མདོ་ཆོག་རྣམས་ལ་སྦྱར་བར་བྱ་བའི་གཤིན་པོ་རྗེས་འཛིན་ཐར་ལམ་སྣང་བྱེད།
མདོ་ཆོག་རྣམས་ལ་སྦྱར་བར་བྱ་བའི་གཤིན་པོ་རྗེས་འཛིན་ཐར་ལམ་སྣང་བྱེད་ཅེས་བྱ་བ་བཞུགས་སོ། །
ན་མོ་གུ་རུ་བུདྡྷ་བོ་དྷི་སཏཱྭ་ཡ། ངོ་མཚར་ཐུགས་བསྐྱེད་སྨོན་ལམ་མཐར་ཕྱིན་པ། །སྲིད་པའི་བཙོན་རར་བཅིངས་པའི་ཉམ་ཐག་འགྲོ། །མཚན་ཙམ་གྱིས་ཀྱང་གཏན་བདེར་དབུགས་འབྱིན་པ། །བདེ་གཤེགས་སྲས་དང་བཅས་ལ་གུས་ཕྱག་འཚལ། །མདོ་ལུགས་ཆོ་གར་དེར་འབྲེལ་གྱི། །གཤིན་པོ་རྗེས་འཛིན་ཚུལ་འདི་ཡང་། །རྒྱ་བོད་མཁས་པས་གསལ་མཛད་ཕྱིར། །གཞན་ཕན་སྒྲུབ་རྣམས་དོན་གཉེར་འོས། །སྨན་བླ་དང་ཐར་མདོ་ལྟ་བུ་མདོ་ལུགས་ཀྱི་ཆོ་ག་ལ་བྱང་ཆོག་སྦྱར་དགོས་པ་བྱུང་ན་སྦྱོང་རྒྱུད་ནས་འབྱུང་བ་སོགས་སྔགས་ལུགས་ཀྱི་ཆོ་ག་ནི་མི་འབྲེལ་བས་མདོ་དང་མཐུན་པའི་ལག་ལེན་དམ་པ་སྔ་མ་རྣམས་ཀྱི་ཕྱག་
བཞེས་བགྱིད་པ་ལ་གསུམ། སྦྱོར་བ། དངོས་གཞི། རྗེས་ཀྱི་བྱ་བའོ། །དང་པོ་ནི། སྨན་ཆོག་དང་ཐར་ཆོག་ལྟ་བུ་གང་ཡིན་པའི་རྟེན་དང་མཆོད་པ། བུམ་པ་ཉེར་ལྔའི་རྫས་དང་དྲི་བཟང་ཆུས་བཀང་བ་བཤམ། གཤིན་པོའི་གཟུགས་སམ་མིང་ཡིག་བྲིས་པའི་བྱང་བུ། བགེགས་གཏོར། ཏིལ། བྲབ་རྫས་བྱེ་མ། ཡུངས་ཀར། ཁྲུས་ཆས་རྣམས་འདུ་བྱ། མདོ་ཆོག་རིགས་ལ་ཁྲུས་བྱ་ཞིང་ཤ་ཆང་སོགས་བཟའ་བ་མིན་པ་སྤངས་ལ་དཀར་གསུམ་ཁ་ཟས་ཀྱིས་མཚོན་གཙང་སྦྲ་ལ་གནས་པ་གཞིར་བཞག །འགྲུབ་ན་ཐེག་ཆེན་གསོ་སྦྱོང་བླང་། སོ་སོའི་ཆོ་གའི་དབུ་ནས་བཟུང་དངོས་གཞི་ཚང་བ་བཏང་། །ཕྱག་མཆོད་སོགས་ཀྱི་སྐབས་ཚེ་འདས་དེས་ཀྱང་རེ་རེ་ནས་བྱེད་པར་བསམ། གཟུངས་བཟླ་བའི་སྐབས། སྔགས་
བཟླས་པའི་རྐྱེན་གྱིས་བདེ་བར་གཤེགས་པ་འཁོར་དང་བཅས་པའི་ཐུགས་དམ་གྱི་རྒྱུད་བསྐུལ་ཏེ་སྐུའི་ཆ་ཐམས་ཅད་ལས་འོད་ཟེར་དཔག་ཏུ་མེད་པ་བྱུང་། བུམ་ཆུ་ལ་ཐིམ་པས་དག་བྱེད་ཡེ་ཤེས་ཀྱི་ཆུ་རྒྱུན་ཏུ་བྱིན་གྱིས་བརླབས། བྱེ་མ་ལ་ཐིམ་བས་སྡིག་སྒྲིབ་སྦྱོང་བྱེད་རེག་གྲོལ་གྱི་རྫས་སུ་བྱིན་གྱིས་བརླབས་པར་གྱུར། ཅེས་མོས་ལ་གཟུངས་སྔགས་བརྒྱ་རྩའམ་ཉེར་གཅིག་ཙམ་ཁྱད་པར་དུ་བཟླས་ལ་བྱིན་གྱིས་བརླབ་བོ། །གཉིས་པ་ནི། ཆོ་ག་དངོས་གཞི་གྲུབ། རྗེས་ཆོག་ལ་སླེབ་པའི་གོང་དེར་བྱང་ཆོག་བྱ་དགོས་པས། དེའང་སྨན་ཆོག་ལ་གཟུངས་སྔགས་རྣམས་བཟླས་ཟིན་པའི་མཚམས་དང་། ཐར་ཆོག་ལ་གཏོར་འབུལ་གྲུབ་པ་དང་འདིར་འཇུག་སྟེ། མིང་བྱང་སློབ་དཔོན་མདུན་ཏུ་བཞག་ལ་བདེན་ཚིག་གིས་རྟེན་གསལ་གདབ་པ་ནི། སྨན་ཆོག་སྐབས། བཅོམ་ལྡན་འདས་དེ་བཞིན་གཤེགས་པ་བདུན་གྱི་སྨོན་ལམ་གྱི་ཁྱད་པར་རྒྱས་པའི་མདོ་ཡི་ཆོ་ག་ཇི་ལྟ་བ་བཞིན་དུ་དེང་འདིར་ཕོ་བྲང་མཆིས་པ་ཙམ་ལ་བརྟེན་ནས་བདེ་བར་གཤེགས་པ་བརྒྱད་སྤྱན་དྲངས་པའི་ཞབས་འབྲིང་དུ་ཚེ་ལས་འདས་པ་ཆྒཻ་མོ་མིང་འདི་ཞེས་བགྱི་བ་ཡང་ཕོ་བྲང་གི་སླད་རོལ་དུ་མཆིས་ནས་གསོན་པོའི་རྣམ་པ་ཇི་ལྟ་བ་བཞིན་དུ་ཐལ་མོ་སྦྱར་ཏེ་ཙོག་པུར་འཁོད་པར་གྱུར་ཅིག །ཅེས་དང་། ཐར་ཆོག་ལ། བཅོམ་ལྡན་འདས་ཀྱིས་ལེགས་པར་གསུངས་
པའི་ཐར་པ་ཆེན་པོ་ཕྱོགས་སུ་རྒྱས་པའི་མདོ་སྡེ་འགྱོད་ཚངས་བཤགས་པའི་རྒྱལ་པོའི་ཆོ་ག་ཇི་ལྟ་བ་བཞིན་དུ། དེང་འདིར་ཕོ་བྲང་མཆིས་པ་ཙམ་ལ་བརྟེན་ནས་བདེ་བར་གཤེགས་པ་སྲས་དང་བཅས་པ་སྤྱན་དྲངས་པའི་ཞབས་འབྲིང་དུ་ཚེ་ལས་འདས་པ་ཆྒཻ་མོ་མིང་འདི་ཞེས་བགྱི་བ་ཡང་ཕོ་བྲང་གི་སླད་རོལ་དུ་མཆིས་ནས་གསོན་པོའི་རྣམ་པ་ཇི་ལྟ་བ་བཞིན་དུ་ཐལ་མོ་སྦྱར་ཏེ་ཙོག་པུར་འཁོད་པར་གྱུར་ཅིག །རྣམ་ཤེས་དགུག་པ་ནི། ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། ཁྱད་པར་བཅོམ་ལྡན་འདས་སྨན་གྱི་བླ་བཻ་ཌཱུརྻ་འོད་ཀྱི་རྒྱལ་པོ་ལ་སོགས་པ་སྟོན་པ་བདེ་བར་གཤེགས་པ་བརྒྱད་འཁོར་དང་བཅས་པ་རྣམས་ཀྱི་བཀའ་བདེན་པ་དང་། གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་ལ་སོགས་པ་སྲུང་མ་དམ་ཚིག་ཅན་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས་ཚེ་ལས་འདས་པ་ཆྒཻ་མོ་ཞེས་བགྱི་བའི་རྣམ་པར་ཤེས་པ་ཁམས་གསུམ་སྐྱེ་གནས་བཞི་རིགས་དྲུག་སྲིད་པ་བར་དོ་གང་ན་གནས་ཀྱང་སྐད་
ཅིག་ལ་འདིར་མཆིས་པར་གྱུར་ཅིག །ཐར་ཆོག་ལ། ཁྱད་པར་བཅོམ་ལྡན་འདས་དཔལ་རྣམ་པར་སྣང་མཛད་ཆེན་པོ་ལ་སོགས་པ་རྒྱལ་བ་སྲས་དང་བཅས་པ་རྣམས་ཀྱི་བཀའ་བདེན་པ་དང་། བསྟན་པ་དམ་པའི་ཆོས་སྐྱོང་བའི་སྲུང་མ་དམ་ཚིག་ཅན་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས་ཚེ་ལས་འདས་པ་ཆྒཻ་མོ་ཞེས་བགྱི་བའི་རྣམ་པར་ཤེས་པ་ཁམས་གསུམ་སྐྱེ་གནས་བཞི་རིགས་དྲུག་སྲིད་པ་བར་དོ་གང་ན་གནས་ཀྱང་སྐད་ཅིག་ལ་འདིར་མཆིས་པར་གྱུར་ཅིག །ཅེས་ལན་གསུམ་བརྗོད། ཨོཾ་ཤོ་དྷ་ནི་ཤོ་དྷ་ནི་སྦ་པཱ་པཾ་ཨ་པ་ནཱ་ཡ་ཧཱུྃ། ཚེ་ལས་འདས་པའི་རྣམ་པར་ཤེས་པ་ཨ་ཐུང་གི་རྣམ་པར་བཀུག་པ་དེ་ཉིད་རྟེན་འདི་ལ་ཐིམ་པར་གྱུར། ཅེས་དམིགས། བགེགས་སྦྱོང་བ་ནི། མདོ་ལུགས་ལ་ཞི་དྲག་གི་སྦྱོང་བ་སྦྱོར་བའི་སྲོལ་མེད་པས། བགེགས་གཏོར་ལ་ཆབ་བྲན། ཨོཾ་ཨཱཿཧཱུྃ། ལན་གསུམ་གྱི་བྱིན་གྱིས་བརླབས་ནས་མཆོག་སྦྱིན་གྱི་ཕྱག་རྒྱ་དང་བཅས་ཏེ། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ། ཨོཾ་སམྦྷ་ར་སམྦྷ་ར་ཧཱུྃ། ཞེས་ལན་བདུན་བརྗོད་ནས་བསྔོས་ལ། བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་
ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །མཆོད་སྦྱིན་གྱི་གཏོར་མ་རྒྱ་ཆེན་པོ་འདི་ཚེ་ལས་འདས་པ་ཆྒཻ་མོ་ཞེས་བགྱི་བ་གསོན་གྱི་དུས་སུ་ཆེ་གནས་པ་དང་། གཤིན་གྱི་དུས་ན་སྡིག་པ་སྦྱོང་བ་ལ་སོགས་པར་བར་དུ་གཅོད་པར་བྱེད་པའི་གདོན་བགེགས་ལོག་པར་འདྲེན་པ་ཐམས་ཅད་ལ་སྦྱིན་ནོ། །གཏོར་མ་འདིས་ཚིམ་པར་གྱིས་ལ་ས་ཡི་ཕྱོགས་འདིར་མ་གནས་པར་གཞན་དུ་སོང་ཞིག །ཅེས་བརྗོད་ལ་རོལ་མོ་བཅས་གཏོར་མ་ཕྱིར་དོར། སྡིག་པ་སྦྱོང་བ་ནི། ཏིལ་དང་གཡས་གཡོན་དུ་མེ་ཆུ་བཤམས་ལ། ཚེ་ལས་འདས་པ་ཆྒཻ་མོའི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་ཀཾ་ཡིག་ནག་པོའི་རྣམ་པས་སྣ་སྒོ་ནས་ཐོན་ཏེ་སྡིག་པ་རྭ་ཅན་གྱི་རྣམ་པ་མདུན་གྱི་ཏིལ་ལ་ཐིམ་པར་གྱུར། ཏིལ་ནག་ཐེབ་སྲིན་གྱིས་བླངས་ནས་གཡས་གཡོན་ཏུ་ལན་གསུམ་གསུམ་བསྐོར་ཞིང་མེ་དང་ཆུར་དོར་ལ། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཞེས་ལན་གསུམ་གྱི་མཐར། ཚེ་ལས་འདས་པའི་སྡིག་སྒྲིབ་ཐམས་ཅད་ཡེ་ཤེས་ཀྱི་མེ་ཆུས་བསྲེགས་ཤིང་སྦྱངས་པར་གྱུར། བྱེ་མ་ཡུངས་ཀར་གྱིས་རྟེན་ལ་བྲབས་ཤིང་ཆོ་ག་སོ་སོའི་གཟུངས་སྔགས་རྣམས་ཀྱི་ཆ་ཐར། ཚེ་ལས་འདས་པ་ཆྒཻ་མོའི་སྡིག་པ་དང་། སྒྲིབ་པ་ཐམས་ཅད་
བྱང་ཞིང་དག་པར་གྱུར་ཅིག །ཅེས་བཏགས་པ་ལན་གསུམ་བརྗོད། ལྷ་རྣམས་ཀྱི་སྐུ་ལས་འོད་ཟེར་དཔག་ཏུ་མེད་པ་བྱུང་ནས་དམིགས་ཡུལ་གྱི་སྡིག་ལྟུང་བག་ཆགས་དང་བཅས་པ་ལྷག་མེད་དུ་སྦྱང་བར་བསམ། དེ་ནས་ཁྲུས་ཀྱིས་སྦྱོང་བའི་ཐོག་མར་ལྷ་ཁྲུས་ཕྱག་ལེན་ལྟར་གསོལ་ལ། ཇི་ལྟར་བལྟམས་པ་ཙམ་གྱིས་ནི། །ལྟ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཅེས་དང་རོལ་མོ་བྱ་ཞིང་། རྒྱས་པར་ནུས་ན་མཆོད་པའི་སྤྲིན་གྱི་གཟུངས་སྔགས། ཨོཾ་ན་མོ་བྷ་ག་ཝ་ཏེ་བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏཱ་ཡ་ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛོ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་་བཛྲེ་སརྦ་ཀརྨ་ཨ་བ་ར་་བི་ཤོ་དྷ་ན་བཛྲེ་སྭཱ་ཧཱ། ཞེས་པའམ། བསྡུ་ན་ཡེ་དྷརྨཱ་སོགས་བརྗོད། དེས་འགྲེས་ཏེ། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་སྩོལ་བར་མཛོད། །འདི་ཕྱིན་ཤློ་ཀ་རེ་རེའི་བར་མཚམས་རྣམས་སུ་རོལ་མོ་དང་སྔགས་རིང་ཐུང་གང་ལྕོགས་བརྗོད་པ་འགྲེ། རྒྱལ་བའི་སྐུ་ལ་འགྱུར་བ་མི་མངའ་ཡང་། །ཚེ་འདས་ལུས་ཀྱི་སྒྲིབ་པ་སྦྱང་སླད་དུ། །རྒྱལ་བའི་སྐུ་ལ་ཁྲུས་ཆབ་འདི་གསོལ་
བས། །ཚེ་འདས་ལུས་ཀྱི་སྒྲིབ་པ་དག་གྱུར་ཅིག །རྒྱལ་བའི་གསུང་ལ་འགག་པ་མི་མངའ་ཡང་། །ཚེ་འདས་ངག་གི་སྒྲིབ་པ་སྦྱང་སླད་དུ། །རྒྱལ་བའི་གསུང་ལ་ཁྲུས་ཆབ་འདི་གསོལ་བས། །ཚེ་འདས་ངག་གི་དྲི་མ་དག་གྱུར་ཅིག །རྒྱལ་བའི་ཐུགས་ལ་འཁྲུལ་པ་མི་མངའ་ཡང་། །ཚེ་འདས་ཡིད་ཀྱི་སྒྲིབ་པ་སྦྱང་སླད་དུ། །རྒྱལ་བའི་ཐུགས་ལ་ཁྲུས་ཆབ་འདི་གསོལ་བས། །ཚེ་འདས་ཡིད་ཀྱི་དྲི་མ་དག་གྱུར་ཅིག །དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོད་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཞེས་པ་རྣམས་དང་སྔགས་རོལ་བཅས་ཁྲུས་གསོལ། དེ་ནས་རས་དཀར་པོ་ཁ་ཚར་མ་ཉམས་པས་སྐུ་ཕྱི་བའི་ཚུལ་བྱ་ཞིང་། བདེ་གཤེགས་སྐུ་གསུམ་དཔེ་དང་མཚན་མངའ་ཡང་། །འགྲོ་བའི་དོན་དུ་གཟུགས་སྐུ་ཅིར་ཡང་གདའ། །རིན་ཆེན་དབྱིག་ལྟར་ཉེས་པའི་སྐྱོན་བྲལ་ཡང་། །འཇིག་རྟེན་སྲི་ཞུ་གུས་པའི་ཚུལ་ཙམ་དུ། །སྡིག་མེད་རྒྱལ་བ་རྣམས་ཀྱིས་རབ་བསྔགས་པའི། །རས་མཆོག་འདི་ཡིས་རྒྱལ་བའི་སྐུ་ཕྱིས་པས། །ཉོན་མོངས་དུག་གསུམ་སྒྲིབ་པ་ཁྲུད་སྦྱངས་ནས། །སྐུ་གསུམ་ངང་དུ་བདག་ཅག་མྱུར་འགྲུབ་ཤོག །དྲི་ཆབ་
ཀྱིས་བྱུགས་པ་འབུལ་བའི་ཚུལ་བྱ་ཞིང་། སྟོང་གསུམ་ཀུན་ཏུ་དྲི་མཆོག་འབྱུང་འགྱུར་བའི། །སྤོས་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ཞེས་བརྗོད། དེ་ནས་ཁྲུས་ཆུ་སླར་ཡང་བུམ་པར་བླུགས་པས་མེ་ལོང་ངོས་སུ་དམིགས་རྟེན་ལ་ཁྲུས་བྱ་ཞིང་། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་པ། །གཏོང་བ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ཀྱིས་ཁྲུས་བགྱིའོ། །འདི་ནས་བཟུང་འོག་གི་ཤློ་ཀ་ལྔ་པོ་རེ་རེའི་བར་མཚམས་རྣམས་སུ་ཆོ་ག་སོ་སོའི་གཟུངས་སྔགས་བརྗོད་བཞིན་ཁྲུས་བྱ། སྨན་ཆོག་སྐབས་གཟུངས་རིང་མི་ལྕོགས་པས་མཚན་སྔགས་བརྗོད། མཐར། འཇིག་རྟེན་འདི་ནས་ཚེ་ལས་འདས་པ་ཆྒཻ་མོ་ཞེས་བགྱི་བས་ཐོག་དྲངས། སེམས་ཅན་ཐམས་ཅད་ཀྱི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་དང་། ཁྱད་པར་དུ་སེར་སྣའི་དྲི་མ་ཐམས་ཅད་བྱང་ཞིང་དག་ནས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ་མྱུར་དུ་མངོན་པར་རྫོགས་པ་འཚང་རྒྱ་བར་གྱུར་ཅིག །དེས་འགྲེས་ཏེ། འདི་ནི་ཚུལ་ཁྲིམས་རང་བཞིན་ཆུ། །ཁྲིམས་འཆལ་དྲི་མ་སྦྱོང་མཛད་པ། །ཚུལ་ཁྲིམས་དྲི་ཡིས་ལེགས་བསྒོས་ཆུ། །ཁྲུས་
ལེགས་མཛད་ལ༴ །གཟུངས་སྔགས་དང་། འཇིག་རྟེན་འདི་ནས་ཚེ་ལས་སོགས་གོང་ལྟར་ལ། ཁྱད་པར་ཁྲིམས་འཆལ་གྱི་དྲི་མ་ཐམས་ཅད་བྱང་ཞིང་དག་ནས་ཚུལ་ཁྲིམས་ཀྱི་ཕ་རོལ་ཏུ་སོགས་འགྲེ། དེ་བཞིན་དུ། འདི་ནི་བཟོད་པའི་རང་བཞིན༴། ཁོང་ཁྲོའི་དྲི་མ་སྦྱོང་༴ །བཟོད་པ་དྲི་ཡིས། །ཁྲུས་ལེགས་མཛད་ལ༴ ། གཟུངས་སྔགས་དང་། །འཇིག་རྟེན་འདི་ནས་སོགས། ཁྱད་པར་ཁོང་ཁྲོའི་དྲི་མ་ཐམས་ཅད་བྱང་ཞིང་དག་ནས་བཟོད་པའི་ཕ་རོལ་ཏུ་ཕྱིན་པ་སོགས་འགྲེ། འདི་ནི་བརྩོན་འགྲུས་རང་བཞིན༴ །ལེ་ལོའི་དྲི་མ་སྦྱོང་༴ །བརྩོན་འགྲུས་དྲི་ཡིས་ལེགས༴ །ཁྲུས་ལེགས་མཛད་ལ། སྔགས་དང་། འཇིག་རྟེན་འདི་ནས་སོགས། ཁྱད་པར་དུ་ལེ་ལོའི་དྲི་མ་ཐམས་ཅད་བྱང་ཞིང་དག་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སོགས་འགྲེ། འདི་ནི་བསམ་གཏན་རང་བཞིན་ཆུ། །རྣམ་གཡེང་དྲི་མ་སྦྱོང་མཛད་པ། །བསམ་གཏན་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ༴ །སྔགས་དང་། འཇིག་རྟེན་འདི་ནས་ཚེ་ལས་འདས་པ་ཆྒཻ་མོ་ཞེས་བགྱི་བས་ཐོག་དྲངས། སེམས་ཅན་ཐམས་ཅད་ཀྱི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་། སྒྲིབ་པ་ཐམས་ཅད་དང་། ཁྱད་པར་དུ་
རྣམ་གཡེང་གི་དྲི་མ་ཐམས་ཅད་བྱང་ཞིང་དག་ནས་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ་མྱུར་དུ་མངོན་པར་རྫོགས་པ་འཚང་རྒྱ་བར་གྱུར་ཅིག །འདི་ནི་ཤེས་རབ་རང་བཞིན་ཆུ། །ཤེས་འཆལ་དྲི་མ་སྦྱོང་མཛད་པ། །ཤེས་རབ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ལ༴ །སྔགས་དང་། འཇིག་རྟེན་འདི་ནས་སོགས། ཁྱད་པར་དུ་ཤེས་འཆལ་གྱི་དྲི་མ་ཐམས་ཅད་བྱང་ཞིང་དག་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ་མྱུར་དུ་མངོན་པར་རྫོགས་པ་འཚང་རྒྱ་བར་གྱུར་ཅིག །ཅེས་པ་རྣམས་ཀྱི་མཐར་འོག་གི། གཙོ་བོ་རྒྱལ་བ་སོགས་ཕྱག་འཚལ་བ་མན་ཆད་སྦྱར་ཡང་ཆོག་མོད། སྤྱི་ལྟར་སྤྲོ་ན། བདེན་ཚིག་གིས་དུག་སྦྱོང་བ་ནི། ཀུ་ཤས་བྱབས་ལ། འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །སངས་རྒྱས་བཅོམ་ལྡན་དུག་མི་མངའ། །སངས་རྒྱས་བདེན་པས་དུག་བཅོམ་མོ། །དེ་བཞིན་དུ། འདོད་ཆགས་ཞེ་སྡང་༴ །འདི་དག་འཇིག་རྟེན༴ །བཅོམ་ལྡན་དམ་ཆོས། །དམ་ཆོས་བདེན་པས༴ །འདོད་ཆགས་ཞེ་སྡང་༴ །འདི་དག་འཇིག་རྟེན༴ །འཕགས་པའི་དགེ་འདུན༴ །དགེ་འདུན་བདེན་པས་དུག་བཅོམ་མོ། །གཟུངས་སྔགས་བརྗོད་ཅིང་ཁྲུས་བྱ། དཀོན་མཆོག་གསུམ་གྱི་བདེན་པའི་བྱིན་གྱི་རླབས་ཀྱིས་
ཚེ་ལས་འདས་པ་ཆྒཻ་མོའི་ཉོན་མོངས་པ་དུག་གསུམ་གྱི་སྒྲིབ་པ་ཐམས་ཅད་བཅོམ་ནས་དགེ་བ་གསུམ་དང་ལྡན་པར་གྱུར་ཅིག །ས་ནི་དུག་གི་ཕ་ཡིན་ཏེ། །ས་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་དག་གིས། །དུག་གསུམ་ས་ཡི་ནང་དུ་སོང་། །དེ་བཞིན་དུ། ཆུ་ནི་དུག་གི་ཕ༴ །ཆུ་ནི་དུག་གི་མ༴ །བདེན་པའི༴ །དུག་གསུམ་ཆུ་ཡི༴ །མེ་ནི་དུག་གི་ཕ༴ །མེ་ནི་དུག་གི་མ༴ །བདེན་པའི་བདེན༴ །དུག་གསུམ་མེ་ཡི༴ །རླུང་ནི་དུག་གི་ཕ༴ །རླུང་ནི་དུག་གི་མ༴ །བདེན་པའི་བདེན༴ །དུག་གསུམ་རླུང་གི་ནང་དུ་སོང་། །གཟུངས་སྔགས་དང་ཁྲུས་བྱ། ཚེ་ལས་འདས་པ་ཆྒཻ་མོས་གཙོར་བྱས་པའི་སེམས་ཅན་ཐམས་ཅད་འབྱུང་བ་བཞི་ལ་བརྟེན་ནས་སྐྱེས་པའི་ཉོན་མོངས་པ་རྒྱུ་དང་བཅས་པ་ཐམས་ཅད་འབྱུང་བ་བཞིའི་ཆོས་ཉིད་ཀྱི་ངང་དུ་ཐིམ་ནས་སྡུག་བསྔལ་རྒྱུ་དང་བཅས་པ་ཐམས་ཅད་དང་བྲལ་བར་གྱུར་ཅིག །ཤིས་པ་བརྗོད་པས་བདེ་ལེགས་སུ་བྱ་བ་ནི། རྟེན་ལ་བུམ་ཆུ་དང་མེ་ཏོག་འཐོར་ཞིང་། གང་ལ་སེར་སྣ་རྣམ་ཆགས་པ། །རྣམ་བཅོམ་དྲི་མ་མེད་མཛད་ཅིང་། །ཐུགས་ཞི་གནོད་པ་མི་མངའ་དེས། །ཁྱེད་ལ་བདེ་ལེགས་མཛད་པར་གྱུར། །འདྲེན་པ་གང་ཞིག་འགྲོ་བ་རྣམས། །ཐར་པའི་ལམ་དུ་
འཇུག་མཛད་ཕྱིར། །ཆོས་རྣམས་མ་ལུས་སྟོན་མཛད་དེས། །ཁྱེད་ལ་བདེ་ལེགས༴ །སྟོན་པ་འགྲོ་བ་རྣམས་ཀྱི་རྟེན། །སེམས་ཅན་ཀུན་གྱི་དོན་གྱི་ཕྱིར། །གང་ལ་བདེ་བ་མངའ་མཛད་དེས། །ཁྱེད་ལ་བདེ་ལེགས༴། སྐྱོབ་པ་གང་ཞིག་བྱམས་པ་ཡི། །ཐུགས་ཀྱིས་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེས། །ཁྱེད་ལ་བདེ་ལེགས༴ །གང་ཞིག་འཁོར་བར་འགྲོ་བ་ཡི། །སེམས་ཅན་ཀུན་གྱི་མགོན་གྱུར་ཅིང་། །གླིང་དང་དཔུང་གཉེན་གྱུར་པ་དེས། །ཁྱོད་ལ་བདེ་ལེགས༴ །གང་ཞིག་ཆོས་ཀུན་མངོན་སུམ་དུ། །གཙང་ཞིང་བཀྲུ་བ་མི་མངའ་ལ། །གསུམ་གཙང་གཙང་མར་མཛད་པ་དེས། །ཁྱེད་ལ་བདེ༴ །དཔའ་བོ་ཆེན་པོ་གང་སྐྱེས་པ། །ཕུན་སུམ་ཚོགས་དོན་གང་འབྱོར་ཅིང་། །དོན་གྲུབ་ཚོགས་ཀྱང་གྲུབ་པ་དེས། །ཁྱེད་ལ་བདེ༴ །གང་ཞིག་སྐྱེས་པས་ས་རྣམས་ནི། །ནགས་ཚལ་བཅས་པ་རབ་གཡོ་ཞིང་། །སེམས་ཅན་ཐམས་ཅད་རབ་དགའ་དེས། །ཁྱེད་ལ་བདེ༴ །བྱང་ཆུབ་སྙིང་པོར་གཤེགས་པ་ན། །ས་དག་རྣམ་དྲུག་གཡོས་གྱུར་ཅིང་། །བདུད་ཡིད་མི་བདེར་གྱུར་པ་དེས། །ཁྱེད་ལ་བདེ༴། ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམས་གསུངས་ཤིང་། །ཐུབ་པའི་
སྙན་པ་གང་བྱུང་དེས། །ཁྱེད་ལ་བདེ༴། ཡིད་འཕྲོག་གང་ཞིག་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་ཅིང་། །ཚོགས་ཀུན་དབང་དུ་མཛད་པ་དེས། །ཁྱེད་ལ་བདེ་ལེགས་མཛད་པར་འགྱུར། །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་ཚངས་པའི་ལྷ་རྣམས་དང་། །འབྱུང་པོ་ཀུན་གྱི་བདེ་ལེགས་ནི། །ཁྱེད་ལ་རྟག་ཏུ་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང་། །ལྷ་རྣམས་ཀུན་གྱི་བསམ་པ་ཡིས། །ཁྱེད་ཀྱི་འདོད་དོན་གང་ཡིན་པ། །དོན་དེ་དེ་རིང་འགྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག །ཁྱེད་ཅག་ལམ་དུ་བདེ་ལེགས་ཤོག །ཕྱིར་འོད་དག་ཀྱང་བདེ་ལེགས་ཤོག །ཉིན་མོ་བདེ་ལེགས་མཚན་བདེ་ལེགས། །ཉིན་མའི་གུང་ལ་བདེ་ལེགས་ཤིང་། །ཁྱེད་ཅག་ཀུན་ཏུ་བདེ་ལེགས་གྱུར། །ཁྱེད་ཅག་སྡིག་པར་མ་གྱུར་ཅིག །ཚེ་ལས་འདས་པ་ཆྒཻ་མོས་གཙོར་བྱས་པའི་སྐྱེ་དགུ་ཐམས་ཅད་མི་མཐུན་པའི་ཕྱོགས་ཐམས་ཅད་ལས་ཤིན་ཏུ་རྒྱལ་ཞིང་བཀྲ་ཤིས་པར་གྱུར་ཅིག །ཅེས་པ་རྣམས་ཀྱིས་སྒོ་གསུམ་རྣམ་པར་དག་པར་བྱས་ནས། སྐྱབས་སུ་འགྲོར་གཞུག་པ་ནི། ཉེ་དུ་ཡོད་ན་མིང་བྱང་འཛིན་དུ་བཅུག་ཅིང་ཕྱག་བྱེད་དུ་གཞུག་ལ། གཙོ་བོ་རྒྱལ་བ་འགྲོ་
བའི་མགོན། །འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་རྣམ་སེལ་བ། །ཚེ་འདས་སྐྱབས་སུ་མཆི་ལགས་སོ། །དེ་ཡི་ཐུགས་སུ་ཆུད་པའི་ཆོས། །འཁོར་བའི་འཇིགས་པ་སེལ་མཛད་པ། །བྱང་ཆུབ་སེམས་དཔའི་ཚོགས་ལ་ཡང་། །དེ་བཞིན་ཚེ་འདས་སྐྱབས་སུ་མཆི། །ཚེ་འདས་འཇིགས་པ་ཆེར་མཐོང་ནས། །ཀུན་ཏུ་བཟང་ལ་ཚེ་འདས་འབུལ། །འཇམ་པའི་དབྱངས་ལ་ཚེ་འདས་ཀྱི། །ལུས་འདི་བདག་གིས་འབུལ་བར་བགྱི། །ཐུགས་རྗེའི་སྤྱོད་པ་མ་འཁྲུལ་བའི། །སྤྱན་རས་གཟིགས་མགོན་དེ་ལ་ཡང་། །ཉམ་ཐག་ང་རོས་འོ་དོད་འབོད། །སྡིག་ལྡན་འདི་ལ་བསྐྱབ་ཏུ་གསོལ། །འཕགས་པ་ནམ་མཁའི་སྙིང་པོ་དང་། །ས་ཡི་སྙིང་པོ་དག་དང་ནི། །ཐུགས་རྗེའི་བདག་ཉིད་ཐམས་ཅད་ལ། །ཕྱག་འཚལ་སྙིང་ནས་འོ་དོད་འབོད། །གང་ཞིག་མཐོང་ན་གཤིན་རྗེ་ཡི། །ཕོ་ཉ་ལ་སོགས་སྡང་བ་རྣམས། །སྐྲག་ནས་ཕྱོགས་བཅུར་འབྱེར་བྱེད་པ། །རྡོ་རྗེ་ཅན་ལ་སྐྱབས་སུ་མཆི། །སྔོན་ཆད་ཁྱེད་ཀྱི་བཀའ་ལས་འདས། །ད་ནི་འཇིགས་པ་ཆེར་མཐོང་ནས། །ཁྱེད་ལ་སྐྱབས་སུ་མཆི་ལགས་ཀྱི། །འཇིགས་པ་མྱུར་དུ་བསལ་དུ་གསོལ། །ཚེ་ལས་འདས་པ་ཆྒཻ་མོ་ཞེས་བགྱི་བ་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་
ཀྱི་བར་དུ། བརྒྱུད་ལྡན་བླ་མ་ཐུགས་རྗེ་ཅན་དང་། དཀོན་མཆོག་རིན་པོ་ཆེ་རྣམ་པ་གསུམ་དང་། སྨན་ཆོག་སྐབས། བཅོམ་ལྡན་འདས་སྨན་གྱི་བླ་བཻ་ཌཱུརྻ་འོད་ཀྱི་རྒྱལ་པོ་བདེ་བར་གཤེགས་པ་བརྒྱད་ཀྱི་ལྷ་ཚོགས་འཁོར་བྱང་ཆུབ་སེམས་དཔའ་བཅུ་དྲུག་དང་བཅས་པ་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་དང་། ཐར་ཆོག་ལ། བཅོམ་ལྡན་འདས་དཔལ་རྣམ་པར་སྣང་མཛད་ཆེན་པོ་ལ་སོགས་པ་བདེ་བར་གཤེགས་པ་སྲས་དང་སློབ་མར་བཅས་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཞེས་སྦྱར། མཐར། སྡིག་པ་ཐམས་ཅད་སྤྱད་དུ་གསོལ། ལམ་བསྟན་དུ་གསོལ། མྱུར་དུ་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་ཐོབ་པར་མཛད་དུ་གསོལ། ཞེས་དང་གུས་དྲག་པོ་དང་བཅས་སྙིང་ཐག་པ་ནས་གསོལ་བ་བཏབ་པས་སྐྱབས་འོག་ཏུ་ཚུད་ཅིང་ཐར་པའི་ལམ་སྣ་ཟིན་པར་བསམ། བཀྲེས་སྐོམ་བསལ་ཞིང་འཁྲི་བ་བཅད་པའི་ཕྱིར་ཟས་གཏད་བྱེད་པ་ནི། ཤ་ཆང་ལ་སོགས་པ་དང་མ་འདྲེས་པའི་དཀར་མངར་གྱི་ཁ་ཟས་དང་། ཇ་འོ་སོགས་བཏུང་བ་དར་ཟབ་ལ་སོགས་པ་བཤམས་ལ་ཆབ་བྲན། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བྱིན་གྱིས་བརླབས་པའི་སྟོབས་དང་། བདག་གི་བསོད་ནམས་དང་སྨོན་ལམ་གྱི་སྟོབས་དང་རིག་སྔགས་ཀྱི་
སྟོབས་ཀྱིས་བཤམས་པའི་རྫས་འདི་དག་འདོད་པའི་ཡོན་ཏན་ཟད་མི་ཤེས་པ། ཚེ་ལས་འདས་པའི་དབང་པོའི་སྤྱོད་ཡུལ་དུ་ཅི་འདོད་འབྱུང་ཞིང་རྒྱས་པར་གྱུར་ཅིག །ཨོཾ་ཨཱཿཧཱུྃ་ལན་གསུམ་གྱིས་བྱིན་བརླབ། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏ་ཨོཾ་སམྦྷ་ར་སམྦྷ་ར་ཧཱུྃ། ལན་བདུན་གྱིས་སྤྱིར་བསྔོ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །གཟུགས་མཛེས་དམ་པ་ལ༴ །སྐུ་འབྱམས་གླས་ལ༴ །འཇིགས་པ་ཐམས་ཅད་དང་ཡོངས་སུ་བྲལ་བ་ལ༴ །མཚན་བཞི་བརྗོད་པས་སྒྲིབ་པ་དང་བྲལ་བར་བྱས་ལ། ཁ་དོག་དབྱིབས་ལེགས་ཡིད་འོང་གཟུགས་མཛེས་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་པ། །བློ་ཡིས་བླངས་ཏེ་དམིགས་ཡུལ་ཁྱོད་ལ་སྦྱིན། །བཞེས་ཤིག་གཟུགས་ཀྱི་འདོད་པ་ཡོངས་རྫོགས་ཤོག །ཨོཾ་རཱུ་པ་ཀཱ་མ་གུ་་ཨཱཿཧཱུྃ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་བརྗོད་སྒྲ་བརྙན་ཡིད་འོང་ལྡན། །བློ་ཡིས་བླངས་ཏེ་དམིགས་ཡུལ་ཁྱོད་ལ་སྦྱིན། །བཞེས་ཤིག་སྒྲ་ཡི་འདོད་པ་ཡོངས་རྫོགས་ཤོག །ཨོཾ་ཤབྡ་ཀཱ་མ་གུ་་ཨཱཿཧཱུྃ། ཕྱོགས་དུས་ཀུན་ན་ཙནྡན་སྦྲུལ་སྙིང་དང་། །ཨ་གར་ལ་སོགས་དབང་པོ་ཚིམས་བྱེད་དྲི། །བློ་ཡིས་བླངས་ཏེ་དམིགས་ཡུལ་ཁྱོད་ལ་སྦྱིན། །བཞེས་ཤིག་དྲི་ཡི་འདོད་
པ་ཡོངས་རྫོགས་ཤོག །ཨོཾ་གནྡྷེ་ཀཱ་མ་གུ་་ཨཱཿཧཱུྃ། ཕྱོགས་དུས་ཀུན་ན་རོ་དང་བཅུད་ལྡན་པ། །ལུས་སེམས་བརྟས་བྱེད་རོ་མཆོག་ཅི་མཆིས་པ། །བློ་ཡིས་བླངས་ཏེ་དམིགས་ཡུལ་ཁྱོད་ལ་སྦྱིན། །བཞེས་ཤིག་རོ་ཡི་འདོད་པ་ཡོངས་རྫོགས་ཤོག །ཨོཾ་རཱ་ས་ཀཱ་མ་གུ་་ཨཱཿཧཱུྃ། ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱ་ཁྱད་པར་འཕགས་པ་ཅི་མཆིས་པ། །བློ་ཡིས་བླངས་ཏེ་དམིགས་ཡུལ་ཁྱོད་ལ་སྦྱིན། །བཞེས་ཤིག་རེག་བྱའི་འདོད་པ་ཡོངས་རྫོགས་ཤོག །ཨོཾ་སྤརྴེ་ཀཱ་མ་གུ་་ཨཱཿཧཱུྃ། ཅེས་ཚིགས་སུ་བཅད་པས་འདོད་ཡོན་སོ་སོར་བསྡོས་ལ། ཐམས་ཅད་ནམ་མཁའི་མཛོད་བཞིན་ཏུ། །ལོངས་སྤྱོད་ཆད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །ཁ་ཟས་བསྟབས་པ་འདི་ཡི་མཐུས། །འཁྲུལ་སྣང་འཇིགས་སྐྲག་ཐམས་ཅད་ཞི། །བར་དོ་རང་ངོ་འཕྲོད་གྱུར་ཏེ། །དག་པའི་ཞིང་དུ་འགྲོ་བར་ཤོག །ཅེས་སྨོན་ལམ་བྱའོ། །དེ་ནས་ལམ་བསྟན་པ་ནི། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་ལས་བྱུང་བ། །དཀོན་མཆོག་རིན་ཆེན་འོད་ཟེར་
གྱིས། །རིན་ཆེན་ཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བླ་ན་མེད་པའི་ཁྱད་པར་ལམ། །བྱང་ཆུབ་བར་ཆད་མེད་པའི་ལམ། །རྣམ་པར་གྲོལ་བའི་ལམ་དག་ལ། །བརྟེན་ནས་སྡིག་པ་ཀུན་སྦྱངས་ནས། །འཕགས་པའི་ལམ་དེར་འགྲོ་བར་ཤོག །ཨོཾ་རཏྣེ་རཏྣེ་མ་ཧཱ་རཏྣེ་རཏྣ་སཾ་བྷ་ཝ། རཏྣ་ཀི་ར་ེ། རཏྣ་མཱ་ལ་བི་ཤུདྡྷེ་ཤོ་དྷ་ཡ་སརྦ་པཱ་པཾ་ཧཱུྃ་ཕཊ། ཚེ་འདས་ཀྱི་རྣམ་ཤེས་ཨ་དཀར་པོ་དྲི་མ་མེད་པའི་རྣམ་པ་ཅན་དེ་ཤར་ཕྱོགས་བཻ་ཌཱུརྻའི་ཞིང་ན་བཞུགས་པའི་བཅོམ་ལྡན་འདས་སྨན་གྱི་བླ་མའི་ཐུགས་ཀར་འཕོས་པར་གྱུར། ཅེས་སྨན་ཆོག་དང་། ཐར་ཆོག་ལ། རྣམ་པ་ཅན་དེ་འོག་མིན་སྟུག་པོ་བཀོད་པའི་ཞིང་ཁམས་སུ་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀར་འཕོས་པར་གྱུར། ཅེས་བསྒྱུར། པདྨ་འདམ་གྱིས་མ་གོས་ལྟར། །སྲིད་གསུམ་དྲི་མས་མ་གོས་པ། །སྲིད་པའི་པདྨོ་ལས་བྱུང་བའི། །དག་པའི་ཞིང་དུ་སྐྱེ་བར་ཤོག །རོལ་མོ་དང་བཅས་ཏེ། ཨོཾ་པདྨེ་པདྨེ་པདྨ་ཨུདྦྷ་ཝེ་མ་ཧཱ་བུདྡྷ་ཀྵེ་ཏྲ་གཙྪ་ནྟུ་སྭཱ་ཧཱ། ཞེས་བརྗོད་ལ་ལྟ་བའི་དབྱིངས་སུ་མཉམ་པར་བཞག་པས་
རྒྱས་གདབ་སྟེ་རྣམ་ཤེས་དག་པའི་ཞིང་དུ་སྤར། རྟེན་མིང་བྱད་བསྲེག་པ་ནི། མར་མེ་སྦར་ལ། སྟོང་ཉིད་ཡེ་ཤེས་འབར་བའི་མེས། །ཚེ་འདས་སྒྲིབ་བའི་བུད་ཤིང་དང་། །འཁོར་བའི་སྡུག་བསྔལ་མ་ལུས་པ། །ཡེ་ཤེས་སྣང་བར་འབར་གྱུར་ཅིག །ལན་གསུམ། དེ་ནས་རོལ་མོ་དང་བཅས་ཏེ་གཟུངས་སྔགས་རྣམས་བརྗོད་ཅིང་བསྲེགས་པའི་ཐལ་བ་ ཆུ་བོར་དོར་བའམ་སཱཙྪ་གདབ། བསྔོ་བ་རྒྱས་བསྡུས་གང་ལྕོགས་དང་། བཟང 
་སྤྱོད་སོགས་ཐེག་པ་ཆེན་པོའི་སྨོན་ལམ་རྒྱས་པར་སྤེལ་ལོ།། ༈ །།ཡང་གསོན་དགུད་བཟུང་བའི་བདུན་ཚིགས་ཀྱི་མཚམས་ལྟ་བུར་སྡིག་སྦྱོང་བྱེད་ན། བཅའ་གཞི་དང་འདོན་བྱ་རྣམས་སྔ་མ་དང་ཁྱད་པར་མེད་པ་ལས་དམིགས་རྟེན་བྱང་བུ་མི་དགོས། ཆོ་གའི་དངོས་གཞི་གྲུབ་པ་དང་སྦྱིན་བདག་ཉིད་མདུན་དུ་འཁོད་བཅུག་ལ། ཐོག་མར་གཟུངས་སྔགས་ཚར་གཅིག་བརྗོད། བགེགས་གཏོར་བྱིན་རླབས་ནས་བསྔོ་བ་མན་ཆད་གོང་གི་གཤིན་ཆོག་ལྟར་བྱ་བ་ལས། ཚེ་འདས་ཞེས་པ་རྣམས་དོར་ནས། ཚེ་དང་ལྡན་པ་ཞེས་སམ། སྦྱིན་བདག་གམ། དམིགས་ཡུལ། ཞེས་བསྒྱུར་བ་སོགས་རིག་པས་འཕྲུལ་ཏེ་མཐར་ཆགས་སུ་བཏང་། གཙོ་བོ་རྒྱལ་བས་ཕྱག་འཚལ་ཞིང་སྐྱབས་སུ་སོང་བའི་མཇུག་གི་ཚིག་ལྷུག །
སངས་རྒྱས་ཀྱི་གོ་འཕང་ཐོབ་བར་མཛད་དུ་གསོལ། ཅེས་པ་ཡན་གྱིས་གྲུབ་པ་ཡིན་ཀྱང་། ཁ་ཅིག་གིས་སྡིག་པའི་ས་བོན་སྲེག་པའི་ཕྱག་ལེན་འདུག་པ་ལྟར་ན་ཀཾ་ཡིག་བྲིས་པའི་བྱང་བུ་ལ་སྦྱིན་བདག་གི་སྡིག་སྒྲིབ་ཐམས་ཅད་ཐིམ་པར་མོས་ལ། སྟོང་ཉིད་ཡེ་ཤེས་སོགས་དང་གཟུངས་སྔགས་བརྗོད་པས་བསྲེག །གང་ལྟར་དགེ་བ་བསྔོས་པས་གྲུབ་བོ། །གསུམ་པ་ནི། ཆོ་གའི་མཇུག་གི་བྱ་བ་གཏང་རག་གི་ཕྱག་མཆོད་འབུལ་བ་ནས་ཤིས་པ་བརྗོད་པའི་བར་ཆོ་ག་སོ་སོའི་གཞུང་ལས་འབྱུང་བ་ལྟར་མཐའ་རྒྱས་སུ་བྱའོ། །འཇུག་པར་སླ་ཞིང་ཉམས་ལེན་ཤིན་ཏུ་བདེ། །ཁེ་ཆེ་ཉེན་ཆུང་མདོ་སྡེ་རྟོགས་པའི་རྒྱུད། །ཚུལ་བཞིན་སྒྲུབ་རྣམས་གཞན་ཕན་ཕྱག་ཆ་རུ། །ལྷག་པའི་བསམ་པ་བཟང་པོས་འདུས་གསལ་བཀོད། །དྲི་མེད་རྒྱལ་བའི་བཀའ་གཞུང་སྤྱོད་རྣམས་ཀྱིས། །སྐལ་བཟང་འགྲོ་བ་ཐར་པའི་ལམ་མཆོག་ཏུ། །འདྲེན་པའི་ཤིང་རྟ་ཆེན་པོར་འདི་གྱུར་ནས། །སྡུག་བསྔལ་འཁོར་བའི་གྲོང་ཁྱེར་སྟོང་བྱེད་ཤོག །ཅེས་པ་འདི་དང་བསླབ་བ་གསུམ་གྱི་བདག་ཉིད་འདུལ་འཛིན་མཁན་པོ་ཀརྨ་དབང་ལྡན་ནས་ཆེད་དུ་བསྐུལ་ངོར།། ༈ །།ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོས་སྦས་པའི་སྒྲུབ་གནས་ཀྱི་
རྒྱལ་པོ་འོད་གསལ་རྡོ་རྗེ་ཨའི་ཕུག་པར་དཔལ་ཞྭ་ལུ་པ་ཆེན་པོ་རིན་ཆེན་བློ་གསལ་བསྟན་སྐྱོང་གི་གསུང་ཉིད་གཞིར་བཞག །ཁ་སྐོང་མཐོང་བརྒྱུད་མདོ་ལུགས་ཀྱི་ཆོག་གང་རུང་ལ་སྤོ་ཆོག་པ་བཀླགས་པས་གྲུབ་པར་བསྡེབས་པ་དགེ་ལེགས་འཕེལ།། ༈ །།ཚུལ་འདི་མཁན་པོ་བླ་མ་དབང་ལྡན་གྱི། །དགོངས་བཞེད་ཇི་བཞིན་དཔལ་སྤུངས་གདན་ས་རུ། །སྤར་དུ་བསྒྲུབས་པའི་དགེ་བས་འགྲོ་བ་ཀུན། །གནས་སྐབས་མཐར་ཐུག་ཕན་བདེའི་དཔལ་གྱིས་འཚོ། །ས་དང་ལམ་གྱི་ཡོན་ཏན་རབ་རྫོགས་ནས། །སྐུ་བཞི་ཡེ་ཤེས་ལྔ་ལྡན་རྒྱལ་བ་འགྲུབ། །བླ་མ་མཆོག་ཀྱང་དགོངས་པ་ཆོས་དབྱིངས་སུ། །རྫོགས་ནས་འགྲོ་བའི་དཔལ་མགོན་བགྱིད་པར་ཤོག། །།སརྦ་དཱ་མངྒ་ལཾ།། །།