མཁའ་འགྲོ་ཐམས་ཅད་ཀྱི་སྙིང་ཁྲག་ཀློང་གསལ། འབར་མ་ཉི་མ།

མཁའ་འགྲོ་ཐམས་ཅད་ཀྱི་སྙིང་ཁྲག་ཀློང་གསལ་འབར་མ་ཉི་མའི་གསང་རྒྱུད་བཞུགས་སོ། །྅྅྅ རྒྱ་གར་སྐད་དུ། དྷཱ་ཀི་ནི་སརྦ་ཙིཏྟ་ཨ྄ཧྱཻ་྅྅྅ རོ་ཏ་སུཪྱ་གུ་ཧྱ་ཏནྟྲ་ན་མ། བོད་སྐད་དུ། མཁའ་འགྲོ་ཐམས་ཅད་ཀྱི་སྙིང་ཁྲག་ཀློང་གསལ་འབར་མ་ཉི་མའི་གསང་རྒྱུད་ཅེས་བྱ་བ། རིག་སྟོང་སྐྱེ་བ་མེད་པའི་དབྱིངས། ཡེ་ནས་ལྷུན་གྱིས་གྲུབ་པ། རྒྱར་མ་ཆད་པ། ཕྱོགས་སུ་མ་ལྷུང་བ། གང་ཡང་མ་ཡིན་པ། གང་དུ་འབྱུང་བའི་གཞི། སྔར་ཡང་སངས་མ་རྒྱས་པ། ད་སངས་མི་རྒྱ་བ། ད་ལྟ་ཡང་སངས་རྒྱས་ལ་མི་གནས་པ། སྔར་འཁོར་བར་མ་འཁྱམས་པ། ད་འཁོར་བར་མི་འཁྱམས་པ། ད་ལྟ་འཁོར་བ་ན་མི་གནས་པ། ལུང་དུ་མ་བསྟན་པའང་མ་ཡིན་པ། ཀུན་གྱི་མཁའ་རྒྱ། བྷ་ག་ཡངས་པའི་ཀློང་། སྲ་བ། བརྟན་པ། མི་འཇིག་པ། མ་འཁྲུལ་བ། མི་གཡོ་བ། མི་འགྱུར་བ། ཕྱི་དེར་འཛིན་གྱི་རྒྱ་མ་རལ་བ། ནང་འོད་ལྔའི་ཁ་དོག་མ་འགགས་པ། ཕྱི་དེར་རྟོག་གི་བཟོ་མ་གྲུབ་པ་ལ། ནང་མཁྱེན་སྤྱོད་ཀྱིས་ཐུགས་རྗེ་མ་ཡེང་བར། དྲན་པ་མེད་བཞིན་དུ་རྣམ་པ་ཐམས་ཅད་མཁྱེན་པ། ཁོ་རང་ཡིན་བཞིན་དུ་བདག་དང་བདག་གིས་མ་ཕྱེས་པ། འཁོར་འདས་ཀུན་གྱི་བྱེད་ལས་ཀྱི་སྟོབས་དང་ལྡན་ཀྱང་། སྟོབས་རྩལ་དེ་ཡི་རྗེས་སུ་མི་འབྲང་བར། རང་བབ་གདལ་བའི་སྐུ་དེ་ཁོ་ན་ལ་ཕྱག་འཚལ་ལོ། །ཨཱོཾ་མ་ཧྲཱི་ཧ་རི་ནི་ས་ར་ཙ་ཧྲི་ཡ། ཨ་ཏྲི་ཪྣྲི་ཙིཏྟ་དུང་དུང་ཛ་ཛ། འདི་སྐད་བདག་གིས་བསྟན་པའི་དུས་ན། གནས་ཕུན་སུམ་ཚོགས་པ་འཁོར་འདས་ཀྱི་སྤྱི་དཔལ་བྷ་ག་ཡངས་པར། སྟོན་པ་ཕུན་སུམ་ཚོགས་པ་ཀུན་ཏུ་བཟང་མོ་སྣང་སྟོང་བཟུང་རིས་དང་བྲལ་བའི་ཐུགས་ཀར་བེམ་སྟོང་མ་ཡིན། རིག་སྟོང་ཡིན་པའི་རྟགས་སུ། རྡོ་རྗེ་སེམས་དཔའ་ཚོན་གང་བས་བརྒྱན་ནས། དུས་སྔ་ཕྱི་ཐོག་མཐའི་རྩིས་དང་བྲལ་བའི་དུས་སུ། འཁོར་རང་གསལ་རིག་པའི་རང་རྩལ་མཁའ་འགྲོ་མ་སྡེ་ལྔ་ལ། བསྟན་པ་རྩོལ་མེད་དུ། རྒྱུ་འབྲས་ལས་འདས་པའི་དོན་འདི་བཀའ་སྩལ་ཏོ༔ ཀ྄ཧྱ་ཨོཾཧྱ་ཧ྄ཧྱ་རྒུ་྅྅྅བྷྱོ༔ ཨེ་མ་འཁོར་འདས་ཐམས་ཅད་ཀུན། །ཡེ་སྟོང་རྩ་བྲལ་གཞི་ཡིན་ཏེ། །མ་འགག་རྩལ་སྣང་ལམ་དུ་ཤར། །ཡེ་གྲོལ་ཆེན་པོའི་འབྲས་བུ་ཐོབ། །འདི་རུ་མ་འདུས་གང་ཡང་མེད། །ཅེས་གསུངས་པ་ཙམ་གྱིས། འཇིག་རྟེན་གྱི་ཁམས་སྟེང་འོག་ཐམས་ཅད། མེར་མེར་པོར་གྱུར་ཏོ། །ཁྱོམ་ཁྱོམ་པོར་གྱུར་ཏོ། །འོད་ཟེར་གྱིས་རང་བཞིན་དུ་གྱུར་ཏོ། །འཇའ་དང་། འོད་དང་། སྒྲ་དང་། ཟེར་གྱིས་འཁྲིགས་པར་གྱུར་ནས། ཐམས་ཅད་རང་བཞིན་གཞི་སྣང་ཆེན་པོར་གསལ་ལ་འཕོ་འགྱུར་མེད་པར་ལྷུན་གྱིས་མཉམས་པར་གྱུར་ཏོ། ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་གསང་སྔགས་གནད་མཛོད་ལས། གླེང་གཞིའི་ལེའུ་སྟེ་དང་པོའོ། ། ྅྅྅ དེའི་ཚེ་འཁོར་རྣམས་ཐམས་ཅད་ཀྱི་ནང་ནས་མངོན་དུ་ཕྱུངས་བའི་ཟེར། །མཁའ་འགྲོ་ཐམས་ཅད་ཀྱི་གཙོ་མོ། དཔལ་རྡོ་རྗེ་ཕག་མོས་འདི་སྐད་ཅེས་ཞུས་སོ། །ཨེ་མ་ཡུམ་ཆེན་ཀུན་ཏུ་བཟང་། །དེ་ལྟར་གཞི་ལམ་འབྲས་བུ་ཡི། །ངོ་མཚར་གད་རྒྱང་གསུངས་ན་ཡང་། །ཐེག་དམན་རྣམས་ཀྱིས་རྟོགས་དཀའ་བས། །རྒྱས་པར་ཕྱེ་ལ་གནང་བར་ཞུ། །ཞེས་ཕྱག་འཚལ་བསྐོར་བ་བགྱིས་པ་དང་། སྟོན་པ་ཉིད་ཏིང་ངེ་འཛིན་ལས་ངེས་པར་གཡོ་ཚུལ་སྟོན་ནས། འདི་སྐད་ཅེས་བཀའ་སྩལ་ཏོ། །ཨེ་མ་མཁའ་འགྲོ་ཡུམ་ཆེན་ཉོན། །ཀློང་གསལ་གསང་རྒྱུད་འདི་ཉིད་ལས། །སྤྱི་གཞི་སྐུ་གསུམ་གནས་ལུགས་དང་། མ་རིག་རྐྱེན་བཞིས་འཁྲུལ་ཚུལ་དང་། སྤྱི་ཐེག་སྒོས་ཐེག་ངོས་བཟུང་དང་། །སྨིན་གྲོལ་ལག་ཁྲིད་རྒྱབ་ཡིག་དང་། །རྟགས་ཚད་གྲོལ་ས་བར་དོ་དང་། །མཇུག་དོན་གཏད་པ་མདོར་བཅད་ནས། །རྒྱས་པར་ཕྱེ་བས་ཡིད་ལ་ཟུངས། །ཆོས་སྒོ་བསམ་ཡས་ཅི་སྙེད་པ། །འདི་ལ་མ་འདུས་གང་ཡང་མེད། །སྔར་སངས་རྒྱས་ཀྱིས་མ་གསུངས་ཤིང་། །ད་སངས་རྒྱས་ཀྱིས་གསུངས་མི་འགྱུར། །འདི་ཐོས་འགྲོ་བ་སྐལ་བ་རབ། །ཅེས་གསུངས་པ་དང་། འཁོར་རྣམས་རབ་ཏུ་སྤྲོས་ནས། ཕྱོགས་མཚམས་ཐམས་ཅད་དུ་ཀུན་ཏུ་བཟང་མོའི་མཆོད་སྤྲིན་གྱིས་ཡོངས་སུ་བཀང་ནས་ལྷུན་གྲུབ་རྫོགས་ལྡན་དུ་མཆོད་དོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུ་གསང་སྔགས་ཀྱི་གནད་མཛོད་ལས། གླེང་བསླང་བའི་ལེའུ་སྟེ་གཉིས་པའོ། །྅྅྅ དེར་མཁའ་འགྲོའི་གཙོ་མོས་འདི་སྐད་ཅེས་ཞུས་སོ། །ཀྱཻ་ཀྱཻ་ཡུམ་ཆེན་ཀུན་ཏུ་བཟང་། །རིག་པ་གཤིས་ཀྱི་འདུག་ཚུལ་ལ། །ལྟ་བྷཻཾ་སྤྱོད་པ་ཅི་ལྟ་བུ། །བདག་ཅག་རྣམས་ལ་བསྟན་དུ་གསོལ། །ཅེས་ཞུས་པ་དང་། ཉོན་ཅིག་ཡུམ་ཆེན་མཁའ་འགྲོའི་འཁོར། །ཉོན་མོངས་སྟོང་ཕྲག་བརྒྱད་ཅུ་སོགས། །མཐའ་ཡས་མུ་མེད་ཐམས་ཅད་ཀྱང་། །མ་རིག་གཅིག་གི་ངོ་བོར་འདུས། །གྲོལ་བྱེད་ཆོས་སྒོ་བསམ་ཡས་ཀྱང་། །རྫོགས་ཆེན་རིག་ཀློང་མི་འདུས་མེད། །རང་སྣང་རང་ངོ་མ་ཤེས་པས། །མ་རིག་པ་ལ་དུ་མར་སྣང་། །ངོ་བོ་རྟོགས་ནས་རང་རིག་ཡིན། །རིག་པ་ཆོས་ཉིད་སྤྲོས་བྲལ་ནི། །གཅིག་ལ་ཐམས་ཅད་རྫོགས་པ་སྟེ། །ཆོས་སྐུ་ཐིག་ལེ་ཉག་གཅིག་ཟེར། །སྟོང་གསལ་དེ་ལ་མཐའ་དབུས་བྲལ། །དམིགས་པར་སྣང་བའི་ཡུལ་རྣམས་ལ། །རང་བཞིན་མེད་པར་སུས་རྟོགས་པ། །ཚོགས་དྲུག་མ་འགགས་ལྷུག་པ་དེ། །སྣ་ཚོགས་རིག་པའི་རྩལ་ཡིན་ཕྱིར། །རིག་པ་སྟོང་པ་ཉིད་དུ་གྲོལ། །དབང་ལྡན་རྒྱལ་པོ་ཇི་བཞིན་ནོ། །ངོ་བོ་ཉིད་ལ་རྒྱུད་མར་གནས། །མཐོང་ཐོས་བཅས་པས་སངས་རྒྱས་འགྲུབ། །གཅིག་ཤེས་པས་ནི་གྲོལ་བར་འགྱུར། །གཅིག་པུའི་དོན་ཉིད་རིག་པས་ན། །ངོ་བོ་གཅིག་ལ་ཀུན་འབྱུང་ཕྱིར། །རང་སྣང་རང་གྲོལ་ཆེན་པོའོ། །གཅིག་པུ་ངོ་བོ་སྟོང་པ་ལས། རང་བཞིན་གསལ་ཆ་མ་འགགས་པ། །ཐུགས་རྗེ་རང་རྩལ་མ་འགགས་སོ། །དེ་དོན་ལེགས་བར་གཏན་ཕབ་ནས། ལྟ་བྷཻཾ་སྤྱོད་པ་གསུམ་དུ་འདུས། །ལྟ་བ་ལ་ཡང་རྣམ་པ་གསུམ། །ཆོས་ཅན་ལྟ་བའི་ལྟ་བ་ཡིས། ཕྱི་ཡི་ཡུལ་རྣམས་ཀུན་ལ་བལྟ། །ཆོས་ཉིད་ལྟ་བའི་ལྟ་བ་ཡིས། །ནང་གི་སེམས་ལ་བལྟ་བར་བྱེད། །རང་ཉིད་ལྟ་བའི་ལྟ་བ་ཡིས། །གསང་བ་རིག་པ་གཅེར་བུར་བལྟ། །བྷཻཾ་པ་ལ་ཡང་གསུམ་ཡིན་ཏེ། །ལྷ་དང་མི་ཡི་སེམས་འཛིན་དང་། །བྱང་ཆུབ་སེམས་དཔའི་བསམ་གཏན་ཏེ། །དེ་བཞིན་གཤེགས་པའི་དགོངས་པའོ། །སྤྱོད་པ་ལ་ཡང་རྣམ་པ་གསུམ། །མ་ཆགས་འཛིན་པའི་སྤྱོད་པ་དང་། །དགག་སྒྲུབ་མེད་པའི་སྤྱོད་པ་དང་། །ཆགས་ལ་ཞེན་པ་མེད་པ་སྟེ། །རྫོགས་པ་ཆེན་པོའི་དགོངས་པའོ། །འདི་འདྲའི་གནད་མཆོག་ཟབ་མོ་ནི། །སྐལ་ལྡན་བུ་ལ་སྦྱིན་པར་བྱ། །སྣོད་དང་མི་ལྡན་གདམས་པ་སྤེལ། །རྡོ་རྗེའི་དམྱལ་བར་ལྟུང་བར་འགྱུར། །དེའི་ཕྱིར་དབང་པོའི་ཁྱད་པར་རྟོགས། །ཞེས་གསུངས་སོ། །ཀློང་གསལ་འབར་མ་ཉི་མའི་གསང་རྒྱུད་ལས། ལྟ་བྷཻཾ་སྤྱོད་གསུམ་མདོར་བསྟན་པའི་ལེའུ་སྟེ་གསུམ་པའོ། །ཡང་ཅིག་སྟོན་པས་བཀའ་སྩལ་བ། །ཀྱེ་ཧོ་ཡུམ་ཆེན་མཁའ་འགྲོ་ཉོན། །ཉག་གཅིག་འཁོར་འདས་ཀུན་གྱི་གཞི། །རང་བྱུང་ཡེ་ཤེས་རང་ལས་བྱུང་། །དེ་ཤེས་ཡེ་ཤེས་རྩལ་དུ་བརྗོད། །ཡེ་ཤེས་དེའི་དོན་རྟོགས་པས། །གཞི་མེད་རྩ་བྲལ་ངར་འཛིན་བྲོལ། །འཁྲུལ་མ་མྱོང་བའི་ཆོས་ཉིད་དེ། །ཆོས་རྣམས་མ་ལུས་ཐམས་ཅད་ཀྱང་། །རྩ་བ་ཐིག་ལེ་གཅིག་ལ་གྱེས། །ཐིག་ལེའི་ཆོས་རྣམས་ངོ་བོར་རྫོགས། །ངོ་བོ་ཆོས་རྣམས་ཀུན་གྱི་དོན། །དེ་མེད་ཚིག་སོགས་དོན་མེད་འགྱུར། །དེ་ཕྱིར་རྒྱུད་ཀྱི་དངོས་པོ་རྣམས། །བསྡུས་ན་བཅོ་ལྔར་འདུ་བ་སྟེ། །ལྟ་བ་སྤྱོད་བ་དབང་དམ་ཚིག །ཏིང་འཛིན་ད་ལ་ལྷ་མཆོད་པ། །འཕྲིན་ལས་ཉམས་རྟགས་ས་ལམ་རིམ། །གཞི་ལམ་འབྲས་བུའི་ཆོས་རྣམས་ཀུན། །ཉག་གཅིག་ཀློང་དུ་མ་འདུས་མེད། །མངོན་སུམ་དོན་འདི་སུས་མཐོང་བ། །ཕྱོགས་རིས་ཀུན་གྱིས་ལྟ་བ་གྲོལ། མ་འགག་ཡེ་ཤེས་ཆེན་པོ་ཉིད། །རང་གསལ་ཕྱོགས་རིས་འཛིན་པ་གྲོལ། །དེ་ལས་མ་ཡེངས་རོལ་པར་སྤྱོད། །ཀུན་འཆར་སྤྱོད་ཀྱང་མི་ཆགས་སོ། །དེ་ལ་གསལ་འགྲིབ་གཉིས་སུ་མེད། །བློ་བྷཻཾ་ཡིད་དཔྱོད་མེད་པ་དེ། །རང་བབ་རྒྱ་ཡན་ལྷག་གེ་བ། །རྟག་ཆད་བློའི་མུན་སང་བས། །སྟོང་གསལ་ཡིད་གཉིས་བྷཻཾ་དང་བྲལ། །བྷཻཾ་པ་ཀུན་གྱི་མཆོག་ཡིན་ནོ། །རང་རིག་རྟོགས་པས་དབང་དོན་མཆོག །ཞུ་དང་བསྐུར་བའི་མཐའ་ལས་འདས། །དེ་རྟོགས་ཉམས་ཆག་ག་ལ་ཡོད། །བསྲུང་བྱ་སྲུང་བྱེད་མེད་པའི། །ཡེ་བསྲུང་ཆེན་པོ་ཨ་ལ་ལ། །རང་བྱུང་རིག་པའི་ཡེ་ཤེས་ལས། །མཐའ་དབུས་ཕྱོགས་མཚམས་མ་གྲུབ་སྟེ། །སྐུ་གསུམ་ལྷུན་གྲུབ་དཀྱིལ་འཁོར་མཆོག །ཐིག་ལེ་ཚོམ་བུ་རང་བྱུང་བས། །རང་བྱུང་རང་ཤར་མཆོད་རྫོགས་སོ། །རེ་དོགས་རང་གྲོལ་མཆོད་པའི་མཆོག །སྙིང་པོའི་སྒྲ་རྣམས་གྲགས་སྟོང་སྟེ། །བརྗོད་མེད་དོན་དེ་སུས་རྟོགས་པས། །སྙིང་པོ་སྔགས་ནི་རང་སར་གྲོལ། །ཡེ་གྲོལ་ཕྱམ་བརྡལ་དེ་ཉིད་ལས། །འགྲོ་དོན་རྟག་ཆད་ཕྱོགས་ལྷུང་བྲལ། །རང་བྱུང་རིག་པའི་དོན་རྟོགས་ནས། །ཕྲིན་ལས་རྩོལ་མེད་ལྷུན་གྲུབ་བོ། །མི་རྟོག་བདེ་ཆེན་ལྷུན་གནས་པས། །ཉམས་དང་རྟགས་ལ་དེ་མཁས་པས། །འཁྲུལ་གྲོལ་བཟང་ངན་བརྟག་པ་ཟད། །རང་བྱུང་ཡེ་ཤེས་འཛིན་པ་མེད། །སྐུ་གསུམ་ལྷུན་གྲུབ་སྦྱང་བསྒྲོད་བྲལ། །མཐར་ཕྱིན་ས་ལམ་དོན་རྟོགས་ཏེ། །ས་ལམ་དབྱེ་བ་འུབ་ཆུབ་བོ། །གང་ཡང་མ་གྲུབ་གཞི་རྩ་བྲལ། །ཀུན་ཡང་འབྱུང་བ་མ་འགག་བྷཻཾ། །ཀུན་གཞི་རྣམ་པར་དག་ཤེས་ན། །གཞི་དོན་མངོན་གྱུར་རང་སར་གྲོལ། །རང་བྱུང་མི་གཡོ་འགྱུ་བྱེད་བྲལ། །རྩོལ་བྲལ་ལམ་ལ་ཉེ་རིང་མེད། །ཡེ་ཤེས་མངོན་དུ་གྱུར་པ་དེ། །ལམ་གྱི་རྩོལ་བ་བྲལ་བའོ། །སྐུ་གསུམ་ལམ་དུ་ཆོས་ཟད་པས། །འབྲས་བུ་རེ་དོགས་བྲལ་བའོ། །དོན་གྱི་ཡིན་ལུགས་རང་སར་གནས། །བློའི་སྤྲོས་པ་རང་སར་ཆོད། །གཉིས་འཛིན་མཚན་མ་རང་སར་གྲོལ། །ཁྲེགས་ཆོད་ལྟ་བ་ནར་སོན་བས། །ཐོད་རྒལ་འབྲས་བུ་མཐར་ཕྱིན་ཏེ། །གཅིག་ཤེས་ཀུན་ལ་མཁས་པར་འགྱུར། །འདི་དོན་ཤེས་པར་བྱ་བ་ལ། །དང་པོ་སྤྱོད་པ་མདོར་བསྡུས་བཤད། །མ་ཆགས་འཛིན་པའི་སྤྱོད་པ་ནི། །ཉན་ཐོས་རང་རྒྱལ་བྱང་སེམས་གསུམ། །མཚན་ཉིད་ཐེག་པའི་སྤྱོད་པ་སྟེ། །དོན་ལ་ཆགས་པ་ཆེན་པོས་བཅིངས། །ཐབས་ཎ་གྲོལ་བ་ག་ལ་ནུས། །དོན་མེད་ཆགས་པའི་སྤྱོད་པའོ། །རང་སྣང་འཛིན་པའི་སྤྱོད་པ་སྟེ། །རྟོག་པས་རང་རྒྱུད་རབ་ཏུ་བཅིངས། །རང་རིག་རང་གིས་སྒྲིབ་པའི་ཕྱིར། །གྲོལ་བར་མི་ནུས་འཁོར་བར་གནས། །ཚུལ་འཆོས་དམ་ཚིག་སྤྱོད་པའོ། །དགག་སྒྲུབ་མེད་པའི་སྤྱོད་པ་ནི། །ཀྲི་ཡོག་སྡེ་གསུམ་ལ་སོགས་པ། །གསང་སྔགས་ཕྱི་ནང་སྤྱོད་པ་དང་། །རྟོག་པ་ལྷའི་ངོ་བོར་བཞེངས། །ཉོན་མོངས་དགག་པར་མི་འདོད་ཅིང་། །ཡེ་ཤེས་བསྒྲུབ་པར་མི་འདོད་པས། །ཚིག་དོན་འབྲེལ་བའི་སྤྱོད་པའོ། །དོན་ནི་ཆགས་མེད་མ་ཡིན་ཏེ། །དམ་ཚིག་ཡེ་ཤེས་གཉིས་སོགས་པ། །ཐབས་ཤེས་ཡོད་པའི་ཁྱད་པར་འཕགས། །ཐབས་ཆེན་འཛིན་སྤྱོད་དེ་བཞིན་ནོ། །དེ་བཞིན་སྤྱོད་པའི་རྣལ་འབྱོར་ཀྱང་། །ཡང་དག་ཉིད་ཀྱི་སྤྱོད་པ་མིན། །རྫོགས་ཆེན་བླ་མེད་རྩར་མ་ཉེ། །ཐབས་ཀྱི་ཁྱད་ཀྱི་བྱང་ཆུབ་འབྱུང་། །ལྟ་སྤྱོད་གཅིག་པའི་ངོས་གདུང་ལས། །འོག་མས་གོང་མ་ཁྱད་པར་འཕགས། །མ་ཆགས་མ་ཞེན་སྤྱོད་པ་ནི། །རྫོགས་ཆེན་ཨ་ཏིའི་སྤྱོད་པ་ཡིན། །བྱར་མེད་བྱས་མེད་བྱུང་བ་མེད། །འགྲོ་མེད་འོང་མེད་གནས་པ་མེད། །ཆགས་པ་མེད་ལ་ཞེན་པ་མེད། །བག་ཆགས་སྤུབ་ལ་ཡེ་ཤེས་འཆར། །དབུགས་བོར་ཡེ་ཤེས་ཞེན་པ་མེད། །སྣང་བའི་ཡུལ་ལ་སྒྲོན་མ་ཆགས། །སྣང་འགག་སྒྲོན་མ་ཞེན་པ་མེད། །ད་ལྟ་སྣང་བ་ཐམས་ཅད་ལ། །མ་འགག་ཆགས་ཀྱང་ཞེན་པ་གྲོལ། །རྣལ་འབྱོར་ཆེན་པོའི་སྤྱོད་པ་ཡིན། །སྣང་བའི་ཡུལ་ལ་ཆགས་གྱུར་ཀྱང་། །དོན་ལ་ཞེན་པ་མེད་པ་ནི། །བདག་དང་འཛིན་པའི་ཡུལ་རྟོག་པས། །ཡོད་མེད་གཉིས་ཀྱིས་མཐའ་ལས་གྲོལ། །དམིགས་པར་བྱེད་པའི་ལམ་ཡང་མེད། །གཉིས་འཛིན་རྟོག་པ་རང་ཟད་པས། །ཆོས་ཅན་ཐམས་ཅད་ཟད་པ་ཡིན། །སྙིང་པོས་རྒྱུད་འདིར་སུ་འཕྲད་པས། །རྫོགས་སངས་རྒྱས་པར་ཐེ་ཚོམ་མེད། །མཐར་ཐུག་སྙིང་པོའི་རྒྱུད་འདི་ཉིད། །གང་དགར་སྤྱོད་ན་ན་རཀ་ལྟུང་། །དེ་ཕྱིར་ཡུལ་དང་བསྟུན་པར་བྱ། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སྤྱོད་པ་མདོར་བསྡུས་ནས་དབྱེ་ཞིང་། རྒྱུད་དོན་དྲིལ་བའི་ལེའུ་སྟེ་བཞི་པའོ། །྅྅྅ ཡང་གཅིག་སྟོན་པས་བཀའ་སྩལ་པ། །ཀྱེ་ཧོ་ཡུམ་ཆེན་མཁའ་འགྲོ་ཉོན། །བྷཻཾ་པའི་རིམ་པ་འདི་ལྟ་སྟེ། །ཁ་དང་སྣའི་དབུགས་བསྡོམ་སྟེ། །རྟོག་མེད་འོག་འགྱུ་ཡིད་ཡོད་པས། །ཤེས་པ་གཅིག་པུ་ངོ་བོ་ཟེར། །འཕྲལ་གྱི་རྣམ་རྟོག་མེད་འདྲ་ཡང་། །ཡང་དག་དོན་ཆེན་དེས་མི་མཚོན། །བྱང་ཆུབ་སེམས་དཔའི་བསམ་གཏན་ནི། །སེམས་ནི་འཛིན་པ་མ་ཡིན་ཏེ། །ངང་ངམ་ཤུགས་ལས་སྐྱེ་བར་འདོད། །གོམ་ཞིང་ཀློང་དུ་གྱུར་པ་ལས། །ཟས་ཀྱི་འདུ་ཤེས་སྤང་བ་སྟེ། །ས་ལ་གནས་པ་རྣམས་ཀྱི་སྤྱོད། །རྣམ་རྟོག་མེད་པའི་ཞི་བ་སྟེ། །དེས་ཀྱང་དོན་ཆེན་མཚོན་མི་ནུས། །དེ་བཞིན་གཤེགས་པའི་དགོངས་པ་ནི། །ནམ་མཁའི་མཐོངས་སུ་ཤེས་པར་བྱ། །དེ་ཉིད་གོམ་པར་གྱུར་ན་ཡང་། །ཡེ་ཤེས་སྣང་བ་ལྷུག་པར་འཆར། །དེ་ལྟ་བུའི་ཡེ་ཤེས་ཏེ། །ངོ་བོ་རང་ཐོག་དོན་འཕྲོད་པས། །གང་ཤར་སྦྲུལ་མདུད་བཞིན་དུ་གྲོལ། །དོན་རྟོགས་སངས་རྒྱས་ཀུན་གྱི་སྲས། །ཐམས་ཅད་འདི་ལས་བྱུང་ཞིང་གྲོལ། །འགྲོ་བ་ཀུན་གྱི་ཤེས་རྒྱུད་ལས། །བསྣན་འཕྲི་མེད་པར་ལྷག་གེ་གནས། །ཀུན་འབྱུང་སྲིད་རྩ་རྟོགས་པས་གྲོལ། །འདི་ལ་རེག་མཐོང་ཐོས་པས་གྲོལ། །ཤི་ཁར་བཅང་ཀྱང་སྐུ་གསུམ་ཐོབ། །རྒྱུད་འདི་ཐོས་པས་སངས་རྒྱས་པས། །ངེས་པར་ཐོབ་པ་གདོན་མི་ཟ། །རང་བྱུང་ཡེ་ཤེས་ཉག་གཅིག་དོན། །ཡེ་ཤེས་གསུམ་ལྡན་དབྱེར་མེད་དོ། །རང་ཤར་ལྷུག་པ་གཟའ་གཏད་བྲལ། །ལྷུག་པ་ཁྲོལ་ལེ་བུན་ནེ་བ། །རིག་པ་རྟོགས་ཚེ་འཛིན་པ་གྲོལ། །རབ་འབྱམས་རིག་པའི་དབང་མེད་ན། །འདུས་བྱས་དབང་གི་སྨིན་མི་སྲིད། །རང་རྒྱུད་མ་སྨིན་གཞན་མི་གྲོལ། །བོག་རྣམས་དབང་གི་འབྱིན་པར་བྱེད། །དབང་བཞི་རྫོགས་པའི་མཐའ་ཉིད་དུ། །རྒྱུད་ལ་ཞེན་པ་མེད་གྱུར་ན། །དཀོན་ཅིང་གསེར་གཡུ་ལ་སོགས་འབུལ། །གཅེས་འཛིན་བློའི་བཏང་བའི་ཕྱིར། །རང་གི་བུ་ནི་འབུལ་བར་བྱ། །ཆགས་སྲེད་འཛིན་པ་སྤང་བའི་ཕྱིར། །རང་གི་ཆུང་མ་འབུལ་བར་བྱ། །ཚོགས་གཉིས་ཡོངས་སུ་རྫོགས་བྱའི་ཕྱིར། །ཡིད་འཇུག་བུ་མོ་གསེར་གཡུའི་བརྒྱན། །བླ་མ་ཉིད་ལ་འབུལ་བར་བྱ། །ནད་མུག་བསྐལ་པ་ཐར་བྱའི་ཕྱིར། །སྨན་འབྲུའི་ཕུང་པོ་འབུལ་བར་བྱ། །རྗེས་ལ་བདག་ལུས་སྲོག་སོགས་ཀྱང་། །ཕུལ་ན་ཡེ་ཤེས་དབྱིངས་སུ་ལྟ། །རྟག་ཆད་གདིངས་བཞིའི་ས་ནོན་འགྱུར། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བྷཻཾ་པའི་བྷཻཾ་པ་དབྱེ་བའི་ལེའུ་སྟེ་ལྔ་པའོ། །྅྅྅ ཡང་ཅིག་སྟོན་པས་བཀའ་སྩལ་པ། ཀྱཻ་ཧོ་ཡུམ་ཆེན་མཁའ་འགྲོ་ཉོན། །ཆོས་ཅན་མཚན་མ་ཐམས་ཅད་ནི། །ཤར་ནི་རང་གི་སྣང་བ་ཤར། །དེ་ལ་དམིགས་སོགས་མ་འགག་པར། །སེམས་ཀྱི་ལྟ་བ་ལོག་པ་ཡིན། །རྣམ་རྟོག་འགྱུ་འཕྲོ་ཅི་ཤར་ཡང་། །རང་གི་རིག་པའི་རོལ་བར་སྣང་། །ཆོ་འཕྲུལ་ཕྱིའི་སྣང་བ་སྟེ། །རྟོག་མེད་རང་གསལ་རིག་པ་སྟེ། །རྟོག་མེད་རང་གསལ་ཧྲིག་གེ་བ། །རང་བྱུང་ཆེན་པོར་ཤེས་པས་ན། །ཆོས་ཅན་ལྟ་བའི་ལྟ་བའོ། །ཆོས་ཉིད་རིག་པ་སྐྱེ་བ་མེད། །རང་གྲོལ་ཡུལ་གྱིས་མཁའ་རྒྱ་ལ། །རྣམ་རྟོག་མཚན་མ་ངང་གིས་མེད། །རིག་པ་དགག་སྒྲུབ་རྩོལ་བ་མེད། །ཞེན་ཆགས་སྤྱོད་པ་ག་ལ་ཡོད། །དེ་དོན་རྫོགས་པར་བྱེད་འདོད་ན། །བྱར་མེད་གཉེར་མེད་སོ་མ་ལས། །འབད་མེད་ངང་དུ་བཞག་པར་བྱ། །རང་བྱུང་གཤིས་ཀྱི་རིག་པ་འདི། །གང་གི་ཕྱོགས་སུ་མ་ལྷུང་བ། །བྷཻཻཾ་པ་ཆེན་པོ་ཞེས་བྱའོ། །ཐབས་ཀྱི་སྟོང་ཐབས་འདི་ལྟ་སྟེ །འདུ་ཤེས་གཅིག་པའི་འདུན་པའི། །རང་བབ་ཤེས་རབ་རང་ལྟ་ན། །གཟུང་འཛིན་འཁོར་བ་བློས་བཏང་ཕྱིར། །རང་སྣང་མ་ལ་ཡིད་ཆེས་ན། །ཆོས་ཉིད་སྐྱེ་མེད་རྟོགས་པར་འགྱུར། ། དེས་ན་ཆོས་ཅན་ལྟ་བ་ཡང་། །ཆོས་ཉིད་ལྟ་བ་ཉིད་དུ་འགྱུར། །ཐབས་ཀྱི་རྒྱལ་པོ་ཁྱད་པར་འཕགས། །གཟུང་འཛིན་འཁོར་བའི་སེམས་ཅན་ལ། །རང་རིག་ལྟ་བ་འདི་ལྟར་གནས། །གཞི་ཤེས་རིག་པ་ཀུན་ཏུ་བཟང་མོའི་མཁའ། །སྣང་བ་རྐྱེན་གྱིས་མ་བསླད་པ། །རང་རིག་ལྟ་བ་མཐར་ཐུག་སྟེ། །རྟགས་ནི་ཐུགས་རྗེས་འབྲེལ་ཐག་ཡིན། །དེ་ནི་སྐུ་ལྔ་དཀྱིལ་འཁོར་ཡིན། །དཔེ་ནི་ནམ་མཁའི་འཇའ་ཚོན་བཞིན། །གནས་ནི་ཙིཏྟའི་དཀྱིལ་ན་གནས། །ལམ་ནི་བྲེ་གུ་ཏ་ནས་འབྱུང་། །ཡུལ་ནི་ནམ་མཁའ་སྟོང་པ་ལས། །དུས་ནི་བར་དོའི་དུས་ནས་ཏེ། །ངོ་བོ་འགྱུར་མེད་ཆེན་པོ་ཡིན། །སྟོང་དང་གསལ་དང་མི་འགག་ཕྱིར། །རྟག་ཆད་ཕྱོགས་ལྷུང་མེད་པའོ། །འགགས་མེད་རྩལ་ལས་ཅིར་ཡང་འཆར། །སྟོང་གསལ་རིག་པའི་འགྱུར་བ་མེད། །རང་བཞིན་གསལ་དང་ཀུན་ཁྱབ་ལ། །ཐུགས་རྗེས་སྣང་བ་མ་འགག་བའོ། །རྒྱུན་ནི་ཀུན་ལ་དེ་བཞིན་གནས། །རྐྱེན་ནི་བླ་མའི་ངག་ལ་གསལ། །རྒྱུ་རྐྱེན་འཚོགས་ན་རིག་པ་མཐོང་། །སྟོང་ཉིད་གསལ་སྟོང་ལྷུག་པ་ལ། །འཛིན་མེད་ཕྱོགས་ལྷུང་འཁྲུལ་པ་མེད། །རང་གསལ་འཛིན་མེད་ཕྱམ་བདལ་བ། །སངས་རྒྱས་ཀུན་གྱི་དགོངས་པ་ཡིན། །དབྱིངས་ཆེན་ཀུན་བཟང་བྷ་ག་ལ། །སྣང་བ་ཐབས་ཀྱི་རྡོ་རྗེར་སྤྱོད། །གཉིས་མེད་བདེ་བའི་གར་མཆོད་འབུལ། །འཁོར་བ་མ་སྤང་བདེ་སྟོང་གྲོལ། །གཞན་གྱི་དོན་ཆེན་བྱེད་འདོད་ན། །མཚན་མ་འབྱུང་བའི་དུས་དག་ཏུ། །རང་ཉིད་ཀུན་བཟང་ཡུམ་ལྔར་བྷཻཾ། །ཕྱོགས་དང་བསྟུན་ཏེ་རང་གིས་ལྕེ། །རྡོ་རྗེ་དང་ནི་རིན་ཆེན་དང་། པདྨ་དང་ནི་རལ་གྲི་དང་། །འཁོར་ལོ་བྷཻཾ་ལ་རྒྱུད་ཉིད་བརྗོད། །འདི་ཉིད་མ་གསང་འབྲས་མི་འབྱུང་། །འདི་འཆང་སྐྱེས་བུ་སྐལ་བ་བཟང་། །དེ་བྷཻཾ་རྣལ་འབྱོར་སྨོས་ཅི་དགོས། །དུས་གསུམ་རྒྱལ་བའི་མཆོད་རྟེན་ཡིན། །རང་རིག་རྟོགས་པའི་གང་ཟག་དེ། །འདས་པའི་ཚེ་ན་གདུང་བཞུ་བ། །གདུང་རིགས་ལྔའམ་གཅིག་འབྱུང་ངེས། །རྡོ་རྗེ་རིན་ཆེན་པདྨའི་གདུང་། །ལས་དང་དེ་བཞིན་གཤེགས་པའི་གདུང་། །ཤ་རི་རམ་དང་ཆུ་རི་རམ། །བ་རི་རམ་དང་ཉ་རི་རམ། །པཉྩ་རམ་དང་ལྔ་ལྡན་གདུང་། །རིགས་ལྔའི་གདུང་སྟེ་སྐུ་ཡང་འབྱུང་། །དེ་རྣམས་སྐུ་ཐོབ་རྟགས་ཡིན་ནོ། །གསུང་གི་རྟགས་ནི་མེ་འོད་སྒྲ། །འཇའ་ཚོན་ནམ་མཁའ་དྭངས་གསལ་བས། །ངེས་པར་ཐུགས་ཐོབ་རྟགས་ཡིན་ནོ། །གདུང་རིགས་ལྔ་ནི་དེ་ལས་འབྱུང་། །མགོ་དང་ཁྲག་དང་སྒལ་ཚིག་དང་། །རྐང་དང་སྙིང་ལ་འབྱུང་བ་ཡིན། །ཨེ་མ་འདི་ནི་ཁྱད་པར་འཕགས། །ཀུན་གྱི་སྤྱོད་ཡུལ་མ་ཡིན་ཏེ། །དབང་པོ་རྣམ་ལྔ་འོན་འགྱུན་ཀྱང་། །རྒན་གཞོན་ཕོ་མོ་དགེ་སྡིག་མེད། །བག་ཆགས་བཟང་ངན་མེད་པ་རུ། །འདི་ཉིད་བཅང་བས་བུདྡྷའོ། །ཐ་མ་དབུགས་ལ་སློབ་ཀྱང་གྲོལ། །སངས་རྒྱས་གདུང་འཛིན་སྲས་གཅིག་ཡིན། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ལྟ་བ་མཐར་ཕྱིན་པའི་དོན་བསྟན་པའི་ལེའུ་སྟེ་དྲུག་པའོ། །྅྅྅ དེ་ནས་མཁའ་འགྲོ་མ་ཐམས་ཅད་ཀྱིས་འདི་སྐད་ཅེས་བསྐུལ་ལོ། །ཀྱཻ་སྟོན་པ་ཡུམ་ཆེན་མོ། །ཐོག་མར་ཆོས་སྐུ་ཞེས་བྱ་བའི། །མིང་དོན་གང་ལགས་གསུང་དུ་གསོལ། །ཞེས་ཞུས་པས། སྟོན་པས་ལན་དུ་བཀའ་སྩལ་བ། ཀྱེ་ཧོ་འདུས་བའི་འཁོར་ཚོགས་ཉོན། །ཆོས་སྐུ་ཡེ་ཤེས་ཆེན་པོ་སྟེ། །མི་འགྱུར་སྙིང་པོ་ལྷང་ངེ་བ། །རང་ཤར་ཀུན་ཏུ་བདལ་ལེ་བ། །མཚན་ཉིད་རྣམ་གསུམ་མེ་རེ་བ། །ངོ་བོ་སྟོང་ལ་རང་བཞིན་གསལ། །ཐུགས་རྗེ་མ་འགག་ཟང་ཐལ་ལེ། །ཆོས་ཀྱི་སྐུ་ཡི་མཚན་ཉིད་ཡིན། །ཡེ་ཤེས་སྣང་བའི་ཡུལ་ལ་ཤར། །རབ་དགྱེས་འཛིན་ལྟར་སྣང་ན་ཡང་། །ཆགས་ཞེན་འཛིན་པའི་ངོ་བོ་སྟོང་། །མི་འཇིགས་སྲ་བ་བརྟན་པ་སྟེ། །ངོ་བོ་རང་གསལ་རྣམ་པ་གསལ། །བྱ་བྱེད་ཐམས་ཅད་རང་རྫོགས་པས། །ཆོས་ཀྱི་སྐུའི་ངེས་ཚིག་ཡིན། །ཡེ་ནས་ཕྱོགས་རིས་སྤྲོས་དང་བྲལ། །འགྱུར་མེད་ཆེན་པོ་ཞེས་ཀྱང་བྱ། །དེ་ལ་གཉིས་ཆོས་དྲི་མ་མེད། །འགགས་མེད་རོལ་བ་ཞེས་ཀྱང་བྱ། །ནམ་མཁར་གར་ཁྱབ་རིག་པའི་ཁྱབ། །དེས་ཁྱབ་ཀུན་ལ་འཁོར་འདས་ཁྱབ། །ཁྱབ་པ་ཆེན་པོ་ཞེས་ཀྱང་བྱ། །གསལ་དང་དྭངས་དང་མ་འདྲེས་གསུམ། །ཆོས་ཀྱི་སྐུའི་ཡུལ་དུ་བཤད། །འགགས་མེད་དམིགས་མེད་འཛིན་པ་མེད། །དཔེ་དང་ཚད་དང་མཚོན་པ་མེད། །ཆོས་ཀྱི་སྐུ་ཡི་གནས་ཡིན་ནོ། །སྣང་བ་དག་ནི་འགགས་མེད་ཀྱང་། །གཉིས་སྣང་བདག་ཏུ་འཛིན་པ་མེད། །དེ་ལ་བློའི་ཞེན་པ་མེད། །ཆོས་ཀྱི་སྐུའི་སྤྱོད་པ་ཡིན། །ལྷང་ངེ་རིག་པ་ཡིན་ལུགས་ལ། །ལྷན་ནེ་རྟོག་པའི་ཕུ་ཐག་བཅད། །མ་ཡེངས་སྣང་ཕྱིར་མི་འཕྲོ་བ། །ཆོས་ཀྱི་སྐུའི་བྷཻཾ་པའོ། །ལྟར་མེད་ལྟ་བྱའི་ཡུལ་ལས་འདས། །བལྟས་ཟིན་གཞི་ལ་འཁོར་འདས་རྫོགས། །ལྟ་རྫོགས་དེ་ལ་འབད་རྩོལ་ཞིག །དེ་ནི་ཆོས་སྐུའི་ལྟ་བ་ཡིན། །རང་རིག་ལྷུན་གྲུབ་བྱ་བ་ཡིན། །ཀ་དག་མིང་ཟད་བྱ་བ་ཡིན། །འདི་མིན་གཞན་ནས་བྱུང་ས་མེད། །ཆོས་ཀྱི་སྐུའི་འབྲས་བུ་ཡིན། །མཐའ་གྲོལ་ཡིན་པས་གྲུབ་བྱ་མེད། །རང་གྲོལ་ཡིན་པས་གྲུབ་བྱ་ཟིན། །ངང་གིས་མ་གོས་བསྒྲུབ་དང་བྲལ། །ཆོས་ཀྱི་སྐུའི་ཕྲིན་ལས་ཡིན། །གཅིག་འབྱུང་རིག་པ་ཉག་གཅིག་ལས། །གཉིས་འབྱུང་སྒྲོན་མ་གཞི་རྫོགས་བྱུང་། ཀུན་འབྱུང་སྣང་བ་སྣ་ཚོགས་པས། །ཆོས་ཀྱི་སྐུའི་ཡོན་ཏན་ཡིན། །ཡུལ་ཀུན་མ་འགགས་ཟང་ཐལ་ལེ། །འཁོར་འདས་མ་འདྲེས་གསལ་ལམ་མེ། །བཟུང་མེད་ངང་ནས་དངས་སང་ངེ་། །མི་འགྱུར་ངང་ནས་སྟོང་ཧྲིག་གེ། །ཆོས་ཀྱི་སྐུའི་སྣང་བ་ཡིན། །རིག་པ་སྐྱེ་མེད་ཕྱི་ནང་མེད། །ཁ་དོག་རི་མོ་དབྱིབས་སུ་མེད། །ཆོས་ཀྱི་སྐུའི་རང་ལུས་ཡིན། །དབུགས་ཎ་འགྲོ་བར་བྱེད་པ་མེད། །ཡིད་མེད་འོང་མེད་བྱེད་པ་མེད། །སེམས་མེད་གནས་པར་བྱེད་པ་མེད། །ཆོས་ཀྱི་སྐུའི་ཕོ་བྲང་ཡིན། །གསལ་བ་ཉི་མ་ལྟ་བུ་ལ། །གཏིང་ཟབ་རྒྱ་མཚོ་ལྟ་བུ་སྟེ། །མ་ཆགས་པདྨ་ལྟ་བུ་སྟེ། །མི་འགྱུར་རི་བོ་ལྟ་བུ་སྟེ། །ཡངས་བ་ནམ་མཁའ་ལྟ་བུ་ལ། །ཟིལ་གནོན་སེང་གེ་ལྟ་བུ་རུ། །ཆོས་ཀྱི་སྐུའི་མཚོན་དཔེའ་བཞག་པའོ། །བསམ་བྲལ་རིག་པ་ཆོས་ཀྱི་སྐུ། །ཡུལ་ལ་སྣང་བ་བྱ་བ་མེད། །བདག་ཏུ་སྣང་བར་བྱ་བ་མེད། །ལྷུན་གྲུབ་འགྲོ་བ་ཡོངས་ལ་ཁྱབ། །ཐོག་མ་ཐ་མ་བར་གསུམ་དུ། །སྐུ་གསུམ་དབྱེ་བ་མེད་པ་རུ། །སེམས་ཅན་ཀུན་གྱི་རྒྱུད་ལ་གནས། །ཆོས་སྐུ་འཕོ་འགྱུར་མེད་པ་འདི། །རང་རང་ཙིཏྟའི་དཀྱིལ་ན་གནས། །སྟོང་པ་ཡེ་ཤེས་སྙིང་པོ་ཅན། །གསལ་བ་འོད་ཀྱི་སྙིང་པོ་ཅན། །རང་བྱུང་རིག་པའི་སྙིང་པོ་ཅན། །བརྗོད་པ་མཐའ་བྲལ་ཆོས་སྐུ་འདི། །ཀུན་ལ་ཡོད་ཀྱང་ངོ་མ་ཤེས། །རྒྱུ་ལ་ཡོད་ཀྱང་རྐྱེན་མེད་ན། །རྐྱེན་ནི་བླ་མའི་དྲིན་ལས་མཐོང་། །དེ་ཕྱིར་བླ་མ་སྤྱི་བོར་ལོང་། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཆོས་སྐུའི་ངེས་དོན་བསྟན་པའི་ལེའུ་སྟེ་བདུན་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱཻ་སྟོན་པ་ཡུམ་ཆེན་མོ། །དེ་ལས་ལོངས་སྐུ་ཞེས་བྱ་བའི། །མིང་དོན་གང་ལགས་གསུང་དུ་གསོལ། །ཞེས་ཞུས་པ་དང་། སྟོན་པས་ལན་བསྩལ་འདི་སྐད་དོ། །ཀྱེ་ཧོ་འདུས་པའི་འཁོར་ཚོགས་ཉོན། །ལོངས་སྤྱོད་རྫོགས་པའི་སྐུ་ལ་ཡང་། །དབྱེ་ན་བསམ་གྱིས་མི་ཁྱབ་སྟེ། །མདོར་བསྡུས་བཤད་ཀྱི་འདི་ལྟར་རོ། །སྟོང་མདངས་ཁ་དོག་མ་འདྲེས་པས། །རང་རང་སོ་སོའི་མཚན་ཉིད་འཛིན། །མཚན་དཔེ་འོད་ཟེར་དཔལ་དུ་འབར། །ཡབ་ཀྱི་སྣང་ཆ་འཛིན་པ་ལ། །ཡུམ་ཡང་སྟོང་ཆ་ཙམ་དུ་འཛིན། །གཉིས་མེད་འཁྲིལ་བའི་རྣམ་པ་ལ། །ལོངས་སྤྱོད་རྫོགས་སྐུའི་མཚན་ཉིད་འཛིན། །སྐད་ཅིག་རྡོ་རྗེར་པདྨ་ལས། །སྐྱེ་མེད་འགག་མེད་རོལ་པ་ལས། །ཡབ་ཡུམ་འཆི་མེད་རྟག་པ་ཅན། །འོད་ལྔ་སྐུ་ལྔ་ཞིང་ཁམས་ལྔ། །མ་འདྲེས་མ་བྱས་སོ་སོར་གསལ། །རྣམ་སྣང་ལ་སོགས་ཡབ་ལྔ་དང་། །ཀུན་བཟང་ལ་སོགས་ཡུམ་ལྔར་སྣང་། །ཤར་ཕྱོགས་ལ་སོགས་ཚོམ་བུ་ལྔ། །མི་འགྱུར་ངེས་པ་ལྔ་ལྡན་པས། །ཡེ་ཤེས་ལྔ་ཤེས་རྟོགས་པ་ལྔ། །གཞི་ལམ་འབྲས་བུ་ལྔ་དང་ལྡན། །གནས་ལྔ་ཡུལ་ལྔ་ངོ་བོ་ལྔ། །ལོངས་སྤྱོད་རྫོགས་སྐུའི་ངོ་བོ་ཡིན། །ཆོས་ཉིད་སྟོང་པ་ཡིན་པས་ལོངས། །འགགས་མེད་རོལ་པ་སྣང་བས་སྤྱོད། །གསལ་ལ་མ་འདྲེས་པས་ན་ལོངས། །དེ་ལས་འཛིན་པ་མེད་པས་སྤྱོད། །སྣང་སྟོང་འདུ་འབྲལ་མེད་པས་ལོངས། །ས་ལེ་དབྱེ་བསལ་མེད་པས་སྤྱོད། །གསལ་ལ་དངོས་པོ་མེད་པས་ལོངས། །རྩོལ་མེད་སྤྲུལ་པ་འགྱེད་པས་སྤྱོད། །དམིགས་མེད་དོན་ལ་རྫོགས་པས་རྫོགས། །རྟག་ཆད་ཕྱོགས་སུ་མ་ལྷུང་བར། །རིག་པའི་ངང་དུ་རྫོགས་པས་རྫོགས། །བློ་འདས་བྱས་པ་མ་ཡིན་ཅིང་། །སྤྱད་བྱའི་ཕྱོགས་དང་བྲལ་བ་རྫོགས། །རང་རིག་རིག་པའི་དོན་རྟོགས་ནས། །གཞན་གྱི་གཟུང་འཛིན་གྲོལ་བས་རྫོགས། །སྣང་སྟོང་རང་ཆས་ཡིན་པས་དཔའ། །གསལ་སྟོང་རང་ཆས་ཡིན་བས་དཔའ། །རིག་སྟོང་རང་ཆས་ཡིན་པས་དཔའ། །མ་འགག་ཡུལ་ལ་སྤྱོད་པས་དཔའ། །རྒྱན་དང་ཆ་ལུགས་མཛེས་པས་དཔའ། །ཁ་དོག་ཞིང་ཁམས་དངས་པས་དཔའ། །ངོ་བོ་གཡོ་བ་མེད་པས་སྐུ། །མ་འགགས་སྤྲུལ་པ་འཆར་བའི་སྐུ། །སྤྲུལ་ཡང་ཐིག་ལེར་འདུས་པའི་སྐུ། །སྔ་ཕྱི་རྩིས་གདབ་མེད་པའི་སྐུ། །ཤ་ཁྲག་སྲོག་ཆགས་བྲལ་བས་སྐུ། །དེ་ནི་ལོངས་སྐུའི་རྣམ་བཤད་ཡིན། །གང་ཟག་དབང་པོ་ཡང་རབ་ཀྱིས། །དེ་དོན་ཐོབ་པར་འདོད་པ་ན། །ཐོག་མར་བླ་མ་བཅུད་ལྡན་བརྩལ། །ལོ་རྒྱུས་ཡིད་ཆེས་གདིང་ཆོས་ནས། །དབང་ནི་རྣམ་པ་བཞི་ཡིན་ཡང་། །སྐལ་བར་ལྡན་པ་སྨིན་པར་བྱ། །སྤྲོས་བཅས་སྤྲོས་མེད་རབ་སྤྲོས་མེད། །ཤིན་ཏུ་རིག་པའི་རྩལ་དབང་བསྐུར། །དབང་མེད་དངོས་གྲུབ་ཐོབ་མི་འགྱུར། །དབང་ཐོབ་མ་བསྒྲུབ་སྐུ་གསུམ་ཐོབ། །དབང་རྟེན་དམ་ཚིག་གསུམ་ཡང་བསྲུང་། །གདམས་པ་སྦྱོར་དངོས་མཇུག་གསུམ་སྟེ། །མི་རྟག་སྙིང་རྗེ་བྱང་སེམས་སྦྱང་། །ལུས་འདི་མ་རིག་རྒྱུ་བསྐྱེད་ཕྱིར། །རིགས་དྲུག་ས་བོན་ཉིད་དུ་གནས། །སྤྱི་བོ་མགྲིན་པ་སྙིང་ཁ་དང་། །ལྟེ་བ་གསང་བ་རྐང་མཐིལ་དུ། །ཨ་ཏྲི་ནྲྀ་སུ་པྲེ་དུ་དྲུག །རིག་པ་སྐུ་གསུམ་དངོས་ཡིན་ཕྱིར། །སྐུ་གསུམ་ཡི་གེ་གསུམ་དུ་ཤར། །ཡི་གེ་རྩལ་སྦྱངས་རུ་ཤན་འབྱེད། །རྩ་གསུམ་ༀ་ཨཱཿཧཱུྃ་གསུམ་བཟླས། །འོད་ཟེར་མེའི་དམིགས་ཤིང་བསྲེག །འདི་ལ་དགོས་བ་རྣམ་པ་གཉིས། །ཐུན་མོང་མཆོག་གི་དབྱེ་བ་བརྟགས། །དེ་ནས་སྒོ་གསུམ་རྣལ་དུ་ཕབ། །ཉན་ཐོས་ཞི་བའི་ལྟ་སྟངས་ཀྱིས། །ལུས་ངག་ཡིད་གསུམ་རྣལ་དུ་ཕབ། །བྷོ་དྷི་ས་ཏྭའི་ལྟ་སྟངས་ཀྱིས། །རྣལ་ཕབ་བདེ་བ་ཉིད་ཐོབ་འགྱུར། །ཁྲོ་བོ་ཉིད་ཀྱི་ལྟ་སྟངས་ཀྱིས། །རྣལ་ཕབ་ཡོན་ཏན་གསུམ་ཙམ་འགྲུབ། །དང་པོ་སྟོང་པའི་རྩ་བ་བཅད། །དེ་ནས་སེམས་ཀྱི་རང་རྩལ་བརྩལ། །དེ་ནས་བྱུང་གནས་འགྲོ་གསུམ་བརྩལ། །དེ་ནས་རྣམ་རྟོག་སེམས་ངོ་སྤྲད། །སེམས་ནི་སྟོང་བའི་སྟོང་རྩ་སྣང་། །སྣང་སྟོང་གཉིས་མེད་རང་གྲོལ་ཉིད། །དུག་ལྔ་ནང་དུ་རང་གྲོལ་དང་། །ཚོགས་དྲུག་ཕྱི་རུ་རང་གྲོལ་ལོ། །དེ་ལྟར་རང་སེམས་གྲོལ་གྱུར་ན། །བར་དོ་མེད་པར་སངས་རྒྱས་སོ། །གནས་རྟེན་གྲོལ་བའི་གདིང་ཐོབ་ནས། །ཕྱི་ནང་བྱ་བ་དགུ་བཏང་ནས། །གནས་གསུམ་སྒོ་གསུམ་རབ་ཏུ་གཟིར། །མངོན་སུམ་རང་ཐོག་དབབ་པར་བྱ། །གླང་སེང་དྲང་སྲོངབཞུག་སྟངས་བཅའ། །ངག་ནི་སྨྲ་བཅད་རླུང་གནད་འདོར། །སེམས་ནི་སྨིན་ཕྲག་མཁའ་ལ་གཏད། །སྒོ་ཡུལ་རླུང་གི་གནད་བསྟུན་པས། །ཡུལ་ལས་ཡེ་ཤེས་སྔོན་དུ་སྣང་། །སྟོང་གསལ་དངས་ལྔའི་སྒོ་ཕྱེས་ཏེ། །ཐིག་ལེ་གསལ་སྟོང་མཐའ་བྲལ་ཉིད། །རྐྱེན་མེད་རྩོལ་བྲལ་ལྷུག་པར་འཆར། ཙཀྵུས་ཟིམ་བུས་སུཪྱར་ལྟ། །ཤར་གྱི་རྒྱ་སྐར་བཞིན་དུ་གསལ། །ཕྱིའི་ནམ་མཁའ་སྟོང་བ་ལ། །དབང་པོ་འདུག་ཚུལ་སུས་གཏད་པས། །ཕྱི་དབྱིངས་མྱུར་དུ་མཐོང་བར་འགྱུར། །རྐྱེན་བྲལ་གསུམ་ལ་གསལ་བ་ཡིན། །ཡུལ་ལ་གསལ་བའི་ཡེ་ཤེས་ནི། །ཕྱི་དབྱིངས་ནམ་མཁའི་མེ་ལོང་འདྲ། །ནང་དབྱིངས་རྣམ་དག་རྨ་བྱ་འདྲ། །བདག་པོའི་བྱད་ལྟར་གསལ་བར་བྱེད། །རིག་པ་རྡོ་རྗེ་ལུ་གུ་རྒྱུད། །བདག་པོའི་སེམས་དང་མཚུངས་པའོ། །རང་རིག་ལུག་རྒྱུད་འདི་བཞིན་གསལ། །ཡེ་ཤེས་ལྔ་ལྡན་འོད་ཀྱི་སྐུ། །གསལ་སྟོང་འབྲེལ་པ་ལུ་གུ་རྒྱུད། །ཅིར་ཡང་འགྲོ་འོང་རྣམ་པ་ཅན། །འགུལ་བ་དང་ནི་འཁྲིགས་པའོ། །སྙིང་དངས་འགགས་མེད་ལུ་གུ་རྒྱུད། །གསལ་བདེ་རང་རིག་སྟོང་པ་ཉིད། །དབྱེར་མེད་གསལ་བ་མ་འདྲེས་གནས། །རིག་གནད་ལུགས་རྒྱུད་བཙོན་དུ་བཟུང་། །མངོན་སུམ་བརྡལ་བ་ཉིད་ཀྱི་རྟེན། །དེ་ལ་སྣང་བ་བཞི་འཆར་ཏེ། །ཆོས་ཉིད་མངོན་སུམ་སྣང་བ་ཡིས། །ཡིད་དཔྱོད་འཛིན་པའི་ལྟ་བ་ནུབ། །གོང་དུ་འཕེལ་པའི་ཉམས་སྣང་གིས། །འཁྲུལ་པའི་སྣང་བ་རང་སར་དག །རིག་པ་ཚད་ཕེབ་སྣང་བ་ཡིས། །སྐུ་གསུམ་འགྲུབ་བྱའི་མདུད་པ་ཞིག །ཆོས་རྣམས་ཟད་པའི་སྣང་བ་ཡིས། །ཁམས་གསུམ་འཁོར་བའི་རྒྱུན་ཐག་བཅད། །སྣང་ཉམས་ཤེས་ཉམས་ལ་སོགས་པ། །བློས་བཅས་ཀུན་རྫོབ་འཁྲུལ་བར་བཤད། །སྡོད་པ་གསུམ་གྱིས་ཚད་བཟུང་ནས། །ཐོབ་པ་གསུམ་གྱི་གཟེར་གདབ་པས། །ཟག་བཅས་ཕུང་པོ་མི་སྣང་བའོ། །མི་འགྱུར་ལྟ་བའི་གདིང་ཆེན་བཞི། །མི་རྟོག་ཡེ་ཤེས་ཚད་བཟུང་ནས། །འཁོར་བ་གཏན་སྤྲུག་ཨ་ལ་ལ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་གསང་སྔགས་ཀྱི་གནད་མཛོད་ལས། །ལོངས་སྐུའི་ངོ་བོ་དབྱེ་བ་དང་། ངོ་སྤྲད་བསྟན་པའི་ལེའུ་སྟེ་བརྒྱད་པའོ། །྅྅྅ ཡང་འཁོར་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱཻ་སྟོན་པ་ཡུམ་ཆེན་མོ། །སྤྲུལ་སྐུ་ཞེས་པ་གསུངས་པའི། །མིང་དོན་གང་ལགས་གསུང་དུ་གསོལ། །ཞེས་ཞུས་བ་དང་། །སྟོན་པས་ལན་དུ་བཀའ་བསྩལ་བ་འདི་སྐད་དོ། །ཀྱེ་ཧོ་རིག་རྩལ་འཁོར་རྣམས་ཉོན། །སྤྲུལ་པ་སྐུ་ཡི་མཚན་ཉིད་ནི། །བྱ་བ་རྫོགས་པའི་སྤྲུལ་སྐུ་དང་། །བྱ་བ་བྱེད་པ་གཉིས་སུ་འདོད། །བྱ་བ་རྫོགས་པའི་སྦྲུལ་སྐུ་ནི། །རང་གི་རྒྱུ་གྲོལ་མངོན་སངས་རྒྱས། །དེ་ནས་སྤྲུལ་པ་འགྱེད་པའོ། །དེ་ནི་ཕྱི་ནང་བྱ་བ་རྫོགས། །བྱ་རྫོགས་སྤྲུལ་སྐུ་ཡིན་པར་འདོད། །བྱ་བ་བྱེད་པའི་སྤྲུལ་སྐུ་ནི། །རིགས་དྲུག་ལ་སོགས་འཇིག་རྟེན་དུ། །སྟོན་པ་དེ་དང་མཐུན་པར་སྤྲུལ། །སྐད་ཀྱང་ལྷ་སོགས་མཐུན་པར་སྨྲ། །ཤེས་རྒྱུ་གཞན་དོན་མ་རྨོངས་པས། །གཞན་དོན་མཐུན་པར་དོན་བྱེད་པས། །ཉོན་མོངས་རང་རྒྱུད་དག་ལ་མེད། །འགྲོ་བ་ཟིལ་གྱིས་གནོན་པར་བྱེད། །བག་ཆགས་ལུས་འདི་མངོན་པའོ། །བསོད་ནམས་ཚོགས་གཉིས་ནར་སོན་པའི། །དུས་ལ་བབ་པའི་སེམས་ཅན་ལ། །ཡང་དག་དོན་ཆེན་སྟོན་པར་བྱེད། །དེ་ཡང་དབང་པོའི་ཁྱད་པར་གྱིས། །ཉན་ཐོས་ལ་སོགས་སྣང་བ་རུ། །ཚིག་གོ་དོན་མི་གོ་བར་སྟོན། །དེ་ནི་རྟོག་པ་སྔོན་ནས་སྤང་། །རང་སངས་རྒྱས་ཀྱི་སྣང་བ་ལ། །རྟེན་འབྲེལ་སྒོ་ནས་སྟོན་པ་སྟེ། །ང་རྒྱལ་དག་ནི་སྤང་བར་བསྟན། །བྱང་ཆུབ་སེམས་དཔའི་ཐེག་པ་ལ། །སྨོན་དང་འཇུག་པའི་སྒོ་ནས་སྟོན། །ཉོན་མོངས་ཞེ་སྡང་སྤང་པའོ། །ཀྲི་ཡ་དག་གི་ཐེག་པ་ལ། །ལྷར་བསྐྱེད་པའི་སྒོ་ནས་སྟོན། །ཉོན་མོངས་གཏི་མུག་སྤང་བའོ། །ཨུ་པ་ཡའི་ཐེག་པ་ལ། །གཉིས་ཀའི་སྒོ་ནས་སྟོན་པ་ན། །ཉོན་མོངས་ཕྲག་དོག་སྤང་པའོ། །ཡོ་ག་དག་གིས་ཐེག་པ་ལ། བྱང་ཆུབ་ལྔའི་ཚུལ་གྱིས་བསྟན། །ཉོན་མོངས་ཁོང་འཁྲོ་སྤང་བར་བྱེད། །མ་ཧཱ་ཡོ་གའི་ཐེག་པ་ལ། །ཏིང་འཛིན་རྣམ་པ་གསུམ་གྱིས་བསྟན། །ཉོན་མོངས་ལྔ་པོ་གནས་བསྒྱུར་རོ། །ཨ་ནུ་ཡོ་གའི་ཐེག་པ་ལ། །དབྱིངས་དང་ཡེ་ཤེས་དབྱེའ་མེད་སྟོན། །ཉོན་མོངས་ཐམས་ཅད་བཅད་པར་འདོད། །ཨ་ཏི་དག་གི་ཐེག་པ་ལ། །ཡེ་གྲོལ་བརྡལ་བ་ཆེན་པོ་སྟོན། ཉོན་མོངས་གནས་དག་ཆེན་པོའོ། །གང་ཟག་རིགས་ཅན་འགའ་འགའ་ལས། །ཀུན་གྱི་རྟོགས་པར་ག་ལ་འགྱུར། །དབང་པོའི་གོ་ལུགས་སོ་སོ་སྟེ། །ལ་ལས་བྷཻཾ་པ་ཅན་དུ་གོ། །ལ་ལས་རིག་མེད་སྟོང་པར་གོ། །ལ་ལས་རིག་མེད་བེམ་སྟོང་གོ། །ལ་ལས་རིག་པ་རྐྱང་པར་གོ། །ལ་ལས་སེམས་ལ་སངས་རྒྱས་གོ། །ལ་ལས་ཀུན་གཞི་ཆོས་སྐུར་གོ། །ལ་ལས་རྒྱུ་འབྲས་རྟག་པར་གོ། །ལ་ལས་བྷཻཾ་པ་ཅན་སྣང་ལ། །རྫོགས་པའི་རིམ་པ་མེད་པར་གོ། །དེ་རྣམས་སྟོན་བྱེད་སྤྲུལ་པའི་སྐུ། །གསང་སྔགས་བླ་མེད་གནས་ཆེན་འདི། །འགའ་ལས་སྣང་བར་མི་འགྱུར་ཏེ། །མ་གསུང་གསུང་པར་མི་འགྱུར་རོ། །སྐབས་སུ་གསུང་པར་གྱུར་ན་ཡང་། །དགྲ་བཅོམ་རང་རྒྱལ་མདོ་སྡེ་དང་། །ཐེག་དམན་ལྟ་ལོག་མེད་ནང་དུ། །རྫོགས་ཆེན་བླ་མེད་སྒྲོགས་པར་འགྱུར། །དེ་ནས་བློ་དམན་གཞན་ལ་གསང་། །དེ་ལྟར་སྟོན་པའི་སྐྱེས་བུ་དེ། །བྱ་བ་བྱེད་པའི་སྤྲུལ་སྐུ་ཡིན། །འཇིག་རྟེན་བློ་དང་མཐུན་པར་སྤྲུལ། །སྤྲུལ་པའི་སྐུ་རུ་གྲགས་པའོ། །འཕྲིན་ལས་བྱ་བ་བྱེད་པའི་ཕྱིར། །སྤྲུལ་པའི་སྐུ་རུ་ངས་བཤད་དོ། །སེམས་ཅན་སངས་རྒྱས་སར་སྒྲོལ་བས། །སྤྲུལ་པའི་སྐུ་རུ་ངས་བཤད་དོ། །ཞིང་ཁམསགཅིག་ཏུ་ཡུན་ཐུང་ཕྱིར་། །སྤྲུལ་པའི་སྐུ་རུ་ངས་བཤད་དོ། །འགྲོ་ཀུན་མཛེས་པར་མཐོང་བའི་ཕྱིར། །སྤྲུལ་པའི་སྐུ་རུ་ངས་བཤད་དོ། །འགྲོ་ན་མགྱོགས་ལ་བསྡད་ན་བརྗིད། །ངེས་མེད་ཚིག་ལ་བྲག་ཆ་འདྲ། །སྐུ་དང་རྟག་དང་ཡི་གེ་བརྒྱན། །འགྲོ་དོན་འཕེལ་འགྲིབ་དུ་མ་སྟོན། །དབང་པོ་འགྱུར་ལྡོག་དུ་མ་འཆར། །སྤྱོད་པ་མ་ངེས་ཆོ་རོལ་སྤྱོད། །ཅི་སྨྲ་རྗེས་སུ་འཛིན་པ་མེད། །རང་གི་ཞེ་འདོད་བརྟེན་མི་འགྱུར། །ཅི་སྤྱོད་སེམས་ཅན་དོན་དུ་སྤྱོད། །སེམས་ཅན་འདོད་པའི་དོན་ཀུན་བསྒྲུབ། །དེ་ནི་སྤྲུལ་སྐུ་ངེས་པའོ། །དེ་གསུངས་ཐེག་པ་ཐམས་ཅད་ཀྱང་། །ལེགས་པར་འདི་ལ་དྲི་བར་བྱ། །དང་པོ་སྣོད་དང་ལྡན་པའི་བུ། །དད་པ་བརྩོན་འགྲུས་སྙིང་རུས་ཆེ། །ཤེས་རབ་ཆེ་ཞིང་འཛིན་ཆགས་མེད། །རྒྱུད་ལྡན་སྙིང་རྗེ་གཏོང་ཕོད་ཆེ། །རྒྱུད་དུལ་ཏིང་འཛིན་དབང་པོ་རྣོ། །གསང་ཐུབ་བརྟུལ་ཞུགས་འགྱུར་བ་མེད། །སྐྱོ་ཤས་སྙིང་རུས་སྡུག་བསྲན་ཆེ། །གསང་སྔགས་གསང་བའི་སྣོད་ཡིན་པས། །བདུད་རྩི་ཐེག་པ་ཡང་ཞུན་འདི། །བུ་མཆོག་འདི་ལ་བསྟན་པར་བྱ། །དེ་ལྟར་ཉམས་ལེན་སྟོན་པའི་གནས། །གངས་ཁྲོད་ལུང་སྟོང་རི་རྩེ་དུར་ཁྲོད་དམ། །ཤིན་ཏུ་དབེན་པ་དངས་ཤིང་མཐོའ་བའི་སར། །སྐལ་ལྡན་སྐྱེས་བུས་ཉམས་ལེན་བྱ་བའི་གནས། །དུས་ཆེན་ངེས་པའི་གདམས་པ་བསྟན་པ་ནི། དབྱར་མ་སྟོན་དང་དགུན་ཆུང་དཔྱིད་ཀྱི་དུས། །ཟེར་གཉིས་དུས་ནི་མཆོག་ཏུ་བཤད་པ་ཡིན། །དེ་ལྟར་ཉམས་ལེན་གྲོགས་ཀྱི་ཁྱད་པར་གཙོ། །དམ་ཚིག་གཙང་ལྡན་དག་པའི་སྣང་བ་ཆེ། །དུག་ལྔའི་ཤུགས་ཆུང་བློ་ལྡན་ཁོང་ཡང་ཆེ། །ངང་རྒྱུད་རིང་ཞིང་བརྩེ་བའི་གྲོགས་དང་འགྲོགས། །དེ་ལྟ་བུའི་དུས་སུ་ཁྱད་པར་རྒྱུད་ཚོགས་ཆེ། །མེ་ཏོག་དབང་ཡོན་ཚོགས་འཁོར་གཏོར་ཚོགས་རྒྱུ། །ཉམས་ལེན་དུས་གསུམ་ཁམས་ཀྱིས་བརྟན་སོ་བརྩལ། །མཐུན་པའི་ཡོ་བྱད་ཀུན་དང་ལྡན་པར་བྱ། །དེ་ནས་དྲང་དོན་ལོ་རྒྱུས་ཡིད་ཆེས་བཤད། །སྨིན་བྱེད་དབང་བཞིའི་སློབ་བུའི་ཤེས་རྒྱུད་བསྒྲུབ། །མི་རྟག་སྙིང་རྗེ་བྱང་སེམས་བདུན་སྦྱངས་ནས། །རྡོ་རྗེ་སྐྱིལ་ཀྲུང་ལུས་ཀྱི་རུ་ཤན་དབྱེའ། །ངག་ནི་རིགས་དྲུག་ཞི་ཁྲོའི་སྒྲ་སྐད་དང་། །ཧཱུྃ་ཞེས་གནས་དང་རྒྱས་གདབ་རྩལ་ཡང་སྦྱངས། །གཉེན་བཙལ་ལམ་ཞུགས་ངག་སྦྱངས་སེམས་ལ་ཕན། །ཡིད་ཀྱང་རིགས་དྲུག་སྡུག་བསྔལ་བློ་ལ་སྦྱངས། །སེམས་ཞེས་བྱུང་གནས་འགྲོ་གསུམ་དབྱིབས་དངོས་བརྟགས། །རིགས་དྲུག་ས་བོན་འབྲུ་གསུམ་བསྲེགས་སྦྱངས་བཟླས། །རྣལ་དབབ་སེར་བཞུགས་ཉམས་ལེན་བརྩོན་པར་བྱ། །ལུས་ངག་ཡིད་གསུམ་བྱ་བ་རབ་བཏང་ནས། །སྒོ་གསུམ་གནད་གཟིར་མངོན་སུམ་སྟེང་དབབ་བོ། །སྣང་བཞི་རིམ་ཤར་གདིང་བཞི་མཐར་ཕྱིན་ནས། །ཟག་བཅས་ཕུང་པོ་མི་སྣང་སངས་རྒྱས་སོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ཆེན་མོ་ལས། །སྤྲུལ་སྐུའི་དབྱེ་བ་བསྟན་པའི་ལེའུ་སྟེ་དགུ་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱཻ་སྟོན་པ་ཡུམ་ཆེན་མོ། །སྐུ་གསུམ་ཞེས་པ་དེ་རྣམས་ཀྱང་། །གཅིག་པ་ལགས་སམ་སོ་སོ་ལགས། །བདག་ཅག་རྣམས་ལ་གསུང་དུ་གསོལ། །ཅེས་ཞུས་པ་དང་། །སྟོན་པས་ལན་དུ་བཀའ་སྩལ་པ། །ཀྱེ་ཧོ་འདུས་པའི་འཁོར་ཚོགས་ཉོན། །སྐུ་གསུམ་ཡེ་ཤེས་ཆེན་པོ་ནི། །འཁོར་འདས་ཀུན་གྱི་སྤྱི་དཔལ་ཏེ། །དམིགས་མེད་ཐིག་ལེ་ཉག་གཅིག་ཚུལ། །ངོ་བོ་སྟོང་པ་ཆོས་ཀྱི་སྐུ། །རྣམ་པ་གསལ་བ་ལོངས་སྤྱོད་རྫོགས། །འགགས་མེད་ཀུན་ཤར་སྤྲུལ་པའི་སྐུ། །གཅིག་དང་དུ་མའི་སྣང་བ་བྲལ། །ཆོས་ཀྱི་སྐུའི་སྣང་ལུགས་སོ། །རང་བཞིན་གཅིག་ལ་ངོ་བོ་གསུམ། །ལོངས་སྤྱོད་རྫོགས་སྐུའི་སྣང་བ་ཡིན། །ངོ་བོ་ཐ་དད་རང་བཞིན་ཐ་དད་པས། །གསལ་ལ་མ་འགག་བྱས་པ་མེད། །སྤྲུལ་པ་སྐུའི་སྣང་བ་ཡིན། །དེ་རྣམས་སོ་སོར་ཕྱེ་གྱུར་ཀྱང་། །སྐུ་གསུམ་གཅིག་ལ་ལྷུན་གྲུབ་རྫོགས། །གཅིག་ལ་དུ་མར་བཟུང་བ་ཡིན། །རང་སྣང་ཨ་འཐས་འཁྲུལ་པ་ཡིན། །ཆོས་སྐུའི་བསམ་བ་ཡུལ་དང་བྲལ། །ལོངས་སྐུའི་བདག་འཛིན་ཡུལ་དང་བྲལ། །སྤྲུལ་སྐུ་ཆགས་པའི་ཡུལ་དང་བྲལ། །དེ་ལྟར་གསུམ་ལྡན་ཐིག་ལེ་ལ། །སྤང་དང་བསྐྱེད་དང་དམིགས་པ་དང་། །འཇུག་གྲོལ་རྟོགས་པའི་སེམས་ཀྱང་མེད། །ཆགས་དང་ཞེན་སྤྱོད་ཚིག་ལ་འདས། །སྤང་དང་སྤང་བྱ་བློ་ལ་འདས། །ཡུལ་སེམས་ཡིད་ཡུལ་དམིགས་པ་འདས། །རང་སྣང་ཚོགས་མཆོག་ཆེན་པོའོ། །འཛིན་མེད་རང་གྲོལ་ཆེན་པོ་སྟེ། །སྤྲུལ་པ་ཕྱོགས་བཅུར་མཛད་པ་ཡིན། །དམིགས་པ་མེད་པའི་ཡུལ་སྣང་ལ། །ཡེ་ཤེས་ལྷུག་པར་རྩོལ་མེད་འཆར། །དམིགས་པ་མེད་པའི་ཡུལ་སྣང་ལ། །མཚན་མ་རང་སར་གྲོལ་བར་འགྱུར། །དེ་ཡང་སྣང་ལུགས་འདི་ལྟ་སྟེ། །རིག་པ་ཆོས་སྐུའི་ངོ་བོ་ཡིན། །དེ་ལས་སྣང་བ་མ་འགགས་པ། །ལོངས་སྐུའི་ངོ་བོ་ཡང་དག་འདོད། །དེ་ལས་རོལ་རྩལ་མ་འགགས་པ། །འཛིན་མེད་སྤྲུལ་སྐུར་འདོད་པའོ། །ཐིག་ལེ་ཡོད་མེད་ཡུམ་མཁའ་ལ། །ཡེ་ཤེས་སྣང་བ་མ་འགགས་གསལ། །སྣང་དག་ཡེ་ཤེས་འོད་ཟེར་འཕྲོ། །སེམས་བྲལ་རིག་སྟོང་མཐའ་བྲལ་ལ། །སྣ་ཚོགས་སྣང་བ་དུས་གཅིག་རྫོགས། །རང་གྲོལ་རང་སངས་ཆེན་པོ་ལ། །ས་ལམ་སྦྱང་བསྒྲོད་ཡེ་ནས་རྫོགས། །རྟོག་པ་མེད་པས་ཉོན་མོངས་སངས། །འཛིན་པ་མེད་པ་ཡེ་ཤེས་སངས། །ཞེན་པ་མེད་པ་གཉིས་འཛིན་སངས། །ཆགས་པ་མེད་པས་གྲུབ་མཐའ་སངས། །རྩོལ་བ་མེད་པ་མིང་ཚིག་སངས། །འགགས་པ་མེད་པས་འབྲས་བུ་སངས། །སྐུ་གསུམ་སངས་ལུགས་འདི་ལྟར་རོ། །རྟོག་པ་མེད་པ་ཡུམ་མཁའ་ལ། །འོད་ལྔ་གསལ་བའི་རྡོ་རྗེར་རྒྱས། །བྱ་བྱེད་བྲལ་བའི་མཁའ་དབྱིངས་ལས། །སྣང་གསལ་གཡོ་མེད་ཐིག་ལེ་རྒྱས། །ཡུལ་མེད་རྐྱེན་བྲལ་བྷ་ག་ལ། འཛིན་མེད་འོད་ཀྱི་བདེ་བ་རྒྱས། །རིག་པ་ཡེ་ཤེས་པདྨ་རྒྱས། །འོད་ལྡན་ཚོམ་བུའི་དགའ་བཞི་རྒྱས། །སྐུ་གསུམ་རྒྱས་ལུགས་འདི་ལྟར་རོ། རྟོག་མེད་ཆོས་སྐུའི་ངོ་བོ་ཡིན། །རང་གསལ་ལོངས་སྐུའི་ངོ་བོ་ཡིན། །ཅིར་འཆར་སྤྲུལ་སྐུའི་ངོ་བོ་ཡིན། །འཁོར་འདས་སྐུ་གསུམ་ངོ་བོ་ཡིན། །མ་རྫོགས་པ་ནི་གཅིག་ཀྱང་མེད། །ཆོས་སྐུ་ངོ་བོ་སྟོང་པའི་སྒྲོན། །ལོངས་སྐུ་ལྔ་ལྡན་གསལ་བའི་སྒྲོན། །སྤྲུལ་སྐུ་འགག་མེད་འབྱེད་པའི་སྒྲོན། །ཙིཏྟ་འབར་བ་གནས་འབྱེད་སྒྲོན། །ཀ་ཏི་ཤེལ་སྦུབ་རྒྱུ་ལམ་སྒྲོན། །རྒྱང་ཞག་སྒོ་ནི་གསལ་བའི་སྒྲོན། །རྐྱེན་བྲལ་ཡུལ་ནི་གཞིའི་སྒྲོན། །སྐུ་གསུམ་ལྷུན་གྲུབ་འདུས་པའི་སྒྲོན། །གཞི་སྣང་ཀ་དག་མཐའ་ཟད་སྒྲོན། །སྒྲོན་མའི་གཏིང་མཐའ་རྟོག་པ་མེད། །གཞིའི་སྒྲོན་མ་ཡུམ་གྱི་མཁའ། །ལམ་གྱིས་སྒྲོན་མ་སྣང་བའི་དབྱིངས། །འབྲས་བུའི་སྒྲོན་མ་སྐུ་གསུམ་རྫོགས། །ཀུན་ཀྱིས་སྒྲོན་མ་ཐིག་ལེ་གཅིག །ཆོས་སྐུའི་རིག་པ་སྤྱན་གྱིས་གཟིགས། །ལོངས་སྐུའི་ས་ལ་སྤྱན་གྱིས་གཟིགས། །སྤྲུལ་སྐུའི་མ་ངེས་སྤྱན་གྱིས་གཟིགས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སྐུ་གསུམ་དབྱེར་མེད་དུ་བསྟན་པའི་ལེའུ་སྟེ་བཅུ་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས། །ཀྱཻ་སྟོན་པ་ཡུམ་ཆེན་མོ། །སྐུ་གསུམ་གནས་ལུགས་དེ་ལྟར་ན། །སྐུ་ལྔར་གནས་ལུགས་གསུང་དུ་གསོལ། །ཞེས་ཞུས་པ་དང་། སྟོན་པས་ལན་དུ་བཀའ་སྩལ་པ། །ཀྱཻ་འདུས་པའི་འཁོར་རྣམས་ཉོན། །སྐུ་ལྔ་དག་ཏུ་སྣང་བ་ནི། །ཀུན་ཁྱབ་སྤྲོས་བྲལ་ཆོས་ཀྱི་སྐུ། །རང་གསལ་མ་འདྲེས་ལོངས་སྤྱོད་རྫོགས། །རོལ་རྩལ་འགག་མེད་སྤྲུལ་པའི་སྐུ། །དེ་ལས་མི་འགྱུར་གཡུང་དྲུང་སྐུ། །ཡེ་རྫོགས་མངོན་པར་བྱང་ཆུབ་སྐུ། །དེ་ནི་རིགས་ལྔའི་སྣང་བ་སྟེ། །དེ་བཞིན་གཤེགས་པ་ཞེས་པ་ནི། །རིག་པ་སྤྲོས་བྲལ་ཉིད་དུའོ། །དེ་ལ་སྐྱེ་དང་འཆི་བ་མེད ། །རྡོ་རྗེའི་རིགས་སུ་བཤད་པའོ། །སྣ་ཚོགས་རོལ་བ་འབྱུང་བའི་ཕྱིར། །རིན་ཆེན་རིགས་སུ་ངས་བཤད་དོ། །དེ་ལ་འཁོར་བའི་སྐྱོན་མ་གོས། །པད་མའི་རིགས་སུ་བཤད་པ་ཡིན། །དེ་ལས་བྱ་བ་ཀུན་རྫོགས་པའི། །ལས་ཀྱི་རིགས་སུ་བཤད་པའོ། །རིག་པ་སྐུ་ལྔ་ལྟར་ཤར་བས། །ཕྱི་རོལ་རྣམ་པ་ཐམས་ཅད་ལ། །རོལ་པ་སྣ་ཚོགས་མཛད་པ་སྟེ། །རྣམ་པར་སྣང་མཛད་ཞེས་པའོ། །རིག་པ་སྐྱེ་མེད་རྡོ་རྗེ་ལ། །ཡུལ་ཀུན་སེམས་པར་བྱེད་པས་ན། །རྡོ་རྗེ་སེམས་དཔའ་ཞེས་བཤད་དོ། །རིག་པ་ཉིད་ལ་ཚོགས་དྲུག་གི །དགོས་འདོད་ཐམས་ཅད་རང་འབྱུང་བས། །རིན་ཆེན་འབྱུང་ལྡན་ཞེས་སུ་བཤད། །རིག་པའི་སྣང་བ་གཏིང་དཔག་དཀའ། །མུ་མཐའ་ཕྱོག་བཅུར་ཡངས་བས་ན། །སྣང་བ་མཐའ་ཡས་ཞེས་སུ་གྲགས། །སྣང་བ་ཀུན་ལ་ངེས་བརྟགས་པས། །འཛིན་མེད་སྐུ་གསུམ་ལྷུན་གྲུབ་པས། །དོན་ཡོད་གྲུབ་པ་ཞེས་བཤད་དོ། །དེ་ལྟར་སྐུ་ལྔའི་དགོངས་པ་ལ། །དུས་གསུམ་མ་ཡེངས་སྤྱོད་པས་ན། །ཉོན་མོངས་རྟོག་ཚོགས་ཐམས་ཅད་ཀྱང་། །སྦྲུལ་མདུད་བཞིན་དུ་རང་སར་གྲོལ། ཚིག་ལ་ཞེན་པ་ཨ་འཐས་ཆད། །དོན་ལ་སྤྱོད་ན་རང་རིག་མཐོང་། །ཀུན་བཟང་བྷ་གས་རྒྱ་ཡིས་ཐེབས། །རིག་པའི་ཡེ་ཤེས་སྲང་ལ་འཇལ། །འཁོར་བའི་རྒྱ་མཚོ་ཧུབ་ཀྱི་བཏབ། །ཉོན་མོངས་ཀུན་ལས་རྒྱལ་བར་འགྱུར། །ནམ་མཁའ་ཁྱབ་ཚད་རིག་པས་ཁྱབ། །ལུས་ཀྱི་ཁྱབ་ཚད་ཐམས་ཅད་ལ། །ཕུང་པོ་ལྔ་ནི་རིགས་ལྔ་དངོས། །ཁམས་ལྔ་ཡུམ་ལྔ་ཉིད་དུ་གནས། །སྟོང་གསལ་རིག་པའི་ཡེ་ཤེས་སྐུ། །ཐབས་ཤེས་ཟུང་འཇུག་དངོས་སུ་སྣང་། །སྣང་སེམས་ཀུན་བཟང་ཡབ་ཡུམ་ཡིན། །སྤྱི་བོར་རྡོ་རྗེ་སེམས་དཔའ་དང་། །མགྲིན་པར་རིན་ཆེན་འབྱུང་ལྡན་ཏེ། །སྙིང་གར་སྣང་བ་མཐའ་ཡས་ཉིད། །ལྟེ་བར་དོན་ཡོད་གྲུབ་བ་ལ། ཡན་ལག་བཞི་ལ་སྒོ་མ་བཞི། །ཀུན་ཀྱང་ཡབ་ཡུམ་འཁྲིལ་སྦྱོར་ལས། །སྐུ་མདོག་རིགས་ཀྱིས་ཁ་དོག་འཛིན། །སྐུ་ནི་སྣང་ལ་རང་བཞིན་མེད། །སྔགས་ནི་གྲག་སྟོང་བྲག་ཆ་འདྲ། །རྫོགས་རིམ་གསལ་སྟོང་མཐའ་དང་བྲལ། །དེ་ལྟར་རྫོགས་པར་བྱ་བའི་ཕྱིར། །སྐལ་ལྡན་གདུལ་བྱར་གྱུར་པ་ལ། །སྤྲོས་བཅས་བུམ་པ་ཕྱིའི་དབང་། །ཐུན་མོང་ལས་དང་པོ་ལ་བསྐུར། །ལས་ཅན་གཅིག་གཉིས་གསུམ་བཞི་ལ། །གསུམ་པའི་དབང་ཉིད་བསྐུར་བྱ་སྟེ། །དབང་ཁྲིད་སོ་སོར་ཉམས་སྙེད་ནས། སྐལ་ལྡན་སྙིང་དང་མིག་འདྲ་ལ། །ཀུན་ཏུ་སྤྲོས་པ་མེད་པའི་དབང་། །མངོན་སུམ་རང་ཐོག་དབབ་ཅིང་བསྐུར། །ཞིང་ས་གཤིན་པོ་ཡོད་གྱུར་ཀྱང་། །སོ་ནམ་རིམ་པ་མ་བྱས་ལྟར། །འབྲས་བུ་སྨིན་བར་མི་འགྱུར་ལྟར། །སེམས་ལ་ཆོས་ཉིད་གནས་གྱུར་ཀྱང་། །དབང་གིས་སྨིན་པར་མ་བྱས་ན། །རྣལ་འབྱོར་དངོས་གྲུབ་ག་ལ་ཐོབ། །དབང་ཐོབ་རིགས་ཀྱི་བུ་དེ་ཉིད། །ཚེ་འདིར་བསམ་པ་ཀུན་འགྲུབ་དང་། །ཕྱི་མ་མངོན་པར་རྫོགས་སངས་རྒྱས། །སྤྲོས་བྲལ་གསང་བ་ལ་བཟླ་བའི། །རིག་པའི་རྩལ་གྱི་དབང་མཆོག་བསྐུར། །སྤྲོས་བཅས་དབང་རྣམས་རྫོགས་བྱས་ནས། །ཁྱད་པར་རིག་པའི་དབང་ལྔ་བསྐུར། །དེ་ནས་མངོན་སུམ་རང་ཐོག་དབབ། །ལྷུན་གྲུབ་རིག་པའི་རྩལ་དབང་བསྐུར། །རྐྱེན་བྲལ་དངས་མཐོ་དབེན་པ་རུ། །ཟེར་གཉིས་དུས་སུ་མཆོད་པ་བཤམ། །གསོལ་བ་མཆི་མ་བྱུང་བྱུང་བཏབ། །གན་རྐྱལ་ཟིམ་བུས་སུཪྱ་ལྟ། །ཐིག་ལེ་ལུག་རྒྱུད་འཇའ་ཚོན་འབྱུང་། །ཡང་ན་ཙོག་པུས་འདུག་སྟངས་གཟིར། །ཕབ་བཟློག་ཟུར་ལ་གནས་པས་འབྱུང་། །དེ་ནི་ཀུན་བཟང་རིགས་ལྔའི་དབང་། །དེ་ལས་འབྲལ་བར་མི་བྱའོ། །ལྷག་མེད་ཀུན་བཟང་ཉིད་དུ་འགྱུར། །ཨེ་མ་ང་ནི་ཀུན་གྱི་ཡུམ། །དུས་གསུམ་སངས་རྒྱས་ཐམས་ཅད་ཀྱང་། །བྷ་གའི་དབྱིངས་ནས་རང་བྱུང་ཏེ། །ཆོས་རྣམས་ཀུན་གྱི་འབྱུང་གནས་ཉིད། །བྷ་ག་གསང་སྔགས་ཀུན་གྱི་གནས། །བདེ་ཆེན་ཡེ་ཤེས་འབྱུང་བ་ཡིན། །འདི་ཉིད་མ་བརྟེན་ཐབས་གཞན་མེད། །ཐབས་ཀྱི་རྒྱུད་ཀྱི་གྲོལ་བ་ཡིན། །བདེ་ཆེན་འདི་བརྟེན་མྱང་འདས་ཐོབ། །ཡང་དག་སངས་རྒྱས་འདི་ལས་བྱུང་། །བུད་མེད་བརྙས་ཤིང་མཁའ་ལ་གཤེ། །བདེ་དང་བྲལ་ན་ན་རཀ་སྤྱོད། །ཐབས་ཀྱི་ཚུལ་གྱི་བྷ་ག་མཆོད། །ཚོགས་མེད་ཡང་དག་འགྲུབ་མི་འགྱུར། །དང་པོ་ལྷའི་རྣལ་འབྱོར་དང་། །གཉིས་པ་ཌཀིའི་རྣལ་འབྱོར་དང་། །གསུམ་པ་རྫོགས་རིམ་རྣལ་འབྱོར་དང་། །བཞི་པ་ལས་མཐའི་རྣལ་འབྱོར་གྱིས། །གཟུགས་སྐུ་གཉིས་ཀྱི་རྩལ་རྫོགས་བྱ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སྐུ་ལྔའི་གནས་ལུགས་བཤད་པའི་ལེའུ་སྟེ་བཅུ་གཅིག་པའོ། །྅྅྅ ཡང་མཁའ་འགྲོ་མ་རྣམས་ཀྱིས་གསོལ་པ། ཀྱཻ་ཡུམ་ཆེན་ཀུན་ཏུ་བཟང་། །དེ་ལྟར་སྐུ་ལྔ་དེ་རྣམས་ལ། །ཡེ་ཤེས་ཅི་ལྟར་སྣང་བ་ལགས། །ཞུས་པས། ཡང་བཀའ་སྩལ་པ་འདིའོ། །ཀྱེ་ཧོ་རིག་མདངས་འཁོར་རྣམས་ཉོན། །ཆོས་ཉིད་ཤེས་རབ་རང་གསལ་བས། །དེ་ལས་ཆོས་ཀུན་རང་ཤར་བས། །དེ་དོན་རང་བྱུང་ཡེ་ཤེས་ནི། །ཡེ་ཤེས་དབྱེ་བ་ཉེར་ལྔ་སྟེ། །བསྡུས་ན་རྣམ་པ་ལྔར་འདུས་སོ། །ཆོས་དབྱིངས་ཡེ་ཤེས་ཀུན་ཁྱབ་ཡངས། །མེ་ལོང་ཡེ་ཤེས་གཡོ་མེད་མདངས། །མཉམ་ཉིད་ཡེ་ཤེས་མ་འདྲེས་གསལ། །སོར་རྟོག་ཡེ་ཤེས་བདེ་སྟོང་བརྡལ། །བྱ་གྲུབ་ཡེ་ཤེས་ཆོས་རྣམས་རྫོགས། །དེ་ལྟར་རྣམ་པ་ལྔར་འདུས་སོ། །ཡེ་ཤེས་དེའི་བཤད་ལུགས་ནི། །རྟོགས་པ་མངོན་འགྱུར་སངས་རྒྱས་དང་། །རང་བཞིན་ལྷུན་གྲུབ་སངས་རྒྱས་སོཧ྅྅྅། །ཡེ་ནས་རང་བཞིན་ལྷུན་གྲུབ་སྟེ། །བླ་མ་དམ་པའི་བཀའ་དྲིན་གྱིས། །ཤེས་པ་རྟོགས་པ་མངོན་འགྱུར་ཡིན། །ཡེ་ཤེས་མ་ངེས་དེ་བཞིན་དེ། །ཚིག་དང་དོན་དང་མཐུན་སྦྱར་ནས། །ཆོས་ཀྱི་དབྱིངས་ཀྱི་ཡེ་ཤེས་ནི། །སྟོང་པ་ཡུམ་གྱི་མཁའ་ཉིད་ལ། །གསལ་བ་ཡབ་ཀྱི་གསང་བ་ཤར། །རིག་པ་གཉིས་མེད་ཐིག་ལེ་འཁྱིལ། །དེ་གསུམ་འཛོམ་པས་དབྱིངས་ཞེས་ཟེར། །དེ་ཡང་རྣམ་པ་གཉིས་སུ་བཤད། །དག་པ་ཡེ་ཤེས་དབྱིངས་ཉིད་དང་། །མ་དག་སེམས་ཅན་དབྱིངས་གཉིས་སོ། །དག་པ་ཡེ་ཤེས་དབྱིངས་ཆེན་ནི། །སྟོང་གསལ་རིག་པ་འདུ་འབྲལ་མེད། །འགྱུར་མེད་བྷ་ག་ཡངས་བའོ། །མ་དག་སེམས་ཅན་དབྱིངས་ཉིད་ནི། །སྟོང་པ་རིག་མེད་འདུས་མ་བྱས། །དེ་ལས་ས་རྡོའི་སྣང་བ་འབྱུང་། །སེམས་ཅན་རྣམས་ཀྱི་ཡུལ་ཡིན་ནོ། །མེ་ལོང་ལྟ་བུའི་ཡེ་ཤེས་ནི། །དཔེར་ན་མེ་ལོང་གཡའ་དག་ལ། །གང་སྣང་ཡུལ་དེ་སྣང་བ་བཞིན། །དེ་བཞིན་རིག་དབྱིངས་མཁའ་དེ་ལ། །ཉོན་མོངས་རྐྱེན་དེ་སྣང་བར་འགྱུར། །དེ་ལས་གྲོལ་བའི་རིག་པ་ནི། །བླ་མའི་ངག་ལས་ཤེས་པར་བྱ། །དེ་ལ་མཚན་མའི་གྲོལ་ལུགས་ནི། །སྣ་ཚོགས་སྣང་བ་ཤེས་རིག་ཡུལ། །བློ་ལ་སྣང་བའི་ཐེ་ཚོམ་རྣམས། །རིག་པའི་ངང་དུ་རྫོགས་པའོ། །བློ་དང་དངོས་པོའི་ཆོས་རྣམས་ཀུན། །རིག་པའི་ངང་དུ་རྫོགས་པའོ། །དེའི་ངེས་ཚིག་འདི་ལྟ་སྟེ། །ཀུན་གྱི་འཆར་གཞིར་གྱུར་པས་ན། །མེ་ལོང་ཡེ་ཤེས་ཞེས་པའོ། །འཁོར་དང་འདས་པས་གཉིས་མེད་མཉམ། །བདེ་དང་སྟོང་པ་གཉིས་མེད་མཉམ། །སྣང་དང་སྟོང་པ་གཉིས་མེད་མཉམ། །གང་གི་ཕྱོགས་སུ་མ་ལྷུང་བས། །མཉམ་ཉིད་ཡེ་ཤེས་དེ་ལྟར་རོ། །སོ་སོར་དབང་པོ་ཉེར་གཅིག་ལ། །གང་འཚམ་ཉམས་ལེན་དྲོད་རྟགས་ཏེ། །འབྲས་བུའི་གྲོལ་ས་རེ་རེ་ཏེ། །མ་འདྲེས་སོ་སོར་རྟོགས་པས་ན། །སོར་རྟོག་ཡེ་ཤེས་དེ་བཞིན་ནོ། །བྱ་གྲུབ་ཡེ་ཤེས་ཞེས་པ་ནི། །ཅིར་སྣང་དབྱིངས་རིག་མཁའ་རུ་རྫོགས། །དབྱེར་མེད་ངང་དུ་བྱ་བ་རྫོགས། །རྟོག་མེད་ངང་དུ་མཁྱེན་པ་རྫོགས། །དམིགས་མེད་ངང་ནས་ཚིག་ཀུན་རྫོགས། །འབད་མེད་ངང་ནས་རྩལ་དབང་རྫོགས། །ཆོས་སྐུའི་ཀློང་ན་གཟུགས་སྐུ་རྫོགས། །བྱ་བ་གྲུབ་པའི་ཡེ་ཤེས་སོ། །དེ་ལྟར་ཡེ་ཤེས་ཆེན་པོ་སྟེ། །རྟོགས་ན་ཡང་དག་དབྱིངས་སུ་གྲོལ། །མ་རྟོགས་རང་གིས་རང་སྒྲིབ་པས། །ཚིག་རེ་དོན་རེ་བཀྲོལ་ཞིང་བཤད། །དེ་ཕྱིར་ཚིག་དང་དོན་སྒྲིལ་ནས། །ཚིག་གི་དོན་ཆེན་བཀྲོལ་ནས་བཤད། །དེ་ནས་དོན་ཚིག་སྒྲིལ་ཅིང་བརྟག །ཚིག་དང་ཡི་གེ་སྤྱོད་ཡུལ་ཀུན། །ཡང་དག་དོན་ལ་མེད་མོད་ཀྱང་། །བློའི་མདུད་པ་བཅད་པའི་ཕྱིར། །ཚིག་ལ་དྲིས་ཤེས་དོན་ལ་བྷཻཾ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡེ་ཤེས་ལྔ་བཤད་པའི་ལེའུ་སྟེ་བཅུ་གཉིས་པའོ། །྅྅྅ ཡང་མཁའ་འགྲོ་མ་རྣམས་ཀྱིས་བསྐུལ་བས། །ཀྱཻ་ཡུམ་ཆེན་ཀུན་ཏུ་བཟང་། །ཡེ་ཤེས་ཉི་ཤུ་རྩ་ལྔ་པོ། །དོན་སྦྱོར་བརྡའ་དེ་བསྟན་དུ་གསོལ། །ཞེས་པས། སྟོན་པས་ལན་དུ་བཀའ་སྩལ་པ། །ཀྱེ་ཧོ་རིག་མདངས་འཁོར་རྣམས་ཉོན། །ཡེ་ཤེས་ཉི་ཤུ་རྩ་ལྔའི། །དགོངས་པ་བཤད་ན་འདི་ལྟ་སྟེ། །དང་པོ་ཆོས་དབྱིངས་ཡེ་ཤེས་ལ། །རྣམ་པ་ལྔ་རུ་ངེས་པ་སྟེ། །དབང་པོ་ཞེན་པ་བཟློག་པའི་ཕྱིར། །ཀརྨ་རག་ཤ་གྷིར་ཧི་ཏེ། །དབྱིངས་ཀྱི་ཡེ་ཤེས་ཆེན་པོ་ཟེར། །དེ་མཐོང་སྐད་ཅིག་སྐུ་གསུམ་ཐོབ། །ཕུང་པོ་ཞེན་པ་བཟློག་པའི་ཕྱིར། །བྷེ་ག་རད་ན་སོ་གད་གླིང་། །ཆོས་དབྱིངས་འཁྱིལ་བའི་ཡེ་ཤེས་ཟེར། །དེ་མཐོང་སྐད་ཅིག་མྱ་ངན་འདས། །ཡུལ་ཀུན་ཞེན་པ་བཟློག་པའི་ཕྱིར། །པུཤྚ་རི་ལ་བྷ་དུ་ཏྲི། །རྣམ་པ་དབྱིངས་ཀྱི་ཡེ་ཤེས་ཟེར། །དེ་མཐོང་བར་དོར་རང་ངོ་ཤེས། །སེམས་ཀྱི་དངོས་པོ་སྤུར་བའི་ཕྱིར། །རམ་པ་ག་ལ་ས་མི་ཁྱེ། །དབྱིངས་ཆེན་བདལ་བའི་ཡེ་ཤེས་ཟེར། །དེ་མཐོང་དགེ་སྡིག་དྲི་མ་དག །བྱུང་ཚོར་གནས་སུ་བཅད་པའི་ཕྱིར། །ཕ་ར་ཕ་ར་ས་མི་ཏ། །འཁོར་འདས་དབྱིངས་ཆེན་ཡེ་ཤེས་ཟེར། །དེ་མཐོང་སྐུ་གསུམ་རང་ཚུགས་ཟིན། །དེ་ནི་གོ་དང་མ་གོ་བས། །འཁོར་དང་འདས་པ་གཉིས་སུ་སྲིད། །བླ་མའི་དྲིན་གྱིས་རྟོགས་པར་གྱིས། །མེ་ལོང་ཡེ་ཤེས་ལ་ཡང་ལྔ། །འདུས་ཚོགས་སྣང་བ་དངོས་བཟུང་ཕྱིར། །ཐ་ཀྴ་རཀྴ་ས་མིག་རླུང་། །མེ་ལོང་གསལ་དངས་ཡེ་ཤེས་ཟེར། །དེ་མཐོང་དང་པོའི་བདེན་པ་ལོན། །རིག་པ་བཙོན་རར་ཞུགས་པའི་ཕྱིར། །ཨེ་ཀ་རེ་ན་བྷེ་ཙཀྴ། །མེ་ལོང་ཀུན་འཆར་ཡེ་ཤེས་ཟེར། །དེ་ནི་ལུག་རྒྱུད་ཨར་ལ་གནོན། །འཁྲུལ་པ་རང་རྒྱུད་ཁུང་བཅད་ཕྱིར། །ཡ་རི་མུ་ཏྲ་ས་གྷུ་ལི། །རྟོག་མེད་ཀུན་གསལ་ཡེ་ཤེས་ཟེར། །དེ་ནི་ཤེས་རབ་རང་བྱུང་རྫོགས། །རིགས་དྲུག་རིམ་གྱིས་བསྒྲལ་བའི་ཕྱིར། །ཡ་སིང་རམ་པ་ས་མ་ཡ། །རྟོག་མེད་གསལ་བའི་ཡེ་ཤེས་ཟེར། །དེས་ནི་རིགས་དྲུག་རུ་ཤན་འབྱེད། ། འཁོར་བ་དོང་ནས་འདོན་པའི་ཕྱིར། །མ་མ་ཀི་ལི་ས་མིན་ཏ། །གསལ་ལ་འཛིན་མེད་ཡེ་ཤེས་ཟེར། །ཆོས་ཟད་བློ་ཟད་འདིས་འགྲུབ་བོ། །དེ་དོན་དྲིས་དང་མ་དྲིས་པས། །སངས་རྒྱས་སེམས་ཅན་གཉིས་སུ་མེད། །ཡུན་དུ་བསྲིང་ལ་གོམས་པར་མཛོད། །མཉམ་ཉིད་ཡེ་ཤེས་ལ་ཡང་ལྔ། །ཆོས་ཅན་མཐུན་དུ་ཞུགས་པའི་ཕྱིར། །གྷ་རི་ཡཾ་པ་རོ་མ་ཏི། །མཉམ་པ་ཉིད་ཀྱི་ཡེ་ཤེས་ཟེར། །ཞི་གནས་ཆེན་པོ་ཅི་སྙེད་དོ། །རིག་པའི་ཡུལ་ཁུང་སྤུར་བའི་ཕྱིར། །བྷུ་གྷ་སིང་ཧ་ཕ་ག་ལ། །མ་འགག་ལྷུན་མཉམ་ཡེ་ཤེས་ཟེར། །ལྷག་མཐོང་རིག་ངར་འདིས་ཐོགས་སོཧ྅྅྅། །ཞེན་པ་འཕྲེང་ཐག་བཅད་པའི་ཕྱིར། །ས་མི་ཏི་སི་ཁེ་ཏ་པ། །མི་གཡོ་མཉམ་ཉིད་ཡེ་ཤེས་ཟེར། །བྱ་བ་དགུ་པོ་འདིས་ཐོངས་སོ། །ལུག་རྒྱུད་ཨར་ལ་གཏད་པའི་ཕྱིར། །ཙི་ཁུཾ་མ་ལ་པ་ཏཾ་ནི། །མཉམ་ཉིད་ཆེན་པོའི་ཡེ་ཤེས་ཟེར། །སྒྲོན་བཞི་དུས་གཅིག་འདིས་འདྲེས་སོ། །ལྷའི་ཕྱག་རྒྱའི་ལྟ་བའི་ཕྱིར། །ས་མ་ཉི་མེ་དྷ་ར་པ། །ཅི་ལ་མི་གནས་ཡེ་ཤེས་ཟེར། །འདི་ཡིས་འཁོར་བ་དོང་སྤྲུགས་སོ། །འདི་དོན་རིག་དང་མ་རིག་པས། །སྣང་དང་སྟོང་པ་གཉིས་སུ་ཕྱེ། །འདི་ལ་རིག་ཅིང་རྟོགས་པར་མཛོད། །སོར་རྟོག་ཡེ་ཤེས་ལ་ཡང་ལྔ། །ལྟ་བྷཻཾ་ལོག་པར་དག་བྱའི་ཕྱིར། །བཛྲ་སཏྭ་ཏྲི་ཏྭོ་མེ། །སོ་སོར་རྟོགས་པའི་ཡེ་ཤེས་ཟེར། །རྟག་ཆད་དྲི་མ་འདིས་དག་གོ། །ས་ལམ་དུས་གཅིག་བཅད་པའི་ཕྱིར། །བྷེ་ས་སུ་གྷུར་རྣར་མ་ཡེ། །དོན་རྣམས་འབྱེད་པའི་ཡེ་ཤེས་ཟེར། །ཇི་ལྟ་ཇི་སྙེད་འདིས་རྟོགས་སོ། །ཡིད་དཔྱོད་ལྟ་བ་ཁུང་བཅད་ཕྱིར། །དྷརྨ་པ་ཏི་ས་གྷུ་ལི། །རྟོག་པ་སྐད་ཅིག་ཡེ་ཤེས་ཟེར། །སྣང་བཞི་རིམ་གཅིག་འདིས་བསྒྲོད་དོ། །སྐུ་གསུམ་ལམ་དུ་སློང་བའི་ཕྱིར། །པ་ར་མ་ས་ཁ་རྒད་རྩེ། །རྟོགས་པའི་ཡེ་ཤེས་ཆེན་པོ་ཟེར། །ས་ལམ་དུས་གཅིག་འདིས་བསྒྲོད་དོ། །སྣང་བ་དངོས་སུ་བླང་བའི་ཕྱིར། །རུ་པ་ས་མི་མི་ཏ་ལང་། །གོ་བ་ཆེན་པོའི་ཡེ་ཤེས་ཟེར། །གཞན་དོན་འབད་མེད་འདིས་བྱེད་དོ། །འདི་དོན་ཡིན་མིན་མ་ཕྱེས་བས། །ཅི་ཙམ་ངལ་བ་དོན་མེད་ཡིན། །དེ་ཕྱིར་བླ་མའི་ངག་ལ་དྲིས། །བྱ་གྲུབ་ཡེ་ཤེས་ལ་ཡང་ལྔ། །སྒྲའི་ཞེན་པ་མཐའ་བཅད་ཕྱིར། །ང་ཏི་པ་ལ་ཡོ་གི་ས། །བྱ་བ་གྲུབ་པའི་ཡེ་ཤེས་ཟེར། །སྣང་མཉམ་ཡེ་ཤེས་འཕེལ་བར་བྱེད། །བསམ་གཏན་ཆེན་པོའི་ས་གནོན་ཕྱིར། །ག་ཙ་པ་ལ་ཨ་ཏཾ་ས། །བྱ་བ་བྱེད་པའི་ཡེ་ཤེས་ཟེར། །དྲོད་རྟགས་ཐམས་ཅད་འདི་ཡིས་འབྱིན། །འཕྲིན་ལས་མཐའ་རུ་དབྱུང་བའི་ཕྱིར། །ཀརྨ་ཨེ་ཀ་ཨ་ནུས་ས། །བྱ་བ་མི་གནས་ཡེ་ཤེས་ཟེར། །མངོན་པར་རྫོགས་སངས་འདི་ཡིས་རྒྱས། །སངས་རྒྱས་མངོན་ཞེན་བཟློག་པའི་ཕྱིར། །སང་ཀྲི་མ་མ་ཀརྨ་ཏ། །བྱ་བ་བཏང་བའི་ཡེ་ཤེས་ཟེར། །སྐུ་གསུམ་ཐིག་ལེ་འདིས་དྲིལ་ལོ། །རྒྱལ་སྲས་རྣམས་ཀྱི་ས་ནོན་ཕྱིར། །ང་ལ་ངེས་པ་ཀི་ལི་པ། །སྒྲ་འོད་དག་ཆོད་ཡེ་ཤེས་ཟེར། །འབད་མེད་འགྲོ་དོན་འདིས་བྱེད་དོ། །འདི་དོན་སྣོད་དང་མི་ལྡན་ནོ། །ཅི་ཙམ་འབད་ཀྱང་ངལ་བ་ཡིན། །བླ་མའི་དྲིན་གྱིས་རྟོགས་པར་མཛོད། །ཨེ་མ་རང་ལུས་འདི་ཉིད་ནི། །རྒྱལ་བའི་དཀྱིལ་འཁོར་ཆེན་པོར་བཞུགས། །འབྱུང་བའི་དངས་མ་ལས་གྲུབ་པའི། །ལུས་འདི་བདེར་གཤེགས་ཕོ་བྲང་ཉིད། །རིགས་ལྔ་ཡབ་ཡུམ་ལྔའི་གནས། །ཕུང་ཁམས་སྐྱེ་མཆེད་ལྷའི་སྐུ། །སྐྱེ་མེད་ཡུམ་གྱི་བྷ་ག་ལ། །འགག་མེད་རོལ་པའི་རྡོ་རྗེར་བསྐྱེད། །སྤྱི་བོ་བདེ་ཆེན་རྩ་འཁོར་ན། །རྡོ་རྗེ་དྷ་ཀི་ཡབ་ཡུམ་བཞུགས། །མེ་ལོང་ལྔ་པོ་དེ་ལྟར་དག །མགྲིན་པ་ལོངས་སྤྱོད་འཁོར་ལོ་ན། །རཏྣ་དྷ་ཀི་ཡབ་ཡུམ་བཞུགས། །མཉམ་ཉིད་ལྔ་པོ་དེ་ལྟར་དག །སྙིང་ཁ་ཆོས་ཀྱི་འཁོར་ལོ་ན། །སངས་རྒྱས་དྷ་ཀི་ཡབ་ཡུམ་བཞུགས། །ཆོས་དབྱིངས་ལྔ་པོ་དེ་ལྟར་དག །ལྟེ་བ་སྤྲུལ་པའི་འཁོར་ལོ་ན། །པདྨ་དྷ་ཀི་ཡབ་ཡུམ་བཞུགས། །སོར་རྟོགས་ལྔ་པོ་དེ་ལྟར་དག །གསང་གནས་བདེ་བྱེད་འཁོར་ལོ་ན། །ལས་ཀྱི་དྷ་ཀི་ཡབ་ཡུམ་བཞུགས། །བྱ་གྲུབ་ལྔ་པོ་རང་སར་དག །ཕུང་པོ་ཐབས་མཆོག་དཔའ་བོ་ལ། །ཁམས་རྣམས་ཤེས་རབ་དཔའ་མོ་ཡིན། །བ་སྤུ་བུ་ག་ཐམས་ཅད་ཀྱང་། །ཏིལ་ལ་མར་གྱིས་ཁྱབ་པ་ལྟར། །ལྷ་དང་ལྷ་མོའི་རང་བཞིན་ཡིན། འབྱུང་བཞིའི་དཀྱིལ་འཁོར་སངས་རྒྱས་ཞིང་། །འཁོར་ལོ་ལྔ་པོ་རིགས་ལྔ་གནས། །ཕུང་པོ་ཁམས་ནི་ལྷ་ཚོགས་ཉིད། །སེམས་ནི་ཡེ་ཤེས་ཆེན་པོ་ཉིད། །རིག་པ་སྤྲོས་བྲལ་ཨ་ལ་ལ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡེ་ཤེས་ཉི་ཤུ་རྩ་ལྔའི་དགོངས་པའི་བཤད་པའི་ལེའུ་སྟེ་བཅུ་གསུམ་པའོ། །྅྅྅ ཡང་མཁའ་འགྲོ་མ་རྣམས་ཀྱིས་བསྐུལ་བ། ཀྱཻ་ཡུམ་ཆེན་ཀུན་བཟང་མཆོག །འོད་ལྔའི་སྣང་བ་ཅི་ལྟར་ལགས། །ཞེས་པ་དང་། སྟོན་པས་འདི་སྐད་དུ་བཀའ་སྩལ་པ། ཀྱེ་མ་འདུས་པའི་འཁོར་རྣམས་ཉོན། །འོད་ལ་དབྱེ་ན་བསམ་ལས་འདས། །དེ་ཡང་མདོ་རུ་བསྡུས་པ་ན། །དག་པ་ཡེ་ཤེས་ཀྱི་འོད་དང་ནི། །མ་དག་བ་འཁྲུལ་པའི་འོད་གཉིས་སོ། །དེ་ཡང་མ་དག་འོད་ལ་དྲུག །དཀར་སེར་དམར་ལྗང་ནག་དང་མཐིང་། །ཨ་འཐས་འཁྲུལ་པར་སྣང་བ་ཡིན། །རྟོགས་པ་ལྡན་པའི་གང་ཟག་ལ། །འོད་ལྔ་སྐུ་ལྔ་ལྷུན་གྱིས་གྲུབ། །མ་རྟོགས་སྐྱེ་བོ་ཐ་མལ་པས། །མི་ལ་དཔེའི་མཚོན་དུ་ཡོད། །ལྷ་རྣམས་ལ་ནི་ལྟ་རུ་ཡོད། །ལྷ་མིན་ལ་ནི་ཕྲ་བར་མངོན། །བྱོལ་སོང་རང་གནས་ཙམ་དུ་སྟེ། །ཡིད་བཏག་རྣམས་ལ་འཕྲིག་པར་མངོན། །དམྱལ་བ་རྣམས་ལ་ཏིལ་འབྲུ་ཙམ། །མ་དག་པ་ལ་སྣང་ལུགས་སོ། །རྟོགས་པར་ལྡན་པའི་སྣང་ལུགས་ནི། །བར་མ་དོ་ལ་སྣང་ལུགས་དང་། །འཁྲུལ་སྣང་འོད་ལ་སྣང་ལུགས་སོ། །དང་པོ་སྣང་བ་འདི་སྣང་ནི། །ཡེ་ཤེས་ཆེན་པོའི་དཀྱིལ་འཁོར་ཏེ། །གནས་ནི་ཙིཏྟའི་སྤུབ་ན་གནས། །ལམ་ནི་རྒྱ་མཚོའི་ནང་ལས་བྱུང་། །ཡུལ་ནི་ནམ་མཁའ་སྟོང་པ་ལ། ལུས་ནི་སྐུ་དང་ཡེ་ཤེས་ཏེ། །སྤྱན་ནི་ཤེས་རབ་སྒྲོན་མའོ། །སྙིང་པོ་ཀུན་གསལ་མེ་ཏོག་སྟེ། །དཔེར་མཚོན་མན་ཤེལ་དྲི་མེད་སྐུ། །དུས་ནི་ཆོས་ཉིད་བར་དོ་སྟེ། །རྐྱེན་ནི་ཉི་ཞུར་འཕྲད་དང་མཚུངས། །རིན་ཆེན་སྤུབས་སུ་ངོ་ཤེས་གྲོལ། །བར་མ་དོ་ཡིས་གྲོལ་ལུགས་ནི། །ཉི་ཤུ་རྩ་གཅིག་གསུང་བས་ཏེ། །དབང་པོ་རབ་འབྲིང་ཐ་མ་ལ། །རེ་རེ་ལ་ཡང་བདུན་བདུན་ནོ། །དག་པ་ཆོས་ཉིད་སྣང་བ་ནི། །ཡེ་ཤེས་རྐྱེན་བྲལ་ནམ་མཁའ་ལ། །འོད་ལྔ་དྲི་མེད་ལྷག་གིས་གསལ། །དེ་ཡང་ཚོམ་བུ་ལྔ་ལྔ་དང་། །ཡབ་ཡུམ་ཚུལ་དུ་འཆར་བའོ། །ཁ་དོག་སྦྱར་ན་འདི་ལྟ་སྟེ། །མཐིང་ཀ་རྣམས་ནི་ཆོས་དབྱིངས་ཏེ། །ཡུམ་ནི་ནམ་མཁའི་དབྱིངས་ཕྱུག་མ། །འབྱུང་བ་སྟོང་པ་ནམ་མཁའ་སྟེ། །ཕུང་པོ་གཟུགས་ཀྱིས་ཕུང་པོའོ། །ས་ནི་བྱ་བ་རྫོགས་པའི་ས། །དེ་བཞིན་གཤེགས་པའི་རིགས་ཡིན་ཏེ། །མཁའ་འགྲོ་རྡོ་རྗེ་ཕག་མོའོ། །ཉོན་མོངས་གཏི་མུག་རྣམ་པར་དག །དཀར་པོ་རྡོ་རྗེ་སེམས་དཔའི་སྐུ། །ཡེ་ཤེས་མེ་ལོང་ཡེ་ཤེས་ཏེ། །ཡུམ་ནི་མཱ་མ་ཀི་རུ་འདོད། །འབྱུང་བ་ཆུ་བོ་ཆེན་པོ་སྟེ། །ཕུང་པོ་རྣམ་ཤེས་ཕུང་པོ་ལ། །ས་ནི་བྱ་བ་སྟོང་པའི་ས། །རིགས་ནི་རྡོ་རྗེའི་རིགས་ཡིན་ཏེ། །མཁའ་འགྲོ་རྡོ་རྗེ་མཁའ་འགྲོ་མ། །ཉོན་མོངས་ཞེ་སྡང་རྣམ་པར་དག །སེར་པོ་རིན་ཆེན་འབྱུང་ལྡན་སྐུ། །ཡེ་ཤེས་མཉམ་ཉིད་ཡེ་ཤེས་སོ། །ཡུམ་ནི་སངས་རྒྱས་སྤྱན་མ་སྟེ། །འབྱུང་བ་སྲ་བརྟན་ཆེན་པོའོ། །ཕུང་པོ་འདུ་བྱེད་ཕུང་པོ་སྟེ། །ས་ནི་སྣ་ཚོགས་འབྱུང་བའི་ས། །རིགས་ནི་རིན་ཆེན་རིགས་ཡིན་ཏེ། །མཁའ་འགྲོ་རིན་ཆེན་མཁའ་འགྲོ་མ། །ཉོན་མོངས་ང་རྒྱལ་རང་སར་དག །དམར་པོ་སྣང་བ་མཐའ་ཡས་སྐུ། །ཡེ་ཤེས་སོར་རྟོག་ཡེ་ཤེས་ཡིན། །ཡུམ་ནི་གོས་དཀར་ཡུམ་ཆེན་མོ། །འབྱུང་བ་བསྲེགས་བྱེད་མེ་ཡིན་ནོ། །ཕུང་པོ་འདུ་ཤེས་ཕུང་པོ་སྟེ། །ས་ནི་རྣམ་པར་སྟོན་པའི་ས། །རིགས་ནི་པདྨའི་རིགས་སུ་བཤད། །མཁའ་འགྲོ་པདྨ་མཁའ་འགྲོ་མ། །ཉོན་མོངས་འདོད་ཆགས་རང་སར་དག །ལྗང་ཀུ་དོན་ཡོད་གྲུབ་པའི་སྐུ། །ཡེ་ཤེས་བྱ་གྲུབ་ཡེ་ཤེས་ཡིན། །ཡུམ་ནི་དམ་ཚིག་སྒྲོལ་མར་འདོད། འབྱུང་བ་གཡོ་བྱེད་ལུང་ཡིན་ནོ། །ཕུང་པོ་ཚོར་བའི་ཕུང་པོ་སྟེ། །ས་ནི་བྱ་བ་ཟིན་པའི་ས། །རིགས་ནི་ལས་ཀྱི་རིགས་སུ་བཤད། །མཁའ་འགྲོ་ཀར་མ་མཁའ་འགྲོ་མ། །ཉོན་མོངས་ཕྲག་དོག་རང་སར་དག །དེ་རྣམས་དག་པའི་སྣང་བ་སྟེ། །འོད་དང་སྐུ་དང་ཡེ་ཤེས་དང་། །ཡུམ་དང་ཕུང་པོ་འབྱུང་བ་དང་། །ས་དང་རིག་དང་མ་རིག་དང་། ཉོན་མོངས་དག་ཚུལ་བཤད་པའོ། །དེ་དོན་རྟོགས་པར་བྱེད་པ་ནི། །སངས་རྒྱས་རིགས་ལྔ་ཀུན་འདུས་གཙོ། །རང་རིག་བླ་མ་ཀུན་བཟང་ལ། །ཕྱི་ནང་གསང་བའི་མཆོད་འབུལ་ན། །དེའི་བསོད་ནམས་བརྗོད་མི་ལང་། །དེ་ཕྱིར་མཆོད་ལ་ངོ་སྤྲོད་ལོང་། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། འོད་ལྔ་དང་སྦྱར་ནས་བསྟན་པའི་ལེའུ་སྟེ་བཅུ་བཞི་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ལོ། །ཀྱེ་མ་ཡུམ་ཆེན་ཀུན་ཏུ་བཟང་། །འབྱུང་བ་ལྔ་ཞེས་བྱ་བ་ཡིས། །དོན་དེ་གང་ལགས་གསུང་དུ་གསོལ། །ཞེས་པ་དང་། །སྟོན་པས་ཡང་བཀའ་སྩལ་པ། །ཉོན་ཅིག་རང་མདངས་རིག་པའི་འཁོར། །འབྱུང་བ་ཆེན་པོ་ཀུན་གྱིས་མྱེས། །སྐྱེ་འགྲོ་ཀུན་གྱི་རང་བཞིན་གནས། །ཁམས་གསུམ་སེམས་ཅན་ཐམས་ཅད་ཀྱང་། །འབྱུང་བ་ལྔའི་དབྱིངས་ལས་སྤྱོད། །འབྱུང་བ་མེད་པའི་སྔོན་རོལ་དུ། །སངས་རྒྱས་སེམས་ཅན་མིང་ཡང་མེད། །འབྱུང་བ་ཀུན་བཟང་གཞིའི་མཁའ། །མཁའ་ལས་རླུང་བྱུང་དེ་ལས་ཆུ། །དེ་ལས་ས་བརྟེན་འགྲོ་བ་བརྟེན། །བྷ་ག་ཡངས་ལ་རླུང་འབྱུང་སྟེ། །དབུགས་ལ་རླུང་འབྱུང་དེ་ལ་ཤ །དེ་ལ་སེམས་ཀྱི་གནས་བརྟེན་ནོ། །ཕྱི་འབྱུང་ནམ་མཁའ་ཡངས་པ་ལ། །བསྐྱེད་པ་རླུང་སྟེ་སྲ་བ་ས། །སྡུད་པ་ཆུ་སྟེ་བསྲེགས་པ་མེ། །འབྱུང་བའི་རྒྱུན་ནི་ས་ཡིན་ཏེ། །འབྱུང་བ་ཤེས་རབ་མ་ཡིན་ལ། །འབྱུང་བ་སྤྲུལ་བ་རླུང་ཡང་ཡིན། །འབྱུང་བའི་བདག་པོ་ཆུ་ཡིན་ཏེ། །འབྱུང་བའི་གཞི་ལ་ནམ་མཁའ་འོ། །མ་བྱས་རང་བྱུང་ས་ཡིན་ཏེ། །དངོས་ཎ་ཀུན་གྱི་རླུང་ཡང་ཡིན། །རྩུབ་རྐྱེན་དོན་ནུས་མེ་ཡིན་ཏེ། །སྡུད་པར་ནུས་བ་ཆུ་ཞེས་ཟེར། །ཀུན་འབྱུང་ཕྱིར་ན་མཁའ་ཞེས་བརྗོད། །དོན་ལ་རིག་ཐོག་སྦྱར་བ་ན། །རིག་པ་བཟང་ངན་གཡོ་མེད་པས། །འབྱུང་བ་ས་ཡང་རིག་པར་འདུས། །མེད་བཞིན་ཀུན་འཆར་སྤྲུལ་བ་འགྱེད། །རླུང་གི་དོན་ཡང་རིག་པར་འདུས། །འཁོར་འདས་ཐིག་ལེར་སྨིན་ནུས་པས། །འབྱུང་བ་མེ་ཡང་རིག་པར་འདུས། །གཉིས་ཆོས་སྒྲོན་བཞིར་བསྡུས་ནུས་པས། །འབྱུང་བ་ཆུ་ཡང་རང་ལ་འདུས། །སྐུ་ཡང་བྷ་གར་འུབ་ཆུབ་པས། །ནམ་མཁའི་ཁམས་ཀྱང་རང་ལ་འདུས། །སྣང་བ་འགག་མེད་འབྱུང་བའོ། །ཆོ་འཕྲུལ་ཆེན་པོ་ཞེས་སུ་བརྗོད། །རིག་པ་འགྱུ་བ་མེད་པ་དེ། །འབྱུང་བའི་ངོ་བོ་ཞེས་སུ་བརྗོད། །སངས་རྒྱས་རྣམས་ཀྱི་ཐུགས་རྗེ་ནི། འབྱུང་བ་ལྔ་རུ་སྣང་བའོ། །འབྱུང་བ་ཆེན་པོའི་ཀློང་དཀྱིལ་ནས། །སྐུ་ལྔ་འགྱུར་མེད་གཏེར་དུ་སྤས། །བླ་མའི་ཐུགས་མཛོད་ཕྱེས་ལ་ཐོན། །ཆོས་ཉིད་བར་དོའི་སྣང་བ་ལ། །རིག་པ་ཡེ་ཤེས་གཏེར་དུ་སྤས། །ངོ་བོ་ཉེར་གཅིག་ཕྱེས་ལས་ཐོན། །ཉོན་མོངས་ལྔའི་གཏིང་རུམ་ན། །ཡེ་ཤེས་ལྔ་པོ་གཏེར་དུ་སྤས། ལུས་གནད་རླུང་དང་ཕྱེས་ལས་ཐོན། །བག་ཆགས་འཁྲུལ་པའི་ཀློང་དཀྱིལ་ནས། །ཤེས་རབ་རང་གསལ་གཏེར་དུ་སྤས། །ཚོགས་གཉིས་མངོན་སངས་ཕྱེས་ལ་ཐོན། །རང་གི་སྙིང་གི་དཀྱིལ་ཤེད་ན། །སྐུ་ལྔའི་དཀྱིལ་འཁོར་གཏེར་དུ་སྤས། །སྒྲོན་བཞི་ཕྱེ་ལ་ལྟ་བར་གྱིས། །ཀུན་བཟང་བྷ་ག་འཁྱིལ་བ་ལ། །འཁོར་འདས་ཆོས་ཀུན་གཏེར་དུ་སྦས། །ཡེ་གྲོལ་ཆེན་པོས་ཕྱེས་ལ་ལྟོས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཕྱི་འབྱུང་ལྔ་བསྟན་པའི་ལེའུ་སྟེ་བཅོ་ལྔ་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱེ་མ་ཡུམ་ཆེན་ཀུན་ཏུ་བཟང་། །དེ་ལྟར་འབྱུང་བ་ལྔ་པོ་དེ། །ལུས་ལ་ཚང་ངམ་མ་ཚང་ལགས། །ཞེས་ཞུས་པས། ཡང་སྟོན་པས་འདི་སྐད་ཅེས་བཀའ་སྩལ་ཏོ། །ཀྱེ་མ་རིག་པའི་འཁོར་རྣམས་ཉོན། །འབྱུང་ལྔ་ལུས་ལ་འདི་ལྟར་ཚང་། །རླུང་ལྔ་ཡེ་ཤེས་དངས་ཕྱེས་ཏེ། །མེ་ལྔ་ཡེ་ཤེས་རྩལ་འབྱེད་དང་། །ས་ལྔ་ཡེ་ཤེས་ངོ་བོ་འབྱེད། །ཆུ་ལྔས་ཡེ་ཤེས་ཡུལ་འབྱེད་ཏེ། །མཁའ་ལྔས་ཡེ་ཤེས་གནས་འབྱེད་དོ། །རླུང་ལྔའི་རྐང་གྲངས་གང་ཞེས་ན། །སྲོག་འཛིན་རླུང་དང་མེ་མཉམ་རླུང་། །བཀྲག་མདངས་སྐྱེད་དང་ཀུན་ཁྱབ་རླུང་། །སྙིང་རྗེ་མེད་པའི་ལས་རླུང་ལྔ། །ལས་རླུང་སྙིང་ཤུན་བར་ན་གནས། །གཞན་རྣམས་མགོ་ལུས་ཁྱབ་པར་གནས། །མེ་ལ་ཡང་ནི་ལྔ་ཡིན་ཏེ། །ཕྱི་ནང་ཀུན་གསལ་མེ་ཞེས་པ། །ཡིད་ཀྱི་གཏིང་ན་གནས་པའོ། །ཕྱི་ནང་ཀུན་ཏུ་ཁྱབ་བྱེད་མེ། །གློ་བའི་ནང་ན་གནས་པའོ། །ཕྱི་ནང་ཀུན་ཏུ་མཉམ་པའི་མེ། །ཤ་ལྤགས་བར་ན་གནས་པ་ཡིན། །ཕྱི་ནང་བར་དུ་རྫོགས་བྱེད་མེ། །རྐང་པའི་མཐིལ་ན་གནས་པ་ཡིན། །ཕྱི་ནང་བྱ་བ་བྱེད་པའི་མེ། །ལག་པའི་མཐིལ་ན་གནས་པ་ཡིན། །ཕྱི་ནང་བྱ་བ་གྲུབ་པའི་མེ། །སྙིང་གི་དཀྱིལ་ན་གནས་པ་ཡིན། །ཀུན་གསལ་བྱ་བ་གྲུབ་པ་གཅིག །ས་ལ་ཡང་ནི་ལྔ་ཡིན་ཏེ། །ཀུན་ཏུ་སྣང་བའི་ས་ཆེན་ནི། །རིག་པ་དག་དང་ལྷན་གཅིག་གནས། །མི་འགྱུར་རྡོ་རྗེའི་ས་ཆེན་ནི། དབྱིངས་སྒྲོན་དག་དང་དབྱེ་མེད་དོ། །ཀུན་འབྱུང་རིན་ཆེན་ས་ཆེན་ནི། །ཐིག་ལེ་སྟོང་སྒྲོན་དབྱེར་མེད་གནས། །སྣང་བ་མཐའ་ཡས་ས་ཆེན་ནི། །ཡེ་ཤེས་ཉིད་དང་ལྷན་གཅིག་གོ། །གྲུབ་པ་མཐར་ཕྱིན་ས་ཆེན་ནི། །ཤེས་རབ་དག་དང་ལྷན་གཅིག་གོ། །ཆུ་ལ་ཡང་ནི་ལྔ་ཡིན་ཏེ། །འགྱུར་བ་མེད་པའི་ཆུ་ཆེན་ནི། །རྩ་རྣམས་ཐམས་ཅད་ལ་གནས་སོ། །ཞི་བ་གསལ་དག་ཆུ་དག་ནི། །རུས་པ་དག་ལ་གནས་པའོ། །ཡོན་ཏན་འབྱུང་བ་རྒྱས་པའི་ཆུ། །ཁྲག་རང་ཉིད་ལ་གནས་པའོ། །ཆགས་པ་མེད་པའི་ཆུ་དག་ནི། །ཆུ་སེར་དག་ལ་གནས་པའོ། །འཛིན་མེད་རྫོགས་པའི་ཆུ་དག་ནི། །མིག་གི་འབྲས་བུ་དག་ལ་གནས། །ནམ་མཁའ་ལ་ཡང་རྣམ་པ་ལྔ། །ཀུན་ལ་ཁྱབ་པའི་ནམ་མཁའ་ནི། །རིག་པ་ཉིད་ལ་གནས་པའོ། །ཡུལ་མེད་གསལ་བའི་ནམ་མཁའ་ནི། །འོད་ལྔ་ཀློང་དུ་གནས་པའོ། །མ་འདྲེས་དག་པའི་ནམ་མཁའ་ནི། །དབྱིངས་ཆེན་རྣམ་དག་དག་ལ་གནས། །དོན་རྣམས་མཚོན་བྱེད་ནམ་མཁའ་ནི། །ཡེ་ཤེས་ཆེན་པོའི་ཀློང་ན་གནས། །དག་པར་གྲོལ་བྱེད་ནམ་མཁའ་ནི། །རྟོགས་པ་ཐུགས་རྗེའི་ཀློང་ན་གནས། །སྲོག་འཛིན་རླུང་ཡང་ལྔ་ཡིན་ཏེ། །རྩ་བ་འཛིན་པའི་སྲོག་ཉིད་ནི། །རིག་པའི་དངས་སྙིགས་འབྱེད་པར་བྱེད། །སྐྱོབ་པར་བྱེད་པའི་སྲོག་ཉིད་ནི། །མདངས་དངས་བཀྲག་ཡང་བསྐྱེད་པར་བྱེད། །རྣམ་པར་འཕྲོ་བའི་སྲོག་ཉིད་ནི། །འོད་ཀྱི་ཁ་དོག་བསྐྱེད་པར་བྱེད། །མི་གཙང་བའི་སྲོག་ཉིད་ཀྱིས། །མ་རིག་པ་ཉིད་བསྐྱེད་པར་བྱེད། །རྣམ་པར་དར་བྱེད་སྲོག་ཉིད་ཀྱིས། །ཡིད་ཀྱི་དྲན་པ་བསྐྱེད་པར་བྱེད། །མེ་མཉམ་རླུང་ཡང་ལྔ་ཡིན་ཏེ། །དངས་སྙིགས་འབྱེད་པའི་རླུང་ཞེས་པས། །ལོང་ཀ་དག་གི་སྟེང་ན་གནས། །དྲོད་བསྐྱེད་པའི་རླུང་ཞེས་པས། །ཕོ་བའི་ཟས་ཀུན་འཇུ་བར་བྱེད། །གསལ་བར་གྱུར་པའི་རླུང་ཞེས་པས། །སྨིན་མའི་བར་ན་གནས་པར་བྱེད། །རྣམ་པར་བསྡུད་པའི་རླུང་ཞེས་པས། །སྙིང་གི་དཀར་ནག་མཚམས་ན་གནས། །རྣམ་པར་གཟེངས་བསྟོད་ཞེས་པའི་ལུང་། །རླུང་སེམས་གཉིས་ཀྱིས་བར་ན་གནས། །གཟིའ་མདངས་བསྐྱེད་པའི་རླུང་ཡང་ལྔ། །རྣམ་པར་ཤེས་པ་བསྐྱེད་པའི་རླུང་། །ཤེས་རབ་ཀུན་གྱི་ཡུམ་ཡང་བྱེད། །རྣམ་པར་ཡིད་ལ་འབྱུང་བའི་རླུང་། །སྣང་བའི་ཡུལ་ཀུན་གསལ་བར་བྱེད། །གཞི་ལ་ཁྱད་པར་བྱེད་པའི་རླུང་། །སེམས་ཀྱི་བག་ཆགས་སློང་བར་བྱེད། །རྣམ་བར་དངས་དང་ལྡན་པའི་རླུང་། །སྒྲོན་མ་བཞི་པོ་སྨིན་པར་བྱེད། །རྣམ་པར་གློགས་པ་བྱེད་པའི་རླུང་། །ཤེས་བཞིན་དྲན་པའི་སྟེང་ན་གནས། །རྣམ་པར་ཁྱབ་བྱེད་རླུང་ཡང་ལྔ། །རྣམ་པར་རྒོད་བྱེད་ཞེས་པའི་རླུང་། །ཡུལ་ཀུན་དྲན་པའི་སྟེང་ན་གནས། །སྔངས་སྐྲག་ཁྱབ་པར་བྱེད་པའི་རླུང་། །གློ་སྙིང་གཉིས་ཀྱི་བར་ན་གནས། །དྲན་པ་ཁྱབ་བྱེད་རླུང་ཞེས་པས། །སེམས་དང་རྐྱེན་གྱི་བར་ན་གནས། །འཛིན་པ་ལུས་ཀུན་ཁྱབ་པའི་རླུང་། །ལུས་སེམས་གཉིས་ཀའི་སྟེང་ན་གནས། །སྙིང་རྗེ་མེད་པའི་རླུང་ཡང་ལྔ། །རྣམ་པར་བསྐྱེད་བྱེད་རླུང་ཞེས་པས། །ཡན་ལག་ལྷུ་ཚིགས་ཀུན་ལ་གནས། །རྣམ་པར་སྒྲོལ་བྱེད་རླུང་ཞེས་པས། །སྐད་ཅིག་གཅིག་གི་སྟེང་ན་གནས། །རྣམ་པར་བཟློག་བྱེད་རླུང་ཞེས་པ། །བར་དོའི་དུས་ན་འཆར་བའི་ཡིན། །རྣམ་པར་མྱུར་བྱེད་རླུང་ཞེས་པས། །ཕུང་ཁམས་ཀུན་ལ་གནས་པ་ཡིན། །སྐད་ཅིག་དུས་མཐའི་རླུང་ཞེས་པ། །འབྱུང་བ་སྡུད་དུས་འཆར་བ་ཡིན། །མ་དག་པ་རུ་བསྐྱོད་པ་ན། །བསྐྱོད་པར་བྱེད་པའི་རླུང་དུ་གྲགས། །དག་པ་ཡེ་ཤེས་སྲོག་འཛིན་པ། །སྲོག་འཛིན་པའི་རླུང་དུ་གྲགས། །ཡེ་ཤེས་རང་མདངས་སྟོན་པས་པ། །གཟི་མདངས་བསྐྱེད་པའི་རླུང་དུ་གྲགས། །ཤེས་རབ་ཆེན་པོ་ཡང་དག་ཕྱིར། །སྙིང་རྗེ་མེད་པས་སྐལ་རླུང་ཟེར། །ཡེ་ཤེས་སྣང་བ་གསལ་བས་ན། །མེ་དང་མཉམ་པའི་རླུང་ཞེས་སོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ནང་གི་འབྱུང་བ་རྣམས་ལུས་ལ་ངོ་སྤྲད་ཅིང་བཤད་པའི་ལེའུ་སྟེ་བཅུ་དྲུག་པའོ། །྅྅྅ དེ་ནས་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱཻ་ཡུམ་ཆེན་ཀུན་བཟང་ཉིད། །དུས་གསུམ་སངས་རྒྱས་ཐམས་ཅད་ཀྱིས། །དགོངས་པ་གང་ལགས་བཤད་དུ་གསོལ། །ཞེས་པ་དང་། །སྟོན་པས་བཀའ་སྩལ་པས་འདི་སྐད་དོ། །ཀྱཻ་འདུས་པའི་འཁོར་རྣམས་ཉོན། །དུས་གསུམ་སངས་རྒྱས་མིང་གྲགས་ཀྱང་། །དཀྱིལ་འཁོར་ཡོངས་སུ་ལྷུན་རྫོགས་པས། །རང་སྣང་རིག་པར་ཤེས་པར་གྱིས། །རིག་པ་སྐྱེ་མེད་ཡུམ་གྱི་མཁའ། །རང་སྣང་གཅིག་ཆོད་ཤེས་པ་ན། །ཆོས་ཉིད་བདེ་ཆེན་རོལ་པར་སྤྱོད། །ཙིཏྟ་འོད་གསལ་བུམ་པ་སྟེ། །འདས་པའི་སངས་རྒྱས་དངོས་ཡིན་ནོ། །འཇའ་འོད་བཀྲག་མདངས་ལམ་མེ་བ། །མ་འོངས་སངས་རྒྱས་དངོས་ཡིན་མོད། །རང་རང་སྒོ་ལ་མ་འགགས་འཆར། །ད་ལྟའི་སངས་རྒྱས་དངོས་ཡིན་མོད། །རིག་པ་བྱུང་ས་མེད་པའི་ཕྱིར། །མར་མེ་མཛད་དུ་ངས་བཤད་དོ། །རིག་པ་གནས་ཡུལ་བྲལ་བའི་ཕྱིར། །ཤཱཀྱ་ཐུབ་པ་ངས་བཤད་དོ། །རིག་པ་འགྲོ་འོང་མེད་པའི་ཕྱིར། །བྱམས་པ་མགོན་པོར་ངས་བཤད་དོ། །ངག་འདི་འདས་བའི་སངས་རྒྱས་ཡིན། །ཡིད་འདི་མ་འོངས་སངས་རྒྱས་ཡིན། །ལུས་འདི་ད་ལྟའི་སངས་རྒྱས་ཡིན། །འབྱུང་བའི་དངས་མ་ལས་གྲུབ་པས། །ལུས་འདི་བདེར་གཤེགས་ཕོ་བྲང་ཡིན། །རིགས་ལྔ་ཡབ་ཡུམ་ལྔ་ཡིན་པས། །ཕུང་ཁམས་སྐྱེ་མཆེད་ལྷའི་སྐུ། །རང་སྣང་རིག་པ་སྐུ་གསུམ་འདི། །ཀུན་ལ་སྣང་བས་རང་སྣང་ཡིན། །སངས་རྒྱས་དགོངས་པ་གྲངས་མང་ཡང་། །སྐུ་གསུམ་ཐུགས་ལ་མ་འདུས་མེད། །གསུང་ནི་འདས་པའི་སངས་རྒྱས་ཡིན། །ཐུགས་ནི་མ་འོངས་སངས་རྒྱས་ཡིན། །སྐུ་ནི་ད་ལྟ་བཞུགས་པའོ། །ཆོས་སྐུ་འདས་པའི་སངས་རྒྱས་ཡིན། །ལོངས་སྐུ་སླད་ནས་འ བྱོན་པ་ཡིན། །སྤྲུལ་སྐུ་ད་ལྟའི་སངས་རྒྱས་སོ། །རིག་པ་འཛིན་པ་མེད་པའི་ཕྱིར། །ཆོས་ཀྱི་སྐུའི་རང་བཞིན་ཡིན། །རིག་སྣང་སྐུ་ཐིག་རྒྱས་པས་ན། །ལོངས་སྤྱོད་རྫོགས་པའི་སྐུ་དངོས་ཡིན། །རིག་རྩལ་སྣ་ཚོགས་འཆར་བས་ན། །སྤྲུལ་པས་སྐུའི་རང་བཞིན་ཡིན། །ཆོས་སྐུ་ཞེས་པའི་ངོ་བོ་ནི། །རིག་པ་མཐའ་བྲལ་རྟོགས་པ་ཡིན། །ཆོས་རྣམས་ཀུན་གྱི་གཙོ་བོ་ནི། །བྱར་མེད་ཡིན་པར་ཤེས་པར་བྱ། །ཆོས་རྣམས་ཀུན་གྱི་མེ་ལོང་ནི། ནམ་མཁའ་བྱ་ལམ་ཤེས་པར་བྱ། །ཆོས་རྣམས་ཀུན་གྱི་འབྲས་བུ་ནི། །རྩོལ་མེད་ལྷུག་པར་ཤེས་བར་བྱ། །ཆོས་རྣམས་ཀུན་གྱི་ལག་ལེན་ནི། །རང་དབབ་བདལ་བར་ཤེས་པར་བྱ། །ཆོས་རྣམས་ཀུན་གྱི་ཁྱེར་སོ་ནི། །འཛིན་པ་མེད་པར་ཤེས་པར་བྱ། །ཆོས་རྣམས་ཀུན་གྱི་ཚིག་མཐའ་ནི། །སྨྲ་མེད་ལྷུག་པར་ཤེས་པར་བྱ། །ཆོས་རྣམས་ཀུན་གྱི་ཉམས་རྟོགས་ནི། །སྒྲོན་བཞིའི་ཀློང་དུ་ཤེས་པར་བྱ། །ཆོས་རྣམས་ཀུན་གྱི་ཐུག་ས་ནི། །གཉིས་ཆོས་ཟད་པར་ཤེས་པར་བྱ། །ཆོས་རྣམས་ཀུན་གྱི་ས་བོན་ནི། །ཀུན་བཟང་མཁའ་རུ་ཤེས་པར་བྱ། །ཆོས་རྣམས་ཀུན་གྱི་ཆོ་འཕྲུལ་ནི། །སྣང་བའི་རྡོ་རྗེ་ཤེས་པར་བྱ། །བྷ་ག་ཡོད་ན་རྡོ་རྗེ་བྱུང་། །བྷ་གའི་ནང་དུ་རྡོ་རྗེ་ཚུད། །རྡོ་རྗེའི་ནང་དུ་མཁའ་མི་ཚུད། །ཡུམ་ཡོད་ན་ནི་ཡབ་འབྱུང་སྟེ། །ཡུམ་གྱི་ནང་དུ་ཡབ་ཚུད་དེ། །ཡབ་ཀྱི་ནང་དུ་ཡུམ་མི་ཤོང་། །ཤེས་རབ་ཡོད་ན་ཐབས་འབྱུང་སྟེ། །ཤེས་རབ་ནང་དུ་ཐབས་སོང་ལ། །ཐབས་ནང་དུ་ཤེས་རབ་མི་ཚུད་དོ། །སྟོང་པ་ཡོད་ན་སྣང་བ་འབྱུང་། །སྟོང་པར་སྣང་བ་ཤོང་བ་སྟེ། །སྣང་བར་སྟོང་པ་ག་ལ་ཚུད། །དོན་དམ་ཡོད་ན་ཀུན་རྫོབ་འབྱུང་། །དོན་དམ་ཀློང་དུ་ཀུན་རྫོབ་ཤོང་། །ཀུན་རྫོབ་ཀློང་དུ་དོན་དམ་མི་ཤོང་ངོ་། །དོན་དམ་བདེན་པའི་མཐུ་དག་གིས། །རང་བཞིན་གཉིས་ཀའི་ངོ་བོ་སྟོང་། །ཀུན་རྫོབ་ཀོར་ལེ་དུམ་བུ་བ། །རང་ཉིད་སྟོང་ལ་གཞན་མི་སྟོང་། །དོན་དམ་རང་གི་ངོ་བོས་སྟོང་། །ཀུན་རྫོབ་གཞན་གྱི་ངོ་བོ་སྟོང་། །གཞི་དང་ལམ་གྱི་ཁྱད་པར་གྱིས། །འདིའི་དོན་ཀུན་རྟོགས་པར་གྱིས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། དུས་གསུམ་སངས་རྒྱས་ཀྱི་དགོངས་པ་ངོ་སྤྲོད་པའི་ལེའུ་སྟེ་བཅུ་བདུན་པའོ། །྅྅྅ དེ་ནས་མཁའ་འགྲོ་མ་རྣམས་ཀྱི་བསྐུལ་བ། ཀྱཻ་སྟོན་པ་ཡུམ་ཆེན་མོ། །དེ་ལྟར་སྐུ་གསུམ་དགོངས་པ་ཡིས། །ལག་ཁྲིད་གང་ལགས་བསྟན་དུ་གསོལ། །ཞེས་པ་དང་། སྟོན་པས་བཀའ་སྩལ་པ་ནི། ཀྱེ་ཧོ་འདུས་པའི་འཁོར་རྣམས་ཉོན། །སྐུ་གསུམ་དགོངས་པའི་ལག་ཁྲིད་ནི། །སྟོན་པ་ཐུགས་རྗེ་ཆེན་པོ་ཡིས། །གདུལ་བྱེད་ཐེག་པ་མང་གསུང་ཡང་། །ཡང་གསང་རྫོགས་པ་ཆེན་པོར་འདུས། །གླེང་གཞི་རྣམ་པ་གཉིས་ཡིན་ཏེ། །ཐུན་མོང་ཐུན་མོང་མ་ཡིན་པ། །ཐུན་མོང་མ་ཡིན་གླེང་གཞི་ནི། །གཞིའི་ཕུན་སུམ་ཚོགས་པ་ལྔ། །གནས་པ་ལུས་ཀྱི་ཕུན་ཚོགས་ལྔ། །ལམ་གྱི་ཕུན་སུམ་ཚོགས་པ་ལྔ། །འབྲས་བུའི་ཕུན་སུམ་ཚོགས་པ་ལྔ། །དང་པོ་ཕུན་སུམ་ཚོགས་པ་ནི། །གནས་ནི་ཆོས་དབྱིངས་སྤྲོས་བྲལ་ལ། །སྟོན་པ་རང་བྱུང་ཡེ་ཤེས་སོ། །འཁོར་ནིི་སྐུ་དང་ཡེ་ཤེས་སོ། །བསྟན་པ་བདེ་ཆེན་འགག་པ་མེད། །དུས་ནི་ཐོག་མཐའ་བྲལ་བའོ། །གནས་པ་ལུས་ཀྱི་ཕུན་ཚོགས་ནི། །ལུས་ལ་གནས་ནི་ཙིཏྟ་དང་། །དུང་ཁང་འཁོར་ལོ་རྩ་གསུམ་མོ། །སྟོན་པ་ངོ་བོ་ཀ་དག་ལ། །འཁོར་ནི་སྐུ་དང་ཡེ་ཤེས་ལྔ། །བསྟན་པ་རྩ་རླུང་ཐིག་ལེ་སྟེ། །བདེ་དང་གསལ་དང་མི་རྟོག་དང་། །དུས་ནི་ནད་སོགས་རྐྱེན་མེད་དོ། ལམ་གྱི་ཕུན་ཚོགས་ལྔ་པོ་ནི། །གནས་ནི་ཕྱི་དང་ནང་གི་དབྱིངས། །སྟོན་པ་རྡོ་རྗེ་ལུ་གུ་རྒྱུད། །འཁོར་ནི་སྐུ་དང་ཐིག་ལེ་སྟེ། །བསྟན་པ་སྒྲོན་མ་བཞི་ལྡན་ལ། །དུས་ནི་ལྟ་སྟངས་གཅིག་ནའོ། མཐར་ཐུག་འབྲས་བུའི་ཕུན་ཚོགས་ནི། །གནས་ནི་བདེ་ཆེན་ཆོས་ཀྱི་དབྱིངས། །སྟོན་པ་རིག་པ་ཡེ་ཤེས་ལ། །འཁོར་ནི་རོལ་རྩལ་སྤྱོད་པའོ། །བསྟན་པ་ཟག་མེད་བདེ་བ་ལ། །དུས་ནི་རྟོགས་པ་མངོན་འགྱུར་རོ། །གཞན་ལས་ཁྱད་པར་ཆེར་འཕགས་པས། །ཐུན་མོང་མ་ཡིན་ལུང་རིགས་སྦྱར། །སྙིགས་མ་དངས་མ་དྲིལ་བ་དང་། །བཅུད་རྣམས་སྙིང་པོར་འདུས་པའོ། །དང་པོ་སྤྱི་གཞི་གཏན་དབབ་སྟེ། །ཤེས་བྱའི་གཞི་དང་གནས་ལུགས་གཞི། །ཤེས་བྱའི་གཞི་ལ་བསམ་མི་ཁྱབ། །དཔེར་ན་སྤོས་གླང་བསྟན་པའམ། །མར་དཀར་མུན་ལོང་བསྟན་དང་མཚུངས། གནས་ལུགས་གཞི་ལ་རྣམ་པ་གསུམ། །ཐོག་མ་ཉིད་ནི་སྤྱི་གཞི་དང་། །མ་དག་འཁྲུལ་པའི་གཞི་དང་ནི། །དེ་ཉིད་རྟོགས་པའི་གྲོལ་གཞིའོ། །ཐོག་མའི་སྤྱི་གཞི་གཉིས་ཡིན་ཏེ། །ཡེ་ཐོག་དང་པོའི་གནས་ལུགས་དང་། །རང་གི་རིག་པའི་གནས་ལུགས་སོ། །ཡེ་ཐོག་གཞིའི་གནས་ལུགས་ནི། །ཐོག་མའི་ཀ་དག་སྟོང་གསལ་ཁྱབ། །རང་བཞིན་ཉིད་ནི་འདི་ལྟ་བུ། །གསལ་འཚེར་བུམ་པའི་སྐུ་བཞིན་ནོ། །ངོ་བོ་ཀ་དག་ཡེ་ཤེས་ཏེ། །མ་རིག་རྟོག་པ་ཀུན་དང་བྲལ། །རང་བཞིན་ལྷུན་གྲུབ་ཡེ་ཤེས་ནི། །སྟོང་གསལ་རང་མདངས་ཉིད་དུ་གནས། །ཐུགས་རྗེ་ཀུན་ཁྱབ་ཡེ་ཤེས་ནི། །འགག་མེད་སྟོང་པ་ཉིད་དུ་གནས། །སྟོང་དང་གསལ་དང་མི་འགག་གསུམ། །རྒྱ་ཆད་ཕྱོགས་ལྷུང་མེད་པའོ། །འགགས་མེད་རྩལ་ལ་ཅིར་ཡང་འཆར། །སྟོང་གསལ་རིག་ཅིང་འགྱུར་བ་མེད། །ངོ་བོ་སྟོང་པ་རྟག་མཐའ་བྲལ། །རང་བཞིན་གསལ་བས་ཆད་མཐའ་བྲལ། །ཐུགས་རྗེ་ཁྱབ་པས་གཉིས་མཐའ་བྲལ། །མཐའ་བཞི་དྲི་མ་རང་དག་ཉིད། །ངོ་བོ་སྣང་སྟོང་དབྱེར་མེད་ལ། །རང་བཞིན་གསལ་སྟོང་དབྱེར་མེད་པས། །ཐོག་མ་ཐ་མ་བར་གསུམ་དུ། །སྐུ་གསུམ་དབྱེ་བ་མེད་པ་རུ། །སེམས་ཅན་ཀུན་གྱི་རྒྱུད་ལ་གནས། །མ་རིག་པའི་འཁྲུལ་གཞི་ནི། །དང་པོ་མ་རིག་དྲུག་ལས་བྱུང་། །མ་རིག་པའི་རྒྱུ་གསུམ་པོ། །ངོ་བོ་རང་བཞིན་ཐུགས་རྗེའོ། །ངོ་བོ་སྟོང་པ་མ་རིག་འཁྲུལ། །རང་བཞིན་གསལ་བ་མ་རིག་འཁྲུལ། །ཐུགས་རྗེ་སྣང་སྟོང་མ་རིག་འཁྲུལ། །འཁྲུལ་པ་དག་གིས་རྐྱེན་གསུམ་ནི། །རྒྱུ་རྐྱེན་དམིགས་རྐྱེན་ངར་འཛིན་རྐྱེན། །གོང་མ་གསུམ་ལ་རྒྱུ་མེད་ཀྱང་། །མ་རིག་པའི་རྐྱེན་དེས་འཁྲུལ། །རྒྱུ་དང་རྐྱེན་ཞེས་གྱུར་པ་ཡང་། །ངོ་བོ་སྟོང་པའི་གསལ་ཆ་ལ། །ཡེ་ཤེས་རང་མདངས་འོད་ཁྱམ་ཤར། །གསལ་མདངས་མ་ཤེས་དངོས་པོར་བཟུང་། །མ་རིག་པའི་རྒྱུ་རྐྱེན་ཡིན། །དེ་ལ་བདག་རྟོག་ཡུལ་ཅན་བཟུང། །དམིགས་པའི་རྐྱེན་ཞེས་བྱ་བའོ། །དེ་ལ་རབ་ཏུ་འཐས་པ་ཡིས། །འབྱུང་ལྔ་དངོས་སུ་གྲུབ་པ་སྟེ། །ལྷུན་གྲུབ་རང་མདངས་འབྱུང་ལྔར་འཁྲུལ། །ཡེ་ཤེས་རྩལ་གྱི་ཁྱབ་པ་ལ། །འཇིག་རྟེན་ཁམས་སུ་ཆགས་པའོ། །དེ་ཉིད་དངས་མ་ལྔ་ཉིད་ལས། །ནང་བཅུད་སེམས་ཅན་ཆགས་པའོ། །མདོར་ན་དེ་རྣམས་ཐམས་ཅད་ལ། །མེད་ལ་ཡོད་བཟུང་འཁྲུལ་པ་ཡིན། །རང་སྣང་རང་དུ་མ་ཤེས་པས། །ཐག་པ་སྦྲུལ་དུ་མཐོང་བ་འམ། །དུང་ལ་སེར་པོ་མཐོང་བ་བཞིན། །རང་སྣང་འཐས་ནས་འཁྲུལ་པ་ཡི། །མ་རིག་དེའི་འཁྲུལ་འབྲས་ནི། །ལུས་ཀྱི་གྲུབ་ཚུལ་བསྟན་པ་ནི། ཡེ་ཤེས་གསུམ་གྱི་འཁྲུལ་ཚུལ་དང་། །འཁྲུལ་པའི་འབྲས་བུ་བྱུང་ཚུལ་ལོ། །དང་པོ་ལུས་ཀྱི་བྱུང་ཚུལ་ནི། །མ་རིག་པའི་ལས་དབང་དེས། །འབྱུང་བཞི་གདོས་བཅས་ལུས་གྲུབ་སྟེ། །དེ་ལས་ཉོན་མོངས་ལ་དབང་གིས། །དབང་པོའི་སྒོ་སོགས་དོད་གྱུར་ནས། །ལས་ངན་སོ་སོར་སྤྱོད་པའོ། །དེ་ལ་བརྟེན་པའི་ཡེ་ཤེས་གསུམ། །ངོ་བོ་སྟོང་པར་འཁྲུལ་པ་སྟེ། །རང་བཞིན་སེམས་སུ་འཁྲུལ་པ་ཡིན། །ཐུགས་རྗེ་ཚོགས་དྲུག་ཡུལ་དུ་འཁྲུལ། །ཉོན་མོངས་ལས་མཐའ་དུ་མ་ཤར། །དེ་ལྟར་མ་རིག་རྫོགས་པའི་མཐའ། །འདོད་དང་གཟུགས་དང་གཟུགས་ཎ་ཀྱི། །ཁམས་གསུམ་པོ་ནི་དེ་ལ་བརྟེན། །འཁྲུལ་པ་དེའི་འབྲས་བུ་ལ། །ཕུང་ཁམས་སྐྱེ་མཆེད་ཐམས་ཅད་ཀྱང་། །གཟུང་དང་འཛིན་པས་རབ་བསྡུས་ནས། །འཁོར་བ་ཉིད་དུ་ཡུན་རིང་འཁོར། །ཁམས་གསུམ་ཐར་མེད་ཁང་པ་རུ། །མིང་གཟུགས་ཆོས་ཀྱི་བཙོན་རར་ཚུད། །མ་རིག་ལྕགས་ཀྱི་ཡན་ལག་སྡོམ། །འཁོར་བའི་མུན་ནག་རླུང་གི་གཡོག །སྔ་ཕྱི་བག་ཆགས་དྲ་བར་ཚུད། །སྐྱེ་ཤི་རིགས་དྲུག་རྒྱ་མཚོར་བྱིང་། །ཐར་དུས་མེད་པ་ཨ་ཙ་མ། །དེ་ལྟར་འཁྲུལ་འབྲས་ལུས་འདི་ལས། །གྲོལ་གཞི་ས་བོན་ཅི་ལྟར་གནས། །ལེགས་པར་བསྟན་པ་འདི་ལྟ་སྟེ། །ལུས་འདི་སངས་རྒྱས་བསྟན་པ་དང་། །སེམས་ནི་སངས་རྒྱས་བསྟན་པ་དང་། །འཁྲུལ་སྣང་རང་གྲོལ་བསྟན་པའོ། །དེའི་ཐོག་མ་འདི་ལྟ་སྟེ། ཐོག་མའི་རིག་རྩལ་ཡེ་ཤེས་ལྔ། །མ་རིག་འཁྲུལ་པ་འབྱུང་བར་འགྱུར། །དེ་ལྟར་ལུས་ནི་སངས་རྒྱས་དངོས། །ཡེ་ཤེས་ཆེན་པོའི་འབྱུང་གནས་ཉིད། །ལུས་ཅན་ཀུན་ལ་བཟང་ངན་མེད། །བདེར་གཤེགས་ངོ་བོ་འགྲོ་ཀུན་ལ། ཏིལ་ལ་མར་གྱི་ཁྱབ་བཞིན་གནས། །མ་རིག་གྲོལ་ཚེ་འབྱུང་བའི་དུས། །ལྷག་མེད་ཡེ་ཤེས་ངང་དུ་བཟློག །ཕུང་ལྔ་ཡེ་ཤེས་སངས་རྒྱས་དངོས། །འབྱུང་བ་ལྔ་ལ་ཡུམ་ལྔ་སྟེ། །ཉོན་མོངས་ལྔ་ལ་ཡེ་ཤེས་ལྔ། །ཡུལ་ལྔ་པོ་ནི་འོད་ལྔའི་སྐུ། །སྲིད་པ་གསུམ་ཉིད་སངས་རྒྱས་ཞིང་། །གཉིས་མེད་ལྟ་བའི་རང་ལུས་ཡིན། །སེམས་ཅན་ཀུན་རིག་དྲི་མ་མེད། །ཕུང་པོ་འབྱུང་བ་ཡབ་ཡུམ་ལྔ། །རྩ་ཁམས་སྐྱེ་མཆེད་ལྷའི་ཚོགས། །སྲིད་གསུམ་དཀྱིལ་འཁོར་རང་ལུས་རྫོགས། །སེམས་ནི་སངས་རྒྱས་བསྟན་པ་ནི། །སེམས་ཅན་རང་རྒྱུད་རྟོག་ཚོགས་ཉིད། །བཞི་བཅུ་ཞེ་གཉིས་སངས་རྒྱས་སོ། །ཕུང་པོ་འབྱུང་བ་ཡབ་ཡུམ་ལྔ། །དུག་ལྔ་སེར་སྣ་ཐུབ་པ་དྲུག །ཚོགས་བརྒྱད་སེམས་དཔའ་ཡབ་ཡུམ་བརྒྱད། །སྒོ་བཞི་སྒོ་མ་ཡབ་ཡུམ་བཞི། །གཡས་གཡོན་ཉི་མ་ཟླ་བའོ། །རང་བྱུང་རིག་པའི་རང་རྩལ་ལས། །སྐུ་ལྔ་དང་ནི་ཡེ་ཤེས་ལྔ། །རིགས་ལྔ་འོད་ལྔ་རླུང་ནི་ལྔ། །ཤེས་རབ་ལྔ་ལ་སོགས་པར་གནས། །རང་རིག་རིག་རྩལ་སྐུ་ལྔ་ཤར། རྣམ་སྣང་མི་བསྐྱོད་རིན་ཆེན་འབྱུང་། །སྣང་མཐའ་དོན་ཡོད་གྲུབ་པར་ཤར། །རིག་པའི་ཡོན་ཏན་འོད་ལྔར་གསལ། །རིག་པའི་རྩལ་ལ་ཡེ་ཤེས་གསུམ། །ངོ་བོ་སྟོང་པའི་ཡེ་ཤེས་དང་། །རང་བཞིན་གསལ་བའི་ཡེ་ཤེས་དང་། །ཐུགས་རྗེ་ཀུན་ཁྱབ་ཡེ་ཤེས་གསུམ། །དབྱེར་མེད་གསུམ་བརྩེགས་ཚུལ་དུ་ཤར། །དམིགས་སུ་མེད་པ་ཆོས་སྐུའི་འོད། །མ་འགགས་གསལ་བ་ལོངས་སྐུའི་འོད། །སྣང་བ་སྣ་ཚོགས་སྤྲུལ་པའི་སྐུ། །གསུམ་ལྡན་ཚུལ་དུ་དབྱེར་མེད་དོ། །སེམས་ནི་དྲན་སེམས་རིག་པའི་རྩལ། །སྣང་ཤེས་དག་ཏུ་འགྱུར་ཚད་ཀུན། །རིག་པ་ཉིད་ནི་ལོག་ན་མེད། །དེ་ལྟར་ལུས་ཅན་ཐམས་ཅད་ལ། །རིག་པའི་ཡེ་ཤེས་ཁྱབ་མོད་ཀྱང་། །ཁྱད་པར་གནས་དངོས་བསྟན་པ་ནི། །སྙིང་དང་རྩ་དང་དུང་ཁང་དང་། །མིག་དང་བཞིའི་གཞལ་ཡས་ཁང་ན། །ཡེ་ཤེས་ཆེན་པོ་དེ་ན་གནས། །སེམས་ཅན་ཀུན་གྱི་ལུས་ཀྱི་ནང་། །ཙིཏྟ་རྩ་ནང་དུང་ཁང་སྒོ། །དེ་ནི་རིག་པའི་གནས་ཡིན་ནོ། །གནས་ལུགས་ཇི་ལྟར་གནས་པ་ནི། །རིན་ཆེན་ལུས་ཀྱི་གནས་དེ་ན། །ངོ་བོ་སྟོང་གསལ་སྐུ་རུ་གནས། །རང་བཞིན་གསལ་སྟོང་དེ་ལ་འོད། །ཐུགས་རྗེ་སྣ་ཚོགས་སྒྲོན་མར་གནས། །རང་རིག་ངོ་བོ་སྐུར་གནས་ཏེ། །གསལ་ལ་རང་བཞིན་ལྷུན་གྲུབ་པས། །སྙིང་ནང་ཡབ་ཡུམ་ཞི་བའི་ཚུལ། །དུང་ཁང་ཁྲོ་བོའི་ཚུལ་དུ་གནས། །ལུས་ལ་གནས་པའི་རིམ་པ་ཡང་། །ཕྱི་ལྟར་ཞི་ཁྲོའི་རང་བཞིན་ལས། །ནང་ལྟར་དྷཱ་ཀི་ཡབ་ཡུམ་མོ། །སྒྱུ་མ་ལུས་ཀྱི་རྩ་ནང་ན། །རིག་པའི་ངོ་བོ་ཡི་གེར་གྲུབ། །ཨ་དང་ཧ་རི་ནི་ས་དང་། །ཧྲི་དང་ར་ཙ་ཧྲི་ཡའོ། །ཐམས་ཅད་རང་བྱུང་ཀ་དག་ཉིད། །རིག་པ་སྐུའི་རང་མདངས་ལས། །རྩའི་ནང་ན་ཐིག་ལེ་དང་། འོད་ཟེར་ལྟ་བུར་གནས་པའོ། །རིག་པ་སྐུའི་རང་རྩལ་ལས། །རྩའི་ནང་ན་ཉི་ཟེར་བཞིན། །དབང་པོའི་སྒོ་ནས་ངེས་ཐོན་ཏེ། །ཐུགས་རྗེ་ནམ་མཁའི་མཐོངས་སུ་གསལ། །སྒྲོན་མ་བཞིའི་ངོ་བོ་སྟེ། །ཐིག་ལེ་སྟོང་པའི་སྒྲོན་མ་དང་། རིག་པ་དབྱིངས་ཀྱི་སྒྲོན་མ་དང་། །ཤེས་རབ་རང་བྱུང་སྒྲོན་མ་དང་། །རྒྱང་ཞག་ཆུའི་སྒྲོན་མའོ། །རིག་པའི་སྐུ་ནི་བུམ་སྐུ་འདྲ། །ཡེ་ཤེས་བུམ་པའི་མར་མེ་འདྲ། །ཐུགས་རྗེ་མེ་ལོང་ངོས་ལྟར་གསལ། །ལོངས་སྤྱོད་སྐུ་ལ་སྐུ་གསུང་ཐུགས། །ཡོན་ཏན་དང་ནི་ཕྲིན་ལས་སོ། །སྐུ་ནི་སྣང་ལ་རང་བཞིན་མེད། །དེ་ནི་ཡེ་ཤེས་གནས་ལུགས་སོ། །དེ་དོན་ཉམས་སུ་བླང་བ་ལ། །ཡེ་ཤེས་འཆར་བའི་ལམ་དག་དང་། །འཆར་བྱེད་ཡུལ་གྱི་གནས་ཉིད་དང་། །ཤར་བ་ཅི་ལྟར་ཉམས་བླང་བའོ། །དང་པོ་འཆར་ལམ་རྩ་ཡིན་ཏེ། །འཁོར་ལོ་ལྔའི་དབུས་དག་ན། །རོ་མ་རྐྱང་མ་ཀུན་དྷར་མ། །དབང་པོའི་སྒོ་ལ་ཟུག་པར་གནས། །རྩའི་གཙོ་བོ་གསུམ་ལ་ནི། །ཡལ་ག་གྲངས་ལས་འདས་པ་གྱེས། །ཐད་སོ་དབང་པོའི་སྒོ་དོན་བྱེད། །དེའི་ཆོས་ཀུན་སྟོན་བྱེད་ཅིང་། །ཁྱད་པར་ཙིཏྟ་ནས་འབྲེལ་བའི། །དར་སྐུད་བ་མན་རྭ་འདྲའི་ཁ། །དབང་པོའི་སྒོ་ལ་ཟུག་པ་སྟེ། །དེ་ནི་ཆོས་ཉིད་ཀུན་གྱི་ལམ། །འདི་དོན་ལེགས་པར་རྟོགས་པར་གྱིས། །འཆར་བར་བྱེད་པའི་ཡུལ་ལམ་ནི། །ཡིད་དཔྱོད་ཚིག་ཕྱིར་མ་ལུས་པ། །མངོན་སུམ་འཆར་བའི་སྒོ་ནི་མིག །གཞན་ལ་དེ་ལྟ་མ་ཡིན་ནོ། །ཡུལ་ནི་རྐྱེན་བྲལ་གསུམ་ཡིན་ཏེ། །དབང་པོ་རྐྱེན་དང་བྲལ་བ་དང་། །ཡུལ་མཁའ་རྐྱེན་དང་བྲལ་བ་དང་། །གནས་ཉིད་རྐྱེན་དང་བྲལ་བའོ། །རྐྱེན་བྲལ་གསུམ་ལས་འཆར་བར་འགྱུར། །དེ་ལྟར་འཆར་བྱེད་བླ་མ་གཙོ། །གནད་གསུམ་ལྡན་པས་བསྟན་པ་དང་། །ཡེ་ཤེས་སྣང་བ་ལྷུག་པར་འཆར། །དེ་ལྟར་བླ་མས་ངོ་སྤྲོད་པས། །རྒྱང་ཞག་ལས་ནི་སྒྲོན་མ་ཤར། །ཡུལ་སྣང་རང་མདངས་ཉིད་དུ་གསལ། །དེ་ཉིད་ཤེས་རབ་སྒྲོན་མ་ཡིན། །ཡིད་དཔྱོད་ཐེག་པ་སྒྲོ་འདོག་ཆོད། །དངོས་སུ་ཐིག་ལེ་སྒྲོན་མ་ཤར། །འཁོར་འདས་ཟང་ཐལ་ཉིད་དུ་ཆོད། །རྣམ་དག་དབྱིངས་ཀྱི་སྒྲོན་མ་ཡིན། །ཉམས་ཀྱི་སྣང་བ་གོང་འཕེལ་ལོ། །ཡུལ་དུ་སྒྲོན་མ་དག་ལ་ནི། །ལམ་སྣང་རིག་པ་ལུ་གུ་རྒྱུད། །ལམ་སྣང་ལྷུན་གྲུབ་རིག་མདངས་ལྔ། །ལམ་སྣང་ཐུགས་རྗེས་དབང་པོ་གསལ། །ཤར་བ་ཉམས་སྣང་ཐབས་གཉིས་མེད། །ཁྲེག་ཆོད་དང་ནི་ཐོད་རྒལ་ལོ། །ཉམས་སྣང་ཐབས་མང་གྲོལ་ཚུལ་ལོ། །ཐུན་མོང་དང་ནི་ཁྱད་པར་གྱིས། །འབྲས་བུས་གྲོལ་ཚུལ་བསྟན་པ་ནི། །དང་པོ་ཐུན་མོང་རྣམ་པ་གསུམ། །སའི་ནོན་ཚུལ་བསྟན་པ་དང་། །སངས་ཀྱི་རྒྱས་ལུགས་བསྟན་པ་དང་། །དེའི་རྟགས་ཀྱི་འབྱུང་ཚུལ་ལོ། །དང་པོའི་སའི་ནོན་ཚུལ་ནི། །ས་ཞེས་ལོག་ན་མི་གནས་ཏེ། །རིག་པ་གཅིག་པུའི་སྟེང་ན་གནས། །དང་པོ་བདེན་པ་མཐོང་བའི་དུས། །རབ་ཏུ་དགའ་བའི་ས་ནོན་ནོ། །རང་སྣང་ཡིན་པར་ཤེས་པ་ཡིས། །དྲི་མ་མེད་པའི་ས་ནོན་ནོ། །དེ་ལ་གོམ་ཞིང་འདྲིས་པ་ཡིས། །གསུམ་པ་འོད་བྱེད་ས་ནོན་ནོ། །དེ་ནས་འོད་སྣང་མཐོང་བ་ནི། །བཞི་པ་འོད་འཕྲོའི་ས་ནོན་ནོ། །ཉོན་མོངས་སྦྱངས་ནས་ཡེ་ཤེས་མཐོང་། །ལྔ་པ་སྦྱང་དཀའི་ས་ནོན་ནོ། །དེ་ནས་སྐུ་རྣམས་མཐོང་བ་ནི། །དྲུག་པ་མངོན་གྱུར་ས་ནོན་ནོ། །ཉོན་མོངས་རིང་དུ་སྤང་བ་ནི། །བདུན་པ་རིང་དུ་སོང་བའོ། །ཡོན་ཏན་ཐམས་ཅད་རྫོགས་པའི་དུས། །བརྒྱད་པ་མི་གཡོ་བའི་ས་ནོན་ནོ། །དེ་ནས་སྣང་ཤེས་ཚད་ལ་ཕེབས། །དགུ་པ་ལེགས་པའི་བློ་གྲོས་སོ། །སྣང་བ་ཡེ་ཤེས་ལྷུན་གྱིས་གྲུབ་པར་འཆར། །ཆོས་ཀྱི་སྤྲིན་གྱི་ས་ནོན་ནོ། །དེ་རྣམས་དབུགས་མ་བོར་བར་ནོན། །དབུགས་བོར་འདི་ལྟར་ནོན་པ་སྟེ །འཁྲུལ་སྣང་འགག་ནས་ཚོམ་བུ་འཆར། །བཅུ་གཅིག་ཀུན་ཏུ་འོད་ནོན་ནོ། །སྣང་བ་དེ་ལ་མ་ཆགས་པས། །པདྨ་ཅན་གྱི་ས་ནོན་ནོ། །ཚོམ་བུ་འཁོར་ལོའི་ཚུལ་དུ་སྣང་། །ཡི་གེ་འཁོར་ལོའི་ས་ནོན་ནོ། །ཡེ་ཤེས་སྣང་བའི་ས་ཟིན་པས། །བཅུ་བཞི་བདེ་ཆེན་ས་ནོན་ནོ། །ལྷུན་གྲུབ་སྦུབས་སུ་ཐིམ་པས་ན། །བཅོ་ལྔ་རིག་འཛིན་ས་ནོན་ནོ། །དེ་ནས་ཀ་དག་རང་ཚུགས་ཐུབ། །བཅུ་དྲུག་བླ་མའི་ས་ནོན་ནོ། །བདེན་པ་མཐོང་བའི་གང་ཟག་གིས། །དང་པོའི་ས་ནས་བཅུ་དྲུག་བར། །རིམ་པར་ཉམས་སུ་བླང་བས་འབྱུང་། །གཞན་དང་སྒོ་བསྟུན་གནས་སྐབས་སུ། །ཡོན་ཏན་འབྲས་བུའི་ཐོབ་ཚུལ་ལོ། །གཉིས་པ་སངས་ཀྱི་རྒྱ་ལུགས་ནི། །ཐུན་མོང་སངས་རྒྱས་ཞེས་བྱ་བ། །ཕུང་པོ་རྟགས་ཅན་སངས་རྒྱས་ཏེ། །དེ་ལ་རྟགས་ཀྱིས་འབྱུང་ལུགས་ཀྱང་། །སྐུ་གདུང་སྒྲ་འོད་ལ་སོགས་པ། །སྐྱེ་འགྲོ་མངོན་པར་འབྱུང་བས་ནི། །མངོན་པར་སངས་རྒྱས་ཞེས་གྲགས་སོ། །ཁྱད་པར་འབྲས་བུ་ཐོབ་ཚུལ་ནི། །ཡང་དག་རྫོགས་པའི་སངས་རྒྱས་ཏེ། །ཕུང་པོ་ལྷག་མེད་རྒྱས་པ་ཡིན། །ངོ་བོ་སྟོང་གསལ་ཡེ་ཤེས་སྐུ། །རང་བཞིན་ཐུགས་རྗེ་ཕྱོགས་རིས་མེད། །དབྱེར་མེད་ཆེན་པོར་ཡེ་སངས་རྒྱས། །ཆོས་ཀྱི་སྐུ་ནི་སྐུ་དང་གསུང་། །ཐུགས་དང་ཡོན་ཏན་འཕྲིན་ལས་སོ། །སྐུ་ནི་སྟོང་དང་གསལ་བའོ། །མཚན་ཉིད་མེད་པའི་རིགས་བཞིན་ནོ། །གསུང་ནི་སྒྲ་ཚིག་མིང་བྲལ་ནས། །བརྗོད་མེད་གླེང་གཞིའི་མིང་བྲལ་ལོ། །ཐུགས་ནི་བསམ་དང་འགྱུར་མེད་པས། །འཕྲོ་ཞིང་སྤྱོད་པ་རྣམས་ལས་འདས། །ཕྱིར་མི་འོང་བས་ཟློག་པ་མེད། །དབྱིངས་དང་ཡེ་ཤེས་ཁྱབ་པ་དང་། །རང་བཞིན་བཅོས་པ་མེད་པའོ། །ཕྲིན་ལས་མ་བྱུང་བྱས་པ་མེད། །ཤུགས་འབྱུང་བ་དང་འགགས་པ་དང་། །མ་བྱས་བྱས་པ་མེད་པའོ། །ལོངས་སྤྱོད་རྫོགས་པའི་སྐུ་གསུང་ཐུགས། །ཡོན་ཏན་དང་ནི་ཕྲིན་ལས་སོ། །སྐུ་ནི་གསལ་ལ་རང་བཞིན་མེད། །གསལ་དང་གསལ་བྱེད་རིག་པས་ཁྱབ། །གསུང་ནི་རང་སྣང་རང་བྱུང་དང་། །སྤྲོ་བསྡུ་སྣང་བའི་འཁོར་ལོ་འོ། །ཐུགས་ནི་རྒྱུན་ཆད་མེད་གཟིགས་དང་། །མཁྱེན་པའི་རྩལ་དང་དགོངས་པའོ། །ཡོན་ཏན་མཚན་དཔེའ་རྫོགས་པ་ལ། །དགོངས་གསལ་མེ་ལོང་རྫོགས་པའོ། །ཕྲིན་ལས་ཆོས་ཀྱི་འཁོར་ལོ་ལས། །ཕྱི་ནང་གསང་བ་རྣམ་འཕྲོས་ཏེ། །སོ་སོ་རིག་པའི་སངས་རྒྱས་དང་། །བྱང་ཆུབ་སེམས་དཔའ་རྣམས་ལ་ཡང་། །རང་བྱུང་ལྗགས་རྣམས་འཕྲོས་པ་སྟེ། །འཁོར་ལ་རང་གི་ངོ་བོ་སྟོན། །སྤྲུལ་པའི་སྐུ་ཡང་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔ། །སྐུ་ནི་མཚན་དང་དཔེའ་བྱད་ལ། །གདུལ་བྱ་གང་འདུལ་ལུས་སྤྲུལ་ཏེ། །གསུང་གི་ཚིག་སྦྱོར་ལེགས་པ་ལ། །ཚངས་པའི་དབྱངས་ནི་ཡན་ལག་དྲུག །ཐུགས་ནི་ཤེས་བྱའི་ཡེ་ཤེས་ལྔ། །རང་བཞིན་དོན་གཉིས་རྫོགས་པར་གནས། །ཡོན་ཏན་མཁྱེན་པ་རྫོགས་པ་དང་། །ཕྲིན་ལས་ཕྱི་ནང་གསང་བ་ཡིས། །མཛད་པ་མ་ལུས་རྫོགས་པའོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སྐུ་གསུམ་དགོངས་པ་ལག་ལེན་དུ་བསྟན་པའི་ལེའུ་སྟེ་བཅོ་བརྒྱད་པའོ། །྅྅྅ དེ་ནས་ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱཻ་ཡུམ་ཆེན་ཀུན་བཟང་མོ། །ཁམས་གསུམ་འཁོར་བའི་སེམས་ཅན་ལ། །གྲོལ་བའི་དུས་མཐའ་ནམ་ཙམ་ལགས། །ཞེས་ཞུས་པ་དང་། སྟོན་པས་འདི་སྐད་ཅེས་བཀའ་སྩལ་པ། ཉོན་ཅིག་མཁའ་འགྲོ་སྡེ་ལྔའི་འཁོར། །སེམས་ཅན་ཐ་མའི་གྲོལ་མཐའ་ཡང་། །རྣམ་པ་གཉིས་ཀྱིས་གཏན་ལ་དབབ། །རྟོགས་པ་དང་ནི་མ་རྟོགས་པའོ། །མ་རྟོགས་འཁོར་བར་གྲོལ་ལུགས་ནི། །རང་སྣང་རང་ངོ་མ་ཤེས་པས། །ཉོན་མོངས་ཞེ་སྡང་ཤས་ཆེ་བས། །དམྱལ་བ་ངུ་འབོད་སྡུག་བསྔལ་དང་། །འདོད་ཆགས་ཆེན་པོས་མནར་བ་ཡིས། །ཡི་དྭགས་བཀྲེས་སྐོམ་སྡུག་བསྔལ་དང་། །ཉོན་མོངས་གཏི་མུག་ཤས་ཆེ་བས། །མུག་ཤིང་མྱོས་པའི་བྱོལ་སོང་དང་། །ཉོན་མོངས་ཕྲག་དོག་ཤས་ཆེ་བས། །འཐབ་རྩོད་ལྷ་མིན་སྡུག་བསྔལ་དང་། །ཉོན་མོངས་ཐམས་ཅད་ཆ་མཉམ་པས། །མི་ཞེས་བརྒྱད་འགྱུར་སྡུག་བསྔལ་དང་། །ཉོན་མོངས་ང་རྒྱལ་ཤས་ཆེ་བས། །ལྷ་ཞེས་དགའ་ལྡན་སྡུག་བསྔལ་དང་། །སྐྱེ་བཞིའི་གནས་ལས་འགྲོ་ས་མེད། །ལོག་པར་འགྲོ་བའི་གནས་ཞེས་བྱ། །རྒྱུད་ཆེན་འདི་དང་འཕྲད་ཙམ་ན། །བདེན་པ་མཐོང་བའི་གང་ཟག་དེ། །རྟོགས་པ་རྒྱུད་ལ་མ་སྐྱེས་ཀྱང་། །ཕྱོགས་བཅུ་སྤྲུལ་པའི་ཞིང་ཁམས་སུ། །གནས་ཅིང་མཐར་ཕྱིན་གྲོལ་བར་འགྱུར། །དབང་པོ་རབ་འབྲིང་ཐ་གསུམ་ལ། །གྲོལ་ལུགས་བདུན་བདུན་བྱུང་བ་དེ། །དབང་པོ་འབྲིང་གི་རྩེ་མོ་ནི། འོད་ལྔའི་དབྱིངས་སུ་གྲོལ་བར་འགྱུར། །འབྲིང་གི་ཕུལ་དུ་གྱུར་བ་ནི། །སྐུ་ལྔའི་དབྱིངས་སུ་གྲོལ་བར་འགྱུར། །འབྲིང་གི་མཆོག་གི་ཚོམ་བུ་འོ། །སྣང་བ་ཤར་མ་ཐག་ལས་གྲོལ། །འབྲིང་གི་རབ་ནི་དཀར་གསལ་གྱིས། །མེ་ལོང་ཡེ་ཤེས་ཤར་དུས་གྲོལ། འབྲིང་གི་འབྲིང་ནི་མུ་ཁྱུད་ཀྱིས། །ར་བ་ཤར་མ་ཐག་ཏུ་གྲོལ། །འབྲིང་གི་ཐ་མ་འོད་སྣང་དང་། །མེ་ཏོག་ཚོམ་བུ་ཤར་དུས་གྲོལ། །འབྲིང་གི་མཐར་ཕྱིན་མུ་ཁྱུད་ཀྱང་། །སྟོང་གཟུགས་རི་མོ་ཤར་དུས་གྲོལ། །དེ་ནི་འབྲིང་གི་གྲོལ་ལུགས་ཡིན། །གང་ཟག་ཐ་མའི་མཐར་ཕྱིན་ལ། །ལམ་བྱང་དཀར་པོ་ཤར་དུས་གྲོལ། །ཐ་མའི་རྩེ་མོ་འོད་སྣང་ལ། །ལམ་བྱང་སེར་པོ་ཤར་དུས་གྲོལ། །ཐ་མའི་ཡུལ་ནི་འོད་སྣང་ལ། །ཁ་དོག་དམར་ལམ་སྟེང་དུ་གྲོལ། །ཐ་མའི་མཆོག་ནི་ཚོམ་བུའི་སྟེང་། །ཁ་དོག་ལྗང་གསལ་སྟེང་དུ་གྲོལ། །ཐ་མའི་རབ་ཉིད་འོད་ཟེར་སྟེ། །མཐིང་ལམ་རྐྱང་པའི་སྟེང་དུ་གྲོལ། །ཐ་མའི་འབྲིང་ནི་ལམ་བྱང་ལྔ། །ཐིག་ལེ་བརྒྱད་པའི་སྟེང་དུ་གྲོལ། ཐ་མའི་ཐ་མ་བདག་ཉིད་ནི། །ཐིག་ལེ་སྐུའི་སྟེང་དུ་གྲོལ། །དེ་ནི་ཐ་མའི་གྲོལ་ལུགས་སོ། །གང་ཟག་དབང་པོ་རབ་མཐར་ཕྱིན། སྐད་ཅིག་གསུམ་པར་ངེས་ཅན་གྲོལ། རབ་ཀྱི་རྩེ་མོ་མེ་ལོང་དང་། །ཚོམ་བུའི་སྟེང་དུ་གྲོལ་བར་འགྱུར། །རབ་ཀྱི་ཕུལ་ནི་ཡབ་ཡུམ་གྱི། །འཁྲིལ་སྦྱོར་ཤར་མ་ཐག་ལ་གྲོལ། །རབ་ཀྱི་མཆོག་ནི་སྣང་བ་འདི། །འཇའ་འོད་མེར་མེར་སྣང་དུས་གྲོལ། །རབ་ཀྱི་འབྲིང་ནི་རང་སྣང་ལ། །བདེན་པ་སྐད་ཅིག་སྐྱེས་པས་གྲོལ། །རབ་ཀྱི་ཐ་མ་འོད་ཟེར་ལ། །ཐིག་ལེ་ཡབ་ཡུམ་འབྲེལ་དུས་གྲོལ། །རབ་ཀྱི་མཆོག་ནི་ཤར་ལུགས་བརྒྱད། །སྐད་ཅིག་གཅིག་ལ་ཤར་དུས་གྲོལ། །དེ་རྣམས་རབ་ཀྱི་གྲོལ་ལུགས་ཡིན། །དེ་རྣམས་རྟོགས་དང་མ་རྟོགས་པ། །ངོ་སྤྲོད་ཐོབ་མ་ཐོབ་ཡིན་ཏེ། །རྟོགས་ཐོབ་ངོ་སྤྲོད་ཉེར་གཅིག་ཡིན། །ངོ་སྤྲོད་ཐོབ་ན་རྟོགས་པར་འགྱུར། །མ་བསྟན་གྲོལ་མཐའ་ག་ལ་ཡོད། །སངས་རྒྱས་ཀུན་གྱི་དགོངས་པ་ཡིན། །ངོ་སྤྲོད་ནང་དུ་ཤེས་པར་གྱིས། །ངོ་སྤྲོད་དཔེ་དོན་འཕྲོད་པ་ནི། །རང་རིག་བདེན་པ་མཐོང་བ་ཡིན། །རིག་པའི་བདེན་པ་འདི་ལྟ་སྟེ། །འོད་སྣང་མཐོང་དུས་མཁྱེན་སྣང་གཟུགས། །དག་པའི་སྣང་བ་རང་གྲོལ་འགྱུར། །རྣམ་དག་ཀློང་དུ་ཆོས་ཟད་ནས། །ཀུན་བཟང་བྷ་གར་འུབ་ཆུབ་སྟེ། །རྫོགས་ལྡན་ཡོད་ཏན་འོད་ཟེར་འཕྲོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་ཅན་གྱི་གྲོལ་མཐའ་བསྟན་པའི་ལེའུ་སྟེ་བཅུ་དགུ་པའོ། །྅྅྅ ཡང་མཁའ་འགྲོ་མ་རྣམས་ཀྱི་གསོལ་པ། །ཨེ་མ་ཡུམ་ཆེན་ཀུན་བཟང་ལགས། །འཁོར་འདས་མ་གྲུབ་སྔོན་རོལ་ན། །སྤྱི་གཞི་ཆེན་པོ་ཇི་ལྟར་གནས། །བདག་ཅག་རྣམས་ལ་གསུང་དུ་གསོལ། །ཞེས་ཞུས་པ་དང་། སྟོན་པས་ལན་དུ་བཀའ་སྩལ་པ་ནི། ཀྱེ་ཧོ་རིག་གདངས་འཁོར་རྣམས་ཉོན། །ཐོག་མ་འཁོར་འདས་མ་གྲུབ་གོང་། །རིག་པ་སྟོང་གསལ་མ་འགག་པ། །ངོ་བོ་སྟོང་པ་ནམ་མཁའ་འདྲ། །རང་བཞིན་གསལ་བ་འཇའ་ཚོན་འདྲ། །ཐུགས་རྗེ་འགགས་མེད་ནོར་བུ་འདྲ། །དཔེར་ན་མན་ཤེལ་མདངས་དང་མཚུངས། །སུས་ཀྱང་བྱས་པ་མ་ཡིན་ཏེ། །ལྷུན་གྲུབ་གདོད་མའི་སྤྱི་གཞི་ཟེར། །ངོ་བོ་སྟོང་ཕྱོགས་ངོས་དག་ནས། །འཁོར་དང་འདས་པའི་ཆོས་རྣམས་མེད། །རང་བཞིན་གསལ་བའི་ཆ་ཙམ་ལ། །སྐུ་དང་ཡེ་ཤེས་ཞིང་ཁམས་གསལ། །ཐུགས་རྗེ་ཉིད་ཀྱི་ངོས་ཕྱོགས་ན། །འཁོར་འདས་སྣང་སྟོང་གཉིས་སུ་མེད། །ཆོས་ཅན་ཆོས་ཉིད་གཉིས་སུ་མེད། །འཇའ་འོད་ནམ་མཁའ་དབྱེར་མེད་ལྟར། །མཁའ་དང་གསང་བ་དབྱེར་མེད་དོ། །གཤིས་ལུགས་ཀུན་ཁྱབ་བྷ་ག་ཡངས། །ཆོས་ཉིད་ལྷུན་གྲུབ་ཞེས་སུ་བཤད། །གདངས་ལ་སྣང་ཆ་མ་འགགས་ཤར། །ཆོས་ཅན་ལྷུན་གྲུབ་ཞེས་སུ་བཤད། །གཉིས་ཆོས་འཛིན་ཆ་རང་སར་གྲོལ། །གཉིས་མེད་ལྷུན་གྲུབ་མཐའ་གྲོལ་ཡིན། །སུས་ཀྱང་བྱས་པ་མ་ཡིན་ཏེ། །སྲ་བ་བརྟན་པ་མཐར་ཐུག་པ། །བདེར་གཤེགས་སའི་སྙིང་པོ་ཡིན། །འཁོར་འདས་ཆོས་རྣམས་ཐམས་ཅད་ལ། །ལྷུན་གྲུབ་མ་ཡིན་གཞན་མེད་པས། །བཟང་ངན་འཕོ་འགྱུར་མེད་པའོ། །འགག་མེད་རྩལ་དུ་ཤར་བའོ། །བདེན་པ་རང་རྒྱུད་ག་ལ་ཡོད། །མཐའ་བྲལ་ལྷུན་གྲུབ་ཕྱོགས་ལྷུང་བྲལ། །ཀ་ནི་སྔ་ཕྱིའི་ཐོག་མཐའ་ལ། །དག་པ་མིང་ལས་འདས་པ་སྟེ། །སྣང་མཐའ་སྟོང་མཐའ་བྲལ་བས་ན། །ཅིར་ཡང་ཁས་ལེན་བྲལ་བ་ཡིན། །འཁོར་འདས་ཆོས་ཀུན་ཡོངས་རྫོགས་པས། །མ་སྤང་རོལ་པ་ཆེན་པོའོ། །བློའི་ཆོས་ཀྱང་རང་བཞིན་མེད། །ཡེ་ཤེས་རིག་པའི་དྲི་མ་བྲལ། །ཡོད་སངས་མེད་པས་རྒྱས་པ་མིན། །ཕྱིའི་སྣང་རྒྱ་མ་རལ་ཏེ། །ནང་གི་འོད་ལྔ་མ་འགགས་པས། །བེམ་པོས་རིག་པ་གཡོགས་པ་མིན། །རིག་པ་བེམ་པོར་ཚུད་པ་མིན། །རྩལ་ཤུགས་ཡོད་སྟེ་རྩལ་མ་རྫོགས། །ས་བོན་ཡོད་སྟེ་ལོ་འདབ་མེད། །གཞོན་ནུ་བུམ་པའི་སྐུ་རུ་བཞུགས། །དེ་ལ་དབང་པོའི་ཁྱད་པར་གྱིས། །འདོད་ལུགས་མི་གཅིག་དུ་མ་སྣང་། །གཞི་ནི་ལྷུན་གྲུབ་འདོད་པ་དང་། །མ་ངེས་པ་རུ་འདོད་པ་དང་། །སྲ་བརྟན་ངེས་ཅན་གཞི་མ་དང་། །ཅིར་ཡང་བསྒྱུར་དུ་བཏུབ་པ་དང་། །ཅིར་ཡང་ཁས་ལེན་བྲལ་བ་དང་། །ཅིར་ཡང་ཁས་མི་ལེན་པ་དང་། །གཞི་ནི་སྟོང་གསལ་འདོད་པ་སོགས། །དབང་པོ་རེ་ལ་འདོད་སྣ་རེ། །བློ་སྣ་རེ་ལ་ཐེག་པ་རེ། །ཐེག་པ་རེ་ལ་གྲུབ་མཐའ་རེ། །དཔེ་ན་སྤོས་ཀྱི་གླང་པོ་ཉིད། །མུན་ལོང་དག་གིས་མཐོང་བ་འདྲ། །སྐྱེས་པ་འམ་ནི་བུད་མེད་ཅིག །ཉེ་འབྲེལ་རང་རང་བསྙན་མིང་རེ། །ལ་ཁའི་སྐྱེར་ཕུང་གཅིག་ཉིད་ལ། །མཐོང་སྣང་དགུ་རུ་སྣང་བའམ། །འབྱུང་བ་ཆུ་ཉིད་གཅིག་པུ་ལ། །རིགས་དྲུག་སྣང་བས་མཐོང་ཚུལ་རེ། །དུ་མར་སྣང་བ་རི་བྲན་འདྲ། །ལྷུན་པོའི་རྩེ་ལ་བལྟས་གྱུར་ན། །གླིང་བཞི་གླིང་ཕྲན་གསལ་བའོ། །མིག་ལྡན་དག་གིས་བལྟས་ཙམ་ན། །གླང་པོ་རྫོགས་པ་མཐོང་བ་ལྟར། །ལྟ་བའིི་རྒྱལ་པོ་འདི་ཉིད་ཀྱིས། །ཡིན་ལུགས་ཀུན་གཞིར་བསྟན་པའོ། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཐོག་མའི་ཀུན་གཞི་བསྟན་པའི་ལེའུ་སྟེ་ཉི་ཤུ་ཐམ་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱེ་མ་ཡུམ་ཆེན་ཀུན་ཏུ་བཟང་། །མ་དག་འཁྲུལ་སྣང་གང་ལས་བྱུང་། །སེམས་ཅན་འཁྲུལ་གཞི་བསྟན་དུ་གསོལ། །ཞེས་གསོལ་པ་དང་། ཡང་སྟོན་པས་བཀའ་སྩལ་པ། ཉོན་ཅིག་ཡུམ་ཆེན་མཁའ་འགྲོ་རྣམས། །གཞི་དང་གཞི་ཤེས་རྩལ་ཉིད་ལ། །མ་དག་འཁྲུལ་པའི་གཞི་མ་ནི། །གདོད་མའི་ཀུན་གཞི་བུམ་སྐུ་ལ། །ཡེ་ཤེས་དག་གིས་རང་རླུང་གིས། །གཡོ་འམ་དེ་ནི་མི་གཡོ་ན། །བྱ་ཕོད་རྐྱེན་མེད་འགུལ་ཙམ་གནས། །རིག་པ་རང་རླུང་སྟོང་པ་ལ། །རིག་གདངས་མཁའ་ལ་སྒོ་ཕྱེ་བས། །རིག་རྩལ་ཐུགས་རྗེ་ལམ་གྱི་ཤར། །ལྷུན་གྲུབ་འོད་དུ་མེར་མེར་གསལ། །དཔེར་ན་མུན་ནག་རྒྱ་སྐར་ལ། །ཤེལ་དཀར་ཉི་ཞུར་ཕོག་པ་ལྟར། །ཡུལ་ལ་རང་མདངས་ཕྱམ་མེ་ཤར། །ལྷུན་གྲུབ་སྣང་བ་དེ་རྣམས་ལ། །བདག་དང་གཞན་གྱི་རྟོགས་པ་དང་། །ནང་དང་ཕྱིའི་སྣང་བ་ཤར། །སྣང་བ་སེམས་ཀྱི་བརྟག་དཔྱད་པས། །ཕྲ་རགས་སྦོོམ་གསུམ་ཡིད་དུ་འགྱུ། །རྒྱུ་རྐྱེན་བདག་རྐྱེན་དམིགས་པའི་རྐྱེན། །དེ་མ་ཐག་བཞིས་མཚམས་སྦྱར་ནས། །ངོ་བོ་གཅིག་ལ་རྣམ་པ་གཉིས། །ག་པུར་རྐྱེན་གྱིས་བསྒྱུར་བ་ལྟར། །ཡིད་དྲུག་གིས་ནི་ཉིང་མཚམས་སྦྱར། །ཀུན་ཏུ་ཚོལ་བར་བྱེད་པའི་ཡིད། །གཏན་ལ་དབབ་པར་བྱེད་པའི་ཡིད། །ངེས་པར་འཇོག་པར་བྱེད་པའི་ཡིད། །འགྱུ་བྱེད་ཐམས་ཅད་འཛིན་པའི་ཡིད། །སྣ་ཚོགས་སྡུད་པར་བྱེད་པའི་ཡིད། །ཉོན་མོངས་སེར་སྣ་ཅན་གྱི་ཡིད། །དྲུག་པོ་རང་རང་བྱེད་ལས་དཔྱད། །དོན་ལ་ཐུགས་རྗེ་རྩལ་ཤར་ཡིན། །འོད་ལྔ་རང་མདངས་མ་རིག་པས། །ཡེ་ཤེས་ལྔ་ལ་ཁ་དོག་འཐས། །དེ་ལ་ཐིག་ལེའི་རྣམ་པ་ལ། །དེ་ཉིད་ཨ་འཐས་གཟུགས་དབྱིབས་འགྱུར། །དེ་ལས་ཨ་འཐས་འབྱུང་ལྔ་འགྱུར། །མཁྲིས་ནད་ཅན་གྱི་དུང་སེར་རམ། །ལིང་ཐོག་ཅན་གྱི་གང་མཐོང་མཚུངས། །ང་དང་བདག་ཏུ་ཐེར་ཟུག་པ། །མཁའ་ལ་རླུང་བརྟེན་དེ་ལ་ཆུ། །དེ་ལས་གསེར་རི་བང་རིམ་བཅས། །ཅོག་དང་གླིང་ཕྲན་འཁོར་ཡུག་བཅས། །ཉི་ཟླ་གཟའ་སྐར་སྟོང་གསུམ་མཆོག །འདོད་ཆགས་ཤ་གཟུགས་ཡིད་གཟུགས་སོགས། །དུ་མས་བདག་ཉིད་དུག་ལྔ་བྱས། །ཐུགས་རྗེ་འགགས་མེད་བཅུད་དུ་འཁྲུལ། །རྣམ་རྟོག་ཕྲ་རག་སྦོམ་གསུམ་ལ། །འདོད་དང་གཟུགས་དང་གཟུགས་མེད་ཀྱིས། །ཁམས་གསུམ་པོ་ནི་དེ་ལས་བརྟེན། །ཡོད་མིན་ཅི་ཡང་མེད་པ་དང་། །རྣམ་ཤེས་ཅུང་ཟད་མེད་པའི། །གཟུགས་མེད་རྣམས་ནི་དེ་ལས་སྐྱེས། །གནས་གཙང་ལ་སོགས་ལུས་ཅན་ནི། །གོང་ནས་གོང་དུ་འཐིབ་པའི་ཚུལ། །དེ་ལ་ང་བདག་འཛིན་པའི་ས། །སྐྱེ་བ་རྣམ་པ་བཞི་རུ་འགྱུར། །བལྟས་དང་དགོད་དང་ལག་བཅང་དང་། །དབང་པོས་སྒོ་སྦྱར་འདོད་ཆགས་བཞིས། །ཕོ་མོ་སྒོ་འདོད་ཉི་ཟླ་འབྱུང་། །ཡིད་དྲུག་སྒོ་དྲུག་ཞུགས་པ་ལས། །ཨ་ཏྲི་ནྲྀ་སུ་པྲེ་དུ་སོགས། །ཡི་གེ་དྲུག་ཏུ་ཨ་འཐས་པས། །ཚོགས་དྲུག་ཡུལ་དྲུག་སྣང་བར་འགྱུར། །དེ་ལ་དགག་སྒྲུབ་སྤང་བླང་གིས། །ཚོགས་དྲུག་ངོ་བོ་བྱུང་ཚོར་མྱོང་། །དེ་ཡང་བཟང་ངན་ལུང་མ་བསྟན། །གསུམ་གྱིས་བསྡུས་ནས་སྨིན་པ་ལ། །སངས་རྒྱས་ཞིང་སྲིད་སེམས་ཅན་གནས། །འཕགས་པའི་ས་ལམ་སྲིད་པ་སྟེ། །སྲིད་པ་གསུམ་གྱི་རབ་བསྡུས་ནས། །རྒྱུན་ཆགས་འཁོར་བ་ཉིད་དུ་འཁོར། །ཡིན་མིན་རེ་དོགས་ཕྱི་ནང་ལ། །རང་མཚང་མ་རིག་བརྟག་པས་འཁྲུལ། །རྐྱེན་བཞི་རང་རྩལ་མ་ཤེས་པས། །ཡིད་རྟོག་གློ་བུར་རང་རྩལ་རྣམས། །བཀག་ཀྱང་མི་ཁོག་འོལ་འོལ་ཤར། །ཉོན་མོངས་སྡུག་བསྔལ་སྤྲིན་ཆེན་འཐིབ། །རྣམ་རྟོག་རེ་དོགས་སེར་ཆེན་འབེབས། །རང་སྣང་རང་གི་དགྲར་ལང་བས། །དར་གྱི་བུའི་ཁ་ཆུ་ལྟར། །ཀུན་གཞི་ཁྱིམ་འདྲའི་རྣམ་ཤེས་སྟོང་། །དགེ་སྡིག་བག་ཆགས་ཟས་ནོར་བསགས། །བདག་འཛིན་ཡིད་ཀྱི་ཆུང་མ་ལ། །དགག་བསྒྲུབ་འདོད་པའི་བུ་ཚ་སྐྱེས། །འདུ་བྱེད་གཞིའི་གཡོག་བྱས་ནས། །སེམས་བྱུང་རླུང་ཁྱོ་དང་འདྲ་བས། །ང་མེད་ཀུན་ལ་ང་རུ་འཛིན། །ལུས་ཀྱི་རྣམ་ཤེས་མནའ་མ་འདྲ། །དེའི་ཚོགས་དྲུག་འཁོར་དུ་ཚུད། །སྐྱེ་གནས་འཆི་ཁ་ཆོས་ཉིད་དང་། །སྲིད་པ་བར་དོ་བཞི་རུ་བསྐོར། །ཐོག་མ་ཐ་མ་བར་མེད་པར། །སྲིད་གསུམ་རིགས་དྲུག་ཀློང་དུ་འཁྱམས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། འཁྲུལ་གཞི་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱེ་མ་ཡུམ་ཆེན་ཀུན་བཟང་མོ། །ཁམས་གསུམ་སེམས་ཅན་དེ་ལྟར་ན། །ཡུམ་ཆེན་ཁྱེད་ཉིད་ཇི་ལྟར་གྲོལ། །བདག་ཅག་རྣམས་ལ་བཤད་དུ་གསོལ། །ཞེས་པ་དང་། ཡང་སྟོན་པས་བཀའ་སྩལ་པ། ཉོན་ཅིག་རིག་མདངས་འཁོར་གྱི་ཚོགས། །གདོད་མའི་གནས་ལུགས་སྐུ་གསུམ་ཏེ། །ནོར་བུ་འོད་འབར་ཇི་བཞིན་མཚུངས། །དེ་ཡང་ལྷུན་གྲུབ་རང་སྣང་སྟེ། ཕྱི་ནང་རྒྱ་རུ་རལ་བའི་ཚེ། །རང་མདངས་རང་སྣང་ཤེས་པ་ལ། །རང་སྣང་རང་གྲོལ་རང་སངས་རྒྱས། །བསགས་སྦྱངས་དགེ་བ་བསགས་པ་མིན། །ངོ་བོ་སྟོང་པ་ཀ་དག་ནི། །ཆོས་སྐུ་བཅུ་དྲུག་བརྩེགས་པའི་ཚུལ། །མི་དམིགས་སྟོང་པའི་ཆོས་སྐུ་དང་། །གཡོ་མེད་གཞིའི་ཆོས་སྐུ་དང་། །རྣམ་པ་ཀུན་གསལ་ཆོས་སྐུ་དང་། །ཐུགས་རྗེ་འོད་ཟེར་ཆོས་སྐུ་དང་། །མི་འགྱུར་དབྱིངས་ཀྱི་ཆོས་སྐུ་དང་། །སྣང་བ་བརྡལ་བའི་ཆོས་སྐུ་དང་། །རང་བཞིན་བབ་ཀྱི་ཆོས་སྐུ་དང་། །རྐྱེན་བཅོས་དུམ་བུའི་ཆོས་སྐུ་དང་། །འཇའ་འོད་གསལ་བའི་ཆོས་སྐུ་དང་། །མ་འགག་འཕྲོ་བའི་ཆོས་སྐུ་དང་། །ཡུལ་རྣམས་སྡུད་པའི་ཆོས་སྐུ་དང་། །སྟོང་གསལ་ཆེན་པོའི་ཆོས་སྐུ་དང་། །བདག་མེད་འཆད་པའི་ཆོས་སྐུ་དང་། །བཟང་ངན་མེད་པའི་ཆོས་སྐུ་དང་། །རྣམ་རྟོག་ཟད་པའི་ཆོས་སྐུ་དང་། །གཞི་སྣང་འུབ་ཆུབ་ཆོས་སྐུ་དེ། །དེ་ཡང་ཇི་ལྟ་ཇི་སྙེད་མཁྱེན། །དག་པ་གཉིས་ལྡན་ཚུལ་དུ་བཞུགས། །རང་བཞིན་གསལ་བའི་ལྷུན་གྲུབ་ནི། །ལྔ་ཚན་སུམ་ཅུ་སོ་དྲུག་ཚུལ། །གཞི་ལྔ་ལམ་ལྔ་འབྲས་བུ་ལྔ། རིགས་ལྔ་ཡེ་ཤེས་ཉི་ཤུ་ལྔ། །སྟོང་པ་ལྔ་དང་ཡབ་ཡུམ་བཅུ། །ཕུང་པོ་ལྔ་དང་ཁམས་ལྔ་དང་། །འབྱུང་བ་ལྔ་དང་འོད་ལྔ་དང་། །ཕོ་ཡིག་ལྔ་དང་མོ་ཡིག་ལྔ། །ཡབ་ཡིག་ལྔ་དང་ཡུམ་ཡིག་ལྔ། །ཕྱོགས་ལྔ་དབང་པོ་ལྔ་དག་དང་། །ཡུལ་ལྔ་འོད་ལྔ་ཤེས་རབ་ལྔ། །རླུང་ལྔ་མཁའ་འགྲོ་སྡེ་ལྔ་དང་། ས་ལྔ་མེ་ལྔ་ཆུ་ལྔ་དང་། །ནམ་མཁའ་ལྔ་ལ་སོགས་པ་རྣམས། །དབྱེར་མེད་ཐིག་ལེ་གཅིག་ཏུ་བཞུགས། །དེ་ཡང་སྐྱེ་ཡོད་འཆི་བ་མེད། །ངེས་པ་ལྔ་ལྡན་ཚུལ་དུའོ། །ཐུགས་རྗེ་འགགས་མེད་རོལ་པ་ནི། །གཉིས་ཆོས་མ་ཟད་ཅི་སྲིད་བར། །གྲངས་བརྗོད་པ་ནི་མུ་མཐའ་ཡས། །གནས་དང་དུས་དང་ཆ་ལུགས་དང་། །འཁོར་དང་བསྟན་པ་མ་ངེས་པས། །ཆོས་སྐུ་ཀློང་ལ་གཡོ་མེད་འཕྲོ། །ལོངས་སྐུའི་ངོས་ནས་འགག་མེད་འཕྲོ། །སྤྲུལ་སྐུའི་ངོས་ནས་འཛིན་མེད་འཕྲོས། །དེ་རྣམས་ཐམས་ཅད་སྐུ་བཞི་སྟེ། །ཡེ་གྲོལ་བདལ་བའི་སྐུ་དང་གཅིག །རང་གྲོལ་གནད་ཀྱི་སྐུ་དང་གཉིས། །བསྐྱར་གྲོལ་བྱ་རྫོགས་སྐུ་དང་གསུམ། །འབད་གྲོལ་རྩོལ་བའི་སྐུ་བཞིའོ། །དེ་རྣམས་གཞོན་ནུ་བུམ་པའི་སྐུ། །ཀུན་བཟང་ངའི་བྷ་གར་འདུས། །དེ་ལྟར་རང་སྣང་རང་གྲོལ་ལ། །མི་འགགས་མི་འཛིན་ས་ལེ་བ། །བཅོས་བསྒྱུར་བྲལ་བའི་རིག་པ་ལ། །ཀ་དག་ཀུན་བཟང་བྷ་ག་ཟེར། །དེའི་གནས་ཚུལ་ཤེས་པ་ལ། །ཡེ་སངས་རྒྱས་པའི་སངས་རྒྱས་ཟེར། །དེའི་མཚན་ཉིད་རྟོགས་པ་ལ། །རང་སངས་རྒྱས་པའི་སྟོན་པ་ཟེར། །དེའི་རང་བཞིན་ཤེས་པ་ལ། །རྟོགས་པ་མངོན་འགྱུར་སངས་རྒྱས་ཟེར། །འཁོར་འདས་བྷ་ག་དེ་ལ་རྫོགས། །ཀུན་རྫོགས་ཐེར་གཟུགས་སངས་རྒྱས་ཟེར། །ངོ་བོ་སྟོང་པ་དངོས་སངས་པས། །ཆོས་སྐུ་དྲི་བྲལ་ཤེས་ལུགས་ཟེར། །འོད་མདངས་ཚོམ་བུ་རང་གྲོལ་བས། །རྫོགས་སྐུ་སྒྲོན་བཞིའི་སངས་རྒྱས་ཟེར། །རོལ་རྩ་མ་ཆགས་ཞན་སྤྱོད་པས། །སྤྲུལ་སྐུ་གཞན་དོན་སངས་རྒྱས་ཟེར། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། གྲོལ་གཞི་བསྟན་པའི་ལེའུ་སྟེ་ཉེར་གཉིས་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱེ་མ་ཡུམ་ཆེན་ཀུན་ཏུ་བཟང་། །དེ་ལྟར་བདེ་གཤེགས་སྙིང་པོ་དེས། །སེམས་ཅན་ཀུན་ལ་ཁྱབ་ལགས་སམ། །ཞེས་ཞུས་པས། སྟོན་པས་བཀའ་སྩལ་པ། ཉོན་ཅིག་ཡུམ་ཆེན་མཁའ་འགྲོ་རྣམས། །བདེར་གཤེགས་སྙིང་པོ་སྟོང་གསལ་མདངས། །སེམས་ཅན་ཀུན་གྱི་རང་རྒྱུད་ལ། །ཏིལ་ལ་མར་གྱི་ཁྱབ་ལྟར་གནས། །ཕྱིའི་ནམ་མཁའ་གང་ཁྱབ་པ། །རིག་པ་དྲི་མེད་སྙིང་པོ་ཁྱབ། །འོ་མ་མར་གྱི་རྒྱུ་ཡིན་ཀྱང་། །མ་བསྲུབ་པ་རུ་དོན་མི་ནུས། །མེ་ལྕགས་མེའི་རྒྱུ་ཡིན་ཀྱང་། །རྟེན་འབྲེལ་མ་འཛོམ་བསྲེགས་མི་ནུས། །བུ་ཆུང་མིའི་རྒྱུ་ཡིན་ཀྱང་། །མ་གསོས་པ་རུ་དོན་མི་ནུས། །ཁྱབ་ནི་འཁོར་འདས་ཀུན་ལ་ཁྱབ། །གནས་ནི་ལྷུན་གྲུབ་ནང་དུ་གནས། །ཉི་མ་དག་དང་འོད་ཟེར་རམ། །ཆུ་དང་རླན་པ་ཇི་བཞིན་དུ། །ཡེ་ནས་ཐམས་ཅད་ལྷུན་གྱིས་གྲུབ། །རྒྱུ་ནི་སེམས་ཅན་ཡིན་པ་ལ། །ལམ་ལ་བསགས་སྦྱངས་བྱས་པའི། །འབྲས་བུ་སངས་རྒྱས་ཐོབ་པ་ཀུན། །བློ་དམན་དྲངས་ཕྱིར་བསྟན་པ་ཙམ། །ཡང་དག་དོན་ལ་གཉིས་ཆོས་འདས། །གང་ཡང་ཡིན་པ་སུས་རྟོགས་པས། ཀུན་འབྱུང་འཛིན་མེད་ཆེན་པོར་སྤྱོད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བདེ་གཤེགས་སྙིང་པོ་འགྲོ་བ་ཀུན་ལ་ཁྱབ་ཚུལ་བསྟན་པའི་ལེའུ་སྟེ་ཉེར་གསུམ་པའོ། །྅྅྅ དེ་ནས་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱཻ་ཡུམ་ཆེན་ཀུན་བཟང་ཉིད། །དེ་ལྟར་བདེ་གཤེགས་སྙིང་པོ་དེ། །ཁྱད་པར་གང་ལགས་བསྟན་དུ་གསོལ། །ཞེས་ཞུས་པ་དང་། ཡང་སྟོན་པས་བཀའ་སྩལ་པ། ཉོན་ཅིག་ཡུམ་ཆེན་མཁའ་འགྲོ་རྣམས། །རིག་པ་ཡེ་ཤེས་ནམ་མཁའ་འདྲ། །ནམ་མཁའ་བུམ་པས་བཅད་པ་ལྟར། །ཤ་གཟུགས་རྣམས་ལ་འདི་ལྟར་གནས། །འབྱུང་ལྔ་ཁམས་ལྔ་འདུས་པའི་དབུས། །ཙིཏྟ་མཆོང་གུར་སྨུག་པོའི་དབུས། །ཤེལ་གྱི་ཁ་བད་ཅན་ལ་གནས། །གསལ་ལ་དབང་པོའི་སྒོ་ལ་འདོན། །ཁྱབ་ནི་སྣང་སྲིད་ཀུན་ལ་ཁྱབ། །ཕྱི་རོལ་རྐྱེན་ལ་མཆེད་པར་སྣང་། །དོན་ལ་ཡིན་པ་ངེས་ཤེས་ཙམ། །བསྟན་དུ་མཚོན་བྱའི་ཐབས་རྣམས་ཟད། །སྒྲོན་བཞི་དུས་གཅིག་འཛོམ་པའི་ཚེ། །མཐོང་རྒྱུ་མེད་པའི་མཐོང་བ་དང་། །མྱོང་རྒྱུ་མེད་པར་མྱོང་བར་འགྱུར། །བརྡའ་སྦྱོར་བླ་མ་ངག་ལ་གསལ། །ཤེས་སུ་ཤེས་བྱའི་མཐའ་རྣམས་བྲལ། །ངོ་བོ་སྐུ་སྟེ་ཞལ་ཕྱག་ཚུལ། །རྣམ་པ་ཞི་ཁྲོ་མཁའ་འགྲོ་མ། །གང་ལྟར་དག་པ་དེ་ལྟར་ལས། །ངེས་པར་རྣམ་པར་གྲུབ་པ་ཎ། །གྲངས་ནི་འདུ་ཤེས་མ་ཟད་བར། །བརྗོད་པས་ལ་ཡང་ག་ལ་སྲིད། །ཐབས་ཤེས་ཡབ་ཡུམ་རྣམ་པ་ལ། །མདུན་རྒྱབ་མ་སྒྲིབ་ཟང་ཐལ་ལེ། །མངོན་ལྐོག་མེད་པར་རྗེན་ཧྲིག་གེ། །ཇི་ལྟ་ཇི་སྙེད་མཁྱེན་བརྩེ་ཡིས། །ཐུགས་རྗེའི་སྤྱན་ནི་ཁྲ་ཁྱུག་གེ །ཆེ་ཆུང་དཔག་པར་དཀའ་བ་སྟེ། །ཉུང་འབྲུ་སྟོང་གསུམ་དུས་གཅིག་འ ཁེང་། །སྟོང་གསུམ་ཉུང་འབྲུར་སྐད་ཅིག་འཛུད། །ཁ་དོག་ཕུག་རོན་འགུལ་བ་འམ། །སེང་གེའི་དཔྲལ་བ་འདྲ་བ་ཡིན། །ཀུན་ཤར་དབྱེའ་བ་མེད་པར་གསལ། །དེ་མདངས་ཀླད་པ་རྩ་འཁོར་ལྔར། །ཞི་ཁྲོ་རྟ་ཕག་མཁའ་འགྲོ་ཐུབ། །སྣ་ཚོགས་མི་སྲིད་མེད་པར་ཤར། །སྟོང་ཞིང་སྣང་ལ་རང་བཞིན་མེད། །རྟག་ཆད་བྲལ་བའི་དོན་ལྟ་ན། །རྣམ་དག་དབྱིངས་སྒྲོན་ངང་དུ་ལྟོས། །རིན་ཆེན་ཟུར་བརྒྱད་འགྱུ་བྱེད་རྩ། དུང་ཁང་ཀླད་རྒྱ་ལྟ་བྱེད་མིག །གཞལ་ཡས་ཕྱི་ནས་སྒྲོན་བཞི་ཤར། །སྣང་བཞི་ཤེས་ན་སྣང་བཞི་རྫོགས། །བར་དོ་བཞི་པོ་རང་གྲོལ་ནས། །གདིང་བཞི་ལོན་ནས་ཆོས་ཟད་དོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཁྱད་པར་རྟེན་བཞི་དང་། །ཡེ་ཤེས་ཀྱི་ངོ་བོ་བསྟན་པའི་ལེའུ་སྟེ་ཉེར་བཞི་པའོ། །྅྅྅ ཡང་མཁའ་འགྲོ་མ་རྣམས་ཀྱི་འདི་སྐད་ཅེས་གསོལ་ཏོ། །ཨེ་མ་ཡུམ་ཆེན་ཀུན་ཏུ་བཟང་། །རིག་པ་ཡེ་ཤེས་དེ་ཉིད་ནི། །ལམ་ནི་གང་ལ་རྒྱུ་བ་ལགས། །ཞེས་པ་དང་། སྟོན་པས་ལན་དུ་བཀའ་སྩལ་པ། ཉོན་ཅིག་རིག་མདངས་འཁོར་རྣམས་ཉོན། །དེ་ལྟར་གནས་པའི་ཡེ་ཤེས་དེ། །རྒྱུ་ལམ་རྩ་མཆོག་དངས་པ་སྟེ། །སྤྱིར་ནི་ལུས་ཀྱི་ཀ་བ་ལྟར། །རྩ་གསུམ་གཤིབ་ནས་གནས་པ་ལྟར། །འཁོར་ལོ་ལྔ་པོ་ལུས་ཚུགས་འཛིན། །ལུས་ཀྱི་རྩ་རྣམས་དེ་ལ་བསྐྱེད། །ཇི་ལྟར་སྐུ་རྣམས་སྨིན་པར་བྱ། །རྩ་རླུང་ཐིག་ལེ་སྨིན་པ་དང་། འཁོར་ལོ་ཀུན་ཏུ་ཡིག་འབྲུ་སྨིན། །ཕུང་པོ་རྟེན་ཅན་གཟི་མདངས་བསྐྱེད། །དོན་དམ་འོད་ཀྱི་ཐིག་ལེ་ཡིས། །འཁོར་ལོ་ཀུན་གྱི་ཚད་གཡོ་བྱེད། ཀུན་རྫོབ་རྒྱུའི་ཐིག་ལེ་ཡིས། །ལམ་གྱི་འབར་འཛག་བོག་འདོན་ནུས། །རྣལ་འབྱོར་ཐབས་ལྡན་སྦྱོར་ཤེས་ན། །སྐད་ཅིག་བདེན་པས་ས་རུ་བསྒྲོད། །མཁས་པ་བཞི་པོ་གནད་དུ་ཟབ། །རྩ་གསུམ་ནང་ན་ཤེལ་སྦུབ་ཅན། །རྩེག་ཆུང་གཉིས་ན་ཀླད་རྒྱར་ཟུག །བ་མེན་རྭ་འདྲའི་མིག་ནས་འདོན། །ཁྲག་དང་ཆུ་སེར་མ་འགག་པ། །དཀར་གསལ་ནང་ན་ཟང་ཐལ་རྒྱུ། །ལམ་ཆེན་དེ་ནི་ཡེ་ཤེས་ལམ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡེ་ཤེས་ཀྱི་ལམ་བསྟན་པའི་ལེའུ་སྟེ་ཉེར་ལྔ་པའོ། །྅྅྅ ཡང་མཁའ་འགྲོ་མ་རྣམས་ཀྱིས་བསྐུལ་བ། ཀྱེ་མ་ཡུམ་ཆེན་ཀུན་ཏུ་བཟང་། །ལམ་དེའི་སྒོ་དེ་གསུང་དུ་གསོལ། །ཞེས་ཞུས་པ་དང་། སྟོན་པས་ཡང་གསུངས་པ། ཉོན་ཅིག་རང་མདངས་མཁའ་འགྲོ་རྣམས། །རིག་པ་ཡེ་ཤེས་འཆར་སྒོ་ནི། །སྤྱིར་ནི་ལུས་ཀུན་ཐམས་ཅད་ཀྱིས། །རྩའི་སྒོ་ལ་འཆར་མོད་ཀྱི། །ཀུན་ཏུ་ཞལ་དུ་གནས་པ་ནི། །ཁྱད་པར་བུམ་ནང་མར་མེ་ཉིད། །བུ་གའི་སྒོ་ལ་གསལ་བ་ལྟར། །ལྐོག་གྱུར་སྒོ་ནི་སྨིན་མཚམས་ཏེ། །མཚན་སྣང་ལྟ་སྟངས་གཟིར་བས་མཐོང་། །ཞར་འབྱུང་སྒོ་ནི་རྣ་བ་གཉིས། །སྒྲ་རྩེ་དག་ལ་གཟིར་བས་འཆར། །དངས་མ་སྒོ་ནི་མིག་གཉིས་ཏེ། །རྒྱང་ནི་རིང་བ་ཐམས་ཅད་གཟིགས། །ཞགས་པས་བཏབ་བཞིན་འཛིན་པ་ནས། །རྒྱང་ཞག་ཆུའི་སྒྲོན་མ་ཟེར། །དཔེར་ན་མན་ཤེལ་སྒོ་དང་འདྲ། །འཁོར་འདས་སྣང་བ་སྟོན་པའམ། །ཉིན་མཚན་སྣང་བ་སྟོན་པར་བྱེད། །སྣང་དང་སྟོང་པ་འདིའི་བསྲེ། །ཕྱི་ནང་གཉིས་ཀྱིས་མཚམས་སྦྱོར་བྱེད། །གཟུགས་སོགས་ངོ་བོ་གཅིག་ཏུ་སྡུད། །དོན་རྣམས་སྣང་ཞིང་ཤན་ཡང་འབྱེད། །དེ་ཕྱིར་སྒོ་རྣམས་ཤེས་པར་བྱ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡེ་ཤེས་ཀྱི་སྒོ་བསྟན་པའི་ལེའུ་སྟེ་ཉེར་དྲུག་པའོ། །྅྅྅ ཡང་མཁའ་འགྲོ་མ་རྣམས་ཀྱིས་བསྐུལ་བ། ཀྱེ་མ་ཡུམ་ཆེན་ཀུན་ཏུ་བཟང་། །སྒོ་དེ་ཤར་བའི་ཡེ་ཤེས་དེ། །ཡུལ་ནི་གང་ན་སྣང་བ་ལགས། །ཞེས་པ་དང་། ཡང་སྟོན་པས་བཀའ་སྩལ་པ། ཀྱེ་མ་རིག་མདངས་འཁོར་རྣམས་ཉོན། །ཡེ་ཤེས་འཆར་བའི་ཡུལ་ཆེན་ནི། །སྤྱིར་ནི་འཁོར་འདས་ཐམས་ཅད་ཀུན། །ངའི་བྷ་གའི་ཀློང་ཡིན་ཏེ། །འཆར་བྱེད་དང་ནི་འཆར་ཡུལ་དང་། །གཉིས་འཛིན་བདུད་དུ་བཅད་པ་ལས། །ཁམས་གསུམ་འཁོར་བར་འཁྱམས་པ་ཡིན། །འོན་ཀྱང་མ་རྟོགས་སེམས་ཅན་ལ། །མ་ཕྱེ་བླུན་བྷཻཾ་བྱུང་སྲིད་པས། །ནང་དབྱིངས་རིག་སྟོང་འཆར་གཞི་སྟེ། །བར་དབྱིངས་རྩ་དཀར་དངས་པའི་ནང་། །ཁྲག་དང་ཆུ་སེར་མེད་པའི། །ཕྱི་དབྱིངས་ནམ་མཁའ་འདུས་མ་བྱས། །སྐྱོན་ཅན་མིང་གི་ནམ་མཁའ་དང་། ཁ་དོག་དབྱིབས་ཀྱི་ནམ་མཁའ་དང་། །རྒྱན་གྱི་ནམ་མཁའ་བུ་གའི་མཁའ། །སྣང་བའི་ནམ་མཁའ་དྲུག་ཡིན་པས། །འདུས་མ་བྱས་པའི་ནམ་མཁའ་ནི། །རིག་པའི་རྟེན་ཡིན་བེམ་སྟོང་སྟེ། །རིག་སྟོང་ཡེ་ཤེས་རྗེན་པར་འཆར། །གནད་གསུམ་གཟིར་བར་གྱུར་པ་ན། །ཉིན་དང་མཚན་ལ་ཁྱད་པར་མེད། །ཁ་དོག་དག་ལ་གསལ་འགྲིབ་མེད། །གདོས་བཅས་དག་ཏུ་བཅས་དུ་མེད། །ཡུལ་གསུམ་དུས་ཀྱི་ཤེས་པར་གྱིས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡེ་ཤེས་འཆར་བའི་ཡུལ་བསྟན་པའི་ལེའུ་སྟེ་ཉེར་བདུན་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱཻ་ཡུམ་ཆེན་ཀུན་ཏུ་བཟང་། །དེ་ལྟར་ཡུལ་དེར་རིག་པ་དེ། །ངོ་བོ་ཇི་ལྟར་འཆར་བ་ལགས། །ཞེས་ཞུས་པ་དང་། ཡང་སྟོན་པས་བཀའ་སྩལ་པ། ཉོན་ཅིག་རིག་གདངས་རང་རྩལ་རྣམས། །རིག་པ་ཡེ་ཤེས་ངོ་བོ་ནི། །སྨྲ་བསམ་གཏིང་དཔག་འདས་པའི་ཕྱིར། །གཟུགས་དབྱིབས་བརྗོད་པར་ག་ལ་ནུས། །ཀྱེ་ཧོ། གཞལ་བར་འོས་པ་ག་ལ་ཡིན། །འོན་ཀྱང་བསྐལ་བཟང་རེ་འགའ་ལ། །དཔེ་དོན་རྟགས་ཀྱིས་ངོ་སྤྲད་ཅིང་། །སྨིན་བྱེད་དབང་གི་ཚུགས་ཐུབ་ན། །ནམ་མཁའ་ཡངས་པའི་དཀྱིལ་དག་ཏུ། །ལྟ་སྟངས་གཟིགས་སྟངས་གནད་གཅུན་པས། །ཡེ་ཤེས་རིག་སྐུ་ལྷུག་པར་འཆར། །ཐིག་ལེ་སྟོང་པའི་སྒྲོན་མ་དང་། །དག་པ་དབྱིངས་ཀྱི་སྒྲོན་མ་དང་། །ཤེས་རབ་རང་བྱུང་སྒྲོན་མ་དང་། །རྒྱང་ཞག་ཆུའི་སྒྲོན་མ་རྣམས། །རེ་རེ་ལའང་བཞི་བཞི་སྟེ། །བཅུ་དྲུག་ལྷན་ཅིག་ལྷང་ངེ་འཛོམ། །ཆོས་ཉིད་མངོན་སུམ་སྣང་བ་ཟེར། །ཡིད་དཔྱོད་བློ་བྷཻཾ་བསྐྱར་ལ་འདོན། །དབང་པོ་ཉིད་ཀྱི་མངོན་སུམ་མཐོང་། །རྒྱང་ཞག་ཆུའི་སྒྲོ་སྒོ་ནི། །ཐེག་མཆོག་འདི་ལ་ཤིན་ཏུ་གཅེས། །ཤེས་རབ་རང་བྱུང་ཇི་སྙེད་པའི། །ཐེག་པ་གྲུབ་མཐའ་ཐེ་ཚོམ་གཅོད། །ཆོས་ཅན་མཚན་མ་ཅན་རྣམས་ཀུན། །ཆོས་ཉིད་མཚན་མ་མེད་པར་སྡུད། །བག་ཆགས་འཕྲལ་རྒྱུན་ཡིད་རྟོགས་ཆོད། །ཐིག་ལེ་སྟོང་པའི་སྒྲོན་མེ་ནི། །འཁོར་འདས་བསྲེ་བའི་མཚམས་སྦྱར་བྱེད། །རང་རླུང་དངས་བས་བཀྲག་མདངས་བསྐྱེད། །ཆེ་ཆུང་གཉིས་ལ་ཞི་ཁྲོ་འཆར། །རྩལ་རྫོགས་ཁྱུང་ཕྲུག་ཚར་བའམ། །སྦྲུམ་མ་ཟླ་གྲངས་ཐིམ་པ་འདྲ། །དག་དབྱིངས་སྒྲོན་མ་ཡུལ་ཡིན་ཏེ། །ཁྱད་པར་ཉམས་ཀྱི་ས་བོན་འདེབས། །སྟེང་ན་འཕེབ་དང་འོག་ནས་འདེགས། །ཕབ་བཟློག་སྐྱོན་གྱི་ངེས་མེད་སྣང་། །འདི་ལ་རྒྱུན་དུ་སུས་བྷཻཾ་པས། །གོང་དུ་འཕེལ་བར་མྱུར་དུ་བསྐྱོལ། །ལུས་འདི་ལྷ་ཁང་དག་དང་མཚུངས། །སྒྲོན་བཞི་འདུས་མཚུངས་ལྷ་ཁང་འདྲ། །རིག་སྐུ་གསལ་བ་ལྷ་མཐོང་འདྲ། །ལྷུན་གྲུབ་བུམ་སྐུ་བཞུགས་པ་འདྲ། །འོད་ཁྱིམ་སྣ་ཚོགས་འོད་ཟེར་འདྲ། །རིག་སྐུ་སྒྲོན་བཞི་འཁོར་འདས་ཀྱི། །བྱེད་ལས་ཐམས་ཅད་དུས་གཅིག་བྱེད། །དག་དབྱིངས་དག་ཏུ་ཆོས་རྣམས་འདུས། །ཡུལ་བྲལ་སྟོང་གསལ་སྤྲུལ་པའི་སྐུ། །སྟོང་གསལ་ལྷུན་སྡུག་བཀྲ་ལམ་མེ། །རང་རིག་རང་གསལ་བློ་བཟོའ་བྲལ། །འབད་རྩོལ་མེད་པས་བློ་ཞིག་པས། །རྡོ་རྗེ་ལུག་རྒྱུད་ཐིག་ལེ་བཅས། །ཁ་དོག་ཞིང་ཁམས་འགུལ་འཕྲེང་ཅན། །མུ་ཁྱུད་ར་བ་ཚོམ་བུར་བཅས། །རྟག་ཆད་མུན་སངས་སོ་མ་ལ། །དབྱིངས་ཀྱི་ནང་ན་བརྡལ་ལེ་ཁྱབ། །གཅེར་མཐོང་སྣང་གྲགས་རང་སར་གྲོལ། །བྱ་བྲལ་རང་བབ་འཕྱམ་མེ་བ། །འདི་ལ་གོམས་པ་སུས་རྙེད་པས། །མ་བསྐྱེད་དཀྱིལ་འཁོར་གཞི་ལ་རྫོགས། །མཐོང་བ་ཙམ་གྱིས་སྣང་སེམས་འདྲེས། །ཤེས་པ་ཙམ་གྱིས་མངལ་ཁ་འགེགས། །བསྟན་པ་ཙམ་གྱི་འཛིན་པ་སྟོང་། །གྲོལ་བ་རྩམ་གྱི་རང་ཚུགས་ཐུབ། །སྣང་བ་ཙམ་གྱི་གཞན་དོན་བྱེད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རིག་པའི་ངོ་བོ་ཇི་ལྟར་འཆར་ཚུལ་བསྟན་པའི་ལེའུ་སྟེ་ཉེར་བརྒྱད་པའོ། །྅྅྅ དེ་ནས་ཡང་མཁའ་འགྲོ་མ་རྣམས་ཀྱི་འདི་སྐད་ཅེས་བསྐུལ་ཏོ། །ཀྱེ་མ་ཡུམ་ཆེན་ཀུན་ཏུ་བཟང་། །དེ་ལྟར་དག་པའི་ཡེ་ཤེས་དེའི། །དབྱེ་བ་བདག་ལ་གསུང་ན་ཡང་། །མ་དག་སེམས་བྱུང་དེ་ཉིད་ཀྱི། །གནས་ལམ་སྒོ་རང་ངོ་བོ་དང་། བྱེད་ལས་འབྲས་བུ་གསུང་དུ་གསོལ། །ཞེས་པ་དང་། ཡང་སྟོན་པས་བཀའ་སྩལ་པ། ཉོན་ཅིག་ཡུམ་ཆེན་མཁའ་འགྲོའི་འཁོར། །མ་དག་སེམས་ཅན་ཉོན་ཡིད་ནི། །ཐོག་མའི་ཀུན་གཞི་གསུམ་ལྡན་ཏེ། །སྙིང་གི་དཀྱིལ་དུ་གནས་པ་ལ། །ཐུགས་རྗེ་འགྱུ་ཟེར་མ་འགག་པས། །སྲོག་རྩ་དམར་པོའི་ནང་ནས་འདོན། །རྩལ་མདངས་ཐལ་གྱི་གློ་བར་སོང་། །མ་རིག་པ་དེ་སེམས་དང་ཡིད། །དབུགས་དང་བཞི་པོ་དྲིལ་བ་ལ། །ཀུན་ལ་འཇུག་པའི་ཡིད་དུ་འགྱུར། །དེ་ཉིད་འཕེན་ལེན་སེམས་པ་ལ། །སེམས་ཞེས་བྱ་བར་ལོག་གིས་འགྱུར། །མ་ངེས་རྣམ་པ་དེ་དག་ལ། །རྟོག་དཔྱོད་སྟོང་པས་རྣམ་རྟོག་སྟེ། །བཟུང་བ་ཡུལ་ལ་ཨ་འཐས་ནས། །ང་དང་བདག་ཏུ་འཛིན་པ་ལ། །གཟུང་འཛིན་ཞེས་པ་མིང་དུ་བཏགས། །དེ་ལྟར་བག་ཆགས་ཀུན་གནས་པས། །བློ་ཞེས་བྱ་བ་བརྗོད་པའོ། །དུས་གཅིག་དུ་མར་འཆར་བ་ལ། །འཆར་སྒོ་ཞེས་པར་བཏགས་པ་ཡིན། །རྣམ་རྟོག་ཕྲ་རག་སྦོམ་གསུམ་གྱིས། །ལས་ངན་བསགས་ཀྱིས་ལུས་ངན་ལེན། །སྡུག་བསྔལ་རང་བསོགས་རང་གི་མྱོང་། །མ་རིག་པ་དེ་དམིགས་ཉིད་ལ། །གཞན་གསལ་རང་མ་མཐོང་བཞིན་སྒྲིབ། །སེམས་ཀྱི་ཡེ་ཤེས་དེ་ཉིད་བཏུམ། །རྣམ་རྟོག་དག་གིས་རང་གྲོལ་བསླད། །ཡིད་ཀྱི་རིག་རྩལ་རབ་ཏུ་གཡོགས། །དབུགས་ཀྱིས་བསྐྱོན་ནས་རྟ་ལ་ཞོན། །ལམ་ནི་རྩ་དམར་གཞུང་འདྲི་ཞུགས། །རྩ་ཆེན་གཉིས་ལ་རབ་ཏུ་འཕར། །སྒོ་ནི་རྩ་ཁམས་བ་སྤུ་ཀུན། །ཁྱད་པར་བུ་ག་དགུ་ལ་འཇུག །ཡང་དག་ཁ་དང་སྣ་ལ་རྒྱུ། །རྟགས་ནི་མེ་འོད་འཕྲོ་འཕྲོ་ཉིད། །སྤྲིད་པ་འབྱུང་བའི་དུས་སུ་འཆར། །ཡུལ་ནི་རྣམ་ཤེས་བསྡུ་བ་རྣམས། །ང་བདག་འགོང་པོས་རབ་ཏུ་སྡུད། །ངོ་བོ་དུག་ལྔ་དུག་གསུམ་ཡིན། །གྲངས་ནི་བརྒྱད་ཁྲི་བཞི་སྟོང་ངམ། །ནམ་མཁའ་གར་ཁྱབ་རླུང་དང་མཚུངས། །བྱེད་ལས་གཟུང་འཛིན་ངན་ལ་སོགས། །འབྲས་བུ་སྲིད་གསུམ་འཁོར་བར་འཁོར། །རིག་སྣང་སེམས་ཀྱི་ཚུར་གཡོགས་བས། །སྙིགས་མའི་དབྱིངས་སུ་དངས་མ་ཡལ། །ཡེ་ཤེས་སེམས་ཀྱི་ཕར་ལ་གཡོགས། །རང་གྲོལ་རང་བཅིངས་ཉིད་དུ་འགྱུར། །བག་ཆགས་འཐུག་པོའི་དབུས་སུ་འཐུམས། །སྔར་ཞེན་ལས་དེ་རྨི་ལམ་འདྲ། །ཕྱིས་འབྱུང་བག་ཆགས་ས་བོན་འདྲ། །རྒྱུ་རྐྱེན་འཛོམ་དུས་ཆོ་འབྲས་འདྲ། །ཁམས་གསུམ་འཁོར་ཞིང་རྒྱུད་དྲུག་འཁྱམས། །རང་གིས་རང་འཁོར་ལྟ་བ་ལོག །སྤྱོད་པ་ནོར་བས་འབྲས་བུ་འཁྲུལ། །སྲིད་གསུམ་ཐར་མེད་ཨ་ཙ་མ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། མ་དག་སེམས་ཀྱི་གནས་ལུགས་བཤད་པའི་ལེའུ་སྟེ་ཉེར་དགུ་པའོ། ། ྅྅྅྅྅྅྅྅྅྅྅དེ་ནས་ཡང་མཁའ་འགྲོ་མ་རྣམས་ཀྱིས་བསྐུལ་བ། ཀྱཻ་ཡུམ་ཆེན་ཀུན་ཏུ་བཟང་། །དེ་ལྟར་སེམས་དང་ཡེ་ཤེས་ལ། །ངོ་གཅིག་བཟློག་པ་གཅིག་པ་ཡིན། །གློ་སྙིང་རྩ་སྒོ་རྟེན་གཞིའི། །ལུས་ཀྱི་ཆགས་ལུགས་གང་ལྟར་ལགས། །ཞེས་ཞུས་པ་དང་། ཡང་སྟོན་པས་བཀའ་སྩལ་པ། ཀྱེ་མ་འདུས་པའི་འཁོར་ཚོགས་ཉོན། །གསང་སྔགས་བླ་མེད་ཐེག་པ་འདིར། །འཇུག་པར་འདོད་པའི་གང་ཟག་དེས། །ལུས་ཀྱི་ཆགས་ལུགས་མ་ཤེས་ན། །རྩའི་གནས་ལུགས་ག་ལ་ཤེས། །རྩའི་གནས་ལུགས་མ་ཤེས་ན། །རླུང་གི་གནས་ལུགས་ག་ལ་ཤེས། །རླུང་གི་གནས་ལུགས་མ་ཤེས་ན། །ཐིག་ལེ་ཡིག་འབྲུ་སྐུ་ཡེ་ཤེས། །རིག་པ་ལ་སོགས་ག་ལ་ཤེས། །དེ་རྣམས་གནས་ལུགས་མ་ཤེས་ན། །ཇི་ལྟར་སྒྲུབ་ཐབས་ཁ་གསག་ཅིང་། སྡུག་སྒྱུར་ངལ་བཏུབ་འབད་ན་ཡང་། བླུན་བྷཻཾ་ཁམས་གསུམ་བསྒྲུབ་པ་ཡིན། །དེ་ཕྱིར་འཁྲུལ་མེད་བློ་ལ་ཞོག །གནས་སྐབས་ཙམ་གྱི་ལུས་འདི་ཡི། རིག་པ་ཉིད་ཀྱི་རྟེན་གཞི་བྱེད། །དབང་ཅན་གཞན་དོན་སྤྲུལ་པ་དང་། །དབང་མེད་འཁོར་བར་འཁྱམས་བ་གཉིས། །འདྲ་འདྲ་རེ་ལ་ཁྱད་པར་ཆེ། །དབང་ཅན་ཡང་སྤྲུལ་ཞེས་པ་དེ། །ཆོས་སྐུའི་གདངས་ལ་ལོངས་སྐུ་ཤར། །ལོངས་སྐུའི་རྩལ་ལ་སྤྲུལ་སྐུ་ཤར། །སྤྲུལ་སྐུ་གདུལ་བྱའི་བློ་སྣང་དུ། །སྐྱེ་བཞི་ཤ་ཁྲག་ལྟར་སྣང་ངོ་། །དབང་མེད་དགེ་བའི་ས་བོན་གྱིས། །མཐོ་རིས་གནས་གཙང་ཐོབ་བ་དང་། །སྡིག་སྤྱོད་ངན་སོང་གསུམ་དུ་ཚུད། །ཐར་མེད་སྡུག་བསྔལ་མྱོང་བའོ། །དེ་ལྟར་སྐྱེ་བཞི་ཐ་དད་ཀྱང་། །འདི་རུ་མངལ་སྐྱེས་བཤད་པ་ན། །སྔ་མའི་སེམས་ནུབ་ཕྱི་མ་ཡིས། །སྣང་བ་མ་ཤར་བར་དེ་ལ། །བར་དོ་ཡིད་ཀྱི་ལུས་ཅན་ཟེར། །རྣམ་ཤེས་རླུང་གི་རབ་ཏུ་བཏེགས། །སེམས་གསལ་དབང་པོ་ཚང་ན་ཡང་། །སྐྱོབ་པའི་གྲོགས་དང་རྟེན་མེད་པས། །ཟས་གོས་དྲན་ཅིང་ཕྱོགས་བཅུར་རྒྱུག །བྱ་སྒྲོ་རླུང་གི་ཁྱེར་བའམ། །སྦྲང་མ་མཁའ་ལ་རླུང་ཁྱེར་འདྲ། །ཡབ་ཡམ་ཕྱད་ཕྱོད་ཤེས་པ་བུན། །རང་གི་གཉེན་འདུན་རྩར་ཕྱིན་ཡང་། །རང་དང་མི་མཐུན་ཕྱིར་ལོག་སྣང་། །ཕར་ལ་མཐོང་ཡང་ཚུར་མི་མཐོང་། །སྐད་ཅིག་ཤི་བར་ངོ་ཤེས་ནས། །ལུས་ཚོལ་བུ་ག་ཡོད་ཚད་ལ། །ཤ་གཡིབ་སྤྲང་འཐིབ་བཞིན་དུ་རུབ། །སྤྲང་མ་རླུང་འགག་ཇི་བཞིན་ཏེ། །ལ་ལས་ཞར་བའི་སྣང་བ་འཆར། །སྔོན་ནས་སྨོན་ལམ་ཆ་མཐུན་ཡིས། །ཕ་མའི་འདོད་སྲེད་འཛོམ་པའི་དུས། །ཚོགས་གཉིས་སྔོན་དུ་སོང་བ་ནི། །རིགས་མཐོ་འབྱོར་ལྡན་མངལ་དུ་འཇུག །བསོད་ནམས་མ་བསགས་ལས་ངན་ཅན། །སྡིག་འཕེལ་འོག་མའི་མངལ་དུ་འཇུག །རང་གིས་རང་ཉིད་མ་རིག་པས། །རྒས་ཤི་བར་དུ་རྒྱུན་ཆགས་འཁོར། །ཕ་མ་ཐིག་ལེ་གཉིས་ཤོར་ནས། །བདེ་བ་གཉིས་མཉམ་གནས་པའི་ཚེ། །རྣམ་ཤེས་ཨའི་རྣམ་པ་ཅན། །ཕའི་གཤང་བའི་ལམ་ལ་ཞུགས། །མའི་བྷ་གར་རིམ་གྱི་ཚུད། །སྔར་གྱི་སྡུག་བསྔལ་བྱུང་ཚོར་རྣམས། །སྐད་ཅིག་འགག་ནས་ཐིག་ལེ་ཐུམ། །བདེ་སྟོང་ངང་དུ་ཕྱམ་མེ་གནས། །བདུན་ཕྲག་དང་པོ་རླུང་གཡོས་ཚེ། །འབྱུང་ལྔའི་བྱེད་ལས་སོ་སོ་ཡིས། །མེར་མེར་པོ་རུ་ཆགས་པར་འགྱུར། །གཉིས་པ་ནུར་ནུར་གསུམ་པ་གོར། །བཞི་པ་ལྟར་ལྟར་ལྔ་པ་མཁྲང་མཁྲང་འགྱུར། །དྲུག་པ་ཁྱབ་འཇུག་ཉ་ལྟ་བུ། །བདུན་ཕྲག་བདུན་ལས་འབྱུང་བཞི་ལས། །རྩ་གསུམ་རྟ་རྔ་ཙམ་རེ་ཆགས། །འབྱུང་བ་བཞི་པོ་ཆགས་པ་ལ། །ཐིག་ལེ་དེ་ཉིད་ཆུའི་བཤིག །སས་མནན་མེས་བསྲེགས་རླུང་གི་གཏོར། །བརྒྱད་པ་སྙིང་དང་རྩ་ལྔ་ཆགས། །དགུ་པ་འཁོར་ལོ་ལྔ་ཆགས་ཏེ། །སྤྱི་བོར་རྩེ་མོ་རྣམ་བཀོད་དང་། །མགྲིན་བར་རོ་རྣམས་འདུས་པ་དང་། །སྙིང་གར་དྲན་པ་འཛིན་པ་དང་། །ལྟེ་བར་བསྐྱེད་པར་བྱེད་པ་དང་། །གསང་བ་བདེ་བ་མྱོང་བྱེད་ཆགས། །བཅུ་པ་རྩ་བྲན་སྲིན་བུ་ཆགས། །བཅུ་གཅིག་མ་ལ་མིག་གློ་ལྷང་། །གཟུགས་ཀྱང་རུས་སྤལ་ལྟ་བུ་ལ། །མའི་མཐོ་གང་ཙམ་ཚད་དུའོ། །བཅུ་གཉིས་རྩ་མདུད་ཐམས་ཅད་ཆགས། །བཅུ་གསུམ་སོང་བའི་དུས་ཚོད་དུ། །དབུགས་ཞེས་ཕྱི་ནང་རྒྱུ་བར་བྱེད། །བཅུ་བཞི་རུས་པའི་ཉ་རྣམས་ཆགས། །བཅོ་ལྔ་དག་ལ་ཤ་རྣམས་ཆགས། །བཅུ་དྲུག་ལྷ་བ་རྐང་མར་ཆགས། །བཅུ་བདུན་པགས་པ་སྐྲ་ཡང་ཆགས། །བཅོ་བརྒྱད་ལུས་ཀྱི་ཡན་ལག་ཆགས། །དཔེར་ན་སྤལ་པ་ལྟ་བུར་འགྱུར། །བཅུ་དགུ་ཉ་སུལ་ཆུ་སེར་ཆགས། །ཉི་ཤུ་ཉེར་གཅིག་ཉེར་གཉིས་ལ། །དོན་སྙིང་ལྔ་དང་ནང་རོལ་ཆགས། །གསུམ་བཞི་ལྔ་དང་དྲུག་རྣམས་ལ། །མཆིན་མཁྲིས་ཀླད་པ་གཞུང་པ་ཆགས། །བདུན་བརྒྱད་དགུ་ལ་གཞུང་པ་ཆགས། །སུམ་ཅུར་གློ་བ་རྒྱུ་མ་ཆགས། །ཚིལ་ལུ་བད་མཁྲིས་ལ་སོགས་ཆགས། །སོ་གཅིག་སོ་གཉིས་ལྟོག་སྣང་ཤར། །མས་ཟོས་བུ་ལ་ཕན་པར་འགྱུར། །སོ་གསུམ་སོ་བཞི་སོ་ལྔ་ལ། །ཁམས་ལྔ་ལུས་བཟུང་འཛིན་པར་བྱེད། །སོ་དྲུག་སོ་བདུན་སོ་བརྒྱད་ལ། །རླུང་དང་རྣམ་ཤེས་གཉིས་འཕྲད་ན། །ཚོགས་དྲུག་དྲན་པའི་སྣང་ཚོར་རྙེད། །སོ་དགུ་བཞི་བཅུ་ཐམ་པ་ལ། །སྔ་ཕྱི་ལེགས་ཉེས་ཐམས་ཅད་དྲན། །ཟླ་བ་དགུ་དང་ཞག་དགུ་སོང་། །ཕ་མ་སྐྱོན་ཅན་ཡིན་པའམ། །གདོན་ནམ་ནད་ཀྱིས་གཙིར་བའམ། །དབང་པོ་མ་ཚང་མི་འབྱུང་ན། །ཆགས་ལུགས་མི་འཁྲུག་གོང་ལྟར་ཆགས། །མངལ་འདིར་བཙོག་པའི་སྣང་བ་ཤར། །ལས་རླུང་སྟོབས་ཀྱི་མགོ་མཇུག་ལོག །མངལ་རྒྱ་རལ་སྣང་བག་ཆགས་ནུབ། །ཕྱི་མའི་ཉེ་ལེན་མ་འཕྲད་པར། །ཤེས་པ་མི་གསལ་ཉོག་ཉོག་པོ། །རྩ་རླུང་ཁམས་སྟོབས་མ་རྒྱས་པས། །ནད་གདོན་ལ་སོགས་ཤིན་ཏུ་སྡང་། །སྨན་རྩིས་སྲུང་གཏོའ་ལྷའི་སྐྱོབ། །ཤིན་ཏུ་ཤེས་པ་ཉམ་ཐགས་སོ། །དེ་ནས་ཁམས་ཀྱི་ཟས་ཟོས་པས། །དངས་མ་རྩ་དང་ཐིག་ལེར་བསྐྱེད། །སྙིགས་མ་ཤ་པགས་བསྐྱོད་པ་ལས། །འདོམ་གང་གྲུ་བཞི་ལུས་རྫོགས་ནས། །འཁོར་འདས་བྱ་བ་ཀུན་ལ་འཇུག །མངལ་ཞུགས་བྱང་ཆུབ་རྣམ་ལྔ་སྟེ། །ཟླ་བ་དགུ་ནི་ས་བཅུའི་ཚུལ། །སྐྱེས་པ་རང་བཞིན་སྤྲུལ་པའི་སྐུ། །ལྷུན་གྲུབ་སྐུ་གསུམ་བདག་ཉིད་དོ། །རྒྱས་པར་ཟླ་ཤེལ་དྲ་བའི་འོད། །ཀློང་གསལ་ཕ་རྒྱུད་ལྟ་བར་གྱིས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བརྟེན་གཞི་ལུས་ཀྱི་ཆགས་ལུགས་བསྟན་པའི་ལེའུ་སྟེ་སུམ་ཅུ་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱེ་མ་ཡུམ་ཆེན་ཀུན་ཏུ་བཟང་། །རྩའི་ཆགས་ལུགས་གསུང་དུ་གསོལ། །ཞེས་པ་དང་། ཡང་སྟོན་པས་བཀའ་སྩལ་པ། ཉོན་ཅིག་རིག་གདངས་འཁོར་རྣམས་ཉོན། །སྤྱིར་ནི་རྩ་ཞེས་བྱ་བ་བཤད་པ་ནི །འཁོར་འདས་གཉིས་པོ་འབྲེལ་པའམ། །སྣང་སྟོང་གཉིས་པོ་འབྲེལ་པའམ། །རྟག་ཆད་གཉིས་པོ་འབྲེལ་པའམ། །སེམས་རིག་གཉིས་པོ་འབྲེལ་པའམ། །དབྱིངས་སྒྲོན་འབྲེལ་ཕྱིར་རྩ་ཞེས་བཤད། །ཧྲིལ་གྱིས་དྲིལ་ན་འདི་ལྟར་ཡིན། །ལུས་ཆགས་ཉམས་སུ་རྩ་རླུང་དང་། །ཐིག་ལེ་སྐུ་དང་ཡེ་ཤེས་རྣམས། །དབྱེར་མེད་བརྩེགས་བའི་ཚུལ་དུ་གྲུབ། །འོད་ལས་ལུས་སུ་སྣང་བ་དང་། །སྒྲ་ལ་ངག་ཏུ་སྣང་བ་དང་། །ཟེར་ལ་སེམས་སུ་སྣང་བ་དང་། །སྐུ་ལ་གཟུགས་སུ་སྣང་བ་དང་། །ཡི་གེ་ཚིགས་སུ་སྣང་བ་དང་། །ཡེ་ཤེས་རིག་པ་ཤར་བ་ཡིན། འབྱུང་བ་ལས་ཀྱི་རྩ་རྣམས་ནི། །བ་སྤུའི་གྲངས་དང་མཉམ་པར་གནས། །དེ་ཡང་སྟོང་ཕྲག་བརྒྱད་ཅུར་འདུས། །དེ་ཡང་བཞི་བརྒྱ་རྩ་བཞིར་འདུས། །དེ་བསྡུས་འཁོར་ལོ་ལྔ་རུ་འདུས། །དེ་རྣམས་བཀོད་པ་སུམ་བརྒྱ་དྲུག་ཅུ་སྟེ། །རེས་འདུས་བརྒྱད་ནི་བཅུ་དྲུག་གོ། །སྙིང་གར་དྲན་པ་སུམ་ཅུ་གཉིས། །ལྟེ་བར་བསྐྱེད་བྱེད་དྲུག་བཅུ་བཞི། །གསང་བར་མྱོང་བྱེད་ཉི་ཤུ་བརྒྱད། །འཁོར་ལོ་ལྔ་པོ་དེའི་དབུས། །རོ་རྐྱང་དབུ་མ་གསུམ་པོ་ནི། །ཀ་བའི་ཚུལ་དུ་དྲང་པོར་གནས། །ཕོ་ནི་རྡོ་རྗེའི་རྣམ་པ་ལ། །མོ་ནི་དྲིལ་བུའི་ཚུལ་དུ་གནས། །སྤྱི་བོ་མགྲིན་པ་སྙིང་ག་དང་། །ལྟེ་བ་གསང་བ་རྐང་མཐིལ་དུ། །ཨ་ཏྲི་ནྲྀ་སུ་པྲེ་དུ་དང་། །རིགས་དྲུག་སྦྱངས་པའི་ཡི་གེ་ཡང་། །ཨ་འ་ཧ་ཤ་ས་མ་དྲུག །དབྱེར་མེད་བརྩེགས་པའི་ཚུལ་དུ་གནས། །ཤེལ་སྤུབ་ཅན་ནི་ཐར་ལ་ཆེ། །ༀ་ཨཱཿཧཱུྃ་གསུམ་ལྷུན་གྲུབ་ཤར། །དག་པ་སྐུ་གསུམ་འཆར་གཞི་བྱེད། །བདེ་གསལ་མི་རྟོག་ལམ་རྟོགས་བྱེད། །འབྲས་བུ་སྐུ་གསུམ་སྨིན་པར་བྱེད། །རོ་མ་ཆུས་བསྐྱེད་རྐྱང་མ་ལ། །ཀུན་འདར་མ་ནི་རླུང་ཡིན་ཏེ། །ཀ་ཏི་ཤེལ་སྦུབ་མེ་འིས་བསྐྱེད། །རོ་མས་བྱང་སེམས་འབབ་རྟེན་བྱེད། །རྐྱང་མའི་སྙིང་རྩེའི་ཐད་ཉིད་ནས། །ཤེལ་སྦུབ་ཅན་དང་ཞར་འགྲོགས་ནས། །རྩེགས་ཆུང་གཡས་གཡོན་གཉིས་རྒྱུད་ལས། །ཀླད་དཀྱིལ་མིག་འབྲས་ནང་ལ་ཞུགས། །ཡེ་ཤེས་སྣང་བ་འཆར་ལམ་བྱེད། །ཀུན་དྷར་མ་ཞེས་བྱ་བ་ནི། །མར་སྣེ་གསང་བའི་གནས་སུ་ཟུག །རྩེ་མོ་གསུམ་དུ་སོང་བ་ལ། །དབུ་མ་སྤྱི་བོའི་གཙུག་ལ་ཟུག །ལྐོག་འགྱུར་སྒོ་ཡིན་དབྱིངས་སྒྲོན་འཆར། །འདི་ལ་ཉམས་སུ་སུས་ལེན་པ། །འབྲས་བུ་རེ་བ་མ་ཡིན་ནོ། །གཉིས་སྣང་རྣ་བ་གཉིས་ལ་ཟུག །ཡེ་ཤེས་རང་སྒྲ་འཆར་བར་བྱེད། །འདི་ལ་ཉམས་སུ་སུས་ལེན་པས། །འཁོར་འདས་སྐད་རྣམས་མྱུར་དུ་ཤེས། །མངོན་པར་ཤེས་པ་ཐོགས་མེད་འཆར། །ལུས་འདི་མི་འགྱུར་བརྟན་པའི་ཕྱིར། །རྩའི་ཐེམས་སུ་ཚུད་པ་ཡིན། །ངག་ནི་མི་འགྱུར་བརྟན་པའི་ཕྱིར། །ཡི་གེའི་ཐེམས་སུ་ཚུད་པ་ཡིན །ཡིད་ནི་མི་འགྱུར་བརྟན་པའི་ཕྱིར། །རླུང་གི་ཐེམས་སུ་གཟུད་པ་ཡིན། །གནས་དང་ཆགས་དང་འཇིགས་དང་སྟོང་། །ལྟེ་བ་དག་ལ་ཀུན་སྲིད་དོ། །རྩ་འདབ་དྲུག་ཅུ་རྩ་བཞི་གནས། །ཀུན་ལ་ཡི་གེ་རེ་རེ་གནས། །ཡི་གེ་རེ་ལ་ཐིག་ལེ་རེ། །ཐིག་ལེ་རེ་ལ་སྐུ་རེ་སྟེ། །སྐུ་རེ་ལ་ནི་ཡེ་ཤེས་རེ། །ཡེ་ཤེས་རེ་ལ་རིག་པ་རེ། །རིག་པ་རེ་ལ་ཐུགས་རྗེ་རེ། །དབུས་སུ་ཡི་གེ་ཧྲཱིཿ་དང་ནི། །པདྨ་མཁའ་འགྲོ་ཡབ་ཡུམ་ཚུལ། །དབྱེར་མེད་སྟོང་གསལ་འདུས་པར་བཞུགས། །དེ་ནས་སོ་བརྒྱད་འཇལ་བ་ན། །དྲན་བྱེད་སྙིང་ཁའི་འཁོར་ལོ་གནས། །གྲངས་མེད་བསམ་གྱིས་མི་ཁྱབ་ཀྱང་། །གྲངས་ཅན་སོ་གཉིས་དག་ཡིན་ཏེ། །བསྡུས་ན་བཞི་གཉིས་བརྒྱད་དུ་འདུས། །རང་བཞིན་ཡི་གེ་ཐིག་ལེའི་ཚུལ། །ཡི་གེའི་ལྟེ་བར་མ་ཧཱུྃ་དང་། །ཀུན་བཟང་རྟ་ཕག་ཡབ་ཡུམ་སོགས། །དབྱེར་མེད་སྟོང་གསལ་འདུས་པར་བཞུགས། །རྩ་ཡིག་ཧྲི་མ་ཡི་གེ་དང་། །ༀ་ལ་སོགས་པ་རེ་རེས་བརྒྱན། །དེ་རྣམས་ཀུན་བཟང་རྟ་ཕག་ཡིན། །རོ་འདུས་མགྲིན་པར་བཅུ་དྲུག་སྟེ། །དབུས་སུ་རི་ཙ་ཡི་གེ་གནས། །རིན་ཆེན་མཁའ་འགྲོ་ཡབ་ཡུམ་སོགས། །དབྱེར་མེད་སྟོང་གསལ་འདུས་པར་བཞུགས། །རྩ་ནང་རེ་ན་རི་ཙ་སོགས། །ཡི་གེ་རེ་རེའི་ནང་དུ་གནས། །དེ་རྣམས་རིན་ཆེན་ཡབ་ཡུམ་ཡིན། །རྣམ་པར་བཀོད་པའི་རྩེ་མོ་ནས། །གདུགས་ཀྱི་རྩིབ་མ་བརྒྱང་ཞིང་གནས། །རྩ་འདབས་སུམ་བརྒྱ་དྲུག་ཅུ་ཡོད། །རག་པ་སུམ་ཅུ་རྩ་གཉིས་ཡིན། །དབུས་སུ་ཧ་རི་ཡི་གེ་གཉིས། །དཀར་གསལ་ཐིག་ལེའི་དབུས་ན་བཞུགས། །རྩ་འདབ་ཀུན་ལའང་ཧ་རི་སོགས། །ཡི་གེ་འབྲུ་རེ་རང་བཞིན་གནས། །དེ་རྣམས་རྡོ་རྗེ་མཁའ་འགྲོ་ཡིན། །ལྟེ་བར་ལས་ཀྱི་རྩ་རྣམས་ནི། །དཔེར་ན་ཤིང་གེར་མེ་ཏོག་བཞིན། །ནུས་པ་ཀླད་པར་སྨིན་ཅིང་ཟུག །དབང་པོའི་སྒོ་ནས་བཏོན་ནས་བཟུང་། །བྱེད་ལས་དུ་མ་བྱས་པ་ལ། །འཁོར་འདས་གཉིས་སྣང་སྟོན་པར་བྱེད། །གསང་གནས་བདེ་བ་མྱོང་བྱེད་ནི། །རྩ་འདབ་ཉི་ཤུ་རྩ་བརྒྱད་ཡིན། །ལྟེ་བར་ཕ་མའི་ཁུ་ཁྲག་དང་། །ཡི་གེ་ཡ་དང་ས་རུ་གནས། །ཀརྨ་མཁའ་འགྲོ་ཡབ་ཡུམ་ཡིན། །དབྱེར་མེད་སྟོང་གསལ་འདུས་པར་བཞུགས། རྩ་འདབ་ཀུན་གྱི་སྣ་དག་ལ། །ཡི་གེ་འབྲུ་རེ་བརྒྱན་པའོ། །གཞན་ཡང་བ་སྤུ་རེ་རེ་ལ། །རྩ་རེའི་ནང་ན་རླུང་ཐིག་རེ། །ཡི་གེ་འབྲུ་བརྒྱའི་ས་བོན་ཏེ། །དམ་པ་རིགས་བརྒྱའ་ཞི་ཁྲོའི་ཚུལ། །འཇིག་རྟེན་ཤ་ཟ་སྣ་ཚོགས་དང་། །དམ་ཚིག་མཁའ་འགྲོ་ཆོས་སྐྱོང་སོགས། །ཡིག་འབྲུ་མ་ངེས་དུ་མར་སྣང་། །འབྱུང་བཞིའི་དཀྱིལ་འཁོར་སངས་རྒྱས་ཞིང་། །འཁོར་ལོ་ལྔ་ནི་རིགས་ལྔ་གནས། །ཕུང་པོ་ཐམས་ཅད་ལྷ་ཚོགས་ཉིད། །སེམས་ནི་ཡེ་ཤེས་ཆེན་པོ་ཉིད། །ཡི་གེ་ཐིག་ལེ་སྐུ་རིག་དང་། །ཡེ་ཤེས་ཐུགས་རྗེ་དབྱེར་མེད་པས། །སྣང་སྟོང་མཐའ་བྲལ་ཏིལ་གང་འདྲ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡི་གེའི་གནས་ལུགས་གསུང་པའི་ལེའུ་སྟེ་སོ་གཅིག་པའོ། ། ྅྅྅ དེ་ནས་ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཨཻ་མ་ཡུམ་ཆེན་ཀུན་ཏུ་བཟང་། །རླུང་གི་གནས་ལུགས་གསུང་དུ་གསོལ། །ཞེས་ཞུས་པ་དང་། ཡང་སྟོན་པས་བཀའ་སྩལ་པ། ཉོན་ཅིག་ཡུམ་ཆེན་མཁའ་འགྲོའི་འཁོར། །གཡོ་བ་རླུང་གི་གནས་ལུགས་ནི། །རླུང་གི་མ་ཁྱབ་མེད་པ་ལྟར། །གཉིས་ཆོས་ཤེས་བྱས་བསྡུས་པ་ལ། །ཡེ་ཤེས་རླུང་གི་མ་ཁྱབ་མེད། །མདོར་བསྡུས་ལུས་ལ་གནས་ལུགས་ནི། །རྒྱས་པར་ཕ་རྒྱུད་ནང་ནས་གསལ། །ལས་རླུང་ཡེ་ཤེས་རླུང་ལ་འདུས། །ཡེ་ཤེས་རླུང་དང་སེམས་གཉིས་འདྲེས། །སེམས་དེ་ལས་ཀྱི་རླུང་དང་འདྲེས། །རླུང་སེམས་གཉིས་མེད་རྣམ་ཤེས་དེས། །འཁོར་འདས་འཇུག་བྱེད་ལས་རྣམས་སྡུད། །མ་རྒྱུད་ལ་སོགས་འགག་འགའ་ན། །སྣ་བུག་གཡོན་འགྱུ་སྲོག་ཡིན་ཏེ། །གཡས་ན་རྒྱུ་བ་རྩོལ་བར་འདོད། །ཕ་རྒྱུད་ལ་སོགས་འགའ་འགའ་ན། །ནང་དུ་འཇུག་པ་སྲོག་ཡིན་ཏེ། །ཕྱི་རུ་འབྱུང་བ་རྩོལ་བར་འདོད། །འདིར་ནི་སྲོག་ཉིད་རླུང་ཡིན་ཏེ། །རྩོལ་བ་འགག་པར་བྱེད་པ་ཡིན། །ཉིན་ཞག་ཕྲུགས་གཅིག་ནང་དག་ཏུ། །ལྔ་སྟོང་བཞི་བརྒྱའ་ས་རླུང་སྟེ། །མེ་ཆུ་གཉིས་ཀྱང་དེ་ཙམ་སྟེ། །ཉི་ཁྲི་གཅིག་སྟོང་དྲུག་ཕྲག་ཏུ། །དེ་ཉིད་བཟུང་བྱེད་ཐབས་ལ་ཡང་། །བུམ་པ་ཅན་གྱིས་ཚད་བཟུང་སྟེ། །པུས་མོ་ཐལ་མོ་ཡུད་རེ་བསྐོར། །སེ་གོལ་བརྡེག་པའི་ཡུན་ཚད་ལ། །སུམ་ཅུ་རྩ་དྲུག་བུམ་ཆུང་ལ། །བདུན་ཅུ་རྩ་གཉིས་བུམ་འབྲིང་ལ། །བརྒྱ་དང་རྩ་བརྒྱད་བུམ་ཆེན་ཡིན། །དེ་འདྲ་ཐུན་ཐུན་རྒྱུན་བྷཻཾ་ལ། །རྩ་མདུད་གྲོལ་ནས་མཆོག་ཐུན་གྲུབ། །དེ་ལྟར་རླུང་ཆེན་རླུང་འབྲིང་གིས། །བྱེད་ལས་གྱེན་རྒྱུ་མཐུར་སེལ་སོགས། །ལྔ་ཚན་ལྔའི་ལས་ཀུན་བྱེད། །འཐས་པ་མ་ཡིན་སྲ་བའི་རླུང་། །ས་དང་ཤའི་གཞི་མ་ཡིན། །གཡོ་བ་མ་ཡིན་བསྐྱོད་པའི་རླུང་། །རླུང་དང་དབུགས་ཀྱི་གཞི་མ་ཤར། །ཚ་བ་མ་ཡིན་བསྲེག་པའི་རླུང་། །མེ་དང་དྲོད་ཀྱི་གཞི་མ་ཤར། །རླན་པ་མ་ཡིན་གཤེར་བ་ཡིན། །ཆུ་དང་ཁྲག་གི་གཞི་མ་ཤར། །མཐའ་ཆད་མ་ཡིན་སྟོང་པའི་རླུང་། །ནམ་མཁའ་སེམས་ཀྱི་གཞི་མ་ཤར། །ནམ་མཁའ་མེད་ན་རླུང་མི་འབྱུང་། །ཡུམ་མཁའ་མེད་ན་ཡབ་མི་འབྱུང་། །སྟོང་པ་མེད་ན་སྣང་མི་འབྱུང་། །རྩ་མེད་རླུང་ཡང་ག་ལ་འབྱུང་། །མྱང་འདས་མེད་ན་འཁོར་བ་མེད། །བདེ་མེད་སྡུག་བསྔལ་ག་ལ་འབྱུང་། །རྩ་རླུང་ཐིག་ལེ་ཡེ་ཤེས་རླུང་། །ཕྱི་ན་རོ་གཅིག་གོ་སྦྱོར་ཨཱོཾ། །མ་ཤེས་ཕྱོགས་ལོག་ཐར་ལམ་འགག །རླུང་རིག་འཕྲད་ཀྱི་ཤེས་ཙམ་ན། །སེམས་འགྱུ་རྟོགས་པ་ཨར་སངས་ནས། །སྤྲིན་དང་ནམ་མཁའི་དཀྱིལ་ལྟ་བུ། །ཟག་བཅས་ལུས་ནི་འོད་དུ་ཡལ། །ཡེ་ཤེས་རླུང་དང་རང་ས་ཟིན། །སྐུ་གསུམ་ཕྱིར་མི་བཟློག་པ་ཐོབ། །ཕྱིའི་རྣམ་བཤད་དེ་ལྟར་ཏེ། །དགོས་སུ་ལུས་གནད་འདི་ལྟ་སྟེ། །འགེགས་བྱེད་རླུང་ནི་ལྷུ་ཚིགས་གནས། །ཁ་དོག་དཀར་པོའི་ཚུལ་དུའོ། །གཟི་མདངས་བསྐྱེད་པ་སྨིན་ཕྲག་གནས། །སེར་པོ་ལུས་ཀུན་ཁྱབ་པའོ། །མེ་མཉམ་ཕོ་བའི་སྟེང་ན་གནས། །ཁ་དོག་དམར་པོ་ཟས་འཇུའོ། །དངས་སྙིགས་འབྱེད་པའི་ཕོ་ལོང་གནས། །ཁ་དོག་ལྗང་གུའི་རྣམ་པ་ལ། །གྱེན་རྒྱུ་སྲོག་གི་ཀ་བ་འཛིན། །དངས་མ་ཕུང་པོ་ཁམས་རྣམས་བསྐྱེད། །སྙིགས་མས་དྲི་ཆེན་དྲི་ཆུར་བྱེད། །གསང་བའི་ལམ་ལ་མཐུར་འདོར་རོ། །སྙིང་རྗེ་མེད་པའི་ལས་རླུང་ནི། །མཐིང་ནག་འོད་བཅས་སྙིང་ན་གནས། །རིག་པ་དང་ནི་ལྷན་གཅིག་གོ། །ཁྱད་པར་སྲོག་རྩའི་ནང་ན་གནས། །དེ་གཡོ་སྙིང་རླུང་སྨྱོ་འབོག་འབྱུང་། །དེ་མལ་འཆུག་ན་སྲོག་ཆད་དོ། །བྱེ་བྲག་འཁོར་ལོ་ལྔ་པོ་ནི། །སྤྱི་བོ་ཆུ་རླུང་མགྲིན་པ་ས། །སྙིང་ཁ་ནམ་མཁའ་ལྟེ་བར་མེ། །གསང་བར་རླུང་གི་རླུང་གནས་སོ། །ཁ་དོག་རེ་ལའང་ལྔ་རུ་སྟེ། །ཀུན་གྱི་དབུས་སུ་སྲོག་འཛིན་གནས། །ཉ་མིག་རྨ་བྱའི་མདངས་སམ་ནི། །ལུག་རྒྱུད་ཟ་འོག་ལྕགས་ཚགས་སམ། །མ་ངེས་སྣ་ཚོགས་གཟུགས་མདོག་སྣང་། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རླུང་གི་གནས་ལུགས་བསྟན་པའི་ལེའུ་སྟེ་སོ་གཉིས་པའོ། །྅྅྅ ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱེ་མ་ཡུམ་ཆེན་ཀུན་བཟང་ལགས། །ཐིག་ལེའི་གནས་ལུགས་བསྟན་དུ་གསོལ། །ཞེས་པ་དང་། ཡང་སྟོན་པས་བཀའ་སྩལ་པ། ཉོན་ཅིག་ཡུམ་ཆེན་མཁའ་འགྲོ་རྣམས། །འཁོར་དང་འདས་པའི་ཆོས་རྣམས་ཀུན། །ཡེ་ཤེས་སྟོང་གསལ་འདུས་མ་བྱས། །ཐིག་ནི་སྐྱེ་བ་མེད་པ་ལ། །ལེ་ནི་འགག་པ་མེད་པ་ཡིན། །ཐིག་ནི་ཡུམ་གྱི་བྷ་ག་ལ། །ལེ་ནི་ཡབ་ཀྱི་རྡོ་རྗེའོ། །ཐིག་ནི་སྟོང་པ་ལེ་སྣང་བ། །ཐིག་ནི་མི་འགྱུར་ལེ་རང་གནས། །ཉག་ནི་ཕྲ་བ་གཅིག་འུབ་ཆུབ། །སྐལ་ལྡན་ལམ་གྱི་གདམས་ངག་ལ། །ལུས་ནི་རྩའི་དྲ་བ་ཡིན། །རྩ་ནི་ཡི་གེའི་ངོ་བོ་ཡིན། །ཡི་གེ་རླུང་དང་ཁ་དོག་སྟེ། །རླུང་ནི་ཐིག་ལེ་བདེ་ཆེན་ཏེ། །བདེ་སྟོང་འདུས་མ་བྱས་པ་ནི། །རིག་པའི་ཡེ་ཤེས་ངོ་བོ་ཡིན། །ཆེ་ཆུང་ཏིལ་འབྲུ་ཉུང་འབྲུ་ཙམ། །ལུས་ཀུན་མ་ལུས་ཀུན་ལ་ཁྱབ། །ཕོ་ལ་དཀར་པོ་དངོས་སུ་བབ། །མོ་ལ་དམར་པོ་མཐུར་དུ་འབབ། །ཁམས་རྒྱས་དུས་སུ་དཀར་པོ་ཡང་། །སྣ་བུག་གཡས་ནས་དུམ་རེ་འབབ། །སྙོམས་འཇུག་དུས་སུ་འབབ་པའང་སྲིད། །དེ་ལྟར་ཐིག་ལེ་སྲ་སྙིའི་རིམ་པ་ཀུན། །རྩ་འགོ་མཐོ་དམན་རིམ་པ་དང་། །རྩ་ཁ་མདུད་པ་ཡངས་དོག་ཡིན། །ཀུན་རྫོབ་རྒྱུའི་ཐིག་ལེ་དེ། །འབྱུང་བ་ལྔའི་དངས་མ་ཡིན། །མཁའ་འགྲོ་ཡབ་ཡུམ་དངོས་ཡིན་ཏེ། །འདས་མ་འདས་ཀྱི་སྲོག་ཡིན་ཏེ། །དེ་ལ་ཡེ་ཤེས་ཐིག་ལེ་གནས། །དོན་དམ་ཀུན་རྫོབ་དབྱེར་མེད་ཡིན། །མ་དང་བླུན་པོ་འགའ་ཞིག་གི། །སོ་སོར་བཟུང་བ་རང་རང་འཁྲུལ། །རུས་པ་ལྷ་བ་རྐང་མར་ཞུགས། །ཀླད་པ་རྩ་རྒྱུས་ཞག་ཚིལ་རྣམས། །ཕ་ལས་ཐོབ་པའི་ཐིག་ལེ་བསྐྱེད། །ཤ་ཁྲག་སྤུ་ཡང་ཁྲག་ཆུ་སེར། །མའི་ཐིག་ལེ་དམར་ལ་བསྐྱེད། །ཐིག་ལེ་འཁོར་འདས་ཀུན་གྱི་སྲོག །ཕྱི་ནི་འབྱུང་ལྔ་ནང་ཡུམ་ལྔ། །གསང་བ་མཁའ་འགྲོ་ཡབ་ཡུམ་སྟེ། །ཡང་གསང་ཡེ་ཤེས་རྣམ་པ་ལྔ། །ཕྱི་ནི་འཁོར་ལོ་ལྔར་སྣང་ཡང་། །ནང་ལྟར་ཞིང་ཁམས་ལྔ་པོ་ཡིན། །གསང་བ་རླུང་ལྔ་ཐིག་ལེ་ལྔ། །སྲོག་ཡིག་ཡབ་ཡུམ་ལྔ་ལྔ་ཤར། །གསང་བ་ཁ་དོག་ལྔ་ཡིན་ཏེ། །གཞི་ལྔ་ལམ་ལྔ་འབྲས་བུ་ལྔ། །ས་ལྔ་རྟགས་ལྔ་ཉམས་ལྔ་དང་། །ཕྱག་རྒྱ་ལྔ་དང་འགྲོ་དོན་ལྔ། །རྒྱུའི་ཐིག་ལེ་མ་ཉམས་སྤེལ། །རྒྱུའི་ཆོས་རྣམས་སྤང་བ་སྟེ། །འབྲས་བུའི་ཆོས་རྣམས་བསྒྲུབ་པ་སྟེ། །ཐབས་ཀྱི་ཁྱད་པར་ཨ་ལ་ལ། །རྒྱུའི་ཐིག་ལེ་ཉམས་པ་ན། །གསང་སྔགས་དམ་ཚིག་ཀུན་ཉམས་ནས། །བསྐལ་པ་འབུམ་འཁྲིར་ན་རག་སྤྱོད། །མཁའ་འགྲོ་ཁྲི་འབུམ་ངུ་སྐད་འདོན། །འདི་རུ་མི་ཤེས་ཕྱི་མ་མནར། །དུས་བཞིར་རིག་གནད་མ་ངེས་སྣང་། །མཚན་ལྡན་ཡིད་འཇུག་ཕོ་མོ་ལས། །ཐབས་ཀྱིས་ཟིན་པས་བདེ་བ་སྦར། །རྩ་རྩལ་བྱིན་བརླབ་རིགས་ཉམས་སོ། །བདག་གཞན་གཉིས་ཀྱི་ལུས་པོ་སྦྱངས། །ཕབ་བཟུང་ལྡོག་འདྲེན་ལུས་གནད་བཅའ། །ཕུང་ཁམས་དཀྱིལ་འཁོར་ཆེན་པོས་མཆོད། །མ་ཆགས་སྤྱོད་པས་ཆགས་མེད་རོལ། །སྐྱེ་མེད་མཐའ་བྲལ་ཆོས་ཀྱི་སྐུ། །རྣམ་པ་ཀུན་གསལ་ལོངས་སྤྱོད་རྫོགས། །བདེ་བ་རོལ་ལྡན་སྤྲུལ་བའི་སྐུ། །མ་བཅོས་ངང་ནས་ཞེན་མེད་སྤྱོད། །ཞིང་བཞི་དུས་གཅིག་དགའ་བཞི་ནོན། །ས་བཅུའ་སྐད་ཅིག་ཐོབ་པ་དང་། །ལྟ་སྤྱོད་ཟུང་འབྲེལ་གནད་ཀྱི་ཆེ། །འདི་འདྲ་སྟོན་པའི་བླ་མ་དང་། །འདི་ཉིད་ཐོས་པའི་སློབ་མ་ཡང་། །སེམས་ཅན་ནང་ནས་རྨ་བྱ་ཙམ། །འགའ་འགའ་རེ་ལས་མི་སྣང་ངོ་། །དེ་ཕྱིར་ཐིག་ལེ་སྤེལ་བའི། །རྫས་ནི་ཤེས་རབ་ཐབས་ལ་སྣང་། །དུས་གསུམ་སངས་རྒྱས་ཐམས་ཅད་ཀྱང་། །བྷ་གའི་ཀློང་ནས་རང་བྱུང་སྟེ། །ཆོས་རྣམས་ཀུན་གྱི་འབྱུང་གནས་ཉིད། །བྷ་ག་གསང་སྔགས་ཀུན་གྱི་གནས། །བདེ་ཆེན་ཡེ་ཤེས་འབྱུང་བ་ཉིད། །འདི་མིན་བསྟེན་པའི་ཐབས་གཞན་མེད། །ཐབས་ཀྱི་རྒྱུད་ཀྱིས་གྲོལ་བ་ཡིན། །བདེ་ཆེན་འདི་བསྟེན་བདེ་བ་ཐོབ། །ཡང་དག་སངས་རྒྱས་ཉིད་ལ་འབྱུང་། །བུད་མེད་བརྙས་ཤིང་མཁའ་ལ་གཤེའ། །བདེ་དང་བྲལ་ན་ན་རཀ་སྤྱོད། །གསུམ་པ་དབང་ཆེན་སུས་ཐོབ་པ། །བྷ་ག་ཡངས་པ་ཀུན་བཟང་ཀློང་། །གསལ་སྟོང་ངང་དུ་བུདྡྷ་འོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཐིག་ལེའི་གནས་ལུགས་བསྟན་པའི་ལེའུ་སྟེ་སོ་གསུམ་པའོ། །྅྅྅ དེ་ནས་ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཀྱེ་མ་ཡུམ་ཆེན་ཀུན་བཟང་ལགས། །དག་པ་ཡེ་ཤེས་ཐིག་ལེ་སྟེ། །སྐུ་མདོག་ཞལ་ཕྱག་ཡོད་དམ་མེད། །བདག་ཅག་རྣམས་ལ་བསྟན་དུ་གསོལ། །ཞེས་ཞུས་པ་དང་། ཡང་སྟོན་པས་བཀའ་སྩལ་པ། ཉོན་ཅིག་མཁའ་འགྲོའི་འཁོར་ཚོགས་རྣམས། །དག་པ་ཡེ་ཤེས་རིག་པ་དེ། །གཞོན་ནུ་བུམ་པའི་སྐུ་རུ་བཞུགས། །མཚན་མ་རྟག་པ་ཐེར་ཟུག་པའི། །ཤ་ཁྲག་ཞལ་ཕྱག་མ་གྲུབ་སྟེ། །གང་ལྟར་བརྟགས་པ་དེ་ལྟར་སྣང་། །འོན་ཀྱང་ལྷུན་གྲུབ་གསལ་ཆ་ལ། །གདུལ་བྱའི་མོས་བློ་ཐ་དད་པས། །སྟོང་གསལ་རིག་པའི་ཡེ་ཤེས་ལྔ། །ཐབས་ཤེས་ཟུང་འཇུག་དངོས་གྲུབ་ཐོབ། །ལ་ལས་ཞི་བའི་སྐུ་རུ་སྣང་། །ལ་ལས་ཁྲོ་བོའི་སྐུ་རུ་སྣང་། །ལ་ལས་ཞི་མ་ཁྲོ་རུ་སྣང་། །ལ་ལས་ཡབ་ཡུམ་ཚུལ་དུ་སྣང་། །ལ་ལས་རྐྱང་བའི་ཚུལ་དུ་སྣང་། །ལ་ལས་སེམས་དཔའ་སེམས་མའི་ཚུལ། །ལ་ལས་ཉན་ཐོས་གཙུག་ཏོར་ཅན། །མ་དག་རིགས་དྲུག་གཟུགས་སུ་སྣང་། །ལ་ལས་གཤིན་རྗེ་གཤེད་དུ་སྣང་། །ལ་ལས་རང་སྣང་བགེགས་འདྲེར་སྣང་། །འོན་ཀྱང་རང་བཞིན་བཞུགས་ཚུལ་ནི། །ཞི་དང་ཁྲོ་དང་ཞི་མ་ཁྲོ། །འདྲེས་མ་ཡབ་ཡུམ་རྐྱང་པའི་ཚུལ། །ཐིག་ལེ་དཀར་པོ་ཕོར་སྣང་སྟེ། །དམར་པོ་མོ་ལ་འདྲེས་པ་རྣམས། །དབྱེར་མེད་ཡབ་ཡུམ་ཚུལ་དུ་གནས། །ཙནྡན་དྲི་ཡིས་སྤྱིར་ཁྱབ་པས། །ཁྱད་པར་སྙིང་པོ་བཟང་བ་བཞིན། །ཕོ་བྲང་བཞི་ན་གནད་ཆེན་གནས། །སྙིང་ནང་ཞི་བའི་ལྷ་ཚོགས་ལ། །ཚུལ་དགུའི་བརྒྱད་ཀྱི་རབ་ཏུ་སྤྲས། །ཆ་ལུགས་མ་ངེས་ཅིར་ཡང་སྟོན། ལྷུན་གྲུབ་འོད་གསལ་ཀླད་པར་སོང་། །ཞི་བའི་གནས་གྱུར་ཁྲོ་བོའི་སྐུ། །ཞལ་ཕྱག་དུ་མ་གར་དགུའི་ཚུལ། །ཞལ་ནས་ཧཱུྃ་ཕཊ་རྒྱོབ་སོད་སྒྲོགས། །ཐུགས་ཉིད་ཞི་བའི་སྙིང་གར་ལྡན། །དུར་ཁྲོད་བརྒྱད་དང་ཆས་བརྒྱད་ལྡན། །སྒྲ་འོད་ཟེར་དང་རང་ཆས་སོ། །ཀླད་པ་དུང་ཁང་རྩ་དབུས་སུ། །རྩེ་མོ་རྣམ་བཀོད་རྩ་མདུད་ལ། །འོད་ཟེར་ལྔའི་དྲ་བའི་ནང་། །ཆུའི་དངས་མ་ཁ་དོག་དཀར། །ཡེ་ཤེས་རང་འོད་ཧ་རི་ལ། །རྡོ་རྗེ་མཁའ་འགྲོ་ཡབ་ཡུམ་འཁྲིལ། །གཡས་པས་རྡོ་རྗེ་གཡོན་ཐོད་ཁྲག །དཀར་གསལ་ལྷུན་གྲུབ་མཛེས་པར་གནས། །རྩ་འདབ་ཀུན་ལ་དེ་བཞིན་བཞུགས། །མགྲིན་པར་རོ་འདུས་རྩ་མདུད་དབུས། །འོད་ཟེར་ལྔའི་དྲ་བ་ལ། །སའི་དངས་མ་ཁུ་ཁྲག་སེར། །ཐིག་ལེ་ཡི་གེ་རི་ཙ་ཉིད། །རད་ན་དྷཱ་ཀི་ཡབ་ཡུམ་སེར། །འཁྲིལ་སྦྱོར་རིན་ཆེན་ཐོད་ཁྲག་བསྣམས། །རྩ་འདབ་ཀུན་ལ་དེ་བཞིན་ནོ། །སྙིང་ཁ་དྲན་པ་རྣམ་བཀོད་ནས། །འདབ་བརྒྱད་བཀོད་པ་རྩ་མདུད་མཐིང་། །ནམ་མཁའི་དངས་མ་ཐིག་ལེ་ཉིད། །ལྔ་ལྡན་ཧཱུྃ་ལ་ཐིག་ལེ་བཀོད། །སངས་རྒྱས་མཁའ་འགྲོ་ཡབ་ཡུམ་བཀོད། །ཕྱག་གཉིས་འཁོར་ལོ་ཐོད་ཁྲག་བསྣམས། །རུས་རྒྱན་བརྐྱང་སྐུམ་གར་ཐབས་ཅན། །འཁོར་ཀྱང་རང་འདྲ་དུ་མས་བསྐོར། །ལྷུན་གྲུབ་བུམ་པའི་སྐུ་རུ་བཞུགས། །རྩ་འདབ་རྣམས་ལ་དེ་བཞིན་ནོ། །ལྟེ་བ་བསྐྱེད་བྱེད་འཁོར་ལོ་རུ། །དྲུག་ཅུ་རྩ་བཞི་རྩའི་དབུས། །འབྱུང་བཞིའི་དངས་མ་ཕ་མའི་རྒྱུ། །དམར་དངས་ཐིག་ལེ་ཧྲི་ནི་ཉིད། །པད་མ་དྷཱ་ཀི་ཡབ་ཡུམ་འཁྲིལ། །གཡས་པ་པད་མ་གཡོན་ཐོད་ཁྲག །ལྷུན་གྲུབ་བུམ་པའི་སྐུ་རུ་བཞུགས་སོ། །རྩ་འདབ་རྣམས་ལ་དེ་བཞིན་གནས། །གསང་གནས་བདེ་བ་མྱོང་བྱེད་ན། །རྩ་འདབ་ཉི་ཤུ་རྩ་བརྒྱད་དབུས། །འབྱུང་བཞིའི་དངས་མ་ཕ་མའི་རྒྱུ། །ཐིག་ལེ་ཡི་གེ་ས་ཡའི་ཚུལ། །ལས་ཀྱི་དྷཱ་ཀི་ཡབ་ཡུམ་འཁྲིལ། །རྒྱ་གྲམ་ཐོད་ཁྲག་རྒྱན་ཅན་བཞུགས། །རྩ་འདབ་ཀུན་ལ་དེ་བཞིན་དུ། །གསལ་སྟོང་རིག་སྟོང་ཀུན་ཏུ་བཞུགས། །གཞན་ཡང་གྲངས་ཅན་རྩ་འདབ་ནི། །བཞི་བརྒྱ་བདུན་ཅུ་རྩ་གཉིས་ལ། །ཤ་ཟ་དྷཱ་ཀི་སྣ་ཚོགས་དང་། །ཆོས་དང་དམ་ཚིག་འཇིག་རྟེན་ན། །མངལ་སྐྱེས་དང་ནི་སྔགས་སྐྱེས་དང་། །དུར་སྐྱེས་རིག་སྐྱེས་ལ་སོགས་པ། །སྣ་ཚོགས་གྲངས་མེད་མ་ངེས་ཚུལ། །ཕྱག་མཚན་མགོ་བརྙན་ངེས་པ་མེད། །སྐུ་མདོག་ཆ་ལུགས་ཅིར་ཡང་འགྱུར། །དཔེར་ན་ཏིལ་གོང་ཁ་ཕྱེས་འདྲ། །རིག་པ་ཡེ་ཤེས་མུ་མེད་པས། །མ་ཤོང་བ་ནི་གཅིག་ཀྱང་མེད། །རིག་པ་ཡེ་ཤེས་མ་འགགས་པ། །མི་སྲིད་པ་ནི་གཅིག་ཀྱང་མེད། །ཏིལ་འབྲུའི་ནང་དུ་སྟོང་གསུམ་ཤོང་། །ཞལ་གཅིག་ཕྱག་གཉིས་བརྒྱ་སྟོང་ངམ། །ཞལ་བརྒྱ་ཕྱག་གཅིག་ལ་སོགས་པ། །གང་ལྟར་སྟོང་གཟུགས་རྟག་པར་འཆར། །བསོད་ནམས་ཚོགས་ཆེན་རྫོགས་བྱའི་ཕྱིར། །སངས་རྒྱས་རིགས་ལྔ་ཀུན་འདུས་གཙོ། །རང་རིག་བླ་མ་ཀུན་ཏུ་བཟང་། །ཕྱི་ནང་གསང་བའི་མཆ ོད་འབུལ་ན། །དེའི་བསོད་ནམས་བརྗོད་མི་ལང་། །ཚེགས་མེད་གང་ཡང་གྲུབ་མི་འགྱུར། །མ་གྲུབ་བཞིན་དུ་འཆར་བའི་ལམ། །སྣང་བཞིན་མ་གྲུབ་འཁོར་འདས་གཞི། །རྟག་ཆད་མེད་པའི་འབྲས་བུའོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡེ་ཤེས་སྐུའི་ཞལ་ཕྱག་བསྟན་པའི་ལེའུ་སྟེ་སོ་བཞི་པའོ། །྅྅྅ དེ་ནས་ཡང་མཁའ་འགྲོ་མ་རྣམས་ཀྱིས་འདི་སྐད་ཅེས་བསྐུལ་ཏོ། །ཨེ་མ་ཡུམ་ཆེན་ཀུན་ཏུ་བཟང་། །རིག་པ་སེམས་ཞེས་བྱ་བ་འདི། །འཕྲད་གྱེས་དུས་འདི་གང་ལྟར་ལགས། །ཞེས་ཞུས་པས། ཡང་སྟོན་པས་བཀའ་སྩལ་པ། ཉོན་ཅིག་རིག་གདངས་འཁོར་ཚོགས་རྣམས། །རིག་པ་དག་ནི་ནམ་མཁའ་འདྲ། །སེམས་འབྱུང་ཡིད་ནི་རླུང་དང་འདྲ། །སྤྱིར་ན་མ་བུ་ལྟ་བུ་སྟེ། །གནས་པ་རིག་པ་འགྱུ་བ་སེམས། །ཆུ་རླབས་ལྟ་བུ་ཕྱམ་གཅིག་སྟེ། །ངོ་བོ་གཅིག་ལ་རྣམ་པ་གཉིས། །ཐུགས་རྗེའི་རྩལ་ཤུགས་ཆེ་ཆུང་ཡིན། །འོན་ཀྱང་མི་གོ་གང་ཟག་ལ། །ཐབས་ཤེས་གནད་དུ་བསྣུན་པ་ན། །གནད་འདི་ཤེས་བས་གྲོལ་བ་ཐོབ། །དང་པོ་སྐྱེ་མེད་རིག་པ་ལ། །ཐུགས་རྗེའི་རོལ་པ་མ་འགག་པས། །ཉོན་ཡིད་དག་ཏུ་ཐལ་འགྱུས་པས། །གྱེས་པའི་དུས་གཅིག་དེ་དུས་ཡིན། །དེ་ཉིད་མཁའ་རུ་སྤྲིན་དངས་ལྟར། །རང་གྲོལ་ཨར་སངས་བྱེད་ཙམ་ན། །འཕྲད་པའི་དུས་ཆེན་ཞེས་སུ་གྲགས། །རིག་པ་སྙིང་ནང་ཧྲིག་གེ་གནས། །ཐུགས་རྗེ་རྩ་དམར་ལམ་ལ་ཞུགས། །རླུང་གྲང་གློ་བར་བསྐྱེད་པ་དེ། །གྱེས་པའི་དུས་གཅིག་དེ་དུས་ཡིན། །རླུང་བཟུང་བུམ་པ་ཅན་གྱི་གཅུན། །རིག་པ་གཞི་བཞག་རང་མལ་ཚུད། །སེམས་བྱུང་བག་ལ་རང་སར་བཞག །ཡུན་ཐུབ་བརྗོད་མེད་གནས་པ་དེ། །འཕྲད་པའི་དུས་གཅིག་དེ་དུས་ཡིན། །རིག་པ་དབྱིངས་སུ་གཡོ་མེད་གནས། །ཁོང་གསལ་ཡེ་ཤེས་ལྷུག་པར་འཆར། །སེམས་བྱུང་སྒོ་ལྔའི་རྗེས་སུ་འབྲངས། །གྱེས་པའི་དུས་གཅིག་དེ་དུས་ཡིན། །ལུས་གནད་ལྟ་སྟངས་དེ་དུས་གཟིར། །སྒྲོན་མ་བཞི་ལྡན་སྐད་ཅིག་འདྲེས། །རིག་པ་མངོན་སུམ་འཆུགས་མེད་མཐོང་། །སྣང་སེམས་དབྱེར་མེད་ཕུ་ཆུ་འདྲེས། །འཛིན་པ་དག་པའི་སྣང་བ་ཕྱོགས་། །སེམས་བྱུང་ཤར་སྒྲོན་དབྱིངས་སུ་ཐིམ། །སྣང་རིག་དབྱེར་མེད་ཁྲ་ལམ་མེ། །འདོད་བློ་ཞིག་ནས་དངས་སང་ངེ་། །མཐའ་བཞི་དྲི་མ་དག་ཙམ་ན། །འཕྲད་པའི་དུས་གཅིག་དེ་དུས་ཡིན། །འཆི་ཁར་འབྱུང་བ་མཐའ་ནས་སྡུད། །རིག་པ་སྙིང་ནང་ལྷང་ངེ་གནས། །ཉོན་ཡིད་སྡུག་བསྔལ་མྱོང་ཚོར་སྤྱོད། །གྱེས་པའི་དུས་གཅིག་དེ་དུས་ཡིན། །ཕྱི་དབུགས་བར་ཆད་མཁའ་ལ་ཡལ། །ཐུགས་རྗེ་རླུང་དང་སྙིང་ནང་འདུས། །རིག་སྟོང་ཚོགས་འགགས་ཞག་བདུན་གནས། །ས་ལེ་ཧྲིག་གེ་སང་ངེ་བ། །གདོད་མའི་གཞི་ནི་བུམ་སྐུའི་ཚུལ། །རང་གསལ་མི་གཡོ་ལྷང་ངེ་གནས། །འཕྲད་པའི་དུས་གཅིག་དེ་དུས་ཡིན། །དེ་ནས་ཁྲག་གིས་སྙིང་ནང་རྒྱས། །ཀ་ཏི་ཀ་ལ་རྒྱངས་ཀྱི་འཐོན། །སྒྲ་འོད་ཟེར་གསུམ་ལམ་གྱི་ཤར། །རིག་པ་འཕོ་འགྱུར་མེད་པར་གནས། །ཉོན་ཡིད་ཕྱིས་ལྟས་སྡུག་བསྔལ་སྤྱོད། །གྱེས་པའི་དུས་གཅིག་དེ་དུས་ཡིན། །སྔོན་དུས་བླ་མའི་ངོ་སྤྲད་རྣམས། །རང་རང་དེ་འདྲར་ལམ་གྱི་ཤར། །རང་རྩལ་སེམས་བྱུང་བུ་འདྲ་དྲན། །རང་གྲོལ་རང་དངས་ཤེས་པ་ཡིན། །སྐད་ཅིག་མ་ལ་སྐུ་གཉིས་ཀྱིས། འགྲོ་བའི་དོན་བྱེད་སྒྲིབ་གཉིས་དག །འཕྲད་པའི་དུས་ཅིག་དེ་དུས་ཡིན། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་རིག་འཕྲད་གྱེས་བསྟན་པའི་ལེའུ་སྟེ་སོ་ལྔ་པའོ། །྅྅྅ ཡང་མཁའ་འགྲོ་མ་རྣམས་ཀྱི་འདི་སྐད་ཅེས་བསྐུལ་ཏོ། །ཀྱེ་མ་ཡུམ་ཆེན་ཀུན་བཟང་ཉིད། །འཕྲད་གྱེས་གནད་དེ་ཤེས་བྱའི་ཐབས། །ཐེག་པ་དབྱེ་བ་དུ་ཙམ་ལགས། །བདག་ཅག་རྣམས་ལ་བསྟན་དུ་གསོལ། །ཞེས་ཞུས་པ་དང་། ཡང་སྟོན་པས་བཀའ་སྩལ་པ། ཉོན་ཅིག་རང་བྱུང་འཁོར་ཚོགས་རྣམས། །རང་ངོ་རང་གི་ཤེས་པ་དང་། །ཡང་དག་རྟོགས་པའི་གང་ཟག་ལ། །གྲུབ་མཐའ་ཞེས་བྱ་ཟབ་མོད་ཀྱང་། །ཕྱོགས་རྟོགས་ལོག་པར་རྟོགས་པ་དང་། །མ་རྟོགས་པའི་གང་ཟག་ལ། །ཇི་སྲིད་བློ་རྟོག་མ་ཟད་པར། །དེ་སྲིད་ཐེག་པ་ཟད་པ་མེད། །ཅི་ཕྱིར་རང་རང་བློ་ལ་འཆར། །དཔེར་ན་མུན་ལོང་གླང་བསྟན་མཚུངས། །འོན་ཀྱང་སེམས་ཅན་བློ་སྦྱར་ན། །མདོ་དང་རྒྱས་པ་ཆེན་པོ་དང་། །ཤིན་ཏུ་རྒྱས་པ་ཆེན་པོའོ། །ཤིན་ཏུ་རྒྱས་པ་ཆེན་པོ་ནི། །བརྒྱད་ཁྲི་བཞི་སྟོང་གཞལ་དུ་མེད། །ཚིག་མཐའ་བཅད་ན་ནམ་མཁའི་མཐའ། །དོན་གྱི་རྩ་བ་ཆོད་པར་གྱིས། །མདོ་རུ་བསྟན་པ་འདི་ལྟ་སྟེ། །སྟོན་པ་གསུམ་གྱི་གནས་གསུམ་དུ། །འདུལ་ཞིང་གསུམ་དང་འཁོར་གསུམ་ལས། །བསྟན་པ་གསུམ་སོགས་ལྔ་ལྔར་གསུངས། །དེ་ཡང་གདུལ་བྱའི་བློ་ངོས་ལས། །དབྱེར་མེད་ཡིན་ཏེ་སོ་སོ་མིན། །ཆགས་འཇིགས་སྟོང་དང་གནས་པའོ། །འདས་དང་མ་འོངས་ད་ལྟ་བ། །མ་ངེས་གཞི་དང་རབ་སྦྱར་ནས། །ཉོན་མོངས་བཞིའམ་མ་རིག་བཞི། །འདུལ་ཕྱིར་རྒྱུད་སྡེ་བཞི་གསུངས་ཤིང་། །འོན་ཏེ་དབང་པོ་ཆེ་ཆུང་འབྲིང་། །རེ་རེར་གསུམ་གསུམ་ཚུལ་སྟོན་ནས། །ཉན་ཐོས་རང་རྒྱལ་བྱང་སེམས་གསུམ། །དབང་པོ་ཐ་མའི་དོན་དུ་གསུངས། །ཐབས་མེད་ཤེས་རབ་འབྲེལ་པ་སྟེ། །ཚིག་གོ་དོན་མི་གོ་བ་ཡིན། །ཀྲི་ཡ་ཨུ་པ་ཡོ་ག་གསུམ། །གང་ཟག་དབང་པོ་འབྲིང་ལ་གསུངས། །ཐབས་ཡོད་ཤེས་རབ་མི་མཁས་པས། །མ་ནོང་ཡ་མ་ཟུང་ཚུལ་ལོ། །མ་ཧཱ་ཨ་ནུ་ཨ་ཏི་གསུམ། །གང་ཟག་དབང་པོ་རབ་ལ་གསུངས། །ཐབས་དང་ཤེས་རབ་གཉིས་ལྡན་ཏེ། །དཔེར་ན་དུག་སྦྲུལ་ནོར་བུ་འདྲ། །ཁེ་ཉེན་ཤིན་ཏུ་ཆེ་བ་སྟེ། །ཚིག་མེད་དོན་གྱི་ཁྱད་པར་འཕགས། །རྒྱས་པར་བཤད་ན་འདི་ལྟ་སྟེ། །འཁོར་བ་དང་ནི་མྱང་འདས་སོ། །འཁོར་བ་ལའང་གཉིས་ཡིན་ཏེ། །ལོག་ལྟ་དང་ནི་བདག་ལྟའོ། །ལོག་ལྟ་མུ་སྟེགས་ཐེག་པའོ། །འཇིག་ཚོགས་སུམ་བརྒྱའ་དྲུག་ཅུར་འདོད། །སུམ་བརྒྱ་པོ་དེ་དབྱིངས་སུ་ཐིམ། །དྲུག་ཅུ་བཤད་ན་འདི་ལྟ་སྟེ། །དང་པོ་གྲངས་ཅན་ཞེས་པ་ནི། །རྡུལ་དང་མུན་པ་སྙིང་སྟོབས་གསུམ། །ལྟ་བ་ལོག་པར་འཛིན་པ་སྟེ། །གཏི་མུག་དག་གིས་གཞི་བྱས་ནས། །འདོད་ཆགས་དག་གི་བདེ་བ་བསྐྱེད། །ཞེ་སྡང་དག་གི་བསྲུང་བཟློག་འདོད། །གཉིས་པ་བྱེ་བྲག་ཅེས་པ་ནི། །ཕྱིས་འབྱུང་སྡུག་བསྔལ་ཕྲ་མོར་ལྡང་། །དངོས་པོ་འཛིན་པ་རབ་བཟུང་ནས། །འདི་ནི་འཇིག་པའི་རྒྱུ་ཅན་ཏེ། །སྟོང་པ་ཅི་ཡང་མེད་པའོ། །ལུས་ནི་འབྱུང་བའི་བག་ལ་ཞ། །སེམས་ནི་ནམ་མཁའི་དབྱིངས་སུ་ཐིམ། །ཅང་མེད་སྟོང་པ་ཡུག་པའོ། །ཞེས་པ་ཆད་དེ་ཉིད་འདོད་དོ། །གསུམ་པ་ཀུན་མ་རིག་ཅེས་པ། །ལུས་ལ་སེམས་ནི་གང་ལ་གནས། །ལེགས་པར་བལྟས་པས་མ་རྙེད་དོ། །ལུས་འདི་འདུས་བྱས་ཆུ་བུར་ཡིན། །སེམས་ནི་ཡེ་མེད་སྟོང་པ་ཡིན། །ཞེས་པའི་གྲུབ་མཐའ་ལོག་པའོ། །བཞི་པ་ལོག་པར་སྨྲ་བ་ནི། །རྟོག་པ་རེ་ལ་སེམས་རེ་སྲིད། །སེམས་རེ་ལུས་རེ་ལེན་པ་སྟེ། །གྲངས་ཚད་མུ་མཐའ་ཡས་པར་འདོད། །ལྔ་པ་སྣ་མ་ཕུག་པ་ནི། །སྣང་བ་གནས་སྐབས་ཙམ་རྟག་ཀྱང་། །དོན་ལ་སྣང་བ་མི་རྟག་སྟེ། །ཕྱི་མ་ཕྱ་དང་དབང་ཕྱུག་དྲུང་། །རང་རང་གང་འདོད་སྐྱེ་བར་འདོད། །དྲུག་པ་མེ་ལྔ་བརྟེན་པ་ནི། །ཙནྡན་སྡོང་པོའི་ཏིལ་བཅོམ་པའི། །མེ་དཔུང་ཕྱོགས་དབུས་ལྔ་སྦར་ན། །དེ་ལ་སྟེང་གི་བར་སྣང་ལ། །ལུས་གནད་བཅས་ལ་འཕུར་བ་ལ། །ཕྱོགས་ནི་གང་གི་སྟེང་འགྱེལ་ལྟ། །ཡེ་ཤེས་ཕྱོགས་མཐུན་ཐོབ་པར་འདོད། །གལ་ཏེ་མཚམས་སུ་འབབ་པ་ན། །གྲུབ་པ་མ་ཐོབ་བསྐྱར་བ་ཡོད། །དེའི་གྲུབ་མཐའ་ལྔ་ཡོད་དེ། །བདུན་པ་མེ་རས་པ་ཞེས་པ། །རས་ཏིལ་མར་བཙོ་རང་ལུས་དཀྲིས། །ལྷའི་དྲུང་དུ་མེ་སྤར་བས། །འགོའི་ཚིག་འགྱེལ་སྤྲུལ་སྐུ་ཐོབ། །སྐེ་ཡང་ཚིག་འགྱེལ་ལོངས་སྐུ་ཐོབ། །སྙིང་ཁ་ཚིག་འགྱེལ་ཆོས་སྐུ་ཐོབ། །ངེས་པའི་སངས་རྒྱས་ཐོབ་འདོད་པའང་ཡོད། །བརྒྱད་པ་མདུང་རྩེ་གསུམ་པ་ནི། །མདུང་རྩེ་གསུམ་ནི་ས་ལ་བཙུག །དེའི་ནང་དུ་མཆོང་པ་ལ། །གཡས་སུ་ལོངས་སྐུ་གཡོན་སྤྲུལ་སྐུ། །དབུས་སུ་ཆོས་སྐུ་འདོད་པ་ཡོད། །དགུ་པ་ལོག་པ་ཅེས་པ་ནི། །བྲག་གིས་གཡང་ལ་མཆོང་པ་ཡིས། །ལུས་པོ་བརླག་ན་དངོས་ཎ་གྱིས། །སངས་རྒྱས་ཐོབ་པར་འདོད་པའང་ཡོད། །གཞན་ལ་ལོག་པར་སྤྱོད་ཅེས་པ། །རང་ལུས་ཤ་པགས་བྲག་བྱས་ནས། །དུར་བྱ་གཅན་གཟན་དག་ལ་སྟེར། །དེ་ལྟ་རྟེན་འབྲེལ་བརྟག་པའང་ཡོད། །ལོག་པ་དུད་འགྲོ་ཞེས་པ་ནི། །ཁྱིའི་ཆ་བྱད་ལྟ་བུར་བཞུགས། །རིལ་མ་ཟ་ཞིང་དཀའ་ཐུབ་སྤྱད། །བྱེད་པ་རྒྱུ་སྨྲས་ཞེས་པ་ནི། །ད་ལྟ་ཡུལ་ཞིང་གཡོག་འཁོར་སྤང་། །མཛེས་འཛོམ་བཀོད་ལེགས་ཐོབ་ཅེས་ན། །ཤི་ན་ཇི་ལྟར་ཡོད་པ་བཞིན། །ཕྱྭའི་དྲུང་དུ་སྐྱེས་འདོད་ཡོད། །བྱེད་པ་ལམ་ཁྱེར་ཞེས་པ་ནི། །ད་ལྟ་ཕྱག་མཆོད་གཙང་སྦྲ་བྱ། །ཤི་ན་སེམས་ཅན་ཐམས་ཅད་ཀྱི། །རང་ལ་དེ་བཞིན་རེ་བ་ཡོད། །རྟག་པ་དོན་འཚོ་ཞེས་པ་ནི། །རང་ཉིད་རྟག་པ་ཐེར་ཟུག་པ། །གཞན་ལ་ཐེར་ཟུག་ལྟ་བའང་ཡོད། །ཐེར་ཟུག་ཆེན་པོ་ཞེས་པ་ནི། །སེམས་ཀྱི་གཞི་ནི་རྟག་པ་ལ། །སྨོན་ལམ་དབང་གི་མ་ངེས་འདོད། །གནས་སྐབས་འགྱུར་སྨྲ་འདི་ལྟ་སྟེ། །སྟོང་པ་ཅི་ཡང་མེད་པ་ཉིད། །དགེ་མེད་སྡིག་མེད་ཟེར་བའང་ཡོད། །རྒྱུ་རྟག་འདོད་པ་འདི་ལྟ་སྟེ། །རང་གི་སྙིང་གི་དཀྱིལ་ཤེད་ན། །སེམས་ནི་ཆེ་ཆུང་སྲན་མ་ཙམ། །དཀར་འཚེར་སྣུམ་ལ་འདྲིལ་བ་ནི། །ཕའི་རྒྱུ་ལས་མ་བྱུང་ཞིང་། །མའི་རྐྱེན་ལས་མ་གྲུབ་འདོད། །རྒྱུ་རྐྱེན་གཙོ་བོར་འདོད་པ་ནི། །རླུང་བཟུང་གོས་ཀྱང་རབ་ཏུ་སྲབ། །ཐིག་ལེ་གཡོ་བའི་བདེ་བ་ལ། །ཡང་དག་དོན་ལ་འདོད་པའང་ཡོད། །གཅེར་བུར་ལྟ་བའི་གྲུབ་མཐའ་ནི། །ཚུལ་དང་རྒྱན་གོས་མི་འདོད་པས། །གཅེར་བུར་སྣ་ཚོགས་སྤྱོད་པར་འདོད། །བཟའ་བཏུང་གོན་པའི་གྲུབ་མཐའ་ནི། །ལུས་ཀྱི་སྤྱོད་ལམ་རབ་ཏུ་གཟབ། །ཁ་ནི་སྙན་པའི་སྒྲ་དབྱངས་སྒྲོགས། །བཟའ་བཏུང་དུས་མིན་རབ་ཏུ་སྤང་། །ངེས་ཅན་མ་ངེས་གཙོར་འདོན་ཡོད། །འབྲས་བུ་རྟག་པར་འདོད་པ་ནི། །རྒྱུ་ཞིང་མི་རྟག་སེམས་མ་གྲུབ། །འབྲས་བུ་ཕྱ་དང་དབང་ཕྱུག་འདོད །ངེས་པར་རེས་འཇོག་འདོད་པ་ཡོད། །ལམ་ལ་རྟག་པར་འདོད་པ་ནི། །རྒྱུ་ནི་སེམས་མེད་གང་ལ་བརྟག །འབྲས་བུ་གྲོགས་མེད་ག་ལ་ཐོབ། །གནས་སྐབས་རི་རབ་ཁོང་སེང་དུ། །དབང་ཕྱུག་དྲུང་དུ་རྟག་འདོད་ཡོད། །སྤྱོད་པ་རྟག་པར་འདོད་པ་ནི། །རྒྱུ་འབྲས་གཉིས་པོ་མ་གྲུབ་སྟེ། །སྤྱོད་པ་རྟག་པའི་སངས་རྒྱས་འདོད། །ངན་སྔགས་གཙོ་བོར་བྱེད་པ་ནི། །ངན་སྔགས་དག་གི་བསད་ཚད་རྣམས། །རང་གི་འཁོར་དུ་སྐྱེ་བར་འདོད། །ནག་པོ་གཅིག་ཚུགས་ཞེས་བྱ་བ། །བསད་ཚད་ཤ་ཁྲག་རང་གིས་ཟོས། །རང་གིས་འཁོར་དུ་སྐྱེ་བར་འདོད། །མོ་དང་པྲ་ལ་གཙོར་བྱེད་པ། །ཐུན་མོང་དངོས་གྲུབ་འདོད་པའང་ཡོད། །རྫུ་འཕྲུལ་ཕྲ་མོ་གཙོ་བྱེད་ནི། །འཇིག་རྟེན་འདིའི་དམག་དཔུང་རྣམས། །སྒྱོག་དང་ཆོ་འཕྲུལ་གཙོ་བོར་སྟོན། །ཐབས་ཀྱིས་བཟློག་པར་འདོད་པའོ། །རྩོད་པ་ལྷུར་ལེན་ཅེས་པ་ནི། །རང་གི་བདེ་ཆེན་ཁོང་དུ་བཅུག །ཕ་རོལ་སུན་འབྱིན་པའང་ཡོད། །ཕྱི་མའི་དོན་དགོས་དྲན་གྱུར་ཀྱང་། །ཚེ་འདིའི་ཆེ་ཐབས་གྲགས་པ་བསྒྲུབ། །རྒྱང་འཕེན་པ་ཞེས་བྱ་བ་འང་ཡོད། །རང་ལ་བདེན་པ་འོག་ཏུ་སྤས། །གཞན་གྱི་ཡོན་ཏན་ཁྱད་བསད་ཅིང་། །ཟོབ་རྫུན་དག་གི་གྲུབ་མཐའ་འང་ཡོད། །ལ་ལས་ཆ་ལུགས་སྣ་ཚོགས་ཀྱིས། །དོན་ཚོལ་སངས་རྒྱས་རེ་བའང་ཡོད། །སྐྲའི་རལ་པ་མང་པོ་བཅིངས། །དེ་ལ་དོན་ཚོལ་རེ་བའང་ཡོད། །རས་རྐྱང་གཅིག་གིས་དྲོད་སྐྱེས་ཟེར། །དེ་ལ་དོན་རྩོལ་རེ་བ་འང་ཡོད། །ཕྱག་མཚན་ཁ་ཊྭཱྃ་ཅང་རེ་ཐོགས། །ང་ནི་སྤྲུལ་བ་ཡིན་ནོ་ཟེར་བ་འང་ཡོད། །ཁ་ནས་བཙོག་སྡོམ་སྤྱོད་ལོག་བྱེད། །ཞིག་པོ་ཡིན་ནོ་ཟེར་བའང་ཡོད། །རང་གི་རིག་པས་གཞན་སུན་འབྱིན། །མཁས་པ་ཡིན་པར་འདོད་པ་ཡོད། །ལྐོག་ཏུ་ཐིག་ལེའི་འབྲས་བུ་ཕྱུང་། །བཙུན་པ་ཡིན་ནོ་ཟེར་བའང་ཡོད། །ཁ་ལྟ་བཟང་པོ་ཁ་རུ་འདོར། །དོན་གྱི་སྤྱོད་པ་ལོག་པར་སྤྱོད། །བཟང་པོ་ཡིན་ནོ་ཟེར་བའང་ཡོད། །ཆ་མཐུན་གོལ་བའི་མུ་སྟེགས་ནི། །ནང་པ་སངས་རྒྱས་ཚུལ་བཟུང་ནས། །ལྟ་བ་ཕྱི་པར་གོལ་བ་ནི། །འཇིག་རྟེན་འདི་ན་ཤིན་ཏུ་མང་། །མངོན་སྣང་སེམས་ཀྱི་ཆོ་འཕྲུལ་ཡིན། །དེ་ལ་བཅོས་ཐབས་མེད་པར་འདོད། །ཆོ་འཕྲུལ་མཐུན་པའི་གྲུབ་མཐའ་འོ། །འཁྲུལ་པའི་སྣང་བ་ད་ལྟ་བདེན། །དོན་དམ་རྫུན་ནོ་ཟེར་བའང་ཡོད། །ཞེ་སྡང་སྐྱེས་པས་དགྲ་ཚར་གཅོད། །ཞེ་སྡང་གཙོ་བོར་འདོན་པའང་ཡོད། །སྣང་བ་སེམས་ཀྱི་ཆ་བྱད་དུ། །མི་འགག་མི་སྤང་བའང་ཡོད། །ལྷ་སྐུ་བྷཻཾ་པ་མཐར་ཐུག་ཏུ། །ལྷ་དེར་བདག་ཉིད་འགྱུར་རེ་འང་ཡོད། །ཁ་ཅིག་མུ་སྟེགས་ང་ཡིན་ཅེས། །ཁས་བླངས་གཙོ་བོར་འདོན་པ འང་ཡོད། །ཀ་ནི་པ་ནི་འཁོར་འདས་གཉིས། །གང་ཡང་མེད་དོ་ཟེར་བའང་ཡོད། །སྣང་བ་ཟད་ཀྱིས་དོགས་ནས་ནི། །ཚད་རང་འཛིན་པ་དག་ཀྱང་ཡོད། །བྷིར་ར་པ་ཞེས་བྱ་བ་ནི། །དོན་ལ་ཁྱད་པར་མེད་མོད་ཀྱང་། །རྩོམ་མེད་ཐུན་མོང་ཁྱད་འདོན་པ་འང་ཡོད། །ཀ་བྷི་ཤ་ཞེས་བྱ་བ་ནི། ཐུན་མོང་འདི་རྣམས་དོན་མེད་ཡིན། །དོན་ལ་ཁྱད་པར་གཞན་བས་ཆེ། །ཞེས་པའི་གྲུབ་མཐའ་འདོད་པ་ཡོད། །ཀ་བྷི་ཞེས་པའི་གྲུབ་མཐའ་ནི། །དབུགས་ཆད་བར་དུ་ཁྱད་པར་ཡོད། །དེ་ནས་དགེ་སྡིག་མེད་པར་འདོད། །སང་གྷ་ཏ་པ་ཞེས་པ་ནི། །དགེ་འདུན་ཆ་ལུགས་བཟུང་བ་ཡིས། །སྤྱོད་པ་ཅི་ཡང་བྱས་པས་ཆོག །ཟེར་བ་འམ་གྲུབ་མཐའ་འདོད་པའང་ཡོད། །ཤ་རི་ཀ་པ་ཞེས་པ་ནི། །ཐམས་ཅད་མི་རྟག་མི་བདེན་ཏེ། །རི་རབ་རིའི་རྩེ་མོ་ནས། །ཕྱ་དང་དབང་ཕྱུག་ཆེན་པོ་ཡོད། །དེ་མཆོད་དྲུང་དུ་བདག་ཀྱང་སྐྱེ། །ངེས་པར་དེ་བདེན་འདོད་པའང་ཡོད། །དེ་ལྟར་འཇིགས་ཚོགས་ལྟ་བ་རྣམས། །མངས་ཀྱང་རྟག་ཆད་གཉིས་སུ་འདུས། །དུས་མཐར་ནང་པའི་ཚུལ་བཟུང་ནས། །ལྟ་བ་ལོག་པ་དུ་མ་ཡིས། །ཤཱཀྱའི་བསྟན་པ་འཇིག་པར་བྱེད། །རྟག་ཆད་གཉིས་སུ་འཛིན་པར་འགྱུར། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། མུ་སྟེགས་ཀྱི་གྲུབ་མཐའ་བསྟན་པའི་ལེའུ་སྟེ་སོ་དྲུག་པའོ། །྅྅྅ ཡང་མཁའ་འགྲོ་མ་རྣམས་ཀྱི་འདི་སྐད་ཅེས་བསྐུལ་ཏོ། །ཀྱེ་ཧོ་ཡུམ་ཆེན་ཀུན་ཏུ་བཟང་། །ནང་པའི་ཐེག་པ་ཇི་སྙེད་པ། །དགུ་རུ་འདུས་ཚུལ་གསུངས་དུ་གསོལ། །ཅེས་ཞུས་པ་དང་། ཡང་སྟོན་པས་བཀའ་སྩལ་པ། ཉོ ན་ཅིག་རིགས་གདངས་རིག་འཁོར་རྣམས། །སྤྲུལ་སྐུའི་བསྟན་པ་གསུམ་ཡིན་ཏེ། །ཐོག་མར་ཉན་ཐོས་ཐེག་པ་ནི། །འཇུག་སྒོ་བདེན་པ་བཞི་ནས་འཇུག །ཉན་ཐོས་ཕྱིའི་འཇུག་སྒོ་ཡིན། །དབྱེ་ན་བྱེ་བྲག་མདོ་སྡེ་པའོ། །བྱེ་བྲག་པའི་ལྟ་བ་ནི། །ཕྱི་ལྟ་ཕུང་ཁམས་ཕྱི་ནང་ཀུན། །གཡག་རྔ་ནེའུ་སེང་ཚུལ་དུ་འདོད། །རང་གི་བློ་ཡིས་བལྟས་གྱུར་ན། །རྡུལ་དང་རྡུལ་ཕྲན་བཞིན་དུ་འདོད། །སྟོང་བ་ཉིད་དུ་བྷཻཾ་པའོ། །མདོ་སྡེ་པའི་ལྟ་བ་ནི། །ཁ་འདོན་བྱེད་པའི་རང་བཞིན་དང་། །ཐོས་པ་བསམ་བ་བྷཻཾ་པ་གསུམ། །ཤེས་རབ་རྣམ་གསུམ་དགོངས་པ་ཡིན། །ས་བཅུའི་འབྲས་བུ་ཐོབ་པར་འདོད། །ཉན་ཐོས་སྤྱིའི་བྷཻཾ་པ་ནི། །བདེན་བཞི་རེ་ཞིང་ཉམས་ལེན་ནི། །འགོག་པ་བྷཻཾ་དང་ཀུན་འབྱུང་སྤང་། །འགོག་པ་བྷཻཾ་ལུགས་འདི་ལྟ་སྟེ། །ཕྱིའི་འབྱུང་བ་འདི་དག་ལ། །མི་ཆགས་གནས་སུ་བཞུགས་ནས་ནི། །དང་པོ་ཟས་ལ་གོམས་པར་བྱེད། །དེ་ནས་བསམ་གཏན་ཏིང་འཛིན་བྷཻཾ། །བསམ་ནས་མི་རྟག་གཅིག་ཚུགས་བྷཻཾ། །རྒྱལ་བ་བྱམས་པའི་བསྟན་པ་ལ། །འབྲས་བུ་ཐོབ་པར་འདོད་པའོ། །ཀུན་འབྱུང་བྷཻཾ་པ་འདི་ལྟ་སྟེ། །ཟས་ཀྱི་འདུ་ཤེས་བྲལ་བ་དང་། །ཀུན་འབྱུང་རྒྱུན་ནི་ཆད་བར་འདོད། །ས་ལམ་བྷཻཾ་པ་འདི་ལྟ་སྟེ། །དུག་གསུམ་གཉེན་པོ་བྷཻཾ་བྱེད་ཅིང་། །དེ་བཞིན་ལམ་གྱི་བྷཻཾ་པ་ནི། །སྡུག་བསྔལ་སྤང་བར་འདོད་པ་སྟེ། །འདོད་ཆགས་གཉེན་པོ་དཔྲལ་བའི་དཀྱིལ། །ཀེང་རུས་དཀར་པོ་མཐེ་བོང་ཙམ། །དེ་ནས་མགོ་ཙམ་རང་ལུས་ཙམ། །དེ་ནས་སྟོང་གསུམ་དཀར་པོ་བྷཻཾ། །འདོད་ཆགས་སྡུག་བསྔལ་སྤང་བར་འདོད །གཏི་མུག་གཉེན་པོ་སྤྱི་བོའ་གཙུག །ཨེ་དམར་གསལ་ལ་དངས་པ་ནི། །རིམ་གྱིས་ཆེན་པོར་བྷཻཾ་པ་ཡིན། །གཏི་མུག་སྡུག་བསྔལ་སྤང་བར་འདོད། །དེ་ལྟར་རྣམ་པ་བཞི་པོ་ཡིས། །འབྲས་བུ་རྣམ་པ་བཞི་ཐོབ་སྟེ། །འགོག་པ་བྷཻཾ་པས་རྒྱུན་ཞུགས་ཐོབ། །ས་ནི་དང་པོ་རབ་དགའ་ནོན། །དེ་ནས་ས་བདུན་མན་ཆད་དོ། །ཀུན་འབྱུང་བྷཻཾ་པའི་འབྲས་བུ་ལ། །ལན་གཅིག་ཕྱིར་མི་ལྡོག་པ་སྟེ། །ས་བརྒྱད་མན་ཆད་ནོན་པ་སྟེ། །ལམ་ལ་བྷཻཾ་པས་དགྲ་བཅོམ་ཐོབ། །ས་བཅུ་མཐར་ཕྱིན་ཐོབ་པའོ། །ས་དང་ལམ་ལ་གནས་པའི་ཚེ། །ཉན་ཅིང་ཐོས་པ་གཙོ་བོར་བྱེད། །ས་བདུན་མན་ཆད་སེམས་དཔའ་ནི། །རང་རང་དཔོན་ལ་ཉན་པའོ། །ས་བརྒྱད་མན་ཆད་སེམས་དཔའ་ནི། །སྤྲུལ་པའི་སྐུ་ལ་ཉན་པའོ། །དེ་ཡང་དངོས་པོར་མཐོང་བ་མེད། །དེ་རྣམས་དུས་ན་དྲུག་ཡིན་ཏེ། །འཇུག་སྒོ་འཕགས་པའི་བདེན་པ་བཞི། །དེ་ཡང་སྡུག་བསྔལ་ཤེས་པར་བྱས། །ཀུན་འབྱུང་བ་ཉིད་སྤང་བར་བྱ། །འགོག་པ་དག་ཉིད་མངོན་དུ་བྱས། །ལམ་ནི་བྷཻཾ་པར་བྱ་བའོ། །དེ་དག་ཀུན་གྱི་འབྲས་བུ་ནི། །རབ་ནི་འདུ་ཤེས་མེད་པའོ། །བསྐལ་པ་གྲངས་མེད་གསུམ་མམ་ལྔ། །སངས་རྒྱས་ཐ་མའི་དྲུང་ཉིད་དུ། །སངས་རྒྱས་ཐོབ་པར་འདོད་པ་ཡིན། །འབྲིང་ནི་བསམ་གཏན་བཞིའི་ལྷ། །ཐ་མ་འདོད་པའི་ཁམས་སུ་སྐྱེ། །དེ་ལྟ་བུའི་ཐེག་པ་ཡང་། །ཀུན་བཟང་ངའི་རོལ་པའི་རྩལ། །རྫོགས་ཆེན་ཨ་ཏིའི་ལམ་སྟེགས་ཡིན། །མ་སྤང་རོལ་པའི་རྒྱན་དུ་མཛེས། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཐོག་མར་ཉན་ཐོས་ཀྱི་ཐེག་བ་བསྟན་པའི་ལེའུ་སྟེ་སོ་བདུན་པའོ། །྅྅྅ ཡང་སྟོན་པས་བཀའ་སྩལ་པ། ཉོན་ཅིག་རིག་གདངས་རྩལ་འཁོར་རྣམས། །རང་རྒྱལ་ཐེག་པའི་དབྱེ་བ་ནི། །འཇུག་སྒོ་རྟེན་འབྲེལ་བཅུ་གཉིས་ཏེ། །དེའི་དོན་རྟོགས་སངས་རྒྱས་ལ། །དོན་མ་རྟོགས་ན་འཁོར་བའོ། །དབང་པོ་རྣོ་རྟུལ་གཉིས་ཡིན་ཏེ། །རྣོན་པོ་བསེ་རུ་ལྟ་བུ་དང་། །རྟུལ་བ་རང་སངས་རྒྱས་ཡིན་ནོ། །བསེ་རུས་ནང་གི་རྟེན་འབྲེལ་རྟོགས། །མ་རིག་པ་ལ་འདུ་བྱེད་འབྱུང་། །དེ་ལས་རྣམ་ཤེས་མིང་དང་གཟུགས། །སྐྱེ་མཆེད་དྲུག་དང་རེག་པ་དང་། །ཚོར་བ་སྲེད་པ་ལེན་པ་དང་། སྲིད་པ་སྐྱེ་བ་རྒ་ཤི་དང་། །དེ་ལས་འཆི་བ་རྒྱུ་རྐྱེན་བརྟགས། །འཕྲལ་གྱིས་ལེགས་ལེགས་ལས་ཀུན་བརྟགས། །ཡང་དག་དེའི་དོན་མ་རྟོགས། །སྔོན་ཆད་ཁམས་གསུམ་འཁོར་བར་ལྟུང་། །དེ་ནས་དེའི་དོན་རིག་པས། །མ་རིག་རིག་པར་རང་ངོ་ལོག །འཁོར་བའི་རྩ་བ་དེས་ཆོད་དོ། །རང་སངས་རྒྱས་ཀྱི་ལྟ་བ་ནི། །ཕྱིའི་གཟུང་ཡུལ་ལྟ་བར་རྟོགས། །འཛིན་པའི་རང་བཞིན་ཡོད་པར་རྟོགས། །འཛིན་པ་བརྗོད་དུ་མེད་པ་སྟེ། །གང་ཟག་དག་གིས་རྟོགས་པར་འདོད། །ལྟ་བ་གང་ཟག་བདག་མེད་རྟོགས། །ཚུལ་ཁྲིམས་ཉིས་བརྒྱའ་ལྔ་བཅུ་བསྲུང་། །ཕྲིན་ལས་བདག་དོན་འབའ་ཞིག་བྱེད། །བྷཻཾ་པ་དྲན་མེད་སྒོ་དྲུག་བགགས། །བསེ་རུ་ལྟ་བུ་གཅིག་པུ་དང་། །ནེ་ཙོ་ལྟ་བུ་ཁྱུར་ལྡིང་བ། །རང་སངས་རྒྱས་ཀྱི་ས་ཐོབ་འདོད། །རབ་ནི་ཚངས་པ་མདུན་ན་འདོན། །འབྲིང་ནི་འདུ་ཤེས་མེད་པ་བསྒྲོད། །ཐ་མ་འདོད་པའི་ཁམས་ན་འཁྱམས། །དེ་ལྟ་བུའི་ལམ་སྟེགས་དེ། །དབང་པོའི་ཁྱད་ཀྱིས་རང་ལ་ཤར། །ཀུན་བཟང་ངའི་ཀློང་ནས་གསལ། །སྣང་འགག་མེད་པ་ཨེ་མ་ཧོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རང་རྒྱལ་གྱི་ཐེག་པ་བསྟན་པའི་ལེའུ་སྟེ་སོ་བརྒྱད་པའོ། །྅྅྅ ཡང་སྟོན་པས་བཀའ་སྩལ་པ། །ཉོན་ཅིག་རིག་པའི་རྩལ་འཁོར་རྣམས། །བྱང་ཆུབ་སེམས་དཔའི་ཐེག་པ་ནི། །འཁོར་འདས་སེམས་རྩལ་མ་སྒྲིབ་སྟེ། །སེམས་ཅན་ཀུན་ལ་ཉོན་ཡིད་འདི། །སྐད་ཅིག་མི་རྟག་ལུང་མ་བསྟན། །གཞི་ནི་མ་བསྒྲིབ་འགྱུར་བ་ཡིས། །ལམ་ནི་གཞན་དབང་དག་མ་དག །མ་རིག་གཞན་དབང་འཁོར་བར་འཁྱམས། །རིག་ན་རང་དབང་སངས་རྒྱས་འདོད། །ལམ་མ་འགག་པ་ཚོགས་དྲུག་ཡུལ། །ཉོན་མོངས་རྒྱུ་རྐྱེན་དབང་ཤོར་བས། །རང་ཤེས་རང་གི་མ་རིག་པ། །ཁྱི་རྒན་རུས་པ་མུར་བའི་ཚེ། །རྐན་ཕུག་ཁྲག་གིས་བྲོ་བ་ལ། །རུས་པའི་ལྷ་བར་སེམས་པ་ལྟར། །རྐྱེན་གྱི་ལས་བསགས་ལུས་ངན་ལེན། །མུ་མེད་འཁོར་བར་གཞན་དབང་ངོ་། །དག་པའི་གཞན་དབང་འདི་ལྟ་སྟེ། །རྩ་བ་སྨོན་འཇུག་སེམས་བསྐྱེད་དང་། །ཚུལ་ཁྲིམས་ལ་སོགས་ཐོབ་བྱ་རྣམས། །མཁན་པོ་དག་ལ་རག་ལུས་སོ། །གཞན་དབང་དག་ལ་རག་ལུས་སོ། །རང་ཤེས་བསྒྱུར་བའི་ཐབས་དག་ཀྱང་། །གཞན་དབང་དག་ལ་རག་ལུས་སོ། །འབྲས་བུ་ཡོངས་གྲུབ་བྱ་བ་དེ། །བདག་མེད་གཉིས་པོ་མ་རྟོགས་ན། །འཁོར་བ་ཡོངས་གྲུབ་ཆེན་པོའོ། །བདག་མེད་གཉིས་སྟོང་ཉམས་ལེན་འཕེལ། །མྱང་འདས་ཡོངས་གྲུབ་ཆེན་པོའོ། །འཇུག་པ་སྒོ་ནི་བདེན་པ་གཉིས། །བསྲུང་བའི་དམ་ཚིག་ཉིས་བརྒྱའ་ལྔ། །ཕྲིན་ལས་གཞན་དོན་སུམ་ཅུ་བདུན། །བསྒྲུབ་ཐབས་འཕྲིན་ལས་ས་བཅུ་བསྒྲུབ། །དབང་པོ་ཡང་རབ་མི་ཚེ་ལྔ། །དབང་པོ་འབྲིང་གི་བསམ་གཏན་བཞི། །དབང་པོ་ཐ་མ་འདོད་པའི་ཁམས། །དེ་ལྟ་བུའི་འཇུག་ལམ་ནི། །ཀུན་བཟང་ངའི་ཡེ་ཤེས་བཤད་པ་མེད། །རང་རང་སྣང་ངོར་ཤར་བ་ཡིན། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སྤྲུལ་སྐུས་ཐེག་པ་འོག་མ་གསུམ་བསྟན་པའི་ལེའུ་སྟེ་སོ་དགུ་པའོ། །྅྅྅ དེ་ནས་ཡང་སྟོན་པས་བཀའ་སྩལ་པ། ཨེ་མ་རིག་གདངས་འཁོར་རྣམས་ཉོན། །དབང་པོ་འབྲིང་གི་སྣང་ཚུལ་ནི། །ལོངས་སྐུའི་ཐེག་པ་སྡེ་གསུམ་རྣམས། །རིམ་པར་བཤད་ཀྱི་གུས་པས་ཉོན། །ཐོག་མར་ཀྲི་ཡའི་ཐེག་པ་ནི། །གཞི་ནི་རང་བཞིན་དག་པ་ལ། །ལམ་ནི་དག་པ་གསུམ་ན་འཇུག །འབྲས་བུ་རིག་གསུམ་མགོན་པོ་ཐོབ། །དག་པ་གསུམ་པོ་འདི་ལྟ་སྟེ། །ཕྱི་ནི་གཟའ་སྐར་དུས་ཚིགས་བཟང་། །ནང་དག་ཁྲུས་དང་གཙང་སྦྲ་བྱེད། །རྫས་དང་ཡོ་བྱད་གཙང་མ་སོགས། །བསྲུང་བའི་དམ་ཚིག་འདི་ལྟ་སྟེ། །སྲོག་གཅོད་མ་བྱིན་ལེན་པ་དང་། །འདོད་ལོག་རྫུན་བཞི་རྩ་བཞི་ཡིན། །དཀོན་མཆོག་གསུམ་ནི་མཆོད་པ་དང་། །དྲིན་ཆེན་བླ་མ་ཕུད་དུ་ཁུར། །མཆེད་གྲོགས་དག་ལ་བརྩེ་བ་དང་། །མི་མཐུན་ཕྱོགས་ཀྱི་ཁ་ཟས་སྤང་། །ཁྱད་པར་ཉ་ཤ་རུལ་བ་དང་། །ཤ་ཆང་སྒོག་གཙོང་སྤང་བའོ། །མཆོད་རྫས་རྙིང་ལ་མི་འགོང་ཞིང་། །བཟའ་བར་བྱེད་པ་མ་ཡིན་ནོ། །ཕྱི་ནང་ཁྲུས་ལ་བརྩོན་པ་དང་། །ལུས་དང་སྤྱོད་པ་དག་པར་གཟབ། །དམ་ཚིག་མ་ཉམས་སྤྱོད་པ་ན། །རྡོ་རྗེ་པདྨ་དེ་བཞིན་འགྲུབ། །ལྷ་ལ་རྗེ་ཁོལ་ཚུལ་དུ་ལྟ། །རྒྱུའི་རྐྱེན་གྱི་དུས་ཉིད་དུ། །དད་བརྩོན་སྐྱེས་ནས་འཁོར་བར་སྐྱོ། །ཟག་བཅས་བདེ་བ་མ་ཞེན་གཅེས། །བདག་པོའི་རྐྱེན་དུ་དུས་ཉིད་དུ། །ཡང་དག་དགེའ་བའི་བཤེས་གཉེན་མཇལ། །དེ་འི་བྱིན་རླབས་ཞུས་པ་གཅེས། །དམིགས་པའི་རྐྱེན་གྱི་དུས་ཉིད་དུ། །སྡེ་སྣོད་ཟབ་མོའི་དོན་ལ་ལྟ། །མ་འཁྲུལ་ཉམས་སུ་ལེན་པ་གཅེས། །དེ་མ་ཐག་པའི་རྐྱེན་གྱི་དུས། །དོན་རྣམས་ཐམས་ཅད་གཏན་ལ་དབབ། །སྒྲོ་འདོགས་ཐེ་ཚོམ་གཅོད་པ་གཅེས། །དབང་པོ་ཡང་རབ་རིག་གསུམ་མགོན། །དབང་པོ་འབྲིང་ནི་བསམ་གཏན་བཞིས། །ཐ་མ་འདོད་པའི་ཁམས་སུ་འཁྱམས། །དེ་ལྟར་ཐེག་པའི་འཇུག་ལམ་ཡང་། །ཀུན་བཟང་ངའི་རོལ་པའི་རྩལ། །ངང་ངམ་ཤུགས་ལས་ཤར་བ་ཡིས། །ཉི་མའི་འོད་ལྟར་རང་བརྒྱན་ནོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཀྲི་ཡའི་ཐེག་པ་བསྟན་པའི་ལེའུ་སྟེ་བཞི་བཅུ་ཐམ་པའོ། །྅྅྅ ཡང་སྟོན་པས་བཀའ་སྩལ་པ། ཉོན་ཅིག་རང་རྩལ་རིག་འཁོར་རྣམས། །ཨུ་པའི་ཐེག་པ་འདི་ལྟ་སྟེ། །གཞི་ནི་ཡོ་ག་དག་དང་མཚུངས། །ལམ་ནི་རྩོལ་བ་དག་ལ་རག །འབྲས་བུ་མཐར་ཐུག་དག་པའོ། །དེ་ནི་ལམ་ནི་རྣམ་པ་གཉིས། །རིག་པ་རང་གི་རྩོལ་བ་དང་། །མ་རིག་པའི་རྩོལ་བའོ། །མ་རིག་པ་ལ་སྣང་ཡུལ་དྲུག །ལས་དང་ཉོན་མོངས་སྣ་ཚོགས་པས། །ལུས་ངག་ཡིད་ཀྱི་རྩོལ་བ་བསགས། །འབྲས་བུ་འཁོར་བར་མཐར་ཐུག་གོ། །རིག་པ་རང་རྩལ་འདི་ལྟ་སྟེ། །ལྟ་བ་ཡར་ལ་ཡོ་གར་སྤྱོད། །སྤྱོད་པ་མར་ལ་ཀྲི་ཡར་སྤྱོད། །བར་དུ་བྷཻཾ་པ་གཙོ་བོ་ཡིས། །ཆོ་འཕྲུལ་བཞི་བྷཻཾ་རིགས་ལྔ་ལྷ། །དཔོན་གཡོག་ཚུལ་དུ་བསྐྱེད་པར་འདོད། །དེ་ལ་ཕྱག་མཆོད་བསྙེན་བསྒྲུབ་བྱ། །འབྲས་བུ་རིགས་བཞིར་སྟེར་བར་རེ། །འབྲས་བུ་རིགས་གསུམ་མགོན་པོ་དང་། །རྡོ་རྗེ་འཆང་ལ་མཐར་ཐུག་གོ། །དབང་པོ་འབྲིང་ནི་བསམ་གཏན་བཞིས། །ཐ་མ་འདོད་པའི་ཁམས་སུ་འཁྱམས། །ཐེག་པའི་འཇུག་ལམ་དེ་ཉིད་ཀྱང་། །ཀུན་བཟང་ངའི་བྷ་གའི་ཀློང་། །བདེ་ཆེན་ཉི་མའི་འོད་དུ་འབར། །མ་སྤང་རོལ་པ་རྒྱན་དུ་མཛེས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཨུ་པའི་ཐེག་པ་བསྟན་པའི་ལེའུ་སྟེ་ཞེ་གཅིག་པའོ། །྅྅྅ ཡང་སྟོན་པས་བཀའ་སྩལ་པ། ཉོན་ཅིག་རིག་པའི་རྩལ་འཁོར་རྣམས། །ཡོ་གའི་ཐེག་བ་འདི་ལྟ་སྟེ། །གཞི་ནི་མཉམ་ཉིད་ཆེན་པོ་ལ། །ལམ་ནི་ཆོ་འཕྲུལ་ཆེན་པོ་སྟེ། །འབྲས་བུ་ཕུལ་ཕྱིན་ཆེན་པོའོ། །མཉམ་ཉིད་གཞི་ལ་དབྱེ་བ་མེད། །ལམ་ལ་རྣམ་པ་གཉིས་ཡིན་ཏེ། །སྣང་བ་སྣ་ཚོགས་རང་སེམས་རྩལ། །མ་རིག་ཆོ་འཕྲུལ་ཉོན་མོངས་ཤར། །དེའི་ཡིན་ཚུལ་དོན་མ་རྟོགས། །འབྲས་བུ་འཁོར་བར་ཕུལ་དུ་ཕྱིན། །ཡང་དག་ཆོ་འཕྲུལ་དེ་རིག་ན། །བདེན་པ་གཉིས་ལ་གཞི་བྱས་ན། །མངོན་བྱ་ལྔ་པོ་ཉམས་སུ་ལེན། །འཇིག་རྟེན་འདས་དང་མ་འདས་ཀྱིས། །དཀྱིལ་འཁོར་དྲུག་ཕྲག་གཉིས་སོགས་རྣམས། །བདག་ཉིད་དམ་ཚིག་སེམས་དཔའ་དང་། །ལྷ་ཚོགས་ཡེ་ཤེས་སེམས་དཔའ་རྣམས། །སྤུན་དང་གྲོགས་ཀྱི་ཚུལ་དུ་འདོད། །འབྲས་བུ་དེ་རྟོགས་ཆོ་འཕྲུལ་ལ། །ཀུན་རྫོབ་སྐུ་དང་ཡེ་ཤེས་ཚུལ། །རྣམ་པ་གཉིས་སུ་སངས་རྒྱས་འདོད། །དེ་ཉིད་ཕུལ་ཕྱིན་འབྲས་བུ་ལས། །མི་ཚེའ་གསུམ་ལ་སྟུག་བཀོད་དུ། །ཡང་དག་རྫོགས་སངས་རྒྱས་པར་འདོད། །རྩ་བའི་དམ་ཚིག་འདི་ལྟར་སྲུང་། །དཀོན་མཆོག་མགོ་དང་བླ་མ་མིག །མཆེད་ལྕམ་ཡན་ལག་ལྟ་བུར་བཙའ། །ཐེག་འོག་ལུང་གཅིག་ཆུ་མི་འཐུང་། །བྱང་སེམས་མ་སྤང་བླ་མ་བཀུར། །རྡོ་རྗེ་སྤུན་ལ་ཐོད་ལྟར་བསྟོད། །དབང་མ་ཐོབ་ལ་ཆོས་མི་འཆད། །ཐེག་པ་དམན་ལ་མི་སྨད་ཅིང་། །རྡོ་རྗེ་ དྲིལ་བུ ་འཆང་བ་ཡིན། །ཡན་ལག་དམ་ཚིག་འདི་ལྟར་སྲུངས། །བླ་མ་དང་ནི་མཆོད་རྟེན་གྱིས། །དྲི་མ་དག་ལ་འགོང་མི་བྱ། །དལ་མི་རྫི་ཞིང་ཆང་ཉིད་སྤང་། །གསང་སྔགས་སྤྱོད་པ་བབ་ཆོལ་སྤང་། །དབང་པོ་ཡང་རབ་ཚེ་གཅིག་ལ། །ཚེའི་རིག་འཛིན་ཆེན་པོ་ཐོབ། །དབང་པོ་འབྲིང་ནི་མི་ཚེ་གཉིས། །ཐ་མར་བསམ་གཏན་བཞི་པོར་སྐྱེས། །དེ་ལྟ་བུའི་ཐེག་པ་ཡང་། །ཀུན་བཟང་བྷ་གའི་ཆོ་འཕྲུལ་ལས། །གཞན་ཞིག་དག་ན་ཡོད་པ་མིན། །མ་སྤང་རོལ་པའི་རྒྱན་དུ་མཛེས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡོ་གའི་ཐེག་པ་བསྟན་པའི་ལེའུ་སྟེ་ཞེ་གཉིས་པའོ། །྅྅྅ ཡང་སྟོན་པས་བཀའ་སྩལ་པ། ཉོན་ཅིག་གདངས་རྩལ་རིག་འཁོར་རྣམས། །ཆོས་སྐུའི་ཐེག་པ་སྡེ་གསུམ་ལས། །གསང་སྔགས་ནང་པ་བླ་མེད་ཀྱིས། །མ་ཧཱའི་ཐེག་པ་འདི་ལྟ་སྟེ། །གཞི་ནི་རྣམ་དག་དབྱིངས་ཆེན་ལས། །ལམ་ནི་རོལ་པ་མ་འགགས་པ། །འབྲས་བུ་སྐུ་གསུམ་མཐར་ཕྱིན་ནོ། །གཞི་ལ་དབྱེ་བ་མེད་པ་སྟེ། །ལམ་ལ་རོལ་པ་རྣམ་གཉིས་ཡིན། །མ་རིག་པ་ནི་ཉོན་མོངས་རོལ། །དེའི་ལས་ངན་སྣ་ཚོགས་བསགས། །ལས་དང་ཉོན་མོངས་མཐར་ཕྱིན་པས། །འཁོར་བའི་སྡུག་བསྔལ་ཆེན་པོའོ། །དེ་ཉིད་བྱང་བར་བྱེད་པའི་ཐབས། །རྒྱུད་ལུང་མན་ངག་ཐུགས་སུ་ཆུད། །ལྟ་བ་བདེན་པ་དབྱེར་མེད་རྟོགས། །བྷཻཾ་པ་ཏིང་འཛིན་རྣམ་གསུམ་བྷཻཾ། །སྤྱོད་པ་འཁོར་བའི་ཆོས་ཉི་ཤུ། །མ་སྤང་རོལ་པར་སྤྱོད་པ་སྟེ། །ཉོན་མོངས་རྣམ་པ་ལྔ་མི་སྤང་། །དམ་ཚིག་བདུད་རྩི་ལྔ་ལ་སྤྱོད། །བདག་གཞན་ཐམས་ཅད་མཉམ་པར་སྦྱོར། །འདོད་ཡོན་རྣམ་པ་ལྔ་མི་སྤང་། །ཡེ་ཤེས་རྣམ་པ་ལྔ་ལྡན་འདོད། །དེ་ལ་ཡུམ་གྱི་མཁའ་ལ་སྤྱོད། །ཡུམ་ནི་དངོས་སུ་བསྟེན་པ་སྟེ། །དབང་བཞི་དངོས་སུ་བསྐུར་བར་ནུས། །དེ་ལྟར་ཐམས་ཅད་གསུམ་དུ་འདུས། །རིག་པ་སྒྱུ་མ་ཙམ་ཉིད་ལས། །དོན་དམ་སྐྱེ་བ་མེད་པ་ཡིན། །རིག་དོན་བདེནགཉིས་དབྱེར་མེད་དེ། །རིག་པ་སྒྱུ་མ་ཡིན་པའི་ཕྱིར། །སེམས་ཀྱི་ཆོ་འཕྲུལ་སྣ་ཚོགས་དང་། །བུདྡྷ་བཞི་བཅུ་ཞེ་གཉིས་བསམ། །ཁྲོ་བོ་ལྔ་བཅུ་རྩ་བརྒྱད་དམ། །དེ་ཉིད་ཆེན་པོ་རིགས་ལྔའམ། །གསང་བ་ཆེན་པོ་རིགས་གཅིག་གམ། །དམ་པ་རིགས་བརྒྱའི་སངས་རྒྱས་ཏེ། །ཉི་ཁྲི་ཆིག་སྟོང་ལ་སོགས་པས། །འཇམ་དཔལ་སྐུ་དང་པདྨ་གསུང་། །ཡང་དག་ཐུགས་དང་ཡོན་ཏན་འཕྲིན་ལས། །མ་མོ་རིག་འཛིན་འཇིག་རྟེན་མཆོད། །དམོད་པ་དྲག་སྔགས་ཆེ་མཆོག་སོགས། །སྐུ་མདོག་ཕྱག་མཚན་སྣང་བའོ། །དོན་དམ་སྐྱེ་བ་མེད་པའི་ཕྱིར། །རིག་པ་ཡེ་ནས་སྐྱེ་བ་མེད། །སྤྲོས་མེད་དེ་བཞིན་ཉིད་ཡིན་ནོ། །རིག་དོན་བདེན་གཉིས་དབྱེར་མེད་ནི། །སྣང་སྟོང་དབྱེར་མེད་ཟུང་འཇུག་གོ། །དཔེར་ན་ཆུ་ཟླ་འཇའ་ཚོན་ལྟར། །བསྐྱེད་རྫོགས་ཟུང་འཇུག་རང་རྫོགས་སོ། །ལག་ཏུ་ལེན་པ་འདི་ལྟ་སྟེ། །འཇུག་སྒོ་ཏིང་འཛིན་གསུམ་ནས་འཇུག །ཕུང་ཁམས་ལྷར་གསལ་ཐབས་ཡིན་ལ། །ཡུལ་སེམས་གཉིས་མེད་ཤེས་རབ་ཡིན། །དམ་ཚིག་ཉི་ཤུ་རྩ་བརྒྱད་ཏེ། །བསྡུའ་ན་རྣམ་པ་གསུམ་དུ་འདུས། །ཚེ་འདིའི་སྣང་སྟོན་ཕ་མ་གཉིས། །རང་གི་སྲོག་བས་གཅེས་པར་བཙའ། །ཅི་ཕྱིར་ཕུང་ཁམས་བསྐྱེད་པའི་ཕྱིར། །མ་རིག་སྒོ་འབྱེད་སངས་རྒྱས་སྟོང་། །བླ་མ་མིག་ལྟར་བཙའ་བ་ཡིན། །དེས་འབྲེལ་མཆེད་གྲོགས་ཕོ་མོ་ལ། །རང་ལུས་བེས་ཀྱང་གཅེས་པར་བཙའ། །ཡི་དམ་བསྙེན་སྒྲུབ་མི་གཡེལ་ཞིང་། །དམ་ཉམས་ཚིག་ཟུར་མི་བསྒྲགས་པ། །གསང་བའི་མན་ངག་མི་སྤེལ་བ། །སྤྱོད་པ་གར་མ་མུ་ཏྲ་སྤྱོད། །བསྒྲུབ་ཐབས་ཕྱི་ནང་གསང་གསུམ་ཏེ། །རབ་ནི་ཚེ་འདིར་རྫོགས་སངས་རྒྱས། །འབྲིང་ནི་བར་དོར་ལོངས་སྐུ་ཐོབ། །ཐ་མ་ཕྱི་མར་སངས་རྒྱས་སོ། །དེ་ལྟར་ཐེག་པ་བྷ་གའི་རྩལ། །བདེ་སྟོང་ཐིག་ལེ་འོད་དུ་འབར། །ཀུན་བཟང་ངའི་རྒྱན་དུ་མཛེས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། མ་ཧཱའི་ཐེག་པ་བསྟན་པའི་ལེའུ་སྟེ་ཞེ་གསུམ་པའོ། །྅྅྅ ཡང་སྟོན་པས་བཀའ་སྩལ་པ། ཉོན་ཅིག་རིག་པའི་འཁོར་གདངས་རྣམས། །ཨ་ནུའི་ཐེག་པ་འདི་ལྟ་སྟེ། །ཆོས་ཅན་ཐམས་ཅད་ཐབས་ཡིན་ཡབ། །ཆོས་ཉིད་ཐམས་ཅད་ཤེས་རབ་ཡུམ། །གཉིས་མེད་བདེ་ཆེན་སྲས་སུ་འདོད། །ཡང་ན་འདུས་བྱས་ཐབས་མཆོག་ཡབ། །འདུས་མ་བྱས་རྣམས་ཤེས་རབ་ཡུམ། །གཉིས་མེད་བདེ་ཆེན་སྲས་སུ་འདོད། །ལྷ་དང་ལྷ་མོ་བསྐྱེད་མི་དགོས། །ཆུ་ལས་ཉ་ལྡང་ཇི་བཞིན་དུ། །སྙིང་པོ་དྲན་པས་ཆོག་པའོ། །ཆོས་ཉིད་ཀུན་བཟང་ཡུམ་མཁའ་ལ། །ཆོས་སྐུ་ཀུན་བཟང་ཡབ་གསང་བསྟོད། །གཉིས་མེད་བདེ་ཆེན་སྲས་སུ་འདོད། །ལམ་དེར་མཐར་ཕྱིན་འབྲས་བུ་ལ། །ཕུང་པོ་ཁམས་དང་སྐྱེ་མཆེད་དང་། གནས་གྱུར་སྐུ་དང་ཡེ་ཤེས་ཏེ། །དུག་ལྔ་གནས་གྱུར་ཡེ་ཤེས་ལྔ། །རྒྱས་པར་སྒྱུ་འཕྲུལ་དྲ་བར་ཤེས། །རབ་ནི་ཚེ་གཅིག་སངས་རྒྱས་ཐོབ། །འབྲིང་ནི་འཆི་ཁར་དབྱིངས་དང་འདྲེས། །ཐ་མར་བར་དོར་ལོངས་སྐུ་ཐོབ། །དེ་ཡང་ཐེག་པའི་ལམ་སྟེགས་ཡིན། །ཀུན་བཟང་བྷ་གའི་ཀློང་དུ་ཤར། །མ་སྤང་རོལ་པའི་རྒྱུན་དུ་འོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཨ་ནུའི་ཐེག་པ་བསྟན་པའི་ལེའུ་སྟེ་ཞེ་བཞི་པའོ། །྅྅྅ དེ་ནས་ཡང་སྟོན་པས་བཀའ་སྩལ་པ། ཉོན་ཅིག་རིག་གདངས་རྩ་འཁོར་རྣམས། །ཨ་ཏིའི་ཐེག་པ་བསྟན་པར་བྱ། །སྟོན་པ་ཐུགས་རྗེ་ཆེན་པོ་ཡིས། །འདུལ་བྱེད་ཐེག་པ་མང་གསུངས་ཀྱང་། །ཡང་གསང་རྫོགས་པ་ཆེན་པོར་འདུས། །ཐེག་པ་འདི་ནི་ཐུན་མོང་མིན། །བློ་ལྡན་རྣམས་ཀྱི་ཡུལ་ཡིན་ནོ། །གཞི་ནི་ཡེ་ཤེས་གསུམ་ལྡན་ཏེ། །ལམ་ནི་ཁྲེགས་ཆོད་ཐོད་རྒལ་ལོ། །འབྲས་བུ་ཡང་དག་མངོན་སངས་རྒྱས། །རྣམ་པ་གསུམ་དུ་འདུས་པའོ། །ཡེ་ཤེས་གཞི་ལ་གསུམ་ཡིན་ཏེ། །སྤྱིའི་གཞི་དང་འཁྲུལ་པའི་གཞི། །གྲོལ་བའི་གཞི་དང་གསུམ་ཡིན་ཏེ། །ཁྲེགས་ཆོད་དག་ལ་གཉིས་ཡིན་ཏེ། །བྷཻཾ་དུ་སྤུ་ཙམ་མེད་པ་དང་། །ཡེངས་སུ་སྐད་ཅིག་མེད་པའོ། །ཐོད་རྒལ་དག་ལ་གཉིས་ཡིན་ཏེ། །སྣང་བ་དག་གིས་ཉམས་ལེན་དང་། །མུན་པ་དག་གིས་ཉམས་ལེན་ནོ། །འབྲས་བུ་སངས་རྒྱས་རྣམ་པ་གཉིས། །གྲོལ་བ་ཆེན་པོ་དུས་གཅིག་འདུས། །འདི་ནི་གཞན་ལས་ཁྱད་ཆེས་འཕགས། །རི་རབ་རྩེ་ནས་གླིང་བཞི་གསལ། །ཉི་ཟླ་གཟའ་སྐར་ཟིལ་གྱིས་མནན། །འབྲུག་གིས་སྒྲ་རྣམས་ཟིལ་ནོན་ལྟར། །ཐེག་ཕྲན་ཐམས་ཅད་ཟིལ་གྱིས་མནན། །ཀུན་བཟང་བྷ་ག་ཡངས་པའི། །ཐམས་ཅད་ཐམས་ཅད་རོལ་རྩ་ཡིན། །འཁོར་རྣམས་དེ་ལ་སྤྲོ་བར་གྱིས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རྫོགས་ཆེན་ཨ་ཏིའི་ཐེག་པ་སྟོན་པའི་ལེའུ་སྟེ་ཞེ་ལྔ་པའོ། །྅྅྅ དེའི་ཚེ་མཁའ་འགྲོ་མ་ཐམས་ཅད་ཕྱོགས་གཅིག་ཏུ་སྟན་ལས་ལངས་ཏེ། ཀུན་ཏུ་བཟང་མོ་ལ་རོལ་པ་ཆེན་པོའི་མཆོད་པས་མཆོད་ཅིང་། ཟག་པ་མེད་པའི་བདེ་བ་ཚད་མི་ཤེས་པས་མཉེས་པར་བྱས་ནས། མགྲིན་གཅིག་ཏུ་འདི་སྐད་ཅེས་ཞུས་སོ། །ཀྱཻ། ཡུམ་ཆེན་ཁྱེད་ཀྱི་དགོངས་པ་སྲིད་པའི་རྩ་བ། བདག་ཏུ་འཛིན་པ་ཡིན་པས། ཕྱི་ནང་ཀུན་ཏུ་བརྟགས་པས་ཡེ་སྟོང་དུ་གྲོལ་པའོ། །ཞེས་པའི་དོན་དེ་བདག་ཅག་རྣམས་ཀྱི་གོ་བར་ཕྱེས་ནས་བཀའ་སྩོལ་ཅིག །ཅེས་པ་དང་། སྟོན་པས་དགྱེས་པའི་མདངས་སྟོན་ནས། །འཛུམ་པའི་ཞལ་གྱིས་འདི་སྐད་དོ། །ཀྱེ་ཧོ་རིག་གདངས་འཁོར་རྣམས་ཉོན། །ཨ་ཏི་ངའི་མཐར་ཐུག་ནི། །སྲིད་པའི་རྩ་བ་བདག་འཛིན་འདི། །ཕྱི་ནང་ཀུན་བརྟག་ཡེ་སྟོང་གྲོལ། །སྟོང་པ་རིག་པའི་སྙིང་པོ་ཅན། །འཁོར་འདས་ཀུན་གྱི་མངའ་དབང་ཡིན། །དེའི་སྣང་བ་རྒྱ་ཡིས་བཏུམ། །རིག་པ་མ་རིག་པ་ཡིས་བཏུམ། །ཆོས་ཉིད་ཆོས་ཅན་དག་གིས་བཏུམ། །ཡེ་ཤེས་སེམས་བྱུང་དག་གིས་བཏུམ། །སྐུ་ནི་ཤ་ཁྲག་གདོས་བས་བཏུམ། །དཔེར་ན་ཉི་ཟླ་སྤྲིན་སྒྲིབ་བཞིན། །ཐོག་མའི་རིག་པ་རང་གསལ་ཏེ། །ཁམས་དང་དྲི་མ་ཚོགས་བརྒྱད་སྒྲིབ། །དེའི་རྒྱ་འདི་གྲོལ་བར་བྱས། །ཆོས་རྣམས་ཀུན་གྱི་དེ་བཞིན་ཉིད། །ནང་འཛིན་སེམས་ཀྱིས་སྟོང་པས་ན། ནང་གི་སྟོང་པ་ཉིད་ཡིན་ནོ། །ཕྱིའི་ཡུལ་འཛིན་སྟོང་པའི་ཕྱིར། །ཕྱིའི་སྟོང་བ་ཉིད་ཡིན་ནོ། །ཕྱི་ནང་བར་གྱི་དབང་པོ་ལྔ། །འཛིན་གནས་སྟོང་པ་གཉིས་སུ་མེད། །ཕྱི་ནང་མེད་པའི་སྟོང་ཉིད་ཡིན། །དེ་དག་ཐམས་ཅད་སྟོང་པ་རུ། །འཛིན་མཁན་རང་ཡང་སྟོང་པ་ན། །གཉིས་སུ་མེད་པས་སྟོང་ཉིད་དོ། །འབྱུང་བ་ཆེན་པོའི་གླིང་བཞི་དང་། །རི་རབ་ལ་སོགས་གང་ལ་ཡང་། །ཆགས་པའི་འཛིན་པ་སྟོང་པས་ན། །ཆེན་པོ་སྟོང་པ་ཉིད་དུའོ། ད་ལྟ་ཐོས་བསམ་བྷཻཾ་གསུམ་སོགས། །རྟོགས་པས་དོན་དམ་སྟོང་ཉིད་ཡིན། །དགེ་རྩ་བཟང་རྟོགས་རློམས་པས་ན། །འདུས་བྱས་སྟོང་པ་ཉིད་དུའོ། །འདུས་མ་བྱས་པའི་དགེ་བ་ཡིས། །རློམ་སེམས་ངང་གིས་སྟོང་པའི་ཕྱིར། །འདུས་མ་བྱས་ཀྱི་སྟོང་པ་ཉིད། །མཐའ་ལས་འདས་ཀྱི་འཛིན་པ་སྟོང་། །མཐའ་ལས་འདས་པའི་སྟོང་ཉིད་དོ། །ཐོག་མ་བར་དང་ཐ་མ་རུ། །སེམས་ཅན་རྣམས་ཀྱི་དོན་བྱེད་ཕྱིར། །འཛིན་པ་ཐམས་ཅད་སྟོང་བས་ན། །ཐོག་མ་ཐ་མ་སྟོང་པའོ། །མྱ་ངན་འདས་པ་ཆེན་པོའི་ཚེ། །སེམས་ཅན་ཀུན་གྱི་དོན་མི་འདོར། །དོར་བ་མེད་པའི་སྟོང་ཉིད་དོ། །སྣང་བ་ཐམས་ཅད་རང་བཞིན་སྟོང་། །རང་བཞིན་སྟོང་པ་ཉིད་ཡིན་ནོ། །སྣང་སྟོང་འཁོར་འདས་མ་ལུས་ཀུན། །རང་བཞིན་དངོས་པོ་སྟོང་བའི་ཕྱིར། །ཆོས་རྣམས་སྟོང་པ་ཉིད་ཡིན་ནོ། །སངས་རྒྱས་མཚན་དཔེར་བརྒྱན་གྱུར་ཀྱང་། །དེ་ལ་བདག་འཛིན་མེད་པའི་ཕྱིར། །རང་གི་མཚན་ཉིད་སྟོང་པའོ། །ཆོས་རྣམས་མི་དམིགས་པ་རུ་ནི། །སྤུ་ཙམ་འཛིན་པས་སྟོང་པ་ན། །མི་དམིགས་པའི་སྟོང་པའོ། །དངོས་པོ་མེད་པའི་འཛིན་པ་རྣམས། །མཐའ་དེ་སྟོང་པ་དངོས་པོ་མེད། །ངོ་བོ་ཉིད་ཀྱི་སྟོང་པའོ། །དེ་ལྟར་ཕྱི་ནང་ཀུན་བརྟགས་པས། །སྟོང་ཉིད་མ་ཡིན་གཅིག་ཀྱང་མེད། །སྟོང་ཉིད་བདག་འཛིན་གྲོལ་བའི་ཚིག །བདག་འཛིན་གྲོལ་བའི་དུས་ཉིད་དུ། །སྤྲོས་བྲལ་གཤིས་ལུགས་རྗེན་པར་ཡིན། །འདི་ལ་ཆོས་སྐུ་ཀ་དག་ཟེར། །དེ་ལ་ལོངས་སྐུ་ངང་གིས་རྫོགས། །དེ་ལ་སྤྲུལ་སྐུ་ལྷུན་གྱིས་གྲུབ། །ཀུན་བཟང་བྷ་ག་ཡངས་པ་ཟེར། །ཆོས་རྣམས་ཀུན་གྱི་མདུད་པ་རུ། །བདག་འཛིན་གྲོལ་བའི་གནད་དུ་ཟབ། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སྟོང་ཉིད་བཅོ་བརྒྱད་ཀྱི་སྲིད་པའི་རྩ་བ་བདག་འཛིན་གྲོལ་བའི་ལེའུ་སྟེ་ཞེ་དྲུག་པའོ། །྅྅྅ཡང་འཁོར་རྣམས་ཀྱིས་གསོལ་པ། ཀྱཻ་མ། དེ་ལྟར་བདག་ཏུ་འཛིན་པའི་སེམས་ཅན་རྣམས་ལ། སྟོང་པ་ཉིད་ཀྱི་རྒྱལ་ཚབ་རྒྱ་དེ་གྲོལ་བར་བྱེད་པའི་བླ་མ་དམ་པ་ཅིག་དགོས་ལགས་སམ། རང་གྲོལ་དུ་གྲོལ་ལགས། ཞེས་པ་དང་། ཡུམ་ཆེན་མོས་བཀའ་སྩལ་པ། ཉོན་ཅིག་རིག་གདངས་འཁོར་ཚོགས་རྣམས། །བདག་ཉིད་གྲོལ་བའི་ཐབས་ཆེན་པོ། །མཆོག་ཏུ་བླ་མ་ཤིན་ཏུ་གཅེས། །ཀ་དག་ནམ་མཁའ་ལྟ་བུ་ལ། །ལྷུན་གྲུབ་ཐུགས་རྗེའི་ཉི་མ་ཤར། །ངོ་བོ་སྟོང་པ་དབྱེར་མེད་བཞུགས། །དེ་ཉིད་དཔེའ་དོན་བསྟན་པའི་ཕྱིར། །བླ་མ་མཚན་ལྡན་ཤིན་ཏུ་གཅེས། །རིག་གདངས་ཡེ་ཤེས་ལྷུན་གྲུབ་སྐུ། །ཙིཏྟའི་ནང་ན་ཚོམ་བུ་བཞུགས། །དེའི་རྩལ་ཉིད་དུང་ཁང་ན། །ཁྲོ་བོའི་སྐུ་རུ་གསལ་བར་བཞུགས། །དེའི་འཕྲུལ་སྒོ་འབྱེད་པའི་ཐབས། །ལྡེ་མིག་ཆེན་པོ་བླ་མ་གཅེས། །ལམ་ནི་རྩ་དེ་ཉི་ཞུར་བཞིན། །སྒོ་ནི་དབང་པོའི་མིག་ལ་གསལ། །ཡེ་ཤེས་མེ་ལོང་བྱད་ལྟར་སྣང་། །རྐྱེན་གྱི་དབང་གི་དུ་མར་སྣང་། །དེ་སྟོན་མེ་ལོང་བླ་མ་གཅེས། །བླ་མ་མཁས་པས་བསྟེན་པ་ལ། །ཡོན་ཏན་ཐམས་ཅད་དེ་ལས་འབྱུང་། །ཅི་ཕྱིར་རིག་པའི་ཡེ་ཤེས་ཏེ། །མ་རིག་སེལ་བྱེད་བླ་མ་ཡིན། །བླ་མ་སངས་རྒྱས་བླ་མ་ཆོས། །དེ་བཞིན་དགེ་འདུན་བླ་མ་མཆོག །ཀུན་བྱེད་རྒྱལ་པོ་བླ་མ་ཡིན། །བླ་མ་དཔལ་ལྡན་རྡོ་རྗེ་འཆང་། །བླ་མ་དཔལ་ཆེན་ཧེ་རུ་ཀ །བླ་མ་མཉམ་མེད་རིན་པོ་ཆེ། །འོད་གསལ་གཡོ་མེད་ལྷུག་པར་བཞུགས། །འཁོར་འདས་གཉིས་ཆོས་སེལ་བའི་མཆོག །གུས་པས་མཆོད་ཅིང་སྐྱབས་གསོལ་འོས། །དལ་གྱི་གཙོ་བོ་བླ་མ་ལ། །རིགས་ལྔ་ལྷ་དང་ལྷ་མོ་ཚོགས། །ཞི་ཁྲོ་མ་ངེས་སེམས་དཔའ་དང་། །སེམས་མ་ཐུབ་དྲུག་སྒོ་མ་བཞི། །མཁའ་འགྲོ་ཆོས་སྐྱོང་ལས་བྱེད་སོགས། །ཟག་བཅས་ཟག་མེད་ཐམས་ཅད་ཀུན། །ཆོས་དབྱིངས་ངང་ནས་སྟོན་པའི་ཕྱིར། །མཆོག་ཏུ་བླ་མ་གཅེས་པའོ། །ནད་གདོན་ཞི་བྱེད་སྨན་གྱི་མཆོག །དགོས་འདོད་འབྱུང་བ་རིན་པོ་ཆེ། །ཐམས་ཅད་དབང་དུ་སྡུད་བྱེད་ཅིང་། འགྲོ་བ་མ་ལུས་སྒྲོལ་བའི་གྲུ། །འཕྲིན་ལས་ཀུན་གྱི་མངའ་བདག་མཆོག །ཐོག་མར་བླ་མ་གལ་ཆེའོ། །གང་ཟག་འཁོར་བར་ཞེན་པ་རྣམས། །ཞེན་པ་བཟློག་ཐབས་བླ་མ་གཙོ། །གང་ཟག་དམ་ཆོས་མ་དྲན་ཅིང་། །དགེ་སྡིག་ངོ་མ་ཤེས་པ་རྣམས། །ཆོས་སྟོན་དགེ་སྡིག་ངོ་སྟོན་ཕྱིར། །བླ་མ་དམ་པ་ཤིན་ཏུ་གཅེས། །སྒོ་སྐྱེ་འགགས་ཀྱི་འཐུམ་པ་ལ། །གེགས་སེལ་འབྲས་བུ་འབྱུང་བ་ཡང་། །བླ་མ་དག་གིས་དྲིན་གྱིས་འབྱུང་། །ཇི་ལྟར་ཉམས་སུ་བླང་བའི་མི། །ཐེག་ཆེན་བླ་མ་གདུང་གསོབ་པའི། །བླ་མ་སྤྱི་བོའི་གཙུག་ཏུ་ཁུར། །རྒྱུ་དང་འབྲས་བུས་ཆོས་རྣམས་ཀུན། །བླ་མའི་ཞལ་ལས་བྱོན་པ་ཡིས། །དུས་གསུམ་སངས་རྒྱས་ཐམས་ཅད་ཀྱང་། །བླ་མ་དམ་པ་བསྟེན་ལས་བྱུང་། །དུས་གསུམ་སངས་རྒྱས་ཐམས་ཅད་ཀུན། །བསྐལ་པ་དུ་མར་མཆོད་པ་དང་། །སྲོག་སྐྱབས་ཁམས་གསུམ་ཚེ་སྐྱོབ་པས། །སྐད་ཅིག་སངས་རྒྱས་ཐོབ་པ་མེད། །བླ་མ་ཡིད་བཞིན་ནོར་བུ་གཅིག །མཆོད་པ་མཉེས་པའི་དྲིན་དག་ལས། །སྐད་ཅིག་སངས་རྒྱས་ཐོབ་པར་འགྱུར། །མཚན་ཉིད་བཞི་ལྡན་བླ་མ་ལ། །མོས་གུས་གདུང་བས་གསོལ་བཏབ་ན། །ཇི་ལྟར་ཡིད་ལ་གང་བསམ་པ། །འགྲུབ་འགྱུར་འདི་ལ་ཐེ་ཚོམ་མེད། །མཚམས་མེད་ལྔ་བྱས་གང་ཟག་དང་། །མ་རྟོགས་ལོག་རྟོགས་ཕྱོགས་རྟོགས་དང་། །བླ་མའི་དྲིན་གྱིས་སངས་རྒྱས་སར། །སྐད་ཅིག་སྐྱེས་པར་ཐེ་ཚོམ་མེད། །བླ་མ་མཆོག་ཀྱང་མཉེས་དགོས་ཏེ། །རང་ཉིད་མོས་ལྡན་བླ་མ་ལ། །བུ་དང་ཆུང་མ་ནོར་གྱི་དབྱིག །ཤིན་ཏུ་ཅེས་དང་ཡིད་འཐད་པས། །རང་གི་སྲོག་གི་རྟེན་བྱས་ནས། །ཤིན་ཏུ་དེ་ནི་མཉེས་པས་མཆོད། །དེ་ལྟར་བླ་མ་མཉེས་བྱས་པས། །ཡོན་ཏན་རྒྱ་མཚོ་སྐྱེ་བར་བྱ། །ཐམས་ཅད་མཁྱེན་པའི་ནོར་བུ་ཡང་། །དེད་དཔོན་བླ་མ་མཉེས་ལས་བྱུང་། །གཞན་དོན་ཕྲིན་ལས་ལྗོན་ཤིང་ཡང་། །ས་བོན་བླ་མ་མཉེས་ལས་བྱུང་། །བྱང་ཆུབ་སྐམ་སར་ཐོན་པ་ཡང་། །མཉན་པ་བླ་མ་མཉེས་ལས་བྱུང་། །མི་ཤེས་མུན་པ་སང་བ་ཡང་། །ཉི་ཟླ་བླ་མ་མཉེས་ལས་བྱུང་། །འཁོར་བའི་རྒྱ་མཚོ་ཐོན་པ་ཡང་། །ལྕགས་ཀྱུ་བླ་མ་མཉེས་ལས་བྱུང་། །ཉོན་མོངས་ནད་ལས་སོས་པ་ཡང་། །སྨན་པ་བླ་མ་མཉེས་ལས་བྱུང་། །ངན་སོང་དོང་ནས་ཐོན་པ་ཡང་། །ཞགས་པ་བླ་མ་མཉེས་ལས་བྱུང་། །དེ་ཕྱིར་བླ་མ་ཚོལ་བ་གཅེས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། །བླ་མ་གལ་ཆེ་བར་བསྟན་པའི་ལེའུ་སྟེ་ཞེ་བདུན་པའོ། །྅྅྅ ཡང་མཁའ་འགྲོ་མ་རྣམས་ཀྱིས་གསོལ་པ། ཀྱེ་མཚན་ཉིད་དང་ལྡན་པའི་བླ་མ་ཇི་ལྟ་བུ་གཅིག་བཙལ་གསུང་དུ་གསོལ། ཅེས་པ་དང་། སྟོན་པས་བཀའ་སྩལ་པ། མཚན་ལྡན་བླ་མའི་མཚན་ཉིད་ནི། །བློ་ཆེ་ཁོང་ཡངས་རང་རྒྱུད་ལ། །བརྩེ་བའི་སེམས་ལྡན་རང་སྣང་དག །གནས་ལུགས་རྟོགས་པ་ཁོང་དུ་ཆུད། །ཤེས་རབ་གསུམ་ལྡན་བརྒྱུད་པར་ལྡན། །དུས་གསུམ་བླ་མའི་རྗེས་སུ་གནང་། །ཆོས་ཉིད་མངོན་སུམ་དོན་ལ་མཁས། །འཇིག་རྟེན་ཁྱིམ་སྤངས་དབེན་བར་གནས། །སློབ་བུ་གསོ་བའི་ཐབས་ལ་མཁས། །མདོ་སྔགས་རྒྱུད་སྡེའི་དོན་རྣམས་འཁྲོལ། །མཁྱེན་པ་ཆེ་ལ་ཆོས་བརྒྱད་བྲལ། །རང་གི་སྤྲོས་པ་ནང་ནས་ཆོད། །གཞན་ལ་ཁྱད་གསོད་མཚང་མི་བྲུ། །ཆོས་དང་གང་ཟག་དག་ལ་འང་། །མི་སྨད་ལོག་པར་ལྟ་དང་བྲལ། །རང་དོན་དུས་སུ་བསྒྲུབ་ལ་བརྩོན། །གཞན་དོན་དུས་སུ་ཐབས་ལ་མཁས། །བྱམས་དང་སྙིང་རྗེ་བརྩེ་བ་ཅན། །སྦས་ཚུལ་གདུལ་བྱ་འགྲོ་བ་འདྲེན། །དབང་ཁྲིད་འདི་སྟོན་ཐབས་ལ་མཁས། །མཚན་ཉིད་ལྡན་པའི་བླ་མ་ནི། །དབང་བསྐུར་བས་ན་སྡུག་བསྔལ་གྲོལ། །དེ་ལྟ་བུའི་བླ་མ་ལ། །གསོལ་བ་བཏབ་པས་དགོས་འདོད་འབྱུང་། །དཔེར་ན་ནོར་བུ་བསམ་འཕེལ་འདྲ། །སྣ་ཚོགས་རིག་པའི་རྩལ་ཡིན་ཕྱིར། །རིག་པ་སྟོང་པ་ཉིད་དུ་གྲོལ། །དབང་ལྡན་རྒྱལ་པོ་ཇི་བཞིན་ནོ། །ངོ་བོ་ཉིད་ལ་རྒྱུན་དུ་གནས། །ཡང་དག་དོན་ལ་གཡོ་བ་མེད། །མཐོང་ཐོས་བཅངས་པས་སངས་རྒྱས་འགྲུབ། །མཚན་ཉིད་དེ་རྣམས་གོ་ལོག་ན། །ནོར་བུ་མཆིང་བུ་དག་དང་མཚུངས། །གསོལ་བ་བཏབ་ཀྱང་བྱིན་རླབས་མེད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བླ་མའི་མཚན་ཉིད་བསྟན་པའི་ལེའུ་སྟེ་ཞེ་བརྒྱད་པའོ། །྅྅྅ གཉིས་པ་སློབ་མའི་མཚན་ཉིད་ནི། །བློ་ཆེ་རིགས་བཟང་ངང་རྒྱུད་རིང་། །དུག་ལྔའི་ཤུགས་ཆུང་བློ་ཁོག་ཡངས། །དད་ལྡན་སྙིང་རྗེ་གཏོང་ཕོད་ཆེ། །དམ་ཚིག་སྒྲུབ་ལ་ཤིན་ཏུ་མོས། །སྡིག་འཛེམ་ཤེས་རབ་དབང་པོ་རྣོ། །གསང་ཐུབ་བརྟུལ་ཞུགས་སྤྱོད་པ་ནུས། །སྐྱོ་ཤས་ཞེན་ལོག་སྙིང་རུས་ཆེ། །ཚེ་འདིའི་ལོ་མ་རྒྱབ་ཏུ་བསྐྱུར། །བླ་མས་ཅི་གསུང་དང་དུ་ལེན། །ལྟོ་གོས་ཕྱིར་ན་ལྷག་སྐྱོབ་བརྟེན། །གྲོང་ཡུལ་བོར་ནས་དབེན་གནས་འགྲིམ། །དཀོར་ཟས་དག་ལ་མིག་རྡུལ་མཚུངས། །སྐྱོ་ངེས་ཐང་ལྷོད་ངོས་དགའ་མེད། །རྐྱེན་ངན་གང་ལའང་བཟོད་པ་ཐུབ། །དེ་ལྟ་བུའི་སློབ་མ་དེ། །གསང་སྔགས་འདིའི་སྣོད་མཆོག་ཡིན། །གསེར་དངུལ་རིན་ཆེན་སྣོད་ནང་དུ། །བདུད་རྩི་དག་ནི་བླུག་པ་འདྲ། །བཅུད་འཕེལ་ཡོན་ཏན་གོང་དུ་འཕེལ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སློབ་མ་སྣོད་དང་ལྡན་པ་བསྟན་པའི་ལེའུ་སྟེ་ཞེ་དགུ་པའོ། །྅྅྅ སྟོན་པས་ཡང་འདི་སྐད་གསུང་། སྣོད་དང་མི་ལྡན་སློབ་མ་ནི། །རིགས་ངན་བློ་ཆུང་ངང་རྒྱུད་ཐུང་། །ཁ་ཟོལ་ཤེས་ཆུང་གདུང་ལྟས་ཆེ། །ཁ་མཁས་ལག་དམ་གཡོ་ཟོག་ཆེ། །བླ་མའི་གསུང་གཅོག་དྲིན་ལན་རྩོད། །ཡོན་ཏན་མི་མཐོང་སྐྱོན་ལ་རྟོགས། །རིགས་རྒྱུད་ངང་རྒྱུད་ངན་པ་དང་། བཀའ་དྲིན་ཁྱད་བསད་རང་ལ་བསྟོད། །དམ་ཚིག་ཉམས་ལེན་ཕྱལ་བར་བཏང་། །དེ་ལྟ་བུའི་གང་ཟག་ལ། །རྫོགས་པ་ཆེན་པོའི་དོན་མི་བསྟན། །བླ་མ་སྨད་དམ་ཐབས་ཀྱི་གསང་། །རང་གིས་ཆེ་བ་གཞོག་ངོམ་བྱེད། །གདམས་ངག་ཟབ་མོ་ཟིན་རིས་བྱེད། །དཔེ་རྐུན་ཁྲམ་པ་སྟོང་མི་ཐུབ། །བློ་རྒོད་འུར་འགྲོགས་བློ་གཏད་མེད། །དོན་དམ་དམ་ཚིག་ཕྱལ་བར་བཏང་། ཆང་དབང་གཉིད་དང་ལེ་ལོར་བཏང་། །སྒྲུབ་པ་གཡེལ་ཅིང་མུ་མེད་གཡེང་། །གདོང་དུ་བསྟོད་ཅིང་ལྐོག་ཤུབ་སྨྲ། །ཐབས་དང་གཡོའི་གདམས་པ་འབྲུ། །རང་གི་ཉམས་སུ་མ་བླངས་པ། །གཞན་ལ་དབང་ཁྲིད་སྟོན་པར་རིངས། །མི་འགོ་བསྐོར་འདོད་རང་མགོ་བསྐོར། །དེ་འདྲའི་སྣོད་ངན་འཕྲད་པ་ན། །སློབ་མ་མ་བརྟག་བླ་མའི་དགྲ། །སངས་རྒྱས་བསྟན་པའི་དགྲ་བོ་ཡིན། །དེ་ལས་གདམས་ངག་གི་འབྲེལ་མི་བྱ། །གལ་ཏེ་གདམས་པ་བྱིན་པ་ན། །དུག་ཅན་སྣོད་དང་ཞབས་རྡོལ་དང་། །རྫ་སོ་མ་བཏང་སྤྱད་པ་འདྲ། །སྣོད་ཆག་བཅུད་འབོ་དོན་མི་འགྲུབ། །སྣོད་དང་མི་ལྡན་གདམས་པ་སྤེལ། །རྡོ་རྗེའི་དམྱལ་བར་ལྟུང་བར་འགྱུར། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སློབ་མ་ངན་པ་སྤང་བའི་ལེའུ་སྟེ་ལྔ་བཅུ་པའོ། །྅྅྅ཀུན་བཟང་ཡུམ་གྱི་ཡང་གསུངས་པ། །བླ་མ་མ་བརྟག་སློབ་མའི་དགྲ། །དམྱལ་བར་ཁྲིད་པའི་ལམ་མཁན་ཡིན། །གལ་ཏེ་འཕྲད་པའི་ཉེན་ཡོད་པས། །མཚན་ཉིད་འདི་ལྟར་ཤེས་པར་བྱ། །བླ་མ་ཞེས་པའི་མིང་ཡང་བཏགས། །བརྒྱུད་པའི་བྱིན་བརླབ་བཀའ་བབ་མེད། །གདམས་ངག་ཡོད་ཟེར་ཚོད་དཔག་སྟོན། །འདུལ་ཁྲིམས་མེད་པ་ཁྱིམ་པའི་གཟུགས། །ལྷ་ཆོས་བོར་ནས་མི་ཆོས་ཀྱི། །སོ་ནམ་བུ་སྨད་གསོག་འཇོག་རེམ། །རང་ལ་ཉམས་ལེན་ཡོན་ཏན་མེད། །གཞན་ལ་ལོག་ལྟ་སྤྱོད་ལོག་སྟོན། །རིགས་དང་བརྒྱུད་པ་ང་ཆེ་ཟེར། །སྤྱོད་པ་ཁྱི་ཕག་ལས་ཀྱང་ལོད། །དྲེགས་པ་ཆེ་འདོད་མིང་ཆེ་ལ། །སྟོང་སོབ་རྫུན་ལ་མི་ཚེ་བསྐྱལ། །ས་རིས་བདག་འཛིན་རིས་སུ་བཅད། །གསོན་གཤིན་ལོག་པའི་ལམ་དུ་ཁྲིད། །རྒྱུ་འབྲས་ཁྱད་བསད་ཁ་ལྟ་མཐོའ། །ཆང་ནག་ཉིད་ལ་བསྒྲུབ་པ་བྱེད། །སངས་རྒྱས་བསྟན་པའི་སྲོག་ལ་བསྡོས། །སྙིང་རྗེ་མེད་ཅིང་ཆགས་སྡང་ཆེ། །ཉག་གཅིག་འཁོར་འདས་ཀུན་གྱི་གཞི། །རང་བྱུང་ཡེ་ཤེས་རང་ལས་བྱུང་། །དེ་ཤེས་ཡེ་ཤེས་རྩལ་ཡིན་ཏེ། །དེ་ལྟ་བུའི་ཟུར་མ་གོ། །མི་མགོ་བསྐོར་ཅིང་རང་དོན་བསྒྲུབ། །གདུལ་བྱའི་བསྟན་འཛིན་ཟོག་ལ་བྱེད། །ཆོས་རྒྱུས་མེད་པས་མཁས་དྲུང་བཤོལ། །མི་ཤེས་བླུན་པོའི་ཚོགས་རྣམས་ལ། །ང་ཆེ་ཆོས་བཤད་ཁ་ཚོ་འདོན། །ཁྱི་སྐྱག་སྦྲང་མ་འདུ་བ་ལྟར། །ཚོགས་མ་བསགས་པའི་བླ་མ་ལ། །ལས་ངན་ཅན་གྱི་འཁོར་གྱིས་བསྐོར། །བཞེད་པ་མཐོ་རིས་སངས་རྒྱས་བཞེད། །གཤེགས་པ་ན་རཀ་དམྱལ་བར་གཤེགས། །ལོང་བས་ལོང་བ་ཁྲིད་པ་འདྲ། །བེའུ་སྦྲེལ་གཡང་ལ་ལྷུང་བ་འདྲ། །མཚན་ཉིད་མི་ལྡན་བླ་མ་ཡིས། །དབང་བསྐུར་བྱས་ཀྱང་གཉིས་ཀ་ཕུང་། །ཐ་མལ་ལོག་པར་ཁྲིད་པ་ལ། ངན་སོང་མིན་པ་འགྲོ་ས་མེད། །དེ་འདྲ་མི་གཙང་བུམ་པ་ལ། །བཟང་བཟང་འདྲ་ཡང་མ་འབྲེལ་ཅིག །དམ་པའི་ཆོས་ཀྱིས་རྒྱང་ཐག་བསྲིང་། །ཕྱི་བལྟས་བཟང་བཟང་འདྲ་མོད་ཀྱང་། །ནང་སྐྱོན་ཁོང་ནས་བརྡོག་ཙམ་ན། །ནམ་ཕུག་སྐྱོན་ཅིག་ཅིས་ཀྱང་འོང་། །དམ་ཉམས་གཉིས་ཀ་དམྱལ་བར་འགྲོ། །དེས་ན་ཐོག་མར་བརྟགས་པར་བྱའོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བླ་མ་ངན་པའི་མཚན་ཉིད་བསྟན་པའི་ལེའུ་སྟེ་ང་གཅིག་པའོ། །྅྅྅ ཡང་ཅིག་སྟོན་པས་བཀའ་སྩལ་པ། །བསྟེན་བྱའི་བླ་མ་རྙེད་པ་དང་། །སྣོད་དང་ལྡན་པའི་སློབ་བུ་དེས། །གུས་པས་འདི་ལྟར་བསྟེན་པར་བྱ། །ངང་ལྷོད་སེམས་དལ་སྐབས་བཙལ་ལ། །བླ་མའི་ཐུགས་དགོངས་འཕྲོད་པར་བྱ། །བསྒྲུབ་ཆོས་ཞུ་བའི་སྙན་གསན་དབབ། །བླ་མས་ཅི་གསུང་བསྒྲུབ་པའི། །དམ་བཅའ་གང་འཚམས་དུས་མཚམས་དབྱེ། །ལུས་ངག་ཡིད་གསུམ་གུས་པ་ཡིས། །བླ་མའི་མདུན་དུ་འདུག་པའི་ཚེ། །ཆེ་བཅོས་མི་བྱེད་དམན་ས་བཟུང་། །སྟེགས་དང་མཐོའ་སར་སྡོད་པ་སྤང་། །རྐང་བརྐྱང་མི་ལེགས་སྤྱོད་པ་སྤང་། །གོང་དང་རྒྱབ་ཏུ་འདུག་པ་སྤང་། །བཞུགས་དུས་གདན་བཏིང་བཞེངས་དུས་སྟབ། །ཁྲུས་དང་སྤོས་དང་ན་བཟའ་གསོལ། །བཞེངས་བཞུད་དུས་སུ་ལྡང་བ་བྱ། །བླ་མ་བཞུགས་པའི་དུས་ཉིད་དུ། །འཛིང་དང་རྒྱུག་པ་ངན་ལས་སྤང་། །ལུས་ཀྱི་མི་འཐད་ཐམས་ཅད་སྤོང་། །ངག་ཏུ་ཁྲེལ་རྒོད་བཞད་གད་སྤང་། །ཁ་བཙོག་ལ་སོགས་མི་འཐད་སྤང་། །སེམས་ཀྱི་འཁྲུལ་སེམས་བརྣབ་སེམས་སྤང་། །བསམ་ངན་དུག་ལྔ་ཐམས་ཅད་སྤང་། །གསོལ་ཆས་གཟིམ་ཆས་བཞུགས་པའི་ཆས། །ཕྱི་རབས་རྒན་གཞོན་ལ་སོགས་པ། །མི་འགོང་བཀུར་ཞིང་གོང་དུ་བཞག །གནང་བའི་དངོས་པོ་མ་གཏོགས་པས། །ཁབ་དང་སྐུད་པ་ཙམ་ལ་འང་། །མིག་གི་རྡུལ་བཞིན་འཛེམ་པར་བྱ། །ལམ་དུས་བྱེད་དང་འཇིགས་པ་མིན། །བཞུད་པའི་དུས་སུ་མདུན་མི་བཅད། །ཞབས་རྗེས་གྲིབ་མ་ལམ་མི་འགོང་། །སྐུ་མཉེའ་རྒྱབ་ཏུ་ཁུར་བ་དང་། །མཉེས་པར་གྱུར་བ་གང་གསུང་བསྒྲུབ། །རྒྱང་འབོད་འོ་འདོད་ལ་སོགས་པ། །ཞེ་མ་འཇིགས་པའི་སྤྱོད་པ་སྤང་། །ལུས་དལ་རྐང་ཤུག་འཇམ་པར་བྱ། །ཞུ་བ་ཐམས་ཅད་དལ་བུས་ཞུ། །སྙན་པའི་ངག་གིས་ཞྭ་ཐོད་ཕུད། །ཐལ་སྦྱར་པུས་བཙུགས་ཚུལ་གྱིས་འདུད། །ཡིད་ཀྱི་ལོག་ལྟ་ཐམས་ཅད་སྤང་། །ཡོན་ཏན་ཐམས་ཅད་དུས་གསུམ་གཞལ། །སངས་རྒྱས་ཀུན་གྱི་རྒྱལ་ཚབ་མཆོག །བདག་གིས་འདྲེན་པར་བྱོན་བར་བྷཻཾ། །ཡོ་བྱད་ལ་སོགས་གང་ཐུགས་བྱོན། །མཉེས་པ་ཐམས་ཅད་འཕང་མེད་ཕུལ། །རང་ལ་མེད་ན་ཐབས་ཀྱིས་བཙལ། །བླ་མ་མཉེས་ན་རྐུ་ཕྲོག་དང་། །སྡུག་བསྔལ་གཏམ་ངན་ཁྱད་དུ་བསད། །ཐུགས་ཀྱི་དགོངས་པ་རྫོགས་པར་བྱ། །བ་མོར་འོ་མ་བཞོས་པ་ལྟར། །དུས་སུ་གདམས་པ་སྣོད་ལྡན་ཞུ། །རིམ་པ་བཞིན་དུ་ཉམས་སུ་བླངས། །ཐོས་བསམ་ལ་སོགས་སྒྲོ་འདོགས་ཆོད། །གསོལ་བ་འདེབས་དུས་སྤྱི་བོར་བྷཻཾ། །ནུབ་མོ་སྙིང་གི་དཀྱིལ་དུ་བྷཻཾ། །ཟ་མ་ཟ་དུས་མགྲིན་པར་བྷཻཾ། །འཇིགས་ས་ཆེ་སར་ལག་མཐིལ་བྷཻཾ། །བྱ་བ་ཅི་དང་ཅི་བྱེད་པ། །བླ་མ་ཉིད་ལ་ཞུ་ལ་བསྒྲུབས། །ཐུགས་ཐུབ་ཁོང་ཚུད་སྐད་ཅིག་སྤང་། །གལ་ཏེ་ཐུགས་དཀྲུགས་སྐད་ཅིག་མས། །བསྐལ་པར་བསོགས་པའི་དགེ་བ་འཇོམས། །བླ་མེད་བྱང་ཆུབ་རྒྱང་ཐག་བསྲིངས། །བླ་མ་དང་ནི་དབང་མཆོག་གིས། །གསུང་དང་གཞུང་ལས་འགལ་བ་ན། །ན་རཀ་སྡུག་བསྔལ་མྱོང་བར་འགྱུར། །དེ་ཕྱིར་ཤིན་ཏུ་གཟབ་ལ་བསྟེན། །བླ་མའི་ཡུམ་མམ་འདུག་ས་འམ། །བླ་མ་ཉིད་དང་མཉམ་པར་ལྟ། །དེ་བཞིན་ཉེ་འཁོར་ལ་སོགས་ལ། །མེ་བཞིན་ཤིན་ཏུ་བག་ཟོན་བྱ། །བླ་མ་བསྟེན་མཉེས་ཡོན་ཏན་ནི། །སངས་རྒྱས་ཐམས་ཅད་བསྟེན་མཉེས་མཚུངས། །ཚེ་གཅིག་བླ་མའི་ས་ནོན་ནས། །སྤྲུལ་པ་དཔག་མེད་འགྱེད་པར་ནུས། །བླ་མ་བསྟེན་ཅིང་མཉེས་ལས་བྱུང་། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། །བླ་མ་བསྟེན་པའི་དགོས་པ་དང་སྤྱོད་ལམ་བསྟན་པའི་ལེའུ་སྟེ་ང་གཉིས་པའོ། །྅྅྅ཡང་སྟོན་པས་བཀའ་སྩལ་པ། །བླ་མས་སློབ་མ་གསོ་བའི་ཚེ། །སློབ་མ་གསར་བུ་དད་ལྡན་དེ། །ཐོག་མར་ཐབས་ཀྱིས་ཁྲིད་པར་བྱ། །ངེས་དོན་སྙིང་པོ་མ་གོ་བར། །རྒྱུ་འབྲས་གཉིས་ཀྱིས་ཆོས་རྣམས་བཤད། །སྒྲུང་དང་དཔེ་དང་བསྟན་ཆོས་དང་། །མགུར་གླུ་ལ་སོགས་འཁོར་བ་ལ། །ཡིད་བྱུང་ངན་སོང་སྡུག་བསྔལ་ལ། །སངས་རྒྱས་ཡོན་ཏན་ལ་སོགས་བཤད། །བླ་མ་ཉིད་ཀྱང་སྤྱོད་ལམ་གཟབ། །གལ་ཏེ་བསྟན་འགལ་ཟུར་འཕྲིག་ན། །བློ་ཆུང་དད་ལོག་རྫ་མི་དྲོས། །དེ་ལ་བྱིན་རླབས་ལ་མི་འགོས། །སློབ་མའི་མོས་གུས་ཆེ་ཆུང་སྟེ། །བླ་མའི་མཛད་སྤྱོད་ལེགས་ཉེས་ཡིན། །འགྲོ་འཆག་ཉལ་དང་ཟས་ལ་སོགས། །སྤྱོད་ལམ་ཐབས་ལ་ལེགས་པར་སློབ། །ཁྱད་པར་ཐེག་པ་འདི་ཉིད་ཀྱིས། །ཆོས་ཀྱི་ཡན་ལག་ཀུན་ལ་སློབ། །འཁོར་བ་བྱ་བ་འབྲེལ་འཁྲིག་ཀུན། །ཐབས་ཀྱིས་སྤང་ཞིང་དལ་དུ་ཞུགས། །སྤྲོས་བཅས་ལ་སོགས་དབང་བསྐུར་ནས། །དེའི་ལྷ་ལ་བསྙེན་སྒྲུབ་ཀུན། །ཐེག་པ་རིམ་གྱི་དབང་བསྐུར་ནས། །ཐོས་པའི་སྒྲོ་འདོགས་ཆོད་དུ་གཞུག །སྤྲོས་མེད་ལ་སོགས་དབང་བསྐུར་ནས། །གཡའ་གངས་དུར་ཁྲོད་དབེན་པ་རུ། །ལུས་ངག་རུ་ཤན་འབྱེད་དུ་གཞུག །དུས་དང་མཐུན་པའི་སྤྱོད་པ་བསླབ། །ལུང་དང་མཐུན་པར་བསླབ་པར་བྱ། །དཔེར་ན་བུ་གཅིག་ཆུང་བ་དེ། །མ་ཡིས་ཇི་ལྟར་གསོ་བ་ལྟར། །བརྩེ་བའི་གདུང་ཤུགས་ཆེན་པོ་ཡི། །གདམས་ངག་བདུད་རྩིའི་ནུ་མ་བླུད། །ཆོས་རྣམས་མ་ལུས་ཐམས་ཅད་ཀུན། །རྩ་བ་ཐིག་ལེ་གཅིག་མ་གྱེས། །གཅིག་པོ་ཐུགས་རྗེའི་རྩ་བ་ཡིན། །ཤེས་རབ་ཡེ་ཤེས་དབང་བསྐུར་ནས། །དབང་དང་འཚམས་པར་རིག་མ་བྱིན། །དྲེད་མོ་ལྟ་བུའི་སྤྱོད་པ་བསླབ། །རང་ཡང་སློབ་བུ་བློ་དག་ཕྱིར། །དངོས་བརྟེན་རྟག་ཚད་འབྱུང་བར་བྱ། །ཚིག་དབང་རྩལ་གྱི་དབང་བསྐུར་ནས། །སྤྲོས་བཅས་བྱ་བ་ཀུན་བོར་ནས། །སྤྲོས་མེད་ངང་དེར་ལྷོད་ཀྱིས་ཀློད། །རི་དྭགས་ལྟ་བུའི་སྤྱོད་པ་བསླབ། །ངེས་དོན་སྙིང་པོའི་ངོ་སྤྲོད་གདབ། །རང་རིག་མི་འགྱུར་གཟེར་ཐེབས་ནས། །རྒྱལ་ཚབ་དག་ཏུ་དབང་བསྐུར་ནས། །འགྲོ་དོན་གྱིས་ཤིག་བཀའ་ལུང་བྱིན། །རང་ཉིད་ཏིང་ངེ་འཛིན་ལ་བཞུགས། །གཞན་དོན་བྱང་ཆུབ་སེམས་དཔའ་འི། །བསླབ་བྱ་ཐམས་ཅད་བསླབ་པར་བྱ། །དང་པོ་སློབ་མ་དེ་དག་གིས། །རྣམ་དབྱེ་བསྲུང་མཚམས་མི་ཤེས་པར། །བླ་མའི་དམ་ཚིག་གསུམ་གཉིས་བསྲུང་། །རག་པ་ཤེས་ན་གསུམ་ཆ་སྟེ། །ཞིབ་པར་ཤེས་ན་སུམ་གཉིས་པོ། །སློབ་མ་ཉིད་ཀྱི་བསྲུང་བར་བྱ། །དུས་དང་གནས་དང་ཡུལ་ཉིད་དང་། །སྣང་དགག་རིམ་པ་མ་ལུས་པ། །བླ་མས་སློབ་བུར་ཁྲིད་པར་བྱ། །དེའི་ཡོན་ཏན་བསམ་མི་ཁྱབ། །སངས་རྒྱས་ཀུན་གྱི་གདུང་མི་ཆད། །དུས་གསུམ་སངས་རྒྱས་ཐམས་ཅད་ཀྱང་། །དེ་ལྟར་བསླབ་ལས་རིམ་གྱིས་བྱུང་། །རྒྱལ་ཚབ་སློབ་བུ་གཅིག་ཚར་ནས། །འཁོར་བ་དོང་ནས་སྤྲུག་པར་འགྱུར། །ཁམས་གསུམ་སེམས་ཅན་མ་ལུས་པ། །འདྲེན་པའི་ལྕགས་ཀྱུ་དེ་ལས་བྱུང་། །དེ་ཕྱིར་སློབ་མ་བླ་མ་གཉིས། །ཕན་ཚུན་རྟེན་འབྲེལ་མ་འཆུགས་གཅེས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བླ་མ་བསྟེན་པའི་དུས་སུ་བསླབ་བྱ་བསྟན་པའི་ལེའུ་སྟེ་ང་གསུམ་པའོ། །྅྅྅ ཡང་སྟོན་པས་བཀའ་སྩལ་པ། ཉོན་ཅིག་རིག་པའི་རྩལ་འཁོར་རྣམས། །དང་པོར་སློབ་མས་བླ་མ་ལ། །དམ་ཆོས་ཞུ་ཚོལ་འདི་ལྟར་བྱ། །སྔ་མོར་ལངས་ལ་ཁ་ལག་བཀྲུས། །ལུས་ཀྱི་ཆས་རྣམས་ལེགས་པར་གཟབ། །མཆེད་གྲོགས་དམ་ཚིག་ལྡན་མི་ལྡན། །སྟ་གོན་རྣམས་ཀྱང་ལེགས་པར་བྱ། །ཆོས་རར་ཆག་ཆག་བྱི་དོར་བྱ། །བཞུགས་ཁྲི་ཡོལ་བ་གདན་ཁྲི་དང་། །མཆོད་པ་ཕྱི་ནང་རྒྱས་པ་བཤམ། །བཀོད་པ་ཁྱད་པར་འཕགས་པ་ནི། །ངང་གིས་དང་འདྲེན་བློ་ཕེབ་བཅའ། །དེ་ནས་ཆོས་འཁོར་བསྐུལ་བའི་སྒྲ། །ཆོས་ཀྱི་དུང་ཆེན་ལན་དགུའོ། །བླ་མའི་ཕྱོགས་སུ་ཁ་བལྟས་འབུད། །ཀུན་གྱི་གསོལ་འདེབས་གདུང་བ་བྱ། །མཆེད་ཀུན་འཛོམ་པར་གྱུར་པའི་ཚེ། །བླ་མ་སྤོས་དང་རོལ་མོས་བསུ། །བདེ་བའི་སྟན་ལ་བཞུགས་སུ་གསོལ། །གུས་པས་མཎྜལ་མང་པོ་ཕུལ། །བདེ་བའི་ས་ལ་སྐྱིལ་ཀྲུང་བཅའ། །ས་གཅིག་དག་ལ་གནས་མི་སྤོ། །ཞྭ་མོ་ཡོད་ན་མདུན་དུ་བཞག །སྐྲ་ལོ་ཡོད་ན་མདུན་དུ་ཕབ། །ལག་པ་ཐལ་སྦྱར་མཉམ་བཞག་བྱ། །ལག་གི་འདུ་བྱེད་ཐམས་ཅད་སྤང་། །མིག་ནི་བླ་མའི་ཞལ་ལ་ལྟ། །རྣ་བ་བླ་མའི་གསུང་ལ་ཉན། །སེམས་ནི་ཚིག་དོན་གཏན་ལ་ཕབ། །ཐེ་ཚོམ་དུས་སུ་བཟློག་ལ་ཞུ། །ངག་ཏུ་ཤུག་བུའི་ཚོགས་རྣམས་སྤང་། །རྐང་བརྐྱང་གཞོག་ཉལ་ཆེ་བཅོས་དང་། །མ་གནང་སྟན་དང་གདན་ཁྲི་སྤང་། །མི་ན་བ་ལ་མགོ་གཡོག་དང་། །དགྲ་མེད་པ་ལ་མཚོན་ཐོགས་དང་། །མ་རྒས་པ་ལ་དབྱུག་ཐོགས་དང་། །ཚུལ་དང་མི་མཐུན་ཐམས་ཅད་སྤང་། །ཚིག་དོན་རེ་རེས་གཞི་འབྲེལ་བྱ། །ཆོས་མཐུན་འཇུག་གི་དམིགས་པ་ལ། །ནན་ཆགས་ཆེན་བོས་གོང་འོག་མཐུད། །ཐ་མལ་སྤྱོད་པ་ཐམས་ཅད་སྤང་། །ཆོས་ཁྲིམས་ལུང་བཞིན་བག་ཡོད་སྤྱོད། །ཁྲེལ་ཡོད་གཡོའ་སྒྱུ་སྤང་བྱ་ཞིང་། །ཚོགས་ལ་སྤྱང་ཀུར་མ་གྱུར་བྱ། །སྤྱི་འཁྲིམ་འཇིགས་པའི་བྱ་བ་སྤང་། །མདོར་ན་བླ་མ་མཆེད་ལྕམ་རྣམས། །ཅི་ལྟར་གསུང་བྱོན་སྤྱོད་ལྟར་སྤྱོད། །ཆོས་གྲལ་སྐུ་དྲིན་མཎྜལ་དང་། །སྐུ་ལ་དྲོ་བ་ཞལ་དུ་བདའ། །ཐུགས་སུ་བྱོན་པ་ཕུལ་བར་བྱ། །ཕྱག་འཚལ་མོས་པས་བསྐོར་བ་བསྐོར། །རང་རང་བདེ་བ་ལ་འདུག་སྟེ། །ཏིང་ངེ་འཛིན་ལ་གནས་པར་བྱའོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སློབ་མས་ཉན་འཆད་གྱི་དུས་སུ་སྤྱོད་ལམ་ཇི་ལྟར་བྱེད་བསྟན་པའི་ལེའུ་སྟེ་ང་བཞི་པའོ། །྅྅྅ཡང་སྟོན་པས་བཀའ་སྩལ་པ། ཉོན་ཅིག་རིག་པའི་རྩལ་འཁོར་རྣམས། །དེ་ལྟར་སྣོད་ལྡན་སློབ་མ་ལ། །ཟབ་ཆོས་བསྟན་པ་དུས་ཀྱི་ཚེ། །བླ་མས་སྤྱོད་ལམ་འདི་ལྟར་བྱ། །བདེ་བའི་ཁྲི་ལ་སྐྱིལ་ཀྲུང་བཅའ། །རང་ཉིད་ཐེག་པ་གང་སྟོན་པའི། །དཀྱིལ་འཁོར་གཙོ་བོ་གསལ་འདེབས་ལ། །འགྲོ་དྲུག་སེམས་ཅན་མ་ལུས་ཀུན། །མདུན་དུ་སྐད་ཅིག་འཁོར་བར་བསམ། །རང་རང་སྐད་དང་བློ་འཚམས་པས། །ཐེག་ཆེན་ཆོས་སྟོན་སེམས་ཀྱང་བསྐྱེད། །ཆོས་སྐྱོང་དཀར་ཕྱོགས་ཐམས་ཅད་ལ། །ལེགས་སྤེལ་བར་ཆད་སྲུངས་ཤིག་ཅེས། །རང་རང་ལས་བྱས་ཕྲིན་ལས་བཅོལ། །ཆོས་གྲལ་དབུས་སུ་སྟོང་པར་བཞག །མི་དང་མི་མིན་དཀར་ཕྱོགས་ཀུན། །མོས་པས་དམ་ཆོས་ཉན་པར་བསམ། །མིག་གི་སློབ་མ་ཀུན་ལ་ལྟོས། །ལག་པ་ཆོས་འཆད་མཉམ་བཞག་བཅའ། །ངག་གི་ཚིག་ལ་གདངས་སྙན་པས། །དཔེ་དོན་རྟགས་གསུམ་འབྲེལ་བར་བཤད། །དབང་པོ་གང་ལ་འཚམས་པའི། །ཆོས་སྒོ་ཐེག་པའི་འཚམས་པར་སྟོན། །རྡོ་རྗེའི་ཚིག་རྐང་བཀྲོལ་བར་བཤད། །རྒྱུད་འཁྲུག་པ་རྣམས་སྡེབ་ལ་བཤད། །ལུང་གཅུས་པ་རྣམས་བརྐྱང་ལ་བཤད། །དྲང་པོར་དགོངས་དང་ལྡེམ་པོར་དགོངས། །མ་འོངས་འཇུག་དོན་དགོངས་པ་དང་། །དྲང་དོན་ངེས་དོན་སྙིང་པོའི་དོན། །གཉིས་སུ་མེད་པའི་ཚིག་དོན་རྣམས། །རྒྱུད་ལུང་མན་ངག་ཕྱེས་ལ་བཤད། །མུན་ནག་འཛུབ་གཡུག་མ་སོང་བའི། །སློབ་བུའི་རྒྱུད་ལ་ཐེབ་པར་སླེབ། །མུན་གླང་མིག་ཕྱེས་ཇི་བཞིན་དུ། །མན་ངག་མྱོང་བས་ཡིད་ཆེས་གཞུག །ཆོས་མཚམས་ལེའུ་ཐུན་གྱི་དུས། །ཡས་དྲིལ་མས་དྲིལ་དོན་རྣམས་བཤད། །བྷཻཾ་བྱ་དམིགས་པ་བསྟན་དུ་གཞུག །བསམ་བྱའི་གོ་བ་བསམ་དུ་གཞུག །སྐབས་སུ་སྒྲུང་རྒྱུད་ལ་སོགས་པ། །ངོ་མཚར་གཏམ་གྱི་བྱིང་བ་སེལ། །སློབ་བུའི་སྐྱོན་མཚང་འདོན་པའི་ཕྱིར། །སྔོན་གྱི་སྒྲུང་རྒྱུད་ལྡེ་ཆུང་འདོག །རྗེས་སུ་བསྔོ་བ་སྨོན་ལམ་བཏབ། །ཀུན་ལ་བྱང་སེམས་བརྩེ་ལྡན་གཅེས། །དེ་ལྟར་ལག་ལེན་སྟོན་མཁས་ན། །བླ་མ་སངས་རྒྱས་བརྐོས་ཕོར་ལ། །དམ་པའི་ཆོས་ཀྱི་རི་མོ་ཡོད། །སློབ་མ་སྣོད་ལྡན་འབི་འབི་བཅུག །བརྐོས་ཕོར་རི་མོ་དེ་ཐེབ་ན། །སྐུ་གསུམ་སཱཙྪ་ཀྲུང་གི་གྱུར། །དེ་ལྟར་དཔོན་སློབ་མན་ངག་ལག་ལེན་གཅེས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བླ་མས་ཆོས་བསྟན་པའི་དུས་ཀྱི་སྤྱོད་ལམ་བསྟན་པའི་ལེའུ་སྟེ་ང་ལྔ་པའོ། །྅྅྅ཡང་སྟོན་པས་བཀའ་སྩལ་པ། ཉོན་ཅིག་རིག་གདངས་རྩལ་འཁོར་རྣམས། །བླ་མ་སློབ་མ་འཛོམ་མོད་ཀྱང་། །མཚན་ཉིད་ལྡན་པའི་གནས་གཅིག་དགོས། །གལ་ཏེ་གནས་ངན་གཅིག་འཕྲད་ན། །འཕྲལ་གྱི་ངན་དགུ་འབྱུང་སྲིད་པས། གནས་བཟང་འདི་ལྟར་བཙལ་བ་གཅེས། །ཕུ་ན་གངས་དཀར་ཆུ་འགོ་ཡོད། །མདའ་ནི་ཕྱག་རྒྱ་བསྣོལ་བ་འདྲ། །བར་དུ་ཐུ་བ་བཏིང་བ་འདྲ། །སྐྱིལ་ཀྲུང་བཅས་པ་ལྟ་བུ་ཡོད། །ཚ་གྲང་སྙོམས་ཤིང་ཆུ་ཤིང་འཛོམ། །སྐྱེ་བོ་ཐ་མལ་ས་ལ་འཕགས། །བཙན་ཅིང་དབེན་ལ་དངས་མཐོ་བ། །འབྲས་བུ་འཚོ་བ་ཤུགས་ཀྱི་མོད། །མི་རྒོད་འཚེ་བ་གཅན་གཟན་མེད། །སྔོན་ཡང་གྲུབ་ཐོབ་བཞུགས་སའི། །གཞི་བདག་འཇམ་ལ་བློ་ཕེབ་པ། །རང་དབང་ཐོབ་ཅིང་དགུ་བག་བདེ། །ལྟ་སྤྱོད་མི་གཅིག་མ་འདྲེས་ཤིང་། །མཛེ་ཡུག་ལ་སོགས་མ་འབགས་པ། །དེ་ལྟ་བུ་གཅིག་བཙལ་ལ་བརྟེན། །དུར་ཁྲོད་བསྡད་ན་སྐྱོ་ཤས་ཆེ། །གངས་ཁྲོད་བསྡད་ན་རིག་པ་དངས། །གཡའ་ཁྲོད་བསྡད་ན་རྟོགས་པ་འཕེལ། །གནས་ཆེན་བསྡད་ན་བྱིན་རླབས་འཕེལ། །རི་ཐང་མཚམས་སུ་འཕྲལ་རྐྱེན་འཛོམ། །དབེན་པའི་གནས་སུ་ཉམས་མྱོང་སྐྱེ། །དུས་དང་མཐུན་པའི་སྤྱོད་པ་ལ། །དུས་དང་མཐུན་པའི་གནས་ཅིག་ཚོལ། །དེའི་དུས་ཀྱི་མྱོང་བ་སྐྱེས། །དེའི་སྐུ་གསུམ་ཉིད་ལ་རེག །སྔར་སངས་རྒྱས་པ་ཐམས་ཅད་ཀྱང་། །གནས་བཟང་བསྟེན་པས་སངས་རྒྱས་སོ། །དེ་བཞིན་གནས་ལ་བརྟག་པར་བྱ། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བླ་མེད་ཟབ་མོ་ཉམས་སུ་བླངས་པའི་གནས་གསུམ་གྱི་མཚན་ཉིད་བསྟན་པའི་ལེའུ་སྟེ་ང་དྲུག་པའོ། །྅྅྅ཡང་སྟོན་པས་བཀའ་སྩལ་པ། དེ་ལྟར་དབེན་པར་གནས་པ་ལ། །གྲོགས་ཀྱི་མཚན་ཉིད་གལ་ཆེ་སྟེ། །ཁ་ངན་དུག་ཆུ་འཐོར་བ་ན། །བློ་གསར་ཁམས་འདུས་ཀློང་བར་འགྱུར། །ཁོང་གྱོང་ཆེ་བཅོས་ཆེ་བ་ན། །ཞེ་འགྲས་དམ་ཚིག་ཉམས་པར་འགྱུར། །ཁ་གཡེང་སྐྱོན་མཚང་གཡེང་བ་ཅན། །དུག་ལྔ་མེ་ལྟར་འབར་བར་འགྱུར། །རིགས་ངན་བསམ་པ་ཆུང་བས་ན། །ནམ་ཞིག་དམན་པར་ལྟུང་བར་འགྱུར། །ཆང་སྨྱོ་འུར་འགྲོགས་ཆེ་བ་ན། །ནམ་ཞིག་ཞོར་ངན་འཕོག་པར་འགྱུར། །སྔར་དང་སུ་འགྲོགས་རྗེས་སུན་ན། །ད་ཡང་དེ་དང་མཚུངས་པར་འགྱུར། །སྒྲུབ་གཡེལ་གཡེང་བ་སྤེལ་བ་ན། །ནམ་ཞིག་འཇིག་རྟེན་པར་འགྱུར་སྲིད། །ཆང་ངན་གྲོང་ཁ་ཉུལ་བ་ན། །དམྱལ་བའི་སྣ་ཁྲིད་འབྱུང་སྲིད་པས། །གྲོགས་པོ་ངན་པ་སྤང་བར་བྱ། །གྲོགས་པོ་བཟང་པོའི་མཚན་ཉིད་ནི། །སྔར་ཡང་བླ་མ་མང་པོ་བསྟེན། །དེ་རྣམས་ཀུན་གྱི་ཐུགས་རྗེ་བཟུང་། །དམ་ཉམས་ལ་སོགས་སེལ་མེད་པས། །ཐོས་བསམ་ལ་སོགས་གདར་ཤ་བཅད། །བྷཻཾ་པའི་དུས་སུ་རྡོ་རུས་ཐུག །སྔར་ཡང་བསྒྲུབ་གེགས་འབྱུང་བ་སེལ། །དཀའ་སྤྱད་སྙིང་རུས་ཞེ་བཅའ་ལྡན། །དེ་འདྲ་བླ་མ་དག་དང་མཚུངས། །ཤིང་སྡོང་རྩ་བའི་རྩ་ཉག་གཅིག །ཤིང་སྡོང་རྩེ་མོར་སླེབ་དང་མཚུངས་། །དེ་ལྟར་མ་ཡིན་འབྲིང་པོས་ཀྱང་། །རང་དང་བློ་མཐུན་ལྟ་སྤྱོད་འདྲ། །གསང་ཐུབ་ཁ་ཉུང་བསྒྱུར་ཁ་ལྕི། །བློ་སྣ་ཐུང་ཞིང་སྐྱོ་ཤས་ཆེ། །ཁོང་དྲང་སྙིང་རུས་ཤེས་རབ་ཆེ། །རིགས་བཟང་རང་དང་བསྟུན་ཐུབ་པས། །དེ་ལྟ་བུ་དང་འགྲོགས་པར་བྱའོ། །གནས་སྐབས་སྒྲུབ་པའི་གེགས་མི་བྱེད། །མཐར་ཐུག་དམ་ཚིག་མ་ཉམས་པ། །སྐུ་གསུམ་དབྱིངས་སུ་སངས་རྒྱས་སོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། གྲོགས་ཀྱི་མཚན་ཉིད་བསྟན་པའི་ལེའུ་སྟེ་ང་བདུན་པའོ། །྅྅྅ཡང་སྟོན་པས་བཀའ་བསྩལ་པ། དེ་ནས་དུས་ཀྱི་ཁྱད་པར་གྱིས། །སྤྱིར་ནི་ན་སོ་གཞོན་པ་གཅིག །རྩ་རླུང་དར་དུས་ཉམས་མྱོང་མྱུར། །གནས་རྫས་མཐུན་རྐྱེན་འཛོམ་དུས་སུ། །བློ་ཕེབ་པའི་དགོས་པ་ཡོད། །གྲོགས་བཟང་བླ་མ་བཟང་དུས་འདིར། །དམ་ཆོས་ཟབ་པའི་དགོས་པ་ཡོད། །བླ་མས་ཐུགས་ལ་འདོགས་དུས་སུ། །གདམས་པ་རྩད་གཅོད་དགོས་པ་ཡོད། །རང་ཉིད་དད་པ་གསར་དུས་སུ། །བརྩོན་འགྲུས་འབྱུང་བའི་དགོས་པ་ཡོད། །དུས་ཚོད་ཚེས་གྲངས་བཟང་དུས་སུ། །རྟེན་འབྲེལ་འགྲིགས་པའི་དགོས་པ་ཡོད། །སོ་སོ་སྐྱེ་བོ་དབེན་དུས་སུ། །སྤྱོད་པ་སྐྱོང་བའི་དགོས་པ་ཡོད། །ལུས་ལ་ནད་སོགས་མེད་པའི་དུས། །དགེའ་སྦྱོར་འཕེལ་བའི་དགོས་པ་ཡོད། །སེམས་ལ་སྡུག་བསྔལ་མེད་པའི་དུས། །གང་བྷཻཾ་གསལ་བའི་དགོས་པ་ཡོད། །ཁྱད་པར་གསང་སྤྱོད་སྐྱོང་བ་ནི། །སྟོན་དཔྱིད་གཉིས་ཀྱིས་དུས་སུ་བཟང་། །མངོན་སུམ་ཉམས་སུ་ལེན་པའི་དུས། །དབྱར་མ་སྟོན་དང་དགུན་ཆུང་དང་། །ཟེར་གཉིས་དུས་སུ་ཁྱད་པར་ཤེས། །ནམ་མཁའ་སྤྲིན་དང་ཁུ་རླང་མེད། །སྤྲོ་བ་སྐྱེས་པའི་དུས་ན་བཟང་། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། དུས་ཀྱི་མཚན་ཉིད་བསྟན་པའི་ལེའུ་སྟེ་ང་བརྒྱད་པའོ། །྅྅྅སྟོན་པ་ཉིད་ཀྱིས་བཀའ་སྩལ་པ། སློབ་མ་གསར་བུ་ཁྲིད་པ་དང་། །སྐྱེ་བོ་སྨིན་གྲོལ་འགོད་པ་ལ། །ཡོ་བྱད་ཕུན་སུམ་ཚོགས་པ་དགོས། །འཚོ་བ་ཟས་ཀྱང་འདབ་ཏུ་བཤམས། །དམ་བཅའ་བསྲིང་ཅོག་དགོས་པ་ཡོད། །ནད་བཟློག་སྨན་དང་སྨན་ཡིག་བཤམས། །འབྱུང་འཁྲུགས་སེལ་བའི་དགོས་པ་ཡོད། །དགྲ་བཟློག་གོ་མཚོན་དུས་བསྟུན་བསགས། །བར་ཆད་སེལ་བའི་དགོས་པ་ཡོད། །བསྐང་བའི་རྫས་ཀྱང་མ་རུལ་བཤམས། །དམ་ཅན་དགྱེས་པའི་དགོས་པ་ཡོད། །མཆོད་པའི་རྫས་ཀྱང་མ་སྙིལ་བཤམས། །དཀོན་མཆོག་མཉེས་པའི་དགོས་པ་ཡོད། །སྒྲུབ་པའི་རྫས་ཀྱང་མ་ཆགས་པ། །དངོས་གྲུབ་འབྱུང་བའི་དགོས་པ་ཡོད། །ཚོགས་འཁོར་རྫས་ཀྱང་ཅི་མང་བསོགས། །ཉམས་རྟོགས་འཕེལ་བའི་དགོས་པ་ཡོད། །མེ་ཏོག་དབང་ཡོན་ལགས་ཡོན་བསོགས། །ཚོགས་གཉིས་རྫོགས་པའི་དགོས་པ་ཡོད། །གཏོར་མའི་རྫས་ནི་མ་སྦག་པ། །དམ་ཅན་ལས་བྱེད་དགོས་པ་ཡོད། །དབང་རྫས་རོལ་མོ་མཆོད་རྫས་བསགས། །སྣང་བ་འགྱུར་བའི་དགོས་པ་ཡོད། །དཔེ་ཆ་རྟེན་ཆ་འཛོམ་པ་དང་། །ཁྱད་པར་ཆོས་འདིའི་ངོ་སྤྲོད་ཆས། །ཤེལ་འབག་ལ་སོགས་གང་དགོས་བསོགས། །བུ་སློབ་འདུ་བའི་དགོས་པ་ཡོད། །ལུས་རྒྱན་ཆས་གོས་ལེགས་པར་བསོགས། །དང་བ་འདྲེན་པའི་དགོས་པ་ཡོད། །འཕྲལ་རྐྱེན་བཀོད་པ་འཕགས་པར་བྱ། །ཡིད་ཆགས་བློ་ཕེབ་དགོས་པ་ཡོད། །དབང་རྟེན་མཚན་ལྡན་བུད་མེད་བསོགས། །ཆགས་པ་རྒྱས་བྱེད་དགོས་པ་ཡོད། །བླ་མའི་གསང་ཡུམ་ཐུགས་མཉེས་བསགས། །དབང་བཞི་ཐོབ་པའི་དགོས་པ་ཡོད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡོ་བྱད་རྫས་ཀྱི་བསགས་ཚུལ་བསྟན་པའི་ལེའུ་སྟེ་ང་དགུ་པའོ། །྅྅྅ཡང་མཁའ་འགྲོ་མ་ཐམས་ཅད་ཀྱི་འཁོར་ཐམས་ཅད་ཀྱི་མགྲིན་གཅིག་ཏུ་འདི་སྐད་ཅེས་གསོལ་ཏོ། །ཀྱཻ། བླ་མ་ཀུན་ཏུ་བཟང་མོ་ཉིད་ཀྱིས་ཡིད་ཚིམས་པར་མཛད་པ་ཨ་ལ་ལ་ཧོ། །དེ་ལྟར་སྤྱི་དང་སྒོས་ཐེག་དང་ངོས་ཟིན་ནས་སྔར་དུས་མདོར་མཆོད་གསུང་པ་ལ་འབྲེལ་པ་མེད་པ་ལས་སྨིན་གྲོལ་ལག་ཁྲིད་རྒྱབ་ཡིག་དང་། །རྟགས་ཚད་གྲོལ་བ་བར་དོ་དང་། །མཇུག་དོན་གཏད་པ་མདོར་བཅད་ནས། །ཞེས་པ་རྣམ་པ་གནང་བར་འཚལ་ལོ། །ཞེས། ཐབས་ཀྱི་རྡོ་རྗེའི་འདུས་མ་བྱས་པའི་མཆོད་པས་མཉེས་པར་བྱའོ། །ཡང་སྟོན་པས་འཛུམ་པའི་མདངས་ཕྱུངས་ནས་འདི་སྐད་ཅེས་བཀའ་སྩལ་ཏོ། །ཧོ། ཉོན་ཅིག་རིག་གདངས་རྩལ་འཁོར་རྣམས། །ངའི་ཐེག་པ་བླ་མེད་འདི། །སུ་འཕྲད་གྲོལ་བར་ཐེ་ཚོམ་མེད། །སྙིང་པོའི་རྒྱུད་འདིར་སུ་འཕྲད་པ། །རྫོགས་སངས་རྒྱས་པར་ཐེ་ཚོམ་མེད། །ཅི་ཕྱིར་རང་རིག་སྐུ་གསུམ་ཡིན། །དེ་ལྟ་བུའི་ཡི་གེ་སྟེ། །ངོ་བོ་རང་ཐོག་འཕྲད་པ་ཡིན། །གང་ཤར་སྦྲུལ་མདུད་བཞིན་དུ་གྲོལ། །གྲོལ་བར་བྱེད་པ་གཞན་ནས་མིན། །ཀུན་འབྱུང་སྲིད་རྩ་རྟོགས་པས་གྲོལ། །སེམས་བྱུང་ཡིད་རྟོག་བག་ལ་ཞ། །རིག་པ་རྟོགས་ཚེ་འཛིན་པ་གྲོལ། །དེ་ཕྱིར་འདི་ཉིད་གར་བབ་པའི། །བརྒྱུད་པའི་རིམ་པ་བཤད་པར་བྱ། །སྤྱི་གཞི་སྐུ་གསུམ་བསྟན་པ་སྟེ། །ཆོས་སྐུའི་ཕུན་སུམ་ཚོགས་ལྔ་དང་། །ལོངས་སྐུའི་ཕུན་སུམ་ཚོགས་ལྔ་དང་། །སྤྲུལ་སྐུའི་ཕུན་སུམ་ཚོགས་ལྔ་བཤད། །ལོ་རྒྱུས་དོན་གྱི་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ནང་གཞི་ལུས་ཀྱི་ཕུན་སུམ་ཚོགས་ལྔ་དང་། །གསང་བ་ལྟ་སྟངས་གཅིག་གི་སྟེང་། །ཁྲེགས་ཆོད་ཐོད་རྒལ་ཕུན་ཚོགས་ལྔ། །ཡང་གསང་སྐུ་གསུམ་བུདྡྷ་ཚེ། །ཕུན་སུམ་ཚོགས་ལྔ་བདེ་བཞིར་ལྡན། །དེ་ཀུན་རྒྱུད་མཆོག་བླ་མེད་འདི། །མཁས་པ་པཎྜི་ཏ་ལྟར་བསྟན། །ནང་དོན་རྒྱལ་བ་དགོངས་བརྒྱུད་དང་། །རིག་འཛིན་བརྡ་དང་གང་ཟག་སྙན། །མཁའ་འགྲོ་གཏད་རྒྱས་བརྒྱུད་པ་དང་། །སྨོན་ལམ་དབང་བསྐུར་གྲུབ་ཐོབ་བརྒྱུད། །ཟབ་མོ་གཏེར་དུ་བརྒྱུད་པ་དང་། །བྱིན་བརླབས་དམ་རྫས་བརྒྱུད་པ་སོགས། །བརྒྱུད་པ་དགུ་ལྡན་ཕྱེས་ལ་བཤད། །དེ་ཀུན་རྒྱུད་མཆོག་ཐེག་ཆེན་འདི། །ཉམས་མྱོང་ཀུ་སུ་ལུ་ལྟར་བསྟན། །འདས་པའི་སངས་རྒྱས་ཆེ་བ་བརྗོད། །གདམས་པ་འདི་སྨིན་གྲོལ་བར་བཤད། །མ་འོངས་གྲུབ་ཐོབ་རིམ་གྱིས་བྱོན། །གདམས་པ་འདི་འཕྲད་གྲོལ་བར་བཤད། །ད་ལྟར་གང་ལ་བབ་པའི་ཆེ། །ཡོན་ཏན་དངོས་གྲུབ་མཉེས་ཚུལ་བཤད། །གང་ཟག་བློ་གསར་ཡིད་ཆེས་ཕྱིར། །ཆུ་འགོ་གངས་ལ་གཏུག་པ་ལྟར། །ཀུན་བཟང་ངའི་བར་དུ་བཤད། །སྣོད་འཇིག་པ་ལ་བཅུད་བརྟེན་དང་། །སེམས་འཇིག་པ་ལ་རིག་པ་བརྟེན། །རིག་པ་ཉིད་ལ་སྐུ་གསུམ་བརྟེན། །དེ་སོགས་སྤྲོས་པ་ཆོད་པར་བཤད། །དེ་ཡིས་ཡིད་ཆེས་གདར་ཤ་ཆོད། །གདམས་པ་ཁུངས་བཙུན་སློབ་མ་སྤྲོ། །བླ་མ་བཟང་པོའི་དགོས་པ་ཡོད། །འདི་མེད་གདམས་པ་སྟོན་འདོད་ན། །ལག་རྡུམ་བྲག་ལ་འཛེགས་པ་ལྟར། །ཁྲོན་ཆུ་ལྐུག་པའི་སྦལ་ཅོང་འདྲ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡིད་ཆེས་པའི་ལོ་རྒྱུས་ཀྱི་དོན་བསྟན་དགོས་པའི་ལེའུ་སྟེ་དྲུག་ཅུ་ཐམ་པའོ། །྅྅྅ཡང་འཁོར་རྣམས་ཀྱིས་བསྐུལ་ཏོ། །ཀྱཻ་སྟོན་པ་ཡུམ་ཆེན་མོ། །དབང་གི་མིང་དོན་གསུང་དུ་གསོལ། །སྟོན་པས་ལན་དུ་བཀའ་སྩལ་པ། ཉོན་ཅིག་རིག་པའི་རྩ་འཁོར་རྣམས། །དབང་གི་དབྱེ་བ་མང་བཤད་ཀྱང་། །དེ་ཡང་རྣམ་པ་བཞིར་འདུས་ཏེ། །སྤྲོས་བཅས་དབང་དང་སྤྲོས་པ་མེད། །ཤིན་ཏུ་སྤྲོས་པ་མེད་པ་དང་། །དེ་བཞིན་རབ་ཏུ་སྤྲོས་པ་མེད། །དབྱེ་བ་བཞིའི་ཚུལ་གྱིས་ནི། །དད་ལྡན་རང་རྒྱུད་སྨིན་པར་བྱ། །དེ་ནས་རིག་པའི་རྩལ་དབང་བསྐུར། །དང་པོ་སྤྲོས་བཅས་ལ་སོགས་ལས། །སྟ་གོན་གོང་མ་ཚར་བ་དང་། །བུམ་དབང་ཆེན་པོ་འདི་བཞིན་བསྐུར། །གདམས་པ་སྦྱོར་དངོས་རྗེས་འཇུག་གསུམ། །དང་པོ་སྔོན་འགྲོ་བཅུ་གཅིག་སྟེ། །བླ་མས་བྱ་བ་དག་དང་གཅིག །སློབ་བུ་བྱ་བ་དག་དང་གཉིས། །གསོལ་བཏབ་བསྙེན་པ་ས་ཆོག་དང་། །སྟ་གོན་ཐིག་ཆོག་མཚོན་ཆོག་དང་། །དཀྱིལ་འཁོར་བསྒྲུབ་དང་མཆོད་པར་བྱ། །སློབ་བུ་དཀྱིལ་འཁོར་ཞུགས་པའོ། །དངོས་གཞིའི་ཆོས་ལ་བཅུ་ཡིན་ཏེ། །རིགས་ལྔ་ཀུན་བཟང་དབང་དང་དྲུག །ཕྱག་རྒྱ་བརྡའི་དབང་དང་བརྒྱད། །དོན་དབང་ཚིག་གི་དབང་དང་བཅུ། །རྗེས་ལ་རྣམ་པ་གསུམ་ཡིན་ཏེ། །ཡོན་འབུལ་བཀའ་བཞིན་བསྒྲུབ་པ་དང་། །སྐྱོན་ཡོན་འགག་གདམས་བསྟན་པའོ། །དེ་ལྟར་དབང་དོན་རྒྱས་པ་རུ། །མཚན་ལྡན་བླ་མས་བསྐུར་བས་ན། །འབྲས་བུ་སྤྲུལ་པའི་སྐུ་ལ་རག །དབང་བསྐུར་ཐོག་མ་ཐ་མ་རུ། །དགའ་སྟོན་མ་བྱས་དངོས་གྲུབ་མེད། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་རྡོ་རྗེའི་སྤུན་སོགས་ལ། །ཚོགས་མཆོད་ཡོན་གྱི་མ་མཉེས་ན། །ནད་མང་ཚེ་ཐུང་བར་གཅོད་འབྱུང་། །ཐུན་མོང་དངོས་གྲུབ་མེད་པ་དང་། །མཆོག་ལ་རིང་དུ་སོང་བ་ལ། །ཚེ་འཕོས་ཡི་དྭགས་སྐྱེ་བར་འགྱུར། །མཚན་ཉིད་མི་ལྡན་བླ་མས་ནི། །དབང་བསྐུར་བྱས་ཀྱང་གཉིས་ཀ་ཕུང་། །དེ་ཕྱིར་རྣམ་དབྱེ་ཤེས་པར་གྱིས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སྤྲོས་བཅས་བུམ་དབང་བསྐུར་བའི་ལེའུ་སྟེ་རེ་གཅིག་པའོ། །྅྅྅ཡང་སྟོན་པས་བཀའ་སྩལ་པ། །ད་ནི་ཡང་དག་ཁྱོད་ཉོན་ལ། །སྤྲོས་པ་ཐམས་ཅད་བཅད་དགོས་ཏེ། །སེམས་ཞེས་བྱ་བའི་རིག་རིག་པོ། །ཡིད་ཞེས་བྱ་བའི་འགྱུ་འ གྱུ་པོ། །ཡོད་དོ་བྱས་ན་དངོས་པོ་མེད། །མེད་དོ་བྱས་ན་སྣ་ཚོགས་སྟོན། །མིག་ལ་གཟུགས་དང་རྣ་བར་སྒྲ། །སྣ་ལ་དྲི་དང་ལྕེ་ལ་རོ། །ལུས་ལ་རེག་དང་ཡིད་ལ་ཆོས། སྤང་བླང་དུ་མས་བདག་ཏུ་བཟུང་། །ཚོགས་དྲུག་དེ་རྣམས་རེ་རེ་ལ། །ཆགས་པ་མིར་སྐྱེ་སྡང་བས་དམྱལ། །ཕྲག་དོག་ལྷ་མིན་སེར་སྣ་ཡི། །རང་ལ་ང་རྒྱལ་ལྷ་རུ་སྐྱེ། །དེ་རྣམས་རང་སྣང་ངོ་མ་ཤེས། །བླུན་པོ་གཏི་མུག་བྱོལ་སོང་སྐྱེ། །རིགས་དྲུག་ས་བོན་དེ་སྦྱངས་ཕྱིར། །སེམས་ཀྱི་སྤྲོས་པ་འདི་ལྟར་བཅད། །ལུས་ཀྱི་སྤྲོས་པ་བྱར་མེད་བཅད། །ངག་གི་སྤྲོས་པ་ལྐུག་བར་བཅད། །ཡིད་ཀྱི་སྤྲོས་པ་བསམ་མེད་བཅད། །ཡུལ་གྲོང་སྤྲོས་པ་དབེན་པར་བཅད། །གཉེན་བཤེས་སྤྲོས་པ་མེད་པར་བཅད། །ནོར་གྱི་སྤྲོས་པ་དཔེ་ལ་བཅད། །ཟས་ཀྱི་སྤྲོས་པ་དཀའ་ཐུབ་བཅད། །གོས་ཀྱི་སྤྲོས་པ་ཧྲུལ་པོར་བཅད། །འདུ་འཛིའི་སྤྲོས་པ་ཡེངས་མེད་བཅད། །ཆགས་ཞེན་སྤྲོས་པ་ཞེ་ནས་བཅད། །གཟུང་འཛིན་སྤྲོོས་པ་ཞེན་ལོག་བཅད། །དུག་ལྔའི་སྤྲོོས་པ་སྐུ་ལྔར་བཅད། །དུག་གསུམ་སྤྲོས་པ་སྐུ་གསུམ་བཅད། །ཡང་དག་སྤྲོས་པ་སེམས་ལ་བཅད། །སེམས་ཀྱི་སྤྲོས་པ་ལྟ་བས་བཅད། །ལྟ་བའི་སྤྲོས་པ་ཚིག་ལ་བཅད། །ཚིག་གི་སྤྲོས་པ་ཉམས་ལེན་བཅད། །ཉམས་ལེན་སྤྲོས་པ་བྷཻཾ་གྱི་བཅད། །བྷཻཾ་གྱི་སྤྲོས་པ་རྟགས་ཀྱིས་བཅད། །རྟགས་ཀྱི་སྤྲོས་པ་རིག་པས་བཅད། །རིག་པས་སྤྲོས་པ་གཅེར་བུས་བཅད། །གཅེར་བུ་བྱ་བྲལ་ཟླ་བྲལ་ལོ། །ཐོག་མར་སྤྲོས་གཅོད་གལ་ཆེ་བས། །ལེགས་པར་དབང་པོ་དགུང་པར་བྱ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཞེན་ཐག་བཅད་པའི་ལེའུ་སྟེ་རེ་གཉིས་པའོ། །྅྅྅ ཡང་སྟོན་པས་བཀའ་སྩལ་པ། དེ་ནས་མི་རྟག་འཆི་བ་བསམ། །ཕྱི་སྣོད་འཇིག་རྟེན་ཁམས་འདི་ན་འང་། །མེ་བདུན་ཆུ་གཅིག་རླུང་གིས་འཇིགས། །འདི་ལ་བློ་གཏད་ག་ལ་ཐུབ། །ནང་བཅུད་སེམས་ཅན་ཐམས་ཅད་ཀྱང་། །ནད་མཚོན་མུ་གེ་གསུམ་གྱིས་འཆི། །འདི་ལ་བློ་གཏད་ག་ལ་ཐུབ། །བར་དུ་ན མ་ཟླ་དུས་བཞི་ཡང་། །དབྱར་དགུན་སྟོན་དཔྱིད་རིམ་བཞིན་འགྱུར། །འདི་ལ་བློ་གཏད་ག་ལ་ཐུབ། །ཁར་སང་དེ་རིང་ནུབ་མོ་ཡང་། །མི་རྟག་ཐང་གཅིག་འགྱུར་བ་སྟོན། །འདི་ལ་བློ་གཏད་ག་ལ་ཐུབ། །ཤིང་རྩི་ལོ་ཐོག་སྐྱེ་བྲི་དང་། །སྐྱེས་པ་འཆི་ཞིང་འདུས་པ་འབྲལ། །བསོགས་པ་ཟད་ཅིང་བརྩིགས་པ་འཇིག །ཡོད་པའི་མཐའ་ནི་མེད་པར་འགྱུར། །ཐམས་ཅད་མི་རྟག་འགྱུར་བའི་ཚེ། །འདི་ལ་བློ་གཏད་མེད་པར་ཞེན། །བློ་བརྟན་པོ་ཁྱོད་ཞེ་རེ་ཁྲེལ། །ཐམས་ཅད་མི་རྟག་ཐག་བཅད་པས། །ད་ནི་རང་སེམས་བཙན་ས་ཟིན། །སྙམ་པ་ཡང་ཡང་ཞེ་ནས་བྷཻཾ། །འཁོར་བའི་ཆོས་ལ་སྐྱུག་ལོག་ན། །ཡང་དག་དོན་ལ་འཇུག་པར་འགྱུར། །སྐབས་སུ་རྣམ་སྣང་ཆོས་བདུན་བཅའ། །ཉན་ཐོས་ཞི་བའི་ལྟ་སྟངས་ཀྱིས། །ལུས་ངག་ཡིད་གསུམ་རྣལ་དུ་ཕབ། །ཁྲོ་བོ་ཉིད་ཀྱི་ལྟ་སྟངས་གྱིས། །རྣལ་ཕབ་ཡོན་ཏན་གསུམ་ཡང་འགྲུབ། །སྙིང་མདངས་འགགས་མེད་ལུ་གུ་རྒྱུད། །གསལ་བདེ་སྣང་རིག་སྟོང་པ་ཉིད། །དབྱེར་མེད་གསལ་བ་མ་འདྲེས་གནས། །རིག་གནས་ལུག་རྒྱུད་བརྩོན་འཛིན་པ། །མངོན་སྣང་དལ་བ་ཉིད་ཀྱི་བརྟེན། །སྣང་བཞི་མྱུར་དུ་མཐོང་བར་བྱེད། །བྱས་ཆོས་ཐམས་ཅད་བློ་ཡིན་ཏེ། །བློ་ནི་ཀུན་རྫོབ་འཁྲུལ་པར་བཤད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཐོག་མར་མི་རྟག་བློ་ལ་སྦྱངས་པའི་ལེའུ་སྟེ་རེ་གསུམ་པའོ། །྅྅྅ ཡང་ཅིག་སྟོན་པས་བཀའ་སྩལ་པ། །འདུས་བྱས་ཐམས་ཅད་མི་རྟག་པ། །དེའི་ནང་ནས་ལུས་མི་རྟག །སྦྱིར་ནི་རིགས་དྲུག་སེམས་ཅན་ལ། །སྐྱེས་ནས་མི་འཆི་སུ་ཡང་མེད། །སྒོས་སུ་གླིང་བཞིའི་མི་རྣམས་ལ། །སྐྱེས་ནས་མི་འཆི་སུ་ཡོད་པ། །ཡང་སྒོས་འཛམ་གླིང་སེམས་ཅན་རྣམས། །མ་ཤི་ལུས་པ་སུ་ཡིས་མཐོང་། །སྔར་འདས་ཕ་མ་རྣམས་ལ་ལྟོས། །ད་སྐྱེས་གཞོན་པ་རྣམས་ལ་བསམ། ། འཆི་ལུགས་བསམ་གྱིས་མི་ཁྱབ་ཀྱང་། །གནས་ལུགས་འཆི་དང་བཙན་ཐབས་འཆི། །རྣམ་པ་གཉིས་སུ་འདུས་པ་ཡིན། །རྒས་ཤིང་རྒུད་ནས་འཆི་བ་དེ། །གནས་ལུགས་ཡིན་ཏེ་རེ་རེ་ཙམ། །ཕལ་ཆེར་རྐྱེན་གྱིས་བཙན་ཐབས་འཆི། །ནད་རིགས་སུམ་བརྒྱའ་དྲུག་ཅུ་པོ། །ཁོང་པའི་ནང་ནས་ལངས་ནས་འཆི། །གདོན་བགེགས་སྟོང་ཕྲག་བརྒྱད་བཅུ་ཡིས། །ཕྱི་ནང་སྲོག་ལ་ཧུར་ཐུམ་སྤྱད། །ས་ཆུ་མེ་རླུང་དུག་མཚོན་སོགས། །གློ་བུར་སུམ་བརྒྱའ་དྲུག་ཅུས་འཆི། །ཡེ་འགྲོགས་བཞི་བརྒྱ་རྩ་བཞི་ཡིས། །ཞུན་མར་རླུང་གི་བསད་ཅིང་འཆི། །འཚོ་ཐབས་ལྟོ་གོས་གཉིས་ཡིན་ཀྱང་། །སུབ་དང་བརྣང་བ་ལ་སོགས་པས། །སྲོག་གཅོད་རྐྱེན་དུ་གྱུར་པ་ཡིན། །ཀྱི་ཧུད་མི་འཆི་ལུས་པ་སུ། །ལྷ་འམ་འཇིག་རྟེན་གཞན་ཞིག་ནས། །སངས་རྒྱས་ཀྱིས་ཀྱང་གཟིགས་པ་མེད། །རང་གི་གཉེན་དང་ཁྱིམ་མཚེས་སོགས། །ཡུལ་མི་ཀུན་ལའང་ལེགས་བསམ་ན། །དམ་ཆོས་མ་གཏོགས་ཅིས་ཕན་པས། །འཆི་བའི་དུས་ཆེན་སླེབ་ཙ་ན། །རྒྱལ་པོའི་དབང་གིས་འཕྲོག་པ་མེད། །བློན་པོའི་གྲོས་ཀྱི་བྲིད་ཐབས་མེད། །ཕྱུག་པོའི་ནོར་གྱིས་བླུས་པ་མེད། །ཁ་གཉན་ཞུ་བ་ཕུལ་ས་མེད། །དམ་ཆོས་ཟབ་ཀྱང་བཤད་ས་མེད། །ལྕེ་བདེ་དག་གིས་བཀྲོལ་ས་མེད། །འཁོར་གཡོག་བླུན་མར་བཏང་ས་མེད། །ད་ནི་ཡང་དག་སྙིང་པོའི་དོན། །དོན་མཆོག་གཅིག་ཚུགས་མི་བྷཻཾ་རེ། །སྙམ་པ་ཡང་ཡང་དྲན་པར་བྷཻཾ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། འཆི་བ་ལ་བློ་སྦྱངས་པའི་ལེའུ་སྟེ་རེ་བཞི་པའོ། །྅྅྅ ཡུམ་ཆེན་ཉིད་ཀྱིས་ཡང་གསུངས་པ། ཉོན་ཅིག་རིག་པའི་རང་འཁོར་རྣམས། །གལ་ཏེ་འཆི་བ་འབྱུང་བ་ན། །དྲན་ནས་དེ་རིང་ཐུག་གི་བར། །མཐོ་རིས་ཐོབ་པའི་ལས་ཅི་བྱས། །ངན་སོང་འཁོར་བའི་གནོད་ཅི་བྱས། །ལེགས་པར་དཀར་ནག་རྡེའུ་བགྲང་། །ལུས་སྡིག་གསུམ་དང་ངག་སྡིག་བཞི། །སེམས་སྡིག་གསུམ་པར་མི་དགེའ་བཅུ། །རྡེའུ་ནག་པོ་རེ་རེ་བཤར། །དེ་བཞིན་དགེ་ལ་དཀར་པོ་རེ་རེ་བཤར། །ནག་པོ་གང་འདུག་འགྱོད་པས་བཤགས། །ཕྱི་ལྟར་ཚིག་དང་རུ་གཟུགས་བཤགས། །སྨྲེ་སྔགས་ངུ་འབོད་ཆེན་པོ་ཚངས། །ནང་ལྟར་བསྐྱེད་རྫོགས་ཟབ་མོ་དང་། །གསང་བ་གནས་ལུགས་སྟེང་དུ་བཞག །ཕྱིས་ནས་སྲོག་ལ་བབ་ཀྱང་བསྲུང་། །བདེར་གཤེགས་སངས་རྒྱས་ཐམས་ཅད་ཀྱིས། །ལས་ཀྱི་རྣམ་སྨིན་སྐྱེས་རབས་ལྟ། །དེ་ལ་ཡོན་ཏན་དུ་མ་སྟེ། །ཆོས་ཀྱི་ཡན་ལག་སྤང་ལེན་གཉིས། །དགེ་སྡིག་འདོར་ལེན་ཤེས་པར་འགྱུར། །གནས་སྐབས་སྡིག་དག་རིག་པས་མཐོང་། །མཐར་ཐུག་བར་དོར་སྔངས་སྐྲག་གྲོལ། །ངན་སོང་སྒོ་ཁེགས་བདེ་བར་འགྲོ། །དེ་བཞིན་དགེ་བ་ཐམས་ཅད་ཀྱང་། བླ་མ་ཉིད་དམ་རྟེན་གྱི་དྲུང་། །འཁོར་གསུམ་ཡང་དག་བསྔོ་བ་བྱ། །སྨོན་ལམ་དག་པར་ཁ་བསྒྱུར་གདབ། །དམིགས་མེད་ཡོངས་སྒྲོལ་ཆེན་པོར་བཞག །གནས་སྐབས་དགེ་འཕེལ་བསྟན་ལ་གནས། །བར་དོར་ལྷའི་ལམ་སྣ་སྟོན། །ཕྱི་མ་རིགས་བཟང་ཆོས་དང་མཇལ། །དེ་ཕྱིར་གཞི་འབྲེལ་ལེགས་བཏང་ཕྱིར། །རྒྱུ་འབྲས་གཉིས་པོ་གོ་བར་གྱིས། །བསམ་པ་དཀར་ལ་སྦྱོར་བ་ནག །བསམ་པ་ནག་ལ་སྦྱོར་བ་དཀར། །འཕེན་བྱེད་མཐོ་ལ་ལག་ལེན་དམའ། །འཕེན་བྱེད་དམའ་ལ་སྦྱོར་བ་མཐོ། །རེག་འཇོམས་ཅན་དང་འདྲེས་མ་དང་། །གནས་སྐབས་གོང་འོག་དུས་ཁྱད་ཀུན། །རིམ་པར་རང་གི་ཤེས་པར་བྱ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ལས་རྒྱུ་འབྲས་ལ་སེམས་སྦྱངས་པའི་ལེའུ་སྟེ་རེ་ལྔ་པའོ། །྅྅྅ཡུམ་ཆེན་ཉིད་ཀྱིས་ཡང་གསུངས་པ། ཉོན་ཅིག་རིག་པའི་རང་འཁོར་རྣམས། །དེ་ནས་ངན་སོང་སྡུག་བསྔལ་བསམ། །ཨ་པ་ད་ལྟ་ང་ཤི་ན། །བར་དོའི་འཕྲང་ལ་འགྲོ་དགོས་སྟེ། །དགེ་བྱེད་མཐོ་རིས་ལས་རེ་དཀོན། །དུག་གསུམ་འདིའི་གཞི་བླངས་ནས། །ངན་སོང་གསུམ་དུ་འགྲོ་བ་དེ། །དམྱལ་ཁམས་བཅོ་བརྒྱད་སྐྱེས་པ་ན། །ད་ལྟ་གྲང་དྲོ་གཅིག་མི་བཟོད། །སྡུག་བསྔལ་དེ་འདྲ་སུས་བཟོད་པས། །ཡི་དྭགས་གནས་སུ་སྐྱེས་པས་ན། །ད་ལྟ་འཁྱག་སྐོམ་ཅིར་མི་བཟོད། །སྡུག་བསྔལ་དེ་འདྲ་སུས་བཟོད་པས། །བྱོལ་སོང་གནས་སུ་སྐྱེས་པ་ན། །ད་ལྟ་ངལ་དུབ་ཅིར་མི་བཟོད། །སྡུག་བསྔལ་དེ་འདྲ་ཡུན་ཐུང་ག་ལ་ཡིན། །བར་བསྐལ་ཉི་ཤུ་ལ་སོགས་པས། །ལས་ངན་མ་ཟད་ཚེ་ཚད་མེད། །འདི་རུ་མིར་སྐྱེ་བའི་ཐབས་འབད་དགོས། །མཐོ་རིས་གནས་སུ་སྐྱེ་ན་ཡང་། །ལྷ་ལ་འཕོ་ལྟུང་སྡུག་བསྔལ་ཆེ། །ལྷ་མ་ཡིན་ལ་འཐབ་ཅིང་རྩོད། །མི་ལ་སྐྱེ་རྒ་ན་དང་འཆི། །བརྒྱད་འགྱུར་སྡུག་བསྔལ་ཆུ་གཉེར་འདྲ། །སངས་རྒྱས་སྐུ་གསུམ་མ་ཐོབ་ན། །འཁོར་བ་འདི་ན་བདེ་བ་མེད། །འཁོར་བའི་ཉེས་དམིགས་མེ་དོང་ནས། །སྐྱོབས་ཤིང་ཐར་པའི་ཐབས་ཚོལ་ལོ། །དེ་ཡང་ལེ་ལོར་མ་གྱུར་བྱ། །ཐར་པ་བྱང་ཆུབ་བསྒྲུབ་པ་ལ། །གེགས་སུ་མ་གྱུར་གང་ཡང་མེད། །གཉེན་འབྲེལ་འཁོར་བའི་བཤལ་ཐག་ཡིན། །རྦད་གྱིས་བཅད་ལ་བྱང་ཆུབ་བསྒྲུབ། །བསོད་ནམས་བདུད་ཀྱི་མགོ་བསྐོར་ཡིན། །ལིངས་གྱིས་བོར་ལ་བྱང་ཆུབ་སྒྲུབས། །ནོར་རྫས་སྡུག་བསྔལ་ཐུམ་པོ་ཡིན། །བཤིག་གྱིས་བཤིག་ལ་བྱང་ཆུབ་བསྒྲུབ། །སྡེ་དགོན་འཁོར་བའི་བཟང་བཙོན་ཡིན། །རྒྱངས་ཀྱིས་བསྐྱུར་ལ་བྱང་ཆུབ་བསྒྲུབ། །དཔེ་རྟེན་གསེར་གྱི་སྡོང་ཤིང་ཡིན། །འཐོར་གྱིས་གཏོར་ལ་བྱང་ཆུབ་བསྒྲུབ། །བུ་སློབ་ཆགས་སྡང་བྱུར་ཤིང་ཡིན། །གཅེར་གྱིས་གཏོན་ལ་བྱང་ཆུབ་བསྒྲུབ། །ཁེ་དང་གྲགས་པ་ལོ་འདོད་དང་། །གཏམ་སྙན་བདེ་བ་ཅི་དང་ཅི། །ཐར་ལམ་སྒྲུབ་པའི་གེགས་ཆེན་བྱེད། །བཟང་ངན་དཀར་ནག་ལ་སོགས་པ། །ཅི་དང་ཅི་ཡིས་རྐྱེན་བྱས་ན། །འཁོར་བའི་རྨིང་རྡོ་མིན་པ་མེད། །རིགས་དྲུག་སྡུག་བསྔལ་སྐྱོབ་པའི་ཐབས། །སྐུ་གསུམ་ཞིང་དུ་འགྲོ་བའི་ལམ། །ཕྱི་ནང་ཀུན་ལ་སྐྱབ་འཚལ་ལོ། །སྙིང་དང་ཁ་ཞེ་འཕྲོད་པར་སྤྲད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རིགས་དྲུག་སྡུག་བསྔལ་ལ་སེམས་སྦྱང་བའི་ལེའུ་སྟེ་རེ་དྲུག་པའོ། །྅྅྅ཡུམ་ཆེན་ཉིད་ཀྱིས་བཀའ་སྩལ་པ། ཉོན་ཅིག་རིག་པའི་མདངས་འཁོར་རྣམས། །དེ་ལ་ལག་ལེན་འདི་ཡིན་ཏེ། །སྐྱབས་གནས་མདུན་གྱི་ནམ་མཁར་གསལ། །ལུས་ནི་སྐྱིལ་ཀྲུང་ཐལ་མོ་སྦྱར། །ངག་ནི་གདུང་དབྱངས་སྙན་པོས་བརྗོད། །སེམས་ནི་ཁ་ཞེ་འཕྲོད་པར་སྤྲད། །མོས་གུས་མཆི་མ་ཁྲོམ་པ་ཡིས། །ན་མོ། །རྣམ་པ་ཀུན་མཁྱེན་སངས་རྒྱས་གཙོ། །དེས་གསུང་ཞི་བ་དམ་པའི་ཆོས། །དེ་རྗེས་འཇུག་པའི་དགེ་འདུན་ལ། །བདག་སོགས་འགྲོ་དྲུག་སྐྱབས་སུ་མཆི། །ཤེས་རབ་ལྔ་ལྡན་བླ་མ་རྗེ། །ཡེ་ཤེས་ལྔ་ལྡན་ཡི་དམ་ལྷ། །མཚན་ཉིད་ལྔ་ལྡན་མཁའ་འགྲོའི་ཚོགས། །བདག་སོགས་འགྲོ་དྲུག་སྐྱབས་སུ་མཆི། །དག་པ་གཉིས་ལྡན་ཆོས་ཀྱི་སྐུ། །ངེས་པ་ལྔ་ལྡན་ལོངས་སྤྱོད་རྫོགས། །མ་ངེས་དོན་མཛད་སྤྲུལ་པའི་སྐུ། །བདག་སོགས་འགྲོ་དྲུག་སྐྱབས་སུ་མཆི། །ཡུམ་ཆེན་མཁའ་འགྲོ་ཀུན་བཟང་ལྔ། །སྤྲུལ་སྐུ་རིམ་བརྒྱུད་བླ་མ་དང་། །སྐྱབས་ཡུལ་གོང་མ་ཐམས་ཅད་ལ། །ངོ་བོ་རང་ཐོག་འདི་བཞིན་བཞག །ན་མོ། དག་པ་དབྱིངས་ཀྱི་དཀྱིལ་འཁོར་དུ། །ཐིག་ལེ་རང་གསལ་ཚོམ་བུར་རྒྱས། །ཡེ་ཤེས་རིག་པ་ཟང་ཐལ་སྐུ། །བདག་འཛིན་བྲལ་བར་སྐྱབས་སུ་མཆི། །ཉིན་མཚན་དུས་དྲུག་ཐམས་ཅད་དུ། །བློ་སྐལ་ངེས་པས་དུང་ངེ་བསམ། །ཨ་པ་ངའི་སྔོན་ཆད་དུ། །བྱས་པ་དོན་མེད་མི་ཚེ་ཟད། །ཉིན་པར་བྱ་བའི་ལས་ལ་ཡེངས། །ནང་ནུབ་ལྟོ་གོས་ཁོལ་པོར་སོང་། །ནུབ་མོ་གཏི་མུག་གཉིད་ཀྱིས་ཁྱེར། །ཚེ་འདི་ཡེངས་བ་ལམ་ལ་ཟད། །དར་ཙམ་ཡུད་ཙམ་རེ་རེ་བས། །ཚེ་འདི་ཆེ་འཕྲང་ཡུད་ཡུད་པོས། །ལོ་ཟླ་འདས་པ་ངས་མཚོར། །མི་ཚེ་སྟོང་ལོག་བྱུང་བས་ན། །མི་ལུས་ཐོབ་པ་དོན་ཅི་ཡོད། །རིགས་དྲུག་གར་སྐྱེས་ཅི་ཆ་ཡོད། །འཁོར་བ་མཐའ་དེ་སུ་ཡིས་རྙེད། །ད་ལྟ་རང་དབང་ཡོད་དུས་སུ། །སྐྱབས་གནས་མི་ཚོལ་ཡི་རེ་མུག །གཞན་རྐྱེན་ཁ་རུ་གཏོང་རེ་ན། །བདག་རྐྱེན་འདོད་པ་མི་སྐྱོང་རེ། །སེམས་ཅན་སྙིང་རྗེ་མི་བྷཻཾ་རེ། །ལེ་ལོར་དར་གཅིག་གཏོང་རེ་ན། །སྐྱིད་འདོད་ཕྱི་ཤོལ་བྱེད་རེ་ན། །ཆང་ནག་གཉིད་དབང་བཏང་རེ་ན། །དཀོན་མཆོག་བླ་མ་སྐྱབས་སུ་བསྟེན། །ཅི་ཡོད་དེའི་ཕྱོགས་སུ་གཏོང་། །ད་ལྟའི་བདེ་ཆུང་ཡུད་ཙམ་རེས། །ཡུན་གྱི་བདེ་བ་འགག་བར་འདུག །སྙིང་རུས་སྡུག་བསྲན་མི་བྱེད་རེ། །ཚེ་འདི་རླུང་ལ་མི་བསྐུར་རེ། །སྙིང་པོའི་དོན་གཅིག་མི་བསྒྲུབ་རེ། །དབེན་པའི་རི་སུལ་མི་འགྲིམ་རེ། །ལུས་ཀྱི་གཅེས་འཛིན་མི་གཏོང་རེ། །དགྲ་གཉེན་རེ་དྭོགས་མི་གཅོད་རེ། །འཇིག་རྟེན་བྱ་བ་བྱེད་རེ་ན། །བླ་མའི་བཀའ་བཞིན་མི་བསྒྲུབ་རེ། །རིག་པ་མངོན་སུམ་མི་ལྟ་རེ། །ཆོས་ཟད་སྐུ་གསུམ་མི་བསྒྲུབ་རེ། །སྙམ་པའི་ཞེ་བཅང་དྲང་པོར་བྱ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སྐྱབས་སུ་འགྲོ་བ་ལ་བློ་སྦྱང་བའི་ལེའུ་སྟེ་རེ་བདུན་པའོ། །྅྅྅ ཡུམ་ཆེན་ཉིད་ཀྱིས་བཀའ་སྩལ་པ། །ཉོན་ཅིག་རིག་གདངས་རྩལ་འཁོར་རྣམས། །དེ་ནས་སངས་རྒྱས་ཡོན་ཏན་ནམ། །དམ་པའི་ཆོས་འདི་བྱས་གྱུར་ན། །ཡུན་དང་མཐར་ཐུག་གཉིས་ཀ་བདེ། །སངས་རྒྱས་ཡོན་ཏན་བསམ་མི་ཁྱབ། །ཆོས་སྐུའི་མཛད་པ་བསམ་མཐའ་ཡས། །ལོངས་སྐུའི་ཞིང་བཀོད་མུ་མཐའ་ཡས། །སྤྲུལ་སྐུའི་ཆོ་འཕྲུལ་བློས་མི་འཁྱུད། །སྐྱེ་ལ་རང་དབང་ཐོབ་པ་དང་། །འཕོ་ལ་རང་དབང་ཐོབ་པ་དང་། །རང་རང་ཡོན་ཏན་བརྗོད་ལས་འདས། །ཡང་དག་རྫོགས་པའི་སངས་རྒྱས་ནས། །འཁོར་བ་དུས་གཅིག་དོང་ནས་སྤྲུག །མངོན་པར་སངས་རྒྱས་ཐོབ་པ་ན། །སྐད་ཅིག་སྤྲུལ་པ་བྱེ་བ་འགྱེད། །འཕོ་བ་ཆེན་པོར་བཞུགས་པ་ན། །སྐད་ཅིག་སྡིག་ཅན་སུམ་སྟོང་གྲོལ། །མཆོག་སྤྲུལ་སྟོང་དང་རྩ་གཉིས་སོགས། །ཡང་སྤྲུལ་ཐུབ་དྲུག་སུམ་སྤྲུལ་སོགས། །སངས་རྒྱས་ཡོན་ཏན་བསམ་མི་ཁྱབ། །དེས་གསུང་དམ་ཆོས་བསམ་མི་ཁྱབ། །ཟབ་དང་རྒྱ་ཆེ་བློ་ལ་འཚམས། །འཁོར་གཅོང་འབྱིན་པའི་སྨན་ལ་ཟབ། །དེ་བཞིན་ཉམས་ལེན་དགེ་འདུན་བསྐྱང་། །ལྷ་མི་ཀུན་གྱི་མཆོད་པའི་རྟེན། །འགྲོ་ཀུན་འདྲེན་པའི་ལམ་སྣ་བ ། །སངས་རྒྱས་བསྟན་པའི་སྲོག་ཤིང་མཆོག །སྤས་པའི་སངས་རྒྱས་མི་གཟུགས་ཅན། །ཐོས་བསམ་བྷཻཾ་པའི་སྲོག་ཤིང་མཆོག །བཤད་སྒྲུབ་ཆ་ལུགས་བསམ་མི་ཁྱབ། །དཀར་སེར་དམར་ནག་ཆ་ལུགས་ལ། །དབུ་ཟླུམ་ལྕང་ལོ་ངེས་པ་མེད། །སེམས་ཅན་བློ་དང་གང་འཚམས་པར། །རིག་གནས་ལྔ་སོགས་རེ་བ་སྐོང་། །གསོན་གཤིན་རིགས་དྲུག་འདྲེན་པའི་དཔལ། །སངས་རྒྱས་མི་གཟུགས་བསམ་མི་ཁྱབ། །གཉིས་འཛིན་ལོག་ལྟ་ངོ་མི་ཤེས། །སངས་རྒྱས་བྱིན་རླབས་རྨད་དུ་བྱུང་། །དམ་ཆོས་ཐུགས་རྗེ་ངོ་མཚར་ཆེ། །དགེ་འདུན་མཛད་པ་ཨ་ལ་ལ། །དེ་ལྟ་བུ་ལ་ལེགས་བསམ་ན། །བདག་ཀྱང་དེ་བཞིན་མི་བསྒྲུབ་རེ། །ཐོག་མའི་སངས་རྒྱས་ཐམས་ཅད་ཀྱང་། །ཆུ་ཐིག་རེ་ལ་བརྟེན་ཙམ་ན། །སྨོན་འཇུག་སེམས་བསྐྱེད་བརྩམ་པའི། །བདག་ཀྱང་སྨོན་འཇུག་སེམས་བསྐྱེད་དེ། །ཉམས་སུ་ཡང་ཡང་ཁ་ཞེ་སྤྲད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སངས་རྒྱས་ཀུན་གྱི་ཡོན་ཏན་ལ་སྦྱངས་པའི་ལེའུ་སྟེ་རེ་བརྒྱད་པའོ། །྅྅྅ ཡང་ཅིག་སྟོན་པས་བཀའ་སྩལ་པ། །ཉོན་ཅིག་རིག་པའི་རྩལ་འཁོར་རྣམས། །དེ་ནས་མདུན་གྱི་ནམ་མཁའ་ལ། །སེམས་བསྐྱེད་དཔང་པོ་སྤྱན་དྲངས་ལ། །པུས་བཙུག་ཐལ་སྦྱར་ཁ་ཞེ་སྤྲད། །ཧོ་ཡུམ་ཆེན་ཀུན་བཟང་སྤྱན་སྔ་རུ། །ལུས་ངག་ཡིད་ཀྱི་གཞན་རྣམས་ལ། །གནོད་པའི་ལས་ལོག་དགེ་བ་བསྒྲུབ། །དགེ་ཚུལ་དགེ་སློང་བྱང་ཆུབ་སེམས། །སོ་སོར་ཐར་པའི་སྡོམ་པ་ལ། །བདག་ནི་རྒྱུན་དུ་གནས་ཤིང་བསྲུངས། །བླ་མ་ཀུན་བཟང་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་བར། །འགྲོ་དྲུག་སེམས་ཅན་མ་ལུས་ཀུན། །མ་དང་བུའི་འདུ་ཤེས་ཀྱིས། །མ་བསྒྲལ་བ་རྣམས་བསྒྲལ་བ་དང་། །མ་གྲོལ་བ་རྣམས་དབུགས་འབྱིན་ཕྱིར། །བྱང་ཆུབ་སྨོན་པའི་སེམས་བསྐྱེད་དོ། །ཧོ་སྔོན་གྱི་རྒྱལ་བ་ཐམས་ཅད་ཀྱིས། །སྡོམ་པ་ལ་ནི་གནས་པ་ལྟར། །དེང་ནས་འཁོར་བ་མ་སྟོང་བར། །བླ་མེད་འཇུག་པའི་བྱང་ཆུབ་སེམས། །རྒྱལ་བ་སྲས་སུ་དཔང་བསྐྱེད་དོ། །གཞན་དོན་བྱེད་པར་སེམས་བསྐྱེད་དོ། །ཁམས་གསུམ་སེམས་ཅན་ཐམས་ཅད་ཀུན། །རང་ངོ་མ་ཤེས་གཟུང་འཛིན་འཐས། །འཁོར་བ་དོང་ནས་སྤྲུགས་པའི་ཕྱིར། །རང་ངོ་ཤེས་པར་སེམས་བསྐྱེད་དོ། །དཀོན་མཆོག་གསུམ་བཟུང་མི་བཏང་ངོ་། །བླ་མ་ཡི་དམ་མི་སྤང་ངོ་། །སྐུ་གསུམ་རང་ཆས་རང་གསལ་གདབ། །འཁོར་འདས་ཆོས་རྣམས་རང་གྲོལ་བཞག །ཧོ་རྡོ་རྗེ་རིགས་ཀྱི་དམ་ཚིག་ཏུ། །རྡོ་རྗེ་དྲིལ་བུའི་ཕྱག་རྒྱ་བཟུང་། །རྣམ་རྟོག་གཉིད་ཀྱི་བྱུང་ས་བརྟག །རྡོ་རྗེ་མཁའ་འགྲོའི་དམ་ཚིག་ཡིན། །རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞི་རྟག་ཏུ་གཏོང་། །ཚོགས་དྲུག་ལྷུག་པ་ཉིད་དུ་བཞག །རིན་ཆེན་མཁའ་འགྲོའི་དམ་ཚིག་ཡིན། །པདྨ་རིགས་ཀྱིས་དམ་ཚིག་ཏུ། །ཐེག་པ་རྣམ་གསུམ་ཆོས་རྣམས་སྤྱད། །པདྨའི་རིགས་གྱུར་ཐམས་ཅད་མཆོད། །པདྨ་མཁའ་འགྲོའི་དམ་ཚིག་ཡིན། །ལས་ཀྱི་རིགས་ཀྱིས་དམ་ཚིག་ཏུ། །འགྲོ་བའི་དོན་ལ་བརྩོན་པར་བྱ། །རྣམ་རྟོག་ཕྲ་རག་སྤོམ་གསུམ་བསྒྲལ། །ལས་ཀྱི་མཁའ་འགྲོའི་དམ་ཚིག་ཡིན། །བདེར་གཤེགས་རིགས་ཀྱིས་དམ་ཚིག་ཏུ། །མི་འགུལ་གསུམ་ལ་གཞི་བྱས་ནས། །དབྱིངས་རིག་གཉིས་པོ་འབྲལ་མི་བྱ། །སངས་རྒྱས་མཁའ་འགྲོའི་དམ་ཚིག་ཡིན། །ཅེས་པས་ཁ་ཞེ་སྤྲད་བྱས་ནས། །ཚད་མེད་བཞི་ལྡན་ཚུལ་གྱིས་ནི། །ཉིན་མཚན་དུས་དྲུག་ལག་ཏུ་བླང་། །དེའི་གོང་མའི་ཡོན་ཏན་རྣམས། །རྒྱུད་ལ་སྐྱེ་བར་ཐེ་ཚོམ་མེད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སྐྱེ་བ་མེད་པ་ལ་བློ་སྦྱངས་བའི་ལེའུ་སྟེ་རེ་དགུ་པའོ། །྅྅྅ཡང་གཅིག་སྟོན་པས་བཀའ་སྩལ་པ། ཉོན་ཅིག་རིག་པའི་རྩལ་འཁོར་རྣམས། །དེ་ནས་ཚོགས་གཉིས་རྫོགས་པའི་ཕྱིར། །མཆོད་ཡུལ་གོང་མ་གསལ་གདབ་ལ། །ས་ཤིང་རིན་ཆེན་མཎྜལ་ལ། །དམིགས་རྟེན་བྱས་ལ་སྐུ་གསུམ་གྱི། །མཎྜལ་རྒྱས་བསྡུས་མང་དུ་ཕུལ། །ཁྱད་པར་རང་གི་གསོལ་འདེབས་པའི། །ཡང་དག་དོན་གྱི་ཚིག་འདི་ཉིད། །ཚིག་དོན་བསམ་ཞིང་འབུལ་བར་བྱ། །ན་མོ། ཧྲཱི་གདོད་མའི་གཞིའི་ཞིང་ཁམས་ཡེ་ནས་རྣམ་པར་དག་པ། སྟོང་པའི་ངོས་ནས་ཁྱམས་དང་མཐའ་དབུས་མ་གྲུབ་ལ། རང་བཞིན་ངོས་ནས་གསལ་ཞིང་བཀྲ་བ། ལྷུན་གྱིས་གྲུབ་པ། གཞོན་ནུ་བུམ་པ་སྐུའི་དཀྱིལ་འཁོར། འཁོར་འདས་ཀྱི་འབྱུང་གནས་ཆེན་པོ། ལྷུན་གྲུབ་རིན་པོ་ཆེའི་མཁའ་སྤུབ། ཁ་དོག་རྣམ་པ་སྣ་ཚོགས་པ་གསལ་ཞིང་། ནང་ནས་ཡེ་ཤེས་འོད་ལྔ་མ་འགག་ཀྱང་། ཕྱི་དེར་འཛིན་གྱིས་རྟོག་པའི་རྒྱ་མ་རལ་བ། འདས་པ་དང་། མ་འོང་བ་དང་། ད་ལྟར་དང་། མ་ངེས་པ་བཞི་ཡེ་ཤེས་སུ་རང་གསལ་བ། ཁ་དོག་དང་རི་མོའི་སྣང་གཟུགས་གྱི་ནམ་མཁའ་གང་ཞིང་། དག་པའི་སྣང་བས་ཕྱོགས་ཀུན་ཁྱབ་པ། ཐུགས་རྗེའི་ཆ་ནས་ཀུན་ཏུ་ཡང་སྣང་བ། བློས་བྱས་གྱིས་རྟོག་པས་བར་མ་ཆད་པ། ཚོགས་དྲུག་གིས་སྣང་བ་མ་འགག་པ་ལ། ཞེན་པ་མེད་པར་རོལ་བ། ཟད་མི་ཤེས་པའི་གཏེར་གྱིས་མངོན་པར་མཐོ་བ། རྣམ་པ་ཅིར་ཡང་འཆར་བ་ལ། ངོ་བོ་གང་དུ་ཡང་མ་གྲུབ་པ། ཡིན་བཞིན་དུ་དག་བྱའི་བློའི་རིས་སུ་མ་བཅད་པ། གསལ་བཞིན་དུ་ཡིད་ཀྱིས་དྲི་མས་མ་བསླད་པ། འཁོར་འདས་ཀུན་ཏུ་ཁྱབ་པ་ལ། དངོས་པོའི་གཟུགས་དང་བྲལ་བ་ལ། མ་ཆགས་རོལ་པའི་རྣམ་དཔྱོད་དང་བཅས་པ་འདི། འདི་ཕྱིའི་བརྟེན་གནས། དགོས་འདོད་འབྱུང་བའི་ནོར་བུ། བླ་མ་དམ་པས་ཐོགས་དྲངས། ཕྱོགས་བཅུའི་བདེ་བར་གཤེགས་པ། ཡི་དམ་དཀྱིལ་འཁོར་གྱིས་ལྷ་ཚོགས། མ་དང་མཁའ་འགྲོ་ཆོས་སྐྱོང་དང་སྲུང་མ་རྣམས་ལ། ཡེ་གྲོལ་རང་བབ་གྱིས་མཆོད་པ་གསལ་གདབ་སྟེ། ལུས་གུས་པ། ངག་སྙན་པ། སེམས་གདུང་བས་འབུལ་ལོ། །བརྩེ་བ་ཆེན་པོས་བཞེས་སུ་གསོལ། ཨེ་མ་ཧོ། ཡེ་ནས་སྤྲོས་མེད་རྟག་ཆད་བློ་འདས་འོད་གསལ་ཞིང་ཁམས་མཆོག །ཐུགས་རྗེ་ཅི་ཤར་དུག་ལྔ་རང་གྲོལ་ཡེ་ཤེས་གཞལ་མེད་ཁང་། །ཚོགས་དྲུག་ཞེན་མེད་སྐུ་གསུམ་མཛད་པའི་འོད་ཟེར་ལྷུན་གྲུབ་ཅན། །བླ་མ་ཡི་དམ་མཁའ་འགྲོ་དམ་ཅན་ཆོས་སྐྱོང་ཚོགས་ལ་འབུལ། །ངོ་བོ་སྟོང་པ་སྤྲོས་བྲལ་ཞིང་ཁམས་སུ། །ལྷུན་གྲུབ་ཡེ་ཤེས་སྐུ་དང་ཐིག་ལེས་བརྒྱན་པ་འདི། །ཐུགས་རྗེ་ཤར་གྲོལ་ངང་དུ་འབུལ་བ་ཡིས། །འགྲོ་ཀུན་སྐུ་གསུམ་ཞིང་དུ་གྲོལ་བར་ཤོག །དེའི་བདག་རྒྱུད་ཚོགས་གཉིས་རྫོགས། །གནས་སྐབས་རིག་སྣང་རང་ངོ་འཕྲོད། །མཐར་ཐུག་གདོད་མ་རང་ཚུགས་ཐུབ། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། མཎྜལ་འབུལ་བ་དང་ཚོགས་བསགས་པ་ལ་སེམས་སྦྱངས་བའི་ལེའུ་སྟེ་བདུན་ཅུ་ཐམ་པའོ། །྅྅྅ཡང་ཅིག་སྟོན་པས་བཀའ་སྩལ་པ། ཉོན་ཅིག་རིག་པའི་རྩལ་འཁོར་རྣམས། །གཞན་ཡང་ཚོགས་བསགས་རིམ་པ་ནི། ཕྱག་འཚལ་ལུས་ངག་ངལ་དུབ་བྱ། །སྡིག་སྒྲིབ་སྦྱངས་པའི་དགོས་པ་ཡོད། །ཕྱི་གཏོར་བརྒྱ་རྩ་ནང་གཏོར་ལྔ། །གསང་བ་ཆ་གཅིག་ལ་སོགས་བཏང་། །རྐྱེན་བཟློག་དངོས་གྲུབ་མྱུར་བ་ཡིན། །ཁྱད་པར་སྲོད་དང་ནམ་གུང་ཚེ། །མཁའ་འགྲོའི་ཚོགས་བསོགས་ཆེན་མོ་བྱ། །རང་ལུས་ཐ་མལ་ལུས་འདི་ཉིད། །དཀར་ལ་འཚེར་བའི་རོ་རུ་གྱུར། །སྙིང་ནང་ཕག་མོ་མཐིང་ནག་པ། །རུས་རྒྱན་དང་ལྡན་ཅེར་གྱིས་དོན། །རོའི་ཐོད་པ་རྦད་ཀྱིས་བྲག །རི་གསུམ་རྩེ་ལ་ལམ་མེ་བཞག །རང་ལུས་བཏུབ་ལ་ཧྲུབ་གྱིས་བྲུབ། །རྃ་ལས་མེ་སྦར་ཐོད་རྫས་ཁོལ། །བླང་བས་མགྲོན་རིགས་བཞི་པོ་བཀུག །ནམ་མཁའ་བར་སྣང་ས་གཞི་ལ། །ཉི་རྒས་གྲིབ་བཞིན་འཁྲིག་གེ་ནང་། །རང་རིག་ཕག་མོ་དེ་ཉིད་ལས། །ལས་བྱེད་མཁའ་འགྲོ་དུ་མ་སྤྲོས། །རྩིབ་མ་གྲིས་བཅད་མགྲོན་ལ་བཀྲམ། །ཁོང་པ་ཐོད་པས་བཅུས་ནས་དྲངས། །ཐམས་ཅད་མཉེས་ཤིང་ཚིམས་པར་བསམ། །ཐ་མ་མཁའ་འགྲོ་དབྱིངས་སུ་ཡལ། །ཕུང་པོ་ཚོགས་ཀྱི་འཁོར་ལོ་བསྐོར། །གང་ཡང་མི་དམིགས་བློ་དང་བྲལ། །བརྒྱག་གཏད་མེད་པར་རྗེན་ནེ་བཞག །དེ་ཡིས་ཉམས་ཆགས་ཐམས་ཅད་སྐོང་། །རྐྱེན་ངན་ནད་གདོན་བར་ཆད་བཟློག །འཆི་བསླུའ་ཉམས་རྟོགས་ཁོང་ནས་འཁྲུངས། །འདི་ཡིས་ཡོན་ཏན་བསམ་མི་ཁྱབ། །དེ་ཕྱིར་གསང་གཏོར་དེ་ལ་འབད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའ་ིགསང་རྒྱུ་ལས། ཚོགས་བསགས་རིམ་པ་ལ་སྦྱངས་བའི་ལེའུ་སྟེ་དོན་གཅིག་པའོ། །྅྅྅ཡང་གཅིག་སྟོན་པས་བཀའ་སྩལ་པ། །དེ་ནས་སྡིག་པ་སྦྱང་བྱ་སྟེ །ལུས་ངག་ཡིད་ཀྱིས་མི་དགེ་སྤྱད། །སྡིག་པ་ཞེས་ནི་བྱ་བ་ཡིན། །བག་ཀྱིས་མ་རིག་མུན་ཅིང་རྨོངས། །སྒྲིབ་པ་ཞེས་ནི་བྱ་བ་ཡིན། །འདོད་ཆགས་ཞེ་སྡང་ཕྲག་དོག་ཆེ། །ཉོན་མོངས་ཆེ་བ་ཞེས་སུ་བཤད། །ཕ་རོལ་མཛེ་ཡུག་གྲིབ་སོགས་ཕོག །གྲིབ་ཞེས་བྱ་བའི་རིགས་སུ་བཤད། །དམ་ཉམས་སྡིག་ཉམས་ཁ་རླུང་འདྲེས། །མི་གཙང་ཆེན་པོས་ཕོག་པ་ཟེར། །བྷཻཾ་པ་མི་གསལ་མ་བྷཻཾ་འཆར། །བག་ཆགས་ཞེས་ནི་བྱ་བ་ཡིན། །མདོར་ན་ཐར་པའི་གེགས་སུ་ཀུན། །སྦྱངས་པའི་ཐབས་ལ་འབད་པར་བྱ། །ཞེས་གསུངས་པ་དང་། སྟོན་པའི་ཐུགས་ཀ་ནས། དཔལ་རྡོ་རྗེ་སེམས་དཔའ་འཛུམ་པ་དང་བཅས་འདི་སྐད་དོ། །སྐྱབས་སེམས་སྔོན་དུ་སོང་བ་ནི། །སྐད་ཅིག་རང་ཉིད་ཐ་མལ་པའི། །སྤྱི་བོར་ཉི་ཟླ་པདྨའི་སྟེང་། །ཧཱུྃ་ལས་བླ་མ་རྡོ་རྗེ་སེམས། །སྐུ་མདོག་ཤེལ་འདྲ་རྡོར་དྲིལ་བསྣམས། །རིན་ཆེན་རྒྱན་མཛེས་འགྱིང་བའི་ཚུལ། །འོད་ལྔའི་རང་བཞིན་མེ་རེ་རེ། །དེའི་ཐུགས་ཀའི་ཧཱུྃ་མཐིང་ལས། །ཡིག་བརྒྱའ་ཞི་ཁྲོའི་རྣམ་པར་བཞུགས། །བརྒྱའ་སྟོང་འབུམ་ཕྲག་གྲངས་མེད་བརྗོད། །དེ་ལས་བདུད་རྩིའི་ཆུ་རྒྱུན་བབས། །སྤྱི་བོའི་ཁ་ཕྱེས་ཕྱི་ནང་བཀྲུས། །རང་ལུས་ཤེལ་སྒོང་བཞིན་དུ་དག །སྡིག་སྒྲིབ་སོལ་ཁུ་ལྟ་བུ་འདོན། །རྗེས་ལ་རྡོར་སེམས་སྤྱི་གཙུག་ཐིམ། །དེ་ཡང་མི་དམིགས་བློ་བྲལ་བཞག །འདི་ལ་བདུན་གསུམ་སུས་བརྗོད་པས། །ཚེ་འདིར་མཆོག་ཐུན་དངོས་གྲུབ་བརྙེས། །འཆི་ཁར་འཇའ་འོད་ས་གཡོས་དང་། །མངོན་པར་སངས་རྒྱའི་རྟགས་རྣམས་འབྱུང་། །བར་དོ་མེད་པའི་གདམས་པ་ཡིན། །རིན་ཆེན་བྲིས་ལ་མགུལ་དུ་འཆང་། །བཏགས་གྲོལ་རེག་གྲོལ་བཀླག་གྲོལ་ཡིན། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རྒྱུད་ཀྱིས་སྡིག་སྒྲིབ་སྦྱངས་པ་ལ་སེམས་སྦྱངས་པའི་ལེའུ་སྟེ་དོན་གཉིས་པའོ། །྅྅྅ཡང་རྡོ་རྗེ་སེམས་དཔས་བཀའ་སྩལ་པ། དེ་ལྟར་སྡིག་སྒྲིབ་སྦྱངས་གྱུར་ཀྱང་། །རིགས་དྲུག་ས་བོན་མ་དག་ན། །འཁོར་བའི་ས་བོན་ལུས་སྲིད་པས། །ནང་ཚངས་ཅན་གྱི་གདན་སྟེང་དུ། །ལུས་པོ་ལྕོག་སོ་སུམ་བལྟབ་བྱ། །བྷཻཾ་ཐག་འཁོར་གཅིག་བསྐྱེད་ལ་སྡོམ། །རང་ལུས་རྟ་ཕྲུ་ཕུས་བཏབ་འདྲ། །ཕྱི་དཀར་ནང་དམར་གསལ་བ་ལ། །སྤྱི་བོར་ལྷའི་ས་བོན་ཨ། །མགྲིན་པར་ལྷ་མིན་ས་བོན་ཏྲི། །སྙིང་གར་མིའི་ས་བོན་ནྲྀ། །ལྟེ་བར་བྱོལ་སོང་ས་བོན་སུཾ། །གསང་གནས་ཡི་དྭགས་ས་བོན་པྲེ། །རྐང་མཐིལ་དམྱལ་བའི་ས་བོན་དུ། །དཀར། ལྗང་། དམར་ནག །སེར་ནག །སེར་པོ། ནག་པོ་རིམ་བཞིན་གསལ། །རྐང་པ་གཉིས་ཀྱིས་བར་ཉིད་དུ། །འོད་ལྔ་ཐིག་ལེ་གཅིག་གི་ངང་། །ༀ་ཨཱཿཧཱུྃ་གསུམ་བརྩེགས་པའི་ཚུལ། །དེ་ལས་ཡེ་ཤེས་མེ་འབར་བས། །རྣམ་སྨིན་ཤ་ཁྲག་ལུས་འདི་དང་། །རིགས་དྲུག་ས་བོན་འབྲུ་དྲུག་པོ། །ཤོག་བུ་དག་ལ་མེ་འབར་ལྟར། །རིམ་པ་ཐུལ་ཐུལ་ཚིག་པར་བསམ། །རླུང་བཟུང་དམིགས་པ་གསལ་བར་བྷཻཾ། །སྐྱོ་དུས་རྗེས་ལ་མ་བཅོས་པར། །ཡིན་ལུགས་ངང་དུ་འབོལ་ལེ་བཞག །དེ་ཡིས་རིགས་དྲུག་ས་བོན་ཚིག །འཁོར་བར་འཁྱམས་པའི་འབྲེལ་ཐག་ཆད། །འབྲུ་གསུམ་དག་ལ་བདུན་འབུམ་བཟླས། །སྐུ་གསུམ་དངོས་གྲུབ་མྱུར་དུ་ཐོབ། །ཨེ་མ་བསྲེགས་སྦྱངས་ཁྱད་པར་འཕགས། །སྡིག་པོ་ཆེ་ལ་གསེང་ལམ་ཡིན། །ཅེས་གསུངས་ནས་ཐུགས་ཀར་ཐིམ་མོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། འཁོར་བའི་ས་བོན་སྦྱངས་པའི་ལེའུ་སྟེ་དོན་གསུམ་པའོ། །྅྅྅ ཡུམ་ཆེན་ཉིད་ཀྱིས་གསུངས་པ། ཉོན་ཅིག་རིག་མདངས་རྩལ་འཁོར་རྣམས། །ད་ནི་བླ་མའི་རྣལ་འབྱོར་གྱིས། །སེམས་སྦྱང་འདི་ལ་འབད་པར་བྱ། །བླ་མ་སངས་རྒྱས་ཀུན་གྱི་ཚབ། །མོས་གུས་གདུང་བས་གསོལ་བཏབ་ན། །སྒྲུབ་ཐབས་གཞན་ཚོ་ག་ལ་དགོས། །དངོས་གྲུབ་ཆེན་པོ་དུས་གཅིག་འབྱུང་། །དེ་ཕྱིར་གུས་པས་གསོལ་བ་གདབ། །དེ་ཡང་བདེ་བར་ལུས་སེམས་ལྷོད། །ལག་པ་ཐལ་སྦྱར་མིག་བཙུམ་ལ། །སྤྱི་གཙུག་ཉི་ཟླའི་གདན་སྟེང་དུ། །བླ་མ་ཀུན་ཏུ་བཟང་མོའི་སྐུ། །རང་ཉིད་ཇི་ལྟར་གསལ་བར་བྷཻཾ། །དེ་ཡང་གདུག་སེམས་ཆེན་པོ་བསྐྱེད། །འདི་དང་ཕྱི་མ་བར་དོ་གསུམ། །རེ་ས་ཁྱེད་མིན་ཡོད་རེ་ན། །བདག་ནི་སྔོན་ནས་ད་ལྟའི་བར། །མ་རིག་ལམ་སྟོར་འཁོར་བར་འཁྱམས། །བླ་མ་ཁྱེད་ཀྱི་ཐུགས་རྗེ་ཡིས། །རིག་པའི་ལམ་སྟོན་འཁོར་བར་སྒྲོལ། །སྙམ་པ་ཁ་ཞེ་ཐག་པ་ནས། །མིག་ནས་མཆི་མ་ཤུམ་པ་དང་། །ཁོང་པ་ཡུས་ཀྱིས་གང་བ་དང་། །དྲིན་མེད་དགའ་བ་ལ་སོགས་པར། །བསྐྱར་ཞིང་ཡང་ཡང་གསོལ་བ་བཏབ། །ཕྱི་ལྟར་བརྒྱུད་པའི་བླ་མ་ལ། །རིམ་པར་མཚན་བརྗོད་གསོལ་བ་གདབ། །ནང་ལྟར་རང་ལུས་མཁའ་འགྲོ་ལ། །ཚིག་དང་བཅས་ནས་འདི་སྐད་དོ། །ན་མོ། །སྣང་སྟོང་དག་པའི་གཞལ་ཡས་སུ། །རིག་སྟོང་ཀུན་བཟང་ཡབ་ཡུམ་ལ། །མོས་གུས་གདུང་བས་གསོལ་བ་འདེབས། །རང་ངོ་ཤེས་པར་བྱིན་གྱིས་རློབས། །སྤྱི་བོ་བདེ་ཆེན་འཁོར་ལོ་རུ། །སུམ་བརྒྱ་དྲུག་ཅུ་རྩའི་དབུས། །ཆུ་ཁམས་རྣམ་པར་དག་པའི་ལྷ། །རྡོ་རྗེ་མཁའ་འགྲོ་ཡབ་ཡུམ་ལ། །མོས་གུས་གདུང་བས་གསོལ་བ་འདེབས། །རང་ངོ་ཤེས་པར་བྱིན་གྱིས་རློབས། །མགྲིན་པ་ལོངས་སྤྱོད་འཁོར་ལོ་རུ། །བཅུ་དྲུག་བཀོད་པ་རྩའི་དབུས། །ས་ཁམས་རྣམ་པར་དག་པའི་ལྷ། །རིན་ཆེན་མཁའ་འགྲོ་ཡབ་ཡུམ་ལ། །མོས་གུས་གདུང་བས་གསོལ་གསོལ་བ་འདེབས། །རང་ངོ་ཤེས་པར་བྱིན་གྱིས་རློབས། །སྙིང་ཁ་ཆོས་ཀྱི་འཁོར་ལོ་རུ། །འདབ་བརྒྱད་བཀོད་པ་རྩའི་དབུས། །ནམ་མཁའ་རྣམ་པར་དག་པའི་ལྷ། །སངས་རྒྱས་མཁའ་འགྲོ་ཡབ་ཡུམ་ལ། །མོས་གུས་གདུང་བས་གསོལ་བ་འདེབས། །རང་ངོ་ཤེས་པར་བྱིན་གྱིས་རློབས། །ལྟེ་བ་སྤྲུལ་བའི་འཁོར་ལོ་རུ། །དྲུག་ཅུ་རྩ་དྲུག་རྩའི་དབུས། །མེ་ཁམས་རྣམ་པར་དག་པའི་ལྷ། །པདྨ་མཁའ་འགྲོ་ཡབ་ཡུམ་ལ། །མོས་གུས་གདུང་བས་གསོལ་བ་འདེབས། །རང་ངོ་ཤེས་པར་བྱིན་གྱིས་རློབས། །གསང་གནས་བདེ་བསྐྱེད་འཁོར་ལོ་རུ། །ཉི་ཤུ་རྩ་བརྒྱད་རྩའི་དབུས། །རླུང་ཁམས་རྣམ་པར་དག་པའི་ལྷ། །ཀརྨ་མཁའ་འགྲོ་ཡབ་ཡུམ་ལ། །མོས་གུས་གདུང་བས་གསོལ་བ་འདེབས། །རང་ངོ་ཤེས་པར་བྱིན་གྱིས་རློབས། །རང་ལུས་འབྱོངས་བར་བྱིན་གྱིས་རློབས། །རང་སེམས་རྟོགས་པར་བྱིན་གྱིས་རློབས། །དབང་བཞི་ཐོབ་པར་བྱིན་གྱིས་རློབས། །སྒྲིབ་བཞི་དག་པར་བྱིན་གྱིས་རློབས། །རྒྱུད་བཞི་གྲོལ་བར་དགའ་བཞི་མྱོང་བར་བྱིན་གྱིས་རློབས། །ཞིང་བཞི་བསྒྲོད་པར་བྱིན་བྱིན་གྱིས་རློབས། །སྐུ་བཞི་གསལ་བར་བྱིན་གྱིས་རློབས། །སྣང་བཞི་འབྱོངས་བར་བྱིན་གྱིས་རློབས། །གདིང་བཞི་ལོན་པར་བྱིན་གྱིས་རློབས། །ཡང་གསང་རིག་ཐོག་གསོལ་བ་གདབ། །ༀ་ཨཱཿཧཱུྃ། གཞིའི་རིག་པ་སྤྱིའི་གཞི། །ཡེ་ཤེས་གསུམ་ལྡན་ཆོས་ཀྱི་སྐུ། །ཡུམ་ཆེན་ཀུན་ཏུ་བཟང་མོ་ལ། །མོས་གུས་གདུང་བས་གསོལ་བ་འདེབས། །རང་ཚུགས་ཐོབ་པར་བྱིན་གྱིས་རློབས། །ༀ་ཨཱཿཧཱུྃ། ལམ་གྱི་རིག་པ་ཉམས་ལེན་བཞི། །བདེ་གསལ་མི་རྟོག་ལོངས་སྤྱོད་རྫོགས། །རིག་རྩལ་མཁའ་འགྲོ་སྡེ་ལྔ་ལ། །མོས་གུས་གདུང་བས་གསོལ་བ་འདེབས། །ལམ་གྱི་རང་གྲོལ་ཆེན་པོར་བྱིན་གྱིས་རློབས། །ༀ་ཨཱཿཧཱུྃ། འབྲས་བུ་རིག་པ་གཞན་དོན་བཞི། །ཁམས་གསུམ་དོང་སྤྲུགས་སྤྲུལ་པའི་སྐུ། །ལྷུན་གྲུབ་སྣ་ཚོགས་རོལ་པ་ལ། །མོས་གུས་གདུང་བས་གསོལ་བ་འདེབས། །འཁོར་བ་དོང་ནས་སྤྲུགས་པར་བྱིན་གྱིས་རློབས། །ཅེས་པས་ཡང་ཡང་བསྐྱར་ཞིང་བྱ། །བྷཻཾ་མ་སྐྱེས་ལ་བྷཻཾ་སྐྱེ་ཞིང་། །སྐྱེས་པ་བོག་འབྱུང་བྱིན་རླབས་འབེབས། །དོན་རྒྱུད་ནང་བརྡོལ་ཨེ་མ་ཧོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། མོས་གུས་བླ་མའི་རྣལ་འབྱོར་ལ་སེམས་སྦྱང་བའི་ལེའུ་སྟེ་དོན་བཞི་པའོ། །྅྅྅ ཡུམ་ཆེན་ཉིད་ཀྱིས་བཀའ་སྩལ་པ། །ཉོན་ཅིག་རིག་པའི་རྩལ་འཁོར་རྣམས། །མོས་གུས་དེའི་རྫོགས་རིམ་ནི། །བླ་མ་ནམ་མཁའི་དབྱིངས་རུམ་དུ། །འོད་ཀྱི་གོང་བུ་གཅིག་ཏུ་གྱུར། །དེ་ཉིད་སྤྱི་བོའི་གཙུག་ཏུ་ཐིམ། །དེ་ནས་རང་སེམས་དཀྲུས་ཀྱིས་འདྲེས། །དེ་ལས་ཡེ་ཤེས་མེ་འབར་ཏེ། །རྣམ་སྨིན་ལུས་འདི་ཐུལ་གྱིས་བསྲེག །བླ་མའི་ཐུགས་དང་རང་གི་སེམས། །དབྱེར་མེད་ཡེ་ཤེས་འོད་གོང་སྟེ། །སྐྱེས་བུས་མདའ་འཕང་བཞིན་དུ་སྤར། །དེ་ལྟར་མཁའ་ལ་སྤྲིན་དངས་ལྟར། །རྒྱར་བསྐྱེད་མ་བཅོས་ལྷུག་པ་ལ། །དམིགས་གཏད་མེད་པར་ཕྱམ་མེ་བ། །ཕྱོགས་ལྷུང་མེད་པར་བདལ་ལེ་བ། །རང་བབ་ངང་དུ་ཨ་ཕྱལ་ལེ། །འདས་པའི་སྣང་བ་བྱ་ལམ་འདྲ། །ད་ལྟའི་སྣང་བ་བར་སྣང་འདྲ། །མ་འོངས་སྣང་བ་མ་བསྐྱེད་པར། །བདེ་གསལ་མི་རྟོག་ངང་ལ་བཞག །འདི་ཡི་ཡོན་ཏན་བརྗོད་མི་ལང་། །བླ་མའི་ཐུགས་དང་དབྱེར་མེད་འདྲེས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བླ་མའི་རྣལ་འབྱོར་གྱི་རྫོགས་རིམ་བྷཻཾ་བའི་ལེའུ་སྟེ་དོན་ལྔ་པའོ། །྅྅྅ ཡུམ་ཆེན་ཉིད་ཀྱི་བཀའ་སྩལ་པ། ཉོན་ཅིག་རིག་མདངས་རྩལ་འཁོར་རྣམས། །དེ་ལྟར་སེམས་སྦྱངས་ཚར་བ་དང་། །ཐེག་པ་བཅུ་གཅིག་སྒོས་དབང་བསྐུར། །དང་པོ་འཇིག་རྟེན་ལྷ་མིའི་དབང་། །རིགས་དྲུག་ས་བོན་བསྲེགས་བར་བྱ། །ཨ་འ་ཧ་ཤ་ས་མ་དྲུག །དབང་བསྐུར་ཐུབ་དྲུག་སྒོས་སྒྲུབ་ཙམ། །ཡང་ན་སངས་རྒྱས་སྟོང་རྩ་གཉིས། །ཕྱག་མཆོད་དབང་དོན་རྒྱས་པར་སྤྲོས། །དེ་ནས་དབང་གི་དགའ་སྟོན་བྱ། །གཉིས་པ་ལྟ་ལོག་མུ་སྟེགས་དབང་། །རྒྱས་པར་སུམ་བརྒྱ་དྲུག་ཅུ་དང་། །བསྡུས་པ་དྲུག་ཅུ་རྟག་ཆད་རྣམས། །ལེགས་པར་ཕྱེ་ལ་བསྐུར་བར་བྱ། །དེ་ནས་ཉན་ཐོས་རྣམ་པ་གཉིས། །དབང་བསྐུར་ཆ་ལུགས་རྟགས་ཀྱིས་དབྱེ། །དེ་ནས་རང་རྒྱལ་མཆོག་དབང་བསྐུར། །བྱང་ཆུབ་སེམས་དཔའ་སྨོན་འཇུག་བླངས། །དེ་ནས་ཀྲི་ཡོག་སྡེ་གསུམ་གྱིས། །དབང་མཆོག་མ་ལུས་བསྐུར་བར་བྱ། །དེ་ནས་ཆོས་སྐུའི་ཐེག་པ་གསུམ། །མ་ཧཱ་ཨ་ནུ་ཨ་ཏིའི། །དབང་མཆོག་རིམ་པ་བཞིན་དུ་བསྐུར། །གཏོར་ཚོགས་དགའ་སྟོན་རྒྱས་པར་བྱ། །བླ་མ་བཞེད་པ་མེད་གྱུར་ཀྱང་། །བུ་ཆུང་ཡིད་འཐད་རང་ལུས་སོགས། །རིམ་པ་བཞིན་དུ་འབུལ་བར་བྱ། །དེའི་གྲུབ་མཐའ་འཕགས་ཚུལ་ཤེས། །ཆོས་རྣམས་ཀུན་གྱི་ཕུ་ཐག་ཁྲུས། །ལྟ་བྷཻཾ་ཀུན་གྱི་གདར་ཤ་ཆོད། །ཤིན་ཏུ་གཅེས་པའི་གལ་མདོའོ། །ཞེས་གསུངས་སོ། །ཀུན་ཏུ་བཟང་མོ་ཀློངགསལ་འབར་མ་ཉི་མའི་གསང་རྒྱུད་ལས། ཐེག་པ་སོ་སོའི་སྒོས་དབང་བསྐུར་བའི་ལེའུ་སྟེ་དོན་དྲུག་པའོ། །྅྅྅ ཡུམ་ཆེན་ཉིད་ཀྱིས་བཀའ་སྩལ་པ། ཉོན་ཅིག་རིག་མདངས་མཁའ་འགྲོ་རྣམས། །དེ་ནས་ལུས་ངག་རུ་ཤན་དབྱེ། །འཁོར་བ་དང་ནི་མྱང་འདས་ཀྱིས། །ས་བོན་ཤན་ཐང་མ་ཕྱེད་ན། །ད་རུང་བག་ཆགས་ངན་པའིས། །སྟེང་དང་ནང་ན་ལྡང་སྲིད་པས། །ཆོས་འབྱུང་ཡུམ་གྱི་ལུས་གནད་བཅའ། །བདེ་བའི་སྟན་ལ་པུས་གཉིས་བརྩེགས། །རྟིང་པ་གཉིས་པོ་དཔྱི་ལ་སྦྱར། །འཕང་རུས་ས་ལ་ཅེར་གྱིས་ཕབ། །ལག་པ་གཉིས་པོ་པུས་འཁྱུད་བསྡོམ། །སྒལ་ཚིག་ཐད་ཀར་དྲང་པོར་བསྲངས། །རླུང་རོ་གསུམ་འབུད་སྲོག་རྩོལ་གྱིས། །བུམ་པ་ཆེ་འབྲིང་ལན་བདུན་བཟུང་། །རྗེས་ལ་མ་བཅོས་རང་སར་ལྷོད། །འདི་ཡི་རྟགས་ཚད་འདི་ལྟ་སྟེ། །ལུས་པོ་མེ་རུ་འབར་བའོ། །བདེ་བ་ཚད་མེད་སྐྱེ་བ་དང་། །རྣམ་རྟོག་རྒྱུན་ལམ་འགགས་པ་དང་། །ལུས་པོ་མེད་པ་སྙམ་པ་དང་། །མངོན་ཤེས་ཐལ་ཐོལ་འཆར་བ་དང་། །ཟས་གོས་དྲན་པ་མེད་པ་དང་། རླུང་ཟིན་རྩ་མདུད་གྲོལ་བ་དང་། །འགྲོ་ལ་སྙིང་རྗེ་སྐྱེ་བ་སོགས། །ཡོན་ཏན་དཔག་མེད་འཆར་བ་དང་། །ཡུམ་ཆེན་བྷ་གའི་ལུས་གནད་འདི། །རྒྱུན་དུ་བྷཻཾ་ན་ང་དང་མཚུངས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཆོས་འབྱུང་ཡུམ་གྱི་ལུས་གནད་བཅའ་བ་བསྟན་པའི་ལེའུ་སྟེ་དོན་བདུན་པའོ། །྅྅྅ ཡུམ་ཆེན་ཉིད་ཀྱིས་བཀའ་སྩལ་པ། ཉོན་ཅིག་རིག་རྩལ་མཁའ་འགྲོ་རྣམས། །དེ་ནས་སྐྱེ་མེད་ཆ་དེ་ལ། །འགག་མེད་རྡོ་རྗེ་སྐྱིལ་ཀྲུང་བཅའ། །ནང་ཚང་ཅན་གྱི་གདན་སྟེང་དུ། །རྐང་མཐིལ་གཉིས་པོ་ས་ལ་སྦྱར། །བྲང་ཐེབ་ཀུན་ལ་ལུས་བརྗིད་བཀལ། །ལག་གཉིས་སྤྱི་བོར་རྩེ་སྤྲད་པས། །པུས་མོ་གཉིས་པོ་ཕྱི་ལ་བསྐྲད། །གྲུ་མོ་གཉིས་པོ་ཕྱིར་བརྒྱངས་ཤིང་། །སྒལ་ཚིགས་དྲང་པོར་བསྲང་བྱས་ལ། །རུས་ཚིག་ཐམས་ཅད་རང་སར་ཐོན། །ཉྭ་ཤ་ཐམས་ཅད་བསྒྲིམ་ཤ་བཏོན། །རླུང་ནི་བུམ་ཆེན་བ དུན་གྱི་བར། །མིག་རྩེ་སྣ་རྩེ་སེམས་རྩེ་གསུམ། །མདུན་དུ་འོད་ལྔའི་ར་བའི་ནང་། །ཨ་དཀར་མཐེ་བོང་ཙམ་ཞིག་བྲིས། །སལ་ལེ་ཧྲིག་གེ་སེམས་བཟུང་ངོ་། །རྗེས་ལ་མ་བཅོས་རང་བབ་ལྷོད། །འདི་ལ་རྟགས་ཚད་འདི་འདྲ་འབྱུང་། །དང་པོ་ལུས་ཚིགས་ཐམས་ཅད་ན། །གཉིས་པ་ལུས་གནད་བཅའ་དུས་འཚེར། །དེ་ནས་ཆུ་སེར་འདྲིལ་བ་རྣམས། །ཐམས་ཅད་ཐིག་ལེ་གཅིག་ཏུ་འགྱུར། །བདེ་བ་ཟག་མེད་འཁྲིལ་ལེ་འབྱུང་། །ངག་གི་རླུང་བཟུང་རིང་དུ་སོང་། །སེམས་ནི་གང་གཏད་ཧྲིག་གེ་བཞག །འཁྲུལ་པའི་རྣམ་གཡེང་རྒྱུད་ཐག་ཆོད། །བྱམས་པ་ཚད་མེད་ཀུན་ལ་སྐྱེས། །སྐྱོ་ཤས་ཞེན་ལོག་ཁོང་ནས་འཆར། །འཇག་མའི་རྩེ་ལ་བསྡད་པ་འམ། །ཁབ་མིག་ནང་དུ་ཚུད་པའམ། །ཕྱག་ཞབས་རྗེས་སོགས་རྫུ་འཕྲུལ་འཆར། །ལུས་ཉིད་འཁོར་བའི་ས་བོན་དང་། །རུ་ཤན་ལེགས་པར་ཕྱེད་པའོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡབ་ཀྱི་ཐབས་མཆོག་རྡོ་རྗེ་སྐྱིལ་ཀྲུང་བཅའ་བའི་ལེའུ་སྟེ་དོན་བརྒྱད་པའོ། །྅྅྅ ཡང་ཅིག་སྟོན་པས་བཀའ་སྩལ་པ། །ཉོན་ཅིག་རིག་རྩལ་མཁའ་འགྲོ་རྣམས། །དེ་ནས་ངག་གི་རུ་ཤ ན་འབྱེད། །ལུས་གནད་དེ་ལ་མ་གཡེངས་པས། །ངག་ཏུ་ཨ་རིང་གླུའི་དབྱངས། །སྙན་ལ་འགྱུར་འཁྱུག་བཅས་པས་བརྗོད། །མདུན་གྱི་ཨ་ཏི་ཇི་ལྟ་བར། །རང་གི་སེམས་ཉིད་ཧྲིལ་གྱིས་འགྱུར། །ཕྱིའི་སྣང་བ་ཐམས་ཅད་ཀྱང་། །ཟང་ཐལ་ཉིད་དུ་ཐལ་ཐལ་ཕིག །སྣོད་ཀྱི་འཇིག་རྟེན་ཁམས་འདི་ཉིད། །ཕྱོགས་མཚམས་སྟོང་པར་སོང་བར་བྷཻཾ། །འདི་ལ་རྟགས་ཚད་འདི་འདྲ་འཆར། །ཁང་ཁྱིམ་བེམས་པོར་མི་འདུག་དང་། །མེ་ཆུས་གནོད་པ་མི་ཚུགས་དང་། །སྣང་བ་ཐམས་ཅད་སྟོང་ཉམས་ཀྱིས། །ཟང་ཐལ་ཕྱམ་ཕྱམས་ཉིད་དུ་འཆར། །སྟོང་ཉིད་བཅོ་བརྒྱད་དེ་དུས་འབེབས། །ཡུམ་ཆེན་བྷ་གའི་དགོངས་པ་ཡིན། །དེ་ནས་ཨ་ཡི་སྟོང་ཁམས་གང་། །སྐྱེ་བ་མེད་ལས་ཐམས་ཅད་སྐྱེས། །དོན་ཆེན་ཡི་གེ་དམ་པས་ཁེངས། །དེ་ཚེ་གསལ་ཉམས་དཔག་མེད་རྣམས། །སྐབས་སུ་བུམ་ཆེན་རླུང་བཟུང་གཅེས། །དེ་ནས་རང་ལུས་རྟ་ཕྲུ་མ། །ཕུས་བཏབ་ལྟ་བུར་བྷཻཾ་བྱས་ལ། །སྟོང་ཁམས་ཨ་རྣམས་ཁེངས་བར་བླུག །བུང་བ་ཚང་དུ་འདུས་པ་ལྟར། །ལུས་པོ་ཨའི་ཐེར་ཐག་བཅད། །ཨ་ཚིགས་དྲག་ལ་ཐུང་བར་བརྗོད། །འདི་ལ་བདེ་ཉམས་དཔག་མེད་འཆར། །ཟས་སྐོམ་ཡིད་ལ་དྲན་པ་མེད། །རང་བཞིན་ཏིང་ངེ་འཛིན་གྱི་འཚོ། །རིག་པ་གསལ་སྟོང་འགྱུ་བ་མེད། །གཅེར་གྲོལ་ངང་དུ་འབོལ་ལེ་གནས། །འདི་གསུམ་ཨའི་ངག་དབྱངས་ཡིན། །འདི་ལ་ཡོན་ཏན་བསམ་མི་ཁྱབ། །མཆོག་དང་ཐུན་མོང་གཉིས་ཀ་འགྲུབ། །ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། །ཁོང་ནས་འབྱུང་བ་སྐྱེ་བ་མེད། །ཐོག་མའི་ཀུན་བཟང་ང་དང་མཚུངས། །སྨྲ་བསམ་བརྗོད་མེད་ཡུམ་ཚིག་ལ། །ཨ་ནི་ངོ་བོ་སྟོང་པ་ཡིན། །ཨའི་རང་བཞིན་གསལ་བ་ཡིན། །ཨའི་ཐུགས་རྗེ་འགག་པ་མེད། །སྐུ་གསུམ་ཨ་ཡི་ངོ་བོ་རྫོགས། །ཨ་ཡིས་ཚེ་འདིར་ཚེ་རིང་དང་། །བདེ་གསལ་མི་རྟོག་རྟོགས་པས་འཕེལ། །སྣང་བ་བཞི་པོ་ཚད་དུ་སྐྱོལ། །ཞི་རྒྱས་དབང་དྲག་མ་བསྒྲུབ་འགྲུབ། །ལྷ་རྣམས་ཀུན་གྱི་སྲོག་ཡིག་ཨཱ། །མཁའ་འགྲོ་ཆོས་སྐྱོངས་མ་བསྐུལ་ཡང། །ཨ་བཟླས་མི་དེའི་འཕྲིན་ལས་འགྲུབ། །ཤི་ཚེ་གདུང་དང་རིང་སྲེལ་དང་། །འཇའ་དང་ས་གཡོས་སྐུ་ཡིག་འབྲུ། །མངོན་པར་སངས་རྒྱས་རྟགས་རྣམས་སྟོན། །དབྱིངས་སུ་འཕོས་ནས་སྐད་ཅིག་གྲོལ། །ནང་དབུག་ཆད་ཚེ་སྙིང་ནང་དུ། །སྐྱེ་མེད་ཨ་ལ་རྫོགས་སངས་རྒྱས། །བར་དོ་རང་སྣང་རང་ངོ་ཤེས། །སྤྲུལ་སྐུའི་ཞིང་དུ་ཡང་སངས་རྒྱས། །སེམས་ཅན་དོན་ཀུན་རྩོལ་མེད་འགྲུབ། །ཨ་འདི་སུས་བཟླས་དོན་དང་ལྡན། །ཡི་གེ་གཅིག་མ་བདེར་གཤེགས་དངོས། །དེ་ཕྱིར་ཡི་གེ་ཨ་འདི་ཉིད། །རྟོག་ནས་རྟོག་གྲོལ་རེག་ཀྱང་གྲོལ། །དྲན་ནས་དྲན་གྲོལ་བྲིས་ཀྱང་གྲོལ། །བཅང་ནས་བཅང་གྲོལ་བཟླས་ཀྱང་གྲོལ། ། བྷཻཾ་ནས་བྷཻཾཻ་གྲོལ་ཚོར་ཀྱང་གྲོལ། །དབང་པོ་རྣོ་རྟུལ་རྒན་གཞོན་དང་། །སྡིག་པ་ཆེ་ཆུང་སྐྱེ་བ་ལ། །ཕོ་མོ་ལ་སོགས་གཏམ་ཁ་མེད། །དེ་ཕྱིར་གཅེས་པའི་གལ་མདོར་བཟུངས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡི་གེ་ཨ་ཡིག་ངག་རུ་ཤན་འབྱེད་ནས་འཁོར་བ་དང་འབྲེལ་རྒྱུད་བཅད་པའི་ལེའུ་སྟེ་དོན་དགུ་པའོ། །྅྅྅སྟོན་པས་ཡང་གཅིག་བཀའ་སྩལ་པ། ཉོན་ཅིག་རིག་པའི་རྩལ་འཁོར་རྣམས། །དེ་ནས་ཨའི་རྫོགས་རིམ་ནི། །ལུས་ནི་གང་བདེ་བར་དུ་བཞགས། །ངག་གི་རླུང་འཛིན་བརྗོད་པ་སྤང་། །ལུས་སེམས་ཨ་དང་སྣང་རིག་རྣམས། །ཐམས་ཅད་དམིགས་མེད་སྟོང་ཉིད་དང་། །འབོལ་ལེ་ཤིག་གེ་རང་སར་ལྷོད། །ངོས་བཟུང་མེད་པར་ལྷོད་དེ་ཞོག །དེ་ལ་ཉམས་མྱོང་འདི་ལྟར་འཆར། །འཁྲུལ་སྣང་བྱས་ཆོས་ཐམས་ཅད་ལ། །སྙིང་པོ་མེད་པར་བློ་ཐག་ཆོད། །ལུས་གནད་དམིགས་བཅས་ཐམས་ཅད་ལ། །གཙང་འཛིན་མེད་པར་སྐྱུག་ལོག་ཅིང་། །བྱར་མེད་རང་བབ་ངང་ཉིད་ལ། །ཆེད་གཉེར་མེད་པར་ལྷན་ནེ་བཞག །ངག་གི་བརྗོད་ཚིག་ཐམས་ཅད་ལ། །མུ་མཐའ་མེད་པར་དང་བ་ལོག །སུ་དང་བརྗོད་སྙིང་མི་འདོད་པས། །ལྐུག་པ་ལྟ་བུར་ངག་གི་ཚུག །འདི་དུས་འཁྲུལ་པའི་སུམ་གཉིས་ནུབ། །རིག་པ་ཡེ་ཤེས་རང་སྣང་ཡིན། །ཅེས་གསུངས་སོ། །ཀུན་དུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ངག་སྦྱང་ཨ་ཡི་རྫོགས་རིམ་བསྟན་པའི་ལེའུ་སྟེ་བརྒྱད་ཅུ་ཐམ་པའོ། །྅྅྅དེ་ནས་སྟོན་པས་བཀའ་སྩལ་པ། ཉོན་ཅིག་རིག་པའི་སྣང་འཁོར་རྣམས། །དེ་ནས་ཞི་བའི་དབང་དང་ནི། །ཁྲོ་བོའི་དབང་མཆོག་རིམ་བཞིན་བསྐུར། །རྫས་དབང་ལྷ་དབང་དཀྱིལ་འཁོར་རྣམས། །བཞི་བསྒྲིལ་བྱས་ལ་སློབ་བུ་རྣམས། །ཚིག་རེས་དོན་རེ་ངོ་སྤྲོད་གདབ། །ལུས་ངག་ཡིད་གསུམ་སྨིན་པ་ཡིས། །རྟགས་ཚད་ཡིད་ཆེས་མ་བྱུང་བར། །བྱ་བ་རིང་ཆོས་སྤང་བྱས་ལ། །སློབ་བུའི་རྒྱུད་མཆོག་སྨིན་པར་བྱ། །དེ་ནས་སྤྱི་གཞི་འཁྲུལ་གཞི་དང་། །གྲོལ་གཞི་གསུམ་དུ་ཕྱེ་ལ་བཤད། །འཁྲུལ་འབྲས་མ་དག་ཁམས་གསུམ་དང་། །རིགས་དྲུག་སྡུག་བསྔལ་གོ་བར་བཤད། །རིག་འབྲས་སྐུ་གསུམ་ཞིང་ཁམས་དང་། །སྐུ་ལྔའི་ཞིང་དང་གསང་ཆེན་རོལ། །མེ་རི་འབར་བའི་ཞིང་ཁམས་དྲུག །དག་མ་དག་གིས་རྒྱུ་མཚན་བཤད། །ཁྱད་པར་སྐྱེ་བའི་མངལ་སྐྱེས་གྱིས། །དང་པོ་ལུས་ཀྱིས་ཆགས་ལུག་དང་། །དེ་ནས་རྩ་དང་དེ་ནས་རླུང་། །དེ་ནས་ཐིག་ལེ་ཡི་གེ་སྐུ། །ཡེ་ཤེས་རང་བཞིན་གཞུགས་ཚུལ་རྣམས། །ལུང་གི་རྒྱབ་བཀྲོལ་སློབ་བུའི། །བློ་ལ་ལེགས་པར་གོ་རུ་གཞུག །དེའི་ཡིད་སྤྱོད་མུ་ལྟས་སངས། །བླུན་བྷཻཾ་རྟག་ཆད་མཐའ་རྣམས་སངས། །བདེ་བར་གཤེགས་པའི་དགོངས་པ་ལོན། །རྫོགས་ཆེན་བྱ་བྲལ་འབྲས་བུ་ཐོབ། །ཅེས་གསུངས་སོ། །ཀུན་དུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཞི་ཁྲོའི་དབང་བསྐུར་བ་དང་གྲོལ་འཁྲུལ་རྩ་རླུང་ཐིག་ལེ། སྐུ་དང་ཡེ་ཤེས་གཞུགས་ཚུལ་བསྟན་པའི་ལེའུ་སྟེ་གྱ་གཅིག་པའོ། །྅྅྅ཡུམ་ཆེན་གྱིས་བཀའ་སྩལ་པ། ཉོན་ཅིག་རིག་མདངས་རྩལ་འཁོར་རྣམས། །དེ་ནས་སེམས་ཀྱི་རུ་ཤན་དབྱེ། །དེའི་སྔོན་འགྲོ་འདི་ལྟར་བཅའ། །ནང་ཚངས་ཅན་གྱི་གདན་སྟེང་དུ། །རྐང་པ་རྡོ་རྗེ་དཀྱིལ་ཀྲུང་བྱ། །ཉོན་མོངས་གཏི་མུག་རྣམ་པར་དག །ཆོས་ཀྱི་དབྱིངས་ཀྱི་ཡེ་ཤེས་རྟོགས། །རྣམ་པར་སྣང་མཛད་ཕྱག་རྒྱ་ཡིན། །སྒལ་པ་མདའ་ལྟར་དྲང་པོར་བསྲངས། །ཉོན་མོངས་ཞེ་སྡང་རྣམ་པར་དག །མེ་ལོང་ལྟ་བུའི་ཡེ་ཤེས་རྟོགས། །རྡོ་རྗེ་སེམས་དཔའི་ཕྱག་རྒྱ་ཡིན། །ལག་པ་མཉམ་བཞག་ལྟེ་འོག་བཅའ། །ཉོན་མོངས་འདོད་ཆགས་རྣམ་པར་དག །སོ་སོར་རྟོགས་པའི་ཡེ་ཤེས་རྟོགས། །སྣང་བ་མཐའ་ཡས་དགོངས་པ་ཡིན། །ལུས་ཁོགས་འཕགས་པ་ལྟ་བུ་གཟིགས། །དཔུང་པ་རྒོད་གཤོག་བཞིན་དུ་བརྐྱངས། །མགྲིན་པ་ཡིད་ཙམ་དགུག་པར་བྱ། །ཉོན་མོངས་ང་རྒྱལ་རྣམ་པར་དག །མཉམ་པ་ཉིད་ཀྱི་ཡེ་ཤེས་རྟོགས། །རིན་ཆེན་འབྱུང་ལྡན་དགོངས་པ་ཡིན། །མཆུ་སོའི་བར་དུ་ནས་ཐར་ཙམ། །རླུང་སེམས་རང་སར་འདུའ་རུ་གཞུག །མིག་ནི་སྣའི་རྩེ་ལ་གཏད། །ཉོན་མོངས་ཕྲག་དོག་རང་སར་དག །བྱ་བ་གྲུབ་པའི་ཡེ་ཤེས་རྟོགས། །དོན་ཡོད་གྲུབ་པའི་དགོངས་པ་ཡིན། །དེ་ནས་ལུས་གནད་དེའི་སྟེང་། །ངག་གནད་སྨྲ་བ་བཅད་བྱས་ལ། །སེམས་གནད་མདུན་དུ་རྡེའུ་འམ། །ཤིང་བུ་གཅིག་ལ་རྟེན་བྱས་ལ། །སྔ་ཕྱིའི་རྟོག་པ་མ་ཤར་བར། །སལ་ལེ་སིང་ངེ་མེར་རེ་བ། །ངང་མདངས་ངང་དུ་ཕྱམ་མེ་བཞག །མི་ཁྱིའི་འཚེ་བ་རབ་སྤངས་ལ། །དབེན་པར་གནས་པའི་ལེགས་པར་བཅའ། །དེ་ལ་རྟགས་ཚད་འདི་ལྟར་འབྱུང་། །ལུས་ནི་ཡོད་དུ་མི་ཚོར་དང་། །ཡང་ན་ཤིང་བལ་ལྟ་བུ་ལ། །ཟས་སྐོམ་འཚོགས་པའི་འདུ་ཤེས་བྲལ། །ངག་ཀྱང་བརྗོད་མེད་ལྷུག་པ་ལ། །རླུང་ཡང་ཕྱི་ནང་མི་འབྱུང་འདྲ། །སེམས་ནི་ནམ་མཁའི་སྤྲིན་དངས་སམ། །རྒྱ་མཚོ་དངས་པ་རླབ་མེད་ལྟར། །ཕྱི་ནང་འགྱུ་བ་རྒྱུན་ཆད་འགྱུར། །ཁ་ཆུ་མིག་ཆུ་སྣ་ཆུ་འཛག །དེ་ལྟར་འགྱུར་བ་ལ་སོགས་འབྱུང་། །འདི་དུས་འགྱུ་རླུང་ཟིན་པ་ཡིན། །འདི་ལ་ཡོན་ཏན་བསམ་མི་ཁྱབ། །བྷཻཾ་སྐྱེས་རྩེ་གཅིག་དང་པོ་ཡིན། །འཁོར་བའི་རྒྱ་མཚོ་རིང་དུ་བརྒལ། །ཚོགས་གཉིས་རྫོགས་བའི་གང་ཟག་ལས། །ཀུན་ལ་འབྱུང་བ་ཤིན་ཏུ་དཀོན། །དེ་ཕྱིར་འདི་ལ་ནན་ཆག་བྱ། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་རུ་ཤན་དབྱེ་བའི་སྔོན་འགྲོ་བསྟན་པའི་ལེའུ་སྟེ་གྱ་གཉིས་པའོ། །྅྅྅ ཡུམ་ཆེན་ཉིད་ཀྱི་བཀའ་སྩལ་པ། ཉོན་ཅིག་རིག་པའི་རྩ་འཁོར་རྣམས། །དེ་ནས་ལུས་གནད་དེ་བཤིགས་ལ། །སེམས་རིག་རུ་ཤན་དབྱེ་བའི་ཕྱིར། །བསམ་མནོ་འདི་ལ་བརྟག་པར་བྱ། །རིག་པ་སྤྲོས་མེད་ཆོས་ཀྱི་སྐུ། འདི་ལ་བྱུང་གནས་འགྲོ་གསུམ་མེད། །མེད་པ་བཙལ་ཡང་ག་ལ་རྙེད། །སེམས་ཞེས་བྱ་བའི་འགྱུ་འགྱུ་པོ། །འོལ་འོལ་ཕྲིག་ཕྲིག་ཡུད་ཡུད་འདི། །དང་པོ་གང་ལས་བྱུང་བ་དང་། །བར་དུ་གནས་དང་ཐ་མ་འགྲོ། །དབྱིབས་དང་ཁ་དོག་ཇི་ལྟ་བུ། །ཕྱི་ནང་བར་གསུམ་བཤིག་ཕྲལ་ལྟ། །རེས་ནི་སྤྲོས་ལ་བསམ་མནོ་བཏང་། །རེས་ནི་སྡུག་བསྔལ་ངང་ལ་བརྟག །རེས་ནི་བློའི་ངོ་ལ་ལྟ། །རེས་ནི་ལུང་རིགས་རྩ་བ་བཅད། །ཐང་ཆད་གོམ་ལ་ཐུག་པའི་ཚེ། །བྱུང་བ་རིག་པའི་ངང་ལས་བྱུང་། །གནས་པ་ཚོགས་དྲུག་སྟེང་དུ་གནས། །འགྲོ་ནི་སྡིག་ཅན་ངན་སོང་གསུམ། །དགེ་བ་ཅན་རྣམས་མཐོ་རིས་ལ། །མི་གཡོ་རིག་ཀློང་མ་ལ་ཐིམ། །གཟུགས་ནི་སྣང་བ་སྣ་ཚོགས་པ། །སེམས་ཀྱིས་བཟོས་པ་བློ་ཐག་ཆོད། །ཁ་དོག་དབང་པོར་སྣང་བ་རྣམས། །རྟོག་དཔྱོད་བྱས་ཚད་སེམས་ཀྱི་མདོག །དབྱིབས་ནི་གང་ལྟར་བརྟག་ལྟར་སྣང་། །ཆེ་ཆུང་ཚད་ནི་བརྗོད་མི་ལང་། །དཔེ་དེས་འདུས་བྱས་གློ་བུར་པ། །རྐྱེན་དབང་ཅན་དུ་ཐག་ཀྱང་ཆོད། །འདི་ནི་སེམས་རིག་ཤན་འབྱེད་དེ། །གཞི་དང་གཞི་ཤེས་ཁྱད་པར་དང་། །གནས་དང་འགྱུ་བའི་ཁྱད་པར་ཤེས། །འདིའི་ཁྱད་པར་མ་ཤེས་ན། །བླུན་བྷཻཾ་རྟག་ཆད་གོལ་སྲིད་པས། །རུ་ཤན་ལེགས་པར་ཕྱེ་བར་བྱ། །ཞེེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་དང་རིག་པ་ཤན་ཕྱེ་ནས། སེམས་བྱུང་གནས་འགྲོ་གསུམ་རྩད་བཅད་པའི་ལེའུ་སྟེ་གྱ་གསུམ་པའོ། །྅྅྅ ཡུམ་ཆེན་ཉིད་ཀྱིས་བཀའ་སྩལ་པ། ཉོན་ཅིག་རིག་པའི་རྩ་འཁོར་རྣམས། །རིག་པ་རང་བྱུང་མེ་ཏོག་ཡིན། །སེམས་ནི་རྐྱེན་ཤར་སྡོང་པོ་ཡིན། །རིག་པ་འདུས་མ་བྱས་པ་སྟེ། །སེམས་ནི་འདུས་བྱས་གློ་བུར་བ། །རིག་པ་ཆོས་ཉིད་སྤྲོས་བྲལ་ལ། །སེམས་ནི་ཆོས་ཆེན་སྤྲོས་པ་ཅན། །རིག་པ་རང་གྲོལ་མཐའ་བྲལ་ལ། །སེམས་ནི་གཟུང་འཛིན་མཐའ་རྒྱས་ཅན། །རིག་པ་སེམས་ལ་ཕར་མི་ལྟོས། །སེམས་ནི་རིག་ལ་ཚུར་ལྟོས་ཅན། །རིག་པ་བྱུང་གནས་འགྲོ་གསུམ་བྲལ། །སེམས་ནི་བྱུང་གནས་འགྲོ་གསུམ་ཅན། རིག་པ་གཟུགས་དབྱིབས་ཁ་དོག་བྲལ། །སེམས་ནི་གཟུགས་དབྱིབས་ཁ་དོག་ཅན། །རིག་པ་དོན་དམ་བློ་ལས་འདས། །སེམས་ནི་ཀུན་རྫོབ་བློའི་ཡུལ། །རིག་པ་ཀུན་བཟང་ཡུམ་མཁའ་ལ། །སེམས་ནི་ཀུན་བཟང་ཡབ་ཀྱི་གསང་། །རིག་པ་ཤེས་རབ་སྐྱེ་མེད་ལ། །སེམས་ནི་ཐབས་མཆོག་འགག་པ་མེད། །རིག་པ་རྟག་པ་ཐེར་ཟུག་ལ། །སེམས་ནི་ཆད་པ་ཀོར་ལེ་བ། །རིག་པ་སྐུ་དང་ཡེ་ཤེས་ཅན། །སེམས་ནི་ཉོན་མོངས་རྫུ་འཕྲུལ་ཅན། །རིག་པ་ཞིང་ཁམས་མཛད་པ་ཅན། །སེམས་ནི་ཁམས་གསུམ་ལས་སྤྱོད་ཅན། །རིག་པ་བསྡུས་རྣམས་བློ་ལས་འདས། །སེམས་ཀྱི་བསྡུས་རྣམས་བློ་མ་འདས། རིག་པ་བསྡུས་རྣམས་མྱ་ངན་འདས། སེམས་ཀྱི་བསྡུས་རྣམས་འཁོར་བའོ། །དེ་ཕྱིར་སྡེ་བསྐོར་ས་ལ་བཀྲམས། །བློའི་རྒྱུད་ལ་གོ་བར་བྱ། འདིའི་མི་བྷཻཾ་གོ་བས་གྲོལ། །གནད་འདི་ཟབ་པའི་ལེའུ་སྟེ། །མཁའ་འགྲོ་རྣམས་ཀྱི་སྙིང་ཐིག་གོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་ཀྱི་སྡེ་སྐོར་དུ་ཕྱེ་བའི་ལེའུ་སྟེ་གྱ་བཞི་པའོ། །྅྅྅ཡང་གཅིག་སྟོན་པས་བཀའ་སྩལ་པ། ཉོན་ཅིག་རིག་པའི་རྩལ་འཁོར་རྣམས། །དེ་ནས་ཆོས་ཅན་གཏན་འབེབས་ཕྱིར། །སེམས་དང་རིག་པའི་འདྲ་དཔེ་བརྩལ། །ཕྱི་ནང་སྣོད་བཅུད་ཐམས་ཅད་ན། །སེམས་རིག་མ་བུ་མཚུངས་པའོ། །འདྲ་དཔེ་མང་པོ་བསྡུར་བར་བྱ། །སྣ་རེ་དག་ནས་མཚུངས་མོད་ཀྱང་། །གང་དང་མཚུངས་ཞིང་ཅི་དང་འདྲ། །མཐའ་ཟད་ཐང་ཆད་མཐར་ཐུག་ཏུ། །རིག་པ་ནམ་མཁའ་དག་དང་འདྲ། །ཁ་དོག་རྒྱན་དང་མིང་དང་ནི། །གཟུགས་དང་བུ་ག་ནམ་མཁའ་མིན། །འདུས་མ་བྱས་པ་ནམ་མཁའ་འོ། །སེམས་ནི་རླུང་དང་འདྲ་བར་ཤེས། །བྱུང་ནི་ནམ་མཁའི་ངང་ནས་བྱུང་། །གནས་ནི་ནམ་མཁའི་ངང་ན་གནས། །འགྲོ་ཡང་ནམ་མཁའི་ཀློང་དུ་འགྲོ། །གཟུགས་དབྱིབས་ཁ་དོག་ཆེ་ཆུང་ཡོད། །གདོས་བཅས་འཕོ་འགྱུར་བྱེད་ལས་ཡོད། །སེམས་ཀྱི་ཉོན་མོངས་ལྔ་མཚུངས་པས། །ས་རླུང་ཆུ་རླུང་མེའི་རླུང་། །ནམ་མཁའི་རླུང་དང་རླུང་གི་རླུང་། །རླུང་ལྔ་དག་ཀྱང་རང་ཆས་ཡོད། །དེ་ནི་སེམས་རིག་འདྲ་དཔེར་མཚུངས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་རིག་འདྲ་དཔེར་ཕྱེ་བའི་ལེའུ་སྟེ་གྱ་ལྔ་པའོ། །྅྅྅ ཀུན་བཟང་ཡུམ་གྱིས་བཀའ་སྩལ་པ། འདྲ་དཔེ་གོ་བ་རྙེད་གྱུར་ཀྱང་། །ནམ་མཁའ་བྱུང་གནས་འགྲོ་གསུམ་བྲལ། །རླུང་ནི་བྱུང་གནས་འགྲོ་གསུམ་ཅན། །ནམ་མཁའ་མི་ཤིགས་འཕོ་འགྱུར་མེད། །རླུང་ནི་རྐྱེན་དབང་འཕོ་འགྱུར་ཅན། །ནམ་མཁའ་རྐྱེན་ནི་ཀུན་བཟང་ཡུམ། །རླུང་ནི་འགག་མེད་ཀུན་བཟང་ཡབ། །ནམ་མཁའ་འདུས་མ་བྱས་པ་ལ། །རླུང་ནི་འདུས་བྱས་གློ་བུར་པ། །ནམ་མཁའ་ཤེས་རབ་དབྱིངས་ཆེན་ལ། །རླུང་ནི་ཐབས་ཀྱི་རོལ་པ་རྩལ། །ནམ་མཁའ་རྟག་པ་ཐེར་ཟུག་པ། །རླུང་ནི་ཆད་པ་བྱེར་གཟུགས་ཅན། །ནམ་མཁའ་རླུང་རྐྱེན་རག་མ་ལུས། །རླུང་ནི་ནམ་མཁའ་རྐྱེན་ལ་ལྟོས། །ནམ་མཁའ་རྟག་ཏུ་གང་ཅི་ཡོད། །རླུང་ནི་མ་གང་མེད་པའི་གདག །ནམ་མཁའ་ཤེས་དོན་མྱ་ངན་འདས། །རླུང་དབང་སོང་ནས་འཁོར་བར་འཁྱམས། །དེ་ཕྱིར་ཆོས་ཅན་ཐམས་ཅད་གྱིས། །མཚན་ཉིད་ལེགས་པར་བཤིག་པ་ཞེས། །སྡེ་བསྐོར་ས་ལ་ལེགས་བཀྲམ་ལ། །སློབ་བུའི་རྒྱུད་ལ་བསྐྱལ་བ་གཅེས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ནམ་མཁའ་རླུང་ཆེན་གྱི་དབྱེ་བ་བསྟན་པའི་ལེའུ་སྟེ་གྱ་དྲུག་པའོ། །྅྅྅ཡང་ཅིག་སྟོན་པས་བཀའ་སྩལ་པ། །དེ་ནས་རིག་པ་སྤྲོས་བྲལ་ཏེ། །ནམ་མཁའ་དག་ལས་འདྲ་བ་ན། །ཕྱོགས་རྣམས་ཐམས་ཅད་ཐུན་མོང་གིས། །འདྲ་ཡང་དངོས་པོ་མེད་པའི་ཕྱིར། །རིག་སྟོང་བློ་འདས་ཆོས་སྐུ་དང་། །བེམ་སྟོང་ནམ་མཁའ་ཁྱད་པར་ཆེ། །རིག་པ་ལོངས་སྐུ་མཚན་དཔེ་དང་། །བེམ་གསལ་ཉི་ཟླ་ཁྱད་པར་ཆེ། །རིག་སྤྲུལ་གཞན་དོན་མཛད་པ་དང་། །བེམ་སྤྲུལ་གླིང་བཞི་ཁྱད་པ་ཆེ། །ཡང་དག་རྟོགས་པའི་ལྟ་བ་ཉིད། །ཕྱོགས་རིག་མེད་པར་ཡངས་པ་དང་། །མ་རྟོགས་པའི་ལྟ་བ་ཉིད། །ཕྱལ་བ་ཡུག་པོ་ཁྱད་པར་ཆེ། །རྟོགས་པའི་བྷཻཾ་པ་ཡེ་བབ་དང་། རང་བཞིན་ཤུགས་ཀྱིས་གསལ་བ་དང་། །མ་རྟོགས་པའི་བློ་རྣམས་དང་། །ཡིད་དཔྱོད་གཉིས་པོ་ཁྱད་པར་ཆེ། །རང་གྲོལ་བ་ཡི་སྤྱོད་པ་ཉིད། །ཤུགས་རྡོལ་འབད་མེད་ཆེན་པོ་དང་། །མ་རྟོགས་པའི་བཅོས་མ་ལ། །སྨྱོན་སྤྱོད་གཉིས་པོ་ཁྱད་པར་ཆེ། །ཡེ་གྲོལ་འབྲས་བུ་ཡེ་ཤེས་ལུགས། །དེ་བཞིན་གཤེགས་པའི་རང་ལུགས་དང་། །འཕྲལ་རྐྱེན་བསོད་ནམས་དགེ་བསགས་འབྲས། །སྐྱེ་མཆེད་མུ་བཞི་ཁྱད་པར་ཆེ། །གྲུབ་མཐའི་སྤྱིའི་མཐར་ཐུག་པ། །སྟོང་ཉིད་ཧད་པོ་མུ་མེད་དང་། །རང་བཞིན་འོད་གསལ་རྫོགས་ཆེན་མཐའ། །སྟོང་རིག་འགགས་མེད་ཁྱད་པར་ཆེ། །རིག་མེད་ནམ་མཁའ་དཔེ་བཞག་ན། །སློབ་བུའི་གོ་བ་མཚོན་པ་དང་། །སྤྲོས་བྲལ་རིག་བ་དོན་ཐོག་སྐལ། །རྒྱུད་ཐོག་མྱོང་བ་ཁྱད་པར་ཆེ། །ཆོས་ཉིད་བར་དོར་འོད་གསལ་ཤར། །སྐལ་མུན་སྒྲོན་མེ་བཏེགས་འདྲ་དང་། །རྨི་ལམ་བག་ཆགས་འོད་གསལ་ཤར། །འཁྲུལ་སྣང་སྐམ་གློག་ཁྱད་པར་ཆེ། །མངོན་པར་རྫོགས་པའི་སངས་རྒྱས་མཆོག །ལོངས་སྐུའི་སྤྱན་ལ་སྣང་བ་དང་། ཡང་དག་པའི་སངས་རྒྱས་ཏེ། །གཟིགས་སྣང་ལས་འདས་ཁྱད་པར་ཆེ། །རྣམ་མཁྱེན་ཡེ་ཤེས་ཐོབ་པའི་ཚེ། །འཁོར་འདས་གཉིས་སུ་སྣང་བ་དང་། །ཐམས་ཅད་མཁྱེན་པའི་ཡེ་ཤེས་ཀྱིས། །དབྱེར་མེད་འདྲེས་པར་ཁྱད་པར་ཆེ། །རྒྱུད་གཅིག་ལས་སྤྲུལ་ལས་ཀྱི་སྐྱེ། །མངལ་ལ་མས་ཀྱིས་འཇུག་པ་དང་། །ཐུགས་རྗེ་ཐམས་ཅད་དོན་དུ་སྤྲུལ། །རྨྱིག་ནས་ཡས་འཇུག་ཁྱད་པར་ཆེ། །དེ་ཕྱིར་ཁྱད་པར་འདི་རྣམས་ཀུན། །མ་འཁྲུལ་བློ་ལ་ལེགས་པར་ཞོག །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། །རིག་པ་དཔེ་བྲལ་གྱི་དོན་དང་། །ཁྱད་པར་དབྱེ་བའི་ལེའུ་སྟེ་གྱ་བདུན་པའོ། །྅྅྅ ཡུམ་ཆེན་ཉིད་ཀྱིས་བཀའ་སྩལ་པ། ཉོན་ཅིག་རིག་གདངས་རྩལ་འཁོར་རྣམས། །དེ་ལྟར་བློ་ཡུལ་གོ་མོད་ཀྱང་། །དེ་ཡི་གཞིའི་རིག་པ་ཉིད། །གནས་པ་གཏན་ལ་ཕབ་བ་ཙམ། །སྤྱི་གཞི་འཁྲུལ་གཞི་གྲོལ་གཞི་ལ། །སྤྱི་གཞི་ཡིན་ལུགས་དེ་རྟོགས་ཏེ། །གཞི་དང་འབྲས་བུ་གཅིག་མི་གཅིག །གཅིག་ན་མི་གཅིག་ཅི་ལ་འོང་། །མི་གཅིག་ས་བོན་འབྲས་བུ་ལ། །གཟུགས་དབྱིབས་རིགས་སུ་མི་གཅིག་གམ། །གཞི་དང་འབྲས་བུ་ཐ་དད་ན། །འགལ་བ་དུ་མའི་སྐྱོན་དུ་རིག །གལ་ཏེ་གཞི་འབྲས་གཅིག་པས་ན། །སངས་རྒྱས་སེམས་ཅན་དག་ཏུ་ལྡོག །སྟོང་བསྐོར་ལྟ་བུར་སྐྱོན་གཅིག་འོང་། །དེ་ཕྱིར་ལམ་གྱི་རིག་པ་ཉིད། །ཉམས་སུ་མྱོང་ཚུལ་གཏན་ལ་དབབ། །ད་ལྟ་ཉམས་སུ་བླངས་པའི་ཚེ། །མ་བཅོས་ལྷུག་པར་གནས་པའི་དུས། །བདེ་དང་གསལ་དང་མི་རྟོག་གསུམ། །འདི་གསུམ་གཅིག་གམ་མི་གཅིག་བརྟགས། །ལུས་སེམས་གང་གི་སྟེང་ནས་གནས། །རྩོལ་མེད་རྣམས་ཀྱི་རྩོལ་བཅས་འཆར། །ལེགས་པར་ཉམས་སུ་བླངས་ལ་བཤིག །ཉམས་སུ་བླང་བའི་གང་ཟག་ལ། །མི་རྟོག་པ་ལ་སྣང་ཆ་གསལ། །རིག་ཆ་མེད་པར་མི་རྟག་ཙམ། །གཅིག་དང་དུ་མའི་ཐ་སྙད་བྲལ། །དཔེར་ན་སྒོང་ཆུ་ལྟ་བུར་ཤེས། །ལུས་སེམས་གང་ལའང་གནས་པ་མེད། །ཕྱོགས་ལྷུང་མེད་པར་ཀུན་ཁྱབ་ཡིན། །ད་ལྟ་རྩོལ་བར་འཆར་བར་སྣང་། །ཡེ་ནས་རྩོལ་བྲལ་རང་ཆས་ཡིན། །མི་རྟོག་ཆོས་ཀྱི་སྐུ་དེ་ཉིད། །གཟུགས་མེད་ཁམས་རྣམས་རྩད་ནས་བཅད། །གསལ་སྣང་ལོངས་སྤྱོད་རྫོགས་སྐུ་ཡིས། །གཟུགས་ཀྱི་ཁམས་རྣམས་རྩད་ནས་བཅད། །བདེ་ཆེན་སྤྲུལ་པའི་སྐུ་ཡིས་ནི། །འདོད་པའི་ཁམས་རྣམས་རྩད་ནས་བཅད། །མི་རྟོག་པ་དེ་ལྟ་བ་ཡིན། །གསལ་སྣང་དེ་ནི་བྷཻཾ་པ་ཡིན། །དེ་ལ་རིག་གྲོལ་སྤྱོད་པ་དེ། །དབྱེར་མེད་འབྲས་བུ་སྐུ་གསུམ་ཡིན། །མི་རྟོག་པ་ཡི་གཏི་མུག་དང་། །ཆོས་དབྱིངས་ཡེ་ཤེས་ངང་གིས་ཤར། །གསལ་བ་ཞེ་སྡང་རང་སར་དག །མེ་ལོང་ཡེ་ཤེས་ངང་གིས་ཤར། །བདེ་བ་འདོད་ཆགས་རང་སར་གྲོལ། །སོར་རྟོགས་ཡེ་ཤེས་ངང་གིས་ཤར། །མི་རྟོག་ངོ་བོ་རང་བཞིན་གསལ། །ཐུགས་རྗེ་བདེ་རིག་མཐའ་བྲལ་ལོ། །ཡོངས་རྫོགས་མ་འདྲེས་མཉམ་ཉིད་ལ། །ཀུན་རྫོབ་བྱ་གྲུབ་ཡེ་ཤེས་ཡིན། །འདིའི་ཉམས་ལ་ཞེན་པས་ན། །ཁམས་གསུམ་འཁོར་བའི་ས་བོན་འདེབས། །འདི་ཕྱོགས་རེ་རེར་ལྷུང་བས་ན། །ལྟ་བ་ལོག་པའི་ཕྱོགས་སུ་འཆོར། །འདི་ལ་མ་ཞེན་རྩལ་རྫོགས་ནས། །གང་ཟག་སྒོས་བཙན་འཁོར་བ་སྟོང་། །དེ་ཕྱིར་ལམ་འདིར་རིག་བ་གཙོའ། །ལམ་གྱི་རིག་པ་འདི་མེད་ན། །རྫོགས་པ་ཆེན་པོ་ཁས་བླང་ན། །གོ་བ་སྤྱི་སྐད་ལུས་པ་ཡིན། །ཁང་སྟོང་དག་གིས་རྐུན་མ་འདྲ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ལམ་གྱི་རིག་པ་བདེ་གསལ་མི་རྟོག་པ་མྱོང་ཐོག་ཏུ་བརྒལ་བའི་ལེའུ་སྟེ་གྱ་བརྒྱད་པའོ། །྅྅྅ ཀུན་བཟང་ཡུམ་གྱིས་བཀའ་སྩལ་པ། ཉོན་ཅིག་རིག་གདངས་རྩ་འཁོར་རྣམས། །དེ་ལྟར་སེམས་དང་རིག་པ་དང་། །ཆོས་ཉིད་ཆོས་ཅན་འཁོར་མྱང་འདས། །ཡོད་མེད་རྟག་ཆད་འཕོ་འགྱུར་དང་། །ཐབས་དང་ཤེས་རབ་འདུས་བྱས་དང་། །འདུས་མ་བྱས་སོགས་དབྱེ་བ་རྣམས། །ལེགས་པར་རུ་ཤན་འབྱེད་པ་གཅེས། །རིག་པ་སྤྱི་སྐད་མ་ལུས་ཕྱིར། །གཞིའི་རིག་པ་སྤྱི་གཞི་སྟོན། །ལམ་གྱི་རིག་པ་ཉམས་ལེན་སྟོན། །འབྲས་བུའི་རིག་པ་གྲོལ་གཞི་སྟོན། །འདི་ཞེས་ས་ལམ་དུས་གཅིག་ཆོད། །སྲིད་པའི་ཧྲིལ་པོར་སྟོང་པ་ཡིན། །དེ་ནས་སྐལ་ལྡན་བུ་མཆོག་ལ། །སྤྲོས་མེད་གསང་བའི་དབང་མཆོག་བསྐུར། །རྩ་རླུང་ཐིག་ལེ་སྦྱང་དུ་གཞུག །དེ་ནས་མཁའ་འགྲོའི་གསང་དབང་བསྐུར། །དེ་ཡང་སྦྱོར་དངོས་རྗེས་གསུམ་སྟེ། །ཞུ་འབུལ་སྣང་བ་སྦྱིན་པ་ཡིན། །དཀྱིལ་འཁོར་མཆོད་རྫས་དབང་རྫས་བཤམས། །ལས་གཞུང་བསྲང་ཞིང་དཀྱིལ་འཁོར་བསྒྲུབ། །ཚོགས་ཀྱི་འཁོར་ལོ་བསྐོར་བར་བྱ། །སློབ་མའི་སྟ་གོན་དཀྱིལ་འཁོར་ཞུགས། །དམ་བསྒྲག་ཡེ་ཤེས་ཕབ་པར་དབབ། །ལྷ་ངོ་སྤྲོད་ཅིང་རྣམ་དག་བཤད། །དགའ་སྤྲོ་ཆེན་པོས་གཟེངས་བསྟོད་དོ། །དངོས་གཞི་ཡིད་ཆེས་ལོ་རྒྱུས་བཤད། །དབང་དོན་རྣམ་པ་བཞི་ཡིན་ཏེ། །བུམ་པ་སྐུ་དང་ཚིག་དོན་སྤྲད། །སྤྱི་བོ་མགྲིན་པ་སྙིང་ཁ་དང་། །ལྟེ་བ་གསང་གནས་རྩ་ཁམས་སུ། །ཡབ་ཡུམ་རོལ་པའི་ཆས་ཀྱིས་བསྐོར། །ཐོད་པ་བདུད་རྩི་ལྕེ་ལ་བཞག །སྔགས་དབང་རྫོགས་པར་ངག་ལ་བསྐུར། །ཐིག་ལེ་དཀར་དམར་ལྕེ་ལ་བཞག །རྡོ་རྗེ་དྲིལ་བུའི་ཕྱག་རྒྱ་ཡིས། །གསུམ་པའི་དབང་མཆོག་སེམས་ལ་བསྐུར། །ཤེལ་དང་རྨ་བྱའི་དཔེ་མཚོན་ནས། །ཚིག་དབང་ངོ་སྤྲོད་རིག་ཐོག་བསྐུར། །གཞན་ཡང་འཇིག་རྟེན་འདས་མ་འདས། །མཁའ་འགྲོ་ཀུན་གྱི་དབང་མཆོག་བསྐུར། །ཕྱག་མཚན་ཆ་ལུགས་རང་རྟགས་གྱིས། །དབང་མཆོག་དོན་ཚིག་བཅས་པ་བསྐུར། །ལུང་སྟོན་རྗེས་གནང་གཟེངས་བསྟོད་དོ། །རྗེས་ལ་ཚོགས་མཆོད་ཡོན་གྱིས་བསྐངས། །གཏང་རག་བཏང་ལ་བྱ་བ་འགྲུབ། །དབང་འདི་ཐོབ་ནས་འཁོར་འདས་ཀྱིས། །མཁའ་འགྲོ་ཀུན་གྱི་སྲོག་དབང་ཐོབ། །མིའི་ལུས་ལ་བདེ་བར་གཤེགས། །སྐལ་བཟང་རེ་ལས་མ་གནང་ངོ་། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། དབང་གཉིས་པ་བསྐུར་ཐབས་དང། དུས་བསྟན་པའི་ལེའུ་སྟེ་གྱ་དགུ་པའོ། །྅྅྅ ཀུན་ཏུ་བཟང་མོས་བཀའ་སྩལ་པ། ཉོན་ཅིག་རིག་གདངས་རྩལ་འཁོར་རྣམས། །དངོས་གཞིའི་གདམས་པ་དྲུག་ཡིན་ཏེ། །བྷཻཾ་སངས་རྒྱས་པའི་བསྐྱེད་རྫོགས་དང་། །གོ་སངས་རྒྱས་པའི་ཁྲེགས་ཆོད་དང་། །མཐོང་སངས་རྒྱས་པའི་ཐོད་རྒལ་དང་། །བཏགས་སངས་རྒྱས་བའི་བཏགས་གྲོལ་དང་། །དྲན་སངས་རྒྱས་པའི་འཕོ་བ་དང་། །ཐོས་སངས་རྒྱས་པའི་བར་དོ་དང་། །མཁའ་འགྲོ་ཀུན་གྱི་སྙིང་ཐིག་ཡིན། །དེ་ལ་ཐོག་མའི་བསྐྱེད་རྫོགས་ནི། །དབང་པོའི་རིམ་པ་བསམ་འདས་པ། །ཞི་བ་དང་ནི་ཁྲོ་བོ་དང་། །ཞི་མ་ཁྲོ་དང་ཡབ་ཡུམ་ཅན། །གཙོ་འཁོར་ཅན་དང་སྐུ་རྐྱང་དང་། །རང་རང་གང་མོས་བྷཻཾ་ཞིང་བསྒྲུབ། །དེ་ཡང་རིག་པའི་རང་རྩལ་ཡིན། །རང་གི་བྷཻཾ་པས་རྒྱུ་ཡི་ལྷ། །རང་བཞིན་བཞུགས་པ་འབྲས་བུའི་ལྷ། །རང་ཉིད་ཚོགས་གཉིས་མངོན་མ་རྫོགས། །སྒྲིབ་པ་གཉིས་ཀྱིས་སྦགས་པ་ཡིན། །ལྷ་ནི་ཚོགས་རྫོགས་སྒྲིབ་གཉིས་དག །ད་ལྟ་གཉིས་འཛིན་དབང་གིས་ནི། །རྩལ་མ་རྫོགས་པས་ན་སོ་གཞོན། །མཐར་ཐུག་འབྲས་བུ་རྩལ་རྫོགས་ཚེ། །ལྷ་དང་རང་རིག་གཉིས་སུ་མེད། །ཞི་རྒྱས་དབང་དྲག་ལས་རྣམས་འགྲུབ། །དེ་ཕྱིར་རིག་པ་སྐྱེ་བ་མེད། །ཀུན་བཟང་ཡུམ་གྱི་བྷ་ག་ལ། །ཐབས་མཆོག་འགགས་མེད་ལྷ་སྐུ་བཞེངས། །དབྱེར་མེད་བདེ་བའི་མཆོད་པ་འབུལ། །འཁོར་བ་དོང་སྤྲུགས་ཨ་ལ་ལ། །ཞི་ཁྲོ་མཁའ་འགྲོ་མ་ལུས་པ། ཕུང་ཁམས་སྐྱེ་མཆེད་ལྷ་ཡིན་པས། །རང་རིག་རང་ལས་ཐོབ་པར་མཛོད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། བསྐྱེད་རྫོགས་ལ་རྩལ་སྦྱངས་པའི་ལེའུ་སྟེ་དགུ་བཅུ་ཐམ་པའོ། །྅྅྅ ཡང་ཅིག་སྟོན་པས་བཀའ་སྩལ་བ། ཉོན་ཅིག་རང་རྩལ་རིག་འཁོར་རྣམས། །གོ་སངས་རྒྱས་པའི་གནད་མཆོག་ནི། །ཁྲེགས་ཆོད་བླ་མེད་འདི་ཡིན་པས། །དེ་ཡང་སེམས་རིག་དབྱེ་བའི་དོན། །བདེ་གསལ་མི་རྟོག་ཉམས་མྱོང་ལ། །མིང་དུ་བཏགས་ན་གང་འདྲར་འདོགས། །མྱོང་བ་སྐད་ཅིག་འདོན་དུ་གཞུག །ཡར་མར་ཕར་ཚུར་གང་བརྟག་ཀྱང་། །འདི་མིན་སྤུ་ཙམ་འདུག་རིག་ན། །ཇི་ལྟར་བྷཻཾ་བསམ་མཉན་གཞུག་ཀྱང་། །མྱོང་བ་འདི་མིན་འདུག་རིག་ན། །མིང་ཚིག་ཐ་སྙད་ཅི་བརྗོད་ཀྱང་། །འདི་ལ་བློ་ཐག་མ་ཆོད་རིགས། །ཁྲེགས་ཆོད་སྟེང་དུ་ལྷན་གྱིས་བསྐྱངས། །སྐུ་དང་གཏོར་མ་མགོ་ཐོག་བཞག །ཐེ་ཚོམ་བྱུང་ན་བསྐྱར་ཞིང་བྷཻཾ། །ད་རུང་ཐེ་ཚོམ་སེལ་བ་དང་། །རྟོགས་པ་བྷཻཾ་དུ་འཆར་བ་ལ། །གནས་པ་དང་ནི་འགྱུ་བ་གཉིས། །སྔ་ཕྱི་གོང་འོག་ཨེ་འདུག་ལྟ། །རྟོག་པ་དང་ནི་མི་རྟོག་པ། །བཟང་ངན་ཁྱད་པར་ཨེ་འདུག་ལྟ། །དྲན་བཅོལ་བྷཻཾ་དང་དྲན་མེད་ལ། །རང་བབ་གཤིས་ཀྱི་གནས་ལུགས་གསུམ། །ཁྱད་པར་གང་གིས་ཕྱེ་འདུག་ལྟ། །མིག་གིས་གདངས་བཙུམ་གཉིས་པོ་ལ། །དོན་ལ་ཁྱད་པར་ཨེ་འདུག་ལྟ། །འཕྲོ་དུས་ས་ཕྱོགས་གང་ཙམ་ཁེངས། །འདུག་དུས་འདུག་ལུགས་ཅི་འདྲར་འདུག །ལེགས་པར་བཤིགས་ལ་ཡང་ཡང་བརྟགས། །རེས་ན་དམྱལ་ཁམས་ཐམས་ཅད་སྤྲུགས། །རེས་ན་སངས་རྒྱས་ཞིང ཁམས་ལྟ། །རེས་ན་སྔ་ཕྱི་བག་ཆགས་ལྟ། །རེས་ན་ལྟ་བྱེད་ལམ་ལམ་བསམ། །དེ་ལྟར་གསལ་ཆའི་རྣམ་པ་དེ། །རིག་པས་ཕྱིན་ནམ་སེམས་ཀྱི་ཕྱིན། །བག་ཆགས་ཡིན་ནམ་བློས་བྱས་ཡིན། །འགྲོ་བའི་དུས་སུ་མདུན་རྒྱབ་ཅི། །ལོག་པའི་དུས་ན་སྤྱོད་ལམ་ཅི། །ལེགས་ལྡན་ཕྱིན་དྲི་རླུང་ཁྱེར་འདྲ །གཞི་ཡི་རིག་པ་ཕྱིན་པ་མེད། །དེ་ཕྱིར་ཀུན་ཁྱབ་ཆེན་པོ་ཡིན། །ལམ་གྱི་རིག་ཆ་གསལ་ཙམ་ཡིན། །འོན་ཀྱང་འབྲས་བུ་གྲོལ་དགོས་པས། །གནས་པ་སྐྱེ་བ་མེད་པ་ལ། །འགྱུ་བ་འགགས་མེད་བྲེང་བ་ཤར། །དེ་རང་མ་རིག་ཁ་ཕྱིར་ལྟ། །སེམས་ཞེས་འཁྲུལ་པ་འགྱུར་བ་ཡིན། །དེ་རང་རིག་པ་ནང་དུ་གསལ། །རིག་པ་སྤྲོས་བྲལ་རྗེན་པར་ཡིན། །དྲན་འཛིན་གཉེན་པོ་མ་བསླད་པར། །རང་བབ་ལྷུག་པར་གུ་ཡངས་པ། །འབྲས་བུ་རིག་པ་དྲི་བྲལ་ཡིན། །ཀུན་གཞི་ཆོས་དང་བཅས་པ་བདག །ངོ་བོ་སྟོང་པ་ཆོས་ཀྱི་སྐུ། །རང་བཞིན་གསལ་བ་ལོངས་སྤྱོད་རྫོགས། །སྣ་ཚོགས་འཛིན་གྲོལ་སྤྲུལ་པའི་སྐུ། །སྐུ་གསུམ་ལྷུན་གྲུབ་དེ་ཀ་ཡིན། །གནས་པ་འགྱུ་བ་གྲོལ་བ་གསུམ། །སྐད་ཅིག་གཅིག་ལ་རྫོགས་སངས་རྒྱས། །གནས་པ་འགྱུ་བ་འཛིན་ཤེས་གསུམ། །སྐད་ཅིག་གཅིག་གི་བྱེ་བྲག་ཕྱེད། །གནས་པ་གཞི་ནས་སྟོང་པ་ལ། །འགྱུ་བ་རིག་པའི་རང་ཞལ་སྟོན། །གྲོལ་བ་ལྷག་མཐོང་རྗེན་པ་ཡིན། །འདི་མཚངས་གོ་བས་འཁྲུལ་པ་མེད། །འདི་གནད་ཤེས་པ་ཀུན་བཟང་ང་། །སྔར་མ་འཁྲུལ་ཅིང་ད་མི་འཁྲུལ། །ད་ལྟ་འཁྲུལ་པར་ང་མི་གནས། །འདི་ལས་དོན་ལ་མ་གཡོས་པས། །སྔར་སངས་མ་རྒྱས་ད་མི་རྒྱས། །ད་ལྟ་སངས་རྒྱས་པར་མི་གནས། །འཁོར་བ་སྤང་བའི་ཕ་རོལ་ན། །མྱང་འདས་ལོག་ནས་བཙལ་དུ་མེད། །རྟོགས་འགྱུ་སྤང་བའི་ཕ་རོལ་དུ། །མི་རྟོགས་ལོག་ན་བཙལ་མི་རྙེད། །དམྱལ་བའི་ངོ་བོ་སངས་རྒྱས་རང་། །དང་པོ་ལེགས་པར་ཕྱེད་པར་བྱ། །ཡིད་དཔྱོད་བླུན་བྷཻཾ་བརྐྱང་ལ་འདོན། །བར་དུ་ཉམས་སུ་ལེན་པ་བྱ། །མྱོང་བ་རྡོ་རུས་ཐུག་པར་འགྱུར། །ཐ་མར་འདྲེས་པར་བསྲེའ་བར་བྱ། །འཐོར་བ་སྡུད་ཅིང་ཐག་ཆོད་འགྱུར། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཁྲེགས་ཆོད་ཀྱི་དོན་དུ། འབྲས་བུའི་རིག་པ་ངོས་བཟུང་བའི་གནས་འགྱུ་གྲོལ་གསུམ་ལ་བཟླ་བའི་ལེའུ་སྟེ་གོ་གཅིག་པའོ། །྅྅྅ སྟོན་པས་འཁོར་རྣམས་ལ་བཀའ་སྩལ་པ། ཉོན་ཅིག་རིག་པའི་རྩལ་འཁོར་རྣམས། །ནམ་མཁའ་དཔེ་བཞག་རིག་པ་ཡིས། །གནས་ལུགས་ལེགས་བར་གོ་ན་ཡང་། །རླུང་དང་འདྲ་བའི་སེམས་བྱུང་འདི། །རྩ་བ་ལེགས་པར་ཆོད་བ་དགོས། །འདིའི་རྩ་བ་མ་ཆོད་ན། །ནམ་མཁའ་ཕྱོགས་ལྷུང་མེད་མོད་ཀྱང་། །རླུང་ནི་འཕོ་འགྱུར་དར་རྒུད་དང་། །ནམ་ཟླ་གྲང་དྲོ་དུས་མ་ཕྱེད། །དེ་བཞིན་ཁྲེགས་ཆོད་དོན་གོ་ཡང་། །སྒོ་ལྔ་ཡུལ་ལ་སེམས་ཐོན་ནས། །འཁོར་འདས་བདེ་སྡུག་དུ་མ་བྱེད། །དེ་ཕྱིར་བཤིག་ཅིང་འདི་ལྟར་བསམ། །སེམས་དང་ངག་གཉིས་མེད་པའི་ལུས། །དབང་པོ་སྒོ་ལྔ་ཚང་བ་འདི། །དཔེ་ནི་ཅི་འདྲ་ལེགས་པར་བརྟགས། །ངག་སེམས་མེད་པ་འདེར་སོ་འདྲ། །ལུས་ནི་བེམ་པོ་ངོ་ཡང་སྤྲད། །ཕན་གནོད་མེད་པར་དོན་གོ་བས། །གཅེས་འཛིན་མེད་པར་བློ་ཐག་ཆོད། །དེ་ནི་ལུས་ཀྱི་བཤིག་པ་ཡིན། །ལུས་དང་སེམས་གཉིས་མ་གཏོགས་པའི། །ངག་ཞེས་བྱ་བའི་ཅ་ཅོ་ཅན། །འདི་ཡི་དཔེ་ནི་ཅི་དང་འདྲ། ཆུ་ཀླུང་འདྲ་བར་དཔེ་བཞག་ན། །སྒྲ་སྐད་རྟེན་མེད་ངོ་ཡང་འཕྲོད། །བྲག་ཆ་འདྲ་བར་བློ་ཐག་ཆོད། །དེ་ནི་ངག་ལ་བཤིག་པ་ཡིན། །ལུས་ངག་གཉིས་ཀ་མེད་པའི་སེམས། །ཝལ་ཝལ་འཆར་ཞིང་འགྱུ་འགྱུ་པོ། །སལ་སལ་གསལ་ལ་དངོས་པོ་མེད། །ཁྱེད་ཀྱི་དཔེ་དེ་ཅི་དང་འདྲ། །འགྱུ་ལ་དངོས་མེད་རླུང་དང་འདྲ། །ཕན་གནོད་ལས་བྱེད་ཆུ་དང་འདྲ། །བྱ་བྱེད་ཡུན་ཐུང་གློག་དང་འདྲ། །སྣ་ཚོགས་རང་གསལ་མེ་ལོང་འདྲ། །བྱ་བྱེད་བློ་མང་སྤྲེའུ་འདྲ། །འབྱར་ལ་གོག་དཀའ་བག་སྦྱིན་འདྲ། །ངེས་རེས་མི་འདྲ་གང་ཡང་མེད། །འགྱུ་འགྱུ་ཝལ་ཝལ་ཅི་ཤར་ཡང་། །དངོས་མེད་སྟོང་པར་བློ་ཐག་ཆོད། །དུ་དགོད་འཕག་ཅིང་བྱས་རྒྱུག་ཀྱང་། །ཆུ་ལ་དབྱུག་བ་བརྒྱབ་པ་འདྲ། །བྲིང་བྲིང་ཧྲིག་ཧྲིག་རིག་པའི་རྩལ། །རིག་རྩལ་དབྱིངས་སུ་ཐིམ་ཙ་ན། །རིག་སྟོང་ཆོས་སྐུར་བློ་ཐག་ཆོད། །དེ་ལ་སེམས་ནི་བཤིག་པའོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་བྱུང་འགྱུ་བའི་ཕུ་ཐག་བཅད་བ་ལས། ཐོག་མར་ལུས་ངག་ཡིད་གསུམ་ལ་བཤིག་པའི་ལེའུ་སྟེ་གོ་གཉིས་པའོ། །྅྅྅ ཉོན་ཅིག་རིག་པའི་རྩལ་འཁོར་རྣམས། །ད་རུང་སེམས་ཀྱི་རྩ་བ་བཅད། །སྣ་ཚོགས་དྲན་བསམ་འཆར་བ་འདི། །སེམས་ཀྱིས་བྱས་པ་ཡིན་ནམ་མིན། །ཡིན་ན་བྱེད་མཁན་ཁྱོད་རང་གིས། །གཟུགས་དབྱིབས་ཁ་དོག་ཇི་ལྟ་བུ། །དེ་ཉིད་ལྟ་མཁན་རང་ཡང་གང་། །རྐྱང་དེད་མཐའ་རུ་འདས་པ་ལ། །རང་ཡང་སྟོང་པ་ཨར་སངས་པའི། །དེའི་དཔེ་དེ་ཅི་དང་འདྲ། །ཉི་ཟླ་གཟའ་སྐར་གླིང་བཞི་སོགས། །ནམ་མཁའ་མ་བྱས་རང་རྩལ་ཡིན། །ཆུ་དང་ཆུ་རླབ་ལྟ་བུ་ཡི། །མེ་ལོང་ནང་གི་ཟུགས་བརྙན་འདྲ། །གནས་པ་གཞིའི་རིག་པ་ལ། །སེམས་བྱུང་ལམ་གྱི་འགགས་མེད་རྩལ། །ངང་ངམ་ཤུགས་ཀྱིས་ཐོལ་ཐོལ་སྐྱེས། །ཤར་ཡང་དངོས་མེད་རྗེན་པར་འདུག །མདོར་ན་གཞི་མེད་རྩ་བྲལ་ངང་། །སྨྲ་བསམ་ཡུལ་བྲལ་ངང་དུ་གྲོལ། །གྲོལ་ལོ་སྙམ་པའི་འཛིན་པ་ཟད། །ཟད་ཅེས་བྱ་བའང་བླ་དྭགས་ཙམ། །ད་རུང་སྣང་བའི་ཡུལ་ཉིད་དུ། །ཚོགས་དྲུག་སྣང་བ་ཅི་ཤར་ཡང་། །ད་རུང་རྟོག་པ་འཇུག་པ་ན། །དེ་ལ་རྣམ་རྟོག་ཞེས་པ་ཡིན། །རྣམ་རྟོག་བྱ་བའི་ཝལ་ཝལ་པོ། །བྱུང་བ་རྒྱུ་རྐྱེན་གང་གིས་ལེན། །དང་པོ་ཕྱི་ནང་སྣོད་བཅུད་སོགས། །གང་ན་བྱུང་ཡང་ཕོ་ཚོད་གཞུག །ད་ལྟ་སྣང་སྟོང་གང་ལས་བྱུང་། །སྣང་བ་ནང་དུ་ཚུར་བྱུང་ངམ། །སྟོང་པས་སྣང་བ་ཕར་བཟུང་ངམ། །འདི་གཉིས་འཕྲད་པའི་བར་དག་གང་། །ལེགས་བར་བརྟགས་ཤིང་བཤིག་པའི་ཚེ། །རྣམ་རྟོག་སྣང་སྟོང་བར་དུ་ཡལ། །ཐོག་མཐའ་བྱུང་ས་མ་རྙེད་ན། །རིག་སྟོང་རྗེན་པར་ཧད་དེ་བ། །དེ་ལ་མིང་འབྲལ་ཆོས་སྐུ་ཟེར། །དཔེ་བྲལ་དེ་རུ་ཐག་ཆོད་ཅིག །ད་རུང་ཁྱོད་ཉིད་གང་དུ་གནས། །ཡིད་ཅེས་བྱ་བའི་ལམ་ལམ་ཁྱོད། །ཕྱི་ནང་བར་གསུམ་ལེགས་བཤིག་པས། །འདིར་གནས་ཏིལ་འབྲུ་ཙམ་མེད་པར། །སྣང་སྟོང་བར་དུ་ཡིད་བྱེད་སྟོར། །གསལ་སྟོང་ངང་དུ་ལམ་མེ་བ། །འདི་ལ་རང་གསལ་ལོངས་སྐུ་ཟེར། །བཟུང་བྲལ་ངང་དུ་ཐག་ཆོད་ཅིག །ད་རུང་ཁྱོད་ཀྱི་འགྲོ་ས་གང་། །འཛིན་པ་བྱ་བའི་ཨ་འཐས་པོ། །བཟུང་ཡུལ་སྒྲ་ཡི་སྟོང་སོང་ན། །སྒྲ་དེ་གང་སོང་རྐྱང་དེད་བྱ། །འདིར་སོང་སྙིང་པོ་མ་རྙེད་ཡལ། །འདི་ལ་རིག་སྟོང་སྤྲུལ་སྐུ་ཟེར། །འཛིན་བྲལ་ངང་དེར་ཐག་ཆོད་ཅིག །སེམས་ལས་འདས་པ་ཆོས་ཀྱི་སྐུ། །ཡིད་ལས་འདས་པ་ལོངས་སྤྱོད་རྫོགས། །འཛིན་པ་བྲལ་བ་སྤྲུལ་པའི་སྐུ། །འདི་ལྟར་ཞུན་ཐག་ཆོད་པར་མཛོད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རྣམ་རྟོག་བྱུང་གནས་འགྲོ་གསུམ་གྱི་འཕྲང་བཅད་ནས། སྐུ་གསུམ་ངོ་སྤྲད་ཐག་བཅད་པའི་ལེའུ་སྟེ་གོ་གསུམ་པའོ། །྅྅྅ ཡང་ཅིག་སྟོན་པས་བཀའ་སྩལ་པ། ད་རུང་སེམས་རྟོག་བྱ་བ་ཁྱོད། །བྱུང་གནས་འགྲོ་གསུམ་མེད་པ་ན། །དྲན་བསམ་ཝལ་ཝལ་འཆར་བ་ཁྱོད། །སེམས་ལས་བྱུང་ཤིང་སེམས་ལ་གནས། །སེམས་གྱི་སྟེང་ན་ཐིམ་པ་ཡིན། །དེ་བཞིན་ཡིན་ན་སྐད་ཅིག་སེམས། །ཚན་པ་མང་པོ་ཡོད་པར་འགྱུར། །སྐྱེ་བའི་སེམས་དང་བྱུང་བའི་སེམས། །བྱུང་མཁན་སེམས་དང་ཐིམ་པའི་སེམས། །རྩད་ཆོད་མཁན་པོའི་སེམས་དང་ནི། །ཚན་པ་གཉིས་གཉིས་དུ་མ་འབྱུང་། །དེ་ནི་སྐྱོན་མེད་སྐྱོན་ཅན་ཡིན། །ཆུ་དང་ཆུ་རླབ་ཇི་བཞིན་ནམ། །མེ་ལོང་གཟུགས་བརྙན་ཇི་བཞིན་ནོ། །ངོ་བོ་སྟོང་པ་གཡོས་པ་མེད། །རང་བཞིན་གསལ་ཆ་དུ་མ་སྣང་། །ཐུགས་རྗེ་སྣ་ཚོགས་བཟུང་བ་ལ། །བྱད་གཟུགས་མང་པོ་སྣང་བ་ནི། །རང་རྒྱུད་སྟེང་དུ་ཐག་ཆོད་ན། །ཁྲེགས་ཆོད་སྟེང་དུ་ངོ་སྤྲད་དོ། །སེམས་གཅིག་པ་ལ་མེད་སྙམས་ན། །སེམས་དང་དྲན་པ་རྣམ་རྟོག་དང་། །འགྱུ་བ་འཆར་སྒོ་ཡིད་དང་བློ། །བསམ་པ་ཕོ་ཚོད་ལ་སོགས་པ། །དུ་མ་འབྱུང་བ་ལྟས་ངན་ཡིན། །དཔེར་ན་མེ་ལ་ཆུ་མི་སྐྱེས། །གསེར་ལས་ཟངས་སུ་འབྱུང་ངམ་ཅི། །ད་རུང་སེམས་ལས་འབྱུང་སྙམས་ན། །སེམས་ཞེས་ཡོད་ལས་འབྱུང་ངམ་མེད་ལས་བྱུང་། །ཡོད་ལས་བྱུང་ན་རྟག་པ་ཅན། །མེད་པ་ལས་ནི་འབྱུང་མི་སྲིད། །རྒྱུ་མེད་འབྲས་བུ་ལྟས་ངན་ཡིན། །ཡོད་མིན་མེད་མིན་ཡིན་བསམ་ན། །དྲན་བསམ་ཝལ་པོ་རྗེས་མེད་འདི། །སྔ་མ་ཤར་བ་མའི་ཚུལ། །ཕྱི་མ་ཤར་བ་བུ་ཡི་ཚུལ། །མ་བུ་གཉིས་པོ་གཅིག་མི་གཅིག །སྔ་ཕྱི་གཉིས་པོ་འཕྲད་མི་འཕྲད། །ཡང་ན་སོ་སོར་གྱེས་སམ་ཅི། །ལེགས་པར་བརྟག་དཔྱད་བསྐོར་ཞིང་བཏང་། །མ་བུ་གཉིས་པོ་གཅིག་པ་ན། །སྔ་ཕྱི་འོང་བ་ཅིའི་ཕྱིར། །སྔ་ཕྱི་གཉིས་པོ་མི་གཅིག་ན། །ཡོངས་ལ་ཁྱབ་པའི་སེམས་གཅིག་པོ། །ཞེས་པ་ལ་སོགས་རྫུན་དུ་ཐལ། །སྔ་མ་སེམས་ལ་ཕྱི་མ་ཐིམ། །ད་རུང་འཆར་བ་ཇི་ལྟར་རུང་། །སྔ་ཕྱི་གཉིས་པོ་མི་འཕྲད་ན། །བར་དོར་མ་བུ་སྦྱོར་བ་དང་། །སེམས་ངོ་འཕྲོད་ཅེས་ཅི་ལ་ཟེར། །ད་རུང་སེམས་ཞེས་དཔེ་མཚོན་པའི། །མིང་རྣམས་དང་པོ་གང་ནས་བྱུང་། །འདོགས་མཁན་སངས་རྒྱས་སེམས་ཅན་གང་། །སངས་རྒྱས་ཡིན་ན་འཛིན་པ་ཅན། །སེམས་ཅན་ཡིན་ན་སེམས་མེད་པའི། །གོང་དུ་སེམས་ཅན་སུ་ཡོད་པ། །དྲན་རིག་ཝལ་གྱིས་ཤར་དུས་སུ། །མིང་དེ་འདི་ཡིན་ཞེས་པ་སྟེ། །གཟུགས་སུ་འདུག་གམ་རི་མོར་འདུག །བརྟགས་པས་མ་རྙེད་དུས་དེར་སྟོར། །སེམས་ཞེས་དཔེ་མཚོན་མིང་རྣམས་མེད། །དཔེར་ན་མ་ཁོང་བུ་ཚ་རྣམས། །མིང་ནི་དང་པོ་གང་ཡང་མེད། །སྐྱེས་ནས་མིང་བཏགས་བདག་དུ་བཟུང་། །དེ་ཡི་འཁོར་བར་འཁྱམས་པར་མཚུངས། །མིང་མེད་པ་ལ་མིང་དུ་བཏགས། །དེ་ལ་ཨ་འཐས་བདག་ཏུ་བཟུང་། །སྲིད་པས་དྲ་བར་ཚུད་པའོ། །མིང་བྲལ་གཅིག་ཏུ་ཐག་ཆོད་ན། །ཁྲེགས་ཆོད་སྟེང་དུ་སླེབ་པའོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་འབྱུང་རྟོག་པ་ཕུ་ཐག་བཅད་པའི་ལེའུ་སྟེ་གོ་བཞི་པའོ། །྅྅྅ ཀུན་བཟང་ཡུམ་གྱིས་བཀའ་སྩལ་པ། ད་རུང་སེམས་ཀྱི་རྩ་བ་བཅད། །ཡོངས་ལ་ཁྱབ་པའི་སེམས་གཅིག་པོ། །ཡོད་ན་རྒྱུ་རྐྱེན་ཅི་ལས་བྱུང་། །མེད་ན་འགྱུ་དྲན་ཅི་ལས་སྐྱེས། །ལུས་སེམས་གཉིས་པོ་གཅིག་མི་གཅིག །གཅིག་ན་ལུས་འཇིག་སེམས་འཇིག་གམ། །མི་གཅིག་ད་ལྟ་འདྲེས་པས་གསལ། །འགྲོ་དྲུག་སེམས་ཅན་འདི་རྣམས་དང་། །རང་གི་སེམས་གཉིས་གཅིག་མི་གཅིག །གཅིག་ན་གཅིག་སྐྱེས་ཀུན་སྐྱེས་ཐང་། །གཅིག་ཤི་ཐམས་ཅད་ཤི་བར་ཐང་། །གཅིག་སངས་རྒྱས་དུས་ཀུན་རྒྱས་ཐང་། །འོ་ན་མི་གཅིག་གྱུར་པ་ན། །འགྲོ་དྲུག་གཟུགས་བརྙེན་ཐ་དད་ལྟར། །སེམས་ཀྱང་དངོས་པོ་ཐ་དད་དམ། །གལ་ཏེ་ཐ་དད་གྱུར་པས་ན། །མི་གཅིག་ཤི་བའི་དུས་ཉིད་དུ། །ལུས་གནས་སྲིན་བུ་མི་འཆི་ཐང་། །འཁོར་བ་སེམས་ཅན་ཐམས་ཅད་རྣམས། །བདེ་ལ་ཀུན་དགའ་སྡུག་ལ་འཚེར། །འཆི་ལ་འཇིགས་ཤིང་དགྲ་ལ་སྡང་། །གཉེན་ལ་བྱམས་སོགས་མི་གཅིག་ཐང་། །དེ་ལྟར་ལེགས་པར་བརྟག་པའི་ཚེ། །གཞིའི་རིག་པ་མ་གཡོས་ཀྱང་། །ལམ་གྱི་རིག་པ་ངོ་མ་ཤེས། །ཁ་ཕྱིས་ལྟས་ན་ལས་རྣམས་བསགས། །ལས་རེ་ལུས་བླང་ལས་ངན་སྤྱོད། །དེ་ཕྱིར་ལམ་གྱི་རིག་པ་ལ། །ངོས་བཟུང་ཉམས་བླངས་འབྲས་བུར་གྲོལ། །དེ་ཕྱིར་ཁྲེགས་ཆོད་དོན་ལ་སྦྱར། །འཁོར་བའི་རྨིང་རྡོ་འདོན་པར་བྱ། །ཡིན་ལུགས་ད་རུང་ཐག་ཀྱང་ཆོད། །ལུས་ལ་གནས་པའི་སེམས་གཅིག་པོ། །དུག་ལྔ་དུག་གསུམ་ཉོན་མོངས་རྣམས། །སྣ་ཚོགས་སྐྱེས་པ་ཅི་ལ་སྐྱེས། །སྐྱེ་འམ་མི་སྐྱེས་ལེགས་པར་ལྟོས། །རྒྱུ་གཅིག་ཡོད་ན་རྐྱེན་གྱིས་འཇིགས། །ལན་གཅིག་ཞི་བར་གྱུར་བ་ན། །ཕྱི་ན་མི་ལྡང་ཐང་བ་ལ། །མང་ཞིག་འཁོར་འདས་གཉིས་སུ་སྣང་། །འོ་ན་ཉོན་མོངས་ཐམས་ཅད་གྱིས། །འབྲས་བུར་འཁོར་བར་ཐག་ཆོད་ན། །བྷཻཾ་བསྒྲུབ་ཙམ་བྱས་འབྲས་བུ་ནི། །སངས་རྒྱས་མི་ཐོབ་སྐྱོན་རེ་ཆེ། །འོན་ཀྱང་གདོད་མའི་སངས་རྒྱས་ཡིན། །གཉིས་འཛིན་དབང་གི་འཁོར་བར་འཁྱམས། །ད་རུང་ཉམས་བླང་གདོད་མ་རུང་། །སངས་རྒྱས་ཉིད་དུ་ཐེ་ཚོམ་མེད། །སྙམ་ན་ད་རུང་སངས་རྒྱས་ན། །རིམ་གྱིས་འཁོར་བར་ལྡོག་པ་ཅི། །འོ་ན་དང་པོ་སངས་རྒྱས་ཡིན། །ད་ལྟ་སངས་རྒྱས་ཆོས་མ་འགྱུར། །འབྲས་བུ་སངས་རྒྱས་ཐེ་ཚོམ་མེད། །སྙམ་ན་སྔོན་གྱི་སངས་རྒྱས་རྣམས། །བསྐལ་བ་གྲངས་མེད་ཚོགས་བསགས་ནས། །ཐོས་བསམ་བྷཻཾ་བསྒྲུབ་དཀའ་བ་སྤྱད། །དེ་ལྟ་བུ་རྣམས་ཅི་ལ་དགོས། །སངས་རྒྱས་སེམས་ཅན་གཉིས་པོ་འདི། །རྒྱུ་གཅིག་པས་ན་འཁོར་འདས་གཉིས། །གཅིག་ལས་མི་འོང་ཐང་བ་ལ། །མི་གཅིག་སེམས་ཅན་བྷཻཾ་བསྒྲུབ་པས། །སངས་རྒྱས་མི་ཐོབ་པར་ཡང་རིག །དེ་ཕྱིར་ལེགས་པར་རྩལ་བ་བཅད། །ཀུན་གཞི་འཁྲུལ་གཞི་གྲོལ་གཞི་གསུམ། །ལེགས་པར་གོ་བར་རྟོགས་པར་བྱ། །གནས་དང་འགྱུ་དང་གྲོལ་དང་གསུམ། །ལེགས་པར་ལག་ཏུ་བླང་བར་བྱ། །ཆོས་སྐུ་ལོངས་སྐུ་སྤྲུལ་སྐུ་གསུམ། །འབྲས་བུ་ཕྱི་དུས་མ་ལུས་བྱས། །དཔེར་ན་རིག་པ་སེམས་གཉིས་པོ། །མེ་ལོང་དང་ནི་གཡའ་ལྟ་བུ། གཡའ་དག་དུས་སུ་མེ་ལོང་གསལ། །དཔེར་ན་སྤྲིན་དང་ཉི་མ་འདྲ། །སྤྲིན་གྱིས་ཉི་མ་བསྒྲིབ་པ་མེད། །ཉི་མའི་འོད་ལ་ཉམས་པ་མེད། །ཆུ་ལ་དྲོ་བར་བསྒྱུར་བའམ། །ཁ་དོག་སྣ་ཚོགས་བསྒྱུར་དང་མཚུངས། །རྒྱུ་མཚན་མེད་པར་བློ་ཐག་བཅད། །ཏིག་པོ་མེད་པར་ཆོས་ཀྱི་སྐུ། །ངང་དངས་ས་ལེ་ཧྲིག་གེ་བ། །རྣམ་པ་ཀུན་གསལ་དེ་རྟོག་བྲལ། །གུ་ཡངས་ཁོག་བདེ་བློ་ཟག་བྲལ། །ཁྲེགས་ཆོད་དོན་དང་དེ་དུས་འབྲེལ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་ཀྱི་ཕྲ་བཅད་ཁང་ཆུང་བཤིག་པའི་ལེའུ་སྟེ་གོ་ལྔ་པའོ། །྅྅྅ ཡང་ཅིག་སྟོན་པས་བཀའ་སྩལ་པ། མཁའ་འགྲོའི་ཚོགས་རྣམས་ཚུར་ཉོན་ཅིག །སེམས་ཅན་མ་ལུས་ཐམས་ཅད་གྱིས། །དྲན་རིག་ཝལ་ཝལ་འཆར་བ་འདི། །མིག་ལ་བཏག་ཀྱང་ངོ་བོ་གཅིག །སེམས་ཡིད་རྟོགས་པ་ཤེས་རབ་དང་། །བློ་ལོག་དུ་མར་ཀུན་བརྟག་ཀྱང་། །སེམས་ཞེས་བྱ་བ་གཅིག་པུར་འདུས། །སེམས་ཞེས་བྱ་བའི་དཔེ་ལ་ནི། །སྒྱུ་མ་མཁན་གྱི་གྲོང་ཁྱེར་འདྲ། །རྟག་ཅིང་བརྟན་བྱ་གང་ཡང་མེད། །དཔེར་ན་དྲི་ཟའི་གྲོང་ཁྱེར་འདྲ། །ད་ལྟའི་སྣང་སེམས་ཕྲ་རག་འདི། །རྐྱེན་གྱིས་འཕྲལ་ལ་བསྒྱུར་བ་སྟེ། །ཆུ་སྣ་ཁྲིད་དམ་རྟ་སྲབ་འདྲ། །བག་ཆགས་ངན་པ་རྫ་དྲེག་འདྲ། །འདོད་པ་སྣ་ཚོགས་གར་སྤྱིན་འདྲ། །མ་རིག་རྒྱུས་མེད་མུན་འགྲོས་འདྲ། །མི་རྟག་རི་གཟར་རྦབ་དང་འདྲ། །དྲན་པ་རླུང་བུར་འཚུབ་མ་འདྲ། །རྟོག་པ་བར་སྣང་གློག་དང་འདྲ། །ཉོན་མོངས་ཆར་སྤྲིན་འཐིབ་པ་འདྲ། །ཕྲ་རག་རྟོག་པའི་རྫུན་མ་འདྲ། །ཟས་ནོར་སྦྲང་མའི་རྩི་ཟིལ་འདྲ། །འཇིག་རྟེན་འདི་དག་རྨི་ལམ་འདྲ། །བདེན་བདེན་འདྲ་ཡང་སྙིང་པོ་མེད། །དྲན་རྟོག་གློ་བུར་གང་ཤར་ཡང་། །རིག་རྩལ་ཡིན་པས་དགག་མི་དགོས། །རྟོག་པ་ཤར་རྐྱེན་མི་རྟོག་རྒྱས། །སྡུག་བསྔལ་ཤར་རྐྱེན་བདེ་བ་རྒྱས། །ཉོན་མོངས་ཆེ་ཞིང་ཡེ་ཤེས་རག །ཤིང་དཔུང་ཆེ་ཞིང་མེ་ཆེན་འབར། །གཟུང་འཛིན་ཆེ་ཞིང་གྲོལ་ཆ་ཆེ། །འཁྱགས་གངས་ཆེ་ཞིང་ཆུ་ཆེན་སྐྱེ། །སྤྲིན་ཚོགས་འཐུག་གྱིན་ཆར་ཆེན་འབབ། །སྦྲུལ་མདུད་གློ་བུར་ལྷོད་ལ་ཞོག །མི་རོ་བཞིན་དུ་བསྐྱུར་ལ་ཞོག །དྲི་ངན་བཞིན་དུ་བོར་ལ་ཞོག །བགག་ན་སླར་ཡང་འཕྲོ་བའི་རྒྱུ། །འདས་ན་སླར་ཡང་བཟློག་པའི་རྒྱུ། །གདམས་ན་སླར་ཡང་འཕར་བའི་རྒྱུ། །བཏུལ་ན་སླར་ཡང་གྱོང་བའི་རྒྱུ། །བསྲེགས་ན་སླར་ཡང་འཁྱགས་པའི་རྒྱུ། །དགག་བསྒྲུབ་ཕྲལ་ལ་ཕྱམ་མེ་ཞོག །བསྒྲུབ་ན་སངས་རྒྱས་འགྲུབ་ཀྱང་ངལ། །ཆགས་ན་ཡི་དམ་ལྷས་ཀྱང་འཆིངས། །ལྟོས་ན་བླ་མ་ཡིན་ཀྱང་བསླུ། །བཙལ་ན་ཡེ་ཤེས་ཡིན་ལ་བྲོས། །ཞེན་ན་དངོས་གྲུབ་ཡིན་ཡང་བདུད། །བྱར་མེད་སྙམ་མེད་ངང་དུ་བཞག །བཞག་ཅེས་པ་ཡང་བླ་དྭགས་ཙམ། །དྲན་འཛིན་མཁན་པོ་ངོ་བོ་སྟོང་། །དྲན་འཛིན་སེམས་ལ་རགས་པ་མེད། །སེམས་ཀྱི་དྲན་པ་ཚོར་བ་མེད། །སེམས་ཀྱི་ཡེ་ཤེས་ཕུག་དེད་དང་། ཡེ་ཤེས་ངང་དངས་རིག་པའི་ཀློང་། །རིག་པ་ཡེ་གྲོལ་ཀུན་བཟང་ངང་། །བྷ་ག་ཡངས་པའི་ཀློང་དུ་གྲོལ། །རྣམ་རྟོག་མ་བསྒག་ཡན་དུ་ཆུག །དྲན་པ་སྣ་ཚོགས་འཕྲོ་རུ་ཆུག །དཔེར་ན་གཟིངས་གྱི་བྱ་རོག་བཞིན། །ཁོ་རང་ངོ་བོ་ཐང་ཆད་དེ། །སྒྱིད་ལུག་སྟོང་གསལ་ཐིག་ལེར་ཆུབ། །བྷ་གའི་ནང་ན་ཐར་བ་མེད། །སངས་རྒྱས་སེམས་ཅན་འཁོར་མྱང་འདས། །ཐམས་ཅད་ངའི་བྷ་གར་ཚུད། །ཀུན་བཟང་བྷ་ག་ཡངས་པ་ཟེར། །དུས་གསུམ་སངས་རྒྱས་ཐམས་ཅད་ཀུན། །བྷ་གའི་ནང་དུ་དགོངས་པ་སྐྱོང་། །ཁམས་གསུམ་སེམས་ཅན་ཐམས་ཅད་ཀྱང་། །བྷ་གའི་ནང་ན་སྙིང་གིས་ཁོལ། །དགྲ་བཅོམ་འཕགས་པ་ཐམས་ཅད་ཀྱང་། །བྷ་གའི་ནང་ནས་ས་ལམ་སྤྱོད། །བྷ་གའི་ནང་ན་མ་འདུས་མེད། །བྷ་གར་ཐོང་དང་རང་ངོ་འཕྲོད། །སེམས་རིག་དབྱེར་མེད་བདེ་བ་ཆེ། །སེམས་འཁོར་བར་འདུག་གོ་སྙམ་པའི། །དགོས་པ་ཐམས་ཅད་རང་སར་བཤིག །དབྱེར་མེད་བདེ་ཆེན་སྐུ་གསུམ་ངང་། །ཀུན་ཏུ་བཟང་མོ་དེར་ཞལ་མཇལ། །རྣམ་རྟོག་རང་གི་བླ་མར་རྟོག །བླ་མ་རང་རིག་དབྱེར་མེད་འཕྲོད། །རྣམ་རྟོག་ཉིད་ཀྱིས་སློབ་མར་བརྟག །སྣང་སྲིད་ཐམས་ཅད་རིག་པར་གྲོལ། །རྣམ་རྟོག་ཉིད་ཀྱང་དབང་བསྐུར་ཞུས། །རིག་པ་རང་དབང་རང་ཚུགས་ཐུབ། །རྣམ་རྟོག་ཉིད་ཀྱིས་དམ་ཚིག་བསྲུངས། བསྲུངས་མཚམས་བྲལ་བར་རང་ཐག་ཆོད། །རྣམ་རྟོག་ཉིད་ཀྱིས་ཡུལ་ལ་བརྟག །ཡུལ་སྣང་སྒྲོན་བཞི་སེམས་ལ་ཤར། །རྣམ་རྟོག་ཉིད་ཀྱིས་ལུས་ལ་བརྟག །དེ་བཞིན་གཤེགས་སྐུ་རང་ངོ་འཕྲོད། །རྣམ་རྟོག་ཉིད་ཀྱིས་ངང་ལ་བརྟག །གྲགས་སྟོང་གསུམ་དང་རང་ངོ་འཕྲོད། །རྣམ་རྟོག་ཉིད་ཀྱིས་ཡེ་ཤེས་བརྟག །རིག་སྟོང་རྗེན་པར་རང་ངོ་འཕྲོད། །ཡངས་པ་གསལ་བ་ཁྱབ་བརྡལ་ལོ། །ཡེ་གྲོལ་བྱར་མེད་སོ་མའོ། །ཤུགས་གྲོལ་ངང་དངས་སོ་མའོ། །འབད་མེད་ཅོག་བཞག་བྱར་མེད་དོ། །བསྒྲུབ་མེད་རེ་དོགས་མཐའ་བཤིག་པ། །ཀུན་བཟང་བྷ་གར་ཁྲེགས་ཀྱིས་ཆོད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། སེམས་རིག་བསྲེས་ནས་ཡིན་ལུགས་ཁྲེགས་བཅད་པའི་ལེའུ་སྟེ་གོ་དྲུག་པའོ། །྅྅྅ སྟོན་པས་འཁོར་ལ་བཀའ་སྩལ་པ། ཉོན་ཅིག་རིག་པའི་སྣང་འཁོར་རྣམས། །རིག་པ་རིག་པ་ཞེས་པ་ནི། །རིག་ཅིང་གསལ་བས་རིག་པ་ཡིན། །དེ་ཡང་རྣམ་པ་ལྔ་ཡིན་ཏེ། །གཞི་གནས་རིག་པ་ཀ་དག་ཡིན། །ལམ་སྣང་རིག་པ་དྲན་གསལ་ཡིན། །འབྲས་བུའི་རིག་པ་རང་གྲོལ་ཡིན། །ཉམས་སྣང་རིག་པ་ལུ་གུ་རྒྱུད། །སྣང་ཤེས་རིག་པ་དབྱེར་མེད་ལ། །ཡེ་ཤེས་ལྔ་ཞེས་བྱ་བར་བརྟག །ཐ་མར་གཉིས་ཆོས་ཟད་དུས་སུ། །གདོད་མའི་རིག་པ་ཀུན་འདུས་སོ། །དེ་ཡང་ཉམས་ལེན་དག་དང་སྦྱར། །ལྐུག་པ་རྨི་ལམ་རྨིས་པ་བཞིན། །སྨྲ་རུ་མེད་པར་ས་ལེ་བ། །གཞོན་ནུས་བདེ་བ་མྱོང་བ་ལྟར། །དགའ་ལ་བརྗོད་དུ་མེད་པ་དང་། །བུ་ཆུང་ལྷ་ཁང་མཐོང་བ་བཞིན། །སྣང་ལ་འདི་གཏད་མེད་པ་དང་། །སྒེགས་མོས་མེ་ལོང་མཐོང་བ་བཞིན། །གསལ་ལ་བཟུང་བ་མེད་པ་དང་། །མ་མཐོང་གླིང་བཞི་མཐོང་བ་བཞིན། །མིང་དོན་མེད་པར་ས་ལེ་པ། །རྒྱ་མཚོར་གཟའ་སྐར་ཤར་བ་འདྲ། །ངོས་བཟུང་མེད་པར་ལམ་མེ་བ། །རྒྱ་བོད་སྐད་གསར་འདྲེས་པ་བཞིན། །ཅི་ཟེར་ཁྱབ་བརྡལ་ཧད་དེ་བ། །རོང་བས་བྱང་ཐང་མཐོང་བ་བཞིན། །ཕྱོགས་ཆ་བྲལ་བར་ཕྱམ་མེ་བ། །རྒྱལ་བུ་འབངས་སུ་འཁྱམས་པ་བཞིན། །རིག་པ་རྗེན་པར་ཁྲོང་ངེ་བ། །གྱད་ཀྱི་ནོར་བུ་མཐོང་བ་བཞིན། །རེ་དོགས་བྲལ་བར་ཧྲིག་གེ་བ། །དབུལ་མོས་གསེར་ཁུང་བརྡོལ་བ་ལྟར། །བློ་བདེ་ཁོང་ནས་འབོལ་ལེ་བ། །ཨ་ཡུས་ཐག་ཁྲ་མཐོང་བ་བཞིན། །ཐེ་ཚོམ་མེད་པར་དངས་སང་ངེ་། །སྦྲུལ་འཛིན་ཐག་པར་ངོ་ཤར་ལྟར། །སོམ་ཉི་མེད་པར་རྗེན་ཅེ་རེ། །མཁས་པ་བ་གླང་སྐྱོང་བ་ལྟར། །ཁོང་ལྷོད་རིག་གསལ་བཀྲ་ལམ་མེ། །རྣམ་རྟོག་སྔ་མ་རང་སར་གྲོལ། །ཕྱི་མའི་དེར་འཛིན་མ་ཤར་བར། །བར་དེར་གཉེན་པོའི་བཅོས་སླད་བྲལ། །དྲི་བྲལ་སངས་དངས་ཕྱེད་པ་འདི། །རིག་པ་ཡིན་པར་ངེས་ཟུངས་ཤིག །ངོ་བོ་སྟོང་ལ་རང་བཞིན་གསལ། །ཐུགས་རྗེ་ཀུན་ལ་སྣང་ནུས་པ། །དེ་ནི་རིག་པའི་གནས་ལུགས་ཡིན། །ཆོས་སྐུའི་རིག་པ་ཀ་དག་ཡིན། །ལོངས་སྐུའི་རིག་པ་གསལ་བ་ཡིན། །སྤྲུལ་སྐུའི་རིག་པ་ཀུན་ཁྱབ་ཡིན། །ལྟ་བའི་རིག་པ་མཐའ་བྲལ་ཡིན། །བྷཻཾ་བའི་རིག་པ་རང་གྲོལ་ཡིན། །སྤྱོད་པའི་རིག་པ་ཤུགས་འབྱུང་ཡིན། །འབྲས་བུའི་རིག་པ་སྐུ་གསུམ་ཡིན། །མ་རིག་པ་ནི་རིག་པ་ཡིན། །དཔེར་ན་གཉིད་དངས་བརྒྱལ་སངས་མཚུངས། །རིག་པ་དོན་ལ་ཤར་ནུབ་མེད། །རིག་པ་གཅེར་བུར་སྒྲིབ་གཡོག་བྲལ། །རིག་པའི་སྐུ་ལ་མདུན་རྒྱབ་མེད། །རིག་པའི་གནས་ལ་ཕྱི་ནང་མེད། །རིག་པ་རྟག་ཆད་གཉིས་མཐའ་ཟད། །རིག་པ་ཡེ་ཤེས་འོད་དུ་བརྡལ། །རིག་པ་དབྱིངས་དང་འདུ་འབྲལ་མེད། །སྣང་བ་ཐམས་ཅད་རིག་པ་ཡིན། །རིག་པའི་རང་བཞིན་ཡི་གེ་ཨ། །རིག་པའི་དཀྱིལ་འཁོར་བརྡལ་བ་ཆེ། །རིག་པ་ཆོས་དབྱིངས་ཁ་དོག་མཐིང་། །རིག་པ་དྲི་མེད་མེ་ལོང་དཀར། །རིག་པ་མཉམ་ཉིད་ཁ་དོག་སེར། །རིག་པ་སོར་རྟོག་ཁ་དོག་དམར། །རིག་པ་བྱ་གྲུབ་ཁ་དོག་ལྗང་། །རིག་པ་གཞོན་ནུ་བུམ་པའི་སྐུ། །རིག་པ་འགྱུར་མེད་རྡོ་རྗེའི་སྐུ། །རིག་པ་རིན་ཆེན་འདོད་དགུ་འབྱུང་། །རིག་པ་དྲི་མེད་མདངས་དང་ལྡན། །རིག་པ་ཡེ་ཤེས་སྐུ་ལྔ་རྫོགས། །རིག་པ་ཐབས་ཤེས་རོལ་པའི་ཚེ། །རིག་པ་རང་བྱུང་རང་ལ་གནས། །རིག་པ་ཡུམ་ཆེན་བྷ་གའི་ངང་། །ཐམས་ཅད་དེའི་ནང་དུ་སྡུད། །དེ་ཕྱིར་རིག་པའི་གནས་ལུགས་རྟོགས། །དེ་ཕྱིར་རིག་པའི་ངང་དུ་ཞོག །དེ་ཕྱིར་རིག་རྩལ་རྫོགས་པར་མཛོད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རིག་པ་སྤྲོས་བྲལ་ཁྲེགས་ཆོད་དུ་ངོ་སྤྲད་པའི་ལེའུ་སྟེ་གོ་བདུན་པའོ། །྅྅྅ ཡང་ཅིག་སྟོན་པས་བཀའ་སྩལ་པ། ཉོན་ཅིག་རིག་གདངས་རྩལ་འཁོར་རྣམས། །དེ་ལྟ་བུའི་ངོ་འཕྲོད་ན། །ཚོགས་དྲུག་སྟེང་དུ་རྩལ་ཡང་སྦྱངས། །གཟུགས་ཀྱི་སྟོང་པ་རིག་རྩལ་སྤྲོ། །གསལ་སྟོང་ཆེན་པོ་ཉམས་སུ་བླངས། །སྒྲའི་སྟེང་དུ་རིག་རྩལ་སྤྲོ། །གྲགས་སྟོང་ཆེན་པོ་ཉམས་སུ་བླངས། །དྲིའི་སྟེང་དུ་རིག་རྩལ་སྤེལ། །ཚོར་སྟོང་ཆེན་པོ་ཉམས་སུ་བླངས། །རོའི་སྟེང་དུ་རིག་རྩལ་སྤེལ། །རེག་སྟོང་ཆེན་པོ་ཉམས་སུ་བླངས། །ཡིད་རྟོག་སྟེང་དུ་རིག་རྩལ་སྤེལ། །དྲན་སྟོང་ཆེན་པོ་ཉམས་སུ་བླངས། །རེས་ནི་མང་ཚོགས་གསེབ་དུ་བསྡད། །སྣ་ཚོགས་ཆོ་འཕྲུལ་ཉམས་སུ་བླངས། །རེས་ནི་གཅིག་པུར་བྱར་མེད་བཞག །གཅིག་པུའི་སྟེང་དུ་ཨེ་གནས་ལྟ། །རེས་ནི་ལྷ་བྷཻཾ་སྔགས་བཟླས་ལ། །བསྐྱེད་རྫོགས་གཉིས་པོ་ཨི་འཕྲུག་ལྟ། །རེས་ནི་རེ་བ་དཔག་མེད་བསམ། །དེ་ལ་བགོ་འདུན་ཨི་འདུག་ལྟ། །རེས་ནི་སྡུག་བསྔལ་འཁོར་ལོ་བསྐོར། །དེ་ཡིས་བྷཻཾ་ལ་ཨེ་སྡོད་ལྟ། །རེས་ངུ་རེས་དགོད་སྣ་ཚོགས་བྱ། །དོན་ལ་ལྟ་ཞིང་མ་ཡེངས་ཀྱང་། །སྤང་དང་བླང་བའི་ཁྲིས་མ་ཞུགས། །རེ་དང་དོགས་པའི་ཁང་བུ་ཞིག །ཡ་ང་བག་ཚ་ཐམས་ཅད་བྲལ། །རང་གྲོལ་བག་ཡངས་གང་བདེར་སྐྱོངས། །སྲོད་ལ་དབང་པོ་གནས་སུ་སྡུད། །ནམ་གུང་ཤེས་བྱའི་བུམ་པར་ཚུད། །ཐོ་རངས་རིག་པ་རང་གསལ་གདབ། །ཉིན་མོ་སྣང་བ་རྒྱ་ཡིས་གདབ། །བྷཻཾ་རྒྱུ་དངོས་པོ་མེད་མོད་ཀྱང་། །མ་ཡེངས་བྱ་ར་སྐད་ཅིག་གིས། །སེམས་རྟོག་རླུང་དབང་མ་བཏང་ཅིག །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ངོ་སྤྲོད་པའི་དོན་ཉམས་སུ་བླང་ཞིང་རྩལ་སྦྱངས་པའི་ལེའུ་སྟེ་གོ་བརྒྱད་པའོ། །྅྅྅ སྟོན་པས་བཀའ་སྩལ་པ། དེ་ནས་སྣོད་ལྡན་སློབ་མ་ཉིད། །ཐིག་ལེར་རང་དབང་ཐོབ་པ་དང་། །རྡོ་རྗེ་ལས་སུ་རུང་བའི་ཕྱིར། །གསུམ་པའི་དབང་མཆོག་བསྐུར་བར་བྱ། །དབང་རྟེན་མཚན་ཉིད་ལྡན་པ་བཙལ། །དེ་ལ་དབང་བསྐུར་གནང་བ་བྱིན། །དེ་ཡང་རྣམ་དབྱེ་འདི་ལྟ་སྟེ། །དེ་ལ་རབ་འབྲིང་ཐ་མ་གསུམ། །ལམ་བོག་ཐོན་པའི་རིགས་བཞི་ནི། །ལོ་ཀའི་ཁམས་ན་རྙེད་པ་དཀའ། །གཞན་དབང་སོང་དང་རིས་ཅན་སོགས། །ཡོན་ཏན་ཀུན་ཚང་སྐྱོན་མ་གོས། །རྡོར་བཞི་མ་དང་རིན་རྒྱས་མ། །བད་འདབ་མ་དང་དཀར་སྤྱོད་མ། །འདི་བཞི་ཡེ་ཤེས་མཁའ་འགྲོ་ཡིན། །བརྟེན་ན་ཚེའི་དངོས་གྲུབ་ཐོབ། །རིན་བཞི་མ་དང་རིན་རྒྱས་མ། །རིན་པད་མ་དང་རིན་སྤྱོད་མ། །འདི་བཞི་ཡེ་ཤེས་མཁའ་འགྲོ་ཡིན། །བརྟེན་ན་མཆོག་ཐུན་བསམ་པ་འགྲུབ། །པད་བཞི་མ་དང་པད་རྒྱས་མ། །པད་དབང་མ་དང་པད་སྤྱོད་མ། །འདི་བཞི་ཡེ་ཤེས་མཁའ་འགྲོ་ཡིན། །བརྟེན་ན་འཛམ་གླིང་དབང་དུ་འདུ། །དཀར་བཞི་མ་དང་དཀར་རྒྱས་མ། །དཀར་དབང་མ་དང་དཀར་སྤྱོད་མ། །འདི་བཞི་ཡེ་ཤེས་མཁའ་འགྲོ་ཡིན། །བརྟེན་ན་སྙན་གྲགས་མཐུ་ལ་དབང་། །མཚན་ལྡན་བཅུ་དྲུག་དེ་དག་གིས། །རབ་ཡིན་རེག་བས་དངོས་གྲུབ་ཐོབ། །བསྐལ་བ་ཁྲི་རུ་ཁྲིམས་བསྲུང་བས། །མཚན་ལྡན་གཅིག་ལ་རེག་བས་ཆོག །ཚེ་གཅིག་སངས་རྒྱས་གདོན་མི་ཟ། །འབྲིང་ནི་བོག་འདོན་བཞི་ཡིན་ཏེ། །ལོ་ཀའི་ཁམས་ན་རེ་རེ་སྲིད། །ལྕུག་ཕྲན་མ་དང་རི་དྭགས་མ། །དུག་མགྲིན་མ་དང་པདྨ་དང་། །བྱ་རོག་ལ་སོགས་ལྔ་བརྒྱད་འདུའ། །འདི་བརྟེན་རྟོགས་པ་མྱུར་དུ་འཆར། །བརྟེན་དུ་མི་རུང་བུད་མེད་ནི། འཇིག་རྟེན་ཁམས་ནི་ཐམས་ཅད་གང་། །ཟ་ཤིང་མ་དང་མེ་དབལ་མ། །མེ་རེག་མ་དང་དམར་ཞལ་མ། །ལྕག་མཚོན་མ་དང་ཞོང་ཅག་མ། །སྤྱན་རིངས་མ་དང་ཁམས་ཟན་མ། །རླུང་གཡབ་མ་དང་ཤོ་རེ་མ། །གྱེན་ཐུར་མ་དང་སོག་སྐྱོང་མ། །སེང་གདོང་མ་དང་སྟག་རིག་མ། །རིས་རྐྱང་མ་དང་ཆུ་རིས་མ། །རུས་མུར་མ་དང་རྐང་འཇིབ་སོགས། །རེག་པས་ཚེ་ཐུང་བར་གཅོད་འབྱུང་། །རྣལ་འབྱོར་བསྐལ་བར་བྷཻཾ་བསྒྲུབ་ཀྱང་། །སྐད་ཅིག་དུས་ཕྱིས་བཞིན་དུ་འགྱུར། །དམྱལ་བར་ཁྲིད་པའི་ལམ་མཁན་བྱེད། །ཚེ་འདིར་མི་ཤིས་སྣ་ཚོགས་འབྱུང་། །དེ་ཕྱིར་སྤང་བླང་ཤེས་པར་བྱ། །བརྟགས་དགུག་བསྒྱུར་དང་སྨིན་བྱས་ན། །དབེན་པའི་གནས་སུ་ཁྲིད་བྱ་ལ། །ཡབ་ཡུམ་ལྷའི་སྐུ་བསྐྱེད་ནས། །ཐིག་ལེ་རང་ཚན་ཤེས་པ་དེས། །རང་གིས་ཐིག་ལེ་སྦྱང་བ་དང་། །ཕྱག་རྒྱའི་ཐིག་ལེ་དྲང་བར་བྱ། །ཡབ་ཡུམ་ལྷ་སྐུ་བསྐྱེད་པ་ལ། །ཁྱད་པར་མཁའ་གསང་བྱིན་གྱིས་བརླབ། །ཐིག་ལེའི་གྲངས་ཚན་བཅུ་དྲུག་ཕྱེད། །རང་གི་ཐིག་ལེར་རྩལ་སྦྱངས་ལ། །ཡབ་ཡུམ་ལྷ་སྐུ་བསྐྱེད་ལ་མཁས། །མེ་ལོང་གཟུགས་བརྙན་འདྲ་དང་གཅིག །རང་གི་ཐིག་ལེ་དབབ་དང་མཁས། །ལུག་མཁན་ཞུས་འཇུ་ལྟ་བུ་གཉིས། །ཐིག་ལེ་མཁའ་ནས་འདྲེན་པ་མཁས། །ཁྲོན་ཆུ་སྤྱང་འདྲེན་འདྲ་དང་གསུམ། །ཐིག་ལེ་ནོར་བུར་འཛིན་པ་མཁས། །ཆང་རྫའི་ཐེམ་བུ་བསྒག་འདྲ་བཞིན། ལུས་ཀུན་ཁྱབ་པར་འདྲིམ་ལ་མཁས། །སྦྱིན་ཤུགས་ཡོ་ལ་འགྱེད་པ་བཞིན། །འདིའི་རྩལ་སྦྱངས་གནད་དུ་ཟབ། །ཕྱག་རྒྱའི་ཐིག་ལེ་དྲངས་པ་ལ། །དང་པོ་ཕྱག་རྒྱའི་རྩ་བཙལ་མཁས། །སྨན་པའི་རྩ་བཤད་འདྲ་དང་གཅིག །ཕྱག་རྒྱའི་ཐིག་ལེ་འབབ་ལ་མཁས། །བུང་བའི་རྩི་ཐོག་བསྙབ་འདྲ་གཉིས། །ཕྱག་རྒྱའི་ཐིག་ལེ་དྲངས་པར་མཁས། །སྦྲང་མར་སྨྱུག་སྤུབ་བཅུག་འདྲ་གསུམ། །བདེ་བའི་རང་བཞིན་གྲོལ་ལ་མཁས། །མཁའ་ལ་སེར་བུ་དངས་འདྲ་བཞི། །ཐབས་སུ་ལེན་ཅིང་གནད་ཤེས་བྱ། །རྗེས་ནི་བདེ་བའི་འཆར་ཚུལ་དང་། །ཡོན་ཏན་ཐོབ་ཚུལ་བསྟན་པ་དང་། །གེགས་འབྱུང་སེལ་ལ་མཁས་པ་དང་། །འབྲས་བུ་མཐར་ཕྱིན་བཞིར་ཤེས་བྱ། །རིགས་རྒྱུད་སྤྲུལ་སྐུར་འགྱེད་པ་དང་། །སློབ་མ་མཚན་ལྡན་སྨིན་པ་དང་། ཡབ་ཡུམ་སྲོག་གི་གེགས་བྱུང་ན། །ཐིག་ལེ་སྟོང་པར་སྣང་བ་ལ། །ཏིལ་འབྲུ་ཙམ་ལས་ཉམས་དབང་མེད། །མི་ཉམས་སྟེང་དུ་སྤེལ་བ་ཡིན། །ཐབས་དང་རྫས་ལ་སྣག་ཅིང་སྦྱངས། །ཕྱི་ནང་གསང་བ་ལ་སོགས་པའི། །དར་རྒུད་འཕོ་འགྱུར་འབྱུང་བའི་ལས། །བླ་མའི་ཞལ་ལས་ཤེས་པར་བྱ། །ཡང་གསང་ཉམས་སུ་ལེན་པ་ལ། །རྩ་ཞིག་རྩ་ཞ་རྩ་རྒུད་གསུམ། །བདེ་བ་མེད་པས་སྤང་བར་བྱ། །ཕྱི་ནང་གསང་བའི་རྟགས་ཚངས་ཞིང་། །དྲི་ཞིམ་ཡིད་འོང་སྐད་སྙན་མཛེས། །བདེ་བའི་མདངས་ལྡན་ཆོས་ལ་མོས། །གསང་ཐུབ་ཤེས་རབ་ཆེ་བ་བསྒྲུབ། །དབབ་སྙིལ་བཟློག་འདྲིམ་ཡོན་ཏན་ལེན། །ཕོ་ཉ་ཐག་རིང་ཇག་པ་འདྲ། །དེ་ཕྱིར་ཐིག་ལེ་ཚོད་ཟིན་གཅེས། །ཁྱད་པར་ལྔ་དང་ལྡན་པའི། །བྱང་ཆུབ་སེམས་ཀྱི་ཀུན་བསླང་ནས། །གཞན་དོན་ལྷུར་དུ་ལེན་འདོད་པས། །སྤྲུལ་སྐུ་བཞག་ལ་ངེས་པ་མེད། །ཡོན་ཏན་ཡར་ལྡན་སྣང་བའོ། །མཁའ་འགྲོ་རྣམས་ཀྱིས་སྲོག་བཅུད་འདི། །བསྐལ་བཟང་རེ་ལས་མ་གནང་ངོ་། །དེ་ཕྱིར་སྐལ་མེད་ལ་གསང་ཞིང་། །བསགས་པ་ཅན་ལ་བསྔགས་པའོ། །ཨཻ་མ་ངོ་མཚར་རྨད་ཀྱི་ཆོས། །འབྲས་བུ་ལམ་དུ་བྱས་པ་འདི། །ཐེག་དམན་རྣམས་ཀྱི་རླུང་ཕྱོགས་སུ། །ཟུར་ཙམ་འཕྲིགས་པར་མ་བྱེད་ཅིག །རང་ཉམས་བླངས་པས་ཤེལ་ལྟར་དུ། །ཚེ་གཅིག་རྡོ་རྗེའི་སྐུ་ཐོབ་བོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཤེས་རབ་ཡེ་ཤེས་བསྐུར་ཞིང་ཆགས་ཅན་ལམ་འབྲས་བུ་དང་བཅས་བ་བདེ་བ་ཉམས་སུ་བླངས་བའི་ལེའུ་སྟེ་གོ་དགུ་པའོ། །྅྅྅ དེ་ནས་འཁོར་ཐམས་ཅད་ཀུན་ཏུ་བཟང་མོའི་མཆོད་སྤྲིན་ནམ་མཁའ་བཀང་བས་མཆོད་ནས་མགྲིན་གཅིག་ཏུ་ཞུས་པ། ཨེ་མ་ཧོ། སྟོན་པ་ཡུམ་ཆེན་མོ། ཉམས་ལེན་སངས་རྒྱས་སུས་བསྟན་ཀྱང་། མངོན་སུམ་ཟག་པ་མེད་པའི་ཡེ་ཤེས་རྒྱུད་ལ་འཆར་ཐབས་བསྟན་དུ་གསོལ། ཨེ་མ་ངོ་མཚར་བསྐལ་བ་མཐོའ ། ཞེས་ཞུས་པས། སྟོན་པས་མཛུམ་པའི་མདངས་ཕྱུངས་ནས། གསལ་དག་སྙན་པའི་དབྱངས་ཀྱིས་འདི་སྐད་ཅེས་བཀའ་སྩལ་ནས། ཀྱེ་ཧོ། རང་རིག་མདངས་འཁོར་མཁའ་འགྲོ་རྣམས། །གུས་པས་ཉོན་ལ་ཡིད་ལ་བཟུང་། །སྐལ་བཟང་ཚོགས་གཉིས་བསགས་པའི་བུས། །མཐོང་སངས་རྒྱ་བའི་གདམས་པ་མཆོག །དངོས་གཞི་ཟག་མེད་ཡེ་ཤེས་ཏེ། །རྒྱུད་ལ་བསྟན་པར་འདོད་པ་ན། །ཚོགས་འཁོར་བརྒྱ་རྩས་མཁའ་འགྲོ་བསྐང་། །རིན་ཆེན་མཎྜལ་བདག་ལུས་རྣམས། །བླ་མ་དག་ལ་གུས་པས་འབུལ། །རི་མཐོ་དབེན་པར་བརྩོན་པར་སོང་། །ཐོག་མར་ལུས་ངག་ཡིད་གསུམ་མོ། །བྱ་བ་དགུ་ཕྲུགས་ཉིད་དུ་བཏང་། །ལུས་ཕྱིའི་བྱ་བ་འཇིག་རྟེན་གྱིས། །རྣམ་པར་གཡེངས་བ་ཐམས་ཅད་བཏང་། །ལུས་ཀྱི་ནང་གི་བྱ་བ་ནི། །ལུས་གནད་བྱ་བ་ཕྱག་འཚལ་དང་། །བསྐོར་བ་ལ་སོགས་ཐམས་ཅད་སྤངས། །ལུས་ཀྱི་གསང་བའི་བྱ་བ་ནི། །ལུས་གནད་འཁྲུལ་འཁོར་ཙམ་ཡང་སྤངས། །ངག་ཕྱིའི་བྱ་བའི་འཇིག་རྟེན་གཏམ། །ཐམས་ཅད་རྦད་ཀྱི་བཅད་ལ་བཏང་། །ངག་ནང་བྱ་བའི་ཆོས་གཏམ་དང་། །ཉན་བཤད་ཁ་འདོན་ཐམས་ཅད་སྤང་། །ངག་གསང་བྱ་བ་སྔགས་བཟླས་དང་། །རླུང་འཛིན་བྱེད་པ་ཐམས་ཅད་སྤངས། །སེམས་ཕྱིའི་བྱ་བ་འཇིག་རྟེན་གྱིས། །ཐ་མལ་བསམ་བློ་ཐམས་ཅད་སྤངས། །སེམས་ནང་བྱ་བ་བཟང་རྟོག་གིས། །ལྷའི་བསྐྱེད་བྷཻཾ་ཙམ་ཡང་སྤངས། །སེམས་ཀྱི་གསང་བའི་བྱ་བ་ནི། །རྣམ་རྟོག་དྲན་འཛིན་ཙམ་ཡང་སྤངས། །དེ་ལྟར་དགུ་པོ་བཏང་བ་ཡིས། །རིག་པ་ཡེ་ཤེས་རྗེན་ལ་བུད། །རང་བབ་ངང་དུ་སིང་དང་ཕྱེད། །དཔེར་ན་ནོར་བུ་ཆུ་དངས་འདྲ། །དེ་ནི་ཐོག་མར་གལ་ཆེ་བས། །བརྟན་པ་མ་ཐོབ་བར་དུ་སྦྱངས། །དཔེར་ན་མེ་ལོང་དངས་པ་འདྲ། །བྱད་གཟུགས་གང་ཡང་གསལ་བ་ལྟར། །ཁྲེགས་ཆོད་དོན་དེ་མི་གསལ་ན། །ཐོད་རྒལ་ཤར་ཡང་གཟུང་འཛིན་ཅན། །མྱོང་མེད་ཁ་ལྟ་ཕུག་པོ་ལ། །བསྟན་གོལ་གསེར་ཕྱེ་ཆུ་ཕོར་མཚུངས། །དེ་ཕྱིར་འདི་ལ་ལེགས་པར་སྦྱངས། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཐོད་རྒལ་བླ་མེད་ཟག་པ་མེད་པའི་ཡེ་ཤེས་མངོན་སུམ་དུ་ལུས་ངག་ཡིད་གསུམ་གྱི་བྱ་བ་དགུ་ཕྲུགས་སུ་བཏང་བའི་ལེའུ་སྟེ་བརྒྱའ་ཐམ་པའོ། །྅྅྅ དེའི་ཚེ་རིག་པ་རང་གསལ་ལམ་ཀུན་ཏུ་བཟང་མོ་ལ། ཐུགས་ཀའི་རྡོ་རྗེ་སེམས་དཔའ་གཉིས་སུ་མེད་པར་རོལ་ནས། བདེ་བ་ཆེན་པོ་གཉིས་སུ་མེད་པའི་གླུ་འདི་གསུངས་སོ། །ཀྱེ་ཧོ། ངོ་མཚར་རྡོ་རྗེའི་གླུ་འདི། །གསང་སྔགས་འདི་དོན་སྟོན་པ་ལ། །སྣོད་ཀྱི་གདམས་པ་རབ་ཏུ་གཅེས། །སྣོད་ལྡན་ཡོན་ཏན་དགུ་ཚངས་ན། །གསང་སྔགས་སྙིང་པོའི་སྣོད་དུ་རུང་། །འགྲོ་བ་འདྲེན་པའི་གྲུ་ཆེན་ཡིན། །ཉམས་སུ་ལེན་པའི་གནས་གལ་ཆེ། །གསང་སྔགས་གནད་ཀྱིས་ཁྱད་པར་འབྱུང་། །ཡོན་ཏན་ལྡན་པའི་གནས་རྙེད་ནས། །བསམ་གཏན་འཕེལ་ཞིང་བརྟན་པ་ཐོབ། །གནས་ངན་དག་དང་འཕྲད་པ་ན། །མཚན་ལྡན་སློབ་བུ་རྐྱེན་དབང་འགྱུར། །ཁྱད་པར་དུས་ཀྱང་གཙོ་ཆེ་སྟེ། །ངོ་སྤྲད་དུས་ཀྱི་ཁྱད་པར་ཕྱིར། །མཁས་པས་དུས་གནད་བརྩལ་བར་བྱ། །དབྱར་མ་སྟོན་དང་རྒུན་ཆུང་དཔྱིད། །ཟེར་གཉིས་དུས་སུ་མཆོག་ཏུ་བཟུང་། །ངོ་འཕྲོད་མགྱོགས་ཤིང་ཉམས་སྣང་འཕེལ། །དུས་གནད་མི་ཤེས་བླུན་པོ་ལ། །དུས་ཀྱི་ཁྱད་པར་མ་ཤེས་པས། །ངོ་བོ་འགག་ཅིང་ཉམས་འཕེལ་བྲལ། །འབྲས་བུ་ཚེ་གཅིག་གསང་སྔགས་གནད། །ཁྱད་པར་འཕགས་པའི་གྲོགས་ལས་བྱུང་། །གྲོགས་མཆོག་ཆོས་ལྡན་བྱང་ཆུབ་ཐོབ། །བདེ་བའི་གྲོགས་སྤང་སྡུག་བསྔལ་ཐོབ། །གསང་སྔགས་ཐབས་ཀྱི་ལམ་ཡིན་ཕྱིར། །རྟེན་འབྲེལ་ཡོ་བྱད་རྫས་རྣམས་བསོག །རྟེན་འབྲེལ་རྫས་མེད་དངོས་གྲུབ་ཡལ། །དེ་ནས་སློབ་བུ་ཁྲིད་པ་ལ། །སྐལ་ལྡན་ངེས་ཤེས་བསྐྱེད་པའི་ཕྱིར། །རྒྱུད་པའི་ལོ་རྒྱུས་བཤད་པར་བྱ། །རྒྱུད་པ་ཉེ་ཟབ་ཁུངས་བཙུན་པ། །ཀུན་བཟང་ཉིད་ནས་རིམ་གྱིས་བཤད། །རྒྱུད་པ་ཁྱད་པར་འཕགས་གོ་བས། །གདམས་ཟབ་བྱིན་རླབས་ངེས་ཤེས་བསྐྱེ། །དེས་ན་དབང་མཆོག་བསྐུར་བར་བྱ། །སྤྲོས་བཅས་ཕྱིའི་བུམ་དབང་དང་། །སྤྲོས་མེད་ནང་གི་གསང་དབང་དང་། །ཤིན་ཏུ་སྤྲོས་མེད་ཤེས་རབ་ཡེ་ཤེས་དབང་། །རབ་ཏུ་སྤྲོས་མེད་ཚིག་གི་དབང་། །སྣོད་ལྡན་བུ་ལ་རིམ་བཞིན་བསྟན། །མངོན་སུམ་གནད་དུ་དབབ་པའི་ཕྱིར། །སྤྲོས་མེད་ཁྱད་པར་དབང་ལྔ་བསྐུར། །དབང་ཐོབ་རྒྱུད་སྨིན་ཆོས་སྒོ་ཕྱེད། །གསང་སྔགས་དོན་ཀུན་འགྲུབ་པར་འགྱུར། །གསང་སྔགས་དབང་ནི་མ་ཐོབ་ན། །ཟབ་དོན་དངོས་གྲུབ་ག་ལ་འབྱུང་། །དེ་ནས་སྔོན་དུ་འགྲོ་ལ་སྦྱངས། །བྱམས་དང་སྙིང་རྗེ་ཆོས་སྤྱིའི་ལམ། །ཐེག་པ་ཆེན་པོར་འཇུག་ཕྱིར་སྦྱངས། །དེ་ལྟར་བདུན་སྦྱངས་ཡོན་ཏན་ཀྱང་། །མི་རྟག་སྙིང་རྗེ་བྱམས་སེམས་ཀྱིས། །ཆོས་འཇུག་ཐེག་ཆེན་ལམ་དུ་འགྲོ། །ལུས་ངག་ཡིད་གསུམ་མངོན་འགྲོས་ནས། །ཐུན་མོང་ཁྱད་པར་མཐར་ཐུག་གིས། །དགོས་པ་གསུམ་དུ་ཤེས་པར་བྱ། །དེ་ནས་ལུས་ངག་རུ་ཤན་འབྱེད། །ནང་གི་འཁྲུལ་རྒྱུ་ཟད་པའི་ཕྱིར། །འཁོར་འདས་རུ་ཤན་ནང་ལྟར་འབྱེད། །རིགས་དྲུག་ས་བོན་འབྲུ་གསུམ་བསྲེགས། །ནང་ལྟར་བསྲེགས་སྦྱངས་སུ་བྱས་པས། །འཁྲུལ་རྒྱུ་འཁོར་བའི་ས་བོན་སྟོང་། །སྒོ་གསུམ་འཁོར་བར་ལྡོག་པ་མེད། །དེ་ལྟར་ས་བོན་མ་ཟད་ན། །འཁོར་བའི་འབྲེལ་ཐག་ཆོད་མི་འགྱུར། །དེ་ནས་རྣལ་དུ་དབབ་ལ་བསླབ། །ལུས་ངག་ཡིད་གསུམ་འབྱུང་འཁྲུག་ལ། །དེ་དག་གྲོལ་ཕྱིར་རྣལ་དུ་དབབ། །དེ་ལྟར་རྣལ་དབབ་ཡོན་ཏན་གྱིས། །འབྱུང་འཁྲུག་ནད་རྐྱེན་ཞི་བ་དང་། །འཛིན་པ་རང་གྲོལ་ཉིད་དུ་འགྱུར། །དེ་ལྟར་མ་དབབ་སྐྱོན་མང་སྟེ། །ཡོན་ཏན་རྣམས་ལ་བཟློག་རྐྱེན་ཡོད། །དེ་ནས་སོར་འཇུག་དག་ལ་སྦྱངས། །ཀ་དག་དོན་ནི་རྟོགས་ཕྱིར་དང་། །ཉམས་ལྡན་མངོན་སུམ་དོན་རྟོགས་འགྱུར། །དེ་ཉིད་མ་དབབ་འགྲུབ་མི་འགྱུར། །མངོན་སུམ་གནད་དུ་དབབ་པའི་ཕྱིར། །ཕྱི་ནང་གསང་བའི་བྱ་བ་ནི། །ལུས་ངག་ཡིད་གསུམ་དགུ་ཕྲུགས་བཏང་། །དེ་ཡང་ལག་ལེན་འདི་ལྟ་སྟེ། །ལུས་ཀྱི་བྱ་བ་བཏང་བའི་ཕྱིར། །ཆོས་དང་ལོ་ཀའི་བྱ་བ་བཏང་། །གྲོགས་མེད་གཅིག་པུར་གནས་པར་བྱ། །ངག་ནི་འཁྲུལ་གཏམ་ཆོས་སྤྱོད་སྤང་། །ལྐུག་པ་ལྟ་བུ་ཉིད་ལ་བསླབ། །ཡིད་ནི་ལོ་ཀ་འདས་པའི། །འགྱུ་བ་བཅད་ལ་གནས་པར་བྱ། །ལུས་ངག་འཁྲུལ་པ་རྒྱུན་བཅད་པས། །ཡེ་ཤེས་རྒྱུད་ལ་གནས་པར་འགྱུར། །བྱར་མེད་རྒྱུད་ལ་མི་གནས་ན། །རིག་པའི་དོན་ལ་རེག་པ་མེད། །དེ་ནས་མངོན་སུམ་རང་ཐོག་དབབ། །རིག་པ་ལུས་ལ་གནས་གྱུར་ཀྱང་། །འཁྲུལ་འཁོར་དག་གིས་མ་གཅུན་ན། །ཡེ་ཤེས་དབང་པོ་སྣང་མི་ནུས་། །ལུས་ཀྱི་གནད་མཆོག་མ་ཟིན་ན། །དེ་བཞིན་ལུས་ལ་དྲོད་མི་སྐྱེས། །རིག་པ་དངོས་སུ་སྣང་མི་ནུས། །དེ་ནས་ངག་གནད་མ་གཟིར་ན། །བརྗོད་མེད་དོན་ནི་མི་རྟོགས་ཤིང་། །འཁྲུལ་པའི་གཏམ་གྱིས་དོན་ལ་སྒྲིབ། །ངག་གི་གནད་གཟིར་མཆོག་ཏུ་གཅེས། སེམས་ཀྱི་གནད་ནི་མ་གཟིར་ན། །དབྱིངས་དང་རིག་པ་མི་མཐོང་བས། །གནད་གཟིར་སྟོང་པའི་འབེན་ཉིད་བཅས། །སེམས་ཉིད་ཕྱི་ཡི་མཁའ་ལ་གཏད། །ནང་གི་སྒྲོན་མ་མངོན་དུ་སྣང་། །གནད་གསུམ་མངོན་དུ་མ་གཟིར་ན། །མངོན་སུམ་རང་ཐོག་མི་ཕེབ་སྟེ། །ཡིད་དཔྱོད་འཛིན་དང་ཁྱད་པར་ཆེ། །གནད་གསུམ་རྩོལ་བ་མཆོག་ཏུ་གཅེས། །ཡེ་ཤེས་འཆར་བའི་སྒོ་ནི་མིག །འཆར་གནད་ཕབ་བཟློག་ཟུར་ལ་གནོད། །རྐྱེན་བྲལ་གསུམ་ལ་འཆར་བར་འགྱུར། །ཕྱི་ནང་རླུང་ནི་དལ་ཞིང་སྙོམས། །ཡིད་ཙམ་ཕྱི་རུ་འདུར་བ་ཡིས། །རླུང་གི་འགྲོ་འོང་ཆད་པར་འགྱུར། །རིག་གནད་ལུག་རྒྱུད་བཙོན་དུ་བཟུང་། །དངོས་སྣང་དལ་བ་ཉིད་ཀྱི་རྟེན། །སྒོ་དང་ཡུལ་རིག་བསྟུན་པ་ཡིས། ཡུལ་ལ་ཡེ་ཤེས་ཀུན་ཏུ་སྣང་། །གནད་གསུམ་བསྟུན་པར་མ་བྱས་ན། །རིག་པའི་དོན་ལ་རེག་མི་འགྱུར། །དེ་ལྟར་ཉམས་སུ་ལེན་པ་ལ། །སྣང་བཞི་འཆར་ཚུལ་མ་ཤེས་ན། །ས་ཟིན་མེད་པའི་སྐྱོན་འབྱུང་བས། །སྣང་བ་བཞི་རུ་ཤེས་པར་བྱ། །རྐྱེན་བྲལ་མཁའ་ལ་བླ་མའི། །གཟིགས་སྟངས་གཅུན་ཞིང་ངོ་སྤྲད་པས། །དབང་པོའི་སྒོ་ལ་སྒྲོན་མ་ནི། །འཇའ་འམ་རྨ་བྱའི་མདོངས་ལྟ་བུ། །ཐིག་ལེ་ལུག་རྒྱུད་འགྲེལ་པ་ལ། །འགུལ་འཕྲིག་རྒྱུ་བའི་རྣམ་པའོ། །དེ་ལྟར་གསལ་བའི་དབྱིངས་རིག་ནི། །ཉི་མ་འོད་ཀྱི་ཚུལ་དུ་གནས། །དེ་དག་ངོ་བོ་ཀ་དག་ལ། །རང་བཞིན་ལྷུན་གྲུབ་ཉིད་དུ་སྟེ། །ཐུགས་རྗེ་ཀུན་ལ་ཁྱབ་པ་ཉིད། །ཙིཏྟ་དག་ནས་རྩ་ལ་འཆར། །ངོ་བོ་མངོན་སུམ་སྒོ་ལ་འཆར། །རིག་པ་མངོན་སུམ་ཞེས་སུ་བརྗོད། །ཡིད་དཔྱོད་རྣམས་དང་བྲལ་བའོ། །རིག་པ་མངོན་སུམ་མཐོང་བ་ནི། །བདེན་པ་མཐོང་བའི་གནད་ཀྱིས་ནི། །ཁམས་གསུམ་བཟློག་པ་མ་ཡིན་ནོ། །མངོན་སུམ་རིག་པ་མ་མཐོང་ན། ཡིད་དཔྱོད་མུན་པའི་མཐའ་འཁོར་བས། །འཁོར་བ་ཉིད་དུ་རྣམ་པར་རྒྱུ། །གོང་དུ་འཕེལ་བའི་སྣང་བའི། །ཉམས་ཀྱི་འཕེལ་ཤན་དབྱེ་བ་གཅེས། །ཉམས་སྣང་གོང་དུ་འཕེལ་བ་ཡིས། འོད་ཟེར་སྣ་ཚོགས་འགྱུར་འཕེལ་དང་། །ཐིག་ལེ་འཕེལ་ཞིང་རིག་རྟེན་ཚད། །ས་བོན་འབྲས་བུའི་བར་བཞིན་འབྱུང་། །སྐུ་ཤར་ཉམས་ཀྱི་འཕེལ་རྫོགས་ནས། །བར་དོའི་སྣང་བ་འདིར་ཆོད་པའི། །ལོངས་སྤྱོད་ངོས་ཟིན་བར་དོ་སྟོང་། །ཉམས་སྣང་གོང་དུ་མ་འཕེལ་ན། །བར་དོ་ལས་ནི་གྲོལ་མི་འགྱུར། །རིག་པ་ཚད་ལ་མ་ཕེབ་ན། །རྣལ་འབྱོར་དྲོད་ཚད་རྙེད་མི་འགྱུར། །རིག་པ་ཚད་ལ་ཕེབ་པ་ཡི། །ལོངས་སྤྱོད་སྐུ་ཉིད་མངོན་དུ་གྱུར། །དེ་ལྟར་ཚད་ལ་མ་ཕེབ་ན། །ཕུང་བོའི་སྣང་འཛིན་དག་མི་འགྱུར། །ཆོས་རྣམས་ཟད་པའི་སྣང་བ་ནི། །ཉམས་ཟད་ཡུལ་ཟད་དབང་ཡུལ་ཟད། །རྟོག་ཚོགས་འཁྲུལ་པ་ཆོས་ཆེན་ཟད། །བརྗོད་གཞི་ཚིག་བྲལ་རང་བབ་བོ། །དེ་ལྟར་ལུས་གནད་རང་སར་གྲོལ། །ཟག་བཅས་ཕུང་པོ་མི་སྣང་བར། །འདི་ལ་ཡང་དག་སངས་རྒྱས་སོ། །ཆོས་རྣམས་ཟད་པར་མ་གྱུར་ན། །ལྷག་མེད་ཉིད་དུ་འགྱུར་བ་མེད། །དེ་ལྟར་འགྱུར་བའི་ཐབས་མཆོག་ལ། །མཐའ་རྟེན་མན་ངག་རྣམ་པ་བཞིས། །གོང་མའི་རྒྱབ་ཏུ་མེད་ཐབས་མེད། །མི་འགུལ་གསུམ་ལ་གཞི་བྱས་ན། །རླུང་གནད་སེམས་གནད་དབབ་པ་གཅེས། །སྡོད་པ་གསུམ་གྱི་ཚད་བཟུངས་པས། །རྨི་ལམ་བཟློག་དང་ལུས་ངག་ཡིད། །རྟགས་དང་ཚད་ནི་ལེགས་པར་ཟིན། །ཐོབ་པ་གསུམ་གྱི་གཟེར་བཏབ་པས། །ཟག་བཅས་ཕུང་པོ་མི་སྣང་བའོ། །མི་འགྱུར་ལྟ་བའི་གདིང་ཆེན་བཞི། །མི་ལྡོག་ཡེ་ཤེས་ཚད་བཟུང་ཞིག །མཐའ་རྟེན་དེའི་ཡོན་ཏན་གྱིས། །གདོད་མའི་ཡོན་ཏན་མཐའ་རུ་ཕྱིན། །མཐའ་བརྟེན་གནད་ཀྱི་རྒྱབ་མེད་ན། །རྫོགས་ཆེན་ཉམས་ལེན་མཐར་མི་ཕྱིན། །ཨེ་མ་ངོ་མཚར་རྡོ་རྗེའི་གླུ། །བདེ་བའི་གད་རྒྱང་ཆེན་པོ་ཡིས། །ཡིད་བཞིན་ནོར་བུའི་གསང་རྒྱུད་འདི། །མ་འོངས་ལས་ཅན་རྣམས་དང་འཕྲད། །ཅེས་གསུངས་སོ། །ཀུན་བཟང་ཡུམ་གྱི་བྷ་གར་ཐིམ་ནས། འཁོར་རྣམས་ཡིད་རངས་པར་གྱུར་ཏོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ངོ་མཚར་རྡོ་རྗེ་བདེ་བའི་གླུ། རྒྱུད་དོན་དྲིལ་ནས་བསྟན་པའི་ལེའུ་སྟེ་བརྒྱ་དང་གཅིག་གོ། ། ྅྅྅ དེར་འཁོར་རྣམས་ཀྱིས་སྟོན་པ་ལ་ཕྱི་ནང་གི་མཆོད་པ་ཕུལ་ཅིང་། སྟོན་པ་ཉིད་བར་གྱིས་ཏིང་ངེ་འཛིན་བསྐལ་པ་གཅིག་ཏུ་ཏིང་ངེ་འཛིན་ལ་བཞུགས་སོ། །དཀྱིལ་འཁོར་རྣམས་ཀྱི་ཏིང་ངེ་འཛིན་གྱིས་བསྐུལ་ནས་ཞུས་པ། ཀྱཻ་ཡུམ་ཆེན་དགོངས་ཤིག །དངོས་གཞི་ཟག་པ་མེད་པའི་ཡེ་ཤེས་རང་ཐོག་དུ་ཕབ་པར་བྱེད་པ་ལས། ལུས་དང་ངག་གི་བྱ་བ་གཏང་ནས། ཇི་ལྟར་བསླབ་པ་བསྟན་དུ་གསོལ། ཞེས་གླུས་བསྐུལ་བ་དང་། སྟོན་པ་འཛུམ་པའི་མདངས་ཕྱུངས་ནས་འདི་སྐད་དུ་བཀའ་སྩལ་པ། ཀྱཻ་ཉོན་ཅིག་རིག་པའི་འཁོར་མདངས། །མཁའ་འགྲོའི་ཚོགས་རྣམས་ད་ཉོན་ཅིག །སྣོད་ལྡན་སྐལ་ལྡན་སྐྱེས་བུ་ཉིད། །ཚིག་དབང་རིན་ཆེན་ངོ་སྤྲོད་དང་། །རིག་པའི་རྩལ་དབང་ཐོབ་པའི་བུ། །ནང་ཚང་ཅན་གྱི་གདན་སྟེང་དུ། །པུས་མོ་གཉིས་པོ་ས་ལ་ཕབ། །གཡོས་བྱེད་རླུང་ནན་དགོས་པ་ཡོད། །ལུས་ཀྱི་ཆ་རྣམས་ཐམས་ཅད་བསྲངས། །ལས་རླུང་བདེ་བར་རྒྱུ་བར་འགྱུར། །མགོའི་བརྗིད་ནི་མཇིང་ལ་བཀལ། །རྣམ་རྟོག་འགག་པའི་དགོས་པ་ཡོད། །ལག་སོར་བསྐུལ་ལ་ཁྱི་ཚུགས་བྱ། །ཡེ་ཤེས་དྲོད་ཕབ་འབྱུང་བཞི་བྷཻཾ། །མིག་གཉིས་སྨིན་ཕྲག་མཁའ་ལ་གཏད། །ཉོན་མོངས་ཐམས་ཅད་རང་དག་གོ། །ཆོས་སྐུའི་བཞུགས་སྟངས་སེང་གེའི། །འཁྲུལ་བའི་འཇིགས་པ་དང་བྲལ་ནས། །མི་འགྱུར་རྡོ་རྗེའི་མིག་གིས་མཐོང་། གཉིས་པ་ལོངས་སྐུའི་བཞུགས་སྟངས་ནི། །ཁ་སྦུབ་པུས་མོ་བྲང་ལ་སྦྱར། །བདེ་དྲོད་ཡེ་ཤེས་ཁམས་རྒྱས་སོ། །གྲུ་མོ་གཉིས་པོ་ས་ལ་བཙུགས། །མ་ནིང་རླུང་དང་ནང་དུ་རྒྱུད། །ཐལ་མོ་མགྲིན་པ་ཡུད་ཙམ་བརྟགས། །རགས་པའི་རླུང་རྣམས་རང་སར་འགགས། །རྐང་སོར་ཕྱིར་ཕུལ་ཅུང་ཟད་བསྐུམ། །བྱིང་རྒོད་གཉིས་པོ་ཆ་སྙོམས་སོ། །མིག་གཉིས་སྨིན་ཕྲག་མཁའ་ལ་ལྟ། །ཟུར་གྱི་གཡས་དང་གཡོན་དུ་ཁྲིད། །ལོངས་སྐུ་མ་འགགས་མིག་གི་མཐོང་། །གསུམ་པ་སྤྲུལ་སྐུའི་བཞུགས་སྟངས་ནི། །བདེ་བའི་སྟན་ལ་ཙོག་པུར་འདུག །རྩ་རླུང་རང་སོར་སྙམ་པ་ཡིན། །རྐང་མཐིལ་ས་ལ་ཅེར་གྱིས་ཕབ། །ཆུ་རླུང་རང་སར་ནོན་པ་ཡིན། །སྒལ་ཚིགས་དྲང་པོར་ཐལ་གྱིས་བསྲང་། །རླུང་སེམས་ཆོས་ཉིད་རྗེན་པ་རུ། །པུས་མོ་གཉིས་པོ་ཅར་གྱིས་སྦྱར། །མེ་རླུང་ཡེ་ཤེས་རང་སར་གསལ། །རྒྱུ་མ་ཡུད་ཙམ་གྱེན་ལ་ཐོན། །སྒལ་པར་སྦྱར་བས་འཕྲོ་འདུ་བསྒག །ལག་མཐིལ་གཉིས་ཀྱིས་འགྲམ་གཉིས་བཏེགས། །ཚ་གྲང་ནད་སེལ་བྷཻཾ་བསྲན་ཆེ། །ཟིལ་འབྲུའི་མིག་གིས་བར་སྣང་ལྟ། །སྤྲུལ་སྐུའི་ཞིང་ཁམས་མཐོང་བར་འགྱུར། །སྦྲུལ་ལ་ཡན་ལག་ཡོད་གྱུར་ཀྱང་། །མ་གཅུས་བར་དུ་མི་མངོན་ལྟར། །རིག་པ་ལུས་ལ་གནས་གྱུར་ཀྱང་། །ལུས་གནད་མ་གཟིར་མི་མངོན་ནོ། །གཞན་ཡང་ཡན་ལག་ལུས་གནད་ནི། །སྔོན་ཡང་བྱ་རྒོད་ལྟ་བུ་དང་། །མི་འགྱུར་རྡོ་རྗེ་ལྟ་བུའོ། །རྩ་བ་གསུམ་དུ་རྒྱུན་དུ་ལྟ། །ཡན་ལག་གཉིས་པོ་ངལ་བསོ་ཙམ། །གཞན་ཡང་ཡེ་ཤེས་རྣམ་ལྔ་ཡིས། །ལུས་གནད་ལྔ་སོགས་གཟིགས་སྟངས་བསྟུན། །བཞུགས་སྟངས་ཐམས་ཅད་གང་བྱེད་ཀྱང་། །ལུས་མི་འགུལ་ཅིང་མིག་མི་འགུལ། །དབུགས་ཀྱང་ཕྱིར་ལ་ཅུང་ཙམ་འདོར། །ཕར་ཚུར་འགྲོ་འོང་དལ་བར་བྱ། །མི་འགུལ་རྣམ་པ་གསུམ་པོ་འདི། །ཤིན་ཏུ་གལ་ཆེའི་གལ་མདོ་འོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། མངོན་སུམ་རང་ཐོག་དུ་དབབ་པའི་ལུས་གནད་བསྟན་པའི་ལེའུ་སྟེ་བརྒྱའ་དང་གཉིས་པའོ། །྅྅྅ ཀུན་བཟང་ཡུམ་གྱིས་བཀའ་སྩལ་པ། དང་པོ་སེང་གེ་ལྟ་བུ་ནི། །གཟིགས་སྟངས་ཨ་འབྲས་གྱེན་ལ་ལྡོག །སྨིན་མཚམས་དབྱིངས་སུ་ལྟ་བར་བྱ། །དེ་ཡིས་དབྱིངས་སྒྲོན་མྱུར་དུ་འཆར། །གླང་ཆེན་ལྟ་བུའི་ལུས་གནད་ལ། །ཐད་ཀ་ཟུར་ཁྲིད་ཉིད་དུ་ལྟ། །ཐིག་ལེ་སྟོང་སྒྲོན་ངོས་ཟིན་ནོ། །སྤྲུལ་སྐུ་དྲང་སྲོང་ལྟ་བུ་ནི། །ཐུར་མིག་ཟུར་དུ་ཟིམ་བུས་ལྟ། །སྤྲུལ་སྐུའི་ཞིང་ཁམས་དཔག་མེད་མཐོང་། ལུ་གུ་རྒྱུད་ཉིད་བརྩོན་ཟིན་ནོ། །སྔོན་བྱང་ཁྲིད་ཅིང་ཟླུམ་པོར་ལྟ། །དབྱིངས་སྣང་འཕེལ་ཚེ་ཤེས་ཉམས་རྒྱས། །རྡོ་རྗེའི་མིག་གིས་མཐུར་དུ་ལྟ། །ཞིང་ཁམས་རྒྱན་རྣམས་མྱུར་དུ་རྫོགས། །གཞན་ཡང་ལྟ་སྟངས་གཟིགས་སྟངས་ཀྱིས། །རང་བཞིན་གནས་པའི་རིག་སྣང་ཀུན། །ཆུ་བུར་མིག་གིས་མཐོང་རྐྱེན་བྱེད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ལུས་གནད་དེ་ལ་གཟིགས་སྟངས་བསྟུན་པའི་ལེའུ་སྟེ་བརྒྱ་དང་གསུམ་པའོ། །྅྅྅ སྟོན་པས་འཁོར་རྣམས་ལ་བཀའ་སྩལ་བ། དེ་ནས་ངག་གནད་སྨྲ་བ་བཅད། །གལ་ཏེ་སྨྲ་བ་མ་ཆོད་ན། །སེམས་འཁྲུལ་རྩོད་དང་སྒྲིབ་རྐྱེན་སོགས། །དོན་མེད་དུས་མཐའི་ཏིང་འཛིན་ཉམས། །སྐྱོན་རྣམས་ཐམས་ཅད་འབྱུང་བའི་ཕྱིར། །བསླབ་དང་གནས་དང་ལ་བཟླ་སྦྱངས། །དང་པོ་ལུང་སྟོང་དབེན་པར་སོང་། །གང་ལ་ཞེན་པའི་ཚིག་དེ་ཉིད། །བརྒྱ་སྟོང་བར་དུ་བསྡུད་ཅིང་བརྗོད། །གཞན་ཡང་སྣ་ཚོགས་བརྗོད་བྱས་ལ། །ངལ་ནས་བརྗོད་སྙིང་མི་འདོད་ཚེ། །ཉིན་རེ་བས་ནི་ཇེ་ཉུང་སྐྱོང་། །འཛབ་དང་འདོན་པ་མི་སྤང་ངོ་། །དེ་ནས་གནས་པར་བྱ་བ་ནི། །ཕྱག་བསྐོར་འདོན་ཟློས་ཐམས་ཅད་སྤང་། །སྔགས་ཀྱི་ཚིག་རྣམས་མི་འདོག་གོ། །གཞན་དང་ཚིག་ཟུར་ཙམ་ཡང་སྤང་། །གལ་ཏེ་གནད་ནི་ལུས་ཀྱིས་ནི། །བརྡ་རེ་ཙམ་ལ་བྱ་བར་སྣང་། །དེ་ནས་སྟོན་ཅིང་ལ་བཟླ་བ། །ལྐུག་པ་ལྟ་བུར་གནས་པ་ལ། །ལུས་ཀྱི་བརྡ་ཡང་མི་བྱ་ཞིང་། །སེམས་ཀྱི་བརྡ་ཙམ་བྱ་བའོ། །དེ་ལས་མི་འདའ་སུས་བྱས་པ། །མྱུར་དུ་གཉིས་ཆོས་ཟད་པ་དང་། །མྱ་ངན་འདས་པ་ཐོབ་པར་འགྱུར། །རླུང་གི་གནད་ཡང་འདི་ལྟར་བསླབ། །ཡུད་ཙམ་འདོར་ཞིང་དལ་བར་བརྟེན། །དེས་ནི་ལས་རླུང་བག་ལ་ཞ། །རིག་རླུང་དབྱིངས་སུ་འཁྱིལ་པར་འགྱུར། །འགྲོ་འོང་རླུང་ཡང་དེ་ལྟར་ཚུལ། །སྙིང་ནང་ཡེ་ཤེས་རང་མདངས་ཏེ། །མི་ནག་རྟ་ལ་ཞོན་དང་མཚུངས། །རྟ་ཕོ་སྒྲོགས་སུ་བཅུག་པ་ན། །མི་ནི་རྐང་རྡུམ་གང་དུ་འགྲོ། །རིག་པ་སྙིང་ནང་མི་གཡོའ་བ། །གསལ་སྟོང་ཆེན་པོར་གནས་ཕྱིར་རོ། །དེ་ཕྱིར་ཁ་སྣའི་རླུང་དལ་བས། །རྩ་གསུམ་འཁོར་ལོ་ཉོན་རླུང་འགག །ཡེ་ཤེས་རླུང་ནི་ཟིན་པར་འགྱུར། །དེ་ཕྱིར་རླུང་གནད་གལ་ཆེའོ། །མཁས་པ་གནད་དང་ལྡན་པ་ཡིས། །སྲོག་རྩོལ་བུམ་ཆེན་བཟུང་བར་ཤེས། །དེ་ལྟར་གནད་གསུམ་མི་སླ་སྟེ། །མདུད་པ་ལྟ་བུར་གཅིག་ཏུ་དྲིལ། །གཅུན་ཕུར་ལྟ་བུར་རླུང་སེམས་གཅུན། །མེ་ལོང་ལྟ་བུར་རང་བྱད་ལྟོས། །གནད་གསུམ་ཉམས་སུ་ལེན་པ་ལ། །ཐབས་མཆོག་ཆེན་པོར་གལ་ཆེའོ། །བུ་ཡིས་ཕ་ཚོལ་གདམས་པ་དང་། །མདའ་ཡིས་གཞུ་ཚོལ་གདམས་པ་དང་། །འབེན་གྱི་མདའ་ཚོལ་གདམས་པ་དང་། །ཆུང་མས་ཁྱོ་ཚོལ་གདམས་པ་དང་། །བུ་མོས་མ་ཚོལ་གདམས་པ་དང་། །རྗེའི་འབངས་ཚོལ་གདམས་པ་གཅེས། །དེ་དུས་ཕུན་སུམ་ཚོགས་ལྔ་པོ། །ལྟ་སྟངས་གཅིག་གི་ངང་དུ་རྫོགས། །གནས་ནི་ཕྱི་ནང་གསང་དབྱིངས་དང་། །སྟོན་པ་རྡོ་རྗེ་ལུ་གུ་རྒྱུད། །འཁོར་ནི་སྐུ་དང་ཐིག་ལེ་སྟེ། །སྟོན་པ་རིག་སྟོང་སྐུ་གསུམ་ཉིད། །དུས་ནི་ལྟ་སྟངས་གཅིག་ཏུ་གོ། །ཁྱད་པར་ཟེར་གཉིས་དུས་སུ་ཤེས། །ཉིན་མོ་ཉི་མ་མཚན་ཟླ་བ། །སྐབས་སུ་ཨ་ལོ་ཨར་ལ་གཏད། །ཉི་ཟླ་འཕེལ་ན་ཉམས་འཕེལ་ཆེ། །ཟེར་ཁྲིད་ཟུར་ལྟ་རྒྱབ་ལྟ་གཅེས། །མིག་ལ་མི་གཟན་གྲང་དྲོ་སྙོམས། །དེ་ཕྱིར་འདི་རྣམས་གལ་ཆེའོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ངག་གནད། ལུས་གནད། སེམས་གནད། དུས་གནད། དབེན་གནད། རྐྱེན་གྱི་གནད་ཐམས་ཅད་བསྟན་པའི་ལེའུ་སྟེ་བརྒྱ་དང་བཞི་པའོ། །྅྅྅ ཡུམ་ཆེན་ཉིད་ཀྱིས་བཀའ་སྩལ་པ། དེ་ལྟར་ཉམས་སུ་བླངས་པ་ལ། །སྣང་བཞི་རིམ་གྱིས་འདི་ལྟར་འཆར། །དང་པོ་ཆོས་ཉིད་མངོན་སུམ་ནི། །ངོ་བོ་ངེས་ཚིག་དབྱེ་དང་བསྡུ། །དོན་དང་གདམས་པ་རྟགས་དང་ཚད། །འབྲས་བུ་གྲོལ་ས་དགུ་ཡིན་ཏེ། །སྒྲོན་བཞི་འདུ་འབྲལ་མེད་པར་གསལ། །དེ་ནི་མངོན་སུམ་ངོ་བོའོ། །དབང་པོ་མངོན་སུམ་རྗེན་པར་གསལ། །ངེས་པའི་ཚིག་ཏུ་དེ་བཞག་གོ། །དབྱེ་ན་དབང་པོ་འདུས་བྱས་དང་། །རྣལ་འབྱོར་རང་རིག་བཞི་རུ་འདོད། །བསྡུ་ན་རིག་པ་མངོན་སུམ་འདུས། །དོན་ནི་བླ་མའི་གདམས་པ་བསྟེན། །ལྟ་སྟངས་བྱས་དུས་མངོན་པའོ། །དེ་ཡང་དཀར་འཕྲོ་ཟང་ཟིང་དང་། །ཁྱག་ཁྱུག་དུ་བ་ལྟ་བུ་དང་། །ལུག་རྒྱུད་གསེར་དངུལ་ཕྲེང་བ་འདྲ། །ཤེལ་ལྟར་འཆར་རམ་དངུལ་ཆུ་ལྟར། །ཟླུམ་ལ་འདྲིལ་བ་འགུལ་འཕྲིང་ཅན། །འཇའ་འོད་ཐིག་ལེར་བཅས་པ་མཐོང་། །འདི་ཉིད་མངོན་སུམ་གཅེས་མཐོང་བས། །ཡིད་ཀྱི་འཛིན་པ་ཉིད་ལས་གྲོལ། །ཉམས་སུ་ལེན་པ་གདམས་པ་ནི། །མིག་གི་གཡས་གཡོན་གོང་འོག་ཁྲིད། །དབང་ལག་བུར་སྦྲང་འཁོངས་སུ་བཟུང་། །འབྲི་མར་ལ་སོགས་སྐུ་མཉེ་བྱ། །བཞུགས་སྟངས་སྤྲུལ་སྐུ་གཙོ་བོར་འདོན། །གང་ཟག་རྩོལ་བ་རབ་རྣམས་ལ། །ཟླ་བ་གཅིག་ལ་རྟགས་འདི་འབྱུང་། །ལུས་ནི་རུས་སྦལ་གཞུག་བཅུག་འདྲ། །ངག་ནི་ལྐུག་པ་འཁྲུལ་རྒྱུན་ཆད། །སེམས་ནི་གང་གཏད་ལྷན་ནེ་བསྡད། །རེས་ནི་མངོན་པར་ཤེས་པ་འབྱུང་། །ཟས་གོས་མི་གདུང་ངོ་ཚ་བྲལ། །ལུས་བདེ་ངག་གསང་སེམས་མི་རྟོག །རིག་པ་ལུག་རྒྱུད་འབྲེལ་མི་ཆོད། །དབྱིངས་ཀྱང་ཕུབ་ཙམ་ཆེར་འཕེལ་ཏེ། །རྨི་ལམ་རྨི་ལམ་ངོ་ཤེས་སོ། །འབྲས་བུ་འོད་ཁྱིམ་རྣམ་ལྔ་མཐོང་། །དུག་ལྔ་དག་ནས་ཡེ་ཤེས་ལྔ། །རང་གསལ་ཉིད་དུ་ཤར་བ་ཡིན། །ཞིང་ཁམས་ལྔ་ལ་རང་བྱན་ཚུད། །རིག་ལྔ་སྐུ་ལྔ་ལྷུན་གྱིས་གྲུབ། །ཨེ་མ་ངོ་མཚར་རྫོགས་སངས་རྒྱས། །ཀུན་བཟང་བྷ་གའི་རང་ཞལ་མཐོང་། །དུས་གསུམ་སངས་རྒྱས་ཐམས་ཅད་དང་། །བདེར་གཤེགས་རིགས་ལྔ་རིགས་གསུམ་མགོན། །ཞི་ཁྲོ་མཁའ་འགྲོ་དཔའ་བོ་རྣམས། །མངོན་སུམ་ཉིད་དུ་མཇལ་བ་ཡིན། །ལས་སྒྲིབ་བག་ཆགས་ཟད་པ་ཡིན། །འདི་ཉིད་མཐོང་བའི་རྣལ་འབྱོར་ལ། །ཁམས་གསུམ་འཁོར་བའི་མིང་མེད་ཅིང་། །སྲིད་གསུམ་གདར་ཤ་ཆོད་པ་ཡིན། །མངོན་སུམ་འདི་དང་མ་བྲལ་ཅིག །ཆོས་རྣམས་ཀུན་གྱི་འདུན་པའོ། །གྲོལ་བ་འདི་ཉིད་ལན་གཅིག་མཐོང་། །སྲིད་པའི་བར་དོ་ཤར་མ་ཐག །རང་བཞིན་སྤྲུལ་སྐུའི་ཞིང་ཁམས་སུ། །རྫུས་ནས་སྐྱེ་བར་ཐེ་ཚོམ་མེད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཆོས་ཉིད་མངོན་སུམ་སྣང་བ་འཆར་ཚུལ་དོན་དགུས་བཅིངས་གནས་བསྟན་པའི་ལེའུ་སྟེ་བརྒྱ་དང་ལྔ་པའོ། ། ྅྅྅ སྟོན་པས་འཁོར་ལ་བཀའ་སྩལ་པ། ཉོན་ཅིག་རིག་རྩལ་མཁའ་འགྲོ་རྣམས། །གཉིས་པ་ཉམས་སྣང་གོང་འཕེལ་གྱིས། །སྣང་བ་འཆར་ཚུལ་བཤད་པར་བྱ། །ངོ་བོ་ངེས་ཚིག་དབྱེ་བ་དང་། །བསྡུ་བ་དོན་དང་གདམས་པ་དང་། །རྟགས་ཚད་འབྲས་བུ་གྲོལ་ས་སྟེ། །རྣམ་པ་དགུའི་རབ་ཏུ་དབྱེ། །སྣང་བ་སྔར་ལས་ཤར་བ་རྣམས། །རིམ་པར་འཕེལ་བའི་ངོ་བོ་ཟེར། །རིག་སྟོང་ཉམས་དང་གསལ་སྟོང་ཉམས། །འགྱུ་སྟོང་ཉམས་རྣམས་རིམ་བཞིན་འཕེལ། །ངེས་པའི་ཚིགས་སུ་དེ་བཞག་གོ། །དབྱེ་ན་མ་དག་འཁྲུལ་ཉམས་དང་། །དག་པ་ཡེ་ཤེས་དག་གིས་ཉམས། །རང་དོན་ཉམས་ལེན་དག་གིས་ཉམས། །གཞན་དོན་ཕྲིན་ལས་ཉམས་བཞི་ཡིན། །བསྡུ་ན་སྣང་ཉམས་ཤེས་ཉམས་འདུས། །དོན་ནི་མངོན་སུམ་དེ་སྦྱོངས་པས། །འོད་ཀྱི་རང་གི་ཐོ་ཕྱི་གང་། །ཐིག་ཕྲན་མེ་ལོང་འཕང་ལོ་ཙམ། །དབྱིངས་སྣང་ཁ་དོག་དུ་མར་འགྱུར། །ཐིག་ལེ་སྟོང་སྒྲོན་སྟོང་དུ་སྣང་། །དབྱིངས་རིག་ཟ་འོག་རྨ་བྱའི་རིགས། །སྨིན་མཚམས་སོར་བཞི་དང་འབྲེལ་ཏེ། །གྱེན་འགྲེང་རྩིབ་ཤར་ཟླུམ་པོར་འཁྲིགས། །རེ་ལྡེ་གྲུ་ཆད་རིགས་བཞི་རིག །འོད་ཀྱི་ཡུལ་གྲུ་གང་བ་དང་། །ཐིག་ལེ་ཚོམ་བུར་འདབ་བཞིར་གྱུར། །ད་རུང་ཉམས་སུ་བླང་བ་ཡིས། །རིག་པ་ཤ་ར་རྒྱུག་པ་ཙམ། །ཐིག་ལེ་ལྔ་ལྡན་རྣམས་ཀྱི་ནང་། །ཁྲི་དང་རྒྱབ་ཡོལ་རྣམ་པ་དང་། །ཉན་ཐོས་སྤྲུལ་སྐུའི་ཆ་ལུགས་དང་། །ཕྱེ་སྐུ་ཞལ་ཕྱག་དོད་མ་དོད། །གཟུགས་བརྙེན་མ་ངེས་དུ་མ་འཆར། །ད་རུང་ཉམས་སུ་བླངས་པ་ཡིས། །རིག་པའི་བར་རྣམས་སྐུའི་བརྒྱན། །རིག་པ་འགུལ་འཕྲིག་མེད་པར་སྡོད། །ལུས་ལ་འབུ་སྲིན་ཤིག་མི་འབྱུང་། །སྐྲ་དཀར་གཉེར་མ་མེད་པ་དང་། །ཟས་དང་སྐོམ་གྱི་གདུང་བ་ཆོད། །སྔར་མ་ཐོས་པའི་ཆོས་རྣམས་ཤེས། །ཅི་སྨྲ་ཐམས་ཅད་ཆོས་སུ་འོང་། །དགྲ་གཉེན་གཉིས་ཀྱིས་ཉེ་རིང་བྲལ། །ཤེས་པ་དགེ་སྡིག་ངོ་ཤེས་ཙམ། །མངོན་པར་ཤེས་པ་ཕྱོགས་མེད་འཆར། །ཉིན་མཚན་འཁོར་ཡུག་འོད་གསལ་འདྲེས། །དེ་ལ་ཉམས་ལེན་གདམས་པ་ནི། །མུན་ཁང་གསུམ་རིམ་ནང་ཉིད་དུ། །རླུང་ནི་བུམ་ཆེན་མདུན་དུ་བཟུངས། །ལུས་གནད་སེང་གེ་རྣམ་གྲོལ་བཅའ། །མིག་འབྲས་བར་སྣང་མཁའ་ལ་གཏད། །ཡང་ན་མཐེབ་མཛུབ་ཨར་ལ་གཏད། །དེའི་ཞིང་ཁམས་གཏན་ལ་ཕེབ། །དེ་ནས་སྐུ་ཡང་གཏན་ལ་ཕབ། །དེ་ནས་ཡེ་ཤེས་རང་ས་ཟིན། །ཉིན་པར་སྣང་བ་ཉམས་སུ་ལེན། །མཚན་མོ་མུན་པ་དག་ལ་བསླབ། །རིགས་དྲུག་ཞིང་ཁམས་མིག་གིས་མཐོང་། །རྣ་བས་འཁོར་འདས་ཚིག་ཀུན་ཐོས། །འདི་ཡང་ད་རུང་ཆེར་འཕེལ་ལོ། །རྟགས་ཚད་ཕྱིའི་གཟུང་འཛིན་ཞིག །ལུས་ཀྱི་རྒྱན་དང་བྱི་དོར་བྲལ། །སྨྱོན་པ་ལྟ་བུར་འགྱུར་བ་ཡིན། །ལས་རླུང་ཕྱེ་དག་ཡེ་ཤེས་གསལ། །ངག་ནི་གཏད་མེད་ཅལ་ཅོལ་སྨྲ། །རླུང་ཆེན་ཆང་གི་ར་རོ་ལྟར། །བག་ཆགས་སྣང་བ་དབྱིངས་སུ་ཐིམ། གདོད་མའི་དབྱིངས་སུ་རྩལ་རྒྱས་སོ། །སེམས་ནི་འབྲུམ་ནད་འབྱང་བ་ལྟར། །འཁོར་བར་མི་ལྡོག་གདིང་ཆེས་སོ། །རྨི་ལམ་མངོན་ཤེས་དག་ཏུ་འཆར། །འབྲས་བུ་དེ་ལྟར་གོང་འཕེལ་དུས། །ལོངས་སྐུའི་ཞིང་ལ་ལོངས་སྤྱོད་པས། །གལ་ཏེ་ཚེའི་དུས་བྱས་ན། །ལྷུན་གྲུབ་སྣང་བ་ཤར་མ་ཐག །སྤྲུལ་པ་འགྱེད་ནས་དོན་བྱེད་དོན། །འདི་ནི་ཉམས་སྣང་གོང་འཕེལ་ཡིན། །གང་ཟག་བརྩོན་པ་རབ་རྣམས་ནི། །ཟླ་བ་གསུམ་ལ་རྩལ་རྫོགས་འགྱུར། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཉམས་སྣང་གོང་འཕེལ་གྱིས་སྣང་བ་དོན་དགུས་བཅིངས་ནས་བསྟན་པའི་ལེའུ་སྟེ་བརྒྱ་དང་དྲུག་པའོ། ། ྅྅྅ ཡུམ་ཆེན་སྟོན་པས་བཀའ་སྩལ་པ། ཉོན་ཅིག་རིག་པའི་རྩལ་འཁོར་རྣམས། །གསུམ་པ་རིག་པ་ཚད་ཕེབ་ཀྱི། །སྣང་བ་འཆར་ཚུལ་བསྟན་པར་བྱ། །ངོ་བོ་ངེས་ཚིག་དབྱེ་བ་དང་། །བསྡུས་དོན་གདམས་པ་རྟགས་ཚད་དང་། །འབྲས་བུ་གྲོལ་ས་དགུ་ཡིན་ཏེ། །ངོ་བོ་གདོད་མ་ཡེ་ཤེས་གསུམ། །དབང་བོས་ཉམས་སུ་ལེན་པ་ཡིན། །ངེས་ཚིག་ཡེ་ནས་རིག་པ་དེ། །ལུས་ངག་ཡིད་ཀྱི་སྟེང་ཉིད་དུ། །རྩལ་སོགས་ཚད་ལ་ཕབ་པའོ། །དབྱེ་ན་ངག་དང་ལུས་དང་སེམས། །རིག་པ་ཚད་ཕེབ་བཞི་ཡིན་ནོ། །དོན་ནི་ད་རུང་ཉམས་བླངས་བས། །འོད་ཟེར་སྟོང་གསུམ་གང་བར་ཁྱབ། །ཐིག་ལེ་ཆེན་པོ་གཅིག་གིས་ནང་། །ལྔ་ལྡན་ཚོམ་བུ་ལྔའི་བརྒྱན། །རིགས་ལྔ་ཡབ་ཡུམ་དབུས་སུ་རྫོགས། །སེམས་དཔའ་སེམས་མའི་འཁོར་གྱིས་བསྐོར། །ལུ་གུ་རྒྱུད་ཀྱི་བར་མཚམས་སུ། །ཞི་ཁྲོ་མ་ངེས་དུ་མ་ཡིས། །ཏིལ་གང་ཁ་ཕྱེས་ལྟ་བུར་གང་། །ཉིན་མཚན་གཉིས་ཀྱིས་སྣང་བ་ནུབ། །དག་པའི་སྣང་བ་འཁོར་ཡུག་འཆར། །རི་བྲག་ཀུན་ལ་ཟང་ཐལ་བ། །ཉམ་ང་བག་ཚ་མེད་པ་རུ། །སྤྱན་དང་མངོན་ཤེས་ཡོན་ཏན་འཆར། །དུག་མཚོན་འབྱུང་བའི་རྫི མི་ནུས། ཕྱི་ནང་རང་སའི་གཟུང་འཛིན་ཟད། །ནང་གི་རླུང་སེམས་ཚད་ལ་ཕེབ། །རྫུ་འཕྲུལ་རྣམ་པ་སྣ་ཚོགས་སྟོན། །རླུང་ལ་ཡོན་ཏན་འཐབ་རྩོད་ཡིན། །སེམས་ལ་རང་དབང་ཐོབ་པའི་རྟགས། །བེམ་པོ་ལ་སོགས་སྣང་བ་ལ། །རིག་པ་གང་ཚུད་འགུལ་བ་དང་། །སྐད་འབྱིན་ཆོས་སྨྲ་ལ་སོགས་དང་། །ཟས་གོས་དག་དང་བྲལ་བའོ། །ལུས་ཀྱང་རེས་ན་འོད་དུ་གྲོལ། །དབུས་སུ་ཡི་གེ་ཨ་དང་གནས། །རིག་པའི་དངོས་པོ་ཐམས་ཅད་ཀུན། །ལོངས་སྐུའི་ཞིང་དུ་རང་སྣང་ངོ་། །སྤྱི་གཙུག་རླུང་གིས་འདེགས་པ་ན། །ཁྲོ་བོ་ཐམས་ཅད་རྫོགས་པར་འཆར། །ལུས་ཀྱི་བ་སྤུ་རེ་རེ་ལ། །སངས་རྒྱས་ཞིང་ཁམས་བརྗོད་མེད་འཆར། །འདི་ནས་བྷཻཾ་ན་རང་གྲོལ་ལོ། །འབྲས་བུ་ཐོབ་པར་ཐེ་ཚོམ་མེད། །དེ་ཚེ་ཉམས་བླང་གདམས་པ་ནི། །རིག་པ་གང་ལ་སྣ་མི་སྐྱིལ། །རིག་རླུང་ཁྱད་མེད་རོལ་པར་ཁྱེར། །སྤྱོད་པ་ཉི་ཤུ་རྩ་གཅིག་སྤྱོད། །རྟགས་ཚད་ལས་རླུང་དག་པ་ཡིས། །འབྱུང་བ་ལྔ་ལ་ཆགས་པ་མེད། །ངག་ནི་ཅི་སྨྲ་ཆོས་སུ་འོང་། །སེམས་ནི་འབྲས་བུ་མ་ཐོགས་ཐིམ། །འཁོར་བར་མི་འཁྱམས་གདིང་ཆེན་ཆོས། །འབྲས་བུ་སྣོད་རྣམས་དག་བའི་ཞིང་། །ནང་བཅུད་ཞི་ཁྲོའི་ལྷ་རུ་གྲོལ། །རང་ལུས་ཉིད་ནི་འཇའ་འོད་ཡལ། །ལྷག་མ་མེད་པར་སངས་རྒྱས་སོ། །འགྲོ་བ་འདི་ནས་རྩོལ་བ་ཞིག །རང་གྲོལ་ཆེན་པོར་སངས་རྒྱས་སོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རིག་པ་ཚད་ཕེབ་ཀྱི་སྣང་བ་དོན་དགུས་བཅིངས་ནས་བསྟན་པའི་ལེའུ་སྟེ་བརྒྱ་དང་བདུན་པའོ། །྅྅྅ ཡང་གཅིག་སྟོན་པས་བཀའ་སྩལ་པ། ཉོན་ཅིག་རིག་རྩལ་མཁའ་འགྲོ་རྣམས། །བཞི་པ་ཆོས་ཟད་ཀ་དག་ནི། །སྣང་བའི་འཆར་ཚུལ་བསྟན་པར་བྱ། །ངོ་བོ་ངེས་ཚིག་དབྱེ་དང་བསྡུ། །དོན་དང་གདམས་པ་རྟགས་དང་ཚད། །འབྲས་བུ་གྲོལ་ས་དགུ་ཡིན་ཏེ། །ངོ་བོ་གཞི་ཐོག་བཙན་ས་ཟིན། །སེང་གེས་གངས་ལ་ཟིན་པ་འམ། །བཅོ་ལྔའི་ཟླ་བ་ཉ་གང་འདྲའ། །ངེས་ཚིག་གཉིས་ཆོས་ཐམས་ཅད་ཟད། །དབྱེ་ན་ཆོས་ཟད་བློ་ཟད་དང་། །འཕེལ་ཟད་ཉམས་ཟད་བཞི་ཡིན་ཏེ། །བསྡུ་ན་ཆོས་རྣམས་ཟད་པར་འདུས། །དོན་ནི་གོང་གི་འཕེལ་རྒྱུ་ཟད། །འཁོར་འདས་ཆོས་རྣམས་རེ་དོགས་བྲལ། །ཕུང་པོ་གདོས་བཅས་འདི་ཉིད་ཀྱིས། །བག་ཆགས་རྐྱེན་དབང་ཐམས་ཅད་ཟད། །མ་དག་རིགས་དྲུག་སྣང་ཚུལ་དག །དག་པའི་ཞིང་ཁམས་ངང་གིས་གསལ། །དེའི་དུས་ཀྱི་གདམས་པ་ནི། །རང་གི་ལག་སོར་འཇའ་འོད་དུ། །བཀྲམ་པ་ཙམ་ལ་ལུས་བརྟེན་ནས། །རིག་པ་དེ་ལ་ཅུང་ཙམ་གཏད། །ལུས་ནི་ཆུ་ནང་ཟླ་ལྟར་སྣང་། །ངོ་བོ་མེད་པར་རང་ལོག་ནས། །སེམས་ཅན་ཚོགས་རྣམས་མ་ཟད་བར། །སྐྱེ་དང་འཇུག་པའི་དབང་གསུམ་གྱིས། །འགྲོ་བ་གྲོལ་བའི་ཕྲིན་ལས་མཛད། །འཕོ་བ་ཆེན་པོར་བཞེངས་བའོ། །གལ་ཏེ་ལག་སོར་མ་གཏད་ན། །སྐད་ཅིག་ན་བུན་ཡལ་བ་ལྟར། །ཕྱི་ནང་འོད་ལུས་དེ་ཡལ་ནས། །དཔེར་ན་གནམ་སྟོང་ཟླ་བ་ལྟར། །བྲི་གང་མེད་ཀྱང་མི་མངོན་བཞིན། །ལྷག་མ་མེད་པར་སངས་རྒྱས་སོ། །རྟག་ཏུ་གཤེད་མས་གནོད་མི་ནུས། །ངག་ནི་ཟུངས་ཟད་བྲག་ཆ་འདྲ། །དབྱིངས་ནི་བག་ཆགས་དབྱིངས་སུ་ཡལ། །གཞི་སྣང་འཇའ་དེ་ཙམ་ཡང་ཐིམ། །འདི་དུས་ཆོས་རྣམས་ཟད་པ་ཡིན། །འབྲས་བུ་སྐུ་གསུམ་ལྷུན་གྱིས་གྲུབ། །མངོན་སུམ་གོང་འཕེལ་རྣམ་གཉིས་ཀྱིས། །འདོད་ཁམས་སྟོངས་ཞིང་སྤྲུལ་སྐུར་གྲོལ། །རིག་པ་ཚད་ལ་ཕེབ་པ་ཡིན། །གཟུགས་ཁམས་སྟོངས་ནས་ལོངས་སྐུར་གྲོལ། །ཆོས་རྣམས་ཟད་པར་གྱུར་པ་ཡིན། །གཟུགས་མེད་ཁམས་རྣམས་ཆོས་སྐུར་ཐིམ། །གྲོལ་ས་ཡེ་གྲོལ་ད་ལྟར་ཉིད། །སྐུ་གསུམ་རང་ཆས་རྩལ་རྫོགས་པས། །འོད་གསལ་གཞི་སྣང་མཐའ་རུ་ཕྱིན། །ཡིན་ལུགས་དྲི་བྲལ་རྗེན་པར་ཐོབ། །ཐེག་པ་ཀུན་གྱི་མཐར་ཐུག་མཆོག །ཀུན་བཟང་མཁའ་འགྲོའི་སྙིང་ཁྲག་ཡིན། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཆོས་རྣམས་ཟད་པའི་སྣང་བ་འཆར་ཚུལ་དོན་དགུས་བཅིངས་ནས་བཤད་པའི་ལེའུ་སྟེ་བརྒྱ་དང་བརྒྱད་པའོ། །྅྅྅ སྟོན་པས་འཁོར་ལ་བཀའ་སྩལ་པ། །ཉོན་ཅིག་རིག་རྩལ་མཁའ་འགྲོ་རྣམས། ཁྲེགས་མ་ཆོད་ན་ཐོད་མི་རྒལ། །ཐོད་མི་རྒལ་ན་ཁྲེགས་མི་ཆོད། །གཉིས་མེད་ཉམས་སུ་ལེན་པ་ལ། །སྣང་བཞི་རིམ་གྱིས་འཆར་ཐབས་ཀྱི། །རྒྱབ་བརྟེན་འདི་ཉིད་བསྟན་པར་བྱ། །དེའི་དང་པོ་འདི་ལྟ་སྟེ། །མི་འགུལ་གསུམ་ལ་གཞི་བྱས་པས། །རླུང་སེམས་གནད་ལ་ཕེབ་པ་ཡིན། །ལུས་ནི་བཞུགས་སྟངས་ལས་མི་འགུལ། །མིག་ནི་གཟིགས་སྟངས་ལས་མི་འགུལ། །རིག་པ་དབྱིངས་ལས་འགུལ་མི་བྱ། །ལུས་མ་འགུལ་བས་རྩ་མི་འགུལ། །རྩ་མི་འགུལ་བས་མིག་མི་འགུལ། །མིག་མི་འགུལ་བས་དབྱིངས་མི་འགུལ། །ལུས་མ་འགུལ་བའི་ཡོན་ཏན་ཡིན། །རླུང་མི་འགུལ་བས་སེམས་མི་འགུལ། །སེམས་མི་འགུལ་བས་རྣམ་རྟོག་འགག །རྣམ་རྟོག་འགགས་པས་དབྱིངས་རིག་གསལ། །རླུང་མི་འགུལ་བས་ཡོན་ཏན་ཡིན། །མིག་མ་འགུལ་བས་ལུས་མི་འགུལ། །ལུག་རྒྱུད་མི་འགུལ་ཁྲེགས་ཆོད་རྟོགས། །ཁྲེགས་ཆོད་གནས་ནས་སྣང་བ་མཆེད། །སྒྲོན་བཞི་དབྱེར་མེད་འདྲེས་པའི་རྟགས། །མིག་མ་འགུལ་བའི་ཡོན་ཏན་ཡིན། །སྒྲོན་བཞི་དབྱེར་མེད་འདི་ལྟ་སྟེ། །སྙིང་ནང་འོད་གསལ་རིག་པའི་གདངས། །རྒྱང་ཞག་ཆུ་སྒྲོན་སྒོ་ལས་གསལ། །དབྱིངས་སྒྲོན་ཞིང་ཁམས་རྒྱ་ཆེའི་ནང་། །སྟོང་སྒྲོན་མུ་ཁྱུད་ལྔ་ལྡན་འཆར། །ཤེས་རབ་རང་བྱུང་སྒྲོན་མ་ཉིད། །ཇི་ལྟ་བ་ཉིད་རང་གི་ཤེས། །ཇི་སྙེད་པ་ཞིག་དུས་གཅིག་ཤེས། །གསལ་སྟོང་ཞི་ལྷག་དབྱེར་མེད་པ། །སྣང་བའི་རིག་པ་དབང་མེད་འཕྲོག །རིག་པས་སྣང་བ་དབང་མེད་བཀྲམ། །སྣང་སྲིད་སིལ་བླུག་དེར་རྟོགས་ནས། །འཁོར་བ་ཀ་ནས་འདིར་དག་གོ། །དེ་ལྟར་ཉམས་བླང་སྣོད་གསུམ་འབྱུང་། །ཕྱི་ནང་ཆོས་རྣམས་ཡེ་སྟོང་ཤེས། །ཁྲེགས་ཆོད་ཐོད་རྒལ་དབྱེར་མེད་པས། །ཕྱིའི་སྣང་བ་སྡོད་པའི་ཕྱིར། །རྐྱེན་ངན་གྲོགས་སུ་འཆར་བ་ཡིན། །ནང་གི་ཕུང་པོ་སྡོད་པའི་ཕྱིར། །བཞུགས་སྟངས་དག་ལས་མི་གཡོའོ། །གསང་བའི་རླུང་སེམས་སྡོད་པའི་ཕྱིར། །རྣམ་རྟོག་འཁྲུག་པ་རང་འགགས་སོ། །རྟགས་ནི་སྒོ་གསུམ་དག་ལས་འབྱུང་། །རབ་ནི་ཕུང་པོ་ལྷག་མ་མེད། །འབྲིང་ནི་འཕོ་བ་ཆེན་པོ་ཐོབ། །ཐ་མ་རྫུ་འཕྲུལ་སྣ་ཚོགས་སྟོན། །དེ་ནི་ལུས་ཀྱི་རྟགས་ཚད་དོ། །རབ་ནི་ཆོས་ཀྱི་དབྱིངས་སུ་བསྒྲགས། །འབྲིང་ནི་མངོན་ཤེས་སྣ་ཚོགས་སྨྲ། །ཐ་མ་ལྐུག་པ་ལྟ་བུའི། །དེ་བཞིན་ངག་གི་རྟགས་ཚད་དོ། །རབ་ནི་སྤྲོས་བྲལ་ཆོས་ཀྱི་སྐུ། །འབྲིང་ནི་གསལ་སྟོང་ལོངས་སྤྱོད་རྫོགས །ཐ་མ་ཤར་གྲོལ་ལྷུག་པ་དེས། །དེ་ནི་སེམས་ཀྱི་རྟགས་གསུམ་ཡིན། །ཚད་ནི་རྨི་ལམ་འཛིན་པ་སྟེ། །རབ་ནི་རྨི་ལམ་འོད་གསལ་འདྲེས། །འབྲིང་ནི་རྨི་ལམ་མངོན་ཤེས་འཆར། །ཐ་མ་རྨི་ལམ་རང་གྲོལ་ཙམ། །དེ་ནི་རྨི་ལམ་ཚད་བཟུང་ཡིན། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རྒྱབ་བརྟེན་གྱི་གདམས་པ་བསྟན་པའི་ལེའུ་སྟེ་བརྒྱ་དང་དགུ་པའོ། །྅྅྅ ཀུན་བཟང་ཡུམ་གྱིས་བཀའ་སྩལ་བ། དེ་ལྟར་ཉམས་སུ་བླང་བའི་ཚེ། །ངང་ངམ་ཤུགས་ལ་མ་འབད་ཀྱང་། །ཐོབ་པ་གསུམ་གྱི་གཟེར་ཐེབས་འགྱུར། །ཕྱིའི་སྣང་བས་དབང་ཐོབ་པས། །སྣང་རྐྱེན་ཞིང་ཁམས་ཉིད་དུ་གྲོལ། །ནང་གི་ལུས་ལ་དབང་ཐོབ་པས། །ཕུང་པོ་འོད་གསལ་ཉིད་དུ་གྲོལ། །གསང་བའི་རླུང་སེམས་དབང་ཐོབ་པས། །ཀུན་རྟོག་ཆོས་དབྱིངས་ངང་དུ་གྲོལ། །མངོན་ཤེས་དཔག་མེད་འཆར་བ་ཡིན། །དེ་ལ་གོམས་པའི་རྣལ་འབྱོར་པས། །དང་པོ་གར་སྐྱེས་དབང་ཐོབ་སྟེ། །རང་ལུས་འོད་སྐུར་གསལ་བའི་ཚེ། །འཕོ་བ་ཆེན་པོའི་སྐུ་འདོད་ན། །རང་གི་ལག་སོར་ཤེས་པ་གཏད། །སྣང་འཛིན་རང་ལོག་འབྱུང་སྒྲ་ལྔ། །སིལ་སྒྲ་ཤང་སྒྲ་དུ་མ་ཐོས། །མི་འམ་སེམས་ཅན་གང་འདོད་དུ། །རིག་པར་བཅུག་སྟེ་སྤྲུལ་པར་ནུས། །འདི་ལྟར་རང་དབང་ཐོབ་དུས་སུ། །རིག་པ་བེམ་པོའི་ནང་དུ་བཅུག །དེ་ཡང་འགུལ་དང་སྐད་འབྱིན་ནུས། །གང་ཟག་མཚམས་མེད་ལྔ་སྤྱད་པས། །སྡིག་སྤྱད་རྣམས་ཀྱི་སྐད་ཐོས་ཀྱང་། །མོས་གུས་སྐྱེས་ནས་སྡིག་པ་བྱང་། །སྡུག་བསྔལ་གྲོལ་ནས་སངས་རྒྱས་ཐོབ། །གང་ཟག་གི་བཤན་པ་མུ་སྟེགས་ལ། །རིག་པ་བཅུག་པས་བདེན་པའི་མཐུས། །བཟང་ངན་མེད་པར་གྲོལ་བ་དང་། །གཞན་དོན་དཔག་མེད་འབྱུང་བར་འགྱུར། །སྐྱེས་ནས་རང་དབང་ཐོབ་པའོ། །གཉིས་པ་འཇུག་པ་དབང་ཐོབ་པས། །རང་རང་ལག་སོར་འཇའ་འོད་ལ། །རིག་པ་བཅུག་གཏད་རང་ལུགས་བཞག །དེ་ཉིད་ཟག་བཅས་མི་སྣང་བར། །ལྷུན་གྲུབ་སྦུབས་སུ་རང་ཐིམ་མོ། །གཞན་ཡང་ཐུབ་དྲུག་ལྟ་བུ་འམ། །ཞི་ཁྲོ་ལ་སོགས་ཞིང་ཁམས་སུ། །གང་ལྟར་དྲན་པ་དེར་འཇུག་གོ། །དེའི་རྫུ་འཕྲུལ་ཐུགས་རྗེ་དང་། །མཐུ་རྩལ་ཐམས་ཅད་དུས་གཅིག་རྫོགས། །སེམས་ཅན་དོན་ཀུན་བྱེད་པའོ། །གསུམ་པ་རླུང་སེམས་ལས་རླུང་རྟགས། །སེམས་ཅན་གང་དག་ཚེ་འཕོས་པས། །དེ་ལ་རིག་པ་ཧྲིག་གེ་བཅུག །མངོན་སངས་རྒྱས་པའི་རྟགས་རྣམས་འབྱུང་། །སྡིག་པོ་ཆེ་དང་མུ་སྟེགས་སོགས། །ཇི་ལྟ་བུ་ཞིག་ཡིན་གྱུར་ཀྱང་། ལས་ལ་བཟང་ངན་མེད་པ་རུ། །རང་དང་དབྱེར་མེད་སངས་རྒྱས་པས། །རྟགས་རྣམས་མངོན་སུམ་གསལ་བའོ། །མངོན་པར་ཤེས་པ་ཐོགས་མེད་འཆར། །རི་བྲག་ཀུན་ལ་ཟང་ཐལ་རྒྱུ། །འབྱུང་བཞི་དུག་མཚོན་གནོད་པ་མེད། ས་ལམ་དུས་གཅིག་རྫོགས་པའི་རྟགས། །དེ་རྣམས་ཐོབ་གསུམ་གཟེར་གསུམ་ཡིན། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཐོབ་གསུམ་གཟེར་གསུམ་བསྟན་པའི་ལེའུ་སྟེ་བརྒྱ་དང་བཅུ་ཐམ་པའོ། །྅྅྅ ཡང་ཅིག་སྟོན་པས་བཀའ་སྩལ་པ། ཉོན་ཅིག་རིག་མདངས་རྩལ་འཁོར་རྣམས། །དེ་ལྟར་ཉམས་བླངས་མཐར་ཐུག་ཚད། །ཇི་ལྟར་བརྗོད་ཚིག་མང་ན་ཡང་། །མི་འགྱུར་གདིང་ཅན་བཞི་རུ་འགྱུར། །དེ་ཡང་ཡར་གདིང་རྣམ་པ་གཉིས། །མར་གདིང་གཉིས་དང་བཞི་ཡིན་ནོ། །དཀོན་མཆོག་ཡོན་ཏན་ལ་སོགས་པས། །བྲོད་པ་སྐྱེ་རུ་རྡུལ་ཙམ་མེད། །རང་རིག་སངས་རྒྱས་ཐག་ཆོད་པས། །གདེང་ཆེན་དེ་ཉིད་ཆོས་པའོ། །ཡར་གྱི་སངས་རྒྱས་ལ་རེ་བ་མེད། །ཅི་ཕྱིར་རང་སྣང་རང་དག་པས། །སངས་རྒྱས་གཞན་མེད་ཐག་ཆོད་པས། །གདིང་ཆེན་དེ་ཉིད་ལོན་པའོ། །དམྱལ་བ་ལ་སོགས་སྡུག་བསྔལ་ལ། །སྔངས་སྐྲག་འཇིགས་པ་ཀུན་དང་བྲལ། །ཅི་ཕྱིར་རང་སྣང་རང་གྲོལ་དུ། །ཐག་ཆོད་གདིང་ཆེན་ལོན་པའོ། །ངན་སོང་འཁོར་བ་དོང་ཕྱིན་ནས། །ལོག་གི་དོགས་པའི་སྡུག་བསྔལ་མེད། །ཅི་ཕྱིར་ཡེ་ནས་སྐུ་གསུམ་དང་། །ཐག་ཆོད་གདིང་ཆེན་ལོན་པའོ། །བདེ་ཆེན་འདི་ལོན་སྐྱེས་བུ་དེས། །མ་རྙེད་པ་ཡི་ནོར་བུ་རྙེད། །རྒྱ་མཚོ་ཆེན་པོ་ཧུབ་གྱིས་བཏབ། །སྲིད་བའི་རི་བོ་སྤང་བ་སྟེ། །ཀུན་བཟང་བྷ་ག་རྒྱ་ཡིས་ཐེབ། །མངའ་ཁ་སྟོང་པར་བཞག་པ་ཡིན། །དེ་ལྟར་ང་ཡིས་བཤད་པ་ལྟར། །འཆུག་མེད་ཉམས་སུ་བླངས་བས་ན། །ཉིན་ཞག་ཆུ་ཚོད་དྲུག་ཅུ་ཐོབ། །རླུང་ནི་ཉི་ཁྲི་གཅིག་སྟོང་དང་། །དྲུག་བརྒྱའ་དང་ནི་ཞག་གཅིག་རྒྱུ། །དེ་ནས་བུམ་ཆེན་བདུན་བདུན་བྷཻཾ། །བརྩོན་འགྲུས་རབ་ཀྱིས་ལོ་གསུམ་ལ། །ལྷག་མེད་རྡོ་རྗེ་འོད་སྐུ་ཐོབ། །འབྲིང་ལྔ་ཐ་མ་བདུན་གཉིས་ལ། །ལོངས་སྤྱོད་རྫོགས་སྐུར་གྲོལ་བར་ངེས། །ནམ་མཁའི་ཁྱབ་ཚད་སེམས་ཅན་འདྲེན། །སྤྲུལ་སྐུར་སྟོན་པ་ཐེ་ཚོམ་མེད། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། མཐར་ཐུག་གདིང བཞིའི་གྲོལ་ཚུལ་བསྟན་པའི་ལེའུ་སྟེ་བརྒྱ་དང་བཅུ་གཅིག་པའོ། །྅྅྅ ཀུན་བཟང་ཡུམ་གྱིས་བཀའ་སྩལ་པ། ཉོན་ཅིག་རིག་པའི་རྩལ་འཁོར་ལྔ། །དེ་ལྟར་གདིང་ལོན་རྣལ་འབྱོར་པས། །ཡང་དག་རྫོགས་པའི་སངས་རྒྱས་དང་། །མངོན་པར་རྫོགས་པའི་སངས་རྒྱས་གཉིས། །ངེས་པར་གཅིག་ཐོབ་ཐེ་ཚོམ་མེད། །དེ་ལ་དང་པོ་ཡང་དག་པའི། །སངས་རྒྱས་ཐོབ་ཚུལ་འདི་ལྟ་སྟེ། །ཕུང་པོ་ལྷག་མ་མེད་པ་རུ། །ཐོག་མའི་ཀུན་བཟང་ངང་ཉིད་དུ། །ངོ་བོ་སྟོང་པ་སྐུ་རུ་རྒྱས། །རང་བཞིན་གསལ་བ་འོད་དུ་རྒྱས། །ཐུགས་རྗེ་ཀུན་ཁྱབ་ཟེར་དུ་རྒྱས། །ཡེ་ཤེས་སྤྱན་གྱིས་འཁོར་འདས་གསལ། །དབྱིངས་སུ་ཡེ་ཤེས་འཁྱིལ་པ་སྟེ། །ནང་གསལ་སྐུ་དང་ཡེ་ཤེས་ལས། །འདུ་འབྲལ་མེད་པར་རྟག་པ་དང་། །བསྟན་པ་མི་འགྱུར་གཡུང་དྲུང་དང་། །མི་ཤིག་རྡོ་རྗེ་སྲ་བརྟན་དང་། །འཕོ་འགྱུར་མེད་པར་བཞུགས་པའོ། །སེམས་ཅན་ངོ་ལ་སྤྲུལ་པ་ཤར། །འབད་རྩོལ་མེད་དེ་རང་རྡོལ་ཡིན། །རོ་སྙོམས་འདྲེས་པའི་དཔེའ་བཞག་ན། །བུམ་ཆག་ནམ་མཁའ་འདྲེས་པ་འདྲ། །རང་གསལ་ཉི་མའི་དཀྱིལ་འཁོར་རྒྱས། །ཉིན་མཚན་གསལ་འགྲིབ་མེད་པར་མཚོན། །ཡེ་ཤེས་དབྱིངས་སུ་ཞི་བའི་དཔེའ། །བཅོ་ལྔའི་ཟླ་བ་ཉ་གང་ལྟར། །ལོངས་སྐུའི་ཞིང་ལ་ཕྱིར་ལ་གསལ། །སྐུ་དང་ཡེ་ཤེས་འདུ་འབྲལ་མེད། །གནམ་གང་ཟླ་བ་ཇི་ལྟ་བུར། །ཆོས་སྐུའི་དབྱིངས་སུ་རོ་གཅིག་གོ། །སྤྲུལ་སྐུ་ཆུའི་ཟླ་བ་ལྟར། །ཟླ་བ་མཁའ་ལས་མ་གཡོས་ཀྱང་། །ཆུ་སྣོད་སོ་སོར་སྣང་དང་མཚུངས། །སྐུ་གསུམ་དབྱིངས་ལས་མ་གཡོས་ཀྱང་། །སྤྲུལ་སྐུའི་ཞིང་དུ་རིགས་ལྔ་འམ། །རིགས་དྲུག་གནས་སུ་ཐུབ་དྲུག་སོགས། །སེམས་ཅན་སོ་སོའི་ངོ་ཁར་སྣང་། །འདི་ཉིད་ངོ་བོ་རང་བཞིན་དང་། །ཐུགས་རྗེ་མཛད་པ་དཔེ་རུ་བསྟན། །གདོད་མའི་ཡེ་ཤེས་གསུམ་ལྡན་དུས། །འཁོར་འདས་གཉིས་སུ་མ་ཆད་པས། །ལུང་མ་བསྟན་དུ་མེད་པ་ཡིན། །སེམས་ཅན་དུས་སུ་འཁྲུལ་གྱུར་པ། །ཁམས་དང་དྲི་མར་བཅས་པ་དག །སླར་ལ་རང་ངོ་རང་གི་ཤེས། །དག་པ་གཉིས་ལྡན་སངས་རྒྱས་ཏེ། །དྲི་མེད་ཕྱིར་མི་ལྡོག་པའི། །འབྲས་བུ་སྐུ་གསུམ་ཞེས་སུ་བརྗོད། །དག་པ་གཉིས་ལྡན་ཞེས་པ་ནི། །གཞི་ནི་ཀ་དག་ཆེན་པོ་ལ། །ལམ་ནི་ཁམས་དང་དྲི་བཅས་དག །ཡང་ན་ཉོན་མོངས་དྲི་མ་དང་། །ཤེས་བྱའི་དྲི་མ་དག་པའོ། །གཞི་དང་འབྲས་བུའི་ཁྱད་པར་ནི། །ས་ལེ་སྦྲམ་ཞིག་གཡའ་སྦྱངས་སམ། །ཏིལ་འབྲུ་མར་ཁུར་བཙིར་དང་མཚུངས། །ཀུན་གཞི་ཉོན་ཡིད་བཅས་པ་སངས། །ཡེ་ཤེས་ལྔ་དང་སྐུ་ལྔ་རྒྱས། །འཁོར་བ་སྤངས་ནས་རང་རིག་རྟོགས། །སྤང་རྟོགས་མཐར་ཕྱིན་སངས་རྒྱས་སོ། །དེ་ཚེ་ནང་དབྱིངས་ཡེ་ཤེས་གནས། །སྟོན་པ་རིག་སྟོང་ཀུན་བཟང་དང་། །འཁོར་ནི་ཡེ་ཤེས་རྒྱ་མཚོ་ལས། །དུས་ནི་འཕོ་འགྱུར་མེད་པའི་ཚེ། །ཆོས་ནི་འོད་གསལ་རྫོགས་པ་ཆེ། །རང་ཆས་རྒྱུན་ཆད་མེད་པར་སྟོན། །སངས་རྒྱས་འོད་མི་འགྱུར་ཞེས་བྱ། །ངོ་བོ་ཀ་དག་རྩལ་རྫོགས་པས། །ཆོས་སྐུ་དག་པའི་ཡེ་ཤེས་ཐོབ། །རང་བཞིན་ལྷུན་གྲུབ་རྩལ་རྫོགས་པས། །ལོངས་སྐུ་རང་གསལ་ཡེ་ཤེས་ཐོབ། །ཐུགས་རྗེ་རིག་པའི་རྩལ་རྫོགས་པས། །སྤྲུལ་སྐུ་མ་འགགས་ཡེ་ཤེས་ཐོབ། །རང་སྣང་དག་པའི་ཞིང་ཁམས་ལྔར། །སྟོན་པ་རིགས་ལྔའི་ཆ་ལུགས་ལས། །ཞི་ཁྲོའི་ཚོམ་བུ་དཀྱིལ་འཁོར་རྒྱས། །དུས་ནི་འོད་གསལ་ཡངས་པའི་ཚེ། །ཆོས་ནི་ལྷུན་གྲུབ་བདེ་ཆེན་ཚིག །མི་གཡོས་རྒྱུན་ཆད་མེད་པར་གསུང་། །མེ་ལོང་མཉམ་ཉིད་སོ་སོར་རྟོགས། །བྱ་བ་གྲུབ་པ་ཆོས་ཀྱི་དབྱིངས། །ཡེ་ཤེས་ལྔ་ཡི་རྣམ་པ་ཡིས། །མཚན་དང་དཔེ་བྱད་དཔལ་འབར་བ། །ལྟ་བ་མི་སྐྱོའི་ཚུལ་དུ་བཞུགས། །དེའི་ངང་ལས་མ་གཡོས་པར། །འགྲོ་བ་རིགས་དྲུག་ཞིང་ཁམས་སུ། །མཆོག་སྤྲུལ་ཐུབ་དྲུག་ལ་སོགས་པ། །འདས་དང་མ་འོངས་དུས་གསུམ་དུ། །མ་ངེས་སེམས་ཅན་སྣ་ཚོགས་ལས། །ཆོས་ནི་ཐེག་པ་སྣ་ཚོགས་ལས། །དབྱངས་ཀྱི་ཡན་ལག་དྲུག་ཅུ་སྟོན། །སྟོན་པ་དེད་དཔོན་རྐང་གཉིས་གཙོ། །འགྲོ་འདུལ་ཚད་མེད་ཅེས་བྱའོ། །ཡེ་ཤེས་ལྔ་ཡང་གཉིས་སུ་འདུས། །ཇི་ལྟ་མཁྱེན་པའི་ཡེ་ཤེས་ཀྱིས། །ཆོས་ཉིད་རོ་སྙོམས་རྫོགས་ཆེན་རྟོགས། །ཇི་སྙེད་མཁྱེན་པའི་ཡེ་ཤེས་ཀྱིས། །ཆོས་ཅན་སྣ་ཚོགས་མ་འདྲེས་རྟོགས། །གཉིས་མེད་ལྷུན་མཉམ་ཆེན་པོ་ཡིས། །འགྲོ་བའི་ཁམས་དང་མོས་བ་ལས། །ཇི་ལྟར་འཚམས་པར་དོན་བྱེད་དོ། །དེ་ལྟར་དབྱིངས་ཆེན་ཆོས་སྐུ་ལས། །སྐུ་གསུམ་ཡེ་ཤེས་འདུ་འབྲལ་མེད། །དེ་རྣམས་མིང་ཚིག་མ་ཕྱེ་ཡང་། །སོ་སོ་མ་ཡིན་ཐ་མི་དད། །རྒྱལ་བ་གཅིག་གི་དགོངས་པ་ཉིད། །སྟོང་གསུམ་ཡུང་འབྲུར་འུབ་ཀྱིས་ཚུད། །ཉུང་འབྲུས་སྟོང་གསུམ་ཁྲིག་གེ་གང་། །ཉུང་འབྲུ་ཆེ་རུ་སོང་བ་མེད། །སྟོང་གསུམ་ཆུང་དུ་སོང་བ་མེད། །རང་ཤར་འདུ་འབྲལ་མེད་པ་ནི། །དཔེར་ན་ཉི་མའི་སྙིང་པོ་དང་། །འོད་དང་དྲོད་དང་ཤེས་རབ་ཀྱིས། །འདི་ནི་ཡང་དག་སངས་རྒྱས་ཏེ། །རྒྱ་རུ་མེད་པས་སངས་རྒྱས་ཐོབ། །འདའ་རུ་མེད་པས་མྱ་ངན་འདས། །ཡང་དག་སངས་རྒྱས་ཡང་སངས་རྒྱས། །སྤྲུལ་པ་པོ་གཅིག་འདིར་སངས་རྒྱས། །འཁྲུལ་ཆགས་ལུས་ཀྱང་འོད་དུ་ཡལ། །འདི་ནི་འབྲས་བུ་ཐོབ་ཚུལ་ལོ། །ཞེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུ་ལས། ཡང་དག་པར་རྫོགས་པའི་སངས་རྒྱས་ནས། སྐུ་གཉིས་སམ་གསུམ་གྱིས་འཁོར་བ་དོང་ནས་སྤྲུགས་ཚུལ་གྱི་ལེའུ་སྟེ་བརྒྱ་དང་བཅུ་གཉིས་པའོ། །྅྅྅ ཡང་ཅིག་སྟོན་པས་བཀའ་སྩལ་པ། །ཉོན་ཅིག་རིག་རྩལ་མཁའ་འགྲོ་རྣམས། །ངེས་པར་བཤད་ཀྱིས་བློ་ལ་ཟུངས། །སྣང་བཞི་ཉམས་བླང་རྣལ་འབྱོར་ལ། །དཔེར་ན་སངས་རྒྱས་སྟོང་རྩ་འམ། །ཁྱད་པར་ཤཱཀྱ་ཐུབ་པ་ལྟར། །མཛད་པ་སྣ་ཚོགས་ཚུལ་བསྟན་ནས། །ཐ་མ་མངོན་པར་སངས་རྒྱས་ཏེ། །འཇའ་དང་འོད་དང་སྒྲ་དང་གདུང་། །སྐུ་དང་ཡི་གེ་ས་གཡོས་དང་། །ནམ་མཁའ་སྤྲིན་མེད་དག་ལ་སོགས། །ཕྱི་རབས་སྤྲོ་བ་སྐྱེ་བ་དང་། །སོ་སོ་སྐྱེ་བོ་ཐ་མལ་དང་། མུ་སྟེགས་སྟོན་གོལ་མུ་རྟུག་རྣམས། །མངོན་དུ་རྫོགས་པར་སངས་རྒྱས་རྟགས། །ཐབས་ཀྱིས་འདྲེན་ཕྱིར་འབྱུང་བ་ཡིན། །དེ་ཡང་འདོད་པས་འགྲུབ་པ་མིན། །རིག་སྣང་ཆོས་ཉིད་བདེན་པའི་མཐུས། །རོལ་པ་ཙམ་དུ་ཤར་བ་ཡིན། །རྟགས་ཤར་བཟང་དུ་སོང་བ་མེད། །མ་ཤར་ངན་དུ་སོང་བ་མེད། །འོན་ཀྱང་མི་བསླུ་ཚད་དུ་འཇོག །གང་དག་མྱ་ངན་འདས་པ་ན། །ནམ་མཁའ་དངས་ཞིང་སྤྲིན་སེར་མེད། །ཆོས་སྐུ་ཐོབ་པའི་རྟགས་ཚད་ཡིན། །རུས་པ་དག་ལ་འཆར་བ་ནི། །ཞི་བའི་སྐུ་འབྱུང་ཞག་ལྔ་ནི། །དབྱིངས་སུ་གྲོལ་བ་ཐེ་ཚོམ་མེད། །ཁྲོ་བོའི་སྐུ་ཉིད་ཤར་བ་ན། །ཁྲོ་བོ་བར་དོར་ཤར་མ་ཐག །གྲོལ་བར་འགྱུར་བ་ཐེ་ཚོམ་མེད། །ཡི་གེ་ཤར་ནས་པད་མའི། །སྣང་ཐག་ཤར་མ་ཐག་ཏུ་གྲོལ། །ཤ་རི་རམ་ནི་དཀར་ལ་དངས། །སྲན་མའི་འབྲུ་ཙམ་རུས་ལ་འབྱུང་། །རྡོ་རྗེ་རིགས་ཀྱི་འབྲས་བུ་ཐོབ། །བ་རི་རམ་ནི་སྔོ་ལ་ནག །སྲན་ཆུང་ཙམ་པ་དྲོད་ལ་འབྱུང་། །བདེར་གཤེགས་རིགས་ཀྱི་འབྲས་བུ་ཐོབ། །ཆུ་རི་རམ་ནི་ཁ་དོག་སེར། །ཉུང་འབྲུ་ཙམ་པ་ཁྲག་ལས་འབྱུང་། །རིན་ཆེན་རིགས་ཀྱི་འབྲས་བུ་ཐོབ། །གསེར་རི་རམ་ནི་དམར་ལ་དངས། །ཉུང་འབྲུ་ཙམ་པ་མཁའ་ལས་འབྱུང་། །པདྨ་རིགས་ཀྱི་འབྲས་བུ་ཐོབ། །ཉ་རི་རམ་པཉྩ་སྔོ་ལྗང་སྟེ། །ཉུང་འབྲུ་ཙམ་པ་ལྔའི་དངས། །གློ་བའི་སྟེང་ནས་འབྱུང་བར་འགྱུར། །ཀརྨ་རིགས་ཀྱི་འབྲས་བུ་ཐོབ། །རིང་བསྲེལ་ལྔ་པོ་གང་བྱུང་ཡང་། །ངེས་པར་སངས་རྒྱས་ཐོབ་པའི་རྟགས། །འབྱུང་བཞིའི་གནོད་པས་ཤིག་མི་འགྱུར། །གཞན་ཡང་པཉྩ་རམ་ཅེས་པས། །འཕྲ་མོ་ངེས་པ་དུ་མ་འབྱུང་། །འདི་ཡང་སྤྲུལ་སྐུ་ངེས་པར་ཐོབ། །འོད་ནི་མུ་ཁྱུད་ཅན་བྱུང་ན། །ཕྱི་དབུགས་ཆད་ཁར་གྲོལ་བར་ངེས། །གལ་ཏེ་གྱེན་ལ་འགྲེང་བ་ན། །འོད་གསལ་ཤར་མ་ཐག་ཏུ་གྲོལ། །འོད་ལྔ་རྩིབ་ཤར་འཇའ་དཀར་འཁྱུགས། །ཆོས་ཉིད་བར་དོར་གྲོལ་ངོ་ཤེས། །འཇའ་སྤྲིན་འོད་དཔུང་མདུང་རྩེ་འདྲ། །ལམ་བྱང་བཞི་པོ་ཤར་མ་ཐག །སྤྲུལ་པ་ཕྱོགས་བཅུར་ཐུབ་དྲུག་སོགས། །མཆོག་གིས་འོད་ཟེར་འགྱེད་པར་བྱེད། །ཤར་དུ་སྒྲ་ནི་འུར་གྲགས་ན། །རྡོ་རྗེའི་རིགས་སུ་སངས་རྒྱས་པའོ། །ལྷོ་རུ་ཐུག་བྱུང་རིན་ཆེན་རིགས། །ནུབ་ཏུ་ལྡིར་བྱུང་པདྨའི་རིགས། །བྱང་དུ་སིལ་སྒྲ་ལས་ཀྱི་རིགས། །ཀུན་ཏུ་འབར་སྒྲ་རྒྱུན་རིང་ན། །བདེར་གཤེགས་རིགས་སུ་སངས་རྒྱས་པའོ། །ཐུག་ཐུག་གྲགས་ན་ཁྲོ་བོ་ལ། །འཇམ་ཤིང་རྒྱུན་རིང་ཞི་བ་ཐོབ། །སྒྲའི་ལོངས་སྐུ་ཐོབ་པ་ཡིན། །སྐྱེ་ཡོད་འཆི་མེད་རྡོ་རྗེའི་སྐུ། །སྤྲུལ་པའི་ཤུགས་ལས་འགྱེད་པའོ། །ས་གཡོས་པའི་དུས་ཚོད་ནི། །དབུགས་དང་མི་འབྲལ་གོང་ཉིད་དུ། །ལོ་དང་ཟླ་བ་ཞག་ལས་འབྱུང་། །འཁོར་དང་སྤྲུལ་པའི་དེད་དཔོན་ཐོབ། །དབུགས་བྲལ་བྱུང་ཚེ་ཉན་ཐོས་ཐོབ། །གསུམ་ཚུད་རང་སངས་རྒྱས་པ་སྟེ། །བདུན་ན་བྱང་ཆུབ་སེམས་དཔའ་ཐོབ། །གསུམ་དུ་བསྟུན་པ་འོད་དང་བཅས། །རིན་ཆེན་བླ་མའི་ས་ནོན་ནོ། །ནམ་མཁའ་དངས་ལ་རླུང་སེར་མེད། །སྤྲིན་ནི་དར་དཀར་ལྟ་བུ་བརྐྱངས། །སྐབས་སུ་གདུགས་ཤམ་པ་ཏྲ་འདྲ། །ཤིན་ཏུ་བཀྲ་ཞིང་གསལ་བ་ལ། །ཉི་ཟླ་འོད་ཁྱིམ་དག་དང་བཅས། །དེ་ཉིད་གང་ལ་བྱུང་བ་དེ། །དེ་ནས་བར་དོ་མེད་པ་རུ། །ཞག་བདུན་སོང་བའི་ཐོ་རངས་ཁར། །རིགས་ལྡན་ཕ་མའི་མངལ་དུ་ཞུགས། །ཆོས་འདི་སྤྱོད་ཅིང་གཞན་དོན་བྱེད། །དེ་བས་རང་སངས་རྒྱས་པའི་རྟགས། །གཞན་ཡང་མེ་འོད་གསལ་བ་དང་། །དུད་པ་གནམ་ལ་འབྲེལ་པ་དང་། །ཕུང་པོ་མཉེན་ཤིང་མདངས་མ་ཤོར། །ཟིལ་པ་དང་བཅས་སྤྱི་གཙུག་འབུར། །ངེས་པར་ལོངས་སྐུ་ཐོབ་པའི་རྟགས། །འདི་ནི་མངོན་པར་སངས་རྒྱས་ཀྱི། །རྟགས་རྣམས་ངེས་བར་བསྟན་པ་ཡིན། །མཁའ་འགྲོ་རྣམས་ཀྱིས་བཀའ་འདི་བཀྲོལ། །ཅེས་གསུངས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུ་ལས། མངོན་པར་སངས་རྒྱས་པའི་རྟགས་ཚད་བསྟན་པའི་ལེའུ་སྟེ་བརྒྱ་དང་བཅུ་གསུམ་པའོ། །྅྅྅ དེའི་ཚེ། དེའི་དུས། འཁོར་ཐམས་ཅད་ཀྱི་གཙོ་མོ། རྡོ་རྗེ་ཕག་མོ་དང་། རྡོ་རྗེ་དང་། རིན་ཆེན་དང་། པདྨ་དང་། ཀརྨ་དང་། ཆོས་དང་། དམ་ཚིག་ལ་སོགས་པའི་འཁོར་ཐམས་ཅད་ཡི་རངས་སྟེ། སྟོན་པ་ཀུན་ཏུ་བཟང་མོ་ལ་མངོན་པར་བསྟོད་དོ། །མངོན་སུམ་དུ་སྙིང་ཐིག་མཁའ་འགྲོ་མ་ཀུན་གྱི་སྙིང་ཁྲག །ཐེག་པ་ཀུན་གྱི་སྙིང་ཁྲག་རྫོགས་སོཧ྅྅྅།། །།ས་མ་ཡ། རྒྱ་རྒྱ་རྒྱ། ནམ་ཞིག་སྐལ་ལྡན་བུ་དང་འཕྲད་པར་ཤོག །ས་མ་ཡ་ཐ། སོ་ཕག་ཤི་ཁ་ཐམ། སྔགས་སྲུང་གཟའ་དང་རྡོ་རྗེ་ལེགས་པ། ཤན་པ་ནག་པོས་བཀའི་བྱ་ར་གྱིས་ཤིག །྅྅྅