བཏགས་པས་གྲོལ་བར་བསྟན་པ་བུ་གཅིག་གིི་གསང་འགྲེལ། སློབ་དཔོན་དགའ་རབ་རྡོ་རྗེ།

༼གསེར་ཡིག་ཅན༽༄༅༔ ༀ་ཨཱཿཧཱུྃ༔ ཨཱོྂ་མཱུྃ་ལཱྃ་པྱྃ་ཏཱྃ༔ ཨཱོྂ་ཧཱུྃ་ཏྲཱྃ་ཧྲཱིཿཨཱཿ བཏགས་པས་གྲོལ་བར་བསྟན་པ་བུ་གཅིག་གིི་གསང་འགྲེལ་སློབ་དཔོན་དགའ་རབ་རྡོ་རྗེས་མཛད་པ་བཞུགས་སོ༔ རྒྱ་ཡིས་སྲུངས་ཤིག༔ རྒྱ་རྒྱ་རྒྱ༔ རྒྱ་གར་སྐད་དུ། བུད་དྷ་སརྦ་པུ་ཏྲ་ཨེ་ཀཿ གུ་ཡ་པུ་རི་སཾ་ཏན་ཏྲ་ཨརྠ་ཀ་ལ་དྷེ་ཤ་ནཱ་མཿ བོད་སྐད་དུ། སངས་རྒྱས་ཐམས་ཅད་ཀྱི་སྲས་གཅིག་པོ། གསང་བ་སྤྱོད་པ་ས་བོན་གྱི་རྒྱུད་ཀྱི་དོན་གསལ་བར་བསྟན་པ་ཞེས་བྱ་བ། བཅོམ་ལྡན་འདས་བྱ་བྲལ་ཀློང་ཆེན་ཀ་ནས་དག་པ་ཉིད་ལ་ཕྱག་འཚལ་ལོ། །ཡེ་ནས་སྙིང་པོའི་བཅུད་བསྡུས་པའི། །སངས་རྒྱས་བྱེ་བ་དུང་ཕྱུར་གྱི། །ཐུགས་ཀྱི་དགོངས་པ་དག་པའི་རྒྱུད། །ནམ་མཁའ་ཉི་ཟླ་ལྟ་བུ་ལ། །དགོངས་པ་རང་གསལ་ཛོ་ཀི་བདག །བླ་མ་ནོར་བུ་འགྲོ་བའི་མགོན། །བྱ་རྩོལ་བྲལ་བའི་གསུང་ལ་འདུད། །རང་བྱུང་ཕྲད་ཆོག་བསྟན་པའི་བཙས། །གསང་སྙིང་ཉི་མ་སྣང་བྱེད་ཀྱི། །གསང་འགྲེལ་འབྲི་ཡི་གུས་པས་ཆོངས། །སངས་རྒྱས་ཐམས་ཅད་ཀྱི་སྲས་གཅིག་པོའི་རྒྱུད་འདི་ལ་སྤྱི་དོན་བདུན་གྱིས་བསྟན་ཏེ། ལེའུ་དང་པོས་རྒྱུད་ཆེ་བའི་ཡོན་ཏན་བསྟན་པ་དང་། ལེའུ་གཉིས་པས་རྒྱུད་འདིས་སངས་རྒྱས་ཀྱི་གདུང་ཇི་ལྟར་སྤེལ་བ་བསྟན་པ་དང་། ལེའུ་གསུམ་པས་ཕྱིས་ཇི་ལྟར་འབྱུང་བར་བསྟན་པ་དང་། ལེའུ་བཞི་པས་ཚེ་འདིར་བསྒོམ་ཞིང་ཉམས་རྟོགས་མཐར་ཕྱིན་ཏེ་ཟག་པ་མེད་པར་བསྟན་པ་དང་། ལེའུ་ལྔ་པས་འགྲོ་བའི་དོན་དུ་ཐུན་མོང་གི་ལས་བསྟན་པ་དང་། ལེའུ་དྲུག་པས་བཏགས་པས་གྲོལ་བའི་སྙིང་པོ་བསྟན་པ་དང་། ལེའུ་བདུན་པས་རྒྱུད་འདི་འདུས་མ་བྱས་པར་བསྟན་པའོ། །དེ་ནས་ལེའུ་དང་པོ་འགྲོལ་ཏེ། དྲན་པ་ཀུན་གྱི་ཐོག་མ་ཡི། །ཞེས་པའི་དོན་ནི། དྲན་པ་ཞེས་པ་མི་དྲན་དགུ་དྲན་འདིའོ། །ཀུན་གྱི་ཞེས་པ་མི་རིག་དགུ་རིག་རྣམས་སོ། །ཐོག་མའི་ཞེས་པ་རྟོགས་ཏེ་སངས་རྒྱས་མེད། མ་རྟོགས་ཏེ་འཁོར་བ་མེད་དེ་དོན་ལས་ཕྱོགས་སུ་མ་ལྷུང་བའོ། །དངོས་མཛད་སངས་རྒྱས་ཐོག་མ་ལ། །ཞེས་པའི་དོན་ནི། དངོས་མཛད་ཅེས་པ་ངོ་བོ་ཀ་དག་དངོས་ཀྱིས་མཛད། རང་བཞིན་ལྷུན་གྲུབ་དངོས་ཀྱིས་མཛད། ཐུགས་རྗེ་ཀུན་ཁྱབ་དངོས་ཀྱིས་མཛད་དོ། །སངས་རྒྱས་ཞེས་པ། ངོ་བོ་ལ་གཟུང་ཡུལ་སངས་ཏེ་ཐིག་ལེར་རྒྱས། རང་བཞིན་ལ་སྒྲིབ་གཡོགས་སངས་ཏེ་སྐུ་རུ་རྒྱས། ཐུགས་རྗེ་ལ་ཕྱོགས་རིས་སངས་ཏེ་མཁྱེན་པ་རྒྱས། ཐོག་མ་ཞེས་པ། གནས། སྟོན་པ། འཁོར་དང་། བསྟན་པ། དུས་དང་ལྔའོ། །གནས་ཀྱི་ཐོག་མ་ཆོས་སྐུའི་གནས་ཆོས་ཀྱི་དབྱིངས། ལོངས་སྐུའི་གནས་རྣམ་དག་འཐུག་པོ་བཀོད་པའི་ཞིང་། སྤྲུལ་སྐུའི་གནས་ཐ་དད་མ་ངེས་ཏེ་ཀུན་ཁྱབ་བོ། །སྟོན་པའི་ཐོག་མ་ཀུན་ཏུ་བཟང་པོ། ལོངས་སྐུའི་སྟོན་པ་རྣམ་པར་སྣང་མཛད་གངས་ཆེན་མཚོ། སྤྲུལ་སྐུའི་སྟོན་པ་རྡོ་རྗེ་འཆང་ངོ་། །འཁོར་གྱི་ཐོག་མ་ཆོས་སྐུའི་འཁོར་དྲན་རིག །ལོངས་སྐུའི་འཁོར་ཞི་ཁྲོ། སྤྲུལ་སྐུའི་འཁོར་སངས་རྒྱས་སྟོང་རྩ་གཉིས། བསྟན་པའི་ཐོག་མ་ཆོས་སྐུའི་བསྟན་པ་ཆོས་ཉིད་མཐའ་བྲལ། ལོངས་སྐུའི་བསྟན་པ་ཆོས་ཉིད་རང་སྒྲ་སངས་རྒྱས་སྲས་གཅིག་པོ། སྤྲུལ་སྐུའི་བསྟན་པ་སྒྲ་ཐལ་འགྱུར་རྩ་བའི་རྒྱུད། དུས་ཀྱི་ཐོག་མ་ཆོས་སྐུའི་དུས་འདས་པ། ལོངས་སྐུའི་དུས་ད་ལྟ། སྤྲུལ་སྐུའི་དུས་མ་འོངས་པ། དང་པོ་ཉིད་དུ་ཕྱག་འཚལ་ལོ། །ཞེས་པའི་དོན་ནི། དང་པོ་ཞེས་པས་ཐོག་མ་ལྔ་ལ། ཉིད་དུ་ཞེས་པ་འཁྲུལ་མ་མྱོངས་པ་ལ། ཕྱག་འཚལ་ལོ་ཞེས་པ་དང་པོ་རྡོ་རྗེ་འཆང་གིས་ཡེ་ཕྱག་ཏུ་བཙལ། དེ་ནས་སངས་རྒྱས་རྣམས་ཀྱིས་རིམ་པ་བཞིན་གྱིས་ཕྱག་མཛད། ད་ལྟ་ཛོ་ཀི་བདག་ཡེ་ཤེས་འཁྲུལ་མ་མྱོང་བའི་རྒྱུད་བསྟན་པའི་བུ་གཅིག་ལ། ལུས་ངག་ཡིད་གསུམ་ཕྱག་འཚལ་ལོ། །སྨིན་པར་མཛད་དུ་གསོལ། གྲོལ་བར་མཛད་དུ་གསོལ། གང་བར་མཛད་དུ་གསོལ། ཆེར་འཕེལ་བར་མཛད་དུ་གསོལ། རྒྱས་པར་མཛད་དུ་གསོལ། ཞེས་པའོ། །འདི་སྐད་བདག་ལ་སོགས་པ་ཡི། །ཞེས་པའི་དོན་ནི། འདི་སྐད་ཅེས་པ་ཆོས་ཉིད་ཀྱི་རང་སྒྲ། བདག་ལ་ཞེས་པ། ཀུན་ཏུ་བཟང་པོ། རྣམ་པར་སྣང་མཛད་གངས་ཆེན་མཚོའོ། །རྡོ་རྗེ་འཆང་ངོ་། །ལ་སོགས་ཞེས་པ། གོང་མ་གསུམ་པོ་མཐའ་མེད་བརྗོད་ལས་འདས་པའོ། །སངས་རྒྱས་བྱེ་བ་དུང་ཕྱུར་གྱིས། །ཞེས་པའི་དོན་ནི། སངས་རྒྱས་ཞེས་པ་གཟུང་འཛིན་སངས་ནས་ཀ་དག་ཏུ་རྒྱས་པའོ། །བྱེ་བ་དུང་ཕྱུར་གྱིས་ཞེས་པ་གྲངས་སོ། །གོང་གིས་སོགས་ཀྱི་སྡེ་ཚན་ནོ། །དགོངས་པ་ཉིད་དང་གྲངས་མེད་པར། །ཞེས་པའི་དོན་ནི། དགོངས་པ་ཞེས་པ་སངས་རྒྱས་ཐམས་ཅད་ཀྱི། ཉིད་དང་ཞེས་པ་རྒྱུད། གྲངས་མེད་པར་ཞེས་པ་བསྐལ་པའོ། །ཐུགས་ཀྱི་སྙིང་པོ་ཇི་ལྟ་བར། །ཞེས་པའི་དོན་ནི། ཐུགས་ཀྱི་ཞེས་པ་སངས་རྒྱས་ཐམས་ཅད་ཀྱི། སྙིང་པོ་ཞེས་པ་རྒྱུད་འདི། ཇི་ལྟ་བར་ཞེས་པ་འདས་མ་འོངས་གསུམ་དག་ཏུ། གསུངས་ཤིང་བསྟན་པའི་དུས་གཅིག་ན། །ཞེས་པའི་དོན་ནི། གསུངས་ཤིང་ཞེས་པ་ཆོས་ཉིད་ཀྱི་སྒྲ་རང་བྱུང་དུ། བསྟན་པའི་ཞེས་པ་རིག་པའི་རང་བཞིན་ལུ་གུ་རྒྱུད་དུ། དུས་གཅིག་ན་ཞེས་པ་ཆོས་ཉིད་རྣམ་པར་དག་པའི། མྱ་ངན་འདས་པའི་ཐོག་མར་ནི། །ཞེས་པའི་དོན་ནི། མྱ་ངན་ཞེས་པ་འཁོར་བའི་སྡུག་བསྔལ། འདས་པའི་ཞེས་བྱ་བ་སངས་རྒྱས་ཀྱི་བདེ་བ། ཐོག་མར་ནི་ཞེས་པ་བདེ་སྡུག་གཉིས་ཀྱིས། འདི་ནི་ཉག་གཅིག་རྣལ་མ་ཡིན། །ཞེས་པའི་དོན་ནི། འདི་ནི་ཞེས་པ་རང་བབས་ཀྱི་རྒྱུད། ཉག་གཅིག་ནི་ཐིག་ལེ། རྣལ་མ་ཡིན་ཞེས་པ་མ་བཅོས་པའོ། །དོན་གྱི་ས་བོན་རྣམས་སུ་ནི། །ཞེས་པའི་དོན་ནི། དོན་གྱི་ཞེས་པ་ཡང་དག་པའི། ས་བོན་ནི་སངས་རྒྱས་པར་བྱེད་པའི། རྣམས་སུ་ནི་ཞེས་ཐམས་ཅད་དུ། ངེས་པའི་སྙིང་པོ་ཉིད་དུ་ཡང་། །ཞེས་པའི་དོན་ནི། ངེས་པའི་ཞེས་པ་སངས་རྒྱ་བར། སྙིང་པོ་ནི་ཆོས་ཐམས་ཅད་ཀྱི། ཉིད་དུ་ཡང་ཞེས་པ་བསྟན་པ་ཐམས་ཅད་ཀྱི་བུ་གཅིག་པོའི་རྒྱུད་འདི། གསུངས་སོ་བསྟན་ཏོ་བཤད་པ་ནི། །ཞེས་པའི་དོན་ནི། གསུངས་སོ་ནི་ཆོས་ཉིད་ཀྱི་སྒྲ་རང་བྱུང་དུ། བསྟན་ཏོ་ནི་སྐུ་དང་གསུང་དང་ཐུགས་ཡེ་ཞེས་རང་ཤར་དུ། བཤད་པ་ནི་ཞེས་པ་བྱིན་རླབས་རང་བབས་སུ། བསྟན་པའི་གསུང་ནི་རྒྱ་མཚོ་ཀུན། །ཞེས་པའི་དོན་ནི། བསྟན་པའི་ཞེས་པ་སངས་རྒྱས་ཐམས་ཅད་ཀྱི། གསུང་ནི་ཞེས་པ་འདུལ་བ་མདོ་སྡེ་མངོན་པ་མདོར་ན་ཐེག་པ་དགུའི་ཆོས་བསམ་ལས་འདས་པའོ། །རྒྱ་མཚོ་ཀུན་ཞེས་པ་གོང་མའི་གསུང་མཐའ་མེད་བརྗོད་ལས་འདས་པའོ། །ལ་ལ་གནས་སྐབས་ཡུལ་དོན་དུ། །ཞེས་པའི་དོན་ནི། ལ་ལ་ཞེས་པ་ཆོས། གནས་སྐབས་ཞེས་པ་སེམས་ཀྱི་སྐྱིད་སྡུག །ཡུལ་དོན་དུ་ཞེས་པ་ཁམས་གསུམ་སེམས་ཅན་གྱི་དོན་གསུངས་སོ། །ལ་ལ་མ་འོངས་འཇུག་དོན་ཡིན། །ཞེས་པའི་དོན་ནི། ལ་ལ་ཞེས་པ་ཆོས། མ་འོངས་ཞེས་པ་ཕྱིས། འཇུག་དོན་ཡིན་ཞེས་པ་སེམས་ཅན་རྣམས་ཆོས་ལ་འཛུད་པའི་དོན་དུ་གསུངས་སོ། །ལ་ལ་འདུལ་དོན་ཐ་དད་ཉིད། །ཅེས་པའི་དོན་ནི། ལ་ལ་ཞེས་པ་ཆོས། འདུལ་དོན་ཞེས་པ་བློ་ཆེ་ཆུང་གི་སེམས་ཅན། ཐ་དད་ཉིད་ཅེས་པ་ཐེག་པའི་མཐོ་དམན། སྙིང་གི་སྙིང་པོ་ཚིག་འགའ་ལས། །ཞེས་པའི་དོན་ནི། སྙིང་གི་ཞེས་པ་ཆོས་ཐམས་ཅད་ཀྱི། སྙིང་པོ་ཞེས་པ་ཡང་གསང་བླ་མེད་སྙིང་ཐིག་གི། ཚིག་འགའ་ལས་ཞེས་པ་རྒྱུད་ལུང་ཐམས་ཅད་དུ་གསུངས་ཀྱང་འཐོར་ཏེ་གོ་དཀའ། ཀུན་གྱིས་གྲུབ་པ་མ་ཡིན་ནོ། །ཞེས་པའི་དོན་ནི། ཀུན་གྱིས་ཞེས་པ་ཐེག་པ་ཐུན་མོང་བའི་ཆོས། གྲུབ་པ་ཞེས་པ་སངས་རྒྱས་ཀྱི། མ་ཡིན་ནོ་ཞེས་པ་སངས་རྒྱས་ནུས་པ། བསྟན་པ་འཕེལ་བྱེད་ས་བོན་དུ། །ཞེས་པའི་དོན་ནི། བསྟན་པ་ནི་སངས་རྒྱས་ཀྱི། འཕེལ་བྱེད་ཅེས་པ་གྲངས་ལས་འདས་པར། ས་བོན་དུ་ཞེས་པ་རྒྱུད་འདིའོ། །ཅི་སྟེ་ཞེས་ན་བཏགས་པས་སངས་རྒྱས། མཐོང་བས་སངས་རྒྱས། བལྟས་པས་སངས་རྒྱས། རེག་པས་སངས་རྒྱས། ཐོས་པས་སངས་རྒྱ་བས་སོ། །འདི་ཀུན་བཞག་ཅིང་བྱིན་བརླབས་ལས། །ཞེས་པའི་དོན་ནི། འདི་ཀུན་ཞེས་པ་རྒྱུད་འདིའི་ཚིག་རྣམས་སོ། །བཞག་ཅིང་ཞེས་པ་ཡེ་གདོད་མ་ནས། བྱིན་བརླབས་ལས་ཞེས་པ་སངས་རྒྱས་རྣམས་ཀྱི། རང་བྱུང་ཉིད་དུ་ཐུགས་ལས་རྡོལ། །ཞེས་པའི་དོན་ནི། རང་བྱུང་ནི་བྱས་པ་མེད་པའི་ཆོས་ཉིད་དོ། །ཉིད་དུ་ཞེས་པ་སྐད་ཅིག་མ། ཐུགས་ལས་རྡོལ་ཞེས་པ་རྡོ་རྗེ་འཆང་གི་ཐུགས། ཀུན་བཟང་ཤེས་རིག་གི་རྒྱལ་པོ་ལས་ཐིག་ལེ་རྡོལ། ཐིག་ལེ་ལས་སྐུ་རྡོལ། སྐུ་ཞི་ཁྲོ་ལས་གསུང་རང་བྱུང་བསྟན་པའི་བུ་གཅིག་རྡོལ་ལོ། །དེ་ཕྱིར་སངས་རྒྱས་ཐམས་ཅད་ཀྱི། །ཞེས་པའི་དོན་ནི། དེ་ཕྱིར་ཞེས་པ་གོང་ལྟར་རང་བབས་སུ་རྡོལ་བ། སངས་རྒྱས་ནི་གོང་དང་མཚུངས། ཐམས་ཅད་ཀྱི་ཞེས་པ་སྔར་འདས་པ། ད་ལྟར་བཞུགས་པ། མ་འོངས་བྱོན་པའི། ཐུགས་ཀྱི་སྲས་ནི་གཅིག་པར་ཡང་། །ཞེས་པའི་དོན་ནི། ཐུགས་ཀྱི་ཞེས་པ་སངས་རྒྱས་ཐམས་ཅད། སྲས་ནི་ཞེས་པ་རྒྱུད་འདིས་སངས་རྒྱས་སྤེལ་བས། གཅིག་པར་ཡང་ཞེས་པ་བསྟན་པ་ཐམས་ཅད་དུ་གང་སངས་རྒྱས་ཀྱང་འདིའི་བྱིན་བརླབས་སོ། །འདི་གཅིག་པུའི་མཐུའོ། །ཞེས་པའོ། །རང་བྱུང་ཆེན་པོ་འཕེལ་དང་བཅས། །ཞེས་པའི་དོན་ནི། རང་བྱུང་ཞེས་འདུས་མ་བྱས་པ་ནི་འདུས་མ་བྱས་པའི་ཆོས་སྐུའི་ཐིག་ལེ་ཉག་གཅིག །ཆེན་པོ་ནི་འདིའི་གོང་ན་མེད་པའི་ཡང་རྩེ། འཕེལ་དང་བཅས་ཞེས་པ་ནི། སངས་རྒྱས་ཀྱི་གདུང་འདི་བཏགས་ཚད་སངས་རྒྱ་བ་ལ་དགོངས་པའོ། །འབྱུང་བའི་དགྲ་དང་བྲལ་བར་གྱུར། །ཞེས་པའི་དོན་ནི། འབྱུང་བའི་ཞེས་པ་ས་ཆུ་མེ་རླུང་གི། དགྲ་དང་ཞེས་པ་གནོད་པ། བྲལ་བར་འགྱུར་ཞེས་པ་ཡེ་གདོད་མ་ནས། འདི་ནི་བསྟན་པ་གང་བྱུང་དུ། །ཞེས་པའི་དོན་ནི། འདི་ནི་ཞེས་པ་རྒྱུད་འདི། བསྟན་པ་ནི་སངས་རྒྱས་ཀྱི། གང་བྱུང་དུ་ཞེས་པ་མཐའ་མེད་དེ། འོད་དང་བཅས་ཏེ་འབྱུང་བ་ཡིན། །ཞེས་པའི་དོན་ནི། འོད་དང་ཞེས་པ་མཐིང་ཀ་དཀར་སེར་དམར་ལྗང་སྣ་ཚོགས་པར། བཅས་ཏེ་ཞེས་པ་རྒྱུད་འདི། འབྱུང་བ་ཡིན་ཞེས་པ་བྱིན་བརླབས་རང་བབས་སུ་སྔར་བྱོན། ད་ལྟ་བཞུགས། ཕྱིས་འབྱོན་པར་འགྱུར་རོ། །ཞེས་པའོ། །གང་ལ་བབས་པར་གྱུར་པའི་མི། །ཞེས་པའི་དོན་ནི། གང་ལ་ཞེས་འགྲོ་བ། བབས་པར་ཞེས་པ་རྒྱུད་བསྟན་པའི་བུ་གཅིག་འདི། གྱུར་པའི་མི་ཞེས་པ་སྐལ་ལྡན་ཏེ། བསྟན་པ་ཀུན་གྱི་བདག་པོར་འགྱུར། །ཞེས་པའི་དོན་ནི། བསྟན་པ་ཞེས་པ་སངས་རྒྱས་ཀྱི། ཀུན་གྱི་ཞེས་པ་མཐའ་མེད་བརྗོད་ལས་འདས་པ། བདག་པོར་འགྱུར་ཞེས་པ་རྒྱུད་འདི་ཐོགས་ཚད། བར་དོར་འདིའི་བྱིན་རླབས་ཀྱིས་སད་བྱེད་བྱས་ནས། རང་ངོ་ཤེས་ནས་སངས་རྒྱས་ཏེ་སྐད་ཅིག་གཅིག་ལ་འཛམ་བུའི་གླིང་བྱེ་བ་ཕྲག་བརྒྱར། སྤྲུལ་པའི་སྐུ་བྱེ་བ་ཕྲག་བརྒྱ་དུས་གཅིག་ལ་འགྱེད་ནུས་སོ། །འདི་ལ་ལྡེམ་པོར་བསྟན་པ་མེད། །ཅེས་པའི་དོན་ནི། འདི་ལ་ཞེས་པ་རྒྱུད་འདིའི་ཚིག་ལ། ལྡེམ་པོར་ཞེས་པ་ལྡེམ་རྒྱུ་དང་པོ་རྒྱུ་མེད་དེ་ཐམས་ཅད་རང་བྱུང་ཆོས་ཉིད་ཀྱི་རང་སྒྲའོ། །བསྟན་པ་མེད་ཅེས་པ་རྡོ་རྗེ་འཆང་ལ་སོགས་པས། སུས་ཀྱང་བཤད་ཅིང་ཉན་མེད་པར། །ཞེས་པའི་དོན་ནི། སུས་ཀྱང་ཞེས་པ་སངས་རྒྱས། བཤད་ཅིང་ཞེས་པ་ཚིག་ཏུ། ཉན་མེད་པར་ཞེས་པ་འཁོར། རང་བྱུང་དགོངས་པ་ཀློང་རྡོལ་དུ། །ཞེས་པའི་དོན་ནི། རང་བྱུང་ཞེས་པ་བྱས་པ་མེད་པའི་སྐུ་དང་ཡེ་ཤེས། དགོངས་པ་ཞེས་པ་སངས་རྒྱས་ཐམས་ཅད་ཀྱི་ཐུགས་ཀྱི། ཀློང་རྡོལ་དུ་ཞེས་པ་ངོ་བོ་རང་བཞིན་ཐུགས་རྗེ་གསུམ། ཉི་མ་སྤྲིན་ལས་འཐོན་པ་བཞིན། །ཅེས་པའི་དོན་ནི། ཉི་མ་ནི་ཡེ་ཤེས་ལྔ་ལྡན་གྱི་ཐིག་ལེ། སྤྲིན་ལས་ཞེས་པ་སེམས་ཅན་ལས་ཀྱི། འཐོན་པ་བཞིན་ཞེས་པ་ནི་དཔེ་སྟེ། འཁྲུལ་སྣང་སངས་ནས་ཡེ་ཤེས་སུ་རྒྱས་སོ། །སུས་ཀྱང་མ་བསྒྲིབས་རང་བྱུང་ངོ་། །ཞེས་པའི་དོན་ནི། སུས་ཀྱང་ཞེས་པ་ལས་དང་བག་ཆགས་ངན་པ་དང་། འབྱུང་བ་ཆེན་པོ་བཞི་དང་། ལྷ་དང་དབང་ཕྱུག་གིས། མ་བསྒྲིབས་ཞེས་པ་ཐིག་ལེ། རང་བྱུང་ངོ་ཞེས་པ་ཡེ་གདོད་མ་ནས། འདི་ལ་འབྱུང་བཞིའི་གནོད་མེད་པས། །ཞེས་པའི་དོན་ནི། འདི་ལ་ཞེས་རྒྱུད་ཀྱི་དོན་ལ། འབྱུང་བཞིའི་ཞེས་པ་ས་ཆུ་མེ་རླུང་གི། གནོད་མེད་པས་ཞེས་པ་ཡེ་ནས། སས་མི་ནོན་ཆུས་མི་འཇིག་མེས་མི་འཚིག་རླུང་གིས་བསྐྱོད་པར་མི་ནུས་སོ། །ནམ་མཁའ་བདག་ལ་འཕར་བར་སྣང་། །ཞེས་པའི་དོན་ནི། ནམ་མཁའ་ཞེས་པ། དབྱིངས་རྒྱན་བུ་ག་ཆོས་ཉིད་ཀྱི། དག་ལ་ཞེས་པ་ཐིག་ལེ། འཕར་བར་སྣང་ཞེས་པ་གོང་ནས་གོང་མངོན་སུམ་དུ། སངས་རྒྱས་འབྲས་བུ་སུས་ཐོབ་པ། །ཞེས་པའི་དོན་ནི། སངས་རྒྱས་ཞེས་པ་ཉོན་མོངས་པ་སངས་ཡེ་ཤེས་ལྔ་རྒྱས་པའོ། །འབྲས་བུ་ཞེས་པ་གཞི་ཀ་དག་གོ། །སུས་ཐོབ་པ་ཞེས་པ་སྐལ་ལྡན། འདི་ཉིད་དེ་ལས་སྣང་བ་ཡིན། །ཞེས་པའི་དོན་ནི། འདི་ཉིད་ཅེས་པ་རྒྱུད་དོན་ཐིག་ལེ་ཉག་གཅིག །དེ་ལས་ཞེས་པ་རྒྱུད་བཏགས་པའི་བྱིན་རླབས་ལས། སྣང་བ་ཡིན་ཞེས་པ་བར་དོར་སྐུ་གསུམ་དུ། འདི་མ་མཐོང་བའི་སངས་རྒྱས་ནི། །ཞེས་པའི་དོན་ནི། འདི་མ་བཅོས་པ་རང་བྱུང་གསུམ་སྟེ། སྐུ་རང་བྱུང་ཞི་ཁྲོ། གསུང་རང་བྱུང་བསྟན་པའི་བུ་གཅིག །ཐུགས་རང་བྱུང་ཐིག་ལེ་གསུམ། མཐོང་བའི་ཞེས་པ་སེམས་མ་བཅོས་པས། སངས་རྒྱས་ནི་ཞེས་པ་གང་དུ། གཅིག་ཀྱང་འབྱུང་བ་སྔ་ཕྱིར་མེད། །ཅེས་པའི་དོན་ནི། གཅིག་ཀྱང་ཞེས་པ་མེད་པའི་ཐ་ཚིག་གོ། །འབྱུང་སྲིད་ཀྱང་འདི་དང་ཕྲད་པའི་རྟགས་སོ། །འབྱུང་བ་ཞེས་པ་མངོན་སུམ་དུ། སྔ་ཕྱིར་མེད་ཅེས་པ་འདས་མ་འོངས་ད་ལྟ་གསུམ་ཀར་འབྱུང་རེ་ཀན་ནོ། །ཞེས་པའི་ཐ་ཚིག་གོ། །དེ་ཕྱིར་བསྟན་པ་རྣམས་ཀྱི་བཙས། །ཞེས་པའི་དོན་ནི། དེ་ཕྱིར་ཞེས་པ་རབ་ཏུ་དཀོན་པའི། བསྟན་པ་ཞེས་པ་སངས་རྒྱས་ཀྱི། རྣམས་ཀྱི་ཞེས་པ་མ་ལུས་པའི། བཙས་ཞེས་པ་རྒྱུད་འདིའོ། །སངས་རྒྱས་ཀུན་གྱི་སྲས་གཅིག་པོ། །ཞེས་པའི་དོན་ནི། སངས་རྒྱས་ནི་ཉོན་མོངས་པ་སངས་ཡེ་ཤེས་རྒྱས་པ་ལ་བྱའོ། །ཀུན་གྱི་ཞེས་པ་མ་ལུས་པའི། སྲས་གཅིག་པོ་ཞེས་པ་སངས་རྒྱས་ཀྱི་གདུང་སྤེལ་བའི་རྒྱུད་འདིའོ། །མྱང་འདས་ཐོབ་པའི་སྣ་ཐག་ཡིན། །ཞེས་པའི་དོན་ནི། མྱང་འདས་ཞེས་པ་སྡུག་བསྔལ་ཆོས་ཉིད་དུ། ཐོབ་པའི་ཞེས་པ་བར་དོར། སྣ་ཐག་ཡིན་ཅེས་པ་རྒྱུད་འདིས་འགྲོ་བ་སེམས་ཅན་ཐམས་ཅད་སངས་རྒྱས་ཀྱི་སར་འཁྲིད་པར་བྱེད་པས་འདི་དབུགས་ལ་སླེབ་པས་ཆོག་གོ། །དགོངས་པ་རང་ཐོག་ཕེབས་པ་ཡི། །ཞེས་པའི་དོན་ནི། དགོངས་པ་ནི་སངས་རྒྱས་ཐམས་ཅད་ཀྱི། རང་ཐོག་ནི་སེམས་ཀྱི། ཕེབས་པའི་ཞེས་པ་སྐད་ཅིག་ལ། གནད་ཀྱི་ཚིག་ཏུ་འདི་ཉིད་བྱུང་། །ཞེས་པའི་དོན་ནི། གནད་ཀྱི་ཞེས་པ་ཆོས་ཐམས་ཅད་ཀྱི། ཚིག་ཏུ་ཞེས་པ་འགྲོ་བ་གང་གི་ཡང་ཚིག་དང་ཡི་གེར། འདི་ཉིད་བྱུང་ཞེས་པ་བསྟན་པའི་བུ་གཅིག་འདི་རང་བབས་སུ་བྱོན་ནོ། །འཇིག་རྟེན་ཁམས་ནི་གང་དུ་ཡང་། །ཞེས་པའི་དོན་ནི། འཇིག་རྟེན་ཞེས་པ་འཇིག་ཆགས་ཅན་ནོ། །ཁམས་ནི་འབྱུང་བ་ལྔའི་སེམས་ཅན་དང་བཅས་པའོ། །གང་དུ་ཡང་ཞེས་པ་མཐའ་མེད་དེ་སྤྲུལ་སྐུའི་ཞིང་ཁམས་གང་བྱུང་བར། དེས་ཐུབ་པའི་ཞིང་ཁམས་འདི་དང་མཚུངས་སོ། །སངས་རྒྱས་ཉིད་ནི་སུས་ཐོབ་པ། །ཞེས་པའི་དོན་ནི། སངས་རྒྱས་ཞེས་པ་ཉོན་མོངས་པ་སངས་ཡེ་ཤེས་རྒྱས་པའོ། །ཉིད་ནི་ཞེས་པ་སྐད་ཅིག་ལ། སུས་ཐོབ་པ་ཞེས་པ་འགྲོ་བ་སྐལ་ལྡན་དེས། དེ་ཚེ་འདི་ནི་ལན་གསུམ་དུ། །ཞེས་པའི་དོན་ནི། དེ་ཚེ་ཞེས་པ་འགྲོ་བ་སྐལ་ལྡན་དེ་ལ་བབས་པ། འདི་ནི་ཞེས་པ་རྒྱུད་རང་འབྱོན། ལན་གསུམ་དུ་ཞེས་པ་ཆོས་ཉིད་ཀྱི་རང་སྒྲ་ལས་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་སྔར་བཀོད་དོ། །ད་ལྟ་བཀོད་པར་བགྱིད་དོ། །ཕྱིས་འགོད་པར་འགྱུར་རོ། །ཞེས་པའི་སྒྲ་ཐོས་ཚད་སྔར་སངས་རྒྱས་སོ། །ད་ལྟ་སངས་རྒྱའོ། །ཕྱིས་འཚང་རྒྱ་བ་ལ་དགོངས་པའོ། །ནམ་མཁའ་དག་ལ་འཕར་བ་དང་། །ཞེས་པའི་དོན་ནི། ནམ་མཁའ་ནི་དབྱིངས་ཀྱི། དག་ལ་ཞེས་པ་དངོས། འཕར་བ་དང་ཞེས་པ་སངས་རྒྱས་མྱ་ངན་ལས་འདས་པ་ལ་ཡང་བརྗོད། སངས་རྒྱས་ཀྱི་བསྟན་པ་གཅིག་རྫོགས་པ་དང་གཞན་དུ་གོང་ལྟར་བསྟན་པ་སྤེལ་བ་ལ་ཡང་དགོངས་པའོ། །རང་འོད་ལྔ་པོ་འདི་ལས་འབྱུང་། །ཞེས་པའི་དོན་ནི། རང་འོད་ནི་རིག་པའི། ལྔ་པོ་ནི་དཀར་སེར་དམར་ལྗང་མཐིང་བའི། འདི་ལས་འབྱུང་ཞེས་བརྒྱུད་འདི་སྔར་ཡོད་པ་འདས་ཙམ་ན་དང་། ཕྱིས་རྒྱུད་འདི་བབས་ཙ་ན་ནམ་མཁའ་གང་ནས་འབྱུང་ངོ་། །གནས་དང་མི་དང་རོ་ལ་ཟུག་པར་ཡང་འགྱུར་རོ། །དེའི་ཚེ་འཇའ་འོད་མཐོང་ཚད་འཁོར་བ་ལས་གྲོལ་ལོ། །འདི་འཛིན་རྣལ་འབྱོར་སྐལ་ཆེ་བས། །ཞེས་པའི་དོན་ནི། འདི་འཛིན་ཅེས་པ་བསྟན་པ་བུ་གཅིག་གི་རྒྱུད། རྣལ་འབྱོར་ཞེས་པ་དབུགས་ཆེན་འབྱིན་པའི། སྐལ་ཆེ་བས་ཞེས་པ་བཏགས་པ་ཙམ་ཐོས་པ་ཙམ་མཐོང་བ་ཙམ་རེག་པ་ཙམ་གྱིས། རབ་ཚེ་འདིར་སངས་རྒྱས་ཏེ། ཚངས་པ་ཆེན་པོ་དང་། ཁྱབ་འཇུག་དང་། ཀ་ལ་པི་ཀའི་གནས་སུ་སྒྲ་ཐོས་པ་ཙམ་གྱིས་འཁོར་བ་སྟོངས་པར་བྱས་སོ། །འབྲིང་བར་དོར་གྲོལ་བ་ལ་ཐེ་ཚོམ་མེད། ཐ་མ་ཡང་མངལ་སྒོ་མི་འགྲིམ་སྟེ། པདྨ་ལྔ་ལས་བརྫུས་ཏེ་སྐྱེས་ནས་ལོ་ལྔ་བརྒྱ་ན་སངས་རྒྱ་བའོ། །ལན་གསུམ་འདི་ཡི་ཚིག་ཀུན་ཡང་། །ཞེས་པའི་དོན་ནི། ལན་གསུམ་ནི་གྲངས་སོ། །འདི་ཡི་ཞེས་པ་སངས་རྒྱས་སྲས་གཅིག་པོའི་རྒྱུད། ཚིག་ཀུན་ཡང་ཞེས་པ་རང་བྱུང་གི། །ལྷག་དང་ཆད་པ་མེད་པར་ནི། །ཞེས་པའི་དོན་ནི། ལྷག་དང་ཞེས་པ་ཚིག །ཆད་པ་ནི་ཚིག །མེད་པར་ནི་ཞེས་པ་ཤིན་ཏུ་དག་པར་མོས་པ་གུས་པས། རྡོ་རྗེའི་ལྕེ་ཡིས་སུས་བརྗོད་ན། །ཞེས་པའི་དོན་ནི། རྡོ་རྗེའི་ཞེས་པས་རིགས་ལྔ་པོ་མཚོན་ཏེ། རྡོ་རྗེ་ནི་འགྱུར་བ་མེད་པའོ། །རིན་པོ་ཆེ་ནི་དགོས་འདོད་འབྱུང་བའོ། །པདྨ་ནི་སྐྱོན་གྱིས་མ་གོས་པའོ། །རལ་གྲི་ནི་གཟུང་འཛིན་གཅོད་པའོ། །འཁོར་ལོ་ནི་སྐུ་གསུམ་རྒྱུན་ཆད་མེད་པའོ། །ལྕེ་ཡིས་ཞེས་པ་ནི་རྡོ་རྗེ་སེམས་དཔའ་ཡབ་ཡུམ་གྱི་ལྕེ། རིན་པོ་ཆེ་རིན་ཆེན་འབྱུང་ལྡན་ཡབ་ཡུམ། པད་མ་སྣང་བ་མཐའ་ཡས་ཡབ་ཡུམ། རལ་གྲི་དོན་ཡོད་གྲུབ་པ་ཡབ་ཡུམ། འཁོར་ལོ་རྣམ་པར་སྣང་མཛད་ཡབ་ཡུམ། གཙོ་འཁོར་དང་ལྕེ་རུ་བསྒོམས་པ། སུས་བརྗོད་ན་ཞེས་པ་སྐལ་ལྡན་བྱང་སེམས་ཅན་གྱིས། གོང་ལྟར་བསྒོམས་ལ། ནད་གདོན་སྡིག་སྒྲིབ་སད་སེར་མུ་གེ་འཁྲུག་པ་ཞི་བར་འདོད་ན། རྡོ་རྗེ་སེམས་དཔའི་ཚོམ་བུར་བསྒོམ། ཚེ་བསོད་རྒྱས་པ་ལ་རིན་ཆེན་འབྱུང་ལྡན། དབང་ལ་སྣང་བ་མཐའ་ཡས། དྲག་པོ་ལ་དོན་ཡོད་གྲུབ་པ། ཐམས་ཅད་ལ་རྣམ་པར་སྣང་མཛད་ཡབ་ཡུམ་གཙོ་འཁོར་དུ་བསྒོམས་ཏེ། ཁ་ཤར་ལྷོ་ནུབ་བྱང་དུ་བལྟས་ལ། ངག་བཅད་ལ་ཚར་གསུམ་གསུམ་བཅོ་ལྔ་དག་པར་བརྗོད་ན། དེའི་དུས་སུ་འཇའ་འོད་ཁ་ཆར་ཁུ་རླངས་འབྲུག་ལ་སོགས་པའི་ལྟས་ཅི་བྱུང་ཡང་རུང་སྟེ། མཐོང་བ་ཐོས་པ་རེག་པ། འདི་ཡང་དེ་དང་མཉམ་པར་ཡོང་། ཞེས་པའི་དོན་ནི། འདི་ཡང་ཞེས་པ་གོང་མའི་ཚིག་ལྷག་སྟེ། གོང་གི་འཇའ་འོད་འབྲུག་སྒྲ་ཐོས་མཐོང་རེག་པའི་སེམས་ཅན་ཐམས་ཅད། དེ་དང་ཞེས་པ་རབ་འདི། འབྲིང་བར་དོ། །ཐ་མ་མངལ་སྒོ་མི་འགྲིམ་སྟེ་གོང་མ་དང་། མཉམ་པར་ཡོང་ཞེས་པ་དགོངས་པ་དང་རྟགས། འགྱུར་བར་འདི་ལ་ཐེ་ཚོམ་མེད། །ཅེས་པའི་དོན་ནི། འགྱུར་བར་ཞེས་པ་སངས་རྒྱ་བར། འདི་ལ་ཞེས་པ་རྒྱུད་འདིས། ཐེ་ཚོམ་ཡོད་རེ་ཀན་ནོ། །མངོན་སུམ་རིག་པ་རྟོགས་པས་སྨོས་ཅི་དགོས། དེ་ཕྱིར་བསྟན་པའི་རྒྱུད་རྣམས་ཀུན། །ཞེས་པའི་ཚིག་དོན་ནི། དེ་ཕྱིར་ཞེས་པ་རྒྱུད་འདི་མིན་པ། བསྟན་པའི་ཞེས་པ་སངས་རྒྱས་ཀྱིས། རྒྱུད་རྣམས་ཀུན་ཅེས་པས་སྔགས་ཕྱི་ནང་གི། ཐམས་ཅད་དུས་གཅིག་བསྒོམ་ཤེས་ཀྱང་། །ཞེས་པའི་དོན་ནི། ཐམས་ཅད་ཅེས་པ་ཆོས། དུས་གཅིག་ཅེས་པས་ས་གཅིག་པར། བསྒོམ་ཤེས་ཀྱང་ཞེས་པ་གང་ཟག་གིས། འདི་མ་སྣང་བར་གྲོལ་བ་མེད། །ཅེས་པའི་དོན་ནི། འདི་མ་ཞེས་པ་རྒྱུད་འདི། སྣང་བར་ཅེས་པ་རྒྱུད་དོན་རིག་པ་མངོན་སུམ་དུ། གྲོལ་བ་མེད་ཅེས་པ་ཆོས་གཞན་མཁས་པ་པཎྜི་ཏར་གྱུར་ཀྱང་། འདི་ནི་ས་བོན་རང་འཕེལ་བས། །ཞེས་པའི་དོན་ནི། འདི་ནི་ཞེས་པ་རྒྱུད། ས་བོན་ནི་སངས་རྒྱས་ཀྱི། རང་འཕེལ་བས་ཞེས་པ་རྒྱུད་འདིའི་བྱིན་བརླབས་ལས། བསྟན་པའི་བདག་པོ་གང་སངས་རྒྱས། །ཞེས་པའི་དོན་ནི། བསྟན་པའི་ཞེས་པ་སངས་རྒྱས་ཀྱི། བདག་པོ་ཞེས་པ་དངོས་དཔེ་ཤཱཀྱ་ཐུབ་པ་ལྟ་བུའོ། །གང་སངས་རྒྱས་ཞེས་པ་འཇིག་རྟེན་གྱི་ཁམས་གང་དུ་སངས་རྒྱས་གང་བྱོན་ཀྱང་། འདི་ཉིད་ས་བོན་མེད་པར་ནི། །ཞེས་པའི་དོན་ནི། འདི་ཉིད་ཅེས་པ་རྒྱུད་བསྟན་པའི་བུ་གཅིག་འདི། ས་བོན་ཞེས་པ་སངས་རྒྱས་ཀྱི། མེད་པར་ནི་ཞེས་པ་རྒྱུད་རང་བྱུང་འདིའི་བྱིན་རླབས་མ་ཐོས་མ་མཐོང་མ་རེག་པར། བསྟན་པའི་གསུང་ནི་ཚིག་ཙམ་ཡང་། །ཞེས་པའི་དོན་ནི། བསྟན་པའི་ཞེས་པ་སངས་རྒྱས་ཀྱིས། གསུང་ནི་ཞེས་པ་མདོ་རྒྱུད། ཚིག་ཙམ་ཡང་ཞེས་པ་གསུང་། ལྕེ་ཡི་དབང་པོས་བརྗོད་མི་ནུས། །ཞེས་པའི་དོན་ནི། ལྕེ་ཡི་ཞེས་པ་འགྲོ་བ་ཐ་དད་པའི། དབང་པོས་ཞེས་པ་སྨྲ་བྱེད་ཀྱིས། བརྗོད་མི་ནུས་ཞེས་པ་ཚིག་གཅིག་ཙམ་ཡང་། དེ་ཚིག་འདི་ལ་མ་བརྟེན་པར། །ཞེས་པའི་དོན་ནི། དེ་ཚིག་ཅེས་པ་ཆོས་ཐམས་ཅད་ཀྱི། འདི་ལ་ཞེས་པ་བསྟན་པའི་བུ་གཅིག་གི་རྒྱུད། མ་བརྟེན་པར་ཞེས་པ་བྱིན་རླབས་རང་བབས་ལ། རྡུལ་ཆ་ཙམ་ཡང་འབྱུང་བ་མེད། །ཅེས་པའི་དོན་ནི། རྡུལ་ཆ་ནི་ཕྲ་རབ་བརྒྱར་བཤགས་པའི་ཆ། ཙམ་ཡང་ཞེས་པ་མེད་པའི་ཚད། འབྱུང་བ་མེད་ཅེས་པ་སངས་རྒྱས་ཀྱི་གསུང་། བསྟན་པ་གཅིག་གི་སྙིགས་མ་ལ། །ཞེས་པའི་དོན་ནི། བསྟན་པ་སངས་རྒྱས་ཀྱི། གཅིག་གི་ཞེས་པ་གང་རུང་། སྙིགས་མ་ལ་ཞེས་པ་བསྟན་པ་མར་འགྲིབ་དུས་ན་འབྱུང་ངོ་། །དེ་ཉོན་མོངས་པ་ཆ་ཆ་ནས་རགས་སུ་སོང་བ་ལས་བྱུང་ཞིང་ལན་ནོ། །བྱིན་རླབས་ཚིག་ནི་འདི་ཀུན་ཡང་། །ཞེས་པའི་དོན་ནི། བྱིན་བརླབས་ནི་ཡེ་གདོད་མ་ནས་ཆོས་ཉིད་ཀྱི། ཚིག་ནི་ཞེས་པ་འདི་རང་གི། འདི་ཀུན་ཡང་ཞེས་པ་ལེའུ་བདུན་པ་འདིའོ། །གང་ལ་སྣང་བའི་མི་དེས་ཀྱང་། །ཞེས་པའི་དོན་ནི། གང་ལ་ཞེས་པ་འགྲོ་བ། སྣང་བའི་ཞེས་པ་བྱིན་རླབས་མངོན་སུམ་དུ། མི་དེས་ཀྱང་ཞེས་པ་སྐལ་ལྡན་ཕོ་མོ། དཔེ་དགའ་རབ་རྡོ་རྗེེ་བདག་དང་མཚུངས་སོ། །མ་མཐོང་རྒྱུད་དང་བསྟན་བཅོས་ནི། །ཞེས་པའི་དོན་ནི། མ་མཐོང་ཞེས་པ་སྔར། རྒྱུད་དང་ཞེས་པ་སྔགས་ཕྱི་ནང་དུ་གྲགས་པའོ། །བསྟན་བཅོས་ནི་ཞེས་པ་རིག་འཛིན་འཕགས་པ་རྣམས་ཀྱི། ལྕེ་ཡི་དབང་པོས་བརྗོད་པར་ནུས། །ཞེས་པའི་དོན་ནི། ལྕེ་ཡི་ཞེས་པ་བརྗོད་པའི། དབང་པོས་ཞེས་པ་རང་དབང་ཐོབ་པར། བརྗོད་པར་ནུས་ཞེས་པ་ཚིག་དོན་འབྲེལ་ཅན་དུ། སེམས་ཅན་ཀུན་གྱི་བསམ་པ་དང་། །ཞེས་པའི་དོན་ནི། སེམས་ཅན་ནི་ཁམས་གསུམ་གྱི། ཀུན་གྱི་ཞེས་པ་མ་ལུས་པའི། བསམ་པ་དང་ཞེས་སོ་སོ་རང་རང་གི། སངས་རྒྱས་ཀུན་གྱི་དགོངས་པ་ནི། །ཞེས་པའི་དོན་ནི། སངས་རྒྱས་ཞེས་པ་ནི་ཆོས་སྐུའི་སངས་རྒྱས་ཀུན་བཟང་ཡབ་ཡུམ། ལོངས་སྐུའི་སངས་རྒྱས་རྣམ་པར་སྣང་མཛད་གངས་ཆེན་མཚོ། སྤྲུལ་སྐུའི་སངས་རྒྱས་རྡོ་རྗེ་འཆང་། ཀུན་གྱི་ཞེས་པ་ནི་སངས་རྒྱས་དེ་དག །དགོངས་པ་ནི་ཞེས་པ་ནི་དེ་རྣམས་ཀྱི། ཇི་ལྟར་མཐུན་པའི་ཆོས་ཀུན་ནི། །ཞེས་པའི་དོན་ནི། ཇི་ལྟར་ཞེས་པ་བློ་ཆེ་ཆུང་། མཐུན་པའི་ཞེས་པ་སོ་སོར། ཆོས་ཀུན་ནི་ཞེས་པ་མ་ལུས་པ་ལ། འདི་ཡིས་སྟོན་པར་ནུས་པ་ཡིན། །ཞེས་པའི་དོན་ནི། འདི་ཡིས་ཞེས་པ་རྒྱུད། སྟོན་པར་ཞེས་པ་སོ་སོ་རང་རང་གི་སྐད་དུ། ནུས་པ་ཡིན་ཞེས་བྱིན་རླབས་ཀྱིས། འཛམ་བུ་གླིང་བྱེ་བ་ཕྲག་བརྒྱས་ཐོག་དྲངས་ནས་མཐའ་མེད་བརྗོད་ལས་འདས་པར། སངས་རྒྱས་རྣམས་ནི་ཐུགས་དང་གཅིག །དེས་པའི་དོན་ནི། སངས་རྒྱས་ནི་ངོ་བོ་རང་བཞིན་ཐུགས་རྗེ་གསུམ་གྱི་དྲི་མ་ཡེ་ནས་སངས། སྐུ་དང་ཡེ་ཤེས་མཁྱེན་པ་ཡེ་ནས་རྒྱས་པའོ། །རྣམས་ཀྱི་ཞེས་པ་བརྗོད་པ་ལས་འདས་པའི། ཐུགས་དང་གཅིག་ཅེས་པ་སྙིང་པོ་ལྔ་ལྡན་ནོ། །རྡོ་རྗེ་འཛིན་པའི་དགོངས་པ་དང་། །ཞེས་པའི་དོན་ནི། རྡོ་རྗེ་ནི་སྟོང་རིག་ལྔ་ལྡན་ནོ། །འཛིན་པའི་ཞེས་པ་རྡོ་རྗེ་འཆང་གི་བརྒྱུད་པ་བླ་མ་མཚན་ལྡན་ནོ། །དགོངས་པ་དང་ཞེས་པ་སངས་རྒྱས་དང་མཉམ་པའོ། །དབྱེར་མི་ཕྱེད་པར་འདིས་འགྱུར་རོ། །ཞེས་པའི་དོན་ནི། དབྱེར་མི་ཞེས་པ་སངས་རྒྱས་ཐམས་ཅད་ཀྱི་ཐུགས་བླ་མའི་དགོངས་པ། ཕྱེད་པར་ཞེས་པ་རྒྱུད་འདི་བཏགས་མཐོང་ཐོས་དྲན་རེག་གི་འགྲོ་བ་དང་། འདིས་འགྱུར་རོ་ཞེས་པ་བསྟན་པའི། །དེ་ཕྱིར་བསྟན་པའི་མེ་རོ་ཡིན། །ཞེས་པའི་དོན་ནི། དེ་ཕྱིར་ཞེས་པ་རྒྱུད་འདི། བསྟན་པའི་ཞེས་པ་སངས་རྒྱས་ཐམས་ཅད་ཀྱི། མེ་རོ་ཡིན་ཞེས་པ་དཔེ་ནགས་ཚིག་པའི་མེ་རོ་དེ། རླུང་སེར་བུ་བྱུང་བ་དང་མེ་རོ་ལངས་ནས་གཞན་དུ་མཆེད་པར་འདྲ་བར་རྒྱུད་འདི་སངས་རྒྱས་ཀྱི་བསྟན་པ་གཅིག་རྫོགས་པ་དང་། ཡང་གཞན་དུ་འབར་ནས་བསྟན་པ་འཕེལ་བ་ལ་དགོངས་པའོ། །རང་བྱུང་ཚིག་གི་རྒྱལ་པོ་འདི། །ཞེས་པའི་དོན་ནི། རང་བྱུང་ནི་མ་བྱས་པའི་རིག་པ། ཚིག་གི་ཞེས་པ་ནི་འདུས་མ་བྱས་པའོ། །རྒྱལ་པོ་འདི་ཞེས་པ་གོང་ན་མེད་པའི་རྒྱུད་བསྟན་པའི་བུ་གཅིག །སོ་སོའི་སེམས་ཅན་སྐྱེ་གཟུགས་ལ། །ཞེས་པའི་དོན་ནི། སོ་སོའི་ཞེས་པ་རིགས་དྲུག །སེམས་ཅན་ཅེས་པ་བཅུད་ཀྱི། སྐྱེ་གཟུགས་ལ་ཞེས་པར་བརྫུས་སྐྱེས། སྒོང་སྐྱེས། དྲོད་གཤེར་ལས་སྐྱེས་པ། མངལ་ལས་སྐྱེས་པ། གཟུགས་ཆེ་ཆུང་ཐ་དད་པའོ། །སོ་སོའི་བརྡ་སྐད་ཇི་ལྟ་བར། །ཞེས་པའི་དོན་ནི། སོ་སོའི་ཞེས་པ་སེམས་ཅན། བརྡ་སྐད་ཅེས་པ་རང་རང་གི། ཇི་ལྟ་བར་ཞེས་པ་མཐུན་པར། འདི་ཉིད་དེ་ལྟར་སྣང་བ་ཡིན། །ཞེས་པའི་དོན་ནི། འདི་ཉིད་ཅེས་པ་རྒྱུད། དེ་ལྟར་ཞེས་པ་གོང་མ་བཞིན། སྣང་བ་ཡིན་ཞེས་པ་སོ་སོ་རང་རང་གི་ཡི་གེར་རྒྱུད་དོན་ཐིག་ལེ་ཡང་བརྗོད་དོ། །དེ་ཕྱིར་རང་བྱུང་ཡི་གེར་ནི། །ཞེས་པའི་དོན་ནི། དེ་ཕྱིར་ཅེས་པ་རྒྱུད་བསྟན་པའི་བུ་གཅིག་འདི། རང་བྱུང་ཞེས་པ་ཡུལ་སོ་སོ་རང་རང་ལས། ཡི་གེར་ནི་ཞེས་པ་རིགས་མི་གཅིག་པ། ཐོག་མ་བབས་ཀྱིས་གྲུབ་ནས་བྱུང་། །ཞེས་པའི་དོན་ནི། ཐོག་མ་ནི་སངས་རྒྱས་དང་སེམས་ཅན་གྱི་མིང་མེད་དེ་ལས། བབས་ཀྱིས་ཞེས་རང་བཞིན། གྲུབ་ནས་བྱུང་ཞེས་པ་ཆོས་ཉིད་ཀྱི་རང་སྒྲར་བྱུང་བའོ། །རང་བྱུང་བཅོམ་ལྡན་འདས་ལ་ཡང་། །ཞེས་པའི་དོན་ནི། རང་བྱུང་ནི་རིག་པའི་ཡེ་ཤེས། བཅོམ་ལྡན་ནི་ཉོན་མོངས་པ་ལྔ་བཅོམ། སྐུ་ལྔ་དང་ལྡན། འདས་ལ་ཡང་ཞེས་པ་སྐུ་གསུམ་གྱི་འཛིན་པ་ལས་འདས་པའོ། །འདི་ལྟར་རྫོགས་པའི་ལུགས་སུ་སྣང་། །ཞེས་པའི་དོན་ནི། འདི་ལྟར་ཞེས་པ་ཆོས་ཐམས་ཅད། རྫོགས་པའི་ཞེས་པ་རྒྱུད་འདི། ལུགས་སུ་སྣང་ཞེས་པ་ཡེ་གདོད་མ་ནས་མངོན་སུམ་དུ། ཆོས་ཀྱི་སྡེ་སྣོད་ཉིད་དུ་ནི། །ཞེས་པའི་དོན་ནི། ཆོས་ཀྱི་ཞེས་པ་སངས་རྒྱས་ཀྱིས་གསུངས་པའི། སྡེ་སྣོད་ནི་འདུལ་བ་མདོ་སྡེ་མངོན་པའོ། །ཉིད་དུ་ནི་ཞེས་པ་སྔགས་ཕྱི་ནང་། འདི་ཚིག་ཡེ་ནས་རང་ཤར་བས། །ཞེས་པའི་དོན་ནི། འདི་ཚིག་ཅེས་པ་བསྟན་པའི་བུ་གཅིག་གི། ཡེ་ནས་ཞེས་པ་སུས་ཀྱང་བྱས་པ་མེད་པར། རང་ཤར་བས་ཞེས་པ་གསལ་སྟོང་དབྱེར་མེད་ཐིག་ལེར། ཐོག་མ་དྲན་པའི་གཞིར་གྱུར་ཏེ། །ཞེས་པའི་དོན་ནི། ཐོག་མ་ཞེས་པ་ཡེ་ཤེས་གསུམ་མོ། །ཡེ་ཤེས་གསུམ་ནི་ངོ་བོ་ཀ་དག །རང་བཞིན་ལྷུན་གྲུབ། ཐུགས་རྗེ་ཀུན་ཁྱབ་ཀྱི་ཡེ་ཤེས་སོ། །དྲན་པའི་ཞེས་པ་རིག་པ་རང་དྭངས་སུ། གཞིར་གྱུར་ཏེ་ཞེས་པ་རྒྱུད་བསྟན་པའི་བུ་གཅིག་འདི། དྲན་པ་ཐམས་ཅད་མ་སྟོངས་པར། །ཞེས་པའི་དོན་ནི། དྲན་པ་ཞེས་པ་མི་དྲན་དགུ་དྲན་འདི། ཐམས་ཅད་ཅེས་པ་མ་ལུས་པ། མ་སྟོངས་པར་ཞེས་པ་དྲན་མེད་དུ། ཚིག་འདི་ཀུན་ཀྱང་སྣང་བ་ཡིིན། །ཞེས་པའི་དོན་ནི། ཚིག་འདི་ཞེས་པ་རྒྱུད་ཀྱི། ཀུན་ཀྱང་ཞེས་པ་མ་ལུས་པར། སྣང་བ་ཡིན་ཞེས་པ་ཐམས་ཅད་ཀྱི་ཡི་གེར། དྲན་ཟད་ཚིག་འདི་ཟད་པར་ནི། །ཞེས་པའི་དོན་ནི། དྲན་ཟད་ཅེས་པ་གཟུང་འཛིན། ཚིག་འདི་ཞེས་པ་བསྟན་པའི་བུ་གཅིག་གིས། ཟད་པར་ནི་སྐུ་གསུམ་གྱི་འཛིན་པ། རྡོ་རྗེ་ཞེས་ནི་ཚིག་འདི་ཀུན། །ཞེས་པའི་དོན་ནི། རྡོ་རྗེ་ནི་འགྱུར་མེད་འཛིན་ཟད་ཀ་དག་དེའོ། །ཞེས་ནི་དེ་ལ་བྱ་ཞེས་པའི་ཚིག་གོ། །ཚིག་འདི་ཀུན་ཞེས་པ་དང་རང་བྱུང་གི། །འབྱུང་བའི་རྐྱེན་དང་བྲལ་བས་ན། །ཞེས་པའི་དོན་ནི། འབྱུང་བའི་ཞེས་པ་ས་ཅུ་མེ་རླུང་གི། །རྐྱེན་དང་ཞེས་པ་ས་རླུང་ལྟ་བུའམ་མེ་ཆུའམ་གཉིས་འདོམ་གྱི་སྒྲ་མིན་ཚིག་མིན། བྲལ་བས་ན་ཞེས་པ་ཡེ་གདོད་མ་ནས། རྡོ་རྗེ་ཀུན་འབྱུང་གསང་སྔགས་ཡིན། །ཞེས་པའི་དོན་ནི། རྡོ་རྗེ་ནི་འཆང་ཆེན་པོའོ། །ཀུན་འབྱུང་ནི་གོང་མ་གྲངས་ལས་འདས་པའོ། །གསང་སྔགས་ཡིན་ཞེས་པ་རྒྱུད་འདི་ལོག་ལྟ་ཅན་ལ། ཐབས་ལམ་དུ་མ་མཚོན་པའི་ཕྱིར། །ཞེས་པའི་དོན་ནི། ཐབས་ལམ་ནི་སངས་རྒྱ་བའི། དུ་མ་ནི་རྩ་ལ་བརྟེན་པ་དང་རླུང་ལ་བརྟེན་པ་དང་ཐིག་ལེ་དང་ལས་རྒྱ་ལ་བརྟེན་པ་དང་ཕྱག་དང་བསྐོར་བ་བྱ་བ་ལ་བརྟེན་པའོ། །མཚོན་པའི་ཕྱིར་ཞེས་པ་རྒྱུད་འདི་ལ། རང་བབས་བསྒོམ་པ་འདི་ལས་བྱུང་། །ཞེས་པའི་དོན་ནི། རང་བབས་ཞེས་པ་སངས་རྒྱས་སྒམ་སྟེ་མ་མཛད་སེམས་ཅན་སྒྲིན་པོས་མི་བཅོས་པའོ། །བསྒོམ་པ་ནི་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པའི། འདི་ལས་བྱུང་ཞེས་པ་རྒྱུད་བསྟན་པའི་བུ་གཅིག །སྙིང་པོ་རང་འདུལ་བསྟན་པའི་བཅུད། །ཅེས་པའི་དོན་ནི། སྙིང་པོ་ནི་ཆོས་ཐམས་ཅད་ཀྱི། རང་འདུལ་ནི་ཉོན་མོངས་པ། བསྟན་པའི་བཅུད་ཅེས་རྒྱུད་འདི། གཞི་ཉིད་ཀྱི་ནི་བབས་ཡིན་ནོ། །ཞེས་པའི་དོན་ནི། གཞི་ཉིད་ཅེས་པ་དང་པོའི། ཀྱི་ནི་ཞེས་པ་ཐམས་ཅད་མ་ལུས་པའི། བབས་ཡིན་ནོ་ཞེས་པ་དངོས་པོ་གཤིས་ཀྱི། ཆོས་ཀུན་མཉམ་པའི་ནན་ཏན་ཚིག །ཅེས་པའི་དོན་ནི། ཆོས་ཀུན་ཞེས་པ་ཐེག་པ་དགུའི། མཉམ་པའི་ཞེས་པ་མཐའ་མཉམ་པ་མཐོ་དམན་མེད་པར། ནན་ཏན་ཚིག་ཅེས་པ་རྒྱུད་འདིས་སེམས་ཅན་སངས་རྒྱ་བར་བྱེད་པའི། རང་གནད་དུ་ནི་འདི་ཀུན་ཤར། །ཞེས་པའི་དོན་ནི། རང་གནད་ཅེས་པའི་དོན་ནི་སེམས་ཅན། དུ་ནི་ཞེས་པ་སངས་རྒྱ་བའི། འདི་ཀུན་ཤར་ཅེས་པ་རྒྱུད་ཀྱི་ཚིག་དོན་གཅིག་པར་མཁའ་ལ་མངོན་སུམ་དུ། འདི་ལ་ནུབ་པ་གཅིག་ཉིད་མེད། །ཅེས་པའི་དོན་ནི། འདི་ལ་ཞེས་པ་རྒྱུད་བསྟན་པའི་བུ་གཅིག །ནུབ་པ་ཅེས་པ་རྟོགས་རུང་མ་རྟོགས་རུང་། བཏགས་རུང་མ་བཏགས་རུང་། མཐོང་རུང་མ་མཐོང་རུང་། རེག་རུང་མ་རེག་རུང་། གཅིག་ཉིད་མེད་ཅེས་པ་གང་དུ་ཡང་། ཅི་སྟེ་ན་འདི་ལ་འབྱུང་བཞིའི་གནོད་མེད་པས་ཞེས་པས་གསལ་ལོ། །བསྒོམ་དང་བསྒྲུབ་པའི་རྩ་བར་ཡང་། །ཞེས་པའི་དོན་ནི། བསྒོམ་དང་ཞེས་པ་རྩ་དང་རླུང་དང་ཐིག་ལེ། བསྒྲུབ་པའི་ཞེས་པ་སྐུ་དང་གསུང་ཐུགས་ལ་སོགས་པ། རྩ་བར་ཡང་ཞེས་པ་བསྟན་པའི་བུ་གཅིག་གི་རྒྱུད་བྱུང་བའོ། །འདི་སྔགས་འཁྲུལ་པའི་ཚིག་མ་ཡིན། །ཞེས་པའི་དོན་ནི། འདི་སྔགས་ཞེས་པ་རྒྱུད་འདིའི། འཁྲུལ་པའི་ཞེས་པ་ལུས་ངག་ཡིད་གསུམ། ཚིག་མ་ཡིན་ཞེས་པ་ཀ་དག་འཁྲུལ་མེད་ཀྱི་སྙིང་པོ། ཡབ་ཀུན་ཏུ་བཟང་པོའི་དགོངས་པ། ཡུམ་ཀུན་ཏུ་བཟང་མོའི་དགོངས་པ། ཡབ་ཡུམ་གཉིས་སུ་མེད་པའི་དགོངས་པ། འཇའ་འོད་ལྷ་སྐུ་རིང་བསྲེལ་གྱི་སྙིང་པོ། ལོངས་སྐུ་ཞི་ཁྲོའི་རང་སྒྲ་ཡི་གེ་དྲུག །དུས་གསུམ་སངས་རྒྱས་ཀྱི་སྙིང་པོ་ཡིག་འབྲུ་གསུམ། གྲགས་སྟོང་སྤྲུལ་པའི་སྐུའི་ཡང་སྙིང་ཨ་ལི་ཀཱ་ལི། བསྟན་པ་མི་འགྱུར་བའི་ཡང་སྙིང་རྟེན་འབྲེལ་སྙིང་པོ་ཕྲིན་ལས་མཐའ་རྒྱས་ཀྱི་ཤམ་བུ་དང་བཅས་པའོ། །མ་འཁྲུལ་སྔོན་ཐོག་ཉིད་ཀྱི་གཞི། །ཞེས་པའི་དོན་ནི། མ་འཁྲུལ་ཞེས་པ་ངོ་བོ་རང་བཞིན་ཐུགས་རྗེ་གསུམ། སྔོན་ཐོག་ཅེས་པ་སངས་རྒྱས་དང་སེམས་ཅན་རྒྱབ་མ་གྱེས་པའི་དུས། ཉིད་ཀྱི་གཞི་ཞེས་པ་རྒྱུད་བསྟན་པའི་བུ་གཅིག་འདི། འདི་ལས་འཕྲོས་པས་སྤྲོས་པའི་རྒྱུད། །འདི་ལས་ཞེས་པ་རྒྱུད། འཕྲོས་པས་ཞེས་པ་ཐུགས་རྗེ། སྤྲོས་པའི་རྒྱུད་ཅེས་པ་ཆོས་ཀྱི་སྒོ་མོ་མ་ལུས་པ། རྒྱུ་ལས་འབྲས་བུ་རང་བྱུང་བཞིན། །ཞེས་པའི་དོན་ནི། རྒྱུ་ལས་ཞེས་པ་འཁྲུལ་མེད་སྙིང་པོ། འབྲས་བུ་ནི་འཁྲུལ་མེད་སངས་རྒྱས། རང་བྱུང་བཞིན་ཞེས་པ་སེམས་ཅན་ལ། འདི་དག་ལས་ནི་ཚིག་ཀུན་ཡང་། །ཞེས་པའི་དོན་ནི། འདི་དག་ཅེས་པ་རྒྱུད། ལས་ནི་ཞེས་པ་བྱིན་བརླབས། ཚིག་ཀུན་ཡང་ཞེས་པ་ཐམས་ཅད། དྲན་བསམ་བྲལ་བའི་ངང་ཉིད་ལས། །ཞེས་པའི་དོན་ནི། དྲན་བསམ་ཞེས་པ་བམས་མནོས་པ་ལྟ་བུ་ཡིན་ཏེ། བྲལ་བའི་ཞེས་པ་བློ་དང་། ངང་ཉིད་ལས་ཞེས་པ་ཆོས་ཉིད་ཀྱི། བྱས་པ་མེད་པར་བྱུང་བ་ཡིན། །ཞེས་པའི་དོན་ནི། བྱས་པ་ཞེས་པ་སུས་ཀྱང་། མེད་པར་ཞེས་པ་འཇིག་རྟེན་གྱི་ཁམས་གང་དུ་ཡང་། བྱུང་བ་ཡིན་ཞེས་པ་ཆོས་ཉིད་ཀྱི་རང་སྒྲར། འོད་ཟེར་འཛིན་པའི་སྐྱེས་བུ་ལ། །ཞེས་པའི་དོན་ནི། འོད་ཟེར་ཞེས་པ་རིག་མདངས་ཞི་ཁྲོ་རང་གསལ་གྱི། འཛིན་པའི་ཞེས་པ་ནམ་མཁའ་ལ། སྐྱེས་བུ་ལ་ཞེས་པ་སྐལ་ལྡན། འདི་ནི་སྣང་བར་འགྱུར་བའོ། །ཞེས་པའི་དོན་ནི། འདི་ནི་རྒྱུད་བསྟན་པའི་བུ་གཅིག །སྣང་བར་ཞེས་པ་མངོན་སུམ། འགྱུར་བ་འོ་ཞེས་པ་རྟགས་ཚད་གོང་དུ་འཕེལ་བ་དང་། དེ་ལས་འཕེལ་ནས་གྲངས་འགའ་འབྱུང་། །ཞེས་པའི་དོན་ནི། དེ་ལས་ཞེས་པ་སྐལ་ལྡན་སེམས་ཀྱི་བུ་རིག་པ་མངོན་སུམ་དུ་མཐོང་བ། འཕེལ་ནས་ཞེས་པ་དོན་རྒྱུད། གྲངས་འགའ་འབྱུང་ཞེས་པ་སངས་རྒྱས་འཇིག་རྟེན་གྱི་ཁམས་སུ། གསང་བའི་བདེན་པ་གཅིག་པ་ཉིད། །ཅེས་པའི་དོན་ནི། གསང་བའི་ཞེས་པ་ལོག་ལྟ་ཅན་ལ། བདེན་པ་ནི་དོན་དམ་པའི། གཅིག་པ་ཉིད་ཅེས་པ་རྒྱུད་འདི། །གྲངས་མེད་རྡོ་རྗེ་འཆང་རྣམས་ཀྱི། །ཞེས་པའི་དོན་ནི། གྲངས་མེད་ཅེས་པ་རྗོད་ལས་འདས་པའི། རྡོ་རྗེ་ཞེས་པ་སྟོང་རིག་ལྔ་ལྡན་ནོ། །འཆང་རྣམས་ཀྱི་ཞེས་པ་རྒྱུན་ཆད་མེད་པར། ཐུགས་རྡོལ་ཉག་གཅིག་དགོངས་དོན་གཅིག །ཅེས་པའི་དོན་ནི། ཐུགས་རྡོལ་ཞེས་པ་སངས་རྒྱས་ཀྱི་དགོངས་པ། ཉག་གཅིག་ཅེས་པ་ཐིག་ལེ། དགོངས་དོན་གཅིག་ཅེས་པ་སངས་རྒྱས་ཐམས་ཅད་ཀྱི། འཛིན་མེད་ཡངས་པའི་རྟོད་ཕུར་ཡིན། །ཞེས་པའི་དོན་ནི། འཛིན་མེད་ནི་སྐུ་གསུམ་ལ། ཡངས་པའི་ཞེས་པ་ལྟ་བ། རྟོད་ཕུར་ཡིན་ཞེས་འགྱུར་བ་མེད་པའི། ཐོད་རྒལ་ཐོག་བབས་ཀུན་གྱི་གནད། །ཅེས་པའི་དོན་ནི། ཐོད་རྒལ་ཅེས་པ་རིག་པ་མངོན་སུམ་མོ། །ཐོག་བབས་ཞེས་པ་ཨ་མ་ན་སེའོ། །ཀུན་གྱི་གནད་ཅེས་པ་རྒྱུད་འདི། རང་ས་འབྱེད་པའི་ལྡེ་མིག་མཆོག །ཅེས་པའི་དོན་ནི། རང་ས་ཞེས་པ་ཐེག་པའི། འབྱེད་པ་ཞེས་པ་སོ་སོར། ལྡེ་མིག་མཆོག་ཅེས་པ་རྒྱུད་འདིས་དོན་ཁྲོལ་ཅིང་རྟོགས་པར་བྱེད་པ། འདི་ནི་བདེ་བའི་ས་བོན་འཛིན། །ཞེས་པའི་དོན་ནི། འདི་ནི་ཞེས་པ་རྒྱུད། བདེ་བའི་ཞེས་པ་ཟད་པ་མེད་པའི། ས་བོན་འཛིན་ཅེས་པ་རྒྱུད་འདི། བཏགས་མཐོང་ཐོས་རེག་པས། སངས་རྒྱས་རྣམས་ཀྱི་ཤེས་རབ་ཡིན། །ཞེས་པའི་དོན་ནི། སངས་རྒྱས་ཞེས་པ་ཉོན་མོངས་པ་སངས་ཡེ་ཤེས་རྒྱས་པའོ། །རྣམས་ཀྱི་ཞེས་པ་མ་ལུས་པ། ཤེས་རབ་ཡིན་ཞེས་པ་མཁྱེན་པ་རྣམས་ཀྱི་གཙོ་བོ། མཁའ་མཉམ་དག་པའི་གནམ་གཟེར་འདིས། །ཞེས་པའི་དོན་ནི། མཁའ་མཉམ་ཞེས་པ་ཆོས་ཉིད། དག་པའི་ཞེས་པ་དབྱིངས། གནམ་གཟེར་འདིས་ཞེས་པ་ཐིག་ལེ་འཕྱུགས་མེད་ཀྱི་རྒྱུད། བསྟན་པ་ཀུན་གྱི་རྩ་བ་འཛིན། །ཞེས་པའི་དོན་ནི། བསྟན་པ་ནི་སངས་རྒྱས་ཀྱི། ཀུན་གྱི་ཞེས་པ་མ་ལུས་པ། རྩ་བ་འཛིན་ཅེས་པ་རྒྱུད་འདིས་གང་ཐམས་ཅད་དུ། འདི་ཡི་གྲངས་སྣ་བཟུང་བས་ན། །ཞེས་པའི་དོན་ནི། འདི་ཡི་ཞེས་པ་རྒྱུད་བསྟན་པའི་བུ་གཅིག །གྲངས་སྣ་ཞེས་པ་ལྷག་ཆད་མེད་པར། བཟུང་བས་ན་ཞེས་པ་འགྲོ་བ་སྐལ་ལྡན་གྱིས། ལྷ་མིན་གཡུལ་རྣམས་རང་ལོག་ཏུ། །ཞེས་པའི་དོན་ནི། ལྷ་མིན་ཅེས་པ་ལྷ་དང་ལྷ་མ་ཡིན་དང་མིའི། གཡུལ་རྣམས་ཞེས་པ་འཐབ་རྩོད་དང་ཕ་རོལ་གྱི་དམག་ཚོགས། རང་ལོག་ཏུ་ཞེས་པ་ཕར་ལ། འདི་ཚིག་བཟུང་བ་ཙམ་གྱིས་འགྱུར། །ཞེས་པའི་དོན་ནི། འདི་ཚིག་ཅེས་པ་རྒྱུད། བཟུང་བ་ཞེས་པ་སྐལ་ལྡན་གྱིས། བསྟན་པའི་བདག་པོ་གང་ཡིན་པ་དེའི་སྐུ་མདོག་དང་མཐུན་པའི་རིན་པོ་ཆེས་བྲིས་ཏེ་སྤྱི་བོར་བཅངས་པ་ཙམ་གྱིས། འགྱུར་ཞེས་པ་རང་ལོག་ལ། ཁམས་གསུམ་གཡུལ་ཀུན་འདིས་བཟློག་གོ། །ཞེས་པའི་དོན་ནི། ཁམས་གསུམ་ཞེས་པ་འདོད་ཁམས་གཟུགས་ཁམས་གཟུགས་མེད་ཁམས་སོ། །གཡུལ་ཀུན་ཞེས་པ་གསུམ་པོར་འཁོར་བའི་སྡུག་བསྔལ། འདིས་བཟློག་གོ་ཞེས་པས་དབང་བསྐུར་བའི་དུས་སུ་རྒྱུད་འདི་སྤྱི་བོར་བཏགས་ན། དབང་བསྐུར་ཐོབ་པ་དང་ཐོས་པ་མཐོང་བ་རེག་པ་ཐམས་ཅད་སངས་རྒྱའོ། །ཆོས་འཆད་པའི་དུས་སུ་རྒྱུད་མགྲིན་པར་བཏགས་ན། ཆོས་འཆད་པ་མཐོང་ཐོས་མོས་རེག་ཐམས་ཅད་སངས་རྒྱའོ། །ངོ་སྤྲོད་བྱེད་པའི་དུས་སུ་རྒྱུད་འདི་སྙིང་གར་བཏགས་ན། ངོ་སྤྲོད་ཐོབ་མཐོང་ཐོས་རེག་མོས་ཐམས་ཅད་སངས་རྒྱའོ། །ལར་རྒྱུད་འདི་བཏགས་པའི་མི་ལ་སྲོག་ཆགས་འབྱུང་མི་སྲིད། བྱུང་བ་སྲིད་ན་ཡང་ལས་སད་པའི་རིགས་ཏེ་གྲོལ་ལོ། །རིགས་དྲུག་རྣམས་ཀྱི་འབྲོས་ཁུང་འགེགས། །ཞེས་པའི་དོན་ནི། རིགས་དྲུག་ཅེས་པ་འགྲོ་བ་སྟེ་ལུས་བཟང་ངན་གྱི་བྱེད་པའོ། །རྣམས་ཀྱི་ཞེས་པ་གྲངས་ལས་འདས་ཏེ་མ་ལུས་པའོ། །འབྲོས་ཁུང་འགེགས་ཞེས་པ་སངས་རྒྱས་ལས་འབྲོས་ཏེ་ལས་ངན་སྣ་ཚོགས་བསགས་ནས། འཁོར་བ་ངན་སོང་གསུམ་དུ་ཟག་པར་བྱེད་པའི་ཁུང་བུ་རྒྱུད་འདི་བཏགས་པ་ཙམ་གྱིས་འགེགས་པའོ། །མྱ་ངན་འདས་པའི་གྲོང་ཁྱེར་དུ། ཞེས་པའི་དོན་ནི། མྱ་ངན་ཞེས་པ་འཁོར་བ་ངན་སོང་གསུམ་གྱི་སྡུག་བསྔལ་ལོ། །འདས་པའི་ཞེས་པ་སངས་རྒྱས་ཀྱི་བདེ་བ་ཟག་པ་མེད་པའོ། །གྲོང་ཁྱེར་དུ་ཞེས་པ་དཔེ་དེ་སངས་རྒྱས་ཀྱི་ཞིང་ཁམས་རྣམ་པར་དག་པ་རིགས་ལྔ་ཚོམ་བུའི་དཀྱིལ་འཁོར་མཐའ་མེད་བརྗོད་ལས་འདས་པར། འཇུག་པར་བྱེད་པའི་འཁོར་ལོ་ཡིན། །ཅེས་པའི་དོན་ནི། འཇུག་པར་ཞེས་པ་གོང་གི་ཞིང་ཁམས་སུ། བྱེད་པའི་ཞེས་པ་རབ་འདི། འབྲིང་བར་དོ། ཐ་མ་སྤྲུལ་སྐུའི་ཞིང་ཁམས་སུ་མངལ་སྒོ་མི་འགྲིམ་སྟེ། ལོ་ལྔ་བརྒྱ་ན་ཟག་པ་མེད་པར་འཚང་རྒྱ། འཁོར་ལོ་ཡིན་ཅེས་པ་སངས་རྒྱས་མྱུར་ཏེ་དཔེ་ནམ་མཁའ་ལ་ཉི་མ་གཅིག་ཤར་བས། གླིང་བཞི་མུན་པ་རང་སངས་པ་ལྟར། རྒྱུད་འདི་ཐོགས་པ་ཙམ་གྱིས་བསྐལ་པར་བསགས་པའི་ལས་སྒྲིབ་འཇོམས་པས་འདི་ལས་འཚང་རྒྱ་བར་མྱུར་བ་མི་འོང་ངོ་། །བྱུང་བ་འདུག་ན་དུས་གསུམ་གྱི་སངས་རྒྱས་ཀྱིས་ངའི་མགོ་ཁོས་ཞེས་པའོ། །སྲིད་པས་བཅིངས་པ་རྣམས་ལས་ནི། །ཞེས་པའི་དོན་ནི། སྲིད་པས་ཞེས་པ་ང་བདག་གི་འཛིན་པའོ། །བཅིངས་པ་ཞེས་པ་སྡུག་བསྔལ་གྱིས། རྣམས་ལས་ནི་ཞེས་པ་སེམས་ཅན་མ་ལུས་པ། འདི་ཡིས་གྲོལ་བར་བྱེད་པའོ། །ཞེས་པའི་དོན་ནི། འདི་ཡིས་ཞེས་པ་རྒྱུད་བསྟན་པའི་བུ་གཅིག །གྲོལ་བར་ཞེས་པ་གཟུང་འཛིན་ལས། བྱེད་པའོ་ཞེས་པ་རྒྱུད་མཐོང་ཐོས་རེག་ཚད། དམ་པའི་སྙིང་པོ་གདུང་རྒྱུད་དུ། །ཞེས་པའི་དོན་ནི། དམ་པའི་ཞེས་པ་རིགས་བརྒྱའི། སྙིང་པོ་ཞེས་པ་རྒྱུད་འདི། གདུང་རྒྱུད་དུ་ཞེས་པ་སངས་རྒྱས་ཟམ་མ་ཆད་པར་བྱེད་པའི། རང་བཞིན་དུ་ནི་བབས་ལས་བྱུང་། །ཞེས་པའི་དོན་ནི། རང་བཞིན་ཞེས་པ་ཡེ་གདོད་མ་ནས་ཀྱི། དུ་ནི་ཞེས་པ་རྒྱུད་འདི། བབས་ལས་བྱུང་ཞེས་པ་སྐུ་གསུམ་རང་ཆས་ཀྱི། འདིས་ནི་བླ་མའི་སྐུ་མི་སྤོང་། །ཞེས་པའི་དོན་ནི། འདིས་ནི་ཞེས་པ་རྒྱུད། བླ་མའི་ཞེས་པ་གདམས་ངག །སྐུ་མི་སྤོང་ཞེས་པ་བླ་མས་འདི་ཉིད། འདི་ཉིད་ནི་བླ་མ་གཅིག་ལ་གཅིག་རང་བབས་པའོ། །དེས་ན་འགྲོ་བའི་བླ་མ་གྲངས་ལས་འདས་པ་འཕེལ་ཞིང་དེའི་རྒྱུད་སྤེལ་ཏེ། ཡང་འགྲོ་བའི་བླ་མས་སྤེལ་ལོ། །སྙིང་ལ་ཉི་མའི་འོད་བརྡལ་བས། །ཞེས་པའི་དོན་ནི། སྙིང་ལ་ཞེས་པ་འགྲོ་བ་སེམས་ཅན་ཐམས་ཅད་ཀྱི། ཉི་མའི་ཞེས་པ་ཡེ་ཤེས་ཐིག་ལེ་ལྔའི། འོད་བརྡལ་བས་ཞེས་པ་དུང་ཁང་ན་ཁྲག་འཐུང་ལྔ་བཅུ་རྩ་བརྒྱད། སྙིང་ག་ན་ལྷ་སུམ་ཅུ་རྩ་བདུན། ལར་ལུས་མགོ་གཞུག་ལ་སངས་རྒྱས་སུམ་སྟོང་བཞུགས་པ་ལ་དགོངས་ཏེ། འོད་མཐིང་ཁ་དཀར་སེར་དམར་ལྗང་སྣ་ཚོགས་པས་ཕྱི་ནང་མེད་པར་ཡེ་གདོད་མ་ནས། ཕྱོགས་བཅུར་ཁྱབ་པའི་མུན་པ་ནི། །ཞེས་པའི་དོན་ནི། ཕྱོགས་བཅུར་ཞེས་པ་ཕྱོགས་བཞི་དང་མཚམས་བཞི་སྟེ་བརྒྱད་སྟེང་འོག་གཉིས་དང་བཅུའོ། །ཁྱབ་པའི་ཞེས་པ་ཆོས་ཉིད་ལ་ང་དང་བདག་ཏུ་འཛིན་པས། མུན་པ་ནི་ཞེས་པ་ཆོས་ཅན་སྤྱིའི་མཚན་ཉིད་ཐམས་ཅད་ཆོས་ཉིད་རང་མདངས་སུ་མ་རིག་པའི། འདི་ཡིས་རང་སངས་ཉིད་དུ་འགྲོ། །ཞེས་པའི་དོན་ནི། འདི་ཡིས་ཞེས་རྒྱུད་བསྟན་པའི་བུ་གཅིག །རང་སངས་ཞེས་པ་འཁྲུལ་པའི་སྣང་བ་ཏག་ཏག་ཏིག་ཏིག་འདི། ཉིད་དུ་འགྲོ་ཞེས་པ་འདིའི་བྱིན་རླབས་ཀྱིས་འཁྲུལ་སྣང་ཞིང་ཁམས་སུ། ལྷག་པར་གནས་པའི་ཡེ་ཤེས་ནི། །ཞེས་པའི་དོན་ནི། ལྷག་པར་ཞེས་པ་སྐུ། གནས་པའི་ཞེས་པ་ལུས་མགོ་གཞུག་ལ་སངས་རྒྱས་སུམ་སྟོང་། ཡེ་ཤེས་ནི་ཞེས་པ་སྔོན་རྡོ་རྗེ་འཆང་གིས་རང་མདངས་སུ་ཡེ་ནས་ཤེས་པ་བཞིན་དུ། འདི་ཡིས་མཆོག་ཏུ་སྟོན་པར་བྱེད། །ཅེས་པའི་དོན་ནི། འདི་ཡིས་ཞེས་པ་རྒྱུད་བསྟན་པའི་བུ་གཅིག །མཆོག་ཏུ་ཞེས་པ་ཐུན་མོང་མ་ཡིན་པ། སྟོན་པར་བྱེད་ཅེས་པ་སངས་རྒྱས་སུམ་སྟོང་གི་ཞལ་དུས་གཅིག་ལ། དཀོན་པའི་མཆོག་རྣམས་བསྐྱེད་པའི་ཡུམ། །ཞེས་པའི་དོན་ནི། དཀོན་པའི་ཞེས་པ་འཇིག་རྟེན་ཁམས་སུ། མཆོག་རྣམས་ཞེས་པ་བསྟན་པའི། བསྐྱེད་པའི་ཡུམ་ཞེས་པ་རྒྱུད་འདི་ཡིས། སེམས་དལ་བསམ་གཏན་ངང་གིས་གྲུབ། །ཅེས་པའི་དོན་ནི། སེམས་དལ་ཞེས་པ་ངོ་བོ་སྟོང་པར་ཤེས་པས། བསམ་གཏན་ཞེས་པ་རང་བཞིན་གྱིས་ཞིང་ཁམས་ཤར་བས། ངང་གིས་གྲུབ་ཅེས་པ་ཆོས་ཉིད་ཀྱི་བྱིན་བརླབས་རྒྱུད་འདིས། ཆོས་སྐུའི་སྣང་བ་དུས་གཅིག་ཏུ། །ཞེས་པའི་དོན་ནི། ཆོས་ནི་སྟོང་ཞིང་བདག་མེད་པའི་རིག་པ། སྐུ་ནི་དེའི་རང་མདངས་སངས་རྒྱས་སུམ་སྟོང་། སྣང་བ་ནི་ངོ་བོ་སྟོང་པ་རང་བཞིན་གསལ་བ་ཐུགས་རྗེས་མ་ཁྱབ་པ་མེད་པའི། དུས་གཅིག་ཏུ་ཞེས་པ་ཐམས་ཅད་དབྱེར་མེད་ཐིག་ལེ་ཉག་གཅིག །སྟོན་པར་བྱེད་པའི་སྒྲོན་མའོ། །ཞེས་པའི་དོན་ནི། སྟོན་པར་ཞེས་པ་མངོན་སུམ་དུ། བྱེད་པའི་ཞེས་པ་སྐད་ཅིག་ལ། སྒྲོན་མའོ་ཞེས་པ་མ་རིག་པའི་མུན་པ་སེལ་བའི། དཔེ་བསྐལ་པར་ཡོད་པའི་མུན་པ་ཡང་སྒྲོན་མེ་གཅིག་གིས་འཇོམས་པ་ལྟར་བསྐལ་པར་བསགས་པའི་ལས་སྒྲིབ་ཀྱང་རྒྱུད་འདི་བཏགས་པས་འདགས་པར་འགྱུར་བའོ། །ཕྱིན་ཅི་ལོག་ལས་ཡང་དག་ཏུ། །ཞེས་པའི་དོན་ནི། ཕྱིན་ཅི་ཞེས་པ་མུ་སྟེགས་སོ། །ལོག་ལས་ཞེས་པ་ལྟ་བ། ཡང་དག་ཏུ་ཞེས་པ་སངས་རྒྱས་ཀྱི་དགོངས་པ། དག་པར་བྱེད་པའི་ཆུ་རྒྱུན་ཡིན། །ཞེས་པའི་དོན་ནི། དག་པར་ཞེས་པ་དམ་གྲིབ། བྱེད་པའི་ཞེས་པ་རྒྱུད་འདི་བཏགས་ན། ཆུ་རྒྱུན་ཡིན་ཅེས་པ་ཀ་དག་གནས་ལུགས་ཀྱི། ཐེག་པ་ཀུན་གྱི་མཐར་ཐུག་ཏུ། །ཞེས་པའི་དོན་ནི། ཐེག་པ་ཞེས་པ་དགུའི། ཀུན་གྱི་ཞེས་པ་ཆོས། མཐར་ཐུག་ཏུ་ཞེས་པ་ཡང་གསང་བླ་ན་མེད་པའི་སྙིང་ཐིག་ཏུ། སྐྱེལ་བར་བྱེད་པའི་ཤིང་རྟའོ། །ཞེས་པའི་དོན་ནི། སྐྱེལ་བར་ཞེས་པ་རྒྱུད་འདིས། བྱེད་པའི་ཞེས་པ་བར་དོར། ཤིང་རྟའོ་ཞེས་པ་ས་ལམ་མཐོང་ཐོས་རེག་པས་ཆོད་པའོ། །ཐོས་བསམ་སྒོམ་པའི་རྒྱངས་ཤིང་དུ། །ཞེས་པའི་དོན་ནི། ཐོས་བསམ་ཞེས་པ་ཐེག་པ་མཐའ་དག་གི་ཆོས་ལ། སྒོམ་པའི་ཞེས་པ་དེའི་དོན། རྒྱངས་ཤིང་དུ་ཞེས་པ་དཔེ་སྟེ་དོན་ལ་སངས་རྒྱས་ཀྱི་མཁྱེན་པ་མཐའ་དག་ལ་མ་རྨོངས་པར། འཇུག་པར་བྱེད་པའི་དངོས་པོ་ཡིན། །ཞེས་པའི་དོན་ནི། འཇུག་པར་ཞེས་པ་སེམས་ཅན་སྐལ་ལྡན་རྣམས་སངས་རྒྱས་ཀྱི་སར། བྱེད་པའི་ཞེས་པ་རྒྱུད་འདི་མཐོང་ཐོས་རེག་པས། དངོས་པོ་ཡིན་ཞེས་པ་ཆོས་ཐམས་ཅད་ཀྱི་ཡང་སྙིང་དྲིལ་བའི། སྡེ་སྣོད་ཐམས་ཅད་འཛིན་པའི་ཆོས། །ཞེས་པའི་དོན་ནི། སྡེ་སྣོད་ཅེས་པ་འདུལ་བ་མདོ་སྡེ་མངོན་པའོ། །ཐམས་ཅད་ཅེས་པ་སེམས་ཅན་གྱི་དུག་གསུམ་རེ་རེ་ལ་རྟོག་པ་མི་འདྲ་བ་ཉི་ཁྲི་ཆིག་སྟོང་འགྱུ། དུག་གསུམ་ཆ་མཉམ་གྱི་རྟོག་པ་མི་འདྲ་བ་ཉི་ཁྲི་ཆིག་སྟོང་འགྱུ་བས་དེའི་གཉེན་པོར། འདུལ་བ་མདོ་སྡེ་མངོན་པ་གསུམ་པོ་རེ་རེ་ལ་ཆོས་ཀྱི་སྒོ་མོ་མི་འདྲ་བ་ཉི་ཁྲི་ཆིག་སྟོང་ཆིག་སྟོང་གསུངས། སྡེ་སྣོད་གསུམ་པོ་ཆ་མཉམ་གྱི་ཆོས་ཉི་ཁྲི་ཆིག་སྟོང་གསུངས། འཛིན་པའི་ཞེས་པ་ཆོས་ཀྱི་སྒོ་མོ་དེ་དག་ཐམས་ཅད་ཀྱི་དོན། མཉེན་ལྕུག་ལྡན་པའི་ལྕགས་ཀྱུའོ། །ཞེས་པའི་དོན་ནི། མཉེན་ལྕུག་ཅེས་པ་ཞི་བའི་ལྷ་བཞི་བཅུ་རྩ་གཉིས། ལྡན་པའི་ཞེས་པ་རང་གི་རིག་པ་ལ། ལྕགས་ཀྱུའོ་ཞེས་པ་དཔེ་སྟེ། རྒྱུད་འདིའི་བྱིན་བརླབས་ཀྱིས་བར་དོར་རང་གི་རིག་པའི་མདངས་སུ་ཟིན་པར་བྱེད་པའི། རྣལ་འབྱོར་དག་པའི་དཀྱིལ་འཁོར་གྱི། །ཞེས་པའི་དོན་ནི། རྣལ་འབྱོར་ཞེས་པ་ཡེ་གདོད་མ་ནས་རྩལ་ཆེན་རྫོགས་པའི། དག་པའི་ཞེས་པ་དབྱིངས། དཀྱིལ་འཁོར་གྱི་ཞེས་པ་རིག་མདངས་ཞི་ཁྲོའི། ལམ་དུ་འཇུག་པའི་ས་མཁན་ཡིན། །ཞེས་པའི་དོན་ནི། ལམ་དུ་ཞེས་པ་ཐར་བའི། འཇུག་པའི་ཞེས་པ་སེམས་ཅན། ས་མཁན་ཡིན་ཞེས་པ་དཔེ་སྟེ། ངམ་གྲོག་གཡང་ས་ཅན་ལམ་རྒྱུས་ཡོད་པས་མི་ནོར་བ་ལྟར། རྒྱུད་འདི་མཐོང་ཐོས་རེག་པས་ལམ་མི་ནོར་ཏེ་སངས་རྒྱའོ། །མངལ་རྣམས་ཁུང་སྒོ་འགོག་པར་བྱེད། །ཅེས་པའི་དོན་ནི། མངལ་རྣམས་ཞེས་པ་རིགས་དྲུག་གི། ཁུང་སྒོ་ཞེས་པ་དེ་རུ་ཕྱིས་ཚུད་པར་བྱེད་པའི། འགོག་པར་བྱེད་ཅེས་པ་རྒྱུད་འདིའི་བྱིན་རླབས་ཀྱིས། ཐར་པའི་སྐས་ནི་རང་འཛུགས་ཡིན། །ཞེས་པའི་དོན་ནི། ཐར་པའི་ཞེས་པ་འཁོར་བ་ལས། སྐས་ནི་ཞེས་པ་རྒྱུད་འདི། རང་འཛུགས་ཡིན་ཞེས་པ་ཡེ་གདོད་མ་ནས། རྣམ་དག་འོད་ཀྱི་མཐོངས་འབྱེད་པ། །ཞེས་པའི་དོན་ནི། རྣམ་དག་ཅེས་པ་དབྱིངས། འོད་ཀྱི་ཞེས་པ་མཐིང་ག་དཀར་སེར་དམར་ལྗང་སྣ་ཚོགས་པའོ། །མཐོངས་འབྱེད་པ་ཞེས་པ་རྒྱུད་འདི་བཏགས་པའི་འགྲོ་བ་དེ་འདས་པའི་ཚེ། ནང་དུ་ཡེ་ཤེས་ཀྱི་མཐོངས་སྐུ་དང་འོད་དང་ཐིག་ལེ་འཆར། ཕྱི་རུ་འཇའ་དང་སྐུ་གདུང་རིང་བསྲེལ་དུ་འགྱུར་རོ། །དེ་ལ་ཡང་འོད་ལྔ་གྱེན་འགྲེང་དང་རྩིབས་ཤར་དང་། ནས་འདྲ་རིས་དང་གདུགས་ཕུབ་པ་ལྟར་འབྱུང་ངོ་། །དེ་ཐིག་ལེ་དང་སྐུ་དང་དབྱིངས་ཟིན་པའི་མཐོངས་སོ། །འཇའ་དཀར་པོ་དར་དཀར་བརྒྱངས་པ་ལྟ་བུ་འབྱུང་སྟེ། དེ་བྱང་ཆུབ་སེམས་འབྱོངས་པའི་མཐོངས་སོ། །ཆོས་རྣམས་ཀྱི་ནི་རེ་གནས་ས། །ཞེས་པའི་དོན་ནི། ཆོས་རྣམས་ཞེས་པ་ཐེག་དགུའི། ཀྱི་ནི་ཞེས་པ་དེ་དག་ཐམས་ཅད་ཀྱི། རེ་གནས་ས་ཞེས་པ་འབྲས་བུ། བདུད་དང་མུ་སྟེགས་མགོ་གནོན་ཡིན། །ཞེས་པའི་དོན་ནི། བདུད་དང་ཞེས་པ་བར་དུ་གཅོད་པའི། མུ་སྟེགས་ཞེས་པ་ལྟ་བ་ལོག་པའི། མགོ་གནོན་ཡིན་ཞེས་པ་རྒྱུད་འདི་ཡི་བྱིན་རླབས་ཀྱིས་བཅོམ་ལྡན་འདས་ཀྱི་མཛད་པ་དང་མཚུངས་ཏེ་གླགས་མི་རྙེད་དོ། །ཤེས་རབ་རྨུགས་པའིི་གསལ་འདེབས་སོ། །ཞེས་པའི་དོན་ནི། ཤེས་རབ་ཅེས་པ་ཡང་དག་པའི་དོན། རྨུགས་པའི་ཞེས་པ་བྱོལ་སོང་ལ་སོགས་པ་ལ་རྒྱུད་འདི་བཏགས་ན། གསལ་འདེབས་ཞེས་པ་ཡེ་གདོད་མ་ནས་སངས་རྒྱས་ཀྱི་སྙིང་པོ་འཁྲུལ་མེད་དེ་སེམས་ཅན་ཐམས་ཅད་ལ་བཞུགས་པས། རྒྱུད་འདི་ཡི་བྱིན་རླབས་ཀྱིས་སད་པར་བྱས་ནས་གྲོལ་བས། དེས་ན་བག་ཆགས་སྲབ་འཐུག་མེད་པའི་ཆོས་སོ། །སྨོན་འཇུག་ཀུན་གྱི་སྲོག་ཤིང་ཡིན། །ཞེས་པའི་དོན་ནི། སྨོན་ཞེས་པ་སེམས་ཅན་ཐམས་ཅད་སངས་རྒྱས་པར་སྨོན་པ་དེ། འཇུག་ཅེས་པ་རྒྱུད་འདི་བཏགས་པ་ཙམ་མཐོང་བ་ཙམ་ཐོས་པ་ཙམ་རེག་པ་ཙམ་གྱིས་སངས་རྒྱ་བར་ནུས་སོ། །ཀུན་གྱི་ཞེས་པ་རྒྱུད་འདི་བཏགས་པ། སྲོག་ཤིང་ཡིན་ཞེས་པ་འཆི་བ་ཡང་ཟློག་སྟེ། གཟའ་བདུད་རྒྱལ་པོ་བསེན་མོ་ས་བདག་ཀླུ་གཉན་ལྷ་མ་སྲིན་སྡེ་བརྒྱད་ཀྱི་རྦོད་གཏོང་གནོད་པ་ཐམས་ཅད་བཟློག །ཚེ་རིང་བ་དང་། ནད་མེད་པ་དང་། བཀྲ་ཤིས་པར་འགྱུར་རོ། །དེས་ན་སྨོན་ལམ་ལ་མི་ལྟོས་པའི་ཆོས་སོ། །ལྷ་དང་སྔགས་ཀྱི་མདོ་མདུད་དོ། །ཞེས་པའི་དོན་ནི། ལྷ་དང་ཞེས་པ་ཕྱི་ནང་གི། སྔགས་ཀྱི་ཞེས་པ་ཕྱི་ནང་ལྷའི། མདོ་མདུད་དོ་ཞེས་པ་རྒྱུད་འདི་མཐོང་ཐོས་རེག་པའི་བྱིན་རླབས་ཀྱིས་བསྐྱེད་རིམ་མ་བསྒོམས་པར་ལྷ་སུམ་སྟོང་གི་ཞལ་མཐོང་། སྔགས་མ་ཟློས་པར་སངས་རྒྱས་ཀྱི་ཕྲིན་ལས་གྲུབ་པས་སོ། །དེས་ན་བསྐྱེད་རིམ་དང་སྔགས་བཟླས་པ་ལ་མི་ལྟོས་པའི་ཆོས་སོ། །དཀྱིལ་འཁོར་རྣམས་ཀྱི་སྐྱེད་ཤིང་ངོ་། །ཞེས་པའི་དོན་ནི། དཀྱིལ་འཁོར་ཞེས་པ་སྟོང་རིག་ཐིག་ལེའི་དཀྱིལ་ལ་རང་མདངས་ཡེ་ཤེས་ལྔ་ཡི་འཁོར། རིགས་ལྔ་རིགས་ཀྱི་གཙོ་བོ་ཡབ་ཡུམ་ལ་རིགས་བཞི་སོ་སོའི་ཡབ་ཡུམ་སྦྲགས་མའི་འཁོར། རིགས་ལྔ་ཚོམ་བུའི་དཀྱིལ་ལ་སེམས་དཔའ་སེམས་མ་སྒོ་བཞི་ཡབ་ཡུམ་འཁོར་བས་ན་དཀྱིལ་འཁོར་ཞེས་པའོ། །རྣམས་ཀྱི་ཞེས་པ་ཕྱི་ནང་ཐམས་ཅད་ཀྱི། སྐྱེད་ཤིང་ངོ་ཞེས་པ་དཔེ་སྟེ་དོན་ལ་རིག་པའི་རང་མདངས་ཀྱི་དཀྱིལ་འཁོར་ཐམས་ཅད། ད་ལྟ་རྣམ་སྨིན་སྒྱུ་ལུས་ཀྱི་རྩ་ནང་དུ་འཁུམས་པ་རྣམས། རྒྱུད་འདི་བཏགས་པའི་བྱིན་རླབས་ཀྱིས། བར་དོར་ནམ་མཁས་གར་ཁྱབ་ཐམས་ཅད་དུ་མཐའ་མེད་ལས་འདས་པ། དེས་ན་ཐོས་པ་དང་དཔེ་ཆ་ལ་མི་ལྟོས་པའི་ཆོས་སོ། །ལྟ་སྒོམ་ལོག་པའི་དག་བྱེད་ཁྲུས། །ཞེས་པའི་དོན་ནི། ལྟ་སྒོམ་ཞེས་པ་ཕྱོགས་ལྷུང་དང་གཉིས་སུ་མེད་པའོ། །ལོག་པའི་ཞེས་པ་ལྟ་བ་སྒོམ་པ་སྤྱོད་པ་ལོག་པའི་མུ་སྟེགས་པ་འབྲས་བུ་ལོག་སྟེ་ལྷ་དང་དབང་ཕྱུག་ཐོབ་པ་ལ་དགོངས་ཀྱང་དམྱལ་བ་བསྒྲུབ་བྱའོ། །དག་བྱེད་ཁྲུས་ཞེས་པ་སྔར་མུ་སྟེགས་ལྟ་བུ་ཡིན་ཡང་ཕྱིས་རྒྱུད་འདི་དང་འཕྲད་ན་གྲོལ་ཏེ། དེས་ན་ལུས་ཀྱི་བྱ་བ་དང་སྒོམ་པ་ལ་མི་ལྟོས་པའི་ཆོས་སོ། །མན་ངག་སྙིང་པོ་རྫོགས་པའི་ས། །ཞེས་པའི་དོན་ནི། མན་ངག་ཅེས་པ་སངས་རྒྱ་བའི། སྙིང་པོ་ཞེས་པ་ཆོས་ཐམས་ཅད་ཀྱི་སྙིང་པོ་སྟོང་པ། སྟོང་པའི་སྙིང་པོ་རིག་པ། རིག་པའི་སྙིང་པོ་འོད་ལྔ། འོད་ལྔའི་སྙིང་པོ་སྐུ་ལྔ། སྐུ་ལྔའི་སྙིང་པོ་རང་མདངས་སུ་ཤེས་པའི་ཤེས་རབ། རྫོགས་པའི་ས་ཞེས་པ་སངས་རྒྱས་སྲས་གཅིག་པོ་འདི་སྔར་འདི། ད་ལྟར་ཀྱང་འདི། ཕྱིས་ཀྱང་འདི་ལས་ཟབ་པ་ཡོད་རེ་ཀན་ནོ་ཞེས་པའོ། །རྡོ་རྗེ་ཐེག་པའི་གྲངས་རྫོགས་ནས། །ཞེས་པའི་དོན་ནི། རྡོ་རྗེ་ནི་སྟོང་རིག་ལྔ་ལྡན་འགྱུར་མེད་དེའོ། །ཐེག་པའི་ཞེས་པ་ཨ་ཏིའི། གྲངས་རྫོགས་ནས་ཞེས་པ་ཨ་ཏི་ལ་སྡེ་གསུམ། དེ་ལ་ཀློང་དགུ་ཤྭ་ལོ་ཀ་འབུམ་ཕྲག་དྲུག་ཅུ་རྩ་བཞི། ལེའུ་སྟོང་ཕྲག་སུམ་ཅུ་རྩ་ལྔ། བམ་པོ་ཉི་ཁྲི་ཆིག་སྟོང་གཅིག །བརྗོད་བྱ་ནམ་མཁའ་དང་མཉམ་པ། རྗོད་བྱེད་ཉེ་བར་བསྡུས་པས་གཟེར་བུ་བརྒྱ་དང་བརྒྱད་ཅུ། གྲངས་ནི་སྟོང་ཕྲག་ཕྱེད་དང་གཉིས། གནད་ཆེན་བསྡུས་པ་སྟོང་ཕྲག་གསུམ། གོལ་སྒྲིབ་ཁྲི་ཕྲག་བཞི་བཅུ་ཐམ་པ། མིང་ཐོགས་པའི་རྒྱུད་ཁྲི་ཕྲག་གཉིས། དེ་དག་གི་ཡང་སྙིང་རྒྱུད་བཅུ་བདུན། དེ་དག་གི་ཡང་སྙིང་རྒྱུད་རང་བྱུང་རང་བབས་སངས་རྒྱས་སྲས་གཅིག་གསེར་གྱི་སྙིང་པོ་ཉི་མ་རབ་ཏུ་སྣང་བྱེད་འདིའོ། །འདི་ནི་ཐིག་ལེ་ཉག་གཅིག་གོ། །ཐིག་ལེ་ཉག་གཅིག་ནི་ཀ་ནས་དག་གོ། །འགྲོ་རྣམས་ལམ་ལ་འཛུད་པའོ། །ཞེས་པའི་དོན་ནི། འགྲོ་རྣམས་ཞེས་པ་ཁམས་གསུམ་གྱི་སེམས་ཅན་ཐམས་ཅད། ལམ་ལ་ཞེས་པ་སངས་རྒྱས་སྐུ་གསུམ་གྱི། འཛུད་པའོ་ཞེས་པ་རྒྱུད་འདིས་སྔར་ཚངས་པ་ཆེན་པོའི་གནས་སུ་ཐམས་ཅད་གྲོལ་ཏེ་འཁོར་བ་སྟོངས་པར་བྱས། དེ་ནས་ཁྱབ་འཇུག་གི་གནས་སུ་ཐམས་ཅད་གྲོལ་ཏེ་སྟོངས་པར་བྱས། དེ་ནས་ཀ་ལ་པིང་ཀའི་གནས་སུ་ཐམས་ཅད་གྲོལ་ཏེ་སྟོངས་པར་བྱས། དེ་ནས་རྫུས་སྐྱེས་ནས། ཐོག་དྲངས་ནས་མཐའ་མེད་བརྗོད་ལས་འདས་པ་གྲོལ་བར་བྱེད་དོ། །ཐེག་པའི་རྒྱལ་པོ་ཡོངས་རྫོགས་ཀྱི། །ཞེས་པའི་དོན་ནི། ཐེག་པའི་ཞེས་པ་དགུའི། རྒྱལ་པོ་ཞེས་པ་གོང་ན་མེད་པའི། ཡོངས་རྫོགས་ཀྱི་ཞེས་པ་མ་རྫོགས་དགུ་རྫོགས་པ་ཡོད་པ་མིན་པ་ཡིན་པ་མེད་པ་སྣང་བ་མི་སྣང་བ། གསལ་བ་མི་གསལ་བ་རྟག་པ་མི་རྟག་པ། གཉིས་དང་གཉིས་མེད་མ་ཡིན་པ་ཐམས་ཅད་ཡོངས་རྫོགས་བསྟན་པའི་བུ་གཅིག་གི། ཡོན་ཏན་བྱུང་ཚུལ་རང་བྱུང་ངོ་། །ཞེས་པའི་དོན་ནི། ཡོན་ཏན་ཞེས་པ་སངས་རྒྱས་ནི། བྱུང་ཚུལ་ཞེས་པ་རྒྱུད་འདི་བཏགས་མཐོང་ཐོས་རེག་པའི་སེམས་ཅན་ལ། རང་བྱུང་ངོ་ཞེས་པ་ཡོན་ཏན་གྱི་ཚིགས་སུ་བཅད་པ་རྣམས་ཀྱང་བྱས་པ་ལྟ་བུ་མ་ཡིན་ཏེ། དངོས་པོ་གཤིས་ཀྱི་གནས་ལུགས་ལས་མངོན་སུམ་དུ་སྣང་བའོ། །དེས་ན་སྔར་ཡང་འདི་ལས་ཟབ་པ་བྱོན་རེ་ཀན་ནོ། །ད་ལྟར་ཡང་འདི་ལས་ཟབ་པ་བཞུགས་རེ་ཀན་ནོ། །ཕྱིས་ཀྱང་འདི་ལས་ཟབ་པ་འབྱོན་རེ་ཀན་ནོ། །དེས་ན་འདི་ཡོད་སངས་རྒྱས་དངོས་སོ། །འགྲོ་བ་རྣམས་ཀྱི་བླ་མ་དམ་པའོ། །དགོས་འདོད་འབྱུང་བའི་ནོར་བུའོ། །རྒྱུད་འདི་དང་བླ་མ་ཕུ་དུད་དུ་ཁུར་བར་བྱའོ། །མཆོད་པར་བྱའོ། །འབྲི་བར་བྱའོ། །བཀླག་པར་བྱའོ། །འཆང་བར་བྱའོ། །ཀུན་ཆུབ་པར་བྱའོ། །ཞེས་ཆེ་བ་ཡོན་ཏན་གྱི་ལེའུ་སྟེ་དང་པོ་རྫོགས་སོ།། ༈ །།ད་ནི་ལེའུ་གཉིས་པ་འགྲོལ་ཏེ། ཨེ་མ་ཧོཿ ཞེས་པའི་དོན་ནི། ཨེ་ནི་ངོ་བོ་ཀ་དག་གི་དབྱིངས། མ་ནི་རང་བཞིན་ལྷུན་གྲུབ་ཀྱི་དབྱིངས། ཧོཿནི་ཐུགས་རྗེ་ཀུན་ཁྱབ་ཀྱི་དབྱིངས་སོ། །གསང་མཛད་རང་བཞིན་ཚིག་འདི་ཡང་། །ཞེས་པའི་དོན་ནི། གསང་མཛད་ཅེས་པ་ལོག་ལྟ་ཅན་ལ་གོང་མའི་ཡོན་ཏན་རྔམས་པོ་ཆེ་རྣམས་བརྗོད་ན་མི་དགའ་བར། མི་བདེན་ངེས་སོ་བརྫུན་ནོ་ཞེས། ཐེག་པ་ཐུན་མོང་བ་རྣམས་སྡིག་གསོག་པ་འབྱུང་། སྡིག་བསགས་ན་སེམས་ཅན་སྟོང་བསྒྲལ་བས་འདི་ལ་སྐུར་པ་བཏབ་པ་བརྒྱའི་ཆར་ཡང་མི་ཉེ་སྟོང་གི་ཆར་ཡང་མི་ཉེ་བར་སྡིག་ཆེ་བས། སངས་རྒྱས་ལ་རྒྱབ་ཀྱིས་ཕྱོགས་པས་གསང་བར་བྱའོ། །རང་བཞིན་ཞེས་པ་དངོས་པོ་གཤིས་ཀྱི། ཚིག་འདི་ཡང་ཞེས་པ་ངོ་བོ་རང་བཞིན་ཐུགས་རྗེ་གསུམ་གྱི། རང་བྱུང་ཡེ་དག་ཆེན་པོར་ནི། །ཞེས་པའི་དོན་ནི། རང་བྱུང་ཞེས་པ་དངོས་པོ་གཤིས་ཀྱི་གནས་ལུགས་ལ། ཡེ་དག་ཅེས་པ་འཁྲུལ་པའི་དྲི་མ། དཔེ་ཉི་མའི་དཀྱིལ་འཁོར་དང་མཚུངས་སོ། །ཆེན་པོར་ནི་ཞེས་པ་ཐེག་པ་ཐམས་ཅད་ཀྱི་ཡང་རྩེ་སངས་རྒྱས་ཐམས་ཅད་ཀྱི་དགོངས་པ་གོང་ན་མེད་པ་སུས་ཀྱང་མ་བྱས་པའོ། །སྤེལ་ཚིག་གསང་བ་འདི་ལྟར་སྣང་། །ཞེས་པའི་དོན་ནི། སྤེལ་ཚིག་ཅེས་པ་སངས་རྒྱས་ཇི་ལྟར། གསང་བ་ཞེས་པ་ལོག་ལྟ་ཅན་ལ། འདི་ལྟར་སྣང་ཞེས་པ་འདི་ན་མར་གསུངས་པ་བཞིན་ནམ་མཁའ་ལ་ཕྱིས་འབྱུང་བར་ལ་ཡང་བརྗོད་དོ། །ཡེ་ཐོག་དང་པོའི་སངས་རྒྱས་ནི། །ཞེས་པའི་དོན་ནི། ཡེ་ཐོག་ཅེས་པ་གར་ཡང་རྒྱ་མ་ཆད་པའི་མིང་མེད་དེའོ། །དང་པོའི་ཞེས་པ་དངོས་པོ་གཤིས་ཀྱི། སངས་རྒྱས་ནི་ཞེས་པ་ངོ་བོ་རང་བཞིན་ཐུགས་རྗེ་གསུམ་མོ། །དང་པོ་མངོན་འཕགས་དྲན་པ་མགོན། །ཞེས་པའི་དོན་ནི། དང་པོ་ཞེས་པ་སངས་རྒྱས་དང་སེམས་ཅན་རྒྱབ་མ་གྱེས་པའི་དུས་སུ་ཤེས་རིག་ཀུན་བཟང་ཡུམ་གྱི། མངོན་ཞེས་པ་སྒྲོན་མ་སྐུ་གསུམ་དུ། འཕགས་ཞེས་པ་གཞི་ལས་ཐུགས་རྗེ། དྲན་པ་ཞེས་པ་རང་མདངས་སུ། མགོན་ཞེས་པ་ཁམས་གསུམ་སེམས་ཅན་གྱི་མགོན་དུ་ཡེ་གདོད་མ་ནས་བྱོན་ནོ། །ཇི་ལྟར་དུ་བྱོན་ན་ཆོས་སྐུ་ལས་ལོངས་སྐུ། ལོངས་སྐུ་ལས་སྤྲུལ་པའི་སྐུ་རྡོ་རྗེ་འཆང་། སྐུ་གསུམ་གྱི་མཛད་པ་སུམ་ཅུ་རྩ་དྲུག་མཐར་ཕྱིན་པར་བྱོན་ནོ། །ཕྱག་རྒྱ་རང་དྲན་འཁོར་ལོ་ནི། །ཞེས་པའི་དོན་ནི། ཕྱག་རྒྱ་ཞེས་པ་ཞི་ཁྲོའི། རང་དྲན་ཞེས་པ་རང་མདང་སུ། འཁོར་ལོ་ནི་ཞེས་པ་སྐུ་གསུང་ཐུགས་མི་ཟད་པ་རྒྱན་གྱི། གཞི་ལས་འཕགས་པའི་ཁྱད་པར་ཚིག །ཅེས་པའི་དོན་ནི། གཞི་ལས་ཞེས་པ་དང་པོ་ཆོས་ཉིད་ཀ་དག་ལས། འཕགས་པའི་ཞེས་པ་རིག་པ་སྐུ་དང་འོད་དུ། ཁྱད་པར་ཚིག་ཅེས་པ་འདུས་མ་བྱས་ཡེ་ཤེས་གསུམ་གྱི་གསུང་བསྟན་པ་ཐམས་ཅད་ཀྱི་བུ་གཅིག་པོ་འདིའོ། །སྤྱི་ཕུད་སྔོན་གྱི་ཐོག་མར་བྱུང་། །ཞེས་པའི་དོན་ནི། སྤྱི་ཕུད་ཅེས་པ་གོང་ན་མེད་པའོ། །སྔོན་གྱི་ཞེས་པ་བསྐལ་པ་ཀུན་གྱི་ཐོག་མར་བྱུང་བའོ། །ཐོག་མར་བྱུང་ཞེས་པ་མདོ་རྒྱུད་ཀུན་གྱི་ཐོག་མར་རང་བྱུང་གི་རྒྱུད་འདི་བྱུང་བའོ། །འདི་དུས་ཁྲག་ཁྲིག་བདུན་ཅུ་ཡིས། །ཞེས་པའི་དོན་ནི། འདི་དུས་ཞེས་པ་ཆོས་ཉིད་ཀྱི་ནམ་མཁའ་ལ་དབྱིངས་གསུམ་བསྡུས་པའི་རང་སྒྲར་རྒྱུད་འདི་བྱོན་ནོ། །ཁྲག་ཁྲིག་བདུན་ཅུ་ཡིས་ཞེས་པ་འགྲོ་བ་དེ་ཙམ་ཞིག་གིས་སྒྲ་ཐོས་པ་ཙམ་གྱིས་སངས་རྒྱས་སོ། །ཕྱག་རྒྱ་འདི་ནི་དམ་པའོ། །ཞེས་པའི་དོན་ནི། བསྟན་པ་ཐམས་ཅད་ཀྱི་བཙས་འདི་རང་གཅིག་པུའོ། །ཞེས་པའོ། །དེའི་འོག་ཏུ། སྙིང་པོས་བརྒྱན་པའི་བསྐལ་བ་ལ། །ཞེས་པ་ལ། དེའི་འོག་ཏུ་སྟོན་པ། སྡེ་སྣོད་དང་པོའི་སངས་རྒྱས་མགོན། །བསྟན་པ་ཐམས་ཅད་ཀྱི་བུ་གཅིག་པོ་འདིའི་མཚན། མངའ་མཛད་ཕྱག་རྒྱ་འཁོར་ལོ་ལས། །འཁོར་ནི་འཛིན་པ་བྱེ་བ་ལྔ། །ཞེས་པ་གྲངས་དེ་ཙམ་ཞིག་བྱུང་སྟེ་སངས་རྒྱས་སོ། །ཕྱག་རྒྱ་འདི་ནི་དམ་པའོ། །ཞེས་པ་ནི་གོང་མའོ་ཡང་རྩེ་འོ་མཆོག་གོ་ཅེས་སོ། །དེའི་འོག་ཏུ་སྟོན་པ། སྤྱི་མེས་དང་པོ་ཕ་རོལ་མགོན། །བསྟན་པ་རྒྱུད་འདིའི་མཚན། དཀྱིལ་འཁོར་སྙིང་པོ་རང་སྤྲོས་པས། །བསྐལ་པ་གསེར་གྱི་ཡི་གེ་ལ། །ས་ཡ་དྲུག་གི་ཕྱག་རྒྱར་བཟུང་། །དེའི་འོག་ཏུ་སྟོན་པ། སྔོན་ཐོག་དང་པོ་འཕགས་པ་མགོན། །བསྟན་པ་རྒྱུད་འདིའི་མཚན། ཕྱག་རྒྱ་དངོས་པོ་ཉིད་སྣང་བས། །བསྐལ་པ་འོད་ཟེར་འགྱེད་པ་ལ། །བདུན་འབུམ་གྱིས་ནི་འབྲས་བུའོ། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སྟོན་པ། འཇིག་རྟེན་དྲྭ་བ་མགོན་པོ་ཡིས། །སྤྲོས་བྲལ་ཕྱག་རྒྱ་འདི་སྤྲོས་ཏེ། །བསྐལ་པ་མེ་ཏོག་མཛེས་པ་ལ། །བསྟན་པའི་འབྲས་བུ་ཕྱལ་ཡས་པས། །ཕྱག་རྒྱ་འདི་ནི་དམ་པའོ། །སྙིང་པོ་སྟོང་གི་སྤྱི་ཕུད་མགོན། །བསྟན་པ་འདིའི་མཚན། སྙིང་པོ་དམ་པའི་འཁོར་ལོ་ལས། །བསྐལ་པ་རྩོད་པའི་སྙིང་པོ་ལ། །གྲངས་མེད་བཞི་ཡི་སྙིང་པོའོ། །འོད་ལྡན་དང་པོ་སེམས་ཅན་མགོན། །སྤྲོས་མེད་སྙིང་པོ་རང་སྒྲ་ལས། །བསྐལ་པ་སྣང་བའི་སྒྲོན་མ་ལ། །བན་བུན་སྟོང་ཕྲག་ཕྱག་རྒྱར་བཟུང་། །མཛེས་པའི་དང་པོ་འགྲོ་བའི་མགོན། །ཡང་དག་སྙིང་པོ་རྣམས་སྤྲོས་ཏེ། །བསྐལ་པ་རགས་པའི་ཡན་ལག་ལ། །ཉར་ཉེར་བརྒྱ་ཡི་གྲངས་ཀྱིས་ནི། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །ཕྱག་རྒྱ་འདི་ནི་དམ་པའོ། །ཞེས་པ་རྒྱུད་གསུངས་པས། འདི་བཟུང་ནས་སངས་རྒྱས་ཕྱག་རྒྱ་མཛད་དོ། །དེའི་འོག་ཏུ་སྟོན་པ། ཐུགས་བརྩེ་སྙིང་པོ་ཉན་ཐོས་མགོན། །ཕྱག་རྒྱ་ཡང་དག་ལམ་སྤྲོས་ཏེ། །ཞེས་གསུངས་སོ། །བསྐལ་པ་དུང་གི་སྒྲ་དག་ལ། །གྲེང་གྲེང་བཅུ་ཡི་དམ་པར་རོ། །ཞེས་པ་གསུངས་པ་སངས་རྒྱའོ། །དེའི་འོག་ཏུ་སྟོན་པ། མི་ཕམ་ཟང་མ་སྒྲ་བྲལ་མགོན། །ཡང་དག་ངེས་པའི་རྒྱུད་ལས་ནི། །ཞེས་པ་རྒྱུད་འདིས། བསྐལ་པ་དྲྭ་བའི་འོད་ཟེར་ལ། །དུང་ཕྱུར་གསུམ་རྩ་བར་བདུན། གྱིས་ལམ་རྒྱལ་བཟུང་། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སྟོན་པ། སྙིང་པོ་སེམས་རྣལ་བདུད་རྩི་མགོན། །ངེས་པའི་ས་བོན་རབ་བསྒྲགས་པས། །ཞེས་པ་རྒྱུད་འདི་གསུངས་པས། བསྐལ་པ་ཚངས་པའི་དབྱངས་ཅན་ལ། །འབུར་རྡུལ་བདུན་གྱིས་ངེས་པར་བཟུང་། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སྟོན་པ། རང་བཞིན་དྲག་པོ་ཏིང་འཛིན་མགོན། །ཕྱག་རྒྱ་འཁོར་ལོ་བདེན་སྤྲོས་ཏེ། །ཞེས་པ་རྒྱུད་ཀྱི་ཐུགས་རྗེ། བསྐལ་པ་སྨྲ་བའི་གཞི་དག་ལ། །ཕྱལ་ཕྱོལ་དགུ་ཡིས་དམ་པར་བཟུང་། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སྟོན་པ། གས ང་བ་ཕྱག་རྒྱ་ལྷ་མིན་མགོན། །ཡང་གསང་འཁོར་ལོ་རྣམས་སྤྲོས་ཏེ། །ཞེས་པ་རྒྱུད་ཀྱི་ཐུགས་རྗེ། བསྐལ་པ་འབུམ་པ་རེག་ལྡན་ལ། ཡལ་ཡོལ་དྲུག་ཅུས་སྙིང་པོའོ། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སངས་རྒྱས། རིམ་པ་ལྔ་པ་གཙུག་ཕུད་མགོན། །ཞེས་པ་བྱོན། བླ་མེད་སྙིང་པོ་ཡོངས་སྤྲོས་པས། །ཞེས་པ་སེམས་ཅན་རྣམས་ལ་རྒྱུད་འདི་གསུངས་ཤིང་རེག་པས། བསྐལ་པ་ཡང་གསལ་རབ་འབྱམས་ལ། །ཁྲག་ཁྲིག་བྱེ་བ་དགུ་བརྒྱ་ཡིས། །ཞེས་པ་འགྲོ་བའི་གྲངས། བླ་ན་མེད་པའི་གསང་བའོ། །ཞེས་པ་སངས་རྒྱས་སོ། །དེའི་འོག་ཏུ་སངས་རྒྱས། འཇིག་རྟེན་ཐོག་མ་ཤེས་རབ་མགོན། །བདེ་ཆེན་སྙིང་པོ་ཡོངས་སྤྲོས་ཏེ། །ཞེས་པ་རྒྱུད་གསུངས་ཤིང་བསྒྲགས་པས། བསྐལ་པ་བཀོད་པ་ཆེན་པོ་ལ། །འབུམ་ཕྲག་དྲུག་ཅུ་རྩ་བཞི་ཡིས། །ཞེས་པ་ལྷ་ཚངས་ཆེན་གྱི་འགྲོ་བའི་གྲངས། ལྷ་ཡི་ལྷར་ནི་འདི་ཉིད་དོ། །ཞེས་པ་འདུས་བྱས་ཀྱི་ལྷ་རྣམས། འདུས་མ་བྱས་རིགས་ལྔའི་ཚོམ་བུར་གྲོལ་ལོ། །དེའི་དུས་སུ་སངས་རྒྱས། འཆང་བ་རྣམས་ཀྱིས་ཐོག་མ་མགོན། །ངེས་པའི་འབྲས་བུ་འདི་སྤྲོས་ཏེ། །ཞེས་པ་རྒྱུད་འདི་འགྲོ་བ་རྣམས་བཏགས་པས། བསྐལ་པ་རིན་ཆེན་སྤུངས་པ་ལ། །ས་ཡ་དགུ་བཅུའི་མགོན་པོ་ཡིས། །རྒྱས་པར་བསྔགས་ཏེ་དམ་པར་རོ། །ཞེས་པ་ས་ཡ་དགུ་བཅུ་གྲོལ་ཏེ་སངས་རྒྱས་པར་སྟོན་པས་དོན་རྒྱས་པར་གྲོལ་ལོ། །འདིའི་དུས་སུ་སངས་རྒྱས། ཡང་རྗེས་འབྱུང་བ་མེ་འོད་མགོན། །དངོས་པོ་བསྒྱུར་བའི་ཕྱག་རྒྱ་ནི། །ཞེས་པ་ཟག་བཅས་ཟག་མེད་དུ་སངས་རྒྱ་བ་ལ་ཟེར་རོ། །སྙིང་པོ་ཉིད་དུ་སྤྲོས་པ་ལ། །ཞེས་པ་ཆོས་ཐམས་ཅད་ཀྱི་ཡང་སྙིང་དུ་གསུངས་པས། བསྐལ་པ་རབ་ཏུ་གཡོ་མེད་ལ། །རབ་མཐའ་བཅུ་ཡི་མགོན་པོ་ཡིས། །ཞེས་པ་སངས་རྒྱས་འདི་ཡིས། སྙིང་པོ་སྙིང་གི་དྭངས་མར་རོ། །ཞེས་པ་རྒྱུད་འདི་ཤེས་རིག་ཀུན་བཟང་གི་རང་མདངས་ཐིག་ལེ་ལྔའོ་ཞེས་པའོ། །དེའི་འོག་ཏུ་སངས་རྒྱས། ཆགས་མེད་རྡུལ་བྲལ་དྲི་མེད་མགོན། །གསང་ཆེན་ངེས་པའི་ཉིད་དུ་སྟེ། །ཞེས་པ་རྒྱུད་ཆེན་འདི་བབས་ཏེ། བསྐལ་པ་གཡོ་སྒྱུ་བྲལ་བ་ལ། །བྱེ་བ་དགུ་ཁྲིའི་གྲངས་མགོན་གྱིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདུ་བའི་ཕྱག་རྒྱ་ཉིད་དུའོ། །ཞེས་པ་ཆོས་ཐམས་ཅད། དེའི་འོག་ཏུ་སངས་རྒྱས། དྲན་པ་དྲི་མེད་བསམ་གཏན་མགོན། །དྲི་མེད་ངེས་པའི་གསང་ཚིག་སྤྲོས། །ཞེས་པ་རྒྱུད་སྤེལ་བས། བསྐལ་པ་མཐའ་ལྡན་སེང་གེ་ལ། །ཉལ་ཉིལ་སུམ་ཅུའི་རྒྱལ་བ་ཡིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ནི་བདེན་ཚིག་དམ་པར་རོ། །ཞེས་པ་དོན་དམ་པའི་གསུང་རབ་བྱོན་ནོ། །དེའི་འོག་ཏུ་སངས་རྒྱས། དམ་པའི་སྐྱེས་བུ་ཆོས་ཀྱི་མགོན། །སངས་རྒྱས་ཤེས་རབ་ས་བོན་སྤྲོས། །ཞེས་རྒྱུད་འདི་གསུངས་ཤིང་བཏགས་པས། བསྐལ་པ་གདུང་བ་སེལ་བ་ལ། །སང་སེང་དགུ་ཁྲིའི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དམ་པའི་ཕྱག་ནི་ཡང་དམ་དུའོ། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། སྤྱི་ཕུད་སྟོང་གི་ཡེ་ཐོག་མགོན། །སྔགས་ཀྱི་རྩ་བ་འདི་བསྔགས་པས། །ཞེས་རྒྱུད་འདི་གསུངས་པས། བསྐལ་པ་དུང་གི་སྙིང་པོ་ལ། །ཁ་ཡེལ་སྟོང་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །གསང་ཆེན་དམ་པར་རབ་བཟུང་བའོ། །ཞེས་པ་ཕྱག་གི་གནས་མཛད་དོ། །དེའི་འོག་ཏུ་སངས་རྒྱས། སངས་རྒྱས་དྲྭ་བ་མགོན་པོ་ཡིས། །ཕྱག་རྒྱ་ཉིད་དུ་གདུང་བཟུང་བས། །ཞེས་པ་རྒྱུད་འདི། བསྐལ་པ་བྱེ་བའི་སྙིང་པོ་ལ། །ཉག་ཐག་ཁྲི་ཡི་གདུང་འཛིན་པས། །ཞེས་པ་གྲངས་ལས་འདས་པར། འདི་ཉིད་སྙིང་པོའི་དོན་དུའོ། །ཞེས་པ་ངེས་པའི་འགྲོ་དོན་ལ་དགོངས་པའོ། །དེའི་འོག་ཏུ་སངས་རྒྱས། ཡང་དག་གསང་བ་པདྨ་མགོན། །སྙིང་གི་སྙིང་པོ་དཀྱིལ་བཟུང་བས། །ཞེས་པ་རྒྱུད་འདི་གསང་བ་བླ་མེད་ཀྱི་ཡང་སྙིང་ཡིན་པས། བསྐལ་པ་ཡོངས་སུ་བརྩེ་བ་ལ། །དེང་དིང་སྟོང་གི་ཡང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ནི་སྙིང་ལ་ཡང་དག་སྤྲོས། །ཞེས་པ་ངོ་བོ་རང་བཞིན་ཐུགས་རྗེ་གཅིག་ཏུ་ དྲིལ་བ་བསྟན་པའི་བུ ་གཅིག་པོ། དེའི་འོག་ཏུ་སངས་རྒྱས། སེམས་ཅན་སྙིང་བརྩེ་མེ་ཏོག་མགོན། །དྲན་གཞི་དང་པོ་རབ་བཟུང་བས། །ཞེས་པ་རྒྱུད་ཀྱི་མཚན། བསྐལ་པ་ཡོད་པ་རབ་མཆོག་ལ། །རྡུལ་མེད་དགུ་ཡི་གསང་འཛིན་པས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །གསང་ཆེན་སྟོང་གི་དམ་པར་རོ། །ཞེས་པ་སངས་རྒྱས་སྟོང་གིས་ཕྱག་མཛད་པའོ། །དེའི་འོག་ཏུ་སངས་རྒྱས། བསྐལ་པ་དྲྭ་བ་ཉི་འོད་མགོན། །དམ་པའི་སྙིང་པོ་ངེས་ཕབ་པས། །ཞེས་པ་རྒྱུད་འདི་བསྟན་པ། །བསྐལ་པ་གླང་པོ་ཡོངས་རྫོགས་ལ། །རབ་རྡུལ་ཉིད་ཀྱི་རྗེས་འཛིན་པས། །ཞེས་པ་འགྲོ་བ་དེ་ཙམ་ཞིག་སངས་རྒྱས་ཤིང་ཕྱག་མཛད་དོ། །སྟོང་ཉིད་གསལ་བའི་མིག་ཏུ་སྤྲོས། །ཞེས་པ་ཕྱོགས་སུ་མ་ལྷུང་བའི་ལྟ་བ། གཉིས་སུ་མེད་པའི་སྒོམ་པ། གོལ་སྒྲིབ་བྲལ་བའི་སྤྱོད་པ། ཀ་ནས་དག་པའི་འབྲས་བུའོ། །ཞེས་པའོ། །དེའི་འོག་ཏུ་སངས་རྒྱས། ཡོངས་རྫོགས་འཁོར་ལོ་རིགས་ཀྱི་མགོན། །སེམས་ཀྱི་དངོས་པོ་དམ་པར་བཟུང་། །ཞེས་པ་རྒྱུད་འདི། བསྐལ་པ་བླ་ན་མེད་པ་ལ། །ཁྲི་ཕྲག་དྲུག་ཅུའི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །གསང་ཆེན་འཁོར་ལོ་ཉིད་དུའོ། །ཞེས་པ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ། །དེའི་འོག་ཏུ་སངས་རྒྱས། དྲི་མེད་དག་པ་ཆོས་ཀྱི་མགོན། །ཡང་གསང་ངེས་པའི་ལུང་འདི་སྤྲོས། །ཞེས་པ་རྒྱུད་འདི་གསུངས་ཤིང་བཏགས་པས། བསྐལ་པ་རྩོད་པ་རང་གྲོལ་ལ། ཉལ་ཉིལ་ཉིད་ཀྱི་འཕེལ་གདུང་གིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །རིམ་པས་མངོན་པར་རབ་སྤྲོས་པའོ། །ཞེས་པ་དམ་པ་རིགས་བརྒྱ་རིག་པའི་མདངས་ཡིན་ཡང་ཐེག་པའི་བློ་དང་ལྷ་ངོ་བསྟུན་ནོ། །དེའི་འོག་ཏུ་སངས་རྒྱས། ཡང་གསང་དང་པོ་ཐོག་མ་མགོན། །རྡོ་རྗེ་ཡང་དག་དམ་བཟུང་བས། །ཞེས་པ་རྒྱུད་འདི། བསྐལ་པ་ཁྱུང་ཆེན་གཤོག་རྫོགས་ལ། །འབུམ་ཕྲག་ལྔ་ཡི་གདུང་འཕེལ་བས། །ཞེས་པ་འགྲོ་དེ་ཙམ་ཞིག་སངས་རྒྱས་སོ། །ཕྱག་རྒྱ་རང་རྫོགས་ཉིད་དུའོ། །ཞེས་པ་ཕྱག་མཛད་པའི་དགོངས་པའོ། །དེའི་འོག་ཏུ་སངས་རྒྱས། སྣང་མཛད་དང་པོ་མར་མེ་མགོན། །བླ་མེད་རྡོ་རྗེ་སྙིང་པོ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་མདའ་ཡིས་ཡོངས་བཟུང་ལ། །རྔ་ཡབ་གསུམ་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །རིགས་ལྡན་རྣམས་ཀྱི་ཕྱག་ཏུ་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། ཡིད་ཤེས་དང་པོ་གནས་གསུམ་མགོན། །བྱ་བ་བྱོན། སྙིང་ཐིག་རྩ་བའི་དྭངས་མར་སྤྲོས། །ཞེས་པ་རྒྱུད་འདི། བསྐལ་པ་རིག་པའི་སྟོབས་ཅན་ལ། །ཁ་ཡེལ་དྲུག་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །གོང་འཕེལ་ཕྱག་རྒྱ་དམ་པར་སྤྲོས། །ཞེས་པ་ཉམས་སུ་བླང་ཚད་དང་བཅས་པར་གསུངས་སོ། །དེའི་འོག་ཏུ་སངས་རྒྱས། དཔའ་བོ་འཇིགས་སངས་དང་པོའི་མགོན། །དྲི་མ་མེད་པའི་སྙིང་དུ་བབས། །ཞེས་པའི་རྒྱུད་འདི། བསྐལ་པ་དྲན་བསམ་བྲལ་བ་ལ། །ཡལ་ཡོལ་སྟོང་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་སྐྱོན་དང་བྲལ་བར་རོ། །ཞེས་པ་དྲི་མ་མེད་པའི་རྒྱུད་ལ་ཕྱག་མཛད་དོ། །དེའི་འོག་ཏུ་སངས་རྒྱས། དྲག་པོ་ཆགས་བྲལ་བདེ་བའི་མགོན། །ཆགས་མེད་རང་རིག་ཕྱག་རྒྱ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་མྱ་ངན་བྲལ་བ་ལ། །དུང་ཕྱུར་གསུམ་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །མེད་པ་རྣམས་ཀྱི་དང་པོར་རོ། །ཞེས་པ་ཟག་པ་མེད་པའི་དོན་ལ་ཕྱག་མཛད་དོ། །དེའི་འོག་ཏུ་སངས་རྒྱས། ཆོས་སྐུ་དངོས་དག་དྲི་མེད་མགོན། །དམ་པ་གསུང་གི་སྙིང་པོ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ཟིལ་གྱིས་གནོན་པ་ལ། ས་ཡ་ཉིད་ཀྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཀུན་ཡང་དག་ཉིད་དུའོ། །ཞེས་པ་ཡང་དག་པའི་སྙིང་པོར་བཟུང་ཞིང་ཕྱག་མཛད་དོ། །དེའི་འོག་ཏུ་སངས་རྒྱས། ཡང་སངས་རྒྱས་པ་སྒྱུ་མ་མགོན། །ཚིག་བྲལ་བདེན་པའི་སྙིང་པོ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ཆོས་ཀྱི་འཁོར་ལོ་ལ། །བྱེ་བ་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །ངེས་པའི་ལམ་གྱི་དྭངས་མར་རོ། །ཞེས་པ་ངེས་པའི་དོན་དུ་བཟུང་ནས་ཕྱག་མཛད་དོ། །དེའི་འོག་ཏུ་སངས་རྒྱས། སྟོང་པ་ཉིད་ནི་དགེ་ལྡན་མགོན། །ཞེས་པ་བྱོན། གསང་བའི་ཡང་གསང་ཆེན་པོ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་པདྨ་བརྩེགས་པ་ལ། །ཁ་ཡེལ་ལྔ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །སྣང་བ་རྣམས་ཀྱི་ཐོག་མར་རོ། །ཞེས་པ་བྱིན་བརླབས་མངོན་སུམ་པ་ལ་ཕྱག་རྒྱ་མཛད་དོ། །དེའི་འོག་ཏུ་སངས་རྒྱས། སྐྱེས་བུ་བྱེད་པ་འོད་ཟེར་མགོན། །ཞེས་པ་བྱོན། འབྲས་བུ་རྫོགས་པའི་རིམ་པ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ངང་པའི་དབྱངས་ཅན་ལ། །རྡུལ་མཐའ་བཞི་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་མངོན་པར་རང་འཐད་དོ། །ཞེས་པ་སྐུ་གསུམ་དབང་པོའི་སྤྱོད་ཡུལ་དུ་བྱོན་པ་ལ་ཕྱག་མཛད་དོ། །དེའི་འོག་ཏུ་སངས་རྒྱས། ཤེས་རབ་མིག་རྙེད་སྒྱུ་འཕྲུལ་མགོན། །སེམས་ཉིད་ཐོག་མའི་དཀྱིལ་འཁོར་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ལྷ་ཡི་ཕྱག་སོར་ལ། །ཉལ་ཉིལ་བདུན་གྱི་་གདུང་འཛིན་པས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །སྙིང་པོ་རང་དག་གནད་དུའོ། །ཞེས་པ་ཆོས་ཐམས་ཅད་ཡང་སྙིང་དུ་ཕྱག་མཛད་དོ། །དེའི་འོག་ཏུ་སངས་རྒྱས། བདེ་བ་དམ་པ་དངོས་གྲུབ་མགོན། །གསང་ཆེན་སྙིང་པོ་དམ་པར་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ཡན་ལག་མེད་པ་ལ། །སང་སེང་དྲུག་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་ཡང་དག་དམ་པར་རོ། །ཞེས་པ་ཡང་དག་པའི་དོན་འདི་ལ་ཕྱག་མཛད་དོ། །དེའི་འོག་ཏུ་སངས་རྒྱས། དངོས་པོ་ཡང་དག་སྟོང་པའི་མགོན། །སྐྱོབ་པ་དམ་པའི་ཕྱག་རྒྱ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་ལོ། །བསྐལ་པ་གྲངས་མཐའ་ལོག་པ་ལ། །སྟོང་ཕྲག་དགུ་ཡི་གྲངས་འཛིན་པས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །རྫོགས་པའི་སངས་རྒྱས་ཉིད་དུའོ། །ཞེས་པ་འདི་རང་གཅིག་པུ་ལ་ཕྱག་མཛད་དོ། །དེའི་འོག་ཏུ་སངས་རྒྱས། ཆོས་ཀྱི་གྲགས་པ་གཉིས་མེད་མགོན། །ཡང་གསང་རང་བྱུང་ཚིག་འདི་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ཡོངས་སུ་གྲོལ་བྱེད་ལ། །ཉལ་ཉིལ་གསུམ་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །མཉམ་པར་རང་གནད་ཉིད་དུའོ། །ཞེས་པ་སེམས་ཅན་དང་སངས་རྒྱས་མཉམ་པར་རྒྱུད་འདིས་བསྟན་པས་ཕྱག་མཛད་དོ། །དེའི་འོག་ཏུ་སངས་རྒྱས། ཡེ་ནས་གསང་བ་དྲི་མེད་མགོན། །བྱིན་རླབས་རང་བྱུང་ཡི་གེ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་སེང་གེ་རྩལ་སྤྲུག་ལ། །ཁྲག་ཁྲིག་བདུན་གྱི་གདུང་འཕེལ་བས། ། ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་ཐུགས་ཀྱི་དཀྱིལ་འཁོར་དུའོ། །ཞེས་པ་ཐུགས་ལ་བཅངས་ཤིང་ཕྱག་མཛད་དོ། །དེའི་འོག་ཏུ་སངས་རྒྱས། མི་ཕམ་དང་པོའི་སངས་རྒྱས་མགོན། །བྱ་བ་བྱོན། གསང་བ་ཐུགས་ཀྱི་བུ་གཅིག་པར། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་དགའ་བས་མྱོས་པ་ལ། །དུང་ཕྱུར་ཕྱེད་དང་དགུ་གདུང་གིས། །ཞེས་པ་དེ་ཙམ་ཞིག་སངས་རྒྱས་སོ། །འདི་ཉིད་དམིགས་མེད་རང་དམ་དུའོ། །ཞེས་པ་རྩོལ་བ་དང་བྲལ་བ་ལ་ཕྱག་མཛད་དོ། །དེའི་འོག་ཏུ་སངས་རྒྱས། དྲན་སྤངས་མངོན་འཕགས་རང་བཞིན་མགོན། །འབྱུང་བའི་དགྲ་དང་བྲལ་བར་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་འདུ་བ་ཆེན་པོ་ལ། །ཁ་ཡེལ་ལྔ་ཡི་གདུང་འཕེལ་བས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཚིག་རང་བྱུང་གསལ་བར་རོ། །ཞེས་པ་ཚིག་དོན་བྱིན་རླབས་མངོན་སུམ་པར་ཕྱག་མཛད་དོ། །དེའི་འོག་ཏུ་སངས་རྒྱས། བར་མའི་དང་པོ་སྐྱེ་མེད་མགོན། །འདི་ནི་ཕྱག་རྒྱ་རབ་བཏབ་སྟེ། །ཞེས་པ་རང་བཞིན་གྱི་རྒྱུད་ཀྱི་དོན་རྟོགས་ཏེ། བསྐལ་པ་ཁུ་བྱུག་རང་བྱུང་ལ། །ཐར་ཐེར་གསུམ་གྱི་རྟགས་ཤར་བས། །ཞེས་པ་སངས་རྒྱས་ཀྱི་སྐུ་གསུང་ཐུགས་ཀྱིས། འདི་ནི་རབ་ཏུ་བསྔགས་པའོ། །ཞེས་པ་རྒྱལ་མཚན་གྱི་རྩེ་ལ་བཞུགས་ཏེ། མཆོད་པ་དཔག་ཏུ་མེད་པས་མཆོད་ཅིང་གསོལ་བ་ཇི་ལྟར་བཏབ་པ་དངོས་སུ་འབྱུང་ངོ་། །དེའི་འོག་ཏུ་སངས་རྒྱས། འཇིག་རྟེན་གྲངས་བསྐལ་ཨུཏྤལ་མགོན། །གསང་ཆེན་རབ་རྒྱས་ཕྱག་རྒྱ་སྤྲོས། །ཞེས་པ་རྒྱུད་གསུངས་ཤིང་སྤེལ་བས། བསྐལ་པ་རབ་ཏུ་མཐོང་བ་ལ། །འབུམ་ཕྲག་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཀུན་སྙིང་གི་དཀྱིལ་དུ་ཕོབ། །ཅེས་པ་ཐུགས་ལ་བཅངས་ཤིང་ཕྱག་མཛད་དོ། །དེའི་འོག་ཏུ་སངས་རྒྱས། འདས་པའི་དང་པོ་དྲྭ་བ་མགོན། །སྙིང་པོ་གསང་བ་ཡང་དག་སྤྲོས། །ཞེས་བརྒྱུད་འདི་གསུངས་ཤིང་སྤེལ་བས། བསྐལ་པ་བུད་མེད་རང་འདུལ་ལ། །ཕྱལ་ཕྱོལ་དགུ་ཡི་རྒྱལ་བ་ཡིས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཚིག་རང་རིག་དམ་པར་རོ། །ཞེས་པ་རྒྱུད་མཐོང་ཐོས་རེག་ཚད་ཀྱི་སེམས་ཅན་བར་དོར་གྲོལ་བར་མཛད་པ་ལ་ཕྱག་མཛད་དོ། །དེའི་འོག་ཏུ་སངས་རྒྱས། གཉིས་འདས་དང་པོ་ཞིང་ཁམས་མགོན། །རྡོ་རྗེ་ཆེན་པོའི་གསང་ཚིག་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་རང་སྒྲ་ཟད་པ་ལ། །ས་ཡ་གཉིས་ཀྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཚིག་གཟིགས་དང་རབ་མཁྱེན་བཟུང་། །ཞེས་པ་བྲིས་བཅངས་ཀླགས་ཀུན་ཆུབ་པར་མཛད་དེ་ཕྱག་མཛད་དོ། །དེའི་འོག་ཏུ་སངས་རྒྱས། གྲུབ་མཐའ་ཐོག་མ་གཉིས་པར་མགོན། །འདུལ་ཚིག་སྙིང་པོ་བླ་མར་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་དགེ་ལྡན་ཆེན་པོ་ལ། །འབུམ་ཕྲག་ལྔ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །སྙིང་པོ་རྣམས་ཀྱི་ཡང་སྙིང་དུའོ། །ཞེས་པ་གསང་བ་བླ་མེད་ཀྱི་རྒྱུད་བཅུ་བདུན་གྱི་ནང་ནས་ཕྱག་མཛད་དོ། །དེའི་འོག་ཏུ་སངས་རྒྱས། མཛད་པ་གཞི་ཐོག་ཐོད་རྒལ་མགོན། ། བླ་ན་མེད་པའི་ངེས་ལུང་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་ལོ། །བསྐལ་པ་བྲམ་ཟེ་བསྒྱིངས་པ་ལ། །ཁྲི་ཕྲག་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཀུན་གསང་བའི་ཚིག་ཏུའོ། །ཞེས་པ་བཀའ་རྒྱ་དང་བཅས་ཏེ་ཕྱག་མཛད་དོ། །དེའི་འོག་ཏུ་སངས་རྒྱས། མཐའ་བྲལ་ཡོངས་རྫོགས་སྐྱོན་བྲལ་མགོན། །བྲལ་གསང་ཚིག་འདི་ཕྱག་རྒྱ་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་སྐྱེད་པར་བྱེད་པ་ལ། ། སྟོང་ཕྲག་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །མེད་ཚིག་རྫོགས་པར་ཡང་དག་བཟུང། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། ཡེ་རྫོགས་དང་པོའི་སྒྱུ་མ་མགོན། །ཡང་གསང་འབར་བ་འོད་ཟེར་འཕྲོས། །ཞེས་པ་ནམ་མཁའ་ལ་ཐུགས་རྗེའི་འོད་ལྔ་རུ་འཁྱིལ་ལ་དཀར་བ་དཀར་ལ་དམར་བ་དམར་ལ་སེར་བ་སེར་ལ་ལྗང་བ་ལྗང་ལ་མཐིང་བ་མཐིང་ལ་བཤད་མི་ཤེས་པར་འཕྲོས་སོ། ། བསྐལ་པ་རབ་ཏུ་འཕགས་པ་ལ། ། ཁྲག་ཁྲིག་གཉིས་ཀྱི་གདུང་འཕེལ་བས། །ཞེས་པ་འོད་ཟེར་མཐོང་ཚད་སངས་རྒྱས་སོ། །འདི་ཉིད་ངེས་པའི་གསང་ཆེན་ནོ། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། དྲི་མ་དངོས་བྲལ་བདེ་བའི་མགོན། །འདི་ཉིད་ལམ་རྒྱལ་དམ་པར་སྤྲོས། །ཞེས་པ་རྒྱུད་གསུངས་ཤིང་སྤེལ་བས། བསྐལ་པ་ཡང་གསང་ཆེན་པོ་ལ། ། ཁྲག་ཁྲིག་བདུན་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཚིག་རིམ་པ་དང་པོར་སྤྲོས། །ཞེས་པ་ཐེག་པའི་ཡང་རྩེར་མཛད་དེ་ཕྱག་མཛད་དོ། །དེའི་འོག་ཏུ་སངས་རྒྱས། འདུས་པ་རྣམས་ཀྱི་ཐོག་མ་མགོན། །ངེས་པའི་གསང་ཆེན་རབ་བསྔགས་ཏེ། །ཞེས་པ་རྒྱུད་གསུངས་ཤིང་སྤེལ་བས། །བསྐལ་པ་གསེར་འོད་དམ་པ་ལ། ། ཡང་འཕེལ་དགུ་ཁྲིའི་མགོན་པོ་ཡིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་ཏེ། འདི་ཀུན་གསང་ཆེན་སྙིང་དུ་བབ། །ཅེས་པ་ཕྱག་མཛད་དོ། །དེའི་འོག་ཏུ་སངས་རྒྱས། ཡང་འབྱེད་སྟོང་གི་དང་པོ་མགོན། །གསང་བའི་སྙིང་པོ་ཡང་གསང་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་ལེ་ལོ་ཡེ་དག་ལ། ། ཐེར་ཟུག་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་ཏེ། །འདི་ཡང་སྙིང་ཐིག་གསང་བར་བབ། །ཅེས་པ་ཕྱག་མཛད་དོ། །དེའི་འོག་ཏུ་སངས་རྒྱས། གསང་བ་ཀུན་གྱི་སྔོན་ཐོག་མགོན། །ཕྱག་རྒྱ་སྙིང་གི་དཀྱིལ་དུ་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་དྲི་མེད་བཟང་པོ་ལ། ། ཉར་ཉེར་ལྔ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཚིག་བླ་མེད་སྙིང་ལ་བབ། །ཞེས་པ་ཟབ་བར་བསྟན་ཏེ་ཕྱག་མཛད་དོ། །དེའི་འོག་ཏུ་སངས་རྒྱས། སྟོན་པའི་དང་པོ་ནམ་མཁའ་མགོན། །ཡང་བསྡུས་རང་བྱུང་ཚིག་འདི་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་ཐར་ཆགས་ཆེན་པོ་ལ། ། ཉལ་ཉིལ་དྲུག་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་མཛད་དོ། །འདི་ཉིད་བསམ་གཏན་འཁོར་ལོར་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། སྟོང་པའི་ཡང་མཛོད་དམ་པ་མགོན། །འདི་ཀུན་གཡོ་མེད་རང་བྱུང་ཚིག །ཅེས་པ་རྒྱུད་འདི་སྤེལ་བས། རྫོགས་པ་དངོས་དག་བསྐལ་པ་ལ། ། འབུམ་ཕྲག་དགུ་ཡི་ཡང་གདུང་གིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཀུན་ངེས་པའི་འབྲས་བུར་སྤྲོས། །ཞེས་པ་རྒྱུད་འདི་གསུངས་ཤིང་ཕྱག་མཛད་དོ། །དེའི་འོག་ཏུ་སངས་རྒྱས། དང་པོ་གསང་འཛིན་དངོས་གྲུབ་མགོན། །འདི་ཡང་མཛད་ཆེན་ཡང་དག་སྤྲོས། །ཞེས་པ་རྒྱུད་འདི་གསུང་ཤིང་སྤེལ་ལོ། །བསྐལ་པ་གྲངས་བརྡལ་གསང་ཆེན་ལ། ། ཁ་ཡེལ་གསུམ་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་ཡང་དག་ལམ་ཉེར་བཟུང་། །ཞེས་པ་སངས་རྒྱས་པ་ནི་འདི་ལས་མྱུར་བ་མ་བྱོན་པས་ཕྱག་མཛད་དོ། །དེའི་འོག་ཏུ་སངས་རྒྱས། དྲི་མེད་རང་ཟད་འབྱུང་བྲལ་མགོན། །དཀྱིལ་འཁོར་ཀུན་དག་རྩ་བ་སྤྲོས། །ཞེས་པ་རྒྱུད་འདི་གསུང་ཤིང་སྤེལ་ལོ། །བསྐལ་པ་མོ་མཚན་རྒྱུན་གཅོད་ལ། ། ཐར་ཐེར་བརྒྱ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །གསང་བ་ཡང་ཞུན་ཐིགས་པར་བཟུང་། །ཞེས་ཕྱག་མཛད་དོ། །དེའི་འོག་ཏུ་སངས་རྒྱས། མོས་པ་རྣམས་ཀྱི་དང་པོ་མགོན། །སྙིང་པོ་དམིགས་དག་ཕྱག་རྒྱ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་འཁོར་བའི་མུན་སེལ་ལ། །འབུམ་ཕྲག་ལྔ་ཡི་ཡང་གདུང་གིས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཉིད་སྤྲོས་ཏེ་དམ་དུའོ། །ཞེས་ཕྱག་མཛད་དོ། །དེའི་འོག་ཏུ་སངས་རྒྱས། སེམས་རིག་ཀུན་གྱི་སྤྱི་ཕུད་མགོན། །ང་མེད་སྔོན་དུ་ཕྱག་རྒྱ་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་སྔ་མོ་སྟོང་ལྡན་ལ། །བྱེ་བ་དགུ་ཡི་གདུང་འཕེལ་བས། །ཞེས་པ་དེ་ཙམ་ཞིག་སངས་རྒྱས་སོ། །ངེས་ཤེས་ཀུན་གྱི་ཐོག་མར་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། བསླབ་གནས་ཀུན་གྱི་དང་ཐོག་མགོན། ། ཕྱག་རྒྱ་མིག་ལྡན་སྟོང་དུ་སྤྲོས། །ཞེས་པ་རྒྱུད་གསུངས་ཤིང་སྤེལ་བས། བསྐལ་པ་སྒྱུ་མ་སྣང་མཛད་ལ། །ཡལ་ཡོལ་གསུམ་གྱི་ཡང་གདུང་གིས། །ཞེས་པ་དེ་ཙམ་ཞིག་སངས་རྒྱས་སོ། །འདི་ཚིག་གོང་མའི་གོང་མས་བཟུང་། །ཞེས་པ་སངས་རྒྱས་སྔོན་མ་སྔོན་མས་ཕྱག་མཛད་དོ། །དེའི་འོག་ཏུ་སངས་རྒྱས། རིམ་པ་སྔོན་གྱི་སྐྱེད་བྱེད་མགོན། ། བབས་བྱུང་མེད་སྣང་ཕྱག་རྒྱ་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །སྐལ་པ་སྙིང་རྗེ་འདུལ་བ་ལ། །སང་སེང་ལྔ་ཡི་གདུང་འཕེལ་བས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །སྙིང་པོ་གསང་བ་ཆེན་པོར་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། འཇིགས་པ་ཀུན་བྲལ་སེང་གེ་མགོན། ། སངས་རྒྱས་སྲས་ནི་གཅིག་པ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་ལོ། །ཐུབ་པའི་སྐུ་མདོག་དང་བསྟུན་ནས་ད་ལྟ་གསེར་ལས་བཞེངས་པར་བྱའོ། །བསྐལ་པ་བཟང་པོ་རབ་གང་ལ། །སྟོང་ཕྲག་བདུན་གྱི་གདུང་འཕེལ་བས། །ཞེས་པ་སངས་རྒྱས་དེ་ཙམ་ཞིག་འབྱུང་བར་བྱས་སོ། །འབྱུང་བའི་རང་སྒྲ་བྲལ་བར་བཟུང་། །ཞེས་རྡོ་རྗེ་གདན་གྱི་སྟེང་གི་ནམ་མཁར་བཟུང་སྟེ་ཕྱག་མཛད་དོ། །དེའི་འོག་ཏུ་སངས་རྒྱས། རྫོགས་པའི་ཡང་ཐོག་ཐ་མ་མགོན། །དོན་དགོངས་ཉག་གཅིག་རྣལ་དུ་བཟུང། །ཞེས་པ་རྒྱུད་འདི་བཟུང་ཞིང་སྤེལ་བས། བསྐལ་པ་རྩོད་ལྡན་ཆེན་པོ་ལ། །བརྒྱ་ཕྲག་དགུ་ཡི་གདུང་འཕེལ་བས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཚིག་རྩོད་དང་བྲལ་བར་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། དྲན་པ་བཟད་པའི་ཡེ་ཤེས་མགོན། །སྙིང་པོ་རང་ཚིག་གཅིག་པར་གོ། །ཞེས་པ་ཐིག་ལེ་ཉག་གཅིག་ཏུ་ཕྱག་མཛད་དོ། །བསྐལ་པ་རྩོད་དང་ལྡན་པ་ལ། །བཅུ་ཕྲག་དགུ་ཡི་གདུང་འཛིན་པས། །ཞེས་དེ་ཙམ་སངས་རྒྱས་པར་བྱེད་དོ། །ངེས་པའི་ཕྱག་རྒྱ་དམ་པར་བཟུང་། །ཞེས་པ་ཕྱག་མཛད་དོ། །དེ་ལྟར་བརྗོད་ཀྱིས་མི་ལངས་པའི། །ཞེས་པའི་དོན་ནི། དེ་ལྟར་ཞེས་པ་སངས་རྒྱས་ཀྱི་གདུང་སྤེལ་བ། བརྗོད་ཀྱིས་ཞེས་པ་ཚིག་ཏུ། མི་ལངས་པའི་ཞེས་པ་ཐུག་པ་མེད་དེ་འཁོར་བ་སྟོངས་པ་མང་པོ་བྱས་སོ། །སངས་རྒྱས་རྣམས་ཀྱི་བྱིན་བརླབས་ལས། །ཞེས་པའི་དོན་ནི། སངས་རྒྱས་ཞེས་པ་འཛིན་རྟོག་སངས་ནས་རང་རིག་རྒྱས་པའོ། །རྣམས་ཀྱི་ཞེས་པ་མ་ལུས་པའི། བྱིན་བརླབས་ལས་ཞེས་པ་གཞི་གསུམ་གྱི། དེ་ཡང་སྐུ་ཞི་ཁྲོའི་གཞི་རིས་མེད། གསུང་སྒྲ་སྐད་ཀྱི་གཞི་བརྗོད་མེད། ཐུགས་དྲན་རིག་གི་གཞི་བསམ་མེད་དོ། །རང་བྱུང་ཆེན་པོའི་ཡི་གེར་ནི། །ཞེས་པའི་དོན་ནི། རང་བྱུང་ཞེས་པ་གཞི་གསུམ་ལས། ཆེན་པོའི་ཞེས་པ་བསམ་དུ་མེད། བརྗོད་དུ་མེད། རིས་སུ་མེད། མིང་མེད། ཡི་གེར་ནི་ཞེས་པ་རྒྱུད་སངས་རྒྱས་སྲས་གཅིག་པོ། བསྟན་པ་ཐམས་ཅད་ཀྱི་བུ་གཅིག་པོ་འདི། སོ་སོར་རང་རང་གི་སྒྲ་དང་མཐུན་པའི་ཡི་གེར་བྱོན་ནོ། །གནས་པའི་ཀ་དག་ཆེན་པོ་ཡི། །ཞེས་པའི་དོན་ནི། གནས་པའི་ཞེས་པ་རང་བཞིན་ལྷུན་གྲུབ་ཏུ། ཀ་དག་ཅེས་པ་ངོ་བོ། ཆེན་པོ་ཡི་ཞེས་པ་ཐུགས་རྗེས་ཀུན་ཁྱབ། བབས་ལས་འདི་ཀུན་རང་བྱུང་ཤར། །ཞེས་པའི་དོན་ནི། བབས་ལས་ཞེས་པ་ངོ་བོ་རང་བཞིན་ཐུགས་རྗེ་གསུམ་གྱི། འདི་ཀུན་ཅེས་པ་རྒྱུད་ཚིག །རང་བྱུང་ཤར་ཞེས་པ་སུས་ཀྱང་བྱས་པ་མེད་པར་ནམ་མཁའ་ལ་སྒྲ་དོན་དབྱེར་མེད་མི་ཕྱེད་པར། བྱིན་རླབས་རིམ་པ་འདི་ཀུན་ཡང་། །ཞེས་བྱིན་རླབས་ཞེས་པ་སངས་རྒྱས་ཐམས་ཅད་ཀྱི། རིམ་པ་ཞེས་པ་ལེའུ་བདུན་པ། འདི་ཀུན་ཡང་ཞེས་པ་ཚིག །ཐོག་མ་བབས་ལས་རང་བསྟན་ནོ། །ཞེས་པའི་དོན་ནི། ཐོག་མ་ཞེས་པ་རྒྱ་མ་ཆད་པའི། བབས་ལས་ཞེས་པ་ངོ་བོ་རང་བཞིན་ཐུགས་རྗེ་གསུམ་གྱི། རང་བསྟན་ནོ་ཞེས་པ་ཡེ་གདོད་མ་ནས་སོ། །སངས་རྒྱས་ཀྱི་གདུང་ཇི་ལྟར་སྤེལ་བ་བསྟན་པའི་ལེའུ་སྟེ་གཉིས་པ་རྫོགས་སོ།། ༈ །།ད་ནི་ལེའུ་གསུམ་པ་འགྲོལ་ཏེ། ཨེ་མ་ཞེས་པའི་དོན་ནི། ཨེ་ནི་གནས་ལུགས་སོ། །མ་ནི་སྣང་ལུགས་སོ། །གནས་ལུགས་དང་སྣང་ལུགས་ཀྱི་རང་སྒྲས་སངས་རྒྱ་བ་ངོ་མཚར་ཆེའོ། །ཞེས་པ་ཆོས་ཉིད་ཀྱི་རང་སྒྲའོ། །རང་བྱུང་ཆེན་པོའི་ཚིག་ལས་ཀྱང་། །ཞེས་པའི་དོན་ནི། རང་བྱུང་ཞེས་པ་སུས་ཀྱང་བྱས་པ་མེད་པར། ཆེན་པོའི་ཞེས་པ་གོང་ན་མེད་པའོ། །ཚིག་ལས་ཀྱང་ཞེས་པ་ངོ་མཚར་ཆེ་བའི། འདི་ལྟར་རང་བྱུང་ཁྱད་པར་ཚིག །ཅེས་པའི་དོན་ནི། འདི་ལྟར་ཞེས་པ་ཚིག །རང་བྱུང་ཞེས་པ་བྱས་པ་མེད་པར། གཞི་གསུམ་ལས་དུས་གསུམ་ཀར་འབྱུང་བ་ལ་བརྗོད་དོ། །ཁྱད་པར་ཚིག་ཅེས་པ་ཆོས་ཐམས་ཅད་ལ། བབས་ལས་བྱུང་ཞིང་ཤར་བ་ལས། །ཞེས་པའི་དོན་ནི། བབས་ལས་ཞེས་པ་གཞི་ཀ་དག་གི། བྱུང་ཞིང་ཞེས་པ་ཡེ་གདོད་མ་ནས། ཤར་བ་ལས་ཞེས་པ་སྐུ་དང་ཐིག་ལེར། རང་གསལ་ཆོས་རྣམས་རང་བྱུང་ཚིག །ཅེས་པའི་དོན་ནི། རང་གསལ་ནི་སྐུའི་སྣང་བ། ཆོས་རྣམས་ཞེས་པ་མ་ལུས་པ། རང་བྱུང་ཚིག་ཅེས་པ་རྒྱུད་འདིའི་བྱིན་རླབས་ལས། ཕྱིས་ནི་འདི་ལྟར་ཡང་དག་གོ། །ཞེས་པའི་དོན་ནི། ཕྱིས་ནི་ཞེས་པ་མ་འོངས་པའི་དུས་སུ་ལུང་བསྟན་པའི་རང་སྒྲ། འདི་ལྟར་ཞེས་པ་འདི་ན་མར་གསུངས་པ་བཞིན། ཡང་དག་གོ་ཞེས་པ་རྒྱུད་འདིའི་བྱིན་རླབས་ལས་བྱུང་བ། རྒྱུད་དང་དེ་ཡི་རང་འགྲེལ་ལོ། །ཞེས་པའི་དོན་ནི། རྒྱུད་དང་ཞེས་པ་སྔགས་ཕྱི་ནང་གི། དེའི་ཞེས་པ་རྒྱུད་སོ་སོ། རང་འགྲེལ་ལོ་ཞེས་པས་གོ་ལུགས་སོ་སོར་ཕྱེ་ནས་བརྩམས་པ་རྣམས། ལྷ་སྔགས་ལ་སོགས་ཕྱག་རྒྱ་བཅུ། །ཞེས་པའི་དོན་ནི། ལྷ་སྔགས་ཞེས་པ་ཕྱི་ནང་གི། ལ་སོགས་ཞེས་པ་ཞི་རྒྱས་དབང་དྲག་གིས་དྲངས་པའི་ལས་མཐའ་བསམ་གྱིས་མི་ཁྱབ་པ་དང་། མ་ལུས་པ་ལ་ཡང་བརྗོད། ཕྱག་རྒྱ་ཞེས་པ་བཅུ། དེ་ལས་འདི་ཚིག་ཕྲག་ཡས་སུ། །ཞེས་པའི་དོན་ནི། དེ་ལས་ཞེས་པ་གོང་མ་ལ་བརྟེན་ནས། འདི་ཚིག་ནི་རྒྱུད་བསྟན་པའི་བུ་གཅིག་གི། ཕྲག་ཡས་སུ་ཞེས་པ་གྲངས། སྣང་བ་ཡིན་ནོ་དོན་ལ་སེམས། །ཞེས་པའི་དོན་ནི། སྣང་བ་ཞེས་པ་གང་ཟག་གི་ཐུགས་ལ། ཡིིན་ནོ་ཞེས་པ་འཆར་བ། དོན་ལ་སེམས་ཞེས་པ་རང་གི། སྣང་མཛད་དོན་ཀུན་རང་རྫོགས་ཏེ། །ཞེས་པའི་དོན་ནི། སྣང་མཛད་ཅེས་པ་ཐུགས་ལ། དོན་ཀུན་ཞེས་པ་མ་ནོར་བའི། རང་རྫོགས་ཏེ་ཞེས་པ་སྐལ་ལྡན་དེ་ཡི་སེམས་ལ། ཚིག་ཀུན་བདག་པོར་རང་བྱུང་བས། །ཞེས་པའི་དོན་ནི། ཚིག་ཀུན་ཞེས་པ་འཁོར་འདས་མ་ལུས་པའི། བདག་པོར་ཞེས་པ་ཤིན་ཏུ་མཁས་པར། རང་བྱུང་བས་ཤེས་པ་སངས་རྒྱས་ཀྱི་སྤྲུལ་པ། དགོངས་པ་ཉིད་ནི་དང་པོ་ལས། །ཞེས་པའི་དོན་ནི། དགོངས་པ་ཞེས་པ་སངས་རྒྱས་ཀྱི། ཉིད་ནི་ཞེས་པ་མ་ནོར་བར། དང་པོ་ལས་ཞེས་པ་འགྲེལ་བ། ཚིག་རྩོམ་མཁས་པ་འདི་ལས་ནི། །ཞེས་པའི་དོན་ནི། ཚིག་རྩོམ་ཞེས་པ་དགོངས་པ་འགྲེལ་བའི། མཁས་པ་ཞེས་པ་མ་ནོར་བར། འདི་ལས་ནི་ཞེས་པ་རྒྱུད་བསྟན་པའི་བུ་གཅིག །གྲངས་ལས་འདས་རྣམས་འབྱུང་བ་ཡིན། །ཞེས་པའི་དོན་ནི། འཇིག་རྟེན་གྱི་ཁམས་སུ་རིག་འཛིན་འཕགས་པ་རྣམས་དང་། དགེ་སློང་དང་། རྣལ་འབྱོར་པ་དང་རྒྱལ་པོ་དང་ཁྱིམ་བདག་དང་བུད་མེད་དང་ཁྱེའུ་ཆུང་དང་བུ་མོའི་གཟུགས་སུ་སྤྲུལ་ནས། མཐའ་མེད་བརྗོད་ལས་འདས་པ་བྱོན་ནོ། །བདག་འཛིན་བདག་མེད་སྔོན་ཐོག་ལས། །ཞེས་པའི་དོན་ནི། བདག་འཛིན་ཞེས་པ་འཇིག་རྟེན་པ། བདག་མེད་ཅེས་པ་རང་སངས་རྒྱས་ལ་སོགས་པ། སྔོན་ཐོག་ལས་ཞེས་པ་ཀ་དག་གི་དགོངས་པ་རྒྱུད་འདི་ལས། མཐར་འཛིན་འདོད་པ་དགག་པའི་ཕྱིར། །ཞེས་པའི་དོན། མཐར་འཛིན་ཞེས་པ་ཡོད་མེད་གཉིས་ཀྱི། འདོད་པ་ཞེས་པ་མུ་སྟེགས་སོ་སོ་རང་རང་གི། དགག་པའི་ཕྱིར་ཞེས་པ་དེ་དག་གི་འདོད་པ་ལོག་པ། མངོན་སུམ་རྗེས་སུ་དཔགས་པ་ཡི། །ཞེས་པའི་དོན་ནི། མངོན་སུམ་ཞེས་པ་མཐོང་བྱེད་ཀྱིས་མཐོང་བ་ལ་བྱའོ། །རྗེས་སུ་ཞེས་པ་ཤེས་བྱེད་ཀྱིས་གནས་ལུགས་ཤེས་པ་ལ་བྱའོ། །དཔགས་པ་ཡི་ཞེས་པ་སྔར་མཐོང་བྱེད་ཀྱི་གནས་ལུགས་གོ་བས་མ་མཐོང་ཡང་རྟགས་ཀྱིས་མཚོན་པ་ལ་བྱའོ། །གཏན་ཚིགས་ཆ་འཛིན་ཚིག་ཀུན་འབྱུང་། །ཞེས་པའི་དོན་ནི། གཏན་ཚིགས་ཞེས་པ་དྲི་བའོ། །ཆ་འཛིན་ཞེས་པ་དམ་བཅའོ། །ཚིག་ཀུན་འབྱུང་ཞེས་པ་ཕ་རོལ་མུ་སྟེགས་སུན་འབྱིན་པའི། ཡིད་དཔྱོད་བློ་ཞེན་དགག་པའི་ཕྱིར། །ཞེས་པའི་དོན་ནི། ཡིད་དཔྱོད་ཅེས་པ་ལྷ་བསྒོམ། བློར་ཞེན་ཞེས་པ་རང་གི་ལྷ་སྒོམ་ལ། དགག་པའི་ཕྱིར་ཞེས་པ་ཉན་ཐོས་རང་རྒྱལ་གྱི་འདོད་པ། ཀུན་རྫོབ་དོན་དམ་གྲངས་ཕྱེ་སོགས། །ཞེས་པའི་དོན་ནི། ཀུན་རྫོབ་ཅེས་པ་སྣང་གྲགས་ཀྱི་ཆོས་ཐམས་ཅད། དོན་དམ་ཞེས་པ་རང་གི་སེམས་སུ་འདོད་པའོ། །དེའི་དོན་དམ་སེམས་ཙམ་དུ་ཡང་མ་གྲུབ་ལ་མཐའ་ལས་འདས་པའོ། །གྲངས་ཕྱེ་སོགས་ཞེས་པ་ཆོས་རྣམས་ཀྱི་རྣམ་གྲངས་མ་ལུས་པ། ཚིག་ནི་འདི་ཀུན་བྱིན་རླབས་ལས། །ཞེས་པའི་དོན་ནི། ཚིག་ནི་ཞེས་པ་ཐེག་པའི་འཇུག་སྒོ་མཐའ་དག་གི། འདི་ཀུན་ཞེས་པ་བསྟན་བཅོས། བྱིན་རླབས་ལས་ཞེས་པ་སངས་རྒྱས་རྣམས་ཀྱི་དགོངས་པ་རྒྱུད་བསྟན་པའི་བུ་གཅིག་གི། འདི་ལྟར་རྩོམ་པའི་དཔའ་བོ་མཁས། །ཞེས་པའི་དོན་ནི། འདི་ལྟར་ཞེས་པ་ཀུན་རྫོབ་དང་དོན་དམ་དུ། རྩོམ་པའི་ཞེས་པ་བསྟན་བཅོས། དཔའ་བོ་མཁས་ཞེས་པ་འཁོར་བའི་གཡུལ་ངོ་ཟློག་པའི། རིག་འཛིན་འཕགས་པ་རྣམས་ལུང་བསྟན་པའི་དགོངས་པའོ། །སེམས་ནི་མཐར་ཞེན་བློ་དགག་ཕྱིར། །ཞེས་པའི་དོན་ནི། སེམས་ནི་ཞེས་པ་ངོ་བོ་སྟོང་པའི་རྩལ་མ་འགགས་པར་ཀུན་ལ་འཇུག །མཐར་ཞེན་ཞེས་པ་མ་དག་པ་འཁྲུལ་པའི་སྣང་བ། བློ་དགག་ཕྱིར་ཞེས་པ་མི་གཙང་བའི་རྫས་སུ་འདོད་པའི། ཕུང་པོ་གྲངས་དང་ཁམས་སོགས་དང་། །ཞེས་པའི་དོན་ནི། ཕུང་པོ་ཞེས་པ་གཟུགས་ཀྱི་ཕུང་པོ། གྲངས་དང་ཞེས་པ་མི་གཙང་བ་ལྔ་པོ་རྒྱལ་བ་རིགས་ལྔར་བསྒོམ་པའོ། །ཁམས་སོགས་དང་ཞེས་པས་ལ་སོགས་པར་ཡུམ་ལྔར་བསྒོམ་པའོ། །བསྟོད་དང་ཡོད་མེད་ཆོས་དང་ནི། ཞེས་པའི་དོན་ནི། བསྟོད་དང་ཞེས་པ་བླ་མ་དང་སངས་རྒྱས་དང་གནས་ལ་སོགས་པ། ཡོད་མེད་ཅེས་པ་ཐམས་ཅད་ལ་འཇུག་པའོ། །ཆོས་དང་ནི་ཞེས་པ་ཡོད་མེད་ཀྱི། ཆོས་མིན་ཇི་ལྟར་རྩི་བ་ཡི། །ཞེས་པའི་དོན་ནི། ཆོས་མིན་ཞེས་པ་ཡང་དག་པའི། ཇི་ལྟར་ཞེས་པ་སྣང་ངོ་མ་འགགས་པར། རྩི་བ་ཡི་ཞེས་པ་དུས་ཚོད་མ་ནོར་བར། ཚིག་ཀུན་འདི་ལས་རབ་བརྩོན་འཐོབ། །ཅེས་པའི་དོན་ནི། ཚིག་ཀུན་ཞེས་པ་འཁོར་འདས་མ་ལུས་པའི། འདི་ལས་ཞེས་པ་རྒྱུད། རབ་བརྩོན་ཐོབ་ཅེས་པ་རྒྱུད་འདིའི་བྱིན་རླབས་ལས་བསླབ་མི་དགོས་པར། འཇིག་རྟེན་མཐུན་འཇུག་དྲང་བའི་ཕྱིར། །ཞེས་པའི་དོན་ནི། འཇིག་རྟེན་ཞེས་པ་ཆགས་འཇིག་ཅན་གྱི་སྣང་བ་ལ། སྐྱེ་འཆི་ཅན་གྱི་སེམས་ཅན་རྟེན་པའོ། །མཐུན་འཇུག་ཅེས་པ་སོ་སོ་རང་རང་དང་། དྲང་བའི་ཕྱིར་ཞེས་པ་ཆོས་ལ། སྒྲ་དང་རིག་པ་དུ་མ་ཡང་། །ཞེས་པའི་དོན་ནི། སྒྲ་དང་ཞེས་པ་བརྗོད་པའི། རིག་པ་ཞེས་པའི་བཟོའོ། །དུ་མ་ཡང་ཞེས་པ་ཅི་དང་ཅིའི་རྣམ་པ་མ་ལུས་པ། འདི་ཡི་རང་བྱུང་ཚིག་ལས་ཤར། །ཞེས་པའི་དོན་ནི། འདི་ཡི་ཞེས་པ་རྒྱུད། རང་བྱུང་ཞེས་པ་བྱས་པ་མེད་པའི། ཚིག་ལས་ཤར་ཞེས་པ་རང་བབས་སུ། ཕྱིར་འགྱུར་ཐེག་པའི་རང་གྲངས་ཀྱིས། །ཞེས་པའི་དོན་ནི། ཕྱིར་འགྱུར་ཞེས་པ་མུ་སྟེགས་པའོ། །ཐེག་པའི་ཞེས་པ་འདོད་དོ། །རང་གྲངས་ཀྱིས་ཞེས་པ་སོ་སོ་རང་རང་གི། དབང་པོའི་འཇུག་སྒོ་གསལ་བའི་ཕྱིར། །ཞེས་པའི་དོན་ནི། དབང་པོའི་ཞེས་པ་རྣོ་རྟུལ། འཇུག་སྒོ་ཞེས་པ་ཐེག་པ་ལ། གསལ་བའི་ཕྱིར་ཞེས་པ་མ་ནོར་བར། རིམ་པའི་འཇུག་སྲོལ་བཅུ་གཅིག་ནི། །ཞེས་པའི་དོན་ནི། རིམ་པའི་ཞེས་པ་མས་འཛེག་ཏུ། འཇུག་སྲོལ་ཞེས་པ་ཤན་ཕྱེད་པར། བཅུ་གཅིག་ནི་ཞེས་པ་ཐེག་པ་དགུ་འཇིག་རྟེན་པ་གཉིས་དང་བཅུ་གཅིག་གོ། །འདི་ཡི་ཡོན་ཏན་བབས་ལས་སྣང་། །ཞེས་པའི་དོན་ནི། འདིའི་ཞེས་པ་རྒྱུད། ཡོན་ཏན་ཞེས་པ་སངས་རྒྱས་ཀྱིི། བབས་ལས་སྣང་ཞེས་པ་སྐལ་པ་ཅན་ལ། རང་འོད་ཇི་ལྟར་ཡོད་པའི་ཚིག །ཅེས་པའི་དོན་ནི། རང་འོད་ཅེས་པ་རིག་པའི་རང་མདངས་མཐིང་ག་དཀར་པོ་སེར་པོ་དམར་པོ་ལྗང་ཁུ་སྣ་ཚོགས་པ། ཇི་ལྟར་ཞེས་པ་ཡེ་གདོད་མ་ནས། ཡོད་པའི་ཚིག་ཅེས་པ་སེམས་ཅན་ཐམས་ཅད་ལ། འདི་ལས་སྤྲོས་སོ་ཉེ་བར་བསྡུས། །ཞེས་པའི་དོན་ནི། འདི་ལས་ཞེས་པ་རྒྱུད། སྤྲོས་སོ་ཞེས་པ་མདོ་རྒྱུད་ཐམས་ཅད་ཀྱི་ནང་དུ། ཉེ་བར་བསྡུས་ཞེས་པ་རྫོགས་པ་ཆེན་པོ་ཐིག་ལེའི་སྐོར་དུ། གྲགས་དང་མ་གྲགས་ཚིག་བཅུད་ནི། །ཞེས་པའི་དོན་ནི། གྲགས་དང་ཞེས་པ་རྫོགས་པ་ཆེན་པོའི་རྒྱུད་རྣམས་སུ། མ་གྲགས་ཞེས་པ་མདོ་རྒྱུད་ཀུན་དང་ཁྱད་པར་མཚན་བརྗོད་དོ། །ཚིག་བཅུད་ནི་ཞེས་པ་ཆོས་ཐམས་ཅད་ཀྱི་ཁྱད་པར་དུ་རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞི། འདི་ལས་ཡང་གསང་ཆེན་པོར་ཡང་། །ཞེས་པའི་དོན་ནི། འདི་ལས་ཞེས་པ་རྒྱུད། ཡང་གསང་ཞེས་པ་ཟབ་པའི་ཡང་ཟབ། ཆེན་པོར་ཡང་ཞེས་པ་གོང་ན་མེད་པའི་ཡང་རྩེ་རྒྱུད་བཅུ་བདུན་ནོ། །གྱུར་ཏེ་སྣང་བར་འགྱུར་བ་ཡིན། །ཞེས་པའི་དོན་ནི། གྱུར་ཏེ་ཞེས་པ་སྔར། སྣང་བར་ཞེས་པ་རིམ་པ་བཞིན་དུ། འགྱུར་བ་ཡིན་ཞེས་པའི་ཕྱིས་ཀྱང་། ལྷ་མིས་ཇི་ལྟར་འདོད་པའི་ཚིག །ཅེས་པའི་དོན་ནི། ལྷ་མིས་ཞེས་པ་མཐོ་རིས་གཉིས། ཇི་ལྟར་ཞེས་པ་རང་རང་འདོད་པའི། ཚིག་ཅེས་པ་སོ་སོར་གོ་བའི། སྒོ་དྲུག་ཐོབ་འདོད་རང་བཀོད་ཚིག །ཅེས་པའི་དོན་ནི། སྒོ་དྲུག་ཅེས་པ་རྣམ་པར་ཐར་པའི། ཐོབ་འདོད་ཅེས་པ་རང་གིས། རང་བཀོད་ཚིག་ཅེས་པ་རྒྱུད་བསྟན་པའི་བུ་གཅིག་འདི། སྔགས་ལུང་སེམས་དཔའི་ལུང་རབ་སྣང་། །ཞེས་པའི་དོན་ནི། སྔགས་ལུང་ཞེས་པ་ཕྱི་ནང་གི། སེམས་དཔའི་ཞེས་པ་རྡོ་རྗེ། ལུང་རབ་སྣང་ཞེས་པ་བཀའ་མངོན་སུམ་དུ། འདི་ལ་གསང་ཆེན་གནད་དུ་གྲགས། །ཞེས་པའི་དོན་ནི། འདི་ལ་ཞེས་པ་རྒྱུད། གསང་ཆེན་ཞེས་པ་བཅུ་བདུན་གྱི། གནད་དུ་གྲགས་ཞེས་པ་རྟགས་མངོན་དུ་འབྱིན་པའི། དེ་བཞིན་སྐྱེ་འཇིག་བསྟན་བཅོས་དང་། །ཞེས་པའི་དོན་ནི། དེ་བཞིན་ཞེས་པ་འདི་དག་ལ་སོགས་པ། སྐྱེ་འཇིག་ཅེས་པ་ནང་བཅུད་དང་ཕྱི་སྣོད་ཀྱི། བསྟན་བཅོས་ཞེས་པ་བསྟན་དང་བཞག་པའི། ཡོད་དང་མེད་སྨྲ་སྡེ་གྲངས་སྤྲོས། །ཞེས་པའི་དོན་ནི། ཡོད་པར་སྨྲ་བའི་སྡེ་སོགས། སྡེ་པ་བཞི་རུ་གསུངས་པ་རྣམས་སོ། །མཐའ་གཉིས་རབ་འབྱེད་ཡོད་སྣང་ཕྱིར། །ཞེས་པའི་དོན་ནི། མཐའ་གཉིས་ཞེས་པ་ཡོད་མེད་ཀྱི། རབ་འབྱེད་ཅེས་པ་དངོས་པོར་འཛིན་པ་དང་། སྟོང་པར་འཛིན་པ་དང་། ཡོད་སྣང་ཕྱིར་ཞེས་པ་གཟུང་ཡུལ་དུ་མེད་ཀྱང་། སྣང་ཡུལ་མ་འགགས་པས། དྲན་སེམས་ཉིད་ཀྱི་སྡེ་གྲངས་ནི། །ཞེས་པའི་དོན་ནི། དྲན་སེམས་ཞེས་པ་སེམས་ཅན་གྱི། ཉིད་ཀྱི་ཞེས་པ་དེའི་དོན། སྡེ་གྲངས་ནི་ཞེས་པ་སེམས་མེད་བཅོ་བརྒྱད་ལ་སོགས་པ། འདི་ཀུན་ལས་བྱུང་སེམས་ཀྱི་ལུང་། །ཞེས་པའི་དོན་ནི། འདི་ཀུན་ཞེས་པ་རྒྱུད་འདིའི་ཚིག །ལས་བྱུང་ཞེས་པ་གོང་གི་ཚིག་ཐམས་ཅད། སེམས་ཀྱི་ལུང་ཞེས་པ་ཆོས་སྐུ་ཐིག་ལེ་ཉག་གཅིག་གི། འཇུག་སྒོ་ཆེན་པོའི་ཤིང་རྟ་ཡང་། །ཞེས་པའི་དོན་ནི། འཇུག་སྒོ་ཞེས་པ་འཁོར་བར། ཆེན་པོའི་ཞེས་པ་མི་ལུས། ཤིང་རྟ་ཡང་ཞེས་པ་ཁྱབ་པ་ཁམས་གསུམ་དུ། སྣང་བའི་མཛད་འཕྲོས་ཁ་ལོ་ནི། །ཞེས་པའི་དོན་ནི། སྣང་བའི་ཞེས་པ་ཆོས་ཉིད་ཀྱི། མཛད་འཕྲོས་ཞེས་པ་འགྲོ་དོན། ཁ་ལོ་ནི་ཞེས་པ་སེམས་ཅན་འཁོར་བར་འཁྱམས་པའི། འདི་ཚིག་དམ་པའི་འཁོར་ལོའོ། །ཞེས་པའི་དོན་ནི། འདི་ཚིག་ཅེས་པ་རྒྱུད། དམ་པའི་ཞེས་པ་ཆོས་ལ། འཁོར་ལོ་ཞེས་པ་སྒྱུར་བར་བྱེད་པ། སངས་རྒྱས་མྱུར་བར་ཡང་བརྗོད་དོ། །གྲགས་པའི་སྔགས་དང་དེ་སྤེལ་ཚིག །ཅེས་པའི་དོན་ནི། གྲགས་པའི་ཞེས་པ་ཡོངས་སུ། སྔགས་དང་ཞེས་པ་ཕྱི་ནང་གཉིས་ཀྱི། དེ་སྤེལ་ཚིག་ཅེས་པ་དེའི་འགྲེལ་པ་ལ་སོགས་པ། རིམ་པ་མདོ་སྡེ་རང་གྲགས་ཚིག །ཅེས་པའི་དོན་ནི། རིམ་པ་ཞེས་པ་ཐེག་པའི། མདོ་སྡེ་ཞེས་པ་མཚན་ཉིད། རང་གྲགས་ཚིག་ཅེས་པ་གསང་སྔགས་ཕྱི་ནང་གི། བཀོད་པ་རྣམས་ཀྱི་ཐོག་མར་ནི། །ཞེས་པའི་དོན་ནི། བཀོད་པ་ཞེས་པ་ཡི་གེ་རིས་སུ། རྣམས་ཀྱི་ཞེས་པ་ཆོས་ཐམས་ཅད། ཐོག་མར་ནི་ཞེས་པ་དེ་དག་ཐམས་ཅད་ཀྱི་མདུན་དུ། འདི་ལས་འཕྲོའོ་ཕན་སེམས་ལྡན། །ཞེས་པའི་དོན་ནི། འདི་ལས་ཞེས་པ་བྱིན་རླབས། འཕྲོའོ་ཞེས་པ་ཐུགས་རྗེ། ཕན་སེམས་ལྡན་ཞེས་པ་རྡོ་རྗེ་འཆང་གིས་ཐོག་དྲངས་པའི་བརྒྱུད་པ་ཟམ་མ་ཆད་པས་འཁོར་བ་སྟོངས་པར་བགྱིས་པའི་རང་སྒྲའོ། །ལུང་རྒྱལ་ཐེག་པ་ཀུན་དངོས་སོ། །ཞེས་པའི་དོན་ནི། ལུང་རྒྱལ་ཞེས་པ་ཆོས་ཐམས་ཅད་ཀྱི། ཐེག་པ་ཞེས་པ་སོ་སོ་རང་རང་གི། ཀུན་དངོས་སོ་ཞེས་པ་ཐམས་ཅད་གཅིག་ཏུ་དྲིལ་བའི། གཞི་རྩ་རྩལ་གྱི་ནན་ཏན་ཚིག །ཅེས་པའི་དོན་ནི། གཞི་རྩ་ཞེས་པ་རང་རང་གི་རིག་པའི་ངོ་བོ་རང་བཞིན་ཐུགས་རྗེ་གསུམ། རྩལ་གྱི་ཞེས་པ་རྒྱུད་ལ། ནན་ཏན་ཚིག་ཅེས་པ་རྒྱུད་འདི་འཕྱུགས་པ་མེད་པའི་གནད་དོ། །འདི་ཀུན་རྒྱན་གྱི་རྒྱལ་པོ་ལས། །ཞེས་པའི་དོན་ནི། འདི་ཀུན་ཞེས་པ་རྒྱུད་ཚིག །རྒྱན་གྱི་ཞེས་པ་ཆོས་ཐམས་ཅད་ཀྱི། རྒྱལ་པོ་ལས་ཞེས་པ་བྱས་པ་མེད་པར་རང་བྱོན། གོང་ན་མེད་པའི་ཡང་རྩེ། བྱ་རྩོལ་མེད་པའི་དགོངས་པའོ། །ཁ་ལོ་སྒྱུར་བའི་དཔའ་བོ་ཡིན། །ཞེས་པའི་དོན་ནི། ཁ་ལོ་ཞེས་པ་སེམས་ཅན་གྱི། སྒྱུར་བའི་ཞེས་པ་སངས་རྒྱས་ལ། དཔའ་བོ་ཡིན་ཞེས་པ་རྒྱུད་འདི་བཏགས་པ་ཙམ་གྱིས་འཁོར་བའི་གཡུལ་ངོ་བཟློག་པའོ། །བྱེད་པའི་ལས་རྒྱས་དཀྱིལ་འཁོར་འཇུག །ཅེས་པའི་དོན་ནི། བྱེད་པའི་ཞེས་པ་ལྟོ་གོས་གཉིས་ཀྱི། ལས་རྒྱས་ཞེས་པ་དེ་གཉིས་ཀྱི་ཞར་ལ། དཀྱིལ་འཁོར་འཇུག་ཅེས་པ་མྱ་ངན་ལས་འདས་པའི་སེམས་ཅན་རྣམས་ཀྱང་རྒྱུད་འདི་དང་འཕྲད་ན་གནས་ལུགས་དོན་གྱི། དཔེ་མེད་བྲིས་པའི་སྒྲ་ཡིག་ཟེར། །ཞེས་པའི་དོན་ནི། དཔེ་མེད་ཅེས་པ་དང་པོའི། བྲིས་པའི་ཞེས་པ་ཡེ་གདོད་མ་ནས། སྒྲ་ཡིག་ཟེར་ཞེས་པ་ཆོས་ཉིད་བྱ་རྩོལ་མེད་པའི། སུ་ཟེར་ན་ངོ་བོ་རང་བཞིན་ཐུགས་རྗེ་གསུམ་འདུས་པའི་རྡོ་རྗེ་འཆང་། གྲངས་མཐའ་འགེག་བྱེད་སེང་ཕྲུག་གོ། །ཞེས་པའི་དོན་ནི། གྲངས་མཐའ་ཞེས་པ་ཐེག་པ་དགུའི། འགེག་བྱེད་ཅེས་པ་འདོད་གཞུང་། སེང་ཕྲུག་གོ་ཞེས་པ་རྒྱུད་འདིས་ཐམས་ཅད་ཟིལ་གྱིས་གནོན་པའོ། །བཅོས་མའི་ཡང་ཆ་དེ་འཕེལ་བཟུང་། །ཞེས་པའི་དོན་ནི། བཅོས་མའི་ཞེས་པ་ལུས་ངག་ཡིད་གསུམ། ཡང་ཆ་ཞེས་པ་ཉན་ཐོས་རྣམས་ཀྱི་དོན། ཡང་དག་པའི་དོན་རྟོགས་པར་འགྱུར་རོ། །དེ་འཕེལ་བཟུང་ཞེས་པ་བྱང་ཆུབ་སེམས་དཔས། དཔའ་བར་འགྲོ་བའི་ལས་རྒྱས་སོ། །ཞེས་པའི་དོན་ནི། དཔའ་བར་ཞེས་པ་གོང་ནས་གོང་དུ། འགྲོ་བའི་ཞེས་པ་སྐད་ཅིག་ལ། ལས་རྒྱས་སོ་ཞེས་པ་དོན་ལ་ཐབས་དམ་པའོ། །མཐོ་དམན་སྙོམས་པའི་དགེ་འབྲས་ལུང་། །ཞེས་པའི་དོན་ནི། མཐོ་དམན་ཞེས་པ་སངས་རྒྱས་ཀྱི་དགོངས་པ་དང་སེམས་ཅན་གྱི་རང་རྒྱུད། སྙོམས་པའི་ཞེས་པ་ཐིག་ལེ་ཉག་གཅིག་ཏུ། དགེ་འབྲས་ལུང་ཞེས་པ་རྒྱུད་འདི་དང་ཕྲད་པ་རྣམས་ཚོགས་གཉིས་རྫོགས་པའོ། །སྒྲིབ་གཉིས་བྱང་བའོ། །སངས་རྒྱས་པའི་དུས་ལ་སླེབས་པའི་སྐལ་བ་ཅན་ནོ། །དེས་ན་བླ་མ་སངས་རྒྱས་སུ་ལྟའོ། །དཔེ་བྲལ་རྣམས་ཀྱི་དང་པོའོ། །ཞེས་པའི་དོན་ནི། དཔེ་བྲལ་ཞེས་པ་ཡང་དག་པའི་དོན་ལ། རྣམས་ཀྱི་ཞེས་པ་རིག་སྟོང་གསལ་སྟོང་གྲགས་སྟོང་བདེ་སྟོང་སྣང་སྟོང་ལ་སོགས་པ། དང་པོའོ་ཞེས་པ་མིང་དང་བྲལ་བའི་ཆོས་ཉིད། ཀ་ནས་དག་པ་དགོངས་པ། འཛིན་པ་ཟད་པའི་རྒྱུད་འདིའོ། །དེ་ལྟར་སྤྲོས་ཚིག་དུ་མ་ཡིས། །ཞེས་པའི་དོན་ནི། དེ་ལྟར་ཞེས་པ་ཐམས་ཅད་ཀྱི་བྱུང་ཁུངས། སྤྲོས་ཚིག་ཅེས་པ་ཐམས་ཅད་ཀྱི་གཞི། དུ་མ་ཡིས་ཞེས་པ་མ་ཁྱབ་པ་མེད་པའི་དགོངས་ཚིག་འདི། འཁོར་ལོ་འཛིན་པའི་སྤྲུལ་པའོ། །ཞེས་པའི་དོན་ནི། འཁོར་ལོ་ཞེས་པ་ཆོས་ཀྱི། འཛིན་པའི་ཞེས་པ་རྒྱུན་ཆད་མེད་པར། སྤྲུལ་པའོ་ཞེས་པ་སངས་རྒྱས་ཀྱི་བསྟན་པ་དངོས་སོ། །འདི་གནས་ན་བསྟན་པ་གནས་པའོ། །འཕེལ་ན་བསྟན་པ་འཕེལ་ལོ། །མཁའ་གསལ་མཁའ་དག་ཀློང་ཆེན་གྱི། །ཞེས་པའི་དོན་ནི། མཁའ་གསལ་ཞེས་པ་མཚན་ཉིད་འཛིན་པའི་ཡེ་ཤེས་ལྔའོ། །མཁའ་དག་ཅེས་པ་འཛིན་པ་ཟད་པའི་ཡེ་ཤེས་སོ། །ཀློང་ཆེན་གྱི་ཞེས་པ་ཆོས་ཉིད་ཅེར་མཐོང་མངོན་སུམ་གྱི། སྤྲོས་པ་རྣམས་ཀྱི་ཡང་སྤྲོས་ལས། །ཞེས་པའི་དོན་ནི། སྤྲོས་པ་ཞེས་པ་ཡང་གསང་བླ་མེད། རྣམས་ཀྱི་ཞེས་པ་རྫོགས་ཆེན་སྐོར། ཡང་སྤྲོས་ལས་ཞེས་པ་མདོ་རྒྱུད་ཐམས་ཅད། སྐྱེ་སྒོ་རབ་ཏུ་སྤངས་པ་ཡིས། །ཞེས་པའི་དོན། སྐྱེ་སྒོ་ཞེས་པ་སྐྱེ་བ་རྣམ་བཞིའོ། །རབ་ཏུ་ཞེས་པ་མཐོང་ཐོས་རེག་པ་ཙམ་གྱིས། སྤངས་པ་ཡིས་ཞེས་པ་ཨ་ཏིའི་དགོངས་པས། བླ་མེད་འདྲེན་པའི་དང་པོར་བྱུང་། །ཞེས་པའི་དོན་ནི། བླ་མེད་ཅེས་པ་ཡོངས་སུ་རྫོགས་པར། འདྲེན་པའི་ཞེས་པ་སེམས་ཅན། དང་པོར་བྱུང་ཞེས་པ་ནམ་མཁའི་མི་མཇེད་ཡང་སྟེངས་སུ། ཆོས་ལས་འདས་པའི་རང་སྒྲར། བདེ་བས་བདེ་བ་འབྱེད་པ་ཡི། །ཞེས་པའི་དོན་ནི། བདེ་བས་ཞེས་པ་རྒྱུད་འཁྲུལ་མེད་ཀྱི་བྱིན་རླབས་ཀྱིས། བདེ་བ་ཞེས་པ་གཞི་འཁྲུལ་མེད་རྟོགས་པར་བྱེད་པས། འབྱེད་པ་ཡི་ཞེས་པ་རྒྱུད་འདི་ཡོད་མེད་ལ་ཕྱི་ནང་གསང་བ་གསུམ་གྱི་རྟགས། རིགས་མཐུན་ཀུན་གྱི་གསང་ཆེན་ཡིན། །ཞེས་པའི་དོན་ནི། རིགས་མཐུན་ཞེས་པ་སངས་རྒྱས་ཀྱི། ཀུན་གྱི་ཞེས་པ་སྐལ་བ་ཅན། གསང་ཆེན་ཡིན་ཞེས་པ་ལོག་ལྟ་ཅན་ལ་གསང་སྟེ་རང་ཉིད་བཅང་བར་བྱའོ། །རིགས་ལ་གནས་ཤིང་རིགས་འབྱེད་པའི། །ཞེས་པའི་དོན་ནི། རིགས་ལ་ཞེས་པ་རིགས་ལྔའི། གནས་ཤིང་ཞེས་པ་དུས་རྒྱུན་ཆད་མེད་པར་ཐིག་ལེ་ཉག་གཅིག་ཏུ། རིགས་འབྱེད་པའི་ཞེས་པ་ཕྱི་ནང་གཉིས་ཀར་ཁ་དོག་སོ་སོར། གཙོ་བོ་གཙོ་བོས་བླང་བའོ། །ཞེས་པའི་དོན་ནི། གཙོ་བོ་ཞེས་པ་རང་རྒྱུད་ལ་ཉོན་མོངས་པ་ལྔ་པོ་གང་ཤས་ཆེ་བ་སྟེ། གཙོ་བོས་ཞེས་པ་རིགས་ལྔ། བླང་པའོ་ཞེས་པ་རིགས་ཀྱི་བདག་པོར་སངས་རྒྱས། ཕྱིར་རྟགས་ཀྱང་དེ་ལྟར་འབྱུང་བ་ལ་དགོངས་པའོ། །ཀ་དང་རྟོགས་དང་རབ་ཏུ་དགོངས། །ཞེས་པའི་དོན་ནི། ཀ་དང་ཞེས་པ་གཞིའི་ཀ །རྟོགས་དང་ཞེས་པ་རང་ལ་ཡེ་ནས་གནས་པ་དེ། རབ་ཏུ་དགོངས་ཞེས་པ་ངོ་བོ་རང་བཞིན་ཐུགས་རྗེ་གསུམ་ཡ་མ་བྲལ་བར། རིམ་པར་རྒྱས་དང་དེ་རྗེས་ནི། །ཞེས་པའི་དོན་ནི། རིམ་པར་ཞེས་པ་ཆོས་སྐུ་ལས་ལོངས་སྐུ་ལོངས་སྐུ་ལས་སྤྲུལ་སྐུ་ལ། རྒྱས་དང་ཞེས་པ་བྱང་ཕྱོགས་གཡོ་བ་ལྡན་དང་། ལྷོ་ཕྱོགས་ཚལ་པ་སྐྱོབ་དང་། ཤར་ཕྱོགས་དེ་བའི་རླུང་དང་། ནུབ་ཕྱོགས་བརྩེ་བའི་གླིང་དང་། དེ་རྗེས་ནི་ཞེས་པ་སྐུའི་ཞིང་ཁམས་ཐོག་མ་ནས་སྐྱེ་བ་བཞིས་གཟུགས་ཀྱི་དོན་བྱེད་ཅིང་། འདི་ལས་རབ་ཏུ་འཕེལ་བ་ཡིན། །ཞེས་པའི་དོན་ནི། འདི་ལས་ཞེས་པ་རྒྱུད། རབ་ཏུ་ཞེས་པ་རིག་འཛིན་ཕུང་པོ་ལྷག་མེད་དང་། འཕེལ་བ་ཡིན་ཞེས་པ་གང་ཟག་གི་བརྒྱུད་པ་ཟམ་མ་ཆད་པར། རབ་ཏུ་རྟོགས་ཕྱིར་དཀྱིལ་འཁོར་ནི། །ཞེས་པའི་དོན་ནི། རབ་ཏུ་ཞེས་པ་ཕུང་པོ་ལྷག་མེད། རྟོགས་ཕྱིར་ཞེས་པ་ཚེ་འདི་ཉིད་ལ། དཀྱིལ་འཁོར་ནི་ཞེས་པ་དབྱིངས་གསུམ་འདུས་པའོ། །དམ་པ་རྣམས་ནི་འདི་ལས་སྤྲུལ། །ཞེས་པའི་དོན་ནི། དམ་པ་ཞེས་པ་རིགས་བརྒྱ། རྣམས་ནི་ཞེས་པ་རིག་པ་ཚད་ལ་ཕེབས་ཏེ་ཞི་ཁྲོ་མཐའ་བྲལ་གྱི་སྐུ་དང་གཉིས་སུ་མེད་པའི་རིག་འཛིན་བརྒྱུད་པ་དང་བཅས་པའོ། །འདི་ལས་སྤྲུལ་ཞེས་པ་རྒྱུད་བསྟན་པའི་བུ་གཅིག །ཐམས་ཅད་ལས་ཀྱི་མཐའ་རྒྱས་ཀྱང་། །ཞེས་པའི་དོན་ནི། ཐམས་ཅད་ཅེས་པ་ཁམས་གསུམ་གྱི་སེམས་ཅན། ལས་ཀྱི་ཞེས་པ་ཚེ་འཁོར་བ་ཐོག་མཐའ་མེད་པ་ནས་བསགས་པའི་རྣམ་སྨིན། མཐའ་རྒྱས་ཀྱང་ཞེས་པ་བསོད་ནམས་ཀྱི་སྟོབས་ཉམས་ཤིང་བྲི་སྟེ། ཚེ་ལོ་ཡང་བཅུ་ལ་ཐུག་པའི་དུས་སུ། འདི་ལས་རབ་ཏུ་ཡང་འཕེལ་ལོ། །ཞེས་པའི་དོན་ནི། འདི་ལས་ཞེས་པ་རྒྱུད། རབ་ཏུ་ཞེས་པ་དེའི་དུས་སུ་དར་བ། ཡང་འཕེལ་ལོ་ཞེས་པ་ཡེ་ཤེས་ཀྱི་མཁའ་འགྲོ་མ་དཔལ་འཛིན་མ་བྱ་བས། བསྟན་པའི་སྙིང་པོ་རྣམས་བཟུང་སྟེ་རྒྱས་པར་བྱས་ནས་ཐམས་ཅད་གྲོལ་བར་བྱེད་དོ། །དེ་ནས་མི་གནས་རང་ས་ཉིད་དུ་འགྱུར་རོ། །འདི་ཚིག་བྱིན་རླབས་བརྒྱུད་པ་ཡང་། །ཞེས་པའི་དོན་ནི། འདི་ཚིག་ཅེས་པ་རྒྱུད། བྱིན་རླབས་ཞེས་པ་རང་བཞིན་བབས་ཀྱི། བརྒྱུད་པ་ཡང་ཞེས་པ་དེ་ནས་བསྐལ་པ་བྱེ་བ་ན། རབ་ཏུ་འཕེལ་ཕྱིར་འབྱུང་བའོ། །ཞེས་པའི་དོན་ནི། རབ་ཏུ་ཞེས་པ་བསྟན་པའི་སྙིང་པོ་སྙིང་ཐིག་གསང་བ་འདི། འཕེལ་ཕྱིར་ཞེས་པ་དེའི་དུས་སུ། འབྱུང་བའོ་ཞེས་པ་འཁོར་ལོ་གློག་གི་ཕྲེང་བ་བྱ་བའི་བཅོམ་ལྡན་འདས་ལ་སྣང་ཞིང་བབས་ཏེ། ཡང་བསྟན་པའི་མེ་རོ་ལངས་སོ། །འདུལ་བའི་བསྟན་པ་བསྐལ་པ་གཅིག །མདོ་སྡེའི་བསྟན་པ་བསྐལ་པ་བརྒྱ། དེ་ནས་སྟོན་པ་འདའ་ཚུལ་བསྟན་ཏེ་མུན་པའི་བསྐལ་པ་གཉིས་འབྱུང་། དེ་ནས་སྟོན་པ་སྐུ་འཁྲུངས་ཏེ། མངོན་པའི་བསྟན་པ་བསྐལ་པ་བརྒྱ་འབྱུང་སྟེ། དེའི་དུས་སུ་མངོན་སུམ་སྙིང་ཐིག་གི་དགོངས་པ་རང་བཞིན་བབས་ཀྱི་བྱིན་བརླབས་ལས། རང་ངོ་ཤེས་ནས་ཐམས་ཅད་ཚེ་གཅིག་ལ་སངས་རྒྱས་ཀྱི་འབྲས་བུ་ཐོབ་བོ། །འདི་ནས་འཁོར་བ་དོང་སྤྲུག་སྟེ་འགྲོ་བ་དྲུག་ཏུ་སྣང་བ་མེད་དོ། །བསྐལ་པ་སྟོང་ཕྲག་ཉི་ཤུར་སེམས་ཅན་འཁོར་བ་རྒྱུན་ཆད་ནས་ལུས་ཅན་རྣམས་མི་སྣང་ངོ་། །དེ་ནས་ལས་ཀྱི་བྱེ་བྲག་ཉོན་མོངས་པ་བག་ལ་ཉལ་ཕྲ་མོ་ལངས་ནས་སྔར་གྱི་འཁོར་འདས་བྱུང་ཚུལ་དང་མཚུངས་སོ། །ཕྱིས་ཇི་ལྟར་འབྱུང་བ་བསྟན་པའི་ལེའུ་སྟེ་གསུམ་པ་རྫོགས་སོ།། །།ས་མ་ཡ། རྒྱ་རྒྱ་རྒྱ། ༈ ད་ནི་ལེའུ་བཞི་པ་འགྲོལ་ཏེ། ཨེ་མ་ཧོཿ ཞེས་པའི་དོན་ནི། ཨེ་བྱ་རྩོལ་མེད་པའི་དོན་ལ། མ་རང་གསལ་གཏིང་བཀྲག་ཕྱེད་པའི་མཚར་བ། ཧོ་མཐའ་དབུས་ཕྱོགས་དང་བྲལ་བའི་ཆེན་པོའི་རང་སྒྲའོ། །འདི་ལྟར་ཡང་གསང་དོན་ཉིད་ལ། །ཞེས་པའི་དོན་ནི། འདི་ལྟར་ཞེས་པ་རྒྱུད་དོན་རིག་པ་མངོན་སུམ་གྱི་གནས་བསྟན་པ། ཡང་གསང་ཞེས་པ་ཆོས་ཉིད་མངོན་སུམ་གྱི་དོན་ལོག་ལྟ་ཅན་གྱི་རིགས་ལ་གསང་བ་བས་ཀྱང་ཆེས་གསང་སྟེ་རླུང་གི་ཕྱོགས་ཙམ་དུ་ཡང་བརྗོད་པར་མི་བྱའོ། །དོན་ཉིད་ལ་ཞེས་པ་བར་དོ་དང་ཚེ་ཕྱི་མ་ཙམ་ལ་མི་ལྟོས་པར། དུས་གསུམ་སངས་རྒྱས་ཐམས་ཅད་ཀྱི་གནས་ལུགས། དགེ་སྡིག་ཀུན་དང་བྲལ་བའི་སྙིང་པོའོ། །འཇུག་པར་འདོད་པའི་སྐལ་པ་རབ། །ཅེས་པའི་དོན་ནི། འཇུག་པར་ཞེས་པ་ཐེག་པ་ཐམས་ཅད་ཀྱི་ཡང་རྩེ། སངས་རྒྱས་ཐམས་ཅད་ཀྱི་ལྟ་ཕུགས། མན་ངག་ཐམས་ཅད་ཀྱི་ཉིང་ཁུ། འབྲས་བུ་ཐམས་ཅད་ཀྱི་མངའ་བདག །ཡོད་མེད་གཅིག་བྲལ་གྱི་ལྟ་བ་ནམ་མཁའི་མདུང་སྐོར། སྐུ་གསུམ་ལག་འཆང་ཟག་བཅས་མི་སྣང་བར་ལོ་བཅུ་ན་གདོན་མི་ཟ་བར་སངས་རྒྱ་བའི་གསང་བ་སྙིང་ཐིག་ཡང་གསང་དམ་པ་ལ། འདོད་པའི་ཞེས་པ་རྟོགས་ལྡན་ནམ་རྣམ་འབྱོར་པའམ། པཎྜི་ཏའམ། སྟོན་པའམ། དགེ་སློང་ངམ། དགེ་ཚུལ་ལམ། དགེ་བསྙེན་ནམ། རྒྱལ་པོའམ། བློན་པོའམ། འབངས་སམ། རིགས་ཀྱི་བུའམ། རིགས་ཀྱི་བུ་མོའམ། སྐལ་པ་རབ་ཅེས་པ་ཚོགས་གཉིས་བསགས་བསགས་པའོ། །སྒྲིབ་གཉིས་སྦྱངས་སྦྱངས་པའོ། །སེམས་ཅན་གྱི་དོན་དུ་ཐུགས་བསྐྱེད་བསྐྱེད་པའོ། །ཕྱི་ནང་གསང་བ་གསུམ་གྱིས་སྨིན་ཟིན་ཟིན་པའོ། །སྔོན་དུ་ལུས་ངག་ཡིད་རྣམས་ཀྱི། །ཞེས་པའི་དོན་ནི། སྔོན་དུ་ཞེས་པ་ཟག་བཅས་མི་སྣང་བར་གྲོལ་བར་བྱེད་པའོ། །ལུས་ངག་ཅེས་པ་རང་གི། ཡིད་རྣམས་ཀྱི་ཞེས་པ་གསུམ་པོའི། མངོན་པར་ཞེས་པ་བཟློག་པའི་ཕྱིར། །ཞེས་པའི་དོན་ནི། མངོན་པར་ཞེས་པ་རྟགས། ཞེན་པ་ཞེས་པ་ཚེ་འཁོར་བ་ཐོག་མཐའ་མེད་པ་ནས་ལུས་ངག་ཡིད་གསུམ་ལ། བཟློག་པའི་ཕྱིར་ཞེས་པ་ཆོས་ཉིད་ཀྱི་རང་སྒྲ་བླ་མ་དམ་པའི་གདམས་ངག་གི་གནད་ཀྱིས། སྔོན་དུ་སྤྱོད་པ་བརྩམ་པར་བྱ། །ཞེས་པའི་དོན་ནི། སྔོན་དུ་ཞེས་པ་ལུས་ངག་ཡིད་གསུམ་གྱི་ཞེན་པ་བཟློག་པར་བྱ་བའི། སྤྱོད་པ་ཞེས་པ་ལུས་ངག་ཡིད་གསུམ་གྱི། བརྩམ་པར་བྱ་ཞེས་སྐལ་པ་ཅན། གཅིག་ནས་གཉིས་གསུམ་ལས་མང་ན་མཁའ་འགྲོ་མའི་བཀའ་ཆད་འབྱུང་ངོ་། །དེ་ཡང་རབ་དུར་ཁྲོད། འབྲིང་ལུང་སྟོངས། ཐ་མ་ཡང་དབེན་པའི་རི་ལ་ཕྱིན་ཏེ། ཚོགས་གཏོར་བཤམས་ལ་ལུས་དུར་ཁྲོད་ཀྱི་རུས་པ་དང་དུང་དང་ཀར་ཤ་པ་ནིས་བརྒྱན་ལ། ཅང་ཏེའུ་དཀྲོལ་ཞིང་ཚོགས་དང་གཏོར་མ་བླ་མ་ཡི་དམ་དྷཱ་ཀི་ལ་ཕུལ་ལ་གསོལ་བ་བཏབ། ཡུལ་བདག་ལ་གཏོར་མ་ཞིག་བྱིན་ཏེ་སྤྱོད་པ་རྩོམ་པ་ལ་བར་ཆོད་མ་བྱེད་ཅིག་བྱས་ལ་བཀའ་བསྒོ། འབྱུང་པོ་ལ་གཏོར་མ་ཞིག་བྱིན་ཏེ་བརྟུལ་ཤུགས་ཀྱིས་བསྐྲད་ལ་བཏང་། རང་ཉིད་ཕྱག་ན་རྡོ་རྗེའམ་དྷཱ་ཀི་མར་བསྒོམས་ལ། ཨེ་ལ་མ་ལ་སོགས་པའི་ཡི་གེས་རྒྱས་བཏབ་ལ། ཕཊ་སྒྲ་དྲག་པོ་ཞིག་བརྗོད་ལ། སྔོན་དུ་ལུས་ཀྱི་སྤྱོད་པ་ཞག་གསུམ་བརྩམས་པར་བྱའོ། །ལུས་ནི་རྒྱུག་དང་ཉལ་བ་དང་། །ཞེས་པའི་དོན་ནི། ལུས་ནི་ཞེས་པ་རང་གི། རྒྱུག་དང་ཞེས་པ་ཡར་མར་ཕར་ཚུར་ལ། ཉལ་དང་ཞེས་པ་ཁ་སྦུབ་དང་གན་རྐྱལ་དང་། གཞོགས་དང་། རྐང་ལག་བསྐུམ་པ་དང་བརྐྱང་བའོ། །ལངས་དང་ཡན་ལག་བསྐྱོད་པ་དང་། །ཞེས་པའི་དོན་ནི། ལངས་དང་ཞེས་པ་ལྐོག་རྩེར་ལངས་འཕྲོ་ལ་ཐང་ལ་སྡོད་པ་དང་། སྡོད་འཕྲོ་ལ་ལངས་པའོ། །ཡན་ལག་ཅེས་པ་རྐང་ལག་བཞི། བསྐྱོད་དང་ཞེས་ཕར་ཚུར་དང་བརྐྱང་བསྐུམ་དང་། བསྐོར་བ་དང་ནི་ཕྱག་བྱ་དང་། །ཞེས་པའི་དོན་ནི། བསྐོར་བ་ཞེས་པ་བླ་མའི་སྐུ་རྟེན་དང་ཆོས་ཁུག་དང་། མཆོད་རྟེན་དང་རི་དང་བྲག་དང་རྡོ་དང་ས་དང་ཆུ་དང་ཕྱུགས་དང་མི་ཕལ་པ་ལའོ། །དང་ནི་ཞེས་པ་དེ་རྣམས་ལ་ཡང་། ཕྱག་བྱ་དང་ཞེས་པ་ཤར་ལྷོ་ནུབ་བྱང་སྟེང་འོག་ལྷ་མི་ཕྱུགས་ས་རྡོ་ལ་སོགས་པ་ལ། རེས་རང་གི་བླ་མ་ལ་ཡང་ཕྱག་མི་བྱའོ། །ཡན་ལག་བསྐོར་དང་མགོ་སྒྲིལ་དང་། །ཞེས་པའི་དོན་ནི། ཡན་ལག་ཅེས་པ་རང་གི། བསྐོར་དང་ཞེས་པ་ནང་དང་ཕྱིན་ག་ལོག་དང་། གཡས་གཡོན་གཉིས་རེས་མོས་ཀྱིས། མགོ་སྒྲིལ་དང་ཞེས་ཕར་ཧྲིལ་ཚུར་ཧྲིལ་ཡར་ཀྱོག་མར་ཀྱོག་བྱའོ། །ཇི་ལྟར་དྲན་པའི་ལས་རྣམས་དང་། །ཞེས་པའི་དོན་ནི། ཇི་ལྟར་ཞེས་པ་རང་གིས། དྲན་པའི་ཞེས་པ་སྙིང་ལ། ལས་རྣམས་དང་ཞེས་པ་ལྷག་མ་མེད་པར། གར་དང་ཕྱག་རྒྱ་བསྒྱུར་བ་དང་། །ཞེས་པའི་དོན་ནི། གར་དང་ཞེས་པ་ཞི་ཁྲོ་དང་། དཔའ་བོ་དང་དཔའ་མོའི། ཕྱག་རྒྱ་ཞེས་པ་ཞི་ཁྲོ་དང་ཡོད་པ་མེད་པ་ཚོགས་དང་གཏོར་མ་དང་འཁྲིག་པ་དང་། ཤོག་ཅིག་པ་དང་མ་ཡོང་ཞིག་བྱ་བའི། བསྒྱུར་བ་དང་ཞེས་པ་ཕྱག་འཚལ་འཕྲོ་ལ་བང་རྒྱུག་པ་དང་རྒྱུག་འཕྲོ་ལ་མགོ་སྒྲིལ་བ་ལ་སོགས་པའོ། །ཇི་ལྟར་དམིགས་པའི་ལས་རྣམས་བྱ། །ཞེས་པའི་དོན་ནི། ཇི་ལྟར་ཞེས་པ་རང་གི། དམིགས་པའི་ཞེས་པ་ཡིད་ལ། ལས་རྣམས་བྱ་ཞེས་པ་དྲན་ཚད། འདི་ལྟར་སུ་ཡིས་བྱས་པའི་མི། །ཞེས་པའི་དོན་ནི། འདི་ལྟར་ཞེས་པ་ལུས་ཀྱི་སྤྱོད་པ། སུ་ཡིས་ཞེས་པ་སྐལ་ལྡན། བྱས་པའི་ཞེས་པ་ཉམས་ལེན། ལུས་ཀྱི་མངོན་ཞེན་རང་བཅད་ནས། །ཞེས་པའི་དོན་ནི། ལུས་ཀྱི་ཞེས་པ་རང་གི། མངོན་ཞེན་ཞེས་པ་ཚེ་འཁོར་བ་ཐོག་མ་མེད་པ་ནས། རང་བཅད་ནས་ཞེས་པ་དེ་ལྟར་བྱས་པས། ལུས་ཀུན་རུ་ཤན་ཕྱེད་པར་ནི། །ཞེས་པའི་དོན་ནི། ལུས་ཀུན་ཞེས་པ་བཟང་ངན་དང་མཛེས་སྡུག་དང་མི་ཕྱུགས་ཀྱི་ཆགས་སྡང་ཐམས་ཅད་ཏིག་མེད་དུ་ཁྲེས་ཀྱི་འགྱུར་རོ། །རུ་ཤན་ཞེས་པ་འཁོར་འདས་ཀྱི། ཕྱེད་པར་ནི་ཞེས་པ་འདི་ཉིད་དུ། འདི་ཡིས་འགྱུར་རོ་སྤྲུལ་པའི་སྐུ། །ཞེས་པའི་དོན་ནི། འདི་ཡིས་ཞེས་པ་རྒྱུད། འགྱུར་རོ་ཞེས་པ་ཆོས་ཉིད་ཀྱི་རང་སྒྲ་བཞིན་ཉམས་སུ་བླངས་ན། སྤྲུལ་པའི་སྐུ་ཞེས་པ་རྡོ་རྗེ་འཆང་ནས་བརྒྱུད་པ་ཟམ་མ་ཆད་པ་ལ་ཆོས་ཉིད་ཀྱི་རང་སྒྲ་བྱུང་བའོ། །དེས་ནི་ལུས་བྱ་རྩོལ་མེད་པར་རྟོགས་ཏེ། སངས་རྒྱས་ཐམས་ཅད་ཀྱི་སྐུ་གསལ་སྟོང་དབྱེར་མེད་གཉིས་སུ་མེད་པར་འགྱུར་བའི་དགོས་པ་ཡོད་དོ། །དེ་འདས་ངག་གི་སྤྱོད་པ་བརྩམ། །ཞེས་པའི་དོན་ནི། དེ་འདས་ཞེས་པ་ལུས་ཀྱི་དྲི་མ་དག་པའི་རྟགས། ནམ་མཁའ་ལ་སྤྲིན་དང་ཁུ་རླངས་ཁ་ཆར་དང་། རླུང་དང་ཡུལ་ཉེས་དང་། དགྲ་དང་ཆོམ་རྐུན་མེད་པར། ནམ་མཁའ་དྭངས་པ་རླུང་དང་སེར་བུ་མེད་པར་འཇའ་དང་འོད་དུ་འཁྲུགས་པ་བྱུང་ན་ལུས་ཀྱི་སྡིག་པ་དག་པའོ། །གོང་མ་རྣམས་ལོག་ནས་བྱུང་ན་བསྐྱར་ལ་བྱའོ། །ལུས་ངག་ཡིད་གསུམ་འདྲའོ། །ངག་གི་ཞེས་པ་རང་གི། སྤྱོད་པ་བརྩམ་ཞེས་པ་ཞག་གསུམ་དུ། སྔགས་དང་ཁ་ཏོན་ཆོས་ཀྱི་སྒྲ། །ཞེས་པའི་དོན་ནི། སྔགས་དང་ཞེས་པ་ལྷ་ཐམས་ཅད་དང་། འདྲེ་ཐམས་ཅད་མེད། ཁ་ཏོན་ཞེས་པ་བསྟོད་པ་དང་སྨོན་ལམ་དང་། གསོལ་ཚིག་དང་། ལྷ་འདྲེའི་བསྟོད་ཚིག་གོ། །ཆོས་ཀྱི་སྒྲ་ཞེས་པ་འཆད་པ་སློབ་པའི་ལད་མོ་བྱའོ། །ཡོད་དང་མེད་དང་སྣང་བ་དང་། །ཞེས་པའི་དོན་ནི། ཡོད་དང་ཞེས་པ་ཆོས་ཡོད་ནོར་ཡོད་གྲོགས་ཡོད་ཟས་ཡོད་ཅེས་པ་སྨྲའོ། །དེའི་མཇུག་ལ་ནད་ཡོད་གདོན་ཡོད་མི་དགེ་བ་ཡོད་ཅེས་སྨྲའོ། །མེད་དང་ཞེས་པ་ཆོས་མེད་ནོར་མེད་གྲོགས་མེད་ཟས་མེད་གོས་མེད་ལས་མེད་སེམས་མེད་མི་དགེ་བ་མེད་དོ་ཞེས་སྨྲའོ། །སྣང་བ་དང་ཞེས་པ་སངས་རྒྱས་སྣང་ངོ་། །འཁོར་བ་སྣང་ངོ་། །ས་ཆུ་མེ་རླུང་ནམ་མཁའ་སྣང་ངོ་། །ལ་སོགས་པ་བྱའོ། །མི་སྣང་ངོ་ཞེས་པ་སངས་རྒྱས་དང་འཁོར་བ་མི་སྣང་བ་བྱའོ། །ཡིད་དཔྱོད་ཚིག་ནི་སྣ་ཚོགས་བརྗོད། །ཅེས་པའི་དོན་ནི། ཡིད་དཔྱོད་ཅེས་པ་དྲན་ཚད། ཚིག་ནི་ཞེས་པ་ཅི་བྱུང་བྱུང་། སྣ་ཚོགས་ཁ་རུ་ཐོན་ཚད་གདོན་ནོ། །གཏད་མེད་དུ་གྲོལ་ལོ། །བྱོལ་སོང་སྣ་ཚོགས་བརྡ་སྐད་དང་། །ཞེས་པའི་དོན་ནི། བྱོལ་སོང་ཞེས་པ་ཡང་དག་པའི་དོན་ལ་བྱོལ་ནས་ངན་པ་སྡུག་བསྔལ་གྱི་ལས་ལ་སོང་བའོ། །སྣ་ཚོགས་ཞེས་པ་རྟ་དང་གླང་པོ་ལ་སོགས་པའི་དུད་འགྲོ་ཐམས་ཅད་དང་། དོམ་དྲེད་སྤྲེའུ་ཅེ་སྤྱང་ཁྱི་ལ་སོགས་པ་དང་། ཀང་ཀ་རྨ་བྱ་རྒོད་ལ་སོགས་པའི་བྱ་ཐམས་ཅད་ཀྱི། བརྡ་སྐད་དང་ཞེས་པ་དེ་རྣམས་ཀྱི་ཟས་ཟ་བ་དང་། འཁྲིག་པ་སྤྱོད་པ་དང་ཕྲུག་གུ་ཡོད་པའི། སྐད་ནི་རྣམ་པ་སྣ་ཚོགས་པ། །ཞེས་པའི་དོན་ནི། སྐད་ནི་ཞེས་པ་གོང་མ་རྣམས་ཀྱི། རྣམ་པ་ཞེས་པ་སོ་སོ་རང་རང་གི་འདྲ་བའི། སྣ་ཚོགས་པ་ཞེས་པ་དེ་དག་ཐམས་ཅད་ཀྱི་སྐད་གདོན་ནོ། །འདི་ལྟར་སུ་ཡིས་བྱས་པའི་མི། །ཞེས་པའི་དོན་ནི། འདི་ལྟར་ཞེས་པ་སྐད་སྣ་ཚོགས་དང་ཡོད་མེད་དང་ཆོས་འཆད་པ་དང་། སྔགས་བརྗོད་པ་ལ་སོགས་པ། སུ་ཡིས་ཞེས་པ་སྐལ་པ་ཅན། བྱས་པའི་མི་ཞེས་པ་ཉམས་སུ་བླངས་པའི། ངག་གི་མངོན་ཞེན་རང་ཆོད་ནས། །ཞེས་པའི་དོན་ནི། ངག་གི་ཞེས་པ་རང་གི། མངོན་ཞེན་ཞེས་པ་ཚེ་འཁོར་བ་ཐོག་མ་མེད་པ་ནས། རང་ཆོད་ནས་ཞེས་པ་སྤྱོད་པ་བྱས། འཁོར་འདས་རུ་ཤན་འདིས་ཕྱེད་དོ། །ཞེས་པའི་དོན་ནི། འཁོར་འདས་ཞེས་པ་གཏན་གྱི་བདེ་སྡུག་གཉིས་སོ། །རུ་ཤན་ཞེས་པ་འཛིན་པ་ཡོད་མེད་དོ། །འདིས་ཕྱེད་དོ་ཞེས་པ་ཆོས་ཉིད་ཀྱི་རང་སྒྲ་བཞིན་ཉམས་སུ་བླངས་ན། ངག་བྱ་རྩོལ་མེད་པར་རྟོགས་ཏེ། སངས་རྒྱས་ཐམས་ཅད་ཀྱི་གསུང་བརྗོད་དུ་མེད་པ་དང་། གཉིས་སུ་མེད་པར་འགྱུར་བའི་དགོས་པ་ཡོད། དེ་ལྟར་རང་ཉིད་ཉམས་སུ་བླངས་པར་འགྱུར་ལ་གཞན་དག་བདེན་ཞེན་གྱི་ཀོ་ལོང་དང་རང་བྲལ་བར་འགྱུར་རོ། །དེ་འདས་ཉིད་ཀྱི་འོག་ཏུ་ཡང་། །ཞེས་པའི་དོན་ནི། དེ་འདས་ཞེས་པ་ངག་ནི་རུ་ཤན་ཕྱེད་པའི་རྟགས་ཐོན་ནས། ཉིད་ཀྱི་ཞེས་པ་བར་དུ་ལུས་ངག་ཡིད་གསུམ་རྣལ་དུ་དབབ་བོ། །དེ་ཡང་ལུས་ཀྱི་ཞག་གསུམ་ཐལ་ནས་ཞག་གཅིག་ལུས་རྣལ་དུ་དབབ་སྟེ། མལ་སྟན་བདེ་བ་ལ་ཉལ་ལ་བསྡད་དོ། །ངག་གི་ཞག་གསུམ་སོང་བ་དང་ཞག་གཅིག་གིས་ངག་རྣལ་དུ་དབབ་སྟེ་སུ་ལའང་མི་སྨྲ་བར་བརྡ་ཙམ་ཡང་མི་བྱ་བར་ལུས་དང་བསྟུན་ནོ། །དེ་བཞིན་སེམས་རུ་ཤན་འབྱེད་པ་ཞག་གསུམ་ཚར་ནས། ཡང་ཞག་གཅིག་སེམས་རྣལ་དུ་འབེབས་ཙམ་ན་ལུས་ངག་ཡིད་གསུམ་ཕྲུགས་ལ། དྲན་བསམ་འཕྲོ་བཅད་ལ་བཞག་གོ། །འོག་ཏུ་ཡང་ཞེས་པ་ཞག་བརྒྱད་སོང་བའི། སེམས་ཀྱི་སྤྱོད་པ་བརྩམ་པར་བྱ། །ཞེས་པའི་དོན་ནི། སེམས་ཀྱི་ཞེས་པ་རང་གི། སྤྱོད་པ་ཞེས་པ་ཞེན་པ་འབྲེལ་བའི། བརྩམ་པར་བྱ་ཞེས་པ་ཞག་གསུམ་དུ། དགའ་དང་མི་དགའ་བདེ་སྡུག་དང་། །ཞེས་པའི་དོན་ནི། དགའ་དང་ཞེས་པ་ཡོད་པ་ལ་བསམ་པ་དང་། མི་དགའ་ཞེས་པ་མེད་པ་དང་ཤི་ན་སྙམ་པའོ། །བདེ་སྡུག་དང་ཞེས་པ་ལུས་ངག་ཡིད་གསུམ་བདེ་བར་བསྒོམ་སྡུག་པར་བསྒོམ་པའོ། །རྟག་དང་མི་རྟག་ལ་སོགས་པ། །ཞེས་པའི་དོན་ནི། རྟག་དང་ཞེས་པ་ཐམས་ཅད་རྟག་པར་བསྒོམ་པ་དང་། མི་རྟག་ཅེས་པ་ཐམས་ཅད་མི་རྟག་པར་བསྒོམ་པ་དང་། ལ་སོགས་པ་ཞེས་པ་བསམ་སྤྱོད་ཀྱི་སྒོམ་དྲན་པར་བྱའོ། །ལྟ་སྒོམ་སྤྱོད་པའི་བསམ་པ་དང་། །ཞེས་པའི་དོན་ནི། ལྟ་སྒོམ་ཞེས་པ་མཐའ་དང་བྲལ་བ་དང་། གསལ་འགྲིབ་མེད་པར་ཁྱེར་བསྒོམ་བྱའོ། །རེས་འདུས་པ་དང་རྨུགས་པར་ཁྱེར་བསྒོམ་བྱའོ། །སྤྱོད་པའི་ཞེས་པ་ཤུགས་འབྱུང་དང་འདུས་པར་བསྒོམ་མོ། །བསམ་པ་དང་ཞེས་པ་ཡར་ལོག་མར་ལོག་ཏུ་བསྒོམ་མོ། །ཆོས་དང་ཆོས་མིན་ལ་སོགས་དང་། །ཞེས་པའི་དོན་ནི། ཆོས་དང་ཞེས་པ་དགེ་བའི་ཕྱོགས་བསམ་པ་དང་། ཆོས་མིན་ཞེས་པ་མི་དགེ་བ་བསམ་པ་དང་། ལ་སོགས་དང་ཞེས་པ་ཐམས་ཅད་བསམ་པའོ། །འདོད་ཆགས་ཞེ་སྡང་གཏི་མུག་དང་། །ཞེས་པའི་དོན་ནི། འདོད་ཆགས་ཞེས་པ་ལུས་ཀྱི་ཡུལ་དུ་རེག་བྱ་འཇམ་པ་དང་། མིག་གི་ཡུལ་དུ་གཟུགས་སྡུག་པ། རྣ་བའི་ཡུལ་དུ་སྒྲ་སྙན་པ་དང་། སྣའི་ཡུལ་དུ་དྲི་ཞིམ་པ། ལྕེའི་ཡུལ་དུ་རོ་མངར་བ། དེ་དག་ཐམས་ཅད་དྲིལ་ནས་ཕོ་མོའི་འཁྲིག་པའི་བདེ་བའོ། །དེ་དག་ལ་སོགས་པ་བསམ་མོ། །ཞེ་སྡང་ཞེས་པ་འཐབ་པ་དང་རྩོད་པ་འཕྲོག་པའི་བསམ་པ་བྱའོ། །གཏི་མུག་ཅེས་པ་མི་ཤེས་པ་མི་གསལ་བ་འཐིབས་པ་ཉོག་པ་བྱིང་བའི་བསམ་པ་བྱའོ། །དགེ་དང་མི་དགེ་ལ་སོགས་པ། །ཞེས་པའི་དོན་ནི། དགེ་དང་ཞེས་པ་བསོད་ནམས་ཀྱི་ཚོགས་གསོག་པ་དང་ཆོས་བྱ་བའི་བསམ་པ་བྱའོ། །མི་དགེ་ཞེས་པ་སྡིག་དང་རྐུ་བ་དང་འཕྲོག་པའི། ལ་སོགས་པའི་ཞེས་པ་བསམ་ངན་ལ་སོགས་པ་བསྒོམ་པར་བྱའོ། །བསམ་སྤྱོད་རྣམ་པ་སྣ་ཚོགས་བྱ། །ཞེས་པའི་དོན་ནི། བསམ་སྤྱོད་ཅེས་པ་དྲན་ཚད་ལ། རྣམ་པ་ཞེས་པ་མི་འདྲ་བ། སྣ་ཚོགས་བྱ་ཞེས་པ་སྤྲོ་ཞིང་བསྒོམ་པར་བྱའོ། །དེ་ཡང་དགེ་འཕྲོ་ལ་མི་དགེ་བ་ཡགས་འཕྲོ་ལ་མི་ཡགས་པ་བསྒོམ་པར་བྱའོ། །འདི་ལྟར་སུ་ཡིས་བྱས་པའི་མི། །ཞེས་པའི་དོན་ནི། འདི་ལྟར་ཞེས་པ་སེམས་ཀྱི་སྤྱོད་པ། སུ་ཡིས་ཞེས་པ་སྐལ་པ་ཅན། བྱས་པའི་མི་ཞེས་པ་ཉམས་སུ་བླངས་པའི། སེམས་ཀྱི་མངོན་ཞེན་རང་ཆོད་ནས། །ཞེས་པའི་དོན་ནི། སེམས་ཀྱི་ཞེས་པ་རང་གི། མངོན་ཞེན་ཞེས་པ་ཚེ་འཁོར་བ་ཐོག་མ་མེད་པ་ནས། རང་ཆོད་ནས་ཞེས་པ་ཉམས་སུ་བླངས་པ་ཙམ་གྱིས། འཁོར་འདས་རུ་ཤན་ཕྱེད་པའོ། །ཞེས་པའི་དོན་ནི། འཁོར་འདས་ཞེས་པ་ཁམས་གསུམ་གྱི་སེམས་ཅན་དང་སྐུ་དང་ཞིང་ཁམས་སོ། །རུ་ཤན་ཞེས་པ་དག་མ་དག་གཉིས་སོ། །ཕྱེད་པའོ་ཞེས་པ་འཛིན་པ་བྲལ་བའོ། །དེ་ནས་ཞག་གཅིག་སེམས་རྣལ་དུ་ཕབ་ལ་ཞག་བཅུ་གཉིས་སུ་རུ་ཤན་འབྱེད་པའི་སྤྱོད་པ་བརྩམ་མོ། །དེ་ལྟར་ལོ་རེ་ལན་རེ་ཅི་ལ་ཐུག་ཀྱང་བྱའོ། །དེས་ནི་སེམས་བྱ་རྩོལ་མེད་པར་རྟོགས་ཏེ། སངས་རྒྱས་ཐམས་ཅད་ཀྱི་ཐུགས་བསམ་དུ་མེད་པ་དང་། གཉིས་སུ་མེད་པར་འགྱུར་བའི་དགོས་པ་ཡོད་དོ། །དེ་ལྟར་སྔོན་དུ་འགྲོ་བྱས་ནས། །ཞེས་པའི་དོན་ནི། དེ་ལྟར་ཞེས་པ་ལུས་ངག་ཡིད་གསུམ་རུ་ཤན་ཕྱེ་བས། སྔོན་དུ་ཞེས་པ་ཆོས་ཉིད་མངོན་སུམ་དུ་ངོ་སྤྲོད་པའོ། །འགྲོ་བྱས་ནས་ཞེས་པ་ལུས་ངག་ཡིད་གསུམ་གྱི་ཞེན་པ་ལོག་པར་དེ་མ་བྱས་ན་ཞེན་པ་མ་ལོག་པས་བསྒོམ་དུ་མི་འདོད་དོ། །དེས་ན་སྤྱོད་པ་རྩོམ་པ་གནད་རབ་ཏུ་ཆེའོ། །མངོན་སུམ་དོན་ལ་ལྟ་བའི་ཕྱིར། །ཞེས་པའི་དོན་ནི། མངོན་སུམ་ཞེས་པ་དབང་པོའི་སྤྱོད་ཡུལ་དུ་མངོན་ལ་གང་མངོན་ན་ཆོས་སྐུ་ལོངས་སྐུ་སྤྲུལ་སྐུ་གསུམ། དོན་ལ་ཞེས་པ་མ་ནོར་བའི། ལྟ་བའི་ཕྱིར་ཞེས་པ་ནང་གི་ནམ་མཁའ་རིག་པའི་ཡེ་ཤེས་ཙིཏྟ་ནས། བར་གྱི་ནམ་མཁའ་རྩ་སྦུག་ལ་བཙུད་དེ། ཕྱིའི་ནམ་མཁའ་རླུང་དང་སེར་བུ་མེད་པ་ལ། རྒྱང་ཞགས་ཆུའི་སྒྲོན་མས། ལུས་དང་ངག་ཡིད་རབ་ཏུ་གཅུན། །ཞེས་པའི་དོན་ནི། ལུས་དང་ཞེས་པ་འདུག་སྟངས་གསུམ། ངག་ཡིད་ཅེས་པ་བསླབ་པར་བྱ་བ་དང་། གནས་པར་བྱ་བ་དང་། གཏད་པའི་འབེན་དང་མ་བྲལ་བར། རབ་ཏུ་གཅུན་ཞེས་པ་བྱ་བ་དགུ་ཕྲུགས་སུ་བཏང་ལ། ལུས་ནི་སེང་གེ་ལྟ་བུ་དང་། །ཞེས་པའི་དོན་ནི། ལུས་ནི་ཞེས་པ་རང་གི། སེང་གེ་ཞེས་པ་ཆོས་སྐུའི་བཞུགས་སྟངས་ཏེ། ལྟ་བུ་དང་ཞེས་པ་ཙོག་ཚུགས་སུ་འདུག་སྟེ་ལག་པ་གཉིས་རྐང་པའི་ནང་ན་མར་བཙུགས་ལ། མཇིང་པ་ཨེན་ཙམ་དགྱེ་བར་བྱའོ། །དྲང་སྲོང་དང་ནི་གླང་ཆེན་ཚུལ། །ཞེས་པའི་དོན་ནི། དྲང་སོང་ཞེས་པ་ནི་སྤྲུལ་སྐུའི་བཞུགས་སྟངས་ཏེ། དང་ནི་ཞེས་པ་ནི་སྤྲུལ་སྐུའི་བཞུགས་སྟངས་ཙོག་པུ་བྱས་ལ་ལག་པ་གཉིས་པུས་མོ་ལ་བསྣོལ་ལ་འཁྱུད་དོ། །གླང་ཆེན་ཚུལ་ཞེས་པ་ལོངས་སྐུའི་བཞུགས་སྟངས་ཏེ། གློས་ཕབས་ལ་ཉལ་ཏེ་ལག་པ་གཉིས་ཀྱི་གྲུ་མོ་ས་ལ་བཙུགས་ལ་ལག་པའི་མཐིལ་གྱིས་ཨོག་ཀོ་བརྟེན། རྐང་པ་གཉིས་པུས་བྲང་སྦྱར་ལ་ཕྱིར་ཕུལ་བ་བཞིན་བྱའོ། །འདི་ལས་གཡོ་བར་མ་བྱས་ན། །ཞེས་པའི་དོན་ནི། འདི་ལས་ཞེས་པ་བཞུགས་སྟངས་གསུམ་མོ། །གཡོ་བར་ཞེས་པ་དུས་རྒྱུན་དུ། མ་བྱས་ན་ཞེས་པ་གཞན། སངས་རྒྱས་སུམ་སྟོང་ཉིད་དང་ཡང་། །ཞེས་པའི་དོན་ནི། སངས་རྒྱས་ཞེས་པ་སྐུ་གསུམ་གྱི་འཛིན་པ་སངས་ནས་ཕྱོགས་བྲལ་ཀ་དག་ཏུ་རྒྱས་པའོ། །སུམ་སྟོང་ཞེས་པ་གྲངས་སོ། །ཉིད་དང་ཡང་ཞེས་པ་རང་ལ་ཡེ་ནས་གནས་པ། སྐལ་བ་དག་ནི་མཉམ་པ་ཡིན། །ཞེས་པའི་དོན་ནི། སྐལ་བ་ཞེས་པ་དུས་གསུམ་གྱི་སངས་རྒྱས་དང་། དག་ནི་ཞེས་པ་རང་དང་། མཉམ་པ་ཡིན་ཞེས་པ་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད། ངག་ནི་ཇི་ལྟར་ལྐུགས་པ་བཞིན། །ཞེས་པའི་དོན་ནི། ངག་ནི་ཞེས་པ་རང་གི། ཇི་ལྟར་ཞེས་པ་དཔེ། ལྐུགས་པ་བཞིན་ཞེས་པ་གཞན་ལ་མི་སྨྲ་བར། སུ་དང་བརྡ་ཙམ་ཉིད་མི་བྱ། །ཞེས་པའི་དོན་ནི། སུ་དང་ཞེས་པ་འགྲོ་བ་ཆེ་ཆུང་མེད་པར། བརྡ་ཙམ་ཞེས་པ་ཡི་གེ་དང་ལག་གི། ཉིད་མི་བྱ་ཞེས་པ་རྦད་ཀྱིས་བཅད་དོ། །ཆགས་སྡང་གི་དམག་སྲུང་བའི་ལྕགས་རི་ཡིན་པས་གལ་ཆེའོ། །མ་ཚུགས་ན་ངག་རུ་ཤན་འབྱེད་པའི་སྤྱོད་པ་བརྩམ་པར་བྱའོ། །དེས་ངག་གི་ཆགས་སྡང་རང་གྲོལ་ལ། རང་གཞན་གཉིས་ཀ་འགྲོའོ། །འདི་ལྟར་སུ་ཡིས་བྱས་པའི་མི། །ཞེས་པའི་དོན་ནི། འདི་ལྟར་ཞེས་པ་སྨྲ་བ་བཅད་པ། སུ་ཡིས་ཞེས་པ་སྐལ་པ་ཅན། བྱས་པའི་མི་ཞེས་པ་ཉམས་ལེན། སེམས་ཀྱི་འཕྲོ་འདུ་རང་ཆད་དོ། །ཞེས་པའི་དོན་ནི། སེམས་ཀྱི་ཞེས་པ་རང་གི། འཕྲོ་འདུ་ཞེས་པ་ཆགས་སྡང་གི། རང་ཆོད་དོ་ཞེས་པ་ངག་བཅད་པས། འདི་ལྟར་ལུས་ངག་སུས་གཅུན་པ། །ཞེས་པའི་དོན་ནི། འདི་ལྟར་ཞེས་པ་གོང་དུ་བསྟན་པའི་གནད། ལུས་ངག་ཅེས་པ་རང་གི། སུས་གཅུན་པ་ཞེས་པ་དབེན་པའི་གནས་སུ། ཆོས་ཀྱི་དབྱིངས་ཀྱི་སྣང་བ་ལ། །ཞེས་པའི་དོན་ནི། ཆོས་ཀྱི་ཞེས་པ་ངོ་བོ་བརྗོད་ལས་འདས་པའི། དབྱིངས་ཀྱི་ཞེས་པ་རང་བཞིན་རྣམ་པར་དག་པའོ། །སྣང་བ་ལ་ཞེས་པ་ཐུགས་རྗེ་ཀུན་ཁྱབ་ཀྱི། འདི་ཡིས་གོམས་པར་འགྱུར་བ་ཡིན། །ཞེས་པའི་དོན་ནི། འདི་ཡིས་ཞེས་པ་ཉམས་སུ་ལེན་ཚུལ། གོམས་པར་ཞེས་པ་སངས་རྒྱས་ཀྱི་དགོངས་པ་ལ། འགྱུར་བ་ཡིན་ཞེས་པ་འདི་ཉིད་དུ། དེ་ལྟར་ལུས་ལ་སོགས་པ་ཡི། །ཞེས་པའི་དོན་ནི། དེ་ལྟར་ཞེས་པ་ཉམས་ལེན། ལུས་ལ་ཞེས་པ་ཝ་མོའི་ཟུར་འགྲོས། སྐྱེས་བུའི་རྒྱངས་སྟབས། བྱ་རྒོད་ཀྱི་དཔུངས་སྟབས། གྱད་ཀྱི་དོར་སྟབས་སོ། །སོགས་པ་ཡི་ཞེས་པ་བཞུགས་སྟངས་དང་གཟིགས་སྟངས་གང་འཐད་པ་བྱའོ། །གནད་ཀུན་རབ་ཏུ་གཟིར་བ་ཡིས། །ཞེས་པའི་དོན་ནི། གནད་ཀུན་ཞེས་པ་ཉམས་སུ་ལེན་པའི། རབ་ཏུ་ཞེས་པ་ལུས་དང་ངག་དང་ཡིད་དང་རླུང་དང་སྒོ་དང་ཡུལ། གཟིར་བ་ཡིས་ཞེས་པ་རབ་ཏུ་དབེན་ཞིང་བཙན་པ། དོམ་དྲེད་དང་ནི་མི་རྒོད་ཀྱི་འགྱུ་བ་མེད་པ། ཁ་ཤར་ལྷོའམ་ལྷོ་ནུབ་བམ་ལྷོར་ལྟ་བ། ཧ་ཅང་དམའ་ཞིང་འཐིབས་པ་མ་ཡིན་པ། ཧ་ཅང་མཐོ་ཞིང་གྲང་བ་མ་ཡིན་པ། རླུང་སེར་བུའི་བཤོར་མེད་ཅིང་ནམ་མཁའ་རྒྱ་ཆེ་བའི་གནས་སུ། རིག་པ་ཉིད་དང་མངོན་སུམ་དུ། །ཞེས་པའི་དོན་ནི། རིག་པ་ཞེས་པ་གཞི་འཛིན་པ་དང་། མཚན་ཉིད་འཛིན་པ་དང་། ཉིད་དང་ཞེས་པ་འབྱེད་བྱེད་ཀྱི་ཤེས་རབ་དང་བཅས་པའོ། །མངོན་སུམ་དུ་ཞེས་པ་དབང་པོའི་སྤྱོད་ཡུལ་དུ་མངོན་པས་གསུམ། བླ་མའི་ལུང་ལས་ཤེས་པ་ཡིན། །ཞེས་པའི་དོན་ནི། བླ་མའི་ཞེས་པ་ཆོས་ཉིད་ཀྱི། ལུང་ལས་ཞེས་པ་ངོ་སྤྲོད་པའི་དུས་སུ་སློབ་མ་བཞུགས་སྟངས་དང་གཟིགས་སྟངས་བྱེད་དུ་བཅུག་ལ་ནམ་མཁའ་ལ་ཅི་མཐོང་ཤོད་ཅིག་བྱས་པས། ཤེས་པ་ཡིན་ཞེས་པ་སྣང་བ་གཞན་དང་མི་འདྲ་སྟེ། ལྟ་སྙིང་འདོད་ལ་འཁྲབ་སྙིང་འདོད། བཤད་སྙིང་འདོད་ལ་གསང་སྙིང་འདོད། དཔེར་ན་གཡུའམ་གསེར་སྦྲམ་རྙེད་པའམ། མཛེས་མཐུན་ནང་འཕྲད་པ་ལྟ་བུ་འབྱུང་ངོ་། །དབྱིངས་དང་རིག་པའི་ལྟ་སྟངས་ནི། །ཞེས་པའི་དོན་ནི། དབྱིངས་དང་ཞེས་པ་ནང་དབྱིངས་ཙིཏྟ། བར་དབྱིངས་རྩ་ཤེལ་གྱི་སྦུ་གུ། ཕྱིའི་དབྱིངས་ནམ་མཁའ་སྟོང་པའོ། །རིག་པ་ཞེས་པ་ལུ་གུ་རྒྱུད་ཀྱི་གནད། ལྟ་སྟངས་ནི་ཞེས་པ་ཆོས་སྐུའི་ལྟ་སྟངས་ལྡོག་པའི་ཚུལ་དུ་ལྟ་བ། ལོངས་སྐུའི་ལྟ་སྟངས་ཟུར་གྱིས། སྤྲུལ་སྐུའི་ལྟ་སྟངས་ཕབ་པའི་ཚུལ་གྱིས། སྒྲིབ་བྱེད་བྲལ་བའི་ནམ་མཁའ་ལྟར། །ཞེས་པའི་དོན་ནི། སྒྲིབ་བྱེད་ཅེས་པ་རི་དང་སྤྲིན་དང་ཁུ་རླངས་ཁ་ཆར་གྱིས། བྲལ་བའི་ཞེས་པ་དེ་རྣམས་མེད་ཅིང་རྒྱ་ཆེ་ལ་དྭངས་པའི། ནམ་མཁའ་ལྟར་ཞེས་པ་དུས་རྒྱུན་དུ། ལུས་ཀྱི་གནད་འདུག་སྟངས་གསུམ། ངག་གི་གནད་སྨྲ་བ་བཅད་པ། རླུང་གི་གནད་དལ་པ་བརྟན་པ། སྒོའི་གནད་ཕབ་དང་ལྡོག་དང་ཟུར་གྱིས་ལྟ་བ། སེམས་ཀྱི་གནད་གཏད་སའི་འབེན་དང་མ་བྲལ་བར། དབྱིངས་ཀྱི་ནང་དུ་ལུ་གུ་རྒྱུད། །ཅེས་པའི་དོན་ནི། དབྱིངས་ཀྱི་ཞེས་པ་ནམ་མཁའི། ནང་དུ་ཞེས་པ་མཐོངས་ལ། ལུ་གུ་རྒྱུད་ཅེས་པ་དཔེར་ན་རིན་པོ་ཆེ་ལ་མཁས་པས་བྱས་པའི་ལུ་གུ་རྒྱུད་འདྲ་བའམ། ཤེལ་དཀར་གྱི་མེ་ལོང་འདྲ་བའམ། ཉ་མིག་གི་རྣམ་པ་ལ། ཆུ་ཐིགས་ཀྱི་རྣམ་པའམ། རྟ་རྔའི་མདུད་པ་ལྟ་བུ་འཇའ་ཚོན་གྱི་རྣམ་པར་འཆར་རོ། །རྣམ་པར་བཞག་ཅིང་འབྲལ་མི་བྱ། །ཞེས་པའི་དོན་ནི། རྣམ་པར་ཞེས་པ་ཤེས་པ། བཞག་ཅིང་ཞེས་པ་ནམ་མཁའ། འབྲལ་མི་བྱ་ཞེས་པ་ཐིག་ལེ་སྟོང་པའི་སྒྲོན་མ་དང་རྒྱང་ཞགས་ཆུའི་སྒྲོན་མ་གཉིས། འདི་ལྟར་སུ་ཡིས་མཐོང་བའི་མི། །ཞེས་པའི་དོན་ནི། འདི་ལྟར་ཞེས་པ་ཐིག་ལེ་སྟོང་པའི་སྒྲོན་མ། སུ་ཡིས་ཞེས་པ་སྐལ་པ་ཅན། མཐོང་བའི་མི་ཞེས་པ་ནམ་མཁའ་ལ། ཐོག་མའི་ཀུན་ཏུ་བཟང་པོ་དང་། །ཞེས་པའི་དོན་ནི། ཐོག་མའི་ཞེས་པ་དུས་གསུམ་གྱི་སངས་རྒྱས་ཐམས་ཅད་ཀྱི། ཀུན་ཏུ་ཞེས་པ་དུས་གསུམ། བཟང་པོ་དང་ཞེས་པ་འཁྲུལ་མ་མྱོང་བའི་སངས་རྒྱས། སྐལ་པ་ཉིད་ནི་མཉམ་པ་ཡིན། །ཞེས་པའི་དོན་ནི། སྐལ་པ་ཞེས་པ་ཐོག་མ་མེད་པ་ནས་བསོད་ནམས་བསགས་སྟོབས། ཉིད་ནི་ཞེས་པ་ཡང་དག་པའི་དགོངས་པ། མཉམ་པ་ཡིན་ཞེས་པ་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་དོ། །དེ་ནས་ཐིག་ལེ་མཐོང་བ་ཡིིན། །ཞེས་པའི་དོན་ནི། དེ་ནས་ཞེས་པ་བསྒོམས་པས། ཐིག་ལེ་ཞེས་པ་མི་འགྱུར་ཞིང་ཀུན་ལ་ཁྱབ་པའི། མཐོང་བ་ཡིན་ཞེས་པ་དང་པོ་ཐིག་ལེ་སྟོང་པའི་སྒྲོན་མ་རྟ་རྔ་ལྟ་བུ། དེ་གཏད་སྣང་བ་གོང་འཕེལ་བས། །ཞེས་པའི་དོན་ནི། དེ་གཏད་ཅེས་པ་སྟོང་པའི་སྒྲོན་མ་ཙཀྵུ། སྣང་བ་ཞེས་པ་ཆོས་ཉིད་ཀྱི། གོང་འཕེལ་བས་ཞེས་པ་ཉམས་སོ། །རང་ངོ་མཐོང་ལས་འདི་ལྟར་རོ། །ཞེས་པའི་དོན་ནི། རང་ངོ་ཞེས་པ་ཁྲེགས་ཆོད་ལྟོས་མེད་ཀྱི་སྟེང་དུ། མཐོང་ལས་ཞེས་པ་ཐིག་ལེ་སྟོང་པའི་སྒྲོན་མ། འདི་ལྟར་རོ་ཞེས་པ་གོང་ནས་གོང་དུ། ཡར་མཚམས་ལས་ནི་སོར་བཞི་ལས། །ཞེས་པའི་དོན་ནི། ཡར་མཚམས་ཞེས་པ་མིག་གི། ལས་ནི་ཞེས་པ་དཔྲལ་བ་ནས། སོར་བཞི་ལས་ཞེས་པ་ཕར་ནམ་མཁའ་ལ། བྲལ་བའི་སྐྱེས་བུ་སྐལ་བཟང་བ། །ཞེས་པའི་དོན་ནི། བྲལ་བའི་ཞེས་པ་དབྱིངས་རྣམ་པར་དག་པའི་སྒྲོན་མ། ཐོག་མ་དཀར་པོ་ལང་ལོང་ལས་འོད་ལྔའི་སྣང་བ་དུམ་བུ་དུམ་བུར་སྣང་བ་ཡིན་ནོ། །སྐྱེས་བུ་ཞེས་པ་ཉམས་སུ་ལེན་པའི། སྐལ་བཟང་བ་ཞེས་པ་ཚོགས་གཉིས་མཐར་ཕྱིན་པའོ། །འཁོར་བར་འཇུག་པ་ག་ལ་སྲིད། །ཅེས་པའི་དོན་ནི། འཁོར་བར་ཞེས་པ་དེ་ལྟ་བུའི་ཉམས་དང་ལྡན་ནས་ཤི་ཡང་། འཇུག་པ་ཞེས་པ་འགྲོ་བ་དྲུག་གི་མངལ་དུ། ག་ལ་སྲིད་ཅེས་པ་འདི་ནི་ཕྱིའི་རྟགས་སྟོན་ཏེ། རང་བཞིན་སྤྲུལ་སྐུའི་ཞིང་ཁམས་སུ་པདྨ་ལས་བརྫུས་ཏེ་སྐྱེས་ཏེ། ལོ་ལྔ་བརྒྱ་ན་སངས་རྒྱ་བ་ལ་ཐེ་ཚོམ་མེད་དོ། །གྲུ་ཆད་རྣམ་པ་གང་སྣང་བ། །ཞེས་པའི་དོན་ནི། གྲུ་ཆད་ཅེས་པ་ཡུལ་གྲུ་ཙམ། རྣམ་པ་ཞེས་པ་རྒྱུ། གང་སྣང་བ་ཞེས་པ་འོད་ལྔའི་སྣང་བ་གྱེན་འགྲེང་དང་། རྩིབས་ལ་ཤར་བ་ཉིན་མོ་དང་མཚན་མོ་མེད་བར་སྣང་བ་ཡིན་ནོ། །སྤྲུལ་པའི་ཡོན་ཏན་འདི་ཡིས་འགྲུབ། །ཅེས་པའི་དོན་ནི། སྤྲུལ་པའི་ཞེས་པ་སངས་རྒྱས་ཀྱི། ཡོན་ཏན་ཞེས་པ་འཛམ་བུའི་གླིང་བྱེ་བ་ཕྲག་བརྒྱ་ན་སངས་རྒྱས་ཀྱི་མཛད་པ་བྱེ་བ་ཕྲག་བརྒྱ་འགྱེད་པ། འདི་ཡིས་འགྲུབ་ཅེས་པ་གོང་མའི་ཉམས་དེ་ལྟ་བུ་དང་ལྡན་ནས་ཤི་ཡང་། མཐོང་བའི་ཡུལ་ཙམ་གང་སྣང་བ། །ཞེས་པའི་དོན་ནི། མཐོང་བའི་ཞེས་པ་རང་གནས་ནས། ཡུལ་ཙམ་ཞེས་པ་ནམ་མཁའ་དང་ཡུལ་ཁམས། གང་སྣང་བ་ཞེས་པ་ཐིག་ལེ་འཁར་ཕོར་རམ་འཁར་གཞོང་ངམ། བསེ་ཕུབ་ཙམ། མུ་ཁྱུད་འཁོར་ཞིང་འོད་དུ་འཁྲུགས་པས། ཚོམ་བུ་ལ་ནི་དེ་བཞིན་ནི། །ཞེས་པའི་དོན་ནི། ཚོམ་བུ་ཞེས་པ་རིགས་ལྔ་ཡབ་ཡུམ་གྱི། ལ་ནི་ཞེས་པ་དེ་ལྟ་བུའི་ཉམས་དང་ལྡན་ན། དེ་བཞིན་ནོ་ཞེས་པ་རིག་པ་ཚད་ལ་ཕེབས་ནས་འགྲོའོ། །ཕྱིར་སྣང་འགགས་པ་གང་ཡིན་པ། །ཞེས་པའི་དོན་ནི། ཕྱིར་སྣང་ཞེས་ས་རྡོ་རི་བྲག་དང་། རྩི་ཤིང་ནགས་ཚལ་ས་ཆུ་མེ་རླུང་ཉི་ཟླ་སྐར་མའོ། །འགགས་པ་ཞེས་པ་འོད་དང་ཐིག་ལེ། ཐིག་ལེའི་ནང་དུ་རྡོ་རྗེ་སེམས་དཔའ་སྐུ་རྐྱང་གིས། གང་ཡིན་པ་ཞེས་པ་སྐལ་པ་ཅན། ལུས་སེམས་ཕྱེད་པའི་རྣལ་འབྱོར་རོ། །སྐད་ཅིག་མ་ནི་བཅུ་དྲུག་ལ། །ཞེས་པའི་དོན་ནི། སྐད་ཅིག་མ་ནི་ཞེས་པ་ཀུན། བཅུ་དྲུག་ལ་ཞེས་བཟླ་བ་གསུམ་ན། འདི་ཡང་དེ་ལྟར་འགྱུར་བའོ། །ཞེས་པའི་དོན་ནི། འདི་ཡང་ཞེས་པ་ལུས་སེམས་ཕྱེད་པའི་རྣལ་འབྱོར། དེ་ལྟར་ཞེས་པ་རིགས་ལྔ་ཚོམ་བུའི་དཀྱིལ་འཁོར་དུ། འགྱུར་བའོ་ཞེས་པ་སྣང་བ་ཐམས་ཅད། མ་སྨིན་ལ་སོགས་ཐིག་ལེ་དང་། །ཞེས་པའི་དོན་ནི། མ་སྨིན་ཞེས་པ་ཐིག་ལེ་སྟོང་པའི་སྒྲོན་མ་མཐོང་ནས། ལ་སོགས་ཞེས་པ་དབྱིངས་རྣམ་པར་དག་པའི་སྒྲོན་མ་རྩིབས་ཤར་དང་། གྱེན་འགྲེང་དང་། མདུང་རྩེ་ལྟ་བུའམ། རེ་ལྡེའི་རྣམ་པ་ཙམ་དང་། རིན་པོ་ཆེའི་དྲྭ་བ་དང་། དྲྭ་བ་ཕྱེད་པ་དང་། མིག་མང་རིས་དང་། མིག་ཚགས་ལྟ་བུའམ། མཆོད་རྟེན་དང་ལྕགས་ཀྱུ་དང་མདའ་དང་ཉ་མིག་དང་། ཟ་འོག་གི་གུར་ཁྱིམ་ལྟ་བུ་དང་། དེ་ནས་དབྱིངས་ཐོག་མ་དཀར་པོ་ལང་ལོང་བས། དེ་བརྟགས་པས་ཁ་དོག་གསལ་བའི་འོད་ལྔས། རང་གནས་པའི་ལུང་པ་ཙམ་མི་སྣང་བ་དང་། དབྱིངས་དང་རིག་པ་ལ་ཉིན་མཚན་མེད་པར་སྣང་བའོ། །ཐིག་ལེ་དང་ཞེས་པ་ཉུང་འབྲུའམ་སྲན་མའི་རྡོག་པོའམ། འཁར་ཕོར་རམ། འཁར་གཞོང་ངམ། བསེ་ཕུབ་ཙམ་དུ་སྣང་བའོ། །དེ་བཞིན་སྐུ་ལ་ཐུག་གི་བར། །ཞེས་པའི་དོན་ནི། དེ་བཞིན་ཞེས་པ་གོང་མའི་ཐིག་ལེ་དེ་རྣམས་ཡུལ་ཁམས་ཙམ་དུ་གང་སྟེ་འོད་ལྔའི་མུ་ཁྱུད་ཀྱིས་རབ་ཏུ་བསྐོར་བའོ། །སྐུ་ལ་ཞེས་པ་ཐིག་ལེ་རེ་རེའི་ནང་དུ་རྡོ་རྗེ་སེམས་དཔའི་སྐུ་རྐྱང་རེ་རེ་སྣང་ངོ་། །ཐུག་གི་བར་ཞེས་པ་སྐུ་རྐྱང་གི་སྣང་བ་མན་ཆོད་ལ། དྲུག་དང་བཅུ་དང་ལྔ་གསུམ་ལ། །ཞེས་པའི་དོན་ནི། དྲུག་དང་ཞེས་པ་དབང་པོ་འབྲིང་གིས་སོ། །བཅུ་དང་ཞེས་པ་དབང་པོ་ཐ་མས་སོ། །ལྔ་གསུམ་ལ་ཞེས་པ་དབང་པོ་རབ་ཀྱིས་སོ། །གདོན་མི་ཟ་སྟེ་ལོངས་སྐུའོ། །ཞེས་པའི་དོན་ནི། གདོན་མི་ཞེས་པ་བློ། ཟ་སྟེ་ཞེས་པ་ཐེ་ཚོམ། ལོངས་སྐུའོ་ཞེས་པ་རིག་པ་ཚད་ལ་ཕེབས་ཏེ་སྣང་བ་ཐམས་ཅད་ཞིང་ཁམས་སུ་གྲོལ་ལོ། །ནང་ལུས་ཟད་པའི་སར་ཕྱིན་ཚེ། །ཞེས་པའི་དོན་ནི། ནང་ལུས་ཞེས་པ་རང་གི། ཟད་པའི་ཞེས་པ་ཟག་པ་རྣམས། སར་ཕྱིན་ཚེ་ཞེས་པ་ཕྱི་ཟད་དེ་ཞིང་ཁམས་རང་སྣང་ངོ་། །ནང་ཟད་དེ་ཆོས་མེད་ཀ་དག་གོ། །བར་ཟད་དེ་འོད་ལུས་ཟང་ཐལ་ལོ། །སོར་མོ་ལ་སོགས་དེ་བཞིན་སྣང་། །ཞེས་པའི་དོན་ནི། སོར་མོ་ཞེས་པ་རང་གི། ལ་སོགས་ཞེས་པ་ལུས་ཀྱི་རྐང་ལག་ཐམས་ཅད། དེ་བཞིན་སྣང་ཞེས་པ་རིགས་ལྔ་ཚོམ་བུའི་ཞིང་ཁམས་སུ། འདི་གཏད་འབྱུང་བར་རང་དེངས་སོ། །ཞེས་པའི་དོན་ནི། འདི་གཏད་ཅེས་པ་རིག་པ་རང་གི་ལུས་ཀྱི་ཞིང་ཁམས་ལ། འབྱུང་བ་ཞེས་པ་ས་ཆུ་མེ་རླུང་གིས་བསྡུས་པའི་ས་རྡོ་རི་བྲག་དང་རང་ལུས་འདི། རང་དེངས་སོ་ཞེས་པ་ནམ་མཁའ་འོད་ཕུང་གིས་བཀང་སྟེ་ཟག་བཅས་མི་སྣང་བར་ཐོག་མ་ཀ་དག་ལ་ཐིམ་མོ། །སྐྱེ་དང་འཇུག་པའི་ཁྱད་པར་གྱིས། །ཞེས་པའི་དོན་ནི། སྐྱེ་དང་ཞེས་པ་རང་དབང་ཐོབ་པ། འཇུག་པའི་ཞེས་པ་རང་དབང་ཐོབ་པའི། ཁྱད་པར་གྱིས་ཞེས་པ་གཞི་གཅིག་པའི། ཆོས་ཀུན་ཟད་པའི་རང་ས་ལ། །ཞེས་པའི་དོན་ནི། ཆོས་ཀུན་ཞེས་པ་ཉམས་སུ་བླང་རྒྱུའི། ཟད་པའི་ཞེས་པ་གོང་དུ་འཕེལ་རྒྱུ། རང་ས་ལ་ཞེས་པ་ངོ་བོ་རང་བཞིན་ཐུགས་རྗེ་གསུམ་གྱི། ཅི་ཡང་འཛིན་པ་མེད་པར་ནི། །ཞེས་པའི་དོན་ནི། ཅི་ཡང་ཞེས་དྲན་བློ། འཛིན་པ་ཞེས་པ་སྐུ་གསུམ་གྱི། མེད་པར་ནི་ཞེས་པ་གང་དུ་ཡང་མ་གྲུབ་པ། གནས་པ་ཡིན་ནོ་སྤྲུལ་པའི་སྐུ། །ཞེས་པའི་དོན་ནི། གནས་པ་ཞེས་པ་ཀ་དག་ལ། ཡིན་ནོ་ཞེས་པ་དེའི་དུས་སུ། སྤྲུལ་པའི་སྐུ་ཞེས་པ་རྡོ་རྗེ་འཆང་ནས་བརྒྱུད་པ་ཟམ་མ་ཆད་པར་ལུང་བསྟན་པའི་རང་སྒྲའོ། །འདི་ནི་འཇུག་པའི་ཤུགས་ཀྱིས་དབང། །ཞེས་པའི་དོན་ནི། འདི་ནི་ཞེས་པ་གདམས་ངག་གི་གནད། འཇུག་པའི་ཞེས་པ་མ་དག་པའི་འཁྲུལ་པའི་སེམས་དག་པ་ཡེ་ཤེས་ལ། ཤུགས་ཀྱིས་དབང་ཞེས་པ་ཡང་དག་པའི་གྲོང་འཇུག་གཅིག་ཡིིན་ཏེ། སེམས་ཅན་སུམ་སྟོང་ལ་རིག་པ་བཅུག་པས་གྲོལ་ལོ། །སྐྱེ་བའི་རང་དབང་སུས་ཐོབ་པ། །ཞེས་པའི་དོན་ནི། སྐྱེ་བའི་ཞེས་པ་མཚམས་མེད་པའི་ལས་བྱས་ཏེ། མནར་མེད་པའི་དམྱལ་བར། རང་དབང་ཞེས་པ་དེ་ཉིད་ཀྱིས་སངས་རྒྱ་བར་བྱེད་པའི། སུས་ཐོབ་པ་ཞེས་ཆོས་ཉིད་ཟད་པའི་སྣང་བ། དེ་ཡང་དེ་ལ་གཏད་ནས་ནི། །ཞེས་པའི་དོན་ནི། དེ་ཡང་ཞེས་པ་ཐབས། དེ་ལ་ཞེས་པ་རིག་པ། གཏད་ནས་ནི་ཞེས་པ་རང་གི་སོར་མོ་ལ། ཡང་དུས་འདི་ལྟར་བྱས་པ་ན། །ཞེས་པའི་དོན་ནི། ཡང་དུས་ཞེས་པ་ཡང་ཡང་། འདི་ལྟར་ཞེས་པ་ཐབས། བྱས་པ་ན་ཞེས་པ་སེམས་ཅན་གྱི་དོན་བྱ་བར་དགོངས་པ་ཡོད་པ་དེས། སྣང་བའི་རང་སྒྲ་སིལ་སྐད་དེ། །ཞེས་པའི་དོན་ནི། སྣང་བའི་ཞེས་པ་འབྱུང་བ་བཞིའི། རང་སྒྲ་ཞེས་པ་འབྱུང་བ་སོ་སོའོ། །སིལ་སྐད་དེ་ཞེས་པ་འུར་ཤྭོལ། སྔོན་དུ་ལོག་སྟེ་འཁྲུལ་པར་སྣང་། །ཞེས་པའི་དོན་ནི། སྔོན་དུ་ཞེས་པ་རང་གི། ལོག་སྟེ་ཞེས་པ་ས་རྡོ་རི་བྲག་ཏུ། འཁྲུལ་པར་སྣང་ཞེས་པ་དང་པོའི། ཨ་འཐས་ཙམ་ཡང་མེད་དེ། མེ་ལོང་ནང་གི་གཟུགས་བརྙན་ཙམ་དུ། འདིས་ནི་སེམས་ཅན་དོན་ཀུན་བྱེད། །ཅེས་པའི་དོན་ནི། འདིས་ནི་ཞེས་པ་རྩལ་ཆེན་རྫོགས་པའི་རྣལ་འབྱོར། སེམས་ཅན་ཞེས་པ་འཁྲུལ་པའི། དོན་ཀུན་བྱེད་ཅེས་པ་ངོ་བོའི་འགྲོ་དོན་འཁོར་བ་མ་སྟོངས་པར། རིག་པ་མཉམ་པར་གཅིག་པའི་ཕྱིར། །ཞེས་པའི་དོན་ནི། རིག་པ་ཞེས་པ་གཞི་འཛིན་པའི་རིག་པ་རྡོ་རྗེ་ལུ་གུ་རྒྱུད། མཉམ་པར་ཞེས་པ་ཀུན་ཏུ་བཟང་པོ་ནས་འཇག་མའི་སྲིན་བུ་ཡན་ཆོད། གཅིག་པའི་ཕྱིར་ཞེས་པ་ཡེ་གདོད་མ་ནས། སྟོང་ཕྲག་གསུམ་རྣམས་སེམས་ཅན་གྱི། །ཞེས་པའི་དོན་ནི། སྟོང་ཕྲག་གསུམ་རྣམས་ཞེས་པ་གྲངས་སོ། །སེམས་ཅན་གྱི་ཞེས་པ་འགྲོ་བ་ཆེ་ཆུང་མེད་པའི། འཕོ་བ་ཆེན་པོ་འདིས་འགྲུབ་བོ། །ཞེས་པའི་དོན་ནི། འཕོ་བ་ཞེས་པ་སེམས་ཅན་རྣམས་དག་པ་ཡེ་ཤེས་ཀྱི་སྐུ་རུ། ཆེན་པོ་ཞེས་པ་མ་རྫོགས་དགུ་རྫོགས། གོང་ན་མེད་པ། འདིས་འགྲུབ་བོ་ཞེས་པ་རྩལ་ཆེན་རྫོགས་པའི་རྣལ་འབྱོར་རོ། །དེ་བཞིན་རིམ་དང་ཅིག་ཆར་གྱིས། །ཞེས་པའི་དོན་ནི། དེ་བཞིན་ཞེས་པ་སེམས་ཅན་སུམ་སྟོང་གྲོལ། རིམ་དང་ཞེས་པ་འདས་གྲོངས་མེད་པར་བཞུགས་ནས། ཅིག་ཆར་གྱིས་ཞེས་པ་རང་ཟག་བཅས་མི་སྣང་བར་ལྷག་མེད་ལ་གྲོལ་བའི་དུས་སུ། ལུས་ནི་འདི་ཡིས་གྲུབ་པ་ཡིན། །ཞེས་པའི་དོན་ནི། ལུས་ནི་ཞེས་པ་ཟག་བཅས་ཀྱི། འདི་ཡིས་ཞེས་པ་ཟག་མེད་དུ། གྲུབ་པ་ཡིན་ཞེས་པ་སེམས་ཅན་སུམ་སྟོང་ལ། རང་གི་རིག་པ་བཅུག་པས་དེ་དག་ཐམས་ཅད་ཕུང་པོ་ལྷག་མེད་དུ། དེ་ཀུན་ལུས་ཟད་མཚན་ལས་གྲོལ། །ཞེས་པའི་དོན་ནི། དེ་ཀུན་ཞེས་པ་རིག་པ་བཅུག་པའི་སེམས་ཅན། ལུས་ཟད་ཅེས་པ་ཟག་བཅས་མི་སྣང་བར། མཚན་ལས་གྲོལ་ཞེས་པ་དངོས་པོ་དང་། འདི་ཀུན་འབྲས་བུ་ངེས་པའོ། །ཞེས་པའི་དོན་ནི། འདི་ཀུན་ཞེས་པ་ཆོས། འབྲས་བུ་ཞེས་པ་ཡང་དག་པའི། ངེས་པའོ་ཞེས་པ་མཐར་ཐུག་གི་དོན། ས་མཆོག་དཀྱིལ་འཁོར་ཆེན་པོ་འགྲུབ། །ཅེས་པའི་དོན་ནི། ས་མཆོག་ཅེས་པ་བཅུ་དྲུག་རྡོ་རྗེ་ཀ་དག་གི། དཀྱིལ་འཁོར་ཞེས་པ་རང་བཞིན་ལྷུན་གྲུབ་རིགས་ལྔའི། ཆེན་པོ་འགྲུབ་ཅེས་པ་མཐའ་བྲལ་གོང་ན་མེད་པ། འདི་ལྟར་ཐབས་ལས་ཡང་དག་བྱུང་། །ཞེས་པའི་དོན་ནི། འདི་ལྟར་ཞེས་པ་ཉམས་སུ་ལེན་པའི། ཐབས་ལས་ཞེས་པ་ཆོས་ཉིད་རང་སྒྲའི་གདམས་ངག་གི། ཡང་དག་བྱུང་ཞེས་པ་ཕུང་པོ་ལྷག་མེད་དུ་སངས་རྒྱ་བ། སངས་རྒྱས་བསྒྲུབ་པར་འདོད་པའི་མིས། །ཞེས་པའི་དོན་ནི། སངས་རྒྱས་ཞེས་པ་ངོ་བོ་ལ་གཟུང་ཡུལ་སངས་ཏེ་ཐིག་ལེར་རྒྱས། རང་བཞིན་ལ་སྒྲིབ་གཡོགས་སངས་ཏེ་སྐུ་རུ་རྒྱས། ཐུགས་རྗེ་ལ་ཕྱོགས་རིས་སངས་ཏེ་མཁྱེན་པར་རྒྱས། བསྒྲུབ་པར་ཞེས་པ་ཚེ་འདིར། འདོད་པའི་མིས་ཞེས་པ་བཀའ་སྡོད་ལས་ཀྱི་རྣལ་འབྱོར། འདི་ཐབས་ལྡན་ན་དེ་བཞིན་ནོ། །ཞེས་པའི་དོན་ནི། འདི་ཐབས་ཞེས་པ་ཆོས་ཉིད་རང་སྒྲ་བསྟན་པའི་བུ་གཅིག་གི། ལྡན་ན་ཞེས་པ་སྐལ་བ་ཅན་ལ། དེ་བཞིན་ནོ་ཞེས་པ་གོང་མ་སངས་ཇི་ལྟར་རྒྱས་པ་བཞིན་ཉམས་སུ་བླངས་ན། གཞན་སྤྱོད་སྙེམས་བྱེད་ཉིད་ཡིན་པས། །ཞེས་པའི་དོན་ནི། གཞན་སྤྱོད་ཅེས་པ་ཐེག་པ་ཐུན་མོང་བའི། སྙེམས་བྱེད་ཅེས་པ་ཡ་བྲལ་ཡིད་དཔྱོད་ཀྱི་ལྟ་སྒོམ། ཉིད་ཡིན་པས་ཞེས་པ་སྐུ་གསུམ་དབྱེར་མེད་དུ་མ་རྟོགས་པས། དངོས་པོ་མཐོང་བ་མ་ཡིན་ནོ། །ཞེས་པའི་དོན་ནི། དངོས་པོ་ཞེས་པ་རིག་པའོ། །མཐོང་བ་ཞེས་པ་མངོན་སུམ་མོ། །མ་ཡིན་ནོ་ཞེས་པ་ཡ་མ་བྲལ་བས་སོ། །དེ་ཕྱིར་འདི་ཀུན་དཀོན་པའི་ཚིག །ཅེས་པའི་དོན་ནི། དེ་ཕྱིར་ཞེས་པ་ཡིད་དཔྱོད་ཀྱི་ལྟ་སྒོམ་གྱིས་སངས་མི་རྒྱ་བས། འདི་ཀུན་ཞེས་པ་ཡང་དག་པའི་དོན། སྐུ་གསུམ་ཡ་མ་བྲལ་བའི་གནད། རིག་པ་རྡོ་རྗེ་ལུ་གུ་རྒྱུད་མངོན་སུམ་དུ་སྟོན་པའི་རང་སྒྲ། དཀོན་པའི་ཚིག་ཅེས་པ་གང་ནའང་། རྟག་ཏུ་རིན་ཆེན་གཏེར་འདི་ལྟོས། །ཞེས་པའི་དོན་ནི། རྟག་ཏུ་ཞེས་པ་དུས། རིན་ཆེན་ཞེས་པ་དཀོན་པའི་ནོར་བུ། གཏེར་འདི་ལྟོས་ཞེས་པ་སངས་རྒྱས་འབྱུང་བའི། འདི་ལྟར་ཟད་པ་ལ་སྤྱོད་ན། །ཞེས་པའི་དོན་ནི། འདི་ལྟར་ཞེས་པ་སྔར་སངས་རྒྱས་པ། ཟད་པ་ཞེས་པ་འོད་ཕུང་དུ། ལ་སྤྱོད་ན་ཞེས་པ་རྩལ་ཆེན་རྫོགས་པའི་རྣལ་འབྱོར། འདི་ནི་སངས་རྒྱས་སྟོང་ཕྲག་གསུམ། །ཞེས་པའི་དོན་ནི། འདི་ནི་ཞེས་པ་རྩལ་ཆེན་རྫོགས་པའི་རྣལ་འབྱོར་རོ། །སངས་རྒྱས་ཞེས་པ་གོང་དུ་བཤད་པ་དང་མཐུན་ནོ། །སྟོང་ཕྲག་གསུམ་ཞེས་པ་གྲངས། འདི་ཡིས་ལེགས་པར་ཞལ་མཐོང་ཡིིན། །ཞེས་པའི་དོན་ནི། འདི་ཡིས་ཞེས་པ་རྒྱུད་བསྟན་པའི་བུ་གཅིག་གི་གནད། ལེགས་པར་ཞེས་པ་ཉམས་སུ་བླངས་ན། ཞལ་མཐོང་ཡིན་ཞེས་པ་ཐེ་ཚོམ་མེད་པར་མངོན་སུམ་དུ། དེ་ལྟར་དུ་སངས་རྒྱས་སུམ་སྟོང་ཞལ་མཐོང་བའི་ནུས་པས། སེམས་ཅན་སུམ་སྟོང་གྲོལ་བར་ནུས་པའོ། །འདི་ཚིག་གསང་བ་ཉིད་ལས་བྱུང་། །ཞེས་པའི་དོན་ནི། འདི་ཚིག་ཅེས་པ་ཡང་དག་པའི་དོན། གསང་བ་ཞེས་པ་མ་ཚོར་བར་ཉམས་སུ་བླངས་པ། ཉིད་ལས་བྱུང་ཞེས་པ་ཕུང་པོ་ལྷག་མེད་དུ་སངས་རྒྱ་བ། སྐྱེས་བུ་རྣམས་ཀྱིས་འདི་ལྟར་བྱ། །ཞེས་པའི་དོན་ནི། སྐྱེས་བུ་ཞེས་པ་སྐལ་བ་ཅན། རྣམས་ཀྱིས་ཞེས་པ་རྗེས་སུ་ཞུགས་པ། འདི་ལྟར་བྱ་ཞེས་པ་ཆོས་ཉིད་ཀྱི་རང་སྒྲ། བསྟན་པའི་བུ་གཅིག་ནས་གསུངས་བཞིན། གསང་ཆེན་ཡང་གསང་དམ་པའོ། །ཞེས་པའི་དོན་ནི། གསང་ཆེན་ཞེས་པ་ཟབ་ལ་རྒྱ་ཆེ་བས། །དེ་ཡང་དེ་བཞིན་གཤེགས་པ་རིག་པ་མཆོག་གི་གདུང་སྒྲུབ། རིགས་དྲུག་འཁོར་བ་རྒྱུན་གཅོད་ལ་འདོད་པས། རང་སྐད་ཅིག་གིས་རྡོ་རྗེ་སེམས་དཔའ་རུ་བསྒོམས་ལ། ཐུགས་དཀྱིལ་རྩ་ལྔའི་ངོ་བོ་པདྨ་འདབ་བཞི་དབུས་དང་ལྔ། དཀར་མཐིང་སེར་དམར་ལྗང་པ་རུ། རིགས་ལྔ་ཡབ་ཡུམ་ལྔ་སྐད་ཅིག་དྲན་རྫོགས་སུ་བསྐྱེད་ལ། རང་གི་སྤྱི་བོ། མགྲིན་པ། སྙིང་ག །ལྟེ་བ། གསང་གནས། རྐང་མཐིལ་རྣམས་སུ། ཨ་སུ་ནྲྀ་དུ་པྲེ་ཏྲི། རིགས་དྲུག་ས་བོན་སྦྱང་ཞིང་རྒྱལ་བའི་སྙིང་པོ་འདི་ལ་ཞག་བདུན་བསྒྲུབ་བོ། །ཨཱོྂ་ཨཱཿཧཱུཾ། ཨོཾ་ཧཱུྃ་ཏྲཱྃ་ཧྲཱིཿཨཱཿ ཨ་ཧ་རི་ནི་ས། ཨཱོྂ་བཛྲ་གར་བཱཻ་སྭཱ་ཧཱ། ཨཱོྂ་ཥ་མ་དར་ཏེ་སྭཱ་ཧཱ། ཨཱོྂ་དྷརྨ་དྷ་ཏུ་གརྦྷེ་སྭཱ་ཧཱ། སྐྱེས་བུ་དེ་ཉིད་འདས་པའི་ཚེ་ན། ཆོས་སྐུ་ནམ་མཁའ་ལྟ་བུ་དང་། ལོངས་སྐུ་ཉི་ཟླ་ལྟ་བུ་དང་། སྤྲུལ་སྐུ་ས་གཞི་ལྟ་བུས་སེམས་ཅན་གྱི་དོན་འབྱུང་ངོ་། །འཇའ་དང་འོད་དུ་འཁྲུག་ཅིང་རུས་པ་ལ་རིང་བསྲེལ་དཀར་པོ། ཤ་ལ་དམར་པོ། ཆུ་སེར་ལ་སྔོན་པོ། པགས་པ་ལ་སེར་པོ། ཤ་རཱི་རམ་སྲན་མ་ཙམ། སྙིང་ལ་སྣ་ལྔ་འབྱུང་བར་འགྱུར་རོ། །འདི་ནི་བསྒྲུབས་པས་སངས་རྒྱ་བའོ། །ཡང་གསང་ཞེས་པ་སྙིང་ཐིག་གི། དམ་པའོ་ཞེས་པ་ཆོས་ཉིད་ཀྱི་རང་སྒྲ་ཐོས་པས་གྲོལ་བ། མཐོང་བས་གྲོལ་བ། བལྟས་པས་གྲོལ་བ། བཏགས་པས་གྲོལ་བའོ། །ཚེ་འདིར་བསྒོམ་ཞིང་ཉམས་སུ་བླངས་པས་རྟགས་མཐར་ཕྱིན་ཏེ། ཟག་པ་མེད་པར་བསྟན་པའི་ལེའུ་སྟེ་བཞི་པ་རྫོགས་སོ།། །།ས་མ་ཡ། རྒྱ་རྒྱ་རྒྱ། ༈ ད་ནི་ལེའུ་ལྔ་པ་འགྲོལ་ཏེ། ཨེ་མ་ཞེས་པའི་དོན་ནི། ཨེ་ནི་དབྱིངས་སོ། །མ་ནི་མི་འགྱུར་བའོ། །དབྱིངས་མི་འགྱུར་བ་ངོ་མཚར་ཆེ་བའི་རང་སྒྲའོ། །འདི་ལྟར་འབྱུང་འདོད་སྐྱེས་བུ་གང་། །ཞེས་པའི་དོན་ནི། འདི་ལྟར་ཞེས་པ་ཐུན་མོང་གི་རྟགས། འབྱུང་འདོད་ཅེས་པ་འགྲོ་བ་འདྲེན་པའི་དོན་དུ། སྐྱེས་བུ་གང་ཞེས་པ་སྐལ་པ་ཅན། ཐབས་ཀྱི་ཡན་ལག་འདི་ལྟ་བུ། །ཞེས་པའི་དོན་ནི། ཐབས་ཀྱི་ཞེས་པ་འགྲོ་བ་འདྲེན་པའི། ཡན་ལག་ཅེས་པའི་དོན་མ་ནོར་བ་ལ་འཇུག་པའི། འདི་ལྟ་བུ་ཞེས་པ་བྱ་ཐབས། རྣམ་པ་སྣ་ཚོགས་ཉིད་ལ་ནི། །ཞེས་པའི་དོན་ནི། རྣམ་པ་ཞེས་པ་སངས་རྒྱས་ཀྱི་རྟགས་ཀྱི། སྣ་ཚོགས་ཞེས་པ་འགྲོ་བའི་དོན་དུ་ཐུན་མོང་གི་ལས། ཉིད་ལ་ནི་ཞེས་པ་འདི་དག །འདི་ལྟར་དེ་ཡི་སྔོན་དུ་སྦྱང་། །ཞེས་པའི་དོན་ནི། འདི་ལྟར་ཞེས་པ་རང་གིས། དེ་ཡི་ཞེས་པ་ཐུན་མོང་གི་ལས་ཀྱི། སྔོན་དུ་སྦྱང་ཞེས་པ་རང་ཞེན་པ་ལོག་པར་བྱ་བའི་ཕྱིར་དུ། འདི་ལྟར་རང་གིས་སྔོན་མ་སྦྱངས་ན། རང་ཉིད་འདོད་པའི་དབང་དུ་ཤོར་ཉེན་ཡོད་པའོ། །སེམས་ཀྱིས་རིམ་པ་ཅི་སྦྱངས་པ། །ཞེས་པའི་དོན་ནི། སེམས་ཀྱིས་ཞེས་པ་རང་གི། རིམ་པ་ཞེས་པ་བདུན་ཏེ། དང་པོ་འདུས་བྱས་ཐམས་ཅད་མི་རྟག་པ་ལ་བསམས་ཏེ་བྱང་ཆུབ་ཀྱི་སེམས་སྦྱང་། གཉིས་པ་འཕྲལ་གྱི་བདེ་སྡུག་དང་ཡུན་གྱི་བདེ་བ་ལ་བསམས་ཏེ་བྱང་ཆུབ་ཀྱི་སེམས་སྦྱང་། གསུམ་པ་འཆི་བའི་རྐྱེན་དུ་མ་ལ་བསམས་ཏེ་བྱང་ཆུབ་ཀྱི་སེམས་སྦྱང་། བཞི་པ་ཚེ་འདིའི་བྱ་བ་ཐམས་ཅད་བྱས་པ་དོན་མེད་དུ་འདུག་པ་ལ་བསམས་ཏེ་བྱང་ཆུབ་ཀྱི་སེམས་སྦྱང་། ལྔ་པ་སངས་རྒྱས་ཀྱི་ཡོན་ཏན་ལ་བསམས་ཏེ་བྱང་ཆུབ་ཀྱི་སེམས་སྦྱང་། དྲུག་པ་བླ་མའི་མན་ངག་ལ་བསམས་ཏེ་བྱང་ཆུབ་ཀྱི་སེམས་སྦྱང་། བདུན་པ་མི་རྟོག་པ་ལ་བསམས་ཏེ་བྱང་ཆུབ་ཀྱི་སེམས་སྦྱང་། ཅི་སྦྱངས་པ་ཞེས་པ་ཉི་མ་གསུམ་གསུམ་ཉི་ཤུ་རྩ་གཅིག་ཏུ་ཉམས་སུ་བླངས་པས། འདིས་ནི་མི་རྟག་སེམས་ལ་འབྱོར། །ཞེས་པའི་དོན་ནི། འདིས་ནི་ཞེས་པ་སེམས་སྦྱོང་བདུན་པོས། མི་རྟག་ཅེས་པ་རྒྱུད་ལ་ཁེལ་ཏེ། སེམས་ལ་འབྱོར་ཞེས་པ། བྱང་ཆུབ་ཀྱི་སེམས་སྦྱངས་པ་དང་པོས་འཁོར་བ་ལས་བློ་ལྡོག །གཉིས་པས་སྡུག་བསྔལ་ལས་ཡིད་འབྱུང་། གསུམ་པས་དད་པ་སྔོན་དུ་འགྲོ། བཞི་པས་བླ་མའི་གདམས་ངག་ལ་འཇུག །ལྔ་པས་སྒོམ་པ་ལ་བསྲན་ཚུགས། དྲུག་པས་བྱ་བ་ངན་པ་ལ་མི་འཇུག །བདུན་པས་ཏིང་ངེ་འཛིན་གོང་ནས་གོང་དུ་འཕེལ་བ་རྣམས་སོ། །ཇི་ལྟར་སྒྲ་ཡི་རྣལ་འབྱོར་པས། །ཞེས་པའི་དོན་ནི། ཇི་ལྟར་ཞེས་པ་མཁྱེན་པ། སྒྲའི་ཞེས་པ་འབྱུང་བ་བཞི། རྣལ་འབྱོར་པས་ཞེས་པ་སྒྲ་འབྱུང་བ་ལ་ཆུའི་རྣལ་འབྱོར་བྱ། སྒྲ་གནས་པ་ལ་སའི་རྣལ་འབྱོར་བྱ། སྒྲ་འཇུག་པ་ལ་རླུང་གི་རྣལ་འབྱོར་བྱ། སྒྲ་ལྡོག་པ་མེའི་རྣལ་འབྱོར་བྱ། ས་ཆུ་མེ་རླུང་འབྱུང་བ་བཞི། །ཞེས་པའི་དོན་ནི། ས་ཆུ་ཞེས་པ་ལྃ་ཁྃ། མེ་རླུང་ཞེས་པ་རྃ་ཡྃ། འབྱུང་བ་བཞི་ཞེས་པ་སོ་སོའི་ཡིག་འབྲུ་དང་ལྷའོ། །སྒྲ་དོན་རྣམས་ལ་གོམས་པ་ཡིས། །ཞེས་པའི་དོན་ནི། ཆུ་སྒྲ་བཤུད་པ། ས་སྒྲ་ལྡེག་པ། མེ་སྒྲ་འཚེག་པ། རླུང་སྒྲ་སྦིར་བ། ནམ་མཁའི་སྒྲ་སེང་བའོ། །རྣམས་ལ་ཞེས་པ་ལྔ་པོ་ལ། གོམས་པ་ཡིས་ཞེས་པ་འབྱུང་འཇུག་གནས་ལྡོག་ལ། རིགས་དྲུག་རྣམས་ཀྱི་རང་སྐད་ཀྱིས། །ཞེས་པའི་དོན་ནི། རིགས་དྲུག་ཅེས་པ་འགྲོ་བ། རྣམས་ཀྱི་ཞེས་པ་ལྷ་ཚངས་པ་མན་ཆོད། རང་སྐད་ཀྱིས་ཞེས་པ་སོ་སོ་རང་རང་གི། མངོན་ཤེས་འཆར་བ་འདིས་འགྲུབ་བོ། །ཞེས་པའི་དོན་ནི། མངོན་ཤེས་ཞེས་པ་འདས་མ་འོངས་ད་ལྟར་གྱི། འཆར་བ་ཞེས་པ་རང་ལ། འདིས་འགྲུབ་བོ་ཞེས་པ་འབྱུང་བ་བཞིའི་སྒྲ་ལ་བརྟག་ཅིང་ཧ་རི་ནི་ས་བཟླས་ན། ཞག་རིམ་དུས་ནི་རྣམ་དྲུག་གིས། །ཞེས་པའི་དོན་ནི། ཞག་རིམ་ཞེས་པ་ཚེས་གཅིག་ནས་བཅུ་དྲུག་ཚུན་ཆོད་ལྷའི་སྐད། ཚེས་བདུན་ནས་བཅུ་གཉིས་ཚུན་ཆོད་ལྷ་མིན་སྐད། བཅུ་གསུམ་ནས་བཅོ་བརྒྱད་ཚུན་ཆོད་མིའི་སྐད། བཅུ་དགུ་ནས་ཉི་ཤུ་བཞི་ཚུན་ཆོད་བྱོལ་སོང་གི་སྐད། དེ་ནས་ཞག་གསུམ་ཡི་དྭགས་སྐད། དེ་ནས་ཞག་གསུམ་དམྱལ་བའི་སྐད་དོ། །དུས་ནི་ཞེས་པ་ལྷའི་འཇུག་པ་དཔྱིད་ཟླ་ར་བ། འབྱུང་བ་དབྱར་ཟླ་ར་བ། གནས་པ་སྟོན་ཟླ་ར་བ། ལྡོག་པ་དགུན་ཟླ་ར་བ། ལྷ་མིན་འབྲིང་པོ་བཞི། མི་ཐ་ཆུང་བཞི། རྣམ་དྲུག་ཅེས་པ་ཞག་རེ་ལ་དུས་ཆུང་དྲུག་སྟེ། སྐྱ་རེངས་ཤར་ནས་ཉི་མ་རྩེ་ཤར་ལྷའི་སྐད། རྩེ་ཤར་ནས་དྲོས་པོ་ཆེ་ཚུན་ཆོད་ལྷ་མིན་སྐད། དྲོས་པོ་ཆེ་ནས་གྲིབ་ཆེན་ལྷགས་ཚུན་ཆོད་མིའི་སྐད། གྲིབ་ཆེན་ལྷགས་ནས་ཉི་མ་དམར་ཐག་ཆོད་པ་ཚུན་ཆོད་བྱོལ་སོང་གི་སྐད། ཉི་མ་དམར་ཐག་ཆོད་ནས་ནམ་མ་ཕྱེད་ཚུན་ཆོད་ཡི་དྭགས་སྐད། ནམ་མ་ཕྱེད་ནས་སྐྱ་རེངས་ཤར་བ་ཚུན་ཆོད་དམྱལ་བའི་སྐད། མཁའ་འགྲོ་ལྔ་དང་ཡང་སྦྱར་རོ། །དེ་ལ་སོགས་པ་དང་གང་རུང་བ་ཞིག་གི་སྐད་ལྷང་ལ་བྱུང་བ་དང་། རླུང་འབྱུང་འཇུག་གནས་ལྡོག་ལ་བརྟགས་པས། འདི་ཡི་སྐད་ཀུན་རང་དུས་ཤེས། །ཞེས་པའི་དོན་ནི། འདི་ཡི་ཞེས་པ་དུས་རྩིས། སྐད་ཀུན་ཞེས་པ་རིགས་དྲུག་དང་མཁའ་འགྲོའི། རང་དུས་ཤེས་ཞེས་པ་སོ་སོ་རང་རང་གི་སྐད་དང་སྐལ་བ་ཅན་གྱིས། འགྲུས་པ་མེད་པར་སུས་ཤེས་པ། །ཞེས་པའི་དོན་ནི། འགྲུས་པ་ཞེས་པ་དུས་གནད་ལ། མེད་པར་ཞེས་པ་མ་ནོར་བར། སུས་ཤེས་པ་འབྱུང་བཞིིའི་རྣལ་འབྱོར། མ་འོངས་ད་ལྟར་འདས་པ་ཡི། །ཞེས་པའི་དོན་ནི། མ་འོངས་ཞེས་པ་ཕྱིས། ད་ལྟར་ཞེས་པ་སྐྱེ་བ་འདི། འདས་པ་ཡི་ཞེས་པ་སྔར། སེམས་རྒྱུད་ཇི་ལྟར་ཤེས་པར་འགྱུར། །ཞེས་པའི་དོན་ནི། སེམས་རྒྱུད་ཅེས་པ་དགའ་མི་དགའ་དང་། ཡོད་མེད་དང་ནམ་འཆི་གར་སྐྱེ་མ་ལུས་པ། ཇི་ལྟར་ཞེས་པ་དེ་ཉིད་མཁྱེན་ཏེ། ཤེས་པར་འགྱུར་ཞེས་པ་མཁའ་འགྲོ་དང་རིགས་དྲུག་གི་དུས་མ་ནོར་བར་ཞར་ལ་འབྱུང་ངོ་། །གཞན་གྱི་དོན་བྱེད་སྤྲུལ་པ་པོས། །ཞེས་པའི་དོན་ནི། གཞན་གྱི་ཞེས་པ་འགྲོ་བ། དོན་བྱེད་ཅེས་པ་སྡུག་བསྔལ་ལས་གྲོལ་བའི། སྤྲུལ་པ་པོས་ཞེས་པ་སངས་རྒྱས་ཀྱི་ཞིང་སྤྲུལ་གྱིས། འདི་ལ་སྔོན་དུ་མ་སྦྱངས་ན། །ཞེས་པའི་དོན་ནི། འདི་ལ་ཞེས་པ་སྒྲ་དང་བཞི་ལ་དུས་བཞི། སྔོན་ཞེས་པ་ཉམས་སུ་ལེན་པའི། མ་སྦྱངས་ན་ཞེས་པ་ཡོ་གིས། སྤྲུལ་པའི་ས་བོན་འཇོག་པར་ནི། །ཞེས་པའི་དོན་ནི། སྤྲུལ་པའི་ཞེས་པ་རྟགས། ས་བོན་ཞེས་པ་ཕན་གནོད་ཀྱི། འཇོག་པར་ནི་ཞེས་པ་ཁྱད་པར། ནུས་པ་ཉིད་ནི་མི་ཐོབ་བོ། །ཞེས་པའི་དོན་ནི། ནུས་པ་ཞེས་པ་མངོན་ཤེས་ཀྱི། ཉིད་ནི་ཞེས་པ་ཅིག་ཆར། མི་ཐོབ་བོ་ཞེས་པ་བསྒོམ་ལོངས་མེད་པར་ཐུན་མོང་གི་མངོན་ཤེས། ཡང་དག་པའི་མངོན་ཤེས་ལུ་གུ་རྒྱུད་ཉམས་སུ་བླངས་པ་ལས་འབྱུང་ངོ་། །དེས་ན་འབྱུང་བའི་སྒྲ་ལ་བསླབ། །ཅེས་པའི་དོན་ནི། དེས་ན་ཞེས་པ་ཐུན་མོང་གི་མངོན་ཤེས་འདོད་ན། འབྱུང་བའི་ཞེས་པ་ས་ཆུ་མེ་རླུང་གི། སྒྲ་ལ་བསླབ་ཅེས་པ་འབྱུང་འཇུག་གནས་ལྡོག་གི་དུས་ལ། བྱ་བྱེད་ཞེན་པ་བཟློག་པའི་ཕྱིར། །ཞེས་པའི་དོན་ནི། བྱ་བྱེད་ཅེས་པ་བཟོ་དང་སྒྱུ་རྩལ་རྩིས་ལ་སོགས་པའོ། །ཞེན་པ་ཞེས་པ་དེ་དག་ལ། བཟློག་པའི་ཕྱིར་ཞེས་པ་ཐབས། ལག་ནི་བྱ་བྱེད་སྣ་ཚོགས་བྱ། །ཞེས་པའི་དོན་ནི། ལག་ནི་ཞེས་པ་རང་གི། བྱ་བྱེད་ཅེས་པ་གང་གི། སྣ་ཚོགས་བྱ་ཞེས་པ་ལག་ལེན་ལ་བལྡབས་ཏེ། མཁར་ཁང་བརྩིགས་ཤིང་འཇོག་པ་དང་། ས་ཆུ་མེ་རླུང་དང་ཤིང་ལྕགས་ལ་སོགས་པའི་ཕན་པ་རྣམས་དང་། གནོད་བྱ་ཐམས་ཅད་དགྲ་གྲོགས་མ་བུ་རྩི་བ་ལ་སོགས་པ། དེ་བཞིན་འདུས་བྱས་རྣམ་པ་ཡིས། །ཞེས་པའི་དོན་ནི། དེ་བཞིན་ཞེས་པ་དེའི་ཞར་ལ། འདུས་བྱས་ཞེས་པ་འཇིག་པའི་ཆོས་ཅན། རྣམ་པ་ཡིས་ཞེས་པ་ཐམས་ཅད་བྱས་པས། དབང་པོའི་མངོན་ཞེན་བཟློག་པ་སྟེ། །ཞེས་པའི་དོན་ནི། དབང་པོའི་ཞེས་པ་ལྔའི། མངོན་ཞེན་ཞེས་པ་ཐོག་མ་མེད་པ་ནས། བཟློག་པ་ཞེས་པ་སུན་ཐོན་པར། ཡུལ་རྣམས་གོམས་པའི་གནད་ཀྱིས་སྦྱངས། །ཞེས་པའི་དོན་ནི། ཡུལ་རྣམས་ཞེས་པ་དབང་པོའི། གོམས་པའི་ཞེས་པ་དེ་རྣམས་ལ། གནད་ཀྱིས་སྦྱངས་ཞེས་པ་ཞེན་པ། ཇི་ལྟར་གཉིད་དང་རྨི་ལམ་དུ། །ཞེས་པའི་དོན་ནི། ཇི་ལྟར་ཞེས་པ་དོན། གཉིད་དང་ཞེས་པ་མཚན་མོའི། རྨི་ལམ་དུ་ཞེས་པ་འོད་གསལ་དུ་བསྲེ་བ། དུས་བཞི་འབྱུང་བའི་གནད་ཀྱིས་དབྱེ། །ཞེས་པའི་དོན་ནི། དུས་བཞི་ཞེས་པ་སྟོན་དཔྱིད་དབྱར་དགུན་ནོ། །འབྱུང་བའི་ཞེས་པ་སྟོན་ས། དགུན་ཆུ། དཔྱིད་རླུང་། དབྱར་མེ། གནད་ཀྱིས་དབྱེ་ཞེས་པ་སའི་དུས་ལ་རིག་པ་ལུ་གུ་རྒྱུད་སྤྱི་བོར་བཟུང་ལ་ཉལ། ཆུའི་དུས་ལ་རིག་པ་ལུ་གུ་རྒྱུད་མགྲིན་པར་བཟུང་ལ་ཉལ། མེའི་དུས་ལ་རིག་པ་ལུ་གུ་རྒྱུད་སྙིང་ཁར་བཟུང་ལ་ཉལ། རླུང་གི་དུས་ལ་རིག་པ་ལུ་གུ་རྒྱུད་ལྟེ་བར་བཟུང་ལ་ཉལ། ཚད་ནི་གནད་ལ་ཕེབས་པས་བཟུང་། །ཞེས་པའི་དོན་ནི། ཚད་ནི་ཞེས་པ་སེམས་བསྐྱེད་པ་དང་ཚོགས་གསོག་པ་དང་གསོལ་བ་འདེབས་པ་སྔོན་དུ་བཏང་སྟེ། ཅི་དང་ཅི་ལ་ཡང་རྨི་ལམ་ཡིན་སྙམ་པ་ཐིས་ཕུར་དུ་བྱས་པས་རྨི་ལམ་དུ་ཤེས་པའོ། །གནད་ལ་ཞེས་པ་དེ་ནས་དཔེ་རྟགས་དོན་གསུམ་གྱི་ངོ་སྤྲོད་ཚོ་ལ་ཐིས་ཕུར་དུ་སྦྱངས་པས། ཕེབས་པས་བཟུང་ཞེས་པ་ཉིན་ནུབ་མེད་ཙ་ན། འཁོར་འདས་ཀྱིས་བསྡུས་པ་ཐམས་ཅད་ཞི་ཁྲོའི་དཀྱིལ་འཁོར་ཡིན་ཞེས་ངག་ཏུ་ཡང་བརྗོད། ཡིད་ཀྱིས་ཀྱང་ཐིས་ཕུར་དུ་བྱས་པས་རྨི་ལམ་དུ་ལུ་གུ་རྒྱུད་དང་ཞིང་ཁམས་ཟིན་ཏེ། སྙམ་བྱེད་ཀྱིས་ལྟ་བས་མྱོང་བྱེད་ཀྱིས་མཐོང་སྟེ་ཡེ་ཡིན་ལ་སླེབས་པ་ཞེས་བྱའོ། །ཐེག་པ་ཐུན་མོང་པ་དང་སྙམ་བྱེད་གཅིག་ཀྱང་། མྱོང་བྱེད་དང་ཡེ་ཡིན་པ་གཅིག་པས་སྤྲུལ་པ་ལ་སོགས་པ་མ་དགོས་སོ། །ཐིག་ལེ་ཕྱི་ནང་བསླབ་བྱའི་ཕྱིར། །ཞེས་པའི་དོན་ནི། ཐིག་ལེ་ཞེས་པ་ཐབས་ཤེས་རབ་གཉིས་ཀྱི་ས་བོན། ཕྱི་ནང་ཞེས་པ་བློ་ཆེ་ཆུང་གིས། བསླབ་བྱའི་ཕྱིར་ཞེས་པ་རླུང་ལ། དེ་ཡང་ཕོ་རླུང་སྣ་བུག་གཡས་ནས་རྒྱུ། མོ་རླུང་སྣ་བུག་གཡོན་ལ་རྒྱུ། ཡབ་ཡུམ་གཉིས་མེད་ཀྱི་རླུང་མཉམ་པོར་རྒྱུ། ཕོ་རླུང་གི་དུས་སུ་མི་རྟོག་བསྒོམ། མོ་རླུང་གི་དུས་སུ་གྲོལ་ལམ་བསྒོམ། གཉིས་མེད་ཀྱིས་དུས་སུ་ཆགས་ལམ་སྤྱད། གང་ཟག་རྣམ་པ་གཉིས་དོན་བྱ། །ཞེས་པའི་དོན་ནི། གང་ཟག་ཅེས་པ་ཉམས་སུ་ལེན་པའི། རྣམ་པ་ཞེས་པ་བློ་ཆེ་ཆུང་། གཉིས་དོན་བྱ་ཞེས་པ་གྲོལ་ལམ་དང་ཆགས་ལམ་གཉིས་ལས་གྲོལ་ལམ་པས་རང་གི་བདེ་བ་ལ་ཉམས་སུ་བླངས་ཏེ། འོད་རིག་ལ་བརྟེན་ནས་དབབ་བཟུང་ལྡོག་དགྲམ་བདེ་སྟོང་དབྱེར་མེད་སངས་རྒྱས་ཀྱི་དགོངས་པ་དང་བསྲེའོ། །ཆགས་ལམ་པས་ཡབ་ཡུམ་གཉིས་མེད་ཀྱི་བདེ་བ་ཉམས་སུ་བླངས་ཏེ། དེ་ཡང་རིག་མ་མཚན་ལྡན་ལ་བརྟེན་ཏེ་ཐིག་ལེ་དབབ། མཚན་ལྡན་ནི་དཀར་སངས་འཕྲ་ལྡེམ་ཆུང་བར་མངོན་པ་ནི་བདེ་གཤེགས་རིགས་སོ། །སྔོ་སངས་བཤན་པ་རྡོ་རྗེ་རིགས། སེར་སངས་གྲུ་བཞི་རིན་ཆེན་རིགས། དམར་སྨུག་སོ་ལེགས་སྐད་སྙན་མིག་ཟླ་གམ་པདྨའི་རིགས། ལུས་ཆེ་འགྲོས་བུལ་གོམ་རླབས་ཆེ་ཆ་ཆ་ནས་ཆེ་བ་ནི་ལས་ཀྱི་རིགས། དེ་རྣམས་གང་ཡིན་ཀྱང་དད་པ་དང་བརྩེ་སེམས་སྙིང་རྗེ་ཆེ་བ། བློ་ཁོག་ཆེ་ཞིང་ལྟ་དགོངས་མཐོ་བ་ནི་མཆོག་གོ། །དེ་ལྟ་བུ་ལ་ལྟ་རྒོད་འཛིང་འཇིབ་མཉེ་སྣོམ་པས་ཕེབས་སོ། །བསྒོམ་པ་ལྷ་སྟེ་ཞི་ཁྲོ་གང་མོས་སུ་ཡབ་ཡུམ་བསྐྱེད་དོ། །ཐིག་ལེ་འཛིན་པ་དེ་ངོ་བོ་སྟེ་བྱུང་ས་གནས་ས་འགྲོ་ས་ལྟ་བའོ། །འདྲེན་པ་ཧཱུཾ་སྟེ་གསུས་པ་སྒལ་པ་ལ་སྦྱར། སྒྲོན་མ་གྱེན་ལ་ཟློག །མགྲིན་པ་གཞུ་ལྟར་བརྡུངས། དམིགས་པ་རྩ་གསུམ་ན་ཡར་ཞོ་ལུད་པ་ལྟར་སྤྱི་བོར་ལན་བདུན་བསྐྱལ། འགྲེམས་པ་སྤྲུག་སྟེ་རླུང་བཟུང་ཉྭ་བཞི་སྒྲིམ་མགོ་ལུས་སྤྲུག་གོ། །སྐྱེལ་སོ་ངོ་བོ་རང་བཞིན་ཐུགས་རྗེ་གསུམ་སྟེ། རིགས་ལྔ་ཚོམ་བུའི་དཀྱིལ་འཁོར་རོ། །བཅོས་མ་འདུས་བྱས་བསྒོམས་པ་ཡིས། །ཞེས་པའི་དོན་ནི། བཅོས་མ་ཞེས་པ་ལུས་ངག་ཡིད་གསུམ། འདུས་བྱས་ཞེས་པ་ལུས་འདུས་བྱས་ལྷ་ཡི་བསྒོམ། ངག་འདུས་བྱས་ཧཱུཾ་རིང་ཧཱུཾ་ཐུང་། སེམས་འདུས་བྱས་དམིགས་པ། བསྒོམ་པ་ཡིས་ཞེས་པ་ཡིད་དཔྱོད། དང་པོ་སེམས་གཡེང་ཞེས་པ་དགག །ཅེས་པའི་དོན་ནི། དང་པོ་ཞེས་པ་ལས། སེམས་གཡེང་ཞེས་པ་མ་ཆུན་པས། ཞེན་པ་དགག་ཅེས་པ་རིགས་ཆད་པ་ཐུགས་རྗེས་བཟུང་བས་གདོད་རིག་པ་མངོན་སུམ་ལ་ངེས་ཤེས་སྐྱེའོ། །འབྲས་བུ་ཅིག་ཆར་མ་ཡིན་པས། ཞེས་པའི་དོན་ནི། འབྲས་བུ་ཞེས་པ་སངས་རྒྱས་ཀྱི། ཅིག་ཆར་ཞེས་པ་མངོན་སུམ་དུ། མ་ཡིན་པས་ཞེས་པ་སྐྱེ་བ་བརྒྱུད་པར་བྱེད་དོ། །སྣང་བ་རིམ་གྱིས་གོམས་པར་བྱ། །ཞེས་པའི་དོན་ནི། སྣང་བ་ཞེས་པ་གང་ཟག་གི། རིམ་གྱིས་ཞེས་པ་དང་པོ་བྱང་ཆུབ་ཀྱི་སེམས་སྦྱངས་ཏེ། སྣང་བ་བདེན་མེད་དུ་རྟོགས་པར་བྱ། དེ་ནས་བསྐྱེད་རིམ་བསྒོམས་ཏེ་སྒྲ་གྲགས་སྟོང་དུ་རྟོགས་པར་བྱ། དེ་ནས་རྩ་དང་རླུང་བསྒོམས་ཏེ། ལམ་གྲོལ་ལམ་ཆགས་ལམ་གྱིས་སྣང་བ་བདེ་སྟོང་དུ་རྟོགས་པར་བྱ། དེ་ནས་མཚན་ཉིད་འཛིན་པའི་རིག་པ་མི་དྲན་དགུ་དྲན་འདི། ཕཊ་བྱས་ཏེ་ཉོན་མོངས་ཁྱེར་ཆོད། ངོ་རང་ཐོག །ཐག་ཆིག་ཆོད། གདིང་གྲོལ་ཐོག་སྟེ་ནམ་མཁའ་ལྟ་བུར་རྟོགས་པར་བྱ། གོམས་པར་བྱ་ཞེས་པ་ལོ་གཉིས་གསུམ་དུ་གོང་མ་རྣམས་ལ། མིག་སྨན་ལ་སོགས་སྒོ་ལྔ་ཡི། །ཞེས་པའི་དོན་ནི། མིག་སྨན་ཞེས་པ་དབང་པོ་དྭངས་བྱེད་ཀྱི། ལ་སོགས་ཞེས་པ་བྱ་ཐབས་ལྔ། སྒོ་ལྔ་ཞེས་པ་གཟུགས་སྒྲ་དྲི་རོ་རེག་བྱའོ། །སྨན་གྱི་རིམ་པ་སྦྱར་བར་བྱ། །ཞེས་པའི་དོན་ནི། སྨན་གྱི་ཞེས་པ་སྒོ་ལྔའི། རིམ་པ་ཞེས་པ་སོ་སོ་གང་འདོད། སྦྱར་བར་བྱ་ཞེས་པ་དང་པོ་མིག་གི་གཟུགས་ནི་ཁ་དོག་དང་དབྱིབས་སོ། །ཁ་དོག་ནི་ལྔའོ། །བཙོད་གདུས་པའི་ཁན་དྷ་དང་ཨ་རུ་རུའི་ཁན་དྷ་ཙན་དན་དཀར་དམར་གྱི་ཐང་ཆུ། བྱ་ནག་མོའི་སྒོ་ངའི་མར། གཙོད་ཀྱི་མིག་དང་ར་དཀར་མོའི་འོ་མ་དང་། དེ་རྣམས་རིམ་པར་སྦྱར་ལ། ལྕགས་ཀྱི་སྣོད་དུ་ཞག་ཉི་ཤུ་རྩ་གཅིག་བྱིབས། དེ་ནས་ཞག་བདུན་པ་དང་། གསེར་ནས་ཙམ་དང་གཡུ་ནས་ཙམ་གཉིས་ཕྱེ་བར་བཏགས་ཏེ་གོང་གི་རྫས་ལ་བཏབ་སྟེ་དཀྲུགས། དེ་ནས་གོས་ཀྱིས་བྱིབས་ཏེ་ཞག་བཅུ་བཞི་ནས་བལྟའོ། །དེ་ལ་བལ་སྔོ་སོབ་ཀྱིས་ཡོང་སྟེ། མ་བྱུང་ན་ཕབ་ཞོ་ཕྱེད་བཏབ་ནས་ཞག་དགུ་བཞག་པས་གོང་ལྟར་འོང་ངོ་། །དེ་ལྟར་བྱུང་བ་དང་། རིལ་བུ་མཐེབ་རྡོག་ཙམ་བྱས་ཏེ་བསྐམ། དེ་ནས་ཁ་དོག་ཏུ་བསྒྱུར་བ་ནི་རི་ལུ་གཅིག་དང་། སྐྱེར་པའི་བར་ཤུན་གྱི་ཁན་དྷ་རུ་ལྡོང་རོས་ཕུལ་གང་ཡུང་བ་དེ་དང་མཉམ་པ་གཅིག་གདུ། དེ་བཙགས་པའི་ཁུ་བ་བྱ་ནག་མོའི་སྒོ་ངའི་སེར་པོ་དང་། བུད་མེད་ནུ་ཞོ་དང་སྦྱར་ནས་མིག་ལ་ཉི་མ་རེ་ལ་ལན་ཉི་ཤུ་རྩ་གཅིག་བྱུགས་ན། ཉི་མ་བདུན་གྱི་བར་ལ་མཉམ་པ་ཉིད་ཀྱི་སྣང་བར་འགྱུར་བ་ལ་ཐེ་ཚོམ་མེད་དོ། །ཡང་སྤྱང་ཚེར་མའི་མེ་ཏོག་ལུག་མིག་པ་དང་། སྤང་རྒྱན་གྱི་མེ་ཏོག་དང་། མན་དྷ་ར་བའི་མེ་ཏོག་རྣམས་གདུས་པའི་ཁན་དྷ་དང་། སྤང་མ་བྱ་རྒོད་ཀྱི་སོར་མོ་མིའི་འོ་མར་སྦྱར་ནས་གོང་ལྟར་བྱུགས་ན། ཆོས་ཀྱི་དབྱིངས་ཀྱི་སྣང་བར་འགྱུར་བ་ལ་ཐེ་ཚོམ་མེད་དོ། །ཡང་སིན་དྷུ་ར་འབྲི་མོག་ཕྱི་རྩི་སྨུག་པོ་སྦལ་རྒྱབ་ཀྱི་ཁུ་བ་དང་རྒྱ་ཤུག་འབྲས་བུ་གདུས་པའི་ཁན་དྷ་བྱ་སྒོང་མིའི་འོ་མར་སྦྱར་ནས་གོང་ལྟར་མིག་ལ་བྱུགས་ན། སོ་སོར་རྟོགས་པའི་ཡེ་ཤེས་སྣང་བར་འགྱུར་བ་ལ་ཐེ་ཚོམ་མེད་དོ། །ཡང་གོང་གི་རིལ་བུ་གཅིག་དང་བྱ་རྒོད་ཀྱི་བྲུན་དཀར་པོ་དང་། སོ་བྱའི་སྒོ་ངའི་ནང་གི་ཆུ། ཨུཏྤལ་དཀར་པོའི་མེ་ཏོག་སྤང་རྒྱན་དཀར་པོ་ཤང་ཤང་དཀར་མོ་སེ་བའི་མེ་ཏོག་དཀར་པོ་རྣམས་ཕྱེ་མར་བྱས་ཏེ། བྱ་སྒོང་མིའི་འོ་མར་སྦྱར་ལ་གོང་ལྟར་མིག་ལ་བྱུགས་ན། མེ་ལོང་ལྟ་བུའི་ཡེ་ཤེས་སྣང་བར་འགྱུར་བ་ལ་ཐེ་ཚོམ་མེད་དོ། །ཡང་གོང་གི་རིལ་བུ་དང་མེ་ཏོག་ལུག་རུ་དམར་སེར་གཉིས་ཀ་དང་། ཐང་ཤིང་ཙནྡན་གྱི་ལོ་མ་རམ་རྒྱ་སྐྱེགས་ཀྱི་ཁུ་བ་དང་སྦྱར་ལ། བྱ་སྒོང་མིའི་འོ་མ་དང་སྦྱར་ལ་གོང་ལྟར་མིག་ལ་བྱུགས་ན། བྱ་བ་གྲུབ་པའི་ཡེ་ཤེས་སྣང་བར་འགྱུར་བ་ལ་ཐེ་ཚོམ་མེད་དོ། །དབྱིབས་ནི་དྷ་རུ་རའི་འབྲས་བུ་བདུན་དང་འོལ་མ་པི་པི་གཅིག་ཙནྡན་དམར་པོའི་ཐང་ཆུ་ཁྱོར་བ་གང་། ཁྱི་དཀར་པོའི་ཀླད་པ་ཞོ་གཅིག་འདམ་གྱི་པདྨ་དཀར་པོ་དྲུག་དང་། བྱའི་སྒོ་ངའི་མར་སྲང་ཕྱེད། ཆང་བཟང་པོ་བྲེ་དོ་བྲེ་ཕྱེད་དུ་གདུས་པའི་ཁན་དྷ་རྣམས་སྦྱར་ལ། འཁར་བའི་སྣོད་དུ་བླུགས་པ་ལ། སའི་དོང་ཁྲུ་དོའི་འོག་ཏུ་ཟླ་གཅིག་ལ་བཞག་ནས། དེ་ཨེ་ལངས་ཁ་བྱེ་ནས་བལྟས་པས་སྤུ་ཆུང་ཉུང་འབྲུ་ཙམ་ཏལ་ཏལ་ཡར་ནས་འོང་ངོ་། །དེ་མ་བྱུང་ན་སྦྲང་རྒོད་ཕུལ་ཕྱེད་དང་དོ་བླུགས་ནས་ཞག་གསུམ་མནན་ནོ། །དེ་ནས་རི་ལུ་སྲན་མ་ཙམ་བྱས་ཏེ། རི་ལུ་གཅིག་དང་མཚོན་ཆའི་ཕྱེ་མ་སྦྱར་ནས་ཟོས་ན་ཐམས་ཅད་མཚོན་ཆར་འགྱུར། སྟག་གི་འགྲམ་པ་གཡས་པའི་རུས་པ་སྦྱར་ནས་ཟོས་ན་སྣང་བ་ཐམས་ཅད་སྟག་ཏུ་འགྱུར་བར་ཐེ་ཚོམ་མེད་དོ། །དུད་འགྲོ་གང་གིས་སྣང་བ་བྱེད་ཀྱང་དེའི་འགྲམ་རུས་དང་སྦྱར་གྱིན་ཟོས་པས་དེར་འགྱུར་བར་ཐེ་ཚོམ་མེད་དོ། །སའི་ཞག་དང་སྦྱར་ན་སའི་སྣང་བ། ཙནྡན་གྱི་མེ་སྟག་དང་སྦྱར་ན་མེའི་སྣང་བ། ཆབ་རོམ་དང་སྦྱར་ན་རླུང་གི་སྣང་བ། ཆུ་སྣ་བཅུ་གཅིག་དང་སྦྱར་ན་ཆུའི་སྣང་བ། ལྷང་མ་ལྷང་ཚེར་མ་དང་། ཐོད་ལེ་སྐོར་དང་སྦྱར་ནས་ཟོས་ན། ནམ་མཁའི་སྣང་བ་འཆར་རོ། །རང་གི་ཡི་དམ་གྱི་ལྷ་གང་ཡིན་པའི་སྐུ་ཤེལ་ལས་ཚོན་གང་བ་བྱས་ཏེ། དེའི་སྐུ་དང་སྦྱར་ནས་ཟོས་ན། སྣང་བ་ཐམས་ཅད་ལྷའི་སྐུར་འཆར་རོ། །ཡང་ལྷ་བཟོ་མཁས་པས་ལྷང་མ་ལྷང་ཚེར་མ་ལ་རྨ་བྱའི་ཁྲག་གིས་ཡི་དམ་གྱི་ལྷ་བྲིས་ནས་བཙན་དུག་གི་དུད་པས་བདུག་པས། འཇའ་ཚོན་སྣ་ལྔའི་ཡི་དམ་གྱི་ལྷ་རུ་འོང་སྟེ་དེ་དང་རི་ལུ་སྦྱར་ནས་ཟོས་ན་འཇའ་ཚོན་དང་ལྷའི་སྐུ་རུ་སྣང་བ་ཐམས་ཅད་དུ་འཆར་རོ། །རི་མོ་གང་འདོད་བྲིས་དེ་བལྟས་ནས་ཟོས་ན་གང་འདོད་དུ་སྣང་བ་ཡིན་ནོ། །སྒྲ་ནི་བུམ་ལྡིར་གྱི་རྔ་ལ་བརྟེན་པས་ནང་གི་ཉམས་སྐྱེ། རྫ་རྔ་ཁ་མང་ལ་བརྟེན་ན་ཕྱིའི་ཉམས་སྐྱེ། རྔ་དྲ་བ་རྒྱུད་མང་ལ་བརྟེན་པས་སྣང་བ་སྣ་ཚོགས་པའི་ཉམས་སྐྱེ། གླིང་བུའི་སྒྲ་ལ་བརྟེན་ན་ཤེས་པ་གཞན་ལ་མི་འཇུག་པའི་ཉམས་སྐྱེ། པི་ཝང་གི་སྒྲ་རྡོ་ཕག་དང་ཆ་ལང་དང་དུང་ཏིང་གི་སྒྲས་རང་བཞིན་དུ་མི་གནས་དང་། སྒྲའི་དབྱིངས་ཀྱི་དོན་རྟོགས་ཏེ་དཔེའོ། །དོན་རྣ་བའི་སྒྲ་ནི་སྒྲ་མངོན་སུམ་མོ། །རྟགས་ཐོས་པ་རྣམས་སོ། །ཤིང་ཀ་ར་བཱི་རའི་འབྲས་བུ་བདུན་ཟོས་ནས་ཉལ་ན། ལྷ་དང་ལྷ་མིན་གྱི་སྒྲ་ཐོས་སོ། །སྲི་ཤིང་གི་འབྲས་བུའི་ནད་ཕྱེ་དང་ཞིམ་ཙེ་ཏིལ་དང་། ཤིང་ཀ་ར་བཱི་རའི་འབྲས་བུ་བདུན་གྱི་ཕྱེ་འབྲུ་མར་དང་སྦྱར་ནས་རྣ་བའི་བུག་པ་གཡས་སུ་བླུགས་ན་དམྱལ་བའི་སྒྲ་ཐོས་སོ། །ཡང་ཤིང་ཀ་ར་བཱི་རའི་འབྲས་བུ་བདུན་དང་ཤིང་ལྡེམ་པ་དང་མ་ཧ་ལྡེ་བ་དང་། འབྲུག་རུས་ཀྱི་ཕྱེ་མ་དང་འབྲུ་མར་སྦྱར་ནས་རྣ་བུག་གཡོན་དུ་བླུགས་ན་ཡི་དྭགས་ཀྱི་སྒྲ་ཐོས་སོ། །ཡང་ཤིང་ཀ་ར་བཱི་རའི་འབྲས་བུ་བདུན་དང་རྡོ་རྗེ་ཅན་གྱི་ཤིང་ཆུ་ཤིང་གི་སྙིང་པོ་དང་། ཁ་བྲལ་བྲེ་བོ་སེང་སྡེང་གི་དབུས་སྙིང་གི་རྩེ་རྣམས་འབྲུ་མར་དང་སྦྱར་ནས་རྣ་བ་གཉིས་ཀར་བླུགས་ན་བྱོལ་སོང་གི་སྒྲ་ཐོས་སོ། །གོང་གི་སྒྲ་བཞི་ལ་སློབ་པའི་དུས་སུ་རྫས་དེ་ལྟ་བུ་དང་སྒྲ་འཇུག་ལྡོག་གནས་པའི་དུས་དང་བསྟུན་ནས་བརྟགས་ན། དོན་ཅིག་ཆར་འགྲུབ་པ་ལ་ཐེ་ཚོམ་མེད་དོ། །དྲི་ནི་གུ་གུལ་དཀར་པོ་རྒྱ་ཤུག་གི་འབྲས་བུ་ཨ་ཀ་རུའི་ཕྱེ་མ་དང་ག་བུར་གྱི་སྙིང་པོ་དང་། མུ་ཟི་བྱ་སྒོང་གིས་བརྟུལ་བ་དང་། ཤིང་བྱིལ་པའི་རྩ་བ་ཉའི་ཀླད་པ་འུག་པའི་མིག །རི་སྐེགས་ཀྱི་མཇུག་རྩེ་རྨ་བྱའི་མགྲིན་པ་སྲིན་པོའི་སྣའི་རྩེ་མོར་སྦྱར་ནས། བ་གླང་པོས་ཟོས་ཏེ་ཤི་བའི་ཕོ་བའི་ནང་དུ་བླུགས་སྦྲང་རྒོད་ཁྱོར་གང་ཡང་བླུགས་སྤོས་སྣ་ཚོགས་ཀྱི་ལོ་མ་དང་ཙནྡན་གྱི་ལོ་མས་བྱི་བས་ལ་ཞག་བཅུ་དགུར་མནན་ནས་ཁ་ཕྱེ་བ་དང་། སྣའི་རྩེ་མོར་ཐིག་ལེ་གཅིག་བྱས་ན་བདེ་བ་དང་མི་རྟོག་པའི་ཉམས་སྐྱེ་བ་ལ་ཐེ་ཚོམ་མེད་དོ། །རོ་ནི་བུ་རམ་གྱི་ཤིང་སྨིན་པ་སོར་བཞི་བཞིར་གཏུབས་ཏེ། སྦྲང་རྩིའི་སྙིང་པོ་བྲེ་གང་དུ་བཙོས་ཏེ་ཐེམ་པ་དང་། ཏིལ་མར་ཕུལ་དོ་བཙོ་དེ་ཐོན་པ་དང་། རྡོ་གཏུན་ནང་དུ་ཁ་ཚིར་བྱས་ཏེ། མར་བཟང་པོ་དང་ག་བུར་སྲན་མ་བདུན་དང་མཉམ་པ་གཅིག་དང་། མི་རྐང་གདུས་པའི་སྙིང་པོ་ཞོ་གཉིས་དང་སྦྲང་རྒོད་ཕུལ་གང་ཏིལ་ཆང་ཕུལ་གང་། དེ་རྣམས་དང་ཆང་སྦྱོར་བ་ཡིན་ཏེ། རྫ་གསར་པ་ཕུལ་དགུ་དགུ་ཤོངས་པ་དགུ་བྱས་ཏེ། དེ་ནས་འབྲས་བཙོས་པའི་ཆང་ལ་ཕབས་དང་སྦྲང་རྒོད་ཞོ་གཅིག་བཏབ་ལ་དེ་ལངས་པ་དང་། རྫའི་སྣོད་ཁ་ཆུང་བར་བྱས་ཏེ། དེའི་ནང་དུ་བླུགས་ལ། ཁེངས་པར་བྱས་ལ་ཤིང་ལོས་ཁ་བཅད། དེ་ནས་ཁ་སས་བཅད་དེ་ནས་ཞག་ཉི་ཤུ་རྩ་གཅིག་ན་གཅིག་གི་ནང་དུ་ནས་ཀྱི་ཆང་བཟང་པོ་དང་། མི་ཞུན་རྙིང་པ་དང་སྦྱར་ལ་བླུག །དེ་ནས་དེ་བཙགས་ལ་གཅིག་ཏུ་བསྲེ། དེ་ནས་དགུའི་མཇུག་མ་ལ་དེ་བཙགས་པ་ཕུལ་གང་འོང་བ་བྱས་ཏེ། དེ་ཕུལ་ཕྱེད་དུ་གདུ་བ་དང་། གོང་མ་རྣམས་དང་སྦྱར་ལ། ལྕེའི་སྟེང་དུ་ཐུར་མས་ལན་ཉི་ཤུ་རྩ་གཅིག་ཏུ་བཞག་ན། ཉི་མ་བདུན་གྱི་བར་ལ་ཅི་ཡང་ཡིད་ལ་མི་འགྱུ་སྟེ། རང་བཞིན་གྱི་བསམ་གཏན་ལ་ཐེ་ཚོམ་མེད་དོ། །རེག་ནི་ཨུ་རྒྱན་གྱི་ཡུལ་དྷེ་བ་རེས་བྱ་བ་ན། ཤིང་མ་ལེ་ཀིས་བྱ་བ་ལོ་མ་གཡས་སུ་འཁྱིལ་བ་ཞིག་ཡོད་དེ། ལོ་མ་མཐུར་དུ་ཟུག་པ་རྩེ་མོ་གསུམ་དུ་གྱེས་པ་ཞིག་ཡོད། དེ་བླངས་ན་དེའི་འདབ་མ་དང་དོམ་གྱི་སྙིང་ཁྲག་བྱུགས་ཏེ་དེ་རང་གི་སྙིང་ཁར་སྦྱར་ན། དེ་དང་མ་བྲལ་གྱི་བར་དུ་མི་རྟོག་པ་རྒྱུད་ལ་སྐྱེ་བ་ཡིན་ནོ། །དེ་ལྟར་དྷཱ་ཀི་མཚན་ལྡན་དང་རང་ཉིད་ཡོ་གིས་གཅིག་ལ་གཅིག་ལྟ་བ་ནི་གཟུགས་ཀྱི་བདེ་བའོ། །རྒོད་ཅིང་གླུ་ལེན་པ་ནི་སྒྲའི་བདེ་བའོ། །ཙནྡན་དང་དུ་རུ་ཀ་བྱུགས་ནས་སྣོམ་རེས་ནི་དྲིའི་བདེ་བའོ། །བུ་རམ་དང་ཀ་ར་མུར་རེས་དང་སྟེར་རེས་དང་ལྕེ་འཇིབ་རེས་ནི་རོའི་བདེ་བའོ། །ཁྲུས་ལེགས་པར་བྱས་ཏེ་ནུ་མ་ཉེད་རེས་དང་གཡའ་དགག་རེས་དང་པདྨའི་ཟེའུ་འབྲུ་ལ་མཛུབ་གུས་རེག་རེག་དང་། ནོར་བུ་དྷཱ་ཀིས་ཁས་འཇིབ་པ་དང་། གཡེར་མ་དང་སྦྲང་རྒོད་ཟེར་རྒོད་གསུམ་ནོར་བུའི་མགོ་ལ་བསྐྱོན་ནས་པདྨར་བརྫངས་ན། མ་འགུལ་ཀྱང་རང་བཞིན་གྱིས་རེག་པས་བདེ་བ་འོང་ངོ་། །དེའི་ཕྱིར་ན་གསང་སྔགས་པས་འདོད་པའི་ཡོན་ཏན་ལྔ་ལ་ལོངས་སྤྱོད་ནས། སྒོ་ལྔའི་ཞེན་པ་ལོག་སྟེ་འབྲས་བུ་སངས་རྒྱས་པ་ཡིན་པས། ཡབ་ཡུམ་གཉིས་མེད་ཀྱི་དོན་ལ་མཁས་པར་བྱའོ། །ཐིག་ལེ་མ་ཤོར་བར་བཟུང་བས་ཡུམ་གྱིས་ཐོབ་འགྲོའོ། །འདི་ཀུན་གསང་བའི་ཐབས་ཡིན་ནོ། །ཞེས་པའི་དོན་ནི། འདི་ཀུན་ཞེས་པ་འདོད་ཡོན་ལམ་དུ་འཁྱེར་བའི་ཆོས། གསང་བའི་ཞེས་པ་བློ་དམན་པའི་རིགས་ལ། ཐབས་ཡིན་ནོ་ཞེས་པ་སྒོ་ལྔའི་ཞེན་པ་དང་བྲལ་ཏེ་སངས་རྒྱས་པའི་ཚེ། ལམ་གྱི་རྟགས་ནི་ལུས་ལས་ནི། །ཞེས་པའི་དོན་ནི། ལམ་གྱི་ཞེས་པ་སངས་རྒྱ་བའི། རྟགས་ནི་ཞེས་པ་ཐུན་མོང་གི། ལུས་ལས་ནི་ཞེས་པ་རང་གི། མངོན་པར་ཕྱི་རོལ་སྣང་འགྱུར་བའི། །ཞེས་པའི་དོན་ནི། མངོན་པར་ཞེས་པ་མིའི། ཕྱི་རོལ་ཞེས་པ་ལུས་ཀྱི། སྣང་འགྱུར་བའི་ཞེས་པ་རྟགས། སྨན་ཉིད་དང་ནི་དེ་བཞིན་ནོ། །ཞེས་པའི་དོན་ནི། སྨན་ཉིད་ཅེས་པ་རྫས། དང་ནི་ཞེས་པ་སྔགས། དེ་བཞིན་ནོ་ཞེས་པ་ལས་འགྲུབ་པ། དེ་ལྟར་འདོད་པ་བརྟེན་པའི་ཡོ་གིས་ལམ་གྱི་གནས་འཁོར་བའི་རྩ་བ་བཅད་པའི་ཐབས་ནི། ལན་གཅིག་ལ་སྲིན་ལག་གཡོན་པའི་རྩ་བ་སྲེ་མོའི་རྒྱུས་བས་བཅིངསཏེ། སྦྱོར་བ་བྱས་ན་འཁོར་བ་འཕེལ་མི་སྲིད་དོ། །གཏན་དུ་བཅད་ན་ཙན་དན་དཀར་པོ་དང་ཏི་ཙ་དང་གསེར་ནས་ཙམ་སྦྱངས་པའི་གཡའ་དང་བསྲེས་ལ། སྐྱེས་པ་ལྟོ་བཀུག་ནས་ཐོ་རངས་བཏུང་ན། ཐིག་ལེ་ཉམས་ཀྱང་འཁོར་བ་འཕེལ་མི་སྲིད་དོ། །ཀ་ར་ཞོ་གཅིག་སྟག་ཤ་དེ་དང་མཉམ་པ་དང་། བྱང་བ་དུག་ཕྱུངས་པ་གསུམ་རྩི་བཞིན་དུ་བཏགས་ཏེ། ཞུ་མཁན་ཆུ་ཕུལ་གང་ལ་བཏབ་སྟེ། བུད་མེད་ལ་ལྟོ་སྟོང་ལ་བཏང་ན། འཁོར་བ་གཏན་ནས་ཆོད་དོ། །ཡང་ན་ག་བུར་གུར་ཀུམ་རྒྱ་ཚིལ་རྨ་བྱའི་སྙིང་རྣམས་ཕྱེ་མ་བྱས་ཏེ། ནོར་བུའི་རྩེར་བྱུགས་ན་ཐིག་ལེ་རྡོ་རྗེའི་བུམ་པར་ཕྱག་རྒྱ་མ་དང་མ་བྲལ་བར་གནས་པ་ཡིན་ནོ། །འོ་མ་ལ་ལྕགས་ཕྱེ་བཏབ་སྟེ། ནོར་བུའི་བུག་པར་རྡོ་ཁབ་ལེན་གྱི་རི་ལུ་བཅུག་ནས་འོ་མ་ལ་ཁ་གཏུགས་ན་འོ་མ་འཐུང་བར་བྱེད་དོ། །གཉེར་མ་མེད་པར་འདོད་ན་མུ་ཙི་རྟའི་འོ་མར་བཙོས་ལ་དེ་ཁམ་བུའི་ཚི་གུའི་མར་དང་རྩི་མར་དང་བ་དམར་མོའི་འོ་མ་དང་བསྲེས་ནས། ལུས་དག་པར་བཀྲུས་ཏེ་རྫས་ཁྱབ་པར་ཕྱུགས་ཤིང་བཏུང་ན་གཞོན་ཅིང་གཉེར་མ་འོང་མི་སྲིད་དོ། །སྐྲ་དཀར་མེད་པར་འདོད་ན། སྐྲ་བཞར་ལ་དག་པར་བཀྲུས་ཏེ་ཨ་རུ་རའི་ཆུ་བླུག །དེ་སྐམ་པོ་དང་ནགས་མཚུར་ཆུ་བླུགས་པས་སྐྲ་དཀར་ནག་པོར་འགྱུར་བ་ལ་ཐེ་ཚོམ་མེད་དོ། །སོའུ་སྐྱེ་བར་འདོད་ན། མ་ཧེའི་དཔྲལ་བའི་རུས་པ་བྱ་རྒོད་ཀྱི་བྲུན་གྱི་དཀར་པོ་ཅོང་ཟི་འབྲུག་རུས་རྣམས་མཉམ་སྟེ། རྩི་བཞིན་བཏགས་ལ་སྦྲང་རྩི་དང་ཞོ་དང་སྦྱར་ལ་རུ་སྦལ་གྱི་ཁོག་པར་བླུགས་ལ། གོས་ཀྱིས་བྱིབས་ཏེ་ཞག་བཅུ་དགུ་མནན། དེ་ནས་ཁ་ཕྱེ་ནས་བལྟས་པས་དཀར་ལ་གནག་པའི་རི་མོའམ། དམར་པོའི་རི་མོ་འོང་ངོ་། །ཡོ་གིས་ཞག་གསུམ་དུ་ཟས་གཞན་མི་ཟ་བར་འོ་མ་བསྐོལ་བ་བཏུང་ངོ་། དེ་ནས་སེའུ་ཤུལ་དུ་གོང་མའི་རྫས་བྱུག་ཅིང་སྦྲང་རྩིས་སྟེང་མནན་དེ་ལྟར་ཡང་ཡང་བྱས་ན་ཟླ་བ་གཅིག་ན་སོའུ་སྐྱེའོ། །ལོ་དུས་སོང་ཙ་ན་རྫས་བྱུག་ཅིང་། དེའི་སྟེང་དུ་སྦྲང་རྩི་བྱུག །དེའི་སྟེང་དུ་ཟར་མའི་མར་བྱུགས་པས་སོ་དང་སོ་སྙིང་མཁྲེགས་ཤིང་མདོག་དང་ལྡན་པར་འགྱུར་རོ། །མཚན་མོ་འོད་འཕྲོ་ཞིང་གོས་མི་དགོས་པར་བྱེད་ན། སྤྱང་ཚེར་གྱི་རྩེ་ཁྲོག་ཆེན་གྱི་ཚི་བ་དང་། ཤུག་རྩི་ཐང་ཚི་རྒྱ་ཚ་ར་ཚ་ཤང་ཚ་དང་། ཁ་རུ་ཚ་ལྕེ་མྱང་ཚ་མུ་ཚི། དེ་ཆ་མཉམ་པ་རྣམས་ཕྱེ་མར་བཏགས་ཏེ། སྐྱུང་གའམ་བྱ་མོ་ནག་མོའི་སྒོ་ངའི་སེར་པོ་དང་ཚི་བ་ལ་བཏབ་སྟེ། བག་ཟན་གྱིས་དྲིལ་ལ་སླ་ངར་མར་ནག་ཕུལ་གང་དེ་ལ་ཐིམ་པར་བཙོ། དེ་དང་རྡོ་སོལ་ངར་ལྡན་གྱི་ལྕགས་ཕྱེ་དང་། སྦྱར་ནས་རས་སམ་གོས་ཀྱི་ཐོང་ཀ་ལ་བྱུགས་ན། རླུང་ཕྱོགས་སམ་ཕུས་གདབ་ཅིང་མཆིལ་མ་བཏབ་ན། འོད་མེ་བདུན་གྱི་ཚད་ཙམ་དུ་གསལ་ཞིང་གོས་མི་དགོས་ཏེ་དྲོད་འབར་བར་འགྱུར་རོ། །འཚིགས་པ་ཙམ་བྱུང་ན་ས་ནུའི་ཆུ་བླུག་གོ། །མ་ཤི་བ་དང་ཤི་བའི་དུས་སུ། གདུང་འབྲུལ་བར་འདོད་ན། མུ་ཏིག་དང་མུ་མེན་ཤེལ་དངུལ་ཆུ་ཟེ་ཚ་ཞོ་རེ་སྦྱར་ཏེ། རྫ་གསར་བའི་ནང་དུ་ར་དཀར་མོའི་འོ་མ་ཕུལ་གང་དང་བཅས་ཏེ་བླུགས་ལ། ཁ་ལེགས་པར་བཅད་ལ་འབའ་ཆས་གྲིལ་ཏེ་ཁམ་སས་གྲིལ། ཡང་ན་བའི་གཅི་བས་གྲིལ། དེ་ཐབ་ཁུང་དུ་བཅུག་ལ་སོལ་བ་སྤུངས་ཏེ། སྦུད་པ་གཉིས་ཀྱིས་རེས་མོས་བུས། ལན་གསུམ་དུ་བསྲེག་ཅིང་བལྟས་པས། རྟགས་ནི་ལྟེང་ལྟེང་མིག་གིས་མི་བཟོད་ན་ཕེབས་པ་ཡིན་ནོ། །གལ་ཏེ་དེ་ལྟར་མ་བྱུང་ན། སྟར་བུ་སྲན་མ་བདུན་དང་མཉམ་པ་བླུག །གོང་ལྟར་བསྲེགས་པས་གཏན་ལ་ཕེབས་སོ། །དེ་ནས་གོང་མའི་རྫས་དང་རིང་བསྲེལ་ཁྱི་ལུད་མེས་བསྲེགས་པ་གཉིས། སྦྱར་ནས་རང་གར་འདོད་པར་བྱུགས་པ་དང་མཉམ་པར། དེ་ནས་གདུང་ཡང་དེ་དང་མཉམ་པར་འབྲུལ་ལོ། །གླང་པོ་ཆེའི་རུས་པའམ་ཐོད་པའམ་རུས་པ་ལ་གོང་མའི་སྐུ་བྲིས་ཏེ། མེས་བསྲེགས་ན་སྐུ་འོང་ངོ་། །ཡང་ན་བསེ་རུའི་ནང་དང་སྦྱར་ཏེ། སྟག་གི་རྐན་ཕུག་ཤ་ཆེན་དང་སྦྱར་ནས་བྱུགས་ན་མཆོད་རྟེན་འོང་ངོ་། །ཡང་ན་ཡོ་གར་འདུག་པའི་ཆུར་ཚ་བ་དྷ་ཀ་ཏ་ཤའི་རྩ་བ་དང་། ཧ་ཤད་ཕྱེ་མ་རྣམས་དང་སྤོས་དཀར་སྦྱར་ཏེ། ཆོས་འཆད་དུས་ན་དུད་པ་བཏང་བས་འཇའ་ཚོན་འཁྲུག་ཅིང་འཇུག་པར་འགྱུར་རོ། །ཡང་ན་ཡོ་གི་ཡིས་སྤྲུ་མ་འོམ་བུ་སེང་ལྡེང་དང་། རྒྱ་ཤུག་ཙནྡན་ལོ་མ་དང་ལན་ཚྭ་བྱ་རྒོད་རྐང་མར་རྣམས་ལེགས་པར་སྦྱར་ནས་རང་གིས་ལུས་ལ་བྱུགས་ན། དུད་འགྲོའི་ཚོགས་རྣམས་འདུས་ཤིང་ཕྱག་དང་བསྐོར་བ་བྱེད་པར་འགྱུར་རོ། །ཡོ་གིས་སྤྱོད་པ་རྩོམ་པའི་དུས་སུ། ཀུ་ཀུ་ར་ཙ་མི་ཡོང་བར་བྱེད་ན། སྦྲང་རྒོད་བུ་རམ་འབྲིའི་ཀླད་པ། ཁྱི་སྦྱོར་བ་བྱེད་པའི་དུས་སུ་ཁྱི་མོའི་སྟུ་བཀབ་ལ་ཕྱིང་པ་སླན་ཏེ། དེ་ལ་ཁྱིའི་ས་བོན་འཛགས་པ་རྣམས་འབྱར་བ་འོང་སྟེ། དེ་བཀོག་ལ་གོང་གི་རྫས་དང་བསྲེས་ནས་སྔགས་འདི་སྟོང་ཚོ་བཞི་བཟླས་པ་ལུས་ལ་ཅོར་ཅོར་དུ་བསྲེལ་ལོ། །ༀ་ཙ་ཙ་ཙོ་ཙོ། ཁུང་ཁུང་། ཐུས་ཤི་ཐུས་ཤི། ཧ་སེ་ཧ་སེ། ཤད་མ་མ་རིལ་རིལ། ཞེས་བཟླས་ཏེ་ཁྱི་བྱུང་བ་དང་། རང་གི་རྐང་པའི་འོག་ནས་ས་སྤར་གང་བླངས་ཏེ་ཁྱིའི་ཕྱོགས་སུ་གཏོར་རོ། །དེས་ནི་ཁྱི་ཐམས་ཅད་མཇུག་མ་བསིལ་ཞིང་འདུག་པར་འགྱུར་རོ། །རི་ལ་བསྒོམ་ཞིང་ལམ་འགྲུལ་སྐྱེལ་མ་བྱ་བའི་ཕྱིར། ཆོམ་རྐུན་ཇག་པ་འཆིང་བ་ནི། བ་སྤྲུ་བ་རང་འཐག་ལྟེ་ཕྱེ་ཉུང་དཀར་གསུམ་བསྲེས་ལ། སྔགས་འདི་འབུམ་དུ་བཟླས་སོ། །ཨཱོྂ་ཨོ་ཏི། ཨི་ཏན་སོད་ཡ། དེ་ནས་དགྲ་བྱུང་བ་དང་རྫས་གཏོར་ཅིང་སྔགས་འདི་བཟླས་སོ། །ཨཱོྂ་ཨོ་ཏི། ཨི་ཏན་སོད་ཡ། བྱས་པས་འགྲོ་མི་ཤེས་སོ། །ལྕེ་ཡ་ཀི་ནན། ཨིས་ཀྲོ་ཏ་ཡཱ་དན་སོད་བྱས་པས་སྨྲ་མི་ཤེས་སོ། །ཧ་ཏཱ་ཧ་ཏཱ། མུ་ཡུ་མུ་ཡུ། ངག་ངག་དུ་དུ། ཨིས་སྐྲ་ན་སོད། བྱས་པས་སྙིང་གི་མི་དྲན་ནོ། །སླར་གསོ་ན། ནི་ཤ་ཀུ་རུ། ཁ་སོ་ཏྲི་ཡ་པ། སེན་མེན་ཡཾ། སུ་ཏྲི་ཡཾ་ཞེས་ཆུ་གཙང་མ་ལ་བཏབ་སྟེ་ཇག་པ་ལ་གཏོར་ན་གྲོལ་ལོ། །ཡོ་གི་ལ་མཚོན་གྱིས་མི་ཆོད་པར་བྱེད་ན། ཞག་བདུན་སྔགས་འདི་ལ་རང་ལུས་མེར་བསྒོམས་ལ་བཟླས་སོ། །ཨཱོྂ་རྣོར་སོད། ཆུམ་བཟློག །དྲིལ་ནན་མི་སྭཱ་ཧཱ། དགོས་དུས་སུ་ས་གཙང་མ་ལ་བརྒྱ་རྩ་བརྒྱད་བཟླས་ཏེ། རང་གི་ལུས་ལ་བྱུགས། དགྲའི་མཚོན་གྱི་ཕྱོགས་སུ་གཏོར་ན་མཚོན་ཁ་འཆིང་ཞིང་ཕིག་པར་མི་འགྱུར་རོ། །ཡང་ཡོ་གི་དུ་རུ་ཀའི་དམག་དང་མིས་མི་མཐོང་བར་བྱེད་ན། མུན་པ་ནག་པོར་བསྒྲུབས་ཏེ། སྐྱེས་པ་གྲིར་ཤི་བའི་པགས་པ་ཤ་དང་རོ་བསྲེགས་པའི་སྦུར་ནག་གཉིས་རྩི་བཞིན་དུ་བཏགས་ཏེ། རྭ་ནང་དུ་སྔགས་འདིས་ཞག་ཉི་ཤུ་རྩ་གཅིག་ཏུ་བསྒྲུབ་བོ། །ཨཱོྂ་ན་མོ་རུ་ཏྲི་ཡ་ན་མོ། ཧི་རི་མི་རི་སྭཱ་ཧཱ། ནམ་དགོས་པའི་དུས་སུ་སྨིན་ཕྲག་ལ་བྱུགས་ན་སུས་ཀྱང་མི་མཐོང་སྟེ། སླར་ཕར་འཇོམས་ནུས་པར་ཐེ་ཚོམ་མེད་དོ། །འདི་ཀུན་འཇིག་རྟེན་དྲང་དོན་དུ། །ཞེས་པའི་དོན་ནི། འདི་ཀུན་ཞེས་པ་ཐབས། འཇིག་རྟེན་ཞེས་པ་སོར་བཞག་དང་ཕྱིན་ཅི་ལོག་གཉིས། དྲང་དོན་དུ་ཞེས་པ་ཡང་དག་པའི་དོན་ལ། སྐལ་བ་ཅན་གྱི་སྤྱོད་ཡུལ་ལོ། །ཞེས་པའི་དོན་ནི། སྐལ་བ་ཞེས་པ་ཚོགས་བསགས་པའི། ཅན་གྱི་ཞེས་པ་ཚེ་འདི་ལ། སྤྱོད་ཡུལ་ལོ་ཞེས་པ་མཆོག་རང་འདོད་དང་བྲལ་བའི་ཡོ་གིའི། འདི་ཡི་ཐབས་ནི་སྣ་ཚོགས་པས། །ཞེས་པའི་དོན་ནི། འདི་ཡི་ཞེས་པ་བསྟན་པའི་བུ་གཅིག །ཐབས་ནི་ཞེས་པ་མཆོག་དང་ཐུན་མོང་གཉིས་ཀའི། དེའི་རྫས་ནི་བདུན་ཏེ། བླ་མ་མཚན་ལྡན་དང་ཨེ་ཀ །རིག་མ་མཚན་ལྡན་དང་དྷུ་ཡི། དེ་བཞིན་གཤེགས་པའི་རིང་བསྲེལ་དང་ཏྲཱི། སྐྱེ་བ་བདུན་པའི་ཤ་དང་རྟག་ཏུ་ངུ་དང་ཙི་རི། དུམ་གཅིག་བྷནྡྷ་བཟང་པོ་དང་པན་ཙ། དྲི་མེད་ཤེལ་སྒོང་དྭངས་པོ་དང་ཚ་ཊུ། བསྟན་པའི་རང་བཙས་སངས་རྒྱས་སས་གཅིག་པོ་དང་ཙེ་ན། དེ་རྣམས་འཛོམ་ན་ནོར་བུ་དབང་གི་རྒྱལ་པོ་ཡིན་པ་དང་ཚ་དྷཱུ། དམིགས་པ་གང་འདོད་ལ་གཏད་ཅིང་། གསོལ་བ་བཏབ་པ་དང་གྷ་ད། བསམས་པ་ཡིད་བཞིན་དུ་འགྲུབ་པའི་ཚེ་ཧཱ། ནོར་འདོད་ན་རིང་བསྲེལ་ཤེལ། སྐྱེ་བདུན་ཤ །བསྟན་པའི་བུ་གཅིག་ཐོད་པར་བཞུགས་སུ་གསོལ། དར་སྣ་ལྔས་གྲིལ་ལ་གང་འདོད་པའི་མཆོད་པ་འབུལ་ཞིང་གསོལ་བ་བཏབ་སྟེ་ཚར་གསུམ་གསུང་བསྒྲགས་ན་མི་འགྲུབ་རེ་ནི་ན་ར་ཀན། སྣ་ཚོགས་པས་ཞེས་པ་འདི་ལ་བརྟེན་པའི་ལས་ཚོགས་ཐུག་པ་མེད་དོ། །ཁྱད་པར་སེམས་ཅན་གྱི་དོན་དུ་ཆར་འབེབས་ན་འབྲུག་ཤིང་ནམ་མཁའ་མ་མཐོང་བ་དང་ཆུ་ཤིང་གཉིས་ལས་ཕུར་པ་སོར་བཞི་ལས་མི་ཐུང་བ་རེ་བྱས་ཏེ། དེ་གཉིས་རས་གཙང་མའི་ཁུག་མར་བཅུག་སྟེ། ཆར་འབེབས་པའི་དུས་སུ་དཀོན་མཆོག་དང་མཁའ་འགྲོ་དང་ཆོས་སྐྱོང་དང་ཀླུ་གཏོར་རྒྱས་པར་བཏང་སྟེ། ཕུར་པ་གཉིས་ལ་ཐག་པ་བཏགས་ལ་ནམ་མཁའ་མ་མཐོང་བར་འབྱུང་བ་ཆུའི་ཉི་མ་དྭངས་དུས་སུ། ཆུ་མིག་ཏུ་བཅུག་ནས་གཅིག་གིས་བསྟན་པའི་བུ་གཅིག་རལ་གྲིའི་ལྕེ་ཡིས་བཀླག་ཅིང་། གཅིག་གིས་སྦྲུལ་ཤ་བསྲེག་ཅིང་སྔགས་འདི་བཟླས་སོ། །ཧ་རི་ནི་དྷཱ་ཀི་ཙ་རི་ཆར་ཕོབ་ཕོབ། ཁཾ་ཁཾ་ནཱ་ག་ར་ཙ་ཕན་ཙ་བྷ་རི་ཤ་ཡ་ཕོབ་ཕོབ། ཁཾ་ཁཾ་ཞེས་བཟླས་སོ། །ཆེས་ན་ཕུར་པ་བཏོན་ཏེ་གོང་གི་རང་ཁུག་ཏུ་སྦས་པས་ཆད་དོ། །གཞན་གྱི་འདོད་ཞེན་མཐའ་དགག་ཕྱིར། །ཞེས་པའི་དོན་ནི། གཞན་གྱི་ཞེས་པ་ཐེག་པ་ཐུན་མོང་བ། འདོད་ཞེན་ཞེས་པ་ཐུན་མོང་གི་སྒྲུབ་རྟགས་ཀྱི། མཐའ་དགག་ཕྱིར་ཞེས་པ་སངས་རྒྱས་པའི་སྔོན་དུ། རབ་ཏུ་གསང་བར་བྱུང་བའོ། །ཞེས་པའི་དོན་ནི། རབ་ཏུ་ཞེས་པ་ཐུན་མོང་གི་ཚིག་ཙམ་རླུང་ཕྱོགས་ཙམ་དུ་ཡང་། གསང་བར་ཞེས་པ་ལོག་ལྟ་ཅན་ཐེག་པ་ཐུན་མོང་གི་ཆོས་བདག་ཅན་དུ་མ་གཏོགས་པ་རྣམས་ལ། བྱུང་བའོ་ཞེས་པ་ཡེ་གདོད་མ་ནས་རང་བབས་སུ་ཆོས་ཉིད་ཀྱི་རང་སྒྲར་རོ། །འགྲོ་བའི་དོན་དུ་ཐུན་མོང་གི་ལས་བསྟན་པའི་ལེའུ་སྟེ་ལྔ་པ་རྫོགས་སོ།། །།ས་མ་ཡ། རྒྱ་རྒྱ་རྒྱ། ༈ ད་ནི་ལེའུ་དྲུག་པ་འགྲོལ་ཏེ། ཁམས་ལ་བསླབ་པའི་ཐབས་ཡོད་པས། །ཞེས་པའི་དོན་ནི། ཁམས་ལ་ཞེས་པ་མེ་རླུང་ནམ་མཁའི། དེ་དག་ཐམས་ཅད་འདུས་པ་བྱང་སེམས་དཀར་དམར་རོ། །བསླབ་པའི་ཞེས་པ་ཟུང་འཇུག་ལ། ཐབས་ཡོད་པས་ཞེས་པ་སངས་རྒྱ་བའི། དྲན་རྫོགས་ཕྱག་རྒྱའི་ངང་དུ་སྦྱོར། །ཞེས་པའི་དོན་ནི། དྲན་རྫོགས་ཞེས་པ་སྐད་ཅིག་ལ། ཕྱག་རྒྱའི་ཞེས་པ་ལས་དམ་ཚིག་ཆོས་ཕྱག་རྒྱ་ཆེན་པོའོ། །ངང་དུ་སྦྱོར་ཞེས་པ་དབུགས་ལ་སླེབ་ཅིང་བཏགས་པ་ཙམ་གྱིས། དབང་པོའི་ཞེན་པ་བཟློག་པའི་ཕྱིར། །ཞེས་པའི་དོན་ནི། དབང་པོའི་ཞེས་པ་སྒོ་ལྔའི། ཞེན་པ་ཞེས་པ་རང་རྒྱུད་པ་སྟེ། བཟློག་པའི་ཕྱིར་ཞེས་པ་རིགས་ལྔ་ཡུམ་ལྔར། ཀརྨ་རཀྵ་གྷི་ཧང་ཏི། །ཞེས་པའི་དོན་ནི། ཉོན་མོངས་པའི་བདུད་རང་སར་དག་པར་བྱེད་པའི་སྙིང་པོའོ། །ཕུང་པོའི་ཞེན་པ་བཟློག་པའི་ཕྱིར། །ཞེས་པའི་དོན་ནི། ཕུང་པོའི་ཞེན་པ་ཞེས་པ་གཟུགས་ཚོར་བ་འདུ་ཤེས་འདུ་བྱེད་རྣམ་པར་ཤེས་པའོ། །ཞེན་པ་ཞེས་པ་རང་རྒྱུད་པ་དེ། བཟློག་པའི་ཕྱིར་ཞེས་པ་རིགས་ལྔ་ཡབ་ལྔ། བྷེ་ག་ར་ན་སོ་གད་གླིང་། །ཞེས་པའི་དོན་ནི། ཕུང་པོའི་བདུད་རང་སར་གྲོལ་བར་བྱེད་པའི་སྙིང་པོའོ། །ཡུལ་ཀུན་ཞེན་པ་བཟློག་པའི་ཕྱིར། །ཞེས་པའི་དོན་ནི། ཡུལ་ཀུན་ཞེས་པ་གཟུགས་སྒྲ་དྲི་རོ་རེག་གོ། །ཞེན་པ་ཞེས་པ་རང་རྒྱུད་པ་དེ། བཟློག་པའི་ཕྱིར་ཞེས་པ་ཞིང་ཁམས་སུ། པུ་ཀཱ་རི་ལ་བྷ་དྷུ་ཏྲི། །ཞེས་པའི་དོན་ནི། ལྷའི་བུའི་བདུད་རང་སར་གྲོལ་བར་བྱེད་པའི་སྙིང་པོའོ། །སེམས་ཀྱི་དངོས་པོ་སྤུར་བའི་ཕྱིར། །ཞེས་པའི་དོན་ནི། སེམས་ཀྱི་ཞེས་པ་མི་དྲན་དགུ་དྲན་འདི། དངོས་པོ་ཞེས་པ་སྐུ་གསུམ། སྤུར་བའི་ཕྱིར་ཞེས་པ་ཀ་དག་ཏུ། རཾ་པ་ཀ་ལ་ས་མི་ཁྱེ། །ཞེས་པའི་དོན་ནི། འཆི་བདག་གི་བདུད་རང་སར་གྲོལ་བར་བྱེད་པའི་སྙིང་པོའོ། །བྱུང་ཚོར་གནས་སུ་གཅོད་པའི་ཕྱིར། །ཞེས་པའི་དོན་ནི། བྱུང་ཚོར་ཞེས་པ་བདེ་སྡུག་གཉིས། གནས་སུ་ཞེས་པ་གཞི་ལ། གཅོད་པའི་ཕྱིར་ཞེས་པ་དངོས་མེད་དུ། མ་ཏང་ཕར་ཕེར་རས་མི་ཏི། །ཞེས་པའི་དོན་ནི། ཀུན་གཞི་རང་སར་གྲོལ་བར་བྱེད་པའི་སྙིང་པོའོ། །འདུས་ཚོགས་སྣང་བ་ངོས་གཟུང་ཕྱིར། །ཞེས་པའི་དོན་ནི། འདུས་ཚོགས་ཞེས་པ་འཁོར་འདས་ཀྱི་ཆོས་མ་ལུས་པ། སྣང་བ་ཞེས་པ་མངོན་སུམ། ངོས་བཟུང་ཕྱིར་ཞེས་པ་རང་སྣང་དུ། བ་ཌ་རེཀྚ་ས་མིག་རླུང་། །ཞེས་པའི་དོན་ནི། རང་སྣང་རང་སར་གྲོལ་བར་བྱེད་པའི་སྙིང་པོའོ། །རིག་པ་བཙོན་རར་གཞུག་པའི་ཕྱིར། །ཞེས་པའི་དོན་ནི། རིག་པ་ཞེས་པ་མཚན་ཉིད་འཛིན་པའི་རིག་པ་མི་དྲན་དགུ་དྲན་འདི། བཙོན་རར་ཞེས་པ་གཞི་འཛིན་པའི་རིག་པ་རྡོ་རྗེ་ལུ་གུ་རྒྱུད། གཞུག་པའི་ཕྱིར་ཞེས་པ་ཟབ་པའི་གནད་ལ་བརྟེན་ནས། ཨ་ཀེ་ར་ན་བྷ་ཙེག་ཤ །ཞེས་པའི་དོན་ནི། ཕྱིར་མི་ལྡོག་པར་བྱེད་པའི་སྙིང་པོའོ། །འཁྲུལ་པའི་རང་རྒྱུད་ཁུངས་བཅད་ཕྱིར། །ཞེས་པའི་དོན་ནི། འཁྲུལ་པའི་ཞེས་པ་ཁམས་གསུམ་གྱིསེམས་ཅན། རང་རྒྱུད་ཅེས་པ་དངོས་པོར་འཛིན་པ། ཁུངས་བཅད་ཕྱིར་ཞེས་པ་ངོ་བོ་རང་བཞིན་ཐུགས་རྗེ་གསུམ། ཡ་རི་མུ་ཊ་ས་གྷུ་ལེ། །ཞེས་པའི་དོན་ནི། ཁམས་གསུམ་རང་སར་གྲོལ་བར་བྱེད་པའི་སྙིང་པོའོ། །རིགས་དྲུག་རིམ་གྱིས་བསྒྲལ་བའི་ཕྱིར། །ཞེས་པའི་དོན་ནི། རིགས་དྲུག་ཅེས་པ་འགྲོ་བ། རིམ་གྱིས་ཞེས་པ་གོང་ནས་གོང་སྟེ། སྡིག་ཅན་ཉན་ཐོས་རྣམས་དང་མཉམ་པས་མངོན་ནོ། །བསྒྲལ་བའི་ཕྱིར་ཞེས་པ་འཁོར་བ་ལས། ཡ་སིང་ར་རླུང་པ་ལ་ཡ། །ཞེས་པའི་དོན་ནི། རིགས་དྲུག་རང་སར་གྲོལ་བར་བྱེད་པའི་སྙིང་པོའོ། །འཁོར་བ་དོང་ནས་གདོན་པའི་ཕྱིར། །ཞེས་པའི་དོན་ནི། འཁོར་བ་ཞེས་པ་ངན་སོང་གསུམ་དང་། དོང་ནས་ཞེས་པ་ཞེ་འཇིགས་ཤིང་གཏིང་རིང་བ་ཐོན་དུས་མེད་པའོ། །གདོན་པའི་ཕྱིར་ཞེས་པ་བྱིན་བརླབས་རང་བབས་འདིས། མ་མ་ཀོ་ལིང་ས་མཱ་ཏ། །ཞེས་པའི་དོན་ནི། ངན་སོང་དོང་ནས་སྤྲུག་པར་བྱེད་པའི་སྙིང་པོའོ། །མི་ཤི་བའི་དུས་སུ་ཡང་རིགས་དྲུག་གི་དཀྱིལ་འཁོར་བཞེངས་ཏེ། སྙིང་པོ་འདི་ཛབ་ཏུ་བགྲང་ཞིང་། ཞག་དྲུག་ལ་ཚེ་འདས་དམིགས་པས་རིམ་པ་བཞིན་རིགས་དྲུག་ལས་དྲངས་ཏེ། བདུན་པ་ལ་འོད་གསལ་གྱི་དཀྱིལ་འཁོར་ཐིག་ལེ་ཆེན་པོ་ལྟར་བཞེངས་ཏེ། རྫོགས་པ་རང་བྱུང་གི་ལམ་བསྟན་པའི་ཚིག་རྣམས་ཀྱིས་ངོ་སྤྲད་པས། ནམ་མཁའ་ལ་འཇའི་ཚོགས་འཁྲུགས་ཤིང་ཚེ་འདས་གྲོལ་བ་ལ་ཐེ་ཚོམ་མེད་དོ། །ཆོས་ཅན་ཐུར་དུ་གཞུག་པའི་ཕྱིར། །ཞེས་པའི་དོན་ནི། ཆོས་ཅན་ཞེས་པ་སྤྱི། ཐུར་དུ་ཞེས་པ་དོན་འགྱུར་བ་མེད་པའི། གཞུག་པའི་ཕྱིར་ཞེས་པ་ཐིག་ལེ་ཉག་གཅིག་ལ། གྷ་རིང་ཡཾ་པ་རི་མཾ་ཏི། །ཞེས་པའི་དོན་ནི། ཡང་དག་དོན་ལ་སྐྱེལ་བར་བྱེད་པའི་སྙིང་པོའོ། །རོལ་པའི་བྱུང་ཁུངས་སྤུར་བའི་ཕྱིར། །རོལ་པའི་ཞེས་པ་ཆོས་ཉིད་ཀྱི། བྱུང་ཁུངས་ཞེས་པ་དང་པོའོ། །སྤུར་བའི་ཕྱིར་ཞེས་པ་ནམ་མཁའ་ལ་མངོན་སུམ་དུ། བུ་ག་སིང་ཧ་ཕ་གྷ་ལ། །ཞེས་པའི་དོན་ནི། རང་ཤར་རང་གྲོལ་བར་བྱེད་པའི་སྙིང་པོའོ། །ཞེན་པའི་ཕྲེང་ཐག་གཅད་པའི་ཕྱིར། །ཞེས་པའི་དོན་ནི། ཞེན་པའི་ཞེས་པ་འཁོར་བ་ལས། ཕྲེང་ཐག་ཅེས་པ་འཛིན་པའི། གཅད་པའི་ཕྱིར་ཞེས་པ་ཡུལ་རིག་སྣང་དུ། ར་མི་སི་པི་ཁེ་ཏ་པ། །ཅེས་པའི་དོན་ནི། ཞེན་ཡུལ་དབྱིངས་སུ་གྲོལ་བར་བྱེད་པའི་སྙིང་པོའོ། །ལུག་རྒྱུད་ཨར་ལ་གཏད་པའི་ཕྱིར། །ཞེས་པའི་དོན་ནི། ལུག་རྒྱུད་ཅེས་པ་ཟུང་འཇུག་གཉིས་མེད་དུ་འབྲེལ་ཆགས་པའི། ཨར་ལ་ཞེས་པ་ཡོལ་སྒྲིབ་མེད་པར། གཏད་པའི་ཕྱིར་ཞེས་པ་ཉམས་ལེན་གྱིས། བི་ཁུ་མ་ལ་པ་ཏཾ་ཀི། །ཞེས་པའི་དོན་ནི། ཉམས་གོང་ནས་གོང་དུ་འཕེལ་ཞིང་གྲོལ་བར་བྱེད་པའི་སྙིང་པོའོ། །ལྷ་ཡི་ཕྱག་རྒྱ་ལྟ་བའི་ཕྱིར། །ཞེས་པའི་དོན་ནི། ལྷའི་ཞེས་པ་རིག་སྐུ་རིགས་ལྔའི། ཕྱག་རྒྱ་ཞེས་པ་བཅུ། ལྟ་བའི་ཕྱིར་ཞེས་པ་མཐོང་བྱེད་ཀྱི་རིག་པས། ས་མཱ་ཉི་བ་དྷེ་ར་པ། །ཞེས་པའི་དོན་ནི། རིག་པ་ཚད་ལ་ཕེབས་ཤིང་ཞིང་ཁམས་ཤེས་བྱེད་ཀྱི་རིག་པར་གྲོལ་བར་བྱེད་པའི་སྙིང་པོའོ། །ལྟ་སྒོམ་ལོག་པ་དག་བྱའི་ཕྱིར། །ཞེས་པའི་དོན་ནི། ལྟ་སྒོམ་ཞེས་པ་མཚན་ཉིད་འཛིན་པའི་རིག་པ་རིག་སྟོང་ཟུང་འཇུག་གི། ལོག་པ་ཞེས་པ་དང་། དག་བྱའི་ཕྱིར་ཞེས་པ་ཡེ་བསྲུང་ཆེན་པོའི་དམ་ཚིག་གིས། བཛྲ་སཏྭ་ཌི་ཌྷོ་མེ། །ཞེས་པའི་དོན་ནི། རྡོ་རྗེ་སེམས་དཔའི་རིག་པ་ལ་རང་རྫོགས་སུ་གྲོལ་བར་བྱེད་པའི་སྙིང་པོའོ། །ས་ལམ་དུས་གཅིག་གཅད་པའི་ཕྱིར། །ཞེས་པའི་དོན་ནི། ས་ལམ་ཞེས་པ་ཐེག་པ་དགུའི། དུས་གཅིག་ཅེས་པ་དོན་མཐོང་བའི། གཅད་པའི་ཕྱིར་ཞེས་པ་མངོན་སུམ་དུ། གྷེ་བ་སུ་གྷར་རྣ་མ་ཡཻ། །ཞེས་པའི་དོན་ནི། ས་ལམ་ཆིག་རྫོགས་གྲོལ་བར་བྱེད་པའི་སྙིང་པོའོ། །ཡིད་དཔྱོད་ལྟ་བ་ཁུངས་གཅད་ཕྱིར། །ཞེས་པའི་དོན་ནི། ཡིད་དཔྱོད་ཅེས་པ་དོན་མ་རྟོགས་པའི། ལྟ་བ་ཞེས་པ་རང་བཞིན་གྱི། ཁུངས་གཅད་ཕྱིར་ཞེས་པ་རིག་པའི་རྡོ་རྗེ་ལུ་གུ་རྒྱུད་དུ། དྷརྨ་པ་ཏི་ས་གྷུ་ལི། །ཞེས་པའི་དོན་ནི། གོལ་ས་ཐམས་ཅད་རང་ཐོག་ཏུ་གྲོལ་བར་བྱེད་པའི་སྙིང་པོའོ། །སྐུ་གསུམ་ལམ་དུ་བླང་བའི་ཕྱིར། །ཞེས་པའི་དོན་ནི། སྐུ་གསུམ་ཞེས་པ་ཆོས་སྐུ་ལོངས་སྐུ་སྤྲུལ་སྐུའོ། །ལམ་དུ་ཞེས་པ་ལྟ་སྒོམ་སྤྱོད་པའི་དུས་སུ། བླང་བའི་ཕྱིར་ཞེས་པ་རིག་པ་མངོན་སུམ་དུ། ར་སྨི་ས་མཱ་ཁ་རྒད་ཚེ། །ཞེས་པའི་དོན་ནི། སྐུ་གསུམ་ལམ་དུ་ཆོད་ཅིང་འཛིན་པ་རང་སར་གྲོལ་བར་བྱེད་པའི་སྙིང་པོའོ། །སྣང་བ་དངོས་སུ་བླང་བའི་ཕྱིར། །ཞེས་པའི་དོན་ནི། སྣང་བ་ཞེས་པ་ཆོས་ཉིད་མངོན་སུམ་གྱི། དངོས་སུ་ཞེས་པ་ཡིད་དཔྱོད་མ་ཡིན་པར། བླང་བའི་ཕྱིར་ཞེས་པ་རང་སྣང་ལྷུན་གྲུབ་ཏུ། རུ་པ་ས་མི་མི་ཏ་ལཾ། །ཞེས་པའི་དོན་ནི། ཅེར་གྲོལ་དུས་མཉམ་མ་གྲོལ་བར་བྱེད་པའི་སྙིང་པོའོ། །སྒྲ་ཡི་ཞེན་པ་མཐའ་གཅད་ཕྱིར། །ཞེས་པའི་དོན་ནི། སྒྲ་ཡི་ཞེས་པ་འབྱུང་བཞིའམ། ཞེན་པ་ཞེས་པ་རང་རྒྱུད་དུ། མཐའ་གཅད་ཕྱིར་ཞེས་པ་བརྗོད་དུ་མེད་པར། ང་ཏིག་པ་ཡཾ་ཀ་ལི་ས། །ཞེས་པའི་དོན་ནི། བརྗོད་མེད་ཚིག་འདས་སུ་གྲོལ་བར་བྱེད་པའི་སྙིང་པོའོ། །བསམ་གཏན་ཆེན་པོའི་ས་གནོན་ཕྱིར། །ཞེས་པའི་དོན་ནི། བསམ་གཏན་ཞེས་པ་ངོ་བོ་རང་བཞིན་ཐུགས་རྗེ་གསུམ་ལ། ཆེན་པོའི་ཞེས་པ་གོང་ན་མེད་པའི། ས་ནོན་ཕྱིར་ཞེས་པ་བཅུ་དྲུག་རྫོགས་ཆེན་རང་བཞིན་གྱི། ག་ཚ་བ་ལ་ས་ཨི་ཊཾ། །ཞེས་པའི་དོན་ནི། ས་ལམ་ཆིག་ཆོད་ལ་གྲོལ་བར་བྱེད་པའི་སྙིང་པོའོ། །ཕྲིན་ལས་མཐའ་རུ་དབྱུང་བའི་ཕྱིར། །ཞེས་པའི་དོན་ནི། ཕྲིན་ལས་ཞེས་པ་སངས་རྒྱས་ཀྱི། མཐའ་རུ་ཞེས་པ་ཚེ་འདིའི་མཐའ་དབུགས་ཆད་པ་དང་། དབྱུང་བའི་ཕྱིར་ཞེས་པ་རྩོལ་མེད་ལྷུན་གྲུབ་ཏུ། ཀརྨ་ཨེ་ཀ་ཨ་ནུ་ས། །ཞེས་པའི་དོན་ནི། ངོ་བོ་རང་བཞིན་ཐུགས་རྗེ་གསུམ་གྱི་མཛད་པར་གྲོལ་བའི་སྙིང་པོའོ། །སངས་རྒྱས་མངོན་ཞེན་བཟློག་པའི་ཕྱིར། །ཞེས་པའི་དོན་ནི། སངས་རྒྱས་ཞེས་པ་འཁྲུལ་པ་སངས་པའི་བར་བ། ཡེ་ཤེས་རྒྱས་པའི་རང་སྣང་བ། མངོན་ཞེན་ཞེས་པ་ཐེག་པ་ཐུན་མོང་བས་རང་བྱུང་དུ་མ་ཤེས་ཏེ། ཡིད་བསྒོམ་བག་ཆགས་ཀྱིས་ཐོབ་པར་འདོད་པ་ལ། བཟློག་པའི་ཕྱིར་ཞེས་པ་སྐུ་གསུམ་རང་སྣང་རང་བྱུང་དུ། སང་ཀྲི་མ་མ་ཀརྨ་ཏ། །ཅེས་པའི་དོན་ནི། སྐུ་གསུམ་ཀ་དག་ཏུ་གྲོལ་བར་བྱེད་པའི་སྙིང་པོའོ། །རྒྱལ་སྲས་རྣམས་ཀྱི་གནས་བཙལ་ཕྱིར། །ཞེས་པའི་དོན་ནི། རྒྱལ་སྲས་ཞེས་པ་ཡང་དག་པར་རྫོགས་པའི་སངས་རྒྱས་ཀྱི་རིགས་འཛིན་པ། རྣམས་ཀྱི་ཞེས་པ་ཟག་བཅས་མི་སྣང་བར་ཕུང་པོ་ལྷག་མེད་དུ་གཤེགས་པ། གནས་བཙལ་ཕྱིར་ཞེས་པ་ངོ་བོ་སྐྱེ་བ་མེད་པའི་གནས་ངོས་གཟུང་དང་བྲལ། རང་བཞིན་འགྲིབ་པ་མེད་པའི་གནས་ཕྱི་ནང་དང་བྲལ། ཐུགས་རྗེ་འགག་པ་མེད་པའི་གནས་ཉེ་རིང་དང་བྲལ་བ། དེ་གསུམ་ལ་འཛིན་པ་མེད་པའི་གནས་ཀ་ནས་དག་པ་སེམས་ཅན་རྣམས་ཀྱི། ང་ལ་ཁེ་པ་ཀི་ལི་ས། །ཞེས་པའི་དོན་ནི། འདི་ཉིད་བཏགས་ཅིང་དབུགས་ལ་སླེབ་ཚད་གྲོལ་བར་བྱེད་པའི་སྙིང་པོའོ། །འདི་ཀུན་རང་ཤུགས་ཚིག་ཏུ་བྱུང་། །ཞེས་པའི་དོན་ནི། འདི་ཀུན་ཞེས་པ་གཉིས་སུ་མེད་པའི་དགོངས་པ། རང་ཤུགས་ཞེས་པ་སྟོང་རིག་མ་འགག་པའི། ཚིག་ཏུ་བྱུང་ཞེས་པ་སེམས་ཅན་གྲོལ་བར་བྱེད་པའི་སྙིང་པོའོ། །ཞེས་པ་ཀུན་བཟང་ཡབ་ཡུམ་གཉིས་སུ་མེད་པའི་དགོངས་པ། རེ་རེས་གྲོལ་བར་བྱེད་པ་ཆོས་ཉིད་ཀྱི་རང་སྒྲ་ཐིག་ལེ་ཉི་ཤུ་རྩ་ལྔ་པའོ། །ཨཱོྂ་ལུས་གྲོལ་བར་བྱེད་པའི་སྙིང་པོའོ། །ཨཱཿངག་གྲོལ་བར་བྱེད་པའི་སྙིང་པོའོ། །ཧཱུཾ་ཡིད་གྲོལ་བར་བྱེད་པའི་སྙིང་པོའོ། །ལྔ་ལྡན་རྡོ་རྗེའི་ལྟེ་བ་ཐིག་ལེ་མཐིང་ཀ་ལ་བྲིའོ། །ཡབ་ཀུན་ཏུ་བཟང་པོའི་དགོངས་པ་ནི། ཨེ་མ་ཀི་རཱི་ཀི་རཱི། མས་དྷ་བྷ་ལི་བཱ་ལི། ས་མི་ཏ་སུ་རུ་སུ་རུ། ཀུན་དྷ་ལི་མ་སུ་མ་སུ། ཨེ་ཀ་ར་སུ་ལི་བྷས་ཏ་ཡེ། ཙ་ཀི་ར་བྷུ་ལི་ཏ་ལྕེ་ཡེ། ས་མུན་ཏ་ཙ་ཡེ་སུ་གྷ་ཡེ། བྷི་ཏི་ལས་ན་བྷ་གྷུ་ལི་ཡེ། ས་ཀ་རི་དྷུ་ཀ་ནི། མ་ཏ་རི་བྷེ་ཏེ་ན། པ་ར་ལི་ཧི་ས་ན། མ་ཁར་ཏེ་ཀེ་ལ་ན་སཾ། སམ་བྷུ་ར་ཏ་མེ་ཀ་ཙ་ར་ཏཾ་པ། ཨུ་རྒྱ་གྷ་ཏ་ར་ཨེ་པ་ཤ་ན། ན་ར་བྷི་ཧི་ས་གྷུ་ཏི་པ་ཡཱ། གྷུ་ར་གྷུ་ར་ཕ་ག་ཁ་ར་ན་ལ་མ། ན་ར་ན་རཱ་ཨི་ཐར་ས་ཌ་ལཾ། སིར་ན་སིར་ན་བྷེ་ས་བྷེ་ས་རས་པ་ལ། བྷུདྡྷ་བྷུདྡྷ་བྷུད་ཚི་ཥ་ས་ཀྱེ་ལཾ། ས་སཱ། རི་རཱི། ལ་ཁཱེ། ཨི་ཨཱི། མ་མཱ། རི་རཱི། ལ་ཏ་ཨ། གཞི་འཛིན་པའི་རིག་པ་རྡོ་རྗེ་ལུ་གུ་རྒྱུད་དུ་གྲོལ་བར་བྱེད་པའི་སྙིང་པོའོ། །ཚིག་བར་ཉི་ཤུ་རྩ་དྲུག་པའོ། །ཡུམ་ཀུན་ཏུ་བཟང་མོའི་དགོངས་པ་ནི། སྨས་ཏ་བྷ་ས་ལི། ས་མི་ཏ་སུ་རུ་སུ་རུ། ཀུན་དྷ་ལི་མ་སུ། ཨི་ཀི་རི་ལི་བྷི་ཏ་ཡེ། ཙ་ཀ་བྷུ་ལི་ཏ་ལྕེ་ཡེ། ས་མུན་ཏ་ཙརྱ་སུ་གྷ་ཡཱེ། བྷི་ཏི་སན་བྷ་ན་གྷུ་ཡཱེ། ཀི་རི་དྷ་ཀི་ན། དྷ་ཀ་མ་ཧཱ་བྷོ་རེ། ཏ་ན་པ་ར་པ་ལི་དྷི། སན་ཁར་ཏ་ཀེ་ལ་ན་སཾ་བྷུ་དྷ་ར་ཏ། ཨེ་ཀ་ཙ་ར་ས་བྷ་ས་ཏཾ། ཏ་པ་སུརྱ་གྷ་ཏ་ར་ཨ། མན་པ་ར་བྷི་ཧོ། ཏིང་གྷུ་ར་ལ། མ་སྨིན་པ་གྷུ་ཏི་ལ། ཏ་ཡ་གྷུ་ར་གྷུ་ར། རླངས་ག་ཁ་བ་ར་ན་ལཾ། ན་ར་ནཱ་རཱ་ལཾ། ཨེ་ཐ་ར་པ་ཊ་ལཾ། སིརྣ་སིརྣ་བྷེ་ས་ར་ས་པ་ལམ། ས་ཀེ་ལཾ། ས་སཱ། རི་རཱི། ལི་ལཱི། ཨི་ཨཱི། མ་མཱ། ར་རཱ། མཚན་ཉིད་འཛིན་པའི་རིག་པ་འགྱུ་སྟོང་ཅིང་མེད་དུ་གྲོལ་བར་བྱེད་པའི་སྙིང་པོ་ཚིག་བར་ཉི་ཤུ་རྩ་དགུ་པ་དང་། གཉིས་ཐིག་ལེའི་དབྱིངས་ལ་བྲིའོ། །ལོངས་སྐུ་ཞི་ཁྲོའི་དགོངས་པ། འ་ཨ་ཤ་ས་མ་ཧ། རིགས་དྲུག་ཀློང་དུ་གྲོལ་བར་བྱེད་པའི་སྙིང་པོ་ཐིག་ལེ་དྲུག་པའོ། །སྤྲུལ་སྐུ་འགག་པ་མེད་པའི་དགོངས་པ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨ། ཨཾ་ཨཱཿ སྐྱེ་བ་མེད་པར་གྲོལ་བར་བྱེད་པའི་སྙིང་པོ་ཚིག་བར་བརྒྱད་པའོ། །ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵཿ འགག་པ་མེད་པར་གྲོལ་བར་བྱེད་པའི་སྙིང་པོ་ཚིག་བར་བརྒྱད་པའོ། །བསྟན་པ་ཐམས་ཅད་མི་འགྱུར་བའི་དགོངས་པ། ཡེ་དྷརྨཱ་ཧེ་ཏུ་པྲ་བྷཱ་བ། ཧེ་ཏུན་ཏེ། ཥཱནྟ་ཐཱ་ག་ཏོ་ཧྱ་བ་དཏ། ཏེཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མ་ཧཱ་ཤྲ་མ་ཎ་ཡེ་སྭཱ་ཧཱ། གནས་པ་རྒྱུན་དུ་གྲོལ་བར་བྱེད་པའི་སྙིང་པོ་ཚིག་བར་བཅུ་གཉིས་པའོ། །དེ་ལྟར་འཇའ་ཚོན་ལྷ་སྐུ་རིང་བསྲེལ་གྱི་སྙིང་པོ་མི་འདྲ་བ་བརྒྱད་པོ་ལ་ཕྲིན་ལས་མཐའ་རྒྱས་ཤིང་ཤམ་བུ་ནི་ནད་དང་གདོན་དང་འཇིགས་པ་བརྒྱད་དང་། སྒྲིབ་པ་ཐམས་ཅད་རིག་པར་ཞི་བ་ཤཱན་ཏིཾ་ཀུ་རུ་ཡེ་སྭཱ་ཧཱ། ཚེ་དང་བསོད་ནམས་དང་ཞིང་ཁམས་ཐམས་ཅད་རིག་པར་རྒྱས་པར་གྱུར་ཅིག་པུཥྚིཾ་ཀུ་རུ་ཡེ་སྭཱ་ཧཱ། དགྲ་བགེགས་དང་སངས་རྒྱས་དང་ཆོས་དང་དགེ་འདུན་དང་འཁོར་འདས་རིག་པའི་དབང་དུ་སྡུས་ཤིག་པཱ་ཤཾ་ཀུ་རུ་ཡེ་སྭཱ་ཧཱ། དུག་ལྔ་དུག་གསུམ་རིག་པའི་ངང་དུ་མཱ་ར་ཡ་སོད་སོད་སྭཱ་ཧཱ། ཞེས་པ་དང་ཡེ་ཤེས་རྣམ་པ་ལྔས་བསྐོར་བ་ནི་གཞི་མི་འགྱུར་བའི་ཐིག་ལེ་ཆེན་པོའོ། །ཞེས་བཏགས་པས་གྲོལ་བའི་སྙིང་པོ་བསྟན་པའི་ལེའུ་སྟེ་དྲུག་པ་རྫོགས།། ༈ །།ད་ནི་ལེའུ་བདུན་པ་འགྲོལ་ཏེ། ཨེ་མ་ཧོཿ ཞེས་པའི་དོན་ནི། ཨེ་ཞེས་པ་ཆོས་སྐུ་འདུས་མ་བྱས་པའོ། །མ་ཞེས་པ་ལོངས་སྐུ་འདུས་མ་བྱས་པའོ། །ཧོཿཞེས་པ་སྤྲུལ་སྐུ་འདུས་མ་བྱས་པའོ། །དེ་ལྟར་འདུས་མ་བྱས་པའོ། །དེ་ལྟར་འདུས་མ་བྱས་ཀྱི་རང་སྒྲ་འདུས་མ་བྱས་པས་ངོ་མཚར་ཆེའོ། །བཅོམ་པ་དང་ནི་ལྡན་པ་དང་། །ཞེས་པའི་དོན་ནི། བཅོམ་པ་ཞེས་པ་མ་རིག་པ། དང་ནི་ཞེས་པ་དུག་ལྔ་དུག་གསུམ། ལྡན་པ་དང་ཞེས་པ་སྐུ་གསུམ་ཡེ་ཤེས་ལྔ་དང་། འདས་པ་ཡང་དག་ལམ་ཡིན་ནོ། །ཞེས་པའི་དོན་ནི། འདས་པ་ཞེས་པ་མ་རིག་པ་ལས། ཡང་དག་ཅེས་པ་རིག་པ། ལམ་ཡིན་ནོ་ཞེས་པ་ཀ་དག་གི། འདི་ཚིག་ལམ་མིན་གདམས་པ་ཡིན། །ཞེས་པའི་དོན་ནི། འདི་ཚིག་ཅེས་པ་སངས་རྒྱས་གཅིག་པའོ། །ལམ་མིན་ཞེས་པ་ད་བསྒྲུབ་དགོས་པ་ལྟ་བུ་མིན་པས་སོ། །གདམས་པ་ཡིན་ཞེས་པ་གསུམ་འདུས་མ་བྱས་འཕྲད་པས་ཆོག་པའི། བསྟན་ཅིང་བཤད་མེད་བརྗོད་མ་ཡིན། །ཞེས་པའི་དོན་ནི། བསྟན་ཅིང་ཞེས་པ་དངོས་པོར། བཤད་མེད་ཅེས་པ་འཁོར་ལ། བརྗོད་མ་ཡིན་ཞེས་པ་སྟོན་པ་གང་གིས་ཀྱང་། གདམས་པ་མ་ཡིན་བྱིན་རླབས་ཡིན། །ཞེས་པའི་དོན་ནི། གདམས་པ་ཞེས་པ་སངས་རྒྱས་ཀྱིས་གསུངས་པའི། མ་ཡིན་ཞེས་པ་དང་པོ་ནས། བྱིན་རླབས་ཡིན་ཞེས་པ་འདུས་མ་བྱས་པ་ངོ་བོ་རང་བཞིན་ཐུགས་རྗེ་གསུམ་གྱི། བྲིས་ཤིང་བཀོད་མེད་རང་བྱུང་ཡིན། །ཞེས་པའི་དོན་ནི། བྲིས་ཤིང་ཞེས་པ་ཡི་གེ་རིས་སུ། བཀོད་མེད་ཅེས་པ་གང་ཟག་གིས། རང་བྱུང་ཡིན་ཞེས་པ་སངས་རྒྱས་སྒམ་པོས་མ་མཛད། སེམས་ཅན་སྒྲིན་པོས་མ་བཅོས་ཏེ་བྱས་པ་མེད་པའི། གནས་དང་དུས་མེད་སྔོན་ཐོག་ཡིན། །ཞེས་པའི་དོན་ནི། གནས་དང་ཞེས་པ་གོང་དུ། དུས་མེད་ཅེས་པ་འདས་མ་འོངས་ད་ལྟ་གསུམ། སྔོན་ཐོག་ཡིན་ཞེས་པ་དྲན་པ་ཀུན་གྱི། ཆོས་མེད་སྙིང་པོ་ཐུགས་གསང་ཡིན། །ཞེས་པའི་དོན་ནི། ཆོས་མེད་ཞེས་པ་སྟོན་པས་གསུངས་པའི། སྙིང་པོ་ཞེས་པ་བསྟན་པ་ཐམས་ཅད་ཀྱི། ཐུགས་གསང་ཡིན་ཞེས་པ་དུས་གསུམ་གྱི་སངས་རྒྱས་ཐམས་ཅད་ཀྱི། སུས་ཀྱང་ཉན་མེད་རང་ཤར་ཡིན། །ཞེས་པའི་དོན་ནི། སུས་ཀྱང་ཞེས་པ་ཕྱག་ན་རྡོ་རྗེ་ལ་སོགས་པའི། ཉན་མེད་ཅེས་པ་རྣ་བའི་དབང་པོས། རང་ཤར་ཡིན་ཞེས་པ་ཐིག་ལེ་ཉག་གཅིག་ཏུ། ཐོས་པ་མེད་ཅིང་རང་བསྒྲགས་ཡིན། །ཞེས་པའི་དོན་ནི། ཐོས་པ་ཞེས་པ་རྣ་བའི་དབང་པོས། མེད་ཅིང་ཞེས་པ་འབྱུང་བཞི་རང་སྡེབ་ཀྱི་སྒྲ། རང་བསྒྲགས་ཡིན་ཞེས་པ་སྒྲ་འདུས་མ་བྱས་ཆོས་ཉིད་མངོན་སུམ་མོ། །བྱས་པས་འདི་ཀུན་མ་ཡིན་ཚིག །ཅེས་པའི་དོན་ནི། བྱས་པས་ཞེས་པ་ཡིད་དཔྱོད་ཚིག་གིས་བཤད་མི་ཤེས་སོ། །འདི་ཀུན་ཞེས་པ་བསྟན་པ་ཐམས་ཅད་ཀྱི་བུ་གཅིག་པོའི་ཚིག །མ་ཡིན་ཚིག་ཅེས་པ་འདུས་མ་བྱས། འདི་ཡོད་འགྲོ་བ་སངས་རྒྱས་ཡིན། །ཞེས་པའི་དོན་ནི། འདི་ཡོད་ཅེས་པ་ཆོས་ཉིད་ཀྱི་རང་སྒྲ། འདུས་མ་བྱས་སངས་རྒྱས་སྲས་གཅིག་པོ། འགྲོ་བ་ཞེས་པ་དབུགས་ཅན། སངས་རྒྱས་ཡིན་ཞེས་པ་མ་བྲལ་གོང་རེག་པས་གྲོལ་བ། བ་མོ་ལ་ཉི་མ་ཕོག་པ་ལྟ་བུས། ཕ་རོལ་མཐོང་བའི་གསང་ཆེན་ལམ། །ཞེས་པའི་དོན་ནི། ཕ་རོལ་ཞེས་པ་འཁྲུལ་སྣང་རང་འགགས་ལ་ས་རྡོ་རི་བྲག་རྩི་ཤིང་ནགས་ཚལ་སྐྱེ་ཤི་བོར་ལེན་འདིས། མཐོང་བའི་ཞེས་པ་སྐུ་གསུམ་ཡེ་རྫོགས་ཡེ་ཤེས་ལྔ་ལྡན་གྱི་སྣང་བ། གསང་ཆེན་ལམ་ཞེས་པ་མ་བསྒོམས་རྒྱུད་བཏགས་པའི་བྱིན་རླབས་ཀྱིས་ཡོན་ཏན་རང་བབས་སུ་བྱུང་བ་ནམ་ཟླ་དྲོས་པ་ལྟ་བུའོ། །སེམས་ཡོད་མ་ཡིན་སྤྲུལ་པ་ཡིན། །ཞེས་པའི་དོན་ནི། སེམས་ཡོད་ཅེས་པས་ཟིན་མེད་པའི་འགྲོ་བ། ཡོད་པ་ལ་མེད་པར་སེམས། མེད་པ་ལ་ཡོད་པར་སེམས་འདུས་བྱས་འཇིག་པའི་ཆོས་ཅན། མ་ཡིན་ཞེས་པ་རྒྱུད་འདི་ཡོད་པའི་སྐལ་བ་ཅན་ཏེ། སྤྲུལ་པ་ཡིན་ཞེས་པ་འདུས་མ་བྱས་ཀུན་བཟང་ཡབ་ཡུམ་གྱི། འཁོར་བའི་སྤྱི་མདུད་གྲོལ་བའོ། །ཞེས་པའི་དོན་ནི། འཁོར་བའི་ཞེས་པ་ཁམས་གསུམ་དུ། སྤྱི་མདུད་ཅེས་པ་གཟུང་འཛིན་གཉིས། གྲོལ་བའོ་ཞེས་པ་རྒྱུད་འདིས་དབུགས་ལ་སླེབ་པ་ཙམ་གྱིས་མུན་ཁུང་དུ་མར་མེ་བཏེག་པའམ་མཁའ་ལ་ཉི་མ་ཤར་བ་ལྟར། ཤེས་བྱ་མ་ཡིན་ལམ་སྣ་ཐག །ཅེས་པའི་དོན་ནི། ཤེས་བྱ་ཞེས་པ་ཡིད་དཔྱོད་ཀྱི། མ་ཡིན་ཞེས་པ་རྒྱུད་འདི། ལམ་སྣ་ཐག་ཅེས་པ་རྒྱུད་འདི་འཕྲད་པ་དང་ལམ་བསྒྲོད་པ་དུས་མཉམ་པས་སོ། །སྟོང་པ་མ་ཡིན་མངོན་སུམ་ཡུལ། །ཞེས་པའི་དོན་ནི། སྟོང་པ་ཞེས་པ་ཅང་མེད་ཆད་ལྟ། མ་ཡིན་ཞེས་པ་རྒྱུད་འདི། མངོན་སུམ་ཡུལ་ཞེས་པ་སྐུ་གསུམ་ཡིད་དཔྱོད་ལ་རག་མ་ལུས་པས། ཡོད་མེད་མ་ཡིན་ཐབས་གསང་བ། །ཞེས་པའི་དོན་ནི། ཡོད་མེད་ཅེས་པ་རྟག་ཆད་གཉིས། མ་ཡིན་ཞེས་པ་རྒྱུད་འདི། ཐབས་གསང་བ་ཞེས་པ་བཏགས་གྲོལ་མཐོང་གྲོལ་ལྟས་གྲོལ་རྣམས། ལྷ་མེད་འདི་ལ་སྔགས་ཡོད་མིན། །ཞེས་པའི་དོན་ནི། ལྷ་མེད་ཅེས་པ་བློས་བྱས་ཡིད་བསྒོམ་གྱི། འདི་ལ་ཞེས་པ་རྒྱུད། སྔགས་ཡོད་མིན་ཞེས་པ་མིང་བརྗོད་ཡི་གེ་དང་བྲལ་བས་བཟླས་པའི། ཕ་རོལ་ཕྱིན་པ་དྲུག་གི་གཞི། །ཞེས་པའི་དོན་ནི། ཕ་རོལ་ཞེས་པ་རྩོལ་བྱས་དྲུག་གི། ཕྱིན་པ་ཞེས་པ་རྩོལ་མེད། དྲུག་གི་གཞི་ཞེས་པ་སྐུ་གསུམ་རང་ཆས་ཀྱི་སྦྱིན་པ། འོད་ལྔ་དྲི་མེད་ཀྱི་ཚུལ་ཁྲིམས། ཉོན་མོངས་རང་གྲོལ་གྱི་བཟོད་པ། ཅེར་མཐོང་ཚོམ་བུའི་བརྩོན་འགྲུས། འགྱུ་བ་དངོས་མེད་ཀྱི་བསམ་གཏན། ཆོས་ཟད་ཀ་དག་གི་ཤེས་རབ་བོ། །བསྙེན་གནས་ལ་སོགས་འདི་ཚུལ་ལོ། །ཞེས་པའི་དོན་ནི། བསྙེན་གནས་ཞེས་པ་ལུས་ངག་ཡིད་གསུམ་དཀོན་མཆོག་གསུམ་ལ་བསྙེན་པ། སྐུ་གསུམ་འདུ་འབྲལ་མེད་པ་ལ་གནས་པའོ། །ལ་སོགས་ཞེས་པ་ཉིས་བརྒྱ་ལྔ་བཅུའོ། །འདི་ཚུལ་ལོ་ཞེས་པ་རྒྱུད་འདིའི། དེ་བཞིན་དུ་ཡང་བྱེ་བྲག་སྨྲ། །ཞེས་པའི་དོན་ནི། དེ་བཞིན་ཞེས་པ་ཚུལ་གྱི་དབྱེ་བ། དུ་ཡང་ཞེས་པ་ཁ་འཛིན། བྱེ་བྲག་སྨྲ་ཞེས་པ་ཉན་ཐོས་པ། དོན་དམ་ཀུན་རྫོབ་གཟུགས་ཀྱིས་སོ། །ཞེས་པའི་དོན་ནི། དོན་དམ་ཞེས་པ་དོན་དམ་གྱི་དོན་དམ་དང་ཀུན་རྫོབ་ཀྱི་དོན་དམ་མོ། །ཀུན་རྫོབ་ཅེས་པ་ཀུན་རྫོབ་ཀྱི་ཀུན་རྫོབ་དང་ཀུན་རྫོབ་ཀྱི་དོན་དམ་མོ། །གཟུགས་ཀྱིས་སོ་ཞེས་པ་སྣོད་བཅུད་གཉིས་ཀྱི། རྒྱུད་ཀྱི་རྩ་བ་འདི་ཉིད་རང་། །ཞེས་པའི་དོན་ནི། རྒྱུད་ཀྱི་ཞེས་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི། རྩ་བ་ཞེས་པ་ཐམས་ཅད་ཀྱི། འདི་ཉིད་རང་ཞེས་པ་རྒྱུད་བསྟན་པའི་བུ་གཅིག །ལྷ་ཡི་རྣལ་འབྱོར་འདི་སྔགས་ཡིན། །ཞེས་པའི་དོན་ནི། ལྷ་ཡི་ཞེས་པ་ཕྱི་ནང་གི། རྣལ་འབྱོར་ཞེས་པ་བསྐྱེད་རྫོགས་གཉིས་ཀྱི། འདི་སྔགས་ཡིན་ཞེས་པ་མ་བཟླས་པའི་སྲོག །ལུང་ཆེན་རྣམས་ཀྱི་དམ་པ་འདི། །ཞེས་པའི་དོན་ནི། ལུང་ཆེན་ཞེས་པ་མདོ་རྒྱུད། རྣམས་ཀྱི་ཞེས་པ་མ་ལུས་པ། དམ་པ་འདི་ཞེས་པ་སྙིང་པོ། ཆོས་རྣམས་རོ་གཅིག་འདྲེས་པའི་རྟེན། །ཞེས་པའི་དོན་ནོ། །ཆོས་རྣམས་ཞེས་པ་ཐེག་པ་དགུའི། རོ་གཅིག་ཅེས་པ་སྐུ་གསུམ་དུ། འདྲེས་པའི་རྟེན་ཞེས་པ་གཉིས་མེད་སྤང་བླང་མེད་པར། སྐུ་གསུང་ཐུགས་ཀྱི་དབྱེ་བ་ཡིས། །ཞེས་པའི་དོན་ནི། སྐུ་གསུང་ཞེས་པ་མདུན་རྒྱབ་ཏུ་མེད་པར་རང་གསལ་བརྗོད་དུ་མེད་པར་ཆད་པའོ། །ཐུགས་ཀྱི་ཞེས་པ་འཁྲུལ་མ་མྱོང་བའི་དངོས་མེད་དོ། །དབྱེ་བ་ཡིས་ཞེས་པ་སྣང་སྲིད་འཁོར་འདས་ཐམས་ཅད་ལ། བླ་མེད་འཁོར་ལོ་བསྐོར་བའི་གནས། །ཞེས་པའི་དོན་ནི། བླ་མེད་ཅེས་པ་གསང་བ། འཁོར་ལོ་ཞེས་པ་སྐུ་གསུམ་གྱི་ཆོས། བསྐོར་བའི་གནས་ཞེས་པ་སྐུ་བཞིའི་ཡེ་ཤེས་ལྔའི་ར་བས། དབང་པོ་རྣམས་ཀྱི་དམིགས་གཏད་ཡིན། །ཞེས་པའི་དོན་ནི། དབང་པོ་ཞེས་པ་ལྔ། རྣམས་ཀྱི་ཞེས་པ་འགྲོ་བ་མ་ལུས་པ། དམིགས་གཏད་ཡིན་ཞེས་པ་འཕྱུགས་སོ་མེད་པའི། ཤེས་རབ་རྣམས་ཀྱི་རྟོགས་པའི་གནས། །ཞེས་པའི་དོན་ནི། ཤེས་རབ་ཅེས་པ་ཡང་དག་པའི། རྣམས་ཀྱི་ཞེས་པ་གཅོད་བྱེད་སྒྲོལ་བྱེད་འབྱེད་བྱེད་འདུ་བྱེད་ལ་སོགས་པའོ། །རྟོགས་པའི་གནས་ཞེས་པ་སྐུ་གསུམ་ལྷུན་གྲུབ་ཏུ། སྐུ་གསུམ་ལམ་དུ་སློང་བའི་རྟེན། །ཞེས་པའི་དོན་ནི། སྐུ་གསུམ་ཞེས་པ་ཆོས་སྐུ་སྐྱེ་མ་མྱོངས་པས་མཐའ་དང་བྲལ། ལོངས་སྐུ་འགྲིབ་མ་མྱོངས་པས་ཞི་ཁྲོར་གསལ། སྤྲུལ་སྐུ་འགག་མ་མྱོངས་པས་ཀུན་ལ་ཁྱབ། ལམ་དུ་ཞེས་པ་སྐལ་བ་ཅན་གྱིས། སློང་བའི་རྟེན་ཞེས་པ་མངོན་སུམ་དུ། ཐིག་ལེ་མངོན་དུ་འབྱིན་པའི་མིག །ཅེས་པའི་དོན་ནི། ཐིག་ལེ་ཞེས་པ་སྐུ་གསུམ་ལྷུན་གྲུབ་ཀྱི། མངོན་དུ་ཞེས་པ་དབང་པོའི། འབྱིན་པའི་མིག་ཅེས་པ་ཅེར་མཐོང་སངས་རྒྱས་སུ། ཐར་བའི་སྐས་ཀུན་སློང་བར་བྱེད། །ཅེས་པའི་དོན་ནི། ཐར་པའི་ཞེས་པ་ཁམས་གསུམ་ལས། སྐས་ཀུན་ཞེས་པ་སྐུ་གསུམ་གྱི། སློང་བར་བྱེད་ཅེས་པ་འཁོར་འདས་རང་དྭངས་སུ། ལམ་དུ་འཇུག་པའི་ས་མཁན་ཡིན། །ཞེས་པའི་དོན་ནི། ལམ་དུ་ཞེས་པ་ཡང་དག་པའི། འཇུག་པའི་ཞེས་པ་འགྲོ་བ་སེམས་ཅན་རྣམས། ས་མཁན་ཡིན་ཞེས་པ་མ་ནོར་བར་བྱེད་པ་སྟེ། གཞི་མ་ནོར་བ་ངོ་བོ་རང་བཞིན་ཐུགས་རྗེ་གསུམ། ལམ་མ་ནོར་བ་སྒྲོན་མ་བཞི། འབྲས་བུ་མ་ནོར་བ་སྐུ་གསུམ་འཛིན་ཟད་ཀ་ནས་དག་གོ། །སྐལ་ལྡན་འཛིན་པའི་ལྕགས་ཀྱུར་སྣང་། །ཞེས་པའི་དོན་ནི། སྐལ་ལྡན་ཞེས་པ་སངས་རྒྱ་བའི། འཛིན་པའི་ཞེས་པ་བཏགས་པ་ཙམ་གྱིས། ལྕགས་ཀྱུར་སྣང་ཞེས་པ་བྱིན་རླབས་མངོན་དུ། ཆོས་སྐུ་རང་འཇོག་གནས་ལུགས་ཡིན། །ཞེས་པའི་དོན་ནི། ཆོས་སྐུ་ཞེས་པ་ཐིག་ལེ་ཉག་གཅིག །རང་འཇོག་ཅེས་པ་སེམས་ཅན་ཀུན་ལ་ཆེ་ཆུང་མེད་པར། གནས་ལུགས་ཡིན་ཞེས་པ་ཡེ་གདོད་མ་ནས། སངས་རྒྱས་ཀུན་གྱིས་ཕྱག་བྱེད་གནས། །ཞེས་པའི་དོན་ནི། སངས་རྒྱས་ཞེས་པ་སྐུ་གསུམ་ལམ་དུ་སངས་ནས་འབྲས་བུ་ཀ་དག་ཏུ་རྒྱས་པའོ། །ཀུན་གྱི་ཞེས་པ་འདས་མ་འོངས་ད་ལྟར། ཕྱག་བྱེད་གནས་ཞེས་པ་སངས་རྒྱས་སྲས་གཅིག་པོ་འདི། ཡུལ་རྣམས་གཅོད་པའི་རལ་གྲིར་སྣང་། །ཞེས་པའི་དོན་ནི། ཡུལ་རྣམས་ཞེས་པ་དབང་པོ་སྒོ་ལྔའི། གཅོད་པའི་ཞེས་པ་རང་སར། རལ་གྲིར་སྣང་ཞེས་པ་རེག་གཅོད་བཏགས་པས་གྲོལ་བའི། གྲོལ་བ་རྣམས་ནི་འདི་ཉིད་ལ། །ཞེས་པའི་དོན་ནི། གྲོལ་བ་ཞེས་པ་མཐར་ཐུག་ཡང་དག་པར། རྣམས་ནི་ཞེས་པ་ཞིང་ཁམས་རང་དག་ཏུ་སངས་རྒྱས་པ། འདི་ཉིད་ལ་ཞེས་པ་རྒྱུད་བསྟན་པའི་བུ་གཅིག །རྣམ་པར་བརྟེན་ནས་གྲོལ་བའོ། །ཞེས་པའི་དོན་ནི། རྣམ་པར་ཞེས་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི། བརྟེན་ནས་ཞེས་པ་འགྲོ་བ་སེམས་ཅན་རྣམས། གྲོལ་བའོ་ཞེས་པ་ཀ་དག་ཏུ། སངས་རྒྱས་ཐམས་ཅད་ཀྱི་བུ་གཅིག་པོ། །ཞེས་པའི་དོན་ནི། སངས་རྒྱས་ཞེས་པ་མ་རིག་པ་སངས་རིག་པ་ཡེ་ཤེས་སུ་རྒྱས་པའོ། །ཐམས་ཅད་ཀྱི་ཞེས་པ་འདས་མ་འོངས་ད་ལྟར་གྱི་སངས་རྒྱས། བུ་གཅིག་པོ་ཞེས་པ་བསྟན་པ་འཕེལ་བར་བྱེད་པའི། བསྟན་པ་རྣམས་ཀྱི་བཙས་སུ་རང་བྱུང་བ། །ཞེས་པའི་དོན་ནི། བསྟན་པས་ཞེས་པ་སངས་རྒྱས་ཀྱི། རྣམས་ཀྱི་ཞེས་པ་མདོ་རྒྱུད། བཙས་སུ་ཞེས་པ་ཕྱིས་ཀྱི། རང་བྱུང་བ་ཞེས་ངོ་བོ་རང་བཞིན་ཐུགས་རྗེ་གསུམ་ལས། རང་བྱུང་གི་ཡི་གེ་ཆེན་པོར་བསྐལ་པ་ཀུན་གྱི་ཐོག་མར་རང་བྱུང་། ཞེས་པའི་དོན་ནི། རང་བྱུང་གི་ཞེས་པ་ཆོས་ཉིད་རང་སྒྲས་སུས་ཀྱང་བྱས་པ་མེད་པའི། ཡི་གེ་ཞེས་པ་གདུལ་བྱ་སོ་སོ་རང་རང་གི། ཆེན་པོར་ཞེས་པ་ལྷུན་གྱིས་གྲུབ་པའི། བསྐལ་པ་ཞེས་པ་གྲངས་ལས་འདས་པ། ཀུན་གྱི་ཞེས་པ་མ་ལུས་པ། ཐོག་མར་ཞེས་པ་དང་པོ། རང་བྱུང་ཞེས་པ་ངོ་བོ་རང་བཞིན་ཐུགས་རྗེ་ལས། བྱིན་བརླབས་ལས་རང་བཀོད་པ། ཞེས་པའི་དོན་ནི། བྱིན་བརླབས་ཞེས་པ་སྐུ་གསུམ་གྱི། རང་བཀོད་པ་ཞེས་པ་ཡི་གེ་རིགས་ནི་གཅིག་པ་ཐ་དད་དུ། སྤྲུལ་པ་སྐུའི་ས་བོན་འཕེལ་བར་བྱེད་པ། ཞེས་པའི་དོན་ནི། སྤྲུལ་ཞེས་པ་སངས་རྒྱས་ཀྱི། སྐུའི་ཞེས་པ་བསྟན་པའི་བདག་པོའི། ས་བོན་ཞེས་པ་རྒྱུ་སེམས་ཅན་ལ། འཕེལ་བར་ཞེས་པ་འབྲས་བུ། སངས་རྒྱས་ཐམས་ཅད་དུ། བྱེད་པ་ཞེས་པ་རྒྱུད་སངས་རྒྱས་སྲས་གཅིག་པོ་འདི་དངོས་སོ། །རབ་ཏུ་དཀོན་པའི་ཚིག །ཅེས་པའི་དོན་ནི། རབ་ཏུ་ཞེས་པ་འཇིག་རྟེན་གྱི་ཁམས་ཐམས་ཅད་དུ། དཀོན་པའི་ཚིག་ཅེས་པ་སྐལ་བ་ཅན་འགའ་ཙམ་མ་གཏོགས་པ། སུ་དག་དང་འཕྲད་པར་མི་འགྱུར་རོ། །ཞེས་རྒྱུད་འདུས་མ་བྱས་པར་བསྟན་པའི་ལེའུ་སྟེ་བདུན་པ་རྫོགས་སོ།། །།ས་མ་ཡ། རྒྱ་རྒྱ་རྒྱ། ༈ ཨེ་མ། ལས་ཟད་སྐལ་ལྡན་སེམས་ཀྱི་བུ། །དུས་གསུམ་སངས་རྒྱས་ཐམས་ཅད་ལ། །ཐུན་མོང་མན་ངག་བསམ་འདས་ཀྱང་། །མཆོག་གི་མན་ངག་སྲས་གཅིག་པོ། །འདི་ལས་ཟབ་པ་ཞིང་ཁམས་ནི། །མཐའ་མེད་དག་ན་ཡོད་རེ་ཀན། །དེས་ན་དགའ་རབ་བརྒྱུད་པར་བཅས། །ཡང་དག་མངོན་སངས་རྒྱ་བར་འགྱུར། །ཅི་ཕྱིར་རིག་པ་དངོས་ཀྱི་གནད། །འདི་ལ་ཡོད་དོ་ས་མཱ་ཡ། །སྔགས་སྲུང་རྒྱལ་མོ་ལྔ་ལ་གཏད། །སྐལ་ལྡན་རྣམས་དང་འཕྲད་པར་ཤོག །ལེའུ་རེ་ལ་གཏོར་ཚོགས་རེ། །བླ་མ་ཡི་དམ་སྔགས་སྲུང་མཆོད། །སྤྲོས་བཅས་དང་ནི་སྤྲོས་པ་མེད། །ཤིན་ཏུ་སྤྲོས་མེད་རབ་སྤྲོས་མེད། །དབང་བཞི་དག་ནི་མ་ཐོབ་པར། །བསྟན་ཅིང་བཤད་པར་མི་བྱའོ། །རྒྱུད་རྒྱལ་སངས་རྒྱས་སྲས་གཅིག་གི། །གསང་འགྲེལ་འདི་བྲིས་མཆོག་དགེ་ཡིས། །ཁམས་གསུམ་སེམས་ཅན་གནས་དག་ནས། །སྐུ་གསུམ་ཀ་ནས་དག་གྱུར་ཅིག །བསྟན་པའི་བུ་གཅིག་འདི་མེད་ན། །བསྒྲུབས་ཀྱང་ཡུན་རིང་དོན་མེད་འགྱངས། །དེས་ན་འདི་ཉིད་མཐིང་ཤུན་ལ། །སྟོན་པའི་ཁ་དོག་གསེར་གྱིས་འབྲི། །ཡིག་མགོ་མ་ལོག་དར་སྣས་དྲིལ། །སྤྱི་བོ་མགྲིན་པ་སྙིང་གར་བཅང་། །དེ་ཉིད་གྲོལ་བར་ཐེ་ཚོམ་མེད། །ཐིག་ལེ་ཆེན་བོའི་བཏགས་གྲོལ་ནི། །མཐིང་ཤུན་བྲེ་ཞབས་ལྷག་ཙམ་ལ། །དངུལ་ལམ་མཚལ་གྱིས་མུ་ཁྱུད་ནི། །ཐིག་ལེ་དཔེའུ་ཆུང་ལྟ་བུར་བསྐོར། །དབུས་སུ་ལྔ་ལྡན་རྡོ་རྗེ་འབྲི། །ཕྱི་རིམ་མུ་ཁྱུད་ཡེ་ཤེས་ལྔ། །སྙིང་པོ་གསེར་གྱིས་འབྲི་བར་བྱ། །བཏགས་གྲོལ་འདུས་པ་ཐིག་ལེ་ཆེ། །དབྱིངས་གསུམ་རིག་པའི་མཐོངས་ན་གསལ། །རྡོ་རྗེ་སེམས་དཔའི་ཐུགས་ལས་ཕྱུང་། །དགའ་རབ་རྡོ་རྗེ་བདག་གིས་གོ། །དེ་ལ་རབ་ཏུ་གནས་པ་ནི། །ཚེས་བརྒྱད་རྒྱལ་འཛོམ་དུས་ན་བྱ། །ཡང་ན་ཟླ་སྟོང་དག་ལའོ། །ཐིག་ལེ་ཆེན་པའི་དཀྱིལ་འཁོར་ལ། །ནས་ཀྱི་ཚོམ་བུ་བཀོད་པ་ལ། །བླ་མ་རིགས་ལྔ་ཡབ་ཡུམ་བསྐྱེད། །ཚོགས་དང་གཏོར་མ་མཆོད་པ་འབུལ། །བགེགས་གཏོར་བཏང་ལ་གསོལ་བ་གདབ། །ཐིག་ལེ་ཆེན་པོའི་སྙིང་པོ་རྣམས། །བརྒྱའམ་ཉི་ཤུ་རྩ་གཅིག་གདོན། །བཀྲ་ཤིས་བརྗོད་ཅིང་མེ་ཏོག་གཏོར། །ཕྱོགས་བཅུའི་སངས་རྒྱས་རབ་འདུས་ནས། །བཏགས་གྲོལ་འོད་ལྔའི་གོང་བུ་ཡི། །རིགས་ལྔ་ཚོམ་བུ་ཉིད་དུ་བསྒོམ། །དེ་ནི་རབ་ཏུ་གནས་པའོ། །དེ་ནས་སྐྱབས་འགྲོ་སེམས་བསྐྱེད་དང་། །དགེ་བསྙེན་སྡོམ་པ་དཔོག་པར་བྱ། །སྡོམ་མེད་རྣམས་ལ་མི་དགོས་སོ། །དེ་ནས་རྒྱུད་དེ་ཚར་གཅིག་བཀླག །དེ་ནས་སྐལ་ལྡན་དེ་ཉིད་ཀྱིས། །ཕྱག་ནི་བརྒྱ་རྩ་བཙལ་བྱ་ཞིང་། །གསེར་གྱི་མཎྜལ་ལན་དགུ་དབུལ། །རྒྱུད་དང་ཐིག་ལེ་སྤྱི་བོར་བཞག །དེ་ལས་འོད་བྱུང་སྣོད་བཅུད་གང་། །ཚིག་འདིས་གསོལ་གདབ་དབང་བསྐུར་རོ། །སངས་རྒྱས་ཐམས་ཅད་ཀྱི་སྲས་གཅིག་པོས། བདག་མིང་འདི་ཞེས་བགྱི་བའི། ལུས་བྱིན་གྱིས་བརླབ་ཏུ་གསོལ། སྨིན་པར་མཛད་དུ་གསོལ། གྲོལ་བར་མཛད་དུ་གསོལ། གང་བར་མཛད་དུ་གསོལ། ཆེར་འཕེལ་བར་མཛད་དུ་གསོལ། རྒྱས་པར་མཛད་དུ་གསོལ། སངས་རྒྱས་ཐམས་ཅད་ཀྱི་སྐུ་དང་གཉིས་སུ་མེད་པར་བྱིན་གྱིས་བརླབ་ཏུ་གསོལ་ལོ། །གྷ་ཛ་ཀཱ་ཡ་ཨ་བྷི་ཥིཉྩ་ༀ། དེ་ནས་རྒྱུད་ཉིད་མགྲིན་པར་བཞག །སངས་རྒྱས་ཐམས་ཅད་ཀྱི་སྲས་གཅིག་པོས། བདག་མིང་འདི་ཞེས་བགྱི་བའི། ངག་བྱིན་གྱིས་བརླབ་ཏུ་གསོལ། ཞེས་གོང་ལྟར་བརྗོད་དེ། སངས་རྒྱས་ཐམས་ཅད་ཀྱི་གསུང་དང་གཉིས་སུ་མེད་པར་བྱིན་གྱིས་བརླབ་ཏུ་གསོལ་ལོ། །གྷ་ཙ་ཝཱཀ་ཨ་བྷི་ཥིཉྩ་ཨཱཿ དེ་ནས་རྒྱུད་སྙིང་ཁར་བཞག །སངས་རྒྱས་ཐམས་ཅད་ཀྱི་སྲས་གཅིག་པོས། བདག་མིང་འདི་ཞེས་བགྱི་བའི། ཡིད་བྱིན་གྱིས་བརླབ་ཏུ་གསོལ། ཞེས་གོང་ལྟར་བརྗོད་དེ། སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པར་བྱིན་གྱིས་བརླབ་ཏུ་གསོལ་ལོ། །དྷརྨཱ་ཙིཏྟ་ཨ་བྷི་ཥིཉྩ་ཧཱུཾ། དེ་ནས་རྒྱུད་ཉིད་ལྟེ་བར་བཞག །སངས་རྒྱས་ཐམས་ཅད་ཀྱི་སྲས་གཅིག་པོས་བདག་མིང་འདི་ཞེས་བགྱི་བའི། ལུས་ངག་ཡིད་གསུམ་བྱིན་གྱིས་བརླབ་ཏུ་གསོལ། སྨིན་པར་མཛད་དུ་གསོལ། གྲོལ་བར་མཛད་དུ་གསོལ། གང་བར་མཛད་དུ་གསོལ། ཆེར་འཕེལ་བར་མཛད་དུ་གསོལ། རྒྱས་པར་མཛད་དུ་གསོལ། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པས་བྱིན་གྱིས་བརླབ་ཏུ་གསོལ་ལོ། །ཀཱ་ཡ་ཝཱ་ཀ་ཙིཏྟ་དྷརྨཱ་ཀརྨ་ཨ་བྷི་ཥིཉྩ་སྭཱ་ཧཱ། དེ་ནས་ཐིག་ལེའི་སྙིང་པོ་རྣམས་ཚར་གསུམ་བཀླག་གོ། །དེ་ནས་གནས་བཞིར་དབང་བསྐུར་ཏེ། །དཔོན་སློབ་གཉིས་ཀྱི་ཚིག་འདི་ཉིད། །ལན་གསུམ་བརྗོད་ལ་དར་སྣས་དྲིལ། །དྲོད་དང་མ་བྲལ་བཅང་བར་བྱ། །ཕྱོགས་བཅུའི་བླ་མ་སངས་རྒྱས་རྣམས། །མ་ལུས་བརྩེ་བས་དགོངས་སུ་གསོལ། །བདག་གིས་སེམས་ཅན་དོན་དུ་ནི། །རྒྱུད་བཏགས་འདི་བཞུགས་བྱིན་རླབས་ཀྱིས། །བདག་མཐོང་ཐོས་དང་དྲན་པ་དང་། །མཆོད་དང་བསྟོད་དང་སྨྲ་ཡང་རུང་། །རེག་པར་གྱུར་བའི་སེམས་ཅན་རྣམས། །མྱུར་དུ་མངོན་པར་སངས་རྒྱས་ཤོག །བསླབ་བྱ་ནི་འདི་དབུགས་ལ་སླེབ་དགོས་པས་རྦབ་དང་ཆུ་དང་འཆི་བའི་རྐྱེན་དང་གར་འཆི་ཆ་མེད་པས་མ་བྲལ་བར་བཅང་བར་བྱའོ། །འདི་བཏགས་ནས་དགེ་བ་ཅི་བྱས་པ་བརྗོད་ལས་འདས་པར་འཕེལ་བས། དགེ་བའི་ལས་གྲུབ་ཚད་སེམས་ཅན་གྱི་དོན་དུ་བྱེད་པར་གལ་ཆེའོ། །འདི་བཏགས་ནས་སྡིག་པ་བསགས་ན་ཡང་བརྗོད་ལས་འདས་པར་འཕེལ་འགྲོ་བས་ཤིན་ཏུ་འཛེམ་པ་གལ་ཆེའོ། །འདི་ཉིད་བཞུགས་པའི་སྐལ་བ་ཅན་དེ་ནི་སངས་རྒྱས་ཐམས་ཅད་འདུས་པའི་མཆོད་རྟེན་དུ་རིགས་པར་བྱའོ། །སྐབས་སྐབས་སུ་དྲི་ཞིམ་པོ་ཡང་འཐུལ་བར་བྱེད་དོ། །དེ་ནི་ལྷ་དང་མཁའ་འགྲོ་མས་མཆོད་པར་ཡོང་བ་ཡིན་པས། རྒྱུད་བཀླག་པར་བྱའོ། །རབ་ཏུ་གསང་བའི་མན་ངག་སྐལ་ལྡན་གྱི་ཙིཏྟར་དྷ་ཐིམ། སློབ་དཔོན་ཆེན་པོ་དགའ་རབ་རྡོ་རྗེས་མཛད་པ་སྲས་གཅིག་རྒྱུད་ཀྱི་འགྲེལ་པ་རྫོགས་སོ།། །།དགེའོ། །སརྦ་མངྒ་ལཾ།། །།