སྦྱོར་བའི་ལས་རིམ།
དེ་ལ་ཡང་སྦྱོར་བ་དང་། དངོས་གཞི་དང། རྗེས་གསུམ་ལས། དང་པོ་ནི། གསལ་བཀྲ་ལས། སྒྲུབ་པའི་གནས་དུས་གྲོགས་དང་རྫས། །བར་དུ་གསང་བས་སྒྲུབ་པར་བྱ། །ཞེས་གསུངས་པ་ལྟར། གང་དུ་སྒྲུབ་པའི་གནས་ནི། ལས་དང་པོ་བ་རྣམས་འདུ་འཛི་བྲེལ་གཡེང་དང་ཆགས་སྡང་འཕེལ་བའི་གནས་ལས་རྒྱང་བསྲིང་བར་བྱ་དགོས་ཏེ། །ལྷག་བསམ་བསྐུལ་བ་ལས། གང་ན་སྤྲོས་པའམ་རྩོད་པ་ཡོད་པ་ལས། །དཔག་ཚད་བརྒྱ་ཡི་ཕ་རོལ་འགྲོ་བ་མཆོག །གང་ལ་ཉོན་མོངས་ཡོད་པ་དེ་དག་ཏུ། ཡུད་ཙམ་ཞིག་ཏུ་གནས་པར་མི་བྱའོ། །ཞེས་གསུངས་ཤིང་། དེ་ཡང་དགེ་འདུན་ནང་འཁྲུགས་བྱེད་པའི་དགོན་གནས་རྣམས་སུ་ནི་སྔར་ཡོད་ཀྱི་དགེ་རྩ་ཉམ་ཤིང་། ཕྱིས་སྐྱེ་དཀའ་བ་དང་། ས་རིམ་པ་བདུན་གྱི་བར་ཚིག་སྟེ་སྣོད་བཅུད་ཀྱི་ལེགས་ཚོགས་ཐམས་ཅད་ཉམས་པ་དང་། ཁྱད་པར་བསྒྲུབ་འབྲས་རྟགས་དང་ཡོན་ཏན་གང་ཡང་སྐྱེ་རྒྱུ་དཀའ་བར་གསུངས་པས་སྤང་བར་བྱ་ཞིང་། མདོ་སྡེ་རྒྱན་ལས། བློ་ལྡན་གང་དུ་སྒྲུབ་པའི་གནས། །ལེགས་པར་རྙེད་དང་གནས་བཟང་དང་། །ས་བཟང་བ་དང་གྲོགས་བཟང་དང་། །རྣལ་འབྱོར་བདེ་བའི་ཡོ་བྱད་ལྡན། །ཞེས་ཡོན་ཏན་ལྔ་ལྡན་ནམ། དུས་འཁོར་རྩ་རྒྱུད་ལས། གང་དུ་ས་སྐྱོང་ཆོས་ལྡན་ཞིང་། །གང་ཞིག་ཁོ་ནར་སྐྱེ་དགུ་རྣམས། །བདེ་བར་གནས་པ་འཛིན་རྩོད་མེད། །དེར་ནི་རྣལ་འབྱོར་ཡང་དག་བརྩམ། །ཞེས་རྒྱལ་པོ་ཆོས་ལྡན་དང་། གཞི་བདག་དཀར་ཕྱོགས་ཀྱི་དགེ་བསྙེན་གནས་པ། དགྲ་རྐུན་དང་རྩོད་པ་མེད་པ་སྟེ་སྤྱི་དང་། ཁྱད་པར་དུ་པད་སྡོང་བརྩེགས་པའི་རྒྱུད་ལས། སྤྱི་དང་བྱེ་བྲག་གང་ལ་ཡང་༔ གནས་དང་ཡུལ་དང་ཉེ་བའི་གནས་༔ རྒྱལ་བས་ཞབས་བཅག་བཀྲ་ཤིས་དང་༔ ཡིད་དང་མཐུན་པ་མཆོག་ཏུ་གཅེས༔ ཞེས་པས་གནས་ཡུལ་བྱིན་ཅན་དང་། ཨོ་རྒྱན་ཆེན་པོ་སོགས་གྲུབ་ཐོབ་གོང་མའི་སྒྲུབ་གནས་རྣམས་ནི་མཆོག་ཏུ་བསྔགས་པ་ཡིན་ཏེ། དགོངས་འདུས་ལས། ཕལ་བའི་གནས་སུ་ལོ་གཅིག་སྒྲུབ་པ་བས༔ འདི་དག་རྣམས་སུ་ཞག་གཅིག་བསྒྲུབ་ཐག་ཉེ༔ ཞེས་དང་། སྒྲུབ་གནས་དེ་ཡང་གནམ་སའི་དབྱིབས་ཁ་ཏོག་སོགས་དཔྱད་ཀྱི་བྱེ་བྲག་རྣམས་ལས་བཞི་སོ་སོ་དང་མཐུན་པའི་དམིགས་བསལ་ཀྱང་གསུངས་སོ། །དེ་ཙམ་མ་འགྲིགས་ན། བསམ་གཏན་ངལ་གསོ་ལས། མདོར་ན་གནས་གང་དང་པོ་ཉམས་དགའ་བ། །འདྲིས་ཤིང་མི་དགའ་དངོས་གྲུབ་ཆུང་བའི་གནས། །དང་པོར་འཇིགས་ལ་མི་དགའ་འདྲིས་ཤིང་དགའ། །བྱིན་ཆེ་དངོས་གྲུབ་མྱུར་ལ་བར་ཆད་མེད། །དེ་ལས་གཞན་ཀུན་བར་མ་ཕན་གནོད་མེད། ཅེས་པས་འདྲིས་ཤིང་དགའ་བ་དང་། བསམ་གཏན་ལ་ཚེར་མ་མེད་པའི་གནས་ཞེས་པ། དབེན་ཞིང་ཉམས་དགའ་ལ་ཡིད་དང་རྗེས་སུ་མཐུན་པ་གལ་ཆེ་སྟེ། དགོངས་འདུས་ལས། ཡིད་མཐུན་བྱུང་ན་གྲོང་ཁྱེར་ཡིན་ཀྱང་རུང་། ཞེས་དང་། བསྡུས་རྒྱུད་ལས། གང་དུ་སེམས་ནི་ཚིམ་པར་འགྱུར་བ་དེར་ནི་བསྒྲུབ་པར་བྱའོ་མི་ཡི་བདག་པོ་ཀྱེ། །ངེས་པར་འཇམ་པའི་མལ་ཆ་དག་དང་སྟན་ལ་ཉེ་བར་འདུག་ནས་སྔགས་བརྗོད་སྲུང་བ་བྱས་ནས་ནི། །ཞེས་གསུངས་པ་ལྟར་རོ། །དུས་ནི། པད་སྡོང་བརྩེགས་པའི་རྒྱུད་ལས། ར་བ་བཞི་ཡི་ཡར་ངོ་དག༔ བཀྲ་ཤིས་དགེ་ལེགས་འབྱུང་བར་བྱེད༔ ཉ་དང་གནམ་སྟོང་ཚེས་བརྒྱད་ཉིད༔ ལྟས་བཟང་བཅས་ཏེ་སྒྲུབ་པ་འཕེལ༔ ཞེས་པས་སྒྲུབ་ཆེན་གྱི་དུས་ནི་དེ་རྣམས་དགེ་ཞིང་། གཞན་ཡང་། རྒྱུ་སྐར་རྒྱལ་སོགས་ཡིད་སྨོན་འགྲུབ༔ གཟའ་དར་ཟླ་བ་ཡར་གྱི་ངོ༔ ཞེས་དང་། རྒྱུད་ལས། ཚེས་གྲངས་ཡར་གྱི་བརྒྱད་ལ་བརྩམ༔ ཤིན་ཏུ་སྐར་མ་རྒྱལ་རྣམས་ལ༔ བྱང་ཆུབ་སྤྱད་པ་ཆེར་སྤྱོད་པ། །གསང་མཆོག་དངོས་གྲུབ་མྱུར་བའི་ཕྱིར། །གཟའ་སྐར་ཤིས་པར་བླང་བར་བྱ། ཞེས་སོ། །དེ་ཡང་རྟོག་མེད་གདེངས་ལྡན་གྱི་གང་ཟག་ལ་གནས་དུས་ཁྱད་པར་མེད་ཀྱང་། ལས་དང་པོ་པས། གཟའ་སྐར་དུས་ཚེས་སོགས་ལས་བཞི་དང་མཐུན་པའི་རྟེན་འབྲེལ་ལེགས་ཕྱོགས་སུ་བསྒྲིགས་པ་ལ་དགོས་འབྲས་ཁྱད་པར་ཅན་ཡོད་པར་གསུངས་ཏེ། རྔམ་གློག་ལས། འབྱོར་དང་དུས་ཚོད་བཟང་བ་ནི། མཚན་མའི་རྟོག་པ་ཡིན་མོད་དེ། །བརྟགས་ན་དངོས་གྲུབ་མཚན་མ་འབྱུང་། ཞེས་སོ། །གང་ལྟར་ཡང་། རྒྱབ་རིམ་གྱི་དཔུང་བསྐྱེད་ཕྱིར། སྲོག་བསླུ་ཉེའུ་འདོན་པ། ལམ་འཕྲང་བཅོས་པ། ཚ་ཚ། གཏོར་མ། བརྒྱ་བཞི་སོགས་མཆོད་སྦྱིན་དང་། འབུམ་སྡེ་ལྔའམ། དཀོན་བརྩེགས། མྱང་འདས། ཡུམ་རྒྱས་པ། ཕལ་ཆེན། ལང་གཤེགས་རྣམས་དང་དེ་ལྔ་ལས་བསྡུས་པ་ལྟུང་བཤགས། འདའ་ཀ་ཡེ་ཤེས། ཤེར་སྙིང་། བཟང་སྤྱོད། རྣམ་འཇོམ། སྡུད་པ་སོགས་བཀའ་ཀློག་པ། ཁྱད་པར་དྲག་པོའི་སྦྱིན་སྲེག་སོགས་དགེ་བའི་རྒྱབ་དཔུང་ཅི་འགྲུབ་བྱ་ཞིང་སྒྲུབ་པའི་གྲོགས་དང་འཚོ་ཆས། སྒྲུབ་རྫས་ལ་སོགས་ཉེར་མཁོའི་ཡོ་བྱད་ཐམས་ཅད་ཀྱང་འདུ་བྱའོ། །དེ་དག་གི་ཚུལ་ཞིབ་པར་མན་ངག་མཛོད་སོགས་ལས་རྟོགས་པར་བྱའོ། །དེ་ནས་གནས་ཁང་བྱི་དོར་བྱ་ཞིང་སྐུ་གསུང་ཐུགས་ཀྱི་རྟེན་ཡོད་ན་བཀྲམ། མཆོད་པ་གཡོ་མེད་ཅིང་བཀོད་པས་མཛེས་པར་བཤམས་ཤིང་ཡིད་དུ་འོང་བས་སྣང་བ་ལ་བག་ཕེབས་ཤིང་བྱིན་ཆགས་པར་བྱ། གནས་ཁང་གསར་བ་ཡིན་ན་བདག་བསྐྱེད་སྔོན་དུ་འགྲོ་བ་ཅན་གྱི་ས་ཆོག་དགོས། རྙིང་པ་ལ་མི་དགོས། དེ་ནས་ཕྱི་རོལ་དུ་བླ་གབ་མེད་པའི་སར་སྡེ་བརྒྱད་སྤྱི་དང་བྱེ་བྲག་གནས་གཞིའི་ས་བདག་སོགས་ལ་དམིགས་ནས་འཁོར་འདས་སྤྱི་གསོལ་ཆེན་མོ་ལྟ་བུའམ། ཆ་གསུམ། སྡེ་བརྒྱད་མཆོད་པ། བསང་བརྔན་སོགས་རྒྱས་བསྡུས་ཇི་ལྟར་རིགས་པ་བཏང་ནས་སྒྲུབ་པའི་སྡོང་གྲོགས་བྱེད་པའི་ཕྲིན་ལས་བཅོལ། སྐབས་འདིར་བགེགས་སྐྲོད་དང་མཚམས་གཅོད་རྒྱལ་ཐོ་འཛུག་པ་རྣམས་བྱས་ཀྱང་ཆོག དཀྱིལ་འཁོར་དང་ཞལ་སྤྲོད་དུ་རང་གི་གདན་གྱི་འོག་ཏུ་འབྲུ་དཀར་རམ་ས་དཀར་གྱི་གཡང་དྲུང་ཆོས་བསྐོར་སྡོད་ཚུགས་པའི་རྟེན་འབྲེལ་དུ་བྲི། སྤྲོ་ན་རྩྭ་ཀུ་ཤའམ་དུར་བའི་རྩ་བ་ཕྱི་དང་རྩེ་མོ་ནང་བསྟན་དུ་བཏིང་བའི་ཁར་མལ་སྟན་བཤམ། དེ་ཡང་གདན་གྱི་རྒྱབ་ཅུང་ཟད་མཐོ་བ་ལེགས་ཞེས་བཤད་དོ། སྐབས་འདི་དག་གི་ཚེ་མཆོད་གཏོར་སོགས་ཀྱང་རྒྱུ་བཟང་བ། དངོས་གཙང་བ། བཀོད་ལེགས་པ་རྣམས་གལ་ཆེ་བར་གསུངས་པས། གཏོར་མའི་རྒྱུ་དེ་ཉིད་ཀྱང་ལོག་འཚོས་བསྒྲུབས་པ་དང་། ངན་སྙིགས་སོགས་མ་ཡིན་པའི་རྒྱུ་བཟང་པོའི་ཕུད་ལ། གཙང་སྦྲ་ལྡན་པས་དང་པོ་དཀར་གསུམ་ཅུང་ཟད་བསྲེས་ནས་ལྷ་བཤོས་བྱ། གཏོར་ཟན་ལ་དམ་སེལ་མེད་པའི་བདུད་རྩིའི་ཕུར་མ་དང་། དཀར་གསུམ་མངར་གསུམ་རྣམས་བསྲེས་ལ་སྐ་སླ་རང་གི་ཟ་ཚོད་རན་པ་ཙམ་དུ་བྱ་ཞིང་རང་གཞུང་གི་སྒྲུབ་གཏོར་མཚན་ཉིད་ལྡན་པར་བཅའ་འོ། འབྲི་སྨུག་གམ་དཀར་པོ་གང་འོས་བྱུགས། གཏོར་མའི་དབྱིབས་གང་ཡང་ཟུར་རང་ལ་མི་བསྟན། དཀར་རྒྱན་དང་བཟའ་བཅའ་སྣ་ཚོགས་པས་བརྒྱན། གཏོར་གདུགས་རང་མདོག་ཅན་གྱི་གཡས་གཡོན་དུ། སྨན་རཀ་རྫས་ལྡན། གཞན་ཡང་དམ་ཅན་ཆོས་སྐྱོང་གཏེར་སྲུང་གཞི་བདག་དང་བཅས་པའི་གཏོར་མ་གང་འོས། ཚོགས་ཀྱི་ཡོ་བྱད་སོགས་སྐབས་ཐོབ་བཞིན་འདུ་བྱའོ། གཏོར་མ་ལ་གཟུངས་འཇུག་འཇོག་པར་སྤྲོ་ན། རྒྱ་ཤོག་ལ་དྲི་བཟང་དང་མཚལ་སྣག་གང་རུང་གིས། ལྷ་གཙོ་འཁོར་གྱི་རྩ་སྔགས་སྦྲེལ་གཤམ་དུ་ནམ་མཁའ་མཛོད་ཀྱི་སྔགས་བྲི། འཕགས་པའི་ལྷ་ཚོགས་འཁོར་དང་བཅས་པས་བདག་ལ་མཆོག་ཐུན་མོང་གི་དངོས་གྲུབ་སྩོལ་བར་མཛད་དུ་གསོལ། ཅེས་པའི་འཕྲོར་ཡེ་དྷར་ཚར་གཅིག་བྲིས་ཏེ་དབུ་ནས་ཡིག་ངོ་ནང་བསྟན་དུ་དྲིལ་ཏེ་མགོ་མཇུག་མ་ལོག་པར་དར་ལྷའི་མདོག་མཚུངས་ཀྱིས་དྲིལ་ནས་སྨྱུག་སྦུབས་སམ་ཟངས་སྦུབས་སུ་བཅུག་སྟེ་འཛུད། བྱེ་བྲག་རྒྱས་པར་སྤྲོ་ན། རྟེན་གཏོར་ནི་གཏོར་མ་དེ་ཉིད་ལྷར་བསྐྱེད་དེ་ཇི་སྲིད་བར་དུ་མཆོད་པས་སྟོབས་དེ་འཇོག་པ་དང་། རྟགས་གཏོར་ནི་ལོ་ཟླའི་དུས་ཚིགས་ངེས་པའི་བར་སྤྱན་རྟེན་མཆོད་པའི་ཚུལ་ཏེ། འདི་ལ་དབྱེ་ན་གཉིས་ལས། སྒྲུབ་གཏོར་རམ་མཆོད་གཏོར་ནི་ལྷ་རྣམས་ལ་མཆོད་འབུལ་གྱི་དུས་བཞེས་པ་སྟོབས་རྒྱུའི་ཚུལ་དང་། བསྐང་གཏོར་ནི། འདོད་ཡོན་ལོངས་སྤྱོད་སྣ་ཚོགས་ཀྱི་མཆོད་རྫས་སྤྱན་གཟིགས་ཀྱི་ཚུལ་དང་། ཐུན་གཏོར་རམ་རྒྱུན་གཏོར་ནི་གློ་བུར་ལས་བཅོལ་གྱི་ཆེད་དུ་ཆོ་གའི་ཐུན་མཐར་བརྔན་གྱི་ཚུལ་དུ་འཕྲལ་ལ་འབུལ་རྒྱུ་ལྟ་བུ་ལ་བྱའོ། །འདི་ལ་གཏའ་གཏོར་ནི་ལས་མ་གྲུབ་བར་དུ་བཟུང་ནས་གྲུབ་ཚེ་མཆོད་རྒྱུ་སྟེ་ལས་མི་འགྱང་བར་མྱུར་བའི་ཆེད་དུ་ཡིན་ནོ། དེ་ཡང་བྱ་བཏང་སྤྲོས་མེད་ཀྱིས་ནི་བཟའ་བཅའ་སྣ་ཚོགས་པའི་ཕུད་ཙམ་ལ་བརྟེན་ཀྱང་རུང་ངོ། །གཞན་ཡང་གཏོར་མ་ལ་ཤེས་པ་གསུམ་ལྡན་ནམ་བཞི་ལྡན་ཅེས་སྐབས་ཐོབ་ཀྱི་དམིགས་པའི་འཕྲུལ་ནི་ཤེས་དགོས་ཏེ། དགོངས་འདུས་ལས། གཏོར་མ་ལ་ཡང་མཚོན་བྱེད་བཞི༔ བྱིན་རླབས་དབང་དུས་བླ་མ་འམ༔ ཡི་དམ་ཊཱཀྐི་ལ་སོགས་དམིགས༔ དེ་བཞིན་དངོས་གྲུབ་འདོད་པ་ཡིས༔ བདུད་རྩིར་དམིགས་རོལ་གང་འདོད་འབྱུང་༔ བགེགས་ཀྱི་སྦྱོར་བ་བཤིག་པའི་ཚེ༔ རྣོ་ངར་ལྡན་པའི་མཚོན་ཆར་དམིགས༔ མཆོག་དང་ཐུན་མོང་བསྐང་ཚེ་ནི༔ འདོད་ཡོན་ལོངས་སྤྱོད་མཆོད་པའི་སྤྲིན༔ བསྐང་བའི་རྫས་རྣམས་སོ་སོར་དམིགས༔ གང་ཡང་ལས་ཀྱི་སྦྱོར་བས་ཤེས༔ ཞེས་དང་། དེ་བཞིན་དུ་སྒྲུབ་པའི་ཚེ་ཡང་། བཀའ་བརྒྱད་ཀྱི་མན་ངག་གཅེས་པའི་ལྡེ་མིག་ལས། ལག་ལེན་ཤེས་པ་བཞིར་བསྟན་ཏེ༔ བ་ལིང་གཏོར་མ་ཆེན་པོ་ཉིད༔ མཆོད་པར་ཤེས་དང་ལྷར་ཤེས་དང་༔ དམག་དཔུང་ཤེས་དང་ཟོར་ཤེས་བྱ༔ ཞེས་པས། ལས་བྱང་སྐབས་སུ་མཆོད་པར། བཟློག་པའི་དུས་སུ་ལྷར། ཆད་ཐོའི་སྐབས་དམག་དཔུང་། འཕང་བའི་ཚེ་གཏོར་མའི་ཡེ་ཤེས་པ་རང་ལ་བསྡུ། དམ་ཚིག་པ་མཚོན་ཆ་མེ་དཔུང་དུག་རླང་ཁྲོ་ཆུ་སོགས་སུ་ཤེས་ནས། མེ་དཔུང་གི་ནང་དུ་དགྲ་སྡེ་ཡུལ་མཁར་བཅས་གསལ་བ་ལ་འཕང་ངོ་། ཞེས་གསུངས་པ་ལྟར་རོ། །གཞན་ཡང་དབང་པོ་རབ་རྣམས་ལ་ཕྱི་མི་ཟད་རྒྱན་གཏོར། འཇིག་རྟེན་གཏོར་སྣོད། སེམས་ཅན་གཏོར་རྒྱུ་སོགས་། ནང་ཕུང་པོ་སྣོད། ཤ་རུས་གཏོར་རྒྱུ་སོགས། གསང་བ་རང་བཞིན་སྟོང་པ་སྣོད། སྣང་བ་གཏོར་མ་ཞེས་གསུངས་པ་རྣམས་ཀྱི་བྱེ་བྲག་ཀྱང་ཤེས་པར་བྱའོ། །དེ་ནས་རྟེན་གྱི་མདུན་དུ་སྟེགས་བུ་ཁེབ་ལྡན་ཉིས་རིམ་གྱི་གོང་མར་འབྲུ་ཚོམ་ལ་རང་གཞུང་བཞིན། སྨན་གཏོར་རཀྟ་སྒྲུབ་རྫས་སོགས་ཐམས་ཅད་བཤམས། སྟེགས་འོག་མར་ཆུ་གཉིས་སྔོན་དུ་འགྲོ་བའི་ཉེར་སྤྱོད་ལྔ་སྦྲེང་ཚར་དུ་བཤམས། བསྙེན་རྐྱང་གི་སྐབས་འདིར་དེ་ཙམ་གྱིས་ཆོག གཞན་ཡང་ཕྱི་མཆོད་ཨརྒྷཾ་སྟེ་མཆོད་ཡོན་ནི་ཞལ་སྐྱེམས་ཏེ་བཏུང་བར་བྱ་བའི་ཆུ་གཙང་དངས་བསིལ་མངར་བ། འབྲས་ཡོས། དྲི་བཟང་པོའི་སྤོས། མེ་ཏོག་དཀར་པོ། ཀུ་ཤ། ཏིལ་དཀར་རྣམས་བཏབ་ཅེས་མན་ངག་ལམ་རིམ་ལས་བཤད་ཅིང་། དེ་རྐྱེན་གྱིས་བསྒྱུར་བ་ནི། ཞིག་དཀར་པོའི་ལྦུ་བ། གུར་གུམ། ཤིང་སྤྱི་ཞུར། རྒྱ་སྐྱེགས་ཀྱི་མེ་ཏོག ཡུང་བ་དང་རམ་ཕྱེ་བསྲེས་པའམ། མེ་ཏོག་ཤང་དྲིལ་གྱི་ཁུ་བ་སོགས་ཀྱིས་ཁ་ཏོག་བསྒྱུར་བ་ལ་ནི་རྐྱེན་གྱི་མཆོད་པ་ཞེས་སུ་དགོངས་འདུས་རྣམ་བཤད་ལས་ཀྱང་གསུངས་ཤིང་། དེ་ཡང་ཨོ་རྒྱན་ཡུལ་གྱི་བྱང་ཕྱོགས་རི་བོ་དཔལ་ལྡན་ཞེས་བྱ་བའི་ངོས་ལ་ཡན་ལག་བརྒྱད་ལྡན་གྱི་ཆུ། དྲི་མ་མེད་པས་གཙང་བ། མ་རྙོག་པས་དངས་བ། ངད་དང་ལྡན་པས་བསིལ་བ། ཟུག་རྔུ་མེད་པས་འཇམ་པ། དྲི་དང་ལྡན་པས་བསུང་བ། རོ་མཆོག་དང་ལྡན་པས་ཞིམ་པ། གདུང་བ་མེད་པས་ངོམ་པ། ལུས་ལ་ཕན་པས་བདེ་བ་སྟེ། དེ་ལྟ་བུའི་ཆུ་དེ་རྩོལ་སྒྲུབ་དུ་མས་བླང་ནས་ཆོས་སྟོན་ཆེན་པོའི་ཚེ་སྔོན་དུ་འགྲོ་བར་ཕུལ་བ་དང་ཆོས་མཚུངས་པར་གསུངས་སོ། ཞབས་བསིལ་ནི་ཕྱག་ཞབ་བཀྲུ་བའི་ཆུ་གཙང་། མེ་ཏོག་ནི་ཆུ་དང་ཐང་ལས་སྐྱེས་པ་སོགས་དུག་རིགས་མ་ཡིན་པ་དང་། རིན་པོ་ཆེ་དང་དར་ཟབ་སོགས་ཀྱིས་བཅོས་པ་ཡང་རུང་། བདུག་སྤོས་ནི། ལྷན་སྐྱེས་དང་སྦྱར་བྱུང་གི་དྲི་ཞིམ་པོའི་རིགས་དང་། ཡང་བླ་མ་དགོངས་འདུས་ལས་འབྱུང་བའི་ཚུལ་བཞིའི་སྦྱར་སྤོས་ནི། ཤིང་ཚྭ་ཆུའི་ཚུལ༔ སྤོས་དཀར་ཐལ་གྱི་ཚུལ༔ ལི་ཤི་སྡོར་གྱི་ཚུལ༔ སྤང་སྤོས་ཚྭའི་ཚུལ༔ དེ་རྣམས་སྦྱར་ལ་སྦྲང་བུར་གྱི་ཁ་ཚར་བཏབ༔ ཁུ་བ་ཆང་ལ་བྱས་སུག་སྨེལ་གྱིས་ཕབ་བཏབ་པས་འགྲུབ་བོ། སྣང་གསལ་ནི་རིན་པོ་ཆེ་དང་འབྲུ་མར་སོགས་ཀྱི་སྒྲོན་མེ་དང་། དྲི་ཆབ་ནི་སྤྱིར་དྲི་ཆུ་སྒྲུབ་ཚུལ་ནི་དུས་འཁོར་ལས། དུང་སོགས་གསེར་གྱི་སྣོད་དང་ཡང་ན་དངུལ་གྱི་རང་བཞིན་དག་ཏུ་དྲི་ཡི་ཆུ་ཡི་སྒྲུབ་པར་བྱ། ཞེས་གསུངས་པ་བཞིན། བུ་སྟོན་རིན་པོ་ཆེས་བཀྲལ་བ་ལྟར་ན། དུང་ཉ་ཕྱིས། གསེར་དངུལ་དག་གི་སྣོད་དུ། སུག་སྨེལ། ཤིང་ཚ། བ་ལེ་ཀ ཙན་ཏན་རྣམས་ཞོ་གཉིས་ཐུམ་པུར་བཅིང་སྟེ། ཆུ་གཙང་བྲེ་བརྒྱད་ལ་བཅུག་ནས་བཞི་གསུམ་སྐམ་སྐམ་གྱི་བར་བསྐོལ་བས། དེའི་ལྷག་མ་དྲི་ཆུར་འགྱུར་ཏེ། དེ་ནས་བསྒྲུབ་ཅིང་བཞག་པར་བྱའོ། ཞེས་གསུངས་པ་ལྟར་རམ། ཡང་ན་གུར་གུམ། ག་བུར། ཙན་ཏན། ཛ་ཏི། སིལྨ་རྣམས་བསྐོལ་ཀྱང་འདྲའོ། དེ་ཙམ་མ་འབྱོར་ན་དྲི་བཟང་པོས་སྦགས་པའང་རུང་ངོ་། །ཞལ་ཟས་ནི་རོ་བཅུད་གྱ་ནོམ་པ་དང་ལྡན་པའི་བཟའ་བཅའ་སྣ་ཚོགས་པའམ་དཀར་གསུམ་མངར་གསུམ་བསྲེས་པའི་ཟླུམ་བཤོས་དཀར་པོའོ། མཆོད་མགོ་ནི། དེ་ཡང་འཇིགས་གླིང་གིས་མཆོད་རྫས་རྣམས་ནི་ཐབས་དང་། སྣང་བ་དང་བདེ་བའི་ཆ་སྟེ། བླ་ན་མེད་པ་མ་ཡིན་ལ་མཆོད་ཡུལ་རྒྱལ་བ་སྲས་བཅས་རྣམས་ནི་རྣམ་པར་གྲོལ་བ་ཤེས་རབ་ཀྱི་ཆར་བཞུགས་པ་ལ། གཡོན་ཕྱོགས་ཤེས་རབ་ཕྱོགས་ལ་མཆོད་མགོ་གཏོད་པ་ལེགས་ཞེས་དང་། འཇམ་དབྱངས་མཁྱེན་བརྩེ་རིན་པོ་ཆེས་བདག་མདུན་གང་ཡིན་ཀྱང་མཆོད་ཡུལ་དེ་ལ་ལྷ་མོ་རྣམས་ཞལ་ཕྱོགས་པ་ཡིན་པས་མཆོད་མགོ་ནི་འབུལ་ཡུལ་དེ་ཉིད་ཀྱི་གཡོན་ཕྱོགས་ནས་བརྩམ་མོ། ཞེས་གསུངས་སོ། བདག་བསྐྱེད་ཞི་མཆོད་རྐྱང་པ་ཅན་ལ་མཆོད་གཏོར་གྱི་གཡོན་ནས་མཆོད་མགོ་བརྩམ་ཞེས་གླིང་སྤྲུལ་གསུངས་སོ། །ཡང་གསར་མ་ཀུན་དང་རང་ཕྱོགས་ཕལ་ཆེ་བས་ནི། བདག་མདུན་གང་ཡིན་ཀྱང་གཡས་ཕྱོགས་ནི་གྲལ་མགོ་ཡིན་པས་མཆོད་མགོ་ཡང་གཡས་ནས་བརྩམ་དགོས་ཞེས་ཀྱང་གསུངས་སོ། །ཡང་བསྙེན་སྒྲུབ་སྦྲག་མ་ལྟ་བུ་མདུན་བསྐྱེད་ཡོད་ཚེ་བདག་བསྐྱེད་ཀྱི་མཆོད་པའི་རྒྱབ་མདུན་གང་བདེར། ཚོན་དཀྱིལ་གཉིས་གང་རུང་ངམ། ཚོམ་བུ་ཙམ་ལ་བརྟེན་ཀྱང་རུང་སྟེ། སྒྲུབ་རྫས་རྣམས་གཞུང་བཞིན་བཤམས་པའི་མཐར། ཞི་མཆོད་ཀྱི་ཚེ་བགེགས་མི་འཇུག་པའི་ཆེད། བྱང་ཤར་དུ་མཚམས་འཛིན་མེ་ཏོག་ནས་བརྩམ་སྟེ། ཤར་དུ་མཆོད་ཡོན། ཤར་ལྷོར་ཞབས་བསིལ་སོགས་གཡས་སྐོར་གྱིས་བཤམས། དྲག་མཆོད་དགོས་ཚེ་ལྷོ་ནུབ་སྲིན་པོ་ནས་མཚམས་འཛིན་གྱིས་ཁྲག་གི་མཆོད་ཡོན། དུག་ཆུའི་ཞབས་བསིལ། དབང་པོའི་མེ་ཏོག ཤ་ཆེན་གྱི་བདུག་སྤོས། ཚིལ་ཆེན་གྱི་མར་མེ། མཁྲིས་པའི་དྲི་ཆབ། ཤ་རུས་ཀྱི་ཞལ་ཟས་དྲག་བཤོས་རྣམས་ཤར་ནས་རིམ་པས་གཡོན་སྐོར་གྱིས་བཤམ་མོ། ཕྱི་རོལ་དུ་རྒྱན་གྱི་བྱེ་བྲག་ཅི་འབྱོར་བས་བསྐོར་ཞིང་། སྟག་ལྤགས་སོགས་ཀྱི་རྒབ་དཀྲིས་བྱ། ཡང་ན་སྟབས་བདེར། མདུན་བསྐྱེད་ཀྱི་གཡས་ནས་བརྩམ་སྟེ་ཞི་མཆོད་དང་། གཡོན་ནས་བརྩམ་སྟེ་དྲག་མཆོད་རྣམས་སྦྲེང་ཚར་དུ་བཤམ་པའི་བར་དུ་རྒྱུན་གཏོར་བཤམ་མོ། །དེ་ཚེ་སྨན་རཀ་སོགས་ཕྱི་ནང་གི་མཆོད་པ་རྣམས་ཀྱང་བབ་ཆོལ་གྱིས་འདྲེས་པར་མི་བྱ་སྟེ། ཨོ་རྒྱན་ཆེན་པོས། མདོར་ན་འོག་མའི་མཆོད་པ་རྣམས་ཀྱི་ཟེར་གོང་མ་ལ་ཕོག་པས་སྐྱོན་དུ་མི་འགྱུར་ཞིང་། གོང་མའི་མཆོད་པ་རྣམས་ཀྱི་ཟེར་འོག་མ་ལ་ཕོག་པས་ཐུན་མོང་གི་མཆོད་པ་ཕྱི་ཨརྒྷཾ་ལ་དགའ་བ་རྣམས་ཀྱིས་མི་ཐོབ་པ་ལ་སོགས་པ་རྣམས་ཀྱི་དོན་ཤེས་པར་བྱའོ། ཞེས་གསུངས་ཤིང་། ཡང་གཏོར་མ་དང་མཆོད་པ་རྣམས་བཤམ་མ་ཐག་བྱིན་རླབས་མ་བྱས་ན་ཡོན་ཆབ་ལ་དྲི་ཟ་ཉེ་བར་འཁོར་དང་། མེ་ཏོག་ལ་མེ་ཏོག་ཚེ་རྒྱས། བདུག་སྤོས་ལ་ནག་པོ་དྲི་ལྡང་། སྣང་གསལ་ལ་གྲིབ་གནོན་རྐུན་པོ། དྲི་ཆབ་ལ་རྟུག་པའི་དྲི་འཕྲོག ཞལ་ཟས་ལ་ལོག་འདྲེན་གདོང་བརྒྱ་པ་ཞེས་བྱ་བའི་བགེགས་འཇུག་པར་གསུངས་པས་ཆབ་གཙང་གིས་བྲན་ཏེ་བྱིན་རླབས་བསྡུས་ཙམ་བྱ། དེ་ནས་ལོང་ཁྱབ་དང་བསྟུན་ཏེ་ཞག་གྲངས་ཇི་ལྟར་རིགས་པར་སྔོན་འགྲོ་རྣམས་སྦྱངས་དགོས་ཏེ། ཐར་པའི་ལམ་གྱི་རྩ་བ་ངེས་འབྱུང་གི་བློ་བཅོས་མ་མ་ཡིན་པ་སྐྱེ་བའི་ཐབས་སུ་བློ་ལྡོག་གི་ཆོས་བཞི་དང་། ཐེག་ཆེན་ལམ་གྱི་རྩ་བ་བྱང་ཆུབ་ཀྱི་སེམས་རིན་པོ་ཆེ་སྐྱེ་བའི་ཐབས་སུ་ཚད་མེད་བཞིས་བློ་སྦྱོང་བ་རྣམས་རྒྱུད་ལ་འདྲོང་བ་ངེས་ཤེས་སྐྱེ་བར་བྱ། གཞན་ཡང་གནོད་བྱེད་ཀྱི་དོན་དུ་བྱང་ཆུབ་སྒྲུབ་པར་བསམ་ན་སྐྱེལ་མ་དགྲ་ལ་བཅོལ་བ་ཡིན་པས་བར་ཆད་མི་འོང་གསུངས། མདོར་ན་སྐྱབས་འགྲོ་སེམས་བསྐྱེད་ཡན་ལག་བདུན་པ་རྣམས་དང་། ཁྱད་པར་ནང་གི་འགལ་རྐྱེན་སེལ་ཕྱིར་སྒྲིབ་སྦྱོང་རྡོ་རྗེ་སེམས་དཔའི་བསྒོམ་བཟླས། ཚོགས་གསོག་པ་མཎྚལ། བྱིན་རླབས་འཇུག་པ་བླ་མའི་རྣལ་འབྱོར་རྣམས་གནད་དུ་བསྣུན་པར་བྱའོ། །གང་ལྟར་ཡང་དང་པོ་སྒྲུབ་པའི་དབུ་འཛུག་པའི་དུས་ནི། ཕྱི་ཐུན་ནམ་སྲོད་ཐུན་གྱི་སྔ་ལོགས་སུ་སྤྲོ་ན་བུམ་ཆུས་ཁྲུས་བྱ་ཞིང་གཙང་སྦྲ་ལ་གནས་པས་སྟན་ལ་འདུག རླུང་རོ་བསལ་ནས་ལུས་སེམས་རྣལ་དུ་ཕབ། ཀུན་སློང་གསལ་གདབ། ཚིག་བདུན་གསོལ་འདེབས་ལན་གསུམ་གྱིས་རང་གི་སྤྱི་བོར་རྩ་བའི་བླ་མ་དང་གཉིས་སུ་མེད་པའི་ཨོ་རྒྱན་རྡོ་རྗེ་འཆང་ལ་རིག་འཛིན་བརྒྱུད་པས་བསྐོར་བ་སྤྱན་དྲངས་ཏེ་བརྒྱུད་པའི་གསོལ་འདེབས་མོས་གུས་གདུང་ཤུགས་དང་ལྡན་པས་བགྱིས་མཐར་རང་ལ་བསྟིམ་ཞེས་རྡོ་བྲག་རིག་འཛིན་པས་གསུངས། དེ་ནས་རང་གི་སྙིང་གར་གཉུག་མ་བྱང་ཆུབ་སེམས་ཀྱི་ངོ་བོ་ཡི་གེ་ཧཱུྃ་སྔོན་པོ་ལས་འོད་ཟེར་འཕྲོས་པས། རང་བཞིན་གྱི་གནས་ནས་ངོ་བོ་རང་གི་རྩ་བའི་བླ་མ་དེ་ཉིད་ཡིན་པ་ལ། རྣམ་པ་ རྒྱུད་སྡེ་གང་ཡིན་དེའི་ལྷ་དེ་གཙོ་བོར་གྱུར་པའི་དཀོན་མཆོག་གསུམ 
་དང་། བརྒྱུད་པའི་བླ་མ་མཁའ་འགྲོ་ཆོས་སྐྱོང་རྣམས་དང་བཅས་ཏེ། སྐྱབས་ཡུལ་མ་ལུས་པས་བསྐོར་བ་ཐམས་ཅད་སྤྱན་དྲངས་ཏེ། མདུན་གྱི་ནམ་མཁར་སྤྲིན་ཕུང་འཁྲིགས་པ་ལྟར་གསལ་གདབ་ལ། བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བའི་དམིགས་རྣམ་ནན་ཏན་དུ་བྱ་བ་ཀུན་རྫོབ་དང་སྐྱབས་ཡུལ་དང་རང་སེམས་དབྱེར་མེད་པའི་ཆོས་ཉིད་བསམ་ཀྱིས་མི་ཁྱབ་པའི་ཡེ་ཤེས་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་ཟུང་འཇུག་སྤྲུལ་པའི་སྐུ་སྟེ། སྐུ་གསུམ་རང་ཆས་སུ་བཞུགས་པའི་དོན་ལ་དྲན་པ་ཉེ་བར་བཞག་པ་དོན་དམ་པའི་སྐྱབས་འགྲོ་ཡིན་ནོ། །སེམས་ཅན་ཐམས་ཅད་རྫོགས་པའི་བྱང་ཆུབ་ལ་འགོད་པར་བྱ་བའི་ཆེད་དུ་ཟབ་མོའི་ལམ་འདི་ཉམས་སུ་བླང་བར་བྱའོ་སྙམ་པ་ཀུན་རྫོབ་བྱང་ཆུབ་ཀྱི་སེམས་དེ་ཉིད། དོན་དམ་པར་ཅིར་ཡང་མ་གྲུབ་ཅིང་ཀུན་རྫོབ་ཏུ་ཅིར་ཡང་འཆར་བའི་གནས་ལུགས་སྟོང་དང་རྟེན་འབྱུང་དབྱེར་མེད་པའི་ངང་དུ་མཉམ་པར་འཇོག་པ་དོན་དམ་སེམས་བསྐྱེད་དེ། ཚུལ་དེ་དག་ལ་ནན་ཏན་དུ་བྱ། སྐྱབས་སེམས་སོགས་ཀྱི་དམིགས་རྣམ་རྒྱས་པར་ནི་གཞན་ལས་ཤེས་པར་བྱའོ། །དེ་ནས་བསགས་སྦྱང་སྤེལ་གསུམ་གྱི་སྒོ་ཐམས་ཅད་ཡན་ལག་བདུན་དུ་བསྡུས་ཏེ་ཚོགས་བསག་གི་འདུན་པ་ལ་སྦྱང་། མཐར་ཚོགས་ཞིང་རྣམས་རང་ལ་བསྟིམ་སྟེ་ཐུགས་ཡིད་དབྱེར་མེད་དུ་འདྲེས་པའི་ངང་ལ་དར་ཅིག་ངལ་གསོ། སྐབས་འདིར་སྤྲོ་ན་རང་ཉིད་གཉུག་མའི་ལྷར་གསལ་བས་རྡོ་དྲིལ་དང་། བསང་ཆུ་སོགས་བྱིན་རླབས་ཀྱི་ཚུལ་གཞན་ནས་འབྱུང་བ་ལྟར་བྱ། དེ་ནས་ཕྱི་རོལ་དུ་ཕྱིན་ཏེ་རང་ཉིད་ལྷར་གསལ་བས་དཀར་གཏོར་བསྔོ་ཞིང་ཕྲིན་ལས་བཅོལ། སྒོ་དྲུང་དུ་བགེགས་གཏོར་ཤ་ཁྲག་སྒོག་ཙོང་སོགས་ཀྱིས་བརྒྱན་པ་བཤམས་ལ། རང་ཉིད་རྟ་མཆོག་ཧེ་རུ་ཀ་སོགས་ཕྲིན་ལས་ཀྱི་ལྷ་ཁྲོ་གཏུམ་བཟོད་པར་དཀའ་བའི་གཟི་བརྗིད་ཅན་དུ་གསལ་བའི་ང་རྒྱལ་གྱིས་གཏོར་མ་ལ་དམིགས་ནས་འབྲུ་གསུམ་བརྗོད་པས་ༀ་གྱིས་མ་དག་པའི་དྲི་མ་ཐམས་ཅད་སྦྱང་ནས་དག་པར་བྱས། ཨཱཿས་རྫས་རྣམས་མང་པོར་སྤེལ་བས་མཐའ་མེད་དུ་འཕེལ་ཞིང་རྒྱས་པར་བྱས། ཧཱུྃ་གིས་གང་འདོད་ཀྱི་དངོས་པོ་ལྟར་འཆར་བའི་འདོད་ཡོན་ཕུན་སུམ་ཚོགས་པར་བྱས་ལ། ཧོས་དེ་ཡང་ཟག་མེད་ཡེ་ཤེས་ཀྱི་བདུད་རྩིར་བསྒྱུར་བས་བྱིན་གྱིས་བརླབས་ལ། རང་གི་ཐུགས་ཀ་ནས་ཁྲོ་བོ་ཊཱཀྐི་ར་ཛ་དམར་སྐྱ་ཞལ་གཅིག་ཕྱག་གཉིས་གཡས་ཐོ་བ་དང་གཡོན་ལྕགས་ཀྱུ་འཛིན་པ་གྲངས་མེད་པ་སྤྲོས་པས། ལོག་འདྲེན་བགེགས་དང་འབྱུང་པོ་ཐམས་ཅད་རང་དབང་མེད་པར་མདུན་དུ་བཀུགས་ལ། བཀའ་བསྒོ་ཞིང་གཏོར་མ་བྱིན་ཏེ་རང་གནས་སུ་གཏོང་། བསྒོ་བའི་བཀའ་ལ་མི་ཉན་པར་བར་གཅོད་རྩོམ་པའི་རིགས་ཐམས་ཅད་ཁྲོ་མཚོན་མེ་དཔུང་གི་དབལ་ཟེར་གྱིས་སྐད་ཅིག་ཉིད་ལ་བསྡིག་བསྐྲད་བརླག་པར་བསམ་ཞིང་། ལས་བྱང་གི་བགེགས་སྐྲོད་རྣམས་བྱ། གུ་གུལ་གྱིས་བདུག དྲག་སྔགས་དང་ཡུང་ཐུན་གྱིས་བྲབ་ཅིང་མི་དམིགས་པས་རྒྱས་གདབ། སྐབས་འདིར་དམ་སྲི་མནན་པ་གྲུབ་ན་མཆོག་ཏུ་ཤིས་པར་གསུངས་སོ། །དེ་ནས་ཕྱི་རོལ་དུ་གོམ་པ་བདུན་ཅུའི་སའམ། ཡང་ན་སྒོ་ཟུར་དུ་ཐོ་ཆུང་དཀར་པོ་བར་ཆད་མི་འབྱུང་བའི་རྟེན་འབྲེལ་བརྩིགས་པ་ལ། རྒྱལ་ཆེན་བཞིའི་མཚན་སྔགས་དང་འདོད་གསོལ་བྲིས་པ་བཙུགས་ནས། དེ་ལ་རྒྱལ་ཆེན་དྲངས་བསྟིམ་བགྱིས་ཏེ། མཆོད་བསྟོད་དང་ཕྲིན་ལས་བཅོལ་ཞིང་ཞལ་ཕྱིར་གཟིགས་ཏེ་དགྱེས་བཞིན་བཞུགས་པས་ཁོར་ཡུག་ཐམས་ཅད་རྒྱལ་ཐབས་བཞིའི་གུར་གྱིས་བར་མཚམས་མེད་པར་བཅིངས་ནས་བསྲུང་བའི་ལས་མཛད་པར་བསམ་ལ་ཕྱི་མཚམས་བཅད། སྐབས་འདིར་དམ་སྲི་མནན་པ་དང་། སྒོ་བྱང་ཕུར་གདབ་སོགས་ནི་སྒྲུབ་ཆེན་ཀྱི་དུས་མ་གཏོགས་བསྙེན་རྐྱང་ལྟ་བུ་ལ་མི་དགོས། དེ་ནས་ནང་དུ་ལོག་ནས་སྒོ་བསྡམ་ལ་རྣམ་གཡེང་རྒྱུ་འགྲུལ་སྤངས་ཏེ། སྲུང་བའི་གུར་ཁང་འོག་ཐམས་ཅད་རྡོ་རྗེའི་ས་གཞི། སྟེང་ཐམས་ཅད་དྲོ་རྗེའི་གུར་དང་བླ་བྲེ། ཁོར་ཡུག་ཕྱོགས་མཚམས་ཐམས་ཅད་རྡོ་རྗེའི་ར་བ་ཟླུམ་སྐོར་ཡངས་ཤིང་རྒྱ་ཆེ་ལ་དཔང་མཐོ་བ། ཀུན་ཀྱང་བར་མཚམས་མེད་པར་རྡོ་རྗེ་ཕྲ་མོས་གཏམས་ཏེ་ཞུ་ལུགས་སུ་འབྲེལ་བ་ཞུན་ཐེབ་པ་ལྟ་བུའི་ཕྱི་རོལ་དུ་རྡོ་རྗེའི་ཐག་པ་བསྣོལ་ཞིང་སྦྲེལ་བས་རྒྱ་ཆིངས་སུ་བཅིང་བའི་དྲྭ་བས་གཡོག་པ། རྩེ་མོར་རྡོ་རྗེ་ཕྱེད་པའི་ཏོག་དང་། རྐེད་པ་རྡོ་རྗེའི་ཕྲེང་བས་དཀྲིས་པ། དེ་ཐམས་ཅད་ཀྱང་ཁ་ཏོག་སྔོན་པོ་ཕྱི་དབྱིབས་ལྕགས་རྨོག་ཁ་སྦུབས་པ་ལྟ་བུ་ལས་ཡེ་ཤེས་ཀྱི་མེ་དཔུང་ཁ་ཏོག་ལྔ་ལྡན་ཕྱོགས་ཀུན་དུ་འཕྲོ་བར་བསམ་ལ། བཛྲ་རཀྵ་སོགས་བསྲུང་སྔགས་བརྗོད་པས་བརྟན་ཅིང་ནུས་ལྡན་དུ་བསམ། ཡང་སྒོང་དབྱིབས་དང་གུར་ཁྱིམ་ལྟ་བུའི་བཞེད་ཚུལ་ཀྱང་སྣང་ཡང་སྲུང་གུར་ཡངས་ཤིང་རྒྱ་ཆེ་བའི་ཕྱོགས་ཐམས་ཅད་གོ་མཚམས་མེད་པས་ན་དོན་གྱིས་གནད་གཅིག་གོ །ཡང་དེའི་ཕྱི་རོལ་དུ་ཁྲོ་ཆུང་དང་མཚོན་ཆ་སྣ་ཚོགས་ཆར་སྤྲིན་ལྟར་འཁྲིགས་ཤིང་མེ་ཆུ་རླུང་གསུམ་གྱི་གུར་ཁང་དང་། ཡང་ནམ་མཁའི་དབྱིངས་ཀྱི་མཐའ་ཀླས་པར་མེ་དཔུང་འབར་བའི་ཀློང་ན་བྷྲུཾ་ལས་འཁོར་ལོ་རྩིབས་བཅུ་མུ་ཁྱུད་ལྟེ་བ་དང་བཅས་པ་ཁོང་སྟོང་ཡངས་ཤིང་རྒྱ་ཆེ་བ་ཆོས་ཀྱི་དབྱིངས་དང་མཉམ་པའི་རྩིབས་ནང་བཅུ་ལ་པད་ཟླ་ཉི་མའི་གདན་ལ་ཧཱུྃ་བཅུ་ལས་ཁྲོ་བོ་བཅུར་བསྐྱེད་པ་དང་། ཡང་སྲུང་བའི་འཁོར་ལོ་སྦུབས་སྟོང་གི་ནང་དུ་གཙུག་ཏོར་འཁོར་ལོས་བསྒྱུར་བའི་ལྷ་རྣམ་སྣང་གི་ལྟོ་བ་ཡངས་ཤིང་རྒྱ་ཆེ་བར་བསྒོམ་པ་སོགས་གསུངས་ཀྱང་། ཆོ་ག་རང་རང་གི་ཚིག་ཟིན་ལྟར་གྱིས་ཆོག་གོ། །དེ་ལྟར་སྲུང་བའི་འཁོར་ལོས་མཚམས་བཅད་པས་བགེགས་དང་ལོག་འདྲེན་ཐམས་ཅད་ཉེ་མི་ནུས་པའི་ནང་དུ་བདག་དང་སྲུང་བྱ་ཐམས་ཅད་ཚུད་པར་བསམ་ལ། མཚམས་གཅོད་ཀྱི་ཚིག་རྣམས་བརྗོད་པར་བྱ་ཞིང་ནང་མཚམས་བཅད། དེ་ནས་གསང་འགྲེལ་ལས། མཚམས་ཀྱི་རྒྱལ་པོ་མི་རྟོག་ཡེ་ཤེས་ཀྱིས། །བགེགས་ཀྱི་རྒྱལ་པོ་རྣམ་རྟོག་མནན་པར་བྱ། ཞེས་པ་ལྟར་གཟོད་མ་ནས་འཁོར་འདས་གཟུང་འཛིན་གྱི་འཁྲུལ་བས་གོས་མ་མྱོང་བའི་འོད་གསལ་གཉུག་མའི་ངང་དུ་ཀུན་བརྟགས་གློ་བུར་གྱི་གདོན་བགེགས་ཐམས་ཅད་རང་བཞིན་མེད་པའི་ལྟ་བས་རྒྱས་འདེབས་པ་ཁྱད་པར་གྱི་བསྲུང་འཁོར་རོ། །དེ་ལྟར་མི་རྟོག་པས་རྒྱས་གདབ་ལ་གསང་མཚམས་བཅད། སྐབས་སུ་འཕྲད་དགོས་པ་རྣམས་སྲུང་འཁོར་དུས་དམིགས་འོག་ཏུ་ཚུད་པར་བྱ། དེ་ལས་གཞན་པའི་ངོ་སར་དང་མི་འཕྲད་ཅིང་ཀ་ཅའི་གཏོང་ལེན་སོགས་མི་བྱ། ཡང་བཀའ་བརྒྱད་རྣམ་བཤད་ལས། ཕྱི་མཚམས་ནི་རང་གི་ཐུགས་ཀ་ནས་ཧཱུྃ་ཡིག་དཀར་སེར་དམར་ལྗང་སྒྲུབ་ཁང་གི་ཕྱོགས་བཞིར་སྤྲོས་པ་ལ་རྒྱལ་ཆེན་བསྐྱེད་བསྟིམ་སོགས་མཐར་ནུབ་རེ་བཞིན་མཆོད་པ་དང་། ནང་མཚམས་ནི་རྒྱུའི་ཧེ་རུ་ཀའི་རིག་རྩལ་ལས་ཆུ་ལས་ཆུ་བུར་ལྟར་མེ་ཀློང་ནས་ཁྲོ་ཚོགས་འཕྲོས་པའི་སྤྲུལ་བ་དང་། དེ་ལས་ཡང་སྤྲུལ་དང་། དེ་ལས་སུམ་སྤྲུལ་གྱི་ཁྲོ་ཚོགས་དཔག་མེད་འཕྲོས་པའི་མཚམས་རྔམས་ཀྱིས་བགེགས་བསྐྲད་ཅིང་ཆོས་ཉིད་སྟོང་པའི་ངང་དུ་འཇོག་པ་དང་། གསང་མཚམས་ནི། རང་ལྷར་གསལ་བའི་སྒོ་གསུམ་ལས་རྡོ་རྗེ་སྔོན་པོའི་ཚ་ཚྭ་འཕྲོས་པས་སྟེང་འོག་ཕྱོགས་མཚམས་ཐམས་ཅད་སྲུང་འཁོར་གྱིས་གཏམས་པར་གསུངས་སོ། །གང་ལྟར་ཡང་། སྲུང་འཁོར་འདི་མཚམས་གྲོལ་བའི་ཐུན་ཐ་མའི་ཚེ་མ་གཏོགས་མི་བསྡུ་ཞིང་ཐུན་ཐམས་ཅད་ཀྱི་མགོར་གསལ་གདབ་རེ་བྱའོ། །ཡང་མཆོད་པ་བཤམས་བཀོད་དང་བསགས་སྦྱངས་སོགས་སྐབས་འདིར་བྱེད་པའི་ཕྱག་བཞེས་ཀྱང་སྣང་ངོ། །དེ་ལྟར་ནང་མཚམས་བཅད་ནས་བཟུང་། ལུས་མཚམས་མི་ཡིས་མ་མཐོང་བ་དང་། ངག་མཚམས་ཐ་མལ་གྱི་སྨྲ་བ་གཅོད་པ་དང་། ཡིད་མཚམས་ཆགས་སྡང་ཉོན་མོངས་པའི་ངན་རྟོག་གི་རྗེས་སུ་མི་འབྲང་བར་དྲན་ཤེས་བག་ཡོད་གསུམ་དང་མ་བྲལ་བའི་སྒོ་ནས་དགེ་སྦྱོར་གནད་དུ་འགྲོ་བའི་ཕྱིར་ཐོར་ཐུན་དང་སྔ་ཐུན། ཕྱི་ཐུན་དང་སྲོད་ཐུན་ཏེ་ཐུན་བཞི་ཁྲིགས་ཆགས་སུ་གཏོང་བ་ཡིན་ནོ། །དེ་ནས་བྱིན་འབེབས་ནི། ཁྱད་པར་གྱི་སྦྱར་སྤོས་དང་དབྱངས་རོལ་བཅས་ཏེ་མོས་གུས་དྲག་པོས། རང་ཉིད་ལྷར་གསལ་བའི་ཐུགས་ཀའི་འོད་ཟེར་གྱིས་རྩ་
གསུམ་ལྷ་ཚོགས་ཀྱི་ཐུགས་རྒྱུད ་བསྐུལ་བས་རང་བཞིན་གྱི་དབྱིངས་ནས་མཁྱེན་བརྩེ་ནུས་པའི་བྱིན་རླབས་དང་དངོས་གྲུབ་ཐམས་ཅད་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན། འོད་དང་འོད་ཟེར། འཇའ་སྤྲིན་མེ་ཏོག་ཐིག་ལེ་ལ་སོགས་པའི་རྣམ་པར་སད་ནས། བདག་གནས་ཡོ་བྱད་ཐམས་ཅད་ལ་ཐིམ་པས་ཡེ་ཤེས་ཆེན་པོའི་གཟི་བྱིན་ནུས་བཅུད་དང་ལྡན་པར་བསམ་མོ། དབང་རབ་རྣམས་ཀྱིས་ནི། ཚོགས་དྲུག་གི་སྣང་བ་གང་ཤར་ཐམས་ཅད་ཤར་ཙམ་ནས་གཟུང་འཛིན་གྱི་མདུད་པ་རང་གྲོལ་དུ་ཞིག་པས་ཅིར་སྣང་ཕྱི་ནང་གསང་བའི་མཆོད་སྤྲིན་དུ་ཤར་བ་དག་པ་རབ་འབྱམས་ཡེ་ཤེས་ཆེན་པོའི་བྱིན་འབེབས་པའོ། །མཆོད་རྫས་བྱིན་རླབས་ནི། སྤྱི་མདོ་ལྟར་ན། དངོས་འབྱོར་གྱི་མཆོད་པ་ཐམས་ཅད་གཟུངས་སྔགས་དང་རིགས་སྔགས་དང་། མོས་པའི་སྟོབས་དང་། བདེན་པའི་སྟོབས་བརྗོད་པས་བྱིན་གྱིས་བརླབས་ཤིང་སྤྲུལ་བར་གསུངས་ལ། སྔགས་སུ་སྐྱབས་འགྲོ། ལྷ། སྔགས། ཏིང་འཛིན། ཕྱག་རྒྱ་སྟེ་ལྔ་དང་ལྡན་པས་བྱིན་གྱིས་རློབ་པར་གསུངས་པས། རང་ཉིད་ལྷའི་ཐུགས་ཀ་ནས་ཡི་གེ་རཾ་ཡཾ་ཁཾ་གསུམ་རིམ་པར་འཕྲོས་ཏེ། ཡེ་ཤེས་ཀྱི་མེ་རླུང་ཆུར་གྱུར་པས་མཆོད་རྫས་རྣམས་ཀྱི་མ་དག་པའི་དངོས་འཛིན་གྱི་ཉེས་སྐྱོན་དྲི་མ་ཐམས་ཅད་བསྲེག་གཏོར་བཀྲུས་ཏེ་སྟོང་པར་བསམ། སྟོང་པའི་ངང་ལས་བྷྲུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་སུ། ༀ་ལས་བྱུང་བའི་ལྷ་རྫས་ཀྱི་མེ་ཏོག་སོགས་ཐུན་མོང་ཕྱི་ཡི་ཉེར་སྤྱོད་ལྔ་དང་། དུག་ལྔ་ཡེ་ཤེས་ལྔའི་རང་རྩལ་རང་བྱུང་དབང་པོ་ལྔའི་མེ་ཏོག་སོགས་ཁྱད་པར་ནང་གི་ཉེར་སྤྱོད་དུར་ཁྲོད་དྲག་པོའི་མཆོད་པ་སོགས་གང་ཡིན་ཀྱང་སྲིད་ཞིའི་འདོད་ཡོན་གྱི་རྣམ་པ་མ་ཚང་བ་མེད་པ། དེ་དག་རེ་རེ་ལས་ཀྱང་མཆོད་རྫས་སོ་སོ་ཐོགས་པའི་ལྷ་མོ་དཔག་ཏུ་མེད་པས་མཆོད་སྤྲིན་སྤྲོ་བས་ནམ་མཁའ་གང་བར་བསམ་མོ། །ཡང་ན་པུ་དྷུ་ག་ན་སོགས་མཆོད་རྫས་རང་རང་གི་མིང་ཡིག་དང་པོ་ཡོངས་སུ་གྱུར་པའི་འཕྲོ་འདུ་ལས་མཆོད་རྫས་སོ་སོ་ཐོགས་པའི་ལྷ་མོ་རེ་རེ་ལས་ཀྱང་དཔག་མེད་འཕྲོ་བ་སྣང་སྟོང་དབྱེར་མེད་ཡེ་ཤེས་ཀྱི་མཆོད་རྫས་སུ་རློབ་པའོ། །འབྲུ་གསུམ་དང་ཨརྒྷཾ་སོགས་ཀྱི་སྔགས་སྤེལ་བས་ནི། རྡོ་རྗེ་གསུམ་གྱི་བདག་ཉིད་དུ་བྱིན་གྱིས་བརླབས་པའི་དོན་ནོ། །དེས་ནི་ལྷ་མཉེས་པར་བྱ་བ་དང་། རང་ཉིད་ཀྱིས་འདོད་ཡོན་གྱི་རང་བཞིན་ཤེས་པའི་སྒོ་ནས་ལོངས་སྤྱད་པས་འབྲས་དུས་སུ་ལོངས་སྤྱོད་ཡོངས་སུ་དག་པ་འགྲུབ་པའི་འབྲས་བུ་ལམ་བྱེད་དུ་འགྱུར་བའི་ཆེད་དོ། །ནང་མཆོད་སྨན་རཀ་གཏོར་གསུམ་གྱི། དང་པོ་སྨན་ནི། ཡཾ་རཾ་ཀཾ་ལས་རླུང་མེ་ཐོད་པའི་རྒྱེད་པུ་གསུམ་གྱི་སྟེང་དུ། ཨའམ་བྷྲུཾ་ལས་ཡེ་ཤེས་ཀྱི་ཀཱ་པ་ལ་ཡངས་ཤིང་རྒྱ་ཆེ་བའི་ནང་དུ། བཅུད་ཤ་ལྔ་དང་བདུད་རྩི་ལྔ་ནི་དབུས་སུ་མི་ཤ་དང་དྲི་ཆེན། ཤར་དུ་བ་གླང་གི་ཤ་དང་ཁུ་བ། ལྷོར་ཁྱི་ཤ་དང་ཤ་ཆེན་གྱི་དྭངས་མ་སྟེ་གླད་པ། ནུབ་ཏུ་རྟ་ཤ་དང་རྡུལ། བྱང་དུ་གླང་ཆེན་གྱི་ཤ་དང་དྲི་ཆུ། དེ་རྣམས་ཀྱི་སྟེང་དུ་རིམ་པར་ཧྲཱིཿཔཱྃ་ཧཱུྃ་ལཱྃ་ཏྲཱྃ་མྃ། ༀ་མཱུཾ་ཨཱཿཏཾ་དེ་རྣམས་ཡོངས་སུ་གྱུར་པ་ལས་རིགས་ལྔ་ཡབ་ཡུམ་དུ་གྱུར་པའི་སྦྱོར་མཚམས་ནས་བྱང་སེམས་དཀར་དམར་གྱི་རྒྱུན་བབས་པས་ཐོད་པ་གང་། མཐར་ལྷ་རྣམས་ཀྱང་འོད་དུ་ཞུ་ནས་རྫས་ལ་ཐིམ་པས་ཡེ་ཤེས་ཀྱི་བདུད་རྩིའི་རྒྱ་མཚོར་འཁྱིལ་ཞིང་ཟེགས་མ་ལས་འདོད་ཡོན་གྱི་ལྷ་མོ་འཕྲོ་བར་བསམ་མོ། །དེ་ཡང་དགོངས་འདུས་ལས། འོག་གི་རླུང་གཡོས་མེ་སྦར་ཐོད་པ་དྲོས༔ རྫས་ཁོལ་རླང་པའི་འོད་ཟེར་ཕྱོགས་བཅུར་འཕྲོས༔ ཡེ་ཤེས་བདུད་རྩི་བཀུག་ཅིང་ནང་དུ་བསྟིམ༔ ལྷ་དང་དམ་རྫས་ཡེ་ཤེས་བདུད་རྩིའི་ཚོགས༔ གཉིས་སུ་མེད་པར་འདྲེས་ཤིང་དཀར་དམར་འཁྱིལ༔ ལྷ་ལ་ཕོག་ན་དགྱེས་པ་སྐོང་བའི་རྫས༔ མཆེད་ལ་ཕོག་ན་དངོས་གྲུབ་འབྱུང་བའི་བཅུད༔ དགྲ་ལ་ཕོག་ན་སྲོག་རྩ་གཅོད་པའི་མཚོན༔ བགེགས་ལ་ཕོག་ན་རྡུལ་དུ་རློག་པའི་ཐུན༔ གང་ལ་ཕོག་ཀྱང་དོན་གྲུབ་བདུད་རྩིར་དམིགས༔ ཞེས་གསུངས་པ་ལྟར་རོ། སྤྱིར་བདུད་རྩི་ལྔ་ནི་གསར་རྙིང་འདྲ་བས། ཤ་ལྔ་ནི་རྙིང་ལུགས་ལྟར་ན། སེང་གེ་གླང་ཆེན་རྟ་དང་རྨ་བྱ་ཁྱུང་། །མཆོག་ཆེན་མི་ལ་སོགས་དེ་རྣམ་པ་ལྔ། ཞེས་དང་། གསར་ལུགས་ལ། མི་ཤ། བ་ལང། ཁྱི། གླང་། རྟ་ཤ་རྣམས་ལ་དངོས་གྲུབ་མྱུར་དུ་འགུགས་པའི་ལྕགས་ཀྱུ་ལྔ་དང་། བདུད་རྩི་ལྔ་ལ་དངོས་གྲུབ་གསལ་བར་བྱེད་པའི་སྒྲོན་མ་ལྔར་གསུངས་སོ། རཀྟ་ནི་བྷནྡྷ་རློན་པ་སྐྲ་དང་བཅས་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཁམས་གསུམ་གྱི་ཞེན་ཆགས་ཀྱི་རྟོག་པ་ཐམས་ཅད་ཁྲག་གི་རྣམ་པར་བསྡུས་ཤིང་འཁྱིལ་བའི་དབུས་སུ། རཀྟའི་ལྷ་མོ་གིརྟི་མ་དམར་མོ་གཅེར་བུ་གྲི་ཐོད་ཅན་གྱི་བྷ་ག་ནས་རཀྟའི་རྒྱུན་བབས་པས་ཐོད་པའི་རྫས་དང་དབྱེར་མེད་དུ་འདྲེས་ཤིང་གང་བའི་མཐར་ལྷ་ཡང་འོད་དུ་ཞུ་ནས་ཐིམ་པས། ངོ་བོ་ཆགས་མེད་བདེ་བ་ཆེན་པོ་རཀྟའི་རྒྱ་མཚོའི་རྦ་རླབས་འཕྱོ་ཞིང་འདོད་ཡོན་གྱི་སྤྲིན་འཕྲོ་བར་བསམ་མོ། གཏོར་མ་ནི། ཀ་པཱ་ལའམ་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་བཟའ་བཅའ་སྣ་ཚོགས་པའི་གཏོར་མ་ལྷའི་བདུད་རྩི་རོ་བརྒྱ་དང་ལྡན་པ། འདོད་ཡོན་གྱི་ཕུང་པོ་ཟད་མི་ཤེས་པའི་གཏེར་དུ་གྱུར་པ་ལས་ཕྱི་ནང་གསང་བའི་མགྲོན་སོ་སོ་དགྱེས་སྐོང་གི་མཆོད་རྫས་ཐོགས་པའི་ལྷ་མོ་གྲངས་མེད་པས་མཆོད་སྤྲིན་སྤྲོ་བར་བསམ་ཞིང་། མཆོད་རྫས་དེ་དག་ཀྱང་མིང་རྐྱང་བཏགས་ཡོད་ཙམ་དུ་ཤེས་པར་བྱའོ། །དེ་ཡན་ཆད་ནི་ཐུན་མོང་དང་ཁྱད་པར་གྱི་སྔོན་འགྲོའི་རིམ་པ་རྣམས་སོ། །