ཐུབ་དབང་རྟེན་གསུམ་མཐོང་གྲོལ་ལྷ་ཁང་ཛམ་གླིང་བཀྲ་ཤིས་འོད་འབར་གྱི་དཀར་ཆག་རྫོགས་ལྡན་དཔྱིད་ཀྱི་དབྱངས་སྙན།
ཐུབ་དབང་རྟེན་གསུམ་མཐོང་གྲོལ་ལྷ་ཁང་ཛམ་གླིང་བཀྲ་ཤིས་འོད་འབར་གྱི་དཀར་ཆག་རྫོགས་ལྡན་དཔྱིད་ཀྱི་དབྱངས་སྙན་ཅེས་བྱ་བ་བཞུགས་སོ། །
མཁའ་ལྟར་ཀུན་ཁྱབ་ཆོས་དབྱིངས་དེ་བཞིན་ཉིད། །སྤྲོས་པའི་ཡུལ་འདས་དོན་དམ་བདེན་གཅིག་པུ།
སྲིད་ཞིའི་དགེ་ལེགས་ཀུན་གྱི་འབྱུང་གནས་དེས། །བཀྲ་ཤིས་འཇིག་རྟེན་གསུམ་ན་རྟག་ཁྱབ་ཤོག །
མ་ལུས་ཤེས་བྱའི་དེ་ཉིད་ཐུགས་སུ་ཆུད་ནས་ཆོས་ཀུན་དབྱིངས་སུ་མངོན་པར་རྫོགས་པའི་སངས་རྒྱས་དང་། །འགོག་པའི་བདེན་པ་རྡུལ་དང་བྲལ་བ་སྟོན་བྱེད་རྣམ་བྱང་དགེ་བ་སུམ་ལྡན་དཀར་པོའི་ཆོས་ཀྱི་མཆོག །མཐོང་སྒོམ་ལམ་གྱིས་ཟག་པ་སྤངས་པས་འཕགས་པའི་སར་གནས་ཚོགས་ཀྱི་མཆོག་གྱུར་རིན་ཆེན་རྣམ་པ་གསུམ། །མཚན་གྱི་སྣང་བས་སྐྱེ་དགུ་མཐའ་དག་ཐར་པའི་ལམ་དུ་སྦྱོར་མཛད་དེ་ལ་སྒོ་གསུམ་གུས་པས་འདུད། །བསྔགས་འོས་ཡོན་ཏན་བརྒྱ་ཡིས་ལེགས་བརྒྱན་སྲིད་པའི་ཁམས་ན་ཆེ་དགུ་རྣམས་ཀྱང་དམན་པ་བཞིན། །ཁྱོད་ཞབས་རྡུལ་ཆ་ཕྲ་བས་ཟིལ་མནན་དུས་གསུམ་གཤེགས་རྣམས་དབྱངས་གཅིག་ཉིད་དུ་རབ་བསྔགས་པ། །འདབ་རྒྱས་ཚལ་དུ་པདྨ་དཀར་བཞིན་སྙིང་སྟོབས་ངོ་མཚར་མཚུངས་ཟླ་སྤངས་པའི་ཐུགས་རྗེ་ཅན། །ལྷ་ཡི་ལྷར་གྱུར་ཤཱཀྱའི་སྐྱེས་མཆོག་ཞབས་ཀྱི་པདྨོར་རྡུལ་སྙེད་ལུས་ཀྱིས་དད་ཕྱག་བརྩེགས། །ཡེ་ཤེས་རང་བཞིན་འོད་ཀྱི་ལུས་ཅན་འཆི་མེད་རྡོ་རྗེར་གདོད་ནས་གྲུབ་པའི་དཔལ་ཆེན་པོ། །ཞིང་འདིར་སློབ་དཔོན་གཟུགས་ཀྱིས་རྣམ་རོལ་སྒྱུ་འཕྲུལ་དྲྭ་བའི་གར་མཁན་ཉིད་དེ་གཤིས་ལུགས་དངོས། །ནམ་མཁའི་རང་བཞིན་སྲིད་ཞི་ཀུན་ཁྱབ་འདི་དང་གཞན་ཏུ་བརྗོད་པས་མི་མཚོན་དམ་པའི་བདག །བརྗོད་པའི་ངག་ཚིག་པདྨའི་འབྱུང་གནས་མགོན་པོ་
གཅིག་པུ་སྙིང་གི་ཟེའུ་འབྲུར་རྟག་བཞུགས་གསོལ། །ལྷག་པའི་བསམ་པ་འགྲོ་ཁམས་མཐར་ཐུག་གསེར་བཟང་ལྟ་བུར་མི་འགྱུར་བས། །བཟང་པོ་སྤྱོད་པས་ནམ་ཡང་མི་ངལ་རྣམ་ཐར་བསམ་ཡས་རིན་ཆེན་རྡུལ། །འཇིག་རྟེན་གསུམ་གྱི་མཆོད་སྡོང་ཆེན་པོར་བསྐལ་པ་རྒྱ་མཚོར་བརྩེགས་མཛད་པ། །རྒྱལ་བའི་སྲས་པོ་དུས་གསུམ་བྱོན་ལ་རབ་གུས་ཡིད་ཀྱི་པདྨོ་བཞད། །རྣམ་དག་ཚུལ་ཁྲིམས་ཕུང་པོས་ལྷར་བཅས་ཀུན་དགར་བྱེད། །ཉོན་མོངས་ཐ་བ་བཅོམ་པས་འཇིག་རྟེན་མཆོད་འོས་གྱུར། །བསྟན་སྐྱོང་འཕགས་པ་གནས་བརྟན་ཚོགས་དང་འཁོར་བཞི་ཡི། །ཉན་ཐོས་བཙུན་པ་སྡེར་བཅས་ལ་ཡང་གུས་ཕྱག་འཚལ། །མཚན་དཔེ་རྗེས་མཐུན་དབྱིབས་ལེགས་དཔལ་གྱིས་དང་བ་འདྲེན། །ངེས་པའི་དོན་རྣམས་ཚིག་ཏུ་སྟོན་པས་ཐར་ལམ་འབྱེད། །ལམ་དང་འབྲས་བུའི་ཆོས་རྣམས་མཚོན་པས་མོས་གུས་སྐྱེད། །སྐུ་གསུང་ཐུགས་རྟེན་ལྷར་བཅས་འགྲོ་བའི་བསོད་ནམས་ཞིང་། །བསླབ་པ་གསུམ་གྱི་ཤ་ཚུགས་རབ་ཏུ་བརླིང་། །རྣམ་དག་ལུང་དང་རིག་པའི་གཡུ་རལ་རྒྱས། །ལོག་རྟོག་ཝ་སྐྱེས་འཆད་རྩོད་ཁ་ལྔས་འཇོམས། །འཕགས་བོད་ལོ་པ་སྐྱེས་མཆོག་རྒྱལ་གྱུར་ཅིག །གསང་བ་གྲུབ་པས་བརྟུལ་ཞུགས་མི་གཡོ་ཞིང་། །ཟུང་འཇུག་དབྱིངས་སུ་གཉིས་རྟོག་མཚན་མ་ཟད། །
འབྲེལ་ཚད་ཐར་པར་དཀྲི་བའི་ནུས་མཐུ་ཅན། །གྲུབ་མཆོག་དཔའ་བོའི་ཚོགས་ཀྱིས་བདག་སྐྱོངས་ཤིག །རྨོངས་པའི་མུན་འཇོམས་ཐེ་ཚོམ་མདུད་པ་འགྲོལ། །ཤེས་དང་ཤེས་བྱར་བློ་ཡི་མཆོག་སྦྱིན་པ། །རྡོ་རྗེ་རྣོན་པོ་ཡིད་ཀྱི་མཚོར་བྱུང་མ། །ཆོས་དང་ལོངས་སྤྱོད་འཁོར་ལོར་རྟག་ཏུ་རོལ། །ཞི་ཆགས་འབར་བ་ཆེན་པོའི་ཡེ་ཤེས་ཀྱི། །ལོངས་སྤྱོད་དགྱེས་རོལ་གང་གི་མཆོག་སྒྲུབ་པ། །དེ་ལ་དེ་ཉིད་སྩོལ་མཛད་ལྷག་པའི་ལྷས། །དངོས་གྲུབ་བཅུད་དུ་སྨིན་པའི་བཀའ་དྲིན་སྩོལ། །རྡོ་རྗེའི་དམ་ཚིག་མི་ལྷོད་བསྟན་པ་དང་། །བསྟན་འཛིན་རྗེས་འབྲང་ནག་པོ་ལྕམ་དང་དྲལ། །སྡེ་རིས་དཔུང་བཅས་ཆོས་མཛད་བུ་བཞིན་ཏུ། །སྐྱོང་བའི་གཡར་དམ་གཉན་པོ་རྗེས་སུ་དགོངས། །གང་ན་རྟེན་མཆོག་དཔག་བསམ་མྱུ་གུ་འཁྲུངས། །དེ་ན་ཐུབ་བསྟན་ཛམ་བུའི་སྙེ་མ་བཞད། །དེར་བརྟེན་ལུས་ཅན་མཐའ་དག་འཕྲལ་ཡུན་ཏུ། །མངོན་མཐོ་ངེས་ལེགས་ལོངས་སྤྱོད་རབ་རྫོགས་བྱེད། །རྒྱལ་བས་རབ་བསྔགས་རྣམ་དཀར་ལམ་པོ་ཆེར། །འཕགས་བོད་རྣམ་དཔྱོད་མིག་ལྡན་རྟག་ཏུ་གཤེགས། །དེ་ཤུལ་མཐོང་བའི་བློ་ཅན་རྩོད་དུས་འདིར། །བྱུང་བ་བརྗོད་པའི་ལྕེ་ཡང་བསྔགས་འོས་ཉིད། །སྙིགས་མཐར་སྐྱེ་བོའི་བློ་ངན་ཚང་ཚིང་དུ། །རྣམ་དཀར་བློ་གྲོས་ཨུ་དུམྦ་ར་བཞིན། །མི་སྲིད་སྲིད་པའི་ཆོས་ཅན་མངོན་
སུམ་དུ། །སྐྱེས་པ་འདི་འདྲ་སངས་རྒྱས་ཉིད་ཀྱི་མཐུ། །སྔོན་གོམས་བསོད་ནམས་མཐུ་ལས་འབྱོར་པའི་དཔལ། །བསོད་ནམས་ཞིང་དུ་བསྔོས་ལས་ཐབས་མཁས་པ། །མ་མཆིས་རྒྱུ་འབྲས་ཚུལ་འདི་མུར་འདུག་དང་། །ཐུན་མིན་ཐམས་ཅད་མཁྱེན་པའི་ཁྱད་ཆོས་ཡིན། །འཛུམ་དཀར་རྩེ་དགས་བྲིད་ཀྱང་ཆུ་བུར་ནི། །སྙིང་པོས་སྟོང་མཚུངས་སྒྱུ་མའི་ཟང་ཟིང་ལས། ཁ་ན་མ་ཐོ་བྲལ་བའི་སྙིང་པོའི་ལྕིང་། །ཕྲག་པར་ངོམས་འདི་དམ་པ་རྣམས་ཀྱི་གཤིས། །གནས་མིན་སེམས་བསྐྱེད་ནག་པོ་བརྩེགས་པའི་རོས། །རྣམ་དཀར་ཆུ་གཏེར་སྒྱུར་བྱེད་ལྟར་སྣང་བའི། །ཡིད་དང་མི་མཛའ་བྱང་ཆུབ་ཆེ་སྤྱོད་པ། །གང་འདི་དམ་པའི་མགོན་གྱིས་ཟིན་པའི་མཐུ། །དད་གསུམ་ཤིང་རྟ་ཆེར་ཞུགས་སྦྱིན་པ་ཡི། །མི་མཐུན་ཕྱོགས་སྤངས་ཕོངས་པ་མེད་པའི་ཕྱག །རིང་པོར་བརྐྱངས་ནས་ཚུལ་བཞིན་བསྒྲུབས་པའི་རྟན། །ཡེ་ཤེས་ཕུང་པོ་སྲིད་མཐའི་བར་དུ་ཞུགས། །དེ་ཡིས་སྣོད་བཅུད་མཐའ་དག་བྱིན་རློབ་ཅིང་། །དེ་ལས་ཕན་བདེའི་དགེ་མཚན་ནུབ་མེད་རྒྱས། །དེས་ཀྱང་བསྟན་འགྲོའི་སྲོག་ཟུང་ཡུན་རིང་པོར། །འཚོ་བྱེད་རྫོགས་ལྡན་ནོར་བུའི་མཛོད་འདི་གྲུབ། །རྣམ་དཀར་དཔག་བསམ་ལྕུག་མར་མངོན་མཐོ་གསེར་གྱི་པདྨོ་འཛུམ་པ་ལས། །ངེས་ལེགས་བདུད་རྩིའི་
ཟིལ་དངར་འཛག་པས་སྐྱེ་བོ་རྣམས་ནི་ཀུན་དགར་བྱེད། །སྔོན་མེད་དུས་ཀྱི་དང་པོའི་དཔྱིད་འདི་སྔོན་རབས་ལེགས་སྤྱད་ས་བོན་ཏུ། །འབྲས་བུས་རྗེས་དཔག་རྒྱུ་ལ་དཔྱོད་དང་བསོད་ནམས་གནས་ལའང་ཡི་རང་བྱོས། །དེ་ལྟར་དགེ་ལེགས་ཀྱི་ཚིགས་སུ་བཅད་པ་ཀ་མ་ལ་གསར་པའི་ཕྲེང་བ་ཅུང་ཟད་བསྟར་བས་མདུན་བསུས་ཏེ། །དཔལ་སྡེ་དགེ་ལྷུན་གྲུབ་སྟེང་གི་རྒྱལ་ཁབ་སུམ་རྩེན་རྣམ་པར་རྒྱལ་བའི་རྫོང་ཆེན་པོའི་ཐུབ་དབང་རྟེན་གསུམ་མཐོང་གྲོལ་ལྷ་ཁང་ཛཾ་གླིང་བཀྲ་ཤིས་འོད་འབར་གྱི་བཞུགས་བྱང་དཀར་ཆག་མདོ་ཙམ་བརྗོད་པ་ལ་བརྒྱད། །གང་ཞིག་བཞེངས་པའི་རྟེན་གྱི་ངོ་བོ། །གང་དུ་བཞེངས་ཡུལ་གནས་ཀྱི་མཚན་ཉིད། །གང་གིས་བཞེངས་བྱེད་བདག་པོའི་ཁྱད་པར། །གང་ཕྱིར་བཞེངས་པའི་དོན་དང་དགོས་ཆེད། །ཇི་ལྟར་བཞེངས་པའི་བྱ་བའི་ཚུལ། །རྟེན་གྱི་བཞུགས་བྱང་དཀར་ཆག་དངོས། །དེ་ལ་རབ་ཏུ་གནས་པའི་ཚུལ། །དེ་ལྟར་བཞེངས་པའི་ཕན་ཡོན་འབྲས་བུ་སྟེ་བཀྲ་ཤིས་པའི་གྲངས་དང་ལྡན་པའོ། །དེའི་དང་པོ་ལ་གསུམ། །བཞེངས་བྱ་སྟོན་པའི་རྣམ་ཐར། །རྟེན་གསུམ་གྱི་བྱུང་ཁུངས། །དེ་ལས་ཁྱད་པར་དུ་བྱ་བ་བཤད་པའོ། །དང་པོ་ནི། །རྒྱལ་བ་ཐམས་ཅད་སྐུ་གསུང་ཐུགས་ཡེ་ཤེས་རྡོ་རྗེ་མི་ཟད་རྒྱན་གྱི་འཁོར་ལོའི་བདག་ཉིད་ཅན་ཤ་སྟག་
ཡིན་པས། དེ་དག་ལ་ཐ་དད་དུ་དབྱེ་ཞིང་རྣམ་པར་གཞག་པའི་སྤྲོས་མཚན་མ་དམིགས་པས། གང་དང་གང་དུ་གདུལ་བྱའི་རྒྱུད་རྣམ་པར་དག་པ་དེ་དང་དེར་སངས་རྒྱས་ཐམས་ཅད་ཀྱི་རྣམ་པར་ཐར་པ་གཅིག་ཏུ་འདུས་པའི་ངོ་བོ་ཅན་གྱི་མཛད་པ་རྒྱ་མཚོ་ཅིག་ཅར་དང་རིམ་གྱིས་ལ་སོགས་པར་སྣང་བ་ཡིན་མོད། འདིར་གདུལ་བྱའི་སྣང་ངོ་དང་བསྟུན་ཏེ་སོ་སོར་བཤད་ན་གཉིས། བདག་ཅག་གི་སྟོན་པ་དང་། དེ་དང་མི་གཉིས་པ་སློབ་དཔོན་ཆེན་པོའི་རྣམ་ཐར་ཕྱོགས་ཙམ་བཤད་པའོ། །དང་པོ་ནི། བདག་ཅག་གི་སྟོན་པ་འདི་ངེས་པ་དོན་གྱི་དབང་དུ་བྱས་ན་བསྐལ་པ་དཔག་ཏུ་མེད་པའི་སྔོན་རོལ་ནས་དེ་བཞིན་གཤེགས་པ་དབང་པོའི་ཏོག་ཅེས་བྱ་བར་སངས་རྒྱས་ནས་བཟུང་། སངས་རྒྱས་རྒྱ་མཚོའི་རྣམ་པར་སངས་རྒྱས་པའི་ཚུལ་བསྟན་ཅིང་། སླར་ཡང་ཀུན་ཏུ་བཟང་པོའི་སྤྱོད་པ་སྤྱད་ནས་མངོན་པར་སངས་རྒྱས་པར་སྟོན་པའང་ཡིན་ཏེ། ཡབ་སྲས་མཇལ་བའི་མདོ་ལས། །དཔའ་བོ་ཆེན་པོ་ཐབས་མཁས་ཏེ། །སེམས་ཅན་ཡོངས་སུ་སྨིན་མཛད་ཕྱིར། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་ཡང་ནི་འདྲེན་པ་ཁྱོད། །སངས་རྒྱས་མང་པོ་སྟོན་པར་མཛད། །ཅེས་པ་ལ་སོགས་པ་འབྱུང་བས་སོ། །དྲང་བའི་དོན་གྱི་
དབང་དུ་བྱས་ན་དང་པོར་ཐུགས་བསྐྱེད། བར་དུ་སྤྱོད་པ་སྤྱད། ཐ་མ་འཚང་རྒྱ་བ་རྣམ་པ་གསུམ་སྟེ། ཐུགས་བསྐྱེད་པ་དེའང་ཐེག་པ་ཆེ་ཆུང་གི་བཞེད་པ་གཉིས་ལས། ཐེག་དམན་པ་རྣམས་ཀྱིས་ནི། སྟོན་པ་འདི་སྔོན་རྒྱལ་པོ་འོད་ལྡན་དུ་གྱུར་པ་ན་བྱང་ཆུབ་མཆོག་ཏུ་ཐུགས་བསྐྱེད་པ་དང་། ཡངས་པའི་གྲོང་ཁྱེར་དུ་རྫ་མཁན་ཡངས་པའི་འོད་ཅེས་བྱ་བར་གྱུར་པ་ན། དེ་བཞིན་གཤེགས་པ་ཤཱཀྱ་ཐུབ་ཆེན་གྱི་དྲུང་དུ་བྱང་ཆུབ་ཏུ་ཐུགས་བསྐྱེད་པ་དང་། ལྷག་པའི་ལྷ་ཞེས་བྱ་བའི་རྒྱལ་པོར་གྱུར་པ་ན་དེ་བཞིན་གཤེགས་པ་ཚངས་པའི་ལྷ་མཐོང་ནས་བྱང་ཆུབ་ཏུ་ཐུགས་བསྐྱེད་པ་ལ་སོགས་པ་འདོད་དོ། །ཐེག་ཆེན་གྱི་ལུགས་སུ། སྔོན་སྟོན་པ་འདི་བྲམ་ཟེ་རྒྱ་མཚོའི་རྡུལ་ཞེས་བྱ་བར་གྱུར་པ་ན། རང་ཉིད་ཀྱི་སྲས་རིན་ཆེན་སྙིང་པོ་ཞེས་བྱ་བ་བླ་ན་མེད་པའི་བྱང་ཆུབ་བརྙེས་པ་དེས་སྲོག་ཆགས་རྣམས་ལ་ཆོས་སྟོན་པའི་ཚེ། རྒྱ་མཚོའི་རྡུལ་གྱིས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་འབུམ་བླ་ན་མེད་པའི་བྱང་ཆུབ་ཏུ་སེམས་བསྐྱེད་དུ་བཅུག་ནས། མཐར་རང་ཉིད་ཀྱིས་རྩོད་པའི་དུས་སྙིགས་མ་ལྔ་བདོ་བའི་དུས་འདིར་སེམས་ཅན་གྱི་དོན་མཛད་པར་གཡར་དམ་ཆེན་པོ་བཞེས་ནས་སྨོན་ལམ་ལྔ་བརྒྱ་བཏབ་སྟེ། བླ་ན་མེད་པའི་བྱང་ཆུབ་ཏུ་ཐུགས་བསྐྱེད་པར་སྙིང་རྗེ་པདྨ་དཀར་པོའི་མདོ་ལས་བཤད་
པ་དང་། གཞན་ཡང་དམྱལ་སྲུང་ཨ་ཝང་གི་མེའི་ཤིང་རྟ་འདྲེན་མཁན་གྱི་གྱད་དུ་གྱུར་པ་ན་གྲོགས་ལ་ཨ་ཝང་གིས་མདུང་རྩེ་གསུམ་པ་བསྣུན་ཅིང་། ལྕགས་ཐོས་བརྡེག་པ་ལ་སྙིང་རྗེ་བསྐྱེད་ནས་བྱང་ཆུབ་ཏུ་ཐུགས་བསྐྱེད་པ་དང་། ཚོང་དཔོན་གྱི་བུ་མངོན་དགར་གྱུར་པ་ན། དེ་བཞིན་གཤེགས་པ་མཛེས་ཆེན་ལ་བརྟེན་ནས་བྱང་ཆུབ་ཏུ་ཐུགས་བསྐྱེད་པ་དང་། དེ་བཞིན་གཤེགས་པ་དོན་ཡོད་མཐོང་གི་དྲུང་དུ་ཐུགས་བསྐྱེད་པ་ལ་སོགས་པ་བཞེད་དོ། །བར་དུ་སྤྱོད་པ་སྤྱད་པའི་ཚུལ་ལ། ཉན་ཐོས་པ་རྣམས་སངས་རྒྱས་ཤཱཀྱ་ཐུབ་པ་ནས་བཟུང་། རིན་ཆེན་གཙུག་ཕུད་ཅན་གྱི་བར་མཆོད་པས་གྲངས་མེད་དང་པོ་དེ་ནས་མར་མེ་མཛད་ཀྱི་བར་གཉིས་པ། དེ་ནས་རྣམ་གཟིགས་ཀྱི་བར་གསུམ་པ་འདས་ཏེ། དེ་བཞིན་གཤེགས་པ་སྐར་རྒྱལ་ལ་བསྟོད་པས་བསྐལ་པ་དགུ་བཅུ་རྩ་གཅིག་གི་ཚོགས་བཟླུམས་ཤིང་མཚན་དཔེའི་རྒྱུ་བསྒྲུབས་ནས་དགའ་ལྡན་དུ་དེ་ཉིད་ཀྱི་ཚེ་ཚད་དང་མཉམ་པར་བཞུགས་པ་སོགས་གྲུབ་མཐའ་དང་སྡེ་པའི་ཁྱད་པར་གྱི་འདོད་པ་དུ་མ་ཡོད་དོ། །ཐེག་ཆེན་གྱི་ལུགས་སུ་ནི། དེ་ལྟར་བླ་ན་མེད་པའི་བྱང་ཆུབ་ཆེན་པོར་ཐུགས་བསྐྱེད་པ་ནས་བསྐལ་པ་གྲངས་མེད་པ་དང་པོས་ཚོགས་ལམ་ནས་ས་དང་པོའི་བར་དང་། གཉིས་པས་དྲི་མ་མེད་པ་ལ་སོགས་
པ་དྲུག་དང་། གསུམ་པས་མི་གཡོ་བ་ནས་སངས་རྒྱས་ཀྱི་སའི་བར་ཏེ་དེ་ལྟར་གྲངས་མེད་གསུམ་དང་། གཞན་ཡང་གྲངས་མེད་པ་སུམ་ཅུ་རྩ་གསུམ་དང་། གྲངས་མེད་པ་དུ་མས་བྱང་ཆུབ་ཀྱི་སྤྱོད་པ་སྤྱད་པ་ལ་སོགས་པ་བཞེད་དོ། །ཐ་མ་འཚང་རྒྱ་བ་ན། ཐེག་པ་ཉི་ཚེ་བའི་ལུགས་སུ་ནི། གོང་དུ་བཤད་པ་ལྟར་དེ་བཞིན་གཤེགས་པ་སྐར་རྒྱལ་ལ་བསྟོད་པའི་མཐར་དགའ་ལྡན་གྱི་གནས་སུ་དམ་པ་ཏོག་དཀར་པོར་འཁྲུངས་ཤིང་། དེ་ནས་འཕོས་ཏེ་རྒྱལ་བུ་དོན་གྲུབ་ཏུ་སྐྱེས་པ་སོགས་མཛད་པ་བཅུ་གཉིས་སྟོན་པར་འདོད་ལ། ཐེག་ཆེན་པ་རྣམས་ནི། འོག་མིན་སྟུག་པོ་བཀོད་པར་ལོངས་སྤྱོད་རྫོགས་པའི་སྐུར་མངོན་པར་སངས་རྒྱས་ནས། སྤྲུལ་པའི་སྐུ་ཞིག་ཞིང་འདིར་འཚང་རྒྱ་བའི་ཚུལ་སྟོན་པ་ལ་སོགས་པ་མདོ་སྔགས་ཀྱི་བཞེད་པ་དུ་མ་ཡོད་དེ། ལང་ཀར་གཤེགས་པ་ལས། གཙང་མའི་རིས་དག་སྤངས་པ་ཡི། །འོག་མིན་གནས་མཆོག་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་སངས་རྒྱས། །ཞེས་པ་ལ་སོགས་པ་གསུངས་སོ། །འོ་ན་བཅོམ་ལྡན་འདས་དེ་སྤྲུལ་པའི་སྐུར་འཚང་རྒྱ་བའི་ཚུལ་བསྟན་པའི་མཛད་པ་དེ་གང་ཞེ་ན། ཐེག་པ་ཆེ་ཆུང་དང་། མདོ་སྔགས་ཀྱི་ཁྱད་པར་ལ་སོགས་
བསམ་གྱིས་མི་ཁྱབ་པའི་མཚན་ཉིད་ཅན་ཡིན་པས་གཅིག་ཏུ་རྣམ་གཞག་བྱར་མེད་ཀྱང་། ཐུན་མོང་ལ་ཡོངས་སུ་གྲགས་པ་ནི་མཛད་པ་བཅུ་གཉིས་ཏེ། རྒྱུད་བླ་མ་ལས། །ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམ་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པ་ལྟར། དགའ་ལྡན་གྱི་གནས་ནས་ལྷའི་བུ་དམ་པ་ཏོག་དཀར་པོས་ཆོས་ཀྱི་མཐོ་བ་ཞེས་བྱ་བའི་ཁང་བཟང་དུ་བྱང་ཆུབ་སེམས་དཔའ་རྣམས་ལ་ཆོས་བསྟན་ནས་ཛཾ་བུའི་གླིང་དུ་འཕོ་བར་བརྩམས་པ་ན། ཐོད་དང་ཅོད་པན་བྱམས་པའི་དབུ་ལ་བཞག་ནས་གླིང་དང་། ཡུལ་དང་། དུས་དང་། ཡབ་དང་། ཡུམ་སྟེ་རྣམ་པ་ལྔ་ལ་གཟིགས་ནས་ཛམྦུའི་གླིང་དུ་དབུས་འགྱུར་འཆང་སེར་སྐྱའི་ཡུལ་དེར་ཚེ་ལོ་
བརྒྱ་པའི་དུས་ན་ཡབ་རྒྱལ་པོ་ཟས་གཙང་མའི་ཡུམ་ལྷ་མོ་སྒྱུ་འཕྲུལ་མའི་ལྷུམས་སུ་གླང་པོ་ཆེ་ཐལ་དཀར་མཆེ་བ་དྲུག་པའི་གཟུགས་ཀྱིས་འཕོས་ཏེ་གང་གི་ཚེ་ལྷུམས་སུ་ཟླ་བ་བཅུ་རྫོགས་པ་དང་། ལུམྦི་ནཱིའི་ཚལ་ལྷ་དང་མི་ཡི་འབྱོར་པ་ཕུན་སུམ་ཚོགས་པས་བརྒྱན་པ་ག་ལ་བར། ངོ་མཚར་བའི་ལྟས་ཀྱི་མཚན་མ་རྒྱ་མཚོ་དང་ལྷན་ཅིག་བྱང་ཆུབ་སེམས་དཔའ་མངོན་པར་བཙས་ཏེ། དོན་ཐམས་ཅད་གྲུབ་པ། ཤཱཀྱ་ཐུབ་པ། ལྷའི་ཡང་ལྷ་ཞེས་བྱ་བའི་མཚན་རྣམས་ཀྱི་ཡི་གེ་ཡང་བརྗིད་པར་གྱུར་ཏོ། །དེ་ནས་བྱང་ཆུབ་སེམས་དཔའ་གཞོན་ནུས་ཡི་གེ་དང་། རྩིས་དང་། འཕོང་ལ་སོགས་པ་བསྐལ་པ་རྒྱ་མཚོར་སྦྱངས་པའི་སྟོབས་ཀྱི་རྩལ་ཇི་སྙེད་པ་བསྟན་ཅིང་། གདུལ་བྱ་སྨིན་པའི་དགོས་པས་ས་འཚོ་དང་། གྲགས་འཛིན་ལ་སོགས་པའི་བཙུན་མོ་དྲུག་ཁྲི་དང་རྩེ་ཞིང་རོལ་པ་ལ་སོགས་པས་བྱང་ཆུབ་ཏུ་སྨིན་པར་མཛད་ནས། རྒས་པ་དང་། ན་བ་དང་། འཆི་བ་དང་། ཚངས་པར་སྤྱོད་པ་རྣམས་གཟིགས་པས་རྒྱལ་སྲིད་སྤངས་ཏེ་བདག་ཉིད་ཀྱིས་བདག་ཉིད་རབ་ཏུ་འབྱིན་པར་མཛད་དོ། །དེ་ནས་བྱང་ཆུབ་སེམས་དཔའ་འཇིག་རྟེན་པའི་བསམ་གཏན་བླ་དང་བཅས་པ་གང་ཇི་སྙེད་པ་བསྒྲུབས་ཤིང་། ཆུ་བོ་ནེ་རཉྫ་ནའི་ངོགས་སུ་ལོ་དྲུག་ཏུ་དཀའ་བ་སྤྱད་ཅིང་། བསམ་གཏན་
དེ་དང་། བརྟུལ་ཞུགས་དེས་མི་གྲོལ་བར་མཁྱེན་ནས་དེ་དག་སུན་དབྱུང་བའི་ཕྱིར་ཁ་ཟས་རགས་པ་གསོལ་ཏེ། གྲོང་མི་དགའ་བྱེད་མའི་བུ་མོ་ལེགས་སྐྱེས་མ་ལས་བ་སྟོང་གི་འོ་མ་ཉིང་ཁུར་བྱས་པའི་འོ་ཐུག་སྦྲང་རྩི་ཅན་བཞེས་ནས། རྩྭ་འཚོང་བཀྲ་ཤིས་ལས་རྩྭ་བླངས་ཏེ་བྱང་ཆུབ་སྙིང་པོ་ལྷ་དང་མིའི་འབྱོར་པ་ལས་འདས་པའི་རྒྱན་བཀོད་པ་ག་ལ་བ་དེར་གཤེགས་ཏེ་དགོངས་པ་མི་གཡོ་བར་བཞུགས་སོ། །དེའི་ཚེ་བྱང་ཆུབ་སེམས་དཔའ་བདུད་རྩི་འཐོབ་པ་ལ་ཕྲག་དོག་ཅན་བདུད་ཀྱི་སྡེ་གང་ཇི་སྙེད་པའི་དམག་དཔུང་དེ་སྙེད་རྣམས་བྱམས་པའི་མཐུས་བཅོམ་སྟེ། ནམ་གྱི་ཆ་སྨད་སྐྱ་རེངས་འཆར་ཀ་རྔ་བརྡུང་བའི་དུས་སུ་བྱང་ཆུབ་སེམས་དཔའ་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །དེ་ནས་ཡུལ་ཝཱ་རཱ་་སཱི་དྲང་སྲོང་ལྷུང་བ་རི་དྭགས་ཀྱི་ནགས་སུ་གཤེགས་ནས་ཚངས་པ་གཙུག་ཕུད་ཅན་ལ་སོགས་པས་ཆོས་ཀྱི་འཁོར་ལོ་བསྐོར་བར་བསྐུལ་བའི་ངོར་ལྔ་སྡེ་བཟང་པོ་ལ་བདེན་པ་བཞི་ལན་གསུམ་བཟླས་པའི་ཆོས་ཀྱི་འཁོར་ལོ་བསྐོར། དེ་ནས་གཞན་ཡང་རྒྱལ་པོའི་ཁབ་དང་། ཡངས་པ་ཅན་གྱི་གྲོང་ཁྱེར་ལ་སོགས་པར་བཀའ་བར་པ་དང་། ཐ་མ་སོགས་དྲང་ངེས་ཆོས་ཀྱི་འཁོར་ལོ་དང་། དཔལ་ལྡན་
འབྲས་སྤུངས་ཀྱི་མཆོད་རྟེན་ལ་སོགས་པར་གསང་སྔགས་རྡོ་རྗེ་ཐེག་པའི་ཆོས་ཀྱི་འཁོར་ལོ་སྟེ། སྔོན་ལྷའམ་མར་གྱུར་པ་སུས་ཀྱང་མ་བསྐོར་བའི་ཆོས་ཀྱི་འཁོར་ལོ་དེ་དག་འཇིག་རྟེན་དུ་བསྐོར་ཞིང་བསྟན་ནས། །ཇི་སྐད་དུ། རྒྱལ་བ་མྱ་ངན་ཡོང་མི་འདའ། །ཆོས་ཀྱང་ནུབ་པར་མི་འགྱུར་ཏེ། །སེམས་ཅན་རྣམས་ལ་ཕན་མཛད་ཕྱིར། །ཡོངས་སུ་མྱ་ངན་འདའ་བ་སྟོན། །ཞེས་གསུངས་པ་ལྟར་དོན་དམ་པར་སངས་རྒྱས་མྱ་ངན་ལས་མི་འདའ་ཡང་། སངས་རྒྱས་འབྱུང་བ་དཀོན་པ་ལ་སོགས་པ་བསྟན་པའི་དགོས་པ་དང་ལྡན་པས་གྲོང་ཁྱེར་རྩྭ་ཅན་གྱད་རྣམས་ཀྱི་ཉེ་འཁོར་ཤིང་སཱ་ལ་ཟུང་གི་བར་དུ་རྒྱལ་བ་མྱ་ངན་ལས་འདའ་བའི་ཚུལ་བསྟན་ཏེ། རིང་བསྲེལ་འཇིག་རྟེན་དུ་རྒྱས་པར་མཛད་པ་ཡིན་ནོ། །གཉིས་པ་ནི། །འཇམ་དཔལ་སྒྱུ་འཕྲུལ་དྲྭ་བ་ལས། །དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་སངས་རྒྱས་རིག་སྔགས་འཆང་། །ཞེས་པ་ལ་སོགས་པས་ལུང་དུ་བསྟན་པའི་སངས་རྒྱས་གཉིས་པ་པདྨ་སཾ་བྷ་བ་ནི། །སྐུ་གསུམ་རྒྱལ་བ་རྒྱ་མཚོའི་སྐུ་གསུང་ཐུགས་མི་ཟད་རྒྱན་གྱི་འཁོར་ལོའི་བདག་པོའི་རྐྱེན་འབའ་ཞིག་ལས་ཛམ་གླིང་འདིར་སྣང་བ་ཡིན་ཏེ། སློབ་
དཔོན་ཉིད་ཀྱི་ཞལ་ནས། ཆོས་སྐུའི་སངས་རྒྱས་རྣམས་ཀྱིས་དགོངས་པ་གཏད༔ ལོངས་སྐུའི་སངས་རྒྱས་རྣམས་ཀྱིས་ལུང་བསྟན་ཅིང་༔ སྤྲུལ་སྐུའི་སངས་རྒྱས་ཐམས་ཅད་བཀའ་བགྲོས་ནས༔ པདྨ་བདག་ཉིད་ཛཾ་བུའི་གླིང་དུ་འོང་༔ ཞེས་གསུངས་པ་ལྟར་རོ། །དེ་ཡང་གདུལ་བྱའི་ཁམས་དབང་བསམ་པ་དང་མཐུན་པར་འབུལ་བྱེད་སྟོན་པ་དང་འདུལ་ཐབས་ཆོས་ཀྱི་སྒོའང་དེའི་རྗེས་སུ་འགྲོ་བས་རྣམ་པར་ཐར་པ་ལ་ཚད་བཟུང་ཞིང་མཐའ་གཅིག་ཏུ་བཤད་པར་ནུས་པ་མ་ཡིན་ཏེ། རྡོ་རྗེའི་གསུང་ལས། ཐུབ་དབང་འདས་ནས་ཉི་ཤུ་རྩ་བཞིའི་ཚེ༔ འོད་དཔག་མེད་ནི་བྱང་སེམས་ཚུལ་བཟུང་བའི༔ འཕགས་པ་རྡོ་རྗེ་ཆེན་པོའི་ཐུགས་ཀ་ནས༔ པདྨ་བདག་ཉིད་ཧྲཱིཿཡིག་ཚུལ་དུ་སྤྲུལ༔དེ་ཡང་བྱེ་བ་ས་ཡ་གྲངས་མེད་པ༔ འཇིག་རྟེན་ཀུན་ཏུ་ཆར་བབ་ཚུལ་དུ་འོང་༔ རྒྱལ་བའི་མཛད་པ་བསམ་གྱིས་མི་ཁྱབ་པ༔ ཚད་བཟུང་རིས་སུ་བཅད་པ་སུ་ཡིས་ནུས༔ ཞེས་གསུངས་པའི་ཕྱིར་རོ། །འོན་ཀྱང་འཕགས་བོད་གཉིས་སུ་བརྫུས་སྐྱེས་དང་། མངལ་སྐྱེས་གཉིས་སུ་རྣམ་པར་གཞག་པ་བྱུང་ལ། དེ་དང་མཐུན་པར་སློབ་དཔོན་ཉིད་ཀྱི་ཞལ་ནས་ཀྱང་། དེ་ཡང་ཁ་ཅིག་སྣང་ངོར་ཨོ་རྒྱན་ཡུལ༔ དྷ་ན་ཀོ་ཥར་པད་སྡོང་རྩེ་ལས་སྤྲུལ༔ཁ་ཅིག་སྣང་ངོར་ཨོ་
རྒྱན་རྒྱལ་པོའི་སྲས༔ ཁ་ཅིག་སྣང་ངོར་གནམ་ལྕགས་ཡོད་པའི་རྩེར༔ ཐོག་བབས་ཚུལ་དུ་བྱུང་ཞེས་ཐ་དད་ཀྱང་༔ ཞེས་གསུངས་སོ། །དེ་ལས་ཀྱང་གྲགས་ཆེ་བ་ནི་བརྫུས་སྐྱེས་ཡིན་ཏེ། །དེ་ནི་མ་ག་དྷཱ་རྡོ་རྗེའི་གདན་གྱི་ནུབ་ཕྱོགས་ཨོ་རྒྱན་གྱི་ཡུལ། སྟེང་འགྲོའི་རྒྱལ་ཁམས་ཀྱི་ཤར་ལྷོ་དྷ་ན་ཀོ་ཥའི་མཚོ་ལས་པདྨའི་གེ་སར་ལས་སྐུ་འཁྲུངས་ཏེ་ཨོ་རྒྱན་གྱི་རྒྱལ་པོའི་བུ་སྐལ་མཛད། རྡོ་རྗེ་སེམས་དཔའི་ལུང་གིས་བསྐུལ་ཏེ་རྒྱལ་སྲིད་སྤང་ནས་ཡུལ་གཞན་དང་གཞན་དུ་གཤེགས་ཤིང་། དུར་ཁྲོད་ཆེན་པོ་བརྒྱད་ལ་སོགས་པར་བརྟུལ་ཞུགས་ཀྱི་སྤྱོད་པ་བསྐྱངས། གུ་རུ་མཚན་བརྒྱད་དང་། འཕྲུལ་མཚན་བཞི་བཅུ་ལ་སོགས་པ་སྐུའི་བཀོད་པ་དུ་མ་བསྟན་ནས་ཆོས་ཐམས་ཅད་ལ་སྒྲོ་འདོགས་གཅོད་པའི་ཚུལ་མཛད། ཕྱག་རྒྱ་ཆེན་པོའི་རིག་འཛིན་གྱི་གོ་འཕང་མངོན་དུ་མཛད་ནས་ཚེ་ལ་དབང་བའི་རིག་འཛིན་གྱིས་ཇི་སྲིད་འཁོར་བ་མ་སྟོང་བར་དུ་འགྲོ་དོན་མཛད་པ་དེས། རྡོ་རྗེ་གདན་དུ་མུ་སྟེགས་ཀྱི་རྒོལ་བ་བཟློག །བདུད་དང་བདུད་ཀྱི་རིས་སུ་གྱུར་པ་ཐམས་ཅད་རྫུ་འཕྲུལ་གྱིས་བཅོམ་ནས་ཕྱག་རྒྱ་གཉན་པོའི་དམ་འོག་ཏུ་བསྡུས། ཤར་ཕྱོགས་བྷདྒ་ལ་སོགས་པའི་ཡུལ་ཁམས་དུ་མར་འགྲོ་བ་བསམ་གྱིས་མི་ཁྱབ་པའི་དོན་མཛད། འགྲོ་ལྡིང་གི་ཡུལ་དུ་གནོད་སྦྱིན་དང་ཕྲ་མེན་
མ་ཀླུ་གདུག་པ་ཅན་སོགས་བཏུལ་ནས་སངས་རྒྱས་ཀྱི་བསྟན་པ་བཙུགས་ཤིང་། གཙུག་ལག་ཁང་དང་དགེ་འདུན་གྱི་སྡེ་རྒྱས་པར་མཛད། ཁྱད་པར་དུ་སྐལ་བ་དང་ལྡན་པ་དྲུག་ལ་གསང་སྔགས་ཀྱི་བསྟན་པ་གཏད། དེར་ལོ་བཅུ་གཉིས་བཞུགས་ནས་ལྷོ་ནུབ་རྔ་ཡབ་གླིང་དུ་བཞུད་པར་འདོད་དོ། །དེ་ནས་བོད་ཡུལ་འདིར། འཇམ་དཔལ་རྩ་རྒྱུད་ལས། ཁ་བ་ཅན་དུ་མཚོ་ཕྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་དང་། །ལྷ་མོ་དྲི་མ་མེད་པས་ཞུས་པའི་མདོ་ལས་སངས་རྒྱས་ཀྱི་བསྟན་པ་དར་བར་ལུང་བསྟན་པ་ལྟར། འཇམ་དཔལ་དབྱངས་མིའི་བདག་པོའི་ཟོལ་ཅན་ཆོས་སྐྱོང་བའི་རྒྱལ་པོ་ཁྲི་སྲོང་ལྡེའུ་བཙན་གྱིས་ཡབ་མེས་ཀྱིས་བསྟན་པ་དར་བའི་སྲོལ་བཏོད་པའི་རྣམ་ཐར་མཐོང་བ་དང་། བདག་ཉིད་ཀྱི་སྨོན་ལམ་སད་པ་དུས་མཚུངས་པས་རྒྱལ་བསྟན་སྤེལ་བར་བཞེད་ནས། ཟ་ཧོར་གྱི་མཁན་ཆེན་ཞི་བ་འཚོ་སྤྱན་དྲངས་ཏེ་ཆོས་བསྟན་པས་བོད་ཀྱི་ལྷ་སྲིན་ཁྲོས་ནས་ཆོ་འཕྲུལ་སྣ་ཚོགས་བསྟན་པ་མཁན་པོས་མ་ཐུལ་བའི་ཚུལ་མཛད་དེ། སློབ་དཔོན་ཆེན་པོ་སྤྱན་དྲངས་དགོས་པར་ལུང་བསྟན་པ་ལྟར། རྒྱལ་པོས་སློབ་དཔོན་འདི་སྤྱན་དྲངས་ནས་ལྷ་སྲིན་མི་སྲུན་པ་ཐམས་ཅད་རྫུ་འཕྲུལ་གྱིས་སྤ་བཀོང་སྟེ་དམ་ལ་བཏགས། བསམ་ཡས་མི་
འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེངས་པའི་ས་འདུལ་དང་རབ་གནས་མཛད། དེ་ནས་སློབ་དཔོན་ཆེན་པོ་འདིའི་བཀའ་དྲིན་གྱིས་སྦ་ཁྲི་གཞེང་སོགས་སད་མི་མི་བདུན་རབ་ཏུ་བྱུང་། རྒྱ་བལ་གྱི་པཎྜི་ཏ་མང་པོ་འོད་དུ་སྤྱན་དྲངས་ནས་མདོ་སྔགས་ཀྱི་ཆོས་ཐམས་ཅད་བོད་སྐད་དུ་བསྒྱུར་ཏེ་འཆད་ཉན་གྱིས་གཏན་ལ་ཕབ། བཤད་གྲྭ་དང་སྒོམ་གྲྭ་མང་དུ་བཙུགས། ཆོས་སྐྱོང་བའི་རྒྱལ་པོ་ཉིད་དང་། ལྷ་སྲས་སྐུ་མཆེད། རྗེ་འབངས་ཉི་ཤུ་རྩ་ལྔ། མཁར་ཆེན་ཡེ་ཤེས་མཚོ་རྒྱལ་སོགས་སྐལ་ལྡན་ཕོ་མོ་མང་པོ་སྨིན་གྲོལ་གྱི་གདམས་པས་རྗེས་སུ་བཟུང་བས་གྲུབ་པ་ཐོབ་པ་སའི་རྡུལ་གྱི་འགྲན་ཟླར་བྱུང་། ཤིན་ཏུ་ཟབ་ཅིང་གནས་སྐབས་དེང་ཁྱབ་གདལ་དུ་སྤེལ་བར་མི་འོས་པ་རྣམས་ཟབ་མོའི་གཏེར་དུ་བཙས་ནས་དམ་ཅན་རྒྱ་མཚོ་ལ་གཉེར་དུ་གཏད། ཕྱི་རབས་སྐལ་ལྡན་གྱི་སྐྱེས་བུ་དམ་པ་རྣམས་ཀྱིས་སྤྱོད་པར་དགོངས་པ་གཏད་པས། ཇི་སྐད་དུ་དཀོན་མཆོག་ཏ་ལའི་མདོ་ལས། ཕྱོགས་རྣམས་གང་ན་ཆོས་ཀྱང་མེད་གྱུར་པ། །ཕྱོགས་དེར་ཆོས་ཀྱི་གཏེར་ནི་སྟོན་པར་བྱེད། །ཅེས་གསུངས་པ་ལྟར་གཏེར་འབྱིན་སྐྱེས་བུ་དམ་པ་རྣམས་ཀྱིས་རིམ་གྱིས་བཏོན་ནས་དུས་སྐལ་དང་འཚམས་པར་འགྲོ་དོན་མཛད་བཞིན་པ་འདི་ཉིད་དོ། །གཞན་ཡང་བོད་ཡུལ་འདིར་སངས་རྒྱས་ཀྱི་
བསྟན་པ་ནམ་གནས་ཀྱི་བར་དུ་མུ་སྟེགས་འོང་བར་མི་དབང་བའི་བཀའ་ནན་རབ་བརྫིད་བརྟན་མ་བཅུ་གཉིས་ལ་སྩལ་བ་སོགས་བསམ་གྱིས་མི་ཁྱབ་པའི་མཛད་པ་ཐམས་ཅད་སྐད་ཅིག་བསྐལ་པར་བསྒྱུར་བའི་རྫུ་འཕྲུལ་ལ་སོགས་པས་བསྟན་ནས། ལྷོ་ནུབ་རྔ་ཡབ་གླིང་དུ་ངོ་མཚར་བའི་བཀོད་པ་རྒྱ་མཚོ་དང་བཅས་ཏེ་གཤེགས་ནས་ད་ལྟའང་འཚོ་ཞིང་གཞེས་ལ་ཆོས་ཀྱང་སྟོན་ཏེ། ལྷག་པར་བོད་ཡུལ་ལའང་ཉིན་མཚན་དུས་དྲུག་ཏུ་ཐུགས་རྗེ་ཆེན་པོས་རྗེས་སུ་གཟིགས་པ་ནི་རྡོ་རྗེའི་གཡང་ངམ་བཞེས་པ་ཡིན་ནོ། །འོ་ན་འགྲོ་ལྡིང་ནས་རྔ་ཡབ་ཏུ་གཤེགས་པ་དང་མི་འགལ་ལམ་ཞེ་ན་མི་འགལ་ཏེ། གདུལ་བྱའི་བློ་དང་བསྟུན་པའི་རྫུ་འཕྲུལ་གྱི་བཀོད་པ་སྣ་ཚོགས་པ་སྟོན་པའི་བདག་ཉིད་ཅན་ཡིན་གྱི། སྐྱེ་བོ་རང་རྒྱུད་ཀྱིས་བསྡུས་པའི་རྣམ་ཐར་མ་ཡིན་པའི་ཕྱིར་རོ། །དེས་ན་སློབ་དཔོན་ཆེན་པོ་འདི་ནི་ཛཾ་གླིང་སྤྱི་དང་། ཁྱད་པར་བོད་ལ་བཀའ་དྲིན་ཆེ་ཞིང་། མདོ་སྔགས་གཉིས་ལས་ཀྱང་སྔགས་ཀྱི་བསྟན་པའི་བདག་པོ་ཡིན་པས་མདོ་དང་སྔགས་ཀྱི་སྟོན་པར་བཤད་པའང་དོན་ལ་མི་འགལ་བར་ཤེས་པར་བྱའོ། །གཉིས་པ་ལ་གསུམ་ལས། ཐུགས་ཀྱི་རྟེན་ནི། བདག་ཅག་གི་སྟོན་པ་རྒྱལ་བ་ཉི་མའི་གཉེན་གྱི་བསྟན་པ་རིན་པོ་ཆེ་འདི་ལ་རྟེན་གསུམ་གྱི་ཐོག་མར་ཐུགས་
ཆོས་སྐུའི་རྟེན་བྱུང་སྟེ། སྟོན་པ་དེ་ཉིད་ལུམྦི་ནཱིའི་ཚལ་དུ་ངོ་མཚར་བའི་ལྟས་རྒྱ་མཚོས་ས་གསུམ་དགེ་བར་བྱས་པ་དང་ལྷན་ཅིག་བལྟམས་པའི་ཚེ། ཡབ་རྒྱལ་པོ་ཟས་གཙང་མ་སོགས་ཀྱིས་པདྨ་སྤུངས་པའི་མཆོད་རྟེན་བརྩིགས། དེ་ནས་བྱང་ཆུབ་མཆོད་རྟེན་སོགས་ཆ་བརྒྱད་མཆོད་རྟེན་དུ་གྲགས་པ་རྣམས་རིམ་པར་བྱུང་བ་དང་། གཞན་ཡང་དབུ་སྐྲ་དང་སེན་མོའི་མཆོད་རྟེན་སོགས་སངས་རྒྱས་ཀྱི་རྟེན་དང་། ཉན་ཐོས་དགྲ་བཅོམ་པ་རྣམས་ཀྱི་མཆོད་རྟེན་མང་པོ་གཟུགས་ཅན་སྙིང་པོ་ལ་སོགས་པ་དད་པ་དང་ལྡན་ཅིང་སྐལ་པ་དགེ་བ་ཅན་རྣམས་ཀྱིས་རིམ་པར་བརྩིགས་པའོ། །སྐུ་རྟེན་ནི། བྲིས་འབུར་གཉིས་ལས་བྲིས་སྐུ་ནི་སྒྲ་སྒྲོགས་ཀྱི་རྒྱལ་པོ་ཨུ་དྲྭཾ་ཡཾ་ནས་མ་ག་དྷཱའི་རྒྱལ་པོ་གཟུགས་ཅན་སྙིང་པོ་ལ་རིན་ཐང་མེད་པའི་ནོར་བུའི་ཁྲབ་སྐྱེས་སུ་བསྐུར་བའི་ལན་དུ། སྟོན་པའི་སྐུ་རས་ལ་བྲིས་ཏེ་བསྐུར་བར་བརྩམས་པ་ན། རི་མོ་མཁན་གྱིས་སྟོན་པའི་གཟི་བྱིན་མ་བཟོད་པས་བྲི་བར་མ་ནུས་པའི་ཚེ། བདེ་བར་གཤེགས་པ་ཐུགས་རྗེ་ཅན་དེ་ཉིད་ཁྲུས་ཀྱི་རྫིང་བུའི་འགྲམ་དུ་བཞུགས་པས་གཟུགས་བརྙན་ཆུ་ནང་དུ་ཤར་བ་བཞིན་རས་ལ་བྲིས་ཏེ། སྒྲ་སྒྲོགས་ཀྱི་རྒྱལ་པོ་ལ་སྐྱེས་ལན་བསྐུར་བ་ལ་ཐུབ་པ་ཆུ་ལོན་མར་གྲགས། ཤཱཀྱ་མིང་ཆེན་གྱི་འབངས་མོ་རོ་ཧི་ཏ་སངས་རྒྱས་ལ་དད་དེ་ཤི་བ་སིངྒ་ལའི་རྒྱལ་
པོའི་སྲས་མོར་སྐྱེས་པ་ན། མུ་ཏིག་གི་ཆར་བབས་པས་བུ་མོ་མུ་ཏིག་འཁྲི་ཤིང་དུ་གྲགས་པ་དེས་ཡུལ་དབུས་ཀྱི་ཚོང་པ་ལས་སངས་རྒྱས་ཀྱི་མཚན་ཐོས་ནས་དད་པས་ཕྲིན་ཡིག་བསྐུར་བའི་ལན་དུ། སྟོན་པས་རས་ཀྱི་ངོས་ལ་འོད་ཟེར་བཀྱེ་བ་བཞིན་རི་མོ་མཁན་གྱིས་བྲིས་ནས་བསྐུར་བ་ལ་ཐུབ་པ་འོད་ཟེར་མར་གྲགས་པ་ལ་སོགས་པའོ། །འབུར་སྐུ་ནི། ཁྱིམ་བདག་དད་སྦྱིན་གྱིས་དགེ་སློང་གི་དགེ་འདུན་གདུགས་ཚོད་ལ་སྤྱན་དྲངས་པ་ན། སྟོན་པ་མ་གཤེགས་པས་གྲལ་གྱི་ཐོག་མ་མི་བརྗིད་པར་མཐོང་ནས། ཁྱིམ་བདག་མགོན་མེད་ཟས་སྦྱིན་གྱིས། བཅོམ་ལྡན་འདས་ཀྱིས་གནང་ན་བདེ་བར་གཤེགས་པའི་སྐུ་བགྱིད་དེ་གྲལ་མགོར་བཞུགས་པར་གསོལ་ཞེས་ཞུས་པས་སྟོན་པས་གནང་ནས་རིན་པོ་ཆེ་ལས་བྱས་པའི་སྐུ་གཟུགས་མང་དུ་བྱུང་བ་དང་། སྟོན་པ་ལྷ་ཡུལ་དུ་གཤེགས་ཤུལ་གྲོང་ཁྱེར་གསལ་ལྡན་གྱི་རྒྱལ་པོས་མཆོད་ཡུལ་དུ་ཙནྡན་གྱི་སྐུ་འདྲ་བཞེངས་པ། ཕྱིས་སུ་རྒྱ་ནག་ཏུ་ཕེབས་པ་ལ་ཙནྡན་ཇོ་བོ་ཞེས་གྲགས་པ་ལ་སོགས་པའོ། །གསུང་རྟེན་ནི། གསུང་རབ་ཀྱི་ཚོགས་ཡི་གེ་འདུས་པ་ལས་བྱུང་སྟེ། ཡི་གེའང་སྤྱིར་སྒྲ་དང་སྐད་ཇི་སྙེད་པ་དེ་སྙེད་དུ་སྣང་བས་མཐའ་གཅིག་ཏུ་བཤད་པར་ནུས་པ་མ་ཡིན་མོད། མུ་སྟེགས་བྱེད་རྣམས་ཀྱི་གཞུང་ལས་བྱེད་པོ་
ཉེར་ལྔ་བསྟན་པའི་ནང་གསེས་ཡི་གེའི་བྱེད་པོ་ལྷ་རྟག་ཏུ་ཞི་བ་སྟེ་དབང་ཕྱུག་ཆེན་པོར་བཤད་ཅིང་། ཡི་གེའི་གཟུགས་ནི་ཡུལ་ཁམས་སོ་སོར་དར་བའི་ཡིག་རིགས་དྲུག་ཅུ་རྩ་བཞི་ལ་སོགས་པ་ཇི་སྙེད་པ་རྣམས་སོ། །དེ་ལས་ཁྱད་པར་དུ་འཕགས་པ་ནི་རྒྱ་གར་འཕགས་པའི་ཡུལ་དུ་དར་བའི་ལཉྩ་ན་དང་ཝ་རྟུ་ལ་ན་གར་ཡིག་ལ་སོགས་པའོ། །གསུང་རབ་གླེགས་བམ་དུ་བྲི་བའི་རྒྱུན་ནི། ཤེར་ཕྱིན་བརྒྱ་བྱིན་གྱིས་གསེར་གྱི་གླེགས་བུ་ལ་བཻ་ཌཱུརྻ་ཞུན་མས་བྲིས་པ་དང་། རྒྱལ་མཚན་གྱི་རྩེ་མོའི་དཔུང་རྒྱན་གླེགས་བམ་ལ་བྲིས་ཏེ་རྒྱལ་མཚན་གྱི་རྩེ་མོར་བཏགས་པས་ལྷ་མ་ཡིན་གྱི་གཡུལ་ངོ་བཟློག་པར་བཤད་པ་ལ་སོགས་པའོ། །གསུམ་པ་ནི། དེ་ལྟར་རྒྱལ་བ་རྒྱལ་ཚབ་དང་བཅས་པའི་སྐུ་གསུང་ཐུགས་ཀྱི་རྟེན་ལས། སྤྱིར་ཐབས་མཁས་ཤིང་ཐུགས་རྗེ་ཆེ་བ་དེ་དག་གི་སྐུ་གསུང་ཐུགས་ཡེ་ཤེས་རྡོ་རྗེའི་བྱིན་རླབས་ནི་བརྟན་གཡོ་ཇི་སྙེད་ལ་ཁྱབ་ཅིང་། །གང་དང་གང་གིས་དད་པར་བྱེད་པ་དེ་དང་དེ་ལ་བྱིན་གྱིས་རློབ་པ་མཛད་པས་ན། དད་པའི་ཡུལ་དུ་གྱུར་པ་ཐམས་ཅད་ནི་རྟེན་དམ་པ་ཡིན་ཀྱང་། མཆོག་ཏུ་གྱུར་པ་སྐུ་བསོད་ནམས་ཆེན་པོའི་བྱིན་རླབས་འཇུག་པའི་རྟེན་བྲིས་འབུར་ལ་སོགས་པའི་སྐུ་བརྙན། གསུང་རྣམ་པ་ཐམས་ཅད་པའི་བྱིན་རླབས་འཇུག་པའི་རྟེན་མིང་ཚིག་ཡི་གེའི་ཚོགས་སུ་སྣང་བ་
ལུང་གི་གླེགས་བམ། །ཐུགས་མཁྱེན་པ་གཉིས་ཀྱི་བྱིན་རླབས་འཇུག་པའི་རྟེན་ཆ་བརྒྱད་མཆོད་རྟེན་ལ་སོགས་པ་སྟེ། དེ་རྣམས་ལ་རྟེན་གསུམ་རིན་པོ་ཆེ་ཞེས་ཁོར་ཡུག་རི་བོའི་ཁོང་ན་ཉི་ཟླ་ལྟར་གྲགས་པ་གང་ཡིན་པའོ། །དེ་ལས་ཐོག་མར་ཆོས་སྐུའི་རྟེན་མཆོད་རྟེན་ནི། །སྤྱིར་བྱང་ཆུབ་ཕྱོགས་ཀྱི་ཆོས་ལ་སོགས་པ་རྒྱལ་བ་རྣམས་ཀྱི་ཡེ་ཤེས་ཆོས་སྐུའི་རྣམ་པ་དང་། རྟགས་དང་། མཚན་ཉིད་ཅན་གྱི་སྐུ་གདུང་མཆོད་རྟེན་ནི་ཆ་བརྒྱད་མཆོད་རྟེན་ལ་སོགས་པ་སྟེ། དེ་ལའང་དབྱིབས་དང་། རྒྱ་ཚད་ལ་སོགས་པ་གཞན་དང་གཞན་དུ་གྱུར་མོད་ཀྱི། །སྤྱི་ཙམ་དུ་འདུལ་བའི་མཆོད་རྟེན་གྱི་ཆ་དབྱེ་བ་ལས། དེ་བཞིན་གཤེགས་པ་ཆོས་ཀྱི་སྐུའི་བདག་ཉིད་དྲན་པ་ཉེ་བར་གཞག་པ་སོགས་ནས་སྙིང་རྗེ་ཆེན་པོའི་བར་གྱི་ཡོན་ཏན་རྣམས་ཡུན་རིང་པོ་ནས་ཐབས་ཀྱི་བྱེ་བྲག་གིས་བསགས་པ་དང་། སྔོན་ཡང་དག་པར་མ་བསྒོམས་ཀྱང་དོན་གྱི་སྐབས་དག་ཏུ་འདུལ་བ་རྣམས་ཀྱིས་དྲན་པར་བྱ་བའི་ཕྱིར་ན་བསགས་པ་ཞེས་བྱ་བའམ། དྲན་པ་ཞེས་བྱ་སྟེ། དེ་དག་གི་གཟུགས་བརྙན་ལ་མཆོད་རྟེན་ཞེས་བྱའོ། །ཆོས་ཀྱི་སྐུའི་གཟུགས་བརྙན་ཞེས་བྱའོ། །ཞེས་གསུངས་པ་ལྟར་རོ། །དེ་ལས་སའི་དབང་མོས་མངོན་པར་འདུ་མཛད་པ་ནི། ངེས་པ་དོན་གྱི་ཐམས་ཅད་མཁྱེན་པ་འཇམ་
དབྱངས་མཁྱེན་བརྩེའི་དབང་པོའི་མདུན་རྟེན་གསུམ་པོ་འདི་རྣམས་ལས་གང་ཞིག་བཞེངས་ན་ལེགས་ཞེས་བཀའ་འདྲི་ཞུས་པའི་ལན་དུ་བསླབ་སྟོན་ཇི་ལྟར་ཕེབས་པ་བཞིན། བདག་ཅག་གི་སྟོན་པས་ཀླུང་ནཻ་རཉྫ་ནའི་འགྲམ་དུ་འཇིག་རྟེན་ན་སུས་ཀྱང་མི་ནུས་པའི་དཀའ་བ་ཆེན་པོ་ལོ་དྲུག་ཏུ་སྤྱད་ནས། དེ་ལས་བཞེངས་ཏེ་མ་གངྷཱ་རྡོ་རྗེའི་གདན་དུ་མངོན་པར་རྫོགས་པ་སངས་རྒྱས་པའི་ཚེ་བྱུང་བ་སྟེ། སློབ་དཔོན་ཀླུས། མ་ག་དྷཱ་ཡི་བྱང་ཆུབ་ཤིང་དྲུང་དུ། །ཆུ་བོ་ནཻ་རཉྫ་ན་ཞེས་བྱ་བའི། །འགྲམ་བཞུགས་མཆོད་རྟེན་ཡོན་ཏན་རྒྱ་ཆེ་བ། །བྱང་ཆུབ་རྟེན་དུ་གྱུར་ལ་ཕྱག་འཚལ་ལོ། །ཞེས་གསུངས་པ་ལྟར་གྱི་བྱང་ཆུབ་མཆོད་རྟེན་ནོ། །སྐུ་རྟེན་ལ་གཉིས་ལས། །དང་པོ་ནི། བདག་ཅག་གི་སྟོན་པ་ཉིད་སྐུ་གསུམ་གྱི་རང་བཞིན་སངས་རྒྱས་ཀྱི་རྣམ་པར་འཕྲུལ་པའི་སྤྱོད་ཡུལ་བསམ་གྱིས་མི་ཁྱབ་པས་གདུལ་བྱའི་སྐལ་པ་དང་མཐུན་པར་གཟུགས་སྐུ་དེ་སྙེད་དུ་སྟོན་པའི་ཕྱིར་གཅིག་ཏུ་ངེས་པ་མ་མཆིས་ཀྱང་། ལྷའི་དབང་པོས་ནོར་བུ་སྣ་ཚོགས་ལས་སྟོན་པའི་སྐུ་བཞེངས་པ། བི་ཤྭ་ཀརྨས་དགུང་ལོ་བརྒྱད་དང་བཅུ་གཉིས་ཀྱི་ཚད་དུ་བསྐྲུན་པ་རྒྱ་བལ་གྱི་ཡུལ་ནས་བོད་དུ་ཕེབས་པ་ལ་ཤཱཀྱ་མུ་ནི་དང་། མི་བསྐྱོད་རྡོ་རྗེ་ཞེས་ད་ལྟ་འཕྲུལ་སྣང་དང་ར་མོ་ཆེར་བཞུགས་པ་ལ། འདུལ་ལུང་ལས། །
ཁྱིམ་པ་བསོད་ནམས་བསགས་པའི་ཆེད་རིན་པོ་ཆེའི་རྒྱན་རུང་བར་གསུངས་པ་དང་། སྤྲུལ་སྐུ་ཉིད་ལོངས་སྤྱོད་རྫོགས་པའི་སྐུར་ཞལ་བསྒྱུར་བས་བོད་ཡུལ་གདུལ་བྱའི་མགོན་པོར་ཡུན་རིང་དུ་བཞུགས་པ་ལ་སོགས་པའི་རྟེན་འབྲེལ་དུ་དགོངས་ནས་རྗེ་རིན་པོ་ཆེ་བློ་བཟང་གྲགས་པའི་དཔལ་གྱིས་རིན་ཆེན་རིན་ཐང་མེད་པའི་དབུ་བརྒྱན་སྙན་རྒྱན་མགུལ་རྒྱན་རྣམས་ཕུལ་བ་ལ་ཇོ་བོ་རིན་པོ་ཆེ་གྲགས་པའི་བཟོ་རྒྱུན་ལྟར་ཕྱིན་དྲུག་དག་པའི་རྒྱབ་ཡོལ་རྒྱན་དྲུག་བཅས། རྣམ་དཔྱོད་དང་ལྡན་པའི་བཟོ་བོ་དུ་མས་འདུ་བགྱིས་པ་དང་། བདེ་བར་གཤེགས་པས་སློབ་པ་ལམ་གྱི་གནས་སྐབས་སུ་སངས་རྒྱས་ཀྱི་ཞིང་རྒྱ་མཚོ་སྦྱོང་བ་དང་། སེམས་ཅན་རྒྱ་མཚོ་སྨིན་པ་དང་། སྨོན་ལམ་རྒྱ་མཚོ་ཡོངས་སུ་རྫོགས་པའི་ཕྱིར་དུ་སྐྱེས་པ་རང་ས་ཀྱི་ཕྲེང་བ་བཟུང་བ་ལས་ཤས་ཙམ་ཞིག་ངོ་མཚར་བའི་མཛད་པ་རྒྱ་མཚོ་དང་བཅས་ཏེ། བདེ་བར་གཤེགས་པ་དེ་ཉིད་ཀྱིས་བསྟོད་པ་བྱེད་པར་ལུང་གིས་བསྟན་པའི་ཆོས་རྒྱལ་བྱང་ཆུབ་སེམས་དཔའ་དགེ་དབང་ཡབ་སྲས་ཀྱིས་ཉམས་འགྱུར་ཕུལ་དུ་བྱུང་བའི་སྙན་ངག་གི་ལུས་དང་རྒྱན་ལ་སྦྱར་ཏེ། འདོད་རྒུ་འབྱུང་བའི་ལེགས་བཤད་དཔག་བསམ་འཁྲི་ཤིང་དུ་གྱུར་པའི་བརྗོད་བྱ་རི་མོར་འབྲི་བའི་རྒྱུན་ཇི་སྙེད་ཅིག་བྱུང་བ་ལས། གནའ་བོའི་མཁས་
པ་ཆོས་ཀྱི་སྤྱན་དང་ལྡན་ཅིང་། རི་མོའི་ཆགས་ཚད་དང་ལྡན་པ་དག་གིས་བྲིས་པའི་ཕྱི་མོ་ཁུངས་དང་ལྡན་པ་ལ་བརྟེན་ཏེ། རི་མོའི་ལས་ལ་རྣམ་དཔྱོད་འགྲན་ཟླ་དང་བྲལ་ཞིང་། བཟོ་བོའི་སྐྱོན་དུ་བཤད་པ་ཐམས་ཅད་སྤངས་པའི་ལྷ་རིས་པ་དུ་མས་འདུ་བགྱིས་པའོ། །གཉིས་པ་ནི། གོང་དུ་བཤད་པ་ལྟར་རྡོ་རྗེའི་སློབ་དཔོན་པདྨཱ་ཀ་ར་ནི། རིགས་དང་དཀྱིལ་འཁོར་རྒྱ་མཚོའི་ཁྱབ་བདག་ཏུ་གྱུར་ཅིང་། གནས་དང་། ཞིང་དང་། ཡུལ་ལ་སོགས་པ་མ་ངེས་པར་སྣ་ཚོགས་པའི་ཆ་ལུགས་དང་བརྟུལ་ཞུགས་ཀྱི་རོལ་པས་ཞིང་ཁམས་རྒྱ་མཚོ་འགེངས་པར་བྱེད་པ་ཉིད་ན་དེའི་སྐུ་ནི་འདི་ལྟ་བུའོ་ཞེས་གཅིག་ཏུ་ཁ་ཚོན་གཅོད་པར་མི་རིགས་ཤིང་། ཡོངས་སུ་གྲགས་པ་ཐོད་ཕྲེང་སྡེ་ལྔ། གུ་རུ་མཚན་བརྒྱད། འཕྲུལ་མཚན་བཞི་བཅུ་ལ་སོགས་པ་བྱུང་བ་ལས། འདིར་ནི་ཟ་ཧོར་གྱི་རྒྱལ་པོ་གཙུག་ལག་འཛིན་ཡབ་སྲས་རྗེས་སུ་བཟུང་བའི་ཕྱིར་ཕེབས་ཏེ། སྲས་མོ་མནྡཱ་ར་བ་ལ་ཆོས་ཀྱི་འཁོར་ལོ་བསྐོར་བ་རྒྱལ་པོས་ཐོས་ནས་ཁྲོས་ཏེ་ཏིལ་མར་གྱི་མེ་ལ་སློབ་དཔོན་བསྲེགས་ཀྱང་མ་ཚིག་པར། ཏིལ་མར་རྒྱ་མཚོ་འཁྱིལ་པའི་དབུས་སུ། པདྨའི་སྡོང་བོའི་རྩེར་ཁྱེའུ་ལོ་བརྒྱད་ཙམ་བལྟ་བས་ཆོག་མི་ཤེས་པར་སྤྲུལ་པ་ལ། རྒྱལ་པོས་མཇལ་བས་གནོང་ཞིང་འགྱོད་དེ་བཤགས་པ་བྱས། སྐུ་
ཆས་ཞྭ་གོས་སོགས་མ་ལུས་པར་ཕུལ་བ་དེའི་དུས་ཀྱི་སྐུའི་ཆ་ལུགས་དང་སྐུ་ཆས་བཞེས་པ་ལ་གུ་རུ་ཟ་ཧོར་མར་གྲགས་པ་ཉིད་འདུ་བགྱིས་པའོ། །གསུང་རྟེན་ལ། ཇི་སྐད་དུ། གསུང་གཅིག་ཉིད་དུ་གསུངས་མེད་ཀྱང་། །དུ་མ་ཉིད་དུ་སོ་སོར་གོ། །ཞེས་གསུངས་པ་ལྟར། རྒྱལ་བ་རྣམས་ཀྱི་གསུང་གི་གསང་བ་ནི་བསམ་གྱིས་མི་ཁྱབ་པས་ཆོས་ཀྱི་སྒོ་ཡང་བསམ་གྱིས་མི་ཁྱབ་པ་ཡིན་མོད། འོ་སྐོལ་ཛམྦུའི་གླིང་དུ་བདེ་བར་གཤེགས་པ་ཐུགས་རྗེ་ཅན་དེས་བསྟན་པ་ལས་ཆ་ཤས་ཙམ་རྒྱ་གར་འཕགས་པའི་ཡུལ་ལ་སོགས་པར་བཞུགས་པ་ལས། ཆོས་རྒྱལ་བྱང་ཆུབ་སེམས་དཔའ་ལོ་པ་རྣམས་དང་བཅས་པའི་བཀའ་དྲིན་གྱིས་གངས་ཅན་གྱི་གསོས་སུ་ཕེབས་པ་རྣམས། བསྟན་པ་སྔ་དར་གྱི་སྐབས་དཔལ་བརྩེགས་རཀྵི་ཏ་སོགས་དང་། ཕྱི་དར་ལ་བཅོམ་ལྡན་རལ་གྲི། ཐམས་ཅད་མཁྱེན་པ་བུ་སོགས་མཁས་གྲུབ་མང་པོས་ཕྱོགས་གཅིག་ཏུ་བསྡོམས་པ་ལ་བཀའ་འགྱུར་རིན་པོ་ཆེ་ཞེས་ཡོངས་སུ་གྲགས་པ་གང་ཡིན་པ་དེའང་ཡི་གེའི་ཕྱི་མོའི་སྤར་ཆ་ཤས་བྱུང་བའི་ནང་གསེས་ཆོས་རྒྱལ་བྱང་ཆུབ་སེམས་དཔའ་ཆེན་པོ་འགྲན་ཟླ་ཐམས་ཅད་དང་བྲལ་བ་བསྟན་པ་ཚེ་རིང་ནས་སྤང་དུ་བསྒྲུབས་ཤིང་། །རྩོད་དུས་ཀྱི་ཐམས་ཅད་མཁྱེན་པ་གཙུག་ལག་ཆོས་ཀྱི་སྣང་
བས་ཞུས་ཆེན་མཛད་པའི་སྤར་མ་དང་། སྔ་འགྱུར་རྡོ་རྗེ་ཐེག་པའི་རྒྱུད་ཇི་སྙེད་པ་བཙུན་མོ་ཚེ་དབང་ལྷ་མོས་སྤར་དུ་བསྒྲུབས་པ་མཁས་དབང་དགེ་རྩེ་རིན་པོ་ཆེས་ཞུས་དག་མཛད་པ་དང་། བསྟན་འགྱུར་རིན་པོ་ཆེ་ས་སྐྱོང་ཕུན་ཚོགས་བསྟན་པས་སྤར་དུ་བསྒྲུབས་པ་ལ་མ་ཧཱ་པཎྜི་ཏ་ཚུལ་ཁྲིམས་རིན་ཆེན་གྱིས་ཞུས་དག་མཛད་པ་བཅས་ཀྱི་སྤར་མ་རྣམས་དང་། སླར་ཡང་སའི་དབང་མོ་མཆོག་ནས་རྨད་དུ་བྱུང་བའི་ཐུགས་བསྐྱེད་དང་གཏོང་བ་ཆེན་པོས་གསེར་དངུལ་བཀྲ་མའི་བཀའ་འགྱུར་རིན་པོ་ཆེ་པུསྟི་བརྒྱ་ཕྲག་ལ་གསུམ་གྱིས་ལྷག་པ་བཅས་གླེགས་ཤིང་ཐག་དབུ་གདོང་དར་སོགས་དབུས་ལེགས་བཞེངས་པའང་བཞུགས་སུ་གསོལ་བ་ཡིན་ནོ། །ཉི་མས་མ་ཕྱེས་རྣམ་དཔྱོད་པདྨོའི་འཛུམ། །ལེགས་པའི་ཕྱོགས་ཀུན་རྫོགས་དང་ལྷན་ཅིག་པར། །བསོད་ནམས་བཅུད་དུ་སྨིན་པའི་བདག་རྐྱེན་ལས། །སྐྱེ་རྒུ་བུང་བ་ཉེར་འཚོའི་ལེགས་བྱས་བྱུང་། །རྟེན་གསུམ་ནོར་བུའི་ལྷུན་པོ་བསྐྲུན་པའི་ཤུགས། །སྲེད་མེད་བུ་ཡི་དཔུང་པ་བརྙན་པའམ། །ལྷག་མ་ཅན་ལ་འགྲན་ཟླར་ཆས་པ་བཞིན། །སྙིང་སྟོབས་མ་སྨད་ཀུན་དགའི་དཔལ་དུ་དར། །ལྷར་བཅས་ནོར་འཛིན་རྒྱན་ཆ་སྔོན་མེད་པ། །རྟ་ལྗང་ཅན་གྱིས་སྣང་བའི་གསེར་རི་ལྟར། །རྣམ་དཀར་མེས་པོས་སྤྲུལ་པའི་ངོ་མཚར་ཕུལ། །
ཡོངས་སུ་བཀྲག་པའི་རྫོགས་ལྡན་འདི་ཁོ་ན། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་གང་དུ་བཞེངས་ཡུལ་གནས་ཀྱི་མཚན་ཉིད་ལ་གཉིས། སྤྱི་དང་། ཁྱད་པར་རོ། །དང་པོ་ནི། རྒྱལ་བ་རྣམས་ཀྱི་ཐུགས་རྗེ་དང་སེམས་ཅན་གྱི་ལས་རྒྱ་མཚོས་རྣམ་པར་བསྐྱེད་པའི་རྟེན་སྣོད་ཀྱི་འཇིག་རྟེན་རབ་འབྱམས་ནམ་མཁའི་མཐའ་ཀླས་པར་བརྡལ་བ་ལས། ལོངས་སྐུ་རྣམ་པར་སྣང་མཛད་གངས་ཆེན་མཚོས་ལོངས་སྤྱོད་པའི་གནས་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ན་བཞུགས་པའི་རྒྱལ་བ་དེའི་བ་སྤུའི་ཁུང་བུ་རེར་ཡང་རྡུལ་སྙེད་ཀྱི་ཞིང་ཁམས་རྒྱ་མཚོ་སྣང་མོད། ཕྱག་མཐིལ་སྦོས་ཆུའི་རྒྱ་མཚོར་བརྟེན་པའི་པདྨ་རྣམས་ལས་འཇིག་རྟེན་གྱི་ཁམས་ཉེར་ལྔ་བརྩེགས་མར་གནས་པའི་ནང་གསེས། བཅུ་གསུམ་པ་མི་མཇེད་ཀྱི་འཇིག་རྟེན་གླིང་བཞི་བྱེ་བ་ཕྲག་བརྒྱ་ཡོད་པའི་སྟོང་གསུམ་གྱི་སྟོང་ཆེན་པོ། གླིང་བཞི་རེ་རེ་ཡང་གླིང་ཕྲན་བཞི་རེ་སྟེ་བརྒྱད་རེ་ཡོད་པའི་ནང་ནས། གང་དུ་མཆོག་གི་སྤྲུལ་སྐུ་འཚང་རྒྱ་བའི་གནས་རྡོ་རྗེ་ལས་གྲུབ་པའི་གདན་དང་ཤིང་ཛམྦུ་བྲི་ཀྵའི་ལྗོན་པས་མཚན་པ་ལྷོ་ཕྱོགས་ཛམྦུའི་གླིང་། །གླིང་གཞན་ལོངས་སྤྱོད་ཀྱི་ས་ཡིན་པ་ལས་འདི་ནི་ལས་ཀྱི་ས། གཞན་དུ་སངས་རྒྱས་མི་བྱོན་
ཀྱང་འདིར་ནི་སངས་རྒྱས་བྱོན་པའི་གནས་ཕུན་སུམ་ཚོགས་པའོ། །གཉིས་པ་ནི། ཛམྦུའི་གླིང་གི་ཡུལ་དབུས་མ་ག་དྷཱ་རྡོ་རྗེའི་གདན་ལས་ཤར་ཕྱོགས་སུ་མ་ཧཱ་ཙི་ན་སོགས་ཕྱོགས་དང་ཕྱོགས་མཚམས་སུ་ཡུལ་ཆེན་ཉི་ཤུ་རྩ་བཞི་ལ་སོགས་པ་ཡོད་པ་ལས། བོད་ཡུལ་དུ་ནི་ལྷན་ཅིག་སྐྱེས། །ཞི་ཞིང་གསལ་བའི་གཟུགས་ཅན་མ། །ཞེས་སོགས་ཀྱིས་ལུང་དུ་བསྟན་པའི་བྱང་ཕྱོགས་བོད་ཁ་བ་ཅན་གྱི་ལྗོངས། སཱ་ལའི་སྨན་ལྗོངས་ཆེན་པོ་ཞེས་ཡོངས་སུ་གྲགས་ཤིང་། །འཕགས་པ་འཇིག་རྟེན་དབང་ཕྱུག་གིས་ཕྱག་མཚན་དུ་བཞེས་པ། གངས་རིའི་ལྗོངས་འདི་ལའང་སྟོད་ན་མངའ་རིས་སྐོར་གསུམ། བར་ན་དབུས་གཙང་རུ་བཞི། སྨད་ན་མདོ་ཁམས་སྒང་དྲུག་རྣམས་སུ་ཡོད་པ་ལས་སྨད་མདོ་ཁམས་སྒང་། དེ་ལའང་ཆུ་བཞི་སྒང་དྲུག་ཏུ་གྲགས་པ་ལས་འབྲི་ཀླུང་གསེར་ལྡན་འཁྱིལ་བ་སྒེག་པའི་འགྲོས་ཀྱིས་འབབས་ཤིང་རྟག་ཆགས་གངས་ཀྱི་རྩེ་མོས་གནམ་སྔོན་འབིགས་པའི་ར་བས་བསྐོར་བ་ཟལ་མོ་སྒང་། ལྷ་ཆེན་རྡོ་རྗེ་བློ་གྲོས་ལ་སོགས་པ་དཀར་ཕྱོགས་ཀྱི་དགེ་བསྙེན་སྤུན་དགུ་སོགས་མཐུ་བོ་ཆེ་མང་པོ་གཉུག་མར་གནས་ཤིང་བསྲུངས་པས་ཡུལ་གྱི་དགེ་བཅུ་ཕུན་སུམ་ཚོགས་པ། རྩ་གསུམ་རྒྱལ་བ་རབ་འབྱམས་རྒྱ་མཚོས་བྱིན་གྱིས་བརླབས་
པའི་རྡོ་རྗེའི་གནས་ཆེན་དུ་མ་དང་འདབ་འབྲེལ་བ། སའི་དཔྱད་ལེགས་རྒུ་སྤྱི་དང་ཁྱད་པར་ཐམས་ཅད་ཚང་བས་ཆོས་སྐྱོང་བའི་ལྷ་བཙན་པོ་ཇི་སྙེད་པའི་བཀའ་ལུང་གི་སྤྲིང་ཡིག་ཕྱོགས་ཀྱི་ཆེན་པོ་རྣམས་ཀྱི་ཟུར་ཕུད་ཀྱི་རྩེ་མོར་བཀོད་པ། མཁས་པ་དང་གྲུབ་པའི་སྐྱེས་བུ་བརྒྱ་ཕྲག་དུ་མ་འབྱུང་བས་རིས་མེད་རྒྱལ་བསྟན་པདྨའི་འབྱུང་གནས་ཀྱིས་ཡོངས་སུ་གང་བ་ལས་བྱེ་བྲག་ཏུ་གྲུབ་ཐོབ་རྒྱ་མཚོའི་སྤྱི་དཔལ་ཐང་སྟོང་རྒྱལ་པོས་ལྷ་སྲིན་ཀླུ་སོགས་གདུག་པ་ཅན་ཐམས་ཅད་དམ་ལ་བཏགས་ཤིང་ཡེ་ཤེས་ཆེན་པོས་བརྟན་གཡོ་བྱིན་གྱིས་བརླབས་པའི་གནས། འཇམ་དབྱངས་ས་སྐྱ་པ་ཡབ་སྲས་ཀྱི་བརྒྱུད་པ་རིན་པོ་ཆེའི་ལུང་རྟོགས་བསྟན་པའི་མཚོ་ཆེན་པོ་དཔལ་ལྡན་ལྷུན་གྲུབ་སྟེང་གི་ཆོས་གྲ། ཕྱོགས་ལས་རྣམ་པར་རྒྱལ་བའི་རྒྱལ་ཁབ་སུམ་རྩེན་རྣམ་རྒྱལ་རྗོད་ཆེན་པོ་ཉིད་དུའོ། །ཚངས་པས་མ་ཡིན་ལེགས་རྒུ་བསོད་ནམས་ཀྱི། །དཔུང་པའི་ཤུགས་ཀྱིས་དྲངས་པའི་ནོར་ལྡན་མའི། །ལུས་ལ་རྟེན་གསུམ་ནོར་བུའི་རྒྱན་མཛེས་པ། །མཐོ་རིས་དབང་པོ་རྣམས་ཀྱི་ཡི་གར་འོང་། །པདྨོའི་ལང་ཚོ་བཀྲག་པས་ཉི་ཟེར་བཞིན། །ལེགས་བྱས་དབང་པོའི་མངོན་སུམ་འདི་ཡིས་ཀྱང་། །གང་ཞིག་ཕན་བདེའི་དངོས་པོ་དམ་པ་ནི། །ཕྲག་པར་ལྷུང་ཞེས་
མཁས་རྣམས་ཅིས་མི་ཤེས། །དེ་སླད་ཁེངས་པ་བརྟུལ་ནས་དད་པའི་ཕྱག །ཡིད་འོང་པདྨའི་འདབ་མ་ཁ་འབུས་ཏེ། །གང་དག་ཡི་རངས་དབྱངས་ཀྱི་སྙན་འགྱུར་ནི། །སྒྲོགས་པ་ངེས་ཀྱང་འབྲས་བུའི་ཆ་ཤས་ལེན། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །གསུམ་པ་གང་གིས་བཞེངས་བྱེད་བདག་པོའི་ཁྱད་པར་ལ་གསུམ། སྡེ་དགེ་ཆོས་རྒྱལ་ཆེན་པོའི་གདུང་རིགས་དང་ཕྱག་རྗེས་ཀྱི་ཆེ་བ། ལེགས་བྱས་རྩོམ་པ་པོ་སའི་དབང་མོའི་ཡབ་མེས་ཀྱི་ཆེ་བ། སའི་དབང་མོ་ཉིད་ཀྱི་ངང་ཚུལ་ངོ་བསྟོད་མེད་པར་ཕྱོགས་ཙམ་བརྗོད་པའོ། །དང་པོ་ལ། ས་ལས་རྣམ་པར་རྒྱལ་བ་མིའི་དབང་པོ་སྡེ་དགེ་ཆོས་རྒྱལ་ཆེན་པོ་འདིའི་གདུང་རིགས་ནི། །མདོ་ཁམས་སམ་བོད་ཆེན་པོའི་ལྗོངས་ཞེས་གྲགས་པ་འདིར། སྤྱིར་སྒ་འབྲུ་སྦྲ་གདོང་སྟེ་རུས་ཆེན་སྡེ་བཞི་དང་། སྒོ་ལྷ་སྡེ་དཀར་པོ་ལྔར་བྱུང་བར་གྲགས་པ་ལས་ཕྱི་མ་སྒོ་ལྷ་སྡེ་དཀར་པོ། རྔུ་ཆེན་རྒྱལ་མོ་ཚོ་བཅོ་བརྒྱད་ལས་མགར་གྱི་རིགས། དེ་ལས་མགར་ཆེན་ཡེ་ཤེས་བཟང་པོས་སྨད་མདོ་དྲུག་གི་ས་ལ་དབང་བསྐྱུར། གཅུང་དམ་པ་ཆོས་སྡིངས་པ་འབྲི་གུང་འཇིག་རྟེན་གསུམ་མགོན་གྱི་སློབ་མར་གྱུར་ཏེ་གྲུབ་པ་ཆེན་པོ་བརྙེས། ཡེ་ཤེས་བཟང་པོའི་སྲས་བསོད་ནམས་རིན་ཆེན་གྱིས་འགྲོ་མགོན་ཆོས་རྒྱལ་འཕགས་པའི་གསོལ་དཔོན་
མཛད་པས་སེ་ཆེན་རྒྱལ་པོས་འཇའ་ས་བྱིན། དེའི་དབོན་རྡུ་རྒུ་རུའི་སྲས་ཟླ་བ་བཟང་པོར་གོང་མ་མཆོད་ཡོན་གྱིས་ས་དམར་སྟོང་དཔོན་གྱི་གོ་ས་གནང་། དེའི་སྲས་རྔུ་རྒྱལ་བ་བཟང་པོ། དེའི་སྲས་པདྨ་བསྟན་སྲུང་། དེའི་སྲས་དཀར་ཆེན་བྱང་ཆུབ་འབུམ། དེའི་སྲས་རྔུ་ཆོས་ཀྱི་རྡོ་རྗེ་ཀཿཐོག་པའི་རིང་ལུགས་བཟུང་བས་གྲུབ་པའི་དབང་ཕྱུག་ཆེན་པོར་གྱུར། དེའི་མཆེད་ཡ་བདེ་ཆེན་བསོད་ནམས་བཟང་པོ་ཀརྨ་པ་ཆོས་གྲགས་རྒྱ་མཚོ་དང་། རྔུ་ཆོས་རྡོང་གྱི་ལུང་བསྟན་ལྟར་འབྲི་རྒྱུད་གྱེན་དེད་དུ་ཕེབས་པས་གླིང་བདག་དྲུང་གི་སྤྱན་སྔར་སླེབས། སྡེ་དགེ་ཞེས་པའི་མཚན་ཐོབ། དེ་ལ་སྲས་བཞི་བྱུང་བའི་ནང་ནས་བོ་ཐར་རམ་བཀྲ་ཤིས་སེང་གེས་གྲུབ་ཆེན་ཐང་སྟོང་རྒྱལ་པོ་སྤྱན་དྲངས། རྒྱལ་ཐབས་ཀྱི་མངའ་དབང་དང་པོར་ཐོབ། ལྷུན་གྲུབ་སྟེང་གི་ཆོས་སྡེ་ཐོག་མར་བཙུགས། དེའི་སྲས་བླ་མ་དཔལ་ལྡན་སེང་གེ་དང་། རྒྱལ་མཚན་འབུམ་གཉིས་ལས་རྒྱལ་མཚན་འབུམ་གྱི་སྲས་ཨ་སྔ་ལ་སྲས་བདུན་བྱུང་བའི་ནང་ནས་རྒྱལ་འཕེལ་གྱི་སྲས་ནམ་མཁའ་རྡོ་རྗེ། དེའི་སྲས་ལྷུན་གྲུབ། དེ་ཡི་སྲས་དྲུག་ནང་ནས་ཆེ་བ་གྲུབ་ཐོབ་ཀུན་དགའ་རྒྱ་མཚོ་གཏེར་ཆེན་འཇའ་ཚོན་སྙིང་པོའི་ཆོས་བདག་ཏུ་ལུང་གིས་ཟིན། གཉིས་པ་དཔོན་ཀླུ་འཕེལ།
གསུམ་པ་བླ་མ་བྱམས་པ་ཕུན་ཚོགས་བསོད་ནམས་དང་སྟོབས་ཀྱི་དབང་ཕྱུག་ཆེན་པོར་གྱུར། ལྔ་པ་བླ་མ་ལྷ་སྲུང་དང་། དྲུག་པ་བླ་མ་ཀརྨ་བསམ་འགྲུབ་གཉིས་ཐུགས་དམ་དང་ཆོས་ཀྱི་བྱ་བ་ལ་བརྩོན་ཞིང་། ཀརྨ་བསམ་འགྲུབ་ཀྱིས་ཀཾ་ཚང་གི་གྲུབ་མཐའ་བཟུང་། དབོན་ཀླུ་འཕེལ་གྱི་སྲས་རྣམས་ལས་དཔོན་ཆེན་ཀུན་དགའ་ཕུན་ཚོགས་ཀྱི་སྲས་ཁྲི་ཆེན་སངས་རྒྱས་བསྟན་པ་ནི་ཅོག་རོ་ཀླུའི་རྒྱལ་མཚན་གྱི་སྐྱེ་བར་གཏེར་ལུང་མང་པོ་ནས་ཟིན། དེའི་རྗེས་སུ་གཅེན་པོ་ཨོ་རྒྱན་བཀྲ་ཤིས་ཀྱི་སྲས་བླ་མ་བསོད་ནམས་ཕུན་ཚོགས་ཀྱིས་ཁྲི་བསྐྱངས། དེའི་མཆེད་ཡ་དབང་ཆེན་མགོན་པོའི་སྲས་ཆོས་རྒྱལ་བསྟན་པ་ཚེ་རིང་སྟེ། འདི་ཡི་མཛད་པ་ཕྱག་རྗེས་ནི་འགྲན་ཟླ་ཐམས་ཅད་དང་བྲལ་བར་ད་ལྟའང་མིག་དང་། རྣ་བའི་བདུད་རྩིར་གྱུར་ཅིང་། རིས་སུ་མ་ཆད་པའི་མཁས་པ་རྣམས་ཀྱིས་བསྔགས་པའི་མེ་ཏོག་འཐོར་བཞིན་པས། སྔོན་གྱི་རྒྱལ་པོ་གྲགས་པའི་གཟུགས། །ངག་གི་རང་བཞིན་མེ་ལོང་ཐོབ། །དེ་དག་ཉེ་པར་མི་གནས་ཀྱང་། །རང་ཉིད་ཉམས་པ་མེད་ལ་ལྟོས། །ཞེས་འབྱུང་བ་ལྟར་གྱུར་པ་འདི་ཉིད་དོ། །དེའི་སྲས་གསུམ་ལས་བསོད་ནམས་མགོན་པོ་གཞིས་ཀར་བཞུགས། བླ་མ་ཕུན་ཚོགས་བསྟན་པས་ཁྲི་བསྐྱངས་
ཤིང་ཡབ་ཆོས་ཀྱི་རྒྱལ་པོའི་ཞལ་ཆེམས་ལྟར་བསྟན་འགྱུར་རིན་པོ་ཆེ་སྤར་དུ་བསྒྲུབས་པ་སོགས་བསྟན་པ་ལ་ཕྱག་རྗེས་ཤིན་ཏུ་ཆེ། དེའི་རྗེས་སུ་ས་སྐྱོང་བློ་གྲོས་རྒྱལ་མཚན། དེའི་སྲས་ས་སྐྱོང་ས་དབང་བཟང་པོ། དེའི་སྲས་ཚེ་དབང་རྡོ་རྗེ་རིག་འཛིན་ནི་ཆོས་སྐྱོང་བྲན་དུ་ཁོལ་བ་ལ་སོགས་པ་ཆོས་སྲིད་ཀྱི་ཕྲིན་ལས་རྒྱ་ཆེ། དེའི་སྲས་ས་དབང་དམ་ཚིག་རྡོ་རྗེ་དང་། སྲས་བླ་མ། སྲས་གཅུང་བཅས་གསུམ་པོ་སོ་སོར་ཆོས་སྐྱོང་བའི་རྒྱལ་པོ་བྱང་ཆུབ་སེམས་དཔའི་རྣམ་ཐར་ཐུན་མོང་མ་ཡིན་པ་མངའ་བ་དང་། དམ་ཚིག་རྡོ་རྗེ་དང་ལེགས་བྱས་རྩོམ་པའི་བྱེད་པོ་སའི་དབང་མོ་འདི་གཉིས་ཀྱི་སྲས་སྐུ་མཆེད་གཉིས་ལས། དང་པོ་དཔལ་ལྡན་འཆི་མེད་རྟག་པའི་རྡོ་རྗེ་ད་ལྟ་གསེར་ཁྲིར་ཕེབས་ནས་ཆོས་སྲིད་བསྐྱང་བཞིན་པ་སྟེ། འདི་ནི་རྩོད་བྲལ་དུས་བབས་ཀྱི་གཏེར་སྟོན་ཆེན་པོ་མཆོག་གྱུར་བདེ་ཆེན་གླིང་པའི་གཏེར་ལུང་ཨོ་རྒྱན་རིན་པོ་ཆེའི་རྡོ་རྗེའི་གསུང་ལས། ལྷ་སྲས་མུ་ཏིག་བཙད་པོ་སད་ན་ལེགས་མཇིང་ཡོན་གྱི་རྣམ་འཕྲུལ་དུ་ལུང་བསྟན། ཐུགས་སྒྲུབ་བར་ཆད་ཀུན་སེལ་གཙོས་གཏེར་ཆོས་དུ་མའི་རྩ་བའི་ཆོས་བདག་ཏུ་གྱུར་ཅིང་། གཞན་ཡང་པདྨའི་ཞལ་ཚབ་འཇིགས་བྲལ་གྱི་སློབ་དཔོན་ཆེན་པོ་པདྨ་འོད་གསལ་མདོ་སྔགས་གླིང་པའམ། འཇམ་དབྱངས་མཁྱེན་
བརྩེའི་དབང་པོས་ཀྱང་ལུང་ཟིན་གྱི་ཆོས་ཀྱི་བདག་པོར་མངའ་གསོལ་ཞིང་གཟེངས་བསྟོད་པ་ལྟར། ཚུར་མཐོང་རྣམ་ཐར་ལའང་། སྐུ་ན་ཕྲ་བའི་དུས་ནས་བླ་མ་དང་དཀོན་མཆོག་སོགས་མཆོད་འོས་ལ་གུས་པ། རིགས་དང་གོ་སའི་ཁེངས་པ་མ་མཆིས་པས་ཤེས་བྱ་སྤྱི་དང་བྱེ་བྲག་གསན་བསམ་སྒྲུབ་པའི་ལས་ལ་བརྩོན་པ། བྱམས་པ་དང་སྙིང་རྗེས་མ་ནུས་པ་མཐའ་ནས་སྐྱོང་བ། ཡོངས་སུ་རྫོགས་པའི་བསྟན་པ་རིན་པོ་ཆེ་དེ་འཛིན་དང་བཅས་པ་ལ་སྲི་ཞུ་དང་ཞབས་འདེགས་ཆེ་བ། ཐུགས་སྒམ་པས་དགོངས་པའི་གཏིང་བརྟག་པར་དཀའ་བ། གཟུ་བོར་གནས་པས་ཉེ་རིང་བར་མའི་ཕྱོགས་སུ་མ་ལྷུང་བ་སོགས་མདོར་ན་དམ་པའི་རྣམ་ཐར་མ་སྦས་མངོན་སུམ་དུ་གསལ་བ་དང་། གཉིས་པ་གཅུང་བླ་མ་ཡང་ཤེས་བྱ་ལ་མཁྱེན་རབ་ཆེ་ཞིང་། རྒྱལ་བ་གཉིས་པ་ངོར་ཨེ་ཝཾ་ཆོས་ལྡན་གྱི་རིང་ལུགས་ལྟར་ཀློག་པ་ཐོས་བསམ་དང་། སྤོང་བ་བསམ་གཏན་གྱི་འཁོར་ལོས་དུས་འདའ་ཞིང་། ཞི་བ་དང་། དུལ་བ་དང་། ཐུགས་རྗེ་དང་བྱམས་པ་ཆེ་བ་སོགས་བསྟན་པ་འཛིན་པའི་སྐྱེས་བུ་དམ་པར་བསྔགས་འོས་པ་ལགས་ལ། མདོར་ན་མིའི་དབང་པོ་འདིའི་གདུང་རབས་རྣམས་ནི་རྒྱལ་བསྟན་ཡོངས་སུ་རྫོགས་པ་མཆོད་པས་ཡོངས་རྫོགས་བསྟན་པའི་སྦྱིན་བདག་དང་། ཉི་འོག་གི་སྐྱེ་རྒུ་
ཐམས་ཅད་ལུགས་དང་མཐུན་པའི་བཀའ་ཁྲིམས་ཀྱིས་བསྐྱངས་པའི་ཕྲིན་ལས་དང་ཕྱག་རྗེས་ཅན་ཁོ་ན་བྱུང་བའི་ནང་གསེས། ཆོས་རྒྱལ་བསྟན་པ་ཚེ་རིང་སྐབས་ནས་གནམ་གྱི་ལྷ་གོང་མཆེན་པོས་ས་སྐྱོང་བའི་བྱེད་པོར་དབང་བསྐུར་ཞིང་། ལུང་ལས་འཇའ་ས་སྩལ་བས་ཐུ་སི་སྡེ་དགེ་གསན་ཡུ་སི་ཞེས་པའི་མཚན་གྱིས་ཤར་ཕྱོགས་ཆུ་གཏེར་ཆེན་པོ་ནས། ནུབ་ཕྱོགས་ཛཱ་ཏིའི་རྐང་པས་དག་བྱེད་འཐུང་བའི་བར་དུ་གྲགས་པ་མངོན་པར་གསལ་བ་འདི་ཉིད་དོ། །གཉིས་པ་ལ། བསོད་ནམས་ཀྱི་སྟོབས་དང་ལྡན་པ་རྣམས་ནི་དེའི་དབང་གིས་འཇིག་རྟེན་ན་ཀུན་གྱི་མཆོག་དང་གཙོ་བོར་འགྱུར་བ་ཆོས་ཉིད་ཡིན་པས། མདོ་སྨད་ཤར་དར་རྩེ་མདོ་ཞེས་པའི་སའི་ཐིག་ལེར་གྱུར་པ་ག་ལ་བར། དཔལ་མིའི་དབང་པོ་ལྕགས་ལ་མིང་ཆེན་རྒྱལ་པོ་ཞེས་མཚན་གྱིས་གྲགས་པ་མངོན་པར་གསལ་ཞིང་། ལས་དབང་སྟོབས་ཀྱི་དཔུང་པ་དར་ལ་དྲག་པས་ཡངས་པའི་ནོར་འཛིན་ལ་དབང་སྒྱུར་བ་མཛད་པ་ལས། དུས་རིང་མོ་ཉིད་ནས་རྒྱལ་རབས་དང་སྐུ་ངོ་གསེར་རིའི་ཕྲེང་བ་རིགས་དང་། བློ་དང་། གཟུ་བོར་གནས་པ་དང་། མངའ་ཐང་ལ་སོགས་པ་རྒྱལ་རིགས་དྲ་མ་ཆེན་པོའི་ཡོན་ཏན་དང་ལྡན་པ་ད་ལྟ་དཔལ་སའི་དབང་པོ་བཞུགས་བཞིན་པ་
ལྕམ་དྲལ་རྣམས་ཀྱི་བར་དུ་བྱུང་བ་ཐམས་ཅད་ཀྱིས། རིས་སུ་མ་ཆད་པའི་སྐྱེ་རྒུ་མཐའ་དག་ལུགས་གཉིས་བཀའ་ཁྲིམས་ཀྱིས་བསྐྱངས་པ་དང་བསྟན། འཇམ་དབྱངས་གོང་མ་ཆེན་པོའི་ལུང་ལས་ཀྱིས་མངོན་པར་གཟེངས་བསྟོད་དེ་བཀའ་ལུང་ཤིང་རྟའི་ཁ་ལོ་བོད་ཤིང་སྒོ་ཅན་ལ་སྒྱུར་བའི་བྱེད་པོར་བསྔགས་པ་དང་། རྒྱལ་བསྟན་སྤྱི་དང་བྱེ་བྲག་སྔ་འགྱུར་རྡོ་རྗེ་ཐེག་པའི་བརྒྱུད་འཛིན་སྐྱེས་ཆེན་དམ་པ་མང་པོ་དབུའི་མཆོད་གནས་སུ་བཀུར་ཏེ། སྨིན་གྲོལ་གྱི་གདམས་པ་ཟབ་མོ་གསན་ཅིང་ཐུགས་ཉམས་སུ་བཞེས་པའི་ཆོས་སྐྱོང་བའི་རྒྱལ་པོའི་རྣམ་པར་ཐར་པ་ཅན་ཤ་སྟག་བྱུང་བ་ཡིན་ནོ། །གསུམ་པ་ལ། བྱེ་བྲག་སྐབས་སུ་བབས་པ་རྣམ་དཀར་རྒྱ་མཚོའི་སྤྲིན་གྱིས་ཕྱོགས་ཀྱི་དཀྱིལ་འཁོར་དོག་པོར་བྱེད་པའི་ལེགས་བྱས་རྩོམ་པ་པོ་དཔལ་སའི་དབང་མོ་འདི་ནི། གོང་དུ་བཤད་པའི་ཆོས་རྒྱལ་ལྕགས་ལ་མཆོག་གི་སྲས་མོར་སྐུ་འཁྲུངས་ཤིང་། སྡེ་དགེ་ས་སྐྱོང་རིན་པོ་ཆེའི་ཆབ་སྲིད་འདོད་རྒུ་འབྱུང་བའི་བུམ་པ་བཟང་པོར་མགྲོན་དུ་ཁུག་པ་སྟེ། དེ་ཡང་རྒྱ་ཆེར་རོལ་པ་ལས། རྒྱགས་པ་མ་མཆིས་མི་གཡེང་ཟུང་ཐུབ་ཚུལ་འཆང་ཞིང་། །ང་རྒྱལ་མ་མཆིས་འགྱིང་དང་བྲལ་བས་བྲན་མོ་བཞིན། །སྒྲ་དྲི་རོ་ལ་མ་ཆགས་ཆང་ལ་མ་ཆགས་ཏེ། འདོད་བྲལ་བརྣབ་སེམས་མ་
མཆིས་རང་གི་ནོར་གྱིས་འཚལ། །བདེན་ལ་གནས་ཤིང་མི་འཕྱར་གཡེང་བ་མ་ལགས་པ། །ངོ་ཚའི་གོས་འཆལ་རྒོད་དང་ཁེངས་པ་མ་མཆིས་གནས། །རྟ་དང་བཀྲ་ཤིས་མ་ཆགས་རྟག་ཏུ་ཆོས་ལ་བརྩོན། །ཞེས་གསུངས་པ་ལྟར་རྒྱགས་པ་ལ་སོགས་པ་མེད་པས་མཆོད་འོས་ལ་གུས་པ། སྙིང་རྗེ་ཆེན་པོས་མངའ་འབངས་བྱམས་པས་སྐྱོང་བ། ནད་ལ་དཔྱད་གཏོང་བ་ལྟ་བུའི་ལེགས་སྤེལ་ཉེས་བསུབས་ཅུང་ཟད་ལས་གཞན་གྱི་སྲོག་གཅོད་པ་ལ་སོགས་པའི་ཁྲིམས་དྲག་པོ་མི་འབེབས་པ། རིས་མེད་པའི་བསྟན་པ་དེ་འཛིན་དང་བཅས་པ་ལ་དད་པ་དང་དག་པའི་སྣང་བ་རྒྱ་ཆེ་བ། བསོད་ནམས་ཀྱིས་ཐོབ་པའི་ནོར་གྱི་དངོས་པོ་ཇི་སྙེད་པ་ལ་ཆགས་པ་མེད་པས་བླ་མ་དང་དཀོན་མཆོག་གི་ཞིང་དུ་འབུལ་བ། ཕོངས་པ་དང་དམན་པ་ལ་ཐུགས་བརྩེ་བས་ཟས་སོགས་ཀྱིས་སྟོབ་པ། རྒྱུད་རང་བཞིན་གྱིས་འཇམ་ཞིང་བདེན་པ་ལ་གནས་པ། བློ་བརྟན་པས་འགྱུར་ལྡོག་མེད་པ། ཁ་ཏོན་དང་རྣལ་འབྱོར་སོགས་ཟབ་མོའི་ཐུགས་དམ་ལ་གཞོལ་བ་སོགས་བུད་མེད་དམ་པའི་རྣམ་པར་ཐར་པ་དང་ལྡན་པ་ཡིན་ཏེ། རྣམ་དཀར་གྱི་མཛད་པ་ནི་ལེགས་བྱས་འདིའི་ཤུགས་ལས་ཀྱང་ཅུང་ཟད་ཤེས་པར་འགྱུར་རོ། །ས་ལས་རྣམ་པར་རྒྱལ་བའི་
རིན་ཆེན་གྱི། །བརྒྱུད་པས་ལེགས་ཚོགས་རྒྱ་མཚོའི་སྙིང་པོ་ནི། །ལྷག་བསམ་ཉི་མ་འབར་བའི་འོད་ཟེར་གྱིས། །རྣམ་པར་དཀར་བའི་པདྨོའི་ནགས་ཀླུང་བྱེ། །དམན་པ་ཐོབ་དང་ནོར་རྣམས་འབྱོར་བ་ན། །སཱ་ལ་ཤ་སྐམ་སྡོང་བུ་བཞིན་ཏུ་རེངས། །དམ་པས་གང་ཚེ་དེ་དག་ཐོབ་པ་ན། །དཔག་བསམ་བཟང་པོའི་འདབ་མ་ལྟ་བུར་དུད། །འབྱོར་པས་བ་གམ་བཀངས་ནས་ཡོན་པོའི་མིག །གཏོང་ལ་ལྟ་བྱེད་ཁུ་ཚུར་དངུལ་ཆུ་ཅན། །དེ་དག་ལེགས་བྱས་འདི་མཐོང་ངོ་ཚའི་གདོང་། །ཟླ་བས་པདྨ་བཞིན་ཏུ་ཟུམ་པར་འགྱུར། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །བཞི་པ་གང་ཕྱིར་བཞེངས་པའི་དོན་དང་དགོས་ཆེད་ནི། བཟང་པོ་སྤྱོད་པའི་སྨོན་ལམ་གྱི་རྒྱལ་པོ་ལས། ནམ་མཁའི་མཐར་ཐུག་གྱུར་པ་ཇི་ཙམ་པ། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུར་པར། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་གསུངས་པ་ལྟར། །ནམ་མཁའི་མཐས་གཏུགས་པའི་སེམས་ཅན་རྒྱ་མཚོ་གནས་སྐབས་སུ་ཕན་པ་དང་མཐར་ཐུག་རྫོགས་པའི་སངས་རྒྱས་ཀྱི་བདེ་བ་བླ་ན་མེད་པ་འཐོབ་པའི་ཕྱིར་དང་། །བྱད་པར་ཛམྦུ་བྲྀཀྵ་ས་མཚན་པའི་ཞིང་སྤྱི་དང་། བྱེ་བྲག་གངས་ཅན་གྱི་ལྗོངས་འདིར་ཐུབ་པ་ཉི་མའི་གཉེན་
གྱི་བསྟན་པ་མདོ་སྔགས་གཉིས་ཀྱི་བདག་ཉིད་ཅན་སྐྱེ་རྒུ་ལྷ་དང་བཅས་པའི་སྐྱབས་དང་། མགོན་དང་། དཔུང་གཉེན་གཅིག་པུར་དར་ཞིང་རྒྱས་ལ་ཡུན་རིང་དུ་གནས་པའི་ཕྱིར་དང་། དེ་ལྟར་རྒྱལ་བསྟན་རིན་པོ་ཆེ་དར་ཞིང་རྒྱས་པ་ལ་ཕྲག་པར་དོག་པའི་ལྷ་མ་ཡིན་གྱི་ཆོས་ལུགས་འཛིན་པ་ཀླ་ཀློ་དང་། དེ་བཞིན་ཏུ་མུ་སྟེགས་བྱེད་དང་། བདུད་དང་། བདུད་ཀྱི་རིས་སུ་གྱུར་པ་གང་ཇི་སྙེད་པའི་མཐུ་སྟོབས་དང་ནུས་པ་ཉམས་ཤིང་། རྒྱལ་བསྟན་དེ་ཉིད་འཛིན་པའི་སྐྱེས་བུ་དམ་པ་ཐམས་ཅད་ཞབས་པད་བརྟན་ཅིང་། འཆད་རྩོད་རྩོམ་པ་ལ་སོགས་པ་བསྟན་པ་ལ་བྱ་བ་བྱེད་པའི་སྒོ་ནས་ཡུན་རིང་དུ་འཚོ་ཞིང་གཞེས་པའི་ཕྱིར་དང་། དེ་དག་གི་མཐུས་འཇིག་རྟེན་གྱི་ཁམས་ཐམས་ཅད་དུ་ནད་ཡམས་དང་། མུ་གེ་དང་། དམག་འཁྲུགས་དང་། སད་སེར་ལ་སོགས་པ་མིང་ཡང་མི་གྲགས་ཤིང་། དཀར་ཕྱོགས་ཀྱི་ལྷ་ཀླུ་མཐུ་བོ་ཆེ་རྣམས་ཀྱིས་དུས་དུས་སུ་ཆར་འབེབས་པས་ལོ་ཏོག་ཕུན་སུམ་ཚོགས་པ་ལ་སོགས་རྫོགས་ལྡན་གྱི་དཔལ་ལ་ལོངས་སྤྱོད་པ་ནས། ཚེ་རིང་ཞིང་ནད་མེད་པ་སོགས་འཇིག་རྟེན་གྱི་བདེ་བས་མངོན་པར་འཚོ་སྟེ། དགེ་བའི་བཤེས་གཉེན་ཚད་མ་དང་མཇལ་བས་བསམ་པ་དཀར་པོའི་ཕྱོགས་སུ་འགྲོ་ཞིང་ཐེག་པ་གསུམ་གྱི་འབྲས་
བུ་མཐར་ཐུག་པ་འཐོབ་པའི་ཕྱིར་དང་། ཁྱད་པར་དུ་མིའི་དབང་པོའི་རྒྱལ་ཁབ་ཕོ་བྲང་ཆེན་པོ་སུམ་རྩེན་རྣམ་རྒྱལ་རྫོང་ཉིད་གསར་དུ་བསྐྲུན་པའི་ནང་ག་ལ་བར། ཛཾ་གླིང་ནོར་འཛིན་གྱི་ཁོང་ན་ཆེས་དཀོན་པའི་རྟེན་གསུམ་རིན་པོ་ཆེའི་ཕུང་པོ་ཇི་སྲིད་རྒྱལ་བསྟན་རིན་པོ་ཆེ་ནས་གནས་ཀྱི་བར་དུ་རིམ་གྱིས་བཞེངས་ཤིང་ཕྱུར་བུར་བཀང་བའི་རྒྱལ་རིགས་ཤིང་སཱ་ལ་ཆེན་པོ་ལྟ་བུར་བརྒྱུད་མར་འབྱུང་བའི་རྟེན་ཅིང་འབྲེལ་བར་འབྱུང་བའི་ཐོག་མ་དང་། དེ་དག་གིས་རིས་སུ་མ་ཆད་པའི་རྒྱལ་བའི་བསྟན་པ་དེ་འཛིན་དང་བཅས་པ་སྲི་ཞུ་གུས་འདུད་ཀྱི་ཕྲག་པར་ཁྱེར་བས་ས་ཕྱོགས་འདི་ཆོས་ཚིགས་ཀྱི་ཡུལ་དབུས་ཞེས་པའི་མིང་ཡང་ཇི་སྲིད་དུས་ཀྱི་ཞུགས་དང་། ཤིང་རྟའི་འཕང་ལོ་ཙམ་གྱི་ཆུས་འབྱུང་པོ་འཛིན་མའི་དཀྱིལ་འཁོར་བག་ལ་ཞ་བར་མ་གྱུར་པ་དེ་སྲིད་དུ་གྲགས་པ་རྣམ་པར་གསལ་བའི་ཕྱིར་དང་། ཁྱད་པར་དུ་མིའི་དབང་མོ་ཉིད་ཀྱི་ཡབ་ཡུམ་དང་། དྲལ་པོ་དང་། མཆེད་ལ་སོགས་པ་བཞུགས་པ་རྣམས་སྐུ་ཚེ་རིང་ཞིང་ཆོས་མཐུན་གྱི་མངའ་ཐང་རྒྱས་པ་དང་། འདས་པ་རྣམས་ཀྱང་བདེ་བ་ནས་བདེ་བར་འགྲོ་བའི་ལུས་དང་། དམ་པ་ཆོས་ཀྱི་ལོངས་སྤྱོད་ཁྱད་པར་ཅན་ཐོབ་ནས། མཐར་ཐུག་རྒྱལ་བ་ཉི་མ་ཆེན་པོའི་གོ་འཕང་རིན་པོ་ཆེ་འཐོབ་པའི་ཕྱིར་དང་། མདོ་
ཁམས་ནོར་འཛིན་གྱི་དབང་ཕྱུག་དཔལ་མིའི་ལྷ་རིགས་ཀྱི་སྲས་མཆེད་ཞལ་དང་། འབྱུང་འགྱུར་གྱི་རྒྱལ་རབས་ནོར་བུའི་ཕྲེང་བ་ཇི་སྙེད་པ་དང་བཅས་པའི་ཆོས་དང་སྲིད་ཀྱི་དཔལ་འབྱོར་ཕུན་སུམ་ཚོགས་པ་རིས་མེད་རྒྱལ་བསྟན་རིན་པོ་ཆེར་སྲི་ཞུ་དང་ཞབས་འདེགས་སྒྲུབ་པའི་ཆ་རྐྱེན་དུ་རྒྱས་ཤིང་རྟག་ལ། བསྟན་པ་མཆོད་པའི་བཞེད་དོན་ལྷུན་གྱིས་གྲུབ་ཅིང་། བསྙུན་མི་མངར་བ་དང་། སྐུ་ཚེ་མཐར་ཕྱིན་པར་འཚོ་ཞིང་གཞེས་པ་ལ་སོགས་ཆོས་སྐྱོང་བའི་མཚན་གྱི་གྲགས་པ་དཀར་པོ་སྤྲིན་དང་བྲལ་བའི་ཉི་མའི་འོད་ཟེར་བཞིན་འབར་ཞིང་ནུབ་པ་མེད་པས་དེ་ལས་ཁྱད་པར་དུ་འཕགས་པའི་ཕྱིར་དང་། སའི་དབང་མོ་ཉིད་ཀྱང་འདི་ནས་བྱང་ཆུབ་སྙིང་པོའི་བར་གྱི་སྲིད་པ་རྒྱ་མཚོར་དཀོན་མཆོག་བླ་མར་བཅས་པ་ལ་བཀུར་སྟི་དང་། བསྟི་སྟང་དང་། ཕུ་དུད་བྱེད་པའི་ལུས་ཁྱད་པར་ཅན་དང་། དགེ་བའི་བཤེས་གཉེན་དམ་པ་རྣམས་ཀྱིས་རྗེས་སུ་བཟུང་བས་ཐེག་པ་ཆེན་པོའི་ཆོས་ཀྱི་ལོངས་སྤྱོད་ཁྱད་པར་ཅན་དང་། ཀུན་ཏུ་བཟང་པོའི་སྤྱོད་པ་ལ་མཐར་གྱིས་ཡོངས་སུ་ཞུགས་པའི་སྤྱོད་པ་ཁྱད་པར་ཅན་ཏེ། ཁྱད་པར་དུ་འཕགས་པ་དེ་དག་འཐོབ་པའི་ཕྱིར་དང་། མཐར་ཐུག་སྐུ་བཞི་ཡེ་ཤེས་ལྔའི་བདག་ཉིད་རྒྱལ་བའི་གོ་འཕང་རིན་པོ་ཆེ་ཐོབ་ནས། མགོན་པོ་
ཀུན་ཏུ་གཟིགས་ལ་སོགས་པ་དང་འཇིག་རྟེན་ཉི་མ་མཚུངས་པ་མེད་པ་གཞན་བརྒྱ་ཕྲག་བཅུའི་ཕྲིན་ལས་དང་། ཞིང་དང་། སྐུ་ཚེ་དང་། འགྲོ་བ་སྨིན་པར་མཛད་པའི་རྣམ་པར་ཐར་པ་འགྲུབ་པའི་ཆེད་དུ་ལྷག་པའི་བསམ་པ་གཡོ་མེད་པས་ཀུན་ནས་བསླངས་ཏེ་རྣམ་པར་དཀར་བའི་ལེགས་བྱས་ཀྱི་ཕུང་པོ་འདི་དག་མངོན་པར་འདུ་མཛད་པའོ། །མི་འཕེལ་ཉུང་བ་རང་དོན་མི་འཛད་པར། །འཕེལ་བ་གཞན་གྱི་དོན་ལ་སེམས་པས་ཏེ། །བསམ་པའི་ཁྱད་པར་འདི་ཡིས་ལེགས་བྱས་ནི། །ནམ་མཁའ་མཉམ་པའི་འབྲས་བུའི་འབྱུང་གནས་ཡིན། །ནོར་བུའི་ཁམས་ལས་རྒྱུ་སྐར་རྒྱ་མཚོ་ནི། །མཉམ་དང་མི་མཉམ་སྣ་ཚོགས་གཟུགས་འཛིན་བཞིན། །ལེགས་བྱས་མཉམ་ཡང་འབྲས་བུ་ཆུང་བ་རྣམས། །ཐབས་ལ་མཁས་པ་འདི་དང་བྲལ་བས་ལགས། །ཐེག་པ་མཆོག་གི་སེམས་ཀྱི་རྒྱ་མཚོ་ལས། །ལྷག་བསམ་ལྷུན་པོ་སྲིད་དང་ཞི་བའི་དབྱིངས། །ཕན་བདེའི་འོད་ཚོགས་འབར་ཞིང་མཐོ་བ་ནི། །སྲས་བཅས་རྒྱལ་བ་དགྱེས་པའི་མཆོད་སྤྲིན་ཉིད། །ཅེས་པ་ནི་བར་སྐབས་ཀྱི་ཚིགས་སུ་བཅད་པའོ། །ལྔ་པ་ཇི་ལྟར་བཞེངས་པའི་བྱ་བའི་ཚུལ་ནི། དེ་ལྟ་བུའི་བསམ་པ་དྲི་མ་མེད་པས་ལེགས་བྱས་རྒྱ་མཚོ་འདུ་མཛད་པའི་དངོས་གཞི་ལ་ཞུགས་ནས། འཛད་པ་
མེད་པའི་གཏོང་བའི་སྒོ་འཕར་བརྒྱ་ཕྲག་དུ་མ་ཕྱེས་པ་དང་ལྷན་ཅིག་གྲུབ་པར་བགྱིས་པ་སྟེ། གནམ་ལོའི་རྒྱལ་པོ་ཆུ་སྤྲེལ་ཟླ་བ་དྲུག་པའི་ཚེས་བཞི་བདག་ཅག་གི་སྟོན་པས་ཞིང་འདིར་བདུད་རྩིའི་སྒོ་ཐོག་མར་དབྱེ་བར་མཛད་ཅིང་འཕྲོད་སྦྱོར་སོགས་བཀྲ་ཤིས་པའི་དུས་ཕུན་སུམ་ཚོགས་པ་ལ་ཐོག་མར་དབུ་འཛུགས་པའི་དགའ་སྟོན་གྱ་ནོམ་པ་དང་བཅས། གཞུང་ནས་བཤད་པའི་ཐིགས་དང་ཆགས་ཚད་ཇི་བཞིན་མ་འཁྲུལ་བར་གཏན་ལ་ཕབ་སྟེ། ལྷ་མགར་དབུ་མཛད་པ་བཟོ་རིག་ལ་གངས་ཅན་ཙམ་ན་འགྲན་ཟླ་ཐམས་ཅད་དང་བྲལ་བའི་མཁས་པ་ཆེན་པོ་ཆབ་མདོ་བ་པདྨ་དབང་ཕྱུག་དང་། བཟོ་གནས་ལ་མངའ་བརྙེས་པ་དབུ་མཆན་ངག་དབང་བརྩོན་འགྲུས་སོགས་མི་ལྔ། མང་འགར་དྲུག་བཅས་བཅུ་གཉིས་ཀྱིས་ཟླ་བ་བཞིའི་ཁོངས་སུ་ཇོ་བོ་དང་། སློབ་དཔོན་སྐུ། མཆོད་རྟེན་བཅས་དངོས་གཞི་ཡོངས་རྫོགས་དང་། ཇོ་བོའི་བཞུགས་ཁྲི་པ་ཏྲ་དང་གསེར་བཅས་གྲུབ། ལོ་རྗེས་མའི་ཟླ་བ་ལྔ་པའི་ནང་ནས་ཟླ་བ་གཉིས་ཀྱི་ཁོངས་སུ་བཞུགས་ཁྲི་མཐའ་ཕུད་རྒྱུ་དང་། རྒྱབ་ཡོལ་རྒྱན་དྲུག་གསེར་དང་ཕྲ་རྒྱན་བཅས་ལེགས་པར་གྲུབ་བོ། །བྲིས་སྐུ་སྐྱེས་རབས་ཞལ་ཐང་ནི། ལྷ་རིས་པའི་དབུ་མཛད་སྒར་སྨན་གཉིས་ཀྱི་བྲི་རྒྱུན་ལ་འགྲན་ཟླ་མེད་པའི་རྣམ་
དཔྱོད་ཅན་ཀརྨ་དགོན་པ་ཕུན་ཚོགས་དར་རྒྱས་དང་། དབུ་མཆན་བཀྲ་ནོར་དང་། བསམ་གཏན་གཉིས། དཀྱུས་གྲས་བཞི་བཅས་མི་བདུན་གྱིས་ཤིང་ཕོ་ཁྱི་ལོ་ཟླ་བ་ལྔ་པའི་ཚེས་ཉེར་བདུན་ཤིན་ཏུ་དགེ་བར་དབུ་བཙུགས་ཏེ། ཟླ་བ་ལྔ་དང་ཞག་བཅུའི་ཁོངས་སུ་ལེགས་པར་གྲུབ་བོ། །སྐུ་རྒྱུ་ནི། ཇོ་བོའི་སྐུ། སློབ་དཔོན་སྐུ། མཆོད་རྟེན། གཉྫི་ར། སྤེན་རྒྱན་བཅས་ལ་ཟངས་རྒྱ་སྟོང་ཕྲག་གཅིག་དང་སུམ་བརྒྱ་ཉི་ཤུ་ལ་འཁོར་དྲུག་ཉིས་བརྒྱ་ལྷག །ཚ་ལ་རྒྱུ་དངུལ་སྲང་བཅུ་གཉིས། སྔོ་འཁྱོག་སྲང་བཞི་བརྒྱ་བཞི་བཅུ་ལ་འཁོར་དྲུག་བཅོ་བརྒྱད། ཇོ་བོའི་སྐུ་རྐྱང་པར་གསེར་སྲང་བཅུ་བདུན་དང་ཞོ་བཞི་སྐར་ལྔ། བཞུགས་ཁྲི་རྒྱབ་ཡོལ་རྒྱན་དྲུག་བཅས་ལ་གསེར་སྲང་སུམ་ཅུ་སོ་གཉིས་དང་ཞོ་དོ་སྐར་དགུ་ལི་ལྔ། སློབ་དཔོན་ལ་གསེར་སྲང་བརྒྱད་དང་ཞོ་དོ། །མཆོད་རྟེན་ལ་གསེར་སྲང་དགུ་དང་ཞོ་དོ་སྐར་བཞི། གསེར་འཕྲུ་ལ་གསེར་སྲང་བཅོ་ལྔ་དང་ཞོ་གཅིག་སྐར་ལྔ། སྒོ་སྦུབས་ལ་གསེར་སྲང་གཅིག་དང་ཞོ་ལྔ་སྐར་ལྔ། འདི་ཡན་གསེར་ཐམས་ཅད་འབོར་བསྡོམས་སྲང་བརྒྱད་ཅུ་གྱ་བཞི་དང་ཞོ་དོ་སྐར་བཞི་ལི་ལྔ་སོང་། སྒྲོལ་མ་ཉེར་གཅིག་ཆ་གཉིས་སོགས་སྐུ་འཐོར་རྣམས་ལ་གསེར་སྲང་བཅུ་གཉིས་དང་ཞོ་གཅིག། ཐམས་ཅད་ལ་དངུལ་ཆུ་སྲང་བཞི་བརྒྱ་དང་བདུན་ཅུ་
དོན་གཅིག་ལ་དངུལ་སྲང་བཞི་བཅུ་ཞེ་གཉིས་དང་ཞོ་བརྒྱད་བབས་སོང་། ཇོ་བོ་ལ། བྱེར་ཕྲ་ཤིན་ཏུ་ཆེ་བ་གཉིས་ལ་དངུལ་རྡིལ་ཚད་གཅིག །དེ་མཆན་བརྒྱད་ལ་དངུལ་སྲང་བརྒྱ་དང་ཉི་ཤུ། བྱེར་ཕྲེང་ཕྱེད་གཉིས་ལ་དངུལ་སྲང་བཅུ་གཅིག །གསེར་གྭ་ལ་དངུལ་སྲང་སུམ་ཅུ། མུ་ཏིག་ཐམས་ཅད་འབོར་བསྡམས་དངུལ་སྲང་བརྒྱ་དང་ལྔ་བཅུ། སྤོས་ཤེལ་གཉིས་ལ་དངུལ་སྲང་ལྔ་བཅུ། ཡང་བྱེ་རུ་གཅིག་ལ་དངུལ་སྲང་བཅོ་ལྔ། དུང་དཀར་གཡས་འཁྱིལ་ལ་དངུལ་སྲང་བདུན་ཅུ་དོན་ལྔ། ཡང་སྤོས་ཤེལ་ཆེ་གཅིག་ལ་དངུལ་སྲང་དྲུག་ཅུ། ཁྲི་ལ་བྱེ་རུ་ཆེ་བདུན་ལ་དངུལ་སྲང་དྲུག་ཅུ། ཡང་དེ་ལས་ཅུང་ཆུང་བ་བཅུ་གཉིས་ལ་དངུལ་སྲང་བརྒྱད་ཅུ་གྱ་བཞི། སྤོས་ཤེལ་ཆེ་ཆུང་དྲུག་ལ་དངུལ་སྲང་དགུ། ཤེལ་ཕྲ་ཉི་ཤུ་ལ་དངུལ་སྲང་ལྔ། སློབ་དཔོན་ལ་བྱེ་རུ་ཆེ་གཉིས་ལ་དངུལ་སྲང་བཅུ་བདུན། ཡང་གཉིས་ལ་དངུལ་སྲང་བཅུ་བཞི། ཡང་གཅིག་ལ་དངུལ་སྲང་བཅུ། གསེར་གྭ་ལ་དངུལ་སྲང་ཉི་ཤུ། མཆོད་རྟེན་ལ་བྱེ་རུ་རྡོག་ཉེར་བཞི་ལ་དངུལ་སྲང་ལྔ་བཅུ། ཡང་རྡོག་དགུ་ལ་སྲང་བདུན། ཡང་བྱེ་རུ་དགུ་ལ་སྲང་སུམ་ཅུ། གཡུ་གྲུ་དཀར་བཞི་ལ་དངུལ་སྲང་ལྔ་བཅུ། གཡུ་ཕྲེང་ཕྱེད་གཉིས་ལ་དངུལ་སྲང་སུམ་ཅུ། དེ་འཕྲོས་གཡུ་ཕྲ་ཡོད་རིགས་ལ་དངུལ་སྲང་བདུན་ཅུ། བྱེ་རུའི་པད་ཀོར་ལ་དངུལ་སྲང་བདུན་བཅས་འབོར་བསྡོམས་རྡིལ་ཚད་ཉི་ཤུ་དང་སྲང་སུམ་ཅུ་ཐམ་པ་སོང་། སྐྱེས་རབས་ཞལ་ཐང་
ཉེར་ལྔ་ལ། ཚོན་རས་གཞི་གཉིས་ལ་འཁོར་དྲུག་དགུ་དང་བག་གཅིག །གསེར་སྲང་གང་ཞོ་དོ་སྐར་ལྔ། གང་ཤམ་དྲིལ་ཏོག་སོགས་ལ་འཁོར་དྲུག་བཞི་བརྒྱ་དང་བཅུ་དགུ་འོག་ནས་འབྱུང་བ་བཟོ་བོའི་ཡོན་བཅས་བསྡམས་པས་འཁོར་དྲུག་དྲུག་བརྒྱ་དང་སུམ་ཅུ་སོ་གཉིས་སོང་། བཀའ་འགྱུར་རིན་པོ་ཆེ་ལ་བསླུ་ཡོན་དངུལ་སྲང་སུམ་བརྒྱ་དང་ལྔ་བཅུ། བསྟན་འགྱུར་ལ་བསླུ་ཡོན་དངུལ་སྲང་དྲུག་བརྒྱ་དང་ལྔ་བཅུ། རྙིང་རྒྱུད་ལ་བསླུ་ཡོན་དངུལ་སྲང་བརྒྱ་ཐམ་པ། བཀའ་འགྱུར་དང་རྙིང་རྒྱུད་གཉིས་ཀྱི་དཔེ་ཐག་ཏང་སྐུད་རྒྱ་རེར་དངུལ་སྲང་ལྔ་རེ་བརྩིས་པའི་རྒྱ་མ་བཅུ་བཞི་དང་སྲང་བདུན་ལ་འཁོར་དྲུག་བདུན་ཅུ་དོན་གཉིས་དང་བག་གཉིས། དཔེ་ལེབ་ཆ་གསུམ་རེ་ལ་རྒྱ་མཚལ་སྲང་རེས་འདོང་རྩིས་མཚལ་སྲང་ཞེ་ལྔ་ལ་འཁོར་དྲུག་བཞི། གསེར་སྐར་རེས་དཔེ་ལེབ་ཆ་རེར་འདོང་རྩིས་གསེར་འདུར་སྲང་གང་ཞོ་གསུམ་སྐར་གསུམ་ལ་འཁོར་དྲུག་ཉེར་བཞི། གདོང་དར་ཕྱི་ཁ་ཐི་ཁ་ལྔ་ལ་འཁོར་དྲུག་ལྔ་བཅུ། ནང་ཁ་དོག་བཞི་ལ་ཁ་ཉི་ཤུ་དང་། ཏད་སྐུད་རྒྱ་དོ། ནང་ཤ་རས་བཅས་ལ་འཁོར་དྲུག་ལྔ་བཅུ་དང་བག་གསུམ་བཅས་དང་བཀའ་འགྱུར་རྙིང་རྒྱུད་གཉིས་ཀྱི་བསླུ་ཡོན་རྣམས་འབོར་བསྡོམས་འཁོར་དྲུག་དྲུག་བརྒྱ་དང་དྲུག་ཅུ་རེ་བདུན་བག་གཉིས་སོང་། བསྟན་འགྱུར་གྱི་དཔེ་ལེབ།
གླེགས་ཐག་སོགས་ཀྱང་གོང་དང་ཕྱོགས་མཚུངས་ཀྱི་རིན་ཐང་དང་། རྒྱུ་རྩ་ཡང་སོང་བ་ཡིན་ནོ། །དེ་ནས་བཟོ་བོའི་གླ་ཆས་སྐོར་ལ། ཆུ་སྤྲེལ་ལོར་ཆབ་མདོའི་མགར་བ་དཔོན་གཡོག་བཅུ་གཉིས་ལ་ཟླ་བ་བཞི་ཡི་ཕོག་ཇ་ཐོག་ཕབ་པས་འཁོར་དྲུག་དྲུག་ཅུ་རེ་བཞི་དང་བག་གསུམ། གཞུང་འགར་ལྷུ་མགོན་གཙོས་མི་བཅུ་བཞི། ཁྲ་བ་དར་གཉིས། གཟི་རྒྱབ་བཞི། རྐོས་པ་གཅིག་བཅས་ལ་ཕོག་འཁོར་དྲུག་སོ་དགུ་དང་བག་གཅིག །ཆབ་མགར་རྣམས་ལ་ཐོག་མའི་སྟོན་ཆས་སྟོན་གདན་བཅས་འབོར་བསྡོམས་འཁོར་དྲུག་བཅུ་བདུན་དང་བག་ཕྱེད་གསུམ། བར་སྟོན་ལ་འཁོར་དྲུག་བཅོ་བརྒྱད་དང་བག་གཉིས། སྤྲོ་སངས་ཆོས་འཁོར་དྲུག་བཞི། སྤྱན་སྟོན་འཁོར་དྲུག་གསུམ་དང་བག་ཕྱེད་གསུམ། གསེར་སྟོན་འཁོར་དྲུག་བཅུ་བཞི་དང་བག་ཕྱེད་གསུམ། གྲུབ་སྟོན་ཆས་འཁོར་དྲུག་བཅུ་གཉིས་དང་བག་གསུམ། དབུ་ཆེན་ལ་རྟ་གོས་འཁོར་དྲུག་བདུན་ཅུ་དོན་ལྔ། དབུ་ཆུང་ལྔ་ལ་འཁོར་དྲུག་ལྔ་བཅུ་ང་བཞི་དང་བག་གཉིས། མགར་མང་དྲུག་ལ་འཁོར་དྲུག་བརྒྱད་དང་བག་གཉིས། སྟོན་ཆས་སྐོར་འབོར་བསྡོམས་འཁོར་དྲུག་ཉིས་བརྒྱ་དང་ང་དགུ་བག་ཕྱེད་གསུམ་སོང་། ཡོན་དབུ་ཆེན་ཉིན་རེ་ཇ་བག །དབུ་མཆན་ཉིན་གཉིས་རེ་དང་། མགར་མང་སུམ་ཁག་
བཞི་ཁག །ལྔ་ཁག་བཅས་འབོར་བསྡོམས་འཁོར་དྲུག་བརྒྱ་དང་སོ་བརྒྱད། ལམ་ཆས་དང་སྦ་དར་བཅས་འབོར་འཁོར་དྲུག་དགུ་དང་བག་གསུམ། གསེར་རྒྱེབ་ཆས་ལ་འབོར་འཁོར་དྲུག་བརྒྱད་དང་བག་གཅིག །གཞུང་འགར་རིགས་ལ་སྟོན་ཆས་གནང་སྦྱིན་སོགས་འབོར་འཁོར་དྲུག་སོ་ལྔ་དང་བག་གཅིག་བཅས་ཐམས་ཅད་བསྡོམས་པས་འཁོར་དྲུག་ལྔ་བརྒྱ་དང་གསུམ་བག་གསུམ་སོང་། ཆུ་བྱ་ལོ་ལྷ་མགར་དབུ་དམངས་བཅུ་བཞི་ལ་ཕོག་ཟླ་བ་གཉིས་དང་། ཐོག་མཐའ་བར་གྱི་སྟོན་ཆས། དབུ་རྟ་གོས་སོགས་འབོར་འཁོར་དྲུག་བརྒྱ་དང་ཞེ་བརྒྱད་བག་གཅིག །ཡོན་འཁོར་དྲུག་དྲུག་ཅུ་རེ་བདུན་དང་བག་གསུམ། གཞུང་མགར་ལྷུ་མགོན་ཟླ་བ་བདུན། གཞན་མི་བཅུ་ཟླ་བ་བཞི་རེ། བཀྲ་བསམ་ཟླ་བ་ཕྱེད་གཉིས། བུ་འདོས་ཞག་ཉི་ཤུ། སྒོ་ལྕགས་བརྡུང་མཁན་མི་བདུན། ཞག་སུམ་ཅུ་རེ་བཅས་ཀྱི་གྲ་ཆས་ཕྱོགས་བསྡམས་འཁོར་དྲུག་བརྒྱད་ཅུ་གྱ་གཉིས་དང་བག་གཉིས། གཟི་རྐྱེབ་ཆོས་སྲུང་དང་རོགས་གཅིག་བཅས་ཟླ་བ་གསུམ་དང་། ཡང་མི་གསུམ་ཟླ་བ་གཉིས་བཅས་ལ་ཕོག་ཡོན་འཁོར་དྲུག་བཅུ་བདུན་དང་བག་ཕྱེད་གསུམ། མི་ལག་ཆབ་མགར། ལྷུ་མགོན་སོགས་ལ་འཁོར་དྲུག་བཅུ། ཐམས་ཅད་འབོར་བསྡམས་འཁོར་དྲུག་སུམ་བརྒྱ་དང་བཅུ་དྲུག་
ཕག་གཅིག་སོང་། སྐྱེས་རབས་བྲིས་ཡོན་ལྷ་བཟོ་དབུ་དམངས་བདུན་གཡོག་གཉིས་བཅས་ཟླ་བ་ལྔ་དང་ཞག་བཅུ་ལ་ཕོག་ཡོན། ཐོག་མཐའ་བར་གྱི་སྟོན་ཆས་དབུ་རྟ་གོས་གནང་སྦྱིན་བཅས་འབོར་འཁོར་དྲུག་ཉིས་བརྒྱ་དང་སོ་གཉིས། གསུང་རབ་ཀྱི་གླེགས་ཤིང་བཟོ་མཁན་ལ་གླ་ཆས་འཁོར་དྲུག་བཅུ་བཞི་བཅས་སོང་། རྟེན་བཞེངས་སྣ་སེལ་རིམ་གྲོར་འཁོར་དྲུག་བརྒྱ་དང་དགུ་བཅུ་གོ་གཉིས། གཟུངས་ཤོག་རྒྱ་ཤོག་ཁ་ཆིག་ཁྲི་ལྔ་བརྒྱར་དངུལ་སྲང་ཉེར་གཅིག །རྒྱ་མཚལ་སྲང་བརྒྱ་དང་ལྔ་ལ་དངུལ་སྲང་བཅུ་དང་ཞོ་ལྔ། གནོད་སྦྱིན་འཁོར་ལོ་སྒྲུབ་རྒྱུ་དང་། བུམ་གཏེར་སྒྲུབ་རྒྱུ། རབ་གནས་ཡོན་བཅས་འཁོར་དྲུག་ཉིས་བརྒྱ་དང་གྱ་བརྒྱད། ལྷ་མགར་རྣམས་ལ་ལོན་ཕོག་བཅས་འཁོར་དྲུག་བཅུ། དེ་དག་བསྡམས་པས་འཁོར་དྲུག་ལྔ་བརྒྱ་དང་བཅུ་དྲུག་གཞན་ཡང་སྒྲོལ་དཀར་ཉེར་གཅིག །སྒྲོལ་ལྗང་ཉེར་གཅིག །ཚེ་ལྷ་རྣམ་གསུམ། མཚན་བརྒྱད། གནས་བཅུ་སྐོར་བསླུ་ཡོན་འཁོར་དྲུག་ཉིས་བརྒྱ་དང་བདུན་ཅུ་དོན་དགུ་བག་གསུམ་བཅས་སོང་ངོ་། །རྟེན་དེ་དག་དང་རྗེས་འབྲེལ་མཆོད་ཆས་སྐོར་ལ། བཟང་གོས་རྒྱན་བཞི་ཡུགས་གཉིས་ཀྱིས་གཞི་བྱས་ཤིང་། གོས་འདྲ་ཡམ་བུའི་དམར་སྨུག་ཁ་བཅུ་དྲུག་དང་། འཇམ་སྔོ་ནག་ཁ་བཅུ་གཅིག་བཅས་
ཀྱིས་འཇའ་ཁྲིད་བྱས་པའི་ཀ་སར་གསུམ། ཀ་འཕེན་བཅུ་གཉིས་ནང་སྐྱིན་ཁབ་དང་གསེར་སྐུད་ཐག་དྲུབ་བྱས་པའི་རྒྱ་མཐོང་ཀ་འཕེན་གཉིས། གཞན་ཡང་ཀ་འཕེན་གསེར་ལས་བྱས་པ་ཊཾ་དྲུག་ལ། དམར་པོ་གཉིས། དམར་སྨུག་གཉིས། སྔོ་ནག་གཉིས་བཅས་ཆ་གསུམ། ཇོ་བོའི་མདུན་ཀ་བཞི་ལ་གོས་ཆེན་ཐག་དྲུབ་ཅན་འཕེན་བཞི་སྟེ་རེ་རེ་ལ་དངུལ་སྲང་བཞི་བཅུ་རེ་རི་བ། དུང་དཀར་རག་གསེར་གཤོག་པ་ཅན་དཔུས་ལེགས་ཆ་གཅིག །དངུལ་གྱི་མཚན་ཀོང་གཅིག་ལ་དངུལ་སྲང་ལྔ་བཅུ་ཡོད་པ། བདུན་ཚར་ཆ་གཅིག་ལ་དངུལ་སྲང་ལྔ་བཅུ། མཁར་བའི་མཚན་ཀོང་གཅིག་སྒྲོས་ལྡན། བརྒྱ་ཀོང་གཅིག །ཟངས་ཀྱི་ཆུ་སྐྱེས་གཅིག་ནང་གསེར་དངུལ་གྱི་མེ་ཏོག་གཡུ་བྱེར་གྱི་ཕྲ་རྒྱན་ཅན། རོལ་མོ་ཧོར་སྦུབས་སྤུས་ལེགས་གཅིག་ལ་དངུལ་སྲང་བཅུ་རི་བ། ཟངས་ཀྱི་མཆོད་གཏིབ་ཆེ་ལེགས་གཅིག །གསེར་རྔ་ཆ་གཅིག །གོས་ཆེན་གྱི་ནོར་ཕྲེང་བཅས་ཡོད་དོ། །གཞན་ཡང་སྤྱན་གཟིགས་མཆོད་པའི་རྫས་ལ། ལྕོག་ཁེབ་དང་ལྕི་ཁབ་སོགས་བཟང་གོས་སྣ་ཚོགས་འདྲེས་པའི་ཀ་འཕེན་ཆ་ལ་དངུལ་སྲང་བཞི་བཅུ། གསེར་ཊཾ་ཅན་དམར་སྨུག་ཆ། སྔོ་ནག་ཆ། དམར་སེར་ཆ་བཅས་ལ་དངུལ་སྲང་བདུན་ཅུ། ཚེམ་དྲུབ་ཅན་རྒྱན་བཞི་ཆ་གཉིས་ལ་དངུལ་
སྲང་བདུན་ཅུ་རེ། གནམ་ཡོལ་རྒྱན་བཞི་དམར་ཁྲ་ཡུགས། ཧུ་ཙུ་དམར་པོས་མཐའ་བསྐོར། འཇའ་འགྲིགས་བཅས་ལ་དངུལ་སྲང་ཉེར་ལྔ་བཅས་འབོར་བསྡམས་རྡོ་ཚད་ཕྱེད་དྲུག་གི་རྒྱུ་རྩ་སོང་བས་མཚོན་སྤུས་དག་ཅིང་ནོམ་པ་ཆེ་བའི་བཀོད་པའི་བྱེ་བྲག་རྣམས་ཀྱང་འདུ་མཛད་པའོ། །དེ་ནས་འཇམ་དབྱངས་བླ་མ་ཐམས་ཅད་མཁྱེན་གཟིགས་ཆེན་པོའི་མདུན་ནས་སའི་དབང་མོ་མཆོག་ལ་ལེགས་འབུལ་དང་། མགར་རིགས་སྐོར་ལ་གནང་སྦྱིན་དགའ་སྟོན་བཅས་པའི་འཕྲོས་སུ་བདག་པོ་གཞུང་ནས་ཀྱང་ལེགས་འབུལ་དང་། མགར་རིགས་ལ་གནང་སྦྱིན་སོགས་སྤུས་ནམ་དག་ཅིང་རྒྱ་ཆེ་བ་དགའ་སྟོན་བཅས་སྩལ་བར་མཛད་པའང་ཞར་བྱུང་དུ་སྨོས་པའོ། །དེ་དག་གི་ཐོག་མཐའ་བར་གསུམ་དུ་ལས་ཀྱི་ཚགས་འཛིན་དོ་དམ་པ་ནི། མདུན་ན་འདོན་ཤིང་སཱ་ལ་ལྟ་བུའི་རྒྱུད་དུ་སྐྱེས་ཤིང་། ཤེས་རབ། དད་པ། བརྩོན་འགྲུས་སོགས་སྐྱེས་བུ་དྲ་མ་ཆེན་པོའི་ཡོན་ཏན་དང་ལྡན་པ་བཀྲ་ཤིས་ཚེ་འཕེལ་ནས་བགྱིས་པའོ། །གཏོང་བའི་རྐང་པས་སེར་སྣ་སྟོབས་ལྡན་ནི། །རྣམ་པར་བཅོམ་ནས་རྟེན་གསུམ་གླིང་བཞིའི་དཔལ། །སྐྱེ་རྒུའི་མགོན་དུ་ལེན་པའི་ཕྲིན་ལས་ཅན། །ཁྱབ་མཇུག་སྙིང་གི་ཆུ་སྐྱེས་ལས་ཐོན་བཞིན། །དངོས་པོ་རྫོགས་ལྡན་སྤྲིན་གྱི་བླ་བྲེ་ནི། །
ཕྱོགས་ཀྱི་མུ་ཁྱུད་དོག་པོར་བཀོད་པ་ལས། །འགྲོ་ལ་ཕན་བདེ་སྟེར་བའི་ཆོས་ཉིད་ཅན། །ནོར་བུའི་གྲུ་ཆར་སྐྱེ་རྒུ་སྨན་སླད་བསྙིལ། །ཡོངས་འདུ་ཉམས་དགའི་མཚལ་ན་མཐོ་རིས་ཀྱི། །བདེ་བས་རྩེ་རྣམས་དེ་བཏང་འདིར་ལྷག་སྟེ། །རྟེན་གསུམ་བསྐྲུན་པའི་ལས་ལ་ཡི་རངས་ན། །སྐལ་བཟང་རྣམས་ནི་དགྱེས་པར་མཛད་པར་རིགས། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །དྲུག་པ་རྟེན་གྱི་བཞུགས་བྱང་དཀར་ཆག་དངོས་ནི། དེ་ལྟར་རྟེན་གསུམ་རིན་པོ་ཆེ་བསྐྲུན་པ་མཐར་ཕྱིན་པའི་ཚེ་གཟུངས་འབུལ་གྱི་རིམ་པའི་སྐབས་སུ་སོན་པ་ན། སའི་དབང་མོ་མཆོག་གིས་རང་ཅག་ལ་མཐར་ཕྱིན་དགོས་པའི་གསུང་བསྐུལ་མཛད་པས། གཙོ་བོོར་ཀུན་མཁྱེན་བླ་མ་རིན་པོ་ཆེར་བསླབ་སྟོན་ཞུས་ཏེ་གཟུངས་འབུལ་རབ་གནས་ཀྱི་བར་དུ་ཇི་ལྟར་འོས་པའི་བཀའ་སྩལ་གནང་བ་ཉིད་གཞིར་བྱས། ཕྱག་བཞེས་ཚད་མ་དང་མཐོང་གོམས་ཀྱི་རྒྱུན་ལ་རང་རྟོག་གིས་མ་བསླད་པར། རྣམ་པར་དཀར་བའི་བསོད་ནམས་ཀྱི་ཕུང་པོ་སླར་ཡང་སྤེལ་བའི་ཕྱིར་ཆར་པ་ཆུ་གྲོགས་སུ་སྨིན་པའི་ལྷག་བསམ་གྱིས་ཞབས་འདེགས་ཞུས་པ་དང་། ཡོངས་འཛིན་མཁན་པོ་དཀོན་མཆོག་འོད་ཟེར། རྡོར་བྲག་སྤྲུལ་པའི་སྐུ་རིན་པོ་ཆེ། ཆོས་རྗེ་རྒྱལ་མཚན་བླ་མ། གྲ་སྒང་དགོན་དཔོན་བླ་མ་
ཝ་ར་བླ་མ་དཔལ་ལྡན་ཡེ་ཤེས། མཁན་བླ་མ་ཀརྨ་བཀྲ་ཤིས་འོད་ཟེར། དགེ་བའི་བཤེས་གཉེན་ཕན་བདེ་བཟང་པོ་སོགས་མཁས་བཙུན་བཟང་གསུམ་དང་། མཁྱེན་བརྩེ་ནུས་གསུམ་གྱི་དབང་ཕྱུག་བཅུ་ཕྲག་གསུམ་ཙམ་འཛོམ་པས། ཐོག་མར་ས་གཞི་ལས་སུ་རུང་བའི་ཕྱིར། རྡོར་བྲག་སྤྲུལ་པའི་སྐུས་འཇམ་དཔལ་ཚེ་བདག་གི་སྒོ་ནས་དམ་སྲི་མནན་པ་དང་། ཕུར་པ་བླ་མས་ས་ལུགས་ཕུར་པའི་དགྲ་དུར་ཕུང་གསུམ་གྱི་མནན་པ། ཞི་བའི་སྦྱིན་སྲེག་ཚད་དང་ལྡན་པ་རྣམས་སྔོན་དུ་འགྲོ་བས་གཟུངས་འབུལ་གྱི་བྱ་བ་ལ་ཞུགས་པ་སྟེ། དེ་ལ་གཉིས། གཟུངས་སྒྲུབ་ཇི་ལྟར་བགྱིས་པ་དང་། གཞུག་ཚུལ་དངོས་སོ། །དང་པོ་ནི། ནང་གཞུག་གི་གཙོ་བོ་སྲོག་ཤིང་ཡིན་པས། ཁྲོ་རྒྱལ་རྡོ་རྗེ་གྲོ་ལོང་ཀྱིས་བྱིན་གྱིས་བརླབས་པའི་ཁམས་བོད་སྟག་ཚང་མིང་ཅན་བཅུ་གསུམ་གྱི་ཡ་གྱལ་རོང་རྨེ་དཀར་མོ་སྟག་ཚང་ནས་བཏུས་པའི་ཤུག་པ་ལ་རྩེ་མོར་མཆོད་རྟེན་དང་རྩ་བར་རྡོ་རྗེ་ཕྱེད་པར་བཅོས་པ་ལ་གསེར་ཞུན་བྱུགས། དངོས་གཞི་གྲུ་བཞི་རྩ་རྩེ་ལྡན་པར་རྒྱ་མཚལ་བྱུགས་ཤིང་དགེ་སློང་ཚད་དང་ལྡན་པས་གནས་ལྔའི་ཡི་གེ་དང་གཟུངས་ཆེན་སྡེ་ལྔ་སོགས་འབྲི་བྱ་རྣམས་གསེར་ཞུན་གྱིས་དབུ་ཅན་བར་མཚམས་མེད་པར་བྲིས། གཡས་གཡོན་
དུ་རྩྭ་དུརྦ་དང་སྐུ་ཤའང་བཅིངས་ཤིང་བཟང་གོས་དང་དར་སེར་པོས་ལེགས་པར་དཀྲིས་པ་སྐུ་བརྟན་གཉིས་ལ་གསང་གནས་ནས་གཙུག་ཏོར་གྱི་བར་དང་། མཆོད་རྟེན་ལ་བུམ་གདན་ནས་ཆོས་འཁོར་གྱི་བར་དུ་སླེབས་པ་འདུ་བྱས། དེའང་བོད་སྔ་མ་ཕལ་ཆེར་གྱིས་རྩ་དབུ་རྐྱང་རོ་གསུམ་མཚོན་བྱེད་དུ་བཞེད་པའི་ཕྱག་བཞེས་སོར་བཞག་བྱས་ཏེ་དཱུརྦ་དང་ཀུ་ཤ་བཅིངས་པ་ཡིན་ལ། རྒྱ་བལ་གྱི་ཕྱག་རྒྱུན་ལྡན་པའི་མཁས་པ་ཚད་མ་འགའ་ཞིག་མཚོན་དོན་དེ་ཉིད་ཁུངས་མེད་རང་བཟོ་སྦྱར་བས་མི་འཐད་པར་བཞེད་ཅིང་། དཱུརྦ་དང་ཀུ་ཤ་འབུལ་བར་མི་མཛད་པའང་འཐད་དེ། སྤྱིར་སྲོག་ཤིང་དགེ་བཅུའི་དག་པར་བཤད་པ་ལས་རྩ་དབུ་མར་འཆད་པའི་གཞུང་མེད་པ་དང་། མཆོད་རྟེན་ཆོས་སྐུའི་རྟེན་ལ་རྩ་གསུམ་གྱི་མཚོན་བྱེད་མི་འཐད་པ་དང་། སྐུ་གཟུགས་ལ་མིའི་རིགས་འདྲར་སྦྱོར་རུང་། སངས་རྒྱས་ལྟ་བུའི་སྐུ་བརྙན་ལ་གཟུང་འཛིན་རྣམ་པར་དག་པས་རོ་རྐྱང་དབུ་མར་ཐམ་དགོས་པ་དང་། བླ་སྐུ་ལྟ་བུར་ཡང་དག་བྱ་དང་སྦྱར་དགོས་པའི་ངེས་པ་མེད་པ་མ་ཟད། སྤྱིར་སྐུ་བརྙན་ལ་སྲོག་ཤིང་ཆེད་དུ་བསྔགས་པ་མེད་པའི་ལུངས་མེད་པའི་ཕྱིར་རོ། །དེ་ནས་གཏེར་གསར་བཀྲ་ཤིས་གཏེར་བུམ་གཙོ་འཁོར་དགུ་ཟངས་ལས་བཅོས། སོ་སོའི་ཙཀྲ། འབྱུང་
ལྔའི་ཉེས་སེལ་ཁ་བསྒྱུར་བཅས་དར་ཤོག་ཁ་དོག་གཞུང་མཐུན་ལ་གསེར་དངུལ་གྱི་ཁུ་བས་བྲིས། སྤྱི་དང་བྱེ་བྲག་པའི་རྫས་གཙང་ཞིང་དག་པས་གཏམས་ཏེ་གཞུང་མཐུན་ཚད་ལྡན་བསྒྲུབས། བླ་མ་ནོར་ལྷ་ཟངས་བུམ་དུ་དར་དམར་ལ་གསེར་གྱིས་བྲིས་པའི་གླང་འཁོར་རྫས་སྣ་ཆ་ཚང་བ་ནོར་བུར་བསླབས་པའི་རིལ་བུ་དང་བཅས་པ་རང་གཞུང་གིས་བསྒྲུབས། གནོད་སྦྱིན་ཕོ་དགུ་མོ་དགུའི་འཁྲུལ་འཁོར་རྗེ་བཙུན་གྲགས་པའི་བཞེད་པ་ལྟར་གསེར་ཟངས་ལ་གཟོང་་རིས་བྱས་པ་ཆ་གསུམ། དགེ་བའི་འདོད་འཇོའི་དགོངས་པ་ཡབ་རྐྱང་། ཡུམ་རྐྱང་། ཡབ་ཡུམ་སྦྲགས་པའི་འཁྲུལ་འཁོར་རྒྱས་བསྡུས་རིགས་བཟང་ཤིང་གི་བྱང་བུ་དང་རྒྱ་ཤོག་ལ་སྤར་བཏབ་པ་ཆ་གྲངས་སུམ་བརྒྱ་བརྒལ་བ་དང་། མགོན་པོ་ཡིད་བཞིན་ནོར་བུའི་གཏེར་བུམ་ཟངས་ལས་བཅོས་པ་གསུམ་དང་། རྫ་བུམ་དུ་མར་སྐུ་བརྙན་གསེར་དངུལ་གྱི་ཞུན་མས་བྱུགས་པ། གཟུངས་སྔགས། འདོད་གསོལ། གཡང་རྫས་ཀྱིས་གཏམས་པ་རྣམས་ངོས་དང་རྫོགས་ཆེན་མཁན་པོ་སོགས་དཔོན་སློབ་བཅུ་ལྷག་གིས་ཞག་བདུན་ཕྲག་གི་ཁོངས་སུ་རྟགས་ཐོན་བསྒྲུབས། གཏེར་གསར་ཐུགས་རྗེ་ཆེན་པོ་ཡིད་བཞིན་འཁོར་ལོའི་ལས་ཚོགས་ཡིད་མཐུན་པ། ཚེ་རིང་བ།
ནད་སེལ་བ། ནོར་རྒྱས་པ། ཆོས་འཕེལ་ཞིང་གྲོལ་བ་བཞི་ལྡན་དུ་འབྱུང་བའི་བུམ་པ་ལྔ་པོའང་སོ་སོའི་སྐུ་གཟུགས་སྔགས་བྱང་འདོད་གསོལ་བཟང་ཤིང་ལ་བྲིས་པ་དང་། གཞུང་མཐུན་བྱེ་བྲག་ཁྱད་པར་བའི་རྫས་སྣས་བཀངས་ཏེ་ཚུལ་བཞིན་བསྒྲུབས། ས་ལུགས་སེང་གེ་སྒྲའི་ལས་ཚོགས་ཀླུ་བུམ་གཙོ་བོ་ཟངས་དང་འཁོར་བརྒྱད་རྫ་བུམ་དང་། ཀླུ་དབང་རྒྱལ་པོའི་བུམ་པ་བཅས་སྐུ་དང་སྔགས་བྱང་འདོད་གསོལ་ཀླུ་སྨན་སོགས་བུམ་རྫས་གཙང་དག་གིས་བཀངས་ནས་བསྙེན་སོང་རྣམས་ཀྱིས་ཞག་བདུན་ཤ་ཆང་སྤངས་པའི་གཙང་སྦྲ་བཅས་བསྒྲུབས། རང་གླིང་ཕུར་པ་ལས་འབྱུང་བའི་ཀླུ་ནོར་རྒྱས་བུམ་པ། སྟག་ཤམ་བདུད་འདུལ་དྲག་མོའི་ལས་ཚོགས་ས་ལྷའི་གཏེར་བུམ་དང་། སྐྱི་གྲོང་ཐུགས་རྡོར་བའི་རྩ་གསུམ་དབང་ཆེན་འདུས་པའི་ལས་ཚོགས་བཀྲ་ཤིས་གཏེར་བུམ་རྣམས་ཀྱང་སོ་སོའི་རང་གཞུང་ལྟར་སྐུ་གཟུགས། རིང་བསྲེལ། རྫས་ཀྱི་ཁྱད་པར་རྣམས་གཙང་ཞིང་དག་པས་བཀངས་ནས་སོ་སོའི་གཞུང་དང་ཕྱག་ལེན་གྱི་ངེས་པས་བསྒྲུབས། ཛཾ་དཀར་རིགས་ལྔའི་གྭའུ་ཟངས་ལས་བཅོས་པར་གཙོ་འཁོར་གྱི་སྐུ་གཟུགས་སྔགས་བྱང་འབྲང་རྒྱས་གཡང་རྫས་ཀྱིས་གཏམས་པ་དང་། ཐོད་པ་མཚན་ལྡན་དུ་ཛཾ་དམར་སྲོག་འཁོར་ཐོད་རྫས་
སྤྱི་དང་གནད་ཀྱི་རྫས་ལྡན། རཏྣའི་རྟ་གསང་ལས་ཚོགས་ཛིན་ག་ཙིཏྟ་སྲོག་གི་འཁོར་ལོ་སུམ་སྦྲགས་གཞུང་མཐུན་རྫས་ཀྱིས་གཏམས་པའི་ཐོད་པ་རྣམས་ཀྱང་སོ་སོའི་གཞུང་མཐུན་གྱིས་སྒྲུབ་པ་ཞག་བདུན་ཕྲག་རེ་མཛད། རིག་བྱེད་མ། འདོད་རྒྱལ། ཚོགས་བདག་སྟེ་དམར་པོ་སྐོར་གསུམ་གྱི་སྐུ་རྟེན་སྲོག་འཁོར་དང་བཅས་པའང་ཀུན་མཁྱེན་ལྔ་པ་རིན་པོ་ཆེས་མཛད་པའི་ཕྱག་བཞེས་ལྟར་བདུན་ཕྲག་གཅིག་ཏུ་བསྒྲུབས། གཏེར་རྙིང་ལུགས་སྲོལ་གསམ་འདུས། གླང་ཆེན་བཅས་ཆོག་སྨད་ཆར་མཚོན་ཆ་སྣེ་ཚང་དང་། སྟོད་ཆ་རྒྱུ་སྐར་རྒྱལ་ལ་ཕྱུག་པོ་དགུའི་ལག་ནས་བླངས་པའི་འབྲུ་ནོར་སོགས་གཡང་རྫས་ནོར་གཟུངས་རྣམས་ཀྱིས་བཀངས་ནས་བསྐྱེད་བསྟིམས་ནན་ཏུ་བགྱིས། ཀློང་གསལ་གཏེར་བྱོན་ཡེ་འབར་ལས་ཚོགས། རི་དབང་སྤྱི་བཅོས། ནཱ་ག་སྤྱི་བཅོས། ཉེས་པ་ཀུན་སེལ་དབང་གི་བུམ་པ་སོགས་གཞུང་དང་བླ་མ་བརྒྱུད་པའི་ཕྱག་བཞེས་ལྟར་ཚད་ལྡན་དམིགས་སུ་བསལ་བ་བཅའ་སྒྲུབ་བྱས། ཛཾ་སེར་ནག །དཔལ་ཆེན་མ་སོགས་སོ་སོའི་སྐུ་དང་། སྔགས་བྱང་། འདོད་གསོལ། བུམ་རྫས་བཅས་པ་ལ་སོ་སོར་བསྐྱེད་རྫས་བརྟན་བཞུགས་དང་། ས་སྙིང་བུམ་པར་གནམ་ཆོས་དང་འབྱུང་རྩིས་ལུགས་སྦྲགས་པ་ཆགས་མེད་ཞབས་ཀྱི་ལུགས་ལྟར་བཅའ་སྒྲུབ་བྱས། གནས་བརྟན་བཅུ་དྲུག་གི་སྒོ་ནས་དགེ་འདུན་འདུ་བ་དང་མཐུན་པའི་འཁོར་ལོ་གནམ་ཆོས་ཐེམས་མེད་ལས་འབྱུང་བ་སྡོམ་ལྡན་གྱིས་བྲིས་
ཤིང་ལུགས་དེ་ཉིད་ཀྱི་སྒོ་ནས་བསྒྲུབས། ཆོས་དབང་གཏེར་བྱོན་བཅས་ཆོག་སྲོག་ཤིང་བརྟན་པའི་ཙཀྲ་ཀཱ་ཤི་ངུར་སྨྲིག་ལ་བྲིས་པ་ཕྱག་རྒྱ་བཞི་ལྡན་གྱིས་རབ་ཏུ་གནས། དགོངས་འདུས་རྒྱུད་དགུ་དང་མཐོང་གྲོལ། གཏེར་ཁ་གསར་རྙིང་གི་བཏགས་གྲོལ་མཐོང་གྲོལ་གྱི་གླེགས་བམ་རྣམས་སོ་སོར་བཤད་པའི་རྫས་དང་དྲི་བཟང་སྦྱར་བའི་མཚལ་གྱིས་བཏབ་ཅིང་ལས་གཞུང་སོ་སོ་བསྲངས་ཤིང་བསྐྱེད་བསྟིམས་དང་། རྒྱུད་དང་བཏགས་གྲོལ་སྔགས་རྣམས་ཚར་གྲངས་བཟླ་ཞིང་ཚོགས་མཆོད་རྟེན་བཞུགས་སོགས་གཞུང་མཐུན་བཅས་གྲོལ་བ་བཞི་ལྡན་གྱི་དངོས་པོར་བསྒྲུབས། གཙུག་ཏོར་གདུགས་དཀར་འཁོར་ལོ་ཁ་དོག་བྱུག་རྫས་མན་ངག་ལྟར་ཆད་ལྷག་མེད་པ་ལ་བསྐྱེད་བསྟིམས་སྒྲུབ་པ་ཚད་ལྡན་ཅན་ཆ་གྲངས་དང་། ཀུན་མཁྱེན་འཇིགས་མེད་གླིང་པའི་དགོངས་གཏེར་ཀློང་ཆེན་སྙིང་ཐིག་གི་ཡབ་བཀའི་བཏགས་སྲོལ། ཡུམ་བཀའི་མཐོང་གྲོལ། མཁའ་འགྲོ་བཞིའི་ཙཀྲས་སོའི་རྫས་རི་ལ་བཅས་ཀུན་མཁྱེན་བླ་མ་འཇམ་དབྱངས་མཁྱེན་བརྩེ་རིན་པོ་ཆེས་བྱིན་རླབས་ཀྱི་ཕུང་པོར་བསྒྲུབས་ནས་སྩལ། ཐུར་མཁར་ཨ་ཇོ་བལ་པོའི་གཏེར་མ་བསོད་ནམས་གླང་པོ་སྟོབས་སྐྱེད་ཙཀྲ་ཆ་མང་པོ་ལྔ་པ་རིན་པོ་ཆེའི་ཕྱག་བཞེས་ལྟར་མཁའ་འགྲོ་ལྔ་བསྐྱེད་བསྟིམས་དང་རང་སྔགས་བཟླས་པ་བཅས་བགྱིས། བླ་མ་གོང་མ་ཁ་ཅིག་གི་ཕྱག་སྲོལ་ལྟར་ཡུལ་ཕྱོགས་སྲུང་བའི་དོན་དུ་རྡོར་འབུམ་ཆོས་གྲགས་ཀྱི་གཏེར་མ་བདུད་རྩི་བུམ་
པའི་ཆ་ལ་གནང་རིམས་སྲུང་བའི་ཙཀྲ་རྡོ་རྗེ་ཁྲབ་རིང་། སྐལ་ལྡན་བྱིས་པའི་ཟབ་གཏེར་གཉན་གག་ལྷོག་གཟེར་གསུམ་གྱི་གཙུན་འཁོར་ནག་པོ་དག་ཀྱང་རྫས་དང་ལྟེ་བས་དྲིལ་མན་ངག་ཕྱག་བཞེས་རྒྱུན་མ་འཆུག་པར་རིག་འཛིན་གོང་མའི་ཕྱག་ལེན་ལྟར་སོ་སོར་བསྒྲུབས། གོང་སྨོས་སྒྲུབ་པ་པོ་དམིགས་སུ་མ་བསལ་བ་དགོངས་འདུས། སྟག་ཤམ། གཏེར་གསར་སྐོར་རྣམས་རང་ནས་ཞག་གྲངས་ཅི་འགྲུབ་རེ་དང་། ས་ལུགས་རྣམས་དགོན་ཆེན་རྒྱལ་མཚན་བླ་མ་དང་། གྲྭ་སྒང་སྒྲུབ་སྡེའི་བླ་མ། དགེ་འདུན་འདུ་འཁོར་དང་། ཛཾ་དཀར་གྭའུ། གཏེར་བུམ་ཙཀྲ་ཕྲན་ཚོགས་ཕལ་མོ་ཆེ་མཁན་བླ་མ་ཀརྨ་བཀྲ་ཤིས་འོད་ཟེར། སྙིང་ཐིག་སོགས་རྒྱུད་དང་བཏགས་གྲོལ་འགའ་ཞིག་མཁན་བླ་མ་དཀོན་མཆོག་འོད་ཟེར། ཛཾ་དམར་ཐོད་པ། ཐུགས་རྡོར་བཀྲ་ཤིས་གཏེར་བུམ། རིམས་སྲུང་སོགས་རྡོར་བྲག་མཆོག་སྤྲུལ་རིན་པོ་ཆེས་བསྒྲུབས་པར་མཛད་པ་སྟེ། མདོར་ན་བུམ་གཏེར། འཁོར་ལོ། རྒྱུད་དང་མཐོང་གྲོལ་རིགས་ཐམས་ཅད་དར་རས་ཀྱི་ན་བཟའ་སོ་སོར་འོས་པའི་ཁ་དོག་ཅན་གྱིས་བཏུམས། གཟུངས་ཐམས་ཅད་ལ་དྲི་བཟང་བྱུགས་ཤིང་རས་སེར་སྤོས་དཀྲིས་ནས། སྦྱོང་ཁྲུས་སྔོན་དུ་འགྲོ་བས་སོ་སོའི་གཞུང་མཐུན་བསྒྲུབས། མཐར་འདོད་དོན་ནན་དུ་གསོལ་ཞིང་བརྟན་བཞུགས་ཤིས་བརྗོད་ཀྱིས་མངའ་གསོལ་བ་ཤ་སྟག་ལས་
རྫས་དང་སྒྲུབ་པ་ལག་ལེན་ཇི་བཞིན་མ་གྲུབ་པའི་སླ་ཆོས་དང་གཟུགས་བརྙན་ཙམ་ལ་རྣམ་གྲངས་སུ་བགྲང་བ་ནི་གཅིག་ཀྱང་མ་མཆིས་སོ། །དེ་ནས་ནང་གཞུག་རིགས་ཐམས་ཅད་ལྷན་ཅིག་ཚོགས་པར་བྱས་ནས་སྦྱོང་བ་དང་། རྣམ་འཇོམས་དང་སྨེ་བརྩེགས་ཀྱིས་བསྒྲུབས་པའི་བུམ་ཁྲུས་སྔོན་དུ་འགྲོ་བས། ཐར་རྩེ་ཞབས་དྲུང་རིན་པོ་ཆེས་ཚེ་དཔག་ལྷ་དགུ་དང་། ཁོ་བོས་རྒྱུད་སྡེ་ལྔ་གཙོ་བསྡུས་ལ་བརྟེན་པའི་རབ་གནས་ལེགས་པར་བགྱིས། བྱེ་བྲག་གཟུངས་སྔགས་ཀྱི་རིགས་ལ་གཟུངས་སྒྲུབ་བྱ་ཚུལ་དརྤ་ཨཱ་ཙརྻའི་བྱ་བཏུས་ཀྱི་ཁུངས་ཀྱིས་ཟིན་པ་ལྟར་དགེ་ཕྱོགས་སྐོར་ནས་ཟབ་རྒྱས་ནན་ཏན་མཛད་པའི་ཕྱག་སྲོལ་ལྟར། བདག་བསྐྱེད་སྔོན་དུ་འགྲོ་བས་སྔགས་ཀྱི་ཚོགས་རྣམས་ཕྱོགས་བཞི་དབུས་ལྔར་པད་ཟླ་སོགས་ཀྱི་ཁྲིར་རིགས་ལྔར་ཕྱེ་བའི་ཡིག་འབྲུ་ལ། ཡེ་ཤེས་པའི་སྔགས་འབྲུ་བསྟིམས་ཏེ་གཟུངས་སྤར་དུ་གང་བཞུགས་ཚར་གྲངས་བཟླས་མཐར་བརྟན་བཞུགས་བྱ་བའི་གཟུངས་སྒྲུབ་ཀྱང་ཁོ་བོས་ཉིན་གཅིག་དང་། ཐར་བརྩེ་རིན་པོ་ཆེས་ཉིན་ཁ་ཤས་ལ་མཛད་པ་ཡིན་ནོ། །གཉིས་པ་ནི། དེ་ལྟར་གཟུངས་སྒྲུབ་ཚད་དང་ལྡན་པ་གྲུབ་ནས་གཟའ་ཚེས་བཟང་པོར་བཀྲ་ཤིས་ཤིང་གནས་ཁང་བྱིན་དབབ་པའི་ཕྱིར་དུ། ལྷུན་གྲུབ་སྟེང་གི་རྡོ་རྗེ་འཛིན་པ་
བསྙེན་སོང་དང་། དགེ་འདུན་ལུང་རྟོགས་ཡོན་ཏན་དང་ལྡན་པ་རྣམས་ཀྱིས་དཔལ་དུས་ཀྱི་འཁོར་ལོ་དང་། རྡོ་རྗེ་གུར་གྱིས་ཆོག་གར་གྱི་སྦྱོར་བ་བཅས་རྒྱས་པར་མཛད། རྟེན་རྣམས་ཀྱི་ནང་དུ་དྲི་བཟང་པོའི་སྨན་སྤོས་ཀྱི་འདམ་པ་བྱུགས་ཤིང་། ཇོ་བོ་རིན་པོ་ཆེའི་སྐུ་རྟེན་ལ་དུས་ཀྱི་འཁོར་ལོ་དང་བདེ་དགྱེས་སོགས་རྒྱུད་སྡེ་གོང་འོག་ནས་གསུངས་པའི་སྐྱེ་མཆེད་བྱིན་རླབས་དང་། གུ་རུ་རིན་པོ་ཆེ་ལ་མདོ་སྒྱུ་དོང་སྤྲུགས་རྣམས་ཀྱི་ལུས་དཀྱིལ་སྙིང་པོ་དག །ཁྱད་པར་སྟག་ཤམ་གཏེར་བྱོན་བླ་མ་ཡིད་བཞིན་ནོར་བུའི་སྐུ་རྟེན་མཐོང་གྲོལ་གྱི་བརྡ་ཡིག་དང་། བདུད་འདུལ་པད་འོད་ཀྱི་ལུགས་རྣམས་མཐིང་ཤོག་ལ་གསེར་ཞུན་གྱིས་བྲིས་པ་གནས་སོ་སོར་སྦྱར་ནས། རྟེན་རྣམས་གོང་འོག་མ་འཆོལ་བར་བཞུགས་སུ་གསོལ་བ་སྟེ།། ༈ །།ཐོག་མར་རྟེན་གཙོ་ཇོ་བོ་རིན་པོ་ཆེ་ལ། གདན་ཁྲིའི་འོག་ཏུ། རྒྱལ་བསྟན་དེ་འཛིན་དང་བཅས་པ་ལ་ལོག་པར་འཁུ་ཞིང་། འགྲོ་བའི་བདེ་སྐྱིད་འཇོམས་པར་བྱེད་པའི་ཡིད་སྲུབས་སྡེ་དང་བཅས་པ་ཐམས་ཅད་ཞི་བ་དང་། མེད་པ་དང་། བརླག་པར་འགྱུར་བའི་རྟེན་འབྱུང་དུ་མེའི་འཕྲུལ་འཁོར་གཅིག །རལ་གྲི་གཅིག །མདའ་གཅིག་རྣམས་མནན་ཏེ་གཡོ་མེད་ཏིང་ངེ་འཛིན་གྱིས་རྒྱས་
བཏབ། དེ་སྟེང་ས་འཛིན་གྱི་ནང་དུ་སྐྱེ་རྒུ་མཐའ་དག་ཕན་བདེའི་འབྱོར་པས་འཚོ་ཞིང་། བསྟན་པ་རིན་པོ་ཆེ་རྙེད་པ་དང་བཀུར་སྟིའི་སྒོ་ནས་འཇིག་རྟེན་ན་ཡུན་རིང་གནས་པའི་སླད་དུ་སེང་གེའི་སྒྲའི་ཀླུ་བུམ་དགུ། ཀླུ་དབང་རྒྱལ་པོའི་ཀླུ་བུམ་གཉིས། གཏེར་གསར་ཀླུ་བུམ་གཅིག །ས་སྙིང་གཏེར་བུམ་གཅིག །ས་ལྷའི་བུམ་གཏེར་གཙོ་འཁོར་ལྔ། ས་བདག་སྙིང་གཏེར་གཅིག་སེང་ཁྲིའི་ནང་། གླང་ཆེན་བཅས་ཆོག །ཐུགས་རྡོར་བཀྲ་ཤིས་གཏེར་བུམ། སྨད་ཕྱོགས་ལ། ཁྲབ་གཅིག །རྨོག་གཅིག །མེ་སྦོར་གཅིག །མདུང་གཅིག །མདའ་གཞུ་སག་ཇས་མ་བཅས་ཆ་གཅིག །རལ་གྲི་གསེར་ཤུབས་ཅན་གཅིག །རྔ་གཅིག་རྔ་ལྕག་བཅས། སྦུབས་ཆལ་ཆ་གཅིག །སིལ་སྙན་ཆ་གཅིག །མཁར་རྔ་གཅིག །དུང་དམར་ཆ་གཅིག་དུང་དཀར་ཡ་གཅིག །རྒྱ་གླིང་གཅིག །ཇ་འབྲུ་དང་པོ་བག་གཉིས། འགོ་ཁག་རས་སྒྱེ་གཉིས། འབྲུ་དང་འཁོར་དྲུག་གསུམ། སྤོབས་རྩེ་འཁོར་དྲུག་བཅུ་གཅིག །མར་དོ་གཅིག །འབྲུ་སྣ་དང་ཤིང་ཐོག་སྣ་ཚོགས་རས་སྒྱེ་གསུམ། བཟང་ཇ་བག་གཉིས། ཤིས་བརྗོད་དང་འདོད་གསོལ་གྱི་སྐོར་ལ། མཛད་པ་བཅུ་གཉིས་ཀྱི་བཀྲ་ཤིས། ཚེ་དཔག་མེད་ཀྱི་མདོ་ལས་བྱུང་བའི་ཕ་
ཕྱིན་དྲུག་གི་སྨོན་ལམ་སཾ་སྐྲྀ་ཏའི་སྐད་དུ་བསྒྱུར་བ། ཕུན་སུམ་ཚོགས་འཛིན་སོགས་ཀྱི་བཀྲ་ཤིས། བསྟན་པའི་བདག་པོ་སོགས་ཀྱི་བཀྲ་ཤིས། བསྟན་པའི་དཔལ་གྱུར་སོགས་ཀྱི་བཀྲ་ཤིས། འབྱུང་པོ་གང་དག་སོགས་ཀྱི་བཀྲ་ཤིས། ཉིན་མོ་བདེ་ལེགས་སོགས་ཀྱི་བཀྲ་ཤིས་ཏེ་དེ་རྣམས་ཤློ་ཀ་རེ་རེ་སཾ་སྐྲྀ་ཏའི་སྐད་དུ་བསྒྱུར་བ་དང་། བཅོམ་ལྡན་འདས་ཀྱིས་ཁྱིམ་བདག་ངེས་པ་ལ་གསུངས་པའི་དཀོན་མཆོག་གསུམ་གྱི་བཀྲ་ཤིས། གཞན་ཡང་བཀྲ་ཤིས་ཐོར་བུའི་རིགས་རྣམས་ཀྱི་མཐར་རིག་པ་ཕུག་རོན་གྱི་གཟུངས་དང་། རྒྱལ་བའི་བསྟན་པ་རིན་པོ་ཆེ་སྒྲུབ་པ་དང་འཆད་པའི་སྒོ་ནས་ཕྱོགས་དུས་ཀུན་ཏུ་དར་ཞིང་རྒྱས་པ་དང་། དེ་འཛིན་གྱི་སྡེ་རྣམས་བསླབ་པ་གསུམ་དང་ཆོས་སྤྱོད་བཅུ་མཁས་ཚུལ་གསུམ་ལ་སོགས་པ་དམ་པའི་སྤྱོད་པ་འཕེལ་ཞིང་། སྐྱེ་རྒུ་སྤྱི་དང་བྱེ་བྲག་སྦྱིན་པའི་བདག་པོ་མངའ་རིས་དང་བཅས་པའི་ཚེ་བསོད་དཔལ་འབྱོར་སྙན་གྲགས་སོགས་ལེགས་ཚོགས་གང་ཇི་སྙེད་པ་རྒྱས་ཤིང་རྟག་ལ་འགྱུར་བ་མི་དམིགས་པའི་འདོད་གསོལ་གྱི་རིམ་པ་རྣམས་བཞུགས། པད་གདན་ནང་དུ། ཟངས་དཀར་བཀྲ་ཤིས་པའི་རི་མོ་ཅན་མར་ཁུས་གཏམས་པ། དེའི་སྟེང་དུ་གནོད་སྦྱིན་འཁོར་ལོ་རྣམས་དང་། གཏེར་གསར་བཀྲ་
ཤིས་གཏེར་བུམ་གཙོ་འཁོར་དགུ། ཛཾ་སེང་སྐུ་བརྙན། ཛཾ་དཀར་གྭའུ། ཛཾ་ནག །ཛཾ་ལྗང་། ནོར་རྒྱུན་མ། དཔལ་ཆེན་མ། ཚོགས་བདག་དཀར་པོ་རྣམས་ཀྱི་བུམ་གཏེར་རེ་རེ། དམར་པོ་སྒོར་གསུམ་བུམ་གཏེར་གསུམ། མགོན་དཀར་བུམ་པ་བཞུགས་སྣོད་སྒམ་ཆུང་བཅས། བསོད་ནམས་གླང་པོ་སྟོབས་སྐྱེད་ཀྱི་འཁོར་ལོ། གུ་གེ་ཆིག་དྲིལ། སྲུང་བ་རྡོ་རྗེ་ཁྲབ་རིང་། བསོད་ཐག་ཉིན་མོ་བདེ་ལེགས། གསེར་སྲང་གང་། དངུལ་རྟ་རྨིག་མ། བྱེ་རུ་རྒྱན་ལག །ཡང་བྱེ་རུ་དཀྲུགས་མ་རྡོག་གསུམ། མུ་ཏིག་བརྒྱ་ཞགས། ནལ་རྡོག་གཅིག །སྤོས་ཤེལ་རྡོག་གསུམ། གཡུ་གྲུ་དཀར་རྡོག་གཅིག །རྒྱ་གཡུ་རྡོག་གཅིག །མུ་མེན་རྡོག་གཅིག །དུང་རྡོག་གཅིག །འཆང་རྡོག་གཅིག །ཤེལ་རྡོག་གསུམ། གཟི་ལེབ་གཅིག །རྒྱལ་རོང་གི་གསེར་འགུ་ཕྲ་རྒྱན་ཅན་གཅིག །གཡང་ཊིའི་ཛཾ་ལྷའི་སྐུ། གཡང་ཊིའི་མཐེ་སྐོར་གཅིག །གཡང་ཊིའི་སྒྲོ་ཤུབས་གཅིག །གཡང་ཊིའི་ཆིགས་རྒྱན་གཅིག །བད་རག་ཚིགས་རྒྱན་གཅིག །གསེར་སྤུག་ཚིགས་རྒྱན་གཅིག །སྤུར་ལེན་ཚིགས་རྒྱན་གཅིག །གསེར་གྭ་གཡུ་ཕྲ་ཚེ་བུམ་ཅན། ཚཾ་ནའི་འཕྲུལ་བཟོས་གསེར་གྱི་མི་ཚེ་རིང་གཟུགས། བསེ་ཁ་སྒོའི་རྭ། བར་ལིང་ཁ་དོག་སྣ་
ལྔ། རྒྱ་རས་ཡུགས་ལྔ། མཛོད་གོས་དམར་སེར་ཡུགས། ན་བཟའ་སྒམ་བཅས་དང་། ཆོས་སྐྱོང་གཙོ་བོ་རྡོ་རྗེ་གུར་གྱི་མགོན་པོའི་སྐུ་རྟེན་ལི་མ་གཉིས། ཐམས་ཅད་མཁྱེན་པ་འཇམ་དབྱངས་མཁྱེན་བརྩེས་གནང་བའི་རྗེ་བཙུན་ཨ་ནེ་དྲུང་འཆི་མེད་བསྟན་པའི་ཉི་མའི་ཐུགས་དམ་རྟེན་ཁའུའི་རྡོ་ནག་ལ་བྲིས་པའི་དཔལ་མགོན་ཞལ་བྲམ་གཟུགས་ཅན་ཁྱད་འཕགས། གསུང་རྟེན་མགོན་པོད་མེ་འབར་མ། འཇམ་དབྱངས་མཁྱེན་བརྩེས་གནང་བའི་ཤཱ་ས་ན་གསེར་བྲིས་དང་། ཐུགས་རྟེན་ཁྱབ་བདག་གནས་གསར་པ་ངག་དབང་ཀུན་དགའ་ལེགས་པའི་འབྱུང་གནས་ཀྱི་ཕྱག་མཚན་གཡབ་དར་གྱི་གནམ་ལྕགས་རྡོ་རྗེ། གུར་གྱི་སྲོག་འཁོར་བཅས་དང་། གཞན་ཡང་གནམ་ལྕགས་རྡོ་རྗེ་ལྕགས་ཀྱི་གྲི་གུག །གསང་བར་ཉི་མ་གྲགས་པའི་གཏེར་ཕུར། རྒྱལ་བུ་སྙིང་སྟོབས་ཆེན་པོས་སྟག་མོ་ལ་ལུས་སྦྱིན་བཏང་དུས་ཀྱི་ན་བཟའ་འགེལ་ཤིང་ཁྱད་འཕགས། ཐུགས་ཀར་དགེ་འདུན་འདུ་བ་དང་མཐུན་པའི་འཁོར་ལོ། ལྟེ་བར་གཏེར་གསར་ཡིད་བཞིན་འཁོར་ལོའི་བུམ་པ་ལྔ། སོ་སོར་འབྲང་མ། གྲོང་ཁྱེར་སྒྲོལ་འཁོར། ཐུགས་རྗེ་ཆེན་པོའི་མཐོང་གྲོལ་འཁོར་ལོ་བཅས་ཆ་བདུན་རེ། སྲོག་ཤིང་མཉམ་དུ་ཆོས་དབང་བཅས་ཆོག་ཙཀྲ། རྩ་བར་མཆོག་གི་རིན་ཆེན་ལྔ་དང་། རིན་ཆེན་རིལ་བུ་དང་བཅས་པ་ལེགས་པར་བཙུགས་ཤིང་། བར་མཚམས་རྣམས་སུ་སྨན་སྤོས་འབྲུ་སྣའི་ཕུང་པོས་བྱུར་བུར་གཏམས་པའོ། །གཏེར་
བུམ་ཙཀྲ་རྟེན་རྫས་རྣམས་སོ་སོར་འཇོག་པའི་སྐབས་སུ་གསར་རྙིང་གཏེར་ཁ་རང་རང་གི་གཞུང་ལས་ཇི་སྐད་བཤད་པའི་བསྐྱེད་བསྟིམས་བརྟན་བཞུགས་སྨོན་ལམ་གྱི་རིམ་པ་རྣམས་ཀྱང་ཐར་རྩེ་རིན་པོ་ཆེ་སོགས་དང་རང་ནས་ཞིབ་རྒྱས་སུ་བགྱིས་སོ། །དེ་ནས་ནད་གཞུག་གི་གཙོ་བོ་ནི། དཔུང་བཟང་གིས་ཞུས་པའི་རྒྱུད་ལས། རིང་བསྲེལ་ཅན་གྱི་གཟུགས་སམ་མཆོད་རྟེན་ལ། །བསྟོད་ཅིང་ཕྲེང་བ་དྲི་དང་མར་མེ་དབུལ། །གདུགས་དང་རྒྱལ་མཚན་པ་དན་རོལ་མོ་དང་། །མཆོག་ཏུ་དད་པ་ཡིས་ནི་མཆོད་པར་བྱ། །ཞེས་གསུངས་པ་ལྟར་རིང་བསྲེལ་ཡིན་ལ། དེའང་སཱཙྪ་མཆོད་རྟེན་སོགས་ཆོས་སྐུའི་རིང་བསྲེལ། གཟུངས་སྔགས་གླེགས་བམ་སོགས་ཆོས་ཀྱི་རིང་བསྲེལ། གདུང་རུས་དབུ་ཀླད་སྐུ་ཤ་སོགས་སྐུ་གདུང་རིང་བསྲེལ། དབུ་ལོ་ན་བཟའ་སོགས་སྐུ་བ་ལ་རིང་བསྲེལ། ཤཱ་རཱི་རཾ་སོགས་ཡུངས་འབྲུ་ལྟ་བུའི་རིང་བསྲེལ་ཏེ། དེ་ལྟར་རིང་བསྲེལ་རྣམ་པ་ལྔའམ། ཡུངས་འབྲུ་ལྟ་བུ་དང་། ཆོས་ཀྱི་རིང་བསྲེལ་གང་རུང་བཞུགས་པ་ལའང་རིང་བསྲེལ་གྱི་སྙིང་པོ་ཅན་ཞེས་གསུངས་པ་ལས། འདིར་རིང་བསྲེལ་རྣམ་པ་ལྔ་ཀ་བཞུགས་པའི། ཐོག་མར་ཡུངས་འབྲུ་ལྟ་བུའི་རིང་བསྲེལ་ནི། དབུ་ནང་དུ། ལྷ་སྲས་མུ་ནེའི་རྣམ་འཕྲུལ་
རིན་སྤུངས་པ་ཆོས་རྒྱལ་ནོར་བུ་བཟང་པོའི་རྟེན་སྒམ་ནས་བྱུང་བའི་སྟོན་མཆོག་ཤཱཀྱ་ཐུབ་པའི་ཡུངས་འབྲུ་ལྟ་བུའི་རིང་བསྲེལ་གཙོས་རིང་བསྲེལ་རྣམ་བཞི་སེལ་མེད་ཁུངས་བཙུན་གྱི་རྣམ་གྲངས་སུམ་བརྒྱ་ལྔ་བཅུ། རང་གིས་ཕུལ་པ་སྒར་ཆེན་རྟེན་ཁྲོད་དུ་གང་བཞུགས་ཀྱི་འཕེལ་གདུང་། ཨ་ལོ་བླ་མ་ཁུ་དབོན་གསུམ་དུས་བཞུགས་པའི་རིང་བསྲེལ་ཁྱད་འཕགས། ཐར་རྩེ་ཞབས་དྲུང་རིན་པོ་ཆེས་གནང་བའི་སངས་རྒྱས་ཀྱི་རིང་བསྲེལ་རྡོག་བཅུ། རྫོགས་ཆེན་ནས་གནང་བ་དེ་བཞིན་གཤེགས་པའི་རིང་བསྲེལ། ར་སྟོན་སྟོབས་ལྡན་རྡོ་རྗེས་སྦྲག་ཡོངས་རྫོང་ནས་སྤྱན་དྲངས་པའི་སངས་རྒྱས་གསེར་ཐུབ་རིང་བསྲེལ་བཅས་བཞུགས། ཆོས་ཀྱི་རིང་བསྲེལ་སྐོར་ལ། སྐྱིལ་ཀྲུང་གི་དཀྱིལ་དུ་འདུལ་བ་པུསྟི་བཅུ་གསུམ། འདུལ་བ་མདོ་རྩ། མངོན་པ་མཛོད། བྱམས་ཆོས་སྡེ་ལྔ། བསྟོང་ཚོགས་པོད་གཅིག །དབུ་མ་རིག་ཚོགས་དྲུག །སྤྱོད་འཇུག །བཻ་དཀར་པོད་གཉིས། སྨན་ཡིག་རྒྱུད་བཞི། སྒྲ་མདོ་པོད་གཅིག །སྐུའི་སྨད་ཆར། དཔང་སྐོང་ཕྱག་བརྒྱ་པ། ཚེ་མདོ། ཤེས་རབ་སྙིང་པོ། ཤེས་ཕྱིན་སྡུད་པ། ཤེས་ཕྱིན་བརྒྱད་སྟོང་པ། ལངྐར་གཤེགས་པ། བྱམས་སྨོན། བཟང་སྤྱོད་རྣམས་ཆ་མང་བ་རེ། ཐུགས་ཀའི་སྟོད་སྨད་དུ།
གཟུངས་འདུས་པོད་གཉིས། གསང་འདུས། དམར་ནག་འཇིགས་གསུམ། གུར། སམྚ། རྡོ་རྗེ་གདན་བཞི། མ་ཧཱ་མཱ་ཡཱ། ཀྱཻ་རྡོ་རྗེ། འཁོར་ལོ་བདེ་མཆོག་རྣམས་ཀྱི་རྒྱུད། འཇམ་དཔལ་སྒྱུ་འཕྲུལ་དྲྭ་བ་ལས་མཚན་ཡང་དག་པར་བརྗོད་པ། དཔལ་དུས་ཀྱི་འཁོར་ལོའི་བསྡུས་རྒྱུད་རྣམས་དང་། དབུ་ནང་མཐོང་གྲོལ་འཁོར་ལོ་ཆ་བཅུ། མཁྱེན་བརྩེའི་བཏགས་གྲོལ་སོགས་བཏགས་གྲོལ་རིགས་ཐམས་ཅད་དང་བཏགས་གྲོལ་རྒྱུད་རྣམས་ཆ་གསུམ་རེ། ཐུགས་ཀར་ཡེ་ཤེས་རབ་འབར་རྩ་བའི་རྒྱུད་བཅས་བཞུགས།། ༈ །།གཟུངས་ཀྱི་སྐོར་ལ། དབུ་ནང་དུ། ལམ་ཟབ་མོ་བླ་མའི་རྣལ་འབྱོར་གྱི་བརྒྱུད་པ། ཀྱཻ་རྡོར་མན་ངག་ལུགས། འགྲེལ་པ་ལུགས། མཚོ་སྐྱེས་ལུགས། ནག་པོ་ལུགས་རྣམས་ཀྱི་དབང་གི་བརྒྱུད་པ། བདག་མེད་ལྷ་མོ་བཅོ་ལྔ། གུར་རིགས་བསྡུས། སམྦུ་ཊི་རྡོ་རྗེ་དབྱིངས། དུས་ཀྱི་འཁོར་ལོ་ས་ལུགས། འཁོར་ལོ་བདེ་མཆོག་ལཱུ་ཡི་པའི་ལུགས། དྲིལ་བུ 
་པའི་ལུགས། ནག་པོ་པའི་ལུགས་རྣམས་ཀྱི་དབང་གི་བརྒྱུད་པ། དཔལ་མཁའ་འགྲོ་རྒྱ་མཚོ། །རྡོ་རྗེ་ཕུར་པ་ས་ལུགས། གསང་འདུས་མི་བསྐྱོད་པ། རྡོ་རྗེ་འཇིགས་མཛད་ས་ལུགས།
རྭ་ལུགས་རོ་ལངས་བརྒྱད་སྐོར། ཀུན་རིག །སྤྱོད་རྒྱུད་དཀྱིལ་འཁོར་བཅུ་གཉིས། འཇམ་དབྱངས་ཨ་ར་པ་ཙ་ན་ལྷ་ལྔ། ཚེ་དཔག་མེད་ལྷ་དགུ་ཛེ་ཏཱ་རིའི་ལུགས་རྣམས་ཀྱི་དབང་བརྒྱུད། སྒྲུབ་ཐབས་རྒྱ་མཚོའི་རྗེས་གནང་དང་ལུང་གི་བརྒྱུད་པ། སེམས་བསྐྱེད་དབུ་མ་ལུགས། སོ་ཐར་སྡོམ་རྒྱུན། གུར་གྱི་མགོན་པོ་ལྷ་བརྒྱད། དཔལ་མགོན་ཞལ་བཞི་པ་རྣམས་ཀྱི་བརྒྱུད་པ། མགོན་དཀར་ཡིད་བཞིན་ནོར་བུའི་རྗེས་གནང་། དམ་ཅན་ཆོས་ཀྱི་རྒྱལ་པོ་ལྷ་བཅུ་གསུམ་གྱི་རྗེས་གནང་། གནོད་སྦྱིན་བེག་ཙོ་ཅན་གྱི་རྗེས་གནང་རྣམས་ཀྱི་བརྒྱུད་པ། ཕྱག་ན་རྡོ་རྗེ་འགྲོ་བཟང་ལུགས། རྣམ་སྲས་ཞི་བ་བདེ་བྱེད་ལྷ་དགུ་སྦྲགས་སྒྲུབ་ཀྱི་བརྒྱུད་པ། དེ་རྣམས་འབྲུ་གསུམ་དང་སྤེལ་བ། སྤེལ་ཚིག་རིག་པ་ཕུག་རོན་དང་བཅས་པ་བཞུགས། མགྲིན་པའི་ནང་དུ་གསུང་རྡོ་རྗེའི་ངོ་བོ་ཅན་གྱི་ཨཱ་ལི་ཀཱ་ལི་གྲངས་མང་། ༈མགྲིན་པ་ནས་ཐུགས་ཀའི་སྟོད་ཡན་བླ་མེད་རྒྱུད་ཀྱི་གཟུངས་ལ། ཀྱཻ་རྡོ་རྗེ་ཡབ་ཀྱི་རྩ་སྔགས་སྙིང་པོ། ཉེ་སྙིང་། རྣལ་འབྱོར་མ་རྣམས་དང་ཡུམ་གྱི་སྔགས། ལྷ་མོ་བརྒྱད། ཀྱཻ་རྡོར་ཕྱག་གཉིས་པ། ཕྱག་བཞི་པ། ཕྱག་དྲུག་པ། བདག་མེད་ལྷ་མོ་བཅོ་ལྔ། གུར་རིགས་བསྡུས་གཙོ་འཁོར་གྱི་ཡབ་ལྔ། ཡུམ་
ལྔ། རྡོ་རྗེ་ཅན་གྱི་ལྷ་མོ། ཕན་པའི་ལྷ་མོ། རྡོ་རྗེ་ཉི་མའི་ལྷ་མོ། པདྨ་གར་དབང་ལྷ་མོ། རྟ་རྒྱལ་ལྷ་མོ། སྒོ་མ་བཞི། སམྚ་རྡོ་རྗེ་དབྱིངས་གཙོ་འཁོར་རྣམས་ཀྱི་སྙིང་པོ། ཉེ་སྙིང་། བརྟག་གཉིས་ལས་བྱུང་བའི་འབྱུང་པོ་ཐམས་ཅད་ཀྱི་གཏོར་མའི་སྔགས། ཀུ་རུ་ཀུལླེ། གུར་ནས་འབྱུང་བའི་ལས་རྒྱས་པའི་ལྷ་འབྱུང་འདུལ། ཁྲོ་བཅུའི་གཤིན་རྗེ་མཐར་བྱེད། ཤེས་རབ་མཐར་བྱེད། པདྨ་མཐར་བྱེད། བགེགས་མཐར་བྱེད། མི་གཡོ་བ། འདོད་རྒྱལ། དབྱུག་སྔོན། སྟོབས་པོ་ཆེ། གཙུག་ཏོར་འཁོར་ལོས་སྒྱུར་བ། གནོད་མཛེས་ཏེ་བཅུ། རྡོ་རྗེ་སྒྲོལ་མ། ཤེར་ཕྱིན་མ། འཇིག་རྟེན་མགོན་པོ། འཇམ་དབྱངས། གཤིན་རྗེ་གཤེད། ཧཱུྃ་མཛད། སྒྲོལ་མ། འོད་ཟེར་ཅན་མ། ཙུནྡ། ནོར་རྒྱུན་མ། རྨུགས་འཛིན། སོ་འབྲང་མ། སམྦུ་ཊི་དྲག་པོ་གདན་ཅན། སམྦུ་ཊི་ནས་བྱུང་བའི་རྒྱས་པའི་ལྷ་སྒྲོལ་མ། རིག་བྱེད་མ། ཤེར་ཕྱིན་དཀར་མོ། འོད་ཟེར་ཅན་མ། རི་ཁྲོད་ལོ་མ་ཅན། གཤིན་རྗེ་གཤེད། །དཔལ་མཆོག །སོ་འབྲང་མ་རྣམས་ཀྱི་སྙིང་པོ་ཉེ་སྙིང་། རྡོ་རྗེ་གུར་ནས་འབྱུང་བའི་ཡིག་བརྒྱ། དུས་ཀྱི་འཁོར་ལོའི་སྙིང་པོ། ཉེ་སྙིང་། རྩ་སྔགས་རྐང་པ་བཅུ་
དྲུག་པ། བདུན་ཅུ་རྩ་གཉིས་པ། མཆོད་སྔགས་ལས། ཐུགས་དཀྱིལ། གསུང་དཀྱིལ། སྐུ་དཀྱིལ། འཇིག་རྟེན་པ། དུར་ཁྲོད། ཕུར་པ་གཙོ་འཁོར་རྣམས་ཀྱི་སྔགས། བདེ་མཆོག་གཙོ་འཁོར་ལས་ཡབ་ཡུམ་གྱི་རྩ་སྔགས། སྙིང་པོ། ཉེ་སྙིང་། འཁོར་ལོ་གསུམ་གྱི་ལྷ། སྒོ་མཚམས་མ་བརྒྱད། གོ་ཆ། ནཱ་རོ་མཁའ་སྤྱོད། མཁའ་འགྲོ་རྒྱ་མཚོ་ཡབ་ཀྱི་སྙིང་པོ། ཉེ་སྙིང་། རྩ་སྔགས་རྐང་པ་བརྒྱད་པ། ཞེ་བརྒྱད་པ། བདེ་མཆོག་རིགས་དྲུག་འཁོར་ལོས་སྒྱུར་བ་དྲུག །ཐོད་པ། མ་ཧཱ་མཱ་ཡཱ། གདན་བཞིའི་ཡུམ་ཡེ་ཤེས་དབང་ཕྱུག་མ། གདན་བཞིའི་ཡབ། གསང་འདུས་མི་བསྐྱོད་པ་གཙོ་འཁོར། འཇམ་པའི་རྡོ་རྗེ་གཙོ་འཁོར། གསང་འདུས་སྤྱན་རས་གཟིགས་གཙོ་འཁོར། གསང་འདུས་སུ་གསུངས་པའི་ཁྲོ་བོ་དགུ་ལས་གཤིན་རྗེ་གཤེད། གཞན་གྱིས་མི་ཐུབ་པ། རྟ་མགྲིན། བདུད་རྩི་འཁྱིལ་བ། མི་གཡོ་བ། འཆིང་བའི་རྒྱལ་པོ། དབྱུག་སྔོན། སྟོབས་པོ་ཆེ། གནོད་མཛེས་དགུ་སྟེ་དེ་རྣམས་ཀྱི་སྙིང་པོ། ཉེ་སྙིང་། གཤེད་དམར་ལྷ་ལྔ་གཙོ་འཁོར་ལས་ཡབ་ཀྱི་སྙིང་པོ། ཕྲེང་སྔགས། ཡུམ་དང་འཁོར། གཤིན་རྗེ་དགྲ་ནག །འཇིགས་བྱེད་རྣམས་ཀྱི་རྩ་སྔགས།
སྙིང་པོ། ཉེ་སྙིང་། རྣམ་སྣང་སྒྱུ་འཕྲུལ་དྲྭ་བ་གཙོ་འཁོར་གྱི་སྔགས། དེ་ཉིད་ལས་གསུངས་པའི་ཁྲོ་བོ་དགུ་ལས། གཤིན་རྗེ་གཤེད། བདུད་རྩི་འཁྱིལ་བ། གཞན་གྱིས་མི་ཐུབ་པ། རྟ་མགྲིན། དབྱུག་སྔོན། སྟོབས་པོ་ཆེ། འཆིང་བའི་རྒྱལ་པོ། མི་གཡོ་བ། གནོད་མཛེས་ཏེ་དགུ །ཕྱག་ན་རྡོ་རྗེ་འཁོར་ཅན། ཕྱག་རྡོར་གཏུམ་པོ། མངོན་སྦྱོང་ཕྱིར་ཟློག །ཧེ་རུ་ཀའི་ཡི་གེ་བརྒྱ་པ། དབྱངས་གསལ་རྟེན་འབྲེལ་སྙིང་པོ་རིག་པ་ཆེན་མོ། སྲོག་ཤིང་བསྟན་པའི་བརྟན་བཞུགས་ཀྱི་སྔགས། ལས་བཞི་དང་འབྲེལ་བའི་སྤེལ་ཚིག །རིག་པ་ཕུག་རོན་གྱི་སྔགས་བཅས་བཞུགས། ཐུགས་ཀའི་སྨད་ནས་སྐྱིལ་ཀྲུང་ཡན་ལ་རྣལ་འབྱོར་རྒྱུད་ཀྱི་གཟུངས། རྡོ་རྗེ་དབྱིངས། གཙོ་འཁོར། ཀུན་རིག་གཙོ་འཁོར། ཤཱཀ་ཐུབ་སྐུ། ཚེ་དཔག་གསུང་། ཕྱག་རྡོར་ཐུགས། དེ་གསུམ་ཐུན་མོང་། འཁོར་ལོས་སྒྱུར་བ་ཡོན་ཏན། མེ་ལྟར་འབར་བ་ཕྲིན་ལས་ཀྱི་དཀྱིལ་འཁོར་རྣམས་ཀྱི་སྔགས། ཆོས་དབྱིངས་གསུང་དབང་། ཁམས་གསུམ་རྣམ་རྒྱལ་གཙོ་བོ། དཔལ་མཆོག་གཙོ་བོ། དཔལ་མཆོག་རྡོ་རྗེ་སེམས་དཔའ་གཙོ་བོ། གཙུག་དགུ་གཙོ་འཁོར་རྣམས་ཀྱི་སྔགས། ༈སྤྱོད་རྒྱུད་སྐོར་ལ། རྣམ་སྣང་མངོན་བྱང་གི་
གཙོ་བོ་རྣམ་སྣང་། ཐུགས་ཆོས་འབྱུང་གྲུ་གསུམ། ནམ་མཁའི་སྤྱན་མ། སྤྱན་རས་གཟིགས། སྒྲོལ་མ། ཁྲོ་གཉེར་ཅན། མཐུ་ཆེན་ཐོབ། གྲགས་ལྡན་མ། གོས་དཀར་མོ། རྟ་མགྲིན། ཕྱག་རྒྱ་ཡིད་བཞིན་ནོར་བུ། ཕྱག་ན་རྡོ་རྗེ། རྡོ་རྗེ་ལུ་གུ་རྒྱུད། ཁྲོ་ཟླ་གཙོ་བོ། རྡོ་རྗེ་འཛིན་པ་བཅུ་གཉིས། རྡོ་རྗེ་རྩེ་མོ་མི་གཡོ་བ། འཇིག་རྟེན་གསུམ་རྒྱལ། གདུལ་དཀའ། མངོན་ཕྱོགས་དཀྱིལ་འཁོར་གཉིས་པ་ལ། ཤཱཀྱ་ཐུབ་པ། སངས་རྒྱས་སྤྱན་མ། ལྷ་མོ་མཛོད་སྤུ། གཙུག་ཏོར་སྤྱི། གདུགས་དཀར། རྒྱལ་བའི་གཙུག་ཏོར། རྣམ་རྒྱལ། རྣམ་པར་འཐོར་བ། གཟི་བརྗིད་ཕུང་པོ། གནས་གཙང་མའི་ལྷ་ལྔ། གཙུག་ཏོར་ཆེར་འབྱུང་། གྱེན་འབྱུང་སྒྲ་དབྱངས་མཐའ་ཡས། མེ་ལྷ་དྲང་སྲོང་དྲུག །གཤིན་རྗེ་འཆི་བདག །དུས་མཚན་མ། གཞོན་ནུ་མ་ཚོགས་བཞི། བདེན་བྲལ་ལྷའི་དབང་པོ། ཆུ་ལྷ། ཉི་མ། ཚངས་པ། སའི་ལྷ་མོ། དབྱངས་ཅན་མ། ཁྱབ་འཇུག །སྐེམ་བྱེད། རླུང་ལྷ། བདེ་བྱེད། ཨུ་མ། ཟླ་བ། ཁྲོ་བོ་དང་ཁྲོ་མོ་གཞན་གྱིས་མི་ཐུབ་པ། ས་བདག །དགའ་བོ། ཉེ་དགའ། དཀྱིལ་འཁོར་གསུམ་པ་ལ། རྡོ་རྗེ་དམ་པ་སྦྱིན་པ། དྲྭ་བ་ཅན་གྱི་
འོད། དྲི་མ་མེད་པའི་འོད། སྒྲ་ཅན་མ། ཉེ་བའི་སྒྲ་ཅན་མ། སྣ་ཚོགས་མ། ནོར་ལྡན་མ། འཕགས་མ། ཕྱག་བརྙན་མ། སྒྲིབ་པ་རྣམ་སེལ། ངོ་མཚར་ཅན། མི་འཇིགས་སྦྱིན། ངན་སོང་སྤོང་། སྐྱོད་སེམས་བློ་གྲོས། བྱམས་པ་མངོན་འབྱུང་། བློ་ཆེན། གདུང་བ་ཐམས་ཅད་ཞི་བྱེད། བློ་གྲོས་བསམ་མི་ཁྱབ་པའི་སྙིང་པོ། རིན་ཆེན་འབྱུང་གནས། རིན་ཆེན་ལག །ས་འཛིན། ཕྱག་ན་རིན་ཆེན། བསམ་པ་བརྟན་པ། ནམ་མཁའི་སྙིང་པོ། ནམ་མཁའི་བློ་གྲོས། རྣམ་དག་བློ་གྲོས། སྤྱོད་པའི་བློ་གྲོས། ནམ་མཁའ་དྲི་མེད། བརྟན་པའི་བློ་གྲོས། གདུལ་དཀའ། མངོན་ཕྱོགས་རྣམས་ཀྱི་སྔགས། དེ་ཁོ་ན་ཉིད་འདུས་པར་གསུངས་པའི་ཡིག་བརྒྱ། རྟེན་འབྲེལ་སྙིང་པོ། བརྟན་བཞུགས་སྔགས་བཅས་བཞུགས།། ༈ །།བྱ་རྒྱུད་སྐོར་ལ། དོན་ཡོད་ཞགས་པའི་གཟུངས། དམ་ཚིག་གསུམ་བཀོད་ཀྱི་སྔགས། གཙུག་ཏོར་གདུགས་དཀར། སྤྱན་རས་གཟིགས་མགྲིན་སྔོན་ཅན། བཅུ་གཅིག་ཞལ་དཔལ་མོ་ལུགས། །སེང་གེ་སྒྲ་རྣམས་ཀྱི་གཟུངས། སྨན་བླའི་མདོའི་སྔགས། སྒྲོལ་མའི་མཚན་བརྒྱ་རྩ་བརྒྱད་པ། དེའི་སྔགས། སྒྲོལ་མ་རང་གིས་དམ་བཅས་པ། འཇིགས་པ་བརྒྱད་སྐྱོབ།
འཇིགས་པ་བརྒྱད་ལས་སྒྲོལ་བ། འོད་ཟེར་ཅན། ལོ་མ་གྱོན་མ། རྡོ་རྗེ་རྣམ་འཇོམས། འཇམ་དཔལ་གྱི་ཞལ་ནས་གསུངས་པ། དམོད་བཙུགས་པ། དམ་བཅས་པ། ཤེས་རབ་བློ་འཕེལ་རྣམས་ཀྱི་གཟུངས། འཇམ་དཔལ་གྱི་མཚན་བརྒྱ་རྩ་བརྒྱད་པ། ཨ་ར་པ་ཙ་ལྷ་ལྔ། དཔའ་བོ་གཅིག་གྲུབ། དེའི་ཉེ་སྙིང་། རྒྱལ་པོ་རོལ་པ། ཡན་ལག་མེད་པ། འཇམ་དཔལ་ངག་གི་རྒྱབ་པོ། ཤེས་རབ་འཁོར་ལོ། །དཔའ་བོ་གཅིག་གྲུབ་ནས་བཤད་པའི་ཚེ་སྒྲུབ་རྣམས་ཀྱི་གཟུངས། ས་བཅུ་པའི་གཟུངས། བྱང་སེམས་གཟི་བརྗིད་ཆེན་པོ། སྟོབས་པོ་ཆེ། ཕྱག་ན་རྡོ་རྗེ་རྣམས་ཀྱི་གཟུངས། ཁྲོ་བོ་སྨེ་བརྩེགས་ཀྱི་བསྟོད་པ་དང་། བདུད་སྐྲག་པར་བྱེད་པའི་གཟུངས། སྲུང་བ་ལྔའི་སྙིང་པོ། རིག་པ་ཆེན་མོའི་སྔགས། སྤེལ་ཚིག་རིག་པ་ཕུག་རོན་བཅས་བཞུགས། ༈གཟུངས་ཆེན་སྐོར་ལ། གཙུག་ཏོར་རྣམ་རྒྱལ་གཟུངས་རིང་། །གཙུག་ཏོར་དྲི་མེད་ཀྱི་གཟུངས་རིང་ཐུང་། གསང་བ་རིང་བསྲེལ། རྟེན་འབྲེལ་སྙིང་པོ། རབ་གནས་རྒྱུད་གཟུངས། ཚུལ་ཁྲིམས་རྣམ་དག་གི་གཟུངས། རབ་གནས་གཟུངས། སྲོག་ཤིང་བརྟན་པའི་གཟུངས་སྔགས། རྡོ་རྗེ་དབྱིངས་ཀྱི་སྙིང་པོ། ཆོས་དབྱིངས་སྙིང་པོ། སྔགས་དབྱིངས་སྙིང་པོ། བརྟན་བཞུགས་བྱང་ཆུབ་
རྒྱན་འབུམ་གྱི་གཟུངས། ཚེ་དཔག་མེད་ཀྱི་མཚན་བརྒྱ་རྩ་བརྒྱད་པའི་གཟུངས། བྱམས་པས་དམ་བཅས་པའི་གཟུངས། བསྐལ་བཟང་སངས་རྒྱས་སྟོང་གི་སྙིང་པོ། རྟེན་འབྲེལ་སྙིང་པོ། མཛོད་སྤུ་ནོར་བུ། དེ་བཞིན་གཤེགས་པའི་ཡི་གེ་བརྒྱ་པ། མཚམས་མེད་པའི་སྒྲིབ་པ་སྦྱོང་བ། དོན་ཡོད་གྲུབ་བ། ཤེར་ཕྱིན་མ། ཤེར་སྙིང་། ནམ་མཁའ་མཛོད་ཀྱི་སྔགས། ཤཱཀྱ་ཐུབ་པའི་སྙིང་པོ་མུ་ནི་འབུམ་ཕྲག་གསུམ། སྤེལ་ཚིག་རིག་པ་ཕུག་རོན་བཅས་བཞུགས། ༈མདོ་གཟུངས་སྐོར་ལ། བཅོམ་ལྡན་འདས་ཀྱི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ། སྤྱན་རས་གཟིགས། བྱམས་པ། ནམ་སྙིང་། ཀུན་ཏུ་བཟང་པོ། ཕྱག་ན་རྡོ་རྗེ། སྒྲིབ་པ་རྣམ་སེལ། སའི་སྙིང་པོ་རྣམས་ཀྱི་མཚན་བརྒྱ་རྩ་བརྒྱད་པའི་གཟུངས། ཡོན་སྦྱོང་བའི་གཟུངས། གནོད་འཛིན་གྱི་མཚན་བརྒྱ་རྩ་བརྒྱད་པའི་སྔགས། །སངས་རྒྱས་ཀྱི་མཚན་གྱི་རྣམ་གྲངས་ཀྱི་སྔགས། སངས་རྒྱས་བཅུ་གཉིས་པའི་མདོའི་གཟུངས། སངས་རྒྱས་བདུན་པའི་མདོའི་སྔགས། རིན་པོ་ཆེ་ཁང་བུ་བརྩེགས་པ་དང་ནོར་བུ་བརྩེགས་པའི་གཞལ་མེད་ཁང་དང་མཐོང་བ་དོན་ཡོད་ཅེས་བྱ་བའི་གཟུངས། མཛོད་སྤུ་ནོར་བུའི་གཟུངས། ཡེ་ཤེས་
ཏ་ལའི་སྔགས། ཆོས་ཐམས་ཅད་ཀྱི་ཡུམ་གྱི་སྔགས། སྟོང་ཕྲག་བརྒྱ་པ། སྟོང་ཕྲག་ཉི་ཤུ་ལྔ་པ། བརྒྱད་སྟོང་པ། ཤེས་རབ་སྙིང་པོ། ཕར་ཕྱིན་དྲུག་གི་སྙིང་པོ་རྣམས་ཀྱི་གཟུངས་ཕལ་པོ་ཆེ་དང་། ཏིང་འཛིན་རྒྱལ་པོ་གཟུང་བར་འགྱུར་བ། ཤེས་རབ་སྐྱེད་པ། ཡི་གེ་ཉུང་ངུ། ཕར་ཕྱིན་བཅུ་ཐོབ་པ། སྟོང་འགྱུར། རིག་པ་ཆེན་མོ། རིན་པོ་ཆེ་ཏོག་གི་སྔགས། སྒོ་མཐའ་ཡས་པའི་སྔགས། སྒོ་དྲུག་པའི་སྔགས། སྤེལ་ཚིག་རིག་པ་ཕུག་རོན་གྱི་གཟུངས་བཅས་བཞུགས། པད་གདན་དང་སྐུའི་མཚམས་ལ། རྡོ་རྗེ་གུར་གྱི་མགོན་པོའི་ཉེ་སྙིང་། རྩ་སྔགས། སྙིང་པོ། ནག་པོ་གནོད་སྦྱིན། ནག་པོ་གནོད་སྦྱིན། པུ་ཊ། བྷ་ཊ། སྲིང་མོ། གུར་གྱི་མགོན་པོ་ལྕམ་དྲལ་གྱི་བོད་རྦད་བསད་པ། ལས་མགོན་གྱི་བོད་རྦད་བསད་པ། སྦྱིན་སྲེག་སྤོག་ཆོག་གི་སྔགས། དཔལ་མགོན་ཞལ་གྱི་སྔགས་རིང་ཐུང་། དུར་ཁྲོད་བདག་པོ། དཀར་བདུད། བྲན་བདུད། བེར་ནག་ཟངས་གྲི་ཅན། གཅེར་བུ་ཟངས་གྲི་ཅན་རྣམས་ཀྱི་སྔགས། བརྟན་བཞུགས་ཀྱི་སྔགས། ཕྱག་བཞི་པ་གཙོ་འཁོར་གྱི་སྔགས། ཕྱག་དྲུག་པ་གཙོ་འཁོར་གྱི་སྔགས། ལེགས་ལྡན་མཆེད་གསུམ་གྱི་དབུས་མ། གཡས་
པ། གཡོན་པ། ཏྲག་ཤད་ཡབ་ཡུམ་འབོད་རྦད་བསད་གསུམ། གཞན་ལ་མི་འཁུ་བ། སྟ་གཞོན། ལྷ་མོ། བེག་རྩེ། ལྕམ་དྲལ། ལས་གཤིན་ནག་པོ་ཡབ་ཡུམ། མེ་རུ་རྩེ་བཞི་སྐོར། ཁྲག་མདོག་ཡབ་ཡུམ་རྣམས་ཀྱི་སྔགས། རྣམ་སྲས། ནོར་བུ་བཟང་པོ། རྣམ་སྲས་ལྗང་སེར་བེ་ཅོན་ཅན། གར་མཁན་མཆོག་དམར་སྨུག །ཡང་གསང་སྲིན་པོ་བཞི་བསྐོར། རྟ་སྔོན་བདུད་མོ་བཞི་བསྐོར། ཡང་གསང་མདུང་དམར་ཅན་རྣམས་ཀྱི་སྔགས། མདུང་དམར་ཅན་ལས་མཁན་དང་བཅས་པ། དཀར་པོ་ཚེ་འཕེལ། ནོར་རྒྱུན་མ་ལྷ་ལྔ། ཛཾ་ནག །ཛཾ་སེར། ཛཾ་ལྷ་ཕྱག་དྲུག་པ། ཛཾ་སེར་ལྷ་དགུ། ནོད་གནས་གཙོ་འཁོར། གནོད་སྦྱིན་ཕོ་དགུ། མོ་དགུ། ཛཾ་བྷ་ལ་ནག་པོ། མགོན་དཀར་ཡིད་བཞིན་ནོར་བུ་རྣམས་ཀྱི་སྔགས། ཚོགས་བདག་དམར་པོའི་ཉེ་སྙིང་། སྙིང་པོ། མིང་གི་སྙིང་པོ། ཚངས་པ། བརྒྱ་བྱིན། དབང་ཕྱུག་ཆེན་པོ། ཁྱབ་འཇུག །ལྷ་མོ་བརྒྱད་རྣམས་ཀྱི་སྔགས། དཔལ་མགོན་བདུན་ཅུ་དོན་ལྔ་ལ། ཕྱོགས་སྐྱོང་བཅུ། རྒྱལ་ཆེན་བཞི། ལྷ་བརྒྱད། ཀླུ་བརྒྱད། གཟའ་དགུ། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་དགུ་རྣམས་ཀྱི་སྔགས། མཆོད་པའི་
སྤྲིན་གྱི་གཟུངས། མཆོག་ཐོབ་པ། ལས་གྲུབ་པ། དོན་ཐམས་ཅད་གྲུབ་པ། རྟེན་འབྲེལ་སྙིང་པོ། དེ་དག་སོ་སོར་འདོད་གསོལ་རིག་པ་ཕུག་རོན་བཅས་གོང་འཁོད་ཀྱི་གཟུངས་ཇི་སྙེད་པ་ཆ་བརྒྱ་དང་བརྒྱད་རེ་བཞུགས་ཤིང་། འདོད་གསོལ་རིག་པ་ཕུག་རོན་གྱི་གཟུངས་འདི་ནི་གཟུངས་ཀྱི་གོ་རིམ་འཁྲུགས་པའི་ཉེས་པ་སེལ་བ་ལ་སོགས་པ་ཕན་ཡོན་ཆེན་པོ་དང་ལྡན་པ་སྟེ། འཇམ་དཔལ་རྩ་རྒྱུད་ལས། རིག་པ་ཕུག་རོན་ཞེས་བྱ་བ། །ལས་རྣམས་ཀུན་ལ་རབ་ཏུ་བསྔགས། །ཞེས་གསུངས་སོ། །སྟོད་སྨད་སྤྱིར་གཟུངས་ཆེན་སྡེ་ལྔ་ཚར་གྲངས་དུ་མ་དང་། གཞན་ཡང་ཨོ་རྒྱན་རིན་པོ་ཆེའི་སྣང་བརྙན་དང་། མཆོད་རྟེན་གྱི་ནང་གཞུག་སྐབས་སུ་འཆད་པར་འགྱུར་བ་ལྟར། སྔ་འགྱུར་བཀའ་གཏེར་གྱི་ལུགས་རྫོགས་ཆེན་དང་ཟེ་ཆེན་གཉིས་ཀྱི་གཟུངས་སྤར་བླ་མ་ཡི་དམ་མཁའ་འགྲོ་ཆོས་སྲུང་རྣམས་ཀྱི་སྙིང་པོ་ཆ་བདུན་རེ་དང་། དཔལ་སྤུངས་སྤར་མ་སྒྲུབ་བརྒྱུད་སྤྱི་དང་བྱེ་བྲག་གི་རྩ་གསུམ་ཆོས་སྐྱོང་དང་བཅས་པའི་སྙིང་པོ་རྣམས་ཀྱང་ཆ་འདུན་རེ་བཅས་གནས་སོ་སོར་མ་འཆོལ་བ་དང་། གནས་ལྔར་དགོངས་འདུས་རྒྱུད་ཆ་དགུ། མགྲིན་པར་རང་གིས་ཕུལ་བའི་གཏེར་གསར་ཤོག་སེར་ཀུན་འདུས་རིལ་བུ། ཤོག་སེར་ཕྱག་བྲིས་ཆོས་ཀྱི་རིང་བསྲེལ་ཀུན་འདུས་རིལ་བུ་དམ་རྫས་
གསེར་ཞུན་ཆེན་མོ། ཀཿཐོག་ཞིང་སྐྱོང་ནས་གནང་བ་རིག་འཛིན་འཇའ་ཚོན་སྙིང་པོ་སོགས་ཀྱི་ཤོག་སེར་རིགས་བཞི། པདྨ་རོལ་པ་རྩལ་གྱིས་བསམ་ཡས་ནས་སྤྱན་དྲངས་པའི་བཻ་རོའི་རྒྱ་དཔེ་བཅས་བཞུགས་སོ། །ཆོས་སྐུའི་རིང་བསྲེལ་ནི། ཐུགས་ཀར་བཀའ་གདམས་མཆོད་རྟེན་བྱིན་ཅན། དྲི་མེད་རྣམ་གཉིས་ཀྱི་སྒོ་ནས་བསྒྲུབས་པའི་སཱཙྪ་ཉིས་བརྒྱ་དང་བདུན། གཞན་ཡང་འདིའི་ཕྱོགས་གཏོགས། དཔྲལ་བར་འཇམ་དཔལ་ལི་མ། མགྲིན་པར་སྤྱན་རས་གཟིགས་ལི་མ། ཐུགས་ཀར་ལྷ་སྲས་མུ་ཁྲིའི་ཐུགས་དམ་རྟེན་འཁྲུལ་མེད་གཏེར་ཆེན་མཆོག་གྱུར་གླིང་པས་ཆོས་རྒྱལ་ལྷ་སྲས་རིན་པོ་ཆེ་ལ་གནང་བའི་ཐུབ་སྐུ་ལི་མ་བྱིན་རླབས་ཀྱི་གཟི་འོད་འབར་བ་ཡེ་ཤེས་སེམས་དཔའི་ཚུལ་གྱིས་བཞུགས་སུ་གསོལ་ཞིང་། གཞན་ཡང་ཐུབ་དབང་ལི་མ་ཆེ་ཆུང་གཉིས། སྨྲྀ་ཏི་ཛྙྭ་ནའི་ཕྱག་ཚའི་ཐུང་སྐུ། ཕྱག་རྡོར་སྐུ་རྙིང་མ་བྱིན་ཅན། ལྟེ་བར་ཀཿཐོག་ནས་བྱུང་བའི་སྨན་བླ་ལི་མ། གསང་གནས་སུ་སྒྲོལ་ལྡང་ལི་མ། རྟེན་འདམ་གྱི་རྗེ་བཙུན་མི་ལའི་སྐུ། ལྷ་ལྡན་ཇོ་བོ་རིན་པོ་ཆེའི་ཕྱག་སྦར། ཝ་ར་བླ་མ་དཔལ་ལྡན་ཡེ་ཤེས་ཀྱི་ཕྱག་ནས་བྱུང་བ་ངོར་ཆེན་རྡོ་རྗེ་འཆང་གི་གདུང་ཚ། མཁན་ཆེན་བྱམས་པ་ཀུན་དགའ་བསྟན་འཛིན་གདུང་ཚ་ཀྱཻ་རྡོར་དང་གདུགས་དགར་གྱི་སྐུ་བཅས་མཁན་
ཆེན་བསྟན་པའི་རྒྱལ་མཚན་གྱིས་རབ་གནས་བརྒྱ་རྩ་མཛད་པ། མཁན་ཆེན་དཀོན་མཆོག་དཔལ་ལྡན་གདུང་ཚྭ་འཇམ་དབྱངས་སྐུ། མཁན་ཆེན་དཀོན་མཆོག་འཕེལ་བའི་གདུང་ཚ་བིརྦ་པ། རྒྱལ་བ་ལྷ་མཆོག་སེངྒེའི་གདུང་ཚྭ་བཅས་བཞུགས། སྐུ་གདུང་རིང་བསྲེལ་ནི། མགྲིན་པར། རྫོགས་ཆེན་ནས་གནང་བ་འཕགས་པ་ཆོས་འཕགས་ཀྱི་ཚེམས། དཔྲལ་བར་རང་གིས་ཕུལ་བ་ཙཱ་འདྲ་རིན་ཆེན་བྲག་ནས་གཏེར་ཚན་མཆོག་གྱུར་གླིང་པས་སྤྱན་དྲངས་པའི་ཕྱོགས་བཅུའི་རྒྱལ་བ་སྲས་བཅས་ཀྱི་སྐུ་གདུང་རིང་བསྲེལ་འདུས་པ་དམ་རྫས་རིན་པོ་ཆེའི་ཏོག་རྩ་བའི་གཏའ་སྤེལ། སྐུ་ཤ་ཕྱོགས་བསྡུས་རིལ་བུ་ས་ལེ་སྦྲམ། དབུ་ཀླད་གདུང་རུས་ཕྱོགས་བསྡུས་སྐུ་གདུང་རིང་བསྲེལ་དོན་གྲུབ་རིལ་བུ། བྱང་སེམས་ཤངས་མཚལ་ཕྱོགས་བསྡུས་རིལ་བུ་དམ་རྫས་པདྨ་རཱ་ག །གཞུང་གི་རྟེན་སྒམ་ནས་བྱུང་བའི་དབུ་ཐོད་བྱིན་ཅན། ཡང་དབུ་ཐོད་ཨོཾ་ཡིག་དང་རྡོ་རྗེ་ཕག་མོའི་སྐུ་རང་བྱོན་ཅན་ཁྱད་འཕགས། བྲམ་ཟེ་སྐྱེ་བདུན་དབུ་ཐོད། བསོ་དབང་དྲག་རྒྱ་མཚོའི་སྐུ་མཆིན། གྲུབ་དབང་ཀརྨ་ཆགས་མེད་ཀྱི་སྐུ་གདུང་རིལ་བུ། པདྨ་ཉིན་བྱེད་དབང་པོའི་གདུང་ལས་བྱོན་པའི་རིང་བསྲེལ། ལྟེ་བར་རྗེ་བཙུན་མ་སྐལ་བཟང་ཕྲིན་ལས་དབང་མོས་གནང་བ་བསྟན་སྲུང་ཀུན་གྱི་གཙོ་བོ་བསེ་མགོན་ཡིད་བཞིན་ནོར་བུའི་ཞལ་ནང་གི་བདུད་རྩི་
བཅས་བཞུགས། སྐུ་བལ་རིང་བསྲེལ་ནི། དཔལ་བར། རང་གིས་ཕུལ་བ་མཆོག་གྱུར་གླིང་པས་ཁ་ལ་རོང་སྒོ་ནས་སྤྱན་དྲངས་པའི་སངས་རྒྱས་འོད་སྲུང་སྐུ་ཆོས་དང་། སེང་བྲག་ནས་སྤྱན་དྲངས་པའི་ཐུབ་པའི་སྐུ་ཆོས་བཅས་ཀྱི་རིལ་བུ་དམ་རྫས་མཐོང་གྲོལ་ཆེན་མོ་སྲིད་ན་ཟླ་བྲལ། སྐུ་བལ་རིང་བསྲེལ་ཀུན་འདུས་དམ་རྫས་ཛཾ་བུ་ཆུ་གསེར། གཞུང་གི་རྟེན་ཁྲོད་ནས་བྱུང་བ་ཐུགས་ཀའི་སྟོད་དུ་མཁན་ཆེན་བྱམས་པ་ཀུན་དགའ་བསྟན་འཛིན་སྐུ་ཆོས། གཡས་ངོས་སུ། པ་པདྨ་བདུད་འདུལ་དབང་ཕྱུག་མན་བསྟོད། རྒྱབ་ངོས་སུ་ས་སྐྱ་པ་མགོན་པོ་དངོས་གྲུབ་དཔལ་འབར་མན་བསྟོད། གཡོན་ངོས་སུ་ས་སྐྱ་པ་རྡོ་རྗེ་རིན་ཆེན་མན་བསྟོད། དཔྲལ་བར་ཐར་རྩེའི་ཕྱག་ནས་གནང་བ་འགྲོ་མགོན་དབང་སྡུད་སྙིང་པོའི་དབུ་ལོ། མཁན་ཆེན་བྱམས་པ་ཀུན་དགའ་བསྟན་འཛིན་དབུ་ལོ། མགྲིན་པར་ས་ཆེན་ཀུན་དགའ་བློ་གྲོས་ཀྱི་ན་བཟའ་སྐུ་འགགས་དཀར་པོ། ཐར་རྩེ་ནམ་མཁའ་འཆི་མེད་ཀྱི་ན་བཟའ་གདུང་དཀྲིས་དམར་པོ། ཀླུ་སྡིང་མི་འགྱུར་རྒྱལ་མཚན་ན་བཟའ། ལྟེ་བར་འགྲོ་མགོན་ཆོས་རྒྱལ་འཕགས་པའི་ཞབས་ཆགས། དྲིའུ་ས་རིན་པོ་ཆེའི་ན་བཟའ། ཚལ་པ་དབང་ཕྱུག་རབ་བརྟན་ན་བཟའ། རྗེ་བཙུན་མ་སྐལ་བཟང་ཕྲིན་ལས་དབང་མོའི་མདུན་ནས་གནང་
བ། །དཔྲལ་བར་བླ་མ་གོང་མའི་དབུ་སྐྲ་བྱིན་ཅན། མགྲིན་པར་བླ་མ་གོང་མའི་ན་བཟའ་བྱིན་ཅན། ཐུགས་ཀར་ཚར་ཆེན་རྡོ་རྗེ་འཆང་གི་ན་བཟའ། མགོན་པོ་བསོད་ནམས་མཆོག་ལྡན་སྐུ་ཆོས། གོང་མ་རིན་པོ་ཆེ་ཕྱོགས་ཀྱི་གླང་པོའི་ཕྱག་ཕྲེང་། རྒྱལ་དབང་ལྔ་པ་ཆེན་པོའི་ན་བཟའ། ལྟེ་བར་གྲུབ་ཆེན་ཐང་སྟོང་རྒྱལ་པོའི་ཞབས་ཆགས། སྐུ་ཞབས་སི་ཏུའི་ཕྱག་ནས་གནང་བ། མགྲིན་པར་མཉམ་མེད་དྭགས་པོ་རིན་པོ་ཆེའི་སྐུ་ཆོས། ཞྭ་དམར་ཆོས་ཀྱི་དབང་ཕྱུག་གི་སྐུ་རེག་དང་རུས་རྒྱན། ཀརྨ་པ་ཆོས་དབྱིངས་རྡོ་རྗེའི་ན་བཟའ། ཀརྨ་པ་ཡེ་ཤེས་རྡོ་རྗེའི་སྐུ་འགགས། ཞྭ་དམར་ཡེ་ཤེས་སྙིང་པོའི་སྐུ་ཆོས། སི་ཏུ་ཆོས་ཀྱི་འབྱུང་གནས་དབུ་སྐྲ་དང་ན་བཟའ། དཔའ་བོ་གཙུག་ལག་དགའ་བའི་ན་བཟའ། པདྨ་ཉིན་བྱེད་དབང་པོའི་ན་བཟའ། ཀརྨ་པ་ཐེག་པ་མཆོག་གི་རྡོ་རྗེའི་དབུ་སྐྲ་རྣམས་བཞུགས་སོ། །དམ་རྫས་རྟེན་འདུས་ཀྱི་སྐོར་ནི། དཔྲལ་བར་རྗེ་བཙུན་མ་སྐལ་བཟང་ཕྲིན་ལས་དབང་མོའི་ཕྱག་ནས་གནང་བ་དཔལ་ས་སྐྱའི་རྟེན་སྒམ་ནང་བཞུགས་རིགས་ཀྱི་བྱིན་རྟེན་ཀུན་འདུས་རིལ་བུ་དང་། རྟེན་ཁྲུས་དང་གྲིབ་སེལ་ཁྲུས་ཆུ་ཀུན་འདུས་རིལ་བུ། རྗེ་བཙུན་གོང་མ་རྣམ་ལྔའི་སྐུ་དུས་ཀྱི་བདུད་རྩི་རིལ་བུ་དང་དྷཱིཿཡིག་རིལ་བུ། ལྟེ་བར་གོང་མ་
དཀར་པོ་རྣམ་གསུམ་དང་། ས་པ། འཕགས་པ་རྣམས་ཀྱི་བདུད་རྩི་རིལ་བུ། ཐར་རྩེ་རིན་པོ་ཆེའི་མདུན་ནས་གནང་བ། ཐར་རྩེ་རང་གི་དམ་རྫས་བརྒྱ་དོ་བྱིན་ཅན། ཁང་སར་མཁན་རིན་པོ་ཆེའི་མདུན་ནས་གནང་བ་རྟེན་འདུས་བདུད་རྩི་རིལ་བུ། རྒྱལ་དབང་ཀརྨ་པའི་དམ་རྫས་རིལ་ནག་ཆེན་མོ། འབྲུག་པའི་རིལ་བུ་འཇའ་ཟུག་མ་རྟེན་ཐམས་ཅད་ཀྱི་རྒྱལ་པོ། ཐུགས་ཀར་ཀཿཐོག་ནས་གནང་བ་རིག་འཛིན་འཇིགས་མེད་གླིང་པའི་དོན་ཀུན་གྲུབ་པའི་རིལ་བུ། ལྟེ་བར་རྫོགས་ཆེན་ནས་གནང་བ་བཀའ་བརྒྱད་བདེ་གཤེགས་འདུས་པའི་སྨན་སྒྲུབ། དཔལ་ཡུལ་ནས་གནང་བ་རིག་འཛིན་ཀུན་བཟང་ཤེས་རབ་ནས་བཟུང་རྒྱུན་མ་ཆད་པར་ལོ་ནར་མར་བསྒྲུབས་པའི་བུམ་སྒྲུབ་རིལ་བུ། རང་གིས་བུལ་བ་སྐྱེ་བདུན་མྱང་གྲོལ་ཨ་དམ་ཧྲཱིཿརྒྱ་མ་སོགས་ཡོད་དོ་ཅོག་གཅིག་ཏུ་བསྡུས་པའི་དམ་རྫས་ཀུན་འདུས་ཡིད་བཞིན་ནོར་བུ། པ་ཆེན་ནཱ་རོ་པའི་བུམ་ཆུ་རིལ་བུ། བུམ་ཆུ་ཁྲུས་ཆབ་ཀུན་འདུས་རིལ་བུ་སྡིག་སྒྲིབ་ཀུན་འཇོམས། སྟག་ལུང་སངས་རྒྱས་གསུམ་པ་ཆོས་སྐུ་ཨོ་རྒྱན་མགོན་པོའི་རྒུ་འཕྲུལ་གྱི་བྱག་ཚ་ཆུ་ཁྲུས་རིལ་བུ་གང་དུ་བཞུགས་པའི་ས་ཕྱོགས་སུ་མེ་དགྲ་ཐུབ་ངེས། ཐུགས་ཀར་ཀུན་གཟིགས་འཇམ་དབྱངས་མཁྱེན་བརྩེའི་དབང་པོའི་
མདུན་ནས་གནང་བ་རིང་བསྲེལ་རྣམ་བཞི་ཡོད་དོ་ཅོག་གཅིག་ཏུ་འདུས་པའི་ཕུར་མ་ཤིན་ཏུ་ཕོན་ཆེ་བརྟེན་གྱི་གན་མཛོད་ཆེན་པོ་དང་། ལྟེ་བར་གཞུང་གི་རྟེན་ཁྲོད་ནས་བྱུང་བ་གཏེར་ཆེན་ཆོས་རྗེ་གླིང་པ། ཨོ་རྒྱན་འགྲོ་འདུལ་གླིང་པ། ཉི་གྲགས་རྒྱལ་སྲས་བདེ་ཆེན་གླིང་པ་རྣམ་གསུམ་གྱིས་སྦས་གནས་པདྨ་བུདྡྷ་ཚེ་ཕུག་ནས་སྤྱན་དྲངས་པའི་ཚེ་ཆུ་རིལ་བུ་འཆི་མིད་ཚེ་དང་ཡེ་ཤེས་འབར་བ་བཅས་བཞུགས་སོ། ༈སངས་རྒྱས་གཉིས་པ་པདྨཱ་ཀ་རའི་སྣང་བརྙན་གྱི་གདན་ཁྲིའི་འོག་ཏུ་རྒྱལ་བསྟན་སྤྱི་དང་བྱེ་བྲག་གསང་སྔགས་རྡོ་རྗེ་ཐེག་པ་ལ་སྡང་བར་བྱེད་པ་ཇི་སྙེད་པ་ཆོས་ཉིད་ཀྱི་ཀློང་དུ་ཞི་བའི་རྟེན་འབྱུང་དུ་མཚོན་ཆ་རྣམས་མནན་ཏེ་དམིགས་རྣམས་ཟབ་མོས་རྒྱས་བཏབ། དེ་སྟེང་ས་འཛིན་ནང་། སེང་གེ་སྒྲ། ཀླུ་དབང་རྒྱལ་པོ། ས་ལྷ་རྣམས་ཀྱི་བུམ་པ་དང་། གཏེར་གསར་ས་ཀླུའི་བུམ་པ་རེ་རེ། ཀླུ་ནོར་རྒྱས་བུམ་པ། སེང་ཁྲིའི་ནང་། བསོད་ཐག་ཉིན་མོ་བདེ་ལེགས། རང་བྱུང་གསར་ཞོ་འཁོར། དངུལ་བཅུ་པ། གཟི་ཆུ་མིག་གསུམ་པ། བྱེ་རུ་དཀྲུགས་མཆེ་ལེགས་རྡོག་གཅིག །གཡུ་རྡོག་གཅིག །མུ་ཏིག་རྡོག་གསུམ། ཤེལ་རྡོག་གཅིག །དུང་རྡོག་གཅིག །མུ་མེན་རྡོག་གཅིག །སྤོས་ཤེལ་རྡོག་གཅིག །འཆང་
རྡོག་གཅིག །ལིང་ཡུག་སྣ་ལྔ། རྒྱ་རས་ཡུགས་ལྔ་སོགས་ནོར་སྣས་གཏམས། ཐུགས་རྡོར་བཀྲ་ཤིས་གཏེར་བུམ། ཇོ་བོའི་སྐབས་སུ་བཤད་པ་ལྟར་ཤིས་བརྗོད་དང་འདོད་གསོལ་རིགས། པད་གདན་ནང་ཟངས་དཀར་བཀྲ་ཤིས་པའི་རྟགས་ཀྱིས་སྤྲས་པ་མར་ཁུས་གཏམས། དེ་སྟེང་གནོད་སྦྱིན་འཁོར་ལོ་ཇོ་བོའི་ནང་ལྟར་བཞུགས་ཤིང་། གཞན་ཡང་ཛཾ་དམར་ཐོད་པ། རྣམ་སྲས། ཛཾ་སེར། ཛཾ་ལྗང་། ཛཾ་ནག །ནོར་རྒྱུན་མ། དཔལ་ཆེན་མ་རྣམས་ཀྱི་བུམ་པ་རེ་རེ། ནོར་སྣ་དང་གོས་སྣ། དམར་པོ་སྐོར་གསུམ་གྱི་འཁོར་ལོ། རྙིང་མའི་ཆོས་སྐྱོང་སྤྱིའི་སྲོག་འཁོར་དང་བླ་རྡོ་ཚད་ལྡན་བྱས་པ། ནོར་ལྷ་དང་ཆོས་སྐྱོང་རྣམས་ཀྱི་གཟུངས་སྔགས་རྫོགས་ཆེན་སྤར་མ་ལ། མགོན་པོ་ལེགས་ལྡན་རྒྱུད་སྔགས། ཉང་གཏེར་མགོན་དཀར། གཉན་གྱི་ལྷ་མོ། མགོན་པོ་ཕྱག་བཞི། མགོན་པོ་སྡེ་ལྔ། སྔགས་སྲུང་མ། སྲོག་སྒྲུབ། གཟའ། གནོད་སྦྱིན། རྡོར་ལེགས། རྣམ་སྲས་སྤྲིན་གསེབ་མ། རྟ་སྔོན་ཅན། ཕྱག་མཚན་བཞི་པ། ཞང་བློན། ཛཾ་དམར། ལྷ་ཆེན་རླུང་ཞགས་མ། མགོན་པོ་སྤྱིའི་སྔགས། ཞིང་སྐྱོང་། ཤ་འུག་གཏེར་བྱོན་ལྷ་ཆེན། ལས་གཤན། ཕུར་སྲུང་། བྲག་བཙན། གནོད་སྦྱིན་བདུད་བཙན་ཀླུ་
གསུམ་སོགས་ཀྱི་སྔགས། འདོད་གསོལ་རིག་པ་ཕུག་རོན་བཅས། གནམ་ལྕགས་རྡོ་རྗེ། མགོན་དཀར་བུམ་པ། བསོད་ནམས་གླང་འཁོར། གུ་གེ་ཆིག་དྲིལ། སྲུང་བ་རྡོ་རྗེ་ཁྲབ་རིང་རྣམས་དང་། སྲོག་ཤིང་རྩ་བར་རིན་ཆེན་རིལ་བུ་དང་བཅས་ལེགས་པར་བཙུགས། ལྟེ་བར་བླ་མ་ནོར་ལྷའི་བུམ་པ། གསང་བར་བཟང་པོ་རྡོ་རྗེའི་གཏེར་ཕུར་བཅས་བཞུགས། དེ་ནས་རིང་བསྲེལ་རྣམ་བཞི་ལ། ཡུངས་འབྲུ་ལྟ་བུའི་རིང་བསྲེལ་ནི། དཔུལ་བར་སངས་རྒྱས་ཀྱི་འཕེལ་གདུང་འཁྲུལ་མེད་ཀྱི་རྣམ་གྲངས་ཇོ་བོའི་ནང་ལྟར་དང་། རང་གིས་ཕུལ་བ་ཡུངས་འབྲུ་ལྟ་བུའི་རིང་བསྲེལ་ཕྱོགས་བསྡུས་དམ་རྫས་ཏོག་གི་བློ་གྲོས་བཅས་བཞུགས། ཆོས་ཀྱི་རིང་བསྲེལ་ནི། དབུའི་སྟོད་སྨད་དུ། སྙིང་ཐིག་བཀའ་གཏེར་གཙོ་བོར་གྱུར་པའི་བསྟན་པ་བུ་གཅིག་གི་རྒྱུད་དང་བཏགས་གྲོལ་ཙཀྲ་ཆེ་ཆུང་། གླེགས་བམ་མའི་རིགས་ཤིན་ཏུ་མང་བ་དང་། རྫོགས་ཆེན་སྤར་མ་ཐུགས་ཐིག །པད་གླིང་བླ་སྒྲུབ། གཏེར་ཁ་གོང་འོག་གི་བླ་སྒྲུབ་རྣམས་ཀྱི་བརྒྱུད་པ། རྒྱ་གར་གྱི་རིག་འཛིན་བརྒྱད་དང་། མཁན་སློབ་ཆོས་གསུམ་གྱི་མཚན་སྔགས། རྫོགས་ཆེན་སྙིང་ཐིག་ཆེན་མོ་དང་མཁའ་འགྲོ་སྙིང་ཐིག །ཨ་ཏི་ཟབ་དོན། ཀློང་སྡེ་རྡོ་རྗེ་ཟམ་པ། སེམས་སྡེ་
སོགས་ཀྱི་བླ་བརྒྱུད་དང་། རྗེ་འབངས་ཉེར་ལྔའི་མཚན་སྔགས། མདོ་དབང་གི་ཨ་ཏི་དང་ཨ་ནུ་གཉིས། མ་ཧཱ་དང་ཆུ་བོ་གཅིག་འདུས། ཟུར་ཁམས་ཀྱི་ཁྱད་པར་བཅས་པའི་བླ་མ་བརྒྱུད་པ། སྒྱུ་འཕྲུལ་ཞི་ཁྲོ། བཤད་རྒྱུད། ན་རཀ་དོང་སྤྲུགས་ཀྱི་བླ་བརྒྱུད་སོགས་ཀྱི་མཚན་སྔགས། སངས་རྒྱས་མཉམ་སྦྱོར་དང་། བཀའ་བརྒྱུད་བདེར་འདུས། ཡང་དག་བཀའ་མ་དང་ཆོས་དབང་གི་ཡང་དག་སྙིང་པོའི་བླ་བརྒྱུད། གཤེད་དམར། ཚེ་བདག །དྲེགས་འཇོམས། རྟ་མགྲིན་ཡང་གསང་། ཕུར་པ་ལྷ་ནག་ཞལ་གཟིགས་མ། ཕུར་པ་སྤུ་གྲི་རྣམས་ཀྱི་བླ་བརྒྱུད་མཚན་སྔགས། ཤིང་རྟ་ཆེན་པོ་གསུམ་གྱི་རྗེས་སུ་འབྲངས་པའི་སེམས་བསྐྱེད་ལུགས་གསུམ་དང་། ལུགས་གསུམ་ཆུ་བོ་གཅིག་འདུས། སོ་ཐར་སྡོམ་བརྒྱུད། བོད་ཀྱི་པཎྜི་ཏ་རྣམས་ཀྱི་མཚན་སྔགས། ལོ་ཙཱ་བ་རྣམས་དང་། གཏེར་སྟོན་གཙོ་ཆེ་བ། སྟོན་པ་ཉན་ཐོས་མཆོག་རྣམས། དགྲ་བཅོམ་བདུན་སོགས་ཀྱི་མཚན་སྔགས། ཐུགས་ཏིག །གསང་འདུས། གཏེར་ཁ་གོང་འོག་གི་བླ་སྒྲུབ་ཕྱི་ནང་གསང་གསུམ། དགོངས་འདུས་སྤྱི་དྲིལ་ཆེན་མོ། སྨིན་གླིང་དང་འོ་བྲན་གྱི་གུར་དྲག །ཉང་གི་བདེར་འདུས། མེ་ཡི་སྤུ་གྲི། པད་གླིང་དྲག་པོ་སྟེ་བླ་མ་
ཞི་དྲག་གི་སྐོར། རིག་པ་ཕུག་རོན་དང་བཅས་པ། སྐུའི་སྟོད་ཆ་ནས་ལྟེ་བའི་བར་ཇི་ལྟར་རིགས་པར། བཏགས་གྲོལ་རྒྱུད་དྲུག་དང་། ཡང་ཏིག་བཏགས་གྲོལ། ཀུན་འདུས་རིག་པའི་མདོ་རྣམས་ཀྱི་སྔགས། ན་རག་དོང་སྤྲུགས་ཀྱི་སྒྲུབ་ཐབས་ནས་བྱུང་བའི་སྔགས། སྨིན་གླིང་གཏེར་གསར་རྡོར་སེམས་ཀྱི་ཡིག་བརྒྱ། གསང་སྙིང་རྒྱུད་སྔགས། མཉམ་སྦྱོར་དང་ཧེ་རུ་ཀ་གལ་པོའི་རྒྱུད་སྔགས། བཀའ་བརྒྱད་བདེར་འདུས་ཀྱི་ཞི་བ་རིགས་བརྒྱ། ཞེ་གཉིས། རིགས་ལྔ། རིགས་གཅིག་རྣམས་ཀྱི་སྔགས། ཁྲོ་བོ་ཆེ་མཆོག །ཡང་དག །གཤིན་རྗེ། རྟ་མགྲིན། ཕུར་པ། མ་མོ། རིག་འཛིན། མཆོད་བསྟོད། དྲག་སྔགས་རྣམས་དང་། བདེར་འདུས་བཀའ་སྤྱི་འདུས་ཀྱི་སྔགས། བཀའ་བརྒྱད་གསང་རྫོགས་ཀྱི་སྔགས་སྤེལ་ཚིག་དང་བཅས་པ། ཆོས་དབང་ཡང་དག་སྙིང་པོའི་སྔགས་རྣམས། གཤིན་རྗེ་རུ་མཚོན་དམར་པོ། ཚེ་བདག །དྲེགས་འཇོམས། ཁྲོ་ཆུ། ཡང་ཟློག་མེ་ཡི་སྤུ་གྲི་རྣམས་ཀྱི་སྔགས། ཐུགས་རྗེ་ཆེན་པོ་བདེ་གཤེགས་ཀུན་འདུས། སངས་རྒྱས་གསང་བའི་ཚེ་སྒྲུབ། མཁའ་འགྲོ་ཆེན་མོ། ཕག་མོ་རིགས་འདུས། ཁྲོས་ནག །རྟ་མགྲིན་ཡང་གསང་ཁྲོས་པ། གཏེར་ཁ་གོང་འོག་གི་རྟ་ནག །རྟ་
མགྲིན་གསང་སྒྲུབ་རྣམས་ཀྱི་སྔགས། རྟ་མགྲིན་ནཱ་ག་ཀླུ་འདུལ་དང་ཕུར་པ་ཡང་གསང་སྤུ་གྲིའི་སྔགས། ཕྱག་རྡོར་དྲེགས་འདུལ། བྱང་ཆུབ་གླིང་པའི་ཕྱག་རྡོར་དང་ཁང་བརྩེགས། ཡང་ཟློག་རྡོ་རྗེ་ཕ་ལམ། ལོཀྟྲི། འཁོར་ལོ་འབར་བ་རྣམས་ཀྱི་སྔགས། བད་གདན་དུ། མཆོད་པའི་སྤྲིན། མཆོད་པ་འབྱུང་བ་ནམ་མཁའ་མཛོད། གལྤོ་ནས་གསུངས་པའི་སྐུ་གསུམ་དུ་བྱིན་གྱིས་རློབ་པའི་སྔགས་རྣམས་དང་། ཆོས་སྲུང་རྣམས་ཀྱི་སྔགས་གོང་དུ་སོང་བ་ལྟར་བཞུགས། ཐུགས་ཀའི་སྟོད་སྨད་དུ་གསར་མའི་སྐོར་ལ། བདེ་མཆོག །ཀྱཻ་རྡོར། གུར་ནས་གསུངས་པའི་ཁྲོ་བཅུ། གསང་འདུས། སམྦུ་ཊི་རྡོར་དབྱིངས། སངས་རྒྱས་ཐོད་པ། གདན་བཞི། འཁོར་ལོས་སྒྱུར་དྲུག །རྡོ་རྗེ་བདུད་རྩི། གསང་འདུས་ནས་གསུངས་པའི་ཁྲོ་བོ་དགུའི་སྔགས་བཅས། སྒྱུ་འཕྲུལ་འཇམ་རྡོར། གཤིན་རྗེ་གཤེད། གསང་འདུས་ཇོ་ལུགས། སམྦུ་ཊ་ཕྱག་གཉིས་མ། གུར་གྱི་ཡིག་བརྒྱ། དུས་འཁོར། མཚན་བརྗོད། མ་ཧཱ་མཱ་ཡཱ། དགྲ་ནག་གདོང་དྲུག་རྣམས་ཀྱི་སྔགས། སྟོད་སྨད་ཐམས་ཅད་དུ། གཙུག་ཏོར་རྣམ་རྒྱལ། གཙུག་ཏོར་དྲི་མེད། གསང་བ་རིང་བསྲེལ། བྱང་ཆུབ་རྒྱན་འབུམ། རྟེན་སྙིང་སྟེ་གཟུངས་སྡེ་ལྔར་གྲགས་
པ་ཚར་གྲངས་དུ་མ། དྲི་མེད་འོད་ཀྱི་མཆོད་རྟེན་གྱི་སྔགས་སོགས་དང་། ལྟེ་བར་རྟ་མགྲིན་ཇོ་ལུགས། ཕྱག་རྡོར་གོས་སྔོན་ཅན། སོ་འབྲང་། འོད་ཟེར་ཅན་སོགས་གཙོ་བོར་གྱུར་པའི་གཟུངས་ཕྲན་སྣ་ཚོགས། དཀོན་མཆོག་གསུམ་ལ་ཕྱག་འཚལ་ཞིང་སྐྱབས་སུ་འགྲོ་བའི་གཟུངས་སོགས། མཆོད་རྟེན་བསྐོར་བའི་གཟུངས་སོགས། སྒོ་མཐའ་ཡས་པའི་གཟུངས་སོགས། དོན་ཞགས་དང་། སྤྱན་རས་གཟིགས་མགྲིན་སྔོན་གྱི་གཟུངས་སོགས་གསང་སྔགས་སྤྱིའི་རྒྱུད་སྡེ་རྣམས་ཀྱི་གཟུངས་གཙོ་ཆེ་བ་རྣམས། ཤེར་སྙིང་སཾ་སྐྲྀ་ཏའི་སྐད། བཅུ་གཅིག་ཞལ་ཀྱི་གཟུངས་སོགས། ལྟེ་འོག་ལ་ཚངས་པ་བརྒྱ་བྱིན་སོགས་ལྷ་ཆེན་རྣམས་ཀྱི་སྔགས་རྒྱུད་སྡེ་ནས་བྱུང་བ་རྣམས། མགྲིན་པར་ཨོ་རྒྱན་མཆོག་གྱུར་བདེ་ཆེན་གླིང་པས་མ་ཡུམ་ཉིད་ལ་དད་པའི་རྟེན་སྐལ་དུ་གནང་བའི་གུ་རུ་བདེ་བ་ཆེན་པོའི་སྒོས་སྒྲུབ་ཤོག་སེར་བུབས་ཚང་ཙནྡན་དཀར་པོོའི་གླེགས་ཤིང་དང་བཅས་པ། དབྱངས་གསལ་རྟེན་འབྲེལ་སྙིང་པོ་གྲངས་མང་། གསང་གནས་སུ་མདོ་སྡེའི་གཟུངས་སྔགས་ཀྱི་སྡེ་ཚན་དང་། དེ་བཞིན་གཤེགས་པ་བདུན་གྱི་གསོ་སྦྱོང་སོགས་ཆ་ཉི་ཤུ་རེ་བཞུགས། གཞན་ཡང་འོག་ནས་མཆོད་རྟེན་སྐབས་སུ་འབྱུང་བའི་ཟེ་ཆེན་སྤར་མ་བླ་མ་ཡི་དམ་ཆོས་སྲུང་
བཅས་པའི་སྙིང་པོ་རྣམས་ཀྱང་ཆ་ཉི་ཤུ་རེ། ལྷུན་གྲུབ་སྟེང་སྤར་ཁང་ཆེན་མོའི་སྤར་མ་ཇོ་བོའི་སྐབས་སུ་བཤད་ཟིན་པ་ལྟར་ཆ་བདུན་རེ། དཔལ་སྤུངས་སྤར་མ་རྩ་གསུམ་ཆོས་སྲུང་རྒྱ་མཚོའི་སྙིང་པོ་རྣམས་ཀྱང་ཆ་བདུན་རེ་བཅས་གོ་རིམ་མ་འཆོལ་བར་བཞུགས། ཡང་དབུ་ནང་དུ་གཏེར་གསར་གཟི་བརྗིད་སྐྱེད་པ་སྐུའི་རིལ་བུ་དང་། ཆོས་སྐུ་སྣང་བ་མཐའ་ཡས་ཀྱི་སྙིང་པོ་ཨ་མི་བྷེ་ལ། །མགྲིན་པར་ཚངས་དབྱངས་སྐྱེད་པ་གསུང་གི་རིལ་བུ་དང་། ཡོངས་སྐུ་ཐུགས་རྗེ་ཆེན་པོའི་སྙིང་པོ་ཡིག་དྲུག །ཐུགས་ཀར་བདེ་ཆེན་སྐྱེད་པ་ཐུགས་ཀྱི་རིལ་བུ་དང་། སྤྲུལ་སྐུ་པདྨ་འབྱུང་གནས་ཀྱི་སྙིང་པོ་བཛྲར་གུ་རུ་རྣམས་གྲངས་མང་། ལྟེ་བ་ཡན་ལ། ཨོ་རྒྱན་རིན་པོ་ཆེའི་རྣམ་ཐར་བཀའ་ཐང་རིགས། ལེའུ་བདུན་མ། བསམ་ལྷུན། སྨོན་ལམ་དང་མདོ་སྡེ་སྐོར་ཆ་བདུན་རེ། ཐུགས་ཀར་གཏེར་གསར་མཐོང་གྲོལ་འཁོར་ལོ་དང་པདྨའི་སྙིང་པོའི་རྒྱུད། ཡེ་ཤེས་རབ་འབར་རྩ་རྒྱུད། དཔྲལ་བར་བླ་མ་དགོངས་འདུས་ཀྱི་སྐུ་རྒྱུད་ཤེལ་གྱི་རི་བོ་དང་བླ་མའི་གསང་རྒྱུད་བཀའི་བང་མཛོད། མགྲིན་པར་གསུང་རྒྱུད་རིན་ཆེན་འབྲུག་སྒྲ་དང་ཡི་དམ་གསང་རྒྱུད་བཀའི་ཐ་རམ། ཐུགས་ཀར་ཐུགས་རྒྱུད་ནམ་མཁའ་ཀློང་ཡངས་དང་མཁའ་འགྲོའི་གསང་
རྒྱུད་བཀའི་ལྡེའུ་མིག །སྐུ་སྟོད་སྐོར་དུ། རྙིང་རྒྱུད་རིགས་དང་དྲི་མེད་བཤགས་རྒྱུད། དགོངས་འདུས་མཐོང་གྲོལ་ཆ་ལྔ། ལྟེ་བར་ཡོན་ཏན་རྒྱུད་བསྟན་པའི་སྲོག་ཤིང་དང་། གྲོང་ཁྱེར་སྒྲོལ་འཁོར་སོ་འབྲང་ཐུགས་རྗེ་ཆེན་པོའི་མཐོང་གྲོལ་ཙཀྲ། གསང་བར་ཕྲིན་ལས་ཀྱི་རྒྱུད་སྤུ་གྲི་རེག་གཅོད་དེ་རྒྱུད་དགུ་ཐམས་ཅད་ཆ་བདུན་རེ། མགྲིན་པར་རང་གིས་ཕུལ་བ་གཏེར་གསར་ཤོག་སེར་ཀུན་འདུས་རིལ་བུ། ཤོག་སེར་ཕྱག་བྲིས་ཀུན་འདུས་རིལ་བུ་བཅས་དང་། མཁྱེན་བརྩེ་སྤྲུལ་སྐུ་ཁྲག་འཐུང་བདེ་བའི་རྡོ་རྗེའི་ཕྱག་དཔེ་ཀློང་ཆེན་སྙིང་ཐིག་སྔོན་འགྲོའི་ཆོས་ཚན་རྣམས་བཞུགས་སོ། །ཆོས་སྐུའི་རིང་བསྲེལ་ནི། ཐུགས་ཀར་དྲི་མེད་རྣམ་གཉིས་སྒོ་ནས་བསྒྲུབས་པའི་སཱཙྪ་ཉིས་བརྒྱ་ལྷག །འཇམ་དབྱངས་མཁྱེན་བརྩེའི་དབང་པོའི་མདུན་ནས་གནང་བ་ཀུན་མཁྱེན་འཇིགས་མེད་གླིང་པའི་ཐུགས་དམ་རྟེན་ཨོ་རྒྱན་རིན་པོ་ཆེའི་སྐུ་ལི་མ་བྱིན་རླབས་ཅན་ཡེ་ཤེས་སེམས་དཔའི་ཚུལ་དུ་འདིར་བཞུགས་སུ་གསོལ་བ་དང་། ཨོ་རྒྱན་སྐུ་ར་སྟོན་གཏེར་བྱོན། ཧཱུྃ་ནག་མེ་འབར་སྐུ་བྱིན་ཅན་རྣམས་བཞུགས་སོ། །སྐུ་གདུང་རིང་བསྲེལ་ནི། དཔྲལ་བར་རང་གིས་ཕུལ་བ་རྫོགས་ཆེན་སྟོན་པ་བཅུ་གཉིས་དང་། དགའ་རབ་རྡོ་རྗེ། འཇམ་དཔལ་བཤེས་གཉེན།
ཤྲཱི་སི༚་ཧ། མི་མ་མི་ཏྲ་བཅས་རིག་འཛིན་བཞིའི་སྐུ་གདུང་རིང་བསྲེལ་གཅིག་བསྡུས་བསྟན་པའི་བཙས། མཆོག་གྱུར་གླིང་པས་པདྨ་ཤེལ་ཕུག་ནས་སྤྱན་དྲངས་པའི་རིག་འཛིན་དགའ་རབ་རྡོ་རྗེའི་འོད་གསལ་ཐུགས་ཀྱི་རིལ་བུ། ཡེལ་ཕུག་གཏེར་བྱོན་ཧེ་རུ་ཀ་ཡབ་ཡུམ་གྱི་བྱང་སེམས་དམ་རྫས་མཁའ་ཀློང་འཁྱིལ་པ། འབུམ་རྫོང་གཏེར་བྱོན་པྲ་བྷཱ་ཧ་སྟིའི་གདུང་ག་རིལ་བུ་དམ་རྫས་མྱང་གྲོལ་ཆེན་མོ། ཡང་དེ་ཉིད་ནས་སྤྱན་དྲངས་པ་ཨོ་རྒྱན་ཡབ་ཡུམ་གྱི་བྱང་སེམས་དམ་རྫས་རོལ་པ་ཆེན་པོ་རྩ་བའི་གཏའ་སྤེལ། ན་བུན་རྫོང་གི་གཏེར་བྱོན་ཨོ་རྒྱན་རིན་པོ་ཆེའི་ཤངས་མཚལ་རིལ་བུ། ཡང་དེ་ཉིད་ནས་སྤྱན་དྲངས་པ་ཆོས་རྒྱལ་ཁྲི་སྲོང་ལྡེའུ་བཙན་གདུང་རུས་རིལ་བུ། སེང་བྲག་གཏེར་བྱོན་སྐྱེ་བདུན་སྐུ་ཤ་རིལ་བུ་རྩ་བའི་གཏའ་སྤེལ། ཀཿཐོག་ནས་གེ་ནང་བ་གཏེར་ཆེན་བདུད་འདུལ་རྡོ་རྗེའི་དབུ་ཐོད། ཀརྨ་ཆགས་མེད་ཀྱི་སྐུ་གདུང་རིལ་བུ། རིག་འཛིན་ཀློང་གསལ་སྙིང་པོའི་དབུ་ཐོད། ཀུན་མཁྱེན་ཡེ་ཤེས་རྡོ་རྗེའི་གདུང་རུས། གསང་གནས་སུ་འདིའི་ཕྱོགས་གཏོགས། རང་གིས་ཕུལ་བ་པདྨ་འོད་གསལ་མདོ་སྔགས་གླིང་པས་ཟིལ་ཕྲམ་རྡོ་རྗེ་གཡུང་དྲུང་ནས་སྤྱན་དྲངས་པ་མཁའ་འགྲོ་མ་ལས་ཀྱི་དབང་མོ་ཆེའི་རང་བྱུང་གསང་བའི་བདུད་རྩི། མཆོག་
གླིང་གཏེར་མ་པྲ་བྷཱ་ཧ་སྟིའི་རྣམ་སྣང་རིལ་བུ་དམ་རྫས་བཅུད་ཀྱི་ཉིད་ཁུ་དང་། གསང་ཆབ་ཀུན་འདུས་མི་བསྐྱོད་རིལ་བུ་དམ་རྫས་བཻ་ཌཱུརྻའི་སྙིང་པོ། དམ་རྫས་དཔལ་གྱི་སྙིང་པོ་རྣམ་སྣང་རིལ་བུ། འབུར་མོ་གནས་ཀྱི་གཏེར་བྱོན་ཡེ་ཤེས་མཚོ་རྒྱལ་གྱི་གསང་ཆབ་རིལ་བུ་དམ་རྫས་རིན་ཆེན་སྙིང་པོ། བྱང་སེམས་ཟླ་ཐིག་རིལ་བུ་དམ་རྫས་ཟླ་ཤེལ་གཞོན་ནུ། ཀཿཐོག་ནས་གནང་བ་གྲུབ་ཆེན་ཐང་སྟོང་རྒྱལ་པོས་ཅོང་ཞི་བཅུད་ལེན་མཛད་པའི་གསང་ཆབ། དྲུང་ནམ་མཁའ་རྒྱ་མཚོ་དང་། འགྱུར་མེད་རྡོ་རྗེ་སོགས་ཀྱི་གསང་ཆབ་བཅས་བཞུགས་སོ། །སྐུ་བལ་རིང་བསྲེལ་ནི། དཔྲལ་བར་རང་གིས་ཕུལ་བ་མཆོག་གྱུར་གླིང་པས་སེང་ཆེན་གནམ་བྲག་ནས་སྤྱན་དྲངས་པ་ཨོ་རྒྱན་རིན་པོ་ཆེའི་ཟབ་བེར། འཛི་ལུང་མཁའ་འགྲོ་ཤེལ་ཕུག་གཏེར་བྱོན་མཁན་ཆེན་བོ་དྷི་སཏྭའི་སྐུ་ཆོས། སེང་བྲག་གཏེར་བྱོན་ལྷ་ལྕམ་མནྡཱ་ར་བའི་ན་བཟའ། ཡང་དེ་ཉིད་ནས་སྤྱན་དྲངས་པ་མཁའ་འགྲོ་ཡེ་ཤེས་མཚོ་རྒྱལ་གྱི་ན་བཟའ་དང་གསང་གོས། ཆོས་རྒྱལ་ཁྲི་སྲོང་ལྡེའུ་བཙན་ན་བཟའ། མགྲིན་པར། ཀཿཐོག་ནས་གནང་བ་ཀུན་མཁྱེན་ཀློང་ཆེན་རབ་འབྱམས་ན་བཟའ། བྱང་བདག་རིག་འཛིན་ངག་གི་དབང་པོའི་ནང་གོས། གཏེར་ཆེན་འགྱུར་མེད་རྡོ་
རྗེའི་གསང་གོས་དང་ཕུར་དང་། རྡོར་བྲག་རིག་འཛིན་ཆེན་པོ་པདྨ་ཕྲིན་ལས་སྐུ་འགགས། གནམ་ཆོས་མི་འགྱུར་རྡོ་རྗེའི་ན་བཟའ། རིག་འཛིན་ཀློང་གསལ་སྙིང་པོའི་དབུ་སྤ། རིག་འཛིན་ཚེ་དབང་ནོར་བུའི་སྐུ་ཤམ། སྟག་བླ་པདྨ་མ་ཏིའི་ཕྱག་རྡོར་དྲིལ། ཀུན་མཁྱེན་འཇིགས་མེད་གླིང་པའི་དབུ་སྐྲ། པདྨ་ཉིན་བྱེད་དབང་པོའི་ན་བཟའ། མཆོག་གྱུར་བདེ་ཆེན་གླིང་པའི་དབུ་སྐྲ། རྫོགས་ཆེན་པ་མི་འགྱུར་ནམ་མཁའི་རྡོ་རྗེའི་ན་བཟའ། ཀཿཐོག་སི་ཏུ་རིན་པོ་ཆེའི་དབུ་ཞྭ་བཅས་བཞུགས་སོ། །དམ་རྫས་རྟེན་འདུས་ཀྱི་སྐོར་ལ། མགྲིན་པར་རང་གིས་ཕུལ་བ་མཆོག་གྱུར་གླིང་པས་སེང་ཆེན་གནམ་བྲག་ནས་སྤྱན་དྲངས་པ་སློབ་དཔོན་འཇམ་དཔལ་བཤེས་གཉེན་གྱིས་བསྒྲུབས་པའི་འཇམ་དབྱངས་རིལ་བུ་ཡེ་ཤེས་སེམས་དཔའི་དྭངས་བཅུད། ག་སྟོད་འོད་འབར་བྲག་ནས་སྤྱན་དྲངས་པའི་སིདྡྷི་རིལ་བུ་དམ་རྫས་ཕྲིན་ལས་རོལ་པའི་ཕབ་གཏའ་གཞན་ཕན་མཁའ་ཁྱབ། ཡེ་རྒྱལ་ནམ་མཁའ་མཛོད་ནས་སྤྱན་དྲངས་པའི་འཆི་མེད་གྲུབ་པ་རྣམས་ཀྱི་ཚེ་བཅུད་ཀུན་འདུས་གུ་རུ་ཡབ་ཡུམ་གྱིས་བསྒྲུབས་པའི་ཚེ་རིལ་ནམ་མཁའི་སྙིང་པོའི་ཕྱག་བསྒྲིལ་ཐབས་ཤེས་རྡོ་རྗེ་རྫས་མཆོག་སྲོག་མཐུད་བདུད་རྩིའི་ཞུན་མ། སྒྲོལ་དཀར་རིལ་བུ་བདུད་རྩིའི་
ཟིལ་ཐིག །ལྟེ་བར་མཆོག་གྱུར་གླིང་པས་བདེ་ཆེན་པདྨ་ཤེལ་ཕུག་ནས་དམ་ཆོས་རྫོགས་པ་ཆེན་པོ་སྡེ་གསུམ་དང་ལྷན་ཅིག་སྤྱན་དྲངས་པའི་ཤྲཱི་སི༚་ཧའི་བདུད་རྩི་ཆོས་སྨན་འཆི་མེད་དྭངས་མའི་བཅུད་ལེན་གྱི་གཏའ་སྤེལ། གནམ་བྲག་གཏེར་བྱོན་རིག་འཛིན་བརྒྱད་ཀྱི་ཆོས་སྨན་ཡེ་ཤེས་ཀློང་དགུའི་བཅུད་ལེན་གཏའ་སྤེལ། ཡང་དེ་ཉིད་ནས་སྤྱན་དྲངས་པའི་རིག་འཛིན་བརྒྱད་ཀྱི་ཆོས་སྨན་ལ་གཞི་བྱས། ཨོ་རྒྱན་རྗེ་འབངས་ཉེར་ལྔས་དཔལ་གྱི་བསམ་ཡས་མཆིམས་ཕུ་དབང་ཆེན་རོལ་བའི་ཕོ་བྲང་དུ་བསྒྲུབས་པའི་བདུད་རྩི་ཆོས་སྨན་བདེ་བར་གཤེགས་པ་ཐམས་ཅད་འདུས་པའི་བཅུད་ལེན་གྱི་གཏའ་སྤེལ། ན་བུན་རྫོང་གི་གཏེར་བྱོན་བི་མ་མི་ཏྲའི་ཆོས་སྨན་བདུད་རྩིའི་བཅུད་ལེན་གྱི་གཏའ་སྤེལ། གསང་གནས་བཙའ་འདྲ་རིན་ཆེན་བྲག་གི་གཏེར་བྱོན་ཡུལ་ཆེན་དྲུག་ཅུ་རྩ་བཞི་དང་། གོ་སྟོད་འོད་འབར་བྲག་གི་གཏེར་བྱོན་དུར་ཁྲོད་བརྒྱད་ཀྱིས་སྣ་རིལ་བུ་དང་ས་ཆུ་འབྱུང་བཅུད་ཀུན་འདུས་ཀྱི་རིལ་བུ་བཅས། ལྟེ་བར་ས་ངོར་གྱི་བདུད་རྩི་རིལ་བུ། དཔལ་ཡུལ་བླ་རབས་རིམ་བྱོན་གྱི་བདུད་རྩི་ཆོས་སྨན། རྫོགས་ཆེན་པས་འདུས་མདོའི་སྒོ་ནས་ལན་གྲངས་དུ་མར་བསྒྲུབས་པའི་བདུད་རྩི་ཆོས་སྨན། ཐུགས་ཀར་ཀུན་གཟིགས་འཇམ་དབྱངས་མཁྱེན་
བརྩེས་གནང་བ་རིང་བསྲེལ་རྣམ་བཞི་གཅིག་འདུས་ཀྱི་ཕུར་མ་ཁྱད་འཕགས། གྲུབ་ཆེན་བརྒྱད་ཅུ། གོང་མ་རྣམ་ལྔ། བླ་མ་བསོད་ནམས་རྒྱལ་མཚན། རྗེ་བཙུན་བསྟན་པའི་ཉི་མ་རྣམས་ཀྱི་ཚེ་རྫས་གཏའ་སྤེལ་འཆི་མེད་བཀྲ་ཤིས་དཔལ་འབར་བཅས་བཞུགས་སོ། །སྐུའི་གཡས་ཟུར་དུ་གནས་ཆེན་བྱིན་འབེབས་ཀྱི་རྟེན་རྣམས་ཚད་དང་ལྡན་པར་བགྱིས་པའང་བཞུགས་པ་ཞར་བྱུང་དུ་སྨོས་པའོ། །བྱང་ཆུབ་མཆོད་རྟེན་ཆེན་པོ་ལ་གཙུག་ཏོར་དྲི་མེད་ཀྱི་ས་ཆོག་སྔོན་དུ་འགྲོ་བས། སེང་ཁྲིའི་འོག་ཏུ་སྙིང་པོའི་རྣལ་འབྱོར་ཟབ་མོ་སྒྲུབ་པ་རྣམས་ལ་འཚེ་བའི་ནག་ཕྱོགས་ཀྱི་སྡེ་དཔུང་དབྱིངས་སུ་ཞི་བའི་རྟེན་འབྱུང་དུ་མཚོན་ཆ་མནན་ཏེ་ཆོས་ཉིད་ཀྱི་བདེན་པས་རྒྱས་བཏབ། ས་འཛིན་ནང་སེང་གེ་སྒྲ། ཀླུ་དབང་རྒྱལ་པོ། ས་ལྷའི་བུམ་པ། གཏེར་གསར་ས་ཀླུའི་བུམ་པ་རྣམས་རེ་རེ། བཀྲ་ཤིས་དང་འདོད་གསོལ་རིགས་ཇོ་བོའི་སྐབས་ལྟར་དང་། སེང་ཁྲིའི་ནང་ཐུགས་རྡོར་བཀྲ་ཤིས་གཏེར་བུམ། བསོད་ཐག་ཉིན་མོ་བདེ་ལེགས། རང་བྱུང་གསེར་ཞོ་འཁོར། དངུལ་བཅུ་པ། གཟི་ཆུ་མིག་དྲུག་པ། བྱ་རུ་ཆེ་ལེགས་རྡོག་གཅིག །གཡུ་རྡོག་གཅིག །མུ་ཏིག་རྡོག་གསུམ། ཤེལ་རྡོག་གཅིག །དུང་རྡོག་གཅིག །མུ་མེན་རྡོག་གཅིག །སྤོས་ཤེལ་རྡོག་
གཅིག །འཆང་རྡོག་གཅིག །ལིང་སྣ་ལྔ། རྒྱ་རས་ཡུགས་ལྔ་སོགས་ནོར་སྣ་དུ་མས་གཏམས། དེ་ནས་ཟངས་དཀར་མར་ཞུན་གྱིས་བཀང་བའི་སྟེང་གནོད་སྦྱིན་ནོར་ལྷའི་འཁྲུལ་འཁོར་རྣམས་དང་ལྷན་ཅིག །ཛཾ་ནག་ཐོད་པ་དང་འཁོར་ལོ་སྐུ་བརྙན་ལི་མ་བཅས། བསོད་ནམས་གླང་པོ་སྟོབས་སྐྱེད་ཀྱི་འཁོར་ལོ། ཚད་མེད་ནང་བླ་མ་ནོར་ལྷའི་བུམ་པ། མགོན་དཀར་བུམ་པ། དམར་པོ་སྐོར་གསུམ། ཆོས་སྐྱོང་ནོར་ལྷ་སྤྱིའི་གཟུངས་སྔགས་ཆ་ཉེར་བདུན་རེ། གུ་གེ་ཆིག་དྲིལ། སྲུང་བ་རྡོ་རྗེ་ཁྲབ་རིང་། བུམ་པའི་ནང་དྲི་མེད་རྣམ་གཉིས་ཀྱི་གཞུང་ལས་ཇི་སྐད་གསུངས་པའི་སྲོག་ཤིང་རྩེ་མོར་གསེར་གྱིས་བྲིས་པའི་འོད་ཟེར་དྲི་མེད་ཀྱི་གཟུངས་མདོའི་གླེགས་བམ། སྨད་ཆའི་ཕྱོགས་བཞིར་སྲོག་ཤིང་གི་སྔགས་དང་སྒྲིབ་སེལ་སྔགས་དགུ་བཅུ་རྩ་དགུ་རེ་དང་། རྩ་བར་འོད་ཟེར་དྲི་མེད་སྙིང་པོ་དང་རྟེན་སྙིང་རྣམས་གཟུངས་ཁུངས་བྲུས་པ་ལ་བཅུག་པའི་ཕྱི་ནས་མཚལ་གྱི་ན་བཟའ་དང་གསེར་བྲིས་སོགས་གོང་སྨོས་ལྟར་བྱས་པ་ཉེ་བར་བསྔོགས་ནས། ཐོག་མར་གཙུག་ཏོར་དྲི་མེད་ཀྱི་དཀྱིལ་འཁོར་རས་བྲིས་བུམ་རྟེན་དུ་བཀོད་པ་ལ་སྒྲུབ་མཆོད་བྱས་ནས་རས་བྲིས་ཞལ་ཁེབས་རྒྱབ། དེ་སྟེང་འོད་ཟེར་དྲི་མེད་དཀྱིལ་
འཁོར་རས་བྲིས་ཀྱི་ལྟེ་བར་སྲོག་ཤིང་མ་ཡོ་བར་བཙུགས་ནས་སྒྲུབ་མཆོད་ཚུལ་བཞིན་བྱས། མཆོད་པའི་ཡོ་བྱད་སོགས་ཀྱང་གཞུང་དང་མཐོང་རྒྱུད་ཀྱི་ལག་ལེན་ལས་ཇི་ལྟར་འབྱུང་བ་བཞིན་གཙང་དག་མ་ཚང་བ་མེད་པར་བཀོད། དེ་སྟེང་གཙུག་ཏོར་དྲི་མེད་ཀྱི་སཱཙྪ་དཀར་པོ་བརྒྱ་རྩ་བརྒྱད་དང་། འོད་ཟེར་དྲི་མེད་ཀྱི་སཱཙྪ་སེར་པོ་དགུ་བཅུ་རྩ་དགུ་རྣམས་སོ་སོའི་ཆོ་གས་ཚུལ་བཞིན་སྔོན་ནས་བསྒྲུབས་ཟིན་པ་བཀོད་པའི་བར་མཚམས་སྤོས་སྨན་གྱི་ཕུར་མས་བཅེར་བ་བཞུགས་སོ། །དེ་ནས་རིང་བསྲེལ་རྣམ་ལྔ་ལས་ཡུངས་འབྲུ་ལྟ་བུའི་རིང་བསྲེལ་ནི། ཏོག་གི་ནང་དུ་བདེ་བར་གཤེགས་པའི་འཕེལ་གདུང་འཁྲུལ་མེད་ཀྱི་རྣམ་གྲངས་ཇོ་བོའི་སྐབས་ལྟར་དང་། རང་གིས་ཕུལ་བ་ཡུངས་འབྲུ་ལྟ་བུའི་རིང་བསྲེལ་ཀུན་འདུས་དམ་རྫས་ཏོག་གི་བློ་གྲོས་དང་། གཏེར་གསར་ཡུངས་འབྲུ་ལྟ་བུའི་རིང་བསྲེལ་རིལ་བུ་དམ་རྫས་མྱང་གྲོལ་ཡིད་བཞིན་ནོར་བུ་བཅས་བཞུགས་སོ། །ཆོས་ཀྱི་རིང་བསྲེལ་ནི། ལྷུན་གྲུབ་སྟེང་སྤར་མ་ཇོ་བོའི་སྐབས་སུ་སོང་བ་ལྟར་ཆ་བདུན་རེ་གནས་སོ་སོར་མ་འཆོལ་བར་བཞུགས་ཤིང་། ཟེ་ཆེན་སྤར་མ་ལ། ཆོས་འཁོར་གྱི་ནང་དུ། བླ་སླུབ་ཐུགས་ཏིག །པད་གླིང་བླ་སྒྲུབ། གཏེར་ཁ་གོང་འོག་ཐུན་
མོང་གི་བླ་སྒྲུབ། རྫོགས་ཆེན་སྙིང་ཐིག །མཁའ་འགྲོ་སྙིང་ཐིག །ཨ་ཏི་ཟབ་དོན་སྙིང་པོ་རྣམས་ཀྱི་བླ་མ་བརྒྱུད་པ། སེམས་སྡེ་དང་། ཀློང་སྡེ་རྡོ་རྗེ་ཟམ་པའི་བརྒྱུད་པ། རྒྱ་གར་རིག་འཛིན་བརྒྱད། རྗེ་འབངས་ཉེར་ལྔ། མཁན་སློབ་ཆོས་གསུམ་གྱི་མཚན་སྔགས། འདུས་པ་མདོའི་ཨ་ཏི། ཨ་ནུ། མ་ཧཱ་རྣམས་ཀྱི་བརྒྱུད་པ། ཟུར་ལུགས་གྲགས་པ་གོང་ར་དང་། ཟུར་བྱམས་སེང་ནས་བརྒྱུད་པ། སྒྲོལ་མ་བསམ་འགྲུབ་རྡོ་རྗེའི་རྗེས་སུ་ཀཿཐོག་པའི་བརྒྱུད་པ། བསྐྱེད་རྫོགས་རྫོགས་པ་ཆེན་པོ་གསུམ་གཅིག་འདྲེས་ཀྱི་བརྒྱུད་པ། ན་ར་ཀ་དོང་སྤྲུགས་དང་། སྒྱུ་འཕྲུལ་ཞི་ཁྲོའི་བརྒྱུད་པ། སྙིང་པོའི་བཤད་བཀའི་བརྒྱུད་པ། སངས་རྒྱས་མཉམ་སྦྱོར། ཡང་དག །ཆོས་དབང་ཡང་དག །ཕུར་པ་ལྷ་ནག །བཀའ་བརྒྱད་བདེར་འདུས། གཤིན་རྗེ་དམར་པོ། ཚེ་བདག །དྲེགས་འཇོམས། ཕུར་པ་ཡང་གསང་སྤུ་གྲི། རྟ་མགྲིན། ཡང་གསང་ཁྲོས་པ་རྣམས་ཀྱི་བརྒྱུད་པ། སེམས་བསྐྱེད་ཀླུ་སྒྲུབ་ལུགས། ཐོགས་མེད་ལུགས། ཞི་བ་ལྷའི་ལུགས། སེམས་བསྐྱེད་ཀྱི་ལུགས་ཆུ་བོ་གཅིག་འདྲེས་རྣམས་ཀྱི་བརྒྱུད་པ། བོད་ལ་བཀའ་དྲིན་ཆེ་བའི་པཎྜི་ཏ་རྣམས་དང་། ལོ་ཙཱ་བ་རྣམས་ཀྱི་མཚན་སྔགས།
གཏེར་སྟོན་གཙོ་ཆེ་བ་འགའི་མཚན་སྔགས། དགྲ་བཅོམ་པ་བདུན་གྱི་མཚན་སྔགས། བུམ་པ་སྟོད་ཀྱི་ཆ་ནས་བཟུང་། གཏེར་གསར་ཐུགས་ཐིག །གཏེར་ཁ་གོང་འོག་གི་ཕྱི་ནང་གསང་བའི་བླ་སྒྲུབ། བླ་མ་གསང་འདུས་ཀྱི་སྐུ་གསུམ་སྒྲུབ་པ། གུར་དྲག་འོ་བྲན་ལུགས། པད་གླིང་དྲག་པོ། མ་ཧཱ་གུ་རུ་དྲག་པོ། ཉང་གི་དྲག་པོ་བདེར་འདུས། འདུས་པ་སྤྱི་དྲིལ་ཆེན་མོ། བླ་མ་དགོངས་འདུས་རྣམས་ཀྱི་སྔགས། ཀུན་འདུས་རིག་པ། ན་རཀ་དོང་སྤྲུགས། སྒྱུ་འཕྲུལ་གསང་སྙིང་། སངས་རྒྱས་མཉམ་སྦྱོར། གལྤོ་རྣམས་ཀྱི་རྒྱུད་སྔགས། བདེར་འདུས་ཞི་བ་རིགས་བརྒྱ། ཞེ་གཉིས། རིགས་ལྔ་རྣམས་ཀྱི་སྔགས། བདེར་འདུས་ཁྲོ་བོ་དཔལ་དགུ། བཀའ་བརྒྱད་གསང་རྫོགས་ཞི་བ་དང་ཁྲོ་བོ། བདེར་འདུས་ཞི་ཁྲོ་བཀའ་བརྒྱད་རྣམས་ཀྱི་སྙིང་པོ། ཆོས་དབང་ཡང་དག་སྙིང་པོ། སངས་རྒྱས་གསང་བའི་ཚེ་སྒྲུབ། ཉང་ལུགས་རྡོ་རྗེ་རྣལ་འབྱོར་མ་མཁའ་འགྲོ་ཆེན་མོ། འཇམ་དཔལ་ཕྱག་རྒྱ་ཟིལ་གནོན། ཕག་མོ་རིགས་འདུས། ཕུར་པ་ཡང་གསང་སྤུ་གྲི་རྣམས་ཀྱི་སྔགས། ལྕགས་སྡིག་ནས་བྱུང་བའི་ཨོ་རྒྱན་ཐུགས་སྔགས། གཤིན་རྗེ་དྲེགས་འཇོམས། ཁྲོ་ཆུ། ཡང་ཟློག་མེའི་སྤུ་
གྲི། གཤིན་རྗེ་དུ་མཚོན་དམར་པོ། ཐུགས་རྗེ་ཆེན་པོ་བདེ་གཤེགས་ཀུན་འདུས། གཏེར་ཁ་གོང་འོག་གི་རྟ་ནག །རྟ་མགྲིན་ཡང་གསང་ཁྲོས་པ། ནཱ་ག་ཀླུ་འདུལ། ཉང་ལུགས་ཁྲོས་ནག་རྣམས་ཀྱི་སྔགས། ཕྱག་རྡོར་དྲེགས་འདུལ། བྱང་ཆུབ་གླིང་པའི་ཕྱག་རྡོར། ལོཀྟྲི། ཡང་ཟློག་རྡོ་རྗེ་ཕ་ལམ། འཁོར་ལོ་འབར་བ་རྣམས་ཀྱི་སྔགས། མཆོད་པའི་སྤྲིན་གྱི་གཟུངས། སྐུ་གསུམ་བྱིན་གྱིས་རློབ་པའི་གཟུངས། བུམ་སྨད་དུ། བདེ་མཆོག་དང་། ཀྱཻ་རྡོར་སྙིང་པོ། ཀྱཻ་རྡོར་ཕྱག་གཉིས་པ། ཕྱག་བཞི་པ། ཕྱག་དྲུག་པ། ཕྱག་བཅུ་དྲུག་པ། ཀྱཻ་རྡོར་རིགས་ལྔ་མཁའ་འགྲོ། སྣ་ཚོགས་མཁའ་འགྲོ་རྣམས་ཀྱི་སྔགས། གསང་འདུས་སུ་གསུངས་པའི་ཁྲོ་བོ་དགུ། གུར་ལས་གསུངས་པའི་ཁྲོ་བོ་བཅུ་རྣམས་ཀྱི་སྔགས། དུས་ཀྱི་འཁོར་ལོའི་རྐང་པ་བཅུ་དྲུག་པའི་སྔགས། རྡོ་རྗེ་ཕག་མོའི་སྙིང་པོ། བཅོམ་ལྡན་འདས་མའི་ཕྲེང་སྔགས། གསང་འདུས་ཇོ་བོ་ལུགས་དང་། གཙུག་ཏོར་འཁོར་ལོས་སྒྱུར་བའི་སྔགས། ཚད་མེད་སོགས་སུ་གཟུངས་ཆེན་སྡེ་ལྔ། ཇོ་བོའི་ཐུགས་དམ་ལྷ་བཞིའི་སྙིང་པོ། ཐུགས་རྗེ་ཆེན་པོ་བཅུ་གཅིག་ཞལ་གྱི་སྙིང་པོ། རྟ་མགྲིན་ཇོ་བོ་ལུགས། ཕྱག་རྡོར་གོས་སྔོན་ཅན། རྡོ་རྗེ་
རྣམ་པར་འཇོམས་པ། གཙུག་ཏོར་གདུགས་དཀར། གྲ་ལྔའི་ལྷ་མོ་ལྔ། ལོ་གྱོན་མ། འོད་ཟེར་ཅན་རྣམས་ཀྱི་གཟུངས། བྱམས་པས་དམ་བཅས་པ། འཇམ་དཔལ་གྱིས་དམ་བཅས་པ། ཤེས་རབ་ཀྱི་ཕ་རོལ་ཏུ་ཕྱིན་མ། སྐུལ་བྱེད་མ་རྣམས་ཀྱི་གཟུངས། དཀོན་མཆོག་གསུམ་ལ་ཕྱག་འཚལ་ཞིང་སྐྱབས་སུ་འགྲོ་བའི་གཟུངས། དྲི་མེད་འོད་ཀྱི་མཆོད་རྟེན་རབ་གནས་གཟུངས་དང་། མཆོད་རྟེན་བསྐོར་བའི་གཟུངས། མཆོད་པ་དང་བསྐོར་བའི་གཟུངས། ཀུན་རིག །རིན་འབྱུང་། འོད་དཔག་མེད། དོན་གྲུབ་རྣམས་ཀྱི་གཟུངས། དེ་བཞིན་གཤེགས་པའི་ཡི་གེ་བརྒྱ་པ། སངས་རྒྱས་དྲི་མེད་འོད་ཀྱི་སྙིང་པོ། གཙུག་ཏོར་གདུགས་དཀར་གྱི་གཟུངས། ཕྱག་ན་རྡོ་རྗེའི་གཟུངས་རིང་། དོན་ཞགས་ཀྱི་གཟུངས། སྤྱན་རས་གཟིགས་མགྲིན་པ་སྔོན་པོའི་གཟུངས། ཚད་མེད་སྨད་དུ། ཤེར་སྙིང་སཾ་སྐྲྀ་ཏའི་སྐད། ཤེར་ཕྱིན་ཡི་གེ་ཉུང་ངུ། སྟོང་ཕྲག་བརྒྱ་པའི་གཟུངས། སྔགས་དབྱིངས་སྙིང་པོ། ཆོས་དབྱིངས་གསུང་དབང་གི་ལས་སྔགས། ངན་འགྲོ་སྦྱོང་བའི་སྙིང་པོ། འཇམ་དཔལ་ཤེས་རབ་བློ་འཕེལ། དཔའ་བོ་གཅིག་པ། སྤྱན་རས་གཟིགས་བཅུ་གཅིག་ཞལ། སྒོ་
སྒོ་མཐའ་ཡས་པ་རྣམས་ཀྱི་གཟུངས། དེ་ཉིད་འདུས་པ་ནས་གསུངས་པའི་ཡི་གེ་བརྒྱ་པ། ལོ་གྱོན་དང་འོད་ཟེར་ཅན་གྱི་སྙིང་པོ་དང་ལས་སྔགས། རྣམ་རྒྱལ་ཚངས་པ། དབང་ཕྱུག་ཆེན་པོ། ཁྱབ་འཇུག་རྣམས་ཀྱི་སྔགས། ཚེས་གྲངས་རྒྱུ་སྐར་གཟའི་སྙིང་པོ། བགེགས་བསྐྲད་པའི་སྔགས། ཆོས་ཐམས་ཅད་ཀྱི་ཡུམ་གྱི་གཟུངས། ཏིང་འཛིན་རྒྱལ་པོའི་གཟུངས། ཕར་ཕྱིན་དྲུག་དང་། བརྒྱད་སྟོང་པའི་སྙིང་པོ། སྟོང་ཕྲག་ཉི་ཤུ་པ་གཟུང་བར་འགྱུར་བ། ཏོག་ནས་ཆོས་འཁོར་གྱི་བར་དུ་ཡང་ཟབ་རྫོགས་པ་ཆེན་པོའི་བཏགས་གྲོལ་གྱི་སྐོར་ཐམས་ཅད། སེང་ཁྲིའི་ནང་དུ་དཔལ་མགོན་ལེགས་ལྡན། ཕྱག་བཞི། མ་ནིང་། ཞལ་བཞི། མགོན་པོ་སྡེ་ལྔ། སྟ་གཞོན། སྔགས་སྲུང་མ། ཉང་གཏེར་མགོན་དཀར། གཉོས་ལུགས་ཏྲཀྵད་ལྕམ་དྲལ། ཤ་འུག་གཏེར་བྱོན་ལྷ་ཆེན། ལས་གཤིན་གཉན་གྱི་མ་མོ། དམ་ཅན། བྲག་བཙན། རྣམ་སྲས་སྤྲིན་གསེབ་མ། རྟ་སྔོན་ཅན། དྲག་པོ་རྟ་སྔོན་ཅན། ཕྱག་མཚན་བཞི་པ། ཞང་བློན་རྡོ་རྗེ་བདུད་འདུལ། གནོད་སྦྱིན་ཤན་པ་དམར་ནག །ཞིང་སྐྱོང་སེང་གདོང་། ཕུར་སྲུང་རྣམས་ཀྱི་སྔགས། མགོན་པོ་སྤྱིའི་སྔགས་བཅས་ཚར་བདུན་རེ་བཞུགས། དཔལ་སྤུངས་
སྤར་མ་རྩ་གསུམ་ཆོས་སྲུང་དང་བཅས་པའི་སྙིང་པོ་རྣམས་ཚར་བདུན་རེ། ཨོ་རྒྱན་རིན་པོ་ཆེའི་སྣང་བརྙན་གྱི་སྐབས་སུ་བཤད་པ་ལྟར་རྫོགས་ཆེན་སྤར་མ་རིགས་ཀྱང་ཆ་བདུན་རེ་བཞུགས། གཞན་ཡང་སྲོག་ཤིང་གི་གནས་ལྔར་དགོངས་འདུས་རྒྱུད་དགུ་ཆ་གཅིག །རྩ་བར་སངས་རྒྱས་རབ་བདུན་གསོ་སྦྱོང་གི་ཚིགས་བཅད་དང་རིན་ཆེན་རིལ་བུ། བུམ་པའི་ནང་ཡེ་ཤེས་རབ་འབར་རྩ་རྒྱུད། བྲེ་ནང་གཏེར་གསར་སེམས་ཉིད་ངལ་བསོའི་མཐོང་གྲོལ་ཙཀྲ། སེང་ཁྲི་ནས་ཆོས་འཁོར་མན་ལ་རྣམ་རྒྱལ་གཟུངས་རིང་སྟོང་ཕྲག །གཟུངས་ཆེན་སྡེ་ལྔ་ཆ་བརྒྱ་དང་ལྔ་བཅུ། ཚད་མེད་སོགས་སུ་སོ་འབྲང་། གྲོང་ཁྱེར་སྒྲོལ་འཁོར། ཐུགས་རྗེ་ཆེན་པོའི་ཙཀྲ་སོགས་ཆ་རེ་བཞུགས་སོ། །ཆོས་སྐུའི་རིང་བསྲེལ་ནི། བཀའ་གདམས་མཆོད་རྟེན་བྱིན་ཅན། དྲི་མེད་རྣམ་གཉིས་ཀྱི་སྒོ་ནས་བསྒྲུབས་པའི་སཙྪ་གོང་སྨོས། ཚེ་དཔག་མེད་ཀྱི་སྐུ་རྙིང་མ་བྱིན་ཅན། བྱམས་པའི་སྐུ་ལི་མ། རྟེན་འདམ་གྱི་ཚེ་ལྷ་རྣམ་གསུམ་སྐུ། ངོར་ཆེན་རྡོ་རྗེ་འཆང་གི་གདུང་ཚ། མཁན་ཆེན་སངས་རྒྱས་སེང་གེའི་གདུང་ཚ་རྣམ་རྒྱལ་མའི་སྐུ། ཐར་རྩེ་པ་ཆེན་ནམ་མཁའ་དཔལ་བཟང་གདུང་ཚ་ཐར་རྩེའི་རྟེན་སྒམ་ནས་བྱུང་བ། སྨིན་གླིང་གཏེར་ཆེན། གྲུབ་ཐོབ་པདྨ་
རིག་འཛིན། སྐུ་ཞབས་དགེ་མང་གཞན་ཕན་མཐའ་ཡས། གླིང་སྤྲུལ་ཐུབ་བསྟན་རྒྱ་མཚོ་རྣམས་ཀྱི་གདུང་ཚ་བྱིན་སྐུ་བཅས་བཞུགས་སོ། །སྐུ་གདུང་རིང་བསྲེལ་ནི། ཆོས་འཁོར་ནང་དུ། རང་གིས་ཕུལ་བ་མཆོག་གྱུར་གླིང་པས་འབུར་མོ་བྲག་ནས་སྤྱན་དྲངས་པ་ཕྱོགས་བཅུའི་རྒྱལ་བ་སྲས་བཅས་ཀྱི་བྱང་སེམས་གཅིག་བསྡུས་དམ་རྫས་རོལ་པ་ཆེན་པོ་རྩ་བའི་གཏའ་སྤེལ། གཏེར་གསར་སྐུ་གདུང་རིང་བསྲེལ་ཀུན་འདུས་ཕབ་གཏའ་དམ་རྫས་འབྲེལ་གྲོལ་ཡིད་བཞིན་སྙིང་པོ། སྐྱེ་བདུན་སྐུ་ཤ་རིལ་བུ་མཁའ་སྤྱོད་བདེ་ལམ། ཀཿཐོག་ནས་གནང་བ་བསོ་དབང་དྲག་རྒྱ་མཚོའི་སྐུ་མཆིན། རིག་འཛིན་ཀློང་གསལ་སྙིང་པོའི་ཐུགས། རྗེས་མཐུན་པ་བུམ་པའི་སྨད་དུ། རིག་འཛིན་འཇིགས་མེད་གླིང་པའི་རྣམ་སྣང་རིལ་བུ། འབྲི་གུང་པ། ཐེག་མཆོག་གླིང་པ། འཇིགས་མེད་གོ་ཆ་རྣམས་ཀྱི་རྣམ་སྣང་རིལ་བུ་བཅས་བཞུགས་སོ། །སྐུ་བལ་རིང་བསྲེལ་ནི། བུམ་པའི་སྟོད་སྨད་དུ་ཐར་རྩེའི་མདུན་ནས་གནང་བ། གཏེར་ཆེན་གུ་རུ་ཆོས་ཀྱི་དབང་ཕྱུག་གི་དབུ་ཞྭ། རྡོར་བྲག་པདྨ་ཐེག་མཆོག་ན་བཟའ། རིག་འཛིན་ཀུན་བཟང་འགྱུར་མེད་ལྷུན་གྲུབ་རྡོ་རྗེའི་སྐུ་གཟན། རྡོར་བྲག་རིག་འཛིན་སྐལ་བཟང་པདྨ་དབང་ཕྱུག་ན་བཟའ།
རྡོར་བྲག་གསང་སྔགས་བསྟན་པ་རྒྱལ་མཚན་དབུ་ལྗོན། གཏེར་ཆེན་ཆོས་རྗེ་གླིང་པའི་ན་བཟའ། ཀཿཐོག་ནས་གནང་བ་རིག་འཛིན་ཀློང་གསལ་སྙིང་པོའི་ཕྱག་ཕྲེང་དང་ན་བཟའ། རྒྱལ་སྲས་བསོད་ནམས་ལྡེའུ་བཙན་ཕྱག་ཕྲེང་དང་དབུ་སྐྲ། དྲི་མེད་ཞིང་སྐྱོང་མགོན་པོའི་དབུ་སྐྲ་དང་ཕྱག་ཕྲེང་། མཁན་ཆེན་བཟང་པོ་རྒྱལ་མཚན་གདུང་རས། རྨོག་སྟོན་རིན་པོ་ཆེའི་དབུ་སྐྲ། ཀུན་བཟང་ངེས་དོན་དབང་པོའི་སྐུ་ཆིངས། རིག་འཛིན་འཇིགས་མེད་གླིང་པའི་ན་བཟའ་དང་སྤུར་ཚྭ། རྫོགས་ཆེན་ནས་གནང་བ། གྲུབ་དབང་པདྨ་རིག་འཛིན་ཕྱག་ཕྲེང་། དཔོན་སློབ་ནམ་མཁའ་འོད་གསལ་གནབས་ཤམ། གཏེར་ཆེན་ཉི་མ་གྲགས་པའི་དབུ་སྐྲ། རྫོགས་ཆེན་གཉིས་པ་འགྱུར་མེད་ཐེག་མཆོག་བསྟན་འཛིན་ན་བཟའ། གསུམ་པ་ངེས་དོན་བསྟན་འཛིན་བཟང་པོའི་དབུ་སྐྲ། བཞི་པ་མི་འགྱུར་ནམ་མཁའི་རྡོ་རྗེའི་དབུ་སྐྲ། རྡོ་རྗེ་ཀུན་བཟང་དབང་པོའི་ན་བཟའ། རྗེ་དབོན་པདྨ་ཕུན་གྲོལ་རྣམ་རྒྱལ་ན་བཟའ། དཔལ་ཡུལ་བའི་ཕྱག་ནས་བྱུང་བ། རིག་འཛིན་ཀུན་བཟང་ཤེས་རབ་དབུ་ལྗོན་དང་ན་བཟའ། པདྨ་ལྷུན་གྲུབ་རྒྱ་མཚོའི་དབུ་སྐྲ་དང་ན་བཟའ། གྲུབ་དབང་པདྨ་ནོར་བུའི་དབུ་སྐྲ་དང་ན་བཟའ། ཀརྨ་ཆོས་དཔལ་བཟང་པོའི་དབུ་ལྗོན་
དང་ན་བཟའ། ཀརྨ་འགྱུར་མེད་ངེས་དོན་བསྟན་འཛིན་དབང་པོའི་དབུ་སྐྲ་དང་སྐུ་ཆིངས། འཇིགས་མེད་ཡེ་ཤེས་རྡོ་རྗེའི་དབུ་སྐྲ་བཅས་བཞུགས་སོ། །དམ་རྫས་སྐོར་ནི། བུམ་པའི་སྟོད་དུ། རང་གིས་ཕུལ་བ་གཏེར་ཆེན་མཆོག་གྱུར་གླིང་པས་སེང་ཆེན་གནམ་བྲག་ནས་སྤྱན་དྲངས་པ་སློབ་དཔོན་ཆེན་པོ་སངས་རྒྱས་གསང་བས་རྡོར་སེམས་སྒྱུ་འཕྲུལ་དྲྭ་བ་ཆེན་པོའི་དཀྱིལ་འཁོར་དུ་བསྒྲུབས་པའི་རྡོར་སེམས་རིལ་བུ་བདེ་བ་ཆེན་པོའི་ཐིག་ལེ་ཉམས་ཆགས་དོང་སྤྲུགས། འབུམ་རྫོང་ཨོ་རྒྱན་སྒྲུབ་ཕུག་ནས་སྤྱན་དྲངས་པའི་ཐུགས་རྗེ་ཆེན་པོ་འཁོར་བ་དོང་སྤྲུགས་རིལ་བུ་རྩ་བའི་གཏའ་སྤེལ། སེང་ཆེན་གནམ་བྲག་ནས་སྤྱན་དྲངས་པའི་ཐུགས་རྗེ་ཆེན་པོའི་མ་ི་རིལ་བུ་འགྲོ་འདུལ་འཕགས་པའི་ཐིག་ལེ་རིགས་དྲུག་དོང་སྤྲུགས། གསར་རྙིང་སྔོན་བྱོན་གྱི་རིང་བསྲེལ་རྣམ་བཞི་ཕྱོགས་བསྡུས་རིལ་བུ། བུམ་སྐེད་དུ། གནས་མཆོག་ཁྱམ་མཐའི་བྲག་ནས་སྤྱན་དྲངས་པའི་མ་གཅིག་གྲུབ་པའི་རྒྱལ་མོའི་ཚེ་རིལ་ཐོག་མའི་གཏའ་སྤེལ། ཀེ་རོང་རྡོ་རྗེ་ཅོད་ཕུག་ནས་སྤྱན་དྲངས་པའི་ཨོ་རྒྱན་ཡབ་ཡུམ་གྱི་ཚེ་རིལ་རྩ་བའི་གཏའ་སྤེལ། མནྡ་ར་བའི་ཚེ་རིལ་རྩ་བའི་གཏའ་སྤེལ། བུམ་སྨད་དུ། སེང་བྲག་ནས་སྤྱན་དྲངས་པའི་དྲང་སྲོང་རིག་པའི་ཡེ་
ཤེས་ཀྱི་འཆི་མེད་བདུད་རྩི་སྨན་གྱི་རིལ་བུ་སྲིད་ཞིའི་ཐིག་ལེ། བུམ་གདན་མཚམས་སུ། ནམ་མཁའ་མཛོད་ཀྱི་གཏེར་བྱོན་རི་བོ་པོ་ཏ་ལའི་ས་རྡོ་མྱང་གྲོལ་རིལ་བུ་དམ་རྫས་སྡུག་བསྔལ་ཞི་བྱེད་ཉོན་མོངས་རང་གྲོལ། ཤེལ་ཕུག་གཏེར་ལྕིབས་སིན་དྷུ་ར། གནམ་བྲག་གཏེར་ལྕིབས་ག་བུར་ཅུ་གང་སོགས་ཕྱོགས་བསྡུས་རིལ་བུ་ཤེས་རབ་དཔྱིད་ཐིག །སེང་བྲག་གཏེར་བྱོན་རི་བོ་པོ་ཏ་ལའི་འབྲུ་སྨན་རིལ་བུ་བརྟན་གཡོའི་དྭངས་བཅུད། རྩི་རྐེ་ནོར་བུ་སྤུན་གསུམ་གྱི་གཏེར་མ་གི་ཝཾ་རིལ་བུ་དོན་ཀུན་གྲུབ་པའི་ཐིག་ལེ། སྤྱི་འབྱམས་ནས་སྤྱན་དྲངས་པའི་གནུབས་སྟོན་སངས་རྒྱས་ཡེ་ཤེས་ཀྱིས་བསྒྲུབས་པའི་བྱད་ཁྲོལ་རིལ་བུ་ཐོག་མའི་གཏའ་སྤེལ། བུམ་པའི་དབུས་སུ་ས་ངོར་གྱི་རྟེན་འདུས། རྫོགས་ཆེན་ནས་གནང་བ་འཇིགས་མེད་གླིང་པའི་སྨན་སྒྲུབ། ཉི་གྲགས་གསུམ་པས་བསྒྲུབས་པའི་བདེ་མཆོག་ཆོས་སྨན། དཔལ་ཡུལ་ནས་གནང་བ། རིང་བསྲེལ་ཀུན་འདུས་སུ་གྲགས་པ། སྐུ་ཡི་ཞུན་ཐིགས་ཟླ་ཤེལ་རིལ་བུ། དམ་རྫས་རོལ་པ་ཆེན་པོ། གྲུབ་དབང་པདྨ་ནོར་བུས་བསྒྲུབས་པའི་བདུད་རྩི་ཆོས་སྨན། འཇིགས་མེད་ཡེ་ཤེས་རྡོ་རྗེའི་སྨན་སྒྲུབ། རྟེན་འདམ་ཁྲི་དར་ལུང་མ། ས་སྐྱ་གོང་མ་རིན་པོ་ཆེས་གསེར་ཆོས་གནང་སྐབས་ཀྱི་ཕྱག་ནས།
ངོར་ཆེན་གོང་མ་རིམ་བྱོན་གྱི་ཕྱག་ནས། ཐམས་ཅད་མཁྱེན་གཟིགས་འཇམ་དབྱངས་མཁྱེན་བརྩེའི་དབང་པོས་གནང་བའི་རིང་བསྲེལ་རྣམ་བཞིའི་གན་མཛོད་ཀྱི་ཕུར་མ་ཤིན་ཏུ་ཁྱད་འཕགས། རང་གིས་ཕུལ་བ་ཚེ་གསང་བཅུད་ལེན་འཆི་མེད་སྲོག་མཐུད་ཀྱི་ཕབ་གཏའ་རིལ་བུ་ཚེ་རིང་དོན་ཀུན་གྲུབ་པ་བཅས་བཞུགས་སོ། །དེ་ལྟར་རྟེན་གསུམ་སོ་སོར་བཀོད་པའི་རིང་བསྲེལ་རྣམ་བཞིའི་ཚོགས་རྣམས་སྐབས་ཐོབ་འཐད་ལྡན་དུ་སྨོས་པ་ཡིན་གྱི། དོན་དུ་གཅིག་ལ་གང་བཞུགས་ཐམས་ཅད་གསུམ་པོ་ལ་ཁྱབ་མཉམ་དུ་བཞུགས་པ་ཡིན་པའང་ཤེས་པར་བྱའོ། །ལྷ་ཁང་གི་རྩེ་མོར་གསེར་གྱི་གཉྫི་རའང་། གཟའ་སྐར་བཟང་པོར་བཀྲ་ཤིས་པའི་ལྷ་བསང་རྒྱགས་བརྔན་བཅས་བཏང་བས་མགྲོན་བཞི་ཚིམ་པར་བྱས་ཏེ། མཆོད་རྟེན་ལྟར་སྲོག་ཤིང་འཛུགས་ཆོག་དང་བཅས་ལེགས་པར་བཙུགས། གདུགས་དཀར་འཁོར་ལོ་བརྒྱ་རྩ་བརྒྱད། རྒྱལ་མཚན་རྩེ་མོའི་དཔུང་རྒྱན་གྱི་གཟུངས་ཆ་གྲངས། གཏེར་གསར་ལུགས་ལྟར་གནས་ཆེན་བྱིན་འབེབས་ཀྱི་ཆས་རྣམས་དང་། དགོངས་འདུས་མཐོང་གྲོལ་འཁོར་ལོ་ཡེ་འབར་རྩ་རྒྱུད། སྲུང་བ་རྡོ་རྗེ་ཁྲབ་རིང་། གུ་གེ་ཆིག་དྲིལ་རྣམས་ཆ་གྲངས་ཁྱད་པར་དུ་བཞུགས་ཤིང་། སྤྱིར་དགོན་ཆེན་སྤར་མའི་
གཟུངས་གཞུག་རྣམས་དང་། ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱི་རིང་བསྲེལ་ཕྱོགས་བསྡུས་དམ་རྫས་རིན་པོ་ཆེའི་ཏོག །སྐུ་གདུང་རིང་བསྲེལ་ཕྱོགས་བསྡུས། སྐུ་བལ་རིང་བསྲེལ་ཕྱོགས་བསྡུས། ཆོས་ཀྱི་རིང་བསྲེལ་ཕྱོགས་བསྡུས། སྐུ་གདུང་རིང་བསྲེལ་ཕྱོགས་བསྡུས། ཡུངས་འབྲུ་ལྟ་བུའི་རིང་བསྲེལ་ཕྱོགས་བསྡུས་བཅས་ཀྱི་རིལ་བུ་ལ་སོགས་པ་རིང་བསྲེལ་རྣམ་བཞིའི་ཚོགས་དུ་མ་དང་བཅས་བཞུགས་སུ་གསོལ་ཞིང་། གཙུག་ཏོར་གདུགས་དཀར་པོའི་རྒྱལ་མཚན་འཛུག་ཆོ་ག་ལེགས་ལྡན་གཏོར་འབུལ་དང་བཅས་པ། མཐོང་གྲོལ་རིགས་དང་གནས་ཆེན་བྱིན་འབེབས་ཀྱི་ཆོ་ག་སོ་སོའི་གཞུང་ལས་འབྱུང་བ་ལྟར་བྱས་ཤིང་། རབ་ཏུ་གནས་པ་དང་། ཤིས་པ་བརྗོད་པའི་ཚིགས་སུ་བཅད་པ་དུ་མས་མངའ་དབུལ་ཞིང་མེ་ཏོག་སིལ་མར་བསྙིལ་པས་དགེ་བར་བྱས་པའོ། །སྲིད་ན་དཀོན་པའི་ཡོན་ཏན་རིན་ཆེན་གཏེར། །འབྱམས་སུ་ཀླས་པས་བྱུར་བུར་གཏམས་པ་ཡི། །མཐོང་གྲོལ་བྱིན་གྱིས་རློབས་པའི་ཆོས་ཉིད་ཅན། །ས་གསུམ་དགེ་བའི་དཔལ་དང་ལྷན་ཅིག་གྲུབ། །པདྨོའི་འབྱུང་གནས་ནོར་བུས་གང་བ་ཡིས། །མི་མཚོན་ཞི་བའི་དཔལ་སྟེར་རྟེན་གསུམ་གྱི། །གང་ཆེན་མཚོ་འདི་དད་པས་མཆོད་བྱེད་པའི། །
དོན་མཐུན་དེ་དག་རྒྱལ་བའི་རིན་ཆེན་བརྙེས། །རིགས་གཟུགས་ཐོས་དང་འབྱོར་པའི་ཁེངས་བརྟུལ་ནས། །རྒྱལ་ཀུན་རིང་བསྲེལ་འདུས་པའི་ནོར་བུའི་ཏོག །རང་གཞན་ཆོས་ཀྱི་རྒྱལ་པོའི་ཁྲི་བཞེད་པའི། །སྐལ་བཟང་རྣམས་ཀྱིས་ཚངས་པའི་རྒྱན་དུ་ལོངས། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །བདུན་པ་དེ་ལ་རབ་ཏུ་གནས་པའི་ཚུལ་ནི། རྟེན་གསུམ་རིན་པོ་ཆེ་ཚར་དུ་དངར་བའི་དགེ་ལེགས་ཀྱི་བྱ་བ་དེ་དག་གྲུབ་ཟིན་ནས་བགྱི་བར་འོས་པ་ནི་རབ་ཏུ་གནས་པ་ཉིད་ཡིན་པས། དེའང་པཎྜི་ཏ་རོང་ཟོམ་ཆོས་ཀྱི་བཟང་པོས་མི་ལ་དབང་བསྐུར་བ་དང་། ལྷ་ལ་རབ་ཏུ་གནས་པ་གཉིས་དོན་གཅིག་པར་བཞེད་པས། དཔེར་ན་ཁམས་དྲུག་ལྡན་པའི་མིའི་ལུས་ཉིད་ལྷའི་ངོ་བོར་ཡེ་གདོད་མ་ནས་གནས་པ་ཡིན་མོད་ཀྱི། སྦྱོང་བྱེད་སྨིན་གྲོལ་གྱི་གདམས་པ་ཟབ་མོ་མ་ནོད་ཀྱི་བར་དུ་བསྐྱེད་རྫོགས་ཀྱི་ཏིང་ངེ་འཛིན་སྒོམ་དུ་མི་རུང་ཞིང་། དེ་ཐོབ་ནས་འབྲས་བུ་མངོན་སུམ་བྱེད་ནུས་ཀྱི་སྐལ་བ་རྒྱུའི་དུས་སུ་བཞག་པ་ལྟར། དཀོན་མཆོག་གསུམ་རྗེས་སུ་དྲན་པའི་རྟེན་དེ་དག་ཀྱང་དོན་དུ་རྣམ་པ་དང་། རྟགས་ཙམ་གྱིས་ཀྱང་བྱིན་རླབས་འཇུག་པ་ཡིན་མོད་ཀྱི། རྟེན་དམ་ཚིག་སེམས་དཔའ་དེ་ལ་ཡེ་ཤེས་པ་བསྟིམས་པའི་ཚུལ་
ལ་སུ་པྲ་ཏིཥྛའི་སྒྲ་ལས་ལེགས་པར་རབ་ཏུ་གནས་པ་ཡིན་པས། མཚན་ཉིད་དང་ལྡན་པའི་རྡོ་རྗེ་སློབ་དཔོན་གྱིས་ཆོ་ག་ཚད་དང་ལྡན་པའི་སྒོ་ནས་རབ་ཏུ་གནས་པར་མ་མཛད་པ་དེ་སྲིད་དུ་ནི་དེ་ཙམ་གྱི་བྱིན་རླབས་འཇུག་པ་མ་ཡིན་ཏེ། སློབ་དཔོན་ཀུན་སྙིང་གི་རྒྱ་གཞུང་ལས། སྐུ་གཟུགས་ལ་སོགས་ཐམས་ཅད་ལ་ནི་རབ་ཏུ་གནས་པ་མེད་པར་ནི་ཞག་འགའ་ཡང་བཞག་པར་མི་བྱ་སྟེ། དེ་ཡང་བཅོམ་ལྡན་འདས་ཀྱིས། །གང་དུ་སྐུ་གཟུགས་ཟིན་ནས་ནི། །ཡུན་རིང་གནས་ཀྱང་མ་མཆོད་ན། །ཇི་སྲིད་རབ་ཏུ་མ་གནས་བར། །དེ་ལ་ཡེ་ཤེས་སྐྱེ་མི་འགྱུར། །ཞེས་གསུངས་པའི་ཕྱིར་རོ། །དེས་ན་སའི་དབང་མོ་མཆོག་གིས་བསྟན་པའི་བདག་པོ་ཐར་རྩེ་ཞབས་དྲུང་རིན་པོ་ཆེར་དགོངས་པ་ནན་ཏན་དུ་བསྐུལ་ཞིང་། བདག་ཅག་ལའང་བཀའ་ཕེབས་པས་ངོས་ལ་རབ་ཏུ་གནས་པའི་སློབ་དཔོན་གྱི་མཚན་ཉིད་མི་ལྡན་མོད། ཆོས་ཐམས་ཅད་སྟོང་ཉིད་ཡིན་པའི་ཕྱིར་ཅི་ཡང་རུང་བར་གསུངས་པ་ལ་དྲན་པ་ཉེ་བར་བཞག་ནས་རབ་ཏུ་གནས་པའི་བྱ་བ་ལ་ཡང་ཞུགས་པ་ཡིན་ནོ། །དེ་ཡང་ཐོག་མར་བརྟན་མཁས་ཡོན་ཏན་ཀུན་ལྡན་མཁན་པོ་བླ་མ་དཀོན་མཆོག་འོད་ཟེར་དང་། མཁན་བླ་མ་ཀརྨ་བཀྲ་ཤིས་འོད་ཟེར་སོགས་ཕུན་སུམ་ཚོགས་པའི་དགེ་འདུན་གྱིས་བཀྲ་
ཤིས་པའི་གསོ་སྦྱོང་དང་། གནས་བརྟན་ཆོ་ག་མཛད་པའི་ཞར་བྱུང་དུ་བཙུན་མོ་མཆོག་དང་བློན་པོའི་གཙོ་བོ་སྔར་སྡོམ་པ་དང་མི་ལྡན་པ་འགའ་ཞིག་སྣ་འགའ་སྤྱོད་པའི་དགེ་བསྙེན་གྱི་སྡོམ་ལྡན་ཏུ་བསྒྲུབས། དེ་ནས་སེམས་བསྐྱེད་མཆོད་པའི་ཕྲེང་བ་ཚར་དུ་དངར་བ་བཤམས་ཏེ་རང་ཉིད་ཆོག་གྲོགས་དང་བཅས་པས་ཐུབ་དབང་ཉེ་སྲས་བརྒྱད་མཆོད་གསར་དུ་སྦྱར་བ་ལྟར་བསགས་སྦྱོང་སྤེལ་གསུམ་སྔོན་ཏུ་འགྲོ་བས། དགེ་བའི་བཤེས་གཉེན་དུ་མ་དང་། ཆོས་སྐྱོང་བའི་རྒྱལ་པོ་ལྷ་སྲས་སྐུ་མཆེད། སའི་དབང་མོ་མ་ཡུམ་དང་། བཙུན་མོ། མདུན་ན་འདོན་ཆེན་པོ་རྣམས་དང་བཅས་པ་ལ་རྒྱ་ཆེན་སྤྱོད་བརྒྱུད་ལུགས་ཀྱི་སེམས་བསྐྱེད་ཕུལ། དེ་ནས་དཀར་ཕྱོགས་ཀྱི་དུས་གཟའ་སྐར་འཕྲོད་སྦྱོར་ཕུན་སུམ་ཚོགས་པའི་ཉིན་མོར། བསྟན་པའི་བདག་པོ་ཤྲཱི་ཨེ་ཝཾ་པ་ཆེན་པོ་བྲང་ཏི་མཁས་པའི་རིགས་འཁྲུངས་འཇམ་དབྱངས་ནམ་མཁའ་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་དབུ་མཛད། བསྙེན་སོང་གི་དགེ་འདུན་བཟང་ལ་གྲངས་མང་བས་བླ་ན་མེད་པའི་རྒྱུད་ཀྱི་རྒྱལ་པོ་དཔལ་ཀྱཻ་རྡོ་རྗེའི་དཀྱིལ་འཁོར་ཆེན་པོ་ཞལ་ཕྱེས་ཏེ། བཟང་པོ་དྲུག་དང་ལྡན་པས་དངོས་ལྟེ་ཉིན་གསུམ་ལ་ཀུན་རྫོབ་བརྡའི་རབ་ཏུ་གནས་པའི་ཆོ་
ག་གཞུང་དང་མཐུན་པར་མཛད་ཅིང་། འཇམ་དཔལ་ཞིང་བཀོད་ཀྱི་མདོ་ལས། ཆོས་རྣམས་ཐམས་ཅད་རྐྱེན་བཞིན་ཏུ། །འདུན་པའི་རྩ་ལ་རབ་ཏུ་གནས། །ཞེས་གསུངས་པ་ལྟར། རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རྣམ་པ་དང་། རྟགས་དང་། ཡོན་ཏན་ལ་སོགས་པ་སྒོ་དུ་མ་ནས་རྗེས་སུ་དྲན་པའི་མོས་པ་དང་འདུན་པའི་དགོངས་པ་མི་ཕྱེད་པས་རྟེན་དམ་ཚིག་སེམས་དཔའ་ལ་བརྟེན་པ་ཡེ་ཤེས་པ་འབེབས་པའི་དམིགས་རྣམ་གྱིས་རྒྱས་གདབ་པར་མཛད་ཅིང་། གོང་རབ་ཏུ་གནས་པར་བྱ་བའི་ཡུལ་དང་། རབ་ཏུ་གནས་པར་བྱེད་པའི་བདག་པོ་དང་། རྒྱལ་བ་རྣམས་ཀྱི་དོན་དམ་པའི་སྐུ་གསུང་ཐུགས་བསམ་བརྗོད་མཚན་མའི་སྤྲོས་པ་དང་། འགྲོ་འོང་། སྐྱེ་འགགས་རྟག་ཆད་ལ་སོགས་པའི་སྤྲོས་པ་དང་བྲལ་བའི་དེ་ཁོ་ན་ཉིད་རྣམས་དབྱེར་མེད་པའི་གནས་ལུགས་ལ་མཉམ་པར་བཞག་སྟེ་དོན་དམ་པའི་རབ་ཏུ་གནས་པ་བཅས་ཀྱི་རྗེས་འབྲེལ་དུ་བཀྲ་ཤིས་པའི་མེ་ཏོག་སིལ་མར་བསྙིལ་བས་དགེ་བར་བྱས་པ་དང་། རྗེས་ཆོག་གི་རིམ་པ་ཡང་། སྡོམ་འབྱུང་ལས། །སྟོན་མོ་དང་ནི་ཡོན་ཕུལ་བས། །སྐྱེ་བོ་ཚིམས་ཤིང་རྒྱས་པར་བྱ། །རྒྱས་པའི་སྐྱེ་བོ་སྐལ་བ་
བཟང་། །བཀྲ་ཤིས་ཞི་བར་བཅས་འགྱུར་ཏེ། །ཞེས་གསུངས་པ་ལྟར་གྱ་ནོམ་པའི་བཟའ་བཏུང་སོགས་འབྱོར་པའི་ཁྱད་པར་གྱི་དགའ་སྟོན་ཕུན་སུམ་ཚོགས་པས་སློབ་དཔོན་མཆོད་ཅིང་། བཟོ་བོ་ལ་སོགས་ཚིམས་པར་མཛད། དེ་ནས། རྒྱུད་ལས། དེ་རྗེས་བུ་སློབ་ཡོན་བདག་ལ། །བུམ་བཟང་བཀྲ་ཤིས་རྫས་བཞི་དང་། །སྣ་བདུན་རྫས་བརྒྱད་དབང་བསྐུར་བྱ། །ཚོགས་འཁོར་བཟང་པོའི་ཞལ་ཡང་བསྲོ། །བཀྲ་ཤིས་སྐྱིད་ཀྱི་ལྷ་བྲོ་བྱ། །ཞེས་འབྱུང་བ་ལྟར་བགྱིས་ཤིང་། མེ་ཏོག་ལ་སོགས་པ་མཆོད་པའི་ཁྱད་པར་སྣ་ཚོགས་པས་ཇི་སྲིད་རྒྱལ་བསྟན་རིན་པོ་ཆེ་གནས་པ་དེ་སྲིད་དུ་མཆོད་ཅིང་། བཀུར་སྟི་དང་། བསྟི་སྟང་དང་། རིམ་གྲོ་དང་། རྗེད་པ་ལ་སོགས་པ་མཛད་པའི་དབུ་ཡང་ཚུགས་སོ། །དེ་ནས་བདག་གིས་ཀྱང་དཔལ་འཁོར་ལོ་སྡོམ་པའི་དཀྱིལ་འཁོར་གྱི་སྒོ་ནས་ཉིན་གཉིས་ལ་རབ་ཏུ་གནས་པ་ཞི་བ་རྒྱས་སུ་བགྱིས་པ་དང་། ཁྱད་པར་གུ་རུ་རིན་པོ་ཆེའི་སྣང་བརྙན་ལ་གཏེར་ཁ་གསར་རྙིང་ལུགས་ཀྱི་མཐོང་གྲོལ་གྱིས་མཚོན་པའི་ཆོ་གར་འོས་པ་རྣམས་སོ་སོར་བྱས་ཏེ་གྲོལ་བ་བཞི་ལྡན་ཏུ་བསྒྲུབས། དེ་རྗེས་སུ་འཇམ་དབྱངས་ས་སྐྱ་གོང་མ་རིན་པོ་ཆེའི་གདུང་རིགས་རྗེ་བཙུན་མ་སྐལ་བཟང་ཕྲིན་ལས་དབང་མོས་ས་ལུགས་ཕུར་པའི་དཀྱིལ་
འཁོར་ཞལ་ཕྱེས་ནས་རབ་ཏུ་གནས་པར་མཛད་པ་བཅས་ཀྱིས་བྱིན་རླབས་ཀྱི་གཟི་བརྗིད་སྲིད་པ་གསུམ་ན་ཉི་མ་བརྒྱ་ཕྲག་སྟོང་གི་འོད་ཟེར་ལས་ལྷག་པར་འབར་ཞིང་། མཐོང་ཐོས་དྲན་རེག་གི་ལུས་ཅན་རྒྱ་མཚོ་བྱང་ཆུབ་མཆོག་ཏུ་སྨིན་པར་མཛད་པའི་བདག་ཉིད་ཅན་དུ་གྲུབ་པ་སྟེ། དེ་ལྟ་བུའི་ལེགས་བྱས་ཀྱང་དང་པོར་དབུ་ཚུགས་ནས་ཐ་མ་རབ་ཏུ་གནས་པའི་བྱ་བས་སའི་སྟེང་ན་འགྲན་ཟླ་མེད་པ་ལྟ་བུའི་རྟེན་གསུམ་རིན་པོ་ཆེའི་ཕུང་པོ་མ་གྲུབ་པའི་བར་དུ། སའི་དབང་མོ་ཉིད་ཀྱི་སྔོན་བསགས་བསོད་ནམས་དཀར་པོའི་མཐུ་དང་། དཀོན་མཆོག་བླ་མར་བཅས་པའི་བྱིན་རླབས་དང་། དཀར་ཕྱོགས་ཀྱི་ཆོས་སྲུང་རྒྱ་མཚོ་རྣམས་ཀྱིས་མཐུས། བདུད་དང་། བདུད་ཀྱི་རིས་ཀྱི་མིའམ་མི་མ་ཡིན་པ་སུས་ཀྱང་བར་དུ་མ་གཅོད་པས་མཐར་ཕྱིན་ཅིང་། ཡིད་སྲུབས་ཀྱི་དཔུང་ཚོགས་ཇི་སྙེད་པ་ངོ་ཚའི་བཞིན་རས་སྟོན་པའི་ངང་ཚུལ་ཅན་དུ་གྱུར་ཏོ། །ཐབས་མཁས་རྒྱལ་བ་རྒྱ་མཚོའི་ཡེ་ཤེས་ནི། །བྱིན་རླབས་མཚུངས་པ་མེད་དང་ལྷན་ཅིག་ཏུ། །བེམ་པོར་གྱུར་པའི་དངོས་ལའང་ཞུགས་ནས་ཀྱང་། །འགྲོ་རྣམས་སྨིན་པར་མཛད་པ་ཆོས་ཉིད་ཡིན། །ནོར་བུའི་སྒྲོན་མེ་མ་བཏེགས་ཏིང་ངེ་འཛིན། །དུ་མའི་འཇུག་ལྡང་བསམ་ཡས་ལ་བརྟེན་ནས། །ཐུབ་བསྟན་རིན་ཆེན་
བཙས་སུ་རྟེན་གསུམ་གྱི། །གཟི་འོད་ཕྱོགས་ཀྱི་ར་བའི་མཐར་ཐུག་འཕྲོ། །བསལ་བཞག་མེད་པའི་ཆོས་ཉིད་དེ་ཁོ་ནར། །ཏིང་འཛིན་སྒོ་བརྒྱས་སྙོམས་ཞུགས་བེམ་པོ་ཡང་། །རྒྱལ་བའི་ཆོས་སྐུར་བསྒྲུབས་པས་བྱིན་རླབས་ནི། །ནམ་མཁའ་ཇི་སྲིད་འབྱུང་བའི་ཐབས་མཁས་ཡིན། །ཅེས་པ་ནི་བར་སྐབས་ཀྱི་ཚིགས་སུ་བཅད་པའོ། །བརྒྱད་པ་དེ་ལྟར་བཞེངས་པའི་ཕན་ཡོན་འབྲས་བུ་ལ་གསུམ། ཐུགས་རྟེན། གསུང་རྟེན། སྐུ་རྟེན་གྱི་འབྲས་བུའོ། །དང་པོ་ནི། འཕགས་པ་རྨད་དུ་བྱུང་བའི་ཆོས་ཀྱི་རྣམ་གྲངས་ལས། ཀུན་དགའ་བོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོད་དེ། དེ་རིགས་ཀྱི་བུའམ་རིགས་ཀྱི་བུ་མོ་དད་པ་ཅན་གང་ལ་ལ་ཞིག་གིས་རིན་པོ་ཆེ་སྣ་བདུན་གྱི་རང་བཞིན་དུ་བྱས་ཏེ། རྒྱུན་དུ་ཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། རང་སངས་རྒྱས་རྣམས་དང་། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་བ་བས། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པའི་མཆོད་རྟེན་མཇི་བ་ལས་སྐྱུ་རུ་རའི་འབྲས་བུ་ཙམ་བྱས་ལ་ཁབ་ཙམ་
ཀྱི་སྲོག་ཤིང་བཙུགས་ཏེ། རྒྱ་ཤུག་གིས་ལོ་མ་ཙམ་གྱི་གདུགས་བྱས་ནས། ནས་ཀྱི་འབྲུ་ཙམ་གྱི་སྐུ་གཟུགས་བྱས་ལ་ཡུངས་འབྲུ་ཙམ་གྱི་རིང་བསྲེལ་བཅུག་ན་དེ་ནི་དེ་བས་བསོད་ནམས་ཆེས་ཆེའོ་ཞེས་པ་སྨྲའོ། །དེ་ཅིའི་ཕྱིར་ཞེ་ན། ཀུན་དགའ་བོ་དེ་བཞིན་གཤེགས་པ་ནི་ཡེ་ཤེས་ཀྱིས་དཔག་ཏུ་མེད་པ། དེ་བཞིན་དུ་སྦྱར་ཏེ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ། ཚད་མེད་བཞི། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་དྲན་པ་ཉེ་བར་གཞག་པ་མ་འདྲེས་པ་གསུམ་དང་སྙིང་རྗེ་ཆེན་པོས་དཔག་ཏུ་མེད་པ་སྟེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཡོན་ཏན་དཔག་ཏུ་མེད་པ་དང་ལྡན་པའི་ཕྱིར་རོ། །ཞེས་དང་། དམ་ཆོས་པད་དཀར་ལས། རྒྱལ་བའི་རིང་བསྲེལ་དག་ལ་སུས་མཆོད་ཅིང་། །གསེར་དང་དངུལ་དང་འོན་ཏེ་ཤེལ་གྱིའམ། །སོགས་ནས། གང་གིས་མཆོད་རྟེན་རྡོ་ལས་བྱས་པ་དང་། གང་གིས་ཨ་ག་རུ་དང་ཙནྡན་ནམ། །གང་གིས་ཐང་ཤིང་མཆོད་རྟེན་བྱས་པ་དང་། །ལ་ལས་ཤིང་མར་གཞན་ལས་བྱས་པ་དང་། །ས་དང་སོ་ཕག་ལས་ནི་བརྩིགས་པ་ཡི།
རྒྱལ་བའི་མཆོད་རྟེན་དགའ་བཞིན་བྱས་པ་དང་། །དེ་ཕྱིར་ས་རྡུལ་ཕུང་པོ་དག་ལས་ཀྱང་། །མྱ་ངམ་དགོན་བདག་ཏུ་བྱས་པ་དང་། །བྱིས་པ་རྩེད་མོར་དེ་དང་དེ་དག་ཏུ། །གང་གིས་རྒྱལ་བ་དེ་ཕྱིར་མཆོད་རྟེན་དག །བྱེ་མ་ལས་ནི་ཕུང་པོར་བྱས་པ་ཡང་། །དེ་རྣམས་ཀྱིས་ཀྱང་བྱང་ཆུབ་འཐོབ་པར་འགྱུར། །ཞེས་དང་། གསང་བ་རིང་བསྲེལ་ཟ་མ་ཏོག་གི་གཟུངས་ལས། གང་ཞིག་ཆོས་ཀྱི་རྣམ་གྲངས་འདི་བྲིས་ཏེ་མཆོད་རྟེན་གྱི་ནང་དུ་བཞག་པ་དེ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྙིང་པོ་རིང་བསྲེལ་གྱི་མཆོད་རྟེན་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་གསང་བ་བྱིན་གྱིས་བརླབས་པའི་མཆོད་རྟེན་དུ་འགྱུར་རོ། །དེ་བཞིན་གཤེགས་པ་ཏིལ་གྱི་གོང་བུ་སྙེད་དགུ་བཅུ་རྩ་དགུའི་མཆོད་རྟེན་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་དང་སྤྱན་གྱི་མཆོད་རྟེན་དུ་བྱིན་གྱིས་བརླབ་པར་འགྱུར་རོ། །ཞེས་སོགས་རྒྱ་ཆེར་གསུངས་པ་དང་། བྱང་ཆུབ་སྙིང་པོ་རྒྱན་འབུམ་གྱི་ཆོ་ག་ཞིབ་མོ་ལས། གང་ལ་ལ་ཞིག་གིས་བྱང་ཆུབ་སྙིང་པོ་རྒྱན་འབུམ་གྱི་གཟུངས་འདི་གྲོག་ལ་བྲིས་ཏེ། ཕྱག་མཚན་གྱི་རྡོ་རྗེའི་ནང་དུ་བཅུག་པའམ། སྐུ་གཟུགས་ཀྱི་ནང་བཅུག་པའམ། ཁོག་པར་བྲིས་པའམ། ལྷ་ཁང་
གི་གནྡྷོ་ལའི་ནང་བཅུག་པའམ། མཆོད་རྟེན་གྱི་ནང་བཅུག་ན། དེས་མཆོད་རྟེན་གཅིག་བྱས་པས་འབུམ་བྱས་པར་འགྱུར་རོ། །མཆོད་རྟེན་དེ་སྙེད་བཞེངས་པའི་བསོད་ནམས་འཐོབ་པར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་དེས་ངས་སྔར་དཔེ་དྲངས་ཏེ་བསྟན་པ་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་ཁམས་ཀྱི་རྡུལ་ཕྲ་རབ་ཀྱི་གྲངས་དང་མཉམ་པའི་ཆོས་ཀྱི་སྐུའི་རིང་བསྲེལ་དང་། ཆོས་ཀྱི་དབྱིངས་ཀྱི་རིང་བསྲེལ་དང་། རུས་པའི་རིང་བསྲེལ་དང་། ཤའི་རིང་བསྲེལ་དེ་དག་ཐམས་ཅད་ལ་མཆོད་རྟེན་བྱས་པའི་བསོད་ནམས་འཐོབ་པར་འགྱུར་རོ། །ཞེས་སོགས་དང་། འོད་ཟེར་དྲི་མེད་ཀྱི་གཟུངས་ལས། ཡང་གང་ལ་ལ་ཞིག་གིས་གསང་སྔགས་ཡི་གེར་བྲི་བ་གཞན་གྱི་མིང་ནས་སྨོས་ཏེ། མཆོད་རྟེན་གྱི་ནང་དུ་བཅུག་ལ་ནན་ཏན་དུ་མཆོད་པ་བྱས་ན་ཤི་བ་གང་ཡིན་པ་དེང་ན་སོང་གི་གནས་ནས་ཐར་ཏེ་མཐོ་རིས་སུ་སྐྱེ་བར་འགྱུར་རོ། །ཡང་ན་དགའ་ལྡན་གྱི་ལྷའི་རིས་སུ་སྐྱེ་བར་འགྱུར་ཏེ། སངས་རྒྱས་ཀྱི་བྱིན་གྱི་རླབས་ཀྱིས་ངན་སོང་དུ་ལྟུང་བར་མི་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་མཆོད་རྟེན་དེ་ལ་བསྐོར་བ་བྱས་སམ། ཕྱག་བྱས་སམ། མཆོད་པ་ཕུལ་ཡང་རུང་སྟེ། དེ་བཞིན་གཤེགས་
པའི་བྱིན་གྱིས་རླབས་ཀྱི་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ཞེས་སོགས་དང་། ཐ་ན་བྱ་དང་སྦྲང་མ་ལ་སོགས་པ་མཆོད་རྟེན་དེའི་གྲིབ་མས་ཕོག་ན་ཡང་དེ་བཞིན་གཤེགས་པས་མཁྱེན་ཅིང་རྗེས་སུ་དགོངས་པར་མཛད་དོ། །བླ་ན་མེད་པ་ཡང་དག་པ་རྫོགས་པའི་བྱང་ཆུབ་ཐོབ་ཅིང་ཕྱིར་མི་ལྡོག་པའི་ས་ལ་གནས་པར་ཡང་འགྱུར་རོ། །གང་ལ་ལ་ཞིག་གིས་མཆོད་རྟེན་འདི་ལྟ་
བུ་རྨི་ལམ་དུ་རྨིས་སམ། རྒྱང་ནས་མཐོང་ངམ། དྲིལ ་བུའི་སྒྲ་ཐོས་སམ། མཆོད་རྟེན་བཞེངས་པ་རྣ་བར་གཏམ་ཐོས་པ་དེ་དག་ཀྱང་མཚམས་མེད་པ་ལྔ་ལ་སོགས་ཏེ། སྡིག་པ་དང་། སྒྲིབ་པ་ཐམས་ཅད་བྱང་སྟེ། རྟག་ཏུ་དེ་བཞིན་གཤེགས་པ་རྣམས་ཀྱིས་བསྲུང་བ་དང་། རྗེས་སུ་དགོངས་པར་མཛད་དེ། བླ་ན་མེད་པ་ཡང་དག་པ་རྫོགས་པའི་བྱང་ཆུབ་ཀྱི་ལམ་ཡོངས་སུ་རྫོགས་པ་འཐོབ་པར་འགྱུར་རོ། །ཞེས་སོགས་ཤིན་ཏུ་རྒྱ་ཆེར་འབྱུང་ངོ་། །གཉིས་པ་ནི། སྡུད་པ་ཚིགས་སུ་བཅད་པ་ལས། ལ་ལས་བདེ་གཤེགས་ཡོངས་སུ་མྱ་ངན་འདས་པ་ཡི། །མཆོད་རྟེན་རིན་ཆེན་བདུན་ལས་བྱས་ཤིང་མཆོད་བྱེད་ལ། །བདེ་བར་གཤེགས་པའི་མཆོད་རྟེན་དེ་དག་གངྒཱ་ཡི། །བྱེ་མ་སྙེད་ཀྱིས་བྱེ་བ་ཕྲག་སྟོང་ཞིང་བཀང་སྟེ། །
ཡོངས་སུ་བརྟག་བཟུང་ཞིང་རྣམས་བྱེ་བ་མཐའ་ཡས་ན། །སེམས་ཅན་ཇི་སྙེད་འཁོད་པ་དེ་དག་ཐམས་ཅད་ཀྱིས། །ལས་གཞན་མི་བྱེད་ལྷ་ཡི་མེ་ཏོག་སྤོས་རབ་དང་། །བྱུག་པས་དུས་གསུམ་བསྐལ་པའམ་དེ་བས་ལྷག་མཆོད་པ། །གང་ཞིག་གང་ལས་རྣམ་འདྲེན་སྟོབས་བཅུ་འབྱུང་འགྱུར་བ། །བདེ་བར་གཤེགས་ཀྱི་ཡུམ་འདི་གླེགས་བམ་ལ་བྲིས་ཏེ། །འཆང་ཞིང་མེ་ཏོག་བྱུག་པས་བསྟི་སྟང་བྱེད་གྱུར་ན། །མཆོད་རྟེན་བྱས་མཆོད་བསོད་ནམས་དེས་ནི་ཆར་མི་ཕོད། །ཅེས་དང་། ལ་ལས་གངྒཱའི་ཀླུང་གི་བྱེ་སྙེད་ཞིང་རྣམས་ན། །སེམས་ཅན་ཇི་སྙེད་འཁོད་ཀུན་དགྲ་བཅོམ་ཉིད་བཏུལ་བས། །གང་གིས་ཤེས་རབ་ཕ་རོལ་ཕྱིན་འདི་ཡིག་བྲིས་ཏེ། །སེམས་ཅན་མཆོག་ལ་གླེགས་བྱིན་བསོད་ནམས་ཁྱད་པར་འཕགས། །ཅི་ཕྱིར་ཞེ་ན་སྨྲ་མཆོག་དེ་དག་འདིར་བསླབས་ནས། །ཆོས་རྣམས་མཐའ་དག་སྟོང་པ་ཉིད་དུ་འདིར་སྟོན་བྱེད། །དེ་ཐོས་ཉན་ཐོས་མྱུར་དུ་རྣམ་པར་གྲོལ་ལ་རེག །རང་རྒྱལ་བྱང་ཆུབ་དང་ནི་སངས་རྒྱས་བྱང་ཆུབ་རེག །ཅེས་དང་། འཕགས་པ་སངས་རྒྱས་ཀྱི་ཆོ་འཕྲུལ་རྣམ་པར་འཕྲུལ་བ་བསྟན་པའི་མདོ་ལས། རིགས་ཀྱི་བུ་གང་ལ་ལ་ཞིག་གིས་ཛམྦུའི་གླིང་གི་སེམས་ཅན་དེ་དག་འཕགས་པའི་ལམ་ཡན་ལག་
བརྒྱད་པ་ལ་འཇོག་ཅིང་། བཞག་ནས་ཀྱང་ལྷའི་ལོ་སྟོང་དུ་ཡོ་བྱད་ཐམས་ཅད་ཀྱིས་མི་བྲེལ་བར་རྗེད་ཅིང་མཆོད་པ་བས། གང་གིས་ཆོས་ཀྱི་རྣམ་གྲངས་འདི་ལས་ཚིག་བཞི་པའི་ཚིགས་སུ་བཅད་པ་ཙམ་ཉན་པ་དང་། འཆང་བ་དང་། འབྲི་བ་དང་། འབྲིར་བཅུག་པ་དང་། གཞན་ལ་རྒྱས་པར་བྱེད་ན་དེ་བས་འདི་ཆེས་བསོད་ནམས་མང་དུ་འཕེལ་ལོ། །ཞེས་གསུངས་སོ། །བྱང་ཆུབ་སེམས་དཔའི་སྤྱོད་པ་བསྟན་པའི་མདོ་ལས། འཇམ་དཔལ་བྱང་ཆུབ་སེམས་དཔའ་གང་གིས་བསྐལ་པ་འབུམ་གྱི་བར་དུ་ཐབས་ལ་མཁས་པ་མེད་པར་ཕ་རོལ་ཏུ་ཕྱིན་པ་དྲུག་ལ་སྤྱོད་པ་བས། །གང་གིས་ཆོས་ཀྱི་རྣམ་གྲངས་འདི་སོམ་ཉི་དང་བཅས་པས་ཐོས་ན་འདི་ནི་དེ་བས་ཆེས་བསོད་ནམས་མང་དུ་སྐྱེད་ན་གང་གིས་སོམ་ཉི་མེད་པར་ཐོས་པ་ལྟ་ཅི་སྨོས། གང་གིས་ཡི་གེར་འབྲི་བ་དང་། ལུང་ནོད་པ་དང་། འཆང་བ་དང་། གཞན་དག་ལའང་རྒྱ་ཆེར་ཡང་དག་པར་སྟོན་པ་ལྟ་ཅི་སྨོས། ཞེས་དང་། དེ་བཞིན་གཤེགས་པའི་སྙིང་པོ་ཞེས་བྱ་བའི་མདོ་ལས། ཀུན་དགའ་བོ་བྱང་ཆུབ་སེམས་དཔའ་ཆོས་ཀྱི་རྣམ་གྲངས་འདི་འཆང་བ་དང་། ཀློག་པ་དང་། གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་པ་དང་། གླེགས་བམ་དུ་བྱས་ཏེ་འཆང་བ་དེས་འདི་སྙམ་དུ་བདག་
གིས་དེ་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་དུ་སེམས་བསྐྱེད་པར་བྱ་སྟེ། དེ་ནི་ཇི་ལྟར་ད་ལྟར་ང་བཞིན་ཏུ་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱ་བའི་འོས་དང་། མཆོད་པའི་འོས་ཡིན་ནོ། །ཞེས་གསུངས་སོ། །ནམ་མཁའ་དང་མཉམ་པའི་རྒྱུད་ལས་ཀྱང་། །རིན་ཆེན་སྣ་བདུན་ལ་སོགས་པ། །རྒྱལ་བ་ཀུན་གྱི་རང་བཞིན་གྱིས། །མ་ལུས་བསྡུས་པའི་ངོ་བོ་ཉིད། །སྐུ་གསུང་ཐུགས་ཉིད་བྲིས་པ་ཡིན། །དེ་བས་རྒྱལ་བ་ཀུན་བྲིས་པའི། །ཆེ་བའི་ཡོན་ཏན་བསམ་མི་ཁྱབ། །ཅེས་སོགས་མདོ་རྒྱུད་རྣམས་ལས་ཤིན་ཏུ་རྒྱ་ཆེར་གསུངས་སོ། །གསུམ་པ་ནི། དེ་བཞིན་གཤེགས་པའི་སྐུ་གཟུགས་ཀྱི་ལེའུ་ལས། སའམ། རྡོ་ཐལ་ལམ། ཤིང་ངམ། རྡོའམ། ར་གན་ནམ། ལྕགས་སམ། གསེར་རམ། དངུལ་ལམ། བཻ་ཌཱུརྻའམ། ཤེལ་ལམ། མུཀྟི་ཀ་དམར་པོའམ། རྡོའི་སྙིང་པོའམ། སྤུག་གམ། དུང་ངམ། མན་ཤེལ་ལམ། སྤོས་སམ། རས་སམ། ཤིང་ལེབ་བམ། རྩིག་ངོས་ལ་དེ་བཞིན་གཤེགས་པའི་སྐུ་གཟུགས་བཞེངས་པར་བྱ། རལ་བ་གསོ་བར་བྱ་བ་དང་། གྲུབ་པ་བཅོས་པར་བྱས་ཏེ་དེ་བཞིན་གཤེགས་པའི་སྐུ་གཟུགས་བྱས་ན་རིགས་དམའ་བ་ཐམས་ཅད་
དང་། སྡིག་པ་བྱེད་པའི་རིགས་རྣམས་དང་། ལོག་པར་ལྟ་བའི་རིགས་སུ་མི་སྐྱེ། ཡན་ལག་གང་ཡང་མ་ཚང་བར་མི་འགྱུར་རོ། །གལ་ཏེ་མཚམས་མེད་པ་ལྔ་བྱས་སུ་ཟིན་ཀྱང་དེ་བཞིན་གཤེགས་པ་ལ་དད་པ་རྙེད་དེ་སྐུ་གཟུགས་བྱས་ན་ལས་དེས་སེམས་ཅན་དམྱལ་བ་མྱང་བ་ཆུང་ངུ་མྱང་སྟེ། ཐེག་པ་གསུམ་གང་ཡང་རུང་བས་ངེས་པར་འབྱུང་བར་འགྱུར་རོ། །ཞེས་སོགས་དང་། དམ་པའི་ཆོས་པདྨ་དཀར་པོ་ལས། །ལ་ལས་དེར་ནི་རིན་ཆེན་གཟུགས་བྱས་པ། །སུམ་ཅུ་རྩ་གཉིས་མཚན་དང་ལྡན་པའི་གཟུགས། །གང་གིས་དེ་ཕྱིར་བྱས་པ་དེ་དག་ཀྱང་། །དེ་དག་ཐམས་ཅད་བྱང་ཆུབ་འཐོབ་པར་འགྱུར། །ལ་ལས་དེང་ནི་རིན་ཆེན་སྣ་བདུན་དང་། །ལ་ལས་དེ་བཞིན་ཟངས་དང་འཁར་བ་ལས། །བདེ་བར་གཤེགས་པ་རྣམས་ཀྱི་གཟུགས་བྱས་པ། །དེ་དག་ཐམས་ཅད་བྱང་ཆུབ་འཐོབ་པར་འགྱུར། །རོ་ཉེ་དང་ནི་ལྕགས་སམས་ཡང་རུང་། །བདེ་བར་གཤེགས་པ་རྣམས་ཀྱི་གཟུགས་བྱས་ཏེ། །བལྟ་ན་སྡུག་པ་འཇིམ་པའི་ལས་བྱེད་བཅུག །དེ་དག་ཐམས་ཅད་བྱང་ཆུབ་འཐོབ་པར་འགྱུར། །གང་གིས་རྩིག་ངོས་གཟུགས་ཀྱི་རི་མོ་དག །བསོད་ནམས་བརྒྱ་མཚན་ཡོངས་སུ་རྫོགས་པའི་སྐུ། །བདག་གིས་བྲིས་
སམ་འདྲི་རུ་བཅུག་ཀྱང་རུང་། །དེ་དག་ཐམས་ཅད་བྱང་ཆུབ་འཐོབ་པར་འགྱུར། །སྐྱེས་བུ་དག་གམ་འོན་ཏེ་གཞོན་ནུའང་རུང་། །གང་དག་ལ་ལ་དེ་ནི་སློབ་པའི་ཚེ། །རྩེད་མོ་དགའ་དང་བསང་བར་བྱེད་པ་ན། །རྩིག་ངོས་སེན་མོ་ཤིང་བུས་གཟུགས་བྲིས་པ། །དེ་དག་ཐམས་ཅད་བྱང་ཆུབ་འཐོབ་འགྱུར་ཏེ། །དེ་དག་ཐམས་ཅད་སྙིང་རྗེ་ཅན་དུ་འགྱུར། །ཐམས་ཅད་ཀྱང་ནི་སྲོག་ཆགས་བྱེ་བ་སྒྲོལ། །བྱང་ཆུབ་སེམས་དཔའ་མང་པོ་ཡང་དག་འཛུད། །ཅེས་དང་། །གསལ་རྒྱལ་གྱི་ཚིགས་སུ་བཅད་པ་ལས། །བཅོམ་ལྡན་འདས་ཀྱི་མཆོད་རྟེན་རྣམས་དང་ནི། །སྐུ་གཟུགས་རྣམས་ལ་རྡུལ་ཕྲན་ཅི་སོང་བ། །དེ་ཡི་གྲངས་སྙེད་དེ་སྙེད་མི་རྣམས་ཀྱིས། །ལྷ་ཡུལ་ས་སྟེང་ངེས་པར་རྒྱལ་སྲིད་ཐོབ། །གཟུགས་དང་གཟུགས་མེད་ཁམས་ཀྱི་ཏིང་ངེ་འཛིན། །ཕུན་སུམ་ཚོགས་པའི་ས་མཆོག་ཀུན་མྱོང་ནས། །ཐ་མར་སྐྱེ་དང་རྒ་ལ་སོགས་པ་ཡི། །སྡུག་བསྔལ་མེད་པའི་སངས་རྒྱས་གོ་འཕང་འཐོབ། །ཅེས་སོགས་མདོ་རྒྱུད་རྣམས་ལས་མཐའ་ཡས་པར་འབྱུང་བ་དང་། ཨོ་རྒྱན་རིན་པོ་ཆེའི་སྣང་བརྙན་བཞེངས་པ་དང་མཆོད་པ་ལ་སོགས་པའི་ཕན་ཡོན་ཀྱང་། མནྡཱ་ར་བའི་ཞུས་ལན་དུ། ཉོན་ཅིག་ལྷ་མོ་གཟུགས་ཅན་ཡིད་འོང་མ༔ མ་
རིག་མུན་སེལ་སྒྲོན་མེ་སྐུ་འདྲས་བྱེད༔ པད་འབྱུང་སྐུ་ཚབ་མཆོད་པའི་རྟེན་བཞེངས་པ༔ སྐུ་གསུམ་དོན་ལྡན་བསྟན་པའི་རྒྱལ་མཚན་འཛུགས༔ དེ་ལ་འདུན་ཞིང་མོས་གུས་སུས་བྱེད་པ༔ འདོད་པ་ཀུན་ཚོགས་རིན་ཆེན་ཕུང་པོ་འདྲ༔ སྙིང་པོ་རྒྱུན་དུ་བཟླས་པ་གང་བྱེད་པ༔ མི་རྣམས་སྨོན་ལམ་ཇི་ལྟར་བཏབ་པ་བཞིན༔ ལེགས་པ་ཀུན་འབྱུང་ཨེ་མ་ངོ་མཚར་ཆེ༔ པད་འབྱུང་སྐུ་འདྲར་སྐུ་གཉེར་སུས་བྱེད་པ༔ ངན་སོང་གསུམ་ལས་རྟག་ཏུ་ཐར་པ་དང་༔ ཕུན་སུམ་ཚོགས་པའི་ཡོན་ཏན་འཐོབ་པར་འགྱུར༔ པད་འབྱུང་སྐུ་ཚབ་གཞལ་ཡས་ཁང་བཞེངས་པ༔ ལྷ་མི་དྲང་སྲོང་ནང་དུ་སྐྱེ་བར་འགྱུར༔ པད་འབྱུང་སྐུ་འདྲར་ན་བཟའ་སུས་འབུལ་བ༔ ཡེ་ཤེས་རྒྱན་ལྡན་རང་ཆས་འཐོབ་པར་འགྱུར༔ པད་འབྱུང་སྐུ་འདྲར་རྡུལ་ཕྱིས་སུས་བྱས་པ༔ གཟུགས་བཟང་ཆས་ལེགས་མདོག་སྡུག་འཐོབ་པར་འགྱུར༔ པད་འབྱུང་སྐུ་འདྲར་མཆོད་པ་སུས་ཕུལ་བ༔ རྫུ་འཕྲུལ་རྐང་པའི་མྱུར་འགྱོགས་འཐོབ་པར་འགྱུར༔ པད་འབྱུང་སྐུ་འདྲར་མར་མེ་སུས་ཕུལ་བ༔ མུན་པ་མེད་ཅིང་བློ་རིག་གསལ་བར་འགྱུར༔ པད་འབྱུང་སྐུ་འདྲར་སྤྱན་གཟིགས་སུས་ཕུལ་བ༔ བསོད་ནམས་ལོངས་སྤྱོད་ཡོ་བྱད་འཕེལ་བར་འགྱུར༔ པད་འབྱུང་སྐུ་འདྲར་གསེར་
ཆབ་སུས་གསོལ་བ༔ རྒྱལ་པོ་རིན་ཆེན་ལྟ་བུ་འཐོབ་པར་འགྱུར༔ ཞེས་སོགས་གཏེར་ཁ་དུ་མ་ནས་རྒྱས་པར་འབྱུང་ངོ་། །རྟེན་གསུམ་རིན་པོ་ཆེ་དེ་དག་ལ་མཆོད་པ་དང་བཀུར་སྟི་ལ་སོགས་པ་བགྱིས་པའི་ཕན་ཡོན་ནི་གསུང་རབ་རིན་པོ་ཆེ་རྣམས་ལས་མཐའ་ཡས་པར་གསུངས་པ་ལྟར་ཤེས་དགོས་མོད། འདིར་ཕྱོགས་ཙམ་ནི། དམ་ཆོས་པད་དཀར་ལས། བདེ་གཤེགས་རིང་བསྲེལ་ལ་ནི་ཅུང་ཟད་དང་། །སིལ་སྙན་གཅིག་བརྡུངས་པ་ཡི་སྒྲ་ཕྱུང་ངམ། །མེ་ཏོག་གཅིག་ཙམ་གྱིས་ནི་མཆོད་པ་དང་། །བདེ་གཤེགས་གཟུགས་དག་རྩིག་ངོས་བྲིས་པ་ལ། །འཁྲུག་བཞིན་པ་ཡི་སེམས་ཀྱིས་མཆོད་ན་ཡང་། །དེ་དག་རིམ་གྱིས་སངས་རྒྱས་བྱེ་བ་མཐོང་། །མཆོད་རྟེན་དག་ལ་གང་གིས་ཐལ་མོ་སྦྱར། །ཡོངས་སུ་ཚང་བའི་ཐལ་མོ་ཡ་ཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །དེ་བཞིན་ལུས་ཀྱང་ལན་ཅིག་བཏུད་པ་དང་། །གང་གིས་རིང་བསྲེལ་གནས་པ་དེ་དག་ལ། །གཡེང་བའི་སེམས་ཀྱིས་ཕྱག་འཚལ་སངས་རྒྱས་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །ཅེས་པ་ལ་སོགས་པ་གསུངས་སོ། །ཛམྦུའི་གསེར་གྱི་ལྷུན་པོ་དངར་བ་ནི། །བྱིན་
རླབས་འོད་ཀྱིས་ཉི་མ་སྟོང་ཕྲག་ལྷག །ཟིལ་གྱིས་གནོན་པའི་ངོ་མཚར་ས་སྟེང་དང་། །མཐོ་རིས་སུ་ཡང་གྲགས་པའི་དཔལ་དུ་ཤེས། །མཆོད་པའི་བསོད་ནམས་གཅི་གཅིག་ལོངས་སྤྱོད་པའི། །སྐལ་བཟང་དེ་ཡང་ཡིད་སྤུབས་འབུམ་ཕྲག་ལ། །ཡེ་ཤེས་མཚོན་ཆས་བསྣུན་ནས་ཞི་བའི་དཔལ། །རང་གིས་ལེན་ལ་ཅིས་ཀྱང་རིངས་པ་བཞིན། །རྟེན་གསུམ་རྣམ་པར་རྒྱལ་བའི་སྨན་ཆེན་པོ། །འབྱོར་པའི་ནགས་ཀླུང་སྟུག་པོ་ལས་སྐྱེས་པ། །ཉོན་མོངས་ནད་རྣམས་འཇོམས་པའི་ཆོས་ཉིད་ཅན། །སྡུག་བསྔལ་མལ་དུ་དུབ་རྣམས་བསྟེན་པར་གྱིས། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །ད་ནི་ལེགས་བྱས་དེ་དག་མཐར་ཕྱིན་པའི་བྱ་བ་དགེ་བའི་རྩ་བ་དུང་དང་པད་རྩ་ལྟར་དཀར་བ་ཐམས་ཅད་ཀྱང་བླ་ན་མེད་པའི་བྱང་ཆུབ་ཆེན་པོར་བསྔོ་བ་དང་། རང་དང་གཞན་ལ་གནས་སྐབས་དང་མཐར་ཐུག་ཀུན་ཏུ་ཕན་བདེ་འབྱུང་བའི་སྨོན་ལམ་གྱི་ཚིགས་སུ་བཅད་པའི་ཕྲེང་བ་ཅུང་ཟད་བསྟར་བ་ནི་འདི་ལྟ་སྟེ། ན་མོ་གུ་རུ་རཏྣ་ཏྲ་ཡཱ་ཡ། ཡ་ཐཱ་པྲ་ི་དྷི་སིདྡྷི་བྷ་བནྟུ། རིགས་ཀྱི་མཐུ་ལས་ཐོག་མཐའ་མེད་པའི་འཁོར་བའི་སྐྱེ་བ་རྣམས་སུ་ཡང་། །རྣམ་བྱང་ཕྱོགས་སུ་དངོས་དང་བརྒྱུད་ནས་བསླན་པར་འོས་པ་དཀར་པོའི་
ཕྱོགས། །གང་མཆིས་རྣམས་དང་འབད་པས་བསྒྲུབས་འདིའི་བསོད་ནམས་དྲི་མེད་ཇི་སྙེད་པ། །སྐྱེ་དགུའི་རྣམ་དཀར་ཆུ་རྒྱུན་དེ་སྙེད་ལྷན་ཅིག་བྱང་ཆུབ་རྒྱ་མཚོར་བསྔོ། །མི་ཡི་སེང་གེ་སྲས་ཀྱིས་ཡོངས་བསྐོར་དུས་གསུམ་གཤེགས་པ་ཐམས་ཅད་ཀྱིས། །དཔལ་གྱི་མགུར་ནས་བསྔགས་པའི་གླིང་བུ་མགྲིན་གཅིག་བསྒྱུར་བའི་སྨོན་ལམ་དང་། །ཡོངས་བསྔོ་རྣམ་དག་ཐབས་ལ་མཁས་པས་མཚན་བཅས་མཚན་མེད་ལེགས་སྤྱད་ཀུན། །དཔག་གིས་མི་དབོག་གཏིང་མཐའ་བྲལ་བའི་བཟང་པོ་སྤྱོད་པར་འཇུག་གྱུར་ཅིག །ཁམས་ཀྱི་རིགས་སད་ཐེག་གསུམ་ལམ་ཞུགས་རང་འབྲས་མཐར་ཕྱིན་མཐར་ཐུག་པར། །བགྲོད་གཅིག་ལམ་ལས་སྲིད་ཞིར་མི་གནས་ཆོས་ཀུན་དབྱིངས་སུ་མངོན་བྱང་བརྙེས། །ཞི་བསིལ་བདུད་རྩི་ཁམས་དབང་འཚམས་པར་བགོ་བཤའ་འགྱེད་པས་མཁའ་མཉམ་གྱི། །ཡིད་ཅན་མཐའ་དག་རྣམ་གྲོལ་ལམ་དུ་ངལ་བསོའི་དབུགས་ཆེན་འབྱིན་གྱུར་ཅིག །གང་ཞིག་མངོན་རྟོགས་ཕ་མཐར་ཕྱིན་ནས་འགྲོ་མང་སྒྲོལ་མཛད་སྟོབས་བཅུ་པ། །གང་ཕྱིར་ས་དང་ལམ་ལ་མཐོར་གཤགས་སྐྱེ་རྒུའི་གཉེན་ཏུ་འཐམ་པ་ཡི། །དཔའ་བོ་དེ་ཀུན་གང་ལ་བསླབས་ཤིང་གང་དག་སྤྱད་པ་སྤྱོད་མཛད་པ། །མཐའ་དག་སློབ་ཅིང་རྗེས་སུ་སྤྱོད་པས་རྒྱལ་
ཀུན་དགོངས་པ་སྐོང་བྱེད་ཤོག །མཁའ་ཁྱབ་ལུས་ཅན་རྣམ་པར་འགྲོལ་མཛད་རང་བདེའི་ཞི་བ་སྤངས་རྣམས་དང་། །གཞན་ལ་ཕན་ཕྱིར་བྱང་ཆུབ་དོན་གཉེར་སེམས་མཆོག་ཉི་ཤུ་གཉིས་དང་ལྡན། །བདག་གཞན་མཉམ་རྫོགས་འཚང་རྒྱའི་བློ་མངའ་ཆེན་པོ་དམན་དང་འབྲིང་དག་གི། །སྙིང་སྟོབས་མཆོག་ལྡན་རྒྱལ་བའི་མྱུ་གུའི་རྣམ་ཐར་ཇི་བཞིན་འཛིན་ནུས་ཤོག །གཏིང་མཐའ་དགེ་མེད་འཁོར་བའི་རྒྱ་མཚོར་དུག་ཅན་རྦལ་བྱིང་བ་རྣམས། །སྙིང་རྗེའི་གྲུ་བོ་ལེགས་པར་བཅུག་སྟེ་ཤེས་རབ་གདོས་པས་ཕ་རོལ་དུ། །བདེ་བར་རབ་བསྒྲལ་ཐར་མཆོག་ནོར་གླིང་ཡིད་འོང་འདོད་རྒུའི་མཛོད་སྦྱིན་ནས། །བསམ་བཞིན་འཇུག་པའི་སྲིད་པ་ལས་གཞན་སྲིད་པའི་མིང་ཙམ་མཐར་འབྱིན་ཤོག །བདག་འཛིན་རྟོག་པས་ཐོག་མར་དབྱེ་ན་བརྩེ་བྲལ་ཉོན་མོངས་ཕྲུ་མ་ཡིས། །ངན་འགྲོའི་བཙོན་རར་བཟོད་དཀའི་དུཿཁས་བསྟིར་མེད་མནར་བའི་མ་རྒན་རྣམས། །ཆོས་ཉིད་བདེན་པས་ཉིང་འཁྲུལ་སད་བཞིན་རྩ་བྲལ་རྫུན་གྱི་འཁྲུལ་འཁོར་བརྟོལ། །འགྲོ་འོང་གནས་བྲལ་ཞི་བདེ་ཐར་པའི་ཁང་བཟང་དམ་པར་བདེར་གནས་ཤོག །བྱིས་བློ་ཉི་ཚེས་གཞལ་པར་མི་བཟོད་རྣམ་པ་ཀུན་མཁྱེན་སྤྱོད་ཡུལ་བ། །ཕྱོགས་སུ་མ་ལྷུང་དོན་དམ་བདེན་པ་ཇི་བཞིན་
རྟོགས་པས་རང་རྒྱུད་གྲོལ། །འཁྲུལ་ངོར་མི་བསླུ་ཀུན་རྫོབ་ཚུལ་ལ་སྲེད་ལེན་བྲལ་ཡང་སངས་རྒྱས་ཀྱིས། །ལགས་གསུང་འཇུག་ལྡོག་ཚུལ་བཞིན་ནུས་པས་མཐའ་གཉིས་རབ་ཏུ་སྤང་བར་ཤོག །ལུས་གཙང་ཐུབ་པའི་བརྟུལ་ཞུགས་ལགས་འཛིན་བརྩེ་སེམས་འགྲོ་བའི་མཛའ་མོར་འཁྱུད། །བདེ་སྟོད་རྡོ་རྗེའི་གོ་ཆ་མཁྲེགས་པས་འཕོ་བའི་འཇིགས་བཅོམ་སྲིད་པ་གསུམ། །རྣམ་དག་གཅིག་སྦྱོར་མཆོག་གི་ས་བརྙེས་སྙིང་སྟོབས་ཆེན་པོས་འཁོར་བ་ཡི། །གཡུལ་ངོར་རབ་ཞུགས་སྲིད་པའི་དཔུང་ཚོགས་རྩད་ནས་བཅོམ་པའི་དཔའ་བོར་ཤོག །སྐྱེ་བ་ཀུན་ཏུ་སྦྱིན་ལ་རབ་བརྩོན་དེ་ཡི་མི་མཐུན་ཕྱོགས་རྣམས་སྤངས། །དེ་བཞིན་ཁྲིམས་སོགས་ཚོགས་ཆེན་གཉིས་བསྡུས་ཕ་རོལ་ཕྱིན་རྣམས་ཡོངས་སུ་རྫོགས། །ཀུན་ཀྱང་དྲི་མེད་ཤེས་རབ་མིག་ལྡན་བྱང་ཆུབ་ཕྱོགས་ཆོས་གོམ་སྟབས་ཀྱིས། །ས་བཅུ་ལམ་ལྔའི་རྩེ་མོར་རབ་འཛེགས་ཆོས་ཀྱི་རྒྱལ་པོའི་དཔལ་མཉེས་ཤོག །ཕལ་པས་བརྣག་དཀའ་དཀྱེལ་ཆེན་བློ་ཡིས་ལེགས་སྤྱད་སྲང་སྒོ་ཆེན་པོ་དབྱེ། །མཐོང་ཐོས་སྐྱེ་བོ་དད་པའི་གནས་བཀོད་དེར་སྨོན་དེ་ཡི་རྗེས་སུ་ཕྱོགས། །ཞིང་འདིའི་མཆོད་སྡོང་འདི་ཁོ་ན་ཞེས་ལྷར་བཅས་འཇིག་རྟེན་མཆོད་པའི་ཡུལ། །མི་མཉམ་མཉམ་པ་བྱ་བ་ལས་ཀྱི་འཁོར་ལོ་བརྒྱ་ཕྲག་
བསྐོར་གྱུར་ཅིག །ཐ་སྙད་ཚིག་དང་སྟོན་པ་རྣམ་བཞིས་དོན་མཁས་ལུང་གི་ཆོས་སྐྱོང་ཞིང་། །མངོན་རྟོགས་བདུད་རྩིས་བདག་རྒྱུད་ངོམས་པས་སྐྱེ་དགུ་མ་གྲོལ་དགྲོལ་བར་ནུས། །དམ་པའི་ཚུལ་དགུས་རྒྱལ་བསྟན་འཛིན་མཛད་སྐྱེས་བུ་ཁྱུ་མཆོག་གང་བཞུགས་དང་། །ཁྱབ་བདག་བླ་མའི་གསང་གསུམ་ལྷུན་པོ་སྲིད་པ་ཇི་སྲིད་རྟག་བརྟན་གསོལ། །ཕན་བདེའི་ལམ་སྟོན་འཇིག་རྟེན་སྣང་བྱེད་མཚུངས་ཟླས་དབེན་པ་སངས་རྒྱས་ཀྱི། །རིང་ལུགས་སྤྱི་དང་དུས་གསུམ་ཀུན་ཏུ་མཚན་ཙམ་འབྱོན་དཀའ་མཚན་གྱིས་ཀྱང་། །རྒྱལ་བའི་མཛད་པ་བདེ་བླག་སྒྲུབ་ནུས་གསང་ཆེན་རྡོ་རྗེ་སྙིང་པོ་ཡི། །ཆོས་ཚུལ་མཐའ་དག་མ་བྱོན་རྒྱལ་བ་ཞིང་འདིར་འབྱོན་པར་ནུབ་མེད་ཤོག །འགྲོ་བའི་ཉེར་འཚོ་འཇིག་རྟེན་སྤྱི་དང་ཁྱད་པར་རྒྱལ་བསྟན་འཚོ་བཞེས་གནས། །ཉེ་རིང་ཀུན་ཏུ་ཕོངས་ཤིང་རྒུད་པ་དགུན་གྱི་གྲང་རེག་རྟག་ཏུ་ཟད། །སྣོད་བཅུད་དཔལ་འབྱོར་དུས་ཀྱི་དང་པོའི་དགའ་སྟོན་ལང་ཚོ་གོང་འཕེལ་ཏེ། །ཆོས་བཞིན་སྤྱོད་པའི་སྐྱེ་རྒུའི་བདེ་སྐྱིད་ལྷ་ལས་ལྷག་པར་བདོ་གྱུར་ཅིག །ལུས་སྲོག་འཕྲོག་བྱེད་ནད་ཀྱི་རྡུལ་ཕྲེང་ལེགས་བྱས་བདུད་རྩིའི་ཆར་བས་གཞིལ། །ཟས་གོས་ཕོངས་པའི་མུ་གེའི་དགོོན་དུང་འཛད་མེད་ནོར་བུའི་གཏེར་ཁ་
ཕྱེ། །འཐབ་རྩོད་མཚོན་ཆའི་སྦྱོར་བ་བཤམས་ཀྱང་ཕན་ཚུན་མཛའ་ཞིང་བྱམས་པས་སྤྲེལ། །དེ་རྒྱུ་དུག་གསུམ་དབྱིངས་སུ་ཞི་ལས་མི་བཟད་འབྲས་བུ་མི་འབྱིན་ཤོག །རྨ་བྱ་གཞོན་ནུའི་མགྲིན་པའི་དཔལ་འཕྲོག་སྤྲིན་གྱི་བླ་བྲེ་བྲེས་པ་ལས། །སྦྲང་ཆར་ཐིགས་ཕྲེང་དུས་སུ་འཇོ་བས་ལོ་ཏོག་རྩི་ཤིང་རྣམ་པར་རྒྱས། །དུས་མིན་གྲང་དང་སད་སེར་བཙའ་ཐན་ཉེ་ཞོ་ས་འོག་བཅིང་བ་ཡི། །བསོད་ནམས་སྟོབས་ལྡན་སྐྱེ་དགུ་ཀུན་ཀྱང་འབྱོར་པའི་འདུ་འཛིས་བྲེལ་བར་ཤོག །ཆོས་ནོར་འདོད་ཐར་སྡེ་བཞིའི་ལྷུན་པོ་དགེ་བཅུའི་བང་རིམ་ཡངས་པས་བཏེགས། །ལུགས་ཟུང་ཉི་ཟླའི་གཟི་འོད་འབར་བས་ཕྱོགས་མཐའི་སྐྱེ་བོ་མགྲོན་དུ་འགུགས། །བསོད་ནམས་མིན་ལས་རྟག་ཏུ་ཕྱིར་ཕྱོགས་འབངས་འཁོར་ཆུ་གཏེར་མུ་ཁྱུད་ཅན། །གང་འདིར་རྐུད་པའི་མིང་ཡང་མི་གྲགས་དཔལ་འབྱོར་སུམ་རྩེན་ལྟར་རྒྱས་ཤོག །ལྷ་རིགས་ཐིག་ལེའི་དྭངས་མར་སྨིན་ཀྱང་མ་འདྲིས་མི་ཡི་འགྲོ་བ་ཀུན། །ཆོས་བཞིན་སྐྱོང་མཛད་ཆོས་ཀྱི་རྒྱལ་པོ་མཆེད་ཞལ་སྐྱེད་ཡུམ་བཙུན་མོར་བཅས། །འཆི་མེད་བདུད་རྩིའི་བཅུད་ལེན་གྲུབ་པས་ནམ་ཡང་མི་ནུབ་སྐུ་ཚེ་ཡི། །རྒྱལ་མཚན་རབ་བརྟན་ཆབ་འོག་བདོག་རྒུའི་ལེགས་བྱས་དཔུང་པས་བཟུང་གྱུར་ཅིག །དཔལ་འབྱོར་ལྗོན་པར་དམ་
བཅའི་འབྲས་སྨིན་ངོ་མཚར་མིག་གི་བདུད་རྩི་ཅན། །གང་ཞིག་འབྲེལ་བས་ཐར་པའི་དཔྱིད་སྟེར་ཡིད་དགའ་ཆོས་འཛིན་འདུན་ས་བཞིན། །མཐོང་གྲོར་ལྷ་ཁང་ཛམ་བུའི་གླིང་ན་བཀྲ་ཤིས་འོད་དུ་འབར་འདི་ཡང་། །མཆོད་པའི་སྤྲིན་ཕུང་སྟུག་པོས་དཀྲིགས་ཏེ་ཉམས་མེད་ཡུན་རིང་བཞུགས་གྱུར་ཅིག །སྙིགས་མའི་རྣམ་འགྱུར་སྣ་ཚོགས་རེ་ཁང་ཉིན་བཞིན་འཕེལ་བའི་རྒྱུན་ཆད་ཅིང་། །གཟུགས་ཅན་གཟུགས་མེད་ཀུན་གྱི་རྒྱུད་ལ་སེམས་ཀྱི་དམ་པ་རིན་ཆེན་འཁྲུངས། །འཕྲལ་ཡུན་བདེ་འབྱོར་དཔག་བསམ་རྐང་འཐུང་ཡོངས་སུ་དཀྲིགས་པའི་གྲིབ་བསིལ་དུ། །དབུགས་མ་ཕྱིན་པའི་ལུས་ཅན་མཐའ་དག་དབུགས་འབྱིན་ངལ་འཚོ་ཐོབ་གྱུར་ཅིག །འཇིག་རྟེན་གསུམ་ན་གྲགས་པའི་བ་དན་མངོན་པར་མཐོ་བ་མཆོག་གསུམ་བདེན་པའི་བྱིན་བརླབས་དང་། །སྲིད་ཞིའི་ཁམས་ན་ངོ་མཚར་ཕུལ་གྱུར་རྩ་གསུམ་ཆོས་སྲུང་དཀར་ཕྱོགས་སྐྱོང་རྣམས་མཐུ་སྟོབས་ཀྱིས། །ལྷག་པའི་བསམ་པས་ཇི་ལྟར་སྨོན་པའི་རེ་བའི་ཤིང་རྟ་མངོན་འདོད་ནོར་བུའི་ཕྱུར་བུར་གཏམས། །འདི་དང་གཏན་གྱི་དབུལ་བ་འཕྲོག་པས་བསམ་དོན་ལྷུན་གྲུབ་མཁའ་ཁྱབ་བཀྲ་ཤིས་དཔལ་འབར་ཤོག །ཅེས་རྒྱལ་ཁབ་ཆེན་པོ་དཔལ་ལྡན་ལྷུན་གྲུབ་སྟེང་ཕོ་བྲང་གི་རྟེན་གཙོ་
ཐུབ་དབང་མཐོང་གྲོལ་ལྷ་ཁང་དུ་བཞུགས་པའི་རྟེན་གསུམ་དཀར་ཆག་ཉུང་ངུར་བསྡུས་པ་འདིའང་། རྣམ་དཀར་འདིའི་ཕྱག་རིས་མཛད་པ་སའི་དབང་མོ་མ་ཡུམ་མཆོག་ཉིད་ཀྱིས་གསུང་བསྐུལ་ཡང་བསྐྱར་ཕེབས་བ་ལྟར། ཐུབ་བསྟན་རིས་མེད་ཀྱི་རྗེས་སུ་སློབ་པའི་དགེ་སྦྱོང་གི་གཟུགས་བརྙན་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོའམ། མིང་གཞན་བློ་གྲོས་མཐའ་ཡས་ཀྱིས་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་བགྱིས་པའི་ཡི་གེ་པ་ནི་རིག་པའི་གནས་ལ་རྣམ་པར་དཔྱོད་པའི་བློ་གྲོས་ཡངས་པ་ཀརྨ་ལྷ་བསམ་གྱིས་བགྱིས་པ་དགེ་ལེགས་འཕེལ།། །།