དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད།

དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོ་ཞེས་བྱ་བའི་རྒྱུད་བཞུགས་སོ། །རྒྱ་གར་སྐད་དུ། ཤྲཱི་ནཱ་ཐཱ་ཀཱ་ལ་ཨ་བྷི་སྣཱ་ས་མ་ལ་ལཱི་ཏ་ཡུདྷ་ཙཀྲ་ནཱ་ཱམ་ཏནྟྲ། བོད་སྐད་དུ། དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོ་ཞེས་བྱ་བའི་རྒྱུད། བཅོམ་ལྡན་འདས་དཔལ་སྒྲོལ་བྱེད་ཐུགས་རྗེའི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ལོ། །འདི་སྐད་འགྲོ་བ་བདག་གིས་ཐོས་པ་དུས་གཅིག་ན། བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེ་དེ་སངས་རྒྱས་ཀྱི་ཞིང་ཁམས་བསམ་གྱིས་མི་ཁྱབ་པའི་ཆོས་ཀྱི་དབྱིངས་ཀྱི་མཐའ་ཀླས་པ་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བྱེ་བྲག་དུ་མ་ན་སྟོན་པ་ཡང་དག་པར་རྫོགས་པའི་སངས་རྒྱས་སྤྱོད་ཡུལ་ཐམས་ཅད་ནས་ཐམས་ཅད་དུ་ཡོངས་སུ་དག་པ་དང་། རྒྱལ་པོ་ལྔ་ལྟར་རྫོགས་ལོངས་སྤྱོད་པ་དང་། ཐུབ་པའི་དབང་པོ་ལྟ་བུ་སོགས་པ་བསམ་གྱིས་མི་ཁྱབ་པའི་དྲུང་ན་རང་རང་དང་མཐུན་པའི་སྐུ་དང་། མཚན་གྱི་བྱེ་བྲག་དུ་མ་སྟོན་ཅིང་འཁོད་དེ། སྐུའི་བྱེ་བྲག་དེ་འདྲ་བ་རེ་རེའི་འཁོར་ན་ཡང་འདུན་པ་སེམས་པ་དང་། རིགས་ཆེན་འབྱེད་པ་དང་། དབུགས་ཆེན་འབྱིན་པ་དང་། ལུང་ཆེན་ཐོབ་པ་དང་། རྩལ་ཆེན་རྫོགས་པའི་རྣལ་འབྱོར་གྱི་བྱེ་བྲག་གྲངས་བརྗོད་ཀྱིས་མི་ལང་བས་བསྐོར་ནས་བཞུགས་སོ། །དེ་དང་དེ་ཉིད་འབྱུང་བའི་དུས་ཀུན་ཏུ། རང་གི་སྟོན་པ་ལ་ཉན་ཅིང་རང་གི་ཉེས་འཁོར་ན་ཆོས་སྟོན་ཏོ། །དེ་ཡང་གང་ཞེ་ན། སེམས་ཀྱི་རང་བཞིན་འོད་གསལ་བ། གསང་སྔགས་ཀྱི་ངོ་བོ་དེ་ཉིད་དོ། །སྤྲུལ་པའི་སྐུ་དེ་དག་འདས་ནས་ཀྱང་འབྱུང་བའི་དུས་དེའི་འཁོར་གྱིས་རྟོག་པ་སེལ་ཞིང་གསང་སྔགས་སྟོན་ཏོ། །དེའི་དུས་ན་ཐུབ་པ་ཆེན་པོ་དེ་ཉིད་དགོངས་པ་གསུམ་གྱི་ཕྱིར་མྱ་ངན་ལས་འདའ་བའི་ཚུལ་སྟོན་ཏོ། །དེའི་དུས་ན་རྫུ་འཕྲུལ་ཅན་བཀའ་འགྲོ་བ་མཛད་ནས་འཁོར་བསྡུས་པས། གང་ནང་དུ་ཡང་དག་པར་འཇོག་པ་ལྔ་མ་གཏོགས་པ་འདུས་ནས་རང་རང་གི་ཐེ་ཚོམ་བཅད་དོ། །འཁོར་འདུས་པའི་ནང་ནས་རིག་འཛིན་རྒྱལ་པོ་ཉིད་ཀྱིས་གསང་བ་དམ་པའི་བསྟན་པ་རྒྱས་པར་ནམ་བྱུང་། སངས་རྒྱས་ཉིད་ཀྱིས་གསང་སྔགས་མི་སྟོན་ནམ་ཞུས་པས། གསང་སྔགས་དུས་བཅུ་གཉིས་ཀྱི་དུས་སུ་བྱུང་། འབྱུང་འབྱུང་བར་འགྱུར་རོ། །དེ་ལྟར་ངས་ཚོགས་སུ་རྒྱས་པར་མ་བྱས་ཀྱང་། དམ་པའི་རིགས་རྟོགས་པ་གསུམ་ལྡན་ལ་སོགས་ཀུན་ལ་རྒྱས་པར་བཤད་པས་ང་མྱ་ངན་ལས་འདས་ནས་ལོ་བརྒྱད་དང་བཅུ་གཉིས་ཀྱི་དུས་སུ་འབྱུང་ཞེས་ལུང་བསྟན་ནས་འདས་སོ། །ལོག་པའི་བདུད་རྣམས་ནི་ཀྱལ་ཀའི་ཚིག་སྒྲོགས་པར་འགྱུར་ལ། དེ་ལ་བྱིས་པ་སོ་སོའི་སྐྱེ་བོ་ཕལ་ཆེ་བ་མྱང་ངན་གྱིས་གདུངས་ཤིང་ཀྱི་ཧུད་ཀྱི་ཧུད་ངུ་ཆོ་ངེས་འདེབས་སོ། །རང་གི་དོན་ལ་སེམས་དཔའ་རྣམས་ནི་འདའ་བ་མེད་པའི་དོན་ཆུད་དེ་གནས་སོ། །དེ་ནས་དེའི་དུས་ལ་བབ་པའི་ཚེ་རིགས་ཅན་ལྔ་ནི་འདི་ལྟ་སྟེ། བློ་གྲོས་ཐབས་དང་ལྡན་པ་དང་། ཟབ་པ་དང་། དྲི་མ་མེད་པ། མཐའ་ཡས་པ། བློ་གྲོས་གསལ་བ། རང་གི་མངོན་པར་ཤེས་པས་མཁྱེན་ཏེ། རྫུ་འཕྲུལ་གྱིས་ལྷོ་ཕྱོགས་ཀྱི་གླིང་ཏན་ཏྲའི་ཚལ་དྲག་ཤུལ་ཅན་གྱི་རི་ལ་ཚོགས་ཏེ་སྟོན་པ་འདས་པ་དང་། གསང་སྔགས་ཀྱི་ཐེག་པ་མ་བྱུང་བ་ལ། གདུག་པ་ཅན་དང་བཅས་ཏེ་སྨྲེ་སྔགས་ཆེར་བསྒྲགས་པས། བདེ་བར་གཤེགས་པ་ཐམས་ཅད་ཀྱིས་གསན་ནས། གསང་བའི་བདག་པོ་ལ། རིན་པོ་ཆེའི་འཁོར་ལོ་རྩིབས་དང་ལྡན་པའི་དབང་བསྐུར་ནས་གསང་སྔགས་རྡོ་རྗེ་ཐེག་པ་ཤོད་ཅིག་པར་བཀའ་བསྒོའོ། །དེ་ནས་གསང་བའི་བདག་པོས་ཞལ་གྱིས་བཞེས་ཏེ། ཐུགས་རྗེའི་རྫུ་འཕྲུལ་གྱིས་རང་བཞིན་གྱི་སྐུར་མཛད་ནས། རི་མ་ལ་ཡའི་རྩེར་བྱོན་ནོ། །དེང་དམ་པའི་རིག་ཅན་ལྔ་པོས་འདི་ཅི་ཡིན་སྙམ་སྟེ་ཐེ་ཚོམ་དུ་གྱུར་ནས་དྲིས་པ། ཨེ་མ་ཧོ། ངོ་མཚར་ཆེའོ། །སྐྱེས་བུ་ཆེན་པོ་ཁྱོད་སུ་ཞིག་ཡིན། གང་ནས་བྱོན། གདུང་རུས་ཕ་མ་ཅི་ཡིན་གང་ལ་བརྟེན། དོན་ཅི་ལ་བྱོན། ཞེས་དྲིས་པས། གསང་བའི་བདག་པོས་བཀའ་སྩལ་བ། །ང་ནི་ཅིས་ཀྱང་མི་བསྐྱོད་དེ། །འགྱུར་མེད་རྡོ་རྗེ་སེམས་དཔའ་ལས། །ཡེ་ཤེས་ཐུགས་རྗེས་འགྲོ་དོན་ལ། །བྱོན་པས་གསང་བདག་ཕྱག་རྡོར་ཡིན། །སྲིད་གསུམ་འགྲོ་བའི་གཉེན་གཅིག་ཡིན། །སྟོང་པ་ཆེན་པོའི་དབྱིངས་ནས་འོང་། །ཕ་ནི་སྣ་ཚོགས་མ་འགགས་ཐབས། །མ་ནི་ཤེས་རབ་བརྗོད་དང་བྲལ། །རྡོ་རྗེ་རིགས་ཆེན་ང་ཡི་རུས། །བཤེས་གཉེན་ཕྱོགས་བཅུའི་སངས་རྒྱས་ཀྱིས། །དབང་བསྐུར་འགྲོ་བའི་ཚིག་ལ་བརྟེན། །ཁྱེད་ཀྱི་ཐེ་ཚོམ་སེལ་དུ་འོངས། །འགྲོ་བ་སྨག་རུམ་འཁྱམས་པ་ལ། །ཡེ་ཤེས་སྒྲོན་མེ་སྦར་དུ་འོངས། །འཁོར་བའི་རྒྱ་མཚོར་བྱིང་བ་ལ། །ཐབས་ཀྱི་གྲུ་གཟིངས་བྱེད་དུ་འོངས། །མ་རིག་ལིང་ཏོག་ལྡོངས་པ་ལ། །ཡེ་ཤེས་ཐུར་མས་འབྱེད་དུ་འོངས། །ལམ་སྟོར་རྫོབ་ཏུ་འཁྱམས་པ་ལ། །མ་ནོར་ལམ་སྣ་འདྲེན་དུ་འོངས། །མ་རྟོགས་དོན་གྱིས་དབུལ་བ་ལ། །རང་གཏེར་ཡིད་བཞིན་འདོན་དུ་འོངས། །རྟོག་པའི་གཟུང་འཛིན་སྒོ་ལྕགས་ལ། །འཁྲུལ་གྱི་ལྡེ་མིག་འགྲོལ་དུ་འོངས། །སྟོན་པ་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །མ་རིག་སྨིན་མཛད་འདུལ་བའི་ཕྱིར། །འབྱུང་འཇིག་དར་ནུབ་ཐུགས་རྗེ་ཡིན། །ཞེས་གསུངས་སོ། །དམ་པའི་རིགས་ཅན་ལྔ་པོས་དང་བའི་སེམས་ཀྱིས་ཕྱག་བཙལ་ནས་བསྟོད་དོ། །ཨེ་མ་བཅོམ་ལྡན་གསང་བའི་བདག །བཀའ་ཡི་འགྲེལ་ཆེན་གསང་བའི་མདོ། །ཆོས་ཀྱི་མེ་ལོང་བདུད་ཀྱི་དག །སྨན་པའི་རྒྱལ་པོ་ཡིད་བཞིན་ནོར། །སངས་རྒྱས་ཀུན་དངོས་ཁྱོད་ཕྱག་འཚལ། །ཞེས་ཕྱག་བཙལ་ལོ། །དེའི་དུས་སུ་མི་མཇེད་འཇིག་རྟེན་འདིར། མངོན་སུམ་མཚན་མའི་ལྟས་སྣ་ཚོགས་དང་། འཕོ་འགྱུར་དང་ཆོ་འཕྲུལ་ལ་སོགས་དུ་མ་ཡང་བྱུང་ངོ་། །དེའི་དུས་སུ་གསང་སྔགས་ཀྱི་རིགས་ཅན་ལྷའི་ཚོགས་དང་། དྲང་སྲོང་དང་། གཤིན་རྗེ་དང་། བདུད་དང་། གནོད་སྦྱིན་དང་། དཔལ་མགོན་པོ་ནག་པོ་ལ་སོགས་པ་མ་མོའི་ཚོགས་དང་། ལྷ་མ་སྲིན་སྡེ་བརྒྱད་ཀུན་འདུས་ཏེ། རང་རང་གི་སྲོག་སྙིང་ཕུལ་ནས་བྲན་དུ་ཁས་བླངས་ཤིང་བསྟན་པ་བསྲུང་བར་དམ་བཅས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། གླེང་གཞི་སྔོན་གྱི་གཏམ་རྒྱུད་ཀྱི་ལེའུ་སྟེ་དང་པོའོ། །དེ་ནས་འཁོར་དེའི་ནང་ནས་སྲིན་པོའི་རྒྱལ་པོ་ལང་ཀ་མགྲིན་བཅུ་ཞེས་བྱ་བ། སྔོན་གྱི་རྒྱལ་བ་རྣམས་ལ་བྱ་བ་བྱས་པ། ཐུབ་པའི་དབང་པོ་ལས་གསང་སྔགས་ཀྱི་ངེས་པ་རྙེད་པ་དེས། ཆེད་དུ་རང་གི་སྟན་ལས་ལངས་ནས། ཨེ་མ་ཐུགས་རྗེའི་མངའ་བདག་མཆོག །སངས་རྒྱས་ཁྲོས་པའི་སྐུ་མཆོག་དཔལ། །ཉིད་ཀྱི་བཀའ་ཡི་ལས་མཁན་མཆོག །སྨྱོན་པ་ནག་པོ་གཏུམ་བག་ཅན། །བདེ་མཐོང་བར་བའི་ལམ་རྙེད་ཀྱང་། །སེམས་བསྐྱེད་དབང་གིས་གཞན་དོན་དུ། །བཟང་པོ་དུས་ཚོགས་སྲུན་པ་དེའི། །ལྟ་སྤྱོད་དཀྱིལ་འཁོར་རྣམ་གྲངས་དང་། །དབང་དང་དམ་ཚིག་སྒྲུབ་ཐབས་དང་། །དེ་ཡི་རྫས་དང་སྙིང་པོ་རྟོགས། །ལས་ལ་བསྐུལ་དང་མཐའ་སྡུད་དང་། །ཕྲིན་ལས་བྱེ་བྲག་འབྲས་བུ་དང་། །རྒྱུ་རྐྱེན་གཏན་ལ་དབབ་པ་རྣམས། འདུས་པའི་འཁོར་དང་ཕྱི་རབས་ཀྱི། །དོན་དུ་བདག་ལ་བསྟན་པར་མཛོད། །ཅེས་ཞུས་པས། དེ་ནས་བཅོམ་ལྡན་འདས་ཀྱིས་ཞལ་གྱིས་བཞེས་པའི་ཏིང་ངེ་འཛིན་ལས་མི་གཡོ་བར་མཛད་དེ་ཆེད་དུ་བརྗོད་པ་འདི་བརྗོད་དོ། །སྨྱོན་པ་ནག་པོ་གདུབ་རྩུབ་ཅན། །སངས་རྒྱས་སྟོང་གིས་བྱིན་བརླབས་པས། །བཏུལ་ཏེ་སྒྲིབ་སྦྱངས་ཐར་ལམ་བསྟན། །ཕྲིན་ལས་རྫོགས་པར་ལུང་བསྟན་ནས། །རང་ངམ་སེམས་བསྐྱེད་བྱ་བའི་ཕྱིར། །བསྐལ་བཟང་རྫོགས་པར་བསྟན་པ་བསྲུངས། །དེ་ཉིད་ལྟ་བ་སྤྱོད་པ་གཉིས་། །དཀྱིལ་འཁོར་དག་ནི་བདུན་དུ་ངེས། །ཇི་བཞིན་ཉིད་ཀྱི་དཀྱིལ་འཁོར་དང་། །ཕྱག་རྒྱ་དངོས་གྲུབ་དཀྱིལ་འཁོར་དང་། །བྱང་ཆུབ་སེམས་དང་བསོད་ནམས་ཚོགས། །བཀའ་སྡོད་ཕོ་ཉ་དྲག་པོ་ལས། །གཏད་ཁྲམ་མནན་པའི་དཀྱིལ་འཁོར་རོ། །དབང་བསྐུར་བ་དང་དམ་ཚིག་བཅུ་གསུམ་དང་། །མཆོད་རྟེན་རྐང་དང་དྲག་ཐུན་རྫས། །བསྙེན་བསྒྲུབ་ལས་སྦྱོར་སྔགས་རྣམས་དང་། །རྟགས་དང་བསྐུལ་བའི་བྱེ་བྲག་གསུམ། །སྒྲུབ་པའི་ཐབས་ལ་གསུམ་དུ་ངེས། །དཔའ་བོ་གྱིང་དུ་སྒྲུབ་པ་དང་། །རྩ་བ་བདུན་ལྟར་སྒྲུབ་པ་དང་། །དྲག་པོ་གཤིན་རྗེ་ལྟར་སྒྲུབ་པའོ། །ལྷ་ནི་ཤེས་པ་ཧེ་རུ་ཀ །གཉེན་པོ་ང་འམ་བྱེ་བྲག་གསུམ། །སྒྲུབ་པའི་ཐབས་ལ་གསུམ་དུ་ངེས། །དཔའ་བོ་རྟ་མགྲིན་དབང་གིས་འདུལ། །བདུད་འདུལ་རྡོ་རྗེ་སྲིན་པོའོ། །དྲག་པོ་འཇམ་དཔལ་གཤིན་རྗེ་གཤེད། །ལས་རིམ་ཞི་རྒྱས་ཕན་གདགས་དང་། །དབང་དུ་བསྡུ་དང་དབབ་བསད་དང་། །བསྲེག་དང་གནན་པ་ཟོར་གྱི་རྫོགས། །དེ་ཡི་རྒྱུ་དང་རྐྱེན་ལ་དབང་། །བཏུལ་ལུགས་བྱེ་བྲག་རིམ་པ་བཞིན། །སྔོན་གྱི་གོ་ཆ་གྱོན་པའི་མཐུས། །རིམ་པས་བཤད་ཀྱིས་ཆགས་པས་ཟུང་། །ཞེས་གསུངས་སོ། །གླེང་སློང་ཞལ་གྱིས་བཞེས་པའི་ལེའུ་སྟེ་གཉིས་པའོ། །དེ་ནས་གནས་ལུགས་མ་བཅོས་པའི་དོན་འདི་གསུངས་སོ། །ཧཱུཾ། འདས་པའི་དུས་ན་སྔོན་བྱུང་བའི། །མི་བསྐྱོད་ཞིང་ཁམས་དག་པ་རུ། །དགེ་སློང་ཐུབ་དཀའ་གཞོན་ནུ་ཡིས། །ཁྱིམ་བདག་ཀེའུ་ཀ་ཡའི་བུ། །དགེ་སློང་ཐར་པ་ནག་པོ་དང་། །དན་ཕག་གཡོག་དང་བཅས་པ་ལ། །ཇི་བཞིན་ཉིད་ཀྱི་དཀྱིལ་འཁོར་གསུངས། །ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་བཅས་ཀྱང་། །ནམ་མཁའ་ལ་ནི་སྤྲིན་བཞིན་ཏེ། །དེ་ནི་རྣལ་འབྱོར་དམ་པའི་ལམ། །སེམས་ཀྱི་དཀྱིལ་འཁོར་གང་གསལ་བས། །གསང་སྔགས་ངོ་བོ་དེ་ཉིད་ཡིན། །རྡོ་རྗེ་སེམས་དཔའི་རང་བཞིན་ཏེ། །ཡོན་ཏན་མཚན་གྲངས་མང་དུ་གྲགས། །གསུངས་པ་དེ་ཡང་འདི་ལྟ་སྟེ། །གནས་ལུགས་ཇི་བཞིན་ཆོས་ཉིད་དེ། །རྣམ་རྟོག་བློ་ཡིས་མ་བཅོས་པར། །རང་བཞིན་རྣལ་མའི་དོན་རྟོགས་ན། །དངོས་པོ་གང་ལ་འང་མ་ཞེན་པར། །གཞི་ལས་མ་གཡོས་གནས་པ་ཡིས །འདོད་ཡོན་ཞེན་ཆགས་ལ་སྤྱད་ཀྱང་། །འཆིང་བར་མི་འགྱུར་རང་སར་གྲོལ། །མཁའ་དང་སྤྲིན་དང་ཆོ་འཕྲུལ་འབྱུང་། །སྣང་དང་རང་གྲོལ་འགྱུར་སྙམ་མེད། །དེ་བཞིན་རྟོགས་པའི་རྣལ་འབྱོར་པ། །དམ་པའི་ལམ་ལ་གནས་པ་ཡིན། །སེམས་ཉིད་མ་བཅོས་སྣ་ཚོགས་འབྱུང་། །གསལ་ཞིང་རིགས་པའི་ངོ་བོའོ། །དཀྱིལ་ཞེས་རང་བཞིན་སྤྲོས་དང་བྲལ། །རྣམས་པ་མི་འགགས་འཁོར་ལྟར་སྣང་། །ཐིག་ལེ་རང་རིག་ཡེ་ཤེས་དེ། །འོད་ཅེས་བྱ་བ་སྣང་བའི་རྩལ། །རང་རིག་མ་བསྒྲིབས་རང་བཞིན་གསལ། །སྨྲར་མེད་སྤྱོད་ཡུལ་བྲལ་བས་གསང་། །དུས་གསུམ་སངས་རྒྱས་ཐམས་ཅད་ཀྱི། །ཡོན་ཏན་འབྱུང་གནས་ཉིད་དུ་སྔགས། །མི་དམིགས་ངང་ལས་ཀུན་འབྱུང་བས། །ངོ་བོ་ཉིད་ཅེས་བརྗོད་པའོ། །དེ་ལ་གཉེན་པོ་མེད་པ་དང་། །འཕོ་འགྱུར་སྐྱེ་འགག་མེད་པ་ཡིན། །མཚན་པའི་བདག་རྟོག་འཇོམས་པའི་ཕྱིར། །རྡོ་རྗེ་ཞེས་སུ་བཤད་པ་ཡིན། །དེ་ཉིད་རང་བཞིན་མ་བཅོས་པ། །གསལ་སྟོང་རིག་པའི་ཡེ་ཤེས་སེམས། །དངོས་པོ་ཀུན་བཅོས་དཔལ་ཞེས་བརྗོད། །འགྲན་ཟླ་མེད་པས་བླ་ན་མེད། །གསལ་ལ་མི་གཡོ་བྱང་ཆུབ་སེམས། །ཕྱོགས་རིས་བྲལ་ཞིང་མ་བཅོས་པ། །ཆོས་རྣམས་ཀུན་གྱི་དེ་བཞིན་ཉིད། །མ་སྤངས་རང་གྲོལ་སྙིང་པོ་ཉིད། །དེ་ཕྱིར་མཐའ་ལས་འདས་པ་དང་། །དབུ་མར་མི་དམིགས་པ་ཞེས་བྱ། །གང་ལྟར་མོས་པར་སྣང་བས་ན། །སངས་རྒྱས་ཀུན་གྱི་དངོས་གཞི་ཡིན། །འགྲོ་འོང་མེད་བཞིན་འདུལ་སྣང་བས། །སྤྲུལ་པ་ཀུན་གྱི་འབྱུང་གནས་ཡིན། །དེ་ལ་བརྟེན་ནས་དེ་འབྱུང་བས། །ཀུན་གྱི་དགེ་བའི་བཤེས་གཉེན་ཡིན། །དེ་རྟོགས་མུན་པ་སེལ་བས་ན། །ཞིང་ཁམས་ཀུན་ཏུ་སྒྲོན་མེ་ཡི། །ཅི་ཡང་མི་འགག་ཀུན་འཆར་བས། །ཐུགས་རྗེ་ཐབས་ཀྱི་འབྱུང་གནས་ཡིན། །ཆོས་རྣམས་མ་འདྲེས་རང་སྣང་བས། །ཀུན་གསལ་མེ་ལོང་འོད་པོ་ཆེ། །དེ་ལྟ་བུ་ཡི་དོན་རྟོགས་ན། །རང་བཞིན་ཉིད་ཀྱི་དཀྱིལ་འཁོར་རོ། །བདག་གཞན་ཆ་ཡིས་སྦྱོད་པ་ཡང་། །ལྟ་བའི་པོགས་སུ་དབྱུང་བ་དང་། །དེ་ལས་མི་འདའ་དམ་ཚིག་བཤད། །གཏན་ནས་མ་རྟོགས་སེམས་ཅན་ལ། །ཕན་པའི་སྤྱོདཔ་སྣ་ཚོགས་པས། །སྒྲོལ་བ་ཉིད་དང་སྦྱོར་ལ་སོགས། །མཁའ་ལ་ཁྱུང་དང་ཆུ་ལ་ཉ། །དབྱེར་མེད་ཐོགས་ཆགས་མེད་པར་སྤྱོད། །ལོངས་སྤྱོད་མེད་བཞིན་ཐམས་ཅད་སྤྱོད། །མི་འགོག་མི་འཛིན་ཚོགས་གཉིས་རྫོགས། །ཤེས་འཇུག་ཀུན་དང་གཞན་དོན་དུ། །ལམ་བསྒོམས་སྐད་ཅིག་ཆ་བསྒོམས་ནས། །བསོད་ནམས་དཀྱིལ་འཁོར་མོས་སློབ་ཅིང་། །རང་བཞིན་རྫོགས་པས་མཆོད་བསྙེན་ཀུན། །ཇི་ལྟར་སྤྱད་ཀྱང་ཉིད་དུ་གྲོལ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །ཇི་བཞིན་ཉིད་ཀྱི་དཀྱིལ་འཁོར་བསྟན་པའི་ལེའུ་སྟེ་གསུམ་པའོ། ། དེ་ནས་ཕྱག་རྒྱ་དངོས་གྲུབ་ཀྱིས་དཀྱིལ་འཁོར་འདི་གསུངས་སོ། །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །གསང་སྔགས་འཕྲིན་སྒྲུབ་བྱེད་པ་རྣམས། །འབྲས་བུ་མེད་ཅིར་རླག་པར་འགྱུར། །ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གི་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པས་ན། །སྣོད་ལྡན་ངང་ཚུལ་བཟང་ལ་བསྟན། །ལུས་དང་ལོངས་སྤྱོད་གཏོང་ལ་སྦྱིན། །གཞན་དུ་ནམ་ཡང་སྦྱིན་མི་བྱ། །རྨོངས་ལ་འཕྱར་རབས་གལ་ཏེ་སྦྱིན། །དུས་མིན་པར་ནི་སྲོག་ཟད་ནས། །བསྲེགས་དང་སྦྲེབས་པར་ཡུན་རིང་གནས། །ཉམས་དགའ་ཕུན་སུམ་ཚོགས་པ་ཡིན། །གནས་མཆོག་དམ་པ་ཡིན་འོང་བར། །ཚུལ་དང་མཐུན་པའི་རྫས་རྣམས་བསོགས། །མཎྜལ་ལ་སོགས་མཛེས་བྱས་ནས། །ཁྲུས་བྱས་ལྷ་བསྒོམས་སྙིང་གར་ཧཱུཾ། །བགེགས་བསྐྲད་ཕྱོགས་བསྲུང་དཀྱིལ་འཁོར་ལ། །འོད་ཟེར་འཕྲོ་འདུས་དབང་པོ་དགུག །ཕྱག་འཚལ་མཆོད་པ་འདི་ཡང་འབུལ། །ༀ་སརྦ་ཏ་ཐ་ག་ཏ་བཛྲ་ཤྲཱི་ཧེ་རུ་ཀ་བཛྲ་ཀྲོ་དྷི་དྷ་ར་མ་ཧཱ་ཛྙཱ་ན་མཎྜལ་ཧཱུཾ། ཡོན་ཆབ་སྤོས་སོགས་མཆོད་པ་དང་། །གཏོར་མ་བདུད་རྩི་རཀྟ་རྣམས། །རིམ་པ་བཞིན་དུ་སྔགས་ཀྱིས་དབུལ། །ཐུགས་ལ་འབྱུང་ལ་གཉིས་མེད་རོལ། །ཧཱུཾ། བདག་འདྲ་ལོག་པའི་སྟོབས་ལྡན་གྱིས། །ཐོག་མཐའ་མེད་པའི་དུས་མཐའ་ནས། །སྲིད་པའི་འཁོར་ལོར་འཁྱམས་པར་ངེས། །སྐྱེ་བ་མང་པོའི་ལུས་བླངས་པས། །སུས་ཀྱང་མ་བྱས་རང་གི་ལས། །དེ་ཙམ་ཆ་གཅིག་དོན་སྤྱད་ན། །དེ་ཙམ་དོན་གྱིས་སངས་རྒྱས་ཟིན། །རང་ལུས་སྟོང་པར་མ་ཕོད་ཅིང་། །ཆགས་པའི་མཐའ་ལ་མངོན་ཞེན་པས། །ཟུག་རྔུའི་ནད་ཀྱིས་ཟིན་པ་ཡིས། །སྲིད་པའི་བཙོན་རར་ཆུད་པ་འདི། །མཁའ་ལ་མདུད་པ་བརྒྱབ་པས་ཉེས། །འཁོར་བའི་རླུང་སྒོར་ཁྱེར་པ་འདི། །ཡས་ཀྱི་རླུང་གིས་དེད་པས་ཉེས། །དུས་གསུམ་རྒྱལ་པ་མ་ལུས་ལ། །འདི་དག་མི་འཆབ་མཐོལ་ལོ་བཤགས། །ༀ། རྡོ་རྗེ་སེམས་དཔའི་ཡིད་སྐྱོབས་ཤིག །རྡོ་རྗེ་སེམས་དཔའ་ཉེ་ཞིང་བསྟན་པར་མཛོད། །བདེ་བར་གྱུར་ཅིག་ཀུན་ཏུ་བདེ་བར་གྱུར། །ཤིན་ཏུ་བདག་ལ་ཐུགས་རྗེས་ཁྱབ་པར་མཛོད། །བདག་ཉིད་ཤིན་ཏུ་བདེ་བར་གྱུར་ཅིག །དངོས་གྲུབ་ཐམས་ཅད་བདག་ལ་མྱུར་དུ་གསོལ། །ཕྲིན་ལས་ཐམས་ཅད་དག་པར་མཛོད། །སེམས་ཉིད་དཔལ་དུ་མཛོད་ཅིང་ཐུགས་དགེས་བདེ། །བཅོམ་ལྡན་དེ་བཞིན་གཤེགས་པ་ཐམས་ཅད་ཀུན། །རྡོ་རྗེ་སེམས་ཀྱི་དཀྱིལ་དུ་བདག་འདྲིལ་ཅིག །རྡོ་རྗེ་འབྱུང་པོ་ཆེན་པོའི་དམ་ཚིག་གིས། །སེམས་དཔའ་སྐྱེ་མེད་ཀློང་དུ་དག་པར་མཛོད། །ༀ་ཏ་ཀེཾ་ཏ་ཀེཾ་ཕཊ། ཀྲོ་ཏ་ཀྲོ་ཏ་རཾ་ཏཾ་སྣ་ཏིག་ཁཾ་ཧ་ལ་ཧ་ལ་ཡཾ། དང་པོ་འཛིན་པ་སྟོང་པ་ཉིད་དག་པར་བསྒོམ་མོ། །དབང་པོ་འོད་དུ་ཞུ། མཆོད་པའི་རྫས་རྣམས་བརླབ། ༀ་བཛྲ་ཨ་མྲྀ་ཏ་ཨ་ཧོ་སརྦ་མ་ན་ཧཱུཾ་ཧྲི་ཋ། ༀ་མ་ཧཱ་བྷ་ལིང་ཏ་ཏེ་ཛྭོ་བྷ་ལིང་ཏེ་ཧཱུཾ། ༀ་མ་ཧཱ་རཀྟ་རཱ་ག་ཤཱུ་ནྱ་ཏྭ་ས་མུ་དྲ་མཎྜ་ལ་ཧཱུཾ། ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། སྔོན་དུ་འགྲོ་བའི་རིམ་པ་བསྟན་པའི་ལེའུ་སྟེ་བཞི་པའོ། །དེ་ནས་སྒྲུབ་པའི་རིམ་པ་འདི་གསུངས་སོ། །ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ནའང་སྐྱེས་པ་མེད། །སྟོང་པ་ཉིད་དུ་རབ་གསལ་བའི། །སྙིང་རྗེའི་ཡུལ་ནི་བསྒོམ་བྱ་ཞིང་། །ཧཱུཾ་གསལ་འབྱུང་བའི་དཀྱིལ་འཁོར་བསམ། །བྷྲཱུྃ་ལས་དུར་ཁྲོད་འཇིགས་པའི་གནས། །རང་བཞིན་ཕྱི་ནང་མཐའ་དབུས་བྲལ། །སྣང་སྟོང་གར་ཡང་རྒྱ་མ་ཆད། །དུར་ཁྲོད་ཐོད་པའི་རྒྱུ་ལས་གྲུབ། །ཡེ་ཤེས་ལྔ་ཡི་འོད་ཟེར་འབར། །འཁོར་ལོ་རྩིབས་བཞི་མུ་ཁྱུད་དང་། །གྲུ་ཆད་བར་ཁྱམས་སྒོ་གཉིས་བརྩེགས། །བསྐལ་པ་མེ་རི་རབ་ཏུ་འཁྲུགས། །དྲེགས་པ་ཁྱོ་ཤུག་བསྣོལ་པ་དང་། །དྲི་ཟ་སྲིན་པོ་གཤིན་རྗེ་བདུད། །དོམ་དང་ཁྱུ་མཆོག་མ་ཧེ་སྟག །གཟིག་གིས་བརྗིས་ཏེ་ཉི་དལ་བསམ། །ཕྱི་རོལ་ཞིང་དང་ཉི་མ་བསལ། །ཞིང་སྐམ་གདན་གྱི་བྱེ་བྲག་ལྡན། །དབུས་སུ་རྒྱུ་ལས་རྡོ་རྗེ་འབར། །འཕྲོ་འདུས་འོད་ལས་རྩ་སྔགས་ཀྱིས། །བཛྲ་ཁྲག་འཐུང་ཧེ་རུ་ཀ །དབུ་གསུམ་ཕྱག་དྲུག་ཞབས་བཞི་བགྲད། །གཡས་གཡོན་དཀར་དམར་དབུས་མཐིང་ཞལ། །ཁམ་ནག་དབུ་སྐྲ་ཁྲོ་རྟགས་བརྒྱད། །རྡོ་རྗེ་ཁ་ཊཾ་རྔེ་ཆུང་གཡས། །བྷནྡྷ་རྒྱུ་ཞགས་དུང་ཁྲག་གཡོན། །དུར་ཁྲོད་ཆས་རྫོགས་གར་དགུའི་སྟབས། །ཡུམ་མཆོག་མཐིང་ནག་འཁྲིལ་འཁྱུད་སྦྱོར། །ཐུགས་ལས་ཧཱུཾ་བཞི་གདན་ལས་སྤྲོས། །སྒོང་སྐྱེས་ཡུལ་དུ་རིགས་བ ཞི་བསྐྱེད། །ཞལ་གཅིག་ཕྱག་གཉིས་ཁྲོ་ཚུལ་འགྱིང་། །སྨུག་སེར་དམར་ལྗང་རྩ་བ་གནག །འཁོར་ལོ་རཏྣ་དབྱུག་པ་དང་། །པདྨ་དགྲ་སྟྭ་རལ་གྲི་འཕྱར། །ཐོད་ཁྲག་འཐུང་ཞིང་ཡུམ་དང་འཁྲིལ། །ཡེ་ཤེས་མེ་ཡི་ཀློང་དུ་བསྒོམ། །རིགས་བཞི་ཐུགས་ཀྱི་འོད་ཟེར་ལས། །སྔགས་བརྗོད་བརྫུས་སྐྱེས་འཁོར་རྣམས་བསྐྱེད། །ནང་གི་རྩིབས་མཆན་གྲུ་ཆད་ལ། །དཀར་མོ་རྐུན་མོ་རྨོངས་མོ་དང ། །ཐལ་བྱེད་སྦོས་མོ་གྷ་སྨ་རཱི། །སྨ་ཤ་ཚེ་འཕེལ་བརྒྱད་པོ་བསྒོམ། །ཁྱམས་ཀྱི་ཕྱོགས་མཚམས་རིམ་པ་རུ། །སེང་སྟག་ཝ་དང་ཁྱི་གདོང་ཚོགས། །བཞད་དང་ཀང་ཀ་བྱ་རོག་འུག །མཚམས་སུ་དགོད་དེ་འཇིགས་བའི་གཟུགས། །སྲིང་འགྲོ་གདོང་འགྲོ་འཇིག་རྟེན་གསལ། །རོ་ལངས་མ་རྣམས་སྒོ་བཞིར་བསྒོམ། །སྲིན་མོ་སྨུག་ནག་ལ་སྩོགས་ཏེ། །དྲག་མོ་ཉེར་བརྒྱད་ཕྱི་ཁྱམས་ལའོ། །བསྐྱེད་ལ་དབང་བསྐུར་བྱིན་བརླབས་བྱ། །རང་བྱུང་ཡེ་ཤེས་དཀྱིལ་འཁོར་ནི། །རང་གི་སྙིང་གའི་འོད་ཟེར་ལས། །དབྱངས་དང་ལྡན་པའི་ལྷ་མོ་ཡི། །ཕྱོགས་དུས་ཀུན་ནས་སྤྱན་དྲངས་ཏེ། །ཕྱག་བཙལ་དབང་བསྡུ་བཀུག་བསྟིམས་ནས། །དང་པོ་ཐུན་མོང་རྫས་ལྔས་མཆོད། །དེ་ནས་ཁྱད་པར་རྣམ་གསུམ་དབུལ། །སྨན་གྱིས་མཆོད་རྗེས་དངོས་གྲུབ་བླང་། །གཏོར་མ་དབུལ་ཞིང་གསང་ནན་སྦྲེང་། །རཀྟ་ཚར་གསུམ་ཕུལ་ནས་ཀྱང་། །མ་མོ་རྣམས་ཀྱིས་བསྟོད་ཚིག་དབུལ། །རྟོགས་པ་རྒྱུན་གྱི་གདུལ་བྱ་རྣམས། །ཡེ་ཤེས་མ་འདྲེས་ཡོངས་རྫོགས་བསྟོད། །སྨོན་ལམ་བཏབ་ལ་འཛབ་བསྙེན་དབུལ། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཕྱི་ནང་གསང་བའི་བཟླས་པ་ཡིས། །འཕྲོ་འདུ་ཚུལ་དང་ཕུང་པོ་བརྟེན། །ཡབ་ཡུམ་ཞལ་སྦྱོར་ཚུལ་གྱིས་ནི། །འབུམ་མམ་བྱེ་བ་རྫོགས་བར་བྱའོ། །ཞེས་གསུངས། དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །ཡི་དམ་གྱི་ལྷ་ཕྱག་རྒྱ་དངོས་གྲུབ་ཀྱི་དཀྱིལ་འཁོར་བསྟན་པའི་ལེའུ་སྟེ་ལྔ་པའོ།། །།དེ་ནས་བསྙེན་པ་ལྷའི་ཏིང་ངེ་འཛིན་འདི་གསུངས་སོ། །གཉེན་པོ་ལྷ་དང་གཉིས་ཡིན་ཏེ། །སྤྱི་དང་སོ་སོར་གཏང་བའོ། །སྤྱི་ནི་ང་ཉིད་གསང་བའི་བདག །མི་རྟོག་ངང་ལས་དྲན་རྫོགས་སུ། །མཐིང་ནག་ཞལ་གཅིག་ཕྱག་གཉིས་བརྗིད། །རྡོ་རྗེ་ཁྲོ་ཚུལ་སྡིག་མཛུབ་རྔམ། །དུར་ཁྲོད་ཆས་རྫོགས་མེད་དཔུང་ཀློང་། །ཉིད་དང་འདྲ་བའི་གནོད་སྦྱིན་ཚོགས། །དུ་མས་བསྐོར་བར་གསལ་བསྒོམས་ནས། །སྙིང་པོ་འདི་དག་རྟག་ཏུ་བཟླས། །ༀ་ནི་ལམ་བྷ་ར་དྷ་ར་བཛྲ་པཱ་ཎི་ཨཛྙཱ་པ་ཡ་ཏི་ཧཱུཾ། ཡག་ཤ་བཛྲ་པཱ་ཎི་ཧྲ་ྀད་ཡ་ཧཱུཾ་ཕཊ། དྲག་པོ་ལ་ནི་གཤིན་རྗེ་གཤེད། །མཐིང་ནག་ཞལ་གསུམ་ཕྱག་དྲུག་བརྗིད། །གཡས་དཀར་གཡོན་དམར་དུར་ཁྲོད་ཆས། །འཁོར་ལོ་རལ་གྲི་ཐོ་བ་གཡས། །ཐོད་པ་སྡིག་མཛུབ་ཕུར་པ་གཡོན། །ཡུམ་དང་གཉིས་སུ་མེད་པར་བསམ། །ཉི་ཟླ་པདྨ་གཤིན་རྗེ་གདན། །དུར་ཁྲོད་མེ་ཡི་གླིང་ན་རྔམ། །གསང་སྔགས་འདི་དག་རྒྱུན་དུ་བཟླས། །ༀ་ཨ་ཀྲོ་ཏེ་ཀ་ཡ་མནྟ་ཀ་ཧ་ན་མ་ཐ་དྷཉྫ་ཧཱུཾ་ཕཊ། དཔའ་བོ་གྱི་ལང་རྟ་མཆོག་དབང་། །དམར་སྨུག་ཞལ་གསུམ་ཕྱག་དྲུག་བརྗིད། །དཀར་ལྗང་ཞལ་ལྡན་རྟ་མགོ་ལྗང་། །པདྨ་རྡོ་རྗེ་མདའ་ཟོར་གཡས། །ཐོད་ཁྲག་དཔལ་བེའུ་གཞུ་འཛིན་གཡོན། །དུར་ཁྲོད་རྒྱན་ལྡན་ཡུམ་དང་འཁྲིལ། །ཉི་དཀྱིལ་ཆུ་བདག་སྟེང་ནས་བགྲད། །གསང་སྔགས་འདི་དག་རྒྱུན་དུ་བཟླས། །ༀ་པདྨཱནྟ་ཀྲྀཏ་བཛྲ་ཀྲོ་དྷ་ཧ་ཡ་གྲཱི་བ་ཧཱུཾ། ཧ་ཧ་ཧི་ཧི་ཧུ་ལུ་ཧུ་ལུ་ཧཱུཾ་ཕཊ། བདུད་འདུལ་རྡོ་རྗེ་སྲིན་པོར་བསྒོམ། །སྔོ་ནག་དབུ་དགུ་ཕྱག་བཅོ་བརྒྱད། །སྤྱན་ནི་འབར་བ་ཉི་ཤུ་དགུ །ཁམ་ནག་རལ་པ་སྲིད་རྩེར་འབར། །རྡོ་རྗེའི་གཤོག་པས་བར་སྣང་ཁེངས། །བ་སྤུ་ལྕགས་ཀྱུ་བསྲེགས་པ་འདྲ། །སྡོམ་དང་སྡིག་པ་དུག་སྦྲུལ་འཕྲོ། །འཇིགས་པའི་གཟུགས་ཀྱིས་ས་གཞི་ཁེངས། །རྡོ་རྗེ་ཐོད་སྐྱོག་ཏིར་དབྱུག་ཞགས། །ཉི་ཟླ་ཁྱུང་དང་འུག་པ་ཁྲ། །རྡོ་རྗེ་མདུང་རྩེ་གསུམ་པ་དང་། །ཟ་མ་ཏོག་དང་རྡུལ་གཡབ་དང་། །རྔ་ཆུང་རི་རབ་སྤྱི་སྐོར་འཕེན། །ཀླུ་དབང་འབུམ་ཀྱིས་བརྒྱན་ཅིང་བཀླུབས། །དུས་མཐའི་མེ་ལྟར་འབར་བའི་དབུས། །ཁྲོ་གཉེར་སྡང་མིག་རྣམ་པར་རྔམ། །ཞབས་བརྒྱད་འབར་བས་ལྷ་བརྒྱད་གནོན། །རྡོ་རྗེ་སྲིན་པོའི་ཁྲོ་བོའི་སྐུ། །ལྷ་དང་བདུད་ལས་རྣམ་པར་རྒྱལ། །གསང་སྔགས་འདི་ཡང་རྟག་ཏུ་བཟླས། །ༀ་རཀྴ་ཧེ་རུ་ཀ་རཱུ་ཏྲ་མ་ཏ་མ་ཧཱ་ཧ་ཏཾ་ཀྲོ་དྷ་ཙྭ་ལ་ཧཱུཾ་ཕཊ། ༀ་བྷུར་ཀུམ་ཨི་ཙི་ཀི་ལི་ཨུཙྪསྨ་ཀྲོ་དྷ་ཧཱུཾ་ཕཊ། དེ་ལྟར་བསྙེན་པའི་སྙིང་པོ་དེ། །ཆོས་སྐྱོང་མགོན་པོའི་དྲག་སྔགས་ཡིན། །རབ་ཏུ་གསང་བའི་ཕྲིན་ལས་ཡིན། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། གཉེན་པོ་སྟོབས་ཀྱི་ལྷ་བསྟན་པའི་ལེའུ་སྟེ་དྲུག་པའོ།། །།དེ་ནས་རྩ་བ་བྱང་ཆུབ་སེམས་ཀྱི་དཀྱིལ་འཁོར་འདི་གསུངས་སོ། །ཨེ་མའོ་འཁོར་དུ་འདུས་པ་རྣམས། །རང་གི་ཡིད་བཞིན་རིན་པོ་ཆེ། །ཡོད་པས་མ་ཤེས་སྟོར་བས་དྲན། །འཚོལ་བར་འདོད་ན་ཇི་ལྟར་འཚོལ། །སྔོན་ཚེ་ང་ཡི་བཤེས་གཉེན་མཆོག །བྱམས་མགོན་དམ་པ་ཞིག་གིས་བསྟན། །ཨེ་མའོ་ཁྱོད་ཀྱིས་མི་ཤེས་སམ། །སྒྲོན་མེས་མུན་ཁུང་གསེར་འཚོལ་ལྟར། །གསང་བའི་སྙིང་པོའི་མཛོད་བརྟོལ་ནས། །ཐིག་ལེ་གཅིག་གིས་ཀུན་ལ་ཁྱབ། །ཐམས་ཅད་ངེས་པར་འདུས་ཆེན་སྟོན། །འཇིག་རྟེན་བརྟན་གཡོ་ལ་སོགས་ཀུན། །ཁྲག་འཐུང་ལྔ་བཅུ་བརྒྱད་དུ་གནས། །མྱ་ངན་འདས་དང་འཁོར་བའི་ཆོས། །བཙལ་མེད་མ་བཅོས་རྣམ་པར་དག །ཐིག་ལེ་ཡུངས་ཀར་ཚད་ཙམ་བསྒོམ། །དེ་ལས་འོད་ཟེར་རྡུལ་སྙེད་འཕྲོ། །མུན་སེལ་དངོས་པོ་ཀུན་སྦྱངས་ནས། །ཐམས་ཅད་མ་བཅོས་སྐུ་རུ་གསལ། །སླར་འདུས་ཐིག་ལེའི་ངང་དུ་ཐིམ། །བརྟན་ནས་འོད་དུ་ཞུ་བར་བསམ། །མ་བཅོས་གཉུག་མའི་ངང་དུ་གསལ། །རྫོགས་པའི་རླུང་ལ་སྦྱང་བ་ནི། །རྡོ་རྗེ་སེམས་དཔའི་ཙིཏྟའི་ནང་། །བདེ་བའི་པདྨ་འདབ་བཞི་བསམ། །དེ་སྟེང་བདེ་ཆེན་ས་རླུང་དང་། །རྣམ་པར་དག་པའི་ཟླ་སྟེང་དང་། །རྡོ་རྗེ་རིན་ཆེན་རང་བཞིན་ཡིན། །དབུས་ན་རྡོ་རྗེ་སེམས་དཔའ་ནི། །ཐིག་ལེ་འོད་ཟེར་ལྔ་དང་ལྡན། །མགྲིན་པ་མགྲོན་པོའི་རླུང་དཀྱིལ་གཉིས། །སྤྲུལ་པ་ཉིད་མའི་མེ་རླུང་གཉིས། །པདྨའི་རིགས་དང་ལས་རིགས་སོ། །ལྔ་ལྡན་དབུས་སུ་ཐིག་ལེ་བསམ། །ཡང་ལ་ཡང་དུ་འདྲེས་བསམ་ནས། །རིག་པ་སེམས་ཀྱི་རླུང་ཟིན་པས། ཡར་འགྲོ་མར་འགེངས་རྩོལ་བ་འགོག །ཡང་ན་འཁོར་ལོ་རྣམས་པ་ལྔ། །བདེ་ཆེན་སུམ་ཅུ་རྩ་གཉིས་ཧཾ། །བརྟན་པའི་ཐིག་ལེ་ཡི་གེ་ལ། །ལོངས་སྤྱོད་བཅུ་དྲུག་ལྔ་ལྡན་ༀ། །ཆུ་ཡི་ས་བོན་ཡི་གེ་བཾ། །སྙིང་གར་བརྒྱད་འདུས་བཞི་འདུས་ཧཱུཾ། །བརྗོད་བྲལ་ཐིག་ལེ་ཡི་གེ་མུཾ། །སྤྲུལ་པ་དྲུག་ཅུ་རྩ་གཉིས་དབུས། །དྲོད་དུ་མི་བཟད་ཨ་དང་མུཾ། །སྟེང་རླུང་མནན་ལ་འོག་རླུང་འཕེན། །ཡི་གེ་ཡོན་ཏན་སྟོབས་ཀྱིས་འགྲུབ། །ས་ཉིད་ཆུ་ལ་ཐིམ་པ་ཡིས། །ཀུན་ཏུ་མཉམ་བློ་ཟག་མེད་པའི། །ལམ་གྱི་ཡེ་ཤེས་དང་པོ་སྐྱེད། །ཆུ་ཉིད་མེ་ལ་ཐིམ་པ་ཡིས། །ཟག་མེད་རོ་མྱོང་བདེ་བ་སྡུད། །མེ་ཉིད་རླུང་ལ་ཐིམ་པ་ཡིས། །འགྱུར་མེད་ངང་བཞིན་གསལ་བ་ཉིད། །གློག་གི་སྣང་བ་ལྟ་བུར་འབྱུང་། །རླུང་ཉིད་རྣམས་ཤེས་ནམ་མཁའ་ཐིམ། ། རང་གསལ་རིག་པ་མར་མེ་འདྲ། །ཕྱི་ནང་མུན་པ་རྣམ་པར་སྦྱངས། །ནམ་མཁའ་ལྟ་བུར་མཐོང་བར་འགྱུར། །ཕྱི་མས་རིམ་པས་རྟོགས་པ་འཆར། །བསྒོམ་པ་སྣང་བཞུགས་སྤྲད་ལ་བསྒོམ། །འཆི་ཀ་མ་ཡི་གདམས་པའོ། །ཨེ་མའོ་དངོས་པོ་མེད་པ་ལས། །སངས་རྒྱས་ཉིད་དང་ཐུགས་རྗེའི་ངང་། །ཇི་ལྟར་སྣང་བ་མ་འགགས་པའོ། །འདུན་པའི་དུས་ན་རིགས་ཀྱི་བུ། །ཡིད་ལ་བྱེད་པ་ཐོབ་ཅེས་ཏེ། །སེམས་གསུམ་སྐྱེ་ཞིང་མཐའ་ཀུན་གྲོལ། །རྟེན་པ་གཞི་ཡི་རྣམ་པར་གནས། །རིགས་ཆེན་འབྱེད་པའི་རྣལ་འབྱོར་པས། །འཕྲོ་འདུ་གསལ་སྟོང་ཏིང་ངེ་འཛིན་ཐོབ་། །སེམས་བཞི་རྟོགས་ཏེ་མཐའ་བཅུ་ཤེས། །དབུགས་ཆེན་འབྱིན་པའི་རྣལ་འབྱོར་པས། །འཇིགས་པ་ལྔ་བྲལ་ཁྱད་པར་གསལ། །ཡོངས་སུ་མི་རྟོག་ཏིང་ངེ་འཛིན། །རྨི་ལམ་ལྟ་བུར་ཆོས་ལུང་བསྟན། །འཇིག་རྟེན་ནོར་བུ་རིན་ཆེན་གྱིས། །གང་བར་སྤྱོད་པའི་ལྟས་མཐོང་འགྱུར། །སྒྱུ་མ་སྤྱོད་པའི་སྐྱེས་བུ་དེ། །འཁོར་ལོས་སྒྱུར་བའི་ཆ་བྱད་དུ། །རིན་ཆེན་བདུན་དང་དཔུང་ཚོགས་ཀྱིས། །དབང་སྒྱུར་ཐབས་ཀྱི་ཐེག་པ་སྟོན། །ལུང་ཆེན་ཐོབ་པའི་རྣལ་འབྱོར་པས། །སེང་གེ་དག་ལ་ཞོན་ནས་ནི། །ཐམས་ཅད་གནོན་པའི་རྟག་མཐོང་འགྱུར། །སྒྲ་བརྙན་འདྲ་བར་ལུང་སྟོན་འགྱུར། འབྲས་བུ་ཉིད་ལ་ལམ་ཤེས་པས། །ལམ་གྱི་ས་ནི་བདེ་རྫོགས་ཏེ། །གཞན་དག་སྨིན་པར་བྱ་བའི་ཕྱིར། །ཇི་ལྟར་འདོད་ལྟར་ཐབས་སྦྱོར་མཆོག །རྩལ་ཆེན་རྫོགས་པའི་རྣལ་འབྱོར་བས། །ཀུན་སྣང་ཏིང་འཛིན་ཉིད་ཐོབ་པས། །སྣང་བྱེད་ཉི་ཟླའི་འཁོར་ལོ་བསྐོར། །ཐམས་ཅད་གསལ་བྱེད་ལྟས་མཐོང་ན། །གདེང་དུ་གྱུར་པའི་ངོ་བོ་ཡིན། །དེ་ནས་རྒྱལ་ཚབ་སྐྱེས་བུ་དེས། །ཆོས་ཀྱི་རྒྱལ་པོ་གང་དེ་ཡི། །གདུང་འཚོབ་དགའ་ལྡན་ཐེག་ཆེན་སྟོན། །མི་གནས་བཅུ་དུས་ཆོ་འཕྲུལ་སྣང་། །ས་བཅུ་དོན་ལ་གནས་ནས་ཀྱང་། །གསང་སྔགས་དོན་མཆོག་མ་རྙེད་ན། །རྣམ་པ་ཐམས་ཅད་མཁྱེན་མི་འགྱུར། །རྙེད་མ་ཐག་ཏུ་དེ་རྙེད་འགྱུར། །གྲོལ་བར་འདོད་ན་བླ་མ་བསྟེན། །རིག་པ་རང་བྱུང་ཡེ་ཤེས་ཉིད། །བྱང་ཆུབ་སེམས་ཀྱི་དཀྱིལ་འཁོར་རྫོགས། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། ཐབས་ལམ་བྱང་ཆུབ་སེམས་ཀྱི་ལེའུ་སྟེ་བདུན་པའོ།། །།དེ་ནས་བསོད་ནམས་ཚོགས་ཀྱི་དཀྱིལ་འཁོར་འདི་གསུངས། ཉོན་ཅིག་འདུས་པའི་འཁོར་ཚོགས་ཀུན། །བསོད་ནམས་ཚོགས་ཀྱི་དཀྱིལ་འཁོར་ནི། །ཞིང་ཁམས་རིན་ཆེན་ཡོད་པ་རུ། །སྟོན་པ་ཀུན་ཏུ་བཟང་པོ་ཡིས། །སྲས་མཆོག་འཇམ་དཔལ་ཆེན་པོ་ལ། །བཤད་པ་བཞིན་དུ་རྟོགས་གྱུར་ན། །གང་ལ་བྱས་ཀྱང་ལམ་གྱི་གྲོགས། །དཔེར་ན་མེ་ལ་ཤིང་སྣན་བཞིན། །མཛད་སྤྱོད་གསུམ་པོ་གདེང་ལྡན་ནས། །རྣལ་འབྱོར་སྤྱོད་ལམ་ཚུལ་གྱིས་རོལ། །དེ་ནི་ཇི་ལྟ་བུ་ཞེ་ན། །འབྱོར་པ་ས་ཡི་རྣལ་འབྱོར་ལྔ། །བཟའ་བཏུང་གོས་རྒྱན་བྲོ་གར་དང་། །གླུ་ཚིག་ག ཏན་གྷན་རྣམ་ལྔའོ། །སྐྱེ་ཤི་མེད་པར་མཛད་སྤྱོད་དང་། །འཆིང་གྲོལ་མེད་པར་མཛད་སྤྱོད་དང་། །མི་འབྱུང་རོལ་པའི་མཛད་སྤྱོད་དོ། །དེ་ཡི་བྱེ་བྲག་རྣམ་གསུམ་སྟེ། །སྣང་བ་ལྷ་རོལ་ལྷ་རོལ་དང་། །རང་སྣང་ཡེ་ཤེས་རོལ་པ་དང་། །རང་བཞིན་ཉིད་ལ་རོལ་པའོ། །དེ་ལ་ཡོན་ཏན་རྣམ་ལྔ་སྟེ། །བཟའ་དང་བཏུང་བའི་ལོངས་སྤྱོད་ཀྱིས། །བདེ་ཆེན་སྐུ་དང་བདུད་རྩི་འགྲུབ། །རྒྱན་དང་བགོ་བའི་ལོངས་སྤྱོད་ཀྱིས། །འབར་བའི་རྒྱལ་པོ་མཐུ་སྟོབས་འགྲུབ། །བྲོ་གར་བསྐྱོད་བསྒུལ་ལོངས་སྤྱོད་ཀྱིས། །སྲ་ལ་འཛུལ་དང་སྟོང་ལ་རྒྱུག །སྒྲ་ཚིག་སྒྲ་ཡི་ལོངས་སྤྱོད་ཀྱིས། །ཆོས་ཀྱི་དངོས་གྲུབ་ཐོབ་པར་འགྱུར། །ཏ་ན་གྷ་ན་ལོངས་སྤྱོད་ཀྱིས། །རང་བྱུང་ཡེ་ཤེས་ཐོབ་པར་བྱེད། །དེ་ཕྱིར་འབྱོར་བའི་ལོངས་སྤྱོད་བྱ། །སེམས་ཉིད་རང་སྣང་འདོད་ཡོན་བརླབས། །བདེ་གཤེགས་དཀྱིལ་འཁོར་སྤྱན་དྲངས་ལ། །ཏིང་འཛིན་རྫས་ཀྱིས་རིམ་བཞིན་མཆོད། །བྲོ་གར་གླུ་ཚིག་རྒྱན་རྫོགས་བྱ། །རོལ་མོ་མུ་སྟེགས་རོལ་ལ་དགུག །བསྒྲལ་བའི་ཤེས་པ་གནས་ཆེན་སྤར། །ཡབ་ཡུམ་མཁའ་ལ་སྲས་སུ་བསྐྱེད། །དེས་ནི་བསོད་ནམས་ཚོགས་ཆེན་ལྡན། །ལྷག་མས་འཇིག་རྟེན་མཁའ་འགྲོ་མཆོད། །ཅེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། ཚོགས་ཀྱི་དཀྱིལ་འཁོར་གྱི་ལེའུ་སྟེ་བརྒྱད་པའོ།། །།དེ་ནས་བཀའ་སྡོད་ཕོ་ཉའི་དཀྱིལ་འཁོར་འདི་གསུངས་སོ། །དེ་ལྟར་གདེང་ལྡན་སྔགས་པ་ཡིས། །དུར་ཁྲོད་ལ་སོགས་རྒྱ་མཚོའི་མ དོ། །རི་རབ་རི་ཡི་རྩེ་མོ་འམ། །ནགས་ཚལ་རྩུབ་པའི་ས་ཕྱོགས་སམ། །སྦྲུལ་དང་གཅན་གཟན་གདུག་པ་རྣམས། །གནས་པ་དེ་ལྟ་བུ་ཡི་ས་དག་ལ། མཎྜལ་འདོམ་གང་གྲུ་བཞི་བརྩིག །བདུད་རྩི་ཁྲག་གིས་ཆགས་ཆག་གདབ། །དུར་སྐྲའི་རུས་ཆེན་ཐིག་བཏབ་ལ། །དུར་ཁྲོད་ཚོན་གྱིས་དཀྱིལ་འཁོར་འབྲི། ལྕགས་ཁང་ལྔ་དང་བར་ཁྱམས་སྒོ། །ལྕགས་རི་ནག་པོ་ཁོར་ཡུག་ཕྱི། །ཁྲག་དང་བཤང་གཅི་ཤ་ཆེན་དང་། །རྐང་དང་ཀླད་པ་ཀླད་རྒྱས་དང་། །རྣག་དང་ཆུ་སེར་ལ་སོགས་པ། །འདམ་ཀྱི་ཕྲུ་མ་བརྒྱད་ཀྱིས་བསྐོོར། །དབུས་སུ་ཡབ་ཡུམ་མཆོག་ཕུར་དགོད། །མཁར་བཞི་སྤྲུལ་པ་དྲེགས་བཞི་ལ། །ལྕགས་སམ་གདུག་ཤིང་ཕུར་པ་དགོད། །ལྷོ་སྒོར་ཐོད་པ་མཚན་ལྡན་དུ། །དཔལ་བཤོས་ཁྲག་སྣ་སྙིང་གི་ཆ། །ལ་ཕུག་ལ་དུ་སྦྱར་བ་ཡི། །བྱང་དུ་ཐོད་པར་གཏོར་མ་དང་། །ཐོད་རུས་རྐང་རུས་ཀླད་པ་དང་། །འབྲུ་མར་སྦྱར་བའི་མཆོད་པ་བཤམ། །ཤར་སྒོར་འབྲུ་ཡི་ཕུང་པོ་སྤུང་། །ནུབ་ཏུ་ཤ་སྣ་སྙིང་སྣ་བཞག །དབུས་སུ་ཐོད་པ་མཚན་ལྡན་གཉིས། སྟེང་འོག་བསྙེན་བསྒྲུབ་སྔགས་བཞི་བྲི། །སྙིང་གསུམ་བདུད་རྩི་དར་བྲི་ཕྱི། །བར་གྱི་ཤ་ཁྲག་རུས་པ་དང་། །རྦ་གསང་རྫས་ཀྱི་རོ་རས་ཀྱིས། །ཁྱམས་ལ་སོགས་པ་གྲྭ་བཞིར་དགོད། །ཚིལ་ཆེན་མེ་མར་ཆེན་པོ་དང་། །རཀྟ་གསང་ནན་ཆང་གིས་སྦྱར། །ཐོད་པའི་རྔ་དང་རྐང་གི་དུང་། །ཤུན་གྱི་རྒྱལ་མཚན་ཕྱོགས་བཞིར་དགྲམ། །ཞིང་གི་བླ་རེའི་མཎྜལ་དབུས། བདག་ཉིད་ཁྲོ་བོ་མ་རུང་བསྒོམ། །ཐུགས་ཀའི་ཧཱུཾ་ལས་འོད་འཕྲོས་པས། །རྡོ་རྗེ་ར་བ་གུར་དུ་གདམས། །མེ་རིས་བརྒྱན་པའི་དབུས་ཉིད་དུ། །འོད་ལྔར་གྱུར་པའི་གཞལ་ཡས་བསམ། །བླ་མ་དཀོན་མཆོག་ཡི་དམ་ལྷ། །ཟླ་བའི་གདན་ལ་སྔོན་བསམ་ལ། །སྔོན་བཞིན་མཆོད་ལ་གསོལ་བ་གདབ། །འོད་ཞུ་བདག་གི་སྒྲིབ་པ་སྦྱངས། །མཆོད་གཏོར་རྒྱན་རྣམས་བྱིན་གྱིས་བརླབས། །ལྷར་གསལ་ཐུགས་ལས་སྨུག་ནག་བྷཱུཾ། །འཕྲོས་འདུས་སྔགས་བརྗོད་དུར་ཁྲོད་གནས། །གོང་གི་ཚུལ་འདྲ་རབ་ཏུ་འཇིགས། །སྟོང་གསུམ་ཤོང་ཞིང་ཡངས་པར་བསྐྱེད། །མི་རྟ་ལ་སོགས་རོ་རློན་གྱི། །གདན་སྟེང་དུན་ལས་ཁྲོ་བོའི་སྐུ། །ༀ་གྷུར་ཀུང་མ་ཧཱ་ཀཱ་ལ་ཀྲོ་དྷ་ཧཱུཾ་ཕཊ། །རཀྴ་ཀྲོ་དྷཱི་ཤྭ་རཱི་རགྨོ་ཧཱ། །མགོན་པོ་ཚོགས་བདག་ཆེན་པོ་ནི། །ལྗང་ནག་ཞལ་གསུམ་ཕྱག་དྲུག་སྟེ། །གཡས་སེར་གཡོན་དམར་ལྗང་ནག་འཇིགས། །ཁམ་ནག་དབུ་སྐྲ་གྱེན་དུ་འཁྱིལ། སྤྱན་དགུ་སྡང་མིག་སྐར་ལྟར་འཁྲུག །ཤུན་གོས་ཐོད་པའི་ཕྲེང་བ་ཅན། །སྟག་དང་གླང་ཆེན་ཐལ་པ་ཞག །གདུག་པའི་རྒྱན་ཚོགས་ཆས་ཀྱིས་མཛེས། །གཡས་ཀྱི་དང་པོ་གསལ་ཤིང་འཕྱར། །བར་མ་རྡོ་རྗེ་རྩེ་ལྔ་པ། །ཐ་མ་ལྕགས་ཕུར་འདྲིལ་ཞིང་འདེབས། །གཡོན་གྱི་དང་པོ་ཐོད་ཁྲག་འཐུང་། །བར་པ་རྣོ་དབལ་ཤུན་གྱི་མདུང་། །ཐ་མ་སྦྲུལ་ཞགས་སྲོག་ལ་རྔམ། །ཞབས་བཞི་གྱད་ཀྱི་དོར་ཐབས་ཅན། །ཉེ་གནས་ཀྲོ་དྷི་ཤྭ་རཱི་མ། །འཇིགས་ཚུལ་ཞལ་གཅིག་ཕྱག་གཉིས་རྔམ། །ཞིང་དང་རེ་སྡེ་ཐོད་སྦྲུལ་བརྒྱན། །གཡས་པ་རྒྱུ་ཞགས་ཡབ་ལ་འཁྱུད། །གཡོན་པ་ཐོད་སྐྱོགས་ཁྲག་གིས་བཀང་། །རུས་བཅུད་རྐང་དང་ཀླད་པ་དང་། །འབྲུ་མར་ཆང་གིས་སྦྱར་བ་ཡི། །རྟག་པར་རང་གིས་ལོངས་སྤྱོད་འཛིན། །འཁོར་བཞིར་ཁྲོ་བོ་གནོད་སྦྱིན་དང་། །སྲིན་མོ་མ་ཚོགས་འཇིགས་པ་བསྐྱེད། །ཕྱི་རིམ་ཉེ་འཁོར་ཉི་ཤུ་བརྒྱད། །སྲིན་མོ་ཉེ་གནས་ཆེན་པོ་བརྒྱད། །ཀ་རི་ཙ་རི་ཕྲ་མོ་ཧ། །བེ་ཏ་ལཱི་དང་པུཀྐ་སཱི། གྷསྨ་རི་དང་སྨ་ཤ་ནི། །ཙཎྜ་ལི་ལ་སོག་པ་ཀུན། །རྔམ་ཞིང་རྔམ་པའི་མ་ཚོགས་ཀུན། །ཤིན་ཏུ་འཇིགས་པའི་གཟུགས་སུ་བསྒོམ། །སྲིན་པོའི་བུ་མོ་དྲི་ཟ་བརྒྱད། །སེང་སྟག་ཝ་སྤྱང་བཞད་ཀྱི་མགོ །ཀང་ཀ་བྱ་རོག་འུག་པའི་ཚོགས། །ཞིང་ལ་རྔམ་ཞིང་སྟོན་པའི་ཚུལ། །དུར་ཁྲོད་པ་ཡི་སྒོ་སྲུང་བཞི། །བརྩོན་མོ་གདོང་མོ་གར་ལོག་མོ། །འཇུག་པར་བྱེད་པའི་མ་མོ་བཞི། །གསང་སྒོ་འཛིན་ཅིང་བཀའ་སྒོ་སྲུངས། །དུར་ཁྲོད་བདག་མོ་གྲུ་འདེགས་བཞི། །བསྐམ་མ་ཤིན་ཏུ་བསྐམ་མ་དང་། །ར་རོ་མ་དང་ཁྲག་འཐུང་མ། །ཆགས་པས་གདུང་བའི་ཚུལ་དུ་གནས། །ཕྱི་རིམ་སླས་དང་བྱི་མོ་བྲན། །མ་མོ་བྲན་མོ་གནོད་སྦྱིན་མོ། །སྲིན་མོ་ཤ་ཟ་ཁྲག་འཕྲོག་མ། །བདུད་ཀྱི་མིང་འཛིན་བླ་རྐུན་མོ། །བློན་མོ་དམག་དཔོན་སྡེ་དཔོན་མོ། །རུ་དཔོན་ཕོ་ཉར་མངག་པར་བྱ། །ཅི་བགྱིད་བཀའ་ཉན་དྲེགས་པའི་འཁོར། །རྦོད་གཏོང་རྔམ་པའི་ཚུལ་དུ་བསྒོམ། །ནད་ཀྱི་བསྐལ་པ་ཚུབ་མར་གཏོང་། །གདུག་པའི་མཚོན་ཆ་ལུས་ལ་འགྱེད། །མཁར་དང་འོངས་པས་ཕྱི་རོལ་ན། །འབུ་དང་ཤིན་ཏུ་འབུ་ཆེན་པོ། །སྦྲང་མ་སྦྲང་རྒོད་བུང་བ་དང་། །སྦྲུལ་དང་སྡིགས་པ་སྡོམ་ལ་སོགས། །ཀང་ཀ་རུ་རྩེ་འུག་པ་ཁྭ། །བྱ་གཅན་ཤ་ཟན་ཚོགས་འཕུལ་ཞིང་། །ཅེ་སྤྱང་སྟག་སེང་དོམ་དྲེད་འཕར། །དུར་ཁྲོད་རོ་ཡི་ལོངས་སྤྱོད་ལ། །བལྟ་ཞིང་རྒྱུག་ཅིང་རོ་ལ་འཐེན། །རྒྱུ་མ་འདྲེན་ཅིང་རུས་པ་འཆའ། །དེ་ལྟར་གསལ་བར་གྱུར་པ་དང་། །རང་བཞིན་ཡུལ་ནས་བཀུག་ཅིང་བསྟིམ། །ཕུར་པས་བསྒྲལ་ཞིང་ཞལ་དུ་གསོལ། །ཕྱལ་དུ་སྦྱངས་ལ་གནས་སུ་གདོན། །འཁོར་བའི་སྨྲེ་སྔགས་བཀའ་འཁོར་དབུལ། །རང་དམ་བཅའ་ཞིང་དམ་ཚིག་དབོག །མནའ་བོར་ལས་ལ་མངག་པར་བསམ། །བརྟན་པར་བྱས་ལ་མཆོད་པ་བསྟབ། །མངའ་གསོལ་ཕྲིན་ལས་གཞོལ་བ་དང་། །བསྙེན་དང་ཉེ་བའི་བསྙེན་པ་བཟླས། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས་བཀའ་སྡོད་ཕོ་ཉའི་དཀྱིལ་འཁོར་པའི་ལེའུ་སྟེ་དགུ་པའོ།། །།དེ་ནས་དེ་དག་གི་དཀྱིལ་འཁོར་གྱི་ཆོ་ག་འདི་གསུངས་སོ། ། ཧཱུཾ། ལང་ཀ་ཡུལ་གྱི་གྲོང་རྡལ་གྱི། །དབུས་ཀྱི་རི་བོ་མ་ལ་ཡ། །ཀོ་ཀ་ཐང་དམར་རྒྱ་མཚོའི་མདོ། །བྱན་ལག་མཆོང་རི་གནམ་ལྕགས་འབར། །དྲག་ཤུལ་ཅན་གྱི་རྩེ་མོ་ན། །རྡོ་རྗེ་ཐབས་ཀྱིས་བལྟ་བའི་ཡུལ། །ཆོས་འཛིན་རིགས་ཀྱི་བསྒྲུབས་གནས་སུ། །དཔལ་ཆེན་རྡོ་རྗེ་སྲིན་པོ་ཡིས། །བདུད་ཀྱི་སྡེ་རྣམས་བཏུལ་ནས་ཀྱང་། །གསང་སྔག་འཁོར་ལོ་བསྐོར་བའི་ཚེ། །མིང་གི་དབང་བསྐུར་བྲན་དུ་ཁས་བླངས་པ། །རྡོ་རྗེ་རོ་ལངས་དུར་ཁྲོད་ཚོགས་ཀྱི་བདག །མགོན་པོ་ནག་པོ་ཆེན་པོ་དང་། །ཉེ་གནས་ཀྲཱོ་དྷཱི་ཤྭ་རཱི་མ། །ཡབ་ཡུམ་གཉིས་སུ་མེད་པའི་འཁོར། །ལར་ཀའི་བདག་པོ་ལ་སོགས་པའི། །འདུས་པ་རྣལ་འབྱོར་ཕོ་མོའི་ཚོགས། །སངས་རྒྱལ་བསྟན་པ་བསྲུང་བའི་ཕྱིར། །གནས་འདིར་སྤྱན་འདྲེན་གཤེགས་སུ་གསོལ། །ༀ་བྷུར་ཀུར་མ་ཧཱ་ཀ་ལ་ཀྲོ་དྷི་ཤྭ་རི་ནག་མོ་ཏི་ལ་མ་ཨེ་ཨ་ར་ལི་ཧྲིང་ཧྲིང་ཛ་ཛ། ༀ་རགྴ་ཤྲཱི་ཧེ་རུ་ཀ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཧ་ལ་ཧ་ལ་ཧཱུཾ་ཕཊ། ཏ་ཀེཾ་ཏ་ཀེཾ་ཕཊ་ཀྲོ་དྷཱ་ཀྲོ་དྷ་རཾ་ཧ་ར་ཧ་ར་ཡཾ་ཏིག་སྣ་ཏིག་སྣ་བ། བཛྲ་ཡཀྴ་ཀྲོ་དྷ་ཧསྟ་ཁཱ་ཧི་ཁཱ་ཧི་ཧཱུཾ་ཧཱུཾ་ས་མ་ཡ་མནབྷ་ལ། མ་ཧཱ་྄སུ་ཁ་ཧཱུཾ་། པྲ་བེ་ཤ་ཕཊ། བཛྲ་ཨ་མྲྀ་ཏ་མ་ཧཱ་ཀྲོ་དྷ་ཨཾ་ཨཾ། །ཨཾ་བྷྱོ་ཨེ་ཨ་ར་ལི་ཛ་ཛ། ཨེ་མ འོ་དཔའ་བོ་ཐུགས་རྗེ་ཆུང་། ཤིན་ཏུ་བདེ་བའི་གནས་དག་ནས། །སྣམ་དུ་འཐོན་པ་ཐུགས་རྗེ་ཆུང་། །དེ་ཡང་ཅི་མཛད་མྱུར་དུ་མཛོད། །མྱུར་དུ་བསྒྲལ་ན་ཡུན་དུ་བདེ། །འབངས་སུ་མཆིའོ་བདག་ལུས་འབུལ། །འབངས་ལ་ནན་ཏན་མ་ཆུང་ཞིག །སླན་ཆད་བཀའ་བཞིན་རྗེས་སུ་བགྱིད། །གལ་ཏེ་བཀའ་བཞིན་མ་བགྱིས་ན། །དམ་པའི་ལུང་ལས་འགལ་འགྱུར་ཏེ། །བདག་ཅག་རྣམས་ཀྱི་མགོ་ལུས་སྙིང་། །རུལ་མྱག་ཚིག་ནས་སྐམ་གྱུར་ཅིག །ཨི་དན་ཏ་ན་ར་ཁ ན་པ་ར་ཧྲི་ཏྲ་ཋ་ཡ་ན་མ་བྷརྟི་ནན་ས་མ་ཡ་རག་ཤ་སི་ཏི་པི་ན་བཛྲ་ཨ་མྲྀ་ཏ་ཀྲོ་ཏ་ན་ར་ཀན། མ་སྲིང་བུ་མོ་ཆུང་མ་རྣམས། །འབངས་སུ་འབུལ་ལོ་རྩིས་མ་ཆུང། །པདྨ་པྲ་བེ་ཤ་ཁ་ཐཾ་ཁ་ཐཾ་པྲ་བེ་ཤ་ཕཊ། ཧཱུཾ། །དབུས་སུ་མཆིས་སྐལ་མ་མཆིས་ཀྱིས། །འབར་བའི་དཀྱིལ་འཁོར་མཐའ་ལ་ཤོག །ཕུད་ལ་འཚལ་སྐལ་མ་མཆིས་ཀྱིས། །ལྷག་མ་ཞལ་ཆབ་བྲོན་ལ་ཤོག །ཡེ་ནས་གདུང་བའི་མ་སྲིང་རྣམས། །དེང་ནས་རྒྱལ་བའི་བཀའ་ཡིན་གྱིས། །ཁྱེད་ཀུན་ང་ཡི་ལས་མཁན་ཏེ། །བཀའ་ཡི་ལས་བྱུང་མྱུར་དུ་བསྒྲུབས། །བདག་ཀྱང་དེང་སྔོན་ལས་ལོག་སྤྱད་པ་ཡིས། །དཔག་ཏུ་མེད་པའི་འཁོར་བའི་སྡུག་བསྔལ་རྒྱུད། །ད་ནི་ལས་འཕྲོ་གཉིད་སད་པས། །བདེ་བ་ཅན་གྱི་ཞིང་དུ་མྱུར་འགྲོ་བའི། །རྗེས་སུ་བསྟན་པའི་བཀའ་ལས་ཉམས་པ་དེ། །ཇི་ལྟར་མ་བྱམས་བུ་ལ་གདུང་བ་བཞིན། །དམ་ཚིག་ཅན་ལ་དུང་དུང་གདུང་བར་གྱིས། །གང་ཞིང་སྲིང་བྱམས་མིང་ལ་གདུང་བ་བཞིན། །ཡལ་དམ་ཅན་ལ་ལྷང་ལྷང་བརྩེ་བར་གྱིས། །མཛའ་མོ་ཇི་སྲིད་གྲོགས་ལ་གདུང་ཚུལ་བཞིན། །རྣལ་འབྱོར་ཅན་གྱིས་ཀྲིལ་ཀྲིལ་བརྩེ་བར་གྱིས། །ཇི་ལྟར་གཡོག་རྣམས་དཔོན་ལ་བརྩེ་བ་ལྟར། །དམ་པ་རྣམས་ལ་ཡིད་བཞིན་ནོར་ལྟར་ཁུར། །བརྩེ་བར་བྱེད་ན་མ་རུ་བྱ། །གདུང་བར་བྱེད་ན་སྲིང་དུ་བྱ། །བརྩོན་པར་བྱེད་ན་བྲན་དུ་བྱ། །རིགས་རྒྱུད་འཛིན་ན་བུ་མོར་བྱ། །འདུ་འབྲལ་མེད་ན་སློབ་མར་བལྟ། །བསྐུལ་བར་མགྱོགས་ན་ཕོ་ཉར་བྱ། །བཀའ་བཞིན་བྱེད་ན་བཀའ་ལ་གདམས། །ཞེས་སྔོན་གྱི་ཐ་ཚིག་བསྟན་པའོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། སྤྱན་དྲངས་ཤིང་སྔོན་གྱི་ཐ་ཚིག་བསྟན་པའི་ལེའུ་སྟེ་བཅུ་པའོ།། །།དེ་ནས་དེ་དག་ལ་མཆོད་ཅིང་མངའ་གསོལ་བ་འདི་གསུངས་སོ། །ཧཱུཾ། དང་པོ་བསྟན་པ་བསྲུང་བར་ཞལ་བཞེས་པའི། །བདུད་འདུལ་དབང་ཕྱུག་མ་ཧཱ་ཀཱ་ལའི་ཚོགས། །སྲིན་ཡུལ་ལང་ཀ་པུ་རི་ཡི། །གྲོང་ཁྱེར་གཏན་ནས་བརླག་མཛད་ཅིང་། །ལྷ་མ་སྲིན་གྱི་བུ་མོ་ནི། གློག་མ་སྲིན་འདུལ་ཞལ་བཞེས་པའི། །ལྷ་ཆེན་མགོན་པོ་ནག་པོ་ཁྱེད། །སྤྱན་འདྲེན་འདིར་སྤྱོན་ཕྲིན་ལས་མཛོད། །དུར་ཁྲོད་གསང་བ་མཆོག་གི་གནས་འདིར་བཞུགས་ནས་ཀྱང་། །རྣལ་འབྱོར་བདག་གིས་བཅོལ་པའི་ཕྲིན་ལས་མཛོད། །ས་མ་ཡ་སྟྭཾ། ལྕང་ལོ་ཅན་གྱི་མ་ཧཱ་བྷན་དྷ་རུ། །བྱང་ཆུབ་སེམས་དང་མཱཾ་ས་རཀྟ་དང་། །དྲི་ཆེན་ཀུ་ཀུ་ཆུ་སྟེ་རྣམ་པ་ལྔ། །གཉིས་སྦྱར་བ་ཡི་པཉྩ་ཨ་མྲྀ་ཏ། །ནག་པོ་ཆེན་པོ་འཁོར་དང་བཅས་ལ་འབུལ། །པཉྩ་ཨ་མྲྀ་ཏ་ཁཱ་ཧི། །བ་ལིང་ཏ་ཁཱ་ཧི། ཧཱུཾ། །རྣལ་འབྱོར་ཀུན་གྱི་དཔལ་མགོན་མཆོག །བསྟན་པ་སྲུང་བར་ཞལ་བཞེས་པ། །མ་ཧཱ་ཀཱ་ལ་མཐུ་རྩལ་ཅན། །དཀའ་ཐུབ་ཆེན་པོ་ཚུར་གསོན་ཅིག །ལེགས་ལྡན་ནག་པོ་མ་རུང་པ། །ཤ་ཁྲག་དམར་གྱི་མཆོད་པ་བཞེས། །རང་གི་རྒྱལ་སྲིད་ལ་གནས་ཏེ། །ཁྲམ་ལ་བཏབ་བའི་དགྲ་བགེགས་རྣམས། །རོལ་ཅིག་དགོངས་ཤིག་དམ་ཚིག་གཙོ། །ཁྱོད་ཀྱི་དམ་ཚིག་དུས་ལ་བབ། །བསེ་སྤྱང་ཁྲམ་ལ་བཏབ་པ་ཡི། །གཤེད་མ་བཞི་ལ་ལས་གཉེར་གཏོད། །མ་དང་སྲིང་མོ་ཆུང་མ་ལ། །དཔའ་བོ་ཁྱོད་ཀྱིས་རོལ་བར་མཛོད། །དམ་ཚིག་ཆེན་པོས་མ་གཏོང་ཞིག །ཞེ་སྡང་ཅན་གྱི་བདག་པོ་རྣམས། །སེམས་ཅན་ཀུན་གྱི་ཚེ་འཕྲོག་པས། །དགྲ་བོ་ཉམས་པའི་སྲོག་དང་ཕྲོལ། །ཤ་དང་ཁྲག་ལ་ལོངས་སྤྱོད་ཀྱིས། །གནོད་སྦྱིན་ཆེན་པོ་མ་རུངས་པ། །བསེ་སྤྱང་ཁྲམ་ལ་བཏབ་པ་ཡི། །གསེར་དངུལ་དབྱིག་ནོར་ཀུན་ལོངས་ལ། །རང་གི་འདོད་པའི་ལོངས་སྤྱོད་ཀྱིས། །སྒྲུབ་པའི་རྣལ་འབྱོར་བདག་ཉིད་ལ། །ཡིད་བཞིན་ལྟ་བུའི་དངོས་གྲུབ་སྩོལ། །རིགས་ངན་སྨེ་ཤ་ཅན་གྱི་ཚོགས། །བ་གླང་ཁྱི་ཤ་རྟ་ཤ་དང་། །མི་ཤ་གླང་ཆེན་ལ་སོགས་བཞེས། །སྲིན་མོ་ཁྲག་འཐུང་མ་ཀུན་ལ། །བསད་པའི་ཁྲག་ནི་དྲོན་མོར་བཅས། །བཞེས་ཤིག་དགྲ་བོའི་ཁྲག་ལ་འཐུང་། །སྤྲུལ་པའི་ཕྲ་མེན་ཆེན་མོ་རྣམས། །ཐོད་རུས་རྐང་དང་འབྲུ་མར་དང་། །རྐང་དང་ཨ་མྲྀ་ཏ་དང་སྦྱར། རྫུ་འཕྲུལ་གྲུབ་པའི་རྫས་རྣམས་བཞེས། །རིགས་ངན་གདུག་པའི་མ་མོ་རྣམས། །ཤ་ཆེན་བཤང་གཅི་ཁུ་བ་ཁྲག །དམ་རྫས་འབར་བ་འདི་བཞེས་ལ། །བདག་གི་ནད་རྣམས་བཟློག་ཏུ་གསོལ། །དམིགས་པའི་དགྲ་ལ་རིམས་ནད་ཐོང་། །སྲིད་པའི་བུད་མེད་མ་རུང་ཁྱེད། །བྲོ་གར་གླུ་ཚིག་མཆོད་པ་བཞེས། །དམིགས་བྱ་འཇོ་ཚུལ་སྟབས་ཀྱིས་ཕྲོགས། །ཤོར་བ་གཞོན་ནུ་བདུད་མོའི་ཚོགས། །རྣལ་འབྱོར་ཆེན་མོའི་བཀའ་བྱུང་བས། །སྔགས་སྒྲ་དྲག་པོའི་མཆོད་པ་བཞེས། །དགྲ་བོའི་ཕུང་པོ་རྡུལ་དུ་རློག །ལོག་འདྲེན་ཅན་གྱི་ཚོགས་ཀུན་ཉོན། །ཡང་དག་ཉིད་དུ་ཀུན་རིག་ན། །མེ་ཆུ་ལས་གཉིས་གང་བྱས་ན། །གཉིས་ཀྱི་དབང་དུ་མི་འགྱུར་ཞིང་། །རྣལ་འབྱོར་པ་ཡི་ལས་འདི་སྒྲུབས། །གསང་ཚིག་སྟོན་པའི་ཚོགས་རྣམས་ཉོན། །བཤང་གཅི་ཁྲག་དང་སོལ་ཁུ་ཡིས། །བརྒྱ་འམ་སྟོང་དུ་གསོ་ནས་ནི། །ལི དྒ་བཅད་ནས་སངས་རྒྱས་འཇིག །དམ་རྫས་མཆོད་པ་བཞེས་སུ་གསོལ། །བཅོལ་བའི་ལས་རྣམས་གྲུབ་པར་མཛོད། །མངའ་བདག་ཆེན་པོ་མ་རུངས་པ། །རྡོ་རྗེ་སེམས་དཔའི་སྤྲུལ་པ་སྟེ། །ཁྲོ་བོའི་རྒྱལ་པོ་གྱིང་ཆེན་པོ། །མངའ་བདག་བདུད་ཀྱི་རྒྱལ་པོ་ཞེས། །བསྟོད་ཅིང་མཐུན་པའི་རྫས་འདི་འབུལ། །སྔོན་གྱི་བསྐལ་བ་བཟང་པོ་ལ། །ཁས་བླངས་དམ་བཅས་མནའ་བོར་བའི། །སྔོན་དུ་རིགས་འཛིན་གོང་མས་བསྒྲུབས། །ད་ལྟ་རྣལ་འབྱོར་དམ་ལ་སྤྱོན། །བམ་རི་ཐོད་པ་མཁར་གྱི་རྩེར། །རུ་མཚོན་ནག་པོ་པུ་རུ་རུ། །མཚོན་ཆ་མང་པོ་ཆར་དུ་འབེབས། །བདུད་བྱ་ནག་པོ་ལྡིང་ཞིང འཇུམ། །དུར་ཁྲོད་རྒྱན་ཆ་མང་པོ་རྣམས། །མཆེ་གཙིགས་རྔམ་པའི་ཞལ་གདངས་ནས། །ཁྲོ་བོ་ཁྲོ་མོ་སྤྲུལ་བ་འཁྲིགས། །སྲིན་པོ་སྲིན་མོ་རྐན་སྒྲ་རྡེབས། །གནོད་སྦྱིན་ཕོ་མོ་འབྲུག་སྒྲ་སྒྲོགས། །ཟ་བྱེད་ཕོ་མོ་གློག་ལྟར་འཁྱུག །སོ་སོའི་མོས་པ་ཐ་དད་པའི། །དམ་རྫས་མཆོད་པ་འདི་བཞེས་ལ། །ཇི་ལྟར་བཅོལ་པའི་ཕྲིན་ལས་མཛོད། །མཱཾ་ས་རཀྟ་གོ་རོ་ཙ་ན་བ་སུ་ཏ་གྷ་ན་ཙིཏྟ་ཁཱ་རཾ་ཁཱ་ཧི། །ཕྲིན་ལས་གཞོལ་པ་གང་འདོད་སྦྱར། །བསྙེན་དུས་སྨོན་ལམ་འདི་ལྟར་གདབ། །ཧོ། མགོན་པོ་ཁྱེད་མཆོད་བྱིན་རླབས་ཀྱིས། །ཕྱོགས་དང་དུས་ནི་ཐམས་ཅད་དུ། །སེམས་ཅན་ལེགས་དོན་འབྱོར་པ་ལ། དགྲ་བགེགས་རྣམ་པ་ཀུན་མེད་ཤོག །རྟ་དང་བ་གླང་ནོར་དང་འབྲུ། །བུ་ཚ་ཕ་མ་གཉེན་བཤེས་རྣམས། །དགེ་ཞིང་ཚེ་རིང་ནད་མེད་པར། །ཐམས་ཅད་འབྱོར་བ་ལྡན་པར་ཤོག །འགྲོ་བ་ཉེས་མེད་བདེ་གྱུར་ཅིག །ནད་དང་མུ་གེ་ཀུན་བྲལ་ནས། །རྒྱལ་པོ་དགེ་ཞིང་དེས་པ་དང་། །ཆོས་ཀྱི་རྒྱལ་སྲིད་སྐྱོང་བར་ཤོག །བདེ་བར་གཤེགས་པའི་བསྟན་པ་ནི། །ཕྱོགས་བཅུ་ཀུན་ཏུ་རྒྱས་པ་དང་། །མྱུར་དུ་སེམས་ཅན་ཐམས་ཅད་ཀྱང་། །ཆོས་ཀྱི་སྣོད་དུ་འགྱུར་བར་ཤོག །དགེ་བ་ཆོས་བཅས་སྤྱན་བསྔོ་ཞིང་། །མགོན་པོ་ཁྱོད་མཆོད་བྱིན་རླབས་ཀྱིས། །བདག་བཅག་འཁོར་དང་བཅས་པ་རྣམས། །ལོངས་སྤྱོད་རྣམ་གཉིས་རྫོགས་པར་སྨོན། །བདག་ཅག་བྱང་ཆུབ་མཆོག་ཐོབ་ནས། །ཁྱོད་དང་མི་འབྲལ་འགྲོགས་པར་ཤོག །ཅེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །བསྙེན་པའི་ལས་གཞུང་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་ཡང་དག་བཤད་བྱ་བ། །གསང་སྔགས་བསྟན་པ་འདི་གསུངས་སོ། །ༀ་བྷུར་ཀུར་མ་ཧཱ་པདྨ་རྡེ་བྷུར་ཙི་བྷུར་བྱིག་གི་བྱེ་མ་ནས་སེ། ཨེ་ཧོ་ཤོ་མོས་ཀྲོ་དྷ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ༀ་བྷུ་རུ་ཀུ་རུ་རྨ་ཨ་པྲ་རྣ། བུད་ཙི་གི་ཕྱི་མ་སེ་ཁ་ཤོ་མོ་ཀྲོ་དྷ་ཧཱུཾ་ཧཱུཾ་ཕཊ་ཕཊ། བསྙེན་པ་དང་ནི་ཉེ་བསྙེན་ནོ། །ༀ་བྷུ་རུ་ཀུ་རུ་ཨི་ཕྱི་ཨུཙྪ་ཀྲོ་དྷ་ཧཱུཾ་ཕཊ། ༀ་བྷུར་ཀུར་ཏི་ཕཊ། སརྦ་སིདྡྷི་ཕ་ལ་ཧཱུཾ་ཨ། ཨོ་བཛྲ་ཙིཏྟ་ས་མ་ཡ་ཨ་མྲྀ་ཏ་ཧཱུཾ་ཕཊ། ༀ་ཧྲཱིཿ་བཛྲ་རག་ཏ་གྲྀ་ཧྞ་གྲྀ་ཧྞ་ར་ག་མ་ཧཱ་ཀཱ་རུ་ཎི་ཧཱུཾ་ཕཊ། ༀ་བཛྲ་ཀྲོ་དྷ་རཱ་ཛ་ཡ་ཧ་ན་ཧ་ན་ད་ཧ་ད་ཧ་པ་ཙ་པ་ཙ་གྲི་སྣ་མི་གེ་ན་ཧཱུཾ་ཕཊ། སྒྲུབ་དང་སྒྲུབ་ཆེན་བླང་བ་དང་། །མཐིང་ནག་དར་ཆེན་ནང་དུ་ནི། །ཡུངས་ཀར་རྒྱལ་པོ་ཁྲག་སྣ་དང་། །ཙནྡན་དམར་པོ་སྦྱར་བ་དང་། །ཙན་ཏན་དཀར་པོ་བཟང་དྲུག་དང་། །བདུད་རྩི་སྐྱང་བའི་ཐུམ་པོ་གསུམ། །དང་པོ་བར་དང་ཐ་མ་གཏུམས། ཧྲཱིཿལས་བདུད་རྩི་སྦྱར་བ་དང་། །རཱ་ལས་ཆགས་པའི་རང་བཞིན་དང་། །ཧཱུཾ་ལས་ཁྲོ་བོར་བརླབ་པའི་སྔགས། །ༀ་བཛྲ་ཀྲོ་དྷ་ཛྭ་ལ་ས་མ་ཡ་ཧཱུཾ། །ཡཀྴ་ཛྭ་ལ་ས་མ་ཡ། །རཀྴ་ཛྭ་ལ་ས་མ་ཡ་། །ཙ་ིཏྲ་ཛྭ་ལ་ས་མ་ཡ། ཧཱུཾ་ཕཊ། །ཕྱོགས་བཞིར་སྤྲུལ་པ་བསྐྱེད་པའོ། །དེ་ཀས་དགུག་དང་བསད་པ་འགྲུབ། །ༀ་བྷུར་ཀུར་མ་ཧཱ་ཀ་ལ་ནྲི་ཐུམ་ལཾ་ཐུམ་རི་ལ་རྦད་བུ་ནི་ཛི་དགྲ་བོའི་སྙིང་ལ་ཡ། ཏྲག་རཀྴ་ཐུམ་རིལ་རྦད། དགྲ་བོའི་སྙིང་ཁ་རག་ནི་ཛ་བྷྱོ། རྦད་པའི་གསང་སྔགས་མཆོག་ཡིན་ནོ། །དམིགས་པའི་རྣམ་ཤེས་དགུག་པ་ཡིན། །ༀ་མ་ཧཱ་ཀཱ་ལ་ནི་ཛ་སྙིང་ལ་ཐུམ་རིལ་རུ་པ་ཡ། རྦད་སུ་རྦད་སུ་ནྲི་ཤག་ཙིཏྟ་ཡ་རྦད། །མུགས་ཤག་ཀླིང་དུ་རྦད། །སྙིང་ལ་ནྲྀ་ཛ་ཛ་། །སྲོག་ལ་སྲོག་རྩ་ལ་བྲེམས་བྲེམས་ཡ་ཡཱ། །ཧབ་ཧབ་ནྲྀ་མ་ར་ཡ་རྦད་ཕཊ། རྣམ་ཤེས་བསད་པའི་དཀྱིལ་འཁོར་ཡིན། །དྲག་པོའི་ཕུར་པ་སྐབས་སུ་གདབ། །ༀ་མ་ཧཱ་ཀཱ་ལི་མ་བྷྱོ། རུ་ལུ་རུ་ལུ་ས་མ་ཡ་བྷྱོ། ཏྲག་རཀྴ་ལ་མུན་ཏྲ་བྷྱོ། རུ་ལུ་མཱ་རཱ་ཡ་ཐུན་བྷྱོ། ཏྲག་མོ་དྲག་སྙིང་ཁྲག་མཱ་ར་ཡ་ཐུན་ཡཱ། ཏྲག་མོ་ཏྲག་མོ་ཐུན་ཡ། ཤྲི་གེ་གྷོ་ཛ་ཤག་རྦད། མུ་རོ་ཙིཏྟ་ནི་ཤག་རྦད། རེ་གེ་ཤོ་ན་ནི་ཤག་རྦད། ཡ་མེ་ཏོ་ཤ་ནི་ཤག་རྦད། ཙིཏྟ་རེ་མ་ནི་ཤག་རྦད། ཤོ་ར་དུ་ན་ཁྲམ་བཛྲ་མ་ཏི་སྲོག་ལ་རྦད་རྦད། མ་ཚོགས་ཐུན་དང་དྲག་པོས་བསད། །བར་དུ་དྲིལ་བྱིན་བྱ་བ་ཡིན། །ༀ་རི་ལི་རི་ལི་སྙིང་ལི་ལི་རི་ཤིག་ཕྲུ་ལུ་ལུ། སྲོག་མཱ་ར་ཡ་རྦད། ཙིཏྟའི་དཀྱིལ་དུ་ནྲི་ཛ་ཐུན། །ཁྲག་གི་སེར་ཆེན་ཕོབ་ཕོབ། །ཅེས་པ་ཟོར་སྔགས་དྲག་པོ་ཡིན། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། གསང་སྔགས་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་བསྙེན་བསྒྲུབ་ཀྱི་རིམ་པ་འདི་གསུངས་སོ། །བདག་ཉིད་ལྷ་ཡི་ང་རྒྱལ་གྱིས། །དཀྱིལ་འཁོར་དབུས་ཀྱི་ཕུར་པ་ལ། །དཀར་ནག་དམར་བའི་གཟུངས་ཐག་སྒྲིལ། །མཐིང་ནག་དར་གྱི་ཕུར་པ་གསུམ། །བསྐུལ་དང་ཆགས་དང་གཞིལ་བའི་རྫས། །ཕ་ཝང་དག་ལ་ཧྲི་ཧྲི་ཛ་དག་ཟི། །ཧཱུཾ་དང་བཅས་པའི་ཡུངས་ཀར་ལ། །ཁྲག་ལ་མཆོད་སྒོང་ཧྲི་དང་མོ། །དེ་བཞིན་ལྕགས་ཐིག་ཡི་གེ་བདུན། ཡུམ་དང་སྦྲེལ་བའི་བླ་རྡོ་ཡིན། །སྨན་ལ་ཡི་དམ་སྙིང་པོ་འམ ། །དཔའ་བོ་འབྲུ་ལྔ་བྲིས་ལ་གཞུག །གཟུངས་ཐག་སྦྲེལ་ལ་འཆང་པར་བྱ། །ཐུགས་ཀར་རྡོ་རྗེ་སྲིན་པོ་འཇིགས། །མཚོན་ཆ་འཁོར་ལོ་བསྐོར་བར་བསམ། །སྔགས་ཀྱི་འོད་ཟེར་རྣོ་ལ་མྱུར། །ལྕགས་ཀྱུའི་ཚུལ་དུ་སྤྲོས་ནས་ཀྱང་། །རང་བཞིན་མགོན་པོའི་སྙིང་ག་ནས། །སྙིང་དཀྱིལ་སྣ་ལྔ་འོད་དང་འབྲེལ། །དུས་ལས་རང་གི་སྙིང་པོས་བསྐོར། །དེ་ནས་བཟུང་ནས་མི་གཏོང་བར། །གནས་ནས་བཀུག་ལ་རྟེན་ལ་བསྟིམས། །བདག་གི་བཀའ་ཉན་གསུང་སྡོད་པ། །ཞི་བའི་ཞལ་དང་ལྡན་པར་བསམ། །འབུམ་ཕྲག་གཅིག་ཏུ་རྫོགས་པར་བྱ། །དེ་ནས་ཉེ་བ་གནས་ཀྱིས་བསྙེན། །ཐུན་གྱི་སྔགས་ཀྱི་འོད་ཟེར་ཉིད་། །རྡོ་རྗེ་སྲིན་པོའི་མཚོན་ཆར་སྤྲོ། །མགོན་པོ་དབང་མེད་བཀུག་ནས་ཀྱང་། །རང་སྙིང་སྲོག་ནས་དྲོད་ལངས་ཤིང་། །ལུས་ངག་ཡིད་གསུམ་ཚ་ཞིང་བསྲེག །དབང་མེད་དྲུང་འདུག་ལས་རྣམས་གྱད། །འབུམ་ཕྲག་གཅིག་ཏུ་རྫོགས་པར་བྱ། །དེ་ནས་ཉེ་བའི་རྟགས་ནི་འབྱུང་། །སྨན་གྱི་ཐུམ་པོ་བདུད་རྩི་ཡིས། །སྐུ་ཡི་ཚ་བ་གཞིལ་ཕྱིར་གཏོར། །སྐུ་གསུམ་རང་བཞིན་རྣལ་མ་ནི། །བདག་ལ་ཉེ་ཞིང་ལས་རྣམས་བྱེད། །ཚོགས་དང་བདུད་རྩི་གཏོར་མས་མཆོད། །དངོས་གྲུབ་བདག་བླང་བྱ་བའི་ཕྱིར། །བསྒྲུབ་པའི་རིམ་པ་བག་ཙམ་སྦྱར། །རཀྟ་དེ་ནི་རྟེན་ལ་གཏོར། ཐུགས་རྗེས་ཆགས་པ་བསྐྱེད་པར་བསམ། །འོད་ཟེར་ལྕགས་ཀྱུ་དབང་གི་མཆོག །འཕྲོས་ཏེ་རང་བཞིན་མགོན་པོ་ལ། །དམ་ཚིག་བསྐུལ་ཞིང་མཆོད་པར་བྱ། །སིདྡྷི་རྟགས་པའི་མདོག་ལྟ་བུ། །བསྡུས་ཤིང་རང་ལ་བསྟིམ་པར་བྱ། །ཕྱེད་ཤས་ཙམ་གྱིས་གནད་ལ་ཕེབས། རྟེན་གྱི་ཐོད་པ་ཁ་ཕྱེ་ལ། །མྱོས་པའི་རྫས་དང་བུ་རམ་དང་། །བདུད་རྩི་འོ་བསྐོལ་ཞལ་ཟས་དང་། །དེ་བཞིན་མཆོད་པ་ཀུན་ཀྱང་བཏང་། །དམར་ལྗང་དར་གྱི་ལིདྒ་བྲི། །རྫས་ཉིད་བདུད་རྩིར་བརླབས་ནས་ཀྱང་། །ནང་དུ་སྲོག་གསུམ་ཡི་གེ་བསྒོམ། །མགོན་པོའི་གཞུང་བསྲང་སྙིང་པོ་བཟླས། །དྲུག་གི་སྔགས་ཀྱི་འོད་ཟེར་འཕྲོ་ཞིང་། །བརྒྱད་ཀྱིས་སིདྡྷིའི་མཐུ་བྱིན་བསྡུ། །འབུམ་ཕྲག་རྫོགས་ནས་སྲོད་གསུམ་བ ཞུ། །སིདྡྷི་རྫས་ལ་བདག་ཉིད་རོལ། །དམ་ཅན་གཏོར་མ་ཚོགས་ཀྱིས་མཆོད། །སྨན་གྱི་མཆོད་པས་སྟོབས་ལྡན་འགྱུར། །བསྙེན་པའི་རྡུལ་ཚོན་ཞལ་ཕྱེ་ལ། །དྲག་པོའི་ལས་ལ་སྦྱར་བར་བྱ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །བསྙེན་བསྒྲུབ་གནད་ཀྱི་ལེའུ་སྟེ་བཅུ་གསུམ་པའོ།། །།དེ་ནས་འབྲུབ་ཁུང་དྲག་པོའི་དཀྱིལ་འཁོར་འདི་གསུང་སོ། །མཎྜལ་འདོམ་གང་གྲུ་བཞི་ལ། །རཀྟ་ཁྲག་གི་དམར་པོ་བྱུག །དབུས་ནས་མཉམ་པའི་ཤིང་གཞག་ལ། །མཎྜལ་ཟླུམ་པོ་བསྐོར་ནས་ཀྱང་། །མཐོ་གང་ཚད་དུ་གྱེན་དུ་བརྩིག །དབུས་ནས་ཁྲུ་གང་གྲུ་གསུམ་ལ། །ནང་རིམ་གསུམ་ལྡན་ཐུར་དུ་བྲུ། །ཐ་མ་ཐོད་པའི་ཕྲེང་བས་བརྒྱན། །དུག་ཤིང་རྩང་དམར་ཉི་ཤུ་བརྒྱད། །རྡོ་རྗེ་འཁོར་ལོ་རལ་གྲི་དབྱུག་ཐོ་རྒྱ་གྲམ་ལྔས། །འོག་མ་དག་ལ་བསྐོར་བར་བྱ། །དམིགས་པ་དགྲ་ཡི་རྫས་རྣམས་དང་། །བག་ཕྱེ་ས་སྤྱིན་བསྲེས་པའི་གཟུགས། །བཅུ་གཉིས་སོར་ཚད་མི་རུས་མངག །ཀནྡྷའི་ཤིང་ལ་དུག་གིས་འབྲི། །དྲེད་མོའི་སྐྲ་ཐག་སྔོ་དམར་གྱིས། །བཅིངས་ལ་གཟུགས་བརྙན་རྩང་ལ་གདགས། །བཅིངས་ལ་མགོ་བརྙན་དག་ཀྱང་གདགས། །དུར་ཁྲོད་གཡམ་པ་ཁྲུ་གང་ལ། །དབུས་ནས་མཐོ་གང་གྲུ་གསུམ་ཁྲུ། །འབྲུབ་སྟེང་བཞག་ལ་ཐོད་མཁར་བརྩེགས། །རྒྱ་ནི་དེ་དང་མཐུན་པ་ལ། །དཔངས་སུ་ཁྲུ་གང་སོར་བཞི་བཏོད། །རང་ངོས་ཐེལ་ལ་སྒོ་བསྟན་ལ། །ལོགས་བཞི་འཕྲིན་ལས་གློ་དཀར་བཞི། །ཕྱོགས་བཞི་མཁར་བཞིར་ཕྱེད་ཕྱེད་བྱ། །དུར་ཁྲོད་ཚོན་གྱི་རི་མོ་ཡིས། །སྟག་དང་མི་རྟ་བྱ་རྒོད་མགོ །སྲིན་པོའི་ཐོད་པ་བ་གམ་བྱ། །ནང་དུ་རྟེན་གྱི་ཕུར་པ་ལྔ། །ཡང་ན་བཀའ་རྟེན་བྲག་ནག་དྲེག །དུར་ཁྲོད་ས་ལ་སྲིན་པོའི་གཟུགས་བྱས་ལ། །ཚོན་གྱིས་བསྒྱུར་ལ་ཕྱག་མཚན་གཏད། །གྲུ་བཞིར་རུ་མཚོན་ནག་པོ་བཞི། །ཕྱོགས་བཞིར་བདུད་བྱ་ནག་པོ་ལྡིང་། །སྨྱུག་མ་ཚིགས་ལྔའི་མདའ་གཅིག་ལ། །དྲི་མེད་དྲག་པོ་བཙུག་ནས་ཀྱང་། །བྱ་རྒོད་སྲིན་བྱ་ཁྲ་འུག་ཁྭ། །ལྔ་སྒྲོན་མདའ་ལ་དར་ནག་གདགས། །གཡུ་མིག་ནམ་མཁའ་ནག་པོ་ལ། །རྒོད་ཀྱི་སྒྲོ་གསུམ་དར་གྱིས་བརྒྱན། །དབུས་ཀྱི་མཁར་སྟེང་གཞག་པར་བྱ། །གཡས་གཡོན་ཡབ་ཡུམ་གཏོར་མ་གཞག །སྙིང་གསུམ་དར་སྒྲིལ་ལུས་ལ་བཅང་། །གྱིང་གི་མཁར་གྱི་སྟེང་ལོགས་གསུམ། །ལྕགས་ཕུར་བཅུ་གཉིས་དར་གྱིས་བརྒྱན། །རལ་གྲི་མཐོ་གང་གྲི་ཁྲག་བྱུག །ཕོ་སྙིང་སྣ་ཚོགས་གཏོར་མ་བཅའ། །ལྷོ་ཕྱོགས་གནོད་སྦྱིན་མཁར་སྟེངས་སུ། །བསེ་མདུང་སྨུག་པོ་དར་གྱིས་བརྒྱན། །ཟོར་མདའ་མོན་ཐོད་གཡས་གཡོན་དགོད། །རུ་སྐྱོགས་ནང་དུ་དམ་རྫས་བསོག །རྟ་དམར་བྱ་དམར་གྲི་བོའི་དོན། །མར་ཁུ་སྦྲང་རྩི་འོ་མ་ཁྲག །སྦྱར་བའི་བདུད་རྩིའི་གཏོར་མ་བཤམ། །ནུབ་ཕྱོགས་སྲིན་པོའི་མཁར་སྟེངས་སུ། །སྦྲུལ་ཤ་དུག་དང་བག་ཕྱེ་སྦྱར། །སྦྲུལ་མགོ་གསུམ་ལྡན་འཁྱིལ་བ་བཅའ། །ཀནྡྷའི་དགྲ་གཟུགས་སྟེང་དུ་བཞག །གཡས་སུ་ཤ་རུལ་ཁྲག་རུལ་དང་། །སྙིང་སྣ་ཚོགས་དང་ཐོད་པ་དང་། །གཡོན་དུ་བ་དམར་འོ་མ་ལ། །ཀླུ་སྨན་བཏབ་ལ་མཁར་གཞོང་བཞག །བྱང་དུ་ཟ་བྱེད་མཁར་སྟེངས་སུ། །ཚོན་དྲུག་ནམ་མཁའ་དར་ནག་བརྒྱན། །གཏོར་མ་ཚིལ་ཆེན་སྤྲིན་ཁེབས་ཅན། །ལིདྒ་རྨ་བྱའི་གདུགས་དང་བཅས། ། མཁར་རྣམས་ཀུན་གྱི་རྒྱུ་དག་ནི། བཀའ་རྟེན་ཆོས་ཁྲི་དུར་ཁྲོད་དང་། །གནོད་སྦྱིན་སྦྲུལ་དང་རྒྱལ་པོའི་མཁར། །ཕྱུག་པོའི་བང་མཛོད་རི་མཐོའི་རྩེ། །ས་སྣ་བདུན་ལ་ཀླུ་ཆུས་སྦྲུ། །བྱན་ཀླག་མཆོངས་ཀྱི་རི་བོ་ལ། །དུག་ཤིང་ཡལ་ག་དུར་ཁྲོད་ཀྱི། །ཤ་རུས་ལ་སོགས་བཅད་ཕོར་དགྲམ། །ཀང་ཀ་ཐང་དང་མཚོ་འགྲམ་ལ། །དཔལ་གཏོར་བདུད་རྩི་རཀྟ་དང་། །སྤོས་ཆེན་སྣུམ་ཆེན་ལ་སོགས་དགྲམ། །གྲུ་བཞི་ཧ་ཧའི་རྒྱལ་མཚན་ཏེ། །ཞིང་གི་བླ་རེ་མཎྜལ་དབུབ། །མོན་ཐོད་ནང་དུ་དུག་སྣ་དང་། །ཁྲག་སྣ་ཕྱེ་གསུམ་མཚོན་དབལ་བརྡར། །ཆང་གིས་སྦྱར་ལ་བྱང་དུ་དགོད། །དེ་བཞིན་རིགས་ངན་ཐོད་པ་རུ། །ཡུངས་དཀར་ཡུངས་ནག་སྐེ་ཚེ་དང་། །ཚ་བ་སྣ་ཚོགས་ལྷོ་རུ་དགོད། །དེ་ལྟར་བཅའ་གཞི་རྫོགས་པ་དང་། །ཕྱོགས་བཅིང་གསོལ་བ་སྔར་བཞིན་གདབ། །དཔལ་གྱི་ལས་གཞུང་རྫོགས་པར་བྱ། །དེ་བརྒྱད་འབྲུ་བརྒྱད་རྦད་བསད་བསྒྱུར། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། དྲག་པོ་འབྲུབ་གཞུང་བཅའ་གཞིའི་སྟེ་བཅུ་བཞི་པའོ།། །།དེ་ནས་ཡང་རིམ་པ་འདི་གསུངས་སོ། །བདག་ཉིད་ལྷ་ཡི་ང་རྒྱལ་ལ། །ཐུགས་ཀར་རིམ་པ་ལྔ་རིམ་དུ། །བཾ་ལས་བྱན་གླག་ཁྲོམ་ལས་རི། །སྟ་ན་བྷ་ཏི་དུར་ཁྲོད་གནས། །ཧཱུཾ་ལས་ཐོད་པའི་མཁར་ལྔ་བསྐྱེད། །དབུས་སུ་དམིགས་པའི་དགྲ་སྟེངས་སུ། །དུན་ལས་རྩ་བའི་སྔགས་བརྗོད་པས། །ལེགས་ལྡན་ཡབ་ཡུམ་སྔོན་བཞིན་བསྐྱེད། །ཡང་ན་ཞལ་གཅིག་ཕྱག་གཉིས་ལྗང་། །གསལ་ཤིང་ཕྱར་ཞིང་ཤུན་གྱི་མདུང་། །དུར་ཁྲོད་ཆས་རྣམས་རྫོགས་པར་བསམ། །མདུན་ན་ལས་ཀྱི་བཀའ་སྡོད་ནི། །དྲག་པོ་གྲི་གུག་ཐོད་པ་འཛིན། །ཕྱོགས་བཞིར་གཙོ་བོའི་འོད་སྤྲོས་ལ། །སྔགས་བསྐྱེད་འཁོར་དང་བཅས་པ་བསྐྱེད། །ཤར་དུ་ཁྲོ་ཆེན་གིང་ཀ་ར། །མཐིང་ནག་མཚོན་ཆའི་འཁོར་ལོ་བསྐོར། །སྙིང་ཁྲག་འཐུང་ཞིང་དམིགས་པ་གནོན། །ཕྱི་ནང་གྲི་ཐོགས་བཅུ་གཉིས་གྱིང་། །རྡོ་རྗེ་མྱུ་གུ་ཆོས་དང་ལས། །རིན་ཆེན་མྱུ་གུ་འཁོར་ལོ་རྩལ། །ཟླ་བའི་རྩལ་དང་ཉི་མའི་མདངས། །ཡི་གེ་ནམ་མཁའ་སྤྱང་ཀི་དང་། །དུས་མཚམས་ཕྱོགས་འདུལ་དུར་ཁྲོད་བདག །ཀུན་ཀྱང་རབ་ཏུ་འཇིགས་པའི་གཟུགས། །དུར་ཁྲོད་རྒྱན་ལྡན་གར་ཐབས་རྒྱུག །ཟངས་གྲི་ཕྱར་ཞིང་གློ་སྙིང་ཟ། །འཛིན་ཅིང་གསོད་པའི་སྤྲུལ་པ་འགྱེད། །ལྷོ་རུ་ཡ་མས་གཤིན་རྗེའི་གཙོ། །དམར་ནག་ཞིང་གྱོན་རལ་པ་ཁྲག །གསེར་གྱི་རལ་གྲི་མདུང་དམར་འཛིན། །ཡུམ་ནི་བྱད་ཐག་ནད་རྐྱལ་རྡེབ། །སྐྱེས་བུ་བཞི་དང་བསེ་མོ་བཞི། །མི་དམར་ཤན་པ་བཞི་བཅུ་གཉིས། །འཇིག་རྟེན་སྐྱོང་བའི་ཆ་ལུགས་རྫོགས། །ནུབ་ཏུ་ཛ་ལས་རཱ་ཧུ་ལ། །དུད་ཀ་མགོ་དགུ་རོ་སྨད་སྦྲུལ། །མགོ་ལུས་ཀུན་གསལ་རལ་པ་ཁྲག །གྲི་གུག་ཐོད་པ་བསྣམས་པ་ཡི། །སྲིན་པོ་བཅུ་དང་སྲིན་མོ་བཅུ། །མཚོན་ཆ་རྣོ་དབལ་ལོངས་སྤྱོད་འཛིན། །བྱང་དུ་མ་ལས་ཟ་བྱེད་མ། །མཐིང་ནག་ཁྲག་རལ་དུག་རླངས་ཅན། །ཤུན་གོས་རེ་ལྡེ་རྒྱུ་ཕྲེང་ཞགས། །བསེ་སྦྲུལ་ཉི་ཟླ་ཆས་ཀུན་རྫོགས། །གཡས་པ་ཁྲམ་ཤིང་ནད་རྐྱལ་གཡོན། །དྲེའུ་ནག་ཞོན་ནས་མེ་རླུང་འཚུབས། །རིགས་བཞི་མཁའ་འགྲོ་འབུམ་གྱིས་བསྐོར། །གཞན་ཡང་མ་ཚོགས་འབུམ་གྱིས་བསྐོར། །སྔོན་བཞིན་འདིར་ཡང་འདུས་པར་བསྒོམ། །རང་བཞིན་གནས་ནས་སྤྱན་དྲངས་ལ། །དུར་ཁྲོད་གནས་སུ་རྟེན་ལ་བསྟིམ། །དམ་ཚིག་སྦྱིན་པ་འདི་ལ་བརྗོད། །སྔོན་ཚེ་དཔལ་ཆེན་ཁྲོ་བོའི་རྒྱལ། །བདུད་འདུལ་རྡོ་རྗེ་སྲིན་པོ་ཡིས། དྲེགས་པ་བཅོམ་ནས་སྒྲིབ་པ་སྦྱངས། །དབང་བསྐུར་མིང་བཏགས་སྲོག་ཡིག་ཕུལ། །ཕོ་བྲང་ཀུན་ལ་དམ་ཚིག་སྦྱིན། །ཕྱི་ཡི་མཚན་ནས་བོས་པའི་ཚེ། །མགོན་པོ་ལེགས་ལྡན་ནག་པོ་བྱ། །ནང་གི་མཚན་ནས་བོས་བའི་ཚེ། །བདུད་འདུལ་དུར་ཁྲོད་སྒྲོལ་བའི་གིང་། །གསང་བའི་མཚན་ནས་བོས་པའི་ཚེ། །རྡོ་རྗེ་སྒྲོལ་བྱེད་དྲག་པོ་རྩལ། །མནའ་བོར་ཁས་བླངས་མ་བསྙེལ་བར། །སྐུ་གསུངས་ཐུགས་སུ་བདག་སྦྱོར་བ། །ཕོ་བྲང་དཀྱིལ་འཁོར་མངའ་བདག་འདིར། །རྟག་ཏུ་དམ་ཚིག་ཚུལ་བཞིན་གྱིས། །ༀ་ཨཱཿ ཧཱུཾ་བཛྲ་ས་མ་ཡ། ས་མ་ཡ། དེ་ནས་མཆོད་པ་ཚུལ་བཞིན་དབུལ། །དེ་ནས་རྟེན་ལ་གཟུངས་ཐག་གདགས། །སྒྲུབ་སྔགས་དྲག་པོ་བཅུ་བཞི་པ། །དབང་མེད་སྲོག་ཡིག་ཚབ་བ་སྐྱེད། །མྱུར་དུ་བཀུག་ལ་རྟེན་ལ་བསྟིམ། །སྐབས་སུ་སྨན་གྱི་ཚ་བ་གཞ་ིལ། །གཏོར་མ་ཤ་ཁྲག་མཆོད་པ་བརྟག །དགོངས་ཀ་རྟེན་ལ་ཡུངས་ཀར་བྲབ། །གདུག་སེམས་ཆེར་བསྐྱེད་དགྲ་ལ་བསྐུལ། །བཅུ་བཞིའི་མཐའ་ལ་རྦད་སྔགས་གདགས། །སྐབས་སུ་སྤྲུལ་བའི་སྔགས་བཞི་པོ། །འབར་བའི་དམ་ཚིག་དམིགས་པ་ཡི། །སྲོག་ལ་བྷྱོ་བྷྱོ་སྦྱར་ལ་བྲབ། །ཡུངས་ཀར་ཁྲོ་བོའི་དབལ་གྱིས་བྲབ། །སྡེ་བཞི་སྤྲུལ་པ་འཁོར་བཅས་ཀྱིས། །དམིགས་པའི་དགྲ་ཡི་ཡུལ་ཁམས་བཀང་། །བླ་དང་ཤེས་པ་བཀུག་ཅིང་བསྟིམ། །ལྷ་ཚོགས་བསྐུལ་དང་ཕོ་ཉ་རྦད། །སྔགས་ཀྱི་ཐུན་འཇུག་རཀྟ་ཡིས། །ཕུར་མ་ཁྲག་སྦྱངས་སྐུ་ལ་གཏོར། །ཐུགས་རྗེ་ཆེན་པོས་ཆགས་པ་སྐྱེས། །དམིགས་པའི་འབྲུབ་ཁུང་ཁྲམ་ལ་གདབ། །ཀུན་ཀྱང་བྱི་རུའི་མདོག་ལྟར་གསལ། །ཧཱུཾ། ཐུགས་རྗེ་སྟོབས་ཀྱིས་དགྲ་འཇོམས་སྐུ་ལྔའོ། །སངས་རྒྱས་ཀུན་གྱི་སྐུ་ཡི་ལམ་མཁན་པོ། །དཔལ་མགོན་ལྗང་སྔོན་དྲག་པོ་གསལ་ཤིང་ཅན། །ཁྱོད་ཀྱིས་བསྟན་པ་བཤིག་པ་བསྒྲལ་བའི་ཕྱིར། །གནས་འདིར་འདུག་ལ་བཀའ་ཡི་དམ་ཚིག་སྲུངས། །སྒྲུབ་པའི་གྲོགས་གྱིས་དགྲ་ལ་རྟགས་རྣམས་ཕྱུང་། །ཧཱུཾ། དྲག་པོ་སྐུ་ལྔ་རྒྱལ་བའི་བཀའ་སྡོད་མཆོག །ཡེ་ཤེས་ལྔ་ལྡན་རྒྱལ་བ་རིགས་ལྔའི་འཁོར། །ཕྲིན་ལས་བདུད་འདུལ་དགྲ་བགེགས་ཀུན་གྱི་གཤེད། །གནས་འདིར་ཚུར་སྤྱོན་བདག་གི་ཕྲིན་ལས་མཛོད། །ཅེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །དྲག་པོ་ཕྲིན་ལས་སྒྲུབ་པའི་ལེའུ་སྟེ་བཅོ་ལྔ་པའོ།། །།སྒྲུབ་པ་ཉམས་སུ་ལོན་པ་དང་། །དྲག་པོ་བསད་ལས་བྱ་བ་སྟེ། །དང་པོ་ཡུངས་ཀར་དཔལ་གྱི་བསྐུལ། །ཐ་མ་བདུད་རྩིའི་ཚབ་གཞི་ལ། །རཀྟས་ལས་ཞེན་དྲག་པོ་ཀུན། །སྒྲུབ་པའི་སྐབས་ལས་འདིར་ཤེས་བྱ། །ཉིན་མོ་ཐུན་སྟོན་རྦད་ཅིང་དགུག །ཐུན་སྨད་བསད་པའི་དྲག་སྔགས་སྦྲེལ། །ལྷ་དང་དབྲལ་ཕྱིར་སྨེ་རྫས་གདབ། །དགོངས་ཀ་ཕོ་ཡི་རེག་ཆོད་ཀྱིས། །སྐམ་ཐུན་ཐུན་ཁུང་ནང་དུ་བསྟིམ། །མཆོག་ཕུར་ནང་ནས་གདབ་པར་བྱ། །དྲེགས་པ་ཕོ་རྣམས་སྲོག་ལ་རུབ། །བཀའ་སྡོད་ལས་ཀྱི་ཤན་པ་ཡིས། །གྲི་གུག་ཁོག་གཤགས་སྙིང་ཕྱུང་ནས། །གཙོ་བོའི་ཞལ་དུ་སྟོབ་པར་བསམ། །གནོད་སྦྱིན་ཚོགས་དང་མཆེ་གཤོག་གིས། །ཤ་ཁྲག་ཟ་ཞིང་རྒྱུ་མ་འདྲེན། །ཕོ་གཤེད་གནད་ཀྱི་རེག་ཆོད་ཀྱིས། དགྲ་བོ་བསྒྲལ་བའི་ཕྲིན་ལས་སོ། །མཚན་མོ་སྒྲུབ་སྔགས་གཉིས་པོ་ལ། །བསད་སྔག་སྤེལ་ལ་དྲག་ཏུ་བཟླས། །ཐོ་རེངས་མོ་ཡི་རེག་ཆོད་ཀྱིས། དུག་ཁྲག་གཤེད་ཐུན་དྲག་ཏུ་བརྡེག །མ་མོ་སྲིན་མོ་གནོད་སྦྱིན་མོ། །བདུད་མོའི་ཚོགས་ཀྱི་དམག་ཚོགས་ཀྱིས། །དམིགས་པའི་ལུས་ལ་ནད་མཚོན་ཆར། །འོད་ཟེར་བུ་ག་དགུ་ནས་འདུས། །སྔོ་དམར་དུག་གིས་རྩ་རྣམས་ཁེངས། སྙིང་ལ་འདུས་ནས་དྭངས་སྙིགས་ཕྱེ། །དྭངས་མ་ཆོས་ཉིད་བདེ་བར་ཐིམ། །ཕུང་པོ་ཤ་ཁྲག་མ་ཚོགས་རོལ། །ཞག་གྲངས་དགུ་ཡི་ཏིང་འཛིན་བསྟར། །ཐུན་རྫོགས་དངོས་དང་འབྲེལ་བའི་གཟུངས། །བྱང་ཤར་ལྕགས་མཁར་སྒོ་མེད་དུ། །དུག་ཤིང་མེ་བཏབ་ཐུན་བྲབ་བརྡེག །གསེར་ཕུད་ལྷ་སྲིན་མཆོད་བྱས་ལ། །ཟོར་གྱི་ལམ་ཕྱེ་བསེ་མདའ་ལ། ཐུན་ཁྲག་བྱུག་ལ་མེ་ལ་བསྲེག །མུ་སྟེགས་ལོག་ལྟའི་ཐོད་པ་རུ། །ཐུན་ཁྲག་བླུགས་ལ་ངད་རླངས་བསྟིམ། །དུར་ཁྲའི་འཁུལ་གཏོར་ཁྲག་མདའ་འཕང་། །སྔགས་ཀུན་དྲིལ་མཐར་ཟོར་སྔགས་གདགས། །དེ་ནས་བསྐུལ་བ་འདི་ཡང་བྱ། །ཧཱུཾ་ཕྱོགས་བཞི་དྲེགས་པའི་ཡུལ་མཁར་ནས། ཟོར་གྱི་བདག་པོ་མཆེད་བཞི་བཞེངས། །ཤར་ཕྱོགས་གནོད་སྦྱིན་སྟག་ཐབས་དང་། །ལྷོ་ཕྱོགས་དྲག་པོ་གཤིན་རྗེའི་རྡོ། །ནུབ་ཕྱོགས་བདུད་ནག་མགོ་དགུ་པ། །བྱང་གི་སོག་པོ་སྨིན་རིངས་པོ། །བསེ་ཁྲབ་དམར་པོ་སི་ལི་ལི། །གོ་ཆེན་འབར་བའི་གོ་མིག་ནས། །ཁྲག་མདའ་དུག་མདའ་དགྲ་ལ་རྒྱོབ། །རུ་སྐྱོགས་ནག་པོ་དགྲ་ལ་ཐུན། །ཡུངས་ཀར་ཁྲོ་བོ་ཁྲོ་མོར་འཁྲིགས། །ཟོར་གྱི་བདག་པོ་བསྐྱོད་ཙམ་ན། །རི་རབ་རྡོ་འཕེན་འུ་རུ་རུ། །རྒྱ་མཚོ་ཞོ་འཁྲོག་ཆི་ལི་ལི། །བསེ་ཡི་གིང་ཆེན་བསྐྱོད་ཙམ་ན། །མོན་གྱི་ལུས་ལ་དུང་སེང་རྐང་། །ལྕགས་ཀྱི་གཞུ་ལ་ཟངས་གྱི་རྐང་། །དྲག་པོ་སྔགས་ཀྱི་ཤུགས་གྱིས་གདུང་། །བསེ་ཡི་ལག་ལེན་གཡོན་པ་སྤྲས། །མོན་གྱི་དུག་མདའ་ནག་པོ་ལ། །ཉི་ཟླ་ཁྱུང་དང་འུག་པ་ཁྲ། །གཟེར་ཆེན་འབེབས་པའི་གཤོག་པ་ཅན། །གནོད་སྦྱིན་བྱེ་བ་ས་ཡར་བཅས། །ནམ་གྱི་ཕར་ཕྱེད་ཚུར་ཕྱེད་ན། །མ་མོ་ཚོགས་ཀྱི་དམག་དང་བཅས། །སྙིང་གི་སྒོང་པ་བཅད་རེ་རན། །སྲོག་རྩ་དབུགས་འདི་གཏུབ་རེ་རན། །དུག་མདའ་དགྲ་ཡི་སྙིང་ལ་རྒྱོབ། །བྷྱོ། ལྷ་ཡི་སྡེ་དཔོན་ཚོགས་ཀྱི་བདག །ལེགས་ལྡན་ནག་པོ་མཐུ་བོ་ཆེ། །དུར་ཁྲོད་བདག་པོ་སྒྲོལ་བའི་གིང་། །ཁྱད་པར་འཕགས་པའི་བླ་མ་ལ། །དད་པའི་སེམས་ཀྱིས་རབ་བཏུད་ནས། །མཐུ་མེད་འཇིག་རྟེན་སྐྱབས་གསོལ་ཅིག །ཆོས་ཀྱི་སྲུང་མ་དམ་ལ་འདུ། །སྔགས་ཀྱི་མ་སྲིང་དམ་ལ་འདུ། །འདོད་ཁམས་བློན་མོ་དམ་ལ་འདུ། །མགོན་པོ་ནག་པོ་དམག་སྣ་དྲོངས། །བདུད་འདུལ་སྒྲོལ་གྱིང་ཟོར་འདི་འཕངས། །ལྔ་ཕུང་རྩད་ནས་གཅད་པའི་ཕྱིར། །མུ་སྟེགས་ཀཱ་ཱལའི་ཐོད་པ་ལ། །ཟོར་གྱི་གཞུ་མཆོག་ལིངས་སེ་ལིང་། །སྔགས་ཀྱི་རྒྱུད་སྒྲ་བྲེངས་སེ་བྲེང་། །རཀྟ་ཆགས་པའི་སྨྱུག་མ་ལ། །གསོད་བྱེད་དུག་གི་སྒྲོ་ཡིས་བསྐྱོན། །ཚ་དཔལ་ཐུན་གྱི་རྒྱུས་ཀྱིས་དཀྲིས། །ཡུངས་ཀར་དཔལ་གྱི་མདེའུ་གསལ། །ཏིང་འཛིན་དྲག་པོས་ཤུགས་ཀྱིས་འཕངས། །དགྲ་ཡི་སྙིང་ལ་དུག་མདའ་ཡ། །རྣམ་ཤེས་རྟེན་ལ་དུག་མདའ་ཡ། །ༀ་མ་ཧཱ་ལ་དགྲ་བོ་སྲོག་ཕྲིག་ཕྲིག་ཆུ་མ་ཆུ་མ་ཧུར་ཧུར་རགྨོ་སྙིང་རྩ་བྲེང་བྲེང་། མར་དམ་མ་མ་རགྨོ་ཆོ་ཆོ་ནི་ཤ་ཀུ་རུ་བྷྱོ་བྷྱོ། ཞེས་འཕང་ངོ་། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། དྲག་པོ་གནད་ཀྱི་ལེའུ་སྟེ་བཅུ་དྲུག་པའོ།། །།དེ་ནས་གཏད་ཁྲམ་གནན་པའི་ལས་འདི་གསུངས་སོ། །ས་སྣ་བདུན་གྱི་འདག་པ་ལ། །ཚད་དང་ལྡན་པའི་མཁར་བྱས་ལ། །ནང་དུ་ལེགས་ལྡན་སྐུ་གཟུགས་རྟེན། །སྟེང་དུ་ལས་ཀྱི་བྱ་ཁྱུང་བཞག །དུར་ཁྲོད་རོ་རས་ཁྲུ་གང་ལ། །དགྲ་བོའི་དྲི་མས་བྱུག་བྱས་ལ། །སྦྲུལ་ནག་འཁྱིལ་པའི་ལྟེ་བ་རུ། །དུག་དང་ཁྲག་གིས་འཁོར་ལོ་ལ། །མུ་ཁྱུད་བཞི་རུ་བསྐོར་བྱས་ལ། །དབུས་སུ་རྩི་མར་སྦྱར་བའི་ཁྲག །དམིགས་པའི་གཟུགས་བྲི་མིང་རུས་དགོད། །གཡས་སུ་གཉེན་པོ་ལྟོ་བར་ཀླུ། །རྒྱབ་ཏུ་ས་བདག་འདོམས་སུ་བསེ། །འབྱུང་པོ་དུག་བཞི་དམིགས་པས་གཟུང་། །དེ་ཕྱིས་སྔགས་རིམ་འདི་དག་ནི། །ཡིག་མགོ་ནང་དུ་བསྟན་ལ་བྲི། །ནཱ་ག་དུ་ནཱ་ག་དུ་ཧེ་ལ་ཧེ་ལ་འདུས་འདུས། །ༀ་ཨ་ཀྲོ་ཏཱི་ཤྭ་རཱི་ནཱ་ག་རགྨོ་ཧེ་ཞུ་ལ་ཕོས་ཕོས་ཤིག་ཤིག །ཧུ་ཡ་ཧུ་ཡ། ཀླུ་མོའི་ཚོགས་ཧེ་ཞེན་ཧུ་ཞེན་ནཱ་ག་ཞེན་དབུགས་ལ་ཐུམ་ཐུམ་སྭཱ་ཧཱ། ཀླུ་སྲིན་སྡུད་དེ་དམ་མེད་འཁྲིལ། །དེ་མཐར་དུག་དང་ཁྲག་སྦྱར་ལ། །སྔགས་འདི་བྲིས་ལ་མིང་བྱང་སྤེལ། །ནཱ་ག་དུ་ནཱ་ག་དུ་ཧེ་ལ་ཧེ། །འདུས་འདུས་ནག་པོ་བམ་ཙི་ཙེ་རྒྱལ། །དྲག་ཐུར་སྙིང་ལ་འདུས་མྱགས་མྱགས་རྩ་བཞི་སྐུམས། །ཤན་ཤན་སྲོག་ལ་ཤན། ཐུར་ཐུར་སོད་ནཱ་ག་གུར་ལིང་སྙིང་ལ་འདུས་འདུས། ནྲྀ་ལོང་ནྲྀ་སོད་ས་མ་ཡ་དམ་དམ་ཛ་ཛ་ནཱ་ག་རཀྴ་ཆེ་གེ་མོ་ཁ་ཁ་ཁཱ་ཧི། །དེ་མཐར་མ་ཧཱ་ཀཱ་ལ་ཡི། །བསྙེན་བསྒྲུབ་བས ད་ཐུན་ནང་བསྟན་བྲི། །ལྷ་ཆེན་མགོན་པོ་ནག་པོ་ནི། །འཆི་བདག་ཀླུ་ཡི་དེད་དཔོན་ཡིན། །འཁོར་ལོ་ དྲིལ་ནས་ཀན་མཱ་ར་ཡ། ཀུ་ཀུ་ཀ་ཡི་སུ་བུ ་རུ། །ཙི་ཏ་ཛྭ་ལའི་ཐོད་པ་རུ། །མ་འཚོར་ཁྲོ་ཆུའི་རྒྱས་གདབ་ནས། །མུན་པ་ནག་པོའི་ཀློང་དུ་དྲིལ། །དཀར་ནག་སྦྲུལ་གྱི་ཐག་པས་བསྡམ། །ནག་པོ་གདོལ་བའི་སྲང་ན་ཡང་། །མདའ་གང་བཅལ་བར་དོང་འབྲུས་ལ། །ཕྱོགས་བཞི་མཆོག་གི་ཕུར་པ་བཞི། །གཤིན་རྗེ་གཤེད་དང་རྟ་མགྲིན་དང་། །གསང་བདག་ཉིད་ཀྱི་སྤྲུལ་བར་བསྒོམ། །རང་ཉིད་མགོན་པོ་ནག་པོར་བསྒོམ། །ནག་གསུམ་ཁྲག་དང་གླ་རྩི་དུག །དྲི་སྤོས་སྦྱར་ལ་ལུས་ལ་གནས། །ལྷ་སྲིན་ཀུན་ལ་གསེར་སྐྱེམས་གཏང་། །རྟེན་བདག་དེ་ལ་རྩི་སྨན་སྦྱར། །ཐོད་པ་ནང་དུ་བཅུག་ནས་ཀྱང་། །སྙིང་པོ་དེ་གཉིས་བརྒྱ་བརྒྱ་བཟླས། །མངས་ན་ཀླུ་སྲིན་རང་ལ་འདུ། །དེ་སྟེང་ཁམས་གསུམ་ཀླུ་རྣམས་ཀུན། །མོ་རྣམས་ཆགས་པའི་ཚུལ་གྱིས་འདུ། །ཕོ་རྣམས་རྔམ་པའི་ཟས་སུ་ཟ། །ཁྲོ་བོའི་མཁར་དང་ཁྱུང་གིས་གནན། །དུར་སོལ་རྒྱ་གྲམ་སྟེང་ནས་དགབ། །ཉི་ཤུ་རྩ་གཅིག་ཕྱིར་བསྐྱེད་ལ། །ཐོ་གཟུག་རྒྱལ་བའི་དལ་དུ་བསྒོམ། །བསྐོར་བ་ཕྱིན་ཀ་ལོག་ཏུ་བྱ། །དུག་གི་སྒྲོ་བ་གཏན་པར་དྲུ། །དུག་ཁྲག་སྙིགས་པས་རྗེས་གཅོད་བྱ། །སླར་ལོག་ཚོགས་མཆོད་བཀྲ་ཤིས་བྱ། །དེས་ནི་ལམ་ལ་ཐེ་ཚོམ་མེད། །ཅེས་གསུངས་སོ། །དཔལ་མགོན་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །གཏད་ཁྲམ་གནན་པའི་ལས་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་དྲག་པོ་གཤིན་རྗེ་ལྟར་སྒྲུབ་པ་འདི་གསུངས་སོ། །དང་པོ་གདེང་ལྡན་སྔགས་པ་ཡིས། །དུར་ཁྲོད་ཆེན་པོ་རབ་འཇིགས་པའི། །ནགས་རི་ཚེར་མ་རབ་ཏུ་རྩུབ། །གདུག་པའི་ཚོགས་སུ་ལྷ་སྲིན་ཡོད། །སྔར་ཤི་མི་རོ་སྦུབས་པའི་གནས། ། དུག་དང་མཚོན་ཆའི་ཐུན་སྒྲུབ་ནི། །ཐ་ཆུང་བཞི་ཡི་མར་ངོ་ལ། །སྔོན་འགྲོ་ལས་ཀུན་རྫོགས་བྱས་ནས། །དུར་ཁྲོད་གནས་སུ་མཎྜལ་ནི། འདོམ་གང་གྲུ་བཞི་ཆག་ཆག་གདབ། །རབས་ཆད་ཕུང་ཁྱིམ་གྲིབ་ས་ལ། །འབྲུབ་ཁུང་ལྕགས་ཁང་རྩེ་གསུམ་བྲན། །རྩང་དང་ཐོད་ཕྲེང་མེ་རི་བྲི། །དུག་ཁྲག་དུར་སོལ་སྦྱར་བྱུགས་ལ། །དབུས་སུ་མོན་ཐོད་ཇ་རིལ་དུ། །སྲུབ་མའི་ལོ་མ་ཞིང་ཆེན་རས། །སྐྱིན་ཐང་ཆུ་ཤུལ་རྔུ་ཆོ་ཕུབ། །གངས་དུམ་རྒྱ་མཚོའི་ལྦུ་བ་ལ། །གྲོག་མཁར་ས་དང་རང་གི་མཁར། །དུག་ཁྲག་སྦྲུས་ལ་ལིདྷ་བྲི། །ཀན་དྷའི་ཤིང་ལ་དུག་ཁྲག་གིས། །མིང་རུས་ལོ་ཁམས་ཁྲམ་སྔགས་བྲི། །སྔོ་དམར་ཕུར་པ་སྐེ་ནས་གདགས། །རྒྱ་ཚིལ་གུ་གུལ་དུད་པས་བདུག །ལྕགས་ཕུར་དྲུག་གིས་ངར་བླུད་ལ། །འཆི་བདག་གཤིན་རྗེར་བསྒོམས་ལ་གཏད། །གྲི་ཐོག་དམ་དམར་ཐོད་སྨེ་བར། །ར་དུག་རེའུ་ལྕག་སྤྱང་དུག་དང་། །བཙན་དུག་བ་སྤྲུ་ཐར་ནུ་ཐུག །མི་རྟ་བྱི་བ་གར་ཡི་ཁྲག །གཅན་གཟན་མཆེ་སྡེར་མཚོན་ཆའི་དཔལ། །ལྕགས་རྒོད་ཟངས་རྒོད་རྡོ་ཕྱེ་སྦྱར། །གུ་གུལ་ནག་པོའི་ཚ་བ་སྦྱར། །ཆང་གིས་སྦྱར་ལ་དར་སྣ་གདགས། །ལྕགས་སམ་ཐོད་པའི་སྣོད་ནང་དུ། །དཔལ་བཤོས་ཁྲུ་གང་རཀྟས་བརྒྱན། །ནག་གསུམ་ཁྲག་དང་སྙིང་གིས་བརྒྱན། །ཐོད་པར་བཤོས་བུ་གྲུ་གསུམ་དང་། །གྲུ་བཞི་མཁར་ཐབས་ཟུང་གསུམ་བཅུ། །རྟ་ནག་ར་དཀར་ཁྲམ་གྱི་སྙིང་། །ར་རྒྱའི་བན་ཁྲག་བརྒྱན་པ་བཞག །དམར་གཏོར་ཚིལ་ཆེན་སྤྲིན་ཁེབས་ཅན། །དཀར་གཏོར་རྩི་སྨན་ཀླུ་ལ་བཤམ། །ཕྱོགས་བཞིར་མཆོད་པའི་བྱེ་བྲག་ཚོགས། །གཅན་གཟན་རྒྱན་རྣམས་བདུད་ལྟ་བུ། །སྟོང་ཉིད་ངང་ལས་གཤིན་རྗེ་བསྒོམ། །བྷྲཱུཾ་ལས་ལྕགས་ཁང་སྟེང་ཤོད་དུ། །འོད་ལས་གྱུར་པའི་གཞལ་ཡས་ཁང་། །གཟས་པའི་གདན་ལ་སྟག་ཆེན་ཁྲི། །མེ་དཔུང་འབར་བའི་ཀློང་དཀྱིལ་དུ། །དུན་ལས་ཡི་གེ་བཅུ་བཞི་པ། །འཆི་བདག་ཞལ་གཅིག་ཕྱག་གཉིས་པ། །མཐིང་ནག་དབུ་སྐྲ་ཁམ་ནག་འཕྲོ། །སྐུ་ལ་བེར་ནག་བརྩེགས་པ་གསོལ། །གཡས་ན་ཙན་དན་བིང་ཆེན་ལ། །གཡོན་པ་ཐོད་པ་ཁྲག་གིས་བཀང་། །ཡབ་ཡུམ་གཉིས་མེད་འཁྲིལ་བར་བསྒོམ། །འཁོར་གྱི་དེད་དཔོན་ཤན་པ་དྲུག །ཀུན་ཀྱང་ཁྲོ་བོའི་ཆ་ལུགས་ཅན། །སྨིག་པའི་ཁྲི་ལ་བརྐྱང་བསྐུམ་བགད། །ནག་པོ་ཁྲམ་ཤིང་ཞགས་པ་ཐོགས། །དཀར་པོ་ཤེལ་གྱི་འཁོར་ལོ་འཕྱར། །ནག་པོ་བན་དམར་མདུང་ཅན་འཇིགས། །ལྗང་ནག་སྦྲུལ་ཞགས་སྦལ་འཛིན་ཀླུ། །དམར་སྐྱ་བཙན་ཞགས་མདུང་དམར་འཛིན། །ལྗང་སེར་རྡོ་རྗེ་སྙིང་འཛིན་གྱིང་། །ཕྱི་རོལ་མ་མོ་རྔམ་པ་ལྟར། །རང་བཞིན་གནས་ནས་བཀུག་ལ་བསྟིམ། །ཕྱི་ནང་ཆོད་པ་སྔགས་ཀྱིས་དབུལ། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །གཤིན་རྗེའི་དཀྱིལ་འཁོར་བསྟན་པའི་ལེའུ་བཅོ་བརྒྱད་པའོ།། །།དེ་ནས་དེ་ཡི་རིམ་པ་ཡང་། ཡབ་ཡུམ་གསང་བའི་སྲོག་སྔགས་བཟླས། །བསྙེན་པ་ཚད་ལ་ཕེབས་པ་དང་། །ཡབ་ཡུམ་བར་དུ་དྲེགས་པ་གཞུག །བསྐུལ་དང་དམིགས་པ་ཏིང་འཛིན་གཞུག ཐུན་ལ་དམར་ནག་ཡི་གེ་མ། །སྔོ་ནག་ཧ་དང་སྔོ་སྐྱ་ཅ། །སྔགས་ཀྱི་འོད་ཟེར་དྲེགས་པའི་ཞལ། །ཐུན་ལ་བསྟིམས་ལ་ཡི་གེ་ཞུ། །ནད་དུག་མཚོན་དུ་གྱུར་པར་བསྒོམ། །དམིགས་པ་ཞུགས་པའི་རྟགས་བྱུང་ན། །དྲག་སྔགས་ཐུན་གྱིས་ཐུན་དུ་དབབ། །ཞག་བདུན་རྫོགས་ནས་ཕུར་པ་གདབ། །ལིངྒ་ཐོད་པ་བཅས་པ་དེ། །རོ་ཁུང་མུན་པའི་གཏིང་རུ་གནན། །ཉ་སྟོང་དྲག་པོའི་ཟོར་ཁ་འཕང། །དེ་ཡི་གསང་སྔགས་འདི་དག་ཡིན། །ༀ་བཛྲ་ཡཀྴ་ཀཱ་ལ་ཀཱ་ལ། །མ་ཧཱ་གྷ་ན་གྷུ་ཏི་ཧྲྀ་ད་ཡ། །བཛྲ་གིང་ཀ་ར་རཀྐ་ཀ་ལི་མུ་མ་མུ་ཤམ་ཁྲག་ལ་མུགས་ཤམ་ཧྲི་ཛཿདུན་རུ་ཏྲ་རུ་ཐུམ་བྷ་ཏི་རཱ་ཛ་ཙ་པ་ལ་ཨ་ཤུག་མེ། མ་ཏཱ་ཀ་རགྴ་ནག་མོ་ཏིང་ལམ་མ་བྷྱོ། ནཱ་ག་ཧུ་ཏི་ས་ནཱ་ག་རུ་རུ་ཧ་ཤུ་ལ་ཙ་ཏྲི་ཤཾ་ཛ་ཡཾ། བཛྲ་ས་ཏུ་ཏྲི་ནཱ་ག་དུན་ཏྲི། སྲོག་ལ་ཐུམ་རིལ། རྩ་ལ་བྲེང་ཤག །ཙཏྟ་ཐུན་རྨུགས་ཁྲག་ཐིབས་རྦད། ལི་ཤག་རྦད་ནི་ཧུར་ཐུམས་ཛཿཁྲམ་རྦད་ཡ་ཐུམ་རི་ལི་ལི་བྷྱོ། སྟམ་པ་ཡ་ནན། ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། དྲག་པོ་ལས་སྦྱོར་གྱི་ལེའུ་སྟེ་བཅུ་དགུ་པའོ།། །།དེ་ནས་དཔའ་བོ་གིང་གི་སྒྲུབ་པ་འདི་གསུངས་སོ། །བསྟན་པ་སྤྱིན་ཡི་བློ་ཅན་གྱིས། །རྟ་མཆོག་དབང་དུ་བསྒོམས་ནས་ཀྱང་། །མཚན་ལྡན་དུར་ཁྲོད་གནས་བཟུང་ནས། །ལས་བཞི་ཚང་བའི་དཀྱིལ་འཁོར་བྲི། །ཐ་མར་དམར་ནག་རོ་ཉེས་སྡམ། །དབུས་སུ་ཐུན་ཁུང་ཐུར་དུ་བྲུ། །ནང་རིས་གསུམ་ལྡན་མཚོན་ཆ་རྩོད། །མི་ཐོད་དུག་དང་ཆང་གིས་སྦྱར། །ཁྲག་སྣ་མཆེ་ལྟར་མཚོན་དབལ་བརྡར། །དར་ནག་གུར་ཕུབ་རོ་ཉེས་བསྡམ། །དགྲ་སོགས་གཡས་ལ་དམིགས་པ་གཟུགས། །ཐུན་གྱིས་དེ་ལ་བརྒྱངས་ལ་བཞག །དུར་གཡམ་རོ་སོལ་རྒྱ་གྲམ་བྲི། །ཐུན་ཁུང་ཁ་བཅད་སྟེང་དུ་དགབ། །གྲི་བོའི་ཐོད་པ་དམར་ཆོད་དུ། །དཔའ་བོའི་སྙིང་དང་ཟངས་ཐིག་དང་། །སྲོག་སྙིང་བཅུག་ལ་དར་གྱིས་གྲིལ། །བསེ་ཕོར་ཤ་སྣ་སྙིང་སྣ་ཁྲག །རིན་ཆེན་འབྲུ་ཡི་གཏོར་མ་བཤམ། །བཀའ་སྡོད་དཔའ་བོ་གིང་ཆེན་བོ། །དམར་ནག་འཇིགས་པའི་བསེ་ཁྲབ་གསོལ། །བསེ་རྨོག་གྱོན་པ་དཔའ་བོའི་ཆས། །ཕྱག་ན་ཟངས་གྲི་ཙིཏྟ་བསྣམས། །འཁོར་ནི་དྲེགས་པའི་སྤུ་གྲི་བཞི། །སྲིན་པོ་ས་མ་རཱ་ཛ་དང་། །གཤིན་རྗེ་ཡ་མ་རཱ་ཛ་དང་། །བདུད་པོ་ཧ་ནུ་ཕག་ཤ་དང་། །གནོད་སྦྱིན་ཛྭ་ལ་གརྦ་དང་། །དཀར་སྔོ་དམར་དང་ལྗང་གུའི་མདོག །གྲི་ཐོགས་ཙིཏྟ་ཟ་བའི་ཚུལ། །དགུག་ཅིང་བསྟིམས་ལ་མཆོད་པ་འབུལ། །སྒོ་ཕུགས་མེད་པའི་སྔགས་འདི་བཟླས། །ༀ་ཏྲོ་ཏ་ནི་ཏྲོ་ཏ་ནི་པ་ཏྲ་པ་ཏྲ་ཤུ་ལ་ཤུ་ལ་དྷ་ཤ་གྲི་བ། ཡཀྴ་གྲི་བ་གིང་ཀར་གིང་ཀ་ར་གིང་ཙ་ཏོ་གིང་ཙ་ཏོ། པར་ཏ་ཏེ་པར་ཏ་ཏེ་ཤ་པ་ཏེ་ཤ་པ་ཏེ། ཤཱར་མ་ཤཱར་མ། རགྴ་ཙ་རཀྴ་ཙ། སྙིང་ཁ་རག་སྙིང་ཁ་རཀ །ཏྲཀ་རཀྴ་ཏྲཀ་རཀྴ། དགྲ་བོའི་སྙིང་ལ་བྷྱོ་བྷྱོ། རྦུད་རྦུད། དགྲ་བོ་གཏོར་ཅིག་རྩ་རྩ་ནན། །ན་ག་རོ་ཡ་མི་པ་རི་ལ་རྦད། །མ་ར་ནི་སྙིང་ལ་མུགས། །སྙིང་ལ་མུགས་སྲོག་ལ་རྩ་བ་མ། །སུ་རུ་སུ་བམ་རིལ་རྦད། །དྲག་པོ་གནད་ཀྱི་གསང་སྔགས་འདི། །དམ་ཅན་ཉེ་སྙིང་ལས་ལ་འཛུད། །ཐུན་གྱི་དྲོད་ལས་འོད་ཟེར་འཕྲོས། །དམིགས་པ་བཀུག་བསྟིམ་ནད་རླངས་ཀྱིས། །བུ་ག་དགུ་ནས་ཐིམ་ཞིང་གསོད། །འབུམ་ཕྲག་བཟླས་པས་ཐེ་ཚོམ་མེད། །ༀ་ཨ་བ་ལོ་ཀི་ཏེ་ཡ་ན་མ་ཤོ་ཧྲི་ཏི་སྙིང་ཁ་ལ་རག་ཤ །ཁས་བླངས་ས་མ་ཡ་ཐུམ་ཐུམ། །རུ་ལུ་རུ་ལུ་མ་ཧེ་བྷྱོ། །ནད་དང་ཐུན་གྱིས་བྱིན་བརླབ་འདི། །བརྒྱ་བའི་བར་དུ་བཅུ་བཅུ་སྦྲེལ། །གསང་སྔགས་མཚོན་ཆ་འདི་ཉིད་གདགས། །དུ་ན་དུ་ན། ག་དུ་ག་དུ། ཨ་ཀ་ནི་རྦད་ཏྲི་ཀ་ལ་ས་མ་ཡ་ཧཱུཾ་བྷྱོ། དྲལ་དྲལ་སྙིང་སྙིང་ལ་དྲལ། །སྲོག་སྲོག་སྙིང་ལ་སྲོག །སྙིང་ཐིམ་སྲོད་ལ་རྦད། ས་མ་ཡ། ཚལ་པ་ཚལ་བ་རྦད་རྦད། ཞག་གྲངས་བཅུ་གསུམ་ཚང་བ་དང་། །ལིདྒ་གསུམ་དུ་གཏུམ་བྱས་ཏེ། །གཅིག་ལ་ཐུན་བྲབ་གཅིག་ནི་བསྲེག །གཅིག་ནི་དུར་མཆེད་གསུམ་ལ་གཏད། །ཀི་ཀང་དྲག་པོ་རྒྱུ་བ་ལ། །ཐུན་ཁྲག་དགྲ་ལ་ཟོར་དུ་འཕང་། །གིང་སྒྲུབ་དྲག་པོས་གསང་སྔགས་འདི། །ནུས་མིན་སྤྱད་ན་རང་ལ་ངན། །དེས་ན་རབ་ཏུ་བསྔགས་ཏེ་སྐ། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། དཔའ་བོ་གིང་སྒྲུབ་ཀྱི་ལེའུ་སྟེ་ཉི་ཤུ་པའོ།། །།དེ་ནས་སྒྲུབ་པའི་རྟགས་ཀྱི་རིམ་པ་འདི་གསུངས་སོ། །རྟེན་འཕར་འགུལ་ལྡེག་མེ་སྟག་འཕྲོ། །སྒྲུབ་པོ་མཁའ་ལ་འཕུར་བ་དང་། །ས་ལ་མི་ཐོགས་ཆུར་མི་འབྱིང་། །ལེགས་ལྡན་མདུན་དུ་ཅི་བྱ་ཟེར། །རབས་ཀྱི་རྟགས་སུ་ཤེས་པར་བྱ། །ཕུང་པོ་མེ་འབར་མདའ་ལ་སྒྲ། །སྨན་ཕུད་ཁོལ་ཞིང་རཀྟ་ལུད། །རྟེན་གྱི་ཞལ་བཞད་ཉམས་འབྱུང་འབྲིང་། །སྒྲུབ་ཁང་གཡོ་ཞིང་འགུལ་ལ་འཚེག །ཡམས་དང་ནད་ཀྱི་ན་བུན་འཐུལ། །བྱ་དང་གཅན་གཟན་འཐབ་ཅིང་འཁོར། །རོ་དམ་འཚོལ་ཞིང་ནང་ན་འབྱུང་། །ཐ་མ་རྨི་ལམ་སྟོན་པར་འགྱུར། །དགྲ་བཅོམ་ཚོགས་སུ་འོང་བ་དང་། །བནྡེ་ནག་པོ་མོན་པ་དང་། །རླུང་ནག་འཚུབ་དང་ཆུ་ནག་འབྲུག །གཡག་ཁྱུ་ཁྱི་ནག་བྱ་ནག་དང་། །མཆོད་རྟེན་ནག་པོ་མེ་སྟག་འཕྲོ། །སྐར་མདའ་མང་པོ་ལྷུང་བར་འགྱུར། །བསྙེན་ནས་ཉེ་བའི་རྟགས་སུ་ཤེས། །གོ་ཚོལ་མཚོན་ཆ་མང་པོ་བརྡུང་བ་དང་། །དམག་འདྲེན་གཡུལ་འགྱེད་ལིངས་ལ་ཆས། །ལས་ལ་ཚུད་པའི་མཚན་མ་ཡིན། །གཞན་ཡང་གཤིན་རྗེ་སྒྲུབ་པ་ལ། །མོན་དང་བནྡེ་ཚུབ་མ་གཡག །བཙན་བཙུན་སྟག་སེང་ལྷ་ཁང་འོད། །བུད་མེད་དྲེའུ་ནག་ཆུ་རླུང་འབྱུང་། །ཉ་སྦྲུལ་ཀླུ་ཡི་ཆོ་འཕྲུལ་སྟོན། །མི་རྟ་དམར་པོ་མེ་དང་འོད། །ཁྲ་སྤྱང་བན་དེ་ཚོང་པ་འབྱུང་། །མངོན་དུ་ཁུག་ནས་ལིངྒ་འགུལ། །བྱ་ཡིས་བྱ་ལ་འདེབས་པ་དང་། །གར་འོང་བླ་ཡི་ཆོ་འཕྲུལ་སྟོན། །སྤུ་འཕྱི་འདོགས་དང་གསོད་པ་དང་། །ཤ་ལ་ལོངས་སྤྱོད་གོད་ལ་རོལ། །བྲག་ཆེན་རྩད་ནས་བཏོན་པ་དང་། །གདུང་བརྒྱུད་རྩད་ནས་གཅོད་པ་ངེས། །སྡོང་པོ་བཅད་ན་དགྲ་ཉིད་འཆི། །ཡལ་ག་བཅད་ན་འགབ་ལ་ངན། །དོན་པོ་བསད་ཅིང་སྙིང་ཕྱུང་ན། །ཐེ་ཚོམ་མེད་པའི་རྟགས་ཡིན་ནོ། །རྒྱན་འཕྲོག་གོས་བཤུས་གྲོགས་ལ་ངན། །ནག་པོ་ལྡོག་པའི་མཚན་མ་ནི། །མུན་པ་སྲོས་དང་མཛེ་ཕོ་རྒོལ། །གཡག་རྒོད་རྡུང་ཞིང་གཅན་གཟན་རྨུག །ཆུ་སྣ་ལྡོག་པ་ཁྲོས་པར་ཤེས། །མུལ་དང་སྤྲང་ལོང་ལོངས་སྤྱོད་འགྱེད། །འབྱོར་པ་འདོད་ཡོན་གཏོར་ཚོགས་གཏོར། །གཞན་ཡང་ཉེས་ལེགས་ལས་རྣམས་སྟོན། །ཅིས་ཀྱང་ལས་འགྱངས་ལྡོག་གྱུར་ན། །ཀནྡྷའི་ཤིང་ལ་མགོན་པོའི་གཟུགས། །མཐོ་གང་ཚད་ལས་སྐྱེ་མཆེད་རྫོགས། །སྤྱི་བོར་རུ་ལུ་བཟློག་པ་བྲི། །ལག་པ་གཡས་གཡོན་བསྙེན་སྔགས་གཉིས། །རྐང་བ་སྒྲུབ་དང་བསད་པའོ། །ཐུན་སྔགས་ཁོ་རང་ལུས་ལ་བྲི། ། དེ་ལ་དགུག་ཅིང་བསྟིམས་བྱས་ལ། །ཞག་གསུམ་དཔལ་གཏོར་འོག་ཏུ་གཟིར། །བསྙེན་སྒྲུབ་སྔགས་ལ་ལས་བཟློག་བརྡེག །དྲག་ཤུལ་འབྱུང་པོའི་ཉི་མ་ལ། །རལ་གྲི་ཕྱར་ལ་གཉེན་པོས་བརྡེག །དུག་ཤིང་གདུག་པའི་མེ་ཡིས་བསྲེག །བཀའ་རྟེན་ས་དང་ཐལ་བ་སྦྱར། །གཟུགས་བྱ་ཁོག་པར་ལིངྒ་གཞུག །བདུད་རྩི་གཏོར་མ་མཆོད་པ་བསྟབ། །དུར་ཁྲོད་དབུས་སུ་དོང་བྲུས་ལ། །མགོན་པོའི་གཟུགས་གཞུག་དུར་གཡམ་དགབ། །མཆོད་རྟེན་ནག་པོ་ཁྲུ་གང་ལ། །གུ་གུལ་དུད་པས་བདུག་ལ་གནན། །ལྷ་ཉིད་གནད་ལ་དབབ་པའི་ལས། །ཡ་བག་ཤར་རབ་ཏུ་གསང་། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །གྲུབ་རྟགས་ཀྱི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་དབང་གི་རིམ་པ་འདི་གསུངས་སོ། །ཉམས་དགའ་བྱེད་པའི་ས་ཕྱོགས་སུ། །མཎྜལ་བྱས་ལ་མེ་ཏོག་དགྲམ། །གཏོར་མ་མཆོད་པའི་རྫས་ཀུན་དགྲམ། །རིན་ཆེན་བུམ་པ་མཛེས་པ་ལ། །ཁ་རྒྱན་མགུལ་ཆིངས་ལྡན་པར་བྱ། །སྣ་ཚོགས་དྲི་དང་རིན་པོ་ཆེ། །སྙིང་བོ་འབྲུ་སྣ་ཆུ་ཡིས་དགང་། །ནང་དུ་མགོན་པོའི་དཀྱིལ་འཁོར་བསྐྱེད། །མཆོད་པའི་རྫས་ཀུན་ཚང་བ་དང་། །སློབ་མས་ནོར་རྫས་ཡོན་ཕུལ་ལ། །ཧོ། དཔལ་མགོན་ནག་པོ་ཡེ་ཤེས་སྐུ། །ལྷུན་གྱིས་གྲུབ་པའི་དཀྱིལ་འཁོར་དུ། །བདག་ཉིད་འཇུག་པར་འཚལ་ལགས་ཀྱིས། །དཔའ་བོ་ཐུགས་རྗེས་གཟུང་བར་མཛོད། །དེ་སྐད་གསོལ་པ་ལན་བཞི་གདབ། །ཧོ། ལེགས་ལྡན་ནག་པོའི་དཀྱིལ་འཁོར་འདིར། །འཇུག་པར་འདོད་པའི་བུ་ཁྱོད་ཉོན། །ལས་རྣམ་འགྲུབ་ཅིང་བསམ་འགྲུབ་ལ། །བླ་མེད་ཐེག་ཆེན་འབྲས་བུ་འབྱུང་། །གནས་སྐབས་བསྟན་པ་བསྲུང་བའི་ཕྱིར། །ཞུམ་མེད་དཀྱིལ་འཁོར་འཇུག་ནུས་སམ། །སློབ་མས་ནུས་པར་ཁས་བླངས་ཤིང་། །སྡོམ་པ་རིམ་པར་བླང་བར་བྱ། །ཆོས་ཀུན་རང་བཞིན་དག་པས་ན། །བདག་ཀྱང་རང་བཞིན་རྣམས་པར་དག །དེ་བཞིན་གཤེགས་པ་ཐམས་ཅད་ཀྱི། །ཐུགས་དམ་ད བྱིངས་མཆོག་རྣམ་དག་ཅིང་། །སེམས་ཅན་འབྱམ་ཀླས་མ་ལུས་ཀུན། །མཆོག་ཉིད་སྒྲུབ་པར་སྦྱོར་བས་ན། །རྒྱལ་བ་རྒྱ་མཚོ་ཀུན་འདུས་པས། །སྐུ་ཡི་དབྱིག་ཏུ་བདག་སྐྱེད་ཅིག །ཡེ་ཤེས་རིན་ཆེན་དབུ་རྒྱན་ཅན། །གཟི་བརྗིད་ཕུང་པོ་བླ་ན་མེད། །སངས་རྒྱས་རིན་ཆེན་འབྱུང་བ་ཡིས །རྣམ་པར་རྒྱལ་ལ་ཕྱག་འཚལ་ལོ། །དབྱིག་གི་ཡེ་ཤེས་གཙོ་མཆོག་ཉིད། །རྡོ་རྗེ་དམ་པ་མཆོག་འཛིན་པ། །ཁྱོད་ནི་དམ་ཚིག་གཙོ་ལགས་ཀྱིས། །དབང་ཕྱུག་རྒྱལ་པོར་དབང་བསྐུར་རོ། །བཅོམ་ལྡན་ཐམས་ཅད་མཆོག་ནི་བདག་ལགས་ཏེ། །མཆོག་ཉིད་སྒྲུབ་ཕྱིར་རྡོ་རྗེ་བླང་བར་བགྱི། །རྡོ་རྗེ་རྒྱལ་པོ་ཁྱོད་བཞུགས་པས། །སྐུ་གསུང་ཐུགས་ཀྱི་རྡོ་རྗེ་སྟེ། །རྡོ་རྗེ་དམ་ཚིག་མཆོག་ཉིད་ཀྱིས། །ཕུན་སུམ་ཚོགས་པ་སྒྲུབ་བར་བགྱི། ཆོས་ཀུན་རྡོ་རྗེའི་མཚན་ཉིད་དེ། །རྡོ་རྗེ་ལ་ཡང་མཚན་ཉིད་མེད། །རྡོ་རྗེ་ལྟ་བུའི་རྣལ་འབྱོར་པས། །དོན་ཀུན་རྡོ་རྗེ་ལྟ་བུར་གསོལ། །འདི་ནི་སངས་རྒྱས་གསུངས་དབྱིངས་ཉིད། །ཡེ་ཤེས་སེམས་དཔའི་དམ་ཚིག་རྣམས། །རྡོ་རྗེ་སེམས་དཔའི་དཀའ་ཐུབ་དམ། །རྟག་ཏུ་བདག་གིས་བཅངས་པར་བགྱི། །བརྒྱ་བའི་ཚུལ་གྱིས་སྒྲིབ་པ་སྦྱང་། །མགོན་པོའི་གཞུང་བསྲང་བསྙེན་པར་བྱ། །དེ་ནས་འཇུག་པའི་ཆོ་ག་བྱ། །ཀྱེ། རྡོ་རྗེ་ཆོས་དབྱིངས་ཀུན་གྱི་གཙོ། །མི་རྣམས་ཆགས་པ་ཆེན་པོ་སྟེ། །མ་ལུས་ཀུན་གྱི་འབྱུང་གནས་མཆོག །བདེ་བ་མཆོག་གི་དམ་པ་ལགས། །ཁྱོད་ནི་དམ་ཚིག་ཀུན་གྱི་གཙོ། །རྡོ་རྗེ་སེམས་དཔའ་སྐྱེད་མཛད་པ། །སེམས་ཅན་དོན་གྲུབ་ཕྲིན་ལས་མཛོད། །ཐུགས་རྗེས་མཉམ་སྦྱོར་གྲུབ་པར་མཛོད། །སངས་རྒྱས་ཡོན་ཏན་འབྱུང་པའི་ཕྱིར། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ཀྱི་གླུ་བླང་པས། །ལས་ཀྱི་རྡོ་རྗེ་ཁྱེད་པར་འགྱུར། །ཧཱུཾ་ཧཱུཾ་ཧཱུཾ་བི་ཤྭ་བཛྲ་དྷ་ཛྭ་ལ་མཎྜ་ལ་ཕཊ་ཕཊ་ཧ་ལ་ཧ་ལ་རཾ་ཀྲོ་དྷ་ཡཾ་ཏིག་སྣ་ཁཾ་ཏ་ཀེཾ་ཏ་ཀེཾ་ཕཊ། ༀ་ཨཱཿཧཱུཾ་ས་མ་ཡ་ཧོ། །ཨི་དན་ཏེ་ན་ར་ཀན་བ་ར་ཧྲྀ་ད་ཡཾ། ན་མ་བ་ཏི་ནན། ས་མ་ཡ་རཀྴ། སིདྡྷི་བི་ན་བཛྲ་ཨ་མྲྀ་ཏ་ཀྲོ་དྷ་ཀན། སྔོན་ཚེ་གོང་ནས་འཕེལ་པ་ཡི། །བདག་གི་ཉེ་གནས་གང་ལགས་པའི། །ལས་ཀྱི་འཕྲོ་དང་ཐུགས་རྗེའི་ལྷ། །ད་ལྟ་ཉིད་དུ་བབས་གྱུར་ཅིག །ཧཱུཾ་ཧཱུཾ་གུ་ཧྱ་བཛྲ་ཙིཏྟ་ཧཱུཾ། །ༀ་ནི་ཡེ་ཤེས་ལྷུན་གྱིས་གྲུབ། །མུ་ནི་ཡེ་ནས་རང་སངས་རྒྱས། །ཧཱུཾ་ནི་རྩ་བ་བྱང་ཆུབ་སེམས། །དཀྱིལ་འཁོར་རྣམས་གསུམ་དབྱེར་མེད་པས། །ཧ་ཞེས་མཐོང་བས་ཡོངས་སུ་དག །མ་འདྲེས་ཡོངས་སུ་རྫོགས་པར་མཐོང་། །རྡོ་རྗེ་ཞེས་སུ་མིང་བཏགས་ནས། །རྡོ་རྗེ་ཐེག་པའི་གསང་སྒོར་བཞག །ཧཱུཾ་མཁའ་དབྱིངས་རྣམ་དག་བུམ་པ་ཆེན་པོ་ན། །དབལ་ལྡན་མགོན་པོའི་དཀྱིལ་འཁོར་རྫོགས་པར་བཞུགས། །གཉིས་མེད་ཡེ་ཤེས་བྱང་ཆུབ་སེམས་རྟགས་ཆུས། །དྲི་མ་ཀུན་སྦྱངས་ཁམས་གསུམ་ཟིལ་གྱིས་གནན། །བྱིན་བརླབས་མཐུ་ཡིས་དབང་རྫོགས་ཐོབ་པར་ཤོག །ༀ་བྷུར་ཀུར་མ་ཧཱ་ཀཱ་ལ་མ་ཧཱ་ལ། ཨ་བྷི་ཤིཉྩ་བྷྲཱུཾ་བྷྲཱུཾ། དངོས་སམ་བདུད་རྩི་བུམ་པ་ལ། །རྡོ་རྗེ་སེམས་དཔའ་ཡབ་ཡུམ་གྱི། །བྱང་ཆུབ་སེམས་ཀྱི་བདེ་བ་བཞིན། །ཧཱུཾ། དཀྱིལ་འཁོར་རྣམ་གསུམ་དབྱེར་མེད་དོན། །ཡབ་ཡུམ་གཉིས་མེད་བདེ་བའི་དོན། །བྱང་ཆུབ་སེམས་ཀྱི་ཐིག་ལེ་འདིས། །བདེ་ཆེན་ཐབས་ཀྱི་རྒྱལ་པོར་དབང་བསྐུར་རོ། །ༀ་བཛྲ་ཨ་མྲྀ་ཏ་ཨ་ཏི་སརྦ་མན་ཏྲ་ཋ། དེ་ནས་བསྟན་པ་བསྲུང་བའི་ཕྱིར། །དྲག་པོའི་རྫས་རྣམས་ཐམས་ཅད་ལ། །མགོན་པོ་འཁོར་བཅས་བསྐྱེད་བསྟིམས་ལ། །ཡོན་ཏན་བརྗོད་ལ་སྦྱིན་པར་བྱ། །བསྙེན་སྒྲུབ་རིམ་པའི་སྔགས་བརྗོད་ཅིང་། །མན་ངག་ཐམས་ཅད་སྦྱིན་པར་བྱ། །དེས་ནི་ཅི་བསམ་འགྲུབ་པ་དང་། །རིག་འཛིན་ས་ལ་སྨིན་པ་ཡིན། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། འབང་བསྒྱུར་བའི་ལེའུ་སྟེ་ཉེར་གཉིས་པའོ།། །།དེས་ནས་དམ་ཚིག་གི་རིམ་པ་འདི་གསུངས་སོ། །དམ་ཚིག་ལ་ཡང་རྣམ་གཉིས་ཏེ། ། རྩ་བ་གསུམ་དང་ཡན་ལག་གཉིས། །རྡོ་རྗེ་སློབ་དཔོན་མིག་གི་འབྲས། །འཁོར་བ་འདྲེན་པའི་དེད་དཔོན་མཆོག །མི་ཤེས་རྨོངས་པའི་བློ་གྲོས་མཁན། །ལམ་སྟོར་རྣམས་ཀྱི་ས་མཁན་མིག །གདུང་བ་སེལ་བའི་རིན་པོ་ཆེ། །ཡིད་བཞིན་ནོར་བུ་ལྟ་བུར་གཟུང་། །དེ་ལ་འགལ་བ་རྡུལ་དང་བྲལ། །རང་བྱུང་ཡེ་ཤེས་ཡི་དམ་ལྷ། །མུན་ཁུང་སེལ་བའི་མིག་བཞིན་གཟུང་། །ཆུ་བོ་གལ་དུ་གསད་མི་བྱ། །སྤྱི་གསང་བ་དང་བར་གསང་བ། །གཉེར་གཏད་པ་དང་འོས་པ་དང་། །སྐྱེ་བོའི་ཚོགས་ལ་དབེན་པར་བྱ། །ཡན་ལག་བལྟ་བ་སྡོམ་པ་དང་། །སྤྱོད་པ་རྒྱུན་གྱི་དམ་ཚིག་གོ། །ནམ་མཁའ་ལྟ་བུའི་རང་བཞིན་གྱིས། །མི་སྐྱེ་མི་འགག་ངོ་བོར་བལྟ། །ཕག་རྒོད་ལྟ་བུའི་རང་བཞིན་གྱིས། །གཙང་སྨེ་རེ་དོགས་མི་བལྟ་བར། །མུན་ཁུང་དུག་གིས་གསེར་འགྱུར་བཞིན། །རྣམ་རྟོག་ཡེ་ཤེས་ཆེན་པོར་བལྟ། །སེང་གེ་རྩལ་རྫོགས་ཇི་བཞིན་དུ། །མ་བགྲོད་ས་རྣམས་ནོན་པར་བལྟ། །དེ་ཕྱིར་བལྟ་བའི་དམ་ཚིག་བཞི། །རང་བྱུང་སེམས་ཀྱི་བྱེ་བྲག་ཡིན། །སྤྱོད་པ་རྒྱུན་གྱི་དམ་ཚིག་དྲུག །དུས་ཀྱི་སྤྱོད་ལམ་ཇི་བཞིན་དུ། །གསང་བའི་ལམ་མིན་གཞན་མི་འགྲོ། །རིག་བའི་བདག་མིན་ཕྱག་མི་བཙལ། །མི་སྨྲ་བར་ནི་ཤ་ཆེན་བསྙེན། །བསྟན་པ་སྤྱི་ཡི་སྐུ་དགྲ་ལ། །བྱམས་ཤིང་གདུང་པའི་སྤྱོད་པ་སྤངས། །རང་བཞིན་ཞེ་སྡང་ལྡང་མི་དགོས། །མི་དགེ་མཚམས་མེད་ལ་སོགས་སྤངས། །གཞན་ཡང་སྔགས་རྡོ་རྗེ་དང་། །བཀོད་པའི་རྩ་བ་རང་བཞིན་བསྲུང་། །ཉམས་པར་གྱུར་ན་འབྲས་གཉིས་སྟོར། །ངན་སོང་གནས་སུ་ཡ་རེ་ང་། །བསྲུང་ནས་དངོས་གྲུབ་རྣམ་གཉིས་པོ། །ཡིད་བཞིན་ནོར་ལྟར་རང་ལས་འབྱུང་། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། དམ་ཚིག་གི་ལེའུ་སྟེ་ཉེར་གསུམ་པའོ།། །།དེ་ནས་བསྲུང་ཞིང་ཕན་གདགས་པ་འདི་གསུངས་སོ། །མཛོད་བདག་མགོན་པོ་ཡིད་བཞིན་སྐུ། །ཡོ་བྱད་སྤེལ་བར་བྱ་བ་ཡི། །དབེན་པའི་གནས་སུ་མཎྜལ་བྱ། །བྱམས་དང་སྙིང་རྗེ་སྔོན་བཏང་ལ། །འགྲོ་དྲུག་དབུལ་སེལ་སེམས་བསྐྱེད་དོ། །མཆོད་སྦྱིན་བྱ་ཕྱིར་ནོར་བུ་སྒྲུབ། །བཀའ་རྟེན་ཆོས་ཀྱི་རྒྱལ་པོའི་མཁར། །ཕྱུག་པོའི་བང་མཛོད་ས་རྣམས་ལ། །མཎྜལ་བྱས་ལ་ལེགས་པར་བྱུག །རིན་ཆེན་དྲི་ཡི་སྨན་གྱིས་བྱུག །འབྲུ་དང་མེ་ཏོག་ཚོམ་བུ་དགོད། །རིན་ཆེན་ཟུར་བརྒྱད་ལྟེ་བར་ལྡན། །དབུས་སུ་ཉ ྄ཡ་྅྅྅ ཏའི་ཤིང་དག་ལ། །བཞོག་ལ་རིན་ཆེན་སྣ་ལྔ་ཡི། །དཔལ་མགོན་ལེགས་པ་ཀུན་ལྡན་བྲི། །ལྗང་སེར་ཞལ་གཅིག་ཕྱག་གཉིས་པ། །རིན་ཆེན་ཕྲེང་བ་བུམ་པ་དང་། །ཡིད་བཞིན་ནེའུ་ལེའི་རྐྱལ་བ་བསྣམས། །འཁོར་དང་དེ་ཡི་རང་བཞིན་བསྐྱེད། །གཏེར་འཆང་ནེའུ་ལེའི་རྐྱལ་པ་བསྣམས། །ནང་དུ་ཅི་འདོད་རྫས་ཀྱིས་དགང་། །མཛེས་པའི་རྒྱན་བཏགས་གདུགས་ཀྱང་དབུབ། །རབ་གནས་བྱས་ལ་དབུས་སུ་བཞག །བསྐྱེད་དང་སྤྱན་དྲངས་བསྟིམ་མཆོད་དང་། །ཇི་ལྟར་འདོད་པའི་གསོལ་བ་གདབ། །སྔགས་འདི་འབུམ་ཕྲག་གསུམ་དུ་བཟླས། །འགྲུབ་པར་འགྱུར་ཏེ་གདོན་མི་ཟ། །རྨི་ལྟས་བཟང་པོ་བྱུང་བ་དང་། །འཕྲལ་སྣང་བསམ་པ་འགྲུབ་པ་དང་། །འབྲུ་ཕྱུགས་ཐམས་ཅད་འཕེལ་བར་འགྱུར། །མཆོད་པ་བཟང་པོས་མཆོད་བྱས་ལ། །ནོར་བུས་གང་བའི་དངོས་གྲུབ་བླང་། །ༀ་བྷུ་རུ་ཀུ་རུ་ཨི་ཕྱི་ཨུཙྪས་མ་ཀྲོ་དྷ་ཧཱུཾ། བ་སུ་དྷ་ར་རཏྣ་སིདྡྷི་ཕ་ལ་ཧྲིཾ་ཧྲིཾ་ཧཱུཾ། དེ་ནས་ནོར་རྫས་བང་མཛོད་དང་། །རྟ་དང་གླང་པོ་བ་གླང་འབྲུ། །ཡོ་བྱད་བསོད་ནམས་རྒྱས་པར་འགྱུར། །རིགས་དང་རྒྱུད་འཕེལ་གྲགས་སྙན་འཐོབ། །གཞན་ཡང་གནད་ཀྱི་རིམ་པ་བཤད། །མགོན་པོའི་བསྙེན་སྒྲུབ་རྫོགས་པ་དང་། །བསྙེན་དང་ཉེ་བསྙེན་སྒྲུབ་པ་གསུམ། །དྲིལ་ནས་གོང་གི་རྫས་ལ་བསྟིམ། །སྐུར་བ་ཕུར་པ་ལྔ་ལ་གདགས། །ཡུལ་ཁམས་ཕྱོགས་བཞིར་ཐོ་གཟུག་བསྲུང་། །གནོད་བྱེད་བགེགས་ཀྱི་ལིདྒ་ལ། །དུག་སྣ་གུ་གུལ་མུ་ཟི་དང་། །བྲུན་གསུམ་ཚིལ་གསུམ་གཞོབ་གཉིས་བདུག །ཡུངས་ཀར་དུག་ཁྲག་ཕུར་པས་བརྡེག །མགོན་པོའི་འོད་ཟེར་གནོད་བྱེད་བསྲེག །གསང་སྔགས་འབུམ་ཕྲག་རྫོགས་པ་དང་། །བཀའ་རྟེན་མགོན་པོའི་འོག་ཏུ་གནན། །གཞན་ཡང་གོང་གི་རྫས་བཀོད་རྣམས། །ཐོད་པར་བླུགས་ལ་སྙིང་པོ་བསྟིམ། །ཞོ་ཆང་ཁ་ཟས་གནོད་ལ་འདུག །འབྲུ་བཅུད་ཕྱོགས་བཞིར་དུད་པ་བཏང་། །མི་ཕྱུགས་སྲུང་བ་སྐེ་རུ་གདགས། །ཀླུ་གཉན་ས་བདག་གནོད་པ་ལ། །རྫས་དང་ཕག་ཚིལ་གླ་རྩིས་བསྲུང་། །དྲི་སྤོས་སྦྱར་ལ་ལུས་ལ་བྱུག །སྨན་དང་བ་དམར་འོ་མ་ལ། །བསྔགས་ལ་ཁོང་དུ་གཏང་བར་བྱ། །བསྙེན་པ་རྫས་དགོད་དུད་པས་བདུག །དྲག་པོའི་སྔགས་ཀྱི་དབལ་གྱིས་བསྐྲད། །སྲིའུ་རིན་ཆེན་རྣམ་ལྔ་ལ། །སྨན་སྣ་ལྔ་ལ་སྦྱར་ལ་གདབ། །རྩ་བ་ཁྱད་པར་སྔགས་གསུམ་ལ། །གསང་བའི་སྤུ་གྲི་འདི་དག་གདགས། །སརྦ་དུ་སྟན་ཧྲིག་ནན་མྱགས་ཐུམ་རིལ་རྦད། །ཨེ་ཧུར་ཐུམ་ཛ། ཧ་ན་ཧ་ན་ད་ཧ་ད་ཧ། པ་ཙ་པ་ཙ་གྲྀཧྣ་གྲྀ་ཧྞ་ཧ་ར་ཧ་ར། མཱ་ར་ཡ་རྦད། སྟོབས་དང་ནུས་པ་ཐམས་ཅད་སྟམ་བྷ་ཡ་ནན། ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། བསྲུང་ཞིང་ཕན་གདགས་པའི་ལེའུ་སྟེ་ཉེར་བཞི་པའོ།། །།དེ་ནས་དབང་དྲག་ལས་ཀྱི་རིམ་པ་འདི་གསུངས་སོ། །དབང་ཆེན་སྟོབས་ཀྱི་སྦྱོར་བ་འདི་ལ། །རི་རྒྱལ་རྩེ་ནས་ས་དང་ནི། །རྒྱལ་ས་ཟིན་པའི་མཁར་ས་དང་། །ཆོས་སྲིད་ཐོབ་པའི་ཁྲི་སྟེགས་དང་། །བཙུན་མོ་མཚན་ལྡན་མ་ལ་གྱིས། །བཀའ་རྟེན་དྲི་ཅན་དུར་ཁྲོད་ཀྱི། །ས་ལ་མངལ་ཁྲག་མཚལ་གྱི་སྦྲུ། །འབྲུབ་ཁུང་ཁྲུ་གང་ཟླ་གམ་བཀོད། །མཚལ་དང་ཙན་དན་རྒྱ་སྐྱེགས་བྱུག །རྒྱལ་བློན་སྟོབས་དང་མུ་སྟེགས་དང་། །བགེགས་ཆེན་གཅན་གཟན་གདུག་པའི་ས། །རྫས་ལ་གཟུགས་བྱ་མིང་བྱང་དགོད། །ཐོད་པ་སྲུབས་མེད་ནང་དུ་གཞུགས། །འབྲུབ་ཁུང་ནང་དུ་དེ་བཅུག་ལ། །བསྙེན་སྒྲུབ་སྔགས་གསུམ་དྲིལ་བ་ལ། །དབང་དུ་བསྡུ་བའི་སྔགས་འདི་བཟླས། །མ་ཧཱ་ཀཱ་ལ་པཱ་ཤཾ་ཀུ་ཧྲིཾ་ཧྲི་ཾཔ་ཤ་མ་ན་ཡ་ཧྲིང་ཧྲིང་ཛཿ་ཛཿ། རཱ་ག་དུན་དུན། བདག་ཉིད་མགོན་པོ་ལེགས་ལྡན་ཆེ། །དམར་ནག་རཱ་གའི་མདོག་ལྡན་པ། །ལྕགས་ཀྱུ་ཞགས་པ་དམར་པོ་ལྡོག །ཐུགས་ཀར་ཧཱུཾ་ལས་སྔགས་ཀྱི་མདོག །གང་ལ་བྱས་པ་རྟེན་ལ་ཕབ། །དབང་ཆེན་དབང་གི་འོད་ཀྱིས་བཀུག །ཁབ་ལེན་རྡོ་ལ་ལྕགས་འདུ་ལྟར། །ཐམས་ཅད་དབང་དུ་འདུས་པར་བསམ། །ཤིང་ཐོག་གོ་ལ་སྟར་བུ་དང་། །རྒུན་འབྲུམ་མེ་ཏོག་དམར་པོ་དང་། །ཤ་ཁྲག་གསར་བའི་གཏོར་མ་འབུལ། །ཚིལ་ཆེན་མངལ་ཁྲག་རྒྱ་སྐྱེགས་དང་། །ཙན་དན་དཀར་དམར་གྷི་ཝང་དང་། །བསེ་ཞོ་བག་ཙམ་ལིངྒར་བྱུག །སེང་ལྡེང་མེ་ལ་བསྲོ་ཞིང་བཟླས། །ཐོན་ནས་ཐོད་པ་དར་ནག་གྲིལ། །རང་གི་མལ་འོག་དག་ཏུ་སྦས། །སྔགས་ཀྱི་ཚད་མ་འབུམ་ཚོ་དྲུག །དབང་དུ་འདུས་པའི་རྟགས་རྣམས་འབྱུང་། །རྒྱལ་བློན་སྟོམས་ཅན་གདུག་པ་ཡང་། །ཇི་ལྟར་བསྒོ་བའི་བཀའ་རྣམས་ཉན། །ཁམས་གསུམ་མཛེས་ལྡན་ཕྱག་རྒྱ་མ། །ཆགས་སྐྱེས་མདངས་ཀྱི་པདྨ་འབུལ། །རྦོད་གཏོང་སྤེ་བགེགས་གནོད་ཆེན་ཀུན། །ཇི་ལྟར་བསྒོ་བ་བྲན་བཞིན་བྱེད། །མཆེ་སྡེར་རཱ་ཅན་ལྕེ་དུག་སྤོས། །ཁྱི་བཞིན་ཕྱི་ནས་འབྲང་བར་འགྱུར། །འབྲུ་དང་རིན་ཆེན་ཟས་བཅུད་ལ། །གོང་བཞིན་སྦྱར་ཀྱིན་བསྒྲུབ་བྱས་ན། །སྣང་སྲིད་ཟས་ནོར་བདག་ལ་འདུ། །ཀུན་སྡུད་དབང་གི་སྦྱོར་བ་བཤད། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །དབང་སྡུད་ཐབས་ཀྱི་ལེའུ་སྟེ་ཉེར་ལྔ་པའོ།། །།དེ་ནས་དབབ་བསད་ཀྱི་ལས་འདི་གསུངས་སོ། །དྲག་པོའི་གསང་སྔགས་བར་བ་ཡང་། །གང་གི་འབྲུབ་ཁུང་ནང་དུ་ཤིས། ། ཀན་དྷའི་ཤིང་ལ་འཁོར་ལོ་བྲི། །དབུས་སུ་ཡུལ་ཞིང་སེར་སྲུང་ལྷ། །མུ་ཁྱུད་འཁོར་ལོ་དང་པོར་བྲི། །རྩིབས་བཞི་དྲེགས་པའི་སྙིང་པོ་བྲི། །ཐ་མ་ཆུ་རིས་ཟླུམ་པོ་ལ། །སྲིན་པོ་མིང་སྲིང་དབབ་སྔགས་དགོད། །ཡུལ་གྱི་རྫས་དང་གཉན་རའི་ཆུ། །བྱུག ས་ལ་ཐོད་པའི་ནང་དུ་གཞུག །དུག་ཁྲག་འབྲུ་ཟླུམ་སྦྱར་བའི་ཁྲག །གོང་གི་རྫས་དང་སྦྱར་ལ་བྱ། །ཞག་གྲངས་ཉི་ཤུ་རྩ་གཅིག་ཏུ། །དྲག་པོའི་སྔགས་དྲིལ་ཏིང་འཛིན་གསལ། །བཅུ་གཅིག་རྫོགས་ནས་ཐུན་བྲབས་ལ། །ཀླུ་ལ་རྟ་གཞུག་ཟོར་འཕང་བསྐུལ། །དེ་ཡི་གསང་སྔགས་འདི་དག་ཡིན། །ༀ་བྷུ་རུ་ཀུ་རུ་ཨི་ཕྱི་ཨུཙྪས་མ་ཀྲོ་དྷ་ཧཱུཾ་ཕཊ། ཀྲོ་དྷ་ཛྭ་ལ་ས་མ་ཡ་ཕྲོམ་ཕོབ། ཡཀྴ་ཛྭ་ལ་ས་མ་ཡ་ཕྲོམ་ཕོབ། རཀ་ཤ་ཛྭ་ལ་ས་མ་ཡ་ཕྲོམ་ཕོབ། །ཙིད་ཏྲ་ཛ་ལ་ས་མ་ཡ་ཕྲོམ་ཕོབ། །ༀ་བཛྲ་རག་ཤ་ས་མ་ཡ་སྙིང་ཡ་མ་ཁྲག་རཱ་ཧུ་ལ་ཕྲོཾ་ཕྲོཾ་ཧྲི ལ་ཧྲི ལ་ཤར་ཤར། མཱ་ར་ཡ་རྩ་ཤ་ཐིབས་རུ་སིང་ཏྲཾ་ཧྲིལ། སོགས་སེ་ཏྲྃ་ཐིབས་བྷྱོ། ཡུལ་ཁམས་བརླག་པར་ཐེ་ཚོམ་མེད། །གཞན་ཡང་ཁྲམ་ཐོད་གསལ་བ་ལ། །མོན་ཚིལ་རྟ་དང་ཟངས་ལྕགས་རྒོད། །གྲི་ལྕགས་ཐོག་ལྕགས་གསེར་དངུལ་དང་། །ཆང་གིས་སྦྱར་ལ་སྔགས་འདི་བཟླས། །ཞུ་འཕེལ་ཆད་འཕྲོ་ཆགས་པ་ན། །མེ་དང་ལྕགས་ཀྱི་གཟའ་སྐར་ལ། །དྲི་དང་ཆུ་བླུགས་དགྲ་ལ་འཕང་། །དེ་ཡི་གསང་སྔགས་འདི་དག་ཡིན། །ཛཱ་ལ་རཾ་རཱ་ཧུ་ལ་སི་སི་བཛྲ་ར་ག་ཤ་ས་མ་ཡ་རཾ་རཾ་མཱ་ར་ཙ་ཤ་ཁྲག་ལ་མུ་ཤཾ་མ་བྷྱོ། མཱ་ར་ཡ་རྦད། བཛྲ་ཤད་ཤད། དགྲ་བོའི་སྲོག་ལ་མཱ་ར་ཡ་རི་རྦད། །དེས་ནི་ལམ་ལ་ཐེ་ཚོམ་མེད། །ཅེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །དྲག་པོ་དབབ་བསད་ཀྱི་ལེའུ་སྟེ་ཉེར་དྲུག་པའོ།། །།དེ་ནས་གཉེན་པོ་ལྷའི་ཐུགས་དམ་བསྐུལ་བ་འདི་གསུངས་སོ། ། ཧཱུཾ། ཁྲོ་བོའི་རྒྱལ་པོ་གདོག་དྲུག་ཧཱུཾ་སྒྲ་ཅན། །ཡན་ལག་དྲུག་ལྡན་ཁྲོ་བོ་གཤིན་རྗེ་གཤེད། །ཡེ་ཤེས་རྒྱན་གྱིས་མ་རིག་མུན་པ་སེལ། །གཏུམ་ཆེན་གཤིན་རྗེ་འཇོམས་ལ་ཕྱག་འཚལ་ལོ། །ཡུན་གྱི་ལྷར་ཡང་ཁྱོད་ལ་གསོལ་འདེབས་ན། །དྲེགས་ཅན་སྟོབས་གཞོམ་ཟིལ་གྱིས་མནན་པ་དང་། །མ་མོ་མཁའ་འགྲོ་རྣམས་ལ་དབང་བསྒྱུར་ནས། །ནད་གཏོང་སྲིན་པོའི་ཚོགས་རྣམས་ཐལ་བར་རློགས། །ཁྱོད་ཀྱི་ཐུགས་རྫེས་བདག་ལ་བྱིན་གྱིས་རློབས། །ཧྲཱིཿ རྒྱལ་བ་ཀུན་གྱི་ཆོས་སྐུ་པདྨའི་གསུང་། །ཆོས་རྗེ་འོད་དཔག་མེད་པ་རྡོ་རྗེའི་ཐུགས། །སྤྱན་རས་གཟིགས་དབང་ཧྲཱི་ཿ་ལས་རྔམ་ཆེན་སྐུ། །ངག་གི་དབང་ཕྱུག་རྟ་གདོང་ཞབས་ཀྱིས་གནོན། །རྡོ་རྗེ་རྟ་ཡི་རྟ་དབུ་ཡིས། །འཇིག་རྟེན་ཀློང་དགུའི་འདོད་པ་སྟོན། །འཇིག་རྟེན་དྲེགས་པ་གཏུམ་པའི་ཚོགས། །རྡོ་རྗེ་རྟོག་པ་བྱ་སྒྲོན་གྱིས། །སྣང་མཛད་ངག་གི་དབང་ཕྱུག་སྐུ། །བྱང་ཆུབ་ཆེན་པོ་ཅང་ཤེས་གཙོ། །ལྷ་ཆེན་དགུ་ཡི་ཆོ་འཕྲུལ་གྱིས། །རྡོ་རྗེ་རྟ་གདོང་སྤྲུལ་པའི་ཚོགས། །ནམ་མཁའི་ཁམས་རྣམས་གང་བར་མཛོད། །འཁོར་བ་མ་གྲོལ་བར་དུ་ནི། །སྙིང་རྗེའི་གོ་ཆ་མ་བསྙེལ་བར། །འཁོར་བའི་སོ་མཐའ་ཆོད་པར་མཛོད། །ཧཱུཾ། རྒྱལ་བ་ཀུན་གྱི་གསང་འཛིན་པ། །ཐུགས་རྗེ་ཀུན་གྱི་བདག་པོ་རྡོ་རྗེ་འཛིན། །དྲག་པོ་བརྟུལ་ཞུགས་ཆེན་པོ་ཅན། །དཔའ་བོ་འཇིག་རྟེན་གསུམ་ལས་རྒྱལ། །སྔོན་གྱི་གོ་ཆ་ཆེན་པོ་ཡིས། །དུས་གསུམ་སངས་རྒྱས་ཐམས་ཅད་ཀྱིས། །གདུལ་དཀའ་མ་ལུས་འདུལ་མཛད་པ། །བདུད་ཀྱི་བདུད་སྟེ་བདུད་རྣམས་འཇོམས། །སེམས་དཔའ་ཆེན་པོ་འབར་བའི་སྐུ། །འཇིགས་སུ་རུང་བའི་དཔའ་བྱད་ཅན། །ཧཱུཾ་རྔམ་འཁྲུག་པའི་ང་རོ་ཡིས། །དུར་ཁྲོད་བདག་པོ་རབ་ཏུ་བཅོམ། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། གཉེན་པོ་ལྷའི་ཐུགས་རྗེ་བསྐུལ་པའི་ལེའུ་སྟེ་ཉེར་བདུན་པའོ།། །།དེ་ནས་ཆོས་སྐྱོང་བསྐུལ་བ་འདི་གསུངས་སོ། བྷྱོ། ཉི་མ་ལྷོ་ནུབ་ཕ་གི་ན། །སྲིན་ཡུལ་པུ་རངས་ནག་པོའི་དཀྱིལ། །ལང་ཀ་ཡུལ་གྱི་གྲོང་རྡལ་ན། །ཀོ་ཀ་ཐང་དམར་རྒྱ་མཚོ་ཡི། །དབུས་ན་རི་བོ་མ་ལ་ཡ། །དྲག་ཤུལ་བྱན་ལག་འཕྱོངས་ཀྱི་རི། །གནམ་ལྕགས་ཡོད་པའི་རྩེ་མོ་ན། །ཆོས་འཛིན་རིགས་ཀྱི་སྒྲུབ་གནས་ཏེ། །རྡོ་རྗེ་ཐབས་ཀྱིས་བལྟ་བའི་ཡུལ། །གསུར་ཆེན་དུད་པ་སྤྲིན་དུ་གཏིབས། །གནམ་ལྕགས་ཆུ་སེར་མཚོ་རུ་འཁྱིལ། །ཤ་རུས་ཕུང་བོ་རི་ལྟར་སྤུངས། །ཅེ་སྤྱང་ལིངས་སུ་རྒྱུག་ཅིང་འདྲལ། །བྱ་གཅན་མང་པོ་འཕུར་ཞིང་ལྡིང་། །དུར་ཁྲོད་མཁའ་འགྲོ་འདུ་བའི་གནས། །རབ་ཏུ་འཇིགས་པའི་ཡུལ་མཁར་ན། །འཇིགས་པའི་ཐོད་མཁར་ལྡེམ་སེ་ལྡེམ། །ཤར་ཕྱོགས་བམ་རིལ་སྟག་ཐོད་མཁར། །སྟག་ཐོད་འཛུམ་མདངས་མུ་ལུ་ལུ། །ལྷོ་ཕྱོགས་བམ་རིལ་མི་ཐོད་བརྩིགས། །མི་ཐོད་སྤྱུགས་པ་ཙེ་རེ་རེ། །ནུབ་ཕྱོགས་བམ་རིལ་རྟ་ཐོད་བརྩེགས། །རྟ་ཐོད་མཚེར་དར་ལྷངས་སེ་ལྷང་། །བྱང་ཕྱོགས་བམ་རིམ་ཐོད་མཁར་བརྩིགས། །བྱ་ཐོད་ཚེག་སྒྲ་དི་རི་རི། །སྲིན་པོ་ཐོད་པའི་ཁ་བད་ཅན། །ལས་ཀྱི་འོད་ཟེར་དཔལ་དུ་འཕྲོ། །ངོས་ལ་ང་རྒྱལ་གློག་དམར་འཁྱུག །རྩེ་ལ་བདུད་བྱ་ནག་པོ་ལྡིང་། །རུ་མཚོན་ནག་པོ་པུ་རུ་རུ། །གནམ་ལྕགས་འབར་བའི་སྒོ་མོ་གསལ། །འཇིགས་པའི་སྐུ་མཁར་ནང་ཤེད་ན། །རྟ་རོ་མང་པོ་གཅལ་དུ་བཀྲམ། །མི་རོ་མང་པོ་ཁྲི་རུ་བརྩིགས། །མི་རོ་རྟ་རོའི་གདན་སྟེང་ན། །མངའ་བདག་བདུད་ཀྱི་རྒྱལ་པོ་བཞུགས། །གསང་བདག་ཕྱག་ན་རྡོ་རྗེ་ཡིས། །ཕྲིན་ལས་དྲག་པོས་དབང་བསྐུར་བ། །སྐུ་མདོག་དབུས་ཞལ་ལྗང་ནག་བརྗིད། །ཞལ་གསུམ་འཇིགས་པའི་ཆ་ལུགས་ཅན། །གཡས་སེར་ཐུག་རྗེས་འགྲོ་ལ་སྐྱོབས། །གཡོན་དམར་ཆགས་པས་དབང་སྡུད་འགུགས། །དམར་ནག་རལ་པ་སྲིད་རྩེར་འབར། །རལ་པ་འཁྲུགས་པའི་སྐྲ་གསེབ་ན། །གནམ་ལྕགས་ཐོག་སེར་སྐར་མདའ་འཕྲོ། །སྤྱན་དགུ་མེ་འོད་སྐར་ལྟར་འཁྱུག །ནད་ཀྱི་རྐྱལ་པ་ཚུབ་མར་འཚུབ། །ཞལ་གདངས་དབང་གི་མཆེ་བ་གཙིགས། །རྔམ་པའི་ང་རོ་འབྲུག་ལྟར་སྒྲོགས། །དྲག་པོའི་རྐན་སྒྲ་བདུད་ལྟར་རྡེབ། །གསང་བའི་སྤྱུགས་པ་འཁོར་ལ་འབོད། །གདུག་པའི་མཚོན་ཆ་མ་ལུས་འཕྲོ། །དྲག་པོའི་ཕྱག་དྲུག་གདེངས་པ་ལ། །གཡས་ཀྱི་དང་པོ་གསལ་ཤིང་གིས། །སྲིད་པ་གསུམ་ཡང་དབང་དུ་སྡུད། །བར་པ་རྡོ་རྗེ་གསོར་ཞིང་འཕྱར། །དགྲ་བགེགས་མགོ་ལུས་ཚལ་པར་གཤོགས། །ཐ་མ་གནམ་ལྕགས་དབལ་ཕུར་འདེབས། །དམིགས་པའི་སྙིང་ལ་གཟེར་ཆེན་འབེབས། །གཡོན་གྱི་དང་པོ་དུང་ཆེན་དུ། །སྲིད་གསུམ་སྙིང་ཁྲག་བླུག་ཅིང་འཐུང་། །བར་པ་རྣོ་དབལ་ཤུན་གྱི་མདུང་། །ཞིང་བཅུའི་སྙིང་ལ་གཟེར་ཆེན་འདེབས། །ཐ་མ་སྦྲུལ་ནག་ཞགས་པ་ཡིས། །བླ་སྲོག་འགུགས་ཤིང་ཡན་ལག་འཆིང་། །ཞབས་བཞི་བརྐྱང་བསྐུམ་འབྱུང་པོ་གནོན། །ཞིང་གི་གཡང་གཞིའི་སྟོད་གཡོགས་ལ། །གཏི་མུག་གླང་ཆེན་པགས་པ་གྱོན། །ཞེ་སྡང་སྟག་གི་ཤམ་ཐབས་ལ། །གདུག་པ་སྦྲུལ་གྱི་སྐེ་རགས་བཅིངས། །ཐོད་སྦྲུལ་ཐལ་ཞག་ཐལ་བས་བརྒྱན། །གདུག་རྩུབ་མེ་ཡི་ཀློང་ན་བཞུགས། །དཔལ་གྱི་འོད་ཟེར་ཕྱོགས་བཅུར་འཕྲོ། །སྔོན་གྱི་དམ་བཅའ་མ་བསྙེལ་བར། །བཅོལ་བའི་ལས་རྣམས་འགྲུབ་པར་མཛོད། །གཡོན་གྱི་ཕྱོགས་ནས་སྐུ་བྱུང་བ། །ཉེ་གནས་ཀྲོ་དྷཱི་ཤྭཱ་རཱི་མ། །གཏུམ་པའི་སྲིན་མོ་འཇིགས་ཚུལ་ཅན། །ཞལ་གཅིག་ཕྱག་གཉིས་ཐལ་བའི་མདོག །ཁྲག་རལ་དམར་པོ་མུན་ལྟར་གཏིབས། །སྐུ་སྟོད་ཞིང་ཆེན་གཡང་གཞི་ལ། །ཉི་ཟླ་གཟའ་སྐར་གཞའ་ཚོན་འཁྲུག །སྐུ་སྨད་སྟག་དང་རེ་ལྡེ་ལ། །སྦྲུལ་ནག་ཆུ་སྲིན་ཐོད་པས་བརྒྱན། །གཡས་པ་སྦྲུལ་ཞགས་ཡབ་ལ་འཁྱུད། །གཡོན་པ་ཐོད་སྐྱོགས་ཁྲག་གིས་བཀང་། །རུས་བཅུད་རྐང་མར་ཀླད་པ་ལ། །འབྲུ་མར་ཆང་གིས་སྦྱར་བ་དག །རྟག་པར་རང་གི་ལོངས་སྤྱོད་བྱེད། །ཡབ་ལ་སྟོབ་ཅིང་དགྲ་ལ་འཕེན། །སྔོན་གྱི་དམ་བཅའ་མ་བསྙེལ་བར། །བཅོལ་པའི་ཕྲིན་ལས་འགྲུབ་པར་མཛོད། །ཆེ་མཆོག་ཐུགས་ཀྱི་སྤྲུལ་པ་ནི། །ལས་ཀྱི་མོན་པ་ནག་པོ་བཞེངས། །ཞལ་གཅིག་ཕྱག་གཉིས་གཅེར་བུའི་ཚུལ། །གཡས་པ་གྲི་གུག་སྔོན་པོ་བརྡར། །གཡོན་པ་བྷན་དྷ་སྙིང་ཁྲག་འཐུང་། །ཞབས་ནི་དམ་ཉམས་སྟེང་ན་བགྲད། །ཤོ་ར་རེ་སྟེ་མ་གཏོང་ཞིག །ཆེད་འགའ་དྲག་ཏུ་བསྐུལ་བའི་ཚེ། །རབ་ཏུ་བྱུང་བའི་ཆ་བྱད་ཅན། །གཡས་པ་གསེག་ཤང་པར་བུ་བསྣམས། །གཡོན་པ་བདུད་ཀྱི་བར་བུ་ནག་པོའོ། །ཆོས་གོས་ནག་པོ་ཕྱིར་ལོག་གྱོན། །ཆོས་ཀྱི་གླེགས་བམ་ཁུར་དུ་ཁུར། །དྲག་པོ་སྔགས་ཟློས་དི་རི་རི། །ལོངས་སྤྱོད་མི་སྙིང་དམར་ལ་བྱེད། །ཤོ་ར་རེ་སྟེ་མ་གཏོང་ཞིག །དེ་ཡི་ཐུགས་ཀྱི་དགྱེས་སྡེ་མོ། །བྱར་ཤར་མཚམས་སུ་གནས་བཅས་ནས། །དཀར་མོ་ཀང་ཀ་མཆུ་རིངས་ཁྲོས་པའི་ཚོམས། །རྣམ་པར་སྣང་མཛད་མི་གཡོ་གཙུག་ཏོར་ཅན། །ཕྱག་ན་རྡོ་རྗེ་བཀའ་སྡོད་ཕོ་ཉ་མོ། །འཁོར་གྱི་མ་ཚོགས་ཐམས་ཅད་ལས་ལ་འགྱེད། །ཤོ་ར་རེ་སྟེ་མ་གཏོང་ཅིག །མཐིང་ནག་དར་གྱི་འཇོལ་བེར་ཅན། །ཆུ་དར་ལྗང་གུ་ཐོད་དུ་བཅིང་། །ཙན་དན་སྨུག་པོའི་གྱིང་བིང་ཅན། །ཁྲོས་པའི་ཆ་བྱད་ཆེན་པོ་ཡིས། །ཤོར་ར་རེ་སྟེ་མ་གཏོང་ཅིག །ཆེད་འགའ་དྲག་ཏུ་བསྐུལ་བའི་ཚེ། །གཅེར་བུ་ཁམས་ནག་གྱེན་དུ་བརྫེས། །ཁ་ནས་ཁྲག་འཛག་ཐོད་ཕྲེང་ཅན། །མིག་ནས་མེ་ཡི་ཕུང་པོ་འབར། །གཡས་པ་གསལ་ཤིང་དགྲ་ལ་བརྡེག །གཡོན་པ་ལྕགས་ཀྱུས་དོན་སྙིང་འབྱིན། །མི་རོ་རློན་པའི་གདན་ལ་བཞུགས། །ཤོ་ར་རེ་སྟེ་མ་གཏོང་ཞིག །ཆེད་འགའ་དྲག་ཏུ་བསྐུལ་བའི་ཚེ། །གདོང་བཞི་ཐོད་ནག་ཕྲེང་བ་ཅན། །ནག་པོ་རོལ་ཅན་འཚིག་ཅིང་ཁྲོ། །ཕྱག་བཞི་གདེངས་པ་ཆོ་འཕྲུལ་ལག །ཞབས་གཉིས་ཞབས་བཞི་ཆོ་འཕྲུལ་རྐང་། །གཡས་ཀྱི་དང་པོ་གྲི་གུག་འདེབས། །འོག་མ་བསེ་མདུང་བ་དན་འཕྱར། །གཡོན་གྱི་དང་པོ་རྒྱུ་ཞགས་ཐོགས། །འོག་མ་ཟངས་གྲི་རྣོ་དབལ་འཕྱར ། །མི་སྙིང་ཟ་ཞིང་ཐོད་རློན་འཕེན། །ཁྱོད་ཀྱི་ཞབས་ཀྱི་ལོང་བུ་ནས། །སྟག་སྨད་རྒྱལ་མོ་སྐྱུགས་སེ་སྐྱུག །གནོད་སྦྱིན་འཁོར་རྣམས་ལས་ལ་འགྱེད། །ཁྱོད་ཀྱི་སྟ་ཟུར་གཡས་གཡོན་ནས། །ཕོ་སེང་གཡས་ལ་མོ་སེང་གཡོན། །རལ་པ་སྔོན་པོ་ཉིགས་སེ་ཉིད། །མཆེ་བ་གངས་རི་གཏམས་པ་འདྲ། །ཁྲོ་བོ་ཚོགས་ཀྱི་སྤྲུལ་པ་འགྱེད། །ཁྱོད་ཀྱི་རྩིབ་ལོགས་གཡོན་པ་ནས། །འཕར་བ་རྐན་ལྡག་ཁྱུགས་སེ་ཁྱུག །དྲེད་མོ་ལག་རྡེབས་ཆེམས་སེ་ཆེམ། །ཟ་བྱེད་ཚོགས་ཀྱི་སྤྲུལ་པ་འགྱེད། །ཁྱོད་ཀྱི་སྨིན་ཁྱུག་གཡས་གཡོན་ནས། །བྱ་ཁྱུང་རྒྱལ་པོ་ག་རུ་ཊ། །ཕྱག་ན་རྡོ་རྗེ་བཀའ་སྡོད་ཅིང་། །སྲིན་མོའི་ཚོགས་ཀྱི་སྤྲུལ་པ་འགྱེད། །ཤོ་ར་རེ་སྟེ་མ་གཏོང་ཞིག །དུར་ཁྲོད་ཆེན་པའི་ཀློང་དཀྱིལ་ནས། །སྲིན་མོ་ཉེ་གནས་ཆེན་མོ་བརྒྱད། །ཀ་རཱི་ཙ་རཱི་པྲ་མོ་ཧ། །བེ་ཏ་ལི་དང་པུཀྐ་སཱི། །གྷསྨ་རཱི་དང་སྨ་ཤ་ནཱི། །ཙཎྜ་ལཱི་སྟེ་སྲིན་མོ་ཀུན། །རྔམ་ཞིང་གཏུམ་པའི་མ་ཚོགས་ལ། །འཇིགས་པའི་གཟུགས་ཅན་མཚོན་ཆ་ཐོགས། །སྲོག་ལ་ཧུར་ཐུམ་དུས་ལ་བབ། །སྲིན་པོའི་བུ་མོ་དྲི་ཟ་བརྒྱད། །སེང་སྟག་ཝ་སྤྱང་བཞད་ཀྱི་མགོ །ཀང་ཀ་བྱ་རོག་འུག་པའི་ཚོགས། །ཞིང་ལ་རྔམ་ཞིང་སྟོད་པའི་ཚོགས། །ཉམས་པ་ལོང་ལ་གློ་སྙིང་ཟོ། །ཆོ་འཕྲུལ་སྣ་ཚོགས་དགྲ་ལ་ཐོང་། །དུར་ཁྲོད་མ་ཡི་སྒོ་སྲུང་བཞི། །གདོང་མོ་བརྩོན་མོ་གར་ལོག་མོ། །འཇུག་པར་བྱེད་པའི་མ་མོ་བཞི། །རྣལ་འབྱོར་འཁོར་བཅས་བར་ཆད་སྲུངས། །ཉམས་པ་དགྲ་ཡི་ཡན་ལག་འཆིངས། །དུར་ཁྲོད་བདག་མོ་གྲུ་འདེབས་བཞི། །བསྐམ་མོ་ཤིན་ཏུ་བསྐམ་པ་དང་། །ར་རོ་མ་དང་ཁྲག་འཐུང་མ། །ཆགས་པའི་ཚུལ་ལ་བླ་སྲོག་ལེན། །དམ་ཉམས་དགྲ་བོའི་དབུགས་ལོང་ལ། །སྨྱོ་འབོག་གཏོང་བའི་དུས་ལ་བབ། །ལྷ་ཡི་དེད་དཔོན་ཀ་རུ་ན། །ཆུང་མ་བུ་མོ་སྲིན་མོ་རྣམས། །ཕྲོག་ནས་དབང་དུ་བྱས་པ་ཡི། །བཅུ་གཉིས་དང་ནི་བཅོ་བརྒྱད་སྩོགས། །མ་མོ་ཕྲ་མེན་གནོད་སྦྱིན་མོ། །སྲིན་མོ་ཤ་ཟ་ཁྲག་འཐུང་མ། །དམ་ཉམས་དགྲ་བོའི་བཀྲག་མདངས་ཕྲོགས། །བདུད་ཀྱི་མིང་འཛིན་བླ་ཀུན་མོ། །དམ་ཉམས་འདི་ཡི་བླ་ལོང་ལ། །བློན་མོ་དམག་དཔོན་སྡེ་དཔོན་མོ། །རུ་དཔོན་ཕོ་ཉ་མངག་པར་བྱས། །ཅི་བགྱིས་བཀའ་ཉན་ཕོ་ཉའི་འཁོར། །སྲིན་པོའི་དམག་ཚོགས་དགྲ་ལ་ཐོང་། །རྦོད་གཏོང་རྔམ་པས་དགྲ་སྙིང་ཁོས། །བམ་རིལ་ཐོད་མཁར་ཕྱི་རོལ་ནས། །ཁྲག་དང་ཤ་ཆེན་བཤང་གཅི་དང་། །རྐང་དང་ཀླད་པ་ཀླད་རྒྱས་དང་། །རྣག་དང་ཆུ་སེར་འོབས་དང་ནི། །འབུ་དང་ཤིན་ཏུ་འབུ་ཆེན་དང་། །སྦྲང་མ་སྦྲང་རྒོད་བུང་བ་དང་། །དུག་སྦྲུལ་སྡིག་པ་སྡོམ་ལ་སྩོགས། །དགྲ་བོའི་ཁང་ཁྱིམ་རྨང་ནས་ཤིག །དགྲ་བོའི་ལུས་ལ་བལ་ལྟར་གཡེངས། །ཀང་ཀ་རུ་རྩེ་རྐང་ལྡག་དང་། །ཁྲག་འཐུང་མཆུ་དམར་ཁྭ་སྐྱེགས་དང་། །བྱ་རོག་འུག་པ་ཁྭ་རྒོད་རྣམས། །བྱ་གཅན་མང་པོ་འཕུར་ཞིང་ལྡིང་། །དགྲ་བོའི་བླ་ཡི་སྟེང་དུ་ལྡིང་། །ཤ་ལ་ཟ་ཞིང་རྒྱུ་མ་དྲོངས། །དབང་པོའི་དྭངས་མ་མིག་འབྲས་ཕྱུང་། །ཅེ་སྤྱང་སྟག་སེང་དོམ་དང་དྲེད། །འཕར་བ་རྐང་ལྡག་ལ་སོགས་པའི། །གཅན་གཟན་གདུག་པའི་ཚོགས་རྣམས་ཀུན། །དམ་ཉམས་ཤ་རུས་བཅུད་ལ་རོལ། །མྱུར་དུ་སོད་ལ་ཁྲག་ལ་འཐུང་། །དུར་ཁྲོད་མཁའ་འགྲོ་མ་མོ་ཀུན། །སྤྱུགས་གླུ་ལེན་ཅིང་དམག་ཚོགས་ཁྱེ། །དམ་ཉམས་སྲོག་དབུགས་མདངས་ལ་ཡ། །བཅོལ་པའི་འཕྲིན་ལས་འགྲུབ་པར་མཛོད། །ཅེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །དབུས་ཀྱི་གཙོ་བོ་བསྐུལ་པའི་ལེའུ་སྟེ་ཉེར་བརྒྱད་པའོ།། །།དེ་ནས་འཁོར་བསྐུལ་པ་འདི་གསུངས་སོ། །བྷྱོ། ཤར་ཕྱོགས་ཐོད་མཁར་འཇིགས་པ་ན། །ཁྲོ་བོའི་ཚོགས་དང་སྤྲུལ་པའི་འཁོར། །ཁྲོ་ཆེན་བཛྲ་གིང་ཀ་ར། །སྐུ་མདོག་མཐིང་ནག་འཇིགས་པའི་སྐུ། །ཕྱག་གཡས་མཚོན་ཆའི་འཁོར་ལོ་སྒྱུར། །དམིགས་པའི་མགོ་ལུས་དུམ་བུར་གཏུབས། །གཡོན་པ་ཐོད་པ་རློན་པ་རུ། །སྙིང་ཁྲག་འཐུངས་ཤིང་དམིགས་པ་གནོན། །ཁྱོད་ཀྱི་ཐུགས་དམ་དུས་ལ་བབ། །ཁྱོད་ཀྱི་བཀའ་འཁོར་ལས་བྱེད་ནི། །གྲི་ཐོགས་གིང་ཆེན་བཅོ་བརྒྱད་འགྱེད། །གསང་བའི་བདག་པོས་དབང་བསྐུར་ནས། །རྡོ་རྗེ་ཆོས་ཀྱི་མིང་བཏགས་པས། །ཞེ་སྡང་འབར་བའི་དཀྱིལ་འཁོར་ནས། །མཐིང་ནག་ཁྲོས་པའི་ཆ་བྱད་ཅན། །ལྟས་ངན་སྣ་ཚོགས་སྤྲུལ་པ་འགྱེད། །རྡོ་རྗེ་མྱུ་གུ་ཞེས་བྱ་བ། །གྲི་ཐོགས་ཆེན་པོའི་དུས་ལ་བབ། །རྒྱལ་བའི་དགོངས་པ་ཀུན་འདུས་པས། །འོད་ཕུང་ཁྲོས་པའི་ཁྲོ་བོ་བཞི། །མི་བཟད་འབར་བ་དྲག་པོའི་གཟུགས། །ཁྲག་མིག་དམར་པོ་ལྡོག་ཅིང་ཁྲོ། །རྡོ་རྗེ་དྲག་པོ་འཁོར་ལོ་རྩལ། །གྲི་ཐོགས་ཆེན་པོའི་དུས་ལ་བབ། །དམ་ཅན་ཁྲག་གི་རལ་པ་ཅན། །པདྨའི་མེ་ཏོག་འབུམ་གྱིས་བརྒྱན། །དུར་ཁྲོད་མཁའ་འགྲོ་ཚོགས་ཀྱི་བདག །རྡོ་རྗེ་ཆོས་ཀྱི་ལས་མཁན་པོ། །གྲི་ཐོགས་ཆེན་པོའི་དུས་ལ་བབ། །སེར་ནག་འཇིག་པའི་སྦྲུལ་གྱིས་བརྒྱན། །ཁ་ནས་མེ་འབར་སྟོང་གསུམ་བསྲེག །རིན་ཆེན་བདུད་དཔུང་ཚོགས་ཀྱི་བདག །རིན་ཆེན་མྱུ་གུ་ཞེས་བྱ་བ། །གྲི་ཐོགས་ཆེན་པོའི་དུས་ལ་བབ། །ཆོས་བཟང་ལྷ་ཡི་འདུན་ས་རུ། །ལྷ་ཡི་དམག་དཔོན་ཆེན་པོ་ནི། །ལྗང་ནག་ལུས་ལ་ཆོ་འཕྲུལ་ཅན། །རྡོ་རྗེ་ལས་རབ་དྲག་པོ་རྩལ། །གྲི་ཐོགས་གིང་ཆེན་བཅོ་བརྒྱད་འགྱེད། །ནམ་གྱི་ཕར་ཕྱེད་ཚུར་ཕྱེད་ན། །སྐྱེས་པ་དར་མའི་སྲོག་གཅོད་ཅིང་། །བུད་མེད་མངལ་ཕུག་སྲིད་ཁ་སྡོམས། །སྤྱུགས་གླུ་ལེན་ཅིང་འཁོར་ལོས་གཅོད། །རྡོ་རྗེ་ཟླ་རྩལ་མཐུ་བོ་ཆེ། །གྲི་ཐོགས་ཆེན་པོའི་དུས་ལ་བབ། །སྐུ་མདོག་དམར་གསལ་ཁྲག་གི་མདོག །ཅེ་སྤྱང་མང་པོའི་སྤྲུལ་པ་འགྱེད། །མི་བཟད་ལག་རིངས་ཆེན་པོ་སྟེ། །རྡོ་རྗེ་ཉི་མ་མདངས་ཆེན་པོ། །གྲི་ཐོགས་ཆེན་པོའི་དུས་ལ་བབ། །རྔམ་པའི་ང་རོ་དྲག་པོ་ནི། །ནམ་མཁའི་ཁམས་ནས་འབྲུག་ལྟར་སྒྲོགས། །མཆེ་བ་རྔམ་པས་དགྲ་སྙིང་འབྱིན། །རྡོ་རྗེ་སེང་ཆེན་མཐུ་བོ་ཆེ། །གྲི་ཐོགས་ཆེན་པོའི་དུས་ལ་བབ། །ནག་པོ་མི་བཟད་སྤྱན་གསུམ་པོ། །ཤྭ་ན་ཁྱི་གདོང་འཇིགས་པའི་གཟུགས། །ལྕགས་ཀྱི་སྤྱང་མོ་མགོ་དགུ་ཞོན། །རྡོ་རྗེ་སྤྱང་ཀི་མཐུ་བོ་ཆེ། །གྲི་ཐོགས་ཆེན་པོའི་དུས་ལ་བབ། །མི་རྟོག་པ་ལ་གནས་པའི་སྐུ། ཐོགས་པ་མེད་པའི་རྫུ་འཕྲུལ་གྱིས། །མཚོན་ཆ་སྣ་ཆོགས་ཆར་དུ་འབེབས། །རྡོ་རྗེ་ནམ་མཁའ་མཐུ་བོ་ཆེ། །གྲི་ཐོགས་ཆེན་པོའི་དུས་ལ་བབ། །ལྗང་སྔོན་དྲག་པོ་གསལ་ཤིང་ཅན། །ཕྱོགས་བཞི་དག་ཏུ་རྒྱུག་བྱེད་ཅིང་། །ཕྱོགས་མཚམས་སྟེང་འོག་རྣམ་པར་འཇོམས། །རྡོ་རྗེ་ཕྱོགས་འདུལ་མཐུ་བོ་ཆེ། །གྲི་ཐོགས་ཆེན་པོའི་དུས་ལ་བབ། །མཐིང་ནག་ཁྲོ་བོའི་ཆ་བྱད་ཅན། །མི་མགོ་སྟོང་གི་ཕྲེང་བས་བརྒྱན། །མི་རོ་བམ་པའི་གདན་ལ་བཞུགས། །དུར་ཁྲོད་བདག་པོ་ཆེན་པོ་བྱ། །གྲི་ཐོགས་ཆེན་པོའི་དུས་ལ་བབ། །གྲི་ཐོགས་གིང་ཆེན་བཅུ་གཉིས་པོ། །ལ་ལ་ཁྲག་གི་ཐིག་ལེ་ཅན། །ལ་ལ་ཞག་གི་ཟོ་རིས་ཅན། །ལ་ལ་ཐལ་ཆེན་ཚོམ་བུ་ཅན། །ཕྱག་ན་ལྕགས་གྲི་རྣོན་པོ་བརྡར། །གློ་སྙིང་འབྱིན་ཅིང་ནང་ཁྲོལ་ཟ། །དམིགས་པའི་དགྲ་ལ་ཁྲོ་ཚོགས་ཆོས། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །ཁྲོ་བོའི་ཚོགས་བསྐུལ་བའི་ལེའུ་སྟེ་ཉེར་དགུ་པའོ།། །།དེ་ནས་གནོད་སྦྱིན་གྱི་ཚོགས་བསྐུལ་བ་འདི་གསུངས་སོ། །བྷྱོ། ཉི་མ་ནུབ་ཕྱོགས་ཕ་གི་ན། །བསེ་གདོང་ཁྲ་མོའི་ནང་ཤེད་ན། །ལྕགས་མཁར་སྔོན་པོ་གནམ་དུ་ལྡེམས་སེ་ལྡེམ། །གཡས་ན་ཕོ་སེང་བརྒྱ་ནི་ཁ་ཡང་འཐབ། །གཡོན་ན་མོ་སེང་བརྒྱ་ནི་མཆེ་བ་བརྡར། །འོག་ན་ཞེ་སྡང་དུག་མཚོའི་རྦ་རླབས་མེ་རེ་རེ། །སྟེང་ན་བསེ་ཡི་བྱ་གླག་བརྒྱད་ཁྲི་བཞི་སྟོང་ལྡིང་། །སྐེད་ནས་ཉི་མ་ཟླ་བའི་འོད་ཟེར་འཆར། །རྩེ་ལ་ང་རྒྱལ་གློག་དམར་ཁྱུགས་སེ་ཁྱུག །བསེ་འབྲུག་ལྡིང་བ་གནམ་ནས་འཁྱུག་ཅིང་ལྡིར། །བསེ་སེར་ལུག་ཙམ་རྟག་ཏུ་ཆར་དུ་འབེབས། །དེ་འདྲའི་མཁར་གྱི་ནང་ཤེད་ན། །མ་རུངས་གདུག་པ་ཀུན་གྱི་གཙོ་གྱུར་པ། །ཡབ་གཅིག་གནོད་སྦྱིན་རྒྱལ་པོ་ཟངས་ཐོགས་བཞེངས། །སྐུ་མདོག་དམར་ནག་བརྗིད་པ་ལ། །དབུ་ལ་རྒྱན་མདུད་འཁོར་ལོ་བརྩེགས། །རལ་པ་དམར་པོ་སྤྲིན་ལྟར་གཏིབས། །སྤྱན་མིག་དམར་པོ་དམ་ཉམས་དགྲ་ལ་ཟློག །འཇིགས་པའི་ཞལ་ནི་བགྲད་པ་ལ། །མཆེ་བ་གནམ་ལྕགས་དགུ་བརྒྱས་གཏམས། །སྐུ་ལ་ཤུན་གྱི་གཡང་གཞི་གསོལ། །ཕྱག་ན་གསེར་གྱི་རལ་གྲི་བསྣམས། །གཡོན་པ་བསེ་ཡི་མདུང་དམར་བསྣམས། །བ་དན་དམར་པོ་གློག་ལྟར་འཁྱུག །འཇིགས་སུ་རུང་བའི་དཔའ་བྱད་ཅན། །སྔོན་དུ་ཞེ་སྡང་ལས་ལ་གྲུབ། །དོ་ནུབ་དྲག་པོའི་དུས་ལ་བབ། །དེ་ཡི་ཡུམ་ཆེན་དྲག་མོ་ནི། །བསེ་གདོང་ཟངས་མགྲིན་རྫུ་འཕྲུལ་ཅན། །སྔོ་དམར་ལུས་ལ་འཇའ་ཡིས་བརྒྱན། །རལ་པ་སྔོན་པོ་བུ་ཡུག་འཚུབ། །གཡས་པ་བྱད་ཐག་དགྲ་ལ་འཕེན། །གཡོན་པ་སྔོ་དམར་བགེགས་ལ་འདེབས། །ཁ་རླངས་སྔོན་པོ་དུ་བར་འཐུལ། །འཇིགས་པའི་སྤྱུགས་གླུ་ཙེ་རེ་རེ། །སྲིན་པོ་འབུམ་ཚོགས་དམག་ཏུ་བསྐུལ། །སྔོན་ཀྱང་འདོད་ཆགས་ལས་ལས་གྲུབ། །དོ་ནུབ་དྲག་པོའི་ལས་ལ་མཛོད། །ཁྱོད་ཀྱི་བཀའ་ཉན་ལས་བྱེད་པ། །བསེ་ཡི་གྱད་ཆེན་དམག་དཔོན་བཞི། །ལྷ་སྲིན་སྡེ་བརྒྱད་ལས་ལ་བསྐུལ། །ཉམས་པ་དགྲ་ཡིས་གཤེད་མ་གྱིས། །ས་བདག་བསེ་ཡི་ལྷ་མོ་བཞི། །བུད་མེད་སྡེ་བཞིས་དམག་སྣ་དྲོངས། །འདུ་བ་རྣམ་བཞི་ནད་མཚོན་རྒྱོབ། སྙིང་ཟན་སྲོག་འདིས་སྲོག་ལེན་སོགས། །འཁོར་གྱི་གིང་ཆེན་བཞི་བཅུ་གཉིས། །བསེ་ཁྲབ་བསེ་རྨོག་འོད་དུ་འབར། །སྟག་རལ་གཡས་ལ་གཟིག་ཤུབ་གཡོན། །ཕྱག་ན་རལ་གྲི་རྣོ་འཇོམས་ཐོགས། །སྲོག་རྩ་བཅད་ནས་སྙིང་ཁྲག་འཐུང་། །བསེ་ཕུབ་དམར་པོ་མེ་འོད་སྣང་སྲིད་འགེངས། །སྲིད་གསུམ་ལྷ་འདྲེ་འཁྲུག་ཅིང་བསྐུལ། །ཧཱུཾ་ཆེན་དྲག་པོ་གིང་གི་ཚོགས། །ཤ་ཁྲག་སྣ་ཚོགས་གིང་ལ་མཆོད། །བཅོལ་བའི་ལས་རྣམས་གྲུབ་པར་གྱིས། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། གནོད་སྦྱིན་གྱི་ཚོགས་བསྐུལ་བའི་ལེའུ་སྟེ་སུམ་བཅུ་པའོ།། །།དེ་ནས་རག་ཤ་སྲིན་པོའི་ཚོགས་བསྐུལ་བ་འདི་གསུངས་སོ། །བྷྱོ། དྲག་པོ་ལྕགས་མཁར་ནང་ཤེད་ན། །རཀྴ་ཛྭ་ལ་གློག་ཕྲེང་ཅན། །ཏམ་ཤམ་བསེ་གདོང་གདུག་པའི་བུ། །ཁྱབ་འཇུག་ཆེན་པོ་ཀུན་ཏུ་རྒྱུ། །འཇིགས་བྱེད་ཆེན་པོ་ཀུན་ཏུ་རྒྱུ། །ལུས་པོ་གཅིག་ལ་མགོ་བོ་དགུ །མགོ་ལུས་མེད་པར་མིག་གིས་ཁེངས། །རོ་སྟོད་སྲིན་ལ་རོ་སྨད་སྦྲུལ། །སྐུ་མདོག་བརྗིད་པའི་དུད་ཁ་བ། །གཡས་པ་རྡོ་རྗེ་གྲི་གུག་གིས། ། ཉམས་པའི་ཁོག་གཤོག་སྙིང་ནས་ཕྱུང་། །གཡོན་པ་ཆུ་སྲིན་ཞགས་པ་ཡིས། བླ་སྲོག་ཟུང་ཞིང་དམ་དུ་ཆིངས། །ཉི་མ་ཟླ་བ་ལྟོ་རུ་ཟ། །ཉི་མའི་རྗེས་གཅོད་ཤར་དུ་རྒྱུག །ཟླ་བའི་རྗེས་གཅོད་ནུབ་ཏུ་རྒྱུག །ཉིན་མོ་རྒྱུག་ཅིང་བླ་སྲོག་སྡུད། །མཚན་མོ་རྒྱུ་ཞིང་སྲོག་དབུགས་གཅོད། །དམག་དཔོན་ཆེན་པོའི་དུས་ལ་བབ། །གཟའ་མཆོག་ཆེན་པོའི་དུས་ལ་བབ། །དབང་ཕྱུག་ཆེན་པོའི་དུས་ལ་བབ། །ནམ་མཁའི་དཀྱིལ་ནས་འབྲུག་བསྒྲགས་ཤིང་། །བར་སྣང་ཁམས་ནས་གློག་ཆེན་འཁྱུག །ས་ཡི་དཀྱིལ་དུ་ཐོག་ཆེན་འབེབས། །རྒྱ་མཚོའི་གཏིང་དུ་སེར་ཆེན་སྒྲིལ། །དམ་ཉམས་དགྲ་ཡི་ཡུལ་འཁོར་ཆོམས། །ལོ་ལ་ཁྲག་གི་སེར་བ་ཕོབ། །སྲོག་ལ་གློ་བུར་ཡེ་འདྲོག་ཐོང་། །ཕྱོགས་བཞི་ནམ་མཁའི་དཀྱིལ་ཡངས་ནས། །ངན་སྔགས་བདག་མོ་གདོང་མོ་བཞི། །ཆོ་འཕྲུལ་སྤྲུལ་པ་དགྲ་ལ་འགྱེད། །ཕོ་ལྷོག་ནད་སྩོགས་ནད་མཚོན་རྒྱོབ། །ཕྱོགས་བཞི་མཚམས་བཞི་སྟེང་འོག་ནས། །སྲིད་པའི་རྒྱལ་པོ་ཆེན་པོ་བཅུ། །མདོག་ནི་མ་ངེས་ཁྲོས་པ་བཞིན། །མཚོན་ཆ་སྣ་ཚོགས་འཁོར་ལོ་སྒྱུར། །བསྟན་པ་བསྲུང་བར་དམ་བཅས་པའི། །དམ་ཚིག་ཆེན་པོའི་དུས་ལ་བབ། །དམ་ཉམས་སྲོག་རྩ་དམར་པོ་ཆོད། །རི་རབ་གཡོ་བསྙིལ་འུ་རུ་རུ། །རྒྱ་མཚོ་ཞོ་འཆོལ་ཆི་ལི་ལི། །གནམ་ས་དཀྲུག་པའི་དུས་ལ་བབ། །སྲོག་རྩ་ཆོད་ཅིང་སྙིང་མགོ་ཆོད། །མཛེ་འབྲས་སྨྱོ་འབོག་ལ་སོགས་ཀྱིས། །དགྲ་བོའི་རྩ་ལག་རླུང་ལ་སྐུར། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །སྲིན་པོའི་ཚོགས་ལས་ལ་མངག་པའི་ལེའུ་སྟེ་སོ་གཅིག་པའོ།། །།དེ་ནས་ཟ་བྱེད་མ་མོའི་ཚོགས་བསྐུལ་བ་འདི་གསུངས་སོ། །བྷྱོ། ཉི་མ་བྱང་ཤར་ཕ་གི་ན། །བྲག་དམར་མཚོ་ཁོལ་མེ་རེ་རེ། །དུག་རླངས་ན་བུན་ཕྱུ་རུ་རུ། །མཚོ་ཆེན་སྔོན་དམར་རྦ་རླབས་ཆི་ལི་ལི། །བསེ་མཁར་སྨུག་པོ་གནམ་དུ་ཟངས་སེ་ཟང་། །དུར་བྱ་ཀང་ཀ་སྣ་ཚོགས་ལྡིང་ཞིང་འཇུམ། །ཅེ་སྤྱང་ལི་རུའི་ཚོགས་རྣམས་དི་རི་རི། །ནད་ཀྱི་མཚོན་སྤྲིན་སྔོན་དམར་ཐིམས་སེ་ཐིབ། །མ་གཅིག་དཔལ་ལྡན་རེ་མ་ཏི། །ཡ་མཚན་བུད་མེད་རྔམ་པའི་མདོག །སྐུ་མདོག་མཐིང་ནག་འཇིགས་པ་ལ། །ཁྲག་གི་རལ་པ་ཐུན་ལྟར་གཏིབས། །སྤྱི་བོའི་གཙུག་ན་ཟླ་གམ་གསལ། །ལྟེ་བའི་དབུས་ནས་ཉི་མ་འཆར། །སྲིད་གསུམ་ཀུན་གསལ་བླ་ཚེ་རྐུ། །སྙན་ཆ་སེང་སྦྲུལ་དྲིལ་བུས་བརྒྱན། །ཐམས་ཅད་ཟིལ་གནོན་གདུག་པ་འདུལ། །སྐུ་སྟོད་ཞིང་ཆེན་གཡང་གཞི་ལ། །རུས་ཕྲེང་ཁྲག་དང་ཞགས་གིས་བརྒྱན། །སྐུ་སྨད་རེ་ལྡེའི་ཤམ་ཐམས་ལ། །སྦྲུལ་དང་ཐོད་ཕྲེང་དྲིལ་བུས་བརྒྱན། །ཆིབས་སུ་དྲེའུ་རྟ་རྐང་གསུམ་ཆིབས། །དྲག་མོ་མཚོན་ཆའི་ལྟེ་ལེ་ཅན། །གཡས་ན་གཤིན་རྗེའི་ཁྲམ་བམ་བསྣམས། །གཡོན་ན་ནད་ཀྱི་རྐྱལ་པ་བསྣམས། །བཙན་གྱི་ཤྭ་རྡེལ་ཕྱོགས་བཅུར་འཐོར། །ཚུབ་ནག་སྟོང་དཀྱིལ་ནང་ན་བཞུགས། །ཁྱེད་ཀྱི་དམ་ཚིག་དུས་ལ་བབ། །ཤར་ཕྱོགས་ཁམས་ཀྱི་ཟ་བྱེད་མ། །སངས་རྒྱས་རིགས་ཀྱི་རྣལ་འབྱོར་མ། །དཀར་མོ་རལ་ཅན་འབུམ་སྡེ་རྣམས། །ཁྱོད་ཀྱིས་ཤར་ཕྱོགས་དགྲ་བགེགས་ཐུལ། །ལྷོ་ཕྱོགས་རིགས་ཀྱི་ཟ་བྱེད་མ། །སེར་མོ་རལ་ཅན་ཁྲོས་པའི་གདོང་། །རིན་ཆེན་རིགས་ཀྱི་རྣལ་འབྱོར་མ། །ཁྱོད་ཀྱིས་ལྷོ་ཡི་དགྲ་བགེགས་ཐུལ། །ནུབ་ཕྱོགས་ཁམས་ཀྱི་ཟ་བྱེད་མ། །དམར་མོ་རལ་ཅན་ཕོ་ཉར་བཅས། །པདྨ་རིགས་ཀྱི་རྣལ་འབྱོར་མ། །ཁྱོད་ཀྱིས་ནུབ་ཀྱི་དགྲ་བགེགས་ཐུལ། །བྱང་གི་ཕྱོགས་གྱི་ཟ་བྱེད་མ། །ལྗང་ནག་རལ་ཅན་རྔམ་པའི་ཚོགས། །ལས་ཀྱི་རིགས་ཀྱི་རྣལ་འབྱོར་མ། །ཁྱོད་ཀྱིས་བྱང་གི་དགྲ་བགེགས་ཐུལ། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །མ་མོའི་ཚོགས་བསྐུལ་བའི་ལེའུ་སྟེ་སོ་གཉིས་པའོ། །དེ་ནས་དྲག་པོ་གཤིན་རྗེ་ལྟར་བསྐུལ་བ་འདི་གསུངས་སོ། །བྷྱོ། དུར་ཁྲོད་ཆེན་པོའི་གནས་མཆོག་ནས། །རཀྟའི་རྒྱ་མཚོའི་རྦ་ཀློང་འཁྲུག །ཐོད་མཁར་སྒོ་མེད་ནང་ཤེད་ན། །མི་རོ་རྟ་རོ་གཅལ་དུ་བཀྲམ། །གཟས་པའི་གདན་ལ་སྟག་ཆེན་ཁྲི། །མེ་དཔུང་ཀློང་ནས་སྐུ་བྱུང་བ། །མ་ཧཱ་ཀཱ་ལ་མགོན་པོ་ཆེ། བདུད་འདུལ་དབང་ཕྱུག་འདུལ་བའི་གིང་། །སྐུ་མདོག་དུག་ཆེན་འཁྱིལ་བ་འདྲ། །སྤྱན་གསུམ་ལྡང་མིག་མེ་ལྟར་འབར། །དགྲ་བོའི་དུས་སྲོག་དབང་པོ་འབྱིན། །ཤར་ནས་རིམས་དལ་རླུང་དམར་གཡོ། །སྟོང་ཁམས་ཐམས་ཅད་ནད་ཀྱིས་ཁེངས། །ཞལ་གདངས་རྣོ་དབལ་མཆེ་བ་གཙིགས། །དམིགས་པའི་དགྲ་བོ་རིལ་མིག་བྱེད། རྔམ་པའི་ར་རོ་འབྲུག་སྟོང་སྒྲོགས། །བདུད་དང་མུ་སྟེགས་བརྒྱལ་བར་བྱེད། །སྐུ་ལ་བེར་ནག་བརྩེགས་པ་གསོལ། །དཔའ་བརྟུལ་སྟག་གི་སློག་པ་ལ། །དར་ལྕེ་མེ་ཏོག་འཇའ་ཚོན་འཁྱུག །དཔའ་བརྟུལ་དུར་ཁྲོད་ཆས་ཀྱིས་བརྒྱན། །གཡས་པ་ཙན་དན་བིང་ཆེན་གྱིས། །དམ་ཉམས་དགྲ་བོ་རྡུལ་དུ་རློགས། །ཕྱག་གཡོན་ཐོད་ཁྲག་དམར་ཆེན་འཐུང་། །དྲག་པོ་རྫུ་འཕྲུལ་བསམ་མི་ཁྱབ། །ཁྱེད་ཀྱི་དམ་ཚིག་དུས་ལ་བབ། །དེ་ཡི་ཡུམ་ཆེན་སྲིན་མོའི་སྐུ། །མཐིང་ནག་བརྗིད་པའི་ཚུལ་གྱིས་འཁྲིལ། །སྦྲུལ་ནག་རལ་བ་མུན་ལྟར་གཏིབས། །དུར་ཁྲོད་ན་བཟའ་སྐུ་ལ་གསོལ། །གཡས་པ་རྒྱུ་ཞགས་བླ་སྲོག་འགུགས། །གཡོན་པ་ཐོད་ཁྲག་དལ་ཡམས་འབེབས། །མོན་པ་ནག་པོའི་ཚོགས་ཀྱིས་བསྐོར། །འོད་ཟེར་གློག་སྟོང་སྐར་མདའ་འཁྱུག །ཁྱོད་ཀྱི་དགྲ་བགེགས་མྱུར་དུ་སྒྲོལ། །བདུད་ཡུལ་ཁ་རག་མགོ་དགུ་མ། །བདུད་ནག་རི་ནག་སྤུངས་པ་ཡང་། །བདུད་མཁར་ནང་ནས་འདིར་བྱོན་ལ། །དགྲ་ལ་ཐིབས་ནད་ཐོང་ལ་སྒྲོལ། །རྒྱ་ཡུལ་ནམ་མཁའི་ཕྱར་ཕྱོད་ནས། །སྲོག་བདག་འོད་ལྷ་དཀར་པོ་ཡང་། །ཤེལ་མཁར་ནང་ནས་འདིར་བྱོན་ལ། །དགྲ་ལ་སྨྱོ་འབོག་ཐོང་ལ་སྒྲོལ། །མང་ཡུལ་བྱང་ཤར་མཚོ་གླིང་ནས། །མ་མོ་རྡོ་རྗེ་སྡེར་མོ་ཡང་། །མཐིང་ནག་གུར་ནས་ལས་ལ་ཆོས། །དགྲ་ལ་དལ་ཡམས་ཐོང་ལ་སྒྲོལ། །ཀླུ་ཡུལ་ན་ར་སིང་ཆེན་ནས། །ཀླུ་གཉན་ནག་པོ་སྲོག་ལེན་ཡང་། །རིན་ཆེན་མཁར་ནས་སྐུ་བསྐྱོད་ལ། །དགྲ་ལ་མཛེ་ཤུ་ཕོལ་འབྲས་ཐོང་། །བཙན་ཡུལ་ཟངས་ཐང་དམར་པོ་ནས། །བཙན་རྗེ་ཤུ་པོ་ལག་རིང་ཀྱང་། །བསེ་མཁར་ནང་ནས་སྐུ་བསྐྱོད་ལ། །དགྲ་ལ་གྲི་ཐབས་ཐོང་ལ་སྒྲོལ། །ཤར་ཕྱོགས་རིན་ཆེན་གླིང་ཐང་ནས། །གིང་གི་རྡོ་རྗེ་ལེགས་པ་ཡང་། །ལུང་ཐང་མཁར་ནས་འདིར་བྱོན་ལ། །དགྲ་ལ་ཕོ་ལྷོག་ཧུར་ཐུམ་ཐོང་། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །སྒྲོལ་གིང་ཆེན་པོ་ལས་ལ་བསྐུལ་བའི་ལེའུ་སྟེ་སོ་གསུམ་པའོ།། །།དེ་ནས་དཔའ་བོ་གིང་ཆེན་གྱི་བསྐུལ་པ་འདི་གསུངས་སོ། །བྷྱོ། དུར་ཁྲོད་ཐོད་པའི་སྐུ་མཁར་ནས། །གསང་བདག་ཐུགས་ཀྱི་སྤྲུལ་པ་ནི། །གསོད་བྱེད་གིང་ཆེན་ལས་ལ་བསྐུལ། །སྐུ་མདོག་དམར་པོ་ཁྲོས་པ་ལ། །གདུག་པའི་མེ་འོད་ལམས་སེ་ལམ། དབུ་ལ་བསེ་རྟོག་དམར་པོ་གསོལ། །ཉི་མ་འབུམ་གྱི་འོད་ཟེར་འཕྲོ། །ལེ་བརྒན་དར་གྱི་ཅོད་པན་ལ། སྤྲུལ་བའི་འོད་ཟེར་མང་པོ་འཁྱུག །སྤྱན་མིག་དམར་པོ་བཟློག་པ་ཡིས། །བདུད་དང་མུ་སྟེགས་ཟིལ་གྱིས་གནོན། །ཁྲོས་པའི་གད་མོ་རྐན་བརྡབས་པས། །མ་ཚོགས་སྲིན་པོ་འདར་སྤྱུག་སྤྱུག །གསང་བའི་སྤྱུགས་པ་ཙེ་རེ་རེ། །སྒྲོལ་གིང་དམར་པོ་ལས་ལ་འགྱེད། །ཕྱག་གཡས་ཟངས་གྲི་རྣོ་དབལ་གྱིས། །ཉམས་པ་དགྲ་བོའི་སྲོག་ལུས་འབྲོལ། །གཡོན་པས་ཙིཏྟ་ཕྱུང་ནས་གསོལ། །ཡེ་ཤེས་གིང་གི་འཁོར་གྱིས་བསྐོར། །སྤྲུལ་པའི་གིང་ཚོགས་སྟོང་གསུམ་སྲེག །ལས་ཀྱི་གིང་ཕྲན་ལས་ལ་འགྱེད། །དཔའ་བོ་གིང་ཆེན་ལས་ལ་ཆོས། །ཤར་ཕྱོགས་སྲིན་པོའི་ཡུལ་རྩེ་ནས། །པྲ་མ་རཱ་ཛ་སྲིན་པོའི་གཙོ། །སྐུ་མདོག་དཀར་པོ་ཤེར་འོད་འཕྲོ། །ཤེལ་གྱི་ཟངས་གྲིས་དགྲ་ལ་འདེབས། །ཙིཏྟ་ཕྱུང་ནས་ཞལ་དུ་གསོལ། །སྲིན་པོའི་འཁོར་ཚོགས་ལས་ལ་ཆོས། །ལྷོ་ཕྱོགས་གཤིན་རྗེའི་ཡུལ་རྩེ་ནས། །ཡ་མ་རཱ་ཛ་གཤིན་རྗེའི་གཙོ། །སྐུ་མདོག་ནག་པོ་མུན་རུམ་འདྲ། །ལྕགས་ཀྱི་ཟངས་གྲི་དགྲ་ལ་འདེབས། །ཙིཏྟ་ཕྱུང་ནས་ཞལ་དུ་གསོལ། །གཤིན་རྗེའི་དམག་ཚོགས་དགྲ་ལ་ཆོས། །ནུབ་ཕྱོགས་སྲིན་པོའི་ཡུལ་རྩེ་ནས། །ཧ་ནུ་དཔག་ཤུ་བདུད་གྱི་གཙོ། །སྐུ་མདོག་དམར་པོ་མེ་འོད་འདྲ། །ཟངས་ཀྱི་རལ་གྲི་དགྲ་ལ་འདེབས། །ཙིཏྟ་ཕྱུང་ནས་ཞལ་དུ་གསོལ། །བདུད་ཀྱི་འཁོར་ཚོགས་དགྲ་ལ་ཡ། །བྱང་ཕྱོགས་གནོད་སྦྱིན་ཡུལ་རྩེ་ནས། །ཡག་ཤ་གར་བ་གནོད་སྦྱིན་གཙོ། །སྐུ་མདོག་ལྗང་ནག་མཐིང་འོད་འབར། །གསེར་གྱི་རལ་གྲི་དགྲ་ལ་འདེབས། །ཙིཏྟ་ཕྱུང་ནས་ཞལ་དུ་གསོལ། །གནོད་སྦྱིན་འཁོར་ཚོགས་ལས་ལ་ཆོས། །ཞེས་གསུངས་སོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །གིང་ཆེན་ལས་ལ་བསྐུལ་བའི་ལེའུ་སྟེ་སོ་བཞི་པའོ།། །།དེ་ནས་རྒྱུད་གཏན་ཚིགས་ཀྱི་ལེའུ་འདི་བཤད་དོ། །འདས་བའི་དུས་ན་སྔོན་བྱུང་བའི། །བསྐལ་པ་རྗོགས་ལྡན་བྱ་བ་ལ། །མི་བསྐྱོད་ཞིང་ཁམས་མངོན་དགའ་བའི། །ལྷོ་ཕྱོགས་འཛམ་བུའི་གླིང་དེ་རུ། །ཁྱིམ་བདག་ཀོའུ་ཀ་ཡ་ཞེས། །བྱ་བ་དེ་ལ་བུ་གཅིག་ཡོད། །དེ་མིང་ཐར་པ་ནག་པོ་བྱ། །ཁོ་བོ་དང་པའི་སེམས་གཡོས་ཏེ། །ཡུལ་ཕྱོགས་དེ་ཡི་དགོན་པ་ན། །དགེ་སློང་ཐུབ་དཀའ་གཞོན་ཞུ་ཞེས། །བྱ་བ་གསང་སྔགས་དོན་རྟོགས་པ། །ཡོན་ཏན་ཁོ་ན་དེ་ཐོས་ཏེ། །དན་ཕག་གཡོག་དང་བཅས་པ་ཡིས། །དེ་དྲུང་ཕྱིན་ཏེ་གདམ་པ་ཞུས། །དེ་ཉིད་ཀྱིས་ཀྱང་གདམས་པ་གནང་། །ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་སྤྱད་བྱས་ཀྱང་། །ནམ་མཁའ་ལ་ནི་སྤྲིན་བཞིན་ཏེ། །དེ་ནི་རྣལ་འབྱོར་དམ་པའི་ལམ། །དེ་སྐད་གདམས་པ་ཕོག་པ་ལས། །ཁོ་བདག་དགའ་མགུ་གནས་སུ་དེངས། །དོན་གྱི་བདེན་ཐོབ་མ་རྙེད་པར། །སྒྲ་བཞིན་འདོད་ཡོན་ལྔ་ལ་ཞེན། །ནམ་ཞིག་དཔོན་གཡོག་མ་མཐུན་ཏེ། །རྩོད་གྱུར་དགེ་སློང་དཔོན་ལ་དྲིས། །ཐུབ་དཀས་རང་བཞིན་སོ་སོ་ནས། །དན་ཕག་བདེན་ནོ་ཞེས་གསུངས་པས། །ཐར་པ་ནག་པོ་ཁམས་འཁྲུགས་ཏེ། །གཉིས་ཀའི་དཔོན་དུ་འདྲ་བ་ལ། །མཉམ་མོ་ཞེས་ཀྱང་མི་བརྗོད་པར། །ངེས་པར་རང་ཉིད་སུན་ཕྱུང་བས། །ཁམས་འདིར་མ་ཆགས་བྱ་སྙམ་སྟེ། །དེ་ནས་དཔོན་གཡོག་གཉིས་སྤྱུག་བཏང་། །གསང་སྔགས་རྡོ་རྗེའི་བཀའ་བསྒོ་ལོག །སྒྲ་བཞིན་སྤྱད་ཅིང་འདོད་དགུར་འཇོམས། །ལྟ་བ་ཐམས་ཅད་ལོག་པར་འགྱུར། །ཐམས་ཅད་ལོག་པའི་རྒྱ་མཚོར་ཞུགས། །ལོག་པའི་དཀའ་ཐུབ་དྲག་པོ་དང་། །ལོག་པའི་བརྟུལ་ཞུགས་ཆེན་པོ་ཡིས། །ཤ་རློན་ཟ་ཞིང་ལྤགས་རློན་གྱོན། །ཤ་ཟའི་ཟག་པ་མང་བསོགས་ཏེ། །ཐམས་ཅད་བསད་ཅིང་ཤ་རློན་ཟོས། །རིགས་བྱེད་སྔགས་ཀྱི་བརྡའ་སྤྲོས་ཏེ། །མོ་རིགས་ཕྲད་པ་ཐམས་ཅད་སྦྱོར། །དངོས་པོ་གཤིས་ལས་འདས་ཤིང་འཁྲུལ། །གནས་པའི་དུས་མེད་ཚེ་ཟད་ནས། །སྐྱེ་བ་ལྔ་བརྒྱ་ཅེ་སྤྱང་ལུས་སུ་སྐྱེས། །གཉེན་པོས་བསད་ཅིང་ཚེ་འཕོས་གྱུར། །ངན་སྐྱུགས་ཕྱི་ཡི་སྲིན་བུ་དང་། །མི་གཙང་ནང་གི་སྲིན་བུར་སྐྱེས། །གཉེན་པོས་བསད་ཅིང་ཚེ་འཕོས་གྱུར། །རོ་དང་སྟོང་ཕྲག་རེ་ལྡེ་ཡི། །ནང་རྩ་གནས་པའི་སྲོག་ཆགས་གྱུར། །དེ་མཐར་མངལ་གྱི་སྲིན་བུར་སྐྱེས། །ན་རག་རྡོ་རྗེ་དམྱལ་བར་གྱུར། །ཚེ་ཚད་ཚེ་ལོ་བརྒྱད་ཁྲིར་གནས། །ཐུབ་པ་ཆོས་ཀྱི་རྒྱལ་པོ་ཡིས། །ལས་སུ་བསྟན་པས་དེར་ཤེས་ཏེ། །འགྱོད་པས་རིམ་བཞིན་ཚ་དམྱལ་བརྒྱད། །རིམ་བཞིན་གོང་ནས་གོང་དུ་འཕོས། །བདེ་བ་བྲལ་ཞིང་ཕུན་རིང་འཁོར། །དེ་ནས་བསད་ཅིང་ཐོན་ཐར་ནས། །ནད་མཚོན་མུ་གེའི་བསྐལ་པ་བརྒྱུད། །གཞན་གྱི་ལོངས་སྤྱོད་ཕྱིར་བསད་དེ། །གཤིན་རྗེའི་འཇིག་རྟེན་འཇུངས་པ་དང་། །ཤ་ཟ་མ་དང་སྲུལ་པོར་སྐྱེས། །དེ་ལྟར་སྐྱེ་བ་རྒྱུད་པའི་མཐར། །ལྷོ་ནུབ་ལང་ཀ་པུ་རི་ཡི། །སྨད་འཚོང་མ་ཡི་མངལ་དུ་ཆགས། །བུ་དེ་ཐོན་པས་མ་དེ་འཆི། །ཡུལ་ཕྱོགས་དེ་ཡི་མི་དག་གིས། །ཕ་མེད་དོ་བུ་ཀོ་ནུ་འདི། །བཞག་ན་ཡུལ་ཕྱོགས་སྨེ་བས་ན། །མ་ཡི་རོ་མཆན་གཞུག་པར་བསྒོས། །དུག་ཤིང་ནལ་བྱའི་རྩ་རུ་བསྐྱལ། །བུ་དེས་མི་ཡི་ནུ་མ་དྲངས། །དེ་ནས་ཁྲག་དང་ཆུ་སེར་དྲངས། །དེ་ནས་མ་རོ་ཟད་པར་ཟོས། །རང་བརྒྱུད་ཁྲོ་བོའི་འཇིགས་པར་བསྒོམ། །མ་ཡི་པགས་པ་གོས་སུ་གྱོན །དེ་ནས་པ་ཏྲ་ལུས་ཆེན་བརྟས། །དུར་ཁྲོད་རོ་ཡི་ཤ་ཁྲག་ཟོས། །ཐོད་ཕྲེང་སོར་ཕྲེང་རྒྱན་དུ་བྱས། །རོ་ཡི་པགས་པ་གོས་སུ་གྱོན། །དུར་ཁྲོད་ནས་པའི་མཁའ་འགྲོ་རྣམས། །ཆུང་མ་སླས་དང་བྲན་དུ་བྱས། །མ་ཟན་རཱུ་ཏྲ་དེ་ཡི་ནི། །ཁ་ནས་ཚ་བའི་དབུགས་བྱུང་ནས། །ནད་དང་རིམས་ཀྱིས་ཐམས་ཅད་གསོད། །སྣ་ནས་གྲང་བའི་དབུགས་བྱུང་བས། །ཕྱོགས་བཅུ་ཀུན་ཏུ་མས་འཁྲུག་བྱེད། །མིག་གི་དུག་གིས་ཐམས་ཅད་གསོད། །སྔགས་ཀྱི་ཟེར་མས་ཐམས་ཅད་སྒྲོལ། །རང་ལུས་ཐལ་ཁ་འཇིགས་པ་ལ། །མགོ་གསུམ་ལག་དྲུག་གཤོག་པ་ཅན། །མིག་གསུམ་སྐྲ་ནི་མེ་ལྟར་འབར། །གནམ་ལ་བྱ་བཞིན་ས་ལ་བྱི། །ཆུ་ལ་ཉ་བཞིན་འཕྱོ་བར་བྱེད། །སེན་མོ་ཀང་ཀའི་མཆུ་སྡེར་གྱིས། །གང་ཟིན་ཤ་རུས་མྱགས་པར་བྱེད། །རང་གི་ང་རྒྱལ་གཏུམ་སྐད་སྒྲོགས། །དེ་ཚོ་འགྲོ་བ་ཐམས་ཅད་ཀྱང་། །ལོག་ལྟ་སྣ་དགུའི་ལམ་ལ་བཙུད། །ང་རྒྱལ་ཆེ་བའི་མཐུས་སྙེམས་པས། །ལང་ཀའི་ཡུལ་གྱི་གྲོང་རྡལ་བཅོམ། །ཀོ་ཀ་ཐང་དམར་མཚོ་ཡི་དོ། །བྱན་ལག་མཆོང་རི་མ་ལ་ཡ། །གནམ་ལྕགས་ཡོད་པའི་རྩེ་མོ་རུ། །སྲིན་པོའི་རྒྱལ་པོ་དབང་དུ་བསྡུས། །རུ་ཏྲ་མ་ཏྲ་མཱ་རཱ་ཏྲ། །རང་གི་གཏུམ་སྐད་དྲག་ཏུ་བསྒྲགས། །སྲིན་པོའི་རྒྱལ་པོ་ཆེན་པོ་དེས། །མངོན་ཤེས་གསང་སྔགས་འབྱུང་བར་མཐོང་། །ཀུན་ཀྱང་འཁོར་དང་གཡོག་རྗེ་བྱས། །དེད་དཔོན་མ་ཧཾ་ཀ་རུ་ཏྲ། །རང་གི་ང་རྒྱལ་ཆེ་བ་རྩོལ། །ལྷ་ཡི་དེད་དཔོན་ཀ་རུ་ཎ། ངན་ཐབས་ཚ་བའི་དབུགས་ཀྱིས་བསད། །རོ་དེ་འཛམ་བུའི་གླིང་དུ་བོར། །དགེ་གནས་མཆོད་རྟེན་བརྒྱད་དུ་སྣང་། །འཁོར་རྣམས་གཡོག་བཞི་གཙོ་མོ་དང་། །བྱིན་དང་བྲན་སླས་ཕོ་ཉ་འཁོར། །གཡོ་འགུལ་ཐམས་ཅད་དབང་དུ་བྱས། །བམ་རིལ་ཐོད་པའི་མཁར་བརྩིགས་ནས། །བདུད་ཀྱི་རྒྱལ་མཚན་ཕྱོགས་སུ་བཙུགས། །བདུད་ཀྱི་རུ་མཚོན་རྩེ་ལ་འཕྱར། །འདམ་གྱི་ཕྲུ་བས་ཡོངས་སུ་བསྐོར། །རྫུ་འཕྲུལ་སྟོན་ཅིང་ཧཱུཾ་སྐད་སྒྲོགས། །ཨེ་མ་ཧོ། །སྔོན་གྱི་གཙང་མ་འཕགས་པས་ཀྱང་། །བདག་ལ་བཀའ་ཉོན་ཟེར་བ་ལ། །མི་ཉན་སླར་ལ་གནས་སུ་ལོག །ངག་གི་དབང་ཕྱུག་དེ་བཞིན་བྱས། །འགྲན་ཟླ་མེད་ཅེས་དེ་བཞིན་སྒྲོགས། །རུ་ཏྲ་ནག་པོ་སྨིན་པར་གྱུར། །དེ་ནས་དེ་ཡི་དུས་ཉིད་ན། །ཐུབ་དཀའ་རྡོ་རྗེ་སྙིང་པོར་སྨིན། །དན་ཕག་རྩལ་ཆེན་རྫོགས་པར་གྱུར། །དེ་བཞིན་གཤེགས་པ་ཐམས་ཅད་ཀུན། །སྙིང་པོ་བྱང་ཆུབ་ཉིད་དུ་འདུས། །སྟོང་ཉིད་ངང་དུ་སྟོང་པའི་སྒྲ། །སངས་རྒྱས་མཛད་པ་མ་རྫོགས་པར། །མངོན་པར་སངས་རྒྱས་ཅི་ཕྱིར་ཡིན། །དེ་བཞིན་ཉིད་དང་ཀུན་སྣང་དང་། །ཡི་གེའི་རང་བཞིན་སྐུལ་བར་མཛད། །སྟོང་ཉིད་མེ་ལོང་མི་རྟོགས་ལས། །མ་སྐྱེས་མི་སྣང་འགག་གཟུགས་སྣང་། །མཁའ་ལ་སྣང་མཛད་ཇི་བཞིན་དུ། །དབྱིངས་ལས་ཕྱག་རྒྱའི་སྐུ་སྣང་བཞེངས། །གོ་འབྱེད་ཕྱག་རྒྱས་ཀུན་བསྡུས་ནས། །བདེ་གཤེགས་དགོངས་པ་མཐུན་པར་གྲོལ། །རྣམ་བཞིའི་ལས་ཀྱིས་བསྐོས་བཏབ་ནས། །བཅོམ་ལྡན་ཤཱཀ་ཐུབ་ཅན་དུ་གཤེགས། །རྒྱུ་འབྲས་ལས་ཀྱི་དགེ་སྡིག་བརྗོད། །བརྟུལ་བས་མ་ཐུལ་ཁོ་ན་རེ། །མི་ཐུབ་པ་ཡི་ངག་སྨྲས་ཏེ། །བུ་ཆུང་རང་གི་གནས་སུ་དེངས། །སྔོན་ཁྱོད་ལྟ་བུས་ང་མ་ཐུལ། །དེ་བས་རང་གི་བཀའ་ཐུབ་གྱིས། །ཟེར་བས་གཙང་རིགས་སླར་ལོག་གོ། །དེ་ནས་སངས་རྒྱས་ཐམས་ཅད་ཀྱིས། །རྟ་མགྲིན་དབང་བསྐུར་ཐད་དུ་གཤེགས། །རྡོ་རྗེ་རྟ་ཐབས་ཁོ་ན་ཡིས། །ཁོ་རང་ཉིད་ཀྱི་གཏམ་སྒྲ་བསྒྲགས། །མགྲིན་བུ་རང་གི་ཟས་ཟོ་དང་། །དེས་ནི་རྟ་མཆོག་སླར་ལ་གཤེགས། །ཁ་ནས་ཁོང་དུ་རྟ་མཆོག་མིད། །དཔལ་གྱིས་བཞེངས་ཏེ་ཧཱུཾ་སྒྲ་བསྒྲགས། །ཁོ་ཡིས་སྐད་ངན་གདུང་པ་བཏོན། །གཉེན་པོ་རྡོ་རྗེ་ཧཱུཾ་བསྒོམས་པས། །དེ་ལ་སྐྱབས་ཉིད་ཚོལ་ཅིག་གསུངས། །རྟ་མཆོག་སྤྱི་གཙུག་འཐོན་ཏེ་གཤེགས། །དེ་ནས་འདུས་པ་ཆེན་པོ་ཀུན། །དབང་དྲག་གཉིས་ཀྱིས་འདུལ་བར་དགོངས། །དེ་དག་ཐམས་ཅད་ཀུན་འདུས་ནས། །དུར་ཁྲོད་གར་གྱི་ཕྱག་རྒྱར་བཞེངས། །ཁྱོད་ཀྱི་རྒྱུ་རྐྱེན་འབྲས་བུ་དང་། །སྐྱོན་དང་ཡོན་ཏན་ཀུན་དྲིས་པས། །སངས་རྒྱས་ཀུན་གྱིས་འདི་སྐད་གསུངས། །རྒྱུ་ནི་སྨུག་པོའི་རོ་ལས་བྱུང་། །རྐྱེན་ནི་ལོག་པའི་དཀའ་ཐུབ་གྱིས། །འབྲས་བུ་སྡུག་བསྔལ་ངོ་བོར་སྨིན། །རིགས་ནི་དམན་རིགས་འཁོར་བའི་རིགས། །ངོ་བོ་ཡི་དྭགས་སྲིན་པོ་དེ། །མ་བཏུལ་འཁོར་བའི་མཐའ་འཕེལ་བས། བདུད་རྣམས་བཏུལ་ན་བསྟན་པ་དར་། །ལས་ངན་འཕྲོ་བཅད་དམྱལ་ཡུན་ཐུང་། །ཐུགས་རྗེས་བཟུང་ན་བསོད་ནམས་ཚང། །སྟོང་གསུམ་མ་ལུས་བཏོན་པ་བས། །འབུམ་གྱི་ཆར་ཡང་མི་ཕོད་གསུངས། །དེ་ནས་སངས་རྒྱས་ཐམས་ཅད་ཀྱིས། །ང་ལ་ཐུལ་ཅིག་པ་རུ་བསྐུལ། །ཁམས་གསུམ་རྡོ་རྗེ་བྱ་སྒྲོན་མངག །དབང་གི་ཁྲོ་བོས་བར་སྣང་དགང་། །བམ་རིལ་ཐོད་པ་མཁར་གྱི་ཕྱི། །བཤུལ་བཤད་འོབས་ཆེན་བྱེད་པའི་བརྒྱད་ཀྱིས་བསྐོར། །སྔོན་དུ་བཤད་པའི་འཁོར་ཚོགས་དང་། །ཁོ་བདག་ལིངས་ལ་ཡོངས་ནས་ནི། །འཁོར་ནི་ཕལ་ཆེར་ལས་ལ་གྲམ། །སྐབས་སུ་དངོས་མིན་སྤྲུལ་པའི་སྲས། །རྡོ་རྗེ་གཞོན་ནུ་སྨེ་བ་བརྩེགས། །མཐིང་ནག་འཇིགས་པའི་ཁྲོ་བོ་ནི། །བླང་དོར་མེད་པའི་མཛད་སྤྱོད་ཀྱིས། །བཤང་བ་ཐམས་ཅད་བདུད་རྩིར་བསྒྱུར། །ཐམས་ཅད་སྟོང་ཉིད་བདུད་རྩི་སྦྱངས། །ཉེ་གནས་བུ་མོ་ལ་སོགས་པ། །མ་ཆགས་ཐབས་ཀྱི་སྦྱོར་བ་ཡིས། །རིགས་དང་མཐུན་པའི་སྲས་དེ་མཐོང་། །དེ་བཞག་གཞན་རྣམས་རིང་དུ་སྤྲས། །ཡེ་ཤེས་སྤྲུལ་པའི་འཁོར་དུ་ལྡན། །འདོད་པའི་དབང་མོ་བསྐམས་མ་ལ། །འདོད་པས་ཞེ་སྡང་ཐེ་ཚོམ་སྐྱེས། །དཔལ་གྱིས་སྲིན་སྐད་གསུངས་བསྒྲགས་པས། །ཐེ་ཚོམ་ཆོད་དེ་སྐུ་ལ་འཁྲིལ། །འཇིག་རྟེན་དྲེགས་པའི་སྲོག་སྔགས་དེ། །ཡེ་ཤེས་ལྷ་ཡི་སྙིང་པོར་བརླབས། །ལྷུམས་སུ་རྡོ་རྗེ་སྲིན་པོ་བཞག །དཔལ་ཆེན་གཤེགས་ནས་ཁོ་འདོམས་པས། །གནས་དང་འཁོར་ཀུན་མེད་བཞིན་འཇིགས། །བདག་གི་དབང་མོ་འཁོར་རྣམས་ཀུན། །སྔོན་དང་མི་འདྲ་ངེས་སྙམ་པས། །ཆགས་པའི་དབང་མོས་འདི་སྐད་བརྗོད། །ཨེ་མ་དཔའ་བོ་སྒེག་པོ་ཁྱོད། །བདག་གི་མངལ་ནི་མི་བདེ་བས། །ཁྱོད་ཀྱི་དངོས་པོ་ཕྱིན་པ་ལས། །འཁོར་གྱི་ནང་དུ་འདི་གསུང་ངམ། །བརྗོད་པས་མདངས་ལ་ཆགས་གྱུར་ཏེ། །དགའ་བའི་ཐབས་ཀྱིས་གཉིས་མེད་འཁྲིལ། །དེ་ནས་པུ་ཏྲ་འཐོན་བྱུང་ནས། །ཁོ་རང་ལྟ་བུའི་རིགས་སུ་བྱུང་། །ནག་པོ་དཔོན་གཡོག་ཡི་རང་དགའ། །མྱུར་བར་པུ་ཏྲ་ལུས་བལྟམ་སྟེ། །སྲིན་སྐད་ཐང་གསུམ་བསྒྲགས་པ་ལས། །དཔལ་གྱི་རྔམ་སྒྲ་དྲག་པོ་དེས། །དྲག་པོ་དྲག་མོ་འཁོར་ཚོགས་བརྒྱལ། །སངས་ནས་བལྟས་པས་ཆ་ལུགས་འགྱུར། །སྔོ་ནག་དབུ་དགུ་བཅོ་བརྒྱད་ཕྱག །སྔོན་དུ་བརྗོད་པ་ཉིད་དུ་གྱུར། །ནག་པོའི་སྟོབས་དང་དབང་ཐང་ཕྲོགས། །དེ་ནས་རླུ་ཏྲ་ནག་པོ་དེས། །རང་གི་ང་རྒྱལ་ཧཱུཾ་སྐད་ཀྱིས། །རང་གི་བདུད་ཀྱི་དམག་ཚོགས་བསྡུས། །འདུ་འདུ་གྲམ་གྲམ་འདི་ལ་ཐུང་། །མཛའ་བཤེས་རྟག་པར་མ་བྱུང་ན། །སྐྱིད་པའི་གྲོགས་ཀྱི་མི་ཕན་པས། །གང་འདིར་ལས་རྣམས་དུས་ལ་བབ། །བརྗོད་བས་བདུད་དམག་བྱེ་བ་འདུས། །མཚོན་ཆའི་དབལ་ནི་སྤྲིན་ལྟར་གཏིབས། །བསོ་དང་ཆོ་ཡི་སྒྲ་བསྒྲགས་ཏེ། །མ་ལ་ཡ་ཡི་རྩེ་ལ་ཆས། །དེ་ནས་རྡོ་རྗེ་རྟ་གདོང་གིས། །རྡོ་རྗེ་མགྲོས་བུའི་སྟངས་སྟབས་མཛད། །གར་དགུའི་འབར་བའི་གླུ་བླངས་པས། །ཁྱོ་ཕོ་སྒྲོལ་ལ་ཆུང་མ་དྲོངས། །ཕྱོགས་རིས་མེད་པའི་སྙིང་རྗེས་བསྐུལ། །རྡོ་རྗེ་རྟ་གདོང་གཟི་བརྗིད་ཀྱིས། །བདུད་དམག་ཐམས་ཅད་ཟིལ་གྱིས་གནོན། །རུ་མཚོན་སྤྲིན་ཕུང་སྟོང་ཉིད་སངས། །མི་སྙན་སྒྲ་རྣམས་སྔགས་སྒྲར་བསྒྱུར། །བདུད་ཀྱི་འཁོར་ཚོགས་ཐམས་ཅད་ཀུན། །རྟ་མགྲིན་དམ་ལ་སྐྱབས་སུ་དོང་། །དེ་ནས་རཱུ་ཏྲ་ཐབས་ཟད་དེ། །རང་གི་རྫུ་འཕྲུལ་སྔགས་ལྔ་ཡིས། །རཱུ་ཏྲ་ལྔ་ཡི་མཐུ་བསྐྱེད་ཀྱང་། །དཔལ་གྱི་དེ་བས་མཐུ་ཆེ་བས། །མཐུ་སྟོབས་མེད་པར་བརྒྱལ་བར་གྱུར། །དཔལ་གྱི་ཐུགས་རྗེའི་གསུང་དུ་བརྗོད། །སྲོག་གི་དབང་པོ་མི་བཟོད་ཀྱང་། །སྔོན་འབྱུང་དུས་ནས་འབྲེལ་པ་ཡིས། །གང་དེར་མདུན་གྱི་ཕྱོགས་ནས་བསྒྲལ། །རྩེ་གསུམ་འབར་བའི་ཕྱག་རྒྱ་བཅས། །རཱུ་ཏྲའི་རི་བོ་བཅོམ་དབང་གིས། །ཕྱག་རྒྱས་རོལ་ཏེ་ཕྱག་དུ་སྦྱངས། །ཐུགས་དམ་དབང་གིས་མཚམས་སྦྱར་ཏེ། །རང་གི་དམ་པ་རྣམ་གཉིས་དང་། །མཐར་ཐུག་མེད་པའི་སངས་རྒྱས་དང་། །དཔག་དུ་མེད་པའི་བྱང་ཆུབ་སེམས། །སྡུག་པོ་བཀོད་པ་མཐོང་བའི་ས། །ཐོག་མ་མེད་པའི་དུས་མཐའ་ཡི། །ཞེན་པའི་མུན་པ་སངས་གྱུར་ཏེ། སྐྱེ་བ་དུས་མཐའ་མེད་རྙེད་ནས། །ལུས་བླངས་ནས་ནི་ཅི་སྤྱད་དྲན། །སྣམ་དུ་བཏོན་ནས་ཞབས་དྲུང་འཁོད། །རབ་ཏུ་དགའ་ཡང་ནོངས་ཚུལ་དུ། །གང་དེར་ཤིན་ཏུ་གདུང་ཞིང་རྨོངས། །ཐུགས་རྗེས་བསྐུལ་ཞིང་འཁོར་འབངས་ཕུལ། །ཀུན་ལ་རང་ཚིག་གསང་དུ་བྱིན། །མནས་པོར་ནས་ནི་སྐབས་སུ་ཡང། །གསང་བའི་སྲོག་སྙིང་བྱིན་གྱིས་བརླབས། །རང་སྟོབས་འགྱོད་པ་དྲག་པོ་དང་། །གཞན་གྱི་སྟོན་པས་སྤྱོ་བས་སྦྱོང་། །རྡོ་རྗེ་ཐེག་པའི་གསང་སྒོར་བཞག །འཁོར་རྣམས་ཀུན་ལའང་དེ་བཞིན་ཏེ། །དབང་བསྐུར་གསང་བའི་མིང་རྣམས་བརྟགས། །བསྐལ་བཟང་བསྟན་པ་རྫོགས་པ་རུ། །དགོངས་པ་མྱ་ངན་འདས་ཀྱི་བར། །འཇིག་རྟེན་ཚུལ་གྱིས་བསྟན་པ་སྲུང་། །འདི་ཉིད་འདས་པའི་འོག་ཏུ་ནི། །ཞིང་ཁམས་ཐལ་བས་ཁེངས་པ་རུ། །ཐལ་བའི་དབང་པོ་དབྱངས་ཞེས་བྱར། །ལུང་བསྟན་ཐོབ་སྟེ་འཚང་རྒྱའོ། །དེ་ཕྱིར་དཔལ་མགོན་ནག་པོ་ཡི། །རབས་རྒྱུད་གཏན་ཚིགས་རྒྱས་པར་བཤད། །ཅེས་གསུངས་སོ། །དཔལ་མགོན་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། །རབས་རྒྱུད་གཏན་ཚིགས་ཀྱི་ལེའུ་སྟེ་སོ་ལྔ་པའོ།། །།དེ་ནས་འཁོར་ལ་རྒྱུད་གཏད་པ་འདི་གསུངས་སོ། །ཨེ་མ་ཧོ་འཁོར་དུ་འདུས་པའི་ཚོགས། །ཆོས་སྐུ་རྣམ་དག་བརྗོད་མེད་པས། །གདུལ་དཀའ་དྲག་པོ་འདུལ་བའི་ཕྱིར། །བདེར་གཤེག་ལོངས་སྤྱོད་རྫོགས་སྐུར་བཞེངས། །སྤྲུལ་པ་གང་ལ་གང་འདུལ་སྟོན། །གསང་སྔགས་ཐུགས་རྗེ་རོལ་པར་ཤར། །རྟགས་དང་ཐུགས་རྗེ་སྦྱིན་བདག་དཔལ། །དེ་ཡི་ཕྲིན་ལས་འགྲོ་བའི་མགོན། །གནས་ལུགས་རྟོགས་པས་འགྱུར་བ་མེད། །ཆོས་ཉིད་ངང་དུ་མཚན་མ་ཡི། །རྣམ་རྟོག་བསྡུས་བཅོམ་དུར་ཁྲོད་ཡིན། །གནས་ལུགས་མངོན་པར་རྫོགས་སངས་རྒྱས། །ཡེ་ཤེས་རོལ་པ་ཅིར་ཡང་འཆང་། །ཞེན་སྣང་རྟོག་པའི་བག་ཆགས་དང་། །ཞིང་བཅུ་གཅོད་པའི་མཚོན་ཆ་ཡིན། །འཁོར་ལོ་རྣམ་པ་གསུམ་ཡིན་ཏེ། །གནས་པ་རྩ་ཡི་ཙཀྲ་དང་། །རྟེན་འབྲེལ་སྲིད་པའི་འཁོར་ལོ་དང་། །ལས་གྲུབ་སྔགས་ཀྱི་འཁོར་ལོའོ། །དང་པོ་བདེ་ཆེན་ལོངས་སྤྱོད་དང་། །ཆོས་དང་སྤྲུལ་པ་སྐྱེ་གནས་ལྔ། །གནས་ལུགས་ཆོས་སྐུའི་འཁོར་ལོའོ། །སེམས་ཀྱིས་དེ་རྟོག་དེ་ཉིད་གྲོལ། །རྟེན་འབྲེལ་སྲིད་པའི་འཁོར་ལོ་ནི། །ནམ་ཟླ་དུས་བཞི་ལོ་ཟླ་ཞག །འཇིག་དང་སྟོང་དང་ཆགས་པ་རྣམས། །སྐྱེ་རྒ་ན་འཆི་བཞི་ལྡན་པས། །མགལ་མེ་ལྟ་བུར་འཁོར་ཞིང་གནས། །ཤིང་རྟའམ་ཟོ་ཆུ་ལྟ་བུའོ། །ལས་གྲུབ་འཁོར་ལོ་གསུམ་ཡིན་ཏེ། །བསྙེན་པ་གནས་འགྱུར་ལྷ་ཡི་འཁོར་ལོ་དང་། །སྒྲུབ་པ་གནས་འགྱུར་སྔགས་ཀྱི་འཁོར་ལོ་དང་། སྦྱོར་བ་རྟེན་འབྲེལ་རྫས་ཀྱི་འཁོར་ལོའོ། །དང་པོ་ལྷར་གསལ་རྩ་བའི་དྲོད་ཐོབ་ཅིང། །དེ་བཞིན་ཉིད་དང་ཕྱག་རྒྱ་དང་། །བྱང་ཆུབ་སེམས་དང་ཚོགས་རྣམས་སོ། །སྔགས་ཀྱི་རྩ་བ་ཡན་ལག་ནི། །བསྙེན་བསྒྲུབ་རྩ་བའི་ལས་སྔགས་སོ། །བཀའ་སྡོད་ལས་དང་གནན་པ་ཡི། །བསྙེན་མཆོད་བསྐང་དང་དམུ་ཐུན་དང་། །དམིགས་པ་རྟེན་གྱི་རྫས་རྣམས་ཏེ། །རང་རང་རྟེན་འབྲེལ་མཐུ་ཡིས་ཀླུས། །དེ་ལྟར་རྣམས་པ་ཀུན་ཚོགས་པས། །ལས་རྣམས་ཐམས་ཅད་གྲུབ་པ་ནི། །ཤ་མ་ཏ་ཡི་འཇིག་རྟེན་ན། །མཚོན་ཆའི་འཁོར་ལོ་ལྟ་བུ་སྟེ། རྒྱུ་དང་རྐྱེན་གྱིས་འཁོར་བར་འགྱུར། །རྒྱུད་ཅེས་བྱ་བར་གང་གསུངས་པ། །རྒྱུད་དང་ཐབས་དང་འབྲས་བུ་དང་། །ལྟ་སྤྱོད་དཀྱིལ་འཁོར་དབང་དམ་དང་། །སྒྲུབ་དང་ཕྱག་རྒྱ་ཟིན་པས་སྔགས། དེ་མཚན་པས་ན་རྒྱུན་མི་འཆད། །བདེ་བར་གཤེགས་པའི་དགོངས་པ་དང་། །རྣལ་འབྱོར་ཤེས་རྒྱུད་འབྲེལ་བས་རྒྱུད། །ཡིད་བཞིན་ནོར་བུ་ལྟ་བུ་འདི། །སྦྱོར་བ་དུ་མ་རྩ་བའི་གནད། །བྱང་ཆུབ་སེམས་དང་ཁྲོ་ཚོགས་དང་། །རིག་འཛིན་ལྔ་དང་མཁའ་འགྲོའི་འཁོར། །གཤིན་རྗེ་བདུད་དང་དམུ་བཙན་རྒྱལ་པོ་དང་། །སྲིན་པོ་དང་ནི་ལྷ་མོ་དང་། །ལྟོ་འཕྱེ་དང་ནི་མི་འམ་ཅི། །གཉན་དང་ས་བདག་འཁོར་སྲུན་གཟའ། །གིང་དང་བྱད་སྟེམས་དྲེགས་པའི་འཁོར། །གསང་བའི་བཀའ་རྒྱུད་རོལ་པ་ལས། །སྒྲུབ་དང་འཆང་དང་གཉེར་བ་དང་། །ཁྲག་གི་གསུམ་པ་གཟུང་བར་བཤད། །རྣལ་འབྱོར་སྒྲུབ་བའི་གྲོས་གྱིས་ཤིག །ང་ཡང་དམ་ལས་མི་གཡེང་སྲུང་། །དེ་ཕྱིར་གསང་བའི་རྒྱུད་དོན་གཏད། །ཅེས་གསུངས་ཏེ་མི་སྣང་བར་གྱུར་ཏོ། །འཁོར་འདུས་པ་ཐམས་ཅད་རྗེས་སུ་ཡི་རངས་ཤིང་མངོན་པར་བསྟོད་དོ། །དཔལ་མགོན་པོ་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་ལས། ལས་གདམས་ཤིང་གཏད་པའི་ལེའུ་སྟེ་སོ་དྲུག་པའོ།། །།དཔལ་མགོན་ནག་པོ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོའི་རྒྱུད་རྫོགས་སོ། །རྒྱ་གར་གྱི་མཁན་པོ་བྲམ་ཟེ་གསལ་བའི་རྒྱན་དང་། །བལ་པོའི་རྒྱལ་པོ་བ་སུ་དྷ་རས་བསྒྱུར་བའོ།། །།