དཔལ་ཆེན་རྡོ་རྗེ་གཞོན་ནུ་གཙོ་འཁོར་སྲུང་མར་བཅས་པའི་བསྟོད་བསྐུལ་གསོལ་ཁ་སྦྲེལ་བ་ལྷའི་རྔ་སྒྲ།
དཔལ་ཆེན་རྡོ་རྗེ་གཞོན་ནུ་གཙོ་འཁོར་སྲུང་མར་བཅས་པའི་བསྟོད་བསྐུལ་གསོལ་ཁ་སྦྲེལ་བ་ལྷའི་རྔ་སྒྲ་ཞེས་བྱ་བ་བཞུགས་སོ།། །།
བླ་མ་དཀྱིལ་འཁོར་དབང་ཕྱུག་དང་། །འཇིགས་བྱེད་རྡོ་རྗེ་སྲིན་པོ་ལ། །གུས་བཏུད་དེ་མཉེས་ཕྲིན་ལས་བྱང་། །གོང་མའི་གསུང་ལས་བསྡེབ་པར་བྱ། དེའང་སྤྲུལ་པ་ཆེན་པོ་དང་མངོན་སྤྱོད་ཀྱི་ལས་གཙོ་བོར་གྱུར་པ་རྣམས་ལ་གཙོ་འཁོར་ཐམས་ཅད་བསྐང་ཞིང་ཐུགས་དམ་བསྐུལ་བ་དང་། ཁྱད་པར་འཇིག་རྟེན་མཆོད་བསྟོད་ཀྱི་ལྷ་ཕུར་སྲུང་དམ་ཅན་རྣམས་བསྐང་བསྐུལ་གལ་ཆེ་བ་ཡིན་ཀྱང་། །རྗེ་བཙུན་རིན་པོ་ཆེའི་ཡིག་ཆ་མཆོག་གྲུབ་མདོར་བསྡུས་གཙོར་མཛད་པས། ཕུར་སྲུང་བསྟོད་བསྐུལ་ལྷག་མའི་བར་མི་འབྱུང་ཞིང་། དེ་ལྟ་ན་གཏོར་ཟློག་ལྟ་བུ་ལ་བྱ་བ་གྲུབ་ཀྱི་བར་སྲུང་མའི་སྐོང་བསྐུལ་བྱར་མེད་པས། འདིར་བདག་ཉིད་ཆེན་པོ་དཔལ་ལྡན་བླ་མའི་གསུང་རབ་ལས་བཏུས་ཏེ་གྲུབ་བརྙེས་ཆགས་མེད་རིན་པོ་ཆེ་སོགས་རྙིང་སྔགས་སྤྱིའི་རྗེས་སུ་འབྲངས་ནས་བསྟོད་བསྐུལ་གསོལ་བ་ལོགས་སུ་བསྡེབས་པ་ལ། གོང་གཏོར་སོགས་ཡོད་ཕྱིན་དཀར་དམར་ཕུད་རྒོད་བཤམས་ནས་བྱིན་གྱིས་བརླབ་སྟེ་འབུལ་བ་ཙམ་གྱིས་ཀྱང་རུང་མོད། བཅའ་གཞི་སྤྲོས་བཅས་ལོགས་སུ་བྱེད་པར་སྤྲོ་ན། སྣོད་གཙང་མར་དབལ་གྱི་བཤོས་བུ་སྟོད་ཟུར་གསུམ་སྨད་ཟླུམ་པོ་རྒྱན་སྤྲོས་གཟས་པ་ལ་འཁོར་ཆུང་བ་བཅུ། དེ་རེ་རེའི་གཡས་གཡོན་ཏུ་གཏོར་ཆུང་གཉིས་རེ་སྟེ་ཉི་ཤུ། དེ་རྒྱབ་ཤར་ལྷོར་ཤྭ་ན་བཞིའི་གཏོར་མ་ཝ་ཁྱི་
འཕར་སྤྱང་གི་ཤས་བརྒྱན་པ། ལྷོ་ནུབ་ཏུ་བསེ་མོ་བཞིའི་གཏོར་མ་ཁྲག་ཞག་འོ་མ་མར་ཁུ་བཞིའི་ཨུ་སྐྱུས་བརྒྱན་པ། །བྱང་ཤར་དུ་རེ་མ་ཏི་བཞིའི་གཏོར་མ་ནལ་བུའི་ཤ་ཁྲག་དང་ཁྲག་སྣ་སྙིང་སྣས་བརྒྱན་ཅིང་ཚིལ་ཆེན་གྱིས་ཁ་བཀབ་ལ་རྩེ་མོར་རྨ་བྱའི་སྒྲོ་གདུགས་ཕུབ་པ། །ནུབ་བྱང་དུ་གིང་གསུམ་གྱི་གཏོར་མ་ཤ་གཟུགས་དང་སྟག་གཟིག་རས་མ་མདའ་དར་ལེབ་རྒན་རྣམས་ཀྱིས་བརྒྱན་པ། ཤ་ཁྲག་སོ་སོར་མ་རྙེད་ན་དམར་གྱི་རྒྱན་སྤྱི་འགྲེ་བྱ། གཏོར་མའི་དབྱིབས་དང་ཁ་དོག་ལས་དང་བསྟུན། མཐའ་སྐོར་དུ་ཐེབས་སྐྱུ་མང་པོ་དང་། འགྲུབ་ན་འདོད་ཡོན་གཟུགས་འགྲོས་སྣ་ཚོགས་པས་བསྐོར། །ཤ་ལྔ་བདུད་རྩི་ལྔས་བརྒྱན། །དར་ནག་གི་གདུགས་ཕུབ། སྒེར་དུ་བྱེད་ན་གཡས་གཡོན་ཏུ་སྨན་རཀ །མདུན་ཏུ་ཕྱི་མཆོད་གསེར་སྐྱེམས་བཤམ་མོ། །ཡི་དམ་བདག་བསྐྱེད་གྲུབ་ནས་བསང་སྦྱང་། སྟོང་པའི་ངང་ལས་མཆོད་པའི་རྫས། བསྒྲུབ་པའི་རྫས། བསྐང་བའི་རྫས། བཀྲ་ཤིས་རིན་པོ་ཆེ་རྟགས་བརྒྱད། རྒྱལ་སྲིད་སྣ་བདུན། འདོད་ཡོན་རྣམ་པ་ལྔ། གཞན་ཡང་སྤྱན་གཟིགས་འདོད་པའི་ལོངས་སྤྱོད་བསམ་གྱིས་མི་ཁྱབ་པ་རྣམས་དང་། ཁྱད་པར་བདག་ཅག་
ལ་གནོད་ཅིང་འཚེ་བར་བྱེད་པའི་དགྲ་བོ་མ་ལུས་པ་བསྒྲལ་བ་ལས་བྱུང་བའི་བཟའ་བ་ཤའི་རི་བོ། །བཏུང་བ་ཁྲག་གི་རྒྱ་མཚོ། རུས་པའི་གྲམ་ཁྲོད། མི་ལྤགས་ཀྱི་གཡང་གཞི། ཀེང་རུས་ཀྱི་དྲ་ཕྱེད། རྒྱུ་རློན་གྱི་ལྡ་ལྡི། ཞུན་ཆེན་གྱི་སྣང་གསལ། ཚིལ་ཆེན་གྱི་དུད་པ། མདོར་ན་དྲག་པོས་དགྲ་བགེགས་བསྒྲལ་བ་ལས་བྱུང་བའི་མཆོད་པའི་བྱེ་བྲག་བསམ་གྱིས་མི་ཁྱབ་པར་གྱུར། ཅེས་བྱིན་གྱིས་བརླབས། རང་གི་སྙིང་ག་ནས་འོད་འཕྲོས་པས་རྡོ་རྗེ་གཞོན་ནུ་ལྷ་ལྔ་བཅུ་རྩ་གཅིག་གི་དཀྱིལ་འཁོར་དམ་ཅན་སྲུང་མས་བསྐོར་བ་མདུན་གྱི་ནམ་མཁར་བྱོན་པར་བསམ་ཞིང་། བཛྲ་ས་མཱ་ཛཿ ཧཱུྃ། །བཅོམ་ལྡན་རྡོ་རྗེ་གཞོན་ནུ་ཡབ་ཡུམ་དང་། །སྤྲུལ་པ་ཡང་སྤྲུལ་བཀའ་སྡོད་སྲུང་མའི་ཚོགས། །གློག་ལྟར་མྱུར་བའི་ཐུགས་རྗེས་འདིར་གཤེགས་ནས། །ཀཱི་ལ་ཡ་ཡི་དངོས་གྲུབ་སྩལ་ཏུ་གསོལ། །ཨོཾ་བཛྲ་ཀཱི་ལི་ཀཱི་ལ་ཡ་ས་པ་རི་ཝཱ་ར་བཛྲ་ས་མཱ་ཛཿ ཛཿཧཱུྃ་བཾ་ཧོཿ ཨ་ཏི་པུ་ཧོཿ པྲ་ཏཱི་ཙྪ་ཧོཿ བཛྲ་ཨཱ་ས་ན་ཏིཥྛནྟུ། ཧཱུྃ། །ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་སྤྱན་དྲངས་ཏེ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་རྣམས་ཀྱིས། །མ་ལུས་གཤེགས་ནས་བསྣམས་
སུ་གསོལ། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་རུ་དྷི་ར་ཁཱ་ཧི། མ་ཧཱ་མཾ་ས་ཁ་ཧི། མ་ཧཱ་ཏ་ཀ་ཁཱ་ཧི། མ་ཧཱ་ཨ་སྠི་ཁཱ་ཧི། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །ཐུགས་དམ་བཞིན་དུ་ཅི་བདེར་བཞེས་སུ་གསོལ། ཛཿཧཱུྃ་བཾ་ཧོཿ ཤྲཱི་ཧེ་རུ་ཀ་ཨི་དཾ་པུཥྤེ་དྷུ་པཾ་དི་པཾ་གནྡྷཾ་བ་ལིནྟ་པྲ་ཏཱིཙྪ་ཧོཿ གྲྀཧྞ་ཁཱ་ཧི། བཛྲ་ཡཀྴ་ཀྲོ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་རྣམས་ཀྱིས་སྤྱན་དྲངས་ཤིང་མཆོད་ནས། བསྟོད་གསོལ་ཕྲིན་ལས་བཅོལ་བ་ནི། ཧཱུྃ། གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །མི་བཟད་དཔལ་ཆེན་རྡོ་རྗེ་གཞོན་ནུའི་སྐུ། །ཞེ་སྡང་། ཐུགས་མཆོག་ཡཀྴ་ཧེ་རུ་ཀ །ཡེ་ཤེས་སྐུ་མཆོག་རིགས་ཀྱི་དཀྱིལ་འཁོར་ནས། །མི་དམིགས་ཐུགས་ཀྱི་དོན་དམ་ཐུགས་ལ་གསལ། །གསུང་གི་ང་རོས་ཁམས་གསུམ་དབང་དུ་སྡུད། །སྤྲུལ་པའི་བྱིན་རླབས་ཁྲོ་བཅུ་དབྱིངས་ནས་འགྱིང་། །སྐུ་མདོག་མཐིང་ནག་འཇིགས་པའི་རྒྱན་གྱིས་བརྒྱན། །གཡས་ཀྱི་ཞལ་མདོག་དཀར་ལ་བཞད་པ་ནི། །སྐྱེ་མེད་ཆོས་ཀྱི་སྐུ་དང་ལྡན་པར་སྟོན། །གཡོན་གྱི་ཞལ་མདོག་དམར་ནག་སྟོན་པ་ནི། །དབང་དྲག་ཕྲིན་ལས་རྣམ་གཉིས་ཅིག་ཆར་རྫོགས། །དབུས་ཀྱི་ཞལ་མདོག་མཐིང་ནག་བསྟན་པ་ནི། །ཕྲིན་ལས་ཐམས་ཅད་ལྷུན་
གྱིས་གྲུབ་པར་སྟོན། །སྐྱེ་འགྲོ་རྩད་ནས་གཅོད་པའི་མཆེ་གཙིགས་ཏེ། །ཉོན་མོངས་ལོག་པར་ལྟ་བ་འཇོམས་པར་མཛད། །རྡོ་རྗེ་རྩེ་དགུ་ཕྱག་ན་བསྣམས་པས་ནི། །ས་དགུ་འཇོམས་ཤིང་ཡེ་ཤེས་དགུ་དང་སྦྱོར། །རྡོ་རྗེ་རྩེ་ལྔ་འབར་བ་བསྣམས་པ་ནི། །རྒྱུད་ལྔ་སྦྱངས་ཤིང་སྐུ་ལྔ་འདྲེན་པར་མཛད། །ཡེ་ཤེས་མེ་དཔུང་འབར་བ་བསྣམས་པས་ནི། ཁམས་སུམ་འཁོར་བའི་བག་ཆགས་སྲེག་པར་མཛད། །རྡོ་རྗེ་ཁ་ཊཱྭྃ་བརྡུངས་ཤིང་འཁྲོལ་བས་ནི། །བདུད་བཞི་ཐལ་བར་རློག་ཅིང་དབང་དུ་སྡུད། །རི་རབ་ཕུར་བུ་འདྲིལ་ཞིང་འདེབས་པས་ནི། །འགལ་བྱེད་མ་ལུས་ཐམས་ཅད་སྒྲོལ་བར་མཛད། །གླང་ཆེན་སྟག་ལྤགས་ཞིང་ཆེན་རྒྱན་གྱིས་བརྒྱན། །ཆེ་བཙན་དཔེ་མེད་ཁམས་གསུམ་རྒྱལ་བར་སྟོན། །ཐོད་སྦྲུལ་སྣ་ཚོགས་འཇིགས་པས་སྐུ་ལ་བརྒྱན། །བསྐལ་པའི་མེ་ལྟར་འབར་བའི་ཀློང་ན་བཞུགས། །རྔམས་པའི་ཞལ་ནས་ཧཱུྃ་སྒྲ་འབྲུག་སྟོང་སྒྲོགས། །ཞབས་གཉིས་བརྐྱངས་བསྐུམ་ཚུལ་གྱིས་དབྱིངས་སུ་སྦྱོར། །ཞབས་གཉིས་གྱད་ཀྱི་འདོར་སྟབས་གདུག་པ་འདུལ། །སྤྲུལ་པའི་བྱིན་རླབས་ཕྱོགས་བཅུར་སྤྲིན་ལྟར་གཏིབ། །ཚུར་བྱོན་མཆོད་སྤྲིན་རྒྱ་མཚོ་འདི་བཞེས་ལ། །ཐུགས་རྗེ་ཆེར་དགོངས་དབང་དང་དངོས་གྲུབ་སྩོལ། །དམ་རྫས་ཕྱི་ནང་གསང་བས་ཐུགས་དམ་བསྐང་། །
རྣལ་འབྱོར་འཁོར་སྲུངས་རྐྱེན་ཟློག་བར་ཆད་སེལ། །དགྲ་བགེགས་བྱད་མ་ཐལ་བ་རྡུལ་དུ་རློག །ཐུགས་དམ་དུས་ལ་བབ་བོ་མ་གཡེལ་ཅིག །བྷྱོ། །དེ་དང་གཉིས་མེད་སྦྱོར་བའི་ཡུམ་མཆོག་ནི། །ཨེ་ཀ་ཛ་ཏི་གུ་ཧྱ་གསང་བའི་ཡུམ། །པདྨ་གར་གྱི་དབང་ཕྱུག་མཁའ་ཀློང་ནས། །བཻ་ཌཱུ་སྔོན་མོའི་སྐུ་མདོར་གསལ་འཚེར་ཞིང་། །ཨིནྡྲ་ནཱི་ལའི་རལ་པ་གཅིག་ཏུ་འཁྱིལ། །ཁྲོ་གཉེར་རབ་གཙིགས་རལ་པ་མེ་ལྟར་འབར། །པཱུཥྤ་རཱ་གའི་འོད་ཟེར་ཕྱོགས་བཅུར་འཕྲོ། །ཁྲོ་གཉེར་སྤྱན་ཟླུམ་འཇིགས་པའི་སྡང་མིག་ཅན། །ཟ་བྱེད་འབར་བའི་རྣོ་དབལ་མཆེ་བ་གཙིགས། །ཐམས་ཅད་ཆམས་ཆེམས་གསོལ་བའི་རྐན་སྒྲ་ཅན། །ཐོད་ཁྲག་རློན་ཆེན་ཕྲེང་བ་སྦྲུལ་ཞགས་ཀྱིས། །མཐིང་ཀའི་སྐུ་ལ་རབ་ཏུ་མཛེས་པར་བརྒྱན། །ཞིང་ཆེན་གཡང་གཞི་གསར་པས་སྐུ་སྨད་གཡོགས། །ཁྲག་མཚོ་ཐང་དམར་སྐེམས་ཤིང་ལྗགས་འདྲིལ་མ། །ཐོད་རློན་ཀླད་ཁྲག་འདྲེས་པ་གཡས་ན་ཐོགས། །བནྡྷ་རྩེ་གསུམ་འབར་བ་གཡོན་ན་ཐོགས། །འཁོར་ལོ་རྒྱས་འདེབས་ཟ་བྱེད་དཔལ་གྱི་ཡུམ། །རྡོ་རྗེ་མེ་དཔུང་འབར་བའི་ཀློང་དཀྱིལ་དུ། །དབང་ཕྱུག་ཨུ་མ་བསྣོལ་བའི་གདན་སྟེང་ནས། །གཟིར་ཞིང་གནོན་པས་བརྐྱང་བསྐུམ་ཚུལ་དུ་བཞུགས། །ཐམས་ཅད་དབང་དུ་སྡུད་པའི་སྲིང་གཅིག་མ། །བར་སྣང་འཕྱོ་བའི་མེ་ཟ་གྲག་གྱོན་མ། །གླིང་
བཞི་ཀུན་ལ་དབང་བའི་དྲག་མོ་རྒྱལ། །སྲོག་གི་སྙིང་པོའི་དམ་ལས་མ་འདའ་ཞིག །དམ་རྫས་དམར་གྱི་ཨརྒྷཾ་འདི་སྦྲེང་བས། །ཐུགས་དམ་རྩེ་གཅིག་མ་གཡེལ་རྒྱུན་དུ་དགོངས། །རང་རྒྱུད་དག་པའི་རྣལ་འབྱོར་སྒྲུབ་པ་པོ། །བརྡ་དང་བཤུག་པ་རྔམས་པའི་ཐལ་མོའི་སྒྲས། །རཀྟ་ཆགས་པའི་བརྡ་ཡིས་གཡབ་འདོར་ན། །གློག་ལྟར་མྱུར་བའི་ཐུགས་རྗེས་འདི་གཤེགས་ཤིག །ཐལ་མོ་བརྡབས་ཤིང་འཇིགས་པའི་བཤུག་གླུ་ལེན། །སྡིག་པའི་གད་མོ་རྒོད་ཅིང་ཁྲག་ཆེན་འཐུང་། །དུས་གསུམ་ཀུན་ལ་མ་སྒྲིབ་མཁྱེན་མངའ་ཞིང་། །དམར་གྱི་དྲི་བསྣམས་ཁྲག་གི་རོ་མྱོང་བ། །དཔག་ཚད་བརྒྱད་ཁྲིའི་གནས་ནས་འདིར་གཤེགས་ལ། །ཤ་ཟ་ཁྲག་འཐུང་རྩུབ་པའི་ལས་ཅན་རྣམས། །ཡེ་ཤེས་རྨད་བྱུང་དོན་དམ་དགོངས་པ་ཅན། །གཞན་གྱིས་མ་བཅོལ་ཉིད་ཀྱིས་ཞལ་འཆེས་མ། །དམ་ཚིག་དགོངས་ཕྱིར་རྟག་ཏུ་རོལ་མཛོད་ཅིག །ཕྲིན་ལས་གཞུང་བཞིན་ཕོ་ཉ་མང་པོ་འགྱེད། །དམ་ཚིག་གཞུང་བཞིན་ཐམས་ཅད་དབང་དུ་སྡུད། །ཕྲིན་ལས་དུས་ལ་བབ་པོ་སྲིང་གཅིག་མ། །མངོན་སུམ་གྲུབ་པའི་ལས་མཛོད་ད་ཚུར་སྦྱོན། །དམ་རྫས་ཕྱི་ནང་༴ །རྣལ་འབྱོར་འཁོར༴ །དགྲ་བགེགས༴ །ཐུགས་དམ༴ །ཛཿ །སྤྲུལ་པ་
ཆེན་པོའི་དུས་ལ་བབ། ཚིག་རྐང་གཅིག་པོ་འདི་འོག་གི་ཁྲོ་བཅུ་ཀུན་གྱི་འགོར་སྦྱར། སྟེང་ཕྱོགས་དགྲ་དང་བགེགས་འགུགས་པ། །ཁྲོ་བོ་ཆེན་པོ་ཧཱུྃ་ཀཱ་ར། །དབུ་གསུམ་ཕྱག་དྲུག་གཤོག་པ་ཅན། །རྡོ་རྗེ་ཕུར་བུ་འདྲིལ་ཞིང་འདེབས། །ཞབས་བཞི་ཚངས་པ་ཕོ་མོ་གནོན། །རྡོ་རྗེ་སྒྲ་འབྱིན་ཁྲོ་མོ་ཡང་། །འཇིགས་བྱེད་ཆེན་མོར་སྣང་བ་སྟེ། །དགྱེས་པའི་ལོངས་སྤྱོད་དོན་དམ་གྱི། །དབྱིངས་ལས་མ་གཡོས་སྤྲུལ་པ་ཡི། །ཕོ་ཉ་མང་པོ་ཕྱོགས་བཅུར་འགྱེད། །འདིར་གཤེགས་མཆོད་སྤྲིན་རྒྱ་མཚོ་བཞེས། །དམ་རྫས་ཕྱི་ནང་གསང་བས་བསྐང་། །འཁོར་སྲུངས་རྐྱེན་ཟློག་བར་ཆད་སོལ། །དགྲ་བགེགས་བྱད་མ་རྡུལ་དུ་རློག །ཐུགས་དམ་གཉེན་པོ་མ་གཡེལ་ཅིག །ཛཿ །སྤྲུལ་པ་ཆེན་པོའི༴ །ཤར་ཕྱོགས་དགྲ་དང་བགེགས༴ །ཁྲོ་བོ་ཆེན་པོ་རྣམ་པར་རྒྱལ། །དབུ་གསུམ་ཕྱག་དྲུག་གཤོག་པ༴ །རྡོ་རྗེ་ཕུར་བུ་འདྲིལ། །ཞབས་བཞིས་དྲི་ཟ་ཕོ་མོ་གནོན། །རྡོ་རྗེ་སྙེམ་མ་ཁྲོ་མོ་ཡང་། །འཇིགས་བྱེད་སོགས་ཚིག་རྐང་དགུ་པོ་ཁྲོ་བོ་ཀུན་ལ་རིགས་འགྲེའོ། ཛཿ །སྤྲུལ་པ༴ །མེ་མཚམས་དགྲ་དང་བགེགས༴ །ཁྲོ་བོ་ཆེན་པོ་དབྱུག་སྔོན་ཅན། །དབུ་གསུམ་ཕྱག་དྲུག༴ །རྡོ་རྗེ་ཕུར་ཕུ༴ ཞབས་བཞིས་མེ་ལྷ་ཕོ་མོ་གནོན། །རྡོ་རྗེ་སྡེར་མོ་ཁྲོ་མོ་ཡང་། །འཇིགས་བྱེད་སོགས། ཛཿ །སྤྲུལ་པ༴ །ལྷོ་ཕྱོགས་དགྲ༴ །ཁྲོ་བོ་
ཆེན་པོ་གཤིན་རྗེ་གཤེད། །དབུ་གསུམ་ཕྱག༴ །རྡོ་རྗེ་ཕུར༴ །ཞབས་བཞིས་གཤིན་རྗེ་ཕོ་མོ༴ །རྡོ་རྗེ་དུར་ཁྲོད་བདག་མོ་ཡང་། །འཇིགས་བྱེད་སོགས། ཛཿ །སྤྲུལ་པ༴ །ལྷོ་ནུབ༴ །ཁྲོ་བོ་ཆེན་པོ་མི་གཡོ་མགོན། །དབུ་གསུམ་ཕྱག །རྡོ་རྗེ་ཕུར་པ༴ །ཞབས་བཞིས་སྲིན་པོ༴ །རྡོ་རྗེ་གཏུན་ཁུང་ཁྲོ་མོ་ཡང་། །འཇིགས་བྱེད༴ །སོགས༴ །ཛ༔ །སྤྲུལ་༴ །ནུབ་ནས་དགྲ༴ །ཁྲོ་བོ་ཆེན་པོ་རྟ་མགྲིན་རྒྱལ། །དབུ་གསུམ་ཕྱག །རྡོ་རྗེ་ཕུར༴ །ཞབས་བཞིས་ཆུ་ལྷ༴ །རྡོ་རྗེ་གཏུམ་མོ་ཁྲོ་མོ་ཡང་། །འཇིགས་བྱེད་སོགས༴ ཛཿ །སྤྲུལ་པ༴ །ནུབ་བྱང་༴ །ཁྲོ་ཆེན་གཞན་གྱིས་མི་ཐུབ་པ། །དབུ་གསུམ་ཕྱག །རྡོ་རྗེ་ཕུར༴ །ཞབས་བཞིས་རླུང་ལྷ༴ །རྡོ་རྗེ་མདའ་སྙེམ་ཁྲོ་མོ་ཡང་། །འཇིགས་བྱེད་སོགས༴ ཛཿ །སྤྲུལ་པ༴ །བྱང་ཕྱོགས་དགྲ༴ །ཁྲོ་བོ་ཆེན་པོ་བདུད་རྩི་འཁྱིལ། །དབུ་གསུམ་ཕྱག །རྡོ་རྗེ་ཕུར༴ །ཞབས་བཞིས་གནོད་སྦྱིན༴ །རྡོ་རྗེ་སྒྲ་མཛད་ཁྲོ་མོ་ཡང་། འཇིགས་བྱེད་སོགས༴ །སྤྲུལ་པ༴ །བྱང་ཤར་དགྲ༴ །ཁྲོ་ཆེན་ཁམས་གསུམ་རྣམ་པར་རྒྱལ། །དབུ་གསུམ༴ །རྡོ་རྗེ་ཕུར༴ ཞབས་བཞིས་བགེགས་བདག༴ །རྡོ་རྗེ་གསོད་མ་ཁྲོ་མོ་ཡང་། །འཇིགས་བྱེད་སོགས༴ ཛཿ །སྤྲུལ་པ༴ །འོག་ཕྱོགས་དགྲ༴ །ཁྲོ་བོ་ཆེན་པོ་སྟོབས་པོ་ཆེ། །དབུ་གསུམ༴ །རྡོ་རྗེ་ཕུར་བུ༴ །ཞབས་
བཞིས་ས་བདག༴ །རྡོ་རྗེ་རིགས་བྱེད་ཁྲོ་མོ་ཡང་། །འཇིགས་བྱེད་སོགས༴ ཛཿ དཔལ་གྱི་ཕོ་ཉ་འགུགས་བྱེད་མ། །སྟེང་གི་ཕྱོགས་ནས་བྱུང་བ་ནི། །རྣམ་རྟོག་མི་མངའ་འཕག་པ་ལ། །ཕྱག་བརྙན་ཕག་པའི་མགོ་ཅན་ཞོན། །ཕྱག་གཡས་རྡོ་རྗེ་འབར་བ་ཐོགས། །གཡོན་པས་ཕུར་བུ་འདྲིལ་ཞིང་འདེབས། །འདིར་གཤེགས་མཆོད་སྤྲིན་རྒྱ་མཚོ་བཞེས། སོགས་ཚིག་རྐང་ལྔ་པོ་གང་གིས་འགྲེས་ཏེ་ཁྲ་ཐབས་ཐམས་ཅད་ལ་སྦྱར་རོ། །བྷྱོཿདཔལ་གྱི་ཕོ་ཉ། །ཤར་གྱི་ཕྱོགས་ནས། །དཔའ་གཏུམ་ཟ་བྱེད་སྟག་མོ་ལ། །ཕྱག་བརྙན་སྟག་གི་མགོ་ཅན༴ །ཕྱག་གཡས་ལྕགས་ཀྱུ་འབར། །གཡོན་པ་ཕུར་བུ་སོགས་བྷྱོཿ །དཔལ་གྱི་ཕོ་ཉ༴ །མེ་མཚམས་ཕྱོགས་ནས༴ །མི་འགྱུར་གཡག་དཀར་ཆེན་མོ་ལ། །ཕྱག་བརྙན་གཡག་གི་མགོ་བོ་ཅན། །ཕྱག་གཡས་དབྱུག་ཐོ་འབར་བ་ཐོགས། །གཡོན་པ་ཕུར་བུ་སོགས་བྷྱོཿ །དཔལ་གྱི་ཕོ་ཉ༴ །ལྷོ་ཡི་ཕྱོགས་ནས༴ །འཇུག་བྱེད་ཆེན་མོ་ཤ་བ་ལ། །ཕྱག་བརྙན་ཤ་བའི༴ །ཕྱག་གཡས་དབྱུག་པ་འབར༴ །གཡོན་པ་སོགས༴ བྷྱོཿ །དཔལ་གྱི་ཕོ་ཉ༴ །ལྷོ་ནུབ་མཚམས་ནས༴ །ཡེ་ཤེས་སྤྱོད་རྫོགས་གཟིག་གི་ཁྲིར། །ཕྱག་བརྙན་གཟིག་གི༴ །ཕྱག་གཡས་རལ་གྲི༴ །གཡོན་པ་སོགས༴ བྷྱོཿ །དཔལ་གྱི༴ །ནུབ་ཀྱི་ཕྱོགས་ནས༴ །མཁས་བརྩོན་བྱི་ལ་ཆེན་མོ་ལ།
ཕྱག་བརྙན་བྱི་ལིའི་མགོ་བོ༴ །ཕྱག་གཡས་པདྨ་དམར་པོ། །གཡོན་པ་སོགས༴ བྷྱོཿ །དཔལ་གྱི༴ །ནུབ་བྱང་མཚམས་ནས༴ །ཟ་བྱེད་འཛིན་བྱེད་ལྕེ་སྤྱང་ལ། །ཕྱག་བརྙན་ལྕེ་སྤྱང་མགོ་བོ༴ །ཕྱག་གཡས་རྡོ་རྗེ་འབར༴ །གཡོན་སོགས༴ བྷྱོ། །དཔལ་གྱི༴ །བྱང་གི་ཕྱོགས་ནས༴ །འཇོམས་བྱེད་རྩལ་འཕག་སེངྒེ་ལ། །ཕྱག་བརྙན་སེངྒེའི༴ །ཕྱག་གཡས་རྒྱ་གྲམ་འབར་བ༴ །གཡོན་པ་སོགས༴ བྷྱོ། །དཔལ་གྱི༴ །བྱང་ཤར་མཚམས་ནས༴ །སྟོབས་ཆེན་ལྡན་པ་དྲེད་ཀྱི་ཁྲིར། །ཕྱག་བརྙན་དྲེད་ཀྱི༴ །ཕྱག་གཡས་རྡོ་རྗེ་འབར༴ །གཡོན་པ་སོགས༴ བྷྱོ། དཔལ་གྱི༴ །འོག་གི་ཕྱོགས་ན༴ །རྣོ་བྱེད་ལྡན་པ་དོམ་གྱི་ཁྲིར། །ཕྱག་བརྙན་དོམ་གྱི༴ །ཕྱག་གཡས་ཐོ་བ་འབར༴ །གཡོན་པ་ཕུར་བུ་སོགས༴ བྷྱོ། །དཔལ་གྱི༴ །སྟེང་གི་ཕྱོགས་ནས༴ །མྱོས་བྱེད་རྨིག་བུ་ཆེན་མོ་ལ། །ཕྲ་མེན་རྨིག་བུའི༴ །ཕྱག་གཡས་ དྲིལ་བུ 
་འབར༴ །གཡོན་པ་སོགས༴ བྷྱོ། དཔལ་གྱི༴ །ཤར་གྱི་ཕྱོགས་ནས༴ །ཐོགས་མེད་བྱ་རྒོད་ཆེན་པོ་ལ། །ཕྲ་མེན་བྱ་རྒོད་མགོ༴ །ཕྱག་གཡས་རྔ་ཡབ་མཛེས་པ་ཐོགས། །གཡོན་པ་སོགས༴ བྷྱོ། །དཔལ་གྱི༴ །མེ་ཡི་མཚམས་ནས༴ །རིགས་བྱེད་བྱ་རོག་ཆེན་མོ་ལ། །ཕྲ་མེན་བྱ་རོག་མགོ༴ །ཕྱག་གཡས་མེ་དབལ་འབར༴ །གཡོན་པ་སོགས༴ བྷྱོ། དཔལ་གྱི༴ །ལྷོ་ཡི་
ཕྱོགས་ནས༴ །མུན་མཐོང་འུག་པ་ཆེན་མོ་ལ། །ཕྲ་མེན་འུག་པའི་མགོ་བོ༴ །ཕྱག་གཡས་དགྲ་སྟ་འབར༴ །གཡོན་པ་སོགས༴ བྷྱོ། །དཔལ་གྱི༴ །ལྷོ་ནུབ་མཚམས་ནས༴ །སྦེད་བྱེད་ཁྭ་ཏ་ཆེན་མོ་ལ། །ཕྲ་མེན་ཁྭ་ཏའི་མགོ༴ །ཕྱག་གཡས་རྡོ་རྗེ་ཞགས་པ། །གཡོན་པ་སོགས༴ བྷྱོ། དཔལ་གྱི༴ །ནུབ་ཀྱི་ཕྱོགས་ནས༴ །འོད་ལྡན་གསལ་བཀྲ་པུ་ཤུད་ལ། །ཕྲ་མེན་པུ་ཤུད་མགོ༴ །ཕྱག་གཡས་སྦྲུལ་ཞགས༴ །གཡོན་པ་སོགས༴ བྷྱོ། །དཔལ་གྱི༴ །ནུབ་བྱང་མཚམས་ནས༴ གསོད་བྱེད་བྱ་ཁྲ་ཆེན་མོ་ལ། །ཕྲ་མེན་ཁྲ་ཡི་མགོ་བོ༴ །ཕྱག་གཡས་འཁོར་ལོ་འབར། །གཡོན་པ་སོགས༴ བྷྱོ། དཔལ་གྱི༴ །བྱང་གི་ཕྱོགས་ནས༴ །སྒྲིམ་པོ་གསལ་ལྡན་ཕ་ཝང་ལ། །ཕྲ་མེན་ཕ་ཝཾ་མགོ༴ །ཕྱག་གཡས་བེ་ཅོན་འབར༴ །གཡོན་པ་སོགས༴ བྷྱོ། །དཔལ་གྱི༴ །བྱང་ཤར་མཚམས་ནས། གསོད་བྱེད་སྲེ་མོང་ཆེན་མོ་ལ། །ཕྲ་མེན་སྲེ་མོང་མགོ༴ །ཕྱག་གཡས་རྩེ་གསུམ་འབར། །གཡོན་པ་སོགས༴ བྷྱོ། །དཔལ་གྱི་ཕོ་ཉ༴ །འོག་གི་ཕྱོགས༴ །དོན་དམ་དབྱིངས་སྦྱོར་བྱི་བ་ལ། །ཕྲ་མེན་བྱི་བའི་མགོ༴ །ཕྱག་གཡས་གཏུན་ཤིང་འབར༴ །གཡོན་པ་སོགས༴ བྷྱོ། དཀྱིལ་འཁོར་དེ་ཡི་ཕྱི་རིམ་ན། །མཐར་བྱེད་ཆེན་མོ་སྒོ་མ་བཞི། །སྙིང་ནས་དྲོངས་ཤིག་ལྕགས་ཀྱུ་མ། །ཡན་ལག་
ཆིངས་ཤིག་ཞགས་པ་མ། །དབང་པོ་སྡོམས་ཤིག་ལྕགས་སྒྲོག་མ། །རྡུལ་དུ་རློགས་ཤིག་
དྲིལ་བུ ་མ། །འདིར་གཤེགས་སོགས། །དཀྱིལ་འཁོར་དེ་ཡི་ཕྱི་རིམ་ན། །དབང་ཕྱུག་ལ་སོགས་ཉི་ཤུ་བརྒྱད། །ཤར་ནས་གཤེགས་པའི་རྣལ་འབྱོར་བདུན། །ཁྱེད་ཀྱིས་ཞི་བའི་ལས་མཛོད་ཅིག །དེ་བཞིན་ཏུ་འདོན་པ་བསྒྱུར་ལ། ལྷོ་ནས་གཤེགས་པའི༴ །ཁྱེད་ཀྱིས་རྒྱས་པའི༴ །ནུབ་ནས་གཤེགས་པའི༴ །ཁྱེད་ཀྱིས་དབང་གི༴ །བྱང་ནས་གཤེགས༴ །ཁྱེད་ཀྱིས་དྲག་པོའི་ལས་མཛོད་ཅིག །འདིར་གཤེགས་སོགས། བྷྱོ། །བདག་ཉིད་ཆེན་མོའི་དུས་ལ་བབ། །ནམ་མཁའི་ཁམས་ཀྱི་དཔལ་མོ་བཙན། །བར་སྣང་ཁམས་ཀྱི་མཐུ་མོ་ཆེ། །བར་སྣང་རྒྱུ་ཚེ་མཁའ་འགྲོ་མ། །ཆོས་ཀྱི་དབྱིངས་ན་བཞུགས་ཙ་ན། །རྡོ་རྗེ་གར་གྱི་དབང་ཕྱུག་མ། །རྒྱ་མཚོའི་གཏིང་ན་བཞུགས་ཙ་ན། །རྡོ་རྗེ་མེ་ཟ་བྲག་གྱོན་མ། །བྷ་གའི་ཀློང་ན་བཞུགས་ཙ་ན། །ཡུམ་ཆེན་བྷ་ག་པྲི་ཏི་མ། །སྟོན་ཚེ་ཤ་བ་ཆིབས་པའི་ཚེ། །ལྷ་མོ་པརྞ་ཤ་བ་རི། །ནམ་གྱི་གུང་ཕྱེད་རྒྱུ་བའི་ཚེ། །རྡོ་རྗེ་ནམ་གྲུ་མཐུ་མོ་ཆེ། །རི་རྒྱལ་རི་རབ་རྩེར་བཞུགས་ནས། །གླིང་བཞི་སྐྱོང་བར་མཛད་པའི་ཚེ། །གླིང་བཞི་ཀུན་འཇོམས་དྲག་མོ་རྒྱལ། །མི་གཅིག་མ་ལ་མིང་དགུ་མ། །མིང་དགུ་མ་ལ་མཚན་སྟོང་མ། །གང་ལ་བྱ་བ་ནོར་ར་རེ། །སྐྱོད་ཅིག་རི་རབ་རྩེ་
ནས་སྤྱོད། །འདིར་གཤེགས་སོགས༴ བྷྱོ། །ཤྭ་ན་མུ་ཁའི་དུས་ལ་བབ། །ཟངས་ཀྱི་ཝ་མོ་རྐང་གསུམ་ལ། །ཟངས་ཀྱི་མི་མོ་ཆེན་མོ་ཞོན། །མིག་ནི་ཉི་མའི་ཟེར་ལས་འཚེར། །སྤུ་ནི་རལ་གྲིའི་སོ་བས་རྣོ། །སྡེར་མོ་ལྕགས་ཀྱུ་འབར་བ་འདྲ། །མཇུག་མ་ལྕགས་ཀྱུ་ལྡོག་པ་འདྲ། །བང་ནི་གློག་གི་སྐྱོད་དུ་མེད། །སྐད་ནི་སྟོང་ཁམས་ཁྱབ་པར་སྒྲོགས། །གཡས་པ་རྡོ་རྗེ་རི་རབ་བསྙིལ། །གཡོན་པ་ཟངས་ཀྱི་ཞགས་པ་ཐོགས། །གང་ལ་བྱ་བ་ནོར་ར་རེ། །སྤྱོད་ཅིག་རྒྱ་མཚོའི་གཏིང་ནས་སྐྱོད། །འདིར་གཤེགས་མཆོད་སྤྲིན་སོགས༴ བོྷྱ། །ས་བདག་ཆེན་མོའི་དུས་ལ་བབ། །རྒྱ་གར་ཡུལ་གྱི་ཚུ་རོལ་ན། །བལ་པོ་ཡུལ་གྱི་ཕ་རོལ་ན། །རྒྱ་བལ་གཉིས་ཀྱི་མཚམས་ཤེད་ན། །ཆུ་ནི་བྱང་ཆུབ་བདུད་རྩིའི་ཆུ། །མེ་ཏོག་པདྨ་དགུན་ཡང་སྐྱེ། །ཡང་ལེ་ཤོད་ཀྱི་བྲག་ཕུག་ཏུ། །སློབ་དཔོན་པདྨ་འབྱུང་གནས་ཀྱི། །སྤྱན་སྔར་ཁས་བླངས་དམ་བཅས་ནས། །ཕུར་པའི་སྲུང་མར་ཞལ་བཞེས་མ། །བསེ་ཡི་ལྷ་མོ་མཆེད་བཞི་སྟེ། །གཅིག་ནི་བལ་ཡུལ་མཐིལ་ན་བཞུགས། །མར་ཁུའི་མཚོ་ལ་གནས་བཅས་ཤིང་། །ཁྱོད་ཀྱི་བཀའ་ཉན་འབུམ་སྡེ་ནི། །ནང་ཡང་མར་ཁུའི་མཚོ་ལ་འདུ། །ནུབ་ཀྱང་མར་ཁུའི་མཚོ་ལ་འདུ། །མར་ཁུའི་མཚོ་ལ་འདུ་འདུ་ནས། །མཐིང་ནག་རལ་པ་ཤ་ར་ར། །དབང་གི་བསྲེ་ཁྲབ་སི་ལི་
ལི། །རལ་པ་རེ་ལ་ཕུར་པ་རེ། །བསེ་ཡི་རལ་པ་སི་ལི་ལི། །ཁྱོད་ནི་བདུད་ཀྱི་བུ་མོ་སྟེ། །ཆིབས་སུ་བདུད་རྟ་ནག་པོ་ཆིབས། །ན་བཟའ་བེར་ཆེན་མཐིང་ནག་གསོལ། །བརྡའ་ནི་མི་འཕྲོད་ལྷོ་བལ་སྐད། །སྐད་ནི་མི་གོ་གསལ་མི་གསལ། །དྲི་ནི་མི་འཕྲོད་ཕྱོགས་ཀུན་ལྡང་། །གཟུགས་ནི་མི་སྟོན་ལག་བརྒྱ་མ། །གཡས་པ་ལྔ་བཅུས་ཕུར་པ་འདྲིལ། །གཡོན་པ་ལྔ་བཅུས་ལྕགས་ཀྱུ་འཛིན། །ལྕགས་ཀྱུས་ཟུང་ལ་ཕུར་པས་ཐོབ། །ཀུ་ལནྡྷ་རའི་དུས་ལ་བབ། །འདིར་གཤེགས་མཆོད་སྤྲིན་སོགས༴ །ས་བདག་ཆེན་མོའི་སོགས་འགྲེ༴ གཅིག་ནི་ཚ་བ་རོང་ན་བཞུགས། །ཞག་གི་མཚོ་ལ་གནས༴ །ཁྱོད་ཀྱི་བཀའ་ཉན༴ །ནང་ཡང་ཞག་གི༴ །ནུབ་ཀྱང་ཞག་གི༴ །ཞག་གི་མཚོ་ལ༴ །སེར་ནག་རལ་པ༴ །དབང་གི་བསེ་ཁྲབ༴ །རལ་པ་རེ་ལ༴ །བསེ་ཡི་རལ་པ༴ །ཁྱོད་ནི་གཟའ་ཡི་བུ་མོ་སྟེ། །ཆིབས་སུ་གཟའ་རྟ་ཞུར་མོ་ཆིབས། །ན་བཟའ་བེར་ཆེན་སེར་ཁྲ་གསོལ། །བརྡ་ནི་མི་འཕྲོད་ཅེས་སོགས་ནས༴ ལྕགས་ཀྱུས་ཟུང་ལ་ཕུར་པས་ཐོབ། །ཞེས་པའི་བར་གོང་བཞིན་ཏེ་འོག་མ་རྣམས་ལའང་སྦྱར། ཤུ་ལནྡྷ་རའི་དུས་ལ་བབ། །འདིར་གཤེགས་སོགས༴ ས་བདག་རྒྱལ་མོའི་སོགས༴ །གཅིག་ནི་མང་ཡུལ་བསེ་ན་བཞུགས། །རཀྟའི་མཚོ་ལ་གནས༴ །ཁྱོད་ཀྱི་བཀའ་ཉན༴ །ནང་ཡང་རཀྟའི༴ །ནུབ་ཀྱང་རཀྟའི༴
རཀྟའི་མཚོ་ལ༴ །དམར་ནག་རལ་པ༴ །དབང་གི་བསེ་ཁྲབ༴ །རལ་པ་རེ་ལ་ཕྱར༴ །ཁྱོད་ནི་བཙན་གྱི་བུ་མོ་སྟེ། །ཆིབས་སུ་བཙན་རྟ་དམར་པོ་ཆིབས། །ན་བཟའ་བེར་ཆེན་དམར་ཁྲ་གསོལ། བརྡ་ནི་སོགས༴ །ཙ་མུན་དྷ་རིའི་དུས་ལ་བབ། །འདིར་གཤེགས་སོགས༴ །ས་བདག་ཆེན་མོའི། སོགས༴ །གཅིག་ནི་སྙེན་མ་བྲིན་ན་བཞུགས། །འོ་མའི་མཚོ་ལ། །ཁྱོད་ཀྱི་བཀའ༴ །ནང་ཡང་འོ་མའི༴ །ནུབ་ཀྱང་འོ་མའི༴ །འོ་མའི་མཚོ་ལ༴ །ལྗང་ནག་རལ་པ༴ །དབང་གི་བསེ་ཁྲབ༴ །རལ་པ་རེ་ལ༴ །བསེ་ཡི་རལ་པ༴ །ཁྱོད་ནི་ཀླུ་ཡི་བུ་མོ་སྟེ། །ཆིབས་སུ་ཀླུ་རྟ་སྔོན་པོ་ཆིབས། །ན་བཟའ་བེར་ཆེན་སྔོ་ཁྲ་གསོལ། །བརྡ་ནི་སོགས༴ །ཀཾ་ཀ་དྷ་རའི་དུས་ལ་བབ། །འདིར་གཤེགས་སོགས༴ །དེ་ཡི་ལས་མཁན་ཆེན་མོ་ནི། །གྲུ་འདེགས་རྒྱལ་མོ་ཆེན་མོ་བཞི། །སྤྱི་བྱིན་རྡོ་རྗེ་མཐུ་མོ་ཆེ། །ཁྱོད་ནི་བདུད་ཀྱི་བུ་མོ་སྟེ། །མཐིང་ནག་འབར་བའི་དཀྱིལ་འཁོར་ནས། །མཐིང་ནག་རལ་པ་ཤ་ར་ར། །མཐིང་ནག་ཅོད་པན་པུ་རུ་རུ། །ཕྱག་ན་གསེར་གྱི་ཕུར་པ་བསྣམས། །གསེར་གྱི་རྔ་ཆུང་དི་རི་རི། །གསེར་གྱི་མདུང་ཐུང་ཆེམས་སེ་ཆེམ། །གསེར་གྱི་རྣ་ཆ་ཀྱི་ལི་ལི། །ཁྱོད་ཀྱི་ཐུགས་དམ་དུས་ལ་བབ། །འདིར་གཤེགས་སོགས༴ །ཡ་བྱིན་རྡོ་རྗེ་མཐུ་མོ་ཆེ། །ཁྱོད་ནི་གཟའ་ཡི་བུ་མོ་སྟེ། །སེར་ནག་འབར་བའི༴ །ཞག་གི་རལ་
པ༴ ལེ་བརྒན་ཅོད་པན༴ །ཕྱག་ན་ཟངས་ཀྱི་ཕུར་པ༴ །ཟངས་ཀྱི་རྔ་ཆུང་༴ །ཟངས་ཀྱི་མདུང་། ཐུང་༴ །ཟངས་ཀྱི་རྣ་ཆ༴ །ཁྱོད་ཀྱི་ཐུགས་དམ༴ །འདིར་གཤེགས་སོགས༴ །བསེ་བྱིན་རྡོ་རྗེ་མཐུ་མོ་ཆེ། །ཁྱོད་ནི་བཙན་གྱི་བུ་མོ༴ །དམར་ནག་འབར་བའི༴ །ཁྲག་གི་རལ་པ༴ །ལེ་བརྒན་ཅོད་པན༴ །ཕྱག་ན་བསེ་ཡི་ཕུར་པ༴ །བསེ་ཡི་རྔ་ཆུང་༴ །བསེ་ཡི་མདུད་ཐུང་༴ །བསེ་ཡི་རྣ་ཆ༴ཁྱོད་ཀྱི་ཐུགས༴ །འདིར་གཤེགས་སོགས༴ །ཕྱག་བྱིན་རྡོ་རྗེ་མཐུ་མོ་ཆེ། །ཁྱོད་ནི་ཀླུ་ཡི་བུ་མོ༴ །ལྗང་ནག་འབར་བའི༴ །ལྗང་ནག་རལ་པ༴ །ལྗང་ནག་ཅོད་པན༴ །ཕྱག་ན་ལྕགས་ཀྱི་ཕུར་པ༴ །ལྕགས་ཀྱི་རྔ་ཆུང་༴ །ལྕགས་ཀྱི་མདུང་ཐུང་༴ །ལྕགས་ཀྱི་རྣ་ཆ༴ །ཁྱོད་ཀྱི་ཐུགས༴ །འདིར་གཤེགས་མཆོད་སྤྲིན༴ །དམ་རྫས་ཕྱི་ནང་༴ །འཁོར་སྲུངས་རྐྱེན་ཟློག༴ །དགྲ་བགེགས་བྱད་མ། །ཐུགས་དམ་གཉན་པོ་མ་གཡེལ་ཅིག །ལྷ་ཚོགས་འཁོར་བཅས་མ་ལུས་ཀུན། །སྔོན་གྱི་ཐུགས་དམ་རྗེས་དགོངས་ལ། །གདུག་པའི་དགྲ་བགེགས་བསྒྲལ་བ་དང་། །ཀཱི་ལ་ཡ་ཡི་དངོས་གྲུབ་སྩོལ། དེ་ནས་འདོད་དོན་གསོལ་བའི། ཧོཿ །གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །བཅོམ་ལྡན་འདས་དཔལ་རྡོ་རྗེ་གཞོན་ནུ་དང་། །ཡུམ་ཆེན་འཁོར་ལོ་རྒྱས་འདེབས་མ། །ཐུགས་ཀྱི་སྲས་མཆོག་རིགས་ལྔའི་ཀཱ་ལ་ཡ། འཇིགས་བྱེད་ཐབས་ཀྱི་ཁྲོ་བོ་ཕ་བཅུ། །ཤེས་རབ་དབྱིངས་
ཀྱི་ཡུམ་གྱུར་ཁྲོ་མོ་མ་བཅུ། ཕྱག་བརྙན་སྤྲུལ་པའི་ཟ་གསོད་ཉི་ཤུ། ལས་བཞི་ལྷུན་གྲུབ་སྒོ་མ་རྣམ་བཞི། བསྟན་སྲུང་ཆེན་མོ་ཤྭ་ན་མུ་ཁ་མཆེད་བཞི། བདག་ཉིད་ཆེན་མོ་རེམ་ཏི་མཆེད་བཞི་ས་བདག་ཆེན་མོ་བསེ་ཡི་ལྷ་མོ། ཁྲག་སྐྱུགས་མདའ་ལྟར་འཕེན་པ་བསེ་ཡི་སྐྱེས་བུ་བཞི། གཟེར་བྱེད་ཕུར་ལྟར་འདེབས་པ་ལྕགས་ཀྱི་སྐྱེས་བུ་བཞི། སྨྱོ་འབོག་རྒྱལ་ནད་གཏོང་བ་དུང་གི་སྐྱེས་བུ་བཞི་ལ་སོགས་པ། ཕུར་པ་ཕྲིན་ལས་ཀྱི་ལྷ་ཚོགས་འཁོར་དང་བཅས་པ་ཐམས་ཅད། དམ་རྫས་ཕུད་ཀྱི་མཆོད་པ་འདི་བཞེས་ལ། །དགྲ་བགེགས་དམ་སྲི་ཐལ་བའི་རྡུལ་དུ་རླག་པའི་ཕྲིན་ལས་མཛོད་ཅིག །གཞན་ཡང་། ཕྱི་ཡི་ལྷ་མ་སྲིན་སྡེ་བརྒྱད། །ནང་གི༴ །གསང་བའི༴ ཡང་གསང་གི༴ །སྦས་པའི༴ ལས་བྱེད་མྱུར་མགྱོགས་ཀྱི༴ འཇིག་རྟེན་བརྟགས་ཆགས་ཀྱི༴ དྲག་པོ་སྔགས་ཀྱི་ལྷ་མ་སྲིན་སྡེ་བརྒྱད། གནོད་སྦྱིན་བྱེ་བའི་ཚོགས་སློབ་དཔོན་དགུ་བརྒྱུད་ཀྱི་སྲུང་མ། བརྟེན་བརྟེན་པ། བསྒྲུབས་བསྒྲུབས་པ། གསོལ་གསོལ་བ། མཆོད་མཆོད་པ། རང་བཞིན་གྱིས་ཆགས་པའི་སྲུང་མ་དམ་ཅན་རྒྱ་མཚོ་ཐམས་ཅད། དམ་རྫས་ཕུད་ཀྱི་མཆོད་པ་འདི་བཞེས་ལ། རྣལ་འབྱོར་བ་བདག་ཅག་འཁོར་དང་བཅས་པ་རྣམས་ལ། སྡང་བར་བྱེད་པའི་དགྲ་སོད། གནོད་པར་བྱེད་པའི་བགེགས་ཐུལ། ཇི་ལྟར་བཅོལ་བའི་ལས་ཀྱིས་ཤིག །སུ་ལ་
མི་རེ་ཁྱོད་ལ་རེ། སུ་ལ་མི་ལྟོས་ཁྱོད་ལ་ལྟོས། རྒྱ་མཚན་དུ་ཁྱེད་འཛུགས། དཔའ་ངར་དུ་ཁྱེད་ཕྱར། ཕྲག་པ་ལ་ཁྱེད་ཁུར་རོ། སྡང་བའི་དགྲ་ལ་མཐུ་མ་ཆུང་། གནོད་པའི་བགེགས་ལ་རྩལ་མ་ཞན། མཐུ་རྩལ་ཕྱུང་ལ་ལས་གྱིས་ཤིག །མི་མཐུན་པའི་ཕྱོགས་ངན་པ་ཐམས་ཅད་ཞི་བ་དང་བཟློག་པའི་ཕྲིན་ལས་མཛད་དུ་གསོལ། སངས་རྒྱས་ཀྱི་བསྟན་པ་བཤིག་ཅིང་སེམས་ཅན་ལ་གནོད་ཅིང་འཚེ་བ་ལ་སོགས་པ་ཞིང་བཅུ་ཚང་པའི་བསྟན་དགྲ་སྤྱི་དང་། ཁྱད་པར་དུ་ངེས་དོན་སྙིང་པོ་ཕྱིར་མི་ལྡོག་པའི་བཤད་སྒྲུབ་ཀྱི་བསྟན་པ་དང་། དེར་འཛིན་འཁོར་དང་བཅས་པ་ལ་དངོས་དང་བརྒྱུད་ནས་འགལ་རྐྱེན་བར་གཅོད་བྱེད་པའི་གཟུགས་ཅན་གྱི་མི་དང་། གཟུགས་མེད་དམ་སྲི་རྒྱབ་བརྟེན་དང་བཅས་པ་ཐམས་ཅད་གཟིར་མནན་བསྐྲད་རྨོངས་རེངས་པ་དང་། བསད་བསྟབ་སྤོར་བའི་སྦྱོར་བ་ལ་སོགས་པ་མངོན་སྤྱོད་དྲག་པོའི་ལས་ཀྱིས་སྐད་ཅིག་ཡུད་ཙམ་ཐང་གཅིག་ལ་ཚར་གཅད་པར་མཛད་དུ་གསོལ། མདོར་ན་ཕྲིན་ལས་བཞི་དང་གྲུབ་པ་ཆེན་པོ་བརྒྱད། རིག་འཛིན་རྣམ་པ་བཞིའི་གོ་འཕང་ལ་སོགས་པ་མཆོག་ཐུན་མོངས་ཀྱི་དངོས་གྲུབ་ཡིད་ལ་ཇི་ལྟར་འདོད་པ་ཐམས་ཅད་མྱུར་དུ་སྩོལ་བར་མཛད་དུ་གསོལ། ཅེས་བརྗོད། འདི་ཉིད་སྒེར་དུ་བྱེད་ན། ཡེ་ཤེས་ལྔ་ལྡན་སོགས་ཀྱིས་དངོས་གྲུབ་ཀྱང་བླང་། གསོལ་མཆོད་གྲུབ་ནས། སངས་རྒྱས་བསྟན་སྲུངས་སོགས་ཀྱི་ཕྲིན་ལས་
བཅོལ། ཡེ་ཤེས་པ་རྣམས་རྟེན་ལ་བསྟིམ། འཇིག་རྟེན་པ་རྣམས། གཙྪ་གཙྪ་སྭ་བྷཱ་བཱ་ནཱཾ། ཞེས་པས་གཤེས་སུ་གསོལ་ལ་གཏོར་མ་གཙང་སར་ཕུལ་ལོ། །ནོར་བུ་བྱི་དོར་བྱས་པས་འདོད་རྒུ་འཇོ། །དཀོན་མཆོག་གསོལ་བ་བཏབ་པས་བྱིན་རླབས་འབྱུང་། །དམ་ཅན་མཆོད་བསྟོད་བསྐུལ་བས་ཕྲིན་ལས་འགྲུབ། །རྒྱུ་ལ་ལྟོས་པས་འཐད་པའི་རིགས་པར་གྲུབ། །གང་ཕྱིར་ནོངས་པ་བཤགས་ཤིང་དགེ་གང་མཆིས། །སྙིང་པོའི་བསྟན་པ་ཕྱོགས་བརྒྱར་རྒྱས་པ་དང་། །དེ་འཛིན་བྱེད་རྣམས་བར་ཆད་ཞི་བ་དང་། །འབྲེལ་ཚད་བདུད་བཞིའི་གཡུལ་ལས་རྒྱལ་ཕྱིར་བསྔོ། །ཞེས་པའང་བསྟན་ལ་ལྷག་པའི་བསམ་པ་དགེ་བ་ཛཾ་ཐང་བླ་མ་ལྔ་པ་ཆེད་དུ་བསྐུལ་ངོར། སྙིང་པོའི་བསྟན་པ་དང་རྗེ་བཙུན་ཆེན་པོའི་གསུང་རབ་ཀྱི་ཞབས་ཏོག་ཏུ་དམིགས་ནས། ཆོས་རྗེ་དཔལ་ལྡན་བླ་མས་མཛད་པའི་སྒྲུབས་ཐབས་རྒྱས་པའི་བསྙོད་བསྐུལ་ཆེན་མོ་མཐའ་བསྒྱུར་གྱིས་བརྒྱན་ཏེ། པདྨའི་འབངས་པདྨ་གར་གྱི་དབང་ཕྱུག་རྩལ་གྱིས་དཔལ་སྤུངས་ཡང་ཁྲོད་ཀུན་བཟང་བདེ་ཆེན་གླིང་དུ་སྦྱར་བ་བསྟན་འགྲོ་ལ་ཕན་བརྒྱ་ཆེན་པོ་འབྱུང་བར་གྱུར་ཅིག །དགེ་ལེགས་འཕེལ། །