སྔོན་བྱུང་སྐྱེས་པའི་རབས་སྤྲུལ་པའི་རྣམ་པར་རོལ་པའི་ཚུལ་ཇི་ལྟར་སྟོན་པ།

སྔོན་བྱུང་སྐྱེས་པའི་རབས་སྤྲུལ་པའི་རྣམ་པར་རོལ་པའི་ཚུལ་ཇི་ལྟར་སྟོན་པ་དང་། སྐུ་ཚེ་འདི་ཉིད་ཀྱི་ཐུན་མོང་གདུལ་བྱའི་སྣང་ངོར་འཚམས་པར་འཆར་བའི་རྟོགས་པ་བརྗོད་པའི་ཚུལ་ལོ། །དང་པོ་ནི།

བདག་ཉིད་ཆེན་མོ་འདི་ཉིད་གདོད་མ་ཉིད་ནས་ཁམས་ཀྱི་དྲི་མ་མཐའ་དག་དང་བྲལ་བ་རང་རིག་པའི་ཡེ་ཤེས་ཆོས་ཀྱི་སྐུའི་ངོ་བོར་མངོན་པར་བྱང་ཆུབ་པ་བརྙེས་ཏེ། དེའི་ངང་ལས་མ་གཡོས་བཞིན་དུ་ངེས་ པ་ལྔ་ལྡན་གྱི་ལོངས་སྤྱོད་རྫོགས ་པའི་སྐུར་རང་སྣང་བ་རྟག་པ་རྒྱུན་གྱི་འཁོར་ལོར་ལྷུན་གྱིས་གྲུབ་པ་ནས། དམིགས་པ་མེད་པའི་ཐུགས་རྗེ་དང་སྨོན་ལམ་གྱི་དབང་གིས་དག་པ་དང་མ་དག་པའི་གདུལ་བྱ་སྣ་ཚོགས་པའི་ངོར་སྤྲུལ་པའི་རྣམ་རོལ་བསམ་གྱིས་མི་ཁྱབ་པར་བསྟན་ནས་མཐའ་ཡས་པའི་གདུལ་བྱ་སོ་སོའི་སྐལ་བ་དང་འཚམས་པར་ལམ་གྱི་རྟེན་དང་། ལམ་དང་འབྲས་བུ་ལ་འགོད་པའི་འཕྲིན་ལས་ཚད་མེད་པས་འདུལ་བར་མཛད་པ་ནི། དྭངས་པའི་ཆུ་སྣོད་ཇི་སྙེད་པར་ཟླ་བའི་གཟུགས་བརྙན་དེ་སྙེད་དུ་འཆར་བ་ལྟར་བསམ་གྱིས་མི་ཁྱབ་སྟེ། རྒྱལ་ཚབ་མི་ཕམ་མགོན་པོས་ཐེག་པ་ཆེན་པོའི་རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །ཞེས་དང་། ཕལ་པོ་ཆེ་ལས་ཀྱང་། ཀྱེ་རིགས་ཀྱི་བུ། དེ་བཞིན་གཤེགས་པའི་སྤྲུལ་པ་ནི་ཚད་མེད་དེ་འགྲོ་བ་གང་དང་གང་འདུལ་བ་དེ་དང་དེའི་གཟུགས་དང་ཁ་དོག་དང་མིང་གིས་དོན་མཛད་དོ། །ཞེས་གསུངས་པ་ལྟར་མཐའ་གཅིག་ཏུ་མ་ངེས་པའི་ཕྱིར་ཕྱོགས་རེར་ཞེན་པའི་སྐྱེས་པའི་རབས་དང་། སྤྲུལ་པའི་ངེས་བརྗོད་དང་། རབ་བཏགས་ཀྱིས་ཀུན་སློང་བརྗོད་པ་ལ་ཡིད་བརྟན་འཆའ་མ་དགོས་ཀྱང་། རེ་ཞིག་ཞིང་འདིར་གདུལ་བྱའི་ཆ་ཤས་འགའ་ཞིག་གི་མཐུན་སྣང་དུ་གྲུབ་པའི་མཛད་པ་ལས་ཆ་ཤས་ཙམ་ཞིག་འཆད་པའི་དབང་དུ་བྱས་ན། རང་གཏེར་སྟག་ཚང་རྡོ་རྗེ་གྲོ་ལོད་ནས་བྱོན་པའི་ཐུགས་གཏེར་གསང་བའི་ལུང་བྱང་ལས། ཨ་ཨཿཔདྨ་ང་སྤྲུལ་ནག་པོས་བྱིན་བརླབས་ཤིང་༔ ནམ་སྙིང་ཐུགས་ཀྱི་འོད་ཟེར་ཞུགས་གྱུར་པ༔ ཀཿཐོག་ལྷོ་ཕྱོགས་བཙན་རིའི་ཉེ་འདབས་སུ༔ མཆོག་དམན་སྤངས་པ་བར་མ་དག་གི་རིགས༔ མགོན་དང་མཚོ་ཞེས་བྱ་བ་གཉིས་ཀྱི་བུ༔ དབང་ངམ་ནོར་བུའི་མིང་ཅན་སྙིང་སྟོབས་ཅན༔ མི་ཆེ་མི་ཆུང་སྒེག་པ་རྡོ་རྗེའི་ལུས༔ རྩ་རླུང་ཐིག་ལེ་སྐྱོན་མེད་མཁའ་འགྲོ་འདུ༔ སྤྱོད་པ་མ་ངེས་བྱིས་པའི་ཚུལ་དུ་སྤྱོད༔ ཁ་དོག་ཉིན་རེ་ལ་ཡང་ངེས་མེད་འགྱུར༔ ལྟ་བའི་གདེངས་ལྡན་རྒྱུ་འབྲས་ཤན་འབྱེད་མཁས༔ རིག་པ་ངར་ཐོབ་གྱོང་ཚིག་ཏལ་མར་སྨྲ༔ ཤེས་བྱ་ཁོག་ཡངས་གདུལ་བྱ་བཀྲི་ལ་མཁས༔ཏིང་འཛིན་གསལ་ཐེབས་གཞན་སྣང་ཟིལ་གྱིས་གནོན༔སྦྱངས་པ་སྔོན་སོང་མདོ་རྒྱུད་དགོངས་དོན་འཁྲོལ༔ བློ་གྲོས་མཐུ་ལྡན་ཆོས་དང་ཆོས་མིན་འབྱེད༔ འཕྲལ་དུ་བརྟགས་ན་མི་ཤེས་གླེན་པའི་ཚུལ༔ ཡུན་དུ་འགྲོགས་ཚེ་མཁས་ཀུན་སྙེམས་པ་འཕྲོག༔ ཡོན་ཏན་ལྡན་པ་སྦས་ཚུལ་རྣམ་པར་སྤྱོད༔ རེས་ནི་མི་རྟག་སྐྱོ་ཤས་འཆི་མ་འཁྲུག༔ རེས་ནི་གང་ལའང་མི་འཇིགས་དཔའ་སྐད་འདོན༔ རེས་ནི་ང་རྒྱལ་རེས་ནི་དམན་པའི་ཚུལ༔ རེས་ནི་ཉོན་མོངས་དྲག་ཏུ་ཞེན་པ་ལྟར༔ རེས་ནི་བྱང་སེམས་ཞི་དུལ་བརྩེ་བའི་ཉམས༔ རེས་ནི་ནོར་ལ་རྐམ་ཆགས་ཞེན་པའི་ཚུལ༔ རེས་ནི་གསེར་དང་ས་རྡོ་སྙོམས་བཞིན་སྤྱོད༔ དེ་སོགས་ཅི་བདེར་སྒྱུ་མ་ལྟར་སྤྱོད་ཅིང་༔ སྣ་ཚོགས་ཐབས་ཀྱིས་འགྲོ་བ་འདུལ་བྱེད་པ༔ མ་ངེས་འཁོར་འདུ་བུད་མེད་ཁྱུ་དང་བཅས༔ ཚངས་སྤྱོད་ཚུལ་གྱིས་རྒྱལ་བའི་བསྟན་སྲོག་འཛིན༔ མཐོང་ཐོས་དྲན་རེག་ཐར་པའི་ལམ་ལ་སྦྱོར༔ སྐྱེ་བ་དམན་ཅིང་རིགས་ངན་བུད་མེད་ཀྱང་༔ དེ་ཡི་གསང་བའི་གྲོགས་འབྲེལ་ཐར་ལམ་ཟིན༔ ལན་བདུན་བསྟེན་པས་མཚམས་མེད་སྤྱད་པ་ཡང་༔ དམ་ཚིག་མ་ཉམས་བདེ་འགྲོ་ངེས་པར་ཐོབ༔ གཞན་གྱིས་གདུལ་དཀའ་བདུད་ཀྱང་སུན་དབྱུང་བའི༔ དཔའ་བོའི་ངར་དང་བརྟུལ་ཞུགས་ནུས་མཐུ་ལྡན༔ མང་པོའི་གསེབ་ན་ལྷག་པར་གཟི་བརྗིད་ཆེ༔ ང་སྲས་སྐྱེས་བུ་དེ་ལྟ་བུ་ཞིག་འབྱུང་༔ ཞེས་དང་། གབ་རྒྱ་ཅན་གྱི་གསང་བའི་ལུང་བྱང་ལས༔ ཐུགས་ཀྱི་སྒྲུབ་ཆེན་ནམ་སྙིང་ཡང་སྤྲུལ་ཞིག༔ མདོ་ཁམས་བུ་འབོར་ཉེ་བའི་ཕྱོགས་སུ་འབྱུང་༔ མ་ཎི་བཛྲ་འགྲོ་འདུལ་སྙིང་སྟོབས་ལྡན༔ རྟེན་འབྲེལ་མ་ཆུགས་མཆོག་གི་གཏེར་ལྔ་སྤྱོད༔ འཛམ་གླིང་འགྲོ་བ་འདྲེན་པའི་སྒྲོན་མེ་འདྲ༔ འོན་ཀྱང་སྔོན་འཕྲལ་རྟེན་འབྲེལ་འགའ་ཞིག་གིས༔ དེ་ལྟ་ཇི་བཞིན་འགྲིག་པར་མ་གྱུར་ཚེ༔ དགོངས་གཏེར་བཀའ་བབས་བཀའ་དང་གཏེར་རྙིང་སྐྱོང་༔ དུས་དེར་ཕན་པའི་ས་བཅོས་ལུང་བྱང་དང་༔ ཆོས་ཟབ་གདམ་ཕྲན་ཁ་ཡར་འདོན་པར་འགྱུར༔ ཞེས་གསུངས་པས་གངས་ཅན་གྱི་ལྗོངས་འདིར་དགེ་སློང་ནམ་མཁའི་སྙིང་པོ་ཞེས་མཚན་གྱི་དབྱར་སྐྱེས་རྔ་བོ་ཆེ་ཡོངས་སུ་གྲགས་པ་གང་གི་སྤྲུལ་པའི་ཟློས་གར་ཉིད་དུ་ལུང་གིས་བསྔགས་ཤིང་༔ རྗེ་ཉིད་ཀྱི་གསང་བའི་རྣམ་ཐར་བག་ཆགས་ཡིད་ཀྱི་རང་གཟུགས་གསལ་བའི་མེ་ལོང་ལས། བདག་གི་སེམས་ཀྱི་རྒྱུན་འདི་སྔགས་རྙིང་ལུགས་ཀྱི་རྒྱ་བོད་ཀྱི་རིག་འཛིན་བརྒྱད་དང་གྲུབ་ཆེན་བརྒྱད་དུ་གྲགས་པའི་ཡ་གྱལ་ཐུགས་ཀྱི་རིག་འཛིན་ཧཱུྃ་ཀ་ར་དང་། གྲུབ་ཆེན་གནུབས་ནམ་མཁའི་སྙིང་པོའི་སྤྲུལ་པ་ཡིན་ཞེས་གུ་རུ་པདྨའི་གཏེར་ལུང་རྩོད་བྲལ་རྣམས་ནས་བསྟན་མོད། དེ་ལྟ་ན་ཡང་རང་ཉིད་ཀྱི་བློ་ལ་ནི་དེས་བྱིན་གྱིས་བརླབས་པ་ཙམ་ལ་སྤྲུལ་པའི་ཐ་སྙད་དུ་གྱུར་པར་ཁས་བླང་བར་བྱ། ཞེས་དང་ནམ་མཁའི་སྙིང་པོའི་སྐྱེ་སྤྲུལ་མིན་ཡང་བྱིན་གྱིས་བརླབས་པའི་ནུས་པས་ཡིན་ཏེ་འོང་། ཆུང་ངུ་ནས་ད་ལྟའི་བར་དེ་ཡི་བག་ཆགས་ཡད་ཡུད་ཞིག་ནི་ངེས་པར་ཤར། ཞེས་དོན་གྱིས་ཞལ་གྱིས་བཞེས་སོ། །དེ་ལྟར་ན་ནམ་མཁའི་སྙིང་པོའི་སྤྲུལ་གཞི་ནི་དཔའ་བོ་ཐུགས་ཀྱི་རྡོ་རྗེ་ཞེས་བྱ་བ་སྟེ། དོན་གྱིས་གསང་བའི་བདག་པོ་དང་ངོ་བོ་གཅིག་ཅིང་། གནས་སྐབས་སུ་རྫོགས་པའི་སངས་རྒྱས་དངོས་ཀྱི་སློབ་མ་རྡོ་རྗེ་ཐེག་པ་ཐམས་ཅད་ཀྱི་སྤྱི་མེས་ཨོ་རྒྱན་གྱི་རྒྱལ་པོ་ཨིནྡྲ་བྷུ་ཏི་གསང་བའི་བདག་པོར་གྱུར་པ་དེ་ཡིན་ལ། དེ་ཉིད་བཞུགས་པའི་གནས་ནི་འོག་མིན་ཆོས་དབྱིངས་མེ་རི་འབར་བའི་དུར་ཁྲོད་ན་ཡིན་པས་ཀུན་ན་སྣང་བ་སྟེ། སློབ་དཔོན་ཆེན་པོའི་གསོལ་འདེབས་ལེའུ་བདུན་པའི་གཉིས་པར། རི་རྒྱལ་མེ་རི་འབར་བའི་རྩེ་མོ་རུ༔ ཕྱག་ན་རྡོ་རྗེ་ཐུགས་ཀྱི་དགོངས་པ་ཡིས༔ རྒྱལ་པོ་ཛ་ཡི་གནས་སུ་གསང་སྔགས་བྱོན༔ ཞེས་སོ། །བྱེ་བྲག་ཏུ་འདིར་ནི་དེང་སང་འཕགས་ཡུལ་དང་། ནཻ་པཱ་ལའི་ཡུལ་གྱི་འཕྲལ་སྐད་དུ་ཛ་ག་བ་ཞེས་འབོད་ལ། ལེགས་པར་སྦྱར་བའི་བརྡར་ཨཽ་ཌི་ཡཱ་ཎ་དང་། ཟུར་ཆག་གི་ཨོར་ཡན་དང་། བོད་འདིར་ཨོ་རྒྱན་དུ་འབོད་པའི་ཡུལ་དེ་ནི་མི་རྣམས་ཀྱི་མཐུན་སྣང་དུ་མ་ཁ་དང་ཉེ་བའི་ཡུལ་སྟག་གཟིག་གི་ཡུལ་གྱི་འགྲམ་ཟླ་ཕྱེད་ཀྱི་ལམ་གྲུ་གསུམ་གྱི་ལུང་པ་ཅན་ལ། ལྷ་དང་། མི་མ་ཡིན་པ་དང་། དཔའ་བོ་མཁའ་འགྲོ་དང་། འབྱུང་པོ་ཕལ་གྱི་སྣང་ངོར་བདེ་བ་ཅན་དང་ཕྱོགས་འདྲ་བའི་དཔག་ཚད་བྱེ་བ་འབུམ་གྲུ་གསུམ་པའི་དབུས་དེར་བསྟི་གནས་དཔག་ཚད་འབུམ་ཕྲག་གསུམ་དང་། ཕོ་བྲང་དཔག་ཚད་སྟོང་དང་།སྙིང་པོ་དཀྱིལ་འཁོར་ལྔ། དཔག་ཚད་བརྒྱད་ཡོད་པ་དེ་ན་བཞུགས་པ་སྟེ། ཕྱག་ན་རྡོ་རྗེའམ། རྡོ་རྗེ་སེམས་དཔའ་ཧེ་རུ་ཀའམ། རྡོ་རྗེ་འཆང་། ཨིནྡྲ་བྷུ་ཏིའམ། པདྨ་བཛྲ་ཡང་ཕོ་བྲང་དེ་ན་བཞུགས་ལ་དོན་གྱིས་དགོངས་པ་གཅིག་པ་ཉིད་དེ། ཉང་གཏེར་བཀའ་བརྒྱད་བདེ་གཤེགས་འདུས་པའི་ལོ་རྒྱས་བཻ་རོས་མཛད་པ་ལས། སྟོན་པ་ཀུན་ཏུ་བཟང་པོ་ཉིད་དང་ཐུགས་གཉིས་སུ་མེད་པ༔ བྱང་ཆུབ་སེམས་དཔའ་རྡོ་རྗེ་ཆོས་ཞེས་ཀྱང་བྱ༔ རྡོ་རྗེ་སེམས་དཔའ་ཞེས་ཀྱང་བྱ༔ ལག་ན་རྡོ་རྗེ་ཞེས་ཀྱང་བྱ༔ རྡོ་རྗེ་དྲག་པོ་རྩལ་ཞེས་ཀྱང་བྱ༔ མིའི་ཐོད་པ་རྩལ་ཞེས་བྱ་བ་དེ་ཉིད་དང་༔ ལྷན་ཅིག་ཏུ་ཐོས་པའི་འཁོར་རིག་འཛིན་གཞན་རྣམས་འཁོར་གྱི་ཚུལ་དུ་བྱས༔ རང་ཉིད་སྟོན་པའི་ཚུལ་དུ་བྱས་ཏེ༔ ཚོམ་བུ་དགུའི་དཀྱིལ་འཁོར་གྱི་ནང་དུ་སྣང་བར་བྱས་ནས༔ རང་གི་ཚིག་གིས་མཚམས་སྦྱར་ནས༔ ཐོག་མར་ངག་ཏུ་བསྡུས༔ དེ་ནས་པུསྟི་དང་གླེགས་བམ་དུ་བཀོད་དེ༔ གསེར་གྱི་གླེགས་བམ་ལ་བཻཌཱུརྻའི་ཞུན་མས་བྲིས་ནས༔ སྤྱི་དང་བྱེ་བྲག་གི་རྒྱུད་སྡེ་རྣམས་སོ་སོའི་ཕྱོགས་སུ་བསྡེབས་ཏེ༔ གླེགས་བམ་དུ་བྱས་ཤིང་གཞན་ལ་སྣང་བར་མཛད་དོ༔ ཞེས་སྟོན་པ་དང་དགོངས་པ་མི་གཉིས་པའི་བཀའི་བསྡུ་བ་པོར་གསུངས་སོ། །དེ་ལྟར་ཨོ་རྒྱན་གྱི་གནས་དེ་ནི་རིག་སྔགས་འཛིན་པའི་གནས་མཁའ་སྤྱོད་ཀྱི་ཞིང་ཞེས་སྤྲུལ་པའི་སྐུའི་ཞིང་མཆོག་གྱུར་རྣམས་དང་རྗེས་སུ་མཐུན་པ་ཡིན་ལ། མི་ཡི་འཇིག་རྟེན་འདིར་སྤྲུལ་པས་འགྲོ་དོན་མཛད་པ་མང་པོ་ཞིག་དེ་ནས་འབྱོན་པར་གསུངས་ཤིང་། ཇོ་ནང་རྗེ་བཙུན་སྒྲོལ་མགོན་ཞབས་ཀྱང་ཞིང་དེ་ནས་བྱོན་པ་དང་། གཞན་ཡང་རྙིང་མའི་གཏེར་སྟོན་ཤས་ཆེ་བ་ཞིག་དང་། གསང་རྣམ་དུ། བདག་གི་རྩ་བའི་བླ་མ་དང་། ཆོས་འབྲེལ་ནོས་པའི་བླ་མ་ཁ་ཤས་ཀྱང་ཞིང་དེ་ནས་བྱོན་པར་རྟོགས། ཞེས་གསུངས་པ་གཏེར་སྟོན་པདྨ་བདེ་ཆེན་གླིང་པ་བཻ་རོའི་རྣམ་སྤྲུལ་ཡིན་ཕྱིར་དེ་ཡི་སྤྲུལ་གཞི་ཡང་དཔལ་གསང་བའི་བདག་པོ་ཉིད་དེ་གཟུགས་སྐུའི་རྣམ་པ་ཐ་དད་པར་སྟོན་པ་ནི། སྟོན་པ་ཐུབ་པའི་དབང་པོའི་ཞབས་རིང་འཕགས་པ་ཀུན་དགའ་བོ་དང་། ཤམ་བྷ་ལར་ཆོས་ཀྱི་རྒྱལ་པོ་ཟླ་བ་བཟང་པོ། ཨིནྡྲ་བྷུ་ཏི་ཆུང་བའམ་རྒྱལ་པོ་ཛ་སོགས་ཡིན་པ་སྤྱིར་གྲགས་པ་ལྟར་དང་། བྱེ་བྲག་ཏུ་ནམ་མཁའི་སྙིང་པོའི་སྐྱེ་བརྒྱུད་གཏེར་ལུང་གཞན་ནས་འབྱུང་བ་ལྟར་ན། སྟོན་པ་ཐུབ་པའི་དབང་པོའི་སྤྱན་སྔར་ཉན་ཐོས་ཆེན་པོ་བཙུན་པའི་མཆོག་དམ་པའི་ཆོས་འདུལ་བའི་བཀའ་སྡུད་པ་པོ་འཕགས་པ་ཉེ་བ་འཁོར་དང་། ཐེག་ཆེན་གྱི་སློབ་དཔོན་འདུལ་འཛིན་ཡོན་ཏན་འོད། རྒྱལ་སྲས་ཞི་བ་ལྷ། གསང་ཆེན་སྒྲུབ་པ་ཆེན་པོ་བཀའ་བརྒྱད་ཀྱི་རིག་འཛིན་བརྒྱད་ཀྱི་ནང་མཚན་ཡང་དག་ཐུགས་ཀྱི་བཀའ་བབ་བརྙེས་པ་རིག་འཛིན་ཧཱུྃ་ཀ་ར་རྣམས་ཡིན་པར་གསུངས་པ་དེ་ཀུན་ཐུགས་རྒྱུད་གཅིག་པ་ལ་དགོངས་པར་ངེས་སོ། །དམིགས་གསལ་རང་གཏེར་ལུང་བྱང་གི་དོན། པདྨ་ང་སྤྲུལ་ནག་པོས་བྱིན་རླབས་ཤིང་༔ ཞེས་གསུངས་པའི།

པདྨ་ང་སྤྲུལ་ནི།

གོང་དུ་སྨོས་པའི་དཔའ་བོ་ཐུགས་ཀྱི་རྡོ་རྗེ་དང་པདྨ་བཛྲ་ཉིད་ངོ་བོ་གཅིག་སྟེ་པདྨ་བཛྲ་ནི་མཚན་གྱི་རྣམ་གྲངས་ལས་དོན་དུ་སློབ་དཔོན་ཆེན་པོ་པདྨ་སམྦྷ་ཝ་ཉིད་དུ་སོམ་ཉི་མེད་པར་གྲུབ་པ་ནི། རྗེ་ཉིད་ཀྱིས་མཛད་པའི་གུ་རུ་རིན་པོ་ཆེའི་རྣམ་ཐར་གསོལ་འདེབས་སུ་ཨརྻ་དེ་བས་སྤྱོད་བསྡུས་སྒྲོན་མེར། ཁུངས་སུ་མཛད་པའི་པདྨ་བཛྲ། །པདྨ་ལས་བྱོན་ཁྱོད་ཉིད་མཚན་ཡིན། །གཞན་ཡང་ས་ར་ཧ་དང་བི་རུ། །ཌཽམྦྷི་སྤྱོད་འཆང་ཀཧྣ་པ། །ཨོ་རྒྱན་པདྨ་བཛྲ་རྣམ་གསུམ། །ཀུན་ཀྱང་ཆོས་སྐུའི་ཆོ་འཕྲུལ་ཉིད་ཡིན། །ཞེས་དང་། ཟ་ཧོར་ཁྱད་པར་ཨོ་རྒྱན་ཡུལ་དུ། །ཚ་བའི་མེ་དབུས་བསིལ་བའི་རྫིང་བུར། །པདྨ་གེ་སར་སྡོང་པོའི་རྩེ་རུ། །འོད་ལུས་བཞུགས་བཞིན་ཐུགས་ཀྱི་རྡོ་རྗེ། །འོད་དཔག་མེད་ཀྱི་ཐུགས་ཀར་ཐིམ་ནས། །ཡ་མཚན་མཆོག་བརྙེས་རྒྱུད་ཀྱི་སྟོན་པ། །དཔལ་ཆེན་པདྨ་བཛྲ་ཞེས་གྲགས། །ཞེས་སོ། །ནག་པོ་ནི།

འཕགས་ཡུལ་གྱི་གྲུབ་ཐོབ་ཆེན་པོ་ནག་པོ་སྤྱོད་པ་ཡིན་ལ། དཔལ་མགོན་འཕགས་པ་ཀླུ་སྒྲུབ་ཀྱི་དཔལ་ལྡན་འབྲས་སྤུངས་ནས་སྤྱན་དྲངས་པའི་དཔལ་མགོན་པོའི་རྒྱུད་བརྒྱད་ཀྱི་སྙིང་པོ་ནག་པོ་ཆེན་པོ་མངོན་པར་འབྱུང་བའི་རྒྱུད་ལས། དེ་ལྟར་ཡུལ་ཨུ་རུ་བི་ཤར་ཡང་མཚུངས་པར་ངེས་པའོ། །དེར་སྐྱེས་བུ་བརྩོན་འགྲུས་ཆེན་པོ་དང་ལྡན་ཞིང་སྦྱོར་བ་བརྩོན་པ་ར་མ་ཎའི་བཀའི་འཇུག་པ་དང་མཚུངས་པ། སྡེ་ཚན་དང་པོའི་དང་པོ་དབྱངས་ཡིག་དང་པོས་བརྒྱན་པ། བདུན་པའི་བཞི་པ་ཅུང་ཟད་ན་ལ་ཞོན་པའི་མིང་ཅན་རྣལ་འབྱོར་དབང་པོ་སྐྱེས་བུའི་མཆོག་གཅིག་པོ་འདིས་རལ་གྲི་ལ་སོགས་པའི་དངོས་གྲུབ་ཆེན་པོ་བརྒྱད་ཐོབ་པར་འགྱུར་རོ། །འཛམ་བུའི་གླིང་དུ་མ་བྱུང་ཞིང་འབྱུང་བར་མི་འགྱུར་རོ། །ཞེས་དང་། དུས་ཀྱི་འཁོར་ལོའི་རྒྱུད་ཕྱི་མ་འགྱུར་རྙིང་ལས། ཁ་ཊྭཱཾ་ཀ་དང་རུས་རྒྱན་ཅང་ཏེའུ་ཆང་སྣོད་ཐོགས་པ་ནག་པོའི་མིང་ཅན་འབྱུང་བར་འགྱུར། ཞེས་འཁྲུངས་པའི་ཡུལ་དང་། མཛད་པ་དང་། མཚན་དང་བཅས་བསྟན་པའི་ཀཧྣ་ཞེས་པ་སློབ་དཔོན་འདི་ཉིད་ཀྱི་ཐུན་མོང་མ་ཡིན་པའི་མཚན་ཏེ། ཀཧྣ་ཙརྻ་འམ།འཕྲལ་སྐད་དུ། ཀཧྣི་པ་ཞེས་གྲགས་ཏེ་དོན་དུ་ནག་པོ་སྤྱོད་པ་ཉིད་དོ། །དེ་ལྟར་ན་གསང་བའི་རྣམ་ཐར་དུ་ཇོ་ནང་རྗེ་བཙུན་དམ་པ་ཏཱ་ར་ནཱ་ཐ་དང་ཐུགས་རྒྱུད་གཅིག་པར་གསུངས་པ་ལུང་འདིས་འགྲུབ་ཅིང། རྗེ་བཙུན་དམ་པའི་སྐུ་ཕྲེང་སྐུ་སྐྱེ་བཅུ་གཅིག་པར་གྲགས་པ་ལས་འབར་བའི་གཙོ་བོ་ནས་ནག་པོ་སྤྱོད་པ་འདྲེན་པ་ལས་གསང་རྣམ་དུ་སྤྲུལ་གཞིའི་ངེས་བརྗོད་གསལ་བར་མ་གསུངས་ཀྱང་དོན་གྱིས་སྤྲུལ་གཞི་ཡང་གསང་བའི་བདག་པོ་ཉིད་དུ་ངེས་ལ། གྲུབ་པའི་སློབ་དཔོན་ཆེན་པོ་དེ་ནི། སྟོན་པ་ཐུབ་པའི་དབང་པོ་མྱ་ངན་ལས་འདས་ནས་ལོ་སྟོང་དང་ལྔ་བརྒྱར་ཉེ་བ་ན་འཕགས་པའི་ཡུལ་དུ་བྱོན་ཞིང་། དེ་ཉིད་དགུང་ལོ་བརྒྱད་ཅུ་སྐོར་ལྷག་ཙམ་ན་བོད་ཡུལ་ལྷོ་བྲག་དང་ཉེ་བ་རྒྱ་གར་ཡུལ་ཏི་ཕུ་ར་ཡི་ཕུ།ཕལ་སྐད་དུ་ཀ་པ་རངྒ་ཞེས་བྱ་བ་ཡུལ་ཉེར་བཞིའི་ཡ་གྱལ་དེ་ཝི་ཀོ་ཊར་རྣམ་སྨིན་གྱི་ལུས་བཏང་ནས་བར་དོར་རྫོགས་སངས་རྒྱས་པ་ཧེ་རུ་ཀ་ཡི་སྐུར་བཞེངས་ཏེ་ལོ་བརྒྱ་ལྷག་ཙམ་ན་ནམ་མཁའི་སྙིང་པོ་ཉིད་དུ་སྐུ་འཁྲུངས་པར་བཞེད་དོ། །

གནུབས་ཆེན་ནམ་མཁའི་སྙིང་པོ་ནི།

དེ་ཡང་ཐུན་མོང་གི་གདུལ་བྱའི་སྣང་ངོ་དང་མཐུན་པའི་ནམ་སྙིང་གི་སྐུ་ཡི་སྐྱེ་བའི་ཚུལ་སྟོན་དངོས་ནི། སྔ་མ་རྒྱ་གར་འཕགས་པའི་ཡུལ་དུ་བྲམ་ཟེའི་རིགས་ཀྱི་ཡབ་གུ་ཎ་སིདྡྷི་ཡོན་ཏན་དངོས་གྲུབ་དང་། ཡུམ་རྒྱལ་རིགས་སུ་ཛྙཱ་ནལིཀྵལཾ་མཁྱེན་རབ་དཔལ་མོ་ཞེས་པའི་སྲས་བྲམ་ཟེ་ཛེ་ཏ་བྱ་བར་གྱུར་ཏེ་སངས་རྒྱས་གཉིས་པ་པདྨ་ཀ་ར་མ་གུ་ཏ་ཡི་བྲག་ཕུག་ཏུ་བཞུགས་པར་རིན་ཆེན་གསེར་གྱི་མཎྜལ་ཕུལ་ནས་དབང་བསྐུར་བ་ནོས་པའི་མཚན་ནམ་མཁའ་རྡོ་རྗེ་ཞེས་སུ་བཏགས་པར་མཛད་ནས་སྐྱེ་བ་དེ་ཡི་འོག་ཏུ་བོད་ཡུལ་དུ་སྐྱེ་བར་ལུང་བསྟན། དེ་ལྟར་ཡང་ཐང་ཡིག་གསེར་འཕྲེང་མའི་ལེའུ་དོན་དྲུག་པར། རྒྱ་གར་ཡུལ་གྱི་མུ་ཏྲ་ན༔ བྲམ་ཟེ་གུ་ཎ་སིདྡྷི་དང་༔ རྒྱལ་མོ་ལེགས་གཞེར་བྱ་བའི་བུ༔ དགེ་སློང་ཛི་ན་ཚེ་འཕོས་པས༔ ནམ་མཁའི་སྙིང་པོ་བྱ་བར་སྐྱེས༔ ཞེས་གསུངས་པ་ལྟར་གཙང་གི་ཕུང་པོ་རི་བོ་ཆེ་ཡི་ཤར་ཕྱོགས་གནུབས་ཡུལ་རོང་ཞེས་བྱ་བར་ཡུམ་མཆིམས་བཟའ་འོད་དེ་རྒྱན་ཞེས་པའི་སྲས་སུ་སྐུ་འཁྲུངས། ཐོག་མར་འཕགས་པ་འཇམ་དབྱངས་ཀྱི་སྤྲུལ་པ་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་བློན་པོར་གྱུར་ཅིང་། དེ་ནས་དམ་པའི་ཆོས་ལ་ཡང་དག་པར་མོས་པས་འཕགས་པའི་ཡུལ་ནས་སློབ་དཔོན་ཆེན་པོ་སྤྱན་འདྲེན་པའི་ཕོ་ཉ་བསྐྱར་ཤོག་པ་མི་བདུན་གྱི་ཐོག་མར་བྱོན་ཏེ་བལ་ཡུལ་ཉི་མ་ཁུད་ཀྱི་མཚོ་འགྲམ་དུ་མཇལ། བོད་དུ་མཁན་ཆེན་ཤནྟ་རཀྵི་ཏ་ཏེ་ཞི་བ་འཚོ་ལས་རབ་ཏུ་བྱུང་ཞིང་དགེ་སློང་གི་དངོས་པོར་བསྒྲུབ། རྒྱལ་པོས་ཀྱང་ལོ་ཙཱ་བ་བརྒྱ་བརྩ་བརྒྱད་ཀྱི་ནང་ནས་ནམ་མཁའི་སྙིང་པོ་དང་བཻ་རོ་གཉིས་གཙུག་གི་བླ་མར་བསྐུར། སློབ་དཔོན་ཆེན་པོ་པདྨ་ཡར་འབྲོག་མུ་ཏིག་ཤེལ་གྱི་སྤ་མ་གོང་དུ་བཞུགས་པའི་སྤྱན་སྔར་བྱོན་ཏེ་རིན་ཆེན་གསེར་གྱི་པ་ཊ་མཎྜལ་དུ་བཀོད་ནས་ཕུལ་བར། སློབ་དཔོན་ཆེན་པོས། ཀྱཻ། ནམ་མཁའི་སྙིང་པོ་བདེའམ། ཞེས་བཀའ་སྩལ་ནས་སྨིན་མཚམས་ནས་འོད་ཟེར་བྱུང་། ནམ་མཁའི་སྙིང་པོར་ཕོག་པས་དྲན་མེད་དུ་ཡུག་ཅིག་བརྒྱལ་ནས། སད་ཚེ་སྐྱེ་བ་དྲན་པར་བྱིན་གྱིས་བརླབས། དེ་ནས་རྟ་གདོང་དཀར་མོ་ཐུགས་ཀྱི་གནས་ལྷོ་བྲག་མཁར་ཆུ་བོད་ཡུལ་གྱི་དེ་ཝཱི་ཀོ་ཊ་ཞེས་དཔལ་ཧེ་རུ་ཀ་ལྷན་སྐྱེས་ཡབ་ཡུམ་བྲག་རི་ལ་རང་བྱུང་དུ་གསལ་བར་བཞུགས་པའི་འདབས་བྲག་རི་དུང་དཀར་གྱི་དབྱིབས་སུ་གནས་པའི་མཁར་ཆུ་ལྕགས་ཕུར་ཅན་དུ་ཕེབས་ནས་ཡང་དག་བཀོལ་བྱང་གི་དཀྱིལ་འཁོར་དུ་དབང་བསྐུར་བར་མཛད། གསང་མཚན་ཐུགས་ཀྱི་རྡོ་རྗེར་གྲགས། ཕྱིས་རྒྱ་གར་དུ་བྱོན་ནས་བྲག་ཕུག་གསེར་གྱི་བྱ་སྐྱིབས་ཅན་དུ་ཡང་དག་གི་བཀའ་བབ་པའི་རིག་འཛིན་ཧཱུྃ་ཀ་ར་དང་མཇལ་ནས་བླ་མེད་མ་ཡི་རྒྱུད་ལ་མཁས་པར་སྦྱངས་ནས་སྒྲུབ་པས་གྲུབ་པ་ཆེན་པོ་ཉམས་འོག་ཏུ་ཆུད་པར་གྱུར་ནས་བོད་དུ་བྱོན། མཁར་ཆུ་གཙོ་བོར་གྱུར་པའི་གཉལ་སྨད་སྒེ་རི་ལ་སོགས་པའི་སྒྲུབ་གནས་དུ་མར་སྒྲུབ་པ་ཡུན་རིང་མཛད་པའི་ཚུལ་བསྟན། སྤྱོད་པའི་ཕྱག་རྒྱ་ལུང་བསྟན་བྱུང་བ་ལྟར་གཙང་རྟ་ནག་ཤེལ་དཀར་བཟའ་རྡོ་རྗེ་མཚོ་སྒྲོན་རྙེད་དེ་ལས་ཀྱི་ཕྱག་རྒྱར་མཛད། བརྟུལ་ཞུགས་ཀྱི་སྤྱོད་པ་གསུམ་བསྐྱངས། དེ་བཞིན་སློབ་དཔོན་ཆེན་པོའི་བཀའ་བཞིན་མཁའ་འགྲོ་ཡེ་ཤེས་མཚོ་རྒྱལ་ལ་བརྟེན་ནས་མི་འགྱུར་བདེ་བ་ཆེན་པོའི་སྐུ་ཕྱག་རྒྱ་ཆེན་པོའི་རིག་འཛིན་ཡང་དག་པར་བརྙེས།སྒྲུབ་མཚན་ཀྱང་མཁར་ཆུར་བྲག་ལ་སྐུ་རྗེས་དང་། བསམ་ཡས་སུ་ཉི་མ་གཏོད་ལ་གནོན་པ། གནམ་ལྕགས་ཀྱི་ཐོག་འོན་ལྗང་རྡོའི་བྲག་ལ་ཕབ། འབྱོན་བཞུད་སྐབས་ཉི་ཟེར་ལ་འཆིབས་ནས་གཤེགས་པ་སོགས་རྫུ་འཕྲུལ་དཔག་མེད་བསྟན། ལོ་བརྒྱ་ཕྲག་གཅིག་ལྷག་ངེས་པར་བཞུགས་པའི་མཐར་རྣམ་སྨིན་གྱི་ལུས་འཇའ་ལྟར་ཡལ་ནས་ཡེ་ཤེས་ཀྱི་སྐུ་མཁའ་ཁྱབ་ཏུ་བཞུགས་སོ། །དེ་ལྟར་ནམ་མཁའི་སྙིང་པོ་ཉིད་མཆོག་གི་དངོས་གྲུབ་ཇི་བཞིན་པ་འཕགས་ལམ་ཟུང་འཇུག་རྡོ་རྗེ་སེམས་དཔའི་གོ་འཕང་སྐུ་ལུས་དེས་བརྙེས་པར་མཛད་པའི་ཕྱིར་འཕགས་པའི་གོ་འཕང་བརྙེས་པའི་སྤྲུལ་པ་ནི་བསམ་གྱིས་མི་ཁྱབ་པ་རྫོགས་སངས་རྒྱས་དང་འཕགས་པ་ས་བཅུ་པ་ཁོ་ནའི་སྤྱོད་ཡུལ་ལས་གཞན་སུ་ཞིག་གིས་དཔོགས་པར་ནུས། འོན་ཀྱང་གངས་རིའི་ཁྲོད་འདིར་གདུལ་བྱའི་ངོར་ཇི་ཙམ་སྣང་བའི་སྐྱེས་རབས་ཀྱི་ཕྲེང་བ་ནི། རྗེ་ཉིད་ཀྱི་རྡོ་རྗེའི་གསུང་འཁྲུལ་པ་མེད་པ་འཁྲུངས་རབས་གསོལ་འདེབས་བྱིན་བརླབས་ཡིད་བཞིན་གཏེར་མཛོད་ལས། ཁྱོད་ཀྱི་སྒྱུ་འཕྲུལ་རིམ་གྱིས་ཅིག་ཅར་ཚུལ། །དཔེ་མེད་གྲོང་འཁྲུངས་རིན་ཆེན་རྡོ་རྗེ་འཛིན། བོད་སྔགས་སྦྱོར་སྒྲོལ་རྩེར་སོན་ཤེས་རབ་གྲགས། །འོད་གསལ་འཁོར་ཡུག་མེས་ཚོམ་དྭགས་སྒོམ་ཚུལ། །མཁའ་འགྲོས་ཡོངས་མཆོད་ནམ་འོད་ཙཱ་རི་རས། །བྱམས་དཔལ་བྱམས་འབུམ་གཞན་ཕན་མཁའ་ལྟར་གདལ། །ཨེ་མ་མ་ཎི་རིན་ཆེན་འགྲོ་འདུལ་མཁས། །ཐང་དབོན་གྲགས་དཔལ་འོད་གསལ་རྡོ་རྗེའི་ཐུགས། །བདེ་ཆེན་ཞིང་གཤེགས་རི་ཁྲོད་དར་རྒྱས་ཞབས། །ཟབ་གཏེར་མཛོད་འབྱེད་བྱང་ཆུབ་གླིང་པ་དཔལ། །སངས་རྒྱས་བློ་གྲོས་རྩ་གསུམ་སྒྲུབ་པའི་གཙོ། །བྱང་ཆུབ་སེམས་བརྙེས་ཆོས་ཀྱི་རིན་པོ་ཆེ། །འཇའ་ལུས་རྡོ་རྗེའི་སྐུར་གཤེགས་བསོད་ནམས་མཆོག །ལུང་རིགས་རྔ་སྒྲ་རྒོད་པ་སངས་རྒྱས་འཕེལ། །རྣམ་དག་ཚུལ་ཁྲིམས་འཛིན་མཁས་བཟོད་དཔལ་གྲུབ། །མཁས་དབང་དམ་པ་ཡེ་ཤེས་རྒྱ་མཚོའི་སྡེ། །སྦས་ཚུལ་བསྔགས་བརྗོད་པདྨ་མ་ཎི་སོགས། །སྤྲུལ་པའི་ཟློས་གར་ཅིར་ཡང་བསྒྱུར་བ་པོ། །ཞེས་གསུངས་པ་ལྟར་འདིར་རྣམ་ཐར་རི་ཐང་མཚམས་ཀྱི་སྨན་མཆོག་དང་གསང་རྣམ། འཁྲུངས་རབས་གསོལ་འདེབས་གཞན་རྣམས་དོན་བསྡུས་ཏེ་སྨོས་ན། དཔལ་ཆེན་ནམ་མཁའི་སྙིང་པོ་འཕོ་མེད་འོད་སྐུར་གཤེགས་ནས་ལོ་སྐོར་ཁ་ཤས་རགས་རྩིས་སུ་སོང་བ་ན། ཀསྨི་རའི་ཡུལ་གྱི་གྲོང་ཁྱེར་དཔེ་མེད་དུ་བྲམ་ཟེའི་རིགས་སུ་འཁྲུངས་པ་རིན་ཆེན་རྡོ་རྗེ་ནི་དཔལ་ནཱ་རོ་ཏ་པ་དང་ཆུང་ངུ་ནས་གྲོགས་པོར་གྱུར། ཨིནྡྲ་བྷོ་དྷི་ཆུང་བ་ལ་ཐུག་ཅིང་ཡི་དམ་འཁོར་ལོ་བདེ་མཆོག་གི་སྒོ་ནས་གྲུབ་པ་ཐོབ། ཕྱིས་བི་ཀྲ་མ་ཤཱི་ལའི་གཙུག་ལག་ཁང་དུ་མཁས་པ་སྒོ་དྲུག་ཏུ་གྲགས་པའི་དབུས་ཀྱི་ཀ་ཆེན་གཉིས་ཀྱི་དང་པོར་གྱུར་ཅིང་མཐར་སྐུ་ཚེའི་སྨད་ཨོ་རྒྱན་དུ་བྱོན་ནས་འཇའ་ལུས་རྡོ་རྗེའི་སྐུ་བརྙེས།

ཟུར་ཆུང་ཤེས་རབ་གྲགས་ནི།

སྔ་འགྱུར་བཀའ་མའི་མཁས་གྲུབ་བདེ་གཤེགས་ཟུར་པོ་ཆེ་ཤཱཀྱ་འབྱུང་གནས་ཀྱི་དབོན་དང་ཆོས་སྲས་ཀ་བ་བཞིའི་ནང་གི་མཆོག་གྱུར་སྦྱོར་སྒྲོལ་གྱི་ནུས་པ་རྨད་དུ་བྱུང་ཞིང་དཔག་པར་དཀའ་བའི་རྫུ་འཕྲུལ་སྟོན་པ་པོར་གྱུར།

གཙང་རོང་གི་མེས་སྟོན་ཚོན་པོ་ནི།

ཤྲཱི་སིངྷའི་སྒྱུ་འཕྲུལ་སྒྲ་བསྒྱུར་ལོ་ཙཱ་བ་ཆེན་པོ་མར་པ་ཆོས་ཀྱི་བློ་གྲོས་ཀྱི་ཐུགས་སྲས་བཞིའི་ནང་ཚན་འོད་གསལ་ལ་བཀའ་བབ་བརྙེས།

དྭགས་སྒོམ་ཚུལ་ཁྲིམས་སྙིང་པོ་ནི།

རྒྱལ་བས་སྙིང་རྗེ་པད་དཀར་དང་ཏིང་འཛིན་རྒྱལ་པོ་སོགས་ནས་ལུང་བསྟན་པའི་མཉམ་མེད་དྭགས་པོ་ལྷ་རྗེ་བསོད་ནམས་རིན་ཆེན་གྱི་རིགས་ཀྱི་དབོན་ཐུགས་ཀྱི་སྲས་རྒྱལ་ཚབ་དམ་པར་བཞུགས་ཤིང་རྗེ་སྒམ་པོ་པའི་སློབ་མ་ཕྱི་ཚར་རྣམས་ཀྱི་བླ་མར་ཡང་གྱུར་པ་རྒྱལ་པོ་བཀའ་འབུམ་ནས་ལུང་གིས་གསལ་བར་བསྟན་པ་དེ་ཉིད་དོ། །

ལྷ་རི་ནམ་མཁའ་འོད་ནི།

ཞང་འགྲོ་བའི་མགོན་པོ་གཡུ་བྲག་པ་བརྩོན་འགྲུས་གྲགས་ཀྱི་སྲས་དམ་པར་གྱུར་པ་མངའ་བདག་མྱང་རལ་ཆེན་པོ་དང་དུས་མཚུངས་པར་བྱོན་པ་ཞིག་གོ །

འགྲོ་བའི་མགོན་པོ་ཙཱ་རི་རས་པ་ནི།

དབུས་གཡོར་པོ་གཞུང་དུ་རྒྱལ་བ་ལོ་རས་པ་དར་མ་དབང་ཕྱུག་གི་ལྕམ་སྲིང་གི་སྲས་སུ་འཁྲུངས། རྗེ་ལོ་རས་པ་ཉིད་ལས་གདམས་པ་རྫོགས་པར་ནོས་ཤིང་གྲུབ་པ་བརྙེས།

ཁྲོ་ཕུ་ལོ་ཙཱ་བ་ཆེན་པོ་བྱམས་པ་དཔལ་ནི།

ཁ་ཆེ་པཎ་ཆེན་ཤཱཀྱ་ཤྲཱི་དང་བལ་པོ་བུདྡྷ་ཤྲཱི། གྲུབ་ཆེན་མི་ཏྲ་ཛྭ་ཀི་སོགས་ཀྱིས་རྗེས་སུ་བཟུང་། བྱམས་པའི་སྐུ་ཁྲུ་བརྒྱད་ཅུ་པ་བཞེངས་པ་སོགས་མཛད་པ་རྒྱ་ཆེའོ། །

མདོ་ཁམས་ཀཿཐོག་པ་བྱམས་པ་འབུམ་ནི།

དམ་གཙང་བྱམས་གསུམ་དུ་གྲགས་པའི་ཡ་གྱལ་དམ་པ་བདེ་གཤེགས་ཀྱི་ཞབས་ལ་ཐུག་ཅིང་གཙང་སྟོན་ལས་སྨིན་གྲོལ་གྱི་ཡོན་ཏན་རྫོགས་པར་མཛད། གཙང་སྟོན་གཤེགས་ནས་ཀཿཐོག་གི་གདན་ས་བཟུང་སྟེ་གདུལ་བྱ་རྒྱ་ཆེར་བསྐྱངས་ཤིང་ཀརྨ་པཀྵིའི་བླ་མར་གྱུར་པ་དེའོ། །

ལྷོ་བྲག་སློབ་དཔོན་ཨེ་མ་ནི།

སྐྱི་སྟོན་གྱི་རིགས་ལས་འཁྲུངས་ཤིང་སྤྱན་རས་གཟིགས་དབང་འགྲོ་འདུལ་གཏེར་སྟོན་གྱི་སྐུར་སྤྲུལ་པ་གུ་རུ་ཆོས་ཀྱི་དབང་ཕྱུག་གི་ཐུགས་སྲས་སུ་གྱུར། འདི་དང་དུས་མཚུངས་སུ་མ་ཎི་རིན་ཆེན་ཞེས་པ་བྱོན་པ་ཆོས་དབང་རིན་པོ་ཆེའི་དངོས་སློབ་ཡིན།

སྟག་ལུང་སངས་རྒྱས་དབོན།

ཞེས་པ་མཚན་དངོས་གྲགས་པ་དཔལ་ནི་རྗེ་སངས་རྒྱས་ཡར་བྱོན་གྱི་དབོན་ཡིན་ཞིང་བྱང་སྟག་ལུང་གི་བྲག་གདོང་ནས་གུ་རུ་པདྨ་ཀཽའུ་རི་མ་བརྒྱད་ཀྱིས་བསྐོར་བའི་བླ་སྒྲུབ་གཏེར་ནས་བཞེས། མདོ་ཁམས་སུ་བྱོན་ནས་རི་བོ་ཆེ་ཡི་དགོན་པ་བཏབ་ཅིང་གཞན་ཕན་རྒྱ་ཆེའོ། །

གཞོ་ལུང་རྡོ་རྗེ་རྒྱལ་པོ་ནི།

གཏེར་སྟོན་དྲི་མེད་ལྷུན་པོའི་ཡི་དམ་ཙིཏྟའི་རྒྱན་གཅིག་གི་ལུང་བསྟན་ཉི་མའི་འོད་ཟེར་ལས། ད་ལྟའི་གནུབ་བན་ནམ་མཁའི་སྙིང་པོ་ནི༔ འབྲི་རུ་རྡོ་རྗེ་རྒྱལ་པོ་རྨུ་རྒོད་འདུལ༔ ཞེས་གསུངས་པ་དེ་ཉིད་ཡིན་ཏེ། གནས་ཆེན་ཏི་སྒྲོ་བྲག་དཀར་གྱི་སྒོ་དབྱེ་བར་མཛད། འབྲི་ཁུང་པའི་རྙིང་ཆོས་ཀྱི་དབུ་ཡང་འདི་ནས་བརྩམས་པར་གྲགས་སོ། །

རི་ཁྲོད་དར་རྒྱས་ནི།

ཀརྨ་པ་རང་བྱུང་རྡོ་རྗེ་དང་། ཞྭ་དམར་གྲགས་སེང་གི་སློབ་མར་གྱུར། འདི་དང་དུས་མཚུངས་པར་ཇོ་ནང་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱི་དངོས་སློབ་ས་བཟང་མ་ཏི་པཎ་ཆེན་བློ་གྲོས་རྒྱལ་མཚན་དུ་འཁྲུངས།

མང་པོ་གཏེར་སྟོན་བྱང་ཆུབ་གླིང་པ་ནི།

དཔལ་ཁུད་བྱ་མང་སོར་འཁྲུངས། གཞོན་ནུའི་སྐབས་སུ་སྒྱུ་འཕྲུལ་ཞི་ཁྲོ་ཡང་ཕུར། སེམས་ཕྱོགས་ཟུར་ཚོ་ལུགས་སུ་གྲགས་པ་ལ་སྦྱངས། གཏེར་སྟོན་ཚེ་བརྟན་རྒྱལ་མཚན་གྱི་ཁ་བྱང་ཕྱག་ཏུ་བྱུང་བ་ལྟར་དཔལ་མོ་དཔལ་ཐང་གི་སྲིན་མཚོའི་ནུབ་བྱང་བྲག་བྱ་ཁྱུང་གི་མཆུ་འདྲ་བ་ནས་ཀུན་བཟང་ཐུགས་གཏེར་བཏོན་ནས་སྐུ་ཚེའི་སྨད་གཉའ་ནང་གསེར་ཕུག་ཏུ་བཞུགས། རིག་འཛིན་རྒོད་ལྡེམ་དང་སངས་རྒྱས་གླིང་པ་དང་དུས་མཚུངས། དེ་གཉིས་ཀ་དང་དངོས་སུ་མ་མཇལ་ཀྱང་སློབ་མས་སྦྲེལ་ཏེ་ཐུགས་མཛའ་གཅུགས་སུ་གྱུར་ཅིང་གཏེར་ཆོས་ཕན་ཚུན་༼གསན༽་བཞེས་དང་། དམ་རྫས་ཕབ་རྒྱུན་གཅིག་ཏུ་སྤེལ་བར་མཛད་ཅེས་གསུངས།

སངས་རྒྱས་བློ་གྲོས་ནི།

ཀོང་ཡུལ་སྙིང་ཕུར་གཏེར་སྟོན་སངས་རྒྱས་གླིང་པའི་གདུང་རིགས་ལས་བྱོན་པ་དཔལ་རྟ་མཆོག་གི་དངོས་གྲུབ་བརྙེས་པ་ཞིག་གོ །

ཤང་པ་བསོད་ནམས་མཆོག་གྱུར་ནི།

བོ་དོང་པཎ་ཆེན་འཇིགས་མེད་གྲགས་པའི་ཆོས་སྲས་ཕོ་ཉའི་ལམ་མཆོག་མཐར་ཕྱིན་པས་འཇའ་ལུས་སུ་གཤེགས། དེ་དང་དུས་འོལ་སྤྱིར་མཚུངས་པ་འབྲས་ཡུལ་སྐྱེད་ཚལ་གྱི་

ཀུན་མཁྱེན་སངས་རྒྱས་འཕེལ་ནི།

གཙང་རོང་ཆེན་སྣར་དུ་སྐུ་འཁྲུངས། ཐོག་མར་རོང་བྱམས་ཆེན་གྱི་གྲྭ་སར་བཞུགས་པས་བྱམས་ཆེན་རབ་འབྱམས་པར་གྲགས། ཕྱིས་འབྲས་ཡུལ་རྫོང་དཀར་སྐྱེད་མོའི་ཚལ་གྱི་བཤད་གྲྭ་བཙུགས། གངས་ལྗོངས་འདིའི་བཤད་གྲྭ་ཕལ་ཆེ་བ་ཞིག་འདི་ནས་གྱེས་སོ། །

འཁོན་སྟོན་བཟང་པོ་དཔལ་ནི།

འགྲོ་བའི་མགོན་པོ་ཆོས་རྒྱལ་འཕགས་པའི་དབོན་ས་སྐྱའི་གདུང་རབས་རྣམས་ཀྱི་སྤྱི་མེས་གྲགས་ཆེ་བ་ཞིག་གོ།

བདག་སྨྱོན་ཀུན་དགའ་ལེགས་པ་ནི།

དཔལ་ལྡན་ས་སྐྱའི་གདུང་ལས་བྱོན་ཞིང་མྱང་གི་དྲག་དམར་གྱི་སྙིང་པོ་དུང་ཕྱུར་འགྲུབ་པར་གྲགས། གཞན་ཡང་། ཟླ་བན་གཟི་བརྗིད་འབར། གཏེར་སྟོན་གྲྭ་པ་བཛྲ། དབུས་པ་བློ་གསལ། མཁས་པ་གཙང་ནག་པ་ཐུགས་རྗེ་སེང་གེ། སྣར་ཐང་གི་མཁན་པོ་བཟོད་པ་དཔལ་གྲུབ། ཀཿཐོག་ཚུལ་ཁྲིམས་འབུམ། ཇོ་ནང་རྗེ་བཙུན་ཏཱ་ར་ནཱ་ཐའི་ཐུགས་སྲས་ཏིང་སྐྱེས་རྒྱལ་པོའི་སྲས་འཇམ་དབྱངས་ཡེ་ཤེས་རྒྱ་མཚོ། མདོ་ཁམས་ཀཿཐོག་དང་ཉེ་བར་འཁྲུལ་ཞིག་དབང་དྲག་རྒྱ་མཚོ། གཏེར་སྟོན་རཏྣ་གླིང་པའི་གདུང་ལས་ཀུན་དགའ་བསྟན་འཛིན་གཏེར་སྟོན་ཀུན་སྐྱོང་གླིང་པའི་སྲས་ཉི་ཟླ་བཟང་པོ། ལྷོ་ལྗོངས་སུ་སྒྲུབ་བརྒྱུད་བསྟན་པ་རྒྱས་པར་མཛད་པ་མཐུ་སྟོབས་ཆེན་པོའི་མཚན་འཆང་ངག་དབང་རྣམ་པར་རྒྱལ་བ་སོགས་སྤྲུལ་པའི་བྱེ་བྲག་ཏུ་གསུངས་ཤིང་། དེ་དག་ལས་ཕལ་ཆེར་ནི་སློབ་དཔོན་ཆེན་པོའི་ལུང་གིས་ཟིན་པ་དང་། འགའ་ཞིག་རྗེ་ཉིད་སྐུའི་ན་ཚོད་ཤིན་ཏུ་ཕྲ་བའི་སྐབས་སུ་ཐུགས་ཀྱི་དྲན་པ་དང་། ལ་ལ་ཞིག་ཕྱིས་སུ་སད་བྱེད་ཀྱི་རྐྱེན་ལ་བརྟེན་ནས་ཐུགས་སུ་དྲན་པ་ཡང་མང་དུ་བྱུང་ཞེས་གསུངས་ལ། སྐྱེས་པའི་རབས་ཀྱི་ཕྲེང་བ་དེ་རྣམས་ཀྱང་ཁ་ཅིག་རིམ་གྱིས་བརྒྱུད་པ་དང་། ལ་ལ་ཐོག་མཚུངས་དང་སྔ་ཕྱིར་ཡུལ་དུས་ཅི་རིགས་སུ་བྱུང་བ་རྣམས་ནི་ཅིག་ཅར་དུ་བྱོན་པའམ། དེ་དང་དེས་བྱིན་གྱིས་བརླབས་པ་དང་ཐུགས་རྒྱུད་གཅིག་པར་ཞལ་གྱིས་བཞེས་པ་སྟེ་སེམས་ཅན་མོས་པ་སྣ་ཚོགས་པའི་ངོར་འདུལ་བྱེད་ཀྱི་སྤྲུལ་པ་སྣ་ཚོགས་པ་ཅིག་ཅར་དུ་སྟོན་པ་ནི་འཕགས་ཆེན་བྱང་ཆུབ་སེམས་དཔའ་རྣམས་ཀྱི་ངོ་མཚར་གྱི་འཕྲུལ་ཆེན་པོ་སྟེ། དཔེར་མཚོན་ན་ཕྱག་རྡོར་དབང་བསྐུར་གྱི་རྒྱུད་དུ། ཀུན་ཏུ་བཟང་པོ་སྐྱེ་བ་བརྒྱུད་པ་ཕྱག་ན་རྡོ་རྗེར་བཤད་ནས་དེ་གཉིས་ཀ་ཉེ་བའི་སྲས་ཆེན་བརྒྱད་ཀྱི་ནང་དུ་དུས་མཉམ་པར་བྱོན་པ་བཞིན་མཐའ་གཅིག་ཏུ་མ་ངེས་པས་ཨ་འཐས་ཞེན་འཛིན་གྱི་ལོག་རྟོག་མི་བྱའོ། །གཞན་ཡང་གསང་རྣམ་ལས། རྒྱ་གར་ཤར་ཕྱོགས་ཀྱི་ལྗོངས་ཞིག་ཏུ་སྡིག་སྤྱོད་ཀྱི་རྒྱལ་པོར་སྐྱེས་པ་ནང་པའི་གྲུབ་ཐོབ་ཞིག་གིས་དེ་ལས་བཟློག་ནས་རྒྱལ་བའི་བསྟན་པ་ལ་གུས་པས་མཆོད་པ་དང་། ཡང་གྲུབ་ཐོབ་ཆེན་པོ་ལ་ལི་ཏ་བཛྲ་གྱི་སྐབས་སུ་སྔགས་འཆང་མ་ནུས་པ་ཆེ་བ་ཞིག་ཀྱང་སྐྱེས་ནས་གྲུབ་ཆེན་གྱི་ཚོགས་ཀྱི་གཟུང་མར་སྔགས་ཀྱིས་བཀུག་ནས་ལས་ཀྱི་ཕྱག་རྒྱར་བྱས་ཤིང་བྱིན་གྱིས་བརླབས་པས་ད་ལྟ་རྡོ་རྗེ་འཇིགས་བྱེད་ཀྱི་རྒྱུད་ལ་མོས་ཤིང་བག་ཆགས་སད་པ་དང་། ཨིནྡྲ་བྷུ་ཏི་ཆུང་བའི་སློབ་མ་ཀམྦྷ་ལ་ཞེས་མཁའ་འགྲོ་ནི་གུ་མ་ཡི་བླ་མར་གྱུར་པ་དེས་རྗེས་སུ་བཟུང་བའི་ལྷོ་ཕྱོགས་རྒྱ་མཚོའི་འགྲམ་དུ་ཚོང་དཔོན་གྱི་རིགས་ལས་བྱུང་བའི་རྣལ་འབྱོར་པ་ཞིག་ཏུ་གྱུར་པ་དང་། བལ་ཡུལ་ཡེ་རང་དུ་སྐྱེས་པའི་མ་རྒྱུད་ཆོས་ཀྱི་བདག་པོ་ཛ་ཡ་སེ་ནར་གྱུར་པ་ཡང་དྲན།ཞེས་དང་། དེ་བཞིན་རྒྱ་གར་གྱི་ལྷོ་འགྲོ་ལྡིང་གི་གླིང་ན་རྗེ་བཙུན་ཏཱ་ར་ནཱ་ཐའི་སྐུའི་སྐྱེ་བ་དངོས་ཡིན་པ། སུ་ཁ་ནཱ་ཐ་བྱ་བའི་སློབ་མ་ཙི་ཀྲ་ནཱ་ཐ་བྱ་བ་ཞིག་ངེད་དང་རྒྱུད་གཅིག་པར་ཡོད། གཞན་ཡང་། རྒྱལ་པོ། དགེ་བཤེས། སྔགས་ཀྱི་རྣལ་འབྱོར་གྱི་གཟུགས་སུ་བྱས་པ་ཡང་ཡོད་མོད་ཀྱི་ཞིབ་པར་བརྗོད་མ་བཏུབ། སྔོན་རིག་འཛིན་པདྨ་མ་ཎིའི་སྐབས་སུ། དེ་དང་རྒྱུད་གཅིག་པའི་སྟོད་ཧོར་སྟེ་སྟག་གཟིག་གི་མ་ཁའི་ཡུལ་ན་ཇིང་ཁི་མི་གན་ཞེས་རྒྱལ་པོ་དང་། འབྲས་ལྗོངས་ཀྱི་ཕྱོགས་སུ་མོན་གྱི་ལིང་པའི་ཚུལ་དང་། ལྷ་ལྡན་དུ་བུད་མེད་མཛེ་ཡིས་གདུང་བའི་ཚུལ་ཅན་ཡོད་གསུངས་པ་ལྟར། ད་ལྟར་ཡང་ཞང་ཞུང་གི་ཡུལ་མཐར་མོན་གྱི་ལིང་པ་དང་། མ་ཧཱ་ཙི་ནའི་ཕྱོགས་སུ་སྨད་ཚོང་གི་གཟུགས་སུ་ཡོད་པར་འདོད། སྤྱིར་འཛམ་བུ་གླིང་འདིར་དཔལ་ཆེན་པོ་ནམ་སྙིང་གི་དངོས་བརྒྱུད་སྤྲུལ་པ་བྱིན་གྱིས་བརླབས་པ་ཁྱོན་ལྔ་ཕྲག་ལྔ་རེ་དུས་ཕལ་ཆེར་འབྱོན་པར་བཞེད། ཅེས་གསུངས་ཤིང་། ཡང་གསང་བའི་རྣམ་ཐར་སྨིག་རྒྱུའི་ཆུ་བོ་ལས། གཞན་ཡང་སྐྱེ་བ་སྔ་མའི་ཡང་སྔ་མ་གང་རུང་ཞིག་གི་ལས་ཀྱིས་བཅོམ་ལྡན་འདས་དཔལ་དགྱེས་པ་རྡོ་རྗེའི་དབང་བསྐུར་སྐབས་དགེ་མཚན་མཐོང་ཞིང་བསྐྱེད་རྫོགས་ལ་ཡང་གོ་བ་བཟང་པོར་ཆགས་པ་དང་། དཔལ་ཆེ་མཆོག་ལ་ཡང་དེ་དང་ཆ་མཐུན་ཙམ་པ་བྱུང་ལ། འཇམ་དཔལ་དཀར་པོ། དབྱངས་ཅན་དམར་མོ། མི་གཡོ་དཀར་པོ་རྣམས་ཀྱང་སྐྱེ་སྔོན་ཡི་དམ་དུ་བྱས་པའི་མཚན་མ་ཅུང་ཟད་རེ་མཐོང་། རྒྱལ་བའི་བསྟན་སྲུང་ཆེན་པོའི་སྐུར་བསྟན་པ་ཡེ་ཤེས་ཀྱི་མགོན་པོ་ཕྱག་བཞི་དྲུག་དང་། མགོན་པོ་བྲམ་གཟུགས། ཞིང་སྐྱོང་སེངྒེ་ནག་པོ། དབྱིངས་ཀྱི་མ་མོ་རལ་པ་གཅིག་མ། དྲང་སྲོང་ཆེན་པོ་རྣམས་རབ་ཏུ་ཉེ་བའི་ལྟས་ཤར་ཡང་སྐྱེ་བ་སྔ་མའི་ལས་འབྲས་སུ་གོ་ཞེས་ཀྱང་གསུངས་སོ། །བདག་ཉིད་ཆེན་པོ་འདི་ཉིད་ཀྱི་སྐུའི་ཡང་སྲིད་སྔ་མ་ནི།

གྲུབ་པའི་དབང་ཕྱུག་སྟག་རས་པ་པདྨ་ནོར་བུ།

ཀུན་བཟང་དྲི་མེད་རྡོ་རྗེ་གཟི་བརྗིད་འཕྲིན་ལས་འགྲོ་འདུལ་དུ་གྲགས་པ་དེ་ཉིད་ཡིན་པར་ཡོངས་སུ་གྲགས་ཤིང་རྗེ་ཉིད་ཀྱི་ཞལ་གྱིས་བཞེས་པའི་ཚུལ་རྣམ་ཐར་སྙིམ་པའི་ཆུ་སྐྱེས་ལས། གྲུབ་དབང་ནམ་མཁའི་སྙིང་པོ་ཡི། །སྤྲུལ་པའི་སྐྱེས་བུ་རིག་པ་འཛིན། །པདྨ་ནོར་བུ་ཞེས་བྱ་བ། །ཨོ་རྒྱན་ཟབ་གཏེར་ཁ་བྱང་འཛིན། །དམ་པ་དེ་ཉིད་ཡིན་ནོ་སྐད། །ཅེས་གསུངས་པའི་སྐྱེས་བུ་ཆེན་པོ་དེའི་རྣམ་པར་ཐར་པའི་ཚུལ་ཞིབ་མོར་ཡི་གེའི་རིས་སུ་འཁོད་པ་ནི་མཐོང་ཐོས་ཀྱི་སྤྱད་བྱར་མ་གྱུར་ཀྱང་། རྗེ་ཉིད་ཀྱི་གསུང་འཁྲུངས་རབས་གསོལ་འདེབས་མུཀྟི་ཀ་ཡི་མཱ་ལི་འདོད་དོན་ཀུན་འབྱུང་ལས་གོང་དུ་སྨོས་པའི་སྐྱེས་རབས་ཀྱི་ཕྲེང་བ་རིམ་པར་བསྟན་པའི་རྗེས་སུ། དེ་ལ་སོགས་ཏེ་སྐྱེ་བའི་ཕྲེང་བ་ནི། །སྣ་ཚོགས་འགྲོ་འདུལ་སྤྲུལ་པའི་ཟློས་གར་ཆེ། །མ་ངེས་གྲངས་མེད་སྐལ་ལྡན་ཁ་ལོ་བསྒྱུར། །གང་འདུལ་དེར་མཚུངས་སྟོན་ལ་གསོལ་འདེབས། །ཁྱད་པར་འབྲི་རྒྱུད་རེ་ཁའི་གདུལ་བྱའི་དོན། །སྟག་བུར་དམ་པའི་གདུང་རིགས་ལས་བསྐྲུན་ཏེ། །སྐྱེས་ནས་བག་ཆགས་བཟང་སད་གསང་སྔགས་ཆོས། །ལེགས་འཆང་མཆོག་སྤྲུལ་དེ་ལ་གསོལ་བ་འདེབས། །ནར་སོན་གཏེར་གྲུབ་དུ་མས་རྗེས་བཟུང་ནས། །ཐུགས་སྲས་དབང་བསྐུར་རྒྱལ་ཚབ་ཅོད་པཎ་བྱིན། །སྨིན་གྲོལ་མངའ་བརྙེས་པདྨ་ནོར་བུ་ཞེས། །རྒྱལ་སྲས་དམ་པ་དེ་ལ་གསོལ་བ་འདེབས། །དཀྱིལ་འཁོར་རབ་འབྱམས་བསྙེན་སྒྲུབ་དྲོད་ཚད་ཐེབས། །སྟོང་ཉིད་དོན་རྟོགས་སྣང་སེམས་མངོན་སུམ་འདྲེས། །བསྐྱེད་རྫོགས་རྫོགས་ཆེན་མན་ངག་དོན་བྱན་ཚུད། །གྲུབ་པའི་དབང་ཕྱུག་དེ་ལ་གསོལ་བ་འདེབས། །རྔ་ཡབ་དཔལ་རིར་གུ་རུ་པདྨའི་དྲུང་། །དབང་བཞི་ཡོངས་རྫོགས་བསྐུར་ནས་གསང་བའི་མཚན། །གུ་རུ་ཞི་བའི་བློ་གྲོས་ཞེས་བྱ་བར། །གྲགས་གྱུར་རིག་འཛིན་དེ་ལ་གསོལ་བ་འདེབས། །ཀུན་བཟང་དྲི་མེད་རྡོ་རྗེ་གཟི་བརྗིད་དང་། །པདྨ་ཆོས་དབྱིངས་འཕྲིན་ལས་འགྲོ་འདུལ་རྩལ། །པདྨ་དབང་དྲག་པདྨ་རྣམ་རོལ་སྟེ། །སྐུ་གཅིག་མཚན་མང་གྲགས་ལ་གསོལ་བ་འདེབས། །པདྨས་ཟབ་གཏེར་བདག་པོར་མངའ་གསོལ་ཞིང་། །འབྲེལ་ཚད་དོན་དང་ལྡན་པར་དབུགས་རབ་དབྱུང་། །སྐྱེ་བའི་ཕྱི་མར་ཁ་བྱང་འཛིན་ལུང་བསྟན། །དུས་གསུམ་འགྲོ་དོན་མཛད་ལ་གསོལ་བ་འདེབས། །ཁྱོད་ཀྱི་དགོངས་པ་ཕྱག་རྒྱ་ཆེན་པོའི་གཤིས། །རྡོ་རྗེ་གཞོན་ནུའི་གསང་དང་དབྱེར་མེད་པར། །ཐིམ་ཀྱང་སླར་ཡང་སྤྲུལ་པས་འགྲོ་བའི་དོན། །རྒྱུན་ཆད་མེད་པར་མཛད་ལ་གསོལ་བ་འདེབས། །ཞེས་གསང་བ་གསུམ་གྱི་ཡོན་ཏན་མཛད་པ་རྣམ་པར་ཐར་པ་རྣམས་ཚིགས་སུ་བཅད་པའི་དབྱངས་ཀྱིས་འདོམས་པར་མཛད་པ་ལྟར་གྲུབ་པའི་ཁྱུ་མཆོག་དེ་ཉིད་རྔ་ཡབ་པདྨ་འོད་དུ་ཞིང་ཁམས་འཕོས་ནས་བདག་ཉིད་ཆེན་པོ་འདི་ཉིད་དུ་སྐུའི་སྐྱེ་སྲིད་བཟུང་བའི་ཚུལ་ནི་རྣམ་ཐར་སྙིམ་པའི་ཆུ་སྐྱེས་ལས། དེ་ནས་འཕོས་ཚེ་དག་པའི་སྐུ། །པདྨ་འོད་དུ་དབུགས་དབྱུང་ཞིང་། །མ་དག་གདུལ་བྱ་འདུལ་བའི་ཕྱིར། །བློ་གསལ་ལག་འགྲོའི་ཚུལ་ཡང་བཟུང་། །དེ་འཕོས་ད་ལྟའི་ལུས་འདི་སྲིད། །ཅེས་གསུངས་སོ། །དེ་ལྟར་ན་རྗེ་ཉིད་ཀྱི་གསུང་གི་གསང་བ་ལས་བྱུང་བ་ལྟར་སྐུ་ཚེ་སྔ་མ་རྣམས་ཀྱི་མཛད་པ་ཕྲིན་ལས་དང་སྐྱེ་བའི་ཕྲེང་བ་ཟུར་ཙམ་ཞིག་སྨོས་པ་ཡིན་ནོ། །