དཔལ་ཆེན་རྡོ་རྗེ་ཕུར་པའི་བསྙེན་སྒྲུབ་ལས་གསུམ་ལ་ཉེ་བར་མཁོ་བའི་ཡིག་སྣ་ཕྲན་ཚེགས་ཕྱོགས་གཅིག་ཏུ་བསྡེབས་པ་འདོད་དགུའི་བང་མཛོད།
དཔལ་ཆེན་རྡོ་རྗེ་ཕུར་པའི་བསྙེན་སྒྲུབ་ལས་གསུམ་ལ་ཉེ་བར་མཁོ་བའི་ཡིག་སྣ་ཕྲན་ཚེགས་ཕྱོགས་གཅིག་ཏུ་བསྡེབས་པ་འདོད་དགུའི་བང་མཛོད་ཅེས་བྱ་བ་བཞུགས་སོ།། །།
དཀྱིལ་འཁོར་དབང་ཕྱུག་དཔལ་ཆེན་པོར། །བཏུད་ནས་དེ་སྒྲུབ་ལས་རིམ་ལ། །འཇུག་བྱེད་དབང་པོའི་ཁྱད་པར་གྱིས། །རྒྱས་དང་བསྡུས་པའི་རྣམ་དབྱེ་འཆད། །དེ་ལ་ལས་གཞུང་སྦྱོར་བའི་ཆོས་བཅུའི་ནང་ཚན་བདུན་པ་བཤགས་པའི་སྐབས་སྤྱི་བཤགས་ངེས་པར་ཕྱག་ལེན་ཏུ་མཛད་པས་འདོན་པར་ལྕོགས་ན་ཐལ་མོ་སྦྱར་ལ། ཧཱུྃ། ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནས། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཐུགས་རྗེ་ཉི་གསལ་འོད་བཞིན་སྙོམས་མཛད་པ། །འདིར་གཤེགས་བཞུགས་ཤིང་བདག་ལ་དགོངས་སུ་གསོལ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེན་རོལ་པ་ཡི། །ཞི་ཁྲོ་སྤྲུལ་པ་འི་སྐུ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཀུན་ཏུ་བཟང་མོ་གསང་བའི་བྷ་ག་ལ། །
རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན། །འདུ་འབྲལ་མེད་པའི་ངང་དུ་རོ་གཅིག་པར། །གཉིས་མེད་བྱང་ཆུབ་སེམས་ཀྱིས་མཉས་གྱུར་ཅིག །སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་འདིར། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །བྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །གསང་ཆེན་རབ་དགོས་གཟུགས་ཆེན་བདག་ཉིད་མ། །མཁའ་དབྱིངས་ཀློང་ཡངས་པདྨོར་འཁྱིལ་བའི་སྐུ། །གཉིས་མེད་ཐིག་ལེ་ཆེན་པོ་འོད་གསལ་ཞིང་། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །འདུ་འབྲལ་མེད་པ་གསང་བའི་དཀྱིལ་འཁོར་འདིར། །
བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །རྡོ་རྗེ་ལྷ་མོ་ཚོགས་ཆེན་ཚོགས་ཀྱི་བདག །རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ། །གནས་དང་ཡུལ་གྱི་ཕྱག་རྒྱ་སྒོ་མ་བཞི། །ཡེ་ཤེས་སྤྲུལ་པའི་ལྷ་ཚོགས་མང་པོ་དང་། །མ་ལྟར་བྱམས་ཤིང་སྲིང་ལྟར་དུངས་ལ་སོགས། །ཉེས་ལེགས་སྙོང་འཛིན་དམ་ཚིག་རྗེས་གཅོད་མ། །ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས། །དབང་གྱུར་རྡོ་རྗེ་དམ་ཅན་དགོངས་སུ་གསོལ། །ཐུགས་རྗེའི་གདུང་འཚོ་བ་རྡོ་རྗེ་བདག་ཅག་གིས། །འགྲོ་བའི་དོན་དུ་བྱང་ཆུབ་སེམས་བསྐྱེད་དོ། །བླ་མེད་གོ་འཕང་བགྲོད་མར་བྱ་བའི་ཕྱིར། །བསྟན་པ་རྒྱ་མཚོ་སོ་སོའི་འདུལ་ཁྲིམས་དང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་ཚོགས། །རྡོ་རྗེ་འདའ་དཀའ་དམ་ཚིག་གཏན་གྱི་གཉེར། །སྤྱི་དང་ཁྱད་པར་ལྷག་པའི་དམ་ཚིག་ལས། །སྔ་ཕྱིར་ནོས་ཤིང་གཉེར་དུ་སྨྲའོ་འཚལ། །ཡུན་དུ་མི་གཏོང་འདའ་བར་མི་བགྱིད་ལ། །དོན་ལ་གོལ་ཞིང་ལྡོག་སེམས་མ་མཆིས་ཀྱང་། །གཟོད་བྱ་ལོངས་ཡོད་སྙམ་པའི་ལེ་ལོ་ཡིས། །ཀློང་དུ་མ་གྱུར་རྩལ་ཤུགས་ཆུང་བ་དང་། །ཤེས་བཞིན་མི་ལྡན་བག་མེད་དབང་གྱུར་ཏེ། །སྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས། །ཚོར་དང་མ་ཚོར་མ་རིག་དབང་གིས་ན། །སྟོན་པའི་བཀའ་དང་དམ་ལས་འགལ་གྱུར་ཏེ། །རྣལ་འབྱོར་གང་ཞིག་དམ་
ཚིག་ཉམས་པ་དང་། །སྐད་ཅིག་ཙམ་ཡང་ཕྲད་པར་མི་བྱ་ཞེས། །བཀའ་ལས་བྱུང་ཡང་དེ་ལྟར་མ་རྟོགས་ཏེ། །གསང་སྒོ་འཆོལ་བས་དབྱེ་གསལ་དཀའ་བ་དང་། །མངོན་ཤེས་མེད་པས་སྐྱོན་ཅན་མ་རྟོགས་ཏེ། །ཉམས་དང་ཚོགས་འདྲེས་ཉམས་པ་བསྐང་བ་དང་། །ཉམས་དང་སྣོད་མིན་རྣམས་ལ་ཆོས་བཤད་དང་། །ཉམས་ལ་མི་འཛེམ་ཉམས་པའི་སྐྱོན་ལ་སོགས། །ཉམས་དང་འགྲོགས་ཤིང་ཉམས་པ་དེ་དག་ཀུན། །ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཡུན་གྱིས་བསྒྲིབ་གྱུར་ཏེ། །རབ་ནོངས་འགྱོད་པའི་སེམས་ཀྱིས་མཐོལ་ལོ་བཤགས། །བྱམས་པའི་ཐུགས་ཀྱིས་བདག་ལ་དགོངས་ནས་ཀྱང་། །གཉིས་མེད་དབྱིངས་ལས་མི་འགྱུར་བདག་བཀོད་དེ། །མི་དམིགས་བཏང་སྙོམས་ངང་དུ་བཞུགས་ནས་ཀྱང་། །གཉིས་མེད་དོན་གྱི་ཚངས་པ་སྩལ་ཏུ་གསོལ། །དོན་དམ་གཉིས་མེད་སྤྲོས་ལས་འདས་པ་ལ། །རྣམ་རྟོག་གང་ཡང་དམིགས་པར་མི་འགྱུར་ཏེ། །ཀུན་རྫོབ་སྒྱུ་མ་ཙམ་གྱིས་དབང་གིས་ན། །ནོངས་པ་མཆིས་ན་རང་ནོངས་བཟོད་པར་གསོལ། །ཞེས་སོ། ༈། བརྒྱད་པ་བྱིན་འབེབས་ནི། །སྒྲུབ་ཟློག་ཞག་གྲངས་དང་འབྲེལ་བ་ལྟ་བུར་རྒྱས་པ་འགྲུབ་ན་གལ་ཆེ་བས། རང་གི་སྙིང་ག་ནས་འོད་འཕྲོས། །བདེ་བར་གཤེགས་པ་ཐམས་ཅད་ཀྱི་ཐུགས་རྗེའི་བྱིན་རླབས་བསྡུས་ནས། བདག་དང་དཀྱིལ་འཁོར་གྱི་གནས་སུ་ཐིམ་
པས་བྱིན་གྱིས་བརླབས་པར་གྱུར་པར་བསམ་ཞིང་། ཧཱུྃ། ནམ་མཁའི་མཐའ་དང་མཉམ་པའི་དཀྱིལ་འཁོར་ནས། །ཞི་ཁྲོ་རབ་འབྱམས་ལྷ་ཚོགས་བྱིན་རླབས་ཅན། །ཚུར་གཤེགས་དཀྱིལ་འཁོར་འདི་ལ་བྱིན་གྱིས་རློབས། །སྒྲུབ་མཆོག་རྣལ་འབྱོར་བདག་ལ་དབང་བསྐུར་སྩོལ། །གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །བདག་ཉིད་རྩ་བའི་དཀྱིལ་འཁོར་བྱིན་རླབས་ཅན། །ཚུར་གཤེགས་དཀྱིལ་འཁོར་སོགས་རྐང་པ་རྗེས་མ་གཉིས་འགྲེའོ། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །ཕྱོགས་བཅུའི་ཁྲོ་བོའི་དཀྱིལ་འཁོར་བྱིན་རླབས་ཅན༴ །ཞིང་ཆེན་གསར་རྙིང་སྤུངས་པའི་དཀྱིལ་འཁོར་ནས། །སྤྲུལ་པའི་ལྕམ་དྲལ་ཉི་ཤུ༴ །བྱམས་སོགས་ཚད་མེད་བཞི་ཡི་དཀྱིལ་འཁོར་ནས། །ཡེ་ཤེས་སྒོ་མ་བཞི་པོ༴ །ལས་བཞིའི་ཕྲིན་ལས་སྒྲུབ་པའི་དཀྱིལ་འཁོར་ནས། །ཕུར་པ་སྲས་ཀྱི་ལྷ་ཚོགས༴ །བསྐལ་པ་བརྒྱད་ཁྲི་བཞི་སྟོང་ཕ་རོལ་ནས། །གཤིན་རྗེ་དམར་ནག་ལྷ་ཚོགས༴ །རཀྟ་མཚོ་ལྟར་འཁྱིལ་བའི་དཀྱིལ་འཁོར་ནས། །མ་མོ་མཁའ་འགྲོའི་ལྷ་ཚོགས༴ །ཀེང་རུས་རི་ལྟར་སྤུངས་པའི་དཀྱིལ་འཁོར་ནས། །གིང་ཆེན་ཀ་རའི་ལྷ་ཚོགས༴ །མ་སྲིང་བྱམས་པའི་ཚུལ་གྱིས་གྲོགས་མཛད་མ། །ཕྱི་ནང་མཁའ་འགྲོ་འཁོར་བཅས༴ །ལྷོ་ནུབ་སྲིན་པོ་བསྣོལ་བའི་གདན་སྟེང་དུ། །སློབ་
དཔོན་པདྨ་འབྱུང་གནས་བྱིན་རླབས་ཅན། །ཚུར་གཤེགས་དཀྱིལ་འཁོར་འདི་ལ་བྱིན་གྱིས་རློབས། །སྒྲུབ་མཆོག་རྣལ་འབྱོར་བདག་ལ་དབང་བསྐུར་སྩོལ། །ཨ་ལ་ལ་ཧོཿཧཱུྃ་ཧཱུྃ་ཧཱུྃ་ཛཿཧཱུྃ་བྃ་ཧོཿས་མ་ཡ་ཧོཿས་མ་ཡ་སྟྃྭ། ཞེས་དང་། འཕགས་མཆོག་ཐུགས་རྗེའི་སོགས་ལ་འཇུག་གོ། ༈ །གཏོར་ཆོག་སྐབས་དཀར་བདུད་ལྕམ་བྲལ་ཕུར་སྲུང་རྣམས་ཀྱི་གཏོར་ཆོག་མདོར་བསྡུས་པ་ནི། །དཀར་མོ་ལ་ཟླུམ་གཏོར་དཀར་པོ། །དེའི་གཡོན་ཏུ་བདུད་རྒྱལ་དང་། །དེའི་གཡོན་ཏུ་ཕུར་སྲུང་སྟེ། གཉིས་ཀ་དམར་གཏོར་གྲུ་གསུམ་རེ་བཤམ། ནང་མཆོད་ཆུ་ཆང་བྲན་ལ་བསང་སྦྱང་། སྟོང་པའི་ངང་ལས་ཡཾ་ལས་རླུང་རཾ་ལས་མེ་ཀཾ་ལས་མི་མགོའི་སྒྱེད་པུ་གསུམ་གྱི་སྟེང་དུ། ཨཿལས་བྱུང་བའི་ཐོད་པ་ཡངས་པར་ཧཱུྃ་ཨོཾ་ཏྲཱཾ་ཧྲཱིཿཨཱཿལས་ཤ་ལྔ་བདུད་རྩི་ལྔ་ཡེ་ཤེས་ལྔའི་ངོ་བོར་གྱུར། རླུང་གཡོས་མེ་སྦར་རྫས་རྣམས་འོད་དུ་ཞུ་བའི་རླངས་པ་ཧཱུྃ་ཨོཾ་སྭཱ་ཨཱཿཧཿལས་ཕྱག་མཚན་ལྔར་གྱུར། ཧཱུྃ་བཛྲ་དྷྲྀ་ཀ་ཨོཾ་ཛཱི་ན་ཛི་ཀ་ས་རཏྣ་དྷྲྀཀ །ཨཱཿཨ་རོ་ལིཀ་ཧཱ་དྲ་ཛྙཱ་དྷྲྀ་ཀ །ཞེས་བརྗོད། ཧེ་རུ་ཀ་ཡབ་ཡུམ་བཅུར་གྱུར། ས་མ་ཡ་སྟཾྭ། ཞེས་བརྗོད། །སྦྱོར་བའི་མེས་འོད་དུ་ཞུ་ཨོཾ་ཨཱཿཧཱུྃ་དུ་གྱུར། དེ་ལས་འོད་འཕྲོས་པས་འཇིག་རྟེན་དང་འཇིག་རྟེན་ལས་འདས་པའི་བདུད་རྩི་བཀུག་ནས་བསྟིམ། འོག་གི་བདུད་རྩི་དང་འདྲེས་པས་ཁ་དོག་དྲི་རོ་ནུས་པ་ཕུན་སུམ་ཚོགས་པ་དང་ལྡན་པར་གྱུར། ཨོཾ་ཨཱཿཧཱུྃ་ཧོཿལན་གསུམ། མདུན་གྱི་ནམ་
མཁའི་གནས་སུ་པདྨ་ཉི་ཟླའི་གདན་གྱི་སྟེང་དུ་བྷྱོཿདཀར་པོ་ཡོངས་སུ་གྱུར་པ་ལས། དཀར་མོ་ཉི་ཟླ་སྟོང་གི་ཐོད་པའི་ཕྲེང་བ་ཅན་སྐུ་མདོག་དཀར་མོ་ཞལ་གཅིག་ཕྱག་གཉིས། སྤྱན་གསུམ་དང་ལྡན་པ་ཕྱག་གཡས་པས་རི་རབ་སྒོང་རྡོར་འཕེན་ཅིང་། གཡོན་པས་གླིང་བཞི་བྱོ་ལྡོག་ཏུ་མཛད་པ། ཉི་ཟླ་བརྒྱ་ཡིས་དབུ་ལ་བརྒྱན་ཅིང་ཉི་ཟླ་དགུ་པ་རྒྱས་དོ་ཤལ་བྱས་པས། རིན་པོ་ཆེའི་རྒྱན་དང་དར་དཀར་པོའི་ན་བཟའ་ཅན། ཡེ་ཤེས་ཀྱི་མེ་འབར་བའི་དབུས་ན་ཞབས་གཉིས་མཉམ་པའི་སྟབས་ཀྱིས་བཞེངས་པ། དེའི་གཡོན་ཏུ་རྟ་ནག་པོའི་སྟེང་དུ་ཧཱུྃཿལས་བདུད་ཀྱི་རྒྱལ་པོ་ཐོད་པའི་ཕྲེང་བ་ཅན་སྐུ་མདོག་ནག་པོ་ཞལ་གཅིག་ཕྱག་གཉིས་སྤྱན་གསུམ་པ་ཞལ་མཆེ་བ་གཙིགས་ཤིང་ལྗགས་འདྲིལ་བ། ཕྱག་གཡས་པས་བ་དན་ནག་པོ་ནམ་མཁའ་ལ་ཕྱར་ཞིང་། གཡོན་པས་རུས་ཕྲེང་འཕྱར་སྟབས་སུ་འཛིན་པ། །དར་ནག་གི་ན་བཟའ་ཅན་མི་མགོའི་ཕྲེང་བ་དང་སྦྲུལ་གྱིས་བརྒྱན་པ། །འཁོར་འཆི་བདག་ནག་པོ་རང་དང་འདྲ་བ་བརྒྱད་ཀྱིས་བསྐོར་བ། །གཉིས་ཀའི་དཔྲལ་བར་ཨོཾ་དཀར་པོ། །མགྲིན་པར་ཨཱཿདམར་པོ། །སྙིང་གར་ཧཱུྃ་སྔོན་པོ། །ཐུགས་ཀའི་ཧཱུྃ་ལས་འོད་འཕྲོས་པས་རང་བཞིན་གྱི་གནས་ནས་དཀར་མོ་ཉི་ཟླ་དང་། བདུད་ཀྱི་རྒྱལ་པོ་འཁོར་དང་བཅས་པ་བཛྲ་ས་མཱ་ཛཿབྷྱོཿཆེ་བའི་ཆེ་མཆོག །འདིའི་སྒོང་ལ་རྡོ་རྗེ་གཡོ་བ་ཅིང་དྲིལ་བུ་བསིལ། གསང་བའི་གཟུགས།
ཐིག་ལེ་སྦྱོར་བའི་ཡུམ་གཅིག་མ། །དཀར་མོ་ཉི་ཟླའི་ཐོད་ཕྲེང་ཅན། །སྲོག་བདག་བདུད་ཀྱི་རྒྱལ་བ་ཡང་། །གནས་འདི་ཉིད་དུ་གཤེགས་སུ་གསོལ། །ཨོཾ་ཨེ་ཧྱ་ཧི་ས་མཱ་ཛཿ ཛཿཧཱུྃ་བཾ་ཧོཿ པདྨ་ཀ་མ་ལ་ཡ་སྟྭཾཾ༔ ཨོཾ་ཨཱ་བྷི་ཥིཉྩ་མཾ། ཞེས་གསོལ་བ་བཏབ་པས་ནམ་མཁར་བཞུགས་པའི་སངས་རྒྱས་རྣམས་ཀྱིས། ཨོཾ་བཛྲི་བྷཱ་ཝ་ཨ་བྷི་ཥིཉྩ་ཧཱུྃཿཞེས་གསུང་ཞིང་དབང་བསྐུར་སྐུ་གང་། དྲི་མ་དག་ཆུ་ལྷག་མ་ཡར་ལུད་པ་ལས། །རྡོ་རྗེ་སེམས་དཔའ་རེ་རེས་དབུ་བརྒྱན། དེ་ནས་རྡོ་རྗེ་རྩེ་ལྔ་པའི་ཕྱག་རྒྱ་བཅས་ལ། བཛྲ་ས་མ་ཡ་སྟྭཾཾ། བཛྲ་ས་མ་ཡ་ཧོཿ དཀར་མོ་ཉི་ཟླ་བདུད་འདུལ་ཐོད་ཕྲེང་ཅན་འཁོར་དང་བཅས་པ་ཁྱེད་རྣམས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། རྡོ་རྗེ་ཕུར་པའི་ལྷ་ཚོགས་རྣམས་ཀྱི་བཀའ་དང་དམ་ལས་མ་འདའ་བར། དམ་ཚིག་སྲུངས། བསྟན་པ་སྐྱོངས། དཀོན་མཆོག་གི་དབུ་འཕང་བསྟོད། ཁྱད་པར་དུ་སངས་རྒྱས་ཀྱི་བསྟན་པ་དང་། བསྟན་པ་འཛིན་པ་རྣམས་དང་། རྣལ་འབྱོར་པ་བདག་ཅག་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་དགྲ་བགེགས་ལོག་པར་འདྲེན་པའི་ཚོགས་ཐམས་ཅད་ཚར་བཅད་པ་དང་། བསམ་སྦྱོར་ཆོས་མཐུན་ཡིད་བཞིན་དུ་འགྲུབ་པར་མཛད་དུ་གསོལ། །རྡོ་རྗེ་ཐལ་མོ་ཁ་གྱེན་དུ་ཕྱེ་ལ། ཨོཾ་བཛྲ་
ཤཱི༚ནྟ་པདྨ་ཀུ་རྟི༚་བྷྱོཿ ཨོཾ་སརྦ་མཱ་ར་ཀྲྀཥྞ་ཀཱ་པཱ་ལ་མཱ་ལ་དྷཱ་ར་ས་པ་རི་ཝཱ་ར་ཨི་དཾ་བ་ལི༚་བྷུཉྫ་ཁ་ཁ་ཁཱ་ཧི་ཁཱ་ཧི་སརྦ་ཤཱ་ཏྲུན་བྷི།།།ན་མར་ཡ་ཧཱུྃ་ཕཊཿཅེས་པ་གསུམ་མམ་ལྔས་གཏོར་མ་འབུལ། ཨོཾ་ཨརྒྷཾ་པ་དྱཾ་པུཥྤེ་དྷུཥྤ་ཨཱ་ལོ་ཀ །གནྡྷཾ། ནཻ་ཝི་དྱཾ། ཤབྡཨཱཿཧཱུྃ༔ ཨོཾ་ཨཱཿཧཱུྃ༔ ཤཱི༚ནྟ་ཀུ་རུ། པཱུཥྚྀ་ངྐུ་རུ་ཝ་ཤཾ་ཀུ་རུ། དཀར་མོ་ཉི་ཟླ་བདུད་རྒྱལ་ཐོད་པའི་ཕྲེང་བ་ཅན་འཁོར་དང་བཅས་པ་རྣམས་ཀྱི་ཞལ་དུ་མཆོད་པ་དམ་པ་འབུལ་ལ། ཅེས་པས་ནང་མཆོད་ཕུལ་ནས། སངས་རྒྱས་ཀྱི་བསྟན་པ་དར་བ་དང་། བླ་མ་དམ་པ་རྣམས་ཀྱི་སྐུ་ཚེ་དང་མཛད་པ་ཕྲིན་ལས་ཀྱི་བར་ཆད་ཐམས་ཅད་ཞི་བ་དང་། བདག་ཅག་འཁོར་དང་བཅས་པ་རྣམས་ཀྱིས་བསམ་དོན་ཆོས་བཞིན་དུ་འགྲུབ་པར་མཛད་དུ་གསོལ། བསྟོད་པ་ནི། །བྷྱོཿ །དཔལ་ལྡན་དཀར་མོ་ཆེན་མོ་ནི། །སྔོན་ཚེ་ཆེ་མཆོག་ཧེ་རུ་ཀའི། །སྤྱན་སྔར་ཁས་བླངས་དེ་བཞིན་དུ། །བདུད་དང་མུ་སྟེགས་འདུལ་བ་དང་། །དགྲ་བགེགས་མ་ལུས་སྒྲོལ་བ་དང་། །སྒྲུབ་པོ་འཁོར་བཅས། ཚིགས་བཅད་དེའི་མཇུག་ཏུ་རྡོ་རྗེ་གསོར་ཞིང་དྲིལ་བུ་བསིལ། །བསྲུང་བ་དང་། །བསམ་པའི་དོན་རྣམས་བསྒྲུབ་པ་དང་། །བཅོལ་པའི་ཕྲིན་ལས་གྲུབ་པར་མཛོད། ཧཱུྃཿ སྔོན་ཚེ་བདུད་ཀུན་གྱི་ནི་བདག་པོ་ཆེ། །ཤིན་ཏུ་མི་ཟད་རྡོ་རྗེ་ཁྲག་འཐུང་གི། སྤྱན་སྔར་དམ་བཅས་བདུད་རྒྱལ་ཐོད་ཕྲེང་ཅན། །མཐུ་རྩལ་རྨད་བྱུང་ནག་པོ་ཆེ་ལ་བསྟོད། །བདུད་རྟ་བྲག་ནག་རུས་
རྒྱན་ཅན། །དེ་སྟེང་གཤིན་རྗེ་ཁྲོས་བའི་གཟུགས། །བ་དན་མི་སྙིང་ཁྲོམ་ཤིང་ཐོགས། །སྲོག་བདག་ནག་པོ་ཁྱོད་ལ་བསྟོད། ཅེས་བསྟོད། དེ་ནས་ཕུར་སྲུང་དམ་ཅན་བཅུ་གཉིས་ཀྱི་གཏོར་མ་ལ། ཨོཾ་ཨཱཿཧཱུྃ་ཧོཿ ལན་གསུམ། ཧཱུྃ། །སློབ་དཔོན་ཆེན་པོ་པདྨ་འབྱུང་གནས་ཀྱི། །སྤྱན་སྔར་ཕུར་པའི་བསྲུང་མར་ཞལ་བཞེས་པ། །བདག་ཉིད་ཆེན་མོ་ཤྭ་ན་བསེ་མོའི་ཚོགས། །དཔལ་གྱི་ཕོ་ཉ་མཐུ་རྩལ། །བྱ་ཁྱུང་གི་ཕྱག་རྒྱ་བསྟན་ཏེ་རྫུ་འཕྲུལ། འདི་སྐོང་ལ་རྡོ་རྗེ་གཡབ་ཅིང་དྲིལ་བུ་བསིལ། ཅན། །དམ་ཚིག་དབང་གིས་གནས་འདིར་གཤེགས་སུ་གསོལ། །ཨོཾ་བཛྲ་ཀཱི་ལི་ཀཱི་ལ་ཡ་དྷ་ཏི་མ་མ་ཤྲཱི་གྷྲཾ་ཀརྨ་ཀཱ་ར་མཱ་ར་སེ་ན་པྲ་མ་རྔྷནི་ས་པ་རི་ཝཱ་ར་བཛྲ་ས་མཱ་ཛཿ ཡངས་པ་རི་ཝཱ་ར་ཡན་གྱི་རྗེས་སུ། ཨི་དཾ་བ་ལི༚་བྷུཉྫ་ཁ་ཁ་ཁཱ་ཧི་ཁཱ་ཧི། སོགས་ལན་གསུམ་མམ་ལྔ་ཡིས་གཏོར་མ་དབུལ་ལ་ནང་མཆོད་གཏོར་ཞིང་། མ་ཧཱ་པེཉྩ་ཨ་མྲྀ་ཏ་ཁཱ་ཧིཿ མ་ཧཱ་རཀྟ་ཁཱ་ཧིཿ བདག་ཉིད་མ་བཞི། ཤྭ་ན་མ་བཞི། ས་བདག་མ་བཞི། ཕུར་སྲུང་དམ་ཅན་བཅུ་གཉིས་འཁོར་དང་བཅས་པའི་ཞལ་དུ་མཆོད་པ་དམ་པ་འབུལ་ལོ། །སངས་རྒྱས་ཀྱི་བསྟན་པ་དར་བ་སོགས་གོང་ལྟར་བརྗོད། ཧཱུྃ། སློབ་དཔོན་ཆེན་པོ་པདྨ་འབྱུང་གནས་ཀྱི། སྤྱན་སྔར་ཕུར་པའི་སྲུང་མ་ཞལ་བཞེས་པ། །བདག་ཉིད་ཆེན་མོ་ཤྭ་ན་བསེ་མོའི་ཚོགས། །དཔལ་གྱི་ཕོ་ཉ་མཐུ་རྩལ་རྫུ་འཕྲུལ་ཅན། །དམ་ཅན་མ་མོ་སྡེ་
གསུམ་མཆེད་བཅུ་གཉིས། །རྣམ་ལྔ་བརྒྱན་གྱི་གཏོར་མ་འདི་བཞེས་ལ། །མ་སྲིང་བྱམས་པའི་ཚུལ་གྱིས་གྲོགས་མཛོད་ཅིག །ཐུགས་དམ་རྗེས་དགོངས་བཅོལ་བའི་ཕྲིན་ལས་མཛོད། །ཅེས་པ་ཙམ་གྱིས་གཏོར་མ་འབུལ་ལོ། ༈ །གལ་ཏེ་ཡུལ་ལུགས་དང་བསྟུན་ནས་སྐོང་ཟློག་བརྒྱ་ཚར་སོགས་བསགས་དགོས་པ་བྱུང་ན་ལུགས་འདིའི་ཕྱག་བཞེས་སུ་མི་འབྱུང་ཡང་། གཏེར་མའི་ཕྱོགས་སུ་དར་སྲོལ་ཆེ་བ་བཞིན། སྐོང་གཏོར་སྤྱི་མཐུན་བཅའ། ཚོགས་དང་པོ་ཕུལ་རྗེས། བར་པས་སྐོང་བ་གསོས་ལ། ཧཱུྃ། སྣང་སྲིད་ཕུར་བུས་གདབ་པའི་ཕྱིར། །རྡོ་རྗེ་གཞོན་ནུའི་ཐུགས་དམ་བསྐང་། ཁམས་སུམ་འཁོར་བ་རྒྱས་འདེབས་ཕྱིར། །འཁོར་ལོ་རྒྱས་འདེབས་ཐུགས་དམ་བསྐང་། །རིགས་འགྲེ། མི་དགེ་བཅུ་པོ་ཚར་གཅོད་ཕྱིར། །ཁྲོ་རྒྱལ་ཡབ་བཅུའི༴ །དགེ་བཅུ་དང་དུ་བླང་བའི་ཕྱིར། །ཁྲོ་མོ་བཅུ་ཡི༴ །ཕྱོགས་བཅུར་སྤྲུལ་པ་འགྱེད་པའི་ཕྱིར། །ཁྲ་ཐབས་ཉི་ཤུའི༴ །གདུག་པའི་དགྲ་བགེགས་སྒྲོལ་བའི་ཕྱིར། །སྲས་མཆོག་ཉེར་གཅིག༴ །ཞི་རྒྱས་དབང་དྲག་ལས་སྒྲུབ་ཕྱིར། །ཕྲིན་ལས་བཞི་ཡི༴ །སློབ་དཔོན་སྐུ་དགྲ་སྒྲོལ་བའི་ཕྱིར། །ཤྭ་ན་མཆེད་བཞིའི༴ །བསྟན་པའི་སྤྱི་དགྲ་སྒྲོལ་བའི་ཕྱིར། རེ་ཏི་མཆེད་བཞིའི༴ །རྣལ་འབྱོར་སྒྲོས་དགྲ་སྒྲོལ་བའི་ཕྱིར། །བསེ་མོ་བཞིའི༴ ། མྱུར་མགྱོགས་དྲག་པོའི་ལས་མཛད་ཕྱིར། །བསེ་ལྕགས་དུང་གསུམ༴ །འགུགས་འདྲེན་འཆིང་སྡོམ་མྱོས་བྱའི་ཕྱིར། །
སྒོ་མ་བཞི་ཡི༴ །རུ་དྲ་སྡེ་གསུམ་འདུལ་བའི་ཕྱིར། །གིང་ཆེན་བཅོ་བརྒྱད༴ །ཕྱོགས་བཅུར་དམག་དཔུང་དབབ་པའི་ཕྱིར། །མ་ང་དུ་ན་སྲིད་བཞིའི༴ །འཕྲིན་ལས་རྒྱ་མཚོ་སྒྲུབ་པའི་ཕྱིར། །དབང་ཕྱུག་ཉེར་བརྒྱད་ཐུགས་དམ་བསྐང་། །ཞེས་དང་གཞན་ཡང་། བསྐང་ངོ་བསྐལ་པས་ཐུགས་དམ་བསྐང་། །དཀྱིལ་འཁོར་ལྷ་ཚོགས་ཐུགས་དམ་བསྐང་། །བདུད་རྩི་སྨིན་གྱིས༴ །བ་ལི༚ང་གཏོར་མས༴ །རཀྟ་དམར་གྱིས༴ །ཞལ་ཟས་ཚོགས་ཀྱིས༴ །དཀྱིལ་འཁོར་ཞལ་གྱིས་ །ཛ་གད་ཕུད་ཀྱིས༴ །ཞུན་ཆེན་མར་མེས༴ །སྲོག་དབུགས་མདངས་ཀྱིས༴ །གསུར་ཆེན་དྲི་ཡིས༴ །རོལ་མོ་སྒྲ་ཡིས་ཐུགས་དམ་བསྐང་། བསྐངས་གྱུར་དབང་དང་དངོས་གྲུབ་སྩོལ། །གཡར་དམ་གཉེན་པོ་སོར་སྩོལ་ཅིག །དེ་ནས་རྗེས་རྣམས་བཞག་སྟེ་སྐོར་བ་ཕྱིར་ཟློག་ཏུ་ཐལ་མོ་བདབ་ཅིང་། དེ་ལྟར་སྐོང་བས་བསྐངས་གསོས་ནས། །འདི་ལྟར་བཟློག་པའི་ཕྲིན་ལས་མཛོད། །རྣལ་འབྱོར་བདག་ཅག་འཁོར་བཅས་ལ། །ཡས་ཀྱིས་བདུད་གཡོས་ཕྱིར་ལ་ཟློག །མས་ཀྱི་སྲི་ལངས་ཕྱིར་ལ་ཟློག །འགྲེའོ། །ཉེ་བའི་བྱོལ་པོ་ཕྱིར༴ །ཡུལ་སའི་འགྲིམ་ཆགས་ཕྱིར༴ །ཕ་ཚན་རྒྱ་འདྲེ་ཕྱིར༴ །མ་བུའི་བྱུར་འདྲེ་ཕྱིར༴ །གཤིན་རྗེའི་འཁྲུལ་འཁོར༴ །མ་མོའི་ཁྲག་ཟོར་ཕྱིར༴ །བདུད་ཀྱི་ཁྲམ་ཁ་ཕྱིར༴ །བཙན་གྱི་གཟེར་ཀ་ཕྱིར༴ །ས་བདག་དུག་བྱེད་ཕྱིར༴ །རྒྱལ་པོའི་
སྨྱོ་འབོག་ཕྱིར༴ །གཟའ་ཡི་ཀིང་ཀང་ཕྱིར༴ །མུ་སྟེགས་ངན་སྔགས་ཕྱིར༴ །ཐེ་རང་སྲིས་རྐུན་ཕྱིར༴ །ནད་ཁ་རིམས་ཁ༴ །སྔགས་པའི་ཕུར་ཁ་ཕྱིར༴ །བོན་གྱི་བོན་ཟོར་ཕྱིར༴ །སུམ་བའི་གླང་ཟོར་ཕྱིར༴ །མི་ཉག་འབོ་ལེ་ཕྱིར༴ །ལོ་ཟླ་ཞག་སྐེག་ཕྱིར༴ །མོ་ངན་རྨིས་ངན་ཕྱིར༴ །ལྟས་ངན་མཚན་ངན་ཕྱིར༴ །ཕོ་བརྒྱའི་མདའ་བདར་མཚོན་ཁ་བཟློག །མོ་བརྒྱའི་དུག་གཡོས་ཟས་ཁ་བཟློག །མི་ནག་སྐྱེ་བོའི་ཡོ་ག་ཟློག །བྲན་ཁོལ་ངན་པའི་དམོད་མཆུ་ཟློག །དགྲ་ལ་བྷྱོ་ལ་བསྒྲལ་དུ་གསོལ། །བགེགས་ལ་བྷྱོ་ལ་རྡུལ་དུ་རློགས། ཞེས་སྐོང་ཟློག་འདི་ནི་ཕུར་པ་སྤུ་གྲི་ལས་བྱུང་བའོ། ༈ །ཚོགས་ལྷག་རྒྱས་པ་མི་ལྕོགས་པའི་སྐབས་སུ། །སྣོད་ཇི་ལྟར་རིགས་པར་ཚོགས་ཀྱི་ལྷག་མ་བསྡུས་ལ་ཆང་གིས་སྦྱངས་ཏེ། །ལྷག་མ་ཟ་བའི་བྱེ་བྲག་ཕོ་ཏ་པྲ་མེན་མེ་འབར་མ་དབང་ཕྱུག་མམ་བདུད་སྲིད་བཞི་སོགས་ཕོ་ཉ་སུམ་བརྒྱ་དྲུག་ཅུ་རྣམས་བློས་བཀུག་ལ་མཆོད་པར་བསམ་ཞིང་རྡོ་རྗེ་དྲིལ་བུ་འཛིན་པས་ངག་ཏུ། བཅོམ་ལྡན་རྡོ་རྗེ་གཞོན་ནུ་དང་། །ཡུམ་ཆེན་འཁོར་ལོ་རྒྱས་འདེབས་མ། །སྤྲུལ་པའི་ཕོ་ཉ་དཔག་ཡས་ལས། །གྲུབ་པ་གསང་བ་འབར་མོའི་ཚོགས། །ཚུར་གཤེགས་གཏོར་མ་འདི་བཞེས་ལ། །རྡོ་རྗེ་ལྕམ་དྲལ་བསྲུང་བ་དང་། །རྐྱེན་ལས་བྱུང་བའི་དགྲ་བོ་རྣམས། །ཡུད་ཙམ་གྱིས་ནི་མེད་པར་མཛོད། །ཅེས་བརྗོད་ཅིང་དམར་གྱི་ཨརྒྷཾ་སྦྲེང་། དཔལ་གྱི་མཁའ་འགྲོ་རྣམས་སྤྱན་དྲངས་ཤིང་མཆོད་པར་བྱ་སྟེ། །དཔལ་ཆེན་ཁྲོ་རྒྱལ་ཡབ་
ཡུམ་གྱིས། །ཕོ་ཉ་འཇིག་རྟེན་འཇིག་རྟེན་འདས། །དེ་ཡི་བཀའ་ཉན་ཕོ་ཉའི་ཚོགས། །ཕྱོགས་བཅུ་དག་ནས་གཤེགས་སུ་གསོལ། །ཁྱོད་ཀྱི་ཐུགས་དམ་དུས་ལ་བབས། །སྔོན་གྱི་ཐུགས་དམ་རྗེས་དགོངས་ཏེ། །མཆོད་པ་དམ་པ་འདི་བཞེས་ལ། །བཅོལ་བའི་ཕྲིན་ལས་གྲུབ་པར་མཛོད། །གཞན་ཡང་ཕྲ་མེན་ཚོགས་དང་བཅས། །འབར་མ་ཆེན་མོ་ཁྱེད་རྣམས་ཀྱང་། །སྔོན་གྱི་ཐུགས་དམ་རྗེས་དགོངས་ལ། །བཅོལ་བའི་ཕྲིན་ལས་གྲུབ་པར་མཛོད། །ཨོཾ་བཛྲ་ཌཱ་ཀི་ནི་པྲ་ཏཱིཙྪ་ཨི་མི་བ་ལི༚་ཧཱུྃ། །ཨོཾ་བུདྡྷ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལི༚་ཨོཾ། །ཨོཾ་རཏྣ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལི༚་ཏྲཱཾཿ །ཨོཾ་པདྨ་ཌཱ་ཀཱི་ནི་པྲ་ཏཱིཙྪ་ཨི་མཾ་བ་ལི༚་ཧྲཱིཿ །ཨོཾ་ཀརྨཱ་ཌཱ་ཀི་ནི་བྲ་ཏཱིཙྪ་ཨི་མཾ་པ་ལི༚་ཨཱཿ ཞེས་པས་གཙོ་མོ་བརྒྱད་ལ་གཏོར་མ་བྱིན་ལ། ཨོཾ་ཨུཙྪིཥྚ་བ་ལི༚་ཏ་བྷཀྵ་སི་སྭཱ་ཧཱཿ ཞེས་ལྷག་མ་ལ་ཁ་ཁྲུ་བཏབ་ལ་སྟེགས་ཅུང་ཟད་དམའ་བར་བཞག་སྟེ། བསྔོ་བ་ནི། བྷྱོཿ ཁྲོ་རྒྱལ་དཔལ་གྱི་ཕོ་ཉ་མོ། །མ་མོ་བདུན་དང་སྲིང་མོ་བཞི། །དཔལ་ལྡན་ལྷ་མོ་རེ་མ་ཏི། །བདུད་འདུལ་ནག་མོ་མཆེད་བཞི་ཡང་། །སྔོན་གྱི་ཐུགས་དམ་རྗེས་དགོངས་ཤིང་། །ཤ་ཁྲག་གཏོར་མ་འདི་བཞེས་ལ། །ཁྱོད་ཀྱི་ཐུགས་དམ་དུས་ལ་བབ། །བཅོལ་བའི་ཕྲིན་ལས་གྲུབ་པར་མཛོད། །སརྦ་ཨཱ་ན་ཡ་ཧཱུྃ་ཕཊཿཏ་ཐཱ་ཡ་ཏ་ཐཱ་ཡ་ཧཱུྃ་ཕཊ༔ ཅེས་བརྗོད་ཅིང་ལྷག་མ་ལ་བཏབ་པོ། ཆད་ལྷག་མར་བྲན་ཅིང་ཉིན་མོ་ཡིན་ན་རེ་དབུ་བཙུགས། །མཚན་
མོ་དཔལ་འབར་གཙུགས་ལ་ཕྱིར་དོར། འདི་ནི་གསང་ཆེན་རྒྱ་གར་བས་མཛད་པ་སྟེ། རྒྱུན་གྱི་ཚོགས་མཆོད་ལྟ་བུ་ལ་འབྲེལ་གྱི། སྒྲུབ་ཟློག་ཞག་གྲངས་སྐབས་སོགས་ལྷག་ཆོག་རྒྱས་པ་ཉིད་ངེས་པར་དགོས་ཆེའོ། ༈། དངོས་གྲུབ་ལེན་ཆོ་ག་གྲོལ་ཉིན་གཞུང་ལྟར་ལ། རྒྱུན་གྱི་དཀྱུས་སུ། ཡེ་ཤེས་ལྔ་ལྡན་རིགས་ལྔ་བདེ་བར་གཤེགས། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །འཁོར་ལོ་རབ་བསྐོར་ཞི་ཁྲོའི་སྐུར་སྟོན་པ། །ཐུགས་དམ་བཞིན་དུ་བདག་ལ་བརྩེར་དགོངས་ནས། །དྲག་པོའི་སྟོབས་ཀྱིས་དགྲ་བགེགས་བསྒྲལ་བ་དང་། །མཆོག་དང་ཐུན་མོང་དངོས་གྲུབ་སྩལ་ཏུ་གསོལ། །ཅེས་བརྗོད་པས། །མཆོག་དང་ཐུན་མོང་གི་དངོས་གྲུབ་མ་ལུས་པ་བརྩལ་བར་བསམ་མོ། བསྙེན་སྒྲུབ་གྱི་མཇུག་ལྟ་བུར་དངོས་གྲུབ་ལེན་ཆོག་རྒྱས་པར་བྱ་དགོས་པས། དེ་ལ་བཞི། དང་པོ་དངོས་གྲུབ་ཀྱི་རྟེན་རྫས་བསགས་པ་ནི། དཀྱིལ་འཁོར་གྱི་མཐའ་སྐོར་དུ་གཞི་གཙང་མ་ལ་མེ་ཏོག་སིལ་མ་བཀྲམ་པའི་ཁར། བཟའ་བཅའ་བཏུང་བའི་རྫས་གང་འབྱོར་འདུ་བྱས་ཏེ། མར་ཐུད་ཞོ་ཟན་སོགས་དཀར་བའི་རྣམ་པ་རྣམས་ཤར། ཁུར་བ་ཤིང་ཏོག་སོགས་སེར་བའི་རྣམ་པ་ལྷོ། །ཤ་སོགས་དམར་བ་ནུབ། ཆང་སོགས་བསྔོ་བ་རྣམས་བྱང་དུ་བཀོད། དར་དམར་རས་དཀར་ཁ་ཚར་མ་ཉམས་པར་རྡོ་རྗེ་རྒྱ་གྲམ་བྲེས་པས་ཁ་བཅད་ལ་རྒྱས་གདབ། མཆོད་གཏོར་གསར་བ་བཟང་དུ་བཤམས་ཤིང་གཏལ་གཏོར་རྙིང་པ་ཁ་གསོ། །སྒྲུབ་པ་པོ་རྣམས་རྒྱན་དང་ཆས་གོས་བཟང་པོ་བསྟར། དངོས་གྲུབ་ཀྱི་གནས་ལ་ཡིད་རྩེ་གཅིག་ཏུ་བྱའོ། །གཉིས་པ་བགེགས་བསལ་བ་ནི། ཉོན་ཅིག་
བགེགས་དང་སོགས་ཀྱི་མཐར། སུམྦྷ་དང་ཁྲོ་བཅུའི་སྔགས་ཀྱིས་བགེགས་བསྐྲད་དེ་མཚམས་བཅད། གསུམ་པ་བྱིན་འབེབས་པ་ནི། དཀྱིལ་འཁོར་ལ་བསྐོར་ཞིང་སྤོས་རོལ། སྤྱུགས་ཀླུའི་གཡབ་མོ་དང་བཅས་པས་བྱིན་དབབ། བཞི་པ་བསྐུལ་ཚིག་གི་སྒོ་ནས་དངོས་གྲུབ་བླང་བ་ལ་གཉིས་ལས། དང་པོ་ཡེ་ཤེས་ཀྱི་ལྷ་ལས་བླང་བ་ནི་དཀྱིལ་འཁོར་གྱི་ལྷ་ཚོགས་རྣམས་ལས་སྐུ་གསུང་ཐུགས་ཀྱི་དངོས་གྲུབ་ཐམས་ཅད་འོད་ཟེར་གྱི་ཚུལ་དུ་མཚོ་ལ་སྦྲང་ཆར་བབས་པ་ལྟར་བདག་དང་དངོས་གྲུབ་ཀྱི་རྫས་རྣམས་ལ་སིབ་སིབ་ཐིམ་པར་བསམ་ཞིང་། །ཧཱུྃ། དཔལ་ཆེན་རྡོ་རྗེ་གཞོན་ནུ་སོགས་ལས་གཞུང་ལྟར་གྱེར་རོ། །གཉིས་པ་ལ་མཚན་མ་རྫས་ལས་བླང་བ་ནི། དངོས་གྲུབ་ཀྱི་རྫས་ཀྱིས་ཛ་གད་ནས་སྣོད་ཆེ་བ་གཅིག་ཏུ་བླུགས་པའི་སྟེང་བདུད་རྩི་བཏབ་ལ། སྒྲུབས་ཐབས་ལྟར་བྱིན་གྱིས་བརླབས་ཏེ་སྨན་མཆོད་རྒྱས་པར་བྱས་ནས། ཀཱི་ལ་ཡ་བརྒྱ་རྩ་བརྒྱད་བཟླས་པས་སྐྱེས་ལེན་གྱི་ཚུལ་དུ། ལྷ་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་འོད་ཟེར་དཀར་དམར་མཐིང་གསུམ་གྱི་རྣམ་པར་གྱུར་ཏེ་ཛ་གད་ལ་ཐིམ་པས། དེ་ཨོཾ་ཨཱ་ཧཱུྃ་གསུམ་དུ་གྱུར་པར་བསམས་ལ། ཨོཾ་ཨཱཿཧཱུྃ། རྡོ་རྗེ་ལྕེ་ཡི་དམ་ཚིག་ལ། །རྡོ་རྗེ་ཅན་གྱི་འབྲུ་གསུམ་བསྒོམ། །བདུད་རྩི་ལྔ་དང་སྦྱར་བའི་རྫས། །མྱངས་ན་དངོས་གྲུབ་ཐོབ་པར་འགྱུར། ཨོཾ་ན་མཿསརྦ་ཏ་ཐཱ་ག་ཏ་ཀཱ་ཡ་སིངྡྷི་ཨོཾ། ཝཱཀྐ་སིངྡྷི་ཨཱཿ ཙིཏྟ་སིངྡྷི་ཧཱུྃ། ཞེས་དངོས་གྲུབ་བླངས་ཏེ། ལྷག་མ་དངོས་གྲུབ་ཀྱི་རྫས་བྱིངས་དང་མཉམ་དུ་བཟའ་བཅའ་རྣམས་གཡས་དང་བཏུང་བ་རྣམས་གཡོན་
བསྐོར་དུ་དྲང་ཞིང་ཨ་ལ་ལ་ཧོཿ ཞེས་བླངས་ཏེ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་སིངྡྷི་ཕ་ལ་ཧོཿ ཞེས་རོལ་ཞིང་། ལྷ་དང་དངོས་གྲུབ་འོད་དུ་ཞུ་ནས་བདག་གི་ཐུགས་སྲོག་ལ་བསྡུ་ཞིང་དབྱེར་མེད་དུ་གྱུར་པར་བསམས་ལ། ཀཱ་ཡ་ཝཱཀ་ཙིཏྟ་ཏིཥྛ་བཛྲ་ཞེས་མེ་ཏོག་གི་ཆར་དབབ་ཅིང་རོལ་མོའི་སྒྲ་ཡང་གྲགས་པར་བྱ་སྟེ། ཤིས་བརྗོད་ཀྱི་དངོས་གྲུབ་བརྟན་པར་བྱའོ། ༈ །ལས་གཞུང་དུ་ཟུར་གྱིས་བསྟན་པ་ལྟར་ཚེ་འགུགས་སྦྱར་བ་སྤྲོ་ན། །དཀྱིལ་འཁོར་གྱི་ནུབ་ཏུ་བུམ་པ་མཚན་ཉིད་དང་ལྡན་པ་ཛ་གད་ལ་ཨ་མྲྀ་ཏ་བཏབ་པས་བཀང་། འབྲིའི་མར་འབྲུམ། མཆེད་ཀྱིས་གྲངས་དང་མཉམ་པ་བླུགས། དེའི་ཁར་ཚེ་རིང་ལ་བཀྲ་ཤིས་པའི་མིས་བླངས་པའི་འབྲུའི་ཕྱེ་ལ་ཚེ་འབྲང་ཟླུམ་བརྗིད་ཉི་ཟླས་བརྒྱན་པ་བཞག །དེ་ལ་ཚེའི་མདའ་དར་གཟུག་ཅིང་གཟུངས་ཐག་འཐེན་ཏེ་བསང་སྦྱང་། སྟོང་པའི་ངང་ལ་བྷྲཱུྃ་ལས་བུམ་པ་གཞལ་ཡས་ ཁང་རྡོ་རྗེའི་གུར 
་ཅན་དུ་གྱུར། རང་ཉིད་དཔལ་ཆེན་པོ་འཁོར་བཅས་ལས་འོད་ཟེར་ལྕགས་ཀྱུ་ལྟ་བུ་འཕྲོས་བས་འཁོར་འདས་ཀྱི་ཚེ་བཅུད་ཐམས་ཅད་བདུད་རྩིའི་རྣམ་པར་བཀུག་ནས་བུམ་ནང་དུ་བསྐྱིལ་བར་བསམ་ཞིང་། ཨོཾ་བཛྲ་ཀཱི་ལི་ཀཱི་ལ་ཡ་བཛྲ་ཨ་ཡུ་ཥེ་ཧཱུྃ་ཛཿ སིངྡྷི་ཕ་ལ་ཧཱུྃ་ཨཱཿ ཞེས་ཅི་འགྲུབ་བཟླས་ལ། ཕོ་ཉ་བསྐུལ་བ་ནི་ཚེ་མདའ་གཡབ་ཅིང་། ཧཱུྃ། དཔལ་ཆེན་འཁོར་བཅས་ཐུགས་ཀྱི་དཀྱིལ་འཁོར་ནས། །ཐུགས་རྗེའི་འོད་ཟེར་འཕྲོས་པས་ཚེ་འགུགས་ལྷ། །རྡོ་རྗེ་གཞོན་ནུ་ཁྲོ་བཅུ་ཡབ་ཡུམ་དང་། །ཟ་གསོད་སྒོ་སྐྱོང་དམ་ཅན་བཅས་རྣམས་ཀྱིས། །རྡོ་རྗེ་ཚེ་མཆོག་འགུགས་པའི་
ལས་མཛོད་ཅིག །ཨོཾ་བཛྲ་ཨ་ཡུ་ཥེ་ཧཱུྃ་ཛ་ཛཿ ཞེས་བཀུག་སྟེ་བུམ་པར་བསྟིམ། གྲོལ་ཉིན་དེའི་རྗེས་སུ། ཚེ་བུམ་འབྲང་རྒྱས་དང་བཅས་མཆེད་རྣམས་ཀྱི་སྤྱི་བོར་བཞག་སྟེ། །ཨོཾ་བཛྲ་ཀཱི་ལི་ཀི་ལ་ཡ་བཛྲ་ཨ་ཡུ་ཥེཿཨ་བྷིཥིཉྩ་ཧཱུྃ་ཨཱཿཞེས་དང་། གནས་གསུམ་སོ་སོར་བཞག་སྟེ། ཀཱ་ཡ་ཨཱ་ཡུ་ཥེ་ཨོཾ། ཝཱཀ་ཨཱ་ཡུཿཥེཿཨཱཿ །ཙིཏྟ་ཨཱ་ཡུ་ཥེ་ཧཱུྃ། ཞེས་སྐུ་གསུང་ཐུགས་ཀྱི་ཚེ་ཡི་དངོས་གྲུབ་བསྟིམ་ཞིང་དབང་བསྐུར་བདུད་རྩི་བླུད། ཚེ་མར་སྤྱི་གཙུག་ཏུ་བྱུགས་པས། །ལུས་མི་ཤིགས་པ་རྡོ་རྗེའི་རང་བཞིན། ངག་གྲགས་སྟོང་ཀཱི་ལ་ཡ་གྲགས། ཡིད་སྟོང་གསལ་འཆི་མེད་གཉུག་མའི་རང་བབས་སུ་འཇོག་ཏུ་བཅུག་སྟེ་མེ་ཏོག་འཐོར། །ཚེ་འབྲང་གཡས་བསྐོར་དང་ཚེ་ཆང་གཡོན་བསྐོར་དུ་རོལ་བར་བྱའོ། ༈ །བསྔོ་སྨོན་སྐབས། ཧོཿདགོངས་སུ་གསོལ་ལོ། །ཆོས་ཉིད་ཀྱི་བདེན་པའོ། །གསང་སྔགས་ཀྱི་བྱིན་གྱིས་རློབ་པོ། །སངས་རྒྱས་ཀྱི་མཐུའོ། །ཨ་བྷི་ཙཱརྻའི་དུས་ལ་བབ་བོ། །བརྣག་པ་ཁོ་ན་ལའོ། །དེ་ལྟར་གསང་སྔགས་ཀྱི་སྤྱོད་པ་རྨད་དུ་བྱུང་བ་སྤྱད་པའི་མཐུ་བྱིན་གྱིས་བཅོམ་འདས་དཔལ་རྡོ་རྗེ་གཞོན་ནུའི་སྐུ་གསུང་ཐུགས་མི་བཟད་པ་རྒྱན་གྱི་འཁོར་ལོ་ལ་ལོངས་སྤྱོད་ཅིང་སྐལ་པ་མཉམ་པར་གྱུར་ཅིག །ཅེས་སྨོན་ལམ་གདབ་བོ། །ཟོར་འཕེན་སྐབས་ས་ལུགས་ལ་སྔགས་ཙམ་གྱིས་འཕེན་པ་ལས་གྱེར་མོ་སྲོལ་མེད་ཀྱང་ཡུལ་དུས་ཀྱིས་མི་ཚིམས་པ་བྱུང་ན། ཐོག་མར་མདའ་ཟོར་ཐོགས་ལ། བྷྱོ། དཔལ་ཆེན་རྡོ་རྗེ་གཞོན་ནུ་ཡིས། །ཕོ་ཉ་མངགས་པ་ཟོར་གྱི་བདག །དགྲ་
བགེགས་སྒྲོལ་ཕྱིར་ལས་ལ་ཡ། །རྣོ་མྱུར་ཤུགས་དྲག་མདའ་ཡི་ཟོར། །གློག་ལྟར་འཁྱུག་ཅིང་ཐོག་ལྟར་འབེབས། །དགྲ་བགེགས་ལུས་སེམས་འཕེན་ལ་ཡཱ། དྲག་སྔགས་བརྗོད་བཞིན་པར་བརྡེག་གཏོར་ཟོར་གཞན་སྔགས་རྐྱང་པ་དང་། གཙོ་གཏོར་འཕེན་སྐབས། ཧཱུྃ། དམར་ཆེན་གཏོར་ཟོར་ཕུར་བུའི་ཚོགས། །སྡེ་བརྒྱད་དྲེགས་པའི་དཔུང་དང་བཅས། །དགྲ་དང་བགེགས་ཀྱི་སྟེང་དུ་རྦད། སྲིད་པ་གཡོ་ཞིང་འཁྲུགས་བྱེད་པའི། །དམག་དཔུང་དེར་བསྐྱོད་གཡུལ་ངོ་སྤྲོད། །དགྲ་དཔུང་ཚོམས་ལ་བགེགས་དཔུང་ཐུལ། །རྗེས་ཤུལ་ལྟག་མ་མེད་པར་མཛོད། །དུས་ལ་བབ་པོ་མཐུ་རྩལ་བསྐྱེད། ཅེས་དང་དྲགས་སྔགས་རྣམས་བཟླས་ཏེ་འཕང་། །མདའ་ཟོར་གྱི་ཚིག་ལ། ཁྲག་ཀློང་འཁྲུགས་པ་རྭ་རྣོན་ཟོར། ཞེས་བསྒྱུར་ལ་རྭ་ཟོར་དང་། །རི་བོ་བསྙིལ་བ་རྡོ་ཡི་ཟོར། ཞེས་བསྒྱུར་ལ་རྡོ་ཟོར་འཕེན། གཏོར་བྲོའི་རྗེས་སུའང་རྙིང་མ་སྤྱིའི་ལད་མོ་སྤྲོ་ན། རྒྱལ་དབྱངས་བདུད་ལས་རྣམ་པར་རྒྱལ་བའི་རྔམ་སྒྲ་བཞུགས་སོ། །ཧཱུྃ། བྱིན་རླབས་འཇའ་ཟེར་འོད་ཕུང་འཐིབས་པའི་ཀློང་། །བརྒྱུད་ལྡན་རྩ་བརྒྱུད་བླ་མའི་བྱིན་རླབས་ཀྱིས། །རྣལ་འབྱོར་བདག་དང་སྦྱིན་པའི་བདག་པོར་བཅས། །རྒྱལ་ལོ་དུག་ལྔའི་གཡུལ་ལས་རྣམ་པར་རྒྱལ། །དངོས་གྲུབ་མེ་དཔུང་ཐིག་ལེ་འབར་བའི་དབུས། །ཡི་དམ་ཞི་ཁྲོ་རབ་འབྱམས་མཐུ་སྟོབས་ཀྱིས། །རྣལ་འབྱོར་བདག་དང་སྦྱིན་པའི་བདག་པོར་བཅས། །
རྒྱལ་ལོ་བདུད་བཞིའི་དཔུང་ལས་རྣམ་པར་རྒྱལ། །ཕྲིན་ལས་མཚོན་ཆའི་བུ་ཡུག་འཚུབས་པ་ནས། །མཁའ་འགྲོ་ཆོས་སྐྱོང་སྲུང་མའི་དྲག་རྩལ་གྱིས། །རྣལ་འབྱོར་བདག་དང་སྦྱིན་པའི་བདག་པོར་བཅས། །རྒྱལ་ལོ་དགྲ་དང་བགེགས་ལས་རྣམ་པར་རྒྱལ། །སྟོབས་བཅུ་མངའ་བ་བདུད་ཀྱི་དཔུང་ལས་རྒྱལ། །ལྷ་ཡི་དབང་པོ་ལྷ་མ་ཡིན་ལས་རྒྱལ། །རྡོ་རྗེ་ཕ་ལམ་དངོས་པོ་ཀུན་ལས་རྒྱལ། །རིག་པའི་ཡེ་ཤེས་མ་རིག་པ་ལས་རྒྱལ། །ཆོས་ཉིད་བདེན་པ་ཆོས་ཅན་གནས་ལས་རྒྱལ། །དཀར་ཕྱོགས་ལྷ་སྲུང་ནག་པོའི་ཕྱོགས་ལས་རྒྱལ། །བདག་ཅག་འཁོར་བཅས་བར་ཆད་དགྲ་ལས་རྒྱལ། །རྣམ་རྒྱལ་བཀྲ་ཤིས་སྣང་བ་དཔལ་འབར་ཤོག །ཅེས་པའང་གཡུ་ཐོག་རྣམ་རྒྱལ་དགོན་ཏུ་ཉེ་བར་མཁོའི་ཆེད་དུ་ཡོན་ཏན་རྒྱ་མཚོས་བྲིས་པ་དགེ་ལེགས་འཕེལ། བཀྲ་ཤིས་རྒྱས་པར་བྱ་བ་སྤྲོ་ན། །བླ་མ་དང་དཀྱིལ་འཁོར་བ་རྣམས་ཀྱིས་ཀྱང་རྡོ་རྗེའི་བདེན་ཚིག་བརྩལ་བར་མོས་ལ། །མེ་ཏོག་འཐོར་ཏེ། །བཀྲ་ཤིས་གང་ཞིག་བདུད་འདུལ་ཕུར་པའི་རིག་པ་འཛིན། །རྣམ་སྨིན་ཚེ་དབང་ཕྱག་རྒྱ་ལྷུན་གྲུབ་ས་ལ་བཞུགས། །པྲབྷ་ཧ་སྟི་པདྨ་ཐོད་ཕྲེང་བརྒྱུད་པར་བཅས། བདེན་པ་དེས་ཀྱང་བདུད་བཞི་ལས་རྒྱལ་བཀྲ་ཤིས་ཤོག །བཀྲ་ཤིས་གང་ཞིག་ཆོས་དབྱིངས་ནམ་མཁའི་དཀྱིལ་ནས་ཤར། །རྡོ་རྗེ་ཁྲོས་པའི་མཚོན་གྱིས་ཉོན་མོངས་དྲ་བ་གཅོད། །དཔལ་ཆེན་རྩ་བའི་
དཀྱིལ་འཁོར་མི་གནས་ཡེ་ཤེས་སྐུ། །བདེན་པ་དེས་ཀྱང་བདུད་བཞི་ལས་རྒྱལ༴ །བཀྲ་ཤིས་གང་ཞིག་སྙིང་རྗེས་སྒྲོལ་བའི་དམ་ཚིག་གིས། །བདག་ཏུ་ཞེན་པའི་ཕུང་པོ་རྡོ་རྗེའི་ཕྱག་རྒྱས་གཏམས། །ཕྱོགས་བཅུ་ཁྲོ་བོའི་དཀྱིལ་འཁོར་རོལ་པའི་ཆོ་འཕྲུལ་བདག །བདེན་པ་དེས་ཀྱང་བདུད་བཞི་ལས་རྒྱལ༴ །བཀྲ་ཤིས་གང་ཞིག་སྲིད་པ་ཕུར་བུའི་རང་རྟགས་རྒྱ། །འཛིན་ཤེས་གཏོང་མི་ཤེས་ཀྱིས་བརྣག་པའི་ཕྲིན་ལས་མཛད། །མཚན་མ་རྫས་ཀྱི་དཀྱིལ་འཁོར་ཤུགས་སྒྲོལ་སྟོབས་འདུས་པ། །བདེན་པ་དེས༴ །བཀྲ་ཤིས་གང་ཞིག་རྣམ་འགྱུར་རྫུ་འཕྲུལ་མཐའ་ཡས་ཤིང་། །དམ་ཚིག་རྗེས་གཅོད་དམ་ཉམས་སྲོག་ལ་མངའ་དབང་མཛད། །བྲན་དང་བཀའ་ཉན་ཕོ་ཉ་དཔལ་ཆེན་བཀའ་སྒྲུབ་པ། །བདེན་པ༴ །བཀྲ་ཤིས་གང་ཞིག་དུར་ཁྲོད་འབར་བའི་གཞལ་མེད་ཁང་། །ཡེ་ཤེས་རེལ་པ་དྲག་པོའི་རྒྱན་བཀོད་ཚད་ལས་འདས། །ལྟ་བར་མི་བཟོད་མཚམས་ཀྱི་ཁྲོ་བོ་དང་བཅས་པའི། །བདེན་པ་དེས༴ །བཀྲ་ཤིས་གང་ཞིག་ཆོས་སྐུ་དོན་གསུང་མི་རྟོག་ཐུགས། །མཉམ་པའི་དམ་ཚིག་ཡེ་ཤེས་ཕྲིན་ལས་མཐའ་གཉིས་སེལ། །བདུད་བཞིའི་དཔུང་བཅོམ་དབྱིངས་དང་ཡེ་ཤེས་རོ་མཉམ་པ། །བདེན་པ་དེས༴ །བཀྲ་ཤིས་གང་ཞིག་ལོངས་སྐུ་སྒྲ་གསུང་སྙིང་རྗེའི་ཐུགས། །དོན་མཛད་དམ་ཚིག་ཐུགས་རྗེའི་ཕྲིན་ལས་འགྲོ་དྲུག་འདྲེན། །
ཆད་མེད་བཞི་ལྡན་ཤེས་རབ་སྙིང་རྗེ་དབྱེར་མེད་པ། །བདེན་པ་དེས་ཀྱང་། །བཀྲ་ཤིས་གང་ཞིག་བདེ་ཆེན་སྔགས་གསུང་རྟག་བདེའི་ཐུགས། །སྦྱོར་བའི་དམ་ཚིག་བྱང་ཆུབ་ཕྲིན་ལས་སྡུག་བསྔལ་སྲེག །དགའ་བཞིའི་མཐར་ཕྱིན་ཐབས་དང་ཤེས་རབ་ཟུང་དུ་འཇུག །བདེན་པ༴ །བཀྲ་ཤིས་གང་ཞིག་སྤྲུལ་སྐུའི་ཚིགས་གསུང་ཀུན་མཁྱེན་ཐུགས། །སྒྲོལ་བའི་དམ་ཚིག་རྣམ་འཕྲུལ་ཕྲིན་ལས་སྲིད་གསུམ་འདུལ། །ལས་བཞི་ལྷུན་གྲུབ་དཀྱིལ་འཁོར་རྣམ་གསུམ་འབྲལ་མེད་དང་། །བདེན་པ་དེས༴ །བཀྲ་ཤིས་གང་ཞིག་སྣང་སྲིད་འཁོར་འདས་མཚན་རྟོག་ཀུན། །ཕུར་བུ་རྣམ་བཞིའི་དགོངས་པས་གྲུབ་མཐའ་ཐལ་བར་འབྱིན། །ཐུན་མོང་མཆོག་གི་དངོས་གྲུབ་བདེ་བླག །འགྲུབ་པ་ཡི། །བདེན་པ་དེས༴ །བཀྲ་ཤིས་གང་ཞིག་འཁོར་འདས་དབྱེར་མེད་ལྟ་བའི་རྫོང་། །རིམ་གཉིས་སྒོམ་པའི་འཕྲང་ལས་བགྲོད་པས་ལེགས་ཟིན་ཏེ། །དོན་གཉིས་ལྷུན་གྲུབ་སྤྱོད་པའི་སྲོག་རྩ་རབ་བརྟན་པ། །བདེན་པ་དེས་ཀྱང་། །བཀྲ་ཤིས་གང་ཞིག་རིགས་ཁམས་སྲིད་པ་ཕུར་བུའི་ལྷ། །གདབ་པའི་ལས་བཞིས་གློ་བུར་དྲི་མའི་སྦུབས་བཀྲོལ་ཏེ། དག་པ་གཉིས་ལྡན་གདོད་མའི་ཧེ་རུ་ཀར་རྫོགས་པ། །བདེན་པ་དེས་ཀྱང་བདུད་བཞི་ལས་རྒྱལ་བཀྲ་ཤིས་ཤོག །ཅེས་དང་། གཞན་ཡང་བྱིན་རླབས་དང་ལྡན་པའི་ཤིས་བརྗོད་རྒྱས་པར་བརྗོད་ལ་དགེ་ལེགས་
ཀྱི་སྣང་བ་ཆེན་པོས་ཁྱབ་པར་བྱའོ། །དེའང་རང་དོན་ལྟ་བུར་གཏོར་ཟློག་གཞུང་གསལ་སྔགས་དམིགས་ཁོ་ནར་ནན་ཏན་བྱ་བ་ལས་ཁ་སྐོང་འདི་རིགས་པ་ལ་ཆེར་མི་དགོས་ཤིང་། གཏོར་ཟློག་གཞུང་ཉིད་ས་ལུགས་བསླད་མེད་ཡིད་ཆེས་སུ་རུང་བ་ཡིན་ལ། གྲོང་ཆོག་རྔ་གྱེར་གྲངས་ཀ་གཙོ་བོར་བཏོན་དགོས་པའི་ཚེ་ཁ་སྐོང་འདི་དག་ཀྱང་ཅི་རིགས་པ་སྦྱར་ན་ཚིག་རྣམས་བཀའ་གཏེར་གྱི་གཞུང་ཁུངས་ལྡན་ཏུ་མ་ཟད། གཞུང་ལའང་བཅོས་བསླད་ཀྱི་སྐྱོན་ཏུ་འགྱུར་བ་ཆེར་མི་འདུག་པས་འདོར་ལེན་གྱི་མཚམས་ཕྱེད་པར་བྱའོ། །འཕྲི་བསྣན་མང་ན་གཞུང་བཟང་འཆལ་གྱིས་དོགས། །རང་ལུགས་བཞག་ན་བློ་ཆུང་མི་མགུ་དོགས། ཁ་སྐོང་དམིགས་སུ་ཕྱེས་འདིར་ཡུལ་དུས་དང་། །མོས་པའི་ཁྱད་པར་ཇི་བཞིན་འཇུག་འཚལ་ལོ། །འདི་ལའང་དགེ་བའི་ཆ་གང་མཆིས། །སྙིང་པོའི་བསྟན་པའི་ཉ་རྒྱས་པའི། །གྲོགས་སྟོབས་དཀར་པོའི་ཚོས་བཞིན་ཏུ། །བསམ་དོན་འགྲུབ་པའི་རྒྱུར་གྱུར་ཅིག། ཅེས་པའང་བསྟན་འགྲོར་ལྷག་པའི་བསམ་པ་དགེ་བ་ཛཾ་ཐང་བླ་མ་ལྔས་བསྐུལ་བ་ལྟར། །ངེས་དོན་སྙིང་པོའི་བསྟན་པ་དང་རྗེ་བཙུན་ཐམས་ཅད་མཁྱེན་པའི་གསུང་རབ་ཀྱི་ཞབས་ཏོག་ཏུ་འགྱུར་བར་རེ་བས། གང་དེའི་བསྟན་པར་སྨོན་ལམ་གྱིས་འབྲེལ་བ། རྒྱལ་དབང་སི་ཏུ་པདྨ་དབང་ཆེན་གྱི་བཀའ་འབངས་ཐ་ཤལ་བ་བློ་གྲོས་མཐའ་ཡས་ཀྱིས་དཔལ་སྤུངས་ཡང་ཁྲོད་དུ་སྦྱར་བ་གཞན་ལ་ཕན་པར་གྱུར་ཅིག །དགེ་ལེགས་འཕེལ། །