པད་་གླིང་གཏོར་བྱོན་རྫོགས་ཆེན་ཀུན་བཟང་དགོངས་འདུས་ཀྱི་སྨིན་གྲོལ་འབོགས་པའི་ཚུལ།
ན་མོ་གུ་རུ་ཝེ། པད་་གླིང་གཏོར་བྱོན་རྫོགས་ཆེན་ཀུན་བཟང་དགོངས་འདུས་ཀྱི་སྨིན་གྲོལ་འབོགས་པའི་ཚུལ་ལ་སྤྱིར་ལོ་རྒྱུས་ལས། ཚིག་དང་ལེའུ་རྣམས་རྒྱུད་ཚིག་ཏུ་ཡོད་པ། དབང་དང་ཁྲིད་རྣམས་སྙིང་ཏིག་ཏུ་ཡོད་པ། དོན་ཐམས་ཅད་མན་ངག་ཏུ་ཡོད་པ། ཕ་རྒྱུད་མ་རྒྱུད་དབྱེར་མེད་པ་ཞེས་གསུངས་པ་ལྟར་དབང་གི་སྤྱི་བབས་མན་ངག་སྡེའི་རྒྱུད་བཅུ་བདུན་གྱི་དབང་རྫོགས་པ་རང་བྱུང་རྒྱལ་པོའི་རྒྱུད་དང་འདི་ཉིད་ཀྱི་ཁྱུང་ཆེན་གཤོག་རྫོགས་སོགས་ཀྱི་དགོངས་པ་ལྟར། ཡོ་ག་འོག་མ་རྣམས་ལྟར་སྤྲོས་བཅས་ཀྱི་རྣམ་གཞག་གཙོར་བཏོན་པ་མིན་ཅིང་། ཨ་ཏི་གསང་སྐོར་གྱི་སྤྲོས་མེད་རིག་པའི་རྩལ་དབང་ཉིད་ལ་ཐེག་པ་འོག་མ་དང་བསྟུན་པའི་རྣམ་གཞག་མཛད་པ་ཡིན་སྟབས། གསང་སྐོར་སྙིང་ཐིག་ལུགས་ལ་རྫོགས་པ་ཆེན་པོའི་ལྟ་སྒོམ་གྱི་གདིང་དང་ལྡན་པའི་བླ་མས་སྣང་སྲིད་གཞིར་བཞེངས་རང་བྱུང་གདོད་མའི་སྐུ་དང་ཡེ་ཤེས་གསལ་བཏབ་པའི་ངང་ལས་དཀྱིལ་འཁོར་བཞེངས་ཤིང་དབང་གི་བྱ་བས་སློབ་མ་རྗེས་སུ་བཟུང་བ་ལས། ཐེག་པ་འོག་མའི་ལུགས་ཀྱི་བདག་མདུན་སྒྲུབ་པ་སོགས་བྱ་བའི་སྐབས་མིན་པས་རྒྱུད་བཅུ་བདུན་གྱི་དབང་ལ་བདག་མདུན་སྒྲུབ་ཚུལ་མདོར་བསྡུས་ཙམ་དང་། སྙིང་ཐིག་ཆེན་མོར་གཞིའི་ཀུན་བཟང་གསལ་འདེབས་བྱ་བ་ཙམ་ལས་མེད་པས་འདིར་ཡང་དོན་གྱིས་དེ་ཙམ་གྱིས་
ཆོག་པར་གསལ། འོན་ཀྱང་གཞུང་འདིར་སྒྲུབ་ཚུལ་གསལ་བར་གསུངས་པས་དེ་ལྟར་བྱ་བ་ནི་བླ་མ་བརྒྱུད་པའི་ཕྱག་བཞེས་སུའང་སྣང་བས་དེ་ལྟར་ན་ཐོག་མར་ཁྲུས་ལུང་དབང་གི་ཕྲེང་བ་སློབ་མ་སྟ་གོན་གྱི་སྐབས། འདི་ཉིད་བར་ཆད་སེལ་བྱེད་ལས་ཀྱི་ལྷ་རྟ་མགྲིན་ལ་གཙོ་བོར་བརྟེན་པར་སྣང་བས། རྟ་མགྲིན་དམར་པོའི་བདག་བསྐྱེད་བཟླས་པ་དང་བཅས་པ་བྱ། དེ་ནས་ཁྲུས་ལུང་ལྟར་ས་སློང་། འདུལ་ཞིང་བྱིན་གྱིས་བརླབ། དཀྱིལ་འཁོར་དབང་རྫས་བཀོད་ཅིང་ཁྲོ་བཅུའི་ཕུར་གདན་གྲུབ་ནས། འོག་གི་ལས་བུམ་ཁྲུས་ལུང་གི་བསྒོམ་བཟླས་ལྟར་བསྒྲུབ། དཀྱིལ་འཁོར་ལ་ཡོལ་བ་བཏང་། སློབ་མ་རྣམས་འབྲུ་གསུམ་བཟླ་བཞིན་བསྐོར་བ་དང་སྒོ་ཞུས་གྲུབ་ནས་ནང་དུ་འཁོད་པ་ལ་རྒྱུ་འབྲས་སོགས་ཀྱི་ཆོས་བཤད་མདོ་རྒྱས་ཇི་ལྟར་འོས་པས་མཚམས་སྦྱར་ལ་མཎྜལ་འབུལ་དུ་གཞུག །གསོལ་གདབ་སྡོམ་བཟུང་ངམ་བཞག་གྲུབ་ནས་ཡོལ་བ་བསལ་ལ། སློབ་དཔོན་བཞེངས་ཏེ་དབང་གི་བྲོ་བརྡུང་། བགེགས་གཏོར་སྤྱི་མཚམས་བཏང་། ལས་བྱང་ལྟར་བགེགས་བསྐྲད་ཅིང་མཚམས་བཅད། ཁྲུས་གཞུང་ལྟར་བྱ། སློབ་མ་རྣམས་མ་གྲོལ་ན་ཡིག་བརྒྱ་བཟླར་གཞུག །སློབ་དཔོན་གྱིས་རྟ་མགྲིན་དམར་པོའི་ཕྲིན་ལས་བཏང་ལ་མདུན་གྱི་དཀྱིལ་འཁོར་བསྐྱེད། མཆོད་བསྟོད་བཟླས་པ་མདོར་བསྡུས་དང་ཚོགས་མཆོད་བཅས་གྲུབ་ནས་
སླར་ཡང་སྟ་གོན་གྱི་དབང་བསྐུར་ཞུ་བའི་ཡོན་ཏུ་མཎྜལ་འབུལ་གཞུག །གསོལ་གདབ་གནང་སྐྱིན་ནས་བརྩམས་རིམ་གྱིས་བསྐུར། སོ་ཤིང་དཔུང་སྐུད་ཀུ་ཤ་སྦྱིན་པ་བཅས་བྱ། མེ་ཐབ་བསྲེག་རྫས་སོགས་སྔར་ནས་འདུ་བྱས་ལ་སྐབས་འདིར་སྦྱིན་སྲེག་འབུལ་ དགོས་པས་དེའང་སྤྲོས་པ 
་ཆེ་ན་དཀྱིལ་འཁོར་ཕྱོགས་བཞིར་མེ་ཐབ་དང་བསྲེག་རྫས་སོ་སོར་བཤམ། སློབ་དཔོན་གྱིས་ཚིག་བརྗོད་པ་དང་བསྟུན་ལས་རྡོར་གྱིས་སོ་སོར་འབུལ། སྤྲོས་པས་མི་ལྕོགས་ན་མེ་ཐབ་གཅིག་ཏུ་ལས་བཞི་ཚང་བར་བྱས་ལ་བསྲེག་རྫས་རྣམས་སྦོམ་སྟེ་སློབ་དཔོན་མདུན་དུ་བཞག་ལ་འབུལ། བྱིན་རླབས་གསང་བ་སྤྱི་ལྟར་བྱ། མེ་ཐབ་ཏུ་རྟ་མགྲིན་རིགས་ལྔ་བསྐྱེད་བསྟིམ་མཆོད་བསྟོད་རྟ་མགྲིན་གཞུང་ལྟར་དང་སླར་ཡང་སྔགས་ཀྱི་བྱིན་རླབས་ཁ་གསོ། སྙིང་པོ་ལ་ཤམ་བུ་བཞི་པོ་སོ་སོར་བཏགས་པ་ཚར་ཉེར་གཅིག་གམ་བདུན་ཙམ་གྱིས་བསྲེག་རྫས་སོ་སོར་འབུལ། མཐར་མཆོད་བསྟོད་མདོར་བསྡུས། ནོངས་བཤགས། གཤེགས་གསོལ་བྱས་ལ་བསྔོ་སྨོན་དང་བཀྲ་ཤིས་གཞུང་ལྟར་བརྗོད་པས་སྟ་གོན་གྲུབ། སློབ་དཔོན་གྱིས་ཚོགས་ལ་རོལ། ལྷག་མ་བཏང་བ་ཕྱིན་བདག་མདུན་རྗེས་རིམ་ལས་བྱང་ལྟར་བྱའོ། །དེ་ནས་ཐེག་དགུའི་དབང་ཆོག་རྫོགས་པ་རང་བྱུང་གི་ཕྲེང་བ་ལྟར་བཤམ་བཀོད་རྣམས་དང་དབང་རྫས་ཉེར་བསྡོགས་གྲུབ་ནས། ཐེག་
དགུ་གང་རུང་གིས་གཞུང་བསྲང་བར་གསུངས་ཀྱང་ལྷ་ཐམས་ཅད་ཀྱི་རིགས་འདུས་པས་བཀའ་བརྒྱད་ཀྱི་ཕྲིན་ལས་བཏང་ན་ལེགས་པས་ཐུགས་ཀྱི་མེ་ལོང་གིས་བདག་མདུན་སྒྲུབ་ཅིང་བཟླས་པ་དང་ཚོགས་མཆོད་ལྷག་མའི་བར་དུ་བཏང་། སྟ་གོན་ཁྲུས་ལུང་ལྟར་ལས་བུམ་བསྒྲུབ་པ་བཅས་བྱ། དེ་ནས་སློབ་མ་རྣམས་འདུས་ལ་མཚམས་སྦྱོར་ཇི་རིགས་བཅས་གསོལ་གདབ་དྲིས་ལན། ལས་བུམ་གྱིས་དབང་བསྐུར་ཅིང་ཁྲུས་བྱ་དུར་ཁྲོད་ཀྱི་ཆས་སུ་ཞུགས། ངག་ལ་ཧཱུྃ་དང་སེམས་ལ་བདུད་རྩིའི་མཎྜལ་འབུལ་དུ་གཞུག །དབུ་རྒྱན་ནས་བརྩམས་ཨ་ཏིའི་དབང་རྫོགས་ཀྱི་བར་བསྐུར། ཨཱ་ལི་ཀཱ་ལི་བརྗོད་ལ་ལྷག་ཆད་ཁ་བསྐང་། དབང་རྗེས་དམ་ཚིག་བསྒྲག་བཟུང་། གཏོང་རག་མཎྜལ། ལུས་འབུལ་དགེ་བསྔོ་བཅས་ཀྱིས་གྲུབ། དབང་ཁྲིད་སྦྲེལ་ན་འདིར་ཐེག་དགུའི་ཁྲིད་ཆེན་གསེར་གྱི་ཐེམ་སྐས་བཀླག་པས་མཚོན་ཕྱི་མ་རྣམས་ལའང་རེ་རེ་བཞིན་དབང་དང་ཁྲིད་སྦྲེལ་ནས་ཚང་བར་བྱ་དགོས་སོ། །སློབ་དཔོན་གྱིས་ཕྲིན་ལས་རྗེས་ཀྱི་བྱ་བ་རྒྱས་བསྡུས་སྐབས་བསྟུན་བྱའོ། །དེ་ནས་ཞི་ཁྲོའི་དབང་ཆོག་དཔག་བསམ་ལྗོན་ཤིང་ལྟར་བཤམ་བཀོད་ལེགས་པར་བྱ། རས་བྲིས་ཀྱི་དཀྱིལ་འཁོར་ལ་བརྟེན་པའི་སྐབས་ཐིག་ཚོན་གྱི་བྱ་བ་རྣམས་མི་དགོས། ཀློང་གསལ་ལ་ཞི་ཁྲོའི་ལས་བྱང་སོ་སོར་ཡོད་ཀྱང་ལུགས་དེ་འདིར་མི་དགོས་པས་ཞི་ཁྲོའི་ལས་བྱང་པདྨའི་ཕྲེང་བས་གཞུང་བསྲངས་
ལ་བདག་མདུན་དབྱེར་མེད་དུ་བསྐྱེད། འདིར་མངོན་རྟོགས་འཕྲོས་སུ་བཟླས་པ་འབྱུང་བ་ལྟར་བྱ་བའམ། སྤྱི་ལྟར་བསྟོད་བཤགས་ཀྱི་རྗེས་སུ་འཐེན་ཀྱང་ཆོག །བུམ་པ་རང་བྱུང་གི་གཞལ་ཡས་ཁང་སོགས་བུམ་བསྐྱེད་དམིགས་པ་སྦྱིན་ལུགས་སྤྱི་ཁྱབ་ལྟར་བྱས་ལ་བཟླས་པ་ཅི་འགྲུབ་མཐར། འབྲུ་གསུམ་གྱིས་མཆོད་ཡོན་ཕུལ་ལ་བུམ་ལྷ་བདུད་རྩིར་བཞུ། ལས་བུམ་དུ་རྡོར་སེམས་བསྐྱེད་ལ་ཡིག་བརྒྱ་བཟླས་ལ་འོད་ཞུ་བྱ། དེ་ནས་གཡུ་སྒྲོན་མ་དང་བེ་བཙན་ཀླུ་གསུམ་གཙོས་གཏེར་སྲུང་གསོལ་ཁ་བཏང་། ཚོགས་བྱིན་རླབས་ནས་བསྒྲལ་སྟབས་ཡན་གྲུབ་པ་དང་། དབང་གཞུང་ལྟར། ཧཱུྃ། རིག་རྩལ་ལྷུན་གྲུབ་སོགས་ཀྱིས་བདག་དབང་བླང་། དེ་ནས་སློབ་མ་རྣམས་ལ་སྒོ་དྲུང་དུ་ཁྲུས་དང་སྒོ་སྲུང་ཞུ་གནང་། སློབ་དཔོན་གྱིས་བགེགས་བསྐྲད་བཅས་ནང་དུ་གཞུག་ལ་སྲུང་འཁོར་བསྒོམ། ཡིག་བརྒྱ་བདུན་ཙམ་འདྲེན་དུ་གཞུག །སློབ་དཔོན་གྱིས་དྲི་བ་དང་ལན་གསོལ་བ་ནས་བརྩམས། དཀྱིལ་འཁོར་ལྟ་བ་ཡན་སོང་ནས་མཚམས་སྦྱོར་མདོར་བསྡུས་བཅས་གཞུང་གསལ་བ་མཎྜལ་འབུལ་གཞུག་སྔགས་ཀྱི་ཆེ་བ་བརྗོད་པ་ནས་དབང་གཞུང་མཐར་ཆགས་སུ་བཏང་བ་ལས་འཕྲི་བསྣན་མ་དགོས། རྗེས་ཞི་ཁྲོའི་ལྷ་ངོ་སྤྲོད་པ་བསྡུ་ན་རྡོ་རྗེ་སེམས་དཔའ་རིག་པ་མཆོག་གི་རྒྱུད་ཀྱི་ལེའུ་གཉིས་པ་ཙམ་དང་རྒྱས་པར་སྤྲོ་ན་ནང་གསང་དེ་
ཁོ་ན་ཉིད་བཅས་རྫོགས་པར་བཏང་ཡང་ལེགས། ཤིས་བརྗོད་རྒྱས་བསྡུས་གང་ལྕོགས། དམ་ཚིག་ཁས་ལེན། གཏོང་རག་མཎྜལ་སོགས་དབང་རྗེས་སྤྱི་འགྲོ་ལྟར། །སློབ་དཔོན་གྱིས་ཚོགས་ལ་རོལ། །ལྷག་མ་བཏང་བ་ནས་ཤིས་བརྗོད་བསྡུ་རིམ་གྱི་བར་ལས་བྱང་ལྟར་བྱས་པས་གྲུབ་བོ། དེ་ནས་ཁྲོ་བོའི་དབང་རྡོ་རྗེའི་ཐེམ་སྐས་ལ། རྡུལ་ཚོན་དཀྱིལ་འཁོར་མི་འགྲུབ་པ་དབང་དུ་བྱས་ནས་ཐིག་ཚོན་གྱི་བྱ་བ་རྣམས་དོར་ལ་རས་བྲིས་ཀྱི་དཀྱིལ་འཁོར་བཀྲམ་པའི་སྟེང་དུ་གཞུང་གསལ་དབང་རྫས་ཕྱི་ནང་རྣམས་གྲངས་ཚང་བ་དང་མཆོད་པའི་བཀོད་པ་རྒྱས་པར་བཤམ། ལྷག་ཆད་བསྐང་བ་རང་གཞུང་ལྟར་གྲུབ་ནས་ལས་བྱང་པད་ཕྲེང་གི་བགེགས་བསྐྲད་ནས་བཟུང་མཐར་ཆགས་སུ་བཏང་ལ་བདག་མདུན་དབྱེར་མེད་དུ་བསྒོམ། ལྷ་བསྐྱེད་སོགས་ལ་ཁྲོ་བོ་ཁོ་ན་སྒེར་དུ་ཕྱུང་ན་ཆོག་པར་སྣང་ཡང་ཁ་བསྒྱུར་དང་དབྱེ་བསལ་དཀའ་ཞིང་། ཁྲོ་བོ་རྣམས་ཞི་བའི་རང་རྩལ་ཡིན་པས་ལྷག་སྐྱོན་མི་འབྱུང་བས་ལས་གཞུང་དཀྱུས་ལྟར་བཏང་བ་ལེགས། ཀློང་གསལ་ལ་ཞི་ཁྲོའི་ལས་བྱང་སོ་སོར་ཡོད་མོད། འདིར་རང་གཞུང་གི་བསྟན་དོན་ལྟར་ལ་རིགས་འགྲེའི་སྤར་ཁབ་མི་དགོས། གང་ལྟར་བསྟོད་བཤགས་ཡན་གྲུབ་ནས་བཟླས་པ་གོང་དུ་མ་སོང་ན་འདིར་བཟླ་ཞིང་སྟོང་ཚིགས་འབུལ། ཐོད་པ་དང་བུམ་པ་རྣམས་ལའང་བཟླས་པ་ཅི་ནུས་རེས་
བྱིན་བརླབ། དབང་གཞུང་གི་དཀྱིལ་འཁོར་མཆོད་པ་དང་བཞུགས་གསོལ་བཏང་། གཏེར་སྲུང་གཏོར་འབུལ་དང་ཚོགས་མཆོད་འབུལ་ལ་བདག་དབང་སྔ་མ་ལྟར་བླངས། སློབ་མ་རྣམས་ལ་སྒོ་དྲུང་དུ་ཁྲུས་དང་སྒོ་ཞུས་བྱར་གཞུག །མིག་དར་གཡོགས་ལ་སློབ་དཔོན་གྱིས་དྲག་སྔགས་ཡུངས་ཐུན་རོལ་མོ་སོགས་ཀྱིས་བགེགས་བསྐྲད་ཅིང་ནང་དུ་རྡོར་སེམས་ཀྱི་སྒོམ་བཟླས་ཕོག་ལ་ཡིག་བརྒྱ་འདྲེན་དུ་གཞུག །དུར་ཁྲོད་ཀྱི་མཚན་མ་སོགས་ཆས་སུ་ཞུགས། དབང་གཞུང་གི་བགེགས་བསྐྲད་ནས་བརྩམས་བར་འདེད་དུ་བཏང་། རྗེས་ཀྱི་ལས་རིམ་ཡན་གྲུབ་ནས་ཤིས་བརྗོད་སོགས་དབང་གི་རྗེས་སྤྱི་མཐུན་དང་། སློབ་དཔོན་གྱིས་ཚོགས་ལ་རོལ་པ་ཕྱིན་ཕྲིན་ལས་ཀྱི་རྗེས་རིམ་ཚང་བར་བཏང་བས་གྲུབ་པ་ཡིན་ནོ། །དེ་ནས་སྤྲོས་བཅས་བུམ་པའི་དབང་སོགས་ལྔ་པོ་དུས་གནད་སོ་སོ་དང་བསྟུན། དབང་རེ་རེ་བསྐུར་ཞིང་ཁྲིད་རེ་རེ་དང་སྦྲེལ་བ་གྲུབ་ན་གཞུང་གི་དགོངས་པ་མཆོག་ཡིན་ཀྱང་དེང་སང་དབང་རྒྱུན་ཙམ་ལས་འཆད་མཁན་འཆད་ཡུལ་གཉིས་ཀ་ཚུལ་ལྡན་ནུས་པ་དཀོན་ཅིང་། འདི་མཚུངས་ཀྱི་གཏེར་ཆོས་གཞན་རྣམས་ལའང་བཀའ་ཐོབ་གཙོར་བྱེད་པར་སྣང་བས་དེ་ལྟར་གྱི་ཚེ། དབང་ལྔ་བོ་དཀྱུས་གཅིག་ཏུ་སྦྲེལ་ནས་བསྐུར་ན་ཕྱག་ལེན་བདེ་བས། ཕྱི་སྤྲོས་བཅས་བུམ་པའི་དབང་ལ་ཐིག་ཚོན་གྱི་བྱ་བ་དོར། རས་
བྲིས་ཀྱི་དཀྱིལ་འཁོར་བཀྲམ་ལ་དབང་རྫས་རང་གཞུང་ལྟར་ཚང་བ་ཕྱི་ནང་གི་གཏོར་མཆོད་བཅས་བཤམ། གསང་དབང་སོགས་གཞན་རྣམས་ཀྱི་བཤམ་བཀོད་ཀྱང་སོ་སོའི་གཞུང་མཐུན་བུམ་དཀྱིལ་གྱི་ཕྱོགས་སོ་སོར་བཀོད། རྒྱབ་མདུན་གང་བདེར་ཁྲིའུའི་སྟེང་ཐོད་པ་འབྲུས་བཀང་བའི་ནང་བཏགས་གྲོལ་གྱི་འཁོར་ལོ་དར་སྣས་དྲིལ་བ་བཞུགས། ཐམས་ཅད་ལེགས་པར་ཚོགས་ནས་བུམ་དབང་ལྟར་དཀྱིལ་འཁོར་ལ་ལྷ་བཞུགས་སུ་གསོལ་བ་དང་། ལྷག་ཆད་བསྐང་། ལས་བྱང་པདྨའི་ཕྲེང་བ་རྫོགས་པར་བཏང་ལ་བཟླས་པ་སྟོང་ཚིགས་བཅས་བྱ། བཏགས་གྲོལ་རབ་གནས་སྐབས་སུ་གསུངས་པ་ལྟར་བསྐྱེད་བཟླས་ཅི་འགྲུབ་བོ། །བུམ་བཟླས་ཟུར་དུ་སྤྲོ་ན་གོང་ལྟར་དང་། ལས་བུམ་རྡོར་སེམས་ཀྱིས་བསྒྲུབ། གཏེར་སྲུང་གསོལ་ཁ། ཚོགས་མཆོད་བཅས་གྲུབ་པར་བྱས་ལ། ཞི་ཁྲོའི་དབང་ལྟར་བདག་དབང་བླང་། དེ་ནས་སློབ་མ་རྣམས་ཁྲུས་ནས་དབྱུང་། བགེགས་བསྐྲད་སྲུང་འཁོར་གཞུང་ནས་མ་གསུངས་ཀྱང་གསང་བ་སྤྱི་འགྲོ་ཡིན་པས་བྱས་ཀྱང་ལེགས། སེམས་བསྐྱེད་གསལ་གདབ་དང་མཚམས་སྦྱོར་མདོར་བསྡུས་བྱས་ལ་གསོལ་གདབ་ནས་བརྩམས། བུམ་དབང་རང་གཞུང་མཐར་ཆགས་སུ་བཏང་། བྱིན་འབེབས་མ་གསུངས་པས་མ་བྱས་ཀ་མེད་མིན་ཀྱང་སྤྱི་འགྲོ་ལྟར་སྤྲོ་ན་ལེའུ་ལྔ་པ་འཇུག་པའི་ཆོས་རྫོགས་
པའི་རྗེས་སུ་དབང་ཆོག་ནོར་བུའི་སྒྲོན་མ་ལྟར་ཡེ་ཤེས་པ་དབབ། བུམ་དབང་ལྔ་ནས་ལྷ་ངོ་སྤྲད་པའི་བར་སོང་ནས། མཚམས་སྦྱོར་བཅས་གསང་དབང་རིན་ཆེན་འཁོར་ལོ། ཤེས་རབ་ཡེ་ཤེས་ཚིག་དབང་རིན་ཆེན་ཕྲེང་བ། རིག་པའི་རྩལ་དབང་དབྱེར་མེད་རྣམས་སོ་སོའི་གསོལ་གདབ་ནས་བརྩམས་རྫོགས་པར་བསྐུར། དེ་ནས་སངས་རྒྱས་སྲས་གཅིག་གི་རྒྱུད་ཀྱི་དབང་བསྐུར་ཞུ་བའི་ཡོན་ཏུ་མཎྜལ་ཕུལ། བཏགས་གྲོལ་ལག་ལེན་ལྟར་གསོལ་བ་གདབ། རྒྱུད་རང་གཞུང་གི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་བསྐུར་དང་། ལག་ལེན་ནང་ལྟར། ཀྱེ་མ་ངོ་མཚར་སོགས་ཀྱིས་དབང་བསྐུར། རྒྱུད་གཞུང་ལྟར་སྨོན་ལམ་བཏབ་ཅིང་ཡོན་ཏན་དང་བསླབ་བྱ་བསྒྲག །ཤིས་བརྗོད་ཇི་ལྟར་འོས་པ། དམ་ཚིག་ཁས་བླང་། གཏོང་རག་མཎྜལ་སོགས་དབང་རྗེས་རྣམས་བྱ། སློབ་དཔོན་གྱིས་ཚོགས་ལ་རོལ་པ་ནས་བསྡུ་རིམ་གྱི་བར་ལས་བྱང་ཉིད་ཆད་བར་བཏང་ངོ་། །འདིའི་དབང་ཐམས་ཅད་ཀྱི་སྙིང་པོ་བསྡུས་པ་དབང་ཆོག་ནོར་བུའི་སྒྲོན་མེ་ཟུང་དུ་བསྐུར་ན་ཤིན་ཏུ་གལ་གནད་ཆེ་བས་དེའི་མཚམས་སྦྱོར་ཁོ་བོས་རིན་ཆེན་གཏེར་མཛོད་དུ་བཀོད་པ་ལྟར་ལགས་སོ། །ཞེས་སྤུ་བོ་རྦ་ཁ་རིག་འཛིན་མཆོག་གི་སྤྲུལ་པའི་སྐུས་གསུང་བསྐུལ་ལྟར་པདྨ་གར་དབང་རྩལ་གྱིས་བགྱིས་པ་དགེ་ལེགས་འཕེལ།། །།