ཡི་དམ་དགོངས་འདུས་སྤྱི་སྡོམ་སྤྲོས་བཅས་དབང་ཆེན་སྨིན་གྲོལ་རྒྱ་མཚོ་དབང་རྐྱང་ལུགས་སུ་བསྐུར་བའི་ཟིན་ཐོ།
ཡི་དམ་དགོངས་འདུས་སྤྱི་སྡོམ་སྤྲོས་བཅས་དབང་ཆེན་སྨིན་གྲོལ་རྒྱ་མཚོ་དབང་རྐྱང་ལུགས་སུ་བསྐུར་བའི་ཟིན་ཐོ་བཞུགས། །
ཨོཾ་སྭ་སྟི། གཏེར་ཆེན་བསམ་གཏན་གླིང་པའི་ཟབ་གཏེར་གྱི་གཙོ་བོ་ཡི་དམ་དགོངས་པ་འདུས་པའི་སྨིན་བྱེད་རྒྱས་པ་སྤྱི་སྡོམ་སྤྲོས་བཅས་ལྷ་དབང་ཆེན་མོ་སྨིན་གྲོལ་རྒྱ་མཚོ། འབྲིང་པོ་སྨིན་བྱེད་རྩ་བའི་དབང་མཆོག་བདུད་རྩིའི་བུམ་བཅུད། བསྡུས་པ་སྤྲོས་མེད་ཐུགས་ཀྱི་དབང་བསྐུར་གསུམ་དུ་བཞུགས་པ་རྣམས་ཕྱག་རྒྱུན་དངོས་ལྟར་ན། །ཆོས་རྗེ་གླིང་པས་བསྒྲིགས་པའི་སྒྲུབ་ཁོག་ལྟར་ཚོམ་བུ་ཚོགས་སྒྲུབ་ཆེན་མོའི་ཁོངས་སུ་དམ་པ་རིགས་བརྒྱ་སོགས་སྒོམ་སྒྲུབ་རྣམས་ཀྱང་བཅུག་ནས་དངོས་གྲུབ་བླང་བའི་རྗེས་སུ་དབང་རྒྱས་འབྲིང་བསྡུས་གསུམ་རིམ་པར་བསྐུར་བ་ཡིན་འདུག་ཀྱང་། དབང་རྒྱུན་ཙམ་ལ་སྒྲུབ་ཆེན་སོགས་མི་འགྲུབ་པས་སྤྱི་འགྲེ་ལག་ཏུ་ལེན་
པའི་ཚུལ། དང་པོ་དབང་བསྐུར་རྒྱས་པ་ལ་ཉིན་དང་པོ་སྟ་གོན་ནི། སྒྲུབ་གནས་རྙིང་པར་དཀྱིལ་འཁོར་རས་བྲིས་ལ་བརྟེན་པའི་དབང་དུ་བྱས་ཏེ། གཏེར་མཛོད་དུ་ཡོད་པའི་རྩ་དབང་ཆོག་ཁྲིགས་མར་བཤད་པ་ལྟར་ལས་བྱང་ཆུབ་བའི་བདག་བསྐྱེད་བཟླས་པ་དང་བཅས་པ་བྱ། དེ་ནས་ས་སློང་གཏོར་འབུལ་ཙམ་བཏང་ན་སྤྱི་འགྲོ་ཡིན་པས་ལེགས། དེ་ནས་ལྷ་སྟ་གོན་རྗེས་དམ་པ་རིགས་བརྒྱའི་བསྐྱེད་བཟླས་ཀྱིས་བུམ་པ་སྟ་གོན་དང་། །སྤྱི་ཁྲུས་བུམ་པར་རྡོར་སེམས་བསྐྱེད་བཟླས་བྱ། ལས་བུམ་བསྒྲུབ། སློབ་མ་རྣམས་འཚོགས། །རྩ་དབང་རྣམས་ཆོག་ཁྲིགས་ལྟར། སེམས་བསྐྱེད་གསལ་གདབ་ནས། འདིར་སྤྱི་སྡོམ་སྤྲོས་བཅས་ལྷ་
དབང་ཆེན་མོ་སྨིན་གྲོལ་རྒྱ་མཚོ་བསྒྲུབ་པ་ལ་ཐོག་མར་གསན་པའི་ཡོན་ཏུ་ཞིང་ཁམས་རྒྱས་པར་འབུལ། ཇི་སྐད་སྨོས་པའི་སྨིན་བྱེད་ཀྱི་རིམ་པ་རྒྱས་པར་བསྒྲུབ་པ་ལ་རྩ་བའི་གཏེར་གཞུང་གི་ཚིག་དོན་ལྷག་ཆད་མེད་པ་བཏང་བའི་ཕྱག་ལེན་གྱི་དབང་དུ་བྱས་ཏེ་ས་བཅད་ལོ་རྒྱུས་རྡོ་རྗེའི་གསུང་རྒྱས་པར་འབྱུང་བ་འདི་ལ་སྙན་གཏོད་པར་ཞུ། །དེ་ལ་དབང་གི་ལོ་རྒྱུས༴ སོགས་ནས། འགྲུབ་པར་འགྱུར། ཅེས་སྤྱི་སྡོམ་ཆེན་པོ་རྣམ་པ་བཞིས་བསྟན་པ་ལ། སྤྱི་དོན་དང་པོ་དབང་གི་བཀའ་བབ༴ སོགས་ནས། བར་གྱི་ལེའུའི་མཚན་རྣམས་བསྐྱུར་བའི་འཕྲོས་མཐར་ཆགས་སུ་བཏང་སྟེ། ཐུགས་ལ་བསྟིམཿཞེས་གསུངས་པ་ལྟར་ལགས་སོ། །སྤྱི་དོན་གཉིས་ པ་དབང་གི་དགོས 
་དོན། སོགས་ནས། འདས་པའི་ཐེག་པ་ལ་མཐར་ཕྱིན་པར་བྱའོ། །དེ་ལྟ་བུའི་ཐེག་པ་རིམ་འཇུག་གི་ཐོག་མར་འཇིག་རྟེན་པའི་ཐེག་པའི་སྤྱི་ཁྲུས་རིགས་དྲུག་གནས་སྦྱངས་གི་དབང་བསྐུར་ཞུ་བའི་ཡོན་ཏུ་མཎྜལ་འབུལ། གསོལ་གདབ། ཨེ་མ། བླ་མ་དཔལ་ཆེན། སོགས། སྤྱི་དོན་གསུམ་པའི་སྐབས་ལྟར་བཏང་ནས། སྤྱི་ཁྲུས་བུམ་དབང་ཡན་བཏང་། རྟ་མཆོག་རོལ་པའི་སོགས་ནས། ཀུན་གྱི་སྔོན་འགྲོའོ། །ཞེས་གསུངས་སོ། །དེ་ནས་གང་གི་འཕྲོས་གཉིས་པ་ལོག་པར་ལྟ་བ་ནས་འཇུག་པར་བྱའོ། །ཞེས་གསུངས་ཏེ་དེའི་དབང་དོན་འདིར་ལོག་པར་འདྲེན་པའི་བགེགས་བསྐྲད་
ཅིང་བར་ཆད་མི་འཇུག་པའི་མཚམས་གཅོད་སྲུང་འཁོར་བསྒོམ་པར་གསུངས་པ་ལྟར་བགྱི་བ་ལགས་པས་འདུན་པ་མཛད་པར་ཞུ། ཞེས་མཚམས་སྦྱར་ལ། ཡི་དམ་ལས་བྱང་རྒྱས་བསྡུས་གང་རུང་སྐབས་བསྟུན་གྱིས་མཚམས་གཅོད་སྲུང་འཁོར་རྣམས་བཏང་། རང་རེ་རྣམས་ཐོག་མར༴དབང་བསྒྲིགས་ལྟར་ལ། མཎྜལ་ཡང་འབུལ་བར་ཞུ། ཞེས་འབུལ་དུ་གཞུག །དབང་གཞུང་གང་གི་འཕྲོས། །འཇིག་རྟེན་ལས་འདས་པའི་ཐོབ་པར་འདོད་པའོ༔ དེ་ལྟ་བུའི་ཉན་རང་བྱང་སེམས་གསུམ་གྱི་ཐེག་པ་ལ་འཇུག་པའི་དབང་དོན་སྐྱབས་སུ་འགྲོ་བ་དང་སེམས་བསྐྱེད་པ་ལགས་ཤིང་། དེའང་ཐོག་མར་སྡོམ་
པ་ཐམས་ཅད་ཀྱི་གཞི་རྟེན་སྐྱབས་སུ་འགྲོ་དགོས ་ཏེ། ཀྱེ་ཧོ༴ སོགས་དབང་བསྒྲིགས་ལྟར་བརྗོད། སྟོང་གསལ་བསྒོམ༔ གསུམ། །དབང་གཞུང་གོང་འཕྲོས། བཞི་པ་དབང་པོ་འབྲིང་གི་ཐ་མ༔ ནས། ས་ནོན་པར་འདོད་པའོ༔དེ་རྣམས་ཀྱི་དབང་དོན་འདིར་གོ་འཕང་མཆོག་ཏུ་དྲོངས་ཤིང་སྒོ་གསུམ་དག་པར་བྱེད་པའི་ཐབས་ཁྱད་པར་ཅན་སོ་ཤིང་སྲུང་སྐུད་ཀུ་ཤ་སྦྱིན་པ་ལགས་ཏེ། དྲི་དང་ལྡན་ཅིང་སོགས། སོ་ཤིང་སྲུང་སྐུད་ཀུ་ཤ་སྦྱིན་པ་རྣམས་རྩ་དབང་ཆོག་ཁྲིགས་ལྟར་གྲུབ་ནས་དགེ་བ་བསྔོ། །སློབ་མ་གྲོལ། སློབ་དཔོན་གྱིས་ལྷ་ལ་གསོལ་གདབ་བྱ། བདག་བསྐྱེད་བསྡུ་ལྡངས་
ལས་བྱང་ལྟར་བྱ།། ༈ །།ཉིན་གཉིས་པར། དངོས་གཞི་ཐོག་མར། བརྒྱུད་འདེབས། གཏོར་མ་ཆ་གཉིས་བཏང་། དམ་པ་རིགས་བརྒྱའི་ལས་བྱང་དང་ཡི་དམ་ལས་བྱང་ཆེན་མོའི་སྔོན་འགྲོ་རྣམས་ཕན་ཚུན་སྦྲག་མར་བཏང་། དེ་ནས་དམ་པ་རིགས་བརྒྱའི་མངོན་རྟོགས་ནས་བརྩམས་མཆོད་པའི་སྐབས་མཆོད་འབུམ་སྦྱར་ཐུབ་ན་ལེགས་ཤིང་བཟླས་པའི་བར་བཏང་ལ་མཆོད་བསྟོད་འབུལ། དེ་ནས་ཡི་དམ་གྱི་མངོན་རྟོགས་ནས་བཟླས་པ་ཡན་གྲུབ་པ་དང་། བུམ་དཀྱིལ་གསལ་གདབ་སྤྱི་འགྲེ་མདོར་བསྡུས་དང་བུམ་བཟླས་མཐར་སྟོང་ཚིག་ཕུལ། འོད་ཞུ་བྱ། ལས་གཞུང་གཏོར་མ་འབུལ། བཀའ་སྲུང་གསང་བ་ཀུན་འདུས་ཀྱི་ལས་བྱང་བཏང་། གཏོར་འབུལ་བྱ། རུ་ཟུང་བཞིའི་བཤགས་པ་མདོངས་སྐོང་། མར་མེ་སྨོན་ལམ་བཅས་སྦྱར། ཞི་དྲག་གཉིས་ཀའི་ཚོགས་དང་སྐོང་བ་གྲུབ་ནས་རིག་མེ་དོར། གནང་བ་ཞུ་བ་སྤྱི་ལྟར་བྱ། དཀྱིལ་འཁོར་ལ་ཡོལ་བ་བཏང་། དེ་ནས་སློབ་མ་ལ་ཁྲུས། བགེགས་བསྐྲད། སྲུང་འཁོར། སེམས་བསྐྱེད་གསལ་གདབ་རྗེས། བདུན་པ་དབང་པོ་རབ་ཀྱི་ཐ་མ་དབང་གཞུང་སྔ་འཕྲོས་ལྟར་བརྗོད་ལ། བགྲོད་དུ་མེད་པའོ༔ ཞེས་གསུངས་པའི་ཡོ་ག་རྣམ་གསུམ་ཡང་ཏི་དང་བཅས་པའི་དབང་རྣམས་རིམ་པར་བསྐུར་བ་ལ། དཀྱིལ་འཁོར་དུ་འཇུག་པའི་ཆོས་
དང་ཞུགས་ནས་དབང་བསྐུར་བ་གཉིས་སུ་ཡོད་པ་ལས། ཐོག་མར་འཇུག་པའི་ཆོས་རྣམས་ཞུ་བའི་ཡོན་ཏུ་དམིགས་ཏེ་མཎྜལ་ཕུལ། མཚམས་སྦྱོར་བཅས་གསོལ་གདབ། ཀྱཻ། དུས་གསུམ་སངས་རྒྱས༴ སོགས་ལས་བྱང་ཆུང་བའི་ནང་ལྟར་ལན་གསུམ། གནང་སྦྱིན་ཕྱིན་དབང་གཞུང་ལྟར་ལ་མིག་དར་མེ་ཏོག །ཚོགས་བསགས། ཀྱཻ། བདེ་གཤེགས་དགོངས་འདུས༴སོགས་ལས་བྱང་ཆེན་མོ་ནས་ལེན། བྱིན་འབེབས་སྐབས་སློབས་མ་དབང་ཆེན་ཞལ་ལྔ་ཕྱག་བཅུ་པར་བསྐྱེད་དགོས་པས་དཔེ་འཛོམ་ན་མངོན་རྟོགས་གཞུང་ཆེན་ནས་ལེན། མ་འཛོམ་ན་ལས་བྱང་ཆེན་མོ་ལྟར་གསལ་གདབ། དཀྱིལ་འཁོར་བརྡའ་དོན་སྤྲད་པའི། དགའ་བ་དང་སྤྲོ་བ་བསྐྱེད་འཚལ། ཡན་སོང་ནས། དེ་རྣམས་ཀྱིས་དཀྱིལ་འཁོར་དུ་འཇུག་པའི་ཆོས་གྲུབ་པ་ལགས། ཞུགས་ནས་མངོན་པར་དབང་བསྐུར་བ་ལ་རྣམ་གྲངས་བདུན་དུ་ཡོད་པའི་དང་པོ་ཕྱི་ལྟར་ཐུན་མོང་རིག་པའི་དབང་ལྔ་ཞུ་བའི་ཡོན་ཏུ་མཎྜལ་ཕུལ། གསོལ་གདབ་བྱ། བུམ་ཆུ་མི་བསྐྱོད་པ་བསྐྱེད་བསྟིམ་ཚིག་ལྷུག་རྒྱས་བསྡུས་གང་ཤེས་སྤྱི་ལྟར་བྱ་བ་སོགས་རིག་དབང་ལྔ་ལ་འགྲེ། རྡོ་རྗེའི་བརྟུལ་ཞུགས་ལ་དབང་རྫས་སློབ་མ་གཉིས་ཀ་རྡོར་སེམས། སློབ་དཔོན་དབང་ལ་སློབ་མ་དབང་ཆེན་ཡབ་ཡུམ་སྔར་ལྟར་བསྐྱེད།
རྡོར་དྲིལ་བྱིན་རླབས་སྤྱི་མཐུན་བྱ། འབྱེད་པར་བྱ། དེ་དག་གིས་དཀྱིལ་འཁོར་སྤྱིའི་འཇུག་ཚུལ་ཐུན་མོང་རིགས་ལྔའི་དབང་བསྐུར་གྲུབ་ནས། བྱེ་བྲག་ཏུ་དཀྱིལ་འཁོར་སོ་སོའི་ལྷ་དབང་རྒྱས་པར་བསྐུར་བའི་ཐོག་མར་ས་བཅད་གཉིས་པ་བརྒྱུད་གསུམ་བླ་མ་རིག་འཛིན་ཀྱི་དབང་བསྐུར་ཞུ་བའི་ཡོན་ཏུ་མཎྜལ་ཕུལ། གསོལ་གདབ། བུམ་པ། བདུད་རྩི། ཤེལ་རྡོ། མེ་ལོང་རྣམས་སོང་ནས་ཕྲིན་ལས་སྐུ་འབག་དབང་གཞུང་གསལ་རྗེས། བརྒྱུད་ པ་རེ་རེ་བཞིན་ཁ་བསྒྱུར་ནས་བསྐུར་དགོས ་པར་འདུག་ཀྱང་མདོར་བསྡུས་ས་བཅད་ཙམ་དུ། རིག་འཛིན་བརྡའ་བརྒྱུད་བླ་མ་རྣམས། །ཡེ་ཤེས་ཆེན་པོའི་རྩལ་རྫོགས་ནས། །ཀུན་བཟང་རྒྱལ་སྲིད་སྤེལ་བ་ལ། །གསོལ་བ༴ སྔགས། །གང་ཟག་སྙན་བརྒྱུད་བླ་མ་རྣམས། །གདོད་མའི་གནས་ལུགས་མངོན་གྱུར་ཏེ། །རླབས་ཆེན་ཕྲིན་ལས་སྒྲུབ་པ་ལ། །གསོལ་བ༴སྔགས། ལས་འཕྲོ་གཏེར་བརྒྱུད་བླ་མ་རྣམས། །ས་ལམ་ཡོན་ཏན་མཐར་ཕྱིན་ཏེ། །ཐུགས་རྗེས་འགྲོ་དོན་མཛད་པ་ལ། །གསོལ་བ་འདེབས་སོ་བྱིན་གྱིས་རློབས། སྔགས་དང་༴ བུམ་དབང་བསྐུར་བ་སོགས་ནས། འདིས་འགྲུབ་འགྱུར༔དེ་དག་གིས་བྱིན་རླབས་ཐོག་བབས་སུ་འབྱུང་བ་བརྒྱུད་གསུམ་བླ་མའི་དབང་བསྐུར་གྲུབ་པ་ལགས། གསུམ་པ་མ་ཧཱ་ཡོ་གའི་དཀྱིལ་འཁོར་དུ་སྒྱུ་འཕྲུལ་དགོངས་འདུས་
ན་རག་དོང་སྤྲུག་གི་དབང་བསྐུར་ཞུ་བའི་ཡོན་དུ་མཎྜལ་ཕུལ། གསོལ་བ་གདབ། གནང་སྦྱིན་སོགས་དང་། བུམ་དབང་དགུ། ཚོམ་བུ་དགུའི་ལྷ་དབང་རྫོགས་པར་བསྐུར། གསུང་དབང་ལ་འོག་ཁྲོ་བོའི་སྐབས་སུ་འབྱུང་བའི་གསོལ་གདབ་ཁ་བསྒྱུར། རིགས་བརྒྱའི་སྔགས་དང་། ཨོཾ་ནི་སངས་རྒྱས༴ སོགས། ཐོབ་གྱུར་ཅིག༔ ཨཱཿབྷནྡྷ་མཚན་ལྡན་སོགས། བདུད་རྩི། ཧཱུྃ་རྡོ་རྗེ་རྩེ་ལྔ་སོགས་ཕྱག་མཚན། ཧཱུྃ། །དུས་གསུམ་བདེ་གཤེགས་སོགས་རྣམ་བུམ། ཧཱུྃ། དབུ་རྒྱན་ཅོད་པན་སོགས་ཆས་དབང་། ཧཱུྃ། ཤེས་རབ་དག་པས་སོགས་བཤད་སྒྲུབ་དབང་། ཕྲིན་ལས་གཏོར་མ་གཏོར་དབང་འོག་གི་ཞི་ཁྲོ་ལྟར། ཨོཾ་ཨཱཿཧཱུྃ་ཧྲཱིཿ དཔལ་གཏོར་མཚན་རྫོགས་སོགས་ཀྱིས་བསྐུར། ཤིས་པ་བརྗོད། སྐབས་འདི་ཙམ་ལ་བར་མཚམས་བྱས་ན་རིང་། ཐུང་འཚམས་པར་འགྱུར་རོ། །སླར་འཚོགས་ལ་ཁྲུས་དང་ཕྱག་བྱ། སེམས་བསྐྱེད་གསལ་གདབ། ཡི་དམ་དགོངས་འདུས་རྟ་མཆོག་རོལ་པའི་རྒྱབ་ཆོས་སྤྱི་སྡོམ་སྨིན་བྱེད་དབང་རིམ་ཆེན་མོ་ལས། རྩ་བའི་ས་བཅད་བཞི་པ་མ་ཧཱ་ཡོ་གའི་ཡི་དམ་ཁྲོ་བོའི་དཀྱིལ་འཁོར་དབང་བསྐུར་བ་ལའང་ནང་གསེས་དབང་གི་རིམ་པ་ལྔ་ཡོད་པའི་དང་པོ་སྐུ་བུམ་པ་ལ་བརྟེན་ནས་ལྷ་དབང་ཡོངས་རྫོགས་ཞུ་བའི་ཡོན་ཏུ་མཎྜལ་ཕུལ། གསོལ་བ་གདབ། བུམ་དབང་སྨོན་ལམ་བཅས་རྩ་བའི་དཀྱིལ་འཁོར་དང་
སྤྲུལ་པའི་མ་མོ་རྣམས་ཀྱི་ལྷ་དབང་སོ་སོ་དང་འོག་གི་སྨོན་ལམ་རེ་རེ་བཞིན་སྒྲགས་ན་ལེགས་པས་བར་རིམ་བཞིན་ཡར་ལེན། དྲེགས་པའི་སྲོག་དབང་ཡང་གཞུང་གསལ་ལྟར་ལ། བྱིན་དབབ་བསྟིམ་གྱི་རྗེས་སློང་མ་དབང་ཆེན་གྱི་གསལ་སྣང་ང་རྒྱལ་བསྐྱེད་པའི་ཚིག་རྒྱས་བསྡུས་གང་རུང་བརྗོད་ལ་ཙ་ཀླི་རྣམས་རིམ་པར་གཏད། གཉིས་པ་དབང་ཆེན་ལྷ་ཚོགས་ཡོངས་རྫོགས་ཀྱི་གསུང་གི་དབང་བསྐུར་ཞུ་བའི་ཡོན་ཏུ་མཎྜལ་ཕུལ། གསོལ་གདབ། རྩ་སྔགས། ཨོཾ་ནི་སངས་རྒྱས་སོགས་ནས། དབང་བསྐུར་རྫོགས་པར་ཤོགཿབླ་མ་རྟ་མགྲིན་དབང་ཆེན་སོགས་དང་སྔགས་གསུམ་རྗེས་ཟློས། ཁྲོ་བོ་དབང་ཆེན་ཡོངས་རྫོགས་ཀྱི༔སྙིང་པོ་གསང་བའི༴སྔགས་ཀྱི་ནུས་པ༴ཁྲོ་བོའི་གསུང་དབང་། ཞེས་བསྒྱུར་ལ་བརྟན་པའི་སྔགས་དང་མེ་ཏོག་འཐོར། དྲེགས་པའི་འཁོར་ཚོགས་སྲོག་ནས་གཟིར་བའི་དྲག་སྔགས་ཁྲོ་འདུས་ཀྱི་རྗེས་ཟློས། ཨོཾ་པདྨ་ན་ཏ་ཀྲིཏ་སོགས་ལན་གསུམ། སྣང་སྲིད་དབང་ཆེན་སོགས། སྔགས་བྱང་མགྲིན་པར་བཞག་ལ། ཧོཿ གསུང་དབང་ཐོབ་ནས་སོགས༴ བདུད་རྩི། ཧཱུྃ་རྡོ་རྗེ་རྩེ་དགུ་སོགས་ཡབ་དང་། གྲི་ཐོད་ཡུུམ་གྱི་ཕྱག་མཚན། བུམ་དབང་བཅས་ཐུགས་དབང་། ཡོན་ཏན་རྒྱན་རྫས། ཧཱུྃ། གཏི་མུག་གླང་ཀོ་ནས་ཉན་འཆད་སྒོམ་སྒྲུབ་ཆས་ཀྱི་བར། ཕྲིན་ལས་མཆོད་རྫས་རྣམས་དང་ལས་བཞིའི་ཕུར་པའི་
དབང་གྲུབ་ནས། བསྒྲལ་དབང་རྒྱས་ པ་བསྒྲལ་བའི་ལས་རིམ་སོགས་དང་སྦྲེལ་ལ་དགོས ་པར་སྣང་ཡང་མདོར་བསྡུས་ཙམ་དུ་ཧོམ་བསྐྱེད་དང་འགུགས་གཞུག་སྤྱི་འགྲེ་བྱ། གོང་གི་ཁྲོ་འདུས་དང་མ་མོ་འདུས་པའི་དྲག་སྔགས་ཀྱི་ཐུན་བྲབ་ཏུ་གཞུགས། གཞུང་གསལ་ཕུར་གདབ་དང་ལས་བྱང་ལྟར་ཞལ་བསྟབ་བྱ། འགྲོ་འདུལ་ཡོངས་རྫོགས་དམ་རྫས་གཏོར་མའི་དབང་གསང་སྒྲུབ་ཀྱི་དངོས་གྲུབ་གཏོར་དབང་དཔེ་མ་འབྱོར་ན་ལས་བྱང་ཆེན་མོའི་དངོས་གྲུབ་བསྐུལ་ཚིག་ཁ་བསྒྱུར། དེ་ནས་ཤིས་བརྗོད། དམ་ཚིགས་བསྒྲག་གཟུང་སོགས་དབང་རྗེས་སྤྱི་ལྟར་བྱ། ཚོགས་ལ་རོལ་ཅིང་ལྷག་ཆོག་ཕྱིན་ལས་བྱང་ཞི་དྲག་གུང་བསྡེབ་ལ་མཐར་དབྱུང་ངོ་།། ༈ །།ཉིན་གསུམ་པའི་སྔ་དྲོ་སྔོན་གཏོར་ཆ་གཉིས་བཏང་། མཁའ་འགྲོའི་ལས་བྱང་པདྨའི་ཟེར་ཕྲེང་ལ་མཆོད་བྱང་གྲུབ་ན་སྐོང་བཤགས་ཀྱང་སྦྱར་ནས་ཚོགས་མཆོད་བར་བཏང་། རྣམ་བུམ་བསྐྱེད་བཟླས། ལས་བུམ་བསྒྲུབ་པ་དང་རིག་མེ་དོར་བསོགས་སྤྱི་ལྟར་བྱ། དབང་ལ་ཁྲུས། བགེགས་བསྐྲད། མཎྜལ། དེ་ནས་སྔོན་འགྲོ་རྣམས་མཁའ་འགྲོ་གསང་ལམ་ཐུགས་སྒྲུབ་ལྟར་སྦྱོར་བར་གསུངས་པས་གྲུབ་ན་གཏེར་གཞུང་དང་། དབང་གཞུང་ཟིན་ཐོ་བསྟུན་ལ་བཏང་། མི་འགྲུབ་ན་སྤྱི་ཙམ་དུ། གོ་གསལ། ཀྱཻ། དུས་གསུམ་སངས་རྒྱས་སོགས་གསོལ་གདབ་ནས་དཀྱིལ་འཁོར་བསྟན་པའི་བར་བཏང་། བྱིན་འབེབས་སྐབས་སློབ་མ་མཁའ་འགྲོའི་གཙོ་མོར་བསྐྱེད།
ལྷ་ངོ་མཁའ་འགྲོའི་དཀྱིལ་འཁོར་མཚན་ཙམ་གྱིས་བསྟན། དངོས་གཞི་བུམ་དབང་ཞུ་བའི་ཡོན་ཏུ་མཎྜལ་ཕུལ། གསོལ་བ་གདབ། བུམ་དབང་བསྐུར་ཚིག་གོང་གི་ཡི་དམ་ཁྲོ་བོ་ལྟར། ཧཱུྃ་ཧྲཱིཿ བུམ་པའི་ངོ་བོ་སོགས་ལ། སྔགས་སོགས། ཨོཾ་ཨཱཿཧྲཱིཿམཛྙཱ་ན་ཌཱ་ཀི་ནཱི་བཛྲ་ཀ་ལ་ཤ། ཞེས་བསྒྱུར་ལ། བི་ཤུདྡྷེ་ཧཱུྃ༔ བར་བརྗོད། དེ་ནས་རང་གཞུང་། ལུས་ཀྱི་དྲི་མ་སོགས་དང་། ལྷ་དབང་གསོལ་གདབ་ནས་བཟུང་སྔགས་ཀྱིས་བརྟན་པའི་བར། །དེ་ནས་ཞི་ཁྲོའི་གསུང་དབང་སྐབས་ལ་ཚིག་ཅུང་ཟད་བསྒྱུར་ཏེ། བླ་མ་ཡེ་ཤེས་མཁའ་འགྲོར་གསལ། ཐུགས་ཀའི་སྔགས་ལས་སོགས༴ འབར་བར་བསམ༔ ཞེས་དམིགས་པ་ཕོག་ལ་དེ་འཕྲོས་ཡོད་པའི་ཨ་ནུ་ཡོ་ག་མཁའ་འགྲོའི་སྙིང་པོ་ཚན་གཉིས་རྗེས་ཟློས་ལན་གསུམ་རེ་བྱར་གཞུག །ཨཱཿ བྷནྡྷ་མཚན་ལྡན་སོགས་ཀྱིས་བདུད་རྩི་སྦྱིན། སྔགས་བྱང་ཕྲེང་བ་གཏད་ལ་རང་གཞུང་ངོ་སྤྲོད་སྨོན་ལམ་སྔགས་ཀྱིས་བརྟན། དེ་ནས་གོང་གི་འཕྲོས། ཧཱུྃ། རྡོ་རྗེ་རྩེ་ལྔས་སོགས་ཐུགས་ཕྱག་མཚན་གྱི་དབང་བསྐུར། རང་གཞུང་། མཁའ་འགྲོའི་མཚན་བརྗོད་སོགས་ཀྱིས་ངོ་སྤྲད། གོང་གི་འཕྲོས་ ཧཱུྃ དབུ་རྒྱན་སྙན་རྒྱན་སོགས་ཡོན་ཏན་ཆས་དབང་བསྐུར། རང་གཞུང་། ཧཱུྃ། ཕུང་ཁམས་དག་པ་སོགས་ཀྱིས་རིག་མ་སྦྱིན། ཧོཿ སྲིད་པའི་འདོད་ཆགས་སོགས་ཀྱིས་ངོ་སྤྲད། འཕྲིན་
ལས་གཏོར་དབང་གསང་སྒྲུབ་དངོས་གྲུབ་བསྐུལ་ཚིག་ལྟར་བྱ་བར་གསུངས། ཤིས་པ་བརྗོད། རྗེས་དམ་ཚིག་བསྒྲག་བཟུང་སོགས་སྤྱི་ལྟར་དང་། །ཚོགས་རོལ་ལྷག་ཆོག་ཕྱིན་ཆོ་གའི་རྗེས་རིམ་རྣམས་ཀྱང་མཁའ་འགྲོའི་ལས་བྱང་ལྟར་བྱའོ།། ༈ །།ཕྱི་དྲོ་རྫོགས་ཆེན་འཁོར་འདས་རང་གྲོལ་ལས་བྱུང་བའི་པདྨ་ཞི་ཁྲོ་རྩ་གསུམ་འདུས་པའི་ལས་བྱང་དྲི་མེད་རབ་གསལ་ལ། མངོན་རྟོག་ཨ་ཏི་ཡོ་གའི་སྒྲུབ་ཐབས་ཉི་ཟླའི་ཕྲེང་བ་སྦྱར། དེའང་བདག་བསྐྱེད་ལུས་དཀྱིལ། མདུན་བསྐྱེད་ཕྱི་དཀྱིལ་ལྔ་ཚོམ་དུ་བསྒོམ་པའང་བདག་མདུན་དབྱེར་མེད་བྱས་ཀྱང་ཆོག །གོང་ལྟར་བཟླས་པ། བུམ་སྒྲུབ། ཆོས་སྲུང་གཏོར་ཆོག །ཚོགས་མཆོད་ཞལ་བསྟབ་བར་བྱ། རིག་མེ་དོར། སློབ་མ་ལ། ཁྲུས། བགེགས་བསྐྲད་བྱ། མཎྜལ་འབུལ། གོང་གསལ། ཀྱེ། དུས་གསུམ་སངས་རྒྱས་སོགས་གསོལ་གདབ་ནས་དཀྱིལ་འཁོར་བསྟན་པའི་བར་བཏང་། བྱིན་འབེབས་སྐབས་ཞི་ཁྲོའི་དབང་གཞུང་ལྟར་བསྐྱེད་བསྟིམས་དང་ཕྱག་རྒྱ་གསུམ་གྱིས་བརྟན་པར་བྱ། ལྷ་ངོ་བསྟན་པའང་མཚན་ཙམ་བསྒྱུར། བུམ་དབང་གཞུང་དོན་རྒྱས་པར་སྤྲོ་ན་གོང་གི་ན་རག་དོང་སྤྲུགས་ལྟར། གསོལ་གདབ་དང་བུམ་ པ་དགུ། དེ་ནས་ཁྲོ་བོས་སྐུར་དགོས ་པར་གསུངས་པས་འདིའི་དབང་ཁོལ་ཕྱུང་བྱེད་
སྐབས་དེ་ལྟར་ངེས་པར་དགོས། འདིར་ཞི་དབང་སྔོན་ཏུ་སོང་བས་འཐུས་པར་བྱས་ནས་ཁྲོ་དབང་སྐབས་ལྟར་ཧེ་རུ་ཀ་དཔལ་སོགས་གསོལ་གདབ་དང་། བུམ་དབང་ཚན་གཉིས། སྨོན་ལམ་བཅས་བྱ། ད་ནས་རང་གཞུང་ལྷ་དབང་ཞུ་བའི་ཡོན་ཏུ་མཎྜལ་ཕུལ། གསོལ་གདབ། ཞི་བའི་བུམ་དབང་། ཞི་བ་ཡོངས་རྫོགས། ཁྲོ་བོའི་བུམ་པ། ཁྲོ་བོ་ཡོངས་རྫོགས་ལྷ་དབང་བསྐུར། དེ་ནས་གསུངས་དབང་གོང་གི་ཁྲོ་བོའི་སྐབས་ཀྱི་དམིགས་པ་ཅུང་ཟད་ཁ་སྒྱུར་ལ། སྔགས་བོ་དྷི་ཙིཏྟ་རྗེས་ཟློས་ལན་གསུམ། སྔགས་བྱང་ཕྲེང་བ་མགྲིན་པར་བཞག་ལ། ཧོཿ གསུང་དབང་ཐོབ་ནས་སོགས། ཨཱཿ བྷནྡྷ་མཚན་ལྡན་སོགས་ཀྱི་བདུད་རྩི་སྦྱིན། ཧཱུྃ། རྡོ་རྗེ་རྩེ་ལྔ་སོགས་ཀྱི་ཐུགས་ཕྱག་མཚན། ཧཱུྃ། དབུ་རྒྱན་ཅོད་པན་སོགས་ཚན་གསུམ་གྱིས་ཡོན་ཏན་ཆས་དབང་སྤྲོ་ན་འདོད་ཡོན་སོགས་གསུམ་ཀ་དང་སྡུན་ཉན་འཆད་སྒོམ་སྒྲུབ་ཙམ་གྱིས་དབང་སྨོན་ལམ་བཅས་སོང་ནས། ཕྲིན་ལས་གཏོར་མའི་དབང་རང་གཞུང་ལྟར་བསྐུར། ཤིས་པ་བརྗོད། དམ་ཚིག་ཁས་བླང་སོགས་དབང་གི་རྗེས་རྣམས་དང་ཚོགས་རོལ་ལྷག་ཆོ་ག་ཕྱིན་ཆོ་གའི་རྗེས་རིམ་རྣམས་ལས་བྱང་དང་སྤྱིའི་འགྲོས་ལྟར་བྱའོ།། ༈ །།ཉིན་བཞི་པར། བརྒྱུད་འདེབས། སྔོན་གཏོར་ཆ་གཉིས་བཏང་། བླ་མ་ཡིད་བཞིན་ནོར་
བུའི་ལས་བྱང་ཆེན་མོ་ཚོམ་བུ་དགུ་པ། མདུན་བསྐྱེད་དཀྱིལ་འཁོར་མཆོད་ཕྲེང་། །སྔགས་བྱང་ཛབ་བསྐུལ་སོགས་སྤྲད་ལ་བདག་མདུན་སྒྲུབ་མཆོད་ཛབ་བཟླས་བཅས་གྲུབ་ནས། གུ་རུའི་རྟགས་བསྟོད་དཀྱིལ་འཁོར་ལྷའི་གྲངས་བསྟོད་རྣམས་ཀྱང་ལོངས་སྐབས་ཡོད་ན་བྱ། བུམ་སྒྲུབ་སྙིང་པོ་འདུས་པས་རྣམ་བུམ་དང་ལས་བུམ་སྤྱི་ལྟར་བསྒྲུབ། ཆོས་སྲུང་གཏོར་ཆོག །བརྒྱ་ཕྱག །སྔགས་བཤགས། བཤགས་པ་ལེ་ཚན་རྣམས་ཀྱང་ལོངས་སྐབས་དང་བསྟུན། མཆོག་སྐོང་། མེར་མེ་སྨོན་ལམ་གྲུབ་ནས་ཚོགས་མཆོད་འབུལ། མདོངས་སྐོང་མ་ལྕོགས་ན་སྐོང་བཤགས་རྒྱུན་ཁྱེར་ཙམ་དང་། རིག་མེ་དོར་ལ་གནང་བ་ནོད། དབང་ལ། ཁྲུས། བགེགས་བསྐྲད། མཎྜལ། སྔོན་འགྲོ་འཇུག་པའི་སྐོར་རྣམས་བུམ་དབང་ནོར་བུའི་བཅུད་ཐིག་ནས་མདོར་བསྡུས་ཙམ་སྦྱོར་བ་ལེགས། བུམ་དབང་རིགས་ལྔའང་དེ་ལྟར་བསྐུར། དེ་ནས་དབང་གཞུང་ཡང་ཏི་བླ་མ་ཡིད་བཞིན་ནོར་བུའི་ལྷ་དབང་ཆེན་མོ་ཞུ་བའི་ཡོན་ཏུ་མཎྜལ་ཕུལ། གསོལ་གདབ་ནས་བརྩམ་ལྷ་དབང་རྫོགས་པར་བསྐུར། གསུང་སྔགས་དབང་། བདུད་རྩི། ཐུགས་རིགས་ལྔའི་ཕྱག་མཚན། ཡོན་ཏན་ཞི་རྒྱས་དང་རྗེས་གནང་རྣམས་
གོང་མ་རྣམས་ལྟར་སྦྱར། ཕྲིན་ལས་གཏོར་མའི་དབང་ནོར་བུའི་གཞུང་གསལ་རྡོ་རྗེ་སྙིང་པོ་སྦྱར། དེ་ནས་བརྒྱུད་པ་འཛིན་ངེས་ལ་བཀའ་གཏད་ཀྱི་དབང་བསྐུར། ལོ་རྒྱུས་བརྗོད། མཐའ་རྟེན་འཕྲིན་ལས་བཞིའི་དབང་ཚིགས་བཅད་སོ་སོར་ཕྲལ་བའི་ཚར་བཞི་དང་རེ་རེའི་མཚམས་སྨོན་ཚིག་སོ་སོར་སྦྱར། བཀྲ་ཤིས་རྫས་རྟགས། རྒྱལ་སྲིད། དཀྱིལ་འཁོར་རྒྱན་རྫས་ཡོངས་རྫོགས་ཀྱི་དབང་བསྐུར་བཅས་གྲུབ་ནས་བཀྲ་ཤིས་རྒྱས་པ་བརྗོད། གཉིས་པ་དབང་ལམ་ དགོས་ཆེད་བསྟན་པ ་སོགས་ནས། མཐར་ཕྱིན་པར་བྱའོ། །ཞེས་པའི་འཕྲོས་མཚམས་སྦྱར་བཅས། གཙོ་བོས་ཇི་ལྟར་གསུམ། ལྔ་པ་དབང་མ་ཐོབ་པའི་སོགས་ནས། བྲན་ཏུ་དབུལ་བར་བྱའོ། །ཞེས་པའི་མཚམས་གཏང་རག་མཎྜལ་དང་ལུས་འབུལ། དེ་ལྟར་དབང་ཆེན་དཀྱིལ་འཁོར་མ་ལུས་པའི་སོགས་ནས། མདོ་འཛིན་དམ་པའོ། །ཞེས་པའི་བར་བརྗོད་ལ་དགེ་བསྔོ་སོགས་སྤྱི་ལྟར་བྱས་པས་འགྲུབ་བོ། །དེ་ནས་ཚོགས་ལ་རོལ། ལྷག་མ་བཏང་བ་ནས་མཇུག་རྫོགས་ཀྱི་བར་སྔོན་འཕྲོས་ལས་བྱང་ཆེན་མོ་མཐར་དབྱུང་བས་དབང་ཆེན་ཡོངས་སུ་རྫོགས་པ་ལེགས་པར་གྲུབ། དབང་ཆེན་གཤམས་གྱི་བཤགས་པ་གཏང་རག་སོགས་ནི་སྒྲུབ་ཆེན་
དང་སྒྲེལ་སྐབས་ལས་དཀྱུས་འདིར་མི་ དགོས་སོ། །ཞེས་པ ་འདིའང་རྫོང་སར་བཀྲ་ཤིས་ལྷ་རྩེར་ཀུན་མཁྱེན་བླ་མ་རིན་པོ་ཆེ་འཇམས་དབྱངས་མཁྱེན་བརྩེའི་དབང་པོ་ལ་དབང་རྐྱང་ལུགས་སུ་ཕུལ་བའི་སྐབས་ཟིན་ཁྱུགས་སྤེལ་བ་པོ་པདྨ་གར་དབང་རྩལ་གྱིས་སོ། །མངྒ་ལཾ། །