ཆོས་ཐམས་ཅད་རྫོགས་པ་ཆེན་པོ་བྱང་ཆུབ་ཀྱི་སེམས་ཀུན་བྱེད་རྒྱལ་པོའི་འགྲེལ་པ་ཀུན་བཟང་དགོངས་རྒྱན། གཞན་ཕན་འོད་ཟེར།
གླེགས་བམ་དང་པོ།
ས རྦ དྷ རྨ མ ཧཱ ས ནྟི བོ དྷི ཙི ཏྟ ཀུ ལ ཡ རཱ ཛ ཊཱི ཀ ས མ ནྟ ར ཤ ཡཱ ལཾ ཀཱ ར ན མ བི ཧ ར ཏི སྨ།
ཆོས་ཐམས་ཅད་རྫོགས་པ་ཆེན་པོ་བྱང་ཆུབ་ཀྱི་སེམས་ཀུན་བྱེད་རྒྱལ་པོའི་འགྲེལ་པ་ཀུན་བཟང་དགོངས་རྒྱན་ཞེས་བྱ་བ་བཞུགས་སོ། །
ན་མོ་གུ་རུ་ཨརྻ་མཉྫུ་ཤྲཱི་ཡེ། ཤེས་བྱའི་མཁའ་དབྱིངས་སྒྲིབ་པ་མེད་སྤྱན་ཇི་སྙེད་ཇི་བཞིན་གཟིགས་གྱུར་ཅིང་། །ཕན་བདེའི་འོད་ཟེར་ཤིན་ཏུ་མཐའ་ཡས་ས་གསུམ་སྐྱེ་རྒུའི་བླ་མར་གཤེགས། །གདོད་མའི་མགོན་པོ་ཀུན་ཏུ་བཟང་དེ་སྐུ་གསུམ་མཛད་པའི་ཕྲིན་ལས་ཅན། །མ་ལུས་སྲིད་ཞིའི་དཔལ་དུ་གྱུར་ལ་ཀུན་ནས་དགའ་བའི་གཙུག་གིས་མཆོད། །གང་གི་རང་བཞིན་གདོད་ནས་སྤྲོས་བྲལ་ནང་གསལ་ཆོས་སྐུའི་རང་གདངས་ཉིད། །མ་འགགས་ཡེ་ཤེས་ཀུན་ནས་རང་གསལ་ཐུགས་རྗེའི་རོལ་པའི་ཆ་གང་ཞིག །བརྗོད་མེད་བརྗོད་པ་ཀུན་གྱི་གཞིར་གྱུར་བརྗོད་བྲལ་ཨ་ཏིའི་རྒྱུད་རྒྱལ་ཉིད། །ཞུ་དང་སྡུད་པོའི་ཚུལ་དུ་རང་སྣང་སེམས་དཔའ་རྡོ་རྗེ་ཉིད་ལ་འདུད། །དག་པ་གཉིས་ལྡན་ཆོས་སྐུའི་དབྱིངས་ནས་མཁྱེན་བརྩེའི་འོད་ཟེར་སྟོང་འབར་བ། །གདུལ་བྱའི་དཔལ་དུ་འགོག་མེད་འཆར་མཛད་ཐུགས་བསྐྱེད་སྨོན་པའི་རྣམ་འགྲོས་ཅན། །འགྲོ་བའི་ཡིད་ཀྱི་མུན་པ་མ་ལུས་ཅིག་ཅར་སེལ་བའི་རྟ་བདུན་དབང་། །དགའ་རབ་དཔའ་བོ་དགྱེས་པ་རྡོ་རྗེས་བྱང་ཆུབ་བར་དུ་བདག་རྒྱུད་སྐྱོངས། །མཁྱེན་རབ་ཡེ་ཤེས་ཐུགས་ཀྱི་མཁའ་ལ་བརྩེ་བའི་སྤྲིན་ཚོགས་རབ་འཁྲིགས་ཤིང་། །མཐུ་སྟོབས་ནུས་པའི་གློག་གི་ཕྲེང་བས་རྣམ་བཞིའི་ཕྲིན་ལས་རབ་ཏུ་ངོམ། །གསང་ཆེན་དབྱར་རྔའི་སྒྲ་ཆེན་སྒྲོགས་བཞིན་ཕན་བདེའི་གྲུ་ཆར་འབེབ་མཁས་པ། །མཁས་གྲུབ་ཡོངས་ཀྱི་གཙུག་གི་རྒྱན་གཅིག་རྒྱལ་དབང་པདྨས་ཤིས་པ་སྩོལ། །མདོ་རྒྱུད་སྤྱི་དང་ཁྱད་པར་ངེས་གསང་རྫོགས་པ་ཆེ། །གངས་ལྗོངས་སྣང་བའི་དཔལ་དུ་འདྲེན་པའི་ཤིང་རྟ་མཆོག །ཤྲཱི་སེང་བཱི་མ་བཻ་རོ་གཡུ་སྒྲ་སྐ་ཅོག་སོགས། །བསྒྱུར་མཛད་སྤྲུལ་པའི་ལོ་པཎ་རྣམས་ཀྱང་གཙུག་ཏུ་མཆོད། །ཡེ་གྲོལ་ལྟ་བའི་རྩལ་ཆེན་རབ་རྫོགས་པས། །ཐེག་མཆོག་གངས་རིའི་སྤོ་ལ་གནས་བཅས་ཏེ། །རྣམ་དཔྱོད་རིགས་པའི་གཡུ་རལ་སྤྲུགས་མཛད་པ། །སྨྲ་བའི་སེང་གེ་རོང་ཟོམ་ཆེན་པོར་འདུད། །གདོད་མའི་མགོན་པོའི་ཡེ་ཤེས་རང་རྩལ་ཉིད། །ཐུགས་རྗེ་སྤྲུལ་པའི་ངོ་བོར་ཡོངས་ཤར་ནས། །སྒྲིབ་བྲལ་ཆོས་སྐུའི་རང་ཞལ་སྟོན་མཛད་པ། །ཀློང་ཆེན་རབ་འབྱམས་སྙིང་གི་པདྨོར་རོལ། །རབ་འབྱམས་རྩ་གསུམ་རྒྱལ་བའི་སྤྱི་གཟུགས་མཆོག །གང་འདུལ་གདུལ་བྱའི་དཔལ་དུ་ཡོངས་སྣང་བ། །བཀའ་དྲིན་འགྲན་བྲལ་རྩ་བའི་བླ་མ་དེ། །བྱང་ཆུབ་བར་དུ་རིགས་ཀྱི་བདག་པོར་བརྟེན། །ཀུན་ཏུ་བཟང་མོའི་ཡེ་ཤེས་སྒྱུ་འཕྲུལ་གར། །སྲིད་ཞིར་དབང་བསྒྱུར་རྒྱལ་ཀུན་སྐྱེད་པའི་ཡུམ། །ཀ་དག་དབྱིངས་ཀྱི་རྗེ་མོ་རལ་གཅིག་མས། །དེང་འདིར་བཀའ་འདི་བཀྲོལ་ལ་གནང་བ་སྩོལ། །སེམས་ཉིད་རང་བཞིན་གཟོད་ནས་འོད་གསལ་རང་བཞིན་གཞི་ཡི་ཀུན་ཏུ་བཟང་། །མཉམ་ཉིད་དྲི་མེད་ཆོས་སྐུའི་མཁའ་དབྱིངས་སྤྲོས་ཀུན་རབ་ཞིའི་ངང་ཉིད་ལས། །གདངས་ཀྱི་ཡེ་ཤེས་སེམས་དཔའ་རྡོ་རྗེ་ཡུལ་དྲུག་མཛིན་པའི་རྣམ་པར་ཤེས། །གཟུང་དང་འཛིན་པ་གཉིས་སུ་མེད་གང་ཀུན་བྱེད་རྒྱུད་རྒྱལ་གསལ་བར་བྱ། །འདིར་རྒྱུད་ཐམས་ཅད་ཀྱི་རྒྱལ་པོ། ལུང་ཐམས་ཅད་ཀྱི་རྩ་བ། མན་ངག་ཐམས་ཅད་ཀྱི་ཉིང་ཁུ། བསྟན་པ་ཐམས་ཅད་ཀྱི་སྙིང་པོ། ཐེག་པ་ཐམས་ཅད་ཀྱི་ཡང་རྩེ། བཀའ་ཐམས་ཅད་ཀྱི་འགྲེལ་བ། ལྟ་བ་ཐམས་ཅད་ཀྱི་མེ་ལོང་། རྒྱུད་དང་མདོ་སྡེ་ཀུན་གྱི་སྤྱི་འགྲེལ། ཆོས་ཐམས་ཅད་ཀྱི་མདོ། རྒྱལ་བ་ཐམས་ཅད་བསྐྱེད་པར་བྱེད་པའི་ཡུམ། མ་རིག་པའི་མུན་པ་སེལ་བར་བྱེད་པ། ཡེ་ཤེས་ཆེན་པོའི་སྣང་བ་འཆར་བར་བྱེད་པ། ཉོན་མོངས་པའི་ཕྲེང་ཐག་གཅོད་པར་བྱེད་པ། སྡུག་བསྔལ་གྱི་རྒྱ་མཚོ་འདྲལ་བར་བྱེད་པ། མ་བཅོས་དོན་གྱི་ལུང་། སྐལ་ལྡན་ཐམས་ཅད་དུས་གཅིག་ལ་གྲོལ་བར་བྱེད་པའི་རྒྱུད། བྱང་ཆུབ་ཀྱི་སེམས་ཀུན་བྱེད་རྒྱལ་པོ། ལྟ་བ་ནམ་མཁའ་དང་མཉམ་པ། སེམས་ཉིད་བྱ་བཙལ་མེད་པའི་རྒྱུད་ཀྱི་རྒྱལ་པོ་ཆེན་པོ་འདི་འཆད་པར་བྱེད་པ་ལ་གསུམ་སྟེ། བཤད་པ་ལ་འཇུག་པའི་རྒྱུ་དང་། རྒྱུད་དངོས་ཇི་ལྟར་བཤད་པ། ཡོངས་སུ་རྫོགས་པའི་དོན་ནོ། །དང་པོ་ལ་གཉིས་ཏེ། མཚན་གྱི་དོན་དང་། ཕྱག་གི་དོན་ནོ། །དང་པོ་ལ་མཚན་རྒྱ་སྐད་ལྟར་སྨོས་པ་དང་། བོད་སྐད་ལྟར་སྨོས་པ། སྐད་གཉིས་ཤན་སྦྱར་བ། མཚན་གྱི་དོན་བཤད་པ་དང་བཞི་ལས། དང་པོ་ནི། རྒྱ་གར་གྱི་ཡུལ་ན་སྐད་རིག་ཆེན་པོ་མི་འདྲ་བ་བཞི་ཡོད་པ་ལས་ཁྱད་པར་དུ་འཕགས་པ་ལེགས་སྦྱར་སཾ་སྐྲྀ་ཏ་ལྷའི་སྐད་དུ་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཀྱི་མཚན་ལ། སརྦ་དྷརྨ་མ་ཧཱ་སནྟི་བོ་དྷི་ཙི ཏྟ་ཀུ་ལ་ཡ་རཱ་ཛཱ། ཞེས་གསུངས་ལ། གཉིས་པ་དེ་བོད་སྐད་དུ་བསྒྱུར་ན་ཆོས་ཐམས་ཅད་རྫོགས་པ་ཆེན་པོ་བྱང་ཆུབ་ཀྱི་སེམས་ཀུན་བྱེད་རྒྱལ་པོ། ཞེས་གསུངས་ཏེ། གསུམ་པ་སྐད་དེ་གཉིས་ཤན་སྦྱར་ན། སརྦ་དྷརྨ་ནི་ཆོས་ཐམས་ཅད་དང་། དེ་བཞིན་ཏུ་མ་ཧཱ་སནྟི་རྫོགས་པ་ཆེན་པོ། བོ་དྷི་ཙིཏྟ་བྱང་ཆུབ་ཀྱི་སེམས། ཀུ་ལ་ཡ་རཱ་ཛཱ་ཀུན་བྱེད་རྒྱལ་པོ་ཞེས་པའོ། །བཞི་པ་མཚན་དེའི་དོན་ནི། སྤྱིར་མཚན་གྱི་འདོགས་ཚུལ་ལ་ས་ལུ་ལྗོང་པའི་མདོ་ཅེས་པ་ལྟ་བུ་དཔེ་ལ་བཏགས་པ་དང་། ཤེར་ཕྱིན་འབུམ་པ་ལྟ་བུ་ཚད་ཀྱི་སྒོ་ནས་བཏགས་པ་དང་། བློ་གྲོས་རྒྱ་མཚོས་ཞུས་པའི་མདོ་ལྟ་བུ་གང་ཟག་གི་མིང་གིས་བཏགས་པ་དང་། དགེ་བའི་རྩ་བ་ཡོངས་སུ་འཛིན་པའི་མདོ་ཞེས་པ་ལྟ་བུ་བྱེད་ལས་ལས་བཏགས་པ་དང་། ལང་ཀར་གཤེགས་པའི་མདོ་ལྟ་བུ་ཡུལ་གྱི་སྒོ་ནས་བཏགས་པ་དང་། ཡབ་སྲས་མཇལ་བའི་མདོ་ལྟ་བུ་དུས་ཀྱི་སྒོ་ནས་བཏགས་པ་དང་། ཏིང་འཛིན་རྒྱལ་པོའི་མདོ་ལྟ་བུ་དོན་གྱི་སྒོ་ནས་བཏགས་པ་རྣམས་ཡོད་པ་ལས། འདིར་ནི་བརྗོད་བྱའི་དོན་གྱི་སྒོ་ནས་མཚན་བཏགས་པ་སྟེ། འདི་ལྟར་གཞི་ལམ་འབྲས་བུའི་བསྡུས་པའི་ཆོས་ཐམས་ཅད་ད་ལྟའི་རང་སེམས་མ་བཅོས་མཉམ་པ་ཆེན་པོ་ཀ་དག་སྐྱེ་བ་མེད་པ་འདི་ཉིད་ཀྱི་ཀློང་དུ་རང་བྱུང་ལྷུན་གྲུབ་ཀྱི་ཚུལ་དུ་མ་འདྲེས་པར་ཡོངས་སུ་རྫོགས་ཤིང་འདུས་པས་ན་རྫོགས་པ་ཞེས་གསུངས་ཏེ། མདོ་བཅུ་ལས། སྣང་སྲིད་སྣོད་བཅུད་ཐམས་ཅད་དང་། །སངས་རྒྱས་སེམས་ཅད་ཐམས་ཅད་དང་། །བསྟན་པའི་ཐེག་པ་ཐམས་ཅད་ཀུན། །སེམས་ཉིད་རྫོགས་ཆེན་འདི་ལ་འདུས། །ཞེས་དང་། རྡོ་རྗེ་སེམས་དཔའ་སྙིང་གི་མེ་ལོང་ལས། རྫོགས་ཆེན་ཐེག་པའི་ངེས་ཚིག་ནི། རིག་པ་བྱ་བྲལ་ངང་ལ་ཡེ་ཤེས་རྫོགས་པས་རྫོགས། །བསྒོམ་པ་རྟོག་མེད་ངང་ལ་ཡེ་ཤེས་དྲི་མེད་རྫོགས་པས་རྫོགས། །སྤྱོད་པ་བཅོས་མེད་ངང་ལ་ཡེ་ཤེས་བརྡལ་བ་རྫོགས་པས་རྫོགས། །ལྟ་བ་དགག་བསྒྲུབ་མེད་པའི་ངང་ལ་ཡེ་ཤེས་རྟོགས་མེད་རྫོགས་པས་རྫོགས། །འབྲས་བུ་དམིགས་མེད་ངང་ལ་ཡེ་ཤེས་ཉི་ཤུ་རྩ་ལྔ་རྫོགས་པས་རྫོགས། །ཞེས་སོགས་གསུངས་པ་ལྟར་ལ། དེ་ལྟ་བུའི་སེམས་ཉིད་རང་བྱུང་གི་ཡེ་ཤེས་སྲིད་ཞི་ཀུན་ཁྱབ་ཆེན་པོ་འདི་ལས་ཐོབ་བྱའི་འབྲས་བུ་མཐར་ཐུག་པ་གཞན་མེད་པ་དང་ཐེག་པ་ཀུན་གྱི་རྩེ་མོར་གྱུར་པ་ཡིན་པས་ན་ཆེན་པོ་ཞེས་གསུངས་ཏེ། དེ་ཉིད་ལས། ཐེག་པ་ཀུན་གྱི་རྩེ་མོར་གྱུར་པས་ཆེ། །གནས་ལུགས་དོན་ལ་ཡེངས་བ་མེད་པས་ཆེ། །ལྟ་བ་ཀུན་གྱི་རྩེ་མོར་གྱུར་པས་ཆེ། །སྒོམ་པ་ཀུན་གྱི་རྩེ་མོར་གྱུར་པས་ཆེ། །སྤྱོད་པ་ཀུན་གྱི་རྩེ་མོར་གྱུར་པས་ཆེ། །འབྲས་བུ་ཀུན་གྱི་རྩེ་མོར་གྱུར་པས་ཆེ། །འགྱུར་མེད་ངང་ལ་འགག་མེད་རྩོལ་བས་ཆེ། །འཛིན་མེད་ངང་ལ་རྟོག་མེད་གསལ་བས་ཆེ། །ཞེན་མེད་ངང་ལ་ཆགས་མེད་གསལ་བས་ཆེ། །བརྗོད་མེད་ངང་ལ་བདེ་ཆེན་གསལ་བས་ཆེ། །རྣམ་དག་བྱང་ཆུབ་བརྡལ་བའི་སྙིང་པོ་ཡིན་པས་ཆེ། །བྱ་བཙལ་བྲལ་བའི་རིག་པ་དངོས་མེད་ཡིན་པས་ཆེ། །བདེ་ཆེན་ངང་ལས་མི་གཡོ་མཉམ་པར་གནས་པས་ཆེ། །སྙིང་པོའི་དོན་ལ་མི་གཡོ་མཉམ་པར་གནས་པས་ཆེ། །འཛིན་པའི་སྤྱོད་ཡུལ་མ་ཡིན་ཀུན་ལ་ཡོད་པས་ཆེ། །ཚིག་དང་ཡི་གེས་གཏན་ལ་མི་ཕེབ་ཀུན་གྱི་སྙིང་པོ་ཡིན་པས་ཆེ། །ཞེས་པ་དང་། ཐིག་ལེ་ཀུན་གསལ་ལས། རྫོགས་པ་ནི་ལྷག་མ་མ་ལུས་པའོ། །ཆེན་པོ་ནི་མ་བྱས་པ་དང་གོང་ན་མེད་པའོ། །ཞེས་གསུངས་པ་ལྟར་ལ། དེ་ལྟ་བུའི་སྟོང་གསལ་འདུས་མ་བྱས་པའི་སེམས་ཉིད་རང་བྱུང་གི་ཡེ་ཤེས་འདི་ལ་ཡེ་ནས་གཟུང་འཛིན་མཚན་མའི་ཆོས་ཀྱི་མ་གོས་པས་བྱང་བ་དང་། ཡོན་ཏན་ཐམས་ཅད་མ་བཙལ་ལྷུན་གྱིས་གྲུབ་པས་ཆུབ་ཅེས་གསུངས་ཤིང་། ཐུགས་རྗེ་འགག་པ་མེད་པའི་རྩལ་གདངས་སོ་སོ་རང་རིག་པའི་ཡེ་ཤེས་ཀྱི་རྩལ་སྣང་འགགས་མེད་དུ་གསལ་བས་སེམས། ཞེས་གསུངས་ཏེ། ཆོས་དབྱིངས་རིན་པོ་ཆེའི་མཛོད་ལས། རང་བྱུང་ཡེ་ཤེས་གཞི་ཀློང་ཡངས་པ་ལ། །ཡེ་ནས་དྲི་མེད་འཁོར་བས་མ་གོས་བྱང་། །ཡོན་ཏན་ལྷུན་གྲུབ་རྒྱུ་འབྲས་འདས་པས་ཆུབ། །རང་རིག་སྙིང་པོ་འོད་གསལ་དག་པས་སེམས། །ཞེས་གསུངས་སོ། །གནས་ལུགས་རང་བྱུང་གི་ཡེ་ཤེས་དེ་ཉིད་འཁོར་འདས་ཀྱི་ཆོས་མ་ལུས་མི་ལུས་ལུས་པ་མེད་པ་ཀུན་གྱི་བྱེད་པ་པོར་གྱུར་པའམ་འདི་ཉིད་ཀྱི་རྩལ་ལས་ཤར་བའི་མཉམ་པ་ཆེན་པོ་གཅིག་གི་རང་བཞིན་ཡིན་ཞིང་རང་གི་ངོ་བོ་ཡེ་ནས་ལྷུན་གྲུབ་འདུས་མ་བྱས་པ་ཡིན་པས་རྒྱུ་རྐྱེན་གཞན་གང་གིས་ཀྱང་བྱ་མི་དགོས་པར་བྱེད་པའི་མཁན་པོ་ཀུན་ལས་རྒྱལ་པོ་རུ་གྱུར་པ་ཡིན་ཕྱིར་བླང་དོར་འབད་རྩོལ་དང་བྲལ་བར་བསྟན་པ་སྟེ། དེ་ལྟར་དོན་གྱི་སྒོ་ནས་མཚན་སྨོས་པའོ། །དེ་ལྟར་ཡང་རྒྱུད་འདི་ཉིད་ལས། ཇི་ལྟར་སྣང་བའི་ཆོས་རྣམས་ཐམས་ཅད་ཀུན། །མ་ལུས་ཀུན་བྱས་བྱེད་ཅིང་བྱེད་འགྱུར་ཏེ། །ཉིད་ལ་བྱ་མི་དགོས་ཏེ་ལྷུན་གྲུབ་པས། །ཀུན་བྱེད་རྒྱལ་པོ་ཞེས་སུ་བསྟན་པ་ཡིན། །ཞེས་སོ། །དེ་ལྟར་མཚན་བཏགས་ཞིང་ཀླད་དུ་སྨོས་པའི་དགོས་པ་ནི། དབང་པོ་རབ་ཀྱིས་ཆོས་ཐམས་ཅད་ཡེ་ནས་བྱ་བཙལ་མེད་པར་བྱང་ཆུབ་སེམས་ཀྱི་ངོ་བོར་སངས་རྒྱས་པའི་རང་བཞིན་དུ་གོ་ནས་རྒྱུད་དོན་ཡོངས་སུ་རྟོགས་པའི་དགོས་པ་དང་། དབང་པོ་འབྲིང་གིས་དོན་གྱི་ཕྱོགས་ཙམ་རྟོགས་པའི་དགོས་པ་དང་། དབང་པོ་ཐ་མས་ཀྱང་སྨན་སྣོད་ལ་ཁ་བྱང་བཏགས་པ་ལྟར་གླེགས་བམ་བཙལ་སླ་བའི་དགོས་པ་ཡོད་དོ། །གཉིས་པ་ཕྱག་གི་དོན་ནི། དེ་ལ་བཅོམ་ལྡན་འདས་ཞེས་པ་ནི་སྤྱིར་བདུད་བཞི་ལ་སོགས་པ་མི་མཐུན་པའི་ཕྱོགས་ཐམས་ཅད་བཅོམ་པ་ནི་སྤངས་པ་ཕུན་སུམ་ཚོགས་པ་དང་། ལེགས་པའི་ཡོན་ཏན་དྲུག་དང་ལྡན་པ་ནི་རྟོགས་པ་ཕུན་སུམ་ཚོགས་པ་དང་། འཁོར་འདས་དང་རྟག་ཆད་ལ་སོགས་པའི་སྤྲོས་པའི་མཐའ་ཐམས་ཅད་ལས་འདས་པ་ནི་ཞི་བའི་མཚན་ཉིད་ཅན་ཏེ། ཕལ་པོ་ཆེ་ལས། སྲིད་དང་ཞི་ལས་རྣམ་གྲོལ་ཞིང་། །ཡོན་ཏན་རྒྱ་མཚོ་གཉིས་སུ་མེད། །སྤྲོས་པ་ཀུན་ལས་རབ་འདས་པའི། །བཅོམ་ལྡན་འདས་ནི་མཁའ་རབ་ཞི། །ཞེས་གསུངས་ལ། དེ་ལས་ཀྱང་འདིར་ཆོས་སྐུ་ལ་སྦྱར་ན། རིག་པ་བྱང་ཆུབ་ཀྱི་སེམས་སྐྱེ་འགགས་མཚན་མའི་ཆོས་སུ་མ་གྲུབ་པས་སྐྱེ་ཤི་དང་བྲལ་བའི་ཕྱིར་འཆི་བདག་གི་བདུད་བཅོམ། ཡུལ་མེད་ཟང་ཐལ་ཆེན་པོའི་ངོ་བོར་གནས་པས་ལྷ་བུའི་བདུད་བཅོམ། རང་བྱུང་འདུས་མ་བྱས་པའི་བདག་ཉིད་ཡིན་པས་ཕུང་པོའི་བདུད་བཅོམ། ཀ་དག་གཞི་རྩ་དང་བྲལ་བའི་བདག་ཉིད་ཡིན་པས་ཉོན་མོངས་པའི་བདུད་བཅོམ་པ་སྟེ། ཐིག་ལེ་ཀུན་གསལ་ལས། ཆོས་སྐུ་སྐྱེ་མེད་འགགས་པ་མེད་པས་འཆི་བདག་གི་བདུད་བཅོམ། མཚན་མ་མེད་པས་ཕུང་པོའི་བདུད་བཅོམ། དེ་གཉིས་སུ་མེད་པས་ཉོན་མོངས་པའི་བདུད་དང་ལྷའི་བུའི་བདུད་བཅོམ། དེ་ནི་ངང་གིས་བཅོམ་པ་ཡིན་ནོ། །ཞེས་གསུངས་ལ། ལེགས་པའི་ཡོན་ཏན་དྲུག་གི་བདག་ཉིད་སྐུ་ལྔ་ཡེ་ཤེས་ལྔ་ཡི་ངོ་བོར་ཡེ་ནས་བཞུགས་པ་ནི་ལྡན་པའི་དོན་ཏེ། དེ་ཉིད་ལས། ཆོས་སྐུ་ཡོན་ཏན་སྒོ་ཡངས་བས། །ཡེ་ཤེས་ལྔ་དང་སྐུ་ལྔ་ལྡན། །ཞེས་པ་སྟེ། དེ་ཡང་ལེགས་པའི་ཡོན་ཏན་དྲུག་ནི། སམྦུ་ཊ་ལས། དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་ཕུན་སུམ་ཚོགས་པ་སྟེ། །དྲུག་པོ་རྣམས་ལ་ལྡན་ཞེས་བྱ། །ཞེས་པས་ཆོས་ཐམས་ཅད་ལ་དབང་བསྒྱུར་བའི་དབང་ཕྱུག་ནི་ངོ་བོ་ཉིད་ཀྱིས་དག་པ་ཆོས་ཀྱི་སྐུ་དང་ཆོས་དབྱིངས་ཡེ་ཤེས་སོ། །མཚན་དཔེའི་གཟུགས་བཟང་བ་ནི་ལོངས་སྤྱོད་རྫོགས་སྐུ་དང་མེ་ལོང་ཡེ་ཤེས་སོ། །ལེགས་པའི་ཡོན་ཏན་ཀུན་གྱི་དཔལ་དང་ལྡན་པ་ནི་མངོན་པར་བྱང་ཆུབ་པའི་སྐུ་དང་མཉམ་པ་ཉིད་ཀྱི་ཡེ་ཤེས་སོ། །ཕྱོགས་བཅུའི་ཞིང་རྣམས་ཀུན་ཏུ་གྲགས་ཤིང་སྣང་བ་དང་། ཇི་ལྟ་ཇི་སྙེད་མཁྱེན་པའ་ིཡེ་ཤེས་དང་ལྡན་པ་ནི་སྤྲུལ་པའི་སྐུ་དང་སོ་སོར་རྟོགས་པའི་ཡེ་ཤེས་སོ། །འགྲོ་བའི་དོན་ལ་གཡེལ་བ་མེད་པའི་བརྩོན་འགྲུས་ཕུན་སུམ་ཚོགས་པ་ནི་དབྱིངས་ལས་འཕོ་འགྱུར་མེད་པ་མི་འགྱུར་རྡོ་རྗེའི་སྐུ་དང་ཕྲིན་ལས་ཚད་མེད་པས་འགྲོ་དོན་རྩོལ་མེད་དུ་མཛད་པ་བྱ་བ་གྲུབ་པའི་ཡེ་ཤེས་སོ། །འདས་ནི་འཁོར་འདས་གང་གི་ཕྱོགས་སུ་མ་ལྷུང་ཞིང་སྤྲོས་པའི་མཚན་མ་ཀུན་ལས་འདས་པའི་དོན་ཡིན་ཏེ། དེ་ཉིད་ལས། ཆོས་སྐུ་མཐའ་རྣམས་ཀུན་ལས་འདས། །ཞེས་གསུངས་སོ། །ཡང་རྣམ་པ་གཅིག་ཏུ་ན། གནས་ལུགས་ཇི་བཞིན་རྟོགས་པའི་ཤེས་རབ་ཀྱིས་མ་རིག་ལོག་རྟོག་གི་བདུད་བཅོམ་ཞིང་མཁྱེན་པའ་ིཡེ་ཤེས་དང་ལྡན་པ་དང་། གཟུང་འཛིན་རྣམ་རྟོག་གི་མཐའ་ལས་འདས་པས་ན་ཡང་དེ་སྐད་ཅེས་གསུངས་ཏེ། དེ་ཉིད་ལས། རྟོགས་པའི་ཤེས་རབ་ཀྱིས་ལོག་པར་རྟོག་པའི་བདུད་བཅོམ་སྟེ། མཁྱེན་པའི་སྟོབས་དང་ལྡན་པ་སྟེ། གཟུང་འཛིན་གྱི་མཐའ་ལས་འདས་པས་ན་བཅོམ་ལྡན་འདས་སོ། །ཞེས་གསུངས་སོ། །དེ་ལྟར་སྤང་རྟོགས་ཀྱི་ཡོན་ཏན་མཐའ་ཕྱིན་པའི་བདག་ཉིད་ཅན་གདོད་ནས་ཡེ་སངས་རྒྱས་པའི་རང་བཞིན་རིག་པ་བྱང་ཆུབ་ཀྱི་སེམས་དང་པོའི་སངས་རྒྱས་ཀུན་ཏུ་བཟང་པོའམ་འཁོར་འདས་ཀྱི་ཆོས་ཀུན་ལ་དབང་བསྒྱུར་བར་བྱེད་པས་ཀུན་བྱེད་རྒྱལ་པོ་དེ་ལ་རྣམ་སྣང་སྤྲུལ་པའི་ལོ་ཙཱ་ཆེན་པོས་འགྱུར་ལ་བར་ཆད་མེད་ཅིང་མཐར་ཕྱིན་པའི་ཕྱིར་དུ་འཁོར་གསུམ་དམིགས་མཐའ་དང་བྲལ་བས་ཕྱག་འཚལ་ལོ་ཞེས་རྒྱུད་འདི་བསྒྱུར་བའི་ཐོག་མར་འགྱུར་ཕྱག་མཛད་པ་སྟེ། ཆེད་དུ་བརྗོད་པའི་ཚོམས་ལས། བསོད་ནམས་བསགས་པའི་མི་དག་ལ། །གཞན་ལས་གྱུར་པའི་གནོད་པའམ། །ལྷ་འམ་བདུད་ཀྱི་རིགས་རྣམས་ཀྱིས། །བར་ཆད་བྱ་བར་མི་ནུས་སོ། །ཞེས་ཡུལ་ཁྱད་པར་ཅན་ལ་ཕྱག་མཛད་པས་བསོད་ནམས་ཀྱི་ཚོགས་རྫོགས་ཤིང་བསོད་ནམས་དང་ལྡན་པ་ལ་གཞན་གྱིས་བར་ཆད་མི་ནུས་པས་སོ། །གཉིས་པ་ལ་གསུམ་སྟེ། རྩ་རྒྱུད་ཐོས་པའི་ཤེས་རབ་ལ་གདམས་པ་དང་། ཕྱི་མ་བསམ་བྱུང་གི་ཤེས་རབ་ལ་གདམས་པ་དང་། ཕྱི་མའི་ཕྱི་མ་བསྒོམ་བྱུང་གི་ཤེས་རབ་ལ་གདམས་པའོ། །དང་པོ་ལ་གསུམ་སྟེ། གླེང་གཞི་ཕུན་སུམ་ཚོགས་པའི་ཚུལ་གྱིས་རྒྱུད་མདོར་བསྟན་པ་དང་། བསྟན་པ་ཕུན་སུམ་ཚོགས་པའི་ཚུལ་གྱིས་རྒྱས་པར་བཤད་པ་དང་། སྙིང་པོ་ཕུན་སུམ་ཚོགས་པའི་ཚུལ་གྱིས་དོན་བསྡུ་བའོ། །དང་པོ་ལ་གཉིས་ཏེ། གླེང་གཞི་དང་། གླེང་བསླང་བའོ། །དང་པོ་ལ་གཉིས་ཏེ། ཕུན་སུམ་ཚོགས་པ་ལྔ་ཡི་རང་བཞིན་མདོར་བསྟན་པ་དང་། དེའི་བྱེ་བྲག་རྒྱས་པར་བཤད་པའོ། །དང་པོ་ནི། དེ་ལ་འདི་སྐད་ཅེས་སྨོས་པ་ནི་འོག་ནས་འབྱུང་བའི་རྒྱུད་དོན་ཡོངས་སུ་རྫོགས་པ་ལ་གོ་དགོས་པས་ཆོས་ཕུན་སུམ་ཚོགས་པ་བསྟན་ལ། བཤད་པའ་ིཚིག་གིས་སྡུད་པ་པོ་སེམས་དཔའ་རྡོ་རྗེ་ཉིད་སྟོན་པ་ཕུན་སུམ་ཚོགས་པ་ཉིད་ཡིན་པར་ཞལ་གྱིས་བཞེས་པས་སྟོན་འཁོར་གཉིས་ཀ་བསྟན་པ་སྟེ། དེ་ལ་ཐོས་པ་ཞེས་མི་སྨོས་པ་ནི་ཐེག་པ་ཐུན་མོང་པའི་སྐབས་སུ་སྟོན་འཁོར་རྒྱུད་ཐ་དད་དུ་སྣང་བ་ལས་ཁྱད་པར་དུ་འཕགས་པ་འདིར་སྟོན་འཁོར་དབྱེར་མེད་དུ་སྟོན་པའི་ཚིག་ཡིན་པར་སྔོན་གྱི་མཁས་དབང་རིག་འཛིན་གོང་མ་རྣམས་ཀྱིས་གསུངས་པ་ལྟར་འདིར་ཡང་ཡིན་དེ། འོག་མིན་ཆོས་སྐུའི་ཞིང་ཁམས་དེ་ན་བདག་གཞན་ཐ་དད་དུ་ཕྱེ་བ་མེད་པར་ཆོས་ཐམས་ཅད་སྟོན་པ་ཀུན་བྱེད་རྒྱལ་པོའི་ཐུགས་རིག་པ་རང་བྱུང་གི་ཡེ་ཤེས་གཅིག་གི་རང་བཞིན་དུ་བསྟན་པའི་ཕྱིར་ཏེ། འདི་ཉིད་ལས། ང་ནི་ཡེ་ནས་ཀུན་བྱེད་རྒྱལ་པོ་ཡིན། །སྟོན་པ་བསྟན་པ་འཁོར་དུས་ངེས་བྱས་ནས། །སྟོན་པའི་སྟོན་པ་ཡང་ནི་ང་ཡིས་བྱེད། །བསྟན་པ་ང་ཡི་རང་བཞིན་དེ་སྟོན་ལ། །འཁོར་ཡང་ང་ཡི་ངོ་བོ་དེ་བྱུང་ནས། །དུས་གནས་ང་ཡི་རང་བཞིན་དེ་རྒྱུད་ནི། །ཀུན་བྱེད་ང་ཡི་རང་བཞིན་བསྟན་པ་ལས། །ང་མིན་ཆོས་ནི་གཅིག་ཀྱང་བསྟན་པ་མེད། །སེམས་དཔའ་ཆེན་པོ་རྡོ་རྗེ་ཁྱོད་ཉིད་ཀྱང་། །ཀུན་བྱེད་ང་ཡི་རང་བཞིན་བསྟན་པའི་ཕྱིར། །ཁྱོད་ཀྱང་ང་ལས་ང་ཡིས་ཕྱུང་བ་ཡིན། །ཀུན་བྱེད་ང་ནི་ཆོས་ཀྱི་སྙིང་པོར་ཞོག །ཅེས་གསུངས་པ་ལྟར་དང་། དུས་ན་ཞེས་པས་དུས་བཞི་མཉམ་པ་ཆེན་པོ་ཀ་དག་སྐྱེ་བ་མེད་པའི་ངང་ན་འཁོར་འདས་དང་དུས་གསུམ་གྱི་དབྱེ་བ་མེད་པས་འོད་གསལ་བསམ་གྱིས་མི་ཁྱབ་པའི་དུས་ཕུན་སུམ་ཚོགས་པ་བསྟན་ལ། དེ་ལྟར་ཆོས་ཀྱི་སྐུ་ཡི་སྟོན་འཁོར་བསྟན་པ་རྣམས་གང་དུ་སྣང་བའི་གནས་དེ་ཉིད་ཆོས་དབྱིངས་དོན་གྱི་འོག་མིན་ཆེན་པོར་ལྷུན་གྱིས་གྲུབ་པ་ཡིན་པས་ན་གནས་ཕུན་སུམ་ཚོགས་པ་ཉིད་དོན་གྱི་ཤུགས་ལས་བསྟན་པ་སྟེ། དེ་ལྟ་བུའི་ཕུན་སུམ་ཚོགས་པ་ལྔ་དང་ལྡན་པའི་ཆོས་སྐུའི་ཞིང་ཁམས་དེ་ཉིད་ཕྱོགས་ག་ཤེད་ན་གནས་རིས་ཆད་ཅན་དུ་ཅི་ཡང་མེད་པར་ནམ་མཁའི་ཁམས་དང་ཆོས་ཀྱི་དབྱིངས་ཀྱིས་གར་ཁྱབ་པར་ཆོས་སྐུའི་ཞིང་ཁམས་ཀྱིས་ཁྱབ་ཅིང་། ཆོས་སྐུའི་གར་ཁྱབ་པར་ལོངས་སྐུ་དང་སྤྲུལ་སྐུའི་ཞིང་ཁམས་ཀྱང་འགོག་པ་མེད་པས་དཔེར་ན་དུང་ལ་སེར་སྣང་ལྟར་དུ་སེམས་ཅན་རྣམས་ལ་རང་རང་གི་རྟོག་པའི་དབང་གིས་མ་དག་པ་ལྟར་དུ་སྣང་ན་ཡང་དོན་ལ་མ་དག་པའི་ཆོས་སུ་གྲུབ་པ་རྡུལ་ཙམ་ཡང་མེད་པར་སྐུ་གསུམ་རྒྱལ་བའི་ཞིང་ཁམས་ཆེན་པོ་གཅིག་གི་རང་བཞིན་ལས་མ་འདས་པས་ན་ངོ་བོ་ལ་དག་པ་ཉག་གཅིག་གི་རང་བཞིན་ཡིན་ཏེ། འདི་ལྟར་དྲི་མ་མེད་པར་གྲགས་པའི་མདོ་ལས། བཙུན་པ་ཤཱ་རིའི་བུས་སྨྲས་པ། བདག་གིས་ས་ཆེན་པོ་འདི་མཐོ་དམན་དང་གཡང་ས་དང་ལྗན་ལྗིན་གྱིས་གང་བར་མཐོང་ངོ་ཞེས་ཟེར་རོ། །སངས་རྒྱས་མྱ་ངན་མེད་པའི་ཞིང་ནས་འོངས་པའི་ཚངས་པ་རལ་པ་ཅན་གྱིས་སྨྲས་པ། བདག་གིས་ནི་བཅོམ་ལྡན་འདས་ཤཱཀྱ་ཐུབ་པའི་ཞིང་འདི་ཉིད་གཞན་འཕྲུལ་དབང་བྱེད་ཀྱི་ལྷའི་གནས་ཀྱི་བཀོད་པ་ཕུན་སུམ་ཚོགས་པ་བཞིན་ཏུ་ཡོངས་སུ་དག་པར་མཐོང་ངོ་ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་རྣམས་ལ་སངས་རྒྱས་ཀྱི་ཞིང་འདིའི་རང་བཞིན་བསྟན་པར་མཛད་པས། ཐམས་ཅད་ཀྱིས་ཤར་ཕྱོགས་ཀྱི་སངས་རྒྱས་རིན་པོ་ཆེའི་རྒྱན་བཀོད་པའི་ཞིང་ཁམས་བཞིན་ཡོངས་སུ་དག་པར་མཐོང་བར་གྱུར་པ་དེའི་ཚེ། བཅོམ་ལྡན་འདས་ཀྱིས་བཀའ་སྩལ་པ། ངའི་སངས་རྒྱས་ཀྱི་ཞིང་འདི་ནི་རྟག་ཏུ་འདི་འདྲ་སྟེ། ཁྱོད་རྣམས་ཀྱིས་མི་མཐོང་ངོ་། །ཞེས་གསུངས་པ་ལྟར་རོ། །འོན་ཀྱང་གནས་ལུགས་མཐར་ཐུག་པའི་དབང་དུ་ན་དེ་ལྟར་དག་དང་མ་དག་གི་དབྱེ་བ་ཙམ་ཡང་མེད་པར་སྤྲོས་པའི་མཚན་མ་ཐམས་ཅད་ངང་གིས་ཞི་བ་ཆོས་སྐུ་ཐིག་ལེ་ཉག་གཅིག་གིས་རབ་ཏུ་ཕྱེ་བ་ཙམ་ལས་ཅི་ཡང་མེད་དེ། བང་མཛོད་འཕྲུལ་གྱི་ལྡེ་མིག་ལས། རྒྱུ་ཉིད་གསེར་དུ་གཅིག་པ་ལས། །བཟོ་ཡི་ལས་ཀྱིས་བསྒྱུར་བྱས་ཏེ། །ཆོལ་ཟངས་དྲི་སྣོད་བྱས་ཙམ་ན། །གསེར་ཡང་ངན་པའི་རྒྱུ་རུ་སྣང་། །སྐུ་གཟུགས་མཆོད་རྟེན་བྱས་ཙམ་ན། །གསེར་ཡང་བཟང་པོའི་རྫས་སུ་སྣང་། །གསེར་གྱི་རྒྱུ་ལ་བཟང་ངན་མེད། །དེ་བཞིན་ཆོས་ཉིད་རྒྱུད་གཅིག་པས། །རྣམ་རྟོག་འཁྲུལ་པས་བརྟགས་ཙམ་ན། །ཡུལ་ཡང་མ་དག་འཇིག་རྟེན་ཁམས། །ངན་གྲོག་གཡང་ས་ལུང་ཁུང་སྣང་། །ཡེ་ཤེས་ཅན་གྱི་ངོ་གང་ལ། །ཡུལ་ཡང་ཞིང་ཁམས་དག་པ་སྟེ། །བདེ་བ་ཅན་གྱི་གནས་སུ་སྣང་། །ཆོས་ཉིད་རང་གི་ངོ་བོ་ལ། །སྣང་དང་མི་སྣང་གཉིས་སུ་མེད། །ཅེས་གསུངས་སོ། །དེ་ལྟར་འཁོར་འདས་ཀྱི་ཆོས་ཐམས་ཅད་བཟང་ངན་དང་ཐ་དད་དུ་གྲུབ་པ་མེད་པར་སེམས་ཉིད་ཀུན་བྱེད་རྒྱལ་པོ་གཅིག་གི་བདག་ཉིད་ཡིན་པའི་ཕྱིར་ན་ད་ལྟ་སེམས་ཅན་རྣམས་ཀྱི་དབང་པོ་སྒོ་ལྔར་སྣང་བ་འདི་ལས་ཕུན་སུམ་ཚོགས་པ་ལྔ་ཞིང་གཞན་དུ་མེད་པར་ལ་བཟླ་བར་ཡང་གསུངས་ཏེ། ལ་ཟློ་གསང་བའི་འཁོར་ལོ་ལས། སྟོན་པ་དང་ནི་བསྟན་པ་འཁོར་དུས་གནས། །རང་བྱུང་ཆོས་ཀྱི་དབྱིངས་སུ་ལ་བཟླས་པས། །རང་བྱུང་ངོ་བོ་མངོན་དུ་ཕྱུང་བ་ལ། །ཕུན་སུམ་ཚོགས་པ་རྣམ་པ་ལྔ་པོ་ཡང་། །རང་ལ་རྫོགས་ཤིང་རང་ལ་ཚང་བར་སྟོན། །རང་ལ་དམིགས་སུ་མེད་པར་དབྱིངས་སུ་ལ་ཟློ་ཡིན། ཞེས་དང་། མིག་གི་དབང་པོས་གཟུགས་རྣམས་ཅིར་ཡང་སྟོན། །ཀུན་བྱེད་རྒྱལ་པོའི་སྐུ་རུ་བསྟན་པ་ཡིན། །དེ་ལས་གཞན་པའི་སྟོན་པ་དམིགས་སུ་མེད། །དེ་ལས་སྟོན་པ་རང་ལ་ཚང་ཞེས་གསུངས། །ལྕེས་ནི་སྣང་སྲིད་ཚིག་དང་ཡི་གེར་བརྗོད། །སྒྲ་རྣམས་བསྒྲགས་པ་སྟོན་པའི་གསུངས་ཡིན་པས། །བསྟན་པའི་ཆོས་ཞེས་ཀུན་ལ་གྲགས་པ་ཡིན། །རྣ་བས་སྒྲ་རྣམས་ཇི་ལྟར་གསན་པ་ཡང་། །ཀུན་བྱེད་རྒྱལ་པོའི་སྒྲ་བསྒྲགས་གསན་པ་ལས། །དེ་ལས་གཞན་པའི་སྒྲ་ནི་ཐོས་པ་མེད། །དེ་ཐོས་འཁོར་གྱི་དམ་པར་བྱུང་བ་ཡིན། །དྲི་རྣམས་སྣ་ཚོགས་ཇི་ལྟར་བྱུང་བ་ཡང་། །སྣ་ཡི་དབང་པོ་གཅིག་ལས་མ་འདས་པས། །དབྱེར་མེད་དུས་གསུམ་གཅིག་ཏུ་བསྟན་པ་ཡིན། །མིག་དང་རྣ་བ་སྣ་དང་ལྕེ་ལ་སོགས། །ཐམས་ཅད་ལུས་ལ་གནས་པས་གནས་སུ་བསྟན། །ལུས་གནས་པ་ལ་ཀུན་ཀྱང་གནས་པ་ལས། །ལུས་མི་གནས་ན་སུ་ཡང་གནས་པ་མེད། །དེ་བས་ལུས་འདི་གནས་སུ་བསྟན་པ་ཡིན། །ཞེས་གསུངས་པ་ལྟར་རོ། །གཉིས་པ་ལ་གཉིས་ཏེ། གནས་དང་འཁོར་ཕུན་སུམ་ཚོགས་པའོ། །དང་པོ་ནི། དེ་ལ་སྤྱིར་འོག་མིན་ཞེས་པའི་དོན་ནི་དེ་ཉིད་ལས་གོང་ན་གཞན་མེད་པའམ་འོག་ཏུ་མ་གྱུར་བའི་དོན་ཡིན་ལ། དེ་ལ་བྱེ་བྲག་ཏུ་དབྱེ་ན། ཆོས་དབྱིངས་དོན་གྱི་འོག་མིན་དང་། རིག་པའི་འོག་མིན་དང་། རྟགས་ཀྱི་འོག་མིན་དང་། གསང་བའི་འོག་མིན་དང་། རྟོག་པའི་འོག་མིན་དང་། འཇིག་རྟེན་གནས་ཀྱི་འོག་མིན་དང་དྲུག་ཏུ་གསུངས་པ་ལས་འདི་ནི་སྔ་མ་གཉིས་ཏེ། ཆོས་དབྱིངས་མཛོད་འགྲེལ་ལས། ཆོས་སྐུའི་གནས་བསམ་བརྗོད་ལས་འདས་པ་ཆོས་དབྱིངས་དོན་གྱི་འོག་མིན་ནོ། །ཞེས་དང་། གསང་འགྲེལ་ཕྱོགས་བཅུ་མུན་སེལ་ལས། རིག་པའི་འོག་མིན་དངོས་པོའི་གནས་ལུགས་ཇི་ལྟ་བ་བཞིན་རྟོགས་པའི་རིག་པའི་ཡེ་ཤེས་ཏེ། དག་པ་གཉིས་ལྡན་གྱི་ཆོས་སྐུའི་བཞུགས་གནས་ཡིན་ཞིང་འདིའི་གོང་ན་རིག་པ་གཞན་མེད་པའི་ཕྱིར་རོ། །ཞེས་གསུངས་པ་ལྟར་ལ། དེ་ཡང་ཡུལ་ཡུལ་ཅན་ཐ་དད་དུ་གྲུབ་པ་མེད་པར་ཡེ་ནས་དབྱིངས་དང་ཡེ་ཤེས་དབྱེར་མེད་པའི་གནས་ལུགས་དེ་ཉིད་གཟུང་འཛིན་མཚན་མའི་སྤྲོས་པ་གང་གི་ཡང་འོག་ཏུ་མ་གྱུར་པས་ན་འོག་མིན། རྒྱལ་བ་ཐམས་ཅད་གནས་ལུགས་དེ་ཉིད་ཀྱི་ངང་ལས་སྐད་ཅིག་ཀྱང་མི་གཡོ་བར་བཞུགས་པས་གནས་ཞེས་གསུངས་སོ། །ཆོས་ཐམས་ཅད་ཀྱི་གནས་ལུགས་སྤྲོས་བྲལ་རང་བྱུང་གི་ཡེ་ཤེས་ཆོས་ཉིད་སྐྱེ་བ་མེད་པ་དེ་ཉིད་ཀྱི་དོན་ཇི་ལྟ་བ་བཞིན་དུ་རྟོགས་པ་ལས་དུས་གསུམ་གྱི་རྒྱལ་བ་ཐམས་ཅད་འབྱུང་བའ་ིགནས་སུ་གྱུར་པས་ན་དུས་གསུམ་རྒྱལ་བའི་བསྐྱེད་ཡུམ་སྟོང་ཆེན་རྡོ་རྗེ་བཙུན་མོའི་མཁའ་ཡང་དེ་ཉིད་ཡིན་ལ། ཇི་ལྟར་སྣང་བའི་འཁོར་འདས་ཀྱི་ཆོས་ཐམས་ཅད་འབྱུང་ཡང་ཆོས་ཉིད་སྐྱེ་བ་མེད་པ་དེ་ཉིད་ཀྱི་ངང་ལས་འབྱུང་ཞིང་གནས་ཀྱང་དེའི་ངང་ལས་འདའ་བ་མེད་པར་གནས་པ་དང་། གྲོལ་ཀྱང་དེའི་ངང་དུ་གྲོལ་བས་དབྱིངས་ཉིད་ཀྱི་ཀློང་ཞེས་གསུངས་ཏེ། ཆོས་དབྱིངས་མཛོད་ལས། མཉམ་ཉིད་གཅིག་ལ་ཅིར་སྣང་འབྱུང་བས་དབྱིངས། །ཡོན་ཏན་ཐམས་ཅད་བསྐྱེད་པར་བྱེད་པས་གཞི། །ཐམས་ཅད་བྱ་བྱེད་མེད་པར་གྲོལ་བས་ཀློང་། །ཀུན་འབྱུང་སྙིང་པོར་ཤར་བས་བྱང་ཆུབ་སེམས། །མཁའ་འདྲ་གདོད་ནས་དག་པ་ཤེས་པར་བྱ། །ཞེས་པ་ལྟར་རོ། །དེས་ན་དེ་ལྟ་བུའི་ཆོས་དབྱིངས་དོན་གྱི་འོག་མིན་ཆེན་པོ་དེ་ཉིད་སེམས་ཉིད་རང་བྱུང་གི་ཡེ་ཤེས་ཆོས་སྐུ་ཀུན་བྱེད་རྒྱལ་པོ་ཉིད་ཀྱི་བཞུགས་གནས་ཡིན་པར་གསུངས་ཏེ། རྒྱུད་འདི་ཉིད་ལས། སྟོན་པ་ཆོས་སྐུའི་གནས་ནི་འདི་ལྟ་སྟེ། །འོག་མིན་ཆོས་ཀྱི་དབྱིངས་ཀྱི་ཕོ་བྲང་སྟེ། །ཡང་དག་དོན་གྱི་འོག་མིན་དེ་རུ་བཤད། །ཅེས་གསུངས་པ་དེ་ལྟ་བུའི་ཞིང་ཁམས་དེ་ན་ཡེ་ཤེས་རང་སྣང་བ་ལ་ཆགས་ཐོག་གི་སྒྲིབ་པ་མི་མངའ་བའི་འོད་གསལ་བའི་གཞལ་ཡས་ཁང་ན་ཞེས་འདིར་སངས་རྒྱས་ཀྱི་རང་སྣང་ཉག་གཅིག་ཡིན་པས་དེ་ལ་གཟིགས་བྱ་གཟིགས་བྱེད་སོགས་གཉིས་ཆོས་གང་ཡང་མི་མངའ་བས་དཀྱིལ་འཁོར་གྱི་དབྱིབས་དང་བཀོད་པ་རྒྱན་དང་ཁ་དོག་ལ་སོགས་པ་མཚན་མ་རིས་ཆད་ཅན་དུ་སྣང་བ་ཡང་མེད་མོད། འོན་ཀྱང་སེམས་ཉིད་རང་བཞིན་གྱིས་རྣམ་པར་དག་པ་ཆོས་ཉིད་བདེ་བར་གཤེགས་པའི་སྙིང་པོའི་རྩལ་ལས་རང་ཤར་བའ ི་འོད་གསལ་ལྷུན་གྲུབ་ཀྱི་བཀོད་པ་ཚད་མེད་པས་བརྒྱན་པའི་གཞལ་མེད་ཁང་ན་སྟོན་འཁོར་ཐམས་ཅད་སྣང་ཆ་མ་འདྲེས་པར་བཞུགས་ཡོད་པར་ཡང་གསུངས་ཏེ། རྫོགས་པ་ཆེན་པོ་བཀྲ་ཤིས་མི་འགྱུར་བའི་རྒྱུད་ལས། ཆོས་ཀྱི་དབྱིངས་ཀྱི་ངང་དཔེ་ལས། བདེ་བར་གཤེགས་པ་བཅོམ་ལྡན་འདས། །སངས་རྒྱས་ཀུན་ཏུ་བཟང་པོ་དཔལ། །རྡོ་རྗེ་སྐུ་གསུང་ཐུགས་ཀྱི་བདག །བདེ་ཆེན་ལྷུན་གྱིས་རྫོགས་པ་ཡིས། །ཕྱོགས་དུས་བདེ་གཤེགས་ཀུན་བདག་ཉིད། །དཀྱིལ་འཁོར་ཆེན་པོས་མཛེས་པར་བརྒྱན། །སྣང་བ་རྣམ་པར་འཕྲུལ་བ་ཡི། །མ་འགགས་ཆེ་བར་རབ་ཏུ་བཀོད། །དཀྱིལ་འཁོར་ཀུན་འབྱུང་བཟང་མོའི་མཁའ། །ཀུན་བཟང་ཆོ་འཕྲུལ་མ་འགགས་པར། །སྣ་ཚོགས་ཁ་དོག་རྣམ་གསལ་ཞིང་། །སྣ་ཚོགས་དབྱིབས་བརྒྱན་ཐ་དད་པའི། །སོ་སོའི་བྱ་རྩལ་འགགས་མེད་ཆོས། །སྒྲིབ་མེད་ནོར་བུའི་མདངས་ལྟ་བུ། །ཞེས་དང་། གཏིང་རྫོགས་ཀྱི་རྒྱུད་ལས། བཅོམ་ལྡན་འདས་དཔལ་ཀུན་རིག་རྒྱལ་པོ་སྟེ། །རང་བྱུང་སེམས་ལ་ངོ་བོ་ཉིད་ཀྱི་སྐུ། །དེ་ཉིད་ཆོས་སྐུ་སྟོན་པ་ཀུན་ཏུ་བཟང་། །འོག་མིན་བདེ་ཆེན་གནས་མཆོག་ཆོས་ཀྱི་དབྱིངས། །ཕྱི་ནང་མེད་པར་མཛེས་ཤིང་འོད་གསལ་བའི། །ཡིད་བཞིན་རྒྱན་གྱི་སྤྲས་ཤིང་བལྟ་ན་སྡུག །ཡངས་དོག་མེད་པའི་གཞལ་ཡས་ཁང་ན་བཞུགས། །ཞེས་གསུངས་པ་དེས་ན་ཚུར་མཐོང་གི་བློས་མཐའ་གཅིག་ཏུ་གཞལ་བའི་ཡུལ་ལས་འདས་པའོ། །གཉིས་པ་འཁོར་ཕུན་སུམ་ཚོགས་པ་ལ་གསུམ་སྟེ། སྣང་སྲིད་གདོད་ནས་དག་པ་སྐུ་གསུམ་གྱི་འཁོར་དང་། ལམ་མངོན་པར་སྣང་བ་རྣལ་འབྱོར་བཞིའི་འཁོར་དང་། འབྲས་བུ་གཞི་ཐོག་ཏུ་གྲོལ་བ་དུས་གསུམ་སངས་རྒྱས་ཀྱི་འཁོར་རོ། །དང་པོ་ལ་གསུམ་སྟེ། མདོར་བསྟན་པ་དང་། རྒྱས་པར་བཤད་པ། དོན་བསྡུ་བའོ། །དང་པོ་ནི། དེ་ལྟ་བུའི་ཆོས་དབྱིངས་དོན་གྱི་འོག་མིན་ན་བཞུགས་པའི་སྐུ་གསུམ་གྱི་རྒྱལ་བ་མ་ལུས་པའི་སྟོན་པ་རང་བྱུང་གི་སངས་རྒྱས་ཀུན་བྱེད་རྒྱལ་པོ་ཉིད་ལ། རང་སྣང་མ་འགགས་པའི་རྩལ་ལས་རང་ཤར་བའི་འཁོར་གྱི་ཚོགས་ནི་སྟོན་པ་བྱང་ཆུབ་ཀྱི་སེམས་ཉིད་ཀྱི་རང་བཞིན་གྱི་འཁོར་ཆོས་ཀྱི་སྐུ་ཞེས་བྱ་བ་དང་། ཉིད་ཀྱི་ངོ་བོ་ཉིད་ཀྱི་འཁོར་ལོངས་སྤྱོད་རྫོགས་པའི་སྐུ་ཞེས་བྱ་བ་དང་། ཉིད་ཀྱི་ཐུགས་རྗེ་ཡེ་ཤེས་ཀྱི་འཁོར་སྤྲུལ་པའི་སྐུ་ཞེས་བྱ་བ་སྟེ། དེ་ལྟར་སྟོན་པ་ཉིད་ཀྱི་ཐུགས་རིག་པ་རང་བྱུང་གི་རྩལ་ལས་མངོན་དུ་ཕྱུང་བའམ་མངོན་དུ་སྣང་བའི་འཁོར་སྐུ་གསུམ་པོ་ནི་འཆད་འགྱུར་འདི་ལྟ་སྟེ་ཞེས་སོ། །གཉིས་པ་ལ་གསུམ་སྟེ། རང་བཞིན་གདོད་ནས་དག་པ་སྟོང་པ་ཉིད་ཆོས་སྐུའི་འཁོར་དང་། ངོ་བོ་འབྱུང་བ་ལྔར་སྣང་བ་གསལ་སྟོང་ལོངས་སྤྱོད་རྫོགས་པའི་སྐུའི་འཁོར་དང་། ཐུགས་རྗེ་རིག་པའི་ཡེ་ཤེས་ཁམས་གསུམ་སེམས་ཅན་དུ་སྣང་བ་སྤྲུལ་སྐུའི་འཁོར་རོ། །དང་པོ་ནི། དེ་ལ་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ཉིད་ཀྱི་གནས་ལུགས་སམ་རང་བཞིན་ཡོད་མེད་དང་རྟག་ཆད་སྐྱེ་འགག་ལ་སོགས་པའི་སྤྲོས་པ་ཐམས་ཅད་དང་བྲལ་བ་རྣམ་ཀུན་མཆོག་ལྡན་གྱི་སྟོང་པ་ཉིད་ཀྱི་འཁོར་ནི་ཆོས་ཀྱི་སྐུ་ཞེས་བྱ་བའི་འཁོར་དང་། ཞེས་འདིར་རང་བཞིན་སྟོང་པ་དང་ངོ་བོ་གསལ་བའི་ཆ་ལ་བཞག་པའི་ཚུལ་ནི། གནས་ལུགས་རིན་པོ་ཆེའི་མཛོད་ལས། རང་བཞིན་སྟོང་ངོ་བོ་གསལ་བ་ནི་གཤིས་དང་དེའི་སྙིང་པོར་དབྱེ་བའི་སྐབས་ཡིན་ལ། ངོ་བོ་སྟོང་རང་བཞིན་གསལ་བ་ནི་དབྱིངས་དང་དབྱིངས་ཀྱི་སྙིང་པོ་སྟོན་པར་ཕྱེ་ཡང་། དོན་ལ་སྟོང་པ་ཆོས་སྐུ། གསལ་བ་ལོངས་སྐུ། འཆར་ཚུལ་སྤྲུལ་སྐུར་གཅིག་པ་ཡིན་ནོ། །ཞེས་གསུངས་པ་ལྟར་ཤེས་པར་བྱའོ། །གཉིས་པ་ནི། བྱང་ཆུབ་ཀྱི་སེམས 
་ཉིད་ཀྱི་ངོ་བོ་སྣང་སྲིད་དག་པ་ཆེན་པོར་རང་ཤར་བ་ནི་རང་ལས་ཤར་བའི་སྣང་བ་ལ་རང་གི་ལོངས་སྤྱོད་པས་ལོངས་སྤྱོད་རྫོགས་པའི་སྐུའི་འཁོར་དུ་བཞག་པ་སྟེ། དེ་ཡང་སྙིང་པོ་རང་བྱུང་གི་ཡེ་ཤེས་སྟོན་པ་ཀུན་བྱེད་ཉིད་ཀྱི་ངོ་བོའི་འཁོར་ལོངས་སྤྱོད་རྫོགས་པའི་སྐུ་སྲ་ཞིང་འཐས་པའི་མཚན་ཉིད་དང་ལྡན་པས་ཐམས་ཅད་བརྟེན་པའི་དོན་བྱེད་པ ས་ཞེས་བྱ་བའི་འཁོར་དང་། ཉིད་ཀྱི་ངོ་བོའི་འཁོར་ལོངས་སྤྱོད་རྫོགས་པའི་སྐུ་རླན་ཞིང་གཤེར་བའི་མཚན་ཉིད་དང་ལྡན་པས་ཐམས་ཅད་སྡུད་པའི་དོན་བྱེད་པ་ཆུ་ཞེས་བྱ་བའི་འཁོར་དང་། ཉིད་ཀྱི་ངོ་བོའི་འཁོར་ལོངས་སྤྱོད་རྫོགས་པའི་སྐུ་ཚ་ཞིང་བསྲེག་པའི་མཚན་ཉིད་དང་ལྡན་པས་ཐམས་ཅད་སྨིན་པའི་དོན་བྱེད་པ་མེ་ཞེས་བྱ་བའི་འཁོར་དང་། ཉིད་ཀྱི་ངོ་བོའི་འཁོར་ལོངས་སྤྱོད་རྫོགས་པའི་སྐུ་ཡང་ཞིང་གཡོ་བའི་མཚན་ཉིད་དང་ལྡན་པས་ཐམས་ཅད་འདེགས་པའི་དོན་བྱེད་པ་རླུང་ཞེས་བྱ་བའི་འཁོར་དང་། ཉིད་ཀྱི་ངོ་བོའི་འཁོར་ལོངས་སྤྱོད་རྫོགས་པའི་སྐུ་ཀུན་ལ་ཁྱབ་ཅིང་ཐོགས་རེག་མེད་པའི་མཚན་ཉིད་དང་ལྡན་པས་ཐམས་ཅད་ལ་གོ་འབྱེད་པའི་དོན་བྱེད་པ་ནམ་མཁའ་ཞེས་བྱ་བའི་འཁོར་དང་ལྔ་པོ་དེ་ནི་བྱང་ཆུབ་སེམས་ཀྱི་ངོ་བོ་རྒྱལ་བ་ལོངས་སྤྱོད་རྫོགས་པའི་སྐུར་ཡེ་ནས་སངས་རྒྱས་པ་ཡིན་པར་གསུངས་སྟེ། མདོ་བཅུ་ལས། སྣང་བའི་ཆོས་དང་སྲིད་པའི་ཆོས། །དེ་ཡང་སྣང་བའི་འབྱུང་ཆེན་ལྔ། །ནམ་མཁའ་སྣང་བྱེད་ཁྱབ་པ་སྟེ། །སེམས་ཉིད་མ་བསྒྲིབ་ཀུན་ལ་ཁྱབ། །དེ་བས་ནམ་མཁའ་བྱང་ཆུབ་སེམས། །སྣང་བྱེད་ཁྱབ་པས་མངོན་སངས་རྒྱས། །འདེགས་པར་བྱེད་པའི་འབྱུང་བ་རླུང་། །བྱང་ཆུབ་སེམས་ཀྱི་ཡེ་ཤེས་རླུང་། །ཡེ་ཤེས་རླུང་གི་ཀུན་འདེགས་པས། །བྱང་ཆུབ་སེམས་སུ་མངོན་སངས་རྒྱས། །ཐམས་ཅད་སྡུད་པའི་འབྱུང་བ་ཆུ། །ཡེ་ཤེས་ཐུགས་རྗེའི་རླན་གྱིས་སྡུད། །དེ་བས་བྱང་ཆུབ་སེམས་ཀྱི་ཆུ། །བྱང་ཆུབ་སེམས་སུ་མངོན་སངས་རྒྱས། །མངོན་སུམ་སྣང་བ་སྲ་བྱེད་པ། །ཐམས་ཅད་འདེགས་པའི་བྱང་ཆུབ་སེམས། །དེ་བས་སེམས་ཀྱི་ས་དེ་ལ། །བྱང་ཆུབ་སེམས་སུ་མངོན་སངས་རྒྱས། །ཐམས་ཅད་དྲོད་སྙོམ་ཚ་བའི་མེ། །པདྨ་རྣམ་དག་ཡེ་ཤེས་དེ། །དེ་བས་སེམས་ཉིད་རྣམ་དག་པས། །བྱང་ཆུབ་སེམས་སུ་མངོན་སངས་རྒྱས། །འབྱུང་ཆེན་ལྔ་ཡི་སངས་རྒྱས་ལྔ། །བྱང་ཆུབ་སེམས་སུ་མངོན་སངས་རྒྱས། །ཞེས་གསུངས་པ་ལྟར་རོ། །གསུམ་པ་ནི། གོང་དུ་བསྟན་པའི་འཁོར་དེ་དག་ལས་གཞན་ཡང་སེམས་ཉིད་རང་བྱུང་གི་རོལ་པ་ཐུགས་རྗེ་འགྱུར་བ་མེད་པའི་ཡེ་ཤེས་ཀྱི་རྣམ་འཕྲུལ་མངོན་དུ་ཕྱུང་བའི་སྤྲུལ་པའི་འཁོར་ནི་འདི་ལྟ་སྟེ། འདོད་པའི་འདོད་ཆགས་དང་ལྡན་པས་འདོད་པའི་ཁམས་ཀྱི་གནས་རིས་ཉི་ཤུའི་སེམས་ཅན་ཞེས་བྱ་བའི་འཁོར་དང་། བསམ་གཏན་གྱི་བདེ་བ་དང་ལྡན་པའི་དངས་མ་འོད་ཀྱི་ལུས་དང་ལྡན་པས་གཟུགས་ཀྱི་ཁམས་ཀྱི་གནས་རིས་བཅུ་བདུན་གྱི་སེམས་ཅན་ཞེས་བྱ་བའི་འཁོར་དང་། གནས་གཟུགས་རག་པ་དང་བྲལ་བས་གཟུགས་མེད་པའི་ཁམས་ཀྱི་སྐྱེ་མཆེད་མུ་བཞིའི་སེམས་ཅན་ཞེས་བྱ་བའི་འཁོར་དང་། གསུམ་པོ་དེ་ནི་སྤྲུལ་སྐུའི་འཁོར་ཡིན་ནོ། །འདི་ལྟར་ཁམས་གསུམ་ན་འཁོར་བའི་སེམས་ཅན་རང་རྒྱུད་པ་དེ་དག་སངས་རྒྱས་རང་སྣང་གི་འཁོར་དུ་ཇི་སྟར་འཐད་སྙམ་ན། འདིར་ནི་འཁོར་འདས་ཀྱི་ཆོས་ཐམས་ཅད་ལ་བཟང་ངན་གཉིས་སུ་མེད་པར་ཀུན་བྱེད་བྱང་ཆུབ་སེམས་ཀྱི་རོལ་རྩལ་མཉམ་པ་ཆེན་པོ་གཅིག་གི་རང་བཞིན་ཡིན་པས་ཆོས་དབྱིངས་དོན་གྱི་འོག་མིན་ན་ཆོས་སྐུ་གདོད་མའི་མགོན་པོ་དང་འབྱེད་པ་མེད་པར་ཐབས་གཅིག་ཏུ་བཞུགས་པ་ཡིན་པར་གསུངས་ཏེ། དེ་ཉིད་ལས། འོག་མིན་ཆོས་ཉིད་ཀྱི་མཁའ། དབྱིངས་ཉིད་ཀྱི་ཀློང་། ཆོས་ཉིད་ཀྱི་གནས། རང་བྱུང་མ་བསྒྲིབས་པའི་གཞལ་ཡས་ཁང་ན་དུས་གསུམ་གཅིག་པའི་སངས་རྒྱས་དང་། མི་སྐྱེ་ལམ་ལ་བལྟ་བའི་རྣལ་འབྱོར་པ་རྣམས་དང་། ས་ལ་གནས་པའི་བྱང་ཆུབ་སེམས་དཔའ་རྣམས་དང་། ངེས་པ་ཐོབ་པ་རྣམས་དང་། སྙིང་པོས་བསྡུས་པའི་སྲིད་པ་གསུམ་ཡན་ཆད། འབྱེད་པ་མི་མངའ་བའི་ཐུགས་རྗེའི་དབང་གིས་ཐབས་གཅིག་གོ། །ཞེས་གསུངས་ལ། དེ་བཞིན་དུ་ཁམས་གསུམ་པོ་འདི་ཉིད་ཀུན་བྱེད་བྱང་ཆུབ་སེམས་ཀྱི་སྐུ་གསུང་ཐུགས་སུ་སངས་རྒྱས་པར་ཡང་གསུངས་ཏེ། དེ་ལས། ཁམས་གསུམ་གནས་ཀྱང་འདི་འདྲ་སྟེ། །འདོད་པའི་ཁམས་ནི་མ་རིག་པ། །ཕྱེ་བ་མེད་པར་ཀུན་ལ་རྨོངས། །མི་རྟོག་གཏི་མུག་ཆོས་ཀྱི་སྐུ། །གཟུགས་ཀྱི་ཁམས་ནི་ཆགས་པའི་གནས། །ང་རྒྱལ་ཆགས་པ་མངོན་གྲུབ་པས། །གཟུགས་ལ་ང་རྒྱལ་བལྟ་མི་ངོམ། །ལྟུང་བ་ཆགས་མེད་ཡེ་ཤེས་སྐུ། །གཟུགས་མེད་ཁམས་ནི་དངོས་མ་གྲུབ། །ཡིད་ཡུལ་ཆོས་ལ་མུ་བཞི་བལྟ། །གཟུང་འཛིན་མེད་པར་རིག་པའི་ཆོས། །མིང་དང་མཚན་མའི་ཡུལ་འདས་ཐུགས། །དེ་བས་སྣང་སྲིད་སྣོད་བཅུད་ཀུན། །བྱང་ཆུབ་སྐུ་གསུང་ཐུགས་སུ་འདུས། །ཞེས་གསུངས་པ་དེས་ན་བཟང་ངན་བླང་དོར་དུ་བསྟན་པ་ཐམས་ཅད་ཐེག་པ་འོག་མའི་ལུགས་ཡིན་པས་འདིར་རྫོགས་པ་ཆེན་པོ་ཨ་ཏི་ཡོ་ག་ནི་དེ་ལས་ཁྱད་པར་དུ་འཕགས་སོ། །གཉིས་པ་རྣལ་འབྱོར་བཞིའི་འཁོར་ནི། བཞི་རང་བཞིན་གྱིས་རྣམ་པར་དག་པའི་འཁོར་དེ་ལས་གཞན་ཡང་ལམ་མངོན་པར་སྣང་བའི་འཁོར་ནི་འདི་ལྟར་ཆོས་ཐམས་ཅད་གདོད་ནས་སྤྲོས་བྲལ་རང་བྱུང་གི་ཡེ་ཤེས་ཀྱི་རང་བཞིན་ཀུན་བྱེད་བྱང་ཆུབ་ཀྱི་སེམས་ཉིད་ཀྱི་རང་བཞིན་དམིགས་བསམ་བརྗོད་བྲལ་ཐམས་ཅད་དང་བྲལ་བ་ལ་བལྟ་བྱ་བ་བལྟ་བྱེད་གཉིས་སུ་གྲུབ་པ་མེད་ཀྱང་གདུལ་བྱའི་རིམ་པས་དེ་ལ་ལྟ་བའི་འཁོར་རྣམ་པ་བཞི་ནི་འདི་ལྟ་སྟེ། ཐེག་པ་ཐམས་ཅད་ཀྱི་རྩེ་མོར་གྱུར་ཅིང་མཚན་མ་མེད་པའི་རྫོགས་རིམ་མཐར་ཐུག་པ་ཡིན་ཤིན་ཏུ་རྣལ་འབྱོར་ཨ་ཏི་ཡོ་ག་ཞེས་བྱ་བའི་འཁོར་དང་། ཀུན་གསལ་ལས། མ་བ སྐྱེད་རྫོགས་དང་དེ་ཡིན་དོན་ལ་འཇུག་པའི་ཕྱིར། །རྫོགས་པ་ཨ་ནུའི་མིང་གི་ངེས་ཚིག་ཡིན། །ཞེས་པ་ལྟར་སྙིང་པོ་བརྗོད་པ་ཙམ་གྱིས་ལྷ་ཡོངས་སུ་རྫོགས་པར་བསྒོམ་པས་སམ། ཤེས་རབ་རྗེས་ཆགས་ཀྱི་ལམ་གཙོ་བོས་སྟོན་པས་ཡོངས་སུ་རྣལ་འབྱོར་རམ་རྗེས་སུ་རྣལ་འབྱོར་ཨ་ནུ་ཡོ་ག་ཞེས་བྱ་བའི་འཁོར་དང་། ཤིན་ཏུ་རྒྱས་པ་ཆེན་པོའི་བསྐྱེད་རིམ་ཉིད་གཙོ་བོར་སྟོན་པས་རྣལ་འབྱོར་ཆེན་པོ་མ་ཧཱ་ཡོ་ག་ཞེས་བྱ་བའི་འཁོར་དང་། ཕྱིའི་སྤྱོད་འགྲོགས་ཙམ་དུ་བྱས་ནས་ནང་སེམས་ཀྱི་སྒོམ་པ་གཙོ་བོར་སྟོན་པས་སེམས་དཔའི་རྣལ་འབྱོར་ཕྱི་རྒྱུད་སྡེ་གསུམ་ཞེས་བྱ་བའི་འཁོར་དང་བཞི་པོ་དེ་ནི་འོག་ནས་ཀྱང་རྒྱས་པར་འབྱུང་ངོ་། །གསུམ་པ་གོང་གི་སྐུ་གསུམ་འཁོར་གྱི་དོན་བསྡུ་བ་ནི། གོང་དུ་བསྟན་པ་དེ་ལྟར་ཀུན་བྱེད་བྱང་ཆུབ་ཀྱི་སེམས་གདོད་ནས་རང་བྱུང་སྟོང་གསལ་ཐུགས་རྗེ་ཁྱབ་བརྡལ་ཆེན་པོ་ཉིད་ཀྱི་རང་བཞིན་གནས་ལུགས་ཆོས་ཀྱི་སྐུ་དང་། ཉིད་ཀྱི་ངོ་བོ་སྣང་ལུགས་ལོངས་སྤྱོད་རྫོགས་པའི་སྐུ་དང་། ཉིད་ཀྱི་ཐུགས་རྗེ་འཆར་ལུགས་སྤྲུལ་པའི་སྐུ་གསུམ་གྱི་རང་བཞིན་སྟོན་པ་ཀུན་བྱེད་ཉིད་ལས་སྟོན་འཁོར་ཐ་དད་དུ་མ་གྲུབ་ཅིང་འབྱེད་པ་མི་མངའ་བས་ཐབས་གཅིག་གོ་ཞེས་ལྷན་གཅིག་ཏུ་མཉམ་པ་ཆེན་པོར་དགྱེས་པར་བཞུགས་སོ། །ས་བཅད་འདི་ཅུང་ཟད་དཀྲུགས་ནས་རྣལ་འབྱོར་བཞིའི་མཐར་གསུངས་པ་ནི་སྣང་ཚུལ་ཙམ་ལ་ལམ་མངོན་པར་སྣང་བའི་ཆ་ནས་རྣལ་འབྱོར་བཞི་ལོགས་སུ་བགྲངས་ཀྱང་དོན་ལ་སྐུ་གསུམ་ལས་མ་འདས་པར་སྟོན་པའི་ཆེད་ཡིན་པར་མངོན་ནོ། །གསུམ་པ་དུས་གསུམ་སངས་རྒྱས་ཀྱི་འཁོར་ནི། དེ་ལྟར་གཞི་རང་བཞིན་གྱིས་དག་པ་དང་ལམ་མངོན་པར་སྣང་བའི་འཁོར་དེ་དག་ལས་གཞན་ཡང་རྩོལ་སྒྲུབ་བླང་དོར་ལ་ལྟོས་པ་མེད་པར་ཡེ་གདོད་མ་ཉིད་ནས་གཟུང་འཛིན་རྣམ་རྟོག་གི་དྲི་མས་མ་གོས་ཤིང་ཡོན་ཏན་ཐམས་ཅད་ལྷུན་གྱིས་རྫོགས་པར་མངོན་པར་སངས་རྒྱས་པའི་བདག་ཉིད་རིག་པ་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ཉིད་ཀྱི་རང་བཞིན་མ་ནོར་བར་རྟོགས་པས་ཡང་སངས་རྒྱས་པའི་འཁོར་ནི་འདི་ལྟ་སྟེ། སྔར་བྱོན་འདས་པའི་སངས་རྒྱས་བྱང་ཆུབ་ཀྱི་སེམས་སྤྲོས་པ་ཐམས་ཅད་དང་བྲལ་བའི་གདོད་མའི་འོད་གསལ་ཆེན་པོ་ཉིད་ཀྱི་ངང་ལ་སྐྱེ་འགགས་འཕོ་འགྱུར་དང་བྲལ་བར་རྟག་ཏུ་གནས་ཤིང་བཞུགས་པའི་འཁོར་དང་། ད་ལྟར་ཆོས་ཀྱི་དབྱིངས་དང་ནམ་མཁའི་མཐས་ཀླས་པར་སྐུ་འཚོ་ཞིང་གཞེས་ཏེ་མངོན་སུམ་དུ་བཞུགས་པའི་སངས་རྒྱས་ཆོས་སྐུ་ཀུན་བྱེད་རྒྱལ་པོ་ཉིད་ཀྱི་ཐུགས་རྗེའི་རྩལ་འགགས་པ་མེད་པ་ལས་ཤར་བ་རྣམས་ཀྱིས་གདུལ་བྱའི་སེམས་ཅད་མ་ལུས་པ་ཀུན་གྱི་དོན་རྟག་ཁྱབ་ལྷུན་གྲུབ་ཀྱི་ཚུལ་དུ་དངོས་སུ་མཛད་པའི་འཁོར་དང་། སླད་ནས་སམ་ཕྱི་ནས་འབྱོན་པའི་སངས་རྒྱས་ཀུན་བྱེད་བྱང་ཆུབ་ཀྱི་སེམས་ཉིད་ཀྱི་རང་བཞིན་མངོན་སུམ་དུ་རྟོགས་པ་ལས་འབྱུང་བར་འགྱུར་བའི་འཁོར་དང་། རྣམ་པ་གསུམ་པོ་དེ་ཡང་ནི་རིག་པ་རང་བྱུང་གི་ཡེ་ཤེས་སམ་བྱང་ཆུབ་ཀྱི་སེམས་ཀྱི་དབྱིངས་ན་དུས་གསུམ་འདུ་འབྲལ་མེད་པར་དབྱེར་མེད་གཅིག་ཏུ་བཞུགས་པས་འབྱེད་པ་མི་མངའ་བའི་རང་བཞིན་གྱིས་ཐབས་གཅིག་པར་བཞུགས་སོ་ཞེས་གསུངས་སོ། །དེ་ལྟར་སྔར་མདོར་བསྟན་གྱི་སྐབས་སུ་བསྟན་པ་དང་སྟོན་པ་དུས་ཕུན་སུམ་ཚོགས་པ་གསུམ་གཙོ་བོར་བསྟན་ནས་གཞན་གཉིས་ཤུགས་ལ་བསྟན་པ་དང་། རྒྱས་བཤད་ཀྱི་སྐབས་འདིར་གནས་དང་འཁོར་ཕུན་སུམ་ཚོགས་པ་གཉིས་གཙོ་བོར་བསྟན་ཏེ་གཞན་གསུམ་ཤུགས་ལ་བསྟན་པའོ། །དེ་ལྟར་ཕུན་སུམ་ཚོགས་པ་ལྔ་པོ་བསྟན་པའི་དགོས་པ་ཡང་། སྤྲོས་བྲལ་དོན་གསལ་ཆེན་པོའི་རྒྱུད་ལས། སྟོན་པ་ཕུན་སུམ་ཚོགས་པ་སྨོས་པའི་དགོས་པ་ནི། གང་ཟག་རིག་བཅོས་མ་ཡིན་པར། །སངས་རྒྱས་ཞལ་ནས་གསུངས་པར་ཡིད་ཀྱང་ཆེས། །མི་བསླུ་བདེན་པའི་གཏན་ཚིག་དག་ཏུ་འགྱུར། །བསྟན་པ་ཕུན་སུམ་ཚོགས་པ་སྨོས་པའི་དགོས་པ་ནི། བབ་བཅོལ་མ་ཡིན་དོན་དང་ལྡན་པར་ཡིད་ཀྱང་ཆེས། འདུས་པའི་འཁོར་ཚོགས་སྨོས་པའི་དགོས་པ་ནི། ཀུན་གྱི་ཐུན་མོང་མ་ཡིན་པའི། ངེས་པར་སྟོན་པས་གསུངས་པར་ཡིད་ཀྱང་ཆེས། གནས་ཀྱི་བྱེ་བྲག་གསུངས་པའི་དགོས་པ་ནི། གཞན་དུ་བསྟན་པའི་སྙིང་པོ་མ་གསུངས་པར། །ངེས་པའི་གནས་དེར་གསུངས་པར་ཡིད་ཀྱང་ཆེས། །གནས་ཀྱི་བྱེ་བྲག་གསུངས་པའི་དགོས་པ་ནི། །གཞན་དུ་བསྟན་པའི་སྙིང་པོ་མ་གསུངས་པར། །ངེས་པའི་གནས་དེར་གསུངས་པར་ཡིད་ཀྱང་ཆེས། །དུས་ཀྱི་ཕུན་སུམ་ཚོགས་པ་སྨོས་པའི་དགོས་པ་ནི། །གནས་སྐབས་སྔ་ཕྱི་མ་བརྒལ་བར། །དུས་ཚོད་མཚུངས་ཤིང་ཟིན་པས་ཡིད་ཀྱང་ཆེས། །ཞེས་གསུངས་པ་བཞིན་ནོ། །གཉིས་པ་གླེང་བ སླང་བ་ལ་གསུམ་སྟེ། སྟོན་པས་དགོངས་དོན་གྱི་ཏིང་ངེ་འཛིན་ལ་མཉམ་པར་བཞག་པ། དེ་ལས་ཉིད་ཀྱི་ཐུགས་རྗེ་རིག་པའི་འཁོར་སེམས་དཔའ་རྡོ་རྗེ་སྤྲུལ་ཏེ་བཀོད་པ། དེ་ཉིད་ཀྱིས་ཞུས་ཤིང་ལན་གསུངས་པའོ། །དང་པོ་ནི། དེ་ལྟར་གླེང་གཞི་ཕུན་སུམ་ཚོགས་པ་མངོན་པར་སྣང་བ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་རང་སྣང་མ་བཅོས་དོན་གྱི་འཁོར་ཚོགས་ཐམས་ཅད་སྟོན་པ་ཉིད་ཀྱི་རང་བཞིན་རིག་སྟོང་གཉིས་སུ་མེད་པའི་ཡེ་ཤེས་ནང་དབྱིངས་ཀ་དག་ཆེན་པོ་གཅིག་ཏུ་བྱིན་གྱིས་བརླབ་པའི་ཕྱིར་དུ་རྩལ་སྣང་འགགས་པ་མེད་པའི་འཁོར་ཐམས་ཅད་ཀུན་རྫོགས་མཉམ་པ་ཆེན་པོ་སྤྲོས་བྲལ་ཐིག་ལེའི་རང་བཞིན་ཆོས་སྐུ་ཀུན་བྱེད་ཉིད་ཀྱི་སེམས་ཉིད་རང་བྱུང་ཡེ་ཤེས་ཀྱི་ཐུགས་དམིགས་བསམ་བརྗོད་པ་ལས་འདས་པའི་དབྱིངས་ལ་ཐིམ་པར་མཛད་དོ། །ཞེས་ཕྱི་གསལ་རྩལ་སྣང་གི་རོལ་པ་ཐམས་ཅད་རིག་པ་བྱང་ཆུབ་ཀྱི་སེམས་མ་བཅོས་མཉམ་པ་ཆེན་པོའི་ཏིང་ངེ་འཛིན་གྱི་ངང་ལ་གཉིས་མེད་དུ་མཉམ་པར་བཞག་པའོ། །ཚུལ་དེ་ཡང་དོན་གསལ་ལས། དེའི་ཚེ་བཅོམ་ལྡན་འདས་རིག་སྟོང་ཀུན་ཏུ་བཟང་པོ་དེ་ཉིད་འཁོར་ཤེས་རིག་སྣ་ཚོགས་པ་རྣམས་བྱིན་གྱིས་རློབས་པའི་ཕྱིར། འཁོར་ཐམས་ཅད་ཉིད་ཀྱི་ཐུགས་ལ་ཐིམ་ཞིང་སོགས་གསུངས་པ་ལྟར་རོ། །དེ་ལྟར་སྟོན་པ་ཉིད་ཀྱིས་དགོངས་དོན་ལ་མཉམ་པར་བཞག་པའི་ངང་ནས་འཁོར་རྣམས་ཀྱི་ཐུགས་ལ་རིག་པ་རང་བྱུང་གི་ཡེ་ཤེས་བསྒྲིབས་མེད་མངོན་སུམ་དུ་གསལ་བར་མཛད་དོ་ཞེས་རྩལ་ལས་ཤར་བའི་རོལ་བའི་ཡེ་ཤེས་ཐམས་ཅད་རང་བྱུང་གི་ཡེ་ཤེས་གཅིག་གི་ངོ་བོར་གྱུར་བའོ། །དེ་ལྟར་འོད་གསལ་བྱང་ཆུབ་སེམས་ཀྱི་དགོངས་པ་གསལ་བར་མཛད་པ་དེ་ནས་སྙིང་པོ་བྱང་ཆུབ་སེམས་ཀྱི་རྩལ་སྣང་གི་ཆོས་ཐམས་ཅད་དབྱིངས་ཆོས་ཉིད་སྐྱེ་བ་མེད་པ་གཅིག་གི་རང་བཞིན་དུ་ལྡན་པར་བྱ་བའི་ཕྱིར་དུ་རྩལ་སྣང་གི་རོལ་པ་དེ་ཐམས་ཅད་ཀ་དག་སྐྱེ་བ་མེད་པའི་ངང་དུ་བསྡུས་ནས་ནང་དབྱིངས་ཐིག་ལེ་ཆེན་པོ་ཉག་གཅིག་ཏུ་བཞུགས་སོ་ཞེས་སྔ་མ་བྱང་ཆུབ་སེམས་ཀྱི་ངོ་བོ་ལྷུན་གྲུབ་འོད་གསལ་གྱི་ཆ་ནས་དང་། ཕྱི་མ་འདི་བྱང་ཆུབ་སེམས་ཀྱི་རང་བཞིན་སྐྱེ་མེད་ཀ་དག་གི་ཆ་ནས་བསྟན་ཡང་དོན་ལ་ཐ་དད་མེད་པར་དབྱིངས་ཡེ་གཉིས་སུ་མེད་པའི་དགོངས་དོན་ལ་མཉམ་པར་བཞག་པའོ། །གཉིས་པ་ནི། དགོངས་དོན་ལ་མཉམ་པར་བཞག་པ་དེ་ནས་སྟོན་པ་ཉིད་དང་ལྷན་གཅིག་པའི་རིག་པའི་འཁོར་སེམས་དཔའ་རྡོ་རྗེ་དེ་ཉིད་སྟོན་པ་ཉིད་ཀྱི་ཐུགས་རང་བཞིན་སྤྲོས་པ་དང་བྲལ་བ་ཐིག་ལེ་ཆེན་པོ་གཅིག་ཏུ་བཞུགས་པའི་དགོངས་པ་མི་གཡོ་བའི་ངང་དེ་ལས་གཟུགས་སྐུའི་རོལ་བར་བྱུང་བའམ་ཆོས་ཉིད་ཀྱི་རང་མདངས་སུ་ཤར་ནས། བྱང་ཆུབ་ཀྱི་སེམས་སྟོན་པ་ཀུན་བྱེད་རྒྱལ་པོའི་སྤྱན་སྔར་རྒྱལ་སྲས་སེམས་དཔའ་རྡོ་རྗེ་ཉིད་རྩོལ་མེད་ཨ་ཏིའི་ཐེག་པ་འབྱུང་བའི་དུས་ལ་བབ་པར་མཁྱེན་པས་ཐུགས་ཤིན་ཏུ་དགྱེས་ཤིང་དགའ་བའི་སེམས་ཀྱིས་མཚན་དཔའི་གཟི་བྱིན་རབ་ཏུ་འབར་བའི་ཞལ་དང་བའི་མདངས་ཕྱུང་སྟེ་འཁོད་པས་བྱང་ཆུབ་ཀྱི་སེམས་སྟོན་པ་ཀུན་བྱེད་རྒྱལ་པོས་སེམས་དཔའ་རྡོ་རྗེ་ལ་སྐྱེ་མེད་དོན་གྱི་གསུང་གིས་སྨྲས་པ། སྟོན་པ་རང་ཉིད་ཀྱི་རྩལ་ལས་བྱུང་བའི་སེམས་དཔའ་རྡོ་རྗེ་ཉིད་སྒྲ་ཚིག་བརྗོད་པ་ལས་འདས་པ་ཡང་གསང་ཨ་ཏི་ཡོ་གའི་རྒྱུད་སྡེ་རྣམས་གསུང་བར་བསྐུལ་བ་པོ་འཁོར་གྱི་ཚུལ་དུ་རང་སྣང་བ་ལ་དགྱེས་ཤིང་ངོ་མཚར་བས་ཨེ་མ་ཧོ་ཞེས་སྤྱིར་བསྟན་ནས། བྱེ་བྲག་ཏུ། རྩོལ་བྲལ་ཨ་ཏིའི་ཆོས་སྟོན་པའི་དུས་ལ་བབས་པར་གཟིགས་ནས་ཡེ་ཤེས་ལྔ་དང་ལྡན་པའི་ཐུགས་ཟག་མེད་རང་བྱུང་གི་ཡེ་ཤེས་ཉིད་དགྱེས་ཤིང་དགའ་བའི་སེམས་སྐྱེས་པ་ལ་ངོ་མཚར་བའི་གསུང་གིས་ཨེ་མ་ཧོ་ཞེས་བརྗོད་པ་དང་། མཚན་དཔེའི་ཞལ་གྱི་དཀྱིལ་འཁོར་སྟོན་ཟླ་གསལ་བའི་ངོས་ལྟར་དང་བའི་མདངས་ཕྱུང་བ་ལ་ངོ་མཚར་བས་ཨེ་མ་ཧོ་ཞེས་པ་དང་། དེ་ཡང་གཞན་དུ་གྲུབ་པ་མེད་པར་གཞི་མེད་རྩ་བ་དང་བྲལ་བ་རིག་པ་རང་བྱུང་གི་ཡེ་ཤེས་སྟོན་པ་ཀུན་བྱེད་རྒྱལ་པོ་ང་ལས་གཞི་སྣང་ལྷུན་གྲུབ་ཀྱི་སྣང་ཆར་སེམས་དཔའ་རྡོ་རྗེ་ཁྱོད་ཉིད་ཆོས་ཉིད་རྫོགས་པ་ཆེན་པོའི་དགོངས་པ་ཕྱི་རབས་རྗེས་འཇུག་རྣམས་ལ་སྣང་བའི་དོན་དུ་གཟུགས་སྐུའི་ངོ་བོར་བྱུང་བ་ཨེ་མ་ཧོ་སྟེ་ངོ་མཚར་རོ། །ཞེས་གསུངས་པས་སྟོན་པའི་ཚིག་གི་མདུན་བསུ་བའི་སྒོ་ནས་གོ་ཕྱེས་སོ། །གསུམ་པ་ལ་གཉིས་ཏེ། ཆོས་ཀུན་གྲུབ་བསལ་མེད་པ་ཡེ་ནས་ཐིག་ལེ་གཅིག་གི་རང་བཞིན་ལ་ཕུན་སུམ་ཚོགས་པ་ལྔ་ཇི་ལྟར་འཐད་ཞུས་པ་དང་། དབྱིངས་གཅིག་དེ་བཞིན་ཉིད་ཆོས་ཐམས་ཅད་ཀྱི་འབྱུང་གནས་སམ་ངོ་བོར་གནས་པ་དེའི་འཐད་པ་ཀུན་བྱེད་ཉིད་དུ་གསུངས་ཚུལ་ལོ། །དང་པོ་ནི། དེ་ལྟར་སྟོན་པའི་ཚིག་གིས་མདུན་བསུས་པའི་རྗེས་དེ་ནས་སེམས་དཔའ་རྡོ་རྗེ་སྟོན་པ་ཀུན་བྱེད་རྒྱལ་པོ་ལ་གླེང་སློང་བའི་ཚིག་དངོས་སུ་ཞུས་པ། ཀྱེ་ཞེས་རང་ལས་མཐོ་བའམ་ཆེ་བ་ལ་འབོད་པའི་ཚིག་སྟེ། དེ་ཡང་དོན་ལ་སྟོན་འཁོར་དགོངས་པ་དབྱེར་མེད་ཡིན་པས་མཐོ་དམན་དང་བཟང་ངན་སོགས་མེད་ཀྱང་སྣང་བའི་ངོས་ནས་སྟོན་པ་དང་འཁོར་ལྟར་སྣང་བའི་ཕྱིར་དེ་ལྟར་གསུངས་པ་དང་། ཕྱི་རབས་རྗེས་འཇུག་རྣམས་ཀྱིས་ཆོས་སྨྲ་བའི་བླ་མ་ལ་གུས་པ་བྱེད་དགོས་པར་ཡང་དོན་གྱིས་སྟོན་ཏོ། །དེ་ལྟར་གུས་པའི་ཚིག་གིས་མདུན་བསུས་ནས་སྟོན་པའི་སྟོན་པ་ཞེས་སྟོན་པ་སྐུ་གསུམ་གྱི་ཡང་སྟོན་པར་གྱུར་པ་ཆོས་སྐུ་ཀུན་བྱེད་རྒྱལ་པོ་ལགས་ཞེས་སྨོས་པ་སྟེ། དེ་ལ་སྐུ་གསུམ་གྱི་སྟོན་པ་གང་ཞེ་ན་ནང་རྒྱུད་སྡེ་གསུམ་གྱི་སྟོན་པ་ཆོས་ཀྱི་སྐུ་དང་། ཕྱི་རྒྱུད་སྡེ་གསུམ་གྱི་སྟོན་པ་ལོངས་སྐུ་དང་། མཚན་ཉིད་སྡེ་གསུམ་གྱི་སྟོན་པ་སྤྲུལ་པའི་སྐུ་སྟེ་གསུམ་ཡིན་ལ། འོ་ན་ཀུན་བྱེད་རྒྱལ་པོ་རང་ཉིད་ཆོས་སྐུ་མིན་ནམ་དེ་ཆོས་སྐུའི་སྟོན་པར་ཇི་ལྟར་འགྱུར་སྙམ་ན། འདིར་སྟོན་པ་ཀུན་བྱེད་རྒྱལ་པོ་ནི་ཡེ་ནས་འཁྲུལ་མ་མྱོང་བའི་སངས་རྒྱས་དུས་གསུམ་གྱི་རྒྱལ་བ་ཀུན་གྱི་སྔོན་རོལ་དུ་མངོན་པར་བྱང་ཆུབ་པ་གདོད་མའི་མགོན་པོ་ཀུན་ཏུ་བཟང་པོ་ཡིན་པར་གསུངས་ཏེ། རྨད་བྱུང་རྒྱལ་པོ་ལས། ཐོག་མ་ཀུན་གྱི་སྔོན་རོལ་དུ། །རང་སྣང་གཞི་ལ་མཐར་ཕྱིན་ཏེ། །སྔར་སངས་སྔ་ནས་རྒྱས་པའི་ཕྱིར། །ཐོག་མའི་ཀུན་ཏུ་བཟང་པོ་ནི། །འཁོར་འདས་ཀུན་གྱི་སྟོན་པར་ཤར། །ཞེས་གསུངས་ལ། ངའི་འཁོར་དུ་གསུངས་པའི་སྐུ་གསུམ་ནི་སྟོན་པ་དེ་ཉིད་ཀྱིས་ལམ་མངོན་པར་བསྟན་པ་ལ་བརྟེན་ནས་ཕྱི་ནས་སངས་རྒྱས་པ་རྣམས་ཏེ། ཀུན་མཁྱེན་བླ་མས། སྟོན་པ་འདི་ཡོད་པས་འཁོར་འདས་གདོད་མར་གྲོལ་བའི་ལམ་སྟོན་པ་བྱུང་སྟེ་དུས་གསུམ་གྱི་རྒྱལ་བ་བྱུང་བ་ཡིན་ནོ། །དེ་ལྟ་མ་ཡིན་ན་འཇིག་རྟེན་དུ་སངས་རྒྱས་འབྱུང་བའང་མི་རིགས་ཏེ། ཐམས་ཅད་སེམས་ཅན་དུ་མཉམ་པ་ལ་གཅིག་གིས་གཅིག་ལ་ལམ་སྟོན་པར་མི་ཤེས་པ་ཉིད་དང་། ལ་ལ་སངས་རྒྱས་ཤིང་ལ་ལ་འཁོར་བ་མི་རིགས་སོ། །ཞེས་གསུངས་སོ། །དེ་ལྟ་བུའི་སངས་རྒྱས་ཐམས་ཅད་ཀྱི་སྟོན་པ་གདོད་མའི་མགོན་པོ་ཀུན་བྱེད་རྒྱལ་པོ་ཉིད་ལ་སེམས་དཔའ་རྡོ་རྗེས་འདི་སྐད་ཅེས་ཞུས་ཏེ། ཅི་སྟོན་པ་ཉིད་ཀྱང་མཚན་རྟོག་གི་སྤྲོས་པའི་གྲྭ་ཟུར་ཐམས་ཅད་དང་བྲལ་བས་ཀུན་ཟླུམ་ཐིག་ལེ་ཆེན་པོ་ཉག་གཅིག་སྤྲོས་པ་མེད་པས་གཉིས་སྣང་གི་ཡུལ་དུ་གྲུབ་པ་མེད་དམ་སྟེ་མེད་པ་ཞིག་ཡིན་ནམ། ཉིད་ཀྱི་རྩལ་ལས་ཤར་བའི་འཁོར་རྣམས་ཀུན་ཀྱང་ཐིག་ལེ་སྤྲོས་མེད་ཀྱི་རང་བཞིན་ཉིད་དམ། གཞན་ཡང་ཀུན་བྱེད་ཉིད་ཀྱིས་བསྟན་པ་དམ་པའི་ཆོས་ཀུན་ཀྱང་ཐིག་ལེ་སྤྲོས་མེད་ཉིད་དམ། ཕུན་སུམ་ཚོགས་པ་རྣམས་སྣང་བའི་དུས་དང་གནས་ཉིད་ཀྱང་ཐིག་ལེ་སྤྲོས་མེད་ཀྱི་རང་བཞིན་མཚན་མའི་ཡུལ་མེད་པ། བློས་གཞལ་དུ་མེད་པ། ངག་གིས་བརྗོད་དུ་མེད་པ། དཔེ་ཡིས་མཚོན་དུ་མེད་པ་སོགས་སྣང་བའི་ཆོས་གང་དུའང་གྲུབ་པ་མེད་དམ་སྟེ། དེ་ལྟར་འཁོར་འདས་ཀྱི་ཆོས་ཐམས་ཅད་ཀྱི་ངོ་བོ་ཕུན་སུམ་ཚོགས་པ་ཀུན་ཀྱང་ཡེ་ནས་སྤྲོས་པའི་གྲ་ཟུར་ཐམས་ཅད་དང་བྲལ་བས་སྤྲོས་མེད་ཐིག་ལེའི་རང་བཞིན་གྲུབ་བསལ་འཕོ་འགྱུར་མེད་པ་ཞིག་ཡིན་ན། དེ་ལས་ཆེས་ཟབ་པའི་དོན་ཞིག་མི་སྲིད་པས་སྐུ་གསུམ་གྱི་སྟོན་པའི་སྟོན་པས་འཁོར་རྣམས་ལ་ཆོས་ཅི་ཞིག་སྟོན་པར་མཛད་དེ་སྤྲོས་པ་མེད་པ་ཐིག་ལེའི་རང་བཞིན་ཡིན་པའི་ཕྱིར་དང་། ཉིད་ཀྱི་འཁོར་དུ་ལྷན་གཅིག་ཏུ་འདུས་ཤིང་འཁོར་བའི་དོན་ནི་ཅི་ལ་འཁོར་ཞིང་འཚོགས་ཏེ་སྤྲོས་པ་མེད་པ་ལ་དེ་ལྟར་མི་འཐད་པའི་ཕྱིར་དང་། གལ་ཏེ་འཁོར་དུ་འདུས་སུ་ཆུག་ཀྱང་དེ་ལ་བསྟན་པ་ཅི་ཞིག་སྟོན་པར་བྱེད་དེ་སྨྲ་བརྗོད་ཀྱི་སྤྲོས་པ་མེད་པའི་ཕྱིར་དང་། སྟོན་འཁོར་བསྟན་པ་གསུམ་པོ་ལྷན་དུ་ཚོགས་པའི་དུས་དང་གནས་ནི་གཅིག་པ་རུ་ཇི་ལྟ་བུ་ཡི་ཕྱིར་ན་འགྱུར་ཏེ་ཆོས་ཉིད་ཡེ་ནས་གཅིག་དང་ཐ་དད་ལ་སོགས་པའི་དམིགས་བསམ་སྤྲོས་པ་ཐམས་ཅད་ལས་འདས་པའི་ཕྱིར་རོ། །དེས་ན་ཚུལ་ཇི་ལྟ་བུ་ཡིན་པ་སྟོན་པ་ཉིད་ཀྱིས་གསུངས་པར་མཛད་དུ་གསོལ་ཞེས་ཞུས་སོ། །གཉིས་པ་ནི། དེ་ལྟར་འཁོར་གྱིས་ཞུས་པའི་དོན་སྟོན་པ་ཉིད་ཀྱི་གསན་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་སླར་ཡང་སེམས་དཔའ་རྡོ་རྗེ་ལ་སྒྲ་ཚིག་དང་བྲལ་བའི་བརྗོད་མེད་དོན་གྱི་གསུང་གིས་འདི་སྐད་ཅེས་གསུངས་སོ། །སྟོན་འཁོར་དགོངས་པ་དབྱེར་མེད་ལ་མཆོག་དམན་མེད་པའི་ཕྱིར་ཀྱེ་ཞེས་པའི་འབོད་ཚིག་སྦྱར་ཏེ་སེམས་དཔའ་ཆེན་པོ་ཁྱོད་ཀྱིས་ཡིད་ཀྱི་རྣམ་པར་ཤེས་པ་སྒྲ་ལ་ཆུག་ཅིག་གམ་སྒྲ་ལ་གཏད་ནས་དོན་མ་ནོར་བར་ཟུང་ཞིག་དང་། སྟོན་པ་ཀུན་བྱེད་དེས་ཇི་ལྟར་ཞུས་པའི་ཟབ་མོའི་དོན་རྣམས་ཆོས་ཉིད་དོན་གྱི་རང་སྒྲར་སྤྲོས་ནས་བཤད་ཀྱིས་ཞེས་སྣོད་ཀྱི་སྐྱོན་དང་བྲལ་བས་ཉན་པར་བསྐུལ་བའི་ཚུལ་གྱིས་གང་ཞིག་གསུང་བའི་དོན་ནི། ཀྱེ་སེམས་དཔའ་ཆེན་པོ་སེམས་ཉིད་རང་བྱུང་གི་ཡེ་ཤེས་སྟོན་པ་ཀུན་བྱེད་རྒྱལ་པོ་ང་ཉིད་ཀྱི་རང་བཞིན་ནི་དབྱིངས་གཅིག་དེ་བཞིན་ཉིད་ཆོས་རྣམས་ཐམས་ཅད་ཀུན་གྱི་འབྱུང་གནས་སུ་གྱུར་པ་སྙིང་པོ་སྟེ་ངོ་བོར་གནས་པ་ཡིན་ཀྱང་འཁོར་འདས་ཀྱི་ཆོས་རྣམས་སྣང་བའི་དུས་ཉིད་ནས་སྙིང་པོ་བྱང་ཆུབ་ཀྱི་སེམས་ཉིད་ནི་གང་དུའང་མ་སྤྲོས་ཤིང་འགྱུར་བ་མེད་པའི་ཕྱིར་ན་ཡེ་ནས་ཆོས་ཉིད་མཉམ་བརྡལ་ཆེན་པོ་ཀུན་ཁྱབ་ཐིག་ལེ་ཉག་གཅིག་གི་རང་བཞིན་དུ་གནས་པ་ཡིན་ཏེ། ཅིའི་ཕྱིར་ན་ཐིག་ལེ་ཞེས་པ་ནི་ཡེ་ཤེས་སྤྲོས་པ་ཡི་གྲྭ་ཟུར་མེད་པའི་ཆོས་ཉིད་འགྱུར་བ་མེད་པ་སྲིད་ཞི་ཀུན་ཁྱབ་ཆེན་པོའི་དོན་ཡིན་པའི་ཕྱིར་ཏེ། ཀུན་གསལ་ལས། ཐིག་ལེ་ཐམས་ཅད་ནི། མི་འགྱུར་བ་མི་འགག་པ་ཁྱབ་པར་བཤད་དོ། །ཞེས་གསུངས་སོ། །དེ་བཞིན་དུ་རྒྱལ་བ་སྐུ་གསུམ་གྱི་སྟོན་པ་རྣམས་དང་ནི་དེ་དག་གིས་གསུངས་པའི་བསྟན་པ་རྒྱུ་འབྲས་ཀྱི་ཐེག་པ་རྣམས་དང་། སྟོན་པ་གསུམ་པོ་དེ་ཉིད་ཀྱི་འདུས་པའི་འཁོར་རྣམས་དང་དེ་རྣམས་ལྷན་དུ་ཚོགས་པའི་དུས་དང་གང་དུ་ཚོགས་པའི་གནས་ཕུན་སུམ་ཚོགས་པས་བསྡུས་པའི་ཆོས་ཐམས་ཅད་སྙིང་པོ་ཀུན་བྱེད་རྒྱལ་པོ་ང་ལས་བྱུང་བས་ན་ཡེ་ནས་སྤྲོས་བྲལ་ཐིག་ལེ་ཡི་ངོ་བོར་བརྗོད་པ་སྟེ། དེ་ཡང་རྒྱུ་མཚན་ཅིའི་ཕྱིར་ན་དེ་དག་གང་ལས་བྱུང་བའི་གཞི་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་སྤྲོས་མེད་ཐིག་ལེ་ཡི་ངོ་བོ་ཉིད་ཡིན་པར་བསྟན་པ་ཡིན་པའི་ཕྱིར་རོ། །ཞེས་གསུངས་སོ། །ལེའུའི་མཚན་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་གླེང་གཞི་དང་གླེང་སློང་གཉིས་ཀ་ཡིན་ཀྱང་བརྗོད་བྱ་མིང་གི་ཆ་ནས་གླེང་གཞིའི་སྒྲར་སྨོས་པ་སྟེ་དེ་ཡང་གང་ཞིག་གླེང་བ་ནི་བསྟན་པ་རྒྱུད་ཀྱི་དོན་ལ་དེ་ཉིད་འབྱུང་བའི་གཞིར་གྱུར་པས་དེ་སྐད་དུ་སྨོས་ལ་ལེའུ་ནི་སྡེ་ཚན་སོ་སོ་མ་འདྲེས་པར་མཚམས་གཅོད་པའི་དོན་ཏེ། དེ་ལས་རིགས་ཀྱི་བུ་ལེའུ་ཞེས་པ་ནི། སོ་སོའི་ས་མཚམས་དང་ཆོས་གཞན་དང་མ་འདྲེས་ཏེ། གང་མཚོན་པའི་དོན་གཙོར་བཤད་པའོ། །ཞེས་སོ། །དེ་ལས་འདིར་ལེའུ་བརྒྱད་ཅུ་རྩ་བཞི་ཡོད་པའི་ནང་ནས་ཐོག་མ་ཡིན་པས་ན་དང་པོའི་འགྲེལ་བའོ།། །།དོན་གཉིས་པ་བསྟན་པ་ཕུན་སུམ་ཚོགས་པའི་ཚུལ་གྱིས་རྒྱས་པར་བཤད་པ་ལ་གསུམ་སྟེ། ཕུན་སུམ་ཚོགས་པ་ལྔའི་རང་བཞིན་ཇི་ལྟར་བཀོད་ཅིང་བྱུང་བའི་ཚུལ་བསྟན་པ། གནས་ལུགས་རྒྱ་ཆེར་བཤད་པ། ཚིག་དོན་བསྡུས་ཏེ་དགྲོལ་བའོ། །དང་པོ་ལ་གཉིས་ཏེ། སྣང་སྲིད་འཁོར་འདས་ཀྱི་ཆོས་ཐམས་ཅད་གདོད་ནས་ཕུན་སུམ་ཚོགས་པ་ལྔར་བཀོད་ཚུལ་བསྟན་པ་དང་། དེ་ཉིད་གཤིས་ཀུན་བྱེད་དེ་བཞིན་ཉིད་ཀྱི་ངང་ལས་བྱུང་ཚུལ་བཤད་པའོ། །དང་པོ་ནི་ལེའུ་གཉིས་པས་བསྟན་པ་ལའང་གཉིས་ཏེ། ལེའུ་ལ་འཇུག་པའི་རྒྱུའི་ཚུལ་གྱིས་མདོར་བསྟན་པ་དང་། དེ་ཉིད་རྒྱ་ཆེར་བཤད་པས་རྒྱས་པར་བསྟན་པའོ། །དང་པོ་ནི། དེ་ལྟར་གླེང་གཞི་ཕུན་སུམ་ཚོགས་པའི་སྒོ་ནས་སྟོན་འཁོར་གཉིས་ཀྱིས་གླེང་བསླང་བའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་འཁོར་འདས་ཀྱི་ཆོས་ཐམས་ཅད་ཉིད་ལས་བྱུང་བའི་རང་བཞིན་དམིགས་བསམ་སྤྲོས་པ་དང་བྲལ་བའི་ངོ་བོར་གཟིགས་པའི་དགོངས་པ་ལས་མི་གཡོ་བའི་ཏིང་ངེ་འཛིན་སྟོང་གསལ་བརྗོད་མེད་བློ་འདས་ཆེན་པོའི་རང་བཞིན་ཅན་གྱི་ཏིང་ངེ་འཛིན་ཅེས་བྱ་བ་ལ་མཉམ་པར་བཞག་ནས་གནས་པར་མཛད་དོ། །གཉིས་པ་རྒྱས་པར་བཤད་པ་ལའང་གསུམ་སྟེ། རིག་པའི་སེམས་དཔའ་ཉིད་འཁོར་དུ་བཀོད་པའི་དོན་ཞུས་པ། དེ་བཞིན་ཉིད་ཀྱི་སྟོན་པའི་ངང་ལས་ཕུན་སུམ་ཚོགས་པས་བསྡུས་པའི་ཆོས་ཉིད་བཀོད་པ། དེའི་དོན་དྲི་ལན་དུ་བཤད་པའོ། །དང་པོ་ནི། སྟོན་པས་དགོངས་དོན་གྱི་ཏིང་ངེ་འཛིན་ལ་མཉམ་པར་བཞག་པ་དེ་ནས་འཁོར་གྱི་ཚོགས་རྣམས་ཆོས་དབྱིངས་མཉམ་པ་ཆེན་པོའི་ངང་དུ་རང་བཞིན་གཅིག་ཏུ་བཞུགས་པ་ལས་སེམས་དཔའ་རྡོ་རྗེ་དགོངས་པའི་ཀློང་ནས་རྩལ་གྱི་ངོ་བོར་ལངས་ནས་སྟོན་པ་བྱང་ཆུབ་ཀྱི་སེམས་ཀུན་བྱེད་རྒྱལ་པོའི་ཞལ་མངོན་སུམ་དུ་ཕྱོགས་པའི་མདུན་དུ་སྐུ་གངས་དཀར་ཤེལ་གྱི་རི་བོ་ལ་ཉིན་བྱེད་འབུམ་གྱིས་འཁྱུད་པ་ལྟ་བུའི་ཞལ་གྱི་མདངས་ཕྱུང་སྟེ་མི་འགྱུར་བརྟན་པའི་རི་རབ་བཞིན་དུ་འཁོད་ནས་སྐྱེ་མེད་རང་བྱུང་གི་ཡེ་ཤེས་ཀྱི་གསུང་ཕྱུང་སྟེ་ཞུས་པ། ཀྱེ་ཆོས་ཉིད་འདུས་མ་བྱས་པའི་སྐུ་ཅན་སྟོན་པའི་སྟོན་པ་ཀུན་བྱེད་རྒྱལ་པོ་ལགས། སྟོན་པ་ཁྱོད་ཀྱི་འཁོར་དུ་ཉིད་ཀྱི་ཐུགས་རྗེ་ཡེ་ཤེས་ཀྱི་རྩལ་ལས་ཤར་བའི་བདག་ཅག་རིག་པའི་སེམས་དཔའ་རྣམས་འདུས་ཤིང་འཁོད་པ་སྟེ་ལྷན་དུ་ཚོགས་པ་ལགས་ན། བདག་ཅག་འདུས་པ་རྣམས་ཀྱིས་ནི་འཚལ་བའམ་ཤེས་པར་བྱ་བའི་དོན་ནི་ཆོས་རྣམས་ཀྱི་གནས་ལུགས་བསལ་བཞག་བྲལ་བའི་ཡེ་ཤེས་རྫོགས་པ་ཨ་ཏི་ཡོ་གའི་དགོངས་པ་དེ་ཅི་ལྟ་བུ་ཞིག་མཆིས་པའམ་བདག་ཅག་རྣམས་ཀྱིས་ཤེས་པར་འཚལ་བའི་དགོངས་དོན་དེ་ནི་སྟོན་པ་ཀུན་བྱེད་ཁྱོད་ཀྱིས་བསྟན་པར་མཛད་དུ་གསོལ་ཞེས་ཞུས་སོ། །གཉིས་པ་ལ་བཞི་སྟེ། གདོད་མའི་གཞི་ཀུན་བྱེད་ཉིད་སྐུ་གསུམ་དུ་བཀོད་པ། དེ་ལས་རང་བྱུང་གི་ཡེ་ཤེས་ལྔ་བཀོད་པ། དེ་ལས་སྲིད་གསུམ་སྣོད་བཅུད་ཀྱི་རང་བཞིན་བཀོད་པ། དེ་ལྟར་དག་མ་དག་སྣ་ཚོགས་སུ་སྣང་དུས་ཉིད་ནས་རང་བཞིན་སྤྲོས་པའི་མཐའ་བྲལ་དུ་གནས་པའོ། །དང་པོ་ནི། སེམས་དཔའ་རྡོ་རྗེས་དགོས་དོན་ཞུས་པའི་རྗེས་དེ་ནས་གདོད་མའི་གཞི་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་ཉིད་ཀྱི་རང་བཞིན་ཆོས་ཉིད་ཡེ་སྟོང་ཆེན་པོ་སྤྲོས་བྲལ་ཀ་དག་གི་རང་བཞིན་རྒྱ་ཆད་ཕྱོགས་ལྷུང་དང་བྲལ་བ་ནི་སྟོང་པ་ཆོས་ཀྱི་སྐུ་དང་། ཉིད་ཀྱི་ངོ་བོ་འོད་གསལ་ལྷུན་གྲུབ་ཀྱི་སྣང་བ་མ་འགག་ཅིར་ཡང་འཆར་བའི་གཞིར་གནས་པ་ནི་གསལ་བ་ལོངས་སྐུ་དང་། ཉིད་ཀྱི་ཐུགས་རྗེ་རིག་པའི་ཡེ་ཤེས་གསལ་སྟོང་ཟུང་འཇུག་གི་རྩལ་ལས་ཅིར་ཡང་འཆར་བའི་ཡེ་ཤེས་ནི་གཉིས་མེད་སྤྲུལ་པའི་སྐུ་སྟེ་གསུམ་པོ་དེ་ཕུན་སུམ་ཚོགས་པའི་ཆོས་ཐམས་ཅད་ཀྱི་འཆར་གཞི་དབྱིངས་དེ་བཞིན་ཉིད་ཀྱི་རང་བཞིན་དུ་བཀོད་པ་སྟེ་ཞེས་ནང་གསལ་གྱི་ཡེ་ཤེས་གསུམ་པོ་དེ་ཆོས་ཐམས་ཅད་ཀྱི་འཆར་གཞི་བསྟན་པ་ཡིན་ཏེ། མཐར་ཐུག་དོན་གྱི་སྙིང་པོ་ལས། འཁོར་དང་འདས་པ་གང་གིས་ཀྱང་། །གོས་པ་མེད་པའི་སྔོན་རོལ་ན། །རང་བྱུང་ཡེ་ཤེས་ཀ་དག་ཉིད། །ངོ་བོ་སྟོང་པ་མཚོན་བརྗོད་འདས། །རང་བཞིན་འོད་ལས་གཏིང་གསལ་ཚུལ། །ཐུགས་རྗེ་རིག་པའི་སྙིང་པོ་ཅན། །ནང་དབྱིངས་ཀ་དག་ཆེན་པོར་གནས། །ངོ་བོ་སྐུར་གནས་འཕོ་འགྱུར་མེད། །རང་བཞིན་འོད་ལས་གསུང་ཉིད་འཆར། །ཐུགས་རྗེ་ཐུགས་ཏེ་རིག་པར་གནས། །སྐུ་རུ་ནས་ཀྱང་ཞལ་ཕྱག་མེད། །འོད་དུ་གནས་ཀྱང་ཁ་དོག་མེད། །རིག་པར་གནས་ཀྱང་འཕྲོ་འདུ་མེད། །རང་ངོ་ནང་གསལ་འཆར་གཞིའི་ཆ། །སྐུ་ལས་སྐུ་གསུམ་ཉིད་དང་ནི། །འོད་ལས་ལྷུན་གྲུབ་ལོངས་སྤྱོད་རྫོགས། །ཐུགས་རྗེ་རིག་པ་ཡེ་ཤེས་སུ། །ངང་གི་འཆར་བའི་གཞི་མོར་གནས། །འདི་ནི་གདོད་མའི་གནས་ལུགས་སོ། །ཞེས་སོ། །གཉིས་པ་ནི། དེ་ལྟ་བུའི་སྟོང་གསལ་ཐུགས་རྗེ་གསུམ་པོ་དེ་ལས་ཆོས་ཐམས་ཅད་བཀོད་པ་ནི་ཞེས་སྤྱིར་བསྟན་ནས་བྱེ་བྲག་ཏུ་སྟོན་པ་ཀུན་བྱེད་ཉིད་ཀྱི་ཐུགས་རིག་པ་རང་བྱུང་གི་ཡེ་ཤེས་ཆེན་པོ་གཅིག་གི་རྩལ་འགགས་པ་མེད་པ་ལས་རང་བྱུང་གི་ཡེ་ཤེས་ཆེན་པོ་ལྔ་བྱུང་བ་ནི་འདི་ལྟ་སྟེ་སེམས་ཁོང་ནས་འཁྲུགས་པའི་བདག་ཉིད་ཅན་གྱི་མནར་སེམས་པའི་ཞེ་སྡང་རང་ཀ་མར་སྣང་བ་འདི་ཉིད་རྒྱུ་རྐྱེན་ལ་ལྟོས་པ་མེད་པར་རང་བྱུང་གི་ཡེ་ཤེས་ཆེན་པོ་ཡི་རྩལ་འགགས་པ་མེད་པ་རང་གསལ་གྱི་ཚུལ་དུ་ཤར་བ་ཡིན་པས་སྤོང་འགོག་སྦྱངས་བསྒྱུར་སོགས་ལ་མི་ལྟོས་པར་ཡེ་ནས་རང་བྱུང་ཡེ་ཤེས་ཀྱི་ངོ་བོར་མངོན་དུ་ཕྱུང་བ་སྟེ། དགའ་རབ་རྡོ་རྗེས། ཆགས་སྡང་ང་རྒྱལ་ཕྲག་དོག་རྨོངས། །རང་རིག་ཤར་ཕྱིར་དོན་མི་སྤོང་། །ཞེས་དང་། འདི་ལས་ཀྱང་། རང་བྱུང་རྒྱུ་རྐྱེན་མེད་པར་བྱུང་བ་ཡིན། །ཡེ་ཤེས་འགགས་པ་མེད་པར་གསལ་བ་ཡིན། །ཞེས་གསུངས་པ་ལྟར་དང་། དེ་བཞིན་དུ་འོག་མ་རྣམས་ལ་ཡང་སྦྱར་ཏེ། ཡུལ་དང་དུ་ལེན་པའི་རང་བཞིན་ཅན་གྱི་འདོད་ཆགས་རང་བྱུང་ཡེ་ཤེས་ཆེན་པོ་དང་། བླང་དོར་མི་འབྱེད་པའི་རང་བཞིན་ཅན་གྱི་གཏི་མུག་རང་བྱུང་ཡེ་ཤེས་ཆེན་པོ་དང་། དམིགས་ཡུལ་ཁོང་དུ་མི་ཤོང་བའི་རང་བཞིན་ཅན་ཕྲག་དོག་རང་བྱུང་ཡེ་ཤེས་ཆེན་པོ་དང་། སེམས་མཐོ་བའི་རྣམ་པ་ཅན་གྱི་ང་རྒྱལ་རང་བྱུང་ཡེ་ཤེས་ཆེན་པོ་དང་ལྔ་མངོན་དུ་བྱུང་ངོ་། །གསུམ་པ་ནི། དེ་ལྟ་བུའི་རང་བྱུང་གི་ཡེ་ཤེས་རྣམ་པ་ལྔ་པོ་དེའི་རྩལ་ལས་རྒྱན་གྱི་རྒྱུ་འབྱུང་བ་ཆེན་པོ་ལྔ་ནི་ཕྱུང་སྟེ་ཞེས། དེ་ལ་རྒྱན་གྱི་རྒྱུ་ཞེས་གསུངས་པ་ནི་འབྱུང་བ་ཆེན་པོ་ལྔ་པོ་དེ་ཉིད་རང་བྱུང་ཡེ་ཤེས་ཀྱི་རྩལ་གྱི་རོལ་པའམ་རྒྱན་དུ་ཤར་བ་ཡིན་པས་རྒྱན་ཞེས་གསུངས་ཏེ། ཟབ་མོ་ཡང་ཏིག་ལས། དེ་ཡང་རིག་པའི་རང་གཟུགས་སྟོང་གསལ་ཟང་ཐལ་ཆེན་པོ་ཅིར་ཡང་མ་གྲུབ་པའི་ངང་ནས། ལྷུན་གྲུབ་འོད་ལྔའི་རྩལ་ལས། ཕྱི་ཡུལ་སྣང་ལུས་དང་བཅས་པར་གྲུབ་པས་རང་སྣང་གི་རྒྱན་དུ་ཤར། ཡེ་ཤེས་ཀྱི་རོལ་བར་ཤར། འགག་མེད་ཀྱི་རྩལ་དུ་ཤར་ཡང་། །སྣང་ལ་བདེན་པས་མ་གྲུབ་པ། །དཔེ་རྨི་ལམ་གྱི་སྣང་བ་ཡུལ་མེད་རང་སྣང་གི་རྩལ་དང་རྒྱན་དང་རོལ་བར་ཤར་བ་བཞིན་ནོ། །ཞེས་གསུངས་ལ། དེ་ལྟར་འབྱུང་བ་ལྔ་པོ་དེ་འབྱུང་འགྱུར་ཀུན་གྱི་རྒྱུ་ཡིན་ཞིང་ཁྱབ་པ་རྒྱ་ཆེ་བས་རྒྱུ་ཆེན་པོ་ཞེས་གསུངས་སོ། །གཞན་ཡང་མཐར་མེ་ཆུ་རླུང་གིས་འཇིག་ཅིང་སྟོང་པར་བྱེད་པ་ཕྱི་སྣོད་དང་དེ་ལ་རྟེན་དང་བརྟེན་པའི་ཚུལ་དུ་གནས་པས་ནང་བཅུད་དེ་སྣོད་བཅུད་ཀྱིས་བསྡུས་པའི་འཇིག་རྟེན་གྱི་ཁམས་ཆེན་པོ་གསུམ་ནི་བཀོད་དེ། དེ་ལས་བྱེ་བྲག་ཏུ་རང་བྱུང་ཡེ་ཤེས་ཀྱི་རྒྱན་གྱི་རྒྱུའི་ལུས་སྔ་དུས་གཅིག་ཏུ་བླང་བ་ནི་འདི་ལྟ་སྟེ་ཞེས་འབྱུང་ལྔའི་རང་བཞིན་ལས་གྲུབ་པའི་རྒྱུད་ལྔའི་སེམས་ཅན་ནམ་འགྲོ་བ་དྲུག་གི་ལུས་སྣང་བར་བསྟན་པ་སྟེ། དེ་ཡང་རྒྱན་གྱི་རྒྱུའི་ལུས་སྲ་བའི་ཁམས་ས་ཞེས་བྱ་བའི་ལུས་དང་། དེ་བཞིན་དུ་རྒྱན་གྱི་རྒྱུའི་ལུས་རླན་ཞིང་གཤེར་བའི་ཁམས་ཆུ་ཞེས་བྱ་བའི་ལུས་དང་། རྒྱན་གྱི་རྒྱུའི་ལུས་དྲོད་ཀྱི་ཁམས་མེ་ཞེས་བྱ་བའི་ལུས་དང་། རྒྱན་གྱི་རྒྱུའི་ལུས་གཡོ་བའི་ཁམས་རླུང་ཞེས་བྱ་བའི་ལུས་དང་། རྒྱན་ཀྱི་རྒྱུའི་ལུས་བུ་ག་ནམ་མཁའ་ཡི་ཁམས་ཞེས་བྱ་བའི་ལུས་རེ་རེ་ལ་ལྔ་ག་ཚང་བས་གཅིག་ཏུ་འདུས་པ་རིགས་དྲུག་གི་ལུས་ཐམས་ཅད་བླངས་བའམ་སྣང་བར་གྱུར་ཏོ། །དེ་དག་ཀུན་བྱེད་བྱང་ཆུབ་ཀྱི་སེམས་གཅིག་གི་རང་བཞིན་ཡིན་པ་ལ་ཡེ་ཤེས་ལྔའི་རིགས་སོ་སོར་ཕྱེ་སྟེ་སྣང་བ་ནི། རང་བྱུང་འདུས་མ་བྱས་པའི་ཡེ་ཤེས་གསལ་སྟོང་ཞེ་སྡང་གི་རང་བཞིན་ཡུལ་ཡོངས་སུ་འཇོམ་པར་བྱེད་པ་རྡོ་རྗེའི་རིགས་དང་། རང་བྱུང་འགག་པ་མེད་པའི་ཡེ་ཤེས་བདེ་སྟོང་འདོད་ཆགས་ཀྱི་རང་བཞིན་ཡུལ་ལ་ཡིད་འོང་གི་རྣམ་པས་དང་དུ་ལེན་པ་པདྨའི་རིགས་དང་། རང་བྱུང་དམིགས་གཏད་དང་བྲལ་བའི་ཡེ་ཤེས་རིག་སྟོང་གཏི་མུག་གི་རང་བཞིན་ཀུན་གྱི་ཁྱབ་བྱེད་དུ་གྱུར་པས་བུདྡྷའི་རིགས་དང་། རང་བྱུང་མཉམ་པ་མེད་པའི་ཡེ་ཤེས་དྲན་སྟོང་ཕྲག་དོག་གི་རང་བཞིན་དམིགས་ཡུལ་ཁོང་དུ་མི་ཤོང་བས་ལས་ཀྱི་རིགས་དང་། རང་བྱུང་སྐྱེ་བ་མེད་པའི་ཡེ་ཤེས་སྣང་སྟོང་ང་རྒྱལ་གྱི་རང་བཞིན་ཆེ་བའི་ཡོན་ཏན་ལ་དམིགས་ནས། གཞན་ལས་མཐོ་བར་བལྟ་བས་རིན་པོ་ཆེའི་རིགས་དང་། དེ་ལྟ་བུའི་རང་བྱུང་ཡེ་ཤེས་ལྔའི་རིགས་ཅན་གྱི་ལུས་བླང་བ་ནི་རྒྱུད་ལྔས་བསྡུས་པའི་འགྲོ་བ་རྣམས་ཀྱི་ལུས་དང་སོ་སོར་སྦྱར་ཏེ། མདོ་བཅུ་ལས། སྲིད་གསུམ་ལམ་ལྔའི་ཆོས་ལྔ་ཡང་། །བྱང་ཆུབ་སེམས་སུ་མངོན་སངས་རྒྱས། །དེ་ཡང་ཇི་ལྟ་བུ་ཞེ་ན། །བསྐམ་ཆགས་ལྔ་ཡི་རྣམ་སྨིན་གྱིས། །ལམ་སྒོ་ལྔ་རུ་ཞུགས་ཕྱིན་ན། །མི་བདེ་སྡུག་བསྔལ་ལྔ་ལ་སྤྱད། །ཞེ་སྡང་ལམ་གྱིས་སྒོར་ཞུགས་པས། །དམྱལ་བའི་གནས་སུ་ཚ་གྲང་སྤྱོད། །སྔ་ཕྱི་མེད་པའི་ཆོས་སྤྱོད་ཀྱང་། །སྔ་མའི་ལས་ཀྱི་རྣམ་སྨིན་གྱིས། །ཚ་དང་གྲང་བའི་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །ཚ་གྲང་ཉམས་དེས་བསྐྱོད་པ་མེད། །དེ་བས་ཞེ་སྡང་མི་གནས་སྟོང་། །བྱང་ཆུབ་སེམས་སུ་མངོན་སངས་རྒྱས། །འདོད་ཆགས་ལམ་གྱི་སྒོར་ཞུགས་པས། །ཡི་དྭགས་གནས་ན་བཀྲེས་སྐོམ་སྤྱོད། །བསྔོས་པས་ཚིམ་པའི་ཆོས་ཡོད་ཀྱང་། །སྔ་མའི་ལས་ཀྱི་རྣམ་སྨིན་གྱིས། །བཀྲེས་དང་སྐོམ་པའི་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །བཀྲེས་དང་སྐོམ་པས་བསྐྱོད་པ་མེད། །དེ་བས་འདོད་ཆགས་མི་གནས་སྟོང་། །བྱང་ཆུབ་སེམས་སུ་མངོན་སངས་རྒྱས། །གཏི་མུག་ལམ་གྱི་སྒོར་ཞུགས་པས། །བྱོལ་སོང་གནས་ན་གླེན་ལྐུགས་སྤྱོད། །རིག་པ་ཕྲ་མོའི་ཆོས་སྤྱོད་དེ། །སྔ་མའི་ལས་ཀྱི་རྣམ་སྨིན་གྱིས། །བླུན་ཞིང་ལྐུགས་པའི་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །བླུན་ལྐུག་ཉམས་དེས་བསྐྱོད་པ་མེད། །དེ་བས་གཏི་མུག་མི་གནས་སྟོང་། །བྱང་ཆུབ་སེམས་སུ་མངོན་སངས་རྒྱས། །ཕྲག་དོག་ལམ་གྱི་སྒོར་ཞུགས་པས། །མི་ཡི་གནས་སུ་དགེ་སྡིག་སྤྱོད། །དགེ་སྡིག་ལས་ཀྱི་ཆོས་ཡོད་ཀྱང་། །མི་དགེ་ཤས་ཆུང་རྣམ་སྨིན་གྱིས། །མི་རྟག་འགྱུར་བའི་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །མི་རྟག་ཉམས་དེས་བསྐྱོད་པ་མེད། །དེ་བས་ཕྲག་དོག་མི་གནས་སྟོང་། །བྱང་ཆུབ་སེམས་སུ་མངོན་སངས་རྒྱས། །ང་རྒྱལ་ལམ་གྱི་སྒོར་ཞུགས་པས། །ལྷ་ཡི་གནས་དང་ལོངས་སྤྱོད་ཀྱིས། །མ་རིག་ལྟུང་བའི་སྡུག་བསྔལ་མྱོང་། །བསམ་པས་འགྲུབ་པའི་ཆོས་སྤྱོད་ཀྱང་། །མ་རིག་ལེ་ལོའི་རྣམ་སྨིན་གྱིས། །ལྟུང་བའི་སྡུག་བསྔལ་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །ལྟུང་བའི་ཉམས་ཀྱིས་མི་བསྐྱོད་དེ། །དེས་ན་ང་རྒྱལ་མི་གནས་སྟོང་། །བྱང་ཆུབ་སེམས་སུ་མངོན་སངས་རྒྱས། །ཞེས་གསུངས་པ་དེ་ལྟ་བུའི་ཕྱིར་ན་ཞེ་སྡང་ལ་སོགས་པའི་རང་བྱུང་ཡེ་ཤེས་ལྔ་པོ་དེ་ལས་བྱུང་བའི་རྒྱན་གྱི་རྒྱུ་འབྱུང་བ་ལྔའི་ལུས་ཅན་གྱི་འགྲོ་བ་ལམ་རྒྱུད་ལྔའི་སེམས་ཅན་དུ་སྣང་བ་འདི་རྣམས་ཀྱང་དོན་ལ་གདོད་ནས་སྐྱེ་བ་མེད་པ་ཆོས་ཉིད་རང་བྱུང་གི་ཡེ་ཤེས་ཀུན་བྱེད་བྱང་ཆུབ་སེམས་ཀྱི་རོལ་པའམ་རྒྱན་དུ་བཀོད་པ་ཡིན་པས་ན་འཁོར་བའི་ཆོས་སུ་སྣང་བ་འདི་ཐམས་ཅད་སྐྱེ་འགག་འགྲོ་འོང་དང་བྲལ་བ་རང་བྱུང་ཡེ་ཤེས་གཅིག་གི་བདག་ཉིད་དུ་སངས་རྒྱས་པར་བསྟན་ཏོ། །དེ་ཉིད་ལས། བསྐམ་ཆགས་ལྔ་ལས་འབྱུང་ལྔ་གྲུབ། །འབྱུང་བ་ལྔ་ལས་རང་བྱུང་སྐྱེས། །སྣང་བའི་ཆོས་དང་སྲིད་པའི་ཆོས། །མི་རྟོག་པ་ཡི་རྒྱུ་རྐྱེན་གྱིས། །བསྐྱེད་ནས་ཇི་ལྟར་འབྱུང་ན་ཡང་། །དོན་དམ་སྐྱེ་བ་མེད་པས་ན། །སྤྲོས་པ་མེད་པའི་དོན་དུ་བསྟན། །ཅེས་གསུངས་སོ། །བཞི་པ་ནི། དེ་ལྟར་སྐུ་གསུམ་ཡེ་ཤེས་ལྔ་སྲིད་གསུམ་སྣོད་བཅུད་ལ་སོགས་པ་དག་པ་དང་མ་དག་པ་སྣ་ཚོགས་སུ་བཀོད་ཅིང་སྣང་བའི་དུས་ཉིད་ནས་གང་གིས་འགོད་པ་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེ་ཉིད་ཀྱང་སྟོན་པ་ཉིད་ཀྱི་རང་བཞིན་འཁོར་འདས་སྣ་ཚོགས་སུ་སྣང་བ་འདི་ཀུན་གྱི་ཆོས་ཉིད་སྤྲོས་པ་དང་བྲལ་བ་ཡེ་སྟོང་སྐྱེ་བ་མེད་པའི་ངང་ཚུལ་ལས་སྐད་ཅིག་ཀྱང་གཡོ་བ་མེད་ལ་དེ་ཉིད་ཀྱིས་གང་ཞིག་བཀོད་པ་ཡི་ཆོས་རྣམས་ཀྱང་དེ་བཞིན་དུ་བཞུགས་སོ་ཞེས་ཆོས་ཉིད་སྐྱེ་བ་མེད་པ་སྤྲོས་བྲལ་རང་བྱུང་གི་ཡེ་ཤེས་ལས་གཡོ་བ་མེད་པར་བསྟན་ཏོ། །གསུམ་པ་དེའི་དོན་དྲི་ལན་གྱི་ཚུལ་དུ་བཤད་པ་ལ་གསུམ་སྟེ། དེ་ལྟར་བཀོད་པའི་དོན་དྲི་བ་དང་། གང་གིས་བཀོད་པ་མཚན་གྱི་དོན་རྒྱ་ཆེར་བཤད་པའོ། །དང་པོ་ནི། དེ་ལྟར་ཕུན་སུམ་ཚོགས་པའི་ཆོས་རྣམས་བཀོད་པ་དེ་ནས་སེམས་དཔའ་རྡོ་རྗེ་དེ་ཉིད་བྱང་ཆུབ་ཀྱི་སེམས་སྟོན་པ་ཀུན་བྱེད་རྒྱལ་པོའི་སྤྱན་སྔར་སླར་ཡང་གུས་འདུད་དང་བཅས་པས་འདུག་ནས་ཞུས་པ། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ལགས། ཉིད་ཀྱི་ཐུགས་ཉག་གཅིག་སྤྲོས་པ་དང་བྲལ་བ་རང་བྱུང་འདུས་མ་བྱས་པའི་ཡེ་ཤེས་འགྱུར་བ་མེད་པའི་དབྱིངས་ལས། རང་བྱུང་གི་ཡེ་ཤེས་རྣམ་པ་ལྔ་རྩོལ་མེད་དུ་བྱུང་ནས་དེ་ལས་རྒྱན་གྱི་རྒྱུ་འབྱུང་བ་ཆེན་པོ་ལྔ་བྱུང་ནས་ནི། དེ་ལ་བརྟེན་ཏེ་ཡེ་ཤེས་ལྔ་ཡི་རིགས་ཅན་གྱིས་ལུས་ལྔ་བླངས་བའམ་བཀོད་པ་འདིས། སྟོན་པ་ཀུན་བྱེད་རྒྱལ་པོའི་མཛད་པ་ཕྲིན་ལས་ཀྱི་དགོས་པ་ཅི་ཞིག་ཆེ་བའམ་དགོས་པ་ཅི་ཞིག་ཡོད་ལགས་ཞེས་ཞུས་སོ། །གཉིས་པ་ནི། སེམས་དཔའ་རྡོ་རྗེས་ཕུན་སུམ་ཚོགས་པ་བཀོད་པའི་དགོས་དོན་ཇི་ལྟར་ཡིན་ཞུས་པའི་རྗེས་དེ་ནས་སྟོན་པ་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་སླར་ཡང་ལན་གསུངས་པ་ནི། ཀྱེ་རིག་པའི་ངོ་བོ་རྒྱལ་སྲས་སེམས་དཔའ་ཆེན་པོ་དེ་ལྟར་ཕུན་སུམ་ཚོགས་རྣམས་བཀོད་པའི་དགོས་པ་ནི། འདི་ལྟར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ནི་ཀུན་བྱེད་རྒྱལ་པོ་བྱེད་མཁན་ང་ལས་ནི་མ་གཏོགས་པ་ཡི་བྱེད་མཁན་གཞན་ན་སུ་ཡང་མེད་དོ་ཞེས་ཆོས་ཐམས་ཅད་ཆོས་ཉིད་བྱང་ཆུབ་སེམས་ཀྱི་རང་བཞིན་གཞི་མེད་རྩ་བྲལ་ཆེན་པོའི་ཀློང་ནས་ཤར་བའི་མེད་སྣང་སྟོང་གཟུགས་ཙམ་ལས་བདེན་པར་གྲུབ་པའི་དངོས་པོ་གཅིག་ཀྱང་མེད་པར་བསྟན་ཏོ། །དེས་ན་ཆོས་རྣམས་ཀྱི་ཆོས་ཉིད་གནས་ལུགས་འདུས་མ་བྱས་པ་ཁྱབ་བརྡལ་ནམ་མཁའ་ལྟ་བུའི་རང་བཞིན་བྱེད་པ་པོ་ཡང་ནི་སྟོན་པ་ང་ཡི་རང་བཞིན་གདོད་ནས་དེ་ལྟར་གནས་པ་ལས་གཞན་དུ་ཅི་ཡང་མེད་ལ། སྐུ་གསུམ་སྟོན་པ་གསུམ་ཡང་འགོད་པར་བྱེད་པ་པོ་ང་ཡི་རང་བཞིན་དང་ངོ་བོ་དང་ཐུགས་རྗེ་གསུམ་གྱི་རྩལ་ལས་དེ་ལྟར་ཤར་བ་མ་གཏོགས་བྱེད་མཁན་གཞན་མེད་ལ། རྒྱལ་བ་སྐུ་གསུམ་པོ་དེ་དག་གི་འཁོར་གྱི་ཚོགས་སུ་འདུས་པ་ཡང་འགོད་པར་བྱེད་པ་པོ་སྔར་སྨོས་པ་ལྟར་སྟོན་པ་ང་ལས་མེད་པ་དང་། དེ་བཞིན་དུ་སྟོན་པ་སྐུ་གསུམ་གྱིས་བསྟན་པའི་ཆོས་ཚུལ་ཉིད་འགོད་པ་ཡང་ཀུན་བྱེད་ང་ཡི་རྩལ་ལས་རང་ཤར་བ་མ་གཏོགས་གཞན་མེད་དོ་ཞེས་ཆོས་ཐམས་ཅད་ལ་བཟང་ངན་དབྱེ་བསལ་མེད་པར་བྱང་ཆུབ་ཀྱི་སེམས་གཅིག་གི་རང་བཞིན་དུ་གསུངས་པས་ཡེ་ནས་ཀུན་བྱེད་ཀུན་ཏུ་བཟང་པོའི་དགོངས་ཀློང་ལས་མ་འདས་པར་བསྟན་པའོ། །གསུམ་པ་ནི། དེ་ལྟར་ཆོས་ཐམས་ཅད་ཀུན་བྱེད་བྱང་ཆུབ་སེམས་ཀྱི་རང་བཞིན་ཡིན་པའི་རྒྱུ་མཚན་དེས་ན་སེམས་དཔའ་རྡོ་རྗེ་ཁྱོད་ལ་སྟོན་པ་ཀུན་བྱེད་ང་ཡིས་ནི་ང་ཡི་རང་བཞིན་ནམ་ཡིན་ལུགས་མ་ནོར་བ་ཇི་ལྟ་བ་བཞིན་དུ་ཁྱོད་ལ་བསྟན་པར་བྱ་སྟེ་དེ་བསྟན་པས་ཆོས་ཐམས་ཅད་ཀྱི་རང་བཞིན་རྟོགས་པར་འགྱུར་བའི་ཕྱིར་རོ། །དེ་ཡང་ཇི་ལྟར་ཞེ་ན་ཀུན་བྱེད་བྱང་ཆུབ་ཀྱི་སེམས་ང་ལ་རང་བཞིན་མ་བཅོས་པའི་དོན་ནི་རྣམ་པ་གསུམ་ཡོད་དེ། ང་ཡི་རང་བཞིན་རྣམ་པ་གསུམ་པོ་དེ་གང་ཞེ་ན་བྱང་བའི་རང་བཞིན་དང་། ཆུབ་པའི་རང་བཞིན་དང་། སེམས་ཀྱི་རང་བཞིན་དང་རྣམ་པ་གསུམ་ཡིན་ནོ། །དེ་ལ་བྱང་བ་དག་གི་རང་བཞིན་བསྟན་པ་ནི་སྟོན་འཁོར་བསྟན་པ་སྟེ་ཕུན་སུམ་ཚོགས་པ་རྣམ་པ་གསུམ་གྱི་རང་བཞིན་ཆོས་ཉིད་ཀ་དག་དྲི་བྲལ་གྱི་ངོ་བོར་གནས་པ་འདི་ཉིད་ནི་བྱང་བའི་དོན་ཡིན་ལ། ཆུབ་པ་དག་གི་རང་བཞིན་བསྟན་པ་ནི་དགོས་པ་ཐམས་ཅད་ཕུན་སུམ་ཚོགས་པ་སྟོན་འཁོར་བསྟན་པ་རྣམ་པ་གསུམ་གྱིས་ཞེས་སྟོན་པ་སྣང་བས་གདུལ་བྱས་བླང་དོར་གྱི་དམིགས་འབྱེད་པའི་དགོས་པ་དང་། འཁོར་ཡོད་པས་ལམ་བསྟན་པ་དོན་མེད་དུ་མི་འགྱུར་བའི་དགོས་པ་དང་། བསྟན་པ་ཡོད་པས་སྟོན་འཁོར་ཚོགས་པ་དོན་མེད་དུ་མི་འགྱུར་བར་གདུལ་བྱའི་དོན་ཡོངས་སུ་རྗོགས་པའི་དགོས་པ་གསུམ་ཡོད་པས་དེ་ལྟར་གསུངས་ལ། དེ་ལྟ་བུའི་ཕུན་སུམ་ཚོགས་པ་གསུམ་གྱིས་ནི་ནམ་མཁའ་ཡི་ཁམས་བཞིན་དུ་གདུལ་བྱ་སེམས་ཅན་གྱི་ཁམས་ཀུན་ལ་ཁྱབ་པར་གནས་ཤིང་སྣང་བའི་རང་བཞིན་འོད་གསལ་བའི་ཆ་ནས་ཆུབ་པའི་དོན་དང་། སེམས་ཞེས་བྱ་བའི་རང་བཞིན་བསྟན་པ་ནི་བྱང་ཆུབ་སེམས་ཀྱི་རྩལ་ཐུགས་རྗེའི་རོལ་པ་མི་འགག་པར་ཤར་བའི་སྣང་སྲིད་འཁོར་འདས་ཀྱི་ཆོས་མ་ལུས་པ་ཐམས་ཅད་ཀུན་བྱེད་རྒྱལ་པོ་ཡི་ཐུགས་རྗེའི་རོལ་རྩལ་ཡིན་པའི་ཆ་ནས་ནི་སེམས་ཞེས་བྱ་སྟེ། དེ་ལྟར་ན་བྱང་བ་དང་ཆུབ་པ་དང་སེམས་གསུམ་པོ་དེ་ཉིད་རང་བཞིན་སྟོང་པ་ཆོས་སྐུ་དང་། ངོ་བོ་གསལ་བ་ལོངས་སྐུ་དང་། །ཐུགས་རྗེ་ཀུན་ཁྱབ་སྤྲུལ་པའི་སྐུ་གསུམ་གྱི་ཆ་ལ་བཏགས་པ་ཡིན་ཏེ། ཀུན་གསལ་ལས། བྱང་ཆོས་སྐུ། ཆུབ་ལོངས་སྐུ། སེམས་སྤྲུལ་སྐུའོ། །ཞེས་སོ། །དེས་ན་སྣང་སྲིད་འཁོར་འདས་ཀྱི་ཆོས་ཀུན་དེ་གསུམ་གྱི་གདངས་ལས་ཤར་བ་ཡིན་པས་ཀུན་བྱེད་རྒྱལ་པོས་བྱས་པ་ཡིན་ཞིང་། དེ་ལྟར་ན་འཁོར་འདས་ཐམས་ཅད་སྣང་དུས་ཉིད་ནས་རང་བཞིན་ངོ་བོ་ཐུགས་རྗེ་སྟེ་སྐུ་གསུམ་གྱི་ངང་ལས་འདའ་བ་མེད་པས་བླང་དོར་བསལ་བཞག་གི་འབད་རྩོལ་གང་ཡང་མི་དགོས་པར་མ་བཅོས་ཡེ་བབ་སོར་བཞག་གི་དགོངས་པ་ལ་རྟག་ཏུ་གནས་ཤིང་དེ་ལས་འདའ་བ་མེད་པ་ནི་ཆོས་ཉིད་བྱང་ཆུབ་སེམས་ཀྱི་གནས་ལུགས་སུ་འཁོར་འདས་ཀྱི་ཆོས་མ་ལུས་པ་བྱས་པའི་དགོས་པ་ཡིན་ནོ། །ཞེས་གསུངས་སོ། །ལེའུའི་མཚན་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་ཆོས་ཉིད་ཀྱི་རང་མདངས་མངོན་དུ་ཕྱུང་ནས་བསྟན་པའི་ལེའུ་སྟེ་གཉིས་པའི་འགྲེལ་བའོ། །དོན་གཉིས་པ་བྱུང་ཚུལ་བཤད་པ་ནི། ལེའུ་གསུམ་པས་བསྟན་པ་ལའང་གཉིས་ཏེ། ལེའུ་ལ་འཇུག་པའི་རྒྱུའི་དོན་མདོར་བསྟན་པ་དང་། དེ་གཉིས་རྒྱས་པར་བཤད་པའོ། །དང་པོ་ནི། དེ་ལྟར་ཕུན་སུམ་ཚོགས་པས་བསྡུས་པའི་འཁོར་འདས་ཀྱི་ཆོས་ཐམས་ཅད་ཇི་ལྟར་བཀོད་ཚུལ་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་སྲིད་ཞི་གཉིས་ཀྱི་བསྡུས་པའི་ཆོས་ཐམས་ཅད་ཀྱི་སྔོན་རོལ་དུ་དེ་དག་ཀུན་གྱི་བྱེད་པ་པོ་སྙིང་པོ་རང་བྱུང་གི་ཡེ་ཤེས་རིག་པ་བྱང་ཆུབ་ཀྱི་སེམས་ཀུན་བྱེད་ང་ཉིད་བྱུང་བ་ཡི་ཚུལ་འདི་གསུངས་སོ། །གཉིས་པ་ལ་གསུམ་སྟེ། སྟོན་པ་ཉིད་ཀུན་གྱི་སྔོན་རོལ་ནས་གཞི་དེ་བཞིན་ཉིད་དུ་གནས་ཚུལ། སྣང་བརྟགས་ཡེ་ཤེས་ལས་འཕྲོས་པའི་ཆོས་ཀྱི་དྲི་ལན། ཐམས་ཅད་རང་བྱུང་གི་ཡེ་ཤེས་གཅིག་གི་རོལ་པར་བསྟན་པའོ། །དང་པོ་ནི། ཀྱེ་སེམས་དཔའ་ཆེན་པོ་རིག་པ་སྟོང་གསལ་འགག་མེད་ལ་ཡིད་ཅེས་བརྗོད་པ་དེ་ཉིད་རྣ་བའི་དབང་པོ་ལ་ཞུགས་ཤིང་གཏོད་ཅིག །རྣ་བའི་དབང་པོ་ཡེ་ཤེས་པས་ཇི་སྐད་བརྗོད་པའི་ཚིག་གི་སྒྲ་དོན་ལ་རྟོགས་པར་གྱིས་ཤིག་དང་བཤད་པར་བྱའོ། །ཞེས་ཉན་པར་བསྐུལ་ཏེ། ཀྱེ་སེམས་དཔའ་ཆེན་པོ་སྟོན་པ་ང་ནི་ཀུན་བྱེད་རྒྱལ་པོ་སྟེ་ཞེས་ཆོས་ཀུན་གྱི་བྱེད་པ་པོ་མཆོག་ཏུ་བསྟན་པ་དང་། ང་ནི་ཀུན་བྱེད་བྱང་ཆུབ་ཀྱི་སེམས་ཞེས་པས་ཆོས་ཀུན་གྱི་སྙིང་པོའམ་གནས་ལུགས་སུ་བསྟན་ནས། དེ་ལྟ་བུའི་སྟོན་པ་ཀུན་ཏུ་བཟང་པོ་རང་བྱུང་གི་ཡེ་ཤེས་ང་མ་བྱུང་བའམ་མེད་པ་ཡི་སྔོན་རོལ་ན། སྣང་སྲིད་སྣོད་བཅུད་ལ་སོགས་པའི་སྐུ་གསུམ་གྱི་ཆོས་རྣམས་འབྱུང་བའི་སྙིང་པོ་མེད་ཅིང་མ་གྲུབ་ལ་ཞེས་གདོད་མའི་སྤྱི་གཞིའི་དུས་ན་འཁོར་འདས་མིང་མེད་ཆེན་པོའི་རང་བཞིན་དུ་བསྟན་པ་སྟེ། དེ་བཞིན་དུ་སྟོན་པ་ང་ཉིད་མེད་པ་ཡི་སྔོན་རོལ་ན་ཆོས་ཀུན་ལ་དབང་བསྒྱུར་བར་བྱེད་པའི་རྒྱལ་པོ་མེད་པ་དང་། ང་མེད་པ་ཡི་སྔོན་རོལ་ན་ཀུན་བྱེད་རྒྱལ་པོ་དེས་གང་ལ་དབང་བསྒྱུར་བར་བྱའི་སྟོན་པ་སྐུ་གསུམ་ཞེས་བྱ་བ་ཡང་ཡེ་ནས་མེད་པ་དང་། ང་མེད་པ་ཡི་སྔོན་རོལ་ན་སྐུ་གསུམ་གྱི་སྟོན་པ་ངོས་བསྟན་པ་དམ་པའི་ཆོས་ཞེས་བྱ་བ་ཡང་ཡེ་ནས་མེད་པ་དང་། ང་མེད་པ་ཡི་སྔོན་རོལ་ན་ཆོས་དེ་རྣམས་གང་ལ་སྟོན་པའི་ཡུལ་འདུས་པའི་འཁོར་ཚོགས་ཞེས་བྱ་བ་དེ་ཐམས་ཅད་ཡེ་ནས་མེད་པས། སེམས་དཔའ་རྡོ་རྗེ་ཁྱོད་ཀྱིས་ཆོས་རྣམས་ལ་ཡོད་མེད་དང་བཟང་ངན་བླང་དོར་སོགས་ཀྱི་ཚུལ་ཇི་ལྟ་བུ་ཡིན་ནམ་སྙམ་པའི་རྟོག་པ་མ་སྐྱེ་ཞིག་ཅེས་གསུངས་ལ། དེ་ལྟར་ཆོས་གཞན་རྣམས་ཡོད་མེད་སོགས་སྤྲོས་པའི་མཐའ་གང་དུའང་གྲུབ་པ་མེད་པར་མ་ཟད་སེམས་དཔའ་ཆེན་པོ་ཁྱོད་ཉིད་ཀྱང་སྟོན་པ་ཀུན་བྱེད་ང་ཡི་ངོ་བོ་ལས་རྩལ་དུ་ཤར་བའི་སྤྲུལ་པ་ལས་ཡོད་པ་ཙམ་མ་ཡིན་པས་ཀུན་བྱེད་རྒྱལ་པོ་ང་ནི་གདོད་མའི་གཞི་དབྱིངས་ཆོས་ཉིད་དེ་བཞིན་ཉིད་ཀྱི་ངང་ལས་གཡོ་བ་མེད་པར་གནས་པའོ། །ཞེས་གསུངས་སོ། །དེ་ལྟར་ཡང་མདོ་བཅུ་ལས། བྱང་ཆུབ་སེམས་ཀྱི་བདེ་ཆེན་ལས། །རྣམ་པར་དག་པའི་ཆོས་ཉིད་ལ། །སྣང་དང་སྲིད་པ་གཉིས་སུ་མེད། །སྣོད་དང་བཅུད་ཀྱང་གཉིས་སུ་མེད། །སངས་རྒྱས་སེམས་ཅན་གཉིས་ཀྱང་མེད། །དགེ་དང་སྡིག་པ་གཉིས་ཀྱང་མེད། །ཕྱི་ནང་སྨོས་པའི་ཆོས་ཀྱང་མེད། །མེད་པའི་དོན་གྱི་སྙིང་པོ་ལ། །ཡོད་པའི་སྒྲོ་སྐུར་གདབ་མི་བྱ། །ཞེས་གསུངས་པ་ལྟར་རོ། །གཉིས་པ་སྣང་བརྟགས་ཡེ་ཤེས་ལས་འཕྲོས་པའི་ཆོས་ཀྱི་དྲི་ལན་ལ་གཉིས། ཕུན་སུམ་ཚོགས་པ་ལྔ་གཅིག་ཐ་དད་ཀྱི་དྲི་ལན་དང་། བགྲོད་ལམ་དེ་བཞིན་ཉིད་ཀྱི་དྲི་ལན་ནོ། །དང་པོ་ལ་གཉིས་ཏེ། འཁོར་གྱིས་དྲི་བ་དང་། ཆོས་ཅན་ཐ་དད་དུ་སྣང་ཡང་ཆོས་ཉིད་དེ་བཞིན་ཉིད་གཅིག་ལས་མ་འདས་པར་བསྟན་པའོ། །དང་པོ་ནི། སྟོན་པའི་གནས་ཚུལ་བསྟན་པའི་རྗེས་དེ་ནས་སེམས་དཔའ་རྡོ་རྗེས་སྟོན་པ་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལ་སླར་ཡང་ཞུས་པ། ཀྱེ་སྟོན་པ་ཀུན་བྱེད་རྒྱལ་པོ་བྱང་ཆུབ་ཀྱི་སེམས་རིག་པ་རང་བྱུང་གི་ཡེ་ཤེས་ཁྱོད་ནི་ཡེ་གདོད་མ་ནས་འཁོར་འདས་ཀྱི་ཆོས་ཀུན་གྱི་སྤྱི་གཞི་ཆོས་ཀྱི་དབྱིངས་ནམ་མཁའ་ཆེན་པོ་ལྟ་བུ་ཡིན་ཞིང་། སྐུ་གསུམ་གྱི་སྟོན་པ་དང་ནི་དེ་དག་གི་བསྟན་པ་དང་འཁོར་དང་ལ་སོགས་པའི་ཁུངས་ནས་དུས་དང་གནས་མ་ལུས་པ་ཡང་ཆོས་རྣམས་ཀུན་བྱེད་པའི་མཁན་པོ་སྟོན་པ་བྱང་ཆུབ་ཀྱི་སེམས་ཁྱོད་ཀྱིས་བྱས་པ་ཡིན་པས་ན། ཕུན་སུམ་ཚོགས་པ་ལྔས་མ་བསྡུས་པའི་ཆོས་གཅིག་ཀྱང་མེད་ཕྱིར་ཇི་ལྟར་སྣང་བའི་ཆོས་རྣམས་མ་ལུས་པ་ཀུན་བྱེད་མཁན་ཀུན་བྱེད་རྒྱལ་པོ་ཁྱོད་ཀྱིས་བྱས་པར་སྣང་ན། ཁྱོད་ཀྱིས་བྱས་པའི་སྟོན་པ་སྐུ་གསུམ་པོ་དེ་རང་བཞིན་གཅིག་གམ་རྣམ་པ་དུ་རུ་ཡོད་པ་དང་། དེ་བཞིན་དུ་སྟོན་པ་དེ་དག་གི་བསྟན་པ་གཅིག་གམ་རྣམ་པ་དུ་རུ་ཡོད་པ་དང་། འཁོར་རྣམས་ཀྱང་གཅིག་གམ་རྣམ་པ་དུ་རུ་ཡོད་ཅེས་ཞུས་སོ། །འདི་སྐབས་གཞུང་ན་ཕུན་སུམ་ཚོགས་པ་གསུམ་ལས་མ་བསྟན་ཀྱང་། ཀུན་མཁྱེན་བླ་མས་ས་བཅད་དུ་ཕུན་སུམ་ཚོགས་པ་ལྔ་གཅིག་ཐ་དད་ཀྱི་དྲི་ལན་དང་གསུངས་པས་དུས་དང་གནས་གཉིས་ཀྱང་ཤུགས་བསྟན་དུ་བཞེད་པར་གསལ་ལོ། །གཉིས་པ་ནི། དེ་ལྟར་ཞུས་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་སེམས་དཔའ་རྡོ་རྗེ་ལ་སླར་གསུངས་པ། ཀྱེ་སེམས་དཔའ་རྡོ་རྗེ་འདི་ལྟར་ཆོས་ཉིད་ཀྱི་ངོས་ནས་རང་བྱུང་གི་ཡེ་ཤེས་འོད་གསལ་བདེ་གཤེགས་སྙིང་པོ་དབྱིངས་ཡེ་ཟུང་དུ་འཇུག་པ་འདི་ཉིད་འཁོར་འདས་ཀུན་གྱི་སྟོན་པར་སྣང་བ་གཅིག་པུ་ལས་ཐ་དད་པའི་དབྱེ་བ་མེད་མོད། འོན་ཀྱང་ཆོས་ཅན་སྣང་བའི་ངོས་ནས་སྟོན་པ་ང་ཡི་རང་བཞིན་ནམ་གཤིས་ལུགས་རང་བཞིན་ངོ་བོ་ཐུགས་རྗེ་སྟེ་རྣམ་པ་གསུམ་གྱི་རྩལ་ལས་སྣང་བ་ལ་སྟོན་པའི་གྲངས་ནི་ཆོས་སྐུ་ལོངས་སྐུ་སྤྲུལ་སྐུ་སྟེ་རྣམ་པ་གསུམ་དུ་བྱུང་བ་དང་། ང་ནི་ཆོས་རྣམས་ཀྱི་ཆོས་ཉིད་དེ་བཞིན་ཉིད་ཀྱི་རང་བཞིན་དུ་རྣམ་དབྱེར་མེད་པ་གཅིག་པུའི་རང་བཞིན་དུ་བཞུགས་པ་ལས་ཐ་དད་པ་མེད་ལ། དེ་བཞིན་དུ་ཇི་ལྟར་སྣང་བའི་ཆོས་རྣམས་ཀུན་གྱི་ཆོས་ཉིད་དེ་བཞིན་ཉིད་ཀྱང་ང་ཉིད་ཀྱི་རང་བཞིན་རིག་པ་བྱང་ཆུབ་ཀྱི་སེམས་འདི་ལས་གཞན་དུ་མེད་དོ། །དེ་ལྟ་ན་ཡང་ང་ལས་བྱུང་བའི་སྟོན་པ་སྐུ་གསུམ་གྱིས་གདུལ་བྱ་རྣམས་རིམ་གྱིས་དྲངས་པའི་ཐབས་སུ་རང་རང་གི་འཁོར་གྱི་ཚོགས་ལ་ཀུན་འབྱུང་འདྲེན་པའི་ཐེག་པ། དཀའ་ཐུབ་རིག་བྱེད་ཀྱི་ཐེག་པ། དབང་བསྒྱུར་ཐབས་ཀྱི་ཐེག་པ་སྟེ་བསྟན་པ་རྣམ་པ་གསུམ་དུ་བསྟན་པ་ཡིན་ཞིང་། སྟོན་པ་སྐུ་གསུམ་གྱི་འཁོར་ཚོགས་ཀྱང་ཀུན་བྱེད་ང་ཡི་དབྱིངས་སྐྱེ་བ་མེད་པ་གཅིག་གི་རང་བཞིན་དུ་གནས་པ་ལས་མངོན་དུ་ཕྱུང་ནས་ནི་སྣང་བ་ཡིན་པས་དེ་ལྟར་སྣང་བའི་དུས་ཉིད་ནའང་ང་ཡི་རང་བཞིན་འོད་གསལ་བའི་སྣང་བ་གཅིག་ཏུ་བསྟན་པའི་ཕྱིར་ན་ཐ་དད་ཀྱི་དབྱེ་བ་མེད་པར་ཀུན་བྱེད་ང་ཡི་འཁོར་དུ་ཀུན་ཀྱང་གཅིག་པ་ཡིན་མོད། སྣང་ཚུལ་ལ་ང་ལས་བྱུང་བའི་སྟོན་པ་སྐུ་གསུམ་གྱིས་གདུལ་བར་བྱ་བའི་འཁོར་གྱི་བྱེ་བྲག་རྣམ་པ་གསུམ་དུ་ཡོད་དོ། །ཞེས་གསུངས་སོ། །གཉིས་པ་བགྲོད་ལམ་དེ་བཞིན་ཉིད་ཀྱི་དྲི་ལན་ལ་གཉིས་ཏེ། དེ་བཞིན་ཉིད་ཀུན་བྱེད་རྒྱལ་པོའི་སར་བགྲོད་ལམ་ཡོད་མེད་ཀྱི་དྲི་ལན། སྐུ་གསུམ་སྟོན་པའི་སར་བགྲོད་པའི་ལམ་བཤད་པའོ། །དང་པོ་ལ་གཉིས་ཏེ། དྲི་བ་དང་། གཤིས་ལ་ལམ་མེད་པར་བཤད་པའོ། །དང་པོ་ནི། སེམས་དཔའ་རྡོ་རྗེ་ཡང་སྟོན་པ་ཀུན་བྱེད་ཉིད་ལ་ཞུས་པ་འདི་ལྟར། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ལགས། སྟོན་པ་ཁྱོད་ལས་བྱུང་བའི་སྟོན་པ་སྐུ་གསུམ་གྱི་བསྟན་པ་ལ་ཆོས་སྐུ་ཀུན་བྱེད་རྒྱལ་པོ་ཁྱོད་ཉིད་ཀྱི་སར་འགྲོ་བའི་ལམ་ནི་ཡོད་དམ་མེད། གལ་ཏེ་མེད་ན་ཁམས་གསུམ་གྱི་སེམས་ཅན་རྣམས་ཀུན་བྱེད་ཁྱོད་ཀྱི་སའམ་ཀུན་བཟང་ཆོས་སྐུའི་ས་རུ་ཕྱིན་པར་འགྱུར་རམ་འོན་ཏེ་མི་ཕྱིན་པར་འགྱུར། གལ་ཏེ་བགྲོད་པའི་ལམ་ཡོད་ན་ལམ་དེ་ཉིད་བགྲོད་པའི་སྒོ་ནས་འབྲས་བུའི་སར་ཕྱིན་ནམ་འོན་ཏེ་མ་བགྲོད་པར་ཕྱིན་པ་ཡིན་ཞེས་དྲིས་སོ། །གཉིས་པ་ནི། དེ་ལྟར་དྲིས་པ་ལ་སྟོན་པས་ལན་ཏུ་གསུངས་པ་ཀྱེ་སེམས་དཔའ་ཆེན་པོ་ཉོན་ཅིག །ཀུན་བྱེད་ང་ལས་བྱུང་བའི་སྟོན་པ་སྐུ་གསུམ་གྱི། བསྟན་པ་ལ་ཀུན་བཟང་གདོད་མའི་མགོན་པོ་ང་ཡི་ས་རུ་བགྲོད་པར་བྱེད་པའི་ལམ་ནི་མེད་དེ། ཅིའི་ཕྱིར་ན་ཆོས་ཐམས་ཅད་ང་ཡི་རང་བྱུང་གི་ཡེ་ཤེས་འོད་གསལ་འདུས་མ་བྱས་པ་གདོད་ནས་ལྷུན་གྲུབ་ཆེན་པོའི་རང་བཞིན་དུ་བསྟན་པ་ཡིན་པ་དེ་ལས་གཞན་དུ་བགྲོད་དེ་འགྲོ་ས་མེད་པའི་ཕྱིར་རོ་ཞེས་སོ། །གཉིས་པ་ལ་གསུམ་ཏེ། ལམ་ལྔ་བསྟན་པ། དེའི་ངེས་ཚིག་དྲི་བ། ལན་གསུངས་པའོ། །དང་པོ་ནི། དེ་ལྟར་རང་བྱུང་གི་ཡེ་ཤེས་ལས་གཞན་པའི་ལམ་མེད་པའི་རྒྱུ་མཚན་དེ་བས་ན་རྒྱལ་བ་སྐུ་གསུམ་གྱི་སྟོན་པ་དེ་ཡི་འཁོར་དུ་འདུས་པ་རྣམས་ལ་གཤིས་ཆོས་ཉིད་འདུས་མ་བྱས་པའི་ངོས་ན་རང་བྱུང་ཡེ་ཤེས་ཀྱི་བདག་ཉིད་ཡེ་ནས་སྒྲིབ་བྲལ་ཀ་དག་གི་ངོ་བོར་གནས་པས་རྣམ་པར་ཐར་པའི་ལམ་ནི་ཡེ་ཤེས་རྣམ་པ་ལྔ་པོ་འདི་ལས་གཞན་དུ་མེད་པ་སྟེ། འདི་ཉིད་ཁོ་ན་དུས་གསུམ་དུ་གཤེགས་བཞུགས་འབྱོར་འགྱུར་གྱི་སངས་རྒྱས་ཀུན་གྱི་ལམ་དུ་བསྟན་པ་ཡིན་ནོ། །དེ་ལ་རང་བྱུང་འདུས་མ་བྱས་པའི་ཡེ་ཤེས་ལྔ་ཡི་ལམ་ལྔ་པོ་དེ་ནི་གང་ཞེ་ན། འདི་ལྟར་ཆོས་ཉིད་ཀྱི་ངང་ལས་ནམ་ཡང་མི་འདའ་བའི་འདོད་ཆགས་དང་ནི། གཟུང་འཛིན་གྱི་ཆོས་ལ་མི་གནས་པས་ཞེ་སྡང་དང་། བླང་དོར་གྱི་རྟོག་པ་མེད་པས་གཏི་མུག་དང་། སེམས་ཉིད་རང་བྱུང་གི་ཡེ་ཤེས་ཆོས་རྣམས་ཀུན་ལས་ཁྱད་པར་དུ་གྱུར་པས་ང་རྒྱལ་དང་ནི། ཆོས་ཉིད་ཀྱི་ཕྲག་ཏུ་མཚན་མའི་ཆོས་མི་ཤོང་བའི་ཕྲག་དོག་དང་རྣམ་པ་ལྔ་སྟེ། དེ་ལྟ་བུའི་རང་བྱུང་ཡེ་ཤེས་རྣམ་པ་ལྔ་པོ་དེ་ནི་སྐུ་གསུམ་གྱི་སྟོན་པའི་འཁོར་རྣམས་ཀུན་གྱི་ལམ་ཡིན་ནོ། །ཞེས་གསུངས་སོ། །གཉིས་པ་ནི། སླར་ཡང་འཁོར་གྱིས་ཞུས་པ། སྐུ་གསུམ་གྱི་སྟོན་པའི་སྟོན་པ་ཀུན་བྱེད་རྒྱལ་པོ་ལགས་དེ་ལྟར་རང་བྱུང་ཡེ་ཤེས་ཀྱི་ལམ་ལྔ་སྐུ་གསུམ་གྱི་སྟོན་པའི་འཁོར་རྣམས་ལ་བསྟན་པ་ཡིན་ན། འོ་ན་དེ་ལ་རང་བྱུང་ཞེས་བྱ་བ་དེ་ནི་ཚུལ་ཇི་ལྟར་བྱུང་བ་ལ་དེ་ལྟར་བརྗོད་པ་ལགས་པ་དང་། དེ་བཞིན་དུ་ཡེ་ཤེས་ཞེས་བྱ་བའི་མིང་གི་བརྗོད་པ་དེ་གཏན་ཚིག་གམ་རྒྱུ་མཚན་ཅི་ལ་གདགས་པ་དང་། ལམ་ཞེས་བགྱི་བའམ་བཏགས་པའི་དོན་ནམ་རྒྱུ་མཚན་ནི་གང་ལ་དགོངས་ནས་དེ་ལྟར་བསྟན་པར་བགྱི་བའི་ཚུལ་རྣམས་རྒྱས་པར་དབྱེ་བའི་སྒོ་ནས་འདོད་ཆགས་དང་ཞེ་སྡང་དང་གཏི་མུག་དང་ང་རྒྱལ་དང་ཕྲག་དོག་ལ་སོགས་ཞེས་པའི་ཁུངས་ནས་དེ་ལྔ་ཡི་རྩལ་ལས་ཤར་བའི་ཀུན་རྟོག་བརྒྱད་ཁྲི་བཞི་སྟོང་ཐམས་ཅད་དོན་ལ་སེམས་ཉིད་རང་བྱུང་གི་ཡེ་ཤེས་ལས་མ་འདས་པས་ཀུན་ཀྱང་བསྡུས་ལ། དེ་དག་ཐམས་ཅད་ཚུར་བསྡུས་ན་རང་བྱུང་གི་ཡེ་ཤེས་ལྔ་པོ་དེ་ལ་འདུས་པས་རྣམ་པ་ལྔ་པོ་དེ་ལམ་ལྔ་ཡིན་པའི་དོན་ནི་སྟོན་པ་ཉིད་ཀྱིས་བཤད་དུ་གསོལ། ཞེས་ཞུས་སོ། །གསུམ་པ་ནི། སྟོན་པ་ཀུན་བྱེད་ཉིད་ཀྱིས་ཇི་ལྟར་དྲིས་པའི་དོན་བཀའ་སྩལ་པ་ཀྱེ་སེམས་དཔའ་ཆེན་པོ་རང་བྱུང་ཡེ་ཤེས་རྣམ་པ་ལྔ་པོ་དེ་ཡི་ལམ་གྱི་ངེས་ཚིག་ནི། འདི་ལྟ་སྟེ་རང་བྱུང་ཞེས་སུ་བརྗོད་པ་ནི་རྒྱུ་རྐྱེན་གང་གིས་གསར་དུ་བསྐྱེད་པ་མེད་པར་ཡེ་ནས་རང་བྱུང་འདུས་མ་བྱས་པ་རིག་པ་བྱང་ཆུབ་སེམས་ཀྱི་རྩལ་འགག་མེད་དུ་ཤར་ཞིང་བྱུང་བ་ཡིན་ལ་ཞེས་ངོ་བོ་སྐྱེ་མེད་ཀྱི་ཆ་ནས་བསྟན་པ་དང་། ཡེ་ཤེས་ཞེས་པ་ནི་གདོད་ནས་འགག་པ་མེད་པར་རང་བཞིན་གྱིས་འོད་གསལ་མ་བཅོས་ལྷུན་གྲུབ་ཆེན་པོར་བསྟན་པ་ཡིན་ནོ་ཞེས་གདངས་འགག་མེད་ཀྱི་ཆ་ནས་བསྟན་པ་སྟེ། དེས་ན་གསལ་སྟོང་དབྱེར་མེད་པ་རང་བྱུང་ཡེ་ཤེས་ཆེན་པོ་སྤྲོས་བྲལ་མཚན་མ་མེད་པའི་རང་བཞིན་དུ་གནས་པ་ཡིན་ལ། དེ་ལྔ་ལ་ལམ་དུ་བཞག་པའི་རྒྱུ་མཚན་ནི་བགྲོད་བྱ་བགྲོད་བྱེད་ཐམས་ཅད་རྒྱུ་རྐྱེན་གྱིས་གསར་དུ་བསྐྱེད་པ་མེད་པར་མ་བཅོས་ཡེ་ཤེས་བླ་མའི་ས་རུ་ཡེ་ནས་ལྷུན་གྱིས་གྲུབ་ཟིན་པས་ན་ད་གསར་དུ་བགྲོད་མི་དགོས་ཏེ། ནམ་མཁའི་མཐའ་དང་མཉམ་པ་ལས། རྟོག་པས་མ་བཅོས་བླ་མའི་ས། །འཁོར་བ་ཉིད་ན་ཡེ་སངས་རྒྱས། །ཞེས་སོ། །རྒྱུ་མཚན་དེས་ན་མ་བགྲོད་མི་བགྲོད་བགྲོད་པར་མི་འགྱུར་བའི་རང་བྱུང་འདུས་མ་བྱས་པའི་ཡེ་ཤེས་ལྔ་ལ་ལམ་ལྔར་བཤད་པ་ཡིན་ཏེ་འཁོར་འདས་ཐམས་ཅད་སྣང་བའི་རྒྱུའམ་འཆར་བའི་ལམ་ནི་འདི་ལྔ་ཡིན་པའི་ཕྱིར་ཏེ། ཀུན་གསལ་ལས། སྐྱེ་དང་བརྟེན་པ་མི་འབྲལ་བས། །འཁོར་དང་མྱ་ངན་འདས་པའི་ལམ། །ཞེས་པ་ལྟར་ལ་དེ་ལྟ་བུའི་ཡེ་ཤེས་ལྔ་པོ་ཡི་སོ་སོའི་ངེས་ཚིག་ནི། དེ་ལ་འདོད་པ་ཞེས་སྨོས་པ་ནི་འཁོར་འདས་ཀྱི་ཆོས་རྣམས་ཐམས་ཅད་རང་བྱུང་ཡེ་ཤེས་ཆེན་པོ་རིགས་པ་བྱང་ཆུབ་སེམས་ཀྱི་བདག་ཉིད་གཅིག་ཏུ་འདོད་པའམ་གྲུབ་པ་ཡིན་ལ། ཆགས་པ་ནི་ཆོས་ཉིད་བྱང་ཆུབ་ཀྱི་སེམས་བདག་ཏུ་འདོད་པའམ་བདག་ཉིད་ཆེན་པོའི་ངོ་བོར་བཞག་པ་དེ་ལ་ཆགས་པའམ་དེ་ལས་འདའ་བ་མེད་པ་དང་། ཞི་བ་ཞེས་པ་ནི་བློའམ་སེམས་ཀྱི་མིང་ཡིན་ཞིང་སེམས་དེ་ནི་གདོད་ནས་སྐྱེ་བ་མེད་པའི་རང་བཞིན་ལ་གནས་པ་དང་། སྡང་བ་ནི་སེམས་ཀྱི་ཆོ་འཕྲུལ་འཁོར་བའི་སྣང་བ་སྣ་ཚོགས་སུ་ཤར་བ་དེ་གནས་ལུགས་ལ་གྲུབ་པ་མེད་པས་སྡང་ཞིང་རྒྱབ་ཀྱིས་ཕྱོགས་པ་ཡིན་ནོ། །གཏི་མུག་ཅེས་པ་ནི་རྣམ་པར་མི་རྟོག་པ་ཡི་ཏིང་ངེ་འཛིན་གྱིས་ཆོས་ཅན་གྱི་སྣང་བ་ཐམས་ཅད་ཆོས་ཉིད་མཉམ་པ་ཉིད་ཀྱི་ངོ་བོར་གྱུར་པ་དེའི་ངང་ལ་དབྱེ་བསལ་གང་ཡང་མེད་པ་དང་། ང་ཞེས་བརྗོད་པ་ནི་གནས་ལུགས་མ་ནོར་བ་ཡི་རང་བཞིན་བྱང་ཆུབ་ཀྱི་སེམས་ཉིད་ཡིན་ལ། དེ་ནི་ཆོས་ཉིད་དེ་བཞིན་ཉིད་ཀྱི་རང་བཞིན་དུ་ཡེ་ནས་གནས་པས་མ་དག་མཚན་མའི་ཆོས་དང་རྩོལ་བཅས་ཀྱི་ཐེག་པ་ཀུན་ལས་རྒྱལ་བར་བྱེད་པ་དང་། ཕྲག་དོག་ཞེས་པ་ནི་སྣང་སྲིད་འཁོར་འདས་ཀྱི་ཆོས་ཐམས་ཅད་ཆོས་ཉིད་དེ་བཞིན་ཉིད་ཀྱི་ངང་དུ་སྤྲོས་བྲལ་བློ་འདས་ཆེན་པོ་གཅིག་ཏུ་གནས་པ་ལ་ཡོད་མེད་དང་རྟག་ཆད་ཡིན་མིན་ལ་སོགས་པའི་སྒྲོ་སྐུར་འདེབས་པ་ཐམས་ཅད་གནས་ལུགས་ཀྱི་ངང་ལ་དེ་ལྟར་གྲུབ་པ་མེད་པས་ཕྲག་དོག་བྱེད་པའམ་ཆོས་ཉིད་ཀྱི་ཕྲག་ཏུ་མཚན་མའི་ཆོས་མི་ཤོང་བར་དོག་པའོ། །དེ་ལྟར་འཕྲུལ་ལྡེ་ལས། སེམས་དཔའ་རྡོ་རྗེས་ཡང་གསོལ་བ། །ཉིད་ཀྱི་བྱང་ཆུབ་སེམས་གཅིག་ནི། །ཉོན་མོངས་དུག་ལྔའི་རང་བཞིན་ས། །དེ་དོན་བདག་གིས་རྟོགས་གྱུར་ཏེ། །འདོད་པ་སྲིད་གསུམ་སངས་རྒྱས་འདོད། །ཆགས་པ་ཆོས་ཉིད་ངང་ལ་ཆགས། །སེམས་ནི་འདོད་ཆགས་ཡིན་པར་རྟོགས། །ཞེ་བ་བྱང་ཆུབ་དོན་ལ་ཞེ། །སྡང་བ་འཁོར་བའི་ཆོས་ལ་སྡང་། །སེམས་ནི་ཞེ་སྡང་ཡིན་པར་རྟོགས། །གཏི་བ་ཆོས་ཉིད་དོན་ལ་གཏི། །མུག་པ་འཁོར་བའི་ཆོས་ལ་མུག །སེམས་ནི་གཏི་མུག་ཡིན་པར་རྟོགས། །ང་ནི་བྱང་ཆུབ་སེམས་ཡིན་ལ། །རྒྱལ་ནི་ཐེག་པ་ཀུན་ལས་རྒྱལ། །སེམས་ནི་ང་རྒྱལ་ཡིན་པར་རྟོགས། །ཕྲག་ནི་ཆོས་ཉིད་དབྱིངས་ཀྱི་ཕྲག །དོག་པ་མཚན་མ་ཀུན་ལ་དོག །སེམས་ནི་ཕྲག་དོག་ཡིན་པར་རྟོགས། །ཞེས་གསུངས་སོ། །ཚུལ་དེ་དག་གི་བགྲོད་དུ་མེད་པའི་རང་བྱུང་ཡེ་ཤེས་ཀྱི་ལམ་ལྔ་ཡི་ངེས་ཚིག་བསྟན་པ་ཡིན་ནོ། །གསུམ་པ་ཐམས་ཅད་རང་བྱུང་ཡེ་ཤེས་སུ་བསྟན་པ་ལ་གཉིས་ཏེ། ཁམས་གསུམ་རང་བྱུང་གི་ཡེ་ཤེས་སུ་བསྟན་པ་དང་། དེའི་ངེས་ཚིག་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་ཁྱོད་ཉོན་ཅིག་ཇི་ལྟར་སྣང་ཞིང་སྲིད་པས་བསྡུས་པ་འཁོར་བའི་ཆོས་དང་ཞི་བ་མྱང་འདས་ཀྱི་ཆོས་རྣམས་ཐམས་ཅད་ཀུན་རང་བྱུང་ཡེ་ཤེས་ཀྱི་ལམ་ལྔ་པོ་འདི་ལས་བྱུང་བ་ཡིན་པས་ན་འདི་ལྟར་འདོད་པའི་ཁམས་སུ་སྣང་བ་འདི་ཉིད་ཀྱང་རང་བྱུང་ཡེ་ཤེས་ཀྱི་ངོ་བོ་དེ་ལྟར་སྣང་བ་ཡིན་ཞིང་། གཟུགས་ཀྱི་ཁམས་ཀྱང་རང་བྱུང་གི་ཡེ་ཤེས་ཀྱི་རང་རྩལ་མངོན་དུ་སྣང་བ་ཡིན་པ་དང་། གཟུགས་མེད་པའི་ཁམས་ཀྱང་རང་བྱུང་ཡེ་ཤེས་ཡིན་ཏེ། དེ་རྒྱུ་མཚན་ཅིའི་ཕྱིར་ན་ཐམས་ཅད་ཀུན་བྱེད་རྒྱལ་པོ་བྱང་ཆུབ་ཀྱི་སེམས་ང་ཡིས་བྱས་པ་ཡིན་པའི་ཕྱིར་ན་ངས་བྱས་པའི་ཆོས་འཁོར་འདས་ཐམས་ཅད་རང་བྱུང་ཡེ་ཤེས་ཀྱི་ངོ་བོར་ཡེ་ནས་གནས་པར་བཤད་པ་སྟེ། ཁམས་གསུམ་གྱི་སེམས་ཅན་མཐོ་རིས་གསུམ་དང་ངན་འགྲོ་གསུམ་སྟེ་རྒྱུད་དྲུག་གིས་བསྡུས་པ་ཐམས་ཅད་ཀུན་ཀྱང་རང་བྱུང་གི་ཡེ་ཤེས་མིན་པ་གཅིག་ཀྱང་ཡོད་པར་ཀུན་བྱེད་རྒྱལ་པོ་ངས་མ་བཤད་དེ། དེས་ན་ཁམས་གསུམ་རྒྱུད་དྲུག་ཏུ་སྣང་བ་དེ་ལས་མ་གཏོགས་པ་ཡི་བྱང་ཆུབ་ཀྱི་སེམས་ནི་སངས་རྒྱས་ཀུན་གྱི་མེས་པོ་སྟོན་པ་ཀུན་བྱེད་རྒྱལ་པོ་ངས་མ་བཤད་དོ་ཞེས་སོ། །གཉིས་པ་ནི། དེ་ལ་ཁམས་གསུམ་ཞེས་བྱ་བའི་ངེས་ཚིག་གང་ཞེ་ན་ཀུན་བྱེད་རྒྱལ་པོ་ང་ཡི་རང་བཞིན་ལ་སྟོང་གསལ་ཐུགས་རྗེ་སྟེ་ཆོས་ཉིད་རྣམ་པ་གསུམ་དུ་བསྟན་པ་སྟེ། དེ་ལ་རང་བཞིན་གདོད་ནས་སྐྱེ་བ་མེད་པའམ་མ་སྐྱེས་པ་ཡི་ཆོས་ཉིད་སྤྲོས་པ་དང་བྲལ་བས་དངོས་པོའི་ཆོས་སུ་མི་སྣང་བའི་ཆ་ནས་བྱང་ཆུབ་ཀྱི་སེམས་དེ་ལ་ནི་གཟུགས་མེད་ཀྱི་ཁམས་ཞེས་སུ་བསྟན་པ་ཡིན་ལ། ངོ་བོ་སྣང་ཆ་མ་འགག་པར་སྐྱེ་བའི་ཆོ་འཕྲུལ་གཟུགས་སུ་སྣང་བ་ཡི་ཆ་ནས་ནི་བྱང་ཆུབ་ཀྱི་སེམས་དེ་ནི་གཟུགས་ཀྱི་ཁམས་ཞེས་སུ་བསྟན་པ་ཡིན་པ་དང་། ཐུགས་རྗེ་མ་འགག་པའི་རྩལ་སྣང་ཡེ་ཤེས་ཀྱི་ངོ་བོ་མངོན་དུ་ཕྱུང་ནས་འབྲས་བུ་བདེ་སྡུག་དང་རྒྱུ་དགེ་སྡིག་གི་ལས་སྣ་ཚོགས་སུ་སྣང་བ་དེ་ཉིད་ཐུགས་རྗེས་ཟད་པར་བྱ་བའི་ཕྱིར་འདོད་པའི་ཁམས་ནི་རང་རྩལ་འགག་པ་མེད་པའི་ཐུགས་རྗེས་མངོན་དུ་ཕྱུང་ཞིང་སྤྲུལ་པར་ཤར་བ་ཡིན་པའི་ཕྱིར་དེ་ལྟར་དུ་བསྟན་ཏོ་ཞེས་གསུངས་སོ། །ལེའུའི་མཚན་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་ཆོས་ཐམས་ཅད་ཀུན་བྱེད་རྒྱལ་པོས་བྱས་པ་ལས་ཇི་ལྟར་བྱུང་བའི་ཁུངས་བསྟན་པའི་ལེའུ་སྟེ་གསུམ་པའི་འགྲེལ་བའོ། །དོན་གཉིས་པ་གནས་ལུགས་རྒྱ་ཆེར་བཤད་པ་ལ་གསུམ་སྟེ། ཆོས་ཐམས་ཅད་གདོད་ནས་དག་པ་ཀུན་བྱེད་ཉིད་དུ་བསྟན་པ། ཆོས་ཉིད་སྒྲུབ་བསལ་ལས་འདས་པར་བསྟན་པ། བྱ་བཙལ་མཚན་མའི་ཡུལ་ལས་གྲོལ་བའོ། །དང་པོ་ལ་དབྱིངས་ཀྱི་ལེའུ་བདུན་ལས། དང་པོ་རྩ་བ་སེམས་སུ་འདུས་པ་ཀུན་བྱེད་མངོན་དུ་ཕྱུང་བའི་ལེའུ་བཞི་པ་ལ་གཉིས་ཏེ། འདུག་ཚུལ་མདོར་བསྟན་པ་དང་། དེ་ཉིད་རྒྱས་པར་བཤད་པའོ། །དང་པོ་ནི་བྱུང་ཚུལ་བསྟན་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་ཉིད་ཀྱི་རང་བཞིན་གསལ་བར་བྱེད་པའི་མཚན་གྱི་ཆོས་རྒྱ་ཆེར་བཤད་པ་འདི་གསུངས་སོ། །གཉིས་པ་ལ་གསུམ་སྟེ། ཐམས་ཅད་ཀུན་བྱེད་ཉིད་དུ་འདུས་པར་རྟོགས་ཤིག་པར་གདམས་པ། དེའི་དོན་བཤད་པ། དེ་ཉིད་རྟོགས་ན་ཐམས་ཅད་ལྷུན་རྫོགས་གཅིག་ཏུ་གྲུབ་པའོ། །དང་པོ་ནི། ཀྱེ་སེམས་དཔའ་ཆེན་པོ་རྡོ་རྗེ་ཁྱོད་ཉོན་ཅིག །སྟོན་པ་ཀུན་བྱེད་ང་ནི་ཡེ་ནས་རྒྱུ་རྐྱེན་གང་གིས་ཀྱང་འདུས་མ་བྱས་པ་རང་བྱུང་གི་ཡེ་ཤེས་ཏེ་ཞེས་མཚན་གྱི་རྣམ་གྲངས་དང་པོ་བསྟན་པ་དང་། ང་ནི་ཡེ་ནས་སྣང་སྲིད་སྣོད་བཅུད་ཀྱི་ཆོས་ཀུན་གྱི་སྙིང་པོའམ་བཅུད་ཡིན་ནོ་ཞེས་མཚན་གྱི་རྣམ་གྲངས་གཉིས་པ་དང་། ང་ནི་ཀུན་བྱེད་རྒྱལ་པོ་བྱང་ཆུབ་ཀྱི་སེམས་ཡིན་ནོ་ཞེས་མཚན་གྱི་རྣམ་གྲངས་གསུམ་པ་སྟེ། དེ་ལྟར་ང་ཡི་མཚན་གྱི་རྣམ་གྲངས་རྣམ་པ་གསུམ་པོ་འདི་སེམས་དཔའ་རྡོ་རྗེ་ཁྱོད་ཀྱིས་རྟོགས་པར་གྱིས་ཤིག་དང་། ང་ཡི་མཚན་རྣམ་པ་གསུམ་པོ་འདི་ཡི་དོན་སེམས་དཔའ་རྡོ་རྗེས་མ་ནོར་བར་རྟོགས་པར་གྱུར་ན་ཇི་ལྟར་སྣང་བའི་ཆོས་རྣམས་ཐམས་ཅད་མ་ལུས་པ་ཡི་རང་བཞིན་རྟོགས་པར་འགྱུར་གྱིས་དེའི་ཕྱིར་ན་མཚན་གྱི་དོན་འདི་རྣམས་ཇི་བཞིན་ཏུ་བསྟན་པར་བྱའོ་ཞེས་སོ། །གཉིས་པ་ལ་གསུམ་སྟེ། ཐམས་ཅད་རང་བྱུང་གི་ཡེ་ཤེས་སུ་བཤད་པ། དེ་ཉིད་ཕུན་སུམ་ཚོགས་པ་ཀུན་གྱི་རང་བཞིན་ཏུ་བསྟན་པ། མཚན་གྱི་ངེས་ཚིག་བཤད་པའོ། །དང་པོ་ནི། དེ་ལ་ང་ཞེས་བྱ་བའི་དོན་ནི་སྙིང་པོ་ཡི་དོན་སྟེ། དེ་གང་གི་སྙིང་པོ་ཡིན་ཞེ་ན་འཁོར་འདས་ཀྱི་ཆོས་རྣམས་ཀུན་གྱི་འབྱུང་གནས་སུ་གྱུར་པས་སྙིང་པོ་ཡིན་པ་དང་། རང་བྱུང་ཞེས་ནི་བྱ་བ་ནི་དང་པོར་བསྐྱེད་པའི་རྒྱུ་དང་ཐ་མ་འཇིག་པའི་རྐྱེན་མེད་པའི་རང་བཞིན་འདུས་མ་བྱས་པའི་ཆོས་ཉིད་ཆོས་ཅན་སྣང་བའི་དངོས་པོ་ཀུན་གྱི་སྙིང་པོ་འམ་གནས་ལུགས་ཡིན་པས་སྒོ་གསུམ་གྱི་རྩོལ་སྒྲུབ་ཀུན་ལས་འདས་པ་ཡི་དོན་ཡིན་པ་དང་། ཡེ་ཤེས་ཞེས་ནི་བྱ་བ་ཡི་དོན་ནི་སྐྱེ་བ་མ་གྲུབ་པས་མཐར་འགག་པ་མེད་ཅིང་རང་བཞིན་འདུས་མ་བྱས་པ་ལ་བསྒྲིབ་བྱ་སྒྲིབ་བྱེད་ཀྱི་ཆོས་སུ་གྲུབ་པ་མེད་པས་མ་བསྒྲིབས་པས་སམ་ཡང་ན་སྐྱེ་བའི་ཆོ་འཕྲུལ་འགག་པ་མེད་ཅིང་རང་བཞིན་འོད་གསལ་གྱི་སྣང་ཆ་མ་སྒྲིབ་པས་ཆོས་ཀུན་མ་ལུས་པའི་རོལ་པ་རྩལ་སྣང་འགག་མེད་དུ་སྟོན་པར་བྱེད་པའོ། །གཉིས་པ་ནི། ང་ཞེས་འདོགས་པའི་ཡུལ་ནི་ཆོས་ཐམས་ཅད་ཀྱི་སྙིང་པོ་རིག་པ་བྱང་ཆུབ་ཀྱི་སེམས་ལ་འདོགས་པར་བྱ་བ་ཡིན་ལ། ཡེ་ནས་ཞེས་བྱ་བའི་དོན་འདི་ནི་དང་པོ་ཞེས་སམ་ཐོག་མ་ཉིད་ནས་གནས་པའི་དོན་དང་། ཆོས་ཀུན་ཞེས་སུ་ནི་བརྗོད་པར་བྱ་བ་ཡི་དོན་ནི་འཁོར་འདས་ཀྱི་ཆོས་མ་ལུས་པ་སྟེ། དེ་དག་ཚུར་བསྡུས་ན་ཕུན་སུམ་ཚོགས་པ་ལྔར་འདུས་པས་འདིར་དེའི་སྒོ་ནས་བསྟན་པ་ནི་སྟོན་པ་སྐུ་གསུམ་པོ་ཀུན་ཀྱང་ཆོས་ཉིད་ཡེ་སྟོང་ཆེན་པོ་བྱང་ཆུབ་སེམས་ཀྱི་རང་བཞིན་ཡིན་ལ། དེ་བཞིན་དུ་སྟོན་པ་དེ་དག་གིས་བསྟན་པ་རྣམ་པ་གསུམ་པོ་ཀུན་ཀྱང་ཆོས་ཉིད་གཉུག་མའི་ཡེ་ཤེས་འདི་ལས་གཞན་དུ་ཡོད་པ་མ་ཡིན་ཞིང་། འཁོར་རྣམས་དང་གནས་དུས་ཀུན་ཀྱང་ཆོས་ཉིད་སྟོང་གསལ་བརྗོད་མེད་བློ་འདས་ཆེན་པོའི་རང་བཞིན་ཉིད་ཡིན་ཏེ། དེས་ན་ཆོས་ཉིད་སྟོང་པ་ཆེན་པོ་བྱང་ཆུབ་ཀྱི་སེམས་མ་ཡིན་པའི་འཁོར་འདས་ཀྱི་ཆོས་གཅིག་ཀྱང་མེད་པར་བསྟན་པའོ། །སྙིང་པོ་ཞེས་བྱ་བའི་དོན་འདི་ནི་ཆོས་རྣམས་ཐམས་ཅད་གང་ལས་འབྱུང་བའི་སྙིང་པོ་སྟེ། ཇི་ལྟར་ན་བྱང་ཆུབ་
སེམས་ཀྱི་རང་བཞིན་ཅིར་ཡང་གྲུབ་པ་མེད་པ་ལས་ཅིར་ཡང་འཆར ་བའི་ཚུལ་དུ་སྐུ་གསུམ་གྱི་སྟོན་པ་གསུམ་ཡང་དེ་ལས་བྱུང་བ་དང་། སྟོན་པ་དེ་དག་གིས་གསུངས་པའི་བསྟན་པ་གསུམ་ཡང་དེ་ལས་བྱུང་བ་དང་དེ་དག་ལ་འདུས་པའི་འཁོར་དང་གང་དུ་བཞུགས་པའི་གནས་དང་སྟོན་འཁོར་ཚོགས་པའི་དུས་རྣམས་ཀྱང་དེ་ལས་བྱུང་བའི་ཕྱིར་ན་བྱང་ཆུབ་ཀྱི་སེམས་འདི་ནི་ཆོས་ཐམས་ཅད་གང་ལས་འབྱུང་བའི་སྙིང་པོ་ཡིན་པར་བཤད་པ་ཡིན་ནོ། །གསུམ་པ་ལ་གཉིས་ཏེ། ཕུན་སུམ་ཚོགས་པའི་ངེས་ཚིག་དང་། །བྱང་ཆུབ་སེམས་ཀྱི་ངེས་ཚིག་གོ། །དང་པོ་ནི། འདི་ལྟར་སྟོན་པ་རང་བྱུང་གི་ཡེ་ཤེས་ང་ནི་ཆོས་རྣམས་ཀུན་གྱི་སྙིང་པོ་བྱང་ཆུབ་ཀྱི་སེམས་ཉིད་ཡིན་ལ་དེ་ཉིད་ཀྱིས་སྲིད་དང་ཞི་བའི་ཆོས་རྣམས་མ་ལུས་པ་ཀུན་བྱེད་པ་ཡིན་ཏེ། དེས་ན་ཀུན་ཞེས་བྱ་བའི་དོན་ནི་ཆོས་རྣམས་ཐམས་ཅད་ཀུན་ཡིན་ལ། ཆོས་རྣམས་ཀུན་ཞེས་སུ་བརྗོད་པ་དེ་ཡང་གང་དང་གང་ལ་བརྗོད་པ་ཡིན་ཞེ་ན། དེ་ནི་ཚུར་བསྡུ་ན་ཕུན་སུམ་ཚོགས་པ་ལྔས་མ་བསྡུས་པའི་ཆོས་གང་ཡང་མེད་པས་ན་སྟོན་པ་དང་ནི་དེ་དག་གི་བསྟན་པ་དང་འཁོར་དང་གནས་དང་དུས་ནི་ཐམས་ཅད་ལ་ཀུན་ཞེས་པའི་མིང་འཇུག་པའོ། །བྱེད་ཅེས་སུ་བྱ་བ་ནི་དེ་དག་བྱེད་པའི་མཁན་པོ་ཡི་དོན་བསྟན་པ་སྟེ། དེས་ན་སྐུ་གསུམ་གྱི་སྟོན་པ་དང་ནི་དེ་རྣམས་ཀྱིས་བསྟན་པའི་ཆོས་ཐེག་པ་གསུམ་དང་གདུལ་བྱའི་འཁོར་དང་བཞུགས་པའི་གནས་དང་ཕུན་སུམ་ཚོགས་པའི་དུས་སྟེ་རྣམ་པ་ལྔ་པོ་ནི་མ་ལུས་པ་ཀུན་བྱེད་པའི་མཁན་པོ་ཡིན་པས་ན་རང་བྱུང་ཡེ་ཤེས་དེ་ལ་མཁན་པོ་ཞེས་བརྗོད་པ་ཡིན་ནོ། །རྒྱལ་པོ་ཞེས་སུ་ནི་བྱ་བ་ཡི་དོན་ནི་སྙིང་པོ་རང་བྱུང་གི་ཡེ་ཤེས་སྟོང་གསལ་བརྗོད་བྲལ་དེ་ཉིད་ནི་ཚུལ་གང་གིས་ཀྱང་བཅོས་བསྒྱུར་བྱེད་མི་ནུས་པས་བྱེད་པའི་མཁན་པོ་ཀུན་ལས་རྒྱལ་ཏེ་གང་གིས་ཀྱང་དབང་བྱེད་པའི་ཡུལ་དུ་མ་གྲུབ་པ་དང་། ཕར་ཆོས་རྣམས་ཐམས་ཅད་བྱེད་མཁན་རང་བྱུང་གི་ཡེ་ཤེས་འདི་ཉིད་གཅིག་པུ་ལས་མེད་པས་ན་ཆོས་རྣམས་ཀུན་ལས་ཀྱང་རྒྱལ་བས་ན་རྒྱལ་པོ་ཞེས་གསུངས་སོ། །འདི་ལ་ས་བཅད་དུ་ཕུན་སུམ་ཚོགས་པའི་ངེས་ཚིག་ཅེས་གསུངས་ཕུན་སུམ་ཚོགས་པ་ཀུན་བྱེད་པའི་ཆོས་སྐུ་ཀུན་བྱེད་རྒྱལ་པོའི་ངེས་ཚིག་གསུངས་པའོ། །གཉིས་པ་ནི། དེ་ལ་བྱང་ཆུབ་ཀྱི་སེམས་ཞེས་བྱ་བའི་ངེས་ཚིག་ནི་ཇི་ལྟར་ཡིན་ཞེ་ན། འདི་ལྟར་བྱུང་བ་ཞེས་བྱ་བའི་དོན་ནི་འདི་ལྟ་སྟེ། ཆོས་རྣམས་ཐམས་ཅད་འབྱུང་བའི་སྙིང་པོ་བྱང་ཆུབ་ཀྱི་སེམས་དེ་ནི་ཚོགས་གཉིས་སོགས་རྒྱུ་རྐྱེན་ལ་བརྟེན་ནས་གསར་དུ་དག་པར་བྱས་ལྟ་བུ་མ་ཡིན་པར་རིག་པ་རང་བྱུང་གི་ངོ་བོར་ཡེ་ནས་རྣམ་པར་དག་པ་ཡིན་པས་རྒྱུ་ཀུན་བྱེད་རྒྱལ་པོ་དེས་བྱས་པ་ཡི་ཆོས་རྣམས་ཀུན་ཀྱང་སྤྱོད་ཡུལ་ཀུན་ཏུ་རྣམ་པར་དག་པའི་ཀུན་བཟང་བདེ་བ་ཆེན་པོ་ཀ་དག་སྤྲོས་པ་དང་བྲལ་བའི་ཀློང་ཉིད་དུ་རྣམ་པར་དག་པ་ཉག་གཅིག་ཏུ་གནས་པས་བྱང་ཞེས་བྱ་བར་བཤད་པ་ཡིན་ལ། ཆུབ་ཅེས་བྱ་བ་ནི་འདི་ལྟ་སྟེ། སྙིང་པོ་རང་བྱུང་གི་ཡེ་ཤེས་ཀུན་ཁྱབ་བདེ་བར་གཤེགས་པའི་སྙིང་པོ་དེས་རང་གི་རྩལ་ལས་ཤར་བའི་ཆོས་སྣང་བ་འབྱུང་ལྔས་བསྡུས་པ་དང་ནི། སྲིད་པ་ཕུང་ལྔས་བསྡུས་པ་དང་། དེ་བཞིན་དུ་ཕྱི་སྣོད་དང་ནང་བཅུད་ཀྱིས་བསྡུས་པ་དང་། དུས་གསུམ་དུ་བྱོན་པའི་སངས་རྒྱས་ཐམས་ཅད་དང་། ཁམས་གསུམ་གྱིས་བསྡུས་པའི་རྒྱུད་དྲུག་གི་སེམས་ཅན་རྣམས་དང་། དེ་བཞིན་ཉིད་སོགས་འདུས་མ་བྱས་ནི་ཐམས་ཅད་ལ་སྟེ། མདོར་ན་འདུས་བྱས་འདུས་མ་བྱས་ཀྱིས་བསྡུས་པའི་ཆོས་ཀུན་ལ་སྙིང་པོ་ཆོས་ཉིད་ཀྱི་ཚུལ་དུ་ཆུབ་སྟེ་ནམ་མཁའི་ཁམས་བཞིན་དུ་ཁྱབ་པར་གནས་པ་དེས་ན་ཆུབ་ཅེས་བྱ་བར་བཤད་པ་དང་། སེམས་ཞེས་བརྗོད་པ་ཉིད་ཀྱི་དོན་ནི་འདི་ལྟ་སྟེ། སྙིང་པོ་རང་བྱུང་གི་ཡེ་ཤེས་དེའི་རྩལ་གདངས་འགག་པ་མེད་པ་སོ་སོར་རྟོག་པའི་ཤེས་རབ་མ་འགགས་པར་གསལ་བ་དེས་སྣང་སྲིད་སྣོད་བཅུད་ཐམས་ཅད་ལ་ཐོགས་པ་མེད་པར་འཇུག་ཅིང་དབང་བསྒྱུར་བའི་སྒོ་ནས་གསལ་བར་གཅོད་པ་དེས་ན་སེམས་ཞེས་བྱ་བར་བཤད་དོ། །དེ་ལྟར་རྒྱུ་རྐྱེན་མེད་པའི་རང་བྱུང་ཡེ་ཤེས་ཆེན་པོ་ཆོས་ཀུན་གྱི་སྙིང་པོ་འམ་སྙིང་པོའི་ཚུལ་དུ་བཞུགས་པ་དེས་སྣང་སྲིད་འཁོར་འདས་ཀུན་ལ་དབང་བསྒྱུར་ཞིང་ཐམས་ཅད་བྱེད་པ་ཡིན་ནོ་ཞེས་འཇུག་བསྡུས་པའོ། །གསུམ་པ་ནི། ཀྱེ་སེམས་དཔའ་ཆེན་པོ་རྡོ་རྗེ་ཀུན་བྱེད་བྱང་ཆུབ་ཀྱི་སེམས་རིག་པ་རང་བྱུང་གི་ཡེ་ཤེས་ང་ཡི་རང་བཞིན་ཆོས་སྐུ་སྟོང་གསལ་ཆེན་པོ། གང་ཡིན་གྱི་གཟའ་གཏད་མེད་པ། འདི་ཡིན་གྱི་ངོས་བཟུང་མེད་པ། བྱ་རྩོལ་གྱི་ཡུལ་དུ་མེད་པ། མཚན་འཛིན་གྱི་བློ་དང་བྲལ་བ། གཉིས་སྣང་གི་མཐའ་ལས་གྲོལ་བ། གཉིས་མེད་ཀྱི་ངོ་བོ་མེད་པ། སྣང་བ་ལ་རང་བཞིན་མེད་པ། སྟོང་པ་ལ་འགག་པ་མེད་པ། ཟུང་འཇུག་གི་གཞི་རྩ་མེད་པ། བཟང་ངན་དང་བླང་དོར་མེད་པ། རྒྱ་ཆད་དང་ཕྱོགས་ལྷུང་མེད་པ་ཁྱབ་བརྡལ་ནམ་མཁའ་ལྟ་བུའི་རང་བཞིན་འདིའི་ལྟ་བ་བཞིན་དུ་རྟོགས་པར་གྱུར་ན་སྐུ་གསུམ་གྱི་སྟོན་པ་ཀུན་གྱི་ཆོས་ཉིད་ཀྱང་རྟོགས་པར་འགྱུར་ལ། དེ་དག་གི་བསྟན་པ་ཀུན་གྱི་དོན་ཀྱང་རྟོགས་པར་འགྱུར་བ་དང་། འཁོར་གྱི་བསམ་པ་ཡི་བྱེ་བྲག་མ་ལུས་པ་ཡང་རིག་པར་འགྱུར་ལ། དུས་དང་གནས་ཀུན་གྱི་རང་བཞིན་ཀྱང་གཅིག་ཏུ་འགྱུར་བའི་ཆོས་ཉིད་དབྱེ་བསལ་མེད་པའི་དོན་རིག་པར་འགྱུར་ཏེ། འདི་ལྟར་སྣང་སྲིད་འཁོར་འདས་ཀྱི་ཆོས་རྣམས་ཐམས་ཅད་ཀུན་ཀྱང་ཀུན་བྱེད་ང་ཡི་རྩལ་དང་རོལ་པར་ཤར་བ་ཁོ་ན་ཡིན་པས་སོ། །དེ་ལྟར་རིག་ཅིང་རྟོགས་པ་ལ་དགོས་པའམ་ཡོན་ཏན་ཅི་ཡོད་སྙམ་ན། ང་ཡི་རང་བཞིན་ཡིན་ལུགས་མ་ནོར་བ་འདི་ཇི་བཞིན་དུ་རིག་ཅིང་རྟོགས་པར་གྱུར་ན་འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་ཀྱི་རང་བཞིན་ཡེ་གྲོལ་བསལ་བཞག་དང་བྲལ་བའི་ཚུལ་མ་ནོར་བར་རིག་པར་འགྱུར་བས་བྱ་བྱེད་རྩོལ་སྒྲུབ་ཀྱི་སྦྲོས་པ་ཀུན་ལས་འདས་ཏེ། རེ་དོགས་དང་དགག་སྒྲུབ་གང་ཡང་མེད་པ་མི་རྩོལ་ལྷུན་གྱིས་གྲུབ་པའི་ཚུལ་དུ་ཀུན་བཟང་ཆོས་སྐུའི་རྒྱལ་ས་རུ་ད་ལྟ་ཉིད་ནས་གཏན་སྲིད་ཟིན་པར་འགྱུར་རོ། །ཞེས་གསུངས་སོ། །ལེའུའི་མཚན་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་ང་ཉིད་ཀྱི་མཚན་གྱི་དོན་རྒྱ་ཆེར་བཤད་པའི་ལེའུ་སྟེ་བཞི་པའི་འགྲེལ་པའོ།། །།གཉིས་པ་ཐམས་ཅད་ཀུན་བྱེད་ཉིད་ལས་བྱུང་བའི་ལེའུ་ལྔ་པ་ལ་གཉིས་ཏེ། འཇུག་ཚུལ་མདོར་བསྟན་པ་དང་། དེ་ཉིད་རྒྱས་པར་བཤད་པའོ། །དང་པོ་ནི། དེ་ལྟར་མཚན་གྱི་རྣམ་གྲངས་བཤད་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་ཐུགས་སྲས་སེམས་དཔའ་རྡོ་རྗེ་ལ་སོགས་པའི་འཁོར་ཚོགས་རྣམས་ལ་སྟོན་པ་ཉིད་ཀྱི་རང་བཞིན་བསྟན་པའི་མདོ་ཐམས་ཅད་སེམས་ཉིད་རང་བྱུང་གི་ཡེ་ཤེས་ཆོས་ཉིད་རྫོགས་པ་ཆེན་པོའི་དགོངས་པ་གཅིག་ཏུ་འདུས་པའི་དོན་འདི་བསྟན་ཏོ། །གཉིས་པ་ལ་གསུམ་སྟེ། དབྱིངས་དེ་བཞིན་ཉིད་ལས་ཐེག་པ་དུ་མར་བསྟན་ཡང་རང་བཞིན་ཆོས་ཉིད་ལས་མ་གཡོས་པ། དེའི་དོན་ནམ་མཁའ་ལྟ་བུར་བསྟན་པ། ཀུན་དཔེ་ཆོས་ཉིད་དུ་ངེས་པར་བྱེད་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག་སྟོན་པ་རང་བྱུང་གི་ཡེ་ཤེས་ང་ཡི་རང་བཞིན་འདི་ལྟ་སྟེ་ཡོད་ནི་ཆོས་ཉིད་བྱང་ཆུབ་ཀྱི་སེམས་རིག་པ་རང་བྱུང་གི་ཡེ་ཤེས་གཅིག་ལས་མེད་པ་སྟེ་ཆོས་ཐམས་ཅད་ཡེ་ནས་མ་གྲུབ་པར་ཆོས་སྐུ་ཐིག་ལེ་ཉག་གཅིག་གི་རང་བཞིན་དུ་གནས་པ་ཡིན་པའི་ཕྱིར་རོ། །དེ་ལྟ་ན་ཡང་སེམས་ཅན་རྣམས་ཀྱིས་རྒྱུ་ལྷན་གཅིག་སྐྱེས་པ་དང་རྐྱེན་ཀུན་ཏུ་བརྟགས་པའི་མ་རིག་པ་གཉིས་ཀྱིས་དབང་གིས་ཡོད་པ་ཆོས་ཉིད་ཀྱི་དོན་མ་རྟོགས་པར་མེད་པ་འཁོར་བའི་འཁྲུལ་སྣང་སྣ་ཚོགས་ལ་སྤྱོད་པ་ལ་གནས་ལུགས་རང་བྱུང་གི་ཡེ་ཤེས་དེ་རྟོགས་བྱེད་ཀྱི་ཐབས་སུ་གདུལ་བྱ་རང་རང་གི་བློ་དང་འཚམས་པར་བསྟན་པའི་ཐེག་པའི་རྣམ་གྲངས་ནི་འཇིག་རྟེན་པའི་ཐེག་པ་དང་འཇིག་རྟེན་ལས་འདས་པའི་ཐེག་པ་རྣམ་པ་གཉིས་སུ་བསྟན་པ་ཡིན་ཏེ་མདོ་བཅུ་ལས། གཉིས་ནི་རྣམ་པའི་བྱེ་བྲག་སྟེ། །ཐེག་པ་རྣམ་པ་གཉིས་སུ་བསྟན། །འཇིག་རྟེན་པ་ཡི་ཐེག་པ་དང་། །འཇིག་རྟེན་འདས་པའི་ཐེག་པ་གཉིས། །ཞེས་གསུངས་པ་ལྟར་ལ་དེ་ལས་འཇིག་རྟེན་འདས་པའི་ཐེག་པ་ལ་ནང་གསེས་ཀྱི་དབྱེ་བ་དུ་ཞིག་བྱུང་ན་ནི་གདུལ་བྱ་དབང་པོ་རབ་འབྲིང་ཐ་མ་གསུམ་ལ་རབ་ཀྱི་རབ་སོགས་ནང་གསེས་གསུམ་གསུམ་དབྱེ་བའི་དགུ་ཡོད་པ་ལ་ལྟོས་ནས་ཐེག་པ་རིམ་པ་དགུ་རུ་བྱུང་བ་ཡིན་ཀྱང་དེ་རྣམས་ཐམས་ཅད་ཚུར་བསྡུས་ན་སྣོད་བཅུད་ཐམས་ཅད་ནམ་མཁའི་ཀློང་དུ་འདུས་པ་ལྟར་ཐེག་པའི་རྣམ་གྲངས་དེ་རྣམས་ཀྱང་འདུས་ནི་ཆོས་ཉིད་རང་བྱུང་གི་ཡེ་ཤེས་ལྷུན་གྲུབ་རྫོགས་པ་ཆེན་པོར་དབྱེ་བསལ་མེད་པར་གཅིག་ཏུ་འདུས་པ་ཡིན་ཏེ། དེ་ཉིད་ལས། སྣང་སྲིད་སྣོད་བཅུད་ཐམས་ཅད་དང་། །སངས་རྒྱས་སེམས་ཅན་ཐམས་ཅད་དང་། །བསྟན་པའི་ཐེག་པ་ཐམས་ཅད་ཀུན། །སེམས་ཉིད་རྫོགས་ཆེན་འདི་ལ་འདུས། །འདི་ལ་གནས་ཤིང་འདི་དོན་སྟོན། །འདི་ནི་ཀུན་བཟང་ང་ཡིན་ཏེ། །སངས་རྒྱས་ཀུན་གྱི་སྟོན་པ་ཡིན། །ཞེས་གསུངས་པ་ལྟར་རོ། །གཉིས་པ་ནི། དེ་ལྟར་ཐེག་པ་ཀུན་གྱི་དོན་རྫོགས་པ་ཆེན་པོར་འདུས་པ་ཡིན་ན་འོ་ན་རྫོགས་པ་ཆེན་པོའི་དོན་ནི་ཇི་ལྟ་བུ་ཞིག་ཡིན་སྙམ་ན་དེ་ནི་སྔར་བསྟན་པའི་བྱང་ཆུབ་ཀྱི་སེམས་འདི་ཉིད་ཡིན་ཏེ་ཞེས་ཆོས་རྣམས་ཀྱི་གནས་ལུགས་རིག་པ་རང་བྱུང་གི་ཡེ་ཤེས་ཀྱི་ངོ་བོ་ངོས་བཟུང་བ་དང་། དེའི་མཚན་ཉིད་བསྟན་པའི་ཕྱིར་དུ་བྱང་ཆུབ་ཀྱི་སེམས་དེ་གནས་ནི་ཆོས་ཉིད་སྐྱེ་བ་མེད་པ་སྟོང་ཆེན་དབྱིངས་ཀྱི་ངང་ལ་རྟག་ཏུ་གནས་ཤིང་དེ་ལས་འདའ་བ་མེད་ལ། གསལ་ནི་རིག་པ་བྱང་ཆུབ་སེམས་ཀྱི་ངོ་བོ་འོད་གསལ་ལྷུན་གྲུབ་ཀྱི་སྣང་ཆ་འགག་པ་མེད་པར་དབྱིངས་སྐྱེ་བ་མེད་པའི་ནམ་མཁའ་ལ་ཡེ་ནས་སྒྲིབ་པ་མེད་པར་གསལ་བ་ཡིན་ལ། ཁྱབ་ནི་ཆོས་ཀྱི་དབྱིངས་དང་ནམ་མཁས་གར་ཁྱབ་པའི་ཕྱི་ནང་སྣོད་བཅུད་ཀྱི་ཁམས་ཀུན་ལ་ཆོས་ཉིད་ཀྱི་ཚུལ་དུ་ཡེ་ནས་འདུ་འབྲལ་མེད་པར་ཁྱབ་པ་དང་། དེའི་གདངས་འགག་པ་མེད་པའི་རོལ་རྩལ་ལས་བྱུང་བ་ནི་སྣང་སྲིད་སྣོད་བཅུད་སོགས་འཁོར་འདས་ཀུན་གྱི་རྣམ་རོལ་དུ་བྱུང་བ་ཡིན་ཀྱང་། དེ་ལྟ་ནའང་རང་གི་ངོ་བོ་འདི་ལྟ་བུའོ་ཞེས་བསྟན་དུ་གཏུབས་པའི་རང་བཞིན་ཅན་མཚན་མའི་དངོས་པོ་ཅན་དུ་གྲུབ་པ་གང་ཡང་མེད་ལ། དེས་ན་རྟོག་མེད་ཀྱི་ཤེས་པས་མངོན་སུམ་དུ་མཐོང་དུ་ཡང་མེད་དེ་དམིགས་པའི་ཡུལ་དུ་གྲུབ་པའི་རང་མཚན་དང་བྲལ་བའི་ཕྱིར་དང་། རྟོག་བཅས་ཀྱི་བློ་ཡིས་ལུང་དང་གཏན་ཚིག་སོགས་ལ་བརྟེན་ནས་རྗེས་དཔག་གི་ཚུལ་དུ་ཤེས་སུ་ཡང་མེད་དེ་ཚིག་ཏུ་བརྗོད་པར་བྱེད་པར་གཞན་སེལ་དོན་སྤྱིའི་ངོ་བོ་ཙམ་དུའང་གྲུབ་པ་མེད་པའི་ཕྱིར་རོ། །རྒྱུ་མཚན་དེ་ལྟ་བུའི་ཕྱིར་ན་བསྐྱེད་བྱེད་ཀྱི་རྒྱུ་ལས་མ་བྱུང་བ་རང་བྱུང་འདུས་མ་བྱས་པ་ཆོས་ཀུན་གྱི་སྙིང་པོ་བྱང་ཆུབ་ཀྱི་སེམས་འདི་ཉིད་ཡོད་མེད་ཡིན་མིན་འཁོར་འདས་བཟང་ངན་ལ་སོགས་སྤྲོས་པའི་མཐའ་གང་དུ འང་གྲུབ་པ་མེད་པས་འདི་དང་འདི་ལྟ་བུའོ་ཞེས་སྒྲ་ཚིག་གི་སྒྲོས་ཀྱིས་བཏགས་པ་ཀུན་དང་བྲལ་བས་ཆོས་ཉིད་དམིགས་བསམ་ལས་འདས་པ་མཐའ་གྲོལ་ཕྱོགས་ཡན་ཆེན་པོའི་རང་བཞིན་དུ་བསྟན་པ་ཡིན་ནོ། །གསུམ་པ་ཀུན་དཔེ་ཆོས་ཉིད་དུ་ངེས་པར་བྱེད་པ་ལ་གཉིས་ཏེ། དཔེ་དོན་རྟགས་གསུམ་གྱིས་ངེས་པར་བྱ་བ་དང་། དེ་ལས་གཞན་པའི་དཔེས་མི་རྟོགས་པར་བསྟན་པའོ། །དང་པོ་ནི། གོང་དུ་བཤད་པའི་ཀུན་བྱེད་བྱང་ཆུབ་སེམས་ཀྱི་དོན་འདི་ངེས་པར་སྟེ་མ་ནོར་བ་ཇི་ལྟ་བ་བཞིན་དུ་རྟོགས་པར་འདོད་ན་དཔེ་དོན་རྟགས་གསུམ་གྱི་སྒོ་ནས་རྟོགས་པར་བྱ་དགོས་ཏེ། དེ་ལ་སེམས་ཉིད་རང་བྱུང་གི་ཡེ་ཤེས་མཚོན་པར་བྱེད་པའི་དཔེ་ནི་ནམ་མཁའ་ལྟ་བུར་བརྟགས་པར་བྱ་སྟེ། བྱང་ཆུབ་སེམས་ཀྱི་མདོ་ལས། ཆོས་ཀུན་དཔེ་ནི་ནམ་མཁའ་འདྲ། །ནམ་འཁའ་དག་ལས་ཐམས་ཅད་འབྱུང་། །ཆོས་ཀུན་སྙིང་པོ་བྱང་ཆུབ་སེམས། །ཐམས་ཅད་འབྱུང་བས་ནམ་མཁའ་འདྲ། །རྒྱུ་མེད་པ་ཡི་བྱང་ཆུབ་སེམས། །མ་སྐྱེས་པས་ན་ནམ་མཁའ་འདྲ། །རྐྱེན་མེད་པ་ཡི་བྱང་ཆུབ་སེམས། །མི་འཇིག་པས་ན་ནམ་མཁའ་འདྲ། །གཉེན་པོ་མེད་པའི་བྱང་ཆུབ་སེམས། །ཐམས་ཅད་འཇོམས་པས་ནམ་མཁའ་འདྲ། །མཚོན་དུ་མེད་པའི་བྱང་ཆུབ་སེམས། །བསྟན་དུ་མེད་པའི་ནམ་མཁའ་འདྲ། །མ་སྒྲིབ་པ་ཡི་བྱང་ཆུབ་སེམས། །ཀུན་ཏུ་གསལ་བས་ནམ་མཁའ་འདྲ། །ཐམས་ཅད་བསྐྱེད་པའི་བྱང་ཆུབ་སེམས། །སྣང་སྲིད་བསྐྱེད་པས་ནམ་མཁའ་འདྲ། །རང་བྱུང་ཟབ་མོའི་དོན་གཞིག་ན། །དོན་དམ་མ་སྐྱེས་ནམ་མཁའ་འདྲ། །སྣང་དང་སྲིད་དང་ཡོད་པ་དང་། །བཏགས་ཤིང་ཆགས་པའི་ཆོས་རྣམས་ཀུན། །དོན་དམ་རང་བཞིན་མ་སྐྱེས་པས། །སྐྱེ་མེད་དཔེ་ནི་ནམ་མཁའ་འདྲ། །ནམ་མཁའ་ལྟ་བུའི་ཆོས་ཀུན་བརྟགས། །ཞེས་གསུངས་ལ། དཔེ་དེས་མཚོན་པར་བྱ་བའི་དོན་ནི་འཁོར་འདས་ཀྱི་བསྡུས་པའི་ཆོས་ཐམས་ཅད་ཀྱི་ཆོས་ཉིད་དམ་འབྱུང་གནས་སུ་གྱུར་བས་ཆོས་ཀྱི་དབྱིངས་སྤྲོས་བྲལ་རང་བྱུང་གི་ཡེ་ཤེས་གདོད་ནས་སྐྱེ་བ་མེད་པའི་རང་བཞིན་དུ་མངོན་པར་སངས་རྒྱས་པའི་བདག་ཉིད་དུ་ཤེས་པར་བྱ་སྟེ། དེ་ལས། དཔེ་དེ་འདྲ་བའི་དོན་ཆོས་ནི། །ཡིན་པ་དག་ལ་དོན་ཞེས་གདགས། །དོན་ནི་སྐྱེ་བ་མེད་པ་ཡིན། །སྐྱེ་མེད་པ་ཡི་རང་བཞིན་ནི། །རྒྱུ་མེད་པ་ལས་སྐྱེ་མེད་པས། །སེམས་ལ་རྒྱུ་མེད་སྐྱེ་བ་མེད། །སྲིད་པའི་ཆོས་ལ་རྒྱུས་བསྐྱེད་ཀྱང་། །ཆོས་ཀྱི་དབྱིངས་ལ་རྒྱུ་མེད་པས། །སྐྱེ་བ་མེད་པའི་དོན་ཡིན་ནོ། །ཐམས་ཅད་ཆོས་ནི་སྐྱེ་བ་མེད། །སྐྱེ་མེད་བྱང་ཆུབ་མངོན་སངས་རྒྱས། །ཞེས་སོ། །དེ་ལྟར་སེམས་ཉིད་འདུས་མ་བྱས་པའི་རང་བཞིན་ཆོས་དབྱིངས་སྐྱེ་བ་མེད་པ་སྤྲོས་བྲལ་ནམ་མཁའ་ལྟ་བུའི་རང་བཞིན་ཏེ་ངེས་པར་བྱེད་པའི་རྟགས་ནི་སེམས་ཉིད་གདོད་ནས་སྐྱེ་བ་མེད་པ་དེ་ཉིད་ཀྱི་གདངས་རྩལ་འགག་པ་མེད་པར་རང་ཤར་བའི་ངོ་བོ་ཉིད་དེ། དེ་ལྟར་ཡང་ཆོས་དབྱིངས་རིན་པོ་ཆེའི་མཛོད་ལས། །རྟགས་ནི་རྩལ་ལས་ཅིར་ཡང་འཆར་བ་སྟེ། །ཤར་བའི་དུས་ན་ཤར་ས་ཤར་མཁན་མེད། །ཤར་ཞེས་མིང་ཙམ་བརྟགས་ན་ནམ་མཁའ་འདྲ། །རིས་མེད་མཉམ་པ་ཆེན་པོར་འུབ་ཆུབ་བོ། །ཞེས་གསུངས་སོ། །དེ་ལྟར་དཔེ་དོན་རྟགས་གསུམ་གྱིས་སྣང་སྲིད་ཀྱི་ཆོས་ཐམས་ཅད་ནམ་མཁའ་ལྟ་བུའི་ཆོས་ཉིད་སྐྱེ་མེད་བསམ་བརྗོད་དང་བྲལ་བའི་རང་བཞིན་ལ་ནམ་མཁའ་ལྟ་བུའི་དཔེ་ཡིས་མཚོན་པར་བྱེད་ཅིང་། མཚན་འཛིན་གྱི་རྟོག་པའི་ཡུལ་དུ་དམིགས་སུ་མེད་པའི་ཆོས་ཉིད་ལ་སྣང་ཡང་རང་བཞིན་མེད་པའི་རྩལ་སྣང་འགག་པ་མེད་པའི་རྟགས་ཀྱི་ངོ་བོ་ངོས་བཟུང་གི་ཚུལ་དུ་དམིགས་སུ་མེད་པར་མཚོན་ཏེ་བསྟན་པར་བྱ་ཞིང་། ཚིག་ཏུ་བརྗོད་དུ་མེད་པའི་དོན་ཆོས་ཉིད་བསམ་བརྗོད་ལས་འདས་པ་ལ་སྨྲ་བསམ་བརྗོད་པ་དང་བྲལ་བའོ་ཞེས་པ་ལྟ་བུའི་བརྗོད་དུ་མེད་པའི་ཚིག་གིས་བརྗོད་དེ་དམིགས་མེད་སྤྲོས་བྲལ་དོན་གྱི་ངོ་བོར་བསྟན་པ་ཡིན་ནོ། །དེ་ལྟར་ཆོས་ཉིད་བྱང་ཆུབ་སེམས་ཀྱི་གནས་ལུགས་ཏེ་དཔེ་དོན་རྟགས་གསུམ་དུ་བསྡུས་ཏེ་བསྟན་པའི་དོན་འདི་ཡིས་ནི་ཀུན་བྱེད་བྱང་ཆུབ་སེམས་ཀྱི་རང་བཞིན་ནམ་དོན་གྱི་ངོ་བོ་འགྲེལ་ཞིང་བསྟན་པ་སྟེ། དེས་ན་དཔེ་དོན་རྟགས་གསུམ་པོ་འདི་ཡིས་ཀུན་དོན་སྐྱེ་བ་མེད་པ་ཀུན་བྱེད་ང་ཡི་དོན་འདི་ཡང་དག་པར་རྟོགས་པར་གྱིས་ཤིག་ཅེས་པའོ། །གཉིས་པ་ནི། གོང་དུ་ཇི་སྐད་བཤད་པའི་དཔེ་དོན་རྟགས་གསུམ་པོ་འདི་ཡིས་ཀུན་བྱེད་རྒྱལ་པོ་ང་ཡི་དོན་སྟོང་གསལ་སྤྲོས་པ་དང་བྲལ་བའ ི་ཡེ་ཤེས་ཏེ་རྟོགས་པར་བྱེད་དགོས་ཀྱི་གལ་ཏེ་དཔེ་དོན་རྟགས་གསུམ་པོ་འདི་ལྟ་བུ་ཡིས་ང་ཡི་དོན་འདི་མ་རྟོགས་ན་དེ་ལས་གཞན་པའི་དོན་གྱི་གནས་ལུགས་འདི་མཚོན་བྱེད་ཀྱི་དཔེ་དང་བརྗོད་བྱེད་སྒྲ་ཚིག་ཅི་དང་གང་བསྟན་ཀྱང་ང་ཉིད་བྱང་ཆུབ་སེམས་ཆོས་སྐུ་ཀུན་བྱེད་རྒྱལ་པོའི་དགོངས་པ་དང་འཕྲད་པར་མི་འགྱུར་ཏེ། ཅིས་ཕྱིར་ན་དམིགས་བསམ་སྤྲོས་པ་དང་བྲལ་བའི་ངང་ཚུལ་དེ་ལས་བརྒལ་ཏེ་གཞན་དུ་ཇི་ལྟར་བསམ་ཇི་ལྟར་བརྟགས་ཀྱང་ཀུན་བྱེད་ང་ཡི་དགོངས་པ་བརྗོད་མེད་བློ་འདས་ཆེན་པོ་ལས་གཞན་དུ་གོལ་ལ་ང་ཡི་རང་བཞིན་ཡིད་དཔྱོད་མཚན་མའི་རྟོག་པས་བསྒྲིབས་ཏེ་མི་སྣང་བ་ཡིན་པས་ན་ཆོས་རྣམས་ཀྱི་སྙིང་པོ་རིག་པ་རང་བྱུང་གི་ཡེ་ཤེས་ཇི་བཞིན་པ་མཐོང་བར་མི་འགྱུར་རོ། །ཞེས་གསུངས་སོ། །ལེའུའི་མཚན་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་དོན་གྱི་འགྲེལ་བའི་ལེའུ་སྟེ་ལྔ་པའི་འགྲེལ་བའོ།། །།གསུམ་པ་ཀུན་བྱེད་དེ་བཞིན་ཉིད་ཕུན་སུམ་ཚོགས་པའི་ངོ་བོར་བསྟན་པའི་ལེའུ་དྲུག་པ་ལ་གཉིས་ཏེ། འཇུག་ཚུལ་མདོར་བསྟན་པ་དང་། དེ་ཉིད་རྒྱས་པར་བཤད་པའོ། །དང་པོ་ནི། དེ་ལྟར་ཐེག་པ་ཐམས་ཅད་ཀྱི་སྤྲོ་གཞི་ཆོས་ཉིད་རྫོགས་པ་ཆེན་པོ་ཀུན་དོན་སྐྱེ་བ་མེད་པའི་རང་བཞིན་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་འཁོར་འདས་ཀྱི་ཆོས་ཐམས་ཅད་ཉིད་ཀྱི་རང་བཞིན་ལ་ཡེ་ནས་མ་བཙལ་ལྷུན་གྱིས་གྲུབ་པས་རྩོལ་བྲལ་རྫོགས་པ་ཆེན་པོ་ཡི་དོན་དེ་བསྟན་པར་བྱེད་པའི་ཚིག་འདི་སྐད་དུ་གསུངས་སོ། །གཉིས་པ་ལ། གཉིས་ཏེ། ཀུན་གྱི་ཐོག་མར་གཤིས་དེ་བཞིན་ཉིད་ཡེ་ནས་གནས་པའི་རང་བཞིན་བསྟན་པ་དང་། དེ་ཉིད་དྲི་ལན་གྱི་ཚུལ་གྱིས་རྒྱས་པར་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་རྡོ་རྗེ་ཇི་སྐད་བཤད་པའི་ཚིག་འདི་ཉོན་ལ་ཡིད་ལ་ཞོག་ཅིག་ཀུན་བྱེད་རྒྱལ་པོ་ང་ཡིས་ནི་ང་ཡི་ངོ་བོར་ཤར་བའི་ཆོས་རྣམས་ཐམས་ཅད་དང་པོར་རོལ་རྩལ་འགག་པ་མེད་པའི་རྟེན་འབྲེལ་དུ་བཀོད་པ་ལ་དོན་གྱི་དགོས་པ་ཅི་ཞིག་ཡོད་སྙམ་ན། ང་ཡི་ངོ་བོ་ཕུན་སུམ་ཚོགས་པ་ལྔའི་ཆོས་རྣམས་མངོན་དུ་ཕྱུང་བ་ལ་སྟོན་པ་ང་ཡི་ངོ་བོ་ཇི་བཞིན་པ་སེམས་དཔའ་རྡོ་རྗེ་ཁྱོད་ལ་སོགས་པའི་འཁོར་ཚོགས་རྣམས་ལ་བསྟན་པར་བྱ་བའི་དགོས་པ་ཡོད་ལ། དེ་ལྟར་ངོ་བོ་བསྟན་པ་ལ་བརྟེན་ནས་ང་ཡི་རང་བཞིན་ཀྱང་བསྟན་པར་འགྱུར་ཏེ། འདི་ལྟར་ངོ་བོ་སྣང་བའི་ཆོས་མངོན་སུམ་པ་འདི་རྣམས་ལ་བརྟེན་ནས་ནི་དེ་ཉིད་རང་བཞིན་མེད་པར་སྟོན་པའི་ཚིག་དང་སྒྲས་ཀྱང་རང་བཞིན་སྐྱེ་བ་མེད་པའི་དོན་ཏེ་མཚོན་པར་བྱས་ནས་བྱང་ཆུབ་སེམས་ཀྱི་ངོ་བོ་འདི་ལྟར་སྣང་བའི་ཆོས་རྣམས་ཀྱི་གནས་ལུགས་ཇི་བཞིན་པ་བསྟན་པར་བྱས་པས་སེམས་དཔའ་ཆེན་པོ་ཁྱོད་ཀྱིས་ཆོས་རྣམས་ཐམས་ཅད་སྟོང་གསལ་བརྗོད་པ་དང་བྲལ་བ་རང་བྱུང་ཡེ་ཤེས་ཉག་གཅིག་གི་རང་བཞིན་དུ་མཐོང་བར་འགྱུར་ཏེ། དགའ་རབ་རྡོ་རྗེས། སྣང་དེ་ཅིས་ཕྱིར་སྟོང་པའི་ཕྱིར། །སྟོང་དེ་ཅིས་ཕྱིར་སྣང་བའི་ཕྱིར། །ཅེས་གསུངས་པ་ལྟར་ལ་འདི་ནི་ཐུན་མོང་གི་ཐེག་པ་ལས་ཀྱང་གསུངས་ཏེ། ཇི་སྐད་དུ། ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །དེ་གཉིས་རྣམ་དབྱེ་གང་གིས་མི་ཤེས་པ། །དེ་དག་རྣམ་རྟོག་ལོག་པའི་ལམ་ངན་ཞུགས། །ཞེས་གསུངས་ཞིང་དཔལ་ལྡན་ན་གཱ་ཱརྫུ་ནས་ཆོས་ཐམས་ཅད་སྐྱེ་མེད་དུ་གཏན་ལ་དབབ་པར་བྱེད་པའི་རྟེན་འབྱུང་ཆེན་པོའི་རིག་པའི་གནད་ཀྱང་ཚུལ་དེ་ཉིད་ལ་ཐུག་པའོ། །དེ་ལྟར་བྱང་ཆུབ་སེམས་ཀྱི་རང་བཞིན་རིག་སྟོང་འདུས་མ་བྱས་པ་དམིགས་མཚན་སྤྲོས་པ་དང་བྲལ་བའི་ཚུལ་དེ་བསྟན་པར་བྱས་པས་ཆོས་ཐམས་ཅད་ཨ་དོན་སྐྱེ་བ་མེད་པའི་རང་བཞིན་མ་བཅོས་མཉམ་པ་ཆེན་པོའི་དོན་དེ་མངོན་སུམ་ཐད་དྲང་དུ་རིག་པར་གྱུར་བ་དང་། དེ་ཉིད་སྟོན་པར་བྱེད་པའི་ཚིག་རྣམས་ངག་ཏུ་བརྗོད་པར་བྱས་པས་ཕྱི་རབས་རྗེས་འཇུག་རྣམས་ཀྱིས་ཀྱང་དོན་རྣམས་ཐམས་ཅད་སྒྲར་བརྗོད་པ་ཐོས་པའི་སྒོ་ནས་ཨ་ཏི་རྫོགས་པ་ཆེན་པོའི་དགོངས་པ་ཇི་བཞིན་རྟོགས་པའི་དགོས་པ་ཡོད་དོ། །ཞེས་གསུངས་ནས་དོན་ལ་སྒྲ་ཚིག་བསམ་བརྗོད་དང་བྲལ་བ་བརྗོད་མེད་བློ་ལས་འདས་པ་མཚོན་པའི་བརྡར་ཅང་མི་གསུང་བར་ཆོས་ཐམས་ཅད་ཀྱི་ངོ་བོར་གཉིས་མེད་མཉམ་པ་ཉིད་ཀྱི་དགོངས་པ་ལ་བཞུགས་སོ། །གཉིས་པ་ལ་གསུམ་སྟེ། དྲིས་པའི་དོན་ཞུས་ཅིག་པར་གདམས་པ་དང་། ཞུས་པ་དངོས་དང་། དེའི་ལན་རྒྱ་ཆེར་གསུངས་པའོ། །དང་པོ་ནི། དེ་ནས་བཀའ་ཡི་བསྡུ་པ་པོ་སེམས་དཔའ་རྡོ་རྗེ་དེ་ཉིད་འཁོར་གྱི་ནང་ནས་རང་གི་གདན་ལས་ལངས་ནས་སྟོན་པ་བྱང་ཆུབ་ཀྱི་སེམས་ཀུན་བྱེད་རྒྱལ་པོའི་ཞལ་དུ་བྱད་ཀྱི་མདངས་ཕྱུང་སྟེ་འཁོར་པས་སྟོན་པ་ཀུན་བྱེད་རྒྱལ་པོས་བཀའ་སྩལ་པ། ཀྱེ་སེམས་དཔའ་ཆེན་པོ་ཁྱོད་ཀྱིས་ང་ཡི་ཞལ་ལ་འཛུམ་པའི་མདངས་ཀྱིས་ལྟ་ཞིང་འཁོད་པ་དེ་ཁྱོད་ཀྱིས་དོན་ཟབ་མོ་ཅི་དང་གང་ཞུ་བར་འདོད་པ་དེ་ང་ལ་གསོལ་ཅིག་དང་ཇི་ལྟར་ཞུས་པའི་དོན་རྣམས་ལུང་བསྟན་པར་བྱའོ། །ཅེས་གསུངས་སོ། །གཉིས་པ་ནི། སྟོན་པས་ཞུས་ཅིག་པར་གནང་བ་སྩལ་བ་དེ་ནས་སེམས་དཔའ་རྡོ་རྗེས་ཞུས་པ། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ལགས་འདི་ལྟར་འཁོར་འདས་ལམ་གསུམ་གྱིས་བསྡུས་པའི་ཆོས་རྣམས་ཐམས་ཅད་ཆོས་སྐུ་ཀུན་བྱེད་རྒྱལ་པོ་ཁྱོད་ཀྱི་རང་བཞིན་ཡེ་སྟོང་སྤྲོས་པ་དང་བྲལ་བ་ཡིན་ན་ཁྱོད་ཀྱི་ངོ་བོ་སྟོན་པ་དང་བསྟན་པ་དང་འཁོར་དང་གནས་དུས་རྣམས་སུ་བཀོད་པ་ལ་དགོས་པ་ཅི་ཞིག་ཡོད་པ་ལགས་དེ་རྣམས་ལྷན་གཅིག་ཏུ་ཕུན་སུམ་ཚོགས་པའི་དགོས་པ་ཅི་ཞིག་ཡོད་པ་ལགས་ཞེས་ཞུས་སོ། །གསུམ་པ་ལན་ལ་ལྔ་སྟེ། དེ་བཞིན་ཉིད་ཕུན་སུམ་ཚོགས་པའི་རང་བཞིན་དུ་མདོར་བསྟན་པ་དང་། གནས་དང་གཞལ་ཡས་ཁང་བྱེ་བྲག་ཏུ་བཤད་པ། འཁོར་དང་སྟོན་པ་སོ་སོར་བརྗོད་པ། སྲིད་པའི་ཁམས་རྒྱས་པར་བསྟན་པ། ཆོས་ཕུན་སུམ་ཚོགས་པ་ཇི་ལྟར་བཀོད་པའོ། །དང་པོ་ནི། དེ་ལྟར་འཁོར་གྱིས་ཕུན་སུམ་ཚོགས་པའི་དགོས་དོན་ཞུས་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་ཇི་ལྟར་དྲིས་པའི་དོན་འདི་སྐད་ཅེས་གསུངས་སོ། །ཀྱེ་སེམས་དཔའ་ཆེན་པོ་ཁྱོད་ཉོན་ཅིག་འདི་ལྟར་སྣང་བའི་ཆོས་རྣམས་ཐམས་ཅད་སྟོན་འཁོར་གནས་དུས་ལ་སོགས་པའི་ཕུན་སུམ་ཚོགས་པར་བཀོད་པ་ནི་ཀུན་བྱེད་བྱང་ཆུབ་ཀྱི་སེམས་ང་ཉིད་ཡེ་ནས་ཕུན་སུམ་ཚོགས་པའི་རང་བཞིན་དུ་གནས་པ་ཡིན་ཏེ། དེ་ལྟ་བུའི་ང་ཡི་རང་བཞིན་ཕུན་སུམ་ཚོགས་པ་ལྔར་གནས་པའི་ཚུལ་འདི་སེམས་དཔའ་རྡོ་རྗེ་ཁྱོད་ལ་བསྟན་པར་བྱའོ་ཞེས་སོ། །གཉིས་པ་ལ་གཉིས་ཏེ། དེ་བཞིན་ཉིད་བྱང་ཆུབ་ཆེན་པོའི་གནས་དང་། སྟོང་གསལ་རང་བྱུང་ཡེ་ཤེས་ཀྱི་གཞལ་ཡས་ཁང་པའོ། །དང་པོ་ནི། འདི་ལྟར་སྟོན་པ་ཀུན་བྱེད་ང་ཡི་རང་བཞིན་སྟོང་གསལ་བརྗོད་མེད་བསམ་འདས་ཀྱི་ཡེ་ཤེས་འདི་ཉིད་དབྱིངས་སྤྲོས་པ་དང་བྲལ་བ་ཆོས་ཉིད་དེ་བཞིན་ཉིད་དང་ཡེ་ནས་དབྱེར་མི་ཕྱེད་པའམ་འདུ་འབྲལ་མེད་པས་འོག་མིན་ཆོས་ཀྱི་དབྱིངས་ཀྱི་གནས་ཆེན་པོ་འདི་ཉིད་ཀུན་བྱེད་ང་ཡིས་བྱས་པ་ཡིན་ལ། ཀུན་བྱེད་བྱང་ཆུབ་ཀྱི་སེམས་རིག་པ་རང་བྱུང་གི་ཡེ་ཤེས་ང་ཉིད་གདོད་ནས་འཕོ་འགྱུར་མེད་པར་བཞུགས་པ་ལས་ཆོས་དབྱིངས་སྤྲོས་པ་དང་བྲལ་བའི་གནས་དེ་ན་གཞན་མཚན་མའི་སྤྲོས་པ་ཅན་གྱི་སྟོན་འཁོར་སུ་ཡང་མི་བཞུགས་ཞིང་མེད་པས་ཆོས་ཉིད་མཉམ་པ་ཆེན་པོ་གཅིག་གི་རང་བཞིན་དུ་གནས་སོ། །གཉིས་པ་ནི། ཀུན་བྱེད་ང་ཡི་རང་བཞིན་ཟང་ཐལ་གཉུག་མའི་ཡེ་ཤེས་སྒྲིབ་བྱེད་གང་གིས་མ་བསྒྲིབས་པར་འཁོར་འདས་ཀུན་ལ་ཁྱབ་པས་སྟོང་ཞིང་གསལ་བའི་རང་བཞིན་སྤྲོས་བྲལ་ནམ་མཁའ་ལྟ་བུའི་ངོ་བོར་གནས་པ་དེ་ནི་ཡེ་ཤེས་རང་སྣང་གི་གཞལ་ཡས་ཁང་ཡིན་ལ་དེ་ན་ཡང་སྟོན་པ་རང་བྱུང་གི་ཡེ་ཤེས་ཆོས་སྐུ་ཀུན་བྱེད་རྒྱལ་པོ་ཉིད་ལས་གཞན་སུ་ཡང་མི་བཞུགས་པས་ཆོས་སྐུ་ཐིག་ལེ་ཉག་གཅིག་གི་རང་བཞིན་ཡིན་ནོ། །གསུམ་པ་ལ་གསུམ་སྟེ། སྲིད་གསུམ་སེམས་ཅན་དང་། དུས་གསུམ་སངས་རྒྱས་ཀྱི་འཁོར་གྱི་རང་བཞིན་དང་། མི་གནས་སྤྲོས་པ་དང་བྲལ་བ་སྟོན་པའི་རང་བཞིན་ནོ། །དང་པོ་ནི། འདི་ལྟར་སྟོན་པ་ཀུན་བྱེད་ང་ནི་ཆོས་ཐམས་ཅད་འབྱུང་བའི་སྙིང་པོ་ཡིན་པའི་རྒྱུ་མཚན་དེ་བས་ན་འབྱུང་བ་ཆེན་པོ་ལྔ་དང་ཁམས་གསུམ་རྒྱུད་དྲུག་གི་སེམས་ཅན་རྣམས་ནི་ཀུན་བྱེད་ང་ཡི་སྐུ་གསུང་ཐུགས་ལས་གཞན་དུ་ལོག་ན་མེད་པས་ཡེ་ནས་ང་ཡི་རང་བཞིན་དུ་གནས་པ་ཉིད་ང་ཡིས་ངོ་བོ་སྣང་བའི་ཆོས་སུ་རྩོལ་མེད་དུ་བཀོད་པ་ཡིན་ནོ་ཞེས་པའོ། །དེ་ལྟར་ཡང་ཆོས་ཆེན་པོ་རྨད་དུ་བྱུང་བ་ལས། སེམས་དཔའ་ཆེན་པོ། སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་འདི་དག་ཐམས་ཅད་དེ་བཞིན་གཤེགས་པ་རྣམས་ཀྱི་ཐུགས་ལས་བྱུང་ཞིང་། ཐུགས་ཉིད་ལས་མ་གྱུར་བ་མེད་དོ། །དེ་བཞིན་གཤེགས་པ་རྣམས་ཟད་པའི་མཐའ་མེད་པས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མཐའ་ཡས་མུ་མེད་པ་ཡང་ཟད་ཅིང་མེད་པའི་དུས་མེད་དོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མཐའ་ཡས་མུ་མེད་པ་ལ་ཟད་ཅིང་སྟོང་པའི་དུས་མེད་པ་ནི་བདེ་བར་གཤེགས་པ་རྣམས་ཀྱི་སྐུ་དང་གསུང་དང་ཐུགས་ཉིད་ཡིན་ཏེ། སྐུ་གསུང་ཐུགས་ཟད་ཅིང་སྟོང་པའི་དུས་མེད་པ་ཉིད་རྨད་དུ་བྱུང་བ་ཡིན་ནོ། །ཞེས་སོ། །གཉིས་པ་ནི། རྒྱུ་མཚན་དེས་ན་འདས་མ་འོང་ད་ལྟ་སྟེ་དུས་གསུམ་གྱི་སངས་རྒྱས་དང་ཁམས་གསུམ་གྱི་བསྡུས་པའི་སེམས་ཅན་འདི་མ་ལུས་པ་ཡང་སྟོན་པ་ང་ཡི་རང་བཞིན་ཁྱོད་ལ་མངོན་དུ་བསྟན་པ་ཡིན་གྱི་གཞན་ནི་ཅི་ཡང་མེད་དོ། །ཅེས་གསུངས་པ་སྟེ། མདོ་བཅུ་ལས། སངས་རྒྱས་སྐུ་དང་ཡེ་ཤེས་དང་། །སེམས་ཅན་ལུས་དང་བག་ཆགས་དང་། །སྣང་དང་སྲིད་པའི་ཆོས་རྣམས་ཀུན། །བྱང་ཆུབ་སེམས་དང་དབྱིངས་སུ་འདུས། །ཞེས་གསུངས་པ་བཞིན་ནོ། །གསུམ་པ་ནི། དེ་ལ་སྟོན་པ་ང་ཡི་རང་བཞིན་ནི་ཇི་ལྟ་བུ་ཡིན་ཞེ་ན། དེ་ནི་ཡེ་ནས་མ་སྐྱེས་ཞིང་སྤྲོས་པའི་མཐའ་ཀུན་དང་བྲལ་བའི་ཕྱིར་ན་གང་ལའང་མི་གནས་ཤིང་དམིགས་པའི་སྤྱོད་ཡུལ་ཀུན་ལས་འདས་པ་ཡིན་པ་དང་མཚན་མ་རིས་ཅན་དུ་མི་སྣང་བའི་ངོ་བོ་ཡིན་པས་ཏིང་ངེ་འཛིན་གྱིས་བསྒོམ་སྒྲུབ་བྱེད་པ་ལ་སོགས་པའི་ཡུལ་ལས་ཀྱང་འདས་པ་ཡིན་ནོ། །བཞི་པ་ནི། གོང་དུ་བསྟན་པ་དེ་ལྟ་བུའི་ཕྱིར་ན་ཀུན་བྱེད་ང་ཡི་རང་བཞིན་དངོས་སུ་ནི་སེམས་དཔའ་རྡོ་རྗེ་ཁྱོད་ལ་མི་སྣང་ཡང་ང་ཡི་ངོ་བོ་རོལ་རྩལ་འགག་པ་མེད་པའི་ཆ་འདི་ཁྱོད་ལ་སྣང་བར་བྱས་པས་དེ་ལ་བརྟེན་ནས་ང་ཡི་རང་བཞིན་མ་ནོར་བར་རྟོགས་པའི་དགོས་པ་ཡོད་པས་འདི་ལྟར་དུ་རྟོགས་པར་གྱིས་ཤིག །དེ་ཡང་འདི་ལྟར་འདོད་ཁམས་དང་གཟུགས་ཁམས་གཟུགས་མེད་ཀྱི་ཁམས་གསུམ་དང་འབྱུང་བ་ཆེན་པོ་ལྔ་དང་རྒྱུད་དྲུག་གི་འགྲོ་བ་རྣམས་སུ་སྣང་བའི་རང་བཞིན་འདི་ཉིད་ནི་བྱང་ཆུབ་སེམས་ཀྱི་རང་བཞིན་ཡེ་ཤེས་ལྔ་པོ་འདི་ལས་བྱུང་བ་ཡིན་ཏེ། ཚུལ་དེ་ཇི་ལྟར་བྱུང་ན་རྒྱུ་རྐྱེན་མེད་པའི་རང་བྱུང་གི་ངོ་བོ་ཆོས་རྣམས་ཀྱི་སྙིང་པོ་ཡེ་ཤེས་རྣམ་པ་ལྔ་པོ་འདི་ཉིད་མངོན་དུ་བྱུང་ཞིང་སྣང་བས། ཡེ་ཤེས་ལྔ་པོ་དེ་ཡི་རྩལ་ལས་ཡུལ་གཟུགས་སྒྲ་ལ་སོགས་པ་ལྔ་ཡང་གསལ་བར་བྱུང་ལ། དེ་བྱུང་བས་ཡུལ་ལྔ་པོ་དེ་ལ་བརྟེན་ནས་ཡུལ་ཡིད་འོང་ལ་འདོད་པའི་སྲེད་པ་དང་ཡིད་དུ་མི་འོང་པ་ལ་འཇིགས་སྲེད་ལ་སོགས་པ་དུག་ལྔའི་ངོ་བོར་གྱུར་པ་ཕྲ་བའི་ཆ་འདོད་པ་ལྔ་བྱུང་བ་དང་། དེ་ཉིད་ཇེ་རགས་སུ་སོང་བའི་སྐམ་ཞིང་ཆགས་པའི་ཉོན་མོངས་པ་ལྔ་བྱུང་ནས་ཆགས་པ་ལྔ་པོ་དེ་ཡི་དབང་གིས་དགེ་སྡིག་མི་གཡོ་བའི་ལས་གསུམ་བསགས་པ་དང་། དེ་ལྟར་ལས་བསགས་པ་དེ་དག་སོ་སོར་སྨིན་པའི་འབྲས་བུ་ནི་ལྷ་ལ་སོགས་པ་འགྲོ་བ་དྲུག་གི་ཁྱད་པར་གནས་རིས་དང་བདེ་སྡུག་ཚེ་ཚད་ལ་སོགས་པ་མི་འདྲ་བ་སོ་སོར་སྣང་བའི་ངོ་བོ་མ་འགག་པར་འདི་ལྟར་དུ་སྣང་བ་ཐམས་ཅད་ཀུན་བྱེད་ང་ཡིས་སེམས་དཔའ་རྡོ་རྗེ་ཁྱོད་ལ་ང་ཡི་ངོ་བོ་བསྟན་པ་ཡིན་ནོ་ཞེས་སྣང་སྲིད་འཁོར་འདས་ཐམས་ཅད་སེམས་ཉིད་ཀྱི་རོལ་པ་ལས་གཞན་དུ་མེད་པར་བསྟན་པའོ། །ལྔ་པ་ལ་བཞི་སྟེ། ཐེག་པའི་རང་བཞིན། དེ་ཉིད་གང་གིས་བསྟན་པ། སྣོད་མིན་ལ་གསང་བ། རྣམ་གྲངས་རྒྱ་ཆེར་བཤད་པའོ། །དང་པོ་ནི། འདི་ལྟར་ཆོས་ཕུན་སུམ་ཚོགས་པ་རྣམས་ཀྱང་ཀུན་བྱེད་བྱང་ཆུབ་སེམས་ཀྱིས་བཀོད་པ་ཡིན་ཏེ། དེ་ཡང་ཇི་ལྟར་ན་སྟོན་པ་སྐུ་གསུམ་གྱིས་སོ་སོའི་རང་འབྲས་ངེས་པར་ཐོབ་པར་བྱེད་པས་ངེས་ཐོབ་ཀྱི་ཐེག་པ་རྣམ་པ་དྲུག་ཏུ་བསྟན་པ་ཡིན་ནོ། །གཉིས་པ་ནི། དེ་ལྟར་སྐུ་གསུམ་གྱི་བསྟན་པ་ཐམས་ཅད་དོན་ལ་ཀུན་བྱེད་ང་ཡིས་བསྟན་པ་ཁོ་ན་ཡིན་མོད། སེམས་དཔའ་རྡོ་རྗེ་ཁྱོད་ཀྱིས་དེ་ལྟར་མ་མཐོང་སྟེ་སྟོན་པ་སྐུ་གསུམ་དང་། ཀུན་བྱེད་བྱང་ཆུབ་ཀྱི་སེམས་གཉིས་ཐ་དད་དུ་བཟུང་ན་ཡང་དོན་ལ་སྟོན་པ་ཀུན་བྱེད་ང་ཡི་རྩལ་ལས་ཤར་བའི་སྟོན་པ་སྐུ་གསུམ་པོ་དེ་རེ་རེ་བཞིན་དུ་ཀུན་བྱེད་ང་ཡི་རང་བཞིན་ནས་ཆོས་ཉིད་སྤྲོས་པ་དང་བྲལ་བ་ཀ་དག་དབྱིངས་ཀྱི་ཆ་རེ་རེ་ཡོད་ལ། དེ་རེ་རེ་བཞིན་དུ་ང་ཡི་ངོ་བོ་མི་འདྲ་བ་རེ་རེ་སྣང་སྟེ། དེ་ཡང་མཚན་ཉིད་ཐེག་པའི་སྐབས་སུ་སྤྲུལ་སྐུ་ཐུབ་པའི་དབང་པོ་ལྟ་བུའི་སྐུ་རེ་དང་ནི། །མཚན་ཉིད་སྡེ་གསུམ་ལྟ་བུའི་གསུང་རེ་དང་། ཇི་ལྟ་ཇི་སྙེད་ཀྱི་ཡེ་ཤེས་ཀྱི་ཐུགས་རེ་སྣང་བ་དང་། ཕྱི་རྒྱུད་ཀྱི་སྐབས་སུ་ལོངས་སྐུ་རྣམ་པར་སྣང་མཛད་ལྟ་བུའི་སྐུ་རེ་དང་། ཀྲྀ་ཡོག་སྡེ་གསུམ་ལྟ་བུའི་གསུང་རེ་དང་། ཡེ་ཤེས་རྣམ་ལྔ་ལྟ་བུའི་ཐུགས་རེ་སྣང་བ་དང་། ནང་རྒྱུད་ཀྱི་སྐབས་སུ་ཁྱབ་བདག་རིགས་དྲུག་པ་ལྟ་བུའི་སྐུ་རེ་དང་། མ་ཧཱ་ཨ་ནུ་ལྟ་བུའི་གསུང་རེ་དང་། དབྱིངས་ནང་གསལ་གྱི་ཡེ་ཤེས་གསུམ་ལྟ་བུའི་ཐུགས་རེའམ། ཡང་ན་མདོ་བཅུ་ལས། སེམས་ཉིད་སྐུ་གསུང་ཐུགས་འདི་ཡིས། །སྐུ་གཅིག་སྐུ་གསུང་ཐུགས་སྟོན་ཏེ། །དེ་ཡང་ཇི་ལྟ་བུ་ཞེ་ན། །སྤྲུལ་པ་སྐུ་ཡི་རང་བཞིན་ནི། །བདེན་པ་བཞི་ཡི་ཆོས་ཉིད་ལ། །དབུ་ཟླུམ་ཞབས་རྗེན་བརྟུལ་ཞུགས་ཀྱིས། །འདུལ་བ་དགྲ་བཅོམ་ཤཱཀྱ་ཐུབ། །སྤྲུལ་པ་སྐུ་ཡི་རང་བཞིན་ནོ། །སྤྲུལ་པ་གསུང་གི་རང་བཞིན་ནི། །བརྒྱད་ཁྲི་བཞི་སྟོང་གསུངས་པ་དང་། །དབྱེ་བསྡུ་རྒྱུ་འབྲས་གཉེན་པོ་ལ། །དགོངས་ཏེ་སྡེ་སྣོད་གསུམ་གསུངས་པ། །སྤྲུལ་པ་གསུང་གི་རང་བཞིན་ནོ། །སྤྲུལ་པ་ཐུགས་ཀྱི་རང་བཞིན་ནི། །ཆོས་ཉིད་སྟོང་པ་བདེན་གཉིས་ཀྱིས། །རྟོག་པ་ཀུན་ཏུ་འོད་ཀྱི་ས། །མི་དམིགས་ཡེ་ཤེས་མངོན་པ་ཐུགས། །སྤྲུལ་པ་ཐུགས་ཀྱི་རང་བཞིན་ནོ། །ལོངས་སྤྱོད་རྫོགས་སྐུའི་རང་བཞིན་ནི། །གཟའ་སྐར་དུས་ཚིག་བཟང་སྒོ་ནས། །དག་པ་གསུམ་སྤྱོད་རིགས་གསུམ་བསྒྲུབ། །རྒྱན་དང་ཆ་ལུགས་རྡོ་རྗེ་འཛིན། །ལོངས་སྤྱོད་སྐུ་ཡི་རང་བཞིན་ནོ། །ལོངས་སྤྱོད་གསུང་གི་རང་བཞིན་ནི། །ཀྲྀ་ཡ་ཡོ་ག་ཕྱི་ནང་གསུམ། །དམ་ཚིག་བསྒྲུབ་དང་གྲུབ་པ་ཡིས། །ཏནྟྲ་སྡེ་གསུམ་གསུངས་པ་ནི། །ལོངས་སྤྱོད་གསུང་གི་རང་བཞིན་ནོ། །ལོངས་སྤྱོོད་ཐུགས་ཀྱི་རང་བཞིན་ནི། །མཚན་མེད་སྒོ་ནས་སྟུག་པོ་བཀོད། །ཕྱག་རྒྱ་བཞི་ལྡན་དཔལ་བེའུ་ནི། །ལོངས་སྤྱོད་ཐུགས་ཀྱི་རང་བཞིན་ནོ། །ཆོས་ཀྱི་སྐུ་ཡི་རང་བཞིན་ནི། །སྐུ་གསུམ་ས་ཡི་ལམ་སྦྱངས་ནས། །སྣང་ཞིང་སྲིད་པའི་ཆོས་རྣམས་ཀུན། །བདག་ཉིད་ཆེན་པོར་ཆོས་སྐུར་འདོད། །ཆོས་ཀྱི་སྐུ་ཡི་རང་བཞིན་ནོ། །ཆོས་ཉིད་གསུང་གི་རང་བཞིན་ནི། །བསྐྱེད་དང་རྫོགས་དང་རྫོགས་ཆེན་གསུམ། །སྐུ་དང་གསུང་དང་ཐུགས་ཀྱི་རྒྱུད། །ཆོས་ཉིད་གསུང་གི་རང་བཞིན་ནོ། །ཆོས་ཉིད་ཐུགས་ཀྱི་རང་བཞིན་ནི། །གཟུང་འཛིན་མེད་པའི་བྱང་ཆུབ་སེམས། །སྒྲོ་སྐུར་བྲལ་བའི་ཡེ་ཤེས་ཐུགས། །ཡེ་ནས་རང་བྱུང་ཡེ་ཤེས་སོ། །ཆོས་སྐུ་ཐུགས་ཀྱི་རང་བཞིན་ནོ། །ཆོས་སྐུའི་རང་བཞིན་བྱང་ཆུབ་སེམས། །བྱང་ཆུབ་སེམས་ཀྱི་འབྱུང་གནས་འདི། །ཐེག་པ་དགུ་ཡི་སྙིང་པོ་སྟེ། །ང་ལས་མ་བྱུང་གཅིག་ཀྱང་མེད། །ད་ནི་ཀུན་གྱི་རང་བཞིན་སྟོན། །ཐམས་ཅད་ང་ཡིན་ཤེས་པར་བྱ། །ཞེས་གསུངས་པ་དེ་ལྟ་བུའི་སྐུ་གསུམ་གྱི་གདུལ་བྱའི་འཁོར་ཀུན་གྱིས་དེ་ལྟར་མཐོང་བའི་ངོ་བོ་མི་འདྲ་བ་རེ་རེ་ཡོད་པའོ། །དེས་ན་དེ་ལྟར་སྣང་བ་དེ་ཡང་གཞན་ཞིག་མིན་པར་ཀུན་བྱེད་ང་ཡི་རང་བཞིན་བསྟན་པ་ཡིན་གྱིས་གནས་ལུགས་ཡང་དག་པ་ཆོས་རྣམས་ཀུན་གྱི་ངོ་བོ་ཀུན་བྱེད་བྱང་ཆུབ་ཀྱི་སེམས་ངས་བསྟན་པ་མིན་པའི་ཆོས་ནི་གཅིག་ཀྱང་ཡོད་པ་མ་ཡིན་ནོ། །དེ་བཞིན་དུ་སྤྲོས་པའི་མཚན་མ་མེད་པ་དོན་དམ་དབྱིངས་ཀྱི་ངོ་བོ་ཡང་ང་ཉིད་ཡིན་ལ། དེའི་རྩལ་ལས་ཤར་བའི་སྐུ་གསུམ་གྱི་སངས་རྒྱས་ཀུན་གྱི་འབྱུང་གནས་ཆེན་པོ་ཡང་ང་ཉིད་ཡིན་པས་གཞན་དུ་མེད་པ་དང་། དབྱིངས་དེ་ཉིད་ཀྱི་རོལ་པ་ཁམས་གསུམ་དང་རྒྱུད་དྲུག་གིས་བསྡུས་པའི་འགྲོ་བ་མ་ལུས་པ་ཡང་ཀུན་བྱེད་ང་ལས་ཤར་བ་ཡིན་ལ། འགྲོ་བ་དེ་དག་གི་བདེ་བ་དང་སྡུག་བསྔལ་རྣམས་དང་དེའི་རྒྱུ་ལས་དགེ་སྡིག་སོགས་ཀྱི་ཁྱད་པར་མི་འདྲ་བ་སྣ་ཚོགས་སུ་སྣང་བ་སྟེ་ཀུན་ཀྱང་ཡང་དག་དོན་གྱི་གནས་ལུགས་མ་ནོར་བ་ང་ཡི་ཐུགས་རྗེ་ཡི་རོལ་རྩལ་འགགས་མེད་དུ་བསྟན་པ་ཡིན་ནོ། །གསུམ་པ་ནི། དེ་ལྟར་ཆོས་ཐམས་ཅད་བྱང་ཆུབ་སེམས་ཀྱི་ངོ་བོར་ཡེ་ནས་སངས་རྒྱས་པ་ཡིན་ཀྱང་འདི་ལྟར་བློ་དང་ཁམས་དབང་ཤིན་ཏུ་དམན་པས་རྒྱུ་དང་འབྲས་བུའི་བླང་དོར་ལ་ཞེན་པའི་ཐེག་པ་འོག་མའི་རིགས་ཅན་རྣམས་ལ་ཀུན་བྱེད་ང་ཡི་ལུང་ཆོས་ཐམས་ཅད་ཡེ་ནས་རིག་པ་བྱང་ཆུབ་སེ མས་ཀྱི་ངོ་བོར་གྲོལ་ཟིན་པས་ད་གསར་དུ་རྒྱུ་འབྲས་འབད་རྩོལ་ལ་ལྟོས་མི་དགོས་པའི་དོན་ཟབ་མོ་འདི་བསྟན་པར་མི་བྱ་བར་གསང་བར་བྱ་སྟེ། གལ་ཏེ་མ་གསང་བར་ང་ཡི་ལུང་འདི་ངེས་པར་ཏེ་སྒྲ་ཇི་བཞིན་དུ་བསྟན་པར་བྱས་ན་དགེ་སྡིག་གི་ལས་ལ་རྒྱུ་འབྲས་ཀྱི་སྨིན་སོ་བསླུ་མེད་དུ་ཡོད་དོ་ཟེར་ནས། རྒྱུ་འབྲས་རྩོལ་སྒྲུབ་ཀུན་ལས་འདས་པ་གནས་ལུགས་ཡང་དག་པའི་དོན་ཀུན་བྱེད་ང་ཡི་དགོངས་པ་ལ་རྒྱུ་འབྲས་བླང་དོར་ལ་སོགས་པ་ཡོད་པར་སྒྲོ་འདོགས་པ་དང་། ངེས་གསང་སྙིང་པོའི་ཆོས་ལ་ལམ་ཡང་དག་མིན་པར་སྐུར་བ་བཏབ་ཏེ་ལོག་རྟོག་སྣ་ཚོགས་པའི་དྲྭ་བར་ཚུད་པས་ཡང་དག་དོན་གྱི་གནས་ལུགས་ཀུན་བྱེད་ང་དང་ཇི་སྲིད་སྐལ་པའི་ཡུན་དུ་འཕྲད་པར་མི་འགྱུར་བའི་ཉེན་ཆེན་པོ་ཡོད་པ་ཡིན་ནོ། །ཞེས་སོ། །བཞི་པ་རྣམ་གྲངས་རྒྱ་ཆེར་བཤད་པ་ལ་ལྔ་སྟེ། ཐམས་ཅད་ཀུན་བྱེད་ཉིད་ཀྱི་བྱས་པ། ཀུན་བྱེད་དེ་བཞིན་ཉིད་ཀྱི་རོལ་པ་ལས་གཞན་དུ་བརྟགས་པས་འཁྲུལ་བ། རང་བཞིན་གཅིག་ལ་སྣང་སྲིད་འཁོར་འདས་ཐམས་ཅད་བརྟེན་ཚུལ། དེ་ཉིད་མ་རྟོགས་པས་རྣལ་མའི་དོན་དང་མི་འཕྲད་པ། ཐམས་ཅད་བྱང་ཆུབ་སེམས་སུ་བསྟན་པའོ། །དང་པོ་ནི། འདི་ལྟར་སྟོན་པ་ང་ནི་ཀུན་བྱེད་བྱང་ཆུབ་ཀྱི་སེམས་ཏེ་དེ་ཡང་བྱང་ཆུབ་ཀྱི་སེམས་ལ་ཀུན་བྱེད་རྒྱལ་པོ་ཞེས་སུ་ཅིའི་ཕྱིར་བརྗོད་སྙམ་ན་དེ་ནི་ཆོས་ཐམས་ཅད་ཀུན་བྱེད་པའི་རྒྱལ་པོ་ཡིན་པའི་ཕྱིར་ན་དེ་ལྟར་བརྗོད་པ་སྟེ་ཞེས་འདིར་ཆོས་ཐམས་ཅད་ཀྱི་བྱེད་པོ་ཡིན་པར་གསུངས་པ་དེ་ཉིད། ཇི་སྐད་དུ། ས་ནི་ཆུ་ལ་ཆུ་རླུང་དང་། །རླུང་ནི་མཁའ་ལ་རབ་ཏུ་གནས། །མཁའ་ནི་རླུང་དང་ཆུ་དག་དང་། །ས་ཡི་ཁམས་ལ་གནས་མ་ཡིན། །དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་པ་བརྟེན། །ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་པ་རྟག་ཏུ་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །སེམས་ཀྱི་རང་བཞིན་འོད་གསལ་ནི། །ཐམས་ཅད་ལ་ཡང་གནས་མ་ཡིན། །ཞེས་གསུངས་པ་ལྟར་སེམས་ཉིད་འོད་གསལ་བ་ཆོས་ཉིད་བྱང་ཆུབ་སེམས་ཀྱི་རྩལ་ལས་རོལ་བའི་ངོ་བོར་སྣང་སྲིད་འཁོར་འདས་ཀྱི་ཆོས་ཐམས་ཅད་འགགས་མེད་ཤུགས་འབྱུང་གི་ཚུལ་དུ་ཤར་ཞིང་དེ་ལྟར་ཤར་བའི་དུས་ཉིད་ནས་ཆོས་ཉིད་ཡེ་སྟོང་ཆེན་པོ་སེམས་ཉིད་འོད་གསལ་བའི་དབྱིངས་ནས་འདའ་བ་མེད་པ་གཞི་མེད་སྟོང་གཟུགས་ཀྱི་རོལ་པ་ཙམ་ལ་གོ་བར་བྱ་སྟེ་དཔེར་ན་ནམ་མཁས་ཆོས་ཐམས་ཅད་འབྱུང་བའི་གོ་འབྱེད་པར་བྱེད་དོ་ཞེས་པ་ལྟ་བུའོ། །འདི་ཉིད་ལས། ཁམས་གསུམ་ཆེན་པོ་ལྔ་དང་རྒྱུད་དྲུག་རྣམས། །སྣང་བའི་རང་བཞིན་བྱང་ཆུབ་སེམས་ལྔ་ལས། །རང་བྱུང་སྙིང་པོ་ཡེ་ཤེས་ལྔ་བྱུང་བས། །ཡེ་ཤེས་ལྔ་ཡི་ཡུལ་ལྔ་གསལ་བྱུང་བས། །འདོད་པ་ལྔ་བྱུང་ཆགས་པ་ལྔ་བྱུང་ནས། །ཆགས་ལྔ་སོ་སོར་སྨིན་པའི་འབྲས་བུ་ནི། །འགྲོ་བ་དྲུག་གི་ཁྱད་པར་སོ་སོར་སྣང་། །ཞེས་པ་ལ་སོགས་པས་བསྟན་པ་ལྟར་ལ་རྒྱས་པར་ན་གཞི་ལས་གཞི་སྣང་འཆར་ཚུལ་གྱི་སྒོ་ནས་ཤེས་པར་བྱ་དགོས་ཀྱི་དེ་ལས་གཞན་དུ་ཕྱི་རོལ་པས་དབང་ཕྱུག་དང་གཙོ་བོ་སོགས་སྣོད་བཅུད་ཀྱི་བྱེད་པ་པོར་རློམ་པ་ལྟ་བུར་བྱང་ཆུབ་ཀྱི་སེམས་ཞེས་པ་ངོ་བོ་འགྱུར་བ་མེད་པའི་རྟག་པ་ཡང་ཡིན་ལ་འཁོར་འདས་ཐམས་ཅད་བྱེད་པའི་དངོས་པོ་ཞིག་ཀྱང་ཡོད་པར་བཟུང་ན་ནི་ཕྱིིན་ཅི་ལོག་ཏུ་འཁྱམས་པའོ། །དེ་ལྟར་ངེས་པར་བྱས་ནས་དེ་ཡང་ཆོས་གང་དང་གང་བྱས་པ་ཡིན་ཞེ་ན་དུས་གསུམ་གྱི་སངས་རྒྱས་འགྲོ་བའི་དེད་དཔོན་དུ་བྱོན་པ་རྣམས་ཀྱང་བྱང་ཆུབ་སེམས་ཀྱིས་བྱས་པ་ཡིན་ལ། ཁམས་གསུམ་གྱི་སེམས་ཅན་རྣམས་ཀྱང་བྱང་ཆུབ་སེམས་ཀྱིས་བྱས་པ་ཡིན་པ་དང་། སྣང་སྲིད་སྣོད་བཅུད་ཀུན་ཀྱང་བྱང་ཆུབ་སེམས་ཀྱིས་བྱས་པ་ཡིན་ལ། རྒྱུ་འབྲས་དང་དཔེ་དོན་གཏན་ཚིགས་རྣམས་ཀྱང་། རྒྱུ་དང་འབྲས་བུ་མི་འགལ་པར་མཐུན་པ་དང་། དཔེ་དང་དོན་མི་འགལ་བར་མཐུན་པ་དང་། སྒྲུབ་བྱེད་ཀྱི་གཏན་ཚིགས་ཀྱང་བསྒྲུབ་བྱའི་དོན་དང་མི་འགལ་བར་མཐུན་པར་བྱས་པ་ཡིན་ཏེ། དེ་ཡང་རྒྱུ་ཡི་དུས་ན་འབྱུང་བ་ཆེན་པོ་རྣམ་པ་ལྔ་བྱས་པ་ཡིན་ལ། འབྲས་བུའི་དུས་ན་རྒྱུ་འབྱུང་བ་དེ་དང་ངོ་བོའི་མཚན་ཉིད་མཐུན་པ་འབྱུང་འགྱུར་གྱི་དངོས་པོ་ཁམས་གསུམ་སེམས་ཅན་རྣམས་ཀྱི་གནས་ལུས་ལོངས་སྤྱོད་རྣམས་དང་། རྣམ་པར་ཤེས་པ་རྣམས་ཀྱང་རང་རང་གི་རྒྱུ་དང་མཐུན་པར་བྱས་པ་དང་། དཔེ་ཡི་དུས་ན་ཆོས་ཀུན་སྐྱེ་མེད་དུ་མཚོན་པར་བྱེད་པའི་དཔེ་ནམ་མཁའ་ལྟ་བུའོ་ཞེས་སྟོན་པར་བྱེད་པའི་དཔེ་དེ་ཡང་ཀུན་བྱེད་ང་ཡིས་བྱས་པ་ཡིན་ལ། དོན་གྱི་ངོ་བོ་སྟོན་པའི་དུས་ན་ཆོས་ཐམས་ཅད་ཀུན་དོན་སྐྱེ་བ་མེད་པའི་རང་བཞིན་དུ་སྟོན་པར་བྱེད་པ་དང་། རྟགས་ཀྱི་དུས་ན་ཀུན་བྱེད་བྱང་ཆུབ་སེམས་ཀྱི་རོལ་རྩལ་འགག་པ་མེད་པ་དང་། གཏན་ཚིགས་ཀྱི་དུས་ན་རང་བྱུང་གི་ཡེ་ཤེས་ཡིན་པར་སྟོན་པའི་གཏན་ཚིགས་ཀྱིས་ཆོས་ཀུན་སྐྱེ་མེད་དུ་བསྒྲུབ་པར་བྱ་བ་སྟེ། དེ་ཡང་ངག་དོན་དུ་འགོད་ན་འདི་ལྟར། བྱང་ཆུབ་སེམས་ཀྱི་རོལ་རྩལ་ལས་ཤར་བའི་འཁོར་འདས་ཀྱི་སྣང་བ་ཐམས་ཅད་ཆོས་ཅན། གདོད་ནས་སྐྱེ་བ་མེད་པ་གཞི་མེད་རྩ་བྲལ་ཆེན་པོ་ནམ་མཁའ་ལྟ་བུའི་རང་བཞིན་ཡིན་ཏེ། ཀུན་བྱེད་བྱང་ཆུབ་ཀྱིས་བྱས་པ་ཡིན་པའི་ཕྱིར། ཞེས་པ་སྟེ་དེ་ལྟར་བྱང་ཆུབ་སེམས་ཀྱིས་བྱས་པ་ཡིན་ན་ཆོས་ཀུན་སྐྱེ་མེད་དུ་གྲུབ་པའི་རྒྱུ་མཚན་ནམ་གཏན་ཚིགས་ཅི་ཡོད་སྙམ་ན། དེ་ནི་འདི་ལྟར་བྱང་ཆུབ་ཀྱི་སེམས་རྒྱུ་རྐྱེན་གྱིས་མ་བསྐྱེད་པ་རང་བྱུང་གི་ཡེ་ཤེས་ཡིན་པའི་གཏན་ཚིགས་ཀྱིས་གྲུབ་ཏེ། འདི་ལྟར་རྒྱུ་རྐྱེན་གྱིས་མ་བསྐྱེད་པའི་རང་བྱུང་ཡིན་ན་སྐྱེ་བ་མེད་པ་ཡིན་པར་གྲུབ་ལ། དེ་ལྟར་རྒྱུ་བྱང་ཆུབ་ཀྱི་སེམས་སྐྱེ་མེད་དུ་གྲུབ་ན་དེའི་བྱས་པའམ་རྩལ་ལས་ཤར་བའི་ཆོས་ཀུན་ཀྱང་སྐྱེ་མེད་དུ་གྲུབ་པའི་གནད་ཀྱིས་ཏེ། མདོ་བཅུ་ལས། རྩ་བ་བྱང་ཆུབ་སེམས་འདི་ནི། །ཀུན་གྱི་རང་བཞིན་འདིས་བྱས་པས། །ཐམས་ཅད་བྱེད་པའི་རྒྱལ་པོ་ཡིན། །བྱེད་པའི་རྒྱལ་པོས་ཀུན་བྱས་པས། །དངོས་སུ་གྲུབ་པ་གང་ཡང་མེད། །ཅེས་གསུངས་སོ། །འདི་ལ་ཀུན་མཁྱེན་ཆེན་པོས་ཆོས་དབྱིངས་མཛོད་འགྲེལ་དུ། རིག་པའི་ངོ་བོ་ཆོས་ཅན། སྐྱེ་མེད་ནམ་མཁའ་ལྟར་བསམ་བརྗོད་ལས་འདས་པའི་ཐ་སྙད་དུ་བརྗོད་དུ་རུང་སྟེ། ཁྱོད་དང་ངོ་བོ་གཅིག་ངང་ནས་རྩལ་དུ་ཤར་བའི་སེམས་ལ་ངོ་བོ་ངོས་བཟུང་གང་ཡང་མེད་པར་ནམ་མཁའ་ལྟར་ཡེ་སྟོང་སྤྲོས་པ་དང་བྲལ་བར་གྱུར་པའི་ཕྱིར། ཞེས་གསུངས་པ་རྩལ་ལས་ཤར་བའི་ཆོས་ལ་སྐྱེ་བ་མེད་པའི་རྟགས་ཀྱིས། འཆར་གཞིའི་རིག་པ་ཉིད་དེ་སྐྱེ་མེད་དུ་སྒྲུབ་པ་ཡིན་ལ། འདིར་ནི་འཆར་གཞིའི་རིག་པ་སྐྱེ་བ་མེད་པའི་རྟགས་ཀྱིས། དེ་ལས་ཤར་བའི་ཆོས་རྣམས་སྐྱེ་མེད་དུ་བསྒྲུབ་ཚུལ་ལས་དོན་འདྲའོ། །དེ་ལྟར་རྒྱུ་འབྲས་དཔེ་དོན་གཏན་ཚིགས་ཐམས་ཅད་མཐུན་པའམ་མཚུངས་པར་བྱས་པས་ན་བྱང་ཆུབ་སེམས་ཀྱིས་ཆོས་ཅན་སྣང་བའི་དངོས་པོ་ཀུན་བྱས་ཀྱང་། ཆོས་ཉིད་བྱང་ཆུབ་ཀྱི་སེམས་རང་གི་ངོ་བོ་གཅིག་པུ་ནི་སུས་ཀྱང་མ་བྱས་པ་སྟེ། ཆོས་ཅན་ཀུན་བྱས་པ་ནི་རིག་པ་བྱང་ཆུབ་ཀྱི་སེམས་ཉིད་ཀྱི་རང་བཞིན་གཞི་མེད་རྩ་བ་དང་བྲལ་བ་འཁོར་འདས་མིང་མེད་ཆེན་པོ། ཡེ་གྲོལ་ཀ་དག་གི་རང་བཞིན། མཐའ་གྲོལ་ཕྱོགས་ཡན་ཆེན་པོ། རྒྱ་གྲོལ་གཏད་ཡལ་ཆེན་པོ། ཕྱི་ནང་ཡུལ་མེད་ཆེན་པོ། སྐྱེ་མེད་རང་བྱུང་གི་ཡེ་ཤེས་ཁྱབ་བརྡལ་བློ་ལས་འདས་པ། ཡུལ་མེད་ཟང་ཐལ་གྱི་ངོ་བོ། མ་བཅོས་མཉམ་པ་ཆེན་པོའི་ངོ་བོ་རུ་བྱས་པ་ཡིན་ལ། ཆོས་ཉིད་བྱང་ཆུབ་ཀྱི་སེམས་རང་གི་ངོ་བོ་གཅིག་པུ་སུས་ཀྱང་མ་བྱས་པ་ཉིད་ལ་ནི་བྱ་བའི་ཡུལ་མེད། བྱེད་པའི་ཆོས་མེད། བྱ་མི་བྱའི་རྩིས་མེད་པས་ན་གང་ཡང་བྱ་མི་དགོས་པར་ཡེ་ནས་ལྷུན་གྲུབ་ཆེན་པོའི་རང་བཞིན་དུ་བསྟན་ཏེ། དུས་གསུམ་ཆིག་ཆོད་ལས། འཁོར་འདས་ཀུན་གྱི་གཞི་ནི་བྱང་ཆུབ་སེམས། །བྱང་ཆུབ་སེམས་ཀྱི་གཞི་ནི་ལྷུན་གྱིས་གྲུབ། །ལྷུན་གྱིས་གྲུབ་པའི་དོན་ནི་མ་སྐྱེས་པས། །སྐྱེ་མེད་ལྷུན་གྲུབ་སྔ་ཕྱི་ཐོག་མཐའ་བྲལ། །འཁོར་འདས་ཀུན་གྱི་ངོ་བོ་བྱང་ཆུབ་སེམས། །བྱང་ཆུབ་སེམས་ཀྱི་ངོ་བོ་མ་ངེས་ཤར། །ངེས་པ་མེད་པའི་གཞི་ནི་ལྷུན་གྱིས་གྲུབ། །ངེས་པ་མེད་པའི་དོན་ནི་མ་སྐྱེས་པས། །སྐྱེ་མེད་མ་ངེས་སྔ་ཕྱི་ཐོག་མཐའ་བྲལ། །འཁོར་འདས་ཀུན་གྱི་དོན་ནི་བྱང་ཆུབ་སེམས། །བྱང་ཆུབ་སེམས་ཀྱི་དོན་ནི་སྐྱེ་བ་མེད། །སྐྱེ་བ་མེད་པའི་རང་བཞིན་ལྷུན་གྱིས་གྲུབ། །སྐྱེ་བ་མེད་པའི་ངོ་བོ་མ་ངེས་ཏེ། །སྐྱེ་བ་མེད་པའི་དོན་ནི་མ་སྐྱེས་པས། །སྐྱེ་མེད་མ་སྐྱེས་སྔ་ཕྱི་ཐོག་མཐའ་བྲལ། །ཞེས་གསུངས་སོ། །གཉིས་པ་ལ་ལྔ་སྟེ། དེ་ཉིད་མ་རིག་པས་སྲིད་པར་འཁྱམས་པ། དེ་བཞིན་ཉིད་དུ་བླང་དོར་བྱས་པའི་ཉེས་དམིགས། རྒྱུ་འབྲས་ཀྱི་འཁྲུལ་བ་རྒྱུན་མི་འཆད་པ། བླང་དོར་མེད་པའི་དོན་མི་མཐོང་བ། རྩོལ་སྒྲུབ་འདས་པའི་ཆོས་ཉིད་ལས་རིང་བའོ། །དང་པོ་ནི། འདི་ལྟར་སྟོན་པ་ཀུན་བྱེད་རྒྱལ་པོ་ང་ཡི་རང་བཞིན་ཡེ་སྟོང་སྤྲོས་བྲལ་ཆེན་པོ་དགག་སྒྲུབ་སྤང་བླང་དང་བྲལ་བ། དམིགས་གཏད་དང་ངོས་བཟུང་ལས་འདས་ཤིང་རེ་དོགས་དང་རྩོལ་སྒྲུབ་ཀྱི་ཡུལ་ལས་འདས་པའི་གནས་ཚུལ་མ་བཅོས་ཇི་བཞིན་པ་ལ་མ་བརྟགས་པའམ་དོན་དེ་མ་ཤེས་པར། ང་ཡི་བྱས་པའི་ཆོས་འཁོར་འདས་ཀྱི་སྣང་བ་མེད་སྣང་སྟོང་པའི་རང་གཟུགས་སྒྱུ་མའི་གྲོང་ཁྱེར་ལྟ་བུ་ལ་བདག་གཞན་དང་བཟང་ངན་བདེན་རྫུན་དང་དགའ་སྡུག་ལ་སོགས་པ་སྣ་ཚོགས་སུ་མི་བདེན་པ་ལ་བདེན་པར་བཟུང་། མ་འཁྲུལ་པ་ལ་འཁྲུལ་བར་བཟུང་། ངེས་པ་མེད་པ་ལ་ངེས་བཟུང་བྱེད། མིན་པ་ལ་ཡིན་པར་བཟུང་། མི་འཐད་པ་ལ་འཐད་པར་བཟུང་ཞིང་ཡིན་མིན་ངེས་ངེས་ལྟར་བརྟགས་ཞིང་ཞེན་པས་དགྲ་གཉེན་ལ་སོགས་པའི་ཡུལ་ལ་སྐམ་ཞིང་ཆགས་པའི་ཉོན་མོངས་དུག་ལྔ་རང་རྒྱུད་དུ་སྐྱེ་ཞིང་དེའི་དབང་གིས་རྒྱུད་དྲུག་འཁོར་བའི་སྣང་བ་འདི་ཐམས་ཅད་བདེན་བདེན་ལྟར་འགྲུབ་པའི་ཚུལ། ཆོས་དབྱིངས་རིན་པོ་ཆེའི་མཛོད་ལས། སྣང་བར་མེད་ལ་སྣ་ཚོགས་སྣང་བར་ཤར། །སྟོང་བར་མེད་ལ་མཐའ་དབུས་ཁྱབ་པར་གདལ། །གཟུང་འཛིན་མེད་ལ་ང་བདག་སོ་སོར་ཞེན། །གཞི་རྩ་མེད་ལ་ཚེ་རབས་བརྒྱུད་མར་སྣང་། །དགག་སྒྲུབ་མེད་ལ་བདེ་སྡུག་བླང་དོར་བྱེད། །ཕར་བལྟས་སྐྱེ་འགྲོའི་སྣང་བ་མཚར་རེ་ཆེ། །མི་བདེན་བདེན་པར་ཞེན་པས་བདེན་བདེན་འདྲ། །མ་འཁྲུལ་འཁྲུལ་པར་ཞེན་པས་འཁྲུལ་འཁྲུལ་འདྲ། །ངེས་མེད་ངེས་པར་བཟུང་བས་ངེས་ངེས་འདྲ། །ཡིན་མིན་ཡིན་པར་བཟུང་བས་ཡིན་ཡིན་འདྲ། །མི་འཐད་འཐད་པར་བཟུང་བས་འཐད་འཐད་འདྲ། །སྣ་ཚོགས་ཅོལ་ཆུང་ཡུལ་གྱིས་སེམས་ཁྲིད་ནས། །དོན་མེད་རིག་པ་སྐད་ཅིག་བརྒྱུད་མར་མཐུད། །ཉིན་ཞག་ཟླ་བ་ལོ་དང་མི་ཚེ་འདས། །གཉིས་མེད་གཉིས་སུ་བཟུང་བས་འགྲོ་བ་བསླུས། །ཞེས་གསུངས་ལ། དེ་ལྟར་ཞེན་ཅིང་ཆགས་པའི་ཡུལ་དུ་གྱུར་པ་སྣང་སྲིད་སྣོད་བཅུད་ཀྱི་དངོས་པོ་འདི་རྣམས་ནི་དོན་ལ་མི་རྟག་སྒྱུ་མའི་རང་བཞིན་ལྟ་བུ་ལས་བདེན་པར་གྲུབ་པ་རྡུལ་ཕྲ་རབ་ཀྱི་ཆ་ཙམ་ཡང་མེད་པར་སྐད་ཅིག་གིས་འཇིག་པར་འགྱུར་བ་ཞིག་ཡིན་ནའང་། ཐོག་མེད་ནས་གོམས་པའི་ཨ་འཐས་ཞེན་འཛིན་གྱི་དབང་གིས་དེ་ལྟར་བདེན་མེད་ཡིན་པའི་ཚུལ་ལ་འདྲིས་ཆ་མེད་པས་མི་ཤེས་པའི་འགྲོ་བ་རྣམས་ནི་ཡང་དག་ལྟ་བའི་འདྲེན་བྱེད་ལྡོངས་པས་ཁུངས་ལོང་ངམ་དམུད་ལོང་ལྟ་བུའི་རང་བཞིན་ཡིན་ནོ་ཞེས་སོ། །གཉིས་པ་ནི། དེས་ན་ཆོས་ཐམས་ཅད་ཆོས་སྐུ་ཀུན་བྱེད་རྒྱལ་པོས་བྱས་པ་ཡིན་པས་བཟང་ངན་བླང་དོར་མེད་པར་ཆོས་ཉིད་དེ་བཞིན་ཉིད་ཀྱི་རང་བཞིན་ལས་འདའ་བ་མེད་ཀྱང་། དེ་ལྟར་མ་རྟོགས་པའི་ཐེག་པ་འོག་མ་པ་རྣམས་ཀྱིས་བླང་དོར་བྱས་པའི་ཉེས་དམིགས་ནི། འདི་ལྟར་ཉན་རང་རྣམས་ཀྱིས་ཆོས་ཐམས་ཅད་ཀུན་བྱེད་རྒྱལ་པོས་བྱས་པ་ཆོས་ཉིད་བྱང་ཆུབ་སེམས་ཀྱི་རང་བཞིན་ཡིན་པར་མི་ཆ་བའམ་ཐག་མ་ཆོད་པར་མིག་སོགས་དབང་པོ་དྲུག་ལ་གཟུགས་སོགས་ཡུལ་དྲུག་གི་རྣམ་པ་མི་འགག་པར་རང་བྱུང་ཡེ་ཤེས་ཀྱི་རོལ་པར་ཤར་ཞིང་སྣང་བ་ལ་ཟག་བཅས་སྡུག་བསྔལ་གྱི་རང་བཞིན་དུ་མཐོང་ནས། དེའི་རྒྱུ་ཀུན་འབྱུང་ལས་དང་ཉོན་མོངས་པ་རྣམས་སྤང་བའི་ཕྱིར་དུ་དབང་པོ་ལ་བརྟེན་པའི་ཚོགས་དྲུག་གི་ཤེས་པ་ཡུལ་ལ་འཇུག་ཏུ་མི་སྟེར་བར་འགེགས་པར་བྱེད་པའི་ཐབས་ལ་བརྟེན་པ་དེས་ནི་ཡུལ་དང་ཡུལ་ཅན་ལ་སོགས་པའི་ཆོས་ཐམས་ཅད་ཀུན་བྱེད་བྱང་ཆུབ་སེམས་ཀྱིས་བྱས་པ་ཡེ་ཤེས་ཉག་གཅིག་གི་རོལ་པ་ཡིན་པར་མི་ཆ་བས་བླང་དོར་བྱས་པའི་དབང་གིས་མཐར་ཐུག་ཉན་རང་གི་དགྲ་བཅོམ་ཐོབ་པར་གྱུར་ཀྱང་མ་རིག་བག་ཆགས་ཀྱི་ས་དང་། ཟག་མེད་ཀྱི་ལས་དང་། ཡིད་ཀྱི་རང་བཞིན་གྱི་ལུས་དང་། བསམ་མི་ཁྱབ་འགྱུར་གྱི་འཆི་འཕོ་རྣམས་ཡོད་པར་གསུངས་པ་བཞིན་སྐྱེ་འགག་མཚན་མའི་སྤྲོས་པ་མེད་པ་རང་བྱུང་འདུས་མ་བྱས་པའི་བདག་ཉིད་མ་བཙལ་ལྷུན་གྱིས་གྲུབ་པའི་འབྲས་བུ་ནི་ལམ་དེ་ལ་བརྟེན་ནས་ཐོབ་པ་མེད་དོ། །གསུམ་པ་ནི། དེ་བཞིན་དུ་ཆོས་ཐམས་ཅད་ཀུན་བྱེད་བྱང་ཆུབ་སེམས་ཀྱི་རང་བཞིན་ཡིན་ཞིང་། བྱང་ཆུབ་ཀྱི་སེམས་ནི་ངེས་པ་དོན་གྱི་བདེན་པ་ཐིག་ལེ་ཉག་གཅིག་གི་རང་བཞིན་ཡིན་པ་ལ་མཚན་ཉིད་བྱང་ཆུབ་སེམས་དཔའི་ཐེག་པ་བ་རྣམས་ཀྱིས་དེ་ལྟར་མ་ཤེས་པར་ཀུན་རྫོབ་སྒྱུ་མ་ལྟར་བུ་དང་དོན་དམ་ནམ་མཁའ་ལྟ་བུའི་བདེན་པ་གཉིས་སུ་སོ་སོར་དབྱེ་བའི་རྟོག་པ་བྱུང་ཞིང་དེ་ལ་བརྟེན་ནས་རྒྱུ་འབྲས་བླང་དོར་གྱི་སྒོ་ནས་ལམ་བསྒྲུབ་པར་བྱེད་ན་ཡང་ཀུན་བྱེད་ང་ཡིས་བྱས་པའི་ཆོས་ཉིད་ལ་དོན་དམ་དང་ཀུན་རྫོབ་ཀྱི་བདེན་པ་གཉིས་སུ་གྲུབ་པ་མེད་པས་ན། གང་ཟག་གི་བློ་ལ་དེ་འདྲའི་རྟོག་པ་བྱུང་བས་ཆོས་ཉིད་རང་གི་ངོ་བོ་ལ་བདེན་པ་གཉིས་ཀྱི་མཚན་ཉིད་ཅན་གྱི་རྒྱུ་འབྲས་སྐྱེ་འགག་གི་དངོས་པོ་ཞིག་ཡོངས་མི་མངའ་བའམ་ཡོངས་སུ་གྲུབ་པར་མི་འགྱུར་ཏེ་ཆོས་ཉིད་རང་གི་ངོ་བོ་སུས་ཀྱང་བསྒྱུར་དུ་མི་བཏུབ་པའི་ཕྱིར་རོ། །དེས་ན་ཀུན་བྱེད་བྱང་ཆུབ་ཀྱི་སེམས་རྒྱུ་འབྲས་རྩོལ་སྒྲུབ་ལས་འདས་པའི་འབྲས་བུ་རང་གནས་ཕྱལ་བའི་ཡེ་ཤེས་དེ་རྒྱུ་འབྲས་བླང་དོར་ཅན་གྱི་ལམ་ལ་ཞུགས་པའི་གང་ཟག་དེ་ལ་མཐོང་བའི་སྐལ་བ་མེད་དེ། རྒྱུ་འབྲས་ཀྱི་འཁྲུལ་བ་རྒྱུན་མི་འཆད་པའི་ཕྱིར་རོ། །བཞི་པ་ནི། འདི་ལྟར་ཀུན་བྱེད་བྱང་ཆུབ་སེམས་ཀྱི་རང་བཞིན་ཡེ་གྲོལ་ཅོག་བཞག་ཆེན་པོའི་ངོ་བོར་གནས་པ་ལས་གཞན་པའི་འབྲས་བུ་ཞིག་ཐོབ་ཏུ་མེད་པ་ལ་མེད་པར་མ་ཤེས་པར་ཕྱི་རྒྱུད་སྡེ་གསུམ་གྱིས་གསར་བྱུང་གི་འབྲས་བུ་ཞིག་ཚོལ་བ་ཡི་ཆེད་དུ་སྒོ་གསུམ་མ་དག་པའི་ཆ་སྦྱངས་ཤིང་དག་པའི་ངོ་བོ་ལྷའི་སྐུ་གསུང་ཐུགས་སུ་བསྒོམ་པའི་ཏིང་ངེ་འཛིན་མངོན་བྱང་ལྔའི་ཚུལ་གྱིས་བསྒོམ་པ་དང་། ཆོས་ཉིད་དེ་བཞིན་ཉིད་ལ་ཆོ་འཕྲུལ་འབྱུང་བའི་ཡུལ་དང་འབྱུང་བའི་དངོས་པོ་གང་ཡང་མ་གྲུབ་པས་མི་འབྱུང་བའི་རང་བཞིན་ཡིན་པ་ལ་དེ་ལྟར་མ་རྟོགས་པས་ཏིང་འཛིན་ལྷའི་ཆོ་འཕྲུལ་སོགས་ཆོ་འཕྲུལ་བཞིའི་མཚོན་པའི་ལམ་གྱི་ཡན་ལག་ཀུན་བསྒོམ་པ་ལ་མངོན་པར་འཆེལ་བའི་བླང་དོར་མངའ་བས་ན་བླང་དོར་མེད་པའི་འབྲས་བུ་ཐོབ་པ་མེད་པར་བསྟན་པའོ། །ལྔ་པ་ནི། དོན་རང་བྱུང་གི་ཡེ་ཤེས་གཅིག་གི་ངོ་བོ་ལ་མ་ཧཱ་ཨ་ནུ་གཉིས་ཀྱིས་ཆོས་སྐུ་དེ་བཞིན་ཉིད་ཀྱི་ཏིང་འཛིན་སོགས་ཏིང་ངེ་འཛིན་རྣམ་པ་གསུམ་སྒོམ་པར་བྱེད་པས་གཞི་བྱས་ཏེ། བསྙེན་སྒྲུབ་ཀྱི་ཡན་ལག་རྣམ་པ་བཞི་ཅི་ཙམ་སྒྲུབ་པའི་ཡུན་དང་བསྟན་ཏེ་རིམ་པར་སྒོམ་པར་བྱེད་པས་གཞུང་བསྲངས་བ་སོགས་རྩོལ་སྒྲུབ་ཀྱི་སྒོ་ནས་འབྲས་བུ་ཐོབ་པར་རེ་བས་རྫོགས་ཆེན་རྩོལ་སྒྲུབ་ལས་འདས་པའི་འབྲས་བུ་བྱར་མེད་རེ་དོགས་དང་བྲལ་བའི་དགོངས་པ་ནི་དེ་ལ་ཡང་མེད་པར་གསུངས་ཏེ། མདོ་བཅུ་ལས། དཔེར་ན་ཕྱི་ནང་ཆོས་རྣམས་ཀུན། །གང་རྒྱུ་དེ་ལ་གྲུབ་པ་ནི། །རྒྱུ་འབྲས་གཅིག་པའི་དོན་ཡིན་ཏེ། །འགྲོ་བའི་སེམས་ཀྱི་ཕྱིན་ཅི་ལོག །བརྐམ་ཆགས་ལྔ་ཡི་སྡུག་བསྔལ་རྒྱུས། །འབྲས་བུ་ཟད་མེད་རྒྱུད་ལྔར་འཁོར། །དེ་ལ་འབྲས་བུར་མིང་མི་གདགས། །སྡུག་བསྔལ་ཀུན་འབྱུང་འགོག་པའི་ལམ། །སྤང་དང་འགོག་དང་སེལ་བ་དང་། །ལམ་ལ་མངོན་དུ་བྱེད་པ་ཡང་། །ཉོན་མོངས་ལྔ་བཅོམ་འབྲས་བུ་སྟེ། །མི་སྐྱེ་མི་འགག་འབྲས་བུ་མིན། །བདེན་པ་གཉིས་ཀྱི་རྟོག་དཔྱོད་ཀྱིས། །མི་རྟག་སྡུག་བསྔལ་སྟོང་བདག་མེད། །མདོ་ཆེན་བཞི་ཡི་དོན་རྟོགས་ཏེ། །ཆོས་ཉིད་སྟོང་པའི་འབྲས་བུ་དེ། །རྒྱུ་འབྲས་འདས་པའི་འབྲས་བུ་མིན། །ཕྱི་ཡི་ཏན་ཏྲ་སྡེ་གསུམ་ཡང་། །བྱང་ཆུབ་ཡན་ལག་ཀུན་བསྒོོམས་ནས། །རྡོ་རྗེ་འཛིན་དང་སྟུག་པོ་བཀོད། །ཐོབ་པ་རྡོ་རྗེའི་འབྲས་བུ་སྟེ། །བླང་དོར་མེད་པའི་འབྲས་བུ་མིན། །ནང་པ་བསྐྱེད་དང་རྫོགས་པ་ནི། །རྣམ་པ་གསུམ་གྱི་དོན་སྦྱར་ན། །རང་རྒྱུད་དག་པའི་དཀྱིལ་འཁོར་ལ། །བསྙེན་བསྒྲུབ་བཞི་ཡི་ཆོ་གས་ནི། །བདག་ཉིད་ལྷུན་གྲུབ་བྱེད་པའང་། །རྩོལ་སྒྲུབ་འདས་པའི་འབྲས་བུ་མིན། །ཞེས་སོ། །གསུམ་པ་རང་བཞིན་གཅིག་ལ་སྣང་སྲིད་འཁོར་འདས་ཐམས་ཅད་བརྟེན་ཚུལ་ལ་བཞི་སྟེ། དབྱིངས་ལྷུན་གྲུབ་ཆེན་པོ། དཔེ་ནམ་མཁའ་ལྟ་བུ། སྣང་སྲིད་ཡེ་ནས་སངས་རྒྱས། །དེའི་དཔེ་དོན་སྦྱར་བའོ། །དང་པོ་ནི། དེ་ལ་དབྱིངས་སྟོང་གསལ་འགག་པ་མེད་པའི་ཡེ་ཤེས་བྱང་ཆུབ་ཀྱི་སེམས་ནི་གདོད་ནས་ལྷུན་གྱིས་གྲུབ་པས་བྱ་བྱེད་ཀུན་དང་བྲལ་བ་ངོ་བོ་སྐྱེ་བ་མེད་པ་དཔེས་མཚོན་དུ་མེད་པ་མིང་ཚིག་གིས་གདགས་སུ་མེད་པའོ་ཞེས་པ་དེ་ལྟ་བུའི་སྨྲ་བསམ་བརྗོད་པ་དང་བྲལ་བའི་ཚིག་དེ་བརྗོད་པས་ཡོད་པར་སྒྲོ་འདོགས་པ་དང་མེད་པར་སྐུར་བ་འདེབས་པ་གཉིས་དང་བྲལ་བའི་བརྗོད་མེད་བློ་འདས་ཆེན་པོ་དེ་རིག་པར་བྱེད་ཅིང་དེ་ལས་གཞན་དུ་བྱ་བྱེད་རྩོལ་སྒྲུབ་ཐམས་ཅད་དང་བྲལ་བ་ནི་མ་བཅོས་ལྷུན་གྱིས་གྲུབ་པའི་འབྲས་བུ་སྟེ། དེ་ཉིད་ལས། སེམས་ཉིད་རང་བྱུང་ཡེ་ཤེས་ལ། །ཡེ་ནས་བཙལ་ཞིང་བསྒྲུབ་མེད་པས། །རྩོལ་སྒྲུབ་གཉིས་ཀྱི་སྤྲོས་དང་བྲལ། །ལྷུན་གྱིས་གྲུབ་པའི་འབྲས་བུ་ཡིན། །ཞེས་པ་ལྟར་རོ། །གཉིས་པ་ནི། འདི་ལྟར་སྣང་སྲིད་འཁོར་འདས་སུ་སྣང་བའི་ཆོས་འདི་ཐམས་ཅད་ཀུན་ནི་གཞན་དུ་གྲུབ་པ་ཅི་ཡང་མེད་པར་བྱང་ཆུབ་སེམས་ཀྱི་རང་བཞིན་མེད་སྣང་སྟོང་གཟུགས་ཀྱི་རོལ་པ་ཙམ་ཡིན་ལ་བྱང་ཆུབ་ཀྱི་སེམས་དེ་མཚོན་པར་བྱེད་པའི་དཔེ་ནི་ཆོས་ཀུན་སྐྱེ་མེད་དུ་སྟོན་པར་བྱེད་པའི་དཔེ་ནམ་མཁའ་ལྟ་བུའི་རང་བཞིན་དུ་ཆོས་ཐམས་ཅད་ཀུན་འབྱུང་བའི་གཞི་དབྱིངས་རིག་པ་བྱང་ཆུབ་སེམས་ཀྱི་དོན་ཡང་གདོད་ནས་སྐྱེ་བ་མེད་པ་གཞི་མེད་རྩ་བྲལ་གྱི་རང་བཞིན་དུ་དེ་བཞིན་དུ་མཚོན་པར་བྱེད་པ་ཡིན་ནོ། །དེ་ལྟར་ཡང་ལ་ཟློ་ལས། ཆོས་ཉིད་བྱང་ཆུབ་སེམས་ནི་ནམ་མཁའ་འདྲ། །ནམ་མཁའ་ཀུན་ཁྱབ་བདག་ཏུ་འཛིན་པ་མེད། །ཆོས་ཉིད་བྱང་ཆུབ་སེམས་ཀྱང་ཀུན་གྱི་རང་བཞིན་ཏེ། །བདག་དང་བདག་ཏུ་གྲུབ་པ་རྡུལ་ཙམ་མིན། །ནམ་མཁའི་ངང་ན་སྣ་ཚོགས་ཀུན་ཁྱབ་གནས། །འཁོར་དང་མྱང་འདས་ཆོས་ཉིད་དབྱེར་མི་ཕྱེད། །སྣ་ཚོགས་ཇི་ལྟར་ཤར་ཡང་ནམ་མཁའི་ངང་དུ་རྫོགས། །ངན་རྟོག་བདེ་དང་སྡུག་བསྔལ་ཆོས་རྣམས་ཀྱང་། །སེམས་ཉིད་སྐྱེ་མེད་དབྱིངས་སུ་མ་རྫོགས་མེད། །ཅེས་གསུངས་པ་བཞིན་ནོ། །གསུམ་པ་ནི། གོང་དུ་བཤད་པ་དེ་ལྟ་བུའི་གཞི་དབྱིངས་ལྷུན་གྲུབ་ཆེན་པོ་ཀུན་བྱེད་བྱང་ཆུབ་སེམས་ཀྱི་ངོ་བོ་གདོད་ནས་སྐྱེ་བ་མེད་པ་ནམ་མཁའི་དཔེས་མཚོན་ཏེ་བསྟན་པ་དེ་ཉིད་ཀྱི་རྩལ་ལས་ཤར་བའི་སྣང་སྲིད་ཐམས་ཅད་ཡེ་ནས་སངས་རྒྱས་པའི་རང་བཞིན་ཡིན་ཏེ། སྒྱུ་འཕྲུལ་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མ་མ་ཀི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། རྫོགས་པ་རང་བྱུང་ལས། ནམ་མཁའི་མཐའ་ཀླས་འཇིག་རྟེན་ན། །སྲིད་གསུམ་སེམས་ཅན་མ་ལུས་ཀུན། །གཟུགས་སུ་སྣང་བ་ཇི་སྙེད་པ། །སྣ་ཚོགས་ཕྱག་རྒྱའི་དཀྱིལ་འཁོར་ཏེ། །སྒྲ་རུ་གྲགས་པ་ཅི་སྙེད་པ། །ཐམས་ཅད་མ་ལུས་སྔགས་ཀྱི་ཚིག །སེམས་ཀྱི་རྟོག་པ་ཇི་སྙེད་པ། །ཏིང་འཛིན་འབུམ་ཕྲག་བསམ་ཡས་ཏེ། །དགེ་དང་མི་དགེའི་ལས་གང་རྣམས། །ཐམས་ཅད་སངས་རྒྱས་མཛད་སྤྱོད་དེ། །ཀུན་ནས་ཀུན་ཏུ་ཐམས་ཅད་ཀུན། །དངོས་པོ་ལ་སོགས་བརྟན་གཡོ་ཀུན། །ཐམས་ཅད་རྒྱལ་བའི་དཀྱིལ་འཁོར་ཏེ། །ཞེས་གསུངས་པ་ལྟར་ཕྱི་སྣོད་ཀྱི་འཇིག་རྟེན་ནམ་མཁའ་རླུང་ཆུ་ས་མེ་ཡི་རྣམ་པར་སྣང་བའི་འབྱུང་བ་ལྔ་པོ་འདི་ཡང་རིག་པ་བྱང་ཆུབ་ཀྱི་སེམས་གདོད་མའི་ཆོས་སྐུ་ཆེན་པོའི་རང་བཞིན་ལས་གཞན་དུ་མ་དག་པའི་སྣང་བ་རྡུལ་ཕྲ་རབ་ཙམ་ཡང་མེད་པར་ཡེ་གདོད་མ་ཉིད་ནས་ངོ་མཚར་རྨད་བྱུང་གི་བཀོད་པ་མངོན་པར་སངས་རྒྱས་པའི་བདག་ཉིད་ཡིན་པ་དང་། དེ་བཞིན་དུ་སྲིད་པ་གསུམ་དང་ལམ་རྒྱུད་ལྔ་དང་འགྲོ་བ་དྲུག་གི་སྣང་བ་ཐམས་ཅད་མ་ལུས་པ་ཡང་དགེ་སྡིག་གི་རྣམ་པར་སྨིན་པའི་ལས་ཀྱིས་མི་བསྐྱོད་པའམ་མི་གོས་པས་ན་སྡིག་པས་ངན་དུ་མི་འགྲོ་སྲིད་གསུམ་ཀ་དག་གི་རང་བཞིན། དགེ་བས་བཟང་དུ་མི་འགྲོ་ཁམས་གསུམ་ཡོངས་གྲོལ་གྱི་དགོངས་པ། དགེ་སྡིག་གཉིས་སུ་མེད་པ་གཞི་མེད་རྩ་བྲལ་གྱི་རང་བཞིན། ཐམས་ཅད་མངོན་སངས་རྒྱས་པས་བཟང་ངན་སྤང་བླང་དང་བྲལ་བ། རེ་དོགས་རྩོལ་སྒྲུབ་ལས་འདས་པས་བྱར་མེད་ཡེ་གྲོལ་གྱི་ཀློང་ཆེན་པོ་སྟེ། མདོར་ན་ཁམས་གསུམ་གྱིས་བསྡུས་པ་འགྲོ་བའི་གནས་རིས་དྲུག་གི་སེམས་ཅན་འདི་ཐམས་ཅད་ཡེ་ནས་བྱང་ཆུབ་སེམས་ཀྱི་རང་བཞིན་རྒྱལ་བ་ཀུན་ཏུ་བཟང་པོའི་སྐུ་གསུང་ཐུགས་གསུམ་གྱི་ངོ་བོ་སྟེ། དེ་ཡང་འདོད་ཁམས་སྣང་བའི་རང་བཞིན་སྐུ་རྡོ་རྗེ་གཟུགས་ཁམས་གསལ་བའི་རང་བཞིན་གསུང་རྡོ་རྗེ། གཟུགས་མེད་མི་སྣང་བའི་རང་བཞིན་ཐུགས་རྡོ་རྗེ་འམ། ཡང་ན་ལུས་སྣང་བ་འདོད་པའི་སྲིད་པ་སྐུ་རྡོ་རྗེ། ངག་ཕྱེད་སྣང་གཟུགས་ཀྱི་སྲིད་པ་གསུང་རྡོ་རྗེ། ཡིད་མི་སྣང་བ་གཟུགས་མེད་པའི་སྲིད་པ་ཐུགས་རྡོ་རྗེ་གསུམ་གྱི་ངོ་བོར་སངས་རྒྱས་པ་ཡིན་ཏེ། ཀློང་ཆེན་རབ་འབྱམས་ལས། འདི་ལྟར་སྣང་བའི་ཆོས་རྣམས་ཀུན། །ལྔའམ་ཡེ་ཤེས་བཞི་ཡིས་ཁྱབ། །འདོད་པའི་ཁམས་ཀྱང་ཀུན་ཏུ་བཟང་པོ་ང་། །གཟུགས་མེད་ཁམས་ཀྱང་ཀུན་ཏུ་བཟང་པོ་ང་། །གཟུགས་ཀྱི་ཁམས་ཀྱང་ཀུན་ཏུ་བཟང་པོ་ང་། །ངས་ཁྱབ་ཐམས་ཅད་བདེ་གཤེགས་སྙིང་པོའམ། །ཀུན་གྱི་ཐིག་ལེ་ས་བོན་ཚུལ་དུའོ། །ཞེས་གསུངས་སོ། །བཞི་པ་ནི། དེ་ལྟར་སྣང་སྲིད་ཐམས་ཅད་ཡེ་ནས་བྱང་ཆུབ་སེམས་ཀྱི་ཀློང་དུ་མངོན་པར་སངས་རྒྱས་པ་དེ་བས་ན་སྣང་སྲིད་སྣོད་བཅུད་ཀྱིས་བསྡུས་པའི་ཆོས་འདི་ཐམས་ཅད་ཀུན་ནམ་མཁའི་ངང་ན་མི་གནས་པ་གཅིག་ཀྱང་མེད་པ་བཞིན་དུ་ཆོས་དབྱིངས་འདུས་མ་བྱས་པ་རིག་པ་བྱང་ཆུབ་སེམས་ཀྱི་ཀློང་ཆེན་པོ་ནི། ཆོས་དབྱིངས་རིན་པོ་ཆེའི་མཛོད་ལས། ཕྱོགས་མེད་ཀུན་ཁྱབ་བརྡལ་བའི་ས་གཞི་ལ། །འཁོར་འདས་རིས་མེད་བྱང་ཆུབ་སེམས་ཀྱི་མཁར། །ཆོས་ཉིད་ཀློང་ཡངས་རྩེ་མོ་ལྷུན་མཐོ་ཞིང་། །མ་བྱས་རང་བཞིན་ཕྱོགས་བཞི་ཡངས་པའི་དཀྱིལ། །རིམ་རྩོལ་བྲལ་བའི་འཇུག་སྒོ་ཤིན་ཏུ་ཡངས། །ལྷུན་གྲུབ་འབྱོར་བའི་བཀོད་པས་བརྒྱན་པ་དེར། །རང་བྱུང་ཡེ་ཤེས་རྒྱལ་པོ་གདན་ལ་བཞུགས། །འདུ་འཕྲོར་སྣང་བ་ཡེ་ཤེས་རྩལ་རྣམས་ཀུན། །བློན་པོར་གྱུར་པས་ཡུལ་ལ་དབང་བསྒྱུར་ཞིང་། །རང་གནས་བསམ་གཏན་བཙུན་མོ་དམ་པ་དང་། །དགོངས་པ་རང་ཤར་སྲས་དང་བྲན་གཡོག་བཅས། །བདེ་ཆེན་ཀློང་དཀྱིལ་རང་གསལ་རྟོག་པ་མེད། །མི་གཡོ་བསམ་བརྗོད་བྲལ་བའི་ངང་ཉིད་ལས། །སྣང་སྲིད་སྣོད་བཅུད་ཀུན་ལ་མངའ་དབང་བསྒྱུར། །ཆོས་དབྱིངས་ཡངས་པའི་ཡུལ་ཁམས་རྒྱ་ཆེའོ། །ཞེས་གསུངས་པ་ལྟར་ཡུལ་གྱི་རང་བཞིན་རྒྱ་ཆེ་བས་སངས་རྒྱས་དང་སེམས་ཅན་སྣང་སྲིད་དང་སྣོད་བཅུད་ཀུན་ཀྱང་བཟང་ངན་དབྱེ་བསལ་མེད་པར་ཆོས་ཉིད་མཉམ་པ་ཆེན་པོ་གཅིག་གི་ཀློང་དུ་གནས་པ་ཡིན་པས་ན་དཔེ་ནམ་མཁའ་དང་ཆོས་མཚུངས་སུ་བསྟན་པ་ཡིན་ནོ། །བཞི་པ་དེ་ཉིད་མ་རྟོགས་པས་རྣལ་མའི་དོན་དང་མི་འཕྲད་པ་ནི། དེ་ལྟར་ཆོས་ཐམས་ཅད་བྱང་ཆུབ་སེམས་ཀྱི་ཀློང་ལས་འདའ་བ་མེད་པ་དེའི་ཕྱིར་ན་སྣང་སྲིད་ཀྱི་ཆོས་ཐམས་ཅད་ཡེ་ནས་རྣམ་པར་དག་པའི་ཆོས་ཉིད་བསམ་གྱིས་མི་ཁྱབ་པ་ལ་འཁོར་འདས་དང་བཟང་ངན་སོགས་གཉིས་ཆོས་སུ་གྲུབ་པ་རྡུལ་ཕྲ་བ་ཙམ་ཡང་མེད་ལ། དེ་མེད་པས་དམིགས་པའི་སྤྱོད་ཡུལ་ཐམས་ཅད་ལས་འདས་ཞིང་། སྒྲོ་སྐུར་ཀུན་དང་བྲལ་བ་ཞིག་ཡིན་པ་ལ་གལ་ཏེ་རྣལ་འབྱོར་པ་གང་གིས་སྨྲ་བསམ་བརྗོད་པ་དང་བྲལ་ཞིང་ཡོད་མེད་སྒྲོ་སྐུར་ལོགས་པའི་རྟོག་པས་བསླད་པ་མེད་པའི་རང་བཞིན་སྙིང་པོ་བྱང་ཆུབ་ཀྱི་སེམས་རྒྱུ་འབྲས་རྩོལ་སྒྲུབ་ལས་འདས་པའི་གནས་ལུགས་འདི་མ་མཐོང་ན། དེ་ལས་གཞན་དུ་འབད་རྩོལ་ཇི་ཙམ་བྱས་ཀྱང་བསྐལ་པ་དུ་མར་སྟེ་བསྐལ་པ་མང་པོའི་ཡུན་དུ་ཡང་དག་གི་དོན་དང་འཕྲད་པར་མི་འགྱུར་བས་ན་རྒྱུ་འབྲས་རྩོལ་སྒྲུབ་དང་བྲལ་བའི་བྱར་མེད་ཡེ་གྲོལ་ཆེན་པོ་གསང་ཆེན་ཨ་ཏིའི་དགོངས་པ་འདི་ལ་ཡིད་ཆེས་ཀྱི་དད་པ་དང་ལྡན་པས་བརྩོན་པར་གདམས་པའོ། །ལྔ་པ་ཐམས་ཅད་བྱང་ཆུབ་སེམས་སུ་བསྟན་པ་ལ་གསུམ་སྟེ། རྩ་བ་ཀུན་བྱེད་ཉིད་དུ་བསྟན་པ། དེ་ལས་ཐེག་པའི་འཕྲོ་ཚུལ། ཇི་ལྟར་སྣང་ཡང་རྩ་བ་ཆོས་ཉིད་ལས་གཞན་མ་ཡིན་པའོ། །དང་པོ་ནི་འདི་ལྟར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཅན་གྱི་སྣང་བ་མི་འདྲ་བ་སྣ་ཚོགས་སུ་སྣང་བ་ཀུན་ཀྱང་། གང་ལས་བྱུང་བའི་གཞི་འམ་རྩ་བ་སེམས་ཉིད་བདེ་གཤེགས་སྙིང་པོ་རིག་པ་བྱང་ཆུབ་སེམས་ཀྱི་ཀློང་དུ་གཉིས་སུ་གྲུབ་པ་མེད་པར་བྱང་ཆུབ་ཀྱི་སེམས་གཅིག་པུའི་རང་བཞིན་ཡིན་ཞིང་། དེ་ལྟ་བུའི་སངས་རྒྱས་དང་སེམས་ཅན་སྣང་སྲིད་དང་སྣོད་བཅུད་ཀུན་སྟེ། མདོར་ན་འཁོར་འདས་ཀྱི་ཆོས་ཐམས་ཅད་གང་ལས་འབྱུང་བའི་གཞི་མ་ཀུན་བྱེད་བྱང་ཆུབ་ཀྱི་སེམས་ཆོས་ཀུན་གྱི་སྙིང་པོ་རང་བྱུང་གི་ཡེ་ཤེས་དེ་ཡི་རང་གི་ངོ་བོ་ལ་གཅིག་ཏུ་གྲུབ་པའི་ཆོས་ཀྱང་མེད་ན་གཉིས་དང་གསུམ་ལ་སོགས་པ་དུ་མའི་ཆོས་སུ་གྲུབ་པ་ཇི་ལྟར་ཡོད་དེ་མེད་མོད། འོན་ཏེ་དེའི་རྩལ་ལས་ཤར་བའི་ཆོས་ཅན་གྱི་ངོས་ནས་བསྒྲངས་ན་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་སྟེ། འདི་ལྟར་སངས་རྒྱས་རྣམས་ཀྱི་སྐུ་གསུང་ཐུགས་སོགས་ཞི་བ་མྱ་ངན་ལས་འདས་པའི་ཆོས་ཁམས་རྒྱ་མཚོ་ལྟ་བུ་དང་། སེམས་ཅན་རྣམས་ཀྱི་ལུས་ངག་ཡིད་གསུམ་སོགས་འཁོར་བའི་ཆོས་སུ་སྣང་བ་ཇི་སྙེད་པ་ཀུན་ཀྱང་བྱང་ཆུབ་སེམས་ཀྱི་རང་བཞིན་ཡིན་པའི་ཕྱིར་ཏེ། མདོ་བཅུ་ལས། བྱང་ཆུབ་སེམས་ཀྱི་དོན་འདི་ལ། །གཅིག་ནི་ཀུན་གྱི་རང་བཞིན་ཏེ། །ཆོས་ཀྱི་དབྱིངས་སམ་བྱང་ཆུབ་སེམས། །ཡིན་པས་རྩ་བའི་དོན་དུ་བཞག །གཅིག་པའི་དོན་ནི་འདི་ལྟ་སྟེ། །སངས་རྒྱས་སྐུ་དང་ཡེ་ཤེས་དང་། །སེམས་ཅན་ལུས་དང་བག་ཆགས་དང་། ། སྣང་དང་སྲིད་པའི་ཆོས་རྣམས་ཀུན། །བྱང་ཆུབ་སེམས་དང་དབྱིངས་སུ་འདུས། །ཞེས་གསུངས་སོ། །དེ་ཡང་བྱང་ཆུབ་སེམས་ཀྱི་མདོ་དེ་ཉིད་ལས། འདི་སྐད་དུ། ཆོས་ཀུན་རྩ་བ་སེམས་སུ་གཅིག །རྩ་བ་གཅིག་ལ་དོན་གཉིས་ནི། །བདེ་དང་སྡུག་བསྔལ་ཐེག་པ་གཉིས། །ཕུན་སུམ་ཚོགས་པ་གསུམ་ཚང་བས། །ཡོ་ག་བཞི་ཡི་བྱེ་བྲག་བྱེད། །ཁྱད་པར་འཕགས་པའི་ཆེ་ལྔ་སྟོན། །གོལ་སྒྲིབ་དྲུག་དྲུག་སྐྱོན་ཡོན་སེལ། །གཏན་ལ་རྣམ་པ་བདུན་གྱིས་འབེབས། །ངེས་པའི་མན་ངག་བརྒྱད་དུ་སྟོན། །བདེན་པའི་ཚིག་དགུ་མཐུན་སྨྲས་ནས། །ཡོངས་སུ་རྫོགས་པའི་མདོ་བཅུ་ནི། །གཅིག་གི་རང་བཞིན་སྟོན་པར་བྱེད། །ཅེས་གསུངས་པ་ལྟར་གཅིག་མདོ་བྱང་ཆུབ་སེམས་ཀྱི་མདོ་ལ་སོགས་པ་རྣམ་པ་བཅུ་བསྟན་པ་ལས་ས་བཅད་འདིའི་ཁུངས་ནས་གཅིག་མདོ་བྱང་ཆུབ་སེམས་ཀྱི་མདོ་ཉིད་བསྟན་པ་ཡིན་ནོ། །གང་དུ་བསྟན་པ་དེ་ལྟར་ཆོས་ཐམས་ཅད་བྱང་ཆུབ་སེམས་ཀྱི་རང་བཞིན་ཡིན་པའི་རྒྱུ་མཚན་དེས་ན་གཉིས་ཆོས་ཀྱི་སྣང་བ་ཐམས་ཅད་གཉིས་མེད་བྱང་ཆུབ་སེམས་ཀྱི་ཀློང་དུ་ཡེ་ནས་གྲོལ་ཟིན་པ་ཡིན་པས་གཟུང་འཛིན་མཚན་མའི་སྤྲོས་པ་ཀུན་དང་བྲལ་བ་ཡིན་ལ། དེ་ལྟ་བུའི་གཟུང་འཛིན་ཀུན་དང་བྲལ་བ་རང་བྱུང་གི་ཡེ་ཤེས་བཅོས་བསྒྱུར་སྤང་བླང་ལས་འདས་པའི་དོན་དེ་གང་ཟག་གང་གིས་གྲུབ་པ་ཡིན་ཀྱང་། དེ་ལྟར་གྲུབ་པའི་གང་ཟག་དེས་ནི་ལམ་དང་འབྲས་བུའི་ཡོན་ཏན་མ་ལུས་པ་ཀུན་གྲུབ་པ་ཡིན་ཏེ་ཆོས་ཐམས་ཅད་ཀྱི་རྩ་བ་རིག་པ་རང་བྱུང་གི་ཡེ་ཤེས་གདོད་ནས་ཡེ་སངས་རྒྱས་པའི་རང་བཞིན་ཅན་དེ་མངོན་དུ་གྲུབ་པས་སོ། །གཉིས་པ་ལ་བརྒྱད་དེ། ཐེག་པ་དུ་མ་སྟོན་པའི་རྒྱུ་བརྗོད་པ། ཕུན་སུམ་ཚོགས་པ་གསུམ་དུ་སྣང་ཚུལ། རྣལ་འབྱོར་བཞིར་དབྱེ་བ། ཆེ་བ་ལྔར་བསྟན། སྒྲོ་སྐུར་བསལ་བ། རྩོལ་སྒྲུབ་ཏུ་ཞེན་པ་དོར་བ། ཐེག་པ་དགུར་དབྱེ་བ། དོན་བསྡུ་བའོ། །དང་པོ་ནི། འོ་ན་ཆོས་ཐམས་ཅད་བྱང་ཆུབ་ཀྱི་སེམས་གཅིག་གི་རང་བཞིན་ཡིན་ན་དེ་ལ་དུ་མར་བསྒྲངས་ཤིང་བསྟན་པའི་རྒྱུ་མཚན་ཅི་ཡིན་ཞེ་ན། འདི་ལྟར་ཀུན་བྱེད་བྱང་ཆུབ་སེམས་ཀྱི་མདོ་རྩ་གཅིག་པུ་རུ་ཆོས་ཐམས་ཅད་ཡེ་ནས་འདུས་ཤིང་གཉིས་སུ་མེད་པ་ཡིན་མོད། འོན་ཀྱང་དེ་ཡི་དོན་ལ་སེམས་ཤིང་བཟང་ངན་བླང་དོར་ཡོངས་སུ་རྟོག་པ་ལ་དགའ་བས་ཏེ་དགའ་བའི་གདུལ་བྱ་སྤྲོས་པ་ལ་འཆེལ་བ་རྣམས་ཀྱི་ངོར་ཐེག་པའི་རྣམ་གྲངས་རྣམ་པར་བསྒྲངས་ཤིང་བསྟན་པ་ནི། འཇིག་རྟེན་པ་དང་མྱ་ངན་ལས་འདས་པའི་ཐེག་པ་གཉིས་དང་གཞན་ཡང་ཐེག་པའི་རིམ་པ་དགུ་ལ་སོགས་པའི་གྲངས་ལ་དགའ་བ་རྣམས་རྫོགས་པ་ཆེན་པོའི་དོན་ལ་རིམ་གྱིས་དྲང་བའི་ཆེད་དུ་ཀུན་བྱེད་ང་ཡིས་བསྟན་པ་ཡིན་ནོ་ཞེས་གཉིས་མདོ་རྣམ་པར་བགྲངས་བའི་མདོའི་དོན་བསྟན་པའོ། །གཉིས་པ་ནི། ཆོས་རྣམས་ཀྱི་གནས་ལུགས་ཇི་བཞིན་པའི་རང་བཞིན་ཆོས་ཉིད་བྱང་ཆུབ་ཀྱི་སེམས་ཆོས་སྐུ་ཐིག་ལེ་ཉག་གཅིག་གི་རང་བཞིན་དུ་གནས་པ་ལ་ལྡོག་ཆའི་སྒོ་ནས་སེམས་ཉིད་རང་བྱུང་གི་ཡེ་ཤེས་དེ་ལ་སྟོང་གསལ་ཐུགས་རྗེ་ཡི་རང་བཞིན་རྣམ་པ་གསུམ་དུ་སྣང་བས་རང་བཞིན་གསུམ་པོ་དེ་ཉིད་ཀྱི་རྩལ་ལས་ནི་རྩོལ་མེད་ཤུགས་འབྱུང་དུ་བཀོད་པའི་ངོ་བོ་སྟོན་པ་ཕུན་སུམ་ཚོགས་པ་སངས་རྒྱས་དང་། བསྟན་པ་ཕུན་སུམ་ཚོགས་པ་དམ་ཆོས་དང་། འཁོར་ཕུན་སུམ་ཚོགས་པ་དགེ་འདུན་གྱི་ངོ་བོ་ཡིན་པས་མཆོག་གསུམ་གྱི་རང་བཞིན་དུ་སྣང་བ་སྟེ། དེ་རྣམས་ནི་ཐེག་པའི་རིམ་པ་རྣམས་གང་ལས་འབྱུང་བའི་གཞི་ཕུན་སུམ་ཚོགས་པའི་ཆོས་རྣམས་ཇི་ལྟར་སྣང་བའི་ཚུལ་ཉིད་དོ་ཞེས་གསུམ་མདོ་ཕུན་སུམ་ཚོགས་པའི་མདོ་ཉིད་བསྟན་པའོ། །གསུམ་པ་ནི། འདི་ལྟར་བྱང་ཆུབ་ཀྱི་སེམས་གཉིས་སུ་དབྱེ་བ་མེད་པར་རང་བྱུང་འདུས་མ་བྱས་པའི་ཡེ་ཤེས་གཅིག་གི་རང་བཞིན་ལ་ལམ་ལ་བསྒྲོད་པར་བྱེད་པའི་རྣལ་འབྱོར་བ་ཀུན་འབྲེལ་ཞིང་ཉམས་སུ་བླང་བས་ཆོས་ཉིད་བྱང་ཆུབ་ཀྱི་སེམས་རྣལ་མ་གཅིག་པུའི་རང་བཞིན་ལ་བློ་འབྱོར་ཚུལ་གྱི་སྒོ་ནས་སེམས་དཔའི་རྣལ་འབྱོར་ཕྱི་རྒྱུད་སྡེ་གསུམ་དང་། རྣལ་འབྱོར་ཆེན་པོ་མ་ཧཱ་ཡོ་ག་དང་། རྗེས་སུ་རྣལ་འབྱོར་ཨ་ནུ་ཡོ་ག་དང་། ཤིན་ཏུ་རྣལ་འབྱོར་ཨ་ཏི་ཡོ་ག་སྟེ་དབྱེ་བ་རྣམ་པ་བཞི་རུ་བྱུང་བ་ཡིན་ན་ཡང་། དེ་དག་གིས་རྟོགས་བྱ་ཆོས་ཀྱི་དབྱིངས་སམ་ཆོས་ཉིད་རང་བྱུང་གི་ཡེ་ཤེས་ལ་ཐ་དད་མེད་པས་རྣལ་འབྱོར་རྣམ་པ་བཞི་པོ་དེ་ཡི་ཡུལ་དུ་ཆོས་ཉིད་བྱང་ཆུབ་ཀྱི་སེམས་འདི་ཉིད་གཅིག་པུ་བསྟན་པ་ཡིན་ནོ་ཞེས་དེས་ནི་བཞི་མདོ་བྱེ་བྲག་འབྱེད་པའི་མདོའི་དོན་བསྟན་པའོ། །བཞི་པ་ནི། འདི་ལྟར་ངོ་བོ་སེམས་ཉིད་རང་བྱུང་གི་ཡེ་ཤེས་གཅིག་གི་རང་བཞིན་ཡིན་པ་ལ་ལྡོག་པས་དབྱེ་ན་ཆེ་བ་རྣམ་པ་ལྔར་བསྟན་ཏེ། ཇི་ལྟར་སྣང་བའི་ཆོས་ཐམས་ཅད་སྤོང་འགོག་སྦྱོང་ལ་མི་ལྟོས་པར་མངོན་སུམ་པར་སངས་རྒྱས་པའི་ཆེ་བས་ནི་མཚན་ཉིད་སྡེ་གསུམ་ལས་གྲོལ་ཞིང་ཁྱད་པར་འཕགས་པ་དང་། ཕྱི་རྒྱུད་ཀྱི་སྐབས་སུ་གཟུང་འཛིན་གྱི་རྟོག་པ་ལོག་པ་དོར་བྱར་ལྟ་བའི་ཆོས་དེ་ཉིད་ཡེ་ནས་སངས་རྒྱས་པ་ཡིན་པའི་ཆེ་བས་ནི་ཀྲྀ་ཡོག་སྡེ་གསུམ་ལས་ཁྱད་པར་དུ་འཕགས་པ་དང་། དེ་ཡང་རྩོལ་སྒྲུབ་ཀྱི་གཞན་དབང་ལ་རག་མ་ལུས་པར་ཆོས་ཐམས་ཅད་རང་བྱུང་ཡེ་ཤེས་ཀྱི་བདག་ཉིད་ཆེན་པོར་སངས་རྒྱས་པའི་ཆེ་བས་ནི་མ་ཧཱ་ཡོ་ག་ལས་ཁྱད་པར་འཕགས་པ་དང་། དེ་ཡང་རྒྱུ་འབྲས་ཀྱི་མཚན་མ་ཀུན་ལས་འདས་དེ་ཐམས་ཅད་ཆོས་ཀྱི་དབྱིངས་སུ་སངས་རྒྱས་པའི་ཆེ་བས་ནི་ཨ་ནུ་ཡོ་ག་ལས་ཁྱད་པར་འཕགས་པ་དང་། སངས་རྒྱས་ཞེས་པ་དེ་ཡང་མིང་གི་བླ་དྭགས་ཙམ་ལས་མེད་པས་སངས་རྒྱས་མེད་པའི་ཆེ་བས་ནི། ཨ་ཏི་ཡོ་ག་རང་གི་ཆོས་ཐམས་ཅད་སངས་རྒྱས་པར་བལྟ་བའི་ཞེན་པ་དང་བྲལ་ནས་ལ་བཟླ་བ་སྟེ། རིན་པོ་ཆེའི་རྒྱན་ལས། མངོན་པར་སངས་རྒྱས་ཆེ་བས་ནི། །གསུམ་གྲོལ་རང་གཞུང་ཨ་ཏི་དངོས། །ཐམས་ཅད་དེ་ཡིན་བླང་དོར་བྲལ། །ཡོ་ག་ཨ་ཏི ར་ལ་བཟླའོ། །རྩོལ་སྒྲུབ་མི་གནས་བདག་ཉིད་ཆེ། །མ་ཧཱ་ཨ་ཏིར་ལ་བཟླའོ། །ཆོས་དབྱིངས་ངང་ལས་རྒྱུ་འབྲས་འདས། །ཨ་ནུ་ཨ་ཏིར་ལ་བཟླའོ། །ཐམས་ཅད་བླ་དྭགས་རྒྱས་བཏབ་པས། །སངས་རྒྱས་མེད་པའི་ཆེ་བ་སྟེ། །ཨ་ཏི་ཡོ་གའི་ཨ་ཏིའོ། །ཞེས་གསུངས་ཏེ། དེ་ལྟར་ཆེ་བ་ལྔ་བསྟན་པ་དེ་བྱང་ཆུབ་སེམས་ཀྱི་རང་བཞིན་ལ་དེ་ལྟ་བུའི་ཡོན་ཏན་ལྔ་དང་ཡེ་ནས་ལྡན་པ་ཡིན་པས་རང་བཞིན་ལྔ་པོ་དེ་ལ་ཆེ་བ་ལྔར་མིང་དུ་བཏགས་ནས་བསྟན་པ་ཡིན་ཏེ་འདིས་ནི་ལྔ་མདོ་ཆེ་བ་ལྔ་ཡི་མདོ་བསྟན་པའོ། །ལྔ་པ་ནི ། ཆོས་ཐམས་ཅད་བྱང་ཆུབ་སེམས་ཀྱི་རང་བཞིན་ངེས་པའི་དོན་གྱི་བདེན་པ་གཅིག་གི་རང་བཞིན་ཡིན་པ་ལ་ཐེག་པ་འོག་མ་པ་རྣམས་ཀྱིས་དེ་ལྟར་མ་རྟོགས་པར་རང་རང་གི་གྲུབ་མཐའ་ལ་ཞེན་ནས་དངོས་པོའི་གནས་ཚུལ་དང་མཐུན་པའི་ཡང་དག་པའི་དོན་ཡིན་མིན་དུ་ལྟ་བའི་དགག་སྒྲུབ་ཀྱི་སྒྲོས་ཏེ་སྒྲོ་བཏགས་སྣ་ཚོགས་པ་བྱུང་བས་གོལ་ས་དང་སྒྲིབ་པ་རྔམ་པོ་ཆེ་དང་ཐེ་ཚོམ་གྱི་རྟོག་པ་བསམ་ཡས་པ་ཞིག་བྱུང་བ་ཀུན་ནི་ཚུར་བསྡུ་ན་ངེས་ཐོབ་ཀྱི་ཐེག་པ་དྲུག་ལ་ལྟོས་པའི་གོལ་སྒྲིབ་དྲུག་ཏུ་བསྟན་པ་དེ་དག་གི་གཉེན་པོ་ནི་ཀུན་བྱེད་བྱང་ཆུབ་ཀྱི་སེམས་རྩོལ་སྒྲུབ་དང་བློ་རྣམ་པར་རྟོག་པའི་ཡུལ་ལས་འདས་པའི་རང་བཞིན་མ་ནོར་བར་མཐོང་བས་སེལ་བར་བྱེད་པ་ཡིན་ནོ་ཞེས་པ་སྟེ་དེ་ནི་དྲུག་མདོ་གོལ་སྒྲིབ་བསྟན་པའི་མདོའི་དོན་ནོ། །དེས་ན་དེ་ལྟ་བུའི་ཡོད་མེད་སྒྲོ་སྐུར་གྱི་མཐའ་ལ་ཞེན་པ་དང་ཐེ་ཚོམ་གྱི་རྟོག་པ་ཐམས་ཅད་བསལ་བའི་ཕྱིར་དུ་ཆོས་ཉིད་དེ་བཞིན་ཉིད་ཀྱི་རང་བཞིན་སྙིང་པོ་བྱང་ཆུབ་ཀྱི་སེམས་དེ་ཉིད་རྒྱུ་འབྲས་སྤང་བླང་ཐམས་ཅད་ལས་འདས་པས་ཅིར་ཡང་རྣམ་པར་མི་རྟོག་པས་སམ་མི་རྟོག་པའི་ཚུལ་གྱིས་མ་ནོར་ཇི་བཞིན་དུ་ངེས་པའི་ལུང་དེ་གཏན་ལ་འབེབས་པར་གསུངས་པ་ནི་བདུན་མདོ་གཏན་ལ་འབེབས་པའི་མདོ་ལས་བསྟན་ཏེ། དེ་ལྟར་ཡང་བྱང་ཆུབ་སེམས་ཀྱི་མདོ་དེ་ལས། ལུང་གསུམ་མན་ངག་བཞི་བདུན་གྱིས། །ངེས་པར་གཏན་ལ་འབེབས་པར་བཤད། །ཅེས་གསུངས་པ་ལྟར་ལུང་གསུམ་དང་མན་ངག་བཞི་སྟེ་བདུན་གྱི་གཏན་ལ་དབབས་པར་གསུངས་ཏེ། དེ་ལ་ལུང་གསུམ་ནི་སྙན་ཁུངས་བརྒྱུད་པའི་ལུང་དང་། མངོན་དུ་ཕྱུང་བའི་ལུང་དང་། གཏན་ལ་འབེབས་པའི་ལུང་གསུམ་སྟེ། དེ་ལས་དང་པོ་ལའང་ཆོས་སྐུའི་བྱིན་གྱིས་རླབས་ཀྱིས་བཤད་པ་ལ་སོགས་པ་སྟོན་པ་སྐུ་གསུམ་གྱིས་རང་བཞིན་རྫོགས་པ་ཆེན་པོའི་ཆོས་རྣམས་གསུངས་པ་ནི་འཕགས་པའི་ཡེ་ཤེས་ཀྱི་སྙན་ཁུང་དུ་རྒྱུད་པ་དང་། སངས་རྒྱས་རབ་བདུན་ལ་སོགས་པས་འཁོར་གྱིས་གང་ཟག་རྣམས་ཀྱི་སྐལ་པ་དང་འཚམས་པར་ཐེག་པ་ཐུན་མོང་པའི་ཆོས་རྣམས་གསུངས་པ་གང་ཟག་རྣ་བའི་དབང་པོ་བརྒྱུད་པ་སྟེ་གཉིས་སུ་གསུངས་ལ། གཉིས་པ་ནི་ཆོས་ཉིད་མངོན་དུ་ཕྱུང་བའི་ལུང་ཐེག་པའི་རིམ་པ་རྣམས་ཏེ་དེ་ཡང་ཚིག་དང་ཡི་གེས་མཚོན་དུ་ཡོད་པར་གསུངས་པ་ཐམས་ཅད་དྲང་བའི་ལུང་དང་། ཆོས་ཉིད་བྱང་ཆུབ་སེམས་ཀྱི་རང་བཞིན་སྒྲ་དང་ཚིག་གིས་མཚོན་དུ་མེད་པར་བསྟན་པ་རྣམས་ངེས་པའི་ལུང་དང་རྣམ་པ་གཉིས་སུ་གསུངས་སོ། །གསུམ་པ་ནི་རྩོལ་བཅས་ཀྱི་ཐེག་པ་འོག་མ་པ་རྣམས་ཀྱིས་ཆོས་ཉིད་ཀྱི་དོན་ཇི་བཞིན་གཏན་ལ་མ་ཕེབ་པ་ཨ་ཏི་རྫོགས་པ་ཆེན་པོས་ཆོས་ཐམས་ཅད་རྒྱུ་འབྲས་སྤང་བླང་ལ་མི་ལྟོས་པར་སེམས་ཉིད་རང་བྱུང་གི་ཡེ་ཤེས་གཅིག་ཏུ་འདུས་པར་བསྟན་པས་ཆོས་རྣམས་ཀྱིས་ཡིན་ལུགས་ཇི་བཞིན་པར་གཏན་ལ་ཕེབ་པར་བསྟན་པའོ། །མན་ངག་བཞི་ལ་བཞི་ཚན་གཉིས་སུ་གསུངས་པ་ལས། དང་པོ་བཞི་ནི་ངེས་པ་བཞི་ཡི་མན་ངག་དང་། མི་རིག་རིག་པར་བཤད་པ་གསུམ་དང་། སྐབས་དང་ཕྱག་རྒྱའི་མན་ངག་གཉིས་དང་། དེ་ཉིད་ལམ་གྱི་མན་ངག་དང་བཞིའོ། །དེ་ལས་དང་པོ་ངེས་པ་བཞི་ནི་ཡེ་ཤེས་ལ་སྤང་ལེན་མེད་པར་ངེས་པ་དང་། སྙིང་རྗེ་ཕྱོགས་རིས་མེད་པར་ངེས་པ་དང་། འབྱུང་ལྔ་སངས་རྒྱས་ཉིད་དུ་ངེས་པ་དང་། རྒྱུ་རྐྱེན་བྲལ་བའི་སེམས་ལ་གཉེན་པོ་མེད་པར་ངེས་པ་བཞིའོ། །མི་རིགས་རིགས་པར་བཤད་པ་གསུམ་ནི། སེམས་ལས་མ་བྱུང་བའི་སངས་རྒྱས། རྒྱུ་ལས་མ་བྱུང་བའི་འབྲས་བུ། ལུང་ལས་མ་བྱུང་བའི་མན་ངག་གསུམ་འོག་མའི་བློ་ལ་མི་འཐད་ཅིང་རྫོགས་པ་ཆེན་པོའི་མན་ངག་གིས་རིགས་ཤིང་འཐད་པར་བཤད་པའོ། །སྐབས་དང་ཕྱག་རྒྱའི་མན་ངག་ལས་སྐབས་ཉི་ཤུ་རྩ་བདུན་ནི། ཆོས་ཉིད་ཀྱི་སྐབས་དང་། རང་བཞིན་དུ་གནས་པའི་སྐབས་དང་། བཙལ་བ་དང་བྲལ་བའི་སྐབས་ལ་སོགས་པ་ཉེར་བདུན་སྟེ། དེ་ཉིད་ལས། ཅི་ལྟར་སྣང་བའི་ཆོས་རྣམས་ཀུན། །ཡེ་ནས་འདུས་བྱས་མ་ཡིན་པས། །ཆོས་ཉིད་དག་ཏུ་གནས་པ་དེ། །ཆོས་ཉིད་སྐབས་ཞེས་བསྟན་པ་ཡིན། །ཞེས་སོགས་ཀྱིས་བསྟན་པ་ལྟར་ལ། ཕྱག་རྒྱ་ཉེར་ལྔ་ནི། མཚན་མའི་ཡུལ་ལས་འདས་པའི་ཕྱག་རྒྱ་དང་། ཐབས་ཤེས་གཉིས་སུ་མེད་པའི་ཕྱག་རྒྱ། དབྱིངས་ཡེ་གཉིས་སུ་མེད་པའི་ཕྱག་རྒྱ་ལ་སོགས་པ་སྟེ། དེ་ལས་མཚན་མའི་ཡུལ་ལ་མི་གནས་ཏེ། ཡེ་ཤེས་ཆེན་པོའི་ཕྱག་རྒྱ་ཡིན། །ཐབས་དང་ཤེས་རབ་གཉིས་མེད་པ། །ཡེ་ཤེས་ཆེན་པོའི་ཕྱག་རྒྱ་ཡིན། །ཅེས་པ་ལ་སོགས་པས་བསྟན་པ་ལྟར་རོ། །དེ་ཉིད་ལམ་གྱི་མན་ངག་ལ་རྣལ་འབྱོར་རྣམ་པ་བཞི་པོ་རེ་རེ་བཞིན་དུ་སེམས་དང་ཆོས་དང་ཡེ་ཤེས་དང་ངོ་བོ་དག་གི་མན་ངག་བཞི་ར ེར་ཕྱེ་བས་དེ་ཉིད་རྣམ་པ་བཅུ་དྲུག་ཏུ་གསུངས་ཏེ། དེ་ལས་ཤིན་ཏུ་རྣལ་འ བྱོར་དེ་ཉིད་ནི། རྣམ་པ་བཞི་རུ་བགྲངས་པར་བྱ། །སངས་རྒྱས་སེམས་ཅན་རྒྱུད་དྲུག་ཀུན། །མ་བཅོས་སེམས་ཀྱི་དེ་ཉིད་དོ། །སྣང་སྲིད་སྣོད་བཅུད་ཐམས་ཅད་ཀུན། །མ་བཅོས་ཆོས་ཀྱི་དེ་ཉིད་དོ། །དུས་གསུམ་བསྐྱོད་པ་ངེས་པ་ནི། །མ་བསྒྲིབས་ཡེ་ཤེས་དེ་ཉིད་དོ། །ཐམས་ཅད་ཡོངས་སུ་རྫོགས་པ་ནི། །ངོ་བོ་དག་གི་དེ་ཉིད་དོ། །ཀུན་ཏུ་རྣལ་འབྱོར་དེ་ཉིད་ནི། །རྣམ་པ་བཞི་རུ་བགྲང་བར་བྱ། །ཆོས་དབྱིངས་ཇི་ལྟར་རིག་པ་དེ། །དེ་ནི་སེམས་ཀྱི་དེ་ཉིད་ཡིན། །དབྱིངས་ཉིད་ཅིར་ཡང་བཅོས་མེད་པས། །དེ་ནི་ཆོས་ཀྱི་དེ་ཉིད་ཡིན། །དབྱིངས་དང་ཡེ་ཤེས་གསལ་བ་ནི། །དེ་ནི་ཡེ་ཤེས་དེ་ཉིད་ཡིན། །དབྱིངས་དང་ཡེ་ཤེས་གཉིས་མེད་པས། །དེ་ནི་ངོ་བོ་དེ་ཉིད་ཡིན། །རྣལ་འབྱོར་ཆེན་པོའི་དེ་ཉིད་ཀྱང་། །རྣམ་པ་བཞི་རུ་ཤེས་པར་བྱ། །ཡི་གེ་ཧཱུཾ་ལ་སོགས་པ་ནི། །དེ་ལས་ཐམས་ཅད་བསྐྱེད་པ་ནི། །སེམས་ཀྱི་དེ་ཉིད་ཡིན་པར་བཤད། །ཕུང་པོ་འབྱུང་བ་རྣམ་ཤེས་ཡུལ། །སྣང་ལ་རང་བཞིན་མེད་པས་ནི། །ཡེ་ནས་ཆོས་ཉིད་དེ་ཉིད་ཡིན། །དེ་ལྟར་མ་བསྒྲིབས་གསལ་བ་ནི། །ཡེ་ཤེས་དག་གི་དེ་ཉིད་ཡིན། །བདག་ཉིད་ཆེན་པོར་གྲུབ་པ་ནི། །ངོ་བོ་དག་གི་དེ་ཉིད་དོ། །སེམས་དཔའི་རྣལ་འབྱོར་དེ་ཉིད་ཀྱང་། །རྣམ་པ་བཞི་རུ་བགྲང་བར་བྱ། །གང་ཞིག་ཏིང་འཛིན་སྡོམ་གནས་ནས། །སྡོམ་དེ་ཡིད་ལ་གང་གནས་པ། །སེམས་ཀྱི་དེ་ཉིད་ཡིན་པར་བཤད། །ཏིང་འཛིན་ཆགས་པ་མེད་པ་ནི། །ཆོས་ཀྱི་དེ་ཉིད་ཡིན་པར་བཤད། །རིགས་དང་ཁ་དོག་སོ་སོར་གསལ། །ཡེ་ཤེས་དག་གི་དེ་ཉིད་ཡིན། །རིགས་བཞི་ཕྱག་རྒྱ་ཆེན་པོ་བཞི། །ངོ་བོ་དག་གི་དེ་ཉིད་ཡིན། །དེ་ཉིད་རྣམ་པ་བཅུ་དྲུག་ནི། །ལམ་གྱི་ལུང་དུ་ཤེས་པར་བྱ། །ཞེས་གསུངས་སོ། །བཞི་ཚན་གཉིས་པ་ནི། བྱང་ཆུབ་སེམས་ཀྱི་མན་ངག་དང་། །སྦྱོར་བ་མེད་པའི་མན་ངག་དང་། །དུས་གསུམ་གཏན་ཚིག་མན་ངག་དང་། །ལུང་ཆེན་ཁུངས་ཀྱི་མན་ངག་བཞི་ལས། དང་པོ་ནི་ཆོས་ཐམས་ཅད་ཀྱི་འབྱུང་གནས་སྙིང་པོ་བྱང་ཆུབ་ཀྱི་སེམས་ཉིད་གཟུང་འཛིན་སྤྲོས་པའི་མཚན་མ་ཀུན་ལས་འདས་པས་བླང་དོར་ཐམས་ཅད་དང་བྲལ་བར་བསྟན་པའོ། །གཉིས་པ་ནི་ཆོས་ཐམས་ཅད་བྱང་ཆུབ་སེམས་ཀྱི་རང་བཞིན་ལས་གཉིས་ཆོས་སུ་གྲུབ་པ་གང་ཡང་མེད་པས་ཐབས་དང་ཤེས་རབ། དབྱིངས་དང་ཡེ་ཤེས། ཡུལ་དང་ཡུལ་ཅན། རྒྱུ་དང་འབྲས་བུ་ལ་སོགས་གཉིས་སུ་སྦྱར་བ་གང་ཡང་མེད་པར་བསྟན་པའོ། །གསུམ་པ་ནི་སེམས་ཉིད་སྐྱེ་འགག་མེད་པ་འདུས་མ་བྱས་པའི་རང་བཞིན་ལ་དུས་གསུམ་གྱི་དབྱེ་བ་མེད་པར་བསྟན་པའོ། །བཞི་པ་ནི་སེམས་ཉིད་རྫོགས་པ་ཆེན་པོས་ཆོས་ཐམས་ཅད་གཏན་ལ་འབེབས་པར་བསྟན་པ་སྟེ་རྒྱས་པར་རྒྱུད་དེ་ལས་རྟོགས་པར་བྱའོ། །དྲུག་པ་ནི། གོང་དུ་བསྟན་པ་དེ་ལྟར་བྱང་ཆུབ་སེམས་ཀྱི་གཤིས་ལུགས་སྒྲོ་སྐུར་དང་བྲལ་བར་མ་ནོར་ངེས་པའི་དོན་ཇི་བཞིན་དུ་གཏན་ལ་ཕབ་པ་དེ་ཉིད་ལ་ཡིད་ཆེས་མངོན་སུམ་དུ་བསྟན་པའི་ཕྱིར་དུ་རང་བཞིན་བཅུ་ལ་རྩོལ་ཞིང་བསྒྲུབ་ཏུ་མེད་པར་ལ་དོར་བར་བྱེད་པའི་མན་ངག་ནི། དེ་ཉིད་ལས། སེམས་ཀྱི་རང་བཞིན་འདི་ལྟ་སྟེ། །ལུང་ཆེན་རྣམ་པ་བཅུར་སྣང་སྟེ། །རྫོགས་ཆེན་ཤིན་ཏུ་རྣལ་འབྱོར་གྱི། །ལྟ་བ་བསྒོམ་དུ་མེད་པ་ཡིན། །དམ་ཚིག་བསྲུང་དུ་མེད་པ་ཡིན། །ཕྲིན་ལས་བཙལ་དུ་མེད་པ་ཡིན། །ཡེ་ཤེས་སྒྲིབ་པ་མེད་པ་ཡིན། །ས་ལ་སྦྱངས་དུ་མེད་པ་ཡིན། །ལམ་ལ་བགྲོད་དུ་མེད་པ་ཡིན། །ཕྲ་བ་གཟུང་འཛིན་བྲལ་བ་ཡིན། །རྒྱུད་ཀྱི་རང་བཞིན་འབྲེལ་བ་ཡིན། །ལུང་གི་རང་བཞིན་ཐོག་ཏུ་འབེབས། །མན་ངག་དག་གིས་ལ་ཡང་བཟླ། །རྫོགས་ཆེན་ཤིན་ཏུ་རྣལ་འབྱོར་གྱི། །རང་བཞིན་བཅུ་ནི་དེ་ལྟར་རོ། །ཞེས་གསུངས་པ་ལྟ་བུའི་ཡིད་ཆེས་པ་ཡི་ངེས་པའི་ལུང་བཅུ་བསྟན་པ་ཡིས་བླང་དོར་རྩོལ་སྒྲུབ་ཀྱི་བྱ་བ་མེད་པའི་དོན་བསྟན་པ་དེ་ལ་ཡིད་ཆེས་པའི་ངེས་ཤེས་གཏིང་ནས་འདྲོངས་པའི་ཕྱིར་དུ་བརྒྱད་མདོ་ངེས་པར་བསྟན་པའི་མདོ་ལས་མེད་པའི་མན་ངག་རྣམ་པ་བརྒྱད་དང་། ངེས་པ་ལྔ་དང་མ་ངེས་གསུམ་སྟེ་བརྒྱད་ཚན་གཉིས་སུ་བསྟན་ཏེ། དེ་ལ་མེད་པའི་མན་ངག་བརྒྱད་ནི། དེ་ལས་སེམས་ལ་སྐྱེ་འཇིག་མེད་པ་དང་། དོན་ལ་བསྒོམ་དུ་མེད་པ་དང་། །སྤྱོད་པ་བླང་དོར་མེད་པ་དང་། །ལམ་ལ་བསྒྲོད་དུ་མེད་པ་དང་། །རྣམ་པ་བགྲང་དུ་མེད་པ་དང་། །སེམས་ལ་ངོ་བོ་མེད་པ་དང་། །ཆོས་ཉིད་མཚོན་དུ་མེད་པ་དང་། །སྒྲོ་སྐུར་གདགས་སུ་མེད་པ་བརྒྱད། །ཅེས་དེ་དག་གི་རྒྱུ་མཚན་དང་བཅས་གསུངས་སོ། །བརྒྱད་ཚན་གཉིས་པ་ལ་ངེས་པ་ལྔ་དང་། མ་ངེས་པ་གསུམ་སྟེ་བརྒྱད་ལས། ངེས་པ་ལྔ་ནི། ཡང་དེ་ལས། ངེས་པ་ལྔ་ནི་གང་ཞེ་ན། དུས་ལ་ཁྱད་པར་མེད་པར་ངེས། །བླ་མ་མཆོད་པར་མཉམ་པར་ངེས། །མཆོད་པ་བསྔོ་རུ་མེད་པར་ངེས། །དཀའ་སླ་མཚོན་དུ་མེད་པར་ངེས། །བདེ་དང་སྡུག་བསྔལ་རྒྱུ་མཐུན་ངེས། །ཞེས་དང་། མ་ངེས་གསུམ་ནི། དེ་ལས། ཆོས་ཀྱི་རང་བཞིན་མ་ངེས་དང་། །བློ་ཡི་རང་བཞིན་མ་ངེས་དང་། །ཡེ་ཤེས་རང་བཞིན་མ་ངེས་གསུམ། །ཅེས་གསུངས་ལ་རྒྱས་པར་རྒྱུད་དེ་ཉིད་དུ་བལྟ་བར་བྱའོ། །བདུན་པ་ནི། འདི་ལྟར་ཆོས་ཐམས་ཅད་ཀྱི་གནས་ལུགས་ཆོས་ཉིད་བྱང་ཆུབ་ཀྱི་སེམས་ལ་རྒྱུ་འབྲས་བླང་དོར་ཅིར་ཡང་མི་དམིགས་པས་དེ་ལ་བགྲོད་པར་བྱེད་པའི་ཐེག་པའི་དབྱེར་མེད་པར་གྲུབ་ཀྱང་གདུལ་བྱ་རྣམས་ཀྱི་ཆོས་ཉིད་ཀྱི་དོན་རང་རང་གིས་ཇི་ལྟར་མཐོང་ཚུལ་བཞིན་བདེན་པའི་ངག་གིས་ཐེག་པའི་ཚིག་དགུ་སྨྲས་པ་ནི་ཆོས་རྣམས་ཀྱི་སྙིང་པོ་བྱང་ཆུབ་ཀྱི་སེམས་གཅིག་པོ་ལ་སོ་སོའི་བློས་མཐོང་བའི་ཚུལ་གྱིས་ཡུལ་དགུ་བྱུང་བ་བཞིན་རྣལ་འབྱོར་རང་རེས་ཏེ་རང་རང་སོ་སོས་ཇི་ལྟར་མཐོང་བའི་དོན་རྣམས་བརྗོད་བྱེད་ཀྱི་བདེན་པའི་ཚིག་དགུ་སྨྲས་པ་དེ་ཐམས་ཅད་དོན་ལ་སེམས་ཉིད་རྫོགས་པ་ཆེན་པོའི་བྱིན་བརླབ་ལས་བྱུང་བ་ཡིན་པར་དགུ་མདོ་ཐེག་པ་ཡས་འབུབས་ཀྱི་མདོ་ལས་གསུངས་ཏེ། དེ་ཉིད་ལས། ཀྱེ་འདུས་པའི་ཚོགས་ཆེན་ད་ཉོན་ཅིག །ཆོས་ཉིད་རང་བཞིན་སེམས་ཉིད་དེ། །སེམས་ཉིད་རང་བཞིན་རྫོགས་པ་ཆེ། །རྫོགས་ཆེན་ཆོས་ཉིད་སྐྱེ་མེད་ལས། སྐྱེ་བའི་ཆོ་འཕྲུལ་འབྱུང་བའི་ཕྱིར། །ལོངས་སྤྱོད་རྫོགས་སྐུ་སྤྲུལ་པའི་སྐུ། །སུམ་བརྒྱད་དགུ་ཕྲུག་རྣམ་སྤྲུལ་པ། །ཚིག་དང་ཡི་གེ་དགུར་གྲགས་ཏེ། །ཐེག་པ་རྣམ་པ་དགུ་རུ་བསྟན། །དེ་ཡང་གང་དང་གང་ཞེ་ན། །ཉན་ཐོས་རང་རྒྱལ་ཐེག་ཆེན་གསུམ། །སྤྲུལ་པའི་སྐུ་ཡི་གསུང་དུ་བསྟན། །ཀྲྀ་ཡ་ཡོ་ག་ཕྱི་བ་གསུམ། །ལོངས་སྤྱོད་རྫོགས་སྐུའི་བསྟན་པར་གྲགས། །བསྐྱེད་དང་རྫོགས་དང་རྫོགས་ཆེན་གསུམ། །ཆོས་ཀྱི་སྐུ་ཡི་གསུང་དུ་བསྟན། །སྐུ་གསུམ་ཡཱ་ན་རྣམ་པ་དགུ། །རྫོགས་པ་ཆེན་པོའི་བྱིན་གྱིས་རློབས། །ཞེས་གསུངས་སོ། །བརྒྱད་པ་ནི། དེ་ལྟར་དབྱེ་བ་སྣ་ཚོགས་བྱས་ཀྱང་དོན་ལ་ཀུན་བྱེད་བྱང་ཆུབ་ཀྱི་སེམས་སྲིད་ཞི་ཀུན་ཁྱབ་ཆེན་པོ་རིག་པ་རང་བྱུང་གི་ཡེ་ཤེས་ང་ལ་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ལུས་པ་མེད་པར་འདུས་ཤིང་རྫོགས་པའི་ཕྱིར་ན་བྱང་ཆུབ་སེམས་ཀྱི་རང་བཞིན་ཡེ་གྲོལ་བསམ་བརྗོད་ལས་འདས་པའི་དོན་བཅོས་བསྒྱུར་སྤང་བླང་དང་བྲལ་བ་འདི་ཉིད་ཇི་བཞིན་དུ་ཤེས་ན་ཆོས་ཐམས་ཅད་ཀུན་རང་བྱུང་ཡེ་ཤེས་ཆེན་པོའི་བདག་ཉིད་དུ་གདོད་ནས་མངོན་པར་སངས་རྒྱས་པའི་ཚུལ་ཀྱང་ཤེས་པར་འགྱུར་བས་ན་འདི་ཉིད་ཤིན་ཏུ་གལ་ཆེ་བར་ཤེས་པར་གྱིས་ཤིག་ཅེས་པ་སྟེ། དེ་ལྟར་ཡང་བཅུ་མདོ་ཡོངས་སུ་རྫོགས་པའི་མདོ་ལས། ཅི་ལྟར་སྣང་བའི་ཆོས་རྣམས་ནི། །བྱང་ཆུབ་སེམས་ལ་རྫོགས་པའི་ཕྱིར། །བྱང་ཆུབ་སེམས་འདི་ཤེས་པར་གྱིས། །བྱང་ཆུབ་སེམས་འདི་ཤེས་པ་དང་། །ཆོས་ཀུན་རང་ལ་རྫོགས་པར་ཤེས། །རང་ལས་བྱུང་བའི་ཆོས་རྣམས་ཀུན། །རང་བྱུང་ཡེ་ཤེས་སེམས་སུ་ཤེས། །རང་བྱུང་བྱང་ཆུབ་སེམས་འདི་ལ། །མ་ཡིན་པ་ཡི་ཆོས་མེད་པས། །སེམས་མ་ཡིན་གྱི་ཆོས་ཡོད་མིན། །ཞེས་གསུངས་ལ། དེ་ཡང་འདིར་ཀུན་བྱེད་བྱང་ཆུབ་ཀྱི་སེམས་ལ་ཆོས་ཐམས་ཅད་རྫོགས་པར་གསུངས་པ་དེ་ཉིད་ཀུན་བཟང་གདོད་མའི་མགོན་པོའི་ཐུགས་རིག་པ་རང་བྱུང་གི་ཡེ་ཤེས་ཞེས་པ་ཞིང་གཞན་དུ་མེད་པར་ད་ལྟ་སེམས་ཅན་རྣམས་ཀྱི་རང་རང་གི་རྒྱུད་ན་སེམས་ཀྱི་ཆོས་ཉིད་རིག་པ་བདེ་གཤེགས་སྙིང་པོ་སྤྲོས་བྲལ་རང་བྱུང་གི་ཡེ་ཤེས་གསལ་ཁྱབ་ནམ་མཁའ་ལྟ་བུའི་རང་བཞིན་དུ་བཞུགས་པ་འདི་ཉིད་སྐུ་གསུམ་གྱི་རྒྱལ་བ་མ་ལུས་པའི་ཐུགས་རང་བྱུང་གི་ཡེ་ཤེས་དང་ཡེ་ནས་དབྱེར་མེད་གཅིག་གི་ངོ་བོར་གནས་ཤིང་དེའི་ཀློང་དུ་འཁོར་འདས་ཀྱི་ཆོས་ཀུན་ཀྱང་མ་བཅོས་མཉམ་པ་ཆེན་པོའི་ངོ་བོར་རྫོགས་པ་ཡིན་པར་བསྟན་པ་སྟེ། དེ་ཉིད་ལས། ཆོས་ཐམས་ཅད་བྱང་ཆུབ་ཀྱི་སེམས་ལ་རྫོགས་པར་བསྟན་པའི་འཕྲོར་འདུས་པའི་འཁོར་ཚོགས་རྣམས་ཀྱིས་སླར་ཡང་ཞུས་པ། ཨེ་མ་ཧོ། སེམས་དཔའ་རྡོ་རྗེ་ཀུན་ཏུ་བཟང་། །ཇི་ལྟར་སྣང་བའི་ཆོས་རྣམས་ཀུན། །སེམས་ཡིན་སེམས་མིན་ཆོས་མེད་ན། །བདག་ཅག་འདུས་པའི་ཚོགས་ཀྱི་སེམས་སུ་ཡང་། །ཆོས་ཀུན་རབ་ཏུ་འདུས་ལགས་སམ། །ཞེས་ཞུས་སོ། །དེ་ལས་སེམས་དཔའ་ཆེན་པོས་དོན་འདི་གསུངས་སོ། །ཀྱེ། འདུས་པའི་ཚོགས་ཆེན་འདི་རྟོགས་ལ། །འདི་ཡི་དོན་ཀུན་རིག་པར་གྱིས། །སྣང་ཆོས་རྒྱུ་ནི་འབྱུང་ཆེན་ལྔ། །འབྱུང་ལྔ་རྒྱུ་ནི་བྱང་ཆུབ་སེམས། །སེམས་ཀྱིས་ཆོས་རྣམས་སྣང་བར་བྱེད། །སེམས་མི་སྣང་ལ་ཆོས་མི་སྣང་། །དེས་ན་ཆོས་རྣམས་སེམས་སུ་འདུས། །སེམས་ལ་གཅིག་ལས་ཡོད་མ་ཡིན། །སེམས་གཅིག་ཀུན་ལ་ཁྱབ་པའི་ཕྱིར། །སངས་རྒྱས་ཡེ་ཤེས་ཐུགས་ཀྱང་སེམས། །སེམས་ཅན་བག་ཆགས་ཡིད་ཀྱང་སེམས། །སངས་རྒྱས་ཉིད་ལ་མི་རྟོག་རྒྱས། །སེམས་ཅན་རང་རྟོགས་བག་ཆགས་བསྒྲིབ། །རང་བྱུང་སེམས་དེ་མི་གཉིས་གཅིག །གཅིག་ཕྱིར་དུས་གསུམ་སངས་རྒྱས་དང་། །འདུས་ཚོགས་ཁྱེད་སེམས་དབྱེར་མེད་པས། །སེམས་ཉིད་རྫོགས་པ་ཆེན་པོ་ནི། །ཡོངས་སུ་རྫོགས་པའི་མདོ་ཞེས་བྱ། །ཞེས་གསུངས་སོ། །གསུམ་པ་ཇི་ལྟར་སྣང་ཡང་རྩ་བ་ཆོས་ཉིད་ལས་གཞན་མ་ཡིན་པར་བསྟན་པ་ལ་གཉིས་ཏེ་ཐམས་ཅད་སེམས་ཀྱི་རང་བཞིན་དུ་བསྟན་པ་དང་། སེམས་ལས་གཞན་པའི་ཆོས་སུ་མ་གསུངས་པའོ། །དང་པོ་ནི། གོང་དུ་བཤད་པ་དེ་ལྟར་ཆོས་རྣམས་ཀུན་གྱི་རྩ་བ་ཀུན་བྱེད་རྒྱལ་པོ་བྱང་ཆུབ་ཀྱི་སེམས་འདི་ཉིད་ཡིན་པའི་ཕྱིར་ན་སྣང་སྲིད་སྣོད་བཅུད་ལ་སོགས་པ་ཇི་ལྟར་སྣང་བ་ཐམས་ཅད་ཀུན་བྱེད་ང་ཡི་ངོ་བོ་སྣང་བ་ཡིན་ལ་ཆོས་ཉིད་སྐྱེ་མེད་ཀྱི་དབྱིངས་ལས་རྩལ་སྣང་འགག་མེད་ཀྱི་རོལ་པ་ཇི་ལྟར་བྱུང་བ་ཐམས་ཅད་སྟོན་པ་ཀུན་བྱེད་ང་ཡི་ཆོ་འཕྲུལ་ལམ་སྤྲུལ་པ་ཡིན་པ་དང་། དེ་བཞིན་དུ་ཟིན་པ་དང་མ་ཟིན་པའི་སྒྲ་ཚིག་ཇི་ལྟར་བྱུང་ཞིང་གྲག་པར་སྣང་བ་ཐམས་ཅད་ཀུན་སྟོན་པ་ང་ཡི་བྱང་ཆུབ་སེམས་ཀྱི་དོན་བརྗོད་དུ་མེད་པའི་ཀློང་ནས་ཆོས་ཉིད་ཀྱི་རང་སྒྲ་བརྗོད་བྱེད་ཀྱི་ཚིག་དང་ཡི་གེའི་སྒྲར་བྱུང་བ་ཡིན། དུས་གསུམ་གྱི་རྒྱལ་བ་སངས་རྒྱས་རྣམས་ཀྱི་སྐུ་དང་ཡེ་ཤེས་ལ་སོགས་པའི་ཡོན་ཏན་རྣམས་དང་། སེམས་ཅན་རྣམས་ཀྱི་གནས་དོན་ལུས་ཀྱི་རྣམ་པ་མངོན་སུམ་དུ་སྣང་བ་དེ་དང་མངོན་དུ་མ་སྨིན་པ་བག་ཆགས་ཀྱི་ཚུལ་དུ་ཡོད་པ་ལ་སོགས་པ་སྣང་སྲིད་སྣོད་བཅུད་ཀྱིས་བསྡུས་པ་ཐམས་ཅད་ཀུན་བྱེད་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ཉིད་ཀྱི་ངོ་བོ་ཡེ་ནས་དེ་ལྟར་གནས་པ་ཡིན་པར་གསུངས་པའོ། །གཉིས་པ་ནི། དེས་ན་ཇི་ལྟར་སྣང་བའི་ཆོས་ཐམས་ཅད་རང་གི་སེམས་ལས་བྱུང་ཞིང་སེམས་ཉིད་ཀྱི་ངོ་བོར་མ་གཏོགས་པ་ཡི་ཆོས་གཞན་རྣམས་ནི་གཅིག་ཀྱང་ཡོད་དོ་ཞེས་སྟོན་པ་ང་ཉིད་ལས་བྱུང་བའི་སངས་རྒྱས་སྔར་འདས་པ་རྣམས་ལ་ཀུན་བྱེད་རྒྱལ་པོ་ང་ཡིས་ལུང་མ་བསྟན་ལ། ད་ལྟར་དངོས་སུ་བཞུགས་པ་དང་སླད་ཀྱིས་འབྱོན་པ་ཡི་སངས་རྒྱས་རྣམས་ལ་ཡང་ཀུན་བྱེད་རྒྱལ་པོ་བྱང་ཆུབ་སེམས་ཀྱི་ལུང་མི་སྟོན་ནོ་ཞེས་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་རྩ་བ་གཅིག་པའི་ལེའུ་སྟེ་དྲུག་པའི་འགྲེལ་བའོ།། །།བཞི་པ་ཆོས་ཐམས་ཅད་གཉིས་སུ་མེད་པའི་རང་བཞིན་རང་སེམས་སྟོན་པར་མངོན་དུ་ཕྱུང་བའི་ལེའུ་བདུན་པ་ལ་གཉིས་ཏེ། ལེའུའི་དོན་མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལྟར་ཆོས་ཐམས་ཅད་ཀྱི་རྩ་བ་བྱང་ཆུབ་སེམས་སུ་གཅིག་པར་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་ཉིད་ཀྱིས་བྱས་པ་ཡི་རྒྱུ་ལས་བྱུང་བའི་སྣང་སྲིད་འཁོར་འདས་ཀྱི་ཆོས་རྣམས་སོ་སོར་རྣམ་པར་དབྱེ་བ་འདི་གསུངས་སོ། །གཉིས་པ་ལ་གསུམ་སྟེ། ཆོས་ཉིད་དམིགས་སུ་མེད་པ་ལས་ཆོས་ཅན་སྣང་བའི་རང་བཞིན་བཀོད་པའི་ཚུལ་གསུངས་པ་བསྟོད་ཅིང་དྲི་བའི་ཚུལ་གྱིས་འཁོར་འདས་ཀྱི་རང་བཞིན་ཞུ་བ། དེའི་ལན་རྒྱ་ཆེར་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་ཞེས་པོས་ནས། འདི་ལྟར་ཆོས་ཐམས་ཅད་ཀྱི་ཆོས་ཉིད་རིག་པ་བྱང་ཆུབ་སེམས་ཀྱི་རང་བཞིན་ནི་སྤང་བླང་བཅོས་བསྒྱུར་ཐམས་ཅད་དང་བྲལ་བ་ཆོས་ཉིད་ཡེ་ཇི་བཞིན་པ་ཡི་ངོ་བོ་སྟེ་དེ་ལྟ་བུའི་གཤིས་ལུགས་འགྱུར་བ་མེད་པ་ཆོས་ཉིད་ཇི་བཞིན་པ་གཉིས་ཆོས་སུ་གྲུབ་པ་མེད་པའི་རང་གནས་ཕྱལ་བའི་ཡེ་ཤེས་མི་འགྱུར་བའི་བདེ་བ་ཆེན་པོ་ལ་འཁོར་འདས་ཀྱི་རོལ་པ་ཅིར་ཡང་མི་འགག་པས་སྣང་བའི་རྣམ་པ་ཀུན་གྱི་མཆོག་དང་ལྡན་པ་ཡིན་མོད། འོན་ཀྱང་དེ་ལྟར་དུ་སྣང་བའི་དུས་ཉིད་ནས་གཟུང་འཛིན་གྱི་མཚན་མར་སྣང་བའི་རྣམ་པ་ཀུན་ཡོངས་ཀྱིས་ཏེ་ཡེ་ནས་མེད་པ་སྤྲོས་བྲལ་ནམ་མཁའ་བཞིན་དུ་རང་བྱུང་འདུས་མ་བྱས་པ་སྐྱེ་མེད་བསམ་ཡུལ་དང་བྲལ་བར་ཡེ་ནས་གནས་པ་ཡིན་ཏེ། འཕྲུལ་ལྡེ་ལས། དཔེར་ན་ནམ་མཁའི་གཟུགས་གཅིག་ལ། །ཆུ་ནང་གཟུགས་བརྙན་བསམ་མི་ཁྱབ། །དེ་བཞིན་རིག་པ་གཅིག་པ་ལ། །རིགས་པའི་རྩལ་ཤུགས་བསམ་མི་ཁྱབ། །དཔེར་ན་ཆུ་ནང་ཟླ་བ་ཡང་། །སྣང་ཡང་དེ་ལ་རང་བཞིན་མེད། །དེ་བཞིན་རིག་པའི་རྩལ་སྣང་བ། །སྣང་ཡང་དེ་ལ་རང་བཞིན་མེད། །ཅེས་གསུངས་སོ། །དེས་ན་ཆོས་ཉིད་ཐིག་ལེ་ཉག་གཅིག་ཏུ་གནས་པ་དེ་ལ་མཚན་འཛིན་གྱི་དམིགས་པའི་ཡུལ་ལས་འདས་པའི་ཕྱིར་ན་གཅིག་ཅེས་བརྗོད་པ་ལ་སོགས་པའི་གྲངས་ཀྱིས་བསྒྲངས་ཞིང་ཐ་དད་དུ་དབྱེ་བ་བྱར་མེད་མོད། འོན་ཀྱང་བྱང་ཆུབ་ཀྱི་སེམས་ཀྱི་རང་གི་ངོ་བོ་ལ་བསྒྲངས་ཞིང་མཚོན་དུ་མེད་པ་དེ་ལྟ་ནའང་སེམས་ཀྱིས་བྱས་པའི་སྣང་བ་སྣང་སྲིད་འཁོར་འདས་ཀྱི་ཆོས་རྣམས་ལ་དབྱེ་བའི་རྣམ་གྲངས་མང་དུ་བྱུང་བ་ཡིན་ནོ། །དེ་ཡང་སེམས་ཀྱིས་བྱས་པ་ཡི་ཆོས་དེ་གང་དང་གང་ཡིན་ཞེ་ན་འདི་ལྟར་སྣང་ཞིང་སྲིད་པའི་དངོས་པོ་སྣོད་བཅུད་དུ་སྣང་བ་རྣམས་དང་། དེ་བཞིན་དུ་དག་པ་སངས་རྒྱས་རྣམས་ཀྱི་སྐུ་དང་ཡེ་ཤེས་དང་མ་དག་སེམས་ཅན་རྣམས་ཀྱི་གནས་ལུས་ལོངས་སྤྱོད་སོགས་སུ་སྣང་བ་འདི་ཐམས་ཅད་ལ་བྱེད་པོ་གཞན་གང་ཡང་མེད་པར་སེམས་ཀྱི་རང་བཞིན་གདོད་ནས་སྐྱེ་བ་མེད་པའི་རང་མདངས་ངོ་བོ་འགགས་པ་མེད་པའི་གདངས་རྩལ་དེ་ལས་བྱས་ཤིང་ཆོས་ཅན་སྣང་བའི་རང་བཞིན་སྣ་ཚོགས་སུ་བཀོད་པ་ཡིན་ལ། དེས་ན་སེམས་ཀྱིས་བྱས་ནས་ཀུན་ལ་མངོན་དུ་ཕྱུང་སྟེ་བསྟན་པ་ནི་སྣང་བ་སྣོད་ཀྱི་འཇིག་རྟེན་འབྱུང་བ་ཆེན་པོ་ལྔ་དང་། སྲིད་པ་བཅུད་ཀྱི་སེམས་ཅན་འགྲོོ་བ་རིགས་དྲུག་ཏུ་སྣང་བ་རྣམས་དང་། གདུལ་བྱའི་སེམས་ཅན་དེ་ཡི་དོན་མཛད་པའི་སངས་རྒྱས་ལོངས་སྐུ་དང་སྤྲུལ་སྐུ་སྟེ་གཟུགས་སྐུ་རྣམ་པ་གཉིས་སུ་སྣང་བ་ཐམས་ཅད་ནི་གཞན་དུ་ཅི་ཡང་མེད་པར་རིག་པ་བྱང་ཆུབ་སེམས་ཀྱི་རང་བཞིན་སྐྱེ་བ་མེད་པ་ལས་རྩལ་སྣང་འགག་མེད་ཀྱི་ངོ་བོར་མངོན་སུམ་དག་ཏུ་ཕྱུང་ནས་གྲངས་སུ་བགྲངས་བའི་རྣམ་པར་བསྟན་པ་ཡིན་པར་ཤེས་པར་བྱའོ། །ཞེས་བཀའ་རྩལ་ཏོ། །གཉིས་པ་ནི། དེ་ལྟར་ཆོས་ཅན་གྱི་ངོ་བོ་ཇི་ལྟར་བཀོད་ཚུལ་བསྟན་པ་དེ་ནས་སེམས་དཔའ་རྡོ་རྗེས་རྣམ་པར་བསྒྲངས་པའི་མདོའི་དོན་ཞུས་པ། ཀྱེ་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ཡི་ངོ་བོ་ཅིར་ཡང་མ་གྲུབ་པ་རང་བཞིན་སྐྱེ་མེད་ཀྱི་གདངས་ལས་རོལ་པ་འགག་མེད་ཀྱི་རྣམ་པ་འཁོར་འདས་ཀྱི་ཆོས་ཀུན་མངོན་དུ་བྱུང་ཞིང་སྣང་བ་ལ་ངོ་མཚར་བས་ཨེ་མ་ཧོ་ཞེས་པ་དང་། དེ་ལྟར་སྣང་བའི་དུས་ཉིད་ནས་མ་དག་མཚན་མའི་ཆོས་སུ་གྲུབ་པ་རྡུལ་ཙམ་ཡང་མེད་པར་ཀུན་ཏུ་བཟང་པོ་དག་པ་ཉག་གཅིག་གི་རོལ་པར་ཤར་བ་ལ་ངོ་མཚར་བས་ཨེ་མ་ཧོ་ཞེས་པ་དང་། དེ་ལྟ་བུའི་ཆོས་རྣམས་ཀྱི་སྣང་གཞིར་གྱུར་པ་ཀུན་བྱེད་བྱང་ཆུབ་ཀྱི་སེམས་ཁྱོད་ཀྱི་རང་བཞིན་དེ་ཡོད་ནི་གཅིག་ཀྱང་གྲུབ་པ་མེད་པ་ཡེ་ནས་རྣམ་པར་དག་པ་ཡིན་པ་ལ་སྣང་ནི་འཁོར་འདས་ཀྱི་ཆོས་སྣ་ཚོགས་སུ་སྣང་ཞིང་མཉམ་རྫོགས་ལྷུན་གྲུབ་ཆེན་པོར་གནས་པ་དེ་ཨེ་མ་ཧོ་ཞེས་ངོ་མཚར་བའི་ཚིག་གིས་མདུན་བསུས་ཏེ། དང་པོར་འཁོར་འདས་གང་ཡང་མ་བྱུང་བའི་ཐོག་མར་གཞི་དབྱིངས་ཁྱབ་གདལ་ཆེན་པོ་བྱང་ཆུབ་ཀྱི་སེམས་སྤྲོས་བྲལ་ནམ་མཁའ་ལྟ་བུའི་ངང་ནས་གཞི་སྣང་ལྷུན་གྲུབ་ཀྱི་རོལ་པ་རང་རྩལ་འགགས་མེད་ཀྱི་རྣམ་པར་ལངས་ནས་མངོན་དུ་སྣང་བ་ལ་རང་དང་ཆོས་རྣམས་ཐམས་ཅད་ཐ་དད་དུ་བཟུང་བས་ཆོས་ཉིད་བྱང་ཆུབ་ཀྱི་སེམས་གཅིག་གི་རོལ་རྩལ་ཡིན་པ་རང་ངོ་མ་ཤེས་ནས་འཁྲུལ་པར་གྱུར་ན་ཡང་། ལས་དང་སྐལ་བར་ལྡན་པས་ད་ལྟ་ཀུན་མཁྱེན་རྒྱལ་བའི་དབང་པོ་སྟོན་པ་ཀུན་བྱེད་ཁྱོད་ཀྱི་འཁོར་དུ་འདུས་པ་ཡིན་ནའང་། ཉིད་ལ་ཆོས་ཉིད་ཟབ་མོའི་དོན་དེ་ཇི་བཞིན་དུ་ཞུ་བའི་དམིགས་ནི་མི་ཆ་བས་སམ་ཞུ་བར་མ་ནུས་པ་ལ་སྟོན་པ་ཀུན་མཁྱེན་གྱིས་དགོངས་པ་རང་བྱུང་དུ་བཀའ་སྩལ་པ་སྣང་སྲིད་འཁོར་འདས་ཀྱིས་ཆོས་རྣམས་ཐམས་ཅད་མདོ་རྩ་གཅིག་ཏུ་འདུས་པར་སྟོན་པའི་ཕྱིར་དུ་ནི་གཅིག་མདོ་བྱང་ཆུབ་སེམས་ཀྱི་མདོ་གོང་དུ་བསྟན་པ་དེ་ལྟར་བཀའ་སྩལ་པ་ཡིན་ན་དེ་ལྟར་ཆོས་ཐམས་ཅད་བྱང་ཆུབ་ཀྱི་སེམས་གཅིག་ཡིན་པ་ལ་ལྷུན་གྲུབ་སྤྱི་གཞིའི་ངང་ནས་ཐུགས་རྗེའི་རོལ་པ་སོ་སོར་སྣང་བ་གཉིས་སུ་བསྟན་པ་ཡི་རྣམ་པ་གྲངས་སུ་བསྒྲངས་པའི་དོན་འདི་ཇི་ལྟར་ལགས་པ་གསུང་དུ་གསོལ་ཞེས་ཞུས་སོ། །གསུམ་པ་དེའི་ལན་རྒྱ་ཆེར་བཤད་པ་ལ་དྲུག་སྟེ། ཀུན་གྱི་ཐོག་མར་ལྷུན་གྲུབ་སྤྱི་གཞི་བསྟན་པ། དེ་ལས་ཐུགས་རྗེ་རིག་པ་ཉིད་ཤར་བས་སོ་སོར་སྣང་བའི་དོན་ཉོན་ཅིག་པར་གདམས་པ། བློ་ལ་ལྟོས་པའི་ཆོས་ཚུལ་དབྱེ་བ། རྒྱུ་འབྲས་ཐེག་པའི་རང་བཞིན་བསྟན་པ་ཐམས་ཅད་ཀུན་འདུས་རྫོགས་པ་ཆེན་པོར་གཏན་ལ་ཕབ་པ། དེ་ཉིད་རྟོགས་པའི་གང་ཟག་བསྔགས་པའོ། །དང་པོ་ནི། དེ་ལྟར་སེམས་དཔའ་རྡོ་རྗེས་རྣམ་པར་བགྲངས་བའི་མདོ་ཞུས་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་ཇི་ལྟར་ཞུས་པའི་དོན་དེ་བཀའ་སྩལ་པ་ནི། ཀྱེ་ཆོས་ཐམས་ཅད་ཀྱི་གནས་ལུགས་རང་བྱུང་འདུས་མ་བྱས་པའི་ཡེ་ཤེས་ཀུན་བྱེད་བྱང་ཆུབ་ཀྱི་སེམས་ང་ནི་སེམས་ཅན་ཀུན་གྱི་རྒྱུད་ལ་ཡེ་ནས་འདུ་འབྲལ་མེད་པར་ལྷུན་གྱིས་གྲུབ་པ་ཡིན་ཀྱང་རང་སྣང་རང་ངོ་མ་ཤེས་པའི་དབང་གིས་མངོན་དུ་མི་སྣང་བར་བག་ཆགས་འཁྲུལ་པའི་སྦུབས་སུ་གནས་པ་ཡིན་ཏེ། རང་བྱུང་བདེ་བའི་འཁོར་ལོ་ལས། ད་ཡང་རྡོ་རྗེ་སེམས་དཔའ་ཉོན། །སེམས་ཅན་ལུས་ཀྱི་ཚོར་བ་ལ། །རང་རིག་ཡེ་ཤེས་རྒྱུན་མི་འཆད། །འདུ་འབྲལ་མེད་པས་ཡེ་ནས་གནས། །དེ་ཕྱིར་ཉོན་མོངས་སྦུབས་ནང་ན། །ཀུན་བཟང་ཡེ་ཤེས་སེམས་ལ་གནས། །ངེས་དོན་ལུང་བསྟན་དོན་རྟོགས་ནས། །དེ་དོན་གཞན་ནས་བསྒྲུབ་མི་དགོས། །སེམས་ཅན་བྱང་ཆུབ་སུ་འདོད་པ། །ཀུན་གཞིའི་གསེབ་ནས་དོལ་ཚོལ་ལ། །དེ་ཡི་ངང་ལ་གནས་པར་གྱིས། །དེ་དོན་རྒྱལ་བའི་དགོངས་པ་ཡིན། །བདེ་གཤེགས་རྣམས་ཀྱི་སྙིང་པོ་ཡང་། །སེམས་ཅན་ལུས་ལ་ཡོད་མོད་ཀྱང་། །ཤེས་པ་མ་མཐོང་ཙམ་དུ་བས། །དེ་མཐོང་ངེས་པའི་གདམས་ངག་ལ། །ཤེས་པ་རྟག་ཏུ་འབྲལ་བ་མེད། །ད་ཡང་འདུས་པའི་སྙིང་པོ་ཉོན། །མ་རིག་འཁྲུལ་པ་ཡོང་བཞིན་དུ། །འབྲས་བུ་སངས་རྒྱས་ཐུགས་ལ་གནས། །དེ་ཕྱིར་གཞན་ནས་འབྱུང་བ་མེད། །ཐོག་མ་མ་ཡིན་དུས་འདིར་རང་། །དེ་ཡང་རང་རིག་ཡེ་ཤེས་ནི། །ཏིལ་ལ་མར་གྱིས་ཁྱབ་པ་བཞིན། །འགྲོ་དྲུག་ཀུན་ལ་རང་རིག་ཁྱབ། །སྐྱེ་འགག་མེད་པར་རྒྱུན་དུ་གནས། །ཞེས་དང་། ཀློང་ཆེན་རབ་འབྱམས་ལས། བདེ་བར་གཤེགས་པའི་སྙིང་པོ་ངས། །སངས་རྒྱས་སེམས་ཅན་ཐམས་ཅད་ལ། །ཏིལ་ལ་མར་གྱིས་ཁྱབ་བཞིན་གནས། །ཐམས་ཅད་བྱམས་པའི་སེམས་ཀྱིས་ཉིད། །རྒྱུ་རྐྱེན་མེད་པའི་སྙིང་པོ་སྟེ། །ཞེས་གསུངས་ལ། དེ་ལྟ་བུའི་གཞི་གནས་ཆོས་སྐུའི་རིག་པ་དེ་མངོན་དུ་གྱུར་པ་ལས་གཞན་པའི་སངས་རྒྱས་ཞིག་མེད་པས་ན་ཀུན་བྱེད་རྒྱལ་པོ་བྱང་ཆུབ་ཀྱི་སེམས་ང་ནི་དུས་གསུམ་དུ་གཤེགས་ཤིང་བྱོན་པའི་སངས་རྒྱས་ཐམས་ཅད་ཀྱི་ཐུགས་རིག་པ་རང་བྱུང་གི་ཡེ་ཤེས་མ་བཅོས་ལྷུན་གྱིས་གྲུབ་པའི་སྙིང་པོའང་ཡིན་ཏེ། དེ་ཉིད་ལས། སངས་རྒྱས་སེམས་ཅན་མེས་པོ་ང་། །ང་ནི་རང་བྱུང་ཡེ་ཤེས་ཏེ། །ང་ནི་ཆོས་ཀུན་སྙིང་པོ་ཡིན། །ང་ནི་ཀུན་གནས་རྩ་བ་བཞིན། །སྙིང་པོ་རང་བྱུང་ཡེ་ཤེས་ངས། །སྣང་བ་དང་ནི་སྲིད་པ་དང་། །སྣོད་དང་བཅུད་ཀྱིས་བསྡུས་པ་དང་། །དུས་གསུམ་སངས་རྒྱས་ཐམས་ཅད་དང་། །ཁམས་གསུམ་རྒྱུད་དྲུག་སེམས་ཅན་དང་། །དེ་བཞིན་དུ་ནི་ཐམས་ཅད་ལ། །མ་ལུས་ཀུན་ཁྱབ་འུབ་ཆུབ་བོ། །ཞེས་དང་། སྔ་མ་ལས། རང་རྒྱུད་རིག་པའི་ཡེ་ཤེས་ནི། །སྤྲིན་མེད་མཁའ་ལ་ཉི་ཤར་བཞིན། །འདུས་མ་བྱས་པའི་ཀློང་དཀྱིལ་ན། །རང་རིག་ཡེ་ཤེས་ཆོས་སྐུ་བཞུགས། །ཞེས་གསུངས་པ་བཞིན་ནོ། །གཉིས་པ་ནི། དེ་ལྟ་བུའི་སྙིང་པོ་རང་བྱུང་གི་ཡེ་ཤེས་ང་ནི་ཐུགས་རྗེའི་རྩལ་གདངས་འགག་པ་མེད་པ་འོད་གསལ་ལྷུན་གྲུབ་ཀྱི་སྣང་ཆ་ཐམས་ཅད་ཀྱི་འཆར་གཞིའི་ངོ་བོ་སྤྲོས་བྲལ་དབྱིངས་ཀྱི་རང་བཞིན་གདོད་ནས་སྐྱེ་བ་མེད་པ་སྟེ། དེ་ལས་གདུལ་བྱའི་འགྲོ་བ་རྣམས་ལ་འདུལ་བྱེད་ཀྱི་ཐབས་ཐེག་པའི་རྣམ་གྲངས་གང་ལ་འགྲོ་བ་གང་ཞིག་དགའ་ཞིང་སྤྲོ་བའི་དུས་སུ་ནི་རང་སྣང་ཕྱོགས་ལྷུང་དང་བྲལ་བ་འཛིན་མེད་སྤྲོ་བསྡུ་བྲལ་བའི་ངང་ལས་གདུལ་བྱ་གང་ཞིག་ཐེག་པ་གང་ལ་དགའ་བ་ཡི་དོན་བྱའི་སྟེ་དོན་བསྒྲུབ་པར་བྱ་བའི་ཕྱིར་དུ་ཀུན་བྱེད་ང་ཡི་རོལ་རྩལ་དུ་ཐེག་པའི་རྣམ་གྲངས་སོ་སོར་བྱུང་བའམ་བྱས་པའི་དོན་བསྟན་པར་བྱ་བ་ཡིན་གྱིས་སེམས་དཔའ་རྡོ་རྗེ་ཁྱོད་ཀྱིས་ཚུལ་བཞིན་དུ་ཉོན་ཅིག་ཅེས་གདམས་པའོ། །གསུམ་པ་བློ་ལ་ལྟོས་པའི་ཆོས་ཚུལ་དབྱེ་བ་ལ་གསུམ་ཏེ། ཤིན་ཏུ་སྤྲོས་པ་མེད་པ་ལ་ཆོས་གཅིག་དང་བཞིན་གྱིས་རྣམ་པར་དག་པར་བསྟན་པ། སྣ་ཚོགས་སྤྲོས་པ་ལ་དགའ་བའི་ངོར་ཐེག་པ་དུ་མ་བཤད་པ། དེ་གཉིས་ཀྱི་རང་བཞིན་དབྱེ་བ་ཐ་དད་དུ་སྨོས་ཀྱང་དོན་ལ་གཅིག་ཏུ་འདུ་བའི་རྒྱུ་མཚན་དགོད་པའོ། །དང་པོ་ནི། དེ་ལ་གང་ཟག་དབང་པོ་ཡང་རབ་ཤིན་ཏུ་སྤྲོས་པ་མེད་པ་ཆོས་སྐུ་ཐིག་ལེ་ཉག་གཅིག་གི་དོན་ལ་དགའ་བའི་རྣལ་འབྱོར་པ་དེ་ལ་ནི་སྣང་སྲིད་འཁོར་འདས་ཀྱི་ཆོས་རྣམས་ཐམས་ཅད་སྤྲོས་བྲལ་སྟོང་གསལ་རང་བྱུང་གི་ཡེ་ཤེས་གཅིག་ཏུ་འདུས་པའི་ཕྱིར་ན་རིག་པ་བྱང་ཆུབ་སེམས་ཀྱི་ངོ་བོ་གཅིག་པུ་བསྟན་པ་སྟེ། དེ་ཡང་སེམས་ཀྱི་ངོ་བོ་ཆོས་ཀྱི་དབྱིངས་རང་བཞིན་གྱིས་འོད་གསལ་བ་རྣམ་དག་བྱང་ཆུབ་སེམས་ཀྱི་རང་བཞིན་དེ་ལ་ཀུན་བྱེད་རྒྱལ་པོ་ཞེས་པའི་མིང་གིས་མཚོན་ཏེ་བསྟན་པ་བཞིན་དུ་རྟོགས་པས་རྩོལ་སྒྲུབ་གཞན་ལ་རག་མ་ལུས་པར་གྲོལ་བར་འགྱུར་ཏེ། རིག་པ་རང་ཤར་ལས། རིག་པའི་ཆོས་ཉིད་དབྱེ་བ་ན། །གཅིག་ལ་ཐམས་ཅད་རྫོགས་པའོ། །ཉོན་མོངས་སྟོང་ཕྲག་བརྒྱད་ཅུ་ཡང་། །གཅིག་མ་ཤེས་པས་བྱུང་བ་སྟེ། །གཅིག་ཤེས་པས་ནི་གྲོལ་བར་འགྱུར། །ཞེས་གསུངས་སོ། །གཉིས་པ་ནི། དེ་ལས་གཞན་པ་མཚན་མ་གྲངས་ཀྱི་ཆོས་སྣ་ཚོགས་ལ་དགའ་བ་ཡི་གདུལ་བྱ་རྣམས་ལ་ནི་སྟོན་པ་ཀུན་བྱེད་རྒྱལ་པོས་བྱས་པའམ་རྩལ་གྱི་ཆོ་འཕྲུལ་དུ་ཤར་བ་ཡི་ཐེག་པ་སྣ་ཚོགས་བརྗོད་ཀྱིས་མི་ལང་བར་བསྟན་པ་དེ་ཡང་ཀུན་བྱེད་ང་ཡི་རང་བཞིན་ལས་ལྷུན་གྲུབ་རྩལ་གྱི་རོལ་པ་འགགས་མེད་སྣ་ཚོགས་སུ་བསྟན་པ་ཡིན་ནོ། །གསུམ་པ་ནི། འོན་ཀྱང་དེ་ལྟར་གདུལ་བྱའི་བློ་ལ་ལྟོས་ནས་སྤྲོས་བཅས་དང་སྤྲོས་མེད་ཀྱི་དབྱེ་བ་ཐ་དད་དུ་བསྟན་ཀྱང་དོན་ལ་དེ་ལྟར་ཐ་དད་དུ་གྲུབ་པ་མེད་དེ་འདི་ལྟར་ཤིན་ཏུ་སྤྲོས་པ་མེད་པའི་ཆོས་གཅིག་ཏུ་བསྟན་པ་ནི་ཀུན་བྱེད་ང་ཉིད་ཅེས་ངོས་བཟུང་གི་ཚིག་གིས་བསྟན་པ་སྟེ། དེ་ལྟ་བུའི་ཚིག་གིས་བརྗོད་པར་བྱ་བའི་ཡུལ་དེ་གང་ཞེ་ན་ཆོས་ཐམས་ཅད་ཀྱི་སྙིང་པོ་བྱང་ཆུབ་ཀྱི་སེམས་སམ་རིག་པ་རང་བྱུང་གི་ཡེ་ཤེས་མ་བཅོས་ཇི་བཞིན་པ་སྟེ། དེའི་རྩལ་འགགས་པ་མེད་པ་ལས་རྒྱུ་འབྲས་ཀྱི་ཐེག་པ་གཉིས་སུ་བྱུང་བ་ནི་སྟོན་པ་ཀུན་བྱེད་ང་ཡིས་གདུལ་བྱའི་བློ་དང་འཚམས་པར་བྱས་པ་སྟེ། རྒྱ་མཚོ་འཁྱིལ་པའི་རྒྱུད་ལས། སེམས་ཅན་བློ་འདི་མ་ཟད་པས། །ཐེག་པ་ཟད་པ་མེད་པར་གསུངས། །ཉོན་མོངས་བརྒྱད་ཁྲི་བཞི་སྟོང་གི། །གཉེན་པོར་ཆོས་སྒོ་དེ་སྙེད་གསུངས། །ཞེས་གསུངས་པ་ལྟར་རོ། །དེས་ན་ང་ཡི་བྱས་པའི་ཆོས་ལ་ཐེག་པའི་དབྱེ་བ་ཐ་དད་དུ་བགྲངས་བ་ཡིན་ལ། དེ་ལྟར་གྲངས་ཀྱིས་བསྒྲངས་པའི་དོན་ནི་གཅིག་དང་གཉིས་ཞེས་དབྱེ་བ་ཐ་དད་དུ་སྨྲས་པ་ཡིན་ཀྱང་དངོས་པོའི་གཤིས་ལ་གཉིས་ཆོས་ཀྱི་དབྱེ་བ་གང་ཡང་མེད་པས་གྲངས་ཀྱི་མཐའ་ནི་ཆོས་ཉིད་སྤྲོས་པ་དང་བྲལ་བ་བློས་བསམ་གྱིས་མི་ཁྱབ་ཅིང་ངག་གིས་བརྗོད་དུ་མེད་པ་ལ་ཐུག་པ་ཡིན་ཞིང་དེ་ལྟ་བུའི་སྨྲ་བསམ་བརྗོད་དུ་མེད་པ་ཡི་རང་བཞིན་དེ་ནི་ཆོས་རྣམས་ཀྱི་སྙིང་པོའམ་གཤིས་ལུགས་ཇི་བཞིན་པ་ཡིན་པས་གནས་སྐབས་སུ་གདུལ་བྱའི་བློ་ལ་ལྟོས་ནས་དབྱེ་བ་ཐ་དད་དུ་བསྟན་པ་དེ་དག་ཀུན་ཀྱང་མཐར་ཐུག་གི་དོན་ལ་ཆོས་ཉིད་བརྗོད་དུ་མེད་པ་སྙིང་པོ་རང་བྱུང་གི་ཡེ་ཤེས་གཅིག་ཏུ་འདུ་ཞིང་ཐེག་པའི་དབྱེ་བ་ཐ་དད་དུ་མེད་པར་བསྟན་ཏེ། དེ་ཉིད་ལས། བློ་མེད་འཁྲུལ་ཆོས་སངས་པ་ན། །ཐེག་པ་མེད་ཅིང་འཇུག་པ་མེད། །ཅེས་སོ། །བཞི་པ་རྒྱུ་འབྲས་ཐེག་པའི་རང་བཞིན་བསྟན་པ་ལ་གསུམ་སྟེ། རྒྱུ་འབྲས་ཀྱི་ཐེག་པ་བདེན་གཉིས་སུ་དབྱེ་བས་མདོར་བསྟན། མཚན་ཉིད་ཀྱི་ཐེག་པ་རྒྱུར་བཞག་པའི་ཚུལ་དང་། སྔགས་ཀྱི་ཐེག་པ་འབྲས་བུར་བཞག་ཚུལ་རྒྱས་པར་བཤད་པའོ། །དང་པོ་ནི། འདི་ལྟར་ཆོས་ཐམས་ཅད་ཀྱི་རང་བཞིན་ནམ་ངོ་བོ་གཅིག་ཏུ་བསྟན་པ་ནི་ཀུན་བྱེད་བྱང་ཆུབ་ཀྱི་སེམས་ཡིན་ལ་དེས་བྱས་པའི་ཆོས་ནི་རྣམ་པ་གཉིས་སུ་དབྱེ་བས་རྒྱུ་མཚན་ཉིད་ཀྱི་ཐེག་པ་དང་འབྲས་བུ་སྔགས་ཀྱི་ཐེག་པ་སྟེ་རྣམ་པ་གཉིས་སུ་ཡོད་པ་ལས་གནས་ལུགས་དོན་དམ་པའི་བདེན་པ་རྒྱུ་འབྲས་གཉིས་མེད་དུ་སྟོན་པ་གསང་སྔགས་རྡོ་རྗེའི་ཐེག་པ་དང་། སྣང་ཚུལ་ཀུན་རྫོབ་ཀྱི་བདེན་པ་རྒྱུ་འབྲས་བླང་དོར་ཅན་དུ་སྟོན་པ་མཚན་ཉིད་རྒྱུ་ཡི་ཐེག་པ་སྟེ་དེ་ལྟར་རྒྱུ་འབྲས་ཀྱི་ཐེག་པ་གཉིས་པོ་བདེན་པ་རྣམ་པ་གཉིས་ཀྱིས་ཞེས་གཉིས་ཀྱི་སྒོ་ནས་དབྱེ་བར་བྱ་ཞིང་འཆད་འགྱུར་ལྟར་སོ་སོའི་དཔེ་དོན་དང་མཐུན་པར་རྟགས་དང་གཏན་ཚིགས་ཀྱིས་ཡོངས་སུ་བརྟགས་ཏེ་ངེས་པའི་ལུང་རྡོ་རྗེའི་ཐེག་པ་དང་། དྲང་བའི་ལུང་མཚན་ཉིད་ཐེག་པ་གཉིས་སུ་དབྱེ་བར་བཤད་དོ། །གཉིས་པ་ལ་གསུམ་སྟེ། རྒྱུ་སྔ་མ་ལས་འབྲས་བུ་ཕྱིས་གྲུབ་པའི་རྒྱུ་མཚན་དགོད་པ། དེ་ཉིད་དྲང་བའི་དོན་དུ་བསྟན་པ། འཁོར་འདས་བླང་དོར་དུ་བཤད་པའོ། །དང་པོ་ནི། དཔེར་ན་རྒྱུ་ནི་འབྱུང་བ་ཆེན་པོ་ས་ཆུ་སོགས་རྣམ་པ་ལྔ་ལ་འབྲས་བུ་ཁམས་གསུམ་གྱི་སེམས་ཅན་རྣམས་གྲུབ་ཅིང་སྣང་བ་ཡིན་པའི་རྒྱུ་མཚན་དེ་ལྟ་བུས་ཕྱིར་ན་དོན་ཁམས་གསུམ་ཀྱི་སེམས་ཅན་རྣམས་རྒྱུ་རུ་བྱས་ནས་ལམ་ཉམས་སུ་བླང་བས་འབྲས་བུ་སངས་རྒྱས་ཀྱི་གོ་འཕང་འཐོབ་པོ་ཞེས་མིང་བཏགས་ཏེ་རྒྱུ་འབྲས་ཀྱི་དཔེ་དོན་གཉིས་པོ་དེ་ལྟ་བུ་རུ་གཏན་ཚིགས་ཀྱིས་བརྟགས་ཏེ་བསྟན་པ་ནི་རྒྱུ་མཚན་ཉིད་ཀྱི་ཐེག་པའོ། །གཉིས་པ་ནི། དེ་ལྟར་རྒྱུ་ནི་ཁམས་གསུམ་གྱི་སེམས་ཅན་རྣམས་ཀྱིས་ལམ་ཚོགས་གཉིས་ལ་རིམ་པར་སློབ་པའི་སྒོ་ནས་སྐལ་པ་གྲངས་མེད་མང་པོའི་མཐར་འབྲས་བུ་སངས་རྒྱས་ཀྱི་གོ་འཕང་དེ་གདོད་འགྲུབ་པར་ལུང་བསྟན་པ་དེ་ལྟ་བུ་ནི་གདུལ་བྱ་རྣམས་རིམ་གྱིས་དྲང་བའི་ཆེད་དུ་བསྟན་པ་དགོངས་པ་ཅན་གྱི་ལུང་དུ་བཤད་པ་ཡིན་ཏེ་གཞི་འབྲས་དབྱེར་མེད་དུ་སྟོན་པར་བྱེད་པའི་ངེས་དོན་ཟབ་མོའི་ལུང་དང་འགལ་བའི་ཕྱིར་རོ། །གསུམ་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལ་རྒྱུ་འབྲས་རྣམ་པ་གཉིས་སུ་དབྱེ་བར་བྱ་བ་ལ་རྒྱུ་ནི་འབྱུང་བ་ཆེན་པོ་རྣམ་པ་ལྔ་ཡིན་ལ། རྒྱུ་དེས་བྱས་པའི་ཆོས་སྣང་སྲིད་སྣོད་བཅུད་སྣ་ཚོགས་སུ་ནི་སྣང་བ་འདི་ཐམས་ཅད་ནི་དོན་ལ་སེམས་ཉིད་རང་བྱུང་གི་ཡེ་ཤེས་འགྱུར་བ་མེད་པའི་རྩལ་མངོན་དུ་ཕྱུང་བ་ཡིན་ཀྱང་སེམས་ཅན་རྣམས་ཀྱི་རང་ངོ་མ་ཤེས་པའི་དབང་གིས་རིགས་དྲུག་གི་སྣང་བ་སྣ་ཚོགས་སུ་ཤར་བ་ལ་མཚན་ཉིད་ཐེག་པ་བས་དངོས་པོ་རང་མཚན་པར་བལྟས་ནས་རྒྱུ་འབྲས་བླང་དོར་ལ་བརྩོན་པར་བྱེད་པ་ཡིན་ནོ། །གཉིས་པ་རྒྱས་བཤད་ལ་བཞི་སྟེ། གཤིས་མ་རིག་པས་འཇིག་རྟེན་དུ་གྲུབ་པ་དང་། དེ་ཉིད་འཁྲུལ་བས་སྡུག་བསྔལ་དུ་གྲུབ་པས་འཁོར་བ་སྤང་བྱར་བསྟན་པ་དང་། མྱ་ངན་ལས་འདས་པ་བླང་བྱར་བཤད་པ་དང་། ཐེག་པ་དེའི་ངེས་ཚིག་བརྗོད་པའོ། །དང་པོ་ནི། དེ་ལྟར་སྣོད་བཅུད་སྣ་ཚོགས་སུ་སྣང་བ་དེ་དག་ཐམས་ཅད་གནས་ལུགས་དེ་བཞིན་ཉིད་ཀྱི་རང་བཞིན་དུ་མ་གཏོགས་པའི་གཟུང་འཛིན་མཚན་མའི་ཆོས་སུ་གྲུབ་པ་གང་ཡང་མེད་ཀྱང་སེམས་ཅན་རྣམས་ཀྱིས་དེ་ལྟར་དུ་མ་རྟོགས་པར་རྒྱུ་ལྷན་གཅིག་སྐྱེས་པའི་མ་རིག་པ་དང་། སྐྱེན་ཀུན་ཏུ་བརྟགས་པའི་མ་རིག་པ་གཉིས་ཀྱི་དབང་གིས་ཡང་དག་པའི་དོན་ལ་ཕྱིན་ཅི་ལོག་ཏུ་རྟོག་པའི་གཟུང་འཛིན་གྱིས་གཟུགས་སྒྲ་ལ་སོགས་པའི་ཡུལ་དྲུག་གི་ཆོས་ལ་ངེས་པར་བརྟགས་ཞིང་ཞེན་པ་མཐུ་བལྟས་པས་རིགས་དྲུག་གི་གནས་སྣོད་མི་བརྟན་པར་འཇིག་པ་དྲུག་དང་དེ་ལ་བརྟེན་ཅིང་གནས་པ་ཡི་བཅུད་འགྲོ་བ་དྲུག་གི་གནས་ལུས་སྣ་ཚོགས་སུ་སྣང་བ་ལ་སྣོད་དང་བཅུད་ཀྱི་འཇིག་རྟེན་དུ་གྲུབ་པ་ཞེས་སུ་བཤད་པ་ཡིན་ནོ། །གཉིས་པ་ནི། དེ་ལྟར་གཟུགས་སོགས་ཡུལ་དྲུག་པོ་ལ་ཞེན་ཅིང་ཆགས་པ་དྲུག་ལ་བརྟེན་ནས་ཉོན་མོངས་པ་སེར་སྣ་ལ་སོགས་པ་སྐམ་ཆགས་དྲུག་སྐྱེ་ཞིང་དེ་དག་གི་སྒོ་ནས་ལས་སྣ་ཚོགས་བསགས་པའི་དབང་གིས་རིགས་དྲུག་གི་སྡུག་བསྔལ་འཇིགས་སུ་རུང་ཞིང་ཡ་ང་བ་མྱོང་བ་ལ་མྱ་ངན་མྱ་ངན་ཞེས་སུ་བཏགས་ཤིང་དེ་ཉིད་སྤང་བྱའི་རང་བཞིན་དུ་བཤད་དོ། །གསུམ་པ་ནི། དེ་ལྟ་བུའི་རིགས་དྲུག་གི་སྡུག་བསྔལ་ཟབ་ཅིང་རྒྱ་ཆེ་ལ་ཡུན་རིང་བའི་མྱ་ངན་གྱིས་གདུང་བའི་སྟེང་དུ་སྡུག་བསྔལ་ཕྱི་མ་ཕྱི་མས་གཙེས་ཤིང་མྱ་ངན་ཆེན་པོས་གདུང་བ་ལས་འདས་ཤིང་ཐར་བ་མངོན་དུ་ཐོབ་པ་ཞེས་བྱ་བ་ནི་ཡུལ་དྲུག་གི་ཆོས་ལ་ཞེན་ཅིང་ཆགས་པའི་སེམས་ཀྱི་མི་རྟོག་ཅིང་ལས་ཉོན་བག་ཆགས་དང་བཅས་པ་ཟད་པས་སྐྱེ་གནས་རྣམ་པ་བཞིས་བསྡུས་པའི་རིགས་དྲུག་འཁོར་བའ ི་གནས་སུ་མི་སྐྱེ་སྟེ་རྒྱུ་མེད་པའི་ཕྱིར་རོ། །དེས་ན་རིགས་དྲུག་གི་སྡུག་བསྔལ་དྲུག་པོ་དེ་ལས་འདས་པའི་ཕྱིར་ན་མྱ་ངན་ལས་འདས་པ་ཞེས་བྱ་བ་ནི་དེ་ལ་བྱ་ཞིང་བརྗོད་པ་ཡིན་ནོ། །བཞི་པ་ནི། དེ་ལ་མཚན་ཉིད་རྒྱུ་ཡི་ཐེག་པ་ཞེས་བརྗོད་པའི་ངེས་ཚིག་ནི་དབྱིངས་སྤྲོས་པ་དང་བྲལ་བའི་གནས་ལུགས་ཇི་བཞིན་པ་སྙིང་པོ་བྱང་ཆུབ་ཀྱི་སེམས་ལས་རྒྱུ་རྐྱེན་རྩོལ་བའི་སྒོ་ནས་མ་བཙལ་བར་རང་བཞིན་དུ་ཤར་བ་ཡི་རྒྱུ་འབྱུང་བ་ཆེན་པོ་ལྔ་པོ་ཡང་རང་རང་གི་མཚན་ཉིད་མེའི་རང་བཞིན་ཚ་ཞིང་བསྲེགས་པ་ལ་སོགས་པ་རང་རང་གིས་འཛིན་པ་ཡིན་ལ། དེ་ལྟ་བུའི་རྒྱུ་འབྱུང་བ་དང་བཅས་པའི་ཆོས་ཐམས་ཅད་གང་ལས་འབྱུང་བའི་སྙིང་པོ་བྱང་ཆུབ་ཀྱི་སེམས་ཀྱིས་ཀྱང་རང་གི་མཚན་ཉིད་སྤྲོས་པ་ཐམས་ཅད་དང་བྲལ་བས་དམིགས་སུ་མེད་པའི་ངོ་བོ་འཛིན་པ་དེ་ལ་མཚན་ཉིད་མཚན་ཉིད་ཅེས་སུ་བཤད་པ་དང་། དེ་ཡང་བསྐྱེད་བྱེད་ཀྱི་རྒྱུ་གཞན་ལ་མ་ལྟོས་པར་བྱང་ཆུབ་སེམས་ཀྱི་རྩལ་ལས་རང་བཞིན་དུ་ཤར་བའི་འབྱུང་བ་ཆེན་པོ་ལྔས་སྣང་སྲིད་ཀྱི་ཆོས་ཀུན་བསྐྱེད་པའི་ཕྱིར་ན་སྙིང་པོ་ཡིན་པར་བཤད་པ་སྟེ། སྙིང་པོ་དེ་ཡིས་བསྐྱེད་པའི་འབྲས་བུ་ཁམས་གསུམ་གྱི་སེམས་ཅན་རྣམས་ཀྱང་དོན་ལ་རྒྱུ་ལས་མ་བྱུང་བའི་རང་བྱུང་ཡེ་ཤེས་ཀྱི་བདག་ཉིད་ཡིན་ཀྱང་། དེ་ལྟར་ཡིན་པར་མ་ཤེས་པའམ་མི་རྟོག་པར་རྒྱུ་འབྲས་རྩོལ་སྒྲུབ་ལ་སྤྱོད་པའི་ལམ་དེ་ལ་རྒྱུར་བལྟས་ནས་རྒྱུ་དེ་ཉམས་སུ་བླང་བ་ལས་འབྲས་བུ་སངས་རྒྱས་ཀྱི་གོ་འཕང་ལ་སོགས་པ་འབྱུང་བར་འདོད་པས་རྒྱུ་ཞེས་མིང་དུ་བཏགས་པ་ཡིན་ཞིང་། དེ་ལྟར་རྒྱུ་ལ་རྩོལ་བས་འབྲས་བུ་བྱང་ཆུབ་གསུམ་པོ་གང་ཞིག་ཐོབ་པར་བྱེད་པའི་ལམ་དེ་ལ་ཐེག་པར་བཤད་པ་སྟེ་དེས་ན་མཚན་ཉིད་རྒྱུ་ཡི་ཐེག་པ་ཞེས་གསུངས་སོ། །དེ་ལྟ་བུའི་ཐེག་པ་དེ་ལ་དབྱེ་ན་ལས་ཉོན་སྤོངས་བར་བྱེད་པ་ཉན་ཐོས་དང་། འགེགས་པར་བྱེད་པ་རང་རྒྱལ་དང་། སྦྱོང་བར་བྱེད་པ་བྱང་སེམས་ཀྱི་ཐེག་པ་ཞེས་བྱ་བ་རྣམ་པ་གསུམ་པོ་དེ་རྣམས་སུ་བསྟན་པ་ཡིན་ནོ། །གསུམ་པ་སྔགས་ཀྱི་ཐེག་པ་འབྲས་བུར་བཞག་པའི་ཚུལ་ལ་གཉིས་ཏེ། འབྲས་བུར་བཞག་པའི་ངེས་ཚིག་དང་། རང་བཞིན་རྒྱས་པར་བཤད་པའོ། །དང་པོ་ནི། དེ་ལ་སྔགས་ཀྱི་ཐེག་པ་ལ་འབྲས་བུ་ཞེས་སུ་མིང་གིས་བཏགས་པ་ཡི་ངེས་ཚིག་ནི་ཆོས་རྣམས་ཀྱི་སྙིང་པོ་རང་བྱུང་གི་ཡེ་ཤེས་སམ་བྱང་ཆུབ་ཀྱི་སེམས་ནི་རྒྱུ་དང་དེ་ལས་མཐར་ཐུག་གི་འབྲས་བུར་སྟེ་འབྲས་བུ་འབྱུང་བར་བཤད་པ་དེ་ཡང་དོན་ལ་རྒྱུ་འབྲས་ཐ་དད་དུ་མེད་པར། དཔེར་ན་རྫས་ཀྱི་རྡོ་རྗེ་དེ་ཉིད་གང་གིས་ཀྱང་གཞོམ་གཞིག་མི་ནུས་པ་ལྟར་དོན་ཆོས་ཉིད་སྙིང་པོའི་རང་བཞིན་སྟོང་གསལ་སྤྲོས་མཐའ་དང་བྲལ་བ་དེ་ལ་ནི་འདུས་བྱས་ཀྱི་རྒྱུ་རྐྱེན་ལ་བརྟེན་ནས་དང་པོར་སྐྱེ་བ་དང་ཐ་མ་འཇིག་པ་མེད་པའི་རང་བཞིན་ཡིན་པས་སྟོང་ཆེན་འདུས་མ་བྱས་པའི་ཡེ་ཤེས་འབྲས་བུའི་ངོ་བོར་གནས་པ་དེ་ལ་རྡོ་རྗེ་ཞེས་བཏགས་པ་དེ་ཉིད་ལམ་དུ་བྱེད་པའི་ཕྱིར་ན་འབྲས་བུ་རྡོ་རྗེའི་ཐེག་པ་ཞེས་སུ་བཤད་པ་ཡིན་ནོ། །གཉིས་པ་ལ་གཉིས་ཏེ། ཕྱི་ཐུབ་པ་རྒྱུད་ཀྱི་ཐེག་པ་གཉིས་སྤྱིར་བསྟན་པ་དང་། ནང་པ་སྔགས་ཀྱི་ཐེག་པ་བྱེ་བྲག་ཏུ་བཤད་པའོ། །དང་པོ་ནི། གོང་དུ་བཤད་པའི་མཚོན་བྱ་དོན་གྱི་རྡོ་རྗེ་སེམས་ཉིད་རང་བྱུང་གི་ཡེ་ཤེས་དེ་ཉིད་མངོན་དུ་སྒྲུབ་པར་བྱེད་པའི་ཐེག་པ་དེ་ལ་ཡང་ཕྱི་ནང་གཉིས་སུ་ཡོད་པ་ལས། དང་པོ་ཐུབ་པ་ཆགས་བྲལ་གྱི་རྣམ་པས་དངོས་སུ་གསུངས་པ་ཕྱི་མཚན་ཉིད་ཀྱི་ཐེག་པ་དང་ཚུལ་མཐུན་པར་ཕྱིའི་སྤྱོད་པ་གཙོ་བོར་སྟོན་པས་ཕྱི་ཐུབ་པ་རྒྱུད་ཀྱི་ཐེག་པ་ཞེས་གྲགས་པ་ཀྲྀ་ཡ་དང་རྣལ་འབྱོར་གྱི་རྒྱུད་གཉིས་ཀྱིས་རང་གི་སྒོ་གསུམ་ལྷའི་སྐུ་དང་གསུང་དང་ཐུགས་རྡོ་རྗེ་གསུམ་གྱི་བདག་ཉིད་ཡེ་ཤེས་ཀྱི་ངོ་བོར་ནི་བསྒྲུབ་པའི་ཕྱིར་དུ་ལྟ་སྤྱོད་བླང་དོར་ལ་བརྩོན་པར་བྱས་པའི་སྒོ་ནས་ནི་འབྲས་བུ་མཐར་ཐུག་ལྷ་སྐུ་སྣང་ཡང་རང་བཞིན་མེད་པ་ཆུ་ཟླ་བཞིན་དུ་གྲུབ་པར་འདོད་པའོ། །འདིར་ཕྱི་རྒྱུད་གཉིས་སུ་བསྟན་པ་ནི། རྒྱ་མཚོ་འཁྱིལ་པའི་རྒྱུད་ལས། ཨུ་པ་ཡ་ལ་ལྟ་བ་གཞུང་ཚུགས་མེད། །ཅེས་གསུངས་པ་ལྟར་ཨུ་པ་ཡའི་སྤྱོད་པ་ཀྲྀ་ཡ་དང་། ལྟ་བ་ཡོ་ག་ལས་གཞན་དུ་མེད་པའི་ཕྱིར་ན་འདིར་ཀྲི་ཡོག་གཉིས་སུ་གསུངས་སོ། །གཉིས་པ་ནང་བ་ལ་གསུམ་སྟེ། བསྐྱེད་རྫོགས་གཉིས་ཀྱི་རང་བཞིན་བརྗོད་པ་དང་། ཨ་ཏི་གཉིས་སུ་མེད་པའི་རང་བཞིན་བསྟན་པ་དང་། དེ་ལ་ཐེག་པ་འོག་མ་དྲངས་པའི་ཕན་ཡོན་བཤད་པའོ། །དང་པོ་ནི་འདི་ལྟར་སྣང་ཚུལ་ལ་འཁོར་བའི་ཆོས་ཕུང་ཁམས་སྐྱེ་མཆེད་དུ་སྣང་བའི་དངོས་པོ་འདིར་ཐམས་ཅད་གནས་ཚུལ་ལ་ཡེ་ནས་དག་པ་རྒྱལ་བའི་དཀྱིལ་འཁོར་ཆེན་པོའི་རང་བཞིན་ཡིན་པར་ཤེས་པའི་ལྟ་བ་དང་ལྡན་པས་ཆོས་གང་ལའང་བླང་དོར་མེད་པར་འཇུག་ནུས་པའི་ནང་པ་བླ་ན་མེད་པའི་ཐེག་པ་ལས་བསྐྱེད་པ་མ་ཧཱ་ཡོ་ག་བས་ནི་ཆོས་སྐུ་དེ་བཞིན་ཉིད་ཀྱི་ཏིང་ངེ་འཛིན་དང་། ལོངས་སྐུ་ཀུན་ཏུ་སྣང་བའི་ཏིང་ངེ་འཛིན་དང་། སྤྲུལ་སྐུ་རྒྱུ་ཡི་ཏིང་ངེ་འཛིན་གྱི་རིམ་པ་གསུམ་ལ་བརྟེན་ནས་སྣོད་བཅུད་ལྷའི་དཀྱིལ་འཁོར་དུ་བསྒོམ་ཞིང་བསྒྲུབ་པ་དང་། ཨ་ནུ་ཡོ་གས་ལྷའི་སྙིང་པོའམ་རྩ་སྔགས་བརྗོད་པ་ཙམ་ལ་བརྟེན་པ་ཡིས་བདག་ཉིད་ལྷའི་དཀྱིལ་འཁོར་དུ་བསྒོམ་པར་བྱེད་པ་སྟེ། དེ་ཡང་ཡུལ་ཆོས་ཀྱི་དབྱིངས་སྟོང་པ་ཉིད་རྒྱུ་དང་ཡུལ་ཅན་རང་བྱུང་གི་ཡེ་ཤེས་འབྲས་བུ་གཉིས་ཡེ་ནས་དབྱེར་མེད་པ་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་དུ་བལྟ་ཞིང་བསྒོམ་པར་བྱེད་དོ། །གཉིས་པ་ནི། ཨ་ཏི་ཡོ་གས་བླང་དོར་དང་བསྐྱེད་རྫོགས་ལ་སོགས་པའི་ཐབས་ཚུལ་གང་ལའང་མི་བརྟེན་པར་གཉིས་སུ་མེད་པའི་རང་བཞིན་སེམས་ཉིད་རང་བྱུང་གི་ཡེ་ཤེས་མ་བཅོས་རྣལ་དུ་འཇོག་པ་ལས་བྱ་བྱེད་གང་ལ་ཡང་ལྟོས་པ་མེད་པ་འདི་ནི་ཆོས་ཀུན་གྱི་སྙིང་པོར་གྱུར་པ་ཡིན་པས་ན་རེ་དོགས་རྩོལ་སྒྲུབ་ལ་སོགས་པའི་བྱ་བ་གང་ཡང་མེད་པར་མ་བཅོས་ལྷུན་གྲུབ་ཀྱི་ངང་དུ་འཇོགས་པ་ཡིན་པའི་ཕྱིར་ན་མཛད་སྤྱོད་ཀྱི་འཕྲིན་ལས་བསྒྲུབ་པ་ཀུན་ལས་འདས་པའི་བྱར་མེད་བློ་འདས་ཆེན་པོའི་རང་བཞིན་དུ་བརྟན་པ་ཡིན་ནོ། །གསུམ་པ་ཨ་ཏི་ཡོ་ག་ལ་ཐེག་པ་འོག་མ་དྲངས་པའི་ཕན་ཡོན་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། གོང་དུ་བསྟན་པ་དེ་ལྟ་བུའི་སྤང་བླང་གི་བྱ་བ་གང་ཡང་མེད་པ་ངེས་གསང་ཨ་ཏི་ཡོ་གའི་ལམ་གྱི་རྩོལ་མེད་རང་བབས་ཀྱི་བདེ་བ་དེ་ཉིད་བླང་དོར་རྩོལ་སྒྲུབ་ལ་ཞེན་པས་སྤོང་བར་བྱེད་པའི་ཐེག་པ་འོག་མ་པ་རྣམས་ལ་རེ་དོགས་ཀྱི་བྱ་བ་གང་ལ་ཡང་མི་རྩོལ་བར་བྱར་མེད་བདེ་བའི་ངང་ལ་གནས་པར་བྱེད་པའི་ལུང་ཐེག་མཆོག་རྫོགས་པ་ཆེན་པོའི་དགོངས་དོན་འདི་མངོན་དུ་བསྟན་ནས་ལྷུན་གྲུབ་གདོད་མའི་ས་ལ་བཀོད་པར་བྱའོ། །ཞེས་སོ། །གཉིས་པ་ནི། དེ་ཡང་མཚན་ཉིད་ཐེག་པའི་ལམ་ནས་བསྐལ་པ་གྲངས་མེད་གསུམ་དང་ཕྱི་རྒྱུད་པས་མི་ཚེ་བདུན་སོགས་དང་ནང་རྒྱུད་གཉིས་ཀྱིས་ལམ་ནས་དབང་པོ་རབ་ཀྱི་ཟླ་བ་དྲུག་དང་འབྲིང་གིས་ལོ་གཅིག་དང་ཟླ་བ་བཞི་ཐ་མས་ཟླ་བ་བཅུ་དྲུག་གི་ཡུན་ལ་རྩོལ་བར་བྱེད་པའི་རྩོལ་བཅས་ཀྱི་ཐེག་པ་ཅན་རྣམས་ལ་བྱར་མེད་རྫོགས་པ་ཆེན་པོའི་གནས་ལུགས་མ་བཅོས་པའི་ངོ་བོ་སེམས་ཉིད་རང་བྱུང་གི་ཡེ་ཤེས་འདི་བསྟན་པར་བྱས་པས། འདི་ལྟར་སྣང་བའི་ཆོས་ཐམས་ཅད་གདོད་ནས་ཡེ་གྲོལ་ཆེན་པོའི་ངོ་བོར་སངས་རྒྱས་ཟིན་པ་ལ་བླང་དོར་རྩོལ་སྒྲུབ་ཀྱིས་བཅོས་སུ་མེད་པར་རྟོགས་ནས་མི་རྩོལ་ལྷུན་གྱིས་གྲུབ་པའི་བདེ་བ་ལ་གནས་པར་འགྱུར་བའི་དགོས་པའམ་ཕན་ཡོན་ཡོད་པར་གསུངས་པའོ། །ལྔ་པ་ཐམས་ཅད་ཀུན་འདུས་རྫོགས་པ་ཆེན་པོར་གཏན་ལ་ཕབ་པ་ནི། དེ་ལྟ་བུའི་ཐེག་པ་ཀུན་གྱི་ཡང་རྩེ་ཆོས་ཉིད་རྫོགས་པ་ཆེན་པོ་གནས་ལུགས་རིག་པ་བྱང་ཆུབ་ཀྱི་སེམས་འདི་ཡི་ཀློང་ལ་འཁོར་འདས་གཉིས་ཀྱིས་བསྡུས་པའི་ཆོས་ཐམས་ཅད་མ་རྫོགས་པ་གང་ཡང་མེད་པས་རྫོགས་པ་ཆེན་པོ་ཞེས་གསུངས་ཏེ། མདོ་བཅུ་ལས། རྫོགས་པ་ཆེན་པོའི་རང་བཞིན་ནི། །སངས་རྒྱས་རྫོགས་ལ་སེམས་ཅན་རྫོགས། །འཇིག་རྟེན་རྫོགས་ལ་འདས་པ་རྫོགས། །བདེ་དང་སྡུག་བསྔལ་གཉིས་མེད་རྫོགས། །ཐེག་པ་རྫོགས་ལ་ཆོས་ཉིད་རྫོགས། །ཡོད་པའི་མཐའ་རྫོགས་མེད་མཐའ་རྫོགས། །གཅིག་རྫོགས་ཀུན་རྫོགས་ཐམས་ཅད་རྫོགས། །ཅེས་གསུངས་པ་ལྟར་གཅིག་རྫོགས་ཆོས་ཐམས་ཅད་རིག་པའི་ངང་དུ་ཐ་དད་མེད་པར་རྫོགས་པ་དང་། གཉིས་རྫོགས་སེམས་ཀྱིས་བྱས་པ་འཁོར་འདས་གཉིས་སུ་སྣང་བ་ཐམས་ཅད་རྫོགས་པ་དང་། ཀུན་རྫོགས་ཕུན་སུམ་ཚོགས་པའི་ཆོས་ཐམས་ཅད་མ་རྫོགས་པ་མེད་པས་ན་ཐེག་པ་འོག་མའི་ལམ་ནས་འབད་རྩོལ་གྱིས་བསྒྲུབས་པའི་ལམ་འབྲས་ཀྱིས་ཡོན་ཏན་ཐམས་ཅད་བྱ་བྱེད་ཀྱི་རྩོལ་བ་གང་ལ་ཡང་མ་ལྟོས་པར་ད་ལྟ་ཉིད་ནས་སྙིང་པོ་རིག་པའི་ཀློང་དུ་ཕུན་སུམ་ཚོགས་པར་རྫོགས་པས་རྩོལ་མེད་བདེ་བ་ཆེན་པོའི་ངང་དུ་གནས་པ་སྟེ། དེ་ཡང་སྣང་སྲིད་འཁོར་འདས་སུ་སྣང་བའི་ཆོས་དག་པ་དང་མ་དག་པའི་རྣམ་པར་ཤར་བ་ཐམས་ཅད་དོན་ལ་རང་བྱུང་གི་ཡེ་ཤེས་གཅིག་གི་ངང་དུ་རྫོགས་པ་ཡིན་ཏེ། ཅིའི་ཕྱིར་ན་ཆོས་དེ་དག་ཐམས་ཅད་བྱུང་ཡང་རིག་པ་བྱང་ཆུབ་སེམས་ཀྱི་རྩལ་ལས་བྱུང་བ་དང་གནས་ཀྱང་བྱང་ཆུབ་སེམས་ཀྱི་ངང་དུ་གནས་པ་དང་གྲོལ་ཡང་བྱང་ཆུབ་སེམས་ཀྱི་ངང་ལ་གྲོལ་ཞིང་དེ་ལས་འདའ་བ་མེད་པས་ན་སྙིང་པོ་བྱང་ཆུབ་ཀྱི་སེམས་སུ་རྫོགས་པ་ཡིན་ལ། གཉིས་རྫོགས་སེམས་ཀྱི་བྱས་པ་ནི་འཇིག་རྟེན་པ་འཁོར་བའི་ཆོས་སུ་སྣང་བ་སྣང་སྲིད་སྣོད་བཅུད་ཕུང་ཁམས་སྐྱེ་མཆེད་ཀྱིས་བསྡུས་པའི་ཆོས་རྣམས་དང་། འཇིག་རྟེན་ལས་འདས་པའི་ཆོས་ཐེག་པའི་རྣམ་གྲངས་དང་། དེ་དག་གི་བརྗོད་བྱ་གཞི་ལམ་འབྲས་བུའི་བསྡུས་སོ་ཅོག་ཐམས་ཅད་གཞན་དུ་ཅི་ཡང་མེད་པར་སེམས་ཀྱིས་བྱས་ཤིང་སེམས་ལ་སྣང་བ་སེམས་ཀྱི་བག་ཆགས་ལས་བྱུང་བ་ཡིན་ཀྱང་དོན་ལ་རིག་པ་བྱང་ཆུབ་སེམས་ཀྱི་ཀློང་ན་མེད་སྣང་སྟོང་གཟུགས་ཀྱི་རོལ་པ་ཙམ་ལས་ཡོད་མ་མྱོང་པས་དེས་ངང་དུ་རྫོགས་པ་དང་། ཀུན་རྫོགས་པ་ནི་རྒྱལ་བ་སྐུ་གསུམ་གྱིས་བསྡུས་པའི་སྟོན་པ་ལ་སོགས་པ་ཕུན་སུམ་ཚོགས་པ་ཐམས་ཅད་ཡེ་ནས་རིག་པའི་རང་བཞིན་སྟོང་པ་ཆོས་སྐུ་གསལ་བ་ལོངས་སྐུ་ཐུགས་རྗེ་འགགས་པ་མེད་པ་སྤྲུལ་པའི་སྐུ་སྟེ་སྐུ་གསུམ་དུ་གནས་པའི་རང་རྩལ་འགགས་པ་མེད་པར་ཤར་ཞིང་དེའི་ངང་ལ་རྫོགས་པ་ཡིན་ནོ། །དེས་ན་སྤྲོས་པ་མེད་པའི་གང་ཟག་ཆོས་ཉིད་ཉག་གཅིག་གི་དོན་ལ་དགའ་བའི་དབང་པོ་ཡང་རབ་རྣམས་ལ་རང་བྱུང་གི་ཡེ་ཤེས་གཅིག་གི་ངང་ལ་ཆོས་ཐམས་ཅད་ཀུན་ཡོངས་སུ་འདུས་ཤིང་རྫོགས་པའི་ལུང་བྱར་མེད་ལྷུན་གྱིས་གྲུབ་པའི་དོན་འདི་བསྟན་པ་ཡིས་རྩོལ་སྒྲུབ་ཀྱི་གདུང་བ་མེད་པར་སངས་རྒྱས་ཀྱི་དགོངས་པ་མཐར་ཐུག་པ་འདི་ལ་ད་ལྟ་ཉིད་ནས་གནས་པའི་དགོས་པ་ཡོད་ལ། ཀུན་རྫོགས་པ་ཡི་ལུང་ཐེག་པའི་རྣམ་གྲངས་སྣ་ཚོགས་པ་ཡི་དོན་འདི་ཐེག་པ་ཐུན་མོང་པའི་རིགས་ཅན་རྣམས་ལ་བསྟན་པ་ཡིས་འགྲོ་བ་ཐམས་ཅད་ཨ་ཏི་ཡོ་ག་ལ་རིམ་གྱིས་དཀྲི་བའི་སྒོ་ནས་འགྲོ་བའི་དོན་ཐམས་ཅད་ཕུན་སུམ་ཚོགས་པར་བྱེད་དེ། དེ་ཉིད་ལས། ཡོངས་སུ་རྫོགས་པའི་མདོ་འདི་ནི། དུས་གསུམ་སངས་རྒྱས་ཐམས་ཅད་ཀྱི། །སྔར་གྲུབ་དགོངས་པ་འདི་ཡིས་གྲུབ། །ད་ལྟར་བཞུགས་པའི་རྣལ་འབྱོར་པ། །མི་ཡེངས་དགོངས་ལམ་འདི་ལ་གནས། །སླད་ནས་འབྱོན་པའི་གདུང་འཚོབ་རྣམས། །དགོངས་པའི་ལུང་བསྟན་འདི་ཡིས་མཛད། །ཅེས་གསུངས་སོ། །དྲུག་པ་དེ་རྟོགས་པའི་གང་ཟག་ལ་བསྔགས་པ་ནི། དེ་ལྟ་བུའི་ཆོས་ཉིད་རྫོགས་པ་ཆེན་པོ་བླང་དོར་བྱ་རྩོལ་མེད་པའི་དོན་འདི་ལ་གང་ཟག་གང་ཞིག་གནས་པ་ཡི་རྣལ་འབྱོར་པ་དེ་ཡི་ལུས་འདི་གང་ཟག་ལྷ་དང་མི་ཡི་རིག ས་གང་དུ་གཏོགས་པ་དེ་ཉིད་དུ་སྣང་བ་ཡིན་ཡང་རུང་ཐུགས་སམ་དགོངས་པ་ནི་ཆོས་ཉིད་འགྱུར་བ་མེད་པ་རིག་པ་བྱང་ཆུབ་སེམས་ཀྱི་གནས་ལུགས་མངོན་དུ་གྱུར་པའི་སངས་རྒྱས་དངོས་ཡིན་པས་གང་ཟག་དམ་པ་འདི་ཡིས་གདུལ་བྱ་སེམས་ཅན་རྣམས་ཀྱིས་དོན་མཛད་པར་བྱས་ན་གདུལ་བྱ་དེ་དག་རྩོལ་བཅས་ཐེག་པའི་ལམ་གྱིས་གདུང་བ་དང་བྲལ་ནས་བླང་དོར་རྩོལ་སྒྲུབ་མི་བྱེད་པར་རྩོལ་མེད་བདེ་བ་ཆེན་པོ་འབྲས་བུ་ཡེ་ཤེས་བླ་མའི་ས་ལ་ད་ལྟ་ཉིད་ནས་གནས་པར་འགྱུར་རོ། །ཞེས་གསུངས་སོ། །དེ་ཉིད་ལས། གང་སུ་འདི་ལ་གནས་པ་ཡི། །དེ་ནི་རྣལ་འབྱོར་ཆེན་པོ་ཡིན། །ལུས་ནི་གང་ཟག་འཇིག་རྟེན་ཡང་། །སེམས་དགོངས་རྫོགས་ཆེན་སངས་རྒྱས་ཡིན། །འདི་ཡིས་སེམས་ཅན་དོན་བྱས་ཀྱང་། །དོན་ལ་ནོར་བ་ངེས་མི་འགྱུར། །ཡིན་པ་དག་ལ་ནོར་བ་མེད། །ངེས་པ་དག་ལ་ཐེ་ཚོམ་མེད། །རྫོགས་པ་ཆེན་པོའི་ལུང་འདི་ལ། །ཡོད་མེད་ཚིག་དང་མ་ངེས་པའི། །དོན་ལ་འདའ་བ་མི་མངའ་བས། །བརྗོད་པའི་ཚིག་ལས་འདའ་མི་མངའ། །ཞེས་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་རྣམ་གྲངས་བསྡུས་པའི་ལེའུ་སྟེ་བདུན་པའི་འགྲེལ་བའོ།། ༈ །།ལྔ་པ་སེམས་ཉིད་ལས་གཞན་པའི་སངས་རྒྱས་ལོགས་སུ་མ་གྲུབ་པའི་གཏན་ཚིག་དོན་གྱི་ལེའུ་བརྒྱད་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལྟར་བྱང་ཆུབ་སེམས་ལས་མངོན་དུ་ཕྱུང་བའི་ཆོས་རྣམ་པར་དབྱེ་བ་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་བྱས་པའི་འཁོར་འདས་ཀྱི་ཆོས་ཐམས་ཅད་ཆོས་ཉིད་དེ་བཞིན་ཉིད་དུ་གཅིག་པ་ལས་དེ་བཞིན་ཉིད་ལ་སྟོན་འཁོར་བསྟན་པ་ཡི་རང་བཞིན་གསུམ་དུ་སྣང་བར་འགྱུར་བ་ཡི་འཆར་གཞིའི་རང་བཞིན་ངོ་བོ་ཐུགས་རྗེ་གསུམ་དུ་ཡོད་པ་ལས་ཕུན་སུམ་ཚོགས་པ་གསུམ་པོ་དེ་སོ་སོར་དངོས་སུ་སྣང་བ་ཡི་ཚུལ་འོག་ནས་འཆད་འགྱུར་འདི་གསུངས་སོ། །གཉིས་པ་རྒྱས་བཤད་ལ་གསུམ་སྟེ། སེམས་ཉིད་རང་བྱུང་གི་ཡེ་ཤེས་ལས་ཆོས་ཐམས་ཅད་བཀོད་པའི་ཚུལ་དང་། རྣལ་འབྱོར་བཞིའི་དབྱེ་བ་སྣང་ཚུལ། རྣལ་འབྱོར་གོང་འོག་གི་ཁྱད་པར་བསྟན་ཚུལ་ལོ། །དང་པོ་ལ་ལྔ་སྟེ། སྐུ་གསུམ་དུ་བཀོད་པའི་ཚུལ། དེས་བསྟན་པ་རྒྱུ་འབྲས་སོ་སོར་དབྱེ་བ། དེ་དག་ཀྱང་དབྱིངས་དེ་བཞིན་ཉིད་དུ་བསྟན་པ། དེ་བཞིན་ཉིད་ཀྱི་དབྱེ་བ། ངོ་བོ་གཅིག་གི་རང་བཞིན་ལས་རྣལ་འབྱོར་བཞི་ཇི་ལྟར་སྣང་ཚུལ་ལོ། །དང་པོ་ལ་གསུམ་སྟེ། སེམས་ཉིད་དེ་བཞིན་ཉིད་ཕུན་སུམ་ཚོགས་པར་ཡེ་ནས་བཀོད་ཚུལ། སྐུ་གསུམ་རྣམ་པར་དབྱེ་བ། ཐུགས་རྗེ་རང་བྱུང་གི་ཡེ་ཤེས་འཁོར་འདས་གཉིས་སུ་སྣང་ཚུལ་ལོ། །དང་པོ་ནི། ཀྱེ་སེམས་དཔའ་ཆེན་པོ་སྟོན་པ་ཀུན་བྱེད་ང་ཡི་སེམས་ཉིད་རང་བྱུང་གི་ཡེ་ཤེས་ཆོས་ཉིད་དེ་བཞིན་ཉིད་ལས་ནི་སྟོན་འཁོར་བསྟན་པ་སྟེ་ཕུན་སུམ་ཚོགས་པ་གསུམ་དུ་སྣང་བ་ཡིན་ཏེ། དེ་ལ་སྙིང་པོ་བྱང་ཆུབ་སེམས་ཀྱི་རང་བཞིན་དེ་ཉིད་གདོད་ནས་ཇི་ལྟར་གནས་པ་དེ་བཞིན་ཏུ་མ་སྐྱེས་མ་འགགས་པ་ཆོས་ཉིད་འདུས་མ་བྱས་པའི་རང་བཞིན་དུ་གནས་པ་ལ་ནི་ཆོས་ཉིད་དེ་བཞིན་ཉིད་དུ་བརྗོད་པ་ཡིན་ལ་དེ་ཉིད་རྟོགས་བྱའི་ཡུལ་དུ་སྣང་བའི་ཆ་ནས་བསྟན་པ་ཕུན་སུམ་ཚོགས་པར་བཞག་པ་སྟེ། དེ་ལྟ་བུའི་ཡུ ལ་དེ་འཁོར་འདས་ཀུན་གྱི་གནས་ལུགས་སམ་ཆོས་ཉིད་དེ་བཞིན་ཉིད་ཀྱི་རང་བཞིན་སྤྲོས་བྲལ་བློ་ལས་འདས་པ་ཡིན་པས་དེའི་ངོ་བོ་ཇི་བཞིན་པ་ནི་གཞན་གྱིས་ཚིག་དང་ཡི་གེས་མཚོན་ཏེ་བསྟན་དུ་མེད་པའི་ཕྱིར་ན། མ་ནོར་ངེས་པའི་སློབ་དཔོན་རིག་པ་རང་བྱུང་གི་ཡེ་ཤེས་ཀྱིས་རང་གི་རང་ལ་ངོ་བོ་དེ་བསྟན་པས་རྟོགས་པ་ཡིན་པར་གསུངས་ཏེ། དེ་ཉིད་ལས། དུས་གསུམ་སྟོན་པ་གང་གིས་ཀྱང་། །བསྟན་པའི་རང་བཞིན་འདི་ཡིན་ཞེས། །ཚིག་དང་ཡི་གེས་བརྗོད་པ་མེད། །མ་གསུངས་མི་གསུང་གསུང་མི་འགྱུར། །ཁྱེད་ཀྱི་རང་བཞིན་བསྟན་པའོ། །ཡེ་ཤེས་ཐུགས་ཀྱི་རིག་པ་ཡིས། །རང་གི་རང་བཞིན་ངོ་བསྟན་ཏེ། །དེ་མཐོང་བསྟན་པས་དེ་འདུས་པས། །དེ་ལ་དེ་བསྟན་དེ་ཡང་མཐོང་། །དེ་ནི་བསྟན་པ་ཞེས་སུ་བཤད། །ཅེས་གསུངས་སོ། །གཉིས་པ་ནི། དེ་ལྟ་བུའི་བསྟན་པ་ཕུན་སུམ་ཚོགས་པའི་རང་བཞིན་བྱང་ཆུབ་ཀྱི་སེམས་དེ་བཞིན་ཉིད་དུ་གནས་པ་དེ་ལ་རྒྱུ་འབྲས་ཀྱི་ཐེག་པ་བ་ཀུན་ཀྱང་བརྟགས་པར་བྱས་ནས་ཡུལ་ཆོས་ཀྱི་དབྱིངས་དེ་བཞིན་ཉིད་དེ་ལ་ལྟ་བར་བྱེད་པ་ལ། དེ་ཉིད་སྟོན་པ་པོའམ་རྟོགས་བྱེད་ཀྱི་ཡེ་ཤེས་མཐའ་ཐུག་པ་སེམས་ཉིད་འོད་གསལ་བའི་ངོ་བོ་ལས་དང་ཉོན་མོངས་ལ་སོགས་པ་གང་གིས་ཀྱང་མ་བསྒྲིབས་པའི་རང་བྱུང་གི་ཡེ་ཤེས་ཉིད་ཀྱི་རྩལ་ལས་ནི་རྒྱུ་འབྲས་ཀྱི་སྟོན་པ་སྐུ་གསུམ་དུ་སྣང་སྟེ། དེ་ལས། རང་རིག་ཡེ་ཤེས་རིག་པའི་རྒྱལ། །རང་བཞིན་རྣམ་པ་གསུམ་སྣང་སྟེ། །མི་གནས་སེམས་ཀྱི་རང་བཞིན་དང་། །རང་བྱུང་ཡེ་ཤེས་རང་བཞིན་ནི། །ཐུགས་རྗེ་སྤྲུལ་པའི་རང་བཞིན་ནོ། །བྱང་ཆུབ་སེམས་ཀྱི་རང་བཞིན་ནི། །མི་གནས་ཆོས་ཀྱི་སྐུ་རུ་བཞུགས། །རང་བྱུང་ཡེ་ཤེས་རང་བཞིན་ནི། །རྫོགས་པའི་ལོངས་སྤྱོད་སྐུ་རུ་བཞུགས། །ཐུགས་རྗེ་སྤྲུལ་པའི་རང་བཞིན་ནི། །རྣམ་པ་ཅིར་ཡང་སྤྲུལ་ཏེ་བཞུགས། །ཞེས་སོ། །དེ་ཡང་ཇི་ལྟར་སྣང་བའི་ཚུལ་ནི་ལ་ལ་སྟེ་སོ་སོའི་སྐྱེ་བོ་ལས་དག་པ་བ་རྣམས་ལ་མཚན་ཉིད་རྒྱུ་ཡི་ཆོས་སྟོན་པ་སྤྲུལ་སྐུའི་རྣམ་པར་སྣང་བ་དང་། གདུལ་བྱ་ལ་ལ་སྟེ་ས་ཐོབ་ཀྱི་འཕགས་པ་རྣམས་ལ་གཞི་འབྲས་དབྱེར་མེད་དམ་རྒྱུ་འབྲས་འབྲེལ་བའི་ཆོས་ཀྱི་སྟོན་པ་ལོངས་སྐུའི་རྣམ་པར་སྣང་བ་དང་། ས་ཐོབ་ཀྱི་སེམས་དཔའ་ལ་ལ་ཞེས་རྒྱུན་མཐའ་བ་རྣམས་དང་ཁྱད་པར་སངས་རྒྱས་རང་སྣང་གི་འཁོར་རྣམས་ལ་སེམས་ཉིད་ཡེ་ནས་སངས་རྒྱས་པའི་རང་བཞིན་འབྲས་བུའི་ངོ་བོར་སྟོན་པ་ཆོས་སྐུའི་རྣམ་པར་སྣང་བ་ཡིན་ཏེ། དེ་ཉིད་ལས། མི་གནས་ཆོས་སྐུར་བཞུགས་ཙམ་ན། །འཁོར་ཡང་བྱང་ཆུབ་སེམས་སུ་བཞུགས། །བྱང་ཆུབ་སེམས་ཀྱི་འཁོར་རྣམས་ལ། །སྤྲོས་པ་མེད་པའི་དོན་ཡང་སྟོན། །ལོངས་སྤྱོད་རྫོགས་སྐུར་བཞུགས་ཙམ་ན། །འཁོར་ཡང་བྱང་ཆུབ་སེམས་དཔའི་འཁོར། །བྱང་ཆུབ་སེམས་དཔའི་འཁོར་རྣམས་ལ། །སྐུ་དང་ཡེ་ཤེས་རྫོགས་པར་སྟོན། །སྣ་ཚོགས་སྤྲུལ་སྐུར་བཞུགས་ཙམ་ན། །འཁོར་ཡང་རྒྱུད་དྲུག་སེམས་ཅན་འཁོར། །རྒྱུད་དྲུག་སེམས་ཅན་འཁོར་རྣམས་ལ། །ཡིད་བཞིན་དབང་པོ་གང་འཐད་སྟོན། །ཅེས་གསུངས་སོ། །གསུམ་པ་ནི། དེ་བཞིན་ཉིད་རིག་པ་རང་བྱུང་གི་ཡེ་ཤེས་དེ་ཡི་ཐུགས་རྗེ་ཡི་རོལ་རྩལ་འགགས་པ་མེད་པའི་ཆ་མངོན་དུ་ཕྱུང་བ་ཡི་སྟོང་གསལ་འགགས་པ་མེད་པའི་རང་བྱུང་གི་ཡེ་ཤེས་རྣམ་པ་ལྔ་ལས་བྱུང་བའི་རིགས་ལྔས་བསྡུས་པའི་སངས་རྒྱས་རྣམས་དང་རྒྱུད་ལྔས་བསྡུས་པའི་སེམས་ཅན་རྣམས་ནི་རྒྱུ་འབྲས་ཀྱི་ཐེག་པ་རྣམས་བསྟན་པའི་ཡུལ་དང་། སྐུ་གསུམ་གྱི་སྟོན་པའི་འཁོར་དུ་སྣང་བ་ཡིན་ཏེ། དེ་ཉིད་ལས། སྟོན་པ་ཆོས་ཀྱི་སྐུ་འཁོར་ནི། །དུས་གསུམ་སངས་རྒྱས་བཞུགས་པ་དང་། །ཁམས་གསུམ་རྒྱུད་དྲུག་སེམས་ཅན་དེ། །འཕགས་པའི་ཐུགས་རྗེའི་སེམས་ཅན་ལ། །འབྲེལ་བ་ཕུན་སུམ་ཚོགས་པར་བཤད། །སྟོན་པ་ལོངས་སྤྱོད་སྐུའི་འཁོར་ནི། །མི་རྟོག་ཏིང་འཛིན་བཅུ་སྦྱངས་པའི། །ས་ལ་གནས་པའི་བྱང་ཆུབ་ས། །ཉོན་མོངས་མི་གནས་ཤེས་བྱ་སྦྱང་། །ཡེ་ཤེས་ཚོགས་དང་ཐུགས་རྗེ་འབྲེལ། །དེས་ན་ཕུན་སུམ་ཚོགས་ཅེས་བྱ། །སྟོན་པ་སྤྲུལ་བའི་སྐུ་འཁོར་ནི། །སྐུ་སྤྲུལ་ཐུགས་རྗེ་དྲུག་སྣང་བས། །འཁོར་ཡང་རྒྱུད་དྲུག་སེམས་ཅན་ནོ། །ལས་དང་ཐུགས་རྗེ་འབྲེལ་བ་ནི། །འཁོར་ནི་ཕུན་སུམ་ཚོགས་ཅེས་བྱ། །ཞེས་གསུངས་སོ། །གཉིས་པ་ནི། གོང་དུ་བཤད་པ་དེ་ལྟ་བུ་ཡི་འཁོར་གྱི་ཚོགས་རྣམས་ལ་རྒྱུ་དང་འབྲས་བུའི་ཆོས་རྣམས་གསལ་བར་མཛད་པའི་སྟོན་པ་སྐུ་གསུམ་གྱིས་ཆོས་ཉིད་དེ་བཞིན་ཉིད་ཀྱི་ངོ་བོ་ཡུལ་གཅིག་གི་རང་བཞིན་ལ་འཁོར་གྱི་གདུལ་བྱ་རྣམས་ཀྱི་ཁམས་དབང་གིས་ལྟ་བ་མཐོ་དམན་སོ་སོར་མི་འདྲ་བས་དེ་དག་རྗེས་སུ་འཛིན་ཕྱིར་གདུལ་བྱ་ལ་ལ་ཉན་ཐོས་ཀྱི་རིགས་ཅན་རྣམས་ཀུན་འབྱུང་ལས་ཉོན་གྱི་ཆ་རྣམས་སྤོང་བར་བསྟན་པ་དང་། རང་སངས་རྒྱས་ཀྱི་རིགས་ཅན་རྣམས་ལ་ལས་དང་ཉོན་མོངས་ཐམས་ཅད་རྟེན་འབྲེལ་ལུག་ལྡོག་གི་ཚུལ་གྱིས་འགེགས་པར་བྱེད་པའི་ཡུལ་དུ་བསྟན་པ་དང་། གདུལ་བྱ་ལ་ལར་སྟེ་བྱང་ཆུབ་སེམས་དཔའི་རིགས་ཅན་རྣམས་ལ་མ་དག་ཀུན་རྫོབ་ཀྱི་སྣང་བ་འཁྲུལ་བའི་ཆ་ཐམས་ཅད་ཆོས་དབྱིངས་སྐྱེ་བ་མེད་པའི་ངང་དུ་སྦྱོང་ཞིང་དག་པའི་སྒོ་ནས་ལམ་རིམ་གྱིས་བསྒྲོད་དེ་སངས་རྒྱས་པར་བསྟན་པ་དང་། གསང་སྔགས་ཀྱི་རིགས་ཅན་ལ་ལར་སྟེ་བྱེད་རྒྱུད་ཀྱི་ཐེག་པ་བ་རྣམས་ལ་མ་དག་སྒོ་གསུམ་གྱི་ཆ་ཐམས་ཅད་དག་པ་ལྷའི་སྐུ་གསུང་ཐུགས་སུ་བྱིན་གྱིས་རླབས་པས་དག་པའི་ངོ་བོར་སྒྲུབ་པར་བསྟན་པ་དང་། ལ་ལར་སྟེ་རྣལ་འབྱོར་གྱི་ཐེག་པ་བ་རྣམས་ལ་ལྟ་སྤྱོད་ཡང་དག་པ་བླང་ཞིང་དེའི་མི་མཐུན་ཕྱོགས་ཐམས་ཅད་དོར་བར་བྱ་བའི་ལམ་གྱིས་འབྲས་བུ་གྲུབ་པ་བསྟན་པ་དང་། ལ་ལར་སྟེ་གསང་སྔགས་བླ་མེད་ཀྱི་སྣོད་དུ་གྱུར་པ་རྣམས་ལ་རང་རྒྱུད་གདོད་ནས་དག་པ་ལྷའི་རང་བཞིན་དུ་གནས་པ་ཉིད་ལམ་བསྐྱེད་རྫོགས་ཟབ་མོས་མངོན་དུ་བསྒྲུབ་པར་བསྟན་པ་སྟེ། མདོར་ན་ལམ་དེ་དག་ཀུན་ཀྱང་རྒྱུ་ལམ་ལ་བརྩལ་ཞིང་འབྲས་བུ་བསྒྲུབ་ཏུ་ཡོད་པར་བསྟན་པ་ཡིན་པས་རྒྱུ་འབྲས་རྩོལ་སྒྲུབ་ལས་འདས་པའི་ཐེག་པ་ལས་གཞན་དུ་གྱུར་པ་ཡིན་ནོ། །གསུམ་པ་ནི། དེ་ལྟར་ཀུན་བྱེད་བྱང་ཆུབ་ཀྱིས་སེམས་ལས་མངོན་དུ་ཕྱུང་བའི་སྟོན་པ་སྐུ་གསུམ་གྱི་རྒྱུ་མཚན་ཉིད་ཀྱི་ཐེག་པ་དང་འབྲས་བུ་སྔགས་ཀྱི་རིགས་ཅན་རྣམས་ལ་དགོངས་ནས་དེ་དག་གི་བློ་དང་འཚམས་པར་རྒྱུ་འབྲས་ཀྱི་ཆོས་རྣམས་སོ་སོར་བསྟན་ན་ཡང་དོན་ལ་རྒྱུ་དང་འབྲས་བུ་རྣམ་པ་གཉིས་ཀ་ཉིད་ཀྱང་གང་ལས་སྣང་བའི་གཞི་ཆོས་ཉིད་དེ་བཞིན་ཉིད་ལས་གཡོས་པ་རྡུལ་ཙམ་ཡང་མེད་པར་སྟོན་པ་ཀུན་བྱེད་ང་ཡི་ལུང་བསྟན་ཏོ། །ཞེས་སོ། །བཞི་པ་ནི། དེ་ལྟ་བུའི་ཕུན་སུམ་ཚོགས་པ་ཀུན་གྱི་རང་བཞིན་ཆོས་ཉིད་དེ་བཞིན་ཉིད་དེ་རང་གི་ངོ་བོ་ནི་སྤྲོས་པ་ཐམས་ཅད་དང་བྲལ་ཞིང་དམིགས་པའི་ཡུལ་ལས་འདས་པས་དབྱེ་བ་མེད་ན་ཡང་། ཇི་སྐད་དུ། ཆོས་ཀྱི་དབྱིངས་ལ་དབྱེར་མེད་པས། །རིགས་ནི་ཐ་དད་རུང་མ་ཡིན། །བརྟེན་པའི་ཆོས་ཀྱི་བྱེ་བྲག་གིས། །དེ་ཡི་དབྱེ་བ་ཡོངས་སུ་བྱ། །ཞེས་གསུངས་པ་དང་། ཚུལ་མཐུན་པར་ཆོས་ཅན་སྣང་བའི་ངོས་ནས་དབྱེ་ན་འདི་ལྟ་སྟེ་རྒྱལ་བ་སྐུ་གསུམ་གྱི་སྟོན་པར་སྣང་བ་ཆོས་སྐུ་ཀུན་བྱེད་རྒྱལ་པོ་ང་ཡང་ཆོས་ཉིད་དེ་བཞིན་ཉིད་ཀྱི་རང་བཞིན་རིག་པ་བྱང་ཆུབ་ཀྱི་སེམས་སྐུ་གསུམ་འདུ་འབྲལ་མེད་པའི་ངོ་བོ་ཡིན་ལ། ངས་བྱས་འཁོར་འདས་ཀྱི་ཆོས་ཀུན་ཀྱང་དབྱིངས་སྤྲོས་པ་དང་བྲལ་བ་དེ་བཞིན་ཉིད་ཀྱི་ངང་ལས་རྩལ་སྣང་འགག་པ་མེད་པ་སྟོང་གཟུགས་སྒྱུ་མའི་ཆོ་འཕྲུལ་དུ་ཤར་བ་ཙམ་ཡིན་པས་དེ་ལས་གཞན་དུ་མེད་ལ། དེ་ལ་ཀུན་བྱེད་ཉིད་ཀྱིས་བྱས་པའི་ཆོས་དེ་སོ་སོར་དབྱེ་ན་གང་དང་གང་ཡིན་ཞེ་ན། ཕྱི་ཡུལ་གྱི་རྣམ་པར་སྣང་བ་གཟུགས་སྒྲ་ལ་སོགས་པ་དྲུག་པོ་རྣམས་ཀྱང་ཀུན་བྱེད་ང་ཡིས་བྱས་པ་ཡིན་ནོ་ཞེས་འདི་དག་ཐམས་ཅད་ཀུན་བྱེད་བྱང་ཆུབ་སེམས་ཀྱི་རྩལ་ལས་རོལ་བར་ཤར་བ་ཙམ་ཡིན་པས་དེ་ལྟར་གསུངས་པའི་ཚུལ་འདི་འོག་མ་རྣམས་ལ་ཡང་འདྲེ་བར་བྱས་ནས། དེ་བཞིན་དུ་མིག་ལ་སོགས་པའི་དབང་པོ་དྲུག་ཏུ་སྣང་བ་འདི་ནི་ང་ཡི་རང་སྣང་མ་འགག་པར་ཆོས་རྣམས་སྒྲིབ་མེད་མངོན་སུམ་དུ་རིག་ཅིང་ཤེས་པ་ཡི་ངོ་བོ་ཡིན་པ་དང་། མིག་གི་རྣམ་པར་ཤེས་པ་སོགས་རྣམ་པར་ཤེས་པའི་ཚོགས་རྣམས་ནི་ཀུན་བྱེད་ང་ཡི་རང་བྱུང་གི་ཡེ་ཤེས་ཀྱི་བདག་ཉིད་ཡིན་པ་དང་། འབྱུང་བ་ཆེན་པོ་ལྔ་ཡང་སྣོད་བཅུད་ཀུན་གྱི་བརྟེན་པའི་གཞི་དང་བསྐྱེད་པའི་རྒྱུ་རུ་གྱུར་པའི་ཕྱིར་སྣོད་བཅུད་ཐམས་ཅད་འདི་ལྔ་ཡི་རང་བཞིན་ལས་མ་འདས་པ་སྟེ་དེ་ལྟར་སྣོད་བཅུད་ཀུན་གྱི་རྒྱུ་འབྱུང་བ་ལྔ་ཡིན་ན་ཡང་འབྱུང་བ་དེ་དག་ཀྱང་བྱང་ཆུབ་ཀྱི་སེམས་དེ་བཞིན་ཉིད་ལས་གཞན་དུ་མེད་པ་དང་། ཐུགས་རྗེ་འགག་པ་མེད་པ་རང་བྱུང་གི་ཡེ་ཤེས་ལྔ་ཡི་རྩལ་ལས་ཁམས་གསུམ་རྒྱུད་དྲུག་གི་སེམས་ཅན་རྣམས་བྱུང་བ་ཡང་དེ་བཞིན་ཉིད་ཀྱི་ངོ་བོར་བཤད་པ་མ་གཏོགས་གཞན་དུ་རྡུལ་ཙམ་ཡང་མེད་དེ། ཀློང་ཆེན་ལས། ཀློང་ཆེན་གཅིག་པོ་ཀུན་ཡིན་པས། །ཐམས་ཅད་ཀུན་གྱི་དངོས་གཞིར་ཤར། །ཕྱོགས་འཛིན་གང་ཡང་མ་སྤངས་པས། །ཕྱོགས་མེད་ཀུན་ཏུ་ཤར་བ་ཡིན། །ཟང་ཐལ་ཡིན་པས་ཀུན་ཏུ་ཤར། །མུ་མཐའ་མེད་པ་ཆོས་ཀྱི་དབྱིངས། །ཞེས་གསུངས་པ་བཞིན་ནོ། །ལྔ་པ་ནི། འོ་ན་ཆོས་ཐམས་ཅད་ཆོས་ཉིད་དེ་བཞིན་ཉིད་གཅིག་གི་རང་བཞིན་ལས་མེད་ན་དེ་ལ་རྣལ་འབྱོར་རྣམ་པ་བཞི་ཡིས་སོ་སོའི་རྟོགས་ཚུལ་མི་འདྲ་བ་ཐ་དད་པ་རྣམས་ཇི་ལྟར་བྱུང་སྙམ་ན། དེ་བཞིན་ཉིད་ཀྱི་རང་བཞིན་ཆོས་དབྱིངས་སྤྲོས་པ་དང་བྲལ་བ་ཉིད་དེ་ངོ་བོ་གཉིས་སུ་གྲུབ་པ་མེད་པ་ཉིད་ནི་དམིགས་མཚན་བློ་ཡི་སྤྱོད་ཡུལ་ཀུན་ལས་འདས་པ་སྟེ། དེས་ན་རྣམ་པའི་དབྱེ་བ་ཐ་དད་ཀྱི་ཆོས་སུ་གྲུབ་པ་གང་ཡང་མེད་པར་རང་གི་རང་བཞིན་ནི་ཆོས་ཉིད་རང་བྱུང་ཡེ་ཤེས་གཅིག་ཏུ་གནས་པ་ཡིན་ཀྱང་དེ་ལ་རྣལ་འབྱོར་གྱི་ལམ་རྣམ་པར་བཞག་པ་བཞི་ཕྱུང་བ་ནི་རྣལ་འབྱོར་རྣམ་པ་བཞི་ཡི་རིགས་ཅན་གྱི་གདུལ་བྱ་རྣམས་ཀྱི་བསམ་པའི་དབང་ལས་དེ་ལྟར་བྱུང་བ་ཡིན་ནོ། །གཉིས་པ་རྣལ་འབྱོར་བཞིའི་དབྱེ་བ་ལ་གསུམ་སྟེ། རྣལ་འབྱོར་བཞི་སེམས་ཉིད་གཅིག་ལ་དབྱེ་བ། དབྱེ་བ་བཞིའི་རང་བཞིན་ངེས་པར་བྱ་བ། དེ་དོན་དབྱེ་བ་བཞི་བཞིས་རྒྱ་ཆེར་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་རྣལ་འབྱོར་རྣམ་པ་བཞི་ཡི་དབྱེ་བ་ལ་ཉོན་ཅིག་དེ་ལ་ཆོས་ཐམས་ཅད་ཀུན་གྱི་འབྱུང་གནས་སྙིང་པོ་བྱང་ཆུབ་ཀྱི་སེམས་ཡེ་ཇི་བཞིན་པར་གནས་པ་འདི་ནི་ཆོས་རྣམས་ཀུན་གྱི་ཆོས་ཉིད་དེ་བཞིན་ཉིད་མ་བཅོས་རྣལ་མའི་ངོ་བོ་སྟེ་གནས་ལུགས་ཇི་བཞིན་པ་ཡིན་ལ། དེ་ཉིད་སངས་རྒྱས་སྒམ་པོས་བཟང་དུ་མ་བཅོས་སེམས་ཅན་བསྒྲིམ་པོས་ངན་དུ་མ་བཅོས་པར་རང་གི་ངོ་བོ་ཇི་ལྟ་བ་དེ་བཞིན་ཉིད་དུ་ཡེ་ནས་གནས་པ་ཡིན་ཀྱང་། གདུལ་བྱ་གང་ཟག་རྣམས་ཀྱི་བློའི་རྩལ་འཕང་མི་འདྲ་བའི་དབང་གིས་ཤིན་ཏུ་རྣལ་འབྱོར་ཨ་ཏི་ཡོ་ག་དང་ཡོངས་སུ་རྣལ་འབྱོར་ཨ་ནུ་ཡོ་ག་དང་རྣལ་འབྱོར་ཆེན་པོ་མ་ཧཱ་ཡོ་ག་དང་སེམས་དཔའི་རྣལ་འབྱོར་ཕྱི་རྒྱུད་སྡེ་གསུམ་སྟེ། དེ་ལྟ་བུའི་རྣལ་འབྱོར་པ་རྣམ་པ་བཞིས་ཆོས་ཀུན་གྱི་སྙིང་པོ་དོན་གྱི་གནས་ཚུལ་རྣལ་མ་བྱ་བྲལ་ལྷུན་རྫོགས་ཆེན་པོ་སྤྲོས་པ་མེད་པའི་དབྱིངས་ལ་བལྟས་ཤིང་བརྟགས་པས་མཐོང་ཚུལ་མི་འདྲ་བའི་ཡུལ་ནི་རྣམ་པ་བཞི་རུ་བྱུང་བ་ཡིན་ནོ། །གཉིས་པ་ལ་གཉིས་ཏེ། ཡོ་ག་མ་ཧཱ་ཨ་ནུ་གསུམ་གྱིས་རྣལ་མའི་དོན་མི་རྟོགས་པར་བཤད་པ་དང་། ཨ་ཏི ས་མ་བཅོས་རྣལ་དུ་འབྱོར་བའི་ངོ་བོར་བཤད་པའོ། །དང་པོ་ནི། དེ་ལ་སེམས་དཔའི་རྣལ་འབྱོར་སྔགས་ཕྱི་པ་གསུམ་གྱིས་ནི་ཆོས་ཉིད་དོན་དམ་པའི་གནས་ལུགས་ལ་ཕྱི་ནང་སྣོད་བཅུད་ཀྱི་སྣང་བ་འདི་ཐམས་ཅད་དོན་དམ་མཚན་མ་མེད་པའི་བྱིན་རླབས་ལས་སྣང་བ་ཡིན་པས་རིགས་གསུམ་ལྷའི་ངོ་བོའམ་འོག་མིན་རྡོ་རྗེ་དབྱིངས་ཀྱི་དཀྱིལ་འཁོར་དུ་ལྟ་བ་ཡིན་ཏེ། གལ་པོ་ལས། ཡོ་གའི་ཐེག་པར་གནས་འདོད་པས། །འོག་མིན་རྡོ་རྗེ་དབྱིངས་སུ་ལྟ། །ཞེས་གསུངས་པ་ལྟར་འདོད་པ་ཡིན་མོད། འོན་ཀྱང་སྣང་ཚུལ་འཁྲུལ་བའི་ངོས་ནས་ཕྱི་ཡུལ་དང་ནང་དབང་པོར་འབྲེལ་བའི་གཟུང་འཛིན་མ་དག་པའི་ཆོས་སུ་མཐོང་ནས་མངོན་པར་བྱང་ཆུབ་པ་ལྔ་དང་ཆོ་འཕྲུལ་རྣམ་པ་བཞིས་སྣོད་བཅུད་ཐམས་ཅད་དག་པ་ལྷའི་སྐུ་གསུང་ཐུགས་སུ་བསྒོམས་ཞིང་བྱིན་གྱིས་བརླབས་ནས་བདག་དམ་ཚིག་སེམས་དཔའི་ངོ་བོར་གནས་པ་དང་ལྷ་ཡེ་ཤེས་པ་གཉིས་བཟང་ངན་ཅན་དུ་ལྟ་བར་བྱེད་པ་དེས་ནི་སྙིང་པོ་དོན་གྱི་གནས་ལུགས་རྣལ་མ་བཟང་ངན་བླང་དོར་མེད་པའི་ཚུལ་མཐོང་བ་མེད་པས། དེ་འདྲེའི་བཟང་ངན་བླང་དོར་དུ་ལྟ་བ་དེ་བོར་ལ་གནས་ལུགས་མ་བཅོས་པ་ཆོས་ཉིད་དེ་བཞིན་ཉིད་ཀྱི་ངང་དུ་སེམས་དཔའ་ཡི་རྣལ་འབྱོར་རྣམས་ཀྱིས་ཞོག་ཅིག་ཅེས་གདམས་སོ། །ཡང་དོན་གྱི་སྙིང་པོ་རྣལ་མ་བྱ་རྩོལ་མེད་པ་ལ་རྣལ་འ བྱོར་ཆེན་པོ་མ་ཧཱ་ཡོ་ག་བ་རྣམས་ཀྱིས་མཐོང་བ་ནི་ཡེ་ནས་རང་རྒྱུད་དག་པའི་ངོ་བོ་གདན་གསུམ་ལྷའི་དཀྱིལ་འཁོར་དུ་གནས་པ་ལ། དེ་ཉིད་མངོན་དུ་བྱེད་པའི་ཐབས་སུ་རྒྱུ་ཏིང་ངེ་འཛིན་རྣམ་པ་གསུམ་ལས་འབྲས་བུ་ལྷ་ཡི་དཀྱིལ་འཁོར་རྫོགས་པར་བསྒོམས་པར་བྱས་ཏེ་བསྒྲུབ་པ་ལ་བསྙེན་པ་དང་ཉེ་བསྙེན་སྒྲུབ་པ་དང་སྒྲུབ་ཆེན་བཞི་ཡི་ཡན་ལག་རྫོགས་པར་བྱས་ནས་འོད་ཟེར་འཕྲོ་འདུ་སོགས་ཀྱིས་བདག་ཉིད་ཡེ་ནས་གཞི་རྒྱུད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ་བཞུགས་པ་ཉིད་མངོན་དུ་འགྲུབ་པར་ལྟ་བ་དེས་ཀྱང་ཆོས་ཉིད་དོན་གྱི་སྙིང་པོ་རྣལ་མ་རྩོལ་སྒྲུབ་ལས་འདས་པའི་དོན་ནི་མཐོང་བ་མེད་པའི་ཕྱིར་ན། མ་བཅོས་དེ་བཞིན་ཉིད་ཀྱི་ངང་དུ་རྣལ་འབྱོར་ཆེན་པོ་ཡི་དགོངས་པ་དེ་ཉིད་ཞོག་ཅིག །དེ་བཞིན་དུ་གནས་ལུགས་དོན་གྱི་སྙིང་པོ་མ་བཅོས་དེ་བཞིན་ཉིད་ཀྱི་རང་བཞིན་རྣལ་མ་རྒྱུ་འབྲས་བྱ་རྩོལ་མེད་པ་ཉིད་ལ་ཡོངས་སུ་རྣལ་འབྱོར་ཨ་ནུ་ཡོ་ག་བ་རྣམས་ཀྱིས་མཐོང་བ་ནི། དབྱིངས་སྐྱེ་མེད་སྤྲོས་པ་དང་བྲལ་བ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར་ནི་གནས་ལུགས་སྙིང་པོ་མ་བཅོས་པའི་རྣལ་མ་ངོ་བོ་རྟོགས་བྱའི་ཡུལ་ལམ་རྒྱུར་མཐོང་ལ། དེས་སྣང་ཆ་ཡེ་ཤེས་ཆེན་པོ་ཀུན་ཏུ་བཟང་པོ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ནི་ཡུལ་ཇི་བཞིན་པ་རྟོགས་པའི་རྣལ་མའི་འབྲས་བུར་མཐོང་བ་སྟེ་དེ་ལྟར་སྙིང་པོ་རང་བྱུང་གི་ཡེ་ཤེས་དེ་བཞིན་ཉིད་གཅིག་ལ་རྒྱུ་འབྲས་གཉིས་སུ་མཐོང་བ་ལ་ཨ་ནུ་ཡོ་ག་བས་ཀྱང་རྒྱུ་འབྲས་གཉིས་ལས་འདས་པའི་ཆོས་ཉིད་རྣལ་མ་མ་བཅོས་པའི་དོན་ནི་མཐོང་བ་མེད་པའི་ཕྱིར་ན། རྒྱུ་འབྲས་རྩོལ་སྒྲུབ་ལས་འདས་པ་མ་བཅོས་དེ་བཞིན་ཉིད་ཀྱི་ངང་དུ་ཡོངས་སུ་རྣལ་འབྱོར་པ་རྣམས་ཀྱིས་ཞོག་ཅིག་ཅེས་སོ། །གཉིས་པ་ནི། གནས་ལུགས་དོན་དམ་གྱི་བདེན་པ་ཆོས་རྣམས་ཀུན་གྱི་སྙིང་པོ་རྣལ་མ་བྱ་རྩོལ་གྱིས་བཅོས་སུ་མེད་པ་ལ་ཤིན་ཏུ་རྣལ་འབྱོར་ཨ་ཏི་ཡོ་ག་བ་རྣམས་ནི་རང་བྱུང་འདུས་མ་བྱས་པའི་ཡེ་ཤེས་སྐུ་གསུམ་ཡེ་ནས་ལྷུན་རྫོགས་ཆེན་པོ་ལ་སྤང་བླང་བཅོས་བསྒྱུར་སྤུ་ཙམ་མི་དགོས་པར་ཡེ་གྲོལ་བསལ་བཞག་མེད་པའི་ལྟ་བ་བློ་འདས་རྫོགས་པ་ཆེན་པོའི་རང་བཞིན་དུ་མཐོང་བ་དེས་བྱང་ཆུབ་ཀྱི་སེམས་ནི་ཆོས་ཀུན་གྱི་ཆོས་ཉིད་དམ་སྙིང་པོར་མཐོང་ཞིང་། སྙིང་པོ་དེ་ཉིད་བླང་དོར་རྩོལ་སྒྲུབ་ལ་སོགས་པ་གཉེན་པོ་གང་གིས་ཀྱང་མ་བཅོས་པའི་དོན་གྱི་གནས་ལུགས་རྣལ་མར་མཐོང་བས་ན ། དེ་ནས་གཞན་དུ་ལྟ་བ་ཞིག་ཡེ་ནས་བསྒོམ་དུ་མེད་པར་ཐག་ཆོད་པས་ལྷུན་འབྱམས་ཡངས་པ་ཆེན་པོར་རང་བབས་སུ་བཞག་པ་ལས་གཞན་པའི་སྒོམ་བྱ་ཅི་ཡང་མེད་པ་དང་། ཆོས་ཉིད་མཉམ་པ་ཉིད་ཀྱི་དོན་ལ་དམ་ཚིག་བསྲུང་མཚམས་ལས་འདས་པས་ཡེ་ནས་བསྲུང་དུ་མེད་པར་བཞག་པ་དང་། ཐམས་ཅད་ཡེ་ནས་རང་བྱུང་ཡེ་ཤེས་ཆེན་པོའི་ངོ་བོར་སངས་རྒྱས་པ་ལ་བྱ་བྱེད་ཀྱི་རྩོལ་བ་མི་མངའ་བས་ཕྲིན་ལས་ཡེ་ནས་བཙལ་དུ་མེད་པར་ཤེས་པས་མ་བཅོས་རང་བབས་སུ་བཞག་པས་མཚོན་རང་བཞིན་བཅུ་པོ་ཀུན་ལ་རྩོལ་ཞིང་བསྒྲུབ་ཏུ་མེད་པར་རྟོགས་པ་སྟེ། དེ་ལྟར་སྒོམ་སྒྲུབ་སྤང་བླང་གི་རྩོལ་བ་སྤུ་ཙམ་མེད་པར་རང་བབས་རང་གནས་སུ་བཞག་པས་ཆོས་ཉིད་དེ་བཞིན་ཉིད་ཀྱི་གནས་ལུགས་ལ་ཇི་ལྟ་བ་བཞིན་དུ་རྣལ་དུ་འབྱོར་བ་ཡིན་པས་འདི་ནི་རྣལ་འབྱོར་ཀུན་གྱི་ནང་ནས་རྣལ་འབྱོར་གྱི་དབང་ཕྱུག་ཆེན་པོ་བླ་ན་མེད་པ་སྟེ། དོན་གསལ་ལས། རྣལ་འབྱོར་ཆེན་པོ་བསྒོམ་ལས་འདས་པར་རྟོགས། །རྟོགས་པའི་དོན་ལ་བྱ་རྩོལ་མི་མངའ་བར། །རང་གདངས་ཆེན་པོའི་ངང་ལ་གནས་པ་ནི། །རྣལ་འབྱོར་དབང་ཕྱུག་ཆེན་པོ་བྱ་རྩོལ་འདས་པ་ཡིན། །ཅེས་སོ། །གསུམ་པ་དེ་དོན་དབྱེ་བ་བཞི་བཞིས་རྒྱ་ཆེར་བཤད་པ་ལ་བཞི་སྟེ། སེམས་དཔའི་རྣལ་འབྱོར། རྣལ་འབྱོར་ཆེན་པོ། ཡོངས་སུ་རྣལ་འབྱོར་ཤིན་ཏུ་རྣལ་འབྱོར་གྱི་དོན་རྣལ་འབྱོར་བཞི་ལྡན་དུ་རྒྱ་ཆེར་བཤད་པའོ། །དང་པོ་ནི། དེ་ལ་རྣལ་འབྱོར་རྣམ་པ་བཞི་པོའི་ལྟ་བའི་བྱེ་བྲག་སོ་སོར་དབྱེ་བ་ནི་ཡུལ་སེམས་ཉིད་རང་བྱུང་གི་ཡེ་ཤེས་དེ་བཞིན་ཉིད་གཅིག་ཡིན་པ་ལ་བློ་རྣལ་དུ་འབྱོར་ཚུལ་གྱི་སྒོ་ནས་རྣམ་པ་བཞི་ཡོད་པ་དེ་རེ་རེ་ལ་ཡང་ནང་གསེས་སུ་བཞི་བཞིར་དབྱེ་བ་ཡི་ཚུལ་ནི་འདི་ལྟར། དང་པོ་སེམས་དཔའི་རྣལ་འབྱོར་ལ་ནང་གི་བྱེ་བྲག་ཏུ་རྣལ་འབྱོར་རྣམ་པ་བཞིར་དབྱེ་བ་ནི། ཕྱི་ཡུལ་དང་ནང་དབང་པོ་སོགས་ཆོས་ཐམས་ཅད་སྟོང་ཉིད་སྤྲོས་པ་དང་བྲལ་བ་དོན་དམ་མཚན་མ་མེད་པའི་རང་བཞིན་དུ་གཏན་ལ་ཕབས་ནས་ཆོས་ཉིད་རྣམ་པར་མི་རྟོག་པའི་དོན་ལ་གཅིག་ཏུ་སེམས་པར་བྱེད་པའི་རྒྱུ་མཚན་ངེས་ན་སེམས་དཔའི་རྣལ་འབྱོར་ཉིད་དུ་བཤད་པ་ཡིན་ལ། དེ་ལྟ་བུའི་དོན་དམ་མཚན་མ་མེད་པའི་སྣང་ཆ་ཀུན་རྫོབ་ཀྱི་སྣང་བ་ཐམས་ཅད་མངོན་པར་བྱང་ཆུབ་པ་ལྔ་ཡི་སྒོ་ནས་འོག་མིན་རྡོ་རྗེ་དབྱིངས་ཀྱི་དཀྱིལ་འཁོར་དུ་བསྒོམས་པ་ལ་གནས་གསུམ་བྱིན་གྱིས་བརླབས་པ་དང་ཏིང་འཛིན་བྱིན་རླབས་དབང་བསྐུར་མཆོད་པ་སྟེ་ཆོ་འཕྲུལ་བཞི་མངོན་དུ་འབྱིན་ཅིང་བསྒོམ་པ་རྣམས་ནི་བསྐྱེད་པའི་ཆར་གྱུར་པ་ཡིན་པས་དེ་ཡི་ཆ་ནས་ནི་རྣལ་འབྱོར་ཆེན་པོ་ཞེས་སུ་བཤད་པ་དང་། སྐུ་གསུང་ཐུགས་ཕྲིན་ལས་ཏེ་ཕྱག་རྒྱ་ཆེན་པོ་བཞི་དང་ལྡན་པས་སྒོ་གསུམ་བྱ་བ་དང་བཅས་པ་ལྷའི་སྐུ་གསུང་ཐུགས་ཕྲིན་ལས་དང་བཅས་པར་ཡོངས་སུ་བསྒྱུར་བར་བྱེད་པ་ལ་ནི་ཡོངས་སུ་རྣལ་འབྱོར་ཞེས་སུ་བཤད་པ་ཡིན་ལ། མཐར་རིལ་འཛིན་དང་རྗེས་གཞིག་གང་རུང་གི་ལྷ་ཡེ་ཤེས་པ་དང་བདག་དམ་ཚིག་པ་གཉིས་ཀ་རང་བཞིན་མེད་པ་མི་དམིགས་སྤྲོས་པ་དང་བྲལ་བའི་ལྟ་བ་ཡི་ངང་ལ་འཇོག་པ་ནི་ཤིན་ཏུ་རྣལ་འབྱོར་གྱི་དགོངས་པ་ཡིན་པར་སེམས་དཔའ་ཡི་རྣལ་འབྱོར་རྣམས་བཞེད་དོ། །དེ་ལྟ་བུའི་སེམས་དཔའི་རྣལ་འབྱོར་བ་དེ་ཉིད་འཁོར་འདས་དང་གཙང་རྨེ་ལ་སོགས་པའི་བླང་དོར་གཉིས་སུ་ལྟ་བ་ཡིན་པས་ན་བླང་དོར་མེད་པའི་རྣལ་འབྱོར་ཆོས་ཉིད་ཇི་བཞིན་པའི་དོན་དེ་མ་མཐོང་བར་གསུངས་པའོ། །གཉིས་པ་ནི། དེ་བཞིན་དུ་རྣལ་འབྱོར་ཆེན་པོ་མ་ཧཱ་ཡོ་ག་ལ་ནང་གསེས་ཀྱི་བྱེ་བྲག་བཞིར་དབྱེ་བ་ནི་གང་ཞེ་ན། དང་པོར་སྟོང་ཆེན་དེ་བཞིན་ཉིད་དང་ཀུན་སྣང་སྙིང་རྗེ་ཆེན་པོ་དང་རྒྱུ་ཡི་ཡི་གེ་བསྒོམ་པ་སྟེ་ཏིང་འཛིན་རྣམ་པ་གསུམ་གྱི་དོན་ལ་སེམས་པར་བྱེད་པ་ལ་ནི་སེམས་དཔའི་རྣལ་འབྱོར་ཞེས་སུ་བཤད་པ་ཡིན་ལ། རང་རྒྱུད་ཀྱི་ཕུང་ཁམས་གཤེགས་པ་གཤེགས་མ། དབང་ཡུལ་སེམས་དཔའ་སེམས་མ། ཡན་ལག་ཁྲོ་བོ་ཁྲོ་མོའི་རང་བཞིན་དུ་དག་པས་ཡེ་ཤེས་ཀྱི་ལྷའི་ངོ་བོ ར་ལྟ་བར་བྱེད་པ་ཡི་ཆ་ནས་རྣལ་འབྱོར་ཆེན་པོ་ཞེས་སུ་བཤད་པ་དང་། དེ་ནས་བསྙེན་སྒྲུབ་རྣམ་པ་བཞི་ཡི་ཡན་ལག་ཡོངས་སུ་རྫོགས་པར་བྱེད་པ་ནི་ཡོངས་སུ་རྫོགས་པའི་རྣལ་འབྱོར་ཞེས་སུ་བཤད་པ་ཡིན་ལ། ཆོས་ཐམས་ཅད་བདག་ཉིད་ཆེན་པོར་གཏན་ལ་འབེབ་པའི་གཏན་ཚིགས་ལྟ་བུའི་རང་བྱུང་ཡེ་ཤེས་གཅིག་གི་རང་བཞིན་དུ་ལྟ་བ་ལ་ནི་ཤིན་ཏུ་རྣལ་འབྱོར་ཞེས་སུ་བཤད་པ་ཡིན་མོད། འོན་ཀྱང་གནས་ཚུལ་ལ་དེ་ལྟར་འདོད་པ་ལས་སྣང་ཚུལ་ལ་མ་དག་དྲི་མའི་ཆ་ཚོགས་བརྒྱད་ཡུལ་དང་བཅས་པ་སྦྱངས་བྱར་བལྟས་ཏེ། དེ་ཉིད་སྦྱོངས་པའི་རྩོལ་སྒྲུབ་ལ་གནས་པས་རྒྱུ་འབྲས་རྩོལ་སྒྲུབ་ལས་འདས་པའི་ཆོས་ཉིད་རྣལ་མ་ཇི་བཞིན་དུ་མཐོང་བ་མིན་ནོ། །གསུམ་པ་ནི། ཡོངས་སུ་རྣལ་འབྱོར་ཨ་ནུ་ཡོ་ག་ལ་ཡང་བྱེ་བྲག་བཞིར་ལྟ་བ་གང་ཞེ་ན། འདི་ལྟར་མ་ཧཱ་ཡོ་ག་ལྟར་དུ་ཏིང་འཛིན་རྣམ་གསུམ་སོགས་ཀྱི་རིམ་པས་བདག་ཉིད་ལྷའི་སྐུར་མི་བསྐྱེད་པར་ཆོས་ཉིད་བྱང་ཆུབ་སེམས་ཀྱི་ཀློང་ན་རང་རྒྱུད་མ་དག་པ་རྡུལ་ཙམ་ཡང་མེད་པར་ཆོས་ཐམས་ཅད་དཀྱིལ་འཁོར་གསུམ་གྱི་རང་བཞིན་དུ་དག་པར་བཞུགས་པའི་ཚུལ་ལ་སེམས་པར་བྱེད་པའི་ཕྱིར་ན་དེ་ཙམ་གྱི་སྒོ་དང་བསྟུན་ནས་སེམས་དཔའི་རྣལ་འབྱོར་ཞེས་སུ་བཤད་པ་ཡིན་ལ། གོང་དུ་བཤད་པའི་ཏིང་འཛིན་རྣམ་གསུམ་སོགས་ཀྱིས་དང་པོར་གཙོ་བོ་ཡབ་ཡུམ་བསྐྱེད་པ་དང་། དེ་ནས་ཡབ་ཡུམ་གཉིས་ཐབས་དང་ཤེས་རབ་མཉམ་པར་སྦྱོར་བའི་སྒོ་ནས་འཁོར་གྱི་ལྷ་ཚོགས་བསྐྲུན་པ་ལྟ་བུའི་རྩོལ་བ་ཆེན་པོ་ལ་མི་ལྟོས་པར། ལྷའི་སྙིང་པོ་རྩ་སྔགས་བརྗོད་པ་ཙམ་གྱིས་དཀྱིལ་འཁོར་ཡོངས་སུ་རྫོགས་པར་བསྒོམས་པའི་ཕྱིར་ན། རྣལ་འབྱོར་ཆེན་པོའི་དགོངས་པ་དང་མཐུན་པར་བཤད་པ་ཡིན་ནོ། །རྩ་རླུང་གི་བྱེད་པ་སོགས་ལ་བརྟེན་ནས་མ་དག་ཐ་མལ་གྱི་སྣང་བ་ཐམས་ཅད་གདོད་ནས་རང་བཞིན་མེད་པའི་ཆོས་ཉིད་བདེ་བ་ཆེན་པོའི་ཀློང་དུ་སྦྱོངས་ཞིང་དག་པའི་རང་བཞིན་དུ་སྤྱོད་པས་ཡོངས་སུ་རྣལ་འབྱོར་ཉིད་དུ་བཤད་པ་དང་། ཇི་ལྟར་སྣང་བའི་ཆོས་རྣམས་ཐམས་ཅད་ཀུན་རྒྱུ་དབྱིངས་དང་འབྲས་བུ་ཡེ་ཤེས་གཉིས་དབྱེར་མེད་པ་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་དུ་ལྟ་བའི་ཕྱིར་ན་ཤིན་ཏུ་རྣལ་འབྱོར་ཞེས་སུ་བཤད་པ་ཡིན་མོད། དེས་ཀྱང་རྒྱུ་འབྲས་ལས་འདས་པའི་དོན་རྣལ་མ་ཇི་བཞིན་པ་མཐོང་བ་མིན་ཏེ་རྒྱུ་འབྲས་གཉིས་སུ་ལྟ་བ་དང་བཅས་པའི་ཕྱིར་རོ། །བཞི་པ་ནི། ཐེག་པའི་ཡང་རྩེ་ཤིན་ཏུ་རྣལ་འབྱོར་ཨ་ཏི་ཡོ་ག་ལ་བྱེ་བྲག་ཏུ་རྣལ་འབྱོར་རྣམ་པ་བཞི་རུ་དབྱེ་བ་ནི་རིག་པ་བྱང་ཆུབ་ཀྱི་སེམས་གཅིག་ལ་ལྡོག་ཆས་དབྱེ་བ་སྟེ། དེ་ཡང་སེམས་པའི་རྣལ་འབྱོར་གྱི་སྐབས་སུ་དག་པ་ལྷའི་སྐུ་གསུང་ཐུགས་གསུམ་དང་མ་དག་ཐ་མལ་གྱི་སྒོ་གསུམ་ལ་བླང་དོར་གཉིས་སུ་ལྟ་བ་དེ་དོན་བླང་དོར་མེད་པའི་གནས་ལུགས་བྱང་ཆུབ་ཀྱི་སེམས་གཅིག་གི་བདག་ཉིད་ཡིན་པ་དེ་ཡི་ཆ་ནས་ནི་སེམས་དཔའི་རྣལ་འབྱོར་ཞེས་སུ་བཤད་པ་ཡིན་ལ། རྣལ་འབྱོར་ཆེན་པོས་བསྙེན་སྒྲུབ་རྣམ་བཞི་སོགས་ཀྱི་ལམ་ལ་རྩོལ་སྒྲུབ་བྱེད་པ་དེ་ཡང་ཨ་ཏིའི་རྩོལ་སྒྲུབ་ལས་འདས་པའི་བྱང་ཆུབ་སེམས་ཀྱི་རང་བཞིན་དུ་བསྟན་པ་དེ་ལ་ནི་རྣལ་འབྱོར་ཆེན་པོ་ཞེས་སུ་བཤད་པ་ཡིན་ནོ། །ཨ་ནུས་རྒྱུ་དབྱིངས་དང་འབྲས་བུ་ཡེ་ཤེས་གཉིས་སུ་ལྟ་བ་དེ་ཡང་འདིར་རྒྱུ་འབྲས་གཉིས་ལས་འདས་པའི་བྱང་ཆུབ་སེམས་ཀྱི་རང་བཞིན་སྤྲོས་བྲལ་ཐིག་ལེ་ཉག་གཅིག་ཏུ་རྟོགས་པ་དེ་ཡི་ཆ་ནས་ནི་ཡོངས་སུ་རྣལ་འབྱོར་ཞེས་སུ་བཤད་པ་ཡིན་ནོ། །ཆོས་ཐམས་ཅད་གདོད་ནས་ཡེ་གྲོལ་ཀ་དག་ཆེན་པོ་ཡིན་མིན་གང་གི་ཕྱོགས་སུ་སྒྲོ་དང་སྐུར་བ་འདེབས་པ་སོགས་མཚན་འཛིན་རྟོགས་པ་ཀུན་ལས་འདས་པའི་དབྱིངས་སུ་ལ་བཟླ་བའི་ཕྱིར་ན་ཤིན་ཏུ་རྣལ་འབྱོར་ཞེས་སུ་ཀུན་བྱེད་རྒྱལ་པོ་ང་ཡིས་བཤད་པ་ཡིན་ནོ། །དེ་ལྟ་བུའི་ཡོ་ག་བཞི་པོ་དེ་དག་ཆེ་བ་ལྔ་དང་སྦྱར་ན་ཆེ་བ་ཉི་ཤུར་དབྱེ་བར་གསུངས་ཏེ། དེ་ཡང་སངས་རྒྱས་མེད་པའི་ཆེ་བ་བཞི་ནི་ཡོ་ག་བཞི་ཡི་ལ་བཟླ་བཞི་དང་། མངོན་པར་སངས་རྒྱས་པའི་ཆེ་བ་བཞི་ནི། ཡོ་ག་བཞི་ཡི་ཨ་ཏི་བཞི་དང་། ཆོས་ཀྱི་དབྱིངས་སུ་སངས་རྒྱས་པའི་ཆེ་བ་བཞི་ནི། ཡོ་ག་བཞི་ཡི་ཨ་ནུ་བཞི་དང་། བདག་ཉིད་ཆེན་པོར་སངས་རྒྱས་པའི་ཆེ་བ་བཞི་ནི་ཡོ་ག་བཞི་ཡི་མ་ཧཱ་བཞི་དང་། དེ་ཡིན་པར་སངས་རྒྱས་པའི་ཆེ་བ་བཞི་ནི་ཡོ་ག་བཞི་ཡི་ཡོ་ག་བཞི་རུ་གསུངས་ཏེ། མདོ་བཅུ་ལས། སངས་རྒྱས་མེད་པའི་ཆེ་བཞི་ནི། །ཡོ་ག་བཞི་ཡི་ལ་བཟླའོ། །མངོན་པར་སངས་རྒྱས་ཆེ་བཞི་ནི། །ཡོ་ག་བཞི་ཡི་ཨ་ཏི་བཞི། །ཆོས་དབྱིངས་སངས་རྒྱས་ཆེ་བཞི་ནི། །ཡོ་ག་བཞི་ཡི་ཨ་ནུ་བཞི། །བདག་ཉིད་སངས་རྒྱས་ཆེ་བཞི་ནི། །ཡོ་ག་བཞི་ཡི་མ་ཧཱ་བཞི། །དེ་ཡིན་སངས་རྒྱས་ཆེ་བཞི་ནི། །ཡོ་ག་བཞི་ཡི་ཡོ་ག་བཞིའོ། །ཞེས་གསུངས་ལ། དེ་ཡང་ཆེ་བ་ལྔ་ལ་གནས་སྐབས་འགྱུར་བའི་ཆེ་བ་དང་། མཐར་ཐུག་ངེས་པའི་ཆེ་བ་གཉིས་སུ་ཡོད་པ་ལས་འདིར་ཡོ་ག་བཞི་ལ་སོ་སོར་སྦྱར་བ་ནི་གནས་སྐབས་འགྱུར་བའི་ཆེ་བ་དང་རྫོགས་པ་ཆེན་པོའི་ཐུན་མིན་གྱི་ཆེ་བ་ལྔ་ནི་མཐར་ཐུག་གི་ཆེ་བ་ཡིན་པར་ཤེས་པར་བྱ་སྟེ། དོན་གསལ་ལས། གནས་སྐབས་འགྱུར་བའི་ཆེ་བ་རྣམས། །ཐེག་པ་སོ་སོའི་ཆེ་བ་ཡིན། །མཐར་ཐུག་ཆེ་བ་རྣམ་པ་ལྔ། །ཡེ་ནས་འདུ་འབྲལ་མེད་པ་ཡིན། །ཅེས་གསུངས་སོ། །གསུམ་པ་རྣལ་འབྱོར་གོང་འོག་གི་ཁྱད་པར་བཤད་པ་ལ་གཉིས་ཏེ། རྣལ་འབྱོར་གོང་མ་གསུམ་གྱིས་སེམས་ཉིད་རྣལ་མའི་དོན་ཅིག་ཆར་དུ་མི་རྟོགས་པ་དང་། ཨ་ཏིས་རྟོགས་པའི་ཚུལ་བསྟན་པའོ། །དང་པོ་ནི་དེ་ལྟ་བུའི་རྣལ་འབྱོར་རྣམ་པ་བཞི་ལས་ཡོངས་སུ་རྣལ་འབྱོར་ལ་སོགས་པ་འོག་མ་གསུམ་པོ་ལ་ཡེ་ནས་འཁྲུལ་མ་མྱོང་བའི་རང་བྱུང་ཡེ་ཤེས་ཆེ་བའམ་ཆེན་པོ་བཅོས་བསྒྱུར་སྤུ་ཙམ་མི་དགོས་པར་བཞུགས་པའི་ཚུལ་ད་ལྟ་ཐད་ཀར་དུ་ངོ་སྤྲོད་པར་བྱེད་པའི་མན་ངག་དང་མི་ལྡན་པས་ལམ་ལྔ་ལ་རིམ་གྱིས་བསྒྲོད་པར་བྱེད་ཅིང་འགྱུར་བ་མ་ངེས་པའི་ས་ལ་སོགས་པ་སོ་སོའི་གཞུང་ནས་གསུངས་པའི་ས་རྣམས་ལ་རང་རང་གི་ངོ་སྐལ་གྱི་སྒྲིབ་པ་སྦྱོང་བར་བྱེད་པ་དང་། ལམ་གྱི་གྲོགས་སུ་དམ་ཚིག་གི་རིམ་པ་རྣམས་མི་ཉམས་པར་ཚུལ་བཞིན་དུ་བསྲུང་བ་དང་། རང་རང་གིས་ཇི་ལྟར་གཏན་ལ་ཕབ་པའི་ལྟ་བ་དེའི་ངང་དུ་སེམས་གནས་ཐབས་དགུ་ལ་སོགས་པས་སྒོམ་པར་བྱེད་པ་ཡིན་པས་ན། འདི་ལྟར་ཨ་ཏི་ཡོ་གའི་ལམ་གྱི་གོམ་པ་དྲག་དལ་ཞེས་པ་ཅིག་ཆར་གྱི་དོན་ཡིན་པས་སྐད་ཅིག་གཅིག་གིས་བྱེ་བྲག་བྱེད་པས་ཤུགས་དྲག་ཅིང་རླབས་ཆེ་བ་དང་རྩོལ་སྒྲུབ་ཀྱི་ངལ་བ་མེད་པར་བྱར་མེད་བག་ཡོངས་སུ་གནས་པས་དལ་བའི་རང་བཞིན་གྱི་ལྟ་སྤྱོད་ཁྱད་པར་ཅན་དེ་འདྲ་བ་ཡོད་པ་མ་ཡིན་པར་གསུངས་སོ། །གཉིས་པ་ནི། རྣལ་འབྱོར་འོག་མ་གསུམ་གྱིས་སེམས་ཉིད་རྣལ་མའི་དོན་ཅིག་ཆར་དུ་རྟོགས་པ་མེད་པའི་རྒྱུ་མཚན་དེ་བས་ན་ཤིན་ཏུ་རྣལ་འབྱོར་ཨ་ཏི་ཡོ་གའི་ལྟ་སྤྱོད་ནི་དེ་ལྟ་བུ་མ་ཡིན་པར་ཆོས་ཐམས་ཅད་ཡེ་ནས་རང་བྱུང་གི་ཡེ་ཤེས་ཀུན་བྱེད་བྱང་ཆུབ་ཀྱི་སེམས་ཉིད་ཀྱིས་བྱས་ཤིང་དེའི་ངང་དུ་གདོད་ནས་སངས་རྒྱས་པའི་རང་བཞིན་ཡིན་པའི་ཕྱིར་རེ་དོགས་དང་རྩོལ་སྒྲུབ་ཀྱི་བློ་མེད་ལ། དེ་མེད་པས་ལམ་ལ་མི་བསྒྲོད་ཅིང་ས་ལ་སྦྱོང་བར་མི་བྱེད་དེ་རྫོགས་པ་སྤྱིར་ཆུབ་ཀྱི་སའམ་ཆོས་ཉིད་དབྱེ་བ་མེད་པའི་ས་ལ་ཡེ་ནས་ཕྱིན་ཟིན་པའི་ཕྱིར་དང་། དེ་བཞིན་དུ་དམ་ཚིག་མི་བསྲུང་ཞིང་ལྟ་བ་སྒོམ་པར་མི་བྱེད་དེ། ཅིས་ཕྱིར་གོང་དུ་སྨོས་པ་ལྟར་རང་བྱུང་ཡེ་ཤེས་བྱང་ཆུབ་ཆེན་པོའི་ལམ་ནས་འཁོར་འདས་ལམ་གསུམ་གྱིས་བསྡུས་པའི་ཆོས་ཀུན་འབྱུང་ཞིང་དེ་ཉིད་ཀྱི་ངོ་བོ་ལས་གཞན་དུ་མེད་པའི་ཕྱིར་ན་བྱང་ཆུབ་ཀྱི་སེམས་ཉིད་ཀྱི་རང་བཞིན་ལ་བྱང་ཆུབ་ཉིད་ཀྱིས་མི་བགྲོད་པའམ་བགྲོད་མི་དགོས་ཏེ་གང་དུ་བགྲོད་པའི་ཡུལ་དུ་གྱུར་པའི་ས་དང་བགྲོད་པར་བྱེད་པ་པོ་གཉིས་ཀ་བྱང་ཆུབ་ཀྱི་སེམས་ཉིད་ལས་གཞན་དུ་མེད་པའི་ཕྱིར་དང་། བྱང་ཆུབ་ཉིད་ཀྱི་ངོ་བོར་གྱུར་པའི་ས་ལ་བྱང་ཆུབ་ཉིད་ཀྱིས་སྒྲིབ་པ་མི་སྦྱོང་སྟེ་ཐམས་ཅད་བྱང་ཆུབ་ཀྱི་སེམས་གཅིག་གི་རང་བཞིན་ཡིན་པ་ལ་སྦྱང་བྱ་སྦྱོང་བྱེད་ཐ་དད་དུ་མེད་པའི་ཕྱིར་དང་། དམ་ཚིག་གི་རང་བཞིན་ཡང་ཡེ་ནས་བསྲུང་མཚམས་ལས་འདས་པ་བྱང་ཆུབ་སེམས་ཀྱི་རང་བཞིན་ཉིད་ལས་ཡོད་པ་མ་ཡིན་པས་ན་བྱང་ཆུབ་ཉིད་ལ་བྱང་ཆུབ་ཉིད་ཀྱིས་དེ་ཡང་མི་བསྲུང་སྟེ་བསྲུང་བྱ་བསྲུང་བྱེད་གཉིས་སུ་མེད་པའི་ཕྱིར་དང་། བསྒོམ་པར་བྱ་བའི་ཡུལ་དང་སྒོམ་པའི་རང་བཞིན་ཡང་བྱང་ཆུབ་ཀྱི་སེམས་ཉིད་ཡིན་གྱིས་དེ་ལས་གཞན་དུ་ཡོད་པ་མ་ཡིན་པས་བྱང་ཆུབ་ཉིད་ཀྱིས་བྱང་ཆུབ་ཉིད་ལ་བསྒོམ་དུ་མེད་དེ་བསྒོམ་བྱ་སྒོམ་བྱེད་ཐ་དད་དུ་མེད་པ་དང་རང་གིས་རང་ཉིད་བསྒོམ་མི་དགོས་པའི་ཕྱིར་དང་། ལྟ་བའི་ཡུལ་གཏན་ལ་དབབ་པར་བྱ་བ་དང་ནི་གཏན་ལ་འབེབ་བྱེད་ཡུལ་ཅན་གྱི་ཡེ་ཤེས་གཉིས་ཀ་བྱང་ཆུབ་ཀྱི་སེམས་ཉིད་ཡིན་ཞིང་དེ་ལས་གཞན་དུ་མེད་པས་ན་བྱང་ཆུབ་ཉིད་ཀྱིས་ཉིད་ལ་བལྟ་བར་བྱར་མེད་པ་སྟེ་རྒྱུ་མཚན་དེ་ཉིད་ཀྱི་ཕྱིར་ན་ཤིན་ཏུ་རྣལ་འབྱོར་ཨ་ཏི་ཡོ་གའི་ལྟ་སྤྱོད་ཐམས་ཅད་བྱ་རྩོལ་མེད་པར་ཡེ་ནས་ལྷུན་གྱིས་གྲུབ་པའི་རང་བཞིན་ཅན་འདི་ནི་རང་བྱུང་རིག་པའི་ཡེ་ཤེས་མ་བཅོས་ཐད་ཀར་ངོ་འཕྲོད་པའི་གོམ་པ་དྲག་དལ་ཅན་དེ་ནི་ཀུན་བྱེད་རྒྱལ་པོ་ང་ཡི་གོམ་པའམ་བསྒོམ་པ་རེ་དོགས་རྩོལ་སྒྲུབ་ལས་འདས་པ་ཁོ་ན་ཡིན་གྱིས་རྒྱུ་འབྲས་རྩོལ་སྒྲུབ་ལ་ཞེན་པའི་ཐེག་པ་ཅན་གྱི་གང་ཟག་རྣམས་ཀྱི་སྤྱོད་ཡུལ་དུ་གྱུར་པ་མིན་ནོ། །ཞེས་གསུངས་སོ། །ལེའུའི་མཚན ། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་ཆོས་ཉིད་ཀྱི་རང་བཞིན་གཅིག་ལས་ཆོས་ཉིད་ཀྱི་ཡུལ་ཀུན་ལ་བཀོད་པའི་ལེའུ་སྟེ་བརྒྱད་པའི་འགྲེལ་བའོ།། ༈ །།དྲུག་པ་སེམས་ཉིད་སྐྱོན་ཡོན་ལས་འདས་པས་གོལ་སྒྲིབ་གཞི་ནས་དག་པའི་ལེའུ་དགུ་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལྟར་ཆོས་ཉིད་དེ་བཞིན་ཉིད་གཅིག་ལས་རང་བཞིན་གསུམ་དུ་སོ་སོར་སྣང་བའི་ཚུལ་བསྟན་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་རྒྱུ་འབྲས་ཀྱི་ཐེག་པ་འོག་མ་པ་རྣམས་ཀྱིས་རང་རང་གིས་བགྲོད་པར་བྱ་བའི་ལམ་དེ་དག་སེམས་ཉིད་མ་བཅོས་རྣལ་མའི་དོན་ཇི་བཞིན་མ་རྟོགས་པར་ནོར་བ་ཡིན་པས་རྫོགས་པ་ཆེན་པོའི་ལམ་ལས་གོལ་ས་དང་སྒྲིབ་པར་གྱུར་པ་ལས་སེམས་ཉིད་རང་གི་ངོ་བོ་ལ་གོལ་སྒྲིབ་གཞི་ནས་མི་སྲིད་པའི་ཚུལ་འདི་གསུངས་སོ། །གཉིས་པ་རྒྱས་པར་བཤད་པ་ལ་བདུན་ཏེ། གཤིས་སེམས་ཉིད་ཀུན་བྱེད་ཉིད་སྦྱངས་བསྒྲོད་སྤང་གཉེན་ལས་འདས་པས་གོལ་སྒྲིབ་གདོད་ནས་དག་པའི་རང་བཞིན་བསྟན་པ། དེ་ཉིད་མ་རྟོགས་པའི་རྩོལ་སྒྲུབ་ཅན་ལ་གོལ་སྒྲིབ་བྱུང་ཚུལ། རྣལ་མའི་དོན་ལ་གོལ་སྒྲིབ་མེད་པའི་འཐད་པ། རྩོལ་སྒྲུབ་ཅན་ལ་གོལ་སྒྲིབ་བྱུང་བའི་རྒྱུ་མཚན། བྱང་ཆུབ་ཀྱི་སེམས་རྩོལ་སྒྲུབ་ཀུན་ལས་འདས་ཚུལ། རང་བཞིན་བཅུས་རྩོལ་བའི་ཉེས་པ། རྩོལ་སྒྲུབ་ཀུན་ལས་འདས་པའི་རང་བཞིན་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་ཞེས་བོས་ནས་འདི་ལྟར་རིག་པ་བྱང་ཆུབ་སེམས་ཀྱི་རང་བཞིན་སྐྱོན་ཐམས་ཅད་ཡེ་དག་དང་ཡོན་ཏན་ཐམས་ཅད་ལྡན་གྱི་རང་བཞིན་ཅན་འདི་ཉིད་ནི་འཁོར་འདས་ཀྱི་ཆོས་ཐམས་ཅད་ཀུན་གྱི་འབྱུང་གནས་ཡིན་པ་དང་ཐམས་ཅད་ལ་ཆོས་ཉིད་ཀྱི་ཚུལ་དུ་ཁྱབ་ཅིང་གནས་པས་ཆོས་རྣམས་མ་ལུས་པ་ཡི་སྙིང་པོའམ་ངོ་བོ་སྟེ། དེ་ཡི་རང་བཞིན་ནི་ཡེ་གདོད་མ་ཉིད་ནས་མ་སྐྱེས་པའི་ཆོས་ཉིད་སྤྲོས་བྲལ་ཀ་དག་གི་ངོ་བོ་རྣམ་པར་དག་པ་ཡིན་པས་ཉོན་ཤེས་ཀྱི་སྒྲིབ་པ་གཉིས་ཀྱི་དྲི་མ་མེད་ཅིང་བླང་དོར་རྩོལ་སྒྲུབ་ཐམས་ཅད་ལས་འདས་པ་ཡིན་ཕྱིར་ད་གསར་དུ་ཚོགས་གཉིས་བསགས་པ་དང་སྒྲིབ་པ་སྦྱང་བ་ལ་སོགས་པའི་སྒོ་ནས་བགྲོད་པར་བྱེད་པའི་ས་ལམ་ཐམས་ཅད་དང་བྲལ་བ་ཡིན་ལ། དེ་ལྟར་ས་ལམ་བགྲོད་དུ་མེད་པའི་རྒྱུ་མཚན་དེ་བས་ན་དེའི་ལྡོགས་ཕྱོགས་སུ་གྱུར་པའི་གོལ་ས་ཡང་མེད་ཅིང་། སྐུ་བཞི་ཡེ་ཤེས་ལྔ་ཡི་བདག་ཉིད་ཆོས་ཐམས་ཅད་ཀྱི་འབྱུང་གནས་རང་རིག་པ་བྱང་ཆུབ་ཀྱི་སེམས་འདི་ཡེ་ནས་སངས་རྒྱས་པའི་ངོ་བོར་ལྷུན་གྱིས་གྲུབ་ཟིན་པས་གཞན་ནས་བཙལ་དུ་མེད་པར་གསུངས་སོ། །དེ་ལྟར་ཡང་གཏིང་རྫོགས་ལས། གཞན་ལས་མ་བཙལ་རང་ལས་རྙེད་པའི་ཕྱིར། །གཉེན་པོས་མ་བསྐྱེད་རང་བཞིན་ཡིན་པས་ན། །ལུས་ངག་ཆེད་དུ་བཙལ་དུ་མེད་པའི་ཕྱིར། །མ་བཙལ་ལྷུན་གྱིས་གྲུབ་པར་ཡིད་ཀྱང་ཆེས། །ཞེས་པ་ལྟར་རོ། །གཉིས་པ་དེ་ཉིད་མ་རྟོགས་པའི་རྩོལ་སྒྲུབ་ཅན་ལ་གོལ་སྒྲིབ་བྱུང་ཚུལ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། འདི་ལྟར་སྣང་སྲིད་འཁོར་འདས་ཀྱི་བསྡུས་པའི་ཆོས་ཀུན་སྙིང་པོ་བྱང་ཆུབ་ཀྱི་སེམས་ལས་ལོགས་སུ་གྲུབ་པ་རྡུལ་ཙམ་ཡང་མེད་པར་དེ་ཉིད་གཅིག་པུའི་རང་བཞིན་ཡིན་ཀྱང་། ཐེག་པ་འོག་མའི་བློ་ཅན་གྱི་གང་ཟག་རྣམས་ཀྱིས་དེ་ལྟར་མ་ཤེས་པས་བྱང་ཆུབ་ཀྱི་སེམས་གཅིག་པུ་ལ་དབྱེ་བའི་སྒོ་རང་བཞིན་བཅུ་རུ་རྣམ་པར་བགྲང་བས་ཆོས་ཉིད་བྱང་ཆུབ་སེམས་ཀྱི་དོན་ལས་གཞན་དུ་གོལ་ཞིང་སྙིང་པོ་རྣལ་མའི་དོན་ཉིད་མི་མཐོང་བའི་སྒྲིབ་པ་བྱུང་བ་ཡིན་ཏེ། མདོ་བཅུ་ལས། རང་བཞིན་བཅུ་རུ་བགྲངས་བ་ནི། །སེམས་ཀྱི་ཆ་ཡི་བྱེ་བྲག་སྟེ། །སེམས་ཅན་བློ་ལ་སྣང་བས་བགྲངས། །སེམས་ལ་བགྲངས་བས་གོལ་སྒྲིབ་བྱུང་། །བགྲངས་དུ་མེད་ལ་གོལ་སྒྲིབ་མེད། །བགྲངས་ཏེ་མ་ཤེས་གོལ་སྒྲིབ་ཡིན། །བགྲངས་ཡོད་མཐོང་བས་གོལ་སྒྲིབ་ཡིན། །སེམས་གཅིག་བྱང་ཆུབ་སྙིང་པོ་ལ། །ལྟ་བའི་ཁྱད་པར་དགུ་བགྲངས་ནོར། །ཞེས་སོགས་གསུངས་པ་ལྟར་ལ། འོ་ན་ཨ་ཏི་ཡོ་ག་རང་གི་སྐབས་ན་ཡང་རང་བཞིན་བཅུ་རུ་བགྲངས་དུ་མེད་དམ་དེ་གོལ་སྒྲིབ་ཇི་ལྟར་ཡིན་སྙམ་ན། འདིར་ཨ་ཏི་ཡོ་གའི་གཞུང་ནས་རང་བཞིན་བཅུ་རུ་བགྲངས་བ་ནི་སྙིང་པོ་བྱང་ཆུབ་ཀྱི་སེམས་གཅིག་ལ་མ་བཅོས་ལྷུན་གྲུབ་ཀྱི་ཚུལ་དུ་ཡོན་ཏན་གྱི་ཆེ་བ་བཅུ་རུ་སྣང་བའི་ཚུལ་བསྟན་པ་ཙམ་ལས། དངོས་པོ་ཐ་དད་པ་བཅུ་བགྲང་བ་མ་ཡིན་ཏེ། དེ་ཉིད་ལས། རང་བཞིན་མ་བཅོས་བཅུ་བགྲངས་བ། །བགྲངས་པ་མ་ཡིན་ངོ་བོ་གཅིག །ངོ་བོ་གཅིག་ལ་རང་བཞིན་བཅུ། །བྱང་ཆུབ་སེམས་ཀྱི་ཆེ་བར་བགྲངས། །ཡོན་ཏན་བཅུ་རུ་སྣང་མོད་ཀྱི། །སྙིང་པོ་བྱང་ཆུབ་སེམས་འདི་ལ། །དུས་གསུམ་བཞུགས་པའི་སངས་རྒྱས་ཀྱིས། །སྔ་རབས་འདས་པས་སྔར་མ་བགྲངས། །ད་ལྟར་བཞུགས་པས་བགྲངས་མི་བྱ། །སླད་ཀྱིས་བྱོན་པའི་སངས་རྒྱས་རྣམས། །སེམས་ཉིད་འདི་ལ་བགྲངས་མི་བྱེད། །བགྲངས་མེད་སེམས་ཀྱི་རང་བཞིན་ལ། །གཅིག་སྟེ་རྣམ་པ་བགྲངས་དུ་མེད། །བགྲངས་དུ་མེད་པའི་སྙིང་པོ་ལ། །གོལ་ས་སྒྲིབ་པ་གཉིས་མེད་དེ། །སེམས་ལ་བགྲངས་དུ་མེད་པའོ། །ཞེས་གསུངས་པ་ལྟར་རོ། །དེ་བཞིན་དུ་ཆོས་ཐམས་ཅད་ཡེ་ནས་རིག་པའི་ངང་དུ་རྫོགས་ཞིང་རིག་པ་སྐུ་གསུམ་གྱི་བདག་ཉིད་དུ་སངས་རྒྱས་ཟིན་པ་དེ་ལས་གཞན་ས་ལམ་ལ་རྩོལ་སྒྲུབ་ཀྱིས་བགྲོད་དུ་མེད་པ་ལ་བགྲོད་པར་འདོད་པས་ཐེགས་པ་འོག་མའི་ལམ་དུ་གོལ་ས་བྱུང་ཞིང་། རྫོགས་པ་ཆེན་པོའི་གནས་ལུགས་དམིགས་མེད་ཁྱབ་བརྡལ་ཆེན་པོའི་རང་བཞིན་ཡིན་པ་ལ་ཐེག་པ་རང་རང་གི་ལྟ་བའི་དོན་ལྟར་བལྟས་པས་ཆོས་ཉིད་བྱང་ཆུབ་སེམས་ཀྱི་རང་ཞལ་མ་མཐོང་བར་སྒྲིབ་པ་ཡི་དྲི་མ་བྱུང་བ་ཡིན་ནོ། །དེ་ཡང་གོལ་སྒྲིབ་གཉིས་པོ་འདིས་ཁྱད་པར་ནི་ཐེག་པ་གོང་མའི་དོན་མ་ཤེས་པ་སྒྲིབ་པ་དང་འོག་མའི་ལམ་དུ་ནོར་བ་གོལ་ས་ཡིན་པར་གསུངས་ཏེ། དེ་ལས། གོང་མ་མ་ཤེས་སྒྲིབ་པར་བཤད། །འོག་མའི་ལམ་ནོར་གོལ་ས་སྟེ། །ཞེས་གསུངས་སོ། །གཉིས་པ་རྒྱས་པར་བཤད་པ་ལ་གཉིས་ཏེ། སེམས་དཔའ་ཀྲི་ཡ། ཨུ་པ། ཡོ་ག་བཞིའི་སྒྲིབ་པ་དང་། མ་ཧཱ་ཨ་ནུ་གཉིས་ཀྱི་གོལ་བ་རྒྱས་པར་བཤད་པའོ། །དང་པོ་ནི། འདི་ལྟར་ཆོས་ཐམས་ཅད་ཆོས་ཉིད་དེ་བཞིན་ཉིད་དུ་བཟང་ངན་དང་དབྱེ་བ་མེད་པར་ཐམས་ཅད་མཉམ་ཉིད་གཅིག་གི་རང་བཞིན་ཡིན་པ་ལ་རྒྱུ་ཕ་རོལ་དུ་ཕྱིན་པ་བཅུ་ལ་སྤྱད་པས་དེའི་འབྲས་བུ་རྣམས་ཕྱི་མར་རམ་མ་འོང་པ་ན་འབྱུང་བར་འདོད་པ་བྱང་ཆུབ་སེམས་དཔའི་ཐེག་པ་བ་རྣམས་ནི་བསམ་པ་སྨོན་འཇུག་གི་སེམས་རྣམ་པ་གཉིས་བསྐྱེད་ཅིང་སྦྱོར་བ་ཕ་རོལ་དུ་ཕྱིན་པ་དྲུག་གམ་བཅུ་ཡིས་བསྡུས་པའི་ཚོགས་གཉིས་རྒྱ་མཚོ་ལྟ་བུ་ལ་བསླབས་པའི་སྒོ་ནས་ས་བཅུ་རིམ་གྱིས་བགྲོད་ཏེ་འབྲས་བུ་སངས་རྒྱས་ཀྱི་ས་ཐོབ་པར་འདོད་པ་དེ་ཡིས་བསྐལ་པ་གྲངས་མེད་གསུམ་གྱི་བར་དུ་ཨ་ཏི་རྫོགས་པ་ཆེན་པོའི་དོན་ལས་གཞན་དུ་གོལ་ནས་ཆོས་ཉིད་སྙིང་པོའི་དོན་སྒྲིབ་པར་བྱེད་པ་དང་། དེ་བཞིན་ཀྲྀ་ཡ་སྟེ་བྱ་བའི་རྒྱུད་ཀྱིས་ཕྱི་ནང་རྟོག་པ་གསུམ་པོ་ལྷ་དང་དཀྱིལ་འཁོར་དག་པ། རྫས་དང་ཡོ་བྱད་དག་པ་སྔགས་དང་ཏིང་འཛིན་དག་པ་སྟེ་དག་པ་རྣམ་པ་གསུམ་གྱི་ཚུལ་གྱིས་ལམ་སྒྲུབ་པར་བྱེད་ཅིང་། དེ་ཡང་མཚན་བཅས་ལྷའི་རྣལ་འབྱོར་ལ་དབང་ཐོབ་ཅིང་སེམས་བསྐྱེད་དང་ལྡན་པས་མངོན་པར་བྱང་ཆུབ་པ་ལྔ་དང་ཆོ་འཕྲུལ་རྣམ་པ་བཞིའི་སྒོ་ནས་སམ་སྟོང་པ་ཡི་གེ་སྒྲ་གཟུགས་ལ་སོགས་པ་ཀྲྀ་ཡ་ལྷ་དྲུག་གི་ཚུལ་གྱིས་རིགས་གསུམ་གྱི་ལྷ་བསྒོམ་པ་དང་མཚན་མེད་ཀྱི་རྣལ་འབྱོར་ལྷ་སྣང་མི་དམིགས་པར་བསྡུས་ནས་དོན་དམ་སྟོང་པ་ཉིད་དག་པ་མཐའ་བཞི་བྲལ་བའི་ངང་ལ་འཇོག་པ་དང་། རྩ་བ་དང་ཡན་ལག་གི་དམ་ཚིག་དང་སྡོམ་པ་ཐམས་ཅད་མི་ཉམས་པ་ཚུལ་བཞིན་དུ་བསྲུང་ཞིང་དག་པར་བྱེད་པ་ཡིན་ན་ཡང་། འབད་རྩོལ་བླང་དོར་ལ་ཞེན་པ་དང་བཅས་པ་ཡིན་པས་མི་ཚེ་བདུན་གྱི་བར་དུ་རྫོགས་པ་ཆེན་པོའི་ལམ་ལས་གོལ་ཞིང་སྒྲིབས་པ་ཡིན་ལ། ཨུ་པ་ཡ་སྟེ་སྤྱོད་པའི་རྒྱུད་དུ་དབང་དང་དམ་ཚིག་དང་ལྡན་པས་མཚན་བཅས་དང་མཚན་མེད་གྱི་རྣལ་འབྱོར་ལ་བརྩོན་པ་སོགས་རྒྱུ་ལམ་ལ་སྤྱོད་ཀྱང་འབྲས་བུ་རྡོ་རྗེ་འཆང་གི་ས་ཐོབ་པར་ལྟ་བ་ནི། ལྟ་བ་ཡོ་ག་དང་སྤྱོད་པ་ཀྲྀ་ཡ་ལྟར་སོ་སོ་ཐ་དད་དུ་བཟུང་ཞིང་གཉིས་སུ་བལྟས་པ་ཡིས་ཆོས་གཉིས་སུ་མེད་པ་བྱང་ཆུབ་སེམས་ཀྱི་གནས་ལུགས་མཐོང་བ་ལ་མི་ཚེ་གསུམ་དུ་སྒྲིབས་ཤིང་གོལ་བ་དང་། ཡོ་ག་སྟེ་རྣལ་འབྱོར་རྒྱུད་ཀྱིས་ཆོས་རྣམས་ཐམས་ཅད་སྙིང་པོ་བྱང་ཆུབ་ཀྱི་སེམས་གཅིག་གི་རང་བཞིན་ཡིན་པ་ལ་རང་ལམ་གྱི་དབང་དང་ལྟ་སྤྱོད་དམ་ཚིག་ལ་སོགས་པ་ལ་བརྟེན་ནས་ཆོས་ལ་བཟང་ངན་དུ་ལྟ་ཞིང་བླང་དོར་བྱེད་པ་དེ་ཡིས་ཆོས་ཐམས་ཅད་བྱང་ཆུབ་ཀྱི་སེམས་ཐིག་ལེ་ཉག་གཅིག་ཏུ་མ་མཐོང་ཞིང་བདག་དང་ལྷ་གཉིས་སུ་མཐོང་བས་ན། དེ་ལྟ་བུའི་བཟང་ངན་བླང་དོར་གྱི་ཞེན་པ་དང་མ་བྲལ་བར་དུ་སྙིང་པོ་བྱང་ཆུབ་ཀྱི་ལམ་ལས་གོལ་ཞིང་བསྒྲིབས་པ་ཡིན་ནོ། །གཉིས་པ་མ་ཧཱ་ཨ་ནུ་གཉིས་ཀྱི་གོལ་ས་རྒྱས་པར་བཤད་པ་ནི། དེ་ཡང་མ་ཧཱ་ཡོ་ག་བས་ཀུན་བྱེད་རྒྱལ་པོ་རང་བྱུང་གི་ཡེ་ཤེས་གཅིག་ལ་སྣོད་འབྱུང་བ་ལྔ་ཡུམ་ལྔ། བཅུད་ཕུང་པོ་ལྔ་ཡབ་ལྔ། རྒྱུད་རྣམ་ཤེས་ཚོགས་བརྒྱད་ཡེ་ཤེས་ལྔའི་རང་བཞིན་ཡིན་པ་གསུམ་བསྒོམ་པས་བླང་དོར་རྩོལ་སྒྲུབ་ཀུན་དང་བྲལ་བ་རང་བཞིན་རྫོགས་པ་ཆེན་པོའི་ལུང་ལས་གཞན་དུ་གོལ་བར་གྱུར་པ་ཡིན་ནོ་ཞེས་སེམས་དཔའ་ཆེན་པོ་ཁྱོད་ཀྱིས་འཁོར་གྱི་ཚོགས་ལ་ལུང་སྟོན་ཅིག་ཅེས་པ་དང་། ཨ་ནུ་ཡོ་ག་བས་ཇི་ལྟར་སྣང་ཞིང་སྲིད་པའི་ཆོས་རྣམས་ལ། སྙིང་པོ་དེ་བཞིན་ཉིད་བྱང་ཆུབ་སེམས་ཀྱི་རང་བཞིན་དུ་མ་རྟོགས་པར་དབྱིངས་སྟོང་པ་ཉིད་དང་ཡེ་ཤེས་གསལ་བའི་ཆ་གཉིས་ཀྱི་སྔ་མ་རྒྱུ་དང་ཕྱི་མ་འབྲས་བུ་སྟེ་རྒྱུ་འབྲས་གཉིས་སུ་བལྟས་པའི་ཕྱིར་ན། རྒྱུ་ཡི་ཆ་ལ་འབྲས་བུ་བསྐྱེད་པར་སྒྲོས་འདོགས་པ་དང་འབྲས་བུའི་ཆ་ལ་རྒྱུ་ལ་ལྟོས་དགོས་པར་སྐུར་བ་འདེབས་པ་ཡིན་པས། རྒྱུ་འབྲས་བླང་དོར་ལས་འདས་པར་ཆོས་ཐམས་ཅད་གདོད་ནས་སྐྱེ་འགག་དང་བྲལ་བར་རང་བྱུང་ཡེ་ཤེས་ཀྱི་ངོ་བོར་མ་རྟོགས་པས་སྒྲོ་སྐུར་གཉིས་དང་བྲལ་བ་རྫོགས་ཆེན་ཨ་ཏིའི་དགོངས་དོན་ལ་ཡིད་ཆེས་ཚུལ་བཞིན་མ་འདྲོང་གི་བར་དུ་ཆོས་ཉིད་ཇི་བཞིན་པའི་དོན་མི་རྟོགས་པར་སྒྲིབ་པར་གསུངས་སོ། །གསུམ་པ་དོན་བསྡུ་ལ་གཉིས་ཏེ། སོ་སོའི་ཐེག་པ་དྲུག་གོལ་སྒྲིབ་ཡིན་པའི་རྒྱུ་མཚན་དང་། མཐར་འཛིན་བྱེད་པའི་གཉིས་བཅས་ཐམས་ཅད་གོལ་སྒྲིབ་ཉིད་དུ་བཤད་པའོ། །དང་པོ་ནི། ཆོས་ཐམས་ཅད་ཡེ་སངས་རྒྱས་པའི་རང་བཞིན་ལས་གཞན་པའི་འབྲས་བུ་ཞིག་ཐོབ་ཏུ་མེད་པའི་རང་བཞིན་ཡིན་པ་ལ་དེ་ལྟར་མ་རྟོགས་པར་ལམ་གྱི་འབད་རྩོལ་ལ་བརྟེན་ནས་རང་རང་གི་ལམ་གྱི་འབྲས་བུ་ངེས་པར་ཐོབ་ཏུ་ཡོད་པར་འདོད་པ་རྣམ་པ་དྲུག་ནི། འབྲས་བུ་མངོན་དུ་ཐོབ་པར་བྱེད་པའི་རྒྱུ་ལ་གཞི་ཀུན་རྫོབ་དང་དོན་དམ་པའི་བདེན་པ་གཉིས་སུ་གཏན་ལ་ཕབ་ནས་ལམ་ཚོགས་གཉིས་ཟུང་འཇུག་ཉིད་དུ་བསྒྲུབ་པའི་ཚུལ་ཉིད་ཀྱིས་འབྲས་བུ་སངས་རྒྱས་ཉིད་ཐོབ་པར་བྱེད་པ་མཚན་ཉིད་ཐེག་པ་དང་། དག་པ་རྣམ་པ་གསུམ་གྱི་སྒོ་ནས་ལམ་ལ་སྤྱད་པས་འབྲས་བུ་ཐོབ་པར་འདོད་པ་ཀྲྀ་ཡ་བ་དང་། ལྟ་སྤྱོད་སོ་སོས་ཏེ་མི་མཐུན་པ་ཆ་གཉིས་སུ་ཉམས་སུ་བླང་བས་འབྲས་བུ་ཐོབ་པར་འདོད་པ་ཨུ་པ་ཡ་དང་། ལྷ་དང་རྟོག་པ་གཙང་དང་རྨེ་བ་ལ་སོགས་བཟང་ངན་བླང་དོར་དུ་སྤྱད་པས་འབྲས་བུ་ཐོབ་པར་འདོད་པ་ཡོ་ག་བ་དང་། སྣོད་བཅུད་རྒྱུད་རྣམས་ལྷའི་རང་བཞིན་དུ་རིག་ཅིང་རྟོགས་པ་དེ་ཉིད་ཏིང་ངེ་འཛིན་རྣམ་པ་གསུམ་གྱི་སྒོ་ནས་བསྒོམས་པས་འབྲས་བུ་ཐོབ་པར་འདོད་པ་མ་ཧཱ་ཡོ་ག་དང་། རྒྱུ་འབྲས་གཉིས་ཀྱི་རང་བཞིན་དབྱིངས་ཉིད་དང་ཡེ་ཤེས་སུ་སོ་སོར་བལྟས་ནས་ལམ་སྒྲུབ་པ་ཡིས་འབྲས་བུ་ཐོབ་པར་འདོད་པའི་ཐེག་པ་ཨ་ནུ་སྟེ་ངེས་པ་ཐོབ་པའི་ཐེག་པ་རྣམ་པ་དྲུག་པོ་དེ་ནི་རྫོགས་པ་ཆེན་པོའི་ལམ་གྱི་གོལ་ས་དྲུག་དང་། སྒྲིབ་པ་དྲུག་དྲུག་སྟེ། སྙིང་པོ་བྱང་ཆུབ་ཀྱི་སེམས་ལས་གཞན་དུ་གོལ་ཞིང་སྒྲིབ་པའི་སྐྱོན་དང་བཅས་པ་ཡིན་པས། རང་འབྲས་ངེས་པ་རེ་ཐོབ་ཏུ་ཡོད་པར་འདོད་པའི་ཐེག་པ་དྲུག་གི་གོང་མ་ལ་ལྟོས་ནས་འོག་མ་གོལ་སྒྲིབ་ཏུ་གྱུར་པའི་སྐྱོན་དང་འོག་མ་འོག་མ་ལ་ལྟོས་ནས་གོང་མ་གོང་མ་ཡོན་ཏན་དུ་གྱུར་ཚུལ་གསལ་བར་གསུངས་པ་ཡིན་ནོ། །གཉིས་པ་མཐར་འཛིན་བྱེད་པའི་གཉིས་བཅས་གོལ་སྒྲིབ་ཉིད་དུ་བཤད་པ་ནི། འདི་ལྟར་བྱང་ཆུབ་སེམས་དཔའི་ཐེག་པ་བས་རྟོག་དཔྱོད་ཀྱི་ཡུལ་ལས་འདས་པའི་ཆོས་ཉིད་བྱང་ཆུབ་ཀྱི་སེམས་ལ་བདེན་པ་གཉིས་ཀྱི་རྟོག་དཔྱོད་ཀྱིས་བསྒོམ་པར་བྱེད་པ་ཉིད་ཀྱང་རྫོགས་པ་ཆེན་པོའི་ཆོས་ཉིད་བྱང་ཆུབ་སེམས་ཀྱི་གོལ་ས་དང་སྒྲིབ་པ་ཡིན་ལ། དེ་བཞིན་དུ་ཀྲྀ་ཡཱ་བས་ཆོས་ཉིད་ཡེ་ནས་གཟུང་འཛིན་བྲལ་བའི་རང་བཞིན་ཡིན་པ་ལ་ད་གདོད་གཟུང་འཛིན་གཉིས་དག་པའི་ཐབས་ལ་བརྩོན་ཅིང་སྒོམ་པར་འདོད་པ་དེ་ཉིད་ཀྱང་གཤིས་ཀྱི་གོལ་ས་དང་སྒྲིབ་པར་བཤད་པ་དང་། ཨུ་པ་ཡས་བྱང་ཆུབ་སེམས་ཀྱི་ངོ་བོ་སྤྲོས་མེད་ཐིག་ལེ་ཉག་གཅིག་གི་དོན་ཡིན་པ་ལ་ལྟ་བ་དང་སྤྱོད་པ་གཉིས་ཆ་མཉམ་དུ་འབྲེལ་བ་ཅན་དུ་བསྒོམ་པར་འདོད་པ་དེ་ཉིད་ཀྱང་གོལ་ས་དང་སྒྲིབ་པའི་སྐྱོན་ཡིན་པར་བཤད་དོ། །གཞན་ཡང་ཡོ་ག་བས་ལྟ་སྤྱོད་བླང་དོར་ཅན་དུ་ལྟ་བ་དང་། མ་ཧཱ་ཡོ་གས་རྩོལ་སྒྲུབ་ཀྱི་སྒོ་ནས་ལམ་བསྒོམ་པ་དང་། ཨ་ནུ་ཡོ་གས་དབྱིངས་དང་ཡེ་ཤེས་རྒྱུ་འབྲས་གཉིས་སུ་ལྟ་ཞིང་ལམ་བསྒོམ་པ་ཀུན་ལས་ཆོས་ཉིད་བྱང་ཆུབ་ཀྱི་སེམས་འདི་འདས་པ་ཡིན་པས་དེ་དག་ཀུན་ཀྱང་གོལ་སྒྲིབ་ཏུ་བཤད་པ་ཡིན་ཏེ། མདོ་བཅུ་ལས། མདོ་སྡེ་བྱང་ཆུབ་སེམས་དཔའ་ནི། །ཀུན་ཏུ་འོད་ཀྱི་ས་འདོད་པས། །བདེན་པ་གཉིས་ཀྱི་རྟོག་དཔྱོད་པས། །ཆོས་ཉིད་སྟོང་པ་ནམ་མཁར་རྟོགས། །ཨ་ཏི་ཡོ་གའི་བདེ་ཆེན་ནི། ། རྟོག་དཔྱོད་འདས་པའི་བྱང་ཆུབ་སེམས། །རྟོག་དཔྱོད་འདས་ལ་མདོ་སྡེས་བསྒྲིབས། །རྫོགས་ཆེན་རྟོག་དང་དཔྱོད་པ་ནི། །མདོ་སྡེ་དག་ཏུ་གོལ་བར་བཤད། །ཀྲྀ་ཡ་རྡོ་རྗེ་འཛིན་འདོད་པ། །དག་པ་རྣམ་གསུམ་སྒོར་ཞུགས་ནས། །ཆོས་ཉིད་དག་པ་འཛིན་པ་སྟེ། །གཟུང་འཛིན་དག་པའི་ཡུལ་ལ་གནས། །ཨ་ཏི་ཡོ་གའི་བདེ་ཆེན་ནི། །གཟུང་འཛིན་འདས་པའི་བྱང་ཆུབ་སེམས། །གཟུང་འཛིན་འདས་ལ་ཀྲི་ཡས་བསྒྲིབས། །རྫོགས་ཆེན་གཟུང་དང་འཛིན་བྱེད་པ། །ཀྲྀ་ཡཱ་དག་ཏུ་གོལ་བར་བཤད། །ཨུ་པ་ཡ་ཡི་ལྟ་སྤྱོད་ནི། །ཀྲྀ་ཡཱ་སྤྱོད་ཅིང་ཡོ་ག་བསྒྲིབས། །ལྟ་སྤྱོད་འབྲེལ་བའི་དོན་མེད་པས། །གཉིས་སུ་མེད་པའི་དོན་མ་རྟོགས། །ཨ་ཏི་ཡོ་གའི་བདེ་ཆེན་ནི། །གཉིས་སུ་མེད་པའི་བྱང་ཆུབ་སེམས། །གཉིས་སུ་མེད་ལ་ཨུ་པས་བསྒྲིབས། །རྫོགས་ཆེན་གཉིས་སུ་འབྱེད་པ་ནི། །ཨུ་པ་ཡ་རུ་གོལ་བར་བཤད། །ཡོ་ག་སྟུག་པོ་བཀོད་འདོད་པས། །མཚན་མ་ཡོད་མེད་སྒོར་ཞུགས་ནས། །ཕྱག་རྒྱ་བཞི་ལ་གཙོར་བྱེད་པ། །བླང་དོར་མེད་ལ་འཇུག་མ་ནུས། །ཨ་ཏི་ཡོ་གའི་བདེ་ཆེན་ནི། །བླང་དོར་མེད་པའི་བྱང་ཆུབ་སེམས། །བླང་དོར་མེད་ལ་ཡོ་གས་བསྒྲིབས། །རྫོགས་ཆེན་བླང་དང་དོར་བྱེད་པ། །ཡོ་ག་དག་ཏུ་གོལ་བར་བཤད། །མ་ཧཱ་རྡོ་རྗེ་འཆང་འདོད་པ། །ཏིང་འཛིན་རྣམ་གསུམ་སྒོར་ཞུགས་ནས། །རང་རྒྱུད་དག་པའི་དཀྱིལ་འཁོར་ལ། །བསྙེན་བསྒྲུབ་རྣམ་བཞིའི་སྒྲུབ་པར་བྱེད། །ཨ་ཏི་ཡོ་གའི་བདེ་ཆེན་ནི། །རྩོལ་སྒྲུབ་འདས་པའི་བྱང་ཆུབ་སེམས། །རྩོལ་སྒྲུབ་འདས་ལ་མ་ཧཱས་བསྒྲིབས། །རྫོགས་ཆེན་རྩོལ་སྒྲུབ་བྱེད་པ་ནི། །མ་ཧཱ་ཡོ་གར་གོལ་བར་བཤད། །ཨ་ནུ་དབྱེར་མེད་པ་འདོད་པས། །དབྱིངས་དང་ཡེ་ཤེས་སྒོར་ཞུགས་ནས། །རྒྱུ་ནི་དག་པའི་དབྱིངས་སུ་བལྟ། །འབྲས་བུ་ཡེ་ཤེས་དཀྱིལ་འཁོར་བལྟ། །ཨ་ཏི་ཡོ་གའི་བྱང་ཆུབ་སེམས། །རྒྱུ་འབྲས་དག་པའི་བྱང་ཆུབ་སེམས། །རྒྱུ་འབྲས་འདས་ལ་ཨ་ནུས་བསྒྲིབས། །རྫོགས་ཆེན་རྒྱུ་འབྲས་གཉིས་བལྟ་ན། །ཨ་ནུ་ཡོ་གར་གོལ་བར་བཤད། །ཐེག་པ་དག་གི་གོལ་སྒྲིབས་སོ། །ཞེས་སོ། །དེས་ན་ཀུན་བྱེད་བྱང་ཆུབ་སེམས་ཀྱི་རང་བཞིན་ནི་དམིགས་མཚན་སྤྲོས་པ་ཐམས་ཅད་དང་བྲལ་ཞིང་ཞེན་འཛིན་གྱི་རྩོལ་བ་གང་ཡང་མི་མངའ་བས་མི་རྩོལ་མི་བསྒྲུབ་པའི་རང་བཞིན་ཅན་ཡིན་ཀྱང་། དེ་ལྟ་བུའི་གནས་ལུགས་འགྱུར་མེད་བདེ་བ་ཆེ་བའམ་ཆེན་པོའི་གནས་ལུགས་གདོད་ནས་བསལ་བཞག་བྲལ་བའི་རང་བཞིན་འདི་ལ་ཐེག་པ་འོག་མ་ཀུན་གྱིས་བླང་དོར་རྩོལ་སྒྲུབ་བྱས་པའི་དབང་གིས་གོལ་ཞིང་སྒྲིབ་པ་ཡིན་ནོ། །གསུམ་པ་རྣལ་མའི་དོན་ལ་རྩོལ་སྒྲུབ་མེད་པར་བསྟན་པ་ནི། འདི་ལྟར་ཆོས་ཐམས་ཅད་ཀྱི་གནས་ལུགས་ཀུན་བྱེད་བྱང་ཆུབ་སེམས་ཀྱི་རང་བཞིན་ནི་ཆོས་ཉིད་ཡངས་པ་ཆེན་པོ་དཔེ་ནམ་མཁའ་ལྟ་བུ་སྟེ། དེ་ལྟར་ནམ་མཁའ་ལྟ་བུ་ཡི་སེམས་ཉིད་སྐྱེ་བ་མེད་པ་ཆོས་ཉིད་སྤྲོས་པ་ཐམས་ཅད་དང་བྲལ་བའི་རང་བཞིན་གདོད་ནས་ཡེ་སངས་རྒྱས་པའི་བདག་ཉིད་དེ་ལ་ལྟ་བས་གཏན་ལ་ཕབ་ནས་བསྒོམ་དུ་མེད་དེ་དམིགས་མེད་བློ་ལས་འདས་པའི་ཕྱིར་དང་དམ་ཚིག་བསྲུང་དུ་མེད་དེ་ཡེ་ནས་འདའ་ཉམས་དང་བྲལ་བའི་ཕྱིར་དང་། དོན་གཉིས་ལྷུན་གྱིས་གྲུབ་པས་ཕྲིན་ལས་བཙལ་དུ་མེད་པ་དང་སྒྲིབ་གཉིས་གཞི་ནས་གྲོལ་བས་ཡེ་ཤེས་སྒྲིབ་པ་མེད་པ་དང་། མ་བགྲོད་ཡེ་ནས་ནོན་པས་ས་ལ་སྦྱང་དུ་མེད་པ་དང་། འབྲས་བུ་གཞི་ལ་རྫོགས་པས་བགྲོད་པའི་ལམ་ལྔ་ཡང་མེད་པ་དང་། གཟུང་འཛིན་གདོད་ནས་དག་པས་ཕྲ་བ་ཆོས་ཉིད་ཙམ་ཡང་མེད་པ་དང་། སེམས་ཉིད་གཅིག་གི་རང་བཞིན་ལ་ཐ་དད་གཉིས་སུ་གྲུབ་པ་མེད་པས་རྒྱུད་ཀྱི་འབྲེལ་བ་མེད་པ་དང་། བྱང་ཆུབ་སེམས་ལས་གཞན་པའི་ངེས་པའི་ལུང་གིས་གཏན་ལ་འབེབས་པ་མེད་པ་དང་། སེམས་ཉིད་ཡེ་ན་སྒྲོ་སྐུར་ལས་འདས་པས་མན་ངག་གིས་ལ་བཟླར་ཏེ་ལ་བཟླ་བར་བྱ་བ་ཙམ་ཡང་མེད་པ་དེ་ནི་ཨ་ཏི་རྫོགས་པ་ཆེན་པོའི་རིག་པ་བྱང་ཆུབ་སེམས་ཀྱི་ལྟ་བ་རྒྱུ་འབྲས་རྩོལ་སྒྲུབ་ཐམས་ཅད་དང་བྲལ་བ་ཡིན་པར་གསུངས་པའོ། །དེ་ལྟར་རྫོགས་ཆེན་བྱང་ཆུབ་སེམས་ཀྱི་གནས་ལུགས་ལ་རང་བཞིན་བཅུའི་རྩོལ་ཞིང་བསྒྲུབ་ཏུ་མེད་པའི་ཚུལ་ཀྱང་དེ་ཉིད་ལས། རྫོགས་ཆེན་ཤིན་ཏུ་རྣལ་འབྱོར་གྱི། །ལྟ་བ་བསྒོམ་དུ་མེད་པ་ཡིན། ། དམ་ཚིག་བསྲུང་དུ་མེད་པ་ཡིན། །ཕྲིན་ལས་བཙལ་དུ་མེད་པ་ཡིན། །ཡེ་ཤེས་སྒྲིབ་པ་མེད་པ་ཡིན། །ས་ལ་སྦྱང་དུ་མེད་པ་ཡིན། །ལམ་ལ་བསྒྲོད་དུ་མེད་པ་ཡིན། །ཕྲ་བ་གཟུང་འཛིན་བྲལ་བ་ཡིན། །རྒྱུད་ཀྱི་རང་བཞིན་འབྲེལ་བ་ཡིན། །ལུང་གི་རང་བཞིན་ཐོབ་ཏུ་འབེབས། །མན་ངག་དག་གིས་ལ་ཡང་བཟླ། །རྫོགས་ཆེན་ཤིན་ཏུ་རྣལ་འབྱོར་གྱི། །རང་བཞིན་བཅུ་ནི་དེ་ལྟར་རོ། །ཞེས་གསུངས་པ་ནི་བྱང་ཆུབ་ཀྱི་སེམས་གཅིག་པུ་ལ་ལྡོག་པས་ཕྱེ་བ་ཙམ་ལས་མེད་པར་བསྟན་པའོ། །བཞི་པ་རྩོལ་སྒྲུབ་ཅན་ལ་གོལ་སྒྲིབ་བྱུང་བའི་རྒྱུ་མཚན་ནི། བློའི་སྤྱོད་ཡུལ་ལས་འདས་པས་ལྟ་བས་བལྟར་མེད་པའི་ཆོས་ཉིད་བྱང་ཆུབ་ཀྱི་སེམས་གཅིག་ལ་བྱིས་པའི་བློ་ཅན་རྣམས་ཀྱིས་བཏགས་པའི་ཐེག་པ་དྲུག་གི་སྒོམ་བྱེད་ཀྱི་བློ་དྲུག་དུ་བྱུང་བས། ཨ་ཏི་ཡེ་གྲོལ་ཆེན་པོའི་ལམ་ལས་གཞན་དུ་ཐེག་པ་འོག་མའི་ལམ་ལ་གོལ་ས་དང་གནས་ལུགས་ཀྱི་རང་ཞལ་ལ་བསྒྲིབས་པའི་ལྟ་བའི་གོལ་སྒྲིབ་བྱུང་བ་ཡིན་ནོ། །དེ་བཞིན་དུ་བསྲུང་བྱ་བསྲུང་བྱེད་ལས་འདས་པས་དམ་ཚིག་བསྲུང་དུ་མེད་པའི་རང་བཞིན་ཆོས་ཉིད་ཐིག་ལེ་ཉག་གཅིག་ལ་འོག་མའི་ཐེག་པ་དྲུག་གིས་རང་རང་གི་སྡོམ་པ་མི་འདྲ་བ་དྲུག་བསྲུང་བས་རྫོགས་ཆེན་བསྲུང་དུ་མེད་པའི་དམ་ཚིག་ལས་འོག་མའི་ལམ་ལ་གོལ་ས་དང་ཡེ་བསྲུང་ཆེན་པོའི་དོན་ལ་སྒྲིབ་པའི་དམ་ཚིག་གི་གོལ་སྒྲིབ་བྱུང་བ་དང་། དོན་གཉིས་བསྒྲུབ་པའི་ཕྲིན་ལས་བཙལ་དུ་མེད་པར་ཆོས་ཉིད་གཅིག་གི་རང་བཞིན་ཡིན་པ་ལ་ཐེག་པ་འོག་མ་རྣམས་ཀྱིས་སོ་སོའི་ལམ་གྱི་ཕྲིན་ལས་ཀྱི་མཛད་པ་དྲུག་ལ་བརྩོལ་སྒྲུབ་བྱས་པས་བྱར་མེད་ཀྱི་ལམ་ལ་གོལ་ས་དང་དེ་ལ་བསྒྲིབས་པར་གྱུར་པའི་ཕྲིན་ལས་ཀྱི་གོལ་སྒྲིབ་བྱུང་བ་དང་། གདོད་ནས་རང་བཞིན་གྱིས་འོད་གསལ་ཞིང་གཟུང་འཛིན་གྱི་བསྒྲིབས་པ་མེད་པའི་རང་བྱུང་གི་ཡེ་ཤེས་གཅིག་ལ་ཐེག་པ་འོག་མའི་བློས་བཏགས་ཀྱི་ཡེ་ཤེས་དྲུག་གི་འཛིན་པ་བྱུང་བས་འོག་མའི་ལམ་ལ་གོལ་ས་དང་རིག་པའི་རང་ཞལ་ལ་བསྒྲིབ་པའི་ཡེ་ཤེས་ཀྱི་གོལ་སྒྲིབ་བྱུང་བ་དང་། བསྒྲིབ་པ་ཡེ་ནས་མེད་པས་སྦྱངས་བར་བྱར་མེད་པའི་མ་བཅོས་ཡེ་ཤེས་བླ་མའི་ས་གཅིག་གི་བདག་ཉིད་ཡིན་པ་ལ་བསྒྲིབས་པ་སྦྱངས་བའི་སྒོ་ནས་ས་བཅུ་རིམ་གྱིས་ཐོབ་པར་ཞེན་པ་དྲུག་ཏུ་བྱུང་བས་འོག་མའི་ལམ་ལ་གོལ་བ་དང་རྫོགས་ཆེན་དོན་ལ་བསྒྲིབས་པའི་ས་ཡི་གོལ་སྒྲིབ་བྱུང་བ་དང་། ལམ་ལ་བསྒྲོད་དུ་མེད་པར་གཞི་འབྲས་དབྱེར་མེད་ཆེན་པོ་གཅིག་གི་རང་བཞིན་ཡིན་པ་ལ་ལམ་བགྲོད་པར་འདོད་པའི་འོག་མའི་ཐེག་པ་དྲུག་ཏུ་བྱུང་བས་འོག་མའི་ལམ་ལ་གོལ་ཞིང་གོང་མའི་རང་བཞིན་ལ་སྒྲིབ་པའི་ལམ་གྱི་གོལ་སྒྲིབ་བྱུང་བ་དང་། དངོས་པོའི་ཆོས་ཉིད་གང་དུ་ཡང་མ་གྲུབ་པས་གཟུང་བའི་ཡུལ་དུ་མེད་པ་ཆོས་དབྱིངས་གཅིག་གི་རང་བཞིན་ཡིན་པ་ལ་འཛིན་བྱེད་ཡུལ་ཅན་གྱི་དབྱེ་བ་དྲུག་ཏུ་བྱུང་བས་ལ་གོལ་ལ་བསྒྲིབས་ཕྲ་བ་ཆོས་ཉིད་ཀྱི་གོལ་སྒྲིབ་བྱུང་བ་དང་། ཆོས་ཐམས་ཅད་ལ་འབྲེལ་བྱ་འབྲེལ་བྱེད་ཐ་དད་དུ་མ་གྲུབ་པར་གཉིས་མེད་བློ་འདས་ཆེན་པོ་གཅིག་གི་རང་བཞིན་ལ་ཆོས་དང་ཆོས་ཅན་འཁོར་བ་དང་མྱང་འདས་གཞི་ལམ་འབྲས་བུ་སོགས་གཉིས་བཅས་འབྲེལ་བ་ཅན་དུ་འཛིན་པ་དྲུག་ཏུ་བྱུང་བས་ལ་གོལ་ལ་བསྒྲིབས་འབྲེལ་བའི་དོན་ཅན་རྒྱུད་ཀྱི་གོལ་སྒྲིབ་བྱུང་བ་དང་། རང་བྱུང་ཡེ་ཤེས་ཆེན་པོ་བདེན་པ་དབྱེར་མེད་གཅིག་ལས་མེད་པ་ལ་ཐེག་པ་སོ་སོའི་རྟོགས་ཚུལ་གྱིས་གཏན་ལ་དབབ་བྱའི་ངེས་པའི་བདེན་པ་དྲུག་ཏུ་བྱུང་བས་ལ་གོལ་ལ་བསྒྲིབས་ལུང་གི་གོལ་སྒྲིབ་བྱུང་བ་དང་། ངག་ཚིག་གིས་བརྗོད་དུ་མེད་པའི་ཆོས་ཉིད་གཅིག་གི་རང་བཞིན་པ་ལ་བརྗོད་བྱེད་ཀྱི་ཐེག་པ་དྲུག་ཏུ་བྱུང་བས་འོག་མའི་སྒྲ་ཚིག་མཚན་མའི་ཡུལ་དུ་ཞེན་པའི་ལམ་ལ་གོལ་བ་དང་རྫོགས་ཆེན་བརྗོད་མེད་ཀྱི་དོན་ལ་བསྒྲིབས་པའི་མན་ངག་གི་གོལ་སྒྲིབ་བྱུང་བ་ཡིན་ནོ་ཞེས་པའོ། །ལྔ་པ་བྱང་ཆུབ་ཀྱི་སེམས་རྩོལ་སྒྲུབ་ཀུན་ལས་འདས་པ་ནི། འདི་ལྟར་ཆོས་རྣམས་མ་ལུས་པ་ཀུན་གྱི་སྙིང་པོ་ཀུན་བྱེད་བྱང་ཆུབ་ཀྱི་སེམས་འདི་ནི་ཡེ་གདོད་ནས་རང་གི་རང་བཞིན་འབད་རྩོལ་ལ་མ་ལྟོས་པར་ལྷུན་གྱིས་གྲུབ་ཟིན་པ་ཡིན་པས་ན། ཕྱི་ནས་ལྟ་བ་དང་དམ་ཚིག་ལ་སོགས་པ་རང་བཞིན་བཅུ་ཡིས་གཞན་ནས་བཙལ་ཞིང་སྒྲུབ་པར་བྱེད་མི་དགོས་པར་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་ནི་དུས་དང་རྣམ་པ་ཀུན་ཏུ་རྒྱུ་རྐྱེན་རྩོལ་སྒྲུབ་གང་ལའང་མི་ལྟོས་པ་དཔེ་ནམ་མཁའ་ཇི་འདྲ་བ་དེ་བཞིན་མཐོང་ཐོས་ལ་སོགས་པའི་དམིགས་པའི་སྤྱོད་ཡུལ་ཀུན་དང་བྲལ་བ་ཡིན་ལ་དེས་ན་ནམ་མཁའ་དག་ལ་མཁས་བླུན་ཀུན་གྱིས་ཀྱང་བྱ་བ་གང་ཡང་རྩོལ་བར་མི་བྱེད་ཀྱང་ནམ་མཁའ་དག་ལ་སུ་ཀུན་གྱིས་ཀྱང་རྩོལ་བར་བྱ་རུ་མ་དམིགས་ལ། དེ་ལྟར་ནམ་མཁའ་རང་ཉིད་མ་གྲུབ་ཅིང་གཞི་མེད་རྩ་བྲལ་གྱི་རང་བཞིན་ཡིན་པས་སུ་ཀུན་གྱིས་བྱས་ཤིང་རྩོལ་སྒྲུབ་བྱེད་པའི་ཡུལ་ཀུན་ལས་འདས་པ་དེ་བཞིན་དུ་ཀུན་བྱེད་སྙིང་པོ་བྱང་ཆུབ་ཀྱི་སེམས་ང་ཉིད་ཚུལ་མཐོང་གི་ཤེས་པའི་སྤྱོད་ཡུལ་ཀུན་ལས་འདས་ཤིང་མ་གྲུབ་པའི་ཕྱིར་ན། ཀུན་བྱེད་གདོད་མའི་གཤིས་ལུགས་རིག་པ་རང་བྱུང་གི་ཡེ་ཤེས་ང་ལ་ལྟ་བས་བལྟར་མེད་ལ་ཡིད་ཀྱིས་བསྒོམ་དུ་ཡེ་ནས་མེད་དེ་བསྒམ་བྱ་ཡུལ་དང་སྒོམ་བྱེད་ཀྱི་བློ་གཉིས་དང་བྲལ་བའི་ཕྱིར་དང་། དེ་བཞིན་དུ་གོང་དུ་བསྟན་པའི་རང་བཞིན་བཅུ་པོ་དེས་ཀྱང་ནི་བློ་འདས་གཉུག་མའི་ཡེ་ཤེས་ཀུན་བྱེད་བྱང་ཆུབ་ཀྱི་སེམས་སྤྲོས་པ་ཐམས་ཅད་དང་བྲལ་བ་ང་ལ་འབད་རྩོལ་གྱི་བྱ་བ་ཅི་ཡང་བྱ་རུ་ཡོད་པ་མ་ཡིན་ནོ། །ཞེས་སོ། །དྲུག་པ་རང་བཞིན་བཅུའི་རྩོལ་བའི་ཉེས་པ་ནི། དེ་ལྟར་སྙིང་པོ་བྱང་ཆུབ་ཀྱི་རང་བཞིན་ཡེ་ནས་བྱ་རྩོལ་གྱི་ཡུལ་ལས་འདས་པ་ལ་རྒྱུ་མཚན་ཉིད་ཀྱི་ཐེག་པ་དང་འབྲས་བུའི་ཐེག་པ་ཅན་སྔགས་འོག་མ་བ་རྣམས་ཀྱི་རང་བཞིན་བཅུ་པོ་དེ་ཡིས་རང་བྱུང་རིག་པ་བྱང་ཆུབ་ཀྱི་སེམས་ང་ལ་རྩོལ་སྒྲུབ་ཆེན་པོས་བཙལ་བར་བྱས་པའི་སྒོ་ནས་ཀུན་བྱེད་བྱང་ཆུབ་ཀྱི་སེམས་ང་དང་ང་ཡི་རང་བཞིན་ཆོས་དབྱིངས་དམིགས་མཐའ་དང་བྲལ་བ་མཐོང་བར་འདོད་པས་ཨ་ཏི་ཡེ་གྲུབ་ཆེན་པོའི་དོན་ལས་ཉམས་པར་གྱུར་པ་དཔེར་ན་ནམ་འཁའ་ལ་གོམ་པ་བོར་ཞིང་འགྲོ་བར་འདོད་པའི་གང་ཟག་དེ་ས་ལ་ལྟུང་བ་མ་གཏོགས་མཁའ་ལ་འགྲོ་བའི་ཡུལ་མེད་པ་བཞིན་དུ་རང་བཞིན་བཅུ་པོས་ས་ལམ་བགྲོད་པར་འདོད་པས་ཐེག་པ་འོག་མའི་ལམ་དུ་ལྟུང་ཞིང་གོལ་བར་འགྱུར་རོ་ཞེས་གསུངས་པའོ། །བདུན་པ་རྩོལ་སྒྲུབ་ཀུན་ལས་འདས་པའི་རང་བཞིན་བཤད་པ་ལ་བཞི་སྟེ། ཡེ་ནས་གང་དུའང་དམིགས་པ་ཐམས་ཅད་ལས་འདས་པ། གཟུང་འཛིན་གཉིས་བཅས་ལས་འདས་པས་ཡེ་ནས་བྱ་བ་རྩལ་མེད་པར་ལ་བཟླ་བ་གོལ་སྒྲུབ་ཀྱི་ངེས་ཚིག་བཤད་པ། ཐམས་ཅད་བྱང་ཆུབ་ཀྱི་སེམས་སུ་བསྟན་པའོ། །དང་པོ་ལ་ལྔ་སྟེ། སེམས་ཉིད་ལྟ་སྒོམ་ལས་འདས་པ། །བསྲུང་སྡོམ་རྩོལ་སྒྲུབ་ལས་འདས་པ། །སྒྲིབ་མེད་སྦྱངས་བསྒྲོད་ལས་འདས་པ། །གཞི་བྲལ་ངོས་བཟུང་ལས་འདས་པ། །མཆོག་གསང་སྤྲོས་པ་ལས་འདས་པའོ། །དང་པོ་ནི། དེ་ལ་ཀུན་བྱེད་རྒྱལ་པོ་ང་ཡི་རང་བཞིན་ཇི་ལྟར་གནས་པའི་ཚུལ་མ་ནོར་ངེས་པར་བྱེད་པའི་ཐབས་སུ་མན་ངག་དོན་གྱི་ཁུངས་སམ་ལུང་ཟབ་མོ་བསྟན་པ་ནི་ང་ནི་རང་བཞིན་བཅུ་པོས་རྩོལ་ཞིང་སྒྲུབ་པའི་སྤྱོད་ཡུལ་ཀུན་ལས་འདས་པའི་ཕྱིར་ན་བལྟ་བྱ་ལྟ་བྱེད་ཀྱི་ཚུལ་དུ་མཚན་འཛིན་དམིགས་པའི་བློ་ཡིས་ལྟ་བ་བསྒོམ་དུ་མེད་པ་ཡིན་ཞིང་། དེ་བཞིན་ཏུ་དམ་ཚིག་ཕྲིན་ལས་ལ་སོགས་པ་རང་བཞིན་བཅུ་ག་ལ་རྩོལ་བར་འདོད་པ་ཐམས་ཅད་ལྟ་བ་བསྒོམ་དུ་མེད་པ་དེ་བཞིན་དུ་ངལ་བ་ཚི་ཆད་ཀྱི་རྒྱུ་ཙམ་ལས་དོན་འབྲས་ཐོབ་ཏུ་མེད་པའི་རྒྱུ་མཚན་དེ་ཉིད་ཀྱིས་ན་རང་བཞིན་བཅུ་ལ་རྩོལ་སྒྲུབ་བྱས་པས་དོན་ཡོད་པར་མ་རྟོགས་ཤིག །རྒྱུ་མཚན་དེས་ན་སེམས་ཉིད་ནམ་མཁའ་ལྟ་བུ་ཆོས་སྐུ་ཀུན་བྱེད་རྒྱལ་པོ་ང་ལ་ནི་ཡོད་མེད་དང་སྣང་སྟོང་སོགས་གང་དུ་བལྟས་པས་ཀྱང་མཐོང་བའི་ཡུལ་དུ་གྲུབ་པ་མེད་པས། དམིགས་མཚན་སྤྲོས་པའི་སྤྱོད་ཡུལ་གང་དུའང་ལྟ་བར་མ་བྱེད་པར་གཤིས་ལུགས་བཅོས་བསྒྱུར་དང་བྲལ་བ་ཆོས་ཉིད་དེ་བཞིན་ཉིད་ཀྱི་ངང་དུ་རང་བབས་སུ་ཞོག་ཅིག་ཅེས་ལྟ་བ་སྒོམ་དུ་མེད་པར་གདམས་ཏེ། ཀློང་ཆེན་རབ་འབྱམས་ལས། བྱང་ཆུབ་སེམས་ལ་བཙལ་དུ་ཡེ་ནས་མེད། །ཇི་བཞིན་ངང་ལ་མ་བཅོས་གང་དགར་ཐོང་། །བདག་གཞན་ཡུལ་ཅན་ཡེ་ནས་མེད་པས་ན། །མཉམ་པ་རིས་མེད་རིག་པ་གང་དགར་ཐོང་། །རྟག་ཏུ་དེ་དང་འདུ་འབྲལ་མེད་པས་ན། །གཉིས་སུ་ཡུལ་མེད་རིས་མེད་གང་དགར་ཐོང་། །ཞེས་པ་ལྟར་དང་། མདོ་བཅུ་ལས། སྙིང་པོ་བྱང་ཆུབ་རང་བཞིན་ལ། །གཞན་དུ་བལྟ་བའི་ཡུལ་མེད་པས། །ལྟ་བ་བསྒོམ་དུ་མེད་པ་ཡིན། ཅེས་སོ། །གཉིས་པ་ནི། རིག་པ་བྱང་ཆུབ་སེམས་ཀྱི་ངོ་བོ་ནི་གདོད་ནས་གཟུང་འཛིན་གྱི་སྤྲོས་པ་ཐམས་ཅད་དང་བྲལ་བ་མ་སྐྱེས་ཀ་ནས་དག་པ་ཡིན་པས་ལས་ཉོན་གྱི་ཟག་པ་དང་བྲལ་བར་བྱ་བའི་རྒྱུ་སྡོམ་པ་དང་དམ་ཚིག་བསྲུང་བར་བྱ་བ་གང་ཡང་མེད་པས་ཐེག་པ་འོག་མ་ལྟར་དུ་སྡོམ་པ་དང་ནི་ཚུལ་ཁྲིམས་བསྲུང་མི་དགོས་ཞེས་དམ་ཚིག་བསྲུང་དུ་མེད་པར་བསྟན་པ་དང་། ཀློང་ཆེན་རབ་འབྱམས་ལས། གཅིག་ལ་ཀུན་རྫོགས་མ་སྤངས་རང་སར་གྲོལ། །སངས་རྒྱས་སྐུ་དང་སེམས་ཅན་ཉོན་མོངས་ལུས། །ཇི་ལྟར་སྣང་བ་ཐམས་ཅད་རིག་པའི་རྒྱན། །ཉོན་མོངས་དུག་ལྔ་ཡེ་ཤེས་བདུད་རྩི་སྟེ། །འཁོར་བའི་གཡང་ས་བྱང་ཆུབ་ལམ་དུ་དྲངས། །དུག་གསུམ་སྐུ་གསུམ་ཀློང་དུ་གཏན་སྤྲུགས་ཏེ། །སྐྱེ་ཤི་རྩད་གཅོད་ཁམས་གསུམ་ཡོངས་སུ་གྲོལ། །ཞེས་གསུངས་པ་ལྟར་ཁམས་གསུམ་རྒྱུད་དྲུག་གི་འགྲོ་བ་ཐམས་ཅད་རིག་པ་བྱང་ཆུབ་ཀྱི་སྙིང་པོར་ཡེ་ནས་ལྷུན་གྱིས་གྲུབ་ཅིང་སངས་རྒྱས་ཟིན་པའི་ཕྱིར་ན་དེ་ལས་གཞན་དུ་ཕྲིན་ལས་ཞིག་རྩོལ་བར་དང་ནི་འབད་པས་བསྒྲུབ་པ་བྱ་མི་དགོས་སོ་ཞེས་ཕྲིན་ལས་བསྒྲུབ་ཏུ་མེད་པར་བསྟན་པ་སྟེ། སྔ་མ་ལས། སྙིང་པོ་བྱང་ཆུབ་སེམས་དེ་ལ། །གཟུང་འཛིན་མེད་པའི་རང་བཞིན་གྱིས། །དམ་ཚིག་བསྲུང་དུ་མེད་པ་ཡིན། །སྙིང་པོ་བྱང་ཆུབ་སེམས་དེ་ལ། །ལྷུན་གྱིས་གྲུབ་པའི་རང་བཞིན་གྱིས། །ཕྲིན་ལས་བཙལ་དུ་མེད་པ་ཡིན། །ཅེས་གསུངས་སོ། །གསུམ་པ་ནི། སྙིང་པོ་རང་བྱུང་གི་ཡེ་ཤེས་ལ་མ་རིག་པའི་མུན་པས་སྒྲིབ་པ་གདོད་ནས་མེད་པའི་ཕྱིར་ན། ཀུན་མཁྱེན་བླ་མས། འདི་ནི་ཉི་མའི་སྙིང་པོ་དེ་ཉིད་དོན། །རང་བཞག་འོད་གསལ་མི་གཡོ་གནས་པར་འདོད། །གཞན་ནི་སྤྲིན་དང་མུན་སེལ་རྩོལ་སྒྲུབ་ཀྱིས། །ཉི་མ་གདོད་སྒྲུབ་བྱེད་དང་མཚུངས་པར་བསྟན། །ཞེས་གསུངས་པ་བཞིན་དུ་དཔེར་ན་ཉི་མའི་ངོས་ལ་སྤྲིན་གྱིས་སྒྲིབ་པ་ཡོད་མ་མྱོང་པའི་ཕྱིར་སྤྲིན་བསལ་ནས་ཉི་མ་གསལ་བར་བསྐྱེད་དུ་མེད་པ་ལྟར་རང་བྱུང་རིག་པའི་ཡེ་ཤེས་ཡེ་ནས་འོད་གསལ་བའི་རང་བཞིན་དུ་གནས་པ་དེ་ལ་ནི་གསར་དུ་བླང་དོར་རྩོལ་སྒྲུབ་ཀྱི་སྒོ་ནས་ལས་ཉོན་གཟུང་འཛིན་གྱི་སྒྲིབ་པ་བསལ་ཞིང་ཡེ་ཤེས་ཀྱི་རང་བཞིན་གསལ་བར་བསྐྱེད་དུ་མེད་དོ་ཞེས་ཡེ་ཤེས་བསྐྱེད་དུ་མེད་པར་བསྟན་པ་དང་། སྲིད་པ་གསུམ་གྱིས་བསྡུས་པའི་འགྲོ་བ་ཐམས་ཅད་ཆོས་སྐུ་ཀུན་བྱེད་རྒྱལ་པོ་ང་ཡི་ས་རུ་ཡེ་ཐོག་མའི་དུས་ནས་གནས་ཤིང་དེ་ལས་སྐད་ཅིག་ཀྱང་གཡོ་བ་མེད་པའི་ཕྱིར་ན་སྒྲིབ་པ་སྦྱངས་བ་སོགས་འབད་རྩོལ་གྱི་སྒོ་ནས་བསྒྲོད་པར་བྱེད་པའི་ས་ཡི་གོ་རིམ་ཀྱང་ནི་ཡོད་པ་མ་ཡིན་ནོ། །ཞེས་ས་ལ་སྦྱང་དུ་མེད་པ་དང་། ཀུན་བྱེད་ང་ཡིས་འཁོར་འདས་ཀུན་ལ་ཡེ་ནས་ཁྱབ་ཅིང་དབྱེར་མེད་པར་གནས་པའི་ཕྱིར་ན་ཆོས་རྣམས་ཀུན་གྱི་གནས་ལུགས་འགྱུར་བ་མེད་པའི་ཡེ་ཤེས་སྲིད་ཞི་ཀུན་ཁྱབ་ཆེན་པོ་ང་ལ་གཞན་དུ་བགྲོད་པར་བྱ་བའི་ལམ་ལྔ་ཡང་ཡོད་པ་མིན་པའི་ཚུལ་ཤེས་པར་བྱའོ་ཞེས་ས་ལམ་ལ་བགྲོད་དུ་མེད་པར་བསྟན་པ་སྟེ། མདོ་བཅུ་ལས། སྙིང་པོ་བྱང་ཆུབ་སེམས་འདི་ལ། །སྒྲིབ་པ་མེད་པའི་རང་བཞིན་གྱིས། །ཡེ་ནས་རང་བྱུང་ཡེ་ཤེས་ཡིན། །སྙིང་པོ་བྱང་ཆུབ་སེམས་འདི་ལ། །ཐམས་ཅད་འདི་ལ་གནས་པའི་ཕྱིར། །ས་ཞེས་བྱ་བ་སྦྱང་དུ་མེད། །སྙིང་པོ་བྱང་ཆུབ་སེམས་འདི་ལ། །གཞན་དུ་བགྲོད་དུ་མེད་པའི་ཕྱིར། །ལམ་ལ་བགྲོད་དུ་མེད་པ་ཡིན། །ཅེས་གསུངས་སོ། །བཞི་པ་ནི། ཆོས་ཉིད་སྙིང་པོ་རང་བྱུང་གི་ཡེ་ཤེས་ང་ནི་ཡེ་ནས་ཕྱིར་བཟུང་བ་དང་། ནང་འཛིན་པའི་སེམས་གཉིས་དང་བྲལ་བའི་གཞི་གྲོལ་བློ་ལས་འདས་པ་ཡིན་པའི་ཕྱིར་ན་ཕྲ་བ་ཆོས་ཉིད་ཀྱི་རང་བཞིན་ཞེས་པ་ཙམ་དུ་ཡང་ནི་མིང་དུ་གདགས་པ་དང་སེམས་ཀྱི་དམིགས་གཏད་སོགས་སུ་བྱ་བའི་ཡུལ་དུའང་གྲུབ་པ་མེད་དོ་ཅེས་ཕྲ་བ་ཆོས་ཉིད་མེད་པ་བསྟན་པ་དང་། གང་སྣང་ཇི་ཤར་ཐམས་ཅད་ཀུན་བྱེད་རྒྱལ་པོའི་སྐུ་ཡི་བཀོད་པ་ཡིན་པས་སྙིང་པོ་ང་ཡི་གཟུགས་ཀྱིས་འཁོར་འདས་ལམ་གསུམ་གྱིས་བསྡུས་པའི་ཆོས་ཀུན་ལ་མ་ཁྱབ་པ་མེད་པར་ཁྱབ་ཅིང་དབྱེར་མེད་པའི་ཕྱིར་ན་འཁོར་འདས་གཉིས་ཤེས་བྱ་བ་སོགས་གཉིས་ཆོས་ཐམས་ཅད་ཡེ་ནས་ཡོད་པ་མ་ཡིན་པས་འབྲེལ་བྱ་དང་འབྲེལ་ཡུལ་མེད་པའོ་ཞེས་འབྲེལ་བ་རྒྱུད་ཀྱི་རང་བཞིན་མེད་པར་བསྟན་པ་སྟེ། དེ་ཉིད་ལས། སྙིང་པོ་བྱང་ཆུབ་སེམས་འདི་ནི། །ཡེ་ནས་ཆོས་ཉིད་ཡིན་པའི་ཕྱིར། །ཕྲ་བ་དག་གི་རང་བཞིན་ཡིན། །སྙིང་པོ་བྱང་ཆུབ་སེམས་འདི་ལ། །སངས་རྒྱས་སེམས་ཅན་གཉིས་སྣང་བ། །འབྲེལ་བ་རྒྱུད་ཀྱི་རང་བཞིན་ཡིན། །ཅེས་པའི་ལུང་འདི་ཉིད་ཀྱིས་སྒྲུབ་པའི་ཚུལ་དུ་བསྟན་པ་ནི་བྱང་ཆུབ་སེམས་ལ་ལྡོག་པའི་ཆ་ནས་དབྱེ་ན་ཡོན་ཏན་དེ་དག་ཚང་ཚུལ་བསྟན་པ་དང་། འདིར་གཞུང་ལས་དགག་པའི་ཚུལ་གྱིས་བསྟན་པ་ནི་ཐེག་པ་འོག་མས་བརྟགས་པ་ལྟ་བུའི་རང་རྒྱུད་པ་མེད་པར་བསྟན་པ་གཉིས་འགལ་མེད་དུ་གོ་བར་བྱའོ། །ལྔ་པ་ནི། ཀུན་བྱེད་ང་ནི་ཡེ་གདོད་ནས་རང་བྱུང་ཡེ་ཤེས་ཆེན་པོ་རྒྱུ་རྐྱེན་གང་ལ་མི་ལྟོས་པར་འགྱུར་མེད་འདུས་མ་བྱས་པའི་རང་བཞིན་ཡིན་ཞིང་ཇི་ལྟར་སྣང་བའི་ཆོས་ཀུན་ཀྱང་དེའི་རང་བཞིན་དུ་གཏན་ལ་ཕེབས་ཟིན་པ་ཡིན་པའི་ཕྱིར་ན་ང་ལ་ཟབ་མོའི་ལུང་གཞན་གྱིས་གཏན་ལ་དབབ་ཏུ་མེད་དོ་ཞེས་ངེས་པའི་ལུང་མེད་པར་བསྟན་པ་དང་། ང་ནི་འཁོར་འདས་ཀུན་གྱིས་སྙིང་པོ་གནས་ལུགས་བྱང་ཆུབ་ཀྱི་སེམས་རང་བཞིན་རྫོགས་པ་ཆེན་པོ་ཡེ་བབས་སྤྲོས་པ་དང་བྲལ་བའི་བདག་ཉིད་དུ་ལ་བཟླས་ཟིན་པ་ཡིན་པས། དེ་བས་ལྷག་པར་གྱུར་པའི་གསང་བའི་མན་ངག་ཆེས་ཟབ་པ་ཞིག་གཞན་ན་བཙལ་དུ་ཡོད་པ་མ་ཡིན་ནོ་ཞེས། མན་ངག་བཙལ་དུ་མེད་པར་བསྟན་པ་སྟེ། དེ་ལས། རང་བྱུང་ཡེ་ཤེས་སྙིང་པོ་འདིས། །ཆོས་ཀུན་གཏན་ལ་འབེབས་པའི་ཕྱིར། །ལུང་གི་ཐོག་ཏུ་འབེབས་པ་ཡིན། །རང་བྱུང་ཡེ་ཤེས་སྙིང་པོ་འདི། །སྒྲོ་སྐུར་ཀུན་དང་བྲལ་བའི་ཕྱིར། །ལ་ཟློ་བ་ཡི་མན་ངག་ཡིན། །ཅེས་གསུངས་ཏེ། དེ་ལྟར་ས་བཅད་ལྔ་པོ་དེས་སྙིང་པོ་བྱང་ཆུབ་སེམས་ཀྱི་གནས་ལུགས་ལ་རང་བཞིན་བཅུ་ཡིས་དམིགས་སུ་མེད་པར་བསྟན་པ་ཡིན་ནོ། །གཉིས་པ་གཟུང་འཛིན་གཉིས་བཅས་ལས་འདས་པས་ཡེ་ནས་བྱ་བཙལ་མེད་པར་ལ་བཟླ་བ་ནི། དེ་ལྟར་ན་ཆོས་སྐུ་ཀུན་བྱེད་རྒྱལ་པོ་ང་ནི་ངོ་བོས་མི་སྟོང་བ་རྟག་པ་ཐེར་ཟུགས་སུ་ཡོད་པར་སྒྲོ་འདོགས་པ་དང་། སྐུ་དང་ཡེ་ཤེས་ཐམས་ཅད་ཡེ་ནས་ལྷུན་གྲུབ་རྫོགས་པ་ཆེན་པོར་གྲུབ་ཟིན་པ་ལ་མེད་པར་སྐུར་བ་འདེབས་པ་སོགས་གཟུང་འཛིན་མཚན་མའི་སྤྲོས་པ་ཀུན་ལས་འདས་པའི་ཕྱིར། བྱར་མེད་ཡེ་སངས་རྒྱས་པའི་ངང་དུ་ཆོས་རྣམས་ཀུན་གྱི་ལ་ནི་ང་ཡིས་བཟླས་པ་ཡིན་ནོ་ཞེས་སྤྱིར་བསྟན་ནས། བྱེ་བྲག་ཏུ་འོད་གསལ་འདུས་མ་བྱས་པ་ཀུན་ཁྱབ་ནམ་མཁའ་ལྟ་བུའི་རང་བཞིན་ཆོས་སྐུ་ཀུན་བྱེད་རྒྱལ་པོ་ང་མེད་པ་ཡི་ཡུལ་ལམ་ང་ཡི་རང་བཞིན་དུ་མ་གྱུར་པའི་ཆོས་ནི་གཞན་གང་ཡང་མེད་པས་དེ་ལས་གཞན་དུ་ལྟ་བ་རང་བྱུང་གི་ཡེ་ཤེས་ལ་བསྒོམ་པས་བཟང་དུ་འགྲོ་བ་མེད་པར་ཡེ་གྲོལ་བྱར་མེད་ཆེན་པོར་ལ་ཡང་བཟླས་ཟིན་པ་དང་། དེ་བཞིན་དུ་ཡེ་མེད་སྟོང་པ་ཀ་དག་ཆེན་པོ་གཅིག་པུའི་བདག་ཉིད་རང་གནས་ཕྱལ་བའི་ཡེ་ཤེས་འོད་གསལ་ལྷུན་གྱིས་གྲུབ་པའི་རང་བཞིན་ང་ཉིད་ལས་གཞན་དུ་བསྲུང་བྱའི་ཆོས་དང་སྲུང་བྱེད་ཀྱི་བློ་ཡང་མ་གྲུབ་པས་བསྲུང་དུ་མེད་པའི་ཕྱིར་དམ་ཚིག་དང་སྡོམ་པ་བསྲུང་དུ་མེད་པར་ལ་ཡང་བཟླས་ཟིན་པ་དང་། སྣང་སྤྱོད་ཐམས་ཅད་ང་ཡི་ཕྲིན་ལས་རྩོལ་མེད་ལྷུན་གྱིས་གྲུབ་པའི་རང་བཞིན་ཡིན་པ་དེ་ལས་གཞན་དུ་གདུལ་བྱ་འདུལ་བའི་ཕྲིན་ལས་ཞིག་བཙལ་དུ་མེད་པའི་ཕྱིར་ན་ཕྲིན་ལས་བཙལ་དུ་མེད་པར་ལ་ཡང་བཟླས་ཟིན་པ་དང་། སྣང་སྲིད་འཁོར་འདས་ཀྱི་ཆོས་ཐམས་ཅད་ཀུན་བྱེད་ང་ཡི་ངོ་བོ་ཡེ་ཤེས་བླ་མའི་ས་ལ་ད་ལྟ་ཉིད་ནས་གནས་ཡོད་པ་འདི་ལས་གཞན་དུ་གནས་པ་གཅིག་ཀྱང་མེད་པའི་ཕྱིར་ན་ད་གསར་དུ་ས་རྣམས་རིམ་གྱིས་ཐོབ་པ་ལ་ལྟོས་པ་མེད་པས་ས་ལ་སྦྱང་དུ་མེད་པར་ལ་ཡང་བཟླས་པ་དང་། ཡེ་གྲོལ་ཀ་དག་ཆེན་པོ་འོད་གསལ་འཕོ་འགྱུར་མེད་པའི་སེམས་ཉིད་ཀུན་བྱེད་རྒྱལ་པོ་ང་ལ་ལས་ཉོན་གཟུང་འཛིན་གྱི་མུན་པས་སྒྲིབ་པ་ཡེ་ནས་མེད་པའི་ཕྱིར་ན་རང་བྱུང་འདུས་མ་བྱས་པའི་ཡེ་ཤེས་རྒྱུ་རྐྱེན་ཀུན་ལས་འདས་པ་ཡིན་པར་ལ་ཡང་བཟླས་ཟིན་པ་དང་། ང་ཡི་ངོ་བོ་དང་རྩལ་དང་རོལ་པས་བསྡུས་པའི་ཆོས་ཐམས་ཅད་ནི་རྒྱུ་རྐྱེན་གྱིས་བསྐྱེད་པ་ལྟར་སྣང་དུས་ཉིད་ནས་མ་སྐྱེས་ཤིང་འགག་པ་མེད་པའི་ཆོས་ཉིད་ཡིན་པའི་ཕྱིར་ན་ཕྲ་བ་ཆོས་ཉིད་སྤྲོས་པ་དང་བྲལ་བ་ཡང་ང་ཉིད་ཡིན་པར་ལ་ཡང་བཟླས་ཟིན་པ་དང་། ཁམས་གསུམ་གྱི་སེམས་ཅན་ཐམས་ཅད་ཀུན་བྱེད་ང་ཡི་ངོ་བོ་ཟུང་འཇུག་མི་སློབ་པའི་ལམ་ལ་གནས་ཟིན་པ་ལས་གཞན་དུ་ལམ་ཇེ་བཟང་དུ་འགྲོ་བའི་སྒོ་ནས་གོང་ནས་གོང་མར་བགྲོད་དུ་མེད་པའི་ཕྱིར་ལམ་ལ་བགྲོད་དུ་མེད་པར་ལ་ཡང་བཟླས་པ་དང་། དག་པ་སངས་རྒྱས་ལྟར་སྣང་བ་དང་མ་དག་སེམས་ཅན་ལྟར་སྣང་བ་དང་སྣང་ཞིང་སྲིད་པས་བསྡུས་པའི་སྣོད་བཅུད་ཀྱི་ཆོས་ཀུན་སྙིང་པོ་བྱང་ཆུབ་ཀྱི་སེམས་གདོད་ནས་ཡེ་སངས་རྒྱས་པ་ང་ཡི་རྩལ་ལས་བྱུང་བའི་རང་བཞིན་ཡིན་པ་ལ་ཁྱད་པར་མེད་པའི་ཕྱིར་ན་སངས་རྒྱས་དང་སེམས་ཅན་ཡེ་ནས་བཟང་ངན་གཉིས་སུ་མེད་པར་འཁོར་འདས་དབྱེར་མེད་ཆེན་པོ་ལ་ཡང་བཟླས་ཟིན་པ་དང་། སྣང་སྲིད་འཁོར་འདས་ཀྱི་ཆོས་ཐམས་ཅད་རང་བྱུང་ཡེ་ཤེས་ཆེན་པོ་གཅིག་པུའི་བདག་ཉིད་དུ་གཏན་ལ་འབེབས་ཤིང་སྣང་སྲིད་ཀྱི་སྤྲོས་པ་ཐམས་ཅད་ཅིག་ཆར་དུ་གཅོད་པའི་ཕྱིར་ན་ཨ་ཏི་གསང་ཆེན་སྙིང་པོ་ཀུན་བྱེད་བྱང་ཆུབ་ཀྱི་སེམས་འདི་ཉིད་ལུང་ཐམས་ཅད་ཀྱི་ནང་ནས་ཆེན་པོའམ་རྒྱལ་པོ་ཡིན་ལུང་ཇི་བཞིན་པའི་ཐོག་ཏུ་འབེབས་པར་བྱེད་པ་ཡིན་པར་ལ་ཡང་བཟླས་པ་དང་། ཕྱི་ནང་སྣོད་བཅུད་ཀྱི་ཆོས་རྣམས་ཐམས་ཅད་སྙིང་པོ་ང་ཡི་རང་བཞིན་སྐྱེ་མེད་ཡེ་སྟོང་ཆེན་པོ་མ་བཅོས་དེ་བཞིན་ཉིད་ལས་གཞན་དུ་མེད་པའི་ཕྱིར་ན་ཀུན་བྱེད་རྒྱལ་པོ་བྱང་ཆུབ་ཀྱི་སེམས་ང་ཉིད་ཀྱི་ཀློང་ཆོས་དབྱིངས་ཡངས་པ་ཆེན་པོའི་ངང་དུ་འཁོར་འདས་སུ་སྣང་བའི་ཆོས་ཐམས་ཅད་བཟང་ངན་དང་དབྱེ་བསལ་ཕྱོགས་རིས་དང་དམིགས་གཏད། འཁོར་འདས་དང་བདེ་སྡུག །དགག་སྒྲུབ་དང་སྤང་བླང་མེད་པར་ཡེ་ནས་གྲོལ་ཟིན་པ་ཡིན་པས་ན་སྟོན་པ་ཀུན་བྱེད་ང་ནི་ཆོས་རྣམས་མ་ལུས་པ་ཀུན་གྱི་ལ་བཟླ་ཡིན་པར་གསུངས་ཏེ། ཀློང་ཆེན་རབ་འབྱམས་ལས། དབྱིངས་ལ་དབྱིངས་ཤར་དབྱིངས་ཀྱི་ཀློང་དུ་གྲོལ། །མཁའ་ལ་གྲོལ་ལོ་མཉམ་པ་ཉིད་དུ་གྲོལ། །དབྱིངས་སུ་གྲོལ་ལོ་བཟང་ངན་མེད་པར་གྲོལ། །ཀློང་དུ་གྲོལ་ལོ་མཐོ་དམན་མེད་པར་གྲོལ། །གཅིག་ཏུ་གྲོལ་ལོ་སྐྱེ་ཤི་མེད་པས་གྲོལ། །གཅིག་གི་དབྱིངས་སུ་འབད་མེད་རྩོལ་མེད་གྲོལ། །མི་གནས་རང་དག་མ་སྤངས་རང་སར་གྲོལ། །མི་མཉམ་གྲོལ་ཡང་མཉམ་པའི་དབྱིངས་སུ་གྲོལ། །གྲོལ་བའི་དུས་ན་རང་གྲོལ་རང་ས་ཟིན། །གྲོལ་དང་མ་གྲོལ་དབྱིངས་ལ་ཡེ་མེད་པས། །ཇི་ལྟར་གྲོལ་ཡང་རང་སར་རང་ལ་གྲོལ། །ཀུན་ཀྱང་རོ་གཅིག་མཉམ་པའི་དབྱིངས་སུ་གྲོལ། །ལུགས་ཟློག་མེད་པར་དབྱིངས་སུ་གྲོལ་བའོ། །ཆོས་ཉིད་ཀློང་དུ་གྲོལ་ལོ་དབྱེ་བསལ་མེད། །རྩོལ་བ་མེད་པར་གྲོལ་ལོ་སྒྲུབ་ཏུ་མེད། །ངེས་པ་མེད་པར་གྲོལ་ལོ་གཟའ་གཏད་མེད། །ལྷུན་གྱིས་གྲུབ་པར་གྲོལ་ལོ་ཕྱོགས་རིས་མེད། །མཚན་མ་ཐམས་ཅད་རང་སར་གྲོལ་བའི་ཕྱིར། །བྱང་ཆུབ་སེམས་ལ་གྲོལ་དང་མ་གྲོལ་མེད། །ནམ་མཁའི་ཀློང་ན་ཇི་ལྟར་བྱས་ཀྱང་གྲོལ། །ལྷུན་གྲུབ་ཀློང་ལ་གང་ལྟར་བྱས་ཀྱང་གྲོལ། །ཀུན་ཀྱང་འདྲའོ་གཞན་མེད་ཡེ་ནས་གྲོལ། །སྤང་བླང་མེད་པར་རང་སར་རང་ཤར་གྲོལ། །ཞེས་གསུངས་པ་ལྟར་ཆོས་ཐམས་ཅད་རིག་པ་བྱང་ཆུབ་སེམས་ཀྱི་དབྱིངས་སུ་ཡེ་གྲོལ་བསྐྱར་གཞི་མེད་པར་ལ་བཟླ་བར་གསུངས་པའོ། །གསུམ་པ་གོལ་སྒྲིབ་ཀྱི་ངེས་ཚིག་བཤད་པ་ལ་བཞི་སྟེ། མདོར་བསྟན། རྒྱས་པར་བཤད། དོན་བསྡུ་བ་དེ་ཉིད་སྤང་བར་གདམས་པའོ། །དང་པོ་ནི། དེ་ལ་གོལ་ས་དང་སྒྲིབ་པ་ཞེས་བྱ་བའི་རྒྱུ་མཚན་ནམ་ངེས་ཚིག་ནི་འདི་ལྟར་ཁམས་གསུམ་ན་གནས་པའི་སེམས་ཅན་ཡིན་ནོ་ཅོག་གི་རྒྱུད་ན་ཆོས་སྐུ་ཀུན་བྱེད་རྒྱལ་པོ་རིག་པ་རང་བྱུང་གི་ཡེ་ཤེས་ང་ཉིད་བྲི་གང་འཕོ་འགྱུར་དང་བྲལ་བར་ལྷུན་གྲུབ་ཡེ་སངས་རྒྱས་པའི་བདག་ཉིད་དུ་བཞུགས་པ་ཡིན་ཀྱང་རང་ངོ་རང་གིས་མ་ཤེས་པས་འཁོར་བའི་འཁྲུལ་སྣང་དུ་མ་ལ་སྤྱོད་ཅིང་འབྲས་བུ་སངས་རྒྱས་ཀྱི་གོ་འཕང་ཞིག་བླང་དོར་བྱ་རྩོལ་ལ་བརྟེན་ནས་གཞན་དུ་ཚོལ་བར་བྱེད་པ་ནི་འོད་གསལ་སྙིང་པོའི་དོན་ལ་སྒྲིབ་པའི་ངོ་བོར་བཤད་པ་ཡིན་ཏེ། རྒྱལ་ཚབ་ཆེན་པོས། ཇི་ལྟར་མི་དབུལ་ཁྱིམ་ནང་རིན་ཆེན་གཏེར། །མི་ཟད་པ་ཡི་གཏེར་ནི་ཡོད་གྱུར་ལ། །མི་དེས་དེ་མ་ཤེས་ཤིང་གཏེར་དེས་ཡང་། །དེ་ལ་ང་འདིར་ཡོད་ཅེས་མི་སྨྲ་ལྟར། །དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བསལ་དང་བཞག་མེད་ཆོས་ཉིད་ཀྱང་། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་དགུ་འདིས་མྱོང་ངོ་། །ཞེས་གསུངས་པ་ལྟར་རོ། །དེ་ལྟར་རང་བྱུང་གི་ཡེ་ཤེས་དེ་ཉིད་རང་ངོ་མ་ཤེས་པའི་དབང་གིས་སེམས་ཉིད་རང་བྱུང་གི་ཡེ་ཤེས་ཆོས་སྐུ་ཀུན་བྱེད་རྒྱལ་པོ་ང་ཉིད་ཡེ་ནས་འབྲལ་མེད་ལྷུན་གྲུབ་ཏུ་ཡོད་པ་ལ་ཡིད་མ་ཆེས་པར་དེ་ལས་གཞན་དུ་རྒྱུ་རྐྱེན་རྩོལ་སྒྲུབ་ཀྱི་སྒོ་ནས་འབྲས་བུ་སྔོན་མེད་གསར་བྱུང་ཞིག་ཐོབ་པར་རེ་ཞིང་བཙལ་བས་ཐེག་པ་འོག་མའི་ལམ་དུ་གོལ་ས་བྱུང་བ་ཡིན་ཏེ། མདོ་བཅུ་ལས། སྒྲིབ་པ་སྒྲིབ་པ་ཞེས་བྱ་བ། །རིག་ཤེས་བྱ་བའི་ཡུལ་དེ་ལ། །མ་རིག་མ་ཤེས་མ་རྟོགས་པ། །སྒྲིབ་པ་སྒྲིབ་པ་ཞེས་སུ་བཤད། །གོལ་ས་གོལ་ས་ཞེས་བྱ་བ། །དཔེར་ན་དོན་ཡོད་ལམ་ཞུགས་པས། །ཤར་གྱི་དོན་ཡོད་ནུབ་ལམ་ཕྱིན། །ནུབ་ཕྱིན་ཤར་གྱི་དོན་མི་འགྲུབ། །སྤྲོས་པ་མེད་པའི་དོན་བཤོར་བས། །མཚན་མ་དག་གི་ལམ་ལ་བསྒྲོད། །སྒྲོ་སྐུར་བྲལ་བའི་ཆོས་ཉིད་ལ། །ཚིག་དང་ཡི་གེ་བརྗོད་པས་གོལ། །བརྗོད་ཡོད་རྟོག་པ་སྒྲིབ་པ་ཡིན། །ཞེས་གསུངས་སོ། །གཉིས་པ་རྒྱས་པར་བཤད་པ་ནི། དེ་ལྟ་བུའི་སྒྲིབ་པ་དེ་ལ་དབྱེ་ན་ལས་ཀྱི་སྒྲིབ་པ་དང་ཤེས་བྱ་ཡི་སྒྲིབ་པ་རྣམ་པ་གཉིས་སུ་བསྟན་ཏེ། དེ་ཡང་རང་བྱུང་རིག་པའི་ཡེ་ཤེས་ཀྱི་རང་ཞལ་མངོན་སུམ་དུ་མ་མཐོང་བའམ་མ་རིག་པ་ནི་ལས་ཀྱི་སྒྲིབ་པ་ཡིན་ཏེ། ཇི་ལྟར་ན་མཚན་ཉིད་ཐེག་པའི་ལམ་གྱིས་བདེན་པ་གཉིས་ཀྱི་དོན་ལ་རྟོག་ཅིང་དཔྱོད་པའི་ལས་ལ་རྩོལ་བས་སེམས་ཉིད་རང་བྱུང་གི་ཡེ་ཤེས་ཀྱི་དོན་ཇི་བཞིན་མི་མཐོང་བར་སྒྲིབ་པར་བྱེད་པ་དང་། དེ་བཞིན་དུ་ཀྲྀ་ཡ་བས་དག་པ་རྣམ་པ་གསུམ་གྱི་ལས་ལ་རྩོལ་བས་དང་། ཨུ་པ་ཡས་ལྟ་སྤྱོད་ཟུང་འབྲེལ་གྱི་ལས་ལ་རྩོལ་བ་དང་། ཡོ་ག་བས་བླང་དོར་གཉིས་ཀྱི་ལས་ལ་རྩོལ་བ་དང་། མ་ཧཱས་བསྙེན་སྒྲུབ་བཞི་ཡི་ལས་ལ་རྩོལ་བ་དང་། ཨ་ནུས་དབྱིངས་དང་ཡེ་ཤེས་ཀྱི་སྒོར་ཞུགས་ནས་བདེ་སྟོང་ལྷན་གཅིག་སྐྱེས་པའི་ཡེ་ཤེས་བསྐྱེད་པའི་ལས་ལ་རྩོལ་བ་དང་། ཐེག་པ་རང་རང་གི་ལས་དེ་ལ་ཞེན་པས་བཙལ་མེད་རྫོགས་པ་ཆེན་པོའི་གནས་ལུགས་ཇི་བཞིན་མི་མཐོང་བར་སྒྲིབ་པར་བྱེད་པའི་ཆ་ནས་ལས་ཀྱི་བསྒྲིབ་པར་བཤད་པ་ཡིན་ལ་དེའི་དབང་གིས་རིག་པའི་རྩལ་ལས་ཤར་བའི་སྣང་སྲིད་ཀྱི་ཆོས་ཐམས་ཅད་ཡེ་གྲོལ་ཀ་དག་ཆེན་པོ་ཡིན་པར་མ་ཤེས་པར་གཟུང་འཛིན་ཐ་དད་དུ་བལྟས་པ་ནི་ཤེས་བྱའི་སྒྲིབ་པ་ཡིན་པ་སྟེ། དེ་བས་ན་ཇི་ལྟར་སྣང་ཞིང་སྲིད་པའི་ཆོས་ཐམས་ཅད་ཀུན་སྙིང་པོ་བྱང་ཆུབ་སེམས་ཀྱི་ངོ་བོ་ལས་གཞན་དུ་བླང་དོར་གྱི་ཡུལ་གང་ཡང་མེད་པར་བས་ཀྱང་ཚུལ་དེ་ལྟར་དུ་མ་རིག་པ་དང་མ་ཤེས་པ་ནི་སྒྲིབ་པ་གཉིས་ཀྱི་ངོ་བོར་བཤད་ལ། དེ་ལྟར་ཆོས་ཐམས་ཅད་སྙིང་པོ་རང་བྱུང་གི་ཡེ་ཤེས་སྒྲིབ་མེད་བསལ་བཞག་བྲལ་བའི་ཆོས་ཉིད་རྩོལ་སྒྲུབ་བྲལ་བ་ཡིན་པར་མ་ཤེས་པས་རང་བཞིན་བཅུ་ལ་སོ་སོར་ཞེན་ནས་བཙལ་ཞིང་བསྒྲུབ་པར་བྱེད་པ་དེ་ནི་ཐེག་པ་འོག་མའི་ལམ་དུ་ལྟུང་བའི་ཆ་ནས་རྫོགས་པ་ཆེན་པོའི་གོལ་སར་གྱུར་བ་ཡིན་པར་སྟོན་པ་ཀུན་བྱེད་ངས་བཤད་དོ་ཞེས་པ་སྟེ་དེ་ཉིད་ལས། རང་བཞིན་བཅུ་པོའི་ངོ་བོ་ནི། །སྙིང་པོ་བྱང་ཆུབ་སེམས་ཡིན་ཏེ། །ཡ་ན་འདུན་གྱི་གོ་སྐབས་སུ། །རང་གི་རང་བཞིན་མ་ཤེས་ན། །སྒྲིབ་པ་སྒྲིབ་པ་ཞེས་སུ་བཤད། །རང་གི་རང་བཞིན་མ་ཤེས་ནས། །འོག་མ་འོག་མ་ཡིན་སྨྲ་ན། །གོལ་ས་གོལ་ས་ཞེས་སུ་བཤད། །ཅེས་གསུངས་སོ། །གསུམ་པ་ནི། ཀྱེ་སེམས་དཔའ་ཆེན་པོ་ཉོན་ཅིག །ཇི་ལྟར་སྣང་བའི་འཁོར་འདས་ཀྱི་ཆོས་རྣམས་ཐམས་ཅད་ནི་སྙིང་པོ་བྱང་ཆུབ་སེམས་ཀྱི་རང་གི་རང་རྩལ་ཡིན་གྱིས་གཞན་དུ་གྲུབ་པ་རྡུལ་ཙམ་ཡང་ཡོད་པ་མིན་མོད། འོན་ཀྱང་དེ་ལ་བཟང་ངན་དང་རང་གཞན་སོགས་སུ་ཞེན་ནས་རྟོག་པར་བྱེད་ན། དེ་ལྟར་རྟོག་ཅིང་ཞེན་པ་དེ་ཡིས་ནི་རང་གི་རང་ཞལ་ལ་རང་གིས་སྒྲིབས་པ་སྟེ། རང་གི་རང་བཞིན་སྙིང་པོ་བྱང་ཆུབ་སེམས་ཀྱི་གཤིས་ལུགས་ཇི་ལྟ་བ་ཉིད་གང་ཟག་དེ་ཡིས་ཤེས་པ་མིན་ལ་དེས་དབང་གིས་གཞན་དུ་བཙལ་བས་གོལ་ས་ཡང་འབྱུང་བ་ཡིན་ནོ་ཞེས་སོ། །བཞི་པ་དེ་ཉིད་སྤང་བར་གདམས་པ་ལ་གཉིས་ཏེ། ངོ་བོ་རང་སེམས་ཡིན་པས་ཡེ་བདེ་གོལ་སྒྲིབ་ལས་འདས་པ་དང་། དེ་ཉིད་བྱ་བཙལ་ལས་འདས་པར་བཞག་པས་གོལ་སྒྲིབ་གང་ཡང་མེད་པར་བསྟན་པའོ། །དང་པོ་ནི། གོང་དུ་བཤད་པའི་རྒྱུ་མཚན་དེས་ན་ཇི་ལྟར་སྣང་བའི་ཆོས་རྣམས་ཐམས་ཅད་ཀུན་སེམས་དཔའ་རྡོ་རྗེ་ཉིད་ཅེས་ཞུ་བ་པོས་མཚོན་ནས་སེམས་ཅན་ཐམས་ཅད་ཀྱིས་རང་གི་སེམས་ཉིད་ཀྱི་རྩལ་འགགས་མེད་དུ་རང་ལ་སྣང་བ་ཡིན་པ་མ་གཏོགས་རང་ཉིད་ལས་གཞན་པའི་ཆོས་ཞིག་ཡོད་པ་མིན་པར་ཤེས་པར་གྱིས་ལ་འཁོར་འདས་ཀྱི་ཆོས་འདི་རྣམས་ལ་ཚུར་མཐོང་གི་བློས་མི་རྟོག་ཅིང་རང་བཞིན་བཅུ་ཡིས་རྩོལ་བར་མི་བྱེད་པར་རྟོག་མེད་མཉམ་པ་ཉིད་ཀྱི་ངང་དུ་མ་བཅོས་རང་བབས་སུ་གནས་པས་བྱ་བྱེད་ཀྱི་གདུང་བ་མེད་པར་བདེ་བར་མནོས་ཤིག་དང་གོལ་སྒྲིབ་ཐམས་ཅད་ལས་འདས་པ་ཡིན་ནོ་ཞེས་གདམས་པ་སྟེ། རྩལ་རྫོགས་ཀྱི་རྒྱུད་ལས། ཨེ་མ་སངས་རྒྱས་སེམས་དཔའི་རིགས། །དོན་གྱི་དགོངས་པ་ངེས་བསྟན་གྱིས། །ལེགས་པར་ཟུང་ཞིག་རྡོ་རྗེ་འཆང་། །ཡུལ་ལ་རྟོགས་བྱེད་མི་སྣང་བས། །སེམས་ཀྱི་འཛིན་པས་ང་མི་བསྒྲིབ། །ཡེ་ཤེས་ཆོས་ལས་འདས་པས་ན། །སྣ་ཚོགས་བློ་ཡིས་ང་མི་བསྒྲིབ། །སྣང་ཡུལ་གཉིས་སུ་མི་འཛིན་པས། །རྣམ་ཤེས་བརྒྱད་ཀྱིས་ང་མི་བསྒྲིབ། །སངས་རྒྱས་སེམས་ཅན་མི་འབྱེད་པས། །བཟང་ངན་གཉིས་ཀྱི་ང་མི་བསྒྲིབ། །སྟོང་གསལ་གཉིས་སུ་མི་འབྱེད་པས། །བྱིང་རྒོད་གཉིས་ཀྱི་ང་མི་བསྒྲིབ། །བྱ་བྱེད་གཉིས་སུ་མི་འཛིན་པས། །ཐེག་པའི་རྩོལ་བས་ང་མི་བསྒྲིབ། །རྟོགས་དང་མ་རྟོགས་གཉིས་མེད་པས། །ཡིན་མིན་གཉིས་ཀྱིས་ང་མི་བསྒྲིབ། །ཤེས་དང་མ་ཤེས་གཉིས་མེད་པས། །བློ་དངོས་གཉིས་ཀྱིས་ང་མི་བསྒྲིབ། །ཕྱོགས་དང་རིས་སུ་མི་འཛིན་པས། །དགྲ་གཉེན་གཉིས་ཀྱིས་ང་མི་བསྒྲིབ། །མཐའ་དང་དབུས་སུ་མི་འབྱེད་པས། །གོལ་སྒྲིབ་གཉིས་ཀྱིས་ང་མི་བསྒྲིབ། །ཅེས་པ་ལ་སོགས་པས་བསྟན་པ་བཞིན་ནོ། །གཉིས་པ་ནི། འོ་ན་བདེ་བར་མནོས་ཤིག་ཅེས་གདམས་པར་མཛད་ན་དེ་ལ་བདེ་བའི་དོན་ལ་གནས་པས་གོལ་སྒྲིབ་ཐམས་ཅད་ལས་འདས་པའི་ཚུལ་ནི་ཇི་ལྟ་བུ་ཡིན་ཞེ་ན། དེ་ནི་འདི་ལྟ་སྟེ་ཡེ་གྲོལ་ཕྱོགས་ཡན་ཆེན་པོའི་དགོངས་པ་འདི་ལ་ལྟ་བ་དང་དམ་ཚིག་ལ་སོགས་པས་ལམ་གྱི་རང་བཞིན་ཐེག་པ་ཀུན་ལ་ཁྱབ་པས་ཆེན་པོ་བཅུ་ཞེས་གསུངས་པ་དེ་ཡིས་འབད་རྩོལ་གང་ཡང་མི་དགོས་པས་ན་ལུས་ངག་གི་བྱ་བྱེད་གང་ཡང་མེད་པར་སྣང་བ་རྒྱ་ཡན། ཤེས་པ་རང་གྲོལ་རིག་པ་གཏད་མེད་དུ་བཏང་ནས་རང་བཞིན་ཆེན་པོ་བཅུ་ལ་བླང་དོར་རེ་དོགས་ཀྱིས་མ་བཙལ་བས་གོལ་ས་དང་སྒྲིབ་པ་དྲུག་དྲུག་བཅུ་པོ་ཡི་ཞེས་ངེས་ཐོབ་ཀྱི་ཐེག་པ་དྲུག་པོ་རེ་རེ་བཞིན་ལྟ་བ་དང་། དམ་ཚིག་དང་། ཕྲིན་ལས་དང་། ཡེ་ཤེས་དང་། ས་དང་། ལམ་དང་། ཆོས་ཉིད་དང་། རྒྱུད་དང་། ལུང་དང་། མན་ངག་གི་གོལ་སྒྲིབ་བཅུ་རེར་ཕྱེ་བས་ཨ་ནུ་ལ་གོལ་ས་མ་ཧཱ་ལ་སོགས་པ་འོག་མ་ལྔ་པོའི་རང་བཞིན་བཅུར་གོལ་བའི་ཆས་དབྱེ་བས་ལྔ་བཅུ་དང་། སྒྲིབ་པ་གོལ་མ་ཨ་ཏིའི་རང་བཞིན་བཅུ་ལ་བསྒྲིབ་པའི་ཆ་བཅུ་ཡོད་པས་དྲུག་ཅུ་དང་། དེའི་འགྲོས་ཀྱིས་མ་ཧཱ་ཡོ་གར་གོལ་ས་བཞི་བཅུ་དང་སྒྲིབ་པ་ཉི་ཤུ་སྟེ་དྲུག་ཅུ་དང་། ཡོ་ག་ལ་གོལ་སྒྲིབ་གཉིས་ཀ་སུམ་ཅུ་རེ་སྟེ་དྲུག་ཅུ་དང་། ཨུ་པ་ལ་གོལ་ས་ཉི་ཤུ་དང་སྒྲིབ་པ་བཞི་བཅུ་སྟེ་དྲུག་ཅུ་དང་། ཀྲྀ་ཡ་ལ་གོལ་ས་བཅུ་དང་སྒྲིབ་པ་ལྔ་བཅུ་སྟེ་དྲུག་ཅུ་དང་། མདོ་སྡེ་ལ་སྒྲིབ་པ་དྲུག་ཅུ་ཡོད་པས་དེ་ལྟར་དྲུག་ཅུ་ཚན་དྲུག་སྡོམ་པས་སུམ་བརྒྱ་དྲུག་ཅུ་ཡི་གོལ་སྒྲིབ་མཐའ་ཡས་པ་ཀུན་འབྱུང་བ་མེད་པར་མ་ཟད་ལྟ་བ་ཡེ་འབྱམས་ཆེན་པོའི་དགོངས་པ་རང་བྱུང་ཡེ་ཤེས་ཀྱི་རང་བཞིན་མངོན་དུ་འགྱུར་བས་རྩོལ་གྲུབ་ཀུན་ལས་འདས་ཏེ་བདེ་བར་གནས་པ་ཡིན་པར་གསུངས་ཏེ། ཀློང་ཆེན་རབ་འབྱམས་ལས། མཚན་ཉིད་མ་འགགས་སྣ་ཚོགས་ཅིར་ཡང་འཆར། །དབང་པོ་གཅེར་མཐོང་ཅིར་སྣང་ཆོས་ཉིད་གསལ། །སྣང་བ་རྒྱ་ཡན་རིག་པ་གང་དགར་བདེ། །མ་བཅོས་རྣལ་འདུག་རིག་པ་ཁོང་ཀློད་བདེ། །ཤེས་པ་བག་ཡང་བྱར་མེད་སྐྱེས་བུ་བཞིན། །གྲིམ་ལྷོད་མེད་པར་ལུས་སེམས་གང་དགར་བཞག །སུས་ཀྱང་མ་བཅོས་རང་གིས་རང་ཉིད་གསལ། །རྩོལ་སྒྲུབ་མེད་པར་ཆོས་ཉིད་བདེ་གདལ་བས། །ཡེ་ནས་ཡིན་པས་བཅོས་སུ་ག་ལ་ཡོད། །གཅིག་པུར་མ་བཅོས་གློད་ན་རང་གྲོལ་བདེ། །ཞེས་གསུངས་པ་བཞིན་ནོ། །བཞི་པ་ཐམས་ཅད་བྱང་ཆུབ་སེམས་སུ་བསྟན་པ་ནི། ཀྱེ་སེམས་དཔའ་ཆེན་པོ་ཇི་ལྟར་སྣང་ཞིང་སྲིད་པའི་ཆོས་རྣམས་ཐམས་ཅད་ཀུན་རང་གི་རང་བཞིན་སྙིང་པོ་བྱང་ཆུབ་སེམས་ཀྱི་རང་རྩལ་འབའ་ཞིག་མངོན་དུ་ཕྱུང་གིས་ཏེ་མངོན་དུ་བྱུང་བ་ཙམ་ལས་ཀུན་བྱེད་བྱང་ཆུབ་ཀྱི་སེམས་འདི་མ་ཡིན་པར་ཉིད་ཀྱི་རང་བཞིན་ལས་གཞན་པའི་རང་མཚན་གྱི་ཆོས་སུ་གྲུབ་པ་ནི་གཞན་ཞིག་ན་ཡོད་པར་མ་བཤད་པས་འདི་ལྟར་སྣང་བའི་ཆོས་རྣམས་ལ་གཞན་དུ་མ་རྟོགས་ཤིག་པར་ཀུན་བྱེད་ང་ཉིད་ཀྱིས་ལུང་སྟོན་པ་ཡིན་པས། སེམས་དཔའ་ཆེན་པོ་ཁྱོད་ཀྱིས་ཡང་རབ་ཨ་ཏིའི་སྐལ་བ་དང་ལྡན་པའི་འཁོར་གྱི་ཚོགས་དངོས་སུ་འདུས་པ་རྣམས་ལ་ངས་ཇི་ལྟར་ལུང་བསྟན་པ་བཞིན་དུ་ལུང་སྟོན་པ་དང་ཕྱི་རབས་རྗེས་འཇུག་གི་ཚོགས་རྣམས་ལ་ཡང་དེ་བཞིན་དུ་ལུང་སྟོན་ཅིག །ཅེས་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་གོལ་སྒྲིབ་སྐྱོན་སེལ་གྱི་ལེའུ་སྟེ་དགུ་པའི་འགྲེལ་པའོ།། །།བདུན་པ་ཐམས་ཅད་བྱང་ཆུབ་སེམས་སུ་འདུས་ཤིང་སེམས་ལ་སྣང་བའི་ལེའུ་བཅུ་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལྟར་གོལ་སྒྲིབ་སྤང་ཚུལ་དང་བཅས་པ་བསྟན་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་ཉིད་ཀྱི་རང་བཞིན་སྟོང་གསལ་ཐུགས་རྗེ་གསུམ་གྱི་རྩལ་ལས་སྟོན་འཁོར་བསྟན་པ་སྟེ་ཕུན་སུམ་ཚོགས་པ་གསུམ་དུ་སྣང་བའི་ཚུལ་འདི་གསུངས་སོ། །གཉིས་པ་རྒྱས་པར་བཤད་པ་ལ་གཉིས་ཏེ། ཕུན་སུམ་ཚོགས་པའི་རང་བཞིན་སྤྱིར་བསྟན་པ་དང་། བྱེ་བྲག་ཏུ་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་ཀུན་བྱེད་ང་ཡི་རང་བཞིན་ལས་སྐུ་གསུམ་གྱི་ཕུན་སུམ་ཚོགས་པ་ཐམས་ཅད་བྱུང་བའི་ཚུལ་འདི་ཉོན་ཅིག །དེ་ཡང་ཇི་ལྟར་ཞེ་ན་ཀུན་བྱེད་ང་ལ་སྟོན་པ་དང་བསྟན་པ་ལ་སོགས་པ་ཐམས་ཅད་འདུས་ཤིང་ཚོགས་པའི་ཕྱིར་ན་དེ་ཕྱིར་སྟོན་འཁོར་ལ་སོགས་པའི་ཆོས་རྣམས་ལ་ཕུན་སུམ་ཚོགས་པ་ཞེས་བྱ་བར་བཤད་ལ། ཀུན་བྱེད་ང་ཡི་རང་བཞིན་སྟོང་པ་དང་གསལ་བ་དང་ཐུགས་རྗེ་རིག་པའི་ཆ་རྣམ་པ་གསུམ་ལས་སྐུ་གསུམ་གྱི་སྟོན་པ་རྣམས་དང་དེ་དག་གི་བསྟན་པ་དང་སོ་སོའི་འཁོར་རྣམས་བྱུང་བའི་ཕྱིར་ན་འཁོར་འདས་ཀྱི་ཆོས་རྣམས་ཀུན་བྱེད་པའི་རྒྱལ་པོ་ཉིད་ཅེས་ནི་རྒྱུ་མཚན་དེ་ལ་བརྟེན་ནས་བཏགས་པ་ཡིན་ནོ། །གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། ཀུན་བྱེད་ཀྱི་རང་བཞིན་ལས་ཕུན་སུམ་ཚོགས་པ་བྱུང་བར་བསྟན་པ་དང་། ཀུན་བྱེད་ཉིད་ལ་ཕུན་སུམ་ཚོགས་པ་ཐམས་ཅད་ཚང་བར་བསྟན་པའོ། །དང་པོ་ལ་བདུན་ཏེ། སྟོན་པ། བསྟན་པ། འཁོར། གནས། ཞིང་ཁམས། དུས། བཤད་ལུགས་ཕུན་སུམ་ཚོགས་པ་རྒྱ་ཆེར་བཤད་པའོ། །དང་པོ་ལ་གཉིས་ཏེ། དབྱེ་བ་དང་། རང་བཞིན་ནོ། །དང་པོ་ནི། དེ་ལ་སྙིང་པོ་བྱང་ཆུབ་ཀྱི་སེམས་ལས་ཕུན་སུམ་ཚོགས་པ་རྣམས་ཇི་ལྟར་བྱུང་བའི་ཚུལ་ལས་དང་པོར་སྟོན་པ་ཕུན་སུམ་ཚོགས་པ་ཇི་ལྟར་སྣང་བའི་ཚུལ་ནི་སྟོན་པ་ཀུན་བྱེད་ང་ཡི་སྙིང་པོ་རང་བྱུང་གི་ཡེ་ཤེས་འགྱུར་བ་མེད་པ་ལྷུན་གྲུབ་རྩལ་གྱི་ཀློང་ལས་འགགས་པ་མེད་པའི་རང་བཞིན་རྣམ་པ་གསུམ་དུ་བྱུང་བ་དེ་ནི་སྐུ་གསུམ་གྱི་སྟོན་པ་རྣམ་པ་གསུམ་དུ་བསྟན་པ་ཡིན་ཏེ། དེ་ཡང་སངས་རྒྱས་ཆོས་ཀྱི་སྐུ་སྤྲོས་བྲལ་རང་བྱུང་གི་ཡེ་ཤེས་འཕོ་འགྱུར་དང་བྲལ་བ་དང་། རིག་རྩལ་འཛིན་མེད་རང་བྱུང་གི་ཡེ་ཤེས་འོད་གསལ་འདུས་མ་བྱས་པའི་ངོ་བོ་ལོངས་སྤྱོད་རྫོགས་པ་ཡི་སྐུ་དང་། རྟོག་བྲལ་བློ་ལས་འདས་པའི་ཡེ་ཤེས་ཐུགས་རྗེ་ཀུན་ཁྱབ་ཡེ་རྫོགས་ཆེན་པོ་སྤྲུལ་པའི་སྐུ་དང་རྣམ་པ་གསུམ་དུ་བསྟན་པ་ཡིན་ནོ། །གཉིས་པ་རང་བཞིན་ནི། དེ་ལྟ་བུའི་སྐུ་གསུམ་པོ་དེ་ཡི་རང་བཞིན་ནམ་མཚན་ཉིད་བསྟན་པ་ནི་འདི་ལྟར། དང་པོ་ཆོས་ཀྱི་སྐུ་ཡི་རང་བཞིན་ཇི་ལྟར་ཡིན་པ་བསྟན་པ་ནི་ཆོས་དབྱིངས་བྱང་ཆུབ་སེམས་ཀྱི་རང་བཞིན་གདོད་ནས་མ་སྐྱེས་ཤིང་འགགས་པ་མེད་པས་སྐྱེ་མེད་སྤྲོས་པ་དང་བྲལ་བ་གཟུང་འཛིན་གྱི་མཚན་མ་ཀུན་དང་བྲལ་བའི་རང་བཞིན་མི་རྟོག་མཉམ་པ་ཆེན་པོ་ཀ་དག་གི་ངོ་བོར་བཞུགས་པ་དང་། ལོངས་སྤྱོད་རྫོགས་པའི་སྐུ་ཡི་རང་བཞིན་བསྟན་པ་ནི་ཇི་ལྟར་ན་བྱང་ཆུབ་སེམས་ཀྱི་ངོ་བོ་གསལ་བའི་ཆ་གཉིས་སྣང་འཛིན་བྲལ་གྱི་ཀློང་ནས་རང་གདང་འགག་མེད་ཀྱི་རང་རྩལ་གཟུགས་སྒྲ་དྲི་རོ་ལ་སོགས་པ་འདོད་པའི་ལོངས་སྤྱོད་ཐམས་ཅད་མ་བཙལ་ལྷུན་གྱིས་གྲུབ་པར་འགགས་མེད་རང་རྩལ་དུ་རྫོགས་ཤིང་རང་སྣང་རྒྱན་དུ་ཤར་བའི་ཚུལ་གྱིས་ལོངས་སྤྱོད་པར་བཞུགས་པ་དང་། གང་འདུལ་སྤྲུལ་པའི་སྐུ་ཡི་རང་བཞིན་ཇི་ལྟར་བསྟན་པ་ནི་ཐུགས་རྗེའི་རིག་རྩལ་གོ་མ་འགགས་པའི་ཆ་ལས་གདུལ་བྱ་གང་ལ་ཐབས་གང་གིས་ཚུལ་ཇི་ལྟར་འདུལ་བའི་སྒྱུ་འཕྲུལ་གྱི་རོལ་པ་ཚད་མེད་པའི་སྐུ་རུ་སྤྲུལ་ནས་བཞུགས་པ་སྟེ། བང་མཛོད་འཕྲུལ་གྱི་ལྡེའུ་མིག་ལས། ཆོས་ཀྱི་སྐུ་རུ་བཞུགས་ཙམ་ན། །མི་རྟོག་མཉམ་པའི་ངོ་བོར་བཞུགས། །ལོངས་སྤྱོད་རྫོགས་སྐུར་བཞུགས་ཙམ་ན། །སྣ་ཚོགས་ཆོས་ལ་ལོངས་སྤྱོད་ཅིང་། །མ་སྤངས་ཡེ་ཤེས་རྒྱན་དུ་བཞུགས། །སྤྲུལ་པའི་སྐུ་རུ་བཞུགས་ཙམ་ན། །གང་ལ་གང་དགོས་དེར་སྤྲུལ་ནས། །དགོས་པ་ཕུན་སུམ་ཚོགས་པར་བཞུགས། །ཞེས་གསུངས་སོ། །གཉིས་པ་བསྟན་པ་ཕུན་སུམ་ཚོགས་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལྟ་བུའི་སྐུ་གསུམ་གྱི་སྟོན་པ་གསུམ་པོ་དེ་ཡི་བསྟན་པ་ནི་ཇི་ལྟར་ཞེ་ན་དེ་ལ་སྤྲུལ་སྐུའི་བསྟན་པ་ནི་ཕྱི་མཚན་ཉིད་སྡེ་གསུམ་དང་། ལོངས་སྐུའི་བསྟན་པ་ནི་ནང་ཀྲྀ་ཡོག་སྡེ་གསུམ་དང་། ཆོས་སྐུའི་བསྟན་པ་ནི་གསང་བ་ནང་རྒྱུད་སྡེ་གསུམ་སྟེ་རྣམ་པ་གསུམ་དུ་བསྟན་པ་ཡིན་ནོ། །གཉིས་པ་རྒྱས་པར་བཤད་པ་ལ་གསུམ་སྟེ། ཆོས་སྐུ་ལོངས་སྐུ་སྤྲུལ་སྐུའི་བསྟན་པ་རྒྱས་པར་བཤད་པའོ། །དང་པོ་ལ་གཉིས་ཏེ། གསང་བ་གསུམ་སྤྱིར་བསྟན་པ་དང་། མ་ཧཱ། ཨ་ནུ། ཨ་ཏི་གསུམ་བྱེ་བྲག་ཏུ་བཤད་པའོ། །དང་པོ་ནི། དེ་ལ་སྟོན་པ་ཆོས་སྐུའི་བསྟན་པ་རྣམ་པ་གསུམ་ནི་གང་ཡིན་ཞེ་ན་འདི་ལྟ་སྟེ། འོག་མའི་ཐེག་པ་བ་རྣམས་ཀྱིས་ཤིན་ཏུ་རྟོགས་པར་དཀའ་ཞིང་བློའི་སྤྱོད་ཡུལ་དུ་མ་གྱུར་པས་གསང་བ་གསུམ་གྱི་རང་བཞིན་དུ་བསྟན་པ་སྟེ། དེ་ཡང་ཆོས་ཐམས་ཅད་ཀྱི་གནས་ལུགས་གཞི་ཡི་རང་བཞིན་གཉུག་མ་དོན་གྱི་ཡེ་ཤེས་སམ་ཆོས་ཉིད་རྣམ་དག་གི་རང་བཞིན་དེ་ཇི་ལྟར་རྟོགས་པའི་ཚུལ་ནི་མ་ཧཱ་ཡོ་ག་བས་ཆོས་ཐམས་ཅད་ཀྱི་རང་བཞིན་གནས་ལུགས་དོན་དམ་པའི་བདེན་པ་དཀོར་བདུན་ངོ་བོ་ཉིད་མེད་པར་ལྷུན་གྱིས་གྲུབ་པ་དང་། དེའི་སྣང་ཆ་ཀུན་རྫོབ་ཀྱི་ཆོས་ཐམས་ཅད་དག་པ་ལྷའི་རང་བཞིན་དུ་གནས་པ་གཉིས་ཡེ་ནས་གཉིས་སུ་མེད་པས་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བར་རྟོགས་པ་དང་། ཨ་ནུ་ཡོ་ག་བས་འཁོར་འདས་སུ་སྣང་བའི་ཆོས་ཐམས་ཅད་གདོད་ནས་སྐྱེ་བ་མེད་པ་དབྱིངས་སྤྲོས་པ་དང་བྲལ་བའི་ངོ་བོར་གནས་པ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར་དང་། དེའི་སྣང་ཆ་རིག་རྩལ་འགག་པ་མེད་པའི་རོལ་པ་རིས་མེད་མཉམ་པ་ཆེན་པོར་ཁྱབ་གདལ་དུ་ཤར་བ་ནི་ཀུན་ཏུ་བཟང་པོ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང་། དབྱིངས་དང་ཡེ་ཤེས་དེ་གཉིས་ཡེ་ནས་དབྱེར་མེད་པ་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་ཏེ། དེ་ལྟ་བུའི་དཀྱིལ་འཁོར་གསུམ་གྱི་རང་བཞིན་དུ་རྟོགས་པ་དང་། ཨ་ཏི་ཡོ་ག་བས་སེམས་ཉིད་རང་བྱུང་གི་ཡེ་ཤེས་ངོ་བོ་ཡེ་སྟོང་སྤྲོས་པ་དང་བྲལ་བ་ཀ་དག་སྐྱེ་བ་མེད་པའི་རང་བཞིན་འོད་གསལ་བའི་སྣང་ཆ་ཐམས་ཅད་ལྷུན་གྲུབ་འདུས་མ་བྱས་པའི་རང་བཞིན་དུ་གནས་པ་གཉིས་དབྱེར་མེད་པའི་རྩལ་སྣང་འཁོར་འདས་ཀྱི་རོལ་པ་སྣ་ཚོགས་སུ་འཆར་བས་ཐུགས་རྗེ་ཀུན་ཁྱབ་ཀྱི་རང་བཞིན་ཅན་ཏེ། དེ་ལྟ་བུའི་རིག་པ་སྐུ་གསུམ་གྱི་ངོ་བོར་ཆོས་ཐམས་ཅད་ཡེ་ནས་སངས་རྒྱས་པའི་བདག་ཉིད་དུ་རྟོགས་པ་སྟེ། དེ་ལྟར་རྟོགས་ཚུལ་གྱི་རིམ་པ་གསུམ་དུ་ཡོད་པ་ལས་གསང་བ་བསྐྱེད་པའི་རིམ་པ་གཙོ་བོར་སྟོན་པ་མ་ཧཱ་ཡོ་ག་དང་། རབ་ཏུ་གསང་བ་མཚན་བཅས་རྫོགས་པའི་རིམ་པ་གཙོ་བོར་སྟོན་པ་ཨ་ནུ་ཡོ་ག་དང་། ཤིན་ཏུ་གསང་བ་ཡང་གསང་བླ་ན་མེད་པ་མཚན་མེད་རྫོགས་པ་ཆེན་པོའི་རང་བཞིན་མ་ནོར་བར་རྟོགས་པ་ཨ་ཏི་ཡོ་ག་དང་གསུམ་པོ་དེ་གང་ཟག་དབང་པོ་རྣོན་པོའི་རིགས་ཅན་རྣམས་ལས་ཀུན་གྱི་སྤྱོད་ཡུལ་དུ་གྱུར་བ་མ་ཡིན་པས་ན་གསང་བར་བཤད་པ་ཡིན་ནོ། །གཉིས་པ་ལ་གསུམ་སྟེ། མ་ཧཱ། ཨ་ནུ། ཨ་ཏི་གསུམ་བྱེ་བྲག་ཏུ་བཤད་པའོ། །དང་པོ་མ་ཧཱ་ཡོ་གའི་འཇུག་སྒོ་ནི་དབང་བཞིས་རང་རྒྱུད་སྨིན་པར་བྱེད་པ་སྟེ། སྒྱུ་འཕྲུལ་ལས། སློབ་དཔོན་གསང་བ་ཤེས་ར བ་དང་། །དེ་མ་ཐག་པ་བཞིན་པ་སྟེ། །ཞེས་གསུངས་པ་ལྟར་ལ། དེ་ཡང་རྒྱུད་ཐམས་ཅད་ཀྱི་རྒྱལ་པོ་གསང་བ་སྒྱུ་འཕྲུལ་དྲྭ་བ་ལྟར་ན། དེ་ཉིད་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །ཞེས་པ་ལྟར་རང་དོན་ནུས་པའི་དད་པ་ཅན་ལ་ཕྱི་ཕན་པའི་དབང་བཅུ་དང་། གཞན་དོན་ནུས་པའི་བརྩོན་འགྲུས་ཅན་ལ་ནང་ནུས་པའི་དབང་ལྔ། སྤྱོད་རིག་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའི་དབང་གསུམ་སྟེ་དབང་མཆོག་བཅོ་བརྒྱད་དུ་གསུངས་པ་སོགས་རྒྱུད་སྡེ་སོ་སོའི་དབང་བཞི་ལ་དབྱེ་བསྡུའི་ཁྱད་པར་མང་དུ་ཡོད་ལ། སྒྲུབ་སྡེ་ཐམས་ཅད་ཀྱི་སྤྱི་བཀའ་བཀའ་བརྒྱད་བདེ་གཤེགས་འདུས་པ་ལྟར་ན་གདུལ་བྱ་ཞེ་སྡང་ཅན་སྒྲོལ་བ་ལམ་དུ་ཁྱེར་བའི་ཕྱིར་ཕྱི་དབང་རྫས་ལ་བརྟེན་ནས་བསྐུར་བ། ང་རྒྱལ་ཅན་ལྷ་ལམ་དུ་ཁྱེར་བའི་ཕྱིར་ནང་དབང་ལུས་ལ་བརྟེན་ནས་བསྐུར་བ། འདོད་ཆགས་ཅན་སྦྱོར་བ་ལམ་དུ་ཁྱེར་བའི་ཕྱིར་གསང་དབང་ཡུན་ལ་བརྟེན་ནས་བསྐུར་བ། གཏི་མུག་ཅན་རྣམ་རྟོག་ལམ་དུ་ཁྱེར་བའི་ཕྱིར་དེ་ཁོ་ན་ཉིད་ཀྱི་དབང་སེམས་ལ་བརྟེན་ནས་བསྐུར་བ་བཞི་ཡོད་ལ། སྒྲུབ་སྡེའི་དགོས་བཀའ་ཡང་ཕུར་མ་གཤིན་སོགས་ལ་སོ་སོའི་ཟབ་ཁྱད་སྒྲུབ་དབང་གི་ལུགས་སུ་བསྐུར་བ་མང་དུ་ཡོད་ཀྱང་སྤྱི་རིགས་ནས་བསྡུ་ན་བླ་མེད་ཀྱི་དབང་ཐམས་ཅད་དབང་བཞིའི་ཁུངས་སུ་འདུས་པར་གསུངས་སོ། །འདི་དག་གི་བྱ་བའི་འཇུག་སྒོ་ནི་ལེའུ་སོ་བརྒྱད་པ་ནས་སྟོན་ལ། ཚུལ་ཁྲིམས་ནི་ལེའུ་ཞེ་དྲུག་པར་སྟོན་པས་འདིར་མ་སྤྲོས་སོ། །ལྟ་བ་ནི་གོང་དུ་བསྟན་པ་ལྟར་ཆོས་ཐམས་ཅད་དག་མཉམ་བདེན་པ་དབྱེར་མེད་བློའི་སྤྱོད་ཡུལ་དང་བྲལ་པར་གཏན་ལ་འབེབས་པའོ། །བསྒོམ་པ་ནི། དོན་དམ་པར་ཆོས་ཐམས་ཅད་ཡེ་སྟོང་སྐྱེ་བ་མེད་པའི་ངོ་བོར་གནས་པས་བསྐྱེད་བྱ་སྐྱེད་བྱེད་གཉིས་སུ་མེད་པའི་རང་བཞིན་ཡིན་པ་ལ་ཀུན་རྫོབ་སྟོང་པ་ཆེན་པོ། སྙིང་རྗེ་སྒྱུ་མ། ཕྱག་རྒྱ་ཕྲ་རགས་ཏེ་ཏིང་ངེ་འཛིན་གྱི་རིམ་པ་གསུམ་དང་བསྙེན་སྒྲུབ་ཡན་ལག་དང་བཅས་པའི་ཚུལ་གྱིས་སྣོད་བཅུད་དག་པ་ལྷའི་དཀྱིལ་འཁོར་དུ་བསྐྱེད་པའི་རིམ་པ་གཙོ་བོར་སྟོན་ཅིང་རྫོགས་རིམ་ཀྱང་རྩ་ཐིག་རླུང་གསུམ་ལ་གནད་དུ་བསྣུན་པས་གསལ་སྟོང་རྣམ་པར་མི་རྟོག་པའི་ཡེ་ཤེས་བསྐྱེད་པ་སོགས་ལ་བརྟེན་ནས་ལམ་བསྒྲུབ་པ་དང་། སྤྱོད་པ་ནི་ཆོས་ཐམས་ཅད་ལ་བླང་དོར་མེད་པའི་ངང་ནས་སྦྱོར་སྒྲོལ་ལ་སོགས་པའི་སྤྱོད་པ་རླབས་པོ་ཆེ་ལ་བསྟེན་ནས། འབྲས་བུ་ནི་གནས་སྐབས་ཀྱི་འབྲས་བུ་རིག་འཛིན་རྣམ་པ་བཞི་དང་། མཐར་ཐུག་གི་འབྲས་བུ་ཡི་གེ་འཁོར་ལོ་ཚོགས་ཆེན་གྱི་ས་ཐོབ་པར་འདོད་པ་སྟེ། དེ་ལྟ་བུའི་གསང་བ་མཆོག་གི་དོན་སྟོན་པར་བྱེད་པ་དེ་ནི་བསྐྱེད་རིམ་གཙོ་བོར་སྟོན་པས་གསང་བ་བསྐྱེད་པའི་རིམ་པ་ཞེས་སུ་བཤད་པའོ། །གཉིས་པ་ཨ་ནུ་ཡོ་ག་ལ། དང་པོ་འཇུག་སྒོ་ནི། ཀུན་འདུས་རིག་པའི་མདོ་ལས། ཕྱི་ཡི་དབང་དང་ནང་གི་དབང་། །སྒྲུབ་པའི་དབང་དང་གསང་བའི་དབང་། །བཅུ་དང་བཅུ་གཅིག་བཅུ་གསུམ་དང་། །རྣམ་པ་གཉིས་ཀྱིས་རྫོགས་པར་འགྱུར། །ཞེས་པ་ལྟར། ཨ་ནུ་ཡོ་གའི་དཀྱིལ་འཁོར་དུ་ཕྱི་དབང་རྒྱུད་ཀྱི་ཆུ་བོ་བཅུ། ནང་དབང་འབྱུང་བའི་ཆུ་བོ་བཅུ་གཅིག །སྒྲུབ་དབང་གྲགས་པའི་ཆུ་བོ་བཅུ་གསུམ། གསང་དབང་རྫོགས་པའི་ཆུ་བོ་གཉིས་བཅས་དབང་མཆོག་སུམ་ཅུ་རྩ་དྲུག་གིས་སྨིན་པར་བྱེད་པ་ཡིན་ནོ། །ལྟ་བ་ནི་ཐུན་མོང་གི་སྤྱོད་ཡུལ་དུ་མ་གྱུར་པས་གསང་བ་མཚན་བཅས་རྫོགས་པའི་རིམ་པ་གཙོ་བོར་སྟོན་པས་སམ་བསྐྱེད་སྔགས་བརྗོད་པ་ཙམ་གྱིས་སྣོད་བཅུད་ལྷའི་དཀྱིལ་འཁོར་དུ་རྫོགས་པར་བསྒོམ་པས་རྫོགས་པ་ཨ་ནུ་ཡོ་ག་ཞེས་སུ་བསྟན་པ་ཡིས་ཆོས་ཐམས་ཅད་རིག་སྟོང་གཉིས་སུ་མེད་པ་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་དུ་གཏན་ལ་ཕབ་པ་ནི་གོང་དུ་བསྟན་པ་ལྟར་ཡིན་ལ། སྒོམ་པ་ནི་སྣོད་བཅུད་ཀྱིས་བསྡུས་པའི་ཆོས་ཐམས་ཅད་ཐོག་མར་གང་ལས་སྣང་བའི་གཞི་ནང་གི་ལུས་ཀྱི་རྩ་རླུང་ཐིག་ལེ་སེམས་དང་བཅས་པ་རྡོ་རྗེ་བཞིའི་རང་བཞིན་དུ་རྟོགས་པའི་ཤེས་རབ་ལ་བརྟེན་ནས་མ་ཧཱ་ཡོ་ག་ལྟར་ཏིང་ངེ་འཛིན་གསུམ་གྱིས་ལྷ་བསྐྱེད་པའི་སྤྲོས་པ་ལ་མི་རྟོག་ཅིང་། ཇི་ལྟར་སྣང་བའི་ཆོས་རྣམས་ཐམས་ཅད་ལ་སོ་སོར་རྟོག་མི་དགོས་པར་ནང་གི་རྩ་རླུང་ཐིག་ལེ་རྣམས་ལམ་དུ་སློང་ན་ཐམས་ཅད་དག་པ་ཡེ་ཤེས་སུ་འཆར་བ་དང་མ་སློང་ན་མ་དག་འཁོར་བའི་སྣང་བ་དབང་མེད་དུ་འབྱུང་བར་ཤེས་ནས་རྩ་རླུང་ཐིག་ལེ་ལ་བརྟེན་པའི་རྡོ་རྗེའི་བཟླས་པ་དང་ལུས་ཀྱི་འཁྲུལ་འཁོར་དང་སྦྱོར་བ་བཞི་ལྡན་གྱི་རླུང་བུམ་པ་ཅན་དུ་བསྒོམ་པ་དང་། ཁྱད་པར་དུ་རང་ལུས་དང་གཞན་ལུས་ཀྱི་ཐབས་ལ་བརྟེན་ནས་བདེ་སྟོང་ལྷན་གཅིག་སྐྱེས་པའི་ཡེ་ཤེས་མངོན་དུ་བྱེད་པའི་མཚན་བཅས་ཀྱི་རྫོགས་རིམ་གཙོ་བོར་བསྒོམ་པ་དང་། ལྷ་སྒོམ་པའི་ཚུལ་ཀྱང་ཏིང་ངེ་འཛིན་དང་ཤེས་རབ་ཟབ་མོ་དང་ལྡན་པས་ལྷའི་ས་བོན་ནམ་སྙིང་པོ་བསྐྱེད་སྔགས་བརྗོད་པ་ཙམ་གྱིས་རང་རྒྱུད་ཀྱི་ཕུང་ཁམས་སྐྱེ་མཆེད་ཐམས་ཅད་རྣམ་པར་དག་པ་ཡེ་ནས་ལྷར་བཞུགས་པ་ཉིད་ཆུ་ལས་ཉ་འཕར་བ་ལྟར་སྐད་ཅིག་གིས་གསལ་བར་བྱས་ནས་རང་གི་ལུས་ཀྱི་གནས་ལུགས་རྡོ་རྗེ་ཕུང་པོའི་གྲོང་ཁྱེར་ཡིན་པས་སྐྱེ་མཆེད་རྣམས་དག་པ་ལྷའི་དཀྱིལ་འཁོར་དུ་བསྒོམ་པ་དང་། སྤྱོད་པ་ནི། སྤྱི་མདོ་དགོངས་འདུས་ལས། བྱིན་གྱིས་རླབས་ཀྱི་སྤྱོད་པ་དང་། །དབང་བསྒྱུར་ཐབས་ཀྱི་སྤྱོད་པ་སྟེ། །དཔེར་ན་ནམ་མཁའ་རྒྱལ་པོའམ། །ཇི་ལྟར་མེ་དཔུང་ཆུ་བོ་འདྲ། །ཞེས་གསུང་པ་ལྟར་དབྱིངས་ཡེ་གཉིས་མེད་དུ་རྟོགས་པའི་བྱིན་རླབས་ཀྱི་སྤྱོད་པ་ནམ་མཁའ་ལྟ་བུ། དུག་ལྔ་ཡེ་ཤེས་སུ་དབང་བསྒྱུར་བའི་སྤྱོད་པ་རྒྱལ་པོས་མངའ་རིས་ལ་དབང་བསྒྱུར་བ་ལྟ་བུའམ་མེ་དཔུང་གིས་བུད་ཤིང་བསྲེག་པ་ལྟ་བུ། སྲིད་ཞི་མཉམ་ཉིད་དུ་རྟོགས་པའི་ལྟ་བ་དང་ལྡན་པས་སྤྱོད་པ་བླང་དོར་གཉིས་སུ་མེད་པའི་ཐབས་ཀྱི་སྤྱོད་པ་རྒྱུན་མི་ཆད་པ་ཆུ་བོའི་རྒྱུན་ལྟ་བུ་རྣམས་སོ། །འབྲས་བུ་ནི། དེ་ལྟ་བུ་རྣལ་འབྱོར་ཟབ་མོ་ལ་བརྟེན་ནས་འདུན་པ་སེམས་པའི་རྣལ་འབྱོར་ལ་སོགས་པའི་ལམ་ལྔ་དང་འགྱུར་དབང་མ་ངེས་པའི་ས་ལ་སོགས་པ་ས་བཅུ་གཅིག་པོ་མྱུར་དུ་བགྲོད་ནས་སྐུ་བཞི་ཡེ་ཤེས་ལྔ་ཡི་བདག་ཉིད་བདེ་བ་ཆེན་པོ་སངས་རྒྱས་རྡོ་རྗེ་འཆང་གི་སྐུ་མངོན་དུ་ཐོབ་པར་འདོད་པ་དེ་ནི་ནང་གི་ཤེས་རབ་དང་ཏིང་འཛིན་ལ་བརྟེན་པའི་ལམ་གསང་བ་ཡོངས་སུ་རྫོགས་པ་ཡིན་པར་བཤད་པའོ། །གསུམ་པ་ཨ་ཏི་ཡོ་ག་ནི། ཤིན་ཏུ་གསང་བ་ཐེག་པའི་རྩེ་རྒྱལ་རྫོགས་པ་ཆེན་པོ་ཇི་ལྟར་བསྟན་པ་ཡི་ཚུལ་ལ། དང་པོ་འཇུག་སྒོ་ནི། དབང་རྫོགས་པ་རང་བྱུང་ལས། སྤྲོས་བཅས་སྤྲོས་པ་མེད་པ་དང་། ། ཤིན་ཏུ་སྤྲོས་མེད་རབ་སྤྲོས་མེད། །དབང་ནི་རྣམ་པ་བཞི་ཡིས་ཀྱང་། །སྐལ་པ་ལྡན་ལ་སྨིན་པར་བྱ། །ཞེས་གསུངས་པ་ལྟར་དབང་བཞི་པ་ལ་ནང་གསེས་སུ་ཕྱེ་བའི་སྤྲོས་བཅས་བུམ་པའི་དབང་དང་། སྤྲོས་མེད་གསང་བའི་དབང་། ཤིན་ཏུ་སྤྲོས་མེད་ཤེས་རབ་ཡེ་ཤེས་ཀྱི་དབང་། རབ་ཏུ་སྤྲོས་མེད་དོན་དམ་ཚིག་གི་དབང་བཞིའམ་རིག་པའི་རྩལ་དབང་ལ་རྟེན་ནས་སྨིན་པར་བྱེད་པའོ། །ལྟ་བ་ནི་ཇི་ལྟར་སྣང་བའི་ཆོས་རྣམས་ཐམས་ཅད་ནི་རྩ་བ་རང་བྱུང་གི་ཡེ་ཤེས་སྙིང་པོ་བྱང་ཆུབ་སེམས་སུ་འདུས་ཤིང་བྱང་ཆུབ་ཀྱི་སེམས་སྐུ་གསུམ་ལྷུན་གྱིས་གྲུབ་པའི་བདག་ཉིད་དུ་གནས་པ་ནི་སྤང་བླང་བསལ་བཞག་ཐམས་ཅད་དང་བྲལ་བ་ཡིན་པས་མ་ཧཱ་ཡོ་ག་ལྟར་ཏིང་འཛིན་རྣམ་པ་གསུམ་གྱིས་བྱང་ཆུབ་ཀྱི་སེམས་གསར་དུ་མ་བསྐྱེད་ལ། ཨ་ནུ་ཡོ་ག་ལྟར་སྙིང་པོ་ཡིག་འབྲུ་བརྗོད་པའི་སྒོ་ནས་ལྷའི་དཀྱིལ་འཁོར་དུ་རྫོགས་པར་མ་བྱས་པར་ཀུན་བྱེད་བྱང་ཆུབ་ཀྱི་སེམས་ང་ནི་ཡེ་ནས་མངོན་པར་རྫོགས་པར་སངས་རྒྱས་པའི་རང་བཞིན་མ་བཙལ་ལྷུན་གྱིས་གྲུབ་པས་རྫོགས་པ་ཆེན་པོ་སྟེ། དེ་ལྟ་བུའི་སྙིང་པོ་བྱང་ཆུབ་ཀྱི་སེམས་ང་ལ་མ་རྫོགས་པ་ཡི་འཁོར་འདས་ཀྱི་ཆོས་དེ་ནི་གང་ཡང་མེད་ལ། ང་ཡི་རང་བཞིན་སྐུ་གསུམ་གྱི་ལྡོག་པས་རྣམ་པ་གསུམ་དུ་བསྟན་པ་ནི་དོན་ལ་རྫོགས་ཆེན་བྱང་ཆུབ་ཀྱི་སེམས་སུ་ངོ་བོར་དབྱེར་མེད་པ་གཅིག་པུའི་རང་བཞིན་ལ་ལྡོག་པ་ཙམ་དུ་དེ་ལྟར་གསུམ་དུ་བསྟན་པ་སྟེ། དེས་ན་ཆོས་ཐམས་ཅད་རིག་པ་བྱང་ཆུབ་སེམས་ཀྱི་རང་བཞིན་དུ་ཡེ་ནས་སངས་རྒྱས་པར་ལྟ་བ་ཡིན་ནོ། །སྒོམ་པ་ནི་དེ་ལྟ་བུའི་ཆོས་ཐམས་ཅད་ཀྱི་གནས་ལུགས་མཐར་ཐུག་པ་རིག་པར་བྱང་ཆུབ་ཀྱི་སེམས་དེ་ལ་རྩོལ་བས་སྒོམ་དུ་མེད་ཅིང་ཡེངས་སུ་ཡེ་ནས་མེད་པའི་རང་བཞིན་བབ་ཀྱི་བསམ་གཏན་ངང་བཞག་ཆུ་བོའི་རྒྱུན་གྱི་ཏིང་ངེ་འཛིན་དང་ལྡན་པའོ། །སྤྱོད་པ་ནི་ཅིར་སྣང་ཐམས་ཅད་ཆོས་ཉིད་ཀྱི་རོལ་པ་ཉག་གཅིག་ཏུ་ཤར་བས་ཆེད་དུ་རྩོལ་བའི་བླང་དོར་གང་ཡང་མེད་པར་ལྷུན་འབྱམས་བྱར་མེད་ཆེན་པོ་གང་ཤར་ཤུགས་འབྱུང་གི་ཚུལ་ཀྱིས་སྤྱོད་པ་སྟེ། འཕྲུལ་ལྡེའུ་ལས། ཨ་ཏི་ཡོ་གའི་སྤྱོད་པ་ནི། ལྟ་སྒོམ་སྲོག་དང་ལྡན་པ་ཡིས། །ཤུགས་ལས་བྱུང་བའི་སྤྱོད་པ་ནི། །ཇི་ལྟར་སྨྱོན་པའི་སྤྱོད་པ་བཞིན། །གང་ལའང་ཐོགས་པ་མེད་པར་སྤྱོད། །ཅེས་གསུངས་པ་ལྟར་རོ། །འབྲས་བུ་ནི་ཡེ་ནས་སྐུ་གསུམ་གྱི་ཡོན་ཏན་ཐམས་ཅད་མ་བཙལ་ལྷུན་གྱིས་གྲུབ་པའི་ཚུལ་དུ་གནས་པ་ཉིད་ཇི་ལྟ་བ་བཞིན་དུ་མངོན་དུ་ཐོབ་པར་འདོད་པ་དེ་ནི་ཤིན་ཏུ་གསང་བ་རྫོགས་པ་ཆེན་པོར་བཤད་པའོ། །དེ་ལྟ་བུའི་ཤིན་ཏུ་གསང་བ་ལས་ཀྱང་ཡང་གསང་བླ་ན་མེད་པ་མ་ཧཱ་ཨ་ནུ་ཨ་ཏི་གསུམ་པོ་དེ་ནི་སྟོན་པ་ཆོས་ཀྱི་སྐུའི་བསྟན་པ་ཡིན་པར་བཤད་པའོ། །གཉིས་པ་ལོངས་སྐུའི་བསྟན་པ་བཤད་པ་ལ་གཉིས་ཏེ། ནང་པ་གསུམ་སྤྱིར་བསྟན་པ་དང་། ཀྲི་ཡ། ཨུ་པ། ཡོ་ག་གསུམ་བྱེ་བྲག་ཏུ་བཤད་པའོ། །དང་པོ་ནི། དེ་ལ་སྟོན་པ་ལོངས་སྤྱོད་རྫོགས་པའི་སྐུ་ཡི་བསྟན་པ་ནི་ཕྱི་ནང་གི་ཆོས་རྣམས་ལ་བླང་དོར་གྱི་བྱ་བ་བྱེད་པའི་ཕྱིར་ན་ཕྱི་བྱ་བ་དང་ཕྱིའི་དཀའ་ཐུབ་ལ་བརྟེན་ནས་ནང་གི་དོན་རིག་པར་བྱེད་པས་དཀའ་ཐུབ་རིག་བྱེད་ཀྱི་ཐེག་པ་ཞེས་གྲགས་པ་ཀྲྀ་ཡ་ཨུ་པ་ཡོ་ག་ཡི་སྡེ་གསུམ་དུ་བསྟན་པ་སྟེ་དེ་དག་ནི་སྟོན་པ་ལོངས་སྐུའི་བསྟན་པ་ཡིན་ནོ་ཞེས་སྤྱིར་བསྟན་པའོ། །གཉིས་པ་བྱེ་བྲག་ཏུ་བཤད་པ་ལ་གསུམ་ལས། དང་པོ་ཀྲྀ་ཡ་ནི། འདི་ལྟར་ལུས་ངག་གི་བྱ་བ་ཁྲུས་དང་གཙང་སྦྲ་ལ་སོགས་པ་བྱེད་པའི་རྟོག་པ་ཅན་གྱི་སྡེ་བ་བྱ་བའི་རྒྱུད་ཀྱི་ཐོག་མའི་འཇུག་སྒོ་ནི། ཡེ་ཤེས་ཐིག་ལེ་ལས། ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །ཞེས་གསུངས་པ་ལྟར་བུམ་པའི་དབང་གིས་ཆོས་སྐུ་དང་ཅོད་པཎ་དབང་གིས་གཟུགས་སྐུའི་ནུས་པ་འཇོག་པ་རྩ་བའི་དབང་དང་། དེའི་འཁོར་དུ་མེ་ཏོག་གང་ལ་ཕོག་པའི་ལྷ་ཡི་བཟླས་ལུང་སྦྱིན་པ་རྡོ་རྗེ་སློབ་མའི་དབང་དང་། བར་ཆད་ཞི་ཞིང་བགེགས་གཞོམ་པ་བྱ་བ་བཀྲུ་བསྲུང་བའི་དབང་དང་། འབྱོར་པ་རྒྱས་བྱེད་བཀྲ་ཤིས་རྫས་བརྒྱད་ཀྱི་དབང་རྣམས་བསྐུར་བའོ། །ལྟ་བ་ནི་དོན་དམ་པར་ཆོས་ཐམས་ཅད་རང་བཞིན་གྱིས་རྣམ་པར་དག་པ་ཡོད་མེད་སྣང་སྟོང་གི་སྤྲོས་པའི་མཐའ་བཞི་དང་བྲལ་བའི་སྣང་ཆ་ཀུན་རྫོབ་རིགས་གསུམ་ལྷའི་རང་བཞིན་དུ་བལྟས་ཏེ་བསྒོམ་ན་མཐར་ཐུག་རང་ཉིད་ལྷ་དེ་དང་དེའི་ངོ་བོར་འགྱུར་དུ་རུང་བའི་ངེས་ཤེས་ཁྱད་པར་ཅན་དང་ལྡན་པའི་སྒོ་ནས་སྒོམ་པ་ནི་མཚན་བཅས་དང་མཚན་མེད་གཉིས་ལས། དང་པོར་རྣམ་པར་མི་རྟོག་པའི་ཏིང་ངེ་འཛིན་གྱིས་ཏེ་ཏིང་འཛིན་གྱི་ངང་ནས་མཚན་བཅས་ལྷའི་ཏིང་འཛིན་ཇི་ལྟར་བསྒོམ་པར་བྱ་བའི་ཚུལ་ནི་ཤ་ཆང་སྒོག་ཙོང་ལ་སོགས་པ་སྤང་ཞིང་ཁྲུས་དང་གཙང་སྦྲ་ལ་གནས་པ་ཕྱི་རྫས་དང་ཡོ་བྱད་དག་པ། བཟླས་བརྗོད་དང་བསམ་གཏན་གྱི་དེ་ཁོ་ན་ཉིད་ནི་ནང་སྔགས་དང་ཏིང་འཛིན་དག་པ་དང་། བདག་དང་ལྷའི་དེ་ཁོ་ན་ཉིད་ནི་གསང་བ་རྟོག་ཚོགས་ལྷ་དང་དཀྱིལ་འཁོར་དུ་ད ག་པ་སྟེ་དག་པ་གསུམ་དང་ལྡན་པར་སྒོམ་དགོས་པས། དེ་ཚུལ་ལ་འཇུག་པ་ན་བླང་དོར་ལ་རྣམ་པར་རྟོག་པའི་སྒོ་ནས་ཕུར་བུ་དང་པ་སངས་སོགས་གཟའ་སྐར་བཟང་བ་དང་མགོ་དང་རྒྱལ་ལ་སོགས་པ་རྒྱུ་སྐར་བཟང་བ་དང་ཡར་གྱི་ཚེས་བརྒྱད་ལ་སོགས་པ་དུས་ཚོད་བཟང་པོའི་འཕྲོད་སྦྱོར་དང་བསྟུན་པའི་སྒོ་ནས་འཇུག་ཅིང་། དེ་ཡང་དེ་ཁོ་ན་ཉིད་བཞིའི་སྒོ་ནས་བསྒོམ་པར་གསུངས་པ་ལས། དང་པོ་བདག་གི་དེ་ཁོ་ན་ཉིད་ནི་ལྟ་བའི་ངང་དུ་འཇོག་པ་སྟེ་གོང་དུ་བསྟན་པ་ལྟར་ལ། གཉིས་པ་ལྷའི་དེ་ཁོ་ན་ཉིད་ནི་སྤྱིར་ཀྲྀ་ཡ་ལྷ་དྲུག་ཏུ་གྲགས་པ། ཇི་སྐད་དུ། སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་ལྷ་དྲུག་གོ། །ཞེས་པས་སྟོང་པའི་ལྷ་བདག་གི་དེ་ཁོ་ན་ཉིད་ལྟ་བའ་ིངང་ལ་འཇོག་པ་དང་། ཡི་གེའི་ལྷ་ཀུན་རྫོབ་ཟླ་དཀྱིལ་གྱི་རྣམ་པར་བསྒོམ་པ་དང་། སྒྲའི་ལྷ་ནི་དེའི་སྟེང་དུ་བཟླ་བྱའི་སྔགས་རང་སྒྲ་སྒྲོག་པར་བསྒོམ་པ་དང་། གཟུགས་ཀྱི་ལྷ་ཟླ་དཀྱིལ་སྔགས་ཕྲེང་དང་བཅས་པ་ལས་འོད་ཟེར་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབ་སྟེ་སྔགས་ཕྲེང་ཟླ་དཀྱིལ་དང་བཅས་པ་ཡོངས་སུ་གྱུར་པ་ལས་རིགས་གསུམ་གྱི་ལྷ་གང་ཡིན་གྱི་སྐུར་བསྒོམ་པ་དང་། ཕྱག་རྒྱའི་ལྷ་དེ་ལ་རིགས་གང་ཡིན་གྱི་ལྷས་དམ་རྒྱས་འདེབས་པ་དང་། མཚན་མའི་ལྷ་ནི་སྤྱོད་ལམ་ཀུན་ཏུ་ལྷ་དེའི་སྣང་བ་དང་མི་འབྲལ་བ་སྟེ་དེ་ལྟར་དུ་བསྒོམ་པར་གསུངས་ཀྱང་། སྐབས་འདིར་མངོན་པར་བྱང་ཆུབ་པ་ལྔའི་སྒོ་ནས་བསྒོམ་པར་གསུངས་པ་གང་ལྟར་ཡང་དབྱེ་བསྡུ་ཙམ་ལས་དོན་གནད་མཐུན་པ་འདྲ་ལ། དེ་ལ་མངོན་བྱང་ལྔ་ནི། སྟོང་པ་ཉིད་དང་། གདན་ཟླ་བ་དང་། གསུང་ཡིག་འབྲུ་དང་། ཐུགས་ཕྱག་མཚན་དང་། སྐུ་ཡོངས་རྫོགས་ལས་མངོན་པར་བྱང་ཆུབ་པ་ལྔ་དང་ནི། ལྷ་གཙོ་འཁོར་ཡོངས་རྫོགས་སུ་བསྒོམ་པ་ནི་ཏིང་ངེ་འཛིན་གྱི་ཆོ་འཕྲུལ་དང་། ལྷ་དེ་དག་ལ་རང་རང་གི་རིགས་ཀྱིས་བྱིན་གྱིས་བརླབ་པ་བྱིན་གྱིས་བརླབས་པའི་ཆོ་འཕྲུལ་དང་། རང་རིགས་ཀྱི་སྐུ་དང་ཡེ་ཤེས་དང་གཟུང་དང་ཏིང་ངེ་འཛིན་དང་ལྡན་པས་དབང་བསྐུར་བ་ནི་དབང་བསྐུར་བའི་ཆོ་འཕྲུལ་དང་། ཕྱག་མཆོད་བསྟོད་པ་བྱ་བ་ནི་མཆོད་པའི་ཆོ་འཕྲུལ་སྟེ། དེ་ལྟ་བུའི་ཆོ་འཕྲུལ་བཞི་ལ་སོགས་པའི་ཐབས་སྣ་ཚོགས་ཀྱིས་བདག་དམ་ཚིག་པ་དང་ཡེ་ཤེས་ཀྱི་ལྷ་གཉིས་ནི་རྗེ་བོ་དང་ཁོལ་པོའི་ཚུལ་དུ་བསྒོམ་ཞིང་། ལྷ་མཉེས་པའི་ཆེད་དུ་ཕྱག་འཚལ་བ་དང་དག་པ་གསུམ་ལྡན་གྱིས་མཆོད་པ་འབུལ་བ་སོགས་ཡན་ལག་བདུན་པ་དང་བསྟོད་པ་རྣམས་བྱ་བའོ། །གསུམ་པ་བཟླས་བརྗོད་ཀྱི་དེ་ཁོ་ན་ཉིད་ནི། བསམ་གཏན་ཕྱི་མའི་རྒྱུད་ལས། སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཡན་ལག་མ་ཉམས་གསང་སྔགས་བཟླས། །ཞེས་གསུངས་པས། གཞི་དང་པོ་ནི་ལྷ་ཡེ་ཤེས་པ་མདུན་དུ་བསྒོམ་པ། ཕྱི་མ་ནི་བདག་ཉིད་ལྷར་གསལ་བ། སེམས་ནི་དེ་དག་གི་ཐུགས་ཀར་ཟླ་དཀྱིལ་བསམ་པ། སྒྲ་ནི་དེའི་སྟེང་དུ་སྔགས་ཕྲེང་རང་སྒྲ་སྒྲོགས་པར་བསམ་པ་སྟེ། དེ་ལྟར་ཡན་ལག་བཞི་པོ་མ་ཉམས་པར་བཟླས་པ་བྱ་བའོ། །བཞི་པ་བསམ་གཏན་གྱི་དེ་ཁོ་ན་ཉིད་ནི། དེ་ཉིད་ལས། གསང་སྔགས་མེར་གནས་དངོས་གྲུབ་སྟེར། །སྒྲར་གནས་རྣལ་འབྱོར་སྟེར་བར་དྲན། །སྒྲ་མཐས་ཐར་བ་སྟེར་བར་བྱེད། །འདི་དག་དེ་ཉིད་གསུམ་པོ་ཡིན། །ཞེས་པས་དེ་ཉིད་གསུམ་ལས་དང་པོ་མེར་གནས་ནི་བདག་མདུན་གྱི་ཐུགས་ཀར་མེ་འབར་བའི་དབུས་སུ་ཟླ་བ་ལ་སྔགས་ཕྲེང་བཀོད་ནས་སྲོག་སྡོམ་པའི་སྦྱོར་བས་བསྒོམ་པ་སྟེ་དེས་ནི་ལས་གཞིའི་དངོས་གྲུབ་འགྲུབ་པའོ། །དེ་ཉིད་གཉིས་པ་སྒྲ་གནས་ནི་སྔགས་ཀྱི་ཡི་གེ་རྣམས་ལས་རང་སྒྲ་དྲིལ་བུའི་སྒྲ་ལྟར་བསམ་པའོ། །དེས་ནི་རྣལ་འབྱོར་སྟེ་ཞི་གནས་སྐྱེ་བའི་རྟེན་བྱེད་པའོ། །དེ་ཉིད་གསུམ་པ་སྒྲ་མཐའ་ནི་སྒྲ་ཡི་རྒྱུན་ཇེ་ཕྲར་སོང་ནས་མཐར་མི་དམིགས་པར་འཇོག་པ་སྟེ་དེས་ནི་ཐར་པ་སྟེ་ལྷག་མཐོང་སྐྱེ་བའི་རྟེན་བྱེད་པའོ། །གཉིས་པ་མཚན་མེད་ཀྱི་རྣལ་འབྱོར་ནི། དེ་ལྟར་བཟླས་སྒོམ་གྱི་རྗེས་སུ་གཏང་རག་གི་མཆོད་བསྟོད་དང་བཟོད་གསོལ་དགེ་བསྔོ་རྣམས་བྱས་མཐར་ལྷ་སྣང་མི་དམིགས་པར་བསྡུས་ནས་སྟོང་པ་ཉིད་མཚན་མ་མེད་པར་བསྒོམ་པའོ། །སྤྱོད་པ་ནི་ཁྲུས་གསུམ་བྱེད་པ་དང་། གོས་གསུམ་བརྗེ་བ་ལ་སོགས་པ་གཙང་སྦྲ་སྤྱོད་ཅིང་སྦྱིན་སྲེག་དང་མཆོད་པ་སོགས་སྔགས་འགྲུབ་བྱེད་ཀྱི་ཆོ་གའི་ཡན་ལག་རྣམས་ལ་བརྩོན་པར་བྱེད་པའོ། །འབྲས་བུ་ནི་དེ་ལྟ་བུའི་མཚན་བཅས་དང་མཚན་མེད་ཀྱི་ལམ་ལ་བརྟེན་ནས་འབྲར་བུ་གཞན་ནས་ཐོབ་ཏུ་མེད་ཀྱང་ཡོད་པར་ལྟ་བའི་བློས་སྐུ་རིགས་རྣམ་སྣང་། གསུང་རིགས་སྣང་མཐའ། ཐུགས་རིགས་མི་བསྐྱོད་པ་སྟེ་རིགས་གསུམ་རྡོ་རྗེ་འཛིན་པའི་སའམ་སངས་རྒྱས་ཀྱི་གོ་འཕང་སྐུ་གསུམ་ཡེ་ཤེས་ལྔའི་བདག་ཉིད་ཅན་གྱི་དངོས་གྲུབ་འདོད་པ་སྟེ། འདི་བས་ཀུན་རྫོབ་དང་དོན་དམ་གཉིས་ཀ་སྒྱུ་མར་བཤད་ཅེས་པའི་དོན་ནི། དམ་པ་རིན་པོ་ཆེའི་ཐེག་སྤྱིའི་འགྲེལ་བར། ལྟ་བ་ནི་ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སེམས་ཅན་སྒྱུ་མ་རྨི་ལམ་ཙམ་དུ་ཆོས་ཅན་དང་དངོས་པོར་སྣང་བ་འདི་རྣམས་དོན་ལ་སེམས་ཡིན་ཅིང་སེམས་ཉིད་ཀྱང་གདོད་མ་ནས་སྟོང་ཞིང་སྐྱེ་བ་མེད་པ་དོན་དམ་པར་སྤྲོས་པའི་མཐའ་ཡོད་མེད་རྟག་ཆད་བཞི་དང་བྲལ་བ་ལས་ཀུན་རྫོབ་སྒྱུ་མའི་མཚན་ཉིད་དུ་སྣང་བའོ་ཞེས་དང་། ཀུན་རྫོབ་སྒྱུ་མའི་མཚན་ཉིད་ནི་འཁྲུལ་བའི་ངོ་ལ་ཇི་ལྟར་སྣང་ཡང་དེ་ཉིད་དེ་བཞིན་གཤེགས་པ་རིགས་གསུམ་མགོན་པོའི་ངོ་བོ་ཉིད་ཡིན་ཏེ། ཞེས་སོགས་གསུངས་པ་ལྟར་དོན་དམ་དུ་ཆོས་ཐམས་ཅད་སྤྲོས་པ་དང་བྲལ་བཞིན་དུ་སྒྱུ་མ་ལྟ་བུའི་སྣང་བ་མི་འགག་པས་སྒྱུ་མ་ལྟ་བུ་དང་། ཀུན་རྫོབ་རིགས་གསུམ་ལྷའི་རྣམ་པར་སྣང་བ་ཡང་སྒྱུ་མ་ལྟ་བུར་བཤད་པའམ། ཡང་ན་ཀུན་རྫོབ་ལ་ཡང་ལོག་གཉིས་སུ་ཕྱེ་བའི་སྔ་མ་མཐོ་འཇམ་རྩུབ་པའི་དངོས་པོ་རྣམས་རིགས་གསུམ་མགོན་པོའི་རང་བཞིན་དུ་འདོད་པ་ཡང་དག་ཀུན་རྫོབ་བམ་དོན་དམ་པ་དང་ཕྱི་མ་དབུ་མ་མན་ཆད་ཀྱི་ཡང་ལོག་གི་ཀུན་རྫོབ་ཏུ་བཞག་པ་རྣམས་ཏེ་དེ་གཉིས་ཀ་སྒྱུ་མ་ལྟ་བུའི་རང་བཞིན་དུ་བཤད་པ་སྟེ། དོན་གཅིག་གོ། །གཉིས་པ་ཨུ་པ་ཡ་ནི། ལྟ་བ་ཡོ་ག་དང་སྤྱོད་པ་ཀྲྀ་ཡ་ལྟར་གཉིས་སུ་འབྱེད་པར་བྱེད་པས་གཉིས་ཀའི་རྒྱུད་ཅེས་བྱ་བར་གྲགས་པ་དེ་ཡི་འཇུག་སྒོ་ནི། ཡེ་ཤེས་ཐིག་ལེ་ལས། རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་དུ་རབ་ཏུ་གསལ། །ཞེས་གསུངས་པ་ལྟར་ཆུ་དང་ཅོད་པཎ་གྱི་སྟེང་དུ་སྤྱོད་རྒྱུད་རང་གི་དགོས་དབང་། རྡོ་རྗེ་དྲིལ་བུ་མིང་དབང་རྣམས་དང་། མེ་ལོང་མིག་ཐུར་ཆོས་བཤད་རྗེས་གནང་སོགས་མཐའ་བརྟེན་དང་བཅས་པར་བསྐུར་བའོ། །ལྟ་བ་ནི། དཀའ་བ་དཔལ་བརྩེགས་ཀྱི་ལྟ་རིམ་ལས། གཉིས་ཀའི་རྒྱུད་ཀྱི་འདོད་པ་ནི། །ལྟ་སྤྱོད་གོང་འོག་རྗེས་སུ་མཐུན། །ཞེས་གསུངས་པ་ལྟ་བུ་ལས་བྱེ་བྲག་ཆོས་ཀྱི་དབྱིངས་མཐའ་ཐམས་ཅད་དང་བྲལ་བ་དང་གཉིས་སུ་མེད་པ་རིག་པ་ཡེ་ཤེས་ཀྱི་བྱིན་རླབས་རིགས་བཞིའི་ལྷར་ཤར་བ་ཉིད་སྤུན་གྲོགས་ཀྱི་ཚུལ་དུ་བསྒོམ་ན་མཐར་ཐུག་རང་ཉིད་ལྷ་དེ་དང་དེའི་ངོ་བོར་འགྲུབ་ཏུ་རུང་བའི་ཚུལ་ལ་ཡིད་ཆེས་ཀྱི་ལྟ་བ་དང་ལྡན་པའོ། །སྒོམ་པ་ལ་མཚན་བཅས་མཚན་མེད་གཉིས་ལས། དང་པོ་ནི་རྣམ་སྣང་མངོན་བྱང་ལས། ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལས་གཞིར་གྱུར་ཉིད། །ཤིན་ཏུ་བསྡམས་པའི་ཡིད་ལས་ནི། །བཟླས་བརྗོད་འབུམ་ཕྲག་གཅིག་བྱའོ། །ཞེས་གསུངས་པ་ལྟར་བདག་གནས་རྣལ་འབྱོར་རྣམས་སྔོན་དུ་འགྲོ་བས། ཡི་གེ་དང་པོ་དོན་དམ་བྱང་ཆུབ་ཀྱི་སེམས་ཉིད་ཀྱི་ངང་ལས་དེའི་སྣང་ཆ་ཀུན་རྫོབ་ཟླ་དཀྱིལ་གྱི་རྣམ་པར་བསྒོམ་པ། ཡི་གེ་གཉིས་པ་དེའི་སྟེང་དུ་བཟླ་བྱའི་སྔགས་རང་སྒྲ་སྒྲོག་པར་བསམ་པ། གཞི་དང་པོ་སྔགས་ཕྲེང་ཟླ་དཀྱིལ་བཅས་པ་ཡོངས་སུ་གྱུར་པ་ལས་རང་ཉིད་ལྷར་བསྒོམ་ནས་སྔགས་རྒྱ་སོགས་ཀྱིས་བྱིན་གྱིས་རློབ་པ། གཞི་གཉིས་པ་ཡེ་ཤེས་པ་མདུན་དུ་གསལ་བའི་ཐུགས་ཀར་ཟླ་དཀྱིལ་ལ་སྔགས་ཕྲེང་བཀོད་ནས་སྲོག་བསྡམ་ཞིང་དམིགས་པ་རྩེ་གཅིག་པས་བཟླས་པ་བྱེད་པའོ། །མཚན་མེད་ཀྱི་རྣལ་འབྱོར་ནི་ཕུང་སོགས་སྐྱེ་མེད་དུ་དཔྱད་པས་རྟོགས་པ་འཇུག་པའི་སེམས། དེ་མི་རྟོག་པའི་ངོ་བོར་མངོན་སུམ་དུ་རྟོགས་པ་གནས་པའི་སེམས། དེ་ལྟར་མ་རྟོགས་པ་ལ་སྙིང་རྗེ་ཆེན་པོས་རྗེས་སུ་འཇུག་པ་ལྡང་བའི་སེམས་ཏེ། དེ་ལྟར་འཇུག་གནས་ལྡང་གསུམ་དང་སྦྱར་བའི་བྱང་ཆུབ་ཀྱི་སེམས་བསྒོམ་པའོ། །སྤྱོད་པ་ནི་སྤྱོད་རྒྱུད་དང་མཐུན་པར་ཁྲུས་དང་གཙང་སྦྲ་སོགས་གྲོགས་ཙམ་དུ་བསྟེན་པའོ། །འབྲས་བུ་ནི་གནས་སྐབས་སུ་མངོན་ཤེས་ལ་སོགས་པ་ཐུན་མོང་གི་གྲུབ་པ་དང་མཐར་ཐུག་རིགས་བཞིའི་སངས་རྒྱས་སུ་འགྲུབ་པར་འདོད་པ་སྟེ། འོན་ཀྱང་རྫོགས་པ་ཆེན་པོས་ཡས་ནས་གཞལ་ན་ལྟ་སྤྱོད་གོང་འོག་གི་ཚུལ་གཉིས་ལ་བརྟེན་ནས་འདོད་པའི་དོན་རིགས་བཞི་རྡོ་རྗེ་འཛིན་པའི་དོན་གཅིག་བསྒྲུབ་པར་བྱེད་པ་དེ་ཡང་རྒྱུ་ལྟ་སྤྱོད་གཉིས་སུ་ཡོད་པར་ཞེན་པའི་སྤྱོད་པས་འབྲས་བུ་སྔོན་མེད་པའམ་གཞི་ལ་མ་གྲུབ་པའི་དོན་ཞིག་སྒྲུབ་པར་བྱེད་པས་ན་དཔེར་ན་རྟེན་མེད་པའི་ནམ་མཁའ་སྟོང་པ་ལ་གཅན་གཟན་སྤྱང་མོ་ཉུང་བར་བྱས་ཀྱང་བཟའ་བའི་དངོས་པོ་ཅི་ཡང་ཐོབ་ཏུ་མེད་པ་དང་འདྲ་བ་སྟེ། ནམ་མཁའི་མཐའ་དང་མཉམ་པའི་རྒྱུད་ལས། གཉིས་མེད་རང་གསལ་ཉག་གཅིག་ལ། །ངེས་མེད་གཉིས་ཀྱི་ཆ་འཛིན་ཅིང་། །དོན་ལ་ངེས་པའི་འབྲས་བུ་གཅིག །འདོད་པ་འཁྲུལ་པའི་རིགས་ཅན་ཏེ། །གཉིས་ཀྱིས་གཉིས་མེད་ཇི་ལྟར་སྙེད། །ཅེས་གསུངས་པ་ལྟར་རོ། །གསུམ་པ་ཡོ་ག་ནི། ལྟ་སྤྱོད་ལ་བླང་དོར་གྱི་སྒོ་ནས་འཇུག་པར་བྱེད་པའི་ཐེག་པ་ཕྱི་རྒྱུད་སྡེ་གསུམ་ཞེས་བྱ་བའི་ནང་ནས་སེམས་ཀྱི་སྒོམ་པ་གཙོ་བོར་འདོད་པས་གསང་བ་རྣལ་འབྱོར་གྱི་རྒྱུད་ཀྱི་ཐོག་མའི་འཇུག་སྒོ་ནི། ཡེ་ཤེས་ཐིག་ལེ་ལས། ཕྱིར་མི་ལྡོག་པ་བུམ་པའི་དབང་། །རྣལ་འབྱོར་རྒྱུད་དུ་གསལ་བར་བྱས། །དེ་ནི་སློབ་དཔོན་དབང་ཞེས་བྱ། །ཞེས་གསུངས་པ་ལྟར་རིག་པའི་དབང་ལྔའི་སྟེང་དུ་སློབ་དཔོན་གྱི་དབང་དྲུག་བསྐུར་བ་སྟེ། དེ་ཡང་རིག་དབང་ངམ་སློབ་མའི་དབང་ལྔ་ནི། དཀྱིལ་འཁོར་དུ་ཞུགས་ཤིང་དམ་ཚིག་དང་སྡོམ་པ་བཟུང་། ཡེ་ཤེས་པ་དབབ་ཅིང་མེ་ཏོག་དོར་བས་ལྷག་པའི་ལྷ་ངེས་པར་བྱས་ཏེ། ལས་བུམ་གྱི་ཁྲུས་སྔོན་དུ་འགྲོ་བས་ལྷ་བུམ་གྱི་དབང་དང་། རིགས་གང་ཡིན་གྱི་ཅོད་པཎ་དང་། དེའི་རིག་ཀྱི་རྡོ་རྗེ་དང་། དེའི་ཡུ་བ་བྱས་པའི་དྲིལ་བུ་དང་། རང་རིགས་དང་མཐུན་པའི་མིང་དབང་རྣམས་སོ། །དཔོན་སློབ་ཀྱི་དབང་དྲུག་ནི། ཕྱིར་མི་ལྡོག་པའི་དབང་དམ་ཚིག་གསུམ་བཟུང་བ། གསང་བའི་དབང་། རྗེས་གནང་། ལུང་བསྟན། དབུགས་དབྱུང་། གཟེང་བསྟོད་རྣམས་ཏེ་སྡོམ་པས་དབང་བཅུ་གཅིག་པོ་རྣམས་བསྐུར་བ་སྟེ། འདིར་གསང་བའི་དབང་ཡང་བླ་མེད་ཀྱི་གསང་དབང་དང་མི་མཚུངས་པར་དཀྱིལ་འཁོར་དུ་གསང་བའི་འཇུག་པས་ཞུགས་ཤིང་མཐོང་བ་ལ་དཀྱིལ་འཁོར་དང་ལྷའི་དེ་ཁོ་ན་ཉིད་དང་། དཀྱིལ་འཁོར་གྱི་དེ་ཉིད་བཅུ་དང་ལས་ཀྱི་རིམ་པ་བསྟན་པར་བྱ་བ་ལ་གསང་དབང་དུ་གསུངས་སོ། །ལྟ་བ་ནི་དོན་དམ་པར་ཆོས་ཐམས་ཅད་སྤྲོས་པའི་མཚན་མ་ཐམས་ཅད་དང་བྲལ་བ་འོད་གསལ་སྟོང་པ་ཉིད་ཀྱི་རང་བཞིན་དུ་འདོད་ལ། ཀུན་རྫོབ་ཏུ་སྣང་བའི་དངོས་པོ་ཐམས་ཅད་ཆོས་ཉིད་རྟོགས་པའི་བྱིན་རླབས་ལས་ཡང་དག་པའི་ཀུན་རྫོབ་རྡོ་རྗེ་དབྱིངས་ཀྱི་དཀྱིལ་འཁོར་དུ་སྣང་བའི་ཕྱིར་ན། སྐྱེ་བོས་བརྟགས་པའི་སྣང་བ་རང་རྒྱུད་པ་ཐམས་ཅད་དོན་ལ་མ་གྲུབ་པར་འདོད་དེ། ལྟ་རིམ་ལས། ཡོ་ག་དོན་དམ་རྣམ་དག་པའི། །ཆོས་ཀྱི་དབྱིངས་ཀྱི་ཡེ་ཤེས་སུ། །རྟོགས་པའི་བྱིན་བརླབས་ལྷར་སྣང་བ། །དེ་ཕྱིར་སྐྱེ་བོ་ལྟར་སྣང་འཁྲུལ། །ཞེས་གསུངས་པ་ལྟར་རོ། །ཁྱད་པར་བའི་དབང་དུ་ན། ཀུན་གཟིགས་མི་ཕམ་པའི་ཞལ་ནས། མཉམ་ཉིད་ཀྱི་ལྟ་བ་གོང་མ་གཉིས་ལས་ཁྱད་པར་འཕགས་པའི་དབང་གིས་བདག་དང་ལྷ་དོན་ལ་མཉམ་པར་མཐོང་བའི་ངེས་ཤེས་ཀྱིས་ཀུན་རྫོབ་ཏུ་ཡང་ཆུ་ལ་ཆུ་བཞིན་མཉམ་པར་བྱས་ཏེ་བསྒོམས་ན། ཆོས་ཐམས་ཅད་རང་སེམས་ཀྱི་སྣང་བ་ཙམ་ཡིན་པས་ཏིང་ངེ་འཛིན་གྱིས་དབང་བསྒྱུར་ན་ཇི་ལྟར་དམིགས་པའི་ལྷ་མངོན་དུ་གྲུབ་པའི་ཕྱིར་ལྷའི་སྐུ་གསུང་ཐུགས་དང་ཕྲིན་ལས་ཀྱི་བདག་ཉིད་ཕྱག་རྒྱ་བཞི་ཡི་ངོ་བོར་འབད་པས་བསྒྲུབ་པས་དེ་ཡི་ངོ་བོར་འགྲུབ་པའི་ངེས་པ་ཁྱད་པར་ཅན་གྱི་ལྟ་བ་དང་ལྡན་པའོ། །ཞེས་གསུངས་པ་ལྟར་གོང་མ་གཉིས་ལས་བདེན་པ་གཉིས་ཀ་ཁྱད་པར་དུ་འཕགས་པར་ཤེས་པར་བྱའོ། །སྒོམ་པ་ལ་མཚན་བཅས་དང་མཚན་མེད་གཉིས་ལས་དང་པོ་ནི། རྡོ་རྗེ་རྩེ་མོ་ལས། བྱང་ཆུབ་སེམས་ནི་མ་བསྐྱེད་དང་། །ཐེ་ཚོམ་ལྡན་པ་ཉིད་དང་ནི། །བཀའ་བཞིན་དུ་ནི་མི་བྱེད་དང་། །དད་པ་མེད་པས་འགྲུབ་མི་འགྱུར། །ཞེས་གསུངས་པའི་སྐྱོན་བཞི་དང་བྲལ་བའི་ལྡོག་ཕྱོགས་ཡོན་ཏན་བཞི་ལྡན་གྱི་གང་ཟག་གིས་སྐྱབས་སེམས་སོགས་སྔོན་དུ་འགྲོ་བས། ཆོས་ཐམས་ཅད་ལ་རྣམ་པར་མི་རྟོག་པ་སྟོང་པ་ཉིད་ཀྱི་ངང་ལས་མངོན་བྱང་ལྔ་ཡི་སྒོ་ནས་ཀུན་རྫོབ་ལྷའི་དཀྱིལ་འཁོར་དུ་བསྒོམ་པ་ཏིང་ངེ་འཛིན་དང་གནས་གསུམ་བྱིན་གྱིས་བརླབས་པ་དང་། དབང་བསྐུར་བ་དང་མཆོད་པའི་ཆོ་འཕྲུལ་གྱིས་དཀྱིལ་འཁོར་ཐམས་ཅད་བྱིན་གྱིས་བརླབས་ཏེ་བདག་དང་ལྷ་ཡེ་ཤེས་སེམས་དཔར་ཏེ་སེམས་དཔའ་གཉིས་དབྱེར་མེད་དུ་བསྒོམ་པར་བྱས་ནས། མཆོད་པའི་བྱེ་བྲག་མེ་ཏོག་ལ་སོགས་པ་ཕྱིར་ཡི་མཆོད་པ། སྒེགས་སོགས་ནང་གི་མཆོད་པ་རིག་མ་བཅུ་དྲུག་གསང་བ་ཡི་མཆོད་པ་གསུམ་གྱིས་མཆོད་ནས། སྐུ་ཉིད་ཕྱག་རྒྱ་ཆེན་པོ། གསུང་ཆོས་ཀྱི་ཕྱག་རྒྱ། ཐུགས་དམ་ཚིག་གི་ཕྱག་རྒྱ་དང་། ཕྲིན་ལས་ལས་ཀྱི་ཕྱག་རྒྱ་སྟེ་བཞི་ཡིས་རང་གི་སྒོ་གསུམ་བྱ་བ་དང་བཅས་པ་ལ་ལྷའི་སྐུ་གསུང་ཐུགས་མཛད་པ་དང་བཅས་པས་རྒྱས་བཏབ་སྟེ་དམ་ཡེ་གཉིས་མེད་ཀྱི་ངང་ནས་བཟླས་པ་ལ་བརྩོན་པ་སྟེ། འདི་ལ་གཙོ་བོ་ཙམ་སྐྱེད་པ་དང་པོའི་སྦྱོར་བ། གཙོ་འཁོར་ཡོངས་རྫོགས་བསྐྱེད་པ་དཀྱིལ་འཁོར་རྒྱལ་མཆོག་དང་། ཡེ་ཤེས་པ་གཞུགས་པ་སོགས་ལས་རྒྱལ་མཆོག་སྟེ་དེ་ལྟ་བུའི་སྒོ་ནས་ཏིང་ངེ་འཛིན་ལ་བརྩོན་པ་ནི་རགས་པ་ལྷ་ལ་དམིགས་པ་དང་། རྡོ་རྗེ་ལ་སོགས་པའི་ཕྱག་མཚན་ཤིན་ཏུ་ཕྲ་བ་སྣ་རྩེ་སོགས་སུ་བསྒོམས་ནས་མཐར་མི་རྟོག་པར་འཇོག་པ་ནི་ཕྲ་བ་ཕྱག་མཚན་ལ་དམིགས་པ་རྣམ་པ་གཉིས་སུ་གསུངས་སོ། །གཉིས་པ་མཚན་མེད་ཀྱི་རྣལ་འབྱོར་ནི། དོན་དམ་མཚན་མ་མེད་པའི་གནས་ལུགས་དང་ཀུན་རྫོབ་རྡོ་རྗེ་དབྱིངས་ཀྱི་ལྷ་སྣང་གཉིས་ཀ་གཉིས་སུ་མེད་པའི་ངང་ལ་མཉམ་པར་འཇོག་པའོ། །སྤྱོད་པ་ནི་གཙང་སྦྲ་ལ་སོགས་པ་ཕྱིའི་ཀུན་སྤྱོད་གྲོགས་ཙམ་དུ་བྱས་ནས་གཙོ་བོར་ནང་གི་ཏིང་ངེ་འཛིན་ཟབ་མོ་དང་ལྡན་པའི་སྒོ་ནས་དངོས་གྲུབ་བསྒྲུབ་པའོ། །འབྲས་བུ་ནི་ཇི་ལྟར་འདོད་པའི་དོན་གནས་སྐབས་སུ་ཐུན་མོང་གི་དངོས་གྲུབ་དང་མཐར་ཐུག་མཆོག་གི་དངོས་གྲུབ་རིགས་ལྔ་སྟུག་པོ་བཀོད་པའི་ས་ལ་མངོན་པར་སངས་རྒྱས་པ་ཐོབ་ཏུ་རེ་བ་དང་ལྡན་པས། ཆགས་ཐོགས་མེད་པའི་འབྲས་བུ་ཡེ་ནས་གྲུབ་ཟིན་པ་དེ་ལ་རྩོལ་བའི་རེ་བ་འཇོག་པའི་ཏིང་ངེ་འཛིན་འདི་ཡིས་ཀྱང་ལྟ་སྤྱོད་བླང་དོར་བྱེད་པས་བླང་དོར་མེད་པའི་དོན་གྲུབ་པ་མེད་པ་སྟེ། ཀློང་ཆེན་རབ་འབྱམས་ལས། དུས་དང་གྲངས་ལ་ལྟོས་པའི་ཐེག་དམན་རྣམས། །མཁའ་ལ་ཤར་བའི་འཇའ་ཚོན་འཛིན་པ་ལྟར། །ཐུག་པའི་མཐའ་མེད་ཟིན་པའི་དུས་མེད་པས། །ནན་གྱིས་རང་སེམས་བྱར་མེད་རྩོལ་བས་བཅིང་། །ཞེས་གསུངས་སོ། །དེ་ལྟར་བྱ་སྤྱོད་རྣལ་འབྱོར་གྱི་རྒྱུད་ཀྱི་རྒྱུད་སྡེ་གསུམ་པོ་དེ་ནི་རྒྱལ་བ་ལོངས་སྤྱོད་རྫོགས་པའི་སྐུ་ཡི་བསྟན་པ་ཡིན་པར་བཤད་དོ། །གསུམ་པ་སྤྲུལ་སྐུའི་བསྟན་པ་བཤད་པ་ལ་བཞི་སྟེ། ཕྱི་པ་གསུམ་སྦྱིར་བསྟན་པ། གང་གི་དོན་དུ་གསུངས་པའི་རྒྱུ་མཚན། འདུལ་བ་མདོ་སྡེ་མངོན་པ་གསུམ་གྱི་དབྱེ་བ་དོན་བསྡུ་བའོ། །དང་པོ་ནི། དེ་ལ་སྟོན་པ་སྤྲུལ་པའི་སྐུ་ཡི་བསྟན་པ་ནི་གང་ཞེ་ན། རང་གི་ཡོངས་འཛིན་རྫོགས་པའི་སངས་རྒྱས་སོགས་ལ་ཇི་ལྟར་ཉན་ཅིང་ཐོས་པའི་དོན་གཞན་ལ་སྟོན་ཅིང་སྒྲོགས་པར་བྱེད་པས་ན་ཐོས་སྒྲོགས་སམ་ཉན་ཐོས་དང་། སྲིད་པ་ཐ་མའི་ཚེ་དགེ་བའི་བཤེས་གཉེན་གཞན་ལ་མི་བརྟེན་པར་རང་གི་བྱང་ཆུབ་རང་གིས་ཐོབ་པར་བྱེད་པས་རང་རྒྱལ་དང་། ཐེག་པ་དམན་པ་ལས་དམིགས་པ་ཆེན་པོ་ལ་སོགས་པ་ཆེན་པོ་བདུན་གྱིས་འཕགས་པ་ཐེག་པ་ཆེན་པོ་བྱང་ཆུབ་བསྒྲུབ་པའི་ཆེད་དུ་བྱ་དཀའ་བའི་སྤྱོད་པ་ལ་སེམས་མི་ཞུམ་པར་དཔའ་བས་བྱང་ཆུབ་སེམས་དཔའི་མདོ་སྡེ་གསུམ་ལ་ཕྱི་མཚན་ཉིད་ཐེག་པ་ཞེས་བཞག་པ་སྟེ། དེ་ཡང་སོ་སོའི་ལམ་དེས་རང་འབྲས་མཚོན་པར་བྱེད་པས་མཚན་ཉིད་ཐེག་པའམ་ཕྱིའི་ཀུན་སྤྱོད་གཙོ་བོར་སྟོན་པས་ཕྱི་པ་ཞེས་སུ་བཤད་པ་སྟེ་གསུམ་དུ་ཡོད་པ་ལས། དང་པོ་ཉན་ཐོས་ཀྱི་ཐེག་པའི་འཇུག་སྒོ་ནི། ཡང་འབྱེད་འཕྲུལ་སྡེ་ལས། ཉན་ཐོས་བདེན་བཞིའི་སྒོ་ནས་འཇུག །ཞེས་གསུངས་པ་ལྟར་འཕགས་པའི་བདེན་པ་བཞི་ལ་བླང་དོར་འཇུག་ལྡོག་གི་སྒོ་ནས་འཇུག་པའོ། །ལྟ་བ་ནི་སྤྱིར་ཉན་ཐོས་ལ་ནང་གི་དབྱེ་བ་བྱེ་བྲག་སྨྲ་བ་དང་མདོ་སྡེ་བ་གཉིས་སུ་ཡོད་ཀྱང་ཐུན་མོང་དུ་གཟུང་འཛིན་དུ་སྣང་བའི་དངོས་པོ་འདི་ཐམས་ཅད་ལ་གཉེན་པོས་བཅོམ་པ་དང་བློས་གཞིག་ཅིང་དཔྱད་པར་བྱས་ན་རགས་པའི་སྣང་བ་ཐམས་ཅད་དོན་ལ་མ་གྲུབ་པར་དུ་མ་དང་སྐད་ཅིག་མའི་རང་བཞིན་ཡིན་པས་གང་ཟག་གི་བདག་དང་མཚན་ཉིད་མི་མཐུན་པའི་ཕྱིར་ཕུང་པོ་བདག་མིན་ལ་དེ་ལས་གཞན་དུ་ཡང་བདག་ཡོད་པར་མི་དམིགས་པས་ན་གང་ཟག་གི་བདག་མེད་པར་རྟོགས་ཀྱང་། གཟུང་འཛིན་རགས་པའི་རྩོམ་གཞི་ཆ་མེད་གཉིས་དོན་དམ་དུ་ཡོད་པར་འདོད་ཅིང་ཀུན་བྱང་གི་ཆོས་ཐམས་ཅད་གཞི་མེད་དུ་མ་རྟོགས་པས་ཆོས་ཀྱི་བདག་ཡོད་པར་ལྟ་བ་སྟེ། ཀུན་གསལ་ལས། གང་ཟག་བདག་མེད་རྟོག་ཀྱང་ཆོས་ཉིད་བདག་མ་སྤངས། །ཆོས་ཀྱི་བདག་ནི་གཟུང་འཛིན་གཉིས་སུ་སྣང་། །འཛིན་པའི་རྒྱུན་རྟོག་སྐད་ཅིག་འགགས། །རྟག་ཆད་གཉིས་ལས་འདས་པ་ལྟར། །དཔེར་ན་ཆུ་བོ་གང་གཱ་བཞིན། །གཟུང་བྱ་ཀུན་རྫོབ་ཕར་བསལ་ནས། །དོན་དམ་རྔུལ་ཕྲན་རྫས་སུ་འདོད། །དཔེར་ན་གཡག་རྔ་ནེ་སེང་བཞིན། །མདོ་སྡེ་བྱེ་བྲག་རྣམ་གཉིས་འདོད། །ཅེས་སོ། སྒོམ་པ་ནི་འདོད་ཆགས་ཀྱི་གཉེན་པོར་མི་སྡུག་པ་དང་། ཞེ་སྡང་གི་གཉེན་པོར་བྱམས་པ་ལ་སོགས་པ་དུག་གསུམ་གྱི་གཉེན་པོ་སོ་སོར་དང་ཐུན་མོང་དུ་བསམ་གཏན་དང་རྣམ་ཐར་སོགས་ཞི་གནས་དང་བདེན་བཞི་རྣམ་པ་བཅུ་དྲུག་བསྒོམ་པ་ལྷག་མཐོང་རྣམས་སོ། །སྤྱོད་པ་ནི་སོ་སོར་ཐར་པའི་ཚུལ་ཁྲིམས་ཡོངས་སུ་དག་པར་བསྲུང་བ་དང་སྦྱང་བའི་ཡོན་ཏན་བཅུ་གཉིས་ལ་གནས་པར་བྱེད་པའོ། །འབྲས་བུ་ནི་གནས་སྐབས་ཀྱི་འབྲས་བུ་རྒྱུན་ཞུགས་ལ་སོགས་པ་བདུན་དང་མཐར་ཐུག་གི་འབྲས་བུ་དགྲ་བཅོམ་པ་ཉིད་ཐོབ་པའོ། །གཉིས་པ་རང་རྒྱལ་གྱི་ཐེག་པའི་འཇུག་སྒོ་ནི། སྔ་མ་ལས། རང་རྒྱལ་རྟེན་འབྲེལ་སྒོ་ནས་འཇུག །ཅེས་གསུངས་པ་ལྟར་རྟེན་འབྲེལ་བཅུ་གཉིས་ལ་ལུགས་འབྱུང་ལྡོག་ཏུ་རྟོག་ཅིང་དཔྱོད་པའི་སྒོ་ནས་འཇུག་པ་དང་། ལྟ་བ་ནི་གང་ཟག་གི་བདག་མེད་རྟོགས་པ་ཉན་ཐོས་དང་འདྲ་བ་ལ། ཆོས་ཀྱི་བདག་ལས་ནང་གི་ཤེས་པ་སྐད་ཅིག་མར་སྐྱེས་པའི་རྟེན་འབྲེལ་གྱི་དབང་གིས་ཕྱི་རོལ་གྱི་སྣང་བ་རྨི་ལམ་གྱི་རོལ་པ་ལྟར་སྣང་བ་ཙམ་ལས་རྡུལ་ཕྲན་ཆ་མེད་ཀྱང་མ་གྲུབ་པར་རྟོགས་ཀྱང་གཟུང་བའི་དངོས་པོ་དེ་དག་གི་སྣང་གཞི་ཤེས་པ་སྐད་ཅིག་ཆ་མེད་བདེན་གྲུབ་ཏུ་འདོད་པས་བདག་མེད་ཕྱེད་གཉིས་ཙམ་རྟོགས་པ་སྟེ། ཀུན་གསལ་ལས། གང་ཟག་བདག་མེད་གོང་མཐུན་དེས་རྟོགས་ནས། །ཆོས་ཀྱི་ཁམས་ལ་ཕྱོགས་གཅིག་བདག་མེད་པ། །དེ་ཉིད་མཚན་མར་ངོས་འཛིན་པ། །རང་རྒྱལ་ཞེས་འདོད་ལྟ་བ་ཡིན། །ཅེས་པ་ལྟར་རོ། །སྒོམ་པ་ནི་བདེན་པ་བཞི་དང་རྟེན་འབྲེལ་ལུགས་འབྱུང་བཀག་ནས་ལུགས་ལྡོག་གི་གནད་ལ་ངེས་པ་འདྲོང་བའི་ཚུལ་གྱིས་བསྒོམ་པའོ། །སྤྱོད་པ་ནི་ངག་གི་ཆོས་མི་གསུང་པར་ལུས་ཀྱི་བརྡས་ཆོས་སྟོན་ཅིང་རྗུ་འཕྲུལ་ཡ་མ་ཟུང་གི་སེམས་ཅན་ལ་ཕན་འདོགས་པ་སྟེ། མངོན་རྟོག་རྒྱན་ལས། གང་གང་དོན་ནི་གང་གང་ལ། །ཇི་ལྟ་ཇི་ལྟར་ཉན་འདོད་པ། །དེ་དེ་ལ་དོན་དེ་དང་དེ། །སྒྲ་མེད་ཀྱང་ནི་དེ་ལྟར་སྣང་། །ཞེས་སོ། །འབྲས་བུ་ནི་ཡིད་བཞིན་བདེ་བ་མཆོག་གི་སའམ་རང་རྒྱལ་དགྲ་བཅོམ་པའི་གོ་འཕང་ཐོབ་པའོ། །གསུམ་པ་བྱང་ཆུབ་སེམས་དཔའི་ཐེག་པའི་འཇུག་སྒོ་ནི། ཡང་འབྱེད་ལས། མདོ་སྡེ་བདེན་གཉིས་སྒོ་ནས་འཇུག །ཅེས་གསུངས་པ་ལྟར་ཀུན་རྫོབ་ཏུ་སེམས་ཅན་རྣམས་ཀྱི་དོན་དུ་སྨོན་འཇུག་བྱང་ཆུབ་ཀྱི་སེམས་རྣམ་པ་གཉིས་ལ་བརྟེན་ནས་བྱང་ཆུབ་ཆེན་པོའི་ལམ་ལ་འཇུག་པ་དང་། དོན་དམ་པར་ཆོས་ཐམས་ཅད་སྐྱེ་བ་མེད་པ་སྤྲོས་བྲལ་སྟོང་པ་ཉིད་དུ་ཤེས་པའི་སྒོ་ནས་འཇུག་པར་བྱེད་པའོ། །ལྟ་བ་ནི། ཆོས་དང་གང་ཟག་གི་བདག་མེད་གཉིས་ཀ་རྟོགས་པ་སྟེ། དེ་ཡང་ཐེག་པ་ཆེན་པོའི་མདོ་སྡེ་ཟབ་པ་དང་རྒྱ་ཆེ་བའི་ཕྱོགས་སོ་སོར་བཀྲལ་ཚུལ་གྱི་དབང་གིས་དབུ་མ་དང་སེམས་ཙམ་པ་གཉིས་སུ་ཡོད་པ་ལས། དང་པོ་སེམས་ཙམ་པ་ནི་འདི་ལྟར་གཟུང་འཛིན་གཉིས་སུ་སྣང་བའི་ཆོས་འདི་དག་ཐམས་ཅད་ནི་དོན་ལ་གྲུབ་པ་མེད་པ་ཀུན་ཏུ་བརྟགས་པ་ཙམ་གྱིས་རང་བཞིན་ཡིན་པས་ཀུན་རྫོབ་ཀྱི་བདེན་པ་ཡིན་པར་འདོད་ལ། དེ་དག་གང་ལས་སྣང་བའི་གཞི་གཞན་དབང་གི་ཤེས་པ་མཐར་ཐུག་པ་རང་རིག་རང་གསལ་ཙམ་དོན་དམ་པར་གྲུབ་པར་འདོད་པ་དང་། དེའི་སྟེང་ན་གཟུང་འཛིན་ཀུན་བརྟགས་ཀྱི་ཆ་བདག་གཉིས་ཀྱིས་སྟོང་པའི་ཆོས་དབྱིངས་དེ་བཞིན་ཉིད་ཆོས་ཉིད་ཀྱི་ཚུལ་ཏུ་ཡོད་པ་ནི་ཡོངས་གྲུབ་སྟེ་དེ་གཉིས་ནི་ཆོས་ཅན་དང་ཆོས་ཉིད་དོན་དམ་དུ་འདོད་པ་སྟེ། དེ་ལ་ཡང་ཡུལ་གྱི་རྣམ་པ་སྣ་ཚོགས་སུ་སྣང་བ་འདི་རྣམས་ཐ་སྙད་དུ་ཤེས་པའི་རང་བཞིན་དུ་བདེན་པར་འདོད་པ་རྣམ་བདེན་པ་དང་། མི་བདེན་པ་རྫུན་སྣང་ཙམ་དུ་འདོད་པ་རྣམ་རྫུན་པ་གཉིས་དང་རྣམ་བདེན་པ་ལའང་ཤེས་པས་ཡུལ་ཤེས་ཚུལ་གྱི་སྒོ་ནས་ནང་གསེས་ཀྱི་དབྱེ་བ་གསུམ་དུ་ཡོད་དོ། །གཉིས་པ་དབུ་མ་པས་ནི་གཟུང་འཛིན་གཉིས་སྟོང་གི་ཤེས་པ་ཙམ་ཡང་བདེན་གྲུབ་ཏུ་མི་འདོད་པར་ཆོས་ཐམས་ཅད་སྟོང་བཞིན་དུ་སྣང་བའི་རྟེན་འབྱུང་ཟབ་མོའི་དོན་ལ་ཡིད་ཆེས་པའི་ལྟ་བ་དང་ལྡན་པ་སྟེ། དེ་ལ་ཡང་བདེན་གཉིས་དབྱེར་མེད་དུ་རྟོགས་པའི་བློའི་རྩལ་འཕང་གིས་ཐལ་རང་གཉིས་སུ་ཡོད་པ་ལས། དང་པོ་རང་རྒྱུད་པས་ནི་གནས་སྐབས་སུ་བདེན་གཉིས་སོ་སོར་ཕྱེ་བའི་སྒོ་ནས་དོན་དམ་པར་ཆོས་ཐམས་ཅད་སྤྲོས་པ་ཐམས་ཅད་དང་བྲལ་བའི་སྟོང་པ་ཉིད་ཡིན་ཀྱང་། ཀུན་རྫོབ་ཏུ་ཐ་སྙད་ཀྱི་དངོས་པོ་རྣམས་ཀྱིས་རང་རང་གི་མཚན་ཉིད་འཛིན་ཅིང་མི་བསླུ་བ་དོན་བྱེད་ནུས་པའི་ངོ་བོར་ཡོད་པར་འདོད་པ་དང་། མཐར་ཐུག་བདེན་གཉིས་སོ་སོའི་འཛིན་པ་དང་བྲལ་ནས་བདེན་གཉིས་དབྱེར་མེད་ཆེན་པོར་ལ་ཟློ་བར་བྱེད་པས་ན། ལམ་རིམ་གྱིས་པ་ལྟ་བུ་ཡིན་པར་གསུངས་པ་སྟེ། དེ་ལའང་རང་རྒྱུད་གོང་འོག་སོགས་ནང་གི་དབྱེ་བ་དུ་མ་ཡོད་དོ། །གཉིས་པ་ཐལ་འགྱུར་པས་ནི་དང་པོ་ཉིད་ནས་ཆོས་ཐམས་ཅད་ཡོད་མེད་ཡིན་མིན་ལ་སོགས་པའི་སྤྲོས་པའི་མཐའ་ཐམས་ཅད་དང་བྲལ་བའི་རྣམ་གྲངས་མིན་པའི་དོན་དམ་བདེན་གཉིས་དབྱེར་མེད་ཆེན་པོར་གཏན་ལ་འབེབ་པར་བྱེད་པས་ན་ལམ་ཅིག་ཆར་བ་ལྟ་བུ་ཡིན་པར་གསུངས་སོ། །དེ་ལྟ་བུའི་དབུ་སེམས་གཉིས་ཀའི་སྒོམ་པ་ནི་ཐེག་ཆེན་གྱི་ས་བཅུ་ལམ་ལྔ་དང་འབྲེལ་བའི་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་བསྒོམ་པ་དང་། སྤྱོད་པ་ནི་ཕ་རོལ་དུ་ཕྱིན་པ་དྲུག་གིས་བསྡུས་པའི་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུ་ལ་བསྐལ་པ་གྲངས་མེད་གསུམ་ལ་སོགས་པར་སྤྱོད་པས་འབྲས་བུ་ནི་བཅུ་གཅིག་ཀུན་ཏུ་འོད་ཀྱི་ས་ལ་མངོན་པར་རྫོགས་པར་སངས་རྒྱས་པར་འདོད་པ་སྟེ། དེ་ལྟ་བུའི་མཚན་ཉིད་སྡེ་གསུམ་པོ་དེ་ནི་སྟོང་པ་སྤྲུལ་པའི་སྐུ་ཡི་བསྟན་པ་ཡིན་ནོ། །གཉིས་པ་ནི། དེ་ཡང་མཚན་ཉིད་སྡེ་གསུམ་པོ་དེ་ཉིད་དོན་གང་གི་ཆེད་དུ་གསུངས་པ་ཡིན་ཞེ་ན་འདི་ལྟར་སྟོན་པ་ཀུན་བྱེད་ང་ཡི་ངོ་བོ་གཅིག་གི་རྩལ་སྣང་ལས་ཕྱི་འདོད་ཡོན་ལྔ་དང་ནང་ཡེ་ཤེས་ལྔ་ཡི་ངོ་བོར་རང་ཤར་དུ་ཕྱུང་བ་ལ། རང་སྣང་དུ་མ་ཤེས་པར་གཟུང་འཛིན་རྒྱང་ཆད་དུ་བལྟས་པའི་དབང་གིས་འདོད་ཆགས་ཞེ་སྡང་གཏི་མུག་སྟེ་དུག་གསུམ་རང་རྒྱུད་པའི་རྣམ་པར་བྱུང་སྟེ་དེའི་སྒོ་ནས་དགེ་སྡིག་གི་ལས་སྣ་ཚོགས་བསགས་པའི་འབྲས་བུ་འགྲོ་དྲུག་གི་འཁྲུལ་སྣང་ཚད་མེད་པ་མཆེད་པ་ཡིན་པས། དེ་དག་གི་རྒྱུ་ཉོན་མོངས་པ་དུག་གསུམ་པོ་དེ་འདུལ་བ་ཡི་གཉེན་པོར་གསུངས་པ་ཡི་ནི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གི་གྲངས་སུ་གསུངས་པ་སྟེ། དེ་ལ་འདོད་པའི་ཡོན་ཏན་རྣམ་པ་ལྔ་རུ་བྱུང་བ་ནི་གང་ཞེ་ན་གཟུགས་དང་སྒྲ་དང་དྲི་དང་རོ་དང་རེག་བྱ་སྟེ་རྣམ་པ་ལྔ་ཡིན་ལ། དེ་ལྔ་པོ་ཀུན་བྱེད་བྱང་ཆུབ་ཀྱི་སེམས་གཉིས་མེད་ཡེ་ཤེས་ཆེན་པོའི་རང་མདངས་སུ་མ་ཤེས་པར་ཕྱི་རོལ་དུ་ཞེན་ཅིང་ཆགས་པ་ལས་ཡུལ་ལྔ་པོ་ཡིད་དུ་འོང་བ་ལ་བརྟེན་ནས་འདོད་ཆགས་དང་ཡིད་དུ་མི་འོང་བ་ལ་བརྟེན་ནས་ཞེ་སྡང་དང་བར་མ་ལ་བརྟེན་ནས་གཏི་མུག་རྣམ་པ་གསུམ་བྱུང་བ་ལ། དེ་དག་འདུལ་བའི་གཉེན་པོར་སྟོན་པ་སྤྲུལ་པའི་སྐུ་ཉིད་ཚངས་སྤྱོད་ཆགས་བྲལ་གྱི་རྣམ་པར་སྣང་ནས་ཆོས་ཀྱི་རྣམ་གྲངས་བསྡུ་ན་སྡེ་སྣོད་རྣམ་པ་གསུམ་དུ་བསྟན་པ་ཡིན་ནོ། །གསུམ་པ་ནི། དེ་ལ་སྡེ་སྣོད་གསུམ་ནི་གང་ཡིན་ཞེ་ན་འདི་ལྟར་ཉོན་མོངས་པ་འདོད་ཆགས་ཀྱི་རྟོག་པ་ཉི་ཁྲི་ཆིག་སྟོང་འདུལ་བའི་གཉེན་པོར་གསུངས་པ་ནི་ལྷག་པ་ཚུལ་ཁྲིམས་ཀྱི་བསླབ་པ་གཙོ་བོར་སྟོན་པ་འདུལ་བ་ཡི་སྡེ་སྣོད་ཉི་ཁྲི་ཆིག་སྟོང་གསུངས་པ་ཡིན་ལ། ཉོན་མོངས་པ་གཏི་མུག་གི་རྟོག་པ་ཉི་ཁྲི་ཆིག་སྟོང་འདུལ་བའི་གཉེན་པོར་གསུངས་པ་ནི་ལྷག་པ་ཏིང་ངེ་འཛིན་གྱི་བསླབ་པ་གཙོ་བོར་སྟོན་པ་མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས་པ་དང་། ཉོན་མོངས་པ་ཞེ་སྡང་གི་རྟོག་པ་ཉི་ཁྲི་ཆིག་སྟོང་འདུལ་བའི་གཉེན་པོར་གསུངས་པ་ནི་ལྷག་པ་ཤེས་རབ་ཀྱི་བསླབ་པ་གཙོ་བོར་སྟོན་པ་མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས་པ་དང་། དུག་གསུམ་ཆ་མཉམ་གྱི་རྟོག་པ་ཉི་ཁྲི་ཆིག་སྟོང་འདུལ་བའི་གཉེན་པོ་རུ་སྡེ་སྣོད་གསུམ་ལས་བརྗོད་བྱ་གཙོ་ཆེ་ཆུང་མེད་པར་ཆ་མཉམ་པའི་སྡེ་སྣོད་བཞི་པ་ཉི་ཁྲི་ཆིག་སྟོང་གསུངས་པ་སྟེ། དེ་ལྟར་ན་ཉོན་མོངས་པའི་ཀུན་རྟོག་བརྒྱད་ཁྲི་བཞི་སྟོང་གི་གཉེན་པོར་ཆོས་སྒོ་བརྒྱད་ཁྲི་བཞི་སྟོང་དུ་གསུངས་པ་ཡིན་ཏེ། ཚུལ་འདི་ལྟར་ཀློང་ཆེན་རབ་འབྱམས་ཀྱི་རྒྱུད་ལས་ཀྱང་། མ་རིག་ལུས་ཅན་འཁྲུལ་པའི་སེམས་ཅན་ལ། །ཉོན་མོངས་བརྒྱད་ཁྲི་བཞི་སྟོང་གནས་པ་ཡིན། །གཉེན་པོ་བརྒྱད་ཁྲི་བཞི་སྟོང་ཆོས་ཀྱང་བཤད། །ཆོས་སྒོ་བསམ་འདས་དེ་སྙེད་ཀྱང་། །སྡེ་སྣོད་གསུམ་གྱིས་འདུལ་བ་ཡིན། །འདོད་ཆགས་གཉེན་པོར་འདུལ་བ་དང་། །གཏི་མུག་གཉེན་པོར་མདོ་སྡེ་དང་། །ཞེ་སྡང་གཉེན་པོར་མངོན་པ་རྣམས། །ཀུན་ཀྱང་ཉི་ཁྲི་ཆིག་སྟོང་སྟེ། །དུག་གསུམ་ཆ་སྙོམས་སྡེ་སྣོད་གསུམ། །ཆ་སྙོམ་ཉི་ཁྲི་ཆིག་སྟོང་གསུངས། །ཞེས་གསུངས་སོ། །བཞི་པ་དོན་བསྡུ་ལ་ལྔ་སྟེ། གྲངས། ཐེག་པ། གསུང་རབ། རྒྱུ་འབྲས། གང་གིས་གསུངས་པའི་དོན་བསྡུ་པའོ། །དང་པོ་ནི། དེ་ལྟར་མདོར་ན་གོང་དུ་བསྟན་པ་ལྟར་སྡེ་སྣོད་གསུམ་ལ་ཉི་ཁྲི་ཆིག་སྟོང་ཚན་བཞི་གསུངས་པ་རྣམས་སྡོམ་པས་སྤྱི་རུ་ཆོས་སྒོ་བརྒྱད་ཁྲི་བཞི་སྟོང་གི་གྲངས་སུ་གསུངས་པ་དེ་མ་ལུས་པ་ཡང་དོན་དུ་དུག་གསུམ་གྱི་རང་བཞིན་ཅན་གྱི་ཉོན་མོངས་པའི་རྟོག་པ་དེ་རྣམས་གཉེན་པོས་འདུལ་བ་ཁོ་ནའི་ཕྱིར་དུ་གསུངས་པ་ཡིན་ནོ། །གཉིས་པ་ནི། དེ་ལྟ་བུའི་ཆོས་སྒོ་བརྒྱད་ཁྲི་བཞི་སྟོང་པོ་དེ་དག་ཐམས་ཅད་ཚུར་བསྡུ་ན་ཉན་ཐོས་རང་རྒྱལ་བྱང་ཆུབ་སེམས་དཔའ་སྟེ་མཚན་ཉིད་རྒྱུ་ཡི་ཐེག་པ་རྣམ་པ་གསུམ་དུ་འདུ་བ་སྟེ། བང་མཛོད་འཕྲུལ་ལྡེ་ལས། དབང་པོ་ཐ་མའི་དོན་དུ་ནི། །སྡེ་སྣོད་གསུམ་གྱི་ཐེག་པ་བསྟན། །ཞེས་གསུངས་པ་ལ། དེ་ལྟར་ན་ཐེག་པ་གསུམ་པོ་དེ་རྣམས་ཆོས་ཀྱི་སྒོ་ནི་མདོ་སྡེ་དང་འདུལ་བ་མངོན་པ་གསུམ་དུ་བསྟན་པ་དེ་ནི་བསྡུས་པའི་དོན་ནོ་ཞེས་བསྟན་པ་ཡིན་ནོ། །གསུམ་པ་ནི། དེ་ལྟ་བུའི་མཚན་ཉིད་མདོ་སྡེ་ཡི་ཐེག་པ་དེ་ལ་ཡང་ཕར་དབྱེ་བའི་དབང་དུ་ན་གསུང་རབ་རྣམས་བཤད་ལུགས་མི་འདྲ་བའི་སྒོ་ནས་ཡན་ལག་བཅུ་དང་གཉིས་སུ་ཡོད་དེ། འཕགས་པ་འཇམ་དཔལ་གྱིས་བཤད་རྒྱུད་རིན་པོ་ཆེའི་ཕྲེང་བ་ལས། འབྲིང་ནི་རྣམ་པ་བཅུ་གཉིས་ཏེ། །མདོ་དང་དབྱངས་དང་ལུང་དུ་བསྟན། །ཚིག་བཅད་ཆེད་བརྗོད་གླེང་གཞིའི་སྡེ། །རྟོགས་བརྗོད་དེ་བྱུང་སྐྱེས་པའི་རབས། །རྒྱས་དང་རྨད་བྱུང་གཏན་ལ་ཕབ། །ཡན་ལག་བཅུ་གཉིས་སྲིད་རྩ་བཏོན། །ཞེས་གསུངས་པ་ལྟར་ཚིག་མདོར་བསྡུས་ཤིང་དོན་སྡེ་ཚན་དུ་བཅད་དེ་བཤད་པ་མདོ་ཡི་སྡེ་དང་། ཚིག་ལྷུག་པའི་སྒོ་ནས་རྒྱས་པར་གསུངས་པ་དེ་དག་སླར་ཡང་ཚིགས་སུ་བཅད་པའི་དབྱངས་ཀྱི་བསྙད་དེ་བཤད་པ་ནི་དབྱངས་བསྙད་དང་། མ་འོངས་པ་ན་འབྱུང་འགྱུར་གྱི་ཆོས་གང་ཞིག་ལུང་བསྟན་པ་རྣམས་ནི་ལུང་དུ་བསྟན་པ་དང་། དང་པོ་ནས་ཚིགས་སུ་བཅད་པ་ཁོ་ནས་གསུངས་པ་ནི་ཚིག་བཅད་དང་། གཞན་གྱིས་མ་བསྐུལ་བར་སྟོན་པ་ཉིད་ཀྱིས་ཆེད་དུ་བཀའ་རྩལ་བ་ནི་ཆེད་བརྗོད་དང་། གླེང་གཞི་ལ་བརྟེན་ནས་རྒྱ་ཆེར་གསུངས་པ་ནི་གླེང་བཞི་དང་། གང་ཟག་ད་ལྟ་བ་འགའ་ཞིག་གི་ངོ་མཚར་གྱི་ལོ་རྒྱུས་བཤད་པ་ནི་རྟོགས་བརྗོད་དང་། སྔོན་བྱུང་གི་ཆོས་རྣམས་ཀྱི་ལོ་རྒྱུས་གསུངས་པ་ནི་དེ་ལྟ་བུ་བྱུང་བ་དང་། བྱང་ཆུབ་སེམས་དཔའ་རྣམས་ཀྱི་སྐྱེ་བའི་ཕྲེང་བ་བཤད་པ་ནི་སྐྱེས་རབས་དང་། ཟབ་ཅིང་རྒྱ་ཆེ་བའི་ཆོས་གང་ཞིག་ཤིན་ཏུ་རྒྱས་པའི་སྒོ་ནས་ཚད་མེད་པར་གསུངས་པ་ནི་ཤིན་ཏུ་རྒྱས་པ་དང་། ཤིན་ཏུ་ངོ་མཚར་བའི་ཆོས་སྔར་མ་གྲགས་པ་ལྟ་བུ་གསུངས་པ་ནི་རྨད་དུ་བྱུང་བ་དང་། བརྗོད་བྱ་གང་ཞིག་ཕྲ་ཞིབ་ནས་སོ་སོར་གཏན་ལ་ཕབས་ཏེ། བཤད་པ་ནི་གཏན་ལ་དབབ་པའི་སྡེ་སྟེ། དེ་ལྟར་བཅུ་གཉིས་སུ་བསྟན་པ་ནི་འབྲིང་དུ་བསྟན་པ་ཡིན་ནོ། །དེ་དག་བསྡུ་ན་སྡེ་སྣོད་གསུམ་དུ་འདུ་བའི་ཚུལ་ཀྱང་། དེ་ཉིད་ལས། བསྡུས་པ་སྡེ་སྣོད་གསུམ་དག་སྟེ། །མདོ་སྡེ་འདུལ་བ་ཆོས་མངོན་ནོ། །དེ་ཡང་རྣམ་པ་བཞི་ཡིན་ཏེ། །གང་གསུངས་གང་དུ་གང་གི་ཕྱིར། །ཚུལ་ནི་ཇི་ལྟར་བསྡུས་པའོ། །གང་ནི་བཅུ་དང་གཉིས་བཤད་པའོ། །གང་དུ་སྡེ་སྣོད་གསུམ་དུའོ། །གང་ཕྱིར་རྣམ་པ་གསུམ་ཡིན་ཏེ། །གཉེན་པོའི་དོན་ཕྱིར་གསུམ་ཉིད་དང་། །བསླབ་གསུམ་རྒྱུད་ལ་སྐྱེ་ཕྱིར་གསུམ། །ཆོས་དང་ཆོས་ཕྱིར་བསྡུ་བ་གསུམ། །ཞེས་གསུངས་པ་ལྟར་གང་ཞིག་བསྡུ་བ་ནི་གསུངས་རབས་ཡན་ལག་བཅུ་གཉིས་སོ། །གང་དུ་བསྡུ་ན་སྡེ་སྣོད་རྣམ་པ་གསུམ་དུ་བསྡུ་བ་དང་། རྒྱུ་མཚན་ནམ་དགོས་པ་གང་གི་ཕྱིར་བསྡུ་ན། ཐེ་ཚོམ་དང་སྤྱོད་པ་དང་ལྟ་བ་ཕྱིན་ཅི་ལོག་གསུམ་མམ་དུག་གསུམ་གྱི་གཉེན་པོའི་དོན་གྱི་ཕྱིར་སོགས་རྣམ་པ་གསུམ་གྱི་ཕྱིར་དུ་བསྡུ་བ་ཡིན་ཞིང་། ཇི་ལྟར་བསྡུ་བའི་ཚུལ་ལ་རྣམ་པ་གཉིས་སུ་གསུངས་ཏེ་བརྗོད་བྱའི་དོན་གྱི་སྒོ་ནས་བསྡུ་བ་དང་། བརྗོད་བྱེད་ཚིག་གི་སྒོ་ནས་བསྡུ་བའོ། །དང་པོ་དོན་གྱི་སྒོ་ནས་བསྡུ་བ་ནི་གང་ཞེ་ན། བསྒོམ་པ་གཙོ་བོར་སྟོན་པ་མདོ་སྡེ་དང་། བསྲུང་སྡོམ་གཙོ་བོར་སྟོན་པ་འདུལ་བ་དང་། ལྟ་བ་གཙོ་བོར་སྟོན་པ་མངོན་པའོ། །ལུང་གོང་གི་འཕྲོས་ལས། བསྡུ་ཚུལ་ལ་ནི་རྣམ་གཉིས་ཏེ། །དོན་དང་ཚིག་གི་སྒོ་ནས་སོ། །དོན་ལ་རྣམ་པ་གསུམ་བཤད་དེ། །སྒོམ་པ་གཙོར་སྟོན་མདོ་ཡི་སྡེ། །བསྲུང་སྡོམ་གཙོར་སྟོན་འདུལ་བ་ཡིན། །ལྟ་བ་གཙོར་སྟོན་མངོན་པ་ཡིན། །ཞེས་གསུངས་ཞིང་། ཚིག་གི་སྒོ་ནས་བསྡུ་བ་ལ་ཐེག་པ་ཆུང་ངུའི་བསྡུ་ཚུལ་དང་། ཐེག་པ་ཆེན་པོའི་བསྡུ་ཚུལ་དང་། གཉིས་གའི་ཐུན་མོང་གི་བསྡུ་ཚུལ་གསུམ་ལས། དང་པོ་ལྟར་ན། སྔ་མ་ལྔ་མདོ་སྡེ་དང་། དེ་རྗེས་གླེང་གཞི་ལ་སོགས་པ་རྣམ་པ་བཞི་འདུལ་བ་དང་། རྒྱས་པ་དང་རྨད་བྱུང་གཏན་དབབ་གསུམ་མངོན་པའོ། །གཉིས་པ་ཐེག་ཆེན་ལྟར་ན། རྒྱས་པ་དང་རྨད་བྱུང་གཉིས་མདོ་སྡེ་དང་། མདོ་སྡེ་ནས་སྐྱེས་རབས་ཀྱི་བར་དགུ་ནི་འདུལ་བ་དང་། གཏན་ལ་ཕབ་པ་མངོན་པ་ཡིན་པར་གསུངས་ལ། ཐུན་མོང་བ་ལྟར་ན་དང་པོ་ལྔ་ནི་མདོ་སྡེ་དང་། དེ་རྗེས་གླེང་གཞི་ལ་སོགས་པ་དྲུག་ནི་འདུལ་བ་དང་། གཏན་དབབ་ནི་མངོན་པ་སྟེ། ལུང་གོང་གི་འཕྲོར། ཚིག་བསྡུ་རྣམ་པ་གསུམ་ཡིན་ཏེ། །ཐེག་པ་ཆེ་ཆུང་ཐུན་མོང་གསུམ། །མདོ་སོགས་རིམ་ལྔ་མདོ་ཡི་སྡེ། །དེ་རྗེས་རྣམ་བཞི་འདུལ་བ་སྟེ། །ཐ་མ་གསུམ་ནི་མངོན་པའོ། །དེ་ནི་ཐེག་པ་ཆུང་ངུ་ཡིན། །རྒྱས་དང་རྨད་བྱུང་མདོ་ཡི་སྡེ། །མདོ་སོགས་དགུ་ནི་འདུལ་བ་ལ། །གཏན་ལ་ཕབ་པ་མངོན་པ་སྟེ། །དེ་ནི་ཐེག་པ་ཆེན་པོའི་གཞུང་། །དང་པོ་ལྔ་ནི་མདོ་ཡི་སྡེ། །དེ་རྗེས་དྲུག་ནི་འདུལ་བ་ཡིན། །ཐ་མ་མངོན་པ་ཐུན་མོང་གཞུང་། །ཞེས་གསུངས་སོ། །དེ་ལྟར་ན་གསུང་རབས་ཡན་ལག་བཅུ་གཉིས་སུ་གསུངས་པ་དེ་ནི་སྡེ་སྣོད་གསུམ་པོ་དེ་ལས་འབྲིང་དུ་སོ་སོར་དབྱེ་བའི་དོན་དུ་བསྟན་པ་ཡིན་ལ། རྒྱས་པར་ནི་གོང་དུ་བཤད་པ་ལྟར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དུ་གསུངས་པ་རྣམས་ཏེ། དེ་ཉིད་ལས། དེ་ལས་རྒྱས་པར་གསུངས་པ་ནི། །དུག་གསུམ་ཉོན་མོངས་ཆ་མཉམ་པའི། །གཉེན་པོ་བརྒྱད་ཁྲི་བཞི་སྟོང་ངོ་། །ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་སྟོན་པའོ། །ཞེས་གསུངས་སོ། །བཞི་པ་རྒྱུ་འབྲས་ནི། དེ་ལྟ་བུའི་སངས་རྒྱས་སྤྲུལ་པའི་སྐུས་གསུངས་པའི་མཚན་ཉིད་ཐེག་པ་གསུམ་གྱིས་བསྟན་བྱའི་གཙོ་བོ་ནི། དུག་གསུམ་གྱི་རྒྱུ་ལ་སྤྱད་པ་ལས་འབྲས་བུ་ཞེ་སྡང་གིས་དམྱལ་བ་དང་། འདོད་ཆགས་ཀྱིས་ཡི་དྭགས་དང་། གཏི་མུག་གིས་འབྲས་བུ་དུད་འགྲོ་སྟེ་ངན་སོང་གསུམ་དུ་སྐྱེ་བ་ཡིན་པས་དེ་དག་སྤང་བྱའོ་ཞེས་སྤང་ཐབས་དང་བཅས་པ་བསྟན་པའི་སྒོ་ནས། སེམས་ཅན་རྣམས་རྒྱུ་དུག་གསུམ་པོ་དེ་ལས་བཟློག་ཏེ་ཡང་དག་པའི་ལམ་ལ་དཀྲི་བའི་ཆེད་དུ་ལས་དཀར་ནག་ལ་སྤྱོད་པའི་དབང་གིས་དགེ་སྡིག་གཉིས་ཀྱི་འབྲས་བུ་རིམ་པ་ལྟར་མཐོ་རིས་དང་ངན་སོང་རྣམ་པ་གཉིས་པོ་ཞེས་དགེ་སྡིག་དེ་དག་ལ་བླང་དོར་བྱེད་པའི་ཚུལ་ནི་མཚན་ཉིད་རྒྱུ་ཡི་ཐེག་པ་གསུམ་པོ་དེ་ལས་རབ་ཏུ་བསྒྲགས་པ་ཡིན་ནོ་ཞེས་འདིས་རྒྱུ་ཡི་ཐེག་པ་ཞེས་པའི་རྒྱུ་མཚན་ཀྱང་བསྟན་པ་ཡིན་ཏེ། བང་མཛོད་འཕྲུལ་སྡེ་ལས། མཚན་ཉིད་རྒྱུ་ཡི་ཐེག་པ་ནི། །དགེ་སྡིག་ལས་ཀྱི་རྒྱུ་བྱས་པས། །འབྲས་བུ་བདེ་དང་སྡུག་བསྔལ་འདོད། །ཆོས་སྤྱོད་དགེ་བས་རྒྱུ་བྱས་ནས། །དེ་ཉིད་ལམ་དུ་ཁྱེར་བའི་ཕྱིར། །རྒྱུ་ཡི་ཐེག་པ་བསྟན་པ་ཡིན། །ཞེས་པ་ལྟར་རོ། །ལྔ་པ་ནི། དེ་ལྟར་རྒྱུ་འབྲས་ལ་བླང་དོར་གྱིས་བརྩོན་པར་བྱེད་པའི་ཐེག་པ་འདི་ནི་སྟོན་པ་སྤྲུལ་པའི་སྐུ་རྣམས་ཀྱིས་སྔར་ཡང་གསུངས་པ་དང་། ད་ལྟར་ཕྱོགས་བཅུའི་ཞིང་ན་སྐུ་འཚོ་ཞིང་མངོན་སུམ་དུ་བཞུགས་པ་རྣམས་ཀྱིས་གསུང་བཞིན་པ་དང་། ཕྱིས་སུ་འབྱོན་པར་འགྱུར་བ་རྣམས་ཀྱིས་ཀྱང་གསུང་བར་འགྱུར་ལ། དགེ་སྡིག་བླང་དོར་བྱེད་པ་འདི་ལྟ་བུ་ཡི་དོན་ཐམས་ཅད་སྨྲ་བསམ་བརྗོད་དུ་མེད་པ་ཀུན་བྱེད་བྱང་ཆུབ་སེམས་ཀྱི་ཀློང་དུ་ལ་བཟླ་བར་བྱེད་པའི་དོན་དུ་གསུངས་པ་ཀུན་བྱེད་ཆོས་སྐུའི་བསྟན་པ་འདི་ནི་སྤྲུལ་སྐུའི་སྟོན་པ་རྣམས་ཀྱི་སྔ་མ་འདས་པའི་དུས་སུ་མ་གསུངས་ལ། ད་ལྟར་མི་གསུང་སྟེ། དེ་བཞིན་དུ་སྟོན་པ་སྤྲུལ་པའི་སྐུ་ཡིས་ཕྱིས་ཀྱང་གསུང་པར་མི་འགྱུར་བ་དེ་བས་ན་སྤྲུལ་པའི་སྐུ་ཡི་བསྟན་པ་ནི་མཚན་ཉིད་རྒྱུ་ཡི་ཐེག་པ་གསུམ་པོ་འདི་ཉིད་ཡིན་པར་བཤད་དོ། །གསུམ་པ་འཁོར་ཕུན་སུམ་ཚོགས་པ་རྒྱ་ཆེར་བཤད་པ་ལ་གཉིས་ཏེ། མདོར་བསྟན་པ་དང་། ཆོས་སྐུ། ལོངས་སྐུ། སྤྲུལ་སྐུ་གསུམ་གྱི་འཁོར་རྒྱས་པར་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་སྟོན་པ་ཀུན་བྱེད་ང་ཡི་རང་བཞིན་སྟོང་གསལ་ཐུགས་རྗེ་སྟེ་རྣམ་པ་གསུམ་གྱི་རྩལ་ལ་འཁོར་གྱི་དང་པོ་སྟོན་པ་སྐུ་གསུམ་དུ་ཤར་ཞིང་བྱུང་བ་སྟེ། དེ་ལྟ་བུའི་སྐུ་གསུམ་སྟོན་པ་གསུམ་གྱི་འཁོར་རྣམས་རིམ་པ་བཞིན་དུ་བསྟན་པ་ནི་འདི་ལྟར་རོ་ཞེས་མདོར་བསྟན་པའོ། །གཉིས་པ་ལ། ཆོས་སྐུ་ལོངས་སྐུ་སྤྲུལ་སྐུའི་འཁོར་གསུམ་ལས། དང་པོ་ཆོས་སྐུའི་འཁོར་ནི། ཀྱེ་སེམས་དཔའ་ཆེན་པོ་ཉོན་ཅིག་ཀུན་བྱེད་བྱང་ཆུབ་སེམས་ཀྱི་རང་བཞིན་སྟོན་པ་ཆོས་ཀྱི་སྐུ་ཡི་འཁོར་རྣམས་བསྟན་པ་ནི་གང་ཞེ་ན། ཀུན་བྱེད་རྒྱལ་པོ་ང་ཡིས་བྱས་ཤིང་རང་རྩལ་ལས་སྤྲུལ་པའི་འཁོར་ནི་སྲིད་ཞི་གཉིས་ཀྱིས་བསྡུས་པའི་ཆོས་ཐམས་ཅད་ཀུན་རང་བྱུང་སྙིང་པོ་བྱང་ཆུབ་ཀྱི་སེམས་ང་ཡི་རང་བཞིན་གདོད་མའི་མགོན་པོ་ཆོས་ཀྱི་སྐུ་ཡི་འཁོར་ཡིན་པས་ན། རིག་པ་བྱང་ཆུབ་ཀྱི་སེམས་རང་ངོ་ཤེས་པའི་སངས་རྒྱས་དང་། རང་ངོ་མ་ཤེས་པས་འཁྲུལ་པ་ལྟར་སྣང་བའི་སེམས་ཅན་གྱི་ཁམས་སྣང་སྲིད་སྣོད་བཅུད་ཀྱིས་བསྡུས་པ་འདི་ཐམས་ཅད་ཀུན་སྟོན་པ་ཆོས་ཀྱི་སྐུ་ཡི་འཁོར་དུ་མ་འདུས་པ་གཅིག་ཀྱང་མེད་པས་ཐམས་ཅད་ཆོས་ཀྱི་སྐུ་ཡི་འཁོར་དུ་བཤད་དོ་ཅེས་གསུངས་སོ། །གཉིས་པ་ལོངས་སྐུའི་འཁོར་ནི། ཀྱེ་སེམས་དཔའ་ཆེན་པོ་ཉོན་ཅིག་བྱང་ཆུབ་སེམས་ཀྱི་ངོ་བོ་སྟོན་པ་ལོངས་སྤྱོད་རྫོགས་པའི་སྐུ་ཡི་འཁོར་རྣམས་བསྟན་པ་ནི། མོས་པས་སྤྱོད་པ་དྲོད་རྩེ་མོ་བཟོད་པ་ཆོས་མཆོག་བཞི་ཡི་ས་ལ་བརྟེན་ནས་འཇིག་རྟེན་ལས་འདས་པ་ཡི་ས་དང་པོ་རབ་ཏུ་དགའ་བའི་ས་མནན་པ་ནས་བཟུང་སྟེ་ས་བཅུ་པ་ཆོས་ཀྱི་སྤྲིན་གྱི་བར་གྱི་ས་པ་ཡི་བྱང་ཆུབ་སེམས་དཔའ་རྣམས་ཏེ། དེ་ནི་སྟོན་པ་ལོངས་སྤྱོད་རྫོགས་པའི་སྐུ་ཡི་འཁོར་དུ་བསྟན་པ་ཡིན་ནོ། །གསུམ་པ་སྤྲུལ་སྐུའི་འཁོར་ནི། ཀུན་བྱེད་བྱང་ཆུབ་སེམས་ཀྱི་ཐུགས་རྗེའི་རོལ་རྩལ་སྟོན་པ་སྤྲུལ་པའི་སྐུ་ཡི་འཁོར་རྣམས་བསྟན་པ་ནི། འདི་ལྟར་དངོས་པོའི་གནས་ཚུལ་ལ་ཕྱིན་ཅི་ལོག་པར་རྟོགས་པ་ལ་ཕྱ་དང་དབང་ཕྱུག་གཙོ་བདག་ལ་སོགས་པ་རྟག་པར་ལྟ་བ་མུ་སྟེགས་པ་དང་། ཚེ་སྔ་ཕྱི་དང་ལས་འབྲས་སོགས་མེད་པར་ལྟ་བས་ཆད་ལྟ་མུར་ཐུག་པ་གཉིས་དང་། གྲུབ་མཐས་བློ་མ་བསྒྱུར་ཞིང་ལས་འབྲས་ཡོད་མེད་སོགས་ཅི་ཡང་མ་རྟོགས་པ་ལ། ཕྱི་མ་རྒྱང་དུ་འཕེན་ཞིང་ཚེ་འདི་གང་ལ་བཙན་ཕྱུག་ལ་སོགས་པ་བསྒྲུབ་པའི་ཆེད་དུ་མཆོད་སྦྱིན་ཕྲ་མོ་བྱེད་པ་དང་ཕ་མེས་ཀྱི་མཚུན་གསོལ་བ་དང་མོ་བོན་གཡང་བླན་ལ་སོགས་པ་ཚེ་འདིར་ཕན་པ་འབའ་ཞིག་བསྒྲུབ་པར་བྱེད་པ་རྒྱང་འཕེན་དང་། འཇིག་རྟེན་ཐ་མལ་པ་རྣམས་ལས་ཀྱང་ཤིན་ཏུ་གླེན་ཞིང་རྨོངས་པ་ཕྱུག་ལྟ་བུ་རྒྱུ་འབྲས་དང་སྤང་བླང་ཅི་ཡང་མི་ཤེས་པས་ལྟ་བ་དང་གྲུབ་མཐའ་འདི་ཡིན་གྱི་ངེས་པ་མེད་པ་ཕྱལ་བ་སྟེ་རྣམ་པ་བཞི་པོ་འདི་ཉིད་བླ་མེད་བྱང་ཆུབ་ཀྱི་ལམ་ལ་མ་ཞུགས་ཤིང་ཕྱིན་ཅི་ལོག་པའི་ལམ་ལ་གཏན་དུ་གོལ་བར་གྱུར་པས། དེ་དག་གི་ཁམས་དང་དབང་པོ་སེམས་ཀྱི་བྱེ་བྲག་རྣམས་ཡང་དག་པའི་ལམ་དུ་བསྒྱུར་བར་བྱེད་ཅིང་ཟག་མེད་རང་བྱུང་གི་ཐུགས་རྗེ་ཡིས་བྱིན་གྱིས་བརླབས་ནས་ལས་ལ་རིམ་གྱིས་དྲངས་བར་མཛད་པའི་འཁོར་དགེ་སློང་ཕོ་མོ་གཉིས་དང་དགེ་བསྙེན་ཕོ་མོ་གཉིས་ཏེ་རྣམ་པ་བཞི་པོ་དེ་ནི་སྟོན་པ་སྤྲུལ་པའི་སྐུ་ཡི་འཁོར་དུ་བསྟན་པ་ཡིན་ནོ་ཞེས་གསུངས་སོ། །བཞི་པ་གནས་ཕུན་སུམ་ཚོགས་པ་རྒྱས་པར་བཤད་པ་ལ་གཉིས་ཏེ། མདོར་བསྟན་པ་དང་། ཆོས་སྐུ་ལོངས་སྐུ་སྤྲུལ་སྐུ་གསུམ་གྱི་གནས་རྒྱས་པར་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག་ཀུན་བྱེད་ང་ལས་བྱུང་བའི་སྟོན་པ་སྐུ་གསུམ་གྱི་བཞུགས་པའི་གནས་གང་ཞིག་སྐུ་གསུམ་པོ་སོ་སོར་ང་རེ་ཡི་ཞེས་རང་རང་གི་གནས་ཀྱི་ཁྱད་པར་བསྟན་པ་ནི་འཆད་འགྱུར་འདི་ཉིད་དོ་ཞེས་མདོར་བསྟན་པའོ། །གཉིས་པ་རྒྱས་པར་བཤད་པ་ལ་གསུམ་ལས། དང་པོ་ཆོས་སྐུའི་གནས་ནི། དེ་ལ་སྟོན་པ་ཆོས་ཀྱི་སྐུའི་གནས་ཀྱི་མཚན་ཉིད་ནི་འདི་ལྟ་སྟེ། གཟུང་འཛིན་གྱི་རྟོག་པ་གང་གི་ཡང་འོག་ཏུ་མ་གྱུར་པའི་ཕྱིར་ན་འོག་མིན་གྱི་གནས་ཆོས་ཐམས་ཅད་ཀྱི་འབྱུང་གནས་སུ་གྱུར་པས་ཆོས་ཀྱི་དབྱིངས་ཀྱི་ཕོ་བྲང་སྟེ། དེ་ནི་རྟོག་པའི་གྲྭ་ཟུར་ཤིན་ཏུ་ཕྲ་བ་ལས་ཀྱང་འདས་ཤིང་ཆོས་རྣམས་ཀྱི་གནས་ལུགས་མཐར་ཐུག་པ་ཡིན་པས་ཡང་དག་དོན་གྱི་འོག་མིན་ཞེས་བཤད་པའི་རྒྱ་ཆད་ཕྱོགས་ལྷུང་དང་བྲལ་བའི་རང་བཞིན་དེ་རུ་སྟོན་པ་ཆོས་ཀྱི་སྐུ་ཉིད་དུས་གསུམ་འཕོ་འགྱུར་བྲལ་བའི་ངོ་བོར་བཞུགས་པས་ན་དེ་ལྟ་བུའི་གནས་དེ་ནི་སྟོན་པ་ཆོས་ཀྱི་སྐུའི་བཞུགས་གནས་སུ་བཤད་དོ། །གཉིས་པ་ལོངས་སྐུའི་གནས་ནི། འདི་ལྟར་སྟོན་པ་ལོངས་སྤྱོད་རྫོགས་པའི་སྐུ་ཡི་གནས་བསྟན་པ་ནི། འཇིག་རྟེན་གྱི་གནས་གཟུགས་སུ་སྣང་བའི་མཚན་མ་ཀུན་གྱི་སྟེང་དུ་གྱུར་པ འམ་མཚན་མའི་སྤྱོད་ཡུལ་ཀུན་ལས་འདས་པ་འཇིག་རྟེན་གནས་ཀྱི་འོག་མིན་ཁང་བུ་བརྩེགས་པ་ཡི་གཞལ་ཡས་ཁང་ཆེན་པོ་སྟེ། སྒྱུ་འཕྲུལ་རྡོ་རྗེ་ལས། གཙང་མའི་རིགས་དག་རབ་སྤང་བའི། །འོག་མིན་ཆེན་པོའི་གནས་མཆོག་ན། །རིགས་བདག་ཕྱག་རྒྱ་ལྷུན་གྲུབ་སྐུ། །གཅིག་དང་དུ་མ་རྣམ་སྤངས་པ། །སངས་རྒྱས་ཀུན་གྱི་སྤྱི་གཟུགས་ཏེ། །གདོད་ནས་ཐེག་ཆེན་མཛོད་ཉིད་ཕྱིར། །སྒྲིབ་པ་མཐའ་སྤངས་གདུལ་བྱ་ལ། །སྐད་ཅིག་གཅིག་གིས་སྣང་བར་མཛད། །ཅེས་དང་། ཡིད་བཞིན་རིན་པོ་ཆེའི་མཛོད་ལས། །དེ་དག་གོང་ན་སྲིད་པ་ཐ་མའི་གནས། །འོག་མིན་རྣམ་མཛེས་ས་བཅུ་ཐོབ་པའི་གནས། །དྭངས་ཤིང་གསལ་ལ་ཡོངས་སུ་རྫོགས་པ་ཡིན། །ཅེས་གསུངས་པ་དེ་ནི་སྟོན་པ་ལོངས་སྤྱོད་རྫོགས་པའི་སྐུའི་བཞུགས་གནས་ཀྱི་འོག་མིན་ཏུ་བཤད་པའོ། །གསུམ་པ་སྤྲུལ་སྐུའི་གནས་ནི། དེ་ལ་སྟོན་པ་སྤྲུལ་པའི་སྐུ་ཡི་གནས་བསྟན་པ་ནི་གང་ཡིན་ཞེ་ན། འདི་ལྟར་མཆོག་གི་སྤྲུལ་པའི་སྐུ་ནི་སངས་རྒྱས་རབས་བདུན་ནམ་དཔའ་བོ་བདུན་ཞེས་ཤཱཀྱ་ཐུབ་པ་དང་རྣམ་གཟིགས་གཙུག་ཏོར་ཅན་ལ་སོགས་པ་སྟེ། དེ་དག་གི་གནས་ནི་རྒྱ་གར་བྱ་རྒོད་ཕུང་པོའི་རི་དང་མ་ག་དྷཱ་ཡི་གནས་ལ་སོགས་པ་ཡིན་པར་བསྟན་ཏེ། མདོར་ན་མི་མཐུན་ཕྱོགས་ཀྱི་དྲི་མས་ཤིན་ཏུ་དབེན་པའི་ཡང་དག་པའི་ཐུགས་རྗེ་ཡི་རོལ་པར་སྤྲུལ་པ་སྣ་ཚོགས་ཚད་མེད་པར་སྣང་བ་རྣམས་ནི་གནས་འདི་ན་བཞུགས་དང་འདིར་མི་བཞུགས་ཞེས་པའི་ངེས་པ་མེད་པར་གདུལ་བྱ་གང་ཞིག་གནས་གང་དུ་ཐབས་ཅི་ལྟ་བུའི་འདུལ་བའི་དུས་ལ་བབ་པ་ན་གནས་དེ་དང་དེ་ཉིད་དུ་གང་འདུལ་གྱི་རོལ་པ་སྒྱུ་མའི་ཆོ་འཕྲུལ་ལྟར་སྣང་བ་ཡིན་ནོ། །ཞེས་གསུངས་སོ། །ལྔ་པ་ཞིང་ཁམས་ཕུན་སུམ་ཚོགས་པ་རྒྱ་ཆེར་བཤད་པ་ལ་གཉིས་ཏེ། མདོར་བསྟན་པ་དང་། ཆོས་སྐུ་ལོངས་སྐུ་སྤྲུལ་སྐུ་གསུམ་གྱི་ཞིང་ཁམས་རྒྱ་ཆེར་བཤད་པའོ། །དང་པོ་ནི། ཀྱེ་སེམས་དཔའ་རྡོ་རྗེ་ཆེན་པོ་ཉོན་ཅིག་སྙིང་པོ་བྱང་ཆུབ་ཀྱི་སེམས་ཀུན་བྱེེད་ང་ལས་བྱུང་བའི་སྐུ་གསུམ་གྱི་སྟོན་པ་གསུམ་པོ་དེ་ཡི་གདུལ་བར་བྱ་བའི་ཞིང་ཁམས་ཀྱི་ཁྱད་པར་བསྟན་པ་ནི་འདི་ལྟར་རོ། །ཞེས་སོ། །གཉིས་པ་སྐུ་གསུམ་གྱི་ཞིང་ཁམས་རྒྱས་པར་བཤད་པ་ལ་གསུམ་ལས། དང་པོ་ནི། འདི་ལྟར་ཀུན་བྱེད་བྱང་ཆུབ་སེམས་ཀྱི་རང་བཞིན་ལས་བྱུང་བ་ཆོས་སྐུ་ཡི་སྟོན་པ་གང་གི་འདུལ་བྱའི་ཞིང་ཁམས་ནི་རྒྱ་ཆད་ཕྱོགས་ལྷུང་དང་བྲལ་བ་སྤྲོས་བྲལ་ཆོས་ཀྱི་དབྱིངས་ཀྱི་མཐའ་ཡིས་ཀླས་པ་དང་ནམ་མཁའ་ཁམས་ཀྱིས་ཕྱོགས་བཅུའི་འཇིག་རྟེན་ཐམས་ཅད་ལ་ཇི་ལྟར་ཁྱབ་པ་དེ་ཐམས་ཅད་སངས་རྒྱས་ཆོས་ཀྱི་སྐུ་ཡི་འདུལ་བའི་གནས་སུ་གྱུར་པ་འོད་གསལ་རྡོ་རྗེ་སྙིང་པོའི་ཞིང་ཁམས་ཞེས་བྱ་བ་ཡིན་ནོ། །དེ་ཡང་ཀློང་ཆེན་རབ་འབྱམས་ལས། ཆོས་སྐུའི་སྟོན་པ་རིག་སྟོང་དང་། །ཆོས་སྐུའི་གནས་ནི་འོག་མིན་ཉིད། །ཆོས་སྐུའི་འདུལ་ཞིང་ནམ་མཁའི་ཁམས། །ཆོས་སྐུའི་འཁོར་ནི་རིག་པའི་མདངས། །ཆོས་སྐུའི་བསྟན་པ་རྣམ་པ་བཞི། །མ་ཧཱ་ཨ་ནུ་ཨ་ཏི་དང་། །ཨ་ཏི་ཆེན་པོ་རྣམ་པ་བཞི། །ཞེས་པ་ལྟར་རོ། །འདིར་ཨ་ཏི་ཆེན་པོ་ནི་ཐོད་རྒལ་ལ་གསུངས་སོ། །གཉིས་པ་ནི། སྟོན་པ་ལོངས་སྤྱོད་རྫོགས་པའི་སྐུའི་འདུལ་བའི་ཞིང་ཁམས་ནི་གང་ཞེ་ན་སྟོན་པ་ཀུན་བྱེད་ང་ལས་བྱུང་བའི་རང་མདངས་འགག་པ་མེད་པའི་རོལ་པ་ཡུལ་སྣང་གཟུགས་སྒྲ་དྲི་རོ་རེག་བྱ་ལྔ་པོ་ཇི་ལྟར་འདོད་པའི་ཡོན་ཏན་གྱིས་བརྒྱན་པའི་ཕྱོགས་བཅུའི་ཞིང་ཁམས་ཐམས་ཅད་ནི་སྟོན་པ་ལོངས་སྤྱོད་རྫོགས་པས་གདུལ་བའི་ཞིང་ཁམས་ཏེ། དེ་ལ་ནང་གསེས་སུ་རྣམ་སྣང་གང་ཆེན་མཚོ་གཅིག་གི་སྐུ་ལུས་ཀྱི་ཆ་ལ་བརྟེན་པའི་ཞིང་གི་བཀོད་པ་ཐམས་ཅད་སྡོམ་པ་ལ་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ཁམས་ཞེས་གསུངས་པ་དང་། དེ་འདྲ་རིགས་ལྔ་ཀ་ལ་ཚངས་པ་ལྔ་སྒྲའི་ཞིང་ཁམས་ཞེས་པ་སྟེ་དེ་ལྟ་བུའི་ནམ་མཁའི་དབྱིངས་ཐམས་ཅད་མ་ཁྱབ་པ་མེད་པ་རྣམས་ནི་ལོངས་སྐུའི་བསྟན་པའི་ཞིང་ཁམས་ཏེ། དེ་ཉིད་ལས། ལོངས་སྐུའི་སྟོན་པ་གངས་ཆེན་མཚོ། །ལོངས་སྐུའི་གནས་ནི་ཁང་བུ་བརྩེགས། །ལོངས་སྐུའི་འདུལ་ཞིང་སྣང་བ་རྣམས། །འདོད་པའི་ལོངས་སྤྱོད་ཁྱབ་ཚད་ཡིན། །ལོངས་སྤྱོད་རྫོགས་པའི་འཁོར་ནི་འདི་ལྟ་སྟེ། །མོས་སྤྱོད་བཞི་ཡི་ས་ལས་རབ་འདས་ནས། །དང་པོ་རབ་ཏུ་དགའ་བའི་ས་གནོན་ཏེ། །ས་བཅུ་ཆོས་ཀྱི་སྤྲིན་ལ་གནས་རྣམས་ཡིན། །འདུལ་ཞིང་སྣང་བ་གསལ་བས་ཁྱབ་ཚད་ཏེ། །བསྟན་པ་ཀྲྀ་ཡ་ཨུ་པ་ཡོ་གའོ། །ཞེས་སོ། །གསུམ་པ་ནི། དེ་བཞིན་དུ་སྟོན་པ་སྤྲུལ་པའི་སྐུ་ཡི་འདུལ་བར་བྱ་བའི་ཞིང་ཁམས་ནི། མཛོད་ལས། གླིང་བཞི་དང་ནི་ཉི་ཟླ་དང་། །རི་རབ་དང་ནི་འདོད་ལྷ་དང་། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་མོ། །ཞེས་གསུངས་པ་ལྟ་བུའི་སྟོང་གསུམ་གྱི་སྟོང་ཆེན་པོ་གཅིག་ན་གླིང་བཞི་རི་རབ་ལ་སོགས་པ་བྱེ་བ་ཕྲག་བརྒྱ་རེ་ཡོད་པ་དེ་སངས་རྒྱས་སྤྲུལ་པའི་སྐུ་གཅིག་གི་འདུལ་ཞིང་ཡིན་པས་ན་ལྷོ་ཕྱོགས་འཛམ་བུའི་གླིང་ནི་བྱེ་བ་ཕྲག་བརྒྱ་ཞེས་མཆོག་གི་སྤྲུལ་སྐུ་རྣམས་ཀྱི་བཞུགས་གནས་དངོས་ཀྱིས་མཚོན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་གདུལ་བྱ་རང་རང་གི་ལས་དང་སྐལ་བ་དང་མཚམས་པར་རང་བྱུང་ཡེ་ཤེས་ཀྱི་རྩལ་དམིགས་པ་མེད་པའི་ཐུགས་རྗེ་ཆེན་པོས་རྒྱུད་དྲུག་གམ་འགྲོ་བ་དྲུག་གི་སེམས་ཅན་རྣམས་འདུལ་བར་བྱེད་པ་ཡིན་ལ། དེ་ལྟ་བུའི་སྟོང་གསུམ་པོ་དེ་ནི་སྤྲུལ་སྐུའི་སྟོན་པ་གཅིག་གི་འདུལ་ཞིང་ཡིན་པ་དེ་བཞིན་དུ། གཞན་ཡང་དེ་དང་མཐུན་པའི་ཕྱོགས་བཅུའི་ཞིང་གི་བྱེད་བྲག་འཇིག་རྟེན་གྱི་ཁམས་ཚད་མེད་བསམ་གྱིས་མི་ཁྱབ་པ་ཇི་སྙེད་ཡོད་པ་ཐམས་ཅད་ཀྱང་སྟོན་པ་སྤྲུལ་པའི་སྐུའི་འདུལ་ཞིང་དུ་བསྟན་པ་ཡིན་ཏེ། སྔ་མ་ལས། སྤྲུལ་སྐུའི་གནས་ནི་ངེས་མེད་བྱ་རྒོད་རི། །སྟོན་པ་རབ་བདུན་ཤཱཀ་ཐུབ་ལ་སོགས་པ། །འདུལ་ཞིང་བྱེ་བ་ཕྱག་བརྒྱའི་འཛམ་གླིང་སྟེ། །འཁོར་ནི་ལྷ་མི་མུ་སྟེགས་བསྟན་གསོ་རྣམས། །དབང་པོ་སེམས་བསྒྱུར་ཐུགས་རྗེའི་བྱིན་རླབས་ནས། །དགེ་སློང་ཕོ་མོ་དགེ་བསྙེན་ཕོ་མོ་བཞི། །མ་ངེས་སྣ་ཚོགས་སྤྲུལ་སྐུའི་འཁོར་ཡིན་ཏེ། །བསྟན་པ་ཉན་ཐོས་རང་རྒྱལ་བྱང་སེམས་གསུམ། །སྐུ་གསུམ་སྟོན་གནས་འཁོར་བསྟན་བཤད་པ་ཡིན། །ཅེས་གསུངས་པ་བཞིན་ནོ། །དྲུག་པ་དུས་ཕུན་སུམ་ཚོགས་པ་ནི། གོང་དུ་བསྟན་པའི་སྟོན་པ་ཀུན་བྱེད་རྒྱལ་པོ་ང་ལས་བྱུང་བའི་སྟོན་པ་ཆོས་ལོངས་སྤྲུལ་པའི་སྐུ་སྟེ་སྐུ་གསུམ་པོ་དེ་ནི་གང་ལས་བྱུང་བའི་རྒྱུ་ཡང་ཐ་དད་མེད་པར་གཅིག་ཏུ་མཐུན་ཅིང་འབྲས་བུ་རང་གི་ངོ་བོ་ལ་ཡང་བཟང་ངན་མེད་པར་མཐུན་ལ་རང་བཞིན་ཡང་ཐ་དད་མེད་པར་གཅིག་པ་སྟེ། དེ་ཡང་རྒྱུ་ནི་ཀུན་བྱེད་བྱང་ཆུབ་ཀྱི་སེམས་སུ་སྐུ་གསུམ་པོ་ཀུན་མཐུན་ལ། རྒྱུ་དེ་ཉིད་ཀྱི་རྩལ་ལས་ཤར་བའི་འབྲས་བུ་སངས་རྒྱས་ཡིན་པར་ཡང་སྐུ་གསུམ་པོ་ཀུན་ཀྱང་མཐུན་པ་དང་། དེ་གསུམ་གྱི་རང་བཞིན་ཆོས་ཉིད་དབྱིངས་ཀྱི་ངོ་བོ་ཆོས་སྐུ་འདུས་མ་བྱས་པའི་བདག་ཉིད་ཡང་གཅིག་ལས་ཐ་དད་མེད་པར་བསྟན་པ་དེ་ཉིད་ཀྱི་ཕྱིར་ན་སྐུ་གསུམ་པོ་དེས་གདུལ་བྱ་རྣམས་འདུལ་བའི་དུས་ལ་སྔ་ཕྱི་སོ་སོར་ཕྱེ་བ་མེད་པར་གཅིག་ཏུ་བསྟན་པ་ཡིན་ནོ། །ཞེས་གསུངས་སོ། །དེ་ལྟར་ཡང་བང་མཛོད་འཕྲུལ་སྡེ་ལས། སྟོན་པ་སྐུ་གསུམ་ཚུར་བསྡུ་ན། །རྒྱུ་ཡི་དུས་ན་བྱང་ཆུབ་སེམས་སུ་ཀུན་ཀྱང་གཅིག །འབྲས་བུའི་དུས་ན་སངས་རྒྱས་ཡིན་པར་ཀུན་ཀྱང་གཅིག །འདུས་པའི་དུས་ན་སྔ་ཕྱི་མེད་པར་ཀུན་ཀྱང་གཅིག །ཆོས་སྐུའི་རང་བཞིན་ངོ་བོར་རང་བཞིན་མེད་པར་གཅིག །ཅེས་གསུངས་སོ། །བདུན་པ་བཤད་ལུགས་ཕུན་སུམ་ཚོགས་པ་རྒྱ་ཆེར་བཤད་པ་ལ་གཉིས་ཏེ། མདོར་བསྟན་པ་དང་། ཆོས་སྐུ་ལོངས་སྐུ་སྤྲུལ་སྐུ་གསུམ་གྱིས་རྒྱས་པར་བཤད་པའོ། །དང་པོ་ནི། སྟོན་པ་རང་བྱུང་གི་ཡེ་ཤེས་ཆོས་སྐུ་ཀུན་བྱེད་རྒྱལ་པོས་རང་གི་རིག་རྩལ་ལས་ཤར་བའི་འཁོར་ལ། ཀྱེ་སེམས་དཔའ་ཆེན་པོ་ཡང་ཉོན་ཅིག་ཅེས་བོས་ནས་ཀུན་བྱེད་རྒྱལ་པོ་ང་ལས་བྱུང་བ་ཡི་སྐུ་གསུམ་གྱི་སྟོན་པ་གསུམ་པོ་དེ་ཡིས་རང་རང་གི་འཁོར་རྣམས་ལ་སྙིང་པོའི་ཆོས་ཀྱི་རང་བཞིན་ཚུལ་ཇི་ལྟ་བུ་ཡི་སྒོ་ནས་བཤད་པའི་ལུགས་སམ་གསུངས་པའི་ཚུལ་ནི་གང་ཞེ་ན། འདི་ལྟར་སྟོན་པ་ཆོས་ཀྱི་སྐུས་ནི་ཉིད་ཀྱི་ཐུགས་རང་བྱུང་གི་ཡེ་ཤེས་ཀྱི་རྩལ་ལས་སྐྱེ་བའོ་ཆོ་འཕྲུལ་དུ་ཤར་བའི་སྣང་བ་ཐམས་ཅད་སྒྲ་ཚིག་གིས་བརྗོད་པ་ལ་མི་ལྟོས་པར་སྐྱེ་མེད་ཡེ་སྟོང་ཆེན་པོའི་དགོངས་པའི་བྱིན་གྱིས་ཡེ་ནས་བརླབས་པའི་ཚུལ་གྱིས་བཤད་པ་དང་། ལོངས་སྤྱོད་རྫོགས་པའི་སྐུ་ཡིས་ནི་འདི་ལྟར་སྣང་བའི་ཆོས་ཐམས་ཅད་འདོད་ཡོན་ལྔའི་རང་བཞིན་དུ་མ་སྤངས་རྒྱན་དུ་རོལ་བའི་ཚུལ་གྱིས་ཡེ་ནས་རང་རྩལ་དུ་རྫོགས་པར་རང་གི་ངོ་བོས་མཚོན་ཏེ་བཤད་པའམ་སྟོན་པར་བྱེད་པ་དང་། སྟོན་པ་སྤྲུལ་པའི་སྐུ་ཡིས་ནི་ཡན་ལག་དྲུག་ཅུ་དང་ལྡན་པའི་གསུང་གིས་བརྗོད་བྱེད་ཀྱི་ཚིག་དང་བརྗོད་བྱའི་དོན་རྣམས་བསྡེབས་སྦྱོར་ལེགས་པའི་སྒོ་ནས་གདུལ་བྱའི་གང་ཟག་རྣམས་ཀྱི་རྣ་བའི་དབང་པོར་ཚིག་གི་དོན་རྣམས་ནོར་འཁྲུལ་མེད་པར་སྟོན་པའོ། །གཉིས་པ་རྒྱས་པར་བཤད་པ་ལ་གསུམ་ལས། དང་པོ་ནི། དེ་ལ་སྟོན་པ་ཆོས་ཀྱི་སྐུ་ཡིས་བྱིན་གྱིས་བརླབས་ཀྱིས་ཇི་ལྟར་བཤད་པ་ཡི་ཚུལ་ནི། ཀུན་བྱེད་ང་ཡི་རང་བཞིན་གདོད་ནས་སྐྱེ་བ་མེད་པ་མཐའ་གྲོལ་བློ་འདས་ཆེན་པོའི་དོན་སྟོན་འཁོར་དགོངས་པ་དབྱེར་མེད་ཀྱི་ངང་ནས་བསྟན་པ་སྟེ། དེ་ཡང་སྒྱུ་འཕྲུལ་ལས། ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་གསུངས་བ་ལྟར་ཆོས་ཐམས་ཅད་གདོད་ནས་སྐྱེ་བ་མེད་པ་ལས་སྐྱེ་བའི་ཆོ་འཕྲུལ་དུ་ཇི་ལྟར་སྣང་སྲིད་སྣོད་བཅུད་དུ་ཤར་བ་ཐམས་ཅད་ཀུན་ཆོས་ཉིད་སྤྲོས་པ་དང་བྲལ་བ་དེ་ཉིད་ཀྱི་ངོ་བོ་རྩལ་སྣང་འགག་པ་མེད་པའི་ཐུགས་རྗེ་ཡི་ཆོ་འཕྲུལ་དུ་ཕྱུང་བ་སྟེ། དེ་ཡང་སྣང་དུས་ཉིད་ནས་རང་བཞིན་སྟོང་པའི་དབྱིངས་ཆོས་སྐུ་སྐྱེ་བ་མེད་པའི་དགོངས་པ་ལས་སྐད་ཅིག་ཀྱང་གཡོ་བ་མེད་པ་དེ་བཞིན་དུ་འཁོར་རྣམས་ཀྱི་བློ་ལ་རང་གསལ་བ་ལ་ཆོས་སྐུས་བྱིན་གྱིས་བརླབས་ཀྱིས་བཤད་ཅེས་བྱའོ། །ཚུལ་དེ་ལྟར་དོན་གསལ་ལས་ཀྱང་། ཆོས་སྐུའི་ཕུན་སུམ་ཚོགས་པ་ལྔ། །སྟོན་པ་འགྱུར་མེད་ཆོས་ཀྱི་སྐུ། །བསྟན་པ་མི་ནུབ་རྒྱལ་མཚན་ནི། །གསང་བ་རིག་པའི་རྒྱུད་ཆེན་ལྔ། །འདུས་པའི་འཁོར་ཚོགས་ཉིད་ལས་མི་གཞན་པ། །རིགས་ལྔ་བདེ་གཤེགས་འོད་དུ་འབར་བ་ལྔ། །བཞུགས་གནས་སྐྱེ་མེད་ཆོས་ཀྱི་དབྱིངས། །དུས་ནི་འདས་དུས་མ་བྱོན་སྔོན་རོལ་ནས། ། རྟོག་མེད་སྟོན་པས་བྱིན་གྱིས་བརླབས་ཀྱིས་བཤད། །ཉིད་ལས་མི་གཞན་སྐུ་ལྔ་རང་རང་གིས། །རྒྱུད་ཆེན་བྱིན་གྱིས་རླབས་ཀྱིས་སོ། །ཞེས་སོ། །གཉིས་པ་ནི། སྟོན་པ་ལོངས་སྤྱོད་རྫོགས་པའི་སྐུ་ཡིས་ནི་ཚིག་དང་ཡི་གེའི་སྒོ་ནས་མི་འཆད་པར་ལོངས་སྐུ་རང་གི་སྐུ་ཡི་ཆ་བྱད་དམ་ངོ་བོ་སྟོན་པར་བྱེད་པ་སྟེ། དེ་ཡང་ཇི་ལྟར་ན་གང་ཞིག་སྣང་བའི་ཆོས་རྣམས་ཐམས་ཅད་ཀུན་སྟེ་གཟུགས་སྒྲ་དྲི་རོ་རེག་བྱ་ལ་སོགས་པ་ཡི་འདོད་པའི་ཡོན་ཏན་ལྔའི་ལོངས་སྤྱོད་ཐམས་ཅད་ཡེ་ཤེས་རང་གསལ་ཆེན་པོའི་ངོ་བོ་མ་བཙལ་ལྷུན་གྱིས་གྲུབ་པའི་ཚུལ་དུ་རྫོགས་པ་འདི་ལས་གཞན་ན་རྒྱལ་བ་ལོངས་སྐུའི་དགོངས་པ་གང་ཡང་མེད་པར་སྟོན་པ་ན་ལོངས་སྐུ་རང་གི་སྐུ་ཡི་ངོ་བོས་བཤད་ཅེས་ཀུན་བྱེད་ང་ཡིས་བཤད་པ་ཡིན་ནོ། །ཞེས་པ་སྟེ། དེ་ཉིད་ལས། སྟོན་པས་ལོངས་སྐུའི་ཕུན་སུམ་ཚོགས་པ་ལྔ་གསུངས་སོ། །སྟོན་པ་རིགས་ལྔ་བདེ་བར་གཤེགས་པ་ལྔ་བསྟན་པ་གསང་བའི་རྒྱུད་ཆེན་ལྔ། འདུས་པའི་འཁོར་ནི་སེམས་དཔའ་སེམས་མའི་ཚོགས། །བཞུགས་པའི་གནས་ནི་ཡེ་ཤེས་གཞལ་མེད་འོད་ཀྱི་ཀློང་། །དུས་ནི་དེ་རྣམས་རིག་པ་ཡུལ་དུ་ཤར་བའི་ཚེ། །ཚིག་དང་ཡི་གེའི་སྒོ་ནས་མི་འཆད་པར། །སྐུ་ཡི་ཆ་བྱད་སྒོ་ནས་སྟོན། །ཅེས་སོ། །གསུམ་པ་ནི། སྟོན་པ་སྤྲུལ་པའི་སྐུ་ཡིས་ཚིག་དང་ཡི་གེའི་སྡེབ་སྦྱོར་ལེགས་པ་ལ་བརྟེན་ནས་ཇི་ལྟར་བཤད་པ་ཡི་ཚུལ་ནི་གང་ཞེ་ན། ཇི་ལྟར་སྣང་བའི་ཆོས་ཕྱི་ནང་སྣོད་བཅུད་ཀྱི་བསྡུས་པ་འདི་རྣམས་ཐམས་ཅད་ཀུན་ཡེ་ནས་སྟོན་པ་ལོངས་སྤྱོད་རྫོགས་པའི་སྐུ་ཡི་ངོ་བོར་གྱུར་པ་རང་བྱུང་ཡེ་ཤེས་ཀྱི་རྩལ་མདངས་འགགས་མེད་དུ་ཤར་བ་ལས་གཞན་དུ་མེད་ཀྱང་། དེ་ཐད་དྲང་དུ་སྟོན་པར་མཛད་པས་གདུལ་བྱ་རྣམས་ཀྱི་མ་རིག་སྟེ་རྟོགས་པར་མི་ནུས་པ་དེས་ན་སྟོན་པ་ཐབས་ལ་མཁས་པས་བསྟན་པ་དམ་པའི་ཆོས་ཞེས་བྱ་བའི་ཐེག་པའི་ཁྱད་པར་མི་འདྲ་བ་གདུལ་བྱ་རང་རང་གི་ཇི་ལྟར་འདོད་པའི་བློ་དང་འཚམས་པར་སྡེ་སྣོད་གསུམ་གྱི་ཆོས་རྣམས་སྤྲུལ་པས་བརྗོད་བྱའི་དོན་རྣམས་ཚིག་དང་ཡི་གེར་སྡེབས་ཏེ། སྒྲ་ཡི་ངོ་བོར་ཚངས་པའི་དབྱངས་ཀྱིས་བརྗོད་པས། རྗོད་བྱེད་ཚིག་གི་སྒྲ་དེས་བརྗོད་བྱ་ཟབ་ཅིང་རྒྱ་ཆེ་བའི་དོན་དེ་དང་དེ་གོ་བར་བྱས་ནས་བསྟན་པ་ཡིན་པས་གང་ཞིག་བསྟན་པར་བྱ་བའི་དོན་དེ་ཐམས་ཅད་སྟོན་པ་སྤྲུལ་པའི་སྐུས་ཚིག་གི་སྒྲ་སྡེབས་སྦྱོར་ལེགས་པ་དེ་ཡིས་བཤད་པ་ཡིན་ལ། དེ་ལས་བྱེ་བྲག་ཏུ་ཀུན་ཏུ་བཟང་པོ་ཆོས་སྐུའི་སྟོན་པ་དེ་ཉིད་མཚན་རྫོགས་སྤྲུལ་པའི་སྐུ་རྡོ་རྗེ་འཆང་གི་རྣམ་པར་བཞེངས་ནས་རང་བཞིན་རྫོགས་པ་ཆེན་པོའི་རྒྱུད་རྣམས་ཇི་ལྟར་གསུངས་པའི་ཚུལ་ནི། སྟོན་པ་སྤྲུལ་སྐུའི་ཕུན་སུམ་ཚོགས་པ་ལྔ་གསུངས་པ། སྟོན་པ་རྡོ་རྗེ་འཆང་ཆེན་ངས། བསྟན་པའི་སྙིང་པོ་གསང་བའི་རྒྱུད་ཆེན་ལྔ། །དེ་སོགས་ཕྱི་ནང་གསང་བས་བསྡུས་པ་རྣམས། །ཐུགས་ཀྱི་ཀློང་དུ་ཤེས་རབ་ཆེན་པོས་བཀྲོལ། །མགུལ་གྱི་བུམ་པར་ཡེ་ཤེས་རླུང་གིས་དྲིལ། །ཞལ་གྱི་ལྗགས་ལ་མ་འདྲེས་གསལ་བར་བཀྲམ། །ཚེམས་ཀྱི་བར་ནས་ཚིག་དོན་སོ་སོར་བཤད། །ཡན་ལག་དྲུག་ཅུ་སྡེབས་སྦྱོར་ལེགས་པར་བཤད། །ཁྱུང་ཆེན་ལྡིང་ཐབས་དོན་གྱི་སྤྱི་ཁོག་ཕུབ། །སྟག་མོའི་མཆོང་སྟབས་དཀྱུས་ཀྱི་ས་ཆེན་བཅད། །རུ་སྦལ་འགྲོས་ཀྱིས་ཚིག་གི་འབྲུ་རྣམས་བཅོམ། །སེང་གེའི་གདངས་སྐད་ལྟ་བས་ཐེག་བརྒྱད་ཟིལ་གྱིས་མནན། །གླག་མོ་གཟན་འཇུག་ལྟ་བུས་མན་ངག་འདྲིལ། །འདུས་པའི་འཁོར་ཚོགས་སངས་རྒྱས་རབ་བདུན་ལ། །ལྷ་གནས་གསུམ་དུ་བདུད་རྩིའི་ཆར་ཆེན་ཕབ། །པདྨ་བརྩེགས་པའི་གནས་མཆོག་རྣམ་གསུམ་མོ། །ཅེས་སོ། །གཉིས་པ་ཀུན་བྱེད་ཉིད་ལ་ཕུན་སུམ་ཚོགས་པ་ཚང་བར་བསྟན་པ་ལ་གསུམ་སྟེ། ཕུན་སུམ་ཚོགས་པའི་ཚང་ཚུལ་རྒྱུ་མཚན་དང་བཅས་པས་མདོར་བསྟན། སྣང་ཚུལ་དབྱེ་བ་དང་བཅས་པས་རྒྱས་པར་བཤད། བཀོད་ཚུལ་རང་བཞིན་དང་བཅས་པས་དོན་བསྡུ་བའོ། །དང་པོ་ལ་གསུམ་སྟེ། ཕུན་སུམ་ཚོགས་པ་གསུམ་གྱི་ཚང་ཚུལ། ཐ་དད་དུ་སྨོས་ཀྱང་གཅིག་ཏུ་འདུ་བའི་རྒྱུ་མཚན། དེ་དག་གི་དོན་བསྡུ་བའོ། །དང་པོ་ལ་གཉིས་ཏེ། མདོར་བསྟན་པ་དང་། སྟོན་པ་བསྟན་པ་འཁོར་གྱི་རང་བཞིན་རྒྱས་པར་བཤད་པའོ། །དང་པོ་ནི། ཀྱེ་བཀའ་ཡི་སྡུད་པ་པོ་སེམས་དཔའ་ཆེན་པོ་ཁྱོད་ཉོན་ཅིག་དང་ཀུན་བྱེད་རྒྱལ་པོ་བྱང་ཆུབ་ཀྱི་སེམས་ང་ནི་སྟོན་པ་སྐུ་གསུམ་གྱི་ཕུན་སུམ་ཚོགས་པ་མ་ལུས་པའི་ངོ་བོ་དབྱེར་མེད་གཅིག་གི་བདག་ཉིད་ཡིན་པའི་ཚུལ་འདི་ལྟ་བུ་སྟེ་ཞེས་སེམས་ཅན་རྣམས་ཀྱི་ད་ལྟའི་སེམས་ཉིད་རང་བྱུང་གི་ཡེ་ཤེས་འདི་ལས་གཞན་ན་སྟོན་པ་སྐུ་གསུམ་ཞིག་བཙལ་དུ་མེད་པར་མདོར་བསྟན་པའོ། །གཉིས་པ་ལ་སྟོན་༡ འཁོར་༣བསྟན་༢ པ་གསུམ་ལས། དང་པོ་སྟོན་པའི་རང་བཞིན་རྒྱས་པར་བཤད་པ་ནི། དེ་ལ་སྟོན་པ་སྐུ་གསུམ་པོ་ཐམས་ཅད་ཀུན་བྱེད་བྱང་ཆུབ་ཀྱི་སེམས་གཅིག་གི་ངོ་བོ་ཡིན་ཚུལ་ཇི་ལྟར་ཞེ་ན། འདི་ལྟར་གནས་ལུགས་དོན་གྱི་ཡེ་ཤེས་མི་རྟོག་མཉམ་པ་ཆེན་པོ་བརྗོད་མེད་བློ་འདས་བྱ་རྩོལ་ལས་འདས་པའི་རང་བཞིན་ཉིད་དུ་གནས་པ་དེ་ནི་ཆོས་དབྱིངས་སྤྲོས་པ་ཐམས་ཅད་དང་བྲལ་བ་ཆོས་ཀྱི་སྐུ་ཡི་ངོ་བོ་ཡིན་ལ། དེའི་རང་བཞིན་འོད་གསལ་བའི་ཡེ་ཤེས་ཀྱི་རང་རྩལ་རྩོལ་མེད་ཤུགས་འབྱུང་གི་ཚུལ་དུ་རང་སྣང་ཞིང་བྱུང་བའི་སྐྱེ་བའི་ཆོ་འཕྲུལ་དུ་ཤར་བའི་གཟུགས་སྒྲ་དྲི་རོ་ལ་སོགས་པ་ཇི་སྙེད་པ་དེ་ཐམས་ཅད་ནི་མ་སྤངས་རིག་པའི་རྒྱན་དུ་ཤར་བ་ཡིན་པའི་ཕྱིར་ན། དེ་ནི་འདོད་པ་ཡི་ཡོན་ཏན་རྣམ་པ་ལྔ་པོ་འབད་མེད་དུ་འབྱུང་བའི་རང་བཞིན་ཅན་ལོངས་སྤྱོད་རྫོགས་པའི་སྐུ་ཡིན་ལ། དམིགས་མེད་ཐུགས་རྗེ་ཆེན་པོའི་རང་རྩལ་འགགས་པ་མེད་པས་གདུལ་བྱ་རྣམས་ཇི་ལྟར་འདུལ་བའི་སྐལ་བ་དང་མཚམས་པར་སེམས་ཅན་གྱི་དོན་མཛད་པ་དེ་ནི་སྤྲུལ་པའི་སྐུ་ཡི་ངོ་བོ་ཡིན་པ་སྟེ། དེ་ལྟར་ན་སྟོན་པ་ཀུན་བྱེད་རྒྱལ་པོའི་རང་བཞིན་སྟོང་གསལ་ཐུགས་རྗེ་རྣམ་པ་གསུམ་གྱིས་གདུལ་བྱ་གང་ལ་སྟོན་པ་གང་གིས་འདུལ་བའི་སྐུར་སྟོན་པར་མཛད་པ་དེ་ལས་གཞན་ན་སྟོན་པ་སྐུ་གསུམ་ཞེས་བྱ་བ་གང་ཡང་ཡོད་པ་མ་ཡིན་ནོ། །གཉིས་པ་ནི། དེ་བཞིན་དུ་བསྟན་པ་དམ་པའི་ཆོས་ཀྱང་གཞན་དུ་མེད་པར་ཀུན་བྱེད་བྱང་ཆུབ་སེམས་ཀྱི་རང་བཞིན་བརྗོད་དུ་མེད་པའི་གནས་ལུགས་འོད་གསལ་སྤྲོས་པ་དང་བྲལ་བའི་དོན་དེ་ནི་བརྗོད་མེད་ཆོས་སྐུའི་བསྟན་པ་ཡིན་ལ། དེ་ལྟ་བུའི་བརྗོད་མེད་བློ་ལས་འདས་པའི་དོན་དེ་གཟུགས་སྐུའི་སྟོན་པ་གཉིས་ཀྱིས་གདུལ་བྱ་སོ་སོ་རང་རང་གང་ལ་གང་འཚམས་པར་བསྟན་པ་དེ་ཡིས་སེམས་ཅན་རྣམས་ཀྱི་དོན་འབད་མེད་དུ་མཛད་པ་དེ་ནི་ལོངས་སྐུ་དང་སྤྲུལ་སྐུའི་བསྟན་པ་ཕུན་སུམ་ཚོགས་པར་གསུངས་སོ། །གསུམ་པ་ནི། སྐུ་གསུམ་གྱི་སྟོན་པ་དེ་ཡི་འཁོར་གྱི་རང་བཞིན་བསྟན་པ་ནི་གང་ཡིན་སྙམ་ན། དེ་ལ་ཆོས་སྐུའི་འཁོར་ནི་གང་ཞིག་བྱང་ཆུབ་སེམས་ཀྱི་རྩལ་འགག་པ་མེད་པ་ལ་རང་སྣང་བའི་ཆོས་རྣམས་ཐམས་ཅད་དང་། ལོངས་སྐུའི་འཁོར་ནི་ས་བཅུའི་བྱང་ཆུབ་སེམས་དཔའ་གང་ཞིག་འོག་མིན་ཆེན་པོར་འདུས་ནས་ཐེག་པ་ཆེན་པོའི་ཆོས་ལ་ལོངས་སྤྱོད་པ་རྣམས་དང་། སྤྲུལ་སྐུའི་འཁོར་ནི་སྟོན་པ་སྤྲུལ་པའི་སྐུ་ཉིད་གང་དུ་སྣང་བའི་གནས་བྱ་རྒོད་སྤུང་རི་ལ་སོགས་པ་དེ་ལ་འདུས་ནས་དམ་པའི་ཆོས་ལ་ལོངས་སྤྱོད་ཅིང་སྟོན་པ་དེ་ཡི་གདུང་འཚོ་བ་པ་དང་བརྒྱུད་པ་འཛིན་པ་དེ་ལ་ཕུན་སུམ་ཚོགས་པའི་འཁོར་ཞེས་སུ་བརྗོད་པར་བྱ་བ་ཡིན་ནོ། །གཉིས་པ་ནི། སྙིང་པོ་རང་བྱུང་གི་ཡེ་ཤེས་ང་ཡི་རང་བཞིན་ནི་སྐུ་གསུམ་གྱི་རྒྱལ་བ་མ་ལུས་པའི་སྟོན་པ་ཕུན་སུམ་ཚོགས་པའི་ཆོས་ཀུན་བྱེད་པའི་རྒྱལ་པོ་བྱང་ཆུབ་ཀྱི་སེམས་ཏེ། དེ་ལྟ་བུའི་ཀུན་བྱེད་བྱང་ཆུབ་ཀྱི་སེམས་གཅིག་གི་རང་བཞིན་ལ་དབྱེ་བ་རྣམ་པ་གསུམ་དུ་བསྒྲངས་བ་ནི་འདི་ལྟ་སྟེ། གང་ཞེ་ན་སྟོན་པ་ཀུན་བྱེད་རྒྱལ་པོ་ང་ཉིད་རང་གི་ངོ་བོ་དང་། ང་ཡི་རང་བཞིན་དང་། ང་ཡི་བྱས་པའི་ཆོས་དང་རྣམ་པ་གསུམ་མོ། །དེ་ལ་ང་ཉིད་ཀྱི་ངོ་བོ་ནི་སྐུ་གསུམ་གྱི་སྟོན་པ་ཀུན་བྱེད་པའི་རྒྱལ་པོ་སྟེ་དུས་གསུམ་སངས་རྒྱས་ཀུན་གྱི་མེས་པོ་ཡིན་ལ། ང་ཡི་རང་བཞིན་ནི་འཇུག་སྒོ་དང་ལྟ་བ་དང་དམ་ཚིག་དང་སྤྱོད་པ་ལ་སོགས་པ་རྣམ་པ་བཅུར་བསྟན་པ་དེ་ནི་རྒྱལ་བའི་བསྟན་པ་ཀུན་གྱི་སྙིང་པོར་བཤད་པ་དང་། ཀུན་བྱེད་ང་ཡི་བྱས་པའི་ཆོས་རྣམས་ནི་གང་ཞེ་ན་དུས་གསུམ་གྱི་སངས་རྒྱས་ཐམས་ཅད་དོན་ལ་སྔ་ཕྱི་མེད་པར་འདུས་མ་བྱས་ཡེ་འབྱམས་མཉམ་པ་ཆེན་པོ་གཅིག་ན་བཞུགས་པའི་སངས་རྒྱས་དང་། འདོད་གཟུགས་མེད་ཀྱི་ཁམས་གསུམ་ན་གནས་པའི་འགྲོ་བ་རིགས་དྲུག་གི་སེམས་ཅན་གང་ཇི་སྙེད་པ་ཐམས་ཅད་ཀུན་བཟང་ངན་གྱི་དབྱེ་བ་མེད་པར་རང་སྣང་ཉག་གཅིག་ཡིན་པས་འཁོར་གྱི་དམ་པར་བྱས་པ་སྟེ། དེ་ལྟར་ཀུན་བྱེད་བྱང་ཆུབ་ཀྱི་སེམས་གཅིག་གིས་ཕུན་སུམ་ཚོགས་པ་ཐམས་ཅད་ཚང་བར་བྱས་པ་ཡིན་པས་ན་འཁོར་གྱི་གདུལ་བྱ་རྣམས་ལ་བསྟན་པ་བྱང་ཆུབ་སེམས་ཀྱི་རང་བཞིན་སྟོན་པར་མཛད་པ་ལ་གང་ཞིག་ཚང་དགོས་པ་སྟོན་འཁོར་བསྟན་པ་གསུམ་པོ་ཀུན་བྱས་ཤིང་ཕུན་སུམ་ཚོགས་པར་མཛད་པའོ། །གསུམ་པ་ནི། དེ་ལྟར་བྱང་ཆུབ་སེམས་ཀྱི་རང་བཞིན་བརྗོད་མེད་དོན་གྱི་གནས་ལུགས་གང་ཞིག་སྟོན་པར་བྱེད་པ་ལ་གང་དག་མེད་ན་མི་འབྱུང་བས་ཚང་དགོས་པ་ནི་སྟོན་པར་བྱ་བའི་ཆོས་དང་། དེ་ཉིད་གང་གིས་སྟོན་པ་པོ་དང་། དེས་གང་ལ་སྟོན་པའི་ཡུལ་འཁོར་གསུམ་སྟེ། དེ་ལྟ་བུའི་དགོས་པ་ཀུན་མ་ཚང་བ་མེད་པར་ཚོགས་པ་ལ་ཀུན་བྱེད་ང་ཡི་ཕུན་སུམ་ཚོགས་པར་བཤད་དོ་ཞེས། སྟོན་པའི་རང་བཞིན་རྣམ་པ་གསུམ་དུ་བསྟན་ཏོ། །འདི་ལྟར་སྐྱེ་མེད་འཕོ་འགྱུར་དང་བྲལ་བ་ཆོས་ཀྱི་སྐུ་དང་། ཡེ་ཤེས་གསལ་བའི་སྣང་ཆ་ལོངས་སྤྱོད་རྫོགས་པའི་སྐུ་དང་། ཐུགས་རྗེའི་རོལ་རྩལ་འགགས་མེད་དུ་ཤར་བ་སྤྲུལ་པའི་སྐུ་སྟེ། དེ་ལྟ་བུའི་སྐུ་གསུམ་པོ་གང་གིས་འདུལ་བར་བྱ་བའི་གདུལ་བྱ་རྣམས་ཀྱི་ངོར་སྟོན་པ་སྐུ་གསུམ་དུ་སྣང་བ་དེ་ལ་སྐུ་གསུམ་པོ་རང་རང་ཉིད་དང་མཐུན་པའི་གནས་དང་དུས་དང་འཁོར་དང་བསྟན་པ་ཐམས་ཅད་མ་ཚང་བ་མེད་པས་ཕུན་སུམ་ཚོགས་པར་སྣང་བ་ཡིན་ནོ་ཞེས་པ་སྟེ། མདོ་བཅུ་ལས། སྟོན་པ་བྱང་ཆུབ་སྙིང་པོ་ནི། །ཆོས་ཉིད་དབྱིངས་ཀྱི་གནས་ཆེན་དུ། །སངས་རྒྱས་སེམས་ཅན་འཁོར་ཚོགས་ནས། །སྔ་ཕྱི་མེད་པའི་བསྟན་པ་ནི། །རང་རིག་ཡེ་ཤེས་རིག་པའི་རྒྱལ། །རང་བཞིན་རྣམ་པ་གསུམ་སྣང་སྟེ། །མི་གནས་སེམས་ཀྱི་རང་བཞིན་དང་། །རང་བྱུང་ཡེ་ཤེས་རང་བཞིན་དང་། །ཐུགས་རྗེ་སྤྲུལ་པའི་རང་བཞིན་ནོ། །བྱང་ཆུབ་སེམས་ཀྱི་རང་བཞིན་ནི། །མི་གནས་ཆོས་ཀྱི་སྐུ་རུ་བཞུགས། །རང་བྱུང་ཡེ་ཤེས་རང་བཞིན་ནི། །རྫོགས་པའི་ལོངས་སྤྱོད་སྐུ་རུ་བཞུགས། །ཐུགས་རྗེ་སྤྲུལ་པའི་རང་བཞིན་ནི། །རྣམ་པ་ཅིར་ཡང་སྤྲུལ་ཏེ་བཞུགས། །ཞེས་གསུངས་པ་ལྟར་རོ། །གཉིས་པ་སྣང་ཚུལ་དབྱེ་བ་དང་བཅས་པས་རྒྱས་པར་བཤད་པ་ལ་གསུམ་སྟེ། སྟོན་པ་གསུམ་གྱི་སྣང་ཚུལ། །སྐུ་གསུམ་མཛད་པའི་འཕྲོ་ཚུལ། །དཀོན་མཆོག་གསུམ་གྱི་ཚང་ཚུལ་ལོ། །དང་པོ་ལ་གཉིས་ཏེ། མདོར་བསྟན་པ་དང་། ཆོས་སྐུ་ལོངས་སྐུ་སྤྲུལ་སྐུ་གསུམ་དུ་སྣང་བས་རྒྱས་པར་བཤད་པའོ། །དང་པོ་ནི། སྐུ་གསུམ་གྱི་སྟོན་པའི་ཡང་སྟོན་པར་གྱུར་པ་ཆོས་སྐུ་ཀུན་བྱེད་རྒྱལ་པོ་ངས་ང་ཡི་རང་བཞིན་གཅིག་ལ་དབྱེ་བ་རྣམ་པ་གསུམ་དུ་བསྟན་པ་དེ་གང་ཡིན་ཞེན་ཀུན་བྱེད་བྱང་ཆུབ་སེམས་ཀྱི་འཁོར་གྱི་དང་པོ་སྟོན་པ་སྐུ་གསུམ་གྱི་རྣམ་པར་ཤར་བ་འདི་རྣམས་ཡིན་ནོ། །གཉིས་པ་ནི། འོ་ན་སྟོན་པ་སྐུ་གསུམ་པོ་དེ་ནི་ཇི་ལྟ་བུ་ཞེ་ན། འདི་ལྟར་རིག་པ་བྱང་ཆུབ་སེམས་ཀྱི་རང་བཞིན་གདོད་ནས་མ་སྐྱེས་ཤིང་ཡུལ་སེམས་གཟུང་འཛིན་དང་བྲལ་བའི་རང་བཞིན་སྤྲོས་བྲལ་འདུས་མ་བྱས་པ་ཀ་དག་རང་བྱུང་གི་ཡེ་ཤེས་སྐྱེ་མེད་བསམ་བརྗོད་ལས་འདས་པ་དེ་ནི་འཁོར་གྱི་དང་པོ་སྟོན་པ་ཆོས་སྐུར་ཤར་བ་ཡིན་ལ་དེ་ལྟ་བུའི་ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་སྐྱེ་བ་མེད་པའི་ཀློང་ལས་སྐྱེ་བའིི་ཆོ་འཕྲུལ་འོད་གསལ་ལྷུན་གྱིས་གྲུབ་པ་ཡེ་ཤེས་རང་བྱུང་ཀུན་ཏུ་བཟང་པོའི་རོལ་པར་ཤར་བ་དེ་ནི་འདོད་ཡོན་ལྔའི་རང་བཞིན་ཟག་མེད་བདེ་བ་ཆེན་པོར་ལོངས་སྤྱོད་པས་སྟོན་པ་ལོངས་སྤྱོད་རྫོགས་པའི་སྐུ་རུ་ཤར་བ་དང་། གདུལ་བྱའི་མོས་པ་སྣ་ཚོགས་དང་མཐུན་པར་ཇི་ལྟར་འདོད་པ་བཞིན་དུ་སྤྲུལ་པའི་རོལ་པ་ཚད་མེད་པ་བྱུང་ནས་ནི། གདུལ་བྱ་དེ་ཡི་རང་རང་སོ་སོའི་སྐལ་བ་དང་མཐུན་པར་སེམས་ཅན་ཀུན་ཀྱང་ཚོམ་པར་བྱེད་པ་དེ་ནི་སྣ་ཚོགས་སྤྲུལ་པའི་སྐུ་ཞེས་སུ་བཤད་པ་ཡིན་ནོ། །གཉིས་པ་ལ་བཞི་སྟེ། འཁོར་གྱི་སྣང་བ་དང་མཐུན་པར་སྟོན་པའི་སྣང་ཚུལ། དེའི་བློ་དང་མཐུན་པར་བསྟན་པའི་སྣང་ཚུལ། སྐུ་གསུམ་གང་ལ་སྣང་བའི་རང་བཞིན། ཕྲིན་ལས་གང་དུ་འཇུག་པའི་དུས་ཚིགས་སོ། །དང་པོ་ནི། དེ་ལྟ་བུའི་རྒྱལ་བ་སྐུ་གསུམ་གྱི་སྟོན་པ་ཞེས་ཡོངས་སུ་གྲགས་པ་དེ་རྣམས་འཁོར་གྱི་ཕྱོགས་གང་དུ་མཐོང་ཞིང་སྣང་བར་མཛད་པ་ཡི་ཚུལ་ནི་འདི་ལྟར་ཆོས་སྐུའི་འཁོར་ནི་དུས་གསུམ་གྱིས་སངས་རྒྱས་རྣམས་དང་། ལོངས་སྐུའི་འཁོར་ནི་འཕགས་པའི་ས་བཅུ་ལ་གནས་པའི་བྱང་ཆུབ་སེམས་དཔའ་རྣམས་དང་། སྤྲུལ་སྐུའི་འཁོར་ནི་སྦྱོར་ལམ་བཟོད་པ་ཐོབ་པ་ལ་སོགས་པ་ནས་ཁམས་གསུམ་རྒྱུད་དྲུག་གི་འགྲོ་བ་རྣམས་ཏེ། དེ་ལྟ་བུའི་འཁོར་གསུམ་པོའི་སྣང་བ་དང་མཐུན་པར་སྐུ་གསུམ་དུ་སྣང་ཞིང་གདུལ་བྱ་རང་རང་གི་བློ་དང་གང་ཞིག་འཐད་པའམ་འཚམས་པར་སྣང་བའི་སྟོན་པ་སོ་སོའི་སྐུ་ལ་འཁོར་གྱི་ཚུལ་དུ་དེ་རྣམས་འདུས་ནས། སྟོན་འཁོར་དེ་རྣམས་རང་རང་དང་མཐུན་པའི་གནས་སུ་བསྟན་པ་དམ་པའི་ཆོས་ཀྱི་དོན་རྣམས་སྟོན་པར་མཛད་ཅིང་བཞུགས་པ་སྟེ། སྔ་མ་ལས། མི་གནས་ཆོས་སྐུར་བཞུགས་ཙམ་ན། །འཁོར་ཡང་བྱང་ཆུབ་སེམས་སུ་བཞུགས། །བྱང་ཆུབ་སེམས་ཀྱི་འཁོར་རྣམས་ལ། །སྤྲོས་པ་མེད་པའི་དོན་ཡང་སྟོན། །ལོངས་སྤྱོད་རྫོགས་སྐུར་བཞུགས་ཙམ་ན། །འཁོར་ཡང་བྱང་ཆུབ་སེམས་དཔའི་འཁོར། །བྱང་ཆུབ་སེམས་དཔའི་འཁོར་རྣམས་ལ། །སྐུ་དང་ཡེ་ཤེས་རྫོགས་པར་སྟོན། །སྣ་ཚོགས་སྤྲུལ་སྐུར་བཞུགས་ཙམ་ན། །འཁོར་ཡང་རྒྱུད་དྲུག་སེམས་ཅན་འཁོར། །རྒྱུད་དྲུག་སེམས་ཅན་འཁོར་རྣམས་ལ། །ཡིད་བཞིན་དབང་པོ་གང་འཐད་སྟོན། །ཅེས་སོ། །གཉིས་པ་ནི། སྟོན་པ་གསུམ་པོ་དེ་ཡི་བསྟན་པའི་རང་བཞིན་ཡང་ནི་སྐུ་གསུམ་གྱི་སྟོན་པ་རྣམས་གདུལ་བྱ་དང་འཚམས་པར་སྣང་བའི་ཚུལ་དེ་དང་འདྲ་བ་སྟེ། འདི་ལྟར་སྐུ་གསུམ་པོ་གང་གིས་རང་རང་གི་འཁོར་རྣམས་ལ་ཆོས་གང་ཞིག་སྟོན་པ་ཡི་ཚུལ་ནི་གདུལ་བྱ་གང་ལ་ཐབས་གང་གིས་འདུལ་བའི་དོན་རྣམས་ཀྱིས་ཞེས་བསྟན་བྱ་ཆོས་ཀྱི་དོན་ཅི་ལྟ་བུས་འདུལ་བར་ནུས་པ་དེ་བཞིན་དུ་འཁོར་གྱི་ཐོག་མ་དུས་གསུམ་གྱི་སངས་རྒྱས་ནས་འགྲོ་བ་ལྷ་མི་ཡི་བར་གྱི་འཇིག་རྟེན་ལས་དག་པ་རྣམས་ལ་དེ་དང་མཐུན་པར་འཇིག་རྟེན་དང་འཇིག་རྟེན་ལས་འདས་པའི་ཐེག་པའི་རྣམ་གྲངས་ཚད་མེད་པར་བསྟན་པས་གདུལ་བྱ་རྣམས་འདུལ་བའི་ཕྱིར་ན་གང་འདུལ་གྱི་ཆོས་ཀྱི་རྣམ་གྲངས་ཚད་མེད་པས་བསྟན་པ་ཕུན་སུམ་ཚོགས་པ་ཞེས་སུ་བཤད་པ་ཡིན་ནོ། །གསུམ་པ་ནི། དེ་ཡང་འདི་ལྟར་སྤྲོས་པའི་མཐའ་གང་ལའང་མི་གནས་པའི་ཆོས་སྐུ་བྱ་བཙལ་དང་བྲལ་བའི་དབྱིངས་སྒྲིབ་མེད་འོད་གསལ་ཟང་མ་ཐལ་བྱུང་གི་ཀློང་ན་བཞུགས་པ་ཡིས། འཁོར་དུས་གསུམ་གྱི་སངས་རྒྱས་རྣམས་དང་ཁམས་གསུམ་གྱི་སེམས་ཅན་ཐམས་ཅད་དགོངས་པ་ལ་བཟང་ངན་མེད་པར་ཁྱབ་གདལ་ལྷུན་འབྱམས་ཆེན་པོར་འབྱམས་ཀླས་སུ་གྱུར་པ་ལ། ཆོས་སྨྲ་བརྗོད་བསམ་ཡུལ་ལས་འདས་པ་སྤྲོས་མེད་རང་བྱུང་གི་ཡེ་ཤེས་བྱང་ཆུབ་ཀྱི་སེམས་ནི་སྟོན་པ་ཆོས་ཀྱི་སྐུས་སྐྱེ་མེད་དགོངས་པའི་དབྱིངས་ནས་བསྟན་པ་དང་། ཆོས་དབྱིངས་འོད་གསལ་བའི་ཡེ་ཤེས་འགགས་པ་མེད་པའི་ངོ་བོ་ལོངས་སྤྱོད་རྫོགས་པའི་སྐུ་དབང་ཕྱུག་ཆེན་པོའི་འོག་མིན་ན་བཞུགས་པ་ཡིས། འཁོར་ས་བཅུ་ན་བཞུགས་པ་ཡི་བྱང་ཆུབ་སེམས་དཔའ་སྒྲིབ་མེད་རང་བྱུང་གི་ཆོས་ཀྱི་སྤྲིན་གྱིས་ཁྱབ་པ་རྣམས་ལ། ཆོས་རང་བྱུང་དབྱིངས་ཀྱི་ངོ་བོ་བྱང་ཆུབ་སེམས་ཀྱི་རང་བཞིན་དེ་ལ་སྐུ་དང་ཡེ་ཤེས་ཐམས་ཅད་གདོད་ནས་འབྲལ་བ་མེད་པར་དབྱེར་མེད་མཉམ་པ་ཆེན་པོའི་བདག་ཉིད་དུ་དགོངས་པ་བརྡའི་གསུང་གི་བཤད་པ་དང་། རང་གདངས་འགག་པ་མེད་པའི་ཐུགས་རྗེ་འཕོ་འགྱུར་དང་བྲལ་བའི་ཡེ་ཤེས་ཅིར་ཡང་འཆར་དུ་རུང་བས་སྣ་ཚོགས་ངེས་པ་མེད་པའི་སྤྲུལ་པ་ཡི་སྐུ་ཡིས། འཁོར་བཟོད་པ་ཐོབ་པ་ལ་སོགས་པ་གནས་གང་ན་ལྷན་དུ་འདུས་པའི་འཁོར་དེ་རྣམས་ལ་ཆོས་འོད་གསལ་དབྱིངས་ཀྱི་སྒྲོམ་བུ་ལས་བྱུང་བའི་ཐེག་པའི་རྣམ་གྲངས་མ་ངེས་པ་གང་ལ་གང་གིས་འདུལ་བའི་དོན་ཡང་གདུལ་བྱ་རང་རང་གི་བློ་དང་འཚམས་པར་བསྟན་ཏོ། །བཞི་པ་ནི། དེ་ལ་སྟོན་པ་ཀུན་བྱེད་ཉིད་ཀྱི་ཕུན་སུམ་ཚོགས་པ་ཐམས་ཅད་ལྷན་དུ་རྫོགས་ནས་ཕྲིན་ལས་རྩོལ་མེད་དུ་འཇུག་པའི་དུས་སྔོན་གྱི་སྨོན་ལམ་རྣམ་དག་བཏབ་པ་སོགས་ལས་འཕྲོ་བཟང་པོའི་རྐྱེན་གྱིས་དུས་གཞན་གྱིས་བར་མ་ཆོད་པར་སྟོན་པ་ཕུན་སུམ་ཚོགས་པ་ཀུན་བྱེད་རྒྱལ་པོ་ང་དང་། ང་ཡི་ཐུགས་རྗེ་འགག་པ་མེད་པའི་རྩལ་གྱི་རོལ་པ་ཕྲིན་ལས་ཀྱི་བྱེད་པ་པོ་སེམས་དཔའ་རྡོ་རྗེའི་རྣམ་པར་སྣང་བའི་དུས་ལ་བབ་པ་ལྟར་ཀུན་བྱེད་དེས་བསྟན་པའི་ཆོས་ཐམས་ཅད་འཁོར་གྱི་ནང་ནས་སེམས་དཔའ་རྡོ་རྗེ་ཁྱོད་བཀའ་ཡི་སྡུད་པ་པོའི་ཚུལ་དུ་སྣང་བ་འཁོར་ཕུན་སུམ་ཚོགས་པ་དང་། བསམ་བརྗོད་ཀུན་ལས་འདས་པ་འོད་གསལ་སྤྲོས་པ་དང་བྲལ་བའི་ཡེ་ཤེས་གཉིས་སུ་མེད་པའི་དོན་ཉིད་སྟོན་པ་ཀུན་བྱེད་ང་ཡིས་ཇི་ལྟར་བསྟན་པ་ནི་ཆོས་ཕུན་སུམ་ཚོགས་པ་སྟེ། དེ་ལྟར་སྟོན་འཁོར་བསྟན་པ་གསུམ་པོ་ཚོགས་པས་དུས་དང་གནས་ཀྱི་རང་བཞིན་ཡང་དེ་ལ་ངང་གིས་ཚང་བའི་ཕྱིར་ན་དེའི་རྩལ་ལས་གདུལ་བྱ་རང་རང་གི་སྐལ་བ་དང་འཚམས་པར་སྐུ་གསུམ་གྱི་བསྟན་པ་རྣམས་སྣང་བ་ཡིན་པས་དེ་ནི་ཕྲིན་ལས་འཇུག་པའི་དུས་ཚིགས་སུ་བསྟན་པ་ཡིན་ནོ། ། ཡང་དེ་ཉིད་ལས། ཀུན་གྱི་སྟོན་པ་བྱང་ཆུབ་སེམས། །སྟོན་པས་བསྟན་པའི་འཁོར་ཚོགས་པས། །དུས་དང་གནས་ནི་རང་བཞིན་འདུས། །ཞེས་པ་ལྟར་རོ། །གསུམ་པ་ནི། གོང་དུ་བསྟན་པ་དེ་ལྟ་བུའི་སྟོན་པ་དང་བསྟན་པ་འཁོར་ཕུན་སུམ་ཚོགས་པ་རྣམ་པ་གསུམ་པོ་དེ་ནི་དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལྟར་དུ་ཡེ་ནས་འབྱུང་བར་དཀོན་པའི་དཀོན་མཆོག་རིན་པོ་ཆེ་རྣམ་པ་གསུམ་གྱི་ངོ་བོ་ཉིད་དུ་བསྟན་པ་དང་། ཀུན་བྱེད་རྒྱལ་པོ་ང་ཡི་གསང་གསུམ་འགྱུར་བ་མེད་པའི་སྐུ་གསུང་ཐུགས་ཀྱི་རང་བཞིན་དང་གཉིས་སུ་མེད་པར་བཤད་པ་སྟེ། དེ་ལ་སྟོན་པ་ཀུན་གྱི་ནང་ནས་བླ་ན་མེད་ཅིང་འབྱུང་བར་དཀོན་པའི་སངས་རྒྱས་དཀོན་མཆོག་ནི་ཆོས་ཀྱི་སྐུ་དང་ལོངས་སྤྱོད་རྫོགས་སྐུ་དང་སྤྲུལ་པའི་སྐུ་སྟེ་རྣམ་པ་གསུམ་ཡིན་ལ། བསྟན་པ་དམ་པའི་ཆོས་རྣམས་ཀྱི་ནང་ནས་ཤིན་ཏུ་འབྱུང་བར་དཀོན་པའི་གསུང་མཆོག་ནི་བསྟན་པ་ཀུན་གྱི་སྙིང་པོ་འོད་གསལ་བྱང་ཆུབ་སེམས་ཀྱི་རང་བཞིན་བརྡའ་ཚིག་གིས་བརྗོད་དུ་མེད་པའི་ཀུན་བྱེད་བྱང་ཆུབ་སེམས་ཀྱི་གསུང་མཆོག་གང་ཞིག་སྐུ་གསུམ་གྱི་གསུང་གི་རང་བཞིན་ཅན་དུ་སྣང་བའོ། །འཁོར་གྱི་དགེ་འདུན་དཀོན་པའི་ངོ་བོ་ནི་སྐུ་གསུམ་གྱི་འཁོར་དུ་འདུས་པ་རྣམས་ཏེ། དེ་ནི་སྟོན་པ་ཀུན་བྱེད་རྒྱལ་པོའི་ཐུགས་མཆོག་ཟབ་གསལ་གཉིས་སུ་མེད་པ་ཀུན་ཁྱབ་མཉམ་བརྡལ་ཆེན་པོ་སྤྲོ་བསྡུ་དང་བྲལ་བའི་རང་བཞིན་ཉིད་དེ། དེ་ལྟ་བུའི་འཁོར་གྱི་ངོ་བོ་དགེ་འདུན་དཀོན་མཆོག་དེ་ལ་ནི་རང་རང་གང་ལ་གང་དགོས་པའི་ཆོས་རྣམས་སོ་སོའི་བློ་དང་གང་འཚམས་པ་དེ་བཞིན་དུ་སྟོན་པར་བྱེད་པ་ཡིན་པར་གསུངས་པའོ། །གསུམ་པ་བཀོད་ཚུལ་རང་བཞིན་དང་བཅས་པས་མཇུག་བསྡུ་བ་ལ་གཉིས་ཏེ། སྟོན་པ་བསྟན་པ་འཁོར་གསུམ་གྱི་རང་བཞིན་བཀོད་ཚུལ་དང་། ཀུན་བྱེད་ཉིད་ཀྱི་རང་བཞིན་ནོ། །དང་པོ་ནི། དེ་ལ་ཕུན་སུམ་ཚོགས་པ་གསུམ་པོ་དེ་ཉིད་གང་གིས་ཇི་ལྟར་བཀོད་པའི་ཚུལ་ནི་འདི་ལྟར་གསུངས་ཏེ། ང་ནི་སྟོན་པ་ཀུན་བྱེད་རྒྱལ་པོ་བྱང་ཆུབ་ཀྱི་སེམས་ཏེ་སྤྲོས་བྲལ་ཐིག་ལེ་ཆེན་པོ་གཅིག་གི་རང་བཞིན་ཡིན་པ་ལ། གདུལ་བྱ་རྣམས་ཀྱི་ངོར་སྟོན་པ་སྐུ་གསུམ་གྱི་རྣམ་པར་སྣང་བ་ཡང་ཆོས་ཐམས་ཅད་ཀུན་བྱེད་པའི་རྒྱལ་པོ་སྟོན་པ་ངས་བྱས་ནས་མངོན་དུ་བསྟན་པ་ཡིན་ནོ། །ཞེས་འཁོར་གྱི་དང་པོ་སྟོན་པ་སྐུ་གསུམ་པོ་བསྟན་ནས། དེས་བསྟན་པ་དམ་པའི་ཆོས་སྐུ་གསུམ་སྟོན་པའི་གསུང་གསུམ་དུ་བཀོད་པ་ནི་ཕྱི་མཚན་ཉིད་སྡེ་གསུམ་དང་ནང་ཀྲྀ་ཡོག་སྡེ་གསུམ་དང་གསང་བ་ནང་རྒྱུད་སྡེ་གསུམ་དུ་བཀོད་པ་དེ་ལ་ནང་གསེས་སུ་རྣམ་པ་གསུམ་གསུམ་དུ་ཕྱེ་བས་ཐེག་པའི་རིམ་པ་དགུར་གྲགས་པ་སྟེ། དེ་ཡང་སྤྲུལ་པའི་སྐུ་རྣམས་ཀྱི་ཐུགས་རྗེས་གདུལ་བྱ་རྣམས་ཇི་ལྟར་འདུས་པར་བྱེད་པའི་ཆོས་ཉན་རང་བྱང་སེམས་ཏེ་མཚན་ཉིད་སྡེ་གསུམ་དུ་བསྒྲགས་པ་དང་། ལོངས་སྤྱོད་རྫོགས་པའི་སྐུས་བྱ་བ་བྱེད་པའི་ཕྱི་རྒྱུད་ལ་ནང་གསེས་སུ་ཕྱི་ཀྲྀ་ཡ་ནང་ཨུ་པ་གསང་བ་ཡོ་ག་ཡི་ཐེག་པ་གསུམ་དུ་སྒྲོགས་ཅིང་སྟོན་པ་དང་། སྟོན་པ་ཆོས་ཀྱི་སྐུ་ཡི་ཐུགས་ཀྱི་གསང་བ་ཟམ་མོ་ཤིན་ཏུ་རྟོགས་པར་དཀའ་བའི་རང་བཞིན་ཅན་མངོན་དུ་སྟོན་པར་བྱེད་པའམ། སྡེ་སྣོད་གསུམ་གྱི་ནང་ནས་མངོན་པར་གཏོགས་པ་མ་ཧཱ་ཨ་ནུ་ཨ་ཏི་སྟེ་ནང་རྒྱུད་སྡེ་གསུམ་པོ་སྒྲོགས་ཅིང་སྟོན་པ་སྟེ། དེ་ལྟ་བུའི་སྐུ་གསུམ་གྱི་བསྟན་པའི་ངོ་བོ་ཕྱི་དང་ནང་དང་གསང་བ་གསུམ་པོ་དེ་ནི་གདུལ་བྱའི་སེམས་ཅན་རྣམས་ཀྱི་ལུས་དང་ངག་དང་ཡིད་གསུམ་དང་། སྟོན་པ་ཀུན་བྱེད་ཉིད་ཀྱི་སྐུ་གསུང་ཐུགས་གསུམ་ཡེ་ནས་དབྱེར་མི་ཕྱེད་པ་དེ་ཡི་རྩལ་ལས་འཕྲོས་པས་རྣམ་པ་དགུར་བྱུང་བ་ཡིན་ཏེ། གསང་བ་སྤྱི་རྒྱུད་ལས། སྐུ་གསུམ་བྱིན་བརླབས་ཐེག་པ་དགུ། །སེམས་ཉིད་སྐུ་གསུང་ཐུགས་ཡིན་པས། །སྐུ་གཅིག་སྐུ་གསུང་ཐུགས་ཡིན་པས། །སྤྲུལ་པ་སྐུ་ཡི་རང་བཞིན་དང་། །སྤྲུལ་པ་གསུང་གི་རང་བཞིན་དང་། །སྤྲུལ་པ་ཐུགས་ཀྱི་རང་བཞིན་ནོ། །ལོངས་སྤྱོད་སྐུ་ཡི་རང་བཞིན་དང་། །ལོངས་སྤྱོད་གསུང་གི་རང་བཞིན་དང་། །ལོངས་སྤྱོད་ཐུགས་ཀྱི་རང་བཞིན་ནོ། །ཆོས་ཉིད་སྐུ་ཡི་རང་བཞིན་དང་། །ཆོས་ཉིད་གསུང་གི་རང་བཞིན་དང་། །ཆོས་ཉིད་ཐུགས་ཀྱི་རང་བཞིན་ནོ། །ཞེས་སོ། །དེ་ལྟ་བུའི་ཐེག་པ་དགུ་པོ་དེ་ལ་བརྟེན་ནས་ཐེག་པ་དགུ་པོ་སོ་སོའི་ལྟ་བའི་ལ་བཟླ་དགུ་དང་ཡིད་ཆེས་ཀྱི་ལུང་དོན་དགུ་དང་བགྲོད་བྱའི་ས་ལམ་དགུ་པོ་དེ་རྣམས་བགྲོད་པ་ཡིས ། མཐར་འོད་གསལ་འདུས་མ་བྱས་པ་སྤྲོས་བྲལ་རང་བྱུང་གི་ཡེ་ཤེས་བསམ་བརྗོད་ལས་འདས་པ་ཇི་བཞིན་དུ་སྟོན་པར་བྱེད་པའི་ཐེག་གཅིག་ཨ་ཏི་ཡོ་ག་ཀུན་བྱེད་བྱང་ཆུབ་སེམས་ཀྱི་ས་ལ་བགྲོད་པར་བྱེད་པའོ། །ཞེས་ཐེག་པ་དེ་དག་ཐམས་ཅད་ཀུན་བྱེད་བྱང་ཆུབ་སེམས་སུ་བགྲོད་པའི་ལམ་སྟེགས་སུ་བཤད་པ་སྟེ། ཀློང་ཆེན་རབ་འབྱམས་ལས། ཡོད་ནི་གཅིག་ལས་མེད་པ་ལ། །བྱུང་ནི་ཐེག་པ་དགུ་རུ་བྱུང་། །མཐོང་ནི་སྣང་བ་དགུ་རུ་མཐོང་། །དེ་ཡིས་གང་བྱས་ལས་འབྲས་ཀུན། །རྫོགས་ཆེན་ང་ཡི་སོ་ནམ་ཡིན། །ཅེས་གསུངས་སོ། །འོ་ན་སྔར་རྩོལ་བཅས་ཀྱི་ཐེ ག་པ་བརྒྱད་པོ་རྫོགས་པ་ཆེན་པོའི་གོལ་སར་གསུངས་པ་དང་འདིར་ལམ་སྟེགས་སུ་བཤད་པ་གཉིས་མི་འགལ་ལམ་སྙམ་ན། མི་འགལ་ཏེ་སྔར་གོལ་སར་གསུངས་པ་ནི་རྫོགས་པ་ཆེན་པོའི་ལམ་དུ་ཞུགས་ནས་དེའི་ལྟ་སྤྱོད་མ་རྟོགས་པར་འོག་མའི་ལྟ་སྤྱོད་ལྟར་སྤྱད་ན་གོལ་སར་འགྱུར་བར་གསུངས་ལ། འདིར་ལམ་སྟེགས་སུ་བཤད་པ་ནི་འོག་མའི་ཐེག་པ་རང་རང་གི་ལམ་དུ་ཞུགས་ནས་དེའི་ལྟ་སྤྱོད་བཞིན་སྤྱད་དེ་རིམ་གྱིས་རྫོགས་ལ་འཇུག་ན་ལམ་སྟེགས་སུ་བཤད་པ་ཡིན་ནོ། །གཉིས་པ་ནི། དེ་ལྟ་བུའི་ཕུན་སུམ་ཚོགས་པའི་ཆོས་མ་ལུས་པ་ཀུན་གྱི་སྙིང་པོ་ཀུན་བྱེད་བྱང་ཆུབ་ཀྱི་སེམས་རང་གི་རང་བཞིན་ནི་དགག་སྒྲུབ་སྤང་བླང་ལ་སོགས་པའི་བྱ་བྱེད་གང་ཡང་མེད་པར་ཁྱབ་གདལ་ནམ་མཁའ་ལྟ་བུའི་རང་བཞིན་དུ་བཞུགས་པ་བསམ་བརྗོད་དང་རྩོལ་སྒྲུབ་ཀུན་གྱི་ཡུལ་ལས་འདས་པ་གཉུག་མ་རང་བྱུང་གི་ཡེ་ཤེས་ཆགས་ཐོགས་དང་བྲལ་བ་ཡིན་པས་ས་ལམ་བགྲོད་པ་ལ་ལྟོས་པ་མེད་པར་སྙིང་པོ་བྱང་ཆུབ་ཀྱི་ས་ལ་ཡེ་ནས་ཕྱིན་པ་ཡིན་ནོ། །ཞེས་གསུངས་སོ། །མདོ་བཅུ་ལས། ཡེ་ནས་རང་བྱུང་ཡེ་ཤེས་ལ། །ཆོས་ཀུན་དུས་གསུམ་སྒྲིབ་མེད་པས། །སྤོང་དང་ལེན་པ་མི་མངའ་སྟེ། །རང་བྱུང་ཡེ་ཤེས་འགྱུར་མེད་གནས། །ཞེས་དང་། སྙིང་པོ་དོན་གྱི་རྒྱུད་ལས། དུས་གསུམ་རྣམ་དག་རིག་པ་དབྱེར་མེད་པས། །རིག་པ་དབྱེར་མེད་གཅིག་ཏུ་ལྷུན་གྱིས་རྫོགས། །མ་བསགས་མ་སྦྱངས་ཡེ་སངས་རྒྱས་པའི་ཀློང་། །མཐའ་བྲལ་རིག་པའི་ཀློང་ལ་བསམ་ཞིང་བརྗོད་དུ་མེད། །ཡེ་ནས་ཀུན་རྫོགས་བདག་ཉིད་ལྷུན་རྫོགས་དང་། །ས་ལ་མི་བགྲོད་ལམ་ལ་མི་སྦྱོང་སྟེ། །མི་རྟོག་ཏིང་འཛིན་སྦྱོང་བ་སྒྱུ་མའི་ནང་། །མ་བཙལ་རང་བཞིན་བཞག་པས་གྲུབ་པ་ཡིན། །ཅེས་གསུངས་པ་བཞིན་ནོ། །དེ་ལྟར་མངོན་དུ་ཕྱུང་བའི་མདོ་ལུང་བཅུ་དགོས་པ་དང་བཅས་པས་ཆོས་ཐམས་ཅད་ཀྱི་རང་བཞིན་ངོ་བོ་ཐུགས་རྗེ་གསུམ་གནས་ལུགས་ཇི་ལྟ་བ་ཉིད་གསལ་བར་སྟོན་པས་དམུས་ལོང་མིག་ཕྱེ་བ་ལྟར་བཤད་པ་ཡིན་ནོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་ཕུན་སུམ་ཚོགས་པ་ཤིན་ཏུ་དཀོན་པའི་ལེའུ་སྟེ་བཅུ་པའི་འགྲེལ་པའོ།། ༈ །།དོན་གཉིས་པ་ཆོས་ཉིད་སྒྲུབ་བསལ་ལས་འདས་པར་བཤད་པ། ཀུན་འདུས་རིན་པོ་ཆེའི་ལེའུ་སུམ་ཅུའི་བསྟན་པ་ལ་གསུམ་སྟེ། དེ་ཉིད་ངེས་པའི་ལེའུ་བཅུ། རྒྱུ་འབྲས་འདས་པའི་ལེའུ་བཅུ། མ་བཙལ་རྫོགས་པའི་ལེའུ་བཅུའོ། །དང་པོ་ལ་བཅུ་ལས། དང་པོ་ཆོས་ཐམས་ཅད་ཀུན་བྱེད་ཉིད་དུ་ངེས་པའི་ལེའུ་བཅུ་གཅིག་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལྟར་ཀུན་བྱེད་རྒྱལ་པོས་ཆོས་ཐམས་ཅད་ཕུན་སུམ་ཚོགས་པ་ལྔའི་རང་བཞིན་དུ་བཀོད་པར་གསུངས་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་སྣང་སྲིད་འཁོར་འདས་ཀྱི་ཆོས་ཐམས་ཅད་སེམས་ཀྱིས་བྱས་ཤིང་སེམས་ལ་སྣང་བ་སེམས་ཀྱི་རང་བཞིན་ལས་གཞན་དུ་མེད་ལ། སེམས་ཀྱང་གཟུང་འཛིན་རྣམ་རྟོག་གི་ཆོས་སུ་གྲུབ་པ་མེད་པར་ཡེ་ནས་རང་བྱུང་ཡེ་ཤེས་ཆེན་པོའི་ངང་ཚུལ་ལས་འདའ་མ་མྱོང་བའི་ཕྱིར་ན་ཆོས་ཀུན་གྱི་རྩ་བ་རིག་པ་བྱང་ཆུབ་སེམས་སུ་བསྡུས་པ་འདི་གསུངས་སོ། །གཉིས་པ་ལ་གསུམ་སྟེ། ཐམས་ཅད་ཀུན་བྱེད་ཉིད་དུ་འདུ་ཚུལ་མདོར་བསྟན་པ། དེའི་རང་བཞིན་རྒྱས་པར་བཤད་པ། །དོན་བསྡུ་བའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག་འདི་ལྟར་འཁོར་འདས་ལམ་གསུམ་གྱི་ཆོས་ཐམས་ཅད་ཀྱི་གཤིས་ལུགས་འགྱུར་བ་མེད་པའི་རང་བཞིན་དང་། དེ་དག་གང་ལས་བྱུང་བའི་རྩ་བ་ནི་འདི་ལྟ་སྟེ། གང་ཞེ་ན་ཀུན་བྱེད་བྱང་ཆུབ་ཀྱི་སེམས་ང་ནི་ཆོས་ཀུན་གྱི་རང་བཞིན་ཆོས་ཉིད་འཕོ་འགྱུར་དང་བྲལ་བའི་བདག་ཉིད་ཡིན་པ་སྟེ། སྟོན་པ་ང་ཡི་རང་བཞིན་ཡེ་གྲོལ་བློ་ལས་འདས་པ་འདི་ལས་ནི་ཐ་དད་དུ་གྱུར་པའི་ཆོས་གཞན་དུ་གྲུབ་པ་རྡུལ་ཙམ་མེད་པ་དེས་ན། ཆོས་སྐུ་ལ་སོགས་པའི་སྟོན་པ་སྐུ་གསུམ་པོ་ང་ཡི་རང་བཞིན་ཡིན་ལ། དེ་བཞིན་དུ་དུས་གསུམ་གྱི་སངས་རྒྱས་རྣམས་ཀྱང་ང་ཡི་རང་བཞིན་ཡིན་པ་དང་། ལམ་ལ་སློབ་པའི་བྱང་ཆུབ་སེམས་དཔའ་རྣམས་ཀྱང་ང་ཡི་རང་བཞིན་ཡིན་པ་དང་། སེམས་དཔའི་རྣལ་འབྱོར་ལ་སོགས་པའི་རྣལ་འབྱོར་རྣམ་པ་བཞི་པོ་ཡང་ང་ཡི་རང་བཞིན་ཡིན་ལ། འདོད་ཁམས་དང་གཟུགས་ཁམས་དང་གཟུགས་མེད་པའི་ཁམས་གསུམ་པོ་ཡང་ཀུན་བྱེད་རྒྱལ་པོ་ང་ཡི་རང་བཞིན་དུ་བསྟན་པ་ཡིན་ལ། ས་སོགས་འབྱུང་བ་ཆེན་པོ་ལྔ་ཡང་སྟོན་པ་ང་ཡི་རང་བཞིན་ཡིན་པ་དང་། འགྲོ་བ་རྒྱུད་དྲུག་གི་སེམས་ཅན་རྣམས་ཀྱང་ང་ཡི་རང་བཞིན་ཡིན་ལ། རི་གླིང་ལ་སོགས་པ་འདི་ལྟར་ཕྱི་སྣང་བ་སྣོད་ཀྱི་འཇིག་རྟེན་ལྟར་སྣང་བ་ཐམས་ཅད་ཀྱང་ང་ཡི་རང་བཞིན་ཡིན་ལ། དེ་ལ་བརྟེན་པ་ན་སྲིད་པ་བཅུད་ཀྱི་འགྲོ་བ་ཐམས་ཅད་ཀྱང་ང་ཡི་རང་བཞིན་ཡིན་པ་དང་། མདོར་ན་ཕྱི་ནང་སྣོད་བཅུད་གཉིས་ཀྱིས་བསྡུས་པ་འདི་ཐམས་ཅད་སྟོན་པ་བྱང་ཆུབ་ཀྱི་སེམས་ང་ཡི་རང་བཞིན་ཡིན་པའི་ཕྱིར་ན། ཀུན་བྱེད་ང་ཡི་རང་བཞིན་རིག་པ་བྱང་ཆུབ་ཀྱི་སེམས་ཡེ་སྟོང་སྤྲོས་པ་དང་བྲལ་བ་འདི་ལས་ནི་གཞན་དུ་གྱུར་པའི་ཆོས་གང་ཡང་མེད་པས་ཆོས་རྣམས་ཀུན་གྱི་རྩ་བ་ཀུན་བྱེད་ང་ལ་འདུས་ཤིང་། ང་ཡི་རྩལ་ལས་མ་བྱུང་བའམ་མ་འདུས་པ་ཡི་ཆོས་ནི་གཅིག་ཀྱང་མེད་དོ་ཞེས་མདོར་བསྟན་པ་སྟེ། ཚུལ་དེ་ལྟར་རིན་ཆེན་སྤུངས་པ་ལས་ཀྱང་། འབྱུང་བ་ས་ཆུ་མེ་རླུང་ཀྱང་། །བདག་ཉིད་ཆེན་པོའི་དེ་བཞིན་ཉིད། །འགྲོ་བའི་རྒྱུད་དྲུག་སྣང་བ་ཡང་། །དག་པའི་ཡེ་ཤེས་རྒྱུ་ཡི་དང་། །ཕྱི་ནང་སྣོད་བཅུད་མ་ལུས་ཀུན། །དང་པོ་རྒྱུ་མེད་དབྱིངས་ལས་བྱུང་། །ཐ་མ་རྒྱུ་མེད་དབྱིངས་སུ་ཐིམ། །ཞེས་པ་ལྟར་རོ། །གཉིས་པ་ལ་གསུམ་སྟེ། སྟོན་པ་དུས་དང་ཆོས་ཉིད་ཀུན་བྱེད་ཉིད་དུ་བཤད་པ། རྣལ་འབྱོར་ཁམས་གསུམ་རྒྱུད་དྲུག་ཀུན་བྱེད་ཉིད་དུ་བཤད་པ། སྐུ་གསུམ་དང་དུས་གསུམ་སངས་རྒྱས་དང་བྱང་ཆུབ་སེམས་དཔའ་ཀུན་བྱེད་ཉིད་དུ་བཤད་པའོ། །དང་པོ་ནི། དེ་ལ་དང་པོ་སྟོན་པ་སྐུ་གསུམ་ཉིད་ཀུན་བྱེད་བྱང་ཆུབ་སེམས་ཀྱི་རང་བཞིན་ཇི་ལྟར་ཡིན་ན། ཀུན་བྱེད་བྱང་ཆུབ་སེམས་ཀྱི་རང་བཞིན་སྟོང་པའི་ཆ་ཆོས་སྐུ་ཟག་མེད་ཡེ་ཤེས་ཀྱི་ངོོ་བོ་གདོད་ནས་མ་སྐྱེས་ཤིང་ཀ་དག་སྤྲོས་པ་དང་བྲལ་བའི་རང་བཞིན་དང་། དེའི་སྣང་ཆ་རང་བྱུང་འོད་གསལ་བའི་ཡེ་ཤེས་ལོངས་སྤྱོད་རྫོགས་པའི་སྐུ་རྟག་བརྟན་འཕོ་འགྱུར་དང་བྲལ་བ་ལས་སྐྱེ་བའི་རོལ་པ་འགགས་མེད་རང་བྱུང་གི་ཆོ་འཕྲུལ་དུ་ཤར་བ་དང་། དེའི་རྩལ་སྣང་སྤྲུལ་སྐུ་ཐུགས་རྗེའི་རང་བཞིན་འབད་མེད་ཤུགས་འབྱུང་གི་རོལ་པ་འགགས་པ་མེད་པ་རྣམ་པ་གསུམ་དུ་བྱུང་བ་དེ་ནི་སྐུ་གསུམ་གྱི་སྟོན་པ་གསུམ་གྱི་རང་བཞིན་ཡིན་ལ། དེ་བཞིན་དུ་སྔར་འདས་པའི་དུས་དང་བར་པ་ད་ལྟ་ཡི་དུས་དང་ཕྱི་པ་མ་འོང་བའི་དུས་གསུམ་པོ་ཡང་། སྟོན་པ་ཀུན་བྱེད་རྒྱལ་པོ་ང་ཉིད་ཡེ་ནས་དུས་གསུམ་འཕོ་འགྱུར་དང་བྲལ་བས་ཀུན་བཟང་ཡངས་པ་ཆེན་པོའི་ཀློང་ན་དུས་བཞི་མཉམ་ཉིད་གཅིག་ཏུ་གནས་པའི་རང་བཞིན་ལས་གཞན་དུ་མེད་དེ། དེ་ཉིད་ལས། ང་ནི་དུས་གསུམ་རྟག་པར་བཞུགས། །སངས་རྒྱས་ཀུན་གྱི་ཡེ་ཤེས་སྐུ། །དྲི་མེད་རང་བྱུང་འོད་གསལ་བ། །དུས་གསུམ་གཅིག་སྟེ་རྟག་པར་བཞུགས། །ཞེས་གསུངས་པ་ལྟར་དུས་གསུམ་དུ་བྱོན་པའི་སངས་རྒྱས་ཐམས་ཅད་ཀྱང་སྙིང་པོ་བྱང་ཆུབ་ཀྱི་སེམས་དུས་བཞི་མཉམ་པ་ཆེན་པོ་གཅིག་ཏུ་གནས་པའི་ཕྱིར་ན། དེ་ལྟ་བུའི་དུས་གསུམ་པོ་དེ་ཡང་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་དུ་བསྟན་པ་ཡིན་པ་དང་། ང་ཉིད་གཟུང་འཛིན་ཡེ་བྲལ་ཆེན་པོའི་དགོངས་པར་རང་ཤར་པས་བྱང་བ་དང་། ནམ་མཁའ་བཞིན་དུ་འཁོར་འདས་ཀུན་ལ་མཉམ་བརྡལ་དུ་ཁྱབ་ཅིང་རིག་པའི་ཀློང་དུ་རྫོགས་པས་ཆུབ་པ་དང་། གཞི་ཀློང་རྣམ་པར་དག་པའི་རྩལ་འགགས་མེད་རང་བྱུང་དུ་ཤར་བའི་སྣང་སྲིད་ཀྱི་ཆོས་རྣམས་ཀུན་གྱི་སྙིང་པོ་བྱེད་པའི་ཕྱིར་ན་ཆོས་ཐམས་ཅད་ཀྱི་ཆོས་ཉིད་བྱང་ཆུབ་ཀྱི་སེམས་ཀྱང་ཀུན་བྱེད་ང་ཡི་རང་བཞིན་ཡིན་ནོ་ཞེས་གསུངས་སོ། །གཉིས་པ་ནི། གཞན་ཡང་ཀུན་བྱེད་ང་ནི་རྒྱུ་རྐྱེན་གང་ལ་མ་ལྟོས་པར་རང་བྱུང་འདུས་མ་བྱས་པ་སྤྲོས་བྲལ་ཐིག་ལེ་ཉག་ཅིག་ཏུ་གནས་པ་ཡིན་ལ། ང་ཡི་རང་བཞིན་མཁའ་ཁྱབ་དབྱིངས་ཀྱི་རྡོ་རྗེ་ཆོས་ཉིད་དེ་བཞིན་ཉིད་ཀྱི་དོན་རྣལ་མ་ལ་སེམས་དཔའི་རྣལ་འབྱོར་ལ་སོགས་པ་རྣམ་པ་བཞི་པོའི་རང་རིག་པའི་ཡེ་ཤེས་ཀྱི་བློ་ཡང་དག་པར་འབྱོར་པ་ཡི་སྒོ་ནས་བཞིར་དབྱེས་ཀྱང་དོན་ལ་ཀུན་བྱེད་བྱང་ཆུབ་སེམས་ཀྱི་དོན་རྣལ་མ་གཅིག་ཏུ་འབྱོར་བ་ལས་ཐ་དད་མེད་པ་དེས་ན་རྣལ་འབྱོར་བཞི་ཡང་ཀུན་བྱེད་ང་ཡི་རང་བཞིན་ཡིན་པར་བཤད་པ་དང་། ཀུན་བྱེད་ང་ཡི་ལུས་སྣང་བ་འདོད་པའི་སྲིད་པ་ངག་ཕྱེད་སྣང་གཟུགས་ཀྱི་སྲིད་པ་ཡིད་མི་སྣང་བ་གཟུགས་མེད་པའི་སྲིད་པ་གསུམ་ཡིན་པ་ལས་གཞན་གང་ཡང་མེད་པས་ཁམས་གསུམ་པོ་དང་པོ་བྱུང་ཡང་ང་ཡི་རང་བཞིན་དེ་ལས་བྱུང་བ་དང་། འདུས་ཀྱང་ང་ཡི་རང་བཞིན་སྒོ་གསུམ་པོ་དེ་ལ་འདུས་པ་དང་། ཡིན་ཡང་ང་ཡི་ངོ་བོ་སྟོང་གསལ་ཐུགས་རྗེ་གསུམ་པོ་དེ་ཉིད་ཡིན་པས་ན་ཁམས་གསུམ་པོ་ཐམས་ཅད་ང་ཡི་རང་བཞིན་ཡིན་པར་བཤད་དེ། བང་མཛོད་འཕྲུལ་ལྡེ་ལས། བྱང་ཆུབ་སེམས་ཀྱི་ཆོས་ཉིད་ནི། །མ་སྐྱེས་སྟོང་པ་སྐྱེ་བ་མེད། །དེ་ནི་གཟུགས་མེད་ཁམས་ཡིན་ནོ། །སྐྱེ་བའི་ཆོ་འཕྲུལ་གཟུགས་སྣང་བ། །དེ་ནི་གཟུགས་ཀྱི་ཁམས་ཡིན་ཏེ། །འདོད་སྤྱོད་སྙིང་རྗེའི་ཀུན་འདུས་པ། །དེ་ནི་འདོད་པའི་ཁམས་སུ་ཡིན། །ཞེས་སོ། །དེ་བཞིན་དུ་ཀུན་བྱེད་ང་ཡི་རང་བཞིན་སྟོང་གསལ་འགག་པ་མེད་པའི་རང་མདངས་སུ་ཤར་པའི་འབྱུང་བ་ཆེན་པོ་རྣམ་པ་ལྔ་ནི་ང་ཡི་ངོ་བོ་ཡེ་ཤེས་རྣམ་པ་ལྔ་ཡི་རང་མདངས་མངོན་དུ་ཕྱུང་བ་སྟེ། སྔ་མ་ལས། རང་ལས་བྱུང་བའི་ཡེ་ཤེས་ལྔ། །གསང་བའི་དཀྱིལ་འཁོར་ཐུགས་ཀྱི་མཚོན། །མཚན་ཉིད་མེ་ཆུ་ས་རླུང་ལྔ། །རང་ལས་བྱུང་བའི་ཆོས་ཉིད་དེ། །ཞེས་གསུངས་པ་ལྟར་ཏེ་དེས་ན་གསལ་ལ་གོ་ཕྱེ་བའི་རང་བཞིན་ནམ་མཁའ་དང་ཡང་ཞིང་གཡོ་བའི་མཚན་ཉིད་རླུང་དང་རླན་ཞིང་སྡུད་པའི་རང་བཞིན་ཆུ་དང་སྲ་ཞིང་རྟེན་པའི་མཚན་ཉིད་ས་དང་སྨིན་ཅིང་དྲོ་བའི་མཚན་ཉིད་ཅན་མེ་ཡི་རྣམ་པར་སྣང་བ་ལྔ་ཡང་ཀུན་བྱེད་ང་ཡི་རང་བཞིན་མངོན་དུ་ཕྱུང་སྟེ་བསྟན་པ་ཡིན་ལ། ཀུན་བྱེད་ང་ཡི་རིག་རྩལ་འགག་མེད་ཀྱི་ཐུགས་རྗེས་མངོན་དུ་ཕྱུང་ནས་རང་བྱུང་འདུས་མ་བྱས་པའི་ཡེ་ཤེས་རྣམ་པ་ལྔ་བསྟན་པ་ནི། ངོ་མ་ཤེས་པའི་དབང་གིས་འགྲོ་བ་རིགས་དྲུག་གི་སེམས་ཅན་དུ་སྣང་བ་མ་ལུས་པ་ཡང་དོན་ལ་ཀུན་བྱེད་ང་ཡི་རང་བཞིན་གདོད་ནས་སྐྱེ་བ་མེད་པ་ལས་སྐྱེ་བའི་ཆོ་འཕྲུལ་འགགས་མེད་ཀྱི་རོལ་བར་བསྟན་པ་ཡིན་པ་སྟེ། མདོར་ན་ཀུན་བྱེད་རྒྱལ་པོ་ང་ཡི་རང་བཞིན་ལས་ལོགས་སུ་མ་གྱུར་པའི་སྣང་སྲིད་སྣོད་བཅུད་ཀྱིས་བསྡུས་པ་ཡི་ཆོས་འདི་ཐམས་ཅད་ཀུན་རྒྱུ་རྐྱེན་གྱི་བྱེད་པ་གཞན་མེད་པར་རིག་པ་བྱང་ཆུབ་སེམས་ཀྱི་རྩལ་ལས་ཆོས་ཐམས་ཅད་རང་བྱུང་དུ་ཤར་བ་ཡིན་པས་ཀུན་བྱེད་ངས་བྱས་པ་ཡིན་པ་དང་ང་ལས་བྱུང་བའི་སྣང་བ་ཡིན་པའི་ཕྱིར་ན་སྙིང་པོ་རང་བྱུང་གི་ཡེ་ཤེས་ངོར་མ་འདུས་པའི་ཆོས་ནི་གཅིག་ཀྱང་མེད་དེ་མདོ་བཅུ་ལས། སངས་རྒྱས་སྐུ་དང་ཡེ་ཤེས་དང་། །སེམས་ཅན་ལུས་དང་བག་ཆགས་དང་། །སྣང་དང་སྲིད་པའི་ཆོས་རྣམས་ཀུན། །བྱང་ཆུབ་སེམས་དང་དབྱིངས་སུ་འདུས། །ཞེས་གསུངས་པ་ལྟར་རོ། །གསུམ་པ་ནི། སྟོན་པ་བྱང་ཆུབ་ཀྱི་སེམས་ང་ལས་བྱུང་བའི་སྟོན་པ་སྐུ་གསུམ་ཡང་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་ལྷུན་གྲུབ་རྣམ་པ་གསུམ་ལས་གཞན་དུ་མེད་པས་སྟོན་པ་སྐུ་གསུམ་ཡང་རང་བྱུང་གི་ཡེ་ཤེས་ཉིད་དུ་བསྟན་ཏེ། བང་མཛོད་འཕྲུལ་ལྡེ་ལས། མི་གཡོ་རང་བཞིན་གནས་པ་ཆོས་སྐུ་ཡིན། །གསལ་ལ་རྟོག་པ་མེད་པས་ལོངས་སྐུ་ཡིན། །སེམས་ལ་དབང་ཐོབ་ཅིར་ཡང་བསྒྱུར་ནུས་པས། །དེ་ནི་ཐུགས་རྗེ་སྤྲུལ་པའི་སྐུ། །ཞེས་སོ། སྔ་བ་འདས་པའི་དུས་དང་བར་མ་ད་ལྟ་ཡི་དུས་དང་ཕྱི་བ་མ་འོང་པའི་དུས་ཏེ་དུས་གསུམ་གྱི་དབྱེ་བ་རྣམ་པ་གསུམ་པོ་གཅིག་ཏུ་འདྲེས་པའི་དུས་བཞི་ཆོས་ཉིད་ཀྱི་དབྱིངས་ན་དགོངས་ཀློང་དབྱེར་མེད་གཅིག་ཏུ་གནས་པའི་སངས་རྒྱས་ཐམས་ཅད་ཀྱང་སྔ་ཕྱི་དུས་ཀྱི་དབྱེ་བ་མེད་པར་ཀུན་བྱེད་རྒྱལ་པོའི་རང་བཞིན་དུ་གནས་པ་དང་། གཟུང་འཛིན་རྟོག་པའི་དྲ་བ་ཅི་རིགས་པ་དང་བྲལ་བའི་སར་གནས་ཀྱི་བྱང་ཆུབ་སེམས་དཔའ་མ་ལུས་པ་ཡང་ཀུན་བྱེད་ང་ཡི་རང་བཞིན་བསལ་བཞག་བྲལ་བའི་ཆོས་ཉིད་མངོན་དུ་བསྒྲུབ་པར་བྱེད་པ་ལ་སེམས་མི་སྐྲག་ཅིང་དཔའ་བར་བྱེད་པ་ལས་གཞན་དུ་མེད་པ་དང་། སེམས་དཔའི་རྣལ་འབྱོར་ལ་སོགས་པ་རྣལ་འབྱོར་རྣམ་པ་བཞི་ཡིས་ཆོས་ཉིད་རྣལ་མའི་དོན་ལ་བློ་ཇི་བཞིན་དུ་རྣལ་མར་འཇོག་པ་ཡང་ཀུན་བྱེད་ང་ཡི་རང་བཞིན་བྱང་ཆུབ་སེམས་ཀྱི་ངང་ལ་རྣལ་དུ་འཇོག་པར་བྱེད་པ་ཡིན་པས་ན་དེ་དག་ཐམས་ཅད་ཀུན་བྱེད་ཉིད་དུ་འདུས་པ་ཡིན་ཏེེ། ནམ་མཁའི་མཐའ་དང་མཉམ་པ་ལས། །སངས་རྒྱས་ཀུན་དང་དེ་ཡི་སྲས། །ཀུན་ཀྱང་རྩ་བ་བྱང་ཆུབ་སེམས། །བཅོས་མེད་རིག་པའི་དོན་རྟོགས་ནས། །རང་གསལ་ཡེ་ཤེས་འོད་ལ་བཞུགས། །ཞེས་པ་ལྟར་རོ། །གསུམ་པ་ནི། དེ་ལྟར་མདོར་ན་སྟོན་པ་ཀུན་བྱེད་རྒྱལ་པོས་འཁོར་འདས་ཀྱི་ཆོས་ཐམས་ཅད་ཀུན་བྱས་པ་བཞིན་དུ་ཇི་ལྟར་སྣང་བའི་ཆོས་ཐམས་ཅད་སེམས་ཉིད་རང་བྱུང་གི་ཡེ་ཤེས་ཀུན་བྱེད་རྒྱལ་པོ་ཉིད་ལ་ལྷུན་གྲུབ་རྫོགས་པ་ཆེན་པོའི་ཚུལ་དུ་འདུས་ཤིང་གནས་པ་ཡིན་ནོ་ཞེས་གསུངས་སོ། །རིན་པོ་ཆེ་རྒྱས་པའི་རྒྱུད་ལས། ཐམས་ཅད་བྱང་ཆུབ་སེམས་ལས་བྱུང་བའི་སྣང་བ་སྟེ། །དེ་ལས་མ་གཏོགས་དངོས་པོ་གང་ཡང་མེད། །ཅེས་གསུངས་པ་ལྟར་རོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་ཆོས་ཐམས་ཅད་ཀྱི་རྩ་བ་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ཉིད་ཁོ་ནར་འདུས་པའི་ལེའུ་སྟེ་བཅུ་གཅིག་པའི་འགྲེལ་བའོ།། ༈ །།དོན་གཉིས་པ་སེམས་ཉིད་ཀུན་བྱེད་རྒྱལ་པོ་རྒྱུད་ལུང་ཀུན་གྱི་རྩ་བ་ཡིན་པའི་ལེའུ་བཅུ་གཉིས་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལྟར་ཆོས་ཐམས་ཅད་རང་བྱུང་ཡེ་ཤེས་ཆེན་པོ་རྩ་བ་བྱང་ཆུབ་སེམས་སུ་འདུས་པར་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ང་ཡིས་འཁོར་འདས་ཀྱིས་བསྡུས་པའི་ཆོས་ཐམས་ཅད་གང་ལས་བྱུང་ཞིང་སྣང་བ་ཀུན་བྱེད་ཉིད་ཀྱི་རང་བཞིན་ཡིན་པར་སྟོན་པའི་ཁུངས་ཀྱི་མདོ་འདི་གསུངས་སོ། །གཉིས་པ་ལ་གསུམ་སྟེ། ཀུན་གྱི་ལུང་ཁུངས་ཀུན་བྱེད་ཉིད་དུ་ཕྱིར་བསྟན་པ། དེའི་རང་བཞིན་རྒྱས་པར་བཤད་པ། ཀུན་བྱེད་ཉིད་དུ་འདུ་བས་དོན་བསྡུ་བའོ། །དང་པོ་ནི། ཀྱེ་སེམས་དཔའ་ཆེན་པོ་ཀུན་བྱེད་ང་ནི་ཆོས་ཀུན་གྱི་རང་བཞིན་གཏན་ལ་འབེབ་པར་བྱེད་པའི་ལུང་ཁུངས་ཡིན་པ་སྟེ། དེས་ན་ཇི་ལྟར་སྣང་བའི་ཆོས་རྣམས་ཐམས་ཅད་ཀུན་དུས་དང་རྣམ་པ་ཐམས་ཅད་དུ་སྟོན་པ་ཀུན་བྱེད་ང་ལས་བྱུང་བ་ཡིན་པར་ཤེས་པར་གྱིས་ཤིག །དེ་ལྟར་སེམས་དཔའ་རྡོ་རྗེ་རང་གིས་ཇི་ལྟར་ཤེས་ཤིང་རྟོགས་པ་བཞིན་དུ་སྲིད་དང་ཞི་བས་བསྡུས་པའི་ཆོས་ཐམས་ཅད་ཀྱི་འབྱུང་གནས་སུ་གྱུར་ཅིང་ཐམས་ཅད་གཏན་ལ་འབེབ་པར་བྱེད་པས་སྤྱི་ཁུངས་ཆེན་པོ་ཡིན་པའི་ཚུལ་འདི་ཉོན་ལ་གདུལ་བྱ་གཞན་རྣམས་ལ་ཡང་ཆོས་རྣམས་ཐམས་ཅད་འདི་ལྟར་དུ་ལུང་སྟོན་པར་མཛོད་ཅིག་ཅེས་སོ། །གཉིས་པ་ལ་བདུན་ཏེ། ལུང་ཆེན་ཀུན་གྱི་རྒྱལ་པོར་བསྟན་པ། མན་ངག་ཀུན་གྱི་རྩ་བར་བཤད་པ། མདོ་རྒྱུད་ཀུན་གྱི་སྤྱི་འགྲེལ་ཡིན་པ། བསྟན་པ་ཀུན་གྱི་ཡང་རྩེར་བརྗོད་པ། ཐེག་པ་ཀུན་གྱི་ཉིང་ཁུར་གསུངས་པ། ཡེ་ཤེས་ཆེན་པོའི་སྣང་བ་མཆེད་པ། ཀུན་རྟོག་ཉོན་མོངས་དྲྭ་བ་གཅོད་པའོ། །དང་པོ་ནི། འདི་ལྟར་ཐེག་པ་འོག་མ་པ་རྣམས་ཀྱི་ལུགས་ལྟར་སྤོང་འགོག་སྦྱངས་བགྲོད་སོགས་ཀྱི་རྩོལ་སྒྲུབ་ལ་མི་ལྟོས་པར་ཆོས་ཐམས་ཅད་གདོད་ནས་གཉིས་མེད་ཡེ་ཤེས་ཆེན་པོ་གཅིག་གི་རང་བཞིན་ཡིན་པས་དགག་སྒྲུབ་སྤང་བླང་གང་ཡང་མི་དགོས་པའི་ཚུལ་དྲང་ཐད་དུ་སྟོན་པར་བྱེད་པ་ཀུན་བྱེད་རྒྱལ་པོ་བྱང་ཆུབ་ཀྱི་སེམས་ང་ནི་སྐུ་གསུམ་གྱི་རྒྱལ་བ་རྣམས་ཀྱིས་ལུང་ཆེན་པོ་གསུངས་པ་ཀུན་གྱི་ནང་ནས་རྒྱལ་པོ་ལྟ་བུ་ང་ཡིན་པས། ཀུན་བྱེད་བྱང་ཆུབ་སེམས་ཀྱི་ངེས་པའི་ལུང་འདི་ལ་བརྟེན་ནས་སྟོན་པ་སྐུ་གསུམ་པོ་ཡང་དང་པོ་ཀུན་བཟང་གདོད་མའི་མགོན་པོའམ་དང་པོའི་སངས་རྒྱས་ང་ལས་བྱུང་བ་ཡིན་ལ། དེ་ལ་ལུང་ཞེས་བྱ་བ་དེ་གང་ཞེ་ན་ལུང་ཞེས་པ་ནི་སྐུ་གསུམ་གྱི་སྟོན་པ་རྣམས་ཀྱིས་གསུངས་པའི་བཀའ་ལ་གདགས་ཞིང་དེ་ཐམས་ཅད་གང་ལས་འབྱུང་བའི་ཁུངས་དང་ཀུན་གྱི་ནང་ནས་རྩོལ་མེད་ཡེ་སངས་རྒྱས་པའི་དགོངས་པ་སྟོན་པས་རྒྱལ་པོ་ལྟ་བུ་ནི་ཀུན་བྱེད་ང་ཉིད་ཡིན་པར་ཤེས་པར་གྱིས་ཤིག །ཅེས་པའོ། །གཉིས་པ་ནི། དེ་བཞིན་དུ་མན་ངག་ཀུན་གྱི་རྩ་བའམ་བསྟན་དོན་མཐར་ཐུག་པ་ཡང་ཆོས་རྣམས་ཀུན་གྱི་གནས་ལུགས་སྐུ་གསུམ་ལྷུན་གྲུབ་ཆེན་པོ་བྱང་ཆུབ་ཀྱི་སེམས་ང་ཉིད་ཡིན་པས་ན་སེམས་ཉིད་སྐྱེ་བ་མེད་པའི་གནས་ལུགས་འདི་ལས་མ་གཏོགས་པ་ཡི་ཆོས་ཉིད་སྤྲོས་བྲལ་རང་བྱུང་གི་ཡེ་ཤེས་རང་བྱུང་ཀུན་ཏུ་བཟང་པོའི་དགོངས་པ་ནི་དུས་གསུམ་གྱི་སངས་རྒྱས་རྣམས་དང་ཁམས་གསུམ་གྱི་སེམས་ཅན་རྣམས་ལ་ཀུན་བྱེད་ང་ཡིས་ཡང་དག་པར་བསྟན་པ་མེད་དོ། །གསུམ་པ་ནི། གསང་སྔགས་ཀྱི་རྒྱུད་དང་ཟབ་རྒྱས་ཀྱི་མདོ་སྡེ་ཀུན་གྱི་བརྗོད་བྱ་མཐར་ཐུག་གཏན་ལ་འབེབ་པར་བྱེད་པའི་ཀུན་གྱི་སྤྱི་འགྲེལ་ཆེན་པོ་ཡང་ཀུན་བྱེད་རྒྱལ་པོ་འདི་ཉིད་ཡིན་པ་དང་། རྒྱུད་སྡེ་ཕྱི་ནང་དང་མདོ་སྡེ་མཚན་ཉིད་ཀྱི་ཐེག་པ་རྣམས་སྟོན་པའི་སྐུ་གསུམ་གྱི་སྟོན་པ་གསུམ་ཡང་ཀུན་བྱེད་ང་ཡི་རང་བཞིན་མངོན་དུ་ཕྱུང་བ་ཡིན་པ་དེས་ན་སྟོན་པ་དང་ནི་བསྟན་པ་དམ་པའི་ཆོས་གཉིས་ཀ་ཡི་སྤྱི་འགྲེལ་ཡིན་ནོ་ཞེས་དེ་དག་ཐམས་ཅད་ཀུན་བྱེད་བྱང་ཆུབ་སེམས་ཀྱི་རྩལ་འགག་པ་མེད་པ་ལས་སྣང་བར་བྱས་པས་ཀུན་གྱི་འབྱུང་གནས་ཡིན་པ་དང་མདོ་རྒྱུད་དེ་དག་གི་བརྗོད་བྱ་མཐར་ཐུག་པ་ཡང་ཀུན་བྱེད་ཉིད་ཡིན་པའི་ཕྱིར་ཏེ། བང་མཛོད་ལས། སྡེ་སྣོད་ཀུན་དང་རྒྱུད་ཀུན་གྱི། །འབྱུང་ག ནས་གཏན་ལ་འབེབས་པའི་ཕྱིར། །ཀུན་གྱི་སྤྱི་འགྲེལ་ཡིན་པར་ཡིད་ཀྱང་ཆེས། །ཞེས་སོ། །བཞི་པ་ནི། ཀུན་བྱེད་རྒྱལ་པོ་བྱང་ཆུབ་ཀྱི་སེམས་ང་ནི་བསྟན་པ་དམ་པའི་ཆོས་མ་ལུས་པ་ཀུན་གྱི་ཡང་རྩེ་ཡིན་པར་ཡང་བཤད་དེ། དེས་ཚུལ་ཇི་ལྟར་ཞེ་ན་ཀུན་བྱེད་ང་ལས་བྱུང་བའི་སྟོན་པ་སྐུ་གསུམ་གྱིས་བསྟན་པའི་ཆོས་འདུལ་བ་མདོ་སྡེ་མངོན་པ་གསུམ་དང་སྔགས་ཀྱི་ཏན་ཏྲ་ཆེན་པོ་སོ་སོའི་སྡེ་ནི་འབུམ་སྡེ་དང་དེ་དག་གི་བརྗོད་བྱ་ཤིན་ཏུ་ཟབ་པ་སྤྲོས་བཅས་བསྐྱེད་པའི་རིམ་པ་དང་སྤྲོས་མེད་རྫོགས་པའི་རིམ་པ་སྟོན་པར་བྱེད་པའི་གསང་བ་བླ་ན་མེད་པ་ལ་སོགས་པ་མདོར་ན་རྩོལ་སྒྲུབ་ཅན་གྱི་ཐེག་པ་ཀུན་ཀྱང་འདིར་རྩོལ་སྒྲུབ་ལས་འདས་པ་སྤྲོས་བྲལ་བློ་འདས་ཡེ་འབྱམས་ཆེན་པོ་ང་ཡི་ས་ལ་བགྲོད་དགོས་ཤིང་། དཔེར་ན་དམའ་བའི་ལུང་ནས་ལྷུན་པོའི་རྩེ་མོ་མཐོང་བར་མི་ནུས་པ་ལྟར་རྩོལ་སྒྲུབ་ཅན་གྱི་ཐེག་པ་དེ་ཉིད་ཀྱིས་རྩོལ་སྒྲུབ་ཀུན་ལས་འདས་པ་སྟོང་གསལ་ཐུགས་རྗེ་ཀུན་ཁྱབ་ཀྱི་རང་བཞིན་ཅན་ཀུན་བྱེད་བྱང་ཆུབ་ཀྱི་སེམས་ང་ཉིད་མི་མཐོང་བ་དེས་ན་བསྟན་པ་ཀུན་གྱི་ཡང་རྩེ་ཡིན་པར་བཤད་དེ། དེ་ཉིད་ལས། རྒྱུ་འབྲས་ཐེག་པ་ཀུན་ལས་ཁྱད་འཕགས་པས། །ཐེག་པའི་ཡང་རྩེ་ཡིན་པར་ཡིད་ཀྱང་ཆེས། །ཞེས་གསུངས་པ་ལྟར་རོ། །འདི་ལ་ཀུན་མཁྱེན་ཆེན་པོས། ཐེག་པ་ཀུན་གྱི་རྩེ་མོ་གསང་སྔགས་ཀྱི་ཐེག་པ་ཡིན་ལ་དེའི་ཀྱང་རྩེ་མོ་རྫོགས་པ་ཆེན་པོ་ཡིན་པས་ཐེག་པའི་ཡང་རྩེ་ཡིན་པར་གསུངས་སོ། །ལྔ་པ་ནི། ཀུན་བྱེད་རྒྱལ་པོ་བྱང་ཆུབ་ཀྱི་སེམས་ང་ནི་རྒྱུ་འབྲས་ཀྱི་ཐེག་པ་ཀུན་གྱི་ཉིང་ཁུའམ་ཡང་ཞུན་ལྟ་བུ་ཡིན་པར་ཡང་བཤད་དེ། འདི་ལྟར་སྟོན་པ་གསུམ་གྱི་ཆོས་ལམ་སྟེགས་ཙམ་ལ་གནས་པའི་ཀུན་འབྱུང་འདྲེན་པའི་ཐེག་པ། དཀའ་ཐུབ་རིག་བྱེད་ཀྱི་ཐེག་པ། མ་ཧཱ་ཨ་ནུ་གཉིས་དབང་བསྒྱུར་ཐབས་ཀྱི་ཐེག་པ་སྟེ། དེ་ལྟ་བུའི་ཐེག་པ་གསུམ་པོ་ཐམས་ཅད་ངེས་པ་དོན་གྱི་སྙིང་པོ་ཟབ་གསལ་གཉིས་སུ་མེད་པའི་ཡེ་ཤེས་མཐར་ཐུག་པར་གནས་པར་བྱེད་པ་ཡི་ཐེག་པ་གཅིག་ལས་མེད་ལ་ངེས་པའི་ཐེག་པ་གཅིག་པོ་དེ་ནི་རྒྱལ་བ་ཀུན་གྱིས་བགྲོད་པ་གཅིག་པུ་པ་ཐེག་གཅིག་བྱང་ཆུབ་སེམས་ཀྱི་ས་འདི་ཉིད་ཡིན་པའི་ཕྱིར་ན་དེ་ནི་ཐེག་པ་ཀུན་གྱི་ཉིང་ཁུར་གྱུར་པས་དུས་གསུམ་གྱི་སངས་རྒྱས་ཐམས་ཅད་གང་ནས་གཤེགས་པའི་ཤུལ་ལམ་ཆེན་པོ་ཡིན་པར་བཤད་དེ། དེ་ཉིད་ལས། དུས་གསུམ་སངས་རྒྱས་ཀུན་གྱི་ལམ་ཡིན་པས། །རྣམ་དག་ལམ་ཆེན་ཡིན་པར་ཡིད་ཀྱང་ཆེས། །ཞེས་པ་ལྟར་རོ། །དྲུག་པ་ནི། ཀྱེ་ཀུན་བྱེད་བྱང་ཆུབ་ཀྱི་སེམས་ང་ནི་ནམ་མཁའི་དབྱིངས་མ་ལུས་པ་ཁྱབ་ཅིང་མཐའ་ཡས་པའི་འགྲོ་བ་ཀུན་གྱི་རྒྱུ་ལྷན་སྐྱེས་དང་རྐྱེན་ཀུན་བརྟགས་ཀྱི་མ་རིག་པ་ཡི་མུན་པའི་སྤྲིན་ཚོགས་ཤིན་ཏུ་སྟུག་ཅིང་སྤང་དཀའ་བ་མ་ལུས་པ་ཀུན་བསལ་བར་བྱས་ནས་མཁྱེན་པའི་ཡེ་ཤེས་འོད་གསལ་ཆེན་པོའི་སྣང་བ་ཕྱོགས་མེད་དུ་མཆེད་པར་བྱེད་པ་ཡིན་ཏེ། དེ་ཡང་ཚུལ་ཇི་ལྟ་བུ་ཡི་སྒོ་ནས་མ་རིག་པའི་མུན་པ་སེལ་ཞིང་ཡེ་ཤེས་ཀྱི་སྣང་བ་མཆེད་པར་བྱེད་པ་ལགས་ཞེས་བསྟན་པ་ཡིན་ཞེ་ན། ཇི་ལྟར་སྣང་སྲིད་སྣོད་བཅུད་དུ་སྣང་བའི་ཆོས་རྣམས་ཐམས་ཅད་ཀུན་གཞན་དུ་ཅི་ཡང་མེད་པར་རིག་པ་བྱང་ཆུབ་སེམས་ཀྱི་ཆོས་ཉིད་སྟོང་ཆེན་དེ་བཞིན་ཉིད་ཀྱི་རྩལ་མ་འགགས་པར་ཤར་བའི་སྣང་བ་ཡིན་པ་ལ་སེམས་ཅན་རྣམས་ཀྱིས་དེ་ལྟར་དུ་མ་རིག་སྟེ། ཆོས་ཅན་སོ་སོའི་མཚན་མར་ཞེན་ཅིང་ཆགས་པའི་མ་རིག་གཟུང་འཛིན་གྱི་རྟོག་པའི་མུན་པར་འཐིབ་པ་ཡི་དབང་གིས་ཁམས་གསུམ་འཁོར་བའི་དུཿཁས་རྟག་ཏུ་གདུང་བ་ལ། ཇི་ལྟར་སྣང་བའི་ཆོས་རྣམས་ཐམས་ཅད་ཀུན་བྱེད་བྱང་ཆུབ་སེམས་ཀྱིས་བྱས་པའམ་ཐོག་མའི་འོད་གསལ་གཞི་དབྱིངས་ཆེན་པོའི་གདངས་འགགས་པ་མེད་པའི་རྩལ་གཞི་སྣང་ཕྱིར་གསལ་གྱི་རྣམ་པར་ཤར་བ་ཡིན་པའི་ཕྱིར་ན་ཀུན་བྱེད་བྱང་ཆུབ་སེམས་ཀྱི་རྩལ་སྣང་དུ་ཆོས་ཐམས་ཅད་ཤར་ཞིང་། དེ་ལྟར་ཤར་བའི་དུས་ཉིད་ནས་གཞི་མེད་རྩ་བྲལ་ཆེན་པོའི་རང་བཞིན་ཆོས་དབྱིངས་སྐྱེ་བ་མེད་པའི་དབྱིངས་སུ་ཡེ་གྲོལ་དུ་སོང་བའི་ཚུལ་རིག་ཅིང་རྟོགས་པར་བྱས་ནས། ཇི་ལྟར་སྣང་བའི་ཆོས་རྣམས་ཐམས་ཅད་ཀུན་ལ་བདག་གཞན་དང་ཡུལ་ཡུལ་ཅན་ལ་སོགས་པར་སོ་སོར་རྟོག་པའི་གཟུང་འཛིན་གྱི་མུན་པ་དེ་ཉིད་བསལ་བར་བྱས་ནས་ཀྱང་། སྤྲོས་བྲལ་རང་བྱུང་གི་ཡེ་ཤེས་ལྷུན་གྲུབ་འོད་གསལ་ཆེན་པོ་གཞི་རྫོགས་འཕོ་འགྱུར་དང་བྲལ་བ་ནམ་མཁའ་ལྟ་བུའི་སྣང་བ་མཆེད་པར་བྱེད་པ་དེས་ན་མ་རིག་པའི་མུན་པ་ཐམས་ཅད་སྒྲིབ་བྲལ་ཟང་ཐལ་ཆེན་པོར་སེལ་བའམ་དངས་ཤིང་རང་བྱུང་ཡེ་ཤེས་ཀྱི་སྣང་བ་མཆེད་ཅིང་རྒྱས་པར་བྱེད་དོ་ཅེས་བྱ་བར་བསྟན་པའོ། །བདུན་པ་ནི། ཀྱེ་སེམས་དཔའ་ཆེན་པོ་ཀུན་བྱེད་བྱང་ཆུབ་ཀྱི་སེམས་ངས་ནི་འགྲོ་བ་རྣམས་ཀྱི་རྒྱུད་ཀྱི་བླང་དོར་རྩོལ་སྒྲུབ་ལ་ཞེན་པ་ལ་སོགས་པའི་རྣམ་པར་རྟོག་པའི་དྲྭ་བ་མ་ལུས་པ་དྲལ་བར་བྱས་ནས་ནི་དུག་ལྔའི་ཉོན་མོངས་པ་ཡི་འཛིན་ཞེན་གྱི་སྲིད་པའི་ཕྲེང་ཐག་མ་ལུས་པ་རྩ་བ་ནས་གཅོད་པར་བྱེད་པ་ཡིན་ཏེ། དེ་ཡང་ཚུལ་ཇི་ལྟར་ཞེ་ན་ཕྱི་ནང་སྣོད་བཅུད་དུ་སྣང་བའི་ཆོས་འདི་དག་ཐམས་ཅད་ལ་རྒྱུ་དང་འབྲས་བུའི་ཐེག་པ་ཅན་རྣམས་ཀྱིས་རང་སེམས་ལས་གཞན་དུ་རྟོག་པའི་དབང་གིས་དགག་སྒྲུབ་དང་བླང་དོར་སྣ་ཚོགས་སུ་བྱེད་དེ། དེ་ཡང་བློ་དམན་ཉན་རང་གི་རིགས་ཅན་ལ་ལས་འདོད་ཡོན་དང་ཉོན་མོངས་པ་སོགས་ལ་ཐར་བའི་སྲོག་ལ་རྒོལ་པའི་དུག་ཏུ་མཐོང་ནས་དེ་ཉིད་གཉེན་པོས་སྤོང་བ་དང་འགོག་པར་བྱ་བའི་ཡུལ་དུ་རྟོག་ཅིང་འཛིན་ལ་གནས་པར་བྱེད་པ་དང་། བྱང་ཆུབ་སེམས་དཔའི་ཐེག་པ་བ་ལ་ལས་སེམས་ཆགས་ཞིང་ཞེན་པ་ཡི་ཡུལ་དུ་མཐོང་ནས་དེ་ལས་བཟློག་པའི་ཕྱིར་དུ་ཀུན་རྫོབ་སྒྱུ་མ་ལྟ་བུ་དང་དོན་དམ་སྟོང་པ་ཉིད་ཀྱི་རང་བཞིན་དུ་བདེན་པ་གཉིས་ཀྱི་ཚུལ་དུ་གཏན་ལ་ཕབ་ཏེ་གང་ལའང་མ་ཆགས་པ་ཡི་ཐབས་ལ་རྟོག་ཅིང་དཔྱོད་པ་ཡི་ལམ་ལ་གནས་པར་བྱེད་པ་དང་། ལ་ལས་ཏེ་ཀྲྀ་ཡོག་སྡེ་གསུམ་གྱི་ཐེག་པ་བ་རྣམས་ཀྱིས་གཟུང་འཛིན་གྱི་དྲི་མ་རྣམ་པར་དག་པར་བྱ་བའི་ཡུལ་དུ་མཐོང་ནས་དག་པ་གསུམ་དང་བདག་གནས་ཡོ་བྱད་ཐམས་ཅད་བྱིན་གྱིས་རླབས་པ་དང་ཆོ་འཕྲུལ་གྱིས་ཏེ་ཆོ་འཕྲུལ་བཞི་ལ་སོགས་པའི་ཐབས་ཀྱི་ལྷ་དང་བདག་གཉིས་རྗེ་དང་ཁོལ་གྱི་ཚུལ་ལམ་སྤུན་ནམ་གྲོགས་ཀྱི་ཚུལ་དུ་རྟོག་ཅིང་སྒོམ་པར་བྱེད་པ་དང་། ལ་ལས་ཏེ་མ་ཧཱ་དང་ཨ་ནུའི་ལམ་དུ་ཞུགས་པ་རྣམས་ཀྱིས་ཆོས་ཐམས་ཅད་རང་གི་ངོ་བོས་དག་པ་ཆེན་པོ་ཡི་རང་བཞིན་ཡིན་པ་ལ་འོན་ཀྱང་གཟུང་འཛིན་གྱི་དྲི་མས་བསྒྲིབ་པ་ཡོད་པའི་ཕྱིར་དེ་ཉིད་བསལ་ནས་དག་པ་མངོན་དུ་འགྱུར་བའ ི་ཕྱིར་དུ་བསྙེན་སྒྲུབ་རྣམ་པ་བཞིས་སྒྲུབ་པར་འདོད་པའི་རྟོག་པ་ཡིད་ལ་བྱེད་པ་སྟེ། དེས་ན་འོག་མའི་ཐེག་པ་བརྒྱད་པོ་དེ་དག་ཐམས་ཅད་རྟོག་པའི་དྲྭ་བར་ཚུད་པ་ལ་ཀུན་བྱེད་བྱང་ཆུབ་ཀྱི་སེམས་ང་ཡིས་སྣང་སྲིད་འཁོར་འདས་ཐམས་ཅད་རང་བྱུང་ཡེ་ཤེས་ཀྱི་རྩལ་སྣང་མཉམ་ཉིད་གཅིག་གི་ངོ་བོར་གདོད་ནས་ཡེ་སངས་རྒྱས་པར་སྟོན་པའི་སྒོ་ནས་སེམས་ཉིད་རང་རིག་པའི་ཡེ་ཤེས་ལས་གཞན་མ་ཞིག་ཡིན་པར་རྟོག་པའི་དྲྭ་བ་ཐམས་ཅད་རིག་སྟོང་ཡེ་ཤེས་ཆེན་པོའི་མཚོན་གྱིས་དྲལ་བར་བྱས་ནས་ནི། འདི་ལྟར་སྣང་བའི་ཡུལ་ལ་ང་བདག་སོ་སོར་རྟོག་པའི་ཞེན་འཛིན་ཉོན་མོངས་པའི་ཕྲེང་ཐག་མ་ལུས་པ་གཅོད་པར་བྱེད་ཅེས་གསུངས་སོ། །དེ་ལྟར་ཡང་མདོ་བཅུ་ལས། སྤང་འགེག་སྦྱང་ཞིང་བགྲོད་པ་དང་། །གཟུང་འཛིན་བླང་དོར་བྱ་བ་དང་། །ལྟ་སྒོམ་རྩོལ་སྒྲུབ་བྱར་མེད་དེ། །ལམ་དང་གཉེན་པོས་བཅོས་མེད་པར། །བྱང་སེམས་ཀུན་བཟང་རང་བཞིན་དུ། །ང་ཡིས་བསྟན་པའི་དོན་འདི་ནི། །བྱང་ཆུབ་སེམས་ཀྱི་ལུང་ཆེན་ཡིན། །རྒྱུད་དང་མདོ་སྡེའི་སྤྱི་འགྲེལ་ཡིན། །མན་ངག་ཀུན་གྱི་རྩ་བ་ཡིན། །གསུང་རབ་ཀུན་གྱི་སྙིང་པོ་ཡི། །བསྟན་པ་ཀུན་གྱི་ཡང་རྩེ་ཡིན། །ཐེག་པ་ཀུན་གྱི་ཉིང་ཁུ་ཡིན། །མ་རིག་པ་ཡི་མུན་སེལ་ཡིན། །རྟོག་པའི་དྲྭ་བ་འདི་ཡིས་སེལ། །ཉོན་མོངས་འཕྲེང་ཐག་འདི་ཡིས་གཅོད། །ཅེས་གསུངས་སོ། །གསུམ་པ་དོན་བསྡུ་བ་ནི། ཀྱེ་སེམས་དཔའ་ཆེན་པོ། ཀུན་བྱེད་རྒྱལ་པོ་བྱང་ཆུབ་ཀྱི་སེམས་ང་ནི་ཆོས་ཐམས་ཅད་ཀྱི་གནས་ལུགས་བྱ་རྩོལ་བྲལ་བའི་རང་བཞིན་ཡིན་པའི་ཕྱིར་ན། སེམས་དཔའ་རྡོ་རྗེ་ཁྱོད་ཀྱིས་ང་ཡི་རང་བཞིན་ཆོས་དབྱིངས་སྤྲོས་བྲལ་ཆེན་པོའི་ངོ་བོ་བརྗོད་བྲལ་འདུས་མ་བྱས་པའི་གནས་ལུགས་འདི་ཚུལ་བཞིན་དུ་རྟོགས་པར་གྱིས་ལ། ཇི་ལྟར་སྣང་བའི་ཆོས་འཁོར་འདས་ལམ་གསུམ་གྱིས་བསྡུས་པ་འདི་རྣམས་ཐམས་ཅད་ཀུན་ཀུན་བྱེད་ང་ལས་གཞན་དུ་མེད་པར་ཆོས་དབྱིངས་བྱང་ཆུབ་སེམས་ཀྱི་རང་བཞིན་བློ་འདས་མཉམ་པ་ཆེན་པོ་རུ་ལུང་སྟོན་པར་མཛོད་ཅིག་དང་། སེམས་དཔའ་རྡོ་རྗེ་ཁྱོད་ཀྱི་ང་ཡི་ངེས་པ་དོན་གྱི་ལུང་རྩོལ་སྒྲུབ་བྲལ་བའི་རང་བཞིན་འདི་འཁོར་གྱི་ཚོགས་ལ་བསྟན་པར་གྱུར་ན་ཁྱོད་ལ་དད་པས་འདུས་པའི་འཁོར་ཚོགས་ཐམས་ཅད་ཀྱིས་ཆོས་ཉིད་རྩོལ་སྒྲུབ་དང་བྲལ་བ་ཀུན་བྱེད་ང་ཡི་རང་བཞིན་ཇི་བཞིན་རྟོགས་པར་གྱུར་ནས་འདུས་པའི་འཁོར་ཚོགས་ཀུན་ཀྱང་སྟོན་པ་ང་ཡི་རང་བཞིན་དང་དབྱེར་མེད་པ་ཉིད་དུ་འགྱུར་བ་ཡིན་ལ། དེ་ལྟར་ཀུན་ཀྱང་རང་བྱུང་ཡེ་ཤེས་ཆེན་པོ་ཀུན་བྱེད་ང་ཡི་རང་བཞིན་དུ་གྱུར་པ་དེའི་ཚེ་ན་ཇི་ལྟར་སྣང་བའི་ཆོས་རྣམས་ཐམས་ཅད་ལ། འགྲོ་བ་ཀུན་ཀྱང་ཉན་རང་ལྟར་སྡུག་ཀུན་གྱི་ངོ་བོར་བལྟས་ནས་སྤོང་ཞིང་འགོག་པར་མི་བྱེད་ལ། བྱང་སེམས་ལྟར་བདེན་པ་གཉིས་སུ་ལྟ་བས་ཆོས་ཉིད་དུ་སྦྱོང་བར་མི་བྱེད་ལ། ཕྱི་རྒྱུད་ལྟར་གཙང་སྦྲས་ལྷ་རྣམས་མཉེས་པར་བྱེད་པ་དང་དག་པ་གསུམ་དང་བྱིན་གྱིས་རློབ་པ་སོགས་ཀྱི་བླང་དོར་མི་བྱེད་ཅིང་། ནང་རྒྱུད་འོག་མ་གཉིས་ལྟར་ཏིང་ངེ་འཛིན་གྱིས་སེམས་རྟོག་ཚོགས་ཐམས་ཅད་ལྷའི་དཀྱིལ་འཁོར་དུ་བསྐྱེད་པ་སོགས་ཀྱིས་རྩོལ་བ་དང་སྒྲུབ་པར་མི་བྱེད་པར་རྩོལ་མེད་བདེ་བ་ཆེན་པོའི་ས་ལ་གནས་པར་འགྱུར་ལ། དེ་ལྟར་ཀུན་བྱེད་རྒྱལ་པོའི་རང་བཞིན་འདི་རྟོགས་པར་གྱུར་ཚེ་རྩོལ་སྒྲུབ་མི་དགོས་པའི་རྒྱུ་མཚན་ཅི་ཞེ་ན། འདི་ལྟར་ཆོས་ཐམས་ཅད་ཀུན་བྱེད་ང་ཡི་རང་བཞིན་གདོད་ནས་ཡེ་གྲོལ་བྱར་མེད་ཆེན་པོ་རུ་བྱས་ཟིན་པས་ཀུན་བྱེད་ང་རུ་འཁོར་འདས་ཀྱི་ཆོས་ཐམས་ཅད་ཆོས་ཉིད་ཡེ་ཀློང་ཆེན་པོར་སྣང་བ་ཨ་འཐས་ཀྱི་གོལ་སྒྲིབ་མེད་པར་ཕྱམས་བརྡལ་དུ་དེངས་ཤིང་། དེ་ཡང་སྟོང་པ་ཕྱང་ཆད་ལྟ་བུ་མ་ཡིན་པར་ཀ་དག་དང་ལྷུན་གྲུབ་དབྱེར་མེད་པའི་གཤིས་ལུགས་བློ་འདས་སྤྲོས་པ་དང་བྲལ་བ་ཡེ་གྲོལ་མཉམ་པ་ཉིད་ཀྱི་རང་བཞིན་དུ་གྲུབ་ཟིན་པས་ཡེ་ནས་མཉམ་པ་ཉིད་ཀྱི་རང་བཞིན་དུ་བཞུགས་པ་ང་ཡིས་ད་གཟོད་སྤང་བླང་བྱ་རྩོལ་ལ་བརྟེན་ནས་མཉམ་པ་ཉིད་དུ་སྒྲུབ་པར་བྱ་མི་དགོས་ཏེ། ཀུན་མཁྱེན་བླ་མས། ཐམས་ཅད་ཡེ་ནས་དབྱིངས་སུ་གྲོལ་ཟིན་པས། །ད་གཟོད་འབད་པས་སུས་ཀྱང་གྲོལ་མི་དགོས། །དེ་ལ་འབད་རྩོལ་བྱས་ཀྱང་དོན་མེད་པས། །མ་བྱེད་མ་བྱེད་རྩོལ་ཞིང་སྒྲུབ་མ་བྱེད། །ཅེས་གསུངས་པ་ལྟར་རྩོལ་སྒྲུབ་ཀྱི་སྒོ་ནས་མཉམ་ཉིད་ཆོས་སྐུའི་དགོངས་པ་ཞིག་ད་གསར་དུ་སྒྲུབ་པར་བྱ་མི་དགོས་པར་ཀུན་ཏུ་བཟང་པོའམ་ཀུན་བྱེད་ཆོས་སྐུའི་སྟོན་པ་ང་ཡིས་སྔར་ནས་ལུང་བསྟན་ཟིན་པ་ཡིན་ནོ། །ཞེས་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་ངེས་པར་ལུང་ཁུངས་བསྟན་པའི་ལེའུ་སྟེ་བཅུ་གཉིས་པའི་འགྲེལ་བའོ།། ༈ །།དོན་གསུམ་པ་སེམས་ཉིད་ཀུན་བྱེད་ངེས་པར་བཤད་པའི་ལེའུ་བཅུ་གསུམ་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལྟར་སེམས་ཉིད་ཀུན་བྱེད་རྒྱལ་པོ་རྒྱུད་ལུང་ཀུན་གྱི་རྩ་བ་ཡིན་པར་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་རང་ཉིད་སྐུ་གསུམ་གྱི་རྒྱལ་བའི་བཀའ་ལུང་ཐམས་ཅད་ཀྱི་རྒྱལ་པོ་ཡིན་པའི་ཕྱིར་ན། ཐེག་པ་གོང་འོག་གི་ཆོས་ཐམས་ཅད་ཀྱི་སྤྱི་ཡི་ལུང་ཆེན་པོ་ཀུན་བྱེད་བྱང་ཆུབ་སེམས་ཀྱི་ཐེག་པ་འདི་ཉིད་ཚུལ་ཇི་ལྟར་བཤད་པའི་བཤད་ལུགས་འདི་ལྟར་དུ་གསུངས་སོ། །གཉིས་པ་རྒྱས་པར་བཤད་པ་ལ་བཞི་སྟེ། འཆད་ཚུལ་ལྔ་ཡི་རྣམ་གྲངས་བསྟན་པ། གོ་རིམ་བརྗོད་པ། དགོས་ཆེད་བཤད་པ། ངེས་ཚིག་སྨོས་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །སྙིང་པོ་བྱང་ཆུབ་ཀྱི་སེམས་པ་ནི་རྒྱུ་འབྲས་ཀྱི་ཆོས་ཐམས་ཅད་ཀྱི་སྤྱི་ཡི་ལུང་ཆེན་པོ་ཡིན་པའི་ཕྱིར་ན་ཐེ་ཚོམ་གྱི་སྒྲོ་འདོགས་སེལ་བར་བྱེད་པའི་གཏན་ཚིགས་དོན་གྱི་བཤད་ལུགས་རྣམ་པ་ལྔ་ནི་འོག་ནས་འབྱུང་བ་འདི་ལྟར་སྤྱི་དོན་རྣམ་པ་ལྔ་ཡིས་བཤད་པ་སྟེ། གང་ཞེ་ན་ཁུངས་ལ་ཡིད་ཆེས་བསྐྱེད་པའི་ཕྱིར་དུ་ལོ་རྒྱུས་དོན་གྱི་བཤད་ལུགས་བསྟན་པ་དང་། ཆོས་ཀུན་སེམས་སུ་རྟོགས་པའི་ཕྱིར་དུ་རྩ་བ་དོན་གྱི་བཤད་ལུགས་བསྟན་པ་དང་། ཐེག་པའི་ཤན་ཐང་འབྱེད་པའི་ཕྱིར་དུ་ཡོ་ག་དོན་གྱི་བཤད་ལུགས་བསྟན་པ་དང་། རྩོལ་སྒྲུབ་བྱ་མི་དགོས་པའི་ཕྱིར་དུ་དགོས་པ་དོན་གྱི་བཤད་ལུགས་བསྟན་པ་དང་། དོན་ཉིད་ཇི་བཞིན་རྟོགས་པར་བྱ་བའི་ཕྱིར་དུ་ཚིག་གི་དོན་གྱི་བཤད་ལུགས་བསྟན་པ་དང་རྣམ་པ་ལྔའོ། །གཉིས་པ་ནི། དེ་ལ་མན་ངག་ཟབ་མོ་འདི་ཉིད་འཆད་པའི་ཚེ་ན་ཆོས་ཟབ་མོ་ཇི་ལྟར་བྱུང་བའི་ལོ་རྒྱུས་བསྙད་པར་མ་བྱས་ན་གདུལ་བྱ་རྣམས་ཡིད་མི་ཆེས་པའི་སྐྱོན་དུ་འགྱུར་བར་གསུངས་ཏེ། བང་མཛོད་འཕྲུལ་ལྡེ་ལས། ལོ་རྒྱུས་དོན་གྱིས་མ་བཤད་ན། །ཡིད་མི་ཆེས་པའི་སྐྱོན་དུ་འགྱུར། །ཞེས་གསུངས་པ་དེ་ལྟར་བུའི་ཕྱིར་ན་དང་པོ་གདུལ་བྱ་རྣམས་ལ་ཡིད་ཆེས་པ་ཡི་ཁུངས་བསྟན་པའི་ཕྱིར་དུ་བསྟན་པའི་སྙིང་པོ་འདི་ཉིད་ཇི་ལྟར་བྱུང་བའི་ལོ་རྒྱུས་ཀྱི་དོན་གྱི་བཤད་ལུགས་བསྟན་པར་བྱ་ལ། དེའི་རྗེས་སུ་སྣང་སྲིད་ཀྱི་ཆོས་ཀུན་རྩ་བ་ཆོས་ཉིད་བྱང་ཆུབ་སེམས་སུ་འདུས་པར་རྟོགས་པའི་དགོས་པ་ཡོད་པའི་ཕྱིར་ན་དེས་ན་རྩ་བའི་དོན་དེ་བསྟན་པར་བྱ་བ་དང་། དེ་ནས་རྩ་བ་དེ་ལས་འཕྲོས་པའི་ཐེག་པའི་ཁྱད་པར་སོ་སོར་འབྱེད་པའི་ཕྱིར་དུ་ཡོ་ག་དོན་གྱི་རྩ་བ་བསྟན་པར་བྱ་ལ། འོན་ཀྱང་གདུལ་བྱའི་བློ་རིམ་ལ་ལྟོས་ནས་ཐེག་པའི་རྣམ་གྲངས་དེ་ལྟར་བསྟན་ཀྱང་དངོས་དོན་ལ་རྩོལ་སྒྲུབ་གང་ཡང་བྱ་མི་དགོས་པར་རྩོལ་མེད་ཡེ་སངས་རྒྱས་པར་བསྟན་པའི་ཕྱིར་དུ་དགོས་ཆེད་དོན་གྱི་བཤད་ལུགས་བསྟན་པའི་དགོས་པ་དེ་རུ་བསྟན་པ་ཡིན་ལ། དེ་ནས་དེ་ལྟ་བུའི་རྩོལ་སྒྲུབ་ཀུན་ལས་འདས་པ་མི་རྟོག་མཉམ་པ་ཉིད་ཀྱི་དོན་དེ་མཚོན་བྱེད་ཚིག་ལ་བརྟེན་ནས་རྟོགས་པར་བྱ་བའི་ཕྱིར་དུ་དེའི་རྗེས་སུ་ཚིག་གི་དོན་དེ་ཇི་ལྟ་བ་བཞིན་ཏུ་སྒྲ་རུ་བརྗོད་པར་བྱ་བ་ཡིན་ནོ། །དེ་ལྟར་ཡང་ལུང་སྔ་མའི་འཕྲོས་ལས། རྩ་བའི་དོན་གྱིས་མ་བཤད་ན། །ཆོས་རྣམས་སེམས་སུ་མི་འདུས་པས། །མཐའ་ཡས་པ་ཡི་སྐྱོན་དུ་འགྱུར། །ཡོ་གའི་དོན་གྱིས་མ་བཤད་ན། །ཐེག་པའི་ཤན་ཐང་མི་ཕྱེད་པས། །ཁྱད་མི་ཕྱེད་པའི་སྐྱོན་དུ་འགྱུར། །དགོས་ཆེད་དོན་གྱིས་མ་བཤད་ན། །རྩོལ་སྒྲུབ་བྱ་བཙལ་མ་བྱས་པར། །སངས་རྒྱས་ས་ལ་དོན་མེད་འགྱུར། །ཚིག་གི་དོན་གྱིས་མ་བཤད་ན། །ཚིག་དང་དོན་དུ་མི་བསྡེབ་པས། །འབྲུ་མི་ཆོམ་པའི་སྐྱོན་དུ་འགྱུར། །དེ་བཟློག་བཤད་པའི་ཡོན་ཏན་ཡིན། །ཅེས་གསུངས་སོ། །གསུམ་པ་ལ་ལྔ་སྟེ། ལོ་རྒྱུས་དོན་གྱི་དགོས་ཆེད་བཤད་པ། རྩ་བའི་དོན་གྱི་དགོས་ཆེད་བཤད་པ། ཡོ་ག་དོན་གྱི་དགོས་ཆེད་བཤད་པ། དགོས་ཆེད་དོན་གྱི་དགོས་ཆེད་བཤད་པ། ཚིག་གི་དོན་གྱི་དགོས་ཆེད་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །ལོ་རྒྱུས་དོན་གྱི་བཤད་ལུགས་ཀྱི་དགོས་པ་བསྟན་པ་ནི། དང་པོར་འདུས་པའི་འཁོར་རྣམས་ཡིད་ཆེས་པ་ཡི་སྒོ་ནས་འཇུག་པའི་དགོས་པ་ཡོད་པས་བསྟན་པ་འདི་ཉིད་གང་ལས་བྱུང་བའི་ཁུངས་བསྟན་པའི་ཕྱིར་དུ་ལོ་རྒྱུས་དོན་གྱི་བཤད་ལུགས་བསྟན་པ་ནི་ཇི་ལྟར་ཞེ་ན་རྒྱལ་བ་དགོངས་བརྒྱུད། རིག་འཛིན་བརྡའ་བརྒྱུད། གང་ཟག་སྙན་བརྒྱུད་གསུམ་གྱི་སྒོ་ནས་བཤད་པ་སྟེ། དེ་ཡང་ཆོས་ཀྱི་དབྱིངས་སྤྲོས་པ་ཐམས་ཅད་དང་བྲལ་བའི་ཀློང་ཡང་དག་དོན་གྱི་འོག་མིན་ཆེན་པོ་རུ། སྟོན་པ་ཡེ་སངས་རྒྱས་པའི་བདག་ཉིད་བཅོམ་ལྡན་འདས་ཀུན་བྱེད་རྒྱལ་པོ་དེ་ཉིད་དགོངས་པ་དོན་གྱི་ཆོས་ཉིད་ལས་བཞེངས་ཏེ། འོག་མིན་ཁང་བུ་བརྩེགས་པའི་གཞལ་མེད་ཁང་ཆེན་པོར། ཉིད་ལས་མི་གཞན་པའི་འཁོར་རིགས་ལྔའི་སངས་རྒྱས་དང་རྒྱལ་སྲས་སེམས་དཔའ་ལ་སོགས་པ་སྤྱི་དང་། ཁྱད་པར་དུ་ཉིད་ཀྱི་ཐུགས་རང་བྱུང་གི་ཡེ་ཤེས་ལས་རང་ཤར་བའི་བཀའ་ཡི་སྡུད་པ་པོ་སེམས་དཔའ་རྡོ་རྗེ་ལ་བརྗོད་མེད་དོན་གྱི་གསུང་གིས་དགོངས་པ་དབྱེར་མེད་ཀྱི་ངང་ནས་བཤད་པ་ནི་སྟོན་པ་ཆོས་ཀྱི་སྐུས་རང་བཞིན་བྱིན་གྱིས་བརླབས་ཀྱིས་བཤད་ལུགས་ཏེ། རྒྱན་ལས། བྱིན་རླབས་ཆོས་སྐུ་དོན་གྱིས་གསུང་། །བརྗོད་མེད་དོན་གྱིས་བྱིན་གྱིས་བརླབས། །དོན་གྱི་མི་གཉིས་བརྒྱུད་པ་ཅན། །ཐ་སྙད་བྲལ་བའི་དོན་མཚོན་པ། །མན་ངག་ཚད་མས་རང་མཚན་སྟོན། །ཅེས་གསུངས་པ་དང་དེ་ནས་སྟོན་པ་སེམས་དཔའ་རྡོ་རྗེ་ལོངས་སྤྱོད་རྫོགས་པའི་སྐུར་བཞེངས་ནས་སྤྲུལ་པའི་སྐུ་དགའ་རབ་རྡོ་རྗེ་ལ་སོགས་པ་ལ་ཐུགས་ཀྱི་དགོངས་པ་དང་སྐུ་ཡི་བརྡའ་ཐབས་ལ་བརྟེན་པའི་དགོངས་པ་བརྡ་ཡི་གསུང་རང་གི་ངོ་བོས་མཚོན་ཏེ་བརྡ་བྲལ་རང་གྲོལ་གྱི་མན་ངག་རང་མཚན་ཡུལ་མེད་དུ་རྟོགས་པར་མཛད་པ་ནི་ལོངས་སྤྱོད་རྫོགས་པའི་སྐུས་རང་གི་ངོ་བོ་བསྟན་པའི་བཤད་ལུགས་ཏེ། དེ་ཉིད་ལས། ལོངས་སྐུས་དགོངས་པ་བརྡ་སྒོ་ནས། །རང་གི་ངོ་བོས་རང་ཤར་མཚོན། །ངོ་བོས་མི་གཉིས་མ་ནོར་ངེས། །བརྡ་བྲལ་རང་གྲོལ་རང་རིག་ཉམས། །རང་མཚན་ཡུལ་མེད་རང་ཤར་པའོ། །ཞེས་པ་དང་། སྤྲུལ་པའི་སྐུ་རིག་འཛིན་དགའ་རབ་རྡོ་རྗེས་སློབ་དཔོན་ཆེན་པོ་འཇམ་དཔལ་བཤེས་གཉེན་ལ་སྒྲ་ཚིག་སྡེབ་སྦྱོར་ལེགས་པས་བཤད་པ་ནི་སྤྲུལ་པའི་སྐུས་དོན་གྱི་སྒྲ་ཚིག་སྡེབ་པའི་སྒོ་ནས་བཤད་ལུགས་སོ། །དེ་ལས། སྤྲུལ་པའི་དབང་པོས་ཚངས་པའི་དབྱངས། །ཚིག་ཏུ་སྡེབ་ལེགས་དོན་ཀུན་མཚོན། །བརྒྱུད་པས་བརྡ་སྤྲོད་ཡི་གེར་བཀོད། །སྤྱི་ཙམ་ཡིད་ཆེས་རྫོགས་ལུང་ཡིན། །ལོ་རྒྱུས་དོན་གྱི་བཤད་པའོ། །ཞེས་གསུངས་སོ། །དེ་ལྟར་ལོ་རྒྱུས་དོན་གྱིས་བཤད་པའི་དགོས་པ་ཡང་། ཀུན་གསལ་ལས། ལོ་རྒྱུས་དོན་ལ་རྣམ་གསུམ་སྟེ། གང་ཟག་དག་གིས་འཕྲལ་ལ་བྱས་པ་མ་ཡིན་པར། །དུས་གསུམ་སངས་རྒྱས་ཀུན་གྱི་དགོངས་པ་བརྒྱུད་ལས་བཤད། །སངས་རྒྱས་ཞལ་ནས་གསུངས་པས་ཡིད་ཆེས་འགྱུར། །ངེས་པ་དོན་གྱི་འཁོར་ཡིན་པས། །རིག་འཛིན་བརྡ་ཡི་བརྒྱུད་པས་བཤད། །ལྡེམ་པོའི་དོན་ལ་དགོངས་པ་མ་ཡིན་པར། །ངེས་པའི་དོན་དུ་གསུངས་པས་ཡིད་ཆེས་འགྱུར། །དེ་བཞིན་བཤད་པའི་དུས་སུ་གང་ཟག་རྣ་བར་བརྒྱུད་ནས་བཤད། །བརྒྱུད་པ་འབྲེལ་མ་ཆད་པས་ངེས་པར་ཡིད་ཆེས་འགྱུར། །ཞེས་གསུངས་ལྟར། སྟོན་པ་ཀུན་བྱེད་ང་ཡི་རང་བཞིན་རྣམ་པ་གསུམ་གྱི་རྩལ་ལས་རང་ཤར་བའམ། ང་ལས་བྱུང་བའི་སྟོན་པ་སྐུ་གསུམ་གྱིས་རིམ་པ་ལྟར་རང་བཞིན་བྱིན་གྱིས་རླབས་དང་ནི་རང་གི་ངོ་བོ་དང་སྒྲ་ཚིག་ལེགས་པ་དག་གིས་ཇི་ལྟར་གསུངས་པའི་ཚུལ་གྱིས་བསྟན་པ་གང་ལས་བྱུང་བའི་ཁུངས་བཤད་པ་དེས་ནི་གདུལ་བྱ་རྣམས་ཡིད་ཀྱང་ཆེས་པར་འགྱུར་བས་མན་ངག་གི་སྣོད་དུ་རུང་བའི་དགོས་པ་ཡོད་པར་གསུངས་པའོ། །གཉིས་པ་ནི། ཀྱེ་སེམས་དཔའ་ཆེན་པོ་ཉོན་ཅིག་ཆོས་ཐམས་ཅད་ཀྱི་རྩ་བ་དོན་གྱི་བཤད་ལུགས་ཀྱི་དགོས་པ་བསྟན་པ་ནི། འདི་ལྟར་སྣང་སྲིད་སྣོད་བཅུད་ཀྱིས་བསྡུས་པ་ཡི་ཆོས་ཐམས་ཅད་དང་དག་པ་སངས་རྒྱས་དང་མ་དག་སེམས་ཅན་གྱིས་བསྡུས་པ་འདི་ཐམས་ཅད་ཀུན་ཀྱང་ཀུན་བྱེད་བྱང་ཆུབ་ཀྱི་སེམས་ང་ཡིས་བྱས་པ་ཡིན་པའི་ཕྱིར་ན་ཆོས་དེ་རྣམས་ཐམས་ཅད་སྙིང་པོ་རང་བྱུང་གི་ཡེ་ཤེས་བྱང་ཆུབ་ཀྱི་སེམས་ཆོས་སྐུ་ཐིག་ལེ་ཉག་གཅིག་འདི་ལས་མ་གཏོགས་པ་དེ་ལས་གཞན་དུ་གྱུར་པའི་ཆོས་མ་དག་པ་ཞེས་བྱ་བ་ཞིག་ཡེ་ནས་གྲུབ་པ་མེད་པའི་ཚུལ། བང་མཛོད་འཕྲུལ་ལྡེ་ལས། བྱང་ཆུབ་སེམས་ཀྱི་ཆོས་ཉིད་དེ། །ཡོད་ནི་གཅིག་ལས་མེད་པ་ལ། །བྱུང་ནི་སྣང་སྲིད་ཀུན་ཏུ་བྱུང་། །ཁྱབ་ནི་སྣོད་བཅུད་ཀུན་ལ་ཁྱབ། །བསྟན་ནི་ཐེག་པ་དགུ་རུ་བསྟན། །འདུས་ནི་བྱང་ཆུབ་སེམས་སུ་འདུས། །ཡིན་ནི་ཆོས་ཀྱི་སྐུ་ཡིན་ཏེ། །བསྟན་དུ་མེད་པས་དངོས་པོ་མེད། །གཟུང་དུ་མེད་པས་ཡུལ་ལས་འདས། །མཚོན་དུ་མཚུངས་པ་གང་ཡང་མེད། །ཅེས་གསུངས་པ་དེ་ལྟ་བུའི་ཕྱིར་ན་འདི་ལྟར་སྣང་བའི་ཆོས་རྣམས་ཐམས་ཅད་ཀུན་ཀྱང་རྩ་བ་བྱང་ཆུབ་སེམས་སུ་ཡེ་ནས་སངས་རྒྱས་པར་བསྟན་པའི་ཕྱིར་དུ་རྩ་བ་དོན་གྱི་བཤད་ལུགས་གསུངས་པ་དེ་ནི་དགོས་ཆེད་དེ་ལྟ་བུ་དང་ལྡན་པར་བསྟན་པ་ཡིན་ནོ། །གསུམ་པ་ནི། ཀྱེ་སེམས་དཔའ་ཆེན་པོ་ཉོན་ཅིག་ཡོ་ག་དོན་གྱི་བཤད་ལུགས་འདིའི་དགོས་ཆེད་བསྟན་པ་ནི་ཀུན་བྱེད་ང་ལས་བྱུང་བའི་སྟོན་པ་སྐུ་གསུམ་གྱིས་བསྟན་པའི་ཆོས་གང་ཞིག་ལོངས་སྤྱོད་རྫོགས་པའི་སྐུ་དང་ཆོས་ཀྱི་སྐུའི་བསྟན་པ་ཡི་ཏན་ཏྲ་ཕྱི་ནང་ལ་སོགས་པའི་ཡོ་ག་ཡི་སྡེ་རྣམས་ལ། ནང་གསེས་སུ་ཐེག་པ་འོག་མ་རྣམས་ལ་ཡང་སོ་སོའི་མཐོ་དམན་གྱི་ཁྱད་པར་མི་འདྲ་བའི་བྱེ་བྲག་དུ་མ་ཡོད་མོད་ཀྱིས། འོན་ཀྱང་དེ་དག་ཐམས་ཅད་ཚུར་བསྡུ་ན་བླང་དོར་ཅན་ཐམས་ཅད་རྣལ་འབྱོར་ཡོ་ག་དང་རྩོལ་སྒྲུབ་ཅན་རྣམས་མ་ཧཱ་ཡོ་གར་འདུ་བ་དང་རྒྱུ་འབྲས་སུ་འདོད་པ་ཐམས་ཅད་ཨ་ནུ་ཡོ་གར་འདུ་བ་དང་། བླང་དོར་རྩོལ་སྒྲུབ་རྒྱུ་འབྲས་ཐམས་ཅད་ལས་གྲོལ་བ་ཐམས་ཅད་ཨ་ཏི་ཡོ་གར་འདུ་བས་ཡོ་ག་རྣམ་པ་བཞིར་བསྡུས་པ་སྟེ། རྒྱན་ལས། ཡོ་ག་རྣམ་པ་བཞིར་བཤད་པ། །ཐེག་པ་ཀུན་གྱི་བསྡུ་ས་ཡིན། །ཡོ་ག་བླང་དོར་སྤྱོད་པ་ཅན། །མ་ཧཱ་ཡོ་ག་རྩོལ་ཞིང་བསྒྲུབ། །ཨ་ནུ་ཡོ་ག་རྒྱུ་འབྲས་འདོད། །ཨ་ཏི་ཡོ་ག་དེ་ལས་གྲོལ། །ཞེས་གསུངས་པ་ལྟར་ལ། དེས་ན་ཡོ་ག་སྔ་མ་གསུམ་པོ་དེ་སྤང་བླང་རྩོལ་སྒྲུབ་དང་བཅས་པ་ཡིན་ལ། རྒྱུ་འབྲས་བྱ་རྩོལ་ཀུན་ལས་འདས་པ་ཀུན་བྱེད་རྒྱལ་པོ་ང་ཡི་བསྟན་པ་ནི་རྫོགས་པ་ཆེན་པོ་ཨ་ཏི་ཡོ་གའི་དོན་ཏེ་འདི་ནི་ཐེག་པ་ཀུན་གྱི་ཤན་འབྱེད་པར་བྱེད་པ་དང་། རྒྱུ་འབྲས་རྩོལ་སྒྲུབ་གང་ལའང་ལྟོས་མི་དགོས་པ་བྱ་བྲལ་རྫོགས་པའི་ལུང་ཆེན་པོ་ཡིན་ནོ་ཞེས་བཤད་དགོས་པ་དེས་ན་དོན་འདི་ནི་ཡོ་གའི་དོན་གྱིས་བཤད་པའི་དགོས་པ་བསྟན་པ་ཡིན་ནོ་ཞེས་བྱའོ། །བཞི་པ་ནི། ཀྱེ་སེམས་དཔའ་ཆེན་པོ་ཉོན་ཅིག །དགོས་ཆེད་དོན་གྱི་བཤད་ལུགས་ཀྱི་དགོས་པ་བསྟན་པ་ནི་བསྐལ་པ་དཔག་ཏུ་མེད་པའི་སྔོན་རོལ་ནས་ཀུན་བྱེད་བྱང་ཆུབ་སེམས་ཀྱི་གནས་ལུགས་བྱར་མེད་རྫོགས་པ་ཆེན་པོའི་དགོངས་པ་ཕྱིན་ཅི་མ་ལོག་པ་ང་ལ། ཡིད་དངས་ཤིང་དད་པ་ཡི་དབང་གིས་ད་ལྟ་བྱར་མེད་ཡེ་གྲོལ་ཆེན་པོ་གསང་ཆེན་ཨ་ཏིའི་དགོངས་དོན་མ་ནོར་བར་རྟོགས་ནུས་པའི་ལས་དང་སྐལ་བ་བཟང་པོ་དང་ལྡན་པའི་ཤིན་ཏུ་རྣལ་འབྱོར་དབང་པོ་ཡང་རབ་ཏུ་གྱུར་པ་རྣམས་ལ་རྒྱུད་འདི་ཉིད་བསྟན་པར་བྱས་ན། ཡེ་གྲོལ་ཀ་དག་ཆེན་པོའི་ནམ་མཁའ་ཡི་ཀློང་དུ་གློ་བུར་རྟོག་པས་བསྐྲུན་པའི་གཟུང་འཛིན་གྱི་སྤྲིན་ཚོགས་ཐམས་ཅད་རང་དེངས་ལ་སོང་སྟེ། བལྟ་བྱ་ལྟ་བྱེད་ཀྱི་བློ་དང་བྲལ་བས་ལྟ་བ་སྒོམ་དུ་མེད་པ་དང་། བསྲུང་མཚམ་འདའ་ཉམས་དང་བྲལ་བས་དམ་ཚིག་བསྲུང་དུ་མེད་པ་དང་། ཡེ་ནས་ལྷུན་གྱིས་གྲུབ་པས་ཕྲིན་ལས་བཙལ་དུ་མེད་པ་དང་། མ་བགྲོད་ཡེ་ནས་ཕྱིན་པས་ལམ་ལ་བགྲོད་དུ་མེད་པ་དང་། གདོད་ནས་ཡེ་སངས་རྒྱས་པས་ས་ལ་སྦྱངས་དུ་མེད་པ་དང་། དེ་བཞིན་དུ་རྒྱུ་དགེ་སྡིག་དང་འབྲས་བུ་བདེ་སྡུག་མེད་པ་དང་། གནས་ལུགས་དོན་དམ་དང་ནི་སྣང་ཚུལ་ཀུན་རྫོབ་ཀྱི་བདེན་པ་རྣམ་པ་གཉིས་ཀྱང་མེད་པ་དང་། ཕྱི་སྣང་བ་ཐམས་ཅད་ཟང་མ་ཐལ་བྱུང་ནང་རྟོག་པ་ཐམས་ཅད་ཤར་གྲོལ་རིས་མེད་དུ་དག་པས་བསྐྱེད་རྫོགས་ལ་སོགས་པ་གང་ཡང་བསྒོམ་ཞིང་བསྒྲུབ་ཏུ་མེད་པར་མཐོང་བ་དང་། དེ་བཞིན་དུ་ཐེག་པ་སོ་སོའི་ལམ་དུ་སེམས་བསྐྱེད་པ་མེད་ཅིང་སྤང་བྱ་དང་གཉེན་པོ་ལ་སོགས་པ་མདོར་ན་བྱ་བྱེད་རྩོལ་སྒྲུབ་གང་ཡང་མེད་པར་མཐོང་བ་ཡི་སྒོ་ནས་ཀུན་བྱེད་བྱང་ཆུབ་སེམས་ཀྱི་རང་བཞིན་མ་བཅོས་གཉུག་མའི་ཡེ་ཤེས་མངོན་དུ་མཐོང་བ་ཡི་དོན་ཆེན་པོ་དེ་ལྟ་བུ་ཡི་དགོས་ཆེད་ཡོད་པར་བསྟན་པ་ཡིན་ནོ། །ཞེས་གསུངས་སོ། །ལྔ་པ་ནི། ཀྱེ་སེམས་དཔའ་ཆེན་པོ་ཉོན་ཅིག །བརྗོད་བྱེད་ཚིག་གི་དོན་གྱི་བཤད་པའི་དགོས་པ་བསྟན་པ་ནི་ཀུན་བྱེད་བྱང་ཆུབ་ཀྱི་སེམས་ང་ནི་ཡེ་ནས་སྤྲོས་པ་ཐམས་ཅད་དང་བྲལ་བ་ཆོས་ཉིད་དེ་བཞིན་ཉིད་ཀྱི་རང་བཞིན་ཡིན་ལ། ཇི་ལྟར་སྣང་བའི་འཁོར་འདས་ཀྱི་ཆོས་རྣམས་བསྟན་པ་ཐམས་ཅད་ནི་ཀུན་བྱེད་དེ་བཞིན་ཉིད་ཀྱི་རང་བཞིན་ཡིན་ཏེ། འོན་ཀྱང་གདུལ་བྱ་རྣམས་ལ་དོན་དེ་ཚིག་དང་ཡི་གེ་ལ་བརྟེན་ནས་སྒྲ་རུ་མ་བསྒྲགས་དུ་ཟིན་ན་གང་ཟག་རྣམས་ཀྱི་ཡིད་ཀྱི་དབང་པོ་ལ་བརྟེན་པའི་རིག་པ་ཡིས་རང་སྟོབས་ཀྱིས་ཆོས་ཉིད་དེ་བཞིན་ཉིད་ཀྱི་རང་བཞིན་གབ་ནས་ཡེ་གསང་ཐབས་ཀྱིས་ཆོད་པ་དེ་རྟོགས་པར་མི་ནུས་ཤིང་མི་སྣང་བ་དེས་ན་དེ་ཉིད་རྟོགས་པའི་ཆེད་དུ་ཚིག་དང་ཡི་གེ་ལ་བརྟེན་ནས་སྒྲ་རུ་བསྒྲགས་པ་ཡིན་པའི་རྒྱུ་མཚན་དེས་ན་འདི་ནི་ཚིག་གི་དོན་གྱི་དགོས་པ་བཤད་པ་ཡིན་ཏེ། བང་མཛོད་འཕྲུལ་ལྡེ་ལས། ཆོས་ཉིད་དོན་གྱི་ངོ་བོ་དེ། །ཚིག་དང་ཡི་གེ་ལས་འདས་ཤིང་། །བརྗོད་པས་ཐོག་ཏུ་མི་ཕེབ་སྟེ། །རང་གི་ངོ་བོ་བརྗོད་མེད་ཀྱང་། །མཐུན་པའི་ཚིག་གིས་མ་མཚོན་ན། །དོན་གྱི་ངོ་བོ་རྟོགས་མི་འགྱུར། །ཆོས་རྣམས་ཐམས་ཅད་བརྡར་བསྟན་གྱིས། །ཡིད་ཀྱི་དབང་པོ་རྣ་བར་ཆུག །རྣ་བའི་དབང་པོ་སྒྲ་ལ་ཉོན། །དཔེར་ན་མེ་ཉིད་འདོད་པས་ཀྱང་། །མེ་འདོད་ཚིག་ཏུ་མ་བརྗོད་ན། །མེ་དང་འཕྲད་པ་ཤིན་ཏུ་དཀའ། །མེ་འདོད་ཚིག་ཏུ་བརྗོད་པས་ཀྱང་། །མེ་དང་འཕྲད་པར་ཐེ་ཚོམ་མེད། །དེ་བཞིན་ཆོས་ཉིད་རྟོགས་འདོད་པས། །རང་བཞིན་མེད་པའི་ཆོས་ཉིད་ལ། །རང་བཞིན་མེད་པས་མཚོན་དེ་བསྟན། །བརྗོད་དུ་མེད་པའི་ཆོས་ཉིད་དེ། །བརྗོད་མེད་ཚིག་གིས་མཚོན་ཏེ་བསྟན། །ཅེས་གསུངས་པ་བཞིན་ནོ། །བཞི་པ་ལ་ལྔ་སྟེ། ལོ་རྒྱུས། རྩ་བ། ཡོ་ག །དགོས་ཆེད། ཚིག་གི་དོན་གྱི་ངེས་ཚིག་སྨོས་པའོ། །དང་པོ་ནི། ཀྱེ་སེམས་དཔའ་ཆེན་པོ། ལོ་རྒྱུས་དོན་གྱི་བཤད་པ་ཞེས་པ་དེ་གང་དང་གང་གི་ལོ་རྒྱུས་བཤད་པ་ཡིན་ཅེ་ན། འདིར་ནི་སྐུ་གསུམ་གྱི་སྟོན་པ་དང་ནི་བསྟན་པ་དང་འཁོར་གསུམ་གྱི་ལོ་རྒྱུས་བཤད་པའི་ཕྱིར་ན་དེ་སྐད་ཅེས་གསུངས་ཏེ། དེ་ལ་སྟོན་པ་ནི་ཆོས་སྐུ་ཀུན་བྱེད་རྒྱལ་པོ་ཉིད་ཀྱི་རང་བཞིན་རྣམ་པ་གསུམ་གྱི་རྩལ་ལས་འཁོར་གྱི་རང་བཞིན་སྐུ་གསུམ་གྱི་སྟོན་པ་རྣམས་བྱུང་བ་དང་། སྐུ་གསུམ་གྱི་སྟོན་པའི་བཤད་ལུགས་ནི་ཆོས་སྐུས་བྱིན་གྱིས་བརླབས་ཀྱིས་བཤད་པ་ལ་སོགས་པ་གོང་དུ་བསྟན་པ་རྣམ་པ་གསུམ་པོ་དེ་ཉིད་དུ་འདུས་པ་ཡིན་པས། དེ་ནི་གང་གིས་སྟོན་པར་མཛད་པ་པོ་སྐུ་གསུམ་གྱི་སྟོན་པ་རྣམས་དང་གང་ལ་བསྟན་བྱའི་ཡུལ་དེ་དག་གི་འཁོར་རྣམས་དང་། གང་ཞ ིག་བསྟན་པར་བྱ་བ་ཐེག་པ་གསུམ་གྱི་ལོ་རྒྱུས་རྣམས་བཤད་པ་ཡིན་པས་དེས་ན་ལོ་རྒྱུས་དོན་གྱི་བཤད་ལུགས་ཞེས་བྱའོ། །གཉིས་པ་ནི། རྩ་བའི་དོན་གྱི་བཤད་པ་ཞེས་པ་དེ་ཆོས་གང་དང་གང་གི་རྩ་བ་བཤད་པ་ཡིན་སྙམ་ན། དེ་ནི་སྟོན་པ་ཀུན་བྱེད་ང་ལས་བྱུང་བའི་སྟོན་པ་སྐུ་གསུམ་གྱིས་ཇི་སྐད་བསྟན་པའི་ཆོས་རྣམས་ཐམས་ཅད་ཀུན་གྱི་བརྗོད་བྱའི་རྩ་བའམ་སྙིང་པོ་མཐར་ཐུག་པ་བྱང་ཆུབ་སེམས་སུ་བསྟན་པའི་ཕྱིར་ན། བྱང་ཆུབ་ཀྱི་སེམས་དེ་ཉིད་སྐུ་གསུམ་གྱི་སྟོན་པ་དང་ནི་བསྟན་པ་དང་འཁོར་རྣམས་ཐམས་ཅད་ཀྱི་སྣང་གཞིའམ་རྩ་བར་བསྟན་པ་ནི་རྩ་བ་དོན་གྱི་བཤད་པའི་གཏན་ཚིགས་སམ་ངེས་ཚིག་བསྟན་པ་ཡིན་ནོ། །གསུམ་པ་ནི། ཀུན་བྱེད་ང་ཡི་རང་བཞིན་ཆོས་ཉིད་དེ་བཞིན་ཉིད་དབྱེ་བསལ་མེད་པ་གཅིག་པུའི་བདག་ཉིད་ཡིན་པ་ལ་རྣལ་འབྱོར་རྣམ་པ་བཞི་པོའི་སོ་སོས་རྟོགས་ཚུལ་མི་འདྲ་བའི་དབང་གིས་ཡོ་གའི་མཐོ་དམན་གྱི་བྱེ་བྲག་གམ་ཁྱད་པར་ནི། རྟོགས་བྱ་ལྟ་བ་ཡི་ཁྱད་པར་སྤྱད་བྱ་སྤྱོད་པ་ཡི་ཁྱད་པར་བསྲུང་བྱ་དམ་ཚིག་གི་ཁྱད་པར་དང་ལམ་ཇི་ལྟར་སྒྲུབ་པ་ཡི་ཁྱད་པར་དང་། འབྲས་བུ་ཐོབ་པའི་དུས་ཀྱི་ཁྱད་པར་ལ་སོགས་པ་མི་མཐུན་པའི་ཁྱད་པར་གོང་འོག་སོ་སོའི་བྱེ་བྲག་དེ་ཐམས་ཅད་ཤིན་ཏུ་རྣལ་འབྱོར་རྩོལ་སྒྲུབ་ཀུན་ལས་འདས་པའི་ཐེག་པས་སོ་སོར་འབྱེད་ཅིང་སྟོན་པར་བྱེད་པ་དེས་ན་ཡོ་གའི་དོན་གྱི་བཤད་པའི་གཏན་ཚིགས་བསྟན་པ་ཡིན་ནོ། །བཞི་པ་ནི། དགོས་ཆེད་དོན་གྱི་ངེས་ཚིག་བསྟན་པ་ནི་གང་ཞེ་ན། དགོས་པ་ནི་ཁམས་གསུམ་གྱི་སེམས་ཅན་ཐམས་ཅད་ཀུན་གྱིས་རང་གི་སེམས་ཀྱི་གཤིས་ལུགས་ཆོས་ཉིད་དེ་བཞིན་ཉིད་ཀུན་བྱེད་བྱང་ཆུབ་སེམས་ཀྱི་རང་བཞིན་དེ་ཇི་བཞིན་དུ་མཐོང་བར་གྱུར་ན། ཆེད་ནི་མངོན་པར་རྫོགས་པ་སངས་རྒྱས་པ་ཞེས་པའི་དོན་དེ་ཚིག་གི་སའམ་ལམ་ཙམ་ལ་མི་གནས་ཏེ་ད་ལྟ་ཉིད་ནས་རང་སེམས་ཆོས་སྐུའི་རང་ཞལ་མངོན་དུ་མཐོང་ནས་ཤིན་ཏུ་རྣལ་འབྱོར་གྱི་དགོངས་པ་མ་བགྲོད་ཡེ་ནས་ཕྱིན་པའི་དོན་ཐོབ་པ་ཡི་ཆེད་ཡིན་ལ། འོན་ཀྱང་རྫོགས་པ་ཆེན་པོའི་དོན་ལ་ཚེ་སྔོན་སྦྱངས་པའི་ལས་འབྲེལ་མེད་པས་ཤིན་ཏུ་སྐལ་པ་ཆུང་བ་ཐེག་པ་དམན་པའི་རིགས་ཅན་རྣམས་ལ་ནི། རང་བྱུང་འདུས་མ་བྱས་པའི་ཡེ་ཤེས་བསལ་བཞག་དང་བྲལ་བའི་ཚུལ་མ་གབ་པར་མངོན་དུ་ཕྱུང་ནས་བསྟན་ན་ཡང་རེ་ཞིག་མི་རྟོགས་ཏེ། དཔེར་ན་གང་ཟག་གང་ཞིག་ནོར་བུ་རིན་པོ་ཆེ་རིན་ཆེན་དབང་གི་རྒྱལ་པོ་འདོད་པ་དེ་ཡིས་ཤིང་གི་བཟོས་པའི་ནོར་བུ་ལ་བྱི་དོར་བྱས་པས་ནོར་བུའི་རང་བཞིན་དུ་མི་འགྱུར་བ་བཞིིིན་དུ་དམན་པའི་རིགས་ཅན་སྐལ་པ་ཆུང་བ་དོན་གཉིས་ལྷུན་གྲུབ་ཀྱི་འདོད་དགུར་འབྱུང་བའི་ཡོན་ཏན་དང་མི་ལྡན་པས་ཤིང་གི་ནོར་བུ་དང་འདྲ་བ་དེ་ཐེག་མཆོག་རྫོགས་པ་ཆེན་པོ་ངེས་གསང་རྡོ་རྗེ་སྙིང་པོའི་རྒྱལ་མཚན་གྱི་རྩེ་མོར་གནས་ཞིང་དོན་གཉིས་ལྷུན་གྲུབ་གྱི་ཆར་ཆེན་པོ་རྩོལ་མེད་ཤུགས་འབྱུང་དུ་འབེབ་པར་བྱེད་པའི་ཡང་རབ་ཨ་ཏིའི་རྣལ་འབྱོར་དུ་འབྱུང་དུ་མེད་པ་ཡིན་ནོ། །དེ་ལྟ་ན་ཡང་ཚེ་སྔོན་རང་བཞིན་རྫོགས་པ་ཆེན་པོའི་ཆོས་དང་བླ་མ་ལ་དད་ཅིང་མོས་པ་བྱས་པ་ལ་སོགས་པའི་ལས་འཕྲོ་བཟང་པོ་དང་ལྡན་པས་ད་ལྟ་ཀུན་བྱེད་ཆོས་སྐུའི་དགོངས་པ་མ་ནོར་ཇི་བཞིན་དུ་རྟོགས་པའི་སྐལ་པ་དང་ལྡན་པའི་ཤིན་ཏུ་རྣལ་འབྱོར་གྱི་གང་ཟག་རྣམས་ལ་བྱར་མེད་ཡེ་གྲོལ་ཆེན་པོའི་དོན་འདི་བསྟན་པར་བྱས་ན། ཐེག་པ་འོག་མ་ལྟར་དུ་ལྟ་བ་རྟོགས་པ་དང་དམ་ཚིག་བསྲུང་བ་དང་ཕྲིན་ལས་བསྒྲུབ་པ་དང་ས་ལམ་བགྲོད་པ་དང་སེམས་བསྐྱེད་པ་དང་རྒྱུ་འབྲས་བླང་དོར་དང་སྒོམ་སྒྲུབ་ཀྱི་རྩོལ་བ་དང་། སྤང་བྱ་དང་དེའི་གཉེན་པོ་བརྟེན་པ་ལ་སོགས་པ་གང་ཡང་མེད་པ་དང་། དོན་དམ་དང་ཀུན་རྫོབ་རྣམ་པ་གཉིས་ཀྱིས་བསྡུས་པའི་དགག་སྒྲུབ་བླང་དོར་གྱི་ཡུལ་གང་ཡང་མེད་པར་མཐོང་ནས་རྩོལ་མེད་ཡེ་སངས་རྒྱས་པའི་དགོངས་པ་མངོན་དུ་འགྱུར་བ་དེས་ན་གང་ཟག་དབང་པོ་ཡང་རབ་རྣམས་ཀྱིས་སེམས་ཀྱིི་ཆོས་ཉིད་དེ་བཞིན་ཉིད་ཀྱི་རང་བཞིན་མཐོང་བར་འགྱུར་བ་དེ་བས་ན་དེ་ལྟ་བུ་ལ་དགོས་པའི་དགོས་ཆེད་ཡོད་པའི་ཕྱིར་ན་དེ་ལྟར་དུ་བརྗོད་པ་ཡིན་ནོ། །ཞེས་གསུངས་སོ། །འདིས་གང་ཟག་དབང་པོ་ཡང་རབ་ཞེས་པ་ཡང་རི་རབ་ཀྱི་རྡུལ་ཕྲན་བརྩི་ནུས་པ་དང་སྐལ་པ་སྐད་ཅིག་མར་བརྩི་བ་དང་ཤྭ་ལོ་ཀ་མང་པོ་བློ་ལ་འཛིན་ནུས་པའི་བློ་རིག་གསལ་བ་ཙམ་མིན་པར། ཕྱོགས་ཞེན་གྱི་མཐའ་ལ་མ་ལྷུང་བར་ཤེས་བྱའི་སྤྱི་རྒྱ་རླབས་ཀྱིས་གཅོད་ཅིང་གནས་ལུགས་ཡང་དག་པའི་དོན་རྟོགས་ནུས་པའི་དོན་དུ་ཨ་ཏི་ཡོ་ག་འདི་ཉིད་བསྟན་པར་གསུངས་ཏེ། རྒྱན་ལས། དགོས་ཆེད་དབང་པོ་ཡང་རབ་སྟེ། །རི་རབ་རྡུལ་དུ་བརྩི་བ་དང་། །བསྐལ་ཆེན་སྐད་ཅིག་མར་བརྩི་ཞིང་། །བློ་ལ་ཤྭ་ལོ་ཀ་འདོན་ཞིང་། །ཐ་སྙད་བྱེ་བྲག་ཤེས་པ་དག །ཡང་རབ་མ་ཡིན་དོན་ལ་རྩིང་། །དོན་གྱི་གནས་ལུགས་མཐར་ཕྱིན་གོ། །ཕྱོགས་སུ་བློ་གྲོས་མ་ལྷུང་པར། །སྤྱི་སར་བཞག་ནས་ཐུན་མོང་བློས། །ཤེས་བྱ་གཅོད་ཅིང་རྟོགས་ནུས་པའི། །དོན་དུ་དཔའ་བོས་གསུངས་པ་ཡིན། །ཅེས་གསུངས་པ་བཞིན་ནོ། །ལྔ་པ་ནི། ཚིག་གི་དོན་གྱིས་བཤད་པའི་དགོས་པའི་ངེས་ཚིག་གམ་གཏན་ཚིགས་བསྟན་པ་ནི། ལྟ་བ་སྒོམ་དུ་མེད་པ་ལ་སོགས་པའི་དོན་ནམ་རང་བཞིན་བཅུ་པོ་མེད་པར་རྩོལ་བྲལ་ལྷུན་གྲུབ་ཏུ་སྟོན་པར་བྱེད་པའི་སྒྲ་དང་ཚིག་རྣམས་བརྗོད་པར་བྱེད་པ་སྟེ། དེ་ལྟར་ཚིག་ཏུ་བརྗོད་ཅིང་བཤད་པས་བྱ་རྩོལ་མེད་པའི་ཆོས་ཉིད་གཞི་རྫོགས་པ་ཆེན་པོ་དོན་མཐོང་བར་གྱུར་ནས། རང་བཞིན་བཅུ་ཡིས་བྱ་བཙལ་མི་དགོས་པའི་ཀུན་བྱེད་བྱང་ཆུབ་སེམས་ཀྱི་ཡོན་ཏན་ཐམས་ཅད་ཉི་མ་དང་ཟེར་བཞིན་ཡེ་ནས་རང་ཆས་ལྷུན་གྲུབ་ཆེན་པོའི་ཚུལ་དུ་ཡོད་པ་དེ་ད་ལྟ་ཉིད་ནས་མངོན་དུ་ཐོབ་པར་འགྱུར་བའི་དགོས་པ་ཡོད་པས་དེས་ན་ཚིག་གི་དོན་གྱི་དགོས་པ་བསྟན་པ་ཡིན་ནོ་ཞེས་གསུངས་སོ། །དེ་ཡང་ཚིག་གི་སྒོ་ནས་ཇི་ལྟར་བཤད་པའི་ཚུལ་ཀྱང་དབང་པོ་རབ་ལ་མཚན་གྱི་དོན་ཙམ་བསྟན་པས་རྒྱུད་དབུ་ཞབས་ཀྱི་དོན་ཀུན་རྟོགས་པར་འགྱུར་བ་དང་། དབང་པོ་འབྲིང་ལ་རྒྱུད་འབྱུང་བའི་རྒྱུ་གླེང་གཞི། རྐྱེན་གླེང་སློང་། འབྲས་བུ་ཡོངས་སུ་ཤེས་པར་བྱ་བ་རྒྱུད་དོན། རྒྱུད་ཀྱི་དགོས་འགྲེལ། འཁོར་ལ་གདམས་ཤིང་བསྟན་པ་གཏད་པ་སྟེ་སྤྱི་དོན་རྣམ་པ་ལྔའི་སྒོ་ནས་བཤད་པ་དང་། དབང་པོ་ཐ་མ་རྣམས་ལ་རྒྱུད་ཀྱི་ཚིག་དོན་སོ་སོར་བཀྲོལ་ཏེ་བཤད་པར་གསུངས་ལ། དེ་ཡང་དོན་གྱི་འགྲེལ་བ་ལྔའི་སྒོ་ནས་བཤད་པར་བྱ་བ་སྟེ། དེ་གང་ཞེ་ན། མདོ་བཅུ་ལས། འགྲེལ་ལྔ་གང་དང་གང་ཞེ་ན། །ཚེག་བར་འབྲུ་ཡི་འགྲེལ་པ་དང་། །དཔེ་དོན་རྒྱུ་འབྲས་འགྲེལ་བ་དང་། །གཏན་ཚིགས་དོན་གྱི་འགྲེལ་པ་དང་། །འབྱེད་པར་བྱེད་པའི་འགྲེལ་པ་དང་། །སྡུད་པར་བྱེད་པའི་འགྲེལ་པའོ། །ཞེས་གསུངས་པ་ལྟར་ཚིག་གི་དོན་རྣམས་འཁྲུགས་པ་སྡེ བ་ཅིང་འཐོར་བ་སྡུད་པ་དང་དངོས་སུ་མི་གསལ་བ་རྣམས་ཚིག་གོང་འོག་གི་ཤུགས་ཀྱིས་དབྱུང་བ་ལ་སོགས་པའི་སྒོོ་ནས་བཀྲལ་ཏེ་བཤད་པ་ནི་ཚེག་བར་འབྲུ་ཡི་འགྲེལ་པ་དང་། དེ་ཉིད་ལས། དེ་འདྲ་དེ་བཞིན་དེ་ལྟར་གསུམ། །དཔེ་རུ་བསྟན་པའི་འགྲེལ་པའོ། །དེ་བས་དེ་ཕྱིར་དེས་ན་གསུམ། །གང་ཡིན་དོན་དེ་དེ་མཐོང་ན། །གཏན་ཚིགས་བསྟན་པའི་འགྲེལ་པའོ། །དེ་ནས་དེ་ཡང་དེ་ལས་གསུམ། །རྒྱུ་འབྲས་བསྟན་པའི་འགྲེལ་པའོ། །དེ་ཡིན་དེ་མིན་ཡིད་ཆེས་ན། །དོན་གྱི་འགྲེལ་པ་ཡིན་པར་བཤད། །འབྲུ་དང་ཡན་ལག་གཅིག་ལ་ཡང་། །དཔེ་དོན་དེ་ལྟར་ཡོད་པས་ན། །དེ་བཞིན་འབྲུ་ལག་ཀུན་ལ་བརྟགས། །དཔེ་དོན་རྒྱུ་འབྲས་འགྲེལ་བར་བཤད། །ཅེས་པ་ལྟར་ཡི་གེའི་འབྲུ་དང་ཡན་ལག་ལ་བརྟགས་ཏེ་དཔེ་དོན་དང་རྒྱུ་འབྲས་གཏན་ཚིགས་རྣམས་སོ་སོར་མ་ནོར་བར་བཤད་པ་ནི་དཔེ་དོན་རྒྱུ་འབྲས་ཀྱི་འགྲེལ་བ་དང་། ཐེ་ཚོམ་གྱི་དོན་ལ་ཚད་མ་གསུམ་གྱིས་བརྟགས་ཏེ་དོན་མ་ནོར་བ་མངོན་དུ་འབྱིན་ཅིང་ཡིད་ཆེས་ཀྱི་ངེས་པ་བསྐྱེད་པ་ནི་གཏན་ཚིགས་དོན་གྱི་འགྲེལ་པ་དང་། གོང་དུ་བཤད་པའི་སྤྱི་དོན་རྣམ་པ་ལྔ་ལྟ་བུའི་རེས་དང་སྡེ་ཚན་སོ་སོར་འབྱེད་ཅིང་དཀྱུས་ཀྱིས་ས་བཅད་དེ་བཤད་པ་ནི་འབྱེད་པར་བྱེད་པའི་འགྲེལ་བ་དང་། ཆོས་ཐམས་ཅད་རྩ་བ་བྱང་ཆུབ་ཀྱི་སེམས་བྱ་རྩོལ་བྲལ་བའི་རང་བཞིན་དུ་སྟོན་པ་ལྟ་བུ་རང་གི་རྒྱུད་ཐོག་ཏུ་དབབ་ཅིང་ཉམས་སུ་བླང་བའི་དོན་མན་ངག་ཏུ་དྲིལ་བ་ནི་སྡུད་པར་བྱེད་པའི་འགྲེལ་བ་སྟེ། དེ་ཉིད་ལས། ཚིག་དང་འབྲུ་ཡི་དོན་འདི་ནི། །ཚིག་བར་འབྲུ་ཡི་འགྲེལ་བར་བཤད། །འདྲ་དང་ཡིན་མིན་དོན་འདི་ནི། །དཔེ་དོན་རྒྱུ་འབྲས་འགྲེལ་བར་བཤད། །བརྟགས་ཏེ་གཏན་ཚིགས་དོན་འབྱིན་ན། །གཏན་ཚིགས་ངག་གི་འགྲེལ་པར་བཤད། །སོ་སོའི་སྡེ་དང་རིས་འབྱེད་ན། །ས་གཅོད་པ་ཡི་འགྲེལ་བར་བཤད། །རྩ་བ་གཅིག་ཏུ་དོན་སྟོན་ན། །སྡུད་པར་བྱེད་པའི་འགྲེལ་བར་བཤད། །ཅེས་གསུངས་པ་དེ་ལྟ་བུའི་དོན་གྱི་འགྲེལ་པ་ལྔའི་སྒོ་ནས་བཤད་པར་བྱའོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་སེམས་ཀྱི་བཤད་ལུགས་ཀྱི་ལེའུ་སྟེ་བཅུ་གསུམ་པའི་འགྲེལ་པའོ།། ༈ །།དོན་བཞི་པ་སེམས་ཉིད་ཀུན་བྱེད་རྒྱུ་འབྲས་བྱ་བཙལ་ལས་འདས་པའི་དོན་སྣོད་མིན་ལ་ངེས་པར་གསང་བའི་ལེའུ་བཅུ་བཞི་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལྟར་ཀུན་བྱེད་བྱང་ཆུབ་སེམས་ཀྱི་བཤད་ཐབས་རྣམ་པ་ལྔ་བསྟན་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་ཉིད་ཀྱི་རང་བཞིན་གཉིས་མེད་བློ་འདས་ཆེན་པོ་ནང་གསལ་གཞོན་ནུ་བུམ་སྐུའི་དགོངས་པ་འདི་ཉིད་སྐུ་གསུམ་གྱི་སྟོན་པ་ནས་ཁམས་གསུམ་སེམས་ཅན་གྱི་བར་ཀུན་ལ་མི་བསྟན་པར་གསང་བ་དམ་པར་བྱེད་དགོས་པའི་ཚུལ་གྱི་གདམས་ངག་འདི་གསུངས་སོ། །གཉིས་པ་རྒྱས་པར་བཤད་པ་ལ་བཞི་སྟེ། ཀུན་བྱེད་བྱང་ཆུབ་ཀྱི་སེམས་གསང་བར་གདམས་པ། སྒྲ་ཇི་བཞིན་པ་བསྟན་པའི་ཉེས་པ། གསང་མི་གསང་གི་ཁྱད་པར་བསྟན་པ། དབང་པོ་ཡང་རབ་ལ་མི་གསང་བར་བསྟན་པའོ། །དང་པོ་ནི། ཀྱེ་སེམས་དཔའ་ཆེན་པོ་ཀུན་བྱེད་བྱང་ཆུབ་ཀྱི་སེམས་ང་ནི་དུས་དང་རྣམ་པ་ཀུན་ཏུ་གསང་བའི་ཡུལ་རྣམ་པ་བཞི་པོ་འདི་ལ་མི་སྨྲ་བར་གསང་བ་དམ་པར་བྱའོ། །ཞེས་སྤྱིར་བསྟན་ནས་བྱེ་བྲག་ཏུ་ཡུལ་གང་དང་གང་ལ་གསང་བར་བྱ་ཞེ་ན། གང་ལ་གསང་བའི་ཡུལ་ནི་ཀུན་བྱེད་ང་ཡི་རྩལ་ལས་བྱུང་བའི་སྐུ་གསུམ་གྱི་སྟོན་པ་རྣམས་ལ་ང་ཡི་རང་བཞིན་མ་སྐྱེས་མི་འགགས་མ་དེས་རྣམ་པ་གསུམ་པོ་འདི་ཉིད་མི་བསྟན་པར་གསང་དགོས་པ་དང་། དེ་བཞིན་དུ་ང་ཡི་དོན་གཉིས་མེད་བྱང་ཆུབ་ཀྱི་སེམས་ཇི་བཞིན་དུ་རྟོགས་པས་མཐར་ཕྱིན་འབྲས་བུའི་ས་ལ་གནས་པའི་དུས་གསུམ་གྱི་སངས་རྒྱས་རྣམས་ལ་ཡང་ང་ཡི་རང་བཞིན་མི་བསྟན་པར་གསང་བར་བྱ་ལ། ང་ལ་ཆོས་ཉན་ཅིང་ལྷན་གཅིག་ཏུ་འདུས་པ་ཉིད་ལས་མི་གཞན་པའི་འཁོར་ཚོགས་ཐམས་ཅད་ཡང་ང་ཡི་རང་བཞིན་བསྟན་པར་གསང་བར་བྱ་བ་དང་། ཀུན་བྱེད་ང་ཡིས་བྱས་པའི་ཁམས་གསུམ་གྱི་སེམས་ཅན་རྣམས་ལ་ང་ཡི་རང་བཞིན་མི་བསྟན་པར་གསང་བར་བྱའོ་ཞེས་སོ། །གཉིས་པ་ལ་བཞི་སྟེ། སྐུ་གསུམ་སྟོན་པ་མེད་པས་ཕུན་སུམ་ཚོགས་པར་མི་འགྱུར་བ། སྟོང་གསུམ་ཐུགས་རྗེ་མེད་པས་འགྲོ་དོན་མི་འབྱུང་བ། སྟོན་གསུམ་བསྟན་པ་མེད་པས་ཐེག་པའི་ཁྱད་པར་མེད་པ། ཐེག་གསུམ་ཉམས་ལེན་མེད་པས་འཁོར་བའི་སྡུག་བསྔལ་མི་གྲོལ་བའོ། །དང་པོ་ནི། གོང་དུ་བསྟན་པ་དེ་ལྟར་གསང་དགོས་པའི་རྒྱུ་མཚན་ཅིའི་ཕྱིར་ཞེ་ན། འདི་ལྟར་སྐུ་གསུམ་གྱི་སྟོན་པ་ལ་སྟོན་པ་ཀུན་བྱེད་ང་ཡི་རང་བཞིན་མ་གསང་བར་སྒྲ་ཇི་བཞིན་དུ་བསྟན་པར་བྱས་ན། ནང་གསལ་སྤྲོས་པ་དང་བྲལ་བའི་དོན་ཇི་བཞིན་མངོན་དུ་བྱས་ནས་སྐུ་གསུམ་སྟོན་པ་གསུམ་གྱི་སྣང་ཆ་ཡེ་ཤེས་ཕྱིར་གསལ་གྱི་རང་བཞིན་ང་ཡི་རྩལ་ལས་འབྱུང་བའམ་འཕྲོ་བར་མི་འགྱུར་ལ། སྐུ་གསུམ་གྱིས་སྟོན་པ་དེ་རྣམས་ང་ལས་མ་བྱུང་ན། སྐུ་གསུམ་གྱི་བསྟན་པ་གསུམ་གྱི་ངོ་བོར་གྱུར་པའི་ཐེག་པ་གསུམ་དང་འཁོར་གསུམ་ལྷན་དུ་ཕུན་སུམ་ཚོགས་པར་མི་འགྱུར་ལ། བསྟན་གསུམ་ཐེག་པ་གསུམ་དང་འཁོར་གསུམ་པོ་རྣམས་མ་ཚོགས་ན་སྐུ་གསུམ་གྱི་སྟོན་པ་གསུམ་པོ་སངས་རྒྱས་དཀོན་མཆོག་དང་བསྟན་གསུམ་ཐེག་པ་དམ་ཆོས་དཀོན་མཆོག་དང་འཁོར་ཚོགས་འདུས་པ་དགེ་འདུན་དཀོན་མཆོག་སྟེ་དེ་ལྟ་བུའི་དཀོན་མཆོག་གསུམ་པོ་འཇིག་རྟེན་གྱི་ཁམས་སུ་འབྱུང་བར་མི་འགྱུར་ལ། མཆོག་གསུམ་པོ་དེ་འཇིག་རྟེན་དུ་མ་བྱོན་ནས་མུན་པའི་སྐལ་བ་འབའ་ཞིག་ཏུ་གྱུར་ན་འཇིག་རྟེན་སྐྱེ་བོ་རྣམས་ཀྱིས་ཐར་བ་དང་ཐམས་ཅད་མཁྱེན་པའི་ལམ་རང་སྟོབས་ཀྱི་རྙེད་པར་མི་འགྱུར་བས་ན་བླ་མེད་བྱང་ཆུབ་ཀྱི་དོན་མཐའ་ཡས་པའི་འགྲོ་བ་ཀུན་གྱིས་རིག་ཅིང་ཐོབ་པ་མེད་པའི་སྐྱོན་དུ་འགྱུར་བ་དེས་ན་གསང་དགོས་པར་གདམས་པ་ཡིན་ནོ། །གཉིས་པ་ནི། ཀུན་བྱེད་ང་ལས་བྱུང་བའི་དུས་གསུམ་གྱི་སངས་རྒྱས་རྣམས་ལ་ང་ཡི་རང་བཞིན་གསུམ་མམ་དབྱིངས་ནང་གསལ་གྱི་ཡེ་ཤེས་གསུམ་དབྱེར་མེད་པའི་གནས་ལུགས་ཏེ་མ་གསང་བར་བསྟན་པར་གྱུར་ན་གང་འདུལ་ཐུགས་རྗེའི་རོལ་པ་སྐུ་གསུམ་གྱི་སྟོན་པ་གསུམ་པོ་གདུལ་བྱའི་དོན་ལ་འབྱུང་བ་མེད་པས་འགྲོ་དོན་རྒྱུན་ཆད་དེ་སངས་རྒྱས་དང་སེམས་ཅན་ཐུགས་རྗེའི་འབྲེལ་བ་མེད་པའི་སྐྱོན་དུ་འགྱུར་རོ། །དེས་ན་སྟོན་པ་ཀུན་ཏུ་བཟང་པོས་འགྲོ་དོན་ཐུགས་རྗེས་མི་འདོར་བའི་ཆེད་དུ་ཉིད་ཀྱི་ངོ་བོ་དུས་གསུམ་གྱི་རྒྱལ་བ་རྣམས་ལ་དབྱིངས་ནང་གསལ་སྤྲོས་པ་དང་བྲལ་བ་སྐུ་གསུམ་དབྱེར་མི་ཕྱེད་པའི་རང་བཞིན་ཏེ་མ་བསྟན་པའམ་དེ་ཉག་གཅིག་ཏུ་མ་མཛད་པར་སྐུ་གསུམ་གྱི་རོལ་པ་ཕྱི་གསལ་གདུལ་བྱའི་དོན་དུ་མངོན་ཏུ་ཕྱུང་བར་བསྟན་པ་ཡིན་ཏེ། ཀློང་ཆེན་རབ་འབྱམས་ལས། ས་ལམ་ཆིག་ཆོད་ཀུན་བཟང་ངས། །ཡེ་ཤེས་རྣམ་གསུམ་བསྟན་པ་དང་། །གདུལ་བྱ་མ་དག་དྲང་བའི་ཕྱིར། །སྟོན་པ་རྣམ་པ་གསུམ་དུ་བྱུང་། །གནས་ཀྱང་རྣམ་པ་གསུམ་ཡིན་ཏེ། །འདུལ་ཞིང་རྣམ་པ་གསུམ་དུ་བཤད། །འཁོར་ཡང་རྣམ་པ་གསུམ་ཡིན་ཏེ། །བསྟན་པ་དག་ཀྱང་རྣམ་པ་གསུམ། །ཞེས་གསུངས་པ་ལྟར་རོ། །གསུམ་པ་ནི། ང་ལ་ཆོས་ཉན་པའི་ཕྱིར་དུ་འདུས་པའི་འཁོར་གྱི་ཚོགས་རྣམས་ལ་ང་ཡི་རང་བཞིན་མ་གསང་བར་བྱེ་བྲག་མེད་པར་བསྟན་པར་གྱུར་ན་གང་ཟག་རྣམས་ཀྱི་ཁམས་དང་མོས་པའི་བྱེ་བྲག་སྣ་ཚོགས་པ་ཡིན་པས་རང་རང་གི་བློ་དང་འཚམས་པར་མ་བསྟན་པས་གདུལ་བྱའི་རྒྱུད་ཆུད་ཟ་བར་འགྱུར་བ་དང་། དེ་ཉིད་ལས། སྤྲོས་ལ་དགའ་བའི་གང་ཟག་ལ། །སྤྲོས་པ་ཅན་གྱིས་ཆོས་ཀྱིས་འདུལ། །ཉན་ཐོས་རང་རྒྱལ་བྱང་སེམས་གསུམ། །གང་ཟག་དབང་པོ་དམན་ལ་བཤད། །ཀྲྀ་ཡ་ཨུ་པ་ཡོ་ག་གསུམ། །གང་ཟག་དབང་པོ་འབྲིང་ལ་བཤད། །མ་ཧཱ་ཨ་ནུ་ཨ་ཏི་གསུམ། །གང་ཟག་དབང་པོ་རབ་ལ་བཤད། །ཅེས་གསུངས་པ་ལྟར་སྐུ་གསུམ་གྱི་སྟོན་པ་གསུམ་གྱིས་གདུལ་བྱའི་བློ་རིམ་དང་འཚམས་པར་བསྟན་པའི་ཐེག་པ་གོང་འོག་གི་ལྟ་གྲུབ་སོགས་ཀྱི་ཁྱད་པར་ཕྱེད་པར་མི་འགྱུར་བའི་སྐྱོན་ཡོད་པ་དེས་ན་གསང་བར་གདམས་པའོ། །བཞི་པ་ནི། ང་ཡིས་བྱས་པའི་ཁམས་གསུམ་གྱི་སེམས་ཅན་རྣམས་ལ་ང་ཡི་རང་བཞིན་མ་གསང་བར་ཐུགས་རྗེས་བསྟན་པར་གྱུར་ན། དེ་ལས་གཞན་དུ་སྐུ་གསུམ་གྱི་སྟོན་པ་གསུམ་གྱི་ཐེག་པ་གསུམ་གྱི་ལམ་བསྟན་པའི་གནས་མེད་པར་འགྱུར་ལ། དེ་ལྟར་སྟོན་པ་གསུམ་གྱིས་བསྟན་པའི་གནས་མེད་པར་གྱུར་ན། སྟོན་པ་ཀུན་བྱེད་ང་ཡིས་བྱས་པའི་ཆོས་རྣམས་ལ་སྟོན་འཁོར་བསྟན་པ་ཕུན་སུམ་ཚོགས་པ་ཞེས་སུ་རྒྱུ་མཚན་ཅི་ལ་བརྟེན་ལ་གང་ཟག་སུ་ཞིག་གིས་འདོགས་པར་བྱེད་དེ་འདོགས་པའི་གནས་མེད་ཅིང་། བསྟན་པ་འབྱུང་བའི་རྒྱུ་ཕུན་སུམ་ཚོགས་པ་རྣམས་མེད་པར་གྱུར་ན་གདུལ་བྱའི་སེམས་ཅན་རྣམས་ཀྱིས་ཐེག་གསུམ་གྱི་ཉམས་ལེན་མི་ཤེས་པས་འཁོར་བའི་སྡུག་བསྔལ་ལས་མི་གྲོལ་བའི་སྐྱོན་དང་། མ་ཟད་རྫོགས་པ་ཆེན་པོའི་དོན་ཀྱང་ཁོང་དུ་མི་ཆུད་པར་སྒྲོ་དང་སྐུར་བ་བཏབ་པས་སེམས་ཅན་དམྱལ་བ་ཆེན་པོར་ལྟུང་བར་གསུངས་ཏེ། རིན་པོ་ཆེ་སྤུངས་པ་ལས། ཚིག་འདི་དག་ནི་ཉན་ཐོས་དང་རང་སངས་རྒྱས་ལ་སོགས་པའི་ནང་དུ་རྡུལ་ཙམ་ཡང་བརྗོད་པར་མ་བྱེད་ཅིག །དེ་ཅིའི་ཕྱིར་ཞེ་ན་བློ་ཆུང་བའི་ཕྱིར་ཏེ། དེ་དག་རྣམས་ཀྱིས་ཚིག་འདི་ཀུན་ཐོས་པས་སྐྲག་པ་དང་། དངངས་པ་དང་། བརྒྱལ་བར་འགྱུར་ཏེ། གསང་སྔགས་རྣམས་ལ་མི་མོས་ཏེ། །ཡིད་ཕྱིར་ལྡོག་ནས་དེའི་རྣམ་པར་སྨིན་པས་སེམས་ཅན་དམྱལ་བ་ཆེན་པོར་དེ་ཉམས་སུ་མྱོང་བར་འགྱུར་བས་ན། བསྟན་ཅིང་ཐོས་པ་ལྟ་ཅི་སྨོས་ཏེ་རླུང་ཕྱོགས་ཙམ་དུ་ཡང་བརྗོད་པར་མི་བྱའོ། །ཞེས་དང་། འདི་ཉིད་ལས་ཀྱང་། རྒྱུ་དང་འབྲས་བུའི་ཐེག་པ་ཅན་རྣམས་ལ། །ཀུན་བྱེད་ང་ཡི་ལུང་འདི་བསྟན་མི་བྱ། །ང་ཡི་ལུང་འདི་ངེས་པར་བསྟན་བྱས་ན། །དགེ་སྡིག་ལས་ལ་རྒྱུ་འབྲས་ཡོད་ཟེར་ནས། །ཡང་དག་ང་ལ་སྒྲོ་དང་སྐུར་བཏབ་པས། །ཡང་དག་ང་དང་ཡུན་དུ་འཕྲད་མི་འགྱུར། །ཞེས་གསུངས་པ་དེ་ལྟ་བུའི་སྐྱོན་རྣམས་སྤང་བའི་ཕྱིར་དུ་གསང་བར་གདམས་པའོ། །གསུམ་པ་ནི། རྒྱུ་མཚན་དེས་ན་གདོད་མའི་མགོན་པོ་ཆོས་སྐུ་ཀུན་བྱེད་རྒྱལ་པོ་ང་ཡིས་ནི་ང་ཡི་རང་བཞིན་སེམས་ཉིད་རང་བྱུང་གི་ཡེ་ཤེས་སྤང་བླང་བསལ་བཞག་དང་བྲལ་བའི་དོན་དེ་སྟོན་པ་ང་ཡི་མངོན་དུ་ཕྱུང་ནས་ནི་ང་ཉིད་རང་ལ་ང་ཡི་རང་བཞིན་རིག་པ་སྐུ་གསུམ་གྱི་བདག་ཉིད་ཅན་དེ་ང་ཡིས་བསྟན་པ་མ་གཏོགས། ང་ལས་བྱུང་བའི་སྟོན་པ་སྐུ་གསུམ་ལ་སོགས་པའི་འཁོར་རྣམས་ལ། ང་ཡི་རང་བཞིན་བསྟན་པའི་བཀའ་ལུང་ནི་ཀུན་བྱེད་རྒྱལ་པོ་ངས་མ་ཕོག་པས་ན་བསྟན་པར་མི་བྱའོ་ཞེས་སོ། །བཞི་པ་ནི། དེ་ལ་བསྟན་པར་བྱ་བའི་ཡུལ་སྟོན་པ་སྟོན་པ་ཀུན་བྱེད་ཉིད་ལ་བསྟན་པར་གསུངས་ན་སྟོན་པ་ཉིད་ཀྱི་རང་བཞིན་ཏེ་གང་ཡིན་ཞེ་ན། ཤིན་ཏུ་རྣལ་འབྱོར་གྱི་རིགས་ཅན་གང་ཟག་ལས་བཟང་སྐལ་བར་ལྡན་པ་རྣམས་ནི་ཀུན་བྱེད་ང་ཡི་རང་བཞིན་ཡིན་ལ། དེ་ལྟ་བུའི་གང་ཟག་དེའི་མཚན་ཉིད་ཀྱང་། འདི་ཉིད་ལས། དད་དང་དམ་ཚིག་བརྩོན་འགྲུས་ཆེ་བ་དང་། །སྙིང་རྗེ་ཡི་རང་སྐྱོ་དང་ཡིད་རྟོག་མེད། །ལུས་དང་བུ་དང་ཆུང་མ་བྲན་དང་ནོར། །གང་ལའང་མ་ཆགས་དད་དང་དགའ་བས་འབུལ། །འདི་དག་དད་དང་དམ་ཚིག་རྟགས་ཡིན་པས། །སྙིང་པོའི་དོན་དང་ལྡན་པ་སྦྱིན་པར་བྱ། །ཞེས་གསུངས་པ་ལྟ་བུ་ཡིན་པས་ན་དེ་ལ་ཀུན་བྱེད་ང་ཡི་རང་བཞིན་འདི་ཉིད་མི་གསང་བར་བསྟན་པར་བྱ་བ་ཡིན་ནོ། །ཞེས་ཡང་རབ་ཨ་ཏིའི་རིགས་ཅན་རྣམས་ལ་བསྟན་པར་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་སྐལ་མེད་ལ་གསང་བར་གསུངས་པའི་ལེའུ་སྟེ་བཅུ་བཞི་པའི་འགྲེལ་བའོ།། ༈ །།དོན་ལྔ་པ་ཀུན་བྱེད་མངོན་དུ་བྱུང་ནས་ཆོས་ཐམས་ཅད་འགྲེལ་བའི་ལེའུ་བཅོ་ལྔ་པ་ལ་གཉིས་ཏེ། མདོར་བསྟན་པ་དང་རྒྱས་པར་བཤད་པའོ། །དང་པོ་ནི་དེ་ལྟར་རྒྱུ་འབྲས་བྱ་བཙལ་ལས་འདས་པའི་ཀུན་བྱེད་བྱང་ཆུབ་ཀྱི་སེམས་གསང་བ་དམ་པ་མཆོག་ཏུ་གདམས་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་ཉིད་ཀྱི་ལུང་ཆེན་པོ་ཕུན་སུམ་ཚོགས་པས་བསྡུས་པའི་ཆོས་སྣང་སྲིད་འཁོར་འདས་ཐམས་ཅད་ཆོས་ཉིད་བྱང་ཆུབ་སེམས་ཀྱི་རང་བཞིན་མངོན་དུ་ཕྱུང་བ་ཡིན་པར་གསུངས་པའི་ངེས་པ་དོན་གྱི་ལུང་འདི་བསྟན་ཏོ། །གཉིས་པ་ལ་གསུམ་སྟེ། སྟོན་པ་འཁོར་དང་བསྟན་པ་གསུམ་མངོན་དུ་ཕྱུང་སྟེ་གདམས་པ། དེ་ཉིད་ཀུན་བྱེད་ལས་གཞན་དུ་མི་ཚོལ་བར་བསྒྲགས་པ། དེ་ཐམས་ཅད་སེམས་ཉིད་དེ་བཞིན་ཉིད་ཀུན་བྱེད་ཉིད་ཀྱི་རང་བཞིན་དུ་བསྟན་པའོ། །དང་པོ་ལ་གསུམ་སྟེ། ཕུན་སུམ་ཚོགས་པ་གསུམ་མངོན་དུ་ཕྱུང་བ། ཇི་ལྟར་ཕྱུང་ཚུལ་བསྟན་པ་དེ་ཉིད་གཞན་ལ་བསྟན་པར་གདམས་པའོ། །དང་པོ་ལ་གཉིས་ཏེ། མངོན་དུ་ཕྱུང་ཚུལ་མདོར་བསྟན་པ་དང་། དབྱེ་བས་རྒྱས་པར་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །སྟོན་པ་ཀུན་བྱེད་རྒྱལ་པོ་ང་ཡིས་ནི་སྙིང་པོ་བྱང་ཆུབ་སེམས་ཀྱི་རང་བཞིན་ལས་རྩལ་འགག་མེད་ཀྱི་རང་མདངས་མངོན་དུ་ཕྱུང་བ་ནི་བསྡུ་ན་རྣམ་པ་གསུམ་དུ་བསྟན་ཏེ། དེ་ལ་ང་ཡི་རང་བཞིན་རྣམ་པ་གསུམ་སྟོན་པར་ངས་མངོན་དུ་ཕྱུང་སྟེ་བསྟན་པ་ནི་གང་ཞེ་ན་གདུལ་བྱའི་བློ་དང་བསྟུན་པའི་ཐེག་པ་སོ་སོའི་དོན་རྣམས་སྟོན་པར་མཛད་པའི་སྟོན་པ་སྐུ་གསུམ་དང་། དེ་དག་གིས་ཇི་ལྟར་བསྟན་པའི་དོན་དེ་ཇི་བཞིན་དུ་རིག་ཅིང་རྟོགས་པར་འདོད་པའི་འཁོར་གྱི་ཚོགས་རྣམས་དང་། དེ་རྣམས་ལ་ཐེག་པ་སོ་སོའི་དགོངས་དོན་མ་ནོར་བར་ངེས་པའི་དོན་དུ་གསུངས་པ་དང་གསུམ་པོ་དེ་ནི་སྟོན་པ་ཀུན་བྱེད་ང་ཡིས་རིག་པ་བྱང་ཆུབ་སེམས་ཀྱི་ཀློང་ནས་མངོན་དུ་ཕྱུང་སྟེ་བསྟན་པ་ཡིན་ནོ། །གཉིས་པ་ལ་གསུམ་སྟེ། རྣམ་གྲངས་རང་བཞིན་དང་བཅས་པས་སྟོན་པ་མངོན་དུ་ཕྱུང་ཚུལ། ངོ་བོ་དབྱེ་བ་དང་བཅས་པས་འཁོར་ཉིད་མངོན་དུ་ཕྱུང་ཚུལ། ངོ་བོ་རང་བཞིན་ཐུགས་རྗེ་དང་བཅས་པས་ངེས་པའི་དོན་ཉིད་མངོན་དུ་ཕྱུང་ཚུལ་ལོ། །དང་པོ་ནི་དེ་ལ་མ་ནོར་ངེས་པའི་དོན་རྒྱལ་བ་སྐུ་གསུམ་གྱི་བསྟན་པ་རྣམས་སྟོན་པར་མཛད་པའི་སྟོན་པ་མ་གབ་མངོན་དུ་ཕྱུང་བ་ནི་གང་ཞེ་ན། ནང་རྒྱུད་སྡེ་གསུམ་གྱི་སྟོན་པ་ཆོས་ཀྱི་སྐུ་དང་། ཕྱི་རྒྱུད་སྡེ་གསུམ་གྱི་སྟོན་པ་ལོངས་སྤྱོད་རྫོགས་པ་དང་། མཚན་ཉིད་སྡེ་གསུམ་གྱི་སྟོན་པ་སྤྲུལ་པའི་སྐུ་དང་རྣམ་པ་གསུམ་ཡིན་ལ། དེ་རྣམས་ནི་ཀུན་བྱེད་རྒྱལ་པོ་ཉིད་ཀྱི་འཁོར་གྱི་དང་པོ་སྟོན་པ་སྐུ་གསུམ་གྱི་རྣམ་པར་ཤར་བ་སྟེ། དེ་ལྟ་བུའི་ཐེག་པ་གསུམ་གྱི་དོན་རྣམས་མ་ནོར་བར་སྟོན་པར་མཛད་པ་ཡི་སྟོན་པ་གསུམ་པོ་དེ་ཡི་རང་བཞིན་གང་ཡིན་པ་ནི་གཟུང་འཛིན་གཉིས་དང་བྲལ་བའི་གནས་ལུགས་མཐར་ཐུག་པ་ཀུན་བྱེད་བྱང་ཆུབ་སེམས་ཀྱི་རང་བཞིན་དབྱིངས་སྐྱེ་བ་མེད་པ་ཀ་དག་དྲི་བྲལ་གྱི་ཆ་ཆོས་ཀྱི་སྐུ་དང་། ཀུན་བྱེད་ང་ཡི་ངོ་བོ་རང་གདངས་འགག་པ་མེད་པ་ལྷུན་གྲུབ་འོད་གསལ་གྱི་ཆ་སྟོན་པ་ལོངས་སྤྱོད་རྫོགས་པ་དང་། རྩལ་སྣང་མ་འགགས་ཐུགས་རྗེའི་རོལ་པ་གང་འདུལ་ངེས་མེད་སྒྱུ་མའི་རང་བཞིན་གྱིས་འགྲོ་བའི་དོན་རྩོལ་མེད་དུ་མཛད་པ་ནི་སྤྲུལ་པའི་སྐུ་སྟེ་སྐུ་གསུམ་པོ་དེ་ནི་གཞན་དུ་ཅི་ཡང་མེད་པར། སྟོན་པ་ཀུན་བྱེད་ཉིད་ཀྱི་ཐུགས་རིག་པ་བྱང་ཆུབ་སེམས་ཀྱི་རང་བཞིན་སྟོང་གསལ་ཐུགས་རྗེ་གསུམ་པོ་དེ་ལས་རང་མདངས་ཕྱི་གསལ་གྱི་ཚུལ་དུ་མངོན་དུ་ཕྱུང་བ་ཡིན་པའི་རྒྱུ་མཚན་དེས་ན་སྐུ་གསུམ་གྱི་སྟོན་པ་གསུམ་ཡང་ཀུན་བྱེད་རྒྱལ་པོ་ཉིད་ཀྱིས་རང་གི་རང་བཞིན་མངོན་དུ་ཕྱུང་བ་ཁོ་ནའོ། །གཉིས་པ་ནི། སྐུ་གསུམ་གྱི་སྟོན་པ་རྣམས་ཀྱིས་ཇི་ལྟར་བསྟན་པའི་ཐེག་པ་གསུམ་གྱི་དོན་དེ་རིག་ཅིང་རྟོགས་པར་འདོད་པ་ཡི་འཁོར་རྣམས་མངོན་དུ་ཕྱུང་བ་ནི། དབྱེ་ན་སྟོན་པ་གསུམ་གྱི་དབྱེ་བས་དེ་དག་གི་འཁོར་ཀྱང་རྣམ་པ་གསུམ་དུ་བསྟན་པ་སྟེ། དེ་ཡང་གང་ཞེ་ན་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་ཐེག་པ་གསུམ་གྱི་ཆོས་རྣམས་བསྟན་པ་ཡི་འཁོར་དེ་ཡི་བྱེ་བྲག་ནི་འདི་ལྟར། དུས་གསུམ་ན་བཞུགས་པའི་སངས་རྒྱས་རྣམས་དང་། ཁམས་གསུམ་ན་གནས་པའི་སེམས་ཅན་ཀུན་ཏེ་དེ་དག་ཐམས་ཅད་ཡེ་ནས་ཆོས་ཉིད་རྣམ་པར་མི་རྟོག་པ་མཉམ་ཉིད་བདེ་བ་ཆེན་པོའི་ངང་ལས་སྐད་ཅིག་ཀྱང་གཡོ་བ་མེད་པར་ཆོས་དབྱིངས་དོན་གྱི་འོག་མིན་ཆེན་པོ་ན་གཞི་རྫོགས་འཕོ་འགྱུར་བྲལ་བར་གནས་པ་ནི་ཆོས་སྐུའི་འཁོར་དུ་བསྟན་པ་སྟེ། ཀློང་ཆེན་རབ་འབྱམས་ལས། སྟོན་པ་རིག་སྟོང་ཀུན་ཏུ་བཟང་པོ་ཉིད། མ་བཅོས་སྤྲོས་བྲལ་བྱང་ཆུབ་སྙིང་པོའི་ངང་ལ་རང་ཤར་ཏེ། ཞལ་ཕྱག་གི་རྣམ་པར་བཞེངས་ནས། སྔོན་དུ་བྱུང་བའི་འཁོར་ནི་ཉིད་ཀྱི་ངོ་བོ་ཆོས་ཀྱི་སྐུ་དང་། ཉིད་ཀྱི་རང་བཞིན་ལོངས་སྤྱོད་རྫོགས་པའི་སྐུ་དང་། ཉིད་ཀྱི་ཐུགས་རྗེ་སྤྲུལ་པའི་སྐུ་དང་། ཞི་ཁྲོའི་སངས་རྒྱས་དཔག་ཏུ་མེད་པ་དང་། ཁྱད་པར་སྐུའི་འཁོར་རྡོ་རྗེའི་རིགས་དང་། རིན་ཆེན་རིགས་དང་། པདྨའི་རིགས་དང་། ལས་ཀྱི་རིགས་དང་། བདེ་གཤེགས་རིགས་དང་། སངས་རྒྱས་དང་། ཆོས་དང་། དགེ་འདུན་དང་། བྱང་ཆུབ་སེམས་དཔའ་དང་། ས་ཆུ་མེ་རླུང་ནམ་མཁའ་དང་། འདོད་ཁམས་དང་། གཟུགས་ཁམས་དང་། གཟུགས་མེད་པའི་ཁམས་དང་ཤིན་དུ་རྣལ་འབྱོར་དང་། ཡོངས་སུ་རྣལ་འབྱོར་དང་། རྣལ་འབྱོར་ཆེན་པོ་དང་། སེམས་དཔའི་རྣལ་འབྱོར་དང་། འདས་པ་དང་། མ་འོངས་པ་དང་། ད་ལྟར་བ་དང་། དག་པ་དང་། མ་དག་པ་དང་། སྒྲོ་སྐུར་ཅན་དང་། ཕྱི་བའི་འཁོར་སྤྱི་དང་། དབང་ཕྱུག་ཆེན་པོ་དང་། མུ་སྟེགས་དང་། མུར་ཐུག་དང་། རྒྱང་འཕེན་དང་། ལྷ་དང་ལྷ་མ་ཡིན་དང་། མི་དང་དྲི་ཟ་དང་བཅས་པའོ། །གསུང་གི་འཁོར་ནི་ཉན་ཐོས་དང་། རང་རྒྱལ་དང་། བྱང་ཆུབ་སེམས་དཔའ་དང་། ཀྲྀ་ཡ་དང་། ཨུ་པ་དང་། ཡོ་ག་དང་། མ་ཧཱ་དང་། ཨ་ནུ་དང་། ཨ་ཏི་དང་། ཨ་ཏི་ཆེན་པོ་དང་། རྡུལ་དང་། མུན་པ་དང་། སྙིང་སྟོབས་དང་། ཕྱིའི་རྟག་ཆད་མུ་བཞིའོ། །ཐུགས་ཀྱི་འཁོར་ནི། གསལ་སྟོང་དང་། སྣང་སྟོང་དང་། བདེ་སྟོང་དང་། གྲགས་སྟོང་དང་། རིག་སྟོང་དང་བཅས་ཏེ། ཉིད་ཀྱི་རང་བཞིན་དང་། ངོ་བོ་དང་། ཐུགས་རྗེ་དང་། ཆོས་ཉིད་ཀྱི་རྡོ་རྗེ་འདུས་མ་བྱས་པ་རྣམས་དང་མི་འབྱེད་ཅིང་། འབྱེད་པ་མི་མངའ་བ། མཉམ་རྫོགས་ལྷུན་གྲུབ་ཀློང་ཡངས་ན་ཐབས་གཅིག་ཏུ་གཉིས་སུ་མེད་པར་བཞུགས་སོ། །ཞེས་དང་། མདོ་བཅུ་ལས། སྟོན་པ་ཆོས་ཀྱི་སྐུའི་འཁོར་ནི། །དུས་གསུམ་བཞུགས་པ་ཐམས་ཅད་དང་། །ཁམས་གསུམ་རྒྱུད་དྲུག་སེམས་ཅན་དེ། །འཕགས་པའི་ཐུགས་རྗེས་སེམས་ཅན་ལ། །འབྲེལ་པ་ཕུན་སུམ་ཚོགས་པར་བཤད། །ཅེས་གསུངས་སོ། །དེས་ན་འཁོར་འདས་ཀྱི་ཆོས་དེ་རྣམས་ནི་ཀུན་བྱེད་ང་ཡིས་མངོན་དུ་ཕྱུང་བའི་ཆོས་ཀྱི་སྐུའི་འཁོར་ཡིན་ནོ། །ལོངས་སྐུའི་འཁོར་ནི་དབང་པོ་ལྔ་ལ་སྣང་བའི་ཡུལ་གྱི་རྣམ་པ་གཟུགས་སྒྲ་དྲི་རོ་ལ་སོགས་པའི་རྣམ་པར་སྣང་བ་འདི་རྣམས་ལ་བརྟེན་ནས་ཆགས་སོགས་ཉོན་མོངས་པའི་རྟོག་པ་མི་སྐྱེ་བའམ་སྐྱེར་མི་འཇུག་པར་ཆོས་ཉིད་རྣམ་པར་མི་རྟོག་པའི་དོན་བསྒོམ་ཞིང་། དེ་ཡང་རང་གི་ཆོས་ཉིད་བྱང་ཆུབ་ཀྱི་སེམས་ཉིད་ལ་བདེན་པ་གཉིས་སུ་དབྱེ་བ་མེད་པ་ཆོས་སྐུ་ཐིག་ལེ་ཉག་གཅིག་གི་རང་བཞིན་ཡིན་པ་ལ་ཆོས་ཅན་ཀུན་རྫོབ་ཀྱི་བདེན་པ་དང་ཆོས་ཉིད་དོན་དམ་པའི་བདེན་པ་གཉིས་ཀྱི་རང་བཞིན་དུ་རྟོག་ཅིང་དཔྱོད་པར་བྱེད་པ་དེའི་དབང་གིས། དང་པོ་རབ་ཏུ་དགའ་བའི་ས་ནས་བཅུ་པ་ཆོས་ཀྱི་སྤྲིན་གྱི་བར་དུ་བྱང་ཆུབ་སེམས་ཀྱི་ངོ་བོ་ཇི་ལྟ་བ་བཞིན་དུ་མ་མཐོང་བར་ཉོན་ཤེས་ཀྱི་སྒྲིབ་པ་གཉིས་པོ་ཅི་རིགས་པས་བསྒྲིབས་པར་གྱུར་པའི་ས་བཅུ་པོ་ལ་གནས་པའི་བྱང་ཆུབ་སེམས་དཔའ་ཡི་འཁོར་རྣམས་དང་། ཐུགས་རང་བྱུང་ཡེ་ཤེས་ལྔ་ཡི་རང་མདངས་མ་འགགས་པ་ལོངས་སྤྱོད་པའི་ཡུལ་འདོད་ཡོན་རྣམ་པ་ལྔར་ཤར་བ་མ་སྤང་རྒྱན་དུ་མཐོང་བས་གཉིས་སུ་མེད་པར་རོལ་བའི་ལོངས་སྐུའི་སྟོན་པ་རྣམས་ཏེ། དེ་ལྟ་བུའི་ལོངས་སྐུའི་སྟོན་འཁོར་རྣམ་པ་གཉིས་ཀྱང་རང་བྱུང་ཀུན་ཏུ་བཟང་པོ་སྟོན་པ་ཀུན་བྱེད་ང་ཡི་ངོ་བོར་ཡེ་ནས་གནས་པ་ཉིད་མངོན་དུ་ཕྱུང་བ་ཡིན་ནོ། །དེ་ཉིད་ལས། སྟོན་པ་ལོངས་སྤྱོད་སྐུའི་འཁོར་ནི། །མི་རྟོག་ཏིང་འཛིན་བཅུ་སྦྱངས་པའི། །ས་ལ་གནས་པའི་བྱང་ཆུབ་པ། །ཉོན་མོངས་མི་གནས་ཤེས་བྱ་སྦྱངས། །ཡེ་ཤེས་ཚོགས་དང་ཐུགས་རྗེ་འབྲེལ། །དེས་ན་ཕུན་སུམ་ཚོགས་ཞེས་བྱ། །ཞེས་སོ། །སྤྲུལ་སྐུའི་འཁོར་ནི་ཆོས་ཉིད་དེ་བཞིན་ཉིད་ཀྱི་རང་བཞིན་ལ་དངོས་པོའི་གནས་ཚུལ་དང་མི་མཐུན་པའི་རིག་པ་ལྟར་སྣང་བ་ཡིད་ཀྱི་དབང་པོའམ་རྣམ་པར་རྟོག་པ་དེས་སོ་སོར་བརྟགས་ཤིང་དཔྱད་པས་ཕྱིན་ཅི་ལོག་ཏུ་མཐོང་བའི་ཤེས་པ་དེ་ལ་ཚད་མར་བཟུང་ནས་གྲུབ་མཐའ་ཕྱིན་ཅི་ལོག་པ་ལ་ཞེན་པའི་ཕྱི་རོལ་པ་རྣམས་ཀྱི་ལ་ལས་ཕྱྭ་དང་དབང་ཕྱུག་ལ་སོགས་པ་རྟག་པ་ཉིད་དུ་མཐོང་བ་དང་། ལ་ལས་རྒྱུ་འབྲས་དང་སྔ་ཕྱིའི་སྲིད་པ་ལ་སོགས་པ་མེད་པར་སྟོང་བ་ཕྱང་ཆད་པར་མཐོང་བ་སོགས་རྒྱུ་འབྲས་ཀྱི་དངོས་པོ་ཐམས་ཅད་ལོག་པར་མཐོང་བ་ཡི་གྲུབ་མཐའ་ཐམས་ཅད་ཚུར་བསྡུ་ན། མུ་སྟེགས་མུར་ཐུགས་ཕྱལ་བ་རྒྱང་འཕེན་སྟེ་རྣམ་པ་བཞིས་བསྡུས་པ་ཡིན་པས་དེ་དག་རྣམས་ཀྱི་རྒྱུད་སྟོན་པ་སྤྲུལ་པའི་སྐུས་ཐུགས་རྗེས་བྱིན་གྱིས་བརླབས་ཏེ་ཕྱིན་ཅི་ལོག་པའི་ལམ་ནས་བཟློག་སྟེ། རྒྱུ་དགེ་སྡིག་དང་འབྲས་བུ་བདེ་སྡུག་ལ་བླང་དོར་བྱེད་པའི་ཚུལ་མ་ནོར་བར་ལུང་བསྟན་པའི་སྒོ་ནས་སྒོ་གསུམ་གྱི་སྡིག་པའི་ལས་སྤོང་ཞིང་སེམས་དགེ་བའི་ལམ་ལ་གནས་པའི་འཁོར་དགེ་སློང་ཕ་མ་གཉིས་དང་དགེ་བསྙེན་ཕ་མ་གཉིས་ཏེ་རྣམ་པ་བཞི་པོ་ནི་བསྐལ་པ་ཆེན་པོ་གསུམ་ལ་སོགས་པ་ཡུན་རིང་པོའི་བར་དུ་རྒྱུ་འབྲས་རྩོལ་སྒྲུབ་ཀྱིས་ས་ལ་གནས་པའི་འཁོར་རྣམས་ཏེ། དེ་ལྟར་ཡང་། ཀློང་ཆེན་རབ་འབྱམས་ལས། འཁོར་ནི་ལྷ་མི་མུ་སྟེགས་བསྟན་གསོ་རྣམས། །དབང་པོ་སེམས་བསྒྱུར་ཐུགས་རྗེའི་བྱིན་རླབས་ནས། །དགེ་སློང་ཕོ་མོ་དགེ་བསྙེན་ཕོ་མོ་བཞི། །མ་ངེས་སྣ་ཚོགས་སྤྲུལ་སྐུའི་འཁོར་ཡིན་ཏེ། །ཞེས་གསུངས་པ་དེ་ལྟ་བུའི་སྤྲུལ་པའི་སྐུའི་འཁོར་དང་སྟོན་པ་གཉིས་སུ་སྣང་བ་ཡང་གཞན་མིན་པར་ཀུན་བྱེད་ང་ཡིས་ཐུགས་རྗེའི་རང་མདངས་མངོན་དུ་ཕྱུང་བ་ཡིན་ནོ། །ཞེས་གསུངས་སོ། །གསུམ་པ་ནི། གོང་དུ་བསྟན་པ་དེ་ལྟ་བུའི་སྐུ་གསུམ་གྱི་སྟོན་པ་རྣམས་ཀྱིས་རང་རང་གི་འཁོར་ཚོགས་རྣམས་ཀྱི་ཐུགས་ཡང་དག་པའི་ཡེ་ཤེས་སོ་སོ་རང་རིག་པའི་ཡུལ་ཅན་གྱི་ངོ་ལ། ཀུན་བྱེད་བྱང་ཆུབ་སེམས་ཀྱི་རང་བཞིན་ངོ་བོ་རང་བཞིན་ཐུགས་རྗེ་གསུམ་གྱི་རྩལ་ལས་ཤར་བའི་བསྟན་པ་ཡང་དག་པ་ངེས་པའི་དོན་ཅན་གྱི་ཐེག་པ་རྣམས་བསྟན་པར་མཛད་པ་ལྟར་འཁོར་རྣམས་ཀྱིས་རང་རང་ལ་ཇི་ལྟར་བསྟན་པའི་དོན་མ་ནོར་བར་མཐོང་བའི་ལུང་དང་རྟོགས་པའི་བསྟན་པ་དེ་ཡང་ཀུན་བྱེད་བྱང་ཆུབ་སེམས་ཀྱི་ངོ་བོ་མངོན་དུ་ཕྱུང་བ་ཡིན་པར་གསུངས་ཏེ། མདོ་བཅུ་ལས། ཡེ་ཤེས་ཐུགས་ཀྱི་རིག་པ་ཡིས། །རང་གི་རང་བཞིན་ངོ་བསྟན་ཏེ། །དེ་མཐོང་བསྟན་པས་དེ་འདུས་པས། །དེ་ལ་དེ་བསྟན་དེ་ཡང་མཐོང་། །དེ་ནི་བསྟན་པ་ཞེས་སུ་བཤད། །ཅེས་སོ། །གཉིས་པ་ནི། ཀྱེ་སེམས་དཔའ་ཆེན་པོ་མངོན་དུ་ཕྱུང་བ་ཞེས་བྱ་བ་དེ་བྱེད་པ་པོ་གང་གིས་ཆོས་གང་ཞིག་ཚུལ་ཇི་ལྟར་མངོན་དུ་ཕྱུང་བ་ཡིན་སྙམ་ན། དེ་ནི་བྱེད་པ་པོ་གང་གིས་མངོན་དུ་ཕྱུང་ན་སྟོན་པ་ཀུན་བྱེད་ང་ཡིས་མངོན་དུ་ཕྱུང་བ་ཡིན་ལ། གང་ཞིག་མངོན་དུ་ཕྱུང་བ་ནི་སེམས་ཉིད་རང་བྱུང་གི་ཡེ་ཤེས་གནས་ལུགས་མ་བཅོས་པ་དེ་ཁོ་ན་ཉིད་ཀྱི་རང་བཞིན་དེ་མངོན་དུ་ཕྱུང་བ་ཡིན་ནོ། །དེ་གང་གི་དོན་དུ་མངོན་དུ་ཕྱུང་བ་ཡིན་སྙམ་ན་རྟོགས་པར་བྱ་བའི་ཡུལ་ཆོས་ཉིད་དེ་བཞིན་ཉིད་སྙིང་པོ་བྱང་ཆུབ་ཀྱི་སེམས་དེ་ལ་སོ་སོར་ལྟ་བ་དང་རྟོགས་པར་བྱེད་པ་ཡི་སྐུ་གསུམ་གྱི་སྟོན་པའི་འཁོར་གྱི་ཚོགས་རྣམས་ཀྱི་དོན་དུ་མངོན་དུ་ཕྱུང་བ་ཡིན་ལ། ཚུལ་ཇི་ལྟར་མངོན་དུ་ཕྱུང་ན་ཐེག་པའི་རིམ་པ་གང་ཞིག་ལ་ལ་བདེན་པ་བཞི་ལ་བླང་དོར་དུ་བྱ་བའི་སྒོ་ནས་ཀུན་ཉོན་ཕྱོགས་ཀྱི་ཆོས་རྣམས་སྤོང་བའི་དོན་དུ་ཕྱུང་པ་དང་། ལ་ལ་རྟེན་འབྲེལ་བཅུ་གཉིས་ལུགས་ལྡོག་ཏུ་བསྒོམ་པའི་སྒོ་ནས་སྡུག་ཀུན་གྱི་ཆོས་རྣམས་འགེགས་པར་བྱེད་པའི་དོན་དུ་ཕྱུང་བ་དང་། ལ་ལ་བདེན་གཉིས་ཀྱི་ངོ་བོར་གྱུར་པའི་ཆོས་རྣམས་ལ་བླང་དོར་དུ་སྤྱོད་པའི་དོན་དུ་ཕྱུང་བ་གསུམ་ནི་ཀུན་འབྱུང་འདྲེན་པའི་ཐེག་པ་གསུམ་དང་། ལ་ལ་གཟུང་འཛིན་གྱི་རྟོག་པ་རྣམས་དག་པར་བྱེད་པའི་དོན་དུ་ཕྱུང་བ་དང་། ལ་ལ་ལྷ་དང་གཙང་བའི་རིགས་རྣམས་བླང་བ་དང་རྟོག་པ་དང་རྨེ་བའི་རིགས་རྣམས་དོར་བར་བྱ་བའི་དོན་དུ་ཕྱུང་བ་ནི་དཀའ་ཐུབ་རིག་བྱེད་ཀྱི་ཐེག་པ་དང་། ལ་ལར་བདག་ཉིད་ཡེ་ནས་དག་པ་ལྷ་དང་དཀྱིལ་འཁོར་གྱི་ངོ་བོར་གནས་པ་ལམ་བསྐྱེད་རྫོགས་ལ་བརྟེན་ནས་མངོན་དུ་བྱེད་པའི་དོན་དུ་ཕྱུང་བ་ནི་དབང་བསྒྱུར་ཐབས་ཀྱི་ཐེག་པ་སྟེ། དེ་ལྟར་མངོན་དུ་ཕྱུང་བ་བཞིན་དུ་འཁོར་རྣམས་ཀྱིས་ཀྱང་ལ་ལས་ཀུན་བྱེད་བྱང་ཆུབ་སེམས་ཀྱི་རང་བཞིན་མངོན་དུ་སྣང་བའི་ཆོས་རྣམས་སྤང་བར་བྱ་བའི་ཡུལ་དུ་མཐོང་བ་དང་། ལ་ལས་དགག་པའི་ཡུལ་དུ་མཐོང་བ་དང་། ལ་ལས་གཉེན་པོ་ལ་སྤྱོད་པའི་ཡུལ་དུ་མཐོང་བ་དང་། ལ་ལས་དག་བྱའི་སྟེ་དག་པར་བྱ་བའི་ཡུལ་དུ་མཐོང་བ་དང་། ལ་ལས་བླང་དོར་དུ་བྱ་བའི་ཡུལ་དུ་མཐོང་བ་དང་། ལ་ལས་བདག་ཉིད་ཆེན་པོར་དབང་བསྡུའི་སྟེ་དབང་དུ་བསྡུ་བར་བྱ་བའི་ཡུལ་དུ་མཐོང་བ་སྟེ་རྒྱས་པར་ན་དུག་སྡོང་གི་སྟོང་ཐུན་དང་སྦྱར་ཏེ་གསུངས་པ་ལྟར་ཤེས་པར་བྱ་སྟེ། དེ་ལྟར་རྒྱུ་དང་འབྲས་བུའི་སྟོན་པ་གསུམ་པོ་ཡི་འཁོར་ཚོགས་རྣམས་ཀྱིས་དེ་ལྟར་མཐོང་བའོ། །གསུམ་པ་ནི། ཀྱེ་སེམས་དཔའ་ཆེན་པོ། དེ་ལྟར་ཆོས་ཐམས་ཅད་སྟོན་པ་ཀུན་བྱེད་ང་ཡི་རང་བཞིན་མངོན་དུ་ཕྱུང་བ་ཡིན་པའི་ཚུལ་འདི་ཉིད་ནི་སེམས་དཔའ་རྡོ་རྗེ་ཁྱོད་ཀྱིས་འཁོར་རྣམས་ལ་དེ་བཞིན་ཏུ་ངེས་པར་ལུང་སྟོན་ཅིག །དེ་ཡང་ཀུན་བྱེད་ང་ནི་སེམས་དཔའ་རྡོ་རྗེ་ཁྱེད་ཀྱི་ཐུགས་རིག་པ་རང་བྱུང་གི་ཡེ་ཤེས་ཀྱི་ངོ་བོ་སྟེ་དེ་ལས་ཐ་དད་དུ་མེད་པས་ན། སྟོན་པ་ང་ཡི་རང་བཞིན་མངོན་དུ་བྱུང་བ་གང་ཡིན་པ་དེ་སེམས་དཔའ་ཆེན་པོ་ཁྱེད་ཀྱི་རང་བཞིན་མངོན་དུ་ཕྱུང་བ་ཡང་ཡིན་ལ། དེ་ལྟར་ཆོས་ཐམས་ཅད་ཁྱེད་ཀྱི་རང་བཞིན་མངོན་དུ་ཕྱུང་བ་ཡིན་པར་བསྟན་པའི་ཚུལ་དེས་ནི། སེམས་དཔའ་ཆེན་པོས་རང་གི་ཆོས་ཉིད་བྱང་ཆུབ་སེམས་ཀྱི་རང་བཞིན་སྤྲོས་བྲལ་བློ་ལས་འདས་པའི་གནས་ལུགས་མ་བཅོས་ཡེ་སངས་རྒྱས་པའི་ཚུལ་དེ་རང་ངོ་ཤེས་པར་གྱིས་ཤིག །དེ་བཞིན་དུ་ཕྱི་ནང་སྣོད་བཅུད་དུ་སྣང་བའི་ཆོས་ཕུན་སུམ་ཚོགས་པ་གསུམ་གྱིས་བསྡུས་པ་འདི་དག་ཐམས་ཅད་རང་གི་རིག་པ་བྱང་ཆུབ་སེམས་ཀྱི་ངོ་བོ་འགག་པ་མེད་པའི་རྩལ་ལས་ཤར་བ་ཡིན་པར་ཡང་ཤེས་པར་གྱིས་ལ། དེ་ལྟར་སེམས་དཔའ་ཉིད་ཀྱིས་ཇི་ལྟར་རྟོགས་པ་ལྟར་རྒྱུ་འབྲས་ཀྱི་སྟོན་པ་གསུམ་གྱི་འཁོར་རྣམས་ལ་ཡང་དེ་བཞིན་དུ་ལུང་སྟོན་ཅིག །ཅེས་གསུངས་སོ། །གཉིས་པ་དེ་ཉིད་རང་སེམས་ལས་གཞན་དུ་མི་ཚོལ་བར་འཁོར་གྱིས་བསྒྲགས་པ་ལ་གསུམ་སྟེ། ཕུན་སུམ་ཚོགས་པ་ཐམས་ཅད་སེམས་ཉིད་དུ་བསྟན་པ། སེམས་ལས་གཞན་དུ་བཙལ་བའི་ཉེས་པ། རང་བཞིན་རྫོགས་པ་ཆེན་པོ་ཡང་རབ་པའི་གང་ཟག་ལ་སྣང་ཚུལ་ལོ། །དང་པོ་ནི། སྟོན་པ་ཀུན་བྱེད་ཉིད་ཀྱིས་སེམས་དཔའ་རྡོ་རྗེ་ལ་ཉིད་ཀྱི་རང་བཞིན་འཁོར་ཚོགས་རྣམས་ལ་སྟོན་ཅིག་པར་བསྐུལ་བ་དེ་ནས་སེམས་དཔའ་རྡོ་རྗེ་དེས་རྒྱུ་འབྲས་ཀྱི་ཐེག་པ་ལ་གནས་པའི་སྟོན་འཁོར་རྣམས་ལ་སྟོན་པ་ཀུན་བྱེད་ཉིད་ཀྱིས་ཇི་ལྟར་གདམས་པའི་དོན་དེ་འདི་སྐད་ཅེས་གསུངས་སོ། །དེ་ཡང་ཇི་ལྟར་ཞེ་ན་ཀྱེ་རྒྱུ་དང་འབྲས་བུའི་ཐེག་པ་ལ་སྤྱོད་པའི་སྐུ་གསུམ་གྱི་སྟོན་པ་དང་འཁོར་དུ་སྣང་བ་རྣམས་ཞེས་བོས་ནས། རྒྱལ་བ་སྐུ་གསུམ་གྱི་སྟོན་པའི་སྟོན་པ་ཀུན་བྱེད་རྒྱལ་པོ་ཉིད་ཀྱིས་སྣང་སྲིད་སྣོད་བཅུད་ལ་སོགས་པའི་ཆོས་ཀུན་བྱས་ཤིང་མངོན་དུ་ཕྱུང་སྟེ། དེ་ཡང་སྟོན་པ་དང་བསྟན་པ་དང་འཁོར་གྱི་རང་བཞིན་དུ་ཕུན་སུམ་ཚོགས་པར་བྱས་ལ། དེ་ལྟ་བུའི་ཕུན་སུམ་ཚོགས་པ་གསུམ་མངོན་དུ་ཕྱུང་བ་དེ་གཞན་ཞིག་མ་ཡིན་པར་ཀུན་བྱེད་རྒྱལ་པོ་རང་གི་རང་བཞིན་མངོན་དུ་ཕྱུང་བ་ཡིན་པ་དང་། ཀུན་བྱེད་བྱང་ཆུབ་སེམས་ཀྱི་རང་བཞིན་གང་ཡིན་པར་དེ་འཁོར་གྱི་རང་བཞིན་ཡང་ཡིན་པར་བསྟན་པས་དེ་བས་ན། ཚུལ་དེ་བཞིན་དུ་རྒྱུ་འབྲས་ཀྱི་སྟོན་འཁོར་ཁྱེད་རྣམས་ཀྱིས་རང་བྱུང་གདོད་མའི་མགོན་པོ་ཀུན་བྱེད་ཀུན་ཏུ་བཟང་པོ་དེ་ཉིད་གཞན་དུ་མེད་པར་རང་གི་རིག་པ་བྱང་ཆུབ་སེམས་ཀྱི་རང་བཞིན་ཀུན་ཤེས་ཀུན་རིག་གི་བདག་ཉིད་ཅན་འདི་ཉིད་ཡིན་པར་རྟོགས་པར་གྱིས་ལ། ཕུན་སུམ་ཚོགས་པ་གསུམ་གྱིས་བསྡུས་པའི་འཁོར་འདས་ཀྱི་ཆོས་འདི་དག་ཐམས་ཅད་ཀྱང་རང་གི་སེམས་ཉིད་རང་བྱུང་གི་ཡེ་ཤེས་ཀྱི་ངོ་བོ་འགག་པ་མེད་པའི་རྩལ་སྣང་རང་ལ་ཤར་བ་ཡིན་པར་རྟོགས་པའི་སྒོ་ནས། ཆོས་དེ་དག་ཐམས་ཅད་ལ་རང་ལས་གཞན་ཡིན་པར་བཟུང་སྟེ་གཟུང་འཛིན་ཐ་དད་དུ་མ་རྟོག་པར་རང་གི་སེམས་ཉིད་ཀྱི་རྩལ་སྣང་ཡིན་པར་ཀུན་གྱིས་རྟོགས་པར་གྱིས་ཤིག །ཆོས་སྐུ་ཀུན་བྱེད་རྒྱལ་པོ་ཉིད་དང་ཡེ་ནས་དབྱེར་མེད་པའི་དོན་དེ་ཇི་བཞིན་དུ་མངོན་དུ་འགྱུར་རོ་ཞེས་གདམས་སོ། །ཚུལ་དེ་ལྟར་སློབ་དཔོན་ཆེན་པོས་ཀྱང་། ད་ལྟའི་ཤེས་རིག་མ་འགག་ས་ལེ་བ། །ཀུན་བཟང་གདོད་མའི་མགོན་པོ་དེ་ཀའོ། །ཞེས་དང་། བྱང་ཆུབ་ཀྱི་སེམས་རྨད་བྱུང་ལས། །སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་འདི་དག་ཐམས་ཅད་ནི། དེ་བཞིན་གཤེགས་པ་རྣམས་ཀྱི་ཐུགས་ལས་བྱུང་ཞིང་ཐུགས་རྨད་དུ་བྱུང་བར་མ་གྱུར་པ་མེད་དོ། །ཞེས་གསུངས་པ་བཞིན་ནོ། །གཉིས་པ་ལ་དྲུག་སྟེ། གཉིས་མེད་བྱང་ཆུབ་ཀྱི་སེམས་ལ་སྤང་གཉེན་རང་མཚན་དུ་ཞེན་པས་ཉན་ཐོས་པས་རྣལ་མིའི་དོན་མི་མཐོང་བ། དགག་སྒྲུབ་གཉིས་མེད་ཀྱི་སེམས་ལ་སྤངས་འགེགས་མཚན་མར་ཞེན་པ་རང་རྒྱལ་ཆོས་ཉིད་ལས་རིང་བ། སེམས་ཉིད་སྒྲུབ་གསལ་ལས། འདས་པ་སྦྱང་བགྲོད་བྱ་བཙལ་དུ་གནས་པའི་བྱང་སེམས་སྐྱེ་མེད་དང་རིང་བ། ཆོས་ཉིད་དག་གྲོལ་ལས་འདས་པ་ཕྱི་ནང་དག་པར་སྦྱོར་བའི་ཀྲྀ་ཡ་གནས་ལུགས་དང་འགལ་བ། བླང་དོར་གཉིས་མེད་ཀྱི་དོན་ལ་ཏིང་འཛིན་བླང་དོར་དུ་ཞེན་པའི་ཡོ་ག་གཉིས་མེད་ལས་རིང་བ ། ལྷུན་གྲུབ་རྩོལ་སྒྲུབ་ལས་འདས་པའི་ཀུན་བྱེད་བྱ་རྩོལ་བསྐྱེད་རྫོགས་ལ་ཞེན་པའི་མ་ཧཱ་ཨ་ནུ་བ་སྙིང་པོ་ཡེ་ཤེས་ལས་རིང་བའོ། །དང་པོ་ནི། དེ་ལྟར་ཆོས་རྣམས་རང་གི་རང་བཞིན་ཡིན་པར་མ་ཤེས་ན་ཅིར་འགྱུར་སྙམ་ན། དེ་ལ་ཉན་ཐོས་རྣམས་ཀྱིས་ཆོས་ཐམས་ཅད་རང་གི་ཆོས་ཉིད་བྱང་ཆུབ་སེམས་ཀྱི་རང་བཞིན་ཉིད་ཡིན་པར་མ་རྟོགས་ཏེ་སྒྲིབ་པར་བྱེད་པའི་ཚུལ་ནི། བརྟགས་བྱའི་ཡུལ་ཕྱི་ནང་སྣོད་བཅུད་ཀྱི་དངོས་པོ་དེ་ཐམས་ཅད་རང་སེམས་དེ་བཞིན་ཉིད་ཀྱི་རང་བཞིན་གཟུང་འཛིན་གཉིས་མེད་ཀྱི་ངོ་བོ་ཡིན་པ་ལ་གང་ཟག་གི་བདག་མེད་ཙམ་དུ་རྟོགས་པ་ལས་ཆོས་ཀྱི་བདག་རང་བཞིན་མེད་པར་མ་རྟོགས་པར་ཕྱི་གཟུང་བ་རྡུལ་ཕྲན་ཆ་མེད་དང་། ནང་འཛིན་པ་སྐད་ཅིག་ཆ་མེད་ཀྱིས་བརྩམ་པའི་གཟུང་འཛིན་ཐ་དད་དུ་བལྟ་ཞིང་། ཡུལ་དེ་ཐམས་ཅད་སྡུག་ཀུན་གཉིས་ཀྱིས་བསྡུས་པས་གནོད་པའི་རང་བཞིན་དུ་གྱུར་པས་ཕུང་པོ་ལྔ་ལ་གཤེད་མ་རལ་གྲི་ཐོག་པ་དང་ཁམས་རྣམས་ལ་སྦྲུལ་གདུགས་ལྟ་བུར་བལྟ་བ་སོགས་མདོར་ན་དགྲ་དང་ཚེར་མ་ལྟ་བུར་བརྟགས་ནས་སྤང་བྱར་ལྟ་བའི་ཕྱིར་ན་རང་གི་རང་བཞིན་སྤང་གཉེན་གཉིས་དང་བྲལ་བའི་ཆོས་ཉིད་དེ་སྤངས་ནས་བསྐལ་པ་བརྒྱ་ཕྲག་སོགས་ཡུན་རིངས་སུ་སྟེ་ཡུན་རིངས་པོའི་བར་དུ་ཆོས་ཉིད་སྤྲོས་པ་དང་བྲལ་བ་རང་གི་སེམས་ཉིད་རང་བྱུང་ཡེ་ཤེས་ཀྱི་རང་ཞལ་མི་མཐོང་བར་འགྱུར་ལ། དེ་ལྟར་རང་གི་སེམས་ཀྱི་ཆོས་ཉིད་དེ་མ་མཐོང་ན་བསྐལ་པ་བརྒྱ་ཕྲག་སོགས་ཡུན་རིངས་སུ་རང་གི་རང་བཞིན་རིག་པ་བྱང་ཆུབ་ཀྱི་སེམས་དེ་མི་མཐོང་བར་སྤོངས་བར་འགྱུར་བས་བྱ་རྩོལ་གཉིས་མེད་ཆོས་སྐུ་བདེ་བ་ཆེན་པོའི་གོ་འཕང་དེ་མི་ཐོབ་པར་གསུངས་སོ། །ཚུལ་འདི་ལྟར་སྤྲོས་བྲལ་དོན་གསལ་ཆེན་པོའི་རྒྱུད་ལས། གང་ཟག་བདག་མེད་རྟོགས་ཀྱང་ཆོས་ཀྱི་བདག་མ་སྤངས། །ཆོས་ཀྱི་བདག་ནི་གཟུང་འཛིན་གཉིས་སུ་སྣང་། །འཛིན་པའི་རྒྱུན་རྟོག་སྐད་ཅིག་འགགས། །རྟག་ཆད་གཉིས་ལས་འདས་པར་བལྟ། །དཔེར་ན་ཆུ་བོ་གང་གཱ་བཞིན། །གཟུང་བྱ་ཀུན་རྫོབ་རྣམ་པར་གསལ། །དོན་དམ་རྡུལ་ཕྲན་རྫས་སུ་འདོད། །དཔེར་ན་གཡག་རྔ་ནེ་སེང་བཞིན། །མདོ་སྡེ་བྱེ་བྲག་གཉིས་སུ་འདོད། །ཉན་ཐོས་ཞེ་འདོད་ཡིན་པས་ན། །གཉིས་མེད་བདེ་ཆེན་དོན་དང་འགལ། །ཞེས་གསུངས་སོ། །གཉིས་པ་ནི། དེ་བཞིན་དུ་རང་རྒྱལ་རྣམས་ཀྱིས་ཡུལ་དེ་ཐམས་ཅད་རང་གི་སེམས་ཉིད་རང་བྱུང་ཡེ་ཤེས་ཀྱི་བདག་ཉིད་དུ་མ་རྟོགས་པར་ཡུལ་དེ་ཕྱི་ནང་རྟེན་འབྲེལ་བཅུ་གཉིས་སྔ་མ་སྔ་མ་རྐྱེན་དང་ཕྱི་མ་ཕྱི་མ་རྐྱེན་ཅན་གྱི་ཚུལ་དུ་བྱུང་བའི་སྡུག་ཀུན་གཉིས་ཀྱི་མཚན་ཉིད་ཅན་དགྲར་གྱུར་པའི་རང་བཞིན་དུ་བརྟགས་ནས། རྟེན་འབྲེལ་ལུགས་འབྱུང་བཅུ་གཉིས་ལུགས་ལྡོག་གི་ཚུལ་དུ་བསྒོམས་པས་རང་གི་རིག་པ་བྱང་ཆུབ་སེམས་ཀྱི་རང་བཞིན་དེ་བཀག་པར་བྱེད་པ་དེས་ན། བསྐལ་པ་བརྒྱ་ཕྲག་ཡུན་རིངས་སུ་ཆོས་ཉིད་རང་གི་རང་བཞིན་ཀུན་བྱེད་བྱང་ཆུབ་ཀྱི་སེམས་དེ་མི་མཐོང་ལ། དེ་ལྟར་རང་གི་སེམས་ཀྱི་ཆོས་ཉིད་སྐྱེ་འགག་དང་བྲལ་བའི་དོོན་དེ་མ་མཐོང་ན། བསྐལ་པ་བརྒྱ་ཕྲག་ཡུན་རིངས་སུ་རང་གི་བྱང་ཆུབ་སེམས་ཀྱི་ངོ་བོ་དེ་རང་ཉིད་ཀྱིས་འགེགས་པར་བྱས་པས་ཡེ་ནས་བྱ་རྩོལ་མེད་པ་བདེ་ཆེན་འགྱུར་བ་མེད་པའི་གོ་འཕང་དེ་མི་ཐོབ་བོ། །དེ་ལས། གང་ཟག་བདག་མེད་གོང་མཐུན་ངེས་རྟོགས་ལ། །ཆོས་ཀྱི་ཁམས་ལ་ཕྱོགས་གཅིག་བདག་མེད་ལྟ། །དེ་གཉིས་མཚན་མར་ངེས་འཛིན་པ། །རང་རྒྱལ་ཞེ་འདོད་ལྟ་བ་ཡིས། །གཉིས་མེད་བདེ་ཆེན་དོན་ལས་ཉམས། །ཞེས་སོ། །གསུམ་པ་ནི། འདི་ལྟར་བྱང་ཆུབ་སེམས་དཔའི་ཐེག་པ་བས་ཚོགས་དྲུག་གི་ཡུལ་དུ་སྣང་བའི་ཕྱི་ནང་གི་ཆོས་དེ་ཐམས་ཅད་རང་གི་སེམས་ཉིད་རང་བྱུང་ཡེ་ཤེས་ཀྱི་ངོ་བོ་ཉིད་དུ་མ་རྟོགས་པར་ཡུལ་དང་ཡུལ་ཅན་དུ་སྣང་བའི་ཆོས་དེ་རྣམས་ཆོས་ཉིད་སྐྱེ་བ་མེད་པའི་རང་བཞིན་དུ་སྦྱངས་བར་བྱ་བའི་ཡུལ་དུ་མཐོངས་ནས་རང་གི་རིག་པའི་རང་བཞིན་དེ་རྩོལ་སྒྲུབ་ཀྱིས་སྦྱོང་བར་བྱེད་པའི་སྒོ་ནས་ས་བཅུ་ལམ་ལྔ་རིམ་གྱིས་བགྲོད་པར་འདོད་པའི་ཞེ་འདོད་དང་བཅས་པ་དེས་ན། བསྐལ་པ་ཆེན་པོ་གྲངས་མེད་གསུམ་སོགས་ཀྱི་བར་དུ་ཆོས་ཉིད་རང་གི་ངོ་བོ་གཉིས་མེད་བྱང་ཆུབ་སེམས་ཀྱི་རང་བཞིན་དེ་མི་མཐོང་ལ། དེ་ལྟར་རང་གི་སེམས་ཉིད་ཆོས་ཉིད་གཉུག་མའི་ཡེ་ཤེས་གདོད་ནས་བསལ་བཞག་བྲལ་བའི་རང་བཞིན་མ་མཐོང་སྟེ་སྒྲིབས་པར་གྱུར་པ་དེས་ན་རང་གི་སེམས་ཉིད་སྦྱང་བགྲོད་གང་ཡང་མི་དགོས་པར་གདོད་ནས་སྐྱེ་བ་མེད་པ་ཡེ་བབ་སོར་བཞག་ཆེན་པོའི་ལྟ་བའི་གདེང་དང་བྲལ་བར་འགྱུར་རོ། །དེ་ཉིད་ལས། བདག་གཉིས་བྲལ་བར་བལྟ་ཞིང་བདེན་གཉིས་ཚུལ་དུ་འདོད། །དོན་དམ་སེམས་སུ་བལྟ་བ་དང་། །ཀུན་རྫོབ་སྐུར་བ་མི་འདེབས་པ། །དཔེར་ན་རྨི་ལམ་སྨིག་རྒྱུ་བཞིན། །བྱང་ཆུབ་སེམས་དཔའི་ལྟ་བ་ཡིན། །གཉིས་མེད་ཡེ་ཤེས་དོན་ལས་གོལ། །ཞེས་གསུངས་སོ། །བཞི་པ་ནི། ཀྲྀ་ཡ་སྟེ་བྱ་བའི་རྒྱུད་ཀྱིས་ཡུལ་ཕྱི་ནང་སྣོད་བཅུད་དུ་སྣང་བའི་ཆོས་དེ་རྣམས་ཀུན་བྱེད་བྱང་ཆུབ་སེམས་ཀྱི་རང་བཞིན་ཡེ་ནས་གཟུང་འཛིན་གཉིས་དང་བྲལ་བས་རྣམ་པར་དག་པའི་རང་བཞིན་ཡིན་པ་ལ་དེ་ལྟར་མ་རྟོགས་པར་གཟུང་འཛིན་གཉིས་ཀྱི་དྲི་མ་ཡོད་པར་མཐོང་ནས། ཕྱི་རྫས་དང་ཡོ་བྱད་དག་པ་ལ་སོགས་པ་ཕྱི་ནང་རྟོག་པ་ཐམས་ཅད་དག་པ་གསུམ་གྱིས་ཉམས་སུ་ལེན་པར་བྱེད་ཅིང་། བདག་དང་ལྷ་གཉིས་རྗེ་དང་བྲན་གྱི་ཚུལ་དུ་བསྒོམ་པ་དང་། སྤྱོད་པ་ཁྲུས་དང་གཙང་སྦྲ་ལ་སོགས་པས་དག་པའི་ངོ་བོར་སྒྲུབ་པར་བྱེད་པ་དེས་ཀྱང་ཡེ་ནས་དག་པའི་ངོ་བོ་རང་གི་སེམས་ཀྱི་ཆོས་ཉིད་མ་མཐོང་བ་ཡིན་ལ། དེ་ལྟར་རང་སེམས་དག་པ་ཆེན་པོའི་རང་ཞལ་མ་མཐོང་བར་དེ་དང་བྲལ་བའི་ཕྱིར་ན། མི་ཡི་སྐྱེ་བ་ཚེ་རབས་བདུན་གྱི་བར་དུ་ཞེས་པ་འདི་རིག་འཛིན་གྲུབ་པའི་ཚེ་བསྐལ་པ་རེ་ཐུབ་པས་བྱ་རྒྱུད་རང་ལམ་ནས་བསྐལ་ཆེན་བརྒྱད་ན་འབྲས་བུ་ཐོབ་པར་བཤད་པ་དང་དོན་གནད་གཅིག་པར་གསུངས་པས། དེའི་བར་དུ་རང་གི་སེམས་ཀྱི་ཆོས་ཉིད་གནས་ལུགས་དག་གྲོལ་ལས་འདས་པ་དེ་མི་མཐོང་བར་གསུངས་པའོ། །དེ་ལས། མི་རྟོག་སྐྱེ་འགག་མེད་པའི་ངང་ལས་མ་གཡོས་ཀྱང་། །སེམས་དཔའ་རྣམ་གཉིས་རྗེ་དང་བྲན་དུ་བལྟ། །ཀྲི་ཡའི་ལྟ་བ་ཞེ་འདོད་དང་བཅས་པས། །ཀུན་བཟང་བདེ་ཆེན་དོན་དང་འགལ། །ཞེས་གསུངས་སོ། །ལྔ་པ་ནི། ཕྱི་རྒྱུད་གོང་མ་གཉིས་ཀྱིས་ཡེ་ནས་བཟང་ངན་བླང་དོར་གཉིས་སུ་གྲུབ་པ་མེད་པའི་རིག་པ་ཀུན་བྱེད་བྱང་ཆུབ་སེམས་ཀྱི་རང་མདངས་སུ་ཤར་བའི་ཆོས་འདི་རྣམས་ལ་ལ་ལ་བླང་བར་བྱ་བ་དང་ལ་ལ་མ་དག་མཚན་མའི་དངོས་པོ་དོར་བར་བྱ་བའི་ཡུལ་དུ་མཐོང་ནས་བཟང་ངན་སྤང་བླང་གཉིས་དང་བྲལ་བའི་སེམས་ཉིད་རང་བྱུང་གི་ཡེ་ཤེས་གཅིག་གི་རང་བཞིན་ཉིད་ཡིན་པ་ལ་མཚན་བཅས་དང་མཚན་མ་མེད་པའི་ཏིང་ངེ་འཛིན་བསྒོམ་པ་ལ་སོགས་པའི་རྩོལ་སྒྲུབ་ཀྱིས་བླང་དོར་བྱས་པ་ཡིན་ལ། དེ་ལྟར་རང་གིས་རང་གི་སེམས་ཉིད་གཅིག་གི་ངོ་བོ་ལ་བླང་དོར་གཉིས་སུ་མཐོང་ཞིང་དགག་སྒྲུབ་བྱས་པ་དེའི་དབང་གི་སྐྱེ་བ་བར་མ་ཆོད་པའི་ཚུལ་གྱིས་ལམ་ལ་སྦྱང་བརྩོན་བྱས་ཀྱང་མི་ཚེ་གསུམ་གྱི་བར་དུ་རང་གི་སེམས་ཉིད་བླང་དོར་གཉིས་སུ་མེད་པའི་གནས་ལུགས་དེ་མི་མཐོང་བའི་ཉེས་པ་དང་བཅས་པའོ། །དོན་གསལ་ལས། མི་རྟོག་ངང་ལས་མ་གཡོས་སྐྱེ་འགག་བྲལ་བཞིན་དུ། །སེམས་དཔའ་རྣམ་གཉིས་སྤུན་དང་གྲོགས་པོར་བལྟ། །ཨུ་པ་ཡོ་གའི་འདོད་པ་ཡིས། །དབྱེར་མེད་ཡེ་ཤེས་བདེ་ཆེན་དོན་ལས་འགལ། །ཞེས་སོ། །དྲུག་པ་ནི། འདི་ལྟར་མ་ཧཱ་དང་ཨ་ནུ་གཉིས་ཀྱིས་ཡེ་ནས་མ་བཅོས་ལྷུན་གྱིས་གྲུབ་པའི་རང་བཞིན་རྩོལ་སྒྲུབ་ལས་འདས་པའི་ཀུན་བྱེད་བྱང་ཆུབ་ཀྱི་སེམས་ལ་རང་རང་གི་ལྟ་བ་དང་མཐུན་པར་བསྐྱེད་རྫོགས་རྣམ་པ་གཉིས་ཀྱིས་བཙལ་ཞིང་སྒྲུབ་པའི་ཡུལ་དུ་མཐོང་ནས། ཀུན་རྫོབ་དང་དོན་དམ་གྱི་སེམས་རྣམ་པ་གཉིས་བསྐྱེད་པ་ལ་སོགས་པའི་སྒོ་ནས་ཏིང་ངེ་འཛིན་རྣམ་པ་གསུམ་གྱིས་སྣོད་བཅུད་ཐམས་ཅད་དཀྱིལ་འཁོར་གཅིག་གི་རང་བཞིན་དུ་དབང་དུ་སྡུད་པའམ་དབང་བསྒྱུར་བར་བྱས་ཏེ་དག་མཉམ་བདེ་བ་ཆེན་པོའི་བདག་ཉིད་དུ་སྒྲུབ་པར་བྱེད་པ་སྟེ། དེ་ལྟར་རང་གི་ཆོས་ཉིད་རིག་པ་བྱང་ཆུབ་ཀྱི་སེམས་ཡེ་ནས་བཙལ་དུ་མེད་པ་ལྷུན་འབྱམས་བདེ་བ་ཆེན་པོ་ལ་བཙལ་བས་གསར་དུ་གྲུབ་པར་འདོད་པའི་ཕྱིར་ན་བཅུ་དྲུག་ཟླ་བས་སམ་ཟླ་བ་བཅུ་དྲུག་ལ་སོགས་པའི་ཚེས་ཚོམ་བུ་ཚོགས་བསྒྲུབ་བྱས་པ་ལ་བརྟེན་ནས། ཚེ་ལ་དབང་བའི་རིག་འཛིན་གྲུབ་སྟེ་སྐྱེ་བ་བཅུ་དྲུག་གི་ཡུན་དུ་ཕྱིར་བསྣུར་བའི་ལོ་སྟོང་དང་བརྒྱ་ཚོ་བཅུ་དྲུག་གི་ལོ་ཡི་བར་དུ་རིག་འཛིན་གྱི་ལུས་དེ་ཡིས་ནི་ཆ་ལུགས་ལོངས་སྐུ་ཡི་ཚུལ་གཟུང་ནས་ནི་རང་གི་སེམས་ཉིད་འོད་གསལ་བའི་ཡེ་ཤེས་ལྷུན་གྲུབ་རྩོལ་སྒྲུབ་ལས་འདས་པ་དེ་གཟོད་རྟོགས་པར་བྱེད་དགོས་པས་སྙིང་པོ་ཡེ་ཤེས་ལས་གོལ་ཞིང་རིང་བར་གསུངས་ཏེ། དེ་ཉིད་ལས། མ་སྐྱེས་འགག་པ་མེད་ཅིང་མི་རྟོག་གཡོ་བ་མེད་བཞིན་དུ། །ཁམས་དང་སྐྱེ་མཆེད་ལྷ་དང་ལྷ་མོར་བལྟ། །མ་ཧཱ་ཞེ་འདོད་མཚན་མར་འཛིན། །སྤྲོས་བྲལ་བདེ་བ་ཆེན་པོའི་དོན་ལས་གོལ། །མ་གཡོས་མི་རྟོག་སྐྱེ་འགག་མེད་བཞིན་དུ། །དབྱིངས་དང་ཡེ་ཤེས་ལྷ་དང་ལྷ་མོར་འཛིན། །ཨ་ནུའི་ཞེ་འདོད་ལྟ་བ་ཡིན། །དངོས་མེད་ཟང་ཐལ་རང་སྣང་བདེ་ཆེན་དོན་ལས་གོལ། །ཞེས་གསུངས་པ་ལྟར་རོ། །གསུམ་པ་ཡང་རབ་པའི་གང་ཟག་ལ་སྣང་ཚུལ་ནི། དེ་ལྟར་རྩོལ་སྒྲུབ་ཅན་གྱི་ཐེག་པ་ལ་གནས་པའི་གང་ཟག་རྣམས་ཀྱིས་རང་སེམས་ཆོས་སྐུའི་རང་ཞལ་རང་གིས་བསྒྲིབ་པའི་རྒྱུ་མཚན་དེས་ན། རང་གི་སེམས་ཀྱི་ཆོས་ཉིད་སྐྱེ་བ་མེད་པ་གདོད་མའི་འོད་གསལ་ཆེན་པོ་མངོན་དུ་ཕྱུང་བ་འདི་ཡིས་རྒྱུ་དང་འབྲས་བུ་ལ་རྟོག་པར་བྱེད་པའི་རྩོལ་སྒྲུབ་ཅན་དེ་རྣམས་ལ་ཕན་པ་མེད་ཀྱང་། སྔོན་གྱི་ལས་འཕྲོ་བཟང་བ་དང་ད་ལྟར་སྐལ་བར་ལྡན་པ་ཡི་གང་ཟག་རྒྱུ་འབྲས་རྩོལ་སྒྲུབ་ལས་འདས་པ་ཨ་ཏི་རྫོགས་པ་ཆེན་པོའི་དགོངས་དོན་ཇི་བཞིན་དུ་རྟོགས་པར་ནུས་པའི་ཡང་རབ་མཆོག་ལྡན་རྣམས་ཀྱིས་ད་ལྟ་ཉིད་ནས་བྱར་མེད་བློ་འདས་ཆེན་པོའི་དགོངས་པ་མངོན་དུ་གྱུར་ནས་ཁམས་གསུམ་འཁོར་བའི་གཡང་ས་རིག་པའི་རླབས་ཀྱིས་གཅོད་པའི་དགོས་ཆེད་ཡོད་པ་དེས་ན་དེ་ལྟ་བུའི་དོན་དུ་མངོན་དུ་ཕྱུང་བ་ཡིན་ནོ། །ཞེས་སེམས་དཔའ་རྡོ་རྗེས་གསུངས་སོ། །གསུམ་པ་དེ་ཐམས་ཅད་སེམས་ཉིད་དེ་བཞིན་ཉིད་ཀུན་བྱེད་ཉིད་ཀྱི་རང་བཞིན་དུ་བསྟན་པ་ལ་བཞི་སྟེ། རྒྱུ་འབྲས་ཀྱི་ཐེག་པས་མི་རྟོགས་པ། ཇི་བཞིན་པའི་གནས་ལུགས་བཤད་པ། ཕུན་སུམ་ཚོགས་པའི་རང་བཞིན་མངོན་དུ་ཕྱུང་ཚུལ། དེའི་འཐད་པ་རྒྱ་ཆེར་བཤད་པའོ། །དང་པོ་ནི། དེ་ལྟར་སྟོན་འཁོར་བསྟན་པ་ཐམས་ཅད་རང་སེམས་ལས་གཞན་དུ་མི་ཚོལ་བར་གདམས་པ་དེ་ནས་སྟོན་པ་ཀུན་བྱེད་རྒྱལ་པོ་ཉིད་ཀྱིས་སེམས་དཔའ་རྡོ་རྗེ་ལ་སོགས་པའི་འཁོར་གྱི་ཚོགས་ལ་རྒྱུ་འབྲས་ཀྱི་ཐེག་པ་འོག་མ་པ་རྣམས་ཀྱི་སེམས་ཉིད་མངོན་དུ་བྱུང་ཡང་མི་རྟོགས་པར་ལུང་བསྟན་པ་ནི། ཀྱེ་སེམས་དཔའ་ཆེན་པོ་ཀུན་བྱེད་བྱང་ཆུབ་ཀྱི་སེམས་ཡེ་བབ་ཀ་དག་ཆེན་པོ་ཟབ་གསལ་གཉིས་སུ་མེད་པའི་ཆོས་ཉིད་མངོན་དུ་ཕྱུང་ཞིང་བསྟན་པ་འདི་ནི་གཞན་དུ་མེད་པར་རང་གི་སེམས་ཉིད་རང་བྱུང་གི་ཡེ་ཤེས་གདོད་ནས་སྐྱེ་བ་མེད་པ་འདི་ཉིད་ཡིན་ཀྱང་། གོང་དུ་བསྟན་པའི་རྒྱུ་དང་འབྲས་བུ་ཡི་ཐེག་པ་ཅན་རྣམས་ཀྱིས་རང་སེམས་མངོན་དུ་ཕྱུང་བ་ཡིན་པར་མ་རྟོགས་ཏེ། ཐེག་པ་རང་རང་གི་ལམ་ལ་ཞེན་ནས་ཉན་རང་རྣམས་ཀྱིས་ཆོས་ཉིད་བྱང་ཆུབ་ཀྱི་སེམས་དེ་སྤོངས་ཞིང་འགེགས་པར་བྱས་པས་བསྐལ་པ་གྲངས་མེད་ཡུན་རིངས་སུ་སྤོང་འགེགས་ཀྱི་ལམ་དེ་ལ་གནས་པ་ལས་མཐར་འབྲས་བྱང་ཆུབ་ཆེན་པོ་མི་ཐོབ་པ་དང་། བྱང་སེམས་རྣམས་ཀྱིས་སྒྲིབ་གཉིས་སྦྱོང་ཤིང་ས་བཅུ་ལམ་ལྔ་རིམ་གྱིས་བགྲོད་པ་ལ་བསྐལ་པ་གྲངས་མེད་གསུམ་དུ་གནས་པ་དང་། ཀྲྀ་ཡ་བས་དག་པར་བྱེད་པའི་ཁྲུས་དང་གཙང་སྦྲའི་སྤྱོད་པ་ལ་ཞེན་པས་མི་ཚེ་བདུན་གྱི་བར་དུ་སྒྲིབ་པ་དང་། ཡོ་ག་བས་སྒོ་གསུམ་བྱིན་གྱིས་རློབས་པ་དང་ཆོ་འཕྲུལ་བཞི་ལ་སོགས་པའི་སྒོ་ནས་བླང་དོར་ཅན་གྱི་ལམ་ལ་གནས་པས་ནི་མི་ཚེ་གསུམ་གྱི་བར་དུ་ཐོགས་པ་དང་། མ་ཧཱ་དང་ཨ་ནུ་བས་ཆོས་ཐམས་ཅད་ཏིང་ངེ་འཛིན་གྱིས་དབང་དུ་སྡུད་ཅིང་བདག་ཉིད་ཆེན་པོའི་ངོ་བོར་སྒྲུབ་པར་འདོད་པས་ལོ་སྟོང་དང་བརྒྱ་ཕྲག་དྲུག་ཏུ་སྟེ་ལོ་སྟོང་དྲུག་བརྒྱའི་བར་དུ་ལོངས་སྤྱོད་རྫོགས་པའི་སྐུ་ཡི་ཆ་ལུགས་འཛིན་པ་དེ་ཡིས་རང་གི་སེམས་ཉིད་སྙིང་པོའི་ཡེ་ཤེས་དེ་གཟོད་རྟོགས་པར་བྱེད་དགོས་པ་ཡིན་ལ། དེ་ལྟ་བུའི་ཐེག་པ་འོག་མའི་བློ་ཅན་དེ་དག་ཀུན་གྱིས་ཀྱང་ཀུན་བྱེད་ཆོས་སྐུའི་དགོངས་པ་རང་སེམས་སྐྱེ་བ་མེད་པའི་དོན་དེ་ནམ་ཞིག་རྟོགས་པའི་དུས་ན་འོག་མའི་རྩོལ་སྒྲུབ་ཀུན་དང་བྲལ་ནས་མི་རྩོལ་མི་འབད་པར་བདེ་ཆེན་འགྱུར་བ་མེད་པའི་ས་ཐོབ་པར་འགྱུར་ཏེ། དེ་ཡང་འོག་མའི་ཐེག་པའི་ལམ་ནས་རྒྱུ་འབྲས་རྩོལ་སྒྲུབ་བྱས་པས་དེ་ལྟར་ཐོབ་པ་མིན་པར་ཡེ་ནས་རིག་པ་རང་གི་ངོ་བོ་རྩོལ་མེད་ཡེ་སངས་རྒྱས་པའི་བདག་ཉིད་དུ་གནས་པ་རྣལ་འབྱོར་བས་མངོན་དུ་མཐོང་བ་ཙམ་སྟེ། མུ་ཏིག་ཕྲེང་བའི་རྒྱུད་ལས། འབད་པས་གྲོལ་བ་མ་ཡིན་ཏེ། །ཡེ་ཉིད་ནས་ནི་གྲོལ་བར་གནས། །ཞེས་དང་། དཔལ་ས་ར་ཧས། གདོད་ནས་སྐྱེ་མེད་དེ་བཞིན་ཡིན་པ་ལ། །དེ་རིང་དཔལ་ལྡན་བླ་མས་བསྟན་པས་རྟོགས། །ཞེས་གསུངས་པ་བཞིན་ནོ། །གཉིས་པ་ལ་བརྒྱད་དེ། སེམས་ཉིད་རྩོལ་སྒྲུབ་ལས་འདས་པས་ཡེ་ནས་བྱང་ཆུབ་དུ་བསྟན་པ། གང་ལྟར་བརྟགས་པ་རང་བཞིན་གྱིས་སྟོང་པས་ཐེག་པ་འོག་མ་མིང་གིས་འཁྲུལ་པ། རེ་དོགས་རྩོལ་སྒྲུབ་ལས་འདས་པས་ཐ་མལ་བཟོ་མེད་དུ་བཞག་པ། སངས་རྒྱས་རང་སེམས་ཡིན་པས་གཞན་དུ་མི་བཙལ་བར་གདམས་པ། བཙལ་ན་དེ་ཉིད་གོལ་བས་ཚོལ་མཁན་དོན་མེད་དུ་བསྟན་པ། རྩེ་གཅིག་སེམས་གནས་ལ་ཞེན་པ་འཆིང་བའི་ཐེག་པར་བརྗོད་པ། རྣལ་དོན་བློ་ཆུང་ལ་བསྟན་ན་ཆོས་སྤོང་སྒྲོ་སྐུར་ལ་གནས་པ། རྒྱུ་འབྲས་རྩོལ་སྒྲུབ་ལས་འདས་པས་རང་སེམས་ཆོས་སྐུར་བསྟན་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །འདི་ལྟར་རྒྱུ་འབྲས་བླང་དོར་གྱི་ལམ་སྟོན་པར་བྱེད་པ་ཉན་རང་གི་ཐེག་པ་ནས་སྔགས་ཀྱི་ཐེག་པ་ཆེན་པོ་རྫོགས་པ་ཨ་ནུ་ཡོ་གའི་བར་གྱིས་བསྟན་པ་བཞིན་དུ་ཆོས་ཉིད་སྙིང་པོའི་ཡེ་ཤེས་རིག་པ་བྱང་ཆུབ་ཀྱི་སེམས་འདི་ནི་རྒྱུ་འབྲས་རྩོལ་སྒྲུབ་ཀྱིས་གསར་དུ་ཐོབ་པར་བྱེད་དགོས་པ་མ་ཡིན་གྱིས། ཀུན་བྱེད་ང་ཡི་ལུང་ཡེ་ནས་སྤང་བླང་བཅོས་བསྒྱུར་ལས་འདས་པར་བསྟན་པ་འདི་ཉིད་ཐེག་པ་ཀུན་གྱི་ནང་ནས་ངེས་པའི་དོན་མཐར་ཐུག་པ་ཡིན་པར་ཟུང་ཞིག །དེ་ཡང་ཚུལ་ཇི་ལྟར་ཞེ་ན་འདི་ལྟར་ཕྱི་ནང་འཁོར་འདས་ལ་སོགས་པར་སྣང་བའི་ཆོས་འདི་རྣམས་ཐམས་ཅད་དང་། རང་སེམས་གདོད་ནས་དག་པའི་ཆོས་ཉིད་དེ་བཞིན་ཉིད་སྨྲ་བསམ་སྤྲོས་པ་ཐམས་ཅད་དང་བྲལ་བ་འདི་གཉིས་ཡེ་ནས་དབྱེར་མེད་པ། སྣང་མཉམ་ཀུན་ཏུ་བཟང་པོའི་རོལ་པར་གཅིག་པ། སྟོང་མཉམ་ཀུན་ཏུ་བཟང་མོའི་རང་བཞིན་དུ་གཅིག་པ། གཉིས་མེད་བདེ་བ་ཆེན་པོའི་དབྱིངས་སུ་གཅིག་པ་ཡིན་ཏེ། རྩལ་རྫོགས་ལས། ཀུན་བཟང་ཡབ་ནི་ཡེ་ཤེས་ཅིར་ཡང་སྟོན། །ཀུན་བཟང་ཡུམ་ནི་ཐམས་ཅད་ངང་དུ་སྡུད། །མཚན་མའི་མིང་མེད་ཀུན་བཟང་སེམས་ཉིད་སྐུ། །འཛིན་པའི་སེམས་མེད་རང་སྣང་ཐབས་ཀྱིས་སྤྱོད། །ཅེས་དང་། ཆོས་དབྱིངས་རིན་པོ་ཆེའི་མཛོད་ལས། ཡེ་ནས་ལྷུན་གྱིས་གྲུབ་པའི་དབྱིངས་རུམ་འདིར། །འཁོར་བ་ཀུན་བཟང་མྱ་ངན་འདས་པ་བཟང་། །ཀུན་བཟང་ཀློང་ན་འཁོར་འདས་ཡེ་ནས་མེད། །སྣང་བ་ཀུན་བཟང་སྟོང་པ་ཀུན་ཏུ་བཟང་། །ཀུན་བཟང་ཀློང་ན་སྣང་སྟོང་ཡེ་ནས་མེད། །སྐྱེ་ཤི་ཀུན་བཟང་བདེ་སྡུག་ཀུན་ཏུ་བཟང་། །ཀུན་བཟང་ཀློང་ན་བདེ་སྡུག་སྐྱེ་ཤི་མེད། །བདག་གཞན་ཀུན་བཟང་རྟག་ཆད་ཀུན་ཏུ་བཟང་། །ཀུན་བཟང་ཀློང་ན་བདག་གཞན་རྟག་ཆད་མེད། །མེད་ལ་ཡོད་པར་འཛིན་པས་འཁྲུལ་བར་བཏགས། །རྟེན་མེད་རྨི་ལམ་འདྲ་བའི་རང་བཞིན་ལ། །འཁོར་འདས་རང་མཚན་ཞེན་པ་མཚར་རེ་ཆེ། །ཞེས་གསུངས་པ་ལྟར་མདོར་ན་ཡེ་ནས་སྤྲོས་བྲལ་བློ་འདས་ཆེན་པོ་རིག་པ་བྱང་ཆུབ་སེམས་ཀྱི་ཀློང་དུ་ཆོས་ཐམས་ཅད་གཉིས་མེད་མཉམ་རྫོགས་ཆེན་པོ་གཅིག་གི་རང་བཞིན་དུ་གནས་པ་ཡིན་པས་ན་རྒྱུ་འབྲས་ཀྱི་ཐེག་པ་རྣམས་ཀྱི་ལུགས་བཞིན་ཇི་ལྟར་སྣང་བའི་ཕྱི་ནང་སྣོད་བཅུད་ཀྱི་ཆོས་འདི་དག་ཐམས་ཅད་ལ་བཟང་ངན་བླང་དོར་ལ་སོགས་པ་གཉིས་ཆོས་སུ་རྟོག་པར་མ་བྱེད་ཅིག་ཅེས་པ་སྟེ། ཀློང་ཆེན་རབ་འབྱམས་ལས། ཆོས་ཀྱི་དབྱིངས་ལས་མ་གཏོགས་པའི། །སེམས་ཅན་བྱ་བ་གུད་ན་མེད། །གཅིག་དུ་མི་གནས་ཀུན་ལ་ཁྱབ། །ཆགས་པའི་ཚུལ་གྱིས་མཉམ་པར་གནས། །ཀུན་ལ་ཉེ་རིང་མེད་པས་ན། །གཉིས་མེད་ཀློང་ན་རྟག་པར་བཞུགས། །ཞེས་གསུངས་པ་བཞིན་དང་། དེ་བཞིན་དུ་རང་གི་སེམས་ཉིད་དེ་བཞིན་ཉིད་ལ་ནང་དུ་ཡང་རྟོག་ཅིང་དཔྱད་པར་མ་བྱེད་ཅིག་ཅེས་གདམས་ཏེ། དེ་ཅིའི་ཕྱིར་ཞེ་ན་རང་གི་སེམས་ཀྱི་གཤིས་ལུགས་ཆོས་ཉིད་དེ་བཞིིན་ཉིད་ཀྱི་རང་བཞིན་ཡེ་གྲོལ་ཀ་ནས་དག་པའི་ཆོས་ཉིད་ལ་བརྟགས་ཤིང་གཏན་ལ་དབབ་པར་བྱ་བའི་གཞི་རུ་གྲུབ་པ་གཞན་དུ་ཅི་ཡང་མེད་པར་འདི་ལྟར་སྣང་བའི་ཕྱི་ནང་སྣོད་བཅུད་ཀྱི་དངོས་པོ་འདི་ཐམས་ཅད་རང་གི་ཆོས་ཉིད་བྱང་ཆུབ་སེམས་ཀྱི་ངོ་བོ་རང་ལ་སྣང་བ་ཡིན་པས་དེ་ལས་གཞན་དུ་བརྟགས་ཤིང་བཙལ་དུ་མེད་ལ་འདི་ཡང་དོན་ལ་གྲུབ་པ་མེད་པར་མེད་སྣང་སྟོང་གཟུགས་ཀྱི་རོལ་པ་གཞི་མེད་རྩ་བྲལ་ཆེན་པོའི་རང་བཞིན་ཡིན་པས་དམིགས་གཏད་བློ་ཡི་འཛིན་ཞེན་ཀུན་དང་བྲལ་བར་མཛོད་ཅིག་ཅེས་གདམས་པ་སྟེ། གནས་ལུགས་རིན་པོ་ཆེའི་མཛོད་ལས། །ཇི་ལྟར་སྒྱུ་མའི་གཟུགས་བརྙན་ཅིར་སྣང་ཡང་། །སྟོང་པའི་རང་བཞིན་དངོས་པོ་མེད་པ་ལྟར། །སྣང་སྲིད་ཆོས་ཀུན་སྣང་བའི་དུས་ཉིད་ནས། །བྱང་ཆུབ་སེམས་ལས་མ་གཡོས་དངོས་པོ་མེད། །ཅེས་གསུངས་པ་བཞིན་ནོ། ། གཉིས་པ་ནི། དེ་ལྟར་ཆོས་ཐམས་ཅད་བྱང་ཆུབ་ཀྱི་སེམས་འདི་ལས་གཞན་དུ་མེད་པར་མ་རྟོགས་པར་འོག་མའི་ཐེག་པ་སོ་སོས་རང་རང་གི་བློས་བརྟགས་ཤིང་མིང་གིས་སྒྲོ་བཏགས་པ་བདེན་གཉིས་སོ་སོར་ཕྱེས་ནས་ཀུན་རྫོབ་ཏུ་སྣང་ལ་དོན་དམ་དུ་མི་སྣང་བར་སྟོང་པ་ཉིད་ཡིན་ནོ་ཞེས་འདོགས་པར་བྱེད་ཀྱང་། དེ་ལྟ་བུའི་དོན་དམ་དང་ཀུན་རྫོབ་གཉིས་ཐ་དད་དུ་མེད་པར་བདེན་པ་དབྱེར་མེད་གཅིག་གི་རང་བཞིན་ཡིན་ལ། བདེན་པ་གཅིག་ཅེས་པ་དེ་ཡང་ཚིག་གིས་མཚོན་པ་ཙམ་ལས་ཡང་དག་པ་ཞིག་ངེས་པར་ཡོད་པ་མ་ཡིན་པས་ན་བདེན་པ་གཅིག་ཡིན་ནོ་ཞེས་ཡང་དག་པར་འདོགས་པར་བྱེད་པ་ཆོས་སྐུ་ཀུན་བྱེད་རྒྱལ་པོ་ང་ཡང་འཁྲུལ་པར་གྱུར་པ་ཁོ་ན་ཡིན་ནོ་ཞེས་དངོས་དོན་སྨྲ་བསམ་བརྗོད་པ་ཀུན་དང་བྲལ་བའི་རང་བཞིན་དུ་བསྟན་པའོ། །ཚུལ་དེ་ལྟར་མཚན་ཉིད་ཐེག་པ་ལས་ཀྱང་། སྐྱེ་བ་མེད་པ་བདེན་པ་གཅིག་ཡིན་ན། །དེ་ལ་ཁ་ཅིག་བདེན་པ་བཞི་ཞེས་བརྗོད། །བྱང་ཆུབ་སྙིང་པོར་འདུག་ན་བདེན་གཅིག་ཀྱང་། །གྲུབ་པ་མ་མཐོང་བཞི་ལྟར་ག་ལ་ཞིག །ཅེས་གསུངས་སོ། །གསུམ་པ་ནི། གཞན་ཡང་སེམས་ཉིད་ཡེ་སངས་རྒྱས་པར་མ་རྟོགས་པར་བླང་དོར་འབད་རྩོལ་གྱི་སྒོ་ནས་ས་ལམ་རིམ་པར་བགྲོད་དེ་འབྲས་བུ་བླ་ན་མེད་པའི་བདེ་བ་ཞིག་གཟོད་ཐོབ་པར་འདོད་པ་དེ་ཡང་རེ་འདོད་ཆགས་པའི་ནད་ཀྱིས་ཟིན་པ་ཡིན་པས་ན། དེ་ལྟ་བུའི་རེ་དོགས་ཀྱི་འདོད་པ་མེད་པར་བྱ་བྱེད་རྩོལ་སྒྲུབ་ཐམས་ཅད་བོར་དེ་མ་བཅོས་རང་བབ་ཀྱི་ངང་ལ་གནས་པས་ཡེ་བདེ་འགྱུར་བ་མེད་པའི་དོན་དེ་དང་ངན་ཤུགས་ཀྱིས་ལེན་ཅིང་ཐོབ་པར་བྱེད་པ་ཡིན་ཏེ། ཅིའི་ཕྱིར་ན་འབྲས་བུ་སངས་རྒྱས་ཀྱི་གོ་འཕང་དེ་བླང་དོར་བྱ་རྩོལ་གྱི་སྒོ་ནས་བསྒྲུབ་པས་གསར་དུ་གྲུབ་པ་མ་ཡིན་ཏེ་མ་བཙལ་རང་བཞིན་དུ་བཞག་པས་འབད་མེད་ལྷུན་གྱིས་གྲུབ་པ་ཡིན་པའི་ཕྱིར་ན་རེ་དོགས་དགག་སྒྲུབ་ཀྱི་བློ་བོར་ལ་བླ་མེད་བྱང་ཆུབ་ཀྱི་གོ་འཕང་ཞིག་གཞན་ནས་མ་བཙལ་བར་རང་བཞིན་བཅོས་བསྒྱུར་དང་བྲལ་བའི་ངང་དུ་ཐ་མལ་རང་བབ་ཏུ་གནས་པར་གྱིས་ལ་སེམས་ཀྱི་དམིགས་གཏད་ཅི་ལའང་མི་འཆའ་བར་མི་རྟོག་མཉམ་པ་ཉིད་དུ་ཞོག་ཅིག་ཅེས་གདམས་པ་སྟེ། བང་མཛོད་འཕྲུལ་སྡེ་ལས། བླ་མེད་བྱང་ཆུབ་ཆེན་པོ་དེ། །བཅོས་པས་འགྲུབ་པ་མ་ཡིན་ཏེ། །མ་བཅོས་རྣལ་དུ་བཞག་པས་འགྲུབ། །དེ་ལ་གང་ཞིག་འཆོས་བྱེད་པ། །མི་ཤེས་སྨིག་རྒྱུ་འཆོས་པ་འདྲ། །བཙལ་བས་འགྲུབ་པ་མ་ཡིན་ཏེ། །མ་བཙལ་མཉམ་པར་བཞག་པས་གྲུབ། །ཅེས་གསུངས་པ་ལྟར་རོ། །བཞི་པ་ནི། མ་བཅོས་ཐ་མལ་དུ་གནས་པས་ཅི་ཞིག་འགྲུབ་སྟེ་ཅིར་ཡང་མི་འགྲུབ་པ་དེས་ན་བླང་དོར་རྩོལ་སྒྲུབ་ཀྱི་སྒོ་ནས་འབྲས་བུ་སངས་རྒྱས་ཀྱི་གོ་འཕང་དེ་བསྒྲུབ་པར་བྱེད་དགོས་སོ་སྙམ་ན། དེ་ལ་སངས་རྒྱས་ཞེས་པ་དོན་གྱི་ངོ་བོ་གང་ཡང་མེད་པ་བླ་དག་ཙམ་གྱི་མིང་གིས་བཏག་པ་འདི་ལ་སངས་རྒྱས་ཞེས་པ་ཞིག་ཡང་དག་པའམ་དོན་དམ་པར་ཡོད་པར་སྟོན་པ་ཀུན་བྱེད་ང་ཡིས་མི་སྟོན་ཏེ། ཅིའི་ཕྱིར་ན་གང་ཟག་གང་ཞིག་གིས་སངས་རྒྱས་ཞེས་པའི་འབྲས་བུ་བཟང་པོ་ཞིག་ཐོབ་ཏུ་ཡོད་པར་མཐོང་ནས་བཙལ་བར་བྱ་བ་དེས་ནི་ཆོས་ཉིད་སྤྲོས་བྲལ་དེ་བཞིན་ཉིད་ཀྱི་དབྱིངས་ལས་སངས་རྒྱས་ཞིག་མི་རྙེད་པ་དེ་ཡི་ཕྱིར་ན་སངས་རྒྱས་ཞེས་པ་གཞན་ནས་ཐོབ་ཏུ་ཡོད་པར་མ་བལྟ་བར་རང་སེམས་བྱར་མེད་ཀྱི་དོན་འདི་ལྷུན་གྲུབ་གདོད་མའི་སངས་རྒྱས་ཡིན་པར་རྟོགས་པར་གྱིས་ཤིག་ཅེས་པ་སྟེ། བདུད་རྩི་བཅུད་ཐིག་ལས། རང་ཉིད་སངས་རྒྱས་ཡིན་ཤེས་ལ། །ཁྱོད་ཀྱིས་སངས་རྒྱས་མ་སྒྲུབས་ཤིག །སེམས་ཉིད་ཆོས་སྐུ་ཡིན་ཤེས་ལ། །ཆོས་སྐུ་གཞན་ནས་མ་བཙལ་ཅིག །བཙལ་བས་བསྐལ་པ་འབུམ་ཕྲག་དུ་ཡང་མི་རྙེད་དོ། །ཅེས་གསུངས་པ་བཞིན་ནོ། །འོ་ན་རང་སེམས་སངས་རྒྱས་ཡིན་ན་སངས་རྒྱས་ཞེས་པ་མིང་གི་བླ་དྭགས་ཙམ་དུ་ཇི་ལྟར་འགྱུར་སྙམ་རང་གི་སེམས་ཉིད་རང་བྱུང་གི་ཡེ་ཤེས་དེ་ལ་ཡང་བརྟགས་ཅིང་དཔྱད་ན་ཅིར་ཡང་གྲུབ་པ་མེད་པས་མིང་གིས་བརྗོད་པ་ཙམ་མམ་ཡེ་སྟོང་ནམ་མཁའ་ལྟ་བུའི་རང་བཞིན་ཡིན་ཀྱང་། འོན་ཀྱང་མ་བཅོས་དེ་ཀར་བཞག་ན་ཅང་མེད་ཕྱང་ཆད་པ་ལྟ་བུ་ཡང་མ་ཡིན་པར་རང་སེམས་ཡེ་ནས་འོད་གསལ་ལྷུན་གྲུབ་ཆེན་པོའི་བདག་ཉིད་དུ་ཡོད་ལ། དེ་བཞིན་དུ་སེམས་ཉིད་ཀྱི་ངོ་བོ་ངོས་བཟུང་ཅན་དུ་དངོས་སུ་མི་སྣང་བས་སྟོང་པ་ཡིན་ཡང་རང་སེམས་འདུས་མ་བྱས་པ་བདེ་ཆེན་བྱང་ཆུབ་སེམས་ཀྱིས་སྲིད་ཞི་ཀུན་ལ་ཁྱབ་བརྡལ་དུ་གནས་པ་ཡིན་ཏེ། ཀློང་ཆེན་རབ་འབྱམས་ལས། སངས་རྒྱས་མེད་པས་སངས་རྒྱས་མིང་ཡང་མེད། །སྟོན་པ་སངས་རྒྱས་མིང་དུ་འདོགས་པ་འཁྲུལ། །ཡང་དག་དོན་ལ་སངས་རྒྱས་སེམས་ཅན་མེད། །རང་རིག་སྟོང་པར་མི་གནས་བདེ་ཆེན་ས་ལ་གནས། །རིག་པ་འཛིན་པ་མེད་པས་སྟོང་། །སངས་རྒྱས་ཀུན་གྱི་རྗེ་བཙུན་ནི། །རང་གི་རིག་པར་ཤེས་པར་བྱ། །རང་སྣང་རིག་པའི་རྒྱལ་པོ་འདི། །ཀུན་ལ་ཡོད་དེ་ཀུན་གྱི་རྟོགས་པ་མེད། །རང་སྣང་རིག་པའི་སྒྲོན་མ་འདི། །ཀུན་ལ་སྣང་ཡང་གསལ་བར་དཀའ། །ཞེས་སོ། །ལྔ་པ་ནི། དེས་ན་སྲིད་ཞི་ཀུན་ཁྱབ་ཆེན་པོ་བློ་འདས་རང་བྱུང་གི་ཡེ་ཤེས་ཡེ་ནས་སངས་རྒྱས་པ་དེ་གང་ཡིན་སྙམ་ན། ཡིད་པའི་ངོ་བོ་ནི་ད་ལྟའི་སྣང་བ་མ་འགགས་པ་ས་ལེར་ཡོད་པ་འདི་ཉིད་ཡིན་ཏེ། ཆོས་དབྱིངས་རིན་པོ་ཆེའི་མཛོད་ལས། ཆོས་སྐུ་མི་འགྱུར་ཡུལ་མེད་ཀུན་འབྱམས་ལ། །ཕྱི་ནང་སྣོད་བཅུད་སྣང་བ་ལོངས་སྤྱོད་རྫོགས། །གཟུགས་བརྙན་ལྟ་བུར་རང་ཤར་སྤྲུལ་པའི་སྐུ། །སྐུ་གསུམ་རྒྱན་དུ་མ་རྫོགས་ཆོས་མེད་པས། །ཐམས་ཅད་སྐུ་གསུང་ཐུགས་ཀྱི་རོལ་པར་ཤར། །ཞེས་གསུངས་པ་ལྟར་འདི་ལྟར་ཕྱི་ནང་སྣོད་བཅུད་དུ་སྣང་བའི་ཆོས་འདི་དག་ཐམས་ཅད་ཡེ་ནས་སྤུ་མ་བརྗེས་མདོག་མ་བསྒྱུར་བར་སངས་རྒྱས་པ་ཡིན་མོད། འོན་ཀྱང་ད་ལྟའི་སྣང་བ་འདི་ཉིད་སངས་རྒྱས་མིན་གྱིས་འབྲས་བུ་སངས་རྒྱས་ཀྱི་གོ་འཕང་དེ་འབད་རྩོལ་གྱི་སྒོ་ནས་གཟོད་བསྒྲུབ་པར་བྱའོ་སྙམ་པའི་རྒྱུ་འབྲས་ཀྱི་ཐེག་པ་ཆེན་པོ་པ་རྣམས་ཀྱི་ལམ་ལ་ཞེན་པ་རྣམས་ནི། གྲུབ་ཆེན་ནག་པོ་པས། ཡེ་སངས་རྒྱས་ཞིག་ཡིན་པ་ལ། །ཡང་སངས་རྒྱ་བར་འདོད་པ་འཁྲུལ། །ཞེས་གསུངས་པ་ལྟར་འོག་མའི་ཐེག་པ་དེ་དག་གིས་སྤོང་འགོགས་སྦྱོང་བ་དང་བྱིན་རླབས་དབང་བསྒྱུར་ལ་སོགས་པའི་ཐབས་ཚུལ་སྣ་ཚོགས་ལ་འབད་རྩོལ་བྱས་པ་ཉིད་ཀྱིས་རང་སེམས་ཆོས་ཉིད་བྱ་རྩོལ་མེད་པའི་དོན་དེ་ལས་གོལ་བ་ཡིན་ལ། དེས་ཕྱིར་ན་རྩོལ་མེད་ལྷུན་གྱིས་གྲུབ་པའི་ཡེ་ཤེས་ཁྱབ་བརྡལ་ཀུན་ཏུ་བཟང་པོའི་དགོངས་པ་དེ་རང་གི་གམ་དུ་བཞག་ནས་འབྲས་བུ་གཞན་མ་ཞིག་རྒྱང་དུ་ཚོལ་བ་ནི་བླང་དོར་བྱ་རྩོལ་གྱིས་གདུང་བ་མེད་པའི་ཡེ་བདེ་འགྱུར་བ་མེད་པའི་དོན་དེ་བོར་ནས་རེ་དོགས་རྩོལ་སྒྲུབ་ཀྱི་ངལ་བ་དང་དུ་ལེན་པ་ཡིན་པས་ཚི་ཆད་པ་ཡི་ནད་དུ་དེ་ལས་ཆེ་བ་མེད་པ་དང་དེ་ལྟར་ཚོལ་མཁན་དེ་ཉིད་ངལ་བ་དོན་མེད་དུ་འགྱུར་བར་བསྟན་ཏོ། །དྲུག་པ་ནི། དེ་ལྟར་རང་སེམས་ཡེ་ནས་ཆོས་སྐུ་ལྷུན་གྲུབ་ཆེན་པོའི་ངོ་བོར་སངས་རྒྱས་ཟིན་པས་བྱ་རྩོལ་གང་ཡང་མི་དགོས་པ་ལ་དེ་ལྟར་མ་རྟོགས་པར་ད་གདོད་སངས་རྒྱས་ཞིག་འགྲུབ་ཏུ་རེ་བའི་བློས་རྣམ་རྟོག་ལ་སྐྱོན་དུ་བལྟས་ཏེ་སེམས་གཞན་དུ་མ་ཡེངས་པར་དམིགས་པ་ལ་རྩེ་གཅིག་ཏུ་གནས་པའི་རྣམ་པར་མི་རྟོག་པའི་ཏིང་ངེ་འཛིན་སྒོམ་པ་དེ་ནི་དོན་ལ་གཟུང་འཛིན་གྱི་རྣམ་པར་རྟོག་པའི་འཆིང་བ་སྲིད་པའི་གནས་སུ་འཛིན་པར་བྱེད་པའི་རྟོད་ཕུར་ལྟ་བུ་ཡིན་ཏེ། ཀུན་མཁྱེན་དགའ་རབ་གཉིས་པའི་ཞལ་ནས། ཆེད་དུ་འཇུར་བུས་བཅོས་ན་ཆོས་ཉིད་ཀྱང་། །མི་རྟོག་མཁའ་ལྟར་ཡངས་ཀྱང་མཚན་མའི་གཟེབ། །ཉིན་མཚན་སྒོམ་པས་འདའ་ཡང་འཆིང་ཞེན་ཉིད། །བསམ་གཏན་ལྷ་དང་མཚུངས་པར་རྒྱལ་བས་གསུངས། །ཞེས་གསུངས་པ་ལྟར་ལ། དེས་ན་སེམས་ཉིད་ཡེ་ནས་ཆོས་སྐུ་ཀུན་བྱེད་རྒྱལ་པོའི་རང་བཞིན་ཡིན་པ་ལ་བསྒོམ་པས་གསར་དུ་ཐོབ་པ་མེད་ཅིང་མ་སྒོམ་པར་ཡེངས་པའི་དབང་གིས་ཤོར་ཅིང་ངན་དུ་འགྲོ་བ་སྤུ་ཙམ་མེད་བཞིན་དུ་སེམས་ཉིད་གཞན་དུ་མ་ཡེངས་པར་རྩེ་གཅིག་ཏུ་ཏིང་ངེ་འཛིན་ལ་གནས་སུ་རེ་བའི་བློ་དེ་ནི་བསླུ་མཁན་ཁོ་ན་ཡིན་ཏེ། རྩེ་མོ་བྱུང་རྒྱལ་ལས། རྣམ་རྟོག་གཉེན་པོར་རྣམ་པར་མི་རྟོག་པ། །མི་རྟོག་འདོད་པས་རྟོག་པ་ཆེན་པོ་ཡིན། །ཆོས་ཀྱི་དབྱིངས་ཉིད་མི་རྟོག་མཐའ་ལས་འདས། །རྟོག་དང་མི་རྟོག་གཉིས་ཀ་ཚིག་གི་མཐའ། །ཞེས་གསུངས་པ་ལྟ་བུ་ཡིན་པ་དེས་ན་དེ་ལྟ་བུའི་བླང་དོར་རྩོལ་སྒྲུབ་ཐམས་ཅད་རྒྱུ་འབྲས་ཀྱི་སྟོན་པ་རྣམས་ཀྱིས་ཐེག་པ་ཆེན་པོའི་ལམ་ལ་རིམ་གྱིས་དྲང་བའི་ལུང་ཙམ་ཞིག་ཏུ་བསྟན་པ་ཡིན་ནོ། །བདུན་པ་ནི། དེ་ལྟར་ཆོས་ཐམས་ཅད་ཡེ་ནས་བཅོས་བསྒྱུར་སྤང་བླང་དང་བྲལ་བ་ཡེ་གྲོལ་ཆོས་སྐུའི་ངོ་བོ་ཡིན་པ་ལ་ཡེངས་མེད་ཤོར་བ་མེད་པའི་དོན་སྟོན་པའི་བྱ་མེད་རྫོགས་པ་ཆེན་པོའི་ལུང་དེ་ནི་ཐེག་པ་འོག་མ་བླང་དོར་རྩོལ་སྒྲུབ་ཅན་ཀུན་གྱི་གཉེན་པོ་རྣམ་པར་རྟོག་པའི་མུན་པ་ཐམས་ཅད་དྲུང་ནས་འཇོམས་པར་བྱེད་པའི་སྟོང་ཁམས་གསལ་བའི་ཉི་མ་ལྟ་བུ་ཡིན་མོད། དེ་ལྟ་ནའང་རྒྱུ་འབྲས་བླང་དོར་གྱི་ལམ་སྟོན་པའི་སྟོན་པ་དང་འཁོར་རྣམས་ལ་ཀུན་བྱེད་རྒྱལ་པོ་ང་ཡི་རྒྱུ་འབྲས་བྱ་རྩོལ་ལས་འདས་པའི་ལུང་འདི་བསྟན་པར་གྱུར་ན་རྒྱུ་ལས་འབྲས་བུ་འབྱུང་དུ་ཡོད་པ་ལ་ལམ་འདི་ནི་ཕྱིན་ཅི་ལོག་པའོ། །ཞེས་རང་བཞིན་རྫོགས་པ་ཆེན་པོའི་ཆོས་ལ་རྒྱུ་འབྲས་ཡོད་པར་སྒྲོ་འདོགས་པ་དང་ལམ་ཡང་དག་པ་མིན་པར་སྐུར་པ་འདེབས་པས་ན་བསྟན་པར་མི་བྱའོ་ཞེས་པ་སྟེ། ཁྱུང་ཆེན་ལས། ལྟ་ངན་ལ་སྤྱོད་ཞིབ་པའི་ཐེག་དམན་རྟགས། །ས་བཅུ་ཕ་རོལ་ཕྱིན་བཅུའི་ལམ་སྤྱོད་པ། །རྒྱུ་འབྲས་ལྷུན་གྲུབ་མཉམ་ཉིད་མཆོག་གི་ལམ། །ཡེ་གྲོལ་མཉམ་གནས་སྒྲོ་སྐུར་ཞི་བ་ཡི། །ཡེ་ནས་བྱར་མེད་འདི་ཡི་དོན་མཐོང་ན། །འཇུག་པར་མི་ནུས་འདི་ཡིས་སྐྲག་གྱུར་ནས། །ཆུད་པར་མི་བྱེད་ལྷན་གཅིག་འགྲོགས་མི་བྱེད། །ཅེས་པ་ལྟར་རོ། །བརྒྱད་པ་ནི། གང་ཞིག་སངས་རྒྱས་ཐོབ་པར་འདོད་པའི་རྣལ་འབྱོར་བ་མི་རྟོག་རྩེ་གཅིག་པའི་ཏིང་ངེ་འཛིན་སྒོམ་པའི་བློ་ཅན་དེ་ནི་ཏིང་ངེ་འཛིན་སྒོམ་པར་འདོད་པའི་རེ་དོགས་དང་བཅས་པའི་ཕྱིར་ན་མ་བཅོས་གཉུག་མར་གནས་པའི་རྣལ་འབྱོར་དམ་པའི་ལམ་ནི་གང་ཟག་དེ་ཡིས་མི་ཐོབ་པས་སྤངས་བ་ཡིན་ལ། སེམས་ཉིད་རང་བྱུང་གི་ཡེ་ཤེས་བཅོས་བསྒྱུར་སྤུ་ཙམ་མེད་པས་མ་བཅོས་རྣལ་མ་རུ་གནས་པ་འདི་ནི་འཁོར་འདས་ཀུན་གྱི་ཆོས་ཉིད་དེ་བཞིན་ཉིད་རིག་པ་བྱང་ཆུབ་སེམས་ཀྱི་གནས་ལུགས་མ་ནོར་བ་ཡིན་པས། དེ་ལྟ་བུའི་ཆོས་ཉིད་སྤྲོས་པ་དང་བྲལ་བའི་རང་བྱུང་འདུས་མ་བྱས་པའི་ཡེ་ཤེས་འདི་ལས་ནི་སངས་རྒྱས་ཞེས་པ་ཞིག་གུད་ན་མེད་པས་སངས་རྒྱས་ཞེས་སུ་མིང་དུ་བཏགས་པ་བླ་དྭགས་ཙམ་ཡིན་ནོ། །ཆོས་ཉིད་རང་བྱུང་གི་ཡེ་ཤེས་ཞེས་བྱ་བ་དེ་ཡང་གཞན་ན་མེད་པར་རང་གི་སེམས་ཉིད་གསལ་སྟོང་འཛིན་མེད་ཆེན་པོར་གནས་པ་འདི་ཉིད་ཡིན་ལ། ཇི་ལྟར་སྣང་བའི་ཆོས་རྣམས་ཐམས་ཅད་སེམས་ཉིད་རང་བྱུང་གི་ཡེ་ཤེས་འདི་ཡི་ཀློང་དུ་གཉིས་མེད་དུ་རྫོགས་ཤིང་མ་སྤངས་རང་གྲོལ་ལ་སོང་བས་ཁམས་གསུམ་ཡོངས་གྲོལ་ཆེན་པོར་གནས་པ་ཡིན་ཏེ། ཀློང་ཆེན་རབ་འབྱམས་ལས། གཅིག་ལ་ཀུན་རྫོགས་མ་སྤངས་རང་སར་གྲོལ། །སངས་རྒྱས་སྐུ་དང་སེམས་ཅན་ཉོན་མོངས་ལུས། །ཇི་ལྟར་སྣང་བ་ཐམས་ཅད་རིགས་པའི་རྒྱན། །ཉོན་མོངས་དུག་ལྔ་ཡེ་ཤེས་བདུད་རྩི་སྟེ། །འཁོར་བའི་གཡང་ས་བྱང་ཆུབ་ལམ་དུ་དྲངས། །དུས་གསུམ་སྐུ་གསུམ་ཀློང་དུ་གཏན་སྤྲུགས་ཏེ། །སྐྱེ་ཤི་རྩད་གཅོད་ཁམས་གསུམ་ཡོངས་སུ་གྲོལ། །གཟུང་འཛིན་གཉིས་དང་བྱ་བྱེད་ཀུན་སྣང་ཀུན། །ཉིད་ལ་ཉིད་འཛིན་ཉིད་ལ་ཉིད་སྤྱོད་པས། །རྩ་བ་བྱང་ཆུབ་རིག་པའི་ཀློང་དུ་གྲོལ། །རང་བྱུང་རིག་པ་ཡེ་ནས་ཆོས་སྐུ་སྟེ། །དུས་གསུམ་རྒྱལ་བ་རྣམས་ཀྱང་དེ་ཡི་སྐུ། །ཞེས་གསུངས་པ་དེས་ན་རང་སེམས་མ་བཅོས་པ་འདི་ཀ་སངས་རྒྱས་ཆོས་ཀྱི་སྐུ་རུ་བཤད་པ་ཡིན་ཞིང་མ་བཅོས་པ་ཡི་རང་བཞིན་རིག་པ་བྱང་ཆུབ་ཀྱི་སེམས་དེ་ལ་ཡེ་ནས་སྐྱེ་བ་མེད་ཅིང་རྒྱུ་རྐྱེན་གང་གིས་ཀྱང་བཅོས་སུ་མེད་པ་རང་བྱུང་འདུས་མ་བྱས་པ་ཡིན་པས་ན། དེ་ལྟ་བུ་སྐྱེ་མེད་ནམ་འཁའ་ལྟ་བུའི་དོན་དེ་ལ་བཙལ་ཞིང་བསྒྲུབ་ཏུ་མེད་ཅིང་བཙལ་ཞིང་བསྒྲུབས་པས་བྱ་རྩོལ་མེད་པའི་དོན་དེ་འགྲུབ་པར་མི་འགྱུར་བས་ན་མ་བཅོས་མཉམ་པ་ཉིད་དུ་གནས་པར་གདམས་པའོ། །དེས་ན་དེ་ལྟར་བཅོས་བསྒྱུར་བླང་དོར་སྤུ་ཙམ་མི་དགོས་པར་ཆོས་ཐམས་ཅད་ཡེ་གྲོལ་ཆེན་པོར་སངས་རྒྱས་ཟིན་པས་བྱར་མེད་བག་ཡངས་སུ་གསུངས་པ་འདི་ཐེག་དམན་རྩོལ་བ་ཅན་གྱི་གང་ཟག་རྣམས་ཀྱིས་ཁོང་དུ་མི་ཆུད་པས་ན་ཨ་ཏི་རྫོགས་པ་ཆེན་པོའི་རྣལ་འབྱོར་བ་རྣམས་ཀྱི་ཐུན་མིན་གྱི་ཁྱད་ཆོས་སུ་གསུངས་པ་སྟེ། དེ་ཉིད་ལས། ཨ་ཏི་མ་སྒྲུབ་དུག་ལྔ་རྒྱུན་དུ་མཛེས། །ཡངས་སོ་ཆེའི་རིག་པ་མཁའ་མཉམ་ཐུགས། །སྤང་ཐོབ་མེད་དོ་ཐིག་ལེ་ཉག་ཅིག་ཀློང་། །རང་སར་གྲོལ་ལོ་རྟོགས་དང་མ་རྟོགས་མེད། །གཉིས་སུ་མེད་པར་གྲོལ་བའི་ཆོས་ཉིད་དེ། །ཐེག་འོག་རྣམས་ལ་མི་སྲིད་སྲིད་པའི་ཆོས། །རྣ་ཕྲུག་བྲག་ལ་འཛེགས་པའི་བདེ་བླག་དེ། །སྲོག་ཆག་གཞན་ལ་མི་སྲིད་ཁོ་ལ་སྲིད། །རིག་པ་བྱར་མེད་ཀློང་དུ་གྲོལ་བ་དེ། །ཐེག་དམན་རྩོལ་སྒྲུབ་ཅན་ལ་མི་སྲིད་དེ། །རྣལ་འབྱོར་མཁའ་མཉམ་བྱ་བྲལ་ཀློང་ན་བདེ། །ཡེ་སངས་རྒྱས་པའི་རིག་པ་ཡུལ་མེད་དེ། །འཁོར་བར་འཁྱམས་པར་མི་སྲིད་ཡེ་ཀློང་བརྡལ། །ཞེས་གསུངས་སོ། །གསུམ་པ་ཕུན་སུམ་ཚོགས་པའི་རང་བཞིན་མངོན་དུ་ཕྱུང་ཚུལ་ལ་གཉིས་ཏེ། མངོན་དུ་ཕྱུང་ཚུལ་མདོར་བསྟན་པ་དང་། ཆོས་སྐུ་ལོངས་སྐུ་སྤྲུལ་སྐུ་གསུམ་གྱི་ཕྱུང་ཚུལ་རྒྱས་པར་བཤད་པའོ། །དང་པོ་ནི་ཀྱེ་སེམས་དཔའ་ཆེན་པོ་ཉོན་ཅིག །འདི་ལྟར་མ་སྐྱེས་སྤྲོས་དང་བྲལ་བའི་རང་བཞིན་སྟོན་པ་ཆོས་ཀྱི་སྐུ་དང་། འགགས་མེད་གསལ་དག་ཆེན་པོའི་ངོ་བོ་ལོངས་སྤྱོད་རྫོགས་པའི་སྐུ་དང་། ངེས་མེད་ཅིར་ཡང་འཆར་བའི་ཐུགས་རྗེ་སྤྲུལ་པའི་སྐུ་དང་སྟོན་པ་རྣམ་པ་གསུམ་པོ་དེ་ནི། ཆོས་ཐམས་ཅད་སྐྱེ་མེད་སྤྲོས་པ་དང་བྲལ་བ་ཆོས་སྐུ་ཐིག་ལེ་ཉག་གཅིག་ཏུ་སྟོན་པར་བྱེད་པའི་ཐེག་པ་གཅིག་དང་། ལྟ་སྤྱོད་གཉིས་ཀྱི་རང་བཞིན་སྟོན་པར་བྱེད་པའི་ཐེག་པ་གཉིས་དང་། གདུལ་བྱ་དབང་པོ་རབ་འབྲིང་ཐ་གསུམ་གྱི་བློ་དང་འཚམས་པར་བསྟན་པའི་ཐེག་པ་རྣམ་པ་གསུམ་གྱི་སྟོན་པ་པོར་ཀུན་བྱེད་རྒྱལ་པོ་ང་ཡིས་མངོན་དུ་ཕྱུང་ནས་བསྟན་པ་ཡིན་ནོ། །གཉིས་པ་ནི། དེ་ཡང་ཀུན་བྱེད་བྱང་ཆུབ་ཀྱི་སེམས་ང་ནི་རྒྱལ་བ་སྐུ་གསུམ་གྱི་སྟོན་པ་ཀུན་གྱི་འབྱུང་གནས་ཡིན་ཏེ། ང་ལས་སྟོན་པ་སྐུ་གསུམ་པོ་ཇི་ལྟར་ཕྱུང་ན་སྟོན་པ་ཀུན་བྱེད་ང་ཡི་རང་བཞིན་རྣམ་པ་གསུམ་ལས་སྐུ་གསུམ་གྱི་སྟོན་པ་རྣམས་ཕྱུང་བ་སྟེ། འདི་ལྟར་ཆོས་ཐམས་ཅད་ཀྱི་གནས་ལུགས་རང་བྱུང་གི་ཡེ་ཤེས་སྤྲོས་པ་ཐམས་ཅད་དང་བྲལ་ཞིང་གདོད་ནས་སྐྱེ་བ་མེད་པ་ཡེ་བབས་སོར་བཞག་ཆེན་པོའི་དོན་ལ་དགའ་བའི་སྟོན་པ་རང་སྣང་གི་འཁོར་རྣམས་ཀྱི་ངོ་ཁ་ལ་ཀུན་བྱེད་ང་ཡི་རང་བཞིན་གཟུང་འཛིན་གཉིས་དང་བྲལ་བ་ལས་མི་རྟོགས་མཉམ་པ་ཉིད་ཀྱི་ངོ་བོ་ཆོས་ཀྱི་སྐུ་རུ་ཕྱུང་ཞིང་། ཆོས་སྐུའི་འཁོར་གྱི་ཚོགས་ནི་སྟོན་པ་ཉིད་ལས་ཐ་དད་དུ་ཕྱེ་བ་མེད་པ་ཡེ་ཤེས་རང་སྣང་བའི་ངོ་བོ་སྟེ། དེ་ལ་ཆོས་ཕུན་སུམ་ཚོགས་པ་གདོད་ནས་མ་སྐྱེས་མཉམ་པ་ཉིད་ཀྱི་ཀློང་དུ་ཆོས་ཐམས་ཅད་དབྱེ་བསལ་མེད་པར་ཐིག་ལེ་ཉག་གཅིག་ཏུ་གནས་པའི་དོན་བསྟན་པ་དེ་ནི་ལྷག་མ་མེད་པའི་ཐེག་པའམ་ཐེག་གཅིག་རྫོགས་པ་ཆེན་པོའི་རང་བཞིན་ཡིན་པར་བཤད་དོ། །ང་ཡི་རང་བཞིན་མ་སྐྱེས་པ་ལས་ཚོགས་དྲུག་གི་སྣང་ཡུལ་ཐམས་ཅད་འགགས་པ་མེད་པར་ཀུན་ཏུ་སྣང་བ་ལ་འདོད་ཡོན་གྱི་རྣམ་པ་མ་སྤངས་རྒྱན་དུ་རོལ་ཞིང་ལོངས་སྤྱོད་པའི་ས་ཐོབ་དག་པའི་འཁོར་གྱི་ཚོགས་རྣམས་ལ། ང་ཡི་ངོ་བོ་གསལ་བའི་ཆ་ལས་སྟོན་པ་ལོངས་སྤྱོད་རྫོགས་པར་ཕྱུང་ཞིང་ངོ་བོ་གང་ལ་སྣང་བའི་འཁོར་དེ་ལ་ཟབ་ཅིང་བརླིངས་པའི་ལྟ་བ་དང་སྤྱོད་པ་གཉིས་ཡོངས་སུ་རྫོགས་པར་བྱེད་པའི་ཆོས་སྟོན་པ་དེ་ནི་ཀུན་གྱི་སྤྱོད་ཡུལ་དུ་མ་གྱུར་པས་ཐུན་མོང་མིན་པའི་ཐེག་པ་གཉིས་སུ་བསྟན་པ་སྟེ་དེ་ནི་ཀུན་བྱེད་ང་ཡི་རོལ་བ་ཕྱི་གསལ་དུ་རོལ་པའི་ངོ་བོ་མངོན་དུ་ཕྱུང་བ་ཡིན་ནོ། །ང་ཡི་རང་བཞིན་སྐྱེ་བ་མེད་པའི་རྩལ་སྣང་འགག་པ་མེད་པའི་ཆ་ཐུགས་རྗེར་བྱུང་བ་ལས་གདུལ་བྱའི་འགྲོ་བ་རྣམས་ཚུལ་ཇི་ལྟར་འདུལ་བར་འགྱུར་བ་དེ་བཞིན་དུ་སྤྲུལ་ནས་འགྲོ་དོན་རྩོལ་མེད་དུ་མཛད་པའི་སྤྲུལ་པའི་སྐུ་རུ་སྣང་བ་དང་། དེས་འཁོར་ཚོགས་རྣམ་པ་བཞི་ལ་རྒྱུ་འབྲས་བླང་དོར་དང་འཚམས་པའམ་མཐུན་པའི་ཆོས་དམིགས་པ་མེད་པའི་ཐུགས་རྗེ་ཡིས་མངོན་དུ་ཕྱུང་སྟེ་གསུངས་པ་ནི་སྤྲུལ་སྐུའི་ཐེག་པ་གསུམ་ཡིན་ནོ། །བཞི་པ་དེའི་འཐད་པ་རྒྱ་ཆེར་བཤད་པ་ལ་བརྒྱད་དེ། རང་བཞིན་གཅིག་ལས་ཆོས་ཐམས་ཅད་སྣང་བ་ཉིད་བཤད་པ། གཉིས་མེད་ལས་གཞན་དུ་རྟོག་པ་ཉིད་ཐེག་པ་འོག་མར་བཞག་པ། སེམས་ཉིད་ཀྱི་དོན་ལ་དུ་མར་སྤྲོས་ཤིང་བརྗོད་ཀྱང་རང་བཞིན་གཅིག་ལས་མ་གཡོས་པར་བསྟན་པ། སེམས་ཉིད་སྒྲུབ་རྩོལ་མེད་པའི་དོན་བསྟན་པས་ཆེ་བ་ལྷུན་རྫོགས་སུ་བཤད་པ། སྙིང་པོ་རང་སེམས་སུ་རྫོགས་པས་སྐུ་གསུམ་ལྷུན་གྲུབ་ཏུ་གནས་པ། སེམས་ཉིད་ཆོས་དབྱིངས་བཤད་པས་ཡོན་ཏན་ལྷུན་རྫོགས་སུ་བསྟན་པ། དཔེ་དོན་རྟགས་གསུམ་ཚང་བས་རང་སེམས་སངས་རྒྱས་སུ་བསྟན་པ། སེམས་ཉིད་དེ་བཞིན་ཉིད་དུ་བསྟན་པས་ཡོད་མེད་སྒྲོ་སྐུར་ལས་འདས་པའོ། །དང་པོ་ནི། ཀྱེ་སེམས་དཔའ་ཆེན་པོ་མདོར་ན་མངོན་དུ་ཕྱུང་བའི་ལུང་ཞེས་སུ་བསྟན་པ་ནི་ཀུན་བྱེད་ང་ཡི་རང་བཞིན་བྱང་ཆུབ་ཀྱི་སེམས་ཆོས་དབྱིངས་ཁྱབ་གདལ་ཆེན་པོའི་རྩལ་ལས་འཁོར་འདས་ཀྱི་ཆོས་ཐམས་ཅད་ཀྱི་སྣང་བ་འདི་ལྟར་བསྟེན་པ་ལ་མངོན་དུ་ཕྱུང་བའི་ལུང་ཞེས་བྱ་བར་བསྟན་པ་ཡིན་ཏེ། དེ་ཡང་ཀུན་བྱེད་ང་ཡི་རང་བཞིན་སྤྲོས་བྲལ་ཆོས་ཀྱི་དབྱིངས་ཀྱི་ངོ་བོ་གཅིག་པུ་རུ་གནས་པ་ལ་ཆོས་རྣམས་ཐམས་ཅད་གང་ལས་སྣང་བའི་ཡུལ་ལམ་གཞི་ནི་སྟོང་གསལ་ཐུགས་རྗེ་རྣམ་པ་གསུམ་དུ་སྣང་བ་ཡིན་ལ་རྣམ་པ་གསུམ་པོ་དེ་ཡི་རྩལ་ལས་རང་བྱུང་དུ་ཤར་བའི་ཆོས་ནི་འདི་ལྟ་སྟེ། སངས་རྒྱས་དང་སེམས་ཅན་སྣང་སྲིད་སྣོད་བཅུད་ཀྱི་བསྡུས་པའི་ཆོས་འདི་ཀུན་དོན་ལ་གནས་ལུགས་རང་བྱུང་གི་ཡེ་ཤེས་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་ལས་རྩལ་སྣང་མ་འགགས་པར་མངོན་དུ་ཕྱུང་བ་ཡིན་ནོ་ཞེས་པ་སྟེ། དེ་ལྟར་ཡང་རྒྱ་མཚོ་འཁྱིལ་བའི་རྒྱུད་ལས། སྙིང་པོས་གར་ཁྱབ་རྩལ་ཟེར་འཆར། །དེ་ཡང་ཇི་ལྟར་འཆར་ཞེ་ན། །གཞི་མེད་ངང་ལས་ཀུན་གཞི་ཤར། །དངོས་མེད་ངང་ལས་དངོས་ཀུན་ཤར། །སྣང་མེད་ངང་ལས་སྣ་ཚོགས་ཤར། །ཡོད་མེད་ངང་ལས་འཁོར་འདས་ཤར། །གཉིས་མེད་ངང་ལས་མ་རིག་ཡེ་ཤེས་ཤར། །ཅིར་ཡང་གྲུབ་པ་མེད་པའི་ངང་ཉིད་ལས། །རང་བཞིན་ངོ་བོ་ཐུགས་རྗེ་གསུམ་དུ་ཤར། །རིག་དང་མ་རིག་རྣམ་གཉིས་ལས། །དེ་ལས་སྐུ་གསུམ་དུག་གསུམ་གཉིས་སུ་ཤར། །དེ་ལས་ཞིང་ཁམས་རྣམ་གསུམ་ཡིད་འཁོར་གསུམ་དུ་ཤར། །དེ་ལས་རང་སར་གྲོལ་དང་མ་གྲོལ་ལས། །འཆར་སྒོ་འཁྲུལ་སྒོ་གཉིས་སུ་ཤར་བ་སྟེ། །དེ་ལས་འགྱུར་དང་མི་འགྱུར་ལས། །རིག་མེད་སེམས་འཁྲུལ་འཁྲུལ་མེད་ཤར། །དེ་ལས་རྟོགས་དང་མ་རྟོགས་པས། །གཟུགས་ལྔ་སྐུ་ལྔ་ཉིད་དུ་ཤར། །དེ་ལས་མངོན་དུ་གྱུར་དང་མ་གྱུར་པས། །འཁོར་བ་མྱང་འདས་གཉིས་སུ་ཤར། །ཅི་ཡང་མེད་ལས་ཅིར་ཡང་ཤར་བ་ཡིན། །རྟོགས་མ་རྟོགས་ལས་སངས་རྒྱས་སེམས་ཅན་གཉིས། །གཏིང་ཡངས་ཆོས་ཉིད་ང་ཡི་རྩལ་དུ་ཤར། །ཅེས་གསུངས་པ་ལྟར་རོ། །གཉིས་པ་ནི། དེ་ལྟར་སྣང་སྲིད་འཁོར་འདས་ཀྱི་ཆོས་ཐམས་ཅད་ཀུན་བྱེད་བྱང་ཆུབ་སེམས་ཀྱི་རང་བཞིན་ཡིན་པ་ལ། གལ་ཏེ་རང་གི་སེམས་ཉིད་འདི་ལས་གཞན་མ་དག་འཁྲུལ་པའི་ཆོས་རང་མཚན་པ་ཞིག་ཡིན་པར་བཟུང་ཞིང་། སངས་རྒྱས་ཞེས་པ་རང་གི་སྣང་བ་འདི་ལས་གཞན་པ་རུ་ཡོད་པར་རྟོག་ཅིང་ཚོལ་བར་བྱེད་པ་དེས་ནི་དཔེར་ན་རང་ཉིད་གླང་པོ་ལ་ཞོན་བཞིན་དུ་གླང་པོ་གཞན་དུ་ཚོལ་བ་དང་འདྲ་བར་ཀུན་བྱེད་རྒྱལ་པོ་རང་བྱུང་གི་ཡེ་ཤེས་ང་དང་འཕྲད་པའི་སྐལ་བ་མེད་པས། ཀུན་བྱེད་རྒྱལ་པོའི་འཁོར་གྱི་དང་པོ་སྟོན་པ་སྐུ་གསུམ་གྱི་བསྟན་པ་གང་ཞིག་གདུལ་བྱའི་རྒྱུད་རིམ་པས་སྦྱངས་བའི་ཆེད་དུ་གསུངས་པའི་རྒྱུ་འབྲས་ཀྱི་ཐེག་པ་འོག་མ་རྣམས་བསྟན་པར་བྱ་བའི་འཁོར་ཙམ་ལས་ཐེག་མཆོག་རྫོགས་པ་ཆེན་པོ་བསྟན་པའི་སྣོད་མ་ཡིན་པར་གསུངས་པའོ། །གསུམ་པ་ནི། ཀྱེ་སེམས་དཔའ་ཆེན་པོ་སྟོན་པ་ཀུན་བྱེད་ང་ཡིས་རྩལ་སྣང་འགགས་པ་མེད་པའི་ཆོས་རྣམས་མངོན་དུ་ཕྱུང་བ་འདི་ནི་སྣང་སྲིད་འཁོར་འདས་ཀྱི་ཆོས་རང་ལས་གཞན་མ་ལྟར་མངོན་དུ་ཕྱུང་བ་ཡིན་ནའང་དོན་ལ་གཞན་མིན་པ་རང་ཉིད་རང་བྱུང་ཡེ་ཤེས་ཀྱི་ངོ་བོ་མངོན་དུ་ཕྱུང་བ་ཡིན་ཏེ། དེ་ཡང་ཇི་ལྟར་ཞེ་ན་སྣང་སྲིད་ཀྱི་ཆོས་འདི་ཐམས་ཅད་ཆོས་ཉིད་བྱང་ཆུབ་སེམས་སུ་ཡེ་ནས་མངོན་པར་སངས་རྒྱས་པའི་ངོ་བོར་མངོན་དུ་ཕྱུང་བ་ཡིན་པ་དང་། དེ་ཡང་རང་གི་སེམས་ཉིད་རང་བྱུང་གི་ཡེ་ཤེས་བདག་ཉིད་ཆེན་པོའི་ངོ་བོར་སངས་རྒྱས་པར་མངོན་དུ་ཕྱུང་བ་ཡིན་པ་དང་། གཟུང་འཛིན་གྱི་རྟོག་པས་མ་བསླད་པས་དོན་མ་ནོར་བ་ཆོས་ཀྱི་དབྱིངས་སུ་སངས་རྒྱས་པར་མངོན་དུ་ཕྱུང་བ་ཡིན་པ་དང་། དཔེ་དོན་རྟགས་གསུམ་གྱིས་ངེས་པ་ལ་བརྟེན་ནས་ཇི་ལྟར་སྣང་བའི་ཆོས་དེ་ཉིད་ཡེ་ནས་སངས་རྒྱས་པ་ཡིན་པར་མངོན་དུ་ཕྱུང་བ་ཡིན་པ་དང་། ཆོས་ཉིད་དེ་བཞིན་ཉིད་ཀྱི་ངང་ན་སངས་རྒྱས་ཞེས་པ་མིང་གི་བླ་དྭགས་ཙམ་ལས་དོན་ལ་གྲུབ་པ་མེད་པར་མངོན་དུ་ཕྱུང་བ་ཡིན་པ་སྟེ། དེ་ལྟར་ཆོས་ཐམས་ཅད་ཆེ་བ་ལྔའི་སངས་རྒྱས་སུ་མངོན་དུ་ཕྱུང་བར་བརྗོད་ཀྱང་དོན་ལ་རང་སེམས་གཅིག་པུ་འདི་ཉིད་མངོན་དུ་ཕྱུང་ནས་བསྟན་པ་ལ་ཆེ་བའི་ཡོན་ཏན་གྱི་ལྡོག་པ་ནས་དབྱེ་བ་རྣམ་པ་ལྔར་ཕྱེས་པ་ཙམ་ལས་ཐ་དད་པའི་ཆོས་སུ་གྲུབ་པ་གང་ཡང་མེད་དོ། །མདོ་བཅུ་ལས། ཆེ་བ་ལྔ་ཡི་བྱང་ཆུབ་སེམས། །སེམས་ཉིད་ཆེ་བ་ལྔས་འཕགས་ཏེ། །ཞེས་དང་། ཡིད་སྐྱོབ་ལས། མ་སྤངས་མི་གནས་མི་ལྟོས་རག་མ་ལུས། །ཐ་སྙད་ཀུན་དང་བྲལ་བ་སྟེ། །རང་བཞིན་ལྷུན་གྲུབ་འདུས་མ་བྱས་པས་ན། །འབྲས་བུའི་རྒྱལ་པོ་ཁྱད་པར་དཔག་སྟེ་ཆེ། །ཞེས་སོ། །བཞི་པ་ནི། ཀྱེ་སེམས་དཔའ་ཆེན་པོ་དེ་ལྟར་ཀུན་བྱེད་ང་ཡི་རང་བཞིན་མངོན་དུ་ཕྱུང་བ་འདིས་མདོར་ན་འདི་ལྟར་སྣང་བའི་ཆོས་ཐམས་ཅད་མ་སྤངས་གར་ཡང་མ་སྤངས་པར་མངོན་སུམ་པར་སངས་རྒྱས་པའི་ཆེ་བ་དང་། རག་གར་ཡང་མ་ལུས་པར་བདག་ཉིད་ཆེན་པོར་སངས་རྒྱས་པའི་ཆེ་བ་དང་། གནས་ཅི་ལ་ཡང་མི་གནས་པར་དབྱིངས་སུ་སངས་རྒྱས་པའི་ཆེ་བ་དང་། ལྟོས་ཅི་ལ་ཡང་མི་ལྟོས་ཏེ་དེ་ཉིད་ཡིན་པར་སངས་རྒྱས་པའི་ཆེ་བ་དང་། ཐམས་ཅད་ནས་ཐམས་ཅད་དུ་སངས་རྒྱས་པས་སངས་རྒྱས་ལས་མེད་པའི་ཆེ་བ་སྟེ་ཆེ་བ་ལྔ་ཡི་ངོ་བོར་སངས་རྒྱས་པའི་རང་བཞིན་དུ་མངོན་དུ་བྱུང་བ་ཡིན་ལ། དེ་ལྟ་བུའི་ཆེ་བ་ལྔ་ཡི་སངས་རྒྱས་ཏེ་གང་ཞེ་ན་འདི་ལྟ་སྟེ། ཀུན་བྱེད་བྱང་ཆུབ་ཀྱི་སེམས་ང་ཡི་ངོ་བོ་མངོན་དུ་ཕྱུང་བ་ནི་སྣང་སྲིད་སྣོད་བཅུད་དུ་སྣང་བའི་ཆོས་འདི་དག་ཐམས་ཅད་མཚན་ཉིད་ཐེག་པ་གསུམ་གྱིས་མ་དག་འཁོར་བའི་ཆོས་སུ་མཐོང་ནས་ཚོགས་བརྒྱད་ཡུལ་དང་བཅས་པ་འདི་རྣམས་སྤང་འགོག་སྦྱོང་བའི་ཆོས་སུ་བལྟ་བ་ལས། དོན་ལ་ཀུན་བྱེད་ང་ཡི་ཆོས་ཉིད་རང་བཞིན་སྤྲོས་བྲལ་དང་མཚན་ཉིད་རང་རིག་དང་རྣམ་པ་སྒྱུ་མར་སྣང་བ་སྟེ་ལྷུན་གྲུབ་གསུམ་གྱི་བདག་ཉིད་འདི་ཀུན་ལ་སྣང་བར་གྱུར་པ་ཡིན་པའི་རྒྱུ་མཚན་དེ་བས་ན་བྱང་ཆུབ་སེམས་ཀྱི་ངོ་བོ་མངོན་དུ་ཕྱུང་བ་ཡིན་ལ། དེས་ན་གསར་དུ་འབད་རྩོལ་གྱི་སྒོ་ནས་མཚན་ཉིད་ཐེག་པ་ལྟར་སྤོང་འགོག་སྦྱོང་བའི་བྱ་བ་ལ་ལྟོས་མི་དགོས་པར་ཆོས་ཉིད་བྱང་ཆུབ་སེམས་ཀྱི་རང་བཞིན་ལ་མ་རིག་པ་ཞིག་གདོད་ནས་ཡོད་མ་མྱོང་བས་སངས་ཤིང་། ཡེ་ཤེས་ཕྱོགས་མེད་དུ་ཡེ་ནས་རྒྱས་པ་ཡིན་པས་ན་ཡེ་ནས་སངས་རྒྱས་པ་ཡིན་ཞིང་། དེ་ལྟར་རྩོལ་སྒྲུབ་མེད་པར་ཡེ་ནས་སངས་རྒྱས་པ་ཡིན་པས་ཉན་རང་བྱང་སེམས་ཀྱི་ཐེག་པ་གསུམ་ཟིལ་གྱིས་གནོན་པར་བྱེད་པའི་གཉེན་པོར་ཡེ་ནས་ཆེ་བར་བཤད་པ་དེ་ནི་མངོན་པར་སངས་རྒྱས་པའི་ཆེ་བ་ཞེས་སུ་བཤད་པ་ཡིན་ཏེ། དགའ་རབ་རྡོ་རྗེས། རྫོགས་ཆེན་རང་གཞུང་མངོན་པར་སངས་རྒྱས་ཆེ། །སྤང་འགེགས་སྦྱོང་ལས་ཚོགས་བརྒྱད་ཡུལ་དང་བཅས། །རང་རིག་སྤྲོས་བྲལ་སྒྱུ་མར་ལྷུན་གྲུབ་པས། །དེར་གནས་བག་ཆགས་རྟེན་གྲོལ་དངོས་མཚན་དང་། །མ་རིག་མུན་སངས་ཡེ་ཤེས་ཕྱོགས་མེད་རྒྱས། །དམན་པའི་ཐེག་པ་ཟིལ་གནོན་གཉེན་པོ་ཆེ། །ཞེས་གསུངས་སོ། །ལྔ་པ་ནི། དེ་བཞིན་དུ་ཀུན་བྱེད་ང་ཡི་རང་སེམས་སྙིང་པོ་རང་བྱུང་གི་ཡེ་ཤེས་མངོན་དུ་ཕྱུང་བ་འདི་ཆོས་ཐམས་ཅད་ཀྱི་སྙིང་པོར་གྱུར་པའམ་ངོ་བོ་ཡིན་པས་ཀུན་གྱི་བདག་ཉིད་ཡིན་ལ། དེ་ལྟར་ཆོས་ཐམས་ཅད་བདག་ཉིད་ཆེན་པོའི་རང་བཞིན་ཡིན་པ་ལ་མ་ཧཱ་ཡོ་ག་བས་བསྐྱེད་རྫོགས་འབད་རྩོལ་གྱི་ལམ་ལ་བརྟེན་ནས་མངོན་དུ་བྱ་བར་འདོད་པ་ལ་རྫོགས་པ་ཆེན་པོའི་རྩོལ་སྒྲུབ་གང་ཡང་བྱ་མི་དགོས་པར་ཆོས་ཐམས་ཅད་ཡེ་ནས་རང་བྱུང་ཡེ་ཤེས་ཀྱི་བདག་ཉིད་ཆེན་པོར་དབང་བསྒྱུར་ཟིན་པས་འོག་མའི་རྩོལ་སྒྲུབ་ཐམས་ཅད་ཡེ་ནས་སམ་གཞི་ནས་སངས་ཤིང་རང་རིག་པའི་ཡེ་ཤེས་ཕྱོགས་མེད་དུ་རྒྱས་པ་ཡིན་ཕྱིར་རྩོལ་སྒྲུབ་གང་ཡང་མེད་པས། རྩོལ་སྒྲུབ་ཅན་གྱི་ཐེག་པ་དེའི་གཉེན་པོར་ཡེ་ནས་ཆེ་བར་བཤད་པ་ནི་བདག་ཉིད་ཆེན་པོ་རུ་སངས་རྒྱས་པའི་ཆེ་བར་བཤད་པ་སྟེ། དེ་ཉིད་ཀྱིས། རྣལ་འབྱོར་ཆེན་པོ་ལ་སོགས་རྩོལ་སྒྲུབ་ཀྱི། །གཞན་དབང་ལ་ལྟོས་ཟིལ་གནོན་གཉེན་པོར་མང་། །བདག་ཉིད་ཆེན་པོར་རང་ཉིད་ཡེ་དབང་པས། །ཚུལ་ངན་རྩོལ་སངས་རང་རིག་ཕྱོགས་མེད་རྒྱས། །ཞེས་གསུངས་སོ། །དྲུག་པ་ནི། འདི་ལྟར་ཆོས་ཐམས་ཅད་གདོད་ནས་མ་སྐྱེས་ཤིང་འགགས་པ་མེད་པ་སྤྲོས་བྲལ་རང་བྱུང་གི་ཡེ་ཤེས་མངོན་དུ་ཕྱུང་བ་འདི་ཉིད་ཡེ་ནས་གཟུང་འཛིན་གྱི་རྟོག་པ་ཐམས་ཅད་དང་བྲལ་བས་སངས་རྒྱས་པ་ཡིན་ཀྱང་། ཨ་ནུ་ཡོ་ག་བས་ཆོས་ཀྱི་དབྱིངས་རྒྱུ་དང་རང་བྱུང་གི་ཡེ་ཤེས་འབྲས་བུའི་ཆོས་སུ་བལྟས་ཏེ་རྒྱུ་འབྲས་དབྱེར་མེད་ཀྱི་ངོ་བོར་བསྒོམ་ཞིང་བསྒྲུབ་པར་འདོད་པ་ལ། རྫོགས་པ་ཆེན་པོས་རྒྱུ་རྐྱེན་འབྲས་བུའི་ཆོས་ཐམས་ཅད་ཡེ་ནས་ཆོས་ཀྱི་དབྱིངས་སུ་དབྱེར་མེད་རོ་གཅིག་དུ་སངས་རྒྱས་པའི་ཕྱིར་འབད་རྩོལ་ཅི་ཡང་བྱ་མི་དགོས་པར་འདོད་པས་རྒྱུ་འབྲས་ཀྱི་མཚན་མར་འཛིན་པའི་རྟོག་པ་ཡེ་ནས་ངང་གིས་སངས་ཤིང་། མཚན་འཛིན་བྲལ་བའི་ཡེ་ཤེས་ཕྱོགས་མེད་དུ་རྒྱས་པ་ཡིན་ཏེ། དེ་ལྟར་རྩོལ་སྒྲུབ་གང་ཡང་མི་དགོས་པས་རྒྱུ་འབྲས་རྩོལ་སྒྲུབ་ལ་ཞེན་པའི་ཐེག་པའི་གཉེན་པོར་གྱུར་ཅིང་ཁྱད་པར་དུ་འཕགས་པས་ཡེ་ནས་ཆེ་བར་བཤད་པ་ནི་ཆོས་ཀྱི་དབྱིངས་སུ་སངས་རྒྱས་པའི་ཆེ་བ་ཡིན་པར་བཤད་དེ། དེ་ཉིད་ཀྱིས། རྗེས་འཇུག་ལ་སོགས་རྒྱུ་འབྲས་གཉེན་པོར་ཡང་། །རྒྱུ་རྐྱེན་འབྲས་བུ་ཆོས་དབྱིངས་རོ་གཅིག་པས། །མ་བསྐྱེད་མི་གནས་འགག་མིན་དེ་འདོད་སངས། །ཀུན་མཁྱེན་མཚན་མ་ཟིལ་གནོན་ཡེ་ཤེས་རྒྱས། །ཞེས་གསུངས་སོ། །བདུན་པ་ནི། ཆོས་ཐམས་ཅད་ཀུན་བྱེད་བྱང་ཆུབ་ཀྱི་སེམས་ང་ཡིས་རང་གི་ངོ་བོ་ངེས་པར་མངོན་དུ་ཕྱུང་ནས་སྣང་བ་འགག་མེད་དུ་བསྟན་པ་འདི་ལ་རྣལ་འབྱོར་ཡོ་ག་བ་ལ་སོགས་ཀྱིས་བླང་དོར་གཉིས་སུ་བྱ་བའི་ཡུལ་དུ་མཐོང་ཞིང་རྩོལ་བར་བྱེད་པ་དེ། ཨ་ཏི་ཡོ་ག་བས་ཡེ་ནས་བླང་དོར་མེད་པར་སངས་རྒྱས་པའི་བདག་ཉིད་དུ་དཔེ་དོན་རྟགས་ནི་རྣམ་པ་གསུམ་གྱིས་ངེས་པར་བསྟན་པ་ཡིན་ཏེ། མདོ་བཅུ་ལས། ཆོས་རྣམས་ཐམས་ཅད་མ་ལུས་པའི། །དཔེ་ནི་ནམ་འཁའ་ཡིན་པ་སྟེ། །ནམ་མཁའ་སྤྱོད་ཡུལ་ཀུན་ལས་འདས། །མཚོན་དུ་མེད་པའི་ཁྱད་པར་གྱིས། །ནམ་མཁའི་དཔེ་ནི་ཁྱད་པར་ཆེ། །དོན་ནི་ཆོས་ཉིད་ཡིན་པ་སྟེ། །ཆོས་ཉིད་དོན་ནི་སྐྱེ་མེད་ལས། །སྐྱེ་བའི་ཆོ་འཕྲུལ་སངས་རྒྱས་ཀྱི། །དོན་ནི་ཆོས་ཉིད་དེ་ཡིན་ཏེ། །རྟགས་ནི་སེམས་ཉིད་འགག་མེད་ཡིན། །འགག་པ་མེད་པའི་བྱང་ཆུབ་སེམས། །མི་འགག་པ་ཡི་ཁྱད་པར་གྱིས། །རྟགས་ནི་ཆེ་བ་ཡིན་པར་བཤད། །ཅེས་གསུངས་པ་ལྟར་ཆོས་ཉིད་བྱང་ཆུབ་སེམས་ཀྱི་རང་བཞིན་གདོད་ནས་སྐྱེ་བ་མེད་པའི་ངང་ལས་སྐྱེ་བའི་ཆོ་འཕྲུལ་དུ་ཤར་བའི་སྣང་སྲིད་ཀྱི་ཆོས་འདི་དག་ཐམས་ཅད་ཡེ་ནས་སངས་རྒྱས་པའི་རང་བཞིན་ཡིན་པ་ནི་སྒྲུབ་བྱའི་དོན་ཡིན་ལ། དེ་ཉིད་མཚོན་པར་བྱེད་པའི་དཔེ་ནི་ཆོས་འདི་དག་ཐམས་ཅད་སྣང་བའི་དུས་ཉིད་ནས་སྐྱེ་མེད་བྱང་ཆུབ་སེམས་ཀྱི་ངོ་བོར་སངས་རྒྱས་པས་བློའི་སྤྱོད་ཡུལ་ལས་འདས་པར་ནམ་མཁའི་དཔེ་ཡིས་མཚོན་ནས་བསྟན་ཏེ་བྱང་ཆུབ་སེམས་ཀྱི་ངང་ལས་འགགས་མེད་དུ་ཤར་བའི་རྩལ་སྣང་ཐམས་ཅད་ངོ་བོ་ངོས་བཟུང་དང་བྲལ་བའི་རྟགས་ཀྱིས་ངེས་པ་རུ་ཐེ་ཚོམ་ཟ་བ་རྣམས་ལ་ཆོས་ཐམས་ཅད་ལ་བཟང་ངན་མེད་པས་བླང་དོར་དུ་སྣང་བའི་ཆོས་དེ་ཉིད་མངོན་སུམ་པ་རུ་སངས་རྒྱས་པར་བསྟན་པས་བླང་དོར་ཅན་གྱི་ཐེག་པ་རྣམས་ཟིལ་གྱིས་གནོན་པའི་གཉེན་པོར་ཆེ་བས་དེ་ལས་ཁྱད་པར་དུ་འཕགས་ཤིང་དཔེ་ནམ་མཁར་ངེས་པ་དོན་ཆོས་ཉིད་དུ་ངེས་པ་རྟགས་སེམས་ཉིད་དུ་ངེས་པ་གསུམ་གྱི་གཏན་ཚིགས་ཀྱིས་རྣལ་འབྱོར་ཡོ་ག་བ་ལ་བླང་དོར་གཉིས་སུ་སྣང་བཞིན་པ་དེ་ཉིད་སངས་རྒྱས་པར་བསྟན་པས་བླང་དོར་དང་ཡིན་མིན་དུ་འཛིན་པ་ཐམས་ཅད་སངས་ཤིང་མཉམ་པ་ཉིད་ཀྱི་དོན་རང་གསལ་དུ་རྒྱས་པ་ནི་ངེས་པར་སངས་རྒྱས་པའམ་དེ་ཉིད་ཡིན་པར་སངས་རྒྱས་པའི་ཆེ་བ་སྟེ། སྔ་མ་ལས། སེམས་དཔའི་རྣལ་འབྱོར་ལ་སོགས་བླང་དོར་ཅན། །ཟིལ་གནོན་གཉེན་པོར་ཐམས་ཅད་དེ་ཡིན་པས། །ཡིན་མིན་ཕྱོགས་སངས་མཉམ་ཉིད་རང་གསལ་རྒྱས། །ཞེས་གསུངས་སོ། །རྒྱས་པ་ནི། གོང་དུ་བཤད་པ་དེ་དག་གི་ཕྱིར་ན་ཕྱི་ནང་སྣོད་བཅུད་དུ་སྣང་བའི་ཆོས་འདི་དག་ཐམས་ཅད་ཀུན་བྱེད་བྱང་ཆུབ་སེམས་ང་ཡི་རང་བཞིན་མ་ནོར་བ་དེ་ཁོ་ན་ཉིད་དུ་མངོན་དུ་ཕྱུང་ཞིང་བསྟན་པ་ཡིན་ལ། དེ་ལྟ་བུའི་ཆོས་ཉིད་འདི་ནི་གཟུང་འཛིན་གྱི་བློས་བསམ་དུ་མེད་པ་དང་། དམིགས་པའི་ཡུལ་མ་གྲུབ་པ་དང་། མཚན་མའི་སྤྲོས་པ་མེད་པ་དང་། དཔེས་མཚོན་དུ་མེད་པ་དང་། གཉིས་བཅས་ཀྱི་ཆོས་སུ་མ་གྲུབ་པ་སྟེ་ཁྱད་པར་ལྔ་དང་ལྡན་པས་ཐེག་པ་འོག་མ་བ་སུ་ལ་མངོན་དུ་ཕྱུང་ཡང་མི་སྣང་བས་ཆོས་ཉིད་དེ་བཞིན་ཉིད་ཀྱི་རང་བཞིན་ཀུན་ལས་ཁྱད་པར་འཕགས་པ་སྟེ། མདོ་བཅུ་ལས། ཐམས་ཅད་སངས་རྒྱས་ཆེ་བ་ཡང་། །བསམ་མེད་དམིགས་མེད་སྤྲོས་པ་མེད། །མཚོན་དུ་མེད་དང་འདུས་པ་མེད། །རྣམ་པ་ལྔ་རུ་ཤེས་པར་བྱ། །ཞེས་གསུངས་པ་ལྟར་ཆོས་ཐམས་ཅད་ཆོས་ཉིད་དེ་བཞིན་ཉིད་དུ་སངས་རྒྱས་པ་སྟེ། འདི་ལྟར་དེ་ཞེས་བྱ་བ་ནི་གནས་ལུགས་རང་བྱུང་གི་ཡེ་ཤེས་མ་ནོར་བ་ཡི་རང་བཞིན་ཡིན་ལ། བཞིན་ཅེས་བྱ་བ་ནི་དེ་ཉིད་རྒྱུ་རྐྱེན་རྩོལ་སྒྲུབ་གང་གིས་ཀྱང་བཅོས་པ་མེད་པའི་རང་བཞིན་ཏེ། མན་ངག་གི་རྩ་བ་བསྡུས་པའི་རྒྱུད་ལས། བྱང་ཆུབ་སེམས་ཀྱི་ངོ་བོ་སྟེ། །རང་བཞིན་གདོད་ནས་རྣམ་པར་དག །སངས་རྒྱས་སྒམ་པོས་འདི་མ་མཛད། །སེམས་ཅན་སྒྲིན་པོས་འདི་མ་བཅོས། །ཞེས་གསུངས་པ་ལྟར་ལ། ཉིད་ཅེས་པ་ནི་དེ་ལྟ་བུའི་གནས་ལུགས་ངོ་བོ་ཉིད་ལ་ངོས་བཟུང་གི་མིང་གིས་བཏགས་པ་ཡིན་ནོ། །དེ་ལྟ་བུའི་གནས་ལུགས་དེ་བཞིན་ཉིད་ཀྱི་རང་བཞིན་དེ་ཉིད་ལ་དངོས་པོ་རང་མཚན་དུ་གྲུབ་པ་ཅི་ཡང་མེད་པས་དུས་གསུམ་གྱི་སངས་རྒྱས་ཡོད་པའི་སྒྲོས་ཀྱང་མི་འདོགས་ལ། ཅང་མེད་ཕྱང་ཆད་པ་ལྟ་བུ་ཡང་མ་ཡིན་པར་འགག་མེད་རང་གསལ་ཆེན་པོའི་ངོ་བོ་ཅིར་ཡང་ འཆར་དུ་རུང་བས་ཁམས་གསུམ་སེམས ་ཅན་རྣམས་མེད་ཅེས་པའི་སྐུར་བའང་མི་འདེབས་ཤིང་རྟོག་དཔྱོད་ཀྱི་བསམ་པ་ཅིར་ཡང་སྟེ་ཅི་ལ་ཡང་དགོངས་པ་མེད་པས་ཡོད་མེད་རྟག་ཆད་ཀྱི་མཐའ་དང་འོག་མའི་ཐེག་པས་རྩོལ་སྒྲུབ་རྒྱུ་འབྲས་བླང་དོར་དུ་ལྟ་བའི་ཕྱོགས་གསུམ་གྱི་འཛིན་པ་དེ་དག་གཞི་མེད་དུ་སངས་ཤིང་རིག་པའི་ངོ་བོ་མ་བཅོས་རང་གསལ་དུ་རྒྱས་པ་དེ་ཉིད་མ་མཐོང་བའི་རྨོངས་པ་རྣམས་ལ་མཚོན་པའི་ཕྱིར་དུ་ཆོས་ཐམས་ཅད་ཡེ་ནས་སངས་རྒྱས་པའོ། །ཞེས་བླ་དྭགས་སུ་བཏགས་པ་ཙམ་ལས་དོན་ལ་དམིགས་མཚན་སྤྲོས་པའི་མཐའ་གང་ཡང་མེད་པར་བསྟན་པས་བརྟགས་པ་ཙམ་ལ་ངེས་པའི་དོན་དུ་ཞེན་པ་དེ་ཟིལ་གྱིས་གནོན་པའི་གཉེན་པོར་ཆེ་ཞིང་ཞེན་འཛིན་ཐམས་ཅད་དང་བྲལ་བར་ལ་བཟླ་བར་བྱེད་པས་ན་སངས་རྒྱས་མེད་པའི་ཆེ་བར་ང་ཡིས་བཤད་དོ་ཅེས་གསུངས་སོ། །སློབ་དཔོན་དགའ་རབ་དཔའ་བོའི་ཞལ་ནས། ལྷུན་གནས་བདེ་ཆེན་དོན་དམ་ཡེ་ཤེས་འཕགས། །ཕྱོགས་གསུམ་ལ་བཟླས་རང་གསལ་ཡེ་སངས་རྒྱས། །དངོས་མཚན་ཉི་ཚེའི་སྟོང་པ་ལས་གྲོལ་ཞིང་། །དོན་ཉིད་རྨོངས་ལ་མཚོན་ཕྱིར་བརྡའ་སྤྲད་ཀྱིས། །དེ་ཡང་ཚིག་ཙམ་ངེས་དོན་ཟིལ་གནོན་ཆེའོ། །ཞེས་གསུངས་སོ། །དེ་ལྟར་ན་ཆེ་བ་ལྔ་པོ་དེ་ལས་དང་པོས་ཤེས་བྱའི་ཆོས་ཕྱི་ནང་སྣོད་བཅུད་དུ་སྣང་བཞིན་པ་འདི་ཉིད་རྒྱུ་རྐྱེན་རྩོལ་སྒྲུབ་ཅི་ལ་ཡང་མ་ལྟོས་པར་སངས་རྒྱས་པར་བསྟན་པས་ཤེས་བྱའི་རང་བཞིན་དང་། ཆོས་ཀྱི་དབྱིངས་དང་བདག་ཉིད་ཆེན་པོ་གཉིས་ཀྱིས་དང་པོས་སྤྲོས་པའི་མུ་མཐའ་ཐམས་ཅད་སངས་པ་དང་། གཉིས་པས་དེ་ལྟར་མཁྱེན་པའི་ཡེ་ཤེས་ཕྱོགས་མེད་དུ་རྒྱས་པའི་རང་བཞིན་སྟོན་པས་དེ་གཉིས་ཀྱིས་མཚན་ཉིད་དང་། བཞི་པས་མངོན་སུམ་དུ་སྣང་བའི་ཆོས་དེ་ཉིད་སངས་རྒྱས་ཀྱི་ངོ་བོ་ཡིན་པར་མཚོན་པས་ངེས་ཚིག་དང་། ལྔ་པས་དེ་ལྟར་སངས་རྒྱས་པར་གསུངས་པ་དེ་ཡང་དགོས་པའི་དབང་གིས་བཏགས་པ་ཙམ་ལས་དོན་གང་དུའང་མ་གྲུབ་པར་རྒྱས་བཏབ་ཏེ་དམིགས་མཚན་བློ་ཡི་སྤྲོས་པ་ཐམས་ཅད་དང་བྲལ་བར་ལ་བཟླས་པ་སྟེ། ཆེ་བ་ལྔ་པོ་དེས་རྩོལ་བཅས་ཀྱི་ཐེག་པ་ཀུན་ལས་ཁྱད་པར་དུ་འཕགས་པས་ན་རྫོགས་པ་ཆེན་པོ་ཞེས་གསུངས་ཏེ། དེ་ཉིད་ཀྱིས། མངོན་སུམ་སྣང་བའི་རང་བཞིན་ཡེ་སངས་རྒྱས། །དེ་ཡི་མཚན་ཉིད་ཆོས་དབྱིངས་མུ་མཐའ་གྲོལ། །དེ་མཁྱེན་ཡེ་ཤེས་མཐའ་དབུས་ཀུན་ཁྱབ་རྒྱས། །དེ་ཉིད་དེ་ཡིན་དེ་མཚོན་ངེས་པའི་ཚིག །དགོས་པས་སྤྲད་ཀྱི་སྒྲ་ལ་དོན་མི་བཞག །དང་པོས་ཤེས་བྱའི་རང་བཞིན་གཉིས་མཚན་ཉིད། །གཅིག་གིས་ངེས་ཚིག་ཐ་མས་རྒྱས་བཏབ་པ། །ཆེ་ལྔས་ཁྱད་འཕགས་དེས་ན་རྫོགས་པ་ཆེ། །ཞེས་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་རང་བཞིན་རྣམ་པ་གསུམ་མངོན་དུ་ཕྱུང་བའི་ལེའུ་སྟེ་བཅོ་ལྔ་པའི་འགྲེལ་བའོ།། ༈ །།དོན་དྲུག་པ་ཕུན་སུམ་ཚོགས་པ་ཐམས་ཅད་ཀུན་བྱེད་དུ་ཡེ་ནས་གྲུབ་ཟིན་པས་རྩོལ་སྒྲུབ་རྒྱུ་འབྲས་ལས་འདས་པའི་ལེའུ་བཅུ་དྲུག་པ་ཉིད་བཤད་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། དེ་ལྟར་སྟོན་འཁོར་བསྟན་པ་གསུམ་པོ་ཀུན་བྱེད་རྒྱལ་པོ་བྱང་ཆུབ་སེམས་ཀྱི་རང་བཞིན་ལས་མངོན་དུ་ཕྱུང་ཞིང་ཆེ་བ་ལྔར་ཡེ་ནས་སངས་རྒྱས་པར་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་སེམས་དཔའ་རྡོ་རྗེ་ལ་ཆོས་རྣམས་ཐམས་ཅད་ཡེ་ནས་བྱང་ཆུབ་སེམས་ཀྱི་རང་བཞིན་དུ་ལྷུན་གྱིས་གྲུབ་པས་དེ་ཉིད་རྟོགས་པའི་རྣལ་འབྱོར་པ་རྣམས་དུས་རྣམས་ཀུན་ཏུ་ཆོས་ཉིད་ཀྱི་འཁོར་ལོ་ལས་འདའ་བ་མེད་ཕྱིར་རྒྱུ་འབྲས་རྩོལ་སྒྲུབ་གང་ཡང་མི་དགོས་པར་མ་བཅོས་རང་བབས་སུ་འཇོག་པའི་གདམས་ངག་གནད་དུ་ཕོག་པ་འདི་གསུངས་སོ། །གཉིས་པ་རྒྱས་པར་བཤད་པ་ལ་གསུམ་སྟེ། ཕུན་སུམ་ཚོགས་པ་ལྔ་སེམས་ཉིད་ཀུན་བྱེད་ལ་ཡེ་ནས་ལྷུན་གྲུབ་ཏུ་རྫོགས་པས་ཇི་བཞིན་བཟོ་མེད་དུ་ལྷུག་པར་གཞག་པར་གདམས་པ་དང་། སེམས་ཉིད་རང་བྱུང་དུ་གྲུབ་པས་རྩོལ་སྒྲུབ་རྒྱུ་འབྲས་ཀྱིས་མི་འགྲུབ་པར་ལུང་བསྟན་པ་དང་། ཇི་བཞིན་ཀུན་བྱེད་རྟོགས་པའི་རྣལ་འབྱོར་པ་ཉིད་རང་བྱུང་ཡེ་ཤེས་ལས་མི་འདའ་བས་ཀུན་ཏུ་ཆོས་ཉིད་ཀྱི་འཁོར་ལོར་བསྟན་པའོ། །དང་པོ་ནི། ཀྱེ་སེམས་དཔའ་ཆེན་པོ་བྱར་མེད་ལྷུན་གྱིས་གྲུབ་པའི་གདམས་ངག་འདི་ཉོན་ཅིག་དང་བསྟན་པར་བྱའོ་ཞེས་ཉན་པར་བསྐུལ་ནས། དེ་ཡང་ཇི་ལྟར་ཞེ་ན་ང་ནི་ཡེ་ནས་ཕུན་སུམ་ཚོགས་པ་ཀུན་བྱེད་པའི་རྒྱལ་པོ་ཡིན་ཏེ། འདི་ལྟར་སྐུ་གསུམ་གྱི་སྟོན་པ་རྣམས་དང་དེ་དག་གིས་གསུངས་པའི་བསྟན་པ་རྒྱུ་འབྲས་ཀྱི་ཐེག་པ་རྣམས་དང་། དེ་གང་ལ་བསྟན་པར་བྱ་བའི་ཡུལ་དུ་གྱུར་པའི་འཁོར་རྣམས་དང་། དེ་ལྟར་སྟོན་པའི་དུས་དང་གང་དུ་སྟོན་པའི་གནས་ཐམས་ཅད་ང་ཡིས་བྱས་ནས་མངོན་དུ་སྣང་བ་ཡིན་པའི་ཕྱིར་ན་སྐུ་གསུམ་གྱི་སྟོན་པ་རྣམས་ལ་ལམ་སྟོན་པར་བྱེད་པའི་སྟོན་པ་ཡང་ནི་ཀུན་བྱེད་ང་ཡིས་བྱེད་ཅིང་། དེ་དག་ལ་བསྟན་བྱའི་དོན་ཡང་གཞན་པ་ཅི་ཡང་མེད་པར་ཀུན་བྱེད་ང་ཡི་རང་བཞིན་རྒྱུ་འབྲས་རྩོལ་སྒྲུབ་ལས་འདས་པའི་བྱང་ཆུབ་སེམས་ཀྱི་ངོ་བོ་དེ་ཉིད་སྟོན་པར་བྱེད་ལ། འཁོར་ཡང་ང་ཡི་ངོ་བོ་རྩལ་སྣང་འགག་པ་པ་མེད་པ་དེ་མངོན་དུ་ཕྱུང་ནས་བསྟན་པ་དང་། དེ་རྣམས་འདུས་པའི་དུས་དང་གནས་ཀྱང་ང་ཡི་རང་བཞིན་དེ་རུ་ནི་མ་འདུས་པ་མེད་པས། སྟོན་པ་ཀུན་བྱེད་ང་ཡི་རང་བཞིན་ཁོ་ན་བསྟན་པ་ལས་ང་ཉིད་མིན་པའི་ཆོས་ནི་གཅིག་ཀྱང་བསྟན་པ་མེད་པར་གསུངས་པ་སྟེ། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། ཕྱོགས་བཅུའི་སངས་རྒྱས་ང་ཡི་སེམས། །ཕྱི་ནང་སྣོད་བཅུད་ང་ཡི་སེམས། །ཕྱོགས་དང་སྣང་བ་ང་ཡི་སེམས། །ཕྱི་དང་ནང་ཡང་ང་ཡི་སེམས། །མཐོ་རིས་ངན་སོང་ང་ཡི་སེམས། །ཞེས་གསུངས་པ་སྟེ། དེས་ན་སེམས་དཔའ་ཆེན་པོ་རྡོ་རྗེ་ཁྱོད་ཉིད་ཀྱང་ཀུན་བྱེད་ང་ཡི་རང་བཞིན་འགག་པ་མེད་པའི་རོལ་པ་མངོན་དུ་བསྟན་པ་ཡིན་པའི་ཕྱིར་ན་ཁྱོད་ཀྱང་སྟོན་པ་ང་ཡི་དབྱིངས་ལས་ང་ཡི་ཐུགས་རྗེས་ཕྱུང་བ་ཡིན་པས་ཀུན་བྱེད་ང་ནི་ཆོས་རྣམས་ཐམས་ཅད་ཀྱི་རང་བཞིན་ནམ་སྙིང་པོར་ཐག་ཆོད་ལ་བླང་དོར་རྩོལ་སྒྲུབ་ཀྱི་རེ་དོགས་གང་ཡང་མི་བྱེད་པར་མ་བཅོས་རང་བབ་ཀྱི་ངང་ཞོག་ཅིག་ཅེས་གདམས་པའོ། །གཉིས་པ་ནི། དེ་ལྟར་ཆོས་ཐམས་ཅད་ནི་ཀུན་བྱེད་ང་ཡི་རང་བཞིན་ལས་གཞན་དུ་མེད་ལ་ཀུན་བྱེད་ང་ནི་ཡེ་ནས་ཆོས་ཉིད་རྫོགས་པ་ཆེན་པོ་མ་བཅོས་ལྷུན་གྱིས་གྲུབ་པའི་རང་བཞིན་དུ་བྱས་ཟིན་པ་ཡིན་གྱིས་ད་གདོད་རྒྱུ་འབྲས་རྩོལ་སྒྲུབ་ལ་བརྟེན་ནས་བྱ་དགོས་པར་འདུས་པའི་འཁོར་ཚོགས་ཀུན་ལ་སེམས་དཔའ་རྡོ་རྗེ་ཁྱོད་ཀྱིས་ལུང་མ་སྟོན་ཅིག །གལ་ཏེ་ད་གདོད་བྱ་དགོས་པར་འདུས་པའི་འཁོར་ཚོགས་རྣམས་ལ་ལུང་བསྟན་པར་གྱུར་ན་འདུས་པའི་འཁོར་རྣམས་རྒྱུ་འབྲས་ཀྱི་ཐེག་པ་བ་ལྟར་བྱ་བྱེད་རྩོལ་པའི་ནད་ཀྱིས་ཟིན་པར་འགྱུར་བ་དང་། འབྲས་བུ་སངས་རྒྱས་ཀྱི་གོ་འཕང་དེ་ཡང་རྒྱུ་འབྲས་རྩོལ་སྒྲུབ་ཀྱིས་གསར་དུ་བྱས་པ་ཞིག་ཡིན་ན་རྒྱུ་རྐྱེན་ལ་ལྟོས་པ་མེད་པའི་རང་བྱུང་རིག་པའི་ཡེ་ཤེས་མེད་པའི་སྐྱོན་དུ་འགྱུར་བ་དང་། བྱང་ཆུབ་ཀྱི་སེམས་རང་བྱུང་འདུས་མ་བྱས་པའི་རང་བཞིན་ལ་རྩོལ་སྒྲུབ་ཀྱིས་འཆོས་པར་བྱས་པའི་སྐྱོན་དུ་འགྱུར་བ་དང་། གནས་ལུགས་དེ་བཞིན་ཉིད་ལ་དེ་བཞིན་ཉིད་དུ་མ་བཞག་པར་དེ་ལས་གཞན་དུ་བསྒྱུར་ཞིང་འཆོས་པའི་སྐྱོན་དུ་འགྱུར་ཞིང་། དེ་ལྟར་ན་བྱ་བྱེད་རྩོལ་བའི་སྐྱོན་གྱིས་མ་བཅོས་ལྷུན་རྫོགས་ཆེན་པོའི་ཡོན་ཏན་རྣམས་མེད་པར་གསར་དུ་བསྒྲུབ་དགོས་པར་སྐུར་པ་བཏབ་ནས་ཁྱད་དུ་གསོད་པར་འགྱུར་བ་དང་། དངོས་པོའི་དོན་དང་མི་མཐུན་པའི་དྲང་དོན་རྫུན་པའི་ལམ་གྱིས་གནས་ལུགས་ཡང་དག་པ་བདེན་པའི་དོན་གཞན་དུ་ལོག་པའི་ལམ་ལ་ཁྲིད་ཅིང་བསླུས་པས་བསླད་པར་བྱས་པས་ན། དེ་ལྟ་བུའི་ཆོས་ཉིད་ཀྱི་དོན་དང་མཐུན་པ་མིན་པའི་རྩོལ་བས་བསྒྲུབ་པར་བྱ་བ་གང་ཡང་མེད་པ་ཡིན་པས་རྒྱུ་འབྲས་བྱ་རྩོལ་གྱིས་མ་སྒྲུབ་པར་རིག་པ་རང་འགྲོས་བཅོས་བསླད་མེད་པར་ཞོག་ཅིག་ཅེས་པ་སྟེ། མདོ་བཅུ་ལས། རང་བྱུང་ཡེ་ཤེས་འགྱུར་མེད་ལ། །སྤང་དང་འགེག་པ་ཡོངས་མི་མངའ། །སྦྱང་ཞིང་བགྲོད་པ་ཡོངས་མི་མངའ། །གཟུང་ཞིང་འཛིན་པ་ཡོངས་མི་མངའ། །བླང་ཞིང་དོར་བ་ཡོངས་མི་མངའ། །བཙལ་ཞིང་བསྒྲུབ་པ་ཡོངས་མི་མངའ། །རྒྱུ་དང་འབྲས་བུ་ཡོངས་མི་མངའ། །དེས་ན་རང་བྱུང་ཡེ་ཤེས་ལ། །སྤང་ལེན་མེད་པར་བསྟན་པ་ཡིན། །ཡ་ན་རྣམ་པ་བརྒྱད་པོ་ལ། །རང་བྱུང་ཡེ་ཤེས་ཡོད་མ་ཡིན། །ཞེས་ཡེ་ཤེས་སྤང་ལེན་མེད་པའི་མན་ངག་གི་སྐབས་ནས་གསུངས་པ་བཞིན་ནོ། །གསུམ་པ་ནི། འདི་ལྟར་སེམས་དཔའ་རྡོ་རྗེ་ཁྱོད་ཀྱིས་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་ནི་དུས་རྟག་ཏུ་གསལ་འགྲིབ་མེད་པར་རིག་གིས་ཞེས་ད་ལྟ་རང་བབས་ཐ་མལ་དུ་གནས་པའི་དུས་ཀྱི་ཤེས་རིག་འགག་པ་མེད་པ་དུས་གསུམ་གྱི་རྟོག་པས་བསླད་མ་ཞུགས་པའི་སྟོང་གསལ་ཟང་མ་ཐལ་བྱུང་འདི་ལས་གཞན་ན་ཆོས་སྐུ་ཀུན་བྱེད་རྒྱལ་པོ་ཞིག་མེད་པས་དེ་ཉིད་རང་ལ་མངོན་སུམ་ཡིན་པར་བསྟན་པ་སྟེ། སངས་རྒྱས་རྡོ་རྗེ་སེམས་དཔའ་ཚིག་གསུམ་པའི་རྒྱུད་ལས། རང་གི་ཤེས་རིག་གི་ངོ་བོ་སང་ངེ་བ་འདི་དངོས་པོ་དང་ཁ་དོག་གི་ངོ་བོ་མ་གྲུབ་པ་སྟོང་སང་ངེ་འདུག་པ་འདི་སངས་རྒྱས་ཀུན་ཏུ་བཟང་མོ་ཡིན་ནོ། །རང་གི་ཤེས་རིག་གི་ངོ་བོ་སྟོང་བདོ་ཙམ་ན་སྟོང་པ་ཕྱང་ཆད་དུ་མ་སོང་བར་ཤེས་རིག་མ་འགག་པར་ཝལ་ལེ་གསལ་བ་འདི་སངས་རྒྱས་ཀུན་ཏུ་བཟང་པོ་ཡིན་ནོ། །རང་གི་རིག་པ་དངོས་པོ་ཅིར་ཡང་མ་གྲུབ་པར་ངོ་བོ་སྟོང་པ་དང་རང་གི་ཤེས་རིག་ཝལ་ལེ་བ་དབྱེར་མི་ཕྱེད་པར་འདུག་པ་འདི་སངས་རྒྱས་ཆོས་ཀྱི་སྐུ་ཡིན་ནོ། །ཞེས་དང་། རང་གི་ཤེས་རིག་ཝལ་ལེ་བ་འདི་ཀ་སངས་རྒྱས་ཡིན་པས་སངས་རྒྱས་གཞན་ནས་བཙལ་དུ་མེད་དོ། །རང་གི་རིག་པ་ཝལ་ལེ། ཁྱུག་གེ་བ་འདི་རྒྱུན་དུ་གསལ་བས་སངས་རྒྱས་ཆོས་ཀྱི་སྐུ་ལ་བསྒྲུབ་པར་བྱར་མེད་དོ། །ཞེས་དང་། ཡེ་ཤེས་མར་མེའི་རྒྱུད་ལས། ཀྱེ་གསང་བདག་ལྷུན་གྱིས་གྲུབ་པ་ནི་རང་གི་སྙིང་གི་དཀྱིལ་ན་རང་གི་རིག་པ་འོད་ཀྱི་ཕུང་པོར་བཞུགས་པ་ཡིན་ནོ། །ཐམས་ཅད་འཆར་གཞི་མ་འགགས་པ་ནི་རང་གི་རིག་པ་མི་གནས་ཕར་སོང་བས་གཟུགས་མཐོང་བ་མ་འགགས་པར་ཤར་རོ། །རང་གི་མིག་མཐོང་བ་མ་འགགས་པར་གསལ་བ་དེ་ཀ་ཆོས་སྐུའི་ཡེ་ཤེས་ཡིན་ནོ། །དེ་བཞིན་དུ་རྣ་བས་སྒྲ་ཐོས་མཁན་གྱི་རིག་པ་དང་། སྣས་དྲི་ཚོར་མཁན་གྱི་རིག་པ་དང་། ལྕེས་རོ་མྱོང་མཁན་གྱི་རིག་པ་འདི་རྣམས་རང་གི་ཆོས་སྐུའི་ཡེ་ཤེས་ཡིན་ནོ། །ཞེས་སོ། །དེས་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀུན་ཀྱང་ཆོས་ཉིད་དེ་བཞིན་ཉིད་དུ་རིག་པ་ཡིན་ཏེ། ཀུན་བྱེད་ང་ཡིས་བྱས་པའི་ཆོས་རྣམས་ཐམས་ཅད་ཀུན་ཡེ་གདོད་ནས་རང་བྱུང་གི་ཡེ་ཤེས་ཀུན་བྱེད་བྱང་ཆུབ་སེམས་ཀྱི་ཀློང་ལས་སྐད་ཅིག་ཙམ་ཡང་གཡོ་མ་མྱོང་པས་ཆོས་ཉིད་དེ་བཞིན་ཉིད་ཀྱི་རང་བཞིན་ཡིན་ལ། དེ་ཡང་བྱས་པའི་ཆོས་དེ་གང་དང་གང་ཞེ་ན་ཕུན་སུམ་ཚོགས་པ་ལྔ་སྟེ། འདི་ལྟར་སྐུ་གསུམ་གྱི་སྟོན་པ་གསུམ་ཡང་ང་ཡི་རང་བཞིན་གསུམ་ལས་ཕྱུང་བའི་རང་བྱུང་གི་ཡེ་ཤེས་ཡིན་ལ། དེ་དག་གི་བསྟན་པའི་ཐེག་པ་གསུམ་ཡང་ང་ཡི་ཆོས་ཉིད་དེ་བཞིན་ཉིད་ལས་གཞན་དུ་ཡོད་པ་མ་ཡིན་པ་དང་། འཁོར་རྣམས་ཀུན་ཀྱང་སེམས་དཔའ་རྡོ་རྗེའི་ངོ་བོ་ང་ཡི་རྩལ་སྣང་འགགས་མེད་དུ་ཤར་བ་ལས་གཞན་དུ་མེད་པ་དེ་ཡི་ཚུལ་དང་མཐུན་པར་སྟོན་པ་ང་ཡི་རང་བཞིན་ཡིན་པ་དང་། དེ་བཞིན་དུ་དུས་དང་གནས་ཕུན་སུམ་ཚོགས་པ་ཐམས་ཅད་ཀུན་ཀྱང་གཞན་དུ་མེད་པར་ཀུན་བྱེད་རྒྱལ་པོ་ང་ཉིད་མངོན་དུ་ཕྱུང་བ་ཡིན་པ་དེས་ན་གང་སྣང་ཇི་ཤར་ཐམས་ཅད་བྱང་ཆུབ་སེམས་ཀྱི་ངོ་བོ་རྟག་ཏུ་སྒྲིབ་མེད་མངོན་སུམ་དུ་གསལ་བ་ཡིན་པའི་ཕྱིར་ཚུལ་དེ་ལྟར་རྟོགས་པའི་རྣལ་འབྱོར་པ་རྣམས་དུས་རྟག་ཏུ་སྣང་སྤྱོད་ཐམས་ཅད་ཆོས་ཉིད་ཀྱི་འཁོར་ལོ་ལས་མི་འདའ་བ་ཡིན་ནོ། །ཞེས་གསུངས་སོ། །ལེའུའི་མཚན་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་སེམས་དཔའ་རྡོ་རྗེ་ལ་གདམས་ངག་འབོག་པའི་ལེའུ་སྟེ་བཅུ་དྲུག་པའི་འགྲེལ་པའོ།། ༈ །།དོན་བདུན་པ་སེམས་ཉིད་བྱ་བཙལ་མེད་པའི་དོན་རྒྱལ་བའི་སྐུ་གདུང་ཡིན་པས་རྟོགས་པའི་དོན་ལས་མི་འདའ་བར་གོམ་པར་གྱིས་ཤིག་པའི་ལེའུ་བཅུ་བདུན་པ་ལ་གཉིས་ཏེ། བསྟན་པ་དང་བཤད་པའོ། །དང་པོ་ནི། དེ་ལྟར་རྒྱུ་འབྲས་རྩོལ་གྲུབ་ལ་མི་ལྟོས་པར་མ་བཅོས་རང་བབས་སུ་བཞག་ན་དུས་བཞི་ཆོས་ཉིད་ཀྱི་འཁོར་ལོ་ལས་མི་འདའ་བར་གདམས་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་ཉིད་ཀྱི་སྐུ་གདུང་རིང་བསྲེལ་འདི་དུས་རྟག་ཏུ་མི་འབྲལ་བར་ཟུང་ཤིག་པར་གདམས་པ་འདི་གསུངས་སོ། །གཉིས་པ་ལ་ལྔ་སྟེ། སེམས་ཉིད་སྒྲུབ་བསལ་མེད་པའི་སྐུ་གདུང་ཟུངས་ཤིག་པར་གདམས་པ། དེའི་དོན་ཇི་ལྟར་བཟུང་ཞུས་པ། སྐུ་གདུང་གི་རང་བཞིན་བཤད་པ། ཇི་ལྟར་མཆོད་ཅིང་ཡོན་ཏན་དྲིས་པ། རྟོག་པ་སེམས་ཉིད་ཀྱི་དོན་ལས་མ་ཡེངས་པར་མཆོད་པས་ཀུན་བྱེད་བྱ་བཙལ་མེད་པའི་རྒྱལ་པོ་འགྲུབ་པར་བསྟན་པའོ། །དང་པོ་ནི། ཀྱེ་སེམས་དཔའ་ཆེན་པོ་དུས་གསུམ་རྒྱལ་བ་རྣམས་ཀྱི་སྐུ་གདུང་སེམས་ཉིད་བྱ་བཙལ་མེད་པའི་དོན་འདི་དང་དུས་རྟག་ཏུ་མི་འབྲལ་བར་ཟུང་ཞིག་དང་། འདི་ལྟ་བུའི་སྐུ་གདུང་རིང་བསྲེལ་འདི་རྟག་ཏུ་མི་འབྲལ་བར་འཆང་བར་བྱས་ན་དུས་གསུམ་རྒྱལ་བའི་ཡང་མེས་ཆོས་སྐུ་ཀུན་བྱེད་རྒྱལ་པོ་ང་དང་སྐལ་པ་མཉམ་པར་འགྱུར་རོ་ཞེས་གསུངས་སོ། །གཉིས་པ་ནི། དེ་ནས་འཁོར་གྱི་གཙོ་བོ་སེམས་དཔའ་རྡོ་རྗེས་སྐུ་གདུང་རིང་བསྲེལ་དེ་ཉིད་ཇི་ལྟར་བཟུང་བར་ཞུས་པ་ནི། ཀྱེ་དུས་གསུམ་དུ་གཤེགས་ཞིང་བྱོན་པའི་སངས་རྒྱས་ཀུན་གྱི་ཡང་མེས་ཆེན་པོ་སྟོན་པ་སྐུ་གསུམ་གྱི་ཡང་སྟོན་པར་གྱུར་པས་སྟོན་པའི་སྟོན་པ་ཀུན་བྱེད་རྒྱལ་པོ་ལགས། སྐུ་གདུང་རིང་བསྲེལ་འདི་ཉིད་རྟག་ཏུ་མི་འབྲལ་བར་ཟུངས་ཤིག་དང་ཀུན་བྱེད་རྒྱལ་པོ་ཁྱོད་དང་སྐལ་པ་མཉམ་པར་འགྱུར་རོ་ཞེས་སྟོན་པ་ཉིད་ཀྱིས་གདམས་པ་ལག་ན། དེ་ལ་སྐུ་ཞེས་པ་ནི་རྒྱལ་བ་གང་དང་གང་གི་སྐུ་ཡིན་པ་དང་། གདུང་ཞེས་བྱ་བ་དེ་ནི་སངས་རྒྱས་གང་དང་གང་གི་གདུང་ཡིན་པ་དང་། རིང་བསྲེལ་ཞེས་བརྗོད་པ་ནི་དོན་ཇི་ལྟ་བུ་ལ་དགོངས་ནས་དེ་ལྟར་གདམས་པར་བགྱི་བའི་ཚུལ་འདི་སྟོན་པ་ཉིད་ཀྱིས་གསུངས་བར་མཛད་དུ་གསོལ་ཞེས་ཞུས་སོ། །གསུམ་པ་ནི། དེ་ནས་སྟོན་པས་སླར་ཡང་ལན་གསུངས་པ། ཀྱེ་སེམས་དཔའ་ཆེན་པོ་ཉོན་ཅིག །འདི་ལྟར་སྐུ་ཞེས་བྱ་བ་ནི་ཀུན་བྱེད་ང་ཡི་ཐུགས་སྲས་རྒྱལ་བ་སྐུ་གསུམ་གྱི་སྐུ་ཡིན་ལ། གདུང་ཞེས་པ་ནི་དུས་གསུམ་གྱི་རྒྱལ་བ་ཀུན་གྱི་ཐུགས་རྣམ་པར་མི་རྟོག་པའི་ངོ་བོ་སྟོན་པ་ཀུན་བྱེད་ང་ཡི་སེམས་སམ་བྱང་ཆུབ་ཀྱི་སེམས་འདི་ཉིད་ཡིན་ལ། དེ་ཉིད་དུས་རེས་འགའ་བ་ལྟ་བུའི་ངེས་བཟུང་མེད་པར་རྟག་པ་རྒྱུན་གྱི་འཁོར་ལོའི་དུས་ཀུན་ཏུ་སེམས་དཔའ་རྡོ་རྗེས་འདི་ཉིད་མི་འབྲལ་བར་འཆང་བར་བྱས་ན། དུས་གསུམ་གྱི་སངས་རྒྱས་མ་ལུས་པ་རྣམས་ཀྱིས་སྐུ་གདུང་ངམ་མཆོད་པའི་རྟེན་ཡིན་པས་ན་སྐུ་གདུང་རིང་བསྲེལ་ཞེས་བྱ་བའི་དོན་ནི་དེ་ལྟ་བུ་ལ་འདོགས་པར་བྱའོ་ཞེས་གསུངས་ཏེ། བང་མཛོད་འཕྲུལ་གྱི་མེ་ལོང་ལས། སྐུ་ནི་སྟོན་པ་སྐུ་གསུམ་སྟེ། །ང་ཡི་རང་བཞིན་ཆོས་སྐུ་ཡིན། །ང་ཡི་ངོ་བོ་ལོངས་སྤྱོད་རྫོགས། །ང་ཡི་ཐུགས་རྗེ་སྤྲུལ་པའི་སྐུ། །གདུང་ནི་སངས་རྒྱས་ཀུན་གྱི་ཐུགས། །མ་ཡེངས་གནས་པ་རིང་བསྲེལ་ཡིན། །ཞེས་གསུངས་པ་ལྟར་ཏེ། དེས་ན་ལེའུ་འདིའི་དོན་ནི་རང་གི་སེམས་ཉིད་རིག་པ་སྐུ་གསུམ་གྱི་བདག་ཉིད་ཅན་འདི་ངོ་ཤེས་པའི་དོན་དང་རྟག་ཏུ་མ་བྲལ་ན་དུས་གསུམ་རྒྱལ་བ་ཀུན་གྱི་ཐུགས་དང་གཉིས་སུ་མེད་པས་དུས་གསུམ་རྒྱལ་བའི་སྐུ་གདུང་ཁམས་གསུམ་འགྲོ་བ་ཀུན་གྱིས་མཆོད་པའི་རྟེན་དུ་འགྱུར་བར་བསྟན་པ་ཡིན་ནོ། །བཞི་པ་ནི། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ལགས་སྐུ་གདུང་རིང་བསྲེལ་ཞེས་གསུངས་པའི་དོན་ནི་ཉིད་ཀྱིས་ཇི་སྐད་བསྟན་པ་དེ་ལྟར་ལགས་ན་ཡང་། འོ་ན་སྐུ་གདུང་རིང་བསྲེལ་དེ་ལ་དུས་གསུམ་གྱི་རྒྱལ་བ་སངས་རྒྱས་རྣམས་ཀྱིས་ཚུལ་ཇི་ལྟར་མཆོད་པ་དང་། དེ་མཆོད་པ་ལ་ནི་ཡོན་ཏན་ཇི་ལྟ་བུ་ཞིག་མཆིས་པ་ཡིན་ཞེས་ཞུས་སོ། །ལྔ་པ་ནི། ཀྱེ་སེམས་དཔའ་ཆེན་པོ་ཁྱོད་ཉོན་ཅིག་སྟོན་པ་ཀུན་བྱེད་ང་ཡི་སྐུ་གདུང་རིང་བསྲེལ་དེ་ལ་ནི་ཚུལ་ཇི་ལྟར་མཆོད་ན་དུས་གསུམ་གྱི་སངས་རྒྱས་ཀུན་གྱིས་དུས་རྟག་ཏུ་རང་གི་སེམས་ཉིད་རང་བྱུང་གི་ཡེ་ཤེས་དེ་ལ་བལྟས་ནས་ཞེས་རང་ངོ་ཤེས་པར་བྱས་ནས་རྩོལ་མེད་ཡེ་གྲོལ་ཆེན་པོ་ཀ་དག་ཡེ་བབ་སོར་བཞག་གི་དགོངས་པས་སམ་མ་བཅོས་རང་བབ་ཆེན་པོའི་བཞག་ཐབས་ཀྱིས་མཆོད་པར་བྱས་ན། དེ་ཡི་ཡོན་ཏན་ཀ་དག་ཆོས་སྐུའི་དགོངས་པ་དང་མི་འབྲལ་བར་དེ་ཉིད་མངོན་དུ་ཐོབ་ནས་སྣང་སྲིད་འཁོར་འདས་ཀྱི་ཆོས་རྣམས་ཐམས་ཅད་ཀུན་བྱེད་རྒྱལ་པོ་བྱང་ཆུབ་སེམས་ཀྱི་ཀློང་དུ་རྗེས་མེད་རང་ཡལ་དུ་སོང་ནས་སྲིད་གསུམ་ཀ་དག་འཁོར་བ་དོང་སྤྲུགས་ཀྱི་དགོངས་པ་མངོན་དུ་བྱེད་ནུས་པར་འགྱུར་རོ། །ཞེས་གསུངས་སོ། །ལེའུའི་མཚན་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་སྐུ་གདུང་གཏད་པའི་ལེའུ་སྟེ་བཅུ་བདུན་པའི་འགྲེལ་བའོ།། ༈ །།དོན་བརྒྱད་པ་ཆོས་ཐམས་ཅད་སེམས་ཉིད་ཀུན་བྱེད་དེ་བཞིན་ཉིད་དུ་བསྟན་པའི་ལེའུ་བཅོ་བརྒྱད་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། དེ་ལྟར་སྐུ་གདུང་རིང་བསྲེལ་མི་འབྲལ་བར་བཟུང་བར་གདམས་པ་དེ་ནས་བྱང་ཆུབ་ཀྱི་སེམས་པ་ཀུན་བྱེད་རྒྱལ་པོ་དེས་སྣང་ཆ་འགག་པ་མེད་པའི་རོལ་པར་ཤར་བའི་སྲིད་ཞི་གཉིས་ཀྱིས་བསྡུས་པའི་ཆོས་ཐམས་ཅད་ཀྱི་གནས་ལུགས་ཆོས་ཉིད་རང་བྱུང་གི་ཡེ་ཤེས་དེ་ཀུན་བྱེད་ང་ཉིད་ཡིན་ནོ། །ཞེས་སྟོན་པར་བྱེད་པའི་ངེས་པ་དོན་གྱི་ལུང་འདི་གསུངས་སོ། །གཉིས་པ་ལ་དྲུག་སྟེ། སེམས་ཉིད་ཀུན་བྱེད་ཉིད་སྐུ་གསུམ་རྩོལ་མེད་དུ་གྲུབ་པས་གཞན་དོན་འབད་མེད་དུ་འབྱུང་ཚུལ། སྐུ་གསུམ་སེམས་ཉིད་ཀྱི་ངང་དུ་ཡེ་ནས་ལྷུན་གྱིས་གྲུབ་པས་རྒྱུ་འབྲས་རྩོལ་སྒྲུབ་ལས་འདས་ཚུལ། ཡེ་ནས་ལྷུན་གྱིས་གྲུབ་པས་བཙལ་མི་དགོས་པར་བསྟན་པ། གང་བཙལ་སྐྱོན་དུ་ཆེ་བས་རྩོལ་སྒྲུབ་རེ་དོགས་ལས་འདས་ཚུལ། རྒྱུ་འབྲས་རྩོལ་སྒྲུབ་ཀྱིས་མི་འགྲུབ་པ་དང་། བཙལ་བས་འགྲུབ་པར་སྟོན་པ་ཉིད་དྲང་དོན་ཡིན་པས་མ་བཙལ་ཤིག་པར་གདམས་ཚུལ་ལོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །འདི་ལྟར་སྣང་སྲིད་སྣོད་བཅུད་ཀྱིས་བསྡུས་པའི་ཆོས་ཐམས་ཅད་ཀུན་གྱི་སྣང་བའི་ཆ་འགགས་པ་མེད་པ་འདི་ནི་ཀུན་བྱེད་ང་ཡི་ངོ་བོར་སྣང་བ་ཡིན་པས་ལོངས་སྐུ་ཡིན་ལ། དེ་ཡང་དོན་ལ་གང་ཡང་གྲུབ་པ་མེད་པར་ཡེ་གྲོལ་ཀ་དག་ཆེན་པོ་གཅིག་གི་ངོ་བོར་དག་པ་སྟེ། དེ་ཉིད་གང་དུ་དག་པའི་ཡུལ་ནི་ཀུན་བྱེད་ང་ཡི་རང་བཞིན་ཆོས་ཉིད་བྱ་རྩོལ་དང་བྲལ་བའི་དབྱིངས་སུ་དག་པ་དེ་ནི་ཆོས་ཀྱི་སྐུ་དང་། དེས་རོལ་རྩལ་ལས་གདུལ་བྱ་གང་ཞིག་ཐབས་གང་གིས་འདུལ་བ་ལ་སྤྲུལ་པའི་རོལ་པ་རྣམ་པ་སྣ་ཚོགས་པར་སྟོན་པ་སྟེ། དེ་ལྟར་སྐུ་གསུམ་ལྷུན་གྲུབ་ཏུ་གནས་པ་ཡིན་ནོ། །དེས་ན་འདི་ལྟར་སྣང་ཚུལ་ལ་མ་དག་འཁོར་བ་ལྟར་སྣང་བའི་ཁམས་གསུམ་རིགས་དྲུག་གིས་བསྡུས་པའི་གནས་འདི་ཐམས་ཅད་དོན་ལ་སྐུ་གསུམ་རྒྱལ་བའི་ཞིང་ཁམས་ཆེན་པོ་ཡིན་ཞིང་ཅིར་སྣང་ཐམས་ཅད་གཟུགས་སྐུའི་རོལ་པ་ལས་མ་འདས་པས་ན་བརྟན་གཡོའི་དངོས་པོ་རྣམས་ཀྱི་གཡོ་རྩོལ་གྱི་བྱ་བ་གང་སྣང་ཐམས་ཅད་རྒྱལ་བའི་ཕྲིན་ལས་ཉག་གཅིག་གི་མཛད་པ་ཡིན་ཕྱིར་དེ་ལྟར་རྟོགས་པའི་རྣལ་འབྱོར་པ་རྣམས་ལ་གཞན་དོན་འབད་མེད་དུ་འབྱུང་བ་ཡིན་ནོ། །འོ་ན་བྱ་བྱེད་གང་སྣང་ཐམས་ཅད་རྒྱལ་བའི་ཕྲིན་ལས་གདུལ་བྱའི་གཞན་དོན་ཁོ་ན་ཡིན་ན། འདི་ལྟར་དམྱལ་བའི་སེམས་ཅན་རྣམས་བཙོ་བསྲེགས་བྱེད་པ་སོགས་ཀྱང་གཞན་དོན་མཛད་པའི་ཕྲིན་ལས་ཡིན་ནམ་ཞེ་ན། དེ་ཡང་སེམས་ཅན་རང་རང་གི་ལས་ཀྱི་སྒྲིབ་པས་ཕྱིན་ཅི་ལོག་ཏུ་སྣང་བ་ཙམ་ལས་དོན་ལ་ཆོས་སྐུ་སྐྱེ་བ་མེད་པའི་ཀློང་ནས་འགགས་མེད་གཟུགས་སྐུའི་རོལ་བ་གང་འདུལ་སྒྱུ་མའི་ཚུལ་དུ་སྣང་བའི་མཛད་པ་ཡིན་པར་གསུངས་ཏེ། རིན་པོ་ཆེ་རྒྱས་པའི་རྒྱུད་ལས། རང་བྱུང་ཆོས་སྐུ་ཆེན་པོ་དེ་ཉིད་ནི། །དབྱེར་མེད་གཅིག་ཡིན་བྲི་གང་མེད་པར་ཆགས། །གཅིག་ལས་མཐོང་སྟངས་ཐ་དད་བྱུང་བས་ན། །ཆོས་སྐུ་རང་བྱུང་འོད་གསལ་ཆེན་པོ་དེས། །འོད་གསལ་མེ་རུ་མཐོང་བས་དམྱལ་བའི་སྡུག་བསྔལ་རྒྱུ། །མ་གཡོས་ཆུ་རུ་མཐོང་བས་གྲང་བའི་སྡུག་བསྔལ་རྒྱུ། །སྤྲུལ་པ་གཤིན་རྗེར་མཐོང་བས་སྡུག་བསྔལ་ཆེན་པོའི་རྒྱུ། །དོན་བྱེད་འདྲེན་པ་སླར་ལ་སྲོག་གཅོད་མཐོང་། །གསུང་གི་ཆོས་སྟོན་ལོག་པའི་སྒྲ་ཉིད་འབྱུང་། །བརྡེག་གསོད་ཆོད་ལ་སོགས་པའི་སྒྲ་རུ་ཐོས། །གདུལ་བྱ་ཕྱག་མཚན་སྤུ་གྲི་ལ་སོགས་མཐོང་། །གཅིག་ལས་མེད་ཀྱང་ལོགས་པའི་སྣང་བ་ཡིན། །ཆོས་སྐུ་སྤྲོས་བྲལ་ཆེན་པོ་དང་། །རིག་པའི་ཡེ་ཤེས་དབྱེར་མེད་པས། །དེ་གཉིས་ཆགས་པར་མཐོང་སྟེ་འདོད་ཆགས་དག་ཏུ་མཐོང་། །མཐོང་བའི་བག་ཆགས་ཞེན་ཅིང་ཆགས་པ་ཡིས། །དེ་ཡི་རྒྱུ་མཐུན་ལས་ཀྱི་འབྲས་བུ་ཡིན། །ཕྱི་པའི་སྣང་བ་སྒྲིབ་པས་རྣག་ཁྲག་དག་ཏུ་མཐོང་། །ནང་གི་སྣང་བ་སྒྲིབ་པས་ཟས་ལས་མེ་ཉིད་འབྱུང་། །སྐུ་ཉིད་སྣང་བས་ཁ་འབར་མ་རུ་མཐོང་། །འདོད་ཆགས་དབང་གིས་སྣང་བ་སྡུག་བསྔལ་རྒྱུ། །རིགས་མཐུན་སྤྲུལ་པ་སྡུག་བསྔལ་སྣ་ཚོགས་མྱོང་། །ཞེས་པ་ལ་སོགས་པས་བསྟན་པ་བཞིན་ནོ། །གཉིས་པ་ནི། དེ་ལྟར་ཀུན་བྱེད་ཆོས་སྐུའི་དབྱིངས་ནས་སྐུ་གསུམ་གྱི་རོལ་པ་སྣ་ཚོགས་བྱུང་ནས་ནི་གདུལ་བྱ་རང་རང་གི་བློ་དང་མཚམས་པར་ཐེག་པ་གསུམ་གྱི་དོན་ནི་ངོ་ཡང་སྟོན་པར་བྱེད་ཅིང་། དེས་ནི་རྒྱུ་འབྲས་མཚན་མར་ཞེས་པའི་བློ་ཅན་རྣམས་ནི་བླང་དོར་རྩོལ་སྒྲུབ་ཅན་གྱི་ཐེག་པ་དེས་ཚིམ་པར་བྱེད་ལ། རྒྱུ་འབྲས་བླང་དོར་ཐམས་ཅད་ལས་འདས་པ་ཡི་གང་ཟག་སྐལ་ལྡན་རྣམས་ནི་དེ་ལྟ་བུའི་ཡུལ་ལ་མི་ལྟོས་པས་རེ་དོགས་བླང་དོར་གྱི་སྒོ་ནས་རྒྱུ་ལ་རྩོལ་ཞིང་མི་སྒྲུབ་ཅིང་འབྲས་བུ་ཐོབ་པར་མི་འདོད་པ་དེ་ལ་ནི་སྤང་གཉེན་རེ་དོགས་ཀྱི་འདོད་པ་མེད་པའི་དགོངས་པ་ལྷུན་གྲུབ་བྱ་རྩོལ་བྲལ་བའི་དོན་དང་། ཆོས་སྐུ་བདེ་བ་ཆེན་པོའི་རང་བཞིན་མ་བཅོས་ལྷུན་གྱིས་གྲུབ་པར་འགྱུར་རོ། །གཏིང་རྫོགས་ལས། རང་རིག་འདི་ཉིད་རྟོགས་པའི་རྣལ་འབྱོར་བ། །ཡེ་ཤེས་བཅུད་ཉིད་ཆོས་ཀྱི་གཏེར་དུ་སྨིན། །ནམ་མཁའ་གོ་ཡངས་འབྱུང་བའི་ལམ་དུ་བདེ། །རྟོགས་པའི་གོ་ཡངས་སངས་རྒྱས་ལམ་དུ་བདེ། །གདམས་ངག་གོ་ཡངས་སྒོམ་པའི་ལམ་དུ་བདེ། །དུས་གསུམ་འགྱུར་མེད་རང་རིག་ལྟ་བའི་དབྱིངས། ། འདོད་དགུ་རང་ལས་ཡོན་ཏན་འཆར་བའི་ཕྱིར། །རྒྱུ་འབྲས་གཞན་ལ་རག་མ་ལུས་པས་ཟབ། །ཡེ་ནས་ཆོས་ཉིད་ཡེ་ཤེས་རང་བྱུང་ལ། །འཁོར་བར་གནས་ཀྱང་སྒྲིབ་པས་གོས་པ་མེད། །དེ་ཕྱིར་དོན་རྟོགས་ད་ལྟ་ཉིད་ནས་ནི། །ཆོས་སྐུ་མངོན་དུ་གྱུར་པས་སངས་རྒྱས་ཡིན། །ཞེས་གསུངས་པ་ལྟར་རོ། །གསུམ་པ་ནི། གོང་དུ་བསྟན་པ་དེ་ལྟར་རང་གི་སེམས་ཉིད་རིག་པ་བྱང་ཆུབ་ཀྱི་སེམས་འདི་ཡེ་ནས་སྐུ་གསུམ་ལྷུན་གྲུབ་ཀྱི་རང་བཞིན་ཡིན་པ་ལ་ད་གདོད་བྱ་རྩོལ་གང་ཡང་མི་དགོས་ཤིང་དོན་ཆོས་རྣམས་ཐམས་ཅད་ཡེ་ཇི་བཞིན་པའི་ངང་དུ་གནས་པ་ལས་ས་ལམ་བསྒྲོད་པ་སོགས་ཀྱིས་གོང་ནས་གོང་དུ་བསྐྱོད་དུ་མེད་པ་ཡིན་པས། ཡེ་ཇི་བཞིན་པ་ཡི་གནས་ལུགས་རང་བྱུང་གི་ཡེ་ཤེས་དེ་ལ་འབྲས་བུ་ཞིག་གསར་དུ་བསྒྲུབ་མི་དགོས་ཏེ་ཆོས་ཐམས་ཅད་ཀུན་གདོད་མ་ཉིད་ནས་ཆོས་ཉིད་དེ་བཞིན་ཉིད་ཀྱི་རང་བཞིན་དུ་ལྷུན་གྱིས་གྲུབ་པའི་ཕྱིར་དང་། དུས་གསུམ་གྱི་སངས་རྒྱས་ཐམས་ཅད་སྔར་ནས་གྲུབ་ཟིན་པས་ཀྱང་། ཀུན་བྱེད་རྒྱལ་པོ་ང་ཡི་དེ་ལས་གཞན་དུ་རྩོལ་ཞིང་སྒྲུབ་དགོས་པའི་ལུང་མི་འབོག་གོ་ཞེས་གསུངས་ཏེ། དེ་ལྟར་ན་ནམ་མཁའི་མཐའ་དང་མཉམ་ལས་ཀྱང་། བསམ་དང་བྲལ་བའི་ཆོས་ཉིད་ལ། །བསམ་ཞིང་དཔྱད་པས་ཡུལ་མི་བསྐྱོད། །རང་བཞག་ལྷུག་པའི་ཏིང་འཛིན་ལ། །སེམས་ཀྱི་འཕྲོ་འདུས་ལས་མི་བྱེད། །ཅེས་མ་བཅོས་རང་བབས་སུ་འཇོག་པར་གདམས་པ་བཞིན་ནོ། །བཞི་པ་ནི། གལ་ཏེ་བླང་དོར་འབད་རྩོལ་གྱིས་བཙལ་ཞིང་བསྒྲུབ་པར་བྱས་ན་གང་བཙལ་བར་བྱ་བའི་ཏིང་འཛིན་དེས་གདོད་ནས་ཡེ་སངས་རྒྱས་པར་རྩོལ་མེད་ལྷུན་གྱིས་གྲུབ་པའི་འབྲས་བུ་དེ་མི་འགྲུབ་པར་མ་ཟད་ཏིང་ངེ་འཛིན་གྱི་རྩོལ་སྒྲུབ་དེ་བླང་དོར་རེ་དོགས་གི་ནང་དུ་ཆེ་བ་ཡིན་པས་རེ་དོགས་དང་འབད་རྩོལ་གང་ཡང་མི་བྱེད་པར་གདམས་པ་སྟེ། ཀློང་ཆེན་རབ་འབྱམས་ལས། བསམ་གཏན་ཏིང་འཛིན་ལ་སོགས་སངས་རྒྱས་སྐུ་ལ་སྒྲིབ། །བསྒོམ་ཞིང་བསྒྲུབ་པ་བྱས་ན་བསམ་གཏན་མིན། །སངས་རྒྱས་མི་འགྲུབ་བསྒྲུབས་ན་རྩོལ་བར་འགྱུར། །འཁོར་བ་མི་སྤང་སྤངས་ན་སངས་མི་རྒྱ། །སངས་རྒྱས་གཞན་ན་མེད་དོ་རིག་པ་ཡིན། །འཁོར་བ་གཞན་ན་མེད་དོ་རང་སེམས་ཡིན། །འདུས་བྱས་དགེ་བ་མི་བྱ་བྱས་ན་འཆིང་བའི་རྒྱུ། །ཞེས་གསུངས་པ་ལྟར་རོ། །འོན་ཀྱང་སྒོམ་སྒྲུབ་རྩོལ་བ་ལ་མཐའ་གཅིག་ཏུ་ཞེན་པའི་རྫོགས་ཆེན་གྱི་གོལ་ས་བཅད་པའི་ཕྱིར་དུ་སྒོམ་མེད་དུ་གསུངས་པ་ཡིན་གྱི། རྣམ་པ་ཀུན་ཏུ་སྒོམ་པ་ལ་སྐྱོན་དུ་བལྟས་ནས་དོར་བྱར་བསྟན་པ་ཡང་མ་ཡིན་ཏེ། གནས་ལུགས་ཡང་དག་པ་རྟོགས་པའི་རྣལ་འབྱོར་པ་རྣམས་ཀྱིས་སྒོམ་ཀྱང་འཆིང་བར་མི་འགྱུར་ཏེ་འཆིང་བྱ་འཆིང་བྱེད་ཀྱི་བློ་དང་བྲལ་བའི་ཕྱིར་སྒྱུ་མའི་ཞགས་པས་སྒྱུ་མའི་གླང་ཆེན་འཆིང་དུ་མེད་པ་ལྟ་བུ་ཡིན་ལ། མ་བསྒོམ་ཀྱང་ཡེངས་སུ་མེད་དེ་གང་ཤར་ཐམས་ཅད་གཞི་མེད་རྩ་བྲལ་དུ་གྲོལ་ཟིན་པས་སྨིག་རྒྱུའི་ཆུ་ལ་ཆུ་རག་མི་དགོས་པ་ལྟ་བུ་ཡིན་པས་ཇི་ལྟར་བྱས་ཀྱང་མི་འགལ་བར་གསུངས་ཏེ། གཏིང་རྫོགས་ལས། རྫོགས་ཆེན་གོལ་ས་བཅད་ཕྱིར་བསྒོམ་མེད་དེ། །ཡེ་ཤེས་བསྒོམ་མེད་དག་ཏུ་རབ་རྟོགས་ན། །བསྒོམས་ཀྱང་སྐྱོན་མེད་ཆོས་དབྱིངས་ནམ་མཁའ་འདྲ། །བསྒོམ་མེད་དེས་ནི་ཀུན་གྱི་རེ་བ་བསྐངས། །ཀུན་ལ་ཁྱབ་ཕྱིར་མ་རྫོགས་མེད་མོད་ཀྱི། །ཀུན་གྱིས་གདམས་ངག་མ་འཕྲད་རྟོགས་པར་དཀའ། །ཞེས་དང་། སྔ་མ་ལས། ཨ་ཏི་ལྟ་བ་ཕྱོགས་རིས་མེད་པ་ལ། །བལྟས་ཀྱང་སྐྱོན་མེད་རང་བྱུང་རོལ་བ་ཡིན། །མ་བལྟས་སྐྱོན་མེད་མཚན་མ་རང་སར་གྲོལ། །གཉིས་མེད་ལྟ་བ་རང་བྱུང་རོལ་པ་ཡིན། །ལྟ་བ་བཟང་ངན་འབྱེད་པའི་མདུད་པ་བོར། །ང་ཡི་སྒོམ་པ་དམིགས་གཏད་མེད་པ་ལ། །བསྒོམས་ཀྱང་སྐྱོན་མེད་རང་བྱུང་རོལ་པ་ཡིན། །མ་བསྒོམས་སྐྱོན་མེད་མཚན་མ་རང་སར་གྲོལ། །རང་གྲོལ་གཉིས་མེད་རང་བྱུང་བསྒོམ་པ་ཡིས། །སྒོམ་པ་ཆེད་དུ་བཙལ་བའི་མདུད་པ་བཀྲོལ། །ཞེས་པ་ལ་སོགས་པས་བསྟན་པ་བཞིན་ནོ། །ལྔ་པ་ནི། ཀྱེ་སེམས་དཔའ་ཆེན་པོ་དེ་ལྟར་བསྒོམས་སྒྲུབ་རྩོལ་བས་མི་འགྲུབ་པའི་རྒྱུ་མཚན་དེས་ན་ཀུན་བྱེད་ང་ཉིད་མིན་པའི་སྐུ་གསུམ་གྱི་སྟོན་པ་ཐམས་ཅད་ཀྱིས་གདུལ་བྱ་འདུལ་བར་བྱ་བའི་ཕྲིན་ལས་སྣ་ཚོགས་དང་། རྣམ་པར་རྟོག་པས་བསམ་ཞིང་སྒོམས་པའི་ཏིང་ངེ་འཛིན་གྱི་རིམ་པ་ཇི་སྙེད་ཡོད་པ་དང་། གདུལ་བྱའི་ཁམས་ལ་ཐུགས་རྗེ་རྩོལ་མེད་དུ་འཕྲོ་བའི་འོད་ཟེར་སྣ་ཚོགས་དང་། བདག་མེད་དང་སྐྱེ་མེད་སྤྲོས་བྲལ་ལ་སོགས་པ་ཐེག་པ་སོ་སོའི་ལྟ་བའི་ཡུལ་ནི་གང་དང་ཅི་དམིགས་ཀྱང་། ཀུན་བྱེད་བྱང་ཆུབ་སེམས་ཀྱི་རང་བཞིན་ཆོས་ཉིད་ཇི་བཞིན་པ་ལ་སྔར་བས་བཟང་དུ་སོང་སྟེ་གཡོས་པ་ཅུང་ཟད་ཀྱང་མེད་པས་ན། བྱ་བའི་ལས་ཀྱིས་ཇི་སྲིད་བསྐལ་པའི་བར་དུ་སྒྲུབ་ཀྱང་དེས་འཕྲིན་ལས་དེ་གྲུབ་པ་ཅི་ཡང་མེད་ལ། བསམ་ཞིང་སྒོམ་པའི་ཏིང་འཛིན་རྣམས་ཀྱང་ཆོས་ཉིད་ཀྱི་དོན་ལ་མི་གནས་པས་ཡལ་བར་འགྱུར་བ་དང་། འཕྲོ་བའི་ཡུལ་མེད་པས་ཐུགས་རྗེས་འོད་ཟེར་རྣམས་ཀྱང་ཞི་བར་འགྱུར་བ་ཡིན་ན། གཞན་དུ་བལྟ་བའི་ཡུལ་གང་ཡང་མཐོང་བ་མེད་པ་སྨོས་ཀྱང་ཅི་དགོས་ཏེ། དེས་ན་རེ་དོགས་འབད་རྩོལ་གྱིས་བཙལ་བའི་ལས་གང་ཡང་མ་བྱེད་པར་མ་བཅོས་རང་བབས་ཆེན་པོའི་ངང་དུ་ཞོག་ཅིག་ཅེས་གདམས་པའོ། །དྲུག་པ་ནི། ཀྱེ་སེམས་དཔའ་ཆེན་པོ་རང་གི་རང་བཞིན་རིག་པ་བྱང་ཆུབ་སེམས་ཀྱི་ཡིན་ལུགས་མ་ཤེས་པར་ཡུལ་གཞན་ལས་བཙལ་བས་འབྲས་བུ་སངས་རྒྱས་ཀྱི་གོ་འཕང་ཞིག་གྲུབ་པའི་ལམ་འགྲུབ་པར་འགྱུར་བའི་ལུང་དེ་ནི་རྒྱུ་དང་འབྲས་བུའི་ཐེག་པ་ཅན་རྣམས་ཀྱིས་སྟོན་པར་བྱེད་པ་སྟེ། དེ་ལྟ་བུའི་རྒྱུ་དང་འབྲས་བུའི་ཐེག་པ་ཅན་དེ་རྣམས་ཀྱིས་ཆོས་ཉིད་དམ་མཚན་ཉིད་ནི་ཆོས་ཅན་སྣང་བ་ཀུན་རྫོབ་ཀྱི་བདེན་པ་དང་། ཆོས་ཉིད་སྟོང་པ་དོན་དམ་གྱི་བདེན་པ་རྣམ་པ་གཉིས་སོ་སོར་ཕྱེ་བའི་སྒོ་ནས་ཆོས་ཅན་སྣང་བའི་ཆ་ཚོགས་གཉིས་བསགས་པ་ལ་སོགས་པའི་ཐབས་ཀྱིས་ཆོས་ཉིད་དོན་དམ་པ་ཞིག་ཚོལ་བར་བྱེད་པ་སྟེ། དེ་ལྟར་ཚོལ་བར་བྱེད་པ་དེ་ནི་དྲང་དོན་ཙམ་ལས་ངེས་པའི་དོན་ལ་དེ་ལྟར་ཚོལ་བས་རྙེད་པའི་ལུང་ཞིག་བསྟན་པ་མེད་པས་ན་དེ་ལྟར་འཚོལ་བའི་ངལ་བ་མ་བྱེད་ཅིག་ཅེས་གསུངས་སོ། །རུས་སྦལ་རྩ་རྒྱུད་ལས། རང་བཞིན་ལྷུན་རྫོགས་རྫོགས་ཆེན་ཉིད། །རྫོགས་པ་ཆེན་པོར་ཡེ་ནས་གནས། །ཐམས་ཅད་རྫོགས་པའི་རང་བཞིན་ལ། །བཟང་ངན་བླང་དོར་གཉིས་སུ་མེད། །ཐེག་པ་ལམ་དང་བསྒོམ་བསྒྲུབ་བརྩོན། །རྫོགས་ཆེན་འདི་ལས་འགལ་བར་བཤད། །རྒྱུ་འབྲས་གཉིས་མེད་རྡོ་རྗེ འི་སྐུ། །སྐྱེ་ཤི་མེད་པར་ལྷུན་གྱིས་གྲུབ། །གནས་པའི་དོན་ལ་གཉིས་སུ་མེད། །དེས་ན་ཆོས་དང་སངས་རྒྱས་མེད། །ལྟ་བས་བལྟས་པས་འཁྲུལ་བར་སྣང་། །རྒྱུ་འབྲས་ཐེག་པ་བརྟགས་པས་ནོར། །ཞེས་གསུངས་པ་ལྟར་རོ། །ལེའུའི་མཚན་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་བཙལ་བས་མི་འགྲུབ་པའི་ལེའུ་སྟེ་བཅོ་བརྒྱད་པའི་འགྲེལ་བའོ།། ༈ །།དོན་དགུ་པ་སེམས་ཉིད་སྐུ་གསུམ་དུ་གནས་པས་ཡོན་ཏན་ལྷུན་གྱིས་གྲུབ་པའི་ལེའུ་བཅུ་དགུ་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། དེ་ལྟར་སྐུ་གསུམ་གྱིས་མཚོན་པའི་ཆོས་ཐམས་ཅད་ཀུན་བྱེད་བྱང་ཆུབ་སེམས་སུ་ཡེ་ནས་ལྷུན་གྱིས་གྲུབ་པས་རེ་དོགས་འབད་རྩོལ་གང་ཡང་མི་བྱེད་པར་གདམས་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་སེམས་ཉིད་མ་བཙལ་ཇི་བཞིན་དུ་བཞག་པས་སྐུ་གསུམ་མ་བསྒྲུབས་ལྷུན་གྱིས་གྲུབ་པའི་དགོངས་པར་སྟོན་པའི་ལེའུ་འདི་གསུངས་སོ། །གཉིས་པ་ལ་བཞི་སྟེ། སེམས་ཉིད་དོན་གྱི་སངས་རྒྱས་ནམ་མཁའ་བཞིན་དུ་བཙལ་བས་མི་འགྲུབ་པར་བསྟན་པ། དེས་རང་བཞིན་མ་བཙལ་ཡང་ད་ལྟ་ཉིད་ནས་སྐུ་གསུམ་ལྷུན་གྱིས་གྲུབ་ཚུལ། སྣང་སྲིད་འཁོར་འདས་ཐམས་ཅད་སེམས་ཀྱི་རོལ་པར་འདུ་ཚུལ། སེམས་ཀྱི་རང་བཞིན་གང་དུའང་མི་དམིགས་པས་སྨྲ་བསམ་བརྗོད་ལས་འདས་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག་ཀུན་བྱེད་རྒྱལ་པོ་ང་ལས་བྱུང་བའི་སྟོན་པ་སྐུ་གསུམ་གྱིས་རང་རང་གི་འཁོར་ལ་བསྟན་པའི་ཕྱི་ནང་གསང་བའི་ཐེག་པ་རྣམ་པ་གསུམ་བསྟན་པ་ནི་རྒྱུ་འབྲས་རྩོལ་སྒྲུབ་ཅན་གྱི་ལམ་ཞིག་མ་གཏོགས་སྟོན་པ་གསུམ་གྱིས་སྟེ་གསུམ་པོ་དེ་ཉིད་ཀྱིས་མི་རྩོལ་ལྷུན་གྱིས་གྲུབ་པའི་ལུང་ནི་མ་བསྟན་ལ། ཀུན་བྱེད་ང་ཡི་ཐེག་མཆོག་རྫོགས་པ་ཆེན་པོ་ཉག་གཅིག་སྤྲོས་པ་དང་བྲལ་བའི་ཚུལ་བསྟན་པ་འདིར་ནི་སེམས་ཉིད་ནམ་མཁའ་ལྟ་བུ་ལ་རེ་དོགས་འབད་རྩོལ་གྱིས་བཙལ་བས་སྔར་བས་ལྷག་པར་གྲུབ་ཏུ་ཡོད་པའི་དོན་ཞིག་བྱར་མེད་ཨ་ཏི་ཡོ་གའི་ལུང་དུ་སྟོན་པ་ངས་མ་བསྟན་ཏེ་གདོད་ནས་ཡེ་སངས་རྒྱས་པ་རང་བྱུང་འདུས་མ་བྱས་པའི་རང་བཞིན་ལ་བྱ་རྩོལ་གང་ཡང་མི་ནུས་པའི་ཕྱིར་རོ་ཞེས་སོ། །གཉིས་པ་ནི། ཀྱེ་སེམས་དཔའ་ཆེན་པོ་ཉོན་ཅིག་ཀུན་བྱེད་བྱང་ཆུབ་ཀྱི་སེམས་སྟོང་གསལ་འགགས་མེད་ཀྱི་ཡེ་ཤེས་ང་ཡི་རང་བཞིན་འདི་ལས་གཞན་དུ་མ་བཙལ་བ ར་རང་བཞིན་གྱིས་ལྷུན་གྱིས་གྲུབ་པ་ཡི་འབྲས་བུ་དེ་ནི་གང་ཞེ་ན་དུས་གསུམ་གྱི་རྒྱལ་བ་མ་ལུས་པ་ཀུན་གྱི་སྙིང་པོའམ་རང་བཞིན་དུ་གྱུར་པ་རིག་པ་སྐུ་གསུམ་གྱི་རང་བཞིན་ཅན་དུ་གནས་པ་སྟེ། དེ་གང་ཞེ་ན་འདི་ལྟར་བྱང་ཆུབ་ཀྱི་སེམས་ང་ཡི་རང་བཞིན་ཡེ་སྟོང་ཆེན་པོ་མ་བཅོས་དེ་བཞིན་ཉིད་ཀྱི་ངོ་བོར་གནས་པ་འདི་སྤྲོས་བྲལ་ཆོས་ཀྱི་སྐུར་གྲུབ་པ་དང་། ང་ཡི་ངོ་བོ་སྣང་ལ་རང་བཞིན་མེད་པ། གསལ་ལ་དེར་འཛིན་མེད་པ། མ་སྐྱེས་ཤིང་འགགས་པ་མེད་པ། ཡོད་མེད་ཀྱི་མཐའ་ལས་འདས་པ། མ་བཅོས་ཡེ་བབ་ཀྱི་ངོ་བོར་གནས་པ་འདི་ནི་རང་གསལ་ལོངས་སྤྱོད་རྫོགས་པའི་སྐུ་དང་། ང་ཡི་ཐུགས་རྗེ་འགགས་པ་མེད་པ་ཤར་གྲོལ་རིས་མེད་ཆེན་པོར་མངོན་དུ་ཕྱུང་བ་འདི་ནི་ངེས་མེད་རང་ཤར་སྤྲུལ་པའི་སྐུའོ་ཞེས་པ་འདིས་ནི་གཞི་གནས་རང་བྱུང་གི་ཡེ་ཤེས་ཀྱི་སྐུ་གསུམ་བསྟན་པ་སྟེ། རིན་པོ་ཆེ་རྒྱས་པ་ལས། གཞི་ཡི་དུས་ན་ཆོས་རྣམས་ཐམས་ཅད་རྫོགས། །ཆོས་སྐུ་རང་བཞིན་སྤྲོས་དང་བྲལ་བས་ཆོས་ཀྱི་སྐུ་ཉིད་རྫོགས། །རིག་པ་གསལ་ལ་མ་འགགས་ལོངས་སྐུ་རྫོགས། །རྩལ་ཉིད་ཅིར་ཡང་སྣང་བས་སྤྲུལ་སྐུ་རྫོགས། །ཞེས་གསུངས་སོ། །དེས་ན་དེ་ལྟ་བུའི་རིག་པ་རང་གནས་ཀྱི་སྐུ་གསུམ་པོ་དེ་ཉིད་ད་ལྟ་ནས་རྩོལ་མེད་ལྷུན་གྱིས་གྲུབ་པ་ལས་འབད་རྩོལ་གྱིས་བཙལ་ནས་གྲུབ་པར་གྱུར་པའི་འབྲས་བུ་རྒྱུ་རྐྱེན་གྱིས་འདུས་བྱས་པའི་མཚན་ཉིད་ཅན་ནི་གང་ཡང་བསྟན་པ་མེད་དོ། །ཞེས་གསུངས་སོ། །གསུམ་པ་ནི། ཀྱེ་སེམས་དཔའ་ཆེན་པོ་ཉོན་ཅིག །འདི་ལྟར་སྐུ་གསུམ་གྱི་རྒྱལ་བ་ཐམས་ཅད་ཀུན་བྱེད་ང་རུ་མ་བཙལ་ལྷུན་གྲུབ་ཀྱི་ཚུལ་དུ་འདུས་པ་སྟེ། དེའི་ཚུལ་ཡང་ཇི་ལྟར་ན་ཕྱི་ནང་སྣོད་བཅུད་དུ་སྣང་བའི་ཆོས་རྣམས་ཐམས་ཅད་ཀུན་ཀུན་བྱེད་པ་ཡི་རང་བཞིན་སྟོང་པ་ཉིད་དང་ངོ་བོ་གསལ་བའི་ཡེ་ཤེས་དང་རོལ་རྩལ་འགགས་པ་མེད་པའི་ཐུགས་རྗེས་འགྲོ་དོན་སྤྱོད་པ་སྟེ་མ་བཅོས་རང་བྱུང་གི་སྐུ་གསུམ་པོ་ལས་གཞན་དུ་མེད་པས་རྒྱལ་བ་སྐུ་གསུམ་པོ་དེ་ང་ཡི་རང་བཞིན་མ་བཅོས་དེ་བཞིན་ཉིད་དུ་བསྟན་པ་ཡིན་ནོ། །ཞེས་རོལ་པའི་སྐུ་གསུམ་མམ་བྱང་ཆུབ་སེམས་ཀྱི་རོལ་པར་ཤར་བའི་ཆོས་རྣམས་ཐམས་ཅད་སྐུ་གསུམ་དུ་བསྟན་པ་སྟེ། དེ་ཉིད་ལས། སྣང་བ་ཡུལ་དུ་གྲུབ་པ་ཉིད་ལས་སྐུ་གསུམ་རྫོགས། །སྣང་བ་རང་བཞིན་སྟོང་པ་ཆོས་སྐུ་རྫོགས། །སྣང་བ་གསལ་བར་གནས་པས་ལོངས་སྐུ་རྫོགས། །སྣང་བ་དོན་དང་མཐུན་པས་སྤྲུལ་སྐུ་རྫོགས། །གཏི་མུག་ཆོས་ཀྱི་སྐུ་རུ་སྣང་བ་དང་། །ཞེ་སྡང་གསལ་བ་ལོངས་སྤྱོད་རྫོགས་པའི་སྐུ་རུ་སྣང་། །འདོད་ཆགས་དག་པ་སྤྲུལ་པའི་སྐུ་ཡིན་པས། །སྐུ་གསུམ་རང་བྱུང་དག་ཏུ་ཤར་བ་ཡིན། །ཐམས་ཅད་སྐུ་གསུམ་དག་ཏུ་སྣང་བ་ལས། །དུག་གསུམ་སྤངས་པའི་ཕ་རོལ་ན། །སྐུ་གསུམ་དག་ནི་ཡོད་མ་ཡིན། །ཚོགས་བརྒྱད་ཡུལ་དུ་སྣང་བ་ཡང་། །སྐུ་ལས་མ་གཏོགས་གང་ཡང་མེད། །ཐམས་ཅད་དེ་བཞིན་ཉིད་ཀྱི་སྣང་བ་དེ། །ཆོས་སྐུ་རིས་མེད་ཆེན་པོ་སྟེ། །རང་བྱུང་ནམ་མཁའ་དག་ཏུ་ཤར། །ཞེས་སོ། །དེས་ན་ཀུན་བྱེད་བྱང་ཆུབ་ཀྱི་སེམས་ང་དང་ང་ཡི་རང་བཞིན་ཆོས་ཉིད་དེ་བཞིན་ཉིད་སྤྲོས་པ་ཐམས་ཅད་དང་བྲལ་བའི་གནས་ལུགས་སྨྲ་བསམ་བརྗོད་དུ་མེད་པའི་བདག་ཉིད་ཅན་འདི་ལས་ནི་གཞན་དུ་འཁོར་འདས་ཀྱི་ཆོས་གང་མེད་པས་ན་སངས་རྒྱས་ཞེས་བྱ་བའི་ཡོན་ཏན་གྱིས་སྒྲོས་འདོགས་པ་ཉིད་ཀྱང་མེད་ལ། སེམས་ཅན་ཞེས་བྱ་བའི་སྐྱོན་གྱི་རྣམ་པ་གང་ཡང་མེད་དོ་ཞེས་འཁོར་འདས་ཐམས་ཅད་བཟང་ངན་མེད་པར་སེམས་ཉིད་གཅིག་གི་རོལ་པར་བསྟན་པའོ། །བཞི་པ་ནི། གོང་དུ་བཤད་པའི་རྒྱུ་མཚན་དེས་ན་ཆོས་ཐམས་ཅད་གཉིས་སུ་མེད་པའི་གནས་ལུགས་རིག་པ་བྱང་ཆུབ་ཀྱི་སེམས་འདི་ནི་འཁོར་འདས་བཟང་ངན་གང་དུ་མི་རྟོག་པས་རྟོག་མེད་མཉམ་པ་ཉིད་ཀྱི་རང་བཞིན་དུ་གནས་པ་ལས་ཡེ་ནས་འཕོ་འགྱུར་མེད་པས་ཇི་ལྟར་སྔར་བཞིན་ཕྱིས་ཀྱང་དེ་བཞིན་ཉིད་དུ་གནས་པ་འདི་ལས་མ་གཏོགས་པ་ཡི་དོན་ཞིག་ནི་གཞན་ན་རྙེད་པ་མེད་པས་ན། དུས་གསུམ་གྱི་སངས་རྒྱས་རྣམས་ཀྱིས་ཀྱང་རིག་པ་བྱང་ཆུབ་ཀྱི་སེམས་ཡེ་ནས་བསལ་བཞག་བྲལ་བ་འདི་ལས་ལྷག་པ་ཡི་ཀུན་བྱེད་རྒྱལ་པོ་ང་ལ་མ་ནོར་ངེས་པའི་དོན་ཟབ་མོ་སྟོན་པར་བྱེད་པའི་ལུང་ཞིག་མནོས་པ་མེད་ལ། དེར་མ་ཟད་ཕུན་སུམ་ཚོགས་པའི་ཆོས་ཐམས་ཅད་བྱེད་པའི་མཁན་པོ་སྟོན་པ་ཀུན་བྱེད་རྒྱལ་པོ་ང་ཡིས་ཀྱང་མི་རྟོག་མཉམ་པ་ཉིད་ཀྱི་རང་བཞིན་སེམས་ཉིད་སྐྱེ་བ་མེད་པ་ཆོས་ཉིད་དེ་བཞིན་ཉིད་ཀྱི་དོན་འདི་ལས་ལྷག་པ་ཞིག་ཀུན་བྱེད་རྒྱལ་པོ་ཉིད་ལ་ཀུན་བྱེད་རྒྱལ་པོ་རང་ཉིད་ཀྱིས་བསྟན་པ་རྡུལ་ཙམ་མེད་དོ། །ཞེས་གསུངས་སོ། །ལེའུའི་མཚན་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་མ་བཙལ་ལྷུན་གྱིས་གྲུབ་པའི་ལེའུ་སྟེ་བཅུ་དགུ་པའི་འགྲེལ་བའོ།། ༈ །།དོན་བཅུ་པ་སེམས་ཉིད་ཀུན་བྱེད་ཐམས་ཅད་ཀྱི་འབྱུང་གནས་ཡིན་པའི་ལེའུ་ཉི་ཤུ་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། དེ་ལྟར་སེམས་ཉིད་སྐུ་གསུམ་གྱི་རང་བཞིན་ལ་ཡོན་ཏན་ཐམས་ཅད་ཡེ་ནས་ལྷུན་གྱིས་གྲུབ་པས་གཞན་ནས་བཙལ་དུ་མེད་པར་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་འཁོར་འདས་གཉིས་ཀྱིས་བསྡུས་པའི་ཆོས་ཐམས་ཅད་ཀྱི་འབྱུང་ཁུངས་གཞན་མེད་པར་ཀུན་བྱེད་བྱང་ཆུབ་ཀྱི་སེམས་ཉིད་ཀྱི་ངང་ལས་བྱུང་བ་ཡིན་ཚུལ་འདི་གསུངས་སོ། །གཉིས་པ་ལ་གསུམ་སྟེ། ཆོས་ཐམས་ཅད་ཀུན་བྱེད་ཡིན་པར་བསྟན་པ། ཕུན་སུམ་ཚོགས་པ་ཐམས་ཅད་ཀུན་བྱེད་ཉིད་ལས་བྱུང་ཡང་དེ་བཞིན་ཉིད་ལས་མ་གཡོས་པ། ཐམས་ཅད་དབྱིངས་གཅིག་ཀུན་བྱེད་དུ་བཤད་པའོ། །དང་པོ་ལ་གཉིས་ཏེ། ཡིན་ཚུལ་མདོར་བསྟན་པ་དང་། དེ་ཉིད་རྒྱས་པར་བཤད་པའོ། །དང་པོ་ནི། ཀྱེ་གསང་ཆེན་སྙིང་པོའི་ཆོས་ཀུན་སྡུད་པའི་བཀའ་ཡི་སྡུད་པ་པོ་སེམས་དཔའ་རྡོ་རྗེ་ཁྱོད་ཀྱིས་ཆོས་ཐམས་ཅད་ཀུན་བྱེད་བྱང་ཆུབ་སེམས་ལས་ཇི་ལྟར་བྱུང་བའི་ཚུལ་འདི་ཉོན་ཅིག །དེ་ཡང་ཇི་ལྟར་ཞེ་ན་ཀུན་བྱེད་རྒྱལ་པོ་བྱང་ཆུབ་ཀྱི་སེམས་ང་ནི་འཁོར་འདས་ཀྱི་ཆོས་ཀུན་འདུས་པའི་སྙིང་པོ་ཡིན་པ་སྟེ། དེ་བཞིན་དུ་ཀུན་བྱེད་ང་ནི་ཆོས་རྣམས་མ་ལུས་པ་ཀུན་བསྐྱེད་པའི་ས་བོན་ཀྱང་ཡིན་ལ། ང་ནི་ཆོས་རྣམས་ཀུན་གྱི་འབྱུང་གནས་སུ་གྱུར་པས་རྒྱུ་ཡང་ཡིན་ལ། ང་ནི་ཡལ་ག་ལྟ་བུའི་ཆོས་རྣམས་ཀུན་གང་ལས་གྱེས་པའི་སྡོང་པོ་ལྟ་བུ་སྟེ། ང་ནི་ཆོས་རྣམས་ཐམས་ཅད་ཀྱི་རྟེན་གཞིར་གྱུར་པས་གཞི་མ་ཡིན་པ་དང་། ང་ནི་ཆོས་རྣམས་མ་ལུས་ཤིང་ལུས་པ་མེད་པ་ཐམས་ཅད་ཀྱི་གནས་ལུགས་མཐར་ཐུག་པ་ཡིན་པས་རྩ་བའང་ཡིན་ནོ། །ཞེས་མདོར་བསྟན་པའོ། །གཉིས་པ་རྒྱས་པ ར་བཤད་པ་ནི། དེ་ལ་གོང་དུ་བཤད་པ་དེ་དག་གི་རྒྱུ་མཚན་ཅི་ལྟ་བུ་ཞེ་ན། ཡང་འབྱེད་འཕྲུལ་གྱི་ལྡེ་མིག་ལས། དཔེར་ན་རྒྱ་མཚོ་ཆེན་པོ་ལས། །ཆུ་བྲན་རྣམ་པ་མང་པོ་ཡང་། །བྱུང་ཡང་རྒྱ་མཚོ་ཉིད་ལས་བྱུང་། །བྱུང་ཡང་རྒྱ་མཚོ་འགྲིབ་པ་མེད། །འདུས་ཡང་རྒྱ་མཚོ་ཉིད་དུ་འདུས། །འདུས་ཀྱང་དེ་ལ་འཕེལ་བ་མེད། །དེ་བཞིན་བྱང་ཆུབ་སེམས་ཉིད་ལ། །ཆོས་རྣམས་སྣ་ཚོགས་བྱུང་བ་ཡང་། །བྱུང་ཡང་བྱང་ཆུབ་སེམས་ལས་བྱུང་། །བྱུང་ཡང་བྱང་ཆུབ་སེམས་ལ་འགྲིབ་པ་མེད། །འདུས་ཀྱང་བྱང་ཆུབ་སེམས་སུ་འདུས། །འདུས་ཀྱང་བྱང་ཆུབ་སེམས་ལ་འཕེལ་བ་མེད། །ཅེས་གསུངས་པ་ལྟར་ཇི་ལྟར་སྣང་བའི་ཆོས་སྣང་སྲིད་འཁོར་འདས་ཀྱི་རོལ་པར་སྣང་བ་འདི་རྣམས་ཐམས་ཅད་ཀུན་ཆོས་སྐུ་ཀུན་བྱེད་རྒྱལ་པོ་རིག་པ་བྱང་ཆུབ་སེམས་ལས་གཞན་དུ་མ་གྲུབ་པར་གང་སྣང་ཅི་ཤར་ཐམས་ཅད་སེམས་ཉིད་རང་བྱུང་ཡེ་ཤེས་ཀྱི་ཀློང་དུ་གཉིས་མེད་མཉམ་པ་ཉིད་དུ་འདུས་ཤིང་འུབ་ཆུབ་པའི་ཕྱིར་ན་སྣང་སྲིད་འཁོར་འདས་ཀྱི་ཆོས་རྣམས་མ་ལུས་པ་ཀུན་གང་ལས་འབྱུང་བ་དང་གང་དུ་འདུས་པའི་སྙིང་པོར་བཤད་པ་སྟེ། བང་མཛོད་འཕྲུལ་སྡེ་ལས། ཇི་ལྟར་སྣང་བའི་ཆོས་རྣམས་ཀུན། །བྱང་ཆུབ་སེམས་ཀྱི་ཆོས་ཉིད་ཡིན། །མི་སྣང་བ་ལ་མངོན་དུ་འབྱིན་ནུས་པ། །ཆོས་ཀྱི་སྙིང་པོ་ཡིན་པར་ཡིད་ཀྱང་ཆེས། །ཞེས་དང་། དེ་བཞིན་དུ། ཇི་ལྟར་སྣང་བའི་ཆོས་རྣམས་ཐམས་ཅད་ཀུན་ཀུན་བྱེད་བྱང་ཆུབ་ཀྱི་སེམས་གདོད་ནས་སྐྱེ་བ་མེད་པ་ལས་སྐྱེ་བའི་ཆོ་འཕྲུལ་དུ་བྱུང་བ་ཡིན་པའི་ཕྱིར་ན་ཆོས་རྣམས་ཀྱི་བསྐྱེད་པའི་ས་བོན་ལྟ་བུ་ཡིན་ཏེ། རྩེ་མོ་བྱུང་རྒྱལ་ལས། སྐྱེ་མེད་དབྱིངས་ལས་སྐྱེ་བའི་ཆོ་འཕྲུལ་རྣམས། །རྣམ་དག་བྱང་ཆུབ་སེམས་ཀྱི་དབྱིངས་ནས་འཕྲོ། །ཞེས་པ་ལྟར་རོ། །ཇི་ལྟར་སྣང་བའི་ཆོས་འཁོར་འདས་གཉིས་སུ་སྣང་བ་འདི་རྣམས་ཐམས་ཅད་ཀུན་བྱང་ཆུབ་སེམས་ཀྱི་རྩལ་སྣང་ངོ་ཤེས་པ་དང་མ་ཤེས་པའི་དབང་གིས་འཁོར་འདས་སོ་སོར་འབྱུང་ཞིང་སྣང་བའི་ཕྱིར་ན་ཆོས་རྣམས་ཐམས་ཅད་ཀུན་གང་ལས་འབྱུང་བའི་རྒྱུ་ཡང་བྱང་ཆུབ་ཀྱི་སེམས་ཡིན་ཏེ། སྔ་མ་ལས། ཐམས་ཅད་སེམས་ལས་འབྱུང་བའི་ཕྱིར། །ཀུན་གྱི་འབྱུང་གནས་ཡིན་པར་ཡིད་ཀྱང་ཆེས། །ཞེས་སོ། །ཇི་ལྟར་སྣང་བའི་ཆོས་རྣམས་ཀྱི་ཡན་ལག་གི་བྱེ་བྲག་སངས་རྒྱས་དང་སེམས་ཅན་ལ་སོགས་པ་ཀུན་འབྱུང་བས་དེ་དག་གི་གཞི་མ་ཡིན་པའི་ཕྱིར་ན་བྱང་ཆུབ་ཀྱི་སེམས་ནི་ཡལ་ག་ཐམས་ཅད་གང་ལས་གྱེས་པའི་སྡོང་པོ་ལྟ་བུ་ཡིན་ཏེ། རིན་པོ་ཆེ་འཁོར་ལོའི་རྒྱུད་ལས། ག་བུར་དག་གི་རང་བཞིན་ལ། །སྨན་དུག་མིང་དུ་མ་བཏགས་ཀྱང་། །སྨན་དུག་གཉིས་སུ་སྣང་བ་ལྟར། །ཀུན་གཞི་སྤྱི་ས་གཅིག་པ་ལས། །འཆར་སྒོ་གཉིས་སུ་ཤུགས་ཀྱིས་བྱུང་། །ཞེས་གསུངས་པ་ལྟར་རོ། །ཇི་ལྟར་སྣང་བའི་ཆོས་རྣམས་ཐམས་ཅད་ཀུན་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་སྲིད་ཞི་ཀུན་ཁྱབ་ཆེན་པོའི་ངང་ལ་ཡེ་ནས་རྫོགས་ཤིང་གནས་པ་དེ་ལས་གཡོ་བ་མེད་པས་ཆོས་ཐམས་ཅད་བརྟེན་པའི་གཞི་མ་ཡིན་ཏེ། ཀུན་གསལ་ལས། འཁོར་འདས་ཐམས་ཅད་ཀྱི་རྟེན་དུ་གྱུར་པས་ན་གཞིའོ། །ཞེས་དང་། བང་མཛོད་ལས། ཐམས་ཅད་སེམས་ལ་གནས་པའི་ཕྱིར། །ཀུན་གྱི་གཞི་མ་ཡིན་པར་ཡིད་ཀྱང་ཆེས། །ཞེས་པ་ལྟར་རོ། །ཇི་ལྟར་སྣང་བའི་ཆོས་རྣམས་ཐམས་ཅད་ཀུན་གདོད་ནས་སྐྱེ་བ་མེད་པ་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་ཡིན་པས་ན་ཆོས་ཐམས་ཅད་ཀྱི་རྩ་བ་ཡིན་པར་བཤད་དེ། མདོ་བཅུ་ལས། གཅིག་ནི་ཀུན་གྱི་རང་བཞིན་ཏེ། །ཆོས་ཀྱི་དབྱིངས་སམ་བྱང་ཆུབ་སེམས། །ཡིན་པས་རྩ་བའི་དོན་དུ་བཞག །ཅེས་གསུངས་སོ། །གཉིས་པ་ལ་གསུམ་སྟེ། སྐུ་གསུམ་བྱུང་ཚུལ་མདོར་བསྟན་པ་དང་། ཆོས་སྐུ་ལོངས་སྐུ་སྤྲུལ་སྐུ་གསུམ་གྱི་བྱུང་ཚུལ་རྒྱས་པར་བཤད་པ། བསྟན་པ་དང་འཁོར་གཡོས་པ་མེད་པ་དང་རྒྱུ་འབྲས་རྩོལ་བས་དེ་བཞིན་ཉིད་ཀྱི་རང་བཞིན་མི་རྟོགས་པས་དོན་བསྡུས་པའོ། །དང་པོ་ནི། ཀྱེ་སེམས་དཔའ་ཆེན་པོ་རྡོ་རྗེ་ཁྱོད་ཉོན་ཅིག །ཀུན་བྱེད་བྱང་ཆུབ་ཀྱི་སེམས་ང་ཡི་ནི་རང་བཞིན་མ་བཅོས་པ་རྣམ་པ་གསུམ་གྱི་རྩལ་ལས་མིང་གིས་བརྗོད་པ་ཙམ་དུ་རྒྱལ་བ་སྐུ་གསུམ་གྱི་སྟོན་པ་རྣམས་བྱུང་ཚུལ་བསྟན་ན་ཡང་ངེས་པར་སྟེ་ངེས་པའི་དོན་ལ་སྐུ་གསུམ་གྱི་སྟོན་པ་ཡང་ཆོས་ཉིད་དེ་བཞིན་ཉིད་ཀྱི་ངང་ལས་གཡོས་པ་རྡུལ་ཙམ་མེད་པས་ཀུན་བྱེད་ང་ཡི་རང་བཞིན་དུ་རྟག་ཏུ་གནས་པ་ཡིན་ནོ། །ཆོས་དབྱིངས་རིན་པོ་ཆེའི་མཛོད་ལས། གཡང་ས་མེད་པའི་བྱང་ཆུབ་སེམས་ཉིད་ལ། །རྩོལ་བ་མེད་པའི་སྐུ་གསུམ་ལྷུན་རྫོགས་ཀྱང་། །དབྱིངས་ལས་མ་གཡོས་ལྷུན་གྲུབ་འདུས་མ་བྱས། །ཞེས་པ་ལྟར་རོ། །གཉིས་པ་ནི། དེ་ཡང་ཀུན་བྱེད་བྱང་ཆུབ་ཀྱི་སེམས་ང་ཡི་ནི་རང་བཞིན་སྟོང་པའི་ཆ་ཡེ་ནས་མ་སྐྱེས་ཤིང་གཟུང་འཛིན་དང་བྲལ་བ་ལས་ནི་ཆོས་སྐུ་སྐྱེ་བ་མེད་པ་ཞེས་པའི་མིང་ཙམ་བྱུང་ན་ཡང་ངེས་པའི་དོན་མཐར་ཐུག་པར་ན་སྨྲ་བསམ་བརྗོད་པ་ཐམས་ཅད་དང་བྲལ་བ་ཀུན་ཟླུམ་ཐིག་ལེ་ཆེན་པོ་གཅིག་གི་རང་བཞིན་ལས་མེད་པས་ན་ཆོས་སྐུ་ཞེས་བརྗོད་པ་དེ་ཡང་མིང་གི་བླ་དྭགས་ཙམ་སྟེ་དོན་ལ་ཆོས་ཉིད་དེ་བཞིན་ཉིད་ལས་གཡོས་པ་རྡུལ་ཙམ་ཡང་མེད་དོ། །དེ་བཞིན་དུ་ཀུན་བྱེད་བྱང་ཆུབ་ཀྱི་སེམས་ང་ཡི་ངོ་བོ་གསལ་བའི་ཆ་ཞེས་པའི་མིང་ཙམ་ཞིག་མངོན་དུ་བྱུང་བ་ལ་ལོངས་སྤྱོད་རྫོགས་པའི་སྐུ་ཞེས་མིང་གི་ཐ་སྙད་ཙམ་གྱི་ཚུལ་དུ་བརྗོད་ཀྱང་དོན་ངེས་པར་ནི་ལོངས་སྤྱོད་རྫོགས་པའི་སྐུ་དེ་དེ་བཞིན་ཉིད་སྤྲོས་མཐའ་ཐམས་ཅད་དང་བྲལ་བའི་ངང་ལས་གཡོས་པ་མེད་པ་དང་། ཀུན་བྱེད་བྱང་ཆུབ་ཀྱི་སེམས་ང་ཡིས་ནི་ཐུགས་རྗེ་འགག་པ་མེད་པ་སྤྲུལ་པའི་སྐུ་རུ་མངོན་དུ་ཕྱུང་བ་ཡང་འདི་ལྟར་ཐུགས་རྗེ་མ་བཅོས་པའི་རང་བཞིན་གྱི་རྩལ་ལས་མིང་ཙམ་དུ་སྤྲུལ་པའི་སྐུ་ཡི་ཚུལ་དུ་བྱུང་བའོ་ཞེས་ངེས་པར་བརྗོད་པ་ཙམ་ལས་དོན་ལ་བྱུང་ས་བྱུང་མཁན་གྱི་ཆོས་སུ་གྲུབ་པ་གང་ཡང་མེད་པས་སྤྲུལ་པའི་སྐུ་དེ་ཡང་ཆོས་ཉིད་དེ་བཞིན་ཉིད་ལས་གར་ཡང་གཡོས་པ་མེད་དོ་ཞེས་སོ། །གསུམ་པ་ནི། དེ་ལྟར་དེ་བཞིན་ཉིད་ཀྱི་རང་བཞིན་ལས་སྐུ་གསུམ་གྱི་སྟོན་པ་རྣམས་སྐད་ཅིག་ཀྱང་གཡོས་པ་མེད་པ་དེ་བཞིན་དུ། སྟོན་པ་སྐུ་གསུམ་གྱིས་བསྟན་པའི་ཐེག་པ་གསུམ་གྱི་ཆོས་རྣམས་དང་སྐུ་གསུམ་གྱི་འདུས་པའི་འཁོར་དུས་གསུམ་སངས་རྒྱས་ལ་སོགས་པ་རྣམས་དང་། དེས་མཚོན་པའི་ཕུན་སུམ་ཚོགས་པ་ལྔས་བསྡུས་པའི་ཆོས་རྣམས་ཀུན་ལའང་དེ་བཞིན་ཉིད་ལས་གཡོས་པ་རྡུལ་ཙམ་ཡང་མེད་པས་གདོད་ནས་སྐྱེ་བ་མེད་པ་ཆོས་ཉིད་མཉམ་པ་ཉིད་ཀྱི་ངང་ལ་རྟག་ཏུ་གནས་པ་ཉིད་དོ། །དེ་ལྟར་ཆོས་ཐམས་ཅད་སྙིང་པོ་བྱང་ཆུབ་སེམས་ཀྱི་ཀློང་ལས་མོ་གཡོས་མི་གཡོ་གཡོ་བ་མེད་པ་ཡི་ཆོས་ཉིད་འདུས་མ་བྱས་པ་ཡེ་སྟོང་ནམ་མཁའ་ལྟ་བུའི་རང་བཞིན་ཡིན་པ་ལ་ཚོགས་གཉིས་བསགས་པ་ལ་སོགས་པ་རྒྱུ་དང་སངས་རྒྱས་ཀྱི་གོ་འཕང་ལ་འབྲས་བུར་སྒྲོ་བཏགས་པར་བྱས་ནས། དེ་ལ་ཞེན་ཅིང་ཆགས་པའི་རེ་དོགས་ཀྱིས་རྒྱུ་འབྲས་བླང་དོར་གྱིས་རྩོལ་བ་དང་བསྒྲུབ་པ་བྱས་ནས་ནི་རྒྱུ་ལས་འབྲས་བུ་འབྱུང་བར་འདོད་པ་རྣམས་ནི་ཀུན་བྱེད་ང་ལས་རང་བྱུང་དུ་བྱུང་བས་ཡེ་ནས་བྱས་ཟིན་པ་ཡི་ཆོས་འདི་རྣམས་ཐམས་ཅད་རྒྱུ་འབྲས་རྩོལ་སྒྲུབ་ཀྱི་ཡུལ་ལས་འདས་པ་ཡིན་ཀྱང་། དེ་ལྟར་མ་རྟོགས་པས་རྫོགས་ཆེན་བྱ་རྩོལ་བྲལ་བའི་དོན་ལས་གཞན་དུ་ཐེག་པ་འོག་མ་བླང་དོར་རྩོལ་སྒྲུབ་ཅན་གྱི་ལམ་དུ་གོལ་བ་ཡིན་ནོ། །ཞེས་གསུངས་སོ། །གསུམ་པ་ལ་གཉིས་ཏེ། ཕུན་སུམ་ཚོགས་པ་ཐམས་ཅད་སེམས་ཉིད་ཀུན་བྱེད་ཉིད་ཡིན་པ་ལ་ཐེ་ཚོམ་ཟ་བ་སྤང་བ། སེམས་ཉིད་བྱང་ཆུབ་ཏུ་ཡེ་ནས་བསྟན་པའོ། །དང་པོ་ནི། ཀྱེ་སེམས་དཔའ་ཆེན་པོ་ཁྱོད་ཉོན་ཅིག །ཀུན་བྱེད་ང་ཡི་རང་བཞིན་རྣམ་པ་གསུམ་ལས་མངོན་དུ་བྱུང་བའི་སྐུ་གསུམ་གྱི་སྟོན་པ་རྣམས་དང་། དེ་བཞིན་དུ་ང་ལས་བྱུང་བའི་དུས་གསུམ་གྱི་སངས་རྒྱས་རྣམས་དང་། ང་ལས་བྱུང་བའི་སྐུ་གསུམ་གྱི་སྟོན་པ་རྣམས་ཀྱི་འཁོར་གྱི་ཚོགས་དང་དེ་དག་གང་དུ་བཞུགས་པའི་གནས་དང་ནམ་གྱི་ཚེ་ལྷན་གཅིག་ཚོགས་པའི་དུས་ལ་སོགས་པ་ཀུན་ཀྱང་ཡེ་ནས་སྟོན་པ་ཀུན་བྱེད་ང་ཡི་ཐུགས་རང་བྱུང་གི་ཡེ་ཤེས་བྱང་ཆུབ་སེམས་ཀྱི་རང་བཞིན་ལས་སྐད་ཅིག་ཀྱང་གཡོ་མ་མྱོང་བར་ཆོས་ཉིད་དེ་བཞིན་ཉིད་དུ་གནས་པ་ཡིན་ན་སེམས་དཔའ་རྡོ་རྗེ་ཁྱོད་ཀྱིས་དེ་ལ་ཡིན་མིན་དུ་འཛིན་པའི་ཐེ་ཚོམ་གྱིས་རྟོག་ཅིག་དཔྱོད་པར་བྱས་པས་མི་རྟོག་མཉམ་པ་ཉིད་ཀྱི་དོན་དང་འགལ་བ་ཡིན་པས་སེམས་དཔའ་རྡོ་རྗེ་ཉིད་ཀྱིས་དེ་ལ་ཡིན་ནམ་མ་ཡིན་སྙམ་པའི་ཐེ་ཚོམ་གྱིས་མ་རྟོག་པར་ཆོས་ཉིད་གཉུག་མའི་ངང་དུ་མི་རྟོགས་མཉམ་པ་ཉིད་དུ་གནས་པར་གྱིས་ཞིག་ཅེས་གདམས་པའོ། །གཉིས་པ་ནི། འདི་ལྟར་སྟོན་པ་ང་ནི་ཡེ་ནས་ཀུན་བྱེད་རྒྱལ་པོ་བྱང་ཆུབ་ཀྱི་སེམས་ཡིན་ལ། ང་ཡིས་བྱས་པའམ་ང་ཡི་རྩལ་ལས་ཤར་བའི་ཆོས་ཀུན་ཀྱང་བྱང་ཆུབ་ཀྱི་སེམས་ཡིན་ཞིང་། དེ་ལ་བྱང་ཆུབ་ཀྱི་སེམས་ཞེས་པའི་དོན་ནི་ཀུན་བྱེད་ང་ཡི་རང་བཞིན་ཡེ་གདོད་ནས་སྒྲིབ་པའི་དྲི་མ་ཐམས་ཅད་རྣམ་པར་དག་པས་བྱང་བ་དང་། ང་ཡིས་འཁོར་འདས་ཀུན་ལ་གཉིས་མེད་དུ་ཁྱབ་ཅིང་ལྷུན་རྫོགས་མཉམ་པ་ཆེན་པོར་ཡེ་ནས་གནས་པས་ཆུབ་པ་དང་། ང་ཡི་རང་བཞིན་གསལ་ལ་འགགས་པ་མེད་པར་ འཆར་བས་ཡེ་ནས་སེམས ་ཉིད་རང་བྱུང་གི་ཡེ་ཤེས་ཡིན་པའམ། ཡང་བྱང་ཆུབ་ཀྱི་སེམས་ཞེས་བྱ་བའམ། བྱང་ཆུབ་ནི་དྲི་མ་ཐམས་ཅད་ཡོངས་སུ་དག་ཅིང་ཕྱིན་ཅི་མ་ལོག་པར་ཁོང་དུ་ཆུབ་པའི་ཡེ་ཤེས་དང་། སེམས་ནི་ཀུན་ཏུ་རྟོག་པའི་རང་བཞིན་ཅན་ཏེ། དེ་གཉིས་ཐ་དད་དུ་བཞག་པ་ནི་དམིགས་པའི་མཚན་ཉིད་ཏེ་དཔེར་ན་འགལ་མེ་ཉིད་འཁོར་ལོར་འཁྲུལ་པ་ཡིན་པས་སྣང་བའི་སྒོ་ནས་གཉིས་ཀ་དུས་གཅིག་ལ་ཐ་དད་དུ་མི་སྣང་ཡང་དམིགས་པའི་སྒོ་ནས་འགལ་མེ་དང་འཁོར་ལོ་ཐ་དད་དུ་དམིགས་པ་ལྟར་ལ། ངོ་བོ་ཉིད་ཀྱི་མཚན་ཉིད་ནི་ཐ་དད་མིན་པར་གཉིས་སུ་མེད་པའི་མཚན་ཉིད་ཏེ། དཔེ ར་ན་འགལ་མེ་ལ་འཁོར་ལོར་སྣང་བཞིན་པའི་སྐབས་ན་ཡང་འཁོར་ལོའི་སྣང་བ་འཁྲུལ་པ་བསླུ་ཞིང་མི་བདེན་པའི་རང་བཞིན་ཡིན་པས་ཡོད་མ་མྱོང་བར་འགལ་མེའི་ངོ་བོར་གྲུབ་པ་ལྟར་སེམས་ཀུན་ཏུ་རྟོག་པ་ལྟར་སྣང་བཞིན་པ་ན་ཡང་དེ་ཉིད་འཁྲུལ་སྣང་ཡིན་པས་ཡོད་མ་མྱོང་བར་བྱང་ཆུབ་སེམས་ཀྱི་ངོ་བོར་གྲུབ་པ་ཡིན་པས་བྱང་ཆུབ་ཀྱི་སེམས་ཞེས་ཀྱང་གསུངས་སོ། །སྟོན་པ་ང་ནི་གདོད་ནས་སྐྱེ་བ་མེད་པའི་ཕྱིར་ནམ་མཁའ་ལྟ་བུའི་རང་བཞིན་གྱིས་ཡེ་ནས་ཆོས་ཐམས་ཅད་ལ་ཁྱབ་ཅིང་གནས་ལུགས་འདུས་མ་བྱས་པའི་རང་བཞིན་འཁོར་འདས་ཐམས་ཅད་ཀྱི་འབྱུང་གནས་སུ་གྱུར་པ་ཡིན་པའི་ཕྱིར་ན། དེ་ལྟ་བུའི་བྱང་ཆུབ་ཀྱི་སེམས་དེ་ཉིད་ཀྱིས་ནི་དཔེར་ན་སྒྱུ་མའི་རྫས་སྔགས་ལ་བརྟེན་ནས་རྟ་གླང་ལ་སོགས་པ་སྣང་བ་ལྟ་བུའི་འཇིག་རྟེན་སྒྱུ་མར་སྣང་བའི་ཆོས་རྣམས་ཀྱི་དཔེ་བཞིན་དུ་སྐུ་གསུམ་གྱི་སྟོན་པ་དང་དུས་གསུམ་གྱི་སངས་རྒྱས་རྣམས་སྟོན་པ་ཀུན་བྱེད་ང་ཡི་བུ་དང་ཚ་བོ་དང་འཁོར་གྱི་ཚུལ་དུ་མངོན་དུ་བྱུང་ནས། ཕས་བུ་ལ་མ་ནོར་བ་བདེན་པའི་ཚིག་གིས་གདམས་ངག་འབོགས་པ་བཞིན་དུ། དོན་ནོར་བ་མེད་པ་རང་གི་རིག་པ་བྱང་ཆུབ་ཀྱི་སེམས་ནི་ནམ་མཁའ་བཞིན་དུ་སྐྱེ་མེད་ཀུན་ལ་ཁྱབ་པའི་རང་བཞིན་དུ་བསྟན་ནས། ཀུན་བྱེད་བྱང་ཆུབ་སེམས་ཀྱི་རྩལ་ལས་འཁོར་འདས་ཀྱི་རོལ་པ་བྱུང་ཚུལ་ནམ་མཁའ་ཡི་ཀློང་དུ་སྣོད་བཅུད་ཐམས་ཅད་སྐྱེ་མེད་ཀྱི་དབྱིངས་ལས་འགགས་མེད་དུ་བྱུང་བ་བཞིན་དུ་བསྟན་པ་ཡིན་ནོ། །ཞེས་གསུངས་སོ། །དེ་ལྟར་ངེས་པར་བསྟན་པའི་མདོ་ལུང་བཅུ་དགོས་པ་དང་བཅས་པས། སེམས་ཉིད་ཕུན་སུམ་ཚོགས་པའི་རང་བཞིན་ཡིན་པར་གཏན་ཚིགས་དཔེ་དོན་དང་བཅས་པས་བསྟན་པ་ཉིད་བདེན་པར་སྨྲ་བའི་སྐྱེ་བོས་བཀའ་ཕྲིན་བསྙད་པ་ལྟར་མ་ནོར་ངེས་པའི་དོན་ལ་ཡིད་ཆེས་པར་བསྟན་པའོ། །ལེའུའི་མཚན་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོའི་མདོ་ལས། ཆོས་ཐམས་ཅད་བྱང་ཆུབ་ཀྱི་སེམས་ཀུན་བྱེད་ལས་བྱུང་བའི་ཁུངས་ཀྱི་ལེའུ་སྟེ་ཉི་ཤུ་པའི་འགྲེལ་བའོ།། ༈ །།དོན་གཉིས་པ་རྒྱུ་འབྲས་ལས་འདས་པའི་ལེའུ་བཅུས་སེམས་ཉིད་ཀུན་བྱེད་རྒྱལ་པོ་ཡེ་ནས་བྱ་བཙལ་མེད་པར་བསྟན་པའི་ལེའུ་བཅུ་ལས་དང་པོ་ཐམས་ཅད་རང་བྱུང་གི་ཡེ་ཤེས་སུ་གཅིག་པས་ངོ་བོ་གཅིག་ལ་རྒྱུ་འབྲས་གཉིས་སུ་མེད་པའི་ལེའུ་ཉེར་གཅིག་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། དེ་ལྟར་ཕུན་སུམ་ཚོགས་པ་ལྔས་བསྡུས་པའི་ཆོས་ཐམས་ཅད་ཀུན་བྱེད་ཉིད་ཡིན་པར་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་སྟོན་པ་སྐུ་གསུམ་གྱིས་བསྟན་པའི་ཆོས་ཐམས་ཅད་ཀྱི་འབྱུང་གནས་སམ་ཁུངས་ཀྱི་རྒྱལ་པོ་ཀུན་བྱེད་ཉིད་ཡིན་པའི་ཕྱིར་དེ་ཐམས་ཅད་ཉིད་ལས་བྱུང་བའི་ཚིག་འདི་གསུངས་སོ། །གཉིས་པ་ལ་གསུམ་སྟེ། སེམས་ཉིད་རང་བྱུང་གི་ཡེ་ཤེས་ཉིད་ཀུན་ལས་ཁྱད་པར་འཕགས་པས་རྒྱུ་འབྲས་རྩོལ་སྒྲུབ་ལས་འདས་ཚུལ་མདོར་བསྟན་པ་དང་། དེ་ཉིད་གཏན་ཚིགས་ལྔས་འདས་ཚུལ་རྒྱས་པར་བཤད་པ་དང་། སེམས་ཉིད་སྤྲོས་བྲལ་བརྗོད་ལས་འདས་པས་རྒྱུ་འབྲས་བྱ་རྩོལ་མི་དགོས་པའི་དོན་བསྡུ་བའོ། །དང་པོ་ལ་གཉིས་ཏེ། ཕུན་སུམ་ཚོགས་པ་ཀུན་ཡེ་ལྡན་ལྷུན་གྲུབ་ཏུ་གནས་པས་ཕྱི་ནས་བྱ་བཙལ་རྒྱུ་འབྲས་ལ་མི་ལྟོས་པ་དང་། སེམས་ཉིད་སྐྱེ་འགགས་གནས་གསུམ་ལས་གྲོལ་བས་སྐུ་གསུམ་ལྷུན་རྫོགས་གཏན་ཚིགས་ལྔ་ལྡན་དུ་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་རྡོ་རྗེ་འཛིན་པ་ཁྱོད་ཀྱིས་ཆོས་ཐམས་ཅད་ཀྱི་ཁུངས་ཀུན་བྱེད་བྱང་ཆུབ་ཀྱི་སེམས་ཡིན་པའི་ཚུལ་འདི་ཉོན་ཅིག་དང་བཤད་པར་བྱའོ་ཞེས་པ་སྟེ། དེ་ཡང་ཇི་ལྟར་ན་ཀུན་བྱེད་ང་ནི་ཕུན་སུམ་ཚོགས་པའི་ཆོས་རྣམས་ཀུན་མ་བཙལ་ལྷུན་གྲུབ་ཀྱི་ཚུལ་དུ་བྱེད་པའི་རྒྱལ་པོ་ཡིན་པ་སྟེ། འདི་ལྟར་སྐུ་གསུམ་གྱི་སྟོན་པ་རྣམས་གང་ལས་བྱུང་བར་གྱུར་པའི་ཕ་མ་ང་ཉིད་ཡིན་ལ། སྐུ་གསུམ་གྱི་སྟོན་པ་དེ་ལས་བྱུང་བའི་དུས་གསུམ་གྱི་སངས་རྒྱས་ཀུན་གྱི་མེས་པོ་ཡང་སྟོན་པ་ང་ཉིད་ཡིན་ཞིང་། དེ་དག་གི་འཁོར་གྱི་ཚོགས་དང་གནས་དང་དུས་རྣམས་ཀྱི་རང་བཞིན་ཕུན་སུམ་ཚོགས་པའི་སྒོ་ནས་སྐུ་གསུམ་པོས་བསྟན་པའི་ཐེག་པ་རྣམས་གསལ་ཞིང་སྟོན་པར་བྱེད་པའི་སྒྲོན་མའང་ང་ཉིད་ཀྱིས་བྱེད་པ་སྟེ། དེ་ལྟར་ན་ཀུན་བྱེད་ང་ཡི་རང་བཞིན་རྣམ་པ་གསུམ་ལས་སྐུ་གསུམ་གྱི་སྟོན་པ་རྣམས་ང་ཡི་རྩལ་ལས་ཐུགས་རྗེ་ཕྱི་གསལ་གྱི་ཆར་བྱུང་བ་ཡིན་པའི་རྒྱུ་མཚན་དེ་བས་ན། ཕུན་སུམ་ཚོགས་པའི་ཆོས་ཐམས་ཅད་ནི་ཡེ་ནས་བྱང་ཆུབ་ཀྱི་སེམས་སུ་ལྷུན་གྱིས་གྲུབ་ཟིན་པས་གསར་དུ་འབད་རྩོལ་རྒྱུ་འབྲས་ལ་ལྟོས་མི་དགོས་ལ། དེས་ན་སྐུ་གསུམ་གྱི་སྟོན་པ་རྣམས་ཀྱིས་བསྟན་པའི་རྒྱུ་འབྲས་ཀྱི་ཐེག་པ་སྣ་ཚོགས་གསུངས་པ་དེ་ཡི་བཤད་ལུགས་ཆོས་སྐུས་བྱིན་གྱིས་རླབས་ཀྱིས་བཤད་པ་ལ་སོགས་པ་རྣམ་པ་གསུམ་གྱིས་དབྱེ་བས་ཆོས་རྣམས་ཀྱི་བཤད་ལུགས་རྣམ་པ་གསུམ་ཡང་བསྟན་པ་དེ་ཡང་སྟོན་པར་བྱེད་པ་པོ་གཞན་སུ་ཡང་མེད་པར་ཀུན་བྱེད་ང་ཡིས་བསྟན་པ་ཁོ་ན་ཡིན་ནོ། །གཉིས་པ་ནི། ཀུན་བྱེད་རྒྱལ་པོ་ང་ཡི་རང་བཞིན་འདི་ཉིད་ནི་ཡེ་ནས་སྐྱེ་འགགས་གནས་གསུམ་དང་བྲལ་བ་རང་བྱུང་འདུས་མ་བྱས་པའི་བདག་ཉིད་རྒྱུ་འབྲས་རྩོལ་སྒྲུབ་ཀུན་ལས་འདས་པ་ཡིན་པས་སྟོན་པ་གཞན་ཀུན་ལས་ཁྱད་པར་དུ་འཕགས་པ་ཡིན་པའི་ཕྱིར་ན་སྐུ་གསུམ་ལྷུན་རྫོགས་རང་བྱུང་ཆེན་པོ་ལ་རྒྱུ་འབྲས་རྩོལ་སྒྲུབ་མི་དགོས་པའི་གཏན་ཚིགས་དོན་གྱི་བཤད་ལུགས་རྣམ་པ་ལྔས་སྒོ་ནས་ཀུན་བྱེད་བྱང་ཆུབ་སེམས་ཀྱི་དོན་མ་ནོར་བ་ཇི་ལྟ་བ་བཞིན་ངེས་པར་བྱེད་པའི་གཏན་ཚིགས་ཀྱི་ཁུངས་ཀྱང་ཀུན་བྱེད་ངས་བསྟན་ཏོ། །ཞེས་པའོ། །གཉིས་པ་ལ་ལྔ་སྟེ། ལོ་རྒྱུས་དོན་གྱི་བཤད་ལུགས་དང་། །རྩ་བ་དོན་གྱི་བཤད་ལུགས་དང་། །ཡོ་ག་དོན་གྱི་བཤད་ལུགས་དང་། །དགོས་ཆེད་དོན་གྱི་བཤད་ལུགས་དང་། །ཚིག་གི་དོན་གྱི་བཤད་ལུགས་སོ། །དང་པོ་ལ་གཉིས་ཏེ། བཤད་ཚུལ་གཉིས་མདོར་བསྟན་པ་དང་། ཀུན་བྱེད་བྱང་ཆུབ་ཀྱི་སེམས་སྐུ་གསུམ་སྟོན་པ་གསུམ་གྱིས་བཤད་ཚུལ་གཉིས་རྒྱས་པར་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་འདི་ལྟར་ཀུན་བྱེད་རྒྱལ་པོ་ཞེས་བྱ་བ་ནི་བྱང་ཆུབ་ཀྱི་སེམས་འདི་ཉིད་ཡིན་ལ། རིག་པ་བྱང་ཆུབ་ཀྱི་སེམས་དེ་ལ་ནི་འཁོར་འདས་ཀྱི་ཆོས་ཐམས་ཅད་ཡེ་ནས་རྫོགས་ཤིང་ཆེ་བ་ལྔའི་ངོ་བོ་སངས་རྒྱས་པ་ཡིན་པས་རྫོགས་པ་ཆེ་བའམ་ཆེན་པོ་ཡིན་ཞིང་དེ་ལྟ་བའི་སེམས་ཉིད་རྫོགས་པ་ཆེན་པོ་རང་བྱུང་གི་ཡེ་ཤེས་དེ་ནི་ཡེ་ནས་རྒྱུ་འབྲས་རྩོལ་སྒྲུབ་ལས་འདས་པ་ཡིན་པས། དེས་ན་རྒྱུ་འབྲས་བྱ་རྩོལ་གྱི་ཡུལ་ལས་འདས་པའི་བཤད་ལུགས་བསྟན་པ་དང་། ཀུན་བྱེད་བྱང་ཆུབ་སེམས་ཀྱི་རང་བཞིན་ལྷུན་གྲུབ་རྣམ་པ་གསུམ་ལས་རྒྱལ་བ་སྐུ་གསུམ་གྱི་སྟོན་པ་རྣམས་བྱུང་ནས་རྒྱུ་འབྲས་ཀྱི་ཐེག་པ་རྣམས་གསུངས་པའི་བཤད་ལུགས་བསྟན་པ་དང་། རྣམ་པ་གཉིས་ཀྱི་བཤད་ལུགས་བསྟན་པའོ། །གཉིས་པ་ནི། དེ་ལ་ཀུན་བྱེད་བྱང་ཆུབ་སེམས་ཀྱི་བཤད་ལུགས་ནི་གང་ཞེ་ན། འདི་ལྟར་བྱང་ཆུབ་ཀྱི་སེམས་དེ་ནི་རྒྱུ་འབྲས་རྩོལ་སྒྲུབ་ཀུན་ལས་འདས་པའི་ཕྱིར་ན་གཏན་ཚིགས་དོན་གྱི་བཤད་ལུགས་ལྔ་ཡིས་བཤད་པ་དང་། སྐུ་གསུམ་སྟོན་པ་གསུམ་གྱི་བཤད་ལུགས་ནི་རང་རང་གི་ཕུན་སུམ་ཚོགས་པ་རྣམ་པ་ལྔ་ཡི་ནང་དུ་བསྡུས་ནས་བཤད་པ་སྟེ། འདི་ལྟར་སྟོན་པ་ཆོས་ཀྱི་སྐུ་ཡིས་ནི་ཉིད་ལས་མི་གཞན་པའི་འཁོར་ཡེ་ཤེས་རྒྱ་མཚོའི་ཚོགས་རྣམས་ལ་སྐྱེ་མེད་དོན་གྱི་གསུང་ལ་བརྟེན་ནས་ཐུགས་རང་བྱུང་ཡེ་ཤེས་ཀྱི་རྒྱུད་ཆེན་པོ་ལྔ་དགོངས་པ་གཉིས་སུ་མེད་པའི་བྱིན་གྱིས་བརླབས་ཀྱིས་བཤད་པའི་ཚུལ་ནི། ཐིག་ལེ་ཀུན་གསལ་ལས། སྟོན་པ་འགྱུར་མེད་ཆོས་ཀྱི་སྐུ། །བསྟན་པ་མི་ནུབ་རྒྱལ་མཚན་ནི། །གསང་བའི་རིག་པ་རྒྱུད་ཆེན་ལྔ། །འདུས་པའི་འཁོར་ཚོགས་ཉིད་ལས་མི་གཞན་པའི། །རིགས་ལྔའི་བདེ་གཤེགས་འོད་དུ་འབར་བ་ལ། །བཞུགས་གནས་སྐྱེ་མེད་སྤྲོས་བྲལ་ཆོས་ཀྱི་དབྱིངས། །དུས་ནི་འདས་དང་མ་བྱོན་སྔོན་རོལ་ན། །རྟོག་མེད་སྟོན་པས་བྱིན་གྱིས་བརླབས་ཀྱིས་བཤད། །ཉིད་ལས་མི་གཞན་སྐུ་ལྔ་རང་རང་གི། །རྒྱུད་ཆེན་བྱིན་གྱིས་བརླབས་ཀྱིས་གོ། །ཞེས་དང་། སྟོན་པ་ལོངས་སྤྱོད་རྫོགས་པའི་སྐུ་བདེ་གཤེགས་རིགས་ལྔའི་ཚོགས་ཀྱིས་རྒྱལ་སྲས་བྱང་ཆུབ་སེམས་དཔའི་འཁོར་ཚོགས་རྣམས་ལ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བསྡུས་པའི་རྒྱུད་ཆེན་པོ་ལྔ་སྟོན་པ་རང་རང་གི་སྐུ་ཡི་ངོ་བོ་མངོན་སུམ་དུ་བསྟན་པའི་སྒོ་ནས་དགོངས་པ་བརྡ་ཡི་གསུང་གིས་སྟོན་པའི་ཚུལ་ཀྱང་། དེ་ཉིད་ལས། སྟོན་པ་རིགས་ལྔ་བདེ་གཤེགས་ལྔ། །བསྟན་པ་གསང་བའི་རྒྱུད་ཆེན་ལྔ། །འདུས་པའི་འཁོར་ནི་སེམས་དཔའ་སེམས་མའི་ཚོགས། །བཞུགས་པའི་གནས་ནི་ཡེ་ཤེས་གཞལ་མེད་འོད་ཀྱི་ཀློང་། །དུས་ནི་དེ་རྣམས་རིག་པ་ཡུལ་ལ་ཤར་བའི་ཚེ། །ཚིག་དང་ཡི་གེའི་སྒོ་ནས་མི་འཆད་པར། །སྐུ་ཡི་ཆ་བྱད་སྒོ་ནས་སྟོན། །ཞེས་སོགས་ཀྱིས་བསྟན་ལ། སྟོན་པ་སྤྲུལ་པའི་སྐུ་རྡོ་རྗེ་སེམས་དཔས་གོང་དུ་བསྟན་པའི་གསང་བའི་རྒྱུད་ཆེན་ལྔས་མཚོན་པའི་ཕྱི་ནང་གསང་བའི་རྒྱུད་སྡེ་བསམ་གྱིས་མི་ཁྱབ་པ་སངས་རྒྱས་རབ་བདུན་ལ་སོགས་པའི་འཁོར་ཚོགས་རྣམས་ནི་ཡན་ལག་དྲུག་ཅུའི་གསུང་གིས་དོན་རྣམས་སྒྲ་ཚིག་ཏུ་བརྗོད་ཅིང་སྡེབ་སྦྱོར་ལེགས་པའི་སྒོ་ནས་བཤད་ཚུལ་ཀྱང་། དེ་ལས། སྟོན་པ་རྡོ་རྗེ་སེམས་དཔའ་ངས། །བསྟན་པའི་སྙིང་པོ་གསང་བའི་རྒྱུད་ཆེན་ལྔ། །དེ་སོགས་ཕྱི་ནང་གསང་བས་བསྡུས་པ་རྣམས། །ཐུགས་ཀྱི་ཀློང་དུ་ཤེས་རབ་ཆེན་པོས་བཀྲོལ། །མགུར་གྱི་བུམ་པར་ཡེ་ཤེས་རླུང་གིས་དྲིལ། །ཞལ་གྱི་ལྗགས་ལ་མ་འདྲེས་གསལ་བར་བཀྲམ། །ཚེམ་གྱི་བར་ནས་ཚིག་དོན་སོ་སོར་བཤད། །ཡན་ལག་དྲུག་ཅུའི་སྡེབ་སྦྱོར་ལེགས་པར་བཤད། །ཁྱུང་ཆེན་ལྡིང་ཐབས་དོན་གྱི་སྤྱི་ཁོག་དབུབ། །སྟག་མོའི་མཆོངས་སྟབས་ལྟ་བུའི་དཀྱུས་ཀྱི་ས་རྣམས་བཅད། །རུ་སྦལ་འགྲོས་ཀྱིས་ཚིག་གི་འབྲུ་རྣམས་གཞོམ། །སེང་གེའི་གདངས་སྐད་ལྟ་བུའི་ཐེག་བརྒྱད་ཟིལ་གྱིས་གནོན། །གླག་མོའི་གཟན་འཇུམ་ལྟ་བུས་དོན་གྱི་མན་ངག་དྲིལ། །འདུས་པའི་འཁོར་ཚོགས་སངས་རྒྱས་རབ་བདུན་ལ། །ལྷ་གནས་གསུམ་དུ་བདུད་རྩིའི་ཆར་ཆེན་ཕབ། །པདྨ་བརྩེགས་པའི་གནས་མཆོག་རྣམ་གསུམ་མོ། །ཞེས་གསུངས་ལ། གཞན་ཡང་སྟོན་པ་ཐུབ་པའི་དབང་པོ་ལ་སོགས་པས་སྡེ་སྣོད་གསུམ་གྱི་ཆོས་འཁོར་བསྐོར་བ་ཐམས་ཅད་སྤྲུལ་སྐུའི་སྡེབ་སྦྱོར་ལེགས་པར་གསུངས་པ་སྟེ། རི་བོ་བརྩེགས་པའི་རྒྱུད་ལས། ཁང་བཟང་གནས་སུ་སྤྲུལ་སྐུའི་སྟོན་པ་ཡིས། །མོས་ཚད་ཀུན་དགའ་བོ་ལ་སྡེ་སྣོད་རྣམ་གསུམ་བཤད། །སྤྲུལ་སྐུས་ཚིག་ཏུ་སྡེབས་ཏེ་བཤད་པའི་དུས། །ཞེས་གསུངས་པ་སྟེ། དེ་དག་ནི་སྐུ་གསུམ་གྱིས་སྟོན་པས་བསྟན་པའི་ཆོས་རྣམས་ཀྱི་བཤད་ལུགས་རྣམ་པ་གསུམ་སྟེ་དོན་ལ་ཀུན་བྱེད་ང་ཡི་རང་བཞིན་རྣམ་པ་གསུམ་ལས་གཞན་པའི་སྐུ་གསུམ་གྱི་སྟོན་པ་ཞིག་མེད་པས་ན་དེ་ཡི་བཤད་ལུགས་བསྟན་པ་ཡིིན་ནོ། །དེ་བཞིན་དུ་རྒྱུ་འབྲས་འདས་པའི་བཤད་ལུགས་ནི་ཇི་ལྟར་ན་ཀུན་བྱེད་བྱང་ཆུབ་ཀྱི་སེམས་ང་ནི་ཡེ་ནས་རང་བྱུང་འདུས་མ་བྱས་པ་སྐུ་གསུམ་ལྷུན་རྫོགས་ཆེན་པོའི་བདག་ཉིད་ཡིན་པས་རྒྱུ་འབྲས་ཀུན་ལས་འདས་པ་སྟེ། དེ་ལྟར་རྒྱུ་འབྲས་ལས་འདས་པས་ལུས་ཀྱི་བྱ་བྱེད་དང་ངག་གིས་སྨྲ་བརྗོད་དང་སེམས་ཀྱིས་བསམ་དཔྱོད་སོགས་སྒོ་གསུམ་གྱི་སྤྱོད་ཡུལ་ཀུན་ལས་འདས་པ་ཡིན་ལ། དེ་ལྟར་རྒྱུ་འབྲས་རྩོལ་སྒྲུབ་ཀུན་གྱི་ཡུལ་ལས་འདས་པའི་ཆོས་ཉིད་ནམ་མཁའ་ལྟ་བུ་དེ་ནི་བྱང་ཆུབ་ཀྱི་སེམས་ཡིན་པས་ན་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ཉིད་ནི་སྐུ་གསུམ་གྱི་ཕུན་སུམ་ཚོགས་པས་བསྡུས་པའི་ཆོས་ཐམས་ཅད་ཀུན་གྱི་འབྱུང་གནས་སུ་གྱུར་པའི་སྙིང་པོ་ཡིན་ཞིང་། དེ་ལྟར་ཆོས་ཐམས་ཅད་གང་ལས་བྱུང་བའི་སྙིང་པོ་ཡིན་པར་བསྟན་པས་ལོ་རྒྱུས་དོན་གྱི་སྒོ་ནས་བསྟན་པ་གང་ལས་བྱུང་བའི་ཚུལ་ལ་ཡིད་ཆེས་ཀྱི་ཁུངས་ཀྱང་བསྟན་པ་ཡིན་ཏེ། བང་མཛོད་འཕྲུལ་ལྡེ་ལས། ཐམས་ཅད་སེམས་ལས་བྱུང་བའི་ཕྱིར། །ཀུན་གྱི་འབྱུང་གནས་ཡིན་པར་ཡིད་ཀྱང་ཆེས། །ཞེས་དང་། རྒྱུ་ལས་མ་བྱུང་རྐྱེན་གྱིས་མ་བསྐྱེད་པས། །རང་བྱུང་ཡེ་ཤེས་ཡིན་པར་ཡིད་ཀྱང་ཆེས། །ཞེས་གསུངས་སོ། །གཉིས་པ་ནི། འདི་ལྟར་བྱང་ཆུབ་ཀྱི་སེམས་ནི་འཁོར་འདས་ཀྱི་ཆོས་ཐམས་ཅད་ཀུན་གྱི་གང་ལས་སྣང་བའི་གཞིའམ་རྩ་བ་སྟེ། དེ་ལྟར་རྩ་བ་ཡིན་པས་ན་ཕྱི་ནང་སྣང་སྲིད་ཀྱི་ཆོས་ཐམས་ཅད་ཀུན་གྱི་དོན་ཡང་བྱང་ཆུབ་སེམས་སུ་འདུས་པ་ཡིན་ཏེ། ཆོས་དབྱིངས་མཛོད་ལས། ཐམས་ཅད་ཀུན་འདུས་བྱང་ཆུབ་སེམས་སུ་འདུས། །བྱང་ཆུབ་སེམས་ལས་མ་གཏོགས་ཆོས་མེད་པས། །ཆོས་ཀུན་བྱང་ཆུབ་སེམས་ཀྱི་རང་བཞིན་ནོ། །ཞེས་གསུངས་སོ། །དེས་ན་ཆོས་ཐམས་ཅད་རྩ་བ་བྱང་ཆུབ་ཀྱི་སེམས་སུ་བསྡུས་ཤིང་དེ་ལས་གཞན་དུ་མེད་པར་ཡེ་གདོད་མ་ཉིད་ནས་སྙིང་པོ་བྱང་ཆུབ་སེམས་ཀྱི་རང་བཞིན་དུ་སངས་རྒྱས་པ་ཡིན་པས། ད་བླང་དོར་འབད་རྩོལ་གྱི་སྒོ་ནས་ལམ་གྱིས་བཅོས་ཤིང་སྒྲུབ་ཏུ་མེད་པར་སྟོན་པ་ནི་རྩ་བའི་དོན་གྱིས་བཤད་པ་སྟེ། དོན་གསལ་ལས། རྩ་བའི་དོན་དུ་བཤད་པ་ནི། །རང་རིག་ཡེ་ཤེས་ཆེན་པོར་བཤད། །ཅེས་སོ། །གསུམ་པ་ནི། ཀུན་བྱེད་བྱང་ཆུབ་སེམས་ཀྱི་རང་བཞིན་ནི་རྒྱུ་འབྲས་རྩོལ་སྒྲུབ་ཀུན་ལས་འདས་པའི་ཕྱིར་ན་རྒྱུ་འབྲས་རྩོལ་སྒྲུབ་ཅན་གྱི་ཐེག་པ་གོང་འོག་གི་ཁྱད་པར་ཀུན་ལས་འཕགས་པ་ཡིན་ལ། དེ་ལྟར་ཐེག་པ་ཀུན་ལས་ཁྱད་པར་འཕགས་པ་ཡིན་པས་ན། རྫོགས་པ་ཆེན་པོའི་གཞུང་གིས་ཐེག་པ་ཐམས་ཅད་ཀྱི་གྲུབ་པའི་མཐའ་སོ་སོར་མ་འདྲེས་པར་ཤན་ཡང་འབྱེད་ཅིང་དེ་དག་གིས་རྒྱུ་འབྲས་རྩོལ་སྒྲུབ་བྱེད་པ་དང་གྲུབ་མཐའི་བློ་སྐྱོན་ཐམས་ཅད་སུན་དབྱུང་ཞིང་རྫོགས་པ་ཆེན་པོ་རྒྱུ་འབྲས་འབད་རྩོལ་ཀུན་ལས་འདས་པར་ལ་བཟླ་བའི་ཚུལ་གྱིས་བཤད་པ་ནི་ཡོ་གའི་དོན་གྱི་བཤད་པ་སྟེ། དེ་ཉིད་ལས། ཡོ་གའི་དོན་དུ་བཤད་པ་ནི། །ཐེག་པའི་ལ་ཤན་ཕྱེ་ལ་བཤད། །ཅེས་སོ། །བཞི་པ་ནི། བྱང་ཆུབ་སེམས་ཀྱི་ཡིན་ལུགས་རྒྱུ་འབྲས་རྩོལ་སྒྲུབ་གང་ཡང་མི་དགོས་པར་གདོད་ནས་མངོན་པར་བྱང་ཆུབ་པས་མ་བཅོས་རྣལ་བཞག་ཆེན་པོའི་དོན་འདི་རྟོགས་པར་གྱུར་ན་ཆོས་ཉིད་དེ་བཞིན་ཉིད་ཀྱི་ཀློང་དུ་འཁོར་འདས་ཀྱི་ཆོས་ཀུན་ཀྱང་ཡེ་ནས་སངས་རྒྱས་པར་རྟོགས་པ་དེས་ན་སྐལ་ལྡན་དབང་རབ་རྣམས་བླང་དོར་འབད་རྩོལ་གྱིས་གདུང་བ་མེད་པར་རྩོལ་མེད་དུ་གྲོལ་བའི་ཆེད་དུ་བཤད་པ་ནི་དགོས་ཆེད་དོན་གྱིས་བསྟན་པ་ཡིན་ཏེ། བང་མཛོད་འཕྲུལ་ལྡེ་ལས། བླ་མེད་བྱང་ཆུབ་ཆེན་པོ་འདི། །བཙལ་བས་འགྲུབ་པ་མ་ཡིན་ཏེ། །མ་བཙལ་རྣལ་དུ་བཞག་པས་གྲུབ། །གདོད་ནས་སྙིང་པོ་བྱང་ཆུབ་ལ། །བཙལ་ཀྱང་དབྱིངས་ལས་བསྐྱོད་པ་མེད། །བཙལ་ན་རྩོལ་བའི་ནད་དུ་འགྱུར། །ཞེས་གསུངས་པ་ལྟ་བུའི་སྐྱོན་དང་བྲལ་བའི་ཕྱིར་རོ། །ལྔ་པ་ནི། འདི་ལྟར་བྱང་ཆུབ་སེམས་ཀྱི་རང་བཞིན་ནི་སྤྲོས་པ་ཐམས་ཅད་དང་བྲལ་ཞིང་བསམ་བརྗོད་ཀྱི་ཡུལ་ལས་འདས་པ་ཡིན་པས་ན་དེའི་ངོ་བོ་འདི་ལྟ་བུའོ་ཞེས་ཚིག་ཏུ་དངོས་སུ་བརྗོད་དུ་མེད་དེ་བརྗོད་མེད་དོན་གྱི་གནས་ལུགས་ཡིན་ན་ཡང་། འོན་ཀྱང་མཛུབ་མོས་ཟླ་བ་ལྟར་མཚོན་པར་བྱེད་པའི་ཚིག་ཙམ་ཞིག་མ་བརྗོད་དུ་ཟིན་ན་ཡང་ཆོས་ཉིད་བྱང་ཆུབ་སེམས་ཀྱི་རང་བཞིན་མི་སྣང་ཞིང་རྟོགས་པར་མི་འགྱུར་བས་ན་ཡོད་མེད་དང་ཡིན་མིན་ལ་སོགས་པ་སྤྲོས་པའི་མཐའ་གང་དུའང་མི་སྣང་ཞིང་དཔེ་དང་གཏན་ཚིགས་སོགས་ཀྱིས་མཚོན་དུ་མེད་དོ་ཅེས་པ་ལྟ་བུས་མ་བརྗོད་པའམ་བརྗོད་པར་མ་བྱས་ན་གང་ཟག་ཀུན་ཀྱང་རང་གི་སེམས་ཀྱི་ཆོས་ཉིད་མ་མཐོང་བར་རྒྱུ་འབྲས་རྩོལ་སྒྲུབ་བྱེད་པའི་ལམ་དུ་གོལ་བའི་ཉེན་ཡོད་པའི་རྒྱུ་མཚན་དེས་ན་རྫོགས་ཆེན་ཨ་ཏི་ཡོ་ག་བརྗོད་དུ་མེད་པའི་ཚིག་གི་དོན་ཡང་བཤད་ཏེ། དེ་ཡང་ཇི་ལྟར་བཤད་ན་དོན་གྱི་ཁོག་ཕུབ། དཀྱུས་ཀྱི་ས་བཅད། ཚིག་གི་འབྲུ་བཅོམ་སྟེ་བཤད་པར་བྱ་སྟེ། དོན་གསལ་ལས། ཁྱུང་ཆེན་གཤོགས་རྫོགས་ལྟ་བུའི་བློས། །དོན་གྱི་སྤྱི་ཁོག་ཕུབ་སྟེ་བཤད། །སྟག་གི་མཆོངས་སྟབས་ལྟ་བུའི་བློས། །དཀྱུས་ཀྱི་ས་རྣམས་བཅད་དེ་བཤད། །རུས་སྦལ་ནུར་འགྲོས་ལྟ་བུའི་བློས། །ཡི་གེའི་འབྲུ་རྣམས་བཅོམ་པར་བཤད། །ཅེས་གསུངས་པ་ལྟར་རོ། །གསུམ་པ་ནི། གོང་དུ་བཤད་པ་ལྟ་བུའི་རྒྱུ་མཚན་དེས་ན་གཏན་ཚིག་དོན་གྱི་བཤད་ལུགས་རྣམ་པ་ལྔ་པོ་འདིས་ཀུན་བྱེད་རྒྱལ་པོ་བྱང་ཆུབ་སེམས་ཀྱི་དོན་བྱར་མེད་ལྷུན་གྱིས་གྲུབ་པའི་ཡིན་ལུགས་མ་ནོར་བ་ཇི་ལྟ་བ་བཞིན་དུ་ངེས་པར་གཏན་ལ་འབེབས་པར་བྱེད་པ་དེས་ནི་རྒྱུ་འབྲས་བླང་དོར་ཀྱང་མེད་པར་ཆོས་ཉིད་མཉམ་པ་ཆེན་པོ་གཅིག་གི་རང་བཞིན་དུ་གཏན་ལ་ཕབ་པ་ཡིན་པས་འཁོར་འདས་སུ་སྣང་བའི་ཆོས་ཐམས་ཅད་ལ་བཟང་ངན་དང་སྤང་བླང་གི་དབྱེ་བ་མེད་པ་ཀུན་བྱེད་བྱང་ཆུབ་སེམས་ཀྱི་རང་བཞིན་ཡིན་པར་ཡིད་ཀྱང་ཆེས་པར་འགྱུར་ལ། དེ་ལྟར་ཆོས་ཐམས་ཅད་བྱང་ཆུབ་ཀྱི་སེམས་ཡིན་ཞིང་སེམས་ཉིད་ཡེ་ནས་སྤྲོས་བྲལ་མཉམ་པ་ཉིད་དུ་སངས་རྒྱས་པར་ཡིད་ཆེས་པས། ད་ལྟའི་སྣང་བ་འདི་ལས་གཞན་དུ་སེམས་ལ་བཙལ་དུ་མེད་པར་ཡིད་ཀྱང་ཆེས་ལ། བཙལ་དུ་ཡེ་ནས་མེད་པར་ཡིད་ཆེས་ཤིང་བློ་ཐག་གཏིང་ནས་ཆོད་པས་ལམ་ལ་མི་རྩོལ་ཞིང་གཉེན་པོས་མི་བསྒྲུབ་པར་རྩོལ་མེད་བདེ་བ་ཆེན་པོའི་ངང་ལ་གནས་ཤིང་སྤྲོས་བྲལ་རང་བྱུང་གི་ཡེ་ཤེས་ཡེ་ནས་འདུས་མ་བྱས་པ་ཀུན་བཟང་ཆོས་སྐུའི་རང་ཞལ་མངོན་དུ་མཐོང་བར་འགྱུར་བ་སྟེ། དེས་ན་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་དེ་ལྟར་དུ་གནས་པ་ཡིན་པས་ན་ཀུན་བྱེད་ང་ལས་སངས་རྒྱས་ཞེས་བྱ་བ་གང་ཡང་གཞན་ནས་བཙལ་དུ་མེད་དོ། །ཞེས་གསུངས་སོ། །ལེའུའི་མཚན་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་གཏན་ཚིགས་བཤད་ལུགས་ཀྱི་ལེའུ་སྟེ་ཉི་ཤུ་རྩ་གཅིག་པའི་འགྲེལ་བའོ།། ༈ །།དོན་གཉིས་པ་སེམས་ཉིད་མཐའ་གང་དུ་ཡང་མི་གནས་ཤིང་དམིགས་པའི་ཡུལ་མེད་པས་རྒྱུ་འབྲས་རྩོལ་སྒྲུབ་ལས་འདས་པའི་དོན་རྒྱུ་འབྲས་དག་གྲོལ་དུ་འཛིན་པས་མི་རྟོགས་པར་གསང་བ་དམ་པའི་ལེའུ་ཉེར་གཉིས་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། རྫོགས་པ་ཆེན་པོ་གཏན་ཚིགས་དང་ལྡན་པས་ཇི་ལྟར་བཤད་པའི་ཚུལ་བསྟན་པ། དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས། རྗེས་འཇུག་སྐལ་པ་དང་ལྡན་པ་ཨ་ཏི་རྫོགས་པ་ཆེན་པོའི་གདུལ་བྱར་གྱུར་པའི་རྣལ་འབྱོར་པ་རྣམས་ཀྱི་སེམས་ཉིད་མ་བཅོས་རྣལ་དུ་བཞག་པའི་ཕྱིར་དུ་བླང་དོར་བྱ་རྩོལ་ལ་ལྟོས་པ་མེད་པར་འབྲས་བུའི་ཆོས་ཐམས་ཅད་ཡེ་རྫོགས་ལྷུན་གྱིས་གྲུབ་པའི་ལུང་ཁུངས་རྩོལ་བཅས་ཀྱི་ཐེག་པ་བརྒྱད་ལས་ཁྱད་དུ་འཕགས་པའི་ཆེན་པོ་བླ་ན་མེད་པ་འདི་གསུངས་སོ་ཞེས་པའོ། །གཉིས་པ་ལ་གསུམ་སྟེ། སེམས་ཉིད་ནམ་མཁའ་ལྟ་བུ་བཅོས་བསྒྱུར་གཉེན་པོ་ལས་འདས་པའི་དོན་མདོར་བསྟན་པ། དེའི་རང་བཞིན་རྒྱས་པར་བཤད་པ། ཐམས་ཅད་སེམས་ཉིད་ཀྱི་རོལ་པ་སྤང་བླང་ལས་འདས་པའི་སྙིང་པོ་ཀུན་ལ་ཁྱབ་ཚུལ་གྱིས་དོན་བསྡུ་བའོ། །དང་པོ་ནི། ཀྱེ་སེམས་དཔའ་ཆེན་པོ་རྡོ་རྗེ་ཁྱོད་ཉོན་ཅིག་དང་བྱར་མེད་ཡེ་ནས་རྫོགས་པའི་མན་ངག་ཟབ་མོ་འདི་ཉིད་སྟོན་པར་བྱའོ། །ཞེས་པ་སྟེ། དེ་ཡང་ཇི་ལྟར་ཞེ་ན། ཀྱེ་བླང་དོར་བྱ་རྩོལ་ལ་ལྟོས་པ་མེད་པའི་ཡུལ་ཆོས་ཀྱི་དབྱིངས་འོད་གསལ་འདུས་མ་བྱས་པའི་ཡེ་ཤེས་ནི་སྤྲོས་པའི་མཐའ་གང་ལའང་མི་གནས་པའི་ཕྱིར་ན་ནམ་མཁའ་དང་འདྲ་བ་ཡིན་ལ། དེ་ལྟར་མཐའ་གང་ལའང་མི་གནས་ཤིང་གཟུང་འཛིན་རྣམ་རྟོག་གིས་དམིགས་པའི་ཡུལ་དུ་གྲུབ་པ་མེད་པ་དེ་ཡི་ཕྱིར་ན། ཐེག་པ་འོག་མ་པ་ལྟར་སྤོང་འགོགས་སྦྱོང་བསྒྱུར་ལ་སོགས་པའི་རྣམ་པ་ཅིར་ཡང་མི་རྟོག་པར་མ་བཅོས་རང་བབ་ཏུ་གནས་པ་ནི་ཆོས་ཉིད་ཀྱི་ངོ་བོ་ཡེ་ནས་བགྲོད་དུ་མེད་པས་མ་ནོར་བའི་ལམ་ཡེ་ཇི་བཞིན་པའི་ངང་དུ་གནས་པ་ཡིན་ཏེ། རྩེ་མོ་བྱུང་རྒྱལ་ལས། མཉམ་སྦྱོར་ཀུན་ཏུ་བཟང་པོ་ཉིད་ཀྱི་དབྱིངས། །རྣམ་དག་ལམ་ཆེན་ཀུན་སྒྲོལ་དགོངས་པའི་ཐུགས། །བགྲོད་མེད་རྣལ་འབྱོར་རྫོགས་པ་ཆེན་པོའི་ལམ། །བྱར་མེད་ལྷུན་རྫོགས་སྐྱེ་མེད་ཆོས་ཀྱི་དབྱིངས། །ཞེས་པ་ལྟར་རོ། །དེ་ལས་གཞན་དུ་སྒོམ་རྩོལ་ལ་རེ་བའི་རྟོག་པ་ནི་བསྔོ་བའི་ཆ་ཤས་ཕྲ་མོ་ཞེས་བསྔོ་བ་ནི་སྨོན་ཅིང་འདུན་པའི་མཚན་ཉིད་ཡིན་ལ། རེ་སྨོན་གྱི་མཐའ་ལ་གནས་པ་ནི་དེའི་ཆ་ཤས་ཕྲ་མོའི་རང་བཞིན་གང་ཞིག་བླང་དོར་གྱི་ཡུལ་ལ་དམིགས་ནས་བྱུང་བ་སྟེ། དེ་ལྟ་བུའི་བློ་རྣམ་པར་རྟོག་པའི་སྒོམ་པ་དེ་ཅི་ཙམ་བརྟན་པར་གྱུར་ཀྱང་ཆོས་ཀྱི་སྐུ་ནི་སེམས་ཀྱི་འཁྲུལ་སྣང་འདི་ལས་ཁྱད་པར་དུ་བྱུང་ཞིང་ལྷག་པར་གྱུར་པའི་དོན་གཞན་ཞིག་མེད་དེ་འཁྲུལ་སྣང་གི་ངོ་བོ་གང་ཡིན་པ་དེ་ཉིད་ཆོས་སྐུ་ཡིན་པའི་ཕྱིར་ཏེ། འདི་ལྟར་འཁྲུལ་སྣང་ཡང་སེམས་ཡིན་ལ་སེམས་རང་གི་ངོ་བོ་མ་གྲུབ་པས་རྟོག་པ་རང་བཞིན་གྱིས་མེད་པ་སྟེ། དེས་ན་ཡུལ་གྱི་རྣམ་པ་གང་སྣང་སེམས་ཀྱི་རྟོག་པ་ཅི་སྐྱེའང་རང་བཞིན་གྱིས་འོད་གསལ་བས་རང་བྱུང་གི་ཡེ་ཤེས་རང་ཤར་བ་མི་རྟོག་ཆོས་སྐུའི་རང་བཞིན་དུ་དུས་དང་རྣམ་པ་ཀུན་ཏུ་ཇི་བཞིན་དུ་གནས་པ་དེ་ནི་འབད་རྩོལ་གྱི་བྱ་བ་དང་བྲལ་བ་དང་། ཡུལ་གང་ལའང་མི་གནས་ཤིང་གཉེན་པོས་བཅོས་སུ་མེད་པས་བྱར་མེད་ཡེ་འབྱམས་ཀྱི་རང་བཞིན་དུ་བསྟན་པ་སྟེ། རྫོགས་པ་སྤྱི་གཅོད་ལས། སྣང་སྲིད་མ་ལུས་ཡེ་ནས་དག་པས་ན། །རང་གི་སེམས་ཉིད་རྒྱལ་བ་སངས་རྒྱས་ཡིན། །རྡོ་རྗེ་སེམས་དཔའ་དབྱེར་མེད་ཡེ་སངས་རྒྱས། །ཡེ་ནས་དག་པས་ཆོས་སྐུ་བདེ་བའི་མཆོག །ཅེས་གསུངས་པ་ལྟར་རོ། །གཉིས་པ་རྒྱས་པར་བཤད་པ་ལ་བཞི་སྟེ། སེམས་ཉིད་རྒྱུ་འབྲས་རྩོལ་སྒྲུབ་ལས་འདས་པའི་དོན་ཐེག་པ་བརྒྱད་ཀྱིས་མི་རྟོགས་པའི་ཚུལ་རྒྱས་པར་བཤད་པ། སེམས་ཉིད་ཨ་ཏིར་རང་གནས་ཆོས་སྐུ་དེ་བཞིན་ཉིད་ཀྱི་དགོངས་པ་རང་ལ་ཡེ་ནས་གནས་པའི་ཚུལ་རྒྱས་པར་བཤད་པ། ཐེག་པ་བརྒྱད་པོ་ཨ་ཏིར་འཇུག་པའི་ཐབས་སུ་ཆེ་འབྲིང་གཉེན་པོའི་རིམ་པས་གསུངས་ཚུལ་རྒྱས་པར་བཤད་པ། སེམས་ཉིད་ཨ་ཏི་ཀུན་བྱེད་ཉིད་མ་བཅོས་རྣལ་དུ་བཞག་ཐབས་འབྲས་བུ་དང་བཅས་པ་རྒྱས་པར་བཤད་པའོ། །དང་པོ་ལ་གཉིས་ཏེ། ཐེག་བརྒྱད་སོ་སོའི་ལམ་གྱིས་སྙིང་པོའི་དོན་མི་མཐོང་བར་བྱེ་བྲག་ཏུ་བཤད་པ་དང་། དེ་ཐམས་ཅད་རྒྱུ་འབྲས་རྩོལ་བའི་ནད་ཀྱིས་སེམས་ཉིད་ཇི་བཞིན་པའི་ལུས་གདུང་བ་སྤྱིར་བཤད་པའོ། །དང་པོ་ལ་བརྒྱད་དེ། སེམས་ཉིད་གདོད་ནས་དག་པའི་སྙིང་པོ་ལ་རྟེན་འབྲེལ་འབྱུང་ལྡོག་གིས་བསྒོམ་ཀྱང་གསར་དུ་དག་པའི་འབྲས་བུ་མི་ཐོབ་སྟེ་ཡེ་ནས་ཆོས་སྐུར་གནས་པའི་ཚུལ་དང་། ཉན་ཐོས་པས་གཟུང་ཡུལ་དངོས་པོ་དང་འཛིན་བྱེད་ཤེས་པ་རྡུལ་ཕྲན་ཆ་མེད་དང་སྐད་ཅིག་མ་དོན་དམ་དུ་བཞག་ནས་བདག་མེད་དུ་བསྒོམས་ཀྱང་སེམས་ཉིད་ཡངས་བའི་དོན་མི་མཐོང་བའི་ཚུལ་དང་། བྱང་ཆུབ་སེམས་དཔའ་ཡུལ་བདག་མེད་དུ་བསྒོམ་ཀྱང་དེ་ཉིད་ལས་ལོག་པའི་དོན་མངོན་སུམ་དུ་མི་མཐོང་བའི་ཚུལ་དང་། ཀྲི་ཡས་སེམས་ལས་གཞན་པའི་ལྷ་ཐ་དད་དུ་བསྒོམ་ཀྱང་དེ་ཉིད་སེམས་ཉིད་ཡིན་པས་དབྱིངས་ཐུག་མེད་དུ་གནས་པའི་ཚུལ་དང་། ཨུ་པས་གཉིས་བཅས་སུ་བསྒོམ་ཀྱང་སེམས་ལས་ལྷག་པའི་ཡེ་ཤེས་གཞན་ན་མེད་པའི་ཚུལ་དང་། ཡོ་གས་བདག་དམ་ཚིག་པ་ལ་ཡེ་ཤེས་སེམས་དཔའ་གཞན་ནས་བསྟིམ་ནས་དབྱེར་མེད་དུ་བསྒོམ་བྱ་སྒོམ་བྱེད་གཉིས་སུ་མི་མཐོང་བའི་ཚུལ་དང་། མ་ཧཱས་སྣང་བཅས་བསྐྱེད་པའི་རིམ་པས་རང་བྱུང་གི་ཡེ་ཤེས་གཅིག་ལ་ལྷ་དང་གཞལ་ཡས་ཁང་དུ་རྟོག་ཀྱང་ལུས་དང་གྲིབ་མ་ལྟར་གཉིས་བཅས་མི་དག་པའི་ཚུལ་དང་། ཨ་ནུས་བདེ་སྟོང་རྫོགས་རིམ་གྱི་ཡེ་ཤེས་དབྱིངས་ལས་རང་བྱུང་དུ་བསྒོམ་ཀྱང་རྗེས་ཆགས་རྩོལ་སྒྲུབ་ལས་མ་འདས་པའི་ཚུལ་ལོ། །དང་པོ་ནི། འདི་ལྟར་རང་རྒྱལ་ལམ་དུ་ཞུགས་པ་རྣམས་ཀྱིས་ཕྱི་ནང་གི་རྟེན་འབྲེལ་ཡན་ལག་བཅུ་གཉིས་ལུགས་འབྱུང་དུ་མཆེད་པའི་སྒོ་ནས་འཁོར་བའི་ཆོས་ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་འགྲོ་བ་གནས་རིས་མཐོ་དམན་སྣ་ཚོགས་སུ་སྣང་བ་སྟེ། མདོར་ན་འཁོར་བའི་ཆོས་ཐམས་ཅད་ཀྱི་རྩ་བ་རྟེན་འབྲེལ་བཅུ་གཉིས་ཀྱི་དབང་གིས་བྱུང་བ་ཡིན་པར་བལྟས་ནས། དེ་ཉིད་ལུགས་ལྡོག་ཏུ་བསྒོམ་པའི་སྒོ་ནས་རང་བྱུང་སྙིང་པོའི་ཡུལ་ལམ་ཆོས་ཐམས་ཅད་ཀྱི་སྙིང་པོའི་རང་བཞིན་དུ་གྱུར་པའི་གནས་ལུགས་ཡང་དག་པ་ཞིག་ཡུལ་དུ་བྱས་ནས་ཚོལ་ཞིང་བསྒོམ་དུ་ཡོད་པར་རློམ་ནས་རྣམ་པ་ཅིར་ཡང་མི་རྟོག་པར་རྩེ་གཅིག་ཏུ་གནས་པའི་ཏིང་ངེ་འཛིན་ལ་མཉམ་པར་འཇོག་པའི་ཐབས་ཀྱིས་སྙིང་པོ་བྱང་ཆུབ་ཀྱི་སེམས་དེ་ལ་རོལ་ཞིང་འཇུག་པར་རྩོལ་ན་ཡང་རྣམ་པར་མི་རྟོག་པ་སྒོམ་པ་དེ་ནི་རྟོག་པ་ལ་ལྟོས་ནས་བཞག་པ་ཙམ་ཡིན་ཀྱང་། རྟོག་པ་ནི་གདོད་ནས་ཡོད་མ་མྱོང་བས་ན་དེ་ལ་ལྟོས་པའི་མི་རྟོག་པ་ཡང་ཇི་ལྟར་གྲུབ་སྟེ་མི་འགྲུབ་པས་ན་ཀུན་བརྟགས་ཁོ་ན་ཡིན་ཞིང་། སྙིང་པོ་བྱང་ཆུབ་ཀྱི་རང་བཞིན་ནི་དེ་ལྟ་བུའི་རྒྱུ་རྐྱེན་ལ་རག་མ་ལུས་པར་གདོད་ནས་ཡེ་སངས་རྒྱས་པའི་ངོ་བོར་བཞུགས་པ་ཉིད་རྣལ་འབྱོར་བ་རྣམས་ལ་རིག་པ་རང་གསལ་གྱི་ཚུལ་དུ་མངོན་དུ་འབྱུང་ཞིང་འཆར་བ་ཡིན་པའི་རྒྱུ་མཚན་དེ་བས་ན་འབྲས་བུ་ཆོས་སྐུ་དེ་ཉིད་གཞན་ན་བཙལ་དུ་མེད་པར་གསུངས་པའོ། །གཉིས་པ་ནི། འདི་ལྟར་ཆོས་ཐམས་ཅད་ནི་གདོད་ནས་སྙིང་པོ་བྱང་ཆུབ་སེམས་ཀྱི་རྩལ་ལས་རང་ཤར་བ་མེད་སྣང་སྟོང་གཟུགས་ཀྱི་རོལ་པ་ཙམ་ལས་ཡོད་མ་མྱོང་བས་ཆོས་ཉིད་སྐྱེ་བ་མེད་པ་དོན་དམ་བློ་འདས་ཆེན་པོའི་ངོ་བོར་གནས་པ་ལ། ཉན་ཐོས་པ་རྣམས་ཀྱིས་བེམ་ཤེས་རང་མཚན་པའི་ངོ་བོར་བལྟས་ཏེ། དེ་ཡང་གཟུགས་མཐའ་རྡུལ་ཕྲན་ཆ་མེད་དང་ཤེས་མཐའ་སྐད་ཅིག་ཆ་མེད་གཉིས་དོན་དམ་དུ་བཞག་ནས། དེ་ལ་གང་ཟག་གི་བདག་མེད་པར་གཏན་ལ་ཕབ་སྟེ་བསྒོམ་པར་བྱེད་པ་དེ་ནི་ཆོས་ཉིད་ཇི་བཞིན་པའི་དོན་མིན་ཏེ། ཅིའི་ཕྱིར་ན་རྡུལ་ཕྲན་ཆ་མེད་གཅིག་ལ་ཕྱོགས་བཅུའི་རྡུལ་ཕྲན་བཅུས་ཅིག་ཆར་དུ་བསྐོར་ཏེ་གཙེས་པའམ་བརྟགས་ཤིང་དཔྱད་ན་ཕྱོགས་བཅུ་ཡི་ཆ་ཀུན་དང་བྲལ་བས་དོན་ལ་མ་གྲུབ་པ་དང་། དེ་བཞིན་དུ་ཤེས་པ་སྐད་ཅིག་སྔ་ཕྱི་ལ་བརྟགས་ཀྱང་མ་གྲུབ་ལ། གང་ཟག་གི་བདག་མེད་བསྒོམ་པ་ཡང་གཞན་སེལ་གྱི་ཆ་བློ་རྣམ་རྟོག་གི་གཟུགས་བརྙན་ཙམ་ལས་དོན་ལ་མ་རེག་པའི་ཕྱིར་རོ། །འོ་ན་གནས་ལུགས་ཇི་བཞིན་པའི་དོན་དེ་ཇི་ལྟ་བུ་ཞེ་ན། ཆོས་ཐམས་ཅད་ཀྱི་གནས་ལུགས་གདོད་ནས་སྐྱེ་བ་མེད་ཅིང་སྤྲོས་པའི་མཐའ་གང་ལའང་མི་གནས་པའི་དོན་དམ་བྱང་ཆུབ་སེམས་ཀྱི་ཆོས་ཉིད་ནོར་བ་མེད་པས་ལེགས་པའམ་ཡང་དག་པའི་ཡེ་ཤེས་ནི་རྒྱུ་རྐྱེན་གཞན་ལ་ལྟོས་པ་མེད་པར་འདུས་མ་བྱས་པའི་ངོ་བོར་རང་གསལ་དུ་འབྱུང་བ་སྟེ། དེས་ན་རང་རིག་པའི་མངོན་སུམ་མམ་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་ཙམ་ལས་ཐེག་པ་འོག་མ་ལྟར་ཕྱི་ནང་གི་ཆོས་ཀུན་ལ་དེ་དང་དེར་རྟོག་ཅིང་ཆ་མེད་གཉིས་སོགས་བརྟགས་པར་མི་བྱེད་པས་རྣམ་པར་མི་རྟོག་པའི་རང་བཞིན་ཆོས་ཐམས་ཅད་ཀྱི་འབྱུང་གནས་སུ་གྱུར་པས། ཆོས་དབྱིངས་ཡངས་པ་ཆེན་པོ་སྤྲོས་པ་ཐམས་ཅད་དང་བྲལ་བའི་བདག་ཉིད། ཀུན་གྱི་དངོས་གཞི་དམ་པར་གྱུར་པས་སྙིང་པོ་བྱང་ཆུབ་ཀྱི་རང་བཞིན་ཡིན་ལ། དེ་ལ་ལས་དང་ཉོན་མོངས་སོགས་མ་གྲུབ་པར་གདོད་ནས་རྣམ་པར་དག་པས་མ་བགྲོད་ཡེ་ནས་ཕྱིན་པའི་འཁོར་འདས་ཡོངས་ཀྱི་སྤྱི་ལམ་ཆེན་པོ་དེར་ཞུགས་ནས་ཞེས་ཡེ་ནས་དེའི་ངང་ལས་འདའ་བ་མེད་པའི་རང་བཞིན་དུ་ཤེས་ན་ཆོས་ཉིད་མཉམ་པའི་རྒྱལ་པོ་ཀུན་བྱེད་ཆོས་སྐུའི་དགོངས་པ་ཇི་བཞིན་པ་མངོན་དུ་ཐོབ་པར་འགྱུར་རོ་ཞེས་སོ། ། དེ་ལྟར་ཡང་མདོ་བཅུ་ལས། ཀུན་དང་མི་མཐུན་སྤང་བའི་ཆོས། །ཉོན་མོངས་ལྔ་དང་མཚམས་མེད་ལྔ། །དེ་ནི་རྣམ་དག་ཆེན་པོ་སྟེ། །གར་བཞུགས་མཉམ་པའི་རྒྱལ་པོ་ཐོབ། །ཅེས་གསུངས་སོ། །གསུམ་པ་ནི། བྱང་ཆུབ་ཀྱི་སེམས་ནི་གོང་དུ་བཤད་པ་དེ་ལྟར་འདུས་བྱས་སྐད་ཅིག་མའི་ཆོས་སུ་མ་གྲུབ་པར་རང་བྱུང་འདུས་མ་བྱས་པའི་ངོ་བོ་ཡིན་པས་རང་གི་ངོ་བོ་མི་འགྱུར་བའི་ཕྱིར་དང་། སྙིང་པོ་བྱང་ཆུབ་ཀྱི་རང་བཞིན་དུ་ཡེ་ནས་སངས་རྒྱས་པའི་ཕྱིར་ན་ད་གསར་དུ་སྒོམ་སྒྲུབ་རྩོལ་བ་ལ་བརྟེན་ནས་སྔར་བས་ལྷག་པའི་གནས་འགྱུར་ཏེ་འབྲས་བུ་སངས་རྒྱས་ཀྱི་ངོ་བོ་ཐོབ་པ་མེད་པས་རྒྱུ་རྐྱེན་གྱིས་འགྱུར་བ་མེད་ལ། དེ་མེད་པས་དེ་ལྟར་ཐོབ་པར་སྨོན་པའི་རེ་འདོད་ཀྱིས་ཆགས་པའི་གནས་ཀྱང་མེད་དེ་དེའི་ཡུལ་དུ་མ་གྱུར་པའི་ཕྱིར་རོ། །དེ་བཞིན་དུ་གཟུང་ཞིང་རྟོགས་པར་བྱ་བའི་ཡུལ་ཆོས་ཀྱི་དབྱིངས་ཞེས་པའང་གཞན་དུ་མེད་ཅིང་ཐོབ་པར་བྱ་བ་སེམས་ཀྱི་གནས་ལུགས་ཆོས་སྐུའི་གོ་འཕང་ཉིད་ཀྱང་རང་བྱུང་གི་ཡེ་ཤེས་དེ་ལས་གཞན་དུ་མེད་པ་ལ། མཚན་ཉིད་བྱང་ཆུབ་སེམས་དཔའི་ཐེག་པ་བ་རྣམས་ཀྱིས་ཡུལ་ཆོས་ཀྱི་དབྱིངས་དེ་ཡུལ་ཅན་བདག་མེད་གཉིས་རྟོགས་ཀྱི་ཡེ་ཤེས་ཀྱིས་མངོན་སུམ་དུ་མཐོང་བའི་སྒོ་ནས་ས་བཅུ་རིམ་གྱིས་བགྲོད་དེ་འབྲས་བུ་སངས་རྒྱས་ཀྱི་གོ་འཕང་ཞིག་གསར་དུ་ཐོབ་པར་འདོད་ནས། དེའི་རྒྱུ་བདག་མེད་པའི་དོན་ལ་རྟག་ཏུ་བསྒོམ་པར་བྱེེད་པ་ནི་སྒོམ་པའི་རོ་ལ་ཆགས་ཞིང་བདེ་བ་ཐོབ་པར་འདོད་པའི་རེ་སྨོན་དང་མ་བྲལ་བས། དེ་ལྟ་བུའི་གང་ཟག་དེ་ལ་འཁོར་འདས་མཉམ་ཉིད་དུ་རྟོགས་པའི་དོན་མི་འབྱུང་བར་གསུངས་པ་སྟེ། ཁྱུང་ཆེན་ལས། ས་བཅུ་མཐའ་ཕྱིན་པ་ཉིད་དེ་འཛིན་དེ་རྟོག་པས། །དེ་ལའང་མི་གནས་གནས་པའི་གནས་དང་བྲལ། །ལམ་མེད་ལམ་དུ་འདོད་པས་འགྲོ་བ་འཁྲུལ། །འབྲས་བུ་ཐོབ་རེ་འཇིགས་པས་དོན་མི་མཐོང་། །ཡང་དག་མཐའ་ལ་བསྙེག་པས་ཡུལ་དང་བྲལ། །དེ་བཞིན་དབྱིངས་སུ་འདོད་པས་བདེ་མི་རྙེད། །འདོད་ཡོན་ཉོན་མོངས་སྤངས་བས་བྱང་མི་ཆུབ། །འཁོར་བ་རྒྱབ་ཕྱོགས་མྱ་ངན་ཡོངས་མི་འདའ། །ས་དང་ཕ་རོལ་ཕྱིན་ལམ་ཟད་མཐའ་མེད། །ཅེས་གསུངས་པ་ལྟར་རོ། །བཞི་པ་ནི། སྔགས་ཀྱི་ཐེག་པ་ཕྱི་རྒྱུད་སྡེ་གསུམ་ལས་ཀྲྀ་ཡ་བས་བདག་དང་ལྷ་ཡེ་ཤེས་པ་གཉིས་ལ་བཟང་ངན་ཐ་དད་དུ་བལྟས་ནས་རྗེ་ཁོལ་གྱི་ཚུལ་དུ་བསྒོམས་པས་འབྲས་བུ་ལྷ་ལ་བརྟེན་ནས་ཐོབ་པར་འདོད་ཀྱང་། ཆོས་སྐུ་ཐིག་ལེ་ཉག་གཅིག་རིག་པ་བྱང་ཆུབ་སེམས་ཀྱིས་འཁོར་འདས་ཀྱི་ཆོས་ཀུན་ལ་བཟང་ངན་བླང་དོར་མེད་པར་མཉམ་ཉིད་དུ་ཁྱབ་ཅིང་འཕོ་འགྱུར་མེད་པར་གནས་པ་ཡིན་པས། དེ་ལས་གཞན་པའི་ལྷ་ཡེ་ཤེས་པ་ཞིག་གིས་མཆོག་ཐུན་གྱི་དངོས་གྲུབ་ལྷག་པ་ཞིག་སྩོལ་ཞིང་བསྣན་པའི་ཆོས་གང་ཡང་མེད་དེ། སྒྲོན་མ་འོད་འབར་ལས། དངོས་གྲུབ་ཀ་དག་ཡེ་གསལ་བློ་འདས་ཏེ། །དངོས་མེད་བསམ་བྲལ་རང་ལ་གྲུབ་པ་ལས། །ལྷ་ཡིས་གནང་ཞིང་གཞན་ནས་ཐེབ་པ་མེད། །ཅེས་གསུངས་པ་ལྟར་ལ། དེས་ན་ཆོས་ཉིད་བྱང་ཆུབ་ཀྱི་སེམས་ནམ་མཁའི་ཁམས་ལྟར་མཐའ་ལ་ཐུག་ཅིང་ཟད་པ་མེད་པས་འཁོར་འདས་ཐམས་ཅད་ལ་ཁྱབ་ཅིང་ཐམས་ཅད་དེའི་ཀློང་ལས་འདའ་བ་མེད་ཕྱིར་འབྲས་བུ་སངས་རྒྱས་ཀྱི་ས་ལ་གཞན་དུ་བགྲོད་པར་འདོད་པས་སྒོམ་སྒྲུབ་རྩོལ་བ་ལ་ཅི་ཙམ་འབད་པར་བྱས་ཀྱང་ཆོས་དབྱིངས་བྱང་ཆུབ་ཀྱི་སེམས་ལ་མ་དག་འཁྲུལ་པའི་ཆ་བྲི་ཞིང་ཟད་པ་དང་སྔར་བས་ལྷག་པའི་ཡོན་ཏན་ཞིག་འཕེལ་ཞིང་གང་བ་མེད་པས་རྫོགས་ཆེན་བྱ་རྩོལ་དང་བྲལ་བའི་ལམ་ལས་གཞན་དུ་གོལ་བ་སྟེ། བང་མཛོད་འཕྲུལ་ལྡེ་ལས། ཆོས་ཉིད་ནམ་མཁའ་ལྟ་བུ་ལ། །བགྲོད་པས་ཕྱིན་པར་འདོད་པ་ནི། །ཁྱུང་ཆེན་ནམ་མཁའི་མཐའ་ཚོལ་འདྲ། །བགྲོད་པས་འབྲས་བུ་ཐོབ་འདོད་པ། །མདོངས་བས་ནམ་མཁའ་བསྙེགས་པ་འདྲ། །ས་དང་ལམ་ལ་བགྲོད་བྱེད་པ། །བྱ་བྲལ་དོན་དང་མཐུན་པ་མེད། །ཅེས་གསུངས་སོ། །ལྔ་པ་ནི། ཨུ་པ་ཡས་ལྟ་བ་ཡོ་ག་དང་སྤྱོད་པ་ཀྲྀ་ཡ་དང་མཐུན་པར་གཉིས་བཅས་ཀྱི་ལམ་ལ་བརྟེན་ཏེ་ལྟ་བ་ཆོས་ཀྱི་དབྱིངས་མཐའ་ཐམས་ཅད་བྲལ་བའི་རོལ་བ་དག་པ་ལྷའི་རང་བཞིན་དུ་བསྒོམ་པས་ཏིང་ངེ་འཛིན་གྱི་ཉམས་ཁྱད་པར་དུ་ཕག་པའམ་འཕགས་པའི་སྒོ་ནས་འབྲས་བུ་རིགས་བཞི་རྡོ་རྗེ་འཛིན་པའི་གོ་འཕང་ཐོབ་པར་འདོད་པ་དེ་ཡང་། སྔར་བས་ལྷག་པའི་གནས་སམ་སངས་རྒྱས་ཀྱི་ས་གཞན་ཞིག་ལ་ཕྱིན་པ་མེད་དེ། སེམས་ཉིད་རང་བྱུང་གི་ཡེ་ཤེས་ཡེ་ནས་ཆེ་བ་ལྔའི་ངོ་བོར་སངས་རྒྱས་པས་ཁྱད་པར་དུ་འཕགས་པའི་ཡུལ་ལ་སེམས་ཅན་ནས་སངས་རྒྱས་ཀྱི་བར་ཀུན་ཏུ་ཁྱད་པར་རྡུལ་ཙམ་མེད་པར་ཡེ་ཇི་བཞིན་དུ་གནས་པའི་ཕྱིར་ཏེ། རྒྱལ་ཚབ་ཆེན་པོས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་ལྟར་རོ། །དྲུག་པ་ནི། རྣལ་འབྱོར་ཡོ་ག་བས་དོན་དམ་མཚན་མ་མེད་པའི་རྩལ་སྣང་ཀུན་རྫོབ་རྡོ་རྗེ་དབྱིངས་ཀྱི་དཀྱིལ་འཁོར་རམ་རིགས་ལྔ་སྟུག་པོ་བཀོད་པའི་ཞིང་ངོ་མཚར་རྨད་དུ་བྱུང་བ་ཞིག་མཐོང་བར་རེ་བའི་བློས་བདག་དམ་ཚིག་སེམས་དཔའ་ལ་ལྷ་ཡེ་ཤེས་སེམས་དཔའ་ཆུ་ལ་ཆུ་བཞག་པ་ལྟར་དབྱེར་མེད་དུ་བསྟིམ་ཞིང་བསྒོམ་པའི་རྩོལ་བ་བྱེད་པ་དེ་ཡང་། རྫོགས་པ་ཆེན་པོས་བསྒོམ་བྱའི་ཡུལ་ལྷ་དང་ཡུལ་ཅན་སྒོམ་བྱེད་ཀྱི་བློ་གཉིས་སུ་མེད་པར་བྱང་ཆུབ་ཀྱི་སེམས་གཅིག་གི་རང་བཞིན་ལས་གཞན་དུ་མེད་པར་རྟོགས་པས་ཅི་ཡང་མི་བསྒོམ་ཞིང་། བྱང་ཆུབ་ཀྱི་སེམས་དེ་ལ་སྤྲོས་པའི་མཚན་མ་གང་ཡང་མི་དམིགས་པས་ཡ་མཚན་ཆེན་པོའི་འབྲས་བུ་གསར་དུ་མཐོང་བ་ཡང་ཅི་ཡང་མེད་ལ། དེ་ལྟར་གང་ཡང་མ་མཐོང་བ་དེ་ནི་མཐོང་བའི་དམ་པ་ཡིན་པས་ཐམས་ཅད་མཁྱེན་པའི་མིག་གམ་སྤྱན་ཡིན་པར་གསུངས་ཏེ། མདོ་བཅུ་ལས། ཐོགས་པ་མེད་པའི་ཡེ་ཤེས་ནི། །བསམ་པ་ཀུན་དང་བྲལ་བ་ཡིན། །ངང་གིས་མི་གཡོ་རྨུག་པ་དེ། །ཏིང་འཛིན་དག་གི་རྒྱལ་པོར་གནས། །ཏིང་འཛིན་ཡེ་ཤེས་མངོན་སུམ་སྤྱན། །མཐོང་བས་དམིགས་པའི་ཡུལ་དང་བྲལ། །ཐམས་ཅད་མཁྱེན་པའི་སྤྱན་ཞེས་བྱ། །ཞེས་གསུངས་སོ། །དེ་ལྟ་བུའི་མཐོང་བྱ་མཐོང་བྱེད་དང་བྲལ་བའི་གནས་ལུགས་རང་བྱུང་གི་ཡེ་ཤེས་དེ་ཡུལ་མེད་རང་གསལ་གྱི་ངོ་བོ་ཡེ་ནས་གནས་པ་གང་ཡིན་པ་དེ་ལས། སྟོན་པ་པོ་གང་དག་གི་གསུང་ལ་བརྟེན་ནས་ཐོས་པར་མི་རིགས་ཏེ། ཅིའི་ཕྱིར་ན་ཚིག་གིས་བརྙད་པ་ཀུན་དང་བྲལ་བའི་ཕྱིར་རོ། །དེས་ན་བྱང་ཆུབ་ཀྱི་སེམས་སྨྲ་བསམ་བརྗོད་པ་དང་བྲལ་བ་དེ་ལ་མཚན་ཉིད་སྒྱུ་མར་སྣང་བ་ཀུན་རྫོབ་ཀྱི་ཆོས་དང་མཚན་ཉིད་ཀྱི་ཆོས་གང་ཡང་གྲུབ་པ་མིན་པ་དོན་དམ་སྟོང་པ་ཉིད་གཉིས་ཐ་དད་དུ་གྲུབ་པ་མེད་པས་ཞེས་སམ་ཆོས་དགེ་བ་དང་ཆོས་མིན་མི་དགེ་བ་ལ་སོགས་པའི་གཉིས་ཆོས་ཐམས་ཅད་གཉིས་མེད་མཉམ་པ་ཉིད་དུ་རྟག་ཏུ་འདྲེས་ཤིང་དབྱེར་མེད་པས་མཚུངས་པའི་ཕྱིར་ན། རྣལ་འབྱོར་ཡོ་ག་བའི་འདོད་པ་ལྟར་དོན་དམ་མཚན་མ་མེད་པའི་ཆོས་ཤེས་བྱ་བ་ཀུན་རྫོབ་སྒྱུ་མ་ལྟ་བས་སྣང་བ་འདི་ལས་ལྷག་པར་གྱུར་པའི་རྟོགས་བྱའི་གནས་ཤེས་བྱ་བ་ཞིག་དོན་ལ་གྲུབ་པ་ལྟ་ཅི་ཚིག་གིས་བཤད་པ་ཙམ་དེའང་མེད་པར་གསུངས་ཏེ། མདོ་བཅུ་ལས། སྟོན་པའི་ལུང་གི་ཚིག་རྣམས་ལ། །ལམ་དུ་དེ་མཐོང་འཇུག་པ་ནི། །རྟོགས་པའི་ལམ་ཞུགས་སྨིག་རྒྱུར་བསྙེགས། །ཡང་དག་ལམ་ནི་འདི་ཡིན་ཞེས། །ཚིག་དང་ཡི་གེས་མཚོན་དུ་མེད། །ཡང་དག་འདི་ཡིན་སྟོན་པ་ནི། །རྡོ་རྗེ་སེམས་དཔའ་ང་ཉིད་འཁྲུལ། །དག་པ་དང་ནི་མ་དག་པ། །ཡེ་ནས་གཉིས་མེད་འདྲེས་ཤིང་མཚུངས། །སེམས་ཉིད་ཀུན་གྱི་གནས་སུའོ། །ཞེས་སོ། །བདུན་པ་ནི། འདི་ལྟར་མ་ཧཱ་ཡོ་གའི་ལམ་ནས་ཀུན་རྫོབ་འཁྲུལ་པའི་སྣང་བ་ཚོགས་བརྒྱད་ཡུལ་དང་བཅས་པ་སྦྱང་བྱར་བལྟས་ཏེ། དེའི་གཉེན་པོར་ཕྱི་སྣོད་ཀྱི་འཇིག་རྟེན་དག་པ་གཞལ་ཡས་ཁང་དང་ནང་བཅུད་ཀྱི་སེམས་ཅན་དག་པ་གདན་གསུམ་ལྷའི་དཀྱིལ་འཁོར་དུ་བསྒོམ་ཏེ་བྱང་ཆུབ་ཀྱི་ལམ་བསྒྲུབ་པར་བྱེད་པ་དེ་ཡང་བློ་རྣམ་པར་རྟོག་པའི་སྒོམ་པ་ཡིན་པས་རྟོག་མེད་མཉམ་པ་ཉིད་ཀྱི་འབྲས་བུ་ནི་དེས་ཀྱང་ཐོབ་པའང་མེད་དེ། ཅིའི་ཕྱིར་ན་རྟོགས་བྱ་ཆོས་ཀྱི་དབྱིངས་སྨྲ་བསམ་བརྗོད་པ་ཀུན་དང་བྲལ་བར་མ་ཟད་རྟོགས་བྱེད་རང་བྱུང་གི་ཡེ་ཤེས་ཉིད་ཀྱང་བློས་བསམ་པ་དང་ཚིག་གི་ལམ་ནས་བརྗོད་པའི་མཐའ་ཐམས་ཅད་དང་བྲལ་ཞིང་ཡུལ་ཡུལ་ཅན་གཉིས་སུ་མེད་པར་བདག་ཉིད་ཆེན་པོར་ཡེ་ནས་སངས་རྒྱས་པའི་བདག་ཉིད་དུ་འགྲོ་བ་ཀུན་ལ་རང་རིག་པའི་མངོན་སུམ་གྱི་ཡུལ་དུ་གནས་པ་ལ། དཔེར་ན་གྲིབ་མ་ལ་གཟུགས་དངོས་སུ་འཁྲུལ་པའི་རྟོག་པ་བྱུང་བ་དེ་དོན་དང་མི་མཐུན་པས་གཟུགས་ཀྱི་རང་བཞིན་དུ་བཟུང་དུ་མེད་པའི་དཔེ་བཞིན་དུ་རྟོག་མེད་མཉམ་པ་ཆེན་པོ་རྩོལ་མེད་རང་བྱུང་གི་ཡེ་ཤེས་དེ་ལ་རྩོལ་སྒྲུབ་ཀྱི་རྟོག་པ་བྱུང་བ་ནི་བྱར་མེད་རྫོགས་ཆེན་གྱི་དོན་དང་མི་མཐུན་པའི་ཕྱིར་ཏེ། དེ་ཉིད་ལས། འཁྲུལ་པར་གྱུར་པའི་བྱང་ཆུབ་ལམ་དེ་ནི། །རྟོགས་པར་གྱུར་པས་འབྲས་བུ་ཐོབ་པ་མེད། །རང་བྱུང་རྒྱུ་རྐྱེན་མ་བསྐྱེད་སེམས་ཉིད་ཀྱང་། ། ཚིག་གི་བརྗོད་པས་མི་ཕེབ་མཐའ་དང་བྲལ། །ཡེ་ནས་བྱ་བཙལ་བྲལ་བས་བདག་ཉིད་ལ། །རང་རིག་མངོན་སུམ་ངང་གིས་བཙལ་མེད་གནས་ཕྱིར་རོ། །གྲིབ་མ་ལས་བྱུང་གཟུགས་ཀྱི་དཔེ་བཞིན་དུ། །མི་རྟོག་ཡེ་ཤེས་དེ་ལས་རྟོག་པ་འབྱུང་བར་ཟད། །ཅེས་དང་། ངེས་དོན་འདུས་པ་ལས། ད་ཡང་འདུས་པའི་སྙིང་པོ་ཉོན། །དེ་དོན་ལམ་གྱི་རིམ་པ་ནི། །ཐབས་དང་ཤེས་རབ་སྒོར་ཞུགས་ནས། །ཏིང་འཛིན་གསུམ་གྱི་ལྷ་བསྒོམས་པས། །གྲིབ་མ་གཟུགས་སུ་བསྒྱུར་བ་འདྲ། །ཞེས་སོ། །བརྒྱད་པ་ནི། འདི་ལྟར་སྣང་སྲིད་འཁོར་འདས་ཀྱི་ཆོས་ཐམས་ཅད་ཡེ་ནས་ཡོད་མ་མྱོང་བ་གཞི་མེད་རྩ་བྲལ་དུ་གནས་པ་ཡིན་མོད། དེ་ཉིད་ཅི་ཡང་མེད་པ་ཕྱངས་ཆད་པ་ལྟ་བུ་ཡང་མ་ཡིན་པར་མེད་པའི་སྙིང་པོ་སྣང་བ་འགག་མེད་དུ་འབྱུང་བའམ་འཆར་དུ་ཡང་ཡོད་ལ། དེ་ལྟར་འཆར་བཞིན་པའི་དུས་ན་ཡང་སྙིང་པོ་རང་བྱུང་གི་ཡེ་ཤེས་ཀྱི་རྩལ་རང་བྱུང་བ་ཙམ་ལས་མ་དག་མཚན་མའི་ཆོས་སུ་གྲུབ་པ་མེད་པས་སྟོང་པ་ཉིད་དུ་གནས་པ་སྟེ། གཏིང་རྫོགས་ལས། འཁོར་འདས་ཚིག་ལས་འདས་པའི་ཡེ་ཤེས་ནི། །དབྱིབས་དང་ཁ་དོག་དབང་པོའི་སྤྱོད་ཡུལ་དུ། །སངས་རྒྱས་ཉིད་ཀྱིས་བསྟན་ཅིང་མཚོན་དུ་མེད། །མཚོན་ཅིང་བརྟགས་པར་དཀའ་བའི་རང་སེམས་དོན། །ཡོད་མེད་དབུས་ལས་འདས་པའི་བྱང་ཆུབ་དེ། །དངོས་མེད་ཡིད་ལ་དྲན་པའི་ཡེ་ཤེས་ནི། །ཀུན་བཟང་ཉིད་ཀྱིས་མི་གཟིགས་བལྟ་བའི་མཆོག །ཅེས་གསུངས་པ་ལྟར་ཡིན་ལ། འོན་ཀྱང་སྟོང་པ་ཉི་ཚེ་བ་ཙམ་མ་ཡིན་པར་སྣང་སྟོང་འདུ་འབྲལ་མེད་པས་སྨྲ་བརྗོད་སྤྲོས་པའི་མཐའ་ཐམས་ཅད་དང་བྲལ་བའི་ཡུལ་ལ་ཡེ་ནས་གནས་པས་ངོ་བོ་ངོས་བཟུང་དང་བྲལ་བ་ནམ་མཁའི་རང་བཞིན་ལྟ་བུ་དེ་ལ། རྗེས་སུ་རྣལ་འབྱོར་ཨ་ནུ་ཡོ་ག་བ་རྣམས་ཀྱིས་རྗེས་ཆགས་ཀྱི་ལམ་ལ་བརྟེན་ནས་བདེ་སྟོང་ལྷན་ཅིག་སྐྱེས་པའི་ཡེ་ཤེས་ཉིད་ད་གདོད་འབྱུང་བར་རེ་བའི་དྲན་པའམ་འདུན་པ་སྐྱེ་བ་ནི། བྱ་རྩོལ་ཐམས་ཅད་དང་བྲལ་བར་ཡེ་ནས་གྲུབ་ཟིན་པའི་ཆོས་ཉིད་རང་བྱུང་གི་ཡེ་ཤེས་ཟུག་རྔུའི་ཚོར་བ་གང་ཡང་མེད་པས་བདེ་བ་ཆེན་པོའི་ངོ་བོར་གྱུར་པ་དེ་ནི་ཐོབ་འདོད་ཀྱི་འདུན་པ་དང་རྩོལ་བ་ལ་ལྟོས་པ་མེད་པར་ཡེ་ནས་འགྲོ་བ་ཀུན་ལ་རང་བཞིན་དུ་གནས་པས་ད་དུང་ཡང་ནས་ཡང་དུ་ལེན་དུ་མེད་བཞིན་དུ། གཟའ་གཏད་ཐམས་ཅད་དང་བྲལ་བའི་རང་བཞིན་གཟུང་འཛིན་རྟོག་པའི་སྤྱོད་ཡུལ་དུ་མེད་པ་དེ་ལ་བདེ་བ་ཆེན་པོའི་ཡེ་ཤེས་གསར་དུ་འབྱུང་བ་ཡི་ཆེད་དུ་བརྩོམ་པ་ཡིན་པས་རྩོལ་སྒྲུབ་ཕྲ་བ་ལས་མ་འདས་པའི་ཕྱིར་ན་ཨ་ཏི་རྫོགས་པ་ཆེན་པོ་ལ་ལྟོས་ན་ཐེག་པ་དམན་པའི་ནང་དུ་གཏོགས་ཞིང་། དེ་ལྟ་བུའི་ཐེག་པ་འོག་མ་ཐམས་ཅད་བྱ་བྲལ་རྫོགས་པ་ཆེན་པོའི་ལྟ་བས་ཟིལ་གྱིས་གནོན་པ་ཡིན་པར་གསུངས་ཏེ། ཀློང་ཆེན་རབ་འབྱམས་ལས། ཐེག་པའི་ཡང་རྩེ་ཨ་ཏི་ཀློང་ཆེན་པོ། །རི་རྒྱལ་ལྟ་བུར་ཀུན་གྱི་རྩེར་གྱུར་པས། །རི་ཕྲན་ཐམས་ཅད་འོག་ཏུ་ནོན་པ་ལྟར། །ལྟ་སྒོམ་ཐེག་པ་ཀུན་གྱི་རྩེར་གྱུར་པས། །ཨ་ནུ་ཕྱི་ནང་ཀུན་བཟང་མཁའ་རོལ་རྣམས། །ཨ་ཏི་ཆེན་པོ་ཀུན་བཟང་ཡངས་པའི་ཀློང་། །རང་སྐད་སྟོན་པས་ཐེག་དམན་ཀློང་དུ་ཐིམ། །དཔེར་ན་རྩལ་གསུམ་ལྡན་པའི་སེང་གེ་ཡིས། །ཝ་སོགས་གཅན་གཟན་ཟིལ་གྱིས་གནོན་པ་ལྟར། །ཨ་ཏི་རང་རྩལ་རིག་པ་ཡུལ་མེད་ཤར། །མཚན་མ་རང་གྲོལ་ཀློང་ཡངས་ཕྱམ་བརྡལ་བས། །ཨ་ནུ་ལ་སོགས་ཐེག་པ་ཕྱོགས་ཞེན་ཅན། །ཡུལ་དང་ཡུལ་ཅན་འདོད་ཀུན་ཀློང་དུ་གྲོལ། །དེ་བཞིན་རིག་པ་ཏི་ལ་མཐའ་བྲལ་ཀློང་། །བྱ་བྲལ་ལྷུན་གྲུབ་རྫོགས་ཆེན་ཤར་གྲོལ་ལ། །གྲོལ་དང་མ་གྲོལ་གཉིས་མེད་རྒྱན་དུ་ཆེ། །དཔེར་ན་འདབ་ཆགས་རྒྱལ་པོ་ཁྱུང་ཆེན་དེ། །མངལ་ན་གནས་ཀྱང་ཀླུ་རྣམས་ཟིལ་གྱིས་གནོན། །སྒོང་ངའི་ནང་དུ་འདབ་གཤོག་ཚད་དུ་ཕྱིན། །སྒོང་རྒྱ་རལ་ནས་སྤྱི་རྒྱ་རླབས་ཀྱིས་ཆོད། །འདབ་ཆགས་གཞན་ལ་ཅི་སྟེ་ག་ལ་རིགས། །ཁྱུང་ཆེན་རང་ལ་རིགས་ཏེ་མཁའ་ལ་བདེ། །ཨ་ཏི་ཆེན་པོ་ཀློང་ཆེན་བརྡལ་ཁྱབ་པ། །རང་སྐད་སྟོན་ཅིང་ཐེག་དགུ་ཟིལ་གྱིས་གནོན། །ཀུན་བཟང་ཀློང་དུ་ས་ལམ་སྦྱང་བགྲོད་གྲོལ། །འཁོར་བའི་ཀློང་ན་ལུས་རྒྱ་མ་བྲལ་ཀྱང་། །གོལ་ས་གཡང་ཆོད་ཀ་དག་ཀློང་ན་ཡན། །ཅེས་གསུངས་པ་ལྟར་རོ། །གཉིས་པ་དེ་ཐམས་ཅད་རྒྱུ་འབྲས་རྩོལ་བའི་ནད་ཀྱིས་གདུང་བ་ལ་གསུམ་སྟེ། ཇི་སྲིད་ལམ་དུ་འཛིན་པ་ཐམས་ཅད་ཆགས་ཞེན་དུ་བསྟན་པ་དང་། ཇི་ཙམ་འབད་པ་འཁོར་བའི་རྒྱུ་འབྲས་སུ་བཤད་པ། མེད་སྣང་འཁྲུལ་པའི་རང་བཞིན་ལམ་བརྒྱད་ཀྱིས་མི་རྟོགས་པའི་དཔེའོ། །དང་པོ་ནི། དེ་ལྟར་ཐེག་རིམ་བརྒྱད་པོ་རྣམས་ལས་གང་ཡིན་ཀྱང་རང་གནས་སྙིང་པོའི་ཡེ་ཤེས་བསལ་བཞག་དང་བྲལ་བ་མ་རྟོགས་པར་མ་ཟད་སྔོན་གྱི་དྲང་སྲོང་ཆེན་པོ་སངས་རྒྱས་རྣམས་ཀྱི་རྗེས་སུ་ཏིང་ངེ་འཛིན་བསྒོམ་པ་སོགས་ལམ་ལ་སློབ་པའི་སྒོ་ནས་འབྲས་བུ་སྔོན་མེད་གསར་བྱུང་ཞིག་ཐོབ་པར་འདོད་པའི་ཆགས་པའི་ཡིད་ཀྱང་འཇོག་པར་བྱེད་པ་ནི། དེ་འདྲའི་རྒྱུ་འབྲས་རྩོལ་སྒྲུབ་ཀྱི་ལམ་ལ་རྣམ་པར་རྩོལ་བ་དང་འབད་པའི་གདུང་བས་དུས་རྣམས་ཀུན་ཏུ་ཟིན་པར་འགྱུར་ཏ་རེ་ཞེས་འགྱུར་བའི་ཉེན་ཡོད་པས་རྒྱུ་འབྲས་བྱ་རྩོལ་བྲལ་བའི་རང་བཞིན་མ་རྟོགས་པར་དེ་ལྟ་བུའི་རྒྱུ་འབྲས་བླང་དོར་ལ་ཞེན་པའི་ཐེག་པ་བརྒྱད་ཀྱི་ལམ་དེར་ཞུགས་པས་འབྲས་བུ་ཐམས་ཅད་མཁྱེན་པ་ཡི་གོ་འཕང་ཐོབ་ཏུ་མེད་པར་གསུངས་ཏེ། རུས་སྦལ་རྩ་བའི་རྒྱུད་ལས། འདི་ཚོལ་རྣམས་ཀྱིས་གཞན་ནས་འདི་མ་བཙལ། །རང་ལ་གནས་ཤིང་གཞན་ནས་འདི་ཚོལ་ན། །བསྐལ་པ་གསུམ་དུ་འདི་བཙལ་རྙེད་མི་འགྱུར། །གང་ཞིག་སངས་རྒྱས་རྣམས་ཀྱིས་འདི་མ་བཙལ། །དེ་བཞིན་སེམས་ཅན་འདི་ཚོལ་བཙལ་མི་རྙེད། །མི་ཚོལ་ངོ་བོ་ཉིད་དུ་ཐམས་ཅད་གནས། །རྩོལ་གྲུབ་ལམ་ལ་གནས་པའི་གང་ཟག་རྣམས། །དངུལ་ལ་གསེར་ཞུན་བྱས་ཀྱང་གསེར་མི་བཏུབ། །མཚོན་པ་ཚིག་ཏུ་སྟོན་པ་ལམ་ལས་ཉམས། །རྫོགས་ཆེན་འདི་ཡི་དོན་དུ་ག་ལ་འགྱུར། །ཞེས་གསུངས་པ་ལྟར་རོ། །གཉིས་པ་ནི། དེར་མ་ཟད་ཡོད་མེད་རྟག་ཆད་ལ་སོགས་པའི་སྤྲོས་པ་ཐམས་ཅད་བྲལ་བའི་གནས་ལུགས་ཡེ་ཇི་བཞིན་པ་ནི་འདི་ལྟ་བུ་ཡིན་ནོ་ཞེས་དམིགས་གཏད་ཐམས་ཅད་དང་བྲལ་བ་ཞིག་ལ་བློ་རྟེན་འཆང་བར་བྱེད་ཅིང་བསྒོམ་ན་ཡང་དེ་ཡང་བླང་དོར་རེ་དོགས་ཀྱི་རྣམ་རྟོག་ཕྲ་མོ་བསྒོམ་པ་ཡིན་པ་དེ་ཡི་ཕྱིར་ན་སླར་ཡང་རྣམ་རྟོག་ཕྱིར་ཕྱིར་འཕེལ་ཞིང་རང་གིས་རང་ཉིད་འཆིང་བར་བྱེད་པ་ལས་རྫོགས་ཆེན་ཨ་ཏི་ཡོ་གའི་མ་བཅོས་གཉུག་མའི་བསྒོམ་པ་མིན་པར་བདེ་བ་ཆེན་པོ་ཆོས་སྐུའི་དགོངས་པ་མངོན་དུ་ཐོབ་པར་འདོད་པའི་རེ་སྨོན་དང་བཅས་པས་ཆགས་པའི་གཅོང་སྙིང་ཆེན་པོའི་ནད་ཀྱིས་ཟིན་པ་ཡིན་ཏེ། བདེ་བ་ཕྲ་བཀོད་ལས། བཙལ་དུ་མེད་པས་བསྒོམ་པའི་ཚིག་དང་བྲལ། །ཚིག་ལས་འདས་པས་བརྗོད་པའི་ཐ་སྙད་མེད། །ཡེ་སངས་རྒྱས་པས་བལྟ་བའི་དམིགས་མེད་དེ། །སྙིང་པོ་བྱང་ཆུབ་དགོངས་སུ་མེད་པའོ། །རྣལ་འབྱོར་བལྟ་དམིགས་ཚོལ་བ་དོན་ལས་ཉམས། །མི་བལྟ་མི་ཚོལ་དོན་དེ་ཉིད་ཡིན་པས། །དོན་ལ་མི་བལྟ་བལྟར་མེད་འཁྲུལ་པ་མེད། །བདེ་བ་ཆེན་པོ་གང་ཞིག་ཚོལ་བ་འཁྲུལ། །ཞེས་གསུངས་པ་ལྟ་བུ་ཡིན་པ་དེས་ན་རེ་སྨོན་ཆགས་པའི་ནད་དེ་ཉིད་ཀྱི་གཉེན་པོར་ཀ་དག་ཀུན་ཏུ་བཟང་པོའི་དགོངས་ཀློང་ཆོས་ཉིད་ཡངས་པ་ཆེན་པོའི་མཁའ་དབྱིངས་སུ་འཁོར་འདས་ཀྱི་ཆོས་ཐམས་ཅད་གཞི་མེད་རྩ་བྲལ་གྱི་རང་བཞིན་དུ་གདོད་ནས་གྲོལ་ཟིན་པ་ལས་ནམ་ཡང་མི་གཡོ་བར་མཉམ་ཉིད་བླང་དོར་མེད་པར་གནས་པས་རེ་དོགས་འབད་རྩོལ་ཅི་ཡང་མི་དགོས་པའི་རང་བབས་གཉུག་མའི་བསམ་གཏན་གྱི་སྨན་ཆེན་པོས་གསོ་བར་མ་བྱས་ན། དམིགས་གཏད་ཅན་གྱི་ལམ་དེས་བསམ་གཟུགས་ཀྱི་གནས་སུ་འཕེན་པ་ཙམ་ལས་མེད་པས་མཐོ་རིས་ཀྱི་གནས་སུ་བགྲོད་པར་བྱེད་པའི་རྒྱུ་བླང་དོར་དང་འཛིན་ཞེན་ཅན་གྱི་ལམ་དེས་ཉོན་མོངས་པའི་ནད་ཀྱིས་ཟིན་པར་འགྱུར་བ་ལས་མེད་པར་གསུངས་པའོ། །གསུམ་པ་ནི། དེས་ན་བྱང་ཆུབ་སེམས་ཀྱི་རང་བཞིན་སྤྲོས་པའི་གྲྭ་ཟུར་དང་བྲལ་བས་སྨྲ་བསམ་བརྗོད་ལས་འདས་པ་ལ་ལམ་གྱིས་བགྲོད་དུ་མེད་པ་ཡིན་བཞིན་ཐེག་བརྒྱད་ཀྱི་ལམ་དུ་ཞུགས་པ་རྣམས་ཀྱི་ནང་དུ་ཆེ་བ་རེ་དོགས་འབད་རྩོལ་གྱི་ལམ་དེས་འབྲས་བུ་མྱང་འདས་ཀྱི་སར་ཕྱིན་པར་འདོད་པ་ནི་གང་ཡང་གྲུབ་པ་མེད་པས་དཔེར་ན་རི་དྭགས་སྐོམ་གྱིས་གདུང་བས་སྨིག་རྒྱུ་ལ་ཆུ་རུ་འཁྲུལ་ནས་དེའི་རྗེས་སུ་བསྙེགས་པ་དང་འདྲ་བར་འབྲས་བུ་སངས་རྒྱས་ཀྱི་གོ་འཕང་ཞིག་གཞན་ནས་རྙེད་པའི་ཡུལ་མེད་པས་འཇིག་རྟེན་གསུམ་དུ་གནས་ཤིང་འཁོར་བའི་འདམས་སུ་ཚུད་པ་ལས་མྱ་ངན་ལས་འདས་པའི་སར་མི་འབྱུང་ཞིང་ས་བཅུ་རིམ་པར་བགྲོད་པ་ལ་ལྟོས་བཅའ་བར་བྱེད་པའི་གནས་ཀྱང་བྱང་ཆུབ་ཆེན་པོ་བགྲོད་དུ་མེད་པའི་གནས་མི་མཐོང་བར་བྱེད་པའི་སྒྲིབ་པ་ཡིན་པར་བསྟན་པ་སྟེ། ཁྱུང་ཆེན་ལས། ལམ་མེད་ལམ་དུ་འཇུག་པས་ལམ་འདི་མི་རྙེད་དེ། །ཆུ་གདུང་གླང་ཆེན་སྨིག་རྒྱུ་བསྙེགས་པའང་། །བསྐལ་པར་བགྲོད་ཀྱང་སྙེད་པར་རབ་ཏུ་དཀའ། །ཞེས་དང་། མདོ་བཅུ་ལས། དེ་བས་བགྲོད་ལམ་མེད་དེས་ཕྱིན་པ་མེད་པས་ན། །ལམ་དེ་གང་ཟག་རྣམས་ཀྱི་ནད་དུ་ཆེ་བས་ན། །དེ་ཉིད་མྱ་ངན་འདས་སར་ཕྱིན་པར་འདོད་པ་དེས། །རི་དྭགས་སྨིག་རྒྱུ་ཆུ་རུ་འདུ་ཤེས་བསྙེགས་པ་འདྲ། །དེ་བས་གང་ཡང་རྙེད་པར་འགྱུར་བའི་ཡུལ་མེད་དེ། །དེ་བཞིན་གང་ལྟར་བགྲོད་ཀྱང་ཁམས་གསུམ་དེ་ལས་ཡོངས་མི་འབྱུང་། །ས་བཅུ་གོང་ནས་གོང་དུ་ལྟོས་པའི་རྟེན་བཅས་ཀྱང་། །བྱང་ཆུབ་ཆེན་པོ་དག་ལ་སྒྲིབ་པར་འགྱུར་བ་ཡིན། །ཞེས་གསུངས་སོ། །གཉིས་པ་སེམས་ཉིད་ཨ་ཏིའི་དགོངས་པ་ཡེ་ནས་རང་ལ་གནས་ཚུལ་བཤད་པ་ལ་གསུམ་སྟེ། གཞི་ལྷུན་གྱིས་གྲུབ་པས་ནོར་བུ་ལྟར་ཡོན་ཏན་གཞན་ནས་བཙལ་དུ་མེད་པ། བཏང་བཞག་མེད་པའི་དོན་རང་གི་རིག་པས་དགེ་བའི་བཤེས་གཉེན་དུ་ཤར་བ། དེའི་ངང་ལས་མི་གཡོ་བ་བརྗོད་མེད་ཆོས་སྐུའི་ངོ་བོ་ཡེ་ནས་རང་ལ་གནས་པའོ། །དང་པོ་ནི། འདི་ལྟར་རྫོགས་པ་ཆེན་པོའི་ལམ་དུ་རང་བྱུང་གི་ཡེ་ཤེས་ཉིད་མ་བཅོས་ཐད་ཀར་རང་ངོ་སྤྲད་པའི་ངང་དུ་རང་བབས་ལ་བཞག་པ་ཙམ་ལས་ཐེག་པ་འོག་མ་ལྟ་བུའི་རྩོལ་སྒྲུབ་གང་ཡང་མི་དགོས་པར་ས་ལམ་ཐམས་ཅད་མ་བགྲོད་ཡེ་ནས་ནོན་པ་ཡིན་པས་ཤིན་ཏུ་མྱུར་བའི་ཡེ་ཤེས་ཞེས་གསུངས་ལ། དེ་ནི་སྨྲ་བསམ་བརྗོད་པ་ཀུན་དང་བྲལ་བའི་གནས་ལུགས། མ་བཅོས་ལྷན་ཅིག་སྐྱེས་པའི་ཡེ་ཤེས། མ་བསྒོམ་ངང་གིས་གནས་པའི་ཏིང་འཛིན། གདོད་ནས་འཆར་ནུབ་བྲལ་བའི་རིག་པ། མ་སྦྱངས་ཡེ་ནས་དག་པའི་ཆོས་སྐུ་ཡེ་གྲོལ་གྱི་དགོངས་པ་གང་ཞིག །མཐའ་ཡས་པའི་འགྲོ་བ་མ་ལུས་པ་དམིགས་མེད་བརྩེ་བའི་ཐུགས་རྗེས་སྐྱོངས་ཞིང་ཕན་བདེའི་ལེགས་ཚོགས་ཐམས་ཅད་ཀྱི་འབྱུང་གནས་སུ་གྱུར་ཅིང་གསང་ཆེན་ཨ་ཏི་ཡོ་གའི་དགོངས་པ་མ་ནོར་བ་མངོན་སུམ་དུ་སྟོན་པར་མཛད་པ་པོ་རིག་འཛིན་དགའ་རབ་རྡོ་རྗེ་དང་རྒྱལ་དབང་པདྨ་ཀ་རཱ་ཱལ་སོགས་པ་བཤེས་གཉེན་དམ་པ་ཀུན་གྱི་ཐུགས་འོད་གསལ་ཆོས་སྐུའི་རྒྱ་མཚོ་ཆེན་པོ་ལས་འབྱུང་བའི་ནོར་བུ་རིན་ཆེན་ཐམས་ཅད་ཀྱི་ནང་ནས་ཁྱད་པར་འཕགས་པ་འདོད་འབྱུང་ཡིད་བཞིན་དབང་གི་རྒྱལ་པོ་ཇི་ལྟ་བ་བཞིན་དུ་སེམས་རྣམ་རྟོག་གིས་དམིགས་པ་དང་ཞེན་པའི་དྲི་མ་མེད་ཅིང་ལམ་སྦྱང་བགྲོད་སོགས་ཀྱིས་ཇེ་བཟང་དུ་འགྱུར་བའི་གནས་ལ་མི་ལྟོས་པར་རིག་པ་རང་བྱུང་གི་ཡེ་ཤེས་རང་གི་རང་བཞིན་ལ་ལེགས་པའི་ཡོན་ཏན་ཐམས་ཅད་ཡེ་ནས་གཞི་རྫོགས་ལྷུན་གྱིས་གྲུབ་པས་རྒྱུ་རྐྱེན་གཞན་ལ་མི་ལྟོས་པར་རིག་པ་རང་ལ་ཤར་བས་རེ་བ་ཐམས་ཅད་ཡིད་བཞིན་དུ་སྐོང་བ་ཡིན་པས་ན་དེ་ལྟ་བུའི་མན་ངག་ཟབ་མོ་སྟོན་པའི་བཤེས་གཉེན་དམ་པ་གཙུག་གི་ནོར་བུ་ལྟར་བརྟེན་པར་གདམས་ཏེ། དེ་ཉིད་ལས། དེ་ཕྱིར་བཤེས་གཉེན་ཡོན་ཏན་ཀུན་གྱི་འབྱུང་གནས་ཏེ། །ནོར་བུ་རིན་ཆེན་བཞིན་དུ་སྤྱི་བོའི་གཙུག་ཏུ་བཀུར། །ཞེས་གསུངས་སོ། །གཉིས་པ་ནི། སྙིང་པོ་བྱང་ཆུབ་ཀྱི་སེམས་ནི་བརྟགས་ཤིང་དཔྱད་ན་སྤྲོས་པའི་མཐའ་གང་དུའང་གྲུབ་པ་མེད་པས་ཡེ་སྟོང་སྤྲོས་པ་དང་བྲལ་བ་ནམ་མཁའི་དབྱིངས་ལྟ་བུ་ཡིན་ལ། མ་བརྟགས་རང་བབས་སུ་བཞག་ན་རང་བྱུང་ཡེ་ཤེས་ཆེན་པོའི་རང་ཞལ་དབྱིངས་ན་སྒྲིབ་མེད་དུ་གསལ་བས་ལེགས་པའི་ཡོན་ཏན་མ་ལུས་པ་རྩོལ་མེད་ལྷུན་གྲུབ་ཏུ་འབྱུང་བ་ཡིན་པས་རྒྱ་ཆེ་བའམ་ཆེ་བའི་ཡོན་ཏན་དང་ལྡན་པ་སྟེ། དེ་ཉིད་དངོས་པོ་མཚན་མའི་ཆོས་སུ་མ་གྲུབ་ཅིང་རྟོག་པའི་སྤྱོད་ཡུལ་དུ་མ་གྱུར་པས་ངོ་བོ་ཅིར་ཡང་མི་སྣང་བཞིན་དུ་གདུལ་བྱ་ཡལ་བར་མི་འདོར་བར་ཐུགས་རྗེས་རྗེས་སུ་ཆགས་པའི་ཆ་ལུགས་འཆར་བ་ལྟར་རྩལ་སྣང་འགགས་མེད་དུ་ཤར་བའི་སྣང་བ་ཐམས་ཅད་བརྡ་བྲལ་རང་གྲོལ་གྱི་མན་ངག་གིས་བཅོས་བསྒྱུར་སྤང་བླང་མེད་པར་ཤར་གྲོལ་རིས་མེད་ཀྱི་དགོངས་པ་ཀུན་ལ་སྟོན་ཅིང་ཨ་ཏི་རྫོགས་པ་ཆེན་པོའི་སྣོད་དུ་གྱུར་པའི་ཡང་རབ་སྐལ་བ་དང་ལྡན་པ་རྣམས་ཀྱིས་དེ་བཞིན་དུ་རྟོགས་པར་ཡང་འགྱུར་ལ། གཞན་རྣམས་ཀྱིས་ཇི་བཞིན་མ་རྟོགས་ཀྱང་ཡོངས་ཀྱི་རྒྱུད་ལ་སྦས་པ་མེད་པར་སྟོན་ཏེ། ཁྱུང་ཆེན་ལས། རྣམ་པར་མི་རྟོག་ཡེ་ཤེས་སྙིང་པོ་འདི། །ཐེག་པ་ཡོངས་ཀྱི་ཆོས་ལ་སྦས་པ་མེད། །སངས་རྒྱས་གསུང་གི་རྒྱུད་ལ་སྦས་པ་མེད། །བགྲོད་རྩོལ་ལམ་ལ་སྦྱངས་བས་རྙེད་མི་འགྱུར། །མི་ལེན་མི་སྤང་བྱང་ཆུབ་སྤྱོད་རྣམས་ལ། །རྣམ་པ་ཀུན་ཏུ་རང་བཞིན་ཇི་བཞིན་གནས། །ཞེས་པ་ལྟར། དེ་ལྟར་བདག་དང་གཞན་དུ་འཛིན་པའི་རྟོག་པ་ཀུན་དང་བྲལ་བའི་བདག་ཉིད་ཅན་འཁོར་འདས་ཀྱི་སྣང་ཆ་མུ་མེད་པར་སྣང་བ་ཐམས་ཅད་རིག་པའི་རང་མདངས་ཁོ་ན་ཡིན་པས་རང་བྱུང་ཡེ་ཤེས་ཀྱི་སྣང་བ་ཀུན་ལ་སྟོན་པར་མཛད་པས་སྟོན་མཁན་དགེ་བའི་བཤེས་གཉེན་དུ་ཤར་བའི་ཀུན་བྱེད་རྒྱལ་པོ་དེ་ནི་གསང་སྔགས་ཀུན་གྱི་གཏེར་དུ་གྱུར་པས་ནོར་བུ་རིན་ཆེན་གྱི་མཛོད་ལྟ་བུ་དེས་བླང་དོར་འབད་རྩོལ་ལ་མི་ལྟོས་པར་རང་གཞན་གྱི་དོན་ཐམས་ཅད་མ་བཙལ་ལྷུན་གྱིས་གྲུབ་པའི་ཡུལ་ལ་གདོད་ནས་གནས་པ་ཡིན་ནོ་ཞེས་ཐེག་མཆོག་ཨ་ཏིའི་དགོངས་པ་འགྲོ་བ་ཀུན་ལ་བདག་འཛིན་གྱི་དམིགས་པ་མེད་པའི་སྙིང་རྗེས་སམ་རང་བཞིན་བྱིན་གྱི་རླབས་ཀྱིས་བསྟན་པར་མཛད་པ་ཡིན་ཏེ། རྒྱན་ལས། མ་ནོར་ངེས་པའི་སློབ་དཔོན་ནི། །རང་སེམས་བླ་མ་རིན་པོ་ཆེ། །བྱིན་རླབས་བརྒྱུད་པ་ཀུན་གྱི་བདག །རང་གྲོལ་མན་ངག་བྱིན་རླབས་སྟོན། །ཞེས་གསུངས་པ་ལྟར་རོ། །གསུམ་པ་ནི། དེ་ལྟ་བུའི་རིག་པ་བྱང་ཆུབ་ཀྱི་སེམས་ཇི་བཞིན་རྟོགས་པའི་རྣལ་འབྱོར་པ་རྣམས་ནང་ནས་ཏེ་ནང་གནས་སྙིང་པོའི་ཡེ་ཤེས་ལས་སྐད་ཅིག་ཙམ་ཡང་མ་གཡོས་ཀྱང་དམིགས་པ་ནང་དུ་བསྡུས་ནས་གནས་ལུགས་ཟབ་མོའི་ངོ་བོ་འདི་ལྟ་བུའོ་ཞེས་བཙལ་བའི་གནས་དང་བཙལ་བྱེད་ཀྱི་རྟོག་པ་ཡང་མེད་དེ་གཟའ་གཏད་ཀྱི་བློ་དང་བྲལ་བའི་ཕྱིར་རོ། །དེ་བཞིན་དུ་ཡུལ་སེམས་ཅན་རྣམས་སྡུག་བསྔལ་ལས་སྐྱབས་པའི་ཕྱིར་དུ་དམིགས་པ་མེད་པའི་ཐུགས་རྗེས་འགྲོ་ལ་རྗེས་སུ་ཆགས་པ་ལྟར་ཡང་སྣང་ལ། ཡུལ་དེ་ལ་བསྔོ་བའི་དམིགས་པའམ་ཞེན་ཅིང་འཛིན་པ་མེད་པས་ཡུལ་ལ་རྣམ་པར་རྟོག་པ་མི་འབྱུང་ཞིང་མཉམ་ཉིད་ཀྱི་དོན་ལ་ཆེད་དུ་མི་འཇུག་པས་བདག་ཏུ་དམིགས་པ་མེད་པའི་སྙིང་རྗེ་ཆེན་པོ་སྤྲོ་བསྡུ་དང་བྲལ་བ་དེ་ཡིས་ནི་རང་གི་རང་ཞལ་སྟོན་པ་ལས་གཞན་གྱི་དངོས་ནོར་སྟོན་པ་ལྟ་བུ་མིན་པས་རང་གནས་སྙིང་པོའི་ཡེ་ཤེས་དེ་ནི་སྔོན་མེད་གསར་དུ་མི་འོང་བར་ཡེ་ནས་རང་ལ་གནས་པའི་ཆོས་ཉིད་འཕོ་འགྱུར་མེད་པ་ཡིན་ཏེ། ཁྱུང་ཆེན་ལས། རང་རིག་བྱང་ཆུབ་སེམས་ཉིད་སངས་རྒྱས་སྐུ། །གཞན་གྱི་ནོར་མིན་ཡེ་ནས་གནས་པ་ཡིན། །ཞེས་གསུངས་པ་ལྟར་རོ། །གསུམ་པ་ཐེག་པ་བརྒྱད་ཨ་ཏིར་འཇུག་ཐབས་ལ་གཉིས་ཏེ། ཐེག་བརྒྱད་རང་ལམ་གྱི་ངོ་བོ་རྣལ་དོན་མཐར་ཐུག་མ་ཡིན་པས་འཇུག་དགོས་པ་དང་། འཇུག་ཚུལ་ཉིད་བཤད་པའོ། །དང་པོ་ནི། འདི་ལྟར་རྩོལ་བཅས་ཀྱི་ཐེག་པ་བརྒྱད་པོས་རང་ལམ་གྱི་འབྲས་བུ་དགྲ་བཅོམ་ནས་བརྡལ་བ་ཆོས་ཉིད་ཀྱི་སའི་བར་གྱི་མཐར་འབྲས་ཀྱི་བདེ་བ་ཐོབ་པར་འདོད་ནས་རྩོལ་བར་བྱས་ན་འགྱུར་མེད་བདེ་བ་ཆེན་པོ་འོད་གསལ་གཉུག་མའི་ཡེ་ཤེས་ནས་རང་ལ་གནས་པའི་ཀུན་བཟང་དབྱེ་བ་མེད་པའམ་རྫོགས་པ་སྤྱིར་ཆིབ་ཆེན་པོའི་ས་ལ་རྒྱབ་ཀྱིས་ཕྱོགས་པ་ཡིན་ཏེ། ཅིའི་ཕྱིར་ན་དེ་ལྟ་བུའི་ཆོས་སྐུ་ལྷུན་གྲུབ་ཆེན་པོ་ཡེ་བདེ་འཕོ་འགྱུར་དང་བྲལ་བས་སྔར་ནས་ཟིན་ཡོད་པའི་དོན་དེ་བོར་བའམ་དེ་འདྲའི་བདེ་བས་བློ་མ་ཚིམ་ནས་སྔོན་མེད་གསར་བྱུང་གི་བདེ་བ་ཞིག་ཚོལ་བ་དེ་ནི་འབྲས་བུ་བྱང་ཆུབ་ཀྱི་བདེ་བ་གཞན་ཐོབ་འདོད་ཀྱི་འཁྲུལ་པ་ཡི་དབང་དུ་སོང་བ་ཡིན་པས་གདོད་ནས་ཡེ་སངས་རྒྱས་པའི་དོན་མ་རྟོགས་པར་རྔམ་ཞིང་ཆགས་པས་ཆོས་ལ་དབང་ཟ་བ་སྟེ། འདི་ལྟ་བུའི་འབྲས་བུ་གཞན་ནས་ཚོལ་བར་འདོད་པའི་ཡུལ་ཅན་གཟུང་འཛིན་གྱི་བློ་དང་ལྡན་པ་རྣམས་ཀྱིས་ཅི་ཙམ་འབད་ཀྱང་འབྲས་བུ་སངས་རྒྱས་ཉིད་མཐོང་བ་མེད་པས་བརྗོད་མེད་ཨ་ཏིའི་ལམ་འདིར་འཇུག་པ་གལ་ཆེ་སྟེ། དེའི་རྒྱུ་མཚན་རིག་པ་བྱང་ཆུབ་ཀྱི་སེམས་འདི་ལས་མ་གཏོགས་པའི་སངས་རྒྱས་ཞེས་པ་རང་མཚན་པ་ཞིག་གྲུབ་པ་མེད་པས་དེ་བརྗོད་བྱེད་ཀྱི་ཚིག་སངས་རྒྱས་ཞེས་པའི་མིང་ཡང་མེད་དེ་གདགས་གཞི་དང་བྲལ་བའི་ཕྱིར་རོ། །འོ་ན་རྒྱལ་བའི་བཀའ་ལས་སངས་རྒྱས་ཀྱི་གོ་འཕང་བསྒྲུབ་ཏུ་ཡོད་པར་གསུངས་པ་དེ་ཇི་ལྟར་ཡིན་སྙམ་ན། དེ་ནི་གདུལ་བྱ་རྣམས་ལམ་ལ་རིམ་གྱིས་དཀྲི་བའི་ཆེད་དུ་སངས་རྒྱས་ཞེས་སྟོན་པས་མིང་དུ་བཏགས་པ་དྲང་དོན་དགོངས་པ་ཅན་གྱི་ཚིག་ཡིན་པ་ལ་དེ་ཉིད་སྒྲ་ཇི་བཞིན་དུ་བཟུང་ན་ནོར་བ་ཡིན་ཕྱིར། དེ་དང་རྗེས་སུ་མཐུན་པར་སངས་རྒྱས་གཞན་ནས་ཐོབ་པར་འདོད་ནས་རྩོལ་སྒྲུབ་བྱེད་པའི་ལམ་ཐམས་ཅད་ཀྱང་ནོར་བའི་ལམ་ཁོ་ན་ཡིན་ཏེ། བྱང་ཆུབ་ཀྱི་སེམས་ནི་གཟུགས་སུ་གྲུབ་པ་མེད་ཀྱང་ངོ་བོ་ངོས་བཟུང་དང་བྲལ་བས་ཅིར་ཡང་གྲུབ་པ་མེད་བཞིན་རྩལ་སྣང་འགག་པ་མེད་པའི་ཆོ་འཕྲུལ་དུ་འཁོར་འདས་ཀྱི་ཆོས་ཀུན་སྣང་ཡང་དེ་ལྟར་སྣང་བའི་དུས་ཉིད་ནས་མཐའ་བརྒྱད་སྤྲོས་པ་དང་བྲལ་བའི་ངང་ལས་འདའ་བ་མེད་པས་དེ་ལམ་འབད་རྩོལ་གྱིས་བསྒྲུབ་ཏུ་ཡོད་པར་བཤད་པ་རྡུལ་ཙམ་ཡང་མེད་དེ་སྨྲ་བསམ་བརྗོད་པ་ཐམས་ཅད་དང་བྲལ་བའི་ཕྱིར་རོ། །ཡེ་ཤེས་ནམ་མཁའི་རྒྱལ་པོ་ལས། མཚན་ཉིད་མེད་པའི་ཆོས་ཉིད་ཆེན་པོ་འདི། ། །ཆོས་ཀྱི་དབྱིངས་སུ་སྒྱུ་མའི་གར་བསྒྱུར་ཀྱང་། །སྒྱུ་མའི་ལམ་དུ་རྒྱལ་བས་བསྔགས་པ་མེད། །མི་གནས་ཆོས་སྐུ་བརྗོད་མེད་ལས་འདས་ཀྱང་། །དབུ་མའང་བརྗོད་དུ་མེད་དེ་དོན་དང་བྲལ། །ཞེས་དང་། མདོ་བཅུ་ལས། སངས་རྒྱས་ཞེས་ནི་གཞན་ནས་ཐོབ་བྱེད་པ། །དེ་ཉིད་སྨིག་རྒྱུ་བཞིན་ཏེ་ནོར་བའི་ལམ། །ཁ་དོག་དབྱིབས་ཀྱི་གཟུགས་ནི་ཡོད་མིན་པས། །ཆོས་ཀུན་བཤད་པ་རྡུལ་ཆ་ཙམ་ཡང་མེད། །ཅེས་གསུངས་སོ། །གཉིས་པ་ལ་གཉིས་ཏེ། ཐེག་པ་བརྒྱད་ཀྱི་དབྱེ་བ་དང་། རྫོགས་པ་ཆེན་པོའི་ལམ་དུ་འཇུག་པའི་རིམ་པ་ཆུང་འབྲིང་ཆེ་གསུམ་དུ་བསྟན་ནས་འཇུག་ཚུལ་ལོ། །དང་པོ་ནི། དེ་ལ་ཐེག་པ་བརྒྱད་ཀྱི་ལམ་ནས་སངས་རྒྱས་ཀྱི་གོ་འཕང་ཚོལ་བའི་ཚུལ་ཡང་འདི་ལྟར་ཨ་ནུ་ཡོ་ག་བས་སྣང་སྲིད་ཀྱི་ཆོས་ཐམས་ཅད་ཡེ་ནས་དཀྱིལ་འཁོར་གསུམ་གྱི་རང་བཞིན་དུ་གྲུབ་ཟིན་པར་ལྟ་བའི་ལྟ་བས་ཚོལ་བ་དང་། མ་ཧཱ་ཡོ་ག་བས་ཡབ་ཡུམ་མཉམ་པར་རོལ་བའི་འདོད་ཆགས་ཆེན་པོའི་ཏིང་ངེ་འཛིན་གྱི་ཐབས་ལས་སྐྱེ་བར་འདོད་པ་དང་། རྣལ་འབྱོར་ཡོ་ག་བས་མཚན་བཅས་དང་མཚན་མེད་ཀྱི་རྣལ་འབྱོར་ལ་བརྟེན་ནས་ཀུན་རྫོབ་འཁྲུལ་བའི་སྣང་བ་དང་བྲལ་བའི་སྒོ་ནས་ཐོབ་པར་འདོད་པ་དང་། བྱ་བྱེད་གཉིས་ཀྱིས་སྔགས་དང་ཕྱག་རྒྱའི་ཏིང་ངེ་འཛིན་གྱིས་མ་དག་ལས་ཉོན་གྱི་ཆ་ཞི་བར་བྱེད་པ་དང་། དབུ་མ་པས་དངོས་པོ་ཀུན་རྫོབ་ཏུ་སྣང་བའི་ཆོས་ཐམས་ཅད་གྲུབ་པ་མེད་པ་དོན་དམ་སྤྲོས་པ་དང་བྲལ་བར་བསྒོམ་པ་དང་། ཉན་རང་གཉིས་ཀྱིས་མཐོང་སྒོམ་གྱི་ལམ་ལ་བརྟེན་ནས་སྡུག་ཀུན་གྱི་ཆོས་རྣམས་རྣམ་པར་སྤོང་བར་རྩོམ་པ་དེ་ཐམས་ཅད་བྱ་རྩོལ་བྲལ་བའི་དོན་ལ་རེག་པ་མིན་ཏེ། ཅིའི་ཕྱིར་ན་འཁོར་བའི་གཅོང་ནད་ཐམས་ཅད་ཀྱི་གཉེན་པོར་གྱུར་པ་རིག་པ་བྱང་ཆུབ་སེམས་ཀྱི་བདུད་རྩི་བདེ་བ་ཆེན་པོའི་རང་བཞིན་གྱིས་འཁོར་བའི་གཅོང་ནད་ཀྱི་ཟུག་རྔུའི་ཚོར་བ་ཐམས་ཅད་ཡེ་ནས་བཅོམས་ཟིན་པས་ཁམས་གསུམ་ཡོངས་གྲོལ་ཆེན་པོའི་དགོངས་པར་གནས་པ་ལ། འོག་མའི་ཐེག་པ་དེ་དག་གིས་འབད་རྩོལ་ལ་བརྟེན་ནས་བཟའ་བའི་ཐབས་སམ་སྤོང་འགོག་སྦྱོང་བསྒྱུར་ལ་སོགས་པ་བྱེད་པའི་ཐབས་ལ་རག་ལུས་པ་མེད་པའི་ཕྱིར་རོ། །དེ་ལྟར་ཡང་ཀློང་ཆེན་རབ་འབྱམས་ལས། འཁོར་བ་ཉིད་ན་འཁོར་བ་མེད། །འཁྲུལ་འཁོར་ཉིད་ན་མྱ་ངན་འདས། །མཁས་པ་རྣམས་ལ་ཡེ་ཤེས་ཤར། །མི་མཁས་པ་ལ་མུན་པ་སྣང་། །འདི་བོར་བདུད་རྩི་གཞན་ན་མེད། །ཅེས་གསུངས་སོ། །གཉིས་པ་ནི། འདི་ལྟར་སྣང་བའི་ཆོས་ཐམས་ཅད་སེམས་ཉིད་སྐྱེ་བ་མེད་པ་ནམ་མཁའ་ལྟ་བུའི་ཀློང་དུ་རྫོགས་ཤིང་ཆེ་བ་རྣམ་པ་ལྔའི་ཚུལ་དུ་སངས་རྒྱས་པའི་ཕྱིར་ཡངས་སོ་ཆེའོ་ཞེས་སྨོས་པ་སྟེ། དེ་ལྟ་བུའི་དོན་རྗེན་ཅེར་དུ་སྟོན་པར་བྱེད་པའི་ཆོས་རྫོགས་པ་ཆེན་པོ་ཨ་ཏི་ཡོ་ག་འདི་ཉིད་ཐེག་པ་ཆུང་ངུ་རྣམས་ཀྱི་ལྟ་བའི་འཛིན་ཞེན་ཐམས་ཅད་སུན་འབྱིན་པར་བྱེད་པའི་གཉེན་པོ་ཡིན་ལ། འོ་ན་ཐེག་པ་འོག་མའི་ལྟ་བ་སུན་འབྱིན་ཅིང་རྫོགས་ཆེན་རང་གི་ཆེ་བ་ལ་དམིགས་པའི་བློ་དང་མ་བྲལ་བས་དེ་ཡང་དགག་སྒྲུབ་བླང་དོར་གྱི་ལམ་དུ་མི་འགྱུར་རམ་སྙམ་ན། དེ་ལྟ་བུའི་བཟང་ངན་ཆེ་ཆུང་དུ་དམིགས་པའི་བློ་ཡོད་ན་དགག་སྒྲུབ་བླང་དོར་དང་བཅས་པ་ཡིན་པར་ཤིན་ཏུ་བདེན་ཏེ་དེ་ཉིད་རྫོགས་པ་ཆེན་པོའི་ལམ་དུ་ཡང་མི་འགྱུར་བའི་ཚུལ། དེ་ཉིད་ལས། ཐེག་བརྒྱད་ཐམས་ཅད་ཁྱད་བསད་ནས། །ང་ནི་རྩོལ་བ་བྲལ་ལོ་ཟེར། །ཕྱོགས་ཞེན་དེ་ཡིས་སངས་མི་རྒྱ། །ཞེས་དང་། ཐེག་འོག་ཁྱད་བསད་རང་ཆེ་བརྗོད། །དེ་ཡིས་འདི་ལ་གཏན་མི་ཕེབ། །རྫོགས་པ་ཆེན་པོའི་ལྟ་སྒོམ་སྤྱོད། །ཆེན་པོ་ང་ཉིད་མཉམ་ཉིད་དང་། །མཐོ་དམན་དབྱེ་བའི་གདམས་གཞི་བྲལ། །ཞེས་གསུངས་པ་ལྟར་རོ། །དེས་ན་ཆོས་ཉིད་མཉམ་པ་ཉིད་ཀྱི་ཀློང་དུ་ཆེ་ཆུང་མཐོ་དམན་གྱི་ཆ་བསྙམས་ནས་མ་གྲུབ་པའི་ཕྱིར་ན་ཆུང་ངུ་དང་ཆེ་བ་དེ་རྣམས་ཀྱི་དམིགས་པ་དང་བྲལ་བ་ཡིན་མོད། དཔེར་ན་ཉི་མའི་མདུན་ན་མུན་པ་གར་ཡང་མ་སྤངས་བཞིན་དུ་ངང་གིས་མི་གནས་པ་ལྟར་བྱར་མེད་ཡེ་གྲོལ་གྱི་ལྟ་བ་ལ་འོག་མའི་ཞེན་འཛིན་ཐམས་ཅད་མི་སྤངས་ལ་ངང་གིས་མི་གནས་པས་སྤངས་པའི་ཐ་སྙད་བཏགས་པ་ཙམ་ལས་ཆེད་དུ་སྤངས་པ་མིན་ཏེ་འོག་མའི་ཐེག་པ་ཐམས་ཅད་ཨ་ཏི་རྫོགས་པ་ཆེན་པོའི་རྒྱན་དུ་གསུངས་པའི་ཕྱིར་ཏེ། དེ་ཉིད་ལས། འབྱུང་ལྔ་འགྲོ་དྲུག་ཐེག་དགུ་ཐམས་ཅད་ཀྱང་། །དབྱིངས་ལ་དབྱིངས་ཤར་ཆོ་འཕྲུལ་ཡིན་པས་ན། །དེ་ཡི་རྒྱན་ཡིན་བདག་དང་མཐོང་མཛེས་བྲལ། །ཡོ་ག་མདུད་པ་ཅན་གྱི་ལྟ་བ་ཏེ། །དོན་དམ་སྣང་ལ་རང་བཞིན་མེད་པ་ལ། །ཀུན་རྫོབ་ཙམ་སྣང་ལྷ་དང་ལྷ་མོ་ཡང་། །མཚན་མ་ཡེ་ཤེས་མཉམ་པའི་ཆོས་ཉིད་ལ། །ལྷ་དང་ལྷ་མོར་འཛིན་པ་མཆོག་འཛིན་བདུད། །གཉིས་ཀ་རང་ཤར་གཉིས་ཀ་རང་གྲོལ་བས། །ཡོ་ག་མ་སྤངས་རྫོགས་པ་ཆེན་པོའི་རྒྱན། །མ་ཧཱ་མདུད་པ་ཅན་གྱི་ལྟ་བ་ནི། །ཐབས་ཀྱི་མཆོག་གྱུར་ལྷག་པའི་ཀུན་རྫོབ་ལ། །ཤེས་རབ་མཆོག་གྱུར་ལྷག་པའི་དོན་དམ་པས། །གཉིས་མེད་མཆོག་གྱུར་བདེ་བ་མཆོག་ཏུ་བལྟ། །དབྱེ་རུ་ཡོད་ཀྱང་མཉམ་ཡང་མཉམ་ཉིད་ལ། །དབྱེར་མེད་སྤྱོད་ཡུལ་བྲལ་བ་ཕྱོགས་འཛིན་བདུད། །ཨ་ཏི་མཉམ་པ་རིས་མེད་ཆོས་ཉིད་ལ། །གཉིས་ཀ་རང་ཤར་གཉིས་ཀ་རང་གྲོལ་བས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །ཨ་ནུ་མདུད་པ་ཅན་གྱིི་ལྟ་བ་ནི། །ཕར་སྣང་ཤེས་པ་ཀུན་ཏུ་བཟང་མོའི་ཀློང་། །ཚུར་སྣང་ཡུལ་ནི་ཀུན་ཏུ་བཟང་པོའི་ཡུལ། །གཉིས་སུ་མེད་པའི་བདེ་བ་ཆེན་པོར་བལྟ། །གཉིས་དང་སྡུག་བསྔལ་མཉམ་པའི་ཆོས་ཉིད་ལ། །གཉིས་མེད་བདེ་ཆེན་ཡིད་དཔྱོད་རེ་བའི་བདུད། །ཨ་ཏི་རྒྱ་ཆད་མེད་པའི་ཆོས་ཉིད་ལ། །གཉིས་ཀར་རང་ཤར་གཉིས་ཀར་རང་གྲོལ་བས། །ཨ་ནུ་མ་སྤངས་རྫོགས་པ་ཆེན་པོའི་རྒྱན། །ཞེས་གསུངས་སོ། །དེས་ན་ཐེག་པ་འོག་མའི་ཞེན་རྟོག་ཐམས་ཅད་རྫོགས་པ་ཆེན་པོའི་ལམ་ལ་བརྟེན་ནས་སྤོངས་པ་དང་ཡོན་ཏན་ཐམས་ཅད་ཡར་ལྡན་གྱི་ཚུལ་དུ་རྫོགས་པར་འགྱུར་བས་ན་ཐེག་པའི་ཡང་རྩེ་འདིར་འཇུག་དགོས་ལ། དེ་ལ་འཇུག་བྱའི་ཐེག་པ་དེ་དག་བསྡུ་ན་གསུམ་དུ་གནས་ཏེ། གང་ཞེ་ན་རྒྱལ་བའི་གསུང་རབ་ལ་བརྟེན་ནས་འབྲས་བུ་དགྲ་བཅོམ་གྱི་གོ་འཕང་ཐོབ་པར་འདོད་པ་ཐེག་དམན་ཉན་རང་གི་ལམ་དང་། བྱང་ཆུབ་ཀྱི་སྤྱོད་པ་ལ་བསྐལ་པ་གྲངས་མེད་གསུམ་སོགས་སུ་སྤྱོད་པའི་མཐར་སངས་རྒྱས་ཀྱི་གོ་འཕང་ཐོབ་པར་འདོད་པ་མཚན་ཉིད་ཐེག་ཆེན་པ་དང་། ལྷ་སྔགས་ཏིང་ངེ་འཛིན་གྱི་དམིགས་པ་དང་ལྡན་པས་མ་དག་འཁྲུལ་པའི་སྣང་བ་ཐམས་ཅད་སྦྱངས་ནས་དག་པ་ལྷའི་རང་བཞིན་དུ་མྱུར་དུ་སྣང་བར་འདོད་པ་ཨ་ནུ་མན་ཆད་ཀྱི་འབྲས་བུའི་ཐེག་པ་རྣམས་ཏེ། དེ་རྣམས་ནི་དཔེར་ན་སྒྱུ་མ་མཁན་གྱིས་སྤྲུལ་པའི་སྒྱུ་མའི་རྣམ་པ་མེད་བཞིན་དུ་སྣང་བ་དང་། རི་མོའི་རྣམ་པ་རྣམས་ནི་མཐོ་དམན་མེད་བཞིན་དུ་མཐོ་དམན་དུ་སྣང་བ་ལྟར་འཁོར་བ་ལས་ངེས་པར་འབྱུང་ཞིང་འབྲས་བུ་མྱང་འདས་ཀྱི་སར་འཇུག་ཏུ་མེད་པར་རང་བྱུང་ཡེ་ཤེས་ཆེན་པོ་གཅིག་གི་བདག་ཉིད་སྲིད་ཞི་མཉམ་པ་ཉིད་དུ་གནས་པ་ལ། དེ་ལྟར་མ་རྟོགས་པར་འཁོར་འདས་ལ་བཟང་ངན་བླང་དོར་དུ་སྣང་བས་རྨུག་པར་བྱས་པ་ཡིས་ཐེག་པ་སོ་སོའི་རྩོལ་སྒྲུབ་ཀྱི་ལམ་ལ་ཞེན་ཅིང་། དེ་ཡི་དབང་ལས་སླར་ཡང་རྟོག་པ་སྐྱེ་ཞིང་འཕེལ་བར་འགྱུར་བས་ན་དེ་དག་ལས་གཞན་པའི་རྩོལ་མེད་ཡེ་གྲོལ་གྱི་ཐེག་པ་ཨ་ཏི་རྫོགས་ཆེན་གྱི་ལམ་ལ་འཇུག་པར་བྱ་སྟེ། དེ་ཡང་ཇི་ལྟར་ཞེ་ན་ཨ་ཏི་རྫོགས་པ་ཆེན་པོ་འདི་ནི་ཐེག་པ་ཀུན་གྱི་རྒྱལ་པོ་ཡིན་པའི་ཕྱིར་འོག་མའི་ཐེག་པ་ལྟར་སྤོང་འགོགས་སྦྱོང་བསྒྱུར་གྱི་འཛིན་ཞེན་གང་ཡང་མེད་པས་བཏང་ངོ་སྟེ་རྩོལ་བར་མི་བྱེད་ལ། དེ་ལྟར་འཛིན་རྩོལ་ཐམས་ཅད་དང་བྲལ་བ་དེ་ནི་ཆོས་ཉིད་ཇི་བཞིན་པའི་ངང་ལ་གནས་པ་ཡིན་པས་བཞག་གོ་ཞེས་གསུངས་སོ། །དེ་ཡང་འཇོག་བྱ་འཇོག་བྱེད་ཀྱི་རྩོལ་བ་ལ་ལྟོས་པ་མིན་ཀྱང་བཏང་སྙོམས་ཆེན་པོའི་ངང་ལས་མི་འདའ་བའི་དོན་ཏེ་དོན་དུ་བཏང་བཞག་ཐམས་ཅད་དང་བྲལ་བའི་རང་བཞིན་དུ་གསུངས་པ་ཡིན་ཏེ། དེ་ལྟ་བུའི་བཏང་བཞག་བྲལ་བའི་གནས་ལུགས་འདུས་མ་བྱས་པའི་ཡེ་ཤེས་དེ་ལ་ཤེས་ཤིང་རྟོགས་པར་བྱ་བ་དང་བསྒྲུབ་ཅིང་མངོན་དུ་བྱ་བ་གང་ཡང་མེད་པས་འདོད་ཅིང་ཞེན་པ་མེད་ཅིང་སྤྱོད་ཅིང་ལེན་པ་མེད་ལ། འབྲས་བུ་ལ་ཐོབ་པར་སྨོན་པའི་བྲོད་པ་རྡུལ་ཙམ་ཡང་མི་བསྐྱེད་དོ་ཞེས་བཅོས་བསྒྱུར་དང་བླང་དོར་གྱི་རེ་དོགས་ཀུན་དང་བྲལ་བ་དེ་རྫོགས་ཆེན་གྱི་དོན་ལ་ཞུགས་པ་ཡིན་གྱིས། གཞན་དུ་སྤང་བླང་ལ་སོགས་པའི་ཞེན་པ་རྡུལ་ཙམ་ཡོད་ཀྱང་ཨ་ཏིའི་ལམ་དང་འགལ་བར་གསུངས་ཏེ། ནམ་མཁའི་རྒྱལ་པོ་ལས། ཡེ་ནས་ལྷུན་གྱིས་གྲུབ་པའི་ཐབས་ཆེན་ལ། །སྒྱུ་བཅོས་སྤྱོད་པ་ཐབས་ཆེན་མ་ཡིན་ཏེ། །སྒྱུ་འཆང་ཐབས་ཀྱིས་བཅོས་དང་མ་བྲལ་ན། །མི་རྟོག་ཐབས་ཆེན་དེ་ཡི་ཅི་ཞིག་བྱ། །ཞེས་པ་ལྟར་རོ། །བཞི་པ་སེམས་ཉིད་ཨ་ཏི་མ་བཅོས་རྣལ་དུ་བཞག་ཐབས་འབྲས་བུ་དང་བཅས་པ་ལ་གསུམ་སྟེ། ཁྱུང་ནམ་མཁར་ལྡིང་བའི་དཔེས་ཐ་མལ་ཤེས་པ་རང་འགྲོས་བཏང་བཞག་མེད་པར་བཞག་ཚུལ། དེ་ཉིད་གོམས་པ་ལས་གནས་སྐབས་སྤྱན་དང་མངོན་ཤེས་ལ་སོགས་པའི་དྲོད་རྟགས་ འཆར་ཚུལ། ཤིན་ཏུ་གོམས་པ་ལས་སེམས ་ཉིད་གཞི་ཐོག་ཏུ་ཕེབ་ཚུལ་ལས་ཆོས་སྐུ་ཏིང་ངེ་འཛིན་གྱི་རྒྱལ་པོ་དང་ལོངས་སྤྲུལ་སྣང་བའི་རྒྱ་མཚོ་ཀུན་ཏུ་བཟང་པོའི་ཐོབ་ཚུལ་ལོ། །དང་པོ་ནི། དཔེར་ན་འདབ་ཆགས་མཁའ་ལྡིང་རྒྱལ་པོ་ཁྱུང་ཆེན་ནམ་མཁའ་ལ་ལྡིང་ནས་འགྲོ་བ་ཡི་ཚེ་ན་འདབ་གཤོག་སྤྲོ་བསྡུ་མེད་ཅིང་མཁའ་དབྱིངས་ལམ་དུ་བདེ་བ་དང་། ཐམས་ཅད་ཁོབས་འོག་ཏུ་ཆུབ་ཅིང་ཀླུ་རྣམས་ཟིལ་གྱིས་གནོན་པ་དང་། ཕྱི་རྒྱ་རླབས་ཀྱིས་གཅོད་ཅིང་གཡང་སར་ལྷུང་དོགས་མེད་པ་བཞིན་དུ། ཨ་ཏི་རྫོགས་པ་ཆེན་པོའི་རྣལ་འབྱོར་པ་རྣམས་ཀྱིས་ཐ་མལ་གྱི་ཤེས་པ་འདི་ལ་བཅོས་བསྒྱུར་སྤུ་ཙམ་མེད་པར་རང་འགྲོས་སུ་བཏང་བ་ལས་དམིགས་པའི་ཡུལ་མ་གྲུབ་པས་ཕར་སྤྲོ་ཞིང་བཏང་བ་མེད་ཅིང་། འཛིན་པའི་རྟོད་ཕུར་བུད་པས་ནང་དུ་དམིགས་ཤིང་བསྡུ་བ་མེད་པར་བྱར་མེད་ལམ་དུ་བདེ་བ་དང་། ཐམས་ཅད་རིག་པའི་ཀློང་དུ་འུབ་ཆུབ་ཅིང་མཚན་རྟོག་ཟིལ་གྱིས་གནོན་པ་དང་། འཁོར་བའི་གཡང་ས་ཆོད་པས་ལྟུང་བའི་ཉམ་ང་མེད་པ་དང་། འབྲས་བུ་ལ་ཐོབ་རེ་མེད་པས་ལམ་ལ་སྟོར་བར་མི་དོགས་པ་སྟེ། དེ་ཉིད་ཀྱི་ཕྱིར་ན་བཟའ་བའམ་གཟའ་གཏང་དང་རྩོལ་བ་ཐམས་ཅད་ངང་གིས་ཞི་ཞིང་མེད་པས་མ་བཅོས་ཤུགས་འབྱུང་གི་སྤྱོད་པ་ཐམས་ཅད་ཅི་ཤར་ཆོས་ཉིད་ཀྱི་རོལ་པར་སྤྱོད་པར་གསུངས་ཏེ། རྩེ་མོ་བྱུང་རྒྱལ་ལས། ཁྱུང་ཆེན་གཤོག་རྫོགས་མཁའ་ལ་ལྡིང་བ་བཞིན། །ཆུ་རླུང་རི་བྲག་གྱེན་ཐུར་ཉམ་མི་ང་། །བར་སྣང་ནམ་མཁའི་ཁམས་ཀུན་ལམ་དུ་བདེ། །གང་དུ་དམིགས་པའི་ས་ཀུན་གཅོད་པར་བྱེད། །དེ་བཞིན་ཡེ་ནས་བློ་སྦྱངས་རྣལ་འབྱོར་ཐུགས། །བྱང་ཆུབ་སྙིང་པོར་འགྲོ་བའི་སྐལ་ལྡན་ནོ། །སངས་རྒྱས་མངོན་དུ་གྲུབ་པའི་མན་ངག་ཅན། །བྱང་ཆུབ་སེམས་རྟོགས་ཡོན་ཏན་ཁྱད་པར་འཕགས། །བདག་དང་གཞན་དོན་ལྷུན་གྲུབ་མ་སྤངས་པ། །སྤྱོད་པ་རྒྱ་མཚོ་སྣ་ཚོགས་ཅི་བདེར་སྤྱོད། །ཅེས་སོ། །གཉིས་པ་ནི། འདི་ལྟར་དཔེར་ན་རྒྱ་མཚོ་ཆེན་པོ་ནི་རྙོགས་མ་མེད་པས་དྭངས་ཞིང་གཏིང་ཟབ་པ་དང་། རླབས་མི་ཟད་ཅིང་འཕེལ་འབྲི་མེད་པ་དང་། རྒྱ་ཆེ་ཞིང་ནོར་བུ་རིན་པོ་ཆེའི་འབྱུང་གནས་སུ་གྱུར་པ་བཞིན་དུ་སྙིང་པོ་བྱང་ཆུབ་ཀྱི་སེམས་ནི་རང་བཞིན་གྱིས་འོད་གསལ་ཞིང་ཀུན་གྱིས་རྟོགས་པར་དཀའ་བ་དང་། ཡོན་ཏན་མི་ཟད་ཅིང་འཕེལ་འབྲི་མེད་པ་དང་། མཐའ་དབུས་དང་བྲལ་བས་རྒྱ་ཆེ་བ་དང་། འདོད་པ་ཐམས་ཅད་སྐོང་བའི་བདག་ཉིད་དུ་ཡེ་ནས་གནས་པ་ལ། བཅོས་བསྒྱུར་སྤང་བླང་མེད་པའི་གནད་ཀྱིས་གོམས་པར་བྱས་ན་རིག་རྩལ་སོ་སོར་རྟོག་པའི་རྩལ་ལས་ཟབ་པ་དང་རྒྱ་ཆེ་བའི་ཆོས་རྣམས་སྣ་ཚོགས་པ་ཀློང་རྡོལ་དུ་འབྱུང་བར་འགྱུར་བས་འགྲོ་བའི་ཁམས་ལ་ཆོས་ཀྱི་ཆར་ཆེན་པོ་འབེབ་པར་བྱེད་པ་དང་། གཏིང་རྫོགས་ལས། རྣལ་འབྱོར་དམ་པ་སྐྱེས་མཆོག་དམ་ཅན་ལ། །རྟོགས་པས་བར་མ་ཆོད་པས་ཡེ་ཤེས་ཀློང་། །མཉམ་ཉིད་མཐར་ཕྱིན་ལམ་ཆེན་ཀུན་བསྒྲལ་བས། །ཅི་སྤྱོད་ཏིང་འཛིན་ལས་ནི་མ་ཉམས་ཀློང་། །གོམས་པའི་ཀློང་དུ་ཤིན་ཏུ་གསལ་འགྱུར་ཏེ། །རྒྱལ་བའི་དགོངས་པ་ཆོས་ཉིད་རང་བྱུང་ཀློང་། །བདག་གཞན་གཉིས་སུ་མཐོང་བ་ཅི་ཡང་མེད། །དེ་ཕྱིར་ཀློང་གསུམ་ལྡན་པའི་ཡེ་ཤེས་བཤད། །ཅེས་གསུངས་པ་ལྟ་བུའི་ཡེ་ཤེས་གསུམ་ལྡན་གྱི་ཀློང་ངམ་ཏིང་ངེ་འཛིན་ཉམས་པ་མེད་ཀློང་ངམ་རྩལ་ལས་སྤྱན་ལྔ་དང་མངོན་ཤེས་དྲུག་དང་གཟུངས་དང་ཏིང་ངེ་འཛིན་ལ་སོགས་པའི་ཡོན་ཏན་གྱི་ཚོགས་གྲངས་དང་ཚད་གཞལ་དུ་མེད་པས་ནམ་མཁའི་མཐའ་དང་མཉམ་པ་འབྱུང་ཡང་། རིག་གདངས་མ་འགགས་པའི་རྩལ་སྣང་རང་ཤར་བ་ཙམ་ལས་ཡོན་ཏན་དེ་དག་བསྡུ་བའི་གནས་སམ་ཁོང་དུ་ཆུད་པར་བྱ་བའི་གནས་སུ་ངེས་པར་བཟུང་ཞིང་ཞེན་པ་དང་དེས་རློམ་སེམས་པ་ཡང་རྡུལ་ཙམ་མེད་པའོ། །གསུམ་པ་ནི། དེ་ལྟར་རྫོགས་ཆེན་བྱ་རྩོལ་བྲལ་བའི་དོན་ལ་ཤིན་ཏུ་གོམས་པ་མཐར་ཕྱིན་པས་སེམས་ཉིད་གཞི་ཐོག་ཏུ་ཕེབས་པའམ་བྱང་ཆུབ་སྙིང་པོར་ཕྱིན་པའི་དེ་མ་ཐག་ཏུ་རང་གནས་ཆོས་སྐུའི་དགོངས་པ་ལ་མཉམ་རྗེས་ཀྱི་དབྱེ་བ་མེད་པར་ཆོས་ཉིད་ཀྱི་ངང་ལས་རྟག་ཏུ་གཡོ་བ་མེད་པས་ཏིང་ངེ་འཛིན་ཐམས་ཅད་ཀྱི་ཕུལ་དུ་ཕྱིན་པའི་རྒྱལ་པོ་ཆེན་པོ་འབྱུང་ཞིང་ཆོས་སྐུ་འདུས་མ་བྱས་པ་སྐྱེ་འཆི་འཕོ་འགྱུར་མེད་པའི་དོན་མངོན་དུ་འགྱུར་བར་གསུངས་ལ། དེ་ལྟ་བུའི་ཏིང་ངེ་འཛིན་དེ་ལ་མཚན་གྱི་རྣམ་གྲངས་ཡང་། མི་གནས་པའི་ཏིང་ངེ་འཛིན་དང་། མི་རྟོག་པའི་ཏིང་ངེ་འཛིན་དང་། ཐམས་ཅད་མཁྱེན་པའི་ཏིང་ངེ་འཛིན་དང་། སྣང་བ་མེད་པའི་ཏིང་ངེ་འཛིན་དང་། ཐོད་རྒལ་གྱི་ཏིང་ངེ་འཛིན་དང་། སྣང་བ་ཆེན་པོའི་ཏིང་ངེ་འཛིན་ཞེས་ཀྱང་གསུངས་སོ། །དེ་ལྟར་ཆོས་སྐུའི་དགོངས་པ་མངོན་དུ་གྱུར་པའི་ཚེ་ན། ཀློང་ཆེན་རབ་འབྱམས་ལས། མི་སྣང་རྒྱུན་གྱི་ཆོས་སྐུ་དང་། །སྣང་བ་གཟུགས་སྐུའི་ཐུགས་རྗེ་ཡང་། །རྒྱུན་ཆད་མེད་པར་འབྱུང་བའི་ཕྱིར། །ནམ་མཁའི་ཀློང་ནས་ཆོ་འཕྲུལ་བཞིན། །ཞེས་གསུངས་པ་ལྟར་ཆོས་སྐུའི་དགོངས་པ་ལས་མ་གཡོས་བཞིན་དུ་དེའི་རྩལ་སྣང་ལོངས་སྐུ་དང་སྤྲུལ་སྐུའི་རོལ་པ་ཚད་མེད་པ་རྒྱ་མཚོ་ཆེན་པོ་ལ་གཟའ་སྐར་བཀྲ་བ་བཞིན་དུ་འགག་མེད་དུ་འཆར་ཞིང་འགྲོ་བའི་དོན་རྟག་ཁྱབ་ལྷུན་གྲུབ་ཆེན་པོའི་ཚུལ་དུ་མཛད་ན་ཡང་། རྣམ་རྟོག་གི་སྤྲོས་པ་དང་བྱ་བྱེད་རྩོལ་བ་མེད་པར་མི་རྟོག་མཉམ་པ་ཆེན་པོའི་ངང་ལས་རྩོལ་མེད་དུ་ཤར་བས་ནམ་མཁའི་མཐའ་ལྟར་རྒྱ་ཆེ་ཞིང་ཡངས་པ་སྟེ། དེ་ཡང་མ་དག་པའི་ཆོས་ཞིག་སྤངས་ནས་གདོད་དག་པ་མངོན་དུ་ཐོབ་པ་ལྟ་བུ་མིན་པར་ཆོས་འདི་དག་ཐམས་ཅད་གདོད་ནས་ཀུན་ཏུ་བཟང་པོའི་ངོ་བོར་སངས་རྒྱས་པས་སྤྱོད་ཡུལ་ཐམས་ཅད་ཡོངས་སུ་དག་པར་གནས་པ་ལ་སྐྱེ་ཞིང་འབྱུང་བ་དང་འཕོ་ཞིང་འགྱུར་བའི་ཆོས་སུ་གྲུབ་པ་མེད་པར་ཡེ་ནས་སངས་རྒྱས་པའི་དོན་དེ་རྣལ་འབྱོར་བས་མངོན་དུ་རྟོགས་པ་ཙམ་སྟེ། རྩེ་མོ་བྱུང་རྒྱལ་ལས། སེམས་ཅན་ཐམས་ཅད་བྱང་ཆུབ་སྙིང་པོ་ལ། །རང་གི་སེམས་ཉིད་སངས་རྒྱས་མངོན་སུམ་ན། །གཞན་ནས་བསྒྲུབ་པའི་རྒྱལ་བ་རྡུལ་ཙམ་མེད། །འགྲོ་བ་སྐལ་ལྡན་རྣམས་ཀྱི་དོན་ཙམ་དུ། །བསྒོམ་ཞིང་བསྒྲུབ་པའི་ཐ་སྙད་ལུང་དུ་བསྟན། །དེ་ལྟ་བས་ན་མི་འགྲུབ་གང་ཡང་མེད། །དེ་ལྟ་དེ་བཞིན་ཆོས་ཀྱི་དབྱིངས་རིག་ན། །མ་རིག་རྣམས་ལ་སྙིང་རྗེ་ཆེན་པོ་སྐྱེ། །སྙིང་རྗེ་སྐྱེས་ནས་སྒྱུ་མའི་ཏིང་འཛིན་གྱིས། །འགྲོ་དོན་ཐབས་ལ་སྤྱོད་པ་སྣ་ཚོགས་སྟོན། །བདག་དང་གཞན་དུ་རྟོག་པ་མེད་པའི་ཕྱིར། །ཡེ་ནས་གཉིས་མེད་དོན་གཅིག་ཆོས་ཀྱི་སྐུ། །ཆོས་སྐུ་སྐྱེ་མེད་རྟོགས་ནས་འགྲོ་དོན་དུ། །སྐྱེ་བའི་ཆོ་འཕྲུལ་ཡང་ནས་ཡང་དུ་བསྟན། །མཛད་པ་བཅུ་གཉིས་འགྲོ་དོན་མཐར་ཕྱིན་པ། །ཅིར་ཡང་འགྱུར་བའི་གཟུགས་ཅན་སྤྲུལ་པའི་སྐུ། །ཐུགས་རྗེ་ཆོ་འཕྲུལ་སྣ་ཚོགས་ཅིར་ཡང་གསལ། །ཐུགས་རྗེའི་སྤྲུལ་པས་གདུལ་བྱ་ཀུན་འདུལ་པས། །སྒྱུ་མའི་བློ་ལྡན་རློམ་སེམས་རྡུལ་ཙམ་མེད། །ཅེས་གསུངས་པ་བཞིན་ནོ། །གསུམ་པ་དོན་བསྡུ་བ་ལ་བཞི་སྟེ། ཐེག་བརྒྱད་ཀྱི་རང་བཞིན་སྤང་བླང་དུ་བསྟན་པ། རྫོགས་ཆེན་རོ་གཅིག་ཏུ་རྟོགས་པ་ལ་དགེ་སྡིག་ཆོས་ཉིད་དུ་ འཆར་ཚུལ། དྲན་བསམ་སྐྱེ་མེད་དུ་སྒོམ་པས་རྣལ་དོན་ཆོས་ཉིད་དུ་མི་མཐོང་བ། སེམས ་ཉིད་ཆོས་སྐུ་ཡིན་པས་ཀུན་ལ་ཁྱབ་ཀྱང་མ་རྟོགས་པ་ཉིད་རྫོགས་ཆེན་སྤྱོད་པའི་རྣལ་འབྱོར་པ་ལ་མངོན་སུམ་དུ་སྣང་ཚུལ་ལོ། །དང་པོ་ནི། འདི་ལྟར་སེམས་ཅན་རྣམས་ཡེ་ནས་འཁྲུལ་མ་མྱོང་པར་སྙིང་པོ་བྱང་ཆུབ་ཀྱི་ཀློང་དུ་སངས་རྒྱས་པ་ཡིན་པ་ལ། ཕྱི་ནང་སྣང་སྲིད་ཀྱི་ཆོས་འདི་དག་ས་བོན་མྱུ་གུ་ལ་སོགས་པ་རྒྱུ་དང་འབྲེལ་བ་དྲུག་དང་ས་ཆུ་མེ་རླུང་ལ་སོགས་པ་རྐྱེན་དང་འབྲེལ་བ་དྲུག་སྟེ་ཕྱིའི་རྟེན་འབྲེལ་བཅུ་གཉིས་དང་མ་རིག་པ་ནས་རྒ་ཤིའི་བར་གྱི་ནང་གི་རྒྱུ་རྐྱེན་རྟེན་འབྲེལ་ཡན་ལག་བཅུ་གཉིས་པོ་ཡེ་དབང་གིས་འཁྲུལ་བ་སྣང་ཚུལ་དང་། དེ་ཉིད་ལྡོག་པའི་ཕྱིར་དུ་ཐེག་པ་བརྒྱད་ཀྱི་ཆོས་བསྟན་པ་ཐམས་ཅད་རྩོལ་མེད་ཡེ་གྲོལ་གྱི་གཤིས་ལུགས་སྙིང་པོ་རང་བྱུང་གི་ཡེ་ཤེས་རྒྱུ་རྐྱེན་དང་བྲལ་བ་ཁོང་དུ་མི་ཆུད་པར་དེ་ལྟ་མ་ཡིན་ནོ་ཞེས་སྐུར་པས་སྤོང་བར་བྱེད་པ་དང་བརྟགས་པས་སྒྲོ་འདོགས་པ་རྣམས་ཀྱི་ཆེད་དུ་རྒྱུ་འབྲས་སྤང་བླང་ཅན་དུ་བཤད་པ་ཡིན་པས། དེ་ལྟ་བུའི་གདུལ་བྱ་འཁྲུལ་པ་ཅན་རྣམས་ཀྱི་དོན་དུ་ལམ་ལ་རིམ་གྱིས་འཇུག་པའི་སྒོ་ཙམ་དུ་བསྟན་པ་ལས་རང་རིག་པ་བྱང་ཆུབ་ཀྱི་སྙིང་པོ་ནི་རྒྱུ་རྐྱེན་རྩོལ་བསྒྲུབ་ལ་ལྟོས་པ་མེད་པར་གཞི་རྫོགས་འཕོ་འགྱུར་བྲལ་བའི་རང་བཞིན་དུ་རྫོགས་ཆེན་གྱི་གཞུང་ནས་ཇི་ལྟར་བསྟན་པ་ལྟར་ཡང་རབ་ཨ་ཏིའི་སྐལ་བ་དང་ལྡན་པའི་མཁས་པ་དོན་གྱི་གནས་ལུགས་མཐར་ཐུག་པ་རྟོགས་པར་ནུས་པའི་བློ་གྲོས་དང་ལྡན་པས་དེ་ཇི་ལྟ་བ་བཞིན་དུ་ཤེས་པར་གྱིས་ཤིག་ཅེས་པ་སྟེ། ཁྱུང་ཆེན་ལས། འཁྲུལ་པ་རྣམས་ཀྱི་སྒོ་ཙམ་ཉིད་དུ་ནི། །ཚིག་དང་ཡི་གེར་སྟོན་པས་བཤད་པ་ཡིན། །རང་རིག་བྱང་ཆུབ་སྙིང་པོ་ཆོས་ཀྱི་དབྱིངས། །ཆོས་དབྱིངས་གཞན་ནས་མི་རྙེད་དེ་བཞིན་ཉིད། །མཁས་པ་རྣམས་ཀྱིས་དེ་བཞིན་ཤེས་པར་གྱིས། །ཞེས་གསུངས་སོ། །དེས་ན་འདི་ལྟར་འགྲོ་བ་རྒྱུད་དྲུག་ཏུ་སྐྱེ་ཤིའི་ཁ་བརྒྱུད་ཅིང་འཁྲུལ་སྣང་གི་དུཿཁ་ལ་སྤྱོད་པ་ལྟར་སྣང་བའི་འགྲོ་བ་མ་ལུས་པ་ཡང་དང་པོའི་ལམ་དུ་སྟེ་དང་པོར་གང་ལས་སྣང་བའི་གཞི་ཆོས་ཉིད་འགྱུར་བ་མེད་པའི་ངང་ལས་སྐད་ཅིག་ཀྱང་གཡོ་མ་མྱོང་བར་ཤེས་པར་བྱ་བ་ནི་གནས་ལུགས་མཐར་ཐུག་པ་རྫོགས་པ་ཆེན་པོའི་དགོངས་པ་མ་ནོར་བ་ཡིན་མོད། འོན་ཀྱང་དེ་ལྟར་མ་རྟོགས་པར་འདོད་པའི་ཡུལ་ལྔ་ལ་ཆགས་སྡང་རང་མཚན་པར་སྤྱོད་པའི་འགྲོ་བ་རྣམས་ལ་དམིགས་པ་མེད་པའི་སྙིང་རྗེས་ཐུགས་རྒྱུད་བརླན་པའི་རྒྱལ་བ་ཐབས་ལ་མཁས་པས་གདུལ་བྱའི་བློ་དང་འཚམས་པར་ཐེག་པ་རིམ་གྱིས་མ་བསྟན་ན། དབང་པོ་དམན་པའི་རིགས་ཅན་རྣམས་ཀྱིས་དང་པོ་ནས་རྫོགས་ཆེན་བྱར་མེད་ཀྱི་དོན་རྟོགས་དཀའ་བ་ལ་དགོངས་ནས་གདུལ་བྱ་རང་རང་ཐེག་པ་གང་དུ་དགའ་བར་སྟེ་མོས་པ་དང་མཐུན་པར་བྱང་ཆུབ་ཀྱི་ལམ་ལ་སྤྱོད་པའི་ཚུལ་སྟོན་པའི་ཐེག་པ་འོག་མ་ཐམས་ཅད་རྫོགས་པ་ཆེན་པོའི་ལམ་སྟེགས་མིན་པ་མེད་ལ། སྤང་བླང་དང་བཅས་པའི་ལམ་དེ་དག་གིས་བྱར་མེད་ཡེ་བབ་སོར་བཞག་གི་དོན་དངོས་སུ་རྟོགས་པར་མི་ནུས་པས་ན་མཐར་ཐུག་མཐར་ཐུག་རྫོགས་ཆེན་ལ་འཇུག་པར་བྱ་དགོས་ཏེ། འཕགས་ལམ་བཀོད་པའི་རྒྱུད་ལས། གནས་ལུགས་དེ་ནི་འདུས་མ་བྱས། །འབྲས་བུ་སྐུ་གསུམ་མཐའ་རུ་ཐུག །རྒྱུ་འབྲས་གཉིས་ལ་མི་ལྟོས་དང་། །བྱས་པའི་ཆོས་ཀྱི་སངས་མི་རྒྱ། །ཡེ་ནས་གནས་པའི་དོན་རྟོགས་ན། །མ་བྱས་ཆོས་ཀྱི་སངས་རྒྱས་དང་། །ཅིག་ཆར་འཇུག་པའི་ལམ་ཡིན་པས། །ངེས་དོན་ཕྱིན་ཅི་མ་ལོག་པའོ། །ཞེས་པ་ལྟར་རོ། །གཉིས་པ་ནི། དེས་ན་རྫོགས་པ་ཆེན་པོའི་དགོངས་དོན་ཇི་བཞིན་པ་ཆོས་ཐམས་ཅད་རང་བྱུང་རིག་པའི་ངང་དུ་གཉིས་མེད་རོ་གཅིག་ཏུ་རྟོགས་པའི་ཚེ་ན་རྒྱུ་འབྲས་བླང་དོར་གང་ལའང་ལྟོས་པ་མེད་དེ། འདི་ལྟར་སེམས་ཅན་སྟོང་ཕྲག་མང་པོའི་སྲོག་གཅོད་པར་བྱེད་པ་ཤན་པའི་ལས་བྱེད་པ་དང་། འདོད་ལོག་གི་ལས་ལ་རྟག་ཏུ་ཞུགས་པ་སྨད་འཚོང་གི་ལས་བྱེད་པ་དང་། ཕ་མ་གསོད་པ་སོགས་མཚམས་མེད་པ་ལྔ་དང་ཉེ་བའི་མཚམས་མེད་པ་ལྔ་ལ་སོགས་ཤིན་ཏུ་ལྕི་བའི་ལས་བཅས་པ་དང་། རང་བཞིན་གྱི་ཁ་ན་མ་ཐོ་བ་འཇིག་རྟེན་དཀར་ཕྱོགས་རྣམས་དང་ཐེག་པ་འོག་མ་པ་རྣམས་ཀྱིས་སྤོང་བར་བྱེད་པའི་ལོག་སྤྱོད་མི་དགེ་བའི་ལས་རྣམས་ཀྱང་དོན་ལ་མིང་ཙམ་ཡང་མ་གྲུབ་པར་རིག་སྟོང་འགྱུར་བ་མེད་པ་ཆོས་ཉིད་སྐྱེ་བ་མེད་པའི་ཀློང་དུ་གཉིས་མེད་ཡེ་ཤེས་ཆེན་པོའི་ངོ་བོར་ཡོངས་སུ་རྫོགས་པ་ཡིན་ཏེ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ད་ཡང་འདུས་པའི་སྙིང་པོ་ཉོན། །ངོ་བོ་ཉིད་ཀྱི་སྐུ་ཤེས་པས། །མི་ལེན་མི་སྤང་ཡེ་མཉམ་ཕྱིར། །རེ་དོགས་མེད་པས་རང་བྱུང་སྐུ། །དེ་ཕྱིར་ཀུན་བཟང་གདལ་བ་ལ། །གང་ཡང་མི་འགག་རོལ་པར་ཤར། །སྲོག་གཅོད་མ་བྱིན་ལེན་པ་དང་། །མི་ཚངས་སྤྱོད་དང་རྫུན་ཏུ་སྨྲ། །མཚམས་མེད་ལ་སོགས་སྡིག་བྱས་ཀྱང་། །ཉེས་པར་མི་འགྱུར་དཔལ་དུ་ཆེ། །སྟོང་གསུམ་མ་ལུས་ཚིག་གྱུར་ཀྱང་། །ནམ་མཁའ་མེ་ཆུས་མི་ཚུགས་འདྲ། །ཞེས་གསུངས་པ་དེ་ལྟ་བུའི་ཕྱིར་ན་ལས་ཉོན་རྣམ་རྟོག་གི་བདུད་ཐམས་ཅད་འཇོམ་པར་བྱེད་པ་ཆོས་ཉིད་ཀྱི་རྩིས་ཐེབ་པས་ཡེ་ནས་རྣམ་པར་དག་པ་འགྱུར་བའི་ཟུག་རྔུ་གང་ཡང་མེད་པས་བདེ་བ་ཆེ་བའམ་ཆེན་པོ་རང་བྱུང་ཟག་པ་མེད་པའི་ཡེ་ཤེས་ལས་གཞན་དུ་གྱུར་པ་རྡུལ་ཙམ་ཡང་མེད་པས་དགེ་སྡིག་ཐམས་ཅད་ཆོས་ཉིད་མཉམ་པ་ཆེན་པོའི་ཀློང་དུ་ལ་བཟླ་བར་བྱེད་པ་ཉིད་དོ། །ཁྱུང་ཆེན་ལས། ཕྱི་དང་ནང་མེད་ཡེ་ཤེས་ཡངས་པའི་མཁའ། །དུས་གསུམ་དུས་མེད་གཅིག་སྟེ་ཁྱད་པར་མེད། །སྔོན་མེད་ཕྱིས་མེད་གདོད་ནས་དག་པ་ཡིན། །ལྟ་བས་བལྟར་མེད་ལྟ་བའི་ཚིག་ལས་འདས། །ཡིད་ཀྱིས་འཇོག་མེད་སྒོམ་པ་ཆེན་པོའི་ཀློང་། །གདོད་ནས་དག་པའི་བདུད་རྩི་དེ་ལྟར་གནས། །རྣམ་རྟོག་འཁོར་བ་བཅད་པ་དེ་ཡི་ལས། །རྒྱུ་འབྲས་རོ་གཅིག་མཉམ་གནས་མཆོག་ཏུ་གནས། །གང་ལའང་མི་གནས་བྱང་ཆུབ་སེམས་ལ་གནས། །རྒྱུ་དང་རྐྱེན་ལས་མ་བྱུང་སྐྱེ་ཤི་མེད། །རང་བཞིན་འོད་གསལ་བདུད་རྩི་ཆེན་པོ་འདི། །སུ་ཡིས་རྟོགས་པས་དངོས་གྲུབ་ཆེན་པོར་གསུངས། །ཞེས་དང་། མདོ་བཅུ་ལས། ཤན་པ་སྨད་འཚོང་མཚམས་མེད་བྱེད་པ་དེ། །འཇིག་རྟེན་ཁ་ན་མ་ཐོ་སྤངས་པ་ཡིན། །དེ་ཉིད་ཡོངས་སུ་རྫོགས་པའི་བདུད་རྩི་སྟེ། །བདེ་བ་ཆེན་པོ་ཉིད་དང་དབྱེར་མེད་ཕྱིར་། །རྣམ་པར་མི་རྟོག་སྙིང་པོ་ཞེས་ཀྱང་བྱ། །ཞེས་གསུངས་ལ། དེ་ཉིད་ཐེག་པ་དམན་པའི་རིགས་ཅན་རྣམས་ཀྱིས་ཤིན་ཏུ་རྟོགས་པར་དཀའ་བས་གསང་བ་མཆོག་གི་དམ་ཚིག་ཏུ་བསྟན་པ་དང་སྐལ་ལྡན་རྣམས་ལ་མི་འདོར་བར་གདམས་པ་ཡང་། སྔ་མ་ལས། བསམ་གཏན་བརྗོད་མེད་མཆོག་གི་བདུད་རྩི་འདི། །ཕལ་གྱིས་མི་ཐོབ་རིས་སུ་ཆད་མེད་དོ། །རྣམ་པ་ཅན་ལ་ཤིན་ཏུ་གསང་བར་འགྱུར། །བལྟ་ཡང་མི་དགོས་ལྟ་བ་མཆོག་ཏུ་གྲགས། །ཅི་སྤྱོད་མི་རྟོག་སྐྱེ་བ་འདི་ཡི་དོན། །ཉམ་ང་སྐྱོན་གྱིས་མི་སྒྲིབ་འདི་ཡི་ལམ། །གཙང་སྨེའི་བློ་རྟོག་བོར་ནས་དོན་ལ་བསྙེགས། །མ་སྲིང་ཀུན་སྦྱོར་མཚམས་མེད་ཀུན་སྤྱོད་ཅིང་། །ཆ་ཤེས་ཕྲ་བའང་མ་རིག་ཉན་ཐོས་ནི། །ཤིན་ཏུ་གསང་བ་འདི་ནི་དམ་ཚིག་མཆོག །ཆུ་སྲིན་རྫས་འཛིན་ཚུལ་དུ་མི་གཏོང་ན། །ཁྱད་པར་གྱུར་པའི་བདུད་རྩི་མཆོག་ཉིད་གྲུབ། །ཅེས་གསུངས་སོ། །གསུམ་པ་ནི། གོང་དུ་བསྟན་པའི་སྤྱོད་པ་དེ་དག་ལས་གཞན་ཡང་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀྱང་ཆོས་ཉིད་བདེ་བ་ཆེན་པོ་བྱང་ཆུབ་སེམས་ཀྱི་རང་བཞིན་ལས་གཞན་དུ་མེད་པའི་རྒྱུ་མཚན་དེ་བས་ན་ཆོས་ཐམས་ཅད་ཀྱིི་རང་བཞིན་བྱང་ཆུབ་སེམས་ཀྱི་ངོ་བོ་གདོད་ནས་སྐྱེ་བ་མེད་པ་དེ་ཡི་རང་བཞིན་དུ་གྲུབ་ཟིན་པ་ཡིན་པས། ད་ཆོས་ཉིད་སྐྱེ་བ་མེད་པའི་དོན་དེ་བསྒོམ་བསྒྲུབ་རྩོལ་བའི་ཐབས་ཀྱིས་ཆོས་ཉིད་ཡེ་ནས་རང་ལ་གནས་པའི་དོན་གཞན་ནས་བཙལ་བ་དང་རྟོགས་སུ་རེ་བ་ནི་དཔེར་ན་ནམ་མཁས་མ་ཁྱབ་པ་གང་ཡང་མེད་པས་རང་ཉིད་ཀྱང་ནམ་མཁའི་ཀློང་ན་གནས་བཞིན་དུ་ནམ་མཁའ་གཞན་དུ་བཙལ་བ་དང་འདྲ་ལ། རྒྱུ་རྐྱེན་རྩོལ་སྒྲུབ་ལ་སོགས་པ་གཞན་ལ་ལྟོས་པའི་སྒོ་ནས་ལས་ཉོན་མ་རིག་པའི་བསྒྲིབ་པ་བསལ་ནས་ཆོས་ཉིད་བདེ་བ་ཆེན་པོ་གསར་དུ་ཐོབ་པར་འདོད་པ་ནི་མེ་ཡིས་མེ་གསོད་པར་འདོད་པ་དང་འདྲ་སྟེ་གྲུབ་འབྲས་ཐོབ་པ་མེད་པས་ཤིན་ཏུ་དཀའ་བའི་ལས་ལ་བརྩོན་པར་བྱེད་པའོ། །བཞི་པ་ནི། འདི་ལྟར་སེམས་ཅན་རྣམས་ཀྱི་རྒྱུད་ཀྱི་ཐ་མལ་གྱི་ཤེས་པ་སྤུ་མ་བརྗེས་མདོག་མ་བསྒྱུར་བ་འདི་ཀ་ཆོས་ཉིད་རྣམ་པར་མི་རྟོག་པའི་ཡེ་ཤེས་སྙིང་པོ་བྱང་ཆུབ་སེམས་ཀྱི་རང་བཞིན་ཡིན་པས་འདི་ཉིད་སེམས་ཅན་ཡོངས་ཀྱི་རྒྱུད་ལ་སྦས་ཤིང་གབ་པ་མེད་ཀྱང་རང་གསང་ཐབས་ཀྱིས་ཆོད་ནས་མ་རྟོགས་པ་ཉིད། རྫོགས་པ་ཆེན་པོའི་དོན་ལ་ཐེ་ཚོམ་དང་བྲལ་བའི་རྣལ་འབྱོར་པ་གང་གིས་ཅི་ཡང་མི་ལེན་གང་ཡང་མི་སྤོང་བར་རེ་དོགས་རྩོལ་སྒྲུབ་དང་བྲལ་བར་གནས་པ་ནི་བྱང་ཆུབ་ཀྱི་སྤྱོད་པ་མ་ནོར་བ་ཡིན་པས། དེ་ལྟ་བུའི་སྐལ་པ་དང་ལྡན་པ་རྣམས་ལ་ཆོས་ཉིད་རྣམ་པར་མི་རྟོག་པའི་ཡེ་ཤེས་ཆོས་སྐུ་རང་གནས་ཀྱི་དགོངས་པ་དུས་དང་རྣམ་པ་ཀུན་ཏུ་རང་བཞིན་གསལ་འགྲིབ་མེད་པར་རྟག་ཏུ་གནས་པ་ཡིན་ཏེ། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། རིན་ཆེན་གླིང་དང་ཉི་མ་ལྟར། །རང་གསལ་འགག་མེད་རྟོག་དང་བྲལ། །འཁོར་བའི་གནས་ཉིད་ཡེ་སངས་རྒྱས། །རང་སེམས་རིག་པ་གང་སྣང་བ། །བསམ་པ་ཅི་འགྱུས་ཡེ་ཤེས་དང་། །ལྷུན་གྲུབ་གཞི་འཛིན་རིག་པ་ལ། །སེམས་ཅན་ཆོས་ཉིད་གང་ཡང་མེད། །དབུས་དང་མཐའ་བྲལ་དཀྱིལ་དུ་རྫོགས། །རྟག་པ་མ་ཡིན་ཆད་མཐའ་མིན། །མི་རྟག་མ་ཡིན་བདག་མཐའ་མེད། །ཤེས་པ་མི་འགག་འདོད་པ་མིན། །བྱ་བྱེད་མེད་ཅིང་རྩོལ་སེམས་དག །བགྲོད་མེད་རྩོལ་བྲལ་རིག་པའི་ཀློང་། །ཞེས་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་བྱ་མེད་རྫོགས་པའི་ལུང་བཅུ་ལས་མི་གནས་ཡུལ་མེད་ཀྱི་ལེའུ་སྟེ་ཉི་ཤུ་རྩ་གཉིས་པའི་འགྲེལ་པའོ།། ༈ །།དོན་གསུམ་པ་སེམས་ཉིད་བྱ་བཙལ་མེད་པར་བལྟ་བའི་ཡུལ་ལས་འདས་པས་རྒྱུ་འབྲས་རྩོལ་སྒྲུབ་ལས་འདས་པའི་ལེའུ་ཉེར་གསུམ་པ་ལ་གཉིས་ཏེ། བསྟན་པ་དང་བཤད་པའོ། །དང་པོ་ནི། དེ་ལྟར་རྒྱུ་འབྲས་བྱ་རྩོལ་ལས་འདས་པ་ཡེ་རྫོགས་ལྷུན་གྱིས་གྲུབ་པའི་རང་བཞིན་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་སེམས་ལས་ཤར་བའི་ཕྱི་ནང་འཁོར་འདས་ཀྱི་ཆོས་ཐམས་ཅད་རྟོག་མེད་མཉམ་པ་ཆེན་པོ་ཡུལ་མེད་ནམ་མཁའ་ལྟ་བུའི་རང་བཞིན་ཡིན་ཕྱིར་ལྟ་བ་ཡུལ་མེད་ཀྱི་ལུང་འདི་གསུངས་སོ། །གཉིས་པ་ལ་བཞི་སྟེ། སྣང་སྲིད་སེམས་ཀྱི་ཆོ་འཕྲུལ་ཡིན་པས་བརྟགས་ན་ཡུལ་མེད་ནམ་མཁའ་ལྟར་གནས་པ། ཡུལ་ལྔར་སྣང་དུས་རང་གསལ་རྟོག་པ་མེད་པས་ཡུལ་མེད་ནམ་མཁའ་ལྟར་གནས་པ། ཚིག་དང་ཡི་གེར་བསྟན་པ་ཐམས་ཅད་ཀྱང་སེམས་ཡིན་པས་ཡུལ་མེད་ནམ་མཁའ་ལྟར་གནས་པ། རྣལ་དོན་སྨྲ་བསམ་བརྗོད་དུ་མེད་པས་ནམ་མཁའི་དགོངས་པར་བསྟན་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །ཇི་ལྟར་སྣང་བའི་ཆོས་ཕྱི་ནང་སྣོད་བཅུད་ཀྱིས་བསྡུས་པ་འདི་རྣམས་ནི་རང་གི་རིག་པ་བྱང་ཆུབ་ཀྱི་སེམས་ཀྱི་རྩལ་ལས་ཤར་བའི་ཆོ་འཕྲུལ་ཙམ་ལས་དོན་ལ་ཅིར་ཡང་གྲུབ་པ་མེད་པ་གཞི་མེད་རྩ་བྲལ་ཆེན་པོའི་རང་བཞིན་ཡིན་པས་དེ་ལ་བལྟ་བའི་ཡུལ་ཞིག་མ་མཆིས་པའི་ཕྱིར་སེམས་ཀྱིས་གང་དུ་ཡང་རྟོག་པར་མི་བྱ་ལ། དེ་ལྟར་འཁོར་འདས་བཟང་ངན་བདེ་སྡུག་ལ་སོགས་པ་ཐམས་ཅད་དོན་ལ་མེད་བཞིན་སེམས་ཀྱིས་བརྟགས་པ་ཙམ་ཡིན་པའི་ཕྱིར། སེམས་ཀྱིས་ཅིར་ཡང་རྣམ་པར་མི་རྟོག་པར་འཛིན་ཞེན་ཐམས་ཅད་དང་བྲལ་བར་རང་བབ་ལ་བཞག་ན་ཆོས་དེ་དག་ཐམས་ཅད་བདག་གཞན་དང་འཁོར་འདས་སྐྱོན་ཡོན་སོགས་ཀྱི་དབྱེ་བ་མེད་པས་ན་ཆོས་ཉིད་མཉམ་པ་ཉིད་ཀྱི་རང་བཞིན་ནམ་མཁའ་ལྟ་བུ་ཡིན་ལ། དེས་ན་དེ་ལྟ་བུའི་ཆོས་ཉིད་དེ་ཇི་ལྟ་བ་བཞིན་དུ་རྟོགས་པ་ནི་ཆོས་ཉིད་ཡེ་སྟོང་ཆེན་པོ་སྟོང་གསལ་ནམ་མཁའི་དབྱིངས་ལྟ་བུའི་དགོངས་པ་ལ་གནས་པ་སྟེ་རེ་དོགས་སྤང་བླང་གི་རྟོག་པ་གང་ཡང་མེད་པ་ཡིན་པས་ཀློང་ཆེན་ནམ་མཁའ་ལྟ་བུའི་རྣལ་འབྱོར་པ་ཞེས་བྱ་བ་ནི་དེ་ལྟ་བུ་ལ་འདོགས་པར་བྱའོ་ཞེས་པ་སྟེ། དེ་ཉིད་ལས། རིག་པ་མཐའ་བྲལ་སྟོང་པ་ཉིད། །འོད་གསལ་ནམ་མཁའི་རང་བཞིན་འདྲ། །གཟུང་འཛིན་མེད་པས་མཉམ་པའི་ངང་། །རོལ་པའི་ཆོ་འཕྲུལ་ཅིར་ཡང་སྟོན། །ཆོ་འཕྲུལ་བསྟན་ཡང་རང་རྒྱུད་བྲལ། །རིག་པ་སྒྱུ་མ་ཆུ་ཟླ་འདྲ། །ཀུན་ཏུ་འཆར་ཞིང་ལྷུན་གྱིས་གྲུབ། །འདི་ཡིན་འདི་མིན་ཐ་སྙད་བྲལ། །རིག་པ་མ་བསླད་དྲི་མ་བྲལ། །ནམ་མཁའ་ལྟ་བུའི་རིག་པ་ལ། །ནམ་མཁའི་དབྱིངས་ལྟར་བསམ་དང་བྲལ། །བསམ་མེད་བློ་བདེ་ནམ་མཁའ་བཞིན། །རང་བྱུང་ཡེ་ཤེས་བསམ་དང་བྲལ། །མི་སྐྱེ་མི་འགག་ཅིར་མི་གནས། །རིག་པའི་རྒྱལ་པོ་བལྟ་བ་ཡིིན། །བལྟར་མེད་ཡེངས་མེད་བལྟ་བ་ཡིན། །ཞེས་གསུངས་པ་བཞིན་ནོ། །གཉིས་པ་ནི། འདི་ལྟར་མིག་རྣ་ལ་སོགས་པའི་དབང་པོ་ལྔ་ལ་སྣང་བ་ཡི་ཡུལ་གཟུགས་སྒྲ་ལ་སོགས་པའི་ཡུལ་སྣང་རྣམས་ཀྱང་རིག་པའི་རྩལ་མ་འགགས་པར་ཤར་བ་ཙམ་ལས་གང་ཡང་གྲུབ་པ་མེད་པས་ཡུལ་མེད་རང་གསལ་གྱི་སྣང་བ་གཞི་མེད་སྟོང་གཟུགས་ཀྱི་རོལ་པ་དྷ་དུ་རའི་སྣང་བ་ལྟ་བུ་ཡིན་པས། དེ་ལ་འཛིན་ཞེན་གྱིས་བཟང་ངན་བླང་དོར་ལ་སོགས་པ་གང་དུའང་མི་རྟོག་ཅིང་སྤོང་འགོག་སྦྱོང་བསྒྱུར་ཅི་ཡང་མི་བྱེད་པར་རང་བབས་ལ་བཞག་པས་གཏད་མེད་རྒྱ་གྲོལ་ལ་སོང་བ་དེ་ཡང་ཆོས་ཉིད་ནམ་མཁའི་དགོངས་པ་ལ་གནས་པ་ཡིན་པས་རྫོགས་ཆེན་ཨ་ཏིའི་རྣལ་འབྱོར་པ་རྣམས་ཀྱིས་དེ་བཞིན་ཉིད་དུ་གནས་པར་བྱས་ན་ཕྱི་ནང་གཟུང་འཛིན་གྱི་སྤྲོས་པ་ཐམས་ཅད་ཡུལ་མེད་ཟང་ཐལ་དུ་དེངས་ཏེ་ཆོས་སྐུ་རྒྱལ་པོའི་གཏན་སྲིད་ཟིན་པར་གསུངས་ཏེ། ཆོས་དབྱིངས་རིན་པོ་ཆེའི་མཛོད་ལས། གཞི་བཞག་མི་གཡོ་མཉམ་པའི་དགོངས་པ་ལ། །ཕྱི་དང་ནང་མེད་གཟུང་འཛིན་སྤྲོས་དང་བྲལ། །ཡུལ་ཞེས་གཞན་དུ་ཞེན་པའི་སེམས་མེད་པས། །གཟུང་བའི་ཆོས་མེད་སྣོད་བཅུད་སྣང་ཞེན་བྲལ། །འཁོར་བར་སྐྱེ་བའི་ཡུལ་མེད་ནམ་མཁའ་འདྲ། །རང་ཞེས་སེམས་ལ་ནང་དུ་མི་རྟོག་པས། །འཛིན་པའི་ཆོས་མེད་སྲིད་པའི་ཀུན་རྟོག་ཞི། །འཁོར་བར་སྐྱེ་བའི་མཁན་པོ་རྩད་ནས་ཆོད། །དེ་ཚེ་མཁའ་འདྲ་ཕྱིི་ནང་འཁྲུལ་པའི་ཆོས། །གང་ཡང་མི་དམིགས་ཆོས་སྐུའི་དགོངས་པར་ཕྱིན། །ཅེས་གསུངས་སོ། །གསུམ་པ་ནི། འདི་ལྟར་རྒྱལ་བ་ཐབས་མཁས་ལ་ཐུགས་རྗེ་དང་ལྡན་པ་རྣམས་ཀྱིས་གདུལ་བྱ་སེམས་ཅན་རྣམས་ལ་ཆོས་སྒོ་ཇི་སྙེད་གསུངས་པ་ཐམས་ཅད་ཆོས་ཉིད་ནམ་མཁའ་ལྟ་བུའི་དོན་མཚོན་བྱེད་དུ་བསྟན་པ་ཡིན་པས། དཔེར་ན་འཛུབ་མོའི་ཟླ་བ་མཚོན་པ་ལྟར་དང་པོར་བརྗོད་བྱེད་ཀྱི་ཚིག་དང་ཡི་གེའི་དོན་ལ་བརྟགས་ཤིང་དཔྱད་པས་ཆོས་ཉིད་ཇི་བཞིན་པའི་ངོ་བོ་ཚིག་ཡིག་སྟེ་ཚིག་དང་ཡི་གེའི་དོན་ལ་བརྟགས་སུ་མེད་པར་སྨྲ་བསམ་བརྗོད་པ་དང་བྲལ་བའི་རང་བཞིན་མཐོང་བའམ་རྟོགས་པས་ཟླ་བ་དངོས་སུ་མཐོང་ཟིན་ནས་འཛུབ་མོ་ལ་ལྟོས་པ་མེད་པར་ལྟར་ཚིག་དང་ཡི་གེའི་མཐའ་ལ་མི་གནས་པར་རྟོག་མེད་མཉམ་པ་ཆེན་པོ་ཆོས་ཉིད་དེ་བཞིན་ཉིད་དུ་བཅོས་བསྒྱུར་སྤོང་བླང་མེད་པར་གནས་པ་དེ་ཡང་ཀུན་བྱེད་ཆོས་སྐུའི་ཐུགས་ཀློང་ཆོས་ཉིད་ནམ་མཁའི་དགོངས་པ་ལ་གནས་པ་ཡིན་ནོ། །དེ་ལྟར་ཡང་རུ་སྦལ་རྩ་རྒྱུད་ལས། མ་བརྟགས་ཇི་བཞིན་གནས་པ་དེ་བཞིན་ཉིད། །མི་རྟོག་མི་བརྟགས་བརྟགས་པའི་ཡུལ་ལས་འདས། ། བརྟགས་མེད་ཡུལ་ལས་འདས་པ་མཁའ་གསལ་ནམ་མཁའི་ཀློང་། །ནམ་མཁའི་ཀློང་ནི་ཡེ་ནས་དེ་བཞིན་ཉིད། །བརྟགས་པས་དངོས་པོ་དབྱིབས་དང་ཁ་དོག་སྟེ། །འདི་ལ་དབྱིབས་དང་ཁ་དོག་མ་གྲུབ་དངོས་མེད་ནམ་མཁའི་ཀློང་། །ཅིར་ཡང་བསྒྱུར་དུ་མེད་པ་དེ་བཞིན་ཉིད། །དེ་བཞིན་ཉིད་ནི་མཚོན་པ་ཡོངས་དང་བྲལ། །འཛུབ་ཁྲིད་ཟླ་བ་ལྟ་བུར་བསྟན་པ་དེ། །དེ་བསྟན་ཟླ་འཛུབ་མི་གཅིག་ཐག་རིང་འགྱུར། །དེ་བཞིན་དེ་དང་དེ་གཉིས་ཐག་རིང་ཡང་། །ཇི་བཞིན་པ་ཉིད་ངེས་པར་རང་ལ་འཆར། །དེ་བཞིན་རྟོགས་པ་སངས་རྒྱས་ཉག་གཅིག་པ། །ཞེས་གསུངས་པ་ལྟར་རོ། །བཞི་པ་ནི། དེ་ལྟར་མདོར་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སེམས་ཀྱི་རྩལ་སྣང་ཙམ་ལས་གཞན་དུ་མེད་ལ། སེམས་ཀྱི་རང་བཞིན་ནི་གདོད་ནས་སྐྱེ་བ་མེད་ཅིང་སྤྲོས་པའི་མཐའ་ཐམས་ཅད་དང་བྲལ་བས་སྨྲ་བསམ་བརྗོད་དུ་མེད་པར་གནས་པའི་དོན་འདི་ནི་སྲིད་ཞི་ཀུན་ལ་ཁྱབ་ཅིང་ཆོས་ཀུན་ཀློང་དུ་ཆུབ་པ་དང་ཡེ་སྟོང་འདུས་མ་བྱས་པའི་བདག་ཉིད་ཡིན་པས་ནམ་མཁའ་བཞིན་དུ་ཡེ་ནས་གནས་སོ། །དེ་ལྟ་བུའི་ཆོས་ཉིད་མཉམ་པ་ཆེན་པོ་ནམ་མཁའ་ལྟ་བུའི་ངོ་བོ་ཇི་བཞིན་པ་ལ་བླང་དོར་བཅོས་བསྒྱུར་གང་ཡང་མི་བྱེད་པར་དེ་བཞིན་ཉིད་དུ་འཇོག་པར་བྱེད་པ་ནི་ནམ་མཁའ་ལྟ་བུའི་དགོངས་པ་ལ་གནས་པའི་རྣལ་འབྱོར་བ་ཡིན་ནོ་ཞེས་གསུངས་སོ། །བང་མཛོད་འཕྲུལ་ལྡེ་ལས། བསམ་དུ་མེད་པའི་ཆོས་ཉིད་ནི། །ཀུན་ལ་ཁྱབ་པའི་བདག་ཉིད་དུ། །ནམ་མཁའ་བཞིན་དུ་ཡེ་གནས་པ། །དེ་བཞིན་ནམ་མཁའི་དགོངས་པར་བཤད། །ཇི་བཞིན་པ་ཡི་ཆོས་ཉིད་ལ། །མ་བཅོས་པ་ཡི་བློ་བཞག་སྟེ། །མི་གཡོ་མཉམ་པའི་སེམས་གནས་པ། །དེ་བཞིན་ནམ་མཁའི་དགོངས་པར་བཤད། །ཅེས་གསུངས་པ་བཞིན་ནོ། །ལེའུའི་མཚན་ནི། བྱ་མེད་རྫོགས་པ་ལས་ལྟ་བ་ཡུལ་མེད་ཀྱི་ནམ་མཁའི་དགོངས་པ་བསྟན་པའི་ལེའུ་སྟེ་རྩ་གསུམ་པའི་འགྲེལ་པའོ།། ༈ །།དོན་བཞི་པ་ཀུན་བྱེད་རྒྱལ་པོ་ཆོས་ཐམས་ཅད་ལ་ཡེ་ཁྱབ་འགྱུར་བ་མེད་པར་བཞུགས་པས་རྒྱུ་འབྲས་རྩོལ་སྒྲུབ་ལས་འདས་པའི་ལེའུ་ཉེར་བཞི་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། དེ་ལྟར་རྫོགས་པ་ཆེན་པོའི་ལྟ་བ་ཡུལ་མེད་ནམ་མཁའ་ལྟ་བུའི་རང་བཞིན་དུ་བསྟན་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་བླང་དོར་རྩོལ་སྒྲུབ་ཀྱི་བྱ་བ་གང་ཡང་མེད་པར་སྐུ་གསུམ་དེ་བཞིན་ཉིད་དུ་ཡེ་ནས་རྫོགས་པའི་ལུང་སྐུ་གསུམ་འགྱུར་བ་མེད་པའི་དགོངས་པ་ནམ་མཁའ་ལྟ་བུའི་རང་བཞིན་ལས་ནམ་ཡང་འདའ་བ་མེད་པའི་ཕྱག་རྒྱ་བཞུགས་ཚུལ་གྱི་ལེའུ་འདི་བསྟན་ཏོ། །གཉིས་པ་རྒྱས་པར་བཤད་པ་ལ་གསུམ་སྟེ། རང་བཞིན་འཕོ་འགྱུར་མེད་པའི་བཞུགས་ཚུལ་མདོར་བསྟན། དེ་ཉིད་རྒྱས་པར་བཤད། དོན་བསྡུ་བའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །རང་གི་སེམས་ཉིད་རང་བྱུང་གི་ཡེ་ཤེས་འདི་ཉིད་ཡེ་ནས་འཁྲུལ་མ་མྱོང་བས་ན་དང་པོའི་སངས་རྒྱས་དུས་གསུམ་རྒྱལ་བ་ཀུན་གྱི་སྤྱི་དཔལ་རང་བྱུང་ཀུན་ཏུ་བཟང་པོ་སྐུ་གསུམ་འདུ་འབྲལ་མེད་པ་ཡི་རང་བཞིན་ཡིན་ལ། དེ་ཉིད་ཡེ་ནས་འཕོ་འགྱུར་མེད་པའི་རང་བཞིན་དུ་ཇི་ལྟར་བཞུགས་པའི་ཚུལ་ལམ་གནས་ཚུལ་བསྟན་པ་ནི་འདི་ལྟ་སྟེ་ཞེས་སོ། གཉིས་པ་ལ་བཞི་སྟེ། གཉིས་མེད་གདོད་ནས་དག་པའི་ངོ་བོ་ཉིད་བྱང་ཆུབ་སེམས་ཀྱི་བཞུགས་ཚུལ། གཟུང་འཛིན་གཉིས་སུ་མེད་པའི་ཡེ་ཤེས་ཆོས་ཀྱི་སྐུའི་བཞུགས་ཚུལ། ཡུལ་སེམས་སྣང་བ་མ་འགགས་པ་ལོངས་སྤྱོད་རྫོགས་སྐུའི་བཞུགས་ཚུལ། རིག་རྩལ་སྣ་ཚོགས་སུ་ཤར་གྲོལ་སྤྲུལ་སྐུའི་བཞུགས་ཚུལ་ལོ། །དང་པོ་ནི། དེ་ལ་རང་བྱུང་རིག་པའི་ཡེ་ཤེས་ཆོས་སྐུ་ཀུན་བྱེད་རྒྱལ་པོ་དེ་ཉིད་གཞི་དབྱིངས་འཕོ་འགྱུར་བྲལ་བ་རིག་པ་བྱང་ཆུབ་སེམས་སུ་བཞུགས་ཙམ་ན་སྣང་སྲིད་འཁོར་འདས་ཀྱི་ཆོས་རྣམས་ཐམས་ཅད་ཀུན་གྱི་འབྱུང་གནས་སུ་གྱུར་པས་ཀུན་གྱི་སྙིང་པོར་བཞུགས་པ་སྟེ། དེ་ཉིད་ལས། བྱང་ཆུབ་སེམས་སུ་བཞུགས་ཙམ་ན། །ཇི་ལྟར་སྣང་བའི་ཆོས་རྣམས་ཀུན། །མི་སྣང་བ་ལ་མངོན་དུ་འབྱིན་ནུས་པས། །ཆོས་རྣམས་ཀུན་གྱི་སྙིང་པོར་བཞུགས། །ཞེས་སོ། །དེ་ལྟ་བུའི་སྙིང་པོ་བྱང་ཆུབ་སེམས་ཀྱི་གནས་ལུགས་མ་བཅོས་པ་དེ་ཉིད་རྟོགས་པའི་གང་ཟག་ནི་སྟོན་པ་ཀུན་བྱེད་རྒྱལ་པོ་དང་ངོ་བོ་དབྱེར་མེད་པ་ཡིན་ལ། ཀུན་བྱེད་རྒྱལ་པོ་ནི་ཡེ་ནས་འགྱུར་བ་མེད་པའི་ཆོས་ཉིད་འདུས་མ་བྱས་པའི་བདག་ཉིད་ཡིན་པ་དེས་ན་དེ་ཉིད་དང་ངོ་བོ་དབྱེར་མེད་པའི་གང་ཟག་རྣལ་འབྱོར་པ་དེ་ཡང་སྐྱེ་ཤིའི་འགྱུར་བ་མེད་པར་འགྱུར་མེད་བདེ་བ་ཆེན་པོའི་ངང་ལ་གནས་པ་ཡིན་པར་བསྟན་པའོ། །གཉིས་པ་ནི། ཀུན་བྱེད་བྱང་ཆུབ་ཀྱི་སེམས་དེ་སྐྱེ་མེད་རང་བྱུང་གི་ངོ་བོ་རྟོག་མེད་ཆོས་ཀྱི་སྐུ་རུ་བཞུགས་ཙམ་ན་གཟུང་འཛིན་རྣམ་རྟོག་གི་སྤྲོས་པ་དང་ངང་གིས་བྲལ་ནས་བློ་འདས་བསམ་བརྗོད་དང་བྲལ་བར་བཞུགས་པ་ཡིན་ཏེ། དེ་ཉིད་ལས། ཆོས་ཀྱི་སྐུ་རུ་བཞུགས་ཙམ་ན། །མི་རྟོག་མཉམ་པའི་ངོ་བོར་བཞུགས། །ཞེས་པ་ལྟར་རོ། །དེ་ཡང་ད་ལྟ་རྟོག་པ་འགྱུ་བཞིན་པའི་སྐབས་ན་གཟུང་འཛིན་གྱི་རྟོག་པ་ཞིག་གཏན་ནས་ཡོད་མ་མྱོང་བར་རྟོག་མེད་མཉམ་པ་ཆེན་པོ་ཆོས་སྐུ་སྤྲོས་པ་དང་བྲལ་བའི་རང་བཞིན་དུ་བཞུགས་ཡོད་པར་ཤེས་དགོས་ཀྱི་མི་རྟོག་པའི་ཏིང་ངེ་འཛིན་བསྒོམ་པ་སོགས་ཀྱིས་གཟོད་རྟོག་བྲལ་ཆོས་སྐུའི་དགོངས་པ་ཞིག་མངོན་དུ་འགྱུར་བར་འདོད་པ་ནི་བྱིས་པའི་བློ་ཅན་ཡིན་པར་གསུངས་ཏེ། ཡང་འབྱེད་ལས། ཇི་ལྟར་གྲོགས་གང་བྱིས་པ་དག །སྤྲིན་འདུས་པ་ཡི་ཕུང་པོ་ལ། །ཁ་ཡི་དབུགས་ཀྱིས་དེངས་པར་འདོད། །འབྱུང་ཆེན་རླུང་གིས་མ་གཏོར་ན། །དེ་ཉིད་དེངས་པར་ག་ལ་འགྱུར། །དེ་བཞིན་རྣལ་འབྱོར་བྱིས་པའི་བློས། །གཟུང་འཛིན་རྣམ་རྟོག་སྤྲིན་འདྲ་བ། །མི་རྟོག་གཉེན་པོས་དེངས་པར་འདོད། །རྣམ་རྟོག་ཡེ་ཤེས་མ་ཤར་ན། །མི་རྟོག་གཉེན་པོས་གཏན་མི་ཞི། །ཞེས་སོ། །དེ་ལྟར་གཟུང་འཛིན་རྣམ་རྟོག་གི་སྤྲོས་པ་ཀུན་དང་བྲལ་བ་ནམ་མཁའ་ལྟ་བུ་ལ་འགྱུར་བཅས་གློ་བུར་བའི་ཆོས་སུ་གྲུབ་པ་གང་ཡང་མེད་པས་འགྱུར་མེད་བདེ་བ་ཆེན་པོ་རང་བྱུང་འདུས་མ་བྱས་པའི་བདག་ཉིད་དུ་གནས་པ་ཡིན་ནོ། །གསུམ་པ་ནི། བྱང་ཆུབ་ཀྱི་སེམས་དེ་ཉིད་ཀྱི་ངོ་བོ་གསལ་བའི་རང་གདངས་འགག་པ་མེད་པ་ལོངས་སྤྱོད་རྫོགས་པའི་སྐུར་མངོན་དུ་སྣང་ནས་བཞུགས་ཙམ་ན་རིག་པའི་རྩལ་ལས་རང་ཤར་བའི་ཚོགས་དྲུག་ཡུལ་གྱི་སྣང་བ་ཐམས་ཅད་མ་འགགས་པ་འདོད་པའི་ཡོན་ཏན་ལྔ་པོ་མ་སྤང་རྒྱན་དུ་ཤར་བའི་ལོངས་སྤྱོད་དང་ལྡན་པས་ཇི་ལྟར་འདོད་པ་ཐམས་ཅད་བྱང་ཆུབ་ སེམས་ཀྱི་རོལ་རྩལ་ལས་རང་འཆར ་བས་རྩོལ་སྒྲུབ་མེད་པར་ཡེ་ནས་ཕུན་སུམ་ཚོགས་པ་དང་ལྡན་པར་བཞུགས་པ་སྟེ། སྔ་མ་ལས། ལོངས་སྤྱོད་རྫོགས་སྐུར་བཞུགས་ཙམ་ན། །སྣ་ཚོགས་ཆོས་ལ་ལོངས་སྤྱོད་ཅིང་། །མ་སྤངས་ཡེ་ཤེས་རྒྱན་དུ་བཞུགས། །ཞེས་སོ། །བཞི་པ་ནི། དེ་ལས་ཐུགས་རྗེའི་རོལ་རྩལ་གང་འདུལ་དུ་སྣང་བ་སྤྲུལ་པའི་སྐུ་རུ་འཕྲོ་ཞིང་བཞུགས་ཙམ་ན་ལྷ་ལ་སོགས་པའི་འགྲོ་བ་རིགས་དྲུག་གི་གདུལ་བྱ་རྣམས་ཐབས་གང་གིས་འདུལ་བའི་དུས་ལ་བབ་ཙམ་ན་གདུལ་བྱ་གང་ལ་མཆོག་གི་སྤྲུལ་པ་ནས་སྣ་ཚོགས་སྤྲུལ་པའི་བར་གང་དང་ཅི་ལྟ་བུའི་རྣམ་པར་བསྟན་ནས་འདུལ་དགོས་པ་དེ་དང་དེ་ལྟ་བུའི་སྐུ་རུ་སྤྲུལ་ནས་གདུལ་བྱ་དེ་དག་ཐབས་ཇི་ལྟ་བུའི་འདུལ་དགོས་པ་ཡི་ཕྲིན་ལས་ཕུན་སུམ་ཚོགས་པ་དང་ལྡན་པར་བཞུགས་སོ། །དེ་ཉིད་ལས། སྤྲུལ་པའི་སྐུ་རུ་བཞུགས་ཙམ་ན། །གང་ལ་གང་འདུལ་དེར་སྤྲུལ་ནས། །དགོངས་པ་ཕུན་སུམ་ཚོགས་པར་བཞུགས། །ཞེས་པ་ལྟར་རོ། །གསུམ་པ་དོན་བསྡུ་བ་ལ་གཉིས་ཏེ། ཐམས་ཅད་ཇི་བཞིན་པར་གདོད་ནས་ལྷུན་གྲུབ་ཏུ་གནས་པས་རྩོལ་སྒྲུབ་བཅོས་བསླད་མི་དགོས་པ་དང་། བྱས་ན་ཚི་ཆད་པས་ནམ་ཡང་གྲུབ་པ་མེད་པའོ། །དང་པོ་ནི། དེ་ལྟར་སྐུ་གསུམ་འདུ་འབྲལ་མེད་པའི་རང་བྱུང་རིག་པའི་ཡེ་ཤེས་སེམས་ཉིད་ཀུན་བྱེད་རྒྱལ་པོ་དེ་དུས་གསུམ་དུ་འགྱུར་བ་མེད་པར་བཞུགས་ཤིང་འཁོར་འདས་ཀྱི་ཆོས་ཐམས་ཅད་ཀུན་ལ་ཆོས་ཉིད་བྱང་ཆུབ་ཀྱི་སེམས་དེའི་ཕྱག་རྒྱ་ཡིས་ཐེབ་པས་ཆོས་ཐམས་ཅད་ཀུན་ཡེ་སྟོང་སྤྲོས་པ་དང་བྲལ་བ་ནམ་མཁའི་མཚན་ཉིད་དུ་གནས་པ་ཉིད་དེ། འོ་ན་ནམ་མཁའ་དེ་ཇི་ལྟ་བུ་ཞེ་ན། དེ་ནི་ཇི་སྐད་དུ། ཀུན་མཁྱེན་བླ་མས། མཚན་དཔེ་ཉིད་ཀྱང་འདི་ཞེས་བྱར་མེད་ན། །མཚན་དཔེའི་དོན་ལ་བསམ་བརྗོད་ག་ལ་སྲིད། །ཞེས་པ་ལྟར་ནམ་མཁའི་མཚན་ཉིད་ཀྱང་སྨྲ་བསམ་བརྗོད་པ་དང་བྲལ་བ་ཆོས་ཉིད་དེ་བཞིན་ཉིད་དུ་གནས་ལ། སྐུ་གསུམ་གྱི་མཚན་ཉིད་ཀྱང་དེ་བཞིན་ཉིད་དུ་གནས་པས་ཆོས་ཐམས་ཅད་དེ་བཞིན་ཉིད་དུ་གནས་པ་དེས་ཕྱིར་ཇི་ལྟར་སྣང་བའི་ཆོས་ཀུན་ནི་ཆོས་ཉིད་ཇི་བཞིན་པ་རུ་གནས་པ་ལས་དེ་ལ་བཙས་སུ་རྡུལ་ཙམ་ཡང་མེད་དོ་ཞེས་པའོ། །གཉིས་པ་ནི། དེ་ལྟར་བཅོས་བསྒྱུར་སྤང་བླང་ལས་འདས་པའི་དོན་ལ་བཙལ་ཞིང་སྒྲུབ་པར་འདོད་པ་ཐམས་ཅད་ཀྱིས་རྩོལ་བའི་ནད་ཀྱིས་ཟིན་པར་འགྱུར་བ་ལས། སྔ་བ་འདས་པའི་དུས་སུ་རྩོལ་སྒྲུབ་ཀྱིས་ལམ་ལ་བགྲོད་པས་གདོད་མའི་ས་རུ་ཕྱིན་པ་གཅིག་ཀྱང་མེད་ལ། དེ་བཞིན་དུ་ཡེ་ནས་མངོན་པར་སངས་རྒྱས་པ་དེ་ལས་ལྷག་པར་སྔ་མ་རྩོལ་སྒྲུབ་བྱས་པས་འབྲས་བུ་ཁྱད་པར་བ་ཞིག་ཐོབ་ཟིན་པ་གཅིག་ཀྱང་མེད་པ་སྟེ། དེ་ལྟར་བསྒྲུབས་ཤིང་བཙལ་བས་སྔ་མ་གྲུབ་པ་གཅིག་ཀྱང་མེད་པ་དེ་ཕྱིར་ཆོས་ཐམས་ཅད་ཡེ་ཇི་བཞིན་པ་རུ་གནས་པ་དེ་ལ་རྩོལ་སྒྲུབ་བྱས་པས་གཞན་དུ་འགྱུར་བ་མེད་དོ། །ཅེས་གསུངས་སོ། །ལེའུའི་མཚན། བྱང་ཆུབ་ཀྱིི་སེམས་ཀུན་བྱེད་རྒྱལ་པོ་ལས་བྱ་མེད་རྫོགས་པ་ཕྱག་རྒྱ་འགྱུར་མེད་ཀྱི་ལུང་གི་ལེའུ་སྟེ་རྩ་བཞི་པའི་འགྲེལ་པའོ།། ༈ །།དོན་ལྔ་པ་ཆོས་ཐམས་ཅད་ཀྱི་ཆོས་ཉིད་ཀུན་བྱེད་རང་གི་སེམས་ཉིད་ལ་སྣང་བ་སྣང་དུས་ཉིད་ནས་སྤྲོས་པའི་མཐའ་བྲལ་དེ་བཞིན་ཉིད་དུ་སྟོན་པ་ཅིར་སྣང་སྟོན་པར་ཤར་བའི་ལེའུ་ཉེར་ལྔ་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། དེ་ལྟར་སྐུ་གསུམ་འཕོ་འགྱུར་མེད་པ་ཆོས་ཉིད་ནམ་མཁའ་ལྟ་བུའི་རང་བཞིན་དུ་བཞུགས་པ་ལ་བཅོས་སུ་མེད་པར་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་ཁམས་གསུམ་གྱི་སེམས་ཅན་ཐམས་ཅད་ལ་རང་གི་སེམས་ཉིད་རང་བྱུང་གི་ཡེ་ཤེས་འདི་ཉིད་སྟོན་པའི་ངོ་བོ་ཡིན་ཀྱང་དེ་ལྟར་ཡིན་པར་མ་ཤེས་པས་འཁྲུལ་བར་གྱུར་པ་ལ་རང་སེམས་སྟོན་པ་ཡིན་པར་མངོན་དུ་ཕྱུང་ནས་བསྟན་པ་ཡི་ཚུལ་འདི་གསུངས་སོ། །གཉིས་པ་ལ་གསུམ་སྟེ། འབྱུང་ལྔ་སྣང་དུས་དེའི་ངོ་བོ་མཉམ་ཉིད་མི་རྟོག་པའི་རང་བཞིན་རང་གི་སེམས་ལ་སྟོན་པར་ཤར་བ་ངོ་ཤེས་པ་གྱིས་པར་གདམས་པ། དེའི་རང་བཞིན་རྒྱས་པར་གདམས་པ། དེ་ལྟར་མཉམ་ཉིད་གཟུང་འཛིན་བྲལ་བའི་དོན་གོམས་པ་མཐར་ཕྱིན་པ་ན་བདག་གཞན་འཁོར་འདས་སུ་སྣང་བ་ཆོས་ཉིད་དུ་གྲོལ་བར་གདམས་པའོ། །དང་པོ་ནི། ཀྱེ་ཞེས་ཁམས་གསུམ་གྱི་སེམས་ཅན་ཐམས་ཅད་ཀུན་ལ་བོས་ནས་འདི་ལྟར་སེམས་ཅན་རྣམས་ཀྱི་རང་རང་གི་རིག་པ་བྱང་ཆུབ་ཀྱི་སེམས་དེ་ནི་སེམས་ཉིད་རང་གི་ངོ་བོ་མ་སྒྲིབ་རང་གསལ་དུ་སྟོན་པའི་སྟོན་པ་ཡིན་པར་མངོན་སུམ་དུ་སྣང་ཞིང་བསྟན་ན་ཡང་། འོན་ཀྱང་སེམས་ཅན་རྣམས་ཀྱིས་བསྐལ་པ་བརྒྱ་ཕྲག་སྟོང་དུ་སྟེ་མང་པོའི་བར་དུ་ནི་རང་གི་སེམས་འདི་ཉིད་ཀུན་བྱེད་ཆོས་སྐུའི་སྟོན་པ་ཡིན་པར་མ་མཐོང་ཞིང་རང་ངོ་མ་ཤེས་པ་དེའི་དབང་གིས་འཁྲུལ་སྣང་སྟོང་གཟུགས་ཀྱི་རོལ་པ་མེད་སྣང་འཁོར་བའི་དུཿཁ་ལ་སྤྱོད་པ་དེས་ཕྱིར་ན། སྟོན་པ་ཀུན་བྱེད་རྒྱལ་པོ་ང་ཡིས་ནི་སེམས་ཅན་རྣམས་ཀྱི་རང་གི་རིག་པ་བྱང་ཆུབ་ཀྱི་སེམས་འདི་ཉིད་སྟོན་པ་འབྱུང་བ་ཆེན་པོ་ལྔའི་ཚུལ་དུ་མངོན་དུ་ཕྱུང་བས་ཏེ་མངོན་དུ་ཕྱུང་ནས་བསྟན་པར་བྱས་པ་ཡིན་པས། དེས་ན་རང་སེམས་སྟོན་པ་ཡིན་པའི་ཚུལ་ལ་གདམས་པའི་མན་ངག་ཟབ་མོའི་ཆོས་འདི་ཉིད་ཉོན་ཅིག་ཅེས་ཉན་པར་བསྐུལ་ཏེ། དེ་ཡང་རང་གི་སེམས་སྟོན་པའམ་བླ་མ་ཡིན་པའི་ཚུལ་ལ་དབྱེ་བ་རྣམ་པ་གསུམ་དུ་གསུངས་ཏེ། ད་ལྟ་ཐོས་བསམ་ཕྱིན་ཅི་མ་ལོག་པ་ལ་བརྟེན་ནས་དགེ་སྡིག་བླང་དོར་གྱི་སྐྱོན་ཡོན་ལ་ངེས་པ་འདྲོངས་པའི་དད་པ་དང་ལྡན་པས་ཡང་དག་པའི་ལམ་ལ་བརྩོན་ཞིང་ཤེས་རབ་ཟབ་མོ་དང་ཏིང་ངེ་འཛིན་ལ་བརྟེན་ནས་མཐར་ཐུག་འབྲས་བུ་སངས་རྒྱས་ཀྱི་གོ་འཕང་མངོན་དུ་ཐོབ་པར་བྱེད་པ་སེམས་ཉིད་རྒྱུ་ཡི་བླ་མ་དང་། སེམས་ཉིད་རང་བྱུང་གི་ཡེ་ཤེས་རིག་པ་སྐུ་གསུམ་གྱི་རང་བཞིན་ད་ལྟ་ཉིད་ནས་སྟོན་པ་སྐུ་གསུམ་གྱི་ངོ་བོར་བཞུགས་པ་ནི་འབྲས་བུ་སེམས་ཀྱི་བླ་མ་དང་། འབྱུང་ལྔ་ལ་སོགས་པ་ཅིར་སྣང་གི་དངོས་པོ་ཐམས་ཅད་སེམས་ཉིད་ཀྱི་རྩལ་ལས་རང་ཤར་བ་ཡིན་པས་བྱང་ཆུབ་སེམས་ཀྱི་རང་བཞིན་དུ་ཡེ་ནས་སངས་རྒྱས་ཤིང་ཆོས་ཉིད་མཉམ་པ་ཆེན་པོའི་དོན་རང་གི་ངོ་བོ་བརྡ་དང་དཔེ་རུ་ འཆར་བའི་ཚུལ་གྱིས་སྟོན་པ་ནི་རང་སྣང་ཆོས་ཀྱི་བླ་མ་ཡིིན་པར་གསུངས་ཏེ། བང་མཛོད་ལས། རང་སེམས ་བླ་མར་སྣང་བ་ལ། །དེ་ལ་རྣམ་པ་གསུམ་ཡོད་དེ། །སེམས་ཉིད་རྒྱུ་ཡི་བླ་མ་དང་། །འབྲས་བུ་སེམས་ཀྱི་བླ་མ་དང་། །རང་སྣང་ཆོས་ཀྱི་བླ་མའོ། །སེམས་ཉིད་རྒྱུ་ཡི་བླ་མ་ནི། །རྟོག་གེ་སྒམ་པོ་རིག་ཆད་པ། །ལོག་སྲེད་ཅན་ནི་མ་ཡིན་ཏེ། །རྟོག་པ་ཡེ་ཤེས་བློ་དམན་གྱིས། །འཁོར་འདས་གཉིས་ལ་བརྟགས་བྱས་པས། །བདེ་དང་སྡུག་བསྔལ་གཉིས་སུ་མཐོང་། །བདེ་སྡུག་གཉིས་ལ་བརྟགས་བྱས་པས། །དགེ་སྡིག་གཉིས་ལས་བྱུང་བར་དྲན། །དྲན་པའི་སེམས་ཀྱིས་དད་པ་བསྐུལ། །དད་པའི་སེམས་ཀྱིས་བརྩོན་འགྲུས་བསྐུལ། །བརྩོན་འགྲུས་ཆེན་པོའི་བླ་མ་དེས། །ཤེས་རབ་རྣམ་གསུམ་བློ་བྱས་ཏེ། །ཏིང་འཛིན་དོན་ལ་ནན་ཏན་བསྒོམ། །ཏིང་འཛིན་མཐུ་བརྟས་ཡེ་ཤེས་རྒྱས། །ཡེ་ཤེས་མངོན་གྱུར་ཆོས་ཀྱི་སྐུ། །དེ་ལས་གཟུགས་སྐུ་རྣམ་པ་གཉིས། །ཉི་ཟླའི་འོད་དང་གཟུགས་བརྙན་བཞིན། །ཐོགས་པ་མེད་པར་ཤུགས་ཀྱིས་འབྱུང་། །བསྟན་པ་ཐེག་པ་ཀུན་བཀོད་ནས། །གར་ཐད་ཡུལ་ལ་འདེབས་སུ་བཞུགས། །འབྲས་བུ་སེམས་ཀྱི་བླ་མ་ནི། །ཤེས་པ་སོ་མ་མ་བཅོས་པ། །འབྲས་བུ་རང་སྣང་སྐུ་གསུམ་ཚུལ། །རང་བཞིན་ཆོས་ཀྱི་སྐུ་རུ་སྣང་། །ངོ་བོ་ལོངས་སྤྱོད་རྫོགས་སྐུར་སྣང་། །ཐུགས་རྗེ་སྤྲུལ་པའི་སྐུ་རུ་སྣང་། །སེམས་རྒྱུད་གཅིག་གི་ངོ་བོ་ལ། །སྟོན་པ་སྐུ་གསུམ་རང་བཞིན་གནས། །རང་སྣང་ཆོས་ཀྱི་བླ་མ་ནི། །འབྱུང་ཆེན་ལྔ་ཡི་བླ་མ་དང་། །འདོད་ཡོན་ལྔ་སོགས་བླ་མ་ཡིས། །ཚིག་དང་ཡི་གེས་མི་སྟོན་པར། །རང་གི་ངོ་བོས་ཆོས་སྟོན་པ། །བདག་གཞན་གཉིས་སུ་མི་རྟོག་པ། །རང་སྣང་ངོ་བོས་ཆོས་སྟོན་ཏོ། །ཞེས་གསུངས་པ་ལས་འདིར་ནི་གཙོ་བོ་རང་སྣང་ཆོས་ཀྱི་བླ་མ་འབྱུང་བ་ཆེན་པོ་ལྔར་སྣང་བ་དེ་ཉིད་ཀྱིས་ཆོས་ཉིད་མཉམ་པ་ཉིད་ཀྱི་དོན་ཇི་ལྟར་སྟོན་པའི་ཚུལ་གསུངས་པ་སྟེ། དེ་ཡང་ཇི་ལྟར་ན་ཆོས་སྐུ་ཀུན་བྱེད་རྒྱལ་པོ་ང་ཡིས་ནི་ཆོས་རྣམས་ཐམས་ཅད་ཀུན་གང་ལས་འབྱུང་བའི་རྒྱུ་བྱང་ཆུབ་སེམས་ཀྱི་རྩལ་འགག་པ་མེད་པར་ལས་ནི་སེམས་ཀྱི་ངོ་བོ་སྣང་བའི་ཆ་འབྱུང་བ་ཆེན་པོ་ལྔ་རུ་སྣང་བ་དེ་ནི། སྟོན་པ་བྱང་ཆུབ་ཀྱི་སེམས་རྒྱལ་བ་རིགས་ལྔ་རུ་བྱུང་བ་ཡིན་ཏེ། དེ་ལ་སྟོན་པ་ལྔ་པོ་དེ་སྐུ་གསུམ་ལས་གང་ཡིན་སྙམ་ན་སྐུ་ནི་ངོ་བོ་གསལ་ལ་འགགས་པ་མེད་པ་ལོངས་སྤྱོད་རྫོགས་པའི་སྐུ་ཡིན་ལ། ཆོས་ནི་མི་རྟོག་མཉམ་པ་ཆེན་པོའི་རང་བཞིན་འབྱུང་བ་ལྔ་པོ་རང་རང་གི་ངོ་བོས་མཚོན་ནས་དགོངས་པ་བརྡའ་ཡི་གསུང་གིས་འཆད་པར་བྱེད་ཅིང་། སྟོན་པར་བྱ་བའི་དོན་ནི་འབྱུང་ལྔ་རང་གིི་རང་བཞིན་སྟོང་གསལ་སྤྲོས་པ་དང་བྲལ་བ། ཁྱབ་གདལ་ཕྱོགས་ལྷུང་དང་བྲལ་བ། མཉམ་ཉིད་བླང་དོར་དང་བྲལ་བ། ཡོད་མེད་བསམ་ཡུལ་ལས་འདས་པའི་མི་རྟོག་མཉམ་པ་ཉིད་ཀྱི་རང་བཞིན་དུ་སྟོན་པ་ཡིན་ནོ། །གཉིས་པ་ལ་གསུམ་སྟེ། འབྱུང་ལྔར་སྣང་དུས་མི་རྟོག་པ་མཉམ་པ་ཉིད་ཀྱི་སྟོན་པ་ཡིན་པར་མདོར་བསྟན། ས་དང་། ཆུ་དང་། མེ་དང་། རླུང་དང་། ནམ་མཁའི་རྣམ་པར་སྣང་དུས་ཉིད་ནས་མི་རྟོག་མཉམ་པ་ཉིད་དུ་རྒྱས་པར་བཤད་པ། འབྱུང་ལྔའི་རང་བཞིན་ལས་སྣང་སྲིད་སྣ་ཚོགས་སུ་སྣང་ཡང་ངོ་བོ་ཡེ་ནས་མ་སྐྱེས་པ་ཀུན་བྱེད་ཉིད་དུ་དོན་བསྡུ་བའོ། །དང་པོ་ནི། གོང་དུ་བསྟན་པ་དེ་ལྟ་བུའི་སྟོན་པ་ལོངས་སྤྱོད་རྫོགས་པའི་སྐུ་རིགས་ལྔ་ཡི་རང་བཞིན་དུ་སྣང་བ་དེ་རྣམས་ཀྱིས་མི་གཡོ་མཉམ་པ་ཆེན་པོའི་དགོངས་པ་ནི་ཇི་ལྟར་སྟོན་ན་ཚུལ་བདག་ཉིད་ཀྱི་ངོ་བོ་ལ་ཉིད་ཀྱི་རང་བཞིན་དུ་རྣམ་པར་མི་རྟོག་ལ། ཕར་ཡུལ་སྣང་གི་ཆོས་གཞན་རྣམས་ལའང་དེ་དང་དེ་ཉིད་དུ་རྟོག་པར་མི་བྱེད་པའི་ཚུལ་གྱིས་བྱང་ཆུབ་སེམས་ཀྱི་སྟོན་པ་ལྔ་པོ་དེ་ཡིས་སྣང་སྲིད་འཁོར་འདས་ཀྱི་ཆོས་ཀུན་ཀྱང་བདག་གཞན་མཉམ་པ་ཉིད་ཀྱི་རང་བཞིན་བློ་འདས་སྤྲོས་པ་དང་བྲལ་བ། ཆོས་ཉིད་དེ་བཞིན་ཉིད་དུ་རྣམ་པར་མི་རྟོག་པའི་བརྡ་ཡི་གསུང་དེ་ལ་བརྟེན་ནས་སྟོན་པར་བྱེད་དོ་ཞེས་སོ། །གཉིས་པ་གོང་གསལ་ལྟར་ལྔ་ལས། དང་པོ་ནི། འདི་ལྟར་བྱང་ཆུབ་སེམས་ཀྱི་རང་བཞིན་འོད་གསལ་སྤྲོས་པ་དང་བྲལ་བའི་རང་མདངས་ཡེ་ཤེས་རང་གསལ་བའི་ཆ་དེའི་རྩལ་ལས་ལོངས་སྤྱོད་རྫོགས་སྐུའི་སྟོན་པ་ས་ཡི་སྐུར་མངོན་དུ་བྱུང་ནས། སྒྲ་ཚིག་བརྗོད་པ་ལས་འདས་པའི་ཆོས་ཉིད་མཉམ་པ་ཆེན་པོ་རྣམ་པར་མི་རྟོག་པའི་དོན་ཚིག་དང་ཡི་གེས་མི་སྟོན་ཏེ། འབྱུང་བ་རང་གི་རང་བཞིན་ཇི་ལྟ་བ་བཞིན་དུ་སྣང་བའི་སྒོ་ནས་སྟོན་པར་བྱེད་པ་སྟེ། འདི་ལྟར་རང་གི་རང་བཞིན་ནི་ཡེ་ནས་རྣམ་པར་རྟོག་པ་ཐམས་ཅད་དང་བྲལ་བ་ཡིན་པས་འདི་ནི་བདག་གོ་སྙམ་དུ་ནང་གི་བདག་ཉིད་དམ་གང་ཟག་ཏུ་མི་རྟོག་ལ། འདི་ནི་གཞན་ནོ་སྙམ་དུ་ཕྱི་རོལ་གྱིི་ཡུལ་དུ་མི་རྟོག་པས་མཚོན་སྤྲོས་པའི་མཐའ་གང་དུའང་མི་རྟོག་པར་ཆོས་ཉིད་མཉམ་པའི་དགོངས་པ་སྟོན་པར་བྱེད་ཅིང་། ཁམས་གསུམ་གྱིས་བསྡུས་པའི་སེམས་ཅན་ཐམས་ཅད་ཀྱིས་མི་རྟོག་མཉམ་པ་ཉིད་ཀྱི་དོན་དེ་ཇི་ལྟ་བ་བཞིན་དུ་རྟོགས་པས་སངས་རྒྱས་ཀུན་དང་དགོངས་པ་མཉམ་པར་འགྱུར་བ་ཡིན་པས་ཐེག་པ་འོག་མ་པ་རྣམས་ཀྱིས་རྩོལ་ཞིང་སྒྲུབ་པས་གྲུབ་པར་རེ་བའི་ཆོས་ཉིད་དེ་ནི། ཨ་ཏི་རྫོགས་པ་ཆེན་པོའི་ལམ་འདིར་མ་བཙལ་ལྷུན་གྱིས་འགྲུབ་པར་འགྱུར་རོ་ཞེས་གསུངས་སོ། །གཉིས་པ་ནི། དེ་བཞིན་དུ་བྱང་ཆུབ་སེམས་ཀྱི་ངོ་བོ་རང་བྱུང་གི་ཡེ་ཤེས་དེས་རང་གི་ངོ་བོ་སྟོན་པ་ཆུ་ཡི་སྐུར་མངོན་དུ་བྱུང་ནས་ཆོས་ཀྱི་དོན་ཚིག་དང་ཡི་གེས་མི་སྟོན་ཏེ། ཆུ་དེ་ཉིད་རང་གི་ངོ་བོས་མཚོན་ཅིང་སྟོན་པར་བྱེད་པ་སྟེ། དེ་ཡང་ནང་བདག་ཏུ་མི་རྟོག་ཅིང་ཕྱི་རོལ་གྱི་ཆོས་གཞན་ལ་མི་རྟོག་པས་མི་རྟོག་མཉམ་པའི་དགོངས་པ་སྟོན་པར་བྱེད་ཅིང་ཁམས་གསུམ་གྱི་སེམས་ཅན་ཐམས་ཅད་ཀྱིས་དོན་དེ་ལྟར་རྟོགས་པས་སངས་རྒྱས་ཀུན་དང་དགོངས་པ་མཉམ་པར་གྱུར་ནས་རྩོལ་བའི་ཆོས་རྣམས་ནི་མ་བཙལ་ལྷུན་གྱིས་གྲུབ་པར་འགྱུར་རོ། །གསུམ་པ་ནི། རིག་པ་བྱང་ཆུབ་སེམས་ཀྱི་རང་བཞིན་རང་བྱུང་ཡེ་ཤེས་ཆེན་པོ་དེས་སྟོན་པ་མེ་ཡི་རྣམ་པའི་སྐུར་བྱུང་ནས་ཚིག་དང་ཡི་གེས་ཆོས་མི་སྟོན་ཏེ། མེ་རང་གི་ངོ་བོས་ཆོས་སྟོན་པ་ཡི་ཚུལ་ནི་ནང་བདག་ཏུ་མི་རྟོག་ཅིང་ཕྱིའི་ཆོས་ལ་གཞན་དུའང་མི་རྟོག་པར། རྣམ་པར་མི་རྟོག་པའི་ངོ་བོ་ཆོས་ཉིད་མཉམ་པའི་དགོངས་པ་རང་གི་ངོ་བོས་སྟོན་ཞིང་ཁམས་གསུམ་སེམས་ཅན་ཐམས་ཅད་ཀྱིས་དེ་ལྟར་རྟོགས་པས་སངས་རྒྱས་ཀུན་དང་མཉམ་པར་རྩོལ་བའི་ཆོས་ཉིད་མ་བཙལ་བར་ངང་གིས་གྲུབ་པར་འགྱུར་རོ། །བཞི་པ་ནི། སྟོན་པ་བྱང་ཆུབ་སེམས་ཀྱི་ཡེ་ཤེས་དེས་སྟོན་པ་ལོངས་སྤྱོད་རྫོགས་སྐུ་རླུང་གི་སྐུར་བྱུང་ནས་སྒྲ་ཚིག་དང་ཡི་གེས་ཆོས་མི་སྟོན་པར་རང་གི་ངོ་བོས་མཚོན་དེ་ཆོས་སྟོན་པ་ཡི་ཚུལ་ནི། བདག་གཞན་གཉིས་སུ་མི་རྟོག་པར་ཅིར་ཡང་མི་རྟོག་པའི་མཉམ་པའི་དགོངས་པ་སྟོན་ལ་ཁམས་གསུམ་གྱི་སེམས་ཅན་ཐམས་ཅད་ཀྱིས་དོན་དེ་རྟོགས་པ་ཙམ་གྱིས་སངས་རྒྱས་ཀུན་དང་དགོངས་པ་མཉམ་པར་གྱུར་ཏེ་རྩོལ་བའི་ཆོས་རྣམས་ནི་མ་བཙལ་བར་རྩོལ་མེད་ལྷུན་གྱིས་གྲུབ་པར་གསུངས་པའོ། །ལྔ་པ་ནི། ཀུན་བྱེད་བྱང་ཆུབ་སེམས་ཀྱི་ཡེ་ཤེས་དེས་སྟོན་པ་ནམ་མཁའི་སྐུར་བྱུང་ནས་ཚིག་དང་ཡི་གེས་དོན་མི་སྟོན་ཏེ། ནམ་མཁའ་རང་གི་ངོ་བོས་ཆོས་ཉིད་ཀྱི་དོན་བརྡ་ལ་བརྟེན་ནས་སྟོན་པར་བྱེད་པ་ནི་བདག་གཞན་གཉིས་སུ་རྣམ་པར་རྟོག་ཅིང་འཛིན་པའི་ཆོས་སུ་མི་སྟོན་པར་བདག་གཞན་དང་འཁོར་འདས་བཟང་ངན་བླང་དོར་སོགས་ཅིར་ཡང་མི་འབྱེད་པར་ཉག་ཅིག་སྤྲོས་པ་དང་བྲལ་བས་རྟོག་མེད་མཉམ་པ་ཆེན་པོ་ཡི་དགོངས་པ་སྟོན་པར་བྱེད་ལ། དེ་ལྟར་ཁམས་གསུམ་གྱི་སེམས་ཅན་ཐམས་ཅད་ཀྱིས་དོན་དེ་ཇི་བཞིན་དུ་རྟོགས་པས་དུས་གསུམ་སངས་རྒྱས་ཀུན་དང་དགོངས་པ་དབྱེར་མེད་པ་མཉམ་པ་ཉིད་དུ་གྱུར་ནས་འོག་མའི་ཐེག་པ་རྣམས་ཀྱིས་རྩོལ་བའི་ཡུལ་དུ་བྱེད་པའི་སངས་རྒྱས་ཀྱི་སའི་ཡོན་ཏན་ཐམས་ཅད་མ་བཙལ་ལྷུན་གྱིས་གྲུབ་པར་འགྱུར་བ་སྟེ། དེས་ན་ཀུན་བྱེད་བྱང་ཆུབ་སེམས་ལས་མངོན་དུ་བྱུང་བའི་སྟོན་པ་ལོངས་སྤྱོད་རྫོགས་པའི་སྐུ་དེ་རྣམས་ཀྱིས་རང་རང་གི་ངོ་བོས་ཆོས་འཆད་པ་འདི་ཡིས་ཆོས་རྣམས་ཀུན་གྱི་དོན་ཀྱང་གཟུང་འཛིན་མཚན་མའི་སྤྲོས་པ་ཀུན་དང་བྲལ་བའི་རྟོག་མེད་མཉམ་པ་ཉིད་ཀྱི་རང་བཞིན། ཆོས་ཉིད་དེ་བཞིན་ཉིད་བཅོས་བསྒྱུར་སྤང་བླང་ཐམས་ཅད་བྲལ་བར་རིག་པར་གྱིས་ཤིག་ཅེས་གདམས་པ་སྟེ། དེ་ལྟར་འབྱུང་བ་ལྔ་པོ་འབྱུང་གྱུར་དང་བཅས་པའི་ཕྱི་ནང་སྣོད་བཅུད་དུ་སྣང་བའི་ཆོས་འདི་ཐམས་ཅད་ཡེ་ནས་བྱང་ཆུབ་སེམས་ཀྱི་རང་བཞིན་དུ་མངོན་པར་བྱང་ཆུབ་ཅིང་རིགས་ལྔའི་སངས་རྒྱས་སུ་བཞུགས་པའི་ཚུལ། རྨད་བྱུང་ལས། ཆེན་པོ་ལྔ་ཉིད་སྐུ་ལྔ་ལྷུན་གྱིས་རྫོགས་པའི་དཀྱིལ་འཁོར་ཉིད་དོ། །ཞེས་དང་། འདས་པ་དང་། མ་འོངས་པ་དང་། ད་ལྟར་བྱུང་བ་རྣམས་དང་། དུས་དང་དུས་ཀྱི་སོ་སོར་གྱུར་པ་དང་། དུས་གསུམ་གྱི་བདེ་བར་གཤེགས་པ་ཐམས་ཅད་དང་། སྐྱེ་བ་ཐམས་ཅད་དང་། སྐྱེ་བོ་དང་། སྐྱེ་འགྲོ་རྣམས་དང་། ཆེན་པོ་ལྔ་དང་འབྱུང་བ་བཞི་ལས་བྱུང་བའི་ཆོས་ཐམས་ཅད་སྐུ་ལྔ་རྣམ་པར་དག་པ་ལས་མ་བྱུང་བ་གཅིག་ཀྱང་མེད་དོ། །དེ་དག་ཐམས་ཅད་སྐུ་ལྔ་ལས་བྱུང་བས་ན་ཐམས་ཅད་ནས་ཐམས་ཅད་དུ་སྐུ་ལྔ་ཉིད་དུ་མ་གྱུར་པ་གཅིག་ཀྱང་མེད་དོ། །དེས་ཕྱིར་སངས་རྒྱས་སུ་མ་གྱུར་པ་གཅིག་ཀྱང་མེད་དོ། །ཞེས་གསུངས་སོ། །གསུམ་པ་ནི། ཀྱེ་ཁམས་གསུམ་ན་འཁོད་པའི་སེམས་ཅན་ཐམས་ཅད་ཀུན་ཆོས་ཐམས་ཅད་ཀྱི་འབྱུང་གནས་སུ་གྱུར་པའི་སྙིང་པོ་བྱང་ཆུབ་ཀྱི་སེམས་སྟོན་པ་ཀུན་བྱེད་རྒྱལ་པོ་ང་ཡིས་ནི་འཁོར་འདས་ཐམས་ཅད་རང་རྩལ་འགག་པ་མེད་པ་ལས་སྤྲུལ་ཅིང་མངོན་དུ་ཕྱུང་བ་ཡིན་པས་སེམས་ཅན་ཁྱེད་རྣམས་ཐམས་ཅད་ང་ཡིས་བྱས་པ་ཡིན་པའི་ཕྱིར་ན། འགྲོ་བ་ཁྱེད་རྣམས་ཐམས་ཅད་ཀུན་བྱེད་རྒྱལ་པོ་ང་ཡི་སྲས་ཡིན་པ་དང་། དོན་ལ་ཐ་དད་མེད་པས་ང་དང་མཉམ་པའང་ཡིན་ལ་ཀུན་བྱེད་ང་དང་ངོ་བོ་མི་གཉིས་པར་ང་ཉིད་དངོས་ཀྱང་ཡིན་པའི་ཕྱིར་ན། ང་ཡིས་ཁྱེད་རྣམས་ལ་ཚུལ་དེ་ལྟར་སྟོན་པར་བྱེད་པའི་ཆེད་དུ་ཀུན་བྱེད་བྱང་ཆུབ་སེམས་ལས་མངོན་དུ་ཕྱུང་བ་ཡི་རང་བཞིན། དོན་ལ་ང་ཡི་ངོ་བོ་དངོས་སུ་སྣང་བའི་སྟོན་པ་འབྱུང་ཆེན་རྣམ་པ་ལྔས། སྲ་ཞིང་བརྟན་པ་དང་རླན་ཞིང་གཤེར་བ་ལ་སོགས་པའི་ཚུལ་དུ་སྣང་བ་འདིའི་རང་བཞིན་རྣམ་པ་ལྔ་པོ་མི་རྟོག་མཉམ་པ་ཉིད་ཆོས་ཉིད་བྱང་ཆུབ་ཀྱི་སེམས་གཅིག་ཏུ་བསྟན་ལ། དེ་ལྟ་བུའི་ཆོས་ཉིད་མཉམ་པ་ཉིད་རྩོལ་སྒྲུབ་ལས་འདས་པའི་རང་བཞིན་གཅིག་པོ་དེ་ནི་ཀུན་བྱེད་ང་ཉིད་ཡིན་གྱིས་དེ་ལས་གཞན་ཞིག་མིན་པ་དེ་བཞིན་དུ་ཁམས་གསུམ་རྒྱུད་དྲུག་ཏུ་གནས་པའི་སེམས་ཅན་ཁྱོད་རྣམས་ཀྱང་ཆོས་ཉིད་གཅིག་པོ་དེ་ལས་གཞན་དུ་མེད་པར་ཡིད་ཆེས་པར་གྱིས་ཤིག་ཅེས་གདམས་པའོ། །གསུམ་པ་ནི། ཀྱེ་ཁམས་གསུམ་གྱི་སེམས་ཅན་ཇི་སྙེད་ཡོད་པ་མ་ལུས་པ་ཀུན། ཀུན་བྱེད་བྱང་ཆུབ་ཀྱི་སེམས་ང་ཡི་ངོ་བོ་གདོད་ནས་སྐྱེ་བ་མེད་པ་ཡེ་སྟོང་སྤྲོས་བྲལ་ཆེན་པོ་བྱ་རྩོལ་བློ་ལས་འདས་པའི་རང་བཞིན་ལས་གྲུབ་པ་རྡུལ་ཙམ་ཡང་མེད་ལ། དེ་ལྟར་ན་དཔེར་ན་སྒྱུ་མ་མཁན་མེད་ན་དེས་སྤྲུལ་པའི་སྒྱུ་མའི་སྣང་བ་རྣམས་ཀྱང་མེད་པ་བཞིན་དུ་ང་ཡི་བྱས་པའི་སེམས་ཅན་ཁྱེད་རྣམས་ཀྱང་མེད་ལ། ཁྱེད་རྣམས་མེད་པར་གྱུར་པ་ཙམ་གྱི་དུས་དེ་ཙམ་ན་སྟོན་པ་འབྱུང་ཆེན་ལྔ་ཡང་སུ་ཡི་ངོར་སྣང་ཞིང་འབྱུང་བར་འགྱུར་ཏེ་སྣང་བར་མི་འགྱུར་ཞིང་། མི་རྟོག་མཉམ་པ་ཉིད་ཀྱི་ཆོས་ཀྱང་གང་གིས་གང་ལ་སྟོན་པར་འགྱུར་ཏེ་མི་འགྱུར་བ་དེས་ན་དེ་ལྟ་བུའི་ཆོས་ཉིད་མཉམ་པའི་དོན་དེ་ལ་གོམ་པ་མཐར་ཕྱིན་པར་གྱིས་ཤིག་དང་སྣང་སྲིད་ཀྱི་ཆོས་ཐམས་ཅད་ཆོས་ཉིད་གཅིག་གི་ཀློང་དུ་རང་གྲོལ་བར་འགྱུར་རོ། །ཞེས་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་རང་སེམས་སྟོན་པར་བྱུང་བའི་ལེའུ་སྟེ་རྩ་ལྔ་པའི་འགྲེལ་པའོ།། ༈ །།དོན་དྲུག་པ་སེམས་ཉིད་སྒོམ་དུ་མེད་པས་རྒྱུ་འབྲས་བྱ་བརྩལ་ལས་འདས་པའི་ལེའུ་ཉེར་དྲུག་པ་ལ་གཉིས་ཏེ། བསྟན་པ་དང་བཤད་པའོ། །དང་པོ་ནི། དེ་ལྟར་རིག་པ་བྱང་ཆུབ་སེམས་ཀྱི་རྩལ་སྣང་འབྱུང་བ་ཆེན་པོ་ལྔས་རྟོག་མེད་མཉམ་པ་ཉིད་ཀྱི་དོན་རང་གི་ངོ་བོས་སྟོན་པས་རང་སེམས་སྟོན་པར་མངོན་དུ་ཕྱུང་བ་ཡིན་ཚུལ་གསུངས་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་སེམས་ལས་བྱུང་བའི་ཆོས་འབྱུང་བ་ཆེན་པོ་ལྔ་སྟོན་པར་བྱུང་བའི་རྟགས་སུ་ལོངས་སྐུ་འབྱུང་བ་ལྔ་པོ་དེ་གང་ལས་སྣང་བའི་གཞི་ཆོས་སྐུ་སྤྲོས་དང་བྲལ་བའི་རང་བཞིན་གདོད་ནས་མ་སྐྱེས་པའི་རིག་པ་བྱང་ཆུབ་ཀྱི་སེམས་སྟོན་པ་ཡིན་པར་ཞལ་གྱིས་བཞེས་པ་འདི་གསུངས་སོ་ཞེས་སྟོན་པ་ཆོས་སྐུའི་རྩལ་ལས་མངོན་དུ་ཕྱུང་བ་ཡིན་ན་གདུལ་བྱ་ལ་ལམ་སྟོན་པའི་གཟུགས་སྐུ་ཡིན་པར་གྲུབ་པའི་གཏན་ཚིགས་གྲུབ་པའོ། །གཉིས་པ་ལ་གཉིས་ཏེ། གཞི་ལམ་འབྲས་བུ་གསུམ་གྱིས་མཚོན་ཏེ་བསྟན་པ་དང་། དེ་དག་ཐམས་ཅད་ཐིག་ལེ་གཅིག་ཏུ་དབྱེར་མེད་དུ་བསྟན་པའོ། །དང་པོ་ལ་བཞི་སྟེ། ལྟ་བ། སྒོམ་པ། སྤྱོད་པ། འབྲས་བུའོ། །དང་པོ་ལྟ་བ་ལ་བཞི་སྟེ། སེམས་ཉིད་རང་བཞིན་གྱིས་དག་པའི་ངོ་བོ་ལྟ་བར་བསྟན་པ། དེ་ཉིད་ཡོན་ཏན་གྱི་འབྱུང་ཁུངས་ཡིན་པ། དེའི་རང་བཞིན་སྤྲོས་པའི་མཐའ་དང་བྲལ་བ། རྩེ་གཅིག་འཛིན་པའི་སེམས་གནས་ཙམ་གྱིས་མི་རྟོགས་པར་བཤད་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །འདི་ལྟར་སེམས་ཀྱི་རང་བཞིན་ཡེ་ནས་དག་པའི་ངོ་བོ་ཡིད་ཀྱི་བསམ་པ་ལས་འདས་ཤིང་ངག་གིས་བརྗོད་དུ་མེད་པའི་བྱང་ཆུབ་ཀྱི་སེམས་ནི་སྟོན་པ་སྐུ་གསུམ་གྱི་རྒྱལ་བ་མ་ལུས་པའི་སྟོན་པ་ཀུན་བྱེད་ཆོས་སྐུའི་ངོ་བོ་མ་རིག་པའི་མུན་པ་ཐམས་ཅད་སེལ་བར་བྱེད་པའི་སྣང་བྱེད་ཀྱི་སྒྲོན་མར་གྱུར་པ་ཡིན་པས། དེ་ཉིད་ཀྱི་ཡོན་ཏན་དུས་གསུམ་གྱི་སངས་རྒྱས་ཀུན་གྱིས་རབ་ཏུ་བསྔགས་པ་ནི་ཇི་ལྟར་ན་ཆོས་ཐམས་ཅད་ཀྱི་གནས་ལུགས་མཐར་ཐུག་ཡིན་པས་སྙིང་པོར་གྱུར་ཅིང་། སྤྲོས་པའི་གྲྭ་ཟུར་དང་བྲལ་བ་དང་ཇི་བཞིན་རྟོག་པར་གྱུར་ན་སྲིད་ཞིའི་དཔལ་དུ་འགྱུར་བས་འཇམ་དཔལ་དང་འཁོར་འདས་སྐྱོན་ཡོན་གྱིས་འཕོ་འགྱུར་མེད་པས་གཞོན་ནུ་ཉིད་ཏེ། དེ་ནི་བྱ་རྩོལ་ཐམས་ཅད་དང་བྲལ་བ་ལྷུན་གྲུབ་རྫོགས་པ་ཆེན་པོ་བདེ་ཆེན་འགྱུར་བ་མེད་པ་སྤྲོས་པ་དང་བྲལ་བའི་ལྷུན་ལ་གནས་པའམ་ཀློང་ན་ཡེ་ནས་གནས་པ་ནི་རྫོགས་པ་ཆེན་པོ་མ་བཅོས་ལྷུན་གྱིས་གྲུབ་པའི་ལྟ་བ་ཡིན་ནོ། །ཚུལ་དེ་དང་མཐུན་པར་མདོ་བཅུ་ལས། སྙིང་པོ་བྱང་ཆུབ་སེམས་འདི་ལ། །ཏིང་འཛིན་བསམ་པའི་ཡུལ་ལས་འདས། །བརྗོད་དུ་མེད་པའི་ངང་ལ་གནས། །དེ་ལྟར་སྙིང་པོ་བྱང་ཆུབ་སེམས། །སྟོན་པའི་སྒྲོན་མར་གྱུར་པས་ན། །སངས་རྒྱས་ཀུན་གྱི་རབ་ཏུ་བསྔགས། །ཆོས་རྣམས་ཀུན་གྱི་སྙིང་པོ་བས། །མཁྱེན་རབ་འཇམ་དཔལ་གཞོན་ནུ་ཉིད། །བྱ་བྱེད་རྩོལ་སྒྲུབ་མི་མངའ་བར། །བདེ་ཆེན་ཀློང་ན་ཇི་བཞིན་གནས། །ཞེས་གསུངས་སོ། །གཉིས་པ་ནི། དེ་ལྟ་བུའི་བྱང་ཆུབ་ཀྱི་སེམས་དེ་ནི་ཚུལ་ཁྲིམས་བསྲུང་བ་དང་བཟོད་པ་སྒོམ་པ་ལ་སོགས་པའི་བྱང་ཆུབ་ཀྱི་སྤྱོད་པ་རྒྱ་མཚོ་ལྟ་བུའི་རྟེན་གཞིར་གྱུར་པའི་རང་བཞིན་ཡིན་པས། ཇི་སྙེད་རྣམ་པར་གྲོལ་བའམ་རྣམ་པར་གྲོལ་བའི་ལམ་ཉན་ཐོས་ནས་གསང་སྔགས་ཀྱི་བར་ཇི་སྙེད་ཅིག་བསྟན་པ་ཐམས་ཅད་ཀྱི་རྩ་བ་ཡང་། བདེ་བར་གཤེགས་པ་མ་ལུས་པ་ཀུན་འབྱུང་བའི་གནས་སུ་གྱུར་པས་རྒྱལ་ཡུམ་ཤེས་རབ་ཀྱི་ཕ་རོལ་དུ་ཕྱིན་པའི་ངོ་བོར་གྱུར་ཅིང་དུས་གསུམ་གྱི་སངས་རྒྱས་ཀུན་གྱི་མཚུངས་པའམ་བགྲོད་པ་གཅིག་པུའི་ལམ་ཀུན་བྱེད་བྱང་ཆུབ་ཀྱི་སེམས་འདི་ཉིད་ཡིིན་དེ། ཅིའི་ཕྱིར་ན་རིག་སྟོང་གཉིས་སུ་མེད་པའི་ཡེ་ཤེས་ཀུན་བྱེད་བྱང་ཆུབ་ཀྱི་སེམས་དེ་ཉིད་མེད་པར་གོང་དུ་བསྟན་པའི་ལམ་དེ་ཀུན་གྱིས་གཏན་ལ་དབབ་པར་བྱ་བའི་གཞི་དང་བསྒོམ་བྱའི་ལམ་དང་ཐོབ་བྱའི་འབྲས་བུ་ཐམས་ཅད་མེད་པས་ལམ་དེ་ཀུན་མི་འབྱུང་བ་དེ་ཡི་ཕྱིར་ན་བྱང་ཆུབ་ཀྱི་སེམས་དེ་ནི་རྣམ་གྲོལ་མཆོག་གི་ལམ་ཐམས་ཅད་ཀྱི་འབྱུང་གནས་སམ་གཞིར་གྱུར་པ་ཡིན་པར་བསྟན་པའོ། །གསུམ་པ་ནི། དེ་ལྟ་བུའི་སེམས་ཉིད་ཡེ་ནས་རྣམ་པར་དག་པ་དེ་ནི་རྟོག་པའི་ཡུལ་དུ་མ་གྱུར་པས་ཤིན་ཏུ་ཕྲ་ཞིང་ཤེས་པར་དཀའ་ལ་གཤེགས་བཞུགས་འབྱོན་འགྱུར་གྱི་སངས་རྒྱས་མ་ལུས་པ་ཀུན་གྱི་སྤྱི་ལམ་ཆེན་པོར་གྱུར་པ་སྟེ། དེའི་ངོ་བོ་ནི་རྣམ་པར་མི་རྟོག་པའི་ཡེ་ཤེས་གང་ཞིག་རྟོག་པའི་ཡུལ་ལས་འདས་ཤིང་མི་རྟོག་པ་ཙམ་དུའང་བསྒོམ་དུ་མེད་པས་ཡུལ་གང་ལའང་མི་གནས་ཤིང་བློས་ཅིར་ཡང་མི་དམིགས་པ། ཡོད་མེད་ལ་སོགས་པའི་སྤྲོས་པའི་མཐའ་གང་དུ་ཡང་གྲུབ་པ་མེད་ཅིང་རྟོག་དཔྱོད་ཀྱི་བསམ་པ་ཀུན་དང་བྲལ་བ། སྨྲ་བརྗོད་ཀྱི་ཡུལ་ལས་འདས་པས་ངག་ཚིག་གིས་གཏན་ལ་མི་ཕེབས་ཤིང་། གྲུ་བཞི་ཟླུམ་པོ་ལ་སོགས་པའི་དབྱིབས་དང་སྔོ་སེར་དཀར་དམར་ལ་སོགས་པའི་ཁ་དོག་དང་རྒྱལ་རིགས་རྗེ་རིགས་ལ་སོགས་པའི་རིགས་རུས་སོགས་བློའི་སྤྱོད་ཡུལ་དུ་གྱུར་པ་གང་ཡང་མེད་པས་གཞན་ལ་བསྟན་ཅིང་དམིགས་པ་རྣམས་ཀྱི་ཚུལ་གྱིིས་བརྟགས་པར་དཀའ་ལ་ཚིག་གིས་བརྗོད་དུ་ཡང་རྡུལ་ཙམ་མེད་པས་སྤྲོས་པའི་མཐའ་ཐམས་ཅད་དང་བྲལ་བ་ཡིན་ནོ། །མདོ་བཅུ་ལས། སེམས་ཀྱི་ངོ་བོ་འདི་ཡིན་ཞེས། །ཆེ་ཆུང་མཚན་མའི་ངོ་བོ་དང་། །དབྱིབས་དང་ཁ་དོག་སྤྱོད་ཡུལ་དུ། །སྟོན་པ་ང་ཡིས་བསྟན་པ་མེད། །ཞེས་སོ། །བཞི་པ་ནི། དེ་ལྟ་བུའི་སྙིང་པོ་རང་བྱུང་གི་ཡེ་ཤེས་ཆོས་ཉིད་མཉམ་པ་ཉིད་དུ་གདོད་ནས་མངོན་པར་སངས་རྒྱས་ཟིན་པས་རྩོལ་སྒྲུབ་གང་ཡང་མི་དགོས་པ་ལ་དེ་ལྟར་མ་རྟོགས་པར་སྔོན་གྱི་དྲང་སྲོང་ཆེན་པོ་སངས་རྒྱས་རྣམས་ཀྱི་དཀའ་ཐུབ་ཀྱི་ལམ་དུ་གང་ཟག་གང་ཞིག་ཞུགས་ནས་ཏིང་ངེ་འཛིན་རྩེ་གཅིག་ཏུ་བསྒོམ་པར་འདོད་པ་རྣམས་ནི་སྒོམ་པ་ཏིང་ངེ་འཛིན་གྱིས་རོ་ལ་ཆགས་ཤིང་དམིགས་པ་ལ་རྩེ་གཅིག་ཏུ་འཛིན་པའི་སེམས་གནས་ཙམ་གྱི་ལམ་རེ་དོགས་དང་དགག་སྒྲུབ་སྤང་བླང་ལ་སོགས་པའི་ཟུག་རྔུ་ཅན་གྱི་ནད་ཀྱིས་ཟིན་པར་འགྱུར་ཏ་རེ་ཞེས་འགྱུར་ཉེན་ཆེ་བ་དེས་ན་དབང་པོ་དམན་པ་རྣམས་ལམ་ལ་རིམ་གྱིས་དཀྲི་བའི་ཆེད་དུ་དཀའ་སྤྱད་དང་སྒོམ་སྒྲུབ་ལ་སོགས་པ་དགོས་ཚུལ་གསུངས་པ་སྟོན་པའི་དྲང་དོན་གྱིི་ལུང་བཞིན་དུ་ཚིག་གི་མཐའ་ལ་སྤྱོད་ཅིང་བྱ་རྩོལ་དང་བཅས་པས་བསྒྲུབ་པའི་ལམ་དུ་ཆོས་ཉིད་དེ་མཐོང་ན། གང་ཟག་དེ་ནི་རྟོག་པའི་རྒྱུན་བཀག་པའི་ཞི་གནས་རྩེ་གཅིག་པའི་རྗེས་སུ་འབྲངས་བ་དཔེར་ན་རི་དྭགས་སྨིག་རྒྱུ་ཡི་ཆུ་ལ་སྙེགས་པ་དང་འདྲ་བས་ཆོས་ཉིད་ཀྱི་དོན་མི་རྟོགས་པར་གསུངས་སོ། །དེས་ན་ཆོས་ཉིད་ཡང་དག་པའི་དོན་སྙིང་པོ་བྱང་ཆུབ་ཀྱི་སེམས་སྨྲ་བསམ་བརྗོད་པ་ཀུན་ལས་འདས་པས་ཡང་དག་པའི་ལམ་ནི་འདི་ལྟ་བུའོ། །ཞེས་ཚིག་གིས་མཚོན་དུ་མེད་པའི་ཕྱིར་ན་ཡང་དག་པ་ཉིད་དུ་བསྟན་དུ་མེད་པ་ལ། ཡང་དག་པའི་ལམ་ནི་འདིའོ་ཞེས་དེ་ལྟར་བསྟན་པར་བྱས་ན་ནི་ཆོས་སྐུ་ཀུན་བྱེད་རྒྱལ་པོ་ང་ཡིས་ཀྱང་ནོར་ཞིང་འཁྲུལ་པ་ཡིན་ནོ་ཞེས་གསུངས་ཏེ། མདོ་བཅུ་ལས། ཡང་དག་ལམ་ནི་འདི་ཡིན་ཞེས། །ཚིག་དང་ཡི་གེས་མཚོན་དུ་མེད། །ཡང་དག་འདི་ཡིན་སྟོན་པ་ནི། །རྡོ་རྗེ་སེམས་དཔའ་ང་ཉིད་འཁྲུལ། །ཞེས་གསུངས་པ་ལྟར་རོ། །གཉིས་པ་སྒོམ་པ་ལ་གཉིས་ཏེ། ཏིང་ངེ་འཛིན་གྱི་རྒྱལ་པོ་དངས་ཤིང་གསལ་ལ་རྟོག་པ་མེད་པའི་ཞི་གནས་དང་། ཆོས་སྐུ་དྲི་མ་མེད་པའི་སྤྱན་སྣང་ཡུལ་འགགས་མེད་དུ་གསལ་བའི་ལྷག་མཐོང་ངོ་། །དང་པོ་ནི། གོང་དུ་བསྟན་པའི་རྒྱུ་མཚན་དེས་ན་དག་པ་སྐུ་དང་ཡེ་ཤེས་དང་མ་དག་པ་འཁོར་བའི་སྣང་བ་ཐམས་ཅད་བཟང་ངན་གྱི་དབྱེ་བ་གཉིས་སུ་གདོད་ནས་མ་གྲུབ་ཅིང་མེད་པས་དབྱེར་མེད་གཅིག་ཏུ་འདྲེས་ཤིང་ཆོས་ཉིད་མཉམ་པ་ཆེན་པོའི་རང་བཞིན་དུ་མཚུངས་པའི་ཕྱིར་ན། རྣམ་པ་བཟང་ངན་ཅིར་ཡང་མི་འབྱེད་པར་རྒྱ་མཚོ་ལ་གཟའ་སྐར་བཀྲ་བ་བཞིན་དུ་ཡེ་ཤེས་རང་གསལ་གྱི་ངོ་བོར་གནས་པ་དེ་ལ་གཟུང་འཛིན་གཉིས་སྣང་གི་རྟོག་པ་ངང་གིས་ཞི་བས་གཏི་མུག་ཞེས་བརྗོད་པ་དེ་ཡི་ངང་དུ་ཐོག་མེད་ནས་གསལ་བའམ་ཡེ་ནས་རང་བཞིན་གྱིས་འོད་གསལ་བའི་རང་བྱུང་རིག་པའི་ཡེ་ཤེས་ཀྱི་མར་མེ་བློ་རྣམ་རྟོག་གིས་བསམ་པ་དང་བརྗོད་པ་ཀུན་དང་བྲལ་བའི་རང་བཞིན་དེ། དཔེར་ན་རྒྱལ་པོ་ཆེན་པོ་གདན་ལས་མི་གཡོ་བར་འཁོར་འབངས་ཐམས་ཅད་མངའ་འོག་ཏུ་བསྡུ་ཞིང་དབང་བསྒྱུར་བ་ལྟར་འཁོར་འདས་ཐམས་ཅད་ཆོས་ཉིད་གཅིག་གི་ཀློང་དུ་བསྡུ་ཞིང་རིག་རྩལ་འགགས་པ་མེད་པས་དབང་བསྒྱུར་ཡང་རང་གནས་ཆོས་སྐུའི་དགོངས་པ་ལས་ངང་གིས་མི་གཡོ་ཞིང་གང་ལའང་མི་རྟོག་པས་རྨུགས་ཤིང་འཛིན་ཞེན་ཐམས་ཅད་དང་བྲལ་བར་གནས་པ་ནི་ཏིང་ངེ་འཛིན་ཐམས་ཅད་ཀྱི་རྒྱལ་པོ་རང་བབ་གཉུག་མའི་ཏིང་ངེ་འཛིན་གྱིི་ངོ་བོར་གནས་པ་ཡིན་པར་གསུངས་པའོ། །གཉིས་པ་ནི། འདི་ལྟར་སྣང་བའི་ཆོས་ཐམས་ཅད་བྱང་ཆུབ་ཀྱི་སེམས་ལས་གཞན་དུ་མ་གྱུར་ཅིང་། བྱང་ཆུབ་ཀྱི་སེམས་ནི་དམིགས་མཚན་སྤྲོས་པ་ཐམས་ཅད་དང་བྲལ་བ་ཡིན་པས་མངོན་སུམ་གྱི་ཡུལ་དུ་དམིགས་ཤིང་མཐོང་བར་བྱ་བ་ཅི་ཡང་མེད་པ་དེ་བས་ན་གང་ཡང་མཐོང་བ་མེད་པར་མཐོང་བ་དེ་ནི་ཆོས་ཉིད་བྱང་ཆུབ་སེམས་ཀྱི་རང་བཞིན་མངོན་སུམ་དུ་མཐོང་བའི་ཆོས་སྐུ་དྲི་མ་མེད་པའི་མིག་ཐོབ་པ་ཡིན་པས་མཐོང་བའི་དམ་པར་གསུངས་པ་སྟེ། རུས་སྦལ་རྩ་རྒྱུད་ལས། མི་མཐོང་པ་ཉིད་མཐོང་བ་ཡིན། །ཅིར་ཡང་མི་དམིགས་གཏི་མུག་སྟེ། །མ་རིག་པ་ནི་ཡེ་ཤེས་གསལ། །ཞེས་གསུངས་སོ། །དེ་ལྟ་བུའི་ཞི་ལྷག་ཟུང་དུ་འཇུག་པའི་ཡེ་ཤེས་དེའི་ཆོས་ཐམས་ཅད་སྣང་ཆ་མ་འདྲེས་པར་སོ་སོར་གསལ་ན་ཡང་གདོད་ནས་སྐྱེ་བ་མེད་པ་ཆོས་ཉིད་བྱང་ཆུབ་ཀྱི་སེམས་གཅིག་གི་རང་བཞིན་དུ་རྟོགས་པས་འཁོར་བ་མྱང་འདས་སུ་ཤར་བ་དེ་ནི་ཆོས་ཐམས་ཅད་ཀྱི་གནས་ལུགས་ཇི་བཞིན་པར་གཟིགས་པ་ཡིན་པའི་ཕྱིར་ན་ཐམས་ཅད་མཁྱེན་པའི་སྤྱན་ཞེས་པ་ཡང་ལྷག་མཐོང་སོ་སོར་རྟོག་པའི་ཡེ་ཤེས་དེ་ལ་བརྗོད་པར་བྱའོ་ཞེས་པ་སྟེ། ནམ་མཁའི་མཐའ་དང་མཉམ་པ་ལས། མཐོང་བའི་སྐབས་ན་དོན་མི་མཐོང་། །མི་མཐོང་བས་ན་དོན་མཐོང་སྟེ། །གཉིས་ཀ་མ་བཅོས་རང་རིག་ལ། །མཐོང་དང་མ་མཐོང་རྗེས་མི་འཇུག །ཐམས་ཅད་བྱང་ཆུབ་སེམས་ཉིད་ལ། །ལོག་རྟོག་རྩོལ་བའི་ཆོས་མི་གནས། །རང་བྱུང་མཚན་མར་མི་འཇུག་པས། །གང་ལྟར་གསལ་ཡང་དམིགས་དང་བྲལ། །འབྱུང་འཇུག་མེད་པའི་རྣལ་འབྱོར་གྱིས། །ཇི་བཞིན་ཉིད་ཀྱི་དོན་ལ་རྟོགས། །ལྟ་བྲལ་གཟིགས་མེད་ཡེ་ཤེས་སྤྱན། །ཆོས་རྣམས་བྱང་ཆུབ་སེམས་སུ་གསལ། །ཞེས་སོ། །གསུམ་པ་སྤྱོད་པ་ལ་གསུམ་སྟེ། ངོ་བོ་ཆོས་ཉིད་ལས་མི་འགྱུར་བས་ཅིར་སྣང་སྐྱེ་མེད་དུ་གྲོལ་བར་རང་བཞིན་ཤུགས་ཀྱི་སྤྱོད་པ། ཉོན་མོངས་ཡེ་ཤེས་སུ་གྲོལ་བ་སྣ་ཚོགས་ཐབས་ལམ་གྱི་སྤྱོད་པ། ཐེག་པ་གཞན་ལྟར་བླང་དོར་དུ་སྤྱོད་པ་དགག་པའོ། །དང་པོ་ནི། འདི་ལྟར་ཆོས་ཉིད་བྱང་ཆུབ་ཀྱི་སེམས་ནི་ཆོས་དབྱིངས་སྤྲོས་པ་དང་བྲལ་བ་མཐའ་དང་དབུས་མེད་པའི་རང་བཞིན་ཡིན་པས་ཡངས་ཤིང་རྒྱ་ཆེ་བའི་ཀློང་དུ་ཆོས་ཐམས་ཅད་གཉིས་མེད་མཉམ་པ་ཉིད་དུ་རྫོགས་ཤིང་དེ་ཐམས་ཅད་ཀྱི་སྙིང་པོ་ཆོས་སྐུའི་ངོ་བོར་གནས་པ་ཡིན་པས་དེ་ལ་བཟང་ངན་ལ་སོགས་པ་གཉིས་ཆོས་ཀྱི་དབྱེ་བ་གང་ཡང་མེད་པའི་ཕྱིར་བཟང་པོ་དང་དུ་མི་ལེན་ཞིང་ངན་པ་ཕྱིར་མི་འདོར་བར་ཆོས་ཉིད་གཅིག་གི་ངོ་བོར་དབང་བསྒྱུར་བས་མཉམ་པའི་རྒྱལ་པོར་གནས་པ་སྟེ། དེས་ན་ཆོས་ཉིད་བྱང་ཆུབ་ཀྱི་སེམས་དང་བག་ཆགས་འཁྲུལ་པའི་སྣང་བ་གཉིས་སུ་མིང་གི་བླ་དྭགས་ཙམ་དུ་སོ་སོར་ཕྱེ་ན་ཡང་། དོན་ལ་བག་ཆགས་འཁྲུལ་པའི་སྣང་བ་ཐམས་ཅད་དྷ་དུ་ར་ཟོས་པའི་སྣང་བ་ལྟར་རྫས་སུ་གྲུབ་པ་མེད་པས་དབྱེ་གཞི་ཟད་པའི་དབྱེར་མེད་ཆེན་པོ་རུ་འདྲེས་ཤིང་ཆོས་ཉིད་གཅིག་གི་རང་བཞིན་དུ་མཚུངས་པ་ཡིན་ཏེ། ཡིད་བཞིན་རིན་པོ་ཆེའི་མཛོད་ལས། ཀུན་རྫོབ་རྣམ་ཆད་རྣམ་དབྱེའི་ཡུལ་འདས་པས། །བཏགས་པའི་བདེན་གཉིས་འདས་ཕྱིར་སྤྲོས་ཀུན་ཞི། །དབྱིངས་ལ་སྣང་སྟོང་རང་བཞིན་གཉིས་མེད་པས། །བདེན་པ་དེ་ཡང་དབྱེར་མེད་ཅེས་སུ་བརྗོད། །ཅེས་གསུངས་པ་ལྟར་རོ། །དེས་ན་འདི་ལྟར་སྣང་བའི་ཆོས་རྣམས་དོན་ལ་ཅིར་ཡང་གྲུབ་པ་མེད་བཞིན་གཟུང་འཛིན་དུ་ཞེན་པའི་རྟོག་པས་རྣམ་པར་བརྟགས་ཤིང་རྨི་ལམ་གྱི་རོལ་པ་ལྟར་སྣ་ཚོགས་སུ་སྣང་བའི་ཆོས་རྣམས་ནི། རིག་པ་རང་གི་རྩལ་སྣང་འགག་མེད་དུ་ཤར་བ་ཆོས་ཉིད་ཀྱི་རྒྱན་དུ་སྣང་བས་མཚན་འཛིན་རྟོག་པའི་བློ་ཡིས་མི་འདོར་བས་སྤོང་བར་མི་བྱེད་ཅིང་། དེ་བཞིན་དུ་བསྒྲུབ་ཅིང་དང་དུ་ཡང་མི་ལེན་པས་ཅིར་ཡང་མི་དགོས་པའམ་མི་རྟོག་པའི་ཐབས་ཀྱིས་གང་སྣང་བའི་ཆོས་ཐམས་ཅད་པོ་དེ་ལ་ཆོས་ཉིད་དུ་རོལ་པ་དེ་ནི་ཀུན་ཏུ་བཟང་པོ་བླང་དོར་མེད་པའི་སྤྱོད་པའམ་རང་བཞིན་ཤུགས་ཀྱིས་སྤྱོད་པ་ཡིན་ནོ། །མདོ་བཅུ་ལས། སྤྱོད་པ་བླང་དོར་མེད་པ་ནི། །སེམས་ཉིད་རྫོགས་པ་ཆེན་པོ་ལ། །སྣང་བའི་ཆོས་དང་སྲིད་པའི་ཆོས། །ཐམས་ཅད་བྱང་ཆུབ་སེམས་ཡིིན་པས། །སེམས་ཉིད་ཡེ་ཤེས་སྤྱོད་པ་ལ། །འདི་བླང་འདི་དོར་ཡོངས་མ་མཆིས། །ཞེས་གསུངས་སོ། །གཉིས་པ་ནི། འདི་ལྟར་རྫོགས་པ་ཆེན་པོའི་དགོངས་དོན་ཇི་བཞིན་དུ་རྟོགས་པའི་རྣལ་འབྱོར་པ་རྣམས་ལ་ཆོས་ཐམས་ཅད་རིག་པ་ཉག་ཅིག་གི་ངོ་བོར་གྲོལ་བ་ཡིན་པས་འོག་མའི་ཐེག་པ་ཀུན་དང་མི་མཐུན་པས་བླང་དོར་གྱི་ལམ་ལ་ཞེན་པ་ཡོངས་ཀྱིས་སྤོང་འགོག་སྦྱོང་བསྒྱུར་ལ་སོགས་པར་ལྟ་བའི་ཆོས་ཉོན་མོངས་པ་དུག་ལྔ་དང་དེས་ཀུན་ནས་བསླང་ཏེ་བསགས་པའི་ལས། མཚམས་མེད་པ་ལྔ་པོོ་ལ་སོགས་པ་ཡི་རང་བཞིན་ནི་གདོད་ནས་ཆོས་དབྱིངས་སྐྱེ་བ་མེད་པའི་ངང་ནས་རང་ཤར་བའི་རང་བྱུང་གི་ཡེ་ཤེས་ལྔ་ཡི་རོལ་རྩལ་ཡིན་ཕྱིར་སྤང་བྱ་མ་དག་པའི་ཆོས་སུ་གྲུབ་པ་རྡུལ་ཙམ་མེད་པར་ཡེ་ནས་རྣམ་པར་དག་པ་སྣ་ཚོགས་ཐབས་ལམ་གྱི་སྤྱོད་པ་ཡིན་པས་འཆིང་བྱེད་དུ་མི་འགྱུར་བར་མ་ཟད། ལམ་དེར་ཞུགས་པར་བྱས་ནས་ཆོས་ཉིད་མཉམ་པ་ཉིད་ཀྱི་དོན་ལ་དབང་བསྒྱུར་བར་བྱེད་པའི་རྒྱལ་པོ་ཀུན་བཟང་ཆོས་སྐུའི་གཏན་སྲིད་ལ་མངའ་དབང་ཐོབ་པར་འགྱུར་བས་ན་བུད་མེད་ལ་སོགས་པ་འདོད་པའི་ཡུལ་ཀུན་ཀྱང་སྤོང་བར་མི་བྱེད་པར་གསུངས་སོ། །ཀློང་ཆེན་རབ་འབྱམས་ལས། རྫོགས་ཆེན་ཨ་ཏིའི་ངོ་བོ་ལ། །ཕྱི་ནང་གསང་བའི་ཆོས་རྣམས་རྫོགས། །དགེ་བ་བྱར་མེད་སྡིག་པ་སྤང་དུ་མེད། །དགེ་སྡིག་གཉིས་དང་བྲལ་བའི་རིག་པ་ཆོས་ཀྱི་སྐུ། །དགེ་བ་མི་བྱ་བྱས་ན་སངས་རྒྱས་མིན། །སྡིག་པ་མི་སྤང་སྤངས་ན་སངས་རྒྱས་འགྲུབ་མི་འགྱུར། །ཞེས་གསུངས་སོ། །གསུམ་པ་ནི། དེ་ལས་གཞན་དུ་རྩོལ་བཅས་ཀྱི་ཐེག་པ་གཞན་ལྟར་བླང་དོར་རྩོལ་སྒྲུབ་ལ་སྤྱོད་པའི་ལོ་རྒྱུས་འཆད་པའི་ལུང་གི་ཚིག་ཙམ་ལ་བརྟེན་ནས་རྒྱུ་འབྲས་བླང་དོར་གྱི་སྒོ་ནས་རང་བཞིན་གྱི་དོན་གཉིས་འགྲུབ་ཏུ་ཡོད་པར་གསུངས་པ་དེ་ཚད་མའི་བློར་བཞག་པའམ་ཚད་མར་བཟུང་ནས་མ་ཧཱ་ཡོ་ག་བས་ཏིང་འཛིན་རྣམ་པ་གསུམ་པོ་བརྟན་པར་བསྒོམ་པ་ལ་སོགས་པ་ལམ་རིམ་གྱིས་བགྲོད་ནས་འབྲས་བུ་ཐོབ་པར་འདོད་པའི་ཐེག་པ་རང་རང་གི་གྲུབ་པའི་མཐའ་ལ་སྤྱོད་ཅིང་ཉམས་སུ་བླང་བས་འབྲས་བུ་ཐོབ་པར་རེ་བ་འཇོག་པ་དེ་ནི་འདིར་རྩོལ་བྲལ་ཨ་ཏིའི་ལུང་ལས་གཞན་དུ་གོལ་བ་ཡིན་ནོ་ཞེས་རང་བྱུང་གི་ཡེ་ཤེས་རྒྱུ་རྐྱེན་ལ་མ་ལྟོས་པར་ཡེ་ནས་སངས་རྒྱས་པ་ཡིན་པའི་དོན་མ་རྟོགས་པར་རྩོལ་བ་ལ་བརྟེན་ནས་འཁོར་བ་སྤངས་ནས་སངས་རྒྱས་ཐོབ་པར་ལྟ་བ་ནི་འཁོར་འདས་མཉམ་ཉིད་དུ་མ་རྟོགས་པས་འཁྲུལ་པ་ཡིན་པར་གསུངས་པའོ། །དེས་ན་འཁོར་འདས་ཐམས་ཅད་སེམས་དང་རིག་པའི་རོལ་པ་ཙམ་ལས་གཞན་དུ་མེད་པས་སྤང་བླང་རེ་དོགས་གང་ཡང་མི་བྱ་བར་བཞག་ན་ཆོས་ཐམས་ཅད་མ་བྱས་ཡེ་ཟིན་དུ་གནས་པར་གསུངས་ཏེ། དེ་ཉིད་ལས། བསམ་གཏན་ཏིང་འཛིན་ལ་སོགས་སངས་རྒྱས་སྐུ་ལ་སྒྲིབ། །བསྒོམ་ཞིང་སྒྲུབ་པ་བྱས་ན་བསམ་གཏན་མིན། །སངས་རྒྱས་མི་བསྒྲུབ་བསྒྲུབ་ན་རྩོལ་བར་འགྱུར། །འཁོར་བ་མི་སྤང་སྤངས་ན་སངས་མི་རྒྱ། །སངས་རྒྱས་གཞན་ན་མེད་དོ་རིག་པ་ཡིན། །འཁོར་བ་གཞན་ན་མེད་དོ་རང་སེམས་ཡིན། །འདུས་བྱས་དགེ་བ་མི་བྱ་བྱས་ན་འཆིང་བའི་རྒྱུ། །མཆོད་རྟེན་ལྷ་ཁང་ལ་སོགས་འདུས་བྱས་དགེ་རྩ་ཡིན། །ཆོས་ནི་བྱས་པས་མི་ཟིན་བཞག་པས་ཟིན་པར་འགྱུར། །ཞེས་གསུངས་སོ། །བཞི་པ་འབྲས་བུ་ལ་གཉིས་ཏེ། སེམས་ཇི་བཞིན་པ་མ་བཅོས་པར་བཞག་པ་དེ་བཞིན་ཉིད་རང་བྱུང་གི་ཡེ་ཤེས་སུ་ལྷུན་གྱིས་གྲུབ་ཚུལ་དང་། དེ་ལྟར་བཞག་པས་རྩོལ་སྒྲུབ་ཞེན་པའི་སྡུག་བསྔལ་ལས་གྲོལ་བའོ། །དང་པོ་ནི། དེས་ན་བྱ་བྱེད་རྩོལ་བ་ཐམས་ཅད་དང་བྲལ་བར་སེམས་ཉིད་ཇི་བཞིན་པ་མ་བཅོས་རྣལ་མར་བཞག་པའི་ཆོས་ཉིད་དེ་བཞིན་ཉིད་ཀྱི་ངང་དུ་འཁོར་འདས་ཀྱི་ཆོས་ཐམས་ཅད་མ་བརྩལ་ལྷུན་གྲུབ་ཀྱི་ཚུལ་དུ་རྫོགས་ཤིང་གདོད་ནས་ཡེ་སངས་རྒྱས་པ་ཆོས་དབྱིངས་བདེ་བ་ཆེན་པོ་མཐའ་གྲོལ་ཕྱོགས་ལྷུང་དང་བྲལ་བའི་ལྷུན་ལ་ཡེ་ནས་གནས་པས་ས་ལམ་སྦྱང་བགྲོད་སོགས་ལ་མི་ལྟོས་པར་ད་ལྟ་ཉིད་ནས་རང་བྱུང་ཀུན་ཏུ་བཟང་པོའི་ངོ་བོར་གནས་པ་སྟེ། དེ་ཡང་ཡེ་ནས་ཆོས་ཉིད་བྱང་ཆུབ་སེམས་ཀྱི་གཤིས་ལུགས་དེ་ལྟར་དུ་གནས་པ་ཉིད་རྣལ་འབྱོར་པ་ལ་མངོན་དུ་ཤར་བ་ལས་བླང་དོར་རྩོལ་སྒྲུབ་ཀྱིས་གྲུབ་པ་མ་ཡིན་ཏེ། ཅིའི་ཕྱིར་ན་རིག་པའི་ཡེ་ཤེས་ཆེན་པོ་རྒྱུ་རྐྱེན་གང་གིས་ཀྱང་མ་བསྐྱེད་པས་རང་བྱུང་འདུས་མ་བྱས་པ་སྲིད་ཞི་ཀུན་ལ་ཁྱབ་ཅིང་ཀུན་གྱི་ཆོས་ཉིད་དུ་གྱུར་པས་ཆེ་བའི་སྙིང་པོ་ཉིད་དུ་གྱུར་པ་དེ་ནི་རྐྱེན་གྱིས་མི་གཡོ་ཞིང་ངོ་བོ་མི་འགྱུར་བར་བློ་འདས་ཆོས་སྐུའི་ངོ་བོ་སྨྲ་བསམ་སྤྲོས་པ་ཀུན་ལས་འདས་པས་ན་ཚིག་གི་བསྙད་པ་ཀུན་དང་བྲལ་བའི་ཕྱིར་རོ། །གཉིས་པ་ནི། འདི་ལྟར་བྱ་བྱེད་རྩོལ་བས་མ་བསྒྲུབ་པར་ཡེ་ནས་ལྷུན་གྱིས་གྲུབ་ཟིན་པའི་རིག་པ་རང་བྱུང་གི་ཡེ་ཤེས་སྤང་བླང་རེ་དོགས་ཀྱི་ནད་ཐམས་ཅད་སེལ་བར་བྱེད་པའི་བདུད་རྩིས་ཏེ་བདུད་རྩི་ལྟ་བུའི་རང་བཞིན་དུ་གྱུར་པ་དེས་ཐེག་པ་འོག་མའི་བྱ་རྩོལ་གྱིས་གདུང་བའི་སྡུག་བསྔལ་གྱི་ནད་ཀུན་འཇོམས་པར་བྱེད་ཅིང་རང་གི་ངོ་བོ་བྱ་བ་ཐམས་ཅད་དང་བྲལ་བར་ཡེ་ནས་གྲུབ་ཟིན་པའི་ཆོས་ཉིད་ཡངས་པ་ཆེན་པོའི་ཡུལ་ལ་འཕོ་འགྱུར་མེད་པར་སྔོན་ཇི་ལྟ་བ་བཞིན་དུ་ཕྱིས་ཀྱང་དེ་ལྟར་དུ་གནས་པ་ཡིན་ནོ། །ཚུལ་དེ་དང་མཐུན་པར་མདོ་བཅུ་ལས་ཀྱང་། བྱ་བྲལ་བདེ་བའི་ལྷུན་ལ་གནས། །ཡེ་ནས་བྱས་ཟིན་བདུད་རྩི་ཡིས། །རྩོལ་བ་དག་གི་སྡུག་བསྔལ་འཇོམས། །ཞེས་གསུངས་སོ། །གཉིས་པ་ཐིག་ལེ་ཉག་གཅིག་གི་རང་བཞིན་དབྱེར་མེད་དུ་བསྟན་པ་ལ་གཉིས་ཏེ། ཇི་བཞིན་པའི་སེམས་ཉིད་རང་གནས་སུ་གནས་པ་ལ་སྐྱེ་འགགས་གནས་གསུམ་གྱི་ཞེན་པ་མེད་པས་ལྟ་སྒོམ་སྤྱོད་འབྲས་སུ་དབྱེ་བ་དང་། རྣལ་དོན་ནམ་མཁའ་བཞིན་དུ་གྲུབ་པས་སྨྲ་བསམ་ལས་འདས་པའོ། །དང་པོ་ནི། ཀྱེེ་སེམས་དཔའ་ཆེན་པོ་ཉོན་ཅིག །འདི་ལྟར་སྣང་བའི་འཁོར་འདས་ཀྱི་ཆོས་རྣམས་ཐམས་ཅད་ནི་ཇི་བཞིན་པའི་སེམས་ཉིད་ཆོས་སྐུ་ཐིག་ལེ་ཆེན་པོའི་རང་བཞིན་ལས་གཞན་དུ་གྲུབ་པ་གང་ཡང་མེད་པར་དེའི་རང་བཞིན་ཡིན་པས་ན། གོང་དུ་བཤད་པའི་ལྟ་སྒོམ་སྤྱོད་འབྲས་བཞི་པོ་དེ་ཡང་གདུལ་བྱའི་ངོར་རིག་པའི་ངོ་བོ་གཅིག་ལ་ལྟ་སྒོམ་སྤྱོད་འབྲས་ཐམས་ཅད་མ་བཙལ་ལྷུན་གྲུབ་ཀྱི་ཚུལ་དུ་རྫོགས་ཤིང་ཚངས་པའི་ཚུལ་ཚིག་གིས་མཚོན་ནས་བསྟན་པ་ཙམ་ལས། དོན་ལ་དེ་དག་ཕར་སྤྲོས་ཤིང་དབྱེ་བར་བྱེད་པ་གང་ཡང་མེད་ཅིང་ཆོས་སོ་སོ་བ་བཞི་རིག་པ་གཅིག་གི་ངོ་བོར་ཚུར་བསྡུ་བ་ཡང་མེད་དོ། །དེ་བཞིན་དུ་ཆོས་འདི་དག་ཐམས་ཅད་དང་པོ་སྐྱེ་བ་མེད་ཅིང་མཐར་འགག་པ་མེད་པར་ཀ་དག་སྐྱེ་བ་མེད་པ་ཆོས་སྐུ་ཐིག་ལེ་ཉག་གཅིག་གི་ངང་ལས་མ་གཡོས་བཞིན་དུ་རང་གདངས་ལྷུན་གྲུབ་ཀྱི་སྣང་ཆ་རུ་འཁོར་འདས་ཀྱི་སྣང་ཆ་སྣ་ཚོགས་པ་འགོག་པ་མེད་པར་འཆར་ཞིང་། དེ་ལྟར་འཆར་བའི་དུས་ཉིད་ནས་གྲུབ་པ་རྡུལ་ཙམ་མེད་པར་གཉིས་མེད་མཉམ་པ་ཆེན་པོའི་རང་བཞིན་དུ་ཇི་ལྟར་སྔར་བཞིན་ཕྱིས་ཀྱང་དེ་བཞིན་དུ་གནས་པ་ཡིན་པས་སྣང་སྟོང་དབྱེར་མེད་སྤྲོས་པ་དང་བྲལ་བར་བསྟན་པ་ཡིན་ཏེ། གཏིང་རྫོགས་ལས། གཉིས་སུ་མེད་པའི་རྒྱུད་ཀྱི་ལྟ་བའི་གཞི། །སྣང་བ་འདི་ཉིད་ཡེ་ནས་སྐྱེ་བ་མེད། །སྐྱེ་མེད་ཉིད་ན་གང་ཡང་ཐམས་ཅད་སྐྱེས། །སྐྱེས་ཙམ་ཉིད་ན་རང་སེམས་ངང་གིས་སྟོང་། །དཔེར་ན་ཆུ་དང་མེ་ལོང་གཟུགས་བརྙན་བཞིན། །སྣང་དང་སྟོང་པ་དབྱེར་མེད་གདོད་ནས་དག །ཅེས་གསུངས་པ་བཞིན་ནོ། །གཉིས་པ་ནི། དེ་ལྟར་ཡོད་མེད་སྐྱེ་འགག་ལ་སོགས་པ་སྤྲོས་པའི་མཐའ་ཐམས་ཅད་དང་བྲལ་ཞིང་རྟོག་པའི་སྤྱོད་ཡུལ་ལས་འདས་པས་གང་དུའང་རྣམ་པར་མི་རྟོག་པ་ཆོས་ཀྱི་དབྱིངས་དང་དབྱེར་མེད་པའི་སེམས་ཉིད་རང་བྱུང་གི་ཡེ་ཤེས་འཁོར་འདས་ཀྱི་ཆོས་རྣམས་ཀྱི་སྙིང་པོ་བཙལ་བ་མེད་པར་ཡེ་ནས་སངས་རྒྱས་པའི་རང་བཞིན་ཅན་འདི་ནི་ནམ་མཁའ་བཞིན་དུ་ཆོས་ཐམས་ཅད་ལ་ཡེ་ནས་ཁྱབ་ཅིང་དུས་གསུམ་འཕོ་འགྱུར་མེད་པར་གནས་པས་ན་རྟོག་པའི་གྲྭ་ཟུར་དང་བྲལ་ཞིང་སྨྲ་བསམ་གྱི་ཡུལ་ཀུན་ལས་འདས་པའོ། །ཞེས་གསུངས་སོ། །ནམ་མཁའི་རྒྱལ་པོ་ལས་ཀྱང་། བསམ་དང་བྲལ་བའི་སེམས་དེ་ནམ་མཁའ་ཉིད། །ནམ་མཁའ་འདྲ་བའི་སེམས་དེ་ཉིད་དང་བྲལ། །ཡོད་མེད་དབུ་མའང་མི་དམིགས་བརྗོད་མེད་ན། །ནམ་མཁའ་མི་དམིགས་བརྗོད་དུ་མེད་ལས་འདས། །སེམས་ལ་ཚིག་ཏུ་བརྗོད་མེད་སྐུ་ཡང་མེད། །ཅེས་གསུངས་སོ། །ལེའུའི་མཚན་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་བྱ་མེད་རྫོགས་པ་བསྒོམ་དུ་མེད་པའི་ལེའུ་སྟེ་རྩ་དྲུག་པའི་འགྲེལ་པའོ།། ༈ །།དོན་བདུན་པ་སེམས་ཉིད་ཀུན་བྱེད་དབྱིངས་རང་བཞིན་གྱིས་དག་པས་རྒྱུ་འབྲས་བྱ་བཙལ་ལས་འདས་པའི་ལེའུ་ཉེར་བདུན་པ་ལ་གཉིས་ཏེ། བསྟན་པ་དང་། བཤད་པ་ནི། དང་པོ་ནི། དེ་ལྟར་རིག་པ་བྱང་ཆུབ་སེམས་ཀྱི་རང་བཞིན་སྟོན་པའི་ངོ་བོར་གནས་པ་དེ་ཡེ་ནས་བསྒོམ་དུ་མེད་པས་རྒྱུ་འབྲས་བྱ་བཙལ་ལས་འདས་པ་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་ཉིད་ཀྱི་ངོ་བོ་ལ་འཁོར་འདས་སྤང་བླང་གང་ཡང་མ་གྲུབ་པར་རང་བཞིན་གྱིས་རྣམ་པར་དག་པས་རྒྱུ་འབྲས་རྩོལ་སྒྲུབ་ཀྱིས་མི་འགྲུབ་པར་རྩོལ་མེད་ལྷུན་གྱིས་གྲུབ་པར་སྟོན་པའི་གདམས་ངག་ཕོག་པ་དང་མཐུན་ཅིང་གཉིས་སུ་མེད་པའི་ལུང་ཐེག་པ་འོག་མ་ལས་ཁྱད་པར་དུ་འཕགས་པས་ཆེན་པོ་ཞེས་གསུངས་པ་འདི་ཉིད་འཆད་འགྱུར་གྱི་ས་བཅད་བདུན་པོའི་གོ་རིམ་ལྟར་རིམ་གྱིས་བསྟན་པ་ནི་འདི་ཉིད་ཡིན་ཏེ་ཞེས་ལྷག་བཅས་ཀྱི་ཚིག་གི་གོང་འོག་མཚམས་སྦྱར་བའོ། །གཉིས་པ་ལ་བདུན་ཏེ། སེམས་ཉིད་ཀུན་བྱེད་ཡེ་ནས་དག་པའི་དབྱིངས་སུ་བསྟན་པ། སྣང་སྲིད་ཆོས་ཉིད་ཀྱི་རོལ་པ་ཡིན་པས་འཁོར་འདས་བླང་དོར་དུ་བྱེད་པའི་ལམ་མ་གྲུབ་པ། ཆོས་དབྱིངས་སྨོན་པ་མེད་པས་སེམས་ལས་གཞན་པའི་སངས་རྒྱས་གྲུབ་ཏུ་མེད་པ། སྲིད་གསུམ་ཡེ་གྲོལ་དུ་རྟོགས་པས་འཁོར་བ་སྤང་དུ་མེད་པ། རྩོལ་སྒྲུབ་རྒྱུ་འབྲས་ཀྱི་ལམ་གྱིས་ནམ་ཡང་སངས་རྒྱས་མི་འགྲུབ་པ། རྩོལ་སྒྲུབ་རྒྱུ་འབྲས་སྟོན་པའི་སློབ་དཔོན་སྤང་བ། འབད་མེད་ཡེ་གྲོལ་དུ་འཆད་པའི་བླ་མ་བརྟེན་ཚུལ་ལོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག་འདི་ལྟར་སྣང་སྲིད་འཁོར་འདས་ཀྱིས་བསྡུས་པའི་ཆོས་རྣམས་ཐམས་ཅད་ནི་ཀུན་བྱེད་བྱང་ཆུབ་ཀྱི་སེམས་ང་ལས་བྱུང་བ་ཡིན་པས་ན་བྱང་ཆུབ་ཀྱི་སེམས་ཡེ་ནས་རྣམ་པར་དག་པ་བཞིན་དུ་དེའི་ངང་ལས་ཤར་བའི་ཇི་ལྟར་སྣང་བའི་ཕྱི་ནང་སྣང་སྲིད་ཀྱིས་བསྡུས་པའི་ཆོས་རྣམས་ཐམས་ཅད་ཀུན་ཀྱང་། རྩོལ་སྒྲུབ་བྱ་བྱེད་ལ་མ་ལྟོས་པར་ཡེ་ནས་རང་བཞིན་གྱིས་རྣམ་པར་དག་པ་ཀ་དག་དབྱིངས་ཀྱི་ངང་ལས་སྐད་ཅིག་ཀྱང་གཡོ་མ་མྱོང་བར་ལུང་དུ་བསྟན་པ་ཡིན་ཏེ། ཆོས་དབྱིངས་རིན་པོ་ཆེའི་མཛོད་ལས། སྐུ་གསུམ་ཀློང་ལས་འཁོར་འདས་རང་ཤར་ཀྱང་། །དབྱིངས་ལས་མ་གཡོས་ཆོས་ཉིད་བདེ་བའི་ཞིང་། །སེམས་ཉིད་ཀློང་ཆེན་འགྱུར་མེད་ནམ་མཁའི་ངང་། །རོལ་པ་ངེས་མེད་ཐུགས་རྗེ་ཆོ་འཕྲུལ་ཀློང་། །ཐམས་ཅད་དབྱིངས་ཀྱི་རྒྱན་ལས་ལོགས་ན་མེད། །ཅེས་གསུངས་པ་ལྟར་རོ། །གཉིས་པ་ནི། འདི་ལྟར་འབྱུང་བ་ཆེན་པོ་ལྔས་བསྡུས་པའི་ཕྱི་སྣོད་ཀྱི་འཇིག་རྟེན་དང་ཕུང་པོ་ལྔས་བསྡུས་པའི་ནང་བཅུད་ཀྱི་སེམས་ཅན་དུ་སྣང་བ་འདི་ཀུན་ཡེ་ནས་སྤྲོས་བྲལ་ཆོས་ཀྱི་དབྱིངས་རིག་པ་བྱང་ཆུབ་སེམས་ཀྱི་རང་བཞིན་དུ་དབྱེར་མེད་པ་ཡིན་ལ། ཆོས་ཀྱི་དབྱིངས་དེ་ལ་ནི་གཟུང་འཛིན་རྣམ་རྟོག་གི་བསྒྲིབ་པ་ཞིག་གཤིས་ལ་ཞུགས་མ་མྱོང་བས་ཡེ་ནས་རྣམ་པར་དག་པའི་སྤྱོད་ཡུལ་དུ་གྱུར་པ་ཡིན་པས། དེ་ལ་དག་པ་སངས་རྒྱས་དང་ནི་མ་དག་པ་སེམས་ཅན་གཉིས་སུ་གྲུབ་པ་མེད་ཅིང་འཁོར་འདས་བླང་དོར་དུ་འབྱེད་པའི་སྒོ་ནས་ས་ལམ་རིམ་གྱིས་བགྲོད་པ་དང་རྒྱུ་འབྲས་བླང་དོར་ལ་སོགས་པའི་གཉེན་པོས་བཅོས་སུ་ག་ལ་ཡོད་དེ་བཅོས་བསྒྱུར་སྤང་བླང་གང་ཡང་མེད་པར་ཡེ་ནས་བསྒྲུབ་མེད་རྩོལ་སྤྲུགས་ཆེན་པོར་གནས་པའི་ཕྱིར་ཏེ། རྩལ་ཆེན་ལས། ཕྱི་དང་ནང་མེད་ཐམས་ཅད་ཆོས་ཀྱི་དབྱིངས། །རྣམ་པར་དག་པའི་སྤྱོད་ཡུལ་གཉིས་མེད་ལ། །སངས་རྒྱས་སེམས་ཅན་ཡོངས་ཀྱིས་མེད་པ་སྟེ། །བསྒྲུབ་མེད་རྩལ་སྤྲུགས་སྨོན་པ་མེད་པ་ཡི། །མ་ནོར་དམ་པའི་ལམ་ཆེན་ལྷུན་རྫོགས་པ། །ཞེས་གསུངས་པ་ལྟར་ལ། འདི་ལ་མདོ་བཅུ་ལས་འབྱུང་བ་ཆེན་པོ་ལྔ་དང་སྣང་སྲིད་ཐམས་ཅད་ཕྱི་དང་བྱང་ཆུབ་ཀྱི་སེམས་དང་ཆོས་ཉིད་ནང་སྟེ་དེ་དག་ཐམས་ཅད་ཆོས་ཀྱི་དབྱིངས་སུ་དབྱེར་མེད་པར་གསུངས་ཏེ། དེ་ཉིད་ལས། ཕྱི་དང་ནང་གི་ཆོས་ཉིད་འདི། །འབྱུང་ཆེན་ལྔ་དང་སྣང་སྲིད་ཕྱི། །བྱང་ཆུབ་སེམས་དང་ཆོས་ཉིད་ནང་། །དབྱེ་བ་མེད་པར་ཆོས་ཀྱི་དབྱིངས། །ཡེ་ནས་རྣམ་དག་སྤྱོད་ཡུལ་ལ། །སངས་རྒྱས་སེམས་ཅན་གཉིས་མེད་པས། །དེ་ལ་རྣམ་པ་བགྲང་དུ་མེད། །ཅེས་རྣམ་པ་བགྲང་དུ་མེད་པའི་མདོ་འགྲེལ་དུ་གསུངས་སོ། །གསུམ་པ་ནི། དེ་ལྟར་ཡེ་ནས་རྣམ་པར་དག་པ་ཡིན་ན་ཡང་འོན་ཀྱང་སེམས་ཅན་རྣམས་ཀྱི་འཁྲུལ་པའི་ཤེས་པས་བསླད་ཅིང་བསླུས་པའི་ཕྱིར་ན་བླང་དོར་འབད་རྩོལ་ལ་བརྟེན་ནས་འཁྲུལ་སྣང་སྦྱང་ཞིང་སངས་རྒྱས་ཀྱི་གོ་འཕང་བསྒྲུབ་པར་བྱེད་དགོས་སོ་སྙམ་ན། ཆོས་ཀྱི་དབྱིངས་ཡེ་སྟོང་སྤྲོས་པ་དང་བྲལ་བ་ཀ་དག་ཡེ་བབས་སོར་བཞག་གི་དོན་འདི་ལ་བྱ་རྩོལ་གང་ཡང་མི་འཇུག་པས་གང་ཡང་བསྒྲུབ་ཏུ་མེད་བཞིན་དུ་ཆོས་ཐམས་ཅད་མ་སྤངས་པར་ཡེ་ནས་གཞི་མེད་རྩ་བྲལ་ཆེན་པོར་ཡེ་གྲོལ་ལ་སོང་སྟེ་ལྷུན་གྲུབ་འབྲས་བུའི་ཆོས་སུ་རྩལ་རྫོགས་ཟིན་པས་རྩལ་སྤྲུགས་ཆེན་པོར་གྲུབ་ཟིན་པ་ལ་འབྲས་བུ་ཐོབ་འདོད་ཀྱི་སྨོན་པ་མེད་པས་ན། སངས་རྒྱས་ཞིག་གཞན་ནས་བཙལ་བར་བྱ་བ་རྡུལ་ཙམ་མེད་པར་ལྷུན་གྲུབ་རྫོགས་པ་ཆེན་པོར་ཡེ་ནས་གནས་པ་ཡིན་ལ། རྒྱུ་མཚན་དེས་ན་སྔ་མ་སྟེ་གོང་དུ་ལམ་དང་གཉེན་པོས་བཅོས་སུ་མེད་པར་གསུངས་པ་དེ་ཉིད་ཀྱི་དོན་ལྟར་མ་བཅོས་རང་བབ་དུ་འཇོག་པ་ལས། ཐེག་པ་འོག་མས་རྩོལ་སྒྲུབ་ཀྱི་ལམ་ལ་རྟོག་ཅིང་དཔྱོད་པ་དང་སེམས་ཅན་རང་ག་མའི་གཟུང་འཛིན་གྱི་རྟོག་པ་གཉིས་ཀ་ཡེ་ནས་རྣམ་པར་དག་པ་གཉིས་མེད་ཆོས་ཀྱི་དབྱིངས་ཀྱི་རང་བཞིན་ཡིན་པ་ལ་ཕྱིན་ཅི་ལོག་ཏུ་རྣམ་པར་རྟོག་པའི་སོ་སྐྱེས་བྱིས་པའི་སྤྱོད་པས་ཅི་ཞིག་བསླུས་ཏེ་ནམ་མཁའ་ལ་ཆུ་མི་ཆགས་པ་བཞིན་དུ་གོས་པ་རྡུལ་ཙམ་ཡང་མེད་དོ། །རྩལ་ཆེན་ལས། སྒྲོ་སྐུར་བཅིང་གྲོལ་དག་པའི་ཆོས་དབྱིངས་ལ། །ལོག་རྟོག་བྱིས་པའི་སྤྱོད་པས་ཅི་ཞིག་བསླུ། །ཞེས་དང་། མདོ་བཅུ་ལས། ཡེ་ནས་རྫོགས་པའི་བྱང་ཆུབ་ལ། །བསྒྲུབ་ཏུ་མེད་པས་སྨོན་དུ་མེད། །ཡེ་ནས་ལྷུན་རྫོགས་བྱ་རྒྱུ་མེད། །སྔ་མ་བཞིན་ཏེ་རྩོལ་སྒྲུབ་མེད། །རྟོག་པ་དང་ནི་དཔྱོད་པ་དང་། །གཟུང་འཛིན་རྣམ་པར་དག་པ་གཉིས། །ཡེ་ནས་གཉིས་མེད་ཆོས་དབྱིངས་ལ། །ལོག་རྟོག་བྱིས་པས་བསླུ་བ་མེད། །ཅེས་གསུངས་སོ། །བཞི་པ་ནི། འདི་ལྟར་རྒྱུ་སེམས་ཅན་གྱི་གནས་སྐབས་དང་འབྲས་བུ་སངས་རྒྱས་ཀྱི་གནས་སྐབས་ལྟ་བུ་དབྱེ་རུ་མེད་པར་འཁོར་འདས་ཐམས་ཅད་ཡེ་ནས་གཉིས་མེད་ཆོས་དབྱིངས་བདེ་བ་ཆེན་པོ་ལས་གཞན་དུ་མེད་པས་ཁམས་གསུམ་ཡོངས་གྲོལ་ཆེན་པོ་སྲིད་གསུམ་ཀ་དག་གི་རང་བཞིན་ཡིན་པའི་ཕྱིར་ན། མ་དག་སེམས་ཅན་ལྟར་སྣང་བ་ཀུན་གྱི་སྤྱོད་པ་ལ། ཐེག་པ་འོག་མ་པ་རྣམས་ཀྱིས་འཁྲུལ་པས་བཞག་པ་ཕྱིན་ཅི་ལོག་ཏུ་ནོར་བའི་ལམ་དུ་བརྟགས་ཤིང་དེ་ཉིད་སྤང་བྱར་བསྟན་པ་ཡིན་ན་ཡང་། དོན་ལ་གོང་དུ་བསྟན་པའི་བསྒྲུབ་མེད་སྨོན་པ་མེད་པའི་ལམ་ཆེན་པོ་དེ་དང་འདི་གཉིས་ལ་ཐ་དད་དུ་དབྱེ་བ་མེད་པས་མི་གཉིས་པ་ཡིན་ཕྱིར། དེ་ལྟ་བུའི་འཁོར་བའི་ཆོས་ཐམས་ཅད་སྤང་དུ་མེད་པར་འཁོར་འདས་གཉིས་ལ་ཡེ་ནས་བཟང་ངན་མེད་པས་མཉམ་པ་ཉིད་ཀྱི་རང་བཞིན་ཡིན་པར་ཤེས་ཏེ་སྤང་བླང་བཅོས་བསྒྱུར་མེད་པར་བཞག་པས་དུས་གསུམ་གྱི་སངས་རྒྱས་ཀུན་གྱི་རྗེ་བཙུན་དམ་པ་ཀུན་བཟང་གདོད་མའི་མགོན་པོ་ཉིད་དང་དབྱེར་མེད་པ་ཡིན་པར་གསུངས་ཏེ། དེ་ཉིད་ལས། འཁྲུལ་པས་ནོར་པའི་ལམ་བསྟན་ཀྱང་། གོང་གི་ཆོས་དབྱིངས་ལམ་དེ་གཉིས། །ཡེ་ནས་གཉིས་མེད་གཅིག་ཡིན་ཏེ། །ལམ་གཉིས་མཉམ་པར་ཤེས་པ་ནི། །དུས་གསུམ་སངས་རྒྱས་ཀུན་གྱི་རྗེ། །ཞེས་སོ། །ལྔ་པ་ནི། དེ་ལྟ་བུའི་གཟུང་འཛིན་རྣམ་རྟོག་གི་སྤྲོས་པ་ཐམས་ཅད་ཡེ་ནས་རྣམ་པར་དག་པས་འཁོར་འདས་གཉིས་མེད་བླང་དོར་དང་བྲལ་བར་རྟོགས་པ་དེ་ནི་ཨ་ཏི་རྫོགས་པ་ཆེན་པོའི་རྣལ་འབྱོར་པ་ཤིན་ཏུ་སྐལ་བ་དང་ལྡན་པ་ཡིན་པར་གསུངས་ལ། དེ་ལས་གཞན་དུ་འཁོར་འདས་གཉིས་ལ་འཇུག་ལྡོག་གི་ཡུལ་དུ་བལྟས་ནས་བདག་གིས་ཡང་དག་པའི་ལམ་ལ་བརྟེན་ནས་འཁོར་བ་སྤང་ཏེ་མྱང་འདས་བསྒྲུབ་པར་བྱའོ་སྙམ་དུ་དགག་སྒྲུབ་སྤང་བླང་ལ་ཞེན་པའི་བློ་ཅན་ཐམས་ཅད་ང་དང་བདག་ཏུ་རྟོག་པ་དང་བཅས་པ་ཡིན་པས། མུ་སྟེགས་འཁྲུལ་པའི་ལམ་དུ་ལྟུང་པ་ཡིན་ལ། དེ་ལྟ་བུའི་ཕྱིན་ཅི་ལོག་ཏུ་རྣམ་པར་རྟོག་པ་མི་ཤེས་བྱིས་པའི་བློ་གཟུང་འཛིན་གྱི་རྟོག་པས་འཁོར་འདས་བླང་དོར་གྱི་ཆོས་སུ་མེད་པ་ལ་ཡོད་པར་བཟུང་ཞིང་བརྟགས་པའི་ལམ་གྱིས་བསླུས་པས་ཆོས་སྤྱོད་རྒྱུ་འབྲས་ལ་རྟོག་ཅིང་རྩོལ་སྒྲུབ་ཀྱིས་གདུང་བར་བྱེད་པའི་ལམ་ལ་བཙུད་པ་དེ་ནི་ལྷུན་གྲུབ་གདོད་མའི་རྒྱལ་སར་ཕྱིན་པའི་དུས་མེད་ལ། དེ་བཞིན་དུ་ཀུན་བྱེད་ཆོས་སྐུའི་དགོངས་པ་རྩོལ་མེད་ཡེ་གྲོལ་གྱི་དོན་རྟོགས་པའི་དུས་ཀྱང་མེད་པས་ཆོས་ཉིད་འདུས་མ་བྱས་པ་རིག་པ་རང་བྱུང་གི་ཡེ་ཤེས་ཏེ་འདུས་བྱས་ཀྱི་དགེ་བ་ཆོས་སྤྱོད་བླང་དོར་གྱིས་ཚོལ་བས་རྙེད་པར་ག་ལ་འགྱུར་ཏེ་ནམ་མཁས་ནམ་མཁའ་ཚོལ་བའམ་རི་དྭགས་སྨིག་རྒྱུ་ལ་བསྙེགས་པ་དང་འདྲ་བར་གསུངས་སོ། །རྩལ་ཆེན་ལས། ང་དང་བདག་ཏུ་བརྟགས་པ་རབ་ཞི་བའི། །མཆོག་ཏུ་རྨད་བྱུང་ཕྱི་དང་ནང་ཀུན་དབྱིངས། །ཡེ་ནས་རྣམ་པར་དག་པའི་སྤྱོད་ཡུལ་ལ། །སེམས་ཅན་སངས་རྒྱས་གཉིས་མེད་སྐལ་ལྡན་དབང་། །བདག་གཞན་བརྟགས་པས་མུ་སྟེགས་འཁྲུལ་པའི་ལམ། །བྱིས་པས་བསླུས་པས་ཆོས་སྤྱོད་ལམ་ལ་བཙུད། །ཕྱིན་པའི་དུས་མེད་རྟོགས་པའི་དུས་མེད་དེ། །གཉིས་མེད་ཆོས་ནི་རྙེད་པར་ག་ལ་འགྱུར། །ཞེས་གསུངས་སོ། །དྲུག་པ་ནི། དེ་ལ་བྱར་མེད་རྫོགས་པ་ཆེན་པོའི་དོན་རྒྱུ་འབྲས་སྤང་བླང་ལས་འདས་པའི་སེམས་ཉིད་རང་བྱུང་གི་ཡེ་ཤེས་མངོན་སུམ་དུ་མ་མཐོང་ཞིང་བྱར་མེད་ཡེ་གྲོལ་གྱི་དོན་མ་ནོར་བར་སྟོན་པའི་ཀུན་ཁྱབ་ཀྱི་ཚད་མ་གསུམ་དང་ཡང་མི་ལྡན་པས་ཚད་མར་མ་གྱུར་པའི་སློབ་དཔོན་གང་ཞིག་ཨ་ཏི་ཡེ་གྲོལ་གྱི་དགོངས་པ་རྒྱུ་འབྲས་རྩོལ་བསྒྲུབ་ཀྱི་ཡུལ་དུ་ཁྲིད་ཅིང་སྟོན་པར་བྱེད་པ་དེ་ནི། དཔེར་ན་སྔོན་གྱི་དུས་སུ་སྤྲེའུའི་སློབ་དཔོན་ཞིག་གིས་མཚོ་ནང་དུ་ཟླ་བའི་གཟུགས་བརྙན་ཤར་བ་ལྷ་དབང་ཕྱུག་ཆེན་པོའི་གཙུག་རྒྱན་མཚོ་ནང་དུ་ལྷུང་བ་ཡིན་པར་བཟུང་ནས། སྤྲེའུ་རྣམས་ལ་དེ་ཉིད་ལེན་ཐབས་བསླབས་པས་ཀུན་གྱིས་སློབ་དཔོན་གྱི་ངག་བཞིན་བྱས་པས་སྤྲེའུ་ཐམས་ཅད་ཆུ་ནང་དུ་ཤི་བར་བཤད་པ་བཞིན། དེ་འདྲའི་ཕྱིན་ཅི་ལོག་ཏུ་ལུང་ཕོག་ཅིང་བསྟན་པ་དང་མཐུན་པར་རྗེས་སུ་ཞུགས་པ་ཐམས་ཅད་ལམ་ནོར་བ་ཡིན་པས་རེ་དོགས་དགག་སྒྲུབ་ཀྱི་རྟོག་པས་ཟིན་པར་འགྱུར་ཏ་རེ་ཞེས་ཟིན་ཉེན་ཆེ་བས་དེ་འདྲའི་སློབ་དཔོན་རྣམས་སྤང་བར་གདམས་པ་སྟེ། མདོ་བཅུ་ལས། སེམས་ཉིད་མངོན་དུ་མ་མཐོང་བའི། །ཚད་མར་མ་གྱུར་སྤྲེལ་འདྲ་ཡིས། །སྟོན་པའི་ལུང་བསྟན་བཀའ་བོར་བས། །ལམ་ནོར་རྟོག་པས་ཟིན་ཏ་རེ། །ཞེས་སོ། །བདུན་པ་ནི། དེ་ལྟར་མཚན་ཉིད་དང་མི་ལྡན་པའི་བླ་མ་བསྟེན་པས་ལམ་ལོག་པར་གོལ་བའི་ཉེན་ཡོད་པའི་རྒྱུ་མཚན་དེ་བས་ན་མཚན་ལྡན་གྱི་བླ་མ་བསྟེན་པ་ཤིན་ཏུ་གལ་ཆེ་བས། འདི་ལྟར་གསེར་ལ་ནག་ཚུར་གཏོང་བ་ཡི་ཐབས་ཀྱིས་གཡའ་དྲེག་གཅོད་ཅིང་གསེར་གྱི་མདངས་འོད་བཏོན་པས་གཞན་ཡིད་འཕྲོག་པར་བྱེད་པ་ལྟར་གདུལ་བྱའི་རྒྱུད་ཀྱི་ལོག་རྟོག་གི་གཡའ་དྲེག་གཅོད་ཅིང་རང་བྱུང་གི་ཡེ་ཤེས་མངོན་དུ་སྟོན་པས་ཚིམ་པར་བྱེད་པའི་སློབ་དཔོན་མཚན་ཉིད་དང་ལྡན་པ་འབད་མེད་ཡེ་གྲོལ་སོར་བཞག་གི་དོན་མ་ནོར་བར་ཡང་དག་པར་སྟོན་པའི་མན་ངག་ཟབ་མོ་རིན་ཆེན་དབང་གི་རྒྱལ་པོ་ལྟ་བུའི་མཛོད་དུ་གྱུར་པ་ནི། ཡིད་བཞིན་རིན་པོ་ཆེའི་མཛོད་ལས། མཐར་ཐུག་སྙིང་པོ་དོན་སྟོན་བླ་མ་ནི། །འབྲེལ་ཚད་རྣམ་གྲོལ་ཟབ་མོའི་དོན་ལ་སྦྱོར། །ལམ་ཟབ་སྙིང་པོའི་རང་གནས་ཆོས་སྐུར་སྤྲོད། །བོགས་འདོན་ཟབ་མོས་ཉམས་རྟོགས་གོང་འཕེལ་བྱེད། །མཐར་ཕྱིན་རྟོགས་པས་གནས་ལུགས་གཞི་ལ་སྐྱེལ། །ཐབས་ལམ་ཟབ་མོས་གང་ཡང་ལམ་དུ་བསྒྱུར། །གདམས་པ་མང་ལྡན་ཤེས་རྒྱུད་འགྲོལ་ལ་མཁས། །ཚེ་འདིར་འཁོར་བའི་ཆུ་བོ་སྒྲོལ་ནུས་པ། །དེད་དཔོན་ཡིད་བཞིན་སྨན་པའི་རྒྱལ་པོ་ནི། །ཀུན་ལས་འཕགས་ཕྱིར་མཚུངས་མེད་གུས་པས་བསྟེན། །ཞེས་གསུངས་པ་དེ་ལྟ་བུའི་མཚན་ཉིད་དང་ལྡན་པའི་བླ་མ་ལ་ལུས་དང་ལོངས་སྤྱོད་ཆོས་སྲིད་སོགས་རིན་ཐང་དཔག་ཏུ་མེད་པ་ཕུལ་བས་བླུ་ཞིང་བརྟེན་པར་འོས་སོ། །ཞེས་གསུངས་སོ། །ལེའུའི་མཚན་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་བྱ་མེད་རྫོགས་པ་རྣམ་དག་དབྱིངས་ཀྱི་ལུང་བསྟན་པའི་ལེའུ་སྟེ་རྩ་བདུན་པའི་འགྲེལ་པའོ།། ༈ །།དོན་བརྒྱད་པ་སེམས་ཉིད་ཀུན་བྱེད་འགྱུར་བ་མེད་པས་ཡེ་ནས་རྒྱུ་འབྲས་རྩོལ་སྒྲུབ་ལས་འདས་པའི་ལེའུ་ཉེར་བརྒྱད་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། དེ་ལྟར་ཆོས་ཐམས་ཅད་ཡེ་ནས་རང་བཞིན་གྱིས་རྣམ་པར་དག་པས་རྩོལ་སྒྲུབ་ལ་ལྟོས་མི་དགོས་པར་བསྟན་པའི་རྗེས་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་ཉིད་ཀྱི་རང་བཞིན་ཆོས་དབྱིངས་བྱང་ཆུབ་ཀྱི་སེམས་ལ་འགྱུར་བ་མེད་པས་རྩོལ་སྒྲུབ་བླང་དོར་ལ་བརྟེན་ནས་འགྱུར་བ་ཅན་དུ་སྟོན་པ་ཐམས་ཅད་དྲང་དོན་དགོངས་པ་ཅན་ཡིན་པའི་ཚུལ་འདི་གསུངས་སོ། །གཉིས་པ་ལ་གསུམ་སྟེ། སེམས་ཉིད་རང་བྱུང་གི་ཡེ་ཤེས་དཔེ་དོན་རྟགས་གསུམ་གྱིས་མི་འགྱུར་བའི་རང་བཞིན་བསྟན་པ་དང་། སྐུ་གསུམ་སྟོན་པས་འགྱུར་བར་བསྟན་ཚུལ་དང་། དེ་ཉིད་དྲང་བའི་ལུང་དུ་བསྟན་པས་རྣལ་དོན་མི་འགྱུར་བ་ཉིད་དུ་དོན་བསྡུ་བའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །ཆོས་སྐུ་ཀུན་བྱེད་རྒྱལ་པོ་ང་ཡི་རང་བཞིན་དབྱིངས་སྤྲོས་པ་དང་བྲལ་བའི་ངོ་བོ་ལ་ཡེ་ནས་འགྱུར་བ་མེད་པའི་ཚུལ་ནི། ཇི་ལྟར་ན་ཀུན་བྱེད་ང་ཡི་སེམས་ཉིད་རང་བྱུང་གི་ཡེ་ཤེས་འོད་གསལ་འདུས་མ་བྱས་པའི་དཔེ་ནམ་མཁའ་ཡི་རང་བཞིན་ལ་མེ་བདུན་ཆུ་གཅིག་ལ་སོགས་པ་རྐྱེན་གང་གིས་འགྱུར་བ་མེད་པ་དེ་བཞིན་དུ། ང་ཡི་ཆོས་ཉིད་བྱང་ཆུབ་སེམས་ཀྱི་རང་བཞིན་དབྱིངས་འོད་གསལ་སྤྲོས་པ་དང་བྲལ་བ་ལ་རྒྱུ་རྐྱེན་རྩོལ་སྒྲུབ་ལ་སོགས་པ་གཉེན་པོ་གང་གིས་ཀྱང་འགྱུར་བ་མེད་ལ་ཞེས། དེ་ལ་ཆོས་ཉིད་ཞེས་པ་སྣང་བ་བཅད་པའི་སྟོང་པ་ལྟ་བུ་མིན་པ་ཇི་ལྟར་སྣང་བའི་དངོས་པོ་འདི་དག་ཐམས་ཅད་སྣང་བཞིན་དུ་སྟོང་། སྟོང་བཞིན་དུ་སྣང་བས་སྣང་སྟོང་གང་གི་ཕྱོགས་སུ་མ་ལྷུང་བ་སྤྲོས་བྲལ་མཉམ་པ་ཉིད་ཀྱི་ངོ་བོར་གནས་པ་འདི་ལས་གཞན་ན་ཆོས་ཉིད་ཅེས་བྱ་བ་ཞིག་མེད་པར་གསུངས་ཏེ། བང་མཛོད་འཕྲུལ་ལྡེ་ལས། ཇི་ལྟར་སྣང་བའི་ཆོས་ཉིད་ལ། །ཆོས་ཞེས་མིང་དུ་བཏགས་པ་ཡིན། །རང་བཞིན་མེད་པ་ཆོས་ཉིད་ཡིན། །ཆོས་ནི་ས་ཡིན་ཆོས་ཉིད་སྲ་བ་ཡིན། །ཆོས་ནི་ཆུ་ཡིན་ཆོས་ཉིད་གཤེར་བ་ཡིན། །ཆོས་ནི་མེ་ཡིན་ཆོས་ཉིད་ཚ་བ་ཡིན། །དེ་ལ་སོགས་པ་གཞན་ཡང་བརྩི་བར་བྱ། །ཆོས་ནི་བྱང་ཆུབ་སེམས་ཡིན་ཏེ། །ཆོས་ཉིད་རིག་ཅིང་གསལ་བའོ། །དེ་སོགས་བཤད་པའི་དོན་རྣམས་ནི། ཆོས་དང་ཆོས་ཉིད་གཏན་ལ་དབབ། །ཅེས་ཆོས་རྣམས་ཀྱི་རང་རང་གི་མཚན་ཉིད་སྣང་བཞིན་པ་འདི་ཆོས་ཉིད་དུ་གསུངས་པའོ། །གཞན་ཡང་ཀུན་བྱེད་ང་ཡི་སེམས་ཉིད་རང་བྱུང་གི་ཡེ་ཤེས་ཆོས་ཀུན་གྱི་སྙིང་པོ་རུ་གྱུར་པ་དེ་ཡི་རྟགས་ཙམ་གྱི་རོལ་པ་རྣམས་ལའང་རྒྱུ་རྐྱེན་གཉེན་པོ་གང་གིས་ཀྱང་འགྱུར་བ་མེད་དེ་གཞི་མེད་རྩ་བ་དང་བྲལ་བ་ཡེ་སྟོང་འདུས་མ་བྱས་པའི་རང་བཞིན་འགྱུར་བའི་ཆོས་སུ་གྲུབ་པ་གང་ཡང་མེད་པའི་ཕྱིར་རོ། །དེ་བཞིན་དུ་དཔེ་དོན་རྟགས་གསུམ་པོས་མཚོན་ནི་ཆོས་ཐམས་ཅད་པོ་རང་གི་ངོ་བོ་ལ་འགྱུར་བ་མེད་པ་ཡིན་པས་དེ་ལ་རྒྱུ་རྐྱེན་གྱི་གཉེན་པོ་མེད་ཚུལ། མདོ་བཅུ་ལས། དཔེ་དང་དོན་རྟགས་གསུམ་པོ་ལ། །རྒྱུ་དང་ས་བོན་མ་མཆིས་པས། །རྐྱེན་དང་གཉེན་པོ་ཀུན་དང་བྲལ། །དེས་ན་སེམས་ཉིད་རྫོགས་པ་ལ། །གཉེན་པོ་མེད་པ་ཞེས་བྱའོ། །ཞེས་གསུངས་སོ། །གཉིས་པ་ལ་བདུན་ཏེ། སོར་བཞག་ལྷ་མིའི་ཐེག་པས་སེམས་ལ་བསྒྲོད་པས་བསྒྱུར་བའི་སྐྱོན་དང་། ཆུང་ངུ་ཉན་རང་གིས་བསྒྱུར་བའི་སྐྱོན། བྱང་ཆུབ་སེམས་དཔའི་ཐེག་པས་བསྒྱུར་བའི་སྐྱོན། འབྲིང་ཀྲྀ་ཡའི་ཐེག་པས་བསྒྱུར་བའི་སྐྱོན། ཡོ་གའི་ཐེག་པས་བསྒྱུར་བའི་སྐྱོན། ཆེན་པོ་མ་ཧཱའི་ཐེག་པས་བསྒྱུར་བའི་སྐྱོན། ཨ་ནུའི་ཐེག་པས་སེམས་ལ་བསྒྲོད་པས་བསྒྱུར་བའི་སྐྱོན་ནོ། །དང་པོ་ནི། དེ་ལྟར་ཆོས་ཉིད་བྱང་ཆུབ་ཀྱི་སེམས་ལ་ཡེ་ནས་འགྱུར་བ་མེད་པས་རྒྱུ་རྐྱེན་རྩོལ་སྒྲུབ་ལ་བརྟེན་ནས་བཅོས་བསྒྱུར་བྱེད་དུ་མེད་པ་ལ། ཀུན་བྱེད་རྒྱལ་པོ་ང་ལས་བྱུང་བའི་སྟོན་པ་སྐུ་གསུམ་གྱིས་འཁོར་འདས་ཐམས་ཅད་རྒྱུ་དང་འབྲས་བུར་བརྟེན་ནས་བྱུང་ཚུལ་གྱིས་རྒྱུ་འབྲས་རྩོལ་སྒྲུབ་ལས་འདས་པའི་ཆོས་ཉིད་འགྱུར་བ་མེད་པའི་དོན་ལ་མིང་ཚིག་གིས་སྒྲོ་བཏགས་ནས་བསྟན་པ་ནི་འདི་ལྟར། སྟོན་པ་སྤྲུལ་པའི་སྐུས་དྲང་དོན་དགོངས་པ་ཅན་གྱི་ཚིག་ལུང་བསྟན་པ་སེམས་ཅན་རྣམས་དབང་པོ་ལྔ་ལ་བརྟེན་ནས་ཤེས་པ་ཡུལ་ལ་སྐྱེ་ཞིང་འདོད་ཡོན་ལ་ལོངས་སྤྱོད་པ་སྤོང་བར་འགྱུར་བའི་ལམ་ནི། དབང་ཤེས་ལྔ་པོ་རང་རང་སྐྱེ་བའི་དམིགས་རྐྱེན་དུ་གྱུར་པའི་ཆོས་གང་ཞིག་གཟུགས་སྒྲ་ལ་སོགས་པའི་ཡུལ་ལྔ་པོ། རིག་པ་བྱང་ཆུབ་སེམས་ཀྱི་རྩལ་ལས་གཞན་དུ་མེད་པས་ཡེ་ནས་རང་ཆས་སུ་འཆིང་བའི་སེམས་ཅན་རྣམས་ལ། རང་བྱུང་འདུས་མ་བྱས་པའི་ཆོས་ཉིད་བྱང་ཆུབ་སེམས་ཀྱི་རྩལ་ཡེ་གྲོལ་སྤང་བླང་ལས་འདས་པ་ཡིིན་པར་ལུང་མ་བསྟན་པར། དེ་ལྟ་བུའི་ཡུལ་ལྔ་ལ་སྤྱོད་པ་དེ་ངན་འགྲོ་ལོག་པར་ལྟུང་བའི་རྒྱུ་སྡིག་སྒྲིབ་ཆེ་བའོ་ཞེས་ལུང་བསྟན་ནས། ལུས་ངག་ཡིད་གསུམ་གྱིས་སྲོག་གཅོད་པ་དང་མ་བྱིན་ལེན་པ་ལ་སོགས་པའི་སྡིག་པ་སྤོང་ཞིང་དགེ་བཅུ་ལ་སྤྱོད་པ་དང་བསམ་གཟུགས་ཀྱི་ཏིང་ངེ་འཛིན་ལ་སོགས་པ་བསྒོམ་པར་བྱེད་པའི་ལམ་དེས་ནི། རང་བྱུང་རྒྱུ་རྐྱེན་དང་བྲལ་བའི་ཆོས་ཉིད་བྱང་ཆུབ་སེམས་ཀྱི་ངོ་བོ་གཅིག་ལ་བླང་དོར་ཏུ་སྤྱད་པའི་ཕྱིར་ན། ཆོས་སྐུ་ཀུན་བྱེད་རྒྱལ་པོ་སེམས་ཉིད་རང་བྱུང་གི་ཡེ་ཤེས་དང་བསྐལ་པ་མང་པོའི་ཡུན་ལ་འཕྲད་པར་མི་འགྱུར་ཞིང་བསྒྲིབ་པར་འགྱུར་བ་ཡིན་ཏེ། རུས་སྦལ་རྩ་རྒྱུད་ལས། མི་བགྲོད་རང་བཞིན་གནས་པའི་དོན་མེད་ན། །མཐོ་རིས་བགྲོད་པའི་རྒྱུ་ལ་ཉོན་མོངས་ཟིན་པར་འགྱུར། །ལམ་མེད་ལམ་དུ་ཞུགས་པས་སྙེད་པར་རབ་ཏུ་དཀའ། །ཞེས་དང་། དགེ་སྡིག་གཉིས་མེད་སྤང་བླང་མེད་པར་ཉག་གཅིག་སངས་རྒྱས་ལམ། དགེ་སྡིག་གཉིས་སྤྱོད་གསེར་དང་བོང་བའི་སེམས། །འཁྲུལ་པའི་ལམ་ཡིན་རྫོགས་ཆེན་ལམ་རིམ་འགྱུར། །ཞེས་གསུངས་པ་ལྟར་རོ། །གཉིས་པ་ནི། ཀྱེ་སེམས་དཔའ་ཆེན་པོ་ཉོན་ཅིག །སྤྲུལ་སྐུའི་སྟོན་པ་དེ་ཡིས་རང་ལས་རྒྱུད་ཐ་དད་པའི་ཚུལ་དུ་འདུས་པའི་འཁོར་ཚོགས་རྣམས་ལ། ཉན་རང་གི་ལམ་བདེན་བཞི་དང་རྟེན་འབྲེལ་བསྒོམ་པ་ལ་སོགས་པའི་བླང་དོར་འཇུག་ལྡོག་གི་ལམ་སྟོན་པའི་སྒོ་ནས་རིག་པ་བྱང་ཆུབ་སེམས་ཀྱི་རོལ་རྩལ་རང་བྱུང་ཡེ་ཤེས་ལྔ་ཡི་ཆོས་ལས་གཞན་དུ་མེད་པའི་ཉོན་མོངས་པ་ལྔ་སྤང་བྱར་སྟོན་ཞིང་། དེ་ལྟར་སྤངས་བར་བྱེད་པ་དེ་དོན་ལ་ཡེ་ཤེས་ལྔ་སྤོང་བ་ཡིིན་ཀྱང་ཉོན་མོངས་པའི་དགྲ་དུག་ལྔ་ཆོམས་པ་ཡིན་ནོ། །ཞེས་ལུང་བསྟན་པས། ཉན་རང་གི་ལམ་དུ་ཞུགས་པ་དེ་དག་གིས་ཉོན་མོངས་པའི་དགྲ་ལྔ་རང་བྱུང་གི་ཡེ་ཤེས་ཡིན་པར་མ་རྟོགས་ཏེ་རང་གི་སེམས་ཉིད་རང་བྱུང་གི་ཡེ་ཤེས་ལྔ་པོ་དེ་སྤོང་བར་འགྱུར་བ་ཡིན་པས་དེ་ལྟ་བུའི་ལམ་དེ་སྟོན་པ་ཀུན་བྱེད་ང་ཡིས་ལུང་དུ་མ་བསྟན་ཏེ། ཅིའི་ཕྱིར་ན་རྫོགས་པ་ཆེན་པོའི་དོན་དང་འགལ་ཞིང་གོལ་ས་ཡིན་པའི་ཕྱིར་རོ་ཞེས་པའོ། །གསུམ་པ་ནི། ཀྱེ་སེམས་དཔའ་ཆེན་པོ་ཉོན་ཅིག །མཚན་ཉིད་བྱང་ཆུབ་སེམས་དཔའི་ཐེག་པ་བ་རྣམས་ཀྱིས་རང་གི་སེམས་ཀྱི་རྩལ་ལས་བྱུང་བའི་ཕྱི་ནང་སྣང་སྲིད་ཀྱི་ཆོས་སུ་སྣང་བ་ཡེ་ནས་སངས་རྒྱས་པའི་རང་བཞིན་དུ་གནས་པ་འདི་ཉིད་ལ། ཚུལ་དེ་ལྟར་མ་རྟོགས་པར་སྤང་བྱ་མ་དག་པའི་ཆོས་སུ་བཟུང་ནས་དོན་དམ་པར་མཐའ་བཞིའི་སྐྱེ་བ་མེད་པ་ཆོས་ཉིད་སྤྲོས་པ་དང་བྲལ་བའི་ངང་དུ་སྦྱངས་ཞིང་སྟོང་པ་ཉིད་དུ་བསྒོམ་པ་དང་། ཀུན་རྫོབ་ཏུ་རྟེན་འབྱུང་གི་སྣང་བ་ཐམས་ཅད་སྒྱུ་མ་དང་རྨི་ལམ་ལྟ་བུའི་ཚུལ་དུ་སྦྱངས་བ་སྟེ་བདེན་པ་རྣམ་པ་གཉིས་ཀྱིས་སྦྱངས་ནས་རྒྱུ་ཚོགས་གཉིས་ལས་འབྲས་བུ་སངས་རྒྱས་ཀྱི་གོ་འཕང་འབྱུང་ངོ་ཟེར་ནས་བསྐལ་པ་གྲངས་མེད་གསུམ་གྱི་བར་དུ་ས་ལམ་སྦྱོང་བའི་རྩོལ་བ་བྱེད་པ་སྟེ། དེ་ལྟ་བུའི་ལམ་གྱི་སྡོམ་པ་བསྲུང་བ་དང་ཕ་རོལ་དུ་ཕྱིན་པ་བཅུ་ལ་སྤྱད་པས་སེམས་ཉིད་རང་གི་ངོ་བོ་མི་འགྱུར་བས་ལམ་དེ་ལ་བརྟེན་ནས་སེམས་ཉིད་ནམ་མཁའ་ལྟ་བུའི་རང་བཞིན་སྔར་བས་བོགས་དབྱུང་སྟེ་སངས་རྒྱས་སུ་འགྱུར་བར་སྟོན་པ་ཀུན་བྱེད་ང་ཡིས་ལུང་མ་བསྟན་ཏོ་ཞེས་གསུངས་སོ། །བཞི་པ་ནི། ཀྱེ་སེམས་དཔའ་ཆེན་པོ་ཉོན་ཅིག །ཀྲྀ་ཡ་བས་ཡེ་ནས་རང་སེམས་ཆོས་ཉིད་ཀྱི་གཤིས་ལ་འགྱུར་བ་མེད་པས་རྩོལ་བསྒྲུབ་ཀྱིས་བཅོས་སུ་མེད་པའི་དོན་མ་རྟོགས་པར་སྔགས་དང་ཕྱག་རྒྱའི་ཏིང་ངེ་འཛིན་གྱིས་བྱིན་གྱིས་རླབས་ནས་དག་པ་གསུམ་དང་ལྡན་པས་ལྷ་ཡེ་ཤེས་པ་སྣང་སྟོང་དབྱེར་མེད་ཆུ་ཟླ་བཞིན་དུ་གསལ་བར་བྱས་ནས། དེ་ཉིད་རང་ལ་དངོས་གྲུབ་སྩོལ་བ་པོ་རྗེ་བོ་ལྟ་བུར་བལྟས་ཏེ་དེ་ལ་མཉེས་པའི་མཆོད་པ་ཕུལ་བས་ནམ་ཞིག་ན་ལྷ་དེ་ལ་བརྟེན་ནས་རེ་ཞིང་འདོད་པའི་དོན་གནས་སྐབས་འདོད་གཟུགས་ཀྱི་རིག་འཛིན་གྲུབ་པ་དང་མཐར་ཐུག་གི་འབྲས་བུ་རིགས་གསུམ་རྡོ་རྗེ་འཛིན་པའི་གོ་འཕང་ཐོབ་པར་རེ་བ་ནི། དཔེར་ན་ཆུ་ཟླ་གྲུབ་པ་མེད་པས་ཚོལ་དུ་མེད་པ་དེ་བཞིན་ཏུ་རང་གི་སེམས་ཉིད་ཡེ་གྲོལ་ནམ་མཁའ་ལྟ་བུའི་རང་བཞིན་ཡིན་པར་མ་རྟོགས་པས་དཀའ་ཐུབ་དང་རྩོལ་སྒྲུབ་ཀྱིས་གདུང་བར་བྱེད་ན་ཡང་བྱ་རྒྱུད་ནས་གསུངས་པ་ལྟར་སྐྱེ་བ་བདུན་གྱི་བར་དུ་གདོད་ནས་ཡེ་སངས་རྒྱས་པའི་སེམས་ཉིད་རང་བྱུང་གི་ཡེ་ཤེས་དེ་ཉིད་མེད་དོ་ཅེས་ཀུན་བྱེད་ང་ཡིས་ལུང་མ་བསྟན་ཏེ་སེམས་ཉིད་འོད་གསལ་བའི་ཡེ་ཤེས་ལ་འཕོ་འགྱུར་དང་གསལ་འགྲིབ་གང་ཡང་མེད་པར་ཁྱབ་གདལ་ནམ་མཁའ་བཞིན་དུ་ཡེ་ནས་གནས་པའི་ཕྱིར་འདུ་འབྲལ་མེད་པར་གསུངས་པའོ། །ལྔ་པ་ནི། ཀྱེ་སེམས་དཔའ་ཆེན་པོ་ཉོན་ཅིག །རྣལ་འབྱོར་ཡོ་ག་བས་རང་གི་སེམས་ཉིད་འགྱུར་བ་མེད་པས་རྒྱུ་འབྲས་བླང་དོར་ལས་འདས་པའི་དོན་མ་རྟོགས་པར་མངོན་བྱང་ལྔ་དང་བྱིན་གྱིས་བརླབ་པ་དང་ཆོ་འཕྲུལ་བཞི་བསྒོམ་པ་ཡི་ཏིང་ངེ་འཛིན་གྱིས་བདག་དམ་ཚིག་པ་དང་ལྷ་ཡེ་ཤེས་སེམས་དཔའ་གཉིས་སྤུན་གྲོགས་ཀྱི་ཚུལ་དུ་བསྒོམ་པ་ཞེས་པ་འདི་ཨུ་པ་ཡའི་ཐེག་པ་དང་ལྷན་དུ་བསྟན་པ་ཡིན་པས་འདིར་དེས་བསྒོམ་ཚུལ་བསྟན་པ་དང་། ཡོ་ག་རང་ལམ་དུ་དམ་ཡེ་དབྱེར་མེད་ཆུ་ལ་ཆུ་བཞག་པ་ལྟར་མཉམ་པ་ཉིད་དུ་བསྒོམ་པའམ། ཡང་ན་ཀུན་གཟིགས་རོང་པའི་ཞལ་ནས། རྣལ་འབྱོར་གྱི་རྒྱུད་དུ་ནི། བདག་ལྷར་བྱིན་གྱིས་བརླབ་པ་དང་། མདུན་དུ་ལྷ་དམིགས་པ་ཡང་འདོད་མོད་ཀྱི། ལྷ་མཉེས་པར་བྱ་བ་ལ་ཡེ་ཤེས་ཀྱི་ལྷ་བདག་ལ་བསྟིམས་ཤིང་དབྱེར་མེད་པར་བྱས་པའི་རེག་པའི་བདེ་བས་མཉེས་པར་བྱ་བ་དང་། སྒྲུབ་པ་ཕལ་ཆེར་སྟོན་པས། ཚུལ་འདིས་ལྷ་དང་གྲོགས་པོའི་ཚུལ་དུ་བལྟའོ། །ཞེས་གྲགས་སོ། །ཞེས་གསུངས་པ་ལྟར། སྐབས་ལ་ཡར་ཨུ་པ་ཡས་དམ་ཡེ་གཉིས་དཔོན་གཡོགས་ཀྱི་ཚུལ་དང་། ཡོ་ག་བས་སྤུན་ནམ་གྲོགས་པོའི་ཚུལ་དུ་མཉམ་པར་བསྒོམ་པར་གསུངས་པའང་ཡོད་དོ། །གང་ལྟར་ཡང་དེ་ལྟར་བླང་དོར་ཅན་གྱི་ལམ་དེས་བདག་ཉིད་ཀྱིས་གང་འདོད་པ་ཡི་གནས་སྐབས་དང་མཐར་ཐུག་གི་དངོས་གྲུབ་བསྒྲུབ་བྱའི་ལྷ་དེས་སྟེར་བར་རེ་བ་ནི། རང་བྱུང་གི་ཡེ་ཤེས་ཡེ་ནས་འཕོ་འགྱུར་མེད་པའི་ཆོས་ཉིད་དེ་ལ་འདོད་པའི་འབྲས་བུ་གསར་དུ་ལེན་པ་མེད་པར་ཡེ་ནས་གནས་པའི་དོན་མ་རྟོགས་པར་བླང་དོར་ལ་ཞེན་པ་དེས་རང་སེམས་བྱ་རྩོལ་མེད་པའི་དོན་ལ་བསྒྲིབས་ནས་མི་ཚེ་གསུམ་གྱིི་བར་དུ་སེམས་ཉིད་ཆོས་སྐུའི་རང་ཞལ་དང་མི་འཕྲད་པའི་ཕྱིར་ན། དེ་འདྲའི་རྩོལ་སྒྲུབ་བླང་དོར་ལ་ཞེན་པའི་ལམ་དེ་ཡང་ཀུན་བྱེད་ང་ཡིས་ངེས་པའི་ལུང་དུ་བསྟན་པ་མ་ཡིན་ནོ། །ཞེས་གསུངས་སོ། །དྲུག་པ་ནི། ཀྱེ་སེམས་དཔའ་ཆེན་པོ་ཉོན་ཅིག །གཞན་ཡང་མ་ཧཱ་ཡོ་ག་བས་ཀུན་བྱེད་རྒྱལ་པོ་རིག་པ་བྱང་ཆུབ་སེམས་ཀྱི་ངང་ལས་བྱུང་བའི་ཕྱི་ནང་སྣོད་བཅུད་ཀྱིས་བསྡུས་པའི་ཆོས་འདི་ཉིད། དག་པ་གསུམ་དང་མཉམ་པ་བཞིའི་གཏན་ཚིགས་སོགས་ལ་བརྟེན་ནས། སྣོད་འབྱུང་བ་ལྔ་ཡུམ་ལྔ། བཅུད་ཕུང་པོ་ལྔ་ཡབ་ལྔ། རྒྱུད་རྣམ་ཤེས་ཚོགས་བརྒྱད་ཡེ་ཤེས་ལྔའི་རང་བཞིན་སེམས་དཔའ་སེམས་མར་བལྟ་བ་སོགས་ཡེ་ནས་རྣམ་པར་དག་པ་གདན་གསུམ་ཚང་བའི་ལྷར་བལྟ་ཞིང་དེ་ཉིད་མངོན་དུ་བསྒྲུབ་པའི་ཆེད་དུ་སྟོང་པ་ཆེན་པོ་ལ་སོགས་པའི་ཏིང་ངེ་འཛིན་གསུམ་གྱིས་སྣོད་བཅུད་ཐམས་ཅད་ལྷ་དང་དཀྱིལ་འཁོར་དུ་གསལ་བར་བྱས་ནས། སྐུ་ཉིད་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་བཞི་དང་སྙིང་པོ་འཛབ་ཀྱི་བཟླས་བརྗོད་ལ་བརྩོན་པ་དང་། འོད་ཟེར་འཕྲོ་འདུ་ཡིས་སངས་རྒྱས་ཀྱི་མཛད་པ་བསྒྲུབ་པར་དམིགས་པ་ལ་སོགས་པའི་སྒོ་ནས་ལམ་བསྒྲུབ་པར་བྱེད་པ་སྟེ། དེ་ཡང་མི་འགྱུར་བ་ཡི་ཆོས་ཉིད་སེམས་ཉིད་རང་བྱུང་གི་ཡེ་ཤེས་དེ་ཉིད་གཞི་རྒྱུད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ་གནས་པ་རྒྱུར་བལྟ་ཞིང་། དེ་ཉིད་ལྷ་དང་དཀྱིལ་འཁོར་དུ་སྒྲུབ་པར་བྱེད་པའི་ཐབས་གོང་དུ་བསྟན་པ་དེ་ལྟ་བུའི་སེམས་ཀྱི་དམིགས་པ་མ་ཡེངས་བའི་ཏིང་ངེ་འཛིན་བསྒོམ་པའི་དབང་གིས་མཐར་ཐུག་ཇི་ལྟར་བསྒོམ་པ་དེ་འདྲའི་འབྲས་བུ་རྡོ་རྗེ་འཆང་གི་གོ་འཕང་ཐོབ་པར་སེམས་པ་དེས་ཀྱང་སེམས་ཉིད་འགྱུར་བ་མེད་པའི་རང་བཞིན་ལ་སྔར་བས་ལྷག་པའི་འབྲས་བུ་ཞིག་ཐོབ་ཏུ་ཡོད་པར་ཀུན་བྱེད་ང་ཡིས་ལུང་མ་བསྟན་ཏེ་ཡེ་ནས་སྤང་ཐོབ་དང་བྲལ་བའི་ཕྱིར་རོ། །ཞེས་སོ། །བདུན་པ་ནི། ཀྱེ་སེམས་དཔའ་ཆེན་པོ་ཉོན་ཅིག །ཨ་ནུ་ཡོ་ག་བས་དབྱིངས་སྤྲོས་པ་དང་བྲལ་བ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར་དང་། དེའི་སྣང་ཆ་ཀུན་ཏུ་བཟང་པོ་རང་བཞིན་ལྷུན་གྱིས་གྲུབ་པའི་དཀྱིལ་འཁོར། དེ་གཉིས་དབྱེར་མེད་པ་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་སྟེ་དཀྱིལ་འཁོར་གསུམ་དུ་བསྒོམ་ཞིང་དེ་ཉིད་མངོན་དུ་བྱེད་པའི་ཐབས་སུ་རྩ་རླུང་ཐིག་ལེ་ལ་གནད་དུ་བསྣུན་པའི་མཚན་བཅས་ཀྱི་རྫོགས་རིམ་བསྒོམ་པ་ལ་སོགས་པའི་ཐབས་ལ་བརྩོན་པ་དེ་ཡང་། ཆོས་རྣམས་ཐམས་ཅད་གང་ལས་འབྱུང་བའི་གཞི་མ་དབྱིངས་སྤྲོས་པ་དང་བྲལ་བ་སེམས་ཉིད་རང་བྱུང་གི་ཡེ་ཤེས་ལ་འགྱུར་བ་ཞིག་ཡེ་ནས་མེད་པའི་ཕྱིར་ན། དེ་ལྟ་བུའི་བསྐྱེད་རྫོགས་བསྒོམ་པ་ལ་སོགས་པ་རྩོལ་གྲུབ་ཅན་གྱི་ལམ་དེས་དབྱིངས་རང་བྱུང་གི་ཡེ་ཤེས་དེ་སྔར་བས་ལྷག་པ་ཞིག་ཏུ་འགྱུར་བར་ཀུན་བྱེད་ང་ཡིས་ལུང་མ་བསྟན་ཏོ་ཞེས་དེ་ལྟ་བུའི་འོག་མའི་ཐེག་པ་ཐམས་ཅད་རྒྱུ་འབྲས་རྩོལ་སྒྲུབ་ཀྱི་ལམ་ལ་ཞེན་པས་སེམས་ཉིད་ཇི་བཞིན་པའི་དོན་མ་རྟོགས་པས་ན་རྫོགས་པ་ཆེན་པོ་ལས་གཞན་དུ་གོལ་བའི་གོལ་སར་བསྟན་པ་ཡིན་ཏེ། ཀུན་གསལ་ལས། ལྡེམ་པོའི་ལྟ་བ་འདི་ལྟ་སྟེ། །ཉན་ཐོས་རང་རྒྱལ་སེམས་དཔའ་དང་། །ཀྲྀ་ཡོག་སྡེ་གསུམ་བསྐྱེད་རྫོགས་གཉིས། །བདེན་པ་ཕྱོགས་རེ་ངོས་བཟུང་ནས། །གཟའ་གཏད་བཅས་པའི་ལྟ་བ་བརྒྱད། །བློ་ཡུལ་གཉིས་ཀྱི་མུར་འཛིན་པས། །རང་རིག་ཡེ་ཤེས་ལ་མ་ཟློས། །དེ་བས་ཕྱིན་ཅི་ལོག་པ་ཡིན། །དོན་ལ་ཉམས་དང་གོལ་བའི་ཕྱིར། །ཞེ་འདོད་བློ་ཡི་ལྟ་བ་ཡིན། །ཞེས་གསུངས་པ་ལྟར་རོ། །གསུམ་པ་དེ་ཉིད་དྲང་ལུང་དུ་བསྟན་པས་རྣལ་དོན་མི་འགྱུར་བ་ལ་གསུམ་སྟེ། དབྱིངས་མི་འགྱུར་བའི་དོན་ལ་རྩོལ་སྒྲུབ་བྱ་བར་སྟོན་པའི་ལུང་ཐམས་ཅད་དྲང་དོན་དུ་བསྟན་པ། དཔེ་དོན་རྟགས་གསུམ་གྱིས་མི་འགྱུར་པར་བསྟན་པ། རྩོལ་སྒྲུབ་རྒྱུ་འབྲས་ཀྱིས་སྒྲུབ་པའི་ཐེག་པ་རྣམས་ལ་ངལ་བ་དོན་མེད་པར་བསྟན་པའོ། །དང་པོ་ནི། དེ་ལྟར་སེམས་ཉིད་འགྱུར་བ་མེད་པ་ཆོས་དབྱིངས་བྱ་རྩོལ་དང་བྲལ་བའི་དོན་ལ་རང་དབང་བསྒྱུར་བར་བྱེད་པའི་རྒྱལ་བ་སྐུ་གསུམ་གྱི་སྟོན་པ་རྣམས་ཀྱིས་རང་རང་གི་འཁོར་རྣམས་ལ་སེམས་ཉིད་རང་བྱུང་གི་ཡེ་ཤེས་རྒྱུ་འབྲས་རྩོལ་སྒྲུབ་ལ་མ་ལྟོས་པར་གདོད་ནས་ཡེ་སངས་རྒྱས་པའི་དོན་ཐད་ཀར་མ་བསྟན་པར་གདུལ་བྱ་སོ་སོའི་བློ་དང་འཚམས་པར། ཞིག་གནས་ཚོལ་བའི་ཐབས་ཐེག་པ་རང་རང་གི་སྐབས་ནས་གསུངས་པའི་ཏིང་ངེ་འཛིན་བསྒོམ་པར་བསྟན་པ་སོགས་རྒྱུ་འབྲས་རྩོལ་སྒྲུབ་ཀྱི་སྒོ་ནས་ལམ་ལ་རིམ་གྱིས་བགྲོད་དགོས་པར་བསྟན་པའི་རྒྱུ་མཚན་དེས་ན། འོག་མའི་ཐེག་པ་ཐམས་ཅད་ངེས་དོན་རྫོགས་པ་ཆེན་པོའི་ལམ་ལས་གཞན་དུ་གདུལ་བྱ་རྣམས་ལམ་ལ་རིམ་གྱིས་འདྲེན་པར་བྱེད་པའི་དྲང་དོན་གྱི་ལུང་ཙམ་དུ་བསྟན་པ་ཡིན་ལ། དེར་མ་ཟད་རྫོགས་ཆེན་རང་གི་སྐབས་སུ་ཡང་ཚིག་དང་ཡི་གེས་བརྗོད་པ་ཐམས་ཅད་དྲང་བའི་ལུང་དུ་བཞག་ནས། ངེས་པའི་དོན་མཐར་ཐུག་པ་ནི་བྱང་ཆུབ་སེམས་ཀྱི་ཆོས་ཉིད་སྨྲ་བསམ་བརྗོད་པ་ཐམས་ཅད་བྲལ་བའི་རང་བཞིན་ཁོ་ན་ཡིན་པར་གསུངས་ཏེ། མདོ་བཅུ་ལས། རིམ་པ་དགུ་ཡི་དོན་བདུན་ནི། ཚིག་དང་ཡི་གེ་ཡོད་བསྟན་པས། །དྲང་བའི་ལུང་ཞེས་ང་ཡིས་བཤད། །ངེས་པའི་ལུང་གི་དོན་འདི་ནི། །བྱང་ཆུབ་སེམས་ཀྱི་ཆོས་ཉིད་ལ། །རྡོ་རྗེ་སེམས་དཔའ་ང་ཡིས་བཤད། །ཡང་དག་ངེས་པ་འདི་ཡིན་ཞེས། །ཚིག་དང་ཡི་གེས་མཚོན་དུ་མེད། །སྒྲ་དང་ཐ་སྙད་རིལ་ལས་འདས། །སྒྲོ་དང་སྐུར་བ་ཀུན་དང་བྲལ། །ཀུན་ལས་འདས་པའི་དོན་འདི་ལ། །འདི་ཉིད་མཚོན་དུ་མེད་པས་ན། །ངེས་པའི་ལུང་ཞེས་མིང་ཙམ་བཏགས། །ངེས་པར་གདགས་སུ་ཡོད་མ་ཡིན། །ཞེས་གསུངས་སོ། །དེ་ལ་ཐེག་རིམ་དགུ་པོ་དོན་བདུན་དུ་བསྡུས་ཏེ་བསྟན་པ་ནི། ཉན་རང་། བྱང་སེམས། ཀྲྀ་ཡ། ཡོ་ག །མ་ཧཱ། ཨ་ནུ། ཨ་ཏི་བདུན་དུ་གསུངས་སོ། །གཉིས་པ་ནི། དེ་ལྟར་ཐེག་པ་འོག་མའི་ལམ་དུ་རྒྱུ་འབྲས་རྩོལ་སྒྲུབ་བྱེད་པར་ལུང་བསྟན་པ་དེ་བཞིན་དུ་ཆོས་དབྱིངས་བྱང་ཆུབ་སེམས་ཀྱི་དཔེ་དོན་རྟགས་གསུམ་ལ་བཅོས་ཤིང་བསྒྱུར་བས་འགྱུར་བ་མེད་དེ། འདི་ལྟར་ཆོས་ཉིད་མཚོན་པའི་དཔེ་ནམ་མཁའ་ལ་རྒྱུ་རྐྱེན་འདུས་བྱས་ཀྱི་ཆོས་སུ་གྲུབ་པ་གང་ཡང་མེད་པར་ཡེ་སྟོང་འདུས་མ་བྱས་པའི་རང་བཞིན་ཡིན་པས་ངོ་བོ་འགྱུར་བ་མེད་པ་དེ་ཡི་ཕྱིར་ན། རང་ཉིད་ཡེ་ནས་མ་གྲུབ་པའི་ནམ་མཁའ་དེ་ཡིས་ནམ་མཁའ་རང་ཉིད་རྩོལ་སྒྲུབ་ཀྱིས་བཅོས་ཤིང་བསྒྱུར་བས་སྔར་དང་མི་འདྲ་བའི་ཆོས་སུ་འགྲུབ་པར་མི་འགྱུར་ཏེ་བྱ་བྱེད་གཉིས་ཀ་རང་བཞིན་མ་གྲུབ་པའི་ཕྱིར་རོ། །དཔེ་དེེ་བཞིན་དུ་དོན་ཆོས་ཉིད་སྤྲོས་པ་མེད་པའི་ཡེ་ཤེས་ལ་འགྱུར་བ་མེད་པ་དེ་ཡི་ཕྱིར་ན། རྒྱུ་འབྲས་རྩོལ་སྒྲུབ་ལ་སོགས་པའི་ངོ་བོར་སྣང་བ་རང་ཡང་ཆོས་ཉིད་ཀྱི་རང་བཞིན་ཡིན་པས་ཆོས་དབྱིངས་གདོད་ནས་སྐྱེ་བ་མེད་པ་དེ་ཉིད་ཀྱིས་ཆོས་ཉིད་དེ་གསར་དུ་རྩོལ་སྒྲུབ་ཀྱིས་འགྲུབ་པར་མི་འགྱུར་ལ། དེ་ལྟར་ཆོས་ཉིད་བྱང་ཆུབ་སེམས་ཀྱི་ངོ་བོ་ལ་འགྱུར་བ་མེད་པ་དེ་བཞིན་དུ་དེའི་རྩལ་ལས་ཤར་བའི་རྟགས་སེམས་ཉིད་ལ་འགྱུར་བ་མེད་པ་དེ་ཡི་ཕྱིར་ན། སེམས་ཉིད་རང་གིས་སེམས་ཉིད་རང་ལ་རྩོལ་བས་འགྲུབ་པར་མི་འགྱུར་ཏེ་བསྒྲུབ་བྱ་སྒྲུབ་བྱེད་ཐ་དད་དུ་མེད་ཅིང་ངོ་བོ་གདོད་ནས་སྐྱེ་བ་མེད་པའི་ཕྱིར་རོ། །གསུམ་པ་ནི། དེ་ལྟར་ཐེག་པ་འོག་མ་པ་རྣམས་ཀྱིས་ཆོས་ཉིད་འདུས་མ་བྱས་པ་མི་འགྱུར་བའི་དོན་ལ་སྤོང་འགོགས་སྦྱོང་བསྒྱུར་གྱི་ཐབས་ཀྱིས་བསྒྲུབ་ཅིང་བསྒྱུར་བར་བྱེད་པའི་ཏིང་ངེ་འཛིན་བསྒོམ་པར་བྱེད་པ་ལ་སོགས་པ་ནི། གྲངས་མེད་གསུམ་ལྟ་བུའི་དུས་དང་འབྲས་བུ་ཐོབ་པར་འདུན་པའི་སྨོན་ལམ་སོགས་ལ་རེ་བ་འཇོག་པ་ཡི་ལམ་ཡིན་པས། དེ་ལྟར་དུས་ཡུན་རིང་པོ་ལ་ལྟོས་པས་དེའི་བར་དུ་ཏིང་ངེ་འཛིན་སྒོམ་པ་དང་བླང་དོར་རྩོལ་སྒྲུབ་ཀྱི་ངལ་བས་ཚི་ཆད་པར་འགྱུར་བ་ལས་སེམས་ཉིད་ཀྱི་དོན་ལ་འགྱུར་བ་གང་ཡང་མེད་པའི་ཕྱིར་ན། རྒྱུ་འབྲས་རྩོལ་སྒྲུབ་ཅན་གྱི་ཐེག་པ་དེ་ཐམས་ཅད་དྲང་དོན་དགོངས་པ་ཅན་གྱི་ལུང་དུ་བསྟན་པ་ལས། ཀུན་བྱེད་རྒྱལ་པོ་ང་ཡིས་ངེས་དོན་བླ་ན་མེད་པའི་ལུང་དུ་དེ་ལྟར་རྒྱུ་འབྲས་རྩོལ་སྒྲུབ་ཀྱི་ཆོས་གང་ཡང་བསྟན་པ་མེད་དོ། །ཞེས་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་བྱ་མེད་རྫོགས་པ་འགྱུར་མེད་བཙལ་བས་མི་རྙེད་པའི་ལེའུ་སྟེ་རྩ་བརྒྱད་པའི་འགྲེལ་པའོ།། ༈ །།དོན་དགུ་པ་སེམས་ཉིད་གཞི་བཞག་ཆེན་པོ་རྒྱུ་འབྲས་བྱ་རྩོལ་ལས་འདས་པས་མ་བཅོས་རྣལ་དུ་བཞག་པའི་ལེའུ་ཉེར་དགུ་པ་ལ་གཉིས་ཏེ། བསྟན་པ་དང་། བཤད་པའོ། །དང་པོ་ནི། དེ་ལྟར་རྒྱུ་འབྲས་རྩོལ་སྒྲུབ་མི་དགོས་པའི་རྒྱུ་མཚན་སེམས་ཉིད་འགྱུར་བ་མེད་པའི་རང་བཞིན་དུ་བསྟན་པ་དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་དེས་སེམས་ཉིད་ཕུན་སུམ་ཚོགས་པ་ལྔའི་རང་བཞིན་དུ་སྣང་བ་ཐམས་ཅད་མ་བཅོས་རྣལ་དུ་བཞག་པར་བསྟན་པ་ཡི་མན་ངག་ཟབ་མོ་འདི་གསུངས་སོ། །གཉིས་པ་རྒྱས་པར་བཤད་པ་ལ་གསུམ་སྟེ། ཆོས་ཀུན་ཡེ་ནས་རྣལ་བཞག་གཅིག་ཏུ་མདོར་བསྟན། དེའི་རང་བཞིན་བཤད་ཚུལ་ལྔ་རྒྱས་པར་བཤད། རྣལ་བཞག་གཅིག་ཏུ་དོན་བསྡུ་བའོ། །དང་པོ་ནི། ཀྱེེ་སེམས་དཔའ་ཆེན་པོ་ཉོན་ཅིག །སེམས་ཉིད་རང་བྱུང་གི་ཡེ་ཤེས་སྐུ་གསུམ་རྒྱལ་བའི་སྟོན་པར་སྣང་བ་ང་ནི་འཁོར་འདས་ཀྱི་ཆོས་རྣམས་ཀུན་གྱི་བྱེད་པ་པོ་གཞི་དབྱིངས་འཕོ་འགྱུར་དང་བྲལ་བ་བྱང་ཆུབ་ཀྱི་སེམས་ཡིན་པས་ན། ཇི་ལྟར་སྣང་བའི་ཆོས་རྣམས་ཐམས་ཅད་ང་ཡི་རང་བཞིན་ཡིན་ཏེ་དེ་ལས་གཞན་དུ་མེད་ལ། དེས་ན་གཞི་ཆོས་ཉིད་བྱང་ཆུབ་ཀྱི་སེམས་ལ་འགྱུར་བ་མེད་པའི་ཕྱིར་ན་ཀུན་བྱེད་བྱང་ཆུབ་ཀྱི་སེམས་ང་ཡི་རང་བཞིན་དུ་གྱུར་པའི་ཆོས་ཐམས་ཅད་ནི་ཡེ་ནས་མ་བཅོས་རྣལ་དུ་བཞག་པའམ་བཅོས་བསྒྱུར་ཐམས་ཅད་དང་བྲལ་བ་ཡིན་པས་དགགས་སྒྲུབ་བླང་དུ་བྱ་བ་གང་ཡང་མེད་དོ། །ཞེས་པའོ། །གཉིས་པ་ལ་ལྔ་སྟེ། ལོ་རྒྱུས། རྩ་བ། ཡོ་ག །དགོས་ཆེད། ཚིག་གི་དོན་གྱི་བཤད་ལུགས་སོ། །དང་པོ་ལ་གཉིས་ཏེ། ཕུན་སུམ་ཚོགས་པ་ལྔའི་རང་བཞིན་སྤྱིར་བསྟན་པ། སྟོན་པ། གནས། དུས། ཆོས་བཞི་བྱེ་བྲག་ཏུ་བཤད་པའོ། །དང་པོ་ནི། དེ་ལྟར་ཀུན་བྱེད་བྱང་ཆུབ་སེམས་ཀྱིས་བྱས་པའི་ཆོས་གང་ཞིག་ཡེ་ནས་མ་བཅོས་རྣལ་དུ་བཞག་པ་ཡིན་པས་བཅོས་བསྒྱུར་སྤང་བླང་ལས་འདས་པར་བསྟན་པ་དེ་གང་ཞེ་ན། འདི་ལྟར་ཀུན་བྱེད་ང་ཡི་རང་བཞིན་དུ་གྱུར་པའི་ཆོས་རྒྱུ་འབྲས་བྱ་རྩོལ་དང་བྲལ་བར་བསྟན་པ་དེ་ནི་རྣམ་པ་ལྔ་རུ་ཤེས་པར་བྱ་སྟེ། གང་ཞེ་ན་ང་ལས་མངོན་དུ་ཕྱུང་བའི་སྐུ་གསུམ་གྱི་སྟོན་པ་དང་། དེ་དག་གིས་གསུངས་པའི་ཆོས་ཐེག་གསུམ་གྱིས་བསྡུས་པའི་བསྟན་པ་དང་། སྐུ་གསུམ་གྱི་སྟོན་པའི་འཁོར་རྣམས་དང་། སྟོན་འཁོར་བསྟན་པ་གསུམ་པོ་གང་དུ་ཚོགས་པའི་གནས་དང་། ཆོས་སྐུའི་དུས་གཞི་རྫོགས་འཕོ་འགྱུར་དང་བྲལ་བ་ལ་སོགས་པ་སྐུ་གསུམ་སོ་སོའི་ཕུན་སུམ་ཚོགས་པའི་དུས་དང་རྣམ་པ་ལྔ་པོ་དེ་ཡི་རང་བཞིན་ཡེ་ནས་ཆོས་ཉིད་བྱང་ཆུབ་སེམས་ཀྱི་ངང་ལས་གཡོ་བ་མེད་པར་ཆོས་ཉིད་ཇི་བཞིན་པར་གནས་པ་ཡིན་པས་བཅོས་བསྒྱུར་དང་སྤང་བླང་གང་ཡང་མི་དགོས་པར་མ་བཅོས་རྣལ་དུ་བཞག་པར་བྱ་བ་ཡིན་ནོ། །ཞེས་པ་སྟེ། བྲམ་ཟེ་རྒྱས་པའི་རྒྱུད་ལས། ཆོས་ཀྱི་སྐུ་ནི་བྱང་ཆུབ་སེམས། །བྱང་ཆུབ་སེམས་ལས་ཆོས་ཀྱི་སྐུ། །རྡུལ་ཙམ་སུས་ཀྱང་བཅོས་པ་མེད། །དེས་ན་སེམས་ལ་སངས་རྒྱས་མེད། །ལོངས་སྤྱོད་རྫོགས་སྐུ་བྱང་ཆུབ་སེམས། །བྱང་ཆུབ་སེམས་ལ་ལོངས་སྤྱོད་རྫོགས། །སེམས་ལས་བྱུང་བའི་གཟུགས་རྣམས་ལ། །ལོངས་སྤྱོད་རྫོགས་པས་སྐུ་གཞན་མེད། །སྤྲུལ་པའི་སྐུ་ནི་བྱང་ཆུབ་སེམས། །བྱང་ཆུབ་སེམས་ནི་སྤྲུལ་པའི་ལས། །འགྲོ་བའི་དོན་མཛད་གཞན་ན་མེད། །དུས་གསུམ་སངས་རྒྱས་ཐམས་ཅད་ཀྱང་། །བྱང་ཆུབ་སེམས་ལས་གཞན་མེད་དེ། །སྔ་རབས་འདས་པའི་སངས་རྒྱས་རྣམས། །རང་སེམས་མ་བཅོས་སྔར་མཐོང་རྟོགས། །ད་ལྟར་བཞུགས་པའི་སངས་རྒྱས་རྣམས། །མ་བཅོས་པ་ཡི་རང་བཞིན་ཏེ། །མ་བཅོས་ཇི་བཞིན་རྟོགས་གྱུར་ནས། །ད་ལྟར་འགྲོ་བའི་དོན་ཡང་མཛད། །སླད་ནས་འབྱོན་པའི་སངས་རྒྱས་རྣམས། །རང་བྱུང་སེམས་ཉིད་འདི་ལ་ནི། །སྔ་བས་འཆོས་པས་ལུང་མ་བསྟན། །ད་ལྟར་ཏིང་འཛིན་སེམས་མི་བཅོས། །མ་བཅོས་རྣལ་དུ་ཞུགས་ནས་བྱོན། །ཞེས་གསུངས་པ་ལྟར་རོ། །གཉིས་པ་བྱེ་བྲག་ཏུ་བཤད་པ་ལ་བཞི་ལས། དང་པོ་ནི། དེ་ལ་ཕུན་སུམ་ཚོགས་པ་ལྔ་ལས་དང་པོ་སྐུ་གསུམ་གྱི་སྟོན་པའི་རང་བཞིན་མ་བཅོས་རྣལ་དུ་བཞག་པའི་ཚུལ་ནི་འདི་ལྟར་བཞག་པར་བྱ་སྟེ། ཆོས་སྐུ་མ་བཅོས་རྣལ་དུ་བཞག་པའི་ཚུལ་ནི་ཆོས་སྐུ་ཞེས་བྱ་བ་ནི་རང་གི་རིག་པ་བྱང་ཆུབ་སེམས་ཀྱི་རང་བཞིན་ཡེ་གྲོལ་བློ་ལས་འདས་པ། རྒྱ་གར་ཡང་མ་ཆད། ཕྱོགས་གང་དུ་མ་ལྷུང་བའི་ཆོས་ཉིད་སྤྲོས་པ་དང་བྲལ་བ་ཀུན་བྱེད་ངའི་རང་བཞིན་འདི་ཉིད་ཡིན་པས། དེ་ལ་བཅོས་བསྒྱུར་སྤང་བླང་གང་ཡང་མེད་པར་རང་བྱུང་འདུས་མ་བྱས་པའི་བདག་ཉིད་ཡིན་པའི་ཕྱིར་ན་མ་བཅོས་རྣལ་དུ་བཞག་པ་ཡིན་ལ། ལོངས་སྤྱོད་རྫོགས་པ་མ་བཅོས་རྣལ་དུ་བཞག་པའི་ཚུལ་ནི། སྙིང་པོ་བྱང་ཆུབ་སེམས་ཀྱི་ངོོ་བོ་འོད་གསལ་དབྱིངས་ཀྱི་སྣང་ཆ་མ་འགགས་པ་སྣང་སྲིད་སྣོད་བཅུད་དུ་ཤར་བ་འདི་རྣམས་ཡིན་ཞིང་། དེ་ཡང་རྒྱུ་རང་བྱུང་ཡེ་ཤེས་ཀྱི་རྩལ་ལས་རང་བྱུང་དུ་ཤར་བ་ཡིན་ཕྱིར་ངོ་བོ་ཅིར་ཡང་གྲུབ་པ་མེད་པ་ཡེ་སྟོང་འདུས་མ་བྱས་པའི་རང་བཞིན་ཡིན་པས་སྤང་བླང་དགག་བསྒྲུབ་གང་ཡང་མི་བྱེད་པར་མ་བཅོས་རང་བབ་ཀྱི་ངང་ལ་རྣལ་དུ་བཞག་པར་བྱ་བ་ལས་ངན་སོང་གསུམ་གྱི་སྡུག་བསྔལ་ལྟ་བུ་ཡང་སྤོང་འདོད་ཀྱི་བློས་སྤང་བླང་བྱེད་མི་དགོས་པར་གསུངས་ཏེ། དེ་ཉིད་ལས། བཀྲེས་སྐོམ་ཚ་གྲང་བླུན་ལྐུགས་ཆོས་ཉིད་ལ། །སྐུ་གསུམ་འཁོར་དང་འགྲོས་པའི་ཆོ་ག་དྲུག །རང་བྱུང་ཡིན་པས་བཙལ་ཞིང་བསྒྲུབ་མི་དགོས། །རྒྱུ་ཉིད་རང་བྱུང་ཡེ་ཤེས་ཡིན་པའི་ཕྱིར། །ལས་ཀྱི་རྐྱེན་གྱི་དབང་དུ་དེ་མི་འགྲོ། །རང་བྱུང་ཡེ་ཤེས་ཀུན་དང་མཚུངས་མེད་པས། །རྒྱུ་རྐྱེན་ལས་ཀྱིས་རང་བྱུང་དེ་མི་འགྲུབ། །ཅེས་གསུངས་སོ། །དེས་ན་ལོངས་སྤྱོད་རྫོགས་སྐུ་དེ་ཡང་ཀུན་བྱེད་ང་ཡི་རང་བཞིན་དུ་མ་བཅོས་རྣལ་དུ་བཞག་པ་ཡིན་ལ། སྤྲུལ་པ་སྐུ་ཡི་རང་བཞིན་མ་བཅོས་རྣལ་དུ་བཞག་པ་ནི་བྱང་ཆུབ་སེམས་ཀྱི་རྩལ་སྣང་ཐུགས་རྗེ་གོ་མ་འགགས་པ་ཤར་གྲོལ་རིས་མེད་རང་ཡན་རྗེས་མེད་ཀྱི་རང་བཞིན་འདི་ལ་དགགས་སྒྲུབ་སྤྲོ་བསྡུ་མེད་པར་མ་བཅོས་རང་སོར་བཞག་པ་སྟེ། དེ་ཡང་སྙིང་པོ་བྱང་ཆུབ་ཀྱི་སེམས་འདི་ལས་གཞན་དུ་སྤྲུལ་པའི་སྐུ་ཞིག་མེད་པས་དོན་ལ་ཀུན་བྱེད་ང་ཡི་རང་བཞིན་མ་བཅོས་རྣལ་དུ་བཞག་པ་སྟེ་དེ་ལས་གཞན་དུ་མེད་ལ། དེས་ན་བསྟན་པ་གང་ནས་བྱུང་བའི་ཁུངས་ལོ་རྒྱུས་དོན་གྱིིས་བཤད་པའི་ནང་ནས་སྐུ་གསུམ་གྱི་སྟོན་པ་ཞིག་བསྟན་པ་དེ་ཉིད། སེམས་ཉིད་རང་བྱུང་གི་ཡེ་ཤེས་ཡེ་ནས་འཕོ་འགྱུར་མེད་པ་འདི་ཉིད་ལས་གཞན་དུ་མེད་པས། དེ་ལས་གཞན་པའི་སྐུ་གསུམ་གྱི་གོ་འཕང་ཞིག་ཐོབ་འདོད་ཀྱི་རེ་རྩོལ་མི་བྱེད་པར་སེམས་ཉིད་རང་བྱུང་གི་ཡེ་ཤེས་འདི་ཡི་ངང་དུ་མ་བཅོས་རྣལ་དུ་བཞག་པར་གསུངས་པ་ཡིན་ཏེ། འཕགས་ལམ་བཀོད་པའི་རྒྱུད་ལས། ཕྱོགས་བཅུ་དུས་གསུམ་མ་ལུས་པའི། །སངས་རྒྱས་ཇི་སྙེད་བཞུགས་པ་ཀུན། །ཀུན་རིག་ང་ཡི་སྤྲུལ་པ་ལས། །གཞན་ན་སངས་རྒྱས་རྡུལ་ཙམ་མེད། །ཕྱི་དང་ནང་དུ་སྣང་བ་ནི། །ཀུན་རིག་ཡིན་པར་ཤེས་པར་བྱ། །རྒྱལ་བའི་སྐུ་ཡི་སྤྲུལ་པ་ལས། །མར་མེ་མཛད་ལ་སོགས་པ་ཡི། །སངས་རྒྱས་རབ་བདུན་བྱུང་བ་ནི། །འདས་པའི་དུས་ཀྱང་ང་ཉིད་དོ། །རྒྱལ་བའི་གསུང་གི་སྤྲུལ་པ་ལས། །བསྐལ་བཟང་བྱང་ཆུབ་སྟོང་ལ་སོགས། །ཀུན་རིག་སྟོན་པ་ང་ཡིན་ནོ། །བདེ་གཤེགས་ཐུགས་ཀྱི་སྤྲུལ་པ་ལས། །ཞི་ཁྲོ་སངས་རྒྱས་ལ་སོགས་པ། །རིགས་ལྔ་ཡབ་ཡུམ་ང་ཉིད་དོ། །ང་མེད་པ་ཡི་སྔོལ་རོལ་ན། །སངས་རྒྱས་བྱ་བའི་མིང་ཡང་མེད། །སེམས་ཅན་བྱ་བའི་སྐྱེ་གནས་མེད། །ཐམས་ཅད་ང་ཡི་སྤྲུལ་པ་ཡིན། །ང་ཉིད་གཞི་ཡི་སངས་རྒྱས་སོ། །ཞེས་ལྷུན་གྲུབ་གཞི་ཡི་སངས་རྒྱས་གཅིག་པོ་འདིའི་རོལ་བར་སྣང་སྲིད་འཁོར་འདས་ཐམས་ཅད་ཤར་བ་ཡིན་པར་གསུངས་པའི་ཕྱིར་རོ། །གཉིས་པ་ནི། དེ་ལྟ་བུའི་སྟོན་པ་སྐུ་གསུམ་པོ་དེ་གང་དུ་བཞུགས་པའི་གནས་ཕུན་སུམ་ཚོགས་པ་ནི་ཆོས་སྐུའི་གནས་ཆོས་དབྱིངས་དོན་གྱི་འོག་མིན་ཆེན་པོ་དང་། ལོངས་སྐུའི་གནས་འོག་མིན་སྟུག་པོ་བཀོད་པ་ལྔ་ལྡན་རིགས་ལྔའི་ཞིང་དང་། སྤྲུལ་སྐུའི་གནས་རྒྱ་གར་རྡོ་རྗེ་གདན་སོགས་མ་ངེས་སྣ་ཚོགས་པ་རྣམས་ཏེ་མདོར་ན་སྐུ་གསུམ་པོ་གང་ན་གནས་ཤིང་བཞུགས་པའི་གནས་སུ་གྱུར་པ་དེ་ལ་གནས་ཕུན་སུམ་ཚོགས་པ་ཞེས་གསུང་པ་དེ་ཡང་གཞན་ན་མེད་པར་ཀུན་བྱེད་བྱང་ཆུབ་ཀྱི་སེམས་ཉིད་ཀྱི་རང་བཞིན་ཡིན་པས་ན་གཞན་དུ་ཚོལ་བའི་རྩོལ་སྒྲུབ་གང་ཡང་མི་བྱེད་པར་མ་བཅོས་རྣལ་དུ་བཞག་པ་ཡིན་ནོ་ཞེས་གསུངས་སོ། །གསུམ་པ་ནི། སྟོན་འཁོར་བསྟན་པ་རྣམས་ནམ་གྱི་ཚེ་ཚོགས་པའི་དུས་ཕུན་སུམ་ཚོགས་པ་ནི་སྔ་མ་འདས་པའི་དུས་དང་ཕྱི་མ་མ་འོངས་པའི་དུས་ལ་སོགས་པ་ཕུན་སུམ་ཚོགས་པ་རྣམས་གང་གི་ཚེ་ཚོགས་པའི་སྐབས་དེ་ལ་དུས་ཕུན་སུམ་ཚོགས་པ་ཞེས་གསུངས་ཀྱང་། རིག་པ་བྱང་ཆུབ་ཀྱི་སེམས་མ་བཅོས་རྣལ་དུ་བཞག་པའི་དུས་སུ་རྣམ་པར་རྟོགས་པས་བརྟགས་པའི་དུས་གསུམ་གྱི་དབྱེ་བ་མེད་པར་འོད་གསལ་བསམ་གྱིས་མི་ཁྱབ་པའི་དུས་སམ། དུས་བཞི་མཉམ་པ་ཉིད་དུ་གནས་པ་དེ་ཉིད་ཀྱི་ངང་དུ་རྒྱལ་བ་སྐུ་གསུམ་གྱི་སྟོན་འཁོར་ཐམས་ཅད་ཡེ་ནས་ཚོགས་ཤིང་འདུ་འབྲལ་མེད་པར་གནས་པ་ཡིན་པས་ན་དེ་ཡང་མ་བཅོས་རྣལ་དུ་བཞག་པའི་རང་བཞིན་དུ་བསྟན་པ་ཡིན་ནོ། །བཞི་པ་ནི། ཀྱེ་སེམས་དཔའ་ཆེན་པོ་ཉོན་ཅིག །དེ་ལ་བསྟན་པ་དམ་པའི་ཆོས་ཞེས་བྱ་བ་ནི། སྐུ་གསུམ་གྱི་ཕུན་སུམ་ཚོགས་པ་རྣམ་པ་ལྔ་པོ་དེ་ལ་རེ་དོགས་དང་བྱ་རྩོལ་གང་ཡང་མི་བྱ་བར་མ་བཅོས་རྣལ་དུ་བཞག་པ་འདི་ཉིད་ཡིན་ཏེ། ཅིའི་ཕྱིར་ན་ཆོས་ཞེས་པའི་སྒྲའི་འཇུག་ཡུལ་རྣམ་པ་བཅུར་གསུངས་པ་ལས། གསུང་རབ་ལུང་གི་ཆོས་ཀྱི་བརྗོད་བྱ་རྟོགས་པའི་ཆོས་མཐར་ཐུག་པ་མྱ་ངན་ལས་འདས་པ་ཇི་བཞིན་པ་ནི་ཆོས་ཐམས་ཅད་ཀྱི་གནས་ལུགས་སྙིང་པོ་བྱང་ཆུབ་སེམས་ཀྱི་རང་བཞིན་མ་བཅོས་པ་འདི་ཉིད་ཡིན་པའི་ཕྱིར་ན། དེ་ལས་ལྷག་པའི་ཆོས་ཞེས་བྱ་བ་ཞིག་གཞན་དུ་ཡོད་པའམ་གྲུབ་པ་མེད་པའི་ཕྱིར་ཏེ། དེས་ན་བསྟན་པ་ཡང་མ་བཅོས་རྣལ་དུ་བཞག་པ་ཡིན་པར་གསུངས་སོ། །དེ་ལྟ་བུའི་ཕུན་སུམ་ཚོགས་པ་ལྔ་པོ་དེ་ཉིད་སེམས་ཉིད་རང་བྱུང་གི་ཡེ་ཤེས་གཅིག་གི་རོལ་པ་ལས་གཞན་དུ་མེད་པའི་ཕྱིར་ན་ད་ལྟ་སེམས་ཅན་རྣམས་ཀྱིས་དབང་པོ་སྒོ་ལྔར་སྣང་བ་འདི་ཡང་ཕུན་སུམ་ཚོགས་པ་ལྔའི་རང་བཞིན་ཡིན་པར་བསྟན་ཏེ། ལ་ཟློ་གསང་བའི་འཁོར་ལོ་ལས། མིག་གི་དབང་པོས་གཟུགས་རྣམས་ཅིར་ཡང་སྟོན། །ཀུན་བྱེད་རྒྱལ་པོའི་སྐུ་རུ་བསྟན་པ་ཡིིན། །དེ་ལས་གཞན་པའི་སྟོན་པ་དམིགས་སུ་མེད། །དེ་ལས་སྟོན་པ་རང་ལ་ཚང་ཞེས་གསུངས། །ལྕེས་ནི་སྣང་སྲིད་ཚིགས་དང་ཡི་གེར་བརྗོད། །སྒྲ་རྣམས་བསྒྲགས་པ་སྟོན་པའི་གསུངས་ཡིན་པས། །བསྟན་པའི་ཆོས་ཞེས་ཀུན་ལ་གྲགས་པ་ཡིན། །རྣ་བས་སྒྲ་རྣམས་ཇི་ལྟར་གསན་པ་ཡང་། །ཀུན་བྱེད་རྒྱལ་པོའི་སྒྲ་བསྒྲགས་གསན་པ་ལས། །དེ་ལས་གཞན་པའི་སྒྲ་ནི་ཐོས་པ་མེད། །དེ་ཐོས་འཁོར་གྱི་དམ་པར་བྱུང་བ་ཡིན། །དྲི་རྣམས་སྣ་ཚོགས་ཇི་ལྟར་བྱུང་བ་ཡང་། །སྣ་ཡི་དབང་པོ་གཅིག་ལས་མ་འདས་པས། །དབྱེར་མེད་དུས་གསུམ་གཅིག་ཏུ་བསྟན་པ་ཡིན། །མིག་དང་རྣ་བ་སྣ་དང་ལྕེ་ལ་སོགས། །ཐམས་ཅད་ལུས་ལ་གནས་པས་གནས་སུ་བསྟན། །ལུས་གནས་པ་ལ་ཀུན་ཀྱང་གནས་པ་ལས། །ལུས་མི་གནས་ལ་སུ་ཡང་གནས་པ་མེད། །དེ་བས་ལུས་འདི་གནས་སུ་བསྟན་པ་ཡིན། །ཅེས་གསུངས་པ་དེས་ན་སྒོ་ལྔའི་ཡུལ་དུ་སྣང་བའི་ཆོས་འདི་དག་ཐམས་ཅད་ཕུན་སུམ་ཚོགས་པ་ལྔའི་རང་བཞིན་ཡིན་པས་ན། ཕུན་སུམ་ཚོགས་པའི་ཆོས་ཐམས་ཅད་མ་བཅོས་རྣལ་དུ་འཇོག་པར་གསུངས་པ་བཞིན་དུ་སྣང་གྲགས་དྲན་རིག་གི་ཆོས་འདི་རྣམས་ཐམས་ཅད་ལ་སྤང་བླང་དང་དགག་སྒྲུབ་ཅི་ཡང་མི་བྱེད་པར་གང་ཤར་ཐམས་ཅད་མ་བཅོས་རང་བབ་ཀྱི་ངང་དུ་བཞག་པར་གསུངས་སོ། །གཉིས་པ་རྩ་བ་དོན་གྱི་བཤད་ལུགས་ལ་གསུམ་སྟེ། ཆོས་ཐམས་ཅད་ཕུན་སུམ་ཚོགས་ལྔར་བསྟན་ཚུལ། དེ་ཉིད་སེམས་ཉིད་རྣལ་བཞག་གཅིག་ཏུ་འདུས་པས་གྲོལ་ཚུལ། གྲོལ་བ་དེ་ཉིད་རྟོགས་པའི་རྣལ་འབྱོར་བས་བསྐྱེད་རྫོགས་རྩོལ་སྒྲུབ་ཀྱི་དོན་ལ་བརྟེན་མི་དགོས་པར་གདམས་པའོ། །དང་པོ་ནི། ཀྱེ་སེམས་དཔའ་ཆེན་པོ་ཉོན་ཅིག །འདི་ལྟར་རྩ་བའི་དོན་གྱི་བཤད་པ་ནི་གོང་དུ་བསྟན་པའི་ཕུན་སུམ་ཚོགས་པར་ཏེ་ཕུན་སུམ་ཚོགས་པ་ལྔ་པོ་དེར་མ་འདུས་པའི་འཁོར་འདས་ཀྱི་ཆོས་ནི་གཅིག་ཀྱང་ཡོད་པར་མ་གསུངས་པ་དེས་ན། འདིར་ཆོས་ཐམས་ཅད་རྩ་བ་ཕུན་སུམ་ཚོགས་པ་ལྔར་བསྡུས་ནས་བསྟན་པ་ཡིན་ལ། དེ་བཞིན་དུ་སྣང་སྲིད་ཀྱི་ཆོས་ཐམས་ཅད་སྐུ་གསུམ་གྱི་རང་བཞིན་མིན་པ་གཅིག་ཀྱང་མེད་པས་སྣང་སྲིད་འཁོར་འདས་ཐམས་ཅད་སྟོན་པ་གཅིག་པུའི་ཁོངས་སུ་འདུས་པ་ལྟར་གཞན་བཞི་ལ་ཡང་ཤེས་པར་བྱ་ཞིང་། དེ་དག་ཐམས་ཅད་ཀུན་བྱེད་བྱང་ཆུབ་ཀྱི་སེམས་གཅིག་གི་རང་བཞིན་དུ་འདུས་པས་མདོར་ན་ཆོས་ཐམས་ཅད་རྩ་བ་བྱང་ཆུབ་ཀྱི་སེམས་གཅིག་གི་རང་བཞིན་དུ་བསྡུས་ཏེ་བསྟན་པས་ཀྱང་རྩ་བའི་དོན་གྱི་བཤད་པ་ཞེས་གསུངས་ཏེ། བྲམ་ཟེ་རྒྱས་པའི་རྒྱུད་ལས། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་དང་། ཁམས་གསུམ་གྱི་སེམས་ཅན་ཐམས་ཅད་ཀྱི་རྩ་བ་ནི་ཀུན་ཏུ་བཟང་མོའི་ཐུགས་རང་བྱུང་གི་ཡེ་ཤེས་སོ། །ཞེས་གསུངས་པ་ལྟར་རོ། །གཉིས་པ་ནི། ཀྱེ། ཞེས་འདུས་པའི་འཁོར་ཚོགས་རྣམས་ལ་འབོད་ཚིག་དང་བཅས་པས་འདི་ལྟར་ཕུན་སུམ་ཚོགས་པ་ལྔ་པོ་དེས་བསྡུས་པའི་འཁོར་འདས་ཀྱི་ཆོས་ཐམས་ཅད་ནི་རྩ་བ་རང་བྱུང་གི་ཡེ་ཤེས་རིག་པ་བྱང་ཆུབ་ཀྱི་སེམས་གཅིག་པོ་འདིར་འདུས་ཤིང་དེ་ལས་གཞན་དུ་མེད་པའི་ཕྱིར་ན་ཀུན་བྱེད་བྱང་ཆུབ་ཀྱི་སེམས་ང་ནི་མ་བཅོས་རྣལ་དུ་བཞག་པ་ཡིས་སྣང་སྲིད་འཁོར་འདས་ཀྱི་ཆོས་ཐམས་ཅད་ཀྱང་མ་བཅོས་རྣལ་དུ་བཞག་པ་ཡིན་པའི་ཕྱིར་ན། ཇི་ལྟར་སྣང་བའི་ཆོས་འདི་དག་ཐམས་ཅད་ཆོས་ཉིད་སྐྱེ་བ་མེད་པ་གཞི་དབྱིངས་ཁྱབ་གདལ་ཆེན་པོའི་ཀློང་དུ་རྒྱ་གྲོལ་གཅིག་ཏུ་འགྲོ་བ་ཡིན་པ་དེས་ན། སྐུ་གསུམ་གྱི་སྟོན་པ་རྣམས་ཀྱང་མ་བཅོས་ཆོས་ཉིད་ཀྱི་ཀློང་དུ་གྲོལ་བར་འགྱུར་བ་ཡིན་ལ། དེ་བཞིན་དུ་བསྟན་པའི་ཐེག་པ་རྣམས་ཀྱང་མ་བཅོས་ཆོས་ཉིད་ཀྱི་ཀློང་དུ་གྲོལ་བ་ཡིན་པ་དང་། སྐུ་གསུམ་གྱི་འཁོར་དང་གནས་དང་དུས་གསུམ་ཡང་དམིགས་མེད་ཡེ་གྲོལ་ཆེན་པོ་མ་བཅོས་ཆོས་ཉིད་ཀྱི་དབྱིངས་སུ་ལ་བཟླ་ཞིང་གྲོལ་བ་ཡིན་པར་གསུངས་ཏེ། ལ་ཟློ་ལས། སྟོན་པ་དང་ནི་བསྟན་པ་འཁོར་དུས་གནས། །རང་བྱུང་ཆོས་ཀྱི་དབྱིངས་སུ་ལ་བཟླས་པས། །རང་བྱུང་ངོ་བོ་མངོན་དུ་ཕྱུང་བ་ལ། །ཕུན་སུམ་ཚོགས་པ་རྣམ་པ་ལྔ་པོ་ཡང་། །རང་ལ་རྫོགས་ཤིང་རང་ལ་ཚང་བར་སྟོན། །རང་ལ་དམིགས་སུ་མེད་པར་དབྱིངས་སུ་ལ་ཟློ་ཡིན། །ཞེས་གསུངས་པ་ལྟར་རོ། །གསུམ་པ་ནི། ཀྱེ་དེ་ལྟར་ཀུན་བྱེད་བྱང་ཆུབ་སེམས་ཀྱི་རང་བཞིན་མ་བཅོས་རྣལ་དུ་བཞག་པ་འདི་ཉིད་གཅིག་པུས་སྣང་སྲིད་ཀྱི་ཆོས་ཐམས་ཅད་ཆོས་དབྱིངས་བྱ་རྩོལ་དང་བྲལ་བ་མ་བཅོས་མཉམ་པ་ཆེན་པའི་ཀློང་དུ་གྲོལ་བར་བཤད་པའི་རྒྱུ་མཚན་དེ་ལྟ་བུ་དང་ལྡན་ན། དེ་ལས་གཞན་པའི་རྒྱུ་འབྲས་དང་རྩོལ་སྒྲུབ་གང་ལ་ལྟོས་པ་འཆའ་མི་དགོས་པའི་ཕྱིར། ཨ་ཏི་ཡེ་བབ་སོར་བཞག་གི་དོན་ཇི་བཞིན་དུ་རྟོགས་པའི་རྣལ་འབྱོར་པ་རྣམས་ཀྱིས་རང་གི་ལུས་མ་བཅོས་པའི་ཕྱིར་ལྷའི་ང་རྒྱལ་ལ་གནས་པའི་ཏིང་ངེ་འཛིན་གྱིས་ལུས་ཐ་མལ་དུ་སྣང་བ་བཅོས་ཏེ་ལྷ་ཡི་རང་བཞིན་དུ་མ་བསྒོམ་ལ། དེ་བཞིན་དུ་སྔགས་བཟླ་བ་ལ་སོགས་པའི་སྒོ་ནས་སྨྲ་བའི་ཚིག་དང་ངག་མ་འཆོས་ཤིག །ཏིང་ངེ་འཛིན་ལ་ཡིད་རྩེ་གཅིག་ཏུ་གནས་པར་མ་བྱེད་ལ་དེ་ལ་སོགས་པའི་རྩོལ་སྒྲུབ་གང་གིས་ཀྱང་སེམས་མ་འཆོས་པར་རང་བབ་བཅོས་བསླད་མེད་པར་ཞོག་ཅིག་ཅེས་པ་སྟེ། ཀློང་ཆེན་རབ་འབྱམས་ལས། ཆོས་ཉིད་འབད་རྩོལ་དང་བྲལ་བས། །ལུས་སེམས་བྱ་བྲལ་ངང་དུ་བཞག །ཆོས་ཉིད་རང་ཐོག་ངོ་སྤྲད་པས། །རྣམ་རྟོག་ཡེ་ཤེས་ཆེན་པོ་འཆར། །ཆོས་ཉིད་རང་སར་གྲོལ་བ་ཡིས། །སྣང་བ་ཉིད་ལ་དགག་སྒྲུབ་མེད། །ལུས་སེམས་བྱ་བྲལ་ཆོས་ཉིད་ནི། །བྱ་བ་མེད་པས་ཡེ་གྲོལ་ཡིན། །ཞེས་གསུངས་པ་ལྟར་ལ། དེ་ལྟར་སྒོ་གསུམ་མ་བཅོས་པར་འཇོག་དགོས་པའི་རྒྱུ་མཚན་ཅིའི་ཕྱིར་ཞེ་ན། བླང་དོར་རྩོལ་སྒྲུབ་ཀྱིས་བཅོས་པར་བྱས་པས་ཆོས་ཉིད་བྱ་རྩོལ་དང་བྲལ་བའི་དོན་ལ་རྣལ་དུ་འབྱོར་བ་མེད་ངེས་སོ། །དེ་ལྟར་ཆོས་ཉིད་ཀྱི་དོན་ལ་རྣལ་དུ་མ་འབྱོར་ན་རེ་དོགས་འབད་རྩོལ་གྱི་འཆིང་བ་ལས་གྲོལ་བར་མི་འགྱུར་ཞིང་། རྣམ་རྟོག་གི་འཆིང་བ་ལས་མ་གྲོལ་ན་ཆོས་ཉིད་མཉམ་པ་ཉིད་ཀྱི་དབྱིངས་སུ་ཆོས་ཅན་སྣང་བའི་རྫུན་རིས་ཐམས་ཅད་རང་སར་གྲོལ་བའི་ཆོས་སྐུ་ཀུན་བྱེད་རྒྱལ་པོའི་རྒྱལ་ས་ལ་དབང་མི་ཐོབ་པའི་ཕྱིར་རོ། །གསུམ་པ་ཡོ་ག་དོན་གྱི་བཤད་ལུགས་ལ་གསུམ་སྟེ། སེམས་ཉིད་ཡེ་ནས་རྣལ་བཞག་བྱར་མེད་པ་ཐེག་པ་འོག་མས་དེ་ཉིད་མ་ཤེས་པའི་ཚུལ་མདོར་བསྟན། ཉན་རང་། སེམས་དཔའ། ཡོ་ག །མ་ཧཱ། ཨ་ནུ་རྣམས་ཀྱིས་མ་ཤེས་པའི་སྐྱོན་རྒྱས་པར་བཤད། ཨ་ཏི་ཡོ་གར་ཤེས་པའི་དོན་བསྡུ་བའོ། །དང་པོ་ནི། ཀྱེ་སེམས་དཔའ་ཆེན་པོ་མ་བཅོས་རྣལ་དུ་བཞག་པའི་ཚུལ་དེ་ཡོ་ག་དོན་གྱི་བཤད་ལུགས་ཀྱིས་ཐེག་པའི་རུ་ཤན་ཕྱེས་ཏེ་བསྟན་པ་ནི་འདི་ལྟ་སྟེ། རིག་པ་བྱང་ཆུབ་སེམས་ཀྱི་རང་བཞིན་ཆོས་སྐུ་ཀུན་བྱེད་རྒྱལ་པོ་ནི་ཡེ་ནས་རྒྱུ་འབྲས་རྩོལ་སྒྲུབ་ཀུན་གྱི་ཡུལ་ལས་འདས་པའི་ཕྱིར་མ་བཅོས་རྣལ་དུ་བཞག་པ་ཡིན་པ་ལ། དེ་ལ་ལྟ་ཞིང་རྟོགས་པར་འདོད་པའི་ཐེག་པ་འོག་མ་བ་རྣམས་ཀྱིས་སེམས་ཉིད་མ་བཅོས་པའི་ངང་ལ་ཇི་བཞིན་རྣལ་དུ་འཇོག་མི་ཤེས་པར་སྤོང་འགོག་སྦྱོང་བསྒྱུར་གྱི་ཐབས་ལ་རྟག་ཏུ་ཞེན་པས། བླང་དོར་རྩོལ་སྒྲུབ་དང་བྲལ་བ་སེམས་ཉིད་ཀུན་བྱེད་རྒྱལ་པོའི་དོན་དང་ཡུན་རིང་དུ་འཕྲད་པའི་སྐལ་བ་མེད་པའི་སྐྱོན་དང་ལྡན་པའོ་ཞེས་སོ། །གཉིས་པ་ལ་གོང་གི་རིམ་པ་ལྟར་ལྔ་ལས། དང་པོ་ནི། དེ་ལ་ཨ་ཏི་རྫོགས་པ་ཆེན་པོ་ཀུན་བྱེད་བྱང་ཆུབ་ཀྱི་སེམས་ནི་དགག་སྒྲུབ་དང་སྤང་བླང་ཅི་ལ་ཡང་མ་ལྟོས་པར་ཡེ་ནས་རྣལ་བཞག་གཅིག་གི་རང་བཞིན་ཡིན་པ་ལ། ཉན་ཐོས་དང་རང་རྒྱལ་གྱི་ཐེག་པ་བ་རྣམས་ཀྱིས་ཚུལ་དེ་ཐོས་ཤིང་མཐོང་ན་ཁོང་དུ་མི་ཆུད་པས་དེ་ལྟར་དགག་སྒྲུབ་སྤང་བླང་ཅི་ཡང་མ་བྱས་པར་བཞག་ན་ཚོགས་དྲུག་ཡུལ་ལ་ཞེན་ཅིང་ཆགས་པའི་དབང་གིས་བདག་ཏུ་འཛིན་པའི་རྩ་བ་ཅན་གྱི་ཉོན་མོངས་པ་དུག་ལྔ་ལ་སོགས་པ་སྐྱེ་ཞིང་། དེ་ལ་བརྟེན་ནས་ལས་བསགས་པར་འགྱུར་ལ། དེ་ལྟར་རྒྱུ་ཀུན་འབྱུང་གི་བདེན་པ་ལས་ཉོན་གཉིས་པོ་ཡོད་ན་འབྲས་བུ་སྡུག་བསྔལ་གྱི་བདེན་པ་སྤོང་བའི་ཐབས་མེད་དོ་ཟེར་ནས། རང་གི་སེམས་ཉིད་རང་བྱུང་ཡེ་ཤེས་ཀྱི་རོལ་རྩལ་དེ་དག་ཉན་ཐོས་ཀྱིས་བདེན་བཞིའི་བླང་དོར་གྱི་སྒོ་ནས་སྤོང་བར་བྱེད་པ་དང་། རང་རྒྱལ་བས་རྟེན་འབྲེལ་ལུགས་འབྱུང་བཀགས་པའི་ལུགས་ལྡོག་སྟོང་པ་བཅུ་གཉིས་བསྒོམ་པའི་ཐབས་ཀྱིས་འགེགས་པའི་ཚུལ་ལ་བརྩོན་པར་འགྱུར་བ་དེས་ཀྱང་། རྫོགས་ཆེན་བྱང་ཆུབ་སེམས་ཀྱི་ལྟ་བ་མ་བཅོས་པར་རང་བབས་སུ་རྣལ་དུ་འཇོག་མ་ཤེས་པས། ལམ་དེ་ལ་ཞུགས་པས་བསྐལ་པ་གྲངས་མེད་མང་པོར་རང་སེམས་རྣལ་དུ་འཇོག་མི་ཤེས་པར་སྤོང་འགོགས་ཀྱི་ལམ་དེ་ལ་གནས་ཞིང་བླང་དོར་རྩོལ་སྒྲུབ་ཀྱིས་གདུང་བར་འགྱུར་བར་གསུངས་སོ། །དེས་ན་ཉན་རང་གི་ཐེག་པ་བ་དེ་དག་གིས་རང་སེམས་རྣལ་དུ་འཇོག་པར་མི་ཤེས་པས་བླང་དོར་རྩོལ་སྒྲུབ་བྱས་པའི་སྐྱོན་དེ་ལྟ་བུ་ཡོད་པའི་ཕྱིར་ན་ཨ་ཏི་རྫོགས་པ་ཆེན་པོའི་རྣལ་འབྱོར་བ་རྣམས་ཀྱིས་བྱ་རྩོལ་གང་ཡང་མི་བྱེད་པར་མ་བཅོས་རྣལ་དུ་འཇོག་པར་གདམས་པའོ། །གཉིས་པ་ནི། དེ་བཞིན་དུ་ཐེག་པ་ཆེན་པོ་མདོ་སྡེས་ཏེ་མདོ་སྡེ་བྱང་ཆུབ་སེམས་དཔའི་ཐེག་པ་བ་རྣམས་ཀྱིས་རྫོགས་ཆེན་ཡེ་བབ་སོར་བཞག་གི་དོན་འདི་ཐོས་པར་གྱུར་ན་ཕྱི་ནང་སྣང་སྲིད་ཀྱི་ཆོས་འདི་དག་ཐམས་ཅད་རང་སེམས་སྐྱེ་བ་མེད་པ་ཆོས་ཉིད་དེ་བཞིན་ཉིད་ཀྱི་ངང་ལས་རང་སྣང་བའི་ཕུན་སུམ་ཚོགས་པ་ལྔའི་རང་བཞིན་དུ་གནས་པ་ཡིན་པས་བཅོས་བསྒྱུར་སྤང་བླང་ལས་འདས་པའི་དོན་མ་རྟོགས་ཏེ། ཆོས་དང་གང་ཟག་གི་བདག་གཉིས་ཀྱི་དབང་གིས་མ་དག་འཁྲུལ་པའི་སྣང་བ་འདི་ལྟར་བྱུང་བ་ཡིན་ནོ་སྙམ་དུ་བལྟ་ཞིང་། དེའི་དབང་གིས་རང་སེམས་མ་བཅོས་ཇི་བཞིན་ཉིད་དུ་འཇོག་པ་མ་ཤེས་ཏེ་ཚོགས་གཉིས་བསགས་པ་ལ་སོགས་པའི་རྩོལ་སྒྲུབ་ལ་ཞེན་པས་ལམ་ལྔ་རིམ་གྱིས་བགྲོད་པའི་སྒོ་ནས་ས་བཅུ་ཐོབ་པར་བྱེད་ཅིང་དེ་དང་དེའི་སྐབས་སུ་ས་བཅུ་རང་རང་གི་ངོ་སྐལ་གྱི་བསྒྲིབ་པ་རྣམས་སྦྱོང་བ་ལ་བསྐལ་པ་གྲངས་མེད་གསུམ་ལ་སོགས་པའི་ཡུན་དུ་གནས་པར་འགྱུར་རོ་ཞེས་གསུངས་པའོ། །གསུམ་པ་ནི། རྣལ་འབྱོར་ཆེན་པོ་གསང་སྔགས་བླ་ན་མེད་པའི་ཐེག་པ་དང་རྗེས་སུ་མཐུན་པ་གསང་སྔགས་ཕྱི་བ་རྣལ་འབྱོར་ཡོ་ག་བའི་ལམ་ལ་ཞུགས་པའི་སེམས་དཔས་ཏེ་སེམས་དཔའི་རྣལ་འབྱོར་བ་རྣམས་ཀྱིས་རྫོགས་ཆེན་མ་བཅོས་རྣལ་བཞག་གི་དོན་འདི་ཐོས་པར་གྱུར་ན། འདི་ལྟར་སྣང་བའི་ཞེས་སྣང་ཞིང་སྲིད་པས་བསྡུས་པའི་ཆོས་རྣམས་ཐམས་ཅད་ཡེ་ནས་ཀུན་བྱེད་བྱང་ཆུབ་སེམས་ཀྱི་རྩལ་ལས་ཤར་བའི་ཆོས་ཉིད་དེ་བཞིན་ཉིད་མ་བཅོས་རྣལ་བཞག་ཆེན་པོའི་རང་བཞིན་ཡིན་པ་ལ། དེ་ལྟར་རང་སེམས་འགྱུར་བ་མེད་པ་ཆོས་ཉིད་དེ་བཞིན་ཉིད་བཟང་ངན་བླང་དོར་ཐམས་ཅད་དང་བྲལ་བའི་རང་བཞིན་དུ་མ་རྟོགས་པར་འཁོར་བ་དང་མྱང་འདས་བདག་དང་ལྷ་ལ་སོགས་པ་བཟང་ངན་དང་བླང་དོར་གྱི་ཡུལ་དུ་མཐོང་ནས། ཆོས་ཉིད་ཀྱི་ངང་དུ་ཇི་བཞིན་རྣལ་དུ་འཇོག་པ་ཡི་དགོངས་དོན་ཟབ་མོ་མ་ཤེས་པས་ན། མངོན་པར་བྱང་ཆུབ་པའི་ཡན་ལག་ལྔ་དང་ཆོ་འཕྲུལ་རྣམ་པ་བཞི་ལ་སོགས་པ་ཐབས་སྣ་ཚོགས་ཀྱིས་རང་སེམས་ལྷའི་རང་བཞིན་དུ་བྱིན་གྱིས་རློབ་པར་སེམས་ཞིང་བླང་དོར་དུ་བརྩོན་པའི་ལམ་ལ་མི་ཚེ་བདུན་གྱི་བར་དུ་གནས་པར་གསུངས་སོ། །བཞི་པ་ནི། གསང་སྔགས་ནང་བ་བླ་ན་མེད་པའི་རྣལ་འབྱོར་ཆེན་པོ་རྣམས་ཀྱིས་རྫོགས་ཆེན་བྱར་མེད་ཡེ་གྲོལ་གྱི་དོན་འདི་ཐོས་པར་གྱུར་ན། འདིའང་གནས་ཚུལ་ལ་གཞི་འབྲས་དབྱེར་མེད་ཆེན་པོར་འདོད་པ་ཡིན་ཀྱང་སྣང་ཚུལ་ལ་རྒྱུ་དང་འབྲས་བུའི་རང་བཞིན་དུ་བལྟ་བའི་བདག་ཉིད་ཡིན་པས་ན། རྫོགས་ཆེན་བྱར་མེད་ཀྱི་དོན་ཇི་བཞིན་མ་རྟོགས་པར། ཡེ་ནས་གཞི་རྒྱུད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཡིན་པ་ལ། གདོད་ལམ་རྒྱུད་བསྐྱེད་རྫོགས་བསྒོམ་བཟླས་ཀྱི་རྩོལ་བ་ལ་བརྟེན་ནས་སྒྲུབ་པར་བྱེད་པའི་ཐབས་ཀྱིས་འབྲས་རྒྱུད་སྐུ་དང་ཡེ་ཤེས་ཐོབ་པར་འདོད་པ་དེ་ཡང་ལོ་སྟོང་ཕྲག་གཉིས་དང་བརྒྱ་ཕྲག་དྲུག་གི་བར་དག་ཏུ་ནི། སེམས་ཉིད་མ་བཅོས་ཇི་བཞིན་ཉིད་ཀྱི་ངང་ལ་རྣལ་དུ་འཇོག་པ་མི་ཤེས་ཏེ་ཏིང་ངེ་འཛིན་གསུམ་གྱི་སྒོ་ནས་ལྷ་བསྒོམ་པ་ལ་སོགས་པ་རྩོལ་སྒྲུབ་ཀྱི་ས་ལ་གནས་པར་བྱེད་པ་ཡིིན་ཏེ། བང་མཛོད་འཕྲུལ་ལྡེ་ལས། ཞག་ནི་སུམ་ཅུ་ཕྲག་དྲུག་ན། །ཚེ་ལ་དབང་བའི་དངོས་གྲུབ་ཐོབ། །ལོ་ནི་ཉིས་སྟོང་ལྔ་བརྒྱ་རུ། །ལོངས་སྤྱོད་རྫོགས་པའི་ཚུལ་བཟུང་ནས། །དོ་གཅིག་སངས་རྒྱས་ས་ལ་འགྲོ། །སྐུ་གསུམ་ལྷུན་གྱིས་གྲུབ་པར་འགྱུར། །ཞེས་གསུངས་སོ། །དེ་ཡང་སྤྱིར་མ་ཧཱ་ཡོ་ག་རང་ལམ་དུ། གསང་སྙིང་ལས། དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པར་ནི། །ཞེས་གསུངས་པ་ལྟར་ཚེ་དབང་ཐོབ་ནས་མི་ཚེ་བཅུ་དྲུག་གི་ཡུན་གྱི་ལོ་བརྒྱ་བརྒྱ་ཕྱིར་བསྣུར་བས་ལོ་སྟོང་ཕྲག་གཅིག་དང་དྲུག་བརྒྱ་ན་སྐུ་ལྔ་ལྷུན་གྲུབ་རྡོ་རྗེ་འཆང་གི་གོ་འཕང་ཐོབ་པར་གསུངས་པ་ཡིན་ཀྱང་། འདིར་ལོ་ཉིས་སྟོང་དྲུག་བརྒྱར་གསུངས་པ་འོག་ཏུ་ལེའུ་ང་ལྔ་པའི་སྐབས་སུ། རིག་འཛིན་ས་སྟེ་ལོ་སྟོང་དྲུག་བརྒྱ་རུ། །ལོངས་སྐུ་འདོད་པའི་ཏིང་འཛིན་ཡེངས་མེད་བྱེད། །ལོངས་སྐུ་ཐོབ་ནས་རང་སེམས་གཟོད་ཚོལ་ལྟ། །སྟོང་ཕྲག་གཅིག་ན་མི་རྟོག་ཉམས་བཟོད་རྙེད། །ཞེས་གསུངས་པ་ལྟར་མ་ཧཱ་རང་ལམ་གྱིས་ལོ་སྟོང་ཕྲག་དྲུག་བརྒྱ་ན་འབྲས་བུ་ཐོབ་པར་གསུངས་པ་དེ། འདིར་རྫོགས་པ་ཆེན་པོའི་ལམ་སྟེགས་ཙམ་དུ་བཞག་ནས་གཟོད་རྫོགས་པ་ཆེན་པོའི་མཐར་འབྲས་ལ་ལོ་སྟོང་ཕྲག་གཅིག་ནས་སྦྱོར་བར་གསུངས་པ་སྟེ། དེ་ཡང་དཔེར་ན་སྔགས་ཐུན་མོང་གི་སྐབས་སུ། ཇི་སྐད་དུ། རྒྱུ་ཡིས་བགྲོད་པའི་ཀུན་ཏུ་འོད། །ཐབས་ཆེན་ལམ་གྱི་བསྟི་གནས་ས། །ཞེས་གསུངས་པ་ལྟར་འདིར་ཡང་མ་ཧཱ་ཨ་ནུའི་ལམ་གྱིས་ཞེན་འཛིན་ཕྲ་བ་ཡོད་པ་དེ་མ་སྤང་བར་དུ་རྫོགས་པ་ཆེན་པོའི་གནས་ལུགས་ཇི་བཞིན་པ་རྟོགས་པར་མི་ནུས་ཤིང་། དེ་མ་རྟོགས་བར་དུ་འབྲས་བུ་མཐར་ཐུག་པའང་ཐོབ་པར་མི་ནུས་པས་ན། དེ་ལྟ་བུའི་རྫོགས་པ་ཆེན་པོའི་ཆེ་བ་སྟོན་པའི་ཕྱིར་དུ་སྔགས་འོག་མའི་འབྲས་བུའི་རྫོགས་ཆེན་གྱི་ལམ་སྟེགས་སུ་བཞག་པ་སྟེ། ཡང་འབྱེད་ལས། ཐེག་པ་ཐུན་མོང་སངས་རྒྱས་དང་། །རྫོགས་ཆེན་འབྲས་བུའི་སངས་རྒྱས་གཉིས། །ཐུན་མོང་མཆོག་གི་དངོས་གྲུབ་སྟེ། །མི་མཐུན་ཁྱད་པར་ཤིན་ཏུ་ཆེ། །ཐུན་མོང་བསྟི་གནས་ས་ལ་གནས། །རྫོགས་ཆེན་ལྷུན་གྲུབ་ས་ལ་གནས། །ཞེས་གསུངས་པ་ལྟ་བུ་ཡིན་ནམ་སྙམ་ཀྱང་བླ་མའི་ཞལ་རྒྱུན་གྱིས་དབེན་ཞིང་རང་ཉིད་རྣམ་དཔྱོད་ཀྱི་བློ་དང་ཡང་མི་ལྡན་པས། གལ་ཏེ་ལོག་བཤད་དུ་སོང་བ་ཡིན་ན་རིག་འཛིན་བརྒྱུད་པའི་ཚོགས་དང་དབྱིངས་ཀྱི་མཁའ་འགྲོ་རྣམས་ལ་བཟོད་པར་གསོལ་ལོ། །ལྔ་པ་ནི། མ་བསྐྱེད་ཡོངས་སུ་རྫོགས་པའི་རྣལ་འབྱོར་ཨ་ནུ་ཡོ་ག་བ་རྣམས་ཀྱིས་རྫོགས་པ་ཆེན་པོའི་དགོངས་པ་མ་བཅོས་ཡེ་བབ་སོར་བཞག་གི་དོན་འདི་ཐོས་པར་གྱུར་ན་ཡང་། མ་བཅོས་རྣལ་བཞག་གི་དོན་ཇི་བཞིན་དུ་མ་རྟོགས་པར་ཆོས་ཐམས་ཅད་ཡེ་ནས་རྒྱུ་འབྲས་གཉིས་སུ་མེད་པ་ཆོས་སྐུ་ཐིག་ལེ་ཉག་གཅིག་གི་རང་བཞིན་ཡིན་པ་ལ། ཡུལ་ཆོས་ཀྱི་དབྱིངས་ལ་རྒྱུ་དང་ཡུལ་ཅན་རང་བྱུང་གི་ཡེ་ཤེས་ལ་འབྲས་བུ་གཉིས་ཀྱི་མིང་བཏགས་ནས། དེ་གཉིས་དབྱེར་མེད་བདེ་བ་ཆེན་པོའི་དཀྱིལ་འཁོར་དུ་བསྒྲུབ་པའི་ཆེད་དུ་བསྐྱེད་རྫོགས་ཟབ་མོའི་ལམ་ལ་རྩོལ་བར་བྱེད་པ་ལས། བཅོས་བསྒྱུར་དང་རྩོལ་བ་ཅི་ཡང་མི་དགོས་པར་ཆོས་ཉིད་ཇི་བཞིན་པའི་ངང་ལ་རྣལ་དུ་འཇོག་པ་མ་ཤེས་ཏེ། རྒྱུ་ནི་ཡོངས་སུ་དག་པ་ཆོས་ཀྱི་དབྱིངས་སུ་གྲུབ་པ་དང་། འབྲས་བུ་རྣམ་པར་དག་པ་ཡེ་ཤེས་ཀྱི་དཀྱིལ་འཁོར་དུ་གྲུབ་པར་བྱེད་པའི་ལམ་ལ་སྐྱེ་བ་བར་མ་ཆོད་པ་ཉིད་ཀྱིས་མི་ཚེ་གཅིག་ཏུ་རྩོལ་བའི་ས་ལ་གནས་དགོས་པ་ཡིན་ནོ། །གསུམ་པ་ཨ་ཏི་ཡོ་གར་ཤེས་པའི་དོན་བསྡུ་བ་ནི། འདི་ལྟར་ཤིན་ཏུ་རྣལ་འབྱོར་རྫོགས་པ་ཆེན་པོའི་རིགས་ཅན་གྱི་གང་ཟག་སྐལ་བ་དང་ལྡན་པ་རྣམས་ཀྱིས་ཀུན་བྱེད་བྱང་ཆུབ་ཀྱི་སེམས་རྩོལ་མེད་རང་བཞག་གི་དོན་འདི་ཐོས་པར་གྱུར་ན། འདི་ལྟར་སྣང་བའི་ཆོས་ཐམས་ཅད་བྱ་བྱེད་རྩོལ་བ་ལ་མ་ལྟོས་པར་ཡེ་ནས་སྐུ་གསུམ་ལྷུན་རྫོགས་ཆེན་པོར་སངས་རྒྱས་པར་རྟོགས་ནས། དུས་དང་རྐྱེན་ལ་མི་ལྟོས་པར་ད་ལྟ་ཉིད་ནས་མ་བཅོས་ཡེ་ཤེས་བླ་མའི་ས་ལ་གནས་པར་འགྱུར་བས། རྒྱུ་འབྲས་བྱ་རྩོལ་གྱི་ངལ་བས་གདུང་བ་མེད་པར་རྩོལ་མེད་བདེ་བ་ཆེན་པོ་མ་བཅོས་རིག་པ་རྒྱ་ཡན་གྱི་ངང་ལ་གུ་ཡངས་བློ་བདེ་རུ་གནས་པའམ་ཡེ་བདེ་འགྱུར་བ་མེད་པའི་དོན་ལ་གནས་པ་གང་ཟག་འདི་ཡིས་ཐོབ་ཅིང་། སྤང་བླང་རྩོལ་བ སྒྲུབ་ཀྱི་སྒོ་ནས་གསར་དུ་བསྒྲུབ་པ་མེད་པར་ཡེ་ནས་མངོན་པར་སངས་རྒྱས་པ་ཀུན་བཟང་ཆོས་སྐུའི་གཏན་སྲིད་ལ་ཡང་དབང་ཐོབ་པ་ཡིན་པས་ན་དགག་སྒྲུབ་སྤང་བླང་ཅི་ཡང་མི་བྱེད་པར་གང་ཤར་ཅིར་སྣང་ཐམས་ཅད་མ་བཅོས་རང་བབ་ཆེན་པོའི་ངང་ལ་འཇོག་པར་གདམས་སྟེ། བྲམ་ཟེ་རྒྱས་པ་ལས། ཀུན་བཟང་མ་ངེས་ནམ་མཁའ་འདྲ། །མ་བརྟགས་གསལ་བའི་ངང་ལ་བཞག །སྒོ་ལྔ་མ་བཀག་རང་སར་བཞག །མ་བཙལ་རང་ལུགས་ཆེན་པོར་བཞག །མི་གཡོ་མཉམ་པའི་ངང་ལ་བཞག །མི་རྟོགས་སྤྲོས་དང་བྲལ་བར་བཞག །གང་དུའང་ངོས་མི་གཟུང་བར་བཞག །སྣང་བ་མི་དགག་གང་དགར་བཞག །རྙོག་མེད་གསལ་བའི་ངང་ལ་བཞག །གཉིས་མེད་མཉམ་པའི་ངང་ལ་བཞག །ལུས་ངག་ཡིིད་གསུམ་གློད་དེ་བཞག །དེ་བཞིན་མ་བཅོས་རང་སར་བཞག །མ་ཆགས་ཞེན་དང་བྲལ་བར་བཞག །བསམ་པ་གང་དུའང་མ་བཞུགས་བཞག །ཤེས་པ་བསམ་དཔྱོད་མེད་པར་བཞག །ཅེས་དང་། ཀུན་མཁྱེན་བླ་མས་མཛད་པའི་སྨོན་ཁྲིད་ལས། ད་ལྟའི་སེམས་ཉིད་ནམ་མཁའ་ལྟ་བུ་ཡེ་ནས་དག་པའི་ངང་ལ་སྒོ་གསུམ་རྩོལ་བྲལ་མཉམ་པ་ཉིད་དུ་ཞོག་ཅིག །སྣང་ཡུལ་ཅི་སྣང་ཡང་དེ་ལ་འཛིན་ཞེན་མེད་པ་དེ་ཉིད་ཀྱི་སྟེང་དུ་ཅེར་གྱིས་ལྟོས་ལ་ཕྱམ་གྱིས་ཞོག་དང་། རྟོག་དང་སྣང་བ་ཙམ་དུ་ཡང་འཛིན་པ་མེད་པའི་ངང་དྭངས་སྤྲོས་པ་དང་བྲལ་བ་ འཆར་བ་ནི་སེམས ་ཉིད་ཡེ་གྲོལ་ཀུན་བྱེད་ཀྱི་དགོངས་པ་ཡིན་ཏེ། ཞེས་སོགས་གསུངས་པ་ལྟར་རང་བབ་བཅོས་བསླད་དང་བྲལ་བའི་ངང་ལ་བཞག་པར་བྱའོ། །བཞི་པ་དགོས་ཆེད་དོན་གྱིས་བཤད་པ་ནི། འོ་ན་ཨ་ཏི་རྫོགས་པ་ཆེན་པོ་བྱར་མེད་ཡེ་སངས་རྒྱས་པའི་དོན་ཏེ་ཤིན་ཏུ་ཟབ་པ་ཡིན་དུ་ཟིན་ཀྱང་། ཐེག་པ་འོག་མའི་བློ་ཅན་སོགས་སུས་ཀྱང་ཤེས་པར་མི་ནུས་ན་འདི་ཉིད་བསྟན་པ་ལ་དགོས་ཆེད་ཅི་ཡོད་སྙམ་ན། དེ་ལྟར་མ་ཡིན་ཏེ་འདི་ལྟར་ལྷ་མི་ལ་སོགས་པའི་སེམས་ཅན་རྣམས་ཀྱིས་ལས་བསགས་ཚུལ་མི་འདྲ་བའི་དབང་གིས་དབང་པོ་རྣོ་བརྟུལ་མི་མཐུན་པ་སྣ་ཚོགས་སུ་ཡོད་པ་ཡིན་ཏེ། དེས་ན་རྫོགས་པ་ཆེན་པོའི་དོན་ལ་སྔོན་སྦྱངས་ཀྱི་ལས་འཕྲོ་མེད་པ་དང་། ཐེག་པ་འོག་མའི་བློ་ཅན་རྣམས་ཀྱིས་རེ་ཞིག་ཤེས་པར་མི་ནུས་ན་ཡང་། གང་ཟག་ལ་ལ་སྔོན་ནས་རྫོགས་པ་ཆེན་པོའི་དོན་ལ་བློ་ཤེས་རབ་ཀྱི་དབང་པོ་སྦྱངས་པའི་ལས་འཕྲོ་ཅན་ཡང་ཡོད་ལ། གཞན་ཡང་ནམ་མཁའ་འབར་བའི་རྒྱུད་ལས། འཁོར་རྣམས་ཀྱིས་སྟོན་པ་ལ་ཞུས་པ། སེམས་ཅན་ཀུན་གྱིས་སེམས་འདི་མཉམ་ལགས་སམ། མཉམ་ན་བཟང་ངན་འོང་བ་དང་། བློ་རྣོ་བརྟུལ་ཤེས་པ་ཆེ་ཆུང་འོང་བ་ཅི་ཡིས་ཉེས། འོན་ཏེ་མི་མཉམ་སེམས་བདག་བཟང་ངན་ཐ་དད་བདོག་ལགས་སམ། ཞེས་ཞུས་པས། སྟོན་པས་འཁོར་ལ་བཀའ་རྩལ་པ། །འཁོར་གྱི་དྲི་བ་གཉིས་པོ་དེ། །ཆོས་ཉིད་གཞི་ལ་འདྲིའམ་སྣང་ཚུལ་ཟེར་ལ་འདྲི། །སེམས་ཀྱི་གཞི་ལ་འདྲི་བ་ན། །ཡ་ཐ་རྒྱལ་བའི་དཀྱིལ་འཁོར་ནས། །མ་ཐ་དམྱལ་བའི་འཇིག་ཚོགས་སུ། །སེམས་ཅན་མཐའ་ཡས་མ་ལུས་ལ། །ཏིལ་ལ་མར་གྱིས་ཁྱབ་བཞིན་མཉམ་པོར་གནས། །དཔེར་ན་རྒྱ་ཞོ་མནན་པ་འདྲ། །སེམས་ལ་བཟང་ངན་བྱེ་བྲག་མེད། །སེམས་ཉིད་གཞི་ལ་རྣོ་བརྟུལ་མེད། །ཤེས་པ་གསལ་མི་གསལ་དུ་མེད། །སྣང་ཚུལ་ཟེར་བ་དྲི་བ་ན། །ཤེས་བྱའི་རང་བཞིན་མ་འགགས་པར། །བློ་རྣོ་བརྟུལ་བཟང་ངན་ཤེས་པ་གསལ་མི་གསལ་ཏུ་ཤུགས་ལས་འཁྲུལ། དཔེར་ན་ཞིང་ས་གཅིག་པ་ལ་ས་བོན་མཉམ་པོར་བཏབ་ནས། ཆུ་ལུད་མཉམ་པོར་བཏབ་ཅིང་བཟང་ངན་ནས་རྡོག་ཆེ་ཆུང་ཤུགས་ལས་འབྱུང་། ལྕགས་རྡོ་བཞུ་བཏུལ་མཉམ་ཡང་རྣོ་བརྟུལ་ཤུགས་ལས་འབྱུང་། ཞེས་གསུངས་པ་ལྟར་གཞི་ཆོས་ཉིད་གཤིས་ཀྱི་གནས་ལུགས་སེམས་ཉིད་རང་བྱུང་གི་ཡེ་ཤེས་ཀྱི་ངོ་བོ་ལ་བཟང་ངན་དང་རྣོ་བརྟུལ་མེད་ཀྱང་། ཐོག་མའི་གཞི་ལས་གཞི་སྣང་ཕྱི་གསལ་དུ་ཤར་བའི་ཚེ་ན་ཆོས་ཉིད་ཅི་ཡང་མ་གྲུབ་པ་ལ་ཅིར་ཡང་འཆར་དུ་རུང་བས་བློ་རྣོ་བརྟུལ་ཤུགས་ལ་འབྱུང་བར་གསུངས་པ་བཞིན། གང་ཟག་ལ་ལ་ཚེ་སྔོན་སྦྱངས་བ་སོགས་ལ་མ་ལྟོས་པར་བློའམ་དབང་པོ་རང་བཞིན་གྱིས་རྣོ་བས་ཡེ་ནས་ཆིག་ཆོད་དམ་ཅིག་ཆར་བའི་རིག་ཅན་ཡོད་པ་དེ་རྣམས་ཀྱིས་ཨ་ཏི་རྫོགས་པ་ཆེན་པོའི་དགོངས་པ་མ་བཅོས་རྣལ་བཞག་གི་དོན་ཇི་བཞིན་པ་རྟོགས་པར་ནུས་པ་དེས་ན། དེ་ལྟ་བུའི་ཡང་རབ་སྐལ་བ་དང་ལྡན་པ་རྣམས་ཀྱི་དོན་དུ་དགོས་ཆེད་དོན་གྱི་བཤད་པ་ཞེས་སུ་བསྟན་པ་ཡིན་ནོ། །ལྔ་པ་ཚིག་གི་དོན་གྱི་བཤད་ལུགས་ལ་གཉིས་ཏེ། ཨ་ཏི་ཡོ་གའི་ངེས་ཚིག་སོ་སོར་བཤད་པ་དང་། དོན་གཉིས་སུ་མེད་པས་རྒྱུ་འབྲས་སྒྲོ་སྐུར་ལས་འདས་པར་བཤད་པའོ། །དང་པོ་ནི། དེ་ལ་ཨ་ཏི་ཡོ་ག་རྫོགས་པ་ཆེན་པོ་ཞེས་བྱ་བ་དེ་ཚིག་གི་དོན་གྱིས་བཤད་པ་ཇི་ལྟ་བུ་ཞེ་ན། འདི་ལྟར་ཨ་ཏི་ཞེས་བྱ་བ་ནི་རྫོགས་པ་ཆེན་པོའི་དོན་སྒྲ་ཡི་ཚིག་ཏུ་བསྟན་པ་ཡིན་ཏེ། དེ་ཡང་ཨ་ཞེས་བྱ་བ་ནི་སྐྱེ་བ་མེད་པའི་དོན་ཡིན་པས་ཆོས་ཐམས་ཅད་ཀྱི་གནས་ལུགས་སེམས་ཉིད་རང་བྱུང་གི་ཡེ་ཤེས་དེ་ཉིད་གདོད་ནས་མ་སྐྱེས་ཤིང་མ་འགགས་པའི་ཆོས་ཉིད་ཡེ་སྟོང་ཆེན་པོ་རྒྱུ་རྐྱེན་རྩོལ་སྒྲུབ་ཐམས་ཅད་ཀྱི་ཡུལ་ལས་འདས་པས་མ་བཅོས་རྣལ་དུ་བཞག་པའི་རང་བཞིན་ཡིན་ལ། ཏི་ནི་ཏི་ལ་ཀ་ཞེས་པ་ཐིག་ལེའི་མིང་ཡིན་པས་ཆོས་ཉིད་སྐྱེ་བ་མེད་པ་དེ་ཡང་སྟོང་པ་ཕྱངས་ཆད་ལྟ་བུ་མ་ཡིན་པར་འགག་མེད་གསལ་བའི་ཡེ་ཤེས་དང་ཡེ་ནས་དབྱེར་མེད་པས་སྤྲོས་པའི་གྲྭ་ཟུར་ཐམས་ཅད་དང་བྲལ་བའི་སྤྲོས་བྲལ་ཐིག་ལེ་ཉག་གཅིག་ཏུ་གནས་པ་དེའི་ཀློང་དུ་འཁོར་འདས་གཉིས་ཀྱིས་བསྡུས་པའི་ཆོས་ཐམས་ཅད་མ་སྤངས་ལ་མ་བཙལ་བར་ཡེ་ནས་རྫོགས་ཤིང་ལྷུན་གྱིས་གྲུབ་པར་བསྟན་པ་སྟེ། མདོར་ན་ཀ་དག་དང་ལྷུན་གྲུབ་དབྱེར་མེད་པའི་གནས་ལུགས་རང་བྱུང་གི་ཡེ་ཤེས་བཅོས་བསྒྱུར་སྤང་བླང་དང་བྲལ་བ་དེའི་ཀློང་ན་ཆོས་ཐམས་ཅད་མ་འདྲེས་ཡོངས་སུ་རྫོགས་པས་བྱར་མེད་རྫོགས་པ་ཆེན་པོའི་རང་བཞིན་དུ་སྟོན་པའི་ཚིག་ཡིན་ལ། ཡོ་ག་ཞེས་པ་ནི་ཐེག་པ་གཞན་ཀུན་ལས་ཀྱང་ཆོས་ཉིད་ཀྱི་དོན་ལ་བློ་ཤིན་ཏུ་རྣལ་དུ་འབྱོར་བའི་དོན་ཡིན་པས་ན་ཐེག་པ་ཐམས་ཅད་ཀྱི་ཡང་རྩེ་རྫོགས་པ་ཆེན་པོ་ཞེས་པའི་ཚིག་དོན་ཡིན་པས་ན་དེ་ལ་ཚིག་གི་དོན་གྱི་བཤད་པ་ཞེས་བྱའོ། །དེ་ཡང་ཀློང་ཆེན་རབ་འབྱམས་ལས། གཅིག་རྫོགས་ཀུན་རྫོགས་སྐྱོན་ཡོན་མཐའ་དག་རྫོགས། །རྫོགས་པ་ཆེན་པོ་ཨ་ཏི་ཀུན་གྱི་ཕུད། །དབྱིངས་རིག་ཏི་ལར་གང་ལ་དབྱེ་བསལ་མེད། །ས་དང་ལམ་དང་ཐེག་པའི་བྱེ་བྲག་ཀུན། །མ་འདྲེས་ཡོངས་རྫོགས་ཐིག་ལེ་གཅིག་གི་རྒྱན། །ཐིག་ལེ་གཅིག་ལ་དབྱེ་བསལ་ངང་གིས་བྲལ། །མི་འགྱུར་བསྟན་པའི་ཀློང་ན་བདེ་བར་བཞུགས། །བྱ་བྲལ་བདེ་བ་ཁ་ཡན་ཀློང་ན་བདེ། །ཀུན་ཀྱང་རོ་གཅིག་མཉམ་པའི་དབྱིངས་སུ་གྲོལ། །སྐྱེ་མེད་རོལ་པ་ཀུན་ཆུབ་ཆེན་པོ་ཨ། །ཐེག་དགུ་མ་འདྲེས་མ་སྤངས་རྫོགས་པས་ཏི། །གོང་ན་གཞན་མེད་སྤྱི་དཔལ་ཆེན་པོར་ཐེག །ཞེས་སོ། །གཉིས་པ་ནི། དེ་ལྟ་བུའི་ཐེག་པ་ཐམས་ཅད་ཀྱི་རྩེ་རྒྱལ་ཨ་ཏི་ཡོ་གའམ་ཤིན་ཏུ་རྣལ་འབྱོར་རྫོགས་པ་ཆེན་པོའི་དོན་གཉིས་སུ་གྲུབ་པ་མེད་པ་རང་བྱུང་གི་ཡེ་ཤེས་དེ་ལ། སྒྲུབ་བྱེད་རྒྱུ་དང་བསྒྲུབ་བྱའི་འབྲས་བུ་གཉིས་ཀ་ཡོད་དོ་ཟེར་ནས་སྨྲ་བར་བྱེད་ཅིང་རྒྱུ་འབྲས་བླང་དོར་གྱི་ཚུལ་ལ་རྩོལ་བསྒྲུབ་བྱེད་པ་དེ་ནི་བྱར་མེད་རྫོགས་པ་ཆེན་པོའི་གཉིས་མེད་བློ་ལས་འདས་པའི་ཡེ་ཤེས་དེ་ཉིད་ཇི་བཞིན་པར་རྟོགས་པའི་དོན་དང་མི་ལྡན་ཏེ། ཀློང་ཆེན་རབ་འབྱམས་ལས། རྣམ་པར་དག་པའི་ཆོས་ཉིད་ལ། །རྒྱུ་འབྲས་རྫས་སུ་རྟོགས་པ་ནི། །གྲུབ་མཐའ་ངན་པས་བཅིང་བ་སྟེ། །འཁྲུལ་པས་དོན་ལས་གོལ་བའི་ཕྱིིར། །བསྟན་ཞིང་བརྗོད་པར་རབ་ཏུ་དཀའ། །ཞེས་གསུངས་པ་ལྟར་དང་། དེ་བཞིན་དུ་རིག་སྟོང་གཉིས་སུ་མེད་པའི་ཡེ་ཤེས་དེ་ཉིད་སྣང་སྟོང་གང་གི་ཕྱོགས་སུ་མ་ལྷུང་བས་སྨྲ་བསམ་བརྗོད་པ་ཐམས་ཅད་དང་བྲལ་བ་སྤྲོས་བྲལ་བློ་ལས་འདས་པའི་རང་བཞིན་ཡིན་པ་ལ། དོན་དམ་སྟོང་པ་ཉིད་དང་ཀུན་རྫོབ་སྣང་བ་གཉིས་སུ་བདེན་གཉིས་སོ་སོར་ཕྱེ་ཞིང་སྨྲ་བར་བྱེད་ན། དེ་ཡང་ཀུན་རྫོབ་ཏུ་ཡོད་པར་སྒྲོ་འདོགས་པ་དང་། དོན་དམ་དུ་མེད་པར་སྐུར་བ་འདེབས་པའི་ཚིག་ཙམ་ཡིིན་ཏེ་གནས་ལུགས་བརྗོད་དུ་མེད་པའི་དོན་ཇི་བཞིན་པའི་ཐོག་ཏུ་མ་ཕེབ་པའི་ཕྱིར་རོ། །རྒྱུ་མཚན་དེས་ན་དེ་ལྟར་སྨྲ་ཞིང་བརྗོད་པར་བྱེད་པའི་གང་ཟག་དེ་ཡིས་རྒྱུ་འབྲས་སྒྲོ་སྐུར་ལ་སོགས་པ་སྤྲོས་པའི་མཐའ་ཐམས་ཅད་དང་བྲལ་བས་གཉིས་སུ་མེད་པའི་ཡེ་ཤེས་སོ་སོ་རང་རིག་པ་ཡི་དོན་རྟོགས་པ་མེད་དོ། །ཞེས་པ་སྟེ། ཉ་མོ་བག་ལ་ཉལ་བའི་རྒྱུད་ལས། ཨ་ཏི་ངེས་མེད་ཐེག་པའི་སྙིང་པོའི་རང་བཞིན་འདི། །སུས་ཀྱང་དཔག་པར་ནུས་པ་མ་ཡིན་བདེན་གཉིས་ཡེ་ནས་མེད། །བདེན་པ་གཉིས་འདོད་པ་ནི་འདི་ན་ག་ན་ཡོད་དེ་ཡེ་ནས་མེད་པ་ཡིན། །བདེན་དང་གཏན་ཚིགས་རྗེས་སུ་དཔག་པ་ཡིས། །ཡ་མཚན་རྨད་ཀྱི་ཆོས་འདི་རྟོགས་པར་ནུས་པ་ག་ལ་ཡོད། །འཁོར་བ་མྱ་ངན་འདས་མེད་ཐིག་ལེ་ཆེན་པོའི་ཀློང་། །ཞེས་གསུངས་པ་ལྟར་རོ། །གསུམ་པ་རྣལ་བཞག་གཅིག་ཏུ་དོན་བསྡུ་བ་ནི། དེ་ལྟར་རྫོགས་ཆེན་ཨ་ཏིའི་དགོངས་པ་མ་བཅོས་ལྷུན་གྲུབ་ཆེན་པོ་རྣལ་བཞག་གཅིག་ཏུ་བསྟན་པ་དེ་བཞིན་དུ། དུས་གསུམ་དུ་གཤེགས་ཤིང་བྱོན་པའི་སངས་རྒྱས་རྣམས་ཀྱི་རྟོགས་དོན་བླ་ན་མེད་པ་ཡང་། རྒྱུ་འབྲས་བླང་དོར་བདེན་གཉིས་སོགས་སུ་མ་མཐོང་བར་གཉིས་མེད་ཆོས་སྐུ་ཆེན་པོ་སྤྲོས་བྲལ་ཐིག་ལེ་ཉག་གཅིག་གི་ཀློང་དུ་མ་བཅོས་རྣལ་དུ་བཞག་པ་ཉིད་དུ་འདོད་དོ། །ཞེས་གསུངས་སོ། །ཚུལ་དེ་ལྟར་བང་མཛོད་འཕྲུལ་ལྡེ་ལས་ཀྱང་བསྟན་ཏེ། བྱར་མེད་བྱང་ཆུབ་ཆེན་པོ་དེ། །བཅོས་པས་གྲུབ་པ་མ་ཡིན་ཏེ། །མ་བཅོས་རྣལ་དུ་བཞག་པས་གྲུབ། །སྔར་འདས་སངས་རྒྱས་ཐམས་ཅད་ཀྱིས། །ཅི་བཞིན་པ་ལ་བཅོས་མ་བྱས། །ད་ལྟའི་སངས་རྒྱས་ཐམས་ཅད་ཀྱང་། །ཅི་བཞིན་པ་ལས་བཅོས་མི་མཛད། །མ་འོངས་སངས་རྒྱས་ཐམས་ཅད་ཀྱང་། །ཅི་བཞིན་པ་ལ་བཅོས་མི་འགྱུར། །གསང་བའི་བདག་པོ་ང་ཡིས་ཀྱང་། །ཅི་བཞིན་པ་ལ་བཅོས་མ་མྱོང་། །སེམས་དཔའ་ཆེན་པོ་ཁྱོད་ཀྱིས་ཀྱང་། །ཅི་བཞིན་པ་ལ་བཅོས་མ་བྱེད། །ཅེས་གསུངས་ལ། དེ་ལྟ་བུའི་རིག་པ་བྱང་ཆུབ་ཀྱི་སེམས་མ་བཅོས་རྣལ་དུ་བཞག་པ་དེ་ལ་ཐེག་པ་འོག་མའི་རྩོལ་སྒྲུབ་ཀྱི་དོན་ཐམས་ཅད་ཀྱང་དོན་གྱིས་འདུས་པར་གསུངས་ཏེ། དེ་ཉིད་ལས། མ་བཅོས་རྣལ་དུ་བཞག་པ་དེ། །ཐེག་དམན་རྩོལ་སྒྲུབ་ཀུན་འདུས་ཏེ། །འོག་མའི་བྱང་ཆུབ་དེ་ལ་རྫོགས། །ལེགས་པར་བསྔོ་བའི་སྨོན་ལམ་ཀུན་ཀྱང་དེ་ལ་རྫོགས། །ཉེས་པ་བཤགས་པའི་འགྱོད་པ་ཀུན་ཀྱང་དེ་ལ་རྫོགས། །འཕགས་པ་མཉེས་པའི་ཕྱི་ནང་མཆོད་པ་རྫོགས། །སྡོམ་དང་ཚུལ་ཁྲིམས་དམ་ཚིག་བསྲུང་མཚམས་རྫོགས། །དཀྱིལ་འཁོར་ཞུགས་དང་དབང་དང་དངོས་གྲུབ་རྫོགས། །སངས་རྒྱས་ས་དང་ཕ་རོལ་ཕྱིན་དྲུག་རྫོགས། །ཚོགས་བསགས་སྒྲིབ་སྦྱངས་རྩོལ་བསྒྲུབ་འབྲས་བུ་རྫོགས། །འགྲོ་དོན་མཐར་ཕྱིན་ཕྲིན་ལས་རྣམ་བཞི་རྫོགས། །སེམས་ཅན་དོན་བྱེད་ཚད་མེད་རྣམ་བཞི་རྫོགས། །ལུས་ཀྱི་བསྐོར་བ་ཕྱག་རྒྱ་གར་ཡང་རྫོགས། །ངག་གི་འདོན་བཟླས་དབྱངས་དང་བསྟོད་པ་རྫོགས། །ཡིད་ཀྱི་ཏིང་འཛིན་ཕྱག་རྒྱ་དཀྱིལ་འཁོར་རྫོགས། །ཞེས་གསུངས་སོ། །ལེའུའི་མཚན། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་དགོངས་པ་རྣལ་དུ་བཞག་པའི་ལེའུ་སྟེ་རྩ་དགུ་པའི་འགྲེལ་བའོ།། །།