སྔོན་ཚེ་འཛམ་གླིང་ནོར་བུ་དགྲ་འདུལ། མི་ཕམ།
དེ་ནས་སྣ་ཚོགས་ཕྲིན་ལས་བྲོ། ། དཔའ་བརྗིད་རྔམ་པའི་ཚུལ་གྱིས་བརྡུང༌། ། དགྲ་བླའི་ཆས་སམ་གང་མཛེས་སུ། ། འཇིགས་ལ་ཟིལ་ཆེ་སྙན་པའི་དབྱངས། ། རིག་པའི་བརྟུལ་ཞུགས་བཅས་ཏེ་བླང༌། ། ཧཱུྃཿ སྔོན་ཚེ་འཛམ་གླིང་ནོར་བུ་དགྲ་འདུལ། ། དགྲ་བླའི་སྐུ་ཆས་སྐུ་ལ་མནབ་ནས། ། བདུད་དང་སྲིན་པོ་འདུལ་དུ་གཤེགས་ཤིང༌། ། ནག་ཕྱོགས་ཧོར་བདུད་གདན་ལ་བཞུགས་ཚེ། ། དགྲ་བླ་ཝེར་མའི་དམག་དཔུང་འདུས་སོང༌། ། དགྲ་བླ་ཝེར་མའི་དམག་དཔུང་འདུས་སོང༌། ། འཇམ་དཔལ་རྣོན་པོ་ཤེས་རབ་རལ་གྲིས། ། ལྔ་ཕུང་སྒྱུ་མའི་དྲྭ་བ་བཤིག་ནས། ། ཤ་ཁྲག་དགྲ་བླའི་མཆོད་སྟོན་འགྱེད་སོང༌། ། དགྲ་བླ་དཔའ་བའི་གད་རྒྱང་བསྒྲགས་སོང༌། ། དགྲ་བླ་དཔའ་བའི༴ ས་སྟེང་བདུད་སྲིན་བསྟན་པ་ནུབ་སོང༌། ། ས་སྟེང་སོགས་ཉིས་བསྐྱར། དཀར་ཕྱོགས་དགའ་བའི་རྒྱལ་མཚན་བསྒྲེངས་སོང༌། ། དཀར་ཕྱོགས་དགའ༴ ལྷ་ཀླུས་སྐྱིད་པའི་བྲོ་གར་བརྡུང་སོང༌། ལྷ་ཀླུས་སྐྱིད༴ ཡང་ཅིག་འཛམ་གླིང་ལྷ་ཡི་ནོར་བུ། ། དགྲ་བླའི་སྐུ་ཆས་སྐུ་ལ་མནབ་ནས། ། རྫུ་འཕྲུལ་རྟ་རྒྱུག་མཛད་པ་བསྟན་ཞིང༌། ། རིན་ཆེན་གསེར་གྱི་ཁྲི་ལ་བཞུགས་ཚེ། ། དགྲ་བླ་ཝེར་མའི་དམག་དཔུང་འདུས་སོང༌། ། འདི་ཉིས་བསྐྱར་སོགས་གོང་གི་རིགས་འོག་མ་ཀུན་ལ་འགྲེས་ཤེས་པར་བྱ། རྟ་མཆོག་རོལ་པ་དབང་གི་ང་རོ། ། བཞད་པ་བརྒྱད་ཀྱི་དབྱངས་སུ་འཚེར་བས། ། སྣང་སྲིད་འདོད་དགུ་དབང་དུ་བསྡུས་ནས། ། དགྲ་བླ་དགྱེས་པའི་མཆོད་སྟོན་མཛད་སོང༌། ། ས་སྟེང་བདུད་སྲིན་བསྟན་པ་ནུབ་སོང༌། ། དཀར་ཕྱོགས་དགའ་བའི་རྒྱལ་མཚན་བསྒྲེངས་སོང༌། ། ལྷ་ཀླུས་སྐྱིད་པའི་བྲོ་གར་བརྡུང་སོང༌། ། ཡང་ཅིག་སེང་ཆེན་སྐྱེས་བུ་དོན་གྲུབ། ། དགྲ་བླའི་སྐུ་ཆས་སྐུ་ལ་མནབ་ནས། ། སྣ་ཚོགས་མཛད་པའི་རོལ་རྩེད་ངོམས་པས། ། མཐའ་བཞིའི་ཆེ་དགུ་ཆབ་འོག་འཛུད་ཚེ། ། དགྲ་བླ་ཝེར་མའི་དམག་དཔུང་འདུས་སོང༌། ། དགྲ་བླ་སོགས། མཐུ་སྟོབས་མཚུངས་པ་མེད་པའི་ལྷ་མཆོག། ཐོགས་མེད་རྡོ་རྗེའི་ནུས་རྩལ་ལྡན་པས། ། གང་འདོད་ཕྲིན་ལས་རང་དབང་བསྒྱུར་ནས། ། དགྲ་བླ་དགྱེས་པའི་མཆོད་སྟོན་མཛད་སོང༌། ། ས་སྟེང་བདུད་སྲིན་བསྟན་པ་ནུབ་སོང༌། ། ས་སྟེང་སོགས་ཉིས་བསྐྱར་སྔ་མ་ལྟར་རོ། ། དཀར་ཕྱོགས་དགའ་བའི་རྒྱལ་མཚན་བསྒྲེངས་སོང༌། ། ལྷ་ཀླུས་སྐྱིད་པའིབྲོ་གར་བརྡུང་སོང༌། ། ཡང་ཅིག་སྐྱེས་མཆོག་གེ་སར་རྒྱལ་པོ། ། བསམ་གྲུབ་བདེ་མཆོག་ནོར་བུའི་ཕོ་བྲང༌། ། བཀྲ་ཤིས་གསེར་གྱི་ཁྲི་ལ་བཞུགས་ཏེ། ། དད་དམ་དག་པ་འདུས་པའི་འཁོར་ལ། ། རང་སྣང་ཆོས་སྐུའི་དགོངས་པ་གཏད་ཚེ། ། མཐོང་བ་ཀུན་སྨོན་གླིང་དཀར་ཡུལ་གྱི། ། དཔའ་ཐུལ་དང་སྨན་འདུས་པའི་ཚོགས་ཀྱིས། ། རང་རིག་ཀུན་བཟང་དགོངས་པ་མཐོང་ནས། ། འཆི་མེད་འོད་ལུས་དྭངས་མ་འགྲུབ་སོང༌། ། དེ་ཚེ་རྩ་གསུམ་སྲུང་མའི་ཚོགས་རྣམས། །
ཡེ་ཤེས་དགྲ་བླ་ཝེར་མའི་རྣམ་པས། ། ངོ་མཚར་ཤིས་པའི་གད་རྒྱང་བསྒྲགས་སོང༌། ། ངོ་མཚར་ཤིས་སོགས་ཉིས་ཟེ། ས་སྟེང་བདུད་སྲིན་བསྟན་པ་ནུབ་སོང༌། ། དཀར་ཕྱོགས་དགའ་བའི་རྒྱལ་མཚན་བསྒྲེང་སོང༌། ། ལྷ་ཀླུས་སྐྱིད་པའི་བྲོ་གར་བརྡུང་སོང༌། །འདི་ནས་དབྱངས་དལ་བུས་ལུས་ཀྱི་སྟབས་རྣམས་བྱ་སྟེ། ལག་གཡས་ཐབས་ཆེན་དཔའ་བོའི་ཕྱག་རྒྱ། ། གཡས་གྱེན་ དུ་གདངས། རྔམ་རྔམ་ནམ་མཁའི་ཁམས་ལ་གདེངས་སོང༌། ། ལག་གཡོན 
་ཤེས་རབ་དཔའ་མོའི་ཕྱག་རྒྱ། ། མཛེས་མཛེས་ས་གཞིའི་ངོས་ལ་གཏད་སོང༌། ། ལག་
གཡོན་མཛེས་པ་བསྒྱུར་ཞིང་ཐུར་དུ ་ཕབ། རྐང་པ་གཡས་གཡོན་སྟོང་ཉིད་སྙིང་རྗེ། ། ལྡེམ་ལྡེམ་གཡོ་བའི་བྲོ་ར་འགྲིགས་སོང༌། ། རྡོག་བྲོ་རས་འཐབ་དང་མཉམ་སྡེབ། རོ་སྟོད་དགྱི་དགུ་གཡུ་འབྲུག་འཁྱུག་འགྲོས། ། སྟོད་འཁྱུག་ལྡེམ། རྐང་པ་དམར་ཡག་སྟག་གི་མཆོངས་སྟངས། ། རྐང་འདེགས་མཆོང་ཆེན། ལག་པ་ཁྱུང་ཆེན་གཤོག་པའི་ལྡིང་སྟབས། ། བརྐྱང་འདེགས། མགོ་བོ་སེང་གེ་རྔམ་པའི་ལྟ་སྟངས། ། ཕྱོགས་སུ་བརྗིད་བར་བལྟ། ཝེར་མ་ལུས་ལ་ཆགས་པའི་སྒྱུ་རྩལ། ། ཁམས་གསུམ་ཟིལ་གནོན་བྲོ་ཡི་སྟབས་ཀྱིས། ། མི་འདོད་དགྲ་བདུད་ཆམ་ལ་ཕབ་སོང༌། ། འཁྲབ་ཆུང༌། མི་འདོད་དགྲ་བདུད་ཆམ་ལ་ཕབ་སོང༌། ། འཁྲབ་ཆེན། དེ་ནས་དལ་བུས་བྲོ་གྲལ་གཡས་སུ་བསྐོར་ལ། གཡས་བསྐོར་ཕོ་རྒྱུད་དཔའ་བོའི་དཔའ་དར། ། གཡོན་དུ ་བསྐོར་ལ། གཡོན་སྐོར་མོ་རྒྱུད་དཔའ་མོའི་དཔའ་སྐྱེམས། ། བྲོ་ཡི་རོལ་རྩེད་དེ་རིང་ངོམས་ན། ། དགྲ་བླ་དགྱེས་པའི་དབུ་འཕང་བསྟོད་ཅིང༌། ། ཝེར་མ་དགའ་བའི་ངོ་སོ་མཐོ་བའི། ། དགའ་སྟོན་བྲོ་གར་རྟེན་འགྲེལ་འདི་ཡིས། ། རྒྱལ་ཁམས་ཡོངས་ལ་བཀྲ་ཤིས་རྒྱས་ཤིང༌། ། འདིར་ཚོགས་ཡོངས་ལ་དགེ་ལེགས་འཕེལ་ཤོག། ཕྱོགས་ལས་རྣམ་པར་རྒྱལ་བའི་རྟེན་འབྲེལ། ། དེ་རིང་ལྷུན་གྱིས་འགྲིགས་པར་ཤོག་ཅིག། ཨ་ཏེ་ཧོ། ཨ་ཏེ་ཧོ། ཞེས་འཁྲབ་ལ་རྒྱ་རོལ་བསྒྲགས། དེ་ནས་དཔའ་སྐྱེམས་དྲངས་བར་བྱའོ། ། བྲོ་ལེའུ་ཚན་གསུམ་པའོ། །