བོད་རྗེ་ལྷ་བཙད་པོའི་གདུང་རབས་མངའ་རིས་སྨད་གུང་ཐང་དུ་ཇི་ལྟར་བྱུང་བའི་ཚུལ་དེབ་ཐེར་དྭངས་ཤེལ་འཕྲུལ་གྱི་མེ་ལོང་།

༄༅། །བོད་རྗེ་ལྷ་བཙད་པོའི་གདུང་རབས་མངའ་རི་(རིས་)སྨད་གུང་ཐང་དུ་ཇི་ལྟར་བྱུང་བའི་ཚུལ་དེབ་གཏེར་(ཐེར་)དྭངས་ཤེལ་འཕྲུལ་གྱི་མེ་ལོང་ཞེས་བྱ་བ་བཞུགས་སོ། །

༈ ཨ་ཐ། རྒྱལ་རིགས་ལྷ་རྫིངས་དབུས་ན་མངོན་མཐོ་ལྷ་རིགས་བཙན་པོ་སུམ་རྩེན་དབང་པོའི་གྲོང་ཁྱེར་ལྟ་ན་སྡུག །གང་གི་སྙིང་པོ་མཛེས་བྱེད་རྣམ་པར་རྒྱལ་བའི་བ་གམ་མངོན་མཐོ་མངའ་རི་མང་ཡུལ་གུང་ཐང་ཁབ། །མངའ་བདག་བསོད་ནམས་འདྲེན་བྱེད་སྟོང་གིས་ཉེར་སྤྲས་རྒྱལ་བསྟན་ཞོ་འཐུས་རུས་པའི་རྩེ་བརྒྱ་འདེགས་མཁས་ཤིང་། །ཆོས་བཞིན་ཁྲིམས་སྲོལ་གཉིས་འཐུང་དབང་པོ་སུམ་ཅུ་རྩ་གསུམ་ཡན་ལག་མཆོག་འཆང་བདག་པོར་ཅིས་མི་བསྔགས། །

དེ་ལྟར་ཆེད་དུ་བརྗོད་པའི་ཚིག་གིས་མདུན་བསུས་ནས་འཆད་པར་བྱ་བ་ནི། མངའ་བདག་ཁྲི་བཀྲ་ཤིས་བརྩེགས་པ་དཔལ་གྱི་སྲས་སྨད་ཀྱི་ལྡེ་གསུམ་དུ་གྲགས་པའི་གདུང་ཡུལ་ཐ་དད་དུ་གྱེས་པ་ལས་བོད་ཡུལ་སྟོད་མངའ་རིའི་ཆ་མང་ཡུལ་གུང་ཐང་ཞེས་ཉི་སྲས་ནམ་མཁའ་ཉི་མའི་གུང་དུ་སླེབས་པས་གུང་ཐང་དང་། སྲིད་པའི་མ་མོ་བདུན་སོགས་གནས་པས་མ་ཡུལ་དང་། གྲུབ་པའི་གནས་ཆེན་མང་དུ་ཡོད་པས་མང་ཡུལ་དུ་གྲགས་པ་དེར་གངས་རི་རྒྱལ་པོ་གདན་ལ་བཞུགས་པ་ལྟ་བུ་སྐུ་ལྷ་དཔལ་རྫོང་གི་འདབས་སུ་མངའ་བདག་རྒྱལ་པོའི་རྒྱུད་པ་བྱུང་བ་ནི་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱི་གསུང་ལས། མང་ཡུལ་གུང་ཐང་གངས་རིའི་འདབས་འདི་རུ༔ ཉིད་ཀྱི་གདུང་རྒྱུད་ཕྱི་མ་བྱོན་པ་རྣམས༔ གདུང་རུས་མ་ནོར་ཆོས་ཀྱི་རྒྱལ་སྲིད་སྐྱོང་༔ ཞེས་སོགས་གཏེར་ཁ་དུ་མ་ནས་ལུང་བསྟན་པ་ལྟར་ཏེ། དེ་ཡང་གུང་ཐང་གི་ཡུལ་དེ་ལུང་པའི་ཕུ་བྱང་ཕྱོགས་གུ་རུ་རིན་པོ་ཆེ་ལྷོ་ནུབ་སྲིད་པོའི་ཁ་གནོན་དུ་འཕུར་ཏེ་གཤེགས་པའི་གནས་གུང་ཐང་ལ་ཡིན། རི་རྒྱུད་རྗེའུ་ལྷ་བཙན་དང་། ཇོ་མོ་རེ་གཟའ་(བཟའ་)ཞེས་པའི་གངས་རི་ལ་གཏད་པ། ལུང་པའི་མདའ་ལྷོ་ཕྱོགས་བལ་ཡུལ་ལ་གཏད་པ། ཆུ་ཀླུང་ཡང་སྐྱིད་རོང་ནས་བལ་པོ་རྫོང་གི་མདོ་བརྒྱུད་དེ་ཆུ་བོ་ཆེན་པོ་གངྒཱར་འབབ་པ་ཞིག་གོ །སྤྱིར་མང་ཡུལ་གྱི་ས་ཚིགས་ནི། གུང་ཐུང་ལ་ཐོག་གངས་རི་རྗེའུ་ལྷ་བཙན་ནས་བལ་པོའི་ཡུལ་མཚམས་ཏིང་ཝ་རི་ཡན་ཡིན་ཏེ། དེ་ཡི་ནང་ཚན་ལྷོ་ནུབ་གུང་གསུམ་དུ་གྲགས་པ་ནི་ཏིང་ཝ་རི་ནས་མཚམས་ཀྱི་བར་ལྷོ་ཕྱོགས་ཏེ་སྐྱིད་གྲོང་གི་ཆ་སྐྱོ་ལ་ནས་སེ་རིབ་ཀྱི་ས་མཚམས་རོད་ཀྱི་གངས་རི་ཆེན་པོ་དཔུང་རྒྱན་ནམ་དབང་པོའི་བྲག་ཅེས་པ་དེ་ཡི་བར་ནུབ་རིའི་ཆ་དང་མཚམས་ནས་རྗེའུ་ལྷ་བཙན་གྱི་རི་རྒྱུད་སྟག་ཁྱེར་ལ་ཡི་རབ་གུང་ཐང་གི་ཁྱོན་ཡིན་ཏེ།

དེ་ཡང་གུང་ཐང་གི་ཡུལ་ཐོག་མར་འཛིན་པ་པོ་ནི། སྔོན་རྒྱལ་པོ་གནམ་རི་སྲོང་བཙན་གྱི་སྐུ་རིངས་ཙམ་དུ་དབུས་གཙང་ནས་མི་གཙོ་གསུམ་འཁོར་དང་བཅས་ཏེ་ཡུལ་ཚོལ་ལ་འོངས་ནས་གུང་ཐང་ཤར་ལའི་རྩེར་སླེབས་ཚེ་བལྟས་པས་ལྗོངས་བཟངས་པོ་མཐོང་ནས་རྨོག་ལ་ཆོལ་ཕོར་བྱས་ཏེ་ཡུལ་རྒྱན་དུ་དོར་ཏེ་བསྒོས་(བགོས་)པས། རྒྱན་པོ་ཆེ་རིམ་གྱིས་འཛང་གཤོང་ལྷ་སྡོང་གསུམ་(གྱི་)མེས་པོ་ཕ་ཚེར་འཐུག་པོས་(པོར་)འཛང་གཞུང་ཐོབ། མེས་པོ་འདབ་སེང་གཡུ་རལ་ཅན་ལ་གཤོང་གཞུང་ཐོབ། ས་ནམ་གྱི་མེས་པོ་སྟག་རྒྱ་བོ་ཆུ་རལ་ཅན་ལ་ལྷ་སྡོང་ཐོབ་སྟེ། ས་ནམ་རྒྱན་ཕམ་སྟེ་ཡིད་མ་ཚིམ་པར་སླར་ཡང་ཤོ་ལ་སྨད་དུ་ཡུལ་ཚོལ་ལ་ཕྱིན་པས་ཡུལ་བཟང་ལ་མང་བ་རྙེད་དེ་ཡིད་དགའ་བས་གླུ་བླང་བ། རྩ་མདའ་རོན་མདའ་དགུན་མདའ་གསུམ། །སྔོན་མོ་ནས་ཀྱི་སྐྱེ་ས་ཡིན། །རྩ་ཕུ་རོན་ཕུ་དགུན་ཕུ་གསུམ་སྐད། །གསལ་ལེ་འབྲི་ཡི་འཆང་ས་ཡིན། །ཞེས་སོགས་ཀྱང་སྨྲས་སྐད། དེ་ནས་རིམ་པས་སྐྱིད་རོང་དུ་ཕྱིན་ནས་ཡུལ་བཟུང་བས་སྒར་བཏབ་པའི་གནས་ལ་སྒར་དང་། སྤང་ཞིང་དུ་རྨོས་པ་ལ་སྤང་ཞིང་ཞེས་སུ་ད་ལྟ་ཡང་གྲགས། གྲ་སོགས་སུ་ཡུལ་བཟུང་ཞིང་ལྷོ་རོང་ནས་སྟག་རྟོལ་མུ་(པོ་)ཞིག་བཟུང་ནས་བྱང་བཙན་མཆོད་པའི་ཕྱིར་ཁྱེར་བས་སྟག་ཁྱེར་ལ་རུ་གྲགས། དེས་བྱང་བཙན་དགྱེས་ནས་མི་ཚན་དར་རྒྱས་སུ་གྱུར་སྐད་གང་ལྟར་རིམ་པས་མི་གྲོང་རྒྱ་ཆེར་ཆགས།

དེ་ནས་ནམ་ཞིག་གི་དུས་བོད་སྤྱི་ལ་དབང་བའི་རྒྱལ་པོ་མེད་པར་ཡུམ་བརྟན་འོད་ སྲུང་འཁྲུགས་ཏེ་བོད་སིལ་བུར་སོང་བའི་སྐབས་སུ་གུང་ཐང་གི་ཡུལ་མི་རྣམས་གྲོས་སུ་འཆམ་ནས་འུ་ཅག་ཐུན་མོང་དུ་སྐྱོང་བའི་རྗེ་གཅིག་དགོས་འདུག་ཅེས་ལྡེ་གསུམ་ལས་གཅེན་དཔལ་ལྡེ་དེ་ལ་བཙུན་མོ་ཅོག་རོང་(རོ་)བཟའ་འབར་རེ་ཁབ་ཏུ་བཞེས་པའི་སྲས་གཉིས་ཀྱི་ཐུ་བོ་འོད་ཟེར་ལྡེ་དང་། གཅུང་བདེ་སྤྱོད་ལྡེ་ཞེས་བྱ་བའི་སྔ་མ་སྤྱན་འདྲེན་པ་ལ་མེས་པོ་སྟོད་ཀྱི་ཁྲི་རྗེ་དང་ཞང་བརྗིད་ལྡན་རིངས་མོ་བྱ་བ་ཕྱིན་ཏེ་མངའ་བདག་འོད་ཟེར་ལྡེ་གུང་ཐང་དུ་ཕེབས་ཟེར་ལ་ལོ་རྒྱུས་ཁ་ཅིག་ཏུ་དཔལ་ལྡེའི་སྲས་དམར་པོ་བཙན་ནམ་དམར་པོ་ལྡེ་ཞེས་བྱ་ལ། དེ་ཡི་སྲས་འོད་ཟེར་ལྡེ་ཡིན་ཞེས་ཀྱང་བརྗོད་པས། དེ་ཡང་མི་འཐད་པ་མེད་དེ། བྱ་མུང་པོའི་ཐུགས་གཏེར་གྱི་ཞུས་ལན་དུ། ལ་སྟོད་དཔལ་(པད་)མའི་སྤྲུལ་པ་དེ༔ དུས་དང་འབྱུང་ལུགས་བཤད་ཀྱིས་ཉོན༔ རྗེ་ཁྲི་སྲོང་ལྡེ་བཙན་གདུང་རྒྱུད་ནི༔ མང་ཡུལ་གུང་ཐང་ཞེས་པའི་སར༔ གདུང་རབས་བཅུ་གསུམ་སོང་ནས་འབྱུང་༔ ཞེས་དང་། ཆོས་སྐྱོང་ཞེས་བྱ་སྐུ་འདས་ནས༔ ཞེས་པས་མུང་པོ་གཏེར་སྟོན་སྐུ་འཁྲུངས་པའི་དུས་གུང་ཐང་གི་རྒྱལ་རབས་བཅུ་གསུམ་འདས་པ། དེ་ཡང་ཆོས་སྐྱོང་ལྡེ་གཤེགས་པའི་དུས་སུ་གསུངས་པས། དམར་པོ་སྡེ་ནས་ཆོས་སྐྱོང་ལྡེ་ཡི་བར་བཅུ་གསུམ་འགྲིག་པའོ། །གུང་ཐང་གི་དབུས་ནུབ་རི་གཟར་ཞིང་མཐོ་བ། གཡས་རི་རྒྱལ་པོ་ཁྲི་ལ་བཞུགས་པ་ལྟ་བུ། གཡོན་རི་བཙུན་མོ་བུ་ཁུར་འདྲ་བ། ཐང་སྟོད་ཐོ་ལེ་ཞེས་པར་གདན་ཕབ་སྟེ་སྐུ་མཁར་བརྩིགས། སྤྱན་འདྲེན་པ་པོ་གཉིས་ཀྱིས་བློན་པོ་བྱས་ནས་ཆབ་སྲིད་བསྐྱངས་པར་གྲགས་སོ། །འདི་ལ་ལོ་རྒྱུས་ཁ་ཅིག་ཏུ་གུང་ཐང་(དུ་)ཐོག་མར་ཕེབས་པ་ཁྲི་བཀྲ་ཤིས་བརྩེགས་པ་ཡིན་ཞེས་དང་། དེའི་སྲས་དཔལ་ལྡེ་ཡིན་པར་འདོད་པ་མང་དུ་བྱུང་ཡང་། དེ་དབང་ལ་མི་འགྲིག་པའི་གནོད་བྱེད་རེ་ཡོད་ལ།

སྤྱན་འདྲེན་པ་པོ་ཡང་ཕ་ཚེར་འཐུག་པོ་དང་། འདམ་སེང་། སྟག་རྒྱ་སོགས་འདོད་པ་ཡང་མི་འཐད་པར་གོ་ཞིང་། འདིར་བཤད་པ་ཉིད་སྔར་ཡིག་རྙིང་ཞིག་ཏུ་མཐོང་བས་ཁུངས་དང་ལྡན་པར་ཤེས་སོ། །དེ་ལྟར་འོད་ཟེར་ལྡེ་ཡི་སྲས་དབང་པོ་ལྡེ། དེའི་སྲས་དུང་དཀར་ལྡེ། དེའི་སྲས་བཙན་ལྡེ། དེ་རྣམས་སྐབས་ལྡེ་གོ་བཞི་བཙད་ཆུང་ཁབ་ས་དང་ལྔ་ཞེས་ཚོགས་འདུ་གྱེན་ལོང་གདོངས་སུ་བྱེད་ཅིང་ཁབ་ས་ཧ་ཅང་མངའ་ཐང་མི་ཆེ་མོད། འདི་ལ་མང་(པོ་)ཞིག་ཏུ་དམར་པོ་ལྡེ་དང་། དུང་ལྡེ་མི་འབྱུང་བར། དཔལ་ལྡེའི་སྲས་འོད་ལྡེ་དང་། འོད་སྡེའི་སྲས་བདེ་སྤྱོད་དང་། དེ་སྲས་དབང་ལྡེ། དེ་སྲས་བཙན་ལྡེ་ཟེར་ཡང་གོང་དུ་བཀོད་པ་ཉིད་འཐད་ལ། གང་ལྟར་བཙན་ལྡེ་ལ་སྲས་གསུམ་སྟེ། གཅེན་ལྷ་མཆོག་ལྡེའམ་འདོལ་ལེ། བར་པ་དཀོན་མཆོག་ལྡེ། གཅུང་འོད་ལྡེའམ་རྩེ་མོ་ཞེས་བྱ་སྟེ། ཐ་ཆུང་གི་རྒྱུད་པ་ནི་ཇོ་བོ་མཛད་པ་ཡིན་ཞེས་དང་། ཕལ་ཆེར་སྡེ་པ་ཚ་མདའ་བ་ཡིན་ཞེས་ཀྱང་བརྗོད་དོ། །གཅེན་ལྷ་མཆོག་ལྡེའི་སྐུ་རིང་དུ་མངའ་ཐང་ཡང་སྔར་ལས་འཕེལ་བར་གྱུར་ཅིང་། གཤོངས་དབུས་ནུབ་རི་སྟོང་པོ་ཆེ་དར་ཡོལ་བྲེས་པ་ལྟ་བུར་ཕོ་བྲང་ཕྱིས་ཁབ་གོང་དུ་གྲགས་པ་སྐུ་མཁར་ལྕགས་རི་འོབ་དང་བཅས་པ་བྱས། དེ་ཙམ་ནས་རྗེ་བཙུན་ཆེན་པོ་མྱི་ལ་རས་པ་ཡང་གྲུབ་པ་བརྙེས་ཏེ་ཟ་འོག་ཕུག་ཏུ་ཕེབས་པ་དང་དུས་མཚུངས་ཟེར་བ་ཡང་དོན་ལ་གནད་(གནས་)པ་ཉིད་དོ། །འོད་ལྡེའི་སྲས་དབང་ཕྱུག་ལྡེ། དེའི་སྲས་སྐྱོབ་པ་ལྡེ། དེ་ལ་སྲས་མོ་གསུམ་དང་། སྲས་པོ་གཅིག་བྱུང་བ་མགོན་པོ་ལྡེ་སྟེ་(འདིའི་)ཕྱག་ལ་ཤ་མཚན་དམར་པོ་ཡོད་པས་དཔུང་དམར་ཞེས་ཀྱང་གྲགས། རྒྱལ་པོ་དེའི་སྐུ་རིངས་སུ་སྤད་ཞོད་ཆོས་གྲགས་ཀྱིས་ཡེ་ཚོའི་ཡུལ་ནས་མོན་གྱི་དམག་དྲངས་པ་དང་འཐབ་པས་མ་ཐུབ། མངའ་བདག་སྐྱིད་གྲོང་དུ་བྲོས་པ་མཚམས་ནས་ཟིན། ཁབ་ཀྱི་སྐུ་མཁར་མཐོང་སར་བཀྲོངས། དབུ་ཁྱེར་བའི་ཁྲག་ཐིགས་ཟག་པའི་ས་ལ་མཆོད་རྟེན་རེ་རེ་ཡང་བསྒྲུབས་པར་གྲགས།

དེའི་བཙུན་མོ་དངོས་ལ་སྲས་མེད་ཅིང་། ར་ལའི་བཙུན་མ་བྱང་ཆུབ་འདྲེན་ཞེས་མཁར་ཆེན་བྱང་ཆུབ་གཟུངས་ཀྱི་དབོན་གྱི་སྲས་མོར་གྱུར་པ་ཞིག་དང་འབྲེལ་བ་ལ་མངལ་ཆགས་ནས་ཡོད་པ་ཕ་རོལ་པོ་ལ་འཇིགས་ཏེ་བྲོས་པས་ཀློང་རྩེར་སླེབས། དེར་བཙུན་མ་བརྒྱད་ཀྱིས་གཟེབ་ཀྱི་ནང་དུ་བཅུག་སྟེ་རྒྱབ་ཏུ་ཁྱེར་ནས་དཔལ་མོ་སྐྱིད་ཕུག་ཏུ་བསྐྱལ་བར་ཕུ་རིར་རང་གི་ཁུ་བོ་མཁན་ཆེན་ཆོས་རྗེ་གཉོས་སྟོན་བྱང་ཆུབ་གཟུངས་ཀྱི་སྤྱན་སྔར་ཕྱིན། མཁན་པོས་ཀྱང་གདུང་རྒྱུད་འདི་ཤིན་ཏུ་གཅེས་པ་ཡིན་ཞེས་ཕུ་རི་དང་གྱམ་གྱི་དགེ་རྣམས་ལ་སྐུ་རིམ་སྒྲུབ་བཅུག་(པ་)བཞིན་རྒྱལ་བུ་མཚན་དང་ལྡན་པ་ཞིག་ལུག་རར་བྱ་ཐེར་ནང་དུ་འཁྲུངས། ཡབ་གཤེགས་པའི་ལོར་བརྩས་(བཙས་)པའི་ཁྱེའུ་ལ་དབུས་སུ་ལྟོ་བོར་བ་དང་། མངའ་རིར་སྒྲོ་སྤངས་སུ་འབོད་ལ། རྒྱལ་བུ་སྒྲོ་སྤངས་དེ་བཙུན་པའི་ཆས་སུ་བཅུག་ནས་མིང་བཙུན་པ་ལྡེར་བཏགས། དེ་སྐབས་རྒྱལ་སྲིད་ཀྱི་བྱ་བ་ནི་ནེ་ནེ་ཆུང་ཤོས་བཙུན་མར་བཞུགས་པ་ལྷ་རིན་ཆེན་མཚོ་ཞེས་པས་བྱེད། དེ་ནི་དགྲ་གཉེན་ལ་ངར་ཐོན་ཞིང་བློ་གྲོས་ཀྱི་ལང་ཚོ་བརྟས་པ་ཞིག་སྟེ་གཅེན་མོ་ལྷ་གཅིག་མཛེས་མ་བདག་ཉིད་ཆེན་པོ་ས་པཎ་གྱི་གཅུང་ཟངས་ཚ་བསོད་ནམས་རྒྱལ་མཚན་གྱི་བཙུན་མོར་ཡོད་པས་སྔར་ནས་གཉེན་སྟབས་དང་། དེའི་སྲས་མོ་ཚ་བོ་བཙུན་པ་ལྡེའི་ཁབ་ཏུ་གཉེན་བརྩེགས་ཏེ། ས་སྐྱར་ཕྱག་རྟེན་བཏང་ཞིང་ཕྲིན་ལས་བཅོལ་ནས་དམག་ཁྱེར་ཆེན་པོས་ཡེ་ཚོའི་ཕྱོགས་ལ་མི་ཤ་བླན་(ཀླན་)ཕྱིར་མི་མང་དུ་བསད། དེའི་སྡིག་སྦྱངས་ལ་ཁབ་གོང་གི་ལྷ་ཁང་དམར་པོ་དང་། ནོར་གནས་གསར་གྱི་ལྷ་ཁང་དང་། དེ་དག་ཏུ་ཀ་ནི་(ཀཀྞི་)ཆེན་པོ་རེ་རེ། གཞན་ཡང་མཆོད་རྟེན་ཕྲ་མོ་མང་དུ་བརྩིགས། ཆོས་མཁར་དུ་རྒྱུད་བརྟག་གཉིས་དང་། འོམ་ཕུག་ཏུ་རྒྱུད་གསང་སྙིང་བཤད་གྲྭ་བཙུགས། སྒོས་གཞིས་གདུང་ཕུག་ཏུ་མཛད་དེ། དེར་མདོ་མང་གླེགས་བམ་བཞི་བཅུ་བཞེངས་ཤིང་གསུང་སྒྲོགས་ནར་མར་བཙུགས་པ་དང་། ཚེ་སྨད་ཐུགས་དམ་པ་རྩེ་གཅིག་ཏུ་གཞོལ་བ་སོགས་བུད་མེད་གཅིག་ལ་ཡ་རབས་ཀྱི་གཏམ་དཔེར་འོས་པ་བྱས། དེས་ས་སྐྱ་དང་གཉེན་བརྩེགས་པའི་ཚུལ་ནི། རང་ཉིད་སྐྱེ་བ་དམན་ཞིང་ཚ་བོ་སྐུ་ན་ཕྲ་བས་གཉེན་དབོན་ཞིག་བཙལ་དགོས་པར་སྙམ་པ་ན། རང་གི་གཅེན་མོ་མཛེས་མ་ལ་སྲས་མོ་བསོད་ནམས་འབུམ་དང་ཉི་མ་འབུམ་གཉིས་ཡོད་པ་ཉི་མ་འབུམ་ཆུ་མིག་སྡེ་དཔོན་གྱི་བཙུན་མོར་གཤེགས་ནས་སྲས་མོ་གཅིག་ཡོད་ཀྱང་ཐུགས་མ་སོང་ནས་སྟོད་གཙང་པོ་ཐང་ཆུང་བ་ཤཱཀྱ་སེང་གེའི་སྙན་པ་གསན་ནས་རང་གི་མིང་པོ་ཆོས་རྒྱལ་འཕགས་པ་ལ་སྐྱིད་གྲོང་ཝ་ཏི་མཇལ་བའི་ཟོལ་གྱིས་གནང་བ་ཞུས་པ་ལ་འཕགས་པའི་ཞལ་ནས། མ་ཞག་གཙང་པོའི་ཕྱོགས་འདི། ལོང་གཏམ་ཚིག་ལ་སྨྲ་ལྕེ་བདེ། ལ་སྟོད་ལྷོ་ཡི་ཕྱོགས་འདི། ཨར་རྐུན་ཇག་པའི་འཇིགས་པ་ཆེ། སྐྱིད་རོང་བལ་པོའི་ཕྱོགས་འདི། ཟས་སྐོམ་བཏུང་བཅས་ཚད་པ་ཆེ། ཞེས་གསུངས་ཤིང་དོན་དུ་གནང་ནས་ཡར་ལམ་ཐང་ཆུང་དུ་བྱོན་ཀྱང་ཁོང་གི་བཞེད་པ་མེད་པར་རིག་ནས་གུང་ཐང་དུ་གཉེན་འཕྲད་དང་འཕགས་པ་ཝ་ཏི་མཇལ་བར་བྱོན་པས་ཁབ་ཀྱི་ཆུ་ཚན་ཁར་རྒྱལ་བུ་དང་མཇལ། སྲུ་མོ་ལྷ་རིན་ཆེན་མཚོས་ཚོ་བ་ན་ཕྲ་ཡང་།

ས་པཎ་ཁུ་དབོན་རྒྱ་ཧོར་རྒྱལ་པོའི་མཆོད་གནས་སུ་གྱུར་པས་སྟོབས་ཆེ་བ་ཡི། དེ་སྐབས་སུ་བབ་པར་སེམས་ནས་བཙུན་པ་ལྡེ་དང་མཚམས་སྦྱར་ནས་ཁབ་ཏུ་བཞུགས་པར་བྱས། དེ་ཚེ་འགྲོ་མགོན་འཕགས་པས་ཨ་ལྕེ་ལ་མར་ཡོངས་(འོངས་)དགོས་ཚུལ་ཕོ་ཉ་སྦྲན་པར་ཉི་མ་འབུམ་གྱིས་ཞུ་ཡིག་དུ་གསོལ་བ། སྐྱིད་གྲོང་བལ་པོའི་ཡུལ་འདི་ཚད་པ་ཚ་གསུང་བ་ལྟར་གདའ་བས་བདག་སྐོམ་ནས་ཆུ་མིག་གཅིག་ནས་ཆུ་འཐུང་པས་སྟེའུ་(ཉིའུ་)ཞིག་ཁོག་པར་ཤོར་བ་ཡིས་ཁོ་མོ་མྱུར་དུ་ཡོང་ཐབས་མ་བྱུང་བས་དེ་ལ་བརྩེ་བའི་བསླབ་བྱ་ཞིག་ཞུ་ཞེས་ཞུས་པར། ཆུ་མིག་ལེགས་པར་བརྟག་ལ་གྱིས། ཉ་ཆུང་ལ་གཅེས་སྤྲས་འཚལ། རེ་ཞིག་དེར་སྡོད་ན་རུང་། ཞེས་གནང་(བ་)བཞིན་བདག་མོ་ཉི་མ་འབུམ་ལ་ཆུ་མོ་གླང་གི་ལོར་རྒྱལ་པོ་བཙུན་པ་ལྡེ་ཡི་སྲས་ཁྲི་རྒྱལ་འབུམ་ལྡེ་མགོན་ཞེས་བསོད་ནམས་ཀྱི་མཐུ་དང་ལྡན་པ་དེ་མངོན་པར་བལྟམས་སོ། །འབུམ་ལྡེ་མགོན་འཁྲུངས་པའི་ཆུ་གླང་འདི་གྲུབ་ཐོབ་ཨོ་རྒྱན་པས་ཉེར་བཞི་དང་། འགྲོ་མགོན་འཕགས་པ་བཅུ་དགུ་བཞེས་པའི་ལོ་དེ་ཡིན། དེ་ཡང་ཨོ་རྒྱན་གྱི་སློབ་དཔོན་ཆེན་པོའི་ལུང་བསྟན་ལས། དེ་ནས་གདུང་རབས་མང་དུ་བརྒྱུད་པའི་མཐར༔ མང་ཡུལ་གུང་ཐང་སྟོད་ཀྱི་ས་ཕྱོགས་སུ༔ དྲག་ཤུལ་སྙིང་རྗེར་ལྡན་པའི་རྒྱལ་པོ་འབྱུང་༔ དེ་ཡི་རིངས་ལ་བོད་ཁམས་དགའ་སྤྲོ་སྐྱེ༔ ཞེས་འབྱུང་བ་ལྟར་ཏེ། རྒྱལ་པོ་འདི་དགུང་ལོ་བརྒྱད་པའི་སྐབས་ཆོས་ཀྱི་རྒྱལ་པོ་འགྲོ་མགོན་འཕགས་པ་རྒྱ་ནག་ཧོར་གྱི་རྒྱལ་པོའི་ཏི་ཤྲི་ཆེན་པོར་གྱུར་ཏེ་བོད་ཆོལ་ཁ་གསུམ་དབང་བསྒྱུར་བའི་ལུང་དང་བཅས་ཏེ་ས་སྐྱར་ཕེབས་པ་ན། ཡུམ་སྲས་གཉིས་ནས་ཕྱག་རྟེན་བཟང་པོ་བསྣམས་ནས་མཇལ་དུ་ཕྱིན་ཞེས་གུང་ཐང་གི་རྒྱལ་རབས་ཁ་ཅིག་(ཏུ་)འབྱུང་ཡང་། འབུམ་ལྡེ་དགུང་ལོ་བརྒྱད་པ་ལྕགས་སྤྲེལ་ལོར་ཧོར་སེ་ཆེན་གྱིས་རྒྱལ་སྲིད་ཐོབ་ཅིང་འཕགས་པ་ཡང་དེ་ཡི་བླ་མར་གྱུར་ནས་ཧོར་ཡུལ་(དུ་)བཞུགས་སྐབས་ཏེ་མི་འགྲིགས་ལ། མངའ་བདག་ཁྲི་འབུམ་ལྡེ་དགུང་ལོ་བཅུ་གཉིས་ལ་ཆོས་རྒྱལ་འཕགས་པ་སུམ་ཅུ་བཞེས་པའི་ཤིང་བྱིར། རྒྱ་ནག་ནས་བོད་དུ་ཕེབས་པའི་ལོ་དེར་མཇལ་བར་གསལ། དེ་རྗེས་འཕགས་པ་རིན་པོ་ཆེ་བོད་དུ་ལོ་ངོ་བཞི་བཞུགས་ཏེ་མེ་ཡོས་ལོར་གོང་ནས་སྤྱན་འདྲེན་བྱུང་(བ་)བཞིན་ཕེབས་པ་ཡིན།

མངའ་བདག་འབུམ་ལྡེ་མགོན་སྐུ་ཞང་མཇལ་བར་ས་སྐྱར་སླེབས་པ་ན་ཆོས་ཁྲི་ཐང་དུ་ཁྲོམ་ཚོགས་ཤིན་ཏུ་ཆེ་བ་འདུག་པ་ཁོང་ལ་ཞེ་ས་བྱེད་པ་པོ་མ་བྱུང་བས་གཡས་ཀྱི་དོང་པ་ནས་ཉག་ཕྲན་བླངས་ཏེ་གནམ་རུའི་དཀྱིལ་འཁོར་ཁེངས་པའི་འདོམ་བཀང་བ་ནམ་མཁའ་ལ་འཕངས་པས་གར་བབ་བརྟོལ་མེད་ཀྱིས་ཁྲོམ་ཚོགས་རྣམས་ཅ་ཅོ་སྒྲོགས་བཞིན་ཀུན་ཏུ་གཡོས་ཏེ་ས་སྐྱ་བའི་ཚ་བོ་འདི་གླང་དང་འདྲ་བ་འདུག་ཅེས་གྲགས། དེ་ཡི་སང་ཉིན་འགྲོ་བའི་མགོན་པོ་འཕགས་པ་ཐོག་མར་མཇལ་བར་སྐུ་ཞང་ས་སྐྱའི་ཞལ་ངོ་རྣམས་ལ་ཟབ་གོས་ཀྱི་གདན་བརྩེགས་མ་དང་། དབོན་མངའ་བདག་སྲས་ཆུང་རང་ལ་འབོལ་དྲུམ་(གྲུམ་)ཞིག་ལས་མེད་པར་གཟིགས་ནས་ཅུང་ཟད་མ་རང་བས་འགྲོ་མགོན་འཕགས་པ་ལ་ཕྱག་མ་བྱས་པར་བསྙུན་གསོལ་བས་འཕགས་པའི་ཞལ་ནས་ཁ་སང་ཁྲོམ་ལ་མདའ་བརྡེག་པ་དང་། ད་རིང་ཕྱག་འབུལ་མི་བྱེད་པ་ཚ་བོ་འདི་གླང་ཤ་ཐག་(སྟག་)ཏུ་འདུག་ཅེས་གསུང་ཤིང་། གནས་སྐབས་གཞན་གྱིས་སྨོད་པ་ལྟར་གྱུར་ཀྱང་དོན་དུ་དཔའ་བོ་དོར་ཐབས་ཅན་ཟིལ་གྱིས་གནོན་པའི་སྙེམས་པ་འཆང་བ་ཞིག་ཏུ་ཐམས་ཅད་ཀྱི་ཡིད་དང་རྣ་བར་འཇགས་པར་བྱས། འགྲོ་མགོན་འཕགས་པས་ཀྱང་སྐབས་སུ་བབས་པའི་དབང་བྱིན་རླབས་དང་དངོས་པོའི་གནས་སྐྱེས་གྱ་ནོམ་པ་ལུགས་གཉིས་ཀྱི་བསླབ་བྱ་བདུད་རྩི་ལྟ་བུ་(དང་)བཅས་ལྕམས་ཀྱི་ལྗོངས་སུ་ཆགས་ཕ་བཞི་དུད་ཆེན་བརྒྱ་སྟེ་དོན་དུ་སྟོང་འཁོར་གཅིག་གནང་ནས། ཡར་བྱོན་ཁར་སྐུ་ཚ་གཞོན་ནུ་ལ་ལོ་གསུམ་མ་སྨྱོ་ན་གྲགས་པའི་གཏམ་མི་ཐོབ་ཅེས་པ་ཡིན་པས་ཡིད་ལ་ཇི་ལྟར་འདོད་པར་བྱོས་ཤིག་པའི་བཀའ་ཤེད་བསྐུར་དུ་བསྩལ། རྒྱབ་གཉེར་དཔོན་ཆེན་ཤཱཀྱ་བཟང་པོ་དཔུང་དང་བཅས་པ་བཏང་ནས་ཡུམ་སྲས་མངའ་རིས་གུང་ཐང་དུ་ཕེབས། གུང་ཐང་གོ་བཞི་ཞེས་བན་དེ་དབང་ཤེད་ཤིན་ཏུ་ཆེ་བས་སྔར་མངའ་འོག་ཏུ་འདུ་བ་མེད་པ་ཐོག་མར་དེ་རྣམས་རྣལ་དུ་ཕེབས་པར་བཞེད་པ་ཡི། སྡེ་གོ་བཞིའི་མཁན་པོ་བཞི་བཀུག་སྟེ་ཁབ་གོང་གི་སྒོ་བཞིར་ཨན་བཅུག་སྟེ། ཆེན་པོ་ཧོར་གྱི་སྲོལ་ལྟར་ཁྲིམས་རྔ་བརྡུངས། ཐོ་སྟ་ཕྱར། རྔ་ཐུག་སྦྲེངས་ནས་ང་རོ་ཆེན་པོ་ཚམ་རྔམ་འཇིགས་འཇིགས་ལྟར་དུ་འདི་སྐད་ཅེས། ཀྱཻ། ཐམས་ཅད་ཉོན་ཅིག གནམ་ལ་ཉི་ཟླ་ཟུང་གཅིག་ས་ལ་གོང་མ་མཆོད་ཡོན་ཞེས་སྙན་པ་འབྲུག་ལྟར་དུ་སྒྲོགས་པ་དེ་མ་ཐོས་སམ། ད་ལྟའི་གུང་ཐང་ཁབ་པ་འདི་བོད་རྒྱལ་པོའི་གདུང་རྒྱུད་དྲི་མ་མེད་པ་ཆོས་རྒྱལ་སྲོང་བཙན་སྒམ་པོ་དང་། ཁྲི་སྲོང་ལྡེའུ་བཙན། ཁྲི་རལ་པ་ཅན་སོགས་ཀྱི་རྒྱུད་པ་མང་པོས་བཀུར་བའི་རིགས་ཡིན་པར་མ་གོའམ། དེ་ལ་དེང་སང་སྡེ་གོ་བཞི་བཙད་ཆུང་ཁབ་པ་དང་ལྔ་ཞེས་ངོ་མཐོན་དུ་སྨྲ་བ་ཁྲིམས་ཆེན་པོ་དང་འགལ་བ་མི་བཟད་པ་ཡིན་པས་ཆད་པ་སྣ་དགུ་ཐོབ་པ་གོ་དགོས་ཞེས་ཁྲིམས་ཚིག་ཏུ་བསྒྲགས་ནས་ཕག་ཏུ་ཉན་རྣ་རྟོག་ཆེན་པ་བཏང་བར། བན་དེ་ཚོ་ན་རེ། འོ་ཅག་གི་མཁན་པོ་རྣམས་ཀྱི་སྐུ་ལ་ཉེས་པ་བྱེད་ན་བཟོད་པ་མེད་པར་སྲོག་དང་བསྡོས་ཏེ་རྒོལ་བར་བྱའོ། །སྡིག་མོ་ཙམ་བྱེད་ནས་འཇགས་ལ་འགེལ་ན་དེང་སང་ས་སྐྱ་པའི་ཁུད་སུས་ཀྱང་མི་ཐེགས་པས་ཅི་ཟེར་ཉན་པ་ལས་མ་འདས་ཞེས་ཟེར་བ་གོ་ནས་སང་ཉིན་ཁྲིམས་གཏམ་དུ།

འོ་ཁྱོད་རྣམས་ཀྱི་སྔར་གྱི་བྱེད་པ་ལ་དཔགས་ན་ཁྲིམས་ཅི་ཡང་ཐོབ་པར་སྣང་ནའང་། ངེད་རང་གི་ཆོས་ཀྱི་རྗེ་སྲིད་ཞི་ལ་བྱམས་པའི་ཐུགས་མངའ་ཞིང་ཁྱོད་རྣམས་ཀྱང་བདེ་བར་གཤེགས་པའི་ངུར་སྨྲིག་གི་རྒྱལ་མཚན་བཟུང་བའི་ཚུལ་ཅན་དུ་འདུག་པས་ད་ལམ་ཉེས་མེད་དུ་འཇོག་ན། ད་ཕྱིན་ཆད་རྒྱལ་རྗེ་ཁབ་པའི་ཞབས་སྤྱི་བོས་ལོངས། ཇི་གསུང་བཀའ་སྒྲུབ་གང་བསྒོ་བའི་ཕྲིན་ལས་སྒྲུབས། དད་གུས་ཀྱི་ཞོ་ཤེ་ཕུལ་ཅིག འདི་ལས་འགལ་ན་དྲག་པོའི་གཞེར་ཡོང་ངེས་པ་ཡིན་ཞེས་གནད་ལ་ཕབ་སྟེ་རྩིག་(གཙིགས་)བླངས་ཤིང་། ཟང་ཟིང་གིས་ཀྱང་ཡིད་མགུ་བར་བྱས་པས་དེ་རྣམས་ཀྱིས་ཀྱང་སྔར་གྱི་སྤྱི་བརྟོལ་ཐོ་ཅོའི་སྤྱོད་པ་དོར་ནས་དེས་ཤིང་གུས་པའི་འབངས་སུ་བྱས། སྡེ་གོ་བཞི་ནི་ལོ་པཎ་གྱི་ཆེ་བ་ཡང་ཐོགས། མཐུ་ཡི་ཆེ་བ་གོ་འཆོ། དེ་གཉིས་ཁབ་རྫོང་དཀར་གྱི་འདབ་འཛངས་གཞུངས་སུ་ཡོད། འབངས་ཀྱི་ཆེ་བ་རོ་གམ་གཤོང་ན་ཡོད་དེ། དེ་གསུམ་གུང་ཐང་པ་དང་། ཟམ་འཕྲང་(གི་)ཆེ་བ་གསར་ཚོ་ནུབ་རི་ན་ཡོད་པར་སྣང་། དེ་ལྟར་གུང་ཐང་རྩ་བའི་མི་སྡེ་ཡང་དག་པར་འཇགས་ནས། རིམ་པས་ཕས་ཀྱི་ཕྱོགས་སོ་སོ་ན་འཁོད་པ་རྣམས་ཀྱང་བཏུལ། འགའ་ཞིག་ནི་བྱ་དགའ་དང་ཚིག་གི་སྦྱོར་བ་བཟང་པོས་ཀྱང་ཡིད་བཞོས་ནས་འབངས་སུ་བཀོད་དེ་མངའ་འོག་སྡེ་ཚན་བརྒྱ་ཚོ་བཅུ་གསུམ་དུ་གཏན་ལ་ཕབ་པར་བྱས། དེ་ཡང་བརྒྱ་ཚོ་བཅུ་གསུམ་གྱི་གྲངས་ནི། གུང་ཐང་སྐྱིད་གྲོང་ནུབ་རི་གསུམ། མ་ཞང་རྒྱ་ཚང་པ་དང་བཞི། རྩ་བའི་མི་སྡེ་རྣམ་བཞི་ཡིན། གློ་སྟོད་གློ་སྨད་དོལ་གྲུ་གསུམ། བཟང་རྒྱུད་པ་དང་རྣམ་པ་བཞི། རལ་གྲིས་བཅད་པའི་སྡེ་བཞི་ཡིན། གཉམས་དངུལ་གཉིས་དང་ཕུ་རི་མཚོ་འཁོར་དང་། གཙང་པོ་ཟངས་ཚ་བ་སྟེ་རྣམ་པ་བཞི། གུས་པས་བཏུད་པའི་མི་སྡེ་ཡིན། ཕ་བཞི་ཆགས་ཀྱི་བརྒྱ་སྐོར་གཅིག ལྕམས་ཀྱི་རྫོང་ལ་བྱུང་བ་སྟེ། བརྒྱ་ཚོ་བཅུ་གསུམ་དེ་ལྟར་གྲགས། ཞེས་པ་སྟེ་འདི་ཡང་བསྒྲང་ཚུལ་ཅུང་ཟད་མི་འདྲ་བ་སྣང་ཡང་འདིར་མཐུན་པ་མང་བའི་ཕྱོགས་བཟུང་སྟེ་བྲིས་པའོ། །འདིར་བསྒྲང་བའི་བརྒྱ་ཚོ་ཡང་དོན་དུ་བཅུ་ཚོ་བརྒྱ་རུ་བྱས་པ་སྟེ་སྟོང་ཕྲག་ལ་བཞག་པ་ཡིན་གྱི། ཧོར་ཁྲིམས་སྐབས་བོད་ཀྱི་སྟོང་སྐོར་ཁ་ཅིག་དེ་དང་འདྲ་ལ། དེང་སང་གཞུང་ཁྲལ་ལ་ཐེམ་བཀུང་(སྐུང་)བྱེད་པ་དང་ཆ་མཐུན་ནོ། །

དེ་ནས་གཞོན་ནུར་གྱུར་པ་དེས་མ་འོངས་གདུང་རབས་རྣམས་ལ་འདི་ཕྱི་ཀུན་ཏུ་དགེ་བའི་བརྩས་(བཙས་)སུ་ཕྱོགས་དེར་རྒྱལ་བའི་བསྟན་པ་རིན་པོ་ཆེ་ཡུན་དུ་གནས་པའི་སྲི་ཞུ་བགྱིད་པའི་ཆེད་དུ་མངོན་པར་མཐོ་ཞིང་ངེས་པར་ལེགས་པའི་ཕོ་བྲང་ཆེན་པོ་ཞིག་གསར་དུ་བཏབ་པར་དགོངས་ཤིང་། དེ་ཡང་མེ་རྡོ་ཐང་དུ་གྲགས་པ་དེ་རྒྱབ་རི་ཐོ་ལེ་ཞེས་རྒྱལ་པོ་གདན་ལ་བཞུགས་པ་ལྟ་བུ་དང་། ཕྱོགས་བཞི་བྱང་ནས་བཙམ་(བརྩམས་)སྟེ་སྣོད་རིན་པོ་ཆེས་བཀང་བ་དང་། འབྲས་སྤུངས་པ་དང་། ས་ཡི་བརྟན་ཕུར་དང་། དལ་གྱི་ཡོལ་བ་ལྟ་བུས་བསྐོར་བ། སྟེང་དགུང་སྔོན་འཁོར་ལོའི་རྣམ་པ་ལ། འོག་(ས་)གཞི་པད་མ་ལྟར་འཁྱིལ་བའི་ལྟེ་བར། ཕོང་ཁ་ཁྱུང་ལྡིང་བ་ལྟ་བུ་དང་། གཞན་ཡང་ཤར་ཕྱོགས་སུ་ཨེ་ཝཾ་གྱི་གཟུགས། ལྷོར་ཉི་ཟླ། ནུབ་ཏུ་བྱ་ཁྱུང་། བྱང་དུ་སྤྱན་རས་གཟིགས། ནུབ་བྱང་དུ་ཚོགས་ཀྱི་བདག་པོ་རྣམས་རང་བྱུང་དུ་གནས་པ་གཟིགས་ནས་ས་ཡི་བདག་པོ་ཡང་ཐོགས་པར་བདག་གི་སྐུ་མཁར་གདབ་པའི་གནས་སུ་ཚོང་ཞེས་གསུངས་པར། རིན་མི་ཞུ། སྣོམ་ནས་བདག་ཅག་ལ་ཡང་ཁང་པ་གཅིག་ཞུ་གསོལ་བས། ད་ཕྱིས་ཁྱད་ཡོང་ཞེས་པའི་རིན་དུ་རིན་པོ་ཆེའི་ཕྲེང་བ་དངུལ་གྱི་ག་ཊ། རྟ་རྒོད་མ་དཀར་པོ། དར་ཡུག་བཟང་པོ་རྣམས་བསྩལ་ནས་ཕུ་ལག་གི་སྔགས་པ་བདུད་རྩི་མགོན་པོ་དང་ཁྲོ་རྒྱལ་རེགས་ཚིག་གཉིས་ལ་ས་ཡི་འདུལ་ཐབས་དགེ་བའི་རྟེན་འབྲེལ་དག་གྱིས་ཤིག་གསུངས་པ་སྔགས་པ་དེ་དག་མེ་རྡོ་ཐང་ས་ཡི་བདག་པོ་ཡང་ཐོགས་པ་ལ་འཇིགས་ཏེ་བསྙད་དུ་བསྙེན་པ་ཁ་གསོ་དང་། དུས་ཀྱི་ཐེབ་ལྟོག་(ལྟོ་)ཡང་ཞུ་དགོས་ཤིང་གཏོར་ཆས་ཡོ་བྱད་ཀྱང་ཤིན་(ཏུ་)མང་བ་དགོས་ཚུལ་ཞུས་པར། རྒྱལ་པོ་ཁྲོས་ནས་ཉིད་ཅག་སྔགས་པ་རྣམས་རེ་ཙ་ན་འགྱན་པར་འདུག་པས་མི་མང་དུ་འཚོགས་པའི་ལག་སྟབས་ཆག་པས་འགུག་(སྒུག་)སྡོད་མི་ཐུབ། ད་ང་ཡི་རྟ་ཡི་རྨིག་རྗེས་བཞིན་རྩིག་པའི་རྨང་ཚུགས། རྐྱ་བསྐོར་འཆམ་པ་རེ་བྱས་པའི་སར་སྤེའུ་ལྕོག་རེ་བརྩིགས་གསུངས་ནས། མངའ་བདག་རང་ཉིད་ཀྱི་སྐུ་ལ་བེར་ནག་པོ་ཞིག་གསོལ། དར་སྣ་ལྔ་ཡི་ཐོད་བཅིངས། མདུང་དར་ནག་པོ་ཞིག་ཕྱག་ཏུ་བསྣམས་ཏེ་ཆིབས་རྟ་ནག་པོ་ཁྱུང་ཕྲུག་འདྲ་བ་ཞིག་ལ་ཆིབས། བྱང་ཤར་ནས་བརྩམ་སྟེ་གཡས་བསྐོར་གྱི་ཆིབས་འགྲོས་སར་ལྡེམ་མེ་བཞུད་པས་རྒྱ་སྒོ་ལྷོ་ཡི་ཐད་དེར་ཕེབས་པ་ན་སྦལ་པ་ཙིད་བུ་ཙམ་ཞིག་ཐོན་ནས་(པར་)འགྲོ་མལ་ཁྱོད་པས་ང་དབང་ཆེ་བས་རང་གནས་སུ་བདེ་བར་སྡོད་གསུངས་པས་དེར་ས་ལ་ཐིམ། འདི་ཅུང་ཟད་གཉེན་པར་འདུག་ཀྱི་མཆོད་རྟེན་ཞིག་རྩིགས་གསུངས། འོག་གི་ལུ་མ་དམར་པོ་འདི་ཇོ་བོ་སྐུ་ལྷ་དཔལ་རྫིང་གི་ལྕམ་མོ་ཡིན་འདུག་པས་དེ་རུ་ཀླུ་ཁང་ཞིག་རྩིགས། ཇོ་བོ་སྐུ་ལྷ་དཔལ་རྫོང་གི་རྗེ་ཡི་མགུར་ལྷ་བཅུ་གསུམ་གྱི་ནང་ཚན་ཡིན་ཅིང་ཆོས་ལ་དཀར་བས་མཆོད་གསོལ་བ་འབད་དགོས་འདུག་གསུངས། དེ་ཚེ་མངའ་བདག་རང་ཉིད་དགུང་ལོ་བཅུ་བདུན་ཡིན་ཞེས་དང་། ཕལ་ཆེར་དགུང་ལོ་བཅོ་བརྒྱད་པ་ལྕགས་ཕོ་རྟ་ཡི་ལོ་ལ་ཡིན་ཞེས་ཟེར། དེ་ནས་བརྒྱ་ཚོ་བཅུ་གསུམ་གྱི་སོ་སོའི་དཔེའུ་(སྤེའུ་)ལྕོག་དང་། ཐུན་མོང་དུ་དབུས་སུ་རྒྱལ་པོའི་ཁབ་ཕོ་བྲང་དཀར་པོ་དང་། བཙུན་མོའི་སླས་ཁང་མོ་ཆེ་ཕྱིའི་ལྕགས་རི་ཆེན་པོ་ལྕགས་སྐོར་རྡེག་པ་བཅས་གྲུབ་པར་མཛད་ཅིང་། ཕོང་ཀ་ཁྱུང་ལྟ་བུ་རྩིག་པའི་རྨང་དུ་བྱས་པས་མིང་རྒྱལ་པོའི་ཁབ་བཀྲ་ཤིས་ཁྱུང་རྫོང་དཀར་པོ་ཞེས་བཏགས་པ་ཡི་ད་ལྟ་ཡང་མངའ་རིས་རྫོང་དཀར་དུ་གྲགས་པའོ། །ཇི་སྐད་དུ། མེ་རྡོ་ཐང་དུ་ཁྱུང་རྫོང་དཀར་པོ་ཞེས་དང་། དབུས་སུ་རྒྱལ་པོའི་ཕོ་བྲང་ལྷུན་པོ་བཞིན། །མཐོ་ལ་རབ་དཀར་གངས་ལ་ཉི་ཤར་འདྲ། །ལོགས་བཞི་ཟུར་བཞི་ལྕོག་བཞིས་རབ་ཏུ་མཛེས། །དེ་ཡི་ཕྱི་ཡུལ་གྲོང་གླིང་དང་གླིང་ཕྲན་ཚུལ། །མཐའ་སྐོར་ལྕགས་རི་མཐོ་བརྗིད་དཀར་འཚེར་ལ། །སྤེའུ་བཅུ་གསུམ་གངས་རིའི་ཕྲེང་བ་བཞིན། །ཡིད་འོང་སུམ་རྩེན་དགའ་བའི་སྐྱེད་ཚལ་མཚུངས། །ཞེས་ཟེར་རོ། །དེ་ལྟ་བུ་རྫོང་གི་བྱ་བ་ཕལ་ཆེ་ཚགས་སུ་ཚུད་པའི་སྐབས་སུ་འགྲོ་བ་རྣམས་ཀྱི་བསོད་ནམས་ཀྱི་ཞིང་། ཡབ་ཡུམ་གྱི་དགེ་རྩར་དགོངས་ནས་རྒྱལ་བ་ཤཱཀྱ་སེང་གེའི་བསྟན་པ་ལ་བྱ་བ་ལྷག་པར་མཛད་པ་རྒྱལ་བའི་གཙུག་ལག་ཁང་མགོན་མེད་ཟས་སྦྱིན་གྱི་ཀུན་དགའ་ར་བ་དང་། དེ་བཞིན་གཤེགས་པའི་གདུང་རྟེན་དཔལ་ལྡན་འབྲས་སྤུངས་ཀྱི་མཆོད་རྟེན་གྱི་རྗེས་སུ་སྙེགས་པ་དང་།

རྫོགས་པའི་སངས་རྒྱས་ཀྱི་གསུང་རབ་རིན་ཆེན་རི་བོའི་ཆོས་ཀྱི་མཛོད་ལྟ་བུ་བསྒྲུབས་པར་མཛད་དེ། དེ་ཡང་ཇི་སྐད་དུ། བཀྲ་ཤིས་སྒོ་མང་གཙུག་ལག་ཁང་། །ཀ་ཆེན་བཅུ་ཕྲག་དྲུག་གི་ནི། །ཁྱོན་ཚད་དག་དང་ལྡན་པ་ལ། །ཕུགས་ན་གཙང་ཁང་བསྐོར་ཁང་ལ། །ཀ་བ་དྲུག་བཞི་ཉེར་བཞིའི་ཁྱོན། །མདོ་ཁྱམས་གཙུག་ལག་ཁང་ཆེན་ལ། །ཀ་བ་སུམ་ཅུ་སོ་དྲུག་ཡོད། །ཀ་གདན་རྡོ་ཡི་སྙིང་པོ་ལ། །ས་བདག་ཁ་གནོན་རུས་སྦལ་གཟུགས། །པད་མ་འཁོར་ལོས་མཚན་པ་དང་། །གྲགས་པས་མཁའ་ཁྱབ་སྒྲ་ཆེན་ནི། །འབྲུག་གིས་འཁྱུད་པའི་ཀ་གདན་སྟེང་། །ཀ་བ་རྒྱན་འཕྱང་མུ་ཏིག་བྲེས། །གཞུ་ཆུང་གཞུ་ཆེན་གདུང་གདན་དང་། །དེ་སྟེང་སྔས་གདུང་སད་གདུང་གཉིས། །མཆོད་རྟེན་བརྐོས་དང་སེང་གདན་གཉིས། །དེ་སྟེང་སེང་ཆེན་བརྗིད་པའི་གཟུགས། །བར་མཚམས་མཁའ་ལྡིང་དབང་པོའི་སྐུ། །ལྟོ་འགྲོ་དབང་པོས་གུས་བསྙེན་ནས། །མཆོད་པ་ཕུལ་ཚུལ་མཚར་དུ་དངར། །དེ་སྟེང་སེང་ཁྱེབས་(ཁེབ་)འོད་ཀོར་དང་། །དེ་སྟེང་རྒྱུག་གདན་ནོར་བུའི་ཕྲེང་། །དེ་སྟེང་རྒྱུག་དང་ཁ་ཁྱམ་ཕུབས། །དེ་སོགས་སྲ་བརྟན་ཤིང་བརྡར་(སྟར་)སྒྲིགས། །གཞན་ཡང་རྒྱལ་སྲིད་བཀྲ་ཤིས་པའི། །རྟགས་དང་རྫས་བཀོད་ཅིར་ཡང་ཡང་བཀྲ། །མཐིལ་ཞལ་རྒྱ་མཚོ་དྭངས་པ་ལ། །ལོགས་ཞལ་མེ་ལོང་ལྔ་བུའི་ངོས། །བླ་མ་སངས་རྒྱས་བྱང་སེམས་དང་། །འདོད་ལྷ་ཆོས་སྐྱོང་ལ་སོགས་པའི། །སྐུ་བརྙན་སྣ་ཚོགས་ལས་པ་ཡི། །རྫུ་འཕྲུལ་མཐུ་ཡིས་བསྐྲུན་པ་བཞིན། །ཞེས་སོ། །གཙུག་ལག་ཁང་འདི་ཡི་ཀུན་དགའ་ར་བ་དྲི་གཙང་ཁང་སྐོར་བཅས་མཐའ་དག་གི་རྩིག་བཟོ་གྱེང་(གྱང་)བཟོ་ཤིང་ཆའི་བཟང་རྔམ་བརྐོས་དང་བསྒྲིགས་ཚུལ་བྲི་འབུར་གྱི་ཉམས་འགྱུར་རྣམས་ཤིན་ཏུ་ངོ་མཚར་ཞིང་དེ་ཡང་སྲ་བརྟན་བརླིང་བར་མཛད་པའི་མཐུས་གཙུག་ལག་ཁང་གི་རྨང་རབ་བྱུང་ལྔ་པའི་ནང་གི་ལྕགས་རྟ་ལ་བཏིང་ནས་ད་ལྟ་རབ་བྱུང་བཅུ་གསུམ་པའི་མེ་ཡོས་ཡན་ལ་ལོ་བཞི་བརྒྱ་དང་བདུན་ཅུ་དོན་བདུན་འདས་ཤིང་། དུས་ཕྱིས་གཙུག་ལག་ཁང་ལ་སྲིད་(སྲི་)ཞུ་ཆེས་བརྩོན་པ་ཡང་དཀོན་རུང་ཞིག་རལ་རྡིབ་འཁྱོམ་ཡོ་འཆུག་ཅུང་ཟད་ཀྱང་མ་སོང་བར་གནས་པ་འདི་ནི་ངོ་མཚར་བའི་ཡུལ་དུ་སྣང་ངོ་། །དེ་ལྟ་བུའི་གཙུག་ལག་ཁང་ཕྱི་ཡི་བྱ་བ་གྲུབ་པའི་སྐབས་སུ་མངའ་བདག་འབུམ་ལྡེ་མགོན་དེས་གཙུག་ལག་(ཁང་)གི་རྟེན་གཙོ་ཇི་ལྟ་བུ་ཞིག་བགྱིད་སྙམ་པ་ན། མདུན་གྱི་ནམ་མཁར་འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་བྱོན་ཏེ་ཤེལ་གྱི་མཆོད་རྟེན་དྲི་མ་མེད་པ་ཞིག་བསྟན་(ཏེ་)འདི་ལྟ་བུ་ཞིག་བཞེངས་ཤིག་ཅེས་བཀའི་གནང་(བ་བསྩལ་)ཞིང་རང་ལ་ཐིམ་པའི་སྣང་བ་བྱུང་བ་ཡིས་དེ་ལྟར་བསྒྲུབ་པའི་ཆེད་དུ་བལ་པོ་ནས་ལྷ་ཡི་བཟོ་བོ་ལས་སྣ་ཚོགས་པ་ལྟ་(ལྷ་)བུ་ཨུ་སིརྦྷ་ཞེས་པས་གཙོ་བྱས་བཟོ་བོ་བརྒྱད་བཀུག་ནས་ས་སྐྱ་རིན་ཆེན་སྒང་གི་མཆོད་རྟེན་བཀྲ་ཤིས་སྒོ་མང་དང་ཆ་མཐུན་པར་བཞེངས་ཞེས་གྲགས་ཏེ། དེ་ལ་ཡང་འདི་སྐད་དུ། གཙང་ཁང་དབུས་སུ་བཀྲ་ཤིས་སྒོ་མང་ཡོད། །རྨང་གཞི་ཕ་ལམ་ལྟ་བུའི་སྲ་མཁྲེགས་རྡོ། །དེ་སྟེང་རང་བྱུང་ཟངས་ལ་ཛམྦུའི་གསེར། །ལན་བདུན་སྦྱང་བའི་ཆུ་ཡིས་ཉེར་བྱུག་པའི། །མཆོད་རྟེན་འོད་འབར་གསེར་གྱི་ལྷུན་པོ་བཞིན། །རྒྱབ་ཡོལ་དང་བཅས་རྒྱལ་ཐོག་གཉིས་ཀྱི་ཚད། །མཆོད་རྟེན་རྨང་ནི་དགེ་བ་བཅུ། །དེ་སྟེང་བང་རིམ་དང་པོ་ནི། །དྲན་པ་ཉེ་བར་བཞག་པ་བཞི། །གཉིས་པ་ཡང་དག་སྤོང་བ་བཞི། །གསུམ་པ་རྫུ་འཕྲུལ་རྐང་པ་བཞི། །བང་རིམ་བཞི་པ་དབང་པོ་ལྔ། །བུམ་རྟེན་མགུར་བཅུ་སྟོབས་ལྔ་དང་། །བུམ་པ་བྱང་ཆུབ་ཡན་ལག་བདུན། །བྲེ་ནི་ཕ་ལམ་ཡན་ལག་བརྒྱད། །སྲོག་ཤིང་ཤེས་པ་བཅུ་རུ་མཚོན། །ཆོས་འཁོར་བཅུ་གསུམ་སྟོབས་བཅུ་དང་། །དྲན་པ་ཉེ་བར་བཞག་པ་གསུམ། །འདེགས་བྱེད་པད་མ་མི་འཇིགས་བཞི། །ཆར་ཁེབས་གདུགས་ནི་ཐུགས་རྗེ་ཆེ། །གདུགས་འདེགས་མ་འདྲེས་ཆོས་བཅོ་བརྒྱད། །ཏོག་ནི་དྲི་མེད་ཆོས་ཀྱི་སྐུ། །བཀྲ་ཤིས་འབྱུང་གནས་གསལ་ལྡན་དུ། །ཆས་འཁོར་བསྐོར་བའི་མཆོད་རྟེན་བཞིན། །དེ་ལ་མཚན་དཔེ་རྒྱལ་བའི་སྐུ། །དུ་མས་ལེགས་པར་རྒྱན་བྱས་པ། །བྲེ་དཔྲོག་དངུལ་གྱི་རྡོ་རྗེ་འཆང་། །རིམ་པས་ལམ་འབྲས་བླ་རབས་ཚོགས། །བུམ་པར་ལོངས་སྐུ་རྣམ་སྣང་མཛད། །གཞན་ཡང་བང་རིམ་སྒོ་ཁྱིམ་དུ། །སངས་རྒྱས་དཔའ་བོ་བདུན་དང་ནི། །སྨན་ལྷ་བདེ་གཤེགས་རྣམ་པ་བརྒྱད། །དེས་མཚོན་དཀྱིལ་འཁོར་དབང་ཕྱུག་དང་། །ཆགས་བྲལ་དེ་བཞིན་གཤེགས་པའི་སྐུ། །མཁའ་འགྲོ་ཆོས་སྐྱོང་ནོར་ལྷ་སོགས། །རྣམ་པ་དུ་མ་བཀོད་ལེགས་ཤིང་། །སྒོ་ཁྱིམ་ཀ་བས་མཛེས་པར་བྱས། །རྒྱབ་ཡོལ་ངོས་སུ་བྱིན་རླབས་བླ་མ་ཡི། །རྒྱུད་རིམ་ཡིད་བཞིན་ནོར་བུའི་འཕྲེང་བ་འདྲ། །མཆོད་རྟེན་དེ་ལ་མདུན་རྒྱབ་གཡས་གཡོན་ཆ། །བཟོ་སྒྲོས་རྩིང་ཞིབ་ཅུང་ཟད་མ་མཆིས་པར། །ལྷ་ཡི་བཟོ་བོའི་འཕྲུལ་ལས་བྱུང་བ་བཞིན། །བལྟ་བས་ཆོག་མི་ཤེས་པ་ཁོ་ནར་གནས། །དེ་ལ་ཕྲ་རྒྱན་རིན་པོ་ཆེ། །བཻཌཱུརྱ་དང་དབང་སྔོན་དང་། །སརྨ་ར་ག་མན་ཤེལ་ནེལ། །གཡུ་རྙིང་མུ་མེན་བྱུ་རུ་དང་། །མུ་ཏིག་ལ་སོགས་དུ་མས་སྤྲས། །ཞེས་ཚིགས་སུ་བཅད་པ་དེ་རྣམས་སྔོན་གྱི་ཡིག་རྙིང་ལ་ཟུར་མ་དག་པ་ཅུང་ཟད་བཅོས་ཏེ་བཀོད་པའོ། །ཞེས་སོ། །མཆོད་རྟེན་ཆེན་པ་དེའི་ནང་དུ་གཟུངས་རྟེན་ཡང་ཆེས་ཁྱད་པར་འཕགས་པ་མང་དུ་མངའ་བ་གཙོ་བོར་རྒྱལ་བསྟན་འདྲེན་པའི་ཤིང་རྟ་འཛམ་གླིང་རྒྱན་དྲུག་གི་ཡ་གྱལ་སློབ་དཔོན་ཆེན་པོ་སུ་བནྡྷུ་ནེལྤ་ལ་ཡི་ཡུལ་དུ་ཞི་བར་གཤེགས་པའི་དབུ་ཐོད་བལ་པོའི་རྒྱལ་པོའི་མཛོད་དུ་གནས་པ་ཆོས་ཀྱི་རྒྱལ་པོ་འདི་ཡི་བསོད་ནམས་ཀྱི་ལྕགས་ཀྱུ་རྣོན་པོས་དྲངས་ནས་ཕྱག་ཏུ་འབྱོར་བ་ཡང་རིན་པོ་ཆེའི་སྒྲོམ་བུར་བཅུག་སྟེ་བཞུགས་སུ་གསོལ་བ་དང་། དེ་བཞིན་འཕགས་པ་ཀླུ་སྒྲུབ་ཀྱི་ཐུགས་དམ་གྱི་རྟེན་མཐིང་ཤོག་ལ་ཛམ་བུ་ཆུ་གསེར་གྱིས་བྲིས་པའི་ཤེར་ཕྱིན་བརྒྱད་སྟོང་པའི་གླེགས་བམ་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐབས་སུ་བྱུང་བ་དང་། ཨོ་རྒྱན་གྱི་སློབ་དཔོན་ཆེན་པོ་པད་མ་འབྱུང་གནས་ཀྱི་ཐུགས་དམ་རྡོ་རྗེ། བོད་ཀྱི་སློབ་དཔོན་བཻ་རོ་ཙ་ནའི་ཕྱག་མཁར་(འཁར།) མཁའ་འགྲོ་མ་ཡེ་ཤེས་མཚོ་རྒྱལ་གྱི་སྐུ་རྒྱན་སྣ་དྲུག་སོགས་རྒྱ་ཆེར་བཞུགས་པར་བཤད་དོ། །

ཡང་མངའ་བདག་འབུམ་ལྡེ་དེས་རྒྱལ་བའི་གསུང་རབ་དྲི་མ་མེད་པའི་གླེགས་བམ་མང་དུ་སྤེལ་བའི་རྟེན་འབྲེལ་དུ་དགོངས། དེ་བཞིན་གཤེགས་པ་ཐམས་ཅད་ཀྱི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་སྟོང་ཕྲག་བརྒྱ་པ་གནམ་སྔོན་ཞུ་བའི་ཁ་དོག་ཅན་གྱི་ཤོག་བུ་ལ་འཆར་ཁའི་འོད་ཀྱང་ཟིལ་གྱིས་གནོན་པའི་གསེར་ཞུན་གྱི་གཟབ་བྲིས་བལྟ་བས་ཆོག་མི་ཤེས་པ་མིག་འཕྲུལ་ལྟ་བུའི་གླེགས་བམ་བཅུ་དྲུག་ལ་ཟབ་ཆེན་གྱི་སྐུ་རགས་དང་གླེགས་བུའི་ཤིང་གདོང་རྒྱབ་ཏུ་རི་མོའི་རྣམ་འགྱུར་ཁྱད་པར་ཅན་ཚོན་རྩིས་བྱུགས་ཏེ་མིག་གི་དགའ་སྟོན་ཅིར་ཡང་བྱེད་པ། གཞན་ཡང་ཞལ་ཁེབས་ཤུབ་སོགས་ཆས་དང་མཛེས་པའི་བྱ་བ་དུ་མས་ཀླུབས་པ་ཡང་བསྒྲུབས་པར་མཛད་དེ། མཆོད་རྟེན་དང་ཡུམ་གྱི་གླེགས་བམ་འདི་ཉིད་ཡབ་དང་ཡུམ་གྱི་བཀའ་དྲིན་བསབ་པའི་ཆེད་དུ་དགོངས་ཞེས་ཀྱང་གྲགས་སོ། །གང་ལྟར་གཙུག་ལག་ཁང་རྟེན་དང་བརྟེན་པར་བཅས་པ་དགུང་ལོ་ཉི་ཤུ་རྩ་ལྔ་པ་མེ་མོ་གླང་ལ་ལེགས་པར་འབྱོངས་ཤིང་། ལོ་དེར་འགྲོ་བའི་མགོན་པོ་ཆོས་རྒྱལ་འཕགས་པ་ཡང་ཆེན་པོ་ཧོར་གྱི་རྒྱལ་ཁབ་ནས་སླར་ཡང་བོད་དུ་ཕེབས་པ་དང་དུས་མཚུངས་པ་ཉིད་ཀྱི་རྟེན་གསུམ་ལ་རབ་ཏུ་གནས་པ་མཛད་པའི་ཆེད་དུ་གུང་ཐང་ཕྱོགས་སུ་ཕེབས་པར་གསོལ་བ་བཏབ་ཀྱང་ཞལ་སྔ་ནས་ཅོ་ཀའི་ཚང་དུ་གླང་པོ་ཆེའི་རྨིག་པ་མི་ཤོང་གི །ངེད་ཀྱི་སྒར་ཁྱོད་ཀྱིས་འདེགས་པར་མི་ནུས་པས་དེས་ན་སངས་རྒྱས་ཀྱི་དུས་ཆེན་ས་ག་ཟླ་བའི་ཚེས་བཅོ་ལྔར་རྟེན་གསུམ་གྱི་དྲུང་དུ་རབ་ཏུ་གནས་པའི་སྟ་གོན་མཆོད་བཤོམས་གྱིས་ཤིག་དང་། ངས་འདི་ནས་རབ་ཏུ་གནས་པ་བྱའོ། །ཞེས་བཀའ་གནང་བས་དེ་བཞིན་གུང་ཐང་གི་དགེ་བའི་བཤེས་གཉེན་གླང་རི་བཀའ་བཅུ་པ་དང་། རི་རབ་པ་སོགས་སྡེ་སྣོད་དུ་མས་མགྲིན་པ་བརྒྱན་ཅིང་སྔགས་ཀྱི་རྡོ་རྗེ་སློབ་དཔོན་གྱི་གོ་འཕང་བརྙེས་པ་ལྔ་བཅུ་སྐོར་གྱིས་ཀྱཻ་རྡོ་རྗེའི་དཀྱིལ་འཁོར་རྡུལ་ཚོན་གྱིས་ལེགས་པར་བྲིས་ཏེ་སྒྲུབ་ཅིང་མཆོད་པའི་རིམ་པ་བཟང་པོ་དང་བཅས་རབ་ཏུ་གནས་པའི་བཀོད་པ་ལེགས་པར་སྒྲིགས་པའི་དུས་ཚེས་གོང་གི་དེ་ཉིད་ལ་ཀུན་གསལ་གྱི་འགྲམ་པའི་ངོས་ནས་རབ་ཏུ་དཀར་བ་ནས་ཀྱི་སྦྲང་ཆར་དཔུང་གིས་མི་དམན་པ་རྟེན་གསུམ་རྣམས་ལ་བབས་པ་དེར་འདུས་པའི་སྐྱེ་བོ་ཐམས་ཅད་ཀྱི་མཐུན་སྣང་དུ་གྱུར་པ་དང་། གཞན་ཡང་འཇའ་ཚོན་གྱི་བླ་བྲེ། མེ་ཏོག་གི་ཆར། ལྷ་ཡི་བདུག་སྤོས་ཀྱི་ངད་ལྡང་གིས་ཕྱོགས་ཀུན་ཁྱབ་པ་སོགས་དགེ་བའི་མཚན་མ་དུ་མས་ཡོངས་སུ་ཁྱབ་པ་བྱས་ཞེས་གྲགས་པ་ཉམས་པ་མེད་པ་ད་ལྟའི་བར་དུ་གནས་པ་ཉིད་དོ། །དུས་དེར་ཕས་ཀྱི་རྒོལ་བ་ནི་མིང་མི་གྲགས། ནང་གི་མངའ་ཐང་ནི་སུམ་རྩེན་ལ་འགྲན་པའི་སྐབས་སུ་གྱུར་ཀྱང་གོང་གི་མཛད་པ་དེ་རྣམས་ཀྱི་བར་སྐབས་སྔ་ཕྱི་ཅི་རིགས་པར་གདུང་རིགས་ཕྱི་རབས་རྣམས་ལ་སྨན་པའི་སླད་དུ་རྣམ་པར་རྒྱལ་བའི་བཙན་རྫོང་བཅུ་ཕྲག་ལྷག་འདེབས་པར་མཛད་དེ། དེ་ཡང་ཇི་སྐད་དུ། གུ་གེ་པུ་རོང་(སྤུ་རང་)ཁ་གནོན་དུ། །དཀར་དུམ་གནམ་གྱི་ཁྱུང་རྫོང་བརྩིགས། །ཕྱི་འབྲོག་མོན་ཞང་ཁ་གནོན་དུ། །བྱ་རྩི་རྣམ་རྒྱལ་ཐར་པོ་དང་། །མཚོ་དབར་ཉེ་བའི་གློ་སྟོད་དུ། །ནི་རི་གཡའ་རྫོང་དཀར་པོ་བརྩིགས། །གློ་བོ་མཚོ་བཞིའི་ཁ་གནོན་ལ། །གཙང་རོང་བྱ་ཕོའི་ཟེ་བ་བརྩིགས། །ཏ་མང་སེ་མོན་ཁ་གནོན་དུ། །གློ་སྨད་མུ་ཁུན་སྲིན་རྫོང་བརྩིགས། །དོལ་པོ་མོན་གྱི་ཁ་གནོན་དུ། །དོལ་པོའི་ཡི་གེ་དྲུག་མ་བརྩིགས། །ལ་སྟོད་བྱང་པའི་ཁ་གནོན་ལ། །ལ་རུའི་གད་རྫོང་དཀར་པོ་བརྩིགས། །ལ་སྟོད་ལྷོ་ཡི་ཁ་གནོན་ལ། །ཁུན་ཚོ་གད་རྫོང་དཀར་པོ་བརྩིགས། །སྐྱིད་རོང་གོ་བཞི་ཀན་འཇིམ་ཁར། །རག་མར་གྱད་ནོན་ཐར་པོ་དང་། །སྐྱིད་རང་མཐིལ་དུ་སེང་གེ་རྫོང་། །གླང་མཁར་གསལ་བའི་ཡང་རྩེ་བརྩིགས། །རྒྱལ་བལ་གཉིས་ཀྱི་ཁ་གནོན་ལ། །བལ་པོ་རྫོང་གི་རྫོང་དམར་བརྩིགས། །སྙི་ཤོང་རོང་གི་ཁ་གནོན་ལ། །བོང་ཚོགས་གནམ་གྱི་ཀ་བ་བརྩིགས། །ནུབ་རི་མཐའ་འཁོབ་ཁ་གནོན་དུ། །རོད་ཀྱི་བྲག་རྫོང་ནག་པོ་བརྩིགས། །ཕྱག་པ་ཕ་བཞིའི་བཙན་ས་རུ། །ཆུ་དབར་རྫོང་ཆུང་འཛུམ་ཤོར་བརྩིགས། །ཞེས་པ་སྟེ། འདི་ལ་བསྒྲངས་ཚུལ་དང་ངོས་འཛིན་མི་འདྲ་བ་ཅི་རིགས་འདུག་ཀྱང་འདིར་ཞིབ་མོར་བྱས་ཏེ་བཀོད་པ་ཡིན་ལ། འོན་ཀྱང་སྐྱིད་རོང་གླང་སེང་གི་མཁར་སོགས་ཁ་ཅིག་གདུང་རིགས་ཕྱི་མས་བཏབ་བམ་སྙམ་པ་ཡང་འདུག སྔར་ས་སྐྱར་ཕེབས་སྐབས་མཚན་གྱི་བླ་གདགས་སུ་གླང་ཞེས་གྲགས་པ་ལྟར་མངའ་བདག་རང་ཉིད་ཀྱི་མཛད་པ་རྣམས་གླང་གི་ལས་སྟབས་སུ་ཞལ་གྱིས་འཆེས་པའི་གླུ་ཡང་མཛད་དོ། །གཞན་ཡང་དཔལ་ལྡན་ས་སྐྱའི་བླ་ཆེན་པོ་ཆོས་རྒྱལ་འཕགས་པ་ཡི་སྤྱན་ལྟོས་ལྟར་ཆེན་པོ་རྣམས་ལ་འོས་པའི་ལས་ཚན་བཅུ་གསུམ་ཡང་བསྒྲིགས་པར་མཛད་དེ་དེ་ཡི་གྲངས་ངེས་ནི། དམ་གཉེར་གཉིས། གསོལ་གཟིམ་གཉིས། མཇལ་ཡིག་གཉིས། རྐྱ་རྔ་གཉིས། ཐབ་འདྲེན་གཉིས། རྟ་མཛོ་གཉིས། གདུགས་འཛིན་པ་དང་བཅུ་གསུམ་ཡིན་ཟེར། འདི་ནི་བསྒྲང་ཚུལ་མི་འདྲ་བ་མང་དུ་འདུག་པས་དཔྱད་བྱར་གནས་སོ། །

དེ་ལྟར་སྲིད་ན་མངོན་པར་མཐོ་བའི་འཕྲིན་ལས་བཟང་པོ་དང་ངེས་པར་ལེགས་པ་རྣམ་པར་དཀར་བའི་ཕྱག་རྗེས་རྒྱ་ཆེན་པོས་བརྒྱན་པར་གྱུར་ཀྱང་སྲིད་ཞི་ལས་ཉེ་བར་ལྡོག་པ་བྱང་ཆུབ་མཆོག་གི་ཉེ་ལམ་ནང་གི་ཡང་དག་འཇོག་ཁོ་ནར་ངེས་པར་འཇུག་དགོས་པར་གཟིགས་ནས་དེའི་ཆེད་དུ་གོང་གི་བྱ་བ་ལས་ཀྱི་འཁོར་ལོ་དེ་རྣམས་སྒྲུབ་པའི་བར་སྐབས་ཇི་སྙེད་པར་ལིང་བ་བྲག་དམར་དུ་བཞུགས་པར་ཞང་སྒོམ་རི་པ་ཆེན་པོ་དང་། རོན་མདའ་རྫོང་སྒོ་གླང་རི་གྲུབ་པའི་སྐྱེས་བུ་བརྩོན་འགྲུས་རྒྱལ་པོ་དག་གི་སྤྱན་སྔར་ཆེད་དུ་ཞབས་བསྐྱོད་དེ་ཕྱག་དང་ཞེ་ས་ཆོས་བཞིན་གྱི་བསྙེན་བཀུར་ཡང་དག་པས་བླ་མ་བསྙེན་པར་བྱས་ཏེ་སྨིན་བྱེད་ཀྱི་རིམ་པ་དང་གྲོལ་བྱེད་ཀྱི་ཞལ་ལུང་ཟབ་མོ་འདེགས་པར་འཇོས་ཏེ་(ནོད་དེ་)ཉམས་དང་རྟོགས་པའི་ཡོན་ཏན་ས་ར་ཟླ་ལྟར་རྒྱས་པར་བྱས་ཞེས་ཡོངས་སུ་གྲགས་སོ། །དེ་ལྟར་ཆེན་པོར་བརློམ་པ་གཞན་ཁ་ཅིག་གིས་ལོ་བརྒྱ་ཕྲག་གི་རིང་དུ་ངལ་བས་བསྒྲུབས་ཀྱང་དཀའ་བར་གྱུར་པ་དེ་དགུང་ལོ་བཅུ་བདུན་ནས་ཉི་ཤུ་རྩ་ལྔའི་བར་ལོ་བརྒྱད་ཀྱི་རིང་ལ་མཐར་སོན་པར་མཛད་དེ་སྐུ་ཚེ་འདི་ཡི་འཕྲིན་ལས་དེ་ཙམ་དུ་དགོངས་ནས་དགུང་ལོ་ཉི་ཤུ་རྩ་བདུན་པའི་མཐར་སོན་པ་རྩ་བརྒྱད་ལྕགས་འབྲུག་གི་ལོ་མགོར་(སྤྱི་ལོ་༡༢༨༠)སྔོན་གྱི་ལས་ཀྱི་རྒྱུ་བས་འབངས་མི་སྲུན་པ་ཞིག་གི་གསོལ་ངན་གྱི་སྦྱོར་བས་སྐུ་ཐིམ་སྟེ་གནམ་གྱི་ལྷར་གཤེགས་སོ། །འདི་ལ་ཁ་ཅིག་གིས་དགུང་ལོ་ཉེར་ལྔར་གཤེགས་ཟེར་བ་ནི་མ་དག་ལ་ཉེར་བདུན་ལ་གཤེགས་ཞེས་པ་ནི་ཉེར་བརྒྱད་ཀྱི་ལོ་མགོར་གཤེགས་པས་དུས་ཉེ་བ་ལ་གྲགས་པར་སྣང་ངོ་། །ཁྲི་འབུམ་ལྡེ་མགོན་གཤེགས་པའི་དུས་དང་མཚུངས་པར་འབྲི་གུང་གཅུང་རྡོ་རྗེ་གྲགས་ཀྱང་སྐུ་གཤེགས་ཤིང་། ལྕགས་འབྲུག་གི་ལོ་གཞུག་འདིར་ས་སྐྱའི་འགྲོ་མགོན་ཆོས་རྒྱལ་འཕགས་པ་ཡང་སྐུ་གཤེགས་ལ། ལོ་དེའི་ཕྱི་མ་ལྕགས་སྦྲུལ་བྱ་རོག་རྫོང་ཧོར་དམག་གིས་བསྐོར་ཞིང་དཔོན་ཆེན་ཀུན་དགའ་བཟང་པོ་ཁྲིམས་ལ་གཏུགས་པའི་དུས་ཏེ་བོད་ཁམས་སྤྱིའི་རྟེན་འབྲེལ་གུང་ཐང་བཙད་པོའི་རིགས་ལ་རག་ལས་ཞེས་གུ་རུ་པད་མས་ལུང་གིས་བསྟན་(པ་)ལྟར་འདིས་མཚོན་མང་(པོ་)ཞིག་མཐུན་རུང་དུ་བྱུང་བར་སྣང་ངོ་། །རྒྱལ་པོ་འབུམ་ལྡེ་(མགོན་)འདི་དཔལ་གསང་བའི་བདག་པོས་བྱིན་གྱིས་བརླབས་ཞེས་དང་། དཔལ་ནག་པོ་ཆེན་པོ་ཡི་སྤྲུལ་པ་ཡིན་ཞེས་ཀྱང་གྲགས་སོ། །མངོན་མཐོ་ཤར་རིའི་ཕྲགནས་འཕོས་པ་ཡི། །ངེས་ལེགས་རྟ་དམར་གྱིས་དྲངས་ཕུན་ཚོགས་ཀྱི། །ཟེར་བརྒྱས་སྐྱེ་རྒུའི་བདེ་སྐྱིད་པད་མོའི་ཚལ། །རྒྱས་བྱེད་ས་དབང་མཆོག་དེར་ཅིས་མི་བསྔགས། །ཞེས་སོ། །

དེ་ལྟར་མངའ་བདག་ཁྲི་ལྡེ་འབུམ་(འབུམ་སྡེ་མགོན་)ལ་སྲས་གསུམ་མངའ་བའི་ཐུ་བོ་སེ་མ་འབུམ་སྐྱོང་རྒྱལ་མོ་ལ་བལྟམས་པ་ཁྲི་རིན་ཆེན་བཟང་པོ་དང་། གཞན་ཁྲི་ལྡེ་འབུམ་དང་། ཐ་ཆུང་བསམ་ལྡེ་སྟེ། ལོ་རྒྱུས་མང་(པོ་)ཞིག་ཏུ་ཁྲི་ལྡེ་འབུམ་གཅེན་ཡིན་ཡང་ཟེར་ལ། ཡུམ་མི་གཅིག་པ་ལ་ལོ་ཁྱད་ཆེར་མེད་པ་ཞིག་ཡིན་ནམ་སེམས། ལྷ་རིན་ཆེན་བཟང་པོས་དེས་ཡོན་ཏན་བཀོད་པའི་སངས་རྒྱས་ཀྱི་སྐུ་བརྙན་མི་ཚད་རིན་པོ་ཆེའི་ཕྲ་རྒྱན་དུ་མས་མཛེས་པར་བྱེད་པ་ངོ་མཚར་བ་སོགས་རྣམ་པར་དཀར་བ་ལ་ཐུགས་གཞོལ་བའི་མཛད་པ་ཅི་རིགས་མཛད་ཅིང་། རྒྱ་ནག་ཧོར་གྱི་རྒྱལ་པོའི་ཕོ་བྲང་དུ་ལུང་ལས་རྟགས་ཞུ་བར་བཞེད་དེ་རྒྱ་ཡུལ་དུ་ཕེབས་པར་དེར་སྐུ་གཤེགས། རྒྱ་ནག་ཏུ་བཞུད་སྐབས་ཐོག་མར་ས་སྐྱར་ཕེབས་ཏེ་ཅུང་ཟད་བཞུགས་པ་ན་མཛའ་བའི་བཤེས་ཤར་པ་ཀུན་དགའ་རིན་ཆེན་པས་ན་རེ། མངའ་བདག་པ་ཁྱེད་ཡུལ་ཐག་རིང་དུ་གཤེགས་པ་འདུག་པས་སྐུ་ཚེས་ཟིན་པར་ཡང་དཀའ། དེ་ཚེ་གདུང་རྒྱུད་ཆད་པར་ཕངས་པས་ང་ཡི་ཁྱིམ་བདག་མོ་འདི་ལ་སྲས་གཅིག་འཚོལ་ཞེས་མཚམས་སྦྱར་(བ་)བཞིན་མ་གཅིག་ལྷ་མོ་འབུམ་དང་རྩེན་པས་རིངས་པོར་མ་ཐོག་པར་བུད་མེད་དེ་ཡང་སྦྲུམ་པར་གྱུར་ཏེ་ལྷ་རིན་ཆེན་བཟང་པོ་གཤེགས་པའི་ལོར་སྲས་སྒྲོ་སྤངས་སུ་བྱུང་བ་མཚན་ཆོས་སྐྱོང་ལྡེར་བཏགས། མངའ་བདག་ཁྲི་ལྡེ་འབུམ་ནི་སྙིང་སྟོབས་བློ་གྲོས་ཕུན་སུམ་ཚོགས་པས་རྒྱལ་སྲིད་ཀྱང་ཡུན་རིངས་སྐྱོང་བར་མཛད་ཅིང་། ཡབ་ཀྱི་དགོངས་རྫོགས་སུ་རྫོགས་པའི་སངས་རྒྱས་ཤཱཀྱ་སེང་གེའི་སྐུ་བརྙན་དགུང་ལོ་བཅུ་གཉིས་པའི་ཚད་དང་མཉམ་པ་བཟོ་སྒྲོས་ཁྱད་པར་འཕགས་པ་དང་། ལོ་ཟླ་དུས་ཀྱི་མཆོད་པ་སོགས་རྣམ་པར་དཀར་བ་དགེ་བའི་ཕྱག་ལས་བཟང་པོ་རྒྱུན་མི་ཆད་པར་མཛད། དུས་ཕྱིས་རྒྱ་ནག་ཧོར་གྱི་རྒྱལ་པོའི་ལུང་ལས་རྟགས་ཞུ་བའི་ཆེད་གོང་དུ་བཞུད་པར་དགོངས་ཏེ་ཆོས་མཁར་མཁན་ཆེན་བྱང་སེམས་སྙིང་པོ་ཡབ་ཀྱི་ཐུགས་བརྙེས་(མཉེས་)ཡིན་པས་དེ་རིང་ཡུལ་གྱི་གཞི་གོ་ཆོད་པ་གྱིས། རྒྱམ་གྱི་མཁན་པོ་བྱང་རྒྱལ་དང་། ཆོས་ལྡིང་མཁན་པོ་བྱང་ཆུབ་གྲགས་པ་གཉིས་ང་ཡི་གྲོས་གྲོགས་ལ་འགྲོ་དགོས་གསུངས་ནས་ཞབས་རིམ་པ་ལྔ་དང་ཁྱོན་རྗེ་བློན་བརྒྱད་གོང་དུ་བྱོན་པས་ཏ་ཡི་ཏུར་སེ་ཆེན་གྱི་སྲས་ཀྱི་ཐུ་བོ་ཧུའང་ཐའི་ཅིའམ་ཇིན་གིན་ཞེས་པའི་སྲས་རྒྱལ་བུའི་སྐབས་སུ་ཐི་མུར་དང་། ཅོད་པན་བཅིངས་ནས་རྒྱལ་ཐབས་སུ་དབང་བསྐུར་བའི་མཚན་ཆེ་ཙུང་ཀུའང་ཥིའོའུ་ཧུའང་དྷི་ཨུལ་ཇེའི་ཐུ་ཞེས་གསོལ་བ་བོད་ཀྱི་ཡིག་ཚངས་རྣམས་སུ་ཡང་མཚན་ཨོལ་ཇེ་ཐུ་ཞེས་བརྗོད་དེ་འདི་ནི་བསོད་ནམས་ཀྱི་མཐུ་ཆེན་པོར་གྱུར་པ་ཡི་རྒྱ་ནག་ཚིན་གྱི་(ཇིན་གིན་)རྒྱལ་པོའི་ཐམ་ག་མི་འགྱུར་གཡུང་དྲུང་རིན་པོ་ཆེ་རྙེད་པའི་མཐུས་རྒྱལ་སྲིད་ཀྱི་གོ་འཕང་ཆེན་པོ་རང་ཤུགས་ཀྱིས་བརྙེས་པ་སྟེ། དེ་ཡི་མདུན་དུ་བཅར་བར་རྒྱལ་པོ་ཆེན་པོ་དེས་ཀྱང་ཐུགས་ལ་བཏགས་ཏེ་ཁྱེད་རང་བོད་ལ་དབང་བསྒྱུར་བའི་རིགས་རྒྱུད་ཆེན་པོ་ཡིན་འདུག་པས་གནམ་གྱི་ཤེད་མོང་སྟེར་བའི་འོས་སུ་སྣང་ཞེས་བོད་ཤིང་སྒོ་བཙུགས་པའི་རྒྱལ་པོ་དུ་དབེན་ཤ་གསུམ་གྱི་བདག་པོ་མངའ་རིས་ཚོ་བཅུ་གསུམ་གྱི་མངའ་ཐང་ལ་དབང་བསྒྱུར་བའི་མངའ་བདག་གི་མིང་དང་། རིན་པོ་ཆེ་ལས་གྲུབ་པའི་ཐམ་ཀ་གླིང་བདུན་མ། ཐམ་གཡོག་ཐམ་ཤུ་བཅས་ཤིང་(དང་།) རྒྱལ་ཐབས་མི་འགྱུར་གཡུང་(དྲུང་)རིན་པོ་ཆེས་སྤྲས་པའི་གསེར་ཡིག་མར་འབོད་པའི་འཇའ་ས། ཐོ་སྟ་ཆེ་རྟགས་གནང་སྐྱེས་ཁྱད་པར་འཕགས་པ་བཅས་ཚེགས་མེད་པར་ཐོབ་ནས་བོད་དུ་བདེ་བར་འཁོར། ཁྲི་ལྡེ་འབུམ་གྱིས་ཐམ་ཀ་ཐོབ་པའི་དུས་དགུང་ལོ་བཞི་བཅུའི་སྐབས་ཡིན་ཞེས་ཡིག་ཚངས་ཁ་ཅིག་ཏུ་བྱུང་བ་དེ་ཚོ་མངའ་བདག་འདི་ཡབ་ཀྱི་བཅུ་དྲུག་པ་ས་འབྲུག་ལ་འཁྲུངས་ནས་བཞི་བཅུ་མེ་ལུག་ལོར་ཧོར་གྱི་རྒྱལ་པོ་ཨོལ་ཇེ་ཐུའི་རྒྱལ་སྲིད་ལོ་བཅུ་གསུམ་མཛད་པའི་དུས་མཐར་མངའ་བདག་ལ་ལུང་ལས་གནང་བ་མངོན། སྐུ་མཆེད་གཉིས་ལ་སྲས་མི་མངའ་བས་ཡར་ལམ་གདན་ས་ཆེན་པོ་ས་སྐྱ་ནས་གཅེན་གྱི་སྲས་ཆོས་སྐྱོང་ལྡེ་ལ་བདག་རྐྱེན་མཛད་དེ་གུང་ཐང་དུ་ཕེབས།

དེ་སྐབས་ཀྱི་ཞབས་རིམ་བློན་པོ་ནི། འཛངས་ཀྱི་གོ་ཆེ་ཚངས་པ། ལྷ་རིགས་གོ་ཆེ་ཚངས་པ། གཉན་རྒྱུད་གོ་ཆེ་ཚངས་པ་དང་གསུམ་ཡིན་ཟེར། དུས་དེར་བོད་ཀྱི་ཆེན་པོ་རྣམས་ཧོར་གྱི་རྒྱལ་པོ་ཁོ་ན་ལ་ལྟོས་པར་བྱེད་པས་སྔར་ཏ་ཇིའི་(སིའི་)ལུང་ཙམ་ལས་མེད་པ་འདི་རེས་དུ་དབེན་ཤ་ཆེན་པོའི་ལུང་དང་ལས་རྟགས་ཀྱིས་མངའ་ཐང་མཐོང་(མཐོ་)ཞིང་དབུ་རྨོག་ཆེས་བཙན་པའི་བརྩས་(བཙས་)དམ་པར་གྱུར། ལྷ་སྲས་ཆོས་སྐྱོང་ལྡེ་ཡི་བཙུན་མོར་ས་སྐྱ་ནས་བདག་ཉིད་ཆེན་པོ་བཟང་པོ་དཔལ་བའི་སྲས་མོ་ཀུན་དགའ་འབུམ་ཞེས་ལྷ་གཅིག་རེ་མདའ་མ་ལ་བལྟམས་པ་དབང་ཀུན་དགའ་ལེགས་པའི་གཅེན་མོ་དེ་ཁབ་ཏུ་བསུས། བདག་མོ་ཕ་མིང་གིས་དྲེགས་ཏེ་ཐོག་མར་རྒྱལ་པོ་དང་ཐུགས་མི་མཐུན་པའི་རྣམ་པ་བྱུང་ཡང་བདག་ཉིད་ཆེན་པོ་ཡབ་སྲས་ཐུགས་བརླིང་ཞིང་བྱམས་པའི་ཞལ་ཏ་བཟང་པོས་ཁྱབ་པ་ཡིས་ཕྱིས་ཐུགས་མཛའ་ཤིང་གཤིམ་(གཤིན་)པའི་སྲས་ཨོ་རྒྱན་གུ་རུའི་གཏེར་ཁ་དུ་མ་དང་ཁྱད་པར་རིག་འཛིན་རྒོད་ལྡེམ་ཅན་གྱི་རྩ་བའི་ཆོས་བདག་གཏེར་སྟོན་ཉིད་དང་མཉམ་པ་ལུང་བསྟན་པ་ཁྲི་བཀྲ་ཤིས་ལྡེ་སྐུ་བལྟམས། དེ་ཡང་ཇི་སྐད་དུ། ཁྱད་པར་མང་ཡུལ་སྐུ་ལྷའི་བྱང་ཤར་དུ༔ ས་མཁར་དུང་གི་ལོ་མང་འདྲ་བ་འབྱུང་༔ དེ་རུ་རྒྱལ་རིགས་བོང་ཐུང་བྱང་སེམས་ཅན༔ ཆོས་རྒྱལ་བཀྲ་ཤིས་ལྡེ་ཞེས་བྱ་བ་དང་༔ གཏེར་འདི་འཕྲད་ན་བོད་ཡུལ་བསྟན་པ་ནི༔ མི་ལོ་ལྔ་བཅུ་རྩ་གསུམ་བསྲིངས་ནུས་སོ༔ ཞེས་པས་མཚོན་མང་དུ་བྱུང་བ་ཉིད་དོ། །ཁྲི་ཆོས་སྐྱོང་ལྡེ་ཆུ་འབྲུག་གི་ལོ་ལ་སྐུ་གཤེགས་ནས་བཀྲ་ཤིས་ལྡེ་ལ་ཅོད་པན་བཅིངས་ནས་རྒྱལ་ཐབས་ཀྱི་བདག་པོར་མངའ་གསོལ་བའི་བཙུན་མོ་དབང་ཀུན་དགའ་ལེགས་པའི་སྲས་མོ་བསོད་ནམས་འབུམ་ཁབ་ཏུ་བསུས། ལོ་ཤས་རིངས་ཡབ་ཡུམ་ཧ་ཅང་ཐུགས་གཤིན་པ་མ་བྱུང་ཡང་། ནང་བློན་རྒྱལ་ཆེན་པོ་དང་ས་གཙོ་བ་དཀར་པོ་དཔལ་སོགས་འཛངས་པ་རྣམས་ཀྱིས་ལེགས་པར་བསྡུམས་ནས་ཤིན་ཏུ་མཐུན་གཤིན་དུ་གྱུར། ཁྲི་བཀྲ་ཤིས་ལྡེས་ཡབ་ཀྱི་དགོངས་རྫོགས་སུ་སྟོན་མཆོག་ཤཱཀྱ་སེང་གེའི་སྐུ་བརྙན་དང་ཡུམ་གྱི་ཆེད་དུ་འཕགས་མ་སྒྲོལ་མའི་སྐུ་བརྙན་གཉིས་ཀ་མི་ཚད་ལས་ཆེས་མཐོ་ཞིང་གཡུ་རྙིང་ཁྱད་པར་ཅན་སོགས་རིན་པོ་ཆེའི་ཕྲ་རྒྱན་གྱིས་ཤིན་ཏུ་མཛེས་པར་བྱས་པ་དང་། གཞན་ཡང་རྫོང་དཀར་གྱི་ལྕགས་རི་ཕྱི་མ་དང་ལྕགས་རི་ཆེན་པོའི་ལྕགས་སྐོར། སྟག་ཚངས་དཔེའུ་(སྤེའུ་)ཆེན་གྱི་ལྕགས་ཁང་། ལྕགས་རིའི་འོག་(གི་)ས་འོག་ནས་རྒྱང་རིང་པོར་འཐོན་པའི་གསང་སྒོ། ཆུ་སྤེའུ་རྫོང་གི་དབུས་དང་། ཆོས་སྡེ་ནང་གི་ཁྲོན་ཆུ་བཟང་པོ་བཏོན་པ་དང་། རྡོ་ཀྱོང་ཆེན་པོ་སོགས་ཉེ་བར་སྤྱོད་པའི་ཞིབ་ཚགས་དུ་མ་མཛད། དེ་སྐབས་མངའ་ཐང་ཡང་གོང་དུ་འཕེལ་ཞིང་ལྷག་ཏུ་སྟོད་གངས་རི་ཏེ་སིའི་ཤར་ཕྱོགས་དྲ་ལ་ཉེ་བར་དྲ་ལུང་རིང་མོར་བུད་མེད་རྒན་མོ་ཤིང་ཐུན་ཞིག་གིས་དྲ་མའི་སྡོང་པོ་འཐེན་པས་གསེར་ཐིག་ཆེན་པོ་གཅིག་རྙེད་པ་ལ་བརྟེན་གསེར་ཁུང་བཟང་པོ་(རྙེད།) ལྷོ་སྡེ་ཁྲི་དཔོན་བྱིར་མ་གསེར་དཔོན་དུ་བསྐོས་པས། དེས་གསེར་བསིལ་མ་ཀ་ཊོ་ར་ཆེན་པོ་ཞིག་ཕྱུར་བུས་བཀང་བའི་སྟེང་དུ་གསེར་ཐིག་ཆེན་པོ་ར་མཆིན་ཙམ་ཞིག་བཀལ་ཏེ་ཕུལ་བས་མངའ་བདག་དགྱེས་ནས་གསུང་འཕྲོས་ཀྱི་མཐར་ང་ལ་འདི་ཙམ་སྟེར་ཕོད་པ་ཁྱོད་རང་ལ་ཅི་ཙམ་ཡོད་གསུང་བ་ན། ཁྲི་དཔོན་གྱིས་ཕྱག་བཙལ་(འཚལ་)ཏེ་ངེད་རང་ལ་འདི་ལས་ལྷག་ངེས་ཤིག་ཡོད་མཆིས་ཞུས་པས་དྲངས་(དྲང་)པོར་སྨྲ་བ་མི་ཡི་དམ་པ་ཡིན་གསུངས་ནས་སྐུ་ལ་གསོལ་འཕྲོའི་བེར་ཕྱམ་གཅིག་གིས་མཚོན་གནང་སྐྱེས་བཟང་པོ་བྱས་པར་གྲགས། ཁྲི་དཔོན་བྱིར་མའི་རིགས་རྒྱུད་གློ་བོ་ཁྲི་དཔོན་དུ་གྲགས་པ་རིམ་ཅན་ད་ལྟའི་བར་བྱུང་བ་དེ་རྣམས་ཡིན་ཟེར་རོ། །དེ་ལྟར་མངའ་བདག་རང་ཉིད་ཀྱི་བསོད་ནམས་མཐུ་ལ་བརྟེན་གསེར་གྱི་འབྱོར་པ་རྒྱ་ཆེན་པོ་རྙེད་པ་ལ་ཐུགས་ཀྱི་དགོངས་པར་འཇིག་རྟེན་འདི་སྣང་གི་བྱ་བ་ལ་སྙིང་པོ་མེད་པར་ཡ་མ་བརླ་[བ་]ཁོ་ནར་ངེས་ཤིང་།

ཚེ་འདིའི་འབྱོར་པ་ཡང་སྐྱེ་བ་སྔ་མའི་སྦྱིན་འབྲས་དཀོན་མཆོག་གི་ཐུགས་རྗེ་ཁོ་ནར་གྲུབ་པས་དེས་ན་གསེར་འདི་ཆུད་ཟོས་སུ་མ་སོང་བ་དཀོན་མཆོག་གི་སྲི་ཞུ་ཆེད་ཁོ་ནར་བཏང་བར་དགོངས་ནས་དགེ་བའི་བཤེས་གཉེན་རྣམས་ལ་བསོད་ནམས་ཀྱི་ཚོགས་གང་གི་ཆེ་དྲིས་པས་ན་རེ། ཚོགས་ཀྱི་ཞིང་མཆོག་ནི་ཕན་བདེའིའབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་ཁོ་ན་ཡིན་ཞིང་། དེ་ཡི་རྩ་བ་གསུང་རབ་ཀྱི་དགོངས་པ་ཡང་བསྟན་བཅོས་ཚད་ལྡན་རྣམས་ཀྱིས་གསལ་བར་འགྲེལ་བ་ཡིན་ཞིང་། ཡིག་ཚོགས་ཀྱང་ཆེ་ལ་མཐའ་དག་ཚང་བ་ཡང་དཀོན་པས་བསྟན་བཅོས་བོད་དུ་བསྒྱུར་རོ་འཚལ་བཞེངས་ནས་(ན་)དཀོན་(པ་)བཞིན་ཕན་ཡོན་ཆེ་ཞེས་གསོལ་བས་དེ་ཐུགས་ལ་འཇུག་ཅིང་དགྱེས་པ་ཡི་བཀའ་ཡང་དག་པའི་དགོངས་འགྲེལ་བསྟན་བཅོས་ཀྱི་གླེགས་བམ་རྣམས་བཻཌཱུརྱ་ཡི་ཁ་དོག་ལྟ་བུའི་གན་ཤོག་ལ་བཙོ་མ་གསེར་གྱི་ཡང་ཞུན་གྱིས་ལེགས་པར་བཞེངས་པ་ལ་མཁས་པའི་ཁྱུ་མཆོག་མཁན་ཆེན་བྱང་ཆུབ་རྩེ་མོ་དང་། བོ་དོང་ལོ་ཙཱ་བ་ཤེས་རབ་མེ་ལྕེ་དཔོན་སློབ་དག་དང་། གཞན་ཡང་པུ་རོང་(སྤུ་རང་)ལོ་ཙཱ་བ། འཛངས་པ་ལོ་ཙཱ་བ་སོགས་མཁས་པར་གྱུར་པ་དུ་མས་ཚིག་འབྲུ་ལྷག་ཆད་ཀྱི་ཞུ་བཏགས་(དག་)དང་། གོ་རིམ་ཕྱོགས་མ་འཁྲུགས་པ་སོ་སོར་བཀོད་པ་སོགས་ཡིག་གཉེར་དོ་དམ་ཡང་དག་པར་མཛད་ཅིང་། གླེགས་བམ་དེ་རྣམས་གསེར་ཆུ་བྱུག་པའི་གླེགས་ཤིང་། སི་ཐ་ཧུའི་གླེགས་ཐག ཟབ་ཆེན་གྱི་གཏན་ཁེབས། རས་བཟང་པོའི་ཕྱི་སྒྲིལ་སོ་སོར་ན་བཟའ་གསུམ་བསྒྲག་(སྦྲག་)བཅས་སྒྲུབ་ནས་ཆུ་མོ་ཡོས་ཀྱི་ལོ་དབྱར་ཟླ་འབྲིང་པོ་ས་ག་ཟླ་བའི་ཡར་ངོ་གཟའ་སྐར་བཟང་པོ་ལ་རབ་ཏུ་གནས་པ་དང་བཅས་ལེགས་པར་གྲུབ་པར་མཛད་དོ། །དེ་ལྟར་བསྟན་འགྱུར་གསེར་གྱི་གད་པ་གྲུབ་ནས་དེ་བཞིན་རྒྱལ་བའི་བཀའ་གྱུར་རོ་ཅོག་ཀྱང་བཞེངས་པར་ཐུགས་སུ་དགོངས་ནས་སྐྱིད་རོང་དུ་ཤོག་བུའི་གྲ་སྒྲིག་གྲུབ་པའི་མཚམས་སུ་བོད་སྤྱིའི་བསོད་ནམས་ཀྱིས་མ་ཐེག་པར་མངའ་བདག་ཆེན་པོ་དགུང་དུ་ཐེགས་ཏེ། དེ་ཡང་གཤེགས་པའི་ལོ་ཤིང་སྦྲུལ་ཡིན་པར་གཏེར་སྟོན་རིག་འཛིན་ཆེན་པོ་རྒོད་ཀྱི་ལྡེ་(ལྡེམ་)འཕྲུ་ཅན་གྱི་གཏེར་འབྱུང་ལས་བྱུང་ངོ་། །(ཤིང་སྦྲུལ་དེའི་ཕྱི་ལོ་མེ་རྟ་ལ་རིག་འཛིན་ཆེན་པོ་རྒོད་ལྡེམ་ཅན་གྱིས་བྱང་གཉེན་ཡུལ་ཟང་ཟང་ལྷ་བྲག་ནས་གུང་ཐང་རྒྱལ་རྒྱུད་སྐྱོབ་པ་མཛོད་ལྔའི་གཏེར་ཆེན་བཏོན་པའི་ཕུན་ཚོགས་ལྡེ་དང་རྟེན་འབྲེལ་བསྒྲིགས་ཀྱང་ཇི་བཞིན་བསྒྲིག་པར་མ་ཐུབ་ཟེར།)

ཁྲི་བཀྲ་ཤིས་ལྡེ་ཡི་སྲས་ཁྲི་ཕུན་ཚོགས་ལྡེ་དཔལ་བཟང་པོ་ནི་བདག་མོ་བསོད་ནམས་འབུམ་ལ་ས་ཕོ་སྟག་གི་ལོར་བལྟམས། དེས་ནི་ཡབ་ཀྱི་དགོངས་རྫོགས་སུ་དེ་བཞིན་གཤེགས་པའི་སྐུ་བརྙན་མི་ཚད་བཞུགས་ཁྲི་རྒྱབ་ཡོལ་དང་བཅས་པ་བཟོ་སྒྲོས་ཁྱད་པར་འཕགས་པ་བཞེངས་པ་སོགས་སྣ་མང་(རྣམ་པར་)དཀར་བའི་མཛད་པ་དང་། རྒྱལ་ཐབས་ཀྱི་བྱ་བ་ཡང་ས་སྐྱ་དང་སྐུ་གཉེན་རིམ་ཅན་སྟབས་སྲིད་འཕེལ་འདུན་མ་གཅིག་པའི་བཅའ་ཡིག་མནའ་བསྒྲིགས་ཀྱང་མཛད། དེ་ལ་སྲས་གཉིས་མངའ་བའི་གཅེན་ས་སྐྱར་བཞུགས་སྐབས་ཇོ་མོ་རེ་མདའ་མ་དང་མཐུན་པས་ཁྲི་མཆོག་གྲུབ་ལྡེར་གྲགས་པ་དང་། བཙུན་མོ་དངོས་བྱང་རྟ་(ཏ་)དབེན་གྱི་སྲས་མོ་ནམ་མཁའ་འབུམ་ཁབ་ཏུ་བཞེས། གྱོད་(གྱོས་)པོ་རྟ་(ཏ་)དབེན་གྱི་ལོག་པའི་བསམ་པས་ཕྲ་མ་བཅུག་ནས་ཞང་སྣ་ཚོགས་པ་སྨོན་ལམ་རྒྱལ་མཚན་གྱིས་ཁྲི་ཕུན་ཚོགས་ལྡེ་དགུང་ལོ་སུམ་ཅུ་སོ་གསུམ་ལྕགས་ཁྱི་ལོར་བཀྲོངས་པའི་ལོ་ཕྱི་མ་ལྕགས་ཕག་ལོར་རྟ་(ཏ་)དབེན་གྱི་སྲས་མོ་ལ་ཁྲི་རྒྱལ་བསོད་ནམས་ལྡེ་སྒྲོ་སྤངས་སུ་འཁྲུངས་ཏེ། དེ་ཡང་སློབ་དཔོན་ཆེན་པོ་པད་མ་འབྱུང་གནས་ཀྱི་བཀའ་ལས། དེ་ནས་གདུང་རབས་འགའ་སོང་མཚམས༔ ཨེ་མ་གུང་ཐང་རྒྱལ་པོའི་རྒྱུད༔ མཐའ་ལ་བབ་ཚེ་པད་མ་ངས༔ བརྩེ་བའི་ཐུགས་རྗེས་སྐྱོབ་པར་ངེས༔ ཕ་ནི་ལྷ་ལ་མ་ནི་སྲིན༔ བརྩེད་(བཙད་)པོ་གདུག་པའི་ལོ་ཅན་གཅིག༔ རྒྱལ་སྲིད་རྩ་བ་ཅུང་ཟད་འཛིན༔ ཞེས་སོ། །དེ་སྐབས་ཏ་དབེན་གྱིས་གུང་ཐང་གི་རྒྱལ་སྲིད་ལོ་ལྔ་བཟུང་སྟེ། སྒོ་མང་མཐིལ་ལ་རྟ་ར་བྱས། གུང་ཐང་ལ་ཤིན་ཏུ་འཚེ་བ་ཆེ་ཞིང་མཐར་ཁོ་རང་རང་སྐྱིད་རོང་དུ་ཕྱིན་པར་རོང་པ་རྣམས་དང་འཁྲུག་སྟེ་མདའ་དགུ་ལུས་ལ་ཟུག་ནས་མཚམས་སུ་ཚེའི་དུས་བྱས་པར་གྲགས། གུང་ཐང་གི་བློན་པོ་ལྷ་རྗེ་ཆོས་སྐྱོང་དང་། ཆེན་པོ་སྣང་མཛད་སོགས་བསམ་པ་ཆེ་བ་བཞིས་འབད་པས་བྱང་པ་བཏོན་ནས་ལྷ་བཙན་པོའི་སྲས་སྐུ་མཆེད་རྒྱལ་སར་བཞུགས་སུ་གསོལ་བ་ཡིན་ལ། མི་ཡི་དབང་པོ་མཆོག་གྲུབ་ལྡེ་ཡི་བཙུན་མོར་མར་ཡུལ་ནས་མངའ་བདག་རས་ཆེན་གྱི་སྲས་མོ་བདག་མོ་རས་ཆེན་དུ་གྲགས་པ་བླངས་ཀྱང་སྲས་མེད་པས་རང་ཡུལ་དུ་ལྡོག་པར་མཛད། སྐབས་དེར་བསོད་ནམས་ལྡེ་དང་སྐུ་མཆེད་གཉིས་ཀྱང་ཅུང་ཟད་ཐུགས་མི་མཐུན་པས། གཅུང་ཁྲི་རྒྱལ་བསོད་ནམས་ལྡེ་སྤུ་རང་དུ་འབྱོན་པར་བཞེད་དེ་ཡར་ལ་ཕེབས་པ་ན། ཁྲི་མཆོག་གྲུབ་ལྡེ་ཆིབས་བཅག་པར་ཐོ་ལེ་ཐང་ཁར་བྱིན་པས་ཆིབས་ཀྱིས་སྐྱུར་ཏེ་སྐུ་གཤེགས། གཅུང་སྟོད་དུ་ཕེབས་པ་ཞབས་བསྐྱིལ་ནས་སྤྱན་དྲངས་པའི་སླད་དུ་ཕོ་ཉ་བཏབ་པས་གྲོ་ཤོད་ཀྱི་འདབས་ཤྲི་དཀར་མོ་དང་ཉེ་བའི་རེ་ལར་རྗེས་ཟིན་ནས་ཚུར་ཕེབས་ཏེ་གཅེན་གྱི་གཤེགས་རྫོངས་རྣམས་ལེགས་པར་བསྒྲུབས། རྒྱལ་པོ་དེ་ནི་ཐུགས་དགོངས་ཟབ་ཅིང་ཤེས་རབ་རྣོ་བ་ཕྱིར་རྒོལ་བ་འཇོམས་པ་ལ་དཔའ་ཞིང་སྲིད་སྐྱོང་ལ་ཤིན་ཏུ་མཁས་ཤིང་། མཆོག་ཏུ་དམ་པའི་ཆོས་ལ་གཞན་གྱི་ཡིད་འཕྲོག་པའི་དད་མོས་གུས་པས་སྟོབས་སུ་གྱུར་པ་ཞིག་སྟེ། ཐོག་མར་རྒྱལ་རབས་ཀྱི་ཁྲི་ལ་བཞུགས་པ་ན་སྔར་ཡབ་མེས་ནས་སྐུ་ལ་བསྡོ་བའི་ཕས་རྒོལ་ལ་སྟོད་ལྷོ་བྱང་ཤར་བ་སོགས་ཡང་དག་པར་བཏུལ་ནས་མི་སྡེ་ཕྱིར་འཁྱར་སོང་བ་ཀུན་ཀྱང་བསྡུས། གསར་དུ་པུ་ཧྲེང་ཡང་མངའ་འོག་ཏུ་ཆུད། པུ་ཧྲེང་དབང་དུ་མཛད་པའི་དམག་དཔོན་ཁྲི་དཔོན་བྱིར་མའི་གཅུང་ཆོས་སྐྱོང་འབུམ་གྱིས་བྱས་པས་དེ་ཡི་བྱ་དགར་གློ་བོ་དོར་པོའི་མི་དཔོན་དུ་བསྐོས་པའི་རིགས་རྒྱུད་གློ་བོ་རྒྱལ་པོར་གྲགས་པ་ད་ལྟའི་བར་རྒྱུན་མ་ཆད་པ་འདིའོ། །

མངའ་བདག་དེས་མངའ་འོག་བཞི་ཚོར་བཅད་ཅིང་སྡུག་འཕང་(འབངས་)སྐྱོབ་ཕྱིར་མི་སྡེ་བཀྲེན་ཕྱུག་ལན་གསུམ་བར་དུ་སྙོམས། དུས་ཀུན་ཆོས་བཞིན་གྱི་རྒྱལ་ཁྲིམས་སྐྱོང་ཞིང་། ངེས་པར་ལེགས་པའི་མཛད་པ་ཡང་དགུང་ལོ་བཅུ་དགུ་ས་སྦྲུལ་ལ་གུ་རུ་པད་མའི་རྒྱལ་ཚབ་གཏེར་སྟོན་རིག་འཛིན་ཆེན་པོ་རྒོད་ལྡེམ་ཅན་སྤྱན་དྲངས་ནས་མང་ཡུལ་རི་བོ་དཔལ་འབར་གྱི་དགོན་གནས་གཞིས་བཅས་ཕུལ། རིག་འཛིན་ཆེན་པོས་སྦས་ཡུལ་སྐྱིད་མོ་ལུང་གི་སྒོ་ཕྱེས། དཔལ་འབར་དང་སྐྱིད་མོ་ལུང་དུ་ཡང་གཏེར་མང་དུ་སྦས། མངའ་བདག་ལ་ཕུར་པ་སྲིད་གསུམ་བདུད་འདུལ་སོགས་བྱིན་རླབས་ཁྱད་པར་ཅན་གཏེར་རྫས་སུ་དུ་མ་དང་གཏེར་ཆོས་ཇི་རིགས་པའི་དབང་བསྐུར་གདམ་ངག་ཀྱང་གནང་ཞིང་བཀྲ་ཤིས་མངའ་གསོལ་རྒྱས་པར་མཛད་པས་སྔར་ཡབ་ཀྱི་སྐབས་རྟེན་འབྲེལ་འཆུག་པ་ཇི་རིགས་སོར་ཆུད་པར་གྲགས། ཡོངས་འཛིན་དགེ་བའི་བཤེས་གཉེན་གཙོ་བོར་བོ་དོང་མཁན་ཆེན་ལོ་ཙཱ་བ་གྲགས་པ་རྒྱལ་མཚན་ཞལ་སྔ་ནས་གཙུག་གི་ནོར་བུར་བཀུར། གཞན་ཡང་རྗེ་སེང་གེ་བཟང་པོ་དང་། ལོ་ཙཱ་བ་ངག་དབང་གྲགས་པ། རེད་མདའ་བ་གཞོན་ནུ་བློ་གྲོས་རྣམས་གུས་པས་བླ་མར་བསྟེན་པར་མཛད། ལོ་དེའི་ཕྱི་མ་ལྕགས་རྟ་ལོར་མངའ་བདག་བསོད་ལྡེ་(དགུང་)ལོ་ཉི་ཤུ་པར་མཁན་ཆེན་གྲགས་རྒྱལ་གྱི་གསུང་གིས་ཀྱང་བསྐུལ་ཞིང་མངའ་བདག་རང་གི་དགོངས་བཞེས་ཁྱད་པར་བས་གུང་ཐང་དུ་བཤད་གྲྭ་དང་འབྲེལ་བའི་ཆོས་སྡེ་ཆེན་པོ་གྲྭ་ཚང་བཅུ་དྲུག་གི་ཁུངས་བཙུགས། མངའ་བདག་རང་ཉིད་ཀྱི་བཞུགས་གནས་མཐིལ་མ་རྫོང་གི་དབུས་དབུ་རྩེ་འདུ་ཁང་དགེ་འདུན་འདུས་ཚོགས་སོ་སོའི་སྤྱི་ཁང་ལ་སྦྱར་ཞིང་། མཁན་ཆེན་ལོ་ཙཱ་བ་ཆོས་དཔོན་དུ་མངའ་གསོལ་ཏེ་བཞུགས་སུ་གསོལ། དབྱར་ཆོས་ཞག་བཞི་བཅུ། དགོན་ཆོས་ཟླ་བ་གཅིག་རྣམས་ཀྱི་གཞིས་(གཞི་)རྟེན་འབྲོག་ནག་ཚང་། ཆོས་ཁག་རྣམས་ལ་ཡང་ཚུགས་སྟོན། བར་སྟོན། གྲོལ་སྟོན། ཚད་འབྲས་བློ་བསྐྱེད། དགེ་འདུན་ཉི་ཤུའི་སྤྱི་སྐྱུར་གྱི་བསྙེན་བཀུར། རྩམ་ཚུལ་ཐུག་ཚུལ། གྲྭ་བསྐོར་བའི་བརྫོང་བ། མཁན་པོའི་གསོལ་ཞིབ། གྲྭ་ཚང་སོ་སོའི་གཞིས་ལ་སྣོན་པ། གཞིས་སྡེབ་ལ་ཁྲལ་ཆག་ཆེ་ཆུང་སོགས་ནང་། བཙུན་པ་རྣམས་བག་མེད་པའི་སྤྱོད་པ་མ་འདྲེས་པའི་ཁྲིམས་བསྡམས་ཤིང་། ཤ་བཙོན་གསོད་ངེས་པ་ཡང་ཆོས་སྡེའི་སྒོ་ནང་ཡན་སྲོག་ཐར་བས་ཐར་པ་གླིང་དུ་མཛད།

དེ་ལྟར་གུང་ཐང་ཆོས་སྡེ་ཆེན་པོ་འདི་རྫོང་དཀར་གྱི་རྨང་བཏིང་ནས་ལོ་བརྒྱ་ཉི་ཤུ་འདས་ཤིང་གཙང་ཉང་སྟོད་སིདྷུ་རབ་བརྟན་འཕགས་ཀྱིས་རྒྱལ་མཁར་རྩེ་དཔལ་འཁོར་བདེ་ཆེན་ལྕགས་སྤྲེལ་ལ་བཏབ་ནས་ལོ་བཅུ་འདས་པའི་སྐབས་དང་། ལྕགས་རྟ་དེ་ནས་ལོ་བདུན་འདས་པའི་མེ་གླང་ལ་བདག་པོ་སིདྷུ་རབ་བརྟན་གྱིས་ལ་སྟོད་ལྷོ་ཤེལ་དཀར་ཆོས་སྡེ་བཏབ་ཅེས་དུས་འཁོར་བ་མང་ཐོས་རྡོ་རྗེས་བྱས་པའི་རྒྱལ་རབས་སུ་བྱུང་ལ། ཡིག་ཚང་གཞན་དུ་ནི་ལྕགས་རྟ་དེ་ནས་ལོ་བཞི་འདས་པ་ཤིང་ཁྱི་ལ་ཡིན་ཞེས་ཀྱང་ཟེར། གཞན་ཡང་ཆོས་རྗེ་སེང་གེ་བཟང་པོའི་བཞུགས་གནས་ཤག་ཏུ་སྒྲུབ་སྡེ་གཙོ་བོར་བྱས་པ་བསམ་གཏན་གླིང་ཡང་ལེགས་པར་སྤེལ་ཏེ་མཐུན་རྐྱེན་བཟང་པོ་ཡང་སྦྱར། སྐྱིད་གྲོང་མེ་ཏོག་མདངས་ཅན་སོགས་རྗེ་རེ་མདའ་བ་ཆེན་པོའི་བཞུགས་གནས་ཞབས་ཏོག་ཕུན་སུམ་ཚོགས་པ་མཛད། ཡུམ་གཤེགས་པའི་དགོངས་རྫོགས་སུ་ཤཱཀྱ་ཏོག་གི་སྐུ་མི་ཚད་ལས་ལྷག་ཁྲི་རྒྱབ་ཡོལ་དང་བཅས་ཡབ་མེས་ཀྱི་སྤྱན་ལྟོས་བཞིན་ཡང་བཞེངས། གཞན་ཡང་དུས་ཀུན་སྐུ་གཟུགས་བྲི་འབུར་དུ་མ་དང་། བཀའ་འགྱུར་བསྟན་འགྱུར་ནས་ཉེ་བར་མཁོ་བའི་གླེགས་བམ། ཁྱད་པར་སྔགས་ཆོས་ཆེས་མང་བ་བྲིས་པ། སྐྱིད་གྲོང་འཕགས་པ་ལ་མཆོག་སྤྲིན་རྒྱ་མཚོ་སྤེལ་བ་སོགས་བྱ་བ་ལས་ཀྱི་འཁོར་ལོ་ཇི་བཞིན་མཛད་པའི་ངང་དགུང་ལོ་སུམ་ཅུ་རྩ་བཞི་ཤིང་སྤྲེལ་ལོར་སྐུ་གཤེགས། གསུང་གི་རྡོ་རྗེ་རྒྱལ་བ་པད་མ་ཡི། །ལུང་གིས་ཡོངས་འདུའི་མེ་ཏོག་ཐོད་བཅིངས་པས། །ལེགས་བྱས་བདུད་རྩི་བཏུང་བས་གཞན་སྡེ་ཡི། །མཚོན་གྱིས་འཇིག་མིན་མངའ་བདག་སྒྲ་གཅན་རྒྱལ། །ཞེས་སོ། །མཚན་དོན་དང་ལྡན་པ་ཁྲི་མངའ་བདག་བསོད་ནམས་ལྡེ་དེའི་བཙུན་མོ་གུ་གེ་ནས་མངའ་བདག་མ་ཆེན་མོ་ཆོས་སྐྱོང་རྒྱལ་མོ་སྟེ། དེས་ཀྱང་ཁྲི་བསོད་ལྡེ་གཤེགས་པའི་དགོངས་རྫོགས་སུ་ཐོག་མར་སངས་རྒྱས་ཀྱི་སྐུ་བརྙན་ཁྱད་པར་འཕགས་པ་སྔ་རབས་དཔེ་འདྲེ་དང་། དེ་ནས་བཀའ་འགྱུར་རོ་ཅོག་མཐིང་ཤོག་ལ་གསེར་གྱིས་བྲིས་པ་ལེགས་པར་བསྒྲུབས་ཤིང་། དེ་རྗེས་མཁས་མཆོག་རེ་མདའ་བ་ཆེན་པོས་བསྟན་འགྱུར་བཞེངས་ན་འགྲུབ་པའི་ལུང་བསྟན་དང་། རྒྱུ་ཚོགས་ཆ་ཤས་བཅས་བསྩལ་(བ་)བཞིན་བསྟན་བཅོས་འགྱུར་རོ་འཚལ་ཡང་ལེགས་པར་བཞེངས། བདག་མོ་ཆོས་སྐྱོང་རྒྱལ་མོ་དེ་ལ་སྲས་གཉིས་མངའ་བ། མངའ་བདག་ལྷ་གཅིག་ཅེས་མཚན་དངོས་བསོད་ནམས་རྒྱལ་མཚན་དཔལ་བཟང་པོ་ཞེས་ཀུན་གྱི་ཡིད་འཕྲོག་པའི་ཁྱད་པར་ཅན་ཞིག་བྱུང་ཡང་དགུང་ལོ་བཅུ་གཉིས་པར་གཤེགས། མངའ་བདག་ལྷ་བཙུན་ཞེས་བྱུང་བ་ཡང་གཞོན་ནུ་ཞིག་ནས་ཐེགས་པར་སྣང་།

ཟུར་དུ་ཆོས་རྗེ་ལྷ་མདུན་པའི་དབོན་མོ་མི་སྐྱའི་སྐབས་དབོན་འཇམ་དབྱངས་དང་བཙུན་མའི་མིང་བྱང་སེམས་སངས་རྒྱས་བཟང་མོ་ལ་ཡབ་གཤེགས་སྐབས་སྲས་གཅིག་སྦྲུམ་ཡོད་པ་ཡུམ་འཇིགས་ནས་ནུབ་རི་ལྷ་མདུན་དུ་བྲོས། སྒྲོ་སྤངས་སུ་ཤིང་སྤྲེལ་ལོ་དེར་སྲས་གཅིག་བཙས་པ་ཁྲི་ལྷ་དབང་རྒྱལ་མཚན་དུ་གྲགས། དེ་དགུང་ལོ་བཅོ་ལྔ་པའི་སྐབས་ཡུམ་དང་བཅས་རྒྱལ་ཁབ་ཏུ་བསུས་ཤིང་། ལོ་བཅུ་དྲུག་པ་ས་ཕག་ལོར་རྒྱལ་སྲིད་དུ་མངའ་གསོལ། བླ་ཆེན་ཆོས་དཔལ་བཟང་པོ་དང་། རྗེ་བཟང་པོ་རྒྱལ་མཚན་དང་། ཁྱད་པར་བོ་དོང་ཐམས་ཅད་མཁྱེན་པ་རྣམས་ཏི་ཤྲི་རུ་བསྟེན། བླ་ཆེན་ཆོས་དཔལ་བཟང་པོ་འདི་ཁྲི་མཆོག་གྲུབ་ལྡེ་དང་ཡུམ་གཅིག་པའི་སྐུ་མཆེད། བླ་མ་དམ་པ་བསོད་ནམས་རྒྱལ་མཚན་གྱི་ཉེ་གནས་ཆེན་པོ་རིན་རྒྱལ་ཞེས་རྭ་ལོའི་རིགས་དེ་ཡི་སྲས་སུ་ལྕགས་ཕག་ལ་ས་སྐྱ་རུ་སྐུ་འཁྲུངས། ལོ་བཅུ་བདུན་སྐོར་ལ་གུང་ཐང་དུ་བྱོན། ལོ་ཤས་ནས་མཆོག་གྲུབ་ལྡེ་གཤེགས་ནས་སླར་ས་སྐྱ་བོ་དོང་སོགས་སུ་ཆོས་ཀྱི་ཕྱིར་བཞུད། སླར་གུང་ཐང་དུ་ཕེབས་ནས་མངའ་བདག་སྔ་མ་རྣམས་ཀྱི་སྐུ་རིམ་པ་བྱས། དགུང་ལོ་ལྔ་བཅུ་པར་ཁྲི་ལྷ་དབང་རྒྱལ་མཚན་གྱི་བླ་མར་གྱུར། ཁྱོན་རེ་དགུ་ས་ལུག་བར་བཞུགས་པའོ། །ཁྲི་ལྷ་དབང་བས་ཕོ་བྲང་བྱང་ཐོག་དྲུག་མ་རྩ་བ་ནས་བརྩིགས། བཀྲ་ཤིས་སྒོ་མང་ཆེན་པོའི་དབུ་རྩེ་སྟེང་འོག་ཏུ་ནང་གསང་སྔགས་ཀྱི་ལྷ་ཁང་། ཕྱི་བིར་ཝ་པ་སོགས་རྒྱ་བོད་ཀྱི་གྲུབ་ཆེན། ས་སྐྱ་བླ་ཆེན་གོང་མ་རྣམས་ཀྱི་སྐུ་བརྙན་གྱིས་བརྒྱན་པ། བར་ཁང་དུ་ཐུགས་དམ་ལྷག་པའི་ལྷ་བཅོམ་ལྡན་འདས་རྡོ་རྗེ་འཇིགས་མཛད་དང་བདེ་དགྱེས་སོགས་དཔལ་ཧེ་རུ་ཀའི་སྐུ་མི་ཚད་བཟོ་སྒྲོས་ཁྱད་པར་ཅན་དང་། གཞན་ཡང་སྔགས་ཐང་ཐོག་ཚད་མ་སོགས་སྐུ་གསུང་ཐུགས་རྟེན་སྔགས་ཀྱི་ཉེར་སྤྱད་དུ་མ་བཅས་གསར་དུ་བཞེངས་སྒྲུབ་མཛད་ནས་དེར་མཐུ་སྟོབས་ཅན་བླ་ཆེན་ཆོས་དཔལ་བཟང་པོ་བཞུགས་སུ་གསོལ། ཡང་། བོ་དོང་འཇིགས་བྲལ་ཐམས་ཅད་མཁྱེན་པ་བཞུགས་པའི་གནས་ཆོས་སྡེ་ཆེན་པོའི་གཟིམ་ཁང་དཀར་པོ་དང་། འཇིགས་མེད་ཐམས་ཅད་མཁྱེན་པའི་སྐུ་བརྙན། དེའི་བསྟན་བཅོས་ཆེན་པོ་དེ་ཉིད་འདུས་པ་རྒྱས་འབྲིང་བསྡུས་གསུམ་གྱི་གླེགས་བམ། དུས་འཁོར་ཡེ་ཤེས་མཆོད་རྟེན། རྒྱུད་སྡེ་བཞི་ཡི་མངོན་རྟོགས་དཀྱིལ་འཁོར་གྱི་རྣམ་ངེས་སོགས་གསུང་པར་མཐའ་ཡས་པ་དང་། དེ་བཞིན་བཀྲ་ཤིས་ནམ་ལིང་འདེབས་པའི་སྦྱིན་བདག་མཐིལ་ལེན་མཛད། ནམ་ལིང་འདི་ཆུ་བྱི་ལོར་གྲུབ་ཟེར། གཞན་ཡང་ཕོ་བྲང་ཕྱི་ནང་ཀུན་ཏུ་ལྷ་ཁང་བྲིས་འབུར་གྱིས་ཁེངས་ཤིང་། ཡི་དམ་ལྷག་པའི་ལྷ་སངས་རྒྱས་བྱང་སེམས་ཀྱི་སྐུ་ཟི་ཁྱིམ་གསེར་དངུལ་གར་བུས་གྲུབ་པ་དུ་མ་དང་། རྡོ་རྗེ་འཆང་གི་སྐུ་ཐོག་ཚད་ཁྲི་རྒྱབ་ཡོལ་དང་བཅས་པ་འདི་ཆོས་རྗེ་བཟང་པོ་རྒྱལ་མཚན་གྱི་དགོངས་རྫོགས་ནང་རྟེན་དུ་བཞེངས་པ་ཡིན་ཡང་ཟེར། བླ་བྲེ་ནམ་མཁའ་ཡིད་འཕྲོག དགེ་འདུན་འདུས་པའི་ཚོགས་ཁྲོ་ཆེན་མོ། བཤད་གྲྭ་དང་སྔགས་གསར་རྙིང་གི་སྒྲུབ་སྡེ། འཁོར་བ་མ་སྟོང་བར་དུ་ཉིན་མཚན་ཐུན་ཆ་དྲུག་གི་ཆ་རྐྱེན་དང་། སངས་རྒྱས་ཀྱི་བཀའ་འགྱུར་རོ་ཅོག་གི་གླེགས་བམ། དགོངས་འགྲེལ་བསྟན་་འགྱུར་གྱི་གླེགས་བམ་བཅས་བཞེངས་པ། སངས་རྒྱས་ཀྱི་ཆོ་འཕྲུལ་དུས་མཆོད་ལོ་མཇུག་ཏུ་བསྟན་པའི་རིམ་གྲོ་གནད་སྨིན་སྤྲོས་པ་དང་བཅས་པ་དེའི་ཉེར་མཁོ་འཆམ་ཆས་རྔ་རོལ། གཡག་སེ། གི་འཆམ་གསོབ་སོགས་མཛེས་བརྗིད་དུ་མ་དང་། སྐྱིད་གྲོང་ཇོ་བོར་མཆོད་སྤྲིན་གསེར་གྱི་གཉྫིར། དཀའ་བའི་ལམ་འཕྲང་ལ་དགེ་ཟམ་འཛུགས་པ་སོགས་རྣམ་པར་དཀར་བའི་མཛད་པ་རྒྱ་ཆེ་ཞིང་། སྤྱིར་དཀོན་མཆོག་ལ་མོས་གུས་ཡང་དག་པ་ཆུབ་ཅིང་། བླ་མའི་དམ་ཚིག་ལ་གཅེས་སྤྲས་ཕུལ་དུ་བྱུང་བ་མཛད་ཅེས་ཁྲི་ལྷ་དབང་རྒྱལ་མཚན་གྱིས་སྲིད་སྐྱོང་བའི་དུས་ཉིད་དུ་ཤེས་རབ་གྲུས་(གྲུབ་)བྱ་བས་སྦྱར་བའི་དེབ་གཏེར་ལྟར་རོ། །ཕྱིས་སྐུ་ཚེའི་སྨད་སེང་གེ་བྱང་ཆུབ་བླ་མར་བསྟེན་ཅིང་དགུང་ལོ་དྲུག་ཅུ་རྩ་གཅིག་བར་དུ་བཞུགས།

དེའི་བཙུན་མོ་ལྷ་རྒྱལ་མོ་ཞེས་པ་ལ་སྲས་ལྕམ་དྲལ་གསུམ་བྱུང་བའི་སྲས་གཉིས་ཁྲི་རྣམ་རྒྱལ་ལྡེ་དང་ནམ་མཁའ་ནོར་བུ་ཡིན་ལ། ལྕམ་སྲིང་ཨཱ་གྲོལ་ཆོས་ཀྱི་སྒྲོན་མེ་ཞེས་རྡོ་རྗེ་ཕག་མོའི་སྤྲུལ་པར་གྲགས་ཤིང་། དུས་དེར་བོ་དོང་འཇིགས་བྲལ་གྱིས་རྗེས་སུ་བཟུང་ནས་ཡང་དག་པའི་ཡེ་ཤེས་བརྙེས་པ་རྣལ་འབྱོར་གྱི་དབང་ཕྱུག་མར་གྱུར་པ་ཞིག་སྟེ། དེའི་སྐྱེ་རྒྱུད་ད་ལྟ་ཡར་འབྲོག་རྗེ་བཙུན་མར་གྲགས་པ་འདིའོ། །སྲས་ཀྱི་ཐུ་བོ་ཁྲི་རྣམ་རྒྱལ་ལྡེ་ནི་རྗེ་བཟང་པོ་རྒྱལ་མཚན་གྱི་ལུང་བསྟན་ལྟར་ཆུ་ཕོ་སྟག་གི་ལོ་ལ་བལྟམས། འདི་གུ་རུ་པད་པས་མངའ་བདག་ཁྲི་སྲོང་ལྡེའུ་བཙན་གྱི་སྤྲུལ་པར་ལུང་བསྟན་པ་ཡོད་ཟེར། བྱིས་སྦའི་(པའི་)སྐབས་ཉིད་ནས་ཐུགས་ཀྱི་འཆར་སྒོ་གསལ་ཞིང་། གསུང་བརྗོད་པ་གཙང་བ། སྐུ་གཟི་བྱིན་ཆེ་ཞིང་འཕོང་དང་སྒྱུ་རྩལ་ལ་མཁས་པ། སྙིང་སྟོབས་བརྟུལ་ཕོད་ངར་དང་ལྡན་པ་ཞིག་བྱོན་ལ། དགུང་ལོ་བཅོ་ལྔ་པར་ཁྲིར་ཕེབས། འོན་ཀྱང་གཞོན་ནུའི་སྐབས་ཐུགས་རྒྱུད་རྩུབ་པའི་ལས་ཀྱི་རྒྱུ་བས་མཛད་པ་མི་ལེགས་པ་ཅུང་ཟད་བྱུང་བ་ཡི་ལྷོ་བདག་པོ་སྒྲོལ་མ་སྐྱབས་དང་བྱང་བདག་པོ་ལ་ཡང་མཇལ་ཕྱག་མཛད་(པ་)དང་། དིང་རི་སྒང་དཀར་ཁྲི་ཚང་དུ་ལོ་ཤས་བཞུགས་དགོས་བྱུང་། སླར་གུང་ཐང་དུ་རྒྱལ་སྲིད་སྐྱོང་བར་སྤྱན་དྲངས་པས་ལུགས་གཉིས་ཀྱི་བློ་གྲོས་ཀྱི་ཉམས་འགྱུར་ཅི་ཡང་རྒྱས་པའི་རང་གཟུགས་མཛད་པ་སྟོབས་པོ་ཆེ་ཡིས་རོང་ཤེར་སོགས་ཕལ་(ཕས་)རྒོལ་སྐྱ་བཙུན་རྣམས་ཚར་བཅད་དེ། དེ་རྣམས་ཀྱི་ས་གཞིས་ཁང་གང་ཡོད་པར་དཔྱ་ཁྲལ་བསྡུད་སྒོ་རྩིགས་(གཙིགས་)སུ་ཕབ་པ་སོགས་མངའ་ཐང་བར་སྐབས་ཅུང་ཟད་ཉམས་པ་ལས་གྲོལ་ཏེ་དཔལ་འབྱོར་དབྱར་མཚོ་བཞིན་རྒྱས་པར་གྱུར་ཏེ། ཞལ་ནས་ཚེ་འདིའི་བུ་རྒྱུད་ཀྱི་དོན་འདི་ཙམ་གྱིས་ཆོག ཕྱི་མའི་དོན་དུ་འདྲེན་པ་བླ་མ་གཅིག་འཚོལ་གསུངས་ནས། བོ་དོང་འཇིགས་བྲལ་ཐམས་ཅད་མཁྱེན་པ་རྩ་བའི་བླ་མར་མཛད། དེ་ལ་ཞུ་དོན་གལ་ཆེན་དུ། ངས་སྡིག་པ་མང་པོ་བསགས། ཕ་མ་ཡང་གསོད་པ་བྱུང་ན་བསད་སྙམ་པ་བྱས། བདག་ངན་སོང་དུ་མི་འགྲོ་བ་ཞིག་ཅིས་ཀྱང་ཞུ་ཞེས་ཞུས་པར། རྗེ་ཐམས་ཅད་མཁྱེན་པས་ཀྱང་སྡིག་པ་སྦྱང་བའི་ཐབས་ལུང་བསྟན་ཅིང་ངན་སོང་དུ་མི་སྐྱེ་བའི་ཞལ་བཞེས་མཛད། གུང་ཐང་ཆོས་སྡེ་སྤྱི་ཡི་ཆོས་དཔོན་དུ་རྗེ་ཐམས་ཅད་མཁྱེན་པ་མངའ་གསོལ་ཏེ་གཙུག་གི་ནོར་བུར་བསྟེན་ནས་མངའ་འོག་ཕལ་ཆེ་དེ་ཡི་བཀའ་སྲོལ་འཛིན་པ་ལ་བཀོད། གཞན་ཡང་མཁས་གྲུབ་དཔལ་ལྡན་སངས་རྒྱས། གྲུབ་ཆེན་རྒྱལ་མཚན་འབུམ། གཙང་སྨྱོན་ཧེ་རུ་ཀ་སོགས་ཀྱང་གུས་པས་མཆོད།

ཆོས་སྡེ་འདུ་ཁང་ཀ་བ་དྲུག་ཅུ་རེ་བཞི་པ་ལོགས་རིས་ཞིང་བཀོད་ཕུན་སུམ་ཚོགས་པ། རིག་ལུང་གི་གྲྭ་རྒྱས་པར་སྤེལ་བ། དུས་དུས་སུ་དགེ་འདུན་བརྒྱ་ཕྲག་གི་རྒྱུད་སྡེ་བཞིའི་སྒྲུབ་མཆོད། བཤད་སྒྲུབ་ཀྱི་སྡེ་སོ་སོའི་བདག་རྐྱེན། མཆོད་གཞིས་གཏན་འཇགས། ཁྲོ་ཆེན་གཉིས། མཆོད་རྟེན་ཀ་ནི་(ཀཀྞིའི་)སངས་རྒྱས་ཀྱི་སྐུ་བརྙན་དཀྱིལ་འཁོར་རིས་སུ་བྲིས་པ་ཆེས་མང་བ་དང་། སྒོ་མང་དུ་ངན་སོང་སྦྱོང་བའི་སྒྲུབ་མཆོད་མི་འཁྲུག་པའི་གཟུངས་དང་སངས་རྒྱས་ཀྱི་མཚན་འབུམ་ཐུན་ཆ། སྐུ་མཁར་བྱང་དགེ་བརྟན་དང་། སྤེ་ཆེན་རྣམས་སུ་ཉིན་མཚན་ཐུན་ཆ་བརྒྱད་བྱས་པ། སྤྲིན་ཟམ་ཀ་ནིའི་(ཀཀྞིའི་)མདུན་དུ་སངས་རྒྱས་བྱང་སེམས་ཀྱི་མཚན་འབུམ་དང་གཟུགས་སྔགས་བྱིན་རླབས་ཅན་རྣམས་སྐྱེ་འགྲོ་སེམས་ཅན་ཀུན་གྱིས་ཐོས་པར་ཐུན་ཆ་བཞིར་བྱས་པ། སྐྱིད་གྲོང་རང་བྱུང་འཕགས་པའི་སྤྱན་སྔར་སྦྱོངས་རྒྱུད་རྩ་རིགས་དང་། ཡི་གེ་དྲུག་མའི་ཐུན་དུས་ཇི་སྲིད་དུ་རྒྱུན་འཛུགས་ཐེབས། རི་འདབས་(དང་)པད་མ་ཆོས་ལྡིང་། ཇོ་བསྟན་གོ་བཞི་(བཅས་)ལ་བསྙེན་བཀུར་བདག་རྐྱེན་ཕུན་སུམ་ཚོགས་པ་དང་། མངོན་དགའི་བདེ་ཆེན་རབ་རྒྱས་འདེབས་པའི་མཐུན་རྐྱེན་དུ་ཤིང་ཆ་གང་དགོས། ལོགས་རིས་བྱེད། ཆོ་འཕྲུལ་དབྱར་གནས་ཀྱི་དགེ་རྒྱུན་སྤེལ་བ། དགོན་ཞིང་གི་འབྲེལ་གང་ཡོད་ལ་ཁྲལ་འུལ་མེད་པ་མཛད་ལ། མངོན་དགའ་འདེབས་ཚུལ་ནི་འདི་སྐད་ཟེར་ཏེ། གུང་ཐང་གནས་འདིར་སངས་རྒྱས་བསྟན་པ་ཡི། །གཞི་འཛིན་དམ་ཆོས་འདུལ་བ་དགོས་པ་ལ། །ཀན་པ་དཔོན་བཙུན་བསོད་ནམས་བཟང་པོ་ཡིས། །དབུས་གཙང་ལ་ཕེབས་འདུལ་བའི་རྣམ་དཔྱད་བཙལ། །ཇོ་ནང་སྒྲུབ་ཆེན་མ་ལ་བརྟག་པ་ཞུས། །ལེགས་ཞེས་བསྔགས་བརྗོད་རྟེན་འབྲེལ་ཐམས་ཅད་འགྲིག །དེ་ཡི་རྒྱུ་མཚན་བླ་ཞང་དཔོན་གསུམ་ལ། །བཀའ་བསྒྲོས་ཞུས་པས་ཀུན་གྱིས་ལེགས་སོ་གནང་། །ཞལ་བཀོད་མཐུན་རྐྱེན་ཐམས་ཅད་ལེགས་སྒྲུབ་ནས། །དཔལ་ལྡན་མངོན་དགའི་སྡེ་ཆེན་འདི་ཉིད་བཙུགས། །དེ་ཡི་ཕྲིན་ལས་རྣམ་པར་དཀར་བ་ལས། །འདུལ་འཛིན་ཆེན་པོ་རྣམ་པ་བཞི་དང་ནི། །མཁས་གྲུབ་ཆེན་པོ་དཔལ་ལྡན་སངས་རྒྱས་དང་། །རྗེ་བཙུན་ཤྲི་མན་སེདྷ་ཡན་ཆད་ཀྱིས། །སྲིད་གསུམ་མཆོད་རྟེན་རང་བྱོན་འདི་ཉིད་དྲུང་། །སྨོན་ལམ་ཆེན་མོ་བཞི་ཡི་བསྒྲུབ་ཚུལ་ནི། །དཀར་ཆག་སོ་སོ་གསལ་བ་འདི་བཞིན་མཛད། །ཅེས་ཀྱང་འབྱུང་ངོ་། །རྫོང་དཀར་ལྷ་ཁང་དམར་པོ་རུ་རྒྱུད་སྡེ་ལྷ་ཚོགས་རབ་འབྱམས་ཀྱི་སྐུ་བརྙན་དང་། བཀའ་འགྱུར་གསེར་རྐྱང་གིས་སྒྲུབ་པ་(དང་)སྐྱ་བྲིས་བཅས་ཚར་གཉིས། ཡང་། སྨན་རྒྱུད་ཡན་ལག་བརྒྱད་པ། མ་ཎི་བཀའ་འབུམ། ཨོ་རྒྱན་གྱི་ཐང་ཡིག མི་ལའི་བཀའ་འབུམ་རྣམས་གླེགས་བམ་གྲངས་མེད་སྤེལ་བའི་ཕྱིར་པར། སྐལ་བཟང་ལྷ་ཁང་དུ་མངའ་བདག་རང་གི་ལུས་བསྐྱེད་(སྐྱེས་)པའི་ཡུམ་ལྷ་རྒྱལ་མོའི་དགོངས་རྫོགས་སུ་འཕགས་མ་སྒྲོལ་མའི་སྐུ་བརྙན་དང་། རིགས་སྲས་ཐུ་བོ་ནོར་བུ་ལྡེ་གཤེགས་པའི་ནང་རྟེན་ཐུབ་དབང་སྐུ་གཞུ་འདོམ་དགུ་པ་བཟོ་སྒྲོས་ཁྱད་པར་འཕགས་པ། བཙུན་མོ་ལྷ་མཚམས་དང་སངས་རྒྱས་རྒྱལ་མོ་གཤེགས་པའི་རྗེས་སྒྲུབ་བྱམས་པ་མི་བསྐྱོད་པ། རྡོ་རྗེ་འཆང་། འོད་དཔག་མེད་ཁྲི་རྒྱབ་དང་བཅས་པ་ཟངས་གསེར་ལས་གྲུབ་པ་ཐོག་ཚད། མཆོད་པའི་ཡོ་བྱད་བླ་རེ་སོགས་དཔག་ཏུ་མེད་པ་དེའི་རབ་གནས་ཀྱི་སློབ་དཔོན་དཔལ་བཟང་པོས་མཛད་ཟེར། ས་གའི་ཡར་ངོ་ལ་ཆོས་སྒོ་ཇོ་བསྟན་གོ་བཞི་རྣམས་ལ་ཀུན་རིག་དང་གསང་འདུས་སྒྲུབ་མཆོད་ཕྱག་ལེན་རྣམ་པར་དག་པ་སྟོང་ཚར་དུ་མ། གཟིམ་ཁང་བྱང་ལ་དེ་ཉིད་འདུས་ཆེན་གྱི་གླེགས་བམ། དགེ་རྟེན་དུ་གསང་སྔགས་གསར་རྙིང་གི་གླེགས་བམ་དུ་མ། ནང་རྟེན་དངུལ་དཀར་གྱི་རྡོ་རྗེ་འཆང་དང་། རྣམ་པར་སྣང་མཛད། སྒྲོལ་མ་རིན་ཆེན་ཕྲས་བརྒྱན་པ། མཆོད་རྫས་དུ་མ། ཕས་རྒོལ་བཟློག་པའི་བསྟན་རིམ། གཤིན་རྗེ་འཆར་ཁའི་བཟློག་པ་གནད་སྨིན། སྐྱིད་གྲོང་འཕགས་པ་རང་བྱོན་དྲུང་དུ་ལེའུ་དགོན་གླང་ཕུག་པ་(དང་)བྲག་ཀའི་བླ་མ་རེས་གཙོ་བྱས། བཙུན་མ་ཉིས་བརྒྱ་ལ་དོན་ཞགས་ཀྱི་ཆོ་ག་བསྙུང་གནས་དང་འབྲེལ་བ་ཆོ་འཕྲུལ་ཞག་བཅོ་ལྔ་སོགས་སངས་རྒྱས་ཀྱི་དུས་ཆེན་རྣམས་སུ་ནར་མ་དང་། མར་མེའི་འཕྲེང་བ་རྒྱུན་མི་ཆད་པ། ཉ་སྟོང་བརྒྱད་ལ་ཀོང་སྤོས་ཀྱི་བདག་རྐྱེན་དུ་྿ལེན་དེ་གྲྭ་྿སྤང་ཞིང་། ཚོང་འདུས་སུ་འབྲི་མཛོ་མོ་བརྒྱ་དང་བཅུ་ཕྲག་དྲུག་རེ་རྒྱུན་འཛུགས་བྱས་པ། མངའ་འོག་ཀུན་ཏུ་རི་དྭགས་གཤོར་དུ་མེད་པའི་རི་རྒྱ། ཉ་སྒོང་བསྲུང་བ། རྩམ་ཚུལ་རྒྱུན་མི་ཆད་པ།་ཟམ་འཕྲང་ལོ་རེ་ཐེར་ཆགས་སུ་བཅོས་པའི་ཐེབས་དང་། དགེ་འདུན་གྱི་སྡེ་སོ་སོའི་གཞིས་ཡིན་ངེས་དང་། དེ་ལ་སྣོན་པ་མཛད་པ་བཅས་ལ་གཙང་ཡིག་མི་འགྱུར་བ་བེམ་བཞག་ཐ་དད་དུ་ལེགས་པར་བསྩལ་ཞིང་། ལྷག་ཏུ་རབ་ཏུ་བྱུང་བ་རྣམས་དང་ཁྱད་པར་རྟེན་བསྙེན་པར་རྫོགས་པ་གཞུང་ལུགས་སྨྲ་བའི་མཁས་པ་རྣམས་ལ་མཆོག་ཏུ་དགྱེས་པའི་བཀུར་བཟོས་ཕུ་དུད་ཤིན་ཏུ་ཆེ་བ་མཛད་པ་སོགས་ལུགས་གཉིས་ཀྱི་མཛད་སྲོལ་ཕུལ་དུ་བྱུང་བ་མངའ་ཞིང་། འདི་ཡི་རྣམ་པར་ཐར་པ་རྒྱ་ཆེ་བ་ལས་རགས་པ་ཙམ་ཡིན་ཞེས་སྨྲའོ། །དགུང་ལོ་ཡང་བརྒྱད་ཅུ་གྱ་གཅིག་བར་དུ་བཞུགས་སོ། །

མངའ་བདག་རྣམ་རྒྱལ་ལྡེ་འདི་ལ་སྔ་ཕྱི་སྲས་མང་དུ་བྱུང་བ་ལ། བཙུན་མོའི་གཙོ་བོ་གཉིས་རིམ་པར་བཞེས་པའི་དང་པོ་བདག་མོ་ལྷ་མཚམས་རྒྱལ་མོ་ལ་སྲས་གཉིས་སྲས་མོ་གཅིག་དང་གསུམ་སྟེ་གཅེན་ཆོས་རྒྱལ་ནོར་བུ་ལྡེ་དཔལ་བཟང་པོ་བྱ་བ་ཨོ་རྒྱན་གུ་རུའི་ལུང་གིས་ཟིན་པའི་སྐྱེས་བུ་དགེ་མཚན་དུ་མས་བརྒྱན་པ་དེ་ལྕགས་ཕོ་རྟ་ཡི་ལོར་གུང་ཐང་དུ་བལྟམས་ཤིང་། ཕྱིས་ནར་སོན་ནས་རྒྱལ་སྲིད་དུ་མངའ་གསོལ་བའི་བཙུན་མོ་ཟུར་ཚོ་ནས་བདག་མོ་རིན་ཆེན་དཔལ་སྒྲོན་ཁབ་ཏུ་བཞེས། རྣམ་པར་དཀར་བའི་མཛད་པ་འབའ་ཞིག་ལ་ཐུགས་དགྱེས་པས་སྒོ་མང་དུ་ལམ་འབྲས་ལྷ་ཁང་དང་། ས་སྐྱ་བཀའ་འབུམ་གྱི་གླེགས་བམ་རྣམས་བཞེངས། སྡེ་གཉིས་ཆོས་ལྡན་དུ་བསྐྱངས་པ་ཞིག་བྱུང་ཡང་གཞོན་ནུ་ནས་སྐུ་ཞི་བར་གཤེགས། བཙུན་མོ་དངོས་ལ་སྲས་མེད་ལ་ཟུར་དུ་བལྟམས་པ་ལྷ་བཙུན་ཀུན་དགའ་རྣམ་རྒྱལ་ཞེས་དགེ་བའི་བཤེས་གཉེན་ཞིག་བྱུང་། ནོར་བུ་ལྡེའི་གཅུང་ཁྲི་རྒྱལ་བསམ་གྲུབ་ལྡེ་ས་མོ་ཡོས་ཀྱི་ལོར་ཡབ་ཡུམ་རྣམས་དིང་རི་སྒང་དཀར་དུ་བཞུགས་པའི་དུས་སུ་སྐུ་བལྟམས། དེས་ན་དིང་རི་སྒང་དམར་སྐྱེ་ལྷ་རུ་མཆོད་པར་མཛད་ཟེར་ལ། སྤྱིར་ནི་མངའ་བདག་ཁྲི་སྲོང་ལྡེའུ་བཙན་གྱི་གདུང་རིགས་རྣམས་ལ་བཙན་རོལ་པ་རྐྱ་བདུན་འདི་ཆེས་འགོ་བའི་སྐུ་ལྷ་ཡིན་པར་བཤད་(པ་)བཞིན། སྒང་དམར་འདི་རོལ་པ་རྐྱ་བདུན་གྱི་གཙོ་བོ་དང་རྒྱུད་གཅིག་པས་དོན་གྱི་འབྲེལ་ཆགས་པའོ། །རྒྱལ་པོ་དེའི་བཙུན་མོར་ཟུར་ཚོ་བཟའ་བདག་མོ་བཟང་དཀར་ཁབ་ཏུ་བཞེས། གཟིམ་ཁང་ལྷོ་གསར་དུ་བཅོས་ཤིང་དཀོན་མཆོག་གི་སྐུ་བརྙན་ལོགས་རིས་མཚར་དུ་དངར་བ་དང་། ཟངས་གསེར་གྱི་རྡོ་རྗེ་འཆང་གཞུ་ཚད། ལམ་འབྲས་བླ་མེད་(རྒྱུད་)ཁྲུ་ཚད་ལི་མ་གཞི་(ཞེ་)གཅིག་དེ་བཞིན་ས་སྐྱ་གོང་མའི་གསུང་འབུམ་ཚང་མ། དངུལ་འབུམ། གསེར་ཐང་། གོས་ཐང་སོགས་གསར་བཞེངས་དང་། རྒྱ་དཀར་དང་རྒྱ་ནག་ནས་བྱུང་བའི་རྟེན་གསུམ་མཆོད་ཆས་ཁྱད་པར་ཅན་གྱི་སྒྲིགས་འཚོལ། གསུང་རབ་ཇི་སྙེད་པ་བཞེངས་པ་དང་། ནམ་ལིང་དགེ་འདུན་རྣམས་ལ་རྣམ་རྒྱལ་འབུམ་གཏེར། མངོན་དགའ་ཆོས་སྡེར་ཀུན་རིགས་སྒྲུབ་མཆོད་སོགས་རྣམ་པར་དཀར་བའི་མཛད་པ་རྒྱ་ཆེ་ཞིང་། རྗེ་གཙང་སྨྱོན་ཧེ་རུ་ཀ་དང་མཁས་གྲུབ་དཔལ་ལྡན་སེང་གེ་སོགས་བླ་མར་བསྙེན་(བསྟེན་)ཅིང་ལུགས་གཉིས་ཀྱི་དཔལ་འབྱོར་རྒྱས་པ་ཡིན་ནོ། །བདག་མོ་ཟུར་ཚོ་མ་ལ་སྲས་མི་མངའ་བས་ཀན་པ་བཟའ་ཤེས་རབ་རྒྱལ་མོ་བཞེས་པའི་སྲས་ཁྲི་བཀྲ་ཤིས་དཔལ་འབར། བར་པ་ལྷ་བཙུན་ནམ་མཁའ་དཔལ་མགོན། ཐ་ཆུང་གོང་མ་ཀུན་དགའ་བློ་གྲོས་གསུམ་བྱོན། ནོར་བུ་ལྡེ་དང་བསམ་ལྡེ་གཉིས་ཀྱི་ཡུམ་གཅིག་པའི་ལྕམ་སྲིང་དོན་གྲུབ་རྒྱལ་མོ་སྟེ། དབུས་སུ་གོང་མ་ཆེན་པོ་གླང་(རླངས་)ལྷ་གཟིགས་སྣེའུ་གདོང་པ་ངག་དབང་གྲགས་པ་རྒྱལ་མཚན་གྱི་བཙུན་མོར་བྱོན། དེ་སྐབས་རྒྱལ་པོ་སྣེའུ་གདོང་པ་གདུང་ཤིན་ཏུ་ཉག་ཕྲ་བའི་སྐབས་ཏེ་མངའ་བདག་མ་འདི་ལ་སྲས་ངག་དབང་བཀྲ་ཤིས་གྲགས་པ་བལྟམས་པ་ཡི་སྣེའུ་གདོང་པའི་གདུང་དུས་རིངས་པོར་གནས་པའི་བརྩས་(བཙས་)སུ་བྱས།

ཁྲི་རྣམ་རྒྱལ་ལྡེ་ཡི་བཙུན་མོ་གཉིས་པ་བཙུན་མོ་སྔ་མའི་སྐུ་མཆེད་སངས་རྒྱས་རྒྱལ་མོ་ཞེས་པ་ལ་ཡང་སྲས་ལྕམ་དྲལ་གསུམ་སྟེ་གཅེན་གོང་མ་ཤེས་རབ་དཔལ་བཟང་དང་། གཅུང་ཀུན་དགའ་རྣམ་རྒྱལ་ལྡེ་གཉིས་མང་ཡུལ་སྐྱིད་རོང་གླང་པོ་མཁར་དུ་བལྟམས། གོང་མ་ཤེས་རབ་དཔལ་བཟང་དེ་ཉིད་དཔའ་ཞིང་བརྟུལ་ཕོད་པའི་སྙིང་སྟོབས་འཕངས་(འཕོང་)(དང་)སྒྱུ་རྩལ་དུ་མས་བརྒྱན་པ་ཡིས་ཕས་ཀྱི་རྒོལ་བ་མཐའ་དག་གཞོམ་ནུས་པ་ཞིག་བྱུང་སྟེ། གུང་ཐང་གི་མངའ་འོག་ནས་བརྒྱ་དཔོན་པ་ངོ་ལོག་ནས་ཐོན་པ་ནག་ཚང་ནས་དཔུང་གི་བསུ་མ་སྟོབས་ཆེ་བ་དང་བཅས་བྱང་དུ་བགྲོད་པའི་རྗེས་འདེད་མངའ་བདག་རང་ཉིད་ངོས་ཀྱིས་གུང་ཐང་གི་དམག་ཚན་ཉུང་ངུ་ཞིག་འཁྲིད་དེ་ཤྲི་བྱང་ལ་རྒྱབ་ཀྱི་བར་དུ་བརྡས་(བདས་)ནང་ཚང་གི་མགོ་མི་རྒྱལ་སྐྱེས་གཡུལ་ངོར་བསད། ཨ་ཇོ་ལྷ་ཕྲུག་སོགས་མང་པོ་ཞིག་བཙོན་དུ་བཟུང་། བརྒྱ་དཔོན་རང་གནས་སུ་བཟློག་པ་སོགས་སྔ་ཕྱི་དཔའ་མཛངས་འཕྲུལ་གྱི་མཛད་པ་དེ་ལྟ་བུ་ཆེས་མང་ཞིང་། ཕྱིས་སྐྱིད་རོང་ཇོ་བོ་ལ་གསེར་གྱི་རྒྱ་ཕིབས་ཤིག་ཕུལ་བར་དགོངས་ཏེ། དེའི་སྟ་གོན་ཚང་བར་བསྒྲིགས་ཟིན་པའི་སྐབས་སུ་གཤེགས། རྒྱལ་པོ་དེ་དང་ཡུམ་གཅིག་པའི་གཅུང་གོང་མ་ཀུན་དགའ་རྣམ་རྒྱལ་ལྡེ་གུ་རུ་རིན་པོ་ཆེའི་ལུང་བསྟན་དུ། དེ་ནས་གདུང་རབས་བཞི་ལྔ་སོང་བ་ན༔ ང་ཡི་སྦས་ཡུལ་ནགས་རོང་དབེན་པ་རུ༔ སྨོན་ལམ་སྟོབས་དང་ལྡན་པའི་རྒྱལ་པོ་འབྱུང་༔ བསྟན་པ་ཁོམ་བུར་དར་ཞིང་སེམས་ཅན་སྐྱིད༔ ཅེས་པ་ཡོད་ཟེར། སྐུ་བཙས་མ་ཐག་ཏུ་གོ་བཞིའི་སྐྱེས་པ་གང་ཡོད་ལ་བཙས་སྟོན་ཕྱེ་མར་ཕུལ་རེ་གནང་ཞིང་། དགེ་མཚན་བཟང་པོས་ཁྱབ། བྱིས་པ་ཉིད་ནས་དེ་ཡི་སྤྱོད་ཚུལ་ལས་འདས་པ་གསུང་ཐར་བརླིང་ཞིང་ཐ་མལ་གྱི་ཚིག་མི་འདྲེ་བ་དོན་ཆེན་པོ་ཁོ་ན་དང་གང་ཟག་ཁྱད་པར་ཅན་ཞིག་གི་སྐྱེ་བ་ཡིན་པར་ཡང་དོན་གྱི་ཞལ་གྱིས་འཆེའ་བར་མཛད། ཚད་མ་རིགས་གཏེར་དང་། ཤེར་ཕྱིན། མངོན་པ་རྟོགས་པའི་རྒྱན་དགུང་ལོ་བརྒྱད་པའི་སྐབས་སུ་ཚིག་དོན་གཉིས་ཀར་ལེགས་པར་བཤད་པ་སྤྲོ་ནུས་པ་ཞིག་བྱུང་། ནར་སོན་ནས་རྒྱལ་ཐབས་ཀྱི་བྱ་བ་མཛད་པའི་བཙུན་མོར་གུ་གེ་བདག་མོ་དཀོན་མཆོག་བསྐྱང་མོ་ཁབ་ཏུ་བཞེས་ཤིང་། མངའ་ཐང་(དང་)བྱམས་སྙིང་རྗེ་བྱང་ཆུབ་ཀྱི་སེམས་བཟང་པོས་ཆོས་བཞིན་གྱི་ཁྲིམས་ཀྱིས་བསྐྱང་བར་མཛད་པས་ཀུན་གྱི་ཡིད་འཕྲོག་པ་དང་། ཡོངས་འཛིན་དུ་སྡེ་སྣོད་དུ་མས་མགྲིན་པ་བརྒྱན་ཅིང་རིགས་སྔགས་གྲུབ་པ་གནས་པ་ནོར་བུ་ཕུན་ཚོགས་དང་།

གཞན་ཡང་མཁས་པའི་ཁྱུ་མཆོག་ཀུན་དགའ་བཟང་པོ། མཁས་གྲུབ་དཔལ་ལྡན་བཀྲ་ཤིས་སོགས་སྤྱི་བོར་མཆོད་ཅིང་ཕོ་བྲང་དགའ་ལྡན་རྣམ་པར་རྒྱལ་བ་འཆར་ཁའི་འོད་སྣང་ལ་འཇའ་ཚོན་པིར་གྱིས་བྲིས་པ་ལྟ་བུའི་གཞལ་མེད་ཁང་ཆེན་པོར་དཀོན་མཆོག་གི་སྐུ་བརྙན་ཅིར་ཡང་བཀྲ་བར་བྱས་ཤིང་། ཡབ་ཀྱི་དགོངས་རྫོགས་ལ་ཆོས་སྒོ་ཤག་མངོན་དགའི་མཁན་པོ་རྣམས་ལ་ཐུགས་དམ་གསལ་འདེབས་ནས་བཟུང་ཉིན་ཞག་ཞེ་དགུའི་བར་མངའ་རིས་སུ་གནས་པའི་དགེ་འདུན་མཆིས་སོ་ཅོག་ལ་ཉིན་རེ་བཞིན་ཀུན་རིགས་རྣམ་སྣང་གི་དཀྱིལ་འཁོར་སྒྲུབ་མཆོད་ཕྱག་ལེན་རྣམ་པར་དག་པའི་སྒོ་ནས་མཚན་བྱང་བཞི་རེ་བཅག་པ་ཁྱོན་སྟོང་དགུ་བརྒྱ་ཉི་ཤུ་རྩ་གཅིག་འགྲོ་བ་དང་། གུང་འགྱེད། ཕྱི་རྟེན་དུ་ཀཀྞིའི་ལྷ་ཁང་ཚར་དུ་དངར་བ་བྱང་ཆུབ་ཆེན་པོའི་མཆོད་རྟེན། ནང་རྟེན་དངུལ་བྲེ་བཅུ་གསུམ་ལ་བརྡུང་བའི་རྡོ་རྗེ་འཆང་གི་སྐུ་ཁྲི་རྒྱབ་ཡོལ་དང་བཅས་པ་ཐོག་ཚད་གཡུ་རྙིང་སོགས་རིན་པོ་ཆེའི་ཕྲ་རྒྱན་དུ་མས་བརྒྱན་པ། གསེར་ཟངས་གཞི་(ཞེ་)གཅིག་གིས་ལམ་འབྲས་བླ་རབས་ཁྲུ་ཚད་མ། སྐུ་བརྙན་རེ་རེའི་སྤྱན་སྔར་ཆོས་རྒྱལ་འཕགས་པའི་སྐབས་ཀྱི་ དྲིལ་བུ ་རྒྱ་ནག་མ་སོགས་རེ་རེ། གུར་གུ་ཤའི་ནང་མཆོད་ཀྱི་སྣོད་སྤྱི་བླུག་སྤོས་སྒམ། དམ་དཔེ། སྤྱི་མཆོད་དུ་དངུལ་སྐོངས་(ཀོང་།) དངུལ་འབུམ། ཏིང་བདུན་ཆ། མཆོད་རྫས་རྒྱ་ཧོར་ནས་བྱུང་བ་འབའ་ཞིག་དང་། ལྷ་ལམ་ཁེངས་པ་ལྟ་བུའི་བླ་བྲེ་རྣམ་(གནམ་)རྒྱན། དར་གྱི་བ་དན། ས་སྐྱ་གོང་མའི་གསུང་འབུམ། གསེར་ཞུན་ཁོ་ནས་བསྒྲུབས་པའི་གླེགས་བམ་གླེགས་ཤིང་གསེར་ཆུ་ཁོ་ནས་བྱུག་པ། སི་ཏ་ཧུའི་གླེགས་ཐག ན་བཟའ་དར་གྱི་གཏན་ཁེབས། རས་སྒྲིལ། ཏི་བིའི་ཤུབ་བཅས་ཡོད་པ། སྒོ་མང་གཙུག་ལག་ཁང་གི་ལོགས་རིས་མཐོང་ཞལ་སོགས་སྔར་ལེགས་པོ་ཡོད་པ་བྱང་རྟ་(ཏ་)དབེན་གྱིས་བཟུང་སྐབས་ཅི་རིགས་ཉམས་པའི་ཞིག་གསོ་གདུང་རྩི་ལོགས་རིས་ཚར་དུ་དངར་ཞིང་ཡིད་དུ་འོང་བ། གནམ་རྒྱན་གླང་རྒྱབ་མ་སོགས་ཕུལ་དུ་བྱུང་བའི་ཡོ་བྱད་ཀྱིས་བརྒྱན་པ་བསྒྲུབས་པའི་རབ་གནས་མཁས་མཆོག་ཀུན་དགའ་བཟང་པོ་དང་དཔལ་ལྡན་བཀྲ་ཤིས་སོགས་རྡོ་རྗེ་སློབ་དཔོན་དུ་གྱུར་པ་དུ་མས་ཚུལ་བཞིན་དུ་མཛད། གཞན་ཡང་ནམ་ལིང་དུ་སྨན་འཇིམ་གྱི་རྡོ་རྗེ་འཆང་ལ་ལམ་འབྲས་བླ་རབས་ཁྲུ་ལྷག་གིས་བསྐོར་བ་དང་། ཕོ་བྲང་དགེ་བརྟན་དུ་ཀྱཻ་རྡོ་རྗེ་(དང་)གུར་གྱི་མགོན་པོའི་སྐུ་བརྙན།

སྐྱིད་གྲོང་དགེ་བརྒྱད་ལྷ་ཁང་གི་རྒྱ་ཕིབས་མདུན་མ་གསེར་ཟངས་ཀྱིས་ལེགས་པར་གཡོགས་པ་སོགས་རང་བྱུང་འཕགས་པ་ལ་ཞབས་ཏོག་ཕུན་སུམ་ཚོགས་པ་དང་། གོང་གི་གཙུག་ལག་ཁང་ཆེན་པོ་དེ་རྣམས་སུ་སྣང་གསལ་རྒྱུན་མི་ཆད་པའི་མཐུན་རྐྱེན་སྦྱར་ཞིང་། གཞན་ཡང་རང་བྱུང་འཕགས་པའི་ཞབས་ཏོག་ལྷོ་ཁ་ཚར་གྱི་སྲིད་འཛིན་དུ་དགོངས། སྐྱིད་གྲོང་འཚོང་འདུས་ཀྱི་ཟོང་མཁར་རྩེ་ལ་ཁམས་གསུམ་རྣམ་རྒྱལ་ཞེས་པའི་རྫོང་ལྟ་ན་སྡུག་པ་འཆི་མེད་དབང་པོའི་ཕོ་བྲང་(ས་ལ་)འཕོས་པ་ལྟ་བུ་དང་། ཆོས་སྡེ་ཐང་དུ་གྲགས་པ་ཞིང་དུ་རྨོད་པ་སོགས་མཛད་པ་རྒྱ་ཆེ་ལ་བཟང་པའི་རང་བཞིན་གྱིས་དུས་འདའ་བ་ཞིག་བྱུང་། རྒྱལ་པོ་དེ་དང་གོང་མ་ཤེས་རབ་དཔལ་བཟང་གི་ཡུམ་གཅིག་པའི་ལྕམ་མཁའ་འགྲོ་རྒྱལ་མོ་ཞེས་ལ་སྟོད་ལྷོ་བདག་པོ ་ཀུན་དགའ་རྣམ་རྒྱལ་གྱི་བཙུན་མོར་བྱོན་ནས་རིགས་རྒྱུད་ཕྱིས་རྒྱལ་མཁར་རྩེའི་བདག་པོར་གྱུར། གཞན་ཡང་ཁྲི་རྣམ་རྒྱལ་ལྡེ་དེ་ལ་ཡུམ་མི་གཅིག་པའི་སྲས་མང་དུ་ཡོད་པར་སྣང་ཞིང་།་གོང་གི་སྲས་བཞི་ལས་ནོར་བུ་ལྡེ་ནི་ཡབ་ཀྱི་སྔོན་དུ་གཤེགས། གཞན་གསུམ་སོ་སོར་གྱེས་ཏེ་གོང་མ་བསམ་ལྡེས་ཕོ་བྲང་ལྷོ་དང་། གོང་མ་ཤེས་རབ་དཔལ་བཟང་གིས་ཕོ་བྲང་བྱང་བཟུང་། གོང་མ་ཀུན་དགའ་རྣམ་རྒྱལ་དགེ་བརྟན་དུ་བཞུགས་ནས་མངའ་ཞབས་ཀྱང་གསུམ་དུ་བགོས། ལྷོ་བྱང་ཞལ་ངོ་ཐུགས་མི་མཐུན་པས་བློན་མོ་དབུ་རྩེ་བ་དཔོན་བཙུན་གྲུབ་པ་སོགས་ཀྱིས་ཕྲ་མས་དཀྲུག་པ་ཡིས་གོང་མ་ཤེས་རབ་དཔལ་བཟང་རྐྱེན་ལམ་(དུ་)བཀྲོང་བས་བར་སྐབས་མི་ལེགས་པ་ཡང་བྱུང་འདུག

གོང་མ་ཁྲི་ཀུན་དགའ་རྣམ་རྒྱལ་ལྡེ་ཡི་བཙུན་མོ་གུ་གེ་མ་དཀོན་མཆོག་བཟང་པོ་ལ་སྲས་ཁྱད་པར་འཕགས་པ་འབྱུང་ཞེས་གཙང་སྨྱོན་ཧེ་རུ་ཀས་ལུང་བསྟན་པ་ལྟར། ཤིང་ཕོ་ཁྱིའི་ལོ་ས་ག་ཟླ་བའི་ཚེས་བཅོ་ལྔ་ཡི་ཐོ་རངས་ཁར་མེ་ཏོག་གི་ཆར་སོགས་ངོ་མཚར་བའི་ལྟས་དུ་མ་(དང་)བཅས་ཁྲི་ཀུན་བཟང་ཉི་ཟླ་གྲགས་པ་བཟང་པོའི་ལྡེ་བལྟམས། སྐུ་ན་ཕྲ་མོ་ནས་བྱིས་པའི་ཀུན་སྤྱོད་སྤངས་ཏེ་ཟབ་ཅིང་དཀྱེལ་ཆེ་བ། དེས་ཤིང་འཛངས་པ། བློ་གྲོས་ཀྱི་འཇུག་པ་ལེགས་པར་རྒྱས་པ་ཞིག་བྱོན་ཅིང་། རྒྱལ་བསྟན་རིན་པོ་ཆེ་རིས་མེད་ལ་གུས་ཤིང་བྱེ་བྲག་སྔ་འགྱུར་རྙིང་མའི་རིང་ལུགས་ལ་བག་ཆགས་མཆོག་ཏུ་སད་པ། གཞོན་ནུ་ནས་རྒྱན་པོ་འགྱེད་པ་དང་འདུས་ལ་བལྟ་བ་སོགས་གྲགས་པ་ཉམས་པའི་རྒྱུ་དྲུག་ཡེ་ནས་སྤང་བ། དགུང་ལོ་བཅུ་དྲུག་པའི་སྐབས་རྒྱལ་སྲིད་དུ་མངའ་གསོལ་བ་ན་རང་སྡེ་བདེ་འཇམ་དར་ཞིང་རྒྱས་ཏེ། གཞན་སྡེ་ཐམས་ཅད་མཚན་ཙམ་གྱིས་ཟིལ་གྱིས་ནོན་ཅིང་དབང་དུ་འདུས་པ་སོགས་ཡོན་ཏན་འཁོར་ལོས་བསྒྱུར་བའི་རྗེས་སུ་འགྲོ་བ་བྱུང་ལ། དེ་ཡང་སྤྲུལ་པའི་སྐུ་མཆོག་ཀུན་སྐྱོང་གླིང་པའི་གཏེར་ལུང་ལས། དུས་མཐའི་དུས་སུ་མང་ཡུལ་གུང་ཐང་དུ༔ བསྟན་པ་རྒྱས་དང་འགྲོ་བའི་དོན་མཛད་པའི༔ ཆོས་རྒྱལ་རྒྱལ་བའི་སྲས་པོ་ཁྱི་ལོ་བ༔ བཅུ་དྲུག་ལོ་ལ་མངའ་བསྒྱུར་འགྲོ་བའི་མགོན༔ འབྲེལ་ཚད་དོན་ལྡན་ཨོ་རྒྱན་སྤྲུལ་པ་འབྱུང་༔ ཞེས་དང་། གཞན་ཡང་གཏེར་ལུང་དུ་མ་ནས་ཟིན་ཅིང་ལྷ་སྲས་མུ་ཁྲི་བཙན་པོའི་སྤྲུལ་པར་གྲགས། དེས་མཐའ་དབུས་ཀུན་ཏུ་སངས་རྒྱས་ཀྱི་བསྟན་པ་དར་ཞིང་རྒྱལ་ཁམས་བདེ་བའི་རྟེན་འབྲེལ་ཇི་སྙེད་པ་བསྒྲིགས། བོད་ཡུལ་དབུས་འགྱུར་འཕྲུལ་སྣང་གི་གཙུག་ལག་ཁང་ཇོ་བོ་ཤཱཀྱ་མུ་ནེའི་སྤྱན་སྔར་གསེར་གྱི་མཎྜལ་ཤིན་ཏུ་ལེགས་པ་དང་དངུལ་གྱི་རྒྱལ་སྲིད་སྣ་བདུན། སྐྱིད་གྲོང་འཕགས་པ་རང་བྱུང་ལ་གསེར་ལྗང་བརྡུངས་ཀྱི་པ་ཏ་ཀ་(ཊ་ཧ་)ཤིན་ཏུ་ཆེ་བ། གུང་ཐང་བཀྲ་ཤིས་སྒོ་ནང་དུ་ཨོ་རྒྱན་གྱི་སློབ་དཔོན་ཆེན་པོ་པདྨ་སམ་བྷའི་སྐུ་རྒྱལ་ཐོག་གི་ཚད་དང་མཉམ་པ། རྒྱལ་བའི་བཀའ་འགྱུར་རོ་ཅོག་གླེགས་བམ་གསེར་རྐྱང་གིས་བསྒྲུབ་པ། སྐྱ་བྲིས་ཀྱི་བསྟན་འགྱུར་ཚང་མ། ཕོ་བྲང་དགའ་ལྡན་བཀྲ་ཤིས་རབ་བརྟན་ཕྱི་ལ་ལངྐ་པུ་རིའི་ལྗོངས་ལྟ་བུ། ནང་ལྷའི་གཞལ་མེད་ཁང་ཆེན་པོ་བདག་ཅག་གི་སྟོན་པའི་རྣམ་པར་ཐར་པའི་ཞིང་བཀོད་ཀུན་ཏུ་རྒྱས་པ་དང་།

གངས་རིའི་ཁྲོད་ཀྱི་དབང་ཕྱུག་ཆེན་པོ་ཆོས་ཀྱི་རྒྱལ་པོ་རིམ་པར་བྱོན་པའི་རབ་ལེགས་བྱས་ཀྱི་རྣམ་ཐར་ཞིབ་འཁོད་དང་འབྲེལ་བ་སོགས་རྣམ་པར་དཀར་བའི་མཛད་ཕྲིན་ལྷ་ལམ་ཁེངས་པ་ལྟ་བུས་མཚོན་ཞིང་། གཞན་ཡང་བསྟན་པ་རིན་པོ་ཆེ་ཕྱོགས་དང་རིས་སུ་མ་ལྷུང་བའི་སྦྱིན་བདག་ཅེས་པ་ཡང་མིང་ཚིག་ཏུ་མ་ལུས་(པ་)ཇི་བཞིན་ཕྱག་ཏུ་བླངས་བའི་(ཏེ་)མངའ་འོག་གྲྭ་རིགས་ལྟ་གྲུབ་རང་རང་གང་མོས་དང་། མདོ་སྔགས་ཀྱི་གྲྭ་ས་རྣམས་སུ་སྡོད་ཅིང་འགྲོ་བ་ལ་ཕྱོགས་རིས་ཀྱི་དགག་སྒྲུབ་ཡེ་མི་མཛད། ཆོས་དང་མི་མཐུན་པ་རྣམས་ལ་ཚར་གཅོད་དང་། ཆོས་མཐུན་ཡོན་ཏན་དང་ལྡན་པ་རྣམས་ལ་གཟེངས་བསྟོད་བྱ་དགའ་བཟང་པོ་གནང་ཞིང་། ཁྱད་པར་གུང་ཐང་གི་ཆོས་གྲྭ་ཆེན་པོར་མདོ་སྔགས་རབ་འབྱམས་ཀྱི་གྲྭ་བསྐོར་བའི་བཀའ་སྲོལ་བཟང་པོ་བཙུགས་པ་ཡིས། གངས་ཅན་སྟོད་སྨད་ཀྱི་འཛིན་མའི་ཁྱོན་དུ་འཁོད་པའི་གྲྭ་ས་རིས་མེད་ནས་ཤེས་བྱ་རིག་པའི་གནས་ལ་མཁས་པ་དགེ་བའི་བཤེས་གཉེན་རྣམས་མཁས་པའི་དགོས་པ་སྒྲུབ་པ་དང་། ཆོས་རྒྱལ་འདི་ཉིད་ཀྱི་རྣམ་དཀར་མཛད་པའི་དྲི་བསུང་ཞིམ་པོས་ཡིད་འཕྲོག་ནས་ལེགས་བཤད་རོལ་མོ་སྒྲོགས་པ་ལ་གཅིག་ཏུ་རེངས་པས་སྡེ་སྣོད་འཛིན་པའི་འདུ་བ་བར་མི་ཆད་(པར་)དགེ་བའི་ལང་ཚོ་རྒྱས་པ་ཡི་གྲགས་སྙན་སྲིད་པའི་རྩེ་མོར་འཕྱོ་ཞིང་བསྟན་པ་རྒྱས་པའི་བཙས་སུ་འགྱུར་པ་དང་། ཡོངས་འཛིན་དམ་པ་ཡང་གུ་རུ་པད་མའི་རྒྱལ་ཚབ་རིག་འཛིན་ཆེན་པོ་མཆོག་ལྡན་མགོན་པོ་དང་གཏེར་སྟོན་ཆེན་པོ་བསྟན་གཉིས་གླིང་པ་སོགས་ཏི་ཤྲིར་བསྟེན་ཅིང་། གཞན་ཡང་རིགས་སྔགས་འཆང་བའི་དབང་པོ་བསམ་ཡས་དཀར་ཆེན་ཀུན་དགའ་གྲགས་པ་དང་། ཡོལ་མོ་བ་ཤཱཀྱ་བཟང་པོ། སྔགས་འཆང་བ་གསང་སྔགས་རྡོ་རྗེ་སོགས་ནུས་པ་ལྡན་པ་མང་པོ་ཡང་བླ་ཡི་མཆོད་གནས་སུ་བཀུར་ནས་བོད་ཡུལ་བདེ་བའི་བསྟན་རིམ་ཡང་རྒྱ་ཆེར་མཛད་ཅིང་། སྐུ་ཚེ་སྨད་གོང་མ་བསམ་ལྡེའི་སྲས་ཁྲི་བཀྲ་ཤིས་དཔལ་འབར་སྐུ་མཆེད་ལ་མངའ་ཐང་ཕོག་ནས་གསོལ་ཐབས་གཅིག་ཏུ་དྲིལ་བའི་སྲིད་ན་ལེགས་བྱས་ཀྱི་དཔེར་འོས་པ་གནང་ནས་རེ་ཞིག་རང་ཉིད་སྒོ་མང་གི་ཆོས་དཔོན་མཛད་པ་དང་། ཕྱིས་འདའ་མེད་གསུམ་གྱི་མཚམས་བཅད་དམ་པོ་ཁོ་ནར་བཞུགས་ཤིང་། ཡེ་ཤེས་ཁྱད་པར་ཅན་རྒྱུད་ལ་སྐྱེས་པ་ཡི་རོལ་པའི་ཆོ་འཕྲུལ་རྒྱ་སྐར་ཆུང་ངུ་ནས་ཕྱིར་ཐོན་ཏེ་གཡང་ཟ་(གཟར་)བའི་གཅོང་རོམ་ངམ་འབྲོག་ཏུ་འདབ་ཆགས་རྒྱལ་པོ་ལྟར་ལྡིང་བ་དང་ཌ་དྲིལ་དང་ཡོལ་གོ་སོགས་ཤུགས་ལྡན་གྱིས་རྒྱང་རིང་པོར་དོར་ཡང་འཆག་གས་མེད་པ་དང་། ཐོལ་བྱུང་དུ་ལུང་བསྟན་སྣ་ཚོགས་པ་བསྩལ་བ་སོགས་གྲུབ་པའི་སྤྱོད་པ་ལ་གནས་པ་ཞིག་བྱུང་ཞིང་། དེ་ལྟ་བུའི་སྐུ་ཚེ་སྨད་ཀྱི་མཛད་པ་ལ་བློ་མིག་མ་དག་པ་ཁ་ཅིག་གིས་དེ་ལ་ཐུགས་རླུང་གི་སྐྱོན་ཡིན་ནོ་ཞེས་པ་ཡང་གླེང་སྐད། དགུང་ལོ་ཡང་བཞི་བཅུ་རྩ་བདུན་བཞུགས་ཏེ་ལྕགས་ཕོ་སྤྲེལ་གྱི་ལོ་ལ་གཤེགས་སོ། །

དེ་ཡི་བཙུན་མོ་ཡར་འབྲོག་སྣ་དཀར་རྩེ་ནས་ལྕམ་ཚེ་རིང་རྒྱལ་མོ་ཁབ་ཏུ་བཞེས་པ་ལ་སྲས་ལྕམ་སྲིང་གསུམ་སྟེ། གཅེན་ལྡང་མ་ཤེས་རབ་ཀུན་དགའ་རྒྱལ་ཕུར་གྱི་འགྲུབ་སྦྱོར་བཟང་པོ་ལ་ངོ་མཚར་ལྟས་དང་བཅས་འཁྲུངས་ཤིང་རྣམ་དཔྱོད་དང་ལྡན་པ་ཞིག་བྱུང་ཡང་ཆུང་ངུ་ཉིད་ནས་སྐུ་གཤེགས། གཅུང་ལྷ་ཀུན་བཟང་རྣམ་འཕྲུལ་རྒྱལ་པོ་ལུགས་གཉིས་ཀྱི་བློ་གྲོས་དང་ལྡན་པ་གཞན་གྱི་ཡིད་འཕྲོག་པ་ཞིག་བྱུང་ཞིང་དེ་ཡི་བདག་མོར་གློ་བོ་ནས་བསོད་ནམས་རྒྱལ་མོ་བཞེས། ལྷ་རྣམ་འཕྲུལ་དེ་ཉིད་སྐུ་གཞོན་ནུ་ནས་གཤེགས་པར་སྣང་། ལྷ་སྲས་སྐུ་མཆེད་དེ་གཉིས་གཤེགས་པའི་སྐབས་སུ་མེ་ཏོག་གི་ཆར་དང་ལྟས་ཁྱད་འཕགས་དུ་མ་བྱུང་ཟེར། དེ་གཉིས་ཀྱི་ཡུམ་གཅིག་པའི་ལྕམ་སྲིང་བདེ་ལེགས་བཟང་མོ་གློ་བོ་སྡེ་པར་གནང་ཡང་ཕྱིས་མ་འཇགས། ཡུམ་མི་གཅིག་པ་ཤེར་བཟའ་ཞིག་ལ་བྱུང་བའི་སྲས་མོ་ཕུན་ཚོགས་རྒྱལ་མོ་བྱང་པ་བདག་པོ་ནམ་མཁའ་རྒྱལ་པོའི་བཙུན་མོར་ཕེབས་ནས་བྱང་པའི་གདུང་རབས་སྤེལ་བའི་མ་མར་གྱུར།

ཡང་། གོང་མ་བསམ་ལྡེའི་སྲས་ཀྱི་ཐུ་བོ་བཀྲ་ཤིས་དཔལ་འབར་གྱི་མཛད་པ་ཡང་རོང་ཤེར་སོགས་ཕས་རྒོལ་རྣམས་ཚར་བཅད་ཅིང་། ལ་སྟོད་ལྷོ་ཡང་མངའ་དབང་དུ་གྱུར། དཀོན་མཆོག་གསུམ་ལ་མི་ཕྱེད་པའི་དད་པ་རྣམ་པར་དཀར་བའི་མཛད་པ་ཡང་གཙུག་ལག་ཁང་གི་ལོགས་རིས་ཁྱད་པར་ཅན་དང་། བསྟན་འགྱུར་གསེར་རྐྱང་ལས་བཞེངས་པ། བདེ་བར་གཤེགས་པ་བརྒྱད་ཀྱི་མཆོད་རྟེན་སོགས་དགེ་བའི་སྤྱོད་པ་རྒྱ་ཆེ་བ་མཛད།་དེ་ཡི་གཅུང་ལྷ་བཙུན་ནམ་(མཁའ་)དཔལ་ཡང་མངོན་དགའ་ཡི་ཆོས་རྗེ་དཔལ་ལྡན་དར་ལ་རབ་ཏུ་བྱུང་ཞིང་ལུང་རྟོགས་ཀྱིས་མངོན་པར་མཐོ་བ་ཞིག་གོ །ཐ་ཆུང་ཀུན་དགའ་བློ་གྲོས་བར་སྐབས་སྒོ་མང་གི་ཆོས་དཔོན་མཛད་ཅིང་སྐུ་གསུང་ཐུགས་རྟེན་མང་དུ་བསྒྲུབས་པ་སོགས་རྣམ་དཀར་གྱི་མཛད་པ་ཤིན་ཏུ་རྒྱ་ཆེ་བ་ཡོད་ཟེར། གོང་མ་ཀུན་དགའ་རྣམ་རྒྱལ་ལྡེ་གཤེགས་པའི་འོག་ཏུ་ཁྲི་ཀུན་བཟང་ཉི་ཟླ་གྲགས་པས་གོང་མ་བསམ་ལྡེའི་སྲས་པོ་སྐུ་མཆེད་དེ་རྣམས་ལ་མངའ་རིས་ཕོག་སྟེ་སྔ་སོར་གཟིམ་ཆུང་མངའ་ཞབས་སོ་སོར་ཡོད་པ་ཐམས་ཅད་གཅིག་ཏུ་དྲིལ་ནས་བཞུགས་པ་ལ། ཡུམ་གུ་གེ་བཟའ་དཀོན་མཆོག་བཟང་མོ་དང་ཁྲི་བཀྲ་ཤིས་དཔལ་འབར་འདུས་པའི་སྲས་མོ་དཀོན་མཆོག་རྒྱལ་མོ་བལྟམས་པ་ཕྱིས་རྒྱལ་མཁར་རྩེའི་བཙུན་མོར་(བྱོན།) དེ་རྗེས་ཁྲི་ཀུན་དགའ་བློ་གྲོས་དང་གུ་གེ་མ་རྩེན་པའི་སྲས་ཀུན་བཟང་གྲགས་པ་རྡོ་རྗེ་དཔལ་བཟང་པོ་ས་ཕོ་བྱི་བའི་ལོ་ལ་འཁྲུངས། འདི་ཐོག་མར་བཀྲ་ཤིས་ནམ་ལིང་དུ་འཇམ་དབྱངས་ཀུན་དགའ་འཕེལ་གྱི་དྲུང་དུ་སྐུ་ཆོས་མཛད་དེ་དགེ་འདུན་གྱི་བྱ་བ་བགྱིད་འོས་རྣམས་རིམ་བཞིན་བགྱིས་ཏེ་ཆོས་དཔོན་དང་མཁན་པོའི་བྱ་བ་ཡང་མཛད། ཕྱོགས་གདུང་རྒྱུད་དཀོན་ཅིང་གཞན་རྐྱེན་དུ་མས་ལྷ་རྣམ་འཕྲུལ་རྒྱལ་པོའི་གྲོགས་སུ་ཁྱིམ་ན་གནས་ཏེ་རྒྱལ་ཐབས་ཀྱི་བྱ་བ་མཛད་དགོས་ཤར།

དེ་ཡང་ཤིང་སྟག་ལོར་བདག་མོ་ཡར་འབྲོག་མ་ཡི་ཐུགས་ལ་གདོན་གསོལ་ནས་མི་ངན་གཞན་དང་གྲོས་སུ་སྟུབས་(བཏུབ།) བདག་མོ་གུ་གེ་མ་བཀྲོངས། ཁྲི་ཉི་ཟླ་གྲགས་པ་དང་ཀུན་བཟང་གྲགས་པ་རྡོ་རྗེ་གཉིས་བཀྲོངས་ནས་གུང་ཐང་ཁབ་རྫོང་དཀར་བ་གཙང་རིན་སྤུངས་པ་ལ་སྤྲོད་རྒྱུ་བྱས་ཏེ་གཤེད་མ་བཀྱེས་ཀྱང་། སྒོ་མང་ནམ་ལིང་ཕུ་ལག་གསུམ་གྱི་ར་མདས་སླེབས་ཏེ་གོང་མ་སྐུ་མཆེད་གཉིས་བཀྲོང་མ་ཐུབ་(པར་)སྐུ་སྲོག་ཐོན། བདག་མོ་གུ་གེ་མ་བཀྲོངས་པའི་མི་ཐམས་ཅད་དྲག་སྦྱོར་ལ་བཏང་། ཡར་འབྲོག་མ་རང་ཡུལ་དུ་བཟློག་པ་སོགས་ཞབས་ཕྱི་ཡང་དག་ཞུས་ནས་རྫོངས་དཀར་གྱི་ཚོ་ཟིན་པ་བྱས། ཡང་དེའི་ལོ་རྗེས་མའི་ཤིང་ཡོས་ལ་བདག་མོ་ཡར་འབྲོག་མས་གཞིས་དགའ་(ཀ་)རིན་སྤུངས་པའི་དམག་དྲངས་ཏེ་དཔལ་ཁུད་བར་དུ་བཅོམ། ལ་སྟོད་ལྷོ་ཡང་དབང་དུ་འདུས་པ་ལ། གོམ་པ་ཀུན་བཟང་གྲགས་པ་རྡོ་རྗེས་ཆིབས་ལྒ་(སྒ་)བསྒྲོན་ཏེ་དཔུང་གི་ཚོགས་དང་བཅས་གཡུལ་དུ་ཞུགས་པའི་ཞབས་འདེབས་ཚ་མདའ་སྡེ་པ་བསོད་ནམས་རྒྱལ་པོས་ཀྱང་ཞུས་ཤིང་རིན་སྤུངས་པའི་དམག་ཤིན་ཏུ་ཕམ་པར་བྱས། ལྷོ་བདག་པོའི་རྒྱལ་ལུ་(བུ་)གཉིས་སྔ་སོར་ནས་རིན་སྤུངས་(པའི་)ལག་ཏུ་གཏེའུ་འཛིན་དུ་ཡོད་པ་དང་། ལྷོ་ཤེལ་དཀར་རྫོང་བཅས་རིན་སྤུངས་པའི་ལག་ནས་བླངས་ཏེ་རྒྱལ་བུ་བགྲེས་པ་བྱེ་ས་ལ་སྟོད་ལྷོ་ཡི་བདག་པོར་བསྐོས། རྒྱལ་བུ་གཞོན་པ་ནམ་མཁའ་ལྷུན་གྲུབ་རྒྱལ་མཁར་རྩེའུ་བདག་མོ་དཀོན་མཆོག་རྒྱལ་མོའི་མག་པར་གནང་བ་སོགས་ཇུས་འགྲོས་ཆེས་བཟང་བ་བྱུང་། དེ་བཞིན་མངའ་བདག་བཀྲ་ཤིས་ལྡེས་བཞེངས་པའི་བསྟན་འགྱུར་གསེར་གྱི་གད་པ་ཟེར་བ་དེ་དང་པོ་བྱང་པ་རྟ་(ཏ་)དབེན་པས་མངའ་རིས་བཟུང་སྐབས་ཁོང་གིས་ཁྱེར་བ་དུས་འཁོར་གྱི་པུ་ཏི་གསུམ་མ་གཏོགས་དམག་སྐོར་འདི་རེས་གཞན་ཐམས་ཅད་༝ ༝ ༝གྱི་རྫོང་ན་བཞུགས་པ་སྤྱན་དྲངས་ཏེ་གུང་ཐང་སྒོ་མང་དུ་བཞུགས་སུ་གསོལ་བ་དང་སྟོད་གོ་གསུམ་ཡང་སྔར་མངའ་རིས་རྫོང་དཀར་གྱི་འོག་ཡིན་ཀྱང་བར་སྐྱབས་འཁྱར་བ་འདི་རེས་དེ་ཡང་བདག་གིར་མཛད་པ་སོགས་གཡུལ་ལས་རྒྱལ་བའི་རང་གཟུགས་སུ་ཀུན་གསལ་འགྲམ་པར་སྙེགས་ཤིང་ཕྱོགས་ཀྱི་བུ་མོའི་མཛའ་བོར་བྱས། དེ་སོགས་སྲིད་ན་སྒྱུ་འཕྲུལ་གྱི་རོལ་མ་རཱ་མ་ཎ་གཉིས་བར་གྱུར་ཞིང་ཐར་པའི་ལས་ལ་ནམ་ཡང་མི་ལྷོད་པའི་བྱང་ཆུབ་མཆོག་ཏུ་ཐུགས་བསྐྱེད་པའི་བསླབ་སྡོམ་ལས་འདའ་བ་མེད་པ་རྣམ་པར་དཀར་བའི་དགེ་བ་རྒྱ་ཆེར་སྤེལ་བར་མཛད་བཞིན་དགུང་ལོ་སུམ་ཅུ་སོ་བརྒྱད་པ་ཤིང་མོ་གླང་གི་ལོ་ལ་སྐུ་གཤེགས་སོ། །

མངའ་བདག་དེས་ལྷ་རྣམ་འཕྲུལ་གྱི་བཙུན་མོ་གློ་བོ་བདག་མོ་བསོད་ནམས་རྒྱལ་མོ་དང་འདུས་པ་ལས་སྲས་ལྕམ་དྲལ་བཞི་བྱུང་བའི་ཐུ་བོ་ཁྲི་རྒྱལ་བསམ་གྲུབ་ལྡེ་སྟེ་འདི་གོང་མ་རྣམ་འཕྲུལ་རྒྱལ་པོའི་སྲས་ཡིན་ཡང་ཟེར། དེའི་གཅུང་ལྷ་སྲས་ལྷུན་གྲུབ་རྒྱལ་པོ་ཞེས་སྒོ་མང་གི་མཁན་པོ་མཛད་པ་གཅིག་དང་། གཞན་གཅིག་བྱུང་བ་སྐུ་ཆུང་ངུ་ཉིད་ནས་གཤེགས་ཏེ་ཁྱོན་སྲས་གསུམ། ལྕམ་སྲིང་གཅིག་བྱུང་བ་གློ་བོར་བརྫངས་ཀྱང་གཞོན་ནུ་ནས་འདས་ཟེར། གཅེན་ཁྲི་རྒྱལ་བསམ་གྲུབ་ལྡེས་རྒྱལ་སྲིད་ཡུན་རིང་དུ་བསྐྱངས་ཤིང་། དེ་སྐབས་སྐྱིད་གྲོང་ཤེར་པ་ངོ་ལོག་སྟེ་ཟིར་བུན་ལངས་པར་ས་ལུག་ལོ་ཟླ་བ་བདུན་པ་ལ་གུང་ཐང་གི་དཔུང་གིས་ཤེར་གྱི་མཁར་ཕབ། ཤེར་པ་དྲུང་ཆེན་སོགས་ལོག་པའི་སྤྱོད་པ་ཅན་ཁ་ཤས་ལྔ་པའི་ལམ་ལ་བཀོད་ནས་རེ་ཞིག་དུས་བདེ་བར་གྱུར། ལོ་དེར་འཕྲལ་དུ་མངའ་བདག་རང་ཉིད་ས་སྐྱར་ཕེབས་ཏེ་བདག་ཆེན་ཀུན་དགའ་རིན་ཆེན་གྱི་སྤྱན་སྔར་དབང་ཆོས་གདམས་པ་ཅི་རིགས་པ་གསན། དེ་ཡི་སྲས་མོ་རིན་ཆེན་སྒྲོལ་མ་བཙུན་མོར་བཞེས་ཏེ་གུང་ཐང་ཕོ་བྲང་དུ་ཕེབས། དེ་ལ་སྲས་ཁྲི་རྒྱལ་བསོད་ནམས་དབང་ཕྱུག་ལྡེ་མེ་མོ་གླང་གི་ལོ་ལ་འཁྲུངས། ལོ་ཤས་མངའ་ཐང་བདེ་འཇམ་དུ་གྱུར། དེ་ནས་དུས་གྱི་འགྱུར་བས་མངའ་ཐང་ཅུང་ཟད་ཉམས་དམའ་དུས་དཔོན་བཙུན་ཧེ་རུ་སོགས་སྐྱིད་གྲོང་བ་ངོ་ལོག་སྟེ་མོན་གོར་ཥ་དཔོན་དུ་བགུར་(མགོ་སྒུར།) རག་མའི་རྫོང་བཟུང་ནས་ལོ་དགུའི་རིང་སེ་པ་ཚོ་རེ་ནས་དམར་ཟོང་སུམ་ཆ་ཆེ་(གཅིག་)རེ་བསྡུས་ཚུལ་དེས་ཁབ་པའི་ཐུགས་སུ་མ་འཇུག་པས་དཔོན་བཙུན་ཧེ་རུ་སོགས་རྫོང་དཀར་(དུ་)བཅུག་སྟེ་བཏུལ། བདག་མོ་ས་སྐྱར་ཕེབས་ཏེ་ཁྲི་ཆེན་བསོད་ནམས་དབང་པོ་སྤྱན་དྲངས་ནས་གུང་ཐང་དུ་ལོ་གཅིག་བཞུགས། ཆོས་ཀྱི་འཁོར་ལོ་རྒྱ་ཆེར་བསྐོར་ཞིང་བསྙེན་བཀུར་གྱིས་དགྱེས་པར་བྱས་ནས་གདན་ས་ཆེན་པོར་ཕྱིར་ཕེབས། ལོ་ཤས་སོང་བ་ཆུ་མོ་སྦྲུལ་ལ་ཁྲི་རྒྱལ་བསམ་ལྡེ་དང་བདག་ཆེན་མ་ཡབ་ཡུམ་གཉིས་ཀ་སྐུ་གཤེགས། དེ་ཡི་དགོངས་རྫོགས་སུ་ཁྲི་རྒྱལ་བསོད་ནམས་ལྡེ་ནས་གངས་ལ་ཉི་མ་ཤར་བ་ལྟ་བུའི་དངུལ་གྱི་མཆོད་སྡོང་སོགས་རྣམ་པར་དཀར་བའི་དགེ་བ་འབྱམས་ཀླས་པ་མཛད་ཅིང་། རྒྱལ་ཐབས་ཀྱི་ཁྲིར་བཞུགས་པའི་བཙུན་མོ་དཔལ་ལྡན་ཤར་དཀའ་བའི་རིགས་ལྷུན་པོའི་རྩེ་ནས་བདག་མོ་དབྱངས་ཅན་བསོད་ནམས་སྒྲོན་ཁབ་ཏུ་བསུས། མངའ་ཐང་དར་རྒྱས་སུ་གྱུར། སྐབས་ཤིག་ལྕང་ཤེར་རོང་གསུམ་གཅིག་ཏུ་དྲིལ་ནས་སྤང་ཞིང་དམག་གིས་བསྐོར་བ་སོགས་བསྙད་འཚོལ་དུ་མ་བྱུང་བར་རྟ་ལོ་ཟླ་བ་བདུན་པར་རྗེ་བློན་གྱི་དཔུང་(གིས་)རག་མར་སྤྱོད་གླང་བུ་མཁར་བཟུང་། དོལ་པོར་དམག་བཅུག་སྟེ་ཤེར་པའི་བླ་མཁར་ཕབ། ཤེར་པ་དང་ལྕང་པའི་མི་གཙོ་སྣ་བསྡུས་རྫོང་དཀར་(དུ་)གཏེའུ་འཛིན་དུ་བཅུག དེ་རེས་མང་ཡུལ་སྐྱིད་གྲོང་དུ་ཟླ་བ་དྲུག་ལྷག་བཞུགས་ནས་ལུག་ལོ་ཟླ་བ་གསུམ་པའི་ཚེས་བཅུ་དགུ་ལ་ལྕང་ཤེར་རྣསམ་ཀྱིས་གུས་པས་བཏུལ་པའི་ཕུད་ཞུ་ཞལ་དཀར་ཕུལ་བ་ཤེལ་དཀར་གྱི་གཙུག་ལག་ཁང་དུ་བཞེས་ནས་མངའ་རིས་བདེ་བར་མཛད། སྤྱིར་མངའ་བདག་འདི་ཐུགས་དམ་པའི་ཆོས་ལ་ཤིན་ཏུ་འཇུག་པ་ཡིས་གཡུལ་སོགས་དྲག་པོའི་བྱ་བ་ལ་ཧ་ཅང་མི་དགྱེས་ཤིང་དགེ་བའི་སྤྱོད་པ་ཁོ་ནས་དུས་འདའ་བ་ཡི། ཡོངས་འཛིན་དུ་གཙོ་བོ་ཀུན་དགའ་ལུང་རིགས་དང་། གཞན་ས་སྐྱ་ཁྲི་ཆེན་བསོད་ནམས་དབང་པོ། ཡོལ་མོ་སྦྲུལ་སྐུ་ནམ་མཁའ་བརྒྱ་བྱིན་སོགས་བསྟེན་ཅིང་། སྔ་སོར་སྐུ་ན་ཕྲ་མོ་ནས་རི་བོ་དཔལ་འབར་དུ་ཀྱཻ་རྡོ་རྗེའི་བསྙེན་ཆེན་བསྐུལ་(བསྐྱལ་)བ་སོགས་བསྙེན་གྲུབ་ཀྱང་ཅི་སྙེད་པ་དང་། སྐུ་ཚེའི་སྨད་དུ་ཡོལ་མོ་སྤྲུལ་སྐུ་བསྟན་འཛིན་ནོར་བུ་ལ་ཡང་བཀའ་ཆོས་ཅི་རིགས་པ་གསན། བར་སྐབས་བོད་སྤྱིའི་རྟེན་འབྲེལ་གྱིས་ཁབ་པ་ལ་འཚེ་བ་བྱེད་པ་མང་དུ་བྱུང་བ་ཀུན་ཐབས་མཁས་ཀྱིས་འདུལ་བར་མཛད་ཅིང་། མཐར་ནང་བློན་ཁ་ཅིག་བློ་ལས་སུ་མ་རུང་བ་ཡིས་གཙང་སྟོད་རྒྱལ་པོ་དང་སེལ་བཅུག་སྟེ་གཙང་པ་རྒྱལ་པོའི་དཔུང་(གིས་)གུང་ཐང་རྫོང་དཀར་བསྐོར་བ་ལ། དཔུང་འཁྲུག་བརྩམས་ན་མི་མང་པོ་འཆི་བ་ཡི་དེ་ལ་ཐུགས་ཀྱིས་མ་བཟོད་པ་ཡི་(བཟོད་པར་)བབ་གཏད་པས་གཙང་པས་ལ་སྟོད་ལྷོ་ཤེལ་དཀར་རྫོང་དུ་སྤྱན་དྲངས་ནས་ལོ་ངོ་གཅིག་ཙམ་ནས་སྐུ་གཤེགས་པར་གྱུར།

དེ་ལྟར་ཁྲི་བཀྲ་ཤིས་བརྩེགས་པ་དཔལ་ནས་ཁྲི་བསོད་ནམས་དབང་ཕྱུག་ལྡེ་འདི་ཡན་ཁུག་པའི་དབང་དུ་བྱས་ནས་མང་དུ་ཡོད་ཀྱང་རྐྱང་པར་བྱས་ན་དཔལ་ལྡེའི་སྲས་དམར་པོ་ལྡེ་བསྒྲང་ན་ཉི་ཤུ་རྩ་བཞི་དང་དེ་མ་བསྒྲང་ན་རྒྱལ་རབས་ཉི་ཤུ་རྩ་གསུམ་མོ། །ཁྲི་བསོད་ནམས་དབང་ཕྱུག་ལྡེའི་བཙུན་མོ་དངོས་ལ་སྲས་མོ་གཅིག་ལས་སྲས་མ་བྱུང་ཞིང་། སྲས་མོ་ལྷ་གཅིག་དེ་ཕྱིས་ཡོལ་མོ་སྤྲུལ་སྐུ་བསྟན་འཛིན་ནོར་བུའི་རིག་མར་གྱུར། དེ་ལ་སྲས་མོ་མ་ཅིག་རྭ་མའི་སྤྲུལ་པར་གྲགས་པ་ནོར་འཛིན་དབང་མོ་ཞེས་མཁའ་ཁྲོའི་(འགྲོའི་)མཚན་དང་ལྡན་པ་ཞིག་བྱུང་བ་ངོ་མཚར་གྱི་ལྟས་དུ་མ་དང་བཅས་དགུང་ལོ་ཉེར་ལྔའི་སྐབས་མཁའ་ལ་སྤྱོད་པའི་གྲོང་ཁྱེར་དུ་གཤེགས་ཞེས་ཟེར། བསོད་ནམས་ལྡེའུ་ཟུར་སྲས་ཤིག ཐང་ཆུང་བྲག་ནས་ཆོས་རྗེའི་སྲས་མོ་ཞིག་ལ་བྱུང་བ་མཚན་ཆོས་རྗེ་ཀུན་ཚང་དུ་གྲགས་ཤིང་ཕྱིས་གཙང་སར་སྤྱན་དྲངས་ནས་སྐུ་ཐིམ་པར་གྱུར། དེ་ལ་གུང་ཐང་ཞོལ་ནས་སྲས་མོ་ཚེ་རིང་རྒྱལ་མོ་ཞེས་ཆོ་འབྲང་དག་པའི་བུད་མེད་ཅིག་ལ་སྲས་གཅིག་བྱུང་བ་ཐོག་མའི་མཚན་རྡོ་རྗེ་བདུད་འདུལ་དང་། ཕྱིས་ཆོས་སྒོར་ཞུགས་ནས་གཞུང་ལུགས་སྨྲ་བའི་རབ་འབྱམས་པ་བྱས་ཤིང་། མིང་རབ་འབྱམས་པ་རྒྱལ་དབང་སེང་གེ་ཞེས་སུ་གྲགས། སྐུ་ཚེ་སྨད་ཁྱིམ་བཙུན་ཚུལ་དུ་སྐུ་ཚེ་རིངས་རབ་བཞུགས་ཤིང་རབ་བྱུང་བཅུ་གཉིས་པའི་གུང་ས་བྱི་ལོར་གཤེགས་སོ། །དེ་ལ་ཡང་སྲས་མོ་དག་ལས་སྲས་ནི་མ་བྱུང་སྟེ་གུང་ཐང་ཆོས་རྒྱལ་ཞེས་སྙན་པར་གྲགས་པའི་བ་དན་ཅན་དེ་ཡི་གདུང་རབས་དེ་ཡན་ཆད་ཀྱིས་གྲུབ་པར་གྱུར།

དེ་ལྟར་གཙང་སྟོད་རྒྱལ་པོའི་དཔུང་གུང་ཐང་དུ་བཅུག་སྐབས་གཙང་སྡེ་སྲིད་ཕུན་ཚོགས་རྣམ་པར་རྒྱལ་བ་ཞེས་བསོད་ནམས་དང་བློ་གྲོས་ཀྱི་ལང་ཚོ་ཅན་དེ་བོད་དབུས་འགྱུར་གྱི་རྒྱལ་ཁམས་འདུལ་བར་དེར་བཞུགས་ཤིང་། གཙང་དུ་ཁྲིམས་ཀྱི་གཏོང་ལེན་ཨ་ལྕེའི་དྲུང་ཞེས་སྡེ་སྲིད་ཀྱི་གཅེན་མོ་རྟེན་བཙུན་མ་ཡིན་པ་ཞིག་གིས་བྱེད་པ་བྱུང་འདུག་པ་དེ་སྐབས་སུ་ཡིན་པར་གསལ། གང་ལྟར་གུང་ཐང་ཁབ་པ་ཕབ་པའི་ལོ་དེར་བྱང་གི་སོག་དམག་དཔུང་ཤིན་ཏུ་ཆེ་བ་རྡོལ་ཞིང་། ལོ་ཕྱི་མར་སྡེ་སྲིད་ཕུན་ཚོགས་རྣམ་རྒྱལ་གཤེགས་ཏེ་བྱང་ཧོར་སོག་དམག་གི་རྒྱུ་འཁྲུལ་(འགྲུལ་)ཡང་ཇེ་མང་གིས་བོད་དང་བོད་ཆེན་པོར་སྡེ་དཔོན་རྣམས་ཀྱང་ཕན་ཚུན་ཟོལ་(བཟོད་)མི་བདེ་ཞིང་། དམག་འཁྲུག་ཟེ་རེ་མང་བའི་ངང་དེ་ནས་ལོ་ཉི་ཤུ་སོང་བ་ལྕགས་འབྲུག་ལ་ཨོ་རོད་ཀྱི་དཔུང་ཁམས་ནས་བརྒྱུད་དགའ་ལྡན་ཕོ་བྲང་གིས་དྲངས་ཏེ་ལྕགས་སྦྲུལ་གྱི་ལོར་གཙང་སྟོད་རྒྱལ་པོའི་རྫོང་དམག་གིས་བསྐོར་ནས་ཆུ་ཕོ་རྟ་ལ་གཙང་པའི་གཞིས་ཀ་བསམ་གྲུབ་རྩེ་དགའ་ལྡན་ཕོ་བྲང་གིས་རྩིས་བླངས་ཤིང་། རྒྱ་ནག་གི་ཡུལ་དུ་རྟ་(ཏཱ་)མིང་གི་རྒྱལ་སྲིད་ཀྱང་ཇག་དཔོན་ཞིག་གིས་འཕྲོག་ཅིང་དེ་ཡང་སླར་མན་ཇུའི་རིགས་ཤར་ཕྱོགས་འབོག་དོ་རྒྱལ་པོས་ཤིང་སྤྲེལ་གྱི་ལོར་བཅོམ་ནས་རྒྱ་ནག་གི་རྒྱལ་སྲིད་བྱས་པ་སོགས་སྲིད་ན་མངོན་པར་མཐོ་བའི་བདེ་བ་མཐའ་དག་འགྱུར་བཅོས་ཀྱི་རང་བཞིན་དེ་དང་དེ་འདྲའོ་ཞེས་རང་གཟུགས་གསལ་བར་སྟོན་པའི་མེ་ལོང་དུ་བྱས་པ་སྟེ། དེས་ན་འཁོར་བའི་ཆོས་ལ་ཡིད་ངེས་པར་འབྱུང་བ་ཡི་ཐར་པ་ཐམས་ཅད་མཁྱེན་པའི་ལམ་བཟང་པོ་ལ་འཇུག་སྟེ་འཆི་བ་མེད་པའི་རྒྱལ་ཐབས་ཁོ་ན་ལ་ཡིད་རྩེ་གཅིག་ཏུ་གཏོད་པ་ཁོ་ན་འོས་སོ། །

འདིར་སྨྲས་པ། ལྟར་སྣང་འབྱོར་པ་སྒེག་མོའི་བཞིན་རས་ཀྱིས། །ཉེར་བསླུས་སྡུག་བསྔལ་སྲིན་གླིང་ལྷུང་འདི་སྐྱོ། །དལ་འབྱོར་དུས་བཟང་བཤེས་གཉེན་རྟ་མཆོག་ལ། །བརྟེན་ནས་བདེ་གླིང་བགྲོད་པར་ཅིས་མི་བྱེད། །བོད་ཀྱི་སྐྱེ་རྒུ་འཛིན་མའི་མེ་ལོང་ངོས། །གུང་ཐང་བཙད་པོའི་བདེ་སྡུག་བཞིན་རས་གཟུགས། །ཇི་བཞིན་འཆར་ཞེས་རྡོ་ལ་རི་མོ་བཞིན། །སངས་རྒྱས་པད་འབྱུང་གསུང་ལ་སོམ་ཉི་ཅི། །སྔོན་དུས་གུང་ཐང་རྒྱལ་པོའི་ཁབ་ཅེས་ཀྱང་། །ད་ནི་྿རེ་རོའི་྿གྲོགས་པོ་ཉིད་དུ་ཉེ། །དྲི་མེད་རིན་ཆེན་གདུང་རབས་འཕྲེང་བ་ཡང་། །སྙན་པའི་མིང་ཙམ་ལྷག་མར་གྱུར་འདི་སོམས། །དེས་ན་འཁོར་བའི་འཇིགས་པས་འབྲོག་དགོན་དུ། །མཚན་དོན་མཐུན་པ་སེང་གེ་དབང་ཕྱུག་གི །རྒྱལ་ཐབས་དེ་ལ་རྩེ་གཅིག་ཡིད་འཇུག་པས། །རྒྱལ་དེའི་གོ་འཕང་འགྲོ་བས་ཡོངས་ཐོབ་སྨོན། །ཞེས་བར་སྐབས་ཚིགས་སུ་བཅད་པའོ། །

སྤྱིར་རྒྱ་གར་དུ་རྒྱལ་རིགས་སོགས་མིའི་རིགས་ལ་འདྲེས་པ་སོ་སོར་ཡོད་ཅིང་། དེ་དག་ཀྱང་རང་རང་གི་ལས་ཀྱི་མཐའ་ལ་སྤྱོད་པར་བྱེད་ཅིང་འོན་ཀྱང་ཀླ་ཀློའི་གྲུབ་མཐས་གར་ཁྱབ་པ་དེར་རིགས་དང་སྤྱོད་ལམ་སོགས་མི་གཙང་འཆོལ་བར་འགྲོ་བར་སྣང་ལ། བོད་འདིར་འཁོར་ལོས་བསྒྱུར་བའི་རྒྱལ་པོའི་གདུང་ཤཱཀྱའི་རིགས་ལི་ཙ་(བྱི་)ནས་ཆད་(ཆས་)པའི་རྒྱལ་རིགས་དྲི་མ་མེད་པ་ནི་ལྷ་བཙད་པོ་མངའ་བདག་ཆོས་ཀྱི་རྒྱལ་པོའི་རིགས་འདི་གཅིག་པུར་ངེས་ལ། གཞན་བོད་ཀྱི་རྒྱལ་རིགས་བྱེ་བྲག་པ་ཆེན་པོར་འདོད་པ་མཐའ་དག་ཀྱང་སྔོན་ཆོས་རྒྱལ་གྱི་བློན་པོ་དང་སྐུ་འཁོར་བྱས་ཞེས་རིགས་གཙང་བའི་ཁུངས་དེར་གཏུགས་དགོས་པ་ཡིན་པས་དེས་ན་མངའ་བདག་གི་རིགས་ནི་ཆེས་མཆོག་ཏུ་གྱུར་པ་དང་། ད་ལྟ་བོད་ན་དམ་པའི་ཆོས་ལེགས་པར་སྤྱོད་པ་ནི་ཆོས་ཀྱི་རྒྱལ་པོ་མེས་དབོན་རྣམ་གསུམ་གྱི་བཀའ་དྲིན་ཁོ་ནར་ཤེས་པ་ཡི་དྭངས་ཤིང་གུས་པས་བསྔགས་པར་བྱ་བའི་གནས་ཡིན་ལ་ཕྱིས་བྱུང་གི་བོད་ཀྱི་དཔོན་ཆེན་ཕལ་ཆེ་བ་ནི་ས་སྐྱ་དང་སྣེའུ་གདོང་གི་བློན་པོ་དང་ལས་ཚན་ཆེ་ཁར་འཁོད་པ་ནས་བསྒྲང་བ་ཤས་ཆེ་ཞིང་། གཞན་གློ་བུར་རྒྱལ་པོ་རྣམས་ནི་རང་རང་བསོད་ནམས་དཔུང་གི་མི་དམན་པའི་སྟོབས་ཀྱིས་རྒྱལ་པོ་གྱུར་ཏེ་དཀོན་མཆོག་གསུམ་བླ་མར་བྱེད་པ་ལ་ཆེས་བསྔགས་ཤིང་རྗེས་སུ་ཡི་རང་བ་བྱ་བའི་གནས་སུ་འགྱུར་བ་ལས་རིགས་ལ་བརྟེན་པར་གྱུར་པ་ནི་མ་ཡིན་ནོ། །གང་ཞིག་སྡིག་སྤྱོད་རྒྱལ་པོ་རྣམས་སྟོབས་དང་འབྱོར་པ་རྒྱ་ཆེར་ལྡན་ཀྱང་དེ་ལ་ཡིད་སྨོན་པ་དང་བསྔགས་པའི་གནས་མ་ཡིན་ཏེ། ཀོའུ་ཤམྦྷིར་སྡིག་སྤྱོད་རྒྱལ་བློན་གྱི་གནས་སུ་ཟས་གོས་རིན་པོ་ཆེའི་ཆར་བབས་པའི་མཐར་ས་ཡི་ཕུང་པོས་གཡོགས་ཏེ་མངོན་སུམ་དམྱལ་བའི་གནས་སུ་བསྐལ་པ་དུ་མར་མེའི་དུཿཁས་མནར་བ་བཞིན་ནོ། །

མངའ་ཐང་ཡུལ་འཁོར་གྱི་ཁྱོན་ལ་མ་ལྟོས་པར་རྒྱལ་ཁྲིམས་ཆོས་བཞིན་དུ་སྤྱོད་ཅིང་དཀོན་མཆོག་གསུམ་བླ་མར་བཀུར་ནས་ཕུ་དུད་བྱེད་པ་ཀུན་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་མཐུས་མིའི་རྗེ་བོར་གནང་བར་ཤེས་ནས་གུས་པ་བསྐྱེད་ཅིང་དགེ་བ་ལ་རྗེས་སུ་ཡི་རང་ཞིང་བསྔགས་པར་བྱའོ། །དེ་ཡང་ས་ལ་དབང་བྱེད་པ་མིའི་བདག་པོ་དྲ་མ་རྣམས་ཀྱི་མཚན་ཉིད་ནི། ཁོང་ཟབ་ཅིང་དཀྱེལ་ཆེ་བ། བྱས་པ་གཟོ་ཞིང་ཕྱི་ཐག་རིང་བ། དཔྱད་པ་ཞིབ་ཅིང་ཚིག་བཙན་པ། ཉེ་རིང་ཆུང་ཞིང་གཟུ་བོར་གནས་པ། སྤྱོད་པ་འཇམ་ལ་སྙིང་ཁམས་ཆེ་བ། ཕྱི་རུ་དཔའ་ཞིང་བརྟུལ་ཕོད་ནུས་པ། བླང་དོར་མཁས་ཤིང་ཁྲིམས་ལ་གནས་པ། ནོར་དང་བུད་མེད་(ཀྱི་)དབང་དུ་མི་འགྲོ་བ་རྣམས་ནི་མངོན་མཐོ་རྒྱལ་ཁྲིམས་འཛིན་པ་རྣམས་ཀྱི་རིགས་ཀྱིས་སྤྱོད་པར་ངེས་པར་ཚང་དགོས་ཤིང་། ངེས་པར་ལེགས་པར་དཀོན་མཆོག་གསུམ་བླ་མར་མཆོད་ཅིང་བསོད་ནམས་ཀྱི་ལས་ལ་འབད་ཅིང་མངའ་འོག་དགེ་བ་བཅུའི་ཁྲིམས་ལ་འགོད་པ་ནི་དམ་པ་ཆོས་ལས་བྱུང་བའི་ཁྲིམས་ཏེ། ཚུལ་དེ་ལྟ་ལ་ལེགས་པར་འཇུག་ན་དཔོན་པོ་ཁྲིམས་ཀྱི་བྱ་བས་འཚང་རྒྱ་ཞེས་པ་འཇིག་རྟེན་སྐྱེ་བོའི་ངག་ནས་རྒྱུ་བ་ཡང་དོན་ལྡན་ཉིད་དོ། །རྒྱལ་རིགས་དྲ་མའི་ངང་ཚུལ་དཔའ་མཛངས་སྒམ། །ཚིག་བཙན་ཁྲེལ་ཡོད་ངོ་ཚ་ཕྱི་ཐག་རིང་། །ཆོས་བཞིན་ཁྲིམས་ཀྱིས་སྐྱེ་རྒུ་བདེ་འཚོ་བ། །དམ་པའི་སྲོལ་ལ་མི་བདག་ཀུན་འཇུག་ཤོག །སྡིག་སྤངས་དགེ་སྒྲུབ་རིགས་རྒྱུད་མི་ཆད་འཕེལ། །དཀོན་མཆོག་རྣམ་གསུམ་བླར་མཆོད་དགེ་བའི་ལས། །ཉམས་མེད་སྔ་ཕྱི་འགྲན་འདྲ་ཡར་ཟླ་བཞིན། །རྒྱལ་བློན་འབངས་བཅས་ཀུན་གྱིས་རྟག་སྤྱོད་ཤོག །ཅེས་དེ་རྣམས་བར་སྐབས་སུ་འཕྲོས་པའོ། །

ད་ནི་དཀྱུས་སུ་འཇུག་པར་བྱ་བ་མངའ་རིས་གུང་ཐང་ཆོས་རྒྱལ་ཞེས་ཕྱི་མའི་དུས་སུ་མངའ་བདག་རྒྱལ་པོའི་གདུང་རིགས་ལས་གྲགས་ཆེ་བར་གྱུར་ཀྱང་དེ་ཡི་རྒྱལ་རབས་ཞིབ་མོར་བྱས་པ་གཞན་དུ་ཆེར་མི་སྣང་བས་ངེད་རབ་བྱུང་བཅུ་གསུམ་པའི་ས་འབྲུག་གི་ལོར་བལ་ཡུལ་མཆོད་རྟེན་ཆེན་པོ་བྱ་རུང་ཁ་ཤོར་གྱི་ཞིག་གསོ་སྔོན་མེད་ཁྱད་པར་འཕགས་པ་སྒྲུབ་སྟེ་དེ་ཡི་ཞོར་མང་ཡུལ་གུང་ཐང་ཟ་འོག་ཕུག་ཏུ་དམ་པ་ཆོས་ཀྱི་བགྱིད་འོས་ཁྱད་པར་བ་དུ་མས་ལོ་ངོ་གཅིག་སྡོད་པར་ཤར་སྐབས་ཕྱོགས་དེར་གུང་ཐང་ཁབ་ཀྱི་རྒྱལ་རབས་ཡིག་རྙིང་ཅི་རིགས་པ་ཁུངས་བཅད་པས་རྒྱལ་རབས་རྒྱས་པ་ཅི་སྙེད་ཡོད་ཚོད་ཀྱང་ད་ལྟ་མ་རྙེད་ལ། རྒྱལ་རབས་མདོར་བསྡུས་འགྱུར་པ་མངའ་བདག་ནོར་བུ་ལྡེས་མཛད་པའི་ཚིགས་བཅད་ཅིག་དང་། ཁྲི་ལྷ་དབང་རྒྱལ་མཚན་གྱི་སྐབས་ཉིད་དུ་བློ་ལྡན་ཤེས་རབ་གྲུབ་ཀྱིས་བྱས་པའི་རྒྱལ་རབས་དང་། ཁྲི་ཉི་ཟླ་གྲགས་པའི་སྐབས་མཁན་པོ་ནམ་མཁའ་ཆོས་དབང་གིས་བྱས་པ་དང་དེའི་སྐུ་ཚེའི་སྨད་དུ་གཞན་ཞིག་གིས་བྱས་པ་རྒྱལ་རབས་ཆེ་ལོང་ཞིག་དང་། ཡང་དེ་སྐབས་ཉིད་དུ་བྱུང་བའི་རབ་འབྱམས་པ་སངས་རྒྱས་ལྷུན་གྲུབ་ཀྱིས་བྱས་པའི་ཚིགས་བཅད་སོགས་རྣམ་གྲངས་གཞན་ཡང་གསུམ་ཙམ་དང་། བསམ་ལྡེ་ཕྱི་མའི་སྐུ་ཚེའི་སྨད་ཙམ་དུ་དུས་འཁོར་བ་མང་ཐོས་རྡོ་རྗེས་བྱས་པ་རྣམས་མཐོང་ཞིང་། དེ་རྣམས་ཁུངས་དང་འབྲེལ་བ་ཀུན་ཕྱོགས་གཅིག་ཏུ་ཡི་གེ་ལ་མ་རྩེགས་པར་ལེགས་པར་དཔྱད་བཟོད་པའི་ལུགས་སུ་དམ་པའི་རིགས་དང་ཆོས་བཞིན་སྤྱོད་པར་བསྔགས་པའི་གནས་དང་བླང་དོར་གྱི་འཇུག་སྒོ་ཡང་མ་ནོར་གསལ་བའི་ཆེད་དུ་འབད་པས། དཀར་པོ་ཞེས་ས་སྦྲུལ་གྱི་ལོ་གྲོ་ཞུན་ཟླ་བའི་དམར་ཕྱོགས་ཀྱི་ཐོབ་པ་གཉིས་པར་འཕགས་ཡུལ་གྱི་མུ་ཁུན་ཀྵེ་ཏྲར་འབོད་པའི་གློ་བོ་ཡི་ཡུལ་སྨོན་ཐང་རྒྱལ་པོའི་ཁབ་ཏུ་རིག་འཛིན་ཚེ་དབང་ནོར་བུས་བཀོད་པར་བྱས་པ་སྟེ། སྨྲས་པ། མང་བཀུར་རྒྱལ་རིགས་གསེར་གྱི་གཞི་ལས་རིགས་མཆོག་ཤཱཀྱ་ལི་ཙ་ཝི་(བྱི་)གྱུར་དཔག་བསམ་ཡོངས་འདུ་ལྷ་ཡི་ཤིང་། །ཕན་བདེའི་ལོ་འདབ་ཀུན་ཏུ་རྒྱས་གྱུར་རྒྱལ་པའི་རྒྱལ་ཚབ་སྤྲུལ་པའི་སྙེ་མ་མཚུངས་པ་མེད་པས་ཀུན་ཏུ་དུད། །ཁྱད་པར་རིགས་གསུམ་རྣམ་འཕྲུལ་མེས་དབོན་བདུད་རྩིའི་འབྲས་བུ་གངས་ཅན་སྐྱེ་རྒུ་འཆི་མེད་སར་བཀོད་བཀའ་དྲིན་གང་། །རྗེས་དྲན་དེ་རིགས་ལས་བྱུང་བསྔགས་འདིས་མི་ཡི་བདག་ཀུན་རིན་ཆེན་གསུམ་མཆོད་དགེར་བརྩོན་བཟང་པོའི་སྲོལ་འཛིན་ཤོག །ཤུབྷཾ། དགེའོ། །དགེའོ། །སརྦ་མངྒ་ལཾ།