བཅོམ་ལྡན་འདས་རྡོ་རྗེ་ཕུར་པ་རྒྱུད་ལུགས་ཀྱི་སྒྲུབ་ཐབས་རྡོ་རྗེ་ཁྲོས་པའི་བཅུད་དུམ་དཔག་བསམ་ལྗོན་པ། འཇིགས་མེད་གླིང་པ།
བཅོམ་ལྡན་འདས་རྡོ་རྗེ་ཕུར་པ་རྒྱུད་ལུགས་ཀྱི་སྒྲུབ་ཐབས་རྡོ་རྗེ་ཁྲོས་པའི་བཅུད་དུམ་དཔག་བསམ་ལྗོན་པ་ཞེས་བྱ་བ་བཞུགས། བཅོམ་ལྡན་འདས་དཔལ་ཆེན་རྡོ་རྗེ་ཕུར་པའི་སྒྲུབ་ཐབས་རྡོ་རྗེ་ཁྲོས་པའི་བཅུད་དུམ་དཔག་བསམ་ལྗོན་པ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཀྱི་བདག་ཉིད་ལ་ཕྱག་འཚལ་ལོ། །རྒྱལ་ཀུན་བདེ་གཤེགས་སྙིང་པོའི་རང་བཞིན་ནི། །སྟོང་ཉིད་སྙིང་རྗེའི་ཉམས་སུ་རོལ་པའི་གར། །སྐུ་གསུམ་ཡན་ལག་བདུན་ལྡན་ཕུར་བུའི་དངོས། །དཀྱིལ་འཁོར་གསུམ་གྱི་ཕྱག་རྒྱས་མཚོན་ལ་འདུད། །གང་ཞིག་ཕུར་པ་སྒྲུབ་པའི་རིག་འཛིན་རྣམས། །ཐབས་ལས་མཁས་མཆོག་རིག་འཛིན་སྡེ་སྣོད་ཆེའི། །ཟབ་དོན་བསྐྱེད་རྫོགས་རྒྱུད་ལུང་ཡོངས་འདུ་བའི། །ཕྲིན་ལས་དཔག་བསམ་ལྗོན་པ་འདིར་བསྙེན་ཅིག །དེ་ལ་རྡོ་རྗེེ་ཐེག་པའི་ལམ་གྱི་འཇུག་སྒོ་མ་ནོར་བའི་དཀྱིལ་འཁོར་དུ་རྡོ་རྗེ་སློབ་དཔོན་མཚན་ཉིད་དང་ལྡན་པ་ལས་དབང་ཐོབ་ནས་དངོས་གྲུབ་ཀྱི་བརྟེན་གཞི་སྡོམ་པ་དང་དམ་ཚིག་ལ་གནས་པ། རིམ་པ་དང་པོ་ལྷའི་རྣལ་འབྱོར་ལ་སོགས་ཏེ་དབང་བཞིའི་ལམ་གྱིས་དག་བྱ་དག་འབྲས་ལས་སྔགས་ལམ་གྱི་རྒྱུ་འབྲས་ཟབ་མོ་བསྐྱེད་རྫོགས་ཟུང་འཇུག་གི་གོ་དོན་རྙེད་ཅིང་དད་བརྩོན་དང་བྱང་ཆུབ་སེམས་གཉིས་ལྡན་པའི་སྒྲུབ་པ་པོས་ཉམས་སུ་བླང་བ་ཡིན་ཏེ། རྡོ་རྗེ་ཁྲོས་པའི་རྩ་རྒྱུད་ལས། བདེ་བར་གཤེགས་པ་ཀུན་གྱི་གཙོ། །ཡབ་ཡུམ་སྲས་བཅས་སྣང་བ་ཡང་། །བྱང་ཆུབ་སེམས་ཀྱི་ངོ་བོར་གཅིག །ཅེས་དང་། མཉན་བསམ་བསྒོམ་པའི་ཤེས་རབ་ཀྱིས། །བློ་ཡི་རྟོག་པ་ཁ་ཕྱེ་ནས། །ངེས་པའི་དོན་འདི་རྟོགས་པར་གྱིས། །ངེས་པའི་དོན་འདི་མ་རྟོགས་ན། །བསྒོམ་དང་བསྒྲུབ་པ་ཡུན་རིང་ཀྱང་། །མི་ཤེས་གཟུང་འཛིན་འཆིང་བའི་རྒྱུ། །ཞེས་སོ། །དེ་ལ་སྦྱོར་དངོས་རྗེས་གསུམ་ལས། དང་པོ་ལ་གཉིས་ལས། དང་པོ་གནས་ཀྱི་མཚན་ཉིད་དང་། དཀྱིལ་འཁོར་འདུ་བྱའི་ལས་རིམ། ཕུར་པ་རྫས་ཀྱི་དཀྱིལ་འཁོར། རྒྱན་དང་མཆོད་རྫས་དཀྲམ་པ་ལ་སོགས་སྒྲུབ་ཁོག་ཏུ་ཤེས་པར་བྱའོ། །གཉིས་པ་རྣམ་གྲངས་བཅུ་ལས། དང་པོ་ནི། ཐེག་པ་ཆེན་པོའི་གང་ཟག་ཏུ་བློ་མ་བཅོས་ན་གསང་སྔགས་ཀྱི་གཟུགས་བརྙན་དུ་འཁྱམས་པས་ཚད་མེད་བཞི་བསྒོམ་པར་བྱ་སྟེ། རྡོ་རྗེ་འབར་བ་ལས། གང་རྣམས་སྡུག་བསྔལ་ཉེན་པ་ལས། །བྲལ་བར་འདོད་པ་སྙིང་རྗེ་ཡིན། །བྱམས་པ་ཕན་པ་བསྒྲུབ་པ་སྟེ། །ཀུན་ལ་སྐྱོབས་ཤིང་ཕན་པར་དགའ། །རབ་ཏུ་དགའ་བ་དགའ་བ་སྟེ། །དམ་པའི་དོན་ལ་བདུན་པའོ། །ཆགས་སྡང་གཉིས་དང་བྲལ་བ་ནི། །བར་མའི་སེམས་དང་ལྡན་པ་སྟེ། །དོན་དམ་པ་ཡི་བཏང་སྙོམས་བསྒོམ། །ལན་གསུམ། གཉིས་པ་སྐྱབས་སེམས་དང་འབྲེལ་བའི་བདུན་རྣམ་དག་ནི། བཛྲ་ས་མཱ་ཛཿས་ཕྱོགས་བཅུ་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་རྡོ་རྗེ་གཞོན་ནུའི་དཀྱིལ་འཁོར་གྱི་རོལ་པ་ཉག་གཅིག་ཏུ་སད་པར་བྱས་པ་ལ་གཞན་དོན་དུ་སངས་རྒྱས་བསྒྲུབ་པར་དམིགས་པའི་དད་གདུང་དྲག་པོས། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་ཅན་ལ། །དགོས་པ་གསུམ་ཕྱིར་ལུས་འབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ལན་གསུམ་གྱི་མཐར། ཛཿཧཱུྃ་བཾ་ཧོཿས་རང་ལ་བསྟིམ་པས་རྒྱལ་ཐབས་སྤྱི་བླུགས་ཀྱི་དབང་ཐོབ་པར་བསམ་མོ། །གསུམ་པ་ཕྱི་རོལ་པ་བསྐྲད་པ་ནི། གཏོར་མ་འབྲུ་གསུམ་དང་ཨ་ཀཱ་རོས་བརླབས་པ་བྱིན་ནས། རྩ་རྒྱུད་ལས། ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །ང་ཡི་བཀའ་ལས་འདའ་མ་བྱེད། །རྡོ་རྗེ་གསང་བའི་བཀའ་ལས་ནི། །སྡིག་ཅན་གང་ཞིག་འདའ་བྱེད་པ། །སྟོབས་ཆེན་ཁྲོ་བོ་ཆེན་པོ་ཡིས། །ཀླད་པ་ཚལ་པ་བརྒྱ་རུ་ཁོས། །ལུས་ཀྱང་དུམ་བུ་སྟོང་དུ་གཏུབས། །སྙིང་ཡང་ཚལ་པ་བདུན་དུ་གཏུབས། །ཞེས་གནད་ལ་བོར་ནས། ཧཱུྃ་བཞིའི་སྔགས་དང་། གུ་གུལ་གྱིས་བསྐྲད། བཞི་པ་མཚམས་བཅད་པ་ལ་བཞི་ལས། དང་པོ་བསྐྱེད་རིམ་ལ་ཁྲོ་བོ་འཆོལ་བའི་མཚམས་ནི། རྡོ་རྗེ་ཁྲོས་པ་ལས། ཧཱུྃ། བསྒྲུབ་པའི་ཡེ་ཤེས་ཚོན་གང་པོ། །གསང་བའི་སྔགས་ཀྱིས་བསྐྱེད་ནས་ཀྱང་། །སྐུ་དང་ལྡན་པར་རབ་བསྐྱེད་ཅིང་། །ཁམས་གསུམ་ཁྲོ་བོས་གང་བར་མཛོད། །ཐུགས་ལས་འབར་བའི་སྲོག་ཀྱང་ཞུགས། །དབུ་ལ་རྫོགས་པའི་རིགས་ལྔས་བསྲུངས། །ཉི་ཟླ་རི་རབ་ཕུར་པས་བརྒྱན། །ཁྲོ་བོ་མང་པོས་གཟིར་ཞིང་མནན། །ༀ་ཤྲཱི་བཛྲ་ཀུ་མཱ་ར་སརྦ་དུཥྚཾ་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ཅེས་བསྐུལ་བས་ཁྲོ་བོའི་ཚོགས་ཀྱིས་བགེགས་དང་ལོག་པར་འདྲེན་པ་ཐམས་ཅད་བསྡིགས་ཤིང་བརླགས་པར་བསམ་ལ། ཁྲོ་བཅུ་སོ་སོའི་སྟངས་སྟབས་དང་ཕྱག་རྒྱ་བསྟུན་ནས། རྩེ་མོ་ལས། ཧཱུྃ་ཧཱུྃ་ཧཱུྃ། མཁའ་དབུས་ལག་མཐིལ་སྦྱར་ཏེ་བསྒྲེང་། །རྐང་པ་བརྐྱང་བསྐུམ་དོར་ཐབས་འདོར། །རྡོ་རྗེའི་སྟངས་སྟབས་གར་ཉིད་ཀྱི། །གོམ་པ་ལེགས་པར་འཇོག་བྱེད་པ། །རྡོ་རྗེ་ཧཱུྃ་གི་ཕྱག་རྒྱ་ཡིན། །ཨཱོཾ་བཛྲ་ཀྲོ་དྷ་ཧཱུྃ་ཀཱ་ར་ཧཱུྃ། བར་ཆད་འབྱུང་པོ་གརྫ་གརྫ་ཧཱུྃ་ཕཊ། ཤེས་རབ་ཀྱི་ནི་རྐང་པ་ཡིས། །ཐབས་ལ་རྣམ་པར་འཁྱུད་པས་ནི། །ལག་གིས་རྡོ་རྗེའི་གར་བྱེད་ཅིང་། །རྡོ་རྗེ་ཐལ་མོ་བརྡབ་པ་ནི། །རྣམ་པར་རྒྱལ་བའི་ཕྱག་རྒྱ་ཡིན། །ཨཱོཾ་བཛྲ་ཀྲོ་དྷ་བི་ཛ་ཡ་ཧཱུཾ། བར་ཆད་འབྱུང་པོ་ཧ་ན་ཧ་ན་ཧཱུྃ་ཕཊ། ལས་རྣམས་ཀུན་ལ་གསོད་པར་བརྩོན། །ཐབས་ཀྱི་སྦོམ་པོ་ཐ་མའི་ཆ། །དེ་ཡི་དབུས་གནས་སྲིད་དུ་བརྐྱང་། །རྡོ་རྗེ་དབྱུང་པའི་ཕྱག་རྒྱ་ཡིན། །ཨཱོཾ་བཛྲ་ཀྲོ་དྷ་ནི་ལ་དཎྜ་ཧཱུྃ། བར་ཆད་འབྱུང་པོ་ད་ཧ་ད་ཧ་ཧཱུྃ་ཕཊ། གཡས་པ་ནས་ནི་ཕན་ཚུན་ཏེ། །སོར་མོ་བསྡུས་པས་དབུས་གནས་པ། །ཀུན་ཏུ་བསྡུས་པ་བརྡེག་པའི་སྟབས། །གཞན་ནི་ཡུམ་གྱི་ངོས་བཞག་སྟེ། །དབུ་མའི་ཚད་དུ་འགྱིངས་པ་སྟེ། །དཔའ་བོ་རྔམས་པའི་ཕྱག་རྒྱ་ཡིན། །ཨཱོཾ་བཛྲ་ཀྲོ་དྷ་ཡ་མཱནྟ་ཀ་ཧཱུྃ། བར་ཆད་འབྱུང་པོ་པ་ཙ་པ་ཙ་ཧཱུྃ་ཕཊ། ཤེས་རབ་ཀྱིས་ནི་བསྒྲུབ་བྱ་འཛིན། །ཐབས་ཀྱིས་ཅོད་པན་གདེངས་པར་བྱེད། །རྣམ་པར་བརྟག་པ་ཆེན་པོ་ནི། །མི་གཡོ་རྒྱལ་པོའི་ཕྱག་རྒྱ་ཡིན། །ཨཱོཾ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ། བར་ཆད་འབྱུང་པོ་བྷནྡྷ་བྷནྡྷ་ཧཱུྃ་ཕཊ། ཐལ་མོ་མཉམ་པར་སྦྱར་ནས་ནི། །གུང་མོས་འདུ་བྱེད་བསྒྲུབ་པར་བྱ། །མཐེ་བོང་དཔྲལ་བའི་སྟེང་དུ་བཞག །རྟ་ཡི་རྒྱལ་པོ་གདེངས་པའི་རྒྱ། །ཨཱོཾ་བཛྲ་ཀྲོ་དྷ་ཧྱ་གྲི་ཝ་ཧཱུྃ། བར་ཆད་འབྱུང་པོ་ཧུ་ལུ་ཧུ་ལུ་ཧཱུྃ་ཕཊ། ལིངྒ་རྟིང་པས་མནན་ནས་ཀྱང་། །ལྷ་ཆེན་རང་བཞིན་འདུས་པར་བྱ། །ཐལ་མོ་མཉམ་གནས་དབུས་སུ་ཡང་། །གསང་བའི་དབང་པོ་ལྟ་ནའོ། །འདོད་པའི་རྒྱལ་པོའི་ཕྱག་རྒྱ་ཡིན། །ཨཱོཾ་བཛྲ་ཀྲོ་དྷ་ཨ་པ་ར་ཙི་ཏ་ཧཱུྃ། བར་ཆད་འབྱུང་པོ་ཏིཥྛ་ཏིཥྛ་ཧཱུྃ་ཕཊ། ལག་གཉིས་རྡོ་རྗེ་དབུས་བསྟན་ཏེ། །རྐང་གཉིས་གཤིབས་ཏེ་དྲག་ཏུ་མཆོང་། །འཇིགས་པའི་རང་བཞིན་རྣམ་བརྟགས་པ། །བདུད་རྩི་འཁྱིལ་བའི་ཕྱག་རྒྱ་ཡིན། །ཨཱོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུྃ། བར་ཆད་འབྱུང་པོ་ཙྪིནྡྷ་ཙྪིནྡྷ་ཧཱུྃ་ཕཊ། ནམ་མཁའ་རྡོ་རྗེ་དབུས་གནས་སུ། །འབར་བ་ཉི་དཀྱིལ་སྟེང་ན་འགྱིང་། །རྡོ་རྗེ་འཇིགས་པའི་རྒྱན་གྱིས་བཞག །དཔའ་བོ་ཐེ་ཚོམ་མེད་པའི་རྒྱ། །ཨཱོཾ་བཛྲ་ཀྲོ་དྷ་ཏྲཻ་ལོཀྱ་བི་ཛ་ཡ་ཧཱུྃ། བར་ཆད་འབྱུང་པོ་བྷིནྡྷ་བྷིནྡྷ་ཧཱུྃ་ཕཊ། ཐུར་དུ་རྐང་མཐིལ་མཉམ་གནས་ཤིང་། །ལག་པ་སོ་སོར་གར་ལ་བརྩོན། །སྟོབས་ཆེན་མཆོང་བའི་ང་རྒྱལ་ནི། །རྡོ་རྗེ་སྟོབས་ཀྱི་ཕྱག་རྒྱ་ཡིན། །ཨཱོཾ་བཛྲ་ཀྲོ་དྷ་མ་ཧཱ་བ་ལ་ཧཱུྃ། བར་ཆད་འབྱུང་པོ་སྥོ་ཊ་སྥོ་ཊ་ཧཱུྃ་ཕཊ། དེ་ནས་ཁྲོ་བོའི་ཚོགས་སླར་འདུས་ནས་ཁྲོ་བོ་འཆོལ་བའི་རང་བཞིན་གྱིས་རྡོ་རྗེའི་གུར་ཁང་ཆེན་པོར་གྱུར། གཉིས་པ་འབྱུང་བ་གསུམ་འཆོལ་བའི་མཚམས་ནི། ཧཱུྃ། ཁམས་གསུམ་གདུག་པ་བསྒྲལ་བའི་ཕྱིར། །ཚམ་རྔམས་གཟུགས་ནི་གློག་ལྟར་འབར། །མེ་རླུང་ཆུ་ཡིས་བསྲེགས་གཏོར་བཀྲུས། །ཉེས་བྱེད་གསུམ་ཡང་སྲིད་པར་གྲོལ། །བཛྲ་ཛྭ་ལ་རཾ་རཾ་ཡཾ་ཁཾ། ཞེས་བརྗོད་པས་བསྐལ་པའི་མེ་དཔུང་། དུས་མཐའི་རླུང་ནག །རྒྱ་མཚོའི་རྦ་རླབས་འཁྲུགས་པའི་ར་བ་གསུམ་གྱིས་ཕྱོགས་ཀུན་གང་བས་མཚམས་བཅད་དེ་ཅིས་ཀྱང་མི་ཤིགས་པར་གྱུར། གསུམ་པ་ཕྱག་རྒྱ་མཚོན་ཆ་འཆོལ་བའི་མཚམས་ནི། ཧཱུྃ། རྡོ་རྗེ་རབ་ཏུ་ཀཱི་ལ་ཡ། །རབ་ཏུ་གསོར་ཞིང་དྲིལ་ནས་ཀྱང་། །ཁམས་གསུམ་འཁོར་བ་བསྒྲལ་ནས་ནི། །ཡེ་ཤེས་སྐུ་ཡིས་ཁྱབ་གདལ་ནས། །འཛིན་ཆགས་ཐམས་ཅད་རྣམ་པར་གྲོལ། །བྱང་ཆུབ་སེམས་ལས་འོད་འཕྲོས་པས། །ཁམས་གསུམ་དེ་བཞིན་རོལ་པའི་སྐུ། །མ་ལུས་ཕུར་པས་ཐེབས་ཞེས་བྱ། །གང་ཞིག་གནོད་པའི་ཚོགས་རྣམས་ལ། །རྣམ་པར་ཤེས་པའི་ཚོགས་བརྒྱད་ནང་། །རྡོ་རྗེ་ཕུར་པ་མང་ཤར་ཞིང་། །དེ་ཡིས་ཚོགས་བརྒྱད་དག་པར་བྱ། །བདག་དང་གསུམ་དུ་ལྡན་ནས་ཀྱང་། །བྱང་ཆུབ་སེམས་ལས་རྣམ་སྤྲོས་ཏེ། །ཕུང་པོ་རྡུལ་དུ་བཤིགས་ནས་ཀྱང་། །ཤ་ཁྲག་ཁམས་གསུམ་གང་བར་དམིགས། །ཧཱུྃ་གིས་རབ་ཏུ་ནམ་མཁའ་གང་། །ཕཊ་ཀྱིས་རབ་ཏུ་གཏོར་བྱས་ཏེ། །རྡོ་རྗེ་ཡེ་ཤེས་ཚོན་གང་གིས། །ཁམས་གསུམ་རབ་ཏུ་གང་ནས་ཀྱང་། །བསྡུས་པས་མཚོན་ཆ་འཆོལ་བར་བསྒོམ། །ཨཱོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ། ཅེས་བརྗོད་པས་རྡོ་རྗེ་དང་ཕུར་བུ་གཙོ་བོར་གྱུར་པའི་མཚོན་ཆ་འཆོལ་བའི་གུར་ཁང་ཆེན་པོས་ཡོངས་སུ་གཏམས་པར་གྱུར། བཞི་པ་བདག་མེད་ལྟ་བའི་མཚམས་ནི། ཧཱུྃ། ཡུམ་ནི་རྣམ་པར་གྲོལ་བའི་ཐུགས། །སྲིད་པ་ཕུར་བུར་རྟོགས་པ་ཡིས། །སྲིད་པ་གསུམ་ལ་ཐེབས་ཞེས་བྱ། །འཛིན་དང་རྟོག་པ་རྣམས་སྤངས་ཏེ། །བྱང་ཆུབ་སེམས་ཀྱི་གོལ་ས་བཅད། །བགེགས་ཞེས་བྱ་བའི་མིང་ཡང་མེད། །དྷརྨ་དྷཱ་ཏུ་ཧོཿ ལྔ་པ་བརྡའ་སྒོ་དབྱེ་བ་ནི། རྡོ་རྗེ་བཀོད་པ་ལས་ཕྲད་བསྒྱུར་བ། མ་བཅོས་སྤྲོས་པ་མེད་པའི་དཀྱིལ། །སྐྱེ་མེད་ཡོངས་ལ་ཁྱབ་པས་འཁོར། །འགྱུར་མེད་དོན་རྟོགས་མཉམ་པའི་ངང་། །ཕུང་པོ་ཁམས་དང་སྐྱེ་མཆེད་རྣམས། །ཡེ་ནས་དབྱེར་མེད་རྫོགས་སངས་རྒྱས། །དེ་ཉིད་མ་རིག་ལིང་ཏོག་ནི། །ཐུགས་རྗེའི་ཐུར་མས་དབྱེ་རུ་གསོལ། །བྷྲཱུྃ་པྲ་ཝེ་ཤ་ཡ་ཕཊ། ཅེས་བརྗོད་པས་མཚོན་པ་ཙམ་དུ་དཀྱིལ་འཁོར་གྱི་སྒོ་བཞི་ལྷག་གིས་ཕྱེ་སྟེ་གཞལ་ཡས་ཁང་རྟེན་དང་བརྟེན་པར་བཅས་པ་ཐལ་ལེར་མཐོང་བར་བསམ་མོ། །དྲུག་པ་བརྡའ་ཕྱག་འཚལ་བ་ནི། བཤད་རྒྱུད་ལས། ཆོས་ཉིད་ཡེ་ནས་ཕུར་པ་ལ། །སངས་རྒྱས་སེམས་ཅན་གཉིས་མེད་དེ། །གང་དུ་འཛིན་པ་སྨིན་པའི་རྒྱུ། །རྒྱུ་གཅིག་འབྲས་བུ་བཟང་ངན་གཉིས། །འཁོར་འདས་ལ་ཤན་དབྱེ་བའི་ཕྱིར། །རྟོགས་པ་དོན་གྱི་བརྡའ་ཕྱག་འཚལ། །དྷརྨ་དྷཱ་ཏུ་ཨ་ཀཱ་རོ་ཡཱ་མི་ན་མ། ཞེས་རྣལ་མའི་དོན་ལ་བལྟའོ། །བདུན་པ་བཤགས་པ་བྱ་བ་ལ་རྟོགས་པ་ལྟ་བ། བསྒོམ་པ་བསྐྱེད་རྫོགས། བསྲུང་བྱ་དམ་ཚིག །གདུང་བ་སྨྲེ་སྔགས་ཀྱི་སྒོ་ནས་བཤགས་པའི་རྒྱུད་ཆེན་བཞི་ལས་འདིར་གསུམ་པ་ལྟར་བཤགས་པ་ལ། བཅས་དང་རང་བཞིན་གྱི་ཁ་ན་ཐོ་བའི་ཚོགས་ཐམས་ཅད་ལ་སྟོབས་བཞིའི་མཚན་ཉིད་དྲན་པས། ཨཱོཾ། ཡེ་ཤེས་ལྔ་ལྡན་བླ་མ་རྡོ་རྗེ་འཛིན། །རྡོ་རྗེ་རིགས་ཀྱི་ལྷ་ཚོགས་དགོངས་སུ་གསོལ། །ཁྲག་འཐུང་ཁྲོ་བོ་ཁྲོ་མོས་བྱིན་གྱིས་རླབས། །བདག་གི་ལུས་ཀྱིས་སྲོག་གཅོད་མ་བྱིན་བླངས། །མི་ཚངས་སྤྱད་ཅིང་ཏིང་འཛིན་སྐུ་མ་གསལ། །སྐུ་ཡི་དམ་ཚིག་ཉམས་པ་མཐོལ་ལོ་བཤགས། །ཨཱཿ བདག་གི་ངག་གིས་རྫུན་དང་ཕྲ་མ་དང་། །ངག་འཁྱལ་ཚིག་རྩུབ་བཟླས་བརྗོད་གྲངས་མ་སྐྱོལ། །རྡོ་རྗེ་བཟླས་པའི་དོན་ནི་མ་རྟོགས་ཏེ། །གསུང་གི་དམ་ཚིག་ཉམས་པ་མཐོལ་ལོ་བཤགས། །བཛྲ། བདག་གིས་སྣོད་ལྡན་སེམས་ཅན་ཐམས་ཅད་ལ། །བརྣབ་སེམས་གནོད་སེམས་ལོག་ལྟ་སྐྱེས་པ་དང་། །ཆོས་ཉིད་ཟབ་མོའི་དོན་ནི་མ་རྟོགས་ཏེ། །ལྟ་བ་ཐུགས་ཀྱི་དམ་ཚིག་ཉམས་པ་བཤགས། །ས། སེམས་ཅན་ཐམས་ཅད་ཡེ་ནས་སངས་རྒྱས་རྒྱུར། །མ་རྟོགས་བདག་གིས་བརྔན་དང་སྐྱོན་དུ་བགྲངས། །སངས་རྒྱས་ཡོན་ཏན་མཐའ་ཡས་མ་བརྗོད་ཅིང་། །ཡོན་ཏན་དམ་ཚིག་ཉམས་ལ་མཐོལ་ལོ་བཤགས། །ཏྭ། སངས་རྒྱས་ཕྲིན་ལས་སྣ་ཚོགས་དཔག་མེད་ཀྱིས། །སྙིང་རྗེ་ཆེན་པོས་སེམས་ཅན་དོན་མ་བྱས། །བདུད་རྩི་ལྔ་ལ་ལོངས་སྤྱོད་མ་ནུས་ཤིང་། །ཕྲིན་ལས་དམ་ཚིག་ཉམས་པ་མཐོལ་ལོ་བཤགས། །ཧཱུྃ། སྐྱེ་བ་རྣམ་བཞིས་བསྡུས་པའི་སེམས་ཅན་རྣམས། །ཆོས་སྐུ་རྣམ་དག་དབྱིངས་ལས་གཟུགས་སྐུར་སྣང་། །བདེ་བ་ཆེན་པོས་ཀུན་ལ་ཁྱབ་དམིགས་ཏེ། །ཡང་དག་དོན་མ་རྟོགས་པ་མཐོལ་ལོ་བཤགས། །ཞེས་པས་རྒྱུད་དག་པར་བྱའོ། །ཚོགས་བསྒྲུབ་ལ་སོགས་པའི་ཚེ་སྐབས་འདིར་རྟགས་གདབ་པར་བྱ་སྟེ་མཆེད་ལྕམ་རྣམས་ཀྱི་སྣ་རྩེ་དང་། མཁུར་མཚོས་གཉིས་སུ་རཀྟའི་ཐིག་ལེ། སྤྱི་མགྲིན་སྙིང་ག་གསུམ་དུ་ཐལ་ཆེན་གྱི་ཚོམ་བུ། དཔྲལ་བར་ཁ་ཊྭཱཾ་ཀ །སྙིང་གར་ཞག་གི་ཟོ་རིས་དང་ཟླ་ཕྱེད་རྒྱ་གྲམ་བྲིས། དེ་ནས་ཕན་ཚུན་གྲལ་ཕྱག་བྱས་ཏེ་འདུག་གོ། །བརྒྱད་པ་བྱང་ཆུབ་སེམས་དཔའི་སྔགས་ཀྱི་ཚུལ་ཁྲིམས་རྣམ་པར་དག་པར་བྱ་བའི་ཕྱིར་དམ་བཅའ་བ་ནི། རྡོ་རྗེ་རྩེ་གཅིག་པའི་ཕྱག་རྒྱ་སྙིང་གར་བཅིངས་ཏེ་གཞན་དོན་ལ་དམིགས་པའི་ལྷག་བསམ་བརྟན་པོས། ཨཱོཾ། རྣལ་འབྱོར་དབང་པོ་ཡེ་ཤེས་མཐར་ཕྱིན་པ། །འགྲོ་ལ་ཕན་མཛད་ཐུགས་རྗེས་དབང་བསྒྱུར་ཞིང་། །སྲིད་པ་གསུམ་གྱི་གཉེན་རྒྱུད་གཅིག་པུ་པ། །ལྷ་ཡི་ལྷ་ཁྱོད་བདག་ལ་དགོངས་སུ་གསོལ། །བདེ་བར་གཤེགས་པའི་སྤྲུལ་པ་རྒྱ་མཚོ་དང་། །རྣལ་འབྱོར་དབང་ཕྱུག་གྲུབ་པའི་ཚོགས་ཆེན་པོ། །ལྷ་དང་ལྷ་མིན་སྔགས་འཆང་དམ་ཚིག་ཅན། །ཀུན་ནས་འདུས་པ་རྣམས་ཀྱང་དགོངས་སུ་གསོལ། །བདག་ནི་རྒྱལ་སྲིད་མཐོ་རིས་ལོངས་སྤྱོད་དང་། །འདོད་པའི་ཡོན་ཏན་བདག་བསྒྲུབ་མ་ལགས་ཏེ། །འགྲོ་ལ་སྙིང་བརྩེ་ཁོ་ནས་དོན་བརྩོན་པ། །འདི་ལ་ཀུན་མཁྱེན་ཁྱེད་ནི་དཔང་དུ་གསོལ། །མགོན་པོ་ཡེ་ཤེས་སྒྲིབ་པ་མི་མངའ་བས། །བདག་གི་ལྷག་པའི་བསམ་པ་ཁྱེད་ཀྱིས་མཁྱེན། །འཕགས་མཆོག་སྤྱན་སྔར་ཇི་ལྟར་དམ་བཅས་པ། །སུན་པར་མི་བགྱི་མགོན་ཁྱོད་བསླུ་མ་ལགས། །སྙིང་ནས་བདག་ནི་ཁེ་དང་གྲགས་ལ་སོགས། །གཡོ་དང་ཟང་ཟིང་སེམས་ནི་གཏན་སྤངས་ནས། །གཞན་དོན་སྒྲུབ་པ་གཅིག་པོའི་སེམས་བཞག་སྟེ། །རྣལ་འབྱོར་སྤྱོད་པ་ཆེན་པོ་བདག་གིས་སྤྱད། །ཀུན་ཏུ་བཟང་པོ་བླ་ན་མེད་པ་ཡི། །བྱང་ཆུབ་མཆོག་ཏུ་བདག་གིས་སེམས་བསྐྱེད་དེ། །དོན་དམ་དང་ནི་ཀུན་རྫོབ་བྱང་ཆུབ་སེམས། །དེང་ནས་ཚུལ་བཞིན་ཡོངས་སུ་གཟུང་བར་བགྱི། །སྲོག་ཆགས་ཐམས་ཅད་གལ་ཏེ་བདུད་གྱུར་ནས། །དུམ་བུ་སྟོང་དུ་བདག་གི་ལུས་གཏུབས་ཀྱང་། །བྱང་ཆུབ་སེམས་མཆོག་ཤེས་རབ་སྙིང་རྗེ་དང་། །ཡི་དམ་རྒྱལ་བ་ཁྱོད་ནི་ཡོངས་མི་སྤང་། །རྡོ་རྗེའི་དམ་ཚིག་ཆེན་པོ་རྣམས་དང་ནི། །རྡོ་རྗེ་སློབ་དཔོན་རྡོ་རྗེ་མཆེད་ལྕམ་དང་། །གཞན་ཡང་ཐེག་པ་མཆོག་ལ་ཞུགས་པ་རྣམས། །སྲོག་གི་ཕྱིར་ཡང་མི་གཏོང་ཅི་ནུས་བསྲུངས། །འཁོར་བ་བདག་མེད་སྒྱུ་མའི་རང་བཞིན་ལ། །བདག་ནི་འཇིགས་པ་ཅི་ཡང་མ་མཆིས་ཏེ། །མ་རིག་སྐྱེ་བོ་རྣམས་ཀྱི་དོན་སླད་དུ། །ཕྱི་མཐར་ཐུག་གི་བར་དུ་གནས་པར་སྤྲོ། །གཞན་དོན་འཁོར་བ་རྣམས་སུ་སྤྱོད་པ་ན། །བྱང་ཆུབ་སྤྱོད་པ་རླབས་ཆེན་བདག་གིས་སྤྱད། །འགྲོ་དྲུག་སེམས་ཅན་རྣམས་ལ་ཕན་གདགས་ཕྱིར། །རང་དབང་དུ་ནི་སྐྱེ་བ་བླང་བར་བགྱི། །བདག་ནི་ཡོངས་སུ་བཟུང་བའི་འཇིག་རྟེན་ནམ། །མྱ་ངན་འདས་ལ་སྤྲོ་བ་མ་མཆིས་ཏེ། །གང་དང་གང་དུ་སྡུག་བསྔལ་གནས་རྣམས་སུ། །བསྐལ་པ་རྒྱ་མཚོར་གནས་ཤིང་ཕན་པར་བགྱི། །སྲིད་པར་ཡུན་རིང་དུས་སུ་བརྩོན་པ་ནི། །བྱང་ཆུབ་སེམས་དཔའི་ཡི་དམ་ལགས་པས་ན། །ཇི་སྲིད་ངན་སོང་སྟོངས་པར་མ་གྱུར་པ། །དེ་སྲིད་བདག་གིས་སྐྱོ་བའི་སེམས་མི་བསྐྱེད། །ཤེས་རབ་ཐབས་ཀྱིས་འགྲོ་བའི་དོན་བགྱིད་པ། །སྙིང་རྗེའི་ལོངས་སྤྱོད་དེ་ལས་མ་མཆིས་པས། །སེམས་དམྱལ་ཡི་དྭགས་གཤིན་རྗེའི་འཇིག་རྟེན་ཡང་། །ལྷ་ཡི་དགའ་ཚལ་ལྟ་བུར་བལྟ་བར་བགྱི། །འགྲོ་ལ་ཐུགས་རྗེ་དཔལ་གྱི་མགུར་ནས་གསུངས། །རྣལ་འབྱོར་དམ་ཆོས་བདུད་རྩི་མཆོག་རྣམས་ནི། །བདག་གིས་འཇིག་རྟེན་ཐུག་པ་མ་མཆིས་པར། །ཇི་ལྟར་འཚམས་པ་བཞིན་དུ་རྒྱས་པར་བགྱི། །སྲིད་པར་ལས་དང་རྐྱེན་གྱི་དབང་གྱུར་ཏེ། །གང་དང་གང་དུ་དམ་ཆོས་འཇིག་པ་དེར། །མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་བཟུང་། །བླ་མེད་བྱང་ཆུབ་མཆོག་ཏུ་སེམས་བསྐྱེད་དེ། །སྒྲུབ་པ་མཆོག་ལ་ཞུགས་པའི་སྐྱེ་བོ་ལ། །ཚེ་རབས་རྣམས་སུ་མཐུ་རྩལ་ཅི་མཆིས་ཀྱིས། །སྐྱེས་ཆེན་རྣམས་ཀྱི་དགོངས་པ་རྟག་ཏུ་བསྐང་། །དམ་པའི་ཆོས་དང་སྒྲུབ་པའི་གེགས་གྱུར་པ། །མི་དང་མི་མིན་གདུག་པ་གང་ཡང་རུང་། །བདག་གིས་ཞི་དང་ཁྲོ་བོའི་ཕྲིན་ལས་ཀྱིས། །ཡོངས་སུ་ཞི་ཞིང་རྣམ་པར་གཞོམ་པར་བགྱི། །རྣལ་འབྱོར་མཆོག་གི་ཐེག་ཆེན་བླ་མེད་དང་། །རྡོ་རྗེ་རྒྱལ་པོ་ཁྱོད་ལ་བརྟེན་ནས་ནི། །སངས་རྒྱས་ཞིང་སྦྱོང་འགྲོ་ལ་སྨན་སླད་དུ། །བྱང་ཆུབ་སྙིང་པོ་བདག་གིས་རྟོགས་པར་བགྱི། །བདག་ནི་འཕགས་མཆོག་ཕྱག་རྒྱ་མངོན་སྤྲུལ་ཏེ། །གལ་ཏེ་སྐབས་མེད་འཆི་བའི་དུས་བྱུང་ཚེ། །གསང་སྔགས་མགོན་པོ་ཡེ་ཤེས་དཀྱིལ་འཁོར་ཅན། །ཁྱེད་ཀྱི་ཞབས་ཀྱི་དྲུང་དུ་མཆི་བར་བགྱི། །སྲིད་གསུམ་སྡུག་བསྔལ་ཅི་འདྲ་ཁྱེད་ཀྱིས་མཁྱེན། །དམྱལ་སོགས་མེད་དཔུང་ཞི་བར་བགྱིད་ལ་སོགས། །སེམས་ཅན་དོན་ལ་མྱུར་དུ་བདག་མཆི་ན། །དམ་པ་རྣམས་ཀྱིས་ནུས་མཐུ་སྩལ་དུ་གསོལ། །དགུ་པ་བྱིན་དབབ་པ་ནི། ཨཱོཾ་བཛྲ་ས་མཱ་ཛཿ ཞེས་སེ་གོལ་བསྣོལ་མར་གཏོགས་པས། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་གསང་སྔགས་ནང་གི་དཀོན་མཆོག་རྩ་བ་གསུམ་གྱི་རྣམ་པར་བྱོན། བྷ་ག་ཝཱ་ན་ས་མ་ཡ་ཧོཿ ཞེས་པས་ཡབ་ཡུམ་རྣམས་ཀྱི་རྗེས་ཆགས་བསྐུལ། ས་མ་ཡ་སྟྭཾ། ཞེས་པས་སྟངས་དཔྱལ་མཉམ་པར་རོལ། ཨ་ལ་ལ་ཧོཿ ཞེས་པས་སྦྱོར་མཚམས་ནས་བྱང་ཆུབ་ཀྱི་སེམས་དངོས་གྲུབ་ཀྱི་ཚུལ་དུ་བྱུང་བ་རང་གི་སྤྱི་གཙུག་ཏུ་ཐིམ། སྒོ་གསུམ་གྱི་སྒྲིབ་པ་དག །སྐུ་གསུང་ཐུགས་ཀྱི་བྱིན་རླབས་ཞུགས་པར་བལྟས་ལ། སྤོས་རོལ་དང་བཅས། ཧཱུྃ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །ཧཱུྃ་ཧཱུྃ་ཧཱུྃ་ཧཱུྃ་གིས་བྱིན་བསྡུས་པས། ནམ་མཁར་བཞུགས་པའི་ལྷ་ཚོགས་རྣམས་བདག་དང་གནས་དང་ཡོ་བྱད་རྣམས་ལ་ཐིམ་སྟེ་བྱིན་གྱིས་བརླབས་པར་བསམ་མོ། །བཅུ་པ་མཆོད་རྫས་བརླབ་པ་ལ་ཐུན་མོང་དང་ཁྱད་པར་གཉིས་ལས། དང་པོ་ནི། དངོས་འཛིན་གྱི་སྣང་བ། མ་ཧཱ་ཤུནྱཱ་ཏཱས་སྦྱངས། སྟོང་པའི་ངང་ལས་རང་ཉིད་ཡི་དམ་དུ་གསལ་བའི་ཐུགས་ཀའི་ཧཱུྃ་ལས་མཆོད་རྫས་སོ་སོའི་མིང་ཡིག་དང་པོ་སྥ་ར་ཎ་ཕཊ་ཀྱིས་སྤྲོས། སྣོད་བཅུད་ཐམས་ཅད་དང་འདྲེས། སཾ་ཧ་ར་ཎ་ཧཱུྃ་གིས་འཁོར་འདས་ཀྱི་དྭངས་བཅུད་དང་གཉིས་སུ་མེད་པར་བསྡུས། མཆོད་རྫས་རྣམས་ལ་ཐིམ་པས་ལྷ་མོ་བཅུ་དྲུག་དང་གཉིས་སུ་མེད་པར་གྱུར། སོ་སོའི་ཕྱག་རྒྱ་དང་བཅས། ཨཱོཾ་ཤྲཱི་བཛྲ་རཱ་ག་དྷཱུ་པེ་ཧཱུྃ། པུཥྤེ་ཏྲཾ། ཨཱ་ལོ་ཀེ་ཧྲཱིཿ གྷནྡྷེ་ཨཱཿ ལཱ་སྱ་ཧཱུྃ། མཱ་ལེ་ཏྲཾ། གཱིརྟི་ཧྲཱིཿ ནཱིརྟི་ཨཱཿ ཝི་ནི་ཧཱུྃ། ཝཾ་སེ་ཏྲཾ། མྲྀ་ཏཾ་ཀེ་ཧྲཱིཿ མུ་རཉྫེ་ཨཱཿ རཱུ་པ་ཧཱུྃ། པཪྴེ་ཏྲཾ། རཱ་ས་ཧྲཱིཿ དྷརྨ་དྷཱརྟུ་ཨཱཿ རྡོ་རྗེ་བདུག་སྤོས་མ་ལ་སོགས་པ་རེ་རེ་ལའང་གྲངས་མེད་པར་འཆར་བས་ནམ་མཁའ་གང་བར་གྱུར། གཉིས་པ་ཁྱད་པར་བ་ནི་རྩ་རྒྱུད་ལས། ཕོ་ཐོད་མོ་ཐོད་མ་ནིང་ཐོད། །བ་ལིང་རཀྟ་བདུད་རྩིར་སྦྱར། །ཞེས་པས་མ་ནིང་གི་ཐོད་པར་གནས་པའི་བདུད་རྩི། ཨ་མྲྀ་ཏས་བསང་། རཾ་ཡཾ་ཁཾ་གིས་བདུད་རྩིའི་དངོས་པོ་བསྲེགས་གཏོར་བཀྲུས། སྟོང་པའི་ངང་ལས་རང་གི་ཐུགས་ཀ་ནས་བྷྲུྃ་ཆད། བདུད་རྩིའི་སྣོད་ཐོད་པའི་གཞལ་ཡས་ཁང་རྡོ་རྗེའི་རྣ་བ་ཅན་གྱི་ནང་དུ་འཁོར་ལོ་རྩིབས་བཞི་པའི་ལྟེ་བར་མི་ཤ་དང་བྱང་སེམས་དཀར་པོ་ལ་ཧཱུྃ་མཱུཾ། ཤར་གྱི་རྩིབས་ལ་བ་ལང་གི་ཤ་དང་དྲི་ཆེན་ལ་ཨཱོཾ་ལཱཾ། ལྷོར་ཁྱི་ཤ་དང་ཤ་ཆེན་ལ་སྭཱ་མཱཾ། ནུབ་ཏུ་རྟ་ཤ་དང་རཀྟ་ལ་ཨཱཾ་པཱཾ། བྱང་དུ་གླང་པོ་ཆེའི་ཤ་དང་དྲི་ཆུ་ལ་ཧཱ་ཏཱཾ་རྣམས་ཀྱིས་མཚན་པར་གྱུར། སྥ་ར་ཎ་ཕཊ་བརྗོད་པས་རང་གི་སྙིང་གའི་ཧཱུྃ་ལས་འོད་ཟེར་འཕྲོས། སཾ་ཧ་ར་ཎ་ཧཱུྃ་གིས་ཞིང་བཅུའི་ཤ་དང་འཁོར་འདས་ཀྱི་བདུད་རྩི་ཐམས་ཅད་བསྡུས་ནས་གདན་དང་བཅས་པའི་གསུང་ཡི་གེའི་འཁོར་ལོ་ལ་ཐིམ། དེ་ཡོངས་སུ་གྱུར་པ་ལས་ཐུགས་ཀྱི་དཀྱིལ་འཁོར་རིགས་སོ་སོའི་ཕྱག་མཚན་ལྔས་ཡུ་བ་བྱས་པའི་ དྲིལ་བུ 
་ལྔར་གྱུར། དེ་ཉིད་ཀྱང་བསྐྱེད་པ་རྐྱེན་གྱི་སྔགས་ལས་སྐུ་ཡོངས་སུ་རྫོགས་པའི་དཀྱིལ་འཁོར་དུ་གྱུར་པ་ནི། ཧཱུཾ་མཱུཾ་ལས་དབུས་སུ་མི་བསྐྱོད་པ་ཡབ་ཡུམ་མཐིང་ག །ཨཱོཾ་ལཱཾ་ལས་ཤར་དུ་རྣམ་སྣང་ཡབ་ཡུམ་དཀར་པོ། སྭཱ་མཱཾ་ལས་ལྷོར་རིན་འབྱུང་ཡབ་ཡུམ་སེར་པོ། ཨཱཾ་པཾ་ལས་ནུབ་ཏུ་སྣང་མཐའ་ཡབ་ཡུམ་དམར་པོ། ཧཱ་ཏཱཾ་ལས་བྱང་དུ་དོན་གྲུབ་ཡབ་ཡུམ་ལྗང་གུ་རྣམས་སུ་གྱུར། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་ཀོ྅་ཧཾ། ཨ་ནུ་རཱ་ག་ཡ་མི། ཛཿཧཱུྃ་བཾ་ཧོཿ ཞེས་སྙོམས་འཇུག་བདེ་བའི་རོལ་མོས་བསྐུལ། བོ་དྷི་ཙིཏྟ་སྥ་ར་ཎ་ཕཊ། ཅེས་བྱང་ཆུབ་ཀྱི་སེམས་ཡུམ་གྱི་མཁའ་ནང་དུ་སྤྲོས་པས་སངས་རྒྱས་ཐམས་ཅད་དགྱེས་པ་བསྐྱེད། སཾ་ཧ་ར་ཎ་ཧཱུྃ་ཞེས་པས་འཁོར་འདས་ཀྱི་དྭངས་བཅུད་དང་ལྷན་ཅིག་ཚུར་འདུས། རིགས་ལྔ་ཡབ་ཡུམ་རྗེས་ཆགས་ཀྱི་སྦྱོར་བས་འོད་དུ་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩི་དམ་ཚིག་གི་བདུད་རྩི་དང་གཉིས་སུ་མེད་པར་གྱུར། ཟླ་བའི་ཁ་གཅོད་ཨཱོཾ་དཀར་པོས་མཚན་པའི་རྡོ་རྗེ་རྒྱ་གྲམ་གྱི་ལྟེ་བར་ཧྲཱིཿདམར་པོ་ལས་འོད་ཟེར་འཕྲོས། དོན་གཉིས་བྱས། ཡོངས་སུ་གྱུར་པ་ལས་རྟ་མགྲིན་དམར་པོ་གཡས་པདྨ་དང་གཡོན་རྒྱ་གྲམ་འཛིན་པའི་ལྟེ་བ་མན་ཆད་བདུད་རྩིའི་ནང་དུ་ནུབ་པའི་མདུན་ནས་བདེ་བ་རྒྱས་བྱེད་མ། གཡས་ནས་ཚེ་འཕེལ་མ། གཡོན་ནས་རྨོངས་བྱེད་མ། རྒྱབ་ནས་ཟ་བྱེད་མ་སྟེ་གསང་བའི་ཡུམ་བཞིས་འཁྲིལ་ཞིང་མཉམ་པར་སྦྱོར་བའི་སྦྱོར་མཚམས་ནས་ཡེ་ཤེས་ཀྱི་བདུད་རྩིའི་རྒྱུན་བབས་པས་དམ་ཚིག་གི་བདུད་རྩིའི་རྒྱ་མཚོ་དང་རོ་གཅིག་ཏུ་གྱུར་པར་བསམས་ལ། གཡོན་པའི་མཐེབ་སྲིན་བདུད་རྩི་ལ་གཏད་དེ། ༀ་ཨཱཿཧཱུྃ། སརྦ་པཉྩ་ཨ་མྲི་ཏ་ཧཱུྃ་ཧྲཱིཿཋཱཿ ཞེས་བརྒྱའམ་ཉེར་གཅིག་གིས་མཐའ་བརྟེན་པ་བཟླས་མཐར། རྡོ་རྗེས་གཡས་སྐོར་དུ་དཀྲུག་པའི་ལྦུ་བ་ལ་ཁྲོ་བོ་བདུད་རྩིའི་འཁྱིལ་བའི་རྡུལ་ཕྲ་རབ་འཕྲོས་ནས་བགེགས་རྣམས་ཚར་བཅད། མཆེད་ལྕམ་རྣམས་ལ་གཏོར་བས་མཁོན་གཅུགས་བྱང་བར་འགྱུར། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧྲཱིཿ ཞེས་བརྗོད་པས་ལྷ་རྣམས་བདུད་རྩི་ལ་ཐིམ་པར་བསམ་མོ། །ཕོ་ཐོད་དུ་གནས་པའི་གཏོར་མ་བསང་སྦྱངས། སྟོང་པའི་ངང་ལས་བྷྲཱུཾ་བྷཉྫ་ཀ་པཱ་ལ་བྷྲཱུཾ། དཔའ་བོ་ཐོད་པའི་གཞལ་ཡས་ཁང་ཡངས་ཤིང་རྒྱ་ཆེ་བའི་ནང་དུ་གཏོར་རྫས་ཞིང་བཅུའི་དགྲ་བགེགས་ཀྱི་གཟུགས་ཕུང་ནང་ཁྲོལ་དུ་ལྷུ་དུམ་དང་བཅས་པ་ཧཱུྃ་མཐིང་གས་མཚན་པར་གྱུར། ཞེས་པས་ཧཱུྃ་ལས་འོད་ཟེར་འཕྲོས། སྥ་ར་ཎ་ཕཊ། སཾ་ཧ་ར་ཎ་ཧཱུྃ་གིས་འཁོར་འདས་ཀྱི་དྭངས་བཅུད་བདུད་རྩི་ལ་བསྡུས་པར་བསམས་ལ་གཏོར་གཞོང་གི་རྒྱ་དང་བཅས། ༀ་མ་ཧཱ་བ་ལིངྟ་ཏེ་ཛྭ་བ་ལིངྟ་བ་ལ་བཱ་དྱ་གུ་ཧྱ་ས་མ་ཡེ་སྭཱ་ཧཱ། ལན་བདུན་བརྗོད་པས། གཟུགས་རྡོ་རྗེ་མ་ལ་སོགས་འདོད་ཡོན་གྱི་ལྷ་མོ་མ་ཚང་བ་མེད་པའི་རང་བཞིན་དུ་འཆར་བར་གྱུར། མོ་ཐོད་དུ་གནས་པའི་རཀྟ་བསང་སྦྱངས། སྟོང་པའི་ངང་ལས་བྷྲཱུཾ་པདྨ་བྷཉྫ་ཀ་པཱ་ལ་བྷྲཱུཾ། དམར་གྱི་དུང་ཆེན་ཡུམ་གྱི་པདྨའི་རང་བཞིན་ཡངས་ཤིང་རྒྱ་ཆེ་བའི་ནང་དུ་དུ་ར་ལས་རཀྟའི་རྒྱ་མཚོའི་སྟེང་དུ་པདྨ་དམར་པོ་འདབ་མ་བཞི་པའི་དབུས་སུ་ཨ་ཡིག་དམར་པོས་མཚན་པར་གྱུར། སྥ་ར་ཎ་ཕཊ། ཅེས་པས་ཨ་ལས་འོད་ཟེར་འཕྲོས། སཾ་ཧ་ར་ཎ་ཧཱུྃ་གིས་ཞིང་བཅུའི་ཤ་ཁྲག་དྲངས་ཏེ་རཀྟ་ལ་ཐིམ་པར་བསམས་ལ་པདྨ་འཁྱིལ་པའི་ཕྱག་རྒྱ་དང་བཅས། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋཱཿ ལན་བདུན་བརྗོད་ནས་ཞལ་གཟར་གྱིས་དཀྲུགས་ཤིང་འཕྱར་བས། ལྦུ་བའི་རླབས་ལ་མི་རོ་དང་རྟ་རོའི་སྣས་དང་། ཁྲོ་བོ་རྟ་མགྲིན་གྱི་རྡུལ་ཕྲ་རབ་འཕྲོ་བས་ཕྱོགས་བཅུའི་གདོན་བགེགས་རྣམས་ཚར་བཅད། ཁམས་གསུམ་གྱི་འདོད་ཆགས་བག་ལ་ཉལ་སྟོངས་པར་གྱུར་པར་བསམ་མོ། །བསྙེན་པ་སྤྲོས་མེད་ལ་སོགས་པའི་ཚེ་དེ་ཙམ་མ་ནུས་ན་དམིགས་པ་རྣམས་ཉམས་འོག་ཏུ་ཚུད་པ་བྱས་ལ་སོ་སོའི་སོ་སོར་རང་སྔགས་ཀྱིས་བརླབ་པ་ཡིན་ནོ། །སྤྱི་དོན་གཉིས་པ་དངོས་གཞི་ལ་བཞི། བསྐྱེད་གཞིའི་ཏིང་ངེ་འཛིན་གསུམ་བྱང་ཆུབ་ཀྱི་སེམས་རྣམ་པ་གཉིས་སུ་བསྡུ་བའི་ཁྱད་པར་བཤད་པ། བསྐྱེད་རིམ་གྱི་ངོ་བོས་དག་པའི་སྣོད་བཅུད་བསྒྲུབ་པ། རང་བཞིན་ཡེ་ཤེས་ཀྱི་དཀྱིལ་འཁོར་དང་གཉིས་མེད་དུ་བྱ་བ། དེ་ལ་ཚོགས་གཉིས་འབྲས་བུ་དང་བཅས་པ་བསྒྲུབ་པའོ། །དང་པོ་བསྐྱེད་གཞིའི་བསམ་གཏན་གསུམ་ནི་རྡོ་རྗེ་ཁྲོས་པ་རྩ་བཤད་གཉིས་དང་། འབར་བ་རྩ་དུམ་ལ་སོགས་པ་མྱང་འདས་ལྟ་བུའི་དངོས་བསྟན་ལས་གཞན་པའི་ཁྱད་ཆོས་བཤད་ཀྱང་སྔ་རབས་པ་རྣམས་ཀྱིས་འགྲེལ་ཚུལ་ཇི་བཞིན་རྔོ་མ་ཐོགས་པར་ད་དུང་ཏིང་འཛིན་གསུམ་ལ་དངོས་ཚིག་བསྣན་པས་བཟློས་པར་གྱུར་ལ། དེའི་ཕྱིར་རྒྱུད་ཀྱི་རྡོ་རྗེའི་གནས་ཆེན་པོ་འདི་ཡིན་ཏེ། སངས་རྒྱས་རྣམས་ཀྱི་ཐུགས་རྣམ་པར་མི་རྟོག་ཅིང་འགྱུར་བ་མེད་པ་རྡོ་རྗེའི་རང་བཞིན་ནི་ལམ་དུས་སུ་དེ་བཞིན་ཉིད་ཀྱི་ཏིང་ངེ་འཛིན་དུ་ངང་གིས་གནས་པའི་རྡོ་རྗེ་ལྟ་བུའི་ཏིང་ངེ་འཛིན་ཞེས་ཀྱང་བྱའོ། །དེ་ཉིད་རྟོགས་ནས་དང་པོ་ན་ཡོད་པའི་ལྷག་བསམ་རྣམ་དག་གི་སེམས་རང་ཤུགས་ལ་སྐྱེ་བས་སྙིང་རྗེའི་མི་མཐུན་ཕྱོགས་ཞེ་སྡང་གི་ཀུན་ཏུ་རྟོག་པ་ལ་རང་བཞིན་ཁྲོས་པ་ལྟ་བུའི་ཞེ་སྡང་མེ་ལོང་ལྟ་བུའི་ཡེ་ཤེས་སུ་གཅོད་པ་ནི་ཞེ་སྡང་རྡོ་རྗེའི་མཚན་ཉིད་ཡིན་ནོ། །ཚུལ་དེ་བཞིན་དུ་རིན་པོ་ཆེའི་རིགས་མཉམ་པ་ཉིད་ཀྱི་ལྟ་བ་ནི་ཉོན་མོངས་པ་ང་རྒྱལ་ལ་ཁྲོས་པ་ལྟ་བུའི་ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གཅོད་པ་ནི་ང་རྒྱལ་རྡོ་རྗེའི་མཚན་ཉིད་དེ། འདོད་ཆགས་ལ་སོགས་པ་གཞན་གསུམ་ལའང་སྦྱང་གཞི་སྦྱོང་བྱེད་དེ་ལྟར་གནས་པ་ནི་ཀུན་སྣང་དཔལ་བར་འགྲོ་བའི་ཏིང་ངེ་འཛིན་ནོ། །དེ་ལྟར་སྟོང་ཉིད་སྙིང་རྗེ་ཆེན་པོ་ཟུང་དུ་འབྲེལ་བའི་མཚོན་བྱ་དོན་གྱི་ནམ་མཁའ་སྐྱེ་བ་མེད་པའི་དབྱིངས་ལས་འགག་མེད་ཐུགས་རྗེ་ཆེན་པོས་རོལ་པ་བཅུད་དུ་འདྲིལ་བའི་ཐིག་པ་ཡེ་གེ་ཧཱུྃ་སྔོན་ལ་སོགས་ཡེ་ཤེས་ལྔའི་རང་འོད་ཅན་དུ་འཕྲོ་ཞིང་འབར་བའི་རྣམ་པ་འཁོར་འདས་མཐའ་དག་པའི་སྲོག་གི་གོ་རུ་ཤར་བ་ནི་རྒྱུའི་ཏིང་ངེ་འཛིན་སྒྱུ་མ་ལྟ་བུའི་རང་བཞིན་ཅན་ནོ། །དེ་ལྟར་འཁོར་འདས་ཐམས་ཅད་ཀྱི་སྲོག་གི་གོར་འཆར་བའི་རྒྱུའི་ཏིང་ངེ་འཛིན་ཡེ་ཤེས་ལྔའི་རང་འོད་ཅན་དུ་འབར་བ་གང་ཞིག་སྙིང་ག་ལ་སོགས་པ་གཟུགས་ཀྱི་ཕུང་པོར་འཛིན་པའི་གནས་ལྔའི་གོར་ཤར་བས་རྣམ་པར་ཤེས་པ་ལ་སོགས་པའི་ཕུང་པོ་ལྔ་སངས་རྒྱས་ལྔའི་རང་བཞིན་དུ་འགྲུབ་པའི་རྒྱུ་བྱེད་ཅིང་དེའི་མི་མཐུན་ཕྱོགས་ཉོན་མོངས་པ་ལྔ་ཚར་གཅོད་པའི་རྟེན་འབྲེལ་སྒྲིག་པ་ནི་ཕུར་པ་ཡེ་ཤེས་རྩེ་མོའི་རྒྱུད་ཀྱི་དགོངས་པ་ཡིན་ནོ། །དེ་དག་གི་དོན་རྒྱུད་གཞུང་གིས་སྟོན་པ་ནི། རྡོ་རྗེ་འབར་བ་ལས། ཧཱུྃ། རྡོ་རྗེ་ཁྲོས་པས་ཞེ་སྡང་གཅོད། །ཐུགས་ནི་ཡང་དག་རྡོ་རྗེ་ཉིད། །སྟོང་པ་ཉིད་ཀྱི་ཡེ་ཤེས་ཏེ། །རྣམ་པར་མི་རྟོག་རྟོག་ལས་འདས། །དེ་བཞིན་ཉིད་དུ་བསྒོམ་པར་བྱ། །དེ་ནི་ཆོས་ཀྱི་སྐུ་ཉིད་ལས། །བཞིན་ནི་མ་ནོར་བ་ཡང་ཡིན། །ཉིད་ནི་བཅོས་སུ་མེད་པའོ། །མཚོན་ཆེན་སྔོན་པོ་འབར་བ་ཡི། །ནམ་མཁའི་དཀྱིལ་ནས་ཐིག་པ་ཤར། །སྲོག་གི་གོ་རུ་ཤར་བ་དང་། །སྙིང་གི་གོ་རུ་བསྒོམ་པར་བྱ། །ཧཱུྃ། རིན་ཆེན་ཁྲོས་པས་ང་རྒྱལ་གཅོད། །འོད་ཆེན་སེར་པོ་འབར་བ་ནི། །ནམ་མཁའི་དཀྱིལ་ནས་ཐིག་པ་ཤར། །ལྟེ་བའི་གོ་རུ་བསྒོམ་པར་བྱ། །ཧཱུྃ། འཁོར་ལོ་ཁྲོོས་པས་གཏི་མུག་གཅོད། །འོད་ཆེན་ནག་པོ་འབར་བ་ཡི། །ནམ་མཁའི་དཀྱིལ་ནས་ཐིག་པ་ཤར། །ཀླད་པའི་གོ་རུ་བསྒོམ་པར་བྱ། །ཧཱུྃ། པདྨ་ཁྲོས་པས་འདོད་ཆགས་གཅོད། །འོད་ཆེན་དམར་པོ་འབར་བ་ནི། །ནམ་མཁའི་དཀྱིལ་ནས་ཐིག་པ་ཤར། །མགྲིན་པའི་གོ་རུ་བསྒོམ་པར་བྱ། །ཧཱུཾ། སྣ་ཚོགས་ཁྲོས་པས་ཕྲག་དོག་གཅོད། །འོད་ཆེན་ལྗང་གུ་འབར་བ་ཡི། །ནམ་མཁའི་དཀྱིལ་ནས་ཐིག་པ་ཤར། །རྐང་པའི་གོ་རུ་བསྒོམ་པར་བྱ། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་རྣམ་པ་ལྔའི། །རྡོ་རྗེའི་དམ་ཚིག་ཆེན་པོ་ནི། །རྣམ་གྲོལ་ཆེན་པོའི་ཏིང་འཛིན་ཏེ། །རང་བཞིན་མེད་པར་གསད་པར་བྱ། །ཞེས་པས་རྒྱུ་མ་རིག་པ་དང་། རྐྱེན་ཉོན་མོངས་པ་ལྔའི་དུག་གིས་བསྐྱེད་པའི་ཆོས་ཅན་ཐམས་ཅད་རང་གི་མཚན་ཉིད་ཀྱིས་མ་གྲུབ་པའི་གཤིས་སྟོང་པ་ཉིད་ཀྱི་ངང་དུ་གསད་པ་ནི་དོན་དམ་པའི་བྱང་ཆུབ་ཀྱི་སེམས་སོ། །དེའི་ངང་ནས་ལྷག་པའི་བསམ་པས་ཀུན་རྫོབ་བྱང་ཆུབ་ཀྱི་སེམས་རྡོ་རྗེའི་རྣལ་འབྱོར་དུ་བསྐྱེད་པ་ནི། སེམས་ཅན་རྣམས་འཁོར་བའི་རྒྱ་མ ཚོ་ལས་བསྒྲལ་འདོད་ཀྱི་བློ་ཚད་མེད་བཞིའི་དམ་ཚིག་སྟེ། གནོད་སེམས་ཀྱི་བློ་དང་ལྷན་ཅིག་མི་གནས་པར་ངེས་པས། ཧཱུྃ། བྱམས་དང་སྙིང་རྗེ་དགའ་བ་དང་། །བཏང་སྙོམས་བཞིས་བསྒྲལ་དམ་ཚིག་ནི། །བསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེས་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །དེ་ལ་ཕུང་པོ་རྡོ་རྗེའི་སྒྲ་དོན་མི་ཆོད་པ་མི་ཤིགས་པ་སོགས་ཆོས་བདུན་དང་ལྡན་པ་ཡིན་པའི་སྟོང་པ་སྙིང་རྗེའི་རོས་གང་བའི་ཡེ་ཤེས་རྡོ་རྗེས་བདག་དང་སེམས་ཅན་ཐམས་ཅད་ཀྱི་མིང་བཞིའི་ཕུང་པོ་གཏམས་ནས། རྣམ་པར་ཤེས་པ་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་རང་བཞིན་ཡི་གེ་ཧཱུྃ་མཐིང་ནག་འོད་ཟེར་ཀུན་ཏུ་འཕྲོ་བར་བསྒོམ་པ་ནི་སྐྱེད་བྱེད་འགྲུབ་པའི་རྒྱུའི་ཏིང་ངེ་འཛིན་ནོ། །གཉིས་པ་ལ་གཉིས། རྟེན་གཞལ་ཡས་ཁང་བསྐྱེད་པ་དང་། བརྟེན་པའི་ལྷ་ཚོགས་བསྐྱེད་པའོ། །དང་པོ་ལ་གཞལ་ཡས་ཁང་དང་། གདན་བསྐྱེད་པ་གཉིས་ལས། དང་པོ་ནི་རྒྱུའི་ཏིང་ངེ་འཛིན་དེ་ཉིད་ལས་གཞལ་མེད་ཁང་གི་རྟེན་གཞི་འབྱུང་བ་རིམ་བརྩེགས་ཀྱི་ས་བོན་རྣམས་ཆད། ཕྱི་སྣོད་ཀྱི་འབྱུང་ཆེན་ལྔ་དང་། ནང་བཅུད་ཀྱི་འབྱུང་ཆུང་ལྔ་པོ་ཡུམ་ལྔའི་མཁའ་ཀློང་རྣམ་པར་དག་པའི་གོར་ཤར་བའི་སྟེང་དུ་ཡེ་ཤེས་ཀྱི་གཞལ་མེད་ཁང་བསྐྱེད་པའི་ཚུལ། རྩ་བཤད་ལས། ཧཱུྃ་ཨེ་ཡཾ་རཾ་སུཾ་ཀེཾ་རཾ་བྷྲཱུཾ། བྷཱུཾ་བི་ཤྭ་བི་ཤུདྡྷེ་ཛྙཱ་ན་ཙཀྲ་མཎྜ་ལ་བྷྲཱུཾ། སྲོག་ལས་ནམ་མཁའ་གྲུ་གསུམ་དང་། །རླུང་ཁྲག་ཤ་ཆེན་ཀེང་རུས་མེ། །འཇིགས་པའི་དུར་ཁྲོད་གཞལ་ཡས་ཁང་། །སྒྲ་ཡི་རྐྱེན་གྱིས་རབ་ཏུ་རྫོགས། །ཏིང་འཛིན་དཀྱིལ་འཁོར་རྒྱུ་གཉིས་ཀྱི། །མཛེས་ཤིང་འཇིགས་པར་རབ་ཏུ་གནས། །ཕྱི་ནི་རིན་ཆེན་ལྔ་ལས་གྲུབ། །དབུས་སུ་ནོར་བུ་བཻ་ཌཱུརྱ། །ཤར་ནི་ཤེལ་ཡིན་ལྷོ་ནི་གསེར། །ནུབ་ནི་པདྨ་རཱ་ག་ལ། །བྱང་གི་ཨིནྡྲ་ནཱི་ལར་གནས། །རིན་ཆེན་ལྔ་ཡི་རྩིགས་པས་མཛེས། །འདོད་ཡོན་ལྷ་མོ་རིན་ཆེན་བརྡར། །མེ་ཏོག་ཕྲེང་བ་མུ་ཏིག་ཧར། །ཏྭ་ར་ཎ་ཞིང་འཁོར་ལོ་གདུགས། །བ་དན་ལ་སོགས་རབ་ཏུ་མཛེས། །ཏོག་ནི་རྡོ་རྗེ་རྩེ་དགུ་པའོ། །ནང་ནི་དུར་ཁྲོད་གཞལ་ཡས་ཁང་། །ཀླུ་ཆེན་བརྒྱད་ཀྱི་ཀ་བ་ལ། །ཉི་མ་ཟླ་བ་ལྷ་ཡི་བུ། །ཀ་གདན་ཀ་གཞུ་མཛེས་པར་གནས། །ལྷ་ཆེན་བརྒྱད་ཀྱི་གདུང་ལ་ནི། །ཟླ་བའི་སྐར་ཁུང་ཡང་དག་གནས། །གཟའ་ཆེན་བརྒྱད་ཀྱི་ལྕམ་ལ་ནི། །ཉི་མའི་མཐོང་ཁུང་བཅུ་ཡིས་མཛེས། །ཉི་ཤུ་རྩ་བརྒྱད་རྒྱུ་སྐར་གྱིས། །གྲལ་མ་རྣམས་སུ་རབ་ཏུ་མཛེས། །ཐོད་པ་སྐམ་རློན་ར་རིས་ཀྱིས། །ཕྱོགས་བཞིའི་རྩིག་པ་རབ་ཏུ་བྱས། །འབྱུང་པོ་བསྣོལ་བས་མ་ཐེབ་བྱས། །ཆུ་སྲིན་ཡ་ཐེབ་ཉིད་དུ་བྱས། །རོ་རློན་ལོགས་ཀྱི་སྐྱེས་བུ་ལ། །རིགས་བཞི་ཀླུ་ཡི་སྒོ་བཞི་མཛེས། །དབུས་ཀྱི་གྲུ་གསུམ་མཐིང་ནག་ལ། །ཟླ་གམ་དམར་པོ་གསུམ་དང་ལྡན། །འཁོར་ལོ་རྩིབས་བརྒྱད་ནག་པོར་གནས། །དུར་ཁྲོད་བརྒྱད་དུ་གནས་པ་སྟེ། །མཚོ་དང་རླུང་དང་སྤྲིན་དང་ནི། །ཞིང་སྐྱོང་ཕྱོགས་སྐྱོང་མཆོད་རྟེན་དང་། །བྲག་དང་མེ་ཡི་རྣམ་པར་གནས། །རོ་ནི་རློན་པ་ར་རི་དང་། །ཀེང་རུས་བམ་རུལ་རྣམ་པར་འཐོར། །བྱ་གཅན་འཇིགས་པའི་མ་མོ་དང་། །སྲིད་པའི་མཁའ་འགྲོ་མང་པོ་གནས། །གཞལ་ཡས་མཛེས་ཤིང་འཇིགས་པ་དེར། །གཉིས་པ་གདན་བསྐྱེད་པ་ནི། རཱུ་ཏྲ་ཀྲོ་དྷི་ཏི་ར་བཾ། པཾ་པདྨ་མཎྜ་ལ། མ་སཱུརྱ་མཎྜ་ལ། ཨ་ཙནྡྲ་མཎྜ་ལ། རཱུ་ཏྲ་ཕོ་མོ་དམ་སྲི་བཅུ། །བདུད་བཞི་བགེགས་བཞི་ཕོ་མོ་རྣམས། །ཁ་སྦུབ་གན་རྐྱལ་བྱི་ཆིངས་མནན། །པདྨ་ཉི་ཟླ་ཡོན་ཏན་སྤྲས། །རབ་བསྐྱེད་འོད་ཟེར་རབ་ཏུ་འཁྲུགས། །གཉིས་པ་བརྟེན་པའི་ལྷ་བསྐྱེད་པ་ལ་གཉིས། གཞན་གྱི་སྲས་སུ་བདག་བྱ་བ་དང་། བདག་གི་སྲས་སུ་གཞན་བྱ་བའི་ཚུལ་ལོ། །དང་པོ་ཡེ་ཤེས་རྩེ་མོར་ལས། ཇི་ལྟར་སངས་རྒྱས་ཐུགས་ལས་བྱུང་། །ལྷུན་གྱིས་གྲུབ་པའི་ཆོ་ག་དང་། །ཆོ་གའི་ཡན་ལག་རྫོགས་པ་ལ། །མཁས་པ་སངས་རྒྱས་སྲས་ཡིན་ནོ། །ཞེས་པས་རྡོ་རྗེ་ཆོ་ག་གསུམ་གྱིས་རྒྱུའི་ཧེ་རུ་ཀ་ཞི་བ་ལས་བརྫུས་སྐྱེས་ཁྲོ་བོར་སྐད་ཅིག་གིས་གནས་འགྱུར་བའི་ཚུལ་ལས་བསྐྱེད་པ་སྟེ། ༀ་ཨཱཿབཛྲ་སཏྭ་ཧཱུྃ། རྡོ་རྗེ་ཧཱུྃ་ཡིག་ཡོངས་གྱུར་ལས། །རྡོ་རྗེ་སེམས་དཔའ་ཡབ་ཡུམ་ནི། །མཚན་དང་དཔེ་བྱད་ཡང་དག་རྫོགས། །རྡོ་རྗེ་
དྲིལ་བུ ་བདེ་བར་འཁྱུད། །ཀུནྡ་ལྟ་བུར་དཀར་བའི་མདོག །རིགས་ལྔ་ཁྲག་འཐུང་ཡབ་ཡུམ་བཅུ། །འདུས་པའི་རྡོ་རྗེ་གཞོན་ནུའི་སྐུ། །ཨཱོཾ་བཛྲ་ཀཱི་ལི་ཀཱི་ལ་ཡ་དཱིཔྟ་ཙཀྲ་ཧ་ན་ཧ་ན་རུ་ལུ་རུ་ལུ་ཧཱུྃ་བྷྱོ་ཧཱུྃ། ཞེ་སྡང་ཁྲག་འཐུང་རྒྱལ་པོ་དང་། །བདེ་བར་སྒྲོལ་བར་བྱེད་པའི་ཡུམ། །ཁྲོ་ཞིང་རྔམས་པའི་ཚུལ་བསྐྱེད་པས། །གདུག་པ་མ་ལུས་སྒྲོལ་བར་བྱེད། །ཨ་དང་ཧཱུྃ་ལས་རབ་ཏུ་སྦྱར། །ཡུམ་གྱིས་ཡབ་ཀྱི་ལྕེ་གཞིབས་ནས། །ཡུམ་གྱི་ཐུགས་ཀར་ཨུཏྤལ་གཏད། །གདུང་བའི་ང་རོས་འདི་སྐད་བརྗོད། །ཧཱུྃ། རྡོ་རྗེ་གཞོན་ནུའི་རིག་འཛིན་རྣམས། །སྲིད་པ་རྡོ་རྗེར་གྲུབ་མཛོད་ཅིག །སྲིད་པ་རྡོ་རྗེ་ཕུར་པའི་ལྷ། །ཡེ་ཤེས་ཁྲོ་བོར་གྲུབ་པར་མཛོད། །ཧཱུཾ། ཡེ་ཤེས་རྩེ་མོ་ལས། འཁོར་ལོ་གཞོན་ནུའི་རིག་འཛིན་རྣམས། །སྲིད་པ་འཁོར་ལོར་གྲུབ་མཛོད་ཅིག །སྲིད་པ་འཁོར་ལོ་ཕུར་པའི་ལྷ། །ཡེ་ཤེས་ཁྲོ་བོར་གྲུབ་པར་མཛོད། །ཧཱུཾ། རིན་ཆེན་གཞོན་ནུའི་རིག་འཛིན་རྣམས། །སྲིད་པ་རིན་ཆེན་གྲུབ་མཛོད་ཅིག །སྲིད་པ་རིན་ཆེན་ཕུར་པའི་ལྷ། །ཡེ་ཤེས་ཁྲོ་བོར་གྲུབ་པར་མཛོད། །ཧཱུྃ། པདྨ་གཞོན་ནུའི་རིག་འཛིན་རྣམས། །སྲིད་པ་པདྨར་གྲུབ་མཛོད་ཅིག །སྲིད་པ་པདྨ་ཕུར་པའི་ལྷ། །ཡེ་ཤེས་ཁྲོ་བོར་གྲུབ་པར་མཛོད། །ཧཱུྃ། སྣ་ཚོགས་གཞོན་ནུའི་རིག་འཛིན་རྣམས། །སྲིད་པ་རལ་གྲིར་གྲུབ་མཛོད་ཅིག །སྲིད་པ་རལ་གྲི་ཕུར་པའི་ལྷ། །ཡེ་ཤེས་ཁྲོ་བོར་གྲུབ་པར་མཛོད། །གཉིས་པ་བདག་སྲས་ནི། རྩེ་མོ་ལས། སྲས་དང་བཙུན་མོ་བཅས་པ་ནི། །འཁོར་བའི་ཆོས་ལས་སྐྱེས་པ་སྟེ། །སེམས་ཅན་གྱི་ནི་སྲས་སུ་བྱ། །ཞེས་པས། ཡབ་ཡུམ་སྦྱོར་བ་མཛད་པ་ལས། །དགྱེས་མཆོད་གསང་བ་སོ་སོར་ཐོབ། །སྥ་ར་ཎ་ཕཊ་བརྗོད་པས། །འོད་ཀྱིས་སྲས་བཅས་རྒྱལ་བ་མཆོད། །སེམས་ཅན་ཀུན་གྱི་སྒྲིབ་པ་སྦྱངས། །སཾ་ཧ་ར་ཎ་ཧཱུྃ་བརྗོད་པས། །ཕྱོགས་བཅུའི་དེ་བཞིན་གཤེགས་པ་རྣམས། །བཀུག་ནས་ཡུམ་གྱི་མཁའ་རུ་བསྟིམ། །བདེ་ཆེན་བྱང་ཆུབ་སེམས་སུ་གྱུར། །རྡོ་རྗེའི་དམ་ཚིག་ཨེ་མ་ཧོ། །གཉིས་མེད་དགྱེས་པ་ཆེན་པོའི་ངང་། །ཡབ་ཡུམ་འོད་ཞུ་ཡི་གེ་ཧཱུྃ། །ཡོངས་གྱུར་འབྲས་བུའི་ཧེ་རུ་ཀ །དཔལ་ཆེན་རྡོ་རྗེ་གཞོན་ནུ་ནི། །སྒེག་པ་དཔའ་བ་གར་དགུ་པ། །རྫུ་འཕྲུལ་ཞབས་བཞི་དོར་སྟབས་བསྒྲད། །རྣམ་པར་ཐར་པའི་དབུ་གསུམ་གྱི། །སྐྲག་མཛད་བཞད་གཤེ་ཁྲོ་བོའི་ཞལ། །གཡས་པ་ལྗང་ནག་གཡོན་དམར་ནག །སྤྱན་དམར་སྨིན་མ་སྨ་ར་སེར། །ཁྲོ་གཉེར་ཆུ་ཡི་རླབས་བཞིན་འཁྲུགས། །ཕ་རོལ་ཕྱིན་དྲུག་མཚོན་པ་ཡི། །ཕྱག་དྲུག་གཡས་ཀྱི་དང་པོ་ན། །གསེར་གྱི་རྡོ་རྗེ་རྩེ་དགུ་དང་། །གཡོན་གྱི་དང་པོ་མེ་དཔུང་བསྣམས། །གཡས་པ་རྡོ་རྗེ་རྩེ་ལྔ་དང་། །དགྲ་སྟྭ་རྡོ་རྗེ་ཐོ་བའོ། །སློབ་དཔོན་ཆེན་པོས་ཆོས་རྒྱལ་གི་ཐུགས་དམ་དུ་བཞག་པ་རྡོ་རྗེ་བཀོད་པ་རྣལ་འབྱོར་ཆེན་པོའི་རྒྱུད་ཀྱི་ལེའུ་དགུ་པ་སྒྲ་ཇི་བཞིན་པའོ། །ཁ་ཊྭཱྃ་ཐོད་དབྱུག་ལྕགས་ཀྱུ་གཡོན། །གཡས་ཀྱི་ཐ་མ་ཕུར་པ་དང་། །གཡོན་ན་ཕྲ་མེན་རྦོད་གཏོང་ནི། །ཁྱུང་དང་བྱ་རྒོད་འུག་པ་དང་། །ཁྲ་དང་བྱ་རོག་ཕོ་ཉར་འགྱེད། །རྡོ་རྗེའི་གཤོག་པས་སྲིད་གསུམ་གནོན། །མཐིང་ནག་སྐུ་ལ་དུར་ཁྲོད་བརྒྱན། །རིགས་ལྔ་ཐོད་པ་ལྔ་ཡིས་བརྒྱན། །ཀླུ་ཆེན་བརྒྱད་དང་ཐོད་པས་བརྒྱན། །འཁོར་ལོ་རྒྱས་འདེབས་བདེ་བའི་ཡུམ། །ཡབ་དང་སྦྱོར། སྦྲུལ་དང་ཐོད་པ་གཟིག་གིས་བརྒྱན། །དྲིལ་བུ་ཐོད་ཁྲག་ཕྱག་ན་བསྣམས། །ཨེ་ཀ་ཛ་ཊི་སྒྲོལ་བའི་ཡུམ། །གཡོན་ན་བཞུགས། གྲི་གུག་ཐོད་ཁྲག་ཁམས་གསུམ་སྒྲོལ། རེ་འགའ་ཁ་ཊྭཱཾ་རྩེ་གསུམ་བསྣམས། །གཡེར་ཁ་ དྲིལ་བུ ་ཉིད་ལས་ཡང་། །རྟོག་མེད་ཆོས་ཀྱི་སྒྲ་འབྱིན་མ། །མ་མོ་དྲུག་ཅུ་ཕོ་ཉར་འགྱེད། །དེ་ནས་སྙོམས་པར་ཞུགས་ནས་ཐོག་མར་མཁའ་གསང་བརླབས་ཤིང་སྲས་འབྱིན་གྱི་སྦྱོར་བ་བསྒྲུབ་པ་ནི། ཧཱུྃ་ལས་ཡབ་ཀྱི་གསང་གནས་ནི། །རྡོ་རྗེ་རྩེ་ལྔར་ཟླ་དཀྱིལ་ཨཱོཾ། །པཾ་ལས་ཡུམ་མཁའ་པད་འདབ་བརྒྱད། །ཟེ་འབྲུ་ཉི་མར་མུཾ་གྱིས་མཚན། །ས་མ་ཡ་ཧོ་ཡབ་ཀྱི་བརྡའ། །ས་མ་ཡ་སྟྭཾ་ཡུམ་གྱི་ལན། །རཱ་ག་ཡ་ཧོ་ཡབ་ཀྱི་བརྡའ། །རཱ་ག་ཡ་མི་ཡུམ་གྱི་ལན། །ཛཿ ཧཱུྃ་བཾ་ཧོཿཕྱག་རྒྱ་བཞིས། །ཐལ་གོང་སྐེད་སྐབས་དབང་པོའི་སྒོ། །བོ་ལ་ཀ་ཀོ་ལ་རྣམས་སྤྲད། །ཆགས་པ་ལྕགས་ཀྱུ་ཞེས་བྱ་སྟེ། །རྡོ་རྗེ་འབར་བ་ལས། པདྨར་ཆུད་པ་ཞགས་པ་མོ། །ཁ་ཕྱེད་མ་ནི་སྒྲོག་ཡིན་ཏེ། །སྒྲ་གྲགས་མ་ནི་དྲིལ་བུའོ། །པདྨ་ཡོ་གི་ནི་པྲ་ཝེ་ཤ་ཡ་ཕཊ། འདོད་ཆགས་ཆེན་པོའི་ཚུལ་གྱིས་ནི། །ཡེ་ཤེས་དཀྱིལ་འཁོར་ཀུན་བསྡུས་ཏེ། །འཁོར་རྣམས་ཐུགས་ལ་ཞུགས་པ་ཡིས། །ཤེས་རབ་མ་ནི་དགའ་བར་བྱ། །དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མེད་དེ། །ཀུན་རྫོབ་དང་ནི་དོན་དམ་གྱི། །ཆོས་ཀུན་བྱང་ཆུབ་སེམས་སུ་གནས། །དང་པོར་བབས་པས་གཞལ་མེད་ཁང་། །ཡུམ་མཁའ། གཉིས་པ་གདན་གྱུར་གསུམ་པ་ལས། །ཡབ་ཀྱི་རྟོག་ཚོགས་ཡི་གེར་རྫོགས། །བྷ་ག་ཉིད་དུ་ལྷ་རྣམས་བསམ། །ༀ་བཛྲ་ཀཱི་ལི་ཀཱི་ལ་ཡ་ཕཊ་ཛཿ ༀ་ཨཱཿཧཱུྃ་ཀཱ་ཡ་ཝཱ་ཀ་ཙིཏྟ་བཛྲ་ཛྙཱ་ན་ཨཱ་བེ་ཤ་ཡ། ༀ་ཨཱཿཧཱུྃ་མཎྜ་ལ་སིདྡྷི་ཧཱུྃ། ཀཱི་ལི་ཀཱི་ལ་ཡ། ཀྲོ་ཏ་ཀྲོ་ཏི་ཧ་ཧེ་ཕཊ། སཾ་ཧ་ར་ཎ་ཧཱུྃ། མ་ཧཱ་ས་ན་ས་མ་ཡ་ཧོཿ ཧཱུྃ་ཧཱུྃ་བཛྲ་གྷཎྜ་བཛྲ་ཀཱི་ལི་ཀཱི་ལ་ཡ། སརྦ་བིག་ནན་བཾ་ཧཱུྃ་ཧཱུྃ་ཕཊ། དཱིཔྟ་ཙཀྲ་ཧ་ན་ཧ་ན་ཧཱུྃ་ཕཊ། མ་ཧཱ་བོ་དྷི་ཙིཏྟ་མཎྜ་ལ་ཧཱུྃ་ཕཊ། ཡབ་ཡུམ་འདོད་ཆགས་ང་རོ་བརྗོད། །བྱིན་གཉིས་དམ་དུ་རབ་འཁྱུད་དེ། །ལག་པ་དམ་འཁྱུད་མ་མཆུ་གཞིབས། །རྡོ་རྗེའི་དམ་ཚིག་གླུ་ཡིས་བསྐུལ། །ཧཱུྃ། སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་རྡོ་རྗེའི་ཆོས་དབྱིངས་ལས། །འབར་བའི་ཁྲོ་བོ་མི་བཟད་པའི། །སྐུ་ཡི་དབྱིག་ཏུ་སྲས་བསྐྱེད་ཅིག །ཧཱུྃ། སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་འཁོར་ལོའི་ཆོས་དབྱིངས་ལས། །འཁོར་ལོའི་ཁྲོ་བོ་མི་བཟད་པའི། །སྐུ་ཡི་དབྱིག་ཏུ་སྲས་བསྐྱེད་ཅིག །ཧཱུྃ། སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་རིན་ཆེན་ཆོས་དབྱིངས་ལས། །རིན་ཆེན་ཁྲོ་བོ་མི་བཟད་པའི། །སྐུ་ཡི་དབྱིག་ཏུ་སྲས་བསྐྱེད་ཅིག །ཧཱུྃ། སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་པདྨའི་ཆོས་དབྱིངས་ལས། །པདྨའི་ཁྲོ་བོ་མི་བཟད་པའི། །སྐུ་ཡི་དབྱིག་ཏུ་སྲས་བསྐྱེད་ཅིག །ཧཱུྃ། སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་རལ་གྲིའི་ཆོས་དབྱིངས་ལས། །རལ་གྲིའི་ཁྲོ་བོ་མི་བཟད་པའི། །སྐུ་ཡི་དབྱིག་ཏུ་སྲས་བསྐྱེད་ཅིག །ཅེས་བདག་ཉིད་རྩ་བའི་དཀྱིལ་འཁོར་ལ་བསྐུལ་ནས། ཕུར་པ་རྫས་ཀྱི་དཀྱིལ་འཁོར་སྲས་ཀྱི་རང་བཞིན་དུ་བསྐྱེད་པ་ནི། དེ་བརྗོད་བདེ་བའི་རྦ་རླབས་ཀྱིས། །ཡི་གེ་འཇོམས་བྱེད་སྒྲ་ཡིས་བསྐྱེད། །ཨཱོཾ་བཛྲ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུཾ་ཧཱུཾ་ཕཊ། ཨཱོཾ་བུདྡྷ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུཾ་ཧཱུཾ་ཕཊ། ཨཱོཾ་རཏྣ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུཾ་ཧཱུཾ་ཕཊ། ཨཱོཾ་པདྨ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུྃ་ཧཱུྃ་ཕཊ། ཨཱོཾ་ཀརྨ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུྃ་ཧཱུྃ་ཕཊ། སྲས་མཆོག་རྡོ་རྗེ་ཕུར་པ་ནི། །ཡུམ་གྱི་བྷ་གར་སྐུ་གསུམ་རྫོགས། །བཛྲ་ས་མ་ཡ་ཛཿ དེ་བརྗོད་ཡབ་ཀྱི་ཕྱག་གིས་བླངས། །ཕྱག་ནི་རིགས་ལྔ་ཡབ་ཡུམ་བཅུ། །ས་མ་ཡ་ཧོཿ ས་མ་ཡ་སྟྭཾ། བདེ་བའི་རླབས་ཀྱིས་དབང་བཞི་བསྐུར། །ༀ་བཛྲ་ཀཱི་ལི་ཀཱི་ལ་ཡ་ཨཱ་ཝེ་ཤ་ཡ་ཧཱུྃ་ཕཊ། རིགས་ལྔའི་དབུ་ཡི་གཙུག་ཏོར་ཅན། །རྡོ་རྗེ་རིན་ཆེན་པདྨ་ལས། །དེ་བཞིན་རིགས་ཀྱི་སྲས་མཆོག་ལྔ། །སྟོད་ནི་གཙོ་བོ་ཡབ་འདྲ་ལ། །སྨད་ནི་ཆུ་སྲིན་ཕུར་པའི་དབལ། །དུས་མཐའི་མེ་ལྕེ་འུར་འུར་འབར། །སྐུ་གཅིག་ངང་ལ་སྐུ་གསུམ་རྫོགས། །རྒྱ་མདུད་ནང་ནས་སྔགས་ཀྱི་སྒྲ། །འབྲུག་སྟོང་ལྟ་བུར་ལྡིར་ཞིང་སྒྲོགས། །ཆུ་སྲིན་ཁ་ནང་མེ་ལྕེ་འོད། །གློག་ལྟར་འཁྱུད་ཅིང་སྟོང་གསུམ་གསལ། །སྡིག་སྦྲུལ་སྦལ་ལྕོང་ཆོ་འཕྲུལ་འགྱེད། །སྟོང་གསུམ་གང་ཞིང་ཀླུ་རྣམས་འདུལ། །ཐུགས་ཀ་དཔལ་བེའི་དཀྱིལ་འཁོར་ན། །བཞི་བཅུ་རྩ་བདུན་ལྷ་ཚོགས་དང་། །དབུ་ལ་རིགས་ལྔ་ཁྲག་འཐུང་རྫོགས། །དཀྱིལ་འཁོར་ཡོངས་རྫོགས་བདག་ཉིད་ཅན། །དགྲ་སྟྭ་གཡས་ལ་རང་རྟགས་གཡོན། །བར་པ་ཁ་ཊྭཱཾ་གཏུན་ཤིང་དང་། །ཐ་མ་རི་རབ་ཕུར་བུ་འདྲིལ། །རྒྱུད་ལྔ་ཡེ་ཤེས་ལྔ་རུ་སྒྲོལ། །དུག་ལྔ་རྩད་ནས་གཅོད་པར་བྱེད། །སངས་རྒྱས་འདུས་པ་ཐམས་ཅད་ཀྱི། །སྐུ་གསུང་ཐུགས་སུ་བྱིན་གྱིས་བརླབས། །ཨཱོཾ་བུདྡྷ་ཀཱི་ལི་ཀཱི་ལ་ཡ་ཀཱ་ཡ་བཛྲ་ནན། ཛྭ་ལ་ཛྭ་ལ་པྲ་ཛྭ་ལ་པྲ་ཛྭ་ལ། སྥུ་ཊ་སྥུ་ཊ་སརྦ་ན་ས་པ་ན་ཡེ་ཧཱུྃ་ཕཊ། ཨཱོཾ་པདྨ་ཀཱི་ལི་ཀཱི་ལ་ཡ་ཝཱ་ཀྐ་བཛྲ་ནན། སརྦ་དུཥྚཾ་ཧྲཱིཿ ཤོདྷ་ཡ་ཧཱུྃ་ཕཊ། ཨཱོཾ་བཛྲ་ཀཱི་ལི་ཀཱི་ལ་ཡ་བཛྲ་ཙིཏྟ་ནན། ཙྪིནྡྷ་ཙྪིནྡྷ་ཧཱུྃ་ཕཊ། ལུས་ཀྱི་བ་སྤུའི་བུ་ག་ཀུན། །ཁྲོ་ཆུང་ཉིད་ཀྱིས་རབ་ཏུ་གཏམས། །ཨཱོཾ་བཛྲ་ཀཱི་ལི་ཀཱི་ལ་ཡ། བེ་ཏཱ་ལི་མཎྜ་ལ་རཀྵ་རཀྵ་ཧཱུྃ་ཕཊ། མ་ཧཱ་རཀྟ་ཛྭ་ལ་ནི་ཧཱུྃ་ཕཊ། ལུས་ཀྱི་བཀྲག་དང་ལྡན་པ་དང་། །བ་སྤུའི་བུ་ག་རྡོ་རྗེས་གཏམས། །ཨཱོཾ་བཛྲ་ཀཱི་ལི་ཀཱི་ལ་ཡ། མ་གུ་ཏ་ལ་པྲ་ཏ་ལ་ཧཱུྃ་ཕཊ། ཨཱོཾ། བུདྡྷ་ཐམས་ཅད་འདུས་པའི་སྐུར། །ཁྲོ་བོ་དུ་མས་བྱིན་གྱིས་བརླབས། །ཁམས་གསུམ་གདུག་པ་བསྒྲལ་བའི་ཕྱིར། །གདུལ་བྱའི་གདན་ལ་བཞུགས་སུ་གསོལ། །ས་མ་ཡ་ཏིཥྛ། ཞེས་ཕུར་པ་རྫས་ཀྱི་དཀྱིལ་འཁོར་དང་གཉིས་སུ་མེད་པར་བསམ་མོ། །དེ་ནས་ཕྱོགས་བཅུ་ཁྲོ་བོའི་དཀྱིལ་འཁོར་བསྐྱེད་པ་ནི། མཚན་སྔགས་ཀྱིས་ཁྲོ་བཅུ་སོ་སོ་དང་། ཧཱུྃ་གིས་ཡུམ། གརྫ་ལ་སོགས་པ་གཉིས་གཉིས་ལས་ཁྲ་ཐབས་རྣམས་བྱུང་། ཧཱུྃ་ཕཊ་ཀྱིས་བསྐུལ་བས། གཙོ་བོ་ཡབ་ཡུམ་གྱི་སྦྱོར་མཚམས་ལས་ཐོན་ཏེ་ཕྱོགས་སྐྱོང་གི་གདན་ལ་འཁོད་པར་བསམས་ལ། དེ་ནས་ཕྱོགས་སྐྱོང་ཚར་གཅད་ཕྱིར། ཧཱུྃ་ཧཱུྃ་ཧཱུྃ། ཧཱུྃ་སྒྲ་དྲག་པོས་སྙོམས་པར་ཞུགས། །བྱང་ཆུབ་སེམས་ཀྱི་རང་བཞིན་ནི། །ཁྲོ་བོར་གྱུར་པས་ཕྱོགས་སྐྱོང་བཅུ། །སྡེ་དང་བཅས་པ་ཚར་བཅད་དེ། །སྲོག་སྙིང་ཕྲོགས་ནས་སྟན་དུ་བཏིང་། །ༀ་ཨིནྡྲ་ཡེ། ཨགྣ་ཡེ། ཡ་མ་ཡེ། ནི་ཪྱཱྀ་ཏི། ཝཱ་རུ་ཎ། བཱ་ཡ་བེ། ཀུ་བེ་ར། ཨི་ཤ་ན། སཱུ་རྱ་ཙནྡྲ། པྲྀ་ཐི་བཱི་བྷྱ་ཏི་ར་བཾ་ཛཿཧཱུྃ་བཾ་ཧོཿ དེ་ནས་འདོད་ཆགས་ཆེན་པོ་ཡིས། །གསང་བའི་པདྨ་རྒྱས་མཛད་ནས། །བྱང་ཆུབ་སེམས་ཀྱི་འོད་ཟེར་དག །གསང་བའི་དབྱིངས་སུ་བསྟིམ་པར་བྱ། །བྱང་ཆུབ་སེམས་ཀྱི་སྒོ་ང་ལས། །ཁྲོ་བོའི་དཀྱིལ་འཁོར་ཐམས་ཅད་ནི། །ཐུགས་ཀ་ནས་ནི་ཕྱུང་གྱུར་ཏེ། །ཁྲོས་པའི་དཀྱིལ་འཁོར་ཉིད་དུ་བཞུགས། །ཨཱོཾ་བཛྲ་ཀྲོ་དྷ་ཧཱུྃ་ཀཱ་ར་ཧཱུྃ། གརྫ་ཧཱུྃ་ཕཊ། གརྫ་ཧཱུྃ་ཕཊ། སྟེང་ཕྱོགས་ཉི་ཟླའི་གདན་སྟེང་དུ། །ཁྲོ་བོ་རྡོ་རྗེ་ཧཱུྃ་མཛད་ནི། །ཞལ་གཡས་སྔོ་ཞིང་གཡོན་པ་དམར། །དབུས་ཞལ་སྐུ་ནི་དཀར་བའོ། །རྡོ་རྗེ་དུང་ཁྲག་རིག་མ་འཁྱུད། །རྡོ་རྗེ་ཐོ་བ་གཡས་པ་སྟེ། །མདའ་གཞུ་སྤུ་གྲི་གཡོན་པའོ། །ཡུམ་ཆེན་རྡོ་རྗེ་སྒྲ་འབྱིན་མ། །སྤྲུལ་པ་ཕག་དང་སྨིག་བུའི་མགོ། །ཨཱོཾ་བཛྲ་ཀྲོ་དྷ་བི་ཛ་ཡ་ཧཱུྃ། ཧ་ན་ཧཱུཾ་ཕཊ། ཧ་ན་ཧཱུྃ་ཕཊ། ཤར་རྩིབས་དྲི་ཟའི་གདན་སྟེང་དུ། །ཁྲོ་བོ་རྡོ་རྗེ་རྣམ་པར་རྒྱལ། །དབུས་དཀར་གཡས་སྔོ་ལྗང་སེར་གཡོན། །དང་པོ་རྡོ་རྗེ་དུང་ཆེན་ཏེ། །བར་པ་རྩེ་གསུམ་འཁོར་ལོ་འཕྱར། །ཏི་ར་བྱ་རྒོད་ཐ་མ་འཛིན། །བྲག་གི་སྟེང་ན་བརྒྱ་བྱིན་གནོན། །རྡོ་རྗེའི་རྒྱན་རྣམས་རྫོགས་པར་བཏགས། །ཡུམ་ཆེན་རྡོ་རྗེ་སྙེམས་མ་དང་། །སྤྲུལ་པ་སྟག་དང་བླ་རྒོད་མགོ། །ཨཱོཾ་བཛྲ་ཀྲོ་དྷ་ནི་ལ་དཎྜ་ཧཱུྃ། ད་ཧ་ཧཱུྃ་ཕཊ། ད་ཧ་ཧཱུྃ་ཕཊ། ཤར་ལྷོ་མེ་ལྷའི་གདན་སྟེང་དུ། །དབྱུག་པ་སྔོན་པོ་སྔོ་སྐྱ་དབུས། །གཡས་དཀར་གཡོན་ནི་དམར་སྐྱ་སྟེ། །རྡོ་རྗེ་དུང་ཆེན་དབྱུག་པ་མེ། །ཏི་རའི་དབྱུག་པ་ཁ་ཡིས་མཛེས། །འབར་བ་ཞབས་དྲུག་དྲང་སྲོང་གནོན། །ཡུམ་ཆེན་རྡོ་རྗེ་སྡེར་མོ་དང་། །སྤྲུལ་པ་གཡག་དང་བྱ་རོག་མགོ། །ཨཱོཾ་བཛྲ་ཀྲོ་དྷ་ཡ་མནྟ་ཀ་ཧཱུྃ། པ་ཙ་ཧཱུྃ་ཕཊ། པ་ཙ་ཧཱུྃ་ཕཊ། ལྷོ་ཕྱོགས་གཤིན་རྗེའི་གདན་སྟེང་དུ། །གཤིན་རྗེའི་རྒྱལ་པོ་སྔོན་པོ་སྟེ། །སྔོ་སྐྱ་ལྗང་ནག་གཡོན་གྱི་དབུ། །དུང་ཁྲག་ཐོད་དབུག་དགྲ་སྟྭ་བསྣམས། །ཏི་ར་བྱ་རོག་ཐ་མར་མཛེས། །འཇིགས་བདག་སྟེང་ན་འཇིགས་པར་བསྟན། །ཡུམ་ཆེན་དུར་ཁྲོད་བདག་མོ་དང་། །སྤྲུལ་པ་ཤ་བ་འུག་པའི་མགོ། །ཨཱོཾ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ། བནྡྷ་ཧཱུྃ་ཕཊ། བནྡྷ་ཧཱུྃ་ཕཊ། ལྷོ་ནུབ་སྲིན་པོའི་གདན་སྟེང་དུ། །མི་གཡོ་ལྗང་སྔོན་འབར་བའི་ཞལ། །སྔོན་པོ་སྨུག་ནག་གཡོན་གྱི་དབུ། །དུང་ཁྲག་རལ་གྲི་ཞགས་པས་བརྒྱན། །ཏི་ར་འུག་པས་རྒྱན་པར་མཛེས། །བདེན་བྲལ་བཙིར་བར་མཛད་པ་སྟེ། །རྒྱན་རྣམས་རྫོགས་པར་ཡང་དག་བཏགས། །ཡུམ་ཆེན་རྡོ་རྗེ་གཏུན་ཁུང་དང་། །སྤྲུལ་པ་གཟིག་དང་ཁྭ་ཏའི་མགོ། །ཨཱོཾ་བཛྲ་ཀྲོ་དྷ་ཧྱ་གྲཱི་ཝ་ཧྲཱིཿ ཧུ་ལུ་ཧཱུྃ་ཕཊ། ཧུ་ལུ་ཧཱུྃ་ཕཊ། ནུབ་ཕྱོགས་ཀླུ་ཡི་གདན་སྟེང་དུ། །རྟ་སྐད་དམར་པོ་གཡས་དཀར་པོ། །གཡོན་ནི་སྔོན་པོ་རྣམ་པར་མཛེས། །དུང་ཁྲག་ཞགས་པ་སྤུ་གྲི་ཅན། །ཏི་ར་མཁའ་ལྡིང་ཐ་མར་མཛེས། །དུག་གི་སྟེང་ན་ཞབས་གཉིས་བརྐྱང་། །རྡོ་རྗེ་རྟ་ཡི་རྒྱལ་པོ་བཏགས། །ཡུམ་ཆེན་རྡོ་རྗེ་གཏུམ་མོ་དང་། །སྤྲུལ་པ་བྱི་ལ་པུ་ཤུད་མགོ། །ཨཱོཾ་བཛྲ་ཀྲོ་དྷ་ཨ་པ་ར་ཛི་ཏ་ཧཱུྃ། ཏིཥྛ་ཧཱུྃ་ཕཊ། ཏིཥྛ་ཧཱུྃ་ཕཊ། ནུབ་བྱང་རླུང་ལྷའི་གདན་སྟེང་དུ། །གཞན་ལས་རྒྱལ་བ་དམར་སྐྱ་སྟེ། །སེར་པོ་ལྗང་གུ་གཡོན་གྱི་ཞལ། །དུང་ཁྲག་དཔལ་མདའ་རྔ་ཡབ་ཅན། །ཏི་ར་སྐྱེ་ཀ་ཡང་དག་འཛིན། །རླུང་གི་སྟེང་ན་ཞབས་བརྐྱང་སྟེ། །འབར་བའི་རྒྱན་རྣམས་ཚང་བར་བཏགས། །ཡུམ་ཆེན་རྡོ་རྗེ་མདའ་སྙེམས་མ། །སྤྲུལ་པ་སྤྱང་ཀི་ཁྲ་ཡི་མགོ། །ཨཱོཾ་བཛྲ་ཀྲོ་དྷ་ཨ་མྲི་ཏ་ཀུཎྜ་ལི་ཧཱུྃ། ཙྪིནྡྷ་ཧཱུྃ་ཕཊ། ཙྪིནྡྷ་ཧཱུྃ་ཕཊ། བྱང་ཕྱོགས་གནོད་སྦྱིན་གདན་སྟེང་དུ། །བདུད་རྩི་འཁྱིལ་བ་ལྗང་ནག་མདོག །སེར་པོ་དུད་ཁ་གཡོན་གྱི་ཞལ། །དུང་ཁྲག་དབྱུག་ཏོ་རྒྱ་གྲམ་སྟེ། །ཏི་རའི་དབྱུག་པ་པུ་ཤུད་ཅན། །གསུས་པ་འཕྱངས་པ་རྣམ་པར་བརྫིས། །འབར་བ་ཆེན་པོ་རྣམ་པར་བཏགས། །ཡུམ་ཆེན་རྡོ་རྗེ་རླུང་འབྱིན་དང་། །སྤྲུལ་པ་སེང་གེ་ཕ་ཝང་མགོ། །ཨཱོཾ་བཛྲ་ཀྲོ་དྷ་ཏྲཻ་ལོཀྱ་བི་ཛ་ཡེ་ཧཱུྃ། བིནྡྷ་ཧཱུྃ་ཕཊ། བིནྡྷ་ཧཱུྃ་ཕཊ། བྱང་ཤར་དབང་ལྡན་གདན་སྟེང་དུ། །ཁམས་གསུམ་ཀུན་ལས་རྒྱལ་བ་ནི། །གསེར་གྱི་མདོག་འདྲ་གཡས་དཀར་ཏེ། །གཡོན་གྱི་དབུ་ནི་ལྗང་དགུའོ། །དུང་ཁྲག་ལྕགས་ཀྱུ་རལ་གྲི་གཡས། །རིན་ཆེན་པདྨ་གཡོན་ན་བསྣམས། །ཡུམ་ཆེན་རྡོ་རྗེ་གསོད་མ་དང་། །སྤྲུལ་པ་དོ་མ་དང་སྲེ་མོང་མགོ། །ཨཱོཾ་བཛྲ་ཀྲོ་དྷ་མ་ཧཱ་པ་ལ་ཧཱུྃ། སྥོ་ཊ་ཧཱུྃ་ཕཊ། སྥོ་ཊ་ཧཱུྃ་ཕཊ། འོག་ཕྱོགས་ས་བདག་གདན་སྟེང་དུ། །རྡོ་རྗེ་ཁྲོ་བོ་སྟོབས་པོ་ཆེ། །དབུས་ནག་གཡས་དཀར་གཡོན་པ་དམར། །རྩ་ཕྱག་རྡོ་རྗེ་དུང་ཁྲག་སྟེ། །གཡས་གཉིས་རྡོ་རྗེ་ཞགས་པ་དང་། །གཡོན་ནི་གཤོལ་དང་གཏུན་ཤིང་འཛིན། །ཀུན་ཀྱང་རྡོ་རྗེའི་གཤོག་པ་གདེངས། །ཡུམ་ཆེན་རྡོ་རྗེ་བསྐྱོད་མ་དང་། །སྤྲུལ་པ་དྲེད་དང་བྱི་བའི་མགོ། །ཡུམ་རྣམས་གཡས་པ་ དྲིལ་བུ ་དང་། །གཡོན་པ་དུང་ཆེན་སྟོབ་ཅིང་འཁྱུད། །སྟག་དང་གཟིག་གི་ཤམ་ཐབས་ཅན། །མཆེ་བ་ཅན་དང་གཤོག་པ་ཅན། །ཕྲ་མེན་མགོ་བརྙན་ཉི་ཤུ་ནི། །རྩིབས་མཆན་རྣམས་ལ་གཉིས་གཉིས་གནས། །ཞལ་གཅིག་ཕྱག་གཉིས་མདོག་ནག་གཟུགས། །སྤྲུལ་དང་ཐོད་པས་རབ་ཏུ་བརྒྱན། །ཕུར་པ་ལྕགས་ཀྱུ་ཕྱག་ན་བསྣམས། །སྐྲ་བརྫེས་སྤྱན་དམར་མཆེ་བ་གཙིགས། །དུས་མཐའི་འོད་ཟེར་དྲྭ་བས་འཁྲུགས། །རྣམ་འགྱུར་མ་ངེས་ཅིར་ཡང་སྟོན། །དེས་ནས་བཀའ་བསྡོད་བསྐྱེད་པ་ནི། ཁྱམས་ཀྱི་ཤར་ལྷོ་ནུབ་བྱང་བཞིར། །ཕྲིན་ལས་བཞི་ཡི་བདག་ཉིད་ཅན། །བྷྱོ་ཡིག་བདུན་བདུན་སྤྲོས་པ་ནི། །ཡོངས་གྱུར་དབང་མོ་ཉི་ཤུ་བརྒྱད། །གནས་འགྱུར་གཉིས་པ་གདོང་ཅན་གཟུགས། །དྲག་ཤུལ་ཆེན་པོའི་སྟབས་ཀྱིས་བཞུགས། །སྒོ་མ་བཞི་བསྐྱེད་པ་ནི། ཨཱོཾ་བཛྲ་ཀཱི་ལི་ཀཱི་ལ་ཡ་བི་ད་ཡ་བི་ད་ཡ་ཧཱུྃ་ཕཊ། ཨཱོཾ་བཛྲ་ཀཱི་ལི་ཀཱི་ལ་ཡ་ན་མཿས་མནྟ་ཧྲིཾ་ཧྲིཾ་ཧཱུྃ་ཕཊ། ཨཱོཾ་བཛྲ་ཀཱི་ལི་ཀཱི་ལ་ཡ་པྲ་སུ་རུ་པྲ་སུ་རུ་ཧཱུྃ་ཕཊ། ༀ་བཛྲ་ཀཱི་ལི་ཀཱི་ལ་ཡ་མཱ་ར་ཡ་མཱ་ར་ཡ་ཧཱུྃ་ཕཊ། དྲོད་གཤེར་ལས་སྐྱེས་སྒོ་མ་བཞི། །ཤར་ཕྱོགས་དྲི་ཟའི་གདན་སྟེང་དུ། །སྐྱེ་ཀའི་མགོ་ཅན་ལྕགས་ཀྱུ་མ། །ལྷོ་ཕྱོགས་གྲུལ་བུམ་གདན་སྟེང་དུ། །པུ་ཤུད་མགོ་ཅན་ཞགས་པ་མ། །ནུབ་ཕྱོགས་ཆུ་བདག་གདན་སྟེང་དུ། །སྲིན་བྱའི་མགོ་ཅན་ལྕགས་སྒྲོག་མ། །བྱང་ཕྱོགས་གནོད་སྦྱིན་གདན་སྟེང་དུ། །ཁྲ་ཡི་མགོ་ཅན་ དྲིལ་བུ ་མ། །འདི་བཞི་ཞལ་གཅིག་ཕྱག་གཉིས་པ། །དཀར་སེར་དམར་དང་ལྗང་བའི་མདོག །གཟིག་དང་ཐོད་སྦྲུལ་རྒྱན་དུ་བྱས། །བསྐུམ་ཞིང་བརྐྱང་བའི་ཞབས་ཀྱིས་མནན། །ཕྱག་གཡོན་ཕུར་པ་འདེབས་པར་མཛད། །མེ་དཔུང་དཀྱིལ་ན་ཁྲོ་ཚུལ་བཞུགས། །རྩ་བའི་ལྷ་ནི་ལྔ་བཅུ་གཉིས། །དྲག་པོའི་ཚུལ་གྱིས་ཞེ་སྡང་འཇོམས། །དེ་བཞིན་ང་རྒྱལ་ཕྲག་དོག་དང་། །འདོད་ཆགས་གཏི་མུག་གནས་རིགས་དྲུག །རྟེན་ཅིང་འབྲེལ་འབྱུང་བཅུ་གཉིས་པོ། །རྣམ་པར་གསོད་བྱེད་ཁྲོ་བོའི་ཚོགས། །ཏིང་ངེ་འཛིན་ལས་སྤྲུལ་པས་ན། །བགྲང་གིས་མི་ལང་གཞལ་དུ་མེད། །རྩེ་མོའི་དགོངས་པ། སྲིད་པའི་རྟོག་པ་འཇོམས་ལ་བརྩོན། །མུ་རན་ལ་ནི་ཕུར་སྲུང་སྟེ། །ཨེ་ཡཾ་མ་ཡ་བཞི་ཉིད་ལས། །ཤྭ་ན་མུ་ཁ་བཞི་པོ་གསལ། །ཛ་ཡིག་བཞི་ལས་ས་བདག་བཞི། །བྷྱོ་ཡིག་བཞི་ལས་བདག་ཉིད་བཞི། །མཐུ་དང་རྫུ་འཕྲུལ་གློག་ལས་མྱུར། །བསྟན་པ་བསྲུང་ཞིང་ཉམས་པ་བདུན། །ཞེ་ལ་གནག་པའི་སྟོབས་ཀྱིས་སྒྲོལ། །མདོར་ན་འཁོར་དང་མྱང་འདས་ཀུན། །དཔལ་ཆེན་དཀྱིལ་འཁོར་གཅིག་ཏུ་རྫོགས། །དེ་ལྟར་བརྟེན་པའི་དཀྱིལ་འཁོར་གཙོ་དང་འཁོར་གྱི་རྣམ་རོལ་དུ་བསྐྱེད་པ་ལ་བསྙེན་པ་ཞེས་བྱ་སྟེ། རྡོ་རྗེ་འབར་བ་ལས། གཙོ་དང་འཁོར་དང་རང་བཞིན་ནི། །རང་རང་བསྙེན་པའི་གཟུགས་འཛིན་ཏོ། །ཞེས་སོ། །བསྐྱེད་གཞི་རང་གི་ཕུང་པོ་ཁམས་དང་སྐྱེ་མཆེད་སྐྲ་དང་བ་སྤུའི་རྣམས་གྲངས་ཡན་ཆོད་གདན་གསུམ་ཚང་བའི་དཀྱིལ་འཁོར་གྱི་རང་བཞིན་དུ་གནས་པ། སྐབས་འདིར་རྡོ་རྗེ་ཕུར་པའི་སྐུའི་རྣམ་པ་གོ་མཚམས་མེད་པར་གྱུར་པས་གཏམས་པར་བསམ་པ་ནི་ཉེ་བར་བསྙེན་པ་སྟེ། ལུས་ཀྱི་རྟགས་པ་ལ་སོགས་པ། །དམ་པའི་ཁྲོ་བོ་བྱིན་རླབས་པ། །ཉེས་བར་གྱུར་པ་ཞེས་བྱ་སྟེ། །ཞེས་སྐྱེད་བྱེད་གྲུབ་པའི་རྒྱུ་མ་ནོར་བ་བདག་ཉིད་ལྷར་གསལ་བའི་སྐུ་གསུང་ཐུགས་རྡོ་རྗེ་གསུམ་གྱི་ངོ་བོར་བྱིན་གྱིས་བརླབས་པས་ཁྱད་གཞི་ངེས་པར་བྱས་ནས། དེ་དེ་ལྟར་དུ་བྱིན་གྱིས་སློབ་པ་དངོས་ནི་རང་སྔགས་དང་བསྟུན་ནས་རྡོ་རྗེ་རྩེ་ལྔ་པའི་ཕྱག་རྒྱ་གནས་སོ་སོར་གཏུགས་ཤིང་། རྡོ་རྗེ་འབར་བ་ལས། རྔ་མེད། སྙིང་ག་མགྲིན་པ་སྤྱི་བོ་རུ། །ཟླ་བའི་དཀྱིལ་འཁོར་བསམ་ནས་ནི། །རྡོ་རྗེ་པདྨ་འཁོར་ལོ་དག །ཧཱུྃ་ཨཱཿཨཱོཾ་གྱིས་མཚན་པ་ལས། །ཐུགས་ཀྱི་རྡོ་རྗེ་ལ་སོགས་བསྒོམ། །དེ་ཉིད་ཤེས་རབ་སྐུ་རྒྱས་མ། །ལྷ་མོ་རྣམས་ཀྱི་འོད་ཚོགས་ཀྱིས། །དུས་གསུམ་ཕྱོགས་རྣམས་ཁྱབ་པ་ཡིས། །མ་ལུས་སངས་རྒྱས་དྲངས་མཆོད་ནས། །བཀྲ་ཤིས་དོན་བྱེད་རྣམས་ལ་ནི། །རང་གི་ཐུགས་སྲོག་རྡོ་རྗེ་ཡིས། །དེ་ལས་བྱིན་བརླབས་བསྐུལ་བར་བྱ། །རྡོ་རྗེ་ཐུགས་འཛིན་དཔལ་དང་ལྡན། །རྡོ་རྗེ་མི་ཕྱེད་གསུམ་བྱེད་པ། །བྱིན་གྱིས་བརླབས་ཀྱི་གནས་བྱས་ཏེ། །རྡོ་རྗེ་ཐུགས་ཀར་ལྡན་པར་བྱ། །རྡོ་རྗེ་མི་བྱེད་གསུམ་བསྒོམ་པས། །ཕྱོགས་བཅུར་བཞུགས་པའི་སངས་རྒྱས་རྣམས། །དེ་ལ་ཐུགས་ལས་བྱུང་བ་ཡིས། །བྱིན་གྱིས་བརླབས་ཀྱི་གནས་མཛད་དོ། །རྡོ་རྗེའི་ཕྱག་རྒྱ་སྙིང་གར་བཞག་ལ། ཨཱོཾ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། རྡོ་རྗེ་གསུང་འཛིན་དཔལ་དང་ལྡན། །རྡོ་རྗེ་མི་ཕྱེད་གསུམ་བྱེད་པ། །བྱིན་གྱིས་བརླབས་ཀྱི་གནས་བྱས་ཏེ། །རྡོ་རྗེ་གསུང་དང་ལྡན་པར་བྱ། །རྡོ་རྗེ་མི་ཕྱེད་གསུམ་བསྒོམ་པས། །ཕྱོགས་བཅུར་བཞུགས་པའི་སངས་རྒྱས་རྣམས། །དེ་ལ་གསུང་ལས་བྱུང་བ་ཡིས། །བྱིན་གྱིས་བརླབས་ཀྱི་གནས་མཛད་དོ། །ཕྱག་རྒྱ་མགྲིན་པར་བཞག་ལ། ཨཱོཾ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། རྡོ་རྗེ་སྐུ་འཛིན་དཔལ་དང་ལྡན། །རྡོ་རྗེ་མི་ཕྱེད་གསུམ་བྱེད་པ། །བྱིན་གྱིས་བརླབས་ཀྱི་གནས་བྱས་ཏེ། །རྡོ་རྗེ་སྐུ་དང་ལྡན་པར་བྱས། །རྡོ་རྗེ་མི་ཕྱེད་གསུམ་བསྒོམ་པས། །ཕྱོགས་བཅུར་བཞུགས་པའི་སངས་རྒྱས་རྣམས། །དེ་ལ་སྐུ་ལས་བྱུང་བ་ཡིས། །བྱིན་གྱིས་བརླབས་ཀྱི་གནས་མཛད་དོ། །ཕྱག་རྒྱ་སྤྱི་བོར་བཞག་ལ། ཨཱོཾ་སརྦ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༈ བསྒྲུབ་པ་ཆེན་པོ་ནི་དབང་བསྐུར་བ་ཉིད་ལ་བརྗོད་དེ། བསྒྲུབ་པ་ཆེན་པོའི་མཐའ་རུ་ནི། །སངས་རྒྱས་རྣམས་ཀྱིས་དབང་བསྐུར་ཏེ། །ཞེས་པས་འདིར་ཕུར་པའི་སྒོས་ཆོས་དང་བཅས་པའི་དབང་དོན་ངེས་པར་བྱ་བ་ནི། ༈ སྙིང་གར་བྷྲཱུྃ་ལས་རིན་པོ་ཆེའི་གཞལ་མེད་ཁང་སྒོ་གཅིག་པའི་སྒོ་སྲུང་རྟ་མགྲིན་ཡབ་ཡུམ་དུ་གནས་པའི་ནང་དུ་ཧཱུྃ་ལས་ཡེ་ཤེས་སེམས་དཔའ་ཚོན་གང་བ་གཅིག་བསམ་ལ། ཡེ་ཤེས་དཔའ་བོའི་ཐུགས་ཀ་ཡི། །འོད་ཀྱིས་མགོན་པོ་རྣམས་བསྐུལ་ནས། །དེ་དག་ཐུགས་ལས་བྱུང་བ་ཡི། །རིག་མས་བདུད་རྩི་བུམ་ཆུ་ཡིས། །དབང་བསྐུར་བྱས་ཏེ་ཐིམ་གྱུར་ནས། །རང་སྔགས་རྡོ་རྗེ་ཅན་གྱིས་གཟུངས། །དབུ་རྒྱན་རྣམས་ལ་རིགས་ལྔ་དང་། །རིགས་ཀྱི་བདག་པོ་རྣམས་ཀྱིས་བརྒྱན། །ཡེ་ཤེས་སེམས་དཔའི་ཐུགས་ཀའི་འོད་ཀྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ་བས། དེ་རྣམས་ཀྱི་ཐུགས་ཀ་ནས་བྱུང་བའི་རྡོ་རྗེ་བཙུན་མོའི་བྷ་ག་ལ་གདན་གསུམ་ཚང་བའི་དཀྱིལ་འཁོར་རྫོགས་པ་མདུན་གྱི་ནམ་མཁའ་ལ་བྱོན། ཨཱོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོཉ་ཧཾ། ཞེས་བསྐུལ་བས་ལྷ་ཚོགས་རྣམས་བདེ་སྟོང་གི་རོས་ཚིམས་རྗེས་ཆགས་ཀྱི་མེས་འོད་དུ་ཞུ་བའི་བདུད་རྩི་བུམ་པའི་ཆུས་མགོ་བོའི་གནས་ལྔར་དབང་བསྐུར། ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་གྱུར་པ་ནས་བཟུང་སྟེ་ཁམས་དང་སྐྱེ་མཆེད་ཐམས་ཅད་ལྷ་ཡི་རང་བཞིན་དུ་རྣམ་པར་དག །དབང་བཞིའི་དམ་ཚིག་ལས་བྱུང་བའི་དགའ་བ་བཞིའི་ཡེ་ཤེས་ཉམས་སུ་མྱོང་། ཆུ་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་རྡོ་རྗེ་མི་བསྐྱོད་པ་དབུས་སུ་བཞུགས་པའི་རིགས་ལྔས་དབུ་བརྒྱན་པར་གྱུར་པར་བསམ་པ་ནི་དུས་གསུམ་གྱི་རྒྱལ་བ་རྣམས་ཀྱིས་དཀྱིལ་འཁོར་གསུམ་གྱི་སྲོག་ཡེ་ཤེས་སུ་དབང་བསྐུར་བ་སྟེ། ཧཱུྃ། ཐབས་ཀྱི་སྤྱོད་པའི་འགྲོ་དོན་དུ། །བྱམས་དང་སྙིང་རྗེས་གང་འདུལ་བ། །སངས་རྒྱས་ཕྲིན་ལས་རྫོགས་མཛད་པ། །དབང་དང་བྱིན་རླབས་བདག་སྩོལ་ཅིག །རྡོ་རྗེ་ཕྱི་བསྡམ་ལས་གུང་མོ་བརྐྱང་བ་མི་བསྐྱོད་པའི་དབང་རྒྱ་སྤྱི་བོར་བཞག་ལ། ཨཱོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་ནས་མཛུབ་མོ་གཉིས་བརྐྱང་བ་རྣམ་སྣང་གི་དབང་རྒྱ་དཔྲལ་བར་བཞག་ལ། ཨཱོཾ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྲིན་ལག་བརྐྱང་བ་རིན་འབྱུང་གི་དབང་རྒྱ་རྣ་ལྟག་གཡས་སུ་བཞག་ལ། ཨཱོཾ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། མཐེ་བོང་བརྐྱང་བ་སྣང་མཐའི་དབང་རྒྱ་ལྟག་པར་བཞག་ལ། ཨཱོཾ་མ་ཧཱ་པྲ་ཏྱ་བེཀྵ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མཐེའུ་ཆུང་བརྐྱང་བ་དོན་གྲུབ་ཀྱི་དབང་རྒྱ་རྣ་ལྟག་གཡོན་དུ་བཞག་ལ། ཨཱོཾ་མ་ཧཱ་ཀྲྀ་ཏ་ཨ་ནུཥྛ་ཛྙཱ་ན་བཛྲ་སྭབྷཱ་ཝ་ཨཱཏྨ་ཀོཉ་ཧཾ། སླར་ཡང་དཀྱིལ་འཁོར་གསུམ་ལས་འོད་དང་ཡི་གེ་སྤྲོས་ཏེ་སེམས་ཅན་ཐམས་ཅད་ཀྱི་ཉོན་མོངས་པའི་དུག་གཞིལ་ནས་རིགས་དྲུག་གི་ས་བོན་དུ་གྱུར་པས་སྦྱང་དུ་རུང་བར་བྱས། འབྱུང་བ་གསུམ་གྱིས་བསྲེག་གཏོར་བཀྲུས་ནས་རྡོ་རྗེ་སེམས་དཔའི་རང་བཞིན་དུ་གྱུར་པ་སྙིང་གའི་རྟ་མགྲིན་ལ་འདུས་པར་བསྒོམ་པ་ནི་དཀྱིལ་འཁོར་གསུམ་གྱིས་ཁམས་གསུམ་གྱི་སྲོག་ལ་དབང་བསྐུར་བ་ཞེས་བྱའོ། །རྟ་མགྲིན་ཡབ་ཡུམ་ཀྱང་སྦྱོར་བ་མཛད་པའི་རྐྱེན་ལས་བྱང་ཆུབ་ཀྱི་སེམས་རྒྱས་པའི་སྤྲིན་ཡེ་ཤེས་སེམས་དཔའ་ལ་ཐིམ་པས་བདེ་བའི་ཉམས་རྒྱས་བཀྲག་དང་གཟི་བྱིན་འབར། ཟག་པ་མེད་པའི་བྱང་ཆུབ་ཀྱི་སེམས་ཐུགས་རྡོ་རྗེར་ཐིམ་པས་ཡིག་འབྲུ་ཏིང་འཛིན་སེམས་དཔའ་དང་བཅས་པ་འཁོར་འདས་ཀྱི་དྭངས་བཅུད་འདུས་པའི་བཀྲག་ཏུ་འཚེར་བར་གྱུར་པ་ནི་ཡེ་ཤེས་སེམས་དཔའི་སྲོག་ལ་ལྷན་ཅིག་སྐྱེས་པའི་ཡེ་ཤེས་ཆེན་པོའི་དབང་བསྐུར་བ་ཞེས་བྱ་སྟེ། ཨཱོཾ་ཨཱཿཧཱུྃ་ཧཱུྃ་ཧཱུྃ་ཧཱུྃ། འགྲོ་དྲུག་ཉོན་མོངས་བཅིངས་པ་རྣམས། །ཧཱུྃ་གིས་དུག་ཆེན་རབ་སྦྱངས་ཏེ། །ཨ་ནྲྀ་སུ་ཏྲི་པྲེ་དུར་གྱུར། །རཾ་ཡཾ་ཁཾ་ལས་མེ་རླུང་ཆུས། །འགྲོ་བ་རབ་སྦྱངས་ཧཱུྃ་དུ་གྱུར། །ཁམས་གསུམ་ཐམས་ཅད་རྡོ་རྗེ་སེམས། །ཏིལ་གྱི་གོང་བུ་ལྟ་བུས་གང་། །ཧཱུྃ། རྟ་མགྲིན་རྒྱལ་པོ་ཡེ་ཤེས་ལ། །བསྟིམ་པས་བྱང་ཆུབ་སེམས་རྒྱས་གྱུར། །ཡབ་ཡུམ་གཉིས་མེད་སྦྱོར་བའི་སྒྲས། །ཡེ་ཤེས་ཁྲོ་བོ་སྤྱན་དྲངས་ངོ་། །གསུམ་པ་རང་བཞིན་ཡེ་ཤེས་ཀྱི་དཀྱིལ་འཁོར་དང་གཉིས་མེད་དུ་བྱ་བ་ལའང་གསུམ་ལས། དང་པོ་སྙན་མནན་པ་ནི། རྡོ་རྗེ་འབར་བ་ལས། ཕྱོགས་བཅུ་དུས་བཞི་ཐམས་ཅད་ཀྱི། །རྒྱལ་བ་སྲས་དང་བཅས་པ་ཀུན། །རྒྱ་དང་བྲལ་བའི་གཞལ་ཡས་ནས། །རང་བྱུང་དཀྱིལ་འཁོར་སྤྱན་དྲང་ངོ་། །བདག་ཉིད་ཐུགས་ཀྱི་འོད་ཟེར་གྱིས། །མཚོན་ཆ་མཆོག་གི་དྲངས་ནས་ནི། །མདུན་དུ་དཀྱིལ་འཁོར་གསལ་བར་དམིགས། །ཐ་དད་མ་ཡིན་དབྱེར་མེད་དོ། །བཅོམ་ལྡན་འདས་དཀྱིལ་འཁོར་གྱི་བདག་ཉིད་ཆེན་པོ་རྡོ་རྗེ་འགུགས་པ་ཞེས་བྱ་བ་བྱམས་པ་ཆེན་པོ་དང་། རྡོ་རྗེ་བཅིངས་པ་ཞེས་བྱ་བ་སྙིང་རྗེ་ཆེན་པོ་དང་། རྡོ་རྗེ་བསྡམས་པ་ཞེས་བྱ་བ་དགའ་བ་ཆེན་པོ་དང་། རྡོ་རྗེ་དབབ་པ་ཞེས་བྱ་བ་བཏང་སྙོམས་ཆེན་པོ་བཞིའི་ཏིང་ངེ་འཛིན་ལ་སྙོམས་པར་བཞུགས། ཨཱོཾ་བཛྲ་ཨཾ་ཀུ་ཤ་ཛཿ ཨཱོཾ་བཛྲ་པཱ་ཤ་ཧཱུྃ། ཨཱོཾ་བཛྲ་སྥོ་ཊ་བཾ། ཨཱོཾ་བཛྲ་གྷཎྜེ་ཧོཿ ཞེས་སོ་སོའི་ཕྱག་རྒྱ་ཡང་བཅའ། ཡེ་ཤེས་རྩེ་མོ་ལས། ནམ་མཁའི་དཀྱིལ་འཁོར་ཕན་ཆོད་ནས། །ནམ་མཁའི་དཀྱིལ་འཁོར་ཚུན་ཆོད་དུ། །དཀྱིལ་འཁོར་ཀུན་གྱི་ཐུན་མོང་བ། །ཅུང་ཟད་དག་གི་ཁྱད་པར་གྱིས། །སངས་རྒྱས་ཡུལ་དུ་གྲགས་པ་ཡི། །གང་འཇུག་པ་ལ་ཐོབ་པ་ཆེ། །ཞེས་ཆོས་ཉིད་བསམ་གྱིས་མི་ཁྱབ་པའི་གླུས་བསྐུལ་ནས་རང་བཞིན་ཡེ་ཤེས་ཀྱི་འཁོར་ལོ་སད་པར་བྱའོ། །གཉིས་པ་སྤྱན་དྲང་བ་ནི། སྤོས་རོལ་གདུང་བའི་དབྱངས་དང་བཅས། ཧཱུྃ། རྡོ་རྗེ་གཞོན་ནུའི་དམ་ཚིག་གིས། །སྲིད་པ་ཕུར་བུར་བསྒྲུབ་པ་དང་། །དབང་དང་དངོས་གྲུབ་སྩོལ་བའི་ཕྱིར། །མྱང་འདས་ལས། མ་བཅོས་ཐིག་ལེའི་ཆོས་ཉིད་ལས། །འགྱུར་མེད་སྐུ་གཅིག་གནས་པ་དེ། །ཡེ་ཤེས་ཁྲོ་བོ་ཆེན་པོ་ཡིན། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་མ་སྟོན་པ་དང་། །རྡོ་རྗེ་ཕུར་པའི་དངོས་གྲུབ་སྩོལ། །ཡེ་ཤེས་རྩེ་མོ་ལས། རྡོ་རྗེེ་ཧཱུྃ་གི་དམ་ཚིག་གིས། །སྲིད་པ་ཕུར་བུར་བསྒྲུབ་པ་དང་། །དབང་དང་དངོས་གྲུབ་སྩོལ་བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་མ་སྟོན་པ་དང་། །རྡོ་རྗེ་ཕུར་པའི་དངོས་གྲུབ་སྩོལ། །རྡོ་རྗེ་རྣམ་རྒྱལ་དམ་ཚིག་གིས། །སྲིད་པ་ཕུར་བུར་བསྒྲུབ་པ་དང་། །དབང་དང་དངོས་གྲུབ་སྩོལ་བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་མ་སྟོན་པ་དང་། །རྡོ་རྗེ་ཕུར་པའི་དངོས་གྲུབ་སྩོལ། །རྡོ་རྗེ་དབྱུག་རྒྱལ་དམ་ཚིག་གིས། །སྲིད་པ་ཕུར་བུར་བསྒྲུབ་པ་དང་། །དབང་དང་དངོས་གྲུབ་སྩོལ་བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་མ་སྟོན་པ་དང་། །རྡོ་རྗེ་ཕུར་པའི་དངོས་གྲུབ་སྩོལ། །རྡོ་རྗེ་གཤིན་རྒྱལ༴ སྲིད་པ་ཕུར་བུར༴ དབང་དང་དངོས་གྲུབ༴ ཡེ་ཤེས་ཁྲོ་བོ༴ ཁྲོ་བོ་ཆེན་པོ༴ རྟགས་དང་མཚན༴ རྡོ་རྗེ་ཕུར་པའི༴ རྡོ་རྗེ་མི་གཡོ༴ སྲིད་པ་ཕུར་བུར༴ དབང་དང་དངོས་གྲུབ༴ ཡེ་ཤེས་ཁྲོ་བོ༴ ཁྲོ་བོ་ཆེན་པོ༴ རྟགས་དང་མཚན་མ༴ རྡོ་རྗེ་ཕུར་པའི༴ རྡོ་རྗེ་རྟ་སྐད༴ སྲིད་པ་ཕུར་བུར༴ དབང་དང་དངོས་གྲུབ༴ ཡེ་ཤེས་ཁྲོ་བོ༴ ཁྲོ་བོ་ཆེན་པོ༴ རྟགས་དང་མཚན་མ༴ རྡོ་རྗེ་ཕུར་པའི༴ རྡོ་རྗེ་གཞན་རྒྱལ༴ སྲིད་པ་ཕུར་བུར༴ དབང་དང་དངོས་གྲུབ༴ ཡེ་ཤེས་ཁྲོ་བོ༴ ཁྲོ་བོ་ཆེན་པོ༴ རྟགས་དང་མཚན་མ༴ རྡོ་རྗེ་ཕུར་པའི༴ རྡོ་རྗེ་བདུད་རྩིའི༴ སྲིད་པ་ཕུར་བུར༴ དབང་དང་དངོས་གྲུབ༴ ཡེ་ཤེས་ཁྲོ་བོ༴ ཁྲོ་བོ་ཆེན་པོ༴ རྟགས་དང་མཚན་མ༴ རྡོ་རྗེ་ཕུར་པའི་དངོས་གྲུབ་སྩོལ། །ཁམས་གསུམ་རྣམ་རྒྱལ་དམ་ཚིག་གི། །སྲིད་པ་ཕུར་བུར་བསྒྲུབ་པ་དང་། །དབང་དང་དངོས་གྲུབ་སྩོལ་བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་མ་སྟོན་པ་དང་། །རྡོ་རྗེ་ཕུར་བའི་དངོས་གྲུབ་སྩོལ། །རྡོ་རྗེ་སྟེགས་ཀྱི་དམ་ཚིག་གིས། །སྲིད་པ་ཕུར་བུར་བསྒྲུབ་པ་དང་། །དབང་དང་དངོས་གྲུབ་སྩོལ་བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་མ་སྟོན་པ་དང་། །རྡོ་རྗེ་ཕུར་པའི་དངོས་གྲུབ་སྩོལ། །ཨེ་ཧྱེ་ཧི་བྷ་ག་ཝཱ་ན། མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ ས་མ་ཡ་སྟྭཾ། ས་མ་ཡ་ཧོཿ ཨེ་ར་ལི་ཧོཿ ཛ་ཛ་ཛཿ ཞེས་པའི་སྒྲ་ཆེན་པོས་སངས་རྒྱས་རྣམས་ཆོས་སྐུའི་དབྱིངས་ནས་སྤྱན་དྲངས་ཏེ་དམ་ཚིག་གི་དཀྱིལ་འཁོར་ལ་ཐིམ་པ་དང་ཆབས་གཅིག་རིགས་ལྔའི་ཕྱག་མཚན་གྱི་མཚན་ཉིད་དང་ལྡན་པའི་ཕུར་བུའི་མེ་ཏོག་གི་ཆར་བབས་པས་སྲིད་པའི་རང་བཞིན་རྡོ་རྗེ་གཞོན་ནུའི་ཡེ་ཤེས་སྐད་ཅིག་མའི་བདག་ཉིད་དུ་གྱུར་པས་དག་པའི་སྣོད་བཅུད་ཀྱང་གཡོ་བར་བསམ་མོ། །གསུམ་པ་རིག་པའི་མེ་ཏོག་དོར་ནས་རང་བཞིན་གྱི་དཀྱིལ་འཁོར་དང་དབྱེར་མེད་དུ་བྱ་བ་དངོས་ནི། ༀ་བཛྲ་ས་མ་ཡ་ཨཱོཾ། ཨཱཿབཛྲ་ས་མ་ཡ་ཨཱཿ ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཧཱུྃ། ཡེ་ཤེས་རྒྱལ་པོའི་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་པས་དངོས་གྲུབ་བསྐུལ་ནས་དམ་ཡེ་གཉིས་མེད་དུ་དགྱེས་པ་བསྐྱེད་པ་ལ་གཏང་རག་གི་ཚུལ་དུ་མཆོད་པ་ནི། ཨ་ལི་ཨུ་ལི་ཏ་ལི་ཏ་པ་ལི་དཎྜ་གོ་ན་ར་ཏྲི་ཁཱ་རཾ་ཡོ་གི་ནཱི་ཁཱ་ཧི་ཧོཿ ཞེས་དང་། ཛཿཧཱུྃ་བཾ་ཧོཿཧཱུྃ་ཧ་ཧེ་ཕཊ། ཅེས་པས་དམ་ཡེ་གཉིས་མེད་ཆུ་ལ་ཆུ་བཞག་ལྟ་བུའི་རང་བཞིན་གསལ་ཞིང་བརྟན་པར་བྱ་བ་ནི་བཞུགས་གསོལ་གྱི་ངོ་བོ་ཡིན་ལ། གཞན་སྣང་ཙམ་དུ་འཇིག་རྟེན་པ་དང་སྒོ་བསྟུན་པའི་ཕྱིར། ཧཱུྃ། ཐུགས་མཆོག་གསལ་བའི་བྱིན་རླབས་ལས། །ཞེ་སྡང་གནས་སུ་འཇོམས་པ་དང་། །མེ་ལོང་ཡེ་ཤེས་འཐོབ་བྱའི་ཕྱིར། །དཀྱིལ་འཁོར་དབུས་སུ་བཞུགས་སུ་གསོལ། །དཀྱིལ་འཁོར་དབུས་སུ་བཞུགས་ནས་ཀྱང་། །ཉོན་མོངས་མུན་པ་བསལ་དུ་གསོལ། །ལས་ཀྱི་སྲས་མཆོག་ལྔ་རྣམས་ཀྱང་། །དུར་ཁྲོད་ཆེན་པོའི་དཀྱིལ་འཁོར་དུ། །ཞིང་བཅུ་བསྒྲལ་བའི་གདན་སྟེང་དུ། །དགྱེས་ཤིང་བརྟན་པར་བཞུགས་སུ་གསོལ། །དགྱེས་ཤིང་བརྟན་པར་བཞུགས་ནས་ཀྱང་། །ཀཱི་ལ་ཡ་ཡི་དངོས་གྲུབ་སྩོལ། །ཕྱོགས་བཅུ་དུར་ཁྲོད་གཞལ་ཡས་སུ། །ཁྲོ་རྒྱལ་སྤྲུལ་པར་བཅས་པ་ཡང་། །ཕྱོགས་སྐྱོང་བསྣོལ་བའི་གདན་སྟེང་དུ། །དགྱེས་ཤིང་བརྟན་པར་བཞུགས་སུ་གསོལ། །དགྱེས་ཤིང་བརྟན་པར་བཞུགས་ནས་ཀྱང་། །ཀཱི་ལ་ཡ་ཡི་དངོས་གྲུབ་སྩོལ། །ས་མ་ཡ་ཏིཥྛ་ལྷན། བཞི་པ་ལ་གཉིས། བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་སོ། །དང་པོ་ལ་རྣམ་གྲངས་གཉིས་ལས། དང་པོ་ལ་ཕྱག་བྱ་བ་ནི། རང་བཞིན་རྟོགས་པའི་ཆ་ནས་འདྲེས་པ་ནན་ཏན་གྱི་ཕྱག་དང་། རྗེས་ཐོབ་སྙིང་རྗེའི་ཆ་ནས་སེམས་ཅན་ཐམས་ཅད་དང་བྱ་བྱེད་ཐུན་མོང་པར་ངེས་པའི་བརྡའ་ཕྱག་འཕྲུལ་དགའི་རྣམ་འཕྲུལ་ལྟར་ངེས་པས། ཧཱུྃ། ཁྲོ་ལ་ཁྲོས་པའི་རྒྱལ་པོ་ཡིས། །ཁྲོ་བོ་ཉེ་བར་ཞི་མཛད་པ། །རྡོ་རྗེ་ཁྲོ་བོ་བཅོམ་ལྡན་འདས། །རྡོ་རྗེའི་རིགས་ལ་ཕྱག་འཚལ་ལོ། །ཧཱུྃ། ཁྲོ་ལ་ཁྲོས་པའི་རྒྱལ་པོ་ཡིས། །ཁྲོ་བོ་ཉེ་བར་ཞི་མཛད་པ། །རིན་ཆེན་ཁྲོ་བོ་བཅོམ་ལྡན་འདས། །རིན་ཆེན་རིགས་ལ་ཕྱག་འཚལ་ལོ། །ཧཱུྃ། ཁྲོ་ལ་ཁྲོས་པའི་རྒྱལ་པོ་ཡིས། །ཁྲོ་བོ་ཉེ་བར་ཞི་མཛད་པ། །པདྨའི་ཁྲོ་བོ་བཅོམ་ལྡན་འདས། །པདྨའི་རིགས་ལ་ཕྱག་འཚལ་ལོ། །ཧཱུྃ། ཁྲོ་ལ་ཁྲོས་པའི་རྒྱལ་པོ་ཡིས། །ཁྲོ་བོ་ཉེ་བར་ཞི་མཛད་པ། །ཕྲིན་ལས་ཁྲོ་བོ་བཅོམ་ལྡན་འདས། །ལས་ཀྱི་རིགས་ལ་ཕྱག་འཚལ་ལོ། །ཧཱུྃ། ཁྲོ་ལ་ཁྲོས་པའི་རྒྱལ་པོ་ཡིས །ཁྲོ་བོ་ཉེ་བར་ཞི་མཛད་པ། །སངས་རྒྱས་ཁྲོ་བོ་བཅོམ་ལྡན་འདས། །དེ་བཞིན་གཤེགས་པའི་རིགས་ལ་འདུད། །ཨ་ཏི་པུ་ཧོཿ ཞེས་ཕྱག་འཚལ་བས། ཡེ་ཤེས་པས། པྲ་ཏཱིཙྪ་ཧོཿ ཞེས་དངོས་གྲུབ་དང་། བཀའ་སྡོད་རྣམས་ཀྱིས་ཕྱག་ལན་བྱས་པར་བསམ་མོ། །གཉིས་པ་མཆོད་པ་ལ་བཅུ་གཉིས་ལས། དང་པོ་ཕྱག་རྒྱའི་མཆོད་པ་ལ། ཉིང་ལག་བྱིན་གྱིས་བརླབ་པ་ནི། ཡེ་ཤེས་རྩེ་མོ་ལས། གཡས་ཀྱི་སོར་མོ་ལྔ་རྣམས་ལ། །མ་ལས་ཉི་དཀྱིལ་ལྔ་ཡིས་མཛེས། །ཨ་ལས་ཟླ་བ་ཉིང་ལག་གཡོན། །དབུ་མ་ལ་ནི་སྣང་མཛད་གཉིས། །མི་བསྐྱོད་དང་འོག་ཡང་དག་གོ། །ཐ་ལྟག་རིན་ཆེན་འབྱུང་ལྡན་ཡིན། །མཐའ་ལ་སྣང་བ་མཐའ་ཡས་བཞག །དོན་ཡོད་གྲུབ་པ་སྦོམ་པོ་ལའོ། །ཐབས་དང་ཤེས་རབ་རང་བཞིན་ལས། །བྱང་ཆུབ་སེམས་ཀྱི་འཕྲོ་འདུ་ཡིས། །བདག་དང་གཞན་དོན་བསྒྲུབ་པར་བྱ། །ༀ་ཧཱུྃ་ཏྲཱཾ་ཧྲཱིཿཨཱཿ མཱུཾ་ལཱཾ་མཱཾ་པཱཾ་ཏཱཾ། ཞེས་བརྗོད་ཅིང་བསམ་མོ། །དེའང་བདག་ཉིད་ལྷའི་ང་རྒྱལ་ལ་གནས་པ་ཕྱག་ཆེན། ས་བོན་ཆོས་རྒྱ། བཅའ་བ་དམ་རྒྱ། དགྲོལ་བ་ལས་རྒྱར་ངེས་པས་མདུན་དུ་བསྒྱུར་ཞིང་ཡབ་རྒྱ་གཡོན་དང་ཡུམ་རྒྱ་གཡས་སུ་དགྲོལ་བར་བྱ་བ་ལས། ཐོག་མར་སྤྱི་རྒྱ་དང་དེ་ནས་རིགས་ལྔ་སོ་སོར་ཕྱག་རྒྱ་ནི། རྡོ་རྗེ་འབར་བ་ལས། ཤེས་རབ་ཐབས་ཀྱི་ཕྱག་རྒྱ་ལས། །བདེ་བའི་རོལ་མོ་རྣམས་འཕྲོས་པས། །ངག་དང་ལུས་ཀྱི་བསྐྱོད་པ་རྣམས། །སྔགས་དང་ཕྱག་རྒྱ་ཡིན་པར་གྲགས། །རྡོ་རྗེ་རིགས་དང་རིན་ཆེན་རིགས། །ཤེས་རབ་ཐབས་སུ་སྦྱོར་བའི་ཕྱིར། །གཉིས་སུ་མེད་པར་སྦྱོར་བ་ནི། །རྡོ་རྗེ་ཐལ་མོར་བཤད་པ་ཡིན། །ལག་གཉིས་སོར་མོ་ནང་དུ་བསྣོལ། །གུང་མཛུབ་མཐེ་བོང་མཐེའུ་ཆུང་རྣམས། །སོ་སོར་རྩེ་སྤྲད་སྲིན་ལག་བསྒྲེང་། །སྤྱི་ཡི་དམ་ཚིག་ཕྱག་རྒྱ་ཡིན། །མ་ཧཱ་མུ་ཏྲ་ས་མ་ཡ་ཧོཿ ལག་པའི་སོར་མོ་རྒྱབ་བསྣོལ་ཏེ། །གཡས་ཀྱི་མཐེ་བོང་བཀུག་ནས་ནི། །གཡོན་པའི་མཐེ་བོང་རྩེ་སྤྲད་པ། །རྣམ་སྣང་མཛད་ཀྱི་ཕྱག་རྒྱ་ཡིན། །མ་ཧཱ་མུ་ཏྲ་ས་མ་ཡ་ཧོཿ སོར་མོ་ནང་དུ་བསྣོལ་ནས་བཀན། །གུང་མཛུབ་ལ་སོགས་རྩེ་སྤྲད་ནས། །སྲིན་ལག་གཤིབ་སྟེ་བསྒྲེངས་པ་ནི། །མི་བསྐྱོད་པ་ཡི་ཕྱག་རྒྱ་མཆོག །མ་ཧཱ་མུ་ཏྲ་ས་མ་ཡ་ཧོཿ སོར་མོ་རྒྱབ་ཏུ་བསྣོལ་ནས་ཀྱང་། །གུང་བསྒྲེངས་རྩེ་སྤྲད་མཐེ་བོང་བཀུག །མཛུབ་མོ་ངོས་ལ་སྦྱར་བ་ནི། །རིན་ཆེན་འབྱུང་གི་ཕྱག་རྒྱ་ཡིན། །མ་ཧཱ་མུ་ཏྲ་ས་མ་ཡ་ཧོཿ ལག་གཉིས་སོར་མོ་རྒྱབ་ཏུ་བསྣོལ། །མཛུབ་མོ་གཉིས་ནི་བསྒྲེངས་ནས་ནི། །རྩེ་སྤྲད་པདྨའི་ཚུལ་དུ་བྱ། །མཐེབ་བཀུག་ཚེ་དཔག་མེད་པའི་རྒྱ། །མ་ཧཱ་མུ་ཏྲ་ས་མ་ཡ་ཧོཿ ལག་གཉིས་ཁུ་ཚུར་བཅངས་ནས་ནི། །དཀུར་བརྟེན་གཡས་ཀྱི་སོར་མོ་རྣམས། །ཐལ་མོ་བྱས་ནས་གདེངས་པ་ནི། །གདོན་མི་ཟ་བའི་ཕྱག་རྒྱ་ཡིན། །མ་ཧཱ་མུ་ཏྲ་ས་མ་ཡ་ཧོཿ ཡུམ་རྣམས་རྟགས་ཀྱི་ཕྱག་རྒྱ་ནི། །ཐབས་ལ་འཁྱུད་ཅིང་ཟུར་གྱིས་བལྟ། །འཇོ་སྒེག་རང་རྟགས་ཚུལ་འཛིན་པས། །དྲིལ་བུ་དང་པོར་འཛིན་པར་བྱེད། །ལག་གཉིས་སོར་མོ་རྒྱབ་ཏུ་བསྣོལ། །གུང་བསྒྲེངས་རྩེ་མོ་སྤྲད་ནས་ནི། །པུག་པུག་པོར་ནི་བྱས་པ་ནི། །དྲིལ་བུ་འཛིན་པའི་རྒྱ་ཡིན་ནོ། །མ་ཧཱ་མུ་ཏྲ་ས་མ་ཡ་ཧོཿ གཉིས་པ་ཀུན་བཟང་ནི། ཧཱུྃ། བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ནམ་མཁའ་མཛོད་ཀྱི་སྔགས་རྒྱ་བརྗོད། གསུམ་པ་ཞབས་བསིལ་ནི། ཧཱུྃ། སྐུ་ལ་དག་བྱ་མི་མངའ་ཡང་། །སེམས་ཅན་རྣམས་ལ་བསོད་ནམས་ཕྱིར། །ཕྱག་ཞབས་ཉེ་རེག་མཛད་ནས་ཀྱང་། །རྡོ་རྗེའི་སྟན་ལ་ཏིཥྛ་ལྷན། །ༀ་ཨཱ་ཧ་ར་ཨཱ་ཧ་ར་སརྦ་བིདྱ་དྷ་ར་པཱུ་ཛི་ཏེ་ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། བཞི་པ་འདོད་ཡོན་ལྷ་མོ་བཅུ་དྲུག་གི་མཆོད་པ་ནི། ཧཱུྃ། སྙིང་རྗེའི་སྒེག་མོ་བལྟ་ན་སྡུག །བྱམས་པའི་ཕྲེང་ལྡན་འགྲོ་ལ་བརྩེ། །དགའ་བའི་གླུ་མཁན་གཞན་ཡིད་འཕྲོག །ཀུན་ལ་བཏང་སྙོམས་གར་མ་ཡིས། །དཀྱིལ་འཁོར་དགྱེས་པ་བསྐྱེད་གྱུར་ཅིག །སོ་སོའི་ཕྱག་རྒྱ་དང་བཅས། ཨཱོཾ་བཛྲ་ལཱ་སྱ་ཧཱུྃ། ཨཱོཾ་བཛྲ་མཱ་ལེ་ཏྲཾ། ཨཱོཾ་བཛྲ་གཱིརྟི་ཧྲཱིཿ ཨཱོཾ་བཛྲ་ནཱིརྟི་ཨཱཿ ཚུལ་ཁྲིམས་སྤོས་ལྡན་ཡིད་དུ་འོང་། །བཟོད་པའི་མེ་ཏོག་བལྟ་ན་མཛེས། །བསམ་གཏན་སྒྲོན་མེ་བཞིན་བཟང་མ། །ཤེས་རབ་དྲེ་ལྡན་བྱུག་པ་མོས། །དཀྱིལ་འཁོར་དགྱེས་པ་བསྐྱེད་གྱུར་ཅིག །ཨཱོཾ་བཛྲ་དྷཱུ་པེ་ཧཱུྃ། ཨཱོཾ་བཛྲ་པུཥྤེ་ཏྲཾ། ཨཱོཾ་བཛྲ་ཨཱ་ལོ་ཀེ་ཧྲཱིཿ ཨཱོཾ་བཛྲ་གནྡྷེ་ཨཱཿ སྦྱིན་ལག་ཡངས་པ་པི་ཝང་བསྒྲེང་། །བརྩོན་འགྲུས་གླིང་བུས་གཞན་སྣང་བསྒྱུར། །སྨོན་པའི་རྔ་ཟླུམ་བཞིན་རས་མཛེས། །འཇུག་པའི་རྫ་རྔ་ཀུན་ཏུ་རྒྱུས། །དཀྱིལ་འཁོར་དགྱེས་པ་བསྐྱེད་གྱུར་ཅིག །ཨཱོཾ་བཛྲ་ཝི་ནི་ཧཱུྃ། ཨཱོཾ་བཛྲ་ཝཾ་སེ་ཏྲཾ། ཨཱོཾ་བཛྲ་མྲྀ་ཏཾ་གེ་ཧྲཱིཿ ཨཱོཾ་བཛྲ་མུ་རཉྫེ་ཨཱཿ གཏོང་ལ་གོམས་པ་གཟུགས་མའོ། །སྙན་པར་སྨྲ་བ་རེག་པ་སྤྲོད། །དོན་སྤྱོད་རོ་བརྒྱའི་དཔལ་འཛིན་ཅན། །དོན་མཐུན་ཆོས་ཀྱི་འབྱུང་གནས་མས། །དཀྱིལ་འཁོར་དགྱེས་པ་བསྐྱེད་གྱུར་ཅིག །ཨཱོཾ་བཛྲ་རཱུ་པ་ཧཱུྃ། ཨཱོཾ་བཛྲ་པཪྴེ་ཏྲཾ། ཨཱོཾ་བཛྲ་ར་ས་ཧྲཱིཿ ཨཱོཾ་བཛྲ་དྷརྨཱ་དྷཱ་ཏུ་ཨཱཿ ཞེས་ཕུལ་ནས་མཐར་ལྷ་མོ་རྣམས་དཀྱིལ་འཁོར་པ་རྣམས་ཀྱི་ཟག་པ་མེད་པའི་དབང་པོའི་གནས་སོ་སོར་ཐིམ་པར་བསམ་མོ། །ལྔ་པ་སྨན་མཆོད་ནི། མཐེབ་སྲིན་གུ་ཧྱ་ལག་གི་རྒྱས་གཏོར་བས་ཟེགས་མ་ལས་བདུད་རྩིའི་ཆར་བབས་པས་དཀྱིལ་འཁོར་པ་ཐམས་ཅད་དགྱེས་པ་བསྐྱེད་པར་བལྟས་ལ། ཧཱུྃ། སངས་རྒྱས་ཀུན་དང་མཉམ་སྦྱོར་ཞིང་། །རང་བྱུང་གདོད་ནས་རྣམ་པར་དག །རྩ་བརྒྱད་ཡན་ལག་སྟོང་སྦྱར་སྨན། །རིགས་ལྔ་དམ་ཚིག་ལྔ་ཡི་དངོས། །སྒྲོན་མ་ལྔ་དང་བདུད་རྩི་ལྔ། །རྒྱུད་ལྔ་དུག་ལྔ་འཇོམས་པའི་བདུད། །ཡེ་ཤེས་ལྔ་པོ་གྲུབ་པའི་རྩི། །འཆི་བ་མེད་པའི་དམ་རྫས་ཆེ། །དཀྱིལ་འཁོར་ལྷ་ཚོགས་རྣམས་ལ་འབུལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཏི། བརྒྱུད་མཆོད་ནི། བྱང་ཆུབ་རྡོ་རྗེ་རིགས་ལྔ་ལྕམ་དྲལ་དང་། །བདེ་བའི་འཁོར་ལོ་རིག་འཛིན་རྡོ་རྗེ་ཆོས། །པྲ་བྷ་ཧསྟི་སངས་རྒྱས་པདྨ་སྐྱེས། །བསྟན་པའི་ཆུ་འགོ་དགོངས་བརྡའ་སྙན་བརྒྱུད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་མྲྀ་ཏ་ཁ་རཾ་ཁཱ་ཧི། བི་མ་ལ་དང་བལ་པོ་མཉྫུ་ཤྲཱི། །རྡོ་རྗེ་སེམས་མ་འགར་སྟོན་ཤེས་རབ་འབྱུང་། །ཆོས་ཀྱི་རྒྱལ་པོ་ཚངས་པའི་མེ་ཏོག་སོགས། །རྒྱལ་ལུགས་བརྒྱུད་པའི་བླ་མ་ཐམས་ཅད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཇོ་མོ་མཁར་ཆེན་བཟའ་དང་ཅོག་རོ་བཟའ། །དཔལ་གྱི་དབང་ཕྱུག་ངམ་འབྲེ་ཨ་ཙར་ས། །སྨད་ལས་རྩལ་ཐོན་ལག་ལྷག་བྱང་ཆུབ་སེམས། །ཇོ་ལྕམ་བརྒྱུད་པའི་བླ་མ་ཐམས་ཅད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྡོ་རྗེ་བདུད་འཇོམས་ཨ་ཙར་དཔལ་མེ་ཏོག །རྡོ་རྗེ་གཞོན་ནུ་ཞང་ཞུང་ཡོན་ཏན་གྲགས། །ཡོན་ཏན་རིན་ཆེན་ཀུན་མཁྱེན་རོང་ཟོམ་སོགས། །སྣ་ནམ་བརྒྱུད་པའི་བླ་མ་ཐམས་ཅད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཕྱི་ཡུལ་སྣང་ཆར་དགྲ་བགེགས་གཉིས་ལ་ཐེབས། །སེམས་མེད་འབྱུང་བ་ཆུ་ཡང་ཆོམ་ལ་ཕོབ། །གཉགས་ལོ་མཆོག་དང་ལྷ་དཔལ་འོ་བྲན་སོགས། །ཤམ་སྔོན་བརྒྱུད་པའི་བླ་མ་ཐམས་ཅད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ནང་དུ་རང་རྒྱུད་ཉོན་མོངས་དུག་ལྔར་ཐེབས། །མཚན་མ་རྫས་ཀྱི་ཕུར་པས་མུ་སྟེགས་བཏུལ། །རྣལ་འབྱོར་དབང་ཕྱུག་འདར་ཕྱར་ལ་སོགས་པ། །དཔལ་ཆེན་ཕུར་པའི་གྲུབ་ཐོབ་ཐམས་ཅད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། དོན་དམ་བྱང་ཆུབ་སེམས་ཀྱི་ཕུར་པ་ནི། །རྟོགས་པ་ཆོས་སྐུའི་ངང་ནས་དགོངས་བརྒྱུད་དང་། །རིག་འཛིན་མཁའ་འགྲོའི་བརྡའ་ལས་སྙན་བརྒྱུད་རྫོགས། །པདྨས་ལུང་བསྟན་འཇིགས་མེད་གླིང་པ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་བསྩོལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཕྲིན་ལས་འོད་ཟེར་འཇིགས་མེད་ཆོས་ཀྱི་གྲགས། །གཞན་ཕན་མཐའ་ཡས་ཐུབ་བསྟན་རྒྱལ་མཚན་དཔལ། །དཔལ་ལྡན་ཆོས་གྲགས་ཕན་བདེའི་འོད་ཟེར་ཞབས། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཁ་སྐོང་ཤློ་ཀ་འདི་ཛྙཱ་ནས་སོ། །བདག་ཉིད་རྩ་བའི་དཀྱིལ་འཁོར་ཡབ་ཡུམ་དང་། །སྲས་མཆོག་རིགས་ལྔ་ཕུར་པ་རྫས་ཀྱི་ལྷ། །ཕྱོགས་བཅུ་ཁྲོ་བོའི་དཀྱིལ་འཁོར་ཁྲ་ཐབས་དང་། །དཀྱིལ་འཁོར་མུ་རན་སྐྱོང་བའི་ཕུར་སྲུང་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མཐར་དངོས་གྲུབ་བླང་བ་ནི། རྒྱལ་བའི་ཡེ་ཤེས་གསང་བ་གསུམ། །བདུད་རྩིའི་སྟེང་དུ་ༀ་ཨཱཿཧཱུྃ། །རྡོ་རྗེ་ལྕེ་ཡི་དམ་ཚིག་གིས། །མྱང་པས་དངོས་གྲུབ་ཐོབ་པར་གྱུར། །རང་གི་ཡ་རྐན་ལ་ༀ་དཀར་པོ། མ་རྐན་ལ་ཨཱཿདམར་པོ། ལྕེ་ལ་ཧཱུཾ་གིས་མཚན་པ་དང་སོ་སོར་འདྲེས། སྤྱི་མགྲིན་སྙིང་ག་གསུམ་དུ་སོང་བས་གནས་སོ་སོར་སྐུ་གསུང་ཐུགས་ཀྱི་ལྷ་གསུམ་དུ་གྱུར་པར་བསམ་མོ། །དྲུག་པ་གཏོར་མའི་མཆོད་པ་ནི། འདོད་ཆགས་ཁྲག །ཞེ་སྡང་རུས། གཏི་མུག་ཤའི་འདོད་ཡོན་དུ་བལྟས་ནས། མྱང་འདས་ལས། ཧཱུྃ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་སྤྱན་དྲངས་ཏེ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་ལ་འབུལ། །མ་ལུས་གཤེགས་ནས་རྣམས་སུ་གསོལ། །ཞེས་དང་། རྩ་བཤད་ལས། ཧཱུྃ། མཐུ་རྩལ་དབྱུང་བའི་དུས་ལ་བབ། །དམ་ཚིག་ཆེན་པོའི་དུས་ལ་བབ། །ཕྱག་བརྙན་ཆེན་པོའི་དུས་ལ་བབ། །དུག་གསུམ་མཆོད་པར་རབ་ཕུལ་བས། །སངས་རྒྱས་སྐུ་གསུམ་ཐོབ་པར་འགྱུར། །ༀ་བཛྲ་ཀཱི་ལི་ཀཱི་ལ་ཡ། ཛཿཧཱུྃ་བྃ་ཧོཿ སརྦ་བིགྷྣཱན་བཾ་ཧཱུྃ་ཕཊ། མ་ཧཱ་བ་ལིཾ་ཏ་ཁཱ་ཧི་ཁ་རཾ་ཁཱ་ཧི་ཁ་རཾ་ཁཱ་ཧི། བདུན་པ་རཀྟའི་མཆོད་པ་ཚར་གསུམ་ནི། ཕུང་དང་རཀྟ་བསྲེས། དང་པོ་ཕོ་ཉལ་བཀའ་བསྒོ་བའི་ཕྱིར་ཕུལ་ནས། ཧཱུྃ། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ཟུང་ཞིག་རྒྱོབ་ཅིག་རྣམ་པར་ཆིངས། །གཏོགས་ཤིང་གྲོགས་དང་བྲལ་བར་བགྱི། །རེངས་པར་ཁུག་ལ་སྨྲར་ཆུག་ཅིག །ཕོབ་ཅིག་རྣམ་པར་གཟིར་བར་གྱིས། །ང་ཡི་དབང་དུ་གྱུར་ནས་ཀྱང་། །བསྒོ་བའི་བཀའ་འདི་ཉན་པར་བྱའོ། །མ་ཧཱ་རཀྟ་ཁཱ་ཧི། གཉིས་པ་དམ་ཅན་གནད་ལ་དབབ་པའི་ཕྱིར་དབུལ་བ་ནི། ཧཱུྃ། བྲན་དང་བཀའ་ཉན་ཕོ་ཉའི་ཚོགས། །ཁྱེད་ཀྱི་དམ་ཚིག་དུས་ལ་བབ། །སྔོན་ཆད་ཇི་བཞིན་བཅས་པ་ཡིས། །མངོན་སྤྱོད་ཕྲིན་ལས་མྱུར་དུ་མཛོད། །མ་ཧཱ་རཀྟ་ཁཱ་ཧི། གསུམ་པ་མཐུ་དང་རྫུ་འཕྲུལ་འཕྲོག་པའི་ཆེད་དུ་དབུལ་བ་ནི། ཧཱུྃ། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ལྷའམ་འོན་ཏེ་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་མཛོད། །མ་ཧཱ་རཀྟ་ཁཱ་ཧི། བརྒྱད་པ་ལས་ཀྱི་མཐའ་སྦྱོར་སྒྲོལ་གྱི་མཆོད་པས་བསྡུ་བ་ནི། ལག་པའི་སོར་མོ་གཡས་གཡོན་ཁྲག་འཐུང་ཡབ་ཡུམ་ལྔར་བསམ་སྟེ་སྦྱར། ཡབ་མཁའ་ཧཱུཾ་ལས་རྡོ་རྗེ་མེ་དཔལ་དང་། ཡུམ་མཁའ་ཨེ་ལས་གནམ་ལྕགས་ཀྱི་བྲུབ་ཁུང་དུ་བསམ་པའི་ནང་དུ་དགྲ་བགེགས་བཀུག་ནས་བརྡུང་བས་སྦྱོར་སྒྲོལ་ཟུང་འཇུག་གི་མཆོད་པས་མཉེས་པར་བསམ་ལ། ཧཱུྃ། ལག་པ་ཁྲག་འཐུང་ཡབ་ཡུམ་བཅུས། །དུག་གསུམ་རྩད་ནས་བཅད་པའི་ཕྱིར། །ཁམས་གསུམ་ཡོངས་སྒྲོལ་སྦྱོར་བ་བྱས། །ཧཱུྃ། རྡུངས་ཤིག་རྡོ་རྗེ་འབར་བའི་གཏུན། །བཀའ་ལས་འདས་བྱེད་སྡིག་ཅན་རྣམས། །རྡོ་རྗེ་མེ་དབལ་སྙིང་བསྲེག་ནས། །ལུས་ངག་རྡུལ་ཕྲན་བཞིན་དུ་རློགས། །ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུང་བྱས་ནས། །ལྷ་ཡང་རུང་སྟེ་བསྒྲལ་བར་གྱིས། །ཁ་ཐཾ། ཁ་ཐཾ། ཁ་ཐཾ། ཁཱ་ཧི་ཁཱ་ཧི་ཁཱ་ཧི། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཧ་ཧ་ཧ། དགུ་པ་བདུད་རྩི་གསང་ནན་གྱི་མཆོད་པ་ནི། བྷཉྫར་བདུད་རྩིའི་རྒྱུན་ལན་གསུམ་དུ་ཕྱར་ནས་བཟེད་ཞལ་དུ་སྦྲེངས་ཤིང་དང་པོས་ལྷ་ཚོགས་རྣམས་དགྱེས་པ་བསྐྱེད། གཉིས་པ་ཉན་ཐོས་རྣམས་འགོག་པ་ལས་བསླངས། གསུམ་པས་རང་རྒྱལ་རྣམས་གཞན་དོན་ལ་བསྐུལ་བར་བསམས་ལ། ༀ་ཨཱཿཧཱུྃ། མི་བསྐྱོད་ཡེ་ཤེས་བདེ་བའི་མཆོག་དང་ལྡན་པའི་རོ་ལ་བསྣམས་སུ་གསོལ། །ཨ་ལ་ལ་ཧོཿ བྱང་ཆུབ་སེམས་དཔའི་བདེ་མཆོག་དེ་ཉིད་འགོག་པ་རྣམས་ལས་བསླང་བའི་ཕྱིར། །ཆགས་པ་མེད་པའི་བདེ་མཆོག་ཀུན་ཏུ་མྱང་མཛད་བཞེས་ཤིང་བསྣམས་སུ་གསོལ། །ༀ་ཨཱཿཧཱུྃ། མཆོག་ཏུ་གསང་བའི་བདེ་ལ་རོལ་ཞིང་དམ་བཅས་འཇིག་རྟེན་སྒྲོལ། །བྱང་ཆུབ་སྐྱེ་གནས་བདེ་མཆོག་དབྱིངས་ལས་མི་ཉམས་དགའ་བའི་གར་མཛོད་ཅིག །ཨ་ལ་ལ་ཧོཿ ཞེན་ཅིང་ཆགས་པས་མཐའ་ལ་ཉོན་མོངས་རྣོ་སྐམས་གཟིར་བ་ཡིས། །མྱོ ང་བདེ་བདེ་མཆོག་བརྒྱད་དང་ལྡན་པས་ཐབས་ཀྱི་སྐུ་ལ་སྨྲེ་བར་མཛོད། །འགྲོ་ཀུན་ཚངས་པར་སྤྱོད་པའི་བྱང་ཆུབ་སྒོ་མོར་ལམ་སྟོན་ཅིག །བདེ་མཆོག་བདུད་རྩི་ཁྱད་པར་མེད་པའི་ཚོགས་ལ་བཀའ་སྩོལ་ཅིག །ཨ་ལ་ལ་ཧོཿ བཅུ་པ་དོན་དམ་བདེན་པའི་མཆོད་པ་ནི། བཤད་རྒྱུད་དྲི་མེད་ལས། ཧཱུྃ། ཡང་དག་དོན་གྱི་ཕུར་པ་ནི། །མ་སྤངས་མ་བསྒྲུབས་བཙལ་བ་མེད། །མ་བསླད་མ་བཅོས་བསྒྱུར་དུ་མེད། །ལྟ་བ་དོན་དམ་རྟོགས་པ་ལ། །རོལ་པ་ཅིར་ཡང་འགག་པ་མེད། །དེ་ཉིད་རྟོགས་ན་ཕུར་པའི་དོན། །དོན་དམ་རྟོགས་པས་ཐུགས་དམ་བསྐང་། །ཞེས་ངོ་བོ་ཉིད་མེད་པའི་དོན་ལ་མཉམ་པར་བཞག་གོ། །བཅུ་གཅིག་པ་བསྟོད་པ་ལ་སྤྱི་དང་བྱེ་བྲག་གཉིས་ལས། དང་པོ་ནི་གསང་བ་གསུམ་གྱི་ཡོན་ཏན་ཁྱད་པར་ཅན་དྲན་པས། ཡེ་ཤེས་རྩེ་མོ་ལས། ཨེ་མ་ཧོ། སངས་རྒྱས་བཅོམ་ལྡན་འདས། པད་ཀོར་ཁྲོ་ལ་ཁྲོས་པའི་ཁྲོ་བོ་ཆེ། །སྣ་ཚོགས་དུ་མའི་པད་ཀོར་ཁྲོ་བོའི་སྤྲིན། །འབར་བ་རྡོར་སེམས་གཅིག་ལས་རིན་འབྱུང་རྣམ་པར་སྣང་མཐའ་འབྱུང་། །དོན་གྲུབ། དེ་བཞིན་སྐོར་ཕྱག་ཉིད་ལ་ཕྱག་འཚལ་ལོ། །སྣ་ཚོགས་དུ་མའི་གཟུགས་མཆོག་ནི། །ཁྲོ་བོ་བཅུ་ཡི་རང་བཞིན་ཆེ། །གཅིག་ནི་དུ་མར་འཕེལ་མཛད་པ། །དུ་མ་རྣམས་ལ་བདག་ཅག་བསྟོད། །ཀྱེ་མ་ཁྲོ་བོའི་སྤྲིན་ཕུང་ཆེ། །མཐའ་ཡས་སྡིག་པ་གསོད་མཛད་པ། །མངོན་སྤྱོད་སྒྲོལ་བའི་རང་བཞིན་ལས། །བདག་གི་སྡིག་པ་གསོད་པར་མཛོད། །ཨེ་མ་དཔའ་བོ་དཔའ་བོ་ཆེ། །མ་ལུས་ཀུན་གྱི་རྒྱལ་པོ་ཉིད། །སྙིང་རྗེ་ཁྲོས་པས་ཁྲོ་བོ་ཆེ། །ཁམས་གསུམ་རྒྱལ་པོ་ཨ་ལ་ལ། །ཨེ་མའོ་བསྡིགས་པའི་སྡིགས་མཛུབ་ཅན། །སྡིགས་པའི་སྤྱོད་ལ་སོགས་པས་བརྗིད། །མངོན་སྤྱོད་ཁྱོད་ཀྱི་སྐུ་དང་མཚམས། །འབར་བའི་ཚོགས་ལ་བདག་ཅག་འདུད། །གཉིས་པ་ནི། བཤགས་རྒྱུད་ལས། ཧཱུྃ། སྒེག་པ་དཔའ་བ་འཇིགས་སུ་རུང་བ་དང་། །དགོད་དང་གཤེ་དང་འཇིགས་པར་བྱེད་པ་དང་། །སྙིང་རྗེ་རྔམས་ཞི་རྡོ་རྗེ་གཞོན་ནུའི་སྐུ། །ཞེ་སྡང་འཇོམས་པའི་ལྷ་ལ་ཕྱག་འཚལ་བསྟོད། །ཡབ་ཀྱི་ཐུགས་དམ་དགྱེས་པ་བསྐྱེད་པའི་ཡུམ། །འཁོར་ལོ་རྒྱས་འདེབས་འདོད་ཆགས་འཇོམས་མ་དང་། །ཨེ་ཀ་ཛ་ཊི་ཞེ་སྡང་འཇོམས་མཛད་མ། །འདོད་ཆགས་ཚུལ་གྱིས་འདོད་ཆགས་འཇོམས་ལ་བསྟོད། །རྣལ་འབྱོར་ཆེན་པོ་ལས། ཡེ་ཤེས་ལྔ་ལྡན་ཕུར་བུས་དུག་ལྔ་འཇོམས། །ཕྲིན་ལས་ལྔ་ཡིས་དྲེགས་པ་སྒྲོལ་བ་ལ། །ཐོགས་པ་མེད་པའི་ལས་མཛད་འདུས་པ་ལྔ། །སྲས་མཆོག་རིགས་ལྔའི་སྐུ་ལ་ཕྱག་འཚལ་བསྟོད། །ཡེ་ཤེས་རོལ་པའི་སྟོབས་བཅུས་མི་དགེ་འཇོམས། །སྐུ་གསུང་ཐུགས་ཀྱིས་གདུག་པ་སྒྲོལ་བར་མཛད། །ཡང་དག་དོན་གྱིས་ལོག་འདྲེན་འཇོམས་མཛད་པ། །ཁྲོ་བོ་ཡབ་ཡུམ་བཅུ་ལ་ཕྱག་འཚལ་བསྟོད། །བྱང་ཆུབ་བདེ་ལ་སྒྲོལ་བའི་ཕོ་ཉ་མོ། །ཡེ་ཤེས་དོན་ལ་ཕྲ་ཐབས་གཟུགས་འཛིན་ཅིང་། །དྲེགས་པའི་ཚོགས་རྣམས་མ་ལུས་འདུལ་མཛད་པ། །ཕྲ་མེན་ཕོ་ཉའི་ཚོགས་ལ་ཕྱག་འཚལ་བསྟོད། །བཅུ་གཉིས་པ་རྒྱལ་བ་དགྱེས་བྱེད་དམ་བཅའི་མཆོད་པ་ནི། འདུན་པ་རྩེ་གཅིག་པས། གསང་རྒྱུད་ལས། བསྐལ་པ་དཔག་ཏུ་མེད་པ་ཚུན་ཆོད་ནས། །ད་ལྟའི་ལུས་འདི་བསྐྱེད་པ་ཕན་ཆད་དུ། །ལྷ་མཆོག་ཁྱེད་དང་སྨོན་ལམ་མཐུ་བསྡེབས་ནས། །དུས་འདིར་ཞལ་མཐོང་ཡི་དམ་ལྷར་གསོལ་ན། །དུས་ཚིགས་འདི་ནས་བཟུང་ནས་ཡི་དམ་ལྷ། །སྙིང་པོ་བྱང་ཆུབ་མཆོག་ལ་མི་གནས་ཚུན། །ཚེ་རབས་འཁོར་བ་གར་བྱུང་གར་སྐྱེས་ཀྱང་། །གསང་བའི་ལྷ་མཆོག་ཁྱེད་དང་མི་འབྲལ་ཞིང་། །སྤྱི་དང་ཁྱད་པར་ལྷག་པའི་དམ་ཚིག་ལས། །མི་འདའ་བ་དང་ཡུན་དུ་བདག་བསྲུང་གིས། །ཆད་ལྷག་འགལ་འཁྲུལ་མཆིས་ན་མཐོལ་ལོ་བཤགས། །བར་ཆོད་རྐྱེན་གྱིས་རྣམ་སྨིན་ཅི་བྱུང་ཡང་། །དཔལ་ཆེན་ཁྱོད་ཀྱི་མོད་ལ་ཟིལ་གྱིས་གནོན། །དངོས་གྲུབ་མཆོག་སྩོལ་ཤེས་རབ་ལྷ་མོའི་ཚོགས། །གཉིས་པ་ཡེ་ཤེས་ཀྱི་ཚོགས་བསགས་ཛཔ྄་ཀྱི་རིམ་པ་ལ་བཞི་ལས། དང་པོ་ཛཔ྄་ཁང་དབྱེ་བ་ནི། སྣང་ཆ་མ་ལུས་པ་དབྱེ་གཞིའི་དཀྱིལ་འཁོར་རྣམ་པ་གསུམ་དུ་རྫོགས་པར་བྱས་ནས། བྷྲཱུཾ་བི་ཤྭ་བི་ཤུདྡྷེ་ཕཊ་ཛཿ ༀ་བཛྲ་ཀཱི་ལི་ཀཱི་ལ་ཡ་དཱིཔྟ་ཙཀྲ་ཧཱུྃ་ཕཊ། ཅེས་བདག་ཉིད་རྩ་བའི་དཀྱིལ་འཁོར་དང་། ༀ་བུདྡྷ་བཛྲ་རཏྣ་པདྨ་ཀརྨ་ཀཱི་ལི་ཀཱི་ལ་ཡ་ཧཱུྃ་ཕཊ། ཅེས་སྲས་མཆོག་རྫས་ཀྱི་དཀྱིལ་འཁོར་དང་། ཧཱུྃ་ཧཱུྃ། ཛཿཛཿ ཧཱུྃ་ཧཱུྃ། ཛཿཛཿ ཧཱུྃ་ཧཱུྃ། ཛཿཛཿ ཧཱུྃ་ཧཱུྃ། ཛཿཛཿ ཧཱུྃ་ཧཱུྃ། ཛཿཛཿ ཧཱུྃ་ཧཱུྃ། ཛཿཛཿ ཧཱུྃ་ཧཱུྃ། ཛཿཛཿ ཧཱུྃ་ཧཱུྃ། ཛཿཛཿ ཧཱུྃ་ཧཱུྃ། ཛཿཛཿ ཧཱུྃ་ཧཱུྃ། ཛཿཛཿ ཛཿཧཱུྃ་བཾ་ཧོཿ ཕཊ་ཛཿ ཞེས་པས་ཕྱོགས་བཅུ་ཁྲོ་བོའི་དཀྱིལ་འཁོར་ཏེ། དཀྱིལ་འཁོར་གསུམ་ལྡན་གྱི་དམ་ཚིག་གི་འཁོར་ལོ་ལས་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས། མདུན་གྱི་ནམ་མཁར་མེ་རི་འདབ་འབྱོར་གྱི་ཚུལ་དུ་ཡོད་པར་བསམ་མོ། །གཉིས་པ་ཛཔ྄་དགོངས་ནི། ཧཱུྃ། ཐུགས་ཀར་དཔལ་གྱི་བེའུའི་དཀྱིལ་འཁོར་ནི། །སྒོ་གཅིག་རིན་ཆེན་གཞལ་ཡས་ཁང་། །བདེ་སྟོང་དབྱེར་མེད་ངང་ཉིད་ལས། །ཆོས་ཀྱི་སྐུ་ལས་ལོངས་སྐུར་ཤར། །པདྨ་ཟླ་བའི་གདན་ལ་བཞུགས། །སྐྱོན་གྱིས་མ་གོས་གཏི་མུག་སེལ། །ཡབ་ཡུམ་གཉིས་མེད་ཟག་མེད་སྐུ། །སྐུ་མདོག་དཀར་གསལ་རྣམ་དག་དབྱིངས། །རྡོ་རྗེ་ དྲིལ་བུ ་ཕྱག་ན་བསྣམས། །ཤེས་རབ་བྱང་ཆུབ་སེམས་དང་ལྡན། །རྟོག་མེད་མི་འགྱུར་སྐྱིལ་ཀྲུང་བཞུགས། །མཁའ་དབྱིངས་བདེ་ཆེན་སྐུ་ལ་བསྟོད། །ཅེས་བརྗོད་ནས་བདག་མདུན་གྱི་གཙོ་བོའི་ཐུགས་ཀར་ཡེ་ཤེས་སེམས་དཔའ་ཞི་བ་ལོངས་སྤྱོད་རྫོགས་པའི་སྐུ་ཡུམ་དང་བཅས་པའི་ཐུགས་ཀར་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་ངོ་བོ་རྡོ་རྗེ་མཐིང་ནག་རྩེ་ལྔ་དང་། དེའི་ལྟེ་བར་ཉི་མའི་དཀྱིལ་འཁོར་གྱི་སྟེང་ཏིང་འཛིན་སེམས་དཔའ་ཧཱུྃ་མཐིང་ནག་ལ་འབྲུ་དགུའི་སྔགས་ཕྲེང་འཁོར་བར་བསྒོམ་པའི་ཚུལ། ཡེ་ཤེས་རྩེ་མོ་ལས། སྙིང་གར་བསམ་པར་བྱ་བ་ནི། །ཉི་མའི་དཀྱིལ་འཁོར་དབུས་གནས་པར། །རྡོ་རྗེ་ས་བོན་མཐིང་ནག་བཞག །སྙིང་པོ་བརྟག་པར་བྱ་བ་ནི། །རྣམ་པར་སྣང་མཛད་མགོར་བཞག་སྟེ། །རྡོ་རྗེ་ཕུར་བུའི་རང་བཞིན་བརྟག །ཅེས་སོ། །གསུམ་པ་ཛཔ྄་དངོས་ལ་གཉིས། སྟོད་ལས་ལ་བརྟེན་ནས་བླ་ན་མེད་པའི་བྱང་ཆུབ་བསྒྲུབ་པ་དང་། སྨད་ལས་ལ་བརྟེན་ནས་དམ་ཅན་ཉེ་བར་བསྙེན་པའོ། །དང་པོ་ལ་བསྙེན་བསྒྲུབ་ཡན་ལག་བཞིའི་ངེས་པ་ཡང་མཐའ་གཅིག་ཏུ་མ་ངེས་ཏེ་ཐབས་བསྐྱེད་པའི་རིམ་པ་ལ་སྦྱར་མ་ཐག་པས་ཀྱང་ཤེས་ཤིང་། ཕུར་པ་རྣལ་འབྱོར་ཆེན་པོ་ལས་ཀྱང་། སྤྱིར་ནི་གསང་སྔགས་ངེས་པ་ལ། །ཏིང་འཛིན་གསུམ་བསྐྱེད་བསྙེན་པ་ཡིན། །བདག་ཉིད་ལྷར་བསྐྱེད་ཉེ་བསྙེན་ཡིན། །ཡུམ་བསྐྱེད་བསྒྲུབ་པར་ཤེས་པར་བྱ། །གཞན་རྣམས་བསྒྲུབ་པ་ཆེན་པོ་ཡིན། །ཞེས་སོ། །འདི་ནི་སྟོད་ལས་བྱང་ཆུབ་སྒྲུབ་པའི་གནས་སྐབས་ན་བསྙེན་སྒྲུབ་གཉིས་ལ་ནང་གསེས་ཀྱིས་ཡན་ལག་བཞིར་ཕྱེ་ན་ཆོས་ཉིད་དང་སྦྱར་ཏེ་བཟླ་བ་བསྙེན་པ། ལྷ་དང་སྦྱར་ཏེ་བཟླ་བ་ཉེ་བསྙེན། ཤམ་བུར་སྦྱར་བ་སྒྲུབ་པ། ཚོགས་སྒྲུབ་དང་འབྲེལ་བའམ་ཕྲིན་ལས་སྣ་ཚོགས་པ་ཅན་སྒྲུབ་པ་ཆེན་པོར་ངེས་པ་ལས། དང་པོ་བསྙེན་པའི། ༼འདིར་སྒྲུབ་པ་ཞག་བདུན་ལ་མཚོན་ན་ཉིན་དང་པོ་གསུམ་ལ་བསྙེན་སྔགས། ༀ་བཛྲ་ཀཱི་ལི་ཀི་ལ་ཡ་ཧཱུྃ། ཞེས་བཟླ། ཉིན་བར་མ་གསུམ་ལ་སརྦ་བིག་ནན་བཾ་སོགས་བཏགས་པ་ཉེ་བསྙེན། ཉིན་ཕྱི་མ་གཅིག་ལ་སྒྲུབ་སྔགས་ཛཿཧཱུྃ་ཨ་གསུམ་བག་ཤེས་པར་བྱའོ། །མཆན། ༽དམིགས་པ་ནི། བདག་མདུན་སོ་སོའི་དཀྱིལ་འཁོར་རྟེན་དང་བརྟེན་པ་སེམས་དཔའ་སུམ་བརྩེགས་སྔགས་ཕྲེང་དང་བཅས་པའི་ལྷར་སྣང་དང་ལྷན་ཅིག་འབྲུ་དགུ་པའི་བཟླས་པ་ལ་བརྩོན་པ་བསོད་ནམས་ཀྱི་ཚོགས་དང་། སྐྱོ་བའི་ཚེ་ཆོས་ཉིད་དང་སྦྱར་ནས་བཟླ་བ་ཡེ་ཤེེས་ཀྱི་ཚོགས་དང་འབྲེལ་བ་ཡིན་ཏེ། རྩེ་མོ་ལས། ལྷ་ཡི་ང་རྒྱལ་རབ་གནས་པ། །བརྗེད་པ་མེད་པའི་དྲན་པ་ནི། །འབད་པ་མེད་པའི་ཚོགས་ཆེན་པོ། །མཁལ་པས་རྟག་ཏུ་བསམ་པར་བྱ། །ཞེས་དང་། བཤད་རྒྱུད་ལས། ལྷ་ཉིད་བསྒོམ་དང་སྤྱན་དྲང་ཡང་། །གཞི་རྩ་མེད་པར་མ་ཤེས་ན། །ལྷ་ཉིད་བརྟགས་པས་ལོག་རྟོག་ཉིད། །གཞི་རྩ་མེད་པར་ལྷ་བསྒོམས་པས། །ཆོས་ཉིད་དོན་དམ་རྟོགས་པ་དང་། །ལོག་པའི་ཆོས་ཅན་འདུལ་བ་དང་། །འགྲོ་བ་ཐ་དད་དྲངས་པ་དང་། །བདུད་དང་སྲིན་པོ་དབང་དུ་སྡུད། །དཔེར་ན་མེ་ལོང་སྣང་གཞི་ལ། །གཞི་རྩ་མེད་པས་ཐམས་ཅད་སྣང་། །མ་བལྟས་སྟོང་ལ་རྣམ་པར་སྣང་། །ཡོད་དང་མེད་པའི་དམིགས་དང་བྲལ། །ཞེས་པའི་དོན་ཁོང་དུ་ཆུད་པར་བྱ་བ་ནི་གལ་པོ་ཆེའོ། །དེ་ལ་གསལ་བརྟན་ཅུང་ཟད་ཐོབ་ནས་འོད་ཟེར་སྤྲོ་བསྡུ་བྱ་བ་ནི། ཐུགས་སྲོག་ཏིང་འཛིན་སེམས་དཔའ་ལས་འོད་ཟེར་བུང་བའི་མཚོན་ཆ་ལྟ་བུ་འཕྲོས་སངས་རྒྱས་ཀྱི་ཞིང་ཁམས་ཐམས་ཅད་གཡོས་ཤིང་མཉེས་པའི་མཆོད་པ་ཕུལ། སེམས་ཅན་གྱི་ཁམས་ལ་འཕྲོས་པས་སྡིག་སྒྲིབ་སྦྱངས། དག་པའི་སྣོད་བཅུད་འབའ་ཞིག་ཏུ་གྱུར་པས་དོན་གཉིས་བྱས། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་སྐུ་དང་ཡིག་འབྲུ་ཕྱག་མཚན་གྱི་རྣམ་པར་བྱུང་སྟེ་བདག་མདུན་གྱི་དཀྱིལ་འཁོར་ལ་ཐིམ་པས་བྱིན་རླབས་དང་དངོས་གྲུབ་མཐའ་དག་ཐོབ་པར་བསམ་མོ། །དེ་ལ་ཅུང་ཟད་གོམས་པ་དང་དོ་ལི་ལ་བསླབ་པར་བྱ་སྟེ། སྔགས་ཕྲེང་ལས་རང་འདྲ་གཉིས་པ་རེ་ཆད་པ་ལུ་གུ་རྒྱུད་དུ་འབྲེལ། རྡོ་རྗེའི་དབུས་སུ་ནས་ཐོན་ཡེ་ཤེས་སེམས་དཔའི་སྐུའི་དབྱིབས་བརྒྱུད་ཞལ་དུ་ཐོན། རིམ་བཞིན་བདག་ཉིད་རྩ་བའི་དཀྱིལ་འཁོར་གྱི་ཤངས་བུག་གཡས་པ་ལས་ཐོན། རྡོ་རྗེ་གཞོན་ནུ་ཡེ་ཤེས་པའི་ཤངས་བུག་གཡོན་ནས་ཞུགས་ཏེ་ཐུགས་ཀར་ཐིམ་སྐུ་གསུང་ཐུགས་མཉེས་པའི་མཆོད་པ་ཕུལ། ཅི་འདོད་པའི་དངོས་གྲུབ་བླངས། དེའི་ཤངས་བུག་གཡས་ནས་བརྒྱུད་རང་གི་སྣ་བུག་གཡོན་དུ་ཞུགས། རིམ་པར་བརྒྱུད་པས་བདག་མདུན་གྱི་རྟེན་དང་བརྟེན་པ་ཐམས་ཅད་ཤིན་ཏུ་གསལ་བར་བྱས། དབང་བཞི་ཐོབ། སྒྲིབ་བཞི་དག །དངོས་གྲུབ་རྣམ་པ་གཉིས་བདེ་བླག་ཏུ་ཐོབ་པར་བསམ་པ་ལས་རྣམ་རྟོག་གཞན་གྱིས་བར་མ་ཆོད་པར་བྱ་སྟེ། ཕུར་པ་གསང་བའི་རྒྱུད་ལས། རིག་པ་བྱང་ཆུབ་སེམས་ཉིད་རྟོགས་ནས་ཀྱང་། །རང་བཞིན་མ་སྐྱེས་ཡོངས་སུ་གྲུབ་པའི་སྐུ། །སྣང་བ་རང་བཞིན་མེད་དེ་འཇའ་ཚོན་འདྲ། །ཆུ་ཟླ་ལྟ་བུའི་སངས་རྒྱས་འོད་དང་ལྡན། །ཐུགས་ཀར་དཔལ་བེའུར་ཡི་གེ་འབྲུ་དགུ་ནི། །གསེར་ལ་ཕྲ་བཀོད་བཞིན་དུ་གསལ་བསྒོམ་སྟེ། །རྫོགས་པའི་རིམ་པ་གདམས་ངག་ཚུལ་བཞིན་བསྒོམ། །རྒོད་ན་སྐྱེ་མེད་རྨུགས་ན་ཆོས་ཉིད་ལ། །འཕྲོ་ན་བདེ་ཆེན་བྱིངས་ན་ཁྲོ་བོ་སྟེ། །ཡེ་ཤེས་ལྷ་ཡི་བསྙེན་པའི་ཏིང་ངེ་འཛིན། །འཛབ་ཀྱི་དགོངས་པ་ཆུ་བོའི་རྒྱུན་བཞིན་ནོ། །ཆོས་ཉིད་ངང་ལས་སྔགས་ཀྱི་སྒྲ་དབྱངས་བླངས། །སེམས་འཛིན་བསམ་གཏན་ཏིང་འཛིན་མ་ཡེངས་བསྒོམ། །དབྱིངས་ཀྱི་ངང་ལས་རང་བྱུང་རང་གྲགས་བསམ། །དེ་ཚེ་རྣམ་རྟོག་དགྲ་ཆེན་ཐམས་ཅད་ཀུན། །གཟུང་འཛིན་མཚན་མ་མེད་པའི་དབྱིངས་སུ་ཕུར། །ཅེས་སོ། །གཉིས་པ་ཉེ་བསྙེན་ནི། སྡེ་ཚན་བཅུ་བཞི་པ་ལ་བྱ་སྟེ། འདི་ནི་བསྐྱེད་པ་རྐྱེན་གྱི་སྔགས་བརྒྱད་པོ་ལ་བསྐུལ་བ་ལས་ཀྱི་སྔགས་དང་བཟླས་པ་ལས་ཀྱི་འབྲུ་གསུམ་བསྣན་པ་ཐམས་ཅད་འདུས་པའི་དྲག་སྔགས་ཡིན་པའི་ཚུལ་རྒྱུད་ལས། ཨཱོཾ་ནི་དཔལ་ཆེན་ཡབ་ཡིན་ཏེ། །བཛྲ་ཤེས་རབ་ཡུམ་ཡིན་ནོ། །ཀཱི་ནི་ཡེ་ཤེས་ཁྲོ་བོ་ལ། །ལི་ནི་དབྱིངས་ཀྱི་ཁྲོ་མོ་བཅུ། །ཀཱི་ནི་ཐབས་ཀྱི་མཆེ་བ་ཅན། །ལ་ནི་ཤེས་རབ་གཤོག་པ་ཅན། །ཡ་ནི་སྲས་མཆོག་ཕུར་པ་སྟེ། །ཧཱུཾ་ནི་ཕྱག་བརྙན་སྒོ་མ་བཞི། །སརྦ་ཐམས་ཅད་འདུས་པ་སྟེ། །བིག་ནི་དགྲ་དང་བགེགས་ཡིན་ཏེ། །ནན་ནི་དགྲ་དང་བགེགས་མནན་ནོ། །བཾ་ནི་དབང་དུ་སྡུད་པ་སྟེ། །ཧཱུྃ་ནི་བརླག་པར་བྱེད་པའོ། །ཕཊ་ཀྱིས་སྒྲོལ་བའི་ཕྲིན་ལས་མཛད། །ཅེས་སོ། །བསྙེན་ཚད་ནི། རྒྱུད་ལས། ས་ཡ་དྲུག་འབུམ་བསྙེན་པའི་ཚད། །ཅེས་པའི་འབུམ་ཕྲག་བཅུ་དྲུག་གོ། །༼སྡེ་ཚན་བཅུ་བཞི་པ་འདི་ནི་ལས་རུང་ཙམ་གྱི་བསྙེན་ཚད་དེ་སྨིན་བར་སློབ་པའི་བསྙེན་ཚད་ལ་འབུམ་ཕྲག་བརྒྱ་ཐམ་པ་སྟེ་བཤད་མ་ཐག་པས་ཤེས་སོ། །མཆན།༽བྱེ་བ་སྔོན་ལ་འདྲེན་པ་སྔ་འགྱུར་གྱི་ཁྱད་ཆོས་སུ་འདོད་པའང་ནོར་བ་ཆེན་པོ་ཡིན་ཏེ་ཀཱི་ལ་བཅུ་གཉིས་ཀྱི་ཏནྟྲ་ཆུང་བ་ལས། རྡོ་རྗེ་ཕུར་པ་ལྷ་བསྐྱེད་བྱ། །འབུམ་ཕྲག་གཅིག་གམ་ས་ཡའམ། །བྱེ་བ་བཟླས་ཏེ་དབང་བསྐུར་ནས། །ཞེས་པས་དུས་ཀྱི་འཁོར་ལོ་དང་མཚུངས་པ་ཡིན་ནོ། །གསུམ་པ་བསྒྲུབ་པ་ནི། ཛཿཧཱུྃ་ཨཱཿགསུམ་བསྣན་པའི་བཅུ་བདུན་ཏེ། དང་པོས་དངོས་གྲུབ་ཐམས་ཅད་སྔགས་ལ་སྡུད། གཉིས་པས་སྔགས་ཀྱི་དངོས་གྲུབ་བདག་ལ་སྡུད། གསུམ་པས་རང་བཞིན་དབྱེར་མེད་དུ་རྒྱས་འདེབས་པའི་མན་ངག་གི་ལྡེ་ཁ་ཁྱད་པར་ཅན་ནོ། །བཞི་པ་སྒྲུབ་པ་ཆེན་པོ་ནི་དཀྱིལ་འཁོར་གྱི་བྱ་བ་དང་འབྲེལ་བ་དང་། སྨན་སྒྲུབ་དང་། བུམ་སྒྲུབ་ལ་སོགས་པ་དང་། གཞན་ཡང་ཕྲིན་ལས་སྣ་ཚོགས་པའི་བདག་ཉིད་དེ། ཕུར་པར་རང་གཞུང་དུ་ཡེ་ཤེས་ལྷ་ཡི་སྒྲུབ་པ། མ་མོ་མཁའ་འགྲོའི་སྒྲུབ་པ། དཔའ་བོ་གིང་གི་སྒྲུབ་པ་ཞེས་སྨད་ལས་ཀྱི་རིམ་པ་སྒྲུབ་པ་ཆེན་པོར་བསྡུ་བ་ཡང་ཡོད་དོ། །དེ་དག་གི་བར་སྐབས་ཅི་རིགས་པར་དག་པའི་སྣོད་བཅུད་ལ་གསལ་བརྟན་གྱི་ཡེ་ཤེས་བསྐྱེད་ཕྱིར་ཛཔ྄་བསྐུལ་བྱ་བར་སྤྲོ་ན། ཧཱུྃ། སྟོང་གསུམ་སྟོང་གི་འཇིག་རྟེན་ན། །སོགས་རྒྱུད་ལས་གསུངས་པ་དངོས་ཟུར་དུ་བཀོད་པ་ལྟར་བྱའོ། །སོ་སོའི་སྔགས་དང་དམིགས་པའི་ཁྱད་པར་ཟབ་མོ་ནི་རྩོད་དུས་འདི་ན་སྔགས་ལ་འཕྱ་ཞིང་དམ་ཚིག་མེད་པའི་གང་ཟག་མང་བས་དངོས་གྲུབ་ཀྱི་གནས་ལ་ཞུད་པའི་ཕྱིར་རེ་ཞིག་དཔའ་བོ་མཁའ་འགྲོའི་བཀའ་རྒྱས་ཆུ་འབབས་སུ་བྲི་བར་མ་གནང་ངོ་། །དེ་ལྟར་ཡང་དངོས་གྲུབ་ཀྱི་རྒྱུ་དམ་ཚིག་མ་ཉམས་པ་རྣམས་ལ་ནི་མཆོག་དང་ཐུན་མོང་གི་དངོས་གྲུབ་ཚང་ལ་མ་ནོར་བ་གྲུབ་པའི་རྒྱུད་གཞུང་འདི་ཉིད་ཀྱིས་སྟོན་པས་ན། གང་ཞིག་བསྒྲུབ་པའི་ཕན་ཡོན་ལ་བསམས་ནས་ཡིད་བཞིན་གྱི་ནོར་བུ་ལྟ་བུར་བཟུང་བར་རིགས་ཏེ། རྡོ་རྗེ་ཁྲོས་པའི་རྩ་བཤད་ལས། འདི་ལ་བརྟེན་པའི་གང་ཟག་རྣམས། །ཐམས་ཅད་གྲོལ་འགྱུར་ཐེ་ཚོམ་མེད། །རྡོ་རྗེ་ཁྲག་འཐུང་ང་ཉིད་ཀྱི། །ཡི་གེ་ཧཱུྃ་ཙམ་བཟླས་པ་ཡང་། །བར་ཆད་བདུད་ཀྱིས་མི་ཚུགས་ཤིང་། །མཚན་མ་གྲུབ་པར་ཐེ་ཚོམ་མེད། །རྡོ་རྗེ་ཅན་གྱི་ཞིང་དུ་སྐྱེ། །ལྷ་ཀླུ་ཀུན་ལ་དབང་བྱེད་འགྱུར། །འདི་བསྒྲུབ་པ་ཡི་གང་ཟག་རྣམས། །སྔ་ནས་སྦྱོང་བར་ཐེ་ཚོམ་མེད། །ཚེ་གཅིག་འདི་ལ་བརྩོན་ལྡན་པས། །འཁོར་བར་མི་ལྡོག་མངོན་སངས་རྒྱས། །གང་ཞིག་དབང་དང་མན་ངག་ཐོབ། །སྐད་ཅིག་ཙམ་གྱིས་མོས་གྱུར་ན། །འཆི་བ་ཞེས་ནི་རྣམ་རྟོག་སྟེ། །མཁའ་སྤྱོད་གནས་སུ་འཁྲིད་པར་འགྱུར། །གང་ཞིག་འདི་ལ་མོས་པ་ཙམ། །དབང་དང་དམ་ཚིག་འཛིན་གྱུར་ནས། །སྐྱེ་བདུན་ཉིད་ན་སངས་རྒྱས་འགྱུར། །སྐྱེ་བ་གཞན་གྱིས་བར་མ་ཆོད། །འདི་ལ་ཐེ་ཚོམ་ལེ་ལོ་སྤངས། །བརྩོན་འགྲུས་དད་ལྡན་ཅན་གྱིས་བསྒྲུབ། །རྒྱུད་འདི་རྟག་ཏུ་གསང་བར་བྱ། །མཁའ་འགྲོའི་ཚོགས་ཀྱིས་བསྲུང་བར་འགྱུར། །ཞེས་སོ། །བཞི་པ་ཛཔ྄་མཇུག་བསྡུ་བ་ནི། མཆོད་བསྟོད་རྒྱས་བསྡུས་ཅི་རིགས་པའི་མཐར་ཡི་གེ་བརྒྱ་པ་ལན་གསུམ་གྱི་ནོངས་བཤགས་དང་། རང་བཞིན་གྱི་དཀྱིལ་འཁོར་དང་ཏིང་ངེ་འཛིན་གྱི་དཀྱིལ་འཁོར་དབྱེར་མེད་དུ་བྱ་བའི་ཕྱིར། ཨཱོཾ་བཛྲ་ཀྲོ་དྷ་ས་མ་ཡ་ཧཱུྃ། ཞེས་རིག་པའི་མེ་ཏོག་དོར། ཨཱོཾ་བཛྲ་ཀྲོ་དྷ་ས་མ་ཡ་སྟྭཾ། ཨཱོཾ་བཛྲ་ཀྲོ་དྷ་ས་མ་ཡ་ཕཊ། ཨཱོཾ་བཛྲ་ཀྲོ་དྷ་ས་མ་ཡ་ཧོ། ཞེས་པས་དངོས་གྲུབ་བསྐུལ་ནས། ཧཱུྃ་ ྄ཞེས་བརྗོད་པས། མདུན་བསྐྱེད་ཡེ་ཤེས་ཀྱི་འཁོར་ལོ་དམ་ཚིག་གི་འཁོར་ལོ་ལ་དབྱེར་མེད་དུ་བསྟིམ། ཧཱུྃ་ཧ་ཧེ་ཕཊ། ཅེས་བརྗོད་ནས་དེ་ཉིད་གསལ་ཞིང་བརྟན་པར་བྱའོ། །གཉིས་པ་སྨད་ལས་ཀྱི་དང་པོ་དམ་ཅན་ཉེ་བར་བསྙེན་པ་ནི་ཟུར་དུ་འཆད་ལ། ངན་སྔགས་ཉེ་བར་བསྙེན་པ་གདབ་པ་དྲུག་གིས་དགྲ་བགེགས་སྒྲོལ་བའི་སྐོར་ནི་བྱང་ཆུབ་སེམས་དཔའི་ཚུལ་ཁྲིམས་སྔགས་སྡོམ་དང་སྦྱར་བའི་གནང་བཀག་མི་ཤེས་པ་དག་གིས་གསང་སྔགས་ཀྱི་ཕྲིན་ལས་རབ་འབྱམས་རང་གར་སྤྱད་པས་ངན་སོང་དུ་འཕེན་པའི་ཚུལ་མང་དུ་མཐོང་བས་བདག་ཅག་ནི་བྱང་ཆུབ་སེམས་དཔའི་སྡེ་སྣོད་ལ་དད་པས་མངོན་སྤྱོད་ཀྱི་ལས་ལ་བརྩོན་པ་ལྷོད་པར་གྱུར་ཏོ། །དེ་ལྟར་ཡང་ཞིབ་ཏུ་ཤེས་པར་འདོད་པའི་དམ་ཚིག་ཅན་ཡོད་ན་ཕུར་པ་རྣལ་འབྱོར་ཆེན་པོའི་རྒྱུད་དང་འབྲེལ་བའི་དོན་སྣ་ནམ་ལུགས་ཀྱི་རྣམ་བཤད་རིན་ཆེན་ཕྲེང་བ་དང་། འགྲེལ་པ་བདུད་རྩི་དྲི་མེད། འབུམ་འགྲེལ་ལ་སོགས་ལས་ཤེས་པར་བྱའོ། །རྗེས་ལ་ཚོགས་ཀྱི་རིམ་པ་ནི། ཧཱུྃ། དཔལ་ཆེན་ཐུགས་ལས་རཾ་ཡཾ་ཁཾ། །འཕྲོས་པས་ཚོགས་ཀྱི་དངོས་འཛིན་སྦྱངས། །སྣང་སྲིད་བདེ་ཆེན་ཀ་པཱ་ལར། །བཅུད་རྣམས་རིགས་ལྔའི་དམ་རྫས་གྱུར། །ཨཱོཾ་ཨཱཿཧཱུྃ་ཧ་ཧོ་ཧྲཱིཿ སྤྱན་འདྲེན་ནི། ཧཱུྃ། འོག་མིན་ཆོས་དབྱིངས་ཕོ་བྲང་དང་། །ཡན་ལག་བདུན་ལྡན་ལོངས་སྤྱོད་རྫོགས། །རང་བཞིན་སྤྲུལ་སྐུའི་ཞིང་ཁམས་ནས། །དཔལ་ཆེན་དཀྱིལ་འཁོར་ལྷ་ཚོགས་དང་། །གནས་དང་ཉེ་གནས་རྣམ་པ་གཉིས། །ཡུལ་ནི་རོལ་པ་ཉེ་ཡུལ་རོལ། །ཞིང་དང་ཉེ་བའི་ཞིང་དང་ནི། །འདུ་དང་ཉེ་བའི་འདུ་བ་དང་། །ཚནྡྷོ་ཉེ་བའི་ཚནྡྷོ་སྟེ། །ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོ་བསིལ་བའི་ཚལ། །ཨ་ཌི་ཡ་ནར་པདྨ་བརྩེགས། །ཟ་ཧོར་ཡུལ་ན་ཁུ་བྱུག་ཀློང་། །སེང་ངའི་ཡུལ་ན་སྐུ་ལ་རྫོགས། །ཁ་ཆེའི་ཡུལ་ན་ཧེ་ཆེན་རོལ། །བལ་པོའི་ཡུལ་ན་ཡ་མ་ཁ། །ཐོ་གར་ཡུལ་ན་གསང་ཆེན་རོལ། །ལི་ཡུལ་འཇིག་རྟེན་མངོན་རྫོགས་ཏེ། །དུར་ཁྲོད་ཆེན་པོ་བརྒྱད་རྣམས་ན། །བཞུགས་པའི་དཔའ་བོ་མཁའ་འགྲོ་དང་། །ཤུགས་འགྲོ་རྣལ་འབྱོར་ཞིང་སྐྱོང་རྣམས། །ཚོགས་ལ་སྤྱན་འདྲེན་གཤེགས་སུ་གསོལ། །ཚོགས་ཁང་འདི་ནི་སྤྲུལ་པའི་ཞིང་། །ཚོགས་རྫས་འདོད་ཡོན་རོལ་པའི་རྒྱན། །ཐབས་དང་ཤེས་རབ་ལྕམ་དྲལ་ལྡན། །རྡོ་རྗེའི་གླུ་གར་བྱིན་རེ་ཆགས། །ཅང་ཏེའུ་ དྲིལ་བུ ་སྙན་ཞིང་འཁྲོལ། །འདི་ནི་དམ་ཚིག་མཆོག་གི་གནས །ཤགས་དང་རྩོད་པ་ཀུ་ཅོ་མེད། །རིག་པ་བརྟུལ་ཞུགས་ཉམས་དང་ལྡན། །དམ་ཚིག་འདི་ནི་དང་དུ་བཞེས། །མཆོག་དང་ཐུན་མོང་དངོས་གྲུབ་སྩོལ། །གུ་རུ་དྷེ་ཝ་ཌཱ་ཀ་ཌཱ་ཀི་ནཱི་དྷརྨཱ་པཱ་ལ་ས་མ་ཡ་ཛཿ ཕུད་དང་པོ་ནི། ཧཱུྃ། སངས་རྒྱས་དམ་ཚིག་བླ་ན་མེད། །ཤ་ལྔ་བདུད་རྩི་རྣམ་པ་ལྔ། །བཟའ་བཅའ་བཏུང་བ་ཕྱི་ཡི་ཚོགས། །འདོད་ཡོན་ལྷ་མོ་རྣམ་པ་ལྔ། །དབང་པོའི་ལོངས་སྤྱོད་ནང་གི་ཚོགས། །བདེ་སྟོང་ཡེ་ཤེས་བླ་ན་མེད། །དགའ་བཞི་རྣམ་རོལ་གསང་བའི་ཚོགས། །དཀྱིལ་འཁོར་ལྷ་ལ་མཆོད་པར་འབུལ། །བཞེས་ནས་དབང་དང་དངོས་གྲུབ་སྩོལ། །ག་ཎ་ཙཀྲ་པཱུ་ཛ་ཧོཿ བར་པ་བཤགས་པ་ནི། ཧཱུྃ། གང་ཞིག་འཁྲུལ་པར་གྱུར་པ་དེ་ནས་བཟུང་། །རྣམ་སྨིན་ལུས་ལ་བརྟེན་པ་དེ་སྲིད་དུ། །མི་དགེ་བཅུ་དང་མཚམས་མེད་ཉེ་བ་ལྔ། །ལྕི་བ་བཅུ་དྲུག་ལོག་པ་བརྒྱད་ལ་སོགས། །ཐེག་པ་གསུམ་དང་རིག་པ་འཛིན་པ་ཡི། །སྡོམ་གསུམ་དམ་ཚིག་ཉམས་པ་མཐའ་དག་ཀུན། །ག་ཎ་ཚོགས་ཀྱི་འཁོར་ལོ་ལ་བརྟེན་ནས། །འཆབ་པ་མེད་པའི་སེམས་ཀྱིས་མཐོལ་ལོ་བཤགས། །དག་ཚངས་ཆེན་པོའི་དངོས་གྲུབ་བདག་ལ་སྩོལ། །ཧེ་རུ་ཀའི་ཡིག་བརྒྱ་བཟླའོ། །ཐ་མ་བསྒྲལ་མཆོད་ནི། ཨེ་ལས་ཐར་མེད་སྲིད་པའི་བྲུབ་ཁུང་ནང་། །མ་རིག་འཁྲུལ་པས་བཅིངས་པ་བདག་ལྟའི་དགྲ། །ཡེ་ཤེས་དབྱིངས་ལ་སྒྲིབ་པའི་གཟུང་འཛིན་བགེགས། །དག་ཆེན་ཡེ་ཤེས་རིག་པའི་ལྕགས་ཀྱུས་ཟུངས། །མཉམ་པར་མ་བཞག་མེད་པའི་ཞགས་པས་ཆིངས། །ལྷག་མཐོང་ལུ་གུ་རྒྱུད་ཀྱི་དྲྭ་བས་སྡོམས། །རྗེས་ཐོབ་འཁྲུལ་པ་མེད་པའི་དྲིལ་བུས་མྱོས། །ཕུང་པོ་ལྔ་ཡི་ཉེ་བར་ལེན་པ་ཀུན། །བདག་མེད་རྟོགས་པའི་མཚོན་གྱིས་རྣམ་པར་གཏུབ། །སྐྱེ་མེད་ཁྲོས་པའི་ལྷ་ཚོགས་ཞལ་དུ་བསྟབ། །མཱཾ་ས་རཀྟ་ཙིཏྟ་གོ་རོ་ཙ་ན་བ་སུ་ཏ་ཀིཾ་ནི་རི་ཏི་ཏ་ན་ཙཀྲ་པཱུ་ཛ་ཁ་ཁ་ཁཱ་ཧི་ཁཱ་ཧི། དེ་ནས་ལྷག་མ་ནི། ཞིང་ལྤགས་ཀྱི་སྟེང་དུ་བཞག་ལ། ཧེ་རུ་ཀའི་དམ་རྒྱས་ཁ་ཕྲུ་དབབ། ཨ་ཀཱ་རོས་བརླབས་ཤིང་། སྤྱུགས་གླུ་དང་བཅས། ཀྱེ། དང་པོ་ཕུད་ཀྱིས་མི་མཆོད་དུ། །དཔལ་ཆེན་དཀྱིལ་འཁོར་ཚོགས་ཀྱི་བདག །བར་དུ་བཤགས་པ་མི་བགྱི་རུ། །རྣལ་འབྱོར་ལྡན་པ་དམ་ཚིག་གཉན། །ཐ་མ་བསྒྲལ་བསྟབ་མི་བགྱི་རུ། །རྟོགས་པས་བདག་རྒྱུད་སྔོན་བསྒྲལ་ཕྱིར། །ད་ལྟ་ལྷག་མས་མི་མཆོད་དུ། །མ་ཚོགས་དབང་ཕྱུག་གིང་ལངྐ། །ཕོ་ཉ་སུམ་བརྒྱ་དྲུག་ཅུ་སོགས། །ཀུན་ཀྱང་དཔལ་ཆེན་སྤྲུལ་པ་ཡིན། །ལྷག་མ་ཁ་ཆུས་མི་བྲན་དུ། །དམ་ཚིག་གཅིག་ཏུ་བསྲེ་བའི་ཕྱིར། །འབངས་ཐོག་རྗེ་ཡིས་མི་མནན་དུ། །ཅི་བཅོལ་ལས་ལ་བསྐུལ་བའི་ཕྱིར། །རྗེ་ལ་འབངས་ཀྱིས་མི་རྒོལ་དུ། །དྲག་ཤུལ་ལས་ཐབས་མྱུར་བའི་ཕྱིར། །ཧཱུྃ། རྣམ་དག་རང་བཞིན་ཞི་བ་ལས། །བཅོམ་ལྡན་དཔལ་ཆེན་སྤྲུལ་པ་ནི། །ཐབས་ཤེས་ཟླ་གསང་རོལ་པ་ལས། །དཀྱིལ་འཁོར་མུ་རན་སྐྱོང་བ་སྟེ། །ཁྱེད་ཅག་སྔོན་གྱི་ཡལ་གམ་ཅན། །ལག་ན་གློ་སྙིང་ནང་ཁྲོལ་ཐོགས། །ལེགས་ཉེས་སྟངས་འཛིན་ཚོགས་ཁང་ཉུལ། །མཐུ་དང་རྫུ་འཕྲུལ་དཔག་ཏུ་མེད། །སྔོན་ཚེ་དཔལ་ཆེན་ཧེ་རུ་ཀས། །དུག་གསུམ་རཱུ་ཏྲ་བསྒྲལ་བའི་ཚེ། །ཁས་བླངས་དམ་བཅས་དྲན་གྱིས་ལ། །སྲིན་མོའི་ཟ་ལམ་ཆེན་པོ་རུ། །ཕམ་ཕབས་ལོང་ལ་བསྟན་པ་སྲུངས། །བཅོལ་བའི་ཕྲིན་ལས་གྲུབ་པར་མཛོད། །ཐུགས་དམ་བསྐུལ་བ་ནི། ཧཱུྃ། མི་གནས་ཡེ་ཤེས་ཆོས་སྐུའི་ཕོ་བྲང་ནས། །ལོངས་སྤྱོད་རྫོགས་པ་ཞི་དང་ཁྲོ་བོའི་ལྷ། །ཐུགས་དམ་བསྐུལ་ལོ་འགྲོ་བའི་དོན་ལ་དགོངས། །རིག་པའི་རང་བཞིན་བདེ་གཤེགས་སྙིང་པོ་ཡང་། །མ་རིག་འཛིན་པའི་ཀུན་གཞི་ལུང་མ་བསྟན། །སྒོ་ལྔའི་ཡུལ་དང་རྟེན་ཅིང་འབྲེལ་བ་ལས། །རིགས་དྲུག་རྒྱུད་ལྔའི་གནས་སུ་འཁྱམས་པ་རྣམས། །ལས་དང་ཉོན་མོངས་མཐུ་ཡིས་གཟིར་བའི་མཐུ། །ཕྱི་རོལ་ཡུལ་ལ་སྨིན་པའི་སྡུག་བསྔལ་དང་། །ནད་མཚོན་མུ་གེ་དགྲ་བགེགས་འབྱུང་པོའི་གདོན། །འཇིགས་པ་ཆེན་པོ་བརྒྱད་དང་བཅུ་དྲུག་ཀུན། །མངོན་སྤྱོད་དྲག་པོའི་རོལ་པས་ཚར་བཅད་ནས། །ལོག་རྟོག་དངོས་པོར་ཞེན་པའི་སེམས་ཅན་རྣམས། །རྒྱུ་འབྲས་ཐེག་པ་གཞན་གྱིས་གདུལ་དཀའ་བས། །རང་བྱུང་ཡེ་ཤེས་རྟོགས་པའི་ཕྲིན་ལས་མཛོད། །ཆད་ཐོ་བསྒྲག་པ་ནི། ཧཱུྃ། དུས་གསུམ་རྣམ་དག་ཀུན་ཏུ་བཟང་པོའི་དུས། །མངོན་རྫོགས་ཡེ་ཤེས་དམ་པའི་འོག་མིན་དུ། །ཀུན་གཞི་ཡིད་ཆོས་དག་པའི་སྟོན་པ་ཡིས། །རང་སྣང་རང་བཞིན་མེད་པའི་འཁོར་ཚོགས་ལ། །རྒྱལ་བ་དགོངས་བརྒྱུད་རྫོགས་པའི་ཡོ་ག་གསུམ། །བརྡའ་ཚིག་བརྗོད་པ་བྲལ་བར་བསྟན་པའི་ཚེ། །གྲགས་ཆེན་གསལ་བའི་སྟོན་པ་བཅུ་གཉིས་དང་། །དགའ་རབ་དཔའ་བོ་གསང་འཛིན་རྡོ་རྗེ་ཆོས། །བརྡའ་བརྒྱུད་རིག་འཛིན་གྲུབ་པ་མཆོག་རྣམས་ཀྱིས། །སྟོན་འཁོར་དགོངས་པ་གཅིག་པའི་དབང་ཐོབ་བཞིན། །ཚོགས་བརྒྱད་རང་གྲོལ་གཏོར་མ་འདི་བཞེས་ལ། །འཁྲུལ་པ་གཞི་ལ་དག་པའི་ཕྲིན་ལས་མཛོད། །དེ་རྗེས་གསང་སྔགས་བསྟན་པ་བྱུང་བའི་ཚེ། །འོག་མིན་དགའ་ལྡན་རི་རབ་ལྷུན་པོའི་རྩེ། །ལྷ་གནས་གསུམ་དུ་གྲགས་པའི་གནས་མཆོག་དང་། །ཤམ་བྷ་ལ་དང་ཨོ་རྒྱན་ཟ་ཧོར་ཡུལ། །སིང་ག་ལ་དང་གནམ་ལྕགས་འབར་བའི་རྩེར། །མཆོད་རྟེན་ཆེན་པོ་བདེ་བྱེད་བརྩེགས་པ་རུ། །རིག་འཛིན་སྡེ་སྣོད་མཐའ་དག་བབ་པའི་ཚེ། །འཇིག་རྟེན་འཇིག་རྟེན་འདས་པའི་མཁའ་འགྲོ་དང་། །དཀྱིལ་འཁོར་མུ་རན་སྐྱོང་བ་ཐམས་ཅད་ཀྱིས། །གཏོར་མ་ལེན་ཞིང་ལེགས་ཉེས་སྟངས་འཛིན་པའི། །ཁས་བླངས་དམ་བཅའ་བཞིན་དུ་ཕྲིན་ལས་མཛོད། །དེ་རྗེས་འགྲོ་དོན་དུས་ལ་བབ་པའི་ཚེ། །ཀླུ་སྒྲུབ་སྙིང་པོ་པདྨ་ཐོད་ཕྲེང་སོགས། །གྲུབ་པའི་རིག་འཛིན་ཆེན་པོ་བརྒྱད་རྣམས་ཀྱིས། །འཛམ་བུའི་གླིང་དུ་དར་ཞིང་རྒྱས་མཛད་ཅིང་། །ཁྱད་པར་བྲག་དམར་དཔལ་གྱི་མཆིམས་ཕུ་རུ། །རིག་འཛིན་སློབ་དཔོན་པདྨ་འབྱུང་གནས་ཀྱིས། །ལྷ་སྲས་རྒྱལ་པོ་ཚངས་པའི་མེ་ཏོག་ལ། །སྒྲུབ་པ་བཀའ་བརྒྱད་དཀྱིལ་འཁོར་ཞལ་ཕྱེ་ཞིང་། །སེང་གེ་རྣམ་རོལ་ཁས་བུ་རི་ཡི་རྩེར། །གནོད་སྦྱིན་ཐམས་ཅད་དམ་ལ་བཞག་པའི་ཚེ། །སྲོག་སྙིང་ཕུལ་ཏེ་ཆད་ཐོ་བཟུང་བ་ལྟར། །མཆོད་གཏོར་བཞེས་ལ་ཕྲིན་ལས་གྲུབ་པར་མཛོད། །དེ་རྗེས་ཚོགས་བདུན་རོལ་པ་བལ་པོའི་ཡུལ། །རང་སྣང་མཆོད་རྟེན་བྱ་རུང་ཁ་ཤོར་དུ། །རང་བྱུང་རྡོ་རྗེ་འཇིགས་མེད་གླིང་པ་ལ། །དབྱིངས་ཀྱི་མཁའ་འགྲོས་ནམ་མཁའ་མཛོད་ཀྱི་བརྡའ། །ཡེ་ཤེས་ལྔ་ལྡན་སྤྲུལ་པའི་ཤོག་སེར་ལས། །བྲག་དམར་བྲེ་གུ་བརྩེགས་པའི་དགེའུ་རུ། །ཀུན་ཏུ་བཟང་པོ་དྲི་མེད་འོད་ཟེར་གྱིས། །བཀའ་རྒྱ་ལུང་རྫོགས་གཏད་རྒྱ་བཀྲོལ་བའི་ཚེ། །སྤྱན་གཅིག་ཁྲག་ཏུ་ཁོལ་བའི་མ་མོ་དང་། །བྱ་རོག་གཙུག་ཕུད་འཛིན་པའི་དྲང་སྲོང་གིས། །ཁས་བླངས་ཐ་ཚིག་བཞིན་དུ་ཕྲིན་ལས་མཛོད། །བཤལ་ཆུ་གཏོར་མར་བྲན་ལ་བརྟན་མ་བསྐྱང་བ་ནི། བྷྱོ། ཚོགས་བདག་བཀའ་ཡི་བདག་ཉིད་ནི། །ཁྲག་འཐུང་རྡོ་རྗེ་ནམ་མཁའི་ཡུམ། །གངས་རི་ཅན་གྱི་ཡུལ་ལྷ་ནི། །བདུད་དང་གནོད་སྦྱིན་སྨན་མོ་བཞི། །ཚུར་སྤྱོན་ཚུར་སྤྱོན་གཏོར་མ་ལོངས། །རྟེན་འབྲེལ་ཡན་ལག་བཅུ་གཉིས་དང་། །དུས་སྦྱོར་བཅུ་གཉིས་གནས་དག་པས། །བལ་བོད་མཚམས་ན་ཚེ་རིང་མ། །ལ་སྟོད་རྡོ་རྗེ་གཡའ་མ་སྐྱོང་། །གནོད་སྦྱིན་གངས་ལ་ཀུན་བཟང་མོ། །འབྲོག་ཆེན་འཁོར་འདུལ་བགེགས་ཀྱི་གཙོ། །ཇོ་མོ་གངས་རར་སྤྱན་གཅིག་མ། །བྱང་ན་མཁའ་ལྡིང་ཀླུ་མོ་རྒྱལ། །ཁ་རག་རྡོ་རྗེ་ཁྱུང་བཙུན་མ། །རྨ་ཆེན་སྤོམ་རར་དྲག་མོ་རྒྱལ། །ཀོང་བཙུན་དེ་མོ་བོད་ཁམས་སྐྱོང་། །འབྲོག་བཙན་རྡོ་རྗེ་སྨན་གཅིག་མ། །ཇོ་མོ་ནགས་རྒྱལ་གཡའ་མོ་བསིལ། །དབུས་ན་རྡོ་རྗེ་ཟུ་ལེ་སྨན། །ཀུན་ཀྱང་པདྨའི་བཀའ་ཉན་ཏེ། །དམ་ལ་གནས་ཤིང་རིགས་ལ་འགོ། །ཐ་ཚིག་བཞིན་དུ་གཏོར་མ་ལོངས། །མཐའ་ཡི་དམག་དང་རྒྱ་འདྲེའི་འཚུབ། །མུ་སྟེགས་འགྱུ་བའི་སྒོ་ཕྲང་དང་། །འགོང་པོ་སྤུན་དགུའི་ནད་དལ་སྲུངས། །རྟག་ཆད་ཐར་པར་འཁྲུལ་བ་ཡི། །འཇིག་ཚོགས་ལྟ་བ་དབུ་མར་བཟློག །བདེན་དོན་རྣམ་པ་བཅུ་གཉིས་ཀྱི། །བསྟན་པ་དར་བའི་ཕྲིན་ལས་མཛོད། །ཨཱོཾ་ལ་ལ། ལེ་ལེ། ཏཾ་ཏཾ། ཏེ་ཏེ་ཁ་རཀྨ་མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃ། གཏོར་གཞོང་རི་རབ་ཏུ་བསམ་པ་ཁ་སྦུབ་ལ། ཧཱུྃ། དམ་སྲི་བྱ་བའི་སྡིག་ཅན་ཁྱོད། །འགྲོ་བ་ཡོངས་ཀྱི་རྒྱུད་ལ་རྒོལ། །བྱང་ཆུབ་སེམས་ཀྱི་བརྟུལ་ཞུགས་བྲོས། །མནན་ནོ་སྟོང་ཆེན་འོག་ཏུ་མནན། །གཏད་དོ་ཆུ་སྲིན་གྲེ་བར་གཏད། །བསྐྱུར་རོ་གཤིན་རྗེའི་ཁ་རུ་བསྐྱུར། །བསྲེག་གོ་ཡེ་ཤེས་མེ་ཡིས་སྲེག །བདག་ཏུ་ལྟ་བ་མ་ཞིག་བར། །བསྐལ་པ་ཞིག་ཀྱང་མི་བཏང་ངོ་། །ༀ་ཨཱཿཧཱུྃ་སྟྭཾ་བྷ་ཡ་ལཾ་ནན། དེ་ནས་དངོས་གྲུབ་བླང་བ་ནི། སྔར་བཞིན་མཆོད་ཅིང་བསྟོད་ལ། ཧཱུྃ། བྱིན་རླབས་ཀུན་གྱི་རྩ་བ་བླ་མ་ནི། །དངོས་གྲུབ་སྩོལ་ཕྱིར་དཔལ་ཆེན་རོལ་པའི་ལྷ། །རྣམ་ཐར་སྒོ་གསུམ་ཐུགས་ཀྱི་དཀྱིལ་འཁོར་ནས། །རང་བཞིན་ཡོངས་གྲུབ་བྱང་ཆུབ་སེམས་ཀྱི་དངོས། །ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ། །ས་བཅུ་ལམ་ལྔ་དབང་བཅུ་ཕྱི་ནང་གཉིས། །རིག་འཛིན་བཞི་དང་སྐུ་ལྔ་ཡེ་ཤེས་ལྔ། །གྲུབ་ཆེན་བརྒྱད་དང་ཕྲིན་ལས་རྣམ་པ་བཞི། །འཁོར་བའི་རང་བཞིན་གློ་བུར་སྒྲིབ་པ་གཉིས། །ཀུན་གཞིའི་ཁམས་ལ་བག་ལ་ཉལ་གྱི་ཚུལ། །ཤིན་ཏུ་རྣམ་དག་རྣམ་ཀུན་མཆོག་ལྡན་གྱི། །དངོས་གྲུབ་དམ་པ་དེང་འདིར་སྩལ་དུ་གསོལ། །རྩ་སྔགས་མཐར། དྷརྨ་ཀཱ་ཡ། སམྦྷོ་ཀཱ་ཡ། ནིརྨཱ་ཀཱ་ཡ། ཙིཏྟ་སིདྡྷི་ཕ་ལ་ཧཱུྃ། ཞེས་སྒྲུབ་རྫས་གནས་གསུམ་དུ་གཏུགས་ཤིང་མྱང་ངོ་། །སླར་ཡང་གཏང་རག་གི་མཆོད་བསྟོད་ཕུལ་ལ། བཤགས་པ་བྱ་བ་ནི། ཧོཿ སྔགས་ཀྱི་དངོས་གྲུབ་མ་ལུས་པ། །དམ་ཚིག་ཉིད་ལ་བརྟེན་གྱུར་ཀྱང་། །རྨོངས་དང་མ་རིག་ཉོན་མོངས་པས། །ཟིལ་གྱིས་ནོན་པ་བདག་ཅག་ནི། །ཉེས་པ་དུ་མའི་སྣོད་ལགས་ཏེ། །མགོན་པོ་ཐུགས་རྗེ་ཆེ་རྣམས་ཀྱིས། །ཐུགས་ལ་ཁྲོ་བོ་མི་མངའ་ཡང་། །ལེགས་ཉེས་སྟངས་འཛིན་བདག་པོ་རྣམས། །སྐྱོན་མཐོང་ཙམ་ནས་ཆད་པ་གཅོད། །འགལ་ཞིང་ནོངས་པ་ཅི་མཆིས་པ། །མཐོལ་ལོ་བཤགས་སོ་ཚངས་པར་སྩོལ། །ཡི་གེ་བརྒྱ་པ་ལན་གསུམ་གྱིས་སྙིང་ནས་བཤགས་པར་བྱའོ། །ཉེར་བསྡུ་ནི། ཧཱུྃ། སྣོད་བཅུད་ལྷ་དང་གཞལ་ཡས་སུ། །ཤར་བ་དག་པའི་སྣོད་བཅུད་ཀྱང་། །རྟེན་ཉིད་བརྟེན་པ་ལྷ་རྣམས་ཀྱང་། །གཙོ་བོ་ལ་ཐིམ་དེ་ཡང་ཧཱུྃ། །ཞབས་ཀྱུ་ནས་བཟུང་ནཱ་དའི་བར། །རིམ་ཡལ་གདོད་མའི་གཤིས་སུ་ཨ། །ཞེས་མཉམ་པར་བཞག །སྤྱོད་ལམ་གྱི་རྣལ་འབྱོར་དུ་ལྡང་བ་ནི། སླར་ཡང་རིག་པ་བྱང་ཆུབ་སེམས། ། རྗེས་ཐོབ་གཉུག་མའི་ཧེ་རུ་ཀ །ཕྱག་རྒྱ་གཅིག་པའི་གནས་གསུམ་དུ། །ཡི་གེས་མཚན་པས་རྣམ་རྟོག་བསྲུང་། །བཛྲ་རཀྵ་ཧཾཿ ཞེས་རྡོ་རྗེའི་གོ་བགོ་ཞིང་། ཡི་གེ་བརྒྱ་པས་བརྟན་པར་བྱའོ། །དེ་ནས་བསྔོ་སྨོན་ནི། ཧཱུྃ། སྣང་གྲགས་རིག་པ་དཀྱིལ་འཁོར་གསུམ་གྱི་ངང་། །བསོད་ནམས་ཡེ་ཤེས་རིམ་གཉིས་རྣལ་འབྱོར་ཚོགས། །མི་གནས་ཡེ་ཤེས་མྱ་ངན་འདས་པར་བསྔོ། །ཀུན་ཀྱང་དཔའ་ཆེན་གོ་འཕང་ཐོབ་པར་ཤོག །ལན་གསུམ། བཀྲ་ཤིས་ནི། ཧཱུྃ། གདོད་མའི་མགོན་པོ་རིགས་ལྔ་གངས་ཆེན་མཚོ། །སྐུ་ལྔ་ལྷུན་རྫོགས་སྤྲུལ་པའི་ཞིང་ཁམས་ལ། །བསྐལ་བཟང་སངས་རྒྱས་སྟོང་རྩ་བྱོན་པ་ཡི། །སྒྲོན་མའི་བསྐལ་པ་བཟང་པོའི་བཀྲ་ཤིས་ཤོག །སྟོང་གསུམ་མི་མཇེད་རྡོ་རྗེ་ཐེག་པའི་ཞིང་། །འཕུར་འགྲོའི་བསྟན་པ་འབྱུང་གནས་ཨུ་རྒྱན་ཡུལ། །གངས་རིའི་ཁྲོད་དུ་འབོད་པ་ཁྲི་སྲོང་རྗེའི། །ཐུགས་བསྐྱེད་བསྟན་པ་མཐའ་རྒྱས་བཀྲ་ཤིས་ཤོག །འཛམ་གླིང་ས་ཡི་ལྟེ་བ་རྡོ་རྗེ་གདན། །པཎ་གྲུབ་ཆོས་རྒྱལ་འཛོམ་པ་ཆོས་འཁོར་གསུམ། །མདོ་སྔགས་བསྟན་པ་དར་བ་གངས་ཅན་ལྗོངས། །རྒྱལ་བསྟན་ཡུན་དུ་གནས་པའི་བཀྲ་ཤིས་ཤོག །ཆོས་སྐྱོང་རྒྱལ་པོ་ཚངས་པའི་མེ་ཏོག་གིས། །ལོ་པཎ་སྤྱན་དྲངས་དཀའ་བས་བཙའ་བའི་རྒྱུད། །ཅི་གར་དོར་ནས་རང་བཟོའི་སྔགས་རྒྱུད་ཀྱིས། །གངས་རིའི་ཁྲོད་འདི་སྐལ་བ་ངན་པར་བྱས། །རྒྱུད་ལས་ལུང་དང་ལུང་ལས་མན་ངག་ཏུ། །སྡེབས་ནས་སྒྲུབ་ཐབས་ཕྲིན་ལས་སྟོན་པ་འདི། །ཨོ་རྒྱན་མཁན་པོའི་བཞེད་གཞུང་མ་ནོར་ཕྱིན། །ལུང་བསྟན་དུས་བབས་བསྟན་པ་འབའ་ཞིག་བསམ། །གསང་སྔགས་རང་གར་བླངས་དང་ཅིས་མཚུངས་རྒྱལ་རིགས་གང་ཟག་སྙན་བརྒྱུད་ཀྱི། །དབང་དང་བྱིན་རླབས་ཆུ་རྒྱུན་མ་ཉམས་དེ་ཡང་རྣམས་པར་རིག་པ་ཙམ། །ངོ་བོ་གཉིས་མེད་ཡེ་གྲོལ་ཆེན་པོར་ཆོས་ཉིད་ཕུར་བུའི་དབང་ཐོབ་པའི། །བྱིན་རླབས་ལྐོག་ཏུ་མ་གྱུར་ཡིད་ཆེས་འདི་ལ་ཉམས་ལེན་མཛོད་དང་གསལ། །ད་ལྟ་ཆོས་ཀྱི་བྱིན་རླབས་མ་ཉམས་ཀྱང་། །བསོད་ནམས་སྙིགས་མར་འགྱུར་པའི་ལོག་ཤེས་ཀྱིས། །སྔགས་ཀྱི་དངོས་གྲུབ་བཟུང་བར་མི་ནུས་དུས། །ལས་ཅན་གཅིག་སྲིད་དེ་ཡིས་འཛིན་པར་ཤོག །ཅེས་པའང་རིག་འཛིན་གྱི་སློབ་དཔོན་པདྨ་སམྦྷ་ཝས་བྱིན་གྱིས་བརླབས་པའི་རྫོགས་ཆེན་པ་རང་བྱུང་རྡོ་རྗེ་འཇིགས་མེད་གླིང་པས་སོ། །དགེའོ། །དགེའོ། །དགེའོ།། །།