༈ འབྲུག་པ་ལ་ཕུལ་བའི་ཆབ་ཤོག །
ཨོཾ་སྭཱསྟི། རྗེ་འགྲོ་བའི་མགོན་པོ་མཆོག་གི་སྤྲུལ་པའི་སྐུ་གང་གི་གནས་ཀྱི་སློབ་དཔོན་དུ་གྱུར་པ་དགེ་བའི་བཤེས་གཉེན་ཆེན་པོ་གཙུག་ལག་དུ་མ་ལ་དབང་འབྱོར་བ་རྗེ་རཏྣ་ས་མུ་དྲ་ཞེས་དམ་པ་གང་གི་གསུང་མཆིད་ཆབ་ཤོག་རྟེན་དང་བཅས་རྟགས་ཀྱི་རི་མོ་ཉམས་པ་མེད་པར་སྒྲུབ་གནས་ཆེན་པོ་མུ་ཏིག་སྤ་མ་གོང་དུ་ཁྲུམས་ཟླའི་དཀར་ཕྱོགས་ཀྱི་དཀའ་བ་གསུམ་པ་ལ་སོན་པས་ཡིད་ཀྱི་བདེ་བའི་ཚོར་བ་སྦོམ་པོར་གྱུར། ངོས་ཀྱང་དམ་པ་ཆོས་བཞིན་དུ་སྤྱོད་པའི་མོས་བློ་མ་བྲལ་ངང་དུ་མཆིས། ཅི་ལྟར་གསུང་ཕེབས་ལྟར་ཐུགས་རྗེ་ཆེན་པོའི་བཅུ་གཅིག་ཞལ་གྱི་བསྒོམ་བཟླས་གནང་བ་ཤིན་ཏུ་ནས་ཀྱང་ལེགས་འདུག་ལ། ཐུགས་རྗེ་རྗེ་ཆེན་པོའི་མདོ་རྒྱུད་གཟུངས་སྔགས་ཐམས་ཅད་ཀྱི་ནང་ནས་བཅུ་གཅིག་ཞལ་གྱི་སྒྲུབ་ཐབས་འདི་རྒྱ་གར་འཕགས་པའི་ཡུལ་དུ་རླུང་ལྟར་གྲགས་ཤིང་ལྕམ་དཔལ་མཛད་ལ་མི་བཟད་པའི་ནད་ཀྱིས་གདུང་བ་ལ་བཅུ་གཅིག་ཞལ་གྱི་གཟུངས་སྔགས་ལ་བརྟེན་ནད་ལས་གྲོལ་བར་མ་ཟད་འཕགས་པའི་ཞལ་མཇལ་ནས་རྡོ་རྗེའི་སྐུ་བརྙེས་པ་དང་།
ཇོ་བོ་རྗེ་ལ་སློབ་མ་རྣམས་ཀྱི་བྱིན་བརླབས་ཆེ་ལ་མྱུར་བའི་སྒྲུབ་ཐབས་ཞིག་དགོས་ཞུས་པར་བཅུ་གཅིག་ཞལ་གྱི་སྒྲུལ་ཐབས་གནང་བས་མཚོན་སངས་རྒྱས་རྣམས་ཀྱི་དགོངས་པ་གཏད་ནས་བྱིན་གྱིས་བརླབས་ཚུལ་གྱིས་ནན་ལྟར་བྱིན་བརླབས་ཆེ་ཞིང་མྱུར་བ་ལགས་ན་དེ་ཡི་ཉམས་བཞེས་ལ་བརྩོན་པ་བསྐྱེད་ན་ཤིན་ཏུ་ལེགས་པར་ཁུམས། འོན་ཀྱང་འདི་ནི་བྱ་རྒྱུད་སོགས་ཕྱི་རྒྱུད་གསུམ་དུ་བཞེད་པ་ཡང་ཡོད་ལ། ཀླུ་སྒྲུབ་དང་ཙནྡྲ་གོ་མའི་ནི་རྣལ་འབྱོར་གྱི་རྒྱུད་དུ་གཞག་ཅིང་། སློབ་དཔོན་པདྨས་ནི་བླ་མེད་དུ་བཀྲལ་བ་ཡང་མཆིས་ལ། གང་ལྟར་རྩ་བ་ཡི་གཟུངས་སྔ་འགྱུར་གྱི་སྐབས་སུ་བསྒྱུར་བ་དང་། སྒྲུབ་ཐབས་ཏ་ར་ནཱ་ཐས་བསྒྱུར་བ་འདི་ཡང་རྩ་བ་འདི་བསྟན་བཅོས་མ་ཡིན་པ་རྒྱུད་ཀྱི་ཚིག་ཁོ་ནར་ངེས་པས་དེས་ན་དེར་ངེས་པ་བསྐྱེད་པའི་ཕྱིར་དེའི་དཔེ་རང་གི་འབྲལ་སྤང་དུ་བྱས་པ་འདི་བཞིན་འབུལ་ལམ་ཞུས་པ་རྩིས་བཞེས་ནས། སླད་མར་ཉམས་བཞེས་ལྷུ་རུ་བླང་བར་ཞུ་ལ། ཡི་དམ་གྱི་ལྷ་བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་ངོ་བོ་ནི་གནས་ལུགས་ཕྱག་རྒྱ་ཆེན་པོའི་རྟོགས་པ་དེ། དེའི་ཉམས་བཞེས་ལ་ཅི་ནས་ཀྱང་འབད་པར་འཚལ་ཞིང་། ཕྱག་རྒྱ་ཆེན་པོ་ནི་གང་ཤར་ཆོས་ཉིད་ཀྱི་རོལ་པ་ལ་ཟླ་བ་ཡིན་ན་བསྐྱེད་རིམ་ལྷ་ཡིན་ནོ་སྙམ་པའི་དྲན་རྟོག་ཁོ་རང་ལ་ཅེ་རེ་ལྟས་པས་ངོ་བོ་ངེས་བཟུང་གི་སྤྲོས་པ་ཐམས་ཅད་ནུབ་པའི་ངང་ལ་གནས་པ་དེ་ཀ་ཕྱག་རྒྱ་ཆེན་པོ་ཉིད་ཡིན་པ་དགོངས་པ་ཆོས་བཞིན་ཏེ། དུས་རྣམས་ཀུན་ཏུ་ཡེངས་མེད་ཀྱི་དྲན་པ་དང་། བླ་མའི་མོས་གུས། སེམས་ཅན་ལ་སྙིང་རྗེ་གསུམ་མི་འབྲེལ་བར་བྱས་ན་ཚེ་གཅིག་རྡོ་རྗེ་འཆང་གི་ས་ལ་རེག་པར་འགྱུར་བ་ལགས། དཔལ་རིག་པ་འཛིན་པས་སྤེལ་བ་སརྦ་མངྒ་ལཾ།
ཨོཾ་སྭཱསྟི། རྣམ་འདྲེན་རྒྱལ་བའི་འཕྲིན་ལས་ཤིང་རྟ་གང་། །མ་སྨད་གྱེན་དུ་འདྲེན་པའི་སྙིང་སྟོབས་ཅན། །དམ་པ་མགོན་གྱི་བྱིན་བརླབས་མིའི་ཁྱུ་མཆོག །རཏྣའི་རིག་འཛི་བསམ་འཕེལ་མཆོག་དེ་ལ། །ཐོས་མང་རྣམ་དག་ཡན་ལག་བརྒྱད་ལྡན་རྫིང་། །བསམ་པ་རྣམ་དག་གདེང་ཀ་བདུན་པའི་བདག །དོན་བསྒོམ་རྣམ་དག་ནོར་བུ་ཕུད་བུ་ཅན། །ལྷག་བསམ་རྣམ་དག་ཀླུ་དབང་དེའི་ཞུ་མཆིད། །དེང་དུས་བོད་ཆེན་ནོར་འཛིན་ལྟོ་བ་རུ། །ཚོགས་གཉིས་ཡོངས་རྫོགས་གསེར་གྱི་ཁྱེའུ་ཡི། །དོ་ཟླར་གྱུར་པ་སྙིགས་དུས་འགྲོ་བའི་མགོན། །ཡབ་སྲས་འཕྲིན་ལས་འཕེལ་གནས་བདག་ཡིད་ཚིམ། །གང་གི་མདུན་ན་འདོན་གྱུར་དམ་པ་ཉིད། །འཚོ་གཞེས་དྭངས་ཤིང་དགེ་བའི་བགྱིད་འོས་རྣམས། །ནམ་ཡང་མ་ཉམས་ལེགས་བྱས་རིན་ཆེན་མཛོད། །དུ་མ་རྒྱས་ཤིང་བཞུགས་པར་རྗེས་ཡི་རངས། །བདག་ཀྱང་རྒྱལ་དབང་པདྨའི་ཐུགས་རྗེའི་མཐུའི། །རིས་མེད་རྒྱལ་བསྟན་རིན་ཆེན་གདུགས་དཀར་པོ། །རྒུད་མེད་གྱེན་དུ་འདེགས་པའི་སྙིང་སྟོབས་ཀྱི། །གསེར་གྱི་ཡུ་བ་མངོན་པར་བརྗོད་དེ་གནས། །འོན་ཀྱང་ད་ནི་ན་ཚོད་ཀྱིས་གཏུགས་ཤིང་། །ལུས་རྒས་སེམས་ཞུམ་འཚོ་བ་ཡང་དམན་པས། །དབེན་པའི་ནགས་ཚལ་ཞིག་ཏུ་གྱི་ན་རུ། །འཇུག་པ་སྙིང་ནས་སྨོན་བཞིན་ངང་དུ་མཆིས། །ད་ནི་དུས་ངན་སྙིགས་མའི་མཐར་ཐུག་པས། །མི་བདེ་དུ་མའི་འཕྲེང་བས་བོད་ཡུལ་འདི། །མནར་བར་དོགས་ཡོད་སྔ་ཕྱི་གནས་ཚུལ་ཀུན། །ཁོང་དུ་ཆུད་བཞིན་སྙིང་ནས་སྐྱོ་བ་སྐྱེ། །དེས་ན་མགོན་དང་སྐྱབས་མེད་འགྲོ་བའི་དོན། །ས་གནས་སེམས་དཔའ་ཡབ་སྲས་དམ་པ་རྣམས། །སྐུ་ཚེ་བརྟན་ཅིང་བསྟན་པ་འཕེལ་རྒྱས་ནས། །བདག་གི་འབད་པས་བགྱིས་ཀུན་དོན་ལྡན་ཤོག །ཉིད་ཀྱང་དམ་པའི་དོན་ལ་སྨན་སླད་དུ། །བྱང་ཆུབ་སྤྲུལ་དབྱིངས་ཏྲམ་མཚན་འོད་ཟེར་མདངས། །ལྷ་ཕྲན་འཕོས་པའི་སྤྱི་བོར་བཞུས་པའི་མཐུའི། །སྨོན་ལམ་ འཕེན 
་པས་རང་བཞིན་བཟང་པོར་ངེས། །དེས་ན་སྟོན་འཁོར་ཚོམ་བུ་གཅིག་པ་རུ། །བཟང་པོའི་རྟེན་འབྲེལ་གྱིས་བསྡུས་ཡང་ནས་ཡང་། །དགེ་ལེགས་རྒྱས་པའི་དགའ་སྟོན་དམ་པ་ལ། །བར་ཆད་མེད་པར་རྟག་ཏུ་སྤྱོད་ཀྱང་སྨོན། །བདག་གི་སྒོ་གསུམ་འབད་པ་དྲག་པོ་ཡི། །རིང་མོ་ཉིད་ནས་བགྱིས་པའི་དགེ་འདིས་ཀྱང་། །ངེས་དོན་བསྟན་འཛིན་རྒྱལ་བ་ཡབ་སྲས་ཀྱི། །བཞེད་དགུ་ཆོས་བཞིན་གེགས་མེད་འགྲུབ་པར་ཤོག །ཞེས་པ་ཡང་རིག་པ་འཛིན་པ་རྒྱལ་ཁམས་པས་ས་ལ་སྤྱོད་པའི་འོག་མིན་མཚུར་གྱི་གནྡྷོ་ལ་ནས་ཟླ་ཚེས་བཟང་པོ་ལ་སྤེལ་བའི་ལི་ཁི་ཏཾ། སརྦ་མངྒ་ལཾ།
ཨོཾ་སྭཱསྟི། ཀུན་གཟིགས་འདྲེན་པ་ཡོངས་ཀྱི་སྤྱི་དཔལ་མཆོག །ལག་ན་པདྨོའི་རྣམ་སྤྲུལ་འགྲོ་བའི་མགོན། །རྗེ་བཙུན་སྤྲིན་སྒྲ་ཅན་གྱི་བྱིན་རླབས་མཐུས། །ངག་གི་དབང་ཕྱུག་ཐོབ་ཁྱེད་རྟག་ཏུ་རྒྱལ། ། ༡ སྐྱེ་ཐོབ་ཤེས་རབ་ཞིང་ས་པདྨོའི་ཚལ། །སྦྱངས་སྟོབས་རྣམ་དཔྱོད་སཱ་ལུ་སྦྲང་རྩིའི་བཅུད། །བློ་ལྡན་སྐྱེ་རྒུ་བུང་བའི་ཡིད་ཀྱི་གསོས། །མཁས་པའི་རྣམ་པར་ཐར་ལ་བདག་ཡི་རང་། །འཇིག་རྟེན་དབང་ཕྱུག་གཞོན་ནུར་གྱུར་པའི་ཚུལ། །གང་གི་གནས་སུ་ཉེ་བར་བསྙེན་པ་འདི། །དགེ་ལེགས་བྱ་བ་རིང་ནས་གོམས་པ་ཡིས། །སྨོན་ལམ་བཟང་པོའི་མཐུ་ལས་གཞན་ཅི་ཞིག །དམ་པའི་རྣམ་ཐར་དད་པའི་གཙུག་ངལ་ལས། །སྔོན་གོམས་མོས་གུས་སྟོབས་རྒྱས་མ་བརྒྱ་བའི། །སྙན་ཚིག་སྐྱ་རེངས་ཀུན་བཟང་གསེར་འཁོར་ལོ། །ཕུན་ཚོགས་མཆོད་སྤྲིན་བཙས་སུ་འཁྱིལ་འདི་རྨད། །མོས་དང་དགེ་གྱུར་གསེར་གྱི་ས་གཞི་ལས། །རྟེན་འབྲེལ་ལེགས་བྱས་རྩ་འཐུང་སུམ་རྩེན་སྐྱེས། །སྨོན་ལམ་བཟང་པོའི་རང་བཞིན་དགེ་འབྲས་འབུམ། །རྒུད་མེད་ཚེ་རབས་རྟག་ཏུ་ཅིས་མི་རྒྱས། །འགྲོ་ཀུན་ལ་ཁྱབ་ཆོས་ཁམས་དགེ་བ་ཅན། །དྲི་མེད་སེམས་ཉིད་རིན་ཆེན་རྫོགས་སངས་རྒྱས། །དོན་གཉིས་ཕུན་ཚོགས་རྒྱ་མཚོའི་དཔལ་གྱུར་གང་། །རིང་མིན་ཡོངས་སུ་འགྲུབ་པའི་རྒྱུར་ཡང་སྨོན། །སྙན་སྙན་ཚངས་པའི་བུ་མོའི་མགྲིན་པའི་རྔ། །ལེགས་ལེགས་དགེ་བའི་ལོ་འདབ་རྒྱས་པའི་གསོས། །བཟང་བཟང་ཚེ་རབས་ཀུན་ཏུ་བཟང་པོའི་རྒྱུ། །གྲུབ་གྲུབ་ཕུན་ཚོགས་དཔལ་ཀུན་འདི་འགྲུབ་ཤོག །
ཅེས་རྗེ་བཙུན་འགྲོ་བའི་མགོན་པོ་ཀུན་མཁྱེན་འབྲུག་པ་མཆོག་གི་སྤྲུལ་པའི་སྐུ་རིན་པོ་ཆེ་གང་གི་གནས་ཀྱི་སློབ་དཔོན་བསླབ་གསུམ་ཡོན་ཏན་དུ་མས་ཕྱུག་པའི་མཁས་པ་ཆེན་པོ་རིན་ཆེན་རྒྱ་མཚོ་གང་གི་དངས་བའི་ཐུགས་ཀྱི་ཆེད་དུ་བསྔགས་པའི་ཡུན་དུ་འཚོ་བའི་ཤིས་བརྗོད་སྙན་ཚིག་ཀུན་ཏུ་བཟང་པོའི་འཁོར་ལོ་ངོ་མཚར་ཕུལ་དུ་བྱུང་བའི་རེ་ཁ་ཅན་རྟེན་འབྲེལ་བཟང་པོའི་སྐྱེས་སུ་གནང་བར་ཆེད་དུ་བརྗོད་པ་རིག་པ་འཛིན་པ་ཚེ་དབང་ནོར་བུས་སོ། །སརྦ་མངྒ་ལཾ།
རྣམ་དཔྱོད་ནམ་མཁའ་ལས་འོང་སྙན་པའི་ཚིག །བྱ་ཀ་ཀུན་བཟང་འཁོར་ལོ་རྩིབས་བརྒྱ་པ། །དགེ་མཚན་དུ་མའི་ངོ་མཚར་འཕྲོ་བ་འདི། །ལེགས་པར་བརྟག་ཞིང་ངོ་མཚར་ཡུལ་དུ་གྱུར། །ཚུལ་དེ་ལེགས་བྱས་དཔལ་དུ་ཆེའོ་ཞེས། །སྐྱེས་ལེན་མཚོན་བྱེད་བསླད་མེད་ས་ལེ་སྦྲམ། །ངང་པའི་བུ་མོའི་ཁ་དོག་འཕྲོག་པ་ཡིས། །རེག་བྱས་འཁྱུད་དེ་སོང་བ་བྷ་ཝནྟུ། །
སྭཱསྟི། མགོན་པོ་ཉིད་ལས་ལེགས་འོང་བདུད་རྩིའི་རྒྱུན། །གྲུབ་པའི་ཉིང་ཁུ་ཕྱག་ཆེན་གའུ་ཞེས། །སྙན་པར་གྲགས་པ་དེ་ཡི་འཛིན་མའི་ཁྱོན། །ཀུན་ཏུ་རྒྱ་ཆེ་རྒྱུན་མི་ཆད་པ་དང་། །དེ་བཞིན་དང་པོའི་སངས་རྒྱས་མཁའ་ལྡིང་དབང་། །སྣ་ཚོགས་སྐུ་ཅན་གང་གི་ཞལ་མཇལ་ཞིང་། །གསུང་ཐོས་ཐུགས་ཀྱི་དགོངས་པ་གཉིས་མེད་འགྲུབ། །རབ་འབྱམས་ལས་རྣམས་ཐོགས་པ་མེད་པ་རུ། །བདག་གིས་འགྲུབ་པར་མགོན་པོ་ཁྱོད་ཉིད་ཀྱི། །སྨོན་ལམ་གདབ་པར་འོས་ཞེས་ཡང་ནས་ཡང་། །གསོལ་བ་འདེབས་པར་ལགས་ན་དེ་དོན་ལྟར། །རྟག་ཏུ་དགོངས་པའི་དབྱིངས་སུ་འཇུག་ཀྱང་ཞུ། །དེ་སྐད་རྒྱ་བོད་ཡུལ་དབུས་སྦས་པའི་གནས། །པདྨ་བཀོད་ཀྱི་ནུབ་བྱང་ས་ཡི་མཐིལ། །རྟག་བརྟན་རིན་ཆེན་སྤུངས་པའི་གཙུག་ལག་ནས། །ཀཿཐོག་སྤྲུལ་སྐུ་ཞེས་བྱས་ཕུལ་བ་ཡིན། །སརྦ་མངྒ་ལཾ།