི་ཀུན་དུ་འདུས། །དེ་བས་དེར་གསུངས་སྔགས་རྣམས་ཀྱི། །ཆོ་ག་ཐམས་ཅད་བཤད་པར་བྱ། །བདེ་བར་གཤེགས་པས་ཞི་བར་བྱ། །རྒྱས་པ་པདྨའི་རིགས་སྐྱེས་ཀྱིས། །རྡོ་རྗེ་རིགས་སྐྱེས་གསང་སྔགས་ཀྱིས། །དྲག་ཤུལ་སྤྱད་པའི་ལས་རྣམས་བྱ། །རོ་སྟོད་ལས་བྱུང་མཆོག་ཡིན་ཏེ། །ལྟེ་བ་མན་ཆད་ཐ་མ་ཡིན། །བར་གྱི་ལུག་ལས་བྱུང་བ་ཡི། །སྔགས་ཀྱི་དངོས་གྲུབ་འབྲིང་བསྟན་ཏོ། །རབ་དང་འབྲིང་དང་ཐ་མ་ཡང་། །རྣམ་པར་རྟོག་པའི་མཐུ་དག་ལས། །དངོས་གྲུབ་རྣམས་ལ་གསུམ་རྣམས་སུ། །གསང་སྔགས་ཆོ་ག་མཁས་པས་བཤད། །མཁས་པས་རིགས་ནི་གསུམ་ཆར་ལའང་། །རབ་ལ་སོགས་པ་བསྟན་པ་དང་། །ཞི་བ་ལ་སོགས་བྱེ་བྲག་གིས། །ལས་ནི་རྣམ་པ་གསུམ་དུ་བྱ། །དེ་ལ་དངོས་གྲུབ་རབ་ལ་ནི། །རིག་སྔགས་བདག་པོ་ཡིན་པར་བཤད། །མཁས་པས་ཤིན་ཏུ་ཐ་མ་ལ། །མངག་གཞུག་ལ་སོགས་ཤེས་པར་བྱ། །ཞི་བ་དང་ནི་རྒྱས་པ་དང་། །གང་ཡང་དྲག་ཤུལ་སྤྱོད་པ་དག །རིགས་གསུམ་ལ་ཡང་དེ་དག་ཀུན། །གསང་སྔགས་དབྱེ་བས་ཤེས་པར་བྱ། །རིག་སྔགས་རྒྱལ་པོས་རྒྱས་པར་བྱ། །ཁྲོ་བོ་རྣམས་ཀྱིས་དྲག་ཤུལ་སྤྱད། །སྤྱན་ལ་སོགས་པས་ཞི་བ་བྱ། །རང་བཞིན་གསུམ་གྱི་ཆོ་ག་ཡིན། །གསང་སྔགས་ཚིག་དང་ཡི་གེ་ཡིས། །མ་སྨོས་པ་ཡང་ཤེས་བྱ་ཞིང་། །ལས་གང་སྐུལ་བར་བྱེད་པའི་སྔགས། །ལས་དེ་སྒྲུབ་པར་ཤེས་པར་བྱ། །ཞི་བས་ཞི་བའི་ལས་རྣམས་བྱ། །མཐུ་དང་ལྡན་པས་གསང་སྔགས་ཀྱི། །དེ་བཞིན་རྒྱས་པའི་ལས་རྣམས་སྤྱད། །དྲག་པོས་དྲག་ཤུལ་སྤྱད་པར་བྱ། །ཁྱད་པར་དུ་ནི་ཞི་བའི་ལས། །རྒྱལ་བས་གསུངས་པས་ཞི་བ་བྱ། །དཔལ་སྡོམ་རྒྱུད་ལས་གསུངས་བ་ཡི། །རྒྱས་པའི་ལས་རྣམས་བྱ་བར་ཤིས། །ཁྲོ་བོ་དྲག་ཤུལ་ཅན་དག་གིས། །དེ་ལ་སོགས་པ་བསྟན་པ་ཡིས། །ལས་ནི་རྣམ་པ་གསུམ་དུ་བསྒྲགས། །གསང་སྔགས་མང་པོ་ཕལ་ཆེར་ནི། །སྐུལ་བའི་ཚིག་དང་ལྡན་པས་ན། །དེ་དང་དེ་ཡི་ལས་རྣམས་ནི། །དེ་དག་ཉིད་ཀྱིས་རབ་ཏུ་བྱ། །རིག་སྔགས་རྒྱལ་པོ་བཅོམ་ལྡན་འདས། །ལེགས་པར་གྲུབ་བྱེད་ཅེས་བྱ་བ། །དེ་ནི་དཔལ་ལྡན་ཆེན་མོ་སྟེ། །ཁྱད་པར་དུ་ནི་ལས་ཀུན་བྱེད། །རིག་སྔགས་འཆང་ཀུན་གྱིས་མཆོད་པ། །དཔལ་ལྡན་རྡོ་རྗེ་འཆང་དེ་ནི། །རིག་སྔགས་རྒྱུད་རྣམས་ཐམས་ཅད་དང་། །སྟོན་ཅིང་དེ་བཞིན་སྒྲུབ་པར་བྱེད། །དེ་ཡི་ཕོ་ཉ་ཆེ་ཆུང་དང་། །ཁྲོ་བོ་གསང་སྔགས་ཕྱག་བརྙན་བཅས། །འཁོར་ནི་རྣམ་པ་སྣ་ཚོགས་ཀྱང་། །ཕ་རོལ་གནོན་པ་སྨད་དུ་གྲགས། །ལྷ་ཡི་ཡང་ནི་ལྷ་འདི་ཡི། །གསང་སྔགས་མང་པོ་གང་གསུངས་པ། །གཟི་བརྗིད་ཆེ་ཞིང་ཁྱད་པར་འཕགས། །དེ་ཀུན་ལས་རྣམས་ཐམས་ཅད་བྱེད། །རྒྱལ་དང་པདྨའི་རིགས་འདིར་ཡང་། །འདི་ཉིད་རྒྱལ་པོར་བསྐོས་པའི་ཕྱིར། །དམ་པ་ཡིན་པར་ཤེས་བྱ་སྟེ། །འདི་དང་མཚུངས་པ་གཞན་མེད་དོ། །གསང་སྔགས་ཡི་གེ་ཉུང་ངུ་དང་། །གང་དག་སྭཱ་ཧཱ་ཨོྂ་ལྡན་པའང་། །ཞི་བའི་ལས་རྣམས་ཐམས་ཅད་ནི། །དེ་ཡིས་དེ་དག་མྱུར་དུ་བྱེད། །ཧཱུྃ་དང་བཅས་ཤིང་ཕཊ་དང་བཅས། །གང་དག་ར་དང་དཀར་ཆགས་མང་། །གསང་སྔགས་དེ་དག་དྲག་སྤྱོད་ལ། །མཁས་པས་ཀུན་དུ་སྦྱར་བར་བྱ། །མཁས་པས་དེ་ལས་གཞན་པའི་སྔགས། །དོན་དང་ཚིག་ནི་ཞིར་ལྡན་པས། །རྒྱས་པའི་ལས་ནི་ཐམས་ཅད་ལ། །ལེགས་པར་རབ་ཏུ་སྦྱར་བར་བྱ། །གདོན་སོགས་དབབ་པའི་ལས་ལ་ནི། །མཁས་པས་ཕོ་ཉ་སོགས་པས་བྱ། །གསང་སྔགས་དག་དེའི་ལས་བྱེད། །དེ་དག་དེ་དང་དེར་སྦྱར་རོ། །ལས་ཀུན་བྱེད་པའི་གསང་སྔགས་ཀྱི། །ཆོ་ག་ཞིབ་མོ་རྒྱས་གསུངས་པར། །ཐོག་མར་ལས་ནི་གང་སྨོས་པ། །དེ་ནི་གཙོ་བོ་ཡིན་པར་བསྟན། །གླེང་གཞི་དབང་དུ་མཛད་ནས་ནི། །གསང་སྔགས་གང་དག་གསུངས་གྱུར་པས། །དེ་ཉིད་དེ་ལ་གཙོ་བོར་བསྟན། །ལྷག་མ་གཞན་དུ་ཤེས་པར་བྱ། །རིགས་དང་རང་བཞིན་མཐུ་རྣམས་དང་། །ལས་ཀྱང་རྣམ་པར་སྤྱད་ནས་ནི། །རང་གི་ཡིད་དང་མཐུན་པ་ཡི། །གསང་སྔགས་ལ་ནི་བསྙེན་པ་བརྩམ། །གསང་སྔགས་ཀྱི་མཚན་ཉིད་རིམ་པར་ཕྱེ་བའོ། །དེ་ནས་གཞན་ཡང་གཞུང་དག་ལས། །ཆོ་གའི་རྩ་བར་འདོད་པ་ཡི། །སློབ་དཔོན་གྱི་ནི་མཚན་ཉིད་དག །ཇི་སྐད་བསྟན་པ་དེ་བཤད་དོ། །ཡན་ལག་ཐམས་ཅད་མཚན་དང་ལྡན། །དཔལ་ལྡན་གཙུག་ལག་རྣམས་ལ་མཁས། །ཆོས་ལ་གཅིག་ཏུ་དགའ་བ་དང་། །རང་གི་བསླབ་པ་ལ་ཡང་གནས། །དེས་ལ་འགྲོགས་ན་བདེ་བ་དང་། །སྙིང་རྗེའི་བདག་ཉིད་བརྩེ་བ་ཅན། །ཆོ་རིགས་བཙུན་ཞིང་ང་རྒྱལ་མེད། །བློ་ལྡན་སྨྲ་མཁས་བཟོད་པ་ཆེ། །ཐེག་ཆེན་དོན་ལ་ཞུགས་པ་དང་། །ཟབ་མོའི་དོན་ལ་ལྷག་པར་མོས། །ཁ་ན་མ་ཐོ་ཆུང་ལའང་། །འཇིགས་པར་ལྟ་ཞིང་ལེགས་བསྡམས་པ། །གཟུངས་ལ་སོགས་པའི་མདོ་སྡེ་རྣམས། །ཀློག་པ་ལ་ནི་ལྷག་པར་བརྩོན། །གསང་སྔགས་སྤྱོད་ལ་བརྩོན་པ་དང་། །གཙུག་ལག་མན་ངག་ལེགས་པར་སྟོན། །ལས་རྣམས་འགྲུབ་ཅིང་བཟླས་བརྗོད་ཅན། །དཀྱིལ་འཁོར་རྣམས་ཀྱི་ལས་ལ་མཁས། །སྡུག་ཅིང་ལེགས་པར་འགྱེད་པ་དང་། །ཆེན་པོར་འདོད་ཅིང་འཇུངས་དང་བྲལ། །དཀྱིལ་འཁོར་ཆེན་པོ་དག་ཏུ་ནི། །བླ་མས་ཚུལ་བཞིན་དབང་བསྐུར་ཞིང་། །བླ་མ་ལ་ནི་ལུང་ཐོབ་པ། །དེ་ནི་སློབ་དཔོན་ཡིན་པར་བཤད། །དེ་ཉིད་ཀྱིས་ནི་ཆོ་ག་བཞིན། །དམ་ཚིག་ལ་སོགས་དཀྱིལ་འཁོར་བྲི། །གསང་སྔགས་རྣམས་ཀྱི་ཆོ་ག་གང་། །དེ་ཉིད་ཀྱིས་ནི་བསྟན་པར་འོས། །དེ་ཡིས་བསྟན་པའི་གསང་སྔགས་ཀུན། །ཐེ་ཚོམ་མེད་པར་འགྲུབ་པར་འགྱུར། །གཞན་དུ་ན་ནི་བསྙེན་བྱས་ཀྱང་། །བཟླས་བརྗོད་ཐམས་ཅད་འབྲས་བུ་མེད། །ཇི་ལྟར་དཀོན་མཆོག་གསུམ་དག་དང་། །རྒྱལ་བའི་སྲས་ལ་ལྟ་བ་ལྟར། །ཟློས་པས་བླ་མ་མཐུ་ཆེན་ལ། །དེ་ལྟར་ལྟ་ཞིང་བཀུར་སྟི་བྱ། །དེ་ནི་ཀུན་ལ་གུས་པར་བྱེད། །སྐྱབས་ལ་སོགས་པ་ཡོངས་སུ་འཛིན། །དེ་ནི་དགེ་བའི་ཕྱོགས་རྣམས་དང་། །མངོན་པར་མཐོ་བ་ཀུན་གྱི་རྒྱུ། །སློབ་དཔོན་རྟེན་དང་དངོས་གྲུབ་ནི། །ཁྱད་པར་ཅན་ཡང་མྱུར་དུ་སྐྱེ། །བྱང་ཆུབ་འབྲས་བུའི་བར་དུ་ཡང་། །དེ་ཉིད་རྒྱུ་ཞེས་རབ་ཏུ་གསུངས། །རིམ་གྲོ་ལ་སོགས་བསྙེན་པ་ཡིས། །དེ་ནི་ནམ་ཞིག་མགུ་གྱུར་བ། །དེ་ཚེ་གསང་སྔགས་རིག་སྔགས་རྣམས། །ཐེ་ཚོམ་མེད་པར་འགྲུབ་པར་འགྱུར། །སློབ་དཔོན་གྱི་མཚན་ཉིད་རིམ་པར་ཕྱེ་བའོ།། །།དེ་ནས་གསང་སྔགས་ཟློས་པ་པོ། །བྱ་བའི་ཆོ་ག་ལ་བརྩོན་པ། །ཇི་ལྟ་བུ་ཡིས་མྱུར་འགྲུབ་པའི། །མཚན་ཉིད་གཞན་ཡང་བཤད་པར་བྱ། །གཙང་ཞིང་དུལ་ལ་བརྟན་པར་ལྡན། །མ་འཇུངས་བློ་ལྡན་གཡེར་བག་ཆེ། །སྨྲ་མཁས་མི་འཇིགས་བཤེས་གཉེན་ཅན། །བཟོད་ལྡན་དྲང་ལ་གཡོ་སྒྱུ་མེད། །ནད་མེད་པ་ལ་བདེན་པར་སྨྲ། །བཟོ་ཞིང་བཤོར་ལ་དར་ལ་བབ། །དེ་བཞིན་ཡན་ལག་ཚང་བ་ཡི། །བློ་ལྡན་དེས་ནི་འགྲུབ་པར་ཤིས། །དཀོན་མཆོག་གསུམ་ལ་གང་དད་ཅིང་། །ཐེག་པ་ཆེན་པོ་ལ་ལང་བསྒོམ། །དགེ་བའི་ཕྱོགས་ལ་བརྩོན་འགྲུས་ཅན། །དེ་ལ་རིག་སྔགས་མྱུར་དུ་འགྲུབ། །གང་ཞིག་བྱང་ཆུབ་སེམས་དཔའ་དང་། །གསང་སྔགས་གུས་ཤིང་རིམ་གྲོ་ཆེ། །སེམས་ཅན་ཀུན་ལ་སྙིང་བརྩེ་ཅན། །དེས་ནི་རིག་སྔགས་འབྲས་བུ་ཐོབ། །གཅིག་པུ་དབེན་པར་དགའ་བ་དང་། །བདེན་པར་སྨྲ་ཞིང་གཙང་སྦྲ་ཆེ། །ཞི་ལ་ཡིད་ནི་མི་གཡེང་བ། །རིག་སྔགས་དངོས་གྲུབ་ཐོབ་པར་འགྱུར། །གང་ཞིག་རྡོ་རྗེ་འཆང་བ་ཡི། །མཐུ་ཆེན་ཐོས་སོ་ཅོག་ན་ཡང་། །ཕྱིར་ཞིང་དགའ་བྱེད་དེའི་ལག་ན། །དངོས་གྲུབ་ཐམས་ཅད་མྱུར་བར་གནས། །ཟས་དང་སྟན་དང་མལ་ཆ་ལ། །བྱ་བ་ཉུང་ཞིང་འདོད་ཆེན་ཆུང་། །བརྩོན་ཞིང་ངལ་ནི་མི་ཤེས་པ། །དེས་ནི་ངེས་པར་འགྲུབ་པར་འགྱུར། །ཆོ་ག་རྒྱས་པར་གློག་པ་ན། །གང་ཞིག་ཡིད་ནི་དགར་འགྱུར་བའམ། །ཡང་ན་བ་སྤུ་ལྡང་འགྱུར་བ། །དེ་ནི་རིག་སྔགས་འབྲས་བུའི་སྣོད། །གང་ཞིག་དེ་དང་དེ་བཤད་དེའི། །རང་བཞིན་གྱུར་ཅིང་ཆགས་སྡངས་ལ། །རྨི་ལམ་ན་ཡང་དངོས་གྲུབ་ཐོབ། །དེ་ལ་ཡང་ནི་དངོས་གྲུབ་ཡོད། །རིག་སྔགས་དམ་ཚིག་འཆང་བ་ཡི། །བླ་མ་ལ་ནི་སྟོན་པ་བཞིན། །གང་ཞིག་གུས་སེམས་ཤེས་རབ་ཅན། །དེ་ཡི་ལག་ན་དངོས་གྲུབ་གནས། །བརྩམས་ཏེ་འབྲས་བུ་མེད་གྱུར་ཀྱང་། །གང་ཞིག་རིག་སྔགས་མི་གཏོང་ལ། །ཡིད་ཀྱང་སྐྱོ་བར་མི་འགྱུར་བའི། །བློ་ལྡན་དེས་ནི་དངོས་གྲུབ་ཐོབ། །སྒྲུབ་པ་པོའི་མཚན་ཉིད་རིམ་པར་ཕྱེ་བའོ།། །།དེ་ནས་གཞན་ཡང་སྒྲུབ་པ་པོའི། །བྱ་བའི་ཆོ་ག་དག་ལ་ཡང་། །ཇི་ལྟ་བུ་དག་ཤིས་པ་ཡི། །སྔགས་གཡོག་དག་གི་མཚན་ཉིད་བཤད། །རིགས་བཙུན་ཆོས་སྤྱོད་དད་པ་ཅན། །སེམས་སྟོབས་ཆེ་ལ་རྩོལ་ཡོད་པ། །བདེན་པར་སྨྲ་ཞིང་གུས་པ་ཆེ། །ཡན་ལག་མ་ཉམས་མ་སྨད་པ། །ཧ་ཅང་མི་རིང་མི་སྦོམ་ལ། །སྐེམ་པོ་མ་ཡིན་མིའུ་ཐུང་མིན། །ཧ་ཅང་ཁ་དོག་གཅིག་མིན་པའི། །ནད་མེད་སྔགས་གཡོག་རབ་ཏུ་ཤིས། །སྡུག་བསྔལ་ཐམས་ཅད་བཟོད་ཅིང་བརྟན། །ལས་རྣམས་ཀུན་ལ་རབ་ཏུ་གཟོ། །བཟོད་དང་ལྡན་ཞིང་དཀའ་ཐུབ་ཅན། །རྗེས་སུ་མཐུན་ཞིང་དགའ་བར་སྨྲ། །བློ་ལྡན་དྲང་ཞིང་ང་རྒྱལ་མེད། །ཕན་ཚུན་འགྲན་པ་དག་ཀྱང་སྤངས། །མཁས་ཤིང་བྱང་ལ་བྱམས་པ་ཅན། །དྲན་པར་ལྡན་ཞིང་གཏོང་ཡང་ཕོད། །གསང་སྔགས་རིག་སྔགས་དབྱེ་བ་ཤེས། །གསང་སྔགས་བཟླས་ཤིང་ཤེས་རབ་རྣོ། །བསྲུང་ལ་སོགས་པའི་ལས་རྣམས་ལ། །མཁས་པས་སྔགས་ཀྱི་གཡོག་ཏུ་གཟུང་། །ལེགས་པར་བསྡམས་ཤིང་དམ་ཚིག་ཤེས། །བསྟན་པ་ལ་ནི་དགའ་བ་དང་། །བཟླས་བརྗོད་བྱེད་པའི་བརྡ་ཤེས་པ། །དད་པ་དེ་ནི་གྲོགས་སུ་འདོད། །བསམ་པ་བཟང་ཞིང་མི་སྐྱོ་ལ། །མ་གྲུབ་བར་དུ་མི་གཏོང་ཞིང་། །སེམས་སྟོབས་ཆེ་བའི་གྲོགས་བསྟེན་ན། །ཟློས་པ་པོ་ནི་འགྲུབ་པར་འགྱུར། །ལོངས་སྤྱོད་ཆེན་པོ་དག་ལ་ཡང་། །གང་ཞིག་ཆགས་པ་མེད་པ་དང་། །གུས་ཤིང་ཕན་པར་སྤྲོ་བ་ཅན། །དེ་ནི་གྲོགས་པོར་ཡོངས་སུ་བསྒྲགས། །དངོས་གྲུབ་ཀྱི་ནི་རྫས་དག་གིས། །གཞན་གྱིས་རབ་ཏུ་བྲིད་གྱུར་ཀྱང་། །ཆུ་གང་གིས་ནི་མི་གཏོང་བ། །དེས་ནི་གྲོགས་པོ་ནུས་པར་ཤེས། །གང་ཞིག་གྲུབ་པའི་བར་དུ་ནི། །དགོས་པ་མེད་པར་འགྲུབ་པ་ལ། །བྱམས་པར་ཡང་ནི་བྱེད་འགྱུར་བ། །དེས་ནི་གཡོག་པ་ནུས་པ་ཡིན། །ཡུན་རིང་དུ་ནི་འབྲལ་མེད་དམ། །འཚེ་བ་རྣམ་པ་སྣ་ཚོགས་ཀྱིས། །གང་ཞིག་སྐྱོ་བར་མི་འགྱུར་བ། །དེ་ནི་གཅིག་པུ་གཡོག་ཡིན་ནོ། །སྒྲུབ་པའི་གྲོགས་མཆོག་ཡོན་ཏན་ཡང་། །དེ་ལྟ་བུར་ནི་ཤེས་པར་བྱ། །ཁྱད་པར་དུ་ནི་རྒྱུད་རྣམས་དང་། །དཀྱིལ་འཁོར་དག་ལ་དེ་མཁས་པའོ། །བློ་ལྡན་གང་ཞིག་སྒྲུབ་པ་བས། །ཡོན་ཏན་གང་གིས་ལྷག་གྱུར་བ། །སྒྲུབ་པའི་ལས་ཀྱི་ལྷག་མ་རྣམས། །དེ་ནི་གཅིག་པུས་བྱེད་པར་ནུས། །དབང་བསྐུར་ཆོ་ག་སྦྱིན་སྲེག་དང་། །དྲི་ལ་སོགས་པ་བསད་པ་དང་། །གང་དག་བསྲུང་ལ་སོགས་པའི་ལས། །དེ་དག་བློ་ཅན་དེས་བྱའོ། །དེས་ནི་ཕྱི་ནང་ཐམས་ཅད་ཀྱི། །སྤྱད་པར་བྱ་བ་གཅེས་པ་ཡང་། །རྒྱུད་ལས་གསུངས་པའི་ཆོ་ག་ཡིས། །ལེགས་པར་རྫོགས་པ་ཉིད་དུ་བྱ། །བསྒྲུབ་པའི་ལས་ནི་ནར་མ་ལ། །ཉམས་པར་གྱུར་པ་ཡོད་ན་ཡང་། །དེ་ཡི་བྱ་བ་ལ་དམིགས་ནས། །དེས་ནི་དེ་ལ་འཇུག་པར་འགྱུར། །རྫས་ཀྱི་ལས་རྣམས་གཞན་ལ་ཡང་། །ཅི་ནས་བར་ཆད་མི་འབྱུང་བར། །རང་གི་གཟེངས་བསྟོད་བྱ་བའམ། །རྫས་ལ་བྲམ་ཞིང་ཅི་ནས་ཀྱང་། །ཟློས་པ་གཙང་སྦྲ་ཅན་གྱིས་ནི། །བཟླས་བརྗོད་བཏང་བའི་དུས་ན་ཡང་། །དེ་ཡིས་དེ་ཡི་སྔགས་བཟླས་པ། །རྟག་པར་རབ་ཏུ་བརྩོན་པར་བྱ། །གྲོགས་པོ་ཡིས་ནི་བསྒོམ་པ་ལ། །མི་སྨྲ་བརྟུལ་ཞུགས་མི་སྤྱད་དོ། །དེ་ཡི་བསྡམས་པ་དེ་དག་པས། །དེ་ཕྱིར་རབ་ཏུ་འཇུག་པར་བྱ། །དེ་ཡི་ཁ་ཟས་གང་ཡིན་པ། །དེ་ནི་རྗེས་སུ་སློབ་པས་བཟའ། །སློབ་དཔོན་མཚན་ཉིད་སྒྲུབ་པ་དང་། །སྔགས་གཡོག་རྣམས་ཀྱི་མཚན་ཉིད་ནི། །གང་དག་གསུངས་པ་དེ་དག་ཉིད། །སྒྲུབ་པའི་གྲོགས་མཆོག་ཡོན་ཏན་དེའོ། །སྔགས་གཡོག་གི་མཚན་ཉིད་རིམ་པར་ཕྱེ་བའོ།། །།དེ་ནས་གཞན་ཡང་སྒྲུབ་པ་པོས། །ཡུལ་གང་དག་ཏུ་གནས་ནས་ནི། །དངོས་གྲུབ་མྱུར་དུ་ཐོབ་འགྱུར་བའི། །གནས་ཀྱི་མཚན་ཉིད་བཤད་པར་བྱ། །གང་དུ་བདུད་བཞི་བཏུལ་ནས་ནི། །བཅོམ་ལྡན་མངོན་པར་སངས་རྒྱས་ནས། །རྨད་བྱུང་གོ་འཕང་བརྙེས་འགྱུར་བ། །དངོས་གྲུབ་མང་པོ་ཀུན་གྱི་མཆོག །ཆུ་བོ་ནེ་རཉྫ་ནའི་འགྲམ། །ཡིད་དུ་འོང་ཞིང་འཚེ་མེད་པ། །དེ་ཡི་དངོས་གྲུབ་ཞིང་མཆོག་ཏུ། །བཅོམ་ལྡན་འདས་ནི་ཉིད་ཀྱིས་གསུངས། །དེར་ནི་བདུད་ནི་མང་པོས་ཀྱང་། །གནོད་པར་བྱ་བར་མི་ནུས་ཏེ། །དེ་བས་དེར་ནི་ལས་རྣམས་ཀུན། །སྒྲུབ་པ་པོས་ནི་བརྩིས་ཏེ་བརྩམ། །གང་དུ་ཆོས་རྣམས་བསྟན་པ་དང་། །ཐུབ་བ་ཞི་བར་གཤེགས་པ་དང་། །སེམས་ཅན་སྨིན་པར་བྱ་བའི་ཕྱིར། །གང་དུ་སྐྱེ་བ་བསྟན་པ་ཡི། །གནས་དེར་དངོས་གྲུབ་རྣམ་གསུམ་དུ། །ཡོངས་སུ་བསྒྲགས་པ་གང་ཡིན་དེ། །བརྟན་ཞིང་མྱུར་དུ་བགེགས་རྣམས་ནི། །ཞི་བར་ཡང་ནི་འགྱུར་བ་ཡིན། །སངས་རྒྱས་རྣམས་དང་དེའི་སློབ་མ། །སྐལ་བ་ཆེན་པོ་བཞུགས་བཞུགས་པ། །བསོད་ནམས་ཅན་གྱི་གནས་གང་ཡང་། །དེར་ཡང་འགྲུབ་པར་ཡོངས་སུ་བསྒྲགས། །ཆུ་མིག་སྣ་ཚོགས་དང་ལྡན་ཞིང་། །ལྗོན་ཤིང་རྣམ་པ་མང་པོས་བརྒྱན། །མེ་ཏོག་འབྲས་བུ་མོད་པའི་རི། །དངོས་གྲུབ་ཕྱིར་ནི་ཡོངས་སུ་བསྒྲགས། །དགོན་པ་དག་གི་ཕྱོགས་གང་ན། །མེ་ཏོག་འབྲས་བུ་ཆུ་མང་ཞིང་། །ཡིད་ཀྱང་མངོན་པར་དགའ་འགྱུར་བ། །དེ་དག་ཏུ་ནི་དངོས་གྲུབ་བཤད། །རྩཱ་གནས་གང་ན་རི་དྭགས་ཚོགས། །བཀྲ་ཤིས་དགའ་མགུར་སྤྱོད་པ་དང་། །གདུག་པའི་སྦྲུལ་རྣམས་མེད་པ་ཡི། །གནས་དེ་ཟློས་པ་རྣམས་ལ་ཕན། །གང་ན་ལུས་ཅན་རྣམས་ལ་ནི། །ལྷགས་པ་ལ་སོགས་གནོད་མེད་ལ། །ཤིན་ཏུ་ཡང་ནི་དགའ་འགྱུར་བ། །གནས་དེ་དངོས་གྲུབ་ཕྱིར་བསྟན་ནོ། །ཐེལ་སྡིངས་ཟོམ་དང་རི་རྩེ་དང་། །རི་འོར་གཡའ་ཆུ་སིལ་མ་ཅན། །ཁྱད་པར་དུ་ནི་ལྡན་པའི་རི། །ལྷག་པར་དངོས་གྲུབ་ཕྱིར་བསྟན་ཏོ། །ནེའུ་སེང་ཉམས་དགའ་མང་པོ་དང་། །མེ་ཏོག་མང་ཞིང་ཡམ་སྲེག་ཤིང་། །གནས་གང་དག་ན་ཡོད་པ་ཡི། །གནས་དེ་དངོས་གྲུབ་ཕྱིར་བསྒྲགས་སོ། །རིང་བསྲེལ་ཅན་གྱི་མཆོད་རྟེན་དང་། །རི་བོ་རྣམས་དང་མཚོ་འགྲམ་དང་། །རི་བོ་རྣམ་པ་སྣ་ཚོགས་དང་། །ནགས་ཚལ་རྒྱུན་ལུགས་མེད་པ་དང་། །དུ་བ་ཡོད་པའི་དུར་ཁྲོད་དང་། །འབབ་ཆུ་དག་དང་མཚེའུ་དག་དང་། །ཆུ་ཀླུང་འགྲམ་ན་ཉམས་དགའ་བར། །ཕྱུགས་ལྷས་གསེང་མ་སྔོན་པོ་དང་། །ལྗོན་ཤིང་ཀུན་ནས་ཟླུམ་པ་དང་། །མཚན་གཅིག་ལམ་གྱི་བཞི་མདོ་དང་། །རྫིང་དང་ལུ་མར་བཅས་པ་དག །དངོས་གྲུབ་ཕྱིར་ནི་ཡོངས་སུ་བསྒྲགས། །ཡུལ་ནི་གང་དང་གང་དག་ཏུ། །མི་ཡི་གཙོ་བོས་ཀུན་སྤྱད་པར། །ཁྱད་པར་དུ་ནི་འགྲུབ་གསུངས་ཕྱིར། །དེར་ནི་ངེས་པར་འགྲུབ་པར་འགྱུར། །གང་དང་གང་ན་སངས་རྒྱས་ཀྱི། །བསྟན་པ་རྣམས་ནི་མཆོད་པ་ཡི། །ཡུལ་དེ་དངོས་གྲུབ་ཕྱིར་གསུངས་ཏེ། །གཞན་དག་ཡོན་ཏན་ཆུང་ཞེས་བྱ། །གང་དང་གང་ན་སྐྱེ་བོ་ནི། །དགེ་ཞིང་འཕགས་པ་མང་བ་དག །དེ་དང་དེར་ནི་འགྲུབ་འདོད་པའི། །སྒྲུབ་པ་པོ་དེས་ས་དེར་གནས། །ཇི་ལྟར་དཀྱིལ་འཁོར་དག་གི་གནས། །རིགས་ཀྱི་བྱེ་བྲག་ཡོན་ཏན་ལས། །རྣམ་པར་དབྱེ་བ་རབ་བསྒྲགས་པ། །དེ་བཞིན་དངོས་གྲུབ་དག་ལའང་ཤིས། །དངོས་གྲུབ་སྒྲུབ་པའི་བདག་ཉིད་ནི། །གང་དུ་ཡིད་ནི་དགའ་འགྱུར་བ། །དེ་ཉིད་དུ་ནི་སྦྱང་བ་ཡི། །རིམ་པས་ལས་རྣམས་བརྩམ་པར་བྱ། །གནས་ཀྱི་མཚན་ཉིད་རིམ་པར་ཕྱེ་བའོ།། །།དེ་ནས་གཞན་ཡང་གང་ཞིག་གིས། །གནས་ན་ཟློས་པ་པོ་རྣམས་ཀྱིས། །དངོས་གྲུབ་མྱུར་དུ་ཐོབ་འགྱུར་བའི། །གསང་སྔགས་ཟློས་པའི་འདུལ་པ་བཤད། །སྒྲུབ་བས་གསང་སྔགས་ཐམས་ཅད་དང་། །ལྷ་རྣམས་དག་ནི་ཐམས་ཅད་དང་། །ཟློས་པ་བདག་ཉིད་ཆེན་པོ་ལ། །མཁས་པས་ཞེ་སྡང་མི་བྱའོ། །མཁས་པས་གསང་སྔགས་ཆོ་ག་དང་། །གསང་སྔགས་རང་བཟོ་མི་བྱ་ཞིང་། །རང་བཞིན་ངན་པའི་མི་དག་ལ། །བརྙས་པར་ཡང་ནི་མི་བྱའོ། །བླ་མ་དཀྱིལ་འཁོར་སྟོན་པ་དང་། །སྤྱོད་པ་ངན་པར་གྱུར་ན་ཡང་། །ངག་གམ་ཡང་ན་ཡིད་ཀྱིས་སུ། །ནམ་ཡང་སྨད་པར་མི་བྱའོ། །མཁས་པས་རིག་སྔགས་དག་ལ་ནི། །ཁྲོས་ནས་མནན་དང་བཅིང་བ་དང་། །བཅད་པ་དང་ནི་ཚར་གཅད་དང་། །དྲག་སྤྱོད་དེ་དང་དེ་མི་བྱ། །གཞན་གྱིས་རྗེས་སུ་མ་གནང་བར། །གསང་སྔགས་གཟུང་བར་མི་བྱ་སྟེ། །བསྙེན་བཀུར་མ་བྱས་པ་ལ་ཡང་། །ཆོ་ག་ཤེས་པས་སྔགས་མི་སྦྱིན། །རྒྱུད་ཤེས་མཁས་པས་གསང་སྔགས་དང་། །ཕྱག་རྒྱ་ཆོ་ག་ཞིབ་མོ་དང་། །རྒྱུད་དང་དཀྱིལ་འཁོར་བཤད་པ་དང་། །དཀྱིལ་འཁོར་མ་ཞུགས་ལ་མི་སྦྱིན། །མཚོན་ཆ་འདྲ་བ་ཐམས་ཅད་དང་། །དེ་བཞིན་སེམས་ཅན་འདྲ་བ་དང་། །ཕྱག་རྒྱ་སྣ་ཚོགས་འདྲ་བ་དང་། །བཟའ་བར་མི་བྱ་འགོང་མི་བྱ། །སྒྲུབ་པ་པོ་ནི་བློ་ཅན་གྱིས། །དམན་རྣམས་སྨད་པར་མི་བྱ་སྟེ། །མི་གཙང་བས་ཀྱང་རེག་མི་བྱ། །རྐང་བས་ཀྱང་ནི་མི་འགོང་ངོ་། །ཐེག་པ་ཆེན་པོ་པ་དག་དང་། །ཤེས་རབ་ཅན་གྱིས་བརྩད་མི་བྱ། །བྱང་ཆུབ་སེམས་དཔའ་མཐུ་ཆེན་དག །ཐོས་ནས་སུན་ནི་མི་དབྱུང་ངོ་། །སྔགས་ཀྱི་སྒྲུབ་པ་པོ་དག་དང་། །ལྷན་ཅིག་ནམ་ཡང་འགྲན་མི་བྱ། །ཉེས་པ་ཆུང་ངུ་དག་ལ་ནི། །ཁྲོས་ནས་དྲག་ཤུལ་སྤྱད་མི་བྱ། །ཟློས་པ་ཆོ་ག་ལ་གནས་པ། །གླུ་གར་རྩེད་མོ་མི་བྱ་སྟེ། །མཛེས་པར་བྱ་ཕྱིར་ཕྲེང་བ་དང་། །ཁ་དོག་བཅང་བར་མི་བྱའོ། །འགོང་བ་དང་ནི་མཆོང་བ་དང་། །རྒྱུག་པ་དང་ནི་རྩབ་ཧྲལ་དང་། །ལུས་ལས་བྱུང་བའི་གནས་ངན་ལེན། །ཐམས་ཅད་ཡོངས་སུ་སྤང་བར་བྱ། །བདེན་པའི་ཆོས་ལ་གནས་པ་ཡིས། །ལོག་པར་ལྟུང་དང་འགྱུར་དང་རྩུབ། །དབྱེན་གྱི་ཚིག་ཀྱང་སྤང་བ་དང་། །དོན་མེད་གཏམ་ཡང་མི་བྱའོ། །མུ་སྟེགས་ཅན་དང་གནས་པ་དང་། །རྩོད་པ་དག་ཀྱང་མི་བྱའོ། །གདོལ་བ་ལ་སོགས་རིགས་ངན་དང་། །གསང་སྔགས་ཟློས་པ་སྨྲ་མི་བྱ། །བློ་ཅན་བཟླས་བརྗོད་བྱེད་པ་ན། །སྔགས་གཡོག་གཅིག་པུ་མ་གཏོགས་པར། །གཞན་དང་ལྷན་ཅིག་དགོས་མེད་པར། །འགའ་དང་ཡང་ནི་སྨྲ་མི་བྱ། །འབྲུ་མར་དག་གིས་ལུས་མི་བསྐུ། །ཏིལ་ཡང་བཟའ་བར་མི་བྱའོ། །ལ་ཕུག་སྒོག་པ་ཚྭ་དག་དང་། །ཆང་སྐྱུར་རྣམ་པ་ཐ་དད་དང་། །ཅུང་པེང་དང་ནི་སྲན་རིལ་དང་། །དེ་བཞིན་མ་ཤའི་སྲན་མ་དང་། །ཏིལ་གྱི་ཅུང་བེང་ལ་དུ་དག །དངོས་གྲུབ་འདོད་པས་རྣམ་པར་སྤང་། །ལོག་འདྲེན་དག་གི་ཟས་ཀུན་དང་། །གཏོར་མའི་ཁ་ཟས་ཐམས་ཅད་དང་། །ཀྲི་ས་ར་དང་འོ་ཐུག་དང་། །གསང་སྔགས་ཟློས་པས་རྣམ་པར་སྤང་། །ཤིང་རྟ་ལ་སོགས་བཞོན་པ་དང་། །པདྨ་ལ་སོགས་བརྗི་མི་བྱ། །ཁ་ཟས་ལྷག་མ་བོར་པ་ལ། །རྐང་པས་ཀྱང་ནི་རེག་མི་བྱ། །སྒེག་པའི་ཆོ་ག་ཐམས་ཅད་དང་། །ལྷམ་དང་གདུགས་དག་འཆང་བ་དང་། །ལུས་ཀྱི་བྱ་བྱེད་ཐམས་ཅད་དང་། །གསང་སྔགས་ཟློས་པས་རྣམ་པར་སྤང་། །རྐང་པས་རྐང་བ་ཉེད་པ་དང་། །ལག་པས་ལག་པ་མཉེ་མི་བྱ། །བཤང་གཅི་རག་ནི་ཆུར་མི་དོར། །དེ་དང་ཉེ་བར་དོར་མི་བྱ། །སྙིམ་པ་ཁོ་ནར་མི་བཟའ་སྟེ། །འཁར་བའི་སྣོད་དུ་བཟའ་མི་བྱ། །ལོ་མའི་རྒྱབ་ཏུའང་བཟའ་མི་བྱ། །མཁས་པས་ཆགས་པའི་ཟས་མི་བཟའ། །ཁྲི་རྣམས་དང་ནི་ཁྲིའུ་དག་ལ། །སྒྲུབ་པོ་བློ་ལྡན་མི་གཙང་བ། །གཞན་དང་ཉལ་བར་མི་བྱ་སྟེ། །གན་རྐྱལ་ཁ་སྦུབ་ཏུའང་མིན། །ཡང་དང་ཡང་དུ་མི་བཟའ་སྟེ། །ཧ་ཅང་ཆུང་དང་ཆེར་མི་བཟའ། །མི་བཟའ་བར་ཡང་མི་བྱ་ལ། །གང་དག་དོགས་པའང་མི་བཟའོ། །ངོ་མཚར་རྣམས་ལ་དགའ་མི་བྱ། །ལྟད་མོ་ཀུན་ལ་མི་བལྟ་ཞིང་། །བུད་མེད་ཀུན་ལ་འཇོལ་ཉོག་ལ། །ཞེན་པའི་སེམས་ཀྱིས་ཆགས་མི་བྱ། །སྔགས་ཟློས་ཆོ་ག་ལ་གནས་པས། །ལུས་དང་ངག་དང་ཡིད་ཀྱིས་ཀྱང་། །ཟས་དང་དེ་བཞིན་སྤྱོད་པ་ལ། །མ་བསྡམས་པར་ནི་ཡོང་མི་བྱ། །སྔགས་ཟློས་ཁྱིམ་པ་མཁས་པ་ཡིས། །ཁ་དོག་བསྒྱུར་བའི་གོས་མི་བགོ། །དེ་བཞིན་རྙིངས་དང་དྲི་མ་ཅན། །གོས་གཅིག་པར་ནི་ཡོང་མི་བྱ། །བདག་ལ་སྨད་པར་མི་བྱ་ཞིང་། །རང་ལ་མི་དགར་མི་བྱ་སྟེ། །སྐྱོ་བར་ཡང་ནི་མ་གྱུར་དང་། །ནན་གྱིས་འགོང་བར་མི་བྱའོ། །བཀའ་ལན་སྩལ་བ་མ་གཏོགས་པ། །བདག་གིས་གསང་སྔགས་གཏང་མི་བྱ། །གཏི་མུག་བློས་ནི་མི་སྨད་ཅིང་། །བསྒྲིམ་པ་ལྷོད་པར་མི་བྱའོ། །ཡིད་ནི་གཞན་དུ་མ་གྱུར་དང་། །བསམ་པ་མང་པོ་མ་ཡིན་དང་། །མི་གཙང་ཆགས་པའི་སེམས་མེད་པར། །ཟློས་པ་པོས་ནི་གསང་སྔགས་གདོན། །གདོན་གྱི་ལས་རྣམས་མི་བྱ་ཞིང་། །བསྲུང་དང་སླར་བཟློག་མི་བྱའོ། །རང་གི་སྔགས་སམ་གཞན་གྱིས་ཀྱང་། །ཟློས་པས་དུག་གི་ལས་མི་བྱ། །སྒྲུབ་ལ་དགོས་པ་མ་གཏོགས་པར། །གསང་སྔགས་གཞན་དུ་སྤྱད་མི་བྱ། །འགྲན་པ་དང་ནི་སད་ཕྱིར་ཡང་། །བདག་གིས་གསང་སྔགས་མི་སྦྱར་རོ། །བློ་ལྡན་གྱིས་ནི་དུས་གསུམ་བཟླས། །དུས་གསུམ་དུ་ནི་ཁྲུས་བྱས་ཏེ། །མཚོ་ལ་སོགས་པའི་ཆུ་ལ་ནི། །སྔགས་ཀྱིས་བཏབ་སྟེ་བཀྲུ་བར་བྱ། །ༀ་ཧ་ན་བཛྲི་བཛྲེ་ན་ཧ། །ས་ལ་ལན་གསུམ་བཟླས་པ་ནི། །རོ་སྟོད་བསྐུ་ལ་སོགས་པ་དང་། །ལུས་ཀྱི་བྱ་བ་ཀུན་བྱས་ཏེ། །སྒྲུབ་པ་པོས་ནི་ཁྲུས་བྱའོ། །ཨོྂ་བཛྲ་ཏཱ་ར་ཧཱུྃ། ལས་རྣམས་ཀུན་ལ་བློ་ཅན་གྱིས། །སྔགས་འདི་ཆུ་ལ་བཏབ་པ་ཡིས། །ཐོག་མ་བསལ་བར་བྱས་ནས་སུ། །དེ་ནས་ལས་རྣམས་བརྩམ་པར་བྱ། །ན་མོ་བཛྲཱ་ཡ། ཧཱུྃ་ཧ་ན་དྷུ་ན་མ་ཐ་བི་དྷཱ་ནྶ་ཡ་ཨུཏ་ས་ར་ཡ་ཕཊ། དེ་ནས་མཁས་པས་ཆུ་ལ་ནི། །ལག་པས་དཀྲུག་ཅིང་བཟླས་པར་བྱ། །ཡིད་ལ་གཙང་མར་གྱུར་བར་དུ། །གསང་སྔགས་འདི་ཡང་བརྗོད་པར་བྱ། །ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། མ་ཧཱ་དོཾ་ཥྚོ་ཏྐ་ཊ་བྷཻ་ར་བཱ་ཡ། ཏདྱ་ཐཱ། ཨོྂ་ཨ་མྲྀ་ཏ་ཀུཎྜ་ལི། ཁ་ཁ་ཁཱ་ཧི་ཁཱ་ཧི། ཏིཥྛི་ཏིཥྛི། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣ་བིནཱ་ཡ་ཀྃ། མ་ཧཱ་ག་ཎ་བ་ཏི་ཛཱི་བི་ཏཱནྟ་ཀ་རཱ་ཡ་སྭཱ་ཧཱ། གསང་སྔགས་བཟླས་པའི་ཆུ་དེ་ཡིས། །དེ་ནས་ཁྲུས་ནི་ཅི་དགར་བྱ། །ཁྲུས་བྱེད་ཚེ་ན་སྔགས་འདི་ནི། །ཡིད་ཀྱིས་ཡང་དང་ཡང་དུ་བཟླས། །ཨོྂ་ཨ་མྲྀ་ཏེ་ཧཱུྃ་ཕཊ། ཁྲུས་བྱས་ཟིན་ནས་འདི་ཉིད་ཀྱིས། །ཆུ་ལ་ཕྱིར་ཡང་བཟླས་ནས་ནི། །སྤྱི་བོར་སྙིམ་པ་གསུམ་བླུགས་ཤིང་། །ཁྲུས་ཚེ་སྒྲུབ་པོས་མི་སྨྲ་བྱ། །དེ་ནས་གསང་སྔགས་འདི་ཟློས་ཤིང་། །སྤྱི་གཙུག་དག་ཀྱང་བཅིང་བར་བྱ། །ཨོྂ་སུ་སིདྡྷི་ཀ་རི་སྭཱ་ཧཱ། དེ་ནས་ཉེ་རེག་ཡང་བྱས་ནས། །ལས་ཀུན་བྱེད་པའི་གསང་སྔགས་ཀྱིས། །ནན་ཏན་དུ་ནི་བསྲུང་བྱས་ཏེ། །ཟློས་ཤིང་རང་གི་རིག་སྔགས་བཀྲུ། །ཨོྂ་ཀཱི་ལི་ཀཱི་ལ་བཛྲ་ཧཱུྃ་ཕཊ། ཅི་ཙམ་འདོད་པར་བཟླས་ནས་སུ། །མཁས་པས་ལྷ་ཡི་གནས་སུ་འགྲོ། །དེ་ཡི་བར་དུ་མི་ཁྲོ་ཞིང་། །འདོད་ཆགས་ཅན་དུ་མི་བྱའོ། །ལྷ་ལ་གཞོལ་བའི་ཡིད་ཀྱིས་སུ། །མ་ཡེངས་པར་ཡང་འགྲོ་བར་བྱ། །སྡོམ་པ་དག་ནི་གཟུང་བ་དང་། །ནན་ཏན་དུ་ནི་དམ་ཚིག་བསྲུང་། །བཟླས་བརྗོད་ཆོ་ག་མཁས་པ་ཡིས། །བཟླས་བརྗོད་བྱ་ལ་བརྩོན་པ་དང་། །རྟག་ཏུ་དཀྱིལ་འཁོར་བྱ་བ་དང་། །གླེགས་བམ་དག་ཀྱང་རྟག་ཏུ་བཀླག །མཁས་པས་མཆོད་རྟེན་རྟག་ཏུ་གདབ། །དགེ་བའི་ཕྱོགས་ཀྱང་རྟག་ཏུ་བྱ། །སྒྲུབ་པ་པོ་ནི་བློ་ཅན་གྱིས། །དུས་གསུམ་དུ་ཡང་སྐྱབས་སུ་འགྲོ། །དུས་གསུམ་དུ་ཡང་སྡིག་པ་བཤགས། །དུས་གསུམ་བྱང་ཆུབ་སེམས་ཀྱང་བསྐྱེད། །རྒྱུད་མཐོང་ཆོ་ག་ཤེས་པ་ཡིས། །དུས་གསུམ་དུ་ཡང་སྨོན་ལམ་གདབ། །ཆོ་གར་སྤྱད་པ་དེ་དང་དེ། །ཇི་ལྟར་འདོད་པར་ཅི་ནུས་བྱ། །རྟག་ཏུ་གཏོང་ལ་བརྩོན་པ་དང་། །འཇུངས་བྲལ་སྙིང་རྗེ་ལྡན་པ་དང་། །རྟག་ཏུ་བཟོད་ཅིང་བྱམས་པར་ལྡན། །རྟག་ཏུ་བརྩོན་འགྲུས་ལྡན་པར་བྱ། །རྗེས་སུ་དྲན་པ་དྲུག་རྣམས་ཀྱང་། །བསམ་པ་ངེས་པས་རྟག་ཏུ་བསྒོམ། །རྣམ་པ་སྣ་ཚོགས་ཆོས་མཉན་ནས། །མོས་པ་རྣམ་པར་སྤྱད་པར་བྱ། །གསང་སྔགས་ཆོ་ག་ཞིབ་བཀླག་ཅིང་། །སྔགས་དང་ཕྱག་རྒྱ་རྣམས་ཀྱང་མཆོད། །ཆོ་ག་ལས་ནི་འབྱུང་བ་བཞིན། །བློ་དང་ལྡན་པས་དཀྱིལ་འཁོར་བྲི། །ཡང་དག་ལྟ་བ་ངེས་གྱུར་ཅིང་། །བྱང་ཆུབ་སེམས་ནི་བརྟན་བྱས་ལ། །དགེ་སློང་ལ་སོགས་འཁོར་བཞི་རྣམས། །མཁས་པས་རྟག་ཏུ་གཟུང་བར་བྱ། །དམ་ཚིག་ཕྱག་རྒྱ་བཅིངས་ནས་སུ། །རང་གི་གསང་སྔགས་རྒྱུད་རྣམས་བསྟན། །མཁས་པས་གསང་སྔགས་ལུང་གི་རྣམས། །ཐམས་ཅད་ཡང་དག་རྒྱས་པར་བྱ། །སྒྲུབ་པ་པོས་ནི་ཚེས་བརྒྱད་དང་། །བཅུ་བཞི་དང་ནི་བཅྭ་ལྔ་དང་། །ཆོ་འཕྲུལ་གྱི་ནི་ཟླ་ཕྱེད་ལ། །ཁྱད་པར་དུ་ནི་མཆོད་པར་བྱ། །བཟླས་བརྗོད་སྦྱིན་སྲེག་མཆོད་པ་དང་། །དེ་བཞིན་སྡོམ་པ་གཟུང་བ་དང་། །ཁྱད་པར་དུ་ཡང་བསོད་ནམས་ལ། །གུས་ཤིང་མངོན་པར་བརྩོན་པར་བྱ། །མཁས་པས་སྔགས་ནི་འདི་ཉིད་ཀྱིས། །བརྒྱའམ་ཡང་ན་སྟོང་དག་ཏུ། །མངོན་པར་བསྔགས་པ་བྱས་པ་ཡིས། །ལས་ཀྱི་རྡོ་རྗེ་རྟག་ཏུ་བཅང་། །ཨོྂ་དྷུ་ན་བཛྲ་ཧ། གནམ་ལྕགས་ཕོག་པའི་ཤིང་དག་གམ། །ནིམ་པའམ་དུར་ཁྲོད་མགལ་དུམ་མམ། །ཙནྡན་དག་གམ་གཞན་ཡང་རུང་། །རྡོ་རྗེ་རྩེ་མོ་གསུམ་པ་བྱ། །ལེགས་པར་གྲུབ་བྱེད་ཅེས་བྱ་བ། །དེ་ནི་བློ་ལྡན་ལག་གཡོན་གྱིས། །བཟླས་བརྗོད་སྦྱིན་སྲེག་ལ་སོགས་པའི། །ལས་ལ་དེ་ནི་གཟུང་བར་བྱ། །རྡོ་རྗེ་དེ་ནི་བཅངས་པ་ཡིས། །བགེགས་དང་ལོག་འདྲེན་ཐམས་ཅད་དང་། །གང་དག་གནོད་པ་བྱེད་པ་རྣམས། །ཤིན་ཏུ་སྐྲ་གནས་འབྱར་བར་འགྱུར། །དེ་ཡང་གསང་སྔགས་དེ་ཉིད་ཀྱིས། །མཁས་པས་རྟག་ཏུ་མཆོད་པར་བྱ། །ཙནྡན་མར་པོས་བསྐུས་ནས་ནི། །བཞག་སྟེ་མངོན་པར་སྔགས་ཀྱིས་བཟླས། །ལས་ཀྱི་རྡོ་རྗེ་ཞེས་བྱ་བ། །འདི་ནི་རྨད་ཀྱི་ལས་ཀྱང་བྱེད། །འདི་ནི་སྒྲུབ་པ་པོ་རྣམས་ལ། །གཅིག་ཏུ་གཅེས་སྤྲས་བྱེད་པར་བསྒྲགས། །སྒྲུབ་པ་བཟླས་བརྗོད་བྱེད་པ་ན། །རིག་སྔགས་འདི་ནི་བརྒྱར་བཟླས་པའི། །སྤོས་ཀྱིས་བྱུགས་པའི་གདུ་བུ་དག །རྟག་ཏུ་ལག་ལ་གདགས་པར་བྱ། །ཨོྂ་ཀུ་ལནྡྷ་རཱི་བནྡྷ་བནྡྷ་ཧཱུྃ་ཕཊ། རིག་སྔགས་ཕྱག་རྒྱ་ཆེན་པོ་འདི། །མཱ་མ་ཀཱི་ཞེས་བྱ་བར་གྲགས། །རིག་སྔགས་ཐམས་ཅད་སྒྲུབ་པ་དང་། །དེ་བཞིན་བྱིན་སྐྱེད་སྐྱོང་བར་བྱེད། །འདིས་ནི་བསྲུང་བ་ལ་སོགས་པའི། །ལས་རྣམས་ཐམས་ཅད་བྱར་ཡང་རུང་། །འདི་ནི་རིག་སྔགས་ཐམས་ཅད་དང་། །རྡོ་རྗེ་འཛིན་པའི་ཡུམ་ཡིན་ནོ། །ཕྱག་ན་རྡོ་རྗེའི་རིགས་ལས་ནི། །རུ་དྲཱ་ཀྵ་ཡི་གདུ་བུ་བྱ། །བགྲང་ཕྲེང་ལ་སོགས་དབྱེ་བ་ཡིས། །རིག་སྔགས་གཞན་ལའང་ཤེས་པར་བྱ། །གཙུག་ཏོར་པདྨའི་རིགས་དག་ལ། །རིག་སྔགས་ཆེན་མོ་སྤྱན་དང་ནི། །གོས་དཀར་ཅན་ནི་གང་ཡིན་པ། །དེ་ཡིས་དེ་ཡི་མདུན་དུ་བཟླས། །ཨོྂ་རུ་རུ་སྥུ་རུ་ཛྭ་ལ་ཏིཥྛི་སིདྡྷི་ལོ་ཙ་ནི། །སརྦ་ཨརྠ་སཱ་དྷ་ནི་སྭཱ་ཧཱ། དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ལ་ཕྱག་འཚལ་ལོ། །མཐོང་བ་དང་ནི་ཐོས་པ་དང་། །རེག་པ་དང་ནི་དྲན་པའང་རུང་། །བདག་ནི་སེམས་ཅན་ཐམས་ཅད་ཀྱི། །ནད་རྣམས་ཀུན་གྱི་གསོས་གྱུར་ཅིག །ཏདྱ་ཐཱ། ཀ་ཊེ། བི་ཀ་ཊེ། ནི་ཀ་ཊེ། ཀ་ཊ། བི་ཀ་ཊ། ཀ་ཊྃ། ཀ་ཊེ་བྷ་ག་བ་ཏི་བི་ཛ་ཡེ་སྭཱ་ཧཱ། འདི་དག་ཉིད་ཀྱིས་དེ་ལ་ནི། །བགེགས་ཀྱིས་ཟིལ་གྱིས་ནོན་མི་འགྱུར། །དེ་དག་བརྗོད་པས་མྱུར་དུ་ནི། །དངོས་གྲུབ་ཐོབ་ཅིང་གཙང་བར་འགྱུར། །རིགས་ཀྱི་སྙིང་པོ་འབྲུ་གསུམ་པས། །སོ་སོ་བཟླས་བརྗོད་བྱས་པ་ཡིས། །ཀུ་ཤ་ཡི་ནི་བསང་བྱེད་ཀྱང་། །སྲིན་ལག་ལ་ནི་གདགས་པར་བྱ། །ཛི་ན་ཛི་ཀ་ཨཱ་རོ་ལིཀ །བཛྲ་དྷྲྀ་ཀ །མཆོད་དང་བཟླས་བརྗོད་སྦྱིན་སྲེག་ལ། །དེ་ནི་རྟག་ཏུ་བཅང་བར་བྱ། །སྒྲུབ་པ་པོས་ནི་འབད་པ་ན། །འདིས་ན་ལག་པ་གཙང་བར་འགྱུར། །བུ་མོས་བཀལ་བའི་སྐུད་པ་ནི། །ལེ་བརྒན་རྩིའམ་གུར་གུམ་དུ། །བཙོས་པ་བཟླས་བརྗོད་སྟོང་བྱས་ཏེ། །དེ་ནས་མདུད་པ་བདུན་པོར་ནས། །སོད་ལ་རིག་སྔགས་འདི་ཡིས་ནི། །རང་གི་རྐེད་པར་བཅིང་བར་བྱ། །འདིས་ནི་ཟློས་པ་པོ་དག་གི། །ཁུ་ཆུ་རྟག་ཏུ་བཀག་པར་འགྱུར། །ཨོྂ་ཧ་ར་ཧ་ར་བནྡྷ་ནི་ཤུ་ཀྲ་དྷཱ་ར་ཎཱི་སིདྡྷ་ཨ་རྠ་སྭཱ་ཧཱ། བཟླས་བརྗོད་སྦྱིན་སྲེག་ཆོ་ག་ལ། །རྟག་ཏུ་སྟོད་གཡོགས་བགོ་བར་བྱ། །ཉལ་དང་འཕྲེས་ལ་ཉེས་པ་མེད། །དེ་ཡང་མངོན་པར་བསྔགས་པར་བྱ། །ཕྱི་རོལ་སར་ནི་ཤིང་གི་ལྷམ། །རྟག་ཏུ་ཡང་ནི་མགོ་བར་བྱ། །ལྷ་དང་བླ་མ་མཆོད་གནས་ཀྱི། །གནས་དག་ཏུ་ནི་རྣམ་པར་སྤང་། །གང་དག་རྟག་ཏུ་བརྩོན་པ་ཡིས། །ཟློས་པ་དངོས་གྲུབ་འདོད་པ་དེས། །ལུས་དང་ངག་ཡིད་འཇུག་པ་ཡིས། །རྟག་ཏུ་མཆོད་གནས་མཆོད་པར་བྱ། །མཆོད་རྟེན་མཐོང་ན་ཕྱག་བྱ་ཞིང་། །དགེ་སློང་མཐོང་ནའང་ཕྱག་བྱའོ། །ལྷ་དག་མཐོང་ནའང་རིམ་གྲོ་བྱ། །བླ་མ་མཐོང་ནའང་མཆོད་པར་བྱ། །ཟབ་མོའི་ཆོས་ནི་བཤད་པ་དག །ཐོས་ནས་དད་པ་བསྐྱེད་པར་བྱ། །བྱང་ཆུབ་སེམས་དཔའ་ཁྱུ་མཆོག་གི། །མཐུ་ལ་རབ་ཏུ་དགའ་བར་བྱ། །སྔགས་ཀྱི་ལས་རྣམས་སྣ་ཚོགས་པ། །ཐོས་ནས་ཡིད་ནི་སྤྲོ་བར་བྱ། །སྒྲུབ་པོ་དངོས་གྲུབ་འདོད་པས་ནི། །བློ་དང་ལྡན་པས་བརྩོན་འགྲུས་བསྐྱེད། །འདི་བྱའོ་འདི་ནི་མི་བྱའོ་ཞེས། །རིག་སྔགས་འདུལ་ལས་སྨོས་པ་དང་། །བསླབ་པའི་སྡོམ་པ་ཉིད་ལ་ཡང་། །ཟློས་པས་རྟག་ཏུ་རྣམ་པར་བསམ། །རང་གི་བདེ་ལ་ཆགས་པ་དག །ཉིན་མཚན་དུ་ཡང་སྤང་བར་བྱ། །འདི་དག་བྱས་ནས་འདི་བྱའོ་ཞེས། །མི་གཡེལ་བར་ནི་གྱུར་པར་བྱས། །ཉིན་པར་བག་མེད་བྱས་པ་དང་། །མཚན་མ་སོ་སོར་བཤགས་པར་བྱ། །ནུབ་མོ་བྱས་ན་ནང་པར་བཤགས། །ལེགས་པར་བྱས་ལ་མངོན་དགའ་བྱ། །བཟླས་བརྗོད་སྦྱིན་སྲེག་གཙང་སྦྲ་བྱ། །རིག་སྔགས་མཆོག་དང་རང་སྡོམ་དང་། །རིག་སྔགས་འདུལ་བ་དག་ལ་ཡང་། །སྒྲུབ་པ་པོས་ནི་ནན་གྱིས་གནས། །རིག་སྔགས་ཀྱི་འདུལ་བ་རིམ་པར་བྱེ་བའོ།། །།ཞི་བ་དང་ནི་རྒྱས་པ་དང་། །དྲག་ཤུལ་སྤྱད་པ་ཉིད་གསུངས་པ། །ཀུན་ལ་བྱེ་བྲག་མེད་པར་ནི། །ངས་ནི་རྣམ་པ་གསུམ་དུ་བསྒྲགས། །གསང་སྔགས་ཁ་ཅིག་འཕགས་པ་སྟེ། །དེ་ལ་ཁ་ཅིག་ལྷ་ཡི་ཡིན། །ཁ་ཅིག་ས་བླའི་ཡིན་པར་གསུངས། །ཐམས་ཅད་རིགས་ནི་གསུམ་དུ་འདུས། །དེ་རྣམས་མེ་ཏོག་སྣ་ཚོགས་ནི། །ཐང་ལས་སྐྱེས་དང་ཆུ་ལས་སྐྱེས། །ཇི་ལྟར་ཕྱེ་བ་བློ་ཅན་གྱིས། །མངོན་པར་བསྔགས་ཏེ་དབུལ་བར་བྱ། །གཙང་ཞིང་གཙང་མར་སྐྱེས་པ་ཡི། །ལྷ་རྫས་ཀྱི་ནི་མེ་ཏོག་འདི། །བདག་གི་དད་པས་དབུལ་ལགས་ཀྱིས། །བཞེས་ནས་བདག་ལས་དགྱེས་པར་མཛོད། །ཨོྂ་ཨཱ་ཧ་ར་ཨཱ་ཧ་ར། སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། མེ་ཏོག་དཀར་པོ་དྲི་ཞིམ་པ། །སངས་རྒྱས་བཅོམ་ལྡན་འདས་ལ་དབུལ། །མེ་ཏོག་དཀར་པོ་ཆུ་སྐྱེས་རྣམས། །འཕགས་པ་སྤྱན་རས་གཟིགས་ལ་དབུལ། །རབ་ཏུ་དྲི་ཞིམ་སྣ་ཚོགས་པ། །ཕྱག་ན་རྡོ་རྗེ་ཉིད་ལ་དབུལ། །མ་སྨོས་པ་ནི་གཞན་རྣམས་ལ། །གང་ཡང་རུང་བ་ཐམས་ཅད་དབུལ། །སྣ་མ་པདྨ་བ་ཏ་ལ། །ནཱ་ག་གེ་སར་ཙམ་པ་ཀ །བཀུལ་ཀུ་མུད་སཱ་ལུ་དང་། །མ་ལི་ཀུ་ཡ་ཡུ་ཏི་ཀ །ཀུ་ར་བ་ཀ་ཤེ་པ་ལི། །ཀ་དྃ་མ་དུ་བུནྟི་ཀ །དྲི་ན་ཤུལ་ཡཾ་ཨ་ཤོ་ཀ །ཀླུ་ཤིང་མེ་ཏོག་བུ་ན་ཀ །ན་བ་མ་ལི་ང་མ་ན། །ཨ་མྲའི་དོག་པ་ཀ་ཐ་ར། །མུ་ཙུ་ཀུཎྜ་ཀཱཉྩ་ན། །ཤིང་གི་ཨུཏྤལ་སྤྲིན་ཏྲི་ཀ །ཨུཏྤལ་ཏ་ཀར་ཀུཾ་ཌ་དང་། །གཞན་ཡང་ཀ་ར་བཱི་ར་སོགས། །གྲོང་དང་དགོན་པ་དག་དང་ནི། །ཆུ་སྐྱེས་ཐང་སྐྱེས་མང་པོ་དང་། །འདི་ལ་སོགས་པའི་མེ་ཏོག་དག །ཆོ་ག་བཞིན་དུ་ཤེས་བྱ་སྟེ། །རིགས་དང་ལས་ཀྱི་དབྱེ་བ་ཡིས། །ལྷ་རྣམས་མཆོད་ལ་མཁས་པས་སྦྱར། །སྣ་མ་ཏ་ཀ་ར་ཀུནྡ་དང་། །དེ་བཞིན་མ་ལི་ཡུ་ཏི་ཀ །ནཱ་ག་གེ་སར་འདི་དག་རྣམས། །དེ་བཞིན་གཤེགས་པའི་རིགས་ལ་གསུངས། །ཨུཏྤལ་ཀུ་མུད་པདྨ་དང་། །ས་ལ་གྲྀཏྟི་ཤེ་པ་ལི། །དེ་བཞིན་ཏ་ཀར་བུ་ན་ཀ །འདི་དག་པདྨའི་རིགས་ལ་ཤིས། །ནི་ལོཏྤ་ལ་ལ་སོགས་དང་། །སྲེ་ཡང་ཀུ་ཡི་དོག་པ་དང་། །གང་གཞན་རུང་བར་བསྒྲགས་པ་སྟེ། །འདི་དག་རྡོ་རྗེའི་རིགས་ལ་གསུངས། །ཁྱད་པར་དུ་ནི་དྲི་ཞིམ་དང་། །ཁ་དོག་དཀར་སོགས་དབྱེ་བ་ཡིས། །ཞི་བ་ལ་སོགས་ལས་རྣམས་ལ། །མེ་ཏོག་ཐམས་ཅད་སྦྱར་བར་བྱ། །ཞི་བ་ལ་ནི་མངར་བ་མཆོག །དྲག་ཤུལ་སྤྱོད་ལ་ཁ་བ་སྟེ། །དེ་ལས་གཞན་པ་རོ་ཅན་དག །རྒྱས་པའི་ལས་ལ་ཤེས་པར་བྱ། །ད་ཚ་གེལ་པ་སྡོང་པོ་དང་། །དེ་བཞིན་ཁྲི་ཤིང་ལྡུམ་བུ་དང་། །ལྷབ་ལྷུབ་རྣམས་དང་ཤིང་ལོ་དང་། །མེ་ཏོག་རྣམ་པ་སྣ་ཚོགས་དག །ས་བླ་པ་ལ་ཤིས་པ་ཡིན། །སྣ་མ་དེ་བཞིན་གཤེགས་རིགས་ལ། །པདྨ་པདྨའི་རིགས་ལ་ཤིས། །ཨུཏྤལ་སྔོན་པོ་རྡོ་རྗེ་ཡི། །རིགས་ལ་མཆོག་ཏུ་བསྒྲགས་པ་ཡིན། །དྲི་དང་ཁ་དོག་མཆོག་གི་རྣམས། །མཆོག་གི་ལས་ལ་ཤེས་པར་བྱ། །དམན་ཅིང་ཤིན་ཏུ་དམན་པ་དང་། །ལྷག་མའི་ལས་ལ་ཤེས་པར་བྱ། །དོག་པ་རྣམ་པ་སྣ་ཚོགས་དང་། །ཁྲི་ཤིང་མེ་ཏོག་གང་ཡིན་པ། །དེ་ལ་མོ་ཡི་མིང་ཅན་གྱི། །རིག་སྔགས་གང་ཡང་རུང་བ་དགྱེས། །ཀ་ར་བཱི་ར་དམར་པོའམ། །ཡང་ན་དཀར་པོ་ཁྱད་པར་དུ། །ཁྲོ་བོ་རྣམས་དང་ཕོ་ཉ་མོ། །གཟི་བརྗིད་ཅན་རྣམས་ཐམས་ཅད་དགྱེས། །ས་ལ་ཀི་ལ་ཀུ་ཏ་ཛ། །ཀརྞི་ཀ་ར་ཨས་ན་མཆོག །བིལ་བའི་མེ་ཏོག་ཀ་ཐ་རན། །ལས་ཀུན་བྱེད་པ་ཐམས་ཅད་དང་། །མེ་ཏོག་ཕྲེང་རྒྱུད་མང་པོ་དང་། །ཐམས་ཅད་ལས་རྣམས་ཀུན་ལ་འདོད། །སྦྱོར་བ་འདི་དག་ཉིད་ཀྱིས་ནི། །སིལ་མ་བཀྲམ་པའང་ཤེས་པར་བྱ། །མེ་ཏོག་རིགས་ནས་མ་སྨོས་དང་། །ཚོར་མ་ཅན་དང་དྲི་དཀུ་དང་། །ཁ་དང་ཚ་བ་ལས་བྱུང་དང་། །ཁ་དོག་ངན་པ་རྣམ་པར་སྤང་། །ཨ་བྷི་མུཀྟ་མང་གོ་ལ། །ནི་པ་ལ་སོགས་སྨད་པ་དང་། །ཛ་བ་དང་ནི་ཀེ་ཊ་ཀའི། །མེ་ཏོག་ཁྱད་པར་དུ་ཡང་སྤང་། །ཤ་མ་མེ་ཏོག་པྲི་ཡང་ཀུ། །འབྲས་ཡོས་ཏིལ་དང་ལེ་བརྒན་རྩི། །དྲུར་བ་ལ་སོགས་ཐམས་ཅད་ནི། །གསང་སྔགས་ཐམས་ཅད་བཞེད་པ་ཡིན། །གང་དུ་གཞན་རྣམས་མ་རྙེད་ན། །འབྲས་ཀྱི་འབྲུ་ནི་རངས་པའང་རུང་། །གཅིག་རྐྱ་ཐུབ་པ་འདི་ཡིས་ཀྱང་། །མཆོད་པ་ལེགས་པར་བྱ་བར་བཤེད། །གཞན་གྱི་མེ་ཏོག་གཞན་དག་ལ། །བྱེའུ་རུག་དན་ཏ་མེ་རུ་པ། །ཏ་མལ་ཀྲིཥྞ་མ་ལ་ཀི། །མ་དུ་ལུང་ག་ཨཛྲ་ཀ །མེ་ཏོག་ལ་སོགས་ལོ་མའང་དབུལ། །བལ་ཀ་ལ་སོགས་རྩ་བ་དང་། །ལི་ཤི་ལ་སོགས་འབྲས་བུ་དག །མཆོད་པའི་ཕྱིར་ནི་མེ་ཏོག་ཏུ། །ཆོ་ག་བཞིན་དུ་རབ་ཏུ་དབུལ། །གཞན་གྱི་མེ་ཏོག་གཞན་དག་ལ། །གང་ཚེ་མ་འབྱོར་ནས་དབུལ་བ། །དེ་ཚེ་རང་རིག་གསང་སྔགས་ཀྱིས། །དེ་ལ་ཡང་ནི་མངོན་པར་བསྔགས། །བློ་ལྡན་རྒྱུད་ལ་མཁས་པ་ཡིས། །མ་འབྱོར་ན་ནི་མཐོང་བ་དང་། །ཐོས་པ་དང་ནི་བྱས་པ་ཡིན། །མཆོད་པ་གང་ཡང་རུང་བ་བྱ། །མཆོད་པ་རྒྱ་ཆེར་འབྱོར་ན་ཡང་། །ཡིད་ལ་གུས་པ་བསྐྱེད་ནས་ནི། །ཐལ་མོ་སྤྱི་བོར་ལེགས་སྦྱར་ཏེ། །མཆོད་པ་ཐམས་ཅད་འབྱུང་བར་བྱ། །ཐེ་ཚོམ་མེད་པར་བློ་ཅན་གྱིས། །སེམས་ཀྱིས་རབ་ཏུ་བསྒྲིམས་ནས་ནི། །རབ་ཏུ་བསྒྲིམས་ཏེ་གང་བྱས་པ། །མཆོད་པ་དེ་ནི་ཁྱད་པར་ཅན། །མེ་ཏོག་གི་མཚན་ཉིད་རིམ་པར་ཕྱེ་བའོ།། །།དྲི་ནི་གང་དག་རུང་བ་དང་། །གསང་སྔགས་ཀུན་ལ་ཤིས་པ་དང་། །ཟློས་པ་རྣམས་ལ་དགོས་པ་ཡི། །དྲི་ཡི་རྫས་རྣམས་བཤད་པར་བྱ། །གླ་སྒང་ཀུ་ཏྲ་ན་ཊ་དང་། །རུ་རྟ་ཨུར་ཤིང་བ་ལི་ཀ །ཨ་གར་རྒྱ་སྦོས་ཤ་རི་བཱི། །གུར་གུམ་ཙནྡན་བརྞ་ཀ །བཏྟྲ་ད་ར་སྒྲོན་ཤིང་སྤྲྀབ། །ཤུག་པ་ཏི་ལ་བཪྞི་ཀ །ལི་ཤི་ཤིང་ཚ་ཀ་ལི་ཡ། །ཐང་ཤིང་ཨརྫུ་བྲི་ཡང་ཀུ། །ས་རནྡ་ད་ལ་བག །ཤི་ལ་བ་ལུ་དེ་བ་དང་། །གསེར་ཕྲོམ་ཤ་ཐི་ཀ་བི་ཐ། །ཀ་ཊུ་ཀ་དང་ཕ་ལི་ནི། །ན་ལི་ཤི་པ་ཙམ་པི་དང་། །སུ་བརྞ་དང་ཤ་ཀ་ལ། །མ་དུ་ལུང་ག་ཤུན་པར་བཅས། །བལ་བུ་སྦང་སྦོས་པུ་པྲི་ན། །མཁན་པ་མུ་ར་བུ་རུ་བ། །ཀེ་ཤི་ཏ་མ ལ་བུ་ན་ག །སུག་སྨེལ་བྱ་ཁྲ་ན་ཁ་དང་། །འུ་སུ་བ་སྤི་ལ་པ་ལི། །ཤ་ཏ་པུཥྤ་ཧ་རེཎུ། །ཛཱ་ཏི་ཕ་ལ་ཀ་ཀོ་ལ། །ཀ་ཏུ་པ་ལ་ཙ་རོང་ཀ །སོའུ་ནི་ཡ་དང་དྷ་མ་ཀ །ཙནྡན་དུ་རུས་པྲ་ཏ་ར། །ཐང་ཆུ་དང་ནི་ར་ས་དང་། །གེ་སར་ལ་སོགས་བསྡུས་པ་ལས། །དྲི་སྦྱོར་བ་ཡི་རྒྱུད་ཤེས་པས། །བདག་ཉིད་ཇི་ལྟར་འདོད་བཞིན་སྦྱར། །མེ་ཏོག་འབྲས་བུ་ཐང་ཆུར་བཅས། །རྒྱལ་པའི་རིགས་ལ་སྦྱར་བར་བྱ། །ཤུན་པ་སྙིང་པོ་ལ་སོགས་ཅན། །སྦྱར་བ་པདྨའི་རིགས་ལ་བསྟན། །སྡོང་བུ་རྩ་བ་ལ་སོགས་ལས། །སྦྱར་བ་རྡོ་རྗེའི་རིགས་ལ་གསུངས། །བྱེ་བྲག་ཏུ་ནི་མ་ཕྱེ་པ། །ལས་ཀུན་བྱེད་པ་ཐམས་ཅད་ལའོ། །དེ་བཞིན་གཤེགས་པའི་རིགས་ལ་ནི། །ཨ་གར་མཆོག་ནི་གཅིག་པུ་དབུལ། །པདྨ་ཅན་ལ་བློ་ཅན་གྱིས། །ཙནྡན་དཀར་པོ་གཅིག་པུ་དབུལ། །གུར་གུམ་གཅིག་པུ་ཁྱད་པར་དུ། །ཕྱག་ན་རྡོ་རྗེ་ཅན་ལ་དབུལ། །འདི་དག་གཅིག་རྐྱ་ཐུབ་པ་སྟེ། །ག་པུར་གྱིས་ནི་བསྒོ་བར་གསུངས། །རྡོ་རྗེ་འཆང་བ་ཐམས་ཅད་ལ། །ཙནྡན་དམར་པོ་བཞེད་པ་ཡིན། །པྲི་ཡང་ཀུ་ལ་སོགས་པའི་དྲི། །རིག་སྔགས་མོ་ཡི་མིང་ཅན་དགྱེས། །སྤང་སྤོས་སུག་སྨེལ་འབྲུ་སྦྱར་བ། །རིག་པའི་རྒྱལ་མོ་རྣམས་ལ་བསྒྲགས། །ཙནྡན་གུར་གུམ་ཨ་ཀ་རུ། །རིག་པའི་རྒྱལ་པོ་ཐམས་ཅད་ལའོ། །ཤུག་པ་དག་ལ་སྦྱར་བ་ཡིས། །མངག་གཞུག་རྣམས་ལ་ཤིས་པ་ཡིན། །གཞན་རྣམས་ལ་ནི་ཕལ་གཞན་གྱིས། །བྱས་ན་ལྷག་པར་དགྱེས་པར་འགྱུར། །རིགས་གསུམ་དག་ནི་ཐམས་ཅད་ཀྱི། །སྤྱི་ཡི་ལས་རྣམས་ཐམས་ཅད་ལ། །ཨ་གར་ནག་པོ་གཅིག་པུ་ཉིད། །ཁྱད་པར་དུ་ནི་རབ་ཏུ་ཤིས། །ཁ་དོག་དཀར་པོ་ཞི་བ་ལ། །རྒྱས་པ་ལ་ནི་སེར་པོ་འཕྲོད། །དྲག་ཤུལ་སྤྱོད་ལ་བསུང་མེད་དང་། །ཁ་དོག་དམར་པོ་རབ་ཏུ་ཤིས། །དངོས་གྲུབ་ཆེན་པོ་རྣམས་ལ་དྲི། །ཐང་ཆུ་འབྲས་བུ་དང་སྦྱར་བའོ། །འབྲིང་ལ་མེ་ཏོག་སྙིང་པོ་རྣམས། །ཕལ་ལ་ཕལ་པ་རྣམས་ཀྱིས་བྱ། །སྲོག་ཆགས་དང་ནི་ཆང་དག་གམ། །ཚྭ་དང་རྒྱ་སྐྱེགས་དག་དང་ནི། །དཀུ་བ་དག་གི་དྲི་འདི་རྣམས། །སྦྱར་བར་ཡང་ནི་མི་བྱའོ། །ཕྱེ་མ་དང་ནི་བྱུག་པ་དང་། །དེ་བཞིན་བསྒོ་བར་བྱ་བ་ལ། །བསྟན་པ་འདི་ཡི་ཚུལ་གྱིས་ནི། །ཁ་དོག་རྣམས་ཀྱང་ཤེས་པར་བྱ། །གཙང་ཞིང་གཙང་མ་ལས་བྱུང་བའི། །ལྷ་རྫས་དམ་པའི་དྲི་འདི་དག །བདག་གི་དད་པས་དབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨཱ་ཧ་ར་ཨཱ་ཧ་ར། སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། སྒྲུབ་པ་པོ་དང་སྔགས་འདི་དང་། །རང་གི་སྔགས་ཀྱིས་ཡོངས་བཟླས་ནས། །བསངས་པའི་དྲི་ནི་ལྷ་རྣམས་ལ། །ཆོ་ག་བཞིན་དུ་དབུལ་བར་བྱ། །གཞན་གྱི་དྲི་དང་གཞན་དག་ལ། །གང་ཚེ་མ་འབྱོར་ནས་དབུལ་བ། །དེ་ཚེ་རང་རིག་གསང་སྔགས་ཀྱིས། །དེ་ལ་ཡང་ནི་མངོན་པར་བསྔགས། །དྲིའི་མཚན་ཉིད་རིམ་པར་ཕྱེ་བའོ།། །།རིགས་གསུམ་རྣམས་ཀྱི་སྤྱིར་ཡང་ནི། །ཙནྡན་ཨ་ཀར་གུར་གུམ་གྱིས། །བདུག་སྤོས་ཐམས་ཅད་རིམ་བཞིན་དུ། །རེ་རེ་དག་ལ་སོ་སོར་དགྱེས། །ཤི་རི་བེ་སྟ་སྲ་རྩི་པོག །སར་གུ་གུལ་སཱ་ལི་ཀི། །ག་བུར་ཅེ་བག་ལྷ་མ་ཀ །སྦྲང་རྩི་གུ་ཏ་གི་རི་ཙན། །བུ་རམ་གླ་སྒང་ཨ་རུ་ར། །དུ་རུས་ཨ་ཀར་བྷ་ལ་ཀ །ཙནྡན་སྒྲོན་ཤིང་ཐང་ཤིང་དང་། །པ་རི་པེ་ལ་ན་ལ་ཀི། །ཁ་ར་སྤང་སྤོས་ཨུ་ཤི་ར། །འབྲས་བུའི་རིགས་སུ་གཏོགས་ལ་སོགས། །སྦྱོར་བ་རྣམ་པ་སྣ་ཚོགས་དག །གསང་སྔགས་བདུག་སྤོས་ཕྱིར་གསུངས་སོ། །དེ་ལ་ཤི་རི་བྷེ་ཏ་ཀ །ལྷ་དང་བཅས་པའི་གསང་སྔགས་ཀྱིས། །གནོད་སྦྱིན་རྣམས་ནི་གུ་གུལ་འདོད། །ཅེ་པོག་ལ་ནི་རིག་སྔགས་དགྱེས། །གསང་སྔགས་ཕལ་པ་ཐམས་ཅད་ནི། །སྲ་རྩི་བོག་ལ་ལྷག་པར་དགྱེས། །ཕོ་ཉ་མོ་རྣམས་སཱ་ལི་ཀི། །མངག་གཞུག་རྣམས་ལ་ར་ས་གསུངས། །ཐང་ཆུ་བདུན་གྱི་བདུག་སྤོས་ནི། །དོན་ཀུན་གྲུབ་པར་ཤེས་པར་བྱ། །ཞི་བ་ལ་སོགས་ལས་རྣམས་ལ། །ཐམས་ཅད་དུ་ནི་སྦྱར་བར་བྱ། །མཆོག་ལ་ཐང་ཆུའི་བདུག་པ་སྟེ། །སྙིང་པོ་རྣམས་ནི་འབྲིང་ལ་གསུངས། །ལྷག་མ་རྫས་ཀྱི་བདུག་སྤོས་ནི། །ཕྲན་ཚེགས་ཀྱི་ནི་ལས་རྣམས་ལ། །ག་བུར་དུ་རུས་ཨ་ག་རུ། །གསུམ་ནི་དྲི་ཞིམ་མཆོག་ཅེས་བྱ། །དྲི་ཞིམ་ལྔ་ནི་དེ་རྣམས་ལ། །ཙནྡན་དང་ནི་བུ་རམ་མོ། །ར་ས་དང་ནི་ཞོས་བསྣན་ན། །དྲི་ཞིམ་རྣམ་པ་བདུན་ཞེས་བྱ། །བདུག་སྤོས་དམ་པ་དེ་གསུམ་ནི། །ལས་རྣམས་ཀུན་ལ་གཙོ་བོར་གསུངས། །གསང་སྔགས་ཕྲན་ཚེགས་ཐམས་ཅད་ལ། །བུ་རམ་སྦྲང་རྩི་ཨ་རུ་རའི། །བདུག་སྤོས་དེ་དག་སྦྱར་ན་ནི། །པདྨ་རྣམས་དང་འཕྲོད་པར་འགྱུར། །བུ་རམ་རྡོ་རྗེ་ཨ་རུ་ར། །ཁ་ར་སྦྲང་རྩི་པོག་དང་ལྔའི། །བདུག་སྤོས་ཞི་བ་ལ་སོགས་པའི། །ཆོ་ག་ཀུན་ལ་སྦྱར་བར་བྱ། །འབྱོར་ན་གང་ཡང་རུང་བ་ཡི། །དྲི་ཞིམ་གཅིག་རྒྱ་ཐུབ་པ་དབུལ། །ཡང་ན་རྫས་རྣམས་ཅི་འབྱོར་ལས། །བདུག་སྤོས་སུ་ནི་སྦྱར་བར་བྱ། །བློ་ལྡན་གྱིས་ནི་རྣམ་པ་འདིས། །རིགས་དང་མི་རིགས་རྣམས་དཔྱད་དེ། །དྲི་ཞིམ་རྫས་ལས་སྦྱར་བ་ཡི། །བདུག་སྤོས་ཆོ་ག་བཞིན་དུ་དབུལ། །རིལ་བུ་གོང་བུ་ཕྱེ་མ་དང་། །རེང་བུ་དང་ནི་རྣམ་པ་བཞི། །བདུག་སྤོས་རིགས་སུ་ཤེས་བྱས་ནས། །ལས་རྣམས་སོ་སོར་སྦྱར་བར་བྱ། །ཞི་བ་ལ་ནི་རིལ་བུ་མཆོག །རྒྱས་བ་ལ་ནི་གོང་བུ་མཆོག །དྲག་ཤུལ་སྤྱོད་ལ་ཕྱེ་མ་ཡིས། །ཐམས་ཅད་ལ་ནི་རེང་བུ་ཤིས། །བུ་རམ་གྱིས་ནི་རི་ལུ་བྱ། །སྦྲང་རྩི་སོགས་པས་གོང་བུ་བྱ། །ཕྱེ་མ་རྣམས་ནི་ཐང་ཆུས་བསྲེ། །རེང་བུ་མར་དང་ལྡན་པ་ཤིས། །བློ་ལྡན་གྱིས་ནི་ངན་པ་དང་། །སེན་མོ་རྒྱ་སྐྱེགས་ཐམས་ཅད་དང་། །དཀུ་བ་དང་ནི་ཆང་སོགས་ཀྱིས། །བདུག་སྤོས་སྦྱར་བར་མི་བྱའོ། །དྲི་ཡི་རྒྱས་པ་ལྷ་ཡི་ཟས། །ནགས་ཚལ་བཅུད་ནི་ཡིད་འོང་འདི། །བདག་གི་དད་པས་འབུལ་ལགས་ཀྱིས། །བདུག་སྤོས་འདི་ནི་བཞེས་སུ་གསོལ། །ཨཱ་ཧ་ར་ཨཱ་ཧ་ར། སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། སྒྲུབ་བོས་དང་པོ་སྔགས་འདི་དང་། །རང་རིག་སྔགས་ཀྱིས་ཡོངས་བཟླས་ནས། །བསངས་པའི་བདུག་སྤོས་ལྷ་རྣམས་ལ། །ཆོ་ག་བཞིན་དུ་དབུལ་བར་བྱ། །གཞན་གྱི་བདུག་སྤོས་གཞན་དག་ལ། །གང་ཚེ་མ་འབྱོར་ན་དབུལ་བ། །དེ་ཚེ་རང་རིགས་སྔགས་ཀྱིས་ནི། །དེ་ལ་ཡང་ན་མངོན་པར་བསྔགས། །བདུག་སྤོས་ཀྱི་མཚན་ཉིད་རིམ་པར་ཕྱེ་བའོ།། །།དེ་ནས་གཞན་ཡང་གསང་སྔགས་ཀྱི། །ལྷ་ནི་མ་ལུས་པ་དག་ལ། །ཇི་ལྟར་བྱས་ན་མཉེས་འགྱུར་བའི། །མར་མེའི་ཆོ་ག་དོན་བཞིན་བཤད། །གསེར་རམ་དབུལ་ལམ་ཟངས་མའམ། །ལྕགས་སམ་ཡང་ན་ཁམ་པ་ལས། །མར་མེ་བླུགས་པའི་སྣོད་བྱས་ན། །གསང་སྔགས་ཡོངས་སུ་མཉེས་པར་འགྱུར། །ལས་རྣམས་བཤད་པའི་བྱེ་བྲག་གིས། །ཤིང་བལ་དང་ནི་རས་གསར་དང་། །དུ་གུ་ལ་དང་གསོ་རས་དང་། །དེ་ལ་སོགས་པའི་སྙིང་པོ་བྱ། །ཞི་བ་ལ་སོགས་བྱེ་བྲག་གིས། །དེ་ཡི་མར་ནི་དྲི་ཞིམ་པ། །འབྲུ་མར་བསུང་ཅན་ཡིད་འོང་བའམ། །ཡང་ན་དྲི་ཞིམ་མར་གྱིས་བྱ། །དྲི་ཞིམ་ཤིང་ལས་བྱུང་བའི་མར། །ཞི་བའི་ལས་ལ་ཤེས་པར་བྱ། །ཏིལ་མར་གྱིས་ནི་རྒྱས་པ་ལ། །དྲག་པོ་ལ་ནི་ཡུངས་མར་ཤིས། །རིག་སྔགས་ཀུན་ལ་ཟར་མའི་མར། །འབྲས་བུ་ལས་བྱུང་གསང་སྔགས་ལ། །ཁ་བའི་ཤིང་ལས་བྱུང་བའི་མར། །ཕལ་པ་རྣམས་ལ་ཡོངས་སུ་བསྒྲགས། །ཤ་ཟ་རྣམས་ལ་ཉ་ཡི་མར། །གནོད་སྦྱིན་རྣམས་ལ་ཚིལ་བུར་བཤད། །ཤིན་ཏུ་དམན་པ་གཞན་རྣམས་ལ། །བྷ་ལ་ཏ་ཀ་ལ་སོགས་མར། །དུར་ཁྲོད་པ་ནི་ཐམས་ཅད་དང་། །རོ་ལངས་ལ་སོགས་དངོས་གྲུབ་ལ། །ཁྱད་པར་དུ་ནི་ཚིལ་ཆེན་གྱི། །སྣུམ་ནི་རྗེས་སུ་མཐུན་པ་ཡིན། །ལས་རྣམས་དག་ནི་ཐམས་ཅད་ལ། །དམར་སེར་བ་མར་མཆོག་ཏུ་གསུངས། །ཡང་ན་རྒྱུད་ལས་གསུངས་པ་བཞིན། །བ་ཡི་ཁ་དོག་རྣམས་ལ་བརྟག །སྨན་རྣམས་ལས་ནི་བྱུང་བའི་མར། །དེ་ཀུན་རྒྱས་པའི་ལས་ལ་གསུངས། །དྲི་ཞིམ་ཐམས་ཅད་ཞི་བ་ལ། །དྲག་སྤྱོད་ལ་ནི་དྲི་ང་རྣམས། །ཆོ་ག་འདི་ཡི་ཚུལ་གྱིས་ནི། །མཐོང་ངམ་མ་མཐོང་ཐ་དད་པས། །མཁས་པས་གསང་སྔགས་ཐམས་ཅད་ལ། །མར་མེའི་ཕྱིར་ནི་སྦྱར་བར་བྱ། །གདོན་རྣམས་འཇོམས་ཤིང་བཀྲ་ཤིས་ལ། །དགེ་ཞིང་མུན་པ་རྣམ་སེལ་འདི། །བདག་གིས་དད་པས་འབུལ་ལགས་ཀྱིས། །མར་མེ་འདི་ནི་བཞེས་སུ་གསོལ། །ཨཱ་ལོ་ཀ་ཡ་ཨཱ་ལོ་ཀ་ཡ། སརྦ་བིདྱཱ་དྷ་ར་བཱུ་ཛི་ཏེ་སྭཱ་ཧཱ། སྒྲུབ་པོས་དང་པོར་སྔགས་འདི་དང་། །རང་གི་སྔགས་ཀྱིས་ཡོངས་བཟླས་ནས། །བསངས་པའི་མར་མེ་ལྷ་རྣམས་ལ། །ཆོ་ག་བཞིན་དུ་དབུལ་བར་བྱ། །གཞན་གྱི་མར་མེ་གཞན་དག་ལ། །གང་ཚེ་མ་འབྱོར་ནས་དབུལ་བ། །དེ་ཚེ་རང་རིག་གསང་སྔགས་ཀྱིས། །དེ་ལ་ཡང་ནི་མངོན་པར་བསྔགས། །མར་མེའི་མཚན་ཉིད་རིམ་པར་ཕྱེ་བའོ།། །།ཇི་ལྟ་བུ་དག་ལྷ་རྣམས་ལ། །ཕུལ་ན་དངོས་གྲུབ་ཐོབ་འགྱུར་བའི། །ལྷ་བཤོས་ལས་ཀྱི་ཆོ་ག་ཀུན། །སྔ་མ་བཞིན་དུ་བཤད་པར་བྱ། །རྩ་བ་རྡོ་གུ་འབྲས་བུ་བཅའ། །ཅུང་པེང་ལ་སོགས་བཟའ་བ་ཡིན། །ཚོད་མར་བཅས་པའི་ཁ་ཟས་དག །མདོར་ན་བཟའ་བ་ཡིན་པར་བཤད། །ཐུག་པ་དང་ནི་སྐོམ་རྣམས་ནི། །བཏུང་བ་རྣམ་པ་སྣ་ཚོགས་ཏི། །དེ་ལྟར་རྣམ་པ་བཞི་པོ་ཀུན། །གཏོར་མ་ལས་ཀྱི་ཆོ་ག་བཤད། །བི་ཛ་པཱུ་ར་གཅིག་པུ་ནི། །གསང་སྔགས་ཀུན་ལ་རབ་ཏུ་ཤིས། །དེ་བཞིན་སེའུ་ཨ་མྲ་དག །རིགས་གསུམ་ལ་ཡང་ཤེས་པར་བྱ། །ཞི་བ་ལ་ཡང་མངར་བ་དབུལ། །མངར་སྒྱུར་དག་ནི་རྒྱས་པ་ལ། །འབྲས་བུ་སྣ་ཚོགས་རོ་གཞན་ཅན། །དྲག་ཤུལ་སྤྱོད་པ་དག་ལ་དབུལ། །ན་རི་ཀེ་ལ་ཏ་མ་ལམ། །བིལ་བ་དང་ནི་ནིམ་པའམ། །དེ་བཞིན་སྨད་པར་བྱ་བ་རྣམས། །གསང་སྔགས་ཀུན་ལ་དབུལ་མི་བྱ། །དངོས་གྲུབ་ཆེན་པོ་དག་ལ་ནི། །མང་ལ་རིན་ཆེན་ཞིམ་པ་བསྒྲགས། །འབྲིང་ལ་ཞིམ་པ་བར་མ་ལ། །ཐ་མ་དག་ནི་ཐ་མ་ལའོ། །འབྲས་བུ་མོ་ཡི་མིང་ཅན་ལ། །རིག་སྔགས་ཐམས་ཅད་ལྷག་པར་དགྱེས། །ནགས་ཀྱི་འབྲས་བུ་མི་ཁ་བ། །རིག་པའི་རྒྱལ་པོ་རྣམས་ལ་ཤིས། །ཁྲོ་བོ་རྣམས་ལ་བིལ་བ་སྟེ། །པ་ཏ་ལས་བྱུང་གནོད་སྦྱིན་ལ། །དཔལ་མོ་ཀུན་ལ་ཀ་བི་ཏ། །བི་ཡ་ལ་ཛ་མངག་གཞུག་ལ། །ལྷག་མ་རྣམ་པ་སྣ་ཚོགས་པ། །ལྷག་མ་བཞེད་པ་རྣམས་ལ་སྦྱར། །གྲོང་དང་དགོན་པའི་རྡོ་གུ་ནི། །ཞིམ་ཞིང་རོ་དང་ལྡན་པ་དང་། །བི་དྷ་རི་ཡི་རྡོ་གུ་རྣམས། །དེ་དག་ལས་རྣམས་ཀུན་ལ་བསྔགས། །གང་དག་ཤིན་ཏུ་མངར་བ་དང་། །མི་རྣམས་ལྷག་པར་སྲེད་པ་དང་། །རི་ལས་སྐྱེས་པའི་རྡོ་གུ་ནི། །ཁྱད་པར་དུ་ནི་མངར་བ་དང་། །བི་དང་རི་དང་ཀ་ཤེ་དྲུ། །བ་ཡང་སེ་དང་ཀུ་ཀུ་ཊི། །མོན་པའི་དོ་བ་སྨིན་པ་དག །རྒྱལ་བའི་རིགས་ལ་དབུལ་བར་བྱ། །ཆུ་ལས་སྐྱེས་པའི་རྡོ་གུ་རྣམས། །པདྨའི་རིགས་ནི་ཀུན་ལ་ཤིས། །སྨན་གྱི་རྡོ་གུ་ཐམས་ཅད་དང་། །ཁ་བ་དང་ནི་ཚ་བ་དང་། །དོ་བ་དག་ནི་ཐམས་ཅད་ཀྱང་། །ལག་ན་རྡོ་རྗེ་ཉིད་ལ་དབུལ། །ཡང་ན་ལས་ཀྱི་བྱེ་བྲག་ལས། །དྲི་དང་ཁ་དོག་རོར་ལྡན་པའི། །རྡོ་གུ་རྣམས་ནི་ཅི་རིགས་པར། །ཞི་བ་ལ་སོགས་དབུལ་བར་བྱ། །རབ་དང་འབྲིང་དང་ཐ་མ་ཡི། །དངོས་གྲུབ་རྣམས་ནི་སོ་སོ་ལ། །ཡོན་ཏན་རབ་འབྲིང་ཐ་མ་ཡི། །རྡོ་གུ་རྣམས་ནི་དབུལ་བར་བྱ། །རྡོ་གུ་བཞིན་དུ་རྩ་བ་ཡང་། །ཞི་ལ་སོགས་པའི་ལས་རྣམས་དང་། །རིགས་དང་དངོས་གྲུབ་དག་ལ་ཡང་། །ཅི་རིགས་པར་ནི་དབུལ་བར་བྱ། །སྒོག་པ་དང་ནི་ལ་ཕུག་དང་། །ཁ་བ་དང་ནི་བསྐ་བ་དང་། །རོ་མེད་པ་དང་ངན་པ་དག །གསང་སྔགས་རྣམས་ལ་མི་དབུལ་ལོ། །པུ་པ་ས་ཏི་ཨུ་ལོ་པི། །བ་ད་ཀི་ཡི་རིགས་རྣམས་དང་། །ཧང་ཚོས་རྣམས་ཀྱི་རྣམ་པ་དང་། །འབྲུ་ཡི་ཆན་ནི་སྣ་ཚོགས་དང་། །ཚག་ཚོག་རྣམ་པ་སྣ་ཚོགས་དང་། །ཧྭགས་དང་བཟའ་བ་སྣ་ཚོགས་དང་། །ལ་དུ་དང་ནི་ཞུའུ་ཏེའུ་དང་། །ཕིན་ཏ་ཀོ་ཤ་ཕེ་ན་ཀ །ཚིལ་ལ་བར་ཏ་ཨ་ཤོ་ཀ །ཁུར་བ་གུ་ཏ་པིཎྜ་ཀ །ཤ་སྐུལ་སྣུམ་ཁུར་པུརྞ་དང་། །མ་ཤ་བུ་བ་བི་དག་དྷ། །པུར་ཤ་བར་ཏ་ལ་བ་ནི། །གར་བྷོད་ཀ་རིའི་རིགས་རྣམས་དང་། །ཁྱིམ་བྱ་ངང་པ་ར་མ་ཀ །སིཀྟ་པྲེའུ་འོལ་པའི་དབྱིབས། །ཤི་རི་བུརྞ་བི་སྟ་ཀ །པང་གི་ཟང་གི་ཟོམ་ཤང་དང་། །བུ་རམ་པུ་པ་ཁ་རྫུ་ཀ །བུ་བ་ཁྲ་བོ་གརྟ་དང་། །ཟུར་གསུམ་བུ་རམ་བར་པ་ཏ། །པིན་རྩི་ཡི་ནི་རིགས་རྣམས་དང་། །ངང་རྒྱལ་བུང་བའི་གོང་བུ་དང་། །མར་གྱི་བུརྞ་ས་རྫ་ཀ །ཀ་མོ་ཏི་ཀི་ཧོན་དོན་དང་། །བེ་རེག་དང་ནི་ཤ་ཏ་པ། །རི་དྭགས་བྱ་དང་ཉ་འདྲ་དང་། །ཀརྞ་བྲི་ཏི་སྣ་ཚོགས་དང་། །གཟིག་དང་ཆུ་ཡི་གླང་པོའི་དབྱིབས། །དེ་བཞིན་ཀར་ཀ་པུཎྜ་ཀ །ཕྲེང་བུ་བྷ་ལ་གྷརྟ་དང་། །ཤིབ་ཏི་ཀ་དང་གླང་རྣ་དང་། །བུ་རམ་འབྲུ་མར་ལས་བྱས་པ། །འདི་ལ་སོགས་པ་བཟའ་བ་རྣམས། །རིགས་དང་ལས་དོན་དངོས་གྲུབ་ལ། །ཅི་རིགས་པར་ནི་དབུལ་བར་བྱ། །ཞི་ལ་པི་ཏ་ཀ་བསྔགས་ཏེ། །གྲོ་ལས་བྱས་པ་རྒྱས་པ་ལ། །མ་ཤ་ཏི་སོགས་ལས་བྱས་པ། །དྲག་ཤུལ་སྤྱོད་པ་རྣམས་ལ་བསྔགས། །ཁ་ཟས་འདི་དག་ཐམས་ཅད་དང་། །བཟའ་དང་བཅའ་བའི་ཁྱད་པར་རྣམས། །རྟོགས་ནས་གསང་སྔགས་ལྷ་རྣམས་ལ། །ཐམས་ཅད་དབུལ་བ་ཉིད་དུ་བྱ། །ཤྲི་པེ་ཏ་ནི་པདྨའི་རིགས། །ལ་དུ་རྡོ་རྗེ་ཅན་ལ་སྟེ། །གནོད་སྦྱིན་རྣམས་ལ་བུ་པ་ཤིས། །བུད་མེད་སྲེད་ལ་རིག་སྔགས་རྣམས། །ཆོ་ག་ཞིབ་མོའི་རྗེས་འབྲངས་ཏེ། །གསང་སྔགས་དབྱེ་བའང་ཤེས་བྱས་ནས། །གང་གཞན་འཇིག་རྟེན་པ་ལ་སོགས། །ཅུང་ཟད་ཙམ་ཡང་དབུལ་བར་བྱ། །སྭ་སྟི་ཨུ་ལོ་བུ་པ་རྣམས། །རིགས་གསུམ་ལ་ནི་རིམ་བཞིན་དབུལ། །ལྷག་མའང་གཞན་ལ་ཅི་རིགས་པར། །གཞི་བཏིང་ནས་ནི་དབུལ་བར་བྱ། །སཱ་ལུ་དང་ནི་བཅུ་དྲུག་པ། །ཇུ་ཙེ་དང་ནི་ཁྲེད་ག་དང་། །འོ་ཐུག་ལེགས་པར་བཙོས་པ་ཡི། །ཆན་དག་དེར་ནི་དབུལ་བར་བྱ། །སྭན་ཚོད་ལ་སོགས་སྣ་ཚོགས་པ། །དྲི་ཞིམ་ཡིད་དུ་འོང་བ་དང་། །ལེགས་པར་ཡོངས་སུ་བྱས་པ་ཡིས། །ཚོད་མ་དག་ཀྱང་དབུལ་བར་བྱ། །ནས་ད ང་ནས་མངར་འབྲས་ཆན་དག །གཙོ་བོ་ལ་ནི་ཡོངས་སུ་བསྒྲགས། །གང་གཞན་ཅུང་ཟད་དམན་པ་དང་། །འབྲིང་ལ་སྭ་ལུ་བཅུ་དྲུག་པ། །གཙོ་བོ་ཞི་བའི་ལས་ཡིན་ཏེ། །འབྲིང་པོ་དག་ནི་རྒྱས་པའོ། །དམན་པ་དྲག་ཤུལ་གསུངས་པ་ལ། །ལྷ་བཤོས་རིམ་པ་བཞིན་དུ་སྦྱར། །ལས་ཅི་འདྲ་བའི་རིགས་དེ་ཤེས། །རིགས་ཅི་འདྲ་བར་དངོས་གྲུབ་སྟེ། །གསང་སྔགས་དབྱེ་བའི་རིམ་པ་ཡིས། །འདིར་ནི་ཆོ་ག་ཐམས་ཅད་སྤྱད། །ཞི་བ་ལ་ནི་དང་པོར་བསྔགས། །རྒྱས་པ་ལ་ནི་མངར་སྐྱུར་ཏེ། །ཁ་དང་ཚ་དང་བསྐ་སོགས་ཀྱི། །ཚོད་མ་དྲག་པོའི་ལས་ལའོ། །ཞི་བ་ལ་ནི་འོ་ཐུག་གསུངས། །ཀྲྀ་ས་ར་ནི་དྲག་སྤྱོད་ལ། །ཞོ་དང་འབྲས་ཐུག་ལ་སོགས་པ། །གཞན་རྣམས་ཐམས་ཅད་རྒྱས་ལ་ཤིས། །བཟའ་བའི་རིགས་ནི་སྣ་ཚོགས་པ། །ཕལ་ཆེར་གྲོང་དང་དགོན་པ་ཡི། །ཅུང་ཟད་ཅིག་ནི་འདིར་བཤད་དེ། །མ་ལུས་པ་དང་རྒྱས་པར་ནི། །གཞན་དག་ལས་ཀྱང་ཤེས་པར་བྱ། །འཇིག་རྟེན་དག་ན་གང་བཟང་དང་། །བདག་ཉིད་སྲེད་པ་གང་ཡིན་པ། །དེ་དག་ཐམས་ཅད་སངས་རྒྱས་ལ། །བློ་དང་ལྡན་པས་ཐོག་མར་དབུལ། །གསང་སྔགས་རྣམས་ཀྱི་བཟའ་བ་དང་། །ཟས་ཉིད་གང་དང་གང་གསུངས་པ། །བློ་དང་ལྡན་པས་དེ་ཉིད་དབུལ། །གཞན་དུ་བྱས་ན་གྲུང་མི་ཐོབ། །གང་དག་འགལ་དང་མ་སྨོས་དང་། །གང་དག་ཅུང་ཟད་ངན་པའི་རྣམས། །དེ་དག་ཐམས་ཅད་དྲག་སྤྱོད་ལ། །ཁྱད་པར་དུ་ནི་དབུལ་བར་གསུངས། །དྲི་དང་བདུག་སྤོས་མར་མེ་དང་། །མེ་ཏོག་དང་ནི་ལྷ་བཤོས་དང་། །ཐམས་ཅད་ཆོ་ག་འདི་ཉིད་ཀྱི། །ཞི་བ་ལ་ཡང་བཤད་པ་ཡིན། །གསང་སྔགས་རྣམས་ཀྱི་རང་བཞིན་དང་། །མཐུ་དང་ལས་དོན་རིག་བྱས་ནས། །དེ་ཡི་བཤོས་དང་ཁ་ཟས་རྣམས། །ཇི་ལྟར་རིགས་པར་དབུལ་བར་བྱ། །སྭ་སྟི་ཀ་དང་སུ་ལོ་པའི། །བཟའ་པ་ཅི་འབྱོར་བུ་རམ་ཅན། །ལག་པན་རྩ་བའི་འབྲས་བུ་དང་། །འོ་ཐུག་དག་ནི་འདོད་པ་ཡིན། །ཐམས་ཅད་འདོད་ཅེས་བྱ་བ་ཡི། །གཏོར་མ་དོན་ཀུན་སྒྲུབ་བྱེད་པ། །གསང་སྔགས་ཀུན་ལ་ཤེས་པར་བྱ། །དྲག་ཤུལ་སྤྱོད་ལ་མ་ཡིན་ནོ། །དེ་དག་ཉིད་ལས་ཅི་འབྱོར་བ། །ཁ་དོག་སྣ་ཚོགས་པ་ཞེས་བྱ། །གང་གཞན་ཅུང་ཟད་ཀྱིས་གླགས་པ། །གཏོར་མ་སྣ་ཚོགས་པ་ཞེས་བྱ། །དང་པོ་དེ་དག་གཉིས་ལས་ནི། །སྣ་རེ་ལས་ཀྱང་མ་བྱས་པ། །གཞན་ཡང་ཅི་སྙེད་པ་བསྣན་པ། །གཏོར་མ་རྒྱ་ཆེན་ཞེས་སུ་གསུངས། །འབྲས་ཆན་ཞོ་དང་འོ་མ་མར། །མིང་ནི་དཀར་གསུམ་པ་ཞེས་གསུངས། །འབྲས་ཆན་འོ་མ་སྦྲང་རྩི་མར། །ལྡན་པའི་གཏོར་མ་མངར་གསུམ་ཡིན། །ས་ཡ་ལི་དང་ལིང་ཀ་ལ། །སྲན་ཅན་ཏིལ་གྱི་པིསྟ་ཀ །ལག་པན་རྩ་བ་འབྲས་བུ་དང་། །ཅུང་ཟད་ཅུང་ཟད་ཀྱིས་བསྣན་ནས། །མེ་ཏོག་འབྲས་ཡོངས་ཆུ་དང་བཅས། །འདབ་མར་བཅས་པའི་གཏོར་མ་ནི། །གསང་སྔགས་ཀུན་གྱི་གཏོར་མ་སྟེ། །དེ་མིང་འབྱུང་པོ་ཐམས་ཅད་པའོ། །འོ་ཐུག་འབྲས་ཡོས་སྭ་སྟི་ཀ །མར་དང་སྦྲང་རྩི་ནས་འོ་ཐུག །པི་ཛ་པཱུ་ར་དེ་དག་རྣམས། །རྟག་པར་ཞི་བའི་ལྷ་བཤོས་སོ། །ཞོ་དང་ལག་པམ་སྲས་ཐུག་དང་། །བུ་རམ་ལ་དུབ་ཨུ་ལོ་པི། །ཤྲི་བེ་སྟ་ལ་སོགས་པའི་ཟས། །རྟག་པར་རྒྱས་པའི་ལྷ་བཤོས་སོ། །འབྲས་མར་ཆན་དང་ཀོ་ཏྲ་བ། །བཟའ་བ་ཏིལ་ཆན་བུ་བར་བཅས། །སྲན་ཆན་དང་ནི་ཀྲི་ས་ར། །དེ་དག་རྟག་པར་དྲག་སྤྱོད་པའོ། །འབྲས་བུ་རྩ་བ་སཱ་ལུ་ཅན། །བཏུང་བ་མངར་བ་སྦྲང་རྩི་དང་། །བཟའ་བ་མང་པོ་བུ་རམ་ཅན། །དེ་དག་གནོད་སྦྱིན་གཏོར་མ་ལའོ། །ཚོད་མར་བཅས་པའི་ཟས་རྣམས་དང་། །སྐོམ་དང་པུརྞ་བྷྲྀ་སྟ་ཀ །འབྲས་བུ་སྣ་ཚོགས་ལྡན་པ་ཡིས། །ལྷ་བཤོས་རིག་སྔགས་ཀུན་ལ་ཤིས། །གང་ཡང་མང་པོས་བསྔགས་པ་དང་། །ཞིམ་ཞིང་ཀུན་སྲེད་ཕལ་ཆེ་བ། །དེ་དག་བསྒྲུབ་པ་མཆོག་དག་དང་། །དམ་པ་རྣམས་ལ་དབུལ་བར་བྱ། །དོན་རྣམས་མང་པོ་ཕྱེ་བ་ནི། །ཆོ་ག་བསྟན་པ་འདི་དག་ལས། །རིགས་དོན་དངོས་གྲུབ་བྱེ་བྲག་ལ། །ཟློས་པ་ཅི་རིགས་ཤེས་པར་བྱ། །ཐོག་མར་འདབ་མ་གཙང་མའམ། །ལོ་མ་བཀྲུས་པའི་གཞི་བཏིང་ནས། །ཆོ་གའི་བྱེ་བྲག་ཤེས་པ་ཡིས། །ཕྱི་ནས་ལྷ་བཤོས་དབུལ་བར་བྱ། །པདྨའི་ལོ་མའམ་པ་ལ་ཤ །འོ་མ་ཅན་ཤིང་ལས་སྐྱེས་པའམ། །ཡང་ན་རས་ནི་སར་པའང་རུང་། །ཞི་བའི་གདིང་བར་བསྔགས་པ་ཡིན། །ཆུ་སྐྱེས་འདབ་མ་ཐམས་ཅད་དང་། །ལྗོན་ཤིང་ལོ་མ་གཙང་མའམ། །ཁུར་སྐྱ་ས་ལ་བཏིང་བ་དང་། །ཆུ་ཤིང་ལོ་མ་རྒྱས་པ་ལའོ། །ཨརྒ་པྷ་ལ་ཏ་ཀ་དང་། །ལྗོན་ཤིང་ཁ་བོའི་ལོ་མའམ། །མཁས་པས་གང་ཡང་རུང་བ་དག །དྲག་པོའི་དོན་དུ་གདིང་པར་བྱ། །ལོ་འདབ་མོ་ཡི་མིང་ཅན་རྣམས། །རིག་སྔགས་རྣམས་ཀྱིས་གདིང་པར་བྱ། །མངག་གཞུག་རྣམས་ལ་རྩྭ་དག་དགྲམ། །འདབ་མ་སྔོན་པོ་ས་ལ་དགྲམ། །སློབ་པ་པོས་ཀྱང་ཆོ་ག་འདིས། །རབ་དང་འབྲིང་དང་ཐ་མ་ལ། །ས་གཞི་བསྐུས་ཤིང་བསྟན་ནས་སུ། །ཅི་རིགས་སུ་ནི་བྱ་བར་བཤད། །ཉེ་རེག་ཁྱད་པར་དུ་བྱས་ནས། །ལྷ་བཤོས་ལས་རྣམས་བརྩམ་པར་བྱ། །ལྷ་བཤོས་ལས་ལ་ཐོག་མར་ནི། །སྭ་སྟི་ཀ་དག་བྲིམ་པར་བྱ། །རྩ་བ་རྡོ་གུ་འབྲས་བུ་དང་། །དེ་ཡི་འོག་ཏུ་བཏུང་བ་རྣམས། །དེ་ནས་བཟའ་བ་མང་པོ་སྟེ། །དེའི་འོག་ཟས་རྣམས་དབུལ་བར་བསྒྲགས། །ཐ་མར་ཞོ་དང་འོ་མ་སྟེ། །འདི་དག་ལྷ་བཤོས་ཆོ་གར་བཤད། །ཆོ་ག་འདིས་ནི་མ་སྨོས་པའི། །ལྷག་མའང་ཁོང་དུ་ཆུད་པར་བྱ། །དཀྱིལ་འཁོར་དག་དང་སྒྲུབ་པ་ལ། །ལྷ་བཤོས་ནན་ཏན་བསྐྱེད་དེ་བྱ། །དེས་ན་མཁས་པས་ལྷ་བཤོས་དག །མི་ངན་པ་དང་རྒྱ་ཆེར་བྱ། །བསྙེན་པའི་དུས་ན་ཅི་ནུས་དང་། །ཅི་སྐད་བསྟན་དང་ཅི་སྙེད་པའི། །གཏོར་མའི་ལས་ནི་བྱ་བར་བསྟན། །དུས་ཚིགས་དག་ལ་བཟང་པོར་བྱ། །གང་དག་བསྲེག་བྱའི་རྫས་རྣམས་དང་། །བདག་གི་ཁ་ཟས་གང་ཡིན་ལས། །ཐོག་མར་དེ་ཡི་ཕུད་དབུལ་ཏེ། །ཆོ་ག་ཤེས་པས་བཟླས་བརྗོད་བྱ། །ཇི་སྐད་བསྟན་པའི་ལྷ་བཤོས་དང་། །རྫས་ཀྱི་རིགས་རྣམས་ཅི་འབྱོར་པ། །མཁས་པ་རྣམས་ཀྱིས་ཕུལ་ནས་ཀྱང་། །ཉིན་གཅིག་བཞིན་དུ་བཟླས་བརྗོད་བྱ། །ལྷ་བཤོས་དབུལ་བ་གསང་སྔགས་ཀྱི། །ཞལ་ཟས་ཡིན་པར་བཤད་པས་ན། །དེས་ནི་རྟག་ཏུ་ཁ་ཟས་སྦྱིན། །དེ་ཕྱིར་ཟློས་པ་དག་གིས་དབུལ། །རྩ་བ་རྡོ་གུ་འབྲས་བུ་དང་། །ལྷ་བཤོས་ཅུང་ཟད་ཅི་སྙེད་པ། །དུས་གསུམ་དུ་ཡང་གསང་སྔགས་ལ། །ཕུལ་ནས་དངོས་གྲུབ་ཐོབ་པར་འགྱུར། །གལ་ཏེ་ཟློས་པས་གསང་སྔགས་ལ། །མཆོད་པའི་བཤོས་རྣམས་མ་ཕུལ་ན། །དེ་ཚེ་རྩུབ་ཅིང་མདོག་ངན་ལ། །བཀྲེས་པ་དག་གིས་གདུངས་པར་འགྱུར། །ལྷ་བཤོས་མེད་ན་དེ་ཡི་སེམས། །རྟོག་པ་དག་ཀྱང་མང་པོར་འགྱུར། །ལྷ་རྣམས་འགྲུབ་པར་མི་འགྱུར་ཞིང་། །བགེགས་རྣམས་ཀྱིས་ཀྱང་ཟིལ་གྱིས་གནོན། །དེ་བས་ནན་ཏན་ཆེར་བསྐྱེད་དེ། །གསང་སྔགས་འཁོར་དང་བཅས་པ་ལ། །དུས་ཚིགས་དག་ལ་ཅི་འབྱོར་བའི། །ལྷ་བཤོས་ལེགས་པར་དབུལ་བར་བྱ། །བསྙེན་པའི་དུས་ན་ཟློས་པ་པོས། །ཁང་པའི་ཕྱིར་རོལ་ཁོར་ཡུག་ཏུ། །ལྷ་རྣམས་ཀུན་ལ་འབྱུང་པོ་ཡི། །གཏོར་མ་གུས་པར་དབུལ་བར་བྱ། །གང་དག་འགལ་དང་མི་ཤིས་དང་། །གང་དག་ངན་ཅིང་སྨད་པ་དང་། །གཞན་དག་མི་གཙང་གྱུར་པའི་རྫས། །ལྷ་བཤོས་ཕྱིར་ནི་ཐམས་ཅད་སྤང་། །ཐམས་ཅད་དང་ནི་ལས་ཀུན་ལ། །ལག་པན་རྒྱ་ཆེན་དབུལ་བར་བྱ། །ལྷ་རྣམས་ཀུན་ལ་དབུལ་བའི་བཤོས། །གསང་སྔགས་ཀྱིས་ནི་མངོན་པར་བསྔགས། །སྨན་རྣམས་བཅུད་ནི་ཡི་གར་འོང་། །སྔགས་ཀྱི་ཟས་ཀྱི་བཅུད་འདི་དག །བདག་གི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨཱཧ་ར་ཨཱཧ་ར། སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། སྒྲུབ་པོས་དང་པོར་སྔགས་འདི་དང་། །རང་གི་སྔགས་ཀྱིས་ཡོངས་བཟླས་ནས། །བསངས་བའི་ལྷ་བཤོས་ལྷ་རྣམས་ལ། །ཆོ་ག་བཞིན་དུ་དབུལ་བར་བྱ། །གཞན་གྱི་ལྷ་བཤོས་གཞན་དག་ལ། །གང་ཚེ་མ་འབྱོར་ནས་དབུལ་བ། །དེ་ཚེ་རང་རིག་གསང་སྔགས་ཀྱིས། །དེ་ལ་ཡང་ནི་མངོན་པར་བསྔགས། །གཏོར་མའི་ཆོ་ག་རིམ་པར་ཕྱེ་བའོ།། །།ཞི་པ་དང་ནི་རྒྱས་པ་དང་། །དེ་བཞིན་དྲག་ཤུལ་སྤྱོད་པ་སྟེ། །མདོར་ན་ལས་ནི་རྣམ་གསུམ་དུ། །གསང་སྔགས་ཀུན་ལ་བསྒྲགས་པ་ཡིན། །ལས་ནི་རྣམ་པ་གསུམ་ཆར་གྱི། །དངོས་གྲུབ་གང་གིས་མྱུར་བ་དང་། །ངེས་པར་འགྲུབ་པར་འགྱུར་བ་ཡི། །ཆོ་ག་དེ་དག་འདིར་བཤད་དོ། །བྱམས་པའི་དྲན་པ་ཉེར་བཞག་ནས། །དཀོན་མཆོག་གསུམ་ལ་གཅིག་ཏུ་གཞོལ། །ཞི་བར་གྱུར་པས་ཞི་བ་ཡི། །བཟླས་པའམ་ཡང་ན་སྦྱིན་སྲེག་བྱ། །ཟླ་བ་ཡར་གྱི་ཚེས་གཅིག་ནས། །ལས་རྣམས་རབ་ཏུ་བརྩམ་པར་བྱ། །བྱེ་བྲག་ཏུ་ནི་སྲོད་ལ་སྟེ། །དེ་ནི་ཞི་བའི་ལས་ཀྱི་དུས། །གནས་གཙང་མ་ཡི་ལྷ་རྣམས་དག །དེ་ན་ཀུན་དུ་གཟིགས་པས་ན། །ལས་རྣམས་མྱུར་དུ་འགྲུབ་པར་འགྱུར། །དེ་བས་དེར་ནི་ཀུན་བརྩམ་མོ། །དཀར་པོའི་གོས་ནི་བགོས་ནས་སུ། །ཀུ་ཤའི་ཁྲེས་ཀྱི་སྟན་འདུག་ནས། །བྱང་ཕྱོགས་ཁ་བལྟས་གཙང་ཞི་བས། །ཞི་བའི་ཆོ་ག་བཤད་པར་བྱ། །བ་ཡི་ལྕི་བ་མ་ལྷུང་བས། །དུས་གསུམ་དག་ཏུ་དེར་བསྐུས་ལ། །མེ་ཏོག་དཀར་པོ་སིལ་མ་དག །བཀྲམ་བ་བྱས་ན་རབ་ཏུ་ཤིས། །ནས་དང་འོ་ཐུག་ཞོ་དག་དང་། །འབྲས་ཡོས་དག་གམ་ཏིལ་དག་གམ། །དུར་བའམ་ཀུ་ཤ་སྔོན་པོའམ། །བྲི་ཡང་ཀུ་ཡི་མེ་ཏོག་གམ། །སཱ་ལུའི་ཆན་ནམ་གེ་སར་རམ། །ཡང་ན་མེ་ཏོག་དཀར་པོའམ། །ཤ་མའི་ཡམ་སྲེག་ཤིང་དག་གམ། །ཡང་ན་དྲི་ཞིམ་ཐང་ཆུའང་རུང་། །མཆོད་སྦྱིན་དག་གི་ལྗོན་ཤིང་ངམ། །འོ་མར་བཅས་ཤིང་ལོ་མ་ཅན། །ཡམ་ཤིང་རྩེ་མོ་ལས་སྐྱེས་རློན། །སྦྲང་རྩིའམ་ཡང་ན་མར་ཡང་རུང་། །རྟོག་པ་ལས་གསུངས་ཆོ་ག་ནི། །དེ་དང་དེ་ལ་སོགས་པ་སྤྱད། །ཞི་བའི་ལས་ལ་བློ་ཅན་གྱིས། །ལྗོན་ཤིང་འོ་མ་ཅན་གྱི་མེ། །རྒྱུན་བཞག་མི་ལ་བླངས་ནས་སུ། །མེ་ནི་ཆོ་ག་བཞིན་བྱས་ཏེ། །ཞི་བའི་ལས་ལ་བསྲེག་བྱིན་ན། །དངོས་གྲུབ་རབ་ཏུ་སྟེར་བར་འགྱུར། །འོ་མ་ཅན་གྱི་ཡམ་ཤིང་གི། །མེ་ལ་ཡམ་ཤིང་མཐོ་གང་ཙམ། །འོ་མ་སྦྲང་རྩི་མར་བཏགས་ཏེ། །ཞི་བའི་ལས་ལ་སྦྱིན་སྲེག་བྱ། །དགོན་པའི་བ་ལང་ལྕི་བ་དང་། །དེ་བཞིན་ཤ་མའི་བུད་ཤིང་བཟང་། །ཡང་ན་ལྗོན་ཤིང་དྲི་ཞིམ་པའི། །བུད་ཤིང་ཞི་བའི་ལས་ལ་ཤིས། །ས་གཞི་དཀར་ལ་བརྐོས་བ་ཡིས། །ཞུགས་ཐབ་ཀུན་དུ་ཟླུམ་པོ་ལ། །ཁྲུ་གང་ཙམ་གྱི་ཚད་དུ་བྱ། །ཟབས་སུ་སོར་ནི་བཅུ་གཉིས་པ། །དེ་ཡི་སྟེང་དུ་ཁར་ན་ནི། །རབ་མཉམ་སོར་བཞིའི་ཚད་ཙམ་གདགས། །དེ་ཡི་ཞབས་སུ་འཁོར་ལོ་བཞག །དེ་ཡང་འཕང་དུ་སོར་གཅིག་པའོ། །པདྨའི་སྐྱིལ་ཀྲུང་དུ་འདུག་སྟེ། །བློ་ཡིས་བསྒོམ་པ་བྱས་ནས་སུ། །མཆོད་པ་ལ་སོགས་ལེགས་བྱས་ཏེ། །དེ་ནས་ཞི་བའི་ལས་བྱའོ། །དང་པོར་སྟོན་པ་ཐུབ་ཆེན་དང་། །ཤེས་རབ་ཕ་རོལ་ཕྱིན་པ་དང་། །ཉན་ཐོས་འདོད་ཆགས་བྲལ་རྣམས་དང་། །བྱང་ཆུབ་སེམས་དཔའ་རྣམས་ལ་མཆོད། །བྱམས་མ་དེ་བཞིན་གཤེགས་མཛོད་སྤུ། །རིག་སྔགས་གཞན་གྱིས་མི་ཐུབ་མ། །དགའ་བོ་ཞེས་བྱ་ཀླུ་རྒྱལ་གཉིས། །གནས་ཙང་རིགས་ཀྱི་ལྷ་རྣམས་དང་། །འདི་དག་ལས་ལ་དགོད་བྱ་ཞིང་། །ཞི་ལ་རྟག་ཏུ་མཆོད་པར་བྱ། །དེ་ནས་མེ་ཏོག་དྲི་ལ་སོགས། །ལེགས་པར་བཞག་སྟེ་ལས་རྣམས་བྱ། །དུས་མིན་འཆི་དང་ནད་རྣམས་དང་། །ཡམས་ཀྱི་ནད་དང་གནོད་པ་དང་། །དེ་བཞིན་བགེགས་དང་ནད་འགོ་རྣམས། །ཞི་བར་བྱེད་པས་ཞི་ཞེས་བྱ། །རང་གི་སེམས་ནི་མཉམ་བཞག་སྟེ། །ཡིད་ལ་དགའ་བ་བསྐྱེད་ནས་སུ། །རྒྱས་པ་དག་གིས་རྒྱས་པ་ཡི། །བཟླས་བའམ་ཡང་ན་སྦྱིན་སྲེག་བྱ། །ཟླ་བ་ཉ་ལ་ཀུན་བརྩམ་སྟེ། །ཕྱི་མའི་ཉ་ཡི་བར་དུ་བྱ། །རྒྱས་པའི་ཆོ་ག་བསྟན་པ་ཡིས། །དེ་སྲིད་བར་དུ་ལས་བྱའོ། །རྒྱས་པ་དག་གི་ལས་རྣམས་ལ། །བྱེ་བྲག་ཏུ་ནི་སྔ་དྲོ་ཤིས། །ལས་དེ་གྲུབ་པའི་ལྷ་རྣམས་ནི། །དེ་ནི་བྱིན་གྱིས་རློབ་པར་མཛད། །ལྷ་རྣམས་མ་ལུས་པ་དག་ཀྱང་། །དེ་ཡི་དུས་སུ་རྒྱུ་བས་ན། །ལས་སུ་བྱ་བ་ཐམས་ཅད་ནི། །དུས་དེ་ཁོ་ནར་རབ་ཏུ་ཤིས། །ནང་པར་དུས་ན་ལྷ་རྣམས་ནི། །ཡིད་དགར་གྱུར་ན་མཆོག་སྦྱིན་མཛད། །དེ་ལྟ་བས་ན་མཁས་པ་ཡིས། །ལྷག་པར་དེ་ཚེ་བརྩམ་པར་བྱ། །གོས་དཀར་ཟུང་གཅིག་བགོས་ནས་སུ། །བཀྲ་ཤིས་སྐྱིལ་མོ་ཀྲུང་བྱས་ཏེ། །ཤར་ཕྱོགས་ཁ་བལྟས་དགའ་བཞིན་དུ། །རྒྱས་པའི་ཆོ་ག་བསྒྲིམས་ཏེ་སྤྱད། །ས་གཞི་ཕྱུག་པ་སྦོས་ཞིམ་བཅས། །དུས་གསུམ་དུ་ནི་བསྐུ་བར་བྱ། །མེ་ཏོག་སིལ་མ་སྣ་ཚོགས་ཀྱིས། །དེར་ནི་རབ་ཏུ་དགམ་བར་བཤད། །ཟས་མཆོག་དག་གི་གོད་དུ་ནི། །མདར་གསུམ་དག་དང་ལྡན་པའམ། །སྦྲང་རྩི་མར་དང་ཞོ་སྦྱར་བའི། །ཏིལ་ནག་དག་གམ་མར་དང་ཞོ། །ཤཏ་པུཥྤ་བིལ་བ་དང་། །སཱ་ལུ་ཡི་ནི་འབྲས་དག་དང་། །ནཱ་ག་གེ་སར་པདྨ་དང་། །ཀརྞི་ཀ་ར་མར་དང་བཅས། །ལག་བན་དང་ནི་འབྲུ་ཀུན་དང་། །དེ་བཞིན་མཆོད་སྦྱིན་ཡམ་སྲེག་ཤིང་། །དེ་དག་ལ་སོགས་རྫས་རྣམས་ཀྱིས། །རྒྱས་པའི་སྦྱིན་སྲེག་ཚུལ་བཞིན་བྱ། །རྒྱལ་རིགས་ཁྱིམ་ནས་བླངས་པའི་མེའམ། །ཡང་ན་རྒྱལ་པོའི་ཁྱིམ་ནས་བླངས། །དགོན་པའི་མེའམ་མེ་ཆེན་པོ། །རྒྱས་པའི་ཆོ་ག་དག་ལ་ཤིས། །ཡམ་ཤིང་སྦོམས་སུ་ཆག་གང་པ། །སྲིད་དུ་ཁྲུ་གང་ཙམ་གྱི་ཚད། །ཞོ་མར་འོ་མ་ལས་བཏགས་ནས། །རྒྱས་པའི་ཆོ་ག་དག་ལ་བསྲེག །ཡམ་སྲེག་ཤིང་དུ་གང་བསྟན་པ། །དེ་དག་ཉིད་ལས་མེ་བུད་དོ། །ཡང་ན་མེ་ཏོག་འབྲས་བུ་ཤིང་། །བུད་ཤིང་ཕྱིར་ནི་རབ་ཏུ་ཤིས། །ཞུགས་ཐབས་གཞི་དམར་པོ་ལ། །རྒྱར་ནི་ཁྲུ་དོ་ཙམ་གྱི་ཚད། །གྲུ་བཞི་པ་ལ་ཁ་རན་ཅན། །ཟབས་སུ་ཁྲུ་གང་ཙམ་དུ་བྱ། །ཁར་ན་མཐོ་གང་ཚད་ཙམ་ལ། །ཁ་དོག་དམར་པོའི་སས་ཀྱང་བསྐུ། །པདྨའི་ཕྱག་རྒྱ་མཛུབ་གང་བ། །འཕང་དུ་སོར་བཞི་ཡོད་པ་བྱ། །དགོས་པའི་དོན་ནི་གང་ཡིན་པ། །དེ་ཉིད་ཡིད་ལ་ལྷུར་བསམས་ཏེ། །ཆོ་ག་ཐོག་མར་བཤད་པ་དག །བྱས་ནས་རྒྱས་པའི་ལས་བྱའོ། །ཕྱག་ན་པདྨའི་མཐུ་ཆེན་དང་། །དོན་གྲུབ་པ་ཡང་མཆོད་པ་བྱ། །རིག་སྔགས་འཆང་དང་གནོད་སྦྱིན་དང་། །དཔལ་གྱི་ལྷ་མོ་ཐམས་ཅད་དང་། །ཚངས་དང་བྱང་ཆུབ་སེམས་དཔའ་དང་། །རིག་པའི་བདག་མོ་མཐུ་ཆེན་དང་། །འཕྲོག་མ་རིག་སྔགས་ཆེན་མོ་དག །རྒྱས་པའི་ལས་ལ་མཆོད་པ་བྱ། །དེ་ལ་སོགས་པ་བློ་ཅན་གྱིས། །ཆོ་ག་བཞིན་དུ་མཆོད་ནས་ཀྱང་། །བདག་ཉིད་མངོན་པར་དབང་བསྐུར་ཏེ། །རྒྱས་པའི་ལས་རྣམས་བརྩམ་པར་བྱ། །གང་ཞིག་ཚེ་དང་ལང་ཚོ་དང་། །བྱིན་དང་མཐུ་སྟོབས་འཕེལ་བྱེད་དང་། །ཡོན་ཏན་དག་དང་འདོད་དོན་གང་། །སྒྲུབ་བྱེད་དེ་ནི་རྒྱས་ཞེས་བྱ། །མཆོག་དང་ཁྲོ་བ་ལ་གནས་ཏེ། །དེ་ནས་འདུན་པ་བརྟན་པོ་ཡིས། །གསང་སྔགས་དག་པོ་བཟླས་པའམ། །སྦྱིན་སྲེག་བྱ་བས་དགྲ་བོ་གཞོམ། །ཚེས་གྲོངས་དག་དང་རྒྱུ་སྐར་དང་། །སྨྱུང་བར་གནས་པར་བྱ་མི་དགོས། །ཁྲོས་པ་བརྟན་པར་བྱས་ནས་ནི། །མོད་ལ་དྲག་ཤུལ་སྤྱོད་པ་བརྩམ། །ཁྱད་པར་དུ་ནི་མར་ངོའམ། །མར་གྱི་དུས་ཚིགས་དག་གིས་ནི། །ཉི་མའི་གུད་དམ་ནམ་ཕྱེད་ན། །དྲག་ཤུལ་སྤྱོད་པ་བརྩམ་པར་བྱ། །གང་གི་ཕྱིར་ནི་ཡི་དྭགས་དང་། །ཤ་ཟ་འབྱུང་པོ་སྲིན་པོའི་ཚོགས། །དྲག་པོ་རྣམས་ཀྱིས་བྱིན་རློབ་པ། །དེ་ཕྱིར་དེས་ན་ལས་རྣམས་འགྲུབ། །དུས་དེ་ན་ནི་དྲག་པོའི་ལས། །འགྲུབ་བར་འགྱུར་ཕྱིར་རབ་ཏུ་ཤིས། །མང་ན་གང་ཚེ་ཁྲོས་གྱུར་པ། །དེ་ཚེ་ཉིད་ན་ལས་བརྩམ་མོ། །གང་ཕྱིར་གསང་སྔགས་དྲག་པོའི་ལྷས། །ཁྲོས་པ་ཉིད་ན་བྱིན་རློབ་པ། །དེ་ཕྱིར་ཁྲོ་བ་བསྐྱེད་ནས་སུ། །དྲག་ཤུལ་སྤྱོད་པའི་ལས་བྱའོ། །རབ་ཏུ་དྲག་པོའི་ལས་རྣམས་ལ། །དམར་པོའི་གོས་ནི་བགོ་བའམ། །སྔོན་པོའམ་ཡང་ན་ཆུས་བརླན་པ། །ཁྲག་གིས་སྤགས་བ་དག་ཀྱང་བཤད། །དེ་ནི་མིག་བགྲད་ཁྲོ་གཉེར་བསྙེར། །སོ་ཡང་ཤིན་ཏུ་གཙིགས་ནས་ནི། །རྐང་པས་རྐང་བ་མནན་ནས་སུ། །ལྷོ་ཕྱོགས་ཁ་བལྟས་འདུག་པར་བྱ། །རང་གི་ལུས་དང་ངག་དང་ནི། །ཡིད་རྣམས་ཀྱིས་ཀྱང་སྲན་བཙུགས་ཏེ། །གསང་སྔགས་མངོན་སུམ་བཞིན་བསྒོམས་ནས། །དྲག་ཤུལ་སྤྱོད་པའི་ལས་བྱའོ། །དེར་ནི་དུས་གསུམ་དག་ཏུ་ཡང་། །ནག་པོའི་ས་ཡིས་བསྐུ་བའམ། །བོང་བུ་རྔ་མོ་ལ་སོགས་པའི། །རྟུག་པའམ་དུར་ཁྲོད་ཐལ་བས་བསྐུ། །མེ་ཏོག་དྲི་ངའི་སིལ་མའམ། །ཡང་ན་དྲི་མེད་པ་དག་དགྲམ། །མེ་ཏོག་སྔོན་པོ་དམར་པོའམ། །འབྲུའམ་ཡང་ན་བུབ་མས་དགྲམ། །ཡུངས་ཀར་འབྲུ་ཙམ་ཆ་བའམ། །རང་གི་ཁྲག་གམ་ལན་ཚྭའམ། །སྐྱེ་ཚེ་ནིམ་པའི་ལོ་མའམ། །རྐང་རྗེས་སའམ་ཐལ་བའམ། །བོང་བུ་ལ་སོགས་རྟུག་པའམ། །སྐྲ་གཏུབས་པའམ་བྱ་རྟུག་གམ། །ཁྲ་ལ་སོགས་པའི་སྒྲོའམ་ཚིལ། །གཅིན་ནམ་ཡང་ན་ཚེར་མའམ། །གྱོ་མོའི་དུམ་བུའམ་རུས་ཕྱེའམ། །དེ་བཞིན་ཤ་ཆེན་ལ་སོགས་པའམ། །ཀ་བིད་ད་རའམ་ནིམ་བའམ། །ཡང་ན་དུར་ཁྲོད་མགལ་དུམ་མམ། །ཚེར་མ་ཅན་གྱི་ཤིང་རྣམས་དང་། །སེང་ལྡེང་གི་ནི་ཡམ་སྲེག་ཤིང་། །ཆོ་ག་བཞིན་དུ་བློ་ཅན་གྱིས། །དྲག་ཤུལ་སྤྱད་ཕྱིར་སྦྱིན་སྲེག་བྱ། །དགྲ་ཡི་མིང་ནས་བརྗོད་ནས་ནི། །དུག་ཅན་ཀུན་དང་ལན་ཚྭ་ཀུན། །ཁྲག་དང་ལྡན་པར་སྦྱར་བྱས་ཏེ། །དྲག་ཤུལ་སྤྱོད་པའི་སྦྱིན་སྲེག་བྱ། །དུར་ཁྲོད་དགན་འབར་བའི་མེའམ། །ཡང་ན་གདོལ་བའི་ཁྱིམ་ནས་བླང་། །རུས་བའམ་རྡོ་ལས་ཕྱུང་བ་དག །དྲག་ཤུལ་སྤྱོད་པའི་ལས་ལ་ཤིས། །གདུག་པ་བཤགས་པའི་ཡམ་སྲེག་ཤིང་། །རྩེ་གཉིས་རྣོན་པོར་བྱས་པ་ལ། །དུག་ཁྲག་ཡུངས་མར་གྱིས་བསྐུས་པ། །སོར་བཅུ་པ་ཡི་ཚད་དུ་བྱས། །བུད་ཤིང་ཁ་དང་ཚད་དང་། །དྲི་ཞིམ་པ་ཡི་སྐམ་ཤིང་ངམ། །ཡང་ན་དྲག་པོའི་ལས་རྣམས་ལ། །དུར་ཁྲོད་ནས་ཕྱུང་ཅི་ཡང་རུང་། །ཁ་དོག་ནག་པོའི་ས་དག་ལ། །ཞུགས་ཐབ་གྲུ་གསུམ་ཕར་བལྟས་པ། །སོར་ནི་ཉི་ཤུའི་ཚད་དུ་བྱ། །ཟབས་སུ་ཁྲུ་ཕྱེད་ཚད་དུ་གསུངས། །ཁ་རན་སོར་ནི་གསུམ་པ་ལ། །ཐལ་བ་དག་གིས་བསྐུ་བར་བྱ། །ཞབས་སུ་རྡོ་རྗེ་སོར་བརྒྱད་པ། །འཕང་དུ་སོར་གཅིག་ཡོད་པ་བཞག །ཐལ་བ་སོལ་བ་ཕུབ་མ་སོགས། །ཡང་ན་ལན་ཚྭ་སྐྱེ་ཚེ་སོགས། །སྦྱིན་སྲེག་དག་གི་རྫས་རྣམས་ལ། །དགྲ་བོ་དག་གི་གཟུགས་བྱས་ལ། །གཟུགས་དེ་རང་གི་མིང་སྨོས་ནས། །གཏུབ་ཅིང་གཏུབ་ཅིང་སྦྱིན་སྲེག་བྱ། །ཡང་ན་དེ་ཡི་སྙིང་ག་རུ། །མནན་ནས་སྦྱིན་སྲེག་ལས་རྣམས་བརྩམ། །སྦྱིན་སྲེག་བཞིན་དུ་བཟླས་བརྗོད་ལའང་། །དྲག་པོའི་གཟུགས་བརྙན་མནན་ཏེ་བྱ། །ཡང་ན་རྟོག་པ་ལས་གསུངས་པའི། །ཆོ་གའི་ལས་བཞིན་བསྒྲུབ་པར་བཤད། །གང་ཞིག་ཡིད་ལ་བསམས་པའི་དོན། །དེ་ལ་བསྟན་ནས་བརྩམ་བྱ་སྟེ། །ཐམས་ཅད་ཆོ་གའི་རྗེས་མཐུན་པར། །ཆོ་ག་བྱས་ནས་ངག་ཤུལ་སྤྱད། །ཕྱག་ན་རྡོ་རྗེ་རབ་གཏུམ་དང་། །ཁྲོ་བོ་རྣམས་ནི་གང་འདོད་པ། །གཡོག་འཁོར་དག་ནི་ཐམས་ཅད་ཀྱང་། །དྲག་པོ་གཟི་བརྗིད་ལགས་པ་དང་། །རིག་པའི་རྡོ་རྗེ་ལྕགས་ཀྱུ་མ། །ཁྲོ་བོ་རྡོ་རྗེ་ཐོག་ཐོག་དང་། །འཆི་མེད་ཚེ་དང་མིག་བརྒྱ་བ། །ཀླུ་དང་གྲུལ་བུམ་སྲིན་པོ་དང་། །དེ་ལ་སོགས་པ་བློ་ཅན་གྱིས། །དྲག་ཤུལ་སྤྱོད་པའི་ལས་དག་ལ། །ཆོ་ག་བཞིན་དུ་སྔར་མཆོད་དེ། །བསྲུང་བ་བྱས་ནས་བརྩམ་པར་བྱ། །ལས་གང་ཡན་ལག་ཉམས་བྱེད་དང་། །གང་ཡང་བསྐྲད་པར་བྱ་བ་དང་། །དབྱེ་བར་བྱ་བ་གང་ཡང་རུང་། །ནད་ཀྱིས་འདེབས་བྱེད་གང་ཡིན་དང་། །ཕུང་བར་བྱ་དང་གདུང་བྱ་དང་། །མི་དགར་འགྱུར་བ་གང་ཡང་རུང་། །ཡང་ན་གསད་པའི་ལས་གང་ཡིན། །དེ་དག་དྲག་ཤུལ་སྤྱོད་པར་བཤད། །དེ་ལྟར་དེའི་ལས་མཁས་པ་ཡིས། །བདེ་བར་གཤེགས་པའི་བཀའ་སྨོད་དང་། །རང་བཞིན་ངན་དང་སྡང་བ་དང་། །དཀོན་མཆོག་གསུམ་ལ་གནོད་བྱེད་དང་། །ལོག་པར་ལྟ་དང་སྡིག་ཅན་དང་། །ཚུལ་ཁྲིམས་འཆལ་དང་རྒོལ་བ་དང་། །བླ་མ་ལ་འཁུ་དེ་དག་ལ། །ཕན་ཕྱིར་ཁྲོ་བ་བསྐྱེད་དེ་བྱ། །རྟོག་པ་མང་པོ་ལས་གསུངས་པའི། །ལུས་དང་ལྡན་པའི་སྦྱོར་བ་དང་། །ཁྲོ་བོ་མངག་གཞུག་ཕོ་ཉ་མོ། །དྲག་པོའི་ཚོགས་ཀྱིས་དྲག་ཤུལ་སྤྱོད། །སེམས་ཅན་འཕོངས་ལ་ཞི་བ་བྱ། །བདེ་བར་གནས་ལ་རྒྱས་པ་སྟེ། །གང་དག་དྲག་ཤུལ་སྤྱོད་པའི་ལས། །དེ་དག་དགྲ་ལ་སྤྱད་པར་བྱ། །མཁས་པས་ས་བླའི་གསང་སྔགས་ཀྱིས། །དྲག་ཤུལ་སྤྱོད་པ་སྤྱད་པར་བྱ། །ཆོ་ག་ཞིབ་མོ་བརྩམ་བྱ་སྟེ། །སྡང་དང་གཡོ་སྒྱུ་ཅན་ལ་སྤྱད། །ངེས་པར་མྱོང་འགྱུར་ལས་མང་པོ། །བདག་གིས་དང་དུ་བླང་དགོས་ཞེས། །དེ་ཡིས་ཉེས་པ་བྱས་པ་ཀུན། །ཚེ་འདི་ཉིད་ལ་སྨིན་པར་བྱ། །དེ་ལྟར་གསང་སྔགས་ལྷ་རྣམས་ཀྱང་། །ངན་སྤྱོད་རྣམས་ལ་བརྩེ་བའི་ཕྱིར། །དེ་ལ་སོགས་པའི་ཐབས་རྣམས་ཀྱིས། །ངན་སོང་དག་ལས་འབྱིན་པར་མཛད། །དགྲ་ལ་གནོད་པ་བྱ་བ་ཡང་། །ཉེས་དང་འཚམ་པར་བྱ་དགོས་པ། །ཉེས་པ་ཆུང་ངུ་བྱས་པ་ལ། །འཆི་བར་འགྱུར་བ་མི་བརྩམ་མོ། །ཁྲོས་པའི་དབང་གིས་བྱས་པ་ཡི། །སྙིང་ཚིམ་ནས་ནི་མོད་ལ་ཡང་། །ཞི་བར་བྱ་ཕྱིར་ཞི་བ་ཡི། །སྔགས་ཀྱིས་ཞི་བའི་ཆོ་ག་བྱ། །ཡང་ན་དེ་ཡི་མེ་ཉིད་ལ། །གསང་སྔགས་དེ་ཉིད་ཁོ་ན་ཡི། །བསྐུལ་ཚིག་ཡོངས་སུ་བརྗོད་ནས་སུ། །འོ་མས་ཞི་བའི་སྦྱིན་སྲེག་བྱ། །མཁས་པས་བདེ་གཤེགས་ཆོས་ཉིད་དང་། །བྱང་ཆུབ་སེམས་ནི་དྲན་བྱ་སྟེ། །གཟུ་ལུམས་ཅན་དང་སྡིག་ཅན་ལ། །དེ་མ་ཐག་ཏུ་ཞི་བ་བྱ། །ཞི་བ་མཆོད་རྟེན་རིང་བསྲེལ་ཅན། །པདྨའི་རྫིང་བུར་རྒྱས་པ་སྟེ། །ཟློས་པ་བོས་ནི་ཁྱད་པར་དུ། །དུར་ཁྲོད་དག་ཏུ་དྲག་ཤུལ་སྤྱད། །ཞི་བ་དང་རྒྱས་པ་དང་དྲག་ཤུལ་སྤྱོད་པའི་ཆོ་ག་རིམ་པར་ཕྱེ་བའོ།། །།གང་དག་སྟེང་དུ་འགྲོ་བའི་ལས། །དེ་ཀུན་རབ་ཏུ་ཤེས་པར་བྱ། །གང་གཞན་ཅུང་ཟད་མི་སྣང་བ། །དེ་དག་འབྲིང་གི་ཆོ་གར་བཤད། །གང་དག་འདི་ནས་ས་པའི་ལས། །དེ་དག་ཐམས་ཅད་ཐ་མར་བཤད། །དེ་བས་རབ་འབྲིང་ཐ་མ་ཡི། །ལས་རྣམས་ཀྱི་ནི་བྱེ་བྲག་དབྱེ། །རབ་དང་འབྲིང་དང་ཐ་མ་ཡི། །དངོས་གྲུབ་ལས་ཀྱི་དབྱེ་བ་ལས། །སྟེང་དང་བར་སྣང་ས་པ་དག །གནས་ནི་རྣམ་པ་གསུམ་དུ་བཤད། །རིག་སྔགས་འཆང་དང་ནམ་མཁར་འགྲོ། །སྣ་ཚོགས་གཟུགས་ཀྱི་དངོས་གྲུབ་དང་། །དེ་བཞིན་མངོན་ཤེས་མཐོང་བ་དང་། །ཞི་བའི་བློ་དང་ཡེ་ཤེས་ཐེབ། །བསྟན་བཅོས་ཀུན་ཤེས་བློ་དག་དང་། །སྨྲ་མཁས་ཐོས་པ་འཛིན་པ་དང་། །རོ་ལངས་གྲུབ་དང་མངོན་ཕྱོགས་དང་། །གནོད་སྦྱིན་མོ་ལ་སོགས་གྲུབ་དང་། །ས་སྟེངས་རྒྱལ་སྲིད་ཡིད་བཞིན་ནོར། །གཏེར་ཆེན་དག་ནི་གཉིས་པ་སྟེ། །དེ་དག་ལ་སོགས་བསྟན་པ་རྣམས། །རིག་སྔགས་དངོས་གྲུབ་རབ་ཡིན་ནོ། །མི་སྣང་སྟོབས་དང་བརྩོན་འགྲུས་དང་། །ཕུག་གི་དངོས་གྲུབ་བཅུད་ཀྱིས་ལེན། །མངག་གཞུག་ལྷ་མིན་དངོས་གྲུབ་དང་། །ཤ་ཟ་ས་ལ་བྷཉྫི་ཀ །མང་དུ་ཐོས་པའི་ཤེས་ཐོབ་དང་། །རྐང་མགྱོགས་པ་ཡི་དངོས་གྲུབ་དང་། །དེ་དག་ལ་སོགས་དངོས་གྲུབ་རྣམས། །འབྲིང་པོའི་ནང་ནས་རབ་ཏུ་བསྟན། །འགྲོ་བ་ཐམས་ཅད་དགའ་བ་དང་། །འཇིག་རྟེན་པ་རྣམས་དབང་བསྐུར་དང་། །དྲག་ཤུལ་སྤྱོད་པའི་ཆོ་ག་ནི། །བསྐྲད་པ་ལ་སོགས་ཐམས་ཅད་དང་། །གང་གཞན་ཅུང་ཟད་ཕལ་གྱི་རྣམས། །མཁས་པས་ཐ་མར་རིག་པར་བྱ། །རྫས་འབར་བ་ལས་རབ་ཏུ་འགྱུར། །དུ་བ་ཉིད་ལས་འབྲིང་དུ་འགྱུར། །དྲོད་ལས་དངོས་གྲུབ་ཐ་མར་འགྱུར། །དེ་ལྟར་དངོས་གྲུབ་རྣམ་གསུམ་པོ། །འཕགས་གསུངས་གསང་སྔགས་མཐུ་ཆེན་གྱིས། །དངོས་གྲུབ་རབ་ནི་འགྲུབ་པར་གྲགས། །ལྷ་ཡི་སྔགས་ཀྱིས་འབྲིང་པོ་གྲུབ། །ས་བླས་ཐ་མ་འགྲུབ་པར་གསུངས། །དེ་བཞིན་གཤེགས་པའི་རིག་པ་ཡི། །སྔགས་ཀྱིས་དངོས་གྲུབ་ཆེན་པོ་འཐོབ། །པདྨ་འཛིན་པས་གསང་སྔགས་ཀྱིས། །དངོས་གྲུབ་འབྲིང་པོ་ཐོབ་པར་བཤད། །རྡོ་རྗེ་འཛིན་པས་གསུངས་པ་ཡིས། །དངོས་གྲུབ་ཐ་མ་འགྲུབ་པར་བསྒྲགས། །རབ་ཀྱི་ཐ་མ་གང་ཡིན་པ། །དེ་དང་ཐ་མའི་རབ་མི་མཉམ། །དངོས་གྲུབ་ལྷག་མ་གཉིས་པ་ཡང་། །ཆོ་གའི་རིམ་པ་དེ་ཉིད་དོ། །འབྲས་བུའི་ཡོན་ཏན་བསྟན་པ་ཡི། །ཆེ་བའི་བྱེ་བྲག་རྣམ་གསུམ་ལས། །རབ་དང་འབྲིང་དང་ཐ་མ་ཡི། །བྱེ་བྲག་དེ་དག་རབ་ཏུ་བསྒྲགས། །སངས་རྒྱས་བྱང་ཆུབ་སེམས་དཔའ་ཡིས། །གསུངས་པའི་གསང་སྔགས་གང་ཡིན་པ། །དེ་ལས་དངོས་གྲུབ་རབ་འབྱུང་བ། །ཐ་མ་དག་ལ་ཡོད་པར་འགྱུར། །རྒྱས་པར་གསུངས་པའི་གསང་སྔགས་ལས། །ཁ་ཅིག་ལས་གཅིག་བྱེད་པའང་ཡོད། །དེ་དག་གི་ནི་ལས་དེ་ཡང་། །རབ་དང་འབྲིང་དང་ཐ་མར་བཤད། །ཁ་ཅིག་དེ་ལྟར་རིམ་མེད་པར། །དངོས་གྲུབ་རྣམས་ནི་འབྱུང་འགྱུར་ཏེ། །འདམ་ལས་པདྨ་སྐྱེ་བ་དང་། །ཙནྡན་ཤིང་ལས་མེ་འབྱུང་བཞིན། །རབ་དང་འབྲིང་དང་ཐ་མ་ལ། །ལུས་ཀྱི་དངོས་གྲུབ་རབ་ཡིན་ནོ། །རྫས་ལས་གྲུབ་བ་འབྲིང་ཡིན་ཏེ། །ལོངས་སྤྱོད་དངོས་གྲུབ་ཐ་མའོ། །ཐ་མའི་གསང་སྔགས་ཟློས་པ་ནི། །ལ་ལས་རབ་ཏུ་བསྙེན་བྱས་ན། །དངོས་གྲུབ་གཞན་ལས་བླངས་ནས་ནི། །མཆོག་ཀྱང་རབ་ཏུ་སྟེར་བར་འགྱུར། །རབ་ལའང་ལ་ལ་ཞིག་གིས་ནི། །མ་བསྒྲིམས་པར་ཡང་བསྙེན་བྱས་ན། །སྔགས་ཀྱི་དངོས་གྲུབ་ཐ་མ་སྩོལ། །དེ་བས་བསྙེན་པ་རབ་ཏུ་གཅེས། །ལྷ་རྣམས་ལ་ཡང་དབུལ་པོ་ཡོད། །ཡི་དྭགས་ལ་ཡང་མཐུ་ཆེན་ཡོད། །དེ་བཞིན་དངོས་གྲུབ་དག་ལ་ཡང་། །རྣམ་པ་སྣ་ཚོགས་ཡོད་པར་འགྱུར། །རབ་འབྲིང་ཐ་མ་རེ་རེ་ལའང་། །དངོས་གྲུབ་རྣམ་པ་གསུམ་དུ་དབྱེ། །གསང་སྔགས་རྣམས་ཀྱི་མཐུ་ཤེས་ནས། །བསྙེན་བ་ལས་ནི་དངོས་གྲུབ་བརྩམ། །དངོས་གྲུབ་དབྱེ་བའི་མཚན་ཉིད་རིམ་པར་ཕྱེ་བའོ།། །།ཟློས་པས་དང་པོ་ལྷ་ཁང་དུ། །ཞུགས་ཏེ་མཉམ་པར་བཞག་ནས་ནི། །ལྷ་ལ་མངོན་དུ་ཕྱོགས་འདུག་སྟེ། །ཐལ་མོ་སྦྱར་བས་ཕྱག་འཚལ་ནས། །རྗེས་སུ་མཐུན་པའི་མེ་ཏོག་དང་། །སྤོས་ཀྱི་ཆུ་ནི་གཙང་མ་ཡིས། །མཆོད་ཡོན་གོ་རིམས་བཞིན་བཤམས་ནས། །བདུག་སྤོས་ཀྱིས་ཀྱང་རབ་བདུགས་ཏེ། །ལན་བདུན་བཟླས་ནས་མཆོད་ཡོན་དེས། །ལྷ་རྣམས་དག་ནི་སྤྱན་དྲང་ངོ་། །གསང་སྔགས་སྤྱན་ནི་དྲངས་ནས་ཀྱང་། །དེ་ཡི་འོག་ཏུ་མཆོད་པ་བྱ། །གསེར་དང་དངུལ་དང་ཟངས་མ་དང་། །རྔོ་བ་དང་ནི་ཤིང་གིའམ། །ཁམ་པའམ་དུང་ངམ་ཉ་ཕྱིས་སམ། །དེ་བཞིན་ལོ་མ་སྐྱོངས་བའང་རུང་། །ཞི་དང་རྒྱས་དང་དྲག་སྤྱོད་དང་། །རབ་དང་འབྲིང་དང་ཐ་མ་ཡི། །ལས་དང་དངོས་གྲུབ་རྣམས་ལ་ནི། །རིགས་པའི་སྣོད་རྣམས་སྦྱར་བར་བྱ། །ཁ་དོག་ཡོན་ཏན་བཤད་པ་ལས། །གཞན་དང་གཞན་ཡང་ཅི་རིགས་པའི། །སྣོད་རྣམས་ཅི་ལྟར་འདོད་པ་ནི། །འདོད་ཡོན་ཕྱིར་ནི་རབ་ཏུ་སྦྱར། །ཞི་བའི་མཆོད་ཡོན་ནས་དང་བཅས། །ཏིལ་དང་བཅས་པ་རྒྱས་པ་ལ། །ཐམས་ཅད་དང་ནི་འགལ་བའི་ཕྱིར། །ཀྲོ་ཏྲ་བར་བཅས་དྲག་སྤྱོད་ལ། །ཞི་བའི་མཆོད་ཡོན་འོ་མ་ཅན། །རྒྱས་པ་ལ་ནི་ཞོ་ཅན་ནོ། །བ་ཡི་གཅིན་ནམ་ཡང་ན་ཁྲག །དྲག་ཤུལ་སྤྱོད་པའི་དོན་དུ་ཤིས། །རབ་དང་འབྲིང་དང་ཐ་མ་ཡི། །ལས་རྣམས་ཀུན་ལ་འབྲས་ཡོས་ཤིས། །སྤོས་དང་མེ་ཏོག་ཀུ་ཤ་ཏིལ། །ཆུ་རྣམས་བྱེ་བྲག་མེད་པར་བཟང་། །མཆོད་ཡོན་ཕྱིར་ནི་ཟངས་ཀྱི་སྣོད། །ལས་རྣམས་ཀུན་ལ་རབ་ཏུ་ཤིས། །འདི་མ་འབྱོར་གྱིས་བདག་ལ་ནི། །བཟོད་མཛོད་ཅི་འབྱོར་བས་ཀྱང་བྱ། །སྔགས་རྒྱུད་ལས་གསུངས་ཐམས་ཅད་ཀྱང་། །རིག་པའི་རྒྱལ་པོས་རིམ་བཞིན་དུ། །སྤྱན་དྲང་ཆོ་ག་བྱ་བར་བཤད། །ཡང་ན་གང་རྗེས་གང་འབྲང་བའི། །སྔགས་རྒྱུད་བདག་པོ་གང་ཡིན་དང་། །རིག་སྔགས་རྒྱལ་མོ་གང་ཡིན་ལ། །དེ་གཉིས་ཀྱིས་ནི་ཡོངས་བཟླས་ན། །དེ་ནས་དེ་ཡིས་མངོན་པར་བསྔགས། །རིགས་གསུམ་ལ་ཡང་དེ་བཞིན་དུ། །ཐམས་ཅད་སྤྱན་ནི་དྲང་བར་བྱ། །གང་དག་རང་རྒྱུད་ལས་གསུངས་བ། །དེ་དག་ལ་ནི་དེ་ཉིད་བཤག །བཞུད་ཅིག་ཞེས་ནི་བདག་པོའི་བཀའ། །ཟློས་པས་རབ་ཏུ་བསྒྲགས་ནས་བཞུད། །སྤྱན་ཡང་དྲངས་མ་ཐག་ཏུ་ནི། །གསང་སྔགས་དགྱེས་ནས་འབྱོན་པར་འགྱུར། །ལ་ལ་ཆོ་ག་གང་ཡིན་ལས། །སྤྱན་དྲངས་སླར་གཤེགས་བཤད་པ་དག །དེ་དག་གསོལ་བའི་ལས་བྱས་ནས། །རབ་ཏུ་དགྱེས་ནས་དེ་བཞིན་མཛད། །རིག་སྔགས་རྒྱལ་མོས་རིག་སྔགས་རྣམས། །སྤྱན་དྲང་བ་ཡི་ཆོ་ག་བྱ། །རིག་སྔགས་རྒྱལ་པོས་གསང་སྔགས་རྣམས། །གཞན་རྣམས་ལ་ནི་གཉིས་ཀས་སོ། །ལན་ཅིག་བཟླས་སམ་ལན་གསུམ་བཟླས། །ཡང་ན་ལན་བདུན་མངོན་པར་བསྔགས། །གསང་སྔགས་བྱེ་བྲག་རྣམས་ཤེས་ནས། །ཉི་ཤུ་རྩ་གཅིག་ཏུ་ཡང་བཟླས། །མཆོད་ཡོན་ཆོ་ག་བཞིན་བཟླས་ནས། །བདུག་སྤོས་དག་གིས་རབ་ཏུ་བདུག །གུས་པས་པུས་མོ་གཉིས་བཙུགས་ནས། །ལས་བྱེད་བཅས་པའི་ལག་པས་དབུལ། །དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདིར། །བདག་གི་མཆོད་ཡོན་དེ་བཞེས་ལ། །མཆོད་པས་བདག་ལ་དགྱེས་པར་མཛོད། །གསང་སྔགས་གང་དག་གཅིག་པུ་ལ། །དྲག་ཅིང་གཏུམ་ལ་ཕ་རོལ་གནོན། །དེ་ནི་རང་གི་སྔགས་ཉིད་ཀྱིས། །སྤྱན་དྲང་བ་ཡི་ཆོ་ག་བྱ། །གང་ཡང་ཕལ་པ་ཁ་ཅིག་དང་། །གང་ཡང་འཁོར་དུ་གྱུར་པ་དག །དེ་དག་རང་གི་སྔགས་ཉིད་ཀྱིས། །སྤྱན་དྲང་ཆོ་ག་བྱ་བར་བཤད། །རིག་སྔགས་རྒྱལ་དང་གསང་སྔགས་རྣམས། །མདོར་ན་སོ་སོའི་གསང་སྔགས་སམ། །ཐམས་ཅད་ལ་ཡང་སྙིང་པོ་ཡིས། །སྤྱན་དྲང་བ་ནི་མ ཆོག་ཏུ་བཤད། །མདོར་ན་མཁས་པས་མཆོད་ཡོན་དང་། །སྤྱི་ཡི་རིགས་ཀྱི་སྙིང་པོ་ཡིས། །ཚུར་གཤེགས་ཞེས་ནི་སྤྱན་དྲང་བ། །འདི་ནི་གསང་བར་རབ་ཏུ་བསྒྲགས། །རབ་ཏུ་དད་པས་ཕྱག་བྱ་སྟེ། །གསོལ་བ་ཡང་དང་ཡང་བྱས་ནས། །གསང་སྔགས་རྣམས་དང་རིག་སྔགས་དང་། །མཁས་པས་གུས་པས་སྤྱན་དྲང་ངོ་། །ཟློས་པས་མཉམ་གཞག་ལག་པ་གཉིས། །སྤྱི་བོར་བཞག་པའི་མཆོད་ཡོན་དག །གསང་སྔགས་མཆོག་ལ་ཕུལ་ན་ནི། །འོན་ཏང་སྤྱན་ནི་དྲང་བར་འགྱུར། །བར་མ་དག་ལ་བྲང་ཁ་ནས། །ཕལ་པ་རྣམས་ལ་ལྟེ་བ་ནས། །མཆོད་ཡོན་ཚུལ་བཞིན་བཟླས་དབུལ་བ། །སྤྱན་དྲང་ཆོ་ག་རིག་པར་བྱ། །མཆོད་ཡོན་སྔགས་ཀྱི་བཟླས་པ་ཡིས། །རི་མོའམ་ཡང་ན་གཟུགས་དག་ལ། །གསང་སྔགས་གང་དག་འགྲེང་སྣང་བ། །དེ་ལ་འགྲེང་སྟེ་སྤྱན་དྲང་བ། །འདུག་པ་ལ་ནི་འདུག་ནས་སོ། །བཟུར་བ་ལ་ནི་བཟུར་ནས་སོ། །སྤྱན་དྲང་ཕྱིར་ནི་མཆོད་ཡོན་དག །ཆོ་ག་བཞིན་དུ་དབུལ་བར་བགྱི། །གསང་སྔགས་ལ་ལའི་གནས་དག་ནི། །གང་དང་གང་གི་ཕྱོགས་ཡིན་པ། །ཕྱོགས་དེར་ཐོག་མར་བལྟས་ནས་ནི། །མཆོད་ཡོན་བཟླས་ཏེ་དེར་ཕྱོགས་ལ། །ལས་དེ་ཕྱོགས་སུ་བལྟས་ནས་ནི། །དེ་ནས་མཆོད་ཡོན་དབུལ་བར་བྱ། །འདི་ནི་སྤྱན་དྲང་ཆོ་ག་གཞན། །གསང་བའི་དམ་པ་བཤད་པ་ཡིན། །ཐལ་སྦྱར་མཆོད་ཡོན་མེ་ཏོག་དང་། །ཡིད་ཀྱིས་སམ་ནི་ཆུས་ཀྱང་རུང་། །མཁས་པས་སྤྱན་དྲང་ཆོ་ག་ནི། །གང་དུའང་རུང་བར་མདུན་དུ་བྱས། །གསང་སྔགས་ཀུན་གྱི་ཆོ་ག་འདིར། །སྔགས་དང་ཕྱག་རྒྱར་ལྡན་པ་ཡིས། །སྤྱན་དྲང་ཆོ་གར་གསུངས་པ་དག །འདི་ནི་ཀུན་གྱི་སྤྱི་ཡིན་ནོ། །སྒྲུབ་པོས་སྔོན་དུ་བསྙེན་པ་དང་། །མཆོད་པ་ལ་སོགས་ལས་རྣམས་དང་། །ལས་ཀྱི་ཆོ་ག་བྱེད་པས་ན། །སྤྱན་དྲང་བ་ནི་ཡིད་ཀྱིས་བྱ། །ཇི་ལྟར་མཐུན་པའི་ཆོ་ག་བཞིན། །སྤྱན་དྲང་ཆོ་ག་བཤད་པ་ནི། །ཐམས་ཅད་དོན་བྱེད་ཕྱིར་གསུངས་ཏེ། །ཕྲན་ཚེགས་དག་ལ་ཕལ་གྱིས་བྱ། །ཟློས་པས་སྤྱན་ནི་དྲངས་ནས་ཀྱང་། །ཆོ་ག་བཞིན་དུ་མཉེས་བྱས་ནས། །གསང་སྔགས་ཀྱི་ནི་བྷ་རྣམས་ཀྱང་། །ཕན་འདོགས་ལ་སོགས་ཐམས་ཅད་མཛད། །སྤྱན་དྲང་བའི་ཆོ་ག་རིམ་པར་ཕྱེ་བའོ།། །།སྒྲུབ་པ་པོས་ནི་ལས་ཀུན་ལ། །ལྷ་རྣམས་སྤྱན་དྲངས་བྱས་ནས་ནི། །གསང་སྔགས་རིམ་པར་ཕྱེ་བ་བཞིན། །ཆོ་ག་ཤེས་པས་མཆོད་པ་བརྩམ། །བདེ་བར་གཤེགས་སོ་བཅོམ་ལྡན་འདས། །ཚུར་གཤེགས་འདིར་ནི་བཞུགས་སུ་གསོལ། །བདག་གི་མཆོད་པ་བཞེས་ནས་ཀྱང་། །ཐུགས་ཀྱིས་ཐུགས་དཔག་མཛད་དུ་གསོལ། །བདག་ནི་གུས་དང་ལྡན་ནོ་ཞེས། །ལྷ་ལ་ཡང་དང་ཡང་གསོལ་ནས། །གསང་སྔགས་སྒྲུབ་པས་དུས་གསུམ་དུ། །ཆོ་ག་འདིས་ནི་མཆོད་པ་བྱ། །སྔོན་གྱི་སྔགས་རྒྱུད་ལུང་གིས་ནི། །ཐོག་མར་དྲི་རྣམས་དབུལ་བར་བྱ། །དེ་ནས་མེ་ཏོག་རྗེས་མཐུན་པའོ། །དེ་ནས་བདུག་སྤོས་རབ་ཏུ་བསྒྲགས། །དེ་ནས་ལྷ་བཤོས་རྗེས་མཐུན་པའོ། །མར་མེ་ཐ་མར་རབ་ཏུ་སྦྱར། །ཁྲོ་བོའི་རྒྱལ་པོས་བསངས་པའི་རྫས། །གཙང་ཞིང་ངན་པ་མ་ཡིན་པ། །རྗེས་སུ་མཐུན་ཞིང་ཡོན་ཏན་ཅན། །བློ་དང་ལྡན་པས་གུས་པས་དབུལ། །སོ་སོ་ཡི་ནི་གསང་སྔགས་ཀྱིས། །རེ་རེ་ལ་ཡང་མངོན་བསྔགས་ནས། །མཆོད་པའི་ཡན་ལག་ཅི་དགར་དབུལ། །སོ་སོ་སོ་སོར་མཆོད་ཡོན་དབུལ། །ཆེ་གེ་མོ་འདི་བཞེས་ཤིག་ཅེས། །རྫས་ཀྱི་མིང་ནས་ཕྱུང་སྟེ་དབུལ། །མ་འབྱོར་ན་ཡང་གཟུགས་བརྙན་རྣམས། །བྱས་ནས་མཆོད་ཡོན་དབུལ་བར་བྱ། །གུས་དང་མཆོད་ཡོན་ཕུལ་བ་ཡིས། །ཆོ་ག་ཐམས་ཅད་རྫོགས་པར་འགྱུར། །ཐལ་སྦྱར་མཆོད་ཡོན་བློས་མཆོད་དང་། །ཆོ་གའི་ཡན་ལག་ཉིད་དང་གཞིའོ། །མཆོད་པའི་ཆོ་ག་ཐམས་ཅད་ལ། །ཇི་ལྟར་རིགས་པར་སྦྱར་བར་བྱ། །རྣམ་པ་ཀུན་ལས་མཁས་པ་ནི། །རྟག་ཏུ་ཅི་ནུས་པས་ཀྱང་རུང་། །ཆོས་ཀྱི་ཐོག་མར་ཡིད་འགྲོ་ཞེས། །ཐུབ་པ་ཆེན་པོས་བཀའ་སྩལ་བས། །ཡིད་ཀྱི་མཆོད་པ་ཁྱད་པར་ཅན། །ལེགས་པ་ཉིད་དུ་བརྩམ་པར་བྱ། །མཆོད་པའི་རིམ་པར་ཕྱེ་བའོ།། །།ཡིད་ནི་རབ་ཏུ་མཉམ་བཞག་ནས། །ཆོ་ག་ལྷག་མ་བྱ་བར་བཤད། །སྒྲུབ་པ་པོས་ནི་ཐོག་མ་རུ། །ཁྲོ་བོའི་རྒྱལ་པོས་བསྐྲད་པར་བྱ། །ཡང་ན་རིག་སྔགས་སོ་སོ་ཡི། །ལས་ཀུན་བྱེད་པའི་རིག་སྔགས་ཀྱིས། །ན་མོ་རཏྣ་ཏྲ་ཡཱ་ཡ། ན་མཤྩ་ཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མཤྩཎྜ་བཛྲ་ཀྲོ་དྷྭ་ཡ། ༀ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ་སྭཱ་ཧཱ། ༀ་ཏྲཾ་བནྡྷ་སྭཱ་ཧཱ། ན་མོ་མ་ཧཱ་ཤྲི་ཡཻ། ༀ་ཤ་མེ་ས་མ་ཡེ་ས་མེ་སིདྡྷི་སིདྡྷི་སཱ་དྷ་ཡ་ཤི་བེ་ཤི་བཾ་ཀ་རི། ཨཱ་བ་ཧ་སརྦ་ཨརྠ་སཱ་དྷ་ནི་སྭཱ་ཧཱ། རིགས་གསུམ་གྱི་ལས་ཐམས་ཅད་བྱེད་པའི་གསང་སྔགས་སོ། །ཁྲོ་བོའི་གསང་སྔགས་རྒྱར་བཅས་པས། །མེ་ཏོག་ལ་སོགས་རྣམ་པར་བསང་། །ལག་པ་གཡོན་པར་བཞག་པའི་ཆུས། །ཐོག་མ་ཉིད་དུ་བསང་གཏོར་བྱ། །བདག་པོའི་སྔགས་ཀྱིས་བྱ་བའམ། །ཡང་ན་རིགས་ཀྱི་སྙིང་པོས་བྱ། །མདོར་ན་གསང་སྔགས་ཐམས་ཅད་ཀྱང་། །ཕྱག་རྒྱར་བཅས་པས་བསང་བར་བྱ། །བདག་ཉིད་རྣམ་པར་སྦྱང་བའི་ཕྱིར། །སྤོས་ཆུས་ལག་མཐིལ་བླུགས་པ་ལ། །བལྟ་ཞིང་དེ་ཡི་སྙིང་པོ་བཟླས། །རང་གི་སྤྱི་བོར་བསང་གཏོར་བྱ། །སྟན་ཡང་རྣམ་པར་སྦྱང་བའི་ཕྱིར། །ལས་ཀུན་བྱེད་པའི་གསང་སྔགས་སམ། །ཡང་ན་ཁྲོ་བོའི་རྒྱལ་པོ་ཡིས། །སྤོས་ཀྱི་ཆུས་ནི་བསང་གཏོར་བྱ། །ལན་བདུན་བཟླས་བརྗོད་བྱས་པའི་ཆུས། །ས་ཕྱོགས་ཀུན་དུ་བསང་གཏོར་བྱ། །བསང་བ་དང་ནི་སྦྱང་བ་དག །གསང་སྔགས་འདིས་ནི་བྱས་པར་འགྱུར། །ༀ་ཀཱི་ལི་ཀཱི་ལ། བཛྲཱི་བཛྲཱི་བྷུར་བནྡྷ་བནྡྷ་ཧཱུྃ་ཕཊ། དེ་ནས་སྟེང་དུ་བློ་ཅན་གྱིས། །རིག་པའི་རྒྱལ་པོ་འདི་འདོན་ཅིང་། །བདུག་པས་ལྷ་རྣམས་བསང་བ་དང་། །བཅིང་བ་དང་ནི་སྦྱང་བར་བྱ། །ༀ་སུ་སིདྡྷི་ཀ་ར་ཛྭ་ལ་ཧི་ཨ་ནནྟ་མཱུརྟ་ཡེ། ཛྭ་ལ་ཛྭ་ལ། བནྡྷ་བནྡྷ། ཧ་ན་ཧ་ན་ཧཱུྃ་ཕཊ། ཐམས་ཅད་སྤྱིའི་འོ། །ༀ་ཛྭ་ལ་ཧཱུྃ། དེ་བཞིན་གཤེགས་པའི་རིགས་ལའོ། །ༀ་པདྨ་ནི་བྷ་ག་བ་ཏི། མོ་ཧ་ཡ། ཛ་གད་མོ་ཧ་ནི་སྭཱ་ཧཱ། པདྨའི་རིགས་ལའོ། །དེ་ནས་བློ་དང་ལྡན་པ་ཡིས། །རིགས་ཀྱི་སྙིང་པོ་ཡོངས་བཟླས་པའི། །སྤོས་ཆུས་ཁོ་ར་ཁོར་ཡུག་ཏུ། །ཐམས་ཅད་དུ་ནི་ཕྱོགས་བཅིང་བའོ། །རིག་སྔགས་རྒྱལ་པོའི་སྙིང་པོའམ། །བདག་གི་རིག་སྔགས་རྒྱལ་པོའམ། །རང་གི་གསང་སྔགས་མངག་གཞུག་པས། །ཕྱོགས་བཅིང་བ་ནི་གུས་པར་བྱ། །བྷྲཱུཾ་ༀ་ཨ་མྲྀ་ཏོདྦྷ་བ་ཧཱུྃ་ཕཊ། ན་མོ་རཏྣ་ཏྲ་ཡཱ་ཡ། ན་མཤྩཎྜཱ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ༀ་སུམྦྷ་ནི་སུམྦྷ་ཧཱུྃ། གྲྀཎྞ་གྲྀཎྞ་ཧཱུྃ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ། ཨཱ་ན་ཡ་ཧོ་བྷ་ག་བན་བིདྱཱ་རཱ་ཛ་ཧཱུྃ་ཕཊ་སྭཱ་ཧཱ། རིགས་གསུམ་གྱི་རིག་པའི་རྒྱལ་པོའི་སྔགས་སོ། །དེ་དག་ཉིད་ཀྱི་སྙིང་པོ་ཡིས། །ར་བ་རྣམས་ཀྱང་རབ་ཏུ་སྦྱར། །རིགས་ཀྱི་རིག་སྔགས་རྣམས་ཀྱིས་ནི། །ལྷ་རྣམས་ཡོངས་སུ་བསྲུང་བར་བྱ། །ལས་རྣམས་ཀུན་ལ་ཐམས་ཅད་དུ། །བགེགས་ལ་སོགས་པ་བསལ་བ་ལས། །རྣམ་པར་རྟོག་པའི་ཆོ་ག་ཡིས། །བདུད་རྩི་ཐལ་སྦྱོར་རབ་ཏུ་སྦྱར། །ཁང་བའི་ཁོ་ར་ཁོར་ཡུག་ཏུ། །དྲ་བ་ར་བ་ཕུར་བུ་དག །ཀཱི་ལི་ཀཱི་ལ་བདུད་རྩི་ཞེས། །ཁྲོ་བོ་གཉིས་ནི་རྟག་ཏུ་སྦྱར། །བསྲུང་བའི་གསང་སྔགས་ཐ་དད་པ། །ཆོ་ག་ལས་བསྟན་གང་ཡིན་པ། །དེ་ཉིད་འདིར་ནི་སྦྱར་བར་བྱ། །ཡང་ན་གང་ལ་དད་པའང་རུང་། །བཅོམ་ལྡན་སྤྱན་ནི་གང་ཡིན་དང་། །གོས་དཀར་ཅན་མ་གང་ཡིན་དང་། །རིག་སྔགས་མཱ་མ་ཀཱི་གང་ཡིན། །དེ་དག་ཐོག་མར་ཡོངས་སུ་བཟླས། །དེས་ནི་བདག་དང་ལྷ་ཡང་བསྲུང་། །སྡིག་པ་ཐམས་ཅད་བྱང་བར་འགྱུར། །བགེགས་རྣམས་སྨ་ཡང་འབེབས་པ་དང་། །བསམས་པའི་འབྲས་བུ་མངོན་དུ་འགྱུར། །རིག་སྔགས་མཱ་མ་ཀཱི་གཅིག་པུ། །རྒྱལ་དང་པདྨའི་རིགས་ལ་ཡང་། །བློ་ཅན་བདག་གི་གཟུངས་སུ་འདོད། །ཐམས་ཅད་ལ་ཡང་རབ་ཏུ་སྦྱར། །ཆོ་ག་ལས་བཤད་གསང་སྔགས་ཀྱིས། །བསྲུང་བའི་ལས་རྣམས་བརྩམ་དུའང་རུང་། །ཡང་ན་དཔའ་བོ་གཅིག་པུ་ཡིས། །ཐམས་ཅད་ཆོ་ག་བཞིན་དུ་བྱ། །དེ་ལྟར་གསང་སྔགས་ཐམས་ཅད་ནི། །དཀྱིལ་འཁོར་ལས་བཤད་ཆོ་ག་བཞིན། །བསྙེན་པའི་ཚེ་ཡང་ཟློས་པ་པོས། །མ་ལུས་པ་ལས་ཤེས་པར་བྱ། །གང་ཡང་རིགས་བདག་གསང་སྔགས་སམ། །རིགས་ཀྱི་སྙིང་པོ་གང་ཡིན་པའམ། །གསང་སྔགས་ཀུན་གྱི་རྒྱལ་པོའམ། །གང་ཡང་སྔགས་རྒྱུད་རྒྱལ་པོའམ། །ལས་ཀུན་བྱེད་པའི་གསང་སྔགས་ནི། །གསུམ་ག་ལ་ཡང་དེ་དག་གིས། །རང་རིགས་ལས་ལ་བྱེ་བྲག་ཏུ། །ཟློས་པ་པོས་ནི་བྱ་བར་རིགས། །བསྲུང་དང་སྤྱན་དྲང་སྦྱང་བ་དང་། །བཅིང་དང་ཕྱིར་བཟློག་མནན་པ་དང་། །དགང་དང་གཞིལ་བར་བྱ་བ་དང་། །ཚར་གཅད་པ་དང་བསྐུལ་བ་དང་། །དེ་ལ་སོགས་པའི་ལས་རྣམས་ཀུན། །རིགས་གསུམ་དག་ནི་ཐམས་ཅད་དང་། །དངོས་གྲུབ་དག་ལ་དེ་དག་གིས། །སྒྲུབ་པ་པོས་ནི་ཐམས་ཅད་བྱ། །བདག་གི་གསང་སྔགས་བདག་ཉིད་ཀྱང་། །སྙིང་པོ་དེ་དག་གཉིད་ཀྱིས་བསྲུང་། །གཙུག་ཕུད་གོས་དང་བསང་ཕྱེད་ལ། །མདུད་པ་བོར་ཏེ་བདུན་གསུམ་བཟླས། །སྙིང་གར་མཐེ་བོ་རྩེ་བཙུགས་ཏེ། །བདག་ཉིད་བསྲུང་བའི་ཕྱིར་བཟླས་སོ། །ཡང་ན་ཐལ་བའམ་ཡུངས་ཀར་ཆུས། །བདག་ཉིད་བསྲུང་བར་སྤྱད་པར་བྱ། །དྲག་པོ་ཡི་ནི་ལས་རྣམས་ལ། །བདག་པོའི་སྔགས་ཀྱིས་བསྲུང་བ་བྱ། །སྒྲུབ་པ་པོས་ནི་ཞི་བ་ལའང་། །གསང་སྔགས་དྲག་པོས་ནན་ཏན་བྱ། །ལྷ་རྣམས་བྱིན་གྱིས་རློབ་པ་ཡང་། །བདག་གི་སྔགས་ཀྱིས་མཛད་པར་འགྱུར། །བདག་གི་སྔགས་ལ་འཇིགས་དོགས་ན། །བསྲུང་བ་བདག་པོས་བྱ་བར་བཤད། །སྒྲུབ་པ་པོ་ནི་བློ་ཅན་གྱིས། །གཉིས་ཀར་རྟག་པར་ལས་རྣམས་ལ། །བདག་ཉིད་བསྲུང་བའི་ཆོ་ག་དང་། །གཙང་མས་ལྷག་པར་ལེགས་པར་བྱ། །ལྷ་ཡི་ཁང་བའི་ཕྱི་རོལ་དུ། །གཅིག་པུ་ཅི་དགར་སྤྱོད་པ་ན། །ལྷ་རྣམས་ཡོངས་སུ་བསྲུང་བའི་ཕྱིར། །བདག་ཉིད་བཞིན་དུ་ཀུན་ཏུ་སྤྱད། །ཕྱི་རོལ་ཆགས་ལ་སོགས་པ་དང་། །ནམ་ཡང་གང་དག་མི་གཙང་བར། །ཁྲོ་བོ་འཆོལ་བའི་གསང་སྔགས་ཀྱིས། །དེ་ཚེ་བསྲུང་བར་བྱ་བར་བཤད། །ན་མོ་བཛྲཱ་ཡ། ༀ་བཛྲ་ཀྲོ་དྷ་མ་ཧཱ་པ་ལ་ཧ་ན་ད་ཧ་པ་ཙ་བིདྷན་ས་ཡ་ཨུཙྪུཤྨ་ཀྲོ་དྷ་ཧཱུྃ་ཕཊ། ཁྲུས་བྱེད་ཚེ་ན་བགེགས་ཀྱི་དགྲས། །བསྲུང་བ་རྟག་ཏུ་བྱ་བར་བཤད། །ཟན་ཟའི་ཚེ་ན་བདག་པོས་བསྲུང་། །ཉལ་ཚེ་རིགས་ཀྱི་རིག་སྔགས་ཀྱིས། །རིགས་གསུམ་ལ་ཡང་རྟག་པར་ནི། །བགེགས་རྣམས་ཀུན་གྱིས་གླགས་གྱུར་ལ། །རིག་སྔགས་རྒྱལ་པོ་ཞེས་བྱ་བ། །དེས་ནི་བསྲུང་བ་བྱ་བར་བཤད། །བསྲུང་བའི་རིམ་པར་ཕྱེ་བའོ།། །།ༀ་ཨེ་ཀ་ཛྭ་ལ་བཛྲ་པཱ་ཎི་ཧཱུྃ། ས་མ་ཡ་མ་ནུ་སྨ་ར་ཧཱུྃ་ཕཊ་སྭཱ་ཧཱ། དེ་ལ་སོགས་པ་མ་ལུས་པ། །དེ་ལྟར་བསྲུང་བ་བྱས་ནས་ནི། །བདག་གི་ཡིད་ནི་མཉམ་བཞག་སྟེ། །བཟླས་བརྗོད་བྱ་བ་ཀུན་དུ་བརྩམ། །ཀུ་ཤ་སྔོན་པོའི་རྩྭ་སྟན་ནི། །འཕང་དུ་སོར་བཞི་ཡོད་པ་ལ། །མཉམ་ཞིང་ཞེང་དུ་མཐོ་གང་བ། །སྲིད་དུ་སོར་ནི་བཅུ་དྲུག་བྱ། །སྔོན་དུ་བསྙེན་པའི་བཟླས་བརྗོད་ཚེ། །དེ་དག་ཐམས་ཅད་བྱ་བར་གསུངས། །དེ་དག་མ་འབྱོར་ཀུ་ཤའི་རྩྭའམ། །ཡང་ན་འཇག་མ་སྔོན་པོའང་རུང་། །ལས་ཀྱི་བྱེ་བྲག་ཇི་ལྟ་བར། །ཤིང་ལས་བྱས་པའི་སྟན་ཡང་རུང་། །དེ་ཡི་ཚད་དུ་ལེགས་བཞོགས་པའི། །ཤིང་གི་ཁྲིའུའང་རབ་ཏུ་ཤིས། །འདབ་མ་གཙང་མ་དེ་དང་དེ། །ཁྱད་པར་དུ་ནི་ལས་ཀུན་ལ། །མན་ངག་བསྟན་པ་དེ་ཡིས་ནི། །ལོ་མའི་སྟན་ཡང་བཤད་པ་ཡིན། །མཆོག་ལ་སོགས་པའི་བྱེ་བྲག་གིས། །སྤྱི་ཡི་ལས་རྣམས་ཐམས་ཅད་དང་། །སྐྱིལ་ཀྲུང་བཀྲ་ཤིས་བཟང་པོ་སྟེ། །དེ་དག་འདུག་ཐབས་གསུམ་ཡིན་ནོ། །མཁས་པས་དེར་ཡང་འདུག་ནས་ནི། །མཆོད་པའི་ཆོ་ག་ལེགས་བྱས་ནས། །བློ་ཡིས་གུས་པ་རབ་བསྐྱེད་དེ། །བཅོམ་ལྡན་དེ་བཞིན་གཤེགས་པ་བསྟོད། །དེ་ནས་ཆོས་དང་དགེ་འདུན་ལ། །དེ་ནས་སྤྱན་རས་གཟིགས་དབང་ཕྱུག །དེ་ནས་རིག་པའི་རྒྱལ་པོ་ཆེ། །རྡོ་རྗེ་འཆང་བ་བསྟོད་པར་བྱ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པས་འདོད་ཆགས་བྲལ་བར་འགྱུར། །དགེ་བས་ངན་སོང་ལས་གྲོལ་བ། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཐོབ་པ། །བསླབ་པ་དག་ལ་རབ་ཏུ་གནས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་བསགས་པ། །སྤྱན་རས་གཟིགས་ཞེས་མཚན་གསོལ་བ། །རྟག་པར་བརྩེ་ལ་ཕྱག་འཚལ་ལོ། །སྟོབས་པོ་ཆེ་ལ་དྲག་ཤུལ་ཅན། །རིག་སྔགས་རྒྱལ་པོ་དགེ་བ་དག །གདུལ་དཀའ་བ་དག་འདུལ་བ་པོ། །རྡོ་རྗེ་འཛིན་པ་ཕྱག་འཚལ་ལོ། །དེ་ལྟར་གུས་པར་ཐལ་སྦྱར་ནས། །རྒྱལ་སྲས་གཞན་ཡང་བསྟོད་པ་ནི། །བྱང་ཆུབ་སེམས་དཔའི་གཞུང་གིས་བསྟོད། །དེ་ནས་སྡིག་པ་སོ་སོར་བཤགས། །འཇིག་རྟེན་དག་གི་ཕྱོགས་ཀུན་ན། །དེ་བཞིན་གཤེགས་པ་གང་བཞུགས་དང་། །དགྲ་བཅོམ་བྱང་ཆུབ་སེམས་དཔའ་དག །དེ་དག་བདག་ལ་དགོངས་སུ་གསོལ། །ཚེ་རབས་གང་ཡང་རུང་བ་ན། །བདག་གིས་སྡིག་པ་གང་བགྱིས་དང་། །སྔོན་གྱི་ཚེ་རབས་གཞན་དག་དང་། །ཚེ་རབས་འདི་དང་འཁོར་བ་ན། །འདོད་ཆགས་དབང་དང་བླུན་པ་དང་། །ཁྲོ་བ་དག་གིས་འཁྲུགས་གྱུར་ཏེ། །སངས་རྒྱས་ཆོས་དང་དགེ་འདུན་ནམ། །བླ་མ་དག་དང་ཕ་མ་དང་། །དགྲ་བཅོམ་བྱང་ཆུབ་སེམས་དཔའ་དང་། །སྦྱིན་གནས་གང་ཡང་རུང་བ་དང་། །དེ་ལ་གཞན་པའི་སེམས་ཅན་དག །ཡོན་ཏན་ལྡན་དང་མི་ལྡན་ལ། །སྡིག་པའི་ལས་རྣམས་གང་བགྱིས་དང་། །གང་ཡང་འགྱིད་དུ་སྩལ་བ་དང་། །གང་ཡང་ཅུང་ཟད་ཡི་རང་བ། །བག་མེད་པས་ནི་ཕྲ་མོ་ཡང་། །ལུས་ངག་ཡིད་ཀྱིས་བགྱིས་པ་རྣམས། །དེ་དག་མ་ལུས་བློས་བསྡུས་ནས། །རྫོགས་པའི་སངས་རྒྱས་སྲས་བཅས་པ། །བདག་གིས་ད་ནི་མངོན་སུམ་བཞིན། །རབ་ཏུ་གུས་པས་ཕྱག་འཚལ་ལོ། །སྐྱོ་བའི་ཡིད་དུ་གྱུར་པ་ཡིས། །ཐལ་མོ་སྦྱར་ཏེ་ནོངས་པའི་རྣམས། །ཡང་དང་ཡང་དུ་སོ་སོར་བཤགས། །བདག་གིས་མི་དགེ་བགྱིས་པའི་རྣམས། །རྫོགས་སངས་རྒྱས་ཀྱིས་མཁྱེན་པ་བཞིན། །དེ་ལྟར་བདག་གིས་སོ་སོར་བཤགས། །སླན་ཆད་དེ་ལྟར་ཡོང་མི་འགྱིད། །སྲོག་ཆགས་སྡུག་བསྔལ་ཞི་བྱའི་ཕྱིར། །བདག་ཉིད་ཇི་སྲིད་འཚོ་བར་དུ། །སངས་རྒྱས་ཆོས་དང་དགེ་འདུན་པ། །གུས་པར་ཡང་དག་སྐྱབས་སུ་མཆི། །དེ་ཡི་ཡོན་ཏན་གུས་བསྒྲགས་ཏེ། །ས་ལ་མགོ་བོས་གཏུགས་ནས་ནི། །དཀོན་མཆོག་གསུམ་ལ་བློ་ཅན་གྱིས། །དེ་ལྟར་གུས་པས་སྐྱབས་སུ་འགྲོ། །དེ་ནས་མཆོག་གི་ས་བོན་གང་། །ཐར་པ་བདུད་རྩི་འབྲས་བུ་སྦྱིན། །ཤིན་ཏུ་བསྒོམས་ནས་མཆོག་གྱུར་པ། །དངོས་གྲུབ་ཕྱིར་ནི་དེ་བསྐྱེད་དོ། །སེམས་ཅན་ཁམས་ནི་མཐའ་ཡས་པའི། །སྡུག་བསྔལ་ཉེ་བར་ཞི་བ་དང་། །ངན་འགྲོ་རྣམས་ལས་བསྒྲལ་པ་དང་། །ཉོན་མོངས་རྣམས་ལས་དགྲོལ་བའི་ཕྱིར། །སྲིད་པ་མི་བདེ་དོག་པ་ན། །སྡུག་བསྔལ་སྣ་ཚོགས་ཅི་མཆིས་པ། །དེ་ལྟས་ཡོངས་སུ་བསྐྱབ་པའི་ཕྱིར། །བདག་གིས་བྱང་ཆུབ་སེམས་བསྐྱེད་དོ། །སེམས་ཅན་ཕོངས་པ་ཐམས་ཅད་ཀྱི། །སྐྱབས་སུ་བདག་ཉིད་རྟག་ཏུ་ཤོག །བདག་ནི་མགོན་མེད་རྣམས་ཀྱི་མགོན། །རྟེན་མེད་རྣམས་ཀྱི་རྟེན་དུ་བདག །སྐྱབས་མེད་རྣམས་ཀྱི་སྐྱབས་འགྱུར་ཞིང་། །སྡུག་བསྔལ་བདེ་བར་བྱེད་པ་དང་། །བདག་ནི་སེམས་ཅན་ཐམས་ཅད་ཀྱི། །ཉོན་མོངས་ཞི་བར་བྱེད་པར་ཤོག །དགེ་བའི་ལས་རྣམས་གང་དང་གང་། །འདི་དང་གཞན་དུ་བསགས་པ་རྣམས། །བསོད་ནམས་ཡེ་ཤེས་ཞེས་བྱ་བའི། །ཚོགས་ནི་རྣམ་པ་གཉིས་སུ་ཤོག །ཕ་རོལ་ཕྱིན་པ་དྲུག་སྒོ་ནས། །བདག་གིས་བརྩོན་འགྲུས་གང་བརྩམས་པ། །དེ་ཡང་སེམས་ཅན་མ་ལུས་པ། །ཐམས་ཅད་ལ་ནི་ཕན་པར་ཤོག །ཚེ་ཡི་མཐའ་ཀླས་བྱེད་པ་དང་། །གང་ཡང་ཅུང་ཟད་བྱེད་འགྱུར་བ། །མདོར་ན་སེམས་ཅན་ཐམས་ཅད་ཀྱི། །ཉོན་མོངས་ཐམས་ཅད་ཞི་བ་དང་། །གྲོལ་བར་བྱ་བའི་ཕྱིར་འབད་ཅིང་། །བྱང་ཆུབ་རབ་ཏུ་དགའ་བརྩོན་ནོ། །དེ་ནས་རྫོགས་པའི་བྱང་ཆུབ་སེམས། །ཆོ་ག་བཞིན་དུ་ཀུན་དུ་བསྐྱེད། །སེམས་ཅན་ཀུན་ལ་སྙིང་རྗེ་དང་། །བྱམས་པ་ཉེ་བར་གནས་པར་བྱ། །སེམས་ནི་ལེགས་པར་སྦྱང་བའི་ཕྱིར། །སྣ་ཚོགས་ཐབས་ཀྱིས་རྗེས་དྲན་དྲུག །ནང་གི་བདག་ཉིད་ཞི་བ་ཡིས། །བསམ་པ་གཅིག་ཏུ་བསྒོམ་པར་བྱ། །སྔོན་གྱི་རྒྱལ་བའི་སྲས་རྣམས་ཀྱིས། །སྨོན་ལམ་ཇི་ལྟར་མཛད་པ་བཞིན། །བདག་ཀྱང་དགེ་བའི་སེམས་ཀྱིས་སུ། །དེ་བཞིན་དུ་ནི་སྨོན་ལམ་འདེབས། །ཆོས་ཀྱི་ལོངས་སྤྱོད་སྣ་ཚོགས་ལ། །མཉམ་པ་བཞག་ནས་ཡི་རང་ངོ་། །སེམས་ཅན་ཐམས་ཅད་བདེ་བ་དང་། །ཞི་ཞིང་ནད་ཀྱང་མེད་པར་ཤོག །བདག་ནི་བྱ་བ་ཀུན་ནུས་ཤིང་། །ཡོན་ཏན་དང་ཡང་ལྡན་པར་ཤོག །ནོར་ལྡན་གཏོང་ཕོད་ཤེས་རབ་ཅན། །བཟོད་ལྡན་དགེ་ལ་དད་པ་དང་། །སེམས་ཅན་ཚེ་རབས་ཐམས་ཅད་དུ། །སྐྱེ་བ་དྲན་ཞིང་བརྩེར་ལྡན་ཤོག །དེ་ནས་ཐལ་མོ་མཉམ་སྦྱར་ནས། །བླ་མ་ལ་ནི་ཕྱག་འཚལ་ནས། །རིག་སྔགས་རྒྱལ་པོ་དྲན་བྱས་ཏེ། །མཁས་པས་ཆོ་ག་འདི་དག་བྱ། །སྔགས་ཀྱི་ནོར་བུ་བླངས་ནས་ནི། །ལག་པའི་སྙིམ་པར་བཅུག་ནས་སུ། །རིག་སྔགས་རྒྱལ་པོ་ལན་ཅིག་བསམ། །དེ་ནས་གསང་སྔགས་འདི་བཟླས་སོ། །ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་བཱ་ཱཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ༀ་ཀི་རི་ཀི་རི་ར་དྲི་ནི་སྭཱ་ཧཱ། རྡོ་རྗེའི་རིགས་ལའོ། །ན་མོ་རཏྣ་ཏྲ་ཡཱ་ཡ། ༀ་ཨུདྦྷུ་ཏེ་བི་ཛ་ཡ་སིདྡྷི་སིདྡྷ་ར་ཏེ་སྭཱ་ཧཱ། དེ་བཞིན་གཤེགས་པའི་རིགས་ལའོ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། ༀ་ཨ་མི་ཏ་ག་མེ། ཤྲི་ཡེ་ཤྲི་ཡ་ནི་ལི་སྭཱ་ཧཱ། པདྨའི་རིགས་ལའོ། །མཐེ་བོང་དང་ནི་སྲིན་ལག་གིས། །ལས་རྣམས་ཀུན་ལ་ནོར་བུ་དང་། །མཁས་པས་དྲག་པོའི་ལས་རྣམས་ལ། །མཛུབ་མོས་དྲང་བར་རབ་ཏུ་བསྒྲགས། །རྒྱལ་བའི་རིགས་ལ་བོ་དེ་ཙེ། །སྔགས་ཀྱི་ནོར་བུར་རབ་ཏུ་བསྒྲགས། །པདྨའི་རིགས་ལ་པདྨའི་སྙིང་། །རྡོ་རྗེའི་རིགས་ལ་རུ་དྲཱཀྵ། །རིགས་གསུམ་དག་ནི་ཐམས་ཅད་ལ། །ནོར་བུ་དེ་དག་རབ་ཏུ་བསྒྲགས། །བཟླས་བརྗོད་བྱེད་པའི་ལས་ཀུན་ལ། །དེ་དག་དགེ་ཞིང་མཆོག་ཏུ་བཤད། །ལུང་ཏང་ཏ་ལའི་འབྲས་བུ་དང་། །དུང་དང་ཁམ་པ་ལས་བྱུང་དང་། །ཤེལ་དང་མུ་ཏིག་བ་སོ་དང་། །དེ་བཞིན་བྱི་རུ་ནོར་བུ་དང་། །ས་བོན་རྣམས་པ་སྣ་ཚོགས་དང་། །ལྦུ་མ་དག་གི་ཕྲེང་བའང་རུང་། །སྔགས་ཕྱི་ནོར་བུ་དེ་དག་རྣམས། །ཆོ་ག་འདི་ལས་རབ་ཏུ་བསྒྲགས། །རིགས་དང་བྱེ་བྲག་ལ་སོགས་ལས། །གཅེས་ཤིང་ཁ་དོག་ཅི་ལྟ་བར། །མཁས་པས་འདི་ལྟར་རིག་པར་བྱ། །དྲག་ཤུལ་སྤྱོད་ལ་ཁྱད་པར་དུ། །རུས་པ་སྣ་ཚོགས་ཤིས་པ་ཡིས། །དེ་ནས་གསང་སྔགས་གཞན་གྱིས་ཀྱང་། །དངོས་གྲུབ་འདོད་པས་མངོན་པར་བསྔགས། །གཅིག་ནི་སྦྱང་བའི་གསང་སྔགས་ཏེ། །གཉིས་པ་འགྲུབ་ཕྱིར་ཤེས་པར་བྱ། །ༀ་ན་མོ་བྷ་ག་བ་ཏེ། སིདྡྷི་སཱ་དྷ་ཡ་སཱ་དྷ་ཧཱ། སིདྡྷཱརྠ་སྭཱ་ཧཱ། དེ་བཞིན་གཤེགས་པའི་རིགས་ལའོ། །ༀ་བ་སུ་མ་ཏི་ཤྲི་ཡེ་སྭཱ་ཧཱ། པདྨའི་རིགས་ལའོ། །ༀ་བཛྲ་ཨ་ཙི་ཏཉྫ་ཡེ་སྭཱ་ཧཱ། རྡོ་རྗེའི་རིགས་ལའོ། །སྔགས་ཀྱི་ནོར་བུའི་རིག་སྔགས་རྣམས་སོ། །ཕྱག་རྒྱ་སྔགས་ཀྱི་ནོར་བུ་དག །ཆོ་ག་བཞིན་དུ་བླངས་ནས་ནི། །ནོར་བུ་སྙིང་གར་བཟུང་ནས་སུ། །བཟླས་བརྗོད་རབ་ཏུ་བརྩམ་པར་བྱ། །གུས་པས་དཀོན་མཆོག་གསུམ་པོ་དང་། །བྱང་ཆུབ་སེམས་དཔའ་རྣམས་དང་ནི། །རིག་སྔགས་ཚོགས་ནི་མཐའ་དག་ལ། །ཕྱག་བྱས་དེ་འོག་བཟླས་བརྗོད་བརྩམ། །ཡིད་ཀྱིས་གསང་སྔགས་ལྷ་རྣམས་ནི། །ཡང་ནས་ཡང་དུ་མངོན་བསམས་ཏེ། །རྟོག་པ་ངན་པ་རྣམས་བསལ་ནས། །མཁས་པས་བཟླས་བརྗོད་བརྩམ་པར་བྱ། །ཞི་བ་དང་ནི་རྒྱས་པ་ལ། །ༀ་དང་བཅས་ཤིང་ཕྱག་དང་བཅས། །ལྷག་པར་ཞི་བའི་སེམས་ཀྱིས་ནི། །བློ་ཡིས་བཟླས་བརྗོད་དལ་བུས་བྱ། །དྲག་ཤུལ་ཅན་གྱི་སེམས་ཀྱིས་ནི། །ཧཱུྃ་དང་བཅས་ཤིང་ཕཊ་དང་བཅས། །བཟླས་བརྗོད་གཞན་གྱིས་ཐོས་བྱ་བ། །དྲག་ཤུལ་སྤྱོད་པ་རབ་ཏུ་ཤིས། །མཁས་པས་གསང་སྔགས་ཡི་གེ་རྣམས། །བཅྭ་ལྔ་མན་ཆད་གྲངས་རྣམས་ལ། །སྤྱིར་ནི་ཡི་གེ་དུ་ཡོད་པ། །དེ་སྙེད་འབུམ་ཕྲག་བཟླས་བརྗོད་བྱ། །ཡི་གེ་སུམ་ཅུ་རྩ་གཉིས་ལ། །བཟླས་བརྗོད་སུམ་འབུམ་བྱ་བར་བཤད། །དེ་བས་ཡི་གེ་མང་བ་ལ། །སྔོན་དུ་བསྙེན་པ་ཁྲི་བྱའོ། །རིགས་དང་ལས་དང་གསང་སྔགས་དག །མཁས་པས་ལེགས་པར་ཤེས་བྱས་ནས། །རྗེས་སུ་མཐུན་པའི་བརྩོན་པ་ཡིས། །སྔོན་དུ་བསྙེན་པ་བརྩམ་པར་བྱ། །ཤིན་ཏུ་མཆོག་གི་ལས་རྣམས་ནི། །བཟླས་བརྗོད་ཁྱད་པར་ཅན་གྱིས་འགྲུབ། །སྔོན་དུ་བསྙེན་པ་མེད་པར་ཡང་། །ལས་རྣམས་ཕལ་ནི་འགྲུབ་པར་འགྱུར། །གསང་སྔགས་དག་ནི་ཐམས་ཅད་ཀྱི། །དངོས་གྲུབ་རྣམས་ནི་ཐམས་ཅད་ལ། །ཐོག་མར་བཟླས་བརྗོད་བཅུ་ཆ་བྱ། །དེ་ནས་དེ་ལ་སྟ་གོན་གནས། །དེ་ལྟར་སྟ་གོན་གནས་བྱས་པས། །ལྷ་ཡང་སྟ་གོན་མཛད་གྱུར་ན། །དེ་ཚེ་ཟློས་བས་ཆོ་ག་བཞིན། །དེ་ཡི་འོག་ཏུ་བཟླས་བརྗོད་བརྩམ། །གང་ཞིག་མཚན་མའམ་ཚིག་གིས་ནི། །བཟླས་བརྗོད་བྱེད་པ་མི་བཞེད་ན། །བསྙེན་པ་ཡང་དང་ཡང་བྱས་ནས། །ལན་གསུམ་བར་དུ་སྟ་གོན་གནས། །རིག་སྔགས་བསྙེན་པས་མཉེས་གྱུར་ན། །ཟློས་པ་པོ་ལ་དགོངས་ནས་སུ། །གང་གིས་དང་པོར་བཀའ་སྩལ་པ། །དེ་དག་མྱུར་དུ་འགྲུབ་པར་འགྱུར། །ཟློས་པ་བློ་དང་ལྡན་པ་ཡིས། །ལན་གསུམ་སྟ་གོན་གནས་བྱས་ཀྱང་། །གང་དག་དགོངས་པ་མི་འཛིན་པའི། །ལྷ་དེ་ནམ་ཡང་མི་བཟླས་སོ། །གཙང་མའི་གནས་སུ་གཙང་སྦྲ་ཅན། །མཉམ་པར་བཞག་སྟེ་ལེགས་བདུག་ནས། །ཅི་སྲིད་ཡིད་ནི་མི་སྐྱོ་བར། །དེ་སྲིད་བར་དུ་བཟླས་བརྗོད་བྱ། །ཆོ་ག་བཤད་པ་ཐམས་ཅད་ལ། །ལུས་ཀྱི་གཙང་སྦྲ་བྱས་ནས་སུ། །སྔ་དྲོ་མེལ་ཚེ་ཐུན་གཅིག་དང་། །ཕྱི་དྲོ་མེལ་ཚེ་ཐུན་གཅག་བཟླས། །ཉི་མའི་གུང་ལ་ཐུན་ཕྱེད་དམ། །ཡང་ན་ཐུན་གྱི་སུམ་ཆ་བཟླས། །ཡང་ན་ཐུན་གྱི་བཞི་ཆའམ། །ཡང་ན་མཁས་པས་ཅུང་ཟད་བཟླས། །མཚན་མོ་སྲོད་དང་ཐོ་རངས་ལ། །མེལ་ཚེ་ཐུན་ནི་ཕྱེད་ཕྱེད་དུ། །གང་ཞིག་མཁས་པས་བཟླས་བྱས་པ། །དེ་ནི་ལྷག་པར་མཆོད་པར་འགྱུར། །དྲག་ཤུལ་སྤྱོད་པའི་ལས་ཀུན་དང་། །མི་སྣང་བ་ལ་སོགས་པ་དང་། །དུར་ཁྲོད་དག་གི་ལས་རྣམས་ལ། །རྟག་ཏུ་མཚན་མོ་བཟླས་པ་བཟང་། །ཉིན་པར་བཟླས་བརྗོད་གང་བཤད་པ། །དེ་དག་སྦྱིན་སྲེག་མཚན་མོ་བྱ། །མཚན་མོ་བཟླས་བརྗོད་གང་བཤད་པ། །དེ་དག་སྦྱིན་སྲེག་ཉིན་པར་བྱ། །གང་ཞིག་བཟླས་པའི་མཇུག་ཏུ་ནི། །སྦྱིན་སྲེག་བྱེད་པ་དེ་མཆོག་གོ། །གསང་སྔགས་ཀུན་ལ་དང་པོར་རམ། །བསྲེག་བྱ་ཡོང་ན་གཉིས་ཀར་བྱ། །མཁས་པས་གང་ཞིག་ཉིན་རེ་ཞིང་། །ཟས་ཀྱི་ཕུད་ལ་སྲེག་བྱེད་པ། །དེས་ནི་ཐ་མའམ་བར་དག་ཏུ། །ཁྱད་པར་མེད་པར་བྱ་བར་བཤད། །དེ་ལྟར་བྱས་ན་རིག་སྔགས་རྣམས། །ཕལ་ཆེར་ཡོངས་སུ་དགྱེས་པར་འགྱུར། །ཆོ་ག་འདི་དག་ཉིད་ཀྱིས་ནི། །སྦྱིན་སྲེག་བྱེད་པའི་བཟླས་བརྗོད་བཤད། །བཟླས་བརྗོད་བྱེད་པས་ཁྲོ་མི་བྱ། །ཡུལ་གྱི་བདག་ཉིད་དགའ་མི་བྱ། །ཞུམ་དང་མི་དགའ་འཇིགས་པ་དང་། །འཛུམས་དང་ང་རྒྱལ་ཡོངས་སུ་སྦང་། །ཟློས་ཚེ་ཅི་ཡང་མི་སྨྲ་ཞིང་། །ཡན་ལག་འགྱུར་པར་མི་བྱའོ། །ཀུན་རྟོག་རླུང་གིས་བསྐྱོད་ནས་ནི། །ཅི་ཡང་རུང་བ་མི་བསམ་མོ། །ཟློས་པོ་བཟླས་བརྗོད་བྱེད་པའི་ཚེ། །རིག་སྔགས་ལྷ་ནི་མ་གཏོགས་པ། །བསྒོམ་པ་མཆོག་ཏུ་གྱུར་པ་དང་། །རྣམ་རྟོག་བཟུང་ནས་མི་བསམ་མོ། །ཟློས་པོས་བཟླས་བརྗོད་ཟིན་པ་དང་། །རིགས་ཀྱི་བདག་པོའི་གསང་སྔགས་སམ། །རིགས་ཀྱི་ལྷ་མོ་གང་ཡིན་པ། །དེ་དག་བཟླས་ཏེ་བསྲུང་བ་བྱ། །བཟླས་བརྗོད་གྲངས་བཞིན་བྱས་པའམ། །ཡང་ན་ལྷག་པར་བྱས་ཀྱང་རུང་། །གསོལ་བ་གདབ་པའི་ཚུལ་གྱིས་སུ། །དེ་ནི་གུས་པར་དབུལ་བར་བྱ། །མཁས་པས་རིག་སྔགས་ཟློས་པའི་ཚེ། །སྦྲིད་པ་ལུད་པ་ལ་སོགས་བྱུང་། །ཉེ་རེག་བྱས་ཏེ་ཕྱག་འཚལ་ཏེ། །གཞི་ནས་ཀུན་དུ་བརྩམ་པར་བྱ། །བཟླས་བརྗོད་ཀྱི་ནི་བགེགས་རྣམས་དང་། །མཁས་པས་བཟླས་བརྗོད་སྐྱོན་རྣམས་ལ། །སླར་ཡང་གྲངས་ཀྱི་ཐོག་མ་ནས། །ཀུན་དུ་བརྩམ་པར་བྱ་བར་བཤད། །སྔགས་ཀྱི་ནོར་བུའི་ཐོག་མ་དང་། །ཐ་མར་རྟག་ཏུ་སྒྲུབ་པ་པོས། །གུས་པར་གསང་སྔགས་ལྷ་དག་ལ། །བློ་དང་ལྡན་པས་ཕྱག་བྱའོ། །སྔགས་ཀྱི་ནོར་བུ་རྫོགས་པའི་ཚེ། །རི་མོའི་གཟུགས་སམ་སྐུ་གཟུགས་སམ། །མཆོད་རྟེན་དག་གམ་དེའི་གདན་རྣམས། །མིག་གིས་ཀུན་དུ་བལྟ་བར་བྱ། །བཟླས་པས་ངལ་ན་ཡང་དང་ཡང་། །བསམ་གཏན་ལམ་གྱི་མན་ངག་དང་། །ཐབས་ནི་རྣམ་པ་ཐ་དད་པས། །བློ་ཅན་སེམས་ནི་སྤྲོ་བ་བསྐྱེད། །བློ་ལ་སྐྱོན་མེད་བྱས་ནས་ནི། །གསང་སྔགས་ཡི་གེ་དག་པ་ལ། །མཉམ་པར་བཞག་སྟེ་རྩེ་གཅིག་ཏུ། །བཟླས་བརྗོད་དུས་གསུམ་དག་ཏུ་བྱ། །མཁས་པས་དུས་གསུམ་ཁོ་ནར་ཡང་། །ཁྲུས་བྱས་ནས་ནི་བཟླས་བརྗོད་བྱ། །མཆོད་པ་ལ་སོགས་ཆོ་ག་ཀུན། །དུས་གསུམ་དག་ཏུ་བྱ་བར་བཤད། །དུས་གསུམ་དག་ཏུ་སྔགས་པ་ཡིས། །གོས་ནི་རྣམ་པ་གསུམ་པོ་དག །བཀྲུ་བའམ་བདུག་པར་བྱ་བའམ། །ཡང་ན་བསང་གཏོར་དག་ཀྱང་བྱ། །ཉལ་དང་ཁྲུས་བྱེད་མ་གཏོགས་པར། །སྔགས་པས་མཐང་གོས་མི་སྦང་ཞིང་། །དཀར་ལ་ཤིན་ཏུ་འཇམ་པོ་དེ། །ཉིན་རེ་བཞིན་དུ་བཀྲུ་བར་བྱ། །ལྷ་ལ་དགོས་པའི་སྣོད་རྣམས་ཀྱང་། །ཉིན་རེ་ལན་རེ་བཀྲུ་བར་བྱ། །མེ་ཏོག་རྙིང་པ་དུས་གསུམ་དུ། །རྟག་པར་ཡང་ནི་ཕྱག་པར་བྱ། །ཤེས་རབ་ཕ་རོལ་ཕྱིན་སོགས་ཀྱི། །གླེགས་བམ་མཇུག་ཏུ་བཀླག་པ་དང་། །མཆོད་རྟེན་དག་དང་དཀྱིལ་འཁོར་ཡང་། །དུས་གསུམ་དག་ཏུ་དེ་བཞིན་བྱ། །སྔོན་དུ་བསྙེན་པའི་བཟླས་བརྗོད་དག །དང་པོར་གྲངས་བཞིན་ཚང་བ་ལས། །མི་ནུས་ན་ནི་དུས་གཅིག་གམ། །དུས་གཉིས་སུ་ནི་ཆོ་ག་བསྒོམ། །གང་ཡང་བགེགས་ཀྱིས་བརླམས་པ་དང་། །ནད་རྣམས་ཀྱིས་ནི་གཟིར་བའམ། །ལྷོད་པ་དང་ནི་བག་མེད་པའམ། །ལུས་དང་སེམས་ནི་སྐྱོ་བའམ། །ཆོ་ག་ཅི་སྐད་བཤད་པ་དག །བཤད་པའི་དུས་ལས་འདས་པ་དང་། །མ་བསྡམས་པ་དང་མི་གཙང་བས། །གང་དག་བཟླས་བརྗོད་བྱེད་པ་ནི། །བཟླས་པའི་གྲངས་ནི་བཤད་པ་ལ། །མཁས་པས་དེ་དག་མི་སྦྱར་གྱི། །ཆོ་ག་བཞིན་དུ་བཟླས་པ་དང་། །མཉམ་གཞག་བཟླས་བརྗོད་དེ་དང་སྦྱར། །སྦྱིན་སྲེག་ལས་ཀྱི་གྲངས་རྣམས་དང་། །སྤྱན་དྲང་བ་ཡི་ཆོ་ག་ལ། །སྔགས་ཀྱི་ནོར་བུ་མ་རྫོགས་པ། །བཟླས་བརྗོད་གྲངས་སུ་མི་གཞུག་གོ། །དཀྱིལ་འཁོར་དག་ཏུ་ཆོ་ག་བཞིན། །གང་གིས་གསང་སྔགས་སྟོང་བཟླས་དང་། །ཉི་མ་ཟླ་བ་གཟས་ཟིན་ཚེ། །བསྙེན་པ་དེ་ནི་ཐེ་ཚོམ་མེད། །གཙུག་ཏོར་ཅན་གྱི་གནས་ཀུན་དང་། །མཆོད་རྟེན་ཆེན་པོ་དག་དང་ནི། །ཆོ་འཕྲུལ་ཆེན་པོའི་ཟླ་ཕྱེད་ལ། །བཟླས་པ་དེ་ནི་མཆོག་ཏུ་བཤད། །བླ་མ་མགུ་བར་གྱུར་པ་ཡས། །རིག་སྔགས་བཟླས་པ་གང་ཐོབ་དང་། །གང་ཡང་ཉིད་ཀྱིས་བཀའ་སྩལ་པ། །དེ་དག་མྱུར་དུ་འགྲུབ་པར་འགྱུར། །གང་ཡང་གནས་ཡུལ་ཡོན་ཏན་ཅན། །མཆོད་སོགས་ཁྱད་པར་ཅན་དག་དང་། །རང་གི་སེམས་ནི་དང་བ་ལས། །རིག་པ་མྱུར་དུ་བཀའ་སྩོལ་ཏེ། །མྱུར་དུ་འགྲུབ་ཀྱང་མི་ཐོགས་པར། །ངེས་པར་ཉམས་པར་འགྱུར་ཞེས་གསུངས། །དེ་བས་བསྙེན་པ་རྫོགས་བྱས་ནས། །དངོས་གྲུབ་ཕྱིར་ནི་འབད་པར་བྱ། །བསྙེན་པའི་ཚེ་ནི་ཅི་རིགས་པར། །དངོས་གྲུབ་ཕྱིར་ནི་ལྷ་རྣམས་ལ། །ལྷ་ཁང་གི་ནི་ཕྱི་རོལ་དུ། །དུས་མཚམས་དག་ལ་མཆོད་པར་བྱ། །དུས་མཚམས་དག་ལ་རིག་སྔགས་རྣམས། །བྱེ་བྲག་ཏུ་ནི་མཆོད་པར་བྱ། །རྟག་ཏུ་དགེ་བའི་ཕྱོགས་རྣམས་དང་། །དེ་བཞིན་དུ་ནི་སྡོམ་པ་གཟུང་། །བུམ་པ་བཀྲ་ཤིས་ལྡན་པ་ལ། །སྦོས་ཀྱི་ཆུ་ལ་སོགས་པས་བཀང་། །རྡོ་རྗེ་ཁྲོ་བོས་མངོན་བསྔགས་ཏེ། །དབང་བསྐུར་དོན་དུ་སྦྱར་བར་བྱ། །དེ་མ་འབྱོར་ན་མཆོད་ཡོན་སྣོད། །མེ་ཏོག་རྣམས་དང་ཆུས་བཀང་སྟེ། །བགེགས་རྣམས་རྣམ་པར་བསལ་བའི་ཕྱིར། །དབང་བསྐུར་དེ་ནི་ཉེ་བར་སྦྱར། །བྱེ་བྲག་ཏུ་ནི་ལྷ་བཤོས་དབུལ། །བྱེ་བྲག་ཏུ་ནི་སྦྱིན་སྲེག་བྱེ། །མར་མེའི་ཆོ་ག་བྱེ་བྲག་ཏུ། །ས་ཡི་བྱི་དོར་དེ་བཞིན་བྱ། །གལ་ཏེ་ཟློས་ཚེ་གློ་བུར་དུ། །སྣ་ཚོགས་པ་ཡི་འོད་བྱུང་ན། །དེ་ཚེ་དངོས་གྲུབ་མྱུར་བར་ངེས། །བཀྲེས་པས་ཅུང་ཞིག་ནད་ལས་ཐར། །ཤེས་པ་ཁྱད་པར་ཅན་ཡང་འབྱུང་། །ལྷག་པར་གཟི་མདངས་ཆེ་བསྟན་པ། །གསང་སྔགས་བཟླས་པའི་མཚན་ཉིད་ཡིན། །མཚན་མོ་རྨི་ལམ་དགེ་བ་དང་། །བདེན་པ་རྣམས་ནི་མཐོང་བ་དང་། །བཟླས་བརྗོད་བྱེད་ལ་དགའ་བ་ནི། །གསང་སྔགས་བཟླས་པའི་མཚན་ཉིད་ཡིན། །ངལ་བ་ཆུང་ཞིང་དྲི་ཞིམ་དང་། །གཏོང་ཕོད་ཡོན་ཏན་ལྷུར་ལེན་ཅིང་། །ལྷ་ལ་ལྷག་པར་གུས་པ་ནི། །གསང་སྔགས་བཟླས་པའི་མཚན་ཉིད་ཡིན། །གསང་སྔགས་བཟླས་པའི་རྗེས་ལ་ཡང་། །བྱེ་བྲག་ཏུ་ནི་མཆོད་པ་བྱ། །ལྷ་རྣམས་ལ་ནི་ཅི་རིགས་པར། །སྦྱིན་སྲེག་དག་ཀྱང་བརྩམ་པར་བྱ། །བསྙེན་པ་ཚུལ་བཞིན་རྫོགས་བྱས་ནས། །རིག་སྔགས་བསྒྲུབ་པར་བྱ་བའི་ཕྱིར། །མཁས་པས་ཇི་ལྟར་མཐོང་བ་བཞིན། །སྟ་གོན་གནས་པ་རབ་ཏུ་བྱ། །གནས་གཅིག་ཏུ་ནི་ཕྱེད་བཟླས་ནས། །གང་ཞིག་གཞན་ལ་བཟླས་བྱས་པ། །བཟླས་པ་ཐམས་ཅད་རྫོགས་གྱུར་ཀྱང་། །དེ་དག་ཐམས་ཅད་དོན་མེད་འགྱུར། །དེ་ལྟའི་གླགས་ལ་ཆོ་ག་བཞིན། །ཚིག་འབུམ་ལྷག་པར་བཟླས་བརྗོད་བྱ། །བདག་པོས་སྟོང་དུ་བཟླས་བྱའམ། །ཡང་ན་བསྙེན་པ་སླར་བརྩམ་མོ། །བག་མེད་པས་ནི་ལན་འགའ་ཞིག །གསང་སྔགས་ལྷ་གཞན་བཟླས་བྱས་ན། །ཡིད་ཀྱིས་གསོལ་བ་གུས་བྱས་ནས། །བཟླས་བརྗོད་སླར་ཡང་བརྩམ་པར་བྱ། །མི་གཙང་ཆོ་ག་མི་ལྡན་པས། །རིག་སྔགས་བག་མེད་བཟླས་གྱུར་ན། །དེ་ལ་རིག་སྔགས་བདག་པོའི་སྔགས། །ལན་བདུན་ཡོངས་སུ་བཟླས་བརྗོད་བྱ། །ཟློས་པོས་ཟླ་བ་ཕྱེད་ཕྱེད་ཅིང་། །ཉིན་ཞག་གཅིག་ཏུ་སྨྱུང་བྱས་ནས། །ཟླ་ཕྱེད་མཚམས་སུ་བ་ཡི་ལྔ། །བརྒྱ་རྩ་བརྒྱད་དུ་བཟླས་པ་བཏུང་། །དེས་ནི་གསང་སྔགས་ཟློས་པ་པོ། །ཟླ་ཕྱེད་དག་ཏུ་དགའ་འགྱུར་ཞིང་། །བཟའ་བ་མིན་སོགས་གང་ཟོས་པ། །དེ་དག་ཐམས་ཅད་རྣམ་པར་སྦང་། །ན་མོ་བྷ་ག་བ་ཏེ་ཨུཥྞཱི་ཥཱ་ཡ། ༀ་བི་ཤུདྡྷེ་བི་ར་ཛེ་ཤི་བེ་ཤཱནྟི་ཀ་རི་སྭཱ་ཧཱ། དེ་བཞིན་གཤེགས་པའི་རིགས་ལའོ། །ༀ་ཡ་ཤོ་ཛེ་སྭཱ་ཧཱ། པདྨའི་རིགས་ལའོ། །ན་མོ་རཏྣ་ཏྲ་ཡཱ་ཡ། ན་མཤྩ་ཎྜ་བཛྲ་བཱ་ཎ་ཡ། མ་ཧཱ་ཡཀྵ་སེནཱ་པ་ཏ་ཡེ། ༀ་ཤི་ཁི་ཤི་ཁི་ནི་ར་མ་ལེ་པྲ་བྷེ། པྲ་བྷ་སཱ་རེ། ཏེ་ཛེ་ཏེཛེ་བ་ཏི་སྭཱ་ཧཱ། རྡོ་རྗེའི་རིགས་ལའོ། །དམར་སེར་བ་ཡི་འོ་མ་དང་། །བ་ཡི་ཞོ་དང་བ་ཡི་མར། །བ་གཅིན་པ་ཡི་ལྕི་བ་རྣམས། །སོ་སོར་མངོན་པར་བསྔགས་པ་དང་། །ཀུ་ཤ་ལན་བརྒྱར་བསྔགས་པ་ཡི། །ཀུ་ཤའི་ཆུན་དང་ལྡན་བྱས་ཏེ། །ཤར་བལྟས་མེ་སྨྲ་ཙོག་ཙོག་པོར། །འདུག་ནས་འབྲིང་ལ་སྲང་གསུམ་ཙམ། །བ་ལ་ཤ་ཡི་ལོ་མར་བཏུང་། །ཡང་ན་མཆོད་ཡོན་སྣོད་བཤད་པ། །གང་ཡང་རུང་བ་ཅིག་ཏུ་བཏུང་། །དེ་ནི་དེ་ཡི་ཆོ་གར་བསྟན། །ཟློས་ཚེ་གལ་ཏེ་གློ་བུར་དུ། །ཅུང་ཟད་བྱའམ་མི་བྱ་ལ། །ལྷ་ཉིད་ཀྱིས་ནི་བཀའ་སྩལ་ན། །བློ་དང་ལྡན་པས་དེ་དག་བརྟག །བསྲུང་བ་བྱས་ཏེ་བརྟགས་ནས་སུ། །བྱ་བ་མིན་པ་དེ་མི་བྱ། །བཀའ་ལུང་རིགས་པར་གང་སྩལ་བ། །དེ་དག་དངོས་གྲུབ་འདོད་པས་བྱ། །ཟློས་པ་རྨི་ལམ་ངན་མཐོང་ན། །རིགས་ཀྱི་བདག་པོ་བརྒྱ་བཟླས་སོ། །དེ་ཡི་ཉིན་པར་དེ་མ་བཟླས། །བཟླས་བརྗོད་གྲངས་སུ་མི་གཞུག་གོ། །གྲངས་ཀྱི་བཟླས་བརྗོད་ཐམས་ཅད་ལ། །ལྷག་པར་གྱུར་ལ་ཉེས་པ་མེད། །དེར་ནི་དེ་ཡིས་མི་འགྲུབ་ལ། །གྲངས་སྐོངས་བ་ལ་མི་ཕན་ནོ། །མདོར་ན་ཟློས་བ་པོ་རྣམས་ཀྱིས། །བཟླས་བརྗོད་ཆོ་ག་གང་གསུངས་པ། །ཆོ་ག་དེ་དག་ཉིད་ཀྱིས་ནི། །རིག་སྔགས་བསྙེན་ནས་འགྲུབ་པར་འགྱུར། །བཟླས་བརྗོད་ཀྱི་ཆོ་ག་རིམ་པར་ཕྱེ་བའོ།། །།དེ་ནས་གཞན་ཡང་ཟློས་པ་པོའི། །གསང་སྔགས་ལྷ་ནི་གང་ཞིག་གིས། །མྱུར་དུ་མཉེས་པར་འགྱུར་བ་ཡི། །ཚིམ་པར་བྱ་བའི་ཆོ་ག་བཤད། །དུས་མཚམས་དག་གམ་ཚེས་གཞན་ལ། །ཁྲུས་རྫིང་བཟང་པོས་ཁྱད་པར་དུ། །མགོ་ལ་སོགས་པ་བཀྲུས་ནས་སུ། །དང་པོ་མཆོད་པའི་ཆོ་ག་བྱ། །ཡིད་ལ་གསང་སྔགས་བརྗོད་ནས་སུ། །སྣ་མའི་མེ་ཏོག་བརྒྱ་ལ་ནི། །རེ་རེ་ལ་ཡང་མངོན་བསྔགས་ཏེ། །བློ་དང་ལྡན་པས་རིགས་གསུམ་མཆོད། །ལན་གྲངས་ཉི་ཤུ་རྩ་གཅིག་གམ། །ཡང་ན་ལན་བདུན་རིམ་བཞིན་དུ། །གསང་སྔགས་ཡི་གེ་རྗེས་མཐུན་པར། །ལྷ་རྣམས་ལ་ནི་མངོན་པར་མཆོད། །དེ་ནས་དྲི་ལ་སོགས་པ་དང་། །དྲི་ཞིམ་བསྒོས་པའི་བདུག་སྤོས་གསོལ། །ལྷ་བཤོས་ཅི་སྐད་བསྟན་པ་དབུལ། །ཞོ་དང་བུ་རམ་བྱེ་བྲག་ཏུའོ། །ཚུལ་བཞིན་སྦྱིན་སྲེག་ལས་བྱས་ཏེ། །ཡམ་སྲེག་ཤིང་གིས་མེ་བུས་ལ། །མཆོད་སྦྱིན་གྱིས་ནི་ཡམ་སྲེག་ཤིང་། །མར་ལ་བཏགས་པ་དང་པོར་བརྒྱ། །དེ་ནས་ཏིལ་དང་ཞོ་དང་མར། །སྦྲང་རྩི་བསྲེས་པ་བརྒྱ་ལྷག་དབུལ། །དེ་ནས་མར་དང་ཞོ་སྦྱར་བའི། །སཱ་ལུའི་འབྲས་ཆན་སྲེག་བླུགས་བརྒྱ། །བ་ཡི་འོ་མ་ཟས་མཆོག་དང་། །མར་བཅས་སྲེག་བླུགས་བརྒྱ་ཕུལ་ཏེ། །མཇུག་ཏུ་མཆོད་ཡོན་བཀང་ནས་སུ། །ལན་བརྒྱར་བཟླས་ཏེ་དབུལ་བར་བྱ། །ཆོ་ག་དེ་ལྟར་ཉིན་གཅིག་གམ། །བདུན་ནམ་ཉི་ཤུ་རྩ་གཅིག་གམ། །ཡང་ན་ཉིན་གསུམ་དུས་གསུམ་དུ། །ཡང་ན་ཉི་མ་ལྔར་བྱས་ནས། །རིག་སྔགས་བཅད་དམ་ཕྲལ་བའམ། །བགག་པའམ་ཕུར་བུས་བཏབ་པའམ། །བྲི་བ་དང་ནི་ལྷག་པའང་རུང་། །བགག་བའམ་ཕུར་བུས་བཏབ་པའམ། །གཟིར་བ་ལྷག་པར་ཚིམ་པར་འགྱུར། །སྦྱིན་སྲེག་ཡན་ལག་དེ་རྣམས་ལས། །གཅིག་གིས་ཉིན་མཚམས་བསྲེག་བྱིན་ན། །ཞག་གསུམ་གྱིས་ནི་ཚིམ་འགྱུར་ཏེ། །ལྷ་རྣམས་རབ་ཏུ་དགྱེས་པར་འགྱུར། །སྤོས་ལ་གཟུགས་བརྙན་ལེགས་བྱས་ཏེ། །མེ་ཏོག་མ་ཏ་ལི་ཡིས་མཆོད། །དུས་གསུམ་བཟླས་བརྗོད་བརྒྱ་བྱས་ཏེ། །མཇུག་ཏུ་ཤིང་གི་ཐང་ཆུས་བདུག །པདྨ་ལ་སོགས་འོ་མ་ལ། །བཞག་སྟེ་མཚན་མོ་རབ་མཆོད་དེ། །ནང་བར་མཆོད་ཅིང་བཟླས་བརྗོད་ནས། །ཆུ་ཀླུང་ཆེན་པོར་བསྐུར་བར་བྱ། །ཆོ་ག་འདི་དག་བྱས་པ་ཡིས། །ལྷ་རྣམས་ཡོངས་སུ་དགྱེས་པར་འགྱུར། །དགྱེས་པར་གྱུར་ནས་དངོས་གྲུབ་ནི། །ཆེན་པོ་མྱུར་དུ་སྩོལ་བར་མཛད། །ལྷ་ཚིམ་པར་བྱ་བའི་ཆོ་ག་རིམ་པར་ཕྱེ་བའོ།། །།གསེར་རམ་དབུལ་ལམ་ཟངས་ཀྱིའམ། །ཁམ་པའི་བུམ་པ་སར་པ་ལ། །མེ་ཏོག་རིན་ཆེན་འབྲས་བུ་རྩྭ། །འབྲུ་དང་སྤོས་ཀྱི་ཆུས་བཀང་ནས། །མགུལ་བར་རས་ནི་སར་པས་བཅིང་། །ལྡུམ་བུ་སར་པས་ཁ་བརྒྱན་ཏེ། །རང་གི་རིག་སྔགས་བདག་པོའམ། །ཡང་ན་རིགས་ཀྱི་རིག་སྔགས་ཀྱིས། །ལན་བརྒྱར་བཟླས་ནས་དང་པོ་དེས། །ལྷ་ཉིད་མངོན་པར་དབང་བསྐུར་རོ། །གསེར་ལ་སོགས་པའི་གཟུགས་བརྙན་ལ། །རྒྱན་ཕྲེང་ན་བཟའ་ལེགས་བརྒྱན་ཏེ། །རིག་སྔགས་ཁྲི་ལ་བཞག་ནས་སུ། །དབང་བསྐུར་ཕྱིར་ནི་མཆོད་པ་བྱ། །མེ་ཏོག་སོགས་པས་མཆོད་བྱས་ཏེ། །བཟླས་བརྗོད་སྦྱིན་སྲེག་དག་གིས་མཆོད། །ཆོ་ག་འདིས་ནི་རིག་སྔགས་དག །མཐུ་ནི་རབ་ཏུ་ཆེ་བར་འགྱུར། །རིག་སྔགས་མཐུ་དང་ལྡན་གྱུར་ན། །དངོས་གྲུབ་ཆེན་པོ་མྱུར་དུ་སྩོལ། །དུས་མཚམས་དག་ལ་རིག་སྔགས་རྣམས། །སྤྱན་དྲང་མཆོད་པ་བྱས་ནས་ནི། །མཆོད་ཡོན་མངོན་པར་བསྔགས་པ་ཡིས། །དབང་བསྐུར་བ་ཡང་བྱ་བར་བཤད། །ཉིན་རེ་ཁྲུས་བྱེད་ཚེ་ན་ཡང་། །དབང་བསྐུར་ཕྱིར་ནི་གུས་པ་རུ། །བློ་དང་ལྡན་པས་སྙིམ་པའི་ཆུ། །བདུན་ནམ་ཡང་ན་གསུམ་གྱིས་བྱ། །མར་དང་འོ་མ་ལ་སོགས་པས། །དབང་བསྐུར་ཕྱིར་ནི་ལེགས་བཀྲུས་ནས། །རིག་སྔགས་གཟིར་བ་རྒྱས་གྱུར་ཅིང་། །འདིས་ནི་ལྷག་པར་ཚིམ་པར་འགྱུར། །ལྷ་དབང་བསྐུར་བའི་ཆོ་ག་རིམ་པར་ཕྱེ་བའོ།། །།དུས་མཚམས་དག་ལ་སྨྱུང་བྱས་ནས། །ནུབ་གཅིག་གམ་ནི་ནུབ་གསུམ་དུ། །གཙང་ཞིང་གོས་དཀར་གསར་བགོས་ཏེ། །ཟློས་པ་སྟ་གོན་གནས་པར་བྱ། །དུས་མཚམས་མིན་ཡང་དགོས་ཡོད་ན། །ཡར་གྱི་ངོ་ཡི་ཚེས་བཟང་ལ། །ཞི་བའི་མཆོག་གི་གསང་སྔགས་ཀྱིས། །སྟ་གོན་གནས་པར་རབ་ཏུ་བྱ། །སྐྱུ་རུ་ར་སོགས་ཁྲུས་རྩི་དང་། །དྲི་ཞིམ་སྤོས་ཆུས་ཁྲུས་བྱས་ཏེ། །ཉེ་རེག་བྱས་ནས་སྲོད་ལ་ནི། །སངས་རྒྱས་སྤྱན་དྲང་མཆོད་པ་བྱ། །དེ་ནས་ལྷག་པར་མངོན་བསྔགས་པའི། །མཆོད་ཡོན་ཆོ་ག་བཞིན་དུ་དབུལ། །དེ་ནས་ཙནྡན་དཀར་པོ་དང་། །སྣ་མའི་མེ་ཏོག་ཁ་འབུས་དང་། །མ་ལ་ཏ་ཡི་ཕྲེང་བ་ལ། །བདུག་པས་བདུགས་ལ་མཆོད་པ་བྱ། །གཏོར་མ་མང་ཞིང་བཟང་བ་དང་། །ཞོ་དང་བཅས་པ་དབུལ་བར་བྱ། །དེ་ནས་མར་གྱི་སྦྱིན་སྲེག་ནི། །ཚུལ་བཞིན་བརྒྱ་རྩ་བརྒྱད་བྱས་ཏེ། །གསང་སྔགས་ལས་དང་རྗེས་མཐུན་པར། །ས་རྫ་ར་སའི་སྲེག་བླུགས་དབུལ། །བུ་མོས་བཀལ་བའི་སྐུད་པ་ལ། །མདུད་པ་བདུན་པོར་ལན་བདུན་བསྔགས། །དཔུང་པ་གཡོན་པ་ལ་བཅིངས་ལ། །ཀུ་ཤའི་ལོ་མ་བཏིང་པ་ལ། །དེ་ཉིད་ཀྱིས་ནི་གློ་ཕབ་སྟེ། །བཀའ་ལུང་གསོལ་བ་བཏབ་ནས་ནི། །རང་གི་ལྷ་ཡི་ཚུལ་འདྲ་བར། །སེམས་ཀྱིས་ལེགས་པར་བསམ་བྱས་ཏེ། །ཡིད་ལ་གསང་སྔགས་འདོན་བཞིན་དུ། །ཀུ་ཤས་ར་པ་ཁྲེས་ཀྱི་སྔས། །མེ་ཏོག་མང་པོས་བཀླུབས་པ་ལ། །ཅི་ལྟར་བདེ་བར་ཉལ་བར་བྱ། །གལ་ཏེ་གཉིད་ལོག་རྨི་ལམ་ན། །བསྟན་པར་གཏོགས་པའི་ལྷ་མཐོང་ངམ། །སོ་སོར་རིག་པའི་གཟུགས་དག་གམ། །ཡང་ན་རིག་སྔགས་བདག་པོའང་རུང་། །དཀོན་མཆོག་གསུམ་ལས་གཅིག་ཙམ་མམ། །དེ་དག་ལ་ནི་མཆོད་པ་སོགས། །རྒྱལ་སྲས་རྫུ་འཕྲུལ་ཆེན་པོའམ། །འཁོར་ནི་རྣམ་པ་བཞི་རྣམས་སམ། །བདག་ཉིད་ཆོ་ག་སྤྱོད་པའམ། །ཡང་ན་གོས་ཀྱིས་སྤུད་པ་དག །མཐོང་ན་དངོས་གྲུབ་ཉེར་འགྱུར་བར། །སྒྲུབ་པ་པོས་ནི་ཤེས་པར་བྱ། །རི་དང་གླང་པོ་འབབ་ཆུ་དང་། །རྒྱ་མཚོ་དང་ནི་འབྲས་བུ་ཤིང་། །ངང་མོ་ལ་སོགས་བྱ་རྣམས་དང་། །སེང་གེ་ལ་སོགས་རི་དྭགས་སོགས། །ཁྱུ་མཆོག་བཀྲ་ཤིས་རྟ་ལ་སོགས། །བུ་མོ་བཟང་མོ་བརྒྱན་པ་དང་། །བུམ་པ་ལ་སོགས་བཀྲ་ཤིས་པ། །རྣམ་པ་སྣ་ཚོགས་གཡས་ནའོ། །ནོར་དང་གོས་རྣམས་རྙེད་པ་དང་། །དེ་ལ་སོགས་པ་རྣམས་དག་པའི། །རྨི་ལམ་བཟང་པོ་མཐོང་ན་ནི། །བློ་ཅན་འགྲུབ་པར་ཤེས་པར་བྱ། །ཞོ་དང་འོ་མ་འབྲས་ཡོས་མར། །མེ་ཏོག་འབྲས་བུ་རྩ་བ་དང་། །ཡང་ན་གྲུབ་པའི་རྫས་ཀྱང་རུང་། །རྨི་ལམ་དག་ན་རྙེད་པའམ། །དེ་འདྲའི་རྣམ་པ་མཐོང་གྱུར་ན། །རིག་སྔགས་འགྲུབ་པར་གསུངས་པས་ན། །དེ་ནས་བློ་དང་ལྡན་པ་ཡིས། །བསྙེན་པའམ་སྒྲུབ་པའི་ལས་རྣམས་བརྩམ། །གལ་ཏེ་སྔགས་ཀྱི་ནོར་བུའམ། །སྒྲུབ་པའི་རྫས་རྣམས་ཐོབ་ན་ནི། །དེ་ནས་བསྙེན་བའམ་སྒྲུབ་པ་ཡི། །ལས་རྣམས་མྱུར་དུ་བརྩམ་པར་བྱ། །གོས་དང་ཁྲུས་དང་རྒྱན་དག་གིས། །བདག་ཉིད་བརྒྱན་པ་མཐོང་ན་ནི། །དེ་ཚེ་བསྙེན་པའམ་སྒྲུབ་པ་ཡི། །ལས་རྣམས་རབ་ཏུ་བརྩམ་པར་བྱ། །རང་གི་རིག་སྔགས་ཚུལ་བཞིན་དུ། །མཆོད་པ་བྱས་ནས་རིགས་ཡུམ་གྱིས། །སྣ་མའི་མེ་ཏོག་བརྒྱ་དག་དང་། །རས་ཟུང་དག་གིས་མཆོད་པར་བྱ། །ཙནྡན་གྱི་ནི་བདུག་སྦོས་ཀྱིས། །ལན་བརྒྱད་ཉིན་དུ་བདུགས་ནས་ནི། །དེ་ནས་ལྷ་ཉིད་རྨི་ལམ་དུ། །ཅི་རིགས་པར་ནི་བཀའ་ལན་སྩོལ། །ཨུ་ཤི་ར་ཡི་གཟུགས་བརྙན་ནི། །གྲོག་མཁར་ས་ཡི་སྣོད་དུ་བཞག །མཆོད་ཅིང་ཡོངས་སུ་ཚིམ་བྱས་ནས། །ལན་བརྒྱད་དག་ཏུ་མངོན་པར་བསྔགས། །དེ་ནི་འོ་མའི་ནང་དུའམ། །ཡང་ན་སྦྲང་རྩིའི་ནང་དུ་གཞུག །དུས་གསུམ་དག་ཏུ་ལེགས་མཆོད་ནས། །སྲོད་ལ་ཡང་ནི་གསོལ་བ་གདབ། །རྣམ་པ་འདི་དག་ཉིད་ཀྱིས་ཀྱང་། །ཡོངས་སུ་དགྱེས་བ་སྐྱེས་གྱུར་ནས། །དེ་ལྟར་བྱའམ་མི་བྱ་བ། །ལྷ་ཉིད་བཀའ་ལན་གསོལ་བར་མཛད། །སྨྱུང་བྱས་འདོད་པའི་དུས་མཚམས་ལ། །རིག་སྔགས་ཆོ་ག་བཞིན་མཆོད་ལ། །ཐང་ཆུ་རྣམ་པ་བདུན་དག་དང་། །ཤིང་གི་སྙིང་པོ་རྣམ་པ་ལྔས། །སྦྱིན་སྲེག་བརྒྱ་རྩ་བརྒྱད་བྱ་བ། །ཡང་ན་བཟླས་བརྗོད་གྲངས་དག་གིས། །བྱས་ན་རིག་སྔགས་ཉིད་ཀྱིས་ནི། །མྱུར་བ་ཉིད་དུ་བཀའ་སྩོལ་ཏོ། །དེ་ལྟར་རིག་པ་སྟ་གོན་གནས། །ངེས་ཤིང་མྱུར་དུ་འགྲུབ་པར་འགྱུར། །སྟ་གོན་གནས་པའི་ཆོ་ག་འདི། །རྒྱས་པར་རབ་ཏུ་བསྒྲགས་པ་ཡིན། །སྟ་གོན་གནས་པའི་ཆོ་ག་རབ་ཏུ་གསང་བའི་རིམ་པར་ཕྱེ་བའོ།། །།སློབ་མས་དཀྱིལ་འཁོར་ཕྱག་བྱས་ནས། །ཁྱད་པར་དུ་ནི་ཡོན་ཕུལ་ཏེ། །བླ་མའི་བ་ནས་མངོན་སུམ་དུ། །རིག་སྔགས་ཡོངས་སུ་གཟུང་བར་བྱ། །སྙིམ་པ་མེ་ཏོག་གིས་བཀང་ནས། །གུས་ཤིང་རིམ་གྲོ་བསྐྱེད་བྱས་ཏེ། །བྲམ་ས་ཐོག་མར་ལན་གསུམ་བཟླས། །རང་གིས་ལན་གསུམ་བཟླས་ཏེ་གདོན། །དེ་ནས་ཡི་གེ་མང་པོའི་སྔགས། །གི་ཝང་དག་གིས་ཤོག་ཤོག་ལ། །ཇི་སྐད་བསྙན་བཞིན་མངོན་བྲིས་ཏེ། །དེ་ནས་ཅི་བདེར་ཁ་ཏོན་བསླབ། །བླ་མ་ཡོངས་སུ་དགུ་པ་ལས། །དུས་མཚམས་དག་གམ་ཚེས་གཞན་ལ། །རིག་སྔགས་བརྟགས་ནས་བྱིན་པ་དག །ཆོ་ག་བཞིན་དུ་གུས་པར་མནོད། །སློབ་མས་ལེགས་པར་མནོད་པ་དེ། །རིང་བོར་མི་ཐོགས་འགྲུབ་པར་འགྱུར། །མ་བསྙེན་བར་ཡང་དེ་ལ་དེ། །རྟག་ཏུ་འགོ་ཞིང་ཉེ་བར་གནས། །ཡང་ན་གསེར་ལ་སོགས་པ་ཡི། །བུམ་པ་གསར་ཞིང་གཙང་ལ་བཟང་། །སྐྱོན་ཀུན་རྣམ་པར་སྤངས་བ་ལ། །བཀྲ་ཤིས་ངོ་མཚར་དག་ཀྱང་བྱས། །དེ་ལ་སྦོས་ཆུ་འབའ་ཞིག་མེད། །ཁྱད་པར་དུ་ནི་བཤས་བྱས་ནས། །གཙང་མར་བྱས་ཏེ་ནུབ་གཅིག་གམ། །ནུབ་གསུམ་དུ་ནི་སྨྱུང་བྱས་ཏེ། །སྲོད་ལ་རབ་ཏུ་བརྩམས་བྱས་ནས། །ཆོ་ག་འདི་དག་སྤྱད་པར་བྱ། །གསང་སྔགས་རིག་སྔགས་གདམས་པ་དག །གྲོ་ག་ལ་སོགས་ཤོག་ཤོག་ལ། །གི་ཝང་དག་གིས་མཉམ་བྲིས་ཏེ། །ཤོག་ཤོག་རྣམས་ནི་ལྷན་ཅིག་གཞུག །རིག་སྔགས་རྒྱལ་པོས་ལེགས་པར་ནི། །དྲི་དང་མེ་ཏོག་བདུག་མཆོག་དང་། །དེ་བཞིན་ལྷ་བཤོས་མར་མེ་དང་། །སྦྱིན་སྲེག་ལས་ཀྱིས་མཆོད་པ་བྱ། །དེ་ནི་ཆོ་ག་འདི་དག་གིས། །ནུབ་གསུམ་སྟ་གོན་གནས་པ་ལ། །བདེན་པ་དང་ནི་དམ་ཚིག་གིས། །ཁྱད་པར་དུ་ནི་གསོལ་བ་གདབ། །ལན་བརྒྱར་བསྔགས་ནས་ཡང་དང་ཡང་། །བདུག་སྤོས་དག་གིས་རབ་བདུགས་ཏེ། །དྲི་ཞིམ་ཁྲུས་བྱས་གཙང་བྱས་ནས། །ཕྱག་བྱས་ཡིད་ལ་བསམས་ནས་སུ། །བསང་བྱེད་བཅས་པའི་ལག་པ་ཡིས། །དེ་ལས་གཅིག་ནི་དབྱུང་བར་བྱ། །དེ་ཤེས་ནས་ནི་ཕྱག་འཚལ་ཏེ། །གུས་པར་སྤྱི་བོའི་སྟེང་དུ་བཞག །ཤེས་རབ་ཅན་གྱིས་སྔགས་དེ་བསྒྲུབ། །དེ་ཉིད་དེ་ལ་མྱུར་དུ་འགྲུབ། །ཤེས་རབ་ཅན་གྱིས་གཞན་མི་སྒྲུབ། །བསྒྲུབས་ན་ཡང་ནི་འཆི་བར་འགྱུར། །གང་ཞིག་བསྒྲུབས་ནས་བྱིན་པ་དག །ཆོ་ག་བཞིན་དུ་དེ་མནོས་ན། །སྒྲུབ་པ་པོ་ཡི་ལྷ་ཡིན་ཏེ། །དེ་ལ་དེ་ནི་འགྲུབ་པར་ཤེས། །རིག་སྔགས་ཡིད་ཀྱིས་གསོལ་བཏབ་ནས། །ལན་བརྒྱར་ཡོངས་སུ་བཟླས་བརྗོད་དེ། །འདི་ནི་ཁྱེར་ཅིག་ཁྱེར་ཅིག་ཅེས། །མེ་ཏོག་དྲི་ཞིམ་དག་གིས་སྦྱིན། །བཅོམ་ལྡན་འདི་ལ་བསྙེན་པ་དང་། །འདི་ལ་རབ་ཏུ་འགོ་བར་མཛོད། །བཅོམ་ལྡན་བདག་གིས་གཟུང་ལགས་ཀྱིས། །བདག་ལ་འགོ་བར་མཛོད་ཅེས་བྱ། །སློབ་དཔོན་དང་ནི་སློབ་མ་ཡིས། །རིག་སྔགས་སྦྱིན་ཞིང་ཡོངས་བཟུང་བའི། །ཆོ་ག་འདི་ལྟར་བྱས་ན་ནི། །ལྷ་ཉིད་རབ་ཏུ་འགྲུབ་པར་འགྱུར། །མཁས་པས་རིག་སྔགས་འགྲུབ་པ་ཀུན། །གྲུབ་པ་ཉིད་དུ་ཤེས་པར་བྱ། །རྣམ་པ་དེ་ལྟར་རྫས་དག་དང་། །ཚུལ་བཞིན་ཐོབ་པས་བསྙེན་མི་དགོས། །ཟློས་པ་སྒྲུབ་པ་པོ་དག་གིས། །རིག་སྔགས་ཚུལ་བཞིན་བཟླས་པ་ཡིས། །བསྙེན་པ་ཚད་བྱས་གང་བྱིན་པ། །དེ་ཡང་མ་བསྙེན་འགྲུབ་པར་འགྱུར། །དངོས་གྲུབ་ཕྱིར་ནི་གསང་སྔགས་ཡོན། །མེ་ཏོག་འབྲས་བུ་རྩ་བ་དང་། །གདུ་བུ་གོས་དང་གསེར་དང་ཞོ། །འབྲུ་དང་ནོར་བུ་བུ་མོ་དང་། །མལ་ཆ་རྣམས་དང་ལྷམ་དག་དང་། །རྒྱན་གྱི་རྣམ་པ་ཐམས་ཅད་དང་། །སྒྲུབ་པའི་ཡོ་བྱད་རྣམས་དང་ནི། །གླང་པོ་བ་ལང་རྟ་ལ་སོགས། །བཀུར་སྟི་རྣམ་པ་དུ་མ་དང་། །བདག་གི་བདོག་པ་མཐའ་དག་དབུལ། །གུས་པར་ཕྱག་བྱས་ཐལ་སྦྱར་ནས། །བདག་ཉིད་ཀྱང་ནི་དབུལ་བར་བྱ། །དེ་ལྟར་ཆོ་ག་ཤེས་པ་ཡིས། །རྣམ་པ་སྣ་ཚོགས་ཅི་རིགས་པར། །བླ་མ་ལ་ནི་ཡོན་ཕུལ་ནས། །དེ་ནས་གསང་སྔགས་ནོད་པར་བྱ། །རིག་སྔགས་ཡོངས་སུ་གཟུང་བའི་རིམ་པར་ཕྱེ་བའོ།། །།སྒྲུབ་པ་པོས་ནི་ཆོ་ག་འདིས། །ལྷག་དང་ཆད་པ་ཤེས་བྱས་ནས། །མཐོང་དང་མ་མཐོང་ལས་དག་གིས། །རིག་སྔགས་ཡོངས་སུ་བཀང་བར་བྱ། །གསང་སྔགས་ཡན་ལག་ལྷག་ཆད་གང་། །རྨི་ལམ་དག་ཏུ་མཐོང་ན་ནི། །དེ་དག་བཀང་བའི་ཆོ་ག་འདི། །གསང་སྔགས་ཟློས་པ་དག་གིས་བྱ། །གལ་ཏེ་འདིར་ཡང་ལ་ལ་ཞིག །ཡི་གེ་ལྷག་གམ་ཆད་པ་ཡི། །དོགས་པ་སྐྱེས་ན་མཁས་པ་ཡིས། །གསང་སྔགས་བཀང་བའི་ཆོ་ག་བྱ། །ཤོག་ཤོག་དག་ལ་གི་ཝང་གིས། །གསང་སྔགས་ཡི་གེ་ཚང་བར་བྲི། །ཆོ་ག་བཞིན་དུ་མཆོད་བྱས་ཏེ། །རིག་སྔགས་རྒྱལ་པོ་མངོན་པར་བསྔགས། །རིག་སྔགས་རྒྱལ་པོར་བཅས་པ་ཡིས། །མཆོད་སྦྱིན་ཡམ་སྲེག་ཤིང་མེ་ལ། །སྔགས་ཀྱིས་མར་གྱི་སྲེག་བླུགས་ནི། །ཅིག་ཅར་ལན་བརྒྱར་བསྲེག་པར་བྱ། །རིག་སྔགས་ཁྲི་ལ་བཞག་ནས་སུ། །གསོལ་བ་བཏབ་སྟེ་མངོན་པར་མཆོད། །རིག་སྔགས་ཀྱི་ནི་བདག་པོ་དང་། །རིག་སྔགས་ཡིད་དབང་ཕྱུག་མ་དང་། །བདེ་གཤེགས་སྲས་བཅས་ཕྱག་བྱས་ཏེ། །བཀང་བའི་ཕྱིར་ནི་གསོལ་བཏབ་ནས། །རིག་སྔགས་དྲན་བཞིན་ཀུ་ཤ་ཡི། །སྟན་ལ་ཤར་ཕྱོགས་ཁ་བལྟས་ཉལ། །རིག་སྔགས་རྒྱལ་པོས་དེ་ཉིད་ཀྱི། །མཚན་མོ་དག་ནི་ངེས་པར་གང་། །ཡི་གེ་གསལ་བ་དེ་དག་དང་། །སྨྱུ་གུ་ཡང་ནི་དེ་ཉིད་དང་། །གི་ཝང་དག་ཀྱང་དེ་ཉིད་ཀྱིས། །ཤོག་ཤོག་ཀྱང་ནི་དེ་ཉིད་ལ། །གསང་སྔགས་ཆད་པ་རབ་ཏུ་སྐོང་། །ལྷག་པ་དག་ཀྱང་མཉམ་པར་མཛད། །གསང་སྔགས་མ་ཉམས་མཉམ་པ་དག །འབའ་ཞིག་འདྲི་བར་མི་མཛད་ལ། །གསང་སྔགས་རིག་སྔགས་མ་ཚང་བ། །ངེས་པར་འདི་ཡིས་སྐོང་བར་མཛད། །ཡང་ན་ཡིག་འབྲུ་མ་ཆད་པ། །རྨི་ལམ་དག་ཏུ་སྟོན་པར་མཛད། །གསང་སྔགས་ཟློས་པ་པོ་དག་གིས། །བསྲུང་བའི་ཆོ་ག་བྱས་ཏེ་བྱ། །རིག་སྔགས་ཡོངས་སུ་བཀང་བའི་རིམ་པར་ཕྱེ་བའོ།། །།རིག་སྔགས་དག་ནི་ཐམས་ཅད་ཀྱང་། །སྦྱིན་སྲེག་ལས་ཀྱིས་གཟི་བྱིན་བསྐྱེད། །སྦྲང་རྩི་འོ་ཐུག་མར་དག་གམ། །ཡང་ན་ཏིལ་དང་མར་བསྲེས་བའམ། །མར་བཏགས་མེ་ཏོག་སྦྱིན་སྲེག་གམ། །ས རྫ་ར་སའི་སྦྱིན་སྲེག་དང་། །མར་དང་ཐང་ཆུའི་སྦྱིན་སྲེག་གིས། །གསང་སྔགས་གཟི་བྱིན་ཆེ་བར་འགྱུར། །བ་ཡི་རྣམ་ལྔ་ཟོས་ནས་སུ། །རི་ཡི་རྩེ་མོར་ཅི་རིགས་པར། །མེ་ཏོག་འབུམ་དག་དབུལ་བྱས་ནས། །དེས་ནི་ལྷ་ཉིད་གཟི་བྱིན་སྐྱེ། །ཉིན་གསུམ་དུ་ནི་དུས་གསུམ་དུ། །དྲི་ཞིམ་དྲི་དང་བདུག་སྤོས་དང་། །མེ་ཏོག་དག་ཀྱང་ཕུལ་ན་ནི། །གསང་སྔགས་གཟི་བྱིན་ཆེ་བར་འགྱུར། །ཤིང་གི་སྙིང་པོའི་སྒྲོན་མ་དག །སྦར་ཞིང་ཞག་བདུན་དུས་གསུམ་དུ། །བཟླས་བརྗོད་བྱས་ན་གསང་སྔགས་རྣམས། །གཟི་བྱིན་ཆེ་བའི་མཆོག་ཏུ་འགྱུར། །དེ་ལྟར་བཟླས་དང་སྦྱིན་སྲེག་དང་། །མཆོད་པ་དག་དང་ལྷ་བཤོས་ཀྱང་། །འདོད་པ་པོས་ནི་ཁྱད་པར་དུ། །ལྷ་རྣམས་ཐམས་ཅད་གཟི་ཆེན་འགྱུར། །ལྷ་གཟི་བྱིན་བསྐྱེད་པའི་ཆོ་ག་རིམ་པར་ཕྱེ་བའོ།། །།གང་ཞིག་གསང་སྔགས་ཟློས་པ་དག །དངོས་གྲུབ་ཆེན་པོ་མྱུར་ཐོབ་པའི། །སྦྱིན་སྲེག་ཆོ་ག་མ་ལུས་པ། །དེ་དག་ཅི་བཞིན་སྤྱད་པར་བྱ། །ལྷ་ཡི་གནས་ཀྱི་ཕྱི་རོལ་དུ། །དེ་ཡི་མདུན་དུ་མི་རིང་བར། །ཅི་ལྟར་རིགས་པས་ཡོངས་བརྟགས་ལ། །ཆོ་ག་འདི་དག་ཀུན་དུ་སྤྱད། །དབུས་སུ་མེ་ཡི་ཐབ་བརྐོ་བ། །གྲུ་བཞི་ལྷམ་པ་ཁ་ཁྱེར་ཅན། །ཁྲུ་གང་ཟབས་སུ་ཁྲུ་བྱེད་པ། །ཡང་ན་ཐབ་ཁུང་ཟླུམ་པོར་བྱ། །དེ་ནས་ཡམ་ཤིང་ལ་སོགས་པས། །ཡོ་བྱད་དགོས་པ་ཐམས་ཅད་དག །གཡས་ཕྱོགས་སུ་ནི་གཞག་པར་བྱ། །གཡོན་དུ་ཆུ་ཡི་སྣོད་བཞག་གོ། །དེ་ནས་ལས་ཀུན་བྱེད་པ་ཡི། །སྔགས་ཀྱིས་དེ་དག་བསང་གཏོར་ཏེ། །འདུག་ནས་མཁས་པས་གསང་སྔགས་རྣམས། །ཡིད་ལ་བསམས་ཏེ་སྤྱན་ཡང་དྲང་། །མཆོད་ཡོན་ཡོངས་སུ་བཟླས་པ་ཡང་། །དེ་དག་རྣམས་ལ་ཕུལ་ནས་སུ། །མེ་ཏོག་གཅིག་གིས་རིག་སྔགས་དེ། །དེ་ཉིད་དུ་ནི་བཞུགས་སུ་གསོལ། །དེ་ནས་མེ་ནི་བསང་བའི་ཕྱིར། །ཁྲོ་བོའི་རྒྱལ་པོས་བསང་གཏོར་ནས། །ཆོ་ག་ལས་སྨོས་ཤིང་དག་གིས། །ཐབ་བཅུག་ཤེས་རབ་ཅན་གྱིས་སྦར། །མེ་འབར་རིག་ནས་དང་པོར་ནི། །གསང་སྔགས་དག་གིས་གཉེར་བར་བྱ། །ཚུར་བྱོན་ཚུར་བྱོན་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེའི་མཆོག །སྲེག་བླུགས་ཞལ་ཟས་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ༀ་ཨགྣ་ཡེ་ཧ་བྱཀ་བྱ་བཱ་ཧ་ནཱ་ཡ་སྭཱ་ཧཱ། དེ་ལྟར་དང་པོར་མེ་གཉེར་ནས། །སྲེག་བླུགས་གསུམ་ཡང་བསྲེག་པར་བྱ། །ༀ་ཨགྣ་ཡེ་ཧ་བྱ་ཀ་བྱ། བ་ཧ་ན་ཡཱ་དཱི་བྱ་དི་པཱ་ཡ་སྭཱ་ཧཱ། དེ་ནས་མཁས་པས་གཡས་ཕྱོགས་ནས། །བསྐོར་ཅིང་བསངས་ནས་རང་གི་ནི། །སྔགས་ཀྱིས་མར་ལ་སོགས་པ་ལས། །སྲེག་བླུགས་གསུམ་ཡང་བསྲེག་པར་བྱ། །སྒྲུབ་པས་སྦྱིན་སྲེག་ཐམས་ཅད་ལ། །ཁྲོ་བོ་ཀཱི་ལི་ཀཱི་ལ་གང་། །དེ་ཡི་ཕྱག་རྒྱས་སྦྱིན་སྲེག་ལ། །མེ་ལ་སོགས་པ་བསང་བར་བྱ། །ༀ་ཀཱི་ལི་ཀཱི་ལི་བཛྲ་བྷཱི་མ་ར་དྲི་པ་ཏྲི་ཏ། མ་ཧཱ་ཀྲོ་དྷ་བི་ཛ་ཡ་ནི་ཀྲྀནྟ་ཧཱུྃ་ཕཊ་བནྡྷ་བནྡྷ་སྭཱ་ཧཱ། དེ་ནས་ཡམ་སྲེག་ཤིང་དག་བསྲེག །དེ་ནས་ཡམ་ཤིང་མེ་ལ་མར། །དེ་ནས་ཏིལ་དང་འབྲས་ཆན་ཏེ། །ཆོ་ག་དེ་དག་མདོར་བསྡུས་པའོ། །པ་ལ་ཤ་དང་ནྱ་གྲོ་དྷ། །པཱ་ཀྵ་སེང་ལྡེང་ཨརྒ་དང་། །བེའུ་ཀང་ཀ་དང་ཨ་མྲ་དང་། །ཀརྨྨ་རི་དང་ཤ་མི་དང་། །ཨ་པ་མརྒ་ལས་བྱུང་དང་། །ཨུ་དུམ་ཨ་ཤྭཏྠར་བཅས་པ། །ཡམ་ཤིང་བཅུ་གཉིས་དག་ཏུ་བསྟན། །སར་པ་དག་ལས་མཛུབ་གང་ཙམ། །ལས་རྣམས་ཀུན་ལ་བསྲེག་བྱ་སྟེ། །ལས་རྣམས་ཀུན་ལ་ཐོར་ཏོ་གཉིས། །བརྟགས་ནས་རྩེ་མོས་བསྲེག་པར་བྱ། །བཟང་ལ་དྲང་ཞིང་གསར་པ་ལ། །སྦོས་ཆུས་བསང་གཏོར་བྱས་པ་ལ། །ཞི་བའི་སྲེག་བྱ་ཅུང་ཟད་གང་། །རྒྱས་པའང་གང་དག་ཡིན་པ་དང་། །བདག་ཟས་ཅུང་ཟད་གང་ཡིན་པ། །དེ་དག་ལས་རྣམས་ཀུན་ལ་བསྲེག །ཉིན་རེའམ་ཡམ་སྲེག་ཤིང་དག་ལ། །བདག་གི་ཟས་ཀྱང་རྟག་ཏུ་བསྲེག །སྔགས་དང་ཇི་ལྟར་རྗེས་མཐུན་པར། །སྦྱིན་སྲེག་བྱས་ནས་ཁ་ཟས་བཟའ། །བཟླས་བརྗོད་ཆོ་ག་ཇི་ལྟར་གསུངས། །སྦྱིན་སྲེག་ལ་ཡང་དེ་ལྟར་བསྒྲགས། །ལག་པས་པུས་མོའི་ནང་རོལ་ནས། །སྦྱིན་སྲེག་དག་ནི་བརྩམ་པར་བྱ། །རིག་སྔགས་ཐམས་ཅད་གཟི་བསྐྱེད་ཕྱིར། །དུ་རུས་འབྲུ་མར་སྦྱར་བ་ལ། །བཏགས་པའི་ཨ་ཀར་དུམ་བུ་ནི། །སོར་བཞི་བསྲེགས་པས་བསང་བར་བཤད། །ཡང་ན་རྟག་ཏུ་གུ་གུལ་ནི། །མར་སྦྱར་སྦྱིན་སྲེག་རབ་ཏུ་ཤིས། །ཡང་ན་གསང་སྔགས་བྱེ་བྲག་ལ། །ས་ལ་ཐང་ཆུའི་བྱེ་བྲག་ཤིས། །སྔགས་འགྲུབ་ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །དང་པོར་བདག་པོ་བཞུགས་གསོལ་ནས། །དེ་ཡི་འོག་ཏུ་སྦྱིན་སྲེག་བརྩམ། །སྔགས་འགྲུབ་ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །དང་པོར་རིགས་ཀྱི་རིག་སྔགས་ཀྱིས། །བསྲུང་བ་བྱས་ཏེ་ལས་རྣམས་བརྩམ། །སྔགས་འགྲུབ་ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །ལས་མཐར་རིགས་ཀྱི་སྙིང་པོ་ཡིས། །གཟི་བྱིན་བསྐྱེད་པ་བརྩམ་པར་བྱ། །སྔགས་འགྲུབ་ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །ཐོག་མ་དང་ནི་ཐ་མར་ཡང་། །མར་གྱི་དགང་བླུགས་རྟག་ཏུ་བསྲེག །སྔགས་འགྲུབ་ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །རིགས་བདག་རིག་སྔགས་སྙིང་པོ་བཟླས། །ཐ་མར་མཆོད་ཡོན་དབུལ་བར་བྱ། །དཀྱིལ་འཁོར་དག་ལ་སྦྱིན་སྲེག་གི། །ཆོ་ག་མ་ལུས་བསྒྲགས་པ་ཡིས། །ཆོ་ག་དེ་ཡིས་འདིར་ཡང་ནི། །སྦྱིན་སྲེག་ལས་རྣམས་བྱ་བར་བཤད། །ལག་མཐིལ་ཆུ་ལ་བཟླས་པས་ནི། །ལན་གསུམ་དུ་ཡང་འཐོར་འཐུང་བྱ། །སྦྱིན་སྲེག་བྱས་པའི་ཐ་མར་ནི། །རང་གི་རིག་སྔགས་ཉིད་ཀྱིས་ཀྱང་། །བསང་གཏོར་ལན་གསུམ་བྱ་བར་བཤད། །དེ་འོག་མེ་ལ་ཀུན་བསྲེགས་ནས། །སྤྱན་དྲང་རིག་སྔགས་དེ་ཉིད་ཀྱིས། །བཞུད་ཅིག་བཞུད་ཅིག་ཅེས་བྱས་ཏེ། །དེ་ཡི་འོག་ཏུ་སླར་བཏང་ངོ་། །གསང་སྔགས་ཡི་གེའི་རྗེས་མཐུན་པར། །མཇུག་ཏུ་བཟླས་བརྗོད་བརྩམ་པར་བྱ། །དེ་ལྟར་སྦྱིན་སྲེག་ཐམས་ཅད་ཀྱི། །ཆོ་ག་མདོར་བསྡུས་བཤད་པ་ཡིན། །སྦྱིན་སྲེག་གི་ཆོ་ག་རིམ་པར་ཕྱེ་བའོ།། །།དེ་ནས་གཞན་ཡང་གང་དག་གིས། །བསྡུས་ནས་རིག་སྔགས་ཐམས་ཅད་ཀྱི། །གསང་སྔགས་ཆོ་ག་རྩོམ་འགྱུར་བའི། །ཆོ་ག་ཡན་ལག་བསྡུ་བ་བཤད། །དགོས་པའི་ཡོ་བྱད་ཐམས་ཅད་ནི། །ཐོག་མ་ཉིད་དུ་ཀུན་བསྡུས་ཏེ། །དེ་ནས་བསྙེན་པའམ་སྒྲུབ་པ་དག །བློ་དང་ལྡན་པས་བརྩམ་པར་བྱ། །དྲི་ཞིམ་དེ་ནི་དེ་དང་དེ། །དེ་བཞིན་བདུག་སྤོས་རྣམ་པ་དང་། །སྙིང་པོ་ཐང་ཆུ་རིགས་རྣམས་དག །ཁྱད་པར་དུ་ནི་གསོག་པར་བྱ། །ཡུངས་ཀར་སརྫ་ར་ས་དང་། །དུག་དང་ལན་ཚྭ་སྐེ་ཚེ་དང་། །ཏིལ་དང་འབྲུ་མར་བ་མར་དང་། །བུམ་པ་དང་ནི་ཟངས་ཀྱི་སྣོད། །འབྲུ་དང་རིན་ཆེན་སྣ་ལྔ་དང་། །སྨན་རྣམས་དང་ནི་སྦྲང་རྩི་དང་། །དེ་བཞིན་བུ་མོས་བཀལ་བ་ཡི། །ཚོན་སྣ་ལྔ་ཡི་སྲད་བུ་དང་། །མར་མེའི་དོན་དུ་ཀོང་བུ་དང་། །ཤིང་བལ་མར་མེའི་སྙིང་པོ་དང་། །ལམ་ཕོར་དང་ནི་ཚོན་རྩིའི་རྫས། །དེ་བཞིན་སེང་ལྡེང་ཕུར་བུ་དང་། །མཆོད་སྦྱིན་གྱི་ནི་ཡམ་ཤིང་དང་། །ནིམ་པའི་དགང་གཟར་བླུགས་གཟར་དང་། །གི་ཝང་དང་ནི་ཨུར་མོའི་ལྕགས། །ཙནྡན་དམར་པོ་ཉིད་དང་ནི། །གོས་དང་གསང་སྲེལ་སྲད་བུ་དང་། །རི་དྭགས་ནག་པོའི་པགས་པ་གསར། །ནས་དང་འབྲས་ཡོས་པྲི་ཡང་ཀུ། །ཙནྡན་དཀར་དང་ཤིང་གི་ལྷམ། །མུཉྫ་ཀུ་ཤ་ཤ་ཏ་བུས། །མེ་ཏོག་སྣོད་ནི་ཤིས་པ་དང་། །མཆོད་པའི་ཡོ་བྱད་མཆོག་དང་ནི། །དེ་བཞིན་བགྲང་ཕྲེང་ལ་སོགས་དང་། །དེ་དག་ལ་སོགས་བློ་ཅན་གྱིས། །ནོར་དང་སྒྲུབ་པའི་ཡན་ལག་རྣམས། །ཐམས་ཅད་ཐོག་མར་ཡོངས་བསྡུས་ནས། །དེ་ཡི་འོག་ཏུ་ལས་རྣམས་བརྩམ། །སྒྲུབ་པའི་ཡན་ལག་གསོག་པའི་ཆོ་ག་རིམ་པར་ཕྱེ་བའོ།། །།དེ་ནས་སྒྲུབ་པའི་རྫས་རྣམས་ཀྱི། །མཚན་ཉིད་གང་དག་གསུངས་པ་ཀུན། །སྔགས་ཟློས་པ་ཡི་དངོས་གྲུབ་ཕྱིར། །དེ་དག་མདོར་བསྡུས་བཤད་པར་བྱ། །ཡིད་བཞིན་ནོར་བུ་བུམ་པ་བཟང་། །ནོར་གྱི་ཆར་འབབ་གསེར་ཆེན་དང་། །འཁོར་ལོ་ལྡོང་རོས་རལ་གྲི་སྟེ། །འདི་དག་དངོས་གྲུབ་བདུན་ཡིན་ནོ། །ཕལ་ཆེར་སྤྱི་ཡིན་ཁྱད་པར་འཕགས། །ཆེ་ལ་མཆོག་གི་མཆོག་ཡིན་ཏེ། །དེ་ཡི་བསོད་ནམས་ཕུང་ཆེན་དང་། །རྒྱལ་སྲིད་དག་ཀྱང་ཐོབ་པར་འགྱུར། །གཞན་ཡང་དངོས་གྲུབ་དམ་པ་ནི། །གཙུག་ཏོར་པདྨ་རྡོ་རྗེ་གསུམ། །རིགས་དང་རིགས་ཀྱི་བྱེ་བྲག་ལས། །ཕལ་ཆེར་ཡོངས་སུ་བསྒྲགས་པ་ཡིན། །གསང་སྔགས་གང་ཡང་རུང་བ་ཡིས། །གང་ཡང་རུང་བའི་དངོས་གྲུབ་ཀྱང་། །མངོན་པར་ཤེས་པ་ལྷག་རྟོག་པ། །གཙོ་བོ་ཡིན་པར་ཡོངས་སུ་བསྒྲགས། །གསེར་དང་དངུལ་ལ་སོགས་པ་ལས། །ཡུ་བ་ཁྲུ་གང་ཙམ་བྱས་ལ། །དེ་སྟེང་རིན་ཆེན་ཆེན་པོ་ནི། །གཅིག་པུ་བཞག་པའམ་ནོར་བུ་ནི། །པདྨ་རཱ་ག་དག་པའམ། །ཡང་ན་ཤེལ་ལས་བྱུང་བའང་རུང་། །ཁྲིའུའི་སྟེང་དུ་ལེགས་བཞག་ནས། །སྒྲུབ་པ་པོས་ནི་མཚན་མོ་བསྒྲུབ། །གསང་སྔགས་སྟ་གོན་ཆོ་ག་དང་། །བདག་ཉིད་དབང་བསྐུར་གང་བཤད་པ། །དེ་ཡི་རང་བཞིན་ཆོ་ག་དེས། །བུམ་པ་བཟང་པོ་བསྒྲུབ་པར་གསུངས། །གསེར་དག་དང་ནི་དངུལ་དག་དང་། །རིན་ཆེན་སྣ་ཚོགས་ལ་སོགས་པ། །དཔག་ཚད་ལྔ་ཡི་ཁོར་ཡུག་ཏུ། །ནོར་ནི་ཆར་བཞིན་འབབ་པར་གསུངས། །མི་ཟད་པ་ཡི་གཏེར་ཆེན་ནི། །གསེར་ལ་སོགས་པས་གང་བ་སྟེ། །སྦྱིན་དང་ལོངས་སྤྱོད་ལ་སོགས་པ། །སྤྱད་ཅིང་ཕྱུང་ཡང་མི་ཟད་པའོ། །ཨུར་མོའི་ལྕགས་ཀྱི་འཁོར་ལོ་ནི། །མཛུབ་གང་ཙམ་ལ་རྩིབ་དྲུག་པ། །ཤིན་ཏུ་གཟུགས་ལེགས་རྣོ་བདར་བ། །མྱུར་དུ་འགྲུབ་ཅིང་ཆེན་པོར་འགྱུར། །ཉི་མ་འཆར་ཀའི་གཟུགས་འདྲ་ཞིང་། །གསེར་ནི་བཙོ་མའི་མདོག་ལྟ་བུ། །ཀ་ར་བཱི་རའི་མདོག་འདྲ་ཞིང་། །ལྡོང་རོས་དག་ནི་མཆོག་ཏུ་བཤད། །རལ་གྲི་མཐེའུ་ཆུང་མཐོ་དོ་བ། །འཕན་མེད་ཞེང་དུ་སོར་བཞི་ཚད། །བདར་བ་ཙ་ཤའི་འདབ་མ་འདྲ། །འགྲུབ་ཕྱིར་བ་སོའི་དངོ་ཅན་ནོ། །ཕྱག་རྒྱ་བྲི་བའི་ཆོ་ག་བཞིན། །གཙུག་ཏོར་ཕྱག་རྒྱ་གསེར་ལས་བྱས། །ཡིད་བཞིན་ནོར་བུའི་ཡུ་བ་བྱས། །ཆེ་ལ་བཞག་སྟེ་བསྒྲུབ་པར་བྱ། །པདྨ་ཙནྡན་ལས་བྱས་པའི། །དེ་བཞིན་གསེར་སོགས་ལས་བྱས་པ། །མཐོ་གང་བ་ལས་སྡོང་བུ་དངུལ། །འདབ་བརྒྱད་སྙིང་པོ་མཛེས་པར་བྱ། །རྡོ་རྗེ་ཨུར་མོའི་ལྕགས་བྱས་པའམ། །ཡང་ན་ཙནྡན་དམར་པོའང་རུང་། །ལྕགས་གསུམ་ལས་བྱས་སོར་བཅུ་དྲུག །གཉིས་ཀ་རྩེ་མོ་གསུམ་པར་བྱ། །བ་བླ་ཡོན་ཏན་འཕགས་པ་དག །གསེར་གྱི་གྱིམ་ཕག་འདྲ་བ་ཡི། །སུལ་གྱིས་གང་ཞིག་ལྗིད་ཆེ་བ། །ཁ་དོག་བཟང་པོ་འགྲུབ་ཕྱིར་མཆོག །སེར་སྐྱ་དག་ལས་བྱུང་བ་ཡི། །གི་ཝང་ཁ་དོག་སེར་པོའོ། །བཙག་ནི་ཡུག་སྣམ་གསེར་མདངས་ཅན། །མེ་ཏོག་བམངུ྅྅྅མའི་མདོག་འདྲ་བའོ། །གྲོག་མཁར་བརྩེགས་པ་འདྲ་བ་ལ། །བཙག་ན་ཨུཏྤལ་སྔོན་པོའི་མདོག །ཤིན་ཏུ་འཇམ་པོ་འདི་འདྲ་བ། །ཆུ་རྒྱུན་ལས་བྱུང་ཨཉྫ་ནའོ། །རས་ཕྲན་གཙང་མ་འཇམ་པོ་ནི། །ཁོ་ལག་ཆེ་ལ་གུར་གུམ་བཙོས། །དགོན་པའི་ཕྱུགས་ཀྱི་ལྕི་བ་ཡི། །ཐལ་བ་ག་པུར་གྱི་བསྒོས་པའོ། །མཆོད་ཕྱིར་ཐོགས་ཀྱི་སྲད་བུ་དཀར། །ཕྲ་ཞིང་སུམ་བསྒྲིལ་ལེགས་བཀལ་བའམ། །ཡང་ན་གསེར་གྱི་སྐུད་པ་ནི། །ལེགས་བསྙོད་སུམ་བསྒྲིལ་ཡོན་ཏན་ཅན། །སྣ་མའི་མེ་ཏོག་ཕྲེང་བ་ནི། །བུ་མོས་བཀལ་སྐུད་ལས་བརྒྱུས་པའོ། །ཤྲི་པ་ཎ་ཡིས་ཤིང་གི་ལྷམ། །ཡམ་ཤིང་ལེགས་བཞོགས་མཐེབ་རྟེན་ཅན། །རྨ་བྱའི་གདུགས་ནི་སྨྱུག་མ་ཡི། །ཡུ་བ་རིང་པོ་གསེར་ལ་བཏགས། །མདུང་རྩེ་གསུམ་དང་དབྱུག་ཐོ་ཐོགས། །ཐམས་ཅད་རང་གི་མཚན་ཉིད་ལྡན། །བསྒྲུབས་ན་མྱུར་དུ་འགྲུབ་པའི་ཕྱིར། །མཚོན་ཆ་རྣམས་ནི་རབ་ཏུ་ཤིས། །འདི་ནི་ཆོ་ག་ལས་གསུངས་པའི། །བསྒྲུབ་བྱའི་རྫས་རིགས་གང་ཡིན་པ། །དེ་དག་མཚན་ཉིད་འཇིག་རྟེན་ལས། །ཁྱད་པར་དུ་ནི་ཉེ་བར་བརྟག །དེ་བཞིན་དངོས་གྲུབ་མང་པོ་ཡིས། །བསྒྲུབ་བྱའི་རྫས་ནི་སྣ་ཚོགས་པ། །དེ་བས་དེ་དག་བདག་བློ་དང་། །གཙུག་ལག་བློ་ཡིས་ཡོངས་སུ་བརྟག །ནད་མེད་མདངས་བཟང་ལུས་མ་ཉམས། །གཟུགས་བཟང་རྨ་མེད་དར་ལ་བབ། །བདག་ཉིད་ཤི་བར་གྱུར་བའི་རོ། །རོ་ལངས་དངོས་གྲུབ་ཕྱིར་ནི་མཆོག །ཡང་ན་ལས་ཀྱི་བྱེ་བྲག་ལས། །རིགས་ངན་དག་ཀྱང་རབ་ཏུ་ཤིས། །རོ་ལངས་བསྒྲུབ་པ་དག་ལ་ནི། །འཇིགས་མེད་མཆོག་སྟེ་དེས་ངེས་སོ། །རྫས་ཀྱི་མཚན་ཉིད་ཀྱི་ཆོ་ག་རིམ་པར་ཕྱེ་བའོ།། །།ཡོ་བྱད་ཀུན་དང་ལྡན་པ་ཡིས། །ཅི་རིགས་བར་ནི་མཆོད་བྱས་ནས། །བསྒྲུབ་པའི་རྫས་རྣམས་ཡོངས་གཟུང་བ། །དུས་མཚམས་དག་ལ་སྔ་དྲོ་བྱ། །གསང་སྔགས་ཉེ་བར་གྱུར་ནས་ནི། །གང་ཚེ་བཀའ་ལུང་གསལ་ཤེས་པ། །དེ་ཚེ་བསྒྲུབ་པའི་རྫས་གཟུང་བ། །མཁས་པ་དག་གིས་ལེགས་པར་བྱ། །ཁྲུས་བྱས་གཙང་ཞིང་སྨྱུང་བྱས་ཏེ། །བཀྲ་ཤིས་ངོ་མཚར་དག་བྱས་ནས། །བློ་དང་ལྡན་པས་བདག་ཉིད་ཀྱིས། །བསྒྲུབ་པའི་རྫས་རྣམས་ཡོངས་སུ་གཟུང་། །འབྱུང་ཁུང་དག་ནས་ཅི་མཐོང་བ། །ལན་ཅིག་སྨྲ་བ་འཇིགས་མེད་པས། །ཁ་ཐབས་བཞིན་དུ་ཉོས་པ་ཡི། །བསྒྲུབ་པའི་རྫས་ནི་ཡོངས་སུ་གཟུང་། །གང་ཚེ་སྒྲུབ་པའི་དུས་དག་ཏུ། །གསང་སྔགས་ཉེ་བར་གྱུར་ཤེས་པ། །དེ་ཚེ་བློ་དང་ལྡན་པ་ཡིས། །བསྒྲུབ་པའི་རྫས་རྣམས་ཡོངས་སུ་གཟུང་། །ཡང་ན་མཁས་པས་རྫས་དག་ནི། །རྣམ་མང་གཟུགས་དང་ལྡན་པ་དག །ལུང་གིས་དག་པར་རྣམ་ཤེས་པ། །དེ་དག་ཆོ་ག་བཞིན་དུ་གཟུང་། །རྫས་བཟང་གང་ཡང་རུང་བ་དག །ཆོ་ག་བཞིན་དུ་ཡོངས་བཟུང་ནས། །དེ་མ་ཐག་ཏུ་རབ་བསྒྲིམས་ཏེ། །བློ་དང་ལྡན་པས་སྒྲུབ་པ་བརྩམ། །རྫས་ཡོངས་སུ་གཟུང་བའི་ཆོ་ག་རིམ་པར་ཕྱེ་བའོ།། །།དེ་ནས་བསྒྲུབ་པའི་རྫས་རྣམས་ཀུན། །ཅི་རིགས་པར་ནི་རྣམ་པར་སྦྱང་། །བརྟག་པར་བྱ་བ་སྲ་བ་རྣམས། །བ་ཡི་སྣ་ལྔས་སྦྱང་བར་བསྒྲགས། །བ་ཡི་རྣམ་ལྔ་ཆ་མཉམ་པས། །ལྡོང་རོས་དག་ནི་བཏག་པར་བྱ། །འོ་མ་གཙང་མ་མང་པོ་ཡིས། །བ་བླ་ལེགས་པར་བཏག་པར་བྱ། །བ་གཅིན་མང་པོས་ལི་ཁྲི་སྟེ། །མར་མང་རྣམས་ཀྱིས་གི་ཝང་ངོ་། །འོ་མ་ཁ་དོག་ལྡན་པའི་རྫས། །ཨཉྫ་ན་ནི་འབའ་ཞིག་གོ། །རལ་གྲི་འཁོར་ལོ་ལ་སོགས་རྫས། །བ་ཡི་ལྕི་བ་ཆུ་མང་བས། །ཤིང་དང་སེམས་ཅན་ལ་སོགས་རྫས། །ཐམས་ཅད་པ་ཡི་གཅིན་དང་ཆུས། །རི་དྭགས་ནག་པོའི་པགས་ལ་སོགས། །བ་ཡི་གཅིན་དང་བསྐ་བས་བཀྲུ། །དེ་ལྟར་རྫས་རྣམས་བཀྲུས་ནས་ནི། །སྦོས་ཆུ་དག་གིས་བཤལ་བར་བྱ། །བ་ཡི་གཅིན་དང་བཅས་པ་ཡི། །ཏིལ་དང་ཆུ་ཡིས་མ་ལུས་བཤལ། །རྫས་དང་མཐུན་པའི་སྦྱང་བ་ནི། །འཇིག་རྟེན་ན་ནི་གང་གྲགས་པ། །དེ་དག་གིས་ནི་རྫས་སྦྱང་བའམ། །ཡང་ན་ཐམས་ཅད་སྤོས་ཆུས་བྱ། །ལས་ཀུན་བྱེད་བའི་གསང་སྔགས་སམ། །རིགས་དང་རིགས་ཀྱི་སྙིང་པོ་ཡི། །གསང་སྔགས་རྫས་དང་མཐུན་པ་ཡིས། །ཐམས་ཅད་སྤྱང་བར་བྱ་བར་གྲགས། །ཐམས་ཅད་རིགས་ཀྱི་རིག་སྔགས་ཀྱིས། །བསང་གཏོར་བྱས་ན་དག་པར་བཤད། །དང་པོ་བ་ཡི་རྣམ་ལྔས་བྱ། །དེ་ཡི་རྗེས་ལ་ཏིལ་གྱི་ཆུས། །ཐམས་ཅད་རབ་ཏུ་སྦྱང་བར་བྱ། །རྫས་སྦྱང་བའི་ཆོ་ག་རིམ་པར་ཕྱེ་བའོ།། །།རྒྱན་དང་མཚོན་ཆ་གོས་ལ་སོགས། །རྫས་ཀྱི་རིགས་སུ་གཏོགས་པ་ཀུན། །ཕལ་ཆེར་འཇིག་རྟེན་གྲགས་པ་ཡི། །ཚད་ཀྱང་གྲགས་པ་ཉིད་དུ་ཟད། །ལྡོང་རོས་དག་ནི་བཏགས་པ་ལས། །དངོས་གྲུབ་ཕྱིར་ནི་སྲང་ལྔའོ། །འབྲིང་པོ་ལ་ནི་སྲང་གསུམ་སྟེ། །ཐ་མ་དག་ལ་སྲང་གཅིག་གོ། །གི་ཝང་དག་ནི་སྲང་གཅིག་ཚད། །བ་བླ་དག་ནི་སྲང་གཉིས་སོ། །ཨཉྫ་ན་ནི་ཞོ་དྲུག་སྟེ། །བ་མར་ལ་ནི་སྲང་བདུན་ནོ། །ཐལ་བ་ལ་ནི་སྲང་ལྔ་སྟེ། །གུར་གུམ་ལྡོང་རོས་དག་དང་མཉམ། །མི་སྣང་བ་ལ་བཤད་པ་ཡི། །རིལ་བུ་སྣ་ཚོགས་ཡང་བྱས་ཏེ། །བྱེ་བྲག་ཏུ་ནི་གྲངས་བདུན་ནམ། །ཉི་ཤུ་གཅིག་གི་བར་དུ་ཤིས། །ཡང་ན་དགོས་པའི་དབང་གིས་སུ། །རྫས་རྣམས་ཚད་ནས་ལྷག་གྱུར་ཀྱང་། །བློ་དང་ལྡན་པས་སྒྲུབ་པ་ལ། །དེ་ཡི་ཚད་དུ་རྫས་རྣམས་གཟུང་། །སྔགས་རྒྱུད་གཞན་ལས་ཅི་གསུངས་དང་། །རང་གི་ཆོ་ག་ལས་གསུངས་དང་། །འཇིག་རྟེན་དག་ན་གང་ཤིས་པ། །དེ་དང་དེ་དག་ཡོངས་སུ་གཟུང་། །སྔོན་དུ་བསྙེན་པའི་ཚད་དང་ནི། །གྲོགས་པོ་རྣམས་ཀྱི་ཚང་དག་དང་། །རིག་སྔགས་ཀྱི་ནི་སྣང་བ་ལས། །རྫས་ཀྱི་ཚད་ཀྱང་ཤེས་པར་བྱ། །རབ་དང་འབྲིང་པོ་ཐ་མ་ཡི། །དངོས་གྲུབ་དག་གི་བྱེ་བྲག་ལས། །རབ་དང་འབྲིང་དང་ཐ་མ་ཡི། །རྫས་ཀྱི་ཚད་ཀྱང་བཤད་པ་ཡིན། །རྫས་ཀྱི་ཚད་ཀྱི་ཆོ་ག་རིམ་པར་ཕྱེ་བའོ།། །།དེ་ནས་གཞན་ཡང་གང་ཞིག་གིས། །དངོས་སྒྲུབ་མྱུར་དུ་ཐོབ་འགྱུར་བའི། །རྫས་སྒྲུབ་པ་ཡི་ཆོ་ག་དག །གསང་ཆེན་རྒྱས་པར་བཤད་པར་བྱ། །སྒྲུབ་པའི་ཕྱིར་ནི་དགོས་པ་རྣམས། །ཐོག་མར་ཡིད་ལ་ལེགས་བསམས་ཏེ། །བློ་དང་ལྡན་པས་ཡོ་བྱད་ནི། །ཐམས་ཅད་ལེགས་པར་བསོག་པར་བྱ། །སྦྱིན་སྲེག་ལས་ཀྱི་ཆོ་ག་ཡིས། །གསང་སྔགས་ཡོངས་སུ་ཚིམ་བྱས་ཏེ། །དབང་བསྐུར་ཆོ་ག་གསུངས་པའང་བྱ། །དེ་ནས་བསྒྲུབ་པ་བརྩམ་པར་བྱ། །དང་པོར་དཀྱིལ་འཁོར་བྲིས་ནས་སུ། །ཆོ་ག་བཞིན་དུ་ལེགས་མཆོད་དེ། །དེར་ནི་བདག་ཉིད་ཚུལ་བཞིན་དུ། །དབང་བསྐུར་ནས་ནི་ལས་རྣམས་བརྩམ། །དེ་ནས་གཞན་ཡང་ཟློས་པ་དག །དངོས་གྲུབ་ཕྱིར་ནི་དབང་བསྐུར་བའི། །དཀྱིལ་འཁོར་ལས་རྣམས་ཀུན་བྱེད་པ། །གང་དག་རབ་ཏུ་བསྒྲགས་བཤད་པ། །རིག་པའི་རྒྱལ་པོའི་དཀྱིལ་འཁོར་གྱི། །ཆོ་ག་གང་དག་སྔར་བསྟན་པ། །དེས་ནི་ས་གཞི་སྦྱང་ལ་སོགས། །ཐམས་ཅད་དེ་བཞིན་ཁོ་ནར་བྱ། །ཁྲུ་ལྔའམ་བདུན་ནམ་བརྒྱད་པ་ལ། །གྲུ་བཞི་པ་ལ་སྒོ་བཞི་པ། །གྲྭ་བཞི་ལྡན་པར་རྣམ་བརྟགས་པ། །ནུབ་ཏུ་སྒོ་གཏོད་སྒོ་ཁྱུད་ཅན། །དེ་ཡི་ཚད་ཀྱི་ཕྱེད་ཀྱི་ཆས། །དཀྱིལ་འཁོར་ཕྱི་རིམ་བསྐོར་བ་དག །ཚོན་རྩི་སྣ་ལྔའི་ཕྱེ་མ་ཡིས། །དཀྱིལ་འཁོར་ལེགས་པར་བྲི་བར་བྱ། །མཁས་པས་དེ་ཡི་ནུབ་ཕྱོགས་སུ། །གྲུ་བཞི་ཡིས་ནི་བར་བཅད་ནས། །ཁྲུ་ལྔའམ་བཞིའམ་གསུམ་པ་ལ། །གྲྭ་བཞི་ཤར་དུ་སྒོ་ཡང་གདོད། །ཆོ་ག་བཟང་པོ་ཀུན་ལ་ཡང་། །སྒྲུབ་པོས་མངོན་པར་དབང་བསྐུར་ཕྱིར། །རྩ་བའི་དཀྱིལ་འཁོར་ཚད་དག་གི། །ཕྱེད་ཀྱི་ཚད་དུ་དཀྱིལ་འཁོར་བྱ། །ས་གཞི་ཤར་དུ་གཞོལ་པ་ལ། །ནུབ་བམ་བྱང་དུ་སྒོ་གཏོད་དོ། །ཀུན་ཀྱང་བྱང་དུ་གཞོལ་ན་ནི། །ནུབ་ཏུ་སྒོ་ཡང་གཏོད་པར་གསུངས། །ཀུན་དུ་ཐིག་ནི་བཏབ་ནས་ཀྱང་། །ཚོན་སྣ་གཅིག་གིས་བྲི་བྱ་སྟེ། །ཕྱི་རོལ་གྱི་ནི་གྲྭ་བཞི་རུ། །རྡོ་རྗེ་རྩེ་མོ་གསུམ་པ་བྲི། །གསང་སྔགས་ཀུན་ལ་ཐོག་མར་ནི། །དབུས་སུ་པདྨའི་སྙིང་པོ་བཅས། །འདབ་མ་བརྒྱད་པ་བྲིས་ནས་ཀྱང་། །དེ་ནས་བཀྲ་ཤིས་རྣམས་ཀྱིས་བརྒྱན། །སྒོ་རྣམས་ཀུན་དུ་རྡོ་རྗེ་དང་། །གྲྭ་རྣམས་སུ་ནི་བུམ་པ་དགོད། །ཕྱི་རོལ་དཀྱིལ་འཁོར་དག་ལ་ཡང་། །ཆོ་ག་དེ་བཞིན་བྱ་བར་བཤད། །དབང་བསྐུར་བ་ཡི་དཀྱིལ་འཁོར་དུ། །བུམ་པ་གང་བ་བཞི་རྣམས་ནི། །གྲྭ་ཡི་རི་མོའི་ནང་རོལ་དུ། །ངེས་པ་ཉིད་དུ་གཞག་པར་བྱ། །དབུས་སུ་གསང་སྔགས་ཟློས་པ་པོའི། །རིག་སྔགས་རྒྱལ་པོ་གང་ཡིན་པ། །དེ་ཡི་ཕྱག་རྒྱ་བྲིས་ནས་སུ། །དེ་ཡི་སྟེང་དུ་བུམ་པ་བཞག །ཇི་ལྟར་རིགས་ལ་རྣམ་བསྟན་པའི། །ཕྱག་རྒྱ་གཙུག་ཏོར་པདྨ་དང་། །རྡོ་རྗེ་འདི་གསུམ་རིམ་བཞིན་དུ། །རབ་ཏུ་གསང་བའི་དམ་པ་ཡིན། །ཕྱག་རྒྱ་རྣམས་ལ་མ་གོམས་ན། །ལས་ཀུན་བྱེད་པའི་གསང་སྔགས་སམ། །ཡང་ན་ལྷ་རྣམས་ཀུན་གྱི་ཕྱིར། །ཡུངས་ཀར་སྟེང་དུ་བུམ་པ་བཞག །སྣམ་བུའི་ཆ་ནི་ལེགས་ཕྱེ་ནས། །ཤར་དུ་བཅོམ་ལྡན་ཕྱག་རྒྱ་བཞག །དེ་ཡི་གཡོན་དུ་སྙིང་པོའོ། །གཡས་སུ་རིགས་ཀྱི་ཡུམ་བཞག་གོ། །དེ་བཞིན་བྱང་དུ་ཆོ་ག་བཞིན། །པདྨ་འཆང་བ་གཞག་པར་བྱ། །ལྷོར་ནི་ཕྱག་རྒྱ་རྡོ་རྗེ་སྟེ། །ནུབ་ཏུ་ཚངས་པ་དྲག་པོའོ། །གྲྭ་གཉིས་ཀྱི་ནི་ངོས་དག་ཏུ། །ཀུན་དགའ་བོ་དང་རབ་འབྱོར་དང་། །མདུང་ཐུང་དང་ནི་མཆེ་བ་དང་། །རིག་སྔགས་གསང་སྔགས་ཚོགས་རྣམས་དགོད། །གྲྭ་གཉིས་ཀྱི་ནི་ངོས་དག་ཏུ། །དོན་གྲུབ་པ་དང་མཐུ་ཆེན་དང་། །དཔལ་མོ་དང་ནི་གོས་དཀར་ཅན། །རིག་སྔགས་གསང་སྔགས་ཚོགས་རྣམས་དགོད། །གྲྭ་གཉིས་ཀྱི་ནི་ངོས་དག་ཏུ། །རྡོ་རྗེ་རྡོ་རྗེ་དབྱུག་པ་དང་། །རྡོ་རྗེ་ཁུ་ཚུར་གནམ་ལྕགས་མ། །རིག་སྔགས་གསང་སྔགས་ཚོགས་རྣམས་དགོད། །གྲྭ་གཉིས་ཀྱི་ནི་ངོས་དག་ཏུ། །དྲག་པོའི་གློར་ནི་དྲག་མོ་དང་། །ཚངས་པའི་གློར་ནི་དཔལ་ཆེན་དང་། །སྣ་ཚོགས་ལྷ་ཡི་ཚོགས་རྣམས་བྲི། །སྔོན་བཞིན་ཕྱི་རོལ་དཀྱིལ་འཁོར་དུ། །ཕྱོགས་མཚམས་སྐྱོང་བའི་ལྷ་ལ་སོགས། །ཕྱོགས་སྐྱོང་གོ་རིམས་བཞིན་དུ་དགོད། །ལྷག་མ་མ་སྨོས་པ་ཡང་དགོད། །ཀླུ་རྒྱལ་དགའ་བོ་བསྙེན་དགའ་བོ། །སྒོ་ཡི་ངོས་སུ་གཞག་པར་བྱ། །མཛེས་དགའ་ཉེ་མཛེས་ཕྱི་རོལ་སྒོར། །མདུན་དུ་བདུད་རྩི་ཐམ་སྦྱོར་བཞག །དཀྱིལ་འཁོར་སྔ་མའི་ཆོ་ག་བཞིན། །མཆོད་སོགས་ཆོ་ག་གང་ཡིན་པ། །དེ་དག་བྱས་ནས་སྦྱིན་སྲེག་ལས། །རྣམ་གསུམ་ཚུལ་བཞིན་ལེགས་པར་བརྩམ། །བགེགས་རྣམས་གཞོམ་ཕྱིར་དྲག་ཤུལ་སྤྱོད། །རང་གི་འབྱོར་ཕྱིར་རྒྱས་པར་བྱ། །ཞི་བའི་ཆེད་ཏུ་ཞི་བ་སྟེ། །ཇི་ལྟར་མཐོང་བཞིན་བྱ་བར་གསུངས། །རིགས་གསུམ་དག་གི་སྤྱི་ལ་ཡང་། །ལས་ཀུན་བྱེད་པའི་གསང་སྔགས་སམ། །ཡང་ན་ཐབ་སྦྱོར་བྱེད་པ་ཡི། །བགེགས་རྣམས་ལ་ནི་དྲག་ཤུལ་སྤྱད། །སྙིང་པོ་ཉིད་ཀྱིས་རྒྱས་པ་སྟེ། །ཞི་བའི་རིགས་ཀྱི་རིག་སྔགས་ཀྱིས། །ཡང་ན་ཀུན་ལ་ལས་ཀུན་པའམ། །སོ་སོ་ཡི་ནི་ཆོ་གས་བྱ། །དཀྱིལ་འཁོར་བཤད་པའི་ཆོ་ག་བཞིན། །མཁས་པས་སྒོ་ཡི་གཡས་རོལ་དུ། །མར་སོགས་སྦྱིན་སྲེག་རྫས་དག་ལས། །སྦྱིན་སྲེག་གི་ནི་ལས་བྱའོ། །ལས་རྣམས་གསུམ་པོ་དག་ལ་ཡང་། །མཁས་པས་གསང་སྔགས་རྣམ་གསུམ་གྱིས། །རིམ་པ་བཞིན་དུ་བརྒྱ་བརྒྱའམ། །ཡང་ན་ལྷག་པར་སྦྱིན་སྲེག་བྱ། །རིག་སྔགས་བདག་བར་བཅས་པ་རྣམས། །ཚིམ་པར་བྱ་ཕྱིར་སྒྲུབ་པ་པོས། །རིགས་དང་རིགས་ལ་སྦྱིན་སྲེག་བརྒྱའམ། །ཡང་ན་སོ་སོར་བདུན་བདུན་བྱ། །སྒྲུབ་པའི་རིག་སྔགས་གང་ཡིན་དེ། །རང་གི་བདག་པོའི་མདུན་དུ་བཞག །འཕྲོག་མ་དང་ནི་རི་མཁར་མ། །དུང་ཅན་མ་དང་ལྷ་མོ་དག །རལ་པ་གཅིག་མའམ་ཕྱོགས་བཞིན་དུ། །མཆོད་པར་འདོད་པས་མཆོད་པ་བྱ། །ལྷ་རྣམས་ཐམས་ཅད་ལེགས་མཆོད་དེ། །སྦྱིན་སྲེག་ཅི་དགར་བྱས་ནས་ནི། །སྔར་བཀོད་པ་ཡི་བུམ་པ་ལ། །རང་གི་སྔགས་ཀྱིས་མངོན་པར་བསྔགས། །ལྷ་ཡི་མདུན་ན་གང་འདུག་པ། །གཅིག་ནི་རང་གི་སྔགས་ཀྱིས་བཟླས། །དཀྱིལ་འཁོར་དབུས་ན་གང་འདུག་པ། །རིག་པའི་རྒྱལ་པོས་བཟླས་བརྗོད་བྱ། །སྒོ་ཡི་དྲུང་ན་གང་འདུག་པ། །རྡོ་རྗེ་ཁྲོ་བོས་བཟླས་བརྗོད་བྱ། །སྙིང་པོའི་རིགས་ཀྱི་རིག་སྔགས་ཀྱིས། །ཤར་གྱི་གྲྭ་གཉིས་བཟླས་བརྗོད་བྱ། །ལས་ཀུན་བྱེད་པའི་གསང་སྔགས་དང་། །དེ་བཞིན་གསང་སྔགས་གཞན་ཀུན་གྱིས། །ནུབ་ཀྱི་གྲྭ་གཉིས་འདུག་པ་ཡི། །བུམ་པ་ལ་ནི་ཚུལ་བཞིན་བཟླས། །དཀྱིལ་འཁོར་གྱི་ནི་ལྷ་རྣམས་ཀུན། །བཟླས་ཤིང་ཚུལ་བཞིན་སྦྱིན་སྲེག་ནས། །ཅི་ནུས་པར་ནི་ལེགས་མཆོད་དེ། །དེ་ནས་རབ་ཏུ་བསྐོར་བར་བྱ། །དབང་བསྐུར་ཆེད་དུ་ཆོ་ག་གང་། །དཀྱིལ་འཁོར་དག་ཏུ་ཀུན་བཤད་པ། །བཀྲ་ཤིས་ལ་སོགས་དེ་དག་ནི། །འདིར་ཡང་ནན་ཏན་བསྐྱེད་དེ་བྱ། །བུམ་པ་བཟང་པོ་རིན་ཆེན་བཅས། །འབྲུ་དང་བཅས་ཤིང་སྨན་དང་བཅས། །མེ་ཏོག་འབྲས་བུ་ལོ་མར་བཅས། །ཆུར་བཅས་མགུལ་ཆིངས་ཕྲེང་བ་ཅན། །དེ་ཡི་ལས་རྣམས་ཐམས་ཅད་ལ། །དང་པོར་དབང་ནི་བསྐུར་བར་གསུངས། །ཟློས་པ་པོ་ཡི་གྲོགས་པོ་ནི། །སྨྱུང་བར་གནས་པ་དབང་བསྐུར་རོ། །ཡང་ན་རང་གི་བླ་མ་ནི། །ལུང་ལ་ལྷག་པར་མཁས་པས་བྱ། །ཡོན་ཏན་ལྡན་ཞིང་དཀའ་ཐུབ་ཅན། །མཁས་པས་ལས་འདི་བྱེད་དུ་གཞུག །དང་པོ་བགེགས་རྣམས་བསལ་བའི་ཕྱིར། །དབང་བསྐུར་བ་ནི་རབ་ཏུ་སྦྱར། །བར་དུ་བར་མ་དག་གིས་ནི། །མཇུག་ཏུ་རང་གིས་བཟླས་པར་བྱ། །ཡུངས་ཀར་བཟླས་བརྗོད་བྱས་པ་དང་། །གི་ཝང་དྲི་དང་བདུག་སྤོས་སོགས། །སྲད་བུ་གདུ་བུ་གོས་རྣམས་ཀྱང་། །འདིར་ནི་ཀུན་དུ་བཅང་བར་བྱ། །དབང་བསྐུར་ཟིན་ནས་བདག་ཉིད་ཀྱིས། །ཞི་བའི་སྦྱིན་སྲེག་ལས་བྱས་ནས། །དོགས་པ་མེད་པར་ཆོ་ག་བཞིན། །སླར་ཡང་གཤེགས་སུ་གསོལ་བར་བྱ། །ཡང་ནས་ས་ཕྱོགས་མཉམ་བཟང་བར། །སྟེགས་བུ་ཁྲུ་དོ་གྲུ་བཞི་ལ། །ཚོན་སྣ་གཅིག་གིས་རྒྱས་པ་དང་། །ཆུང་ངུར་ལེགས་པར་བྲི་བར་བྱ། །ཕྱག་རྒྱ་གསུམ་པོ་ཕྱོགས་བཞིན་དུ། །དེ་བཞིན་ནུབ་ཏུ་མདུང་རྩེ་གསུམ། །དེ་ཡི་དབུས་ཀྱི་བུམ་པ་ཡིས། །དབང་བསྐུར་ཕྱིར་ནི་སྔོན་བཞིན་བྱ། །མདོར་བསྡུས་ཆོ་ག་འདི་ཡིས་ཀྱང་། །བདག་ཉིད་དབང་བསྐུར་བྱས་པར་འགྱུར། །དེ་ལྟར་བྱས་ན་བགེགས་མེད་པ། །འདི་ནི་ཟློས་པའི་གསང་ཆེན་ཡིན། །ལྷ་རྣམས་བྱིན་གྱིས་རློབ་པ་དང་། །བགེགས་རྣམས་རབ་ཏུ་ཞི་བར་འགྱུར། །ཚེ་དང་བསོད་ནམས་མངོན་པར་འཕེལ། །སྡིག་པ་རྣམ་པར་བྱང་བར་འགྱུར། །དེ་ཕྱིར་ཟློས་པ་ཚུལ་ཤེས་པ། །ཆོ་ག་རྒྱས་པ་ཤེས་བྱས་ནས། །བསྒྲུབ་པའི་ཕྱིར་ནི་དབང་བསྐུར་བ། །གསང་བ་འདི་ནི་ཀུན་དུ་སྤྱད། །དབང་བསྐུར་བའི་ཆོ་ག་རིམ་པར་ཕྱེ་བའོ།། །།དེ་ནས་གཞན་ཡང་སྔགས་སྒྲུབ་པས། །ཉིན་རེ་ཞིང་ཡང་དུས་གསུམ་དུ། །སྔགས་དང་རྗེས་སུ་མཐུན་པ་ཡི། །སྦྱིན་སྲེག་ལས་ནི་གསུངས་པ་བརྩམ། །ཆོ་ག་བཞིན་དུ་ཏིལ་ནག་དང་། །ཞོ་དང་སྦྲང་རྩི་མར་སྦྱར་རམ། །ལག་པན་གྱི་ནི་སྦྱིན་སྲེག་བྱ། །ཞག་གྲངས་ཉི་ཤུ་རྩ་གཅིག་གམ། །ཞག་བདུན་ཡང་ན་ཟླ་གཅིག་ཏུ། །གསང་སྔགས་དངོས་གྲུབ་རྗེས་མཐུན་པར། །ཆོ་ག་འདི་ནི་བྱ་བར་བསྟན། །དེ་ལ་བདུག་ཅིང་བསང་གཏོར་བྱ། །ཡིད་ལ་བཟླས་ཤིང་བལྟ་བར་བྱ། །བསང་བྱེད་བཅས་པའི་ལག་པ་ཡིས། །གསང་སྔགས་བཟླས་ཤིང་བྲིམ་པར་བྱ། །གི་ཝང་ཆུ་དང་ཡུངས་ཀར་གྱིས། །བྱེ་བྲག་ཏུ་ཡང་བསང་གཏོར་བྱ། །རྫས་ལ་དུས་ཚིགས་དུས་ཚིགས་སུ། །ཇི་ལྟར་རིགས་པར་མཆོད་པར་བྱ། །ཡར་གྱི་ངོ་ལ་སྒྲུབ་འོས་པ། །མཁས་པས་ཟླ་བ་ཉ་ལ་བྱ། །མར་གྱི་ངོ་ལ་སྒྲུབ་འོས་པ། །མར་གྱི་ངོ་ཡི་བཅུ་བཞི་ལ། །མཁས་པས་རིགས་ཀྱི་རིག་སྔགས་ཀྱིས། །རྫས་རྣམས་བྱིན་ནི་བསྐྱེད་པར་བྱ། །དྲི་དང་བདུག་སྤོས་ཕྲེང་སོགས་ཀྱིས། །ཁྱད་པར་དུ་ནི་མཆོད་པར་བྱ། །ལག་ངར་གདུ་བུ་བཏགས་པ་ཡིས། །ལག་མཐིལ་དྲི་ཡིས་བསྐུས་པ་ཡིས། །ལག་པས་མཚན་གཅིག་ཐལ་བྱུང་དུ། །ཉི་མ་ཤར་གྱི་བར་དུ་བཟླས། །དེ་ཉིད་ཀྱི་ནི་ནུབ་མོ་ཡང་། །སོ་སོའི་རིགས་ཀྱི་གསང་སྔགས་ནི། །རྫས་རྣམས་བྱིན་སྐྱེད་བྱེད་པ་འདིས། །དུས་གསུམ་དུ་ནི་བརྒྱ་བརྒྱ་བཟླས། །དེ་ལྟར་བློ་དང་ལྡན་པ་ཡིས། །རྫས་དེ་ཡོངས་སུ་བཟུང་བ་ནས། །མ་གྲུབ་བར་དུ་དུས་གསུམ་བཟླས། །དེ་ལྟར་བྱས་ན་འགྲུབ་པར་འགྱུར། །ཨོྂ་ཏེ་ཛ་ཏེ་ཛ་ས་ནི་སིདྡྷི་སཱ་དྷ་ཡ་ཧཱུྃ་ཕཊ། དེ་བཞིན་གཤེགས་པའི་རིགས་ལའོ། །ཨོྂ་དཱི་བྱ་དཱི་བྱ། དཱི་པ་ཡ་ཨཱ་བི་ཤ་མ་ཧཱ་ཤྲི་ཡེ་སྭཱ་ཧཱ། པདྨའི་རིགས་ལའོ། །ཨོྂ་ཛྭ་ལ་ཛྭ་ལ། ཛྭ་ལ་ཡ་བནཱུ་རི་ཧཱུྃ་ཕཊ། རྡོ་རྗེའི་རིགས་ལའོ། །ཀ་ར་བཱི་ར་དམར་པོའམ། །མེ་ཏོག་མ་ལ་ཏི་ཡང་རུང་། །ཡང་ན་ཡུངས་ཀར་དག་གིས་བྱ། །རྫས་ལ་ལེགས་པར་འཕང་བར་བྱ། །ཐོག་མ་བར་རམ་མཐའ་མར་རམ། །མཚན་མ་བྱུང་བའི་ཚེ་ན་ཡང་། །སྒྲུབ་པ་རྩོམ་པའི་བར་བར་དུ། །འཕངས་ན་རྫས་ཀྱི་བྱིན་བསྐྱེད་འགྱུར། །དུས་དེ་རྣམས་སུ་ཆོ་ག་བཞིན། །སྤོས་ཆུ་བཟླས་བརྗོད་བྱས་པའམ། །མར་ལ་སོགས་པས་ཅི་རིགས་སུ། །བསང་གཏོར་བྱས་པས་བྱིན་བསྐྱེད་དོ། །གལ་ཏེ་རྫས་རྣམས་མ་གྲུབ་ན། །ཆོ་ག་དེ་ཉིད་བྱ་བར་བཤད། །ཡང་ན་དཀྱིལ་འཁོར་འདི་བྲིས་ནས། །ཆོ་ག་ཤེས་པས་བྱིན་བསྐྱེད་དོ། །ཚོན་རྩི་སྣ་ལྔའི་ཕྱེ་མ་ཡིས། །དཀྱིལ་འཁོར་སྔ་མ་བཞིན་དུ་བྲི། །གྲུ་བཞི་པ་ལ་སྒོ་གཅིག་པ། །ཁྲུ་བཞི་པ་ཡི་ཚད་དུ་བྱ། །དང་པོར་ཤར་དུ་འཁོར་ལོ་དང་། །ངོས་སུ་ཆོས་གོས་ལྷུང་བཟེད་བཞག །དེ་ནས་བྱང་དུ་པདྨ་དང་། །རིལ་བ་སྤྱི་བླུགས་དབྱུག་པ་བཞག །དེ་བཞིན་ལྷོར་ནི་འཁོར་ལོ་དང་། །ངོས་སུ་དབྱུག་ཏོ་བུམ་པ་བཞག །ཕྱག་རྒྱ་ཐམས་ཅད་སྟེགས་བུ་ལ། །བཞག་ཅིང་ཁ་དོག་དཀར་པོར་བྱ། །རང་གི་ཕྱག་རྒྱ་བཀོད་ནས་སུ། །རྫས་ནི་སྣོད་དང་བཅས་པ་བཞག །དེ་སྟེང་བཞག་པའི་རྫས་ལ་ནི། །སྔགས་ཀྱིས་སྔོན་བཞིན་བྱིན་བསྐྱེད་དོ། །དེ་བཞིན་གཤེགས་པའི་མདུང་ཐུང་དང་། །རིག་སྔགས་གྲུབ་པའི་སྤྱན་དང་ནི། །གསང་སྔགས་དབང་ཕྱུག་གཟི་བརྗིད་གཏེར། །དེ་བཞིན་གཞན་གྱིས་མི་ཐུབ་པ། །ཕྱག་དྲུག་པ་དང་རྟ་མགྲིན་དང་། །སྒྲོལ་མ་ལྷ་མོ་ཟླ་བ་དང་། །རྡོ་རྗེ་ལྕགས་ཀྱུ་ཁུ་ཚུར་དང་། །ངོས་སུ་ཀི་ལི་གནོད་མཛེས་དང་། །རིག་སྔགས་ཆེན་མོ་མཱ་མ་ཀཱི། །གོས་དཀར་ཅན་མ་གང་ཡིན་དང་། །རིག་སྔགས་གཞན་གྱིས་མི་ཐུབ་མ། །དེ་དག་ནུབ་ཀྱི་ཕྱོགས་སུ་དགོད། །བགེགས་རྣམས་ཐམས་ཅད་སེལ་བྱེད་པ། །བདུད་རྩི་ཐབ་སྦྱོར་གཞག་པར་བྱ། །སྒོ་ཡི་ཕྱོགས་སུ་རང་གི་རྒྱ། །སྔ་མ་བཞིན་དུ་ཆོ་གས་མཆོད། །ཕྱོགས་ཆའི་དབྱེ་བ་ཤེས་པ་ཡིས། །གོ་རིམས་བཞིན་དུ་གྲྭ་ཀུན་དུ། །ལས་ཀུན་བྱེད་པའི་གསང་སྔགས་དང་། །ལུས་ངན་པོ་ཡང་རིམ་བཞིན་དུ། །རྫས་ཀྱི་ཁྲི་ཡི་ཤར་ཕྱོགས་སུ། །བསྒྲུབ་པར་བྱ་བའི་ལྷ་ཉིད་གཞག །རིགས་དང་རིགས་ཀྱི་ཕྱག་རྒྱ་ནི། །སྣ་ཚོགས་ཅི་འདོད་པ་ཡང་གཞག །སོ་སོ་ཡི་ནི་གསང་སྔགས་ཀྱིས། །ཆོ་ག་བཞིན་དུ་སྤྱན་དྲངས་ནས། །མཆོད་པའི་ཆོ་ག་ཐམས་ཅད་ནི། །དཀྱིལ་འཁོར་སྔར་བསྟན་བཞིན་དུ་བྱ། །རིག་སྔགས་སོ་སོར་ཇི་ལྟ་བར། །གསང་སྔགས་གསུངས་པའམ་རིག་སྔགས་ཀྱིས། །ཁྱད་པར་དུ་ནི་སྦྱིན་སྲེག་བྱ། །དེ་ནས་ཆོ་ག་འདི་དག་བྱ། །དང་པོ་སྦྱིན་སྲེག་ལས་དག་གིས། །རྫས་རྣམས་ལེགས་པར་བྱིན་ཡང་བསྐྱེད། །ཀུན་ལ་རིགས་ཀྱི་རིག་སྔགས་ཀྱིས། །བསྔགས་ཤིང་མཇུབ་ཏུ་བསང་གཏོར་བྱ། །མཱ་མ་ཀཱི་ཡི་སྙིང་པོ་དང་། །རིགས་དབང་ཡི་གེ་བཞི་བཅས་པ། །དེ་དག་གིས་ནི་བྱེ་བྲག་ཏུ། །བྱིན་བསྐྱེད་ཆོ་ག་བྱ་བར་བཤད། །ན་མོ་ལོ་ཀ་དྷ་ཏྲ་ཡེ། ན་མཿ ཤྃ་ཀ་རེ། ཤཱནྟི་ཀ་རེ། གྷུཊྚ་གྷུཊྚ་གྷུཊྚི་ནི། གྷཊྚ་ཡེ། གྷུཊྚི་ནི་སྭཱ་ཧཱ། མཱ་མ་ཀཱི་ཡི་རིག་སྔགས་སོ། །ཨོྂ་ཀུ་ལནྡྷ་རི་བནྡྷ་བནྡྷ་ཧཱུྃ་ཕཊ། མཱ་མ་ཀཱིའི་སྙིང་པོའོ། །ཨོྂ་བཛྲ་ཧཱུྃ་དྷ། རིག་པའི་དབང་པོའི་འོ། །ཨོྂ་ཛྭ་ལ་ཛྭཱ་ལ་ཡཱ། །རྒྱལ་བ་རྣམས་ཀྱིའོ། །སིདྡྷི་སཱ་དྷ་ཡ། བར་མ་རྣམས་ཀྱིའོ། །དཱི་བྱ་དཱི་པ་ཡཱ། གསང་སྔགས་བར་མ་རྣམས་ཀྱི་ཡིན་ཏེ། རྫས་གཟེངས་བསྟོད་པའོ། །ཕཊ་ཅེས་བྱ་བ་ནི་ཐམས་ཅད་ལའོ། །གཟི་བརྗིད་ལྡན་པས་རྫས་ནང་དུ། །ཕྱི་བཤོལ་མ་མཛད་བཞུགས་ནས་སུ། །ཀུན་གྱི་གཟི་བརྗིད་སྤེལ་བ་དང་། །བྱིན་རླབས་ཅན་དུ་མཛད་དུ་གསོལ། །དེ་ལ་སོགས་པའི་ཚིག་གི་རྣམས། །ཟློས་བུ་དང་ནི་མ་འདྲེས་དང་། །བསྣོར་བ་ཡིས་ཀྱང་ཅི་འདོད་པ། །མཁས་པས་རྫས་ཀྱི་བྱིན་བསྐྱེད་དོ། །ཀ་ར་བཱི་རའི་མེ་ཏོག་ནི། །དམར་པོ་དག་དང་ཡུངས་ཀར་དང་། །དེ་ནས་སྣ་མའི་མེ་ཏོག་གིས། །རིམ་པ་བཞིན་དུ་རྫས་བྱིན་བསྐྱེད། །ཐོག་མར་དྲི་ཡིས་བྱུག་པར་བྱ། །དེ་ནས་མེ་ཏོག་ཡུངས་ཀར་གྱི། །བདུག་སྤོས་ཀྱིས་ཀྱང་རྣམ་པར་བདུག །སྤོས་ཆུ་ཡིས་ཀྱང་བསང་གཏོར་བྱ། །དུས་གསུམ་དུ་ནི་སྤོས་ཀྱི་ཆུས། །རང་སྔགས་བདག་པོའི་གསང་སྔགས་ཀྱིས། །བསང་གཏོར་བྱ་ཞིང་རང་སྔགས་ཀྱིས། །སྐབས་སྐབས་སུ་ནི་བཟླས་བརྗོད་བྱ། །ཉི་མ་ཤར་གྱི་བར་དུ་ཡང་། །བྱིན་བསྐྱེད་པ་ཡི་ཆོ་ག་བྱ། །ཆོ་ག་འདིས་ནི་རིག་སྔགས་རྣམས། །ཟློས་པ་པོ་ལ་མྱུར་དུ་འགྲུབ། །དེ་ལྟར་བྱིན་ནི་བསྐྱེད་པའི་རྫས། །བརྟན་ཞིང་མྱུར་དུ་འགྲུབ་པ་འགྱུར། །སྒྲུབ་པའི་རྫས་ནི་ཉུང་ངུས་ཀྱང་། །དངོས་གྲུབ་ཆེན་པོ་སྟེར་བར་འགྱུར། །མངོན་པར་འཕེལ་ཞིང་གཟི་བྱིན་དང་། །རྣམ་པར་དག་པ་མངོན་དུ་འགྱུར། །ཆོ་ག་འདི་ཡིས་རྫས་རྣམས་ལ། །རྟག་ཏུ་བྱིན་ཡང་བསྐྱེད་པར་བྱ། །བསྒྲུབ་པར་བྱ་བའི་ལས་རྣམས་ཀུན། །ཡོངས་སུ་བཟུང་བ་བྱས་ནས་ཀྱང་། །ཆོ་ག་གསང་བར་བསྟན་པ་འདིས། །རྫས་རྣམས་ཀུན་གྱི་བྱིན་ཡང་བསྐྱེད། །རྟག་ཏུ་དུས་དང་དུས་མཚམས་ལ། །དེ་ལྟ་བུར་ནི་བྱིན་བསྐྱེད་དེ། །དེ་ནས་ཕྱིས་ནི་མཚན་གཅིག་ཏུ། །བསྒྲུབ་ལ་ལེགས་པར་བརྩམ་པར་བྱ། །རྫས་བྱིན་བསྐྱེད་པའི་ཆོག་རིམ་པར་ཕྱེ་བའོ།། །།དེ་ནས་གཞན་ཡང་ཅི་མཐོང་བའི། །དུས་བཟང་ཡོན་ཏན་ལྡན་པ་ལ། །བསྒྲུབ་པའི་ཕྱིར་ནི་མཁས་པ་ཡིས། །ཆོ་ག་བཞིན་དུ་བརྩམ་པར་བྱ། །དགུན་ཟླ་ཐ་ཆུངས་སྟོན་ཟླ་འབྲིང་། །དཔྱིད་ཟླ་ར་དང་འབྲིང་པོ་དང་། །དབྱར་ཟླ་ར་བ་ཉ་དག་ལ། །སྒྲུབ་པ་ཆེན་པོ་བརྩམ་པར་བྱ། །དབྱར་ཟླ་ར་བ་རྟག་ཏུ་འབབ། །དཔྱིད་ཟླ་འབྲིང་པོ་རླུང་གི་འཁོར། །དཔྱིད་ཟླ་ར་བ་སྣ་ཚོགས་བགགས། །དགུན་ཟླ་ར་བ་བགེགས་མེད་དོ། །སྟོན་ཟླ་འབྲིང་པོ་གློག་འགྱུ་ཞིང་། །སྒྲ་ཆེན་རྣམས་ཀྱང་འབྱུང་བར་འགྱུར། །བགེགས་ནི་འགྲུབ་པའི་མཚན་མ་བས། །དེ་ལྟར་དེ་དག་བརྟག་པར་བྱ། །ཟླ་བ་ལྔ་པོ་དེ་དག་ལ། །དངོས་གྲུབ་རབ་ནི་འགྲུབ་པར་བྱ། །ཞི་བ་ཡི་ནི་ལས་རྣམས་ཀྱང་། །དེ་དག་ཉིད་ལ་ལེགས་པར་བརྩམ། །ལྔ་བོ་མར་གྱི་ཟླ་ཕྱེད་ཀྱི། །དུས་ཚིགས་རྣམས་སུ་གང་བསྒྲགས་པ། །དེ་ལ་འབྲིང་དང་ཐ་མ་ཡི། །དངོས་གྲུབ་བསྒྲུབ་པར་རབ་ཏུ་ཤིས། །ཟླ་བ་གཟའ་ཡིས་ཟིན་པའི་ཚེ། །རྫས་ཀྱི་དམ་པ་བསྒྲུབ་པར་བྱ། །ཉི་མ་གཟས་ཟིན་ཚེ་ན་ཡང་། །མཁས་པས་ལས་རྣམས་བསྒྲུབ་པར་བྱ། །ཚེས་ལྔ་དང་ནི་ཚེས་བདུན་དང་། །ཚེས་གཅིག་དང་ནི་ཚེས་གསུམ་དང་། །ཚེས་གྲངས་བཅུ་གསུམ་དག་ལ་ཡང་། །ལས་རྣམས་ཐམས་ཅད་བྱ་བར་ཤིས། །ཚེས་གྲངས་སྐར་མ་དང་ལྡན་ན། །མཆོག་ཏུ་འགྱུར་བར་ཤེས་པར་བྱ། །ཕལ་དག་ལ་ནི་བྱེ་བྲག་ཏུ། །སྐར་མ་རྒྱལ་ནི་ཀུན་ལ་ཤིས། །གཟའ་དང་ཡུད་ཙམ་བྱེད་པ་དང་། །དྲག་པོ་དྲག་པོའི་ལས་ལའོ། །རང་གི་ཆོ་གས་གསུངས་པའམ། །ལྷ་རྣམས་ཀྱིས་ནི་བསྐུལ་བའང་རུང་། །ཆོ་འཕྲུལ་གྱི་ནི་ཟླ་ཕྱེད་ལ། །ལས་རྣམས་ཐམས་ཅད་རབ་ཏུ་ཤིས། །བཀའ་ལུང་སྩལ་བའི་ཚེས་གྲངས་སམ། །ཚེས་གྲངས་བཅུ་གསུམ་པ་ཡང་རུང་། །ཞི་བ་ཕལ་ཆེར་སྟོན་ངོ་ལ། །དེ་བཞིན་རྒྱས་པ་དགུན་ངོ་ལ། །དཔྱིད་སྨད་དྲག་ཤུལ་ཆོ་ག་བཞིན། །བསྒྲུབ་པ་དག་ནི་རབ་ཏུ་ཤིས། །དཔྱིད་སྟོད་ལས་རྣམས་ཐམས་ཅད་བྱ། །དབྱར་གྱི་ངོ་ལ་ལས་རྣམས་བྱ། །སྟོན་དང་དགུན་དང་དཔྱིིད་སྨད་ནི། །འབྲིང་དང་རབ་དང་ཐ་མའོ། །གསུམ་དུ་ཕྱེ་བ་དེ་ལ་ཡང་། །གསུམ་གསུམ་དག་ཏུ་དབྱེ་བར་བཤད། །དུས་གསུམ་དག་གི་དངོས་གྲུབ་ཀྱང་། །ཕལ་ཆེར་རྣམ་པ་གསུམ་དུ་བཤད། །དང་པོ་སྲོད་ཀྱི་དུས་ལས་ཏེ། །འབྲིང་པོ་ནམ་གྱི་ཕྱེད་ནའོ། །རབ་ཀྱི་དུས་ནི་ནང་པར་ཏེ། །དེར་ནི་དངོས་གྲུབ་རིམ་བཞིན་འགྱུར། །ཞི་དང་དྲག་ཤུལ་རྒྱས་པ་ཡི། །དུས་ཀྱང་དེ་དག་ཡིན་པར་བསྒྲགས། །ཐ་མ་འབྲིང་དང་རབ་རྣམས་ཀྱི། །ཆོ་གའི་རིམ་པ་དེ་དག་ཉིད། །རབ་དང་འབྲིང་དང་ཐ་མ་ཡི། །དངོས་གྲུབ་རྣམས་ཀྱི་མཚན་མ་ལ། །རིམ་པ་ཅི་ལྟར་མཐོང་བ་བཞིན། །བྱེ་བྲག་རྣམ་གསུམ་ཤེས་པར་བྱ། །ཉི་མ་ཟླ་བ་གཟས་ཟིན་ལ། །དུས་ནི་གང་ཡང་ངེས་པ་མེད། །དྲག་ཤུལ་སྤྱོད་པ་ཁྱད་པར་དུ། །གཟས་ཟིན་ཚེ་ནི་བྱ་པར་བཟང་། །རབ་ལ་སོགས་པའི་བྱེ་བྲག་ལས། །ཞག་གསུམ་ཡང་ན་ཞག་གཉིས་སམ། །ཡང་ན་ཞག་གཅིག་ཏུ་ཡང་རུང་། །སྨྱུང་བར་བྱ་བ་རབ་ཏུ་བཤད། །སྒྲུབ་པའི་དུས་རིམ་པར་ཕྱེ་བའོ།། །།དེ་ནས་གཞན་ཡང་རྟོག་པ་ལས། །ཇི་སྐད་བསྟན་པའི་ཆོ་ག་བྱ། །ངལ་བར་ཐལ་བའི་སྐྱོན་ཡོད་པས། །སྨྱུང་བར་བྱ་བ་མི་ཤིས་སོ། །དེ་ཡི་བར་དུ་སྒྲུབ་པ་པོས། །བསྙེན་པ་དང་ནི་མཆོད་པ་དང་། །སྦྱིན་སྲེག་ཆོ་ག་བསྟོད་པ་དང་། །དགེ་བ་དག་ལ་བརྩོན་པར་བྱ། །ལན་བརྒྱར་མངོན་པར་བསྔགས་པ་ཡི། །བུ་མོས་བཀལ་བའི་སྐུད་པ་ནི། །མང་དུ་བསྒྲིལ་ཅིང་སྤོས་བསྐུས་བ། །མདུད་པ་བདུན་ནི་བོར་བ་ལ། །སྒྲུབ་པ་པོས་ནི་གསང་སྔགས་འདིས། །བརྒྱ་རྩ་བརྒྱད་དུ་བཟླས་བརྗོད་ནས། །སྲོད་ལ་རྐོད་པར་བཅིངས་ན་ནི། །ཁུ་ཚུ་དགག་པ་བྱས་པར་འགྱུར། །ཨོྂ་ཛ་ཡེ་ཀུ་མཱ་རི་ཤུ་ཀྲ་བནྡྷ་ནི་སྭཱ་ཧཱ། ཨོྂ་རཀྵ་ཀུ་རུ་ཀུ་རུ་གི་ན་སྭཱ་ཧཱ། ཨོྂ་ཀུ་ལནྡྷ་རི་བནྡྷ་བནྡྷ་ཧཱུྃ་ཕཊ་སྭཱ་ཧཱ། བདེ་གཤེགས་སྔགས་པ་གཞོན་ནུ་མས། །པདྨ་འཛིན་ལ་ཀུ་རུང་གིས། །རྡོ་རྗེའི་རིགས་ལ་མཱ་མ་ཀཱིས། །ཆོ་ག་བཞིན་དུ་ཁུ་ཆུ་དགག །ཚུར་སྦྱོར་ཚུར་སྤྱན་བརྟུལ་ཞུགས་བཟང་། །བདག་གི་ལུས་ལ་མྱུར་ཞུགས་ནས། །རྐང་གི་བར་དུ་གནས་ནས་སུ། །འདིར་ནི་ཡུན་རིང་རྒྱུ་བར་མཛོད། །རིག་སྔགས་བཤད་པ་འདི་གསུམ་ནི། །ཐམས་ཅད་ཀྱི་ནི་སྤྱིར་ཡིན་ནོ། །ཁ་ཅིག་ཏུ་ནི་རྟོག་པ་ལས། །གསུངས་བའི་སྔགས་ཀྱིས་ཆོ་ག་བྱ། །དཀྱིལ་འཁོར་དག་ནི་འདྲི་བ་དང་། །བསྙེན་པ་དང་ནི་དུས་ཚིགས་དང་། །བྱིན་བསྐྱེད་ལ་སོགས་ཆོ་ག་ཡང་། །ཉི་མ་རེ་རེ་བཅིང་བར་བྱ། །ཐོག་མར་ལན་བརྒྱབ་སྔགས་པ་ཡི། །མིག་སྨན་གྱིས་ནི་གཉིད་ཀྱང་བསལ། །བསྒྲུབ་པའི་ཚེ་ཡང་མིག་སྨན་དེ། །ལེགས་པར་བསྐུ་བར་བྱ་བར་བསྒྲགས། །སུག་སྨེལ་ག་པུར་སྲོ་ཏན་ཙ། །ཤིང་ཚ་ཏ་ཀར་པི་པི་ལིང་། །ཁ་ར་ཏ་ཡི་ཁ་ཆུར་སྦྱར། །གཉིད་དང་སྙོམ་དང་འཇིགས་པ་སེལ། །འཐོར་འཐུང་ཡང་དང་ཡང་བྱས་ཏེ། །ཁ་གདོང་བཀྲུས་ནས་མིག་བཀྲུའོ། །མིག་སྨན་བསྐུས་པའི་མིག་དེས་ནི། །བསྒྲུབ་པའི་ཚེ་ན་བགེགས་ཀྱང་མཐོང་། །ༀ་ཛྭ་ལ་ལོ་ཙ་ནི་སྭཱ་ཧཱ། དེ་བཞིན་གཤེགས་པའི་རིགས་ལའོ། །ཨོྂ་བི་ལོ་ཀི་ན་སྭཱ་ཧཱ། པདྨའི་རིགས་ལའོ། །ཨོྂ་བནྡུ་ནི་རི་དྷི་བ་ཏེ་སྭཱ་ཧཱ། རྡོ་རྗེའི་རིགས་ལའོ། །རིགས་གསུམ་གྱི་མིག་སྨན་བསྐུ་བའི་རིག་སྔགས་སོ། །ངལ་དང་རྨྱ་བ་བསལ་བའི་ཕྱིར། །སྤོས་ཀྱི་ཆུ་ནི་ཁྱོར་གང་ཙམ། །དྲི་ཞིམ་བདུན་བདུན་བཟླས་པ་དག །ཁྱོར་བ་ཉིད་ཀྱིས་བཏུང་བར་བྱ། །དེ་ནས་ཉེ་རེག་བྱས་ནས་ནི། །བློ་དང་ལྡན་པས་མཚན་མ་བརྟག །མཚན་མ་བཟང་པོ་མཐོང་ནས་ནི། །བསྒྲུབ་པ་གུས་པས་བརྩམ་པར་བྱ། །འཁོར་ལོ་དུང་དང་ལྕགས་ཀྱུ་ཉ། །གཡུང་དྲུང་པདྨ་རྒྱལ་མཚན་དང་། །བཀྲ་ཤིས་བུམ་པ་གང་བ་དང་། །དཔལ་བེའུ་རྡོ་རྗེ་ཕྲེང་བ་དང་། །བུ་མོ་རྒྱན་གྱིས་བརྒྱན་པ་དང་། །སྦྲུམ་མའམ་པང་ན་བུ་ཐོགས་དང་། །ན་ཆུང་དགའ་ཞིང་རྒྱགས་པ་དག །གང་ཞིག་དེ་ཡིས་འགྲུབ་པར་སྟོན། །བྲམ་ཟེ་གོས་དཀར་གྱོན་པ་དང་། །ཤིང་རྟ་གླང་པོ་རྟ་དག་དང་། །རྩ་རྡོག་འབྲས་བུ་སྣ་ཚོགས་དང་། །ངོ་མཚར་ཆེ་ཞིང་མཐོང་བ་དག །འབྲུག་གི་སྒྲ་ནི་གྲག་པ་དང་། །རིག་བྱེད་དབྱངས་དང་རྒྱལ་བའི་སྒྲ། །ཀུང་དང་རྔ་དང་རྫ་རྔ་ཡི། །སྒྲ་རྣམས་འགྲུབ་ཕྱིར་རབ་ཏུ་ཤིས། །རྨ་བྱ་ཁྲུང་ཁྲུང་ངང་མོ་དང་། །ནེ་ཚོ་ལ་སོགས་བྱ་རྣམས་ཀྱི། །སྒྲ་སྙན་རྣམས་ནི་ཀུན་ཐོས་ནས། །དངོས་གྲུབ་སྦྱིན་བའི་ལས་བརྩམ་མོ། །སྨོན་ལམ་བཀྲ་ཤིས་ཐམས་ཅད་དང་། །བསོད་ནམས་དགའ་དང་བདེ་ལེགས་ཚིག །ཡིད་དུ་འོང་བའི་ཚིག་གི་རྣམས། །ཐོས་ནས་འགྲུབ་པ་ཤེས་པར་བྱ། །གློག་དང་སྤྲིན་དང་ཆར་འབབ་དང་། །སེར་བུ་མེ་ཏོག་ཆར་འབབ་དང་། །འཇའ་དང་དྲི་ནི་ཞིམ་པོ་སྟེ། །མཚན་མ་འདི་དག་ལྷ་ཡི་ཡིན། །བར་སྣང་ལས་བྱུང་མཚན་མ་ནི། །ཐམས་ཅད་འབྲིང་པོར་ཤེས་པར་བྱ། །ས་ལས་བྱུང་བའི་མཚན་མ་དག །དེ་དག་ས་པའི་ཡིན་པར་བཤད། །ལྷ་དག་གིས་ནི་དངོས་གྲུབ་རབ། །བར་སྣང་དག་གི་འབྲིང་པོར་འགྱུར། །ས་པ་དག་གི་དངོས་གྲུབ་ཕལ། །གསུམ་ལའང་གསུམ་གསུམ་དག་ཏུ་དབྱེ། །དེ་དག་ལ་སོགས་མཚན་མ་རྣམས། །དངོས་གྲུབ་ཕྱིར་ནི་རབ་ཏུ་བསྒྲགས། །མདོར་ན་གསང་སྔགས་ཐམས་ཅད་ལ། །དེ་ལས་བཟློག་པས་མི་འགྲུབ་བོ། །དང་པོར་མཚན་མ་བཟུང་ནས་ནི། །སེམས་ཀྱང་རབ་ཏུ་དགའ་བྱས་ཏེ། །ཡོངས་སུ་མགུ་བའི་བསམ་པ་ཡིས། །དེ་ནས་བསྒྲུབ་པ་བརྩམ་པར་བྱ། །བསྒྲུབ་པའི་མཚན་མ་རིམ་པར་ཕྱེ་བའོ།། །།དཀྱིལ་འཁོར་གྱི་ནི་རྒྱུད་ཀུན་དང་། །ཡང་ན་བསྒྲུབ་པ་དག་ལའང་རུང་། །ཚེས་གྲངས་ཡུད་ཙམ་བྱེད་པ་དང་། །མཚན་མའང་རྒྱས་པར་ཤེས་བྱས་ནས། །མི་བཟང་པ་ལ་མར་དག་གི། །རིགས་ཀྱི་རིག་པས་སྦྱིན་སྲེག་བྱ། །དེ་ནས་ལས་རྣམས་བརྩམ་བྱས་ནས། །འོན་ཏམ་དངོས་གྲུབ་ཐོབ་པར་འགྱུར། །གནས་གང་དག་ཏུ་རིམ་པ་བཞིན། །དཀྱིལ་འཁོར་དག་ནི་མངོན་བྲི་ཞིང་། །དེ་ཉིད་དུ་ནི་སྒྲུབ་པ་ཡི། །དེ་ཡི་རིམ་པ་བཤད་པ་ཡིན། །རི་ལ་སོགས་པའི་གནས་རྣམས་སུ། །དངོས་གྲུབ་ཆེན་པོ་ཐོབ་པར་བསྒྲགས། །མཚོ་ལ་སོགས་པར་འབྲིང་རྣམས་འཐོབ། །གཞན་དག་ཏུ་ནི་ཕལ་རྣམས་སོ། །སྔགས་དང་རྗེས་སུ་མཐུན་ནས་སུ། །བཟླས་བརྗོད་བྱེད་པས་ལས་རྣམས་བརྩམ། །གཞན་དུ་བསྒྲུབ་པར་བྱས་ན་ནི། །དངོས་གྲུབ་མྱུར་དུ་མི་འཐོབ་བོ། །རིང་བསྲེལ་ཅན་གྱི་མཆོད་རྟེན་ཀུན། །བདེ་གཤེགས་ཀུན་གྱི་གསང་སྔགས་འགྲུབ། །མཆོད་རྟེན་ཆེན་པོ་ཉམས་དགའ་བ། །བྱང་ཆུབ་ཆེན་པོ་གྲུབ་གནས་དང་། །དེ་བཞིན་བལྟམ་ལ་སོགས་པ་བརྒྱད། །དེ་ན་བགེགས་ནི་ཡོད་མ་ཡིན། །ལས་ཀྱི་ཆོ་ག་ཐམས་ཅད་དང་། །མཐུན་པ་དག་ཀྱང་དེ་ན་ཡོད། །དེར་ནི་བདུད་ཀྱིས་བགེགས་བྱ་བར། །ནམ་ཡང་ནུས་པ་མ་ཡིན་ནོ། །དེ་བས་གསང་སྔགས་ཐམས་ཅད་ཀྱང་། །དེར་ནི་ངེས་པར་འགྲུབ་པར་གསུངས། །འདིར་ནི་དྲག་ཤུལ་སྤྱོད་པའི་ལས། །དུར་ཁྲོད་དག་ཏུ་བྱ་བར་ཤིས། །ཡང་ན་ཤིང་གཅིག་པ་དག་གམ། །ཁང་སྟོང་མཚན་མ་གཅིག་པའང་རུང་། །འབབ་ཆུའི་འགྲམ་ནི་ཐམས་ཅད་དུ། །རིག་སྔགས་བསྒྲུབས་ན་འགྲུབ་པར་གསུངས། །སྐྱེད་མོས་ཚལ་དུ་གནོད་སྦྱིན་མོ། །ཀླུ་ཡི་བདག་པོ་མཚོ་རྣམས་སུ། །ཁང་སྟོང་དུ་ནི་ལོངས་སྤྱོད་ཕྱིར། །མངག་གཞུག་གྲོང་སྲང་ལ་སོགས་པར། །ཕུག་གི་གསང་སྔགས་ཕུག་རྣམས་སུ། །བསྒྲུབས་ན་མྱུར་དུ་འགྲུབ་པར་འགྱུར། །སྔགས་རྣམས་མྱུར་དུ་འགྲུབ་པའི་ཕྱིར། །ཆོ་ག་གསང་བ་འདི་གསུངས་སོ། །མན་ངག་བསྟན་པ་འདི་ཉིད་ཀྱིས། །གནས་རྣམས་གཏན་ལ་དབབ་པར་བྱ། །གང་ཡང་རུང་བའི་གནས་གཅིག་ཏུ། །དཀྱིལ་འཁོར་ཆོ་ག་གསུངས་པའམ། །བཟླས་བརྗོད་ས་ཡི་ཆོ་ག་ཡིས། །དང་པོར་ས་ནི་སྤྱང་བར་བྱ། །ལྷ་ཡི་གནས་ནི་རྣམ་དག་པར། །བྱིན་གྱིས་རློབ་ཅིང་བཞུགས་འགྱུར་བས། །བསྒྲུབ་པ་ལ་ནི་བྱེ་བྲག་ཏུ། །ཆོ་ག་གཞན་ཡང་འདི་དག་བཤད། །ཙནྡན་དམར་པོས་བསྐུས་པ་ཡི། །སེང་ལྡིང་ཕུར་བུ་མཛུབ་གང་པ། །རྣོན་པོར་བྱས་པ་བཞི་དག་ལ། །སྐུད་པ་དམར་པོ་དག་གིས་དཀྲིས། །རྡོ་རྗེ་ཕུར་བུས་ལན་གྲངས་བརྒྱར། །མངོན་པར་བཟླས་བརྗོད་བྱས་པ་དག །གནས་སམ་ཁྱིམ་དག་ཏུ་ཡང་རུང་། །ཁུ་ཚུར་གྱིས་ནི་ཕྱོགས་བཞིར་གདབ། །དང་པོར་ལས་ཀུན་བྱེད་སྔགས་སམ། །ཡང་ན་བགེགས་ཀྱི་དགྲས་ཀྱང་རུང་། །ཡུངས་ཀར་དག་ལ་སོགས་པ་ཡིས། །ལེགས་པར་ཀུན་དུ་བསལ་བར་བྱ། །བ་དན་དཀར་པོ་གཅིག་ལ་ནི། །རིག་སྔགས་རྒྱལ་པོས་མངོན་བསྔགས་ཏེ། །སྨྱུག་མ་རིང་པོའི་ཡུ་བ་ལ། །བཏགས་ཏེ་དང་པོ་ཤར་དུ་གཟུགས། །རྡོ་རྗེ་ར་བས་བསྔགས་པ་ཡི། །ལྕགས་ཀྱུའི་ཕྱེ་མས་ར་བ་བྱ། །རྡོ་རྗེ་དྲ་བའི་གསང་སྔགས་ཀྱིས། །ལན་བརྒྱར་བསྔགས་པའི་ཕྱེ་མ་ཡིས། །ཁོར་ཡུག་ཏུ་ནི་རྡོ་རྗེ་ཕྲེང་། །བྲིས་ན་རྡོ་རྗེ་དྲ་བར་འགྱུར། །དཀྱིལ་འཁོར་ནང་གི་དང་པོ་ཡི། །སྒོ་ཀར་བདུད་རྩི་ཐབ་སྦྱོར་གྱིས། །རྡོ་རྗེའི་ཕྱག་རྒྱ་སྲུང་བའམ། །ཡང་ན་གཞན་གྱིས་མི་ཐུབ་པས། །དཀྱིལ་འཁོར་གཉིས་པ་བསྲུང་བ་ནི། །འཕྲོག་མ་སོགས་པས་བྱ་བར་འདོད། །རིགས་གསུམ་དག་གི་སྤྱི་ལ་ཡང་། །ཆོ་ག་འདི་ནི་རབ་ཏུ་བསྒྲགས། །ཆོ་ག་གསུམ་པོ་འདི་དག་ནི། །ཐུབ་དཀའ་བར་ཡང་ཡོངས་སུ་བསྒྲགས། །རེ་རེའམ་ཡང་ན་ཀུན་གྱིས་ཀྱང་། །བསྒྲུབ་པའི་ཚེ་ན་བགེགས་ཀུན་སེལ། །རྫས་བསྒྲུབ་པ་ན་བསྲུང་བའི་ཕྱིར། །ཆོ་ག་གསང་བ་འདི་གསུངས་ཏེ། །མདོར་བསྡུས་པ་ལ་དོན་ཡང་ཆེ། །རིམ་པ་བཞིན་དུ་རབ་ཏུ་གཅེས། །མཁས་པས་རིན་ཆེན་ལ་སོགས་པས། །ས་གཞི་སྙིང་པོ་ཅན་དུ་བྱ། །ཐབ་ཁུང་ལ་ཡང་ཅི་རིགས་པར། །རྫས་བཞག་པ་ཡི་འོག་ཏུ་རུང་། །དྲི་གཙང་ཁང་ངམ་ཁང་བཟངས་སུ། །བསང་གཏོར་བྱས་པ་དག་གསུངས་པས། །དེར་ནི་ས་བརྐོ་མི་དགོས་ཀྱི། །ཆོ་ག་དེ་ལྟར་ཕྱི་རོལ་དུའོ། །བདག་ཉིད་ཀྱིས་ནི་ཆོ་ག་བཞིན། །བརྟགས་ཤིང་བྱས་པའི་ཁང་པར་ནི། །བྱེ་བྲག་ཏུ་ནི་ལས་བརྩམས་ན། །དེར་ནི་མྱུར་དུ་འགྲུབ་བར་འགྱུར། །ཁུང་དག་ཏུ་ནི་བསྒྲུབ་པ་ཡིན། །ས་ཕྱོགས་དོག་པར་མི་བྱའོ། །ཁང་རུལ་དུ་ཡང་བློ་ཅན་གྱིས། །བསྒྲུབ་པ་བརྩམ་པར་མི་བྱའོ། །དེ་ནས་དད་པའི་ཡིད་ཀྱིས་སུ། །སྲོད་ལ་གསང་སྔགས་ལྷ་ཡི་རྣམས། །མཐོང་བ་བཞིན་དུ་གུས་བྱས་ཏེ། །སྟ་གོན་གནས་པ་ལགས་པར་བྱ། །རིགས་གསུམ་གྱི་ནི་རིག་སྔགས་ལྷ། །བདག་པོར་བཅས་པ་གང་བཞུགས་དང་། །སྔགས་རྒྱུད་འདི་ལ་ལྷ་རྣམས་ནི། །གང་དག་ཡོངས་སུ་བསྒྲགས་པ་དང་། །གསང་སྔགས་ལྷ་ནི་གང་དག་ཅིག །བདག་ཉིད་ཉོན་མོངས་ཆེན་པོ་ཡིས། །ཆོ་ག་འདི་བཞིན་བསྙེན་པ་དང་། །བཟླས་བརྗོད་སྦྱིན་སྲེག་གིས་མཉེས་པ། །ཞག་བདུན་ན་ནི་སྒྲུབ་པའི་ཚེ། །བྱིན་གྱིས་རློབ་ཅིང་གཤེགས་སུ་གསོལ། །འདི་ན་ལྷ་དང་འབྱུང་པོ་དང་། །འཁོར་རྣམས་དང་ནི་བཅས་པ་དག །ཅི་ནུས་པར་ནི་མཆོད་བྱས་པས། །མཆོད་པ་ལ་ནི་ཕན་འདོགས་རྣམས། །ཡོངས་སུ་མཉེས་ཤིང་ཀུན་འདུས་ནས། །བདག་ལ་དངོས་གྲུབ་མྱུར་གནས་མཛོད། །དེ་ལྟར་གུས་པར་ཉིན་རེ་རིང་། །ཚིག་གིས་ཀྱང་ནི་ཕྱོགས་བཞིར་བརྗོད། །ཉིན་རེའམ་ཞག་རེ་བྲི་བྱས་བས། །གསང་སྔགས་སྟ་གོན་གནས་པར་བྱ། །མཆོད་ཡོན་དག་དང་མེ་ཏོག་དང་། །བདུག་པ་དྲི་ཞིམ་དག་ཀྱང་དབུལ། །སྒྲུབ་པ་པོས་ནི་ཆོ་ག་འདིས། །སྲོད་ཀྱི་དུས་སུ་བྱ་བར་བཤད། །སྒྲུབ་པ་པོ་ཡི་ཆོ་ག་འདིས། །རྫས་ཀྱང་སྟ་གོན་གནས་པར་བྱ། །ལག་པས་ལེགས་པར་བྲིམ་པ་དང་། །བདུག་པ་དག་གིས་ལེགས་པར་བདུག །ཡང་ན་གཟའ་སྐར་བྱེད་པ་དག །བཟང་པོ་ལ་ནི་སྨྱུང་བྱས་ཏེ། །དཀྱིལ་འཁོར་བྲིས་ནས་རྫས་ཀྱི་རྣམས། །སྟ་གོན་གནས་པའི་ཆོ་ག་བྱ། །ས་ནི་སྒྲུབ་པར་བྱེད་པའམ། །གསང་སྔགས་སྒྲུབ་པས་ཞག་གསུམ་ན། །ཡོ་ལང་ཆུང་ངུ་དག་གིས་བྱ། །བཟླས་བརྗོད་བྱེད་པས་དཀྱིལ་འཁོར་བྲི། །ཕྱེ་མ་སྣ་ཚོགས་ཉིད་ཀྱིས་ཀྱང་། །དཀྱིལ་འཁོར་སྣ་ཚོགས་ཟླུམ་པོ་ལ། །ཕྱི་རོལ་རིམ་པ་གཉིས་པས་བསྐོར། །སྒོ་གཅིག་བཏོད་པ་བྲི་བར་བྱ། །དེ་ཡི་དབུས་སུ་ཁྲུ་དོ་པའི། །པདྨ་འདབ་མ་བརྒྱད་པ་བྲི། །དཀྱིལ་འཁོར་ལྷག་མ་ཚང་དག་ནི། །ཅི་ལྟར་དགའ་བ་ཉིད་དུ་བྱ། །དེར་ནི་བདག་པོ་གསུམ་དག་དང་། །ནུབ་ཏུ་བདུད་རྩི་ཐབ་སྦྱོར་བཞག །དཀྱིལ་འཁོར་གཉིས་པའི་ནུབ་ཕྱོགས་སུ། །དབང་ཕྱུག་ཆེན་པོ་ཆུང་མར་བཅས། །གཅིག་ཏུ་གཟི་བརྗིད་ཕུང་པོ་སྟེ། །གཅིག་ཏུ་ཡང་ན་སྒྲུབ་པའི་སྤྱན། །གཅིག་ཏུ་དཔའ་མོ་ཆེན་མོ་སྟེ། །ཕྱག་དྲུག་མ་ཡང་གཅིག་ཏུ་བྲི། །གཅིག་ཏུ་རིག་སྔགས་མཱ་མ་ཀཱི། །རིག་སྔགས་རྒྱལ་སྙིང་གཅིག་ཏུ་བྲི། །ཁྲོ་བོ་ཀཱི་ལི་གཅིག་ཏུ་སྟེ། །གཅིག་ཏུ་རྡོ་རྗེ་ལྕགས་ཀྱུ་མ། །དེ་ལྟར་བསྟེན་པ་དེ་དག་ཀུན། །སྙིང་པོའི་དཀྱིལ་འཁོར་དག་ཏུ་དགོད། །ལས་ཀུན་བྱེད་པའི་གསང་སྔགས་རྣམས། །ཕྱི་རོལ་ཕྱོགས་སུ་རིམ་པ་བཞིན། །དེ་ལྟར་བཀོད་ནས་ཕྱི་རོལ་སྒོར། །གཞན་གྱིས་མི་ཐུབ་པ་ཡང་བྲི། །དེ་ནས་ཕྱོགས་མཚམས་སྐྱོང་བ་དང་། །འདོད་པའི་ལྷ་རྣམས་བྲི་བར་བྱ། །དེ་ནས་སོ་སོའི་གསང་སྔགས་ཀྱིས། །རིམ་པ་བཞིན་དུ་སྤྱན་ཡང་དྲང་། །བདག་པོ་རྣམས་ནི་སྙིང་པོ་ཡིས། །དེ་ཡི་འོག་ཏུ་མཆོད་པར་བྱ། །པདྨའི་དབུས་སུ་རང་སྔགས་ཀྱིས། །རྫས་ནི་ལེགས་པར་བཞག་སྟེ་མཆོད། །བུམ་པ་གང་བ་དེ་སྟེང་དུ། །ཆོ་ག་བཞིན་དུ་རྫས་བཞག་གོ། །ཡང་ན་གབ་ཚེའམ་ཁམ་ཕོར་དག །མེ་ཏོག་ལ་སོགས་བླུགས་པ་བཞག །དེ་ནས་ལག་པས་བྲིམ་བྱ་ཞིང་། །རང་གི་རིག་སྔགས་ཡོངས་བཟླས་པའི། །མེ་ཏོག་བརྒྱའམ་སྟོང་དག་གིས། །དེ་ཡི་འོག་ཏུ་འཕང་བར་བྱ། །དེ་ནས་གུ་གུལ་བདུག་སྤོས་ནི། །མར་དང་སྦྱར་བས་བདུག་པར་བྱ། །སྤོས་ཆུས་བཟླས་བརྗོད་བྱས་པ་ཡི། །དེ་ནས་དལ་བུས་བསང་གཏོར་བྱ། །དེ་ནས་རང་གི་གསང་སྔགས་དང་། །དཀྱིལ་འཁོར་དུ་བཤད་ཐམས་ཅད་ཀྱིས། །རེ་རེས་སོ་སོར་བཟླས་པ་དག །སྦྱིན་སྲེག་ཅི་སྐད་བསྟན་པའང་བྱ། །སྦྱིན་སྲེག་བྱ་བའི་མར་དག་གམ། །ཡང་ན་བ་ཡི་འོ་མས་བྱ། །མར་དང་སྦྲང་རྩི་ཏིལ་སྦྱར་དང་། །ལག་པན་གྱིས་ནི་མཇུག་ཏུ་བྱ། །དེ་ནས་གསང་སྔགས་ཐམས་ཅད་ཀྱིས། །མཁས་པས་རྫས་ལ་བསང་གཏོར་བྱ། །དཀྱིལ་འཁོར་ལེགས་པར་བྲི་བ་དང་། །རྗེས་སུ་མཐུན་པར་བྱིན་བསྐྱེད་དོ། །ཡིད་ལ་ཡོངས་སུ་ཟློས་བྱེད་ཅིང་། །ཆོ་ག་ཤེས་པས་ཟློས་བཞིན་དུ། །རྫས་ལ་མིག་གིས་བལྟ་བར་བྱ། །དེ་བྱས་སྟ་གོན་གནས་བྱས་འགྱུར། །སྦྱིན་སྲེག་ཆོ་ག་གཏོར་མའི་རིམ། །མཆོད་སོགས་གང་ཡིན་དེ་དག་ཀུན། །བཟླས་བརྗོད་བྱེད་པས་རྒྱས་པར་འདིར། །རྒྱུད་ལས་བཤད་པ་བཞིན་དུ་བྱ། །འདི་ནི་རྫས་ལ་སྟ་གོན་དུ། །གནས་པའི་ཆོ་ག་ཡིན་པར་བསྒྲགས། །སྟ་གོན་གནས་པའི་རྫས་དེ་ནི། །མྱུར་དུ་འགྲུབ་པ་ཉིད་དུ་འགྱུར། །ཆོ་གའི་རིམ་པ་འདི་ཡིས་ནི། །ཡོངས་སུ་གཟུང་བ་དག་ཀྱང་བྱ། །དངོས་གྲུབ་གཟུང་བ་དག་ཀྱང་བྱ། །རྫས་ཀྱི་བྱིན་ཡང་བསྐྱེད་པ་དང་། །ཆོ་ག་འདི་དག་ཉིད་ཀྱིས་ཀྱང་། །དཀྱིལ་འཁོར་འདི་ཡི་དབུས་སུ་ནི། །རྫས་རྣམས་སྒྲུབ་པ་དག་ཀྱང་བྱ། །དཀྱིལ་འཁོར་དམ་པ་འདི་ཉིད་དུ། །བགེགས་ཀྱང་མྱུར་དུ་ཞི་བར་འགྱུར། །རྫས་རྣམས་སྦྱང་བར་བྱ་བ་དང་། །དབང་བསྐུར་བ་ཡི་ཆོ་ག་ཡིས། །སྒྲུབ་པ་པོ་རྣམས་དབང་བསྐུར་བའང་། །དཀྱིལ་འཁོར་འདིར་ནི་རབ་ཏུ་བྱ། །ལས་ཀུན་བྱེད་པའི་དཀྱིལ་འཁོར་འདིར། །གསང་ཆེན་གསང་བའི་བདག་པོས་གསུངས། །དཀྱིལ་འཁོར་འདི་ནི་བྲི་བྱས་ན། །དངོས་གྲུབ་མྱུར་དུ་ཐོབ་པར་འགྱུར། །རྫས་སྟ་གོན་དུ་གནས་པའི་ཆོ་ག་རིམ་པར་ཕྱེ་བའོ།། །།རྫས་ནི་ཡོངས་སུ་བཟུང་བྱས་ནས། །སྒྲུབ་པ་པོས་ནི་དུས་གསུམ་དུ། །ཁྲུས་དང་མཆོད་པ་སྦྱིན་སྲེག་དང་། །ལག་པ་ཡིས་ཀྱང་བྲིམ་པར་བྱ། །གོས་ནི་ལན་གསུམ་བརྫེ་བ་དང་། །དུས་མཚམས་དག་ལ་སྨྱུང་བྱས་ཏེ། །མཆོད་དང་ལྷ་བཤོས་ཆོ་ག་དག །ཁྱད་པར་དུ་ནི་ལེགས་པར་བྱ། །དུས་གསུམ་དག་ཏུ་སྡིག་པ་བཤགས། །བསོད་ནམས་རྗེས་སུ་ཡི་རང་དང་། །དུས་གསུམ་དག་ཏུ་སྨོན་ལམ་གདབ། །གླེགས་བམ་དུས་གསུམ་ལན་གསུམ་བཀླག །དཀྱིལ་འཁོར་ལན་གསུམ་དག་ཏུ་བྱ། །ལན་གསུམ་དུ་ཡང་སྡོམ་པ་བཟུང་། །དུས་གསུམ་དུ་ཡང་བསྲུང་བ་བྱ། །དེ་ལྟར་བྱས་ན་ངེས་པར་འགྲུབ། །གང་ཚེ་བག་མེད་གྱུར་པ་ཡིས། །དུས་གསུམ་དག་གི་ལས་ཉམས་ན། །དེ་ཚེ་རང་གི་རིག་སྔགས་དེ། །ཉི་ཤུ་རྩ་གཅིག་བཟླས་བརྗོད་བྱ། །དེ་ལྟར་ཉིན་རེ་དུས་གསུམ་དུ། །མཁས་པ་དག་གིས་རྟག་ཏུ་བྱ། །དེ་ཉམས་ན་ནི་བརླག་འགྱུར་ཞིང་། །དངོས་གྲུབ་དག་ཀྱང་ཉམས་པར་འགྱུར། །ལས་ཀྱི་ཀླགས་ལ་འབུམ་བཟླས་པའམ། །ཡང་ན་དཀྱིལ་འཁོར་འདི་བྲིས་པས། །གསང་བའི་ཆོ་ག་དེ་བྱས་ཏེ། །དེ་ནས་ལས་རྣམས་བརྩམ་པར་བྱ། །སྔོན་བཞིན་ལེགས་པར་ཐིག་བཏབ་ནས། །གྲུ་བཞི་པ་ལ་སྒོ་བཞི་པ། །ཕྱི་རོལ་དཀྱིལ་འཁོར་གྱིས་བསྐོར་བ། །ཆོ་ག་བཞིན་དུ་ལེགས་པར་བྲི། །དབུས་སུ་འཁོར་ལོ་བྲིས་ནས་དེའི། །ཤར་དུ་འཁོར་ལོས་སྒྱུར་བ་དང་། །གཟི་བརྗིད་ཕུང་པོ་གཙུག་ཏོར་དཀར། །རྒྱལ་དང་རྨད་དུ་བྱུང་བ་དགོད། །མཁས་པས་ངོས་གཉིས་དག་ཏུ་ཡང་། །བདེ་གཤེགས་མཛོད་སྤུ་མདུང་ཐུང་དང་། །སངས་རྒྱས་བྱམས་མ་སྤྱན་དུ་བཅས། །ཀུན་དགའ་བོ་དང་རབ་འབྱོར་དང་། །དེ་བཞིན་ལྷུང་བཟེད་ཁར་གསིལ་དང་། །སྒོ་ཀར་ལས་ཀུན་བྱེད་པ་དགོད། །རིམ་བཞིན་སྒོར་ནི་འཕྲོག་མ་དང་། །གཞན་གྱིས་མི་ཐུབ་པ་ཡང་དགོད། །འཁོར་ལོའི་དབུས་སུ་རྫས་རྣམས་ནི། །ཡང་ན་གསང་སྔགས་ལྷ་བཞག་སྟེ། །དེ་ནས་མཆོད་པའི་ཆོ་ག་བྱ། །སྦྱིན་སྲེག་ཐམས་ཅད་བྱ་བར་གསུངས། །དཀྱིལ་འཁོར་འདི་ནི་ཕྱག་རྒྱའམ། །གཏན་དུ་དགོད་པར་རབ་ཏུ་བསྒྲགས། །སོ་སོའི་ཆོ་གས་སྤྱན་དྲང་བའམ། །སྤྱི་ཡི་སྙིང་པོས་བྱར་ཡང་རུང་། །དེར་ནི་རང་གི་རིག་སྔགས་ཀྱིས། །སྔ་མ་བཞིན་དུ་མེ་སྦར་ཏེ། །དེ་ནས་མར་དང་སྦྲང་རྩི་ལས། །སྦྱིན་སྲེག་བརྒྱ་ནི་རྩ་བརྒྱད་བྱ། །དེ་ནས་ཞོ་དང་འབྲས་ཆན་དང་། །ཏིལ་གྱི་སྦྱིན་སྲེག་བརྒྱ་བརྒྱ་བྱ། །མཁས་པས་མཇུག་ཏུ་བརྒྱ་བཟླས་པས། །འདི་ནི་ཆོ་ག་གསང་ཆེན་ཡིན། །དྲི་ཞིམ་མེ་ཏོག་དྲི་སོགས་ཀྱིས། །འདིར་ནི་མཆོད་པ་བྱ་བར་གསུངས། །ཞོ་དང་བུ་རམ་ལེགས་སྦྱར་བའི། །གཏོར་མ་རྒྱ་ཆེན་དབུལ་བར་བྱ། །ཆོ་ག་འདི་ཡིས་ལྷ་རྣམས་ནི། །མྱུར་དུ་ལེགས་པར་ཚིམ་པར་འགྱུར། །དགྱེས་ནས་རིང་པོར་མི་ཐོགས་པར། །སྒྲུབ་པ་པོ་ལ་དངོས་གྲུབ་སྩོལ། །ཟླ་བ་རེ་རེའམ་ཟླ་ཕྱེད་དམ། །ཉི་མ་རེ་རེའམ་དུས་མཚམས་ལ། །དབུལ་པོས་ཀྱང་ནི་ཅི་ནུས་པར། །དཀྱིལ་འཁོར་འདི་ནི་བྲི་བར་བྱ། །ཆོ་ག་དེ་ལྟར་བྱ་བ་ཀུན། །དཀྱིལ་འཁོར་འདི་ལའང་ཤེས་པར་བྱ། །ཅི་ལྟར་དགའ་བའི་ཚད་ཅམ་དུ། །ཀུན་དུ་ཟླུམ་པོར་རབ་ཏུ་བྱ། །དེ་དབུས་པདྨ་བྲིས་ནས་སུ། །རིག་སྔགས་རྒྱལ་དང་རྟ་མགྲིན་དང་། །སྣ་ཚོགས་གཟུགས་དང་སྤྱན་གསུམ་པ། །ཕྱག་བཞི་ཕྱག་དྲུག་བཅུ་གཉིས་ཕྱག །དེ་བཞིན་འདོད་པ་འབྱོར་བྱེད་དང་། །གྲགས་དང་ལྡན་པ་དབལ་མོ་ཆེ། །སྒྲོལ་མ་ལྷ་མོ་ཟླ་བ་དགོད། །སྒོ་ཡི་ཕྱོགས་སུ་དཀར་མོ་དང་། །གོས་དཀར་ཅན་མ་གཞག་བྱ་ཞིང་། །སྒོ་ཀར་ལས་ཀུན་བྱེད་བཞག་པ། །འགྲུབ་ཕྱིར་པདྨ་འཆང་བ་ཡི། །དཀྱིལ་འཁོར་ཆོ་ག་འདི་གསུངས་སོ། །ཅི་ལྟར་འདོད་པར་དཀྱིལ་འཁོར་ནི། །གྲུ་བཞི་པར་ཡང་ལེགས་བྲིས་ཏེ། །སྔོན་བཞིན་སྙིང་པོའི་དཀྱིལ་འཁོར་དུ། །རིག་སྔགས་རྒྱལ་པོ་གཞག་པར་བྱ། །རིག་པ་ཆེན་མོ་མཱ་མ་ཀཱི། །ཁྲོ་བོ་བདུད་རྩི་ཐབ་སྦྱོར་དང་། །རིག་པ་ཆེན་པོ་ལྕགས་ཀྱུ་མ། །དབྱུག་པ་དང་ནི་སྟོབས་པོ་ཆེ། །རྡོ་རྗེ་ཁུ་ཚུར་རིག་རྒྱལ་མོ། །གནོད་མཛེས་གོ་རིམས་བཞིན་དུ་བཞག །ཁྲོ་ཆེན་ལྷ་ཡི་ཡན་ལག་དང་། །གོམ་པ་འདོར་བ་ཉིད་དང་ནི། །ཁྲོ་མོ་མེ་རྣམས་ངོས་གཉིས་སུ། །བློ་དང་ལྡན་པས་གཞག་པར་བྱ། །སྒོ་ཡི་ཕྱོགས་ཀྱི་ནང་རོལ་དུ། །རྡོ་རྗེ་འཇིགས་བྱེད་མིག་དང་ནི། །རྡོ་རྗེ་གཞན་གྱིས་མི་ཐུབ་མ། །སྒོ་ཀར་ལས་ཀུན་བྱེད་པ་བཞག །དཀྱིལ་འཁོར་གཉིས་པ་མཆོད་པ་ཡང་། །ཆོ་ག་སྔ་མ་བཞིན་དུ་བྱ། །ལྷ་རྣམས་དགའ་བར་འགྱུར་བ་ནི། །ཕྱག་ན་རྡོ་རྗེས་རབ་ཏུ་བཤད། །དེ་ནས་ནང་པར་ནམ་ལངས་ནས། །རྨི་ལམ་བཟང་པོ་རྣམས་དཔྱད་དེ། །གཙང་ཞིང་ཁྲུས་བྱས་གོས་དཀར་བགོས། །སྦྱིན་སྲེག་ལས་ནི་བརྩམ་པར་བྱ། །ལྷ་རྣམས་ཆོ་ག་བཞིན་མཆོད་དེ། །བཀྲ་ཤིས་ངོ་མཚར་དག་ཀྱང་བྱ། །ཆོ་ག་བཞིན་དུ་མེ་སྤར་ནས། །ཅི་སྐད་གསུངས་པའི་སྦྱིན་སྲེག་བྱ། །བ་ལང་ལྕི་བས་བྱུགས་ནས་སུ། །འབྲས་ཡོས་ཀུ་ཤ་སྔོན་པོ་དང་། །མེ་ཏོག་དཀར་པོ་དྲི་ཞིམ་པས། །གནས་དེ་ཁྱད་པར་ཅན་དུ་བཤམ། །དེ་ཡི་གཡས་ཀྱི་ཕྱོགས་སུ་ནི། །བུད་ཤིང་ཞོ་དང་ཀུ་ཤ་དང་། །མར་དང་སྦྲང་རྩི་འབྲས་ཆན་ཏིལ། །བསྲེག་བྱ་ཅུང་ཟད་ཅི་འབྱོར་དགོད། །གཡོན་དུ་ལེགས་པར་བརྟགས་པ་ཡི། །མཆོད་ཡོན་སྣོད་ནི་གཞག་པར་བྱ། །དབུས་སུ་དགང་གཟར་བླུགས་གཟར་དང་། །ལེགས་པར་བཞུས་པའི་མར་དག་བཞག །བཞག་ནས་མཁས་པས་ལས་ཀུན་པའི། །གསང་སྔགས་ཀྱིས་ནི་བསད་གཏོར་བྱ། །སྔོན་བཞིན་གསང་སྔགས་བདག་པོ་ནི། །མདུན་དུ་བཞག་སྟེ་མཆོད་བྱས་ནས། །དེ་ནས་རང་རིགས་སྤྱན་དྲང་སྟེ། །མཆོད་ཡོན་བཟླས་པས་བཞུགས་སུ་གསོལ། །བདག་གི་མདུན་དུ་མར་གྱི་སྣོད། །དག་པར་བྱས་པ་གཞག་པར་བྱ། །མར་དང་མེ་ཡི་བར་དག་ཏུ། །བསྒྲུབ་པར་བྱ་བའི་རྫས་བཞག་གོ། །བདག་དང་མར་དང་བསྒྲུབ་བྱའི་རྫས། །མེ་དང་གསང་སྔགས་བདག་པོར་བཅས། །ལྔ་པོ་འདི་དག་གོ་རིམས་བཞིན། །བློ་དང་ལྡན་པས་ལེགས་པར་དགོད། །གཡོན་དུ་རིག་སྔགས་བྱིན་བསྐྱེད་མ། །གཡས་སུ་ལས་ཀུན་བྱེད་པ་སྟེ། །གནས་དེར་སྔ་མ་བཞིན་དུ་ཡང་། །བསྲུང་བ་ཐམས་ཅད་རབ་ཏུ་སྦྱར། །དེ་ནས་ཀུ་ཤ་སར་པ་ཡི། །གདིང་བ་དག་ཀྱང་བཀྲམ་ནས་སུ། །ལྷ་བཤོས་འབྲས་ཡོས་བཀྲ་ཤིས་ཅན། །སཱ་ལུའི་འབྲས་ཆན་ཞོར་བཅས་དབུལ། །དེ་ནས་བདུག་སྤོས་དྲི་ཞིམ་པས། །ཀུན་ནས་རབ་ཏུ་བདུག་པར་བྱ། །དེ་འོག་ཅི་ལྟར་བསྟན་པ་ཡི། །སྦྱིན་སྲེག་ལས་ནི་ཅི་དགར་བྱ། །གསེར་དང་དངུལ་ཟངས་རྡོ་བའམ། །དུང་དང་མུ་ཏིག་ཤིང་དག་གམ། །གྲོག་མཁར་ས་ལས་བྱས་པ་ཡི། །སྣོད་དུ་རྫས་ནི་གཞག་པར་བྱ། །བྱང་ཆུབ་ཤིང་གི་ལོ་མ་དག །དེ་ཡི་གདིང་བར་ཤིས་པ་ཡིན། །འོ་མ་ཅན་གྱི་ཤིང་གིའམ། །ཡང་ན་ཨརྒའི་ལོ་མའང་རུང་། །ཆུ་ཤིང་པདྨའི་འདབ་མའམ། །ཡང་ན་རས་དཀར་འཇམ་པོའམ། །དྲི་ཞིམ་ཤིང་ལས་སྐྱེས་པ་ཡི། །གདིང་བ་ལྔ་པོ་འདོད་པ་ཡིན། །ཕྱེ་མ་ཁུ་བ་གོས་སོགས་དང་། །ཅི་རིགས་པར་ནི་གཡོགས་ནས་ཀྱང་། །ཆོ་ག་ཤེས་པས་མཉམ་བཞག་སྟེ། །རྫས་ལ་ལེགས་པར་བདུག་པར་བྱ། །ཡིད་ཀྱིས་རྫས་ཀྱི་བྱིན་བསྐྱེད་ཅིང་། །མར་གྱི་སྲེག་བླུགས་རྒྱུན་དུ་བསྲེག །ལེགས་པར་བལྟ་ཞིང་ཆོ་ག་འདིས། །མཁས་པས་རྫས་ལ་བདུག་པར་བྱ། །རྫས་ལ་བཟླས་ཤིང་བསང་གཏོར་ནས། །བླུགས་གཟར་ཆང་པས་བཟུང་ནས་ནི། །དལ་བུས་མར་གྱིས་ལེགས་བཀང་སྟེ། །རྫས་ཀྱི་སྟེང་དུ་དེ་བཟླས་ཤིང་། །སྲེག་བླུགས་ཟློས་པ་མེ་འབར་བ། །སྭཱ་ཧཱ་ཞེས་ནི་བརྗོད་བྱ་ཞིང་། །ཧཱ་ཡི་དབྱངས་ཀྱི་རྒྱུན་བསྲིངས་ཏེ། །བླུགས་གཟར་རྩེ་མོར་དེ་བདུག་ཅིང་། །སྟོང་ངམ་ཡང་ན་ལན་གྲངས་བརྒྱར། །རྫས་རྣམས་ལ་ནི་བདུག་པར་བྱ། །དེ་ལྟར་རྫས་ལ་ཡང་དང་ཡང་། །ཆོ་ག་འདི་ནི་བྱ་བར་གསུངས། །གསང་སྔགས་ཀྱི་ནི་རང་བཞིན་དང་། །དངོས་གྲུབ་ཆེ་ཆུང་ཤེས་བྱ་སྟེ། །ལན་གྲངས་ཉི་ཤུ་རྩ་གཅིག་ཀྱང་། །གྲངས་ཀྱི་ཆོ་ག་ཡིན་པར་བཞེད། །རྫས་ནི་ཟད་པ་མ་གྲུབ་ན། །མཁས་པས་དེ་ལ་ཉུང་ཟད་ཅིག །རིག་སྔགས་བཟླས་ཤིང་བསང་གཏོར་དེ། །བཞག་ནས་མཆོད་ཅིང་བལྟ་བར་བྱ། །རབ་ལ་སོགས་པའི་དབྱེ་བ་དང་། །ལས་ཀྱི་དབྱེ་བ་བསྒྲགས་པ་དག །དཀྱིལ་འཁོར་དུ་གསུངས་ཆོ་ག་བཞིན། །འབར་ན་འགྲུབ་པའི་མཚན་མ་ཡིན། །ཤིན་ཏུ་ཆེན་པོའི་རྫས་ཀྱི་རྣམས། །དེ་ཡི་གཡས་སུ་བཞག་པའམ། །གཡོན་དུ་འོས་པ་གཡོན་དུ་བཞག །དེར་ནི་དེ་ལ་གཏུག་ཅིང་བ། །སེམས་ཅན་ཀུན་གྱི་མགོ་བོ་ལ། །ཡང་ན་རང་གི་མགོ་བོ་ཉིད། །མོད་ལས་བསྒྲུབ་རྫས་ཅི་ཡང་རུང་། །མཁས་པས་བདུག་པ་བསྔོས་ཏེ་བྱ། །བདུག་པའི་ཆོ་ག་འདི་ཡིས་སུ། །སྔོན་བཞིན་ཕྱེ་ལ་མར་དག་གིས། །ལ་ལའི་ཕྱིར་བསྔོ་ཁ་ཅིག་ལ། །བལྟ་ཞིང་སྦྱིན་སྲེག་རབ་ཏུ་བྱ། །གལ་ཏེ་མར་དག་མ་འབྱོར་ན། །ཆོ་ག་བཞིན་དུ་འོ་མས་བྱ། །ཡང་ན་འོ་མ་མར་དང་ནི། །མཁས་པས་མངར་གསུམ་དག་གིས་བྱ། །ཞི་བ་ལ་སོགས་ཁྱད་པར་གྱིས། །ཁ་ཅིག་ལ་ནི་ཞོ་ཡང་རུང་། །ཡང་ན་བསྲེག་བྱའི་རྫས་བསྟེན་པས། །ཅི་ལྟར་རིགས་པར་བདུག་པར་བྱ། །མཚོན་ཆ་རྣམས་ལ་འབྲུ་མར་གྱིས། །དྲི་ཞིམ་ཐང་ཆུ་ཨཾ་ཛ་ན། །དུ་རུས་ཀ་སོགས་འབྲུ་མར་གྱིས། །བདུག་པའི་ཆོ་ག་བྱ་བར་གསུངས། །རྫས་ལ་སོགས་པའི་བྱེ་བྲག་ལས། །རྫས་ནི་རྣམ་པ་སྣ་ཚོགས་དང་། །དྲི་ཞིམ་ལས་བྱུང་འབྲས་བུ་ཡིས། །བདུག་པའི་ཆོ་ག་དག་ཀྱང་བྱ། །ཤ་ཆེན་ལ་སོགས་རྫས་རྣམས་ལ། །ཚིལ་བུ་དག་གིས་བྱ་བར་བསྒྲགས། །དེ་ཡི་གཟུགས་བརྙན་བྱས་ནས་ཀྱང་། །སོ་སོའི་ཤ་དང་ཚིལ་གྱིས་བྱ། །ཆོ་ག་བསྟན་པ་འདི་ཡིས་སམ། །ཡང་ན་སྔར་གསུངས་ཆོ་ག་ཡིས། །དངོས་གྲུབ་མྱུར་བར་བྱ་བའི་ཕྱིར། །བདུག་པའི་ཆོ་ག་རྒྱས་པར་བསྟན། །ཆོ་ག་འདི་ཡིས་རྫས་དག་ལ། །བདུགས་ནས་དེ་ལ་དབང་ཡང་བསྐུར། །དབང་བསྐུར་ནས་ནི་ལྷ་གནས་སུ། །བཞག་སྟེ་ལེགས་པར་མཆོད་པར་བྱ། །དེ་ནས་ཆོ་ག་ལས་གསུངས་པ། །ཐོབ་པར་བྱ་ཕྱིར་གཏོར་མ་བསོག །བདག་ཉིད་རྒྱས་པར་ཁྲུས་བྱས་ནས། །ཆོ་ག་འདི་ནི་བརྩམ་པར་བྱ། །དྲི་ཞིམ་རྣམས་ཀྱིས་དྲིལ་བྱས་ནས། །དེ་བཞིན་ཁྲུས་རྩི་སྐྱུ་རུ་རས། །ཁྲུས་བྱ་ཉི་མ་ཕྱེད་མཚམས་ནས། །མཁས་པས་རྫས་ལ་ཡོངས་སུ་བཟླས། །སྐུད་པ་གདུ་བུ་གོས་རྣམས་དང་། །ཐལ་བ་ཡུངས་ཀར་ཆུ་དག་ལ། །བསྲུང་བའི་ཕྱིར་ནི་རྫས་འདི་ལ། །གསང་སྔགས་བཟླས་པ་བརྩམ་པར་བྱ། །དེ་དག་ཐོག་མར་བཟླས་བརྗོད་དེ། །ཆོ་ག་འདི་ནི་མྱུར་དུ་བྱ། །དེ་ཕྱིར་དེ་ཚེ་དགོས་པ་ཀུན། །ཐོག་མ་ཉིད་དུ་བསྔགས་པར་བྱ། །མེ་ཏོག་ལ་སོགས་ཅི་འབྱོར་པ། །ཡོངས་སུ་བསྡུ་བ་བྱས་ནས་ནི། །ཅི་རིགས་པ་ཡི་གནས་བཞག་སྟེ། །སྒྲུབ་པའི་སར་ནི་གནས་པར་བྱ། །དཀྱིལ་འཁོར་ལས་གསུངས་ཆོ་ག་ཡིས། །མཁས་པས་དཀྱིལ་འཁོར་བྲིས་ནས་ཀྱང་། །ཅི་རིགས་པར་ནི་མཆོད་བྱས་ཏེ། །རྫས་རྣམས་བསྒྲུབ་པ་བརྩམ་པར་བྱ། །ལས་ཀུན་བྱེད་པའི་གསང་སྔགས་ཀྱིས། །ཚོན་སྣ་ལྔ་ཡི་སྲད་བུ་ལ། །ལན་བརྒྱར་བསྔགས་ནས་དང་པོར་དེས། །ཕུར་བུ་རྣམས་ལ་བྲེ་བར་བྱ། །མཁས་པས་ཐབ་སྦྱོར་བཟླས་པ་ཡིས། །སྒོ་དྲུང་གི་ནི་བུམ་པ་ལ། །སྲད་བུ་ལྷོད་པར་བཏགས་ནས་སུ། །དེ་ནས་དེར་ནི་གཞག་པར་བྱ། །ཐབ་སྦྱོར་བགེགས་རྣམས་སེལ་བྱེད་པའི། །ཁྲོ་བོ་མིང་ལ་དྲན་བཞིན་དུ། །སྲད་བུའི་འོག་ནས་འབྱུང་བ་དང་། །འཇུག་པར་བྱ་བ་འདི་གསུངས་སོ། །ཡང་ན་མཁས་པས་ཁྲོ་བོ་དེས། །སྲད་བུ་ལ་ནི་བསྔགས་པའམ། །བསྲུང་བའི་དོན་དུ་གང་དགའ་བའི། །རིག་སྔགས་གཞན་གྱིས་བཟླས་ཀྱང་རུང་། །བསྐྲད་པ་ལ་སོགས་ཆོ་ག་དག །སྔར་གསུངས་པ་ཡང་ཤེས་བྱ་ཞིང་། །དཀྱིལ་འཁོར་གྱི་ནི་ཉེ་འཁོར་དུ། །ཆོ་ག་འདི་དག་བྱ་བར་གསུངས། །ཕྱོགས་དང་ཕྱོགས་སྐྱོང་ཅི་སྙེད་དང་། །སོ་སོའི་རིགས་ཀྱི་ལྷ་ཡི་རྣམས། །ཕྱོགས་དང་གོ་རིམས་ཅི་ལྟ་བར། །དེ་ཀུན་ཕྱི་རོལ་དག་ཏུ་མཆོད། །བུམ་པར་རྡོ་རྗེ་བཞག་པའམ། །ཡང་ན་ལོ་མས་ཁ་བརྒྱན་པ། །དེ་ལ་སྲད་བུ་བཏགས་ནས་སུ། །སྒོ་ཡི་ཕྱོགས་སུ་གཞག་པར་བྱ། །རིགས་དང་རིགས་རྣམས་སོ་སོ་ཡི། །རིག་པའི་རྒྱལ་པོའི་སྙིང་པོའམ། །ཡང་ན་ཅི་ལྟར་རིགས་པ་ཡིས། །རྫས་སྒྲུབ་ཚེ་ན་ཀུན་ནས་བསྲུང་། །ཡང་ན་རིགས་ཀྱི་རིག་སྔགས་དང་། སོ་སོའི་རིགས་ཀྱི་ཕྱག་རྒྱ་ཡིས། །བགེགས་རྣམས་ཞི་བར་བྱ་བའི་ཕྱིར། །བསྒྲུབ་ཚེ་འདིར་ནི་ཐམས་ཅད་བསྲུང་། །ཕུར་བུ་རྡོ་རྗེ་རྩེ་འདྲའམ། །ཡང་ན་རྩེ་གཅིག་སྦོམ་པོ་ལ། །རྡོ་རྗེ་ཕུར་བུས་ལན་བརྒྱ་རུ། །མངོན་པར་བསྔགས་པ་བྱས་པ་དག །ལྷ་ཡི་གནས་ཀྱི་ཕྱི་རོལ་དུ། །གྲྭ་བཞི་ཀུན་དུ་གདགས་པར་བྱ། །ཡང་ན་དཀྱིལ་འཁོར་ཕྱི་རོལ་དུ། །བཏབ་ནས་ལས་རྣམས་རབ་ཏུ་བྱ། །རྡོ་རྗེ་ཕུར་བུའི་ཆོ་ག་འདི། །ལས་ཀུན་བྱེད་པར་ཤེས་པར་བྱ། །བསྒྲུབ་ཚེ་འདིར་བགེགས་འཚེ་མེད་ཅིང་། །སྒྲུབ་པ་པོ་ཡིས་དངོས་གྲུབ་ཐོབ། །དྲི་ཞིམ་ཕྱེ་མའམ་པིར་དག་གིས། །སྣ་ཚོགས་ཚོན་གྱི་འདེ་གུ་ཡིས། །དཀྱིལ་འཁོར་ལེགས་པར་བྲིས་ནས་སུ། །དེ་ནས་ཆོ་ག་འདི་དག་དང་། །སོ་སོའི་ཕྱོགས་ཀྱི་རི་མོའི་མཐར། །རྡོ་རྗེ་རྩེ་གསུམ་བྱ་བར་གསུངས། །དབུས་ཀྱི་ངོས་རྣམས་དག་ཏུ་ཡང་། །རྡོ་རྗེ་བསྒྲེངས་པའི་ཕྲེང་བ་བྱ། །རྡོ་རྗེ་ར་བའི་གསང་སྔགས་ཀྱིས། །ཆོ་ག་དེ་ནི་བྱ་བར་བསྟན། །དེ་ཡི་དབུས་སུ་བཞུགས་ནས་སུ། །རྫས་རྣམས་རབ་ཏུ་བསྒྲུབ་པར་བྱ། །ཆོ་ག་འདི་ཡི་ཕྱི་ནང་དུ། །རྡོ་རྗེའི་ལྟེ་བའི་དྲ་བ་བྱ། །རྡོ་རྗེ་དྲ་བའི་གསང་སྔགས་ཀྱིས། །ཤིན་ཏུ་ཐུབ་པར་དཀའ་བར་འགྱུར། །སྒོ་ཁྱུད་དག་ནི་ཐམས་ཅད་དང་། །སྒོ་རྣམས་ཀྱི་ནི་མདུན་དག་ཏུ། །མཁས་པས་རྡོ་རྗེ་བྲིས་ནས་སུ། །དེ་ནས་ལས་རྣམས་བྱ་བར་བསྒྲགས། །ཡོ་ལང་ཆུང་ངུས་ཐང་བུ་ལ། །དཀྱིལ་འཁོར་ལེགས་པར་བྲི་བར་བྱ། །མདོར་བསྡུས་ཆོ་ག་བྲིས་ནས་སུ། །རྫས་རྣམས་བསྒྲུབ་པ་བརྩམ་པར་བྱ། །ཁྲུ་ལྔའམ་བདུན་ནམ་བརྒྱད་པ་ལ། །གྲུ་བཞི་པ་ལ་སྒོ་བཞི་པ། །གསང་སྔགས་དངོས་གྲུབ་རྗེས་མཐུན་པར། །ཡང་ན་ལྷག་པར་བྱས་ཀྱང་རུང་། །སྒོ་རྣམས་ཀུན་དུ་རྡོ་རྗེ་དང་། །གྲྭ་རྣམས་སུ་ནི་བུམ་པ་དགོད། །ལས་ཀུན་བྱེད་པའི་བུམ་པ་དག །སྒོ་དྲུང་དུ་ནི་གཞག་པར་བྱ། །དབུས་སུ་ཆོས་ཀྱི་འཁོར་ལོ་དང་། །ཐོག་མ་རྒྱལ་པོ་ལྔ་རྣམས་དགོད། །ངོས་སུ་མཆེ་བ་མདུང་ཐུང་དང་། །སྤྱན་དང་རྒྱལ་བའི་མཛོད་སྤུའོ། །བདེ་གཤེགས་ཕྱག་རྒྱ་ཐམས་ཅད་དང་། །སྒོར་ནི་གཞན་གྱིས་མི་ཐུབ་མའོ། །རབ་འབྱོར་དང་ནི་ཀུན་དགའ་བོ། །སྙིང་པོའི་དཀྱིལ་འཁོར་ལྷ་རྣམས་ནི། །ཕྱོགས་ཆ་བསྟན་པ་བཞིན་དུ་དགོད། །ཕྱི་རོལ་དུ་ནི་ཅི་དགའ་བའི། །ལྷ་རྣམས་དགོད་པ་བྱ་བར་གསུངས། །དོན་གྲུབ་པ་དང་མཐུ་ཆེན་དང་། །འཇམ་དཔལ་དང་ནི་གླང་པོ་ཆེ། །དཔལ་ལྡན་ཚངས་པ་མེས་པོ་དང་། །དེ་བཞིན་དུ་ནི་བརྒྱ་བྱིན་དང་། །བཅོམ་ལྡན་མངག་གཞུག་སངས་རྒྱས་པའི། །ལྷ་ནི་དེ་དང་དེ་དག་དང་། །ཕྱོགས་སྐྱོང་རྣམ་པ་སྣ་ཚོགས་རྣམས། །ཕྱི་རོལ་དཀྱིལ་འཁོར་དག་ཏུ་བྲི། །དེ་ནས་དབུས་སུ་གསང་སྔགས་སམ། །སྙིང་པོའི་དཀྱིལ་འཁོར་རྫས་བཞག་སྟེ། །མཆོད་པའི་ཆོ་ག་ཐམས་ཅད་དང་། །སྦྱིན་སྲེག་ལས་ནི་བྱ་བར་བསྒྲགས། །མདོར་ན་བསྲུང་བའི་ལས་ཀྱི་རྣམས། །དཀྱིལ་འཁོར་དག་ཏུ་གསུངས་པ་བཞིན། །བསྒྲུབ་པའི་ཚེ་ན་དེ་དག་ཀུན། །ཁྱད་པར་དུ་ནི་སྦྱར་བར་བྱ། །དཀྱིལ་འཁོར་ཆོ་ག་བསྟན་པ་འདི། །དེ་བཞིན་གཤེགས་པའི་རིགས་ཀྱིས་གསུངས། །འདིས་ནི་རྫས་རྣམས་བསྒྲུབ་བྱས་ནས། །ཟློས་པ་པོ་ལ་མྱུར་དུ་འགྲུབ། །དེར་ནི་ཞུགས་པ་ཙམ་གྱིས་ཀྱང་། །བགེགས་རྣམས་མེད་པར་གྱུར་པ་དང་། །ལྷ་རྣམས་ཁྱད་པར་དག་ཏུ་ཡང་། །བྱིན་གྱིས་རློབ་པ་མཛད་པར་འགྱུར། །དེ་བཞིན་གཤེགས་པའི་རིགས་ཀྱི་རྫས་བསྒྲུབ་པའི་དཀྱིལ་འཁོར་གྱི་ཆོ་ག་རིམ་པར་ཕྱེ་བའོ།། །།ཚོན་རྩི་སྣ་ནི་ལྔ་པོ་ཡིས། །སྔོན་བཞིན་དཀྱིལ་འཁོར་ཐམས་ཅད་བྲི། །དབུས་སུ་པདྨ་བྲིས་ནས་ཀྱང་། །དང་པོར་ཤར་གྱི་ཕྱོགས་སུ་ནི། །འདོད་པ་སྦྱོར་བྱེད་དགོད་པར་བྱ། །དེ་ནས་གསང་སྔགས་རྒྱལ་པོ་དྲུག །དེ་ཡི་འོག་ཏུ་གོས་དཀར་ཅན། །སྒྲོལ་མ་བདུན་དང་དཔའ་མོ་བདུན། །རིག་པའི་རྒྱལ་མོ་གྲགས་ལྡན་མ། །སྒྲོ་ཀར་རིག་སྔགས་རལ་པ་གཅིག །རྟ་མགྲིན་ཡང་ནི་དགོད་པར་བྱ། །ལས་ཀུན་བྱེད་པའི་བུམ་པ་ཡང་། །སྒོ་དྲུང་དུ་ནི་གཞག་པར་བྱ། །སྒོ་ཡི་གྲྭར་ནི་རྡོ་རྗེ་བྲི། །ཕྱི་རོལ་ཚངས་དང་ལྷ་ཡི་སྤྱན། །དབང་ཕྱུག་ཆེན་པོ་ལྷ་ཡི་བུ། །རྒྱལ་སྲས་དྲི་མ་མེད་པ་དང་། །འོད་ཟེར་ཕྲེང་བས་བརྒྱན་པ་དང་། །ཀླུ་ཡི་རྒྱལ་པོ་མཐའ་ཡས་དང་། །སྟོབས་ཆེན་མཛེས་པ་ཞེས་དགའ་དང་། །རིག་སྔགས་འཆང་གི་རྒྱལ་པོ་ནི། །བརྩོན་འགྲུས་ཆེན་པོ་དུང་ཅན་དང་། །སྔོན་བཞིན་ཕྱོགས་མཚམས་སྐྱོང་བ་དང་། །འདིར་ཡང་རིག་པའི་ལྷ་རྣམས་དགོད། །དཀྱིལ་འཁོར་སྔ་མའི་ཆོ་ག་བཞིན། །འདིར་ཡང་ཐམས་ཅད་བྱ་བར་གྲགས། །བཤད་པ་འདི་ལ་བརྟེན་ན་ནི། །བགེགས་རྣམས་ཀུན་གྱིས་ཐུབ་པར་དཀའ། །པདྨ་རིགས་ཀྱི་རྫས་སྒྲུབ་པའི་དཀྱིལ་འཁོར་གྱི་ཆོ་ག་རིམ་པར་ཕྱེ་བའོ།། །།གྲུ་བཞི་པར་ནི་ཐིག་བཏབ་ནས། །དང་པོར་དཀྱིལ་འཁོར་བྲི་བར་བྱ། །དབུས་སུ་རྡོ་རྗེ་བྲིས་ནས་ཀྱང་། །ཤར་དུ་རིག་སྔགས་རྒྱལ་པོ་ནི། །ལེགས་པར་འགྲུབ་བྱེད་ཐོག་མར་དགོད། །དེ་ནས་དེ་ཡི་ངོས་གཉིས་སུ། །རིག་སྔགས་རྒྱལ་མོ་གཉིས་བྲིས་ནས། །རིན་ཆེན་རྡོ་རྗེ་གནམ་ལྕགས་དང་། །གཡོན་དུ་རྡོ་རྗེ་ཁུ་ཚུར་རོ། །བཀོད་ནས་དེ་ཡི་ངོས་གཉིས་སུ། །ཀཱི་ལི་དང་ནི་གནོད་མཛེས་དགོད། །རྡོ་རྗེ་རྡོ་རྗེ་དབྱུག་པ་དང་། །ཐོ་བ་དང་ནི་ལུ་གུ་རྒྱུད། །རིན་ཆེན་རྡོ་རྗེ་ལྕགས་ཀྱུ་མ། །མཱ་མ་ཀཱི་ཡང་ཡོངས་སུ་དགོད། །རྒྱལ་པོ་བློན་སོགས་ཕོ་ཉ་མོ། །རྡོ་རྗེ་བློས་གྲོས་ལ་སོགས་དང་། །དབང་ཕྱུག་ཆེན་པོ་ཆུང་མར་བཅས། །ནོར་བདག་གནོད་སྦྱིན་ལྷན་ཅིག་ཏུ། །ལས་ཀུན་བྱེད་པའི་ཕྱི་རོལ་དུའོ། །ཕྱི་རོལ་ཕྱག་ན་རྡོ་རྗེའི་རིགས། །འཁྲུངས་འདོད་པ་ཡི་རིག་སྔགས་དང་། །འབྱུད་པོ་སྲིན་པོ་ཤ་ཟ་དང་། །གྲུབ་པ་གནོད་སྦྱིན་ལྟོ་འཕྱེ་ཆེ། །ཕྱོགས་མཚམས་སྐྱོང་བའི་ལྷ་རྣམས་དག །ཐམས་ཅད་གོ་རིམས་བཞིན་དུ་དགོད། །དེ་ནས་མཆོད་པའི་ཆོ་ག་དང་། །གང་ཡང་བསྲུང་བ་ལ་སོགས་ཀུན། །སྦྱིན་སྲེག་བསྟན་པ་བཞིན་བྱས་ཏེ། །ཅི་སྐད་བསྟན་པའི་ལས་རྣམས་བྱ། །ཟློས་པ་པོས་ནི་དཀྱིལ་འཁོར་དུ། །སྤྱན་དྲང་བ་ལ་སོགས་པའི་ལས། །རིག་པའི་རྒྱལ་པོའི་སྙིང་པོའམ། །ཡང་ན་རྣམ་པར་ཕྱེ་སྟེ་བྱ། །བུམ་པ་དགང་བ་ཐམས་ཅད་ནི། །སྒྲུབ་པར་གསུངས་པའི་ཆོ་ག་དང་། །བསྒྲུབ་པའི་དཀྱིལ་འཁོར་དུ་བསྟན་པ། །ཆོ་ག་འདྲ་བར་གསུངས་པ་ཡིན། །དབང་ཆེན་གྲགས་པའི་སེམས་ཅན་ཀུན། །དམ་ཚིག་ལས་ནི་མི་འདའ་བས། །བསྲུང་བར་བྱ་བ་མ་བྱས་ཀྱང་། །དཀྱིལ་འཁོར་དག་ཏུ་བསྒྲུབ་པར་བྱ། །རིག་སྔགས་ཀྱི་ནི་ལྷ་ཡི་རྣམས། །དམ་ཚིག་གིས་ནི་དཀྱིལ་འཁོར་དུ། །ལྷག་པར་བྱིན་གྱིས་རློབ་པ་དག །ཁྱད་པར་དུ་ནི་འབྱུང་བར་འགྱུར། །རྟག་ཏུ་གུས་པས་མཉེས་བྱ་བའི། །ཆོ་ག་འདིས་ནི་དགོངས་འགྱུར་ཞིང་། །སྒྲུབ་པ་པོ་དག་འདོད་པ་ཡི། །དངོས་གྲུབ་ཐམས་ཅད་སྩོལ་བར་མཛད། །འདིར་ནི་རིགས་ཀྱི་སྙིང་པོ་དང་། །རིགས་ཀྱི་ཡུམ་དང་རྒྱལ་པོ་དང་། །སྤྱི་ཡི་བསྲུང་བའི་གསང་སྔགས་ཀྱང་། །དངོས་གྲུབ་མྱུར་དུ་སྩོལ་བར་མཛད། །དཀྱིལ་འཁོར་གསུམ་པོ་འདི་དག་ནི། །གསང་ཆེན་ཡིན་པར་ཡོངས་སུ་བསྒྲགས། །རྡོ་རྗེ་རིགས་ཀྱི་ཕོ་ཉ་རྫས་སྒྲུབ་པའི་དཀྱིལ་འཁོར་གྱི་ཆོ་ག་རིམ་པར་ཕྱེ་བའོ།། །།དེ་ནས་གཞན་ཡང་དཀྱིལ་འཁོར་འདི། །གསང་ཆེན་སྙིང་པོར་གྱུར་པ་སྟེ། །ཚུལ་བཞིན་རྡོ་རྗེས་མཚན་པ་ཡི། །དཀྱིལ་འཁོར་ལེགས་པར་བྲི་བར་བྱ། །དབུས་སུ་རིགས་ཀྱི་རྒྱ་བྲིས་ནས། །དེ་ལ་རིག་སྔགས་གཞག་པར་བྱ། །ཡང་ན་བུམ་པ་གང་བ་ནི། །བཀྲ་ཤིས་སྔོན་བཞིན་བཤད་པ་བཞག །དེ་སྟེང་ཁམ་ཕོར་ལ་སོགས་པ། །ཁ་སྦྱོར་ནང་དུ་རྫས་ཀྱང་བཞག །ཤར་དུ་སངས་རྒྱས་བཅོམ་ལྡན་འདས། །བྱང་དུ་སྤྱན་རས་གཟིགས་དབང་ཕྱུག །ལྷོར་ནི་བཅོམ་ལྡན་རྡོ་རྗེ་འཛིན། །ནུབ་ཏུ་དྲག་པོ་ནོར་བདག་གོ། །རིག་པའི་རྒྱལ་པོའི་ཚུལ་དུ་ནི། །ཐམས་ཅད་ཕྱག་རྒྱའི་སྟེང་དུ་དགོད། །རིགས་ཀྱི་རིག་སྔགས་གཡས་ཕྱོགས་སུ། །གཡོན་དུ་ལས་རྣམས་ཀུན་བྱེད་པ། །ནུབ་ཕྱོགས་ཀྱི་ནི་ངོས་གཉིས་སུ། །དཀར་ཤམ་མ་དང་དཔལ་མོ་བཞག །ལྷུང་བཟེད་དང་ནི་ཆོས་གོས་ཀྱང་། །ཤར་གྱི་གྲྭ་ནི་གཉིས་སུ་བྲི། །བྱང་ཕྱོགས་ཕྱག་ན་པདྨ་ཡི། །དབྱུག་པ་དང་ནི་གུཎྜི་བྲི། །ལྷོ་ཕྱོགས་རྡོ་རྗེ་འཛིན་པ་ཡི། །རྡོ་རྗེ་དང་ནི་ཐོ་བ་བྲི། །ནུབ་ཕྱོགས་ཀྱི་ནི་གྲྭ་གཉིས་སུ། །རྩེ་གསུམ་ནོར་གྱི་བུམ་པ་བྲི། །སྒོ་ཀར་གཞན་གྱིས་མི་ཐུབ་མ། །ཤར་གྱི་ཕྱོགས་སུ་འཕྲོག་མ་བཞག །ལྷོ་ཡི་ཕྱོགས་སུ་རི་མཁར་མ། །བྱང་དུ་རལ་པ་གཅིག་མ་བྲི། །ཕྱི་རོལ་ལྷ་རྣམས་དགོད་པ་ནི། །མདོར་ན་ཅི་ལྟར་འདོད་པ་བཞིན། །གསང་སྔགས་མཆོད་པའི་ཆོ་ག་ཀུན། །སྔ་མ་བཞིན་དུ་ཡོངས་སུ་བསྒྲགས། །དཀྱིལ་འཁོར་རབ་ཏུ་གསང་བ་འདི། །སྒྲུབ་པའི་ཚེ་ན་བགེགས་མེད་བཤད། །རྫས་རྣམས་ཀུན་དང་ལས་རྣམས་ནི། །གསང་སྔགས་བདག་གིས་ཅི་དགར་འགྲུབ། །བཅུག་ནས་འབྱུང་བ་ཉིད་ཀྱིས་ཀྱང་། །བགེགས་བྱ་བར་ནི་མི་ནུས་སོ། །དྲི་དང་མེ་ཏོག་བསུང་ཞིམ་དང་། །བདུག་སྤོས་མར་མེ་གསལ་བ་དང་། །བཤོས་ཀྱང་རྣམ་པ་སྣ་ཚོགས་ཀྱིས། །དེ་ནས་མཆོད་པ་ལེགས་པར་བརྩམ། །བཟླས་བརྗོད་ཆོ་ག་ལས་གསུངས་དང་། །དཀྱིལ་འཁོར་དག་ཏུ་ཅི་བསྟན་པ། །དེ་བཞིན་ཁང་པའམ་དཀྱིལ་འཁོར་དུ། །མཆོད་པ་ཡི་ནི་ཆོ་ག་བྱ། །རིག་སྔགས་རྒྱལ་ལ་ལྷ་བཤོས་ནི། །སྙིང་པོར་གྱུར་པ་སྣ་ཚོགས་དང་། །མཆོད་པ་སྣ་ཚོགས་གང་ཡིན་པ། །ཆོ་ག་བཞིན་དུ་བྱ་བར་གསུངས། །མར་གྱི་མར་མེ་གསལ་བ་དང་། །སྙིང་པོ་དག་ཀྱང་གསལ་བར་དབུལ། །འགོ་བར་བྱ་བའི་ཆེད་དུ་ནི། །རང་རིག་སྔགས་ལ་མཆོད་ཡོན་དབུལ། །དེ་ནས་རིག་སྔགས་རྒྱལ་པོ་ཡིས། །ཡུངས་ཀར་དག་ལ་བསྔགས་ནས་སུ། །ནད་རིམས་དག་ནི་ཐམས་ཅད་དུ། །གསང་བའི་བསྲུང་བ་རབ་ཏུ་བྱ། །ལས་ཀུན་བྱེད་པའི་རིག་སྔགས་སམ། །ཡང་ན་བསྲུང་བ་གཞན་ཡང་རུང་། །ཡུངས་ཀར་ཡོངས་སུ་བཟླས་པ་དག །རྫས་ཀྱི་དྲུང་དུ་གཞག་པར་བྱ། །དེ་ཡིས་ཀུན་དུ་གཏོར་བ་ཡིས། །བགེགས་རྣམས་ལས་ནི་བསྲུང་བར་འགྱུར། །གཡོན་དུ་རང་གི་ཕྱག་རྒྱ་བཞག་པའམ། །རལ་གྲི་མངོན་པར་བསྔགས་པའང་རུང་། །ཕྱོགས་སྐྱོང་ཕྱོགས་སུ་བཞག་བྱས་ཏེ། །དེའི་མོད་སྨྱུང་ཞིང་བསྲུང་བ་བྱས། །སེམས་སྟོབས་ཆེ་ཞིང་གཙང་སྦྲ་ཅན། །གོས་ཀྱང་དེ་ཡི་ཁ་དོག་ལྡན། །ལུས་དང་སྟོབས་དང་ལང་ཚོ་དང་། །གཟུགས་དང་ལྡན་པའི་སྐྱེས་བུ་ཞིག །དབལ་ལ་བཟླས་པའི་རལ་གྲི་འཛིན། །མགུལ་ནས་ཕྲེང་བའི་དོ་ཤལ་འཕྱང་། །ཡུངས་ཀར་དག་ནི་ཐུ་བར་བླུགས། །བགེགས་རྣམས་བལྟ་ལ་མཁས་པ་སྟེ། །ཕྲེང་བ་དང་ནི་ཡུངས་ཀར་དག །བགེགས་ལ་རབ་ཏུ་ འཕེན ་པར་ནུས། །བགེགས་རྣམས་ཀུན་ནས་འབྱུང་བའམ། །ཡང་ན་འཇིགས་པ་ཆེན་པོ་ལ། །འཇིགས་པ་མེད་པར་རལ་གྲིས་བསྡིགས། །གལ་ཏེ་ཉེ་བར་འོངས་ནས་འདེབས། །ཡུངས་ཀར་དག་དང་ཕྲེང་བ་སྤོས། །བགེགས་རྣམས་ཉེ་བར་ཞི་བར་འགྱུར། །ཡང་ན་རང་གི་གནས་དག་ན། །ལེགས་པར་གནས་པའི་རལ་གྲིས་བྱ། །བསྐོར་བའི་གནས་རྣམས་བོར་ན་ནི། །སྐབས་དང་གླགས་ནི་རྙེད་འགྱུར་ཞིང་། །དེ་ལ་བགེགས་ཀྱང་འཇུག་པར་འགྱུར། །དེ་བས་ནན་ཏན་བསྐྱེད་དེ་བསྲུང་། །དེ་དག་སྒྲུབ་པའི་ཆོ་ག་ལས། །བསྲུང་བའི་ལས་ནི་མདོར་བསྡུས་པའོ། །རྒྱུད་ལས་གསུངས་པའི་ཡོན་ཏན་ཅན། །ཕྱོགས་སྐྱོང་རྣམས་ནི་མ་རྙེད་ན། །ལྕགས་མདའ་འམ་ཡང་ན་མདའ་ཅན་དག །བཟླས་ནས་ཕྱོགས་སུ་གཟུགས་པར་བྱ། །གསང་སྔགས་བཟླས་ཤིང་དཀའ་ཐུབ་ཅན། །རྒྱུད་འཛིན་ཤེས་པར་ལྡན་པ་ཞིག །གསང་སྔགས་སྒྲུབ་པའི་གྲོགས་མཆོག་སྟེ། །བཟླས་བརྗོད་བྱེད་ཅིང་སྒོ་ཀར་བཞག །དེས་ནི་བགེགས་ནི་བཟློག་པ་དང་། །ལས་རྣམས་ཀུན་ལ་འཇུག་པར་བྱ། །རྒྱུད་རྒྱུད་དག་ལས་རང་གི་རྒྱ། །བསྲུང་བ་ཞེས་ཀྱང་མི་ཚུགས་གང་། །དེ་དག་བཟླས་ཤིང་མཆོད་བྱས་ནས། །བདག་ཉིད་ཀྱིས་ནི་བཅང་བར་བྱ། །བགེགས་ཆེན་དྲག་པོ་རྣམས་ལ་ནི། །དེ་དག་གིས་ནི་བཟླས་བྱའམ། །ཡང་ན་འདོད་པའི་གསང་སྔགས་ཀྱིས། །བསྔགས་པའི་ཡུངས་ཀར་དག་གིས་བྱ། །ལྷ་ཡི་དཀྱིལ་འཁོར་ཕྱི་རོལ་དུ། །གཏོར་མའི་ཆོ་ག་ཅི་རིགས་པར། །རབ་ཏུ་དང་ཞིང་བཟང་བའམ། །ཡང་ན་འབྱུང་པོ་ཀུན་ལ་བྱ། །བསྐྲད་པ་དང་ནི་འོག་བཅིང་དང་། །སྟེང་ཡང་བཅིང་ཞིང་ཁོར་ཡུག་ཏུ། །མཚམས་བཅད་ཕྱོགས་ཀྱང་བཅིང་བྱ་ཞིང་། །རྡོ་རྗེ་དྲ་བ་ར་བ་བྱ། །རྒྱུད་དང་སློབ་དཔོན་ལུང་དག་གིས། །རྫས་དང་བདག་དང་ལྷ་ཡང་བསྲུང་། །གསང་སྔགས་དག་གིས་ཕྱི་ནང་དུ། །བགེགས་རྣམས་ཐམས་ཅད་བཟློག་པར་བྱ། །ཆོ་ག་དེ་དག་ཐམས་ཅད་ནི། །ཕྱི་དྲོའི་དུས་སུ་བྱ་བར་བཤད། །ཉི་མ་ནུབ་པར་གྱུར་ནས་ནི། །རྫས་རྣམས་བསྒྲུབ་པ་བརྩམ་པར་བྱ། །བློ་དང་ལྡན་པ་ཕྱིར་བྱུང་ནས། །ཉེ་རེག་ཡང་དང་ཡང་བྱས་ཏེ། །བདུད་རྩི་ཐོབ་སྦྱོར་བཟླས་བྱས་པའི། །སྤོས་ཆུ་ཁྱོར་གང་བཏུང་བར་བྱ། །དཀྱིལ་འཁོར་བདག་པོའི་སྙིང་པོ་ཡིས། །བཟླས་པའི་མར་ནི་ཅུང་ཟད་བཏུང་། །ངལ་དང་སྙམ་པ་ལ་སོགས་པའི། །གནོད་པ་ཐམས་ཅད་ཞི་བར་འགྱུར། །སྟང་ཟིལ་སྦྲང་རྩི་པི་པི་ལིང་། །སངས་རྒྱས་སྤྱན་གྱིས་བཟླས་པའམ། །སྔ་མས་བསྐུས་ན་མྱུར་བར་ནི། །བགེགས་ལས་བྱུང་བའི་གཉིད་སེལ་ལོ། །བསྡམས་ཤིང་ཤར་དུ་ཁ་བསྟན་འདུག །ལྷ་རྣམས་ལ་ཡང་ཕྱག་འཚལ་ནས། །ཀུན་ལ་ཡིད་ཀྱིས་གསོལ་བཏབ་སྟེ། །དེ་ནས་སྒྲུབ་ལ་འཇུག་པར་བྱ། །མཚན་མ་བཟང་པོ་རྣམ་པ་གསུམ། །བཟླས་བརྗོད་བྱེད་པས་བཟུང་ནས་ནི། །རབ་ཏུ་དགའ་བའི་སེམས་ཀྱིས་ནི། །དེ་ནས་སྒྲུབ་ལ་འཇུག་པར་བྱ། །མཚན་མ་དག་ནི་ཅི་འདྲ་ལས། །དངོས་གྲུབ་དག་ཀྱང་དེ་འདྲར་གསུངས། །དེ་ནས་ཟློས་པའི་མཚན་མ་ཡིས། །དངོས་གྲུབ་བསྟན་པ་འདོད་པར་བྱ། །ལེགས་པར་གྲུབ་བྱེད་ཅེས་བྱ་བ། །རིག་པའི་རྒྱལ་པོའི་བློ་བསམས་ནས། །བུམ་པ་སྒོ་ཀར་བཞག་པ་ལ། །བསྐོར་བ་དག་ཀྱང་གུས་པར་བྱ། །ལྷ་ཡི་གནས་སུ་ཞུགས་ནས་ནི། །དེ་ཡི་འོག་ཏུ་ཕྱག་བྱས་ནས། །འགོ་བར་བྱ་ཕྱིར་ཐམས་ཅད་ལ། །མཆོད་ཡོན་གྱི་ནི་བྱ་བ་བྱ། །རིག་སྔགས་རྒྱལ་པོའམ་རྒྱལ་མོའམ། །ཡང་ན་སྤྱི་ཡི་སྙིང་པོའམ། །རང་རང་སྔགས་ཀྱིས་ཅི་རིགས་པར། །སྤྱན་དྲང་བ་ཡི་ཆོ་ག་བྱ། །དཀྱིལ་འཁོར་དག་ཏུ་བྱ་བ་བཞིན། །རང་གི་ཕྱག་རྒྱ་ལེགས་པར་བསྟན། །དེ་ལྟར་བྱས་ན་རིག་སྔགས་དང་། །གསང་སྔགས་མཐུ་ཆེན་བྱིན་གྱིས་རློབ། །རྫས་ནི་ཁ་ཅིག་རྣམ་བརྟགས་པ། །ལག་པའི་སྙིམ་པའི་ནང་དུ་གཞུག །ཁ་ཅིག་མཆོད་ཡོན་སྣོད་དུ་གཞུག །ཁ་ཅིག་བུམ་པའི་སྟེང་དུའོ། །གྲོག་མཁར་ས་ཡི་ཁམ་ཕོར་རམ། །ཡག་ན་ལོ་མ་བཏིང་བར་བཞག །བསྒྲུབ་བྱ་སྟེགས་བུ་ལ་བཞག་པ། །གི་ཝང་བསྐུས་པའི་སྣོད་བཅུག་སྟེ། །བཟླས་པའི་གནས་སུ་བཞག་ནས་སུ། །ཡུངས་ཀར་དག་གིས་མངོན་བསྲུང་སྟེ། །བློ་ཅན་ཆོ་ག་ཤེས་པ་ཡིས། །མེ་ཏོག་ཏ་མ་ལི་ཡིས་མཆོད། །བརྟན་པར་བྱ་དང་བསྲུང་བ་དང་། །བྱིན་བསྐྱེད་པ་ནི་གང་བཤད་པ། །ཅི་ལྟར་རིགས་པར་རྫས་ལའོ། །མ་སྟོངས་པར་ནི་བྱ་བའི་རིགས། །ལྷ་དང་རྫས་ཀྱི་བར་དག་ཏུ། །ཅི་ཡང་གཞག་པར་མི་བྱའོ། །རྫས་ཀྱི་གཡས་གཡོན་གཉིས་སུ་ནི། །བསྲུང་བའི་རྒྱ་དང་ཡུངས་ཀར་བཞག །བདུག་སྤོས་མཆོད་ཡོན་གཏོར་མ་དང་། །ཞོ་དང་མར་མེ་ལ་སོགས་དང་། །བསྒྲུབ་བྱའི་རྫས་ནི་བཞག་ནས་ཀྱང་། །དཀྱིལ་འཁོར་བལྟ་བ་གཞག་པར་བྱ། །རྫས་ལ་མིག་གམ་ལག་པ་ཡིས། །བལྟའམ་ཡང་ན་བྲིམ་པར་བྱ། །གཡོ་བའི་ཡིད་ནི་མཉམ་བཞག་སྟེ། །བློ་དང་ལྡན་པས་ཤུབ་བུར་བཟླས། །འདིར་ཡང་བྱིན་བསྐྱེད་ཆོ་ག་དག །སྔོན་བཞིན་སྐབས་སྐབས་དག་ཏུ་བྱ། །དེ་ཡི་མཚན་མོ་ཐོག་ཐག་ནི། །དེ་བཞིན་རྒྱུན་མི་འཆད་པར་བཟླས། །མཆོད་ཡོན་ལ་སོགས་ཆོ་ག་ཀུན། །དུས་གསུམ་དུ་ཡང་བྱ་བར་བཤད། །འཐོར་འཐུང་ལ་སོགས་དགོས་པ་ལ། །དེ་ཚེ་རྗེས་སུ་བསྒྲུབ་པ་བཞག །སྒྲུབ་པ་པོས་ནི་བསྒྲུབ་པ་ན། །རྟག་ཏུ་ཉེ་བར་གནས་པར་བྱ། །སྒྲུབ་པ་པོ་བཞིན་ཆོ་ག་ཡི། །ལྷག་མ་སྒྲུབ་གྲོགས་མཆོག་གིས་བྱ། །བགེགས་ཆེན་རྣམས་ནི་ཟློག་པ་ལ། །རྗེས་སུ་བསྒྲུབ་པ་དག་གིས་བྱ། །དེས་ན་ནུས་ན་བདག་ཉིད་ཀྱིས། །ཡུངས་ཀར་ལ་སོགས་བཟླས་པས་བྱ། །ཤར་ཕྱོགས་ནས་ནི་ཆར་ཆེན་འབབ། །འཇིགས་སུ་རུང་བའི་འབྲུག་སྒྲ་སྒྲོགས། །མེ་ཡི་ཕྱོགས་སུ་གློ་བུར་དུ། །མཚམས་ཀྱི་སྣང་བ་ནམ་ལངས་བཞིན། །གཤིན་རྗེའི་ཕྱོགས་ནས་འོང་བ་ནི། །འཆི་བདག་གཟུགས་ཅན་འཇིགས་འཇིགས་བལྟ། །རལ་གྲི་ཐོགས་ཤིང་སྒྲ་ཆེན་འབྱིན། །སྣ་ཆད་ལོ་མ་མི་ཐོད་དུ། །མི་ཡི་ཁྲག་ནི་འཐུང་བར་བྱེད། །མགོ་སྐྲ་གྱེན་དུ་བརྫེས་ཤིང་འབར། །གཅིན་རྒྱང་ཆར་བཞིན་འབབ་པ་ཡི། །བསྲུང་བའི་ལས་རྣམས་འཇིག་པར་བྱེད། །བདེན་བྲལ་ཕྱོགས་ནས་སེམས་ཅན་མང་། །འཇིགས་པའི་གཟུགས་ཅན་ཐ་དད་པའོ། །ཆུ་ལྷའི་ཕྱོགས་ནས་ལྷ་ཡི་བདག །སྤྲིན་དང་བཅས་པར་འབྲུག་སྒྲ་སྒྲོགས། །རླུང་གི་ཕྱོགས་ནས་ཚུབ་ཆེན་འབྱུང་། །གནོད་སྦྱིན་ཕོ་མོ་བྱང་ཕྱོགས་ནས། །དབང་ལྡན་ཕྱོགས་ནས་ཚོགས་ཀྱི་གཟུགས། །སྟེང་ནས་མཐུ་ཆེན་ལྷ་རྣམས་འབྱུང་། །འོག་ན་ས་འགས་གཡོ་བར་བྱེད། །རྫས་ཀྱི་དངོས་གྲུབ་ཆེན་པོ་ལ། །དེ་ལ་སོགས་པ་བགེགས་ཀྱི་རྣམས། །ནམ་གྱི་ཕྱེད་ན་འབྱུང་བར་འགྱུར། །དངོས་གྲུབ་ཆེན་པོ་རྣམས་ལ་ནི། །བགེགས་ཀྱང་ཆེན་པོ་ཉིད་དུ་འགྱུར། །ཕལ་ལ་རྗེས་སུ་མཐུན་པ་ཡི། །བགེགས་ནི་རྣམ་པ་སྣ་ཚོགས་འབྱུང་། །དུས་གསུམ་དག་གི་དངོས་གྲུབ་ནི། །ཐ་མ་འབྲིང་དང་རབ་ཏུ་བཤད། །དུས་བཞིན་བྱུང་ན་རབ་ཏུ་ཤིས། །དེ་ལ་ཟློས་པ་མི་ཤིས་སོ། །དྲོ་དང་དུད་འཐུལ་འབར་བ་དག །འགྲུབ་པའི་མཚན་མར་བསྟན་པ་ཡིན། །འབར་བ་ལས་ནི་སུམ་ཆར་བཤད། །དུ་བ་ལ་ནི་རིམ་བཞིན་གཉིས། །དྲོད་ལས་དངོས་གྲུབ་གཅིག་པུ་སྟེ། །དེ་ནི་ཐ་མ་ཡིན་པར་བཤད། །ཁ་ཅིག་གསང་སྔགས་མཐུ་དག་ལས། །མྱུར་དུ་འབབ་པར་གྱུར་པའམ། །གལ་ཏེ་བསྒྲུབ་ཚེ་ཐོག་མར་ནི། །དངོས་གྲུབ་ཁ་ཅིག་འོད་བྱུང་ནས། །དེ་ཚེ་རང་རིག་རིག་སྔགས་ཀྱིས། །དངོས་གྲུབ་མནན་པ་བརྩམ་པར་བྱ། །མིས་ནི་རིག་སྔགས་རྒྱལ་བ་ཡི། །སྙིང་པོས་བ་ཡི་གི་ཝང་ངམ། །ལག་པས་བྲིམ་ན་དངོས་གྲུབ་ནི། །མནན་པར་འགྱུར་ཞིང་བརྟན་པར་འགྱུར། །མར་རམ་ཡང་ན་མེ་ཏོག་གམ། །རྫས་ཀྱི་རིགས་ལ་བཟླས་ཀྱང་རུང་། །དེ་ལྟར་མནན་ན་རྫས་རྣམས་ནི། །སྤྱད་ན་ཡོན་ཏན་ཐོབ་པར་འགྱུར། །དང་པོར་གྲུབ་པར་གྱུར་ན་ནི། །ཐོག་མར་གནས་པར་བྱས་ནས་སུ། །དེ་ནས་མཚན་མོའི་ལྷག་མ་ལ། །བློ་ཅན་བཟླས་བརྗོད་ཅི་འདོད་བྱ། །དངོས་གྲུབ་འབྲིང་པོ་དག་ལ་ཡང་། །ཆོ་ག་དེ་བཞིན་བྱ་བར་བཤད། །ནམ་ཕྱེད་དག་ན་གྲུབ་པ་ནི། །སྤྱད་པའང་དེ་ཡི་དུས་སུ་བཤད། །དང་པོ་བ་ནི་སྲོད་ལ་སྟེ། །འབྲིང་པོ་དག་ནི་ནམ་ཕྱེད་ན། །དངོས་གྲུབ་རབ་དག་སྤྱད་པ་ནི། །སྐྱ་རེངས་འཆར་ཀའི་དུས་སུའོ། །དང་པོ་པ་ནི་ནང་པར་ཏེ། །ལྷག་མ་གཉིས་ལ་ངེས་པ་མེད། །འབྲིང་པོ་མཚན་མོ་སྤྱད་བྱ་བ། །ནང་བར་སྤྱད་པར་མི་བྱའོ། །དངོས་གྲུབ་ཐ་མར་གྱུར་པ་དག །ནང་པར་སྤྱད་པར་དགག་པ་མེད། །དུས་ལས་འདས་པའི་ངེས་པའམ། །རིམ་པ་གཞན་ཡང་མི་ཤེས་སོ། །གང་ཞིག་ནང་པར་མི་སྤྱད་ལ། །གལ་ཏེ་གནས་པའང་མ་བྱས་ན། །དེ་ནི་དམན་མ་བཞིན་བོར་བ། །སྤྱད་ཟིན་པ་ཞེས་བྱ་བར་འགྱུར། །བསྒྲུབ་པས་བསྐུལ་བའི་རྫས་དག་ལ། །གསང་སྔགས་གཟི་བརྗིད་ཀུན་ཞུགས་པ། །དུས་ལས་འདས་པའི་ཉེས་པ་ཡིས། །ཕལ་ཆེར་ཡོངས་སུ་སྦོང་བར་འགྱུར། །མནན་པ་དག་ནི་ཕྱི་ནས་ཡང་། །གྲུབ་ཀྱི་བར་དུ་རུང་བར་འགྱུར། །མནན་ཏེ་བཞག་པའི་རྫས་དག་ནི། །ཅི་ལྟར་འདོད་པ་སྤྱད་པར་བྱ། །གལ་ཏེ་གྲུབ་པའི་རྫས་དག་ནི། །ནམ་ཡང་སྤྱད་པར་མ་བྱས་ན། །དེ་ལས་གཞན་པའི་དུས་མཚམས་ལ། །བཟླས་པ་ཡང་བྱས་སྤྱད་པར་བྱ། །མ་གྲུབ་པ་ཡི་རྫས་དག་ལ། །ཆོ་ག་དེ་ཉིད་རབ་ཏུ་བསྒྲགས། །དུས་ཚིགས་དུས་ཚིགས་དག་ལ་ཡང་། །བྱིན་བསྐྱེད་ལ་སོགས་ཆོ་གས་བསྒྲུབ། །ལོ་གསུམ་གྱིས་ནི་གང་མ་གྲུབ། །དེ་ནི་ནམས་ཀྱང་མི་འགྲུབ་བོ། །མཆོག་ཏུ་གྱུར་པའི་རྫས་རྣམས་ལ། །ཆོ་ག་འདི་ནི་ཡོངས་སུ་བསྒྲགས། །ཟླ་བ་དྲུག་གིས་འབྲིང་པོ་རྣམས། །དངོས་གྲུབ་ཉེ་བར་འཐོབ་པར་འགྱུར། །ཆུང་ངུ་རྣམས་ལ་དུས་དག་ནི། །གང་ཡང་ངེས་པ་མེད་པར་བཤད། །རི་མོ་ཡི་ནི་ལྷ་རྣམས་ལའང་། །ཆོ་ག་འདི་ཉིད་བཤད་པ་ཡིན། །ཡོངས་སུ་གཟུང་བ་ལ་སོགས་པའི། །ཆོ་གའང་དེ་ལས་གཞན་པའང་བྱ། །རྫས་བསྒྲུབ་པའི་ཆོ་ག་རིམ་པར་ཕྱེ་བའོ།། །།སེམས་ཅན་སྣང་དང་མི་སྣང་ལས། །གྲུབ་པའི་རྫས་མ་གྲུབ་པའི་ཚེ། །གལ་ཏེ་ཕྲོགས་པར་གྱུར་ནས་ནི། །དཀྱིལ་འཁོར་འདིར་ནི་བྲི་བར་བྱ། །ཚེས་གྲངས་མི་དགོས་རྒྱུ་སྐར་མིན། །སྨྱུང་བར་བྱ་བའང་མེད་པར་གསུངས། །མཆོག་ཏུ་ཁྲོ་བ་ལ་གནས་ཏེ། །མོད་ལ་དུར་ཁྲོད་ཐལ་བ་ཡིས། །གྲུ་གསུམ་ནུབ་ཏུ་སྒོ་གཏོད་པའི། །དཀྱིལ་འཁོར་འདི་ནི་བྲི་བར་བྱ། །དེ་ལྟར་བྲིས་ནས་ཕྱི་རོལ་བསྐོར། །སྒྲུབ་པའི་རིག་སྔགས་གཞག་པར་བྱ། །དེ་ནས་ཤར་དུ་བཅོམ་ལྡན་འདས། །ལེགས་པར་གྲུབ་བྱེད་ཅེས་བྱ་བ། །དྲག་པོ་གནོད་སྦྱིན་སྡེ་དཔོན་ནི། །མཐུ་ཆེན་རིག་སྔགས་རྒྱལ་པོ་དང་། །རྡོ་རྗེ་ཁྲོ་བོ་རྡོ་རྗེ་དབྱུག །རྡོ་རྗེ་ཁུ་ཚུར་ལྕགས་ཀྱུ་མ། །རྡོ་རྗེ་ཀཱི་ལི་འཇིགས་བྱེད་གཟུགས། །སེར་སྐྱ་དང་ནི་ཐོག་ཐོག་གཟུགས། །ལུག་རྒྱུད་རྣམ་རྒྱལ་ནག་པོ་དང་། །དེ་བཞིན་སྒོར་ནི་དགའ་བྱེད་དགོད། །རྡོ་རྗེ་སྡེ་དང་དཔུང་བཟང་དང་། །ཁྲོ་བོ་ཆེན་པོར་གྲགས་པ་རྣམས། །དེ་དག་རིམ་བཞིན་བཀོད་ནས་སུ། །མཁས་པས་མཆོད་པའི་ཆོ་ག་བཞིན། །མེ་ཏོག་དམར་ལ་སོགས་པས་མཆོད། །གཏོར་མ་ཁྲག་དང་བཅས་པར་གསུངས། །དྲག་ཤུལ་སྤྱོད་པའི་ཆོ་ག་འདི། །སྔོན་དུ་བསྟན་པ་ཀུན་ཀྱང་བྱ། །མཁས་པས་རང་གི་རིག་སྔགས་ལྷ། །སྒོ་ཀར་མངོན་དུ་ཕྱོགས་བཞག་ལ། །དྲི་ཞིམ་མེ་ཏོག་དག་གིས་ཀྱང་། །ཆོ་ག་བཞིན་དུ་མཆོད་པར་བྱ། །ཕྱི་རོལ་དཀྱིལ་འཁོར་ཅི་དགའ་བར། །དེ་དང་རྗེས་སུ་མཐུན་བྱ་སྟེ། །ལྷ་ནི་དྲག་པོ་གང་འདོད་པ། །མཆོད་པ་དག་ལ་སོགས་པ་བྱ། །སྙིང་པོའི་དཀྱིལ་འཁོར་དབུས་སུ་ནི། །དྲག་ཤུལ་སྤྱོད་པའི་ལས་ཀྱི་ཐབ། །གྲུ་གསུམ་ཁ་རན་ཅན་བྱས་ཏེ། །སྦྱིན་སྲེག་ལས་ནི་བརྩམ་པར་བྱ། །མེ་འབར་ཡམ་ཤིང་སེང་ལྡེང་ངོ་། །ནིམ་པའམ་དུར་ཁྲོད་ནས་སྐྱེས་པ། །རང་གི་ཁྲག་ལས་བཏགས་པ་དང་། །དུར་ཁྲོད་ཐལ་བ་སར་པའམ། །དུག་ཁྲག་ཡུངས་ཀར་བསྲེས་པ་དང་། །དེ་ནས་སྐྱེ་ཚེ་སྲེག་བླུགས་དབུལ། །རྫས་འཕྲོག་པ་ཡི་ཕྱིར་བསྡོས་ཏེ། །གཟུགས་བརྙན་སྟེང་དུ་གནས་པའམ། །ཡང་ན་གཟུགས་བརྙན་གཏུབ་གཏུབ་ཅིང་། །མཇུག་ཏུ་སྦྱིན་སྲེག་དག་ཀྱང་བྱ། །ཁྲོ་བོའི་ཆོ་ག་ཤེས་པ་ཡིས། །ཆོ་ག་འདི་ནི་བྱ་བར་གསུངས། །གསང་སྔགས་ཟློས་པས་སྐྲག་གྱུར་ནས། །རྫས་འཕྲོག་པ་ནི་རིངས་པར་ཡང་། །འཕྲོགས་པའི་རྫས་ནི་ཁྱེར་ནས་སུ། །མངོན་དུ་འོངས་ཏེ་སྦྱིན་པར་བྱེད། །བྱེད་ན་དེ་ལ་མི་འཇིགས་སྦྱིན། །ཞི་བ་ཅི་དགར་རབ་ཏུ་བྱ། །གལ་ཏེ་ཞི་བ་མ་བྱས་ན། །དེ་ཚེ་མོད་ལ་འཆི་བར་འགྱུར། །ཡང་ན་མི་སྣང་བ་ཡི་རྣམས། །དཀྱིལ་འཁོར་སྒོར་ནི་རྫས་ཀྱང་འཇོག །ཡང་ན་ཟློས་པར་འདོད་པའི་རྣམས། །རྫས་དག་ལྷག་པར་སྟེར་བར་འགྱུར། །རྫས་འཕྲོག་པ་མོད་ལ་དགུག་པའི་ཆོ་ག་རིམ་པར་ཕྱེ་བའོ།། །།རྫས་ཕྲོགས་ནས་ནི་རིང་ལོན་ནས། །དཀྱིལ་འཁོར་འདིར་ནི་བྲི་བར་བྱ། །རིགས་གསུམ་རྣམས་ཀྱི་སྤྱི་ཡིན་ཏེ། །དངོས་གྲུབ་ཕྱིར་ནི་ལས་ཀུན་བྱེད། །ཐམས་ཅད་དུ་ཡང་རིག་སྔགས་རྒྱལ། །ལེགས་པར་གྲུབ་བྱེད་ཅེས་བྱ་བ། །སྙིང་པོའི་དཀྱིལ་འཁོར་དབུས་སུ་ནི། །ཕྱག་རྒྱ་བྲིས་ཏེ་དགོད་པར་བྱ། །རྡོ་རྗེ་ཁྲོ་བོ་ཁྲོ་ཆེན་དང་། །མཱ་མ་ཀཱི་དང་ལྕགས་ཀྱུ་མ། །རྡོ་རྗེ་ཁུ་ཚུར་རྡོ་རྗེའི་ཏོག །རྡོ་རྗེ་དབྱུག་པ་ཐོ་བ་དང་། །འཇིགས་བྱེད་ལུག་རྒྱུད་ཀཱི་ལི་དང་། །རྡོ་རྗེ་བློ་གྲོས་མི་ཐུབ་མ། །གསང་སྔགས་ཁྲོ་བོ་ཕོ་ཉ་མོ། །རྨད་བྱུང་ཕ་རོལ་གནོན་གང་དང་། །འདོད་པ་འབྱོར་བྱེད་རྟ་མགྲིན་དང་། །ཕྱག་ན་ཞལ་རས་ཕལ་ཆེན་དང་། །བཅོམ་ལྡན་སྣ་ཚོགས་གཟུགས་ཅན་དག །སྙིང་པོའི་དཀྱིལ་འཁོར་དག་ཏུ་དགོད། །གྲགས་ལྡན་མ་དང་དཔལ་མོ་ཆེ། །དཀར་མོ་དང་ནི་གོས་དཀར་ཅན། །སྒྲོལ་མ་ཟླ་བ་དཔལ་མོ་གང་། །རྨད་བྱུང་ཕ་རོལ་གནོན་རྣམས་དང་། །འཁོར་ལོས་སྒྱུར་སོགས་གཙུག་ཏོར་དང་། །མཛོད་སྤུ་དང་ནི་བདེ་གཤེགས་སྤྱན། །མཆེ་བ་མདུང་ཐུང་བྱ་མས་མཆེ། །རྨད་བྱུང་ཕ་རོལ་གནོན་གང་དང་། །གཞན་གྱིས་མི་ཐུབ་ལ་སོགས་པ། །རིགས་ཀྱི་རིག་སྔགས་བསྟན་པ་དང་། །ལས་ཀུན་བྱེད་པའི་གསང་སྔགས་དང་། །འཁོར་ལོས་སྒྱུར་སོགས་གཙུག་ཏོར་དང་། །མཛོད་སྤུ་དང་ནི་བདེ་གཤེགས་སྤྱན། །མཆེ་བ་མདུང་ཐུང་བྱ་མས་མཆེ། །རྨད་བྱུང་ཕ་རོལ་གནོན་གང་དང་། །གཞན་གྱིས་མི་ཐུབ་ལ་སོགས་པ། །རིགས་ཀྱི་རིག་སྔགས་བསྟན་པ་དང་། །ལས་ཀུན་བྱེད་པའི་གསང་སྔགས་དང་། །ཕྱག་རྒྱ་ཆེན་པོར་གྲགས་པ་དང་། །ཕྱི་རོལ་བསྲུང་བའི་སྒོ་བ་དང་། །ཆོ་གར་གཏོགས་པ་གང་ཡིན་པའི། །སོ་སོའི་རིགས་ཀྱི་མངག་གཞུག་པ། །བརྩོན་འགྲུས་ཆེན་པོ་དགོད་པར་བྱ། །ཕྱི་རོལ་འཇིག་རྟེན་སྐྱོང་བ་དང་། །ཚངས་པ་མེས་པོ་ཆེན་པོ་དང་། །དབང་ཕྱུག་ཆེན་པོ་ཆུང་མར་བཅས། །ཚོགས་སྤྱན་ཚོགས་དང་ལྷན་ཅིག་ཏུ། །མ་མོ་རྣམས་པར་ཀླུ་བདུན་དང་། །དེ་བཞིན་ལྷ་མིན་བདག་པོ་དང་། །བསྟན་པ་ལ་ནི་གང་དགའ་བ། །རྨད་བྱུང་ཕ་རོལ་གནོན་ཀུན་དང་། །དཀྱིལ་འཁོར་སྔ་མར་གསུངས་པ་ཡི། །ལྷ་ནི་གང་དང་གྲང་ཡིན་དང་། །གསང་སྔགས་ཆོ་གར་གང་བསྟན་པ། །དེ་ཀུན་ཕྱི་རོལ་མཆོད་པར་གསུངས། །དེ་ནས་དེ་ཡི་འོག་ཏུ་ནི། །ཆོ་གས་སྔོན་བཞིན་མེ་སྦར་ཏེ། །རྫས་འཕྲོག་གཟུགས་བརྙན་སྤྲ་ཚིལ་ལས། །བྱས་ཏེ་སློབ་མའི་སྟེང་བཞག་ནས། །སྦྱིན་སྲེག་ཆོ་ག་བྱ་པར་གསུངས། །དེར་ནི་གློར་ཡང་བཞག་ནས་སུ། །མཚོན་ཆ་ཡིས་ནི་གཏུབ་གཏུབ་ཅིང་། །མཇུག་ཏུ་ཚུལ་བཞིན་བསྲེག་པར་བྱ། །སྔོན་བཞིན་མཆོད་པའི་ཆོ་ག་དང་། །གཏོར་མ་ཡི་ནི་ལས་ཀྱང་བསྒྲགས། །ཕྱག་ན་རྡོ་རྗེའི་རིགས་དེ་ཡི། །ཆོ་ག་ཀུན་གྱི་དྲག་ཤུལ་སྤྱད། །དེ་བཞིན་རང་གི་རིག་སྔགས་ཀྱིས། །ཆོ་ག་དྲག་ཤུལ་བྱ་བར་གསུངས། །ཉི་ཤུ་བརྒྱད་ལ་མ་ཐོབ་ན། །རྫས་ཕྱིར་དགྲ་ལ་དྲག་ཤུལ་སྤྱོད། །མར་གྱི་ངོ་ཡི་ཚེས་ལྔ་ལ། །ཆོ་ག་བྱས་པ་དེ་མཆོག་གོ། །ལྕུག་ལྕག་གིས་ནི་དགྲ་གཞུ་ཞིང་། །དེ་བཞིན་མེས་ཀྱང་གདུང་བར་བྱ། །སྣ་ཚོགས་ཚིག་གིས་བརྒྱན་པ་དང་། །མདའ་ཡི་ཚེ་རམ་རྣོན་པོས་དབུག །སྐེ་ཚེ་ལན་ཚྭ་བྱུགས་ནས་སུ། །ཅི་དགའ་བར་ནི་ཡན་ལག་གཏུབ། །དགྲ་བོ་ལ་ནི་ཆེར་ཁྲོས་པ། །ཅི་ལྟར་འདོད་པས་ཆད་པས་གཅད། །དར་རས་དམར་པོས་དགྲིས་ནས་སུ། །སྐུད་པ་དམར་པོས་བཅིང་པར་བྱ། །མེ་ཏོག་དམར་པོས་མཆོད་བྱ་ཞིང་། །ཇི་སྲིད་འདུག་གི་བར་དུ་ནི། །རྫས་ཀྱི་ཕྱིར་ནི་བསྐུལ་བྱ་ཞིང་། །ཉིན་གཅིག་བཞིན་དུ་བཞུ་བར་བྱ། །གལ་ཏེ་དེས་ནི་དེ་བྱིན་ན། །དེ་ཚེ་ཆད་པས་གཅད་པ་བཤོལ། །རྫས་ནི་བསྟན་པ་འདི་དག་གིས། །ནམ་གྱི་ཕྱེད་ན་སྦྱིན་སྲེག་བྱ། །ཀོ་བི་ད་རིའི་ཡམ་སྲེག་ཤིང་། །འབྲུ་མར་བསྟེགས་པ་མེ་ལ་བསྲེག །རང་གི་ཁྲག་དང་དུག་དང་བཅས། །ཡུངས་ཀར་ལན་ཚྭར་བཅས་པ་དང་། །སྐེ་ཚེ་དེ་ལ་བསྟེགས་པ་ཡི། །སྦྱིན་སྲེག་བརྒྱ་ནི་རྩ་བརྒྱད་བྱ། །རྫས་འཕྲོག་པ་ཡི་མིང་དང་ནི། །རང་བཞིན་དག་ནི་སྨོས་ནས་སུ། །ཁྲག་དང་སྦྱར་བའི་ལན་ཚྭ་ཡིས། །ལྷག་པར་སྦྱིན་སྲེག་བྱ་བར་གསུངས། །གལ་ཏེ་རྫས་ནི་མ་སྟེར་ན། །བདག་ཉིད་ངན་པ་འདིར་བརྟག་ཅིང་། །དེ་ཚེ་འཆི་བར་གྱུར་པའི་ལས། །མ་ལུས་པས་ནི་སྦྱིན་སྲེག་བྱ། །གང་ཚེ་རྫས་ནི་སྦྱིན་གྱུར་ཏམ། །ཡང་ན་སྐྱིན་པ་གཞན་ཡང་རུང་། །སྒྲུབ་པ་པོ་ལ་འཆགས་བྱེད་ན། །དེ་ཚེ་མཁས་པས་ཞི་བར་བྱ། །གལ་ཏེ་ཆུང་ནི་གསན་པའམ། །བག་མེད་པས་ནི་སྤྱད་གྱུར་པ། །དེ་ཚེ་སྐྲག་པ་དེ་ལ་ནི། །སྒྲུབ་པས་མྱུར་དུ་དད་པར་གྱིས། །འཕགས་པ་རྡོ་རྗེ་རྣམ་འཇོམས་སམ། །མྱུར་དུ་ཁྲོ་བོ་ཆེན་པོའམ། །ཡང་ན་མནོལ་བ་མེད་པ་ཡིས། །སྦྱིན་སྲེག་ལས་མཐར་མྱུར་དུ་བསྐུལ། །མཁས་པས་རིགས་གསུམ་དག་གིས་ཀྱང་། །འཕྲོགས་པ་སླར་ནི་དགུག་པའི་ཕྱིར། །དཀྱིལ་འཁོར་དག་ནི་ཆོ་ག་བཞིན། །གསང་སྔགས་འདི་ནི་སྔོན་བཞིན་བྱ། །ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོྂ་ཧ་ར་ཧ་ར་བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ཧ་ན་ཧ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷཱ་ར་ཡ་དྷཱ་ར་ཡ་བཛྲ། དཱ་རུ་ཎ་དཱ་རུ་ཎ་བཛྲ། དཱ་ར་ཡ་བི་དཱ་ར་ཡ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུྃ་ཕཊ། ཟློས་པས་གལ་ཏེ་རྫས་རྙེད་དམ། །ཡང་ན་གཞན་དག་ཐུབ་ཀྱང་རུང་། །དེ་ནི་སྔོན་བཞིན་དུས་མཚམས་ལ། །བསྲུང་བར་བྱ་སྟེ་སྦྱར་བར་བྱ། །གཞན་ཡང་དངོས་གྲུབ་འབྲིང་དག་དང་། །ཐ་མ་ཅུང་ཟད་ཙམ་ལ་ཡང་། །ཆོ་ག་ཤེས་པས་ཅི་རིགས་པར། །དེ་ཡི་མདོ་ལ་སྦྱར་བར་གསུངས། །བཅོམ་ལྡན་འདས་ཀྱི་སྐུ་སྐལ་དུ། །རྫས་ཀྱི་ཆ་གཅིག་ཐོག་མར་དབུལ། །བློ་དང་ལྡན་པས་བླ་མ་ལ། །ཕྱག་བྱས་ནས་ནི་གཉིས་པ་དབུལ། །གསུམ་པ་སྔར་གྲུབ་པ་རྣམས་ལ། །དཀྱིལ་འཁོར་ཕྱི་རོལ་དག་ཏུ་དབུལ། །བཞི་པ་གྲོགས་པོ་རྣམས་ལ་སྦྱིན། །ལྔ་པ་བདག་ཉིད་སྤྱད་པར་བྱ། །དེ་ལའང་སྐལ་བ་ཕྱེད་ཕྱེད་དུ། །བགོས་ནས་བདག་གིས་ཕྱེད་བསྐུར་བ། །བརྟག་པར་བྱ་བའི་རྫས་རྣམས་ལ། །ཆོ་ག་འདི་དག་བཤད་པ་ཡིན། །བཅོམ་ལྡན་སྐུ་སྐལ་བདག་ཉིད་ཀྱིས། །མཆོད་ཡོན་ཕུལ་ནས་བསྐུར་བར་བྱ། །སངས་རྒྱས་རྣམས་ལ་སླུ་བའི་ཕྱིར། །མཆོད་པའི་ཆོ་ག་ལ་སོགས་བཤད། །བླ་མ་མེད་པར་གྱུར་ན་ནི། །བླ་མའི་སྐལ་བ་བདག་གིས་བླང་། །དེ་ལ་ལྷག་པར་གུས་བྱ་བ། །དེ་ནི་དེ་ཡི་སླུ་བ་ཡིན། །སྒྲུབ་པ་པོ་ཡིས་ཕྱི་རོལ་དུ། །མཆོད་ཡོན་དབུལ་ཞིང་གྲུབ་པ་ཁྱེད། །ཉིད་ཀྱི་རྫས་སྐལ་འདི་བཞེས་ཞེས། །ཚིག་ནི་ལན་གསུམ་བསྒྲག་པར་བྱ། །སྔགས་གྲུབ་པ་རྣམས་མེད་ན་ནི། །དེ་ཡི་སྐལ་བས་སྔགས་ཟློས་པས། །དོགས་མེད་པ་ཡི་སེམས་ཀྱིས་ནི། །གྲོགས་པོ་རྣམས་ལ་སྦྱིན་པར་བྱ། །གསང་སྔགས་ཟློས་པའི་གྲོགས་རྣམས་ནི། །གུས་ཤིང་རྟག་པར་དོན་དུ་གཉེར། །དཀའ་ཐུབ་དག་དང་གྲོགས་བྱེད་པས། །ཐོག་མ་ཉིད་ནས་གྲུབ་པ་ཡིན། །དེ་བས་དེ་ཡིས་སྦྱིན་པ་ནི། །རྫས་ནི་བླང་བར་འོས་པས་ན། །བདག་ཅག་སྔོན་ནས་གྲུབ་པ་ཞེས། །མཐུན་པར་སྨྲ་ཞིང་བླང་བར་བྱ། །གྲུབ་པའི་རྫས་རྣམས་དེ་ལྟ་བུར། །བགོ་བར་རབ་ཏུ་བསྒྲགས་པས་ན། །བདག་རང་ཉིད་ཀྱིས་དེ་རྣམས་ལ། །རྫས་ནི་རྣམ་པར་བགོ་པར་བྱ། །གྲུབ་པའི་རྫས་རྣམས་ཁ་ཅིག་ནི། །ཅི་རན་ཙམ་དུ་བགོ་སྟེ་དཔེར། །ཨཉྫ་ན་ནི་ཐམས་ཅད་དང་། །གི་ཝང་ལ་སོགས་བཞིན་དུ་བཤད། །ཆོ་ག་ཤེས་པས་ལ་ལ་ནི། །ཡིད་ཀྱིས་བགོས་པ་བྱས་ཏེ་དཔེར། །རལ་གྲི་ལ་སོགས་མཐོང་བ་བཞིན། །དེ་ལ་ཕན་གདགས་བསམ་པར་བྱ། །གྲུབ་པའི་རྫས་རྣམས་ཁ་ཅིག་ནི། །གཅིག་པུས་སྤྱད་པར་བྱ་སྟེ་དཔེར། །རས་ལ་སོགས་པ་མཐོང་བ་བཞིན། །དེ་ལ་ཕན་གདགས་བསམ་པར་བྱ། །གྲུབ་པའི་རྫས་ཀྱི་བྱེ་བྲག་ལས། །ཁ་ཅིག་མཉམ་པར་བགོ་སྟེ་དཔེར། །རིལ་བུ་ལ་སོགས་མཐོང་བ་བཞིན། །དེ་ལ་ཕྱེད་དུ་བགོ་བ་མེད། །རྫས་རྣམས་ལ་ཡང་ཕལ་ཆེར་ཡང་། །གཅིག་པུས་མང་དུ་བསྐུར་བར་གསུངས། །སྐལ་བར་ནོར་རམ་མན་ངག་བསྟན། །རྒྱུད་ལས་གསུངས་བས་ཡིད་ཆེས་བྱ། །འདི་དག་ཁྱོད་ཀྱིས་བྱོས་ཤིག་ཅེའམ། །བདག་གི་ནོར་འདི་ཁྱོད་ཀྱིའོ་ཞེས། །བཟླས་བརྗོད་བྱེད་པས་གྲོགས་པོ་ལ། །བགོ་བ་དག་ནི་དེ་ལྟར་བྱ། །གྲུབ་པར་གྱུར་ན་ཆོ་ག་བཞིན། །མཁས་པ་དག་གིས་ཕན་འདོགས་པ། །བདག་ཉིད་ཀྱིས་ནི་ཅི་རིགས་པར། །གང་ཡང་རུང་བས་རབ་ཏུ་བྱ། །དངོས་གྲུབ་རྣམ་པ་མང་པོ་དག །གྲུབ་པས་རྣམ་པར་བགོ་བ་ནི། །བྱེ་བྲག་ཏུ་ནི་བདག་ཉིད་ཀྱིས། །དྲི་མེད་བློ་ཡིས་ཤེས་པར་བྱ། །སྐལ་བ་དབང་བ་མཆོག་གནས་སུ། །ཟློས་པས་གསོལ་བ་གདབ་པར་བྱ། །བཀའ་ལུང་གྲུབ་བར་ཤེས་པར་བྱ། །དེ་ཡི་འོག་ཏུ་བགོ་བར་གསུངས། །དེ་ལྟར་ཀུན་ལ་ཅི་རིགས་པར། །ལེགས་པར་བགོ་བར་བྱ་བར་གསུངས། །དངོས་གྲུབ་དག་ནི་ཕལ་ལ་ཡང་། །མདོར་ན་ཆོ་ག་དེ་བཞིན་བྱ། །གུས་ཤིང་ནོར་དང་མཆོད་པ་བྱ། །བཀའ་བཞིན་བྱེད་པར་ཕན་འདོགས་པས། །རྫས་གྲུབ་བླ་མའི་སྐལ་ལ་སོགས། །སླུ་བ་དག་ནི་དེ་ལྟར་བཤད། །རང་གི་མཆོད་ཡོན་ཕུལ་ནས་སུ། །རྫས་རྣམས་ལེགས་པར་ལུང་བཞིན་བགོ། །རིག་སྔགས་རྒྱལ་ལ་ཕྱག་བྱས་ནས། །རིག་རྒྱལ་མོ་ལའང་གུས་བྱས་ཏེ། །བློ་ཡིས་གསང་སྔགས་ལྷ་རྣམས་ལ། །གུས་པར་བསམ་སྟེ་སྤྱད་པར་བྱ། །བློ་ཅན་གྲུབ་ནས་ནམ་མཁའ་ལ། །ཅི་བདེ་བར་ནི་འགྲོ་བར་བྱ། །འོན་ཏམ་གྲུབ་པ་རྣམས་དང་ནི། །ལྷན་ཅིག་འདུག་ཀྱང་ཅིས་མི་ཚུགས། །རྟག་ཏུ་རང་གི་ལྷ་ཉིད་ནི། །ཡིད་ལ་ཡོངས་སུ་བཟླས་པ་དང་། །བདག་གི་གྲུབ་བའི་རྫས་རྣམས་ལ། །རྟག་ཏུ་བལྟ་ཞིང་དྲན་བྱས་ན། །ཕ་རོལ་གནོད་པ་བྱེད་པ་ནི། །སྡང་བ་རྣམས་ཀྱིས་ཡོངས་མི་ཚུགས། །མཁས་པས་རིག་སྔགས་བརྒྱ་བཟླས་ནས། །གྲུབ་པ་རྣམས་ཀྱིས་མཆོད་པར་འགྱུར། །རིགས་ཀྱི་རིག་སྔགས་བཟླས་ན་ནི། །སྒྲུབ་པོ་འཇིགས་པ་ཀུན་ལས་ཐར། །གཅིག་ལ་གཅིག་ནི་མཐོང་པ་ན། །མཁས་པས་ལེགས་པར་སྨྲ་བར་བྱ། །ལེགས་པར་འོངས་སམ་བདེའམ་ཞེས། །མཐོང་ནས་དང་པོར་མངོན་པར་བརྗོད། །དམ་ཚིག་རིགས་ཀྱི་ཕྱག་རྒྱ་དང་། །གྲུབ་པའི་རྫས་ཀྱང་བསྟན་པར་བྱ། །གང་ནས་འོངས་ཞེས་ཟེར་ན་ཡང་། །དྲིས་པའི་ལན་ཡང་གདབ་པར་བྱ། །ལྷ་ཡི་གནས་ནི་ཐམས་ཅད་དང་། །ཤིང་གཅིག་ལམ་གྱི་བཞི་མདོ་དང་། །དཀའ་ཐུབ་གནས་དང་བྱིན་ཅན་དང་། །མཆོད་སྦྱིན་པ་དང་བྲམ་ཟེའི་གནས། །མུ་སྟེགས་ལ་སོགས་གྲུབ་པ་དང་། །ནམ་ཡང་འདའ་བར་མི་བྱའོ། །ང་རྒྱལ་གྱིས་ནི་འདས་གྱུར་ན། །འཁྲུགས་ནས་མོད་ལ་ལྟུང་བར་འགྱུར། །བག་མེད་དམ་ཚིག་ཉམས་པ་ཡིས། །ལྟུང་ངམ་ལྟུང་བར་གྱུར་ཀྱང་རུང་། །རིག་རྒྱལ་ཉིད་ཀྱིས་བཟླས་ན་ནི། །དེ་ནས་མོད་ལ་ལྡང་བར་འགྱུར། །ནམ་མཁའ་གཟུགས་མེད་པ་ལ་ཡང་། །རབ་ཏུ་གྲུབ་པ་ལྷ་མིག་ཅན། །རང་གི་ལས་རྣམས་རིག་འགྱུར་ཏེ། །རྣལ་འབྱོར་ཅན་རྣམས་འགྲོ་བ་བཞིན། །དེ་བས་སྔོན་ཆད་སྤྲུལ་པ་ཡིས། །ལམ་ནས་འགྲོ་དང་འོང་བར་འགྱུར། །བསོད་ནམས་དབང་གིས་གནས་ཀྱི་ཕྱིར། །ཁྱིམ་ཡང་ཅི་ལྟར་འདོད་པ་འབྱུང་། །ཀུན་ནས་ལྗོན་ཤིང་མང་པོས་བརྒྱན། །སྣ་ཚོགས་བྱ་རྣམས་འཕུར་ཞིང་ལྡིང་། །ལྷ་ཡི་བུ་མོ་རྒྱུ་བ་ཡི། །རྒྱན་གྱི་སྒྲ་ནི་སིལ་ཁྲོལ་ཅན། །དེ་ཡི་གླུ་གར་སིལ་སྙན་གྱིས། །མངོན་པར་དགའ་བའི་ཡོན་ཏན་གསལ། །མེ་ཏོག་བཟང་པོ་གསུམ་གྱིས་ཁྱབ། །མར་མེའི་འོད་ནི་རབ་ཏུ་གསལ། །གང་དང་གང་དུ་ཀུན་བརྟགས་པ། །དེར་ཡང་དཔག་བསམ་ལྗོན་ཤིང་ཆེ། །འདོད་པ་ཐམས་ཅད་འབྱོར་པ་ཡི། །རྨད་དུ་བྱུང་བའི་མཚན་ཉིད་འབྱུང་། །རིན་ཆེན་རྡོ་ལབ་ངལ་བསོའི་ཕྱིར། །ནོར་བུའི་གཞི་ལས་འབབ་ཆུ་ཅན། །ས་གཞི་ནེའུ་གསིང་གིས་བརྒྱན་པ། །ཐམས་ཅད་དུ་ཡང་མངོན་པར་འབྱུང་། །རྒྱན་རྣམས་དང་ནི་གོས་རྣམས་དང་། །རྩེད་མོ་རྣམས་ཀྱི་ཆ་བྱད་དང་། །བདུད་རྩི་ལ་སོགས་འབྲས་ལྡན་པའི། །དཔལ་གྱི་ཤིང་ཡང་དེ་ལས་བྱུང་། །དེ་ལྟར་གྲུབ་པ་འདོད་པ་རྣམས། །ཅི་ལྟར་འདོད་པ་ཐམས་ཅད་འགྲུབ། །གྲུབ་པར་གྱུར་ནས་དེ་ནས་ནི། །བསྲུང་བའི་ཕྱིར་ནི་འབད་པར་བྱ། །བདེན་པའི་སྐྱེད་མོས་ཚལ་དག་གམ། །རི་རྣམས་ཀྱི་ནི་རྩེ་མོའམ། །རྒྱ་མཚོ་ཡི་ནི་གླིང་དག་གམ། །མཚོ་ཆེན་དག་གི་གླིང་མའང་རུང་། །རང་འཕྲུལ་སྤྲུལ་པ་ལས་བྱུང་བ། །གྲུབ་པར་དགའ་ཕྱིར་སྤྱོད་པར་བྱེད། །གྲུབ་པ་གཞན་དང་ལྷན་ཅིག་ཏུ། །སྔོན་གྲུབ་པ་ཡི་གནས་སུའང་རུང་། །དེ་ལྟར་གྲུབ་པ་བྱས་ན་ཡང་། །གལ་ཏེ་གྲུབ་པར་མ་གྱུར་ན། །རྫས་དེས་བསྲུངས་ཏེ་བཞག་བའམ། །ཆོ་ག་བཞིན་དུ་གནས་པར་བྱ། །སྔོན་དུ་བསྙེན་པ་ཅི་ལས་གསུངས། །ལྷག་པར་ཡང་ནི་བྱས་ནས་སུ། །མཁས་པས་རྫས་དེ་སྔ་མ་བཞིན། །སླར་ཡང་བཟླས་ཏེ་བསྒྲུབ་པར་བྱ། །འོན་ཀྱང་གལ་ཏེ་རྫས་དེ་ནི། །བརྒྱ་ལ་གྲུབ་པར་མ་གྱུར་ན། །བརྩོན་འགྲུས་བརྟན་པར་བསྐྱེད་ནས་ནི། །དེར་ནི་ཕྱིར་ཡང་བསྒྲུབ་པར་བྱ། །གལ་ཏེ་ལན་བདུན་བར་དུ་རྫས། །བསྒྲུབ་སྟེ་འོན་ཀྱང་མ་གྲུབ་ན། །གང་གི་ཆོ་ག་འདི་བྱས་པ། །དེས་ནི་ངེས་པར་འགྲུབ་པར་འགྱུར། །བསོད་སྙོམས་ཟས་ལ་ཟ་ཞིང་གནས། །སྒྲུབ་པོ་བཟླས་བརྗོད་བྱེད་ལ་བརྩོན། །སངས་རྒྱས་རྣམས་ལ་དད་པ་ཡིས། །མཆོད་རྟེན་ཆེ་ལ་ཕྱག་བྱའོ། །གུས་པས་ཤེས་རབ་ཕ་རོལ་ཕྱིན། །བདུན་ནམ་ཡང་ན་ལན་བརྒྱར་བཀླག །ཡང་ན་ཡོན་ནི་ཁྱད་པར་ཅན། །དགེ་འདུན་རྣམས་ལ་དབུལ་བར་བྱ། །རྒྱ་མཚོར་འབབ་པའི་གླིང་མའམ། །ཡང་ན་རྒྱ་མཚོའི་གླིང་མ་ལ། །མཆོད་རྟེན་དག་ནི་ཁྲུ་གང་པ། །མཁས་པས་གུས་པས་བརྒྱ་བྱས་ཏེ། །རེ་རེའི་མདུན་ནས་འདུག་ནས་ནི། །བཟླས་བརྗོད་དག་ཀྱང་སྟོང་བྱས་ནས། །མཆོད་རྟེན་ཐ་མ་འབར་གྱུར་པ། །མཐོང་ནས་ངེས་པར་འགྲུབ་པར་འགྱུར། །མཚམས་མེད་ལྔ་ནི་བྱས་པས་ཀྱང་། །སྟོང་དག་ལེགས་པར་བྱས་ནས་ནི། །མཆོད་རྟེན་ངེས་པར་འབར་འགྱུར་ཞིང་། །གདོན་མི་ཟ་བར་འགྲུབ་པར་འགྱུར། །ཀུན་ལའང་བྱེ་བར་བཟླས་ན་ནི། །ངེས་པར་འགྲུབ་པར་རྣམ་པར་བསྟན། །ཉེས་པ་ཆེན་པོ་བྱས་པ་ཡང་། །ལོ་བཅུ་གཉིས་ཀྱིས་འགྲུབ་པར་འགྱུར། །ཆོ་ག་བཞིན་དུ་མ་བསྙེན་པས། །རིག་སྔགས་དངོས་གྲུབ་མི་སྟེར་ན། །ཚིམ་པར་བྱ་ཕྱིར་བཤད་པ་ཡི། །སྦྱིན་སྲེག་དེ་ནི་བརྩམ་པར་བྱ། །ཡང་ན་ལས་དང་དོན་རྣམས་ཀུན། །སྒྲུབ་པར་བྱེད་པའི་དཀྱིལ་འཁོར་འདི། །བྲིས་ནས་དེ་ཡི་ནང་ཉིད་དུ། །སྦྱིན་སྲེག་རྣམ་པ་བཞི་བྱའོ། །རི་ཡི་རྩེ་མོའམ་ཕྱུགས་ལྷས་སམ། །ཡང་ན་གང་གཱའི་གླིང་མའམ། །ཡང་ན་ས་གཞི་མཉམ་བྱས་པར། །དཀྱིལ་འཁོར་བཟང་པོ་སྔོན་བཞིན་བྱ། །འདི་ནི་བློ་དང་ལྡན་པ་ཡིས། །ཁྲུ་ནི་བརྒྱ་རྩ་བརྒྱད་པར་བྱ། །དེ་དང་མཉམ་པའི་བུམ་པ་ཡིས། །ཁོ་ར་ཁོར་ཡུག་ཉེ་བར་བརྒྱན། །རྟ་བབས་བཟང་པོ་བཞི་དག་ཀྱང་། །སྒོ་སྒོ་དག་ཏུ་ཡོངས་སུ་གཟུགས། །ཁོར་ཡུག་རྣམ་པར་རྒྱལ་བ་ཡི། །བ་དན་སྣ་ཚོགས་རྣམས་ཀྱིས་བརྒྱན། །རྟ་བབས་དག་ཀྱང་རྒྱལ་མཚན་དང་། །ལོ་མ་སར་པ་དག་གིས་བརྒྱན། །ཕྲེང་བ་བརྒྱུས་པ་གཤིབས་པ་དག །བློ་དང་ལྡན་པས་གཅད་པར་བྱ། །ཕྱི་རོལ་ཁོ་ར་ཁོར་ཡུག་ཏུ། །མར་གྱི་མར་མེ་གསལ་བྱ་ཞིང་། །བདུག་སྤོས་རིགས་ནི་སྣ་ཚོགས་པས། །རྒྱུན་མི་འཆད་པར་བདུག་པར་བྱ། །དཀྱིལ་འཁོར་གཉིས་པ་ཁོར་ཡུག་ཏུ། །ཁྲུ་བདུན་དག་དང་ལྡན་པ་དང་། །གསུམ་པ་ཁྲུ་ནི་གསུམ་པ་སྟེ། །ཆོ་ག་དེ་ལྟར་ཡོངས་སུ་གཟུང་། །མཆོད་སོགས་ཆོ་ག་གང་ཡིན་དང་། །དཀྱིལ་འཁོར་ཆོ་ག་སྔོན་བཞིན་བྱ། །གཞན་ཡང་ཆོ་ག་ལྷག་པར་ནི། །སྦྱིན་སྲེག་དག་ཀྱང་བྱ་བར་གསུངས། །དབུས་སུ་རང་གི་རིག་སྔགས་ཀྱིས། །བུམ་པ་གང་བ་བཞག་ནས་སུ། །དེ་ཡི་ཕྱོགས་བཞི་དག་ཏུ་ཡང་། །སྦྱིན་སྲེག་ཆོ་ག་བཞིན་དུ་བྱ། །དེ་བཞིན་གཤེགས་པའི་རིགས་རྣམས་ཀུན། །ཤར་གྱི་ཕྱོགས་སུ་བྲི་བར་བྱ། །བྱང་ཕྱོགས་སུ་ནི་པདྨའི་རིགས། །ཆ་དང་མཐུན་པར་ལེགས་པར་བྲི། །མཁས་པས་ལྷོ་ཡི་ཕྱོགས་སུ་ནི། །རྡོ་རྗེའི་རིགས་ཀུན་བྲི་བར་བྱ། །ནུབ་ཀྱི་ཕྱོགས་སུ་དྲག་པོ་དང་། །གཅིག་པུ་གནོད་སྦྱིན་རིགས་རྣམས་བྲི། །དེ་ཡི་ལྷག་པའི་ཆ་དག་ཀྱང་། །ནང་རིམ་བཞིན་དུ་ཕྱི་རོལ་བྲི། །དེ་ཡི་ཕྱི་རོལ་འཇིག་རྟེན་སྐྱོང་། །གཞན་དག་ཀྱང་ནི་བྱ་བར་བསྒྲགས། །གསང་སྔགས་ཟློས་པས་དང་པོར་ནི། །བདག་པོ་ལྔ་རྣམས་དགོད་པར་བྱ། །དེ་ནས་རིག་སྔགས་རྒྱལ་པོ་དང་། །རིག་སྔགས་རྒྱལ་མོར་བསྒྲགས་པ་དང་། །ལས་ཀུན་བྱེད་པས་གསང་སྔགས་དང་། །དཀྱིལ་འཁོར་དག་ཏུ་གང་བསྟན་པའི། །ཕོ་ཉ་ཆེ་ཕྲ་གོ་རིམས་བཞིན། །དཀྱིལ་འཁོར་དུ་ནི་དགོད་པར་བྱ། །སྒོ་ཀར་བགེགས་ཀྱི་སྡེ་དཔོན་དང་། །ཁྲོ་བོ་བདུད་རྩི་ཐབ་སྦྱོར་དང་། །ལྷ་མོ་གཞན་གྱིས་མི་ཐུབ་བཞག །ལྷག་མ་ཅི་དགར་བྱ་བར་བཤད། །དེ་ལྟར་རྒྱུད་དོན་མཐོང་བ་ཡིས། །དཀྱིལ་འཁོར་དགོད་པར་བྱས་ནས་ཀྱང་། །དེར་ནི་སྙིང་པོ་སྤྱན་དྲངས་ཏེ། །ཆོ་ག་ལྷག་མའང་བྱ་བར་གསུངས། །མཁས་པས་ཕྱོགས་བཞི་རིགས་ར་ལ། །སྦྱིན་སྲེག་ཆོ་ག་བཞིན་བྱས་ནས། །ནུབ་ཀྱི་བུམ་པའི་དྲུང་དུ་ནི། །རང་གི་རིག་སྔགས་སྦྱིན་སྲེག་བྱ། །འདིར་ནི་སྦྱིན་སྲེག་ཆོ་ག་བཞིན། །བྱས་ན་ཐམས་ཅད་ཚིམ་པར་འགྱུར། །དེར་ནི་གཏོར་མ་རྒྱ་ཆེར་བྱ། །དེས་ནི་ལྷ་རྣམས་མགུ་བར་འགྱུར། །དཀྱིལ་འཁོར་འདི་ནི་བྲིས་ནས་ཀྱང་། །བཟླས་བརྗོད་སྦྱིན་སྲེག་ཅི་དགར་བྱ། །རང་རིགས་རིག་པས་རིག་སྔགས་ལ། །མར་གྱི་སྦྱིན་སྲེག་དག་ཀྱང་བྱ། །འོ་ཐུག་མར་དང་སྦྱར་བའམ། །ཏིལ་དང་མངར་གསུམ་སྦྱར་བ་ཡིས། །མཚན་མོའི་ལྷག་མ་རང་རིགས་ཀྱི། །རིག་པས་རིག་སྔགས་སྦྱིན་སྲེག་བྱ། །ལས་འདི་དག་གིས་ངེས་པར་ཡང་། །ལྷ་ཉིད་མྱུར་དུ་འགྲུབ་འགྱུར་ཞིང་། །ཚིམ་པར་འགྱུར་ཞིང་མཉེས་པར་འགྱུར། །ལེགས་པར་ཡང་ནི་སྐོངས་པར་འགྱུར། །དཀྱིལ་འཁོར་འདི་ནི་བྲིས་ནས་ཀྱང་། །གསང་སྔགས་རྗེས་མཐུན་སྦྱིན་སྲེག་བྱ། །ལན་བདུན་ཁོ་ན་བྲིས་ནས་ཀྱང་། །ཐེ་ཚོམ་མེད་པར་ངེས་པར་འགྲུབ། །རིག་པའི་རྒྱལ་པོའི་རིག་སྔགས་སམ། །དེ་བཞིན་རིགས་ཀྱི་རིག་སྔགས་ཀྱིས། །རིག་སྔགས་དག་ལ་དྲག་སྤྱད་པ། །ཐམས་ཅད་བཏུད་དེ་བྱ་བར་གསུངས། །སྤྲ་ཚིལ་ལས་ནི་གཟུགས་བྱས་ནས། །དེ་ཡང་རིག་སྔགས་ཀྱིས་བཟླས་ཏེ། །དྲག་ཤུལ་སྤྱོད་པའི་སྦྱིན་སྲེག་ནི། །ལས་ཀྱི་ཆོ་ག་ཐམས་ཅད་བྱ། །སྐེ་ཚེ་ཡུངས་མར་གྱིས་བླུགས་ན། །རིམས་ནད་དྲག་པོས་འདེབས་པར་འགྱུར། །ཁ་སྦུབ་ཏུ་ནི་བཞག་བྱས་ན། །ལུས་ལ་སྡུག་བསྔལ་ཚོར་བ་འབྱུང་། །མི་མཐུན་པ་ཡིས་བརྡེག་པ་དང་། །མེ་ཏོག་གིས་ཀྱང་བསྣུན་པར་བྱ། །དེ་ཉིད་ལ་ནི་སྤྱོ་བར་གསུངས། །ཐོ་འཚམ་པ་ཡང་ཅི་དགར་བྱ། །དཀྱིལ་འཁོར་འདིར་ནི་གསང་སྔགས་དག །གདོན་བཞིན་དུ་ནི་ཚར་བཅད་ན། །ཆོ་ག་ལས་ནི་བསྟན་པ་ཡི། །དངོས་གྲུབ་དག་ཀྱང་སྩོལ་བར་འགྱུར། །འདིར་ནི་ལྷ་ཉིད་མངོན་གཤེགས་ནས། །ཉིད་ཀྱིས་བསྒྲུབ་པ་ཉིད་ལ་ནི། །དངོས་གྲུབ་མྱུར་དུ་སྦྱིན་པར་འགྱུར། །བྱིན་ནས་ཞི་བའི་ཆོ་ག་བྱ། །གལ་ཏེ་ཅི་ཞིག་ལྟར་གྱུར་ན། །དུག་ཁྲག་ལན་ཚྭ་སྐེ་ཆེ་དང་། །ཡུངས་ཀར་སྦྱར་ནས་དཀྱིལ་འཁོར་འདིར། །མཚན་མོ་ལྷག་མ་བསྲེག་པར་བྱས། །རང་གི་རིག་སྔགས་ལྷ་ཉིད་ནི། །སྡུག་བསྔལ་བཞིན་དུ་མྱུར་གཤེགས་ནས། །ཀྱེ་ཀྱེ་ང་ཡིས་མཆོག་སྦྱིན་ཞེས། །སྒྲུབ་པ་པོ་ལ་གཅུགས་པར་མཛད། །གལ་ཏེ་བག་མེད་མ་བྱོན་ན། །སྒྲུབ་པ་པོས་ནི་ཞག་གསུམ་དུ། །འཇིགས་པ་མེད་པས་རང་གི་ཤ །སྲེག་བླུགས་གསུམ་ནི་དེར་བསྲེགས་ན། །དེ་ཚེ་ངེས་པར་མངོན་གཤེགས་ནས། །སྒྲུབ་པ་པོ་ལ་ཆགས་མཛད་ཅིང་། །ཅི་འདོད་པ་ཡི་དངོས་གྲུབ་སྩོལ། །ཉེས་པ་མ་ལུས་བརྗོད་པར་མཛད། །མཚམས་མེད་ལྔ་ནི་བྱེད་པས་ཀྱང་། །ཞག་དགུར་ལས་འདི་དེས་བྱས་ན། །གདོན་མི་ཟ་བར་འགྲུབ་འགྱུར་བས། །དེ་ཕྱིར་ལེགས་པར་བརྩམ་པར་བྱ། །ལས་འདི་དོན་ཡོད་བྱ་བའི་ཕྱིར། །རིག་སྔགས་དག་ལ་རྒོལ་བའི་ཚེ། །ཟློས་པ་འཇིགས་པ་མེད་པ་དང་། །བསྲུང་བ་དག་ཀྱང་བྱས་ཏེ་བྱ། །འདིར་ནི་དངོས་གྲུབ་ལེགས་བྱིན་ན། །ཆོ་ག་བཞིན་དུ་ཞི་བར་བྱ། །ལས་ཀྱི་ཉེས་པ་ཅི་ཡོད་པ། །དེ་དག་རབ་ཏུ་བསྒྲིམས་ཏེ་གཤེགས། །གསང་སྔགས་དངོས་གྲུབ་ཐམས་ཅད་ལ། །དཀྱིལ་འཁོར་འདི་ནི་དམ་པ་ཡིན། །སྦྱིན་སྲེག་ལས་ལ་བསྟན་པ་ཡི། །སྦྱིན་སྲེག་རྣམ་གསུམ་བྱ་བར་གསུངས། །ལས་རྣམས་ཐམས་ཅད་བྱས་ན་ནི། །དངོས་གྲུབ་རྣམ་གསུམ་ཐོབ་པར་འགྱུར། །ཟློས་པ་རང་གི་རིག་སྔགས་དག །གདོན་བཞིན་ཚར་གཅོད་བྱེད་པ་ན། །ཉིན་གཅིག་བཞིན་དུ་ཡོ་བྱད་ནི། །ཤིན་ཏུ་སར་པ་དག་གིས་བྱ། །མཁས་པས་བསྲུང་བ་བྱས་པ་དག །བག་ཡོད་པ་ལ་གཅང་བ་དང་། །རྒྱུད་ཤེས་དཀའ་ཐུབ་ལྡན་པ་ཡིས། །རིག་སྔགས་ཚུལ་བཞིན་དྲག་ཤུལ་སྤྱད། །གཞན་དུ་བྱས་ན་ངེས་པར་འཆི། །ལེགས་པར་གྲུབ་པར་བྱེད་པའི་རྒྱུད་ཆེན་པོ་ལས་བསྒྲུབ་པའི་ཐབས་བསྡུས་པ་རྫོགས་སོ།། །།