འདོད་པའི་བསྟན་བཅོས་འཇིག་རྟེན་ཀུན་ཏུ་དགའ་བའི་གཏེར།

༄༅། ། འདོད་པའི་བསྟན་བཅོས་འཇིག་རྟེན་ཀུན་ཏུ་དགའ་བའི་གཏེར་ཞེས་བྱ་བ་བཞུགས་སོ། ། རྒྱ་གར་སྐད་དུ། ཀཱ་མ་ཤཱའ་སྟྲ་ལོ་ཀཱ་ནནྡ་སྱ་ནི་དྷི་ནཱ་མ། བོད་སྐད་དུ། འདོད་པའི་བསྟན་བཅོས་འཇིག་རྟེན་ཀུན་ཏུ་དགའ་བའི་གཏེར་ཞེས་བྱ་བ། གར་གྱི་དབང་ཕྱུག་ལ་ཕྱག་འཚལ་ལོ། ། སྟོང་ཆེན་ཕྱག་རྒྱའི་བཞིན་ལ་རྗེས་ཆགས་པ། ། བདེ་མཆོག་ཨུཏྤལ་གཞོན་ནུའི་ཟུར་མིག་ཅན། ། རྡོ་རྗེ་རྣོན་པོར་རབ་གྲགས་སྲིད་ཞིའི་དཔལ། ། འགུགས་པ་གང་དེས་ཁྱོད་ལ་སྲུང་གྱུར་ཅིག། འདོད་ན་འདོད་བདེ་དགའ་བའི་མཐར་ཐུག་ལོ། ། གང་དང་བྲལ་ན་ཀུན་དགའ་ཉིད་མིན་ཀྱེ། ། སྒྱུ་རྩལ་རྒྱ་མཚོས་མཛེས་སོ་མིག་ཡངས་མ། ། བདེ་བའི་མེ་ཆེན་སྦར་ལ་མཐུ་ལྡན་མཛོད། ། རྟེན་དང་ཉེར་བསྡོགས་བྱེད་པའི་འཁྲུལ་འཁོར་ནི། ། དགའ་བ་རྣམ་པར་འཕེལ་བའི་འབྱུང་གནས་ཏེ། ། འཇིག་རྟེན་གྲངས་སུ་གནས་པ་དེའི་དང་པོ། ། གྲོགས་མཆོག་ལྷ་ཡི་དགའ་ཚལ་ཡངས་པ་ཡིན། ། འདི་ལ་སོ་དྲུག་རིགས་དང་བཀྲ་ཤིས་གྲངས། ། ཆུ་གཏེར་དང་ལྡན་དབང་པོའི་རིམ་པ་ལས། ། བདེ་ཆེན་དགའ་བ་འཕེལ་སླད་རྣལ་འབྱོར་མ། ། ཡུལ་ན་གནས་པའི་མཚན་ཉིད་ཤེས་པར་བྱ། ། རྡོ་རྗེ་ལ་སོགས་རེ་ཁཱས་རྣམ་བཀྲ་ཞིང༌། ། ཁྱིམ་དུ་རི་མོ་འབྲི་ཞིང་བརྡ་ལ་མཁས། ། ཞི་སོགས་རིགས་མཚུངས་མཐོང་བས་བདེ་འཕེལ་མ། ། དམ་ལ་གནས་པ་དཔའ་བོས་བརྟགས་ཏེ་བླང༌། ། པད་འདྲ་པདྨའི་དྲི་ལྡན་གདོང་པ་སྣུམ། ། སྣ་རྩེ་ཏིལ་འདྲ་སེན་མོ་རབ་ཏུ་དམར། ། རྒྱབ་སྒུར་རྐང་མཐིལ་ཀུན་ནས་ས་ལ་རེག། བ་སྤུ་འཁྱིལ་ལྡན་ནུ་མ་ཏིལ་འབྲས་འདྲ། ། གསུས་གཉེར་གསུམ་ལྡན་བྲང་མཛེས་གླང་ཆེན་འགྲོས། ། འོ་མདངས་སྐྱུར་བའི་རོ་ལྡན་རྡུལ་འབབས་མ། ། དམར་བའི་མདངས་མངའ་ཡིད་འོང་གཟུགས་མཆོག་ཅན། ། ཀུན་ཏུ་གྲགས་ལྡན་པདྨ་ཅན་གྱི་རིགས། ། བ་ཚྭའི་དྲི་ལྡན་སྐྲ་དང་སྣ་རིང་ཞིང༌། ། འོ་ཞོ་ལ་དགའ་དཀར་འཛིན་ཀུན་ནས་རྒྱས། ། དཀར་སེར་མདོག་ལྡན་ཡིད་འོང་ངང་པའི་འགྲོས། ། བློ་གྲོས་རབ་གསལ་རཀྟ་མངར་བག་ཅན། ། རྡེབ་བཞིན་སྦྱོར་བ་འདོད་པའི་བུ་མོ་ནི། ། དུང་དང་མཚུངས་པར་གྱུར་གང་དུང་ཅན་མ། ། ཤ་རློན་དྲི་ལྡན་ལུས་ཆུང་བརླ་མཛེས་ཤིང༌། ། ངོ་ཚ་ཆུང་ཞིང་ཁྲོ་སྐྱེན་འཐབ་ལ་དགའ། ། བྱ་རོག་རྐང་པ་འདྲ་བའི་རྗེ་ངར་ཅན། ། མཆུ་འཕྱང་གན་རྐྱལ་ཉལ་ཞིང་ཕུག་རོན་སྐད། ། སྔོ་བསང་མདོག་ལྡན་རཀྟ་ཚ་བའི་རོ། ། གནག་པའི་སྐྲ་ལྡན་རི་མོ་ཅན་ཞེས་བྱ། ། ཆང་གི་དྲི་འབྱུང་ལུས་དང་བྱིན་པ་སྦོམ། ། ཅུང་ཟད་ཡོ་བའི་སྣ་ལྡན་མདོག་སྨུག་ཅིང༌། ། སྤྱོད་པ་རྩིངས་ལ་དྲི་ང་རྡུལ་སྐྱེན་མ། ། ནུ་མ་གཡས་དང་གཡོན་དུ་དགྱེ་བའི་ཉམས། ། ཚོ་བརྗིད་གཟི་ལྡན་ཅུང་ཟད་མཆེ་བ་ཅན། ། བསྐའམ་བསྔལ་བའི་རོ་ལྡན་རྡུལ་འབབས་མ། ། གླང་ཆེན་དང་འདྲ་གླང་པོ་ཅན་ཞེས་བྱ། ། དེ་དག་རྣམས་ཀྱང་རབ་འབྲིང་ཐ་མ་སྟེ། ། འདྲེས་པར་གྱུར་གང་སྣ་ཚོགས་གཟུགས་ཅན་མ། ། གང་ཡང་ལུས་དང་སྤྱོད་ལམ་ཡིད་དུ་འོང༌། ། མཐོང་བས་དགའ་སྐྱེད་འགྲོགས་ན་བདེ་སྟེར་ཞིང༌། ། ལྟ་བས་སུན་པ་མེད་ལ་སྦྱར་བར་བྱ། ། རེག་པས་མངོན་དགའ་ལུས་ཀྱི་བདེ་བའི་གནས། ། གྱོ་མོའི་སྦུབས་འདྲ་རྩུབ་རིང་མི་སྡུག་གཟུགས། ། རྟག་ཏུ་སྐམ་མམ་ཧ་ཅང་གཤེར་བག་འཇག། བདེ་བའི་འོས་མིན་ཆེའམ་ཆུང་བ་དང༌། ། དྲོད་བྲལ་ལྷོད་པོར་གྱུར་པ་སྤང་བར་བྱ། ། ཟེའུ་འབྲུ་དང་བཅས་སྟེང་དུ་འབུར་བའི་དབྱིབས། ། རུ་སྦལ་རྒྱབ་འདྲ་མཐུག་མཁྲང་ཡིད་དུ་འོང༌། ། འཇམ་ལ་སྤུ་ཉུང་ཕྱི་ན་ཁྱོན་ཡངས་ཀྱང༌། ། ནང་གི་བུ་ག་བད་སྙིང་བཞིན་དུ་ཟླུམ། ། དུས་སུ་ཆགས་པའི་ཟིལ་འབྱུང་མྱུར་དུ་སྐམ། ། དྲོད་བཅས་བུ་ག་རན་རྣམས་བདེ་བ་སྟེར། ། ནོར་བུ་གཞིབས་པར་ནུས་པ་མཆོག་ཏུ་བསྔགས། ། གང་ཡང་གཟུགས་དང་ན་ཚོད་མཆོག་གྱུར་ཅིང༌། ། ཕན་ཚུན་དགའ་ཞིང་ཆགས་པའི་ཡིད་ལྡན་ན། ། འདོད་པའི་སྒྱུ་རྩལ་འཕེལ་བའི་གཞིར་འགྱུར་ཏེ། ། དགའ་བའི་དུས་སྟོན་ཆར་གྱིས་རྒྱ་མཚོ་བཞིན། ། བདེ་བའི་རྟེན་དུ་གྱུར་པ་དེ་དག་ཀྱང༌། ། མཐོང་ན་དགའ་འཛུམ་ངག་སྙན་དྲུང་དུ་འདུ། ། ཕག་ནས་ལྟ་འཁྲི་དབྱངས་ལེན་གོ་བར་བྱེད། ། དྲུང་དུ་གླལ་ཞིང་མི་བཟོད་སོར་མོ་དང༌། ། ལུས་ཉེང་སྐྲ་འགྲོལ་གོས་བཅོས་ནུ་མ་སྟོན། ། བུས་པར་འོ་བྱེད་རྐང་པས་ས་རིས་འདྲི། ། དགོད་ཅིང་ལུ་ལ་སྐ་རགས་འགྲོལ་བ་དང༌། ། རྨྱང་བྱེད་ཟུར་མིག་དང་བཅས་སྒེག་ཆོས་སོགས། ། བུད་མེད་སྒྱུ་ཡི་དངོས་པོ་གང་ཡིན་པ། ། གང་གིས་སྟོན་པ་ཐབས་ཀྱིས་དྲང་བར་ནུས། ། མདོར་ན་མཐོང་བས་རང་ཉམས་བདེ་སྟེར་ཞིང༌། ། འགྲོགས་པས་རྩ་རླུང་སེམས་ལ་བག་ཕེབས་པ། ། ཨུཏྤལ་དྲི་ལྡན་པདྨ་གཞོན་ནུའི་བཞིན། ། ངང་པའི་གདངས་ལྡན་དམ་ཚིག་ཆེད་འཛིན་མ། ། སྔགས་ཀྱི་བདག་པོས་དངོས་གྲུབ་ཡན་ལག་ཏུ། ། རྫས་སྔགས་དམིགས་པའི་ལྕགས་ཀྱུས་དགུག་པར་འོས། ། བཙས་ནས་ལྔ་ལམ་གྱུར་བ་བྱིས་པའི་ལྕེ། ། གི་ཝཾ་ཀ་ར་རྨ་བྱའི་མདོངས་དང་ནི། ། རང་ཁྲག་དང་བཅས་དཔྲལ་བར་བྱུགས་པས་འགུགས། ། ཡང་ན་མི་ཁྱིའི་ལག་ངར་མཆོག་གཡས་གཡོན། ། མེར་བསྲེགས་ཐལ་བ་གོ་བོའི་བྲུན་དང་ནི། ། བྱང་བལྟའི་ཕུག་སྐྱེས་རྩ་རྩེ་ལྷོར་བསྟན་རྣམས། ། ཞིབ་བཏགས་རང་གི་མི་བསྐྱོད་དང་བཅས་པ། ། དཔྲལ་བར་ཐིག་ལེ་གསུམ་བྱས་གང་ལ་བལྟས། ། འདིར་ཤོག་སྨྲས་གང་དེ་མ་ཐག་ཏུ་འདུན། ། སྔགས་ཀྱིས་དགུག་པ་གསང་བའི་ཡི་གེ་ནི། ། མན་ངག་བཞིན་དུ་བཟླས་པས་འདོད་བཞིན་བྱེད། ། ཏིང་འཛིན་ལོངས་སྤྱོད་འཁོར་ལོར་ཨཱཿདམར་པོའི། ། བདེ་ཆེན་ཆགས་པའི་རང་མདངས་འོད་དམར་གྱིས། ། བཞུས་ནས་བདག་དང་རོ་མཉམ་བདེ་བའི་ངང༌། ། གསུང་གི་ཡི་གེ་དབྱངས་སུ་བརྗོད་པས་འགྲུབ། ། གཉིས་པ་ཡིད་དུ་འོང་བའི་ས་ཕྱོགས་སུ། ། བཅུད་དང་ལྡན་པའི་ཟས་དང་སྐོམ་བསྟེན་ལ། ། བག་ཕེབས་བདེ་བའི་གནས་སུ་ཡོ་བྱད་བཅས། ། དགའ་བའི་དུས་ལྡན་སྒྱུ་རྩལ་དབང་ཕྱུག་དེས། ། འདོད་པའི་ཉེར་བསྡོགས་རྒྱལ་སྲིད་གྲངས་ལྡན་བྱ། ། པདྨོ་རྣམ་པར་རྒྱས་པའི་སྤྱན་བཟང་གིས། ། ཆགས་ལ་ཉེར་བསྐུལ་ཡིད་འོང་ཟུར་གྱི་མིག། སྣ་ཚོགས་བླན་ཏེ་ལྟ་བའི་རོ་མྱོང་བས། ། དགའ་བའི་འཁྲི་ཤིང་སྤེལ་བ་དང་པོ་ཡིན། ། འདོད་པའི་འདུན་པ་རབ་ཏུ་གསལ་བྱེད་པ། ། དབྱངས་དང་དོན་གྱི་རྣམ་པ་མི་མཉམ་པས། ། སྣ་ཚོགས་གྱུར་པ་དགོད་པ་སོགས་ཅ་ཅོའི་ངག་གི་སྒྲས། ། བདེ་བའི་ཆུ་གཏེར་འཕེལ་དེ་གཉིས་པ་ཡིན། ། བཅུད་ཀྱིས་རྒྱས་པར་བྱས་པའི་ཡིད་འོང་ལུས། ། དག་པར་ཁྲུས་བྱས་གུ་རྒུམ་ཙནྡ་དང༌། ། ག་བུར་ལ་སོགས་དྲི་བསུང་ལྡན་པ་ཡིས། ། བྱུགས་བས་དགའ་སྟོན་རྣམ་འཕེལ་གསུམ་པའོ། ། ཡོལ་བས་བར་དུ་བཅད་བྱས་གྲོགས་མཆོག་གི ། རྒྱན་དང་གླུ་གར་སོགས་ཀྱི་སྒྲ་དེ་དག། བདག་གིར་བྱས་པས་སྙིང་ལ་འདོད་པའི་མེ། ། དྲག་ཏུ་སྦར་བར་བྱས་གང་བཞི་བ་ཉིད། ། ཡིད་དུ་འོང་བའི་གཟུགས་དང་བསུང་ཞིམ་དྲི། ། སྙན་པའི་གླུ་སོགས་དེ་ཡི་འདོད་ཡོན་ལྔ། ། མདུན་ན་བསྟར་བྱས་དེ་ལ་ཡིད་ཞུགས་པས། ། རྩེ་གཅིག་དགའ་བར་བྱེད་པ་ལྔ་པ་ཡིན། ། རྩེད་འཇོ་དང་ནི་དགའ་མགུར་སྤྱོད་ལ་སོགས། ། སྔོན་ཚེ་རང་ཉམས་བསྟར་པའི་རི་བོང་གཟུགས། ། དྲན་པའི་ཟླ་ཤེལ་ངོས་ལ་གསལ་བཀོད་པས། ། ཀུན་དགའི་རོ་དང་ལྡན་པ་དྲུག་པ་ཡིན། ། ཕན་ཚུན་འདོད་ལ་འདུན་པས་ཉེར་བསྐུལ་བས། ། རེག་བྱའི་དགའ་སྟོན་ཉམས་སུ་བསྟར་བ་ལ། ། ཉེ་བར་ཕྱོགས་པའི་འདུ་ལག་བཅང་སོགས་འགོད་སྣ་ཚོགས་པ། ། ཉམས་སུ་མྱོང་བ་དེ་དག་བདུན་པའོ། ། ཡིད་འོང་ཡུལ་གཅིག་གིས་ཀྱང་ཚིམ་བྱེད་ན། ། ལྔ་ཆར་ཚང་བའི་སྨིན་ལེགས་སྨོས་ཅི་འཚལ། ། ལང་ཚོའི་དུས་ལྡན་རང་དབང་གྱུར་པའི་གྲོགས། ། ཡུལ་གྱིས་ཡིད་ལ་གནོད་པ་ཆུང་ངུའང་མེད། ། རོ་ཙའི་སྦྱོར་བ་ཉེ་བར་ལྡན་གྱུར་པས། ། འདོད་པའི་དགའ་བ་ཡོངས་སུ་རྫོགས་པར་བྱེད། ། མ་མྱོངས་སྦྲང་རྩི་མིད་པས་དགའ་སྐྱེད་མིན། ། སྒྱུ་རྩལ་བྲལ་ལ་མཆོག་གི་བདེ་བ་མེད། ། དེ་ཕྱིར་བརྒྱད་ལས་བརྒྱད་དུ་ཕྱེ་བ་ཡི། ། དྲུག་ཅུ་རྩ་བཞིར་དྲང་སྲོང་གིས་བཤད་པའི། ། སྒྱུ་རྩལ་ཆོ་ག་མཁས་པར་མ་བྱས་པར། ། འཁྲིག་པར་བྱེད་པ་ཕྱུགས་ཀྱི་ངང་ཚུལ་ཡིན། ། གསུམ་པ་སྦྱོར་བའི་སྒྱུ་རྩལ་དང༌། ། བདེ་བའི་ཡན་ལག་ཕུན་ཚོགས་ལྡན། ། བྱེད་བཅིང་པ་ཡི་བདེ་མྱོང་བ། ། ཡོན་ཏན་གྲངས་ཀྱིས་རྣམ་པར་བཤད། ། འཁྱུད་དང་འོ་བྱེད་སེན་མོས་རྩེན། ། སོ་འདེབས་འཇུག་དང་སིད་སྒྲ་འབྱིན། ། ཉེད་དང་སྐྱེས་པ་ལྟར་བྱེད་པ། ། བརྒྱད་པོ་འདི་དག་རྩ་བ་ཡིན། ། དང་པོ་ལ་ཡང་རྣམ་པ་བརྒྱད། ། གདོང་བལྟ་དགའ་བའི་སེམས་བཅས་སུ། ། འགྲོ་ན་དོག་པོའི་ཟོལ་གྱིས་ནི། ། ལུས་ཀྱི་ཆ་ཙམ་འཕྲད་བྱེད་པ། ། རེག་པ་ཅན་ཞེས་བྱ་བར་བརྗོད། ། གང་དུ་འདུག་ལ་ནུ་མས་རེག། དེས་ཀྱང་དེ་བཟུང་འབིགས་པ་ཅན། ། མཐུན་བའི་གཏམ་བཅས་ཡུད་ཙམ་དུ། ། ལུས་དྲུད་ཉེ་བར་འདར་བ་ཅན། ། རྩིག་སོགས་ལ་བརྟེན་འཁྱུད་ཅིང་འཚིར། ། སོས་འདེབས་གཟིར་བ་ཅན་ཞེས་བྱ། ། ལག་པས་མགོ་བོ་བཀུག་ནས་འཁྱུད། ། སིད་བཅས་འོ་བྱེད་འཁྲི་ཤིང་ཞོན། ། ལངས་ལ་རྐང་པས་རྐང་བོལ་བརྫིས། ། རྐང་པ་ཡ་གཅིག་འཁྱུད་ནས་སུ། ། ལག་པས་མགོ་བཀུག་འོ་བྱེད་པ། ། ཤིང་ཐོག་ལེན་ཞེས་འདྲ་བའི་མིང༌། ། ཐང་པ་ཉལ་ནས་ཕན་ཚུན་གྱི། ། ལྟོ་དང་བརླ་སོགས་ལེགས་སྦྱར་ཏེ། ། ལག་པ་རྒྱབ་འཁྱུད་འོ་བྱ་བ། ། ཏིལ་འབྲས་ལྟ་བུའི་འཁྱུད་པར་བཤད། ། གཅིག་གི་འདོམས་སུ་གཅིག་ཞུགས་ཏེ། ། ཀུན་འཁྱུད་ཆགས་མྱོས་ཁྲི་འོ་ཆུ་ལྟར་འདྲེས་པའང་ཟེར་ར་ཛ། ། དེ་དག་འཁྱུད་པའམ་རོལ་བ་ཡིན། ། གཉིས་པ་འོ་བྱེད་བརྒྱད་པོ་ནི། ། གནས་ཀྱི་དབང་གིས་བྱེ་བ་སྟེ། ། ཁ་དང་མགྲིན་པ་ནུ་མ་དང༌། ། མཆན་ཁུང་རྐེད་པ་རྒྱབ་ཁུང་དང༌། ། སྣ་དང་མཁུར་ཚོས་པདྨར་བཅས། ། ཁ་ཡིས་འོ་བྱ་ཆགས་པའི་སྒྲ། ། འབྱིན་པ་ཝརྟི་ཀ་ཡིས་བཞིན། ། ཀུན་ཏུ་ཆགས་པ་སྤེལ་བའོ། ། སེན་མོ་འདེབས་པའི་ཚུལ་བརྒྱད་ནི། ། བ་སྤུ་ལྡང་ཕྱིར་གཞོན་ནུ་མར། ། རྣ་དྲུང་ནུ་མ་མཆུ་སོགས་སུ། ། ཟོར་ཡང་སོར་མོས་འབྲས་ཀྱི་ནི། ། གཟེགས་མའི་རྗེས་ཙམ་མངོན་བྱེད་པ། ། དྲལ་བ་ཞེས་སུ་བྱ་བར་བརྗོད། ། མགྲིན་པ་ནུ་མ་རྒྱབ་སོགས་སུ། ། རི་མོ་ཡོན་པོར་བྲི་བ་ནི། ། ཟླ་ཕྱེད་ཅེས་བྱ་གཡའ་ལྡངས་ཞིང༌། ། དྲེགས་བྲལ་སེམས་ནི་གཡོ་བར་བྱེད། ། དེ་འདྲ་ཐ་དཀར་དྲང་པོར་བྲིས། ། དཀྱིལ་འཁོར་ཞེས་སུ་མངོན་པར་བརྗོད། ། ལྟེ་བའི་རྩ་བ་དཔྱི་ཡི་སྟེང༌། ། ཚང་ར་ལ་སོགས་གནས་དག་ཏུ། ། ཀུན་ཏུ་རིང་བའི་རེ་ཁཱ་བཀོད། ། རི་མོ་རིང་པོ་ཞེས་བྱའོ། ། དེ་ཉིད་ཡོན་པོར་བྲིས་པ་ན། ། སྟག་གི་སེན་རྗེས་ཅེས་སུ་འདོད། ། ནུ་མ་རྒྱབ་དང་ཀོས་ཀོའི་འོག། རྒྱ་གྲམ་ལྟ་བུའི་རྗེས་མངོན་པར། ། གང་བྲིས་རྨ་བྱའི་རྐང་རྗེས་ཞེས། ། བརྡ་ཤེས་དྲང་སྲོང་རྣམས་ཀྱིས་བརྗོད། ། ཚུལ་དེས་ནུ་མ་ལ་སོགས་སུ། ། སེན་མོ་ལྔ་ཡི་རི་མོ་ནི། ། ཤ་ཡིག་གཉིས་པའིརྗེས་ལྟ་བུར། ། མངོན་བྱས་རི་བོང་འཕྱོང་བར་བརྗོད། ། དགའ་བའི་རོ་ནི་བསྐུལ་བའི་ཕྱིར། ། ནུ་མ་རྒྱབ་དང་རྐེད་པར་ཡང༌། ། ཨུཏྤལ་འདབ་འདྲའི་གཟུགས་བྲིས་པ། ། ཨུཏྤལ་འདབ་མ་ཞེས་སུ་བཤད། ། གང་ཕྱིར་སོ་དང་སེན་མོས་རྣམ་བཏབ་པ། ། མྱོས་བྱེད་ལྕགས་ཀྱུའི་རྣམ་པ་མི་ལྡན་ཡང༌། ། གང་ལ་བཏབ་པའི་ཡིད་དབང་མྱོས་བྱེད་ཅིང༌། ། མཐོང་བ་ཙམ་གྱིས་ཆགས་ལྡན་མིག་ནས་འགུགས། ། དགའ་བའི་ཆུ་གཏེར་དག་ཀྱང་རྒྱས་བྱེད་ལ། ། ལུས་ཀྱི་བ་སྤུའི་འཁྲི་ཤིང་གཡོ་བར་བྱེད། ། དེ་ཕྱིར་ཐོག་མར་ཕྲད་དང་མགྲོན་ཕྱིན་དང༌། ། དགའ་བ་གཡོ་བའི་དུས་སུ་སྦྱར་བར་བྱ། ། བཞི་པ་སོ་ཡིས་གདབ་ལ་བརྒྱད། ། ཆགས་པས་ཤིན་ཏུ་དམར་བར་ནི། ། འདེབས་པར་མུ་ཁ་ཅན་ཞེས་ཀྱང་བྱ། ལ་ཀཾ་ཞེས་བྱ། ། དེ་ལས་མཆུ་དབུས་སོ་ཡི་རྗེས། ། དོད་ཙམ་ཅུང་ཟད་བཙིར་བར་ནི། ། འདེབས་པ་ཀྱི་ཤུས་སྐྲངས་པ་ཞེས། ། བྱ་བར་ཡོངས་སུ་བརྗོད་པ་ཡིན། ། མཆུ་དང་སོ་གཉིས་ཁ་སྦྱར་ནས། ། འགྲམ་ངོས་འདེབས་པ་མཆུ་སོ་ཞེས། ། བྱ་སྟེ་བྱེ་རུའི་ནོར་བུར་ཡང༌། ། འབོད་པ་སྒྲ་སྒྱུར་འགའ་ལ་གྲགས། ། ཕྱོགས་དེར་སོ་ཕྲེང་གཉིས་ཀྱིས་ནི། ། མངོན་ཙམ་འདེབས་པ་སོ་ཕྲེང་ཡིན། ། ཁ་ཅིག་མ་ཎི་མཱ་ལ་ཞེས། ། ནོར་བུའི་ཕྲེང་བ་ཉིད་དུ་འབོད། ། མཆེ་བ་གཉིས་ཀྱི་རྗེས་ཙམ་ནི། ། གསལ་བར་འདེབས་པ་ཐིག་ལེ་ཅན། ། རྐེད་པ་ན་མཚོང་མགྲིན་སོགས་དང༌། ། དཔྲལ་བར་སོ་རྣམས་ཀུན་གྱི་རྗེས། ། མངོན་ཙམ་འདེབས་པར་བྱེད་པ་ནི། ། ཐིག་ལེའི་ཕྲེང་བ་ཞེས་བྱའོ། ། ནུ་མ་དང་ནི་རྒྱབ་དག་ཏུ། ། སྤྲིན་གྱི་དཀྱིལ་འཁོར་དབྱིབས་ལྟ་བུར། ། མ་ངེས་འཆོལ་བར་སོས་བཏབ་པ། ། སྤྲིན་གྱི་དུམ་བུ་ཞེས་སུ་བརྗོད། ། མཆན་ཁུང་སེན་མོས་བཏབ་རྗེས་སུ། ། སོ་ཡིས་ཡུན་རིང་འདེབས་བྱེད་དོ། ། ཕག་གིས་རྨུགས་པ་ཞེས་བྱ་སྟེ། ། མཆིལ་པ་བོང་བུ་བཞིན་ཆགས་པའོ། ། སོ་སེན་གདབ་པའི་གནས་དག་ཀྱང༌། ། རྣ་དྲུང་མགུལ་པ་མཆན་ཁུང་དང༌། ། ནུ་མ་རྒྱབ་དང་གསང་བ་དང༌། ། སྐེད་པ་བརླ་དང་བཅས་པ་སྟེ། ། གཡའ་ཟའི་གནས་སུ་ངེས་པར་སྦྱར། ། མདོར་ན་མིག་གཉིས་ཡ་མཆུ་དག། མ་གཏོགས་གར་འདོད་གནས་སུ་གདབ། ། འདོད་པའི་འཁོར་ལོར་ཞུགས་པ་ལ། ། གནས་ལ་ངེས་པ་ཡོད་མ་ཡིན། ། ཡང་དག་འཇུག་པ་བརྒྱད་པོ་ནི། ། མཁའ་གསང་རབ་ཏུ་སྦྱར་བ་སྟེ། ། ཆགས་པ་སྲ་བ་བསྐུལ་ཕྱིར་དང༌། ། མི་བཟོད་བདེ་བ་འཕེལ་ཕྱིར་བྱ། ། ལྟོ་སྦྱར་རྡོ་རྗེ་ཡོན་པོར་བཅུག། གསེག་སྟེ་དྲུད་པ་ཉེ་རོག་ཅན། ། ལག་པས་རྟགས་ཀྱི་རྩ་བར་བཟུང༌། ། ཕྱོགས་ཀུན་བསྐོར་བ་སྲུབ་པར་འདོད། ། བུ་མོ་རྐང་བརྐྱང་གན་རྐྱལ་ལ། ། སྐྱེས་པས་ཕུར་ཐབས་གཟུགས་པ་ནི། ། ཧུ་ལ་ཞེས་སུ་བྱ་བ་སྟེ། ། འཇུག་པ་དག་ཏུ་ཉེ་བར་བརྗོད། ། དེ་ནས་དགའ་བཅས་བསྐྱོད་བྱས་བ། ། ཆེར་སྲུབ་བ་ཞེས་བྱ་བར་འདོད། ། ལིངྒ་བཅུག་ནས་ཡུན་རིང་དུ། ། བསྡམས་ཏེ་གནས་པ་གཟིར་ལྡེམ་ཡིན། ། ལིངྒ་རིང་དུ་ཕྱིར་ཕྱུང་ནས། ། སླར་ཡང་དྲག་ཏུ་འཇུག་ཅིང་རྡེབ། ། རབ་ཏུ་སྣུན་པར་བྱེད་པས་ན། ། ནིར་ཁ་རབ་བསྣུན་ཏ་ཞེས་བྱ་བར་བརྗོད། ། ལན་གཅིག་བཅུག་ནས་དེ་མ་ཐག། གསུམ་མམ་བཞིར་བརྡབ་སླར་ཡང་ནི། ། གསུམ་མམ་ལན་བཞིར་འབྱིན་འཇུག་བྱེད། ། མཆིལ་པ་ལྟར་བྱེད་དེའི་ཡན་ལག། ཕན་ཚུན་གཉིས་ཀས་རྡེབ་པ་ནི། ། རྡེབ་ཅིང་བསྣུན་པ་ཞེས་བྱའོ། ། གྱེན་དུ་འགྲེང་ཞིང་དལ་བུས་གཞུག། རྡེབ་པར་བྱེད་པ་ཕག་ལྟར་བསྣུན། ། སིད་ཀྱི་སྒྲ་འབྱིན་རྣམ་པ་བརྒྱད། ། ངུ་དང་འཁུན་བྱེད་གདུང་བྱེད་དང༌། ། དབྱངས་ཅན་དང་ནི་ཨ་ཝརྟ། ། ཝ་རྞ་ཨ་རྡ་གྲོལ་བ་ཆུང༌། ། ཨ་ལམ་ཨརྦ་ཞེས་བྱ་བ། ། རིམ་བཞིན་ཕུག་རོན་ཁུ་བྱུག་དང༌། ། ཧ་རི་ཏ་དང་སོ་བྱ་དང༌། ། བུང་བ་ངང་སྐྱ་ཐི་བ་དང༌། ། ལ་བ་ཀ་ཡི་སྐད་དང་སྦྱར། ། དེ་ཡང་ཁོང་ན་གནས་པ་དང༌། ། ངག་ཏུ་གསལ་པོར་དབྱུང་བ་ཡི། ། ཆགས་པ་ཅན་གྱི་དབྱངས་ལ་ནི། ། ངེས་མེད་ཅི་དགར་བརྗོད་པར་བྱ། ། རྩ་གནས་བདེ་བའི་རང་མདངས་སྒྲ། ། ཧ་སིད་ཨ་ཧཾ་ཧྲིཾ་ཧ་སོགས། ། མ་བཅོས་ངག་གི་རོལ་མོ་ནི། ། ཇི་ལྟར་འབྱུང་བ་འགོག་མེད་བརྗོད། ། རྣམ་འགྱུར་སྣ་ཚོགས་ཀྱང་དེ་འདྲ། ། སྐྱེས་བུས་བསྣུན་དང་སིད་སྒྲ་སོགས། ། གང་བྱས་ལན་དུ་བུ་མོ་ནི། ། ཆགས་ལྡན་བསྟན་བཅོས་བྱང་བ་ཡིས། ། སླར་ཡང་བསྣུན་སོགས་སྒྱུ་རྩལ་ལན། ། མིག་འཕྲུལ་ལྟ་བུར་སྦྱར་བར་བྱ། ། འོ་བྱ་བ་ཡི་གནས་བརྒྱད་ཀྱི། ། དབྱེ་བས་ཉེད་པའང་རྣམ་པ་བརྒྱད། ། ཁུ་ཚུལ་ཐལ་མོ་གྲུ་མོ་དང༌། ། སྟ་ཟུར་མཁུར་བ་ལ་སོགས་པས། ། ཉེད་ཅིང་སིད་ཀྱི་སྒྲ་བཅས་པར། ། ཆགས་པའི་བདེ་བ་བསྐུལ་བར་བྱ། ། གྲང་བའི་དབུགས་དང་བཅས་ནས་སུ། ། ཤིན་ཏུ་འཚིར་ཞིང་ཉེད་པ་ནི། ། ཡུན་རིང་བདེ་བའི་གནས་སུ་བྱ། ། བདེ་བ་མཆོག་ཏུ་སྤེལ་བྱེད་པའོ། ། གལ་ཏེ་སྐྱེས་བུ་ངལ་བའམ། ། ཡང་ན་ཆགས་འཕེལ་ཕྱིར་ཡང་ནི། ། ཆགས་ལྡན་བུད་མེད་རྣམས་ཀྱིས་ནི། ། སྐྱེས་བུའི་བྱ་བ་བྱེད་པ་ལ། ། སྐྱེས་པ་ལྟར་བྱེད་ཅེས་བྱ་སྟེ། ། དེ་ཡང་རྣམ་པ་བརྒྱད་དུ་བརྗོད། ། སྐྱེས་པ་འདུག་ནས་བུད་མེད་ཀྱིས། ། བསྐྱོད་པ་ལ་ནི་དྲུད་པར་བརྗོད། ། ཡུན་རིང་སྡུད་ཅིང་འཚིར་བ་ནི། ། འཚིར་བ་ཞེས་སུ་མངོན་པར་བརྗོད། ། འཁྲུལ་འཁོར་དང་བཅས་འཁོར་ལོལྟར། ། བསྐོར་བ་ལ་ནི་བསྐོར་བར་འདོད། ། བརླ་དང་བྱིན་པ་ཕན་ཚུན་བསྣོལ། ། ཀུན་ཏུ་བསྐོར་བ་བརླ་དང་ནི། ། བྱིན་པས་བསྐོར་བ་ཞེས་བྱའོ། ། དེ་ཚེ་སྐྱེས་བུ་ངལ་གྱུར་ན། ། ངལ་གསོའི་ཆེད་དུ་དལ་འདུག་ནས། ། སླར་ཡང་འཇུག་པར་བྱེད་པ་ནི། ། ངལ་གསོ་ཅན་ཞེས་བྱ་བར་བཤད། ། སྐྱེས་བུའི་སྟེང་ནས་མར་སྤྱོད་པ། ། ཁྱུང་ལྡིང་དག་ཏུ་མངོན་པར་བརྗོད། ། རྐང་ལག་བརྐྱངས་ནས་བྱེད་པ་ནི། ། ཤིན་ཏུ་བརྐྱང་བ་ཞེས་པར་འདོད། ། པང་དུ་རྒྱབ་ནས་སྤྱོད་བྱེད་པ། ། གྲོང་གི་བྱ་བ་ཞེས་བྱའོ། ། དེ་ལྟར་སྒྱུ་རྩལ་དྲུག་ཅུ་བཞིས། ། མཚོན་ནས་འདོད་པའི་རྣམ་འགྱུར་མཐའ། ། སྣ་ཚོགས་ཇི་ལྟར་འདོད་པ་ཡིས། ། འདོད་པའི་དགའ་བ་སྤེལ་བར་བྱ། ། གཞན་ཡང་འདི་ལྟར་ལུང་ལས་བཤད་པ་ཡི། ། བསམ་པས་འགྱུར་བའི་ལྟ་སྟངས་སོ་དྲུག་དང༌། ། བྱེད་པའི་རྣམ་པ་བརྒྱ་དང་བརྒྱད་ཉིད་དེ། ། ལུས་བསྒྱུར་སོ་གཉིས་དབྱུང་བ་བཞི་ལ་སོགས། ། རྣམ་པའི་དབྱེ་བ་གྲངས་མེད་གནས་པ་ལ། ། ཇི་ལྟར་རིགས་པར་མཁས་ཤིང་གོམས་པར་བྱ། ། གཉིས་པ་ཕུན་ཚོགས་བདེ་བའི་ཐབས་བསྒྲུབ་པ། ། དང་པོར་དོགས་མེད་ཤིན་ཏུ་བག་ཕེབས་གནས། ། མེ་ཏོག་འཁྲི་ཤིང་རྒྱས་པའི་སྐྱེད་མོས་ཚལ། ། ནེའུ་གསེང་འབབ་ཆུ་དྲི་ཞིམ་པ་ཡི་གཞིར། ། གློག་བཅས་འབྲུག་སྒྲ་གཡོ་བའི་སྤྲིན་ཕྲེང་གིས། ། བླ་རེ་མངོན་མཛེས་དགའ་བའི་ས་ཕྱོགས་སུ། ། རྣམ་མང་བཀོད་པས་མཛེས་ལྡན་ཁང་པར་ནི། ། ཁྲུས་བྱས་བདེ་བའི་སྟན་ལ་འདུག་ནས་སུ། ། གླ་རྩི་ག་བུར་ཙནྡ་ན་གུར་གུམ་སོགས། ། དྲི་ཞིམ་སྨན་གྱིས་ལུས་བྱུགས་མཁུར་བཀང་ལ། ། གོས་བཟང་རྒྱན་གྱིས་སྤྲས་བཅས་གླུ་དབྱངས་སོགས། ། བདེ་བ་སྤེལ་བའི་ཐབས་ལ་བརྟེན་པར་བྱ། ། རྒྱུ་སྐར་སྨིན་དྲུག་མགོ་དང་ཝ་དང་ནི། ། རྟ་ཆུང་བྲེ་དང་ཕུལ་གྱི་དུས་དག་དང༌། ། ཁྱད་པར་ཉི་ཟླ་འཕོ་བའི་དུས་མཚམས་སུ། ། འཁྲིག་པ་སྤངས་ལ་དགའ་བའི་དུས་སུ་སྦྱར། ། སྲིད་བཅུད་རྩ་བ་དྲུག་དང་ཤིང་མངར་བཅས། ། འོ་མར་གདུས་འཐུང་བདེ་བའི་རོ་ཉམས་དང༌། ། ལང་ཚོར་བཅས་པ་དཀར་ཕྱོགས་ཟླ་བཞིན་འཕེལ། ། ད་བྱིད་རྩངས་པ་བྱེའུའི་ཤ་དང་ནི། ། ཐུག་འབྲས་སྣ་ཚོགས་འོ་མས་རོ་ཚར་བྱེད། ། ཤིང་མངར་སྦྲང་རྩི་འོ་མར་བཅས་པའམ། ། པི་ལིང་སྐྱུ་རུ་ཤ་ཁ་ར་དང་བཅས། ། ཡང་ན་ཅོང་ཞི་ཤིང་མངར་དབང་པོ་ལག། འབྲས་དཀར་འོ་མར་བཏབ་བསྐོལ་སྔགས་འདི་ཉིད། ། ཨོཾ་ཙ་ལ་ཙ་ལ་སྭཱ་ཧཱ། ། སྟོང་བཟླས་བཏབ་འཐུང་བདེ་འཕེལ་དངོས་གྲུབ་འཐོབ། ། ལྷ་མོ་དུང་ཅན་སྔགས་འདིས་འཁྲིད་ཞུགས་ལ། ། དངོས་གྲུབ་སྟེར་ཕྱིར་དུང་ཅན་མ་སོགས་ལ་བསྲུབ་སོགས་དུས་སུ་བཟླ་སྟོང་ཕྲག་གཉིས་འདོད་ཆགས་ལྷ་མོའི་རཀྟ་འཛག་པ་དང༌། ། ལྷ་ཆེན་མཚན་མ་ས་ལས་སྐྱེས་པ་ཡི། ། མི་ཡི་ལྕེ་དང་དབང་པོའི་ལག་པ་དང༌། ། སྲིད་པའི་ཁུ་བ་མཉམ་སྦྱར་རིལ་བུ་ལ། ། ཡི་དམ་སྔགས་ལ་འདི་གདགས་བཟླས་ཏེ་བཟའ། ། ཨོཾ་རཱ་ག་རཱ་ག་མ་ཧཱ་རཱ་ག་ཛྭ་ལ་ཛྭ་ལ་ཡེ་སྭཱ་ཧཱ། ། འདོད་པའི་མེ་ཆེན་ཆེས་ཆེར་ངེས་པར་འབར། ། ཡང་ན་སྟར་བུ་དབང་ལག་ཅོང་ཞི་རྣམས། ། འོ་མར་བཏབ་འཐུང་ཧ་རི་ནི་ས་བཟླ། ། དེས་ཀྱང་ཆགས་པ་ཆེ་བར་འགྱུར་བ་ཡིན། ། ཧ་ཅང་ཆགས་པས་གཡོ་བར་གྱུར་པ་ན། ། སྙིང་གར་བླ་མའི་ངོ་བོ་བྃ་ཡིག་ལས། ། ཆགས་བྲལ་བདུད་རྩི་དཀར་པོས་ལུས་གང་ནས། ། བསིལ་ལྟེམ་སོང་བས་ཆགས་དཔལ་དམར་མདངས་རྣམས། ། མཁའ་ལ་འཇའ་ཚོན་བཞིན་དུ་ཡལ་བར་བསམ། ། ཡང་ན་ཡུང་བ་བྱང་བུལ་མ་ནུ་རྣམས། ། ལྟོ་སྟོངས་ཆུ་བསྐོལ་གྱིས་དབུལ་འབྲུ་བཞི་བཟླ། ། བདེ་བ་མཆོག་ཏུ་སྤེལ་བའི་མན་ངག་ནི། ། དཀར་པོའི་ཚེས་གཅིག་ནས་བརྩམས་བཅོ་ལྔའི་བར། ། ཐབས་ཀྱི་གཡས་དང་ཤེས་རབ་གཡོན་གཙོ་བར། ། བདེ་ཆེན་ཐིག་ལེ་སྔགས་ཀྱི་གཟུགས་གནས་ཕ། ། མཐེ་བོང་ཨ་དང་རྗེ་ངར་ཨཱ་ཡི་གཟུགས། ། བརླ་ལ་ཨི་དང་གསང་བར་ཨཱི་ཡིག་དང༌། ། ལྟེ་སྙིང་ཨུ་ཨཱུ་ནུ་ལག་རྀ་དང་རཱྀ། ། མགྲིན་མཆུ་ལྀ་ལཱྀ་མཁུར་ཚོས་མིག་ཨེ་ཨཻ། ། རྣ་བར་ཨོ་དང་སྤྱི་བོར་ཨཽ་ཉིད་དེ། ། བཅོ་ལྔ་སྤྱི་གཙུག་ཨཾ་གི་གཟུགས་ཀྱིས་གནས། ། མཚམས་སུ་ཨཿཡིས་ལུས་ཀུན་ཁྱབ་པའོ། ། མར་ངོར་ལྡོག་སྟེ་བརྒྱད་གཉིས་སྤྱི་བོར་ཨ། ། སྟོང་ལ་རྐང་མཐིལ་ཨཾ་དང་མཚམས་སུ་ཨཿ ། གང་ཡིན་གནས་དེར་དྭངས་མའི་སྔགས་ཀྱི་གཟུགས། ། དཀར་དམར་ཐིག་ལེའི་དབུས་སུ་རྣམ་གནས་པ། ། མཚུངས་མེད་བདེ་བ་ཆེན་པོའི་གཟི་བྱིན་ཅན། ། དེར་ནི་ཡུན་རིང་རྩེ་གཅིག་སེམས་བཟུང་ནས། ། རབ་འབར་ཕྲེང་བ་འཁྲུགས་པའི་འོད་ཟེར་གྱིས། ། བརྟན་གཡོའི་དྭངས་བཅུད་བསྡུས་ནས་དེར་བསྟིམས་ཞིང༌། ། མཆོག་ཏུ་དགའ་བས་ཉེད་ཅིང་འོ་བྱ་སོགས། ། གནས་དེར་ལྷག་པར་བྱས་པས་བདེ་འཕེལ་ཞིང༌། ། ཚེ་མདངས་སྟོབས་ལྡན་དངོས་གྲུབ་མཆོག་ཀྱང་ཐོབ། ། ཞུན་མར་བདུད་རྩིའི་རྫས་ཀྱང་གནས་དེར་བྱུག། ཁྱད་པར་སྤྱི་བོར་གནས་ཙམ་ཞུན་མར་དང༌། ། གླ་རྩི་ཙནྡན་དཀར་པོས་ལེགས་པར་བྱུག། བསིལ་ཟེར་བྱེད་པའི་འོད་ལ་འདེ་བར་བྱ། ། སྟོང་ལ་འབྲུ་མར་སྣ་ཚོགས་སྦྲང་རྩི་དང༌། ། ཛཱ་ཏི་སྦྱར་བའི་ལྡེ་གུས་རྐང་མཐིལ་བྱུག། ཉི་མར་བསྲོ་ཞིང་འཕུར་ན་ཁམས་སྙོམས་ཤིང༌། ། བཅུད་དང་དྭངས་མ་ཚེ་དང་བདེ་བ་འཕེལ། ། བདེ་བའི་རྟེན་མཆོག་ཀུནྡ་ལྟ་བུ་ནི། ། སྲུང་དང་འཕེལ་བའི་ཐབས་ལ་ཅི་ནས་འབད། ། དེ་བྲལ་རླན་གྱིས་བཏང་བའི་ལྗོན་པ་བཞིན། ། བདེ་བའི་མེ་ཏོག་འབྲས་བུ་གསལ་མི་འགྱུར། ། རྣལ་འབྱོར་པ་ནི་དྲུག་ཅུར་དྲོད་བྲལ་ཞིང༌། ། བདུན་ཅུ་ལ་ནི་བདེ་བ་དང་ཡང་འབྲལ། ། བུད་མེད་ལྔ་བཅུར་དྲོད་དང་དྲུག་ཅུ་ལ། ། བདེ་བ་འབྲལ་ཕྱིར་ལང་ཚོའི་དུས་ཉིད་དུ། ། མཆོག་ཏུ་རྙེད་པར་དཀའ་བའི་བདེ་ཆེན་བཙལ། ། གལ་ཏེ་འདུ་བྱེད་རྙིང་པར་གྱུར་ན་ཡང༌། ། རྫས་སྔགས་དམིགས་པའི་ཐབས་ཀྱིས་གསོས་བྱས་ནས། ། མཆོག་དགའི་རྟེན་ལས་བདེ་བ་བསྒྲུབ་པར་བྱ། ། ནོར་བུ་ལེགས་བཀྲུས་ཞུན་མར་བཀུ་མཉེར་བཅས། ། མེ་ལ་བསྲོས་བྱས་བདེ་བའི་མྱུ་གུ་རྒྱས། ། ད་བྱིད་སྡིག་སྲིན་མཆིལ་པའི་ཤ་མཉམ་པ། ། སྦྲང་སྦྱར་རིལ་བུ་ལྕམ་པའི་ཐང་གིས་དབུལ། ། སྦྲང་སྨྱོན་ཁ་ཤོག་པ་དང་ཐང་ཕྲོམ་འབྲུ། ། དངུལ་ཆུ་དུལ་མ་མར་རྙིང་སྦྱར་ནས་སུ། ། ཉིན་མོར་རྟགས་བྱུགས་བསྲོ་ཞིང་མཉེ་བྱས་ལ། ། མཚན་མོར་རོལ་ན་ནོར་བུ་ཆེར་རྒྱས་ཤིང༌། ། མི་བཟོད་བདེ་བ་མཆོག་ཀྱང་འབར་བར་བྱེད། ། དབྱུང་བར་དཀའ་ན་རྒྱ་སྐྱེགས་བྱང་བུལ་དང༌། ། ཚྭ་ལ་ཆ་མཉམ་ཞུ་མཁན་ཆུ་ཡིས་དབུལ། ། བུ་རམ་རིལ་བུ་སྲན་ཙམ་བཏང་བས་འཐོན། ། འོད་ལྡན་ག་བུར་གླ་རྩི་ཤིང་ཚ་དང༌། ། ནུ་ཞོ་སྦྱར་བྱུགས་སྦོམ་ཞིང་བདེ་བ་འཕེལ། ། མོན་སྲན་གྲེའུ་གཟེ་མ་སྡིག་སྲིན་གསུམ། ། ཆ་མཉམ་བསྐོལ་འཐུང་རྡོ་རྗེ་རྟག་ཏུ་འགྲེང༌། ། གལ་ཏེ་རྡོ་རྗེ་ཆུང་བར་འདོད་པ་ན། ། སྲན་མའི་མེ་ཏོག་ལུག་གི་བུ་སྣོད་དང༌། ། རྟ་ཤ་ཆ་མཉམ་ལོ་བརྒྱད་དྲི་ཆུས་དབུལ། ། ཨུག་ཆོས་སྤང་རྒྱན་ཤང་ཤང་མེ་ཏོག་གསུམ། ། ཟུམ་པར་བཏུས་ལ་རྟག་ཏུ་ངུ་དང་ནི། ། བྱ་ཕོ་མཚལ་བུའི་ཨོག་ཞོལ་སྦྱར་བ་དེ། ། བུ་མོར་བྱིན་པས་པདྨ་ཟུམ་པར་བྱེད། ། གལ་ཏེ་རྡོ་རྗེས་ཕིགས་པར་མ་གྱུར་ན། ། སྔ་མའི་མེ་ཏོག་གསུམ་པོ་ཁ་བྱེ་བ། ། བྱ་ཕོའི་ཟེ་བ་གཡེར་མ་ཆང་སྦྱར་བཏང༌། ། ཚུལ་འདིས་མེ་ཏོག་ཁ་འབྱེད་ཡངས་པར་བྱེད། ། གཞན་ཡང་ཁྱིམ་བྱའི་ཚིལ་བུ་ཏིལ་མར་དང༌། ། བྱེའུའི་ཤ་སྦྱར་པདྨར་བསྐུས་ན་དམ། ། དེ་སྟེང་བྱི་ལའི་གཞང་ཚིལ་བསྣན་ན་མཆོག། ལྕུམ་རྩའི་ཕྱེ་མ་བཏབ་པས་ཆུང་བར་བྱེད། ། ཆ་ག་པ་ཡི་ཕྱེ་མས་མཆོག་ཏུ་སྡོམ། ། གལ་ཏེ་དྲོད་དང་བྲལ་ན་ཚ་བ་གསུམ། ། རྩ་བ་ལྔ་སྦྱར་སྨན་མང་བཅུད་ཀྱིས་གསོ། ། གླ་རྩི་ཤིང་ཚ་པི་ལིང་ནུ་ཞོ་བྱུག། དོག་པོར་གྱུར་ན་བཅོས་མའི་རྡོ་རྗེ་ནི། ། རྒྱུ་རློན་བཀླུབས་པ་སོགས་ཀྱིས་དལ་བུར་དབྱེ། ། རྩ་ཁ་འབྱེད་པའི་སྨན་གྱིས་ཡངས་པར་བྱ། ། སེང་དཀར་ལིངྒ་ག་བུར་ཤིང་མངར་དང༌། ། ཙནྡན་དཀར་པོ་བྱ་བྲ་རྩི་བཞིན་བཏགས། ། སྦྲང་སྨྱོན་སྦྱར་བས་རྟགས་བསྐུས་སྦོམ་རིང་མཁྲང༌། ། མི་ཟད་བདེ་བ་ཆེས་ཆེར་རྒྱས་པར་བྱེད། ། མཚེ་དང་བུ་རམ་བྱ་བྲུན་སྡོང་རོས་དང༌། ། རྒྱ་ཚྭ་ཞིབ་བཏགས་ཆུར་སྦྱར་བྱུགས་ཀྱང་མཆོག། ཡང་ན་ཟེ་ཚྭ་སྦྲང་རྩི་ཕུག་རོན་བྲུན། ། ཡང་ན་སྒོག་གཅིག་རྒྱ་སྐྱེགས་ཕག་ཚིལ་སྦྱར། ། ཡང་ན་གཡེར་མ་རྒྱ་ཚྭ་དྭ་བའི་འབྲས། ། དེ་དག་རྣམས་ཀྱིས་ནི་གུ་རྟ་སྐད་འབྱིན། ། ཐམས་ཅད་བདེ་བ་སྐྱེད་པའི་སྨན་དུ་བཤད། ། ག་བུར་ཚྭ་ལ་ཤིང་མངར་ཕུག་རོན་བྲུན། ། ཁྱི་དཀར་ལིངྒ་འབྲས་བུ་རོ་འཛིན་བཅས། ། ད་བྱིད་བྱེའུའི་ཤ་རྣམས་ཞིབ་བཏགས་ལ། ། སྦྲང་སྨྱོན་སྦྱར་བས་རྟགས་བསྐུ་ཏིལ་མར་བྱུགས། ། མི་བཟོད་བདེ་བ་མཆོག་ཏུ་འཕེལ་བར་བྱེད། ། དེ་ལྟར་བདེ་འཕེལ་རྫས་རྣམས་གང་ལ་ཡང༌། ། རྩི་ཡི་ལྷ་མོ་བློ་གྲོས་མ་ཡི་ནི། ། རིག་པ་འདིས་གདབ་བདེ་ཆེན་འཕེལ་བང་འགྱུར། ། ཨོཾ་གི་རི་ཧི་རི་ཙི་རི། ། ཨ་ཨ་ཤུ་མ་ཤམ་སྭཱ་ཧཱ། ། ཁྱད་པར་བདེ་བའི་རྟེན་མཆོག་དབྱིངས་ཕྱུག་རྩ། ། ལྷ་མོ་གང་གི་ཆུ་སྐྱེས་སྦུབས་སུ་ནི། ། སོར་མོ་གཉིས་ནས་བརྒྱད་ཀྱི་བར་གནས་པ། ། སྦོམ་དང་ཕྲ་བ་མ་ངེས་དབྱིབས་ཚུལ་ཅན། ། སོར་མོ་གསུམ་པོ་སྦྲུལ་གྱི་གདེངས་ཀ་ལྟར། ། གནས་པས་བསྐུལ་བྱ་དེ་ཡིས་མ་རྙེད་ན། ། གཏེམ་བའི་འཁྲུལ་འཁོར་སྨན་གྱི་ནུས་པ་ཡིས། ། མཐོང་དང་རེག་པའི་ཡུལ་དུ་མངོན་བྱས་ལ། ། དེ་ཡི་སྣ་རྩེའི་པདྨའི་སྐུད་པ་དག། ནོར་བུའི་མིག་ཏུ་བརྒྱུས་པའི་ཐབས་མཁས་ཀྱིས། ། ནམ་མཁའི་སྒོ་འབྱེད་བདེ་བའི་ཁྱིམ་མཐོང་བྱ། ། དེ་ལྟར་ཐབས་རྣམས་ཀུན་ཏུ་ཤེས་བྱས་ནས། ། དང་པོར་ཆགས་པའི་ཉེར་བསྡོགས་རྣམ་མང་བྱ། ། ཅུང་ཟད་དགོད་བཅས་ངོ་མཚར་བཅས་ལྟ་བུ། ། སྨིན་མ་བསྐྱོད་བཅས་ཟུར་མིག་དང་ལྡན་པས། ། མཛའ་བ་གསལ་བྱེད་རབ་དགའ་མཐར་ཐུག་པ། ། སྒེག་པ་ལས་སྐྱེས་ལྟ་སྟངས་ཉིད་དུ་བཤད། ། ཅུང་ཟད་གྱེན་བཟློག་མིག་གིས་གང༌། ། སྟེང་གི་མིག་པགས་མཛེས་བརྫེས་ནས། ། མིག་ཟུར་མཉམ་པར་རྒྱས་བྱས་པ། ། ངོ་མཚར་བ་ཡི་ལྟ་སྟངས་འདོད། ། གང་ཞིག་དབུས་ནི་ཅུང་ཕྱེ་ཞིང༌། ། སྦུབས་ནི་རྟག་ཏུ་ཚེར་མ་ཕྱེ། ། མིག་རྒྱན་ཀུ་མུ་ད་དེ་འགྱུར། ། རེག་པ་འཛིན་ལ་རྟག་ཏུའོ། ། རྫི་མའི་རྩེ་མོ་གཡོ་བཞིན་པར། ། སྟེང་གི་མིག་པགས་སྣུམ་མཛེས་པ། ། དྲི་དང་རེག་པའི་དགའ་བ་ལ། ། ལྟ་སྟངས་ཀུ་མུ་ལ་རུ་འདོད། ། འཇམ་ལ་ཅུང་ཞིག་བསྐུམས་པ་གང༌། ། ཅུང་ཟད་འཛུམ་ཞིང་དེ་བཞིན་མཛེས། ། ལྟ་སྟངས་རོལ་བ་ཞེས་བྱ་སྟ། ། བུད་མེད་རྣམས་ཀྱིས་ཕྱེད་ལྟ་བའོ། ། དེ་ལྟར་ཕན་ཚུན་དགའ་བས་བལྟ་བ་ན། ། སྟེང་དུ་གདོང་དང་འོག་ཏུ་བདེ་བའི་གནས། ། གཙོར་བྱ་ཆགས་པའི་གཏམ་དང་ཉེད་པ་སོགས། ། དྲུག་ཅུ་རྩ་བཞིའི་གར་གྱིས་རྩེན་བྱ་ཞིང༌། ། ཁྱད་པར་མཆུ་དང་ལྕེ་འཇིབས་མཐིལ་བཞི་ཉེད། ། ལག་པས་བདེ་གནས་མཉེ་ཞིང་ལྕེས་བསྐྱོད་སོགས། ། ཆགས་ཚུལ་འཆོལ་བར་སྤྱད་པའི་དགའ་སྟོན་གྱིས། ། བདེ་བའི་རྩ་མཆོག་སད་པར་གྱུར་པའི་རྟགས། ། མདོག་དམར་ཁ་སྐོམ་ལུས་རྡུལ་དྲོད་གཡོ་ཞིང༌། ། མིག་ཟུམ་ནན་གྱིས་འཁྱུད་དང་ཆགས་ཚིག་འབྱིན། ། ངོ་ཚ་རྣམ་བྲལ་མ་ངེས་མྱོས་པ་བཞིན། ། བ་སྤུ་ལངས་ཤིང་སྙིང་འདར་ལུས་འཕར་ཞིང༌། ། རང་ལ་ཆགས་པས་བལྟ་ཞིང་གུས་པ་སོགས། ། བཟོད་མེད་བདེ་བ་འབར་བའི་རྟགས་རྫོགས་ནས། ། བྱེད་པའི་འཁྲུལ་འཁོར་རྣམ་པར་བཅིང་བར་བྱ། ། དེ་ཡང་བཞི་དང་བརྒྱད་དང་བཅུ་དྲུག་དང༌། ། སུམ་ཅུ་རྩ་གཉིས་དྲུག་ཅུ་རྩ་བཞི་སོགས། ། མིང་དང་གྲངས་ཀྱི་དབྱེ་བ་དུ་མར་གསུངས། ། ཉལ་ནས་སྦྱོར་བ་མི་ཡི་ཚུལ། ། དེ་ལ་སྟེ་འོག་གཉིས་སུ་དབྱེ། ། ཟུར་དུ་སྦྱོར་བ་པྲེ་ཏ་ཀ། གཡས་དང་གཡོན་པས་རྣམ་པ་གཉིས། ། ཙོག་པུར་སྦྱོར་བ་ལྷ་ཡི་སྟེ། ། རྒྱབ་ནས་དུད་འགྲོའི་སྦྱོར་བ་ཡིན། ། ལངས་ཏེ་སྦྱོར་བ་ཁྲོ་བོའི་ཚུལ། ། དེ་ལ་འདེགས་དང་མཉམ་པ་གཉིས། ། སྦྱར་བའི་རྩ་བ་འདི་བརྒྱད་ཡིན། ། དེ་ལས་རྣམ་པར་ཕྱེ་བ་ན། ། བདག་ཉིད་སྐྱིལ་ཀྲུང་དག་གིས་གནས། ། དབུས་སུ་ལྷ་མོ་ཙོག་བུར་འདུག། དེའི་དཔུང་པས་ཕྲག་པར་བསྡམ། ། རང་གི་ལག་པས་རྐེ་ནས་འཁྱུད། ། པདྨར་ནོར་བུ་གནས་བྱས་པ། ། བདེ་བ་འབྱུང་བ་ཞེས་བྱའོ། ། ལག་པས་རབ་འཁྱུད་ཕན་ཚུན་སྦྱོར། ། གཉིས་ཀས་བསྐྱོད་པ་དོ་ལི་བསྐྱོད། ། གཡས་བརྐྱང་སེམས་དཔའི་སྐྱིལ་ཀྲུང་ལ། ། གཡོན་བརྐྱང་སེམས་མའི་སྐྱིལ་ཀྲུང་ཡིན། ། གཉིས་ཀ་བསྣོལ་བསྐུམ་རྡོ་རྗེའི་གདན། ། ཙོག་པུར་རྐང་པ་ཟླུམ་པོར་གདངས། ། ཟླ་བ་ཕྱེད་པ་ཞེས་པ་ཡིན། ། པུས་མོ་འཕྲེད་དུ་ས་ལ་རེག། ལོང་བུ་འཕོངས་ཚོས་སུ་རེག་པ། ། གཞུ་ཡི་གདན་ཞེས་བྱ་བ་སྟེ། ། འདུག་སྟངས་རྣམ་པ་འདི་སོགས་ཀྱིས། ། མདུན་དུ་དགའ་བ་བསྐྱེད་པར་བྱ། ། བདེ་འབྱུང་དག་ལས་རིག་མ་ཡི། ། རྐང་མཐིལ་རང་གི་བརླ་ལ་བཞག། ཙོག་པུས་བསྐྱོད་པ་བརླ་ཉིད་དོ། ། ཡུམ་གྱི་འཕོངས་ཚོས་ས་ལ་བཞག། ཕར་འཁྱུད་ས་ལ་མནན་ཞེས་བྱ། ། ཙོག་པུར་གཉིས་ཀའི་རྐང་པ་བརྐྱང༌། ། མཉམ་སྦྱར་འཕོངས་ལ་ལག་པས་མཉེ། ། རི་མོ་ཅན་དུ་བརྗོད་པ་ཡིན། ། རིག་མའི་རྐང་པའི་སྒྱིད་ཁུང་གཉིས། ། རང་གི་ཕྲག་པར་བཀལ་ཏེ་སྤྱོད། ། འཁྲུལ་འཁོར་ཞོན་པ་ཞེས་བྱར་གྲགས། ། དེ་ལས་རྐང་པ་ཡ་གཅིག་ནི། ། སྐྱེས་བུའི་བརླ་བར་མར་བརྐྱངས་ཞིང༌། ། གསེག་སྤྱོད་བུང་པའི་དྲ་བ་ཅན། ། རྐང་པ་གཡས་གཡོན་གང་རུང་ལ། ། འཁྱུད་པའིརྐང་པ་ཅན་ཡང་ཟེར། ། རིག་མའི་རྐང་མཐིལ་གཉིས་ཀ་ནི། ། རང་གི་བྲང་དབུས་སྦྱར་བྱས་ལ། ། འཕོངས་ཚོས་ནས་འཁྱུད་ལག་པས་འཚིར། ། པུས་མོ་རུ་སྦལ་བཅིང་བར་བཤད། ། རིག་མའི་བྱིན་པ་སྐྱེས་བུ་ཡི། ། མཚོགས་མར་གཏུགས་ལ་སྟེང་ནས་འཕུལ། ། འདི་ནི་མཆོག་ཏུ་བྱེད་པའོ། ། བུ་མོའི་བྱིན་པ་གྱེན་དུ་བལྟེབ། ། སྐྱེས་བུས་སྟེང་མནན་རྣམ་པར་འདར། ། རིག་མའི་པུས་མོ་བསྐུམས་ནས་སུ། ། རང་གི་བརླ་དང་དཀུར་སྦྱར་བའི། ། སྟེང་ནས་སྐྱེས་བུས་ཡུན་རིང་མནན། ། དབང་པོ་ཞེས་བྱའི་བྱེད་བཅིང་ཡིན། ། ཡུམ་གྱི་རྐང་པའི་མཐིལ་དག་ལ། ། མིག་དང་རྣ་བ་མགོ་བོ་སྦྱར། ། ལག་པས་འཁྱུད་དེ་འཚིར་བ་ནི། ། ཀུན་ཏུ་བཟང་པོ་ཞེས་བྱའོ། ། ལྷ་མོ་གན་རྐྱལ་རྐང་བ་དག། བགྲད་པའི་དབུས་སུ་སྐྱེས་བུས་སྦྱོར། ། ལག་པས་རིག་མའི་འགུལ་ནས་འཁྱུད། ། བུད་མེད་ལག་པས་སྐྱེས་པ་ཡི། ། སྐེད་པར་རྒྱབ་ཀྱི་ཕྱོགས་སུ་ཉེད། ། འདི་ནི་དཔུང་པ་ཅན་ཞེས་བྱ། ། དེ་ལས་རིག་མའི་རྐང་པ་ནི། ། བཀུག་སྟེ་ཐབས་ཀྱི་འཕོངས་ཚོས་རེག། སྐྱེས་བུའི་ལུས་ནི་ཙོག་བུ་ལྟར། ། ལག་པས་རྩིབས་ལོགས་ལ་རེག་པ། ། མི་མཉམ་པར་ནི་སྦྱོར་བའོ། ། བུད་མེད་གན་རྐྱལ་བྱིན་པ་དག། སྐྱེས་པའི་བརླ་ལ་གཤིབས་ཏེ་སྦྱར། ། བུད་མེད་ལག་པ་སྐྱེས་བུ་ཡི། ། མགྲིན་འཁྱུད་སྐྱེས་པའི་ལག་པ་ནི། ། བུ་མོའི་གཞོག་ཏུ་རེག་པ་ནི། ། གྲོང་པ་ཞེས་ནིབྱ་བའོ། ། བུད་མེད་པུས་མོ་བགྲད་བྱས་ལ། ། རྐང་པས་སྐྱེས་བུའི་རྩིབས་ལོགས་བརྟེན། ། ལག་པས་སྐྱེས་བུའི་མགྲིན་པར་འཁྱུད། ། བུད་མེད་པུས་མོའི་ཕྱི་རོལ་ནས། ། སྐྱེས་བུའི་ལག་པ་ས་ལ་བརྟེན། ། འདི་ནི་གྲོང་ཁྱེར་གར་ཞེས་བྱ། ། བུད་མེད་གན་རྐྱལ་ཉལ་བ་ཡི། ། པུས་མོ་བྲང་གི་ཕྱོགས་སུ་བསྐྱུངས། ། ལག་པས་གཞོན་ནུའི་ཚང་རར་འཁྱུད། ། སྐྱེས་བུའི་ལག་པ་བུད་མེད་ཀྱི། ། མགུལ་འཁྱུད་བྲང་གིས་འབུགས་པའོ། ། རྐང་པ་གཅིག་དེ་སྙིང་གར་བཀུག། གཉིས་པ་བརྐྱངས་ནས་ལག་པ་ཡིས། ། སྐྱེས་བུའི་རྒྱབ་ནས་འཇུས་བྱས་ལ། ། སྐྱེས་བུའི་ལག་པ་བུད་མེད་ཀྱི། ། མགྲིན་པད་འཁྱུད་པ་རབ་བརྐྱང་ཡིན། ། བུ་མོ་གན་རྐྱལ་ཉལ་བ་དག། ཁྲི་ལས་ཕྱི་རོལ་རྐང་བརྐྱངས་ནས། ། དེར་ཞུགས་སྐྱེས་བུའི་རྐང་པ་དག། ཁྲི་ལས་ཕྱིར་བརྐྱང་ལག་པས་ནི། ། སྐྱེས་པའི་རྒྱབ་འཁྱུད་ཁབ་ཅན་ནོ། ། བུད་མེད་རྐང་པ་ཤད་ཀྱིས་བརྐྱང༌། ། ཡབ་ཀྱིས་ཀྱང་ནི་དེ་ལྟར་བརྐྱང༌། ། རྡོ་རྗེ་ཕྱེད་ལས་མི་ཚུད་ཀྱང༌། ། དུང་ཅན་མ་ཡི་རྩ་རྙེད་ཕྱིར། ། ཤིན་ཏུ་བརྐྱང་བའམ་ཁ་སྦྱོར་རོ། ། སྐྱེས་པ་འོག་ཏུ་བྱས་པ་ལ། ། རིག་མ་སྟེང་སྦྱོར་གཉིས་ཀས་ནི། ། སྟོད་སྨད་དགྱེ་ལྡེམ་ཤུགས་ཆེན་བསྐྱོད། ། དོ་ལིའམ་ཁྱོགས་ཞེས་བྱ་བར་བརྗོད། ། སྐྱེས་པ་སྟེང་ངམ་འོག་བྱས་ཀྱང༌། ། རེས་མོས་བརྡེབ་ཅིང་དམ་དུ་འཚིར། ། བརླ་ཞེས་བྱ་བའི་སྦྱོར་བར་བཤད། ། བུ་མོའི་རྐེ་ནས་འཁྱུད་བྱས་ཏེ། ། ལྟག་པར་གྲུ་མོ་གཉིས་སྦྱར་ལ། ། རྣ་བའམ་སྐྲ་གཉིས་འཇུས་ནས་སུ། ། བུད་མེད་རྐང་པ་སྟེང་དུ་འདུད། ། ཕན་ཚུན་ལྷོད་བསྐྱོད་གྲུ་མོར་འདོད། ། ལྷ་མོ་སྟེང་དུ་བྱས་ནས་སུ། ། རྫ་མཁན་འཁོར་ལོ་བཞིན་དུ་བསྐོར། ། རྐང་ཟུང་གྱེན་དུ་བསྐྱོད་ཅིང་བསྐྱོད། ། ལག་གཡོན་གྲུ་མོ་གཡས་སྟེང་ཕྱིན། ། གཡས་པའི་གྲུ་མོ་གཡོན་སྟེང་འཛིན། ། འདི་ནི་བུང་བ་ཅན་ཡང་ཟེར། ། སྐྱེས་བུ་གན་རྐྱལ་འཕོངས་མཐོ་བྱས། ། རྐང་གཉིས་རྩེ་མོ་མཁའ་ལ་གཏད། ། དེར་ཞུགས་མྱོས་བྱེད་མ་དེས་ནི། ། སྐྱེས་པར་མདུན་བསྟན་བྱས་ནས་རོལ། ། ལག་པས་མགྲིན་འཁྱུད་སྐྱེས་བུ་ཡི། ། ལག་པ་བུད་མེད་རྒྱབ་ཏུ་སྦྱར། ། འདི་ནི་མྱོས་བྱེད་རྟ་བབས་སོ། ། སྐྱེས་པ་ཉེར་འདུག་བརྐྱང་བཞིན་དུ། ། ཅུང་ཟད་བཀུག་པའིརྐང་གཉིས་ལ། ། གནས་པའི་བུ་མོ་འདོད་ལྡན་མ། ། རྐང་གཉིས་བསྐུམ་ཞིང་རོལ་པས་བསྲུབ། ། འདི་ནི་སྲུབ་བྱེད་ཅེས་བྱའོ། ། རིག་མ་གཡས་སམ་གཡོན་དུ་བཞག། བརླ་ནི་ཅུང་ཟད་ཁ་ཕྱེ་སྦྱོར། ། བཙིར་བ་ཞེས་བྱའི་བྱེད་བཅིང་ངོ༌། ། ཡན་ལག་ཀུན་གྱིས་ཅི་བདེར་འཁྱུད། ། ཕན་ཚུན་ཀུ་ཅོ་ག་ཞིའི་ཚིག། སྣ་ཚོགས་སྨྲ་ལྡན་རྒོད་པ་ཅན། ། བུད་མེད་ཁ་སྦུབ་རྒྱབ་ནས་ནི། ། བྱེད་ལའང་བསྐུམ་དང་འཕོང་བསྟོད་དང༌། ། ཟུམ་དང་འགྲོད་དང་ལྟེབ་འདུག་ལ། ། སྐྱེས་བུས་དེ་དང་འཚམས་པར་ནི། ། དགུ་དང་དགྱེ་དང་ཤིན་ཏུ་དགྱེས། ། རོལ་པའི་རྣམ་པ་དུ་མར་འགྱུར། ། ཟུར་དང་ལངས་ཏེ་འདུག་ལ་ཡང༌། ། བརྐྱང་བསྐུམ་རྐང་ལག་འཁྱུད་སྟབས་ཀྱིས། ། ཅུང་ཟད་མི་འདྲ་དུ་མར་གནས། ། དེ་དག་ངེས་པ་མེད་པར་ནི། ། བདེ་བའི་སྒྱུ་རྩལ་ཅི་རིགས་བྱ། ། ལྷ་མོའི་མཁའ་དང་རྩ་ཁྱད་ཀྱིས། ། གང་ལ་གང་འཚམས་སྦྱར་བར་བྱ། ། དེ་ལས་གྲོང་གི་བྱ་བ་ཕལ། ། གཉུག་མ་ཉིད་དེ་གཞན་ཕལ་ཆེར། ། དཀའ་ཕྱིར་གོམས་པས་བསྒྲུབ་བྱ་ཉིད། ། རྒན་ཆེས་གཞོན་ཆེས་སྦྲུམ་མ་དང༌། ། ངལ་ཞིང་དུབ་པ་མ་གཏོགས་པ། ། ལྷ་མོ་བདེ་བའི་སྐྱེད་ཚལ་དུ། ། སྒྱུ་རྩལ་གར་གྱི་སྦྱོར་བ་བྱ། ། དེ་ལྟར་བྱེད་པ་དེ་དག་གི ། གཙོ་བོའི་རྣམ་པ་བསྡུས་ནས་ནི། ། མཆོད་པའི་ལྷ་མོ་བཅུ་དྲུག་གི ། སྟོབས་ལྡན་སྦྱོར་བ་བཅུ་དྲུག་གསུངས། ། བདེ་གསལ་མི་རྟོག་སྐྱེད་པ་ཡི། ། ལྷ་ཡི་འདུག་སྟངས་རྣམ་བཞི་ནི། ། སྒེག་མཛེས་འཇོལ་བག་འགྱིང་ལྡེམ་དང༌། ། རྣམ་གཟིགས་བཞི་ཡིན་དང་པོ་ནི། ། རིག་མའི་རྐང་གཉིས་རང་ཉིད་ཀྱི། ། ལྟག་པར་བཀལ་བྱས་ལག་གཉིས་ཀྱིས། ། སྒྱིད་པའི་ཐད་ནས་ཕར་ལ་གདངས། ། གན་རྐྱལ་དུ་ནི་འདུག་པ་ལ། ། དཔའ་བོས་ཅི་བདེར་རྩེན་པར་བྱ། ། འཇོལ་བག་ཕྱག་རྒྱ་རང་ཉིད་ཀྱི། ། དཔུང་པར་སྒྱིད་པ་གཉིས་བཀལ་ལ། ། ལག་གཉིས་སྒྱིད་པའི་ནང་ངོས་ནས། ། རྟིང་པ་གཉིས་པོ་འདེགས་བྱས་ཏེ། ། ཕྱིར་ལ་བགྲད་པའི་ཚུལ་གྱིས་འདུག། དེ་ལ་དཔའ་བོས་ཅི་བདེར་རོལ། ། འགྱིང་ལྡེམ་རིག་མའི་ལག་པ་གཉིས། ། སྒྱིད་པའི་ནང་ནས་ཕྱིར་བཏོན་ནས། ། རྐང་པར་འཇུས་ལ་འདེགས་ཤིང་བགྲད། ། དེ་ལ་ཅི་བདེར་རོལ་པའོ། ། རྣམ་གཟིགས་རྣ་བ་གཡས་གཡོན་གྱི། ། ཐད་དུ་རྐང་གཉིས་གནམ་ལ་བཏེགས། ། ལག་གཉིས་སྒྱིད་ཁུང་གཉིས་ནས་ནི། ། ཚུར་ལ་འཁྱུད་བྱས་དེ་ལ་རོལ། ། ལྷ་ཡི་འདུག་སྟངས་འདི་བཞི་ལ། ། ཐབས་ནི་བརྐྱང་བསྐུམ་ཙོག་པུ་གསུམ། ། གང་བདེའི་ཚུལ་གྱིས་རོལ་པར་བྱ། ། གསལ་ཉམས་སྐྱེད་པར་བྱེད་པ་ཡི། ། ལྷ་མིན་འདུག་སྟངས་རྣམ་བཞི་ནི། ། བསྡིགས་པ་ཁྲོས་པ་རྔམས་པ་དང༌། ། འཇིགས་པ་བཞི་ཡིན་དང་པོ་ནི། ། རིག་མ་གན་རྐྱལ་འདུག་བ་ཡི། ། རྐང་གཉིས་གནམ་ལ་ཤད་བརྐྱང་བའོ། ། ཁྲོས་པ་རིག་མ་དེ་ཉིད་ནི། ། འཕྲེད་དམ་གན་རྐྱལ་དུ་འདུག་ལ། ། རྐང་པ་ཡ་གཅིག་ཐབས་ཀྱི་ནི། ། དཔུང་པའི་སྟེང་དུ་བཀལ་ནས་རོལ། ། པདྨོ་ཡངས་ན་དེ་ལྟར་བྱ། ། རྔམས་པ་རིག་མ་ཙོག་པུར་འདུག། ལག་གཉིས་རྐང་པའི་བྱིན་པ་ནས། ། མཉམ་བྱས་ཕྱིར་ལ་བགྲད་དེར་རོལ། ། འཇིགས་པ་རིག་མ་ཙོག་པུར་འདུག། རྐང་པའི་ཕྱི་ནས་ལག་གཉིས་ཀྱི། ། གྲུ་ཁུག་གཉིས་ལ་སྒྱིད་པ་བཀལ། ། ཕྱིར་བགྲད་ཚུལ་གྱིས་འདུག་པར་བྱ། ། ལྷ་མིན་འདུག་སྟངས་འདི་བཞི་ལ། ། ཐབས་ནི་ཁ་སྦུབ་དང་ཙོག་པུ། ། གཉིས་པོ་ཇི་ལྟར་རིགས་པས་འཁྱུད། ། བདེ་ཉམས་སྐྱེད་པར་བྱེད་པ་ཡི། ། མི་ཡི་འདུག་སྟངས་རྣམ་བཞི་ནི། ། གྱད་དང་རོལ་པ་འཁྲིལ་སྦྱོར་དང༌། ། རབ་འཁྱུད་ཅེས་པ་རྣམ་པ་བཞི། ། དང་པོ་ཡུམ་ནི་གན་རྐྱལ་ལ། ། རྐང་པ་གཉིས་ཀྱི་སྒྱིད་པ་ནི། ། ཐབས་ཀྱི་ཕྲག་པ་ལ་བཀལ་སྤྱོད། ། ཚུལ་དེས་རིག་མ་སྟེང་དུའང་འདུག། རོལ་པ་རིག་མ་གན་རྐྱལ་འདུག། སྐེད་པར་ཐབས་ཀྱིས་སྐྱིལ་ཀྲུང་སྤྱོད། ། བཟློག་སྟེ་རིག་མ་སྟེང་དུའང་བྱ། ། འཁྲིལ་སྦྱོར་རིག་མ་འཕྲེད་ལ་ཉལ། ། གཞོགས་གཉིས་གང་རུང་སར་ཕབས་ལ། ། རྐང་པ་ཐབས་ཀྱི་སྟེང་དང་ནི། ། འོག་ཏུ་བཏང་ནས་བསྒུལ་བར་བྱ། ། རབ་འཁྱུད་རིག་མ་གན་རྐྱལ་ལ། ། བརྐྱང་བསྐུམ་ཐབས་ཀྱི་མཁལ་ཁུང་གཏད། ། བཟློག་སྟེ་རིག་མ་སྟེང་དུ་བྱ། ། ཚུལ་དེས་འཕྲེད་ལའང་སྦྱོར་བ་ཡིན། ། འདི་སྐབས་ཡུམ་གྱི་འདུག་སྟངས་རྣམས། ། གོ་བཟློག་བྱ་ཚེ་ཡབ་ཀྱིའང་ཡིན། ། མི་རྟོག་ཉམས་བསྐྱེད་ཀླུའམ་ནི། ། དུད་འགྲོའི་འདུག་སྟངས་རྣམ་བཞི་ནི། ། མཁའ་ལྡིང་སེང་གེ་གླང་ཆེན་དང༌། ། རུ་སྦལ་བཞི་ལས་དང་པོ་ནི། ། རིག་མ་ལངས་ཏེ་ལྡེམ་འགྱིང་གིས། ། ཚང་ར་ཕྱིར་བསྟན་ལག་གཉིས་ཀྱིས། ། འཕོངས་ཀྱི་ཤ་བོ་ཆེ་བགྲད་ནས། ། ཐབས་ཀྱིས་རྒྱབ་ནས་ལངས་ཏེ་སྦྱར། ། གཉིས་པ་རིག་མ་འཕྲེད་ལ་ཉལ། ། རྒྱབ་ནས་ཐབས་འདུག་རིག་མ་ཡི། ། རོ་སྟོད་ཐབས་ཀྱི་བྲང་སྤྲད་ལ། ། བར་དུ་ཆེར་བརྒྱང་ཐབས་དགྱེ་ཞིང༌། ། རིག་མ་དགུ་པའི་རྣམ་པས་སྦྱར། ། གསུམ་པ་རིག་མ་ཆེར་དགུས་ལ། ། རྐང་ལག་བཞི་པོ་ས་ལ་བཙུགས། ། ཐབས་ཀྱི་ལག་པ་རིག་མ་ལ། ། གཏད་དེ་རྒུར་པར་བྱས་པའམ། ། ཡང་ན་ཐབས་ནི་འགྲེང་སྟེ་འདུག། རིག་མའི་སྐེད་པར་ལག་པས་བསྡམ། ། བཞི་པ་རུ་སྦལ་ལྟ་བུ་ནི། ། རིག་མ་ཁ་སྦུབ་ཏུ་འདུག་ལ། ། དེ་སྟེང་ཐབས་འདུག་ཡང་ན་ཐབས། ། ཙོག་པུར་བྱས་ནས་སྦྱོར་བའོ། ། དེ་ལྟར་ལེགས་པར་བསྟན་པ་ཡི། ། འདོད་པའིབྱེད་པ་རྣམ་མང་པོས། ། ལུས་ནི་ཤིན་ཏུ་མཉེན་བྱེད་ཅིང༌། ། དགའ་བ་མཆོག་ཏུ་མྱོང་བར་བྱེད། ། རྩ་དུལ་རླུང་ནི་ཆམ་ལ་ཕབ། ། བདེ་བའི་ཡེ་ཤེས་རྙེད་པ་དང༌། ། ཐབས་ཀྱི་མན་ངག་དང་ལྡན་པས། ། སོ་སོའི་རྩ་མདུད་གྲོལ་བར་འགྱུར། ། བྱེད་པ་མི་ཤེས་སྦྱོར་བྱས་ན། ། རླུང་མཁྲིས་བད་ཀན་ནད་གཞི་འཁྲུགས། ། དེ་ཕྱིར་འཇིག་རྟེན་སྦྱོར་ཐབས་ལ། ། མཁས་ བྱས་ཡེ་ཤེས་སྦྱོར་ཐབས་བརྟེན། ། གང་ཚེ་སྦྱོར་བའི་རིམ་པ ་ལས། ། བདུད་རྩི་ཞུ་བ་རླུང་དང་ནི། ། དམིགས་པས་བཟུང་བར་མ་ནུས་པས། ། རྫས་ལ་བརྟེན་ཏེ་བཟུང་བ་ནི། ། ག་བུར་ཐུན་གཅིག་ཚ་ལ་ནི། ། བསྲེགས་པ་ཐུན་གཉིས་སྲད་དཀར་དང༌། ། མེ་ཏོག་ལུག་མིག་ཐུན་རེ་རེ། ། ཞིབ་བཏགས་སྦྲང་གིས་རིལ་བུར་དྲིལ། ། ནངས་མ་བཅུ་རུ་ལྟོ་སྟོངས་བཏང༌། ། ལོ་གཅིག་བར་དུ་ཐིག་ལེ་འཛིན། ། ཡང་ན་ཟངས་རྩི་དཀར་པོ་ཡི། ། ཁཎྜ་ཟླ་གཅིག་ཟོས་ཀྱང་འཛིན། ། མགྲོན་བུ་བུ་མར་དངུལ་ཆུ་བླུགས། ། རང་གི་རྐང་མཐིལ་དྲེག་པ་ཡིས། ། ཁ་བཅད་སྦྲ་ཚིལ་གྱིས་ཀྱང་བསྡོམ། ། སྦྱོར་བའི་དུས་སུ་ལྕེ་འོག་བཅུག། འོག་རླུང་ཅུང་བསྡོམས་ཐིག་ལེ་འཛིན། ། དེ་སྟེང་ས་བོན་བླུགས་ཀྱང་མཆོག། བྱ་བྲུན་མི་ཁྱིའི་རུས་པ་རྣམས། ། བཏགས་པའི་ལྡེ་གུ་རྡོ་རྗེར་བསྐུས། ། ས་བོན་འབྱུང་བ་འགོག་ཅེས་བཤད། ། རང་གི་ཏི་ལ་རྟག་ཏུ་ངུ༌། ། མེ་ཏོག་གཡུ་ལོ་དང་བཅས་པ། ། ར་འོར་བསྐོལ་ནས་མར་གསར་སྦྱར། ། ལྟོ་སྟོངས་བཏུང་ཞིང་གནམ་སྟོང་ལ། ། རྐང་མཐིལ་བྱུགས་པས་ཐིག་ལེ་འཛིན། ། གཞན་ཡང་ཌཱ་ཀི་སྦ་འདོད་ན། ། བྱ་རྒོད་ལྕེ་དང་འུག་པའི་མིག། སྐམ་ལ་ཞིབ་བཏགས་བྱ་རོག་གི ། ཁྲག་གིས་སྦྲུས་པའི་རིལ་བུ་ནི། ། གསེར་དངུལ་ཟངས་ཀྱིས་བཏུམས་ནས་སུ། ། སྔགས་འདི་ཉིས་འབུམ་བཟླས་ནས་གདབ། ། ཨོཾ་ཤ་མོག་ཤ་རི་དྷ་རི་སྭཱ་ཧཱ། ། དགོས་དུས་རྫས་དེ་ཁར་བཅུག་ན། ། མཁའ་ལ་འགྲོ་ཞིང་མི་སྣང་འགྲུབ། ། དངུལ་ཕོར་སྨུག་པའི་བུ་མོ་བསྐམས། ། ཕྱེ་མ་ཁྭ་ཏའི་ཚིལ་དང་སྦྱར། ། གོང་གི་སྔགས་བཏབ་ལུས་ལ་བྱུགས། ། གོང་རྫས་ཁར་བཅུག་མི་སྣང་མཆོག། ཁྭ་ཏའི་སྒྲིབ་ཤིང་ཆུ་ལས་བརྟག། ཁྱི་ནག་རུས་པ་མེ་ལོང་ལས། ། བྱི་ལ་ནག་མོའི་ཤ་མར་བཅས། ། རིལ་བུ་ལུས་འཆང་མི་མཐོང་ངོ༌། ། སྲིད་འབྱུང་བ་ཡིས་དོགས་པ་ལ། ། རྒྱ་སྐྱེགས་གླ་རྩི་ཤུགས་འགྲོའི་མཚལ། ། ལྟོ་སྟོངས་བཏང་བས་བགྲང་བྱ་ནི། ། རྩེ་མོའིསྲིད་པ་སྲུང་བར་གསུངས། ། སྲེ་མོའི་རྒྱུས་པ་སུམ་སྒྲིལ་གྱིས། ། སྲིན་ལག་གཡོན་པར་བསྡམས་ཀྱང་འགོག། རྒྱ་ཚྭ་མཛེ་ཚྭ་ཚ་ལ་དང༌། ། སྟར་བུ་ལན་ཚྭ་བུལ་ཏོག་དང༌། ། མཚུར་ནག་ཞིབ་བཏགས་སྦང་རྒོད་ཀྱིས། ། མགོ་བསྡུས་རིལ་བུ་སྲན་ཆུང་ཙམ། ། བཅུད་དང་མཉམ་པར་སུས་བཏང་བ། ། མེ་ཏོག་ལམ་དུ་དྲི་ཟ་མིན། ། གལ་ཏེ་སྲིད་འབྱུང་འདོད་པ་ན། ། སྲིད་སྤེལ་མན་ངག་བཞིན་དུ་བྱ། ། རྫས་དང་དམིགས་པ་སྔགས་ཀྱིས་ནི། ། སྙོམས་འཇུག་དུས་སུ་རབ་བསྐུལ་བས། ། ཡེ་ཤེས་ཆགས་པའི་ཌཱའ་ཀི་ནཱི། ། དབབ་པའང་མན་ངག་དག་ལས་ཤེས། ། ལྷ་མོ་རང་ལ་འདུན་པའི་ཕྱིར། ། ཨོཾ་ཙག་ཤུ་ཙེར་ལྡན་གུམ། ། སྔགས་འདི་བཟླས་ལ་ཁམས་འབབས་ཚེ། ། མཆིལ་མ་མོ་ཡི་ཁར་བླུགས་ན། ། རྟག་ཏུ་རང་དབང་ཁོ་ནར་འགྱུར། ། ཆགས་དང་བྲལ་ལ་རྣམ་གྲོལ་མེད། ། ཆགས་པ་བདེ་ཆེན་རྒྱུ་ཉིད་ཕྱིར། ། སྣང་སྲིད་ཆགས་པ་བསྡུས་ནས་ཀྱང༌། ། འོད་དམར་རྣམ་པས་རང་སེམས་བསྲེ། ། རང་སེམས་གདོད་ནས་མ་སྐྱེས་པས། ། ཆགས་པ་དམིགས་སུ་མེད་པ་ལ། ། དམིགས་མེད་རྗེས་སུ་ཆགས་པའི་གཟུགས། ། རྡོ་རྗེ་ཆོས་སུ་བདག་བསྒོམ་ཞིང༌། ། བདེ་ཆེན་ཆགས་པའི་འོད་དམར་པོས། ། སྣང་སྲིད་ཀུན་ཏུ་ཁྱབ་བྱས་པས། ། ཆགས་ཅན་མ་ལུས་རྣམ་གྲོལ་ཏེ། ། ཀུན་ཀྱང་བདེ་ཆེན་ངང་དུ་བསམ། ། ཨཾ་སོགས་ཕྱེད་དང་བཞི་པ་ཡི། ། གསང་སྔགས་མཆོག་ནི་ལེགས་བཟླས་ན། ། རྡོ་རྗེ་ཆགས་པའི་རྒྱལ་པོ་ནི། ། པདྨ་གཟི་ལྡན་འགྲུབ་ཅེས་གསུངས། ། དེ་རྣམས་ཞར་བྱུང་ཉེར་མཁོར་བསྡུས། ། གཞན་ཡང་ཟབ་མོའི་སྔགས་དམིགས་རྫས། ། རྫོགས་པའི་རིམ་པའི་མན་ངག་ནི། ། བརྒྱུད་ལྡན་བླ་མའི་ཞལ་ལས་བླང༌། ། འདོད་པས་འཆིང་བར་གྱུར་པ་ནི། ། འཆིང་བ་ཀུན་གྱི་ནང་ན་དམ། ། འདོད་པས་གྲོལ་བར་གྱུར་པ་ནི། ། གྲོལ་བ་ཀུན་གྱི་ནང་ན་མྱུར། ། དེ་ཕྱིར་འདོད་པ་ལ་བརྟེན་ནས། ། བདེ་ནས་བདེ་བར་གྲོལ་བའི་ཐབས། ། རྣལ་འབྱོར་ཆེན་པོ་སྔགས་ཀྱི་ནི། ། ཡེ་ཤེས་སྦྱོར་ཐབས་བདུད་རྩིའི་བཅུད། ། འཆིང་བའི་ནད་ཀྱིས་ཟིན་པ་ཡི། ། རྣམ་ཤེས་ལྡན་པས་བཙལ་བར་བྱ། ། དེ་ལས་བདེ་ཆེན་མཆོག་ཐོབ་ཅེས། ། རྡོ་རྗེ་འཆང་གིས་མངོན་པར་བསྔགས། ། དྲང་སྲོང་སྭ་ར་ཡཱ་ན་ཡི། ། འདོད་པའི་བསྟན་བཅོས་འབུམ་པ་ལས། ། ཀླུ་སྒྲུབ་ཀྱིས་བཏུས་སྟོང་ཕྲག་གཅིག། དེ་དོན་གཟུགས་བཟང་གིས་བསྡུས་སོགས། ། གཞུང་དང་རྒྱུད་དང་དགོངས་འགྲེལ་རིགས། ། སྣ་ཚོགས་ཆུ་གཏེར་ལྟ་བུ་ལས། ། དོན་བསྡུས་སྙིང་པོའི་ཟླ་བ་འདི། ། འདོད་ལྡན་སྐྱེ་བོའི་ཚོགས་རྣམས་ཀྱི། ། དགའ་བའི་རྒྱ་མཚོ་འཕེལ་ཕྱིར་དང༌། ། རྣལ་འབྱོར་ལྡན་པ་རྣམས་ཀྱི་ནི། ། ཡེ་ཤེས་སྣང་བ་གསལ་བའི་ཕྱིར། ། སྔགས་ཀྱི་དགོངས་འགྲེལ་ཡན་ལག་ཏུ། ། ཉུང་ངུའི་ངག་གིས་གསལ་བར་སྤེལ། ། སྔོན་ཆད་ཡོངས་སུ་མ་གྲགས་ཕྱིར། ། འདི་ཚུལ་འཆད་ལ་གངས་ཅན་པ། ། སོམ་ཉིའི་གཟེབ་ཏུ་ཆུད་མཐོང་ནས། ། བློ་གྲོས་སྟོབས་ཀྱིས་གསལ་བར་བྱས། ། ཟབ་མོའི་མན་ངག་གིས་བརྒྱན་པས། ། འདོད་པའི་བསྟན་བཅོས་གཞན་ལས་འཕགས། ། ས་སྟེང་ཀུན་དགའི་རོ་ལྡན་ཞིང༌། ། དངོས་གྲུབ་མཛོད་དང་ལྡན་པའོ། ། ཟླ་རྒྱས་མུན་པའི་རུམ་དུ་ཉལ་མིབྱེད། ། རྣམ་དཀར་བསམ་པ་ཉེས་པའི་ལམ་མི་འགྲོ། ། མཁས་པའི་བཞེད་ལ་འཕྱ་བའི་དམན་པ་སུ། ། ཁྲ་འདྲ་ངོ་ཚ་མེད་ལ་འདིས་ཅི་བགྱི། ། ཟབ་མོ་སྔགས་ཀྱི་ཚུལ་ལས་ལེགས་གསུངས་ཤིང༌། ། བློ་ཆེན་རྣམས་ཀྱིས་གསལ་བར་བྱས་པའི་དོན། ། ཕན་པའི་བསམ་པས་བརྗོད་ལ་ལེགས་བྱས་ཆ། ། གང་མཆིས་ཟླ་བ་ནོར་བུ་ཆུ་ཤེལ་བཞིན། ། མཐའ་བྲལ་དག་པའི་མཁའ་ལ་ཉེར་མཛེས་པས། ། འགྲོ་ཀུན་དགའ་བའི་ཀུ་མུད་རྒྱས་པ་དང༌། ། བཅུ་དྲུག་བདེ་བ་མཆོག་གི་ཆ་རྫོགས་ནས། ། གཞོམ་མེད་ལྷན་ཅིག་སྐྱེས་པ་གྲུབ་པར་ཤོག། ཅེས་པ་འདི་ནི་སྔགས་རྒྱུད་ནས་བསྟན་པའི་སྦྱོར་ཐབས་རྣམས་ཀྱི་དགོངས་པ་གསལ་བའི་ཕྱིར་དུ། མཁས་པ་སུ་མ་ཏི་སོགས་ཀྱིས་བསྐུལ་ནས། བཀའ་གཏེར་བསྟན་བཅོས་ཀྱི་རིམ་པ་རྣམས་ལས་བཏུས་ཏེ་བརྩམ་ཐོ་ཙམ་གྲུབ་པ་ལ། སླར་རབ་ཚེས་མི་ཟད་པའི་ལོའི་ཆོ་འཕྲུལ་ཟླ་བའི་དམར་ཕྱོགས་ཀྱི་བཟང་པོ་དང་རྒྱལ་བ་དང་པོའི་ཞག་གཉིས་ལ་གྲུབ་པར་བགྱིད་པ་པོ་ནི་མི་ཕམ་འཇམ་དབྱངས་རྣམ་རྒྱལ་ཏེ། འདིས་ཀྱང་འགྲོ་བ་ཀུན་ལ་དགེ་ལེགས་ཀྱི་དཔལ་ཕུན་སུམ་ཚོགས་པ་སྦྱིན་པར་གྱུར་ཅིག། མངྒ་ལཾ། །