༄༅། །ཨོ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་པདྨ་བཀའི་ཐང་ཡིག་ཅེས་བྱ་བ་བཞུགས་སོ། །
༄༅། །༼འདིར་གཏེར་ཡིག་ཡོད་ཀྱང་འབྲི་མ་ཐུབ་པར་ལུས༽ ཨོ་རྒྱན་སྐད་དུཿ རུ་ཨཀྵ་ཤ་ཀ་ར་ཎཿ བོད་སྐད་དུཿ གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་ཞེས་བྱ་བཿ བདེན་པ་རང་བྱུང་སངས་རྒྱས་སྐུ་ལྔ་འཆང་ཿ སྣ་ཚོགས་ཐབས་ཀྱིས་སེམས་ཅན་བདེ་ལ་བཀོདཿ གདུལ་བྱའི་བསམ་པ་ཡོངས་སུ་རྫོགས་མཛད་པའིཿ སྐྱེ་ཤི་མི་མངའ་རྡོ་རྗེའི་སྐུ་ལ་འདུདཿ ལྷ་ལྕམ་མནྡཱ་ར་བ་དང་ཿ བལ་འབངས་ཀ་ལ་སིདྡྷི་དང་ཿ བལ་མོ་ཤཱ་ཀྱ་དེ་བ་དང་ཿ མོན་མོ་བཀྲ་ཤིས་ཁྱེ་འདྲེན་དང་ཿ བུད་མེད་ཡེ་ཤེས་མཚོ་རྒྱལ་དང་ཿ གྷུ་རུའི་ཐུགས་སུ་བྱོན་པའི་བུད་མེད་ལྔསཿ མི་འདུལ་ལས་ཅན་ཁ་ལོ་རྣམ་བསྒྱུར་དང་ཿ དཀོན་ཅོག་གསུམ་ནི་གནས་པར་བྱ་བ་དང་ཿ བསྟན་གཉིས་ཡ་མ་ཟུང་གིས་སེལ་མེད་ཕྱིརཿ མདོ་སྔགས་ཐབས་དང་ཤེས་རབ་སྙིང་པོའི་བཀའཿ ཉེ་བར་གྱུར་པ་གསང་སྔགས་བསྒྲུབ་པའི་ལུང་ཿ བདེན་པའི་བཀའ་འཆང་ངེས་པའི་དོན་གོ་ཕྱིརཿ ཨུ་རྒྱན་གྷུ་རུ་པདྨ་འབྱུང་གནས་ཀྱིཿ སྐུ་གསུང་ཐུགས་ཡོན་འཕྲིན་ལས་མཐར་རྒྱས་པཿ རྣམ་ཐར་སྟོང་ཕྲག་བཅུ་དང་བརྒྱ་ཕྲག་དགུཿ མ་འོངས་དམ་ལྡན་དོན་དུ་བཀོད་ནས་སྦསཿ དེ་ཐོན་མི་ལ་བསོད་ནམས་སྙན་གྲགས་འོང་ཿ གྷུ་རུའི་རྣམ་ཐར་རྒྱས་བསྡུས་གང་འཐད་པརཿ མཐོང་ཐོས་མོས་གུས་ཚད་མེད་བྱ་བ་གཅེསཿ འདི་ལ་དད་མོས་བསྟན་པའི་མཐའ་རྒྱས་འཛིནཿ བླ་མེད་བྱང་ཆུབ་སངས་རྒྱས་ཐེ་ཚོམ་མེདཿ དུས་གསུམ་མཁྱེན་པའི་སློབ་དཔོན་པདྨ་འབྱུང་ཿ ཕྱི་རྒྱུད་དག་པས་སྤྲུལ་སྐུའི་བསྟན་པ་འཛིནཿ ནང་རྒྱུད་དག་པས་ལོངས་སྐུའི་བསྟན་པ་སྐྱོང་ཿ གསང་རྒྱུད་དག་པས་བསྐྱེད་རྫོགས་རང་ལ་བཞུགསཿ འགྲན་གྱི་དོ་མེད་སངས་རྒྱས་འདི་ཡིན་པསཿ དུས་གསུམ་འཇིག་རྟེན་ཁམས་འདིར་མཚུངས་མེད་རྗེཿ རྒྱལ་བའི་བཀའ་ལས་རྩོད་མེད་སྤྲུལ་སྐུར་གྲགསཿ སྐྱོན་སྤངས་ཡོན་ཏན་ཡིད་བཞིན་ནོར་བུ་འདྲཿ འགྲོ་ཀུན་མ་ལུས་དགོས་པའི་དོན་ཀུན་འགྲུབཿ མཛད་ཚུལ་རྣམ་གྲངས་བསམ་གྱིས་མི་ཁྱབ་ཀྱང་ཿ འདི་རུ་སྤྲོས་ཏེ་མ་འོངས་སེམས་ལ་གླནཿ དེ་ལ་ནུབ་ཕྱོགས་པདྨོ་བཀོད་པའི་ཞིང་ཁམས་ཞེས་བྱ་བཿ གསེར་གྱི་ས་གཞི་མིག་མངས་རིས་སུ་ཆགས་པ་ལསཿ ས་གཞི་རི་རབ་མིང་ཡང་མི་གྲགས་བཙལ་ཀྱང་མི་རྙེད་པཿ བྱང་ཆུབ་ཤིང་གི་ལོ་འདབ་མེ་ཏོག་རྒྱས་པ་ལསཿ རྩི་ཤིང་ནགས་ཚལ་མིང་ཡང་མི་གྲགས་བཙལ་ཀྱང་མི་རྙེད་པཿ ཏིང་འཛིན་ཡན་ལག་བརྒྱད་ལྡན་ཆུ་བོ་འབབ་པ་ལསཿ སྣ་ཚོགས་ཆུ་ཡི་མིང་ཡང་མི་གྲགས་བཙལ་ཀྱང་མི་རྙེད་པཿ རིག་པའི་ཡེ་ཤེས་འོད་ལྔ་རང་མེ་ འབར་བ 
་ལསཿ འཇིག་རྟེན་མེ་ཡི་མིང་ཡང་མི་གྲགས་བཙལ་ཀྱང་མི་རྙེད་པཿ རྣམ་པར་དག་པ་སྤོས་ཀྱི་དྲི་ངད་ལྡང་བ་ལསཿ འཇིག་རྟེན་རླུང་གི་མིང་ཡང་མི་གྲགས་བཙལ་ཀྱང་མི་རྙེད་པཿ ཁྱབ་གདལ་ཆོས་ཀྱི་དབྱིངས་ལ་ཕྱོགས་ལྷུང་མེད་པ་ལསཿ འབྱུང་བ་ནམ་མཁའི་མིང་ཡང་མི་གྲགས་བཙལ་ཀྱང་མི་རྙེད་པཿ དབྱིངས་རིག་ཡེ་ཤེས་གསལ་བའི་ཁྲི་གདུགས་བརྡལ་བ་ལསཿ ཉི་མ་ཟླ་བའི་མིང་ཡང་མི་གྲགས་བཙལ་ཀྱང་མི་རྙེད་པཿ རྒྱལ་བ་འཕགས་པའི་རང་འོད་ལྡ་རུ་
འབར་བ ་ལསཿ ཉིན་དང་མཚན་གྱི་མིང་ཡང་མི་གྲགས་བཙལ་ཀྱང་མི་རྙེད་པཿ མཆོག་ལྡན་ཆོས་ཀྱི་རྒྱལ་སྲིད་རང་ཤར་རང་གྲོལ་སྐྱོང་བ་ལསཿ རྒྱལ་པོ་བློན་པོའི་མིང་ཡང་མི་གྲགས་བཙལ་ཀྱང་མི་རྙེད་པཿ བདག་དང་གཞན་གཉིས་ཐ་མི་དད་པར་གཅིག་པ་ལསཿ འཐབ་ཅིང་རྩོད་པའི་མིང་ཡང་མི་གྲགས་བཙལ་ཀྱང་མི་རྙེད་པཿ འཚོ་བ་ཏིང་འཛིན་ཟས་ཀྱི་འཚོ་བས་ཚིམ་པ་ལསཿ ཟས་ཞེས་བྱ་བའི་མིང་ཡང་མི་གྲགས་བཙལ་ཀྱང་མི་རྙེད་པཿ སྐོམ་དུ་ཡིད་བཞིན་བདུད་རྩིའི་ཆུ་རྒྱུན་འཐུང་བ་ལསཿ སྐོམ་ཞེས་བྱ་བའི་མིང་ཡང་མི་གྲགས་བཙལ་ཀྱང་མི་རྙེད་པཿ གོས་སུ་ཚུལ་ཁྲིམས་གཙང་མའི་གོས་བཟང་གྱོན་པ་ལསཿ གོས་ཞེས་བྱ་བའི་མིང་ཡང་མི་གྲགས་བཙལ་ཀྱང་མི་རྙེད་པཿ སྐྱེ་བ་པདྨའི་སྟེང་དུ་རྫུས་ཏེ་སྐྱེ་བ་ལསཿ སྐྱེ་བ་གཞན་གྱི་མིང་ཡང་མི་གྲགས་བཙལ་ཀྱང་མི་རྙེད་པཿ ཟག་མེད་རྡོ་རྗེ་ལྟ་བུའི་ཚོ་ལ་མངའ་བརྙེས་པསཿ རྒས་ཤིང་རྒུད་པའི་མིང་ཡང་མི་གྲགས་བཙལ་ཀྱང་མི་རྙེད་པཿ སྐྱེ་ཤི་མེད་པའི་ས་ལ་ཡོངས་རྫོགས་འཇོག་པ་ལསཿ སྐྱེ་ཞིང་འཆི་བའི་མིང་ཡང་མི་གྲགས་བཙལ་ཀྱང་མི་རྙེད་པཿ དུས་གསུམ་སངས་རྒྱས་ཀུན་གྱི་ཞིང་མཆོག་དེ་ན་ནིཿ མ་ལུས་ཐམས་ཅད་བྱང་ཆུབ་ལ་སྤྱོད་སྐྱིད་པ་ལཿ མི་བདེ་སྡུག་བསྔལ་མིང་ཡང་མི་གྲགས་བཙལ་ཀྱང་མི་རྙེད་པཿ བདེ་ཅན་བྱང་ཆུབ་རྫོགས་སངས་རྒྱས་ཀྱི་ཞིང་དེ་ནཿ ངོ་བོ་རང་བཞིན་སྟོང་པ་ཉིད་ཀྱི་གཞལ་ཡས་ཁང་ཿ ངོས་གཏིང་ཟབ་ལོག་བརྒྱ་དང་དཔངས་ནི་ཚད་མེད་པཿ ཕྱི་ནང་མེད་པ་ཆོས་དབྱིངས་མངོན་ཤེས་སྐར་ཁུང་གསལཿ མི་མཁྱེན་པ་དང་མི་གཟིགས་པ་ནི་གཅིག་ཀྱང་མེདཿ སྟེང་ན་ཐེག་པ་ཆེན་པོའི་ཆོས་ཀྱི་གདུགས་ཕུབ་པཿ འོག་ན་ཆགས་མེད་པདྨ་འོད་ལྡན་ཁྲི་བ་རྩིགས་པཿ དགའ་བཞི་ཡེ་ཤེས་ཚད་མེད་བཞི་ཡི་གདན་བརྩིགས་པཿ ཕྱོགས་བཞི་མཚམས་བརྒྱད་བྱང་ཆུབ་ཡན་ལག་འཕན་འཕྱར་བཿ ཆོས་རྣམས་ཕྱོགས་མེད་མཉམ་པ་ཉིད་ཀྱི་ངང་ལ་བྱསཿ རེ་དོགས་སྤང་བླང་གཉིས་སྣང་མེད་པའི་པདྨོ་བཀྲམཿ ཡེ་དག་དྲི་མཆོག་ཚུལ་ཁྲིམས་སྤོས་ཀྱི་དྲི་ངད་འཐུལཿ སུས་ཀྱང་མ་བྱས་ཡེ་ནས་རང་བྱུང་ལྷུན་གྱིས་གྲུབཿ ཏིང་འཛིན་མི་གཡོ་ཆོས་དབྱིངས་རྒྱ་མཚོ་དངས་པ་ལཿ རྣམ་ཤེས་མ་ཆགས་ཡེ་གྲུབ་པདྨོ་ཀུན་རྫོགས་འཁྲུངསཿ འགྲོ་བ་མ་ལུས་ཐུགས་རྗེས་སྙོམས་པའི་རྒྱན་གྱིས་བརྒྱནཿ ཕོ་བྲང་དེ་ན་སངས་རྒྱས་འོད་དཔག་མེད་པ་བཞུགསཿ སྟོབས་བཅུ་མི་འཇིགས་རྣམ་བཞི་སྐུ་ཡི་རྒྱན་རབ་མཛེསཿ སྐུ་ལུས་བཀོད་པ་མཚན་བཟང་ཇི་ལྟ་བས་མི་ངོམས་ཤིང་ཿ ཐོ་ཕྱི་ཐམས་ཅད་འོད་ཟེར་སྣ་ཚོགས་འཇའ་འོད་འཁྲིགསཿ ཐུགས་རྗེའི་འོད་ཟེར་དཀར་དམར་སྣ་ཚོགས་ཕྱོགས་བཅུར་འཕྲོཿ རྫོགས་པའི་སངས་རྒྱས་དཔལ་ལྡན་སྐྱེས་བུ་མཐུ་ལྡན་པཿ སྐུ་གསུང་ཐུགས་ཡོན་འཕྲིན་ལས་བལྟ་བས་ཆོག་མི་ཤེསཿ རྒྱལ་བ་རྒྱ་མཚོ་འཁོར་མང་དག་ནི་སྤྲིན་ལྟར་གཏིབསཿ མིག་ནི་མི་གཡོ་བདེ་ཆེན་དད་ལ་མཉམ་པར་བཞགཿ བརྩེ་བའི་ཐུགས་རྗེ་འོད་ཟེར་དུ་མ་ཕྱོགས་བཅུར་འཕྲོཿ འོད་ཟེར་རེ་རེའི་རྩེ་ལས་སངས་རྒྱས་སྤྲུལ་པ་འགྱེདཿ བསམ་གྱིས་མི་ཁྱབ་གྲངས་མེད་བརྗོད་དུ་མེད་པ་འཕྲོཿ གང་ལ་གང་འདུལ་དཔག་ཏུ་མེད་པས་འགྲོ་དོན་མཛདཿ ཞིང་ཁམས་དེ་ན་འཕགས་པ་མིན་པ་གཞན་མི་གནསཿ སྤྲུལ་པ་ཡང་སྤྲུལ་ཉིད་སྤྲུལ་ཐོར་བུ་བསམ་མི་ཁྱབཿ ཨུ་རྒྱན་གྷུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ནུབ་བདེ་བ་ཆེན་པོའི་ཞིང་ཁམས་བསྟན་པའི་ལེའུ་སྟེ་དང་པོའོཿ ཿཐཐཉརྒྱརྒྱཿ