དཔེ་སྐྲུན་གསལ་བཤད།
ཀུན་མཁྱེན་ཀློང་ཆེན་རབ་འབྱམས་ཀྱིས་མཛད་པའི་ཆོས་འབྱུང་རིན་པོ་ཆེའི་གཏེར་མཛོད་བསྟན་པ་གསལ་བར་བྱེད་པའི་ཉི་འོད་ཅེས་བྱ་བ་འདི་ནི་མདོ་རྒྱུད་དང། བསྟན་བཅོས། རྒྱལ་རབས་ཆེ་ཆུང། པདྨ་བཀའ་ཆེམས། འདྲ་འབག་ཆེན་མོ། །མདོ་སྔགས་རྣམས་ཀྱི་འགྱུར་བྱང༌། ཆོས་འབྱུང་གསར་རྙིང་ཀུན་ལས་ལེགས་པར་བཏུས་ཤིང་གསར་དུ་གོ་བདེར་བཀོད་པ་ཞིག་ཡིན་ཞིང། སྤྱི་དོན་བཅུ་ཡོད་པ་དེ་དག་སོ་སོའི་བརྗོད་བྱའི་ནང་དོན་ཁ་གསལ་ལ་གོ་བདེ་བའི་ཁྱད་ཆོས་ལྡན་པ་དང། ལྷག་པར་བོད་དུ་བསྒྱུར་བའི་བཀའ་དང་དགོངས་འགྲེལ་བསྟན་བཅོས་ཁག་གི་མཚན་བྱང་དང་མཛད་པ་པོ་སུ་ཡིན་ཧ་ཅང་ཞིབ་གསལ་འཁོད་ཡོད་པ་དང་གཅིག ལོ་ཙཱ་བ་སུ་ཞིག་གིས་གནས་གང་དུ་བསྒྱུར་བའི་མཚན་བྱང་དང་བོང་ཚད་གསལ་བར་འཁོད་ཡོད་པ་དང་གཉིས། ཐེག་པ་ཆེ་ཆུང་དང། མདོ་སྔགས། སྔ་འགྱུར་ཕྱིས་འགྱུར་སོགས་ཀྱི་ཁྱད་པར་དང་དབྱེ་མཚམས་རྒྱུ་མཚན་སོགས་གསལ་སྟོན་གནང་ཡོད་བརྒྱུད་ཚུལ་གསལ་བར་བསྟན་པ་དང་གསུམ། སློབ་དཔོན་པདྨ་འབྱུང་གནས་དང་ལོ་ཙྭ་བ་བཻ་རོ་ཙ་ནས་མཚོན་ལོ་པཎ་གྲགས་ཅན་དག་གི་ལོ་རྒྱུས་ཞིབ་ཙམ་འཁོད་པ་དང་བཞི། དེ་སྐབས་སོ་སོའི་པཌ་གྲགས་ཅན་དག་གི་ལོ་རྒྱུས་ཞིབ་ཙམ་འཁོད་པ་དང་བཞི། དེ་སྐབས་སོ་སོའི་ཆོས་སྲིད་ཀྱི་གནས་སྟངས་བཀོད་ཡོད་པ་མ་ཟད། གནད་དོན་མང་པོར་ལུང་དང་རིཊ་པ་རྣོན་པོས་དགག་བཞག་ལྷུར་ལེན་མཛད་དེ་འཁྲུལ་བྲལ་གྱི་ལྟ་བ་གསལ་ལེར་བསྟན་ཡོད་པ་དང་ལྔ་བཅས་ལོ་མས་འབྲས་སྒྲིབ་ལྟ་བུ་མ་ཡིན་པ་ལོ་རྒྱུས་ཆོས་འབྱུང་གཞན་ལས་བླ་ལྷག་ཏུ་འཕགས་པའི་ཁྱད་ཆོས་ལྡན་པ་དང། དེ་བཞིན་སྲིད་པ་ཆགས་འཇིག་གི་སྐོར་ཡང་
ཚིག་ཉུང་དོན་བསྡུས་ཀྱི་སྒོ་ནས་བསྟན་ཡོད་པ་སོགས་མདོར་ན་ཆོས་འབྱུང་འདི་ཉིད་དབུ་མཇུག་མཐུད་ཐུབ་པ་དང། ནང་དོན་ཕན་ཚུན་འགལ་བ་མེད་པར་ཆ་ལག་ཚང་བའི་དགེ་མཚན་ལྡན་པ་ཞིག་ཏུ་མཆིས། ང་ཆོས་ལོ་རྒྱུས་འབྱུང་འདི་བཞིན་དཔེ་སྐྲུན་བྱེད་པའི་དགོས་པ་གཞན་ཞིག་ནི་སྐྱེ་མེད་རྡོ་རྗེའི་སློབ་མ་རྗེ་བཙུན་མ་ངག་དབང་སོགས་ཀྱིས་དེ་སྔོན་ གཙང 
་རིན་སྤུངས་སུ་ཤིང་དཔར་རྐོ་མྱོང་ཡོད་འདུག་ཀྱང་དཔར་ཤིང་སྣུམ་བཅོས་བྱེད་ཁོམ་མ་བྱུང་གོང་དུས་ཟིང་ཡོ་ལང་གིས་རྐྱེན་པས་དཔར་ཤིང་རྣམས་རི་སྟེང་དུ་སྦས་ཁུལ་གནང་རུང་རུལ་སྐྱོན་ཕོག་པ་སོགས་ཀྱིས་གསུམ་ཆ་གཉིས་ཙམ་ཕན་མེད་དུ་སོང་ཟིན་པ་བཅས་དེང་སང་རེ་གཉིས་ཙམ་མཐོང་རྒྱུ་ཡོད་པ་ནི་དཔེ་རྒྱུན་དཀོན་པོར་གྱུར་ཟིན་པའི་མ་དཔེ་སྐྲུན་བགྱིས་པ་ལགས། ད་རེས་དཔེ་སྐྲུན་བྱས་པའི་ཆོས་འབྱུང་འདི་ཉིད་ཀྱི་མ་དཔེ་ནི་ཁམས་ཡིག་བྲིས་མ་ཞིག་འདུག་པ་དེ་ཁུངས་བཙན་པར་མངོན་སྐབས་དེ་ཉིད་ནས་གཡར་པོ་བྱུང་བར་གྲགས་པའི་མ་དཔེ་ཞིག་བོད་ལྗོངས་ཡིག་ཚགས་ལས་ཁུངས་སུ་ཡོད་པ་དེ་དང་ཞུས་དགེ་རྗེས་སྣུམ་དཔར་དུ་བཏབ་པའི་དེབ་ཅིག་འདུག་པ་དེ་དང། འཛིམ་ཚེ་དཔག་མེད་དགོན་པར་ཡོད་པའི་སྨན་པ་པདྨ་སྐལ་བཟང་ནས་དབུ་ཅན་དུ་ལག་བྲིས་གནང་བ་གཉིས་དཔྱད་གཞིར་བཟུང་ནས་དཔེ་སྒྲིག་བྱས་པ་ཡིན། དཔེ་སྒྲིག་བྱེད་པའི་བརྒྱུད་རིམ་ནང་མ་དཔེ་ཁམས་ཡིག་མ་དེར་བྲིས་ནོར་སོང་བའི་ཕྲད་ཀྱི་སྦྱོར་ཚུལ་དང་བརྡ་དག་
འཁྲུལ་ཅན་མང་ཙམ་མཆིས་པ་རྣམས་ཡིག་ནོར་རྒྱུན་འབྱམས་མི་འབྱུང་བའི་སླད་དག་བཅོས་ཐད་ཀར་ཞུས་ཡོད། བློ་དོགས་མ་ཆོད་པ་འགའ་རང་སོར་བཞག་པའི་གཤམ་དུ་རྟགས་འདི། བཀོད་པའི་ནང་དཔྱད་གཞིའི་ཚིག་འབྲུ་བཅུག་ཡོད་པ་ནི་དག་པ་མ་དག་པར་བཟོ་ཉེས་མི་ཡོང་བའི་ཆེད་དུ་དམིགས། མ་ཕྱིའི་ནང་དུ་དེ་སྔོན་ནས་མཆན་བུ་བཏབ་ཡོད་པ་རྣམས་རྟགས་འདི། ཡི་ནང་ཡིག་ཆུང་དུ་བཀོད་ཡོད། དེ་བཞིན་ཁམས་ཡིག་བྲིས་མའི་མ་ཕྱི་དེའི་ནང་གཞུང་ཚིག་མངོན་གསལ་དུ་ཆད་པའི་དུམ་བུ་རེ་ཟུང་འདུག་པ་རྣམས་མ་དཔེ་གཞན་སལ་རྟགས་འདི། ཡི་ནང་དུ་ཁ་སྐོང་ཞུས་ཡོད་ལ་དོགས་འགའ་ཞིག་ལ་སྒྲིག་པ་པོའི་མཆན་བུ་ཐུང་དུ་རེ་བཏབ་ཡོད། དཔེ་དུས་མཚུངས་འདི་ནས་དེང་དཀར་ཆག་གི་ཀློག་པ་པོའི་ལྟ་ཀློག་གོམས་སྲོལ་དང་མཐུན་པའི་ཞིབ་ཕྲའི་དཀར་ཆག་ཞིག་གསར་དུ་བསྒྲིགས་ནས་གཞུང་ཚིག་གི་དཀྱུས་སུ་སྐབས་སྦྱར་འགོ་བརྗོད་ཆུང་དུ་རེ་བསྣན་ཡོད་པ་ནི་གཟིགས་པ་པོར་སྟབས་བདེ་ཡོང་ཐབས་ཞུས་ཁུལ་ཡིན། མཇུག་ཏུ་ད་རེས་ལག་སོན་ཐུབ་པའི་མ་དཔེ་རྣམས་བསོད་ནམས། དོན་གྲུབ་ལགས་ནས་གཡར་པོ་གནང་བྱུང་བ་དང། འབྲེལ་ཡོད་དཔྱད་གཞིའི་ཡིག་ཆ་འགའ་ཡང་མཚམས་སྦྱོར་གནང་བྱུང་བས་གོ་སྐབས་འདི་དང་བསྟུན་ནས་ཐུགས་རྗེ་ཞུ་རྒྱུ་ཡིན། དེ་བཞིན་རྩོམ་སྒྲིག་ཞུ་བའི་བརྒྱུད་རིམ་ནང་ཁོ་བོར་སློབ་སྟོན་གནང་མྱོང་བའི་མཁས་པ་ཚོར་ཡང་ཐུགས་རྗེ་ཆེ་ཞུ་རྒྱུ་ཡིན། བུ་བྱུང་དབང་འདུས་ཀྱིས།