ལེའུ་བཞི་པ་འཁོར་བ་སྡུག་བསྔལ་གྱི་ཚོམས།

༈ གཉིས་པ་སྐྱེས་བུ་འབྲིང་དང་ཐུང་མོང་བའི་ལམ་དུ་བདེན་པ་བཞི་ལ་བློ་སྦྱོང་བར་བྱེད་པ་འཁོར་བའི་སྡུག་བསྔལ་གཙོ་བོར་སྟོན་པའི་ལེའུ་ལ་གཉིས་ཏེ། སྐྱེས་བུ་འབྲིང་གི་ལམ་དངོས། དེ་ཉིད་སྐྱེ་མེད་དུ་ཤེས་པས་དོན་བསྡུ་བའོ། །དང་པོ་སྐྱེས་བུ་འབྲིང་གི་ལམ་དངོས་ལའང་གཉིས་ཏེ། བདེན་བཞི་བཤད་པ་དང༌། རྟེན་འབྲེལ་ཡན་ལག་བཅུ་གཉིས་བཤད་པའོ། །དང་པོ་བདེན་པ་བཞི་བཤད་པ་ལ་གཉིས་ཏེ། སྤྱིའི་དོན་དང༌། གཞུང་གི་དོན་ནོ། །དང་པོ་སྤྱིའི་དོན་ལ་བཞི་སྟེ། ངོ་བོ། རྣམ་པ། སྒྲ་དོན། གོ་རིམ་མོ། །དང་པོ་བདེན་པ་བཞི་རང་རང་གི་ངོ་བོ་ནི།

སྡུག་བསྔལ་ནི་འཁོར་བའི་སྣོད་བཅུད་གཉིས་པོ་འདི་ཐམས་ཅད་ཡིན། ཀུན་འབྱུང་ནི་ལས་དང་ཉོན་མོངས་པ་གཉིས་ཡིན་ཏེ། ལས་ནི་འཁོར་བར་འཕེན་བྱེད་ཀྱི་དགེ་བ་དང་མི་དགེ་བ་སོགས་ཡིན། ཉོན་མོངས་པ་ནི་ལས་དེ་ཀུན་ནས་སློང་བའི་ཉོན་མོངས་པ་ཆགས་སྡང་རྨོངས་གསུམ་ཡིན། འགོག་པ་ནི་སྡུག་བསྔལ་དང་ཀུན་འབྱུང་གཉིས་པོ་དེ་ལམ་གྱི་མཐུས་སྤངས་བའི་ཆ་དེ་དང༌། སྤོང་གཞི་ཆོས་ཉིད་དེ་བཞིན་ཉིད་དང་གཉིས་ཀ་ཡིན། ལམ་ནི་ཁ་ཅིག་མཐོང་སྒོམ་གཉིས་ཁོ་ན་ལ་འདོད་ཀྱང་གཙོ་ཕལ་ཙམ་ལས་ལམ་ལྔ་ཡོངས་རྫོགས་ཡིན།

གཉིས་པ་དེ་དག་གི་རྣམ་པ་བཅུ་དྲུག་ནི།

སྐད་ཅིག་གིས་སྐྱེ་འགག་བྱེད་པས་མི་རྟག་པ། གང་ཅི་ཚོར་ཡང་རུང་སྡུག་བསྔལ་ལས་མ་འདས་པས་སྡུག་བསྔལ་བ། ང་ཡི་བའི་དངོས་པོ་རྣམས་ལ་བདག་པོ་མེད་པས་སྟོང་པ། གང་ཟག་གི་གདགས་གཞི་མེད་པས་བདག་མེད་པ་སྟེ་སྡུག་བསྔལ་གྱི་རྣམ་པ་བཞི། འཁོར་བའི་སྡུག་བསྔལ་ཐམས་ཅད་འབྱུང་བས་ཀུན་འབྱུང༌། སྡུག་བསྔལ་ཐམས་ཅད་ཀྱི་རྩ་བར་འགྱུར་པས་རྒྱུ། སྡུག་བསྔལ་དྲག་པོ་འཕྲལ་དུ་བསྐྱེད་པས་རབ་སྐྱེ། སྡུག་བསྔལ་ཉམས་སུ་མྱོང་བའི་མཚམས་སྦྱོར་བས་རྐྱེན་དང་བཞི་སྟེ་ཀུན་འབྱུང་གི་རྣམ་པ། མ་འོངས་པའི་སྡུག་བསྔལ་དང་ཀུན་འབྱུང་གི་རྒྱུན་འགོག་པས་འགོག་པ། འཁྲུལ་བའི་ཉོན་མོངས་པ་ཐམས་ཅད་ཞི་བས་ཞི་བ། ཕུན་སུམ་ཚོགས་པ་མཆོག་གི་ཆོས་ཡིན་པས་གྱ་ནོམ་པ། སླར་མི་ལྡོག་པར་འཁོར་བ་ལས་ངེས་པར་ཐར་བས་ངེས་པར་འབྱུང་བ་དང་བཞི་སྟེ་འགོག་པའི་རྣམ་པ། གོང་ནས་གོང་དུ་བགྲོད་པར་བྱ་བས་ལམ། ཉོན་མོངས་པའི་གཉེན་པོ་བྱེད་པས་རིགས་པ། སེམས་ཕྱིན་ཅི་མ་ལོག་པར་བསྒྲུབ་པས་སྒྲུབ་པ། གཏན་དུ་ཐར་པ་མྱང་འདས་ཀྱི་གནས་སུ་འཁྲིད་པས་ངེས་པར་འབྱིན་པ་དང་བཞི་ནི་ལམ་བདེན་གྱི་རྣམ་པའོ།།

གསུམ་པ་སྒྲ་དོན་ནི།

བསྟན་པ་དང་མི་མཐུན་པ་མེད་པ་དང༌། དེ་མཐོང་ན་རྣམ་པར་དག་པའི་རྒྱུར་འགྱུར་པའི་དོན་ནི་བདེན་པའོ། །ཞེས་གསུངས་པས་བདེན་པ་བཞིའི་མཚན་ཉིད་འདི་ལྟར་ཡིན་ནོ་ཞེས་སངས་རྒྱས་ཀྱིས་བསྟན་པའི་དོན་ཇི་ལྟ་བ་བཞིན་ཡུལ་བདེན་བཞི་རང་རང་གི་ངོས་ནས་མི་མཐུན་པ་མེད་པས་ན་ཡུལ་གྱི་ངོས་ནས་བདེན་པ་དང༌། བདེན་བཞིའི་མཚན་ཉིད་ཇི་ལྟར་བསྟན་པ་དེ་ལྟར་ཤེས་ན་ཤེས་པའི་བློ་དེ་ཡང་མ་ནོར་བ་ཡིན་པས་ན་ཡུལ་ཅན་གྱི་ངོས་ནས་བདེན་པའོ། །དེ་ཡང་བདེན་བཞི་རང་རང་གི་མཚན་ཉིད་ཇི་ལྟར་གནས་པ་དེ་འཕགས་པ་རྣམས་ཁོ་ནས་མཁྱེན་པས་ན་འཕགས་པའི་བདེན་པར་བཞག་ལ། སོ་སྐྱེས་རྣམས་ལ་སྡུག་བསྔལ་ཀུན་འབྱུང་སོགས་རང་ལ་ཡོད་ཀྱང་དེ་དག་གི་མཚན་ཉིད་ཇི་ལྟ་བར་མི་ཤེས་པས་ཕྱིན་ཅི་ལོག་ཏུ་འཛིན་པས་ན་དེ་དག་གི་བདེན་པར་མ་བཞག་གོ།

བཞི་པ་གོ་རིམ་ནི།

ལམ་མངོན་པར་རྟོགས་པའི་གོ་རིམ་དང་སྦྱར་ནས་བཞག་སྟེ། རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་ཕྱིར་སྨན་ནི་བསྟེན་པ་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིགས་པར་བྱ་ཞིང་བསྟེན་པར་བྱ། །ཞེས་པ་ལྟར་དང་པོ་སྡུག་བསྔལ་ཤེས་པར་བྱས་ནས་འཁོར་བ་ལ་ངེས་འབྱུང་བསྐྱེད། དེ་ནས་སྡུག་བསྔལ་གྱི་རྒྱུ་ཀུན་འབྱུང་སྤངས་ཏེ་འགོག་པ་མངོན་དུ་བྱ་བར་འདོད་པས་ལམ་རྒྱུད་ལ་བསྟེན་པའི་གོ་རིམ་དང་སྦྱར་ནས་དེ་ལྟར་བཞག་སྟེ། དེ་ཡང་འཁོར་བའི་རྒྱུ་ཀུན་འབྱུང་ཡིན་ལ། དེའི་འབྲས་བུ་སྡུག་བདེན་ཡིན་པས་དེ་གཉིས་ཀུན་ནས་ཉོན་མོངས་པའི་ཕྱོགས་དང༌། མྱ་ངན་ལས་འདས་པའི་རྒྱུ་ལམ་བདེན་དང༌། འབྲས་བུ་འགོག་བདེན་ཏེ་དེ་གཉིས་རྣམ་པར་བྱང་བའི་ཕྱོགས་སོ།།

གཉིས་པ་གཞུང་གི་དོན་ལ་གཉིས་ཏེ། མདོར་བསྟན་པ་དང༌། རྒྱས་པར་བཤད་པའོ། །དང་པོ་མདོར་བསྟན་པ་ནི།

མངོན་མཐོའི་གྲུ་བོ་མཆོག་ལ་བསྟེན་པ་རྣམས། །རེ་ཞིག་ངན་སོང་ཆུ་སྲིན་གདུག་པའི་ལྕེས།།

བཏང་ཡང་ཐར་པའི་སྐམ་སར་མ་ཕྱིན་པས།།

འཕགས་པའི་བདེན་པ་བཞི་ཡིས་དེད་དཔོན་༴བསྟེན།།10

དེ་ཡང་ལས་འབྲས་ལ་བླང་དོར་བྱེད་པ་དེ་སྐྱེས་བུ་འབྲིང་གི་ལམ་གྱི་ཐབས་ཤེས་ཀྱིས་ཇི་ལྟར་ཟིན་ནས་ཉམས་སུ་ལེན་པའི་ཚུལ་འཁོར་ལོ་དང་པོའི་གཏམ་དང་འབྲེལ་བར་སྟོན་ཏེ། འདི་ལྟར་སྲིད་པའི་གནས་རིས་ན་མངོན་པར་མཐོ་བའི་ལྷ་དང་ཁྱད་པར་མི་ཡི་འགྲོ་བ་དག དཔེར་ན་རྒྱ་མཚོ་ཆེན་པོའི་ནང་དུ་གྲུ་བོ་ཆེ་ལ་ཞུགས་ནས་འགྲོ་བ་རྣམས་གནས་སྐབས་ཆུ་སྲིན་གྱི་ཁར་ཚུད་པ་སོགས་ཉམས་ཉེས་པར་མ་གྱུར་ཀྱང་ཕ་རོལ་ཏུ་མ་ཕྱིན་བར་དུ་དེད་དཔོན་མཁས་པ་ལ་བསྟེན་དགོས་པ་ལྟར་འཁོར་བའི་རྒྱ་མཚོ་ལས་སྒྲོལ་བའི་ལུས་རྟེན་གྲུ་བོ་ཆེ་མཆོག་ལ་བསྟེན་པ་ཡིན་ནའང༌། དེ་རྣམས་རེ་ཞིག་ཚེ་འདི་ལ་ངན་སོང་གསུམ་གྱི་ཆུ་སྲིན་གདུག་པའི་ལྕེས་བཏང་བ་སྟེ། དེ་རུ་ལྷུང་ཟིན་པ་མ་ཡིན་ཡང་ཐར་པ་མྱ་ངན་ལས་འདས་པའི་སྐམ་ས་སྲེད་དང་ཉོན་མོངས་པའི་རླན་དང་བྲལ་བར་མ་ཕྱིན་ཏེ།

རྩེ་མོ་ཐོབ་པ་རྩ་མི་འཆད། །བཟོད་ཐོབ་ངན་སོང་ལྟུང་མི་སྲིད། །ཅེས་པ་ཙམ་ཡང་མ་ཐོབ་པས་གཏན་གྱི་བཙན་ས་མ་ཟིན་བར་དུ་འཕགས་པའི་བདེན་པ་བཞི་ཡི་མངོན་རྟོགས་རྣལ་འབྱོར་དུ་བྱེད་པའི་དེད་དཔོན་བསྟེན་པར་བྱའོ་ཞེས་གཟུགས་ཅན་གྱི་རྒྱན་དུ་སྦྱར་བ་སྟེ། དེ་ཡང་བདག་ཅག་གི་སྟོན་པས་ཝཱ་ར་ཎཱ་སིར་ལྔ་སྡེ་བཟང་པོ་སོགས་ལ།

དགེ་སློང་དག་འདི་ནི་སྡུག་བསྔལ་ལོ། །འདི་ནི་ཀུན་འབྱུང་ངོ༌། །འདི་ནི་འགོག་པའོ། །འདི་ནི་ལམ་མོ། །ཞེས་ངོ་བོའི་སྒོ་ནས་དང༌། ཡང་དགེ་སློང་དག་སྡུག་བསྔལ་ཤེས་པར་བྱའོ། །ཀུན་འབྱུང་སྤང་བར་བྱའོ། །འགོག་པ་མངོན་དུ་བྱའོ། །ལམ་རྒྱུད་ལ་བསྟེན་པར་བྱའོ། །ཞེས་རྒྱུའི་སྒོ་ནས་དང༌། ཡང་དགེ་སློང་དག སྡུག་བསྔལ་ཤེས་ཟིན་ཤེས་པར་བྱ་བ་གཞན་མེད། ཀུན་འབྱུང་སྤངས་ཟིན་སྤང་བར་བྱ་བ་གཞན་མེད། འགོག་པ་མངོན་དུ་བྱས་ཟིན་མངོན་དུ་བྱ་བ་གཞན་མེད། ལམ་རྒྱུད་ལ་བསྟེན་ཟིན་བསྟེན་པར་བྱ་བ་གཞན་མེད། ཅེས་འབྲས་བུའི་སྒོ་ནས་ཏེ་བཟློས་ཏེ་ལན་གསུམ་དུ་གསུངས་པ་བཞིན་ཤེས་པར་བྱའོ།།

གཉིས་པ་རྒྱས་པར་བཤད་པ་ལ་གཉིས་ཏེ། སྡུག་བསྔལ་གྱི་བདེན་པ་རྒྱས་པར་བཤད་པ་དང༌། བདེན་པ་ལྷག་མ་གསུམ་རྒྱས་པར་བཤད་པའོ། །དང་པོ་སྡུག་བསྔལ་གྱི་བདེན་པ་རྒྱས་པར་བཤད་པ་ལའང་གཉིས་ཏེ། འཁོར་བ་སྤྱིའི་སྡུག་བསྔལ་དང༌། རིགས་དྲུག་སོ་སོའི་སྡུག་བསྔལ་བཤད་པའོ། །དང་པོ་འཁོར་བ་སྤྱིའི་སྡུག་བསྔལ་བཤད་པ་ལ་བཞི་སྟེ། སྡུག་བསྔལ་གྱི་རང་བཞིན་ཁྱབ་ཆེ་བར་བསྟན་པ། སྡུག་བསྔལ་ཉེ་བར་ལེན་པའི་རྐྱེན་བཤད་པ། སྡུག་བསྔལ་གྱི་གནོད་པ་མཐུ་ཆེ་བར་བ་སྟན་པ། སྡུག་བསྔལ་གྱི་རྣམ་གྲངས་ཡུན་རིང་བར་བསྟན་པའོ། །དང་པོ་སྡུག་བསྔལ་གྱི་རང་བཞིན་ཁྱབ་ཆེ་བར་བསྟན་པ་ནི།

དེ་ལ་སྡུག་བསྔལ་ཤེས་པར་བྱ་བ་ནི། །གནས་རིགས་དྲུག་པོ་དམའ་འམ་མཐོ་ཡང་རུང༌།།

སྡུག་བསྔལ་འགྱུར་དང་ཁྱབ་པ་འདུ་བྱེད་ཀྱིས།།

དམ་ལ་མ་བཞག་འཁོར་བ་ཡོད་མ་ཡིན།།

དེ་ལྟར་འཕགས་པའི་བདེན་པ་བཞི་པོའི་མངོན་རྟོགས་སྒོམ་པའི་ཚུལ་དེ་ལ། དང་པོ་སྡུག་བསྔལ་གྱི་མཚན་གཞི་འཁོར་བའི་སྣོད་བཅུད་ཐམས་ཅད་སྡུག་བསྔལ་གྱི་རང་བཞིན་དུ་ཤེས་པར་བྱ་བ་ནི། འདི་ལྟར་འཁོར་བའི་གནས་རིགས་དྲུག་པོ་དམའ་བ་ངན་སོང་གསུམ་པོའམ། མངོན་པར་མཐོ་བ་ལྷ་མི་ལྷ་མིན་གསུམ་གང་ཡིན་ཡང་རུང་སྟེ། སྡུག་བསྔལ་སྔ་ཕྱི་བར་མ་ཆད་པས་བསྟུད་མར་མནར་བ་སྡུག་བསྔལ་གྱི་སྡུག་བསྔལ་ཏེ་དཔེར་ན་མཛེ་ཐོག་ཏུ་ཕོལ་གྱིས་གཏུགས་པ་ལྟ་བུ་དང༌། བདེ་བར་ཡོད་འཕྲོ་ལ་སྡུག་བསྔལ་གྱི་རྐྱེན་དང་འཕྲད་ནས་སྡུག་བསྔལ་བ་འགྱུར་བའི་སྡུག་བསྔལ་སྟེ། དཔེར་ན་ནགས་ཁྲོད་དུ་སྐྱོ་སངས་ལ་ཕྱིན་པ་དུག་སྦྲུལ་གྱིས་གཙེས་པའམ། ཁ་ཟས་རོ་བདའ་བ་ཟོས་པས་སྲིན་ཕོ་བར་ལངས་པ་ལྟ་བུ་དང༌། རྣམ་པ་ཀུན་ཏུ་ཉོན་མོངས་པ་ཅན་གྱི་ཡིད་ཀྱིས་སྡིག་པའི་ལས་ལྐོག་གྱུར་དུ་བྱས་པའང་ཕྱིའི་སྡུག་བསྔལ་གྱི་རང་བཞིན་མངོན་གྱུར་དུ་འདུ་བྱེད་པ་ནི་ཁྱབ་པ་འདུ་བྱེད་ཀྱི་སྡུག་བསྔལ་ཏེ། དཔེར་ན་འཇམ་དུག་ཁོང་དུ་སོང་བས་ཕྱིས་ནད་འདུ་བྱེད་པ་དང༌། བཙན་པོ་དང་གདོན་ཆེན་པོ་སོགས་ལ་གནོད་པ་བྱས་པས་གནོད་ལན་དུ་འདུ་བྱེད་པ་གདོན་མི་ཟ་བ་ལྟར་རོ། །དེས་ན་སྡུག་བསྔལ་གསུམ་པོ་མཐའ་དག་པའམ་ཅི་རིགས་ཀྱིས་དམ་ལ་མ་བཞག་པའི་འཁོར་བ་ཡི་གནས་ནི་གང་ཡང་ཡོད་པ་མ་ཡིན་ཏེ། དེ་ཡང་ངན་སོང་གསུམ་ན་སྡིག་པའི་འབྲས་བུ་སྡུག་བསྔལ་གྱི་ཚོར་བ་མངོན་གྱུར་བ་དང་ལྡན་པས་དང་པོ་དང༌། མི་དང་འདོད་ལྷའི་གནས་ན་དགེ་བའི་འབྲས་བུ་བདེ་བ་མངོན་གྱུར་བ་དང་ལྡན་པས་གཉིས་པ་དང༌། ཁམས་གོང་མ་གཉིས་ན་མི་གཡོ་བའི་ལས་ཀྱི་འབྲས་བུ་ཚོར་བ་བཏང་སྙོམས་དང་ལྡན་པས་སྔར་བསགས་པའི་སྡིག་པའི་ལས་དུ་མ་བག་ཉལ་དུ་ཡོད་ཀྱང་དེའི་འབྲས་བུ་སྡུག་བསྔལ་མངོན་གྱུར་མིན་པར་འབྱུང་རུང་དུ་ཡོད་པ་དང༌། དགེ་བའི་ལས་ཀྱི་འབྲས་བུ་འདོད་པར་སྨིན་རུང་འགྱུར་བའི་སྡུག་བསྔལ་ཡང་དེ་བཞིན་དུ་ཡོད་པས་གསུམ་པ་ཤས་ཆེ་བར་ཡོད་དོ། །དེའི་ཕྱིར་འཁོར་བའི་རང་བཞིན་ནི་སྡུག་བསྔལ་ཁོ་ན་སྟེ། ལས་རྣམ་འབྱེད་ལས།

སྲིད་པའི་སྡུག་བསྔལ་ནི་བསིལ་བའི་སྐབས་མེད་པ་མེའི་འོབས་ལྟ་བུའོ། །འཇིགས་ཤིང་ཉམ་ང་བ་གཅན་གཟན་ཁྲོ་བོ་ལྟ་བུའོ། །མི་རྒོད་ཀྱི་ནང་ན་གནས་པ་ལྟ་བུའོ། །ཐར་པའི་གོ་སྐབས་དང་བྲལ་བའི་རྒྱལ་པོའི་ཁྲི་མུན་ལྟ་བུའོ། །ཡང་ནས་ཡང་དུ་འབྱུང་བས་རྒྱ་མཚོའི་རླབས་ལྟ་བུའོ། །བདེ་འགྲོའི་སྲོག་འཇོམས་པས་དུག་ཧ་ལ་ཧ་ལ་ལྟ་བུའོ། །ཞེས་གསུངས་སོ།།

གཉིས་པ་སྡུག་བསྔལ་ཉེ་བར་ལེན་པའི་རྐྱེན་བཤད་པ་ནི།

ཕུང་དཀྲོལ་བསྐྱེད་ལ་མགོ་འཕང་བསྟོད་པ་ཡི། །མ་རུངས་འདོད་པའི་གདོན་དང་ཡུལ་གྱི་དུག།

ཕན་ཚུན་འཛིངས་ཤིང་གཏུགས་པའི་བཙོན་ར་ནས། །ཐར་པའི་སྐབས་མེད་ཉམ་ཐག་སྐྱོ་བ་འཕེལ།།

བདེ་བ་འདོད་ལ་མངོན་སྦྱོར་བརྩོན་པ་དག །གཏི་མུག་མཐུས་ནོན་སྡུག་བསྔལ་རྒྱུ་འབྲས་ཀྱི།།

མཚོན་ཆ་རྣོན་པོའི་དབལ་ལ་བརྟེན་བྱས་པས། །གནོད་པའི་གནས་སུ་རང་ཉིད་ཡང་དག་སྦྱར།།

མར་མེའི་གཟུགས་དང་ཕྱེ་མ་ལེབ་བཞིན་དུ། །སྒྲ་དང་དྲི་རོ་རེག་བྱས་བསླུ་བ་ནི།།

རི་དྭགས་བུང་བ་ཉ་དང་གླང་པོ་ཆེ།།

འདོད་པའི་ཡུལ་ལྔ་དག་དང་རྟེན་ཅིང་འབྲེལ།།

འདི་ལྟར་འཕྲལ་ཕུགས་ཀུན་ཏུ་ཕུང་ཁྲོལ་ཏེ་གནོད་པའི་རྒྱུ་འབྲས་མཐའ་དག་པ་བསྐྱེད་པར་བྱེད་པ་ལ་དུག་སྦྲུལ་གདུག་པ་མགོ་འཕང་བསྟོད་པ་ཡི་གནོད་པ་ལྟར་ཤིན་ཏུ་མ་རུངས་པ་ནི་ནང་དུ་སེམས་ཚུལ་བཞིན་མ་ཡིན་པར་ཡིད་ལ་བྱེད་པའི་དབང་གིས་འཁྲུལ་སྣང་ལ་མངོན་པར་ཞེན་པ་འདོད་པའི་གདོན་དང༌། ཕྱི་རོལ་གཟུགས་སྒྲ་ལ་སོགས་པའི་ཡུལ་གྱི་དངོས་པོ་ནི་དང་པོ་མྱོང་བ་ན་བདེ་བ་ལྟར་སྣང་ཡང་ཕྱིས་གནོད་པར་འགྱུར་བའི་དུག་དང་འདྲ་སྟེ། དེ་གཉིས་ཕན་ཚུན་ཡུལ་གྱི་རྣམ་པས་སེམས་བསླད་དེ་ལྕགས་བསྲེགས་པའི་དུས་ཀྱི་ཚ་བ་ལྟར་འཛིངས་ཤིང་གཏུགས་ཏེ་འདོད་པའི་ཉེས་དམིགས་ཤེས་པའི་བློ་གྲོས་ནི་མེད། གལ་ཏེ་ཅུང་ཟད་ཤེས་ཀྱང་བག་ཆགས་ངན་པའི་རྒྱུན་བརྟན་པས་གཉེན་པོའི་མཐུ་ནི་ཞན། ཉོན་མོངས་དང་རྣམ་རྟོག་ནི་ཆུ་བོ་ཤུགས་དྲག་པོའི་རྒྱུན་ལྟར་བཟློག་པའི་ཐབས་ནི་ཤིན་ཏུ་དཀའ་བས་ན་འཆིང་བྱེད་ཀྱི་སྒྲོག་དམ་པོས་བཅིངས་པའི་འཁོར་བའི་བཙོན་ར་དེ་ནས་ཐར་པའི་གོ་སྐབས་མེད་པར་སྡུག་བསྔལ་གྱིས་གདུངས་ཤིང་ཉམ་ཐག་པའི་རང་ཅག་འཁོར་བའི་སྐྱེ་བོ་རྣམས་ཀྱི་ངང་ཚུལ་ལ་བསམ་ན་སྙིང་ནས་སྐྱོ་བ་འཕེལ་བའི་གནས་སུ་གྱུར་བས་རྟག་ཏུ་དྲན་ཤེས་བག་ཡོད་ཀྱིས་སེམས་བསྲུངས་ཏེ་འདོད་པ་ལས་ཡིད་དབྱུང་བར་བྱ་སྟེ། བཤེས་སྤྲིང་ལས།

གཡོ་བའི་སེམས་ནི་ཐོས་མཚུངས་བུ་ལྟ་བུ། །གཏེར་བཞིན་སྲོག་དང་འདྲ་བར་བསྲུང་བགྱི་སྟེ། །གདུག་པ་དུག་དང་མཚོན་དང་དགྲ་བོ་དང༌། །མེ་བཞིན་འདོད་པའི་བདེ་ལས་ཡིད་དབྱུང་མཛོད། །ཅེས་སོ། །འདོད་པའི་ཡུལ་ལྔ་པོ་སོ་སོས་བསླུ་བར་འགྱུར་བའི་ཚུལ་ཡང༌། སྲིད་པར་འཁོར་བའི་སྐྱེ་བོ་བདེ་བ་འབའ་ཞིག་འདོད་ནས་དེ་སྒྲུབ་པའི་བྱ་བ་ལ་མངོན་པར་སྦྱོར་ཞིང་སྒོ་གསུམ་དུབ་པའི་ཚེགས་ཆེན་པོས་རྟག་ཏུ་བརྩོན་པ་དག་དེའི་རྒྱུ་དགེ་བ་ཡིན་པར་མི་ཤེས་པའམ། ཤེས་ཀྱང་ཉོན་མོངས་པ་མཐུ་ཆེ་བའི་དབང་དང༌། སྡུག་བསྔལ་འདོར་བར་འདོད་ཀྱང་དེའི་རྒྱུ་མི་དགེ་བ་ཡིན་པར་མི་ཤེས་པའམ་ཤེས་ཀྱང་སྡུག་བསྔལ་གྱི་རྒྱུ་ལ་བདེ་བར་ཞེན་པ་ལ་སོགས་པ་ལས་དང་འབྲས་བུའི་གནས་ལ་རྨོངས་པའི་གཏི་མུག་གི་མཐུས་ནོན་ཏེ་དགེ་བའི་ཕྱོགས་ལ་བརྩོན་པ་དོར་ནས་ལུས་སེམས་བདེ་བའི་ཕྱིར་ལོག་པར་གཡེམ་པ་སོགས་སྡུག་བསྔལ་གྱི་རྒྱུ་སྣ་ཚོགས་བསགས་ནས་དེའི་འབྲས་བུ་སྡུག་བསྔལ་དངོས་ཀྱི་མཚོན་ཆ་རྣོན་པོའི་སོ་དབལ་ལ་བརྟེན་པར་བྱས་པས་ན་འཕྲལ་དང་ཡུན་གྱི་གནོད་པ་དུ་མའི་གནས་སུ་གཞན་གྱིས་མ་ཡིན་པར་རང་གིས་རང་ཉིད་ཡང་དག་པ་སྟེ་ངེས་པར་སྦྱར་བར་བྱེད་དེ། སྤྱོད་འཇུག་ལས།

སྡུག་བསྔལ་འདོར་འདོད་སེམས་ཡོད་ཀྱང༌། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །ཞེས་སོ། །ཇི་ལྟར་ཞེ་ན། བུད་མེད་མཛེས་མའི་ལུས་ལ་སོགས་པའི་གཟུགས་ཡིད་དུ་འོང་བ་ལ་མིག་ཤེས་ཆགས་པ་ལས་འདི་ཕྱིའི་སྡུག་བསྔལ་དུ་མ་བྱེད་པ་ནི། མར་མེའི་གཟུགས་མཛེས་པ་དང་ཡིད་དུ་འོང་བ་ལ་ཆགས་ནས་ཕྱེ་མ་ལེབ་བསྲེགས་ནས་འཆི་བ་ལྟ་བུ་སྟེ། སློབ་དཔོན་དབྱིག་གཉེན་གྱིས།

འབར་བ་ཆེན་པོའི་ཚོགས་དག་གི །མེ་ཆེན་དག་ནི་མཐོང་ནས་ཀྱང༌། །གཟུགས་ལ་ཆགས་པ་ཆེན་པོ་ཡང༌། །ཕྱེ་ལེབ་མེ་ལ་འཇུག་པར་འགྱུར། །ཞེས་སོ། །དེ་བཞིན་དུ་བསྟོད་པ་དང་སྙན་པར་གྲགས་པ་ལ་སོགས་པའི་སྒྲ་ལ་རྣ་ཤེས་དང༌། ཐ་མ་ཁ་ལ་སོགས་པའི་དྲི་ལ་སྣ་ཤེས་དང༌། ཤ་ལ་སོགས་པའི་རོ་ལ་ལྕེ་ཤེས་དང༌། བུད་མེད་དང་དར་གོས་ལ་སོགས་པའི་རེག་བྱ་ལ་ལུས་ཤེས་ཞེན་ནས་ཐར་པའི་སྲོག་ལ་རྒོལ་ཞིང་བདེ་བའི་ཚོགས་བཅོམ་སྟེ་བསླུ་བར་འགྱུར་བ་ནི། རིམ་པ་བཞིན། རྔོན་པའི་པི་ཝང་དང་གླུ་དབྱངས་ལ་ཆགས་ནས་རི་དྭགས་དུག་མདའ་ལ་སོགས་པས་གསོད་པ་ཡང༌། སློབ་དཔོན་གྱིས།

རྩྭ་ཡི་མྱུ་གུ་གཙང་མ་ཟ། །ཤིན་ཏུ་རིང་དུ་འགྲོ་ནུས་པ། །རི་དྭགས་རྔོན་པའི་གླུ་དབྱངས་ཀྱིས། །ངེས་པར་གསོད་པ་ཚོལ་བར་འགྱུར། །ཞེས་དང༌། མེ་ཏོག་གི་དྲི་ལ་ཞེན་ནས་བུང་བ་དེར་འཐུམས་ཏེ་འཆི་བའང༌། རྟག་ཏུ་ནམ་མཁའ་ལ་རྒྱུ་ཞིང༌། །གཟུགས་ནི་ཤིན་ཏུ་ཡིད་འོང་བའི། །བུང་བ་དྲི་ཡི་ཉེས་པ་ཡིས། །ངེས་པར་འཆི་བར་འགྱུར་པ་ཡིན། །ཞེས་དང༌། ཉ་རྣམས་ལྕགས་ཀྱུའི་རྩེ་ལ་གནས་པའི་རོས་བསླུས་པའང༌། བཀག་པ་མེད་པའི་ལམ་འགྲོ་ཞིང༌། །རྟག་ཏུ་རྣམ་པར་རྒྱུ་བ་ཡང༌། །རོ་མྱོང་བ་ལ་ཆགས་པ་ཡིས། །ཉ་ནི་ལྕགས་ཀྱུས་རླག་པར་བྱེད། །ཅེས་དང༌། གླང་པོ་ཆེ་དགའ་མའི་རེག་བྱ་ལ་ཞེན་པས་སྲོག་དང་ཕྲལ་བ་ཡང༌། ས་སྲུང་དང་ནི་རབ་འགྲན་ཞིང༌། །རི་ཡི་རྒྱལ་པོ་རྒྱུན་ཤེས་བྱའི། །བན་གླང་མོ་ཡི་ཉེ་རེག་གིས། །ངེས་པར་གླང་པོ་གསད་སར་སོང༌། །ཞེས་པ་ལྟར། འདོད་པའི་ཡུལ་ལྔ་པོ་རེ་རེ་དག་གིས་ཀྱང་བསླུས་ཏེ་སྲོག་དང་བྲལ་བར་ནུས་ན། སྐྱེས་བུ་རྣམས་ནི་རྟག་ཏུ་ཐམས་ཅད་དང་རྟེན་ཅིང་འབྲེལ་པ་ཡིན་པས་ཅིའི་ཕྱིར་ཉམས་ཉེས་པར་མི་འགྱུར་ཏེ། དེ་སྐད་དུ་སྔ་མ་ལས།

སྐྱེས་བུ་དག་ནི་གཅིག་ལ་ཡང༌། །ལྔ་པོ་འདི་དག་རྟག་ལྡན་ཞིང༌། །ཉིན་མཚན་དུ་ནི་རབ་འཇོམས་ན། །བདེ་བའི་གནས་ཅི་ཐོབ་པར་འགྱུར། །ཞེས་བཤད་དོ།།

གསུམ་པ་སྡུག་བསྔལ་གྱི་གནོད་པ་མཐུ་ཆེ་བར་བསྟན་པ་ནི།

སྲིད་པའི་ཡུལ་ལ་ཐུ་བ་གཏུམ་པོའི་མེ། །ཁྲོ་བའི་མངོན་སྤྱོད་རྩུབ་པ་གཅན་གཟན་དང༌།།

མི་རྒོད་རྒྱལ་པོའི་ཆད་པ་ལས་མྱུར་བའི།།

སྡུག་བསྔལ་སྔ་ཕྱི་བརྒྱུད་མས་འགྲོ་འདི་མནར།།

སྲིད་པ་འཁོར་བའི་ཡུལ་འདི་ལ་རྟག་ཏུ་གནས་པ་རྣམས་ཀྱི་སྡུག་བསྔལ་གྱི་གནོད་པ་ནི་ཤུགས་དྲག་ལ་ཡུན་རིང་སྟེ། འཇིག་རྟེན་ན་ཐུ་བ་གང་དང་འཕྲད་པ་ཙམ་གྱིས་ཚར་གཅོད་པར་བྱེད་པ་གཏུམ་པོའི་མེ་ཡིན་ནའང༌། དེ་བས་ཀྱང་འཕགས་པ་རྣམས་ཀྱིས་སྲིད་རྩེ་མན་ཆད་མེ་འབར་བ་ལྟ་བུའི་སྡུག་བསྔལ་ཅན་དུ་རྟག་པར་གཟིགས་པ་ཡིན་ལ། དེ་བཞིན་དུ་འབྲོག་དགོན་ཆེན་པོ་བཤེས་མེད་ཀྱི་གནས་སུ་ཁྲོ་ཞིང་འཚེ་བའི་མངོན་པར་སྤྱོད་པ་རྩུབ་པ་སྟག་དང་སེང་གེ་སོགས་གཅན་གཟན་དང་མི་རྒོད་ཀྱིས་གཙེས་ནས་འབྲོས་པའི་ཐབས་འགགས་པའམ། ལན་བྱེད་པའི་ནུས་པ་ཟད་པས་སྡུག་བསྔལ་བ་དེ་བས་སྲིད་པར་ཉིང་མཚམས་སྦྱོར་བའི་དུས་སུ་བར་དོ་མྱ་ངམ་གྱི་ཐང་ཆེན་པོར་འཁྱམས་ནས་འཇིགས་སྐྲག་དང་སྡུག་བསྔལ་བཟོད་དཀའ་བས་གཙེས་པར་འགྱུར་བ་དང༌། རྒྱལ་པོའི་ཆད་པས་བཙོན་དོང་དུ་བཅུག་ནས་ཡན་ལག་ལྕགས་སྒྲོག་གིས་བསྡམ། མི་གཙང་བའི་དཀྱིལ་དུ་ཉལ། བདེ་བར་བརྐྱང་བསྐུམ་བྱེད་ས་ནི་མེད། མིག་དང་སྙིང་དང་པགས་པའི་སྟེང་དུ་སྤུ་གྲིའི་དབལ་གྱིས་འཚེ་བར་ཉེ་བ་དེ་ལས་ཀྱང་ཤུགས་མྱུར་ཞིང་རྒྱུན་རིང་བའི་སྡུག་བསྔལ་ནི་ཐར་དུས་མེད་པའི་འཁོར་བའི་བཙོན་དོང་གཏིང་རིང་པོར་ཞུགས་ཏེ་རྩ་བའི་སྡུག་བསྔལ་ཆེན་པོ་ གསུམ་དང་སྐྱེ་རྒ་ན་འཆི་སོགས་ཡན་ལག་གི་སྡུག་བསྔལ་བརྒྱད་སྔ་ཕྱི་བརྒྱུད ་མར་འབྱུང་བའི་སྒྲོག་དམ་པོས་བཅིངས། ལས་ངན་གྱི་མི་གཙང་བས་གོས། བདེ་བའི་སར་རང་སྟོབས་ཀྱིས་དབུགས་མི་ཕྱིན། འོག་འགྱུ་དང་རྣམ་རྟོག་ངན་པའི་མཚོན་རྩེ་རྣོན་པོས་ཤེས་རབ་ཀྱི་མིག་དང༌། བཟོད་པའི་སྙིང་དང༌། དགེ་ཚོགས་ཀྱི་པགས་པའི་སྟེངདུ་འཛུགས་ཤིང་གཟིར་བས་འགྲོ་བ་འདི་རྣམས་མནར་བར་འགྱུར་བ་ཡིན་ནོ།།

བཞི་པ་སྡུག་བསྔལ་གྱི་རྣམ་གྲངས་ཡུན་རིང་བར་བསྟན་པ་ནི།

བདག་ལ་བཤེས་སམ་མི་མཐུན་ཉེ་དང་འཁོན། །བསམ་པར་མི་ནུས་མཐའ་དག་སེམས་ལྡན་གྱིས།།

དགྲ་དང་མཛའ་བཤེས་བར་མའི་ཕྱོགས་བཟུང་ནས། །ཕན་དང་གནོད་པ་སྦྱིན་པ་བསམ་ལས་འདས།།

རྡུལ་ཕྲན་ལྟ་བུའི་ལུས་ཀྱི་བདག་གཅིག་པུའི། །སྲོག་རྟེན་གཟུགས་སུ་གྱུར་དང་འདོད་པའི་ཕྱིར།།

མགོ་དང་ཡན་ལག་བཅད་གཏུབས་བགྱིས་སོ་ཅོག །སྤུངས་ན་ལྷུན་པོའི་ཆེ་ཐང་ཉམས་པར་འགྱུར།།

དམྱལ་གནས་ཟངས་ཞུན་ཁོལ་མ་འཐུངས་པ་དང༌། །ཡི་དྭགས་ལུས་གྱུར་རྣག་ཁྲག་མི་གཙང་ཟོས།།

ཀུན་ཏུ་སྡུག་བསྔལ་རྒྱུ་ལས་མཆི་མ་ཟགས།།

ཕྱོགས་མཐའ་གཏུགས་པའི་ཆུ་ཀླུང་དག་ལས་མང༌།།

འཇིག་རྟེན་ན་གྲགས་པ་ཤིན་ཏུ་བརྟན་ཅིང་གོམས་པས་འདི་ནི་བདག་གི་མཛའ་བཤེས་སོ། །འདི་ནི་བདག་གི་དགྲ་བོར་གྱུར་པའོ། །འདི་ནི་ཕའོ། །འདི་ནི་ཕའི་ཕྱོགས་ཀྱི་ཉེ་དུ་རིགས་དང་རུས་ལ་བརྟེན་པའོ། །འདི་ནི་མའོ། །འདི་ནི་མའི་ཕྱོགས་ཀྱི་ཆོ་འབྲང་གི་བདག་ཉིད་ཅན་ནོ། །འདི་ནི་བར་མའོ། །བར་མ་ནི་བཏང་སྙོམས་ཀྱི་ཡུལ་ལ། མཛའ་བཤེས་ནི་ཕན་འདོགས་པའི་ཡུལ་ལོ། །དགྲ་བོ་ནི་ཚར་བཅད་པའི་གནས་སོ། །བུ་དང་བུ་མོ་སོགས་ནི་ཡིད་བཅུགས་པའི་གནས་སོ་ཞེས་ཞེན་ཅིང་ཆགས་སྡང་ལ་སོགས་པ་བྱེད་ཀྱང་རིགས་པ་མིན་ཏེ། ཐོག་མ་མེད་པ་ནས་འཁོར་བའི་གནས་འདི་རུ་བདག་ལ་ཕན་འདོགས་པའི་བཤེས་སམ་མཐུན་མི་མཐུན་གང་ཡང་མིན་པའི་བར་མ་དང༌། ཉེ་བའི་གཉེན་དང༌། འཁོན་པའི་དགྲ་འདི་ཙམ་མོ་ཞེས་གྲངས་བསམ་པར་མི་ནུས་ཏེ། ཅིའི་ཕྱིར་ཞེ་ན་མཐའ་དག་སྟེ་མ་ལུས་པའི་སེམས་ལྡན་ཀུན་གྱི་ནང་ནས་རེ་རེས་ཀྱང་དགྲ་དང་གཉེན་བཤེས་དང་བར་མའི་ཕྱོགས་གསུམ་བཟུང་ནས། ཕ་མ་སོགས་གཉེན་བཤེས་སུ་གྱུར་པ་ན་ཕན་བཏགས་པ་དང༌། དགྲར་གྱུར་པའི་ཚེ་ན་གནོད་པ་སྦྱིན་པ་དང༌། བར་མར་གྱུར་པ་ན་བཏང་སྙོམས་སུ་འདུག་པའི་ཚུལ་བསམ་པའི་ཡུལ་ལས་འདས་པ་སྙེད་ཅིག་མཆིས་ན་སེམས་ཅན་ཐམས་ཅད་ཀྱིས་སྨོས་ཀྱང་ཅི་དགོས། དེས་ན་སྐྱེ་བ་སྔ་ཕྱིའི་དུས་ཀྱི་དགྲ་གཉེན་ལ་ངེས་པ་མེད་པའི་ཚུལ། བཤེས་སྤྲིང་ལས།

ཕ་ནི་བུ་ཉིད་མ་ནི་ཆུང་མ་ཉིད། །སྐྱེ་བོ་དགྲར་གྱུར་པའང་བཤེས་ཉིད་དང༌། །བཟློག་པ་ཉིད་དུ་མཆི་བས་དེ་སླད་དུ། །འཁོར་བ་དག་ན་ངེས་པ་འགའ་མ་མཆིས། །ཞེས་སོ། །དེར་མ་ཟད་རང་གི་ཚེ་གཅིག་ཙམ་ལ་ཡང་དགྲ་གཉེན་ངེས་པ་མེད་དེ། འཕགས་པ་ཀཱ་ཏྱཱ་ནས།

ཁྱིམ་བདག་གཅིག་ལ་བསོད་སྙོམས་བསླངས་པས། དེས་དགྲ་བོ་བུ་ཆུང་དུ་གྱུར་པ་པང་དུ་ཐོགས། ཕ་ཉ་རུ་གྱུར་པ་བཟའ་ཞིང་མུར། མ་ཁྱི་རུ་སྐྱེས་ནས་ཉ་རུས་འཆའ་བ་ལ་བརྡེག་པ་གཟིགས་ནས། ཕ་ཤ་ཟ་ཞིང་མ་ལ་བརྡེག །ལས་ངན་དགྲ་བོ་པང་དུ་ཁུར། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་བྲོ། །ཞེས་གསུངས། སྐྱེ་བ་ཡང་ཡང་བླངས་པའི་དུས་ནའང་འདི་ནི་བདག་གི་མའོ། །འདི་ནི་བདག་གི་མ་དེའི་ཡང་མའོ་ཞེས་པ་ལ་སོགས་པ་མ་ཁོ་ནའི་བརྒྱུད་པའི་གྲངས་ཡང་བགྲངས་པ་ལས་འདས་ཏེ། སྔ་མ་ལས།

མ་ཡི་ཐུག་མཐའ་རྒྱ་ཤུག་ཚིག་གུ་ཙམ། །རིལ་བུར་དྲིལ་ཀྱང་ས་ཡིས་ལང་མི་འགྱུར། །ཞེས་སོ། །རྣམ་པ་ཐ་དད་པའི་ལུས་ཡང་ཡང་དོར་བའི་ཚུལ་ལ་བསམ་ན་ཡང་འདི་ལྟར། སྲོག་ཆགས་གྲོག་སྦུར་ལ་སོགས་པ་ཤིན་ཏུ་ཕྲ་བ་རྡུལ་ཕྲན་ལྟ་བུའི་སེམས་ཅན་མང་པོའི་ལུས་ཀྱི་རྣམ་གྲངས་སྨོས་ཅི་འཚལ་ཡང༌། བདག་ཉིད་གཅིག་པུའི་སྲོག་གི་རྟེན་དུ་འོས་ཙམ་པ་ཤིན་ཏུ་ཕྲ་བའི་གཟུགས་སུ་གྱུར་པ་དེ་དང༌། ཡང་འདོད་པའི་དངོས་པོ་སྒྲུབ་པའི་ཕྱིར་མགོ་དང་ཡན་ལག་དང་ཉིང་ལག་རྣམས་མཚོན་ཆ་ལ་སོགས་པས་བཅད་གཏུབས་བགྱིས་སོ་ཅོག་གི་དངོས་པོ་དེ་རྣམས་གལ་ཏེ་མེད་དུ་མ་སོང་བར་ཕྱོགས་གཅིག་ཏུ་སྤུངས་པར་བྱས་ན་དཔག་ཚད་བརྒྱད་ཁྲི་པའི་རི་རྒྱལ་ལྷུན་པོའི་ཆེ་ཐང་ཡང་ཉམས་ཏེ་དེ་བས་ཆེས་ཆེ་ཞིང་ལྷག་པར་འགྱུར་ཞིང༌། ཚ་དམྱལ་གྱི་གནས་སུ་ལན་གྲངས་མང་པོར་སྐྱེས་ཤིང་སྐྱེ་བ་ལན་རེའི་ཚེ་ནའང་ཡུན་རིང་པོར་ཟངས་ཞུན་ཁོལ་མ་འཐུངས་པ་དང༌། ཡི་དྭགས་ཀྱི་ལུས་སུ་གྱུར་ནས་རྣམ་པ་ཐམས་ཅད་དུ་མ་ཡིན་པར་བརྒྱ་ལ་རེས་འགའ་རེར་རྣག་ཁྲག་དང་ཕྱི་ས་སོགས་མི་གཙང་བ་ཅུང་ཟད་རེ་རྙེད་པ་ཟོས་པ་དང༌། འཁོར་བའི་གནས་མཐོ་དམན་ཀུན་ཏུ་ལུས་སེམས་སྡུག་བསྔལ་བའི་རྒྱུ་ལས་ངུས་པའི་མཆི་མ་ཟག་པ་རྣམས་ཀྱང་གལ་ཏེ་བསོགས་ན་གླིང་བཞིའི་ནང་ནས་ཕྱོགས་ཀྱི་མཐའ་ལ་གཏུགས་པའི་རྒྱ་མཚོར་འབབ་པའི་ཆུ་ཀླུང་དག་ལས་ཀྱང་མང་བར་མདོ་སྡེ་དྲན་པ་ཉེར་བཞག་ལས་གསུངས་པས། སྔོན་གྱི་དུས་སུ་ཡུན་དེ་ཙམ་ཞིག་ཏུ་སྡུག་བསྔལ་བར་གྱུར་པའི་ཚུལ་ལ་སྙིང་ཐག་པ་ནས་སྐྱོ་བ་བསྐྱེད་དེ་ཕྱིན་ཆད་ཀྱི་སྲིད་རྒྱུན་གཅོད་པའི་ཐབས་མ་ནོར་བ་ལ་བརྩོན་པར་བྱ་དགོས་སོ།།

གཉིས་པ་རིགས་དྲུག་སོ་སོའི་སྡུག་བསྔལ་བཤད་པ་ལ་གཉིས་ཏེ། ངན་སོང་གི་སྡུག་བསྔལ་བཤད་པ་དང༌། མཐོ་རིས་ཀྱི་སྡུག་བསྔལ་བཤད་པའོ། །དང་པོ་ངན་སོང་གི་སྡུག་བསྔལ་བཤད་པ་ལ་ལྔ་སྟེ། ཚ་དམྱལ་བརྒྱད་ཀྱི། ཉེ་འཁོར་ལྷག་པ་བཅུ་དྲུག་གི གྲང་དམྱལ་བརྒྱད་ཀྱི། ཉེ་ཚེ་བའི་སྡུག་བསྔལ་བཤད་པ། སྐབས་ཀྱི་དོན་བསྡུ་བའོ། །དང་པོ་ཚ་དམྱལ་བརྒྱད་ཀྱི་སྡུག་བསྔལ་བཤད་པ་ནི།

ཁྱད་པར་དམྱལ་བའི་སྡུག་བསྔལ་ཚད་མེད་དེ།།

ཕན་ཚུན་གཅིག་གིས་གཅིག་གསོད་ཡང་སོས་ལ།།

སྤྱིར་འཁོར་བའི་གནས་ཐམས་ཅད་སྡུག་བསྔལ་གྱི་རང་བཞིན་ལས་མ་འདས་ཀྱང་ཁྱད་པར་ངན་སོང་གསུམ་དང༌། དེའི་ནང་ནས་ཀྱང་དམྱལ་བའི་སྡུག་བསྔལ་གྱི་ཚད་ནི་བཟུང་དུ་མེད་དེ་མཐའ་ཡས་པའི་ཕྱིར་རོ། །དེ་ལྟ་ནའང་རིགས་བསྡུས་ཏེ་ཕྱོགས་ཙམ་སྟོན་པར་བྱས་ན་འདི་ལྟར་ཚ་དམྱལ་བརྒྱད་ཀྱི་སྤྱི་མཐུན་གྱི་སྡུག་བསྔལ་ནི་གཞི་དང་ཁོར་ཡུག་ཐམས་ཅད་ལྕགས་བསྲེགས་པའི་རང་བཞིན་མེ་ལྕེ་ཁྲུ་གང་ཙམ་དུ་རྒྱུན་མི་འཆད་པར་འབར་བ་དེར་ལུས་ཀྱི་ཆ་ཤས་གང་ཕྲད་ཀྱང་དེ་མ་ཐག་སྲེག་པར་བྱེད་ལ་རྟག་ཏུ་མེ་འབར་ཡང་ལས་ཀྱི་མུན་པ་སྟུག་པོས་རྟག་ཏུ་ཁེབས་ནས་དམུས་ལོང་ལ་ཉི་མའི་སྣང་བས་མི་ཕན་པ་བཞིན་མེ་འབར་བ་དེས་སྣང་བས་བྱ་བ་མི་བྱེད་པར་ལག་པ་བརྐྱང་བསྐུམ་ཙམ་ཡང་མི་མཐོང་ངོ༌།།

དེ་ལ་ཚ་དམྱལ་གྱི་གནས་དང་པོ་ཡང་སོས་ནི། ལྕགས་ཀྱི་མདག་མེ་འབར་བའི་སྟེང་དུ་གནས་བཞིན་ཕན་ཚུན་གཅིག་གིས་གཅིག་མཐོང་ན་དགྲ་མི་ཤ་བོ་མཐོང་བ་བཞིན་ཞེ་སྡང་དྲག་པོ་སྐྱེས་ནས་ལས་ལས་བྱུང་བའི་མཚོན་ཆ་སྣ་ཚོགས་པས་ཡན་ལག་དང་ཉིང་ལག་གཅོད་ཅིང་བརྡེག་པས་གསོད་པ་ན་ནམ་མཁའ་ནས་ཡང་སོས་པར་གྱུར་ཅིག་ཅེས་པའི་སྒྲ་གྲགས་པའི་མོད་ལ་སླར་ཡང་སོས་ནས་སྔར་བཞིན་སྡུག་བསྔལ་བ་ཡིན་ལ། འདི་དག་ཏུ་སྐྱེ་བའི་རྒྱུ་སྤྱིར་ལས་འབྲས་ཀྱི་སྐབས་སུ་བཤད་པ་ལྟར་ལ། བྱེ་བྲག་སོ་སོའི་རྒྱུ་དྲན་པ་ཉེ་བར་བཞག་པའི་ཚིག་ལེའུར་བྱས་པ་ལས་བྱུང་བ་ནི། འདི་ལྟ་སྟེ།

མི་གང་མི་ནི་གསོད་པ་དང༌། །གཞན་ཡང་བསྐྱེད་ནས་གསོད་བྱེད་པ། །དེ་དག་ངེས་པར་ཡང་སོས་འགྲོ། །ཞེས་སོ།།

གཉིས་པ་ཐིག་ནག་ནི།

ཐིག་ནག་སོག་ལེས་གཤོག་འབྱར་རྒྱུན་མི་འཆད།།

གཅོད་པའི་འཁྲུལ་འཁོར་གྱིས་མནར་བར་བྱེད་དེ་གཤིན་རྗེའི་སྐྱེས་བུ་རྣམས་ཀྱིས་དེར་འཁོད་ཀྱི་སེམས་ཅན་དག་གི་ལུས་རིའི་གསེབ་བམ་ལྕགས་ཀྱི་གཞིར་བཅུག་ནས་ཐིག་ནག་པོ་བརྒྱད་དང་བཅུ་དྲུག་ནས་གྲངས་མེད་པར་བཏབ་སྟེ་དེར་མེ་འབར་བའི་སོག་ལེས་གཤོག་ཅིང་སླར་འབྱར་བ་སྔར་བཞིན་གཤོག་པའི་སྡུག་བསྔལ་རྒྱུན་མི་འཆད་པ་མྱོང་བར་འགྱུར་རོ། །དེའི་རྒྱུ་ཡང༌།

ཕ་མ་དང་ནི་གྲོགས་དང་གཉེན། །བཤེས་གཉེན་ལ་ནི་འཁུ་བྱེད་དང༌། །ཕྲ་མ་རྫུན་ནི་སྨྲ་བའི་མི། །ཐིག་ནག་ཏུ་ནི་འགྲོ་བར་འགྱུར། །ཞེས་སོ།།

གསུམ་པ་བསྡུས་འཇོམས་ནི།

བསྡུས་འཇོམས་མགོ་བརྙན་རི་དང་ཐོ་བས་འཐག།

སེམས་ཅན་མང་པོ་ཕྱོགས་གཅིག་ཏུ་ལས་མཁན་རྣམས་ཀྱིས་བསྡུས་ཏེ་དེད་ནས་ཐག་པའི་འཁྲུལ་འཁོར་གྱིས་འཇོམས་པར་བྱེད་པ་སྟེ། ད་ལྟ་བསད་པའི་སྲོག་ཆགས་ཀྱི་མགོ་བརྙན་དུ་ཡོད་པའི་བྲག་རི་ཕན་ཚུན་འཐབ་པའི་བར་དུ་ཡང་ཡང་འཚིར་བ་དང༌། ཡང་ལྕགས་ཀྱི་གཏུན་ཆེན་པོ་མེ་འབར་བའི་ནང་དུ་སེམས་ཅན་མང་པོ་བཅུག་ནས་ཐོ་བ་འབར་བ་རི་ཙམ་གྱིས་འཐག་པར་བྱེད་དོ།།

རྒྱུ་ནི། ར་དང་ལུག་དང་ཝ་ཕག་དང༌། །རི་བོང་བྱི་བ་རི་དྭགས་ཕག །གཞན་ཡང་བསྐྱེད་ནས་བསད་བྱས་ན། །ལུས་ཅན་བསྡུས་འཇོམས་འགྲོ་བར་འགྱུར། །ཞེས་སོ།།

བཞི་པ་ངུ་འབོད་ནི།

ངུ་འབོད་ལྕགས་ཞུན་བཀོལ་བར་༴འཚོད་ཅིང་དབད།།11

ངུ་འབོད་དྲག་པོ་འདོན་པའི་སྡུག་བསྔལ་གྱིས་གདུང་སྟེ། ལྕགས་ཀྱི་ཞུན་ཁུ་བསྐོལ་བར་ལས་ངན་པའི་སེམས་ཅན་མང་པོ་འཚོད་ཅིང་མེ་འབར་བའི་ཐོ་བ་དང་རལ་གྲི་ལ་སོགས་པས་དབད་པ་དང༌། དེར་གནས་ཚོལ་བ་རྣམས་ལྕགས་ཁྱིམ་རིམ་པ་གཅིག་པར་ཆུད་དེ་མེ་ལྕེ་དྲག་པོས་གདུངས་ནས་འོ་དོད་འབོད་པའོ།།

རྒྱུ་ནི། འདིར་ནི་ལུས་ཅན་གང་དག་གིས། །ལུས་དང་ངག་ཡིད་ཉོན་མོངས་བྱེད། །གང་དག་ལྷད་འཇུག་གཞན་གཡོ་བྱེད། །མི་དེ་དག་ནི་ངུ་འབོད་འགྲོ། །ཞེས་སོ།།

ལྔ་པ་ངུ་འབོད་ཆེན་པོ་ནི།

འབོད་སྒྲོག་ཆེན་པོ་ལྕགས་ཁྱིམ་འབར་བར་བསྲེག།

དེ་བས་ཀྱང་སྡུག་བསྔལ་གྱི་རྣམ་གྲངས་ཆེ་བས་འབོད་སྒྲོག་གི་སྒྲ་ཆེན་པོ་འདོན་པ་སྟེ། ལྕགས་ཀྱི་ཁང་ཁྱིམ་འབར་བ་ཉིས་རིམ་དུ་བཙུད་པར་བྱས་ཏེ་བསྲེགས་ཤིང་སྡུག་བསྔལ་བས་འོ་དོད་སྔར་བས་ཆེ་བ་འདོན་པའོ། །རྒྱུ་ནི། གང་གིས་ལྷ་དང་བྲམ་ཟེ་དང༌། །བླ་མའི་རྫས་འཕྲོག་སྡུག་བསྔལ་བྱས། །གང་དག་གཏམས་པ་འཕྲོག་བྱེད་པ། །དེ་དག་ངུ་འབོད་ཆེན་པོར་འགྲོ། །ཞེས་སོ།།

དྲུག་པ་ཚ་བ་ནི།

ཚ་བ་གསལ་ཤིང་འབར་བས་ལུས་ལ་འབིགས།།

ལྕགས་ཀྱི་གཞི་ཀུན་ནས་འབར་བར་གན་རྐྱལ་དུ་བསྙལ་ནས་ཐོ་བས་བརྡུང་ཞིང་མེས་བསྲེགས་པས་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་མེ་རེག་བྱ་ཤིན་ཏུ་ཚ་བ་དག་གིས་གདུང་བ་དང༌། ལྕགས་ཀྱི་གསལ་ཤིང་མེ་རབ་ཏུ་འབར་བས་ལུས་ལ་ཐལ་མར་འབིགས་པས་སྡུག་བསྔལ་ལོ།།

བདུན་པ་རབ་ཏུ་ཚ་བ་ནི།

རབ་ཏུ་ཚ་བ་མདུང་ཐུང་རྩེ་གསུམ་ལས། །ལུས་ཀྱི་གཞུང་འབིགས་ཕྱི་ནས་ལྕགས་བསྲེགས་དཀྲི།།

ཁྲོ་ཆུ་ཁོལ་མར་འཚོད་དང་་་་་་་་་་།

མེ་མཚོན་གྱི་གནོད་པས་སྔ་མ་བས་ཀྱང་ཆེས་རབ་ཏུ་ཚ་བའི་སྡུག་བསྔལ་མྱོང་དགོས་པ་སྟེ། མདུང་ཐུང་རྩེ་གསུམ་པས་རྐང་མཐིལ་གཉིས་དང་འོག་སྒོ་ནས་ཕུག་པས་མགོ་དང་ཕྲག་པ་གཉིས་ཏེ་གསུམ་དུ་ཐོན་པ་དང༌། ཡང་ཀླད་པ་དང་ཐལ་གོང་གཉིས་ནས་ཕྱིར་ལུས་ཀྱི་གཞུང་འབིགས་པར་བྱས་པས་ནང་ཁྲོལ་ཐམས་ཅད་ཚིག་ཅིང༌། ཕྱི་ནས་ལྕགས་ཀྱི་ལེབ་མ་བསྲེགས་ཤིང་འབར་བས་མར་མེའི་སྡོང་བུ་བཞིན་ཏུ་དཀྲི་བས་ལུས་ཀྱི་ཕྱི་ཐམས་ཅད་ཚིག་པར་འགྱུར་བ་དང༌། ཡང་ལྕགས་ཟངས་ཀུན་ཏུ་འབར་བའི་ནང་ཁྲོ་ཆུ་བསྐོལ་མར་ཁ་སྦུབ་ཏུ་འཛུད་པར་བྱས་ནས་འཚོད་ཅིང་སྟེང་དུ་ཐོན་རེས་མཚོན་ཆ་སྣ་ཚོགས་ཀྱིས་དབད་པ་སྟེ། དེ་ལྟར་བསྲེགས་ཤིང་འཚེད་པས་པགས་པ་དང་ཤ་ཁྲག་འཐོར་ནས་ཀེང་རུས་ཙམ་གྱི་རྟེན་ལ་སྡུག་བསྔལ་བ་དང་གཉིས་པོ་ནི་དབད་པའི་འཁྲུལ་འཁོར་ཅན་ནོ། །དེ་ལྟར་ཡང་ཙནྡྲ་གོ་མིས།

ཁ་ཅིག་འབྲུ་མར་བསྐོལ་བའི་ཟངས་ཆེན་ནང་དུ་ལྷུང༌། །གཞན་བདག་བྱེ་མ་བསྲེགས་པའི་མེ་སྟག་འཕྲོ་བ་ཡིས། །ས་གཞི་རྐང་པ་བཞག་པའི་གནས་མི་ཐོབ་པར་ལྟུང༌། །ཞེས་དང༌། རབ་ཏུ་ཚ་བའི་ཁྱད་པར་ཡང༌།

དམྱལ་མེ་དུ་བ་ཆེ་དཀུ་མནམ་པ་འཐུལ་བས་གནམ་མདོག་འགྱུར། །མེ་ལྕེ་ལག་མང་རྣམ་པར་འཕྲོས་ནས་ཕྱོགས་ཀྱི་དཀྱིལ་འཁོར་ཁེབས། །རུས་གོང་དཀར་དུམ་ཕྲེང་བའི་རྒྱན་གྱིས་སྤུད་པ་སྐྱི་གཡའ་བ། །གླང་ཆེན་གོས་གྱོན་སྡིག་ཐབས་ཀྱེ་མ་ཀྱི་ཧུད་ཟེར་བ་བཞིན། །ཞེས་སོ།།

བརྒྱད་པ་མནར་མེད་པ་ནི།

་་་་་་་་་་མནར་མེད་ནི།།

ལྕགས་ཁྱིམ་འབར་བར་མེ་དང་གཉིས་མེད་བསྲེགས།།

འདིའི་སྡུག་བསྔལ་ངོ་བོ་དབལ་ཚ་ཞིང་རྣམ་པ་གྲངས་མང་བ། བར་དང་མཚམས་མེད་པའི་ཕྱིར། དེ་ལས་ལྷག་པ་མནར་དུ་མེད་པས་ན་དེ་སྐད་ཅེས་བྱ་སྟེ། དེ་ནི་འདི་ལྟར་ཕྱོགས་དང་སྟེང་འོག་ཐམས་ཅད་ཀུན་ཏུ་འབར་བའི་ལྕགས་ཁྱིམ་དུ་ཚུད་ནས་རྩྭ་སྐམ་ལ་མེ་འབར་བ་རླུང་གིས་བསྐྱོད་པ་བཞིན་དེར་ཤ་དང་ཆུ་རྒྱུས་དང༌། རུས་པ་དང་རྐང་གི་བར་མེས་ཁྱབ་ནས་ལྕགས་བསྲེགས་དང་སོལ་མེ་ཐ་དད་དུ་མི་མངོན་པ་བཞིན་མེ་དང་ལུས་གཉིས་སུ་ཕྱེ་རུ་མེད་པར་བསྲེགས་ཤིང་མེའི་ཕུང་པོ་གཅིག་གི་ཀློང་ན་འོ་དོད་འབོད་པའི་སྒྲ་ཙམ་སྟེ། རེས་འགའ་མེ་སྒོ་ཕྱེ་བའི་སྣང་བ་ཤར་ནས་འགྲོ་བར་བརྩམས་པ་ན་མདའ་བོ་ཆེ་དང་ཐོ་བ་འབར་བ་ལ་སོགས་པས་བསྣུན་ཏེ་དམྱལ་བ་གོང་མ་བདུན་གྱི་སྡུག་བསྔལ་དང་འདྲ་བ་དུས་གཅིག་ཏུ་གཏད་ནས་སླར་ཡང་བཙུད་དེ་སྔར་བཞིན་གདུང་བས་ཡི་མུག་ཅིང་སྡུག་བསྔལ་བས་ཉམ་ཐག་པ་སྟེ། སློབ་སྤྲིང་ལས།

ལ་ལར་མེ་སྟག་ཆེར་འཕྲོ་འཁྲུག་པ་འུར་སྒྲ་ཏོག་ཡར་ལ། །ཞག་གི་བབ་ན་སྐད་ངན་འབོད་པའི་རྩེ་གཞིལ་ཆིལ་ཆིལ་འབར། །ཞེས་ཕྱིའི་གནོད་པ་དང༌། བྲང་གི་རུས་པའི་ཁོང་དུ་ཐལ་ལ་ལྷག་ལྷག་སྒྲ་གྲགས་པ། །བསྐལ་པའི་དུས་ཀྱི་མེ་ཡིས་བསྐྱོད་དུ་མེད་པའི་ནང་དུ་ལྷུང༌། །ཞེས་ནང་གི་གནོད་པ་བསྟན་ནོ། །དེ་དག་གི་ལུས་ཚད་ཀྱང༌། མདོ་སྡེ་མྱང་འདས་ལས།

མཚམས་མེད་བརྒྱད་བྱས་པ་ལ་དཔག་ཚད་བརྒྱད་ཁྲི་པའི་ལུས་ཡོད་ཀྱང་གཅིག་ལ་གཅིག་མི་ཐོགས་པར་བཤད་པ་དང༌། ཐེག་པ་ཆེན་པོ་ལ་སྐུར་པའི་ལས་ཀྱིས་ལྕེ་དཔག་ཚད་འབུམ་དུ་བཤད་པ་སོགས་ཚོར་བ་རྒྱ་ཆེ་ལ། རྒྱུ་ནི། དམྱལ་བའི་རབས་ལས།

ཡོན་ཏན་དག་གི་ཆེ་བ་ལ། །ཆོས་སྤང་ཞིང་སྐུར་པ་བཏབ་པ་སོགས། མཆན། གནོན་པ་དྲག་པོ་བྱས་པ་ལས། །ཕ་མ་བླ་མ་བསད་བྱས་པ། །ངེས་པར་བསྐལ་པར་མནར་མེད་འཚེད། །ཅེས་སོ།།

བརྒྱད་པོ་དེ་དག་གི་མེའི་ཚ་ཁྱད་ཀྱང༌། ལས་རྣམ་འབྱེད་ལས།

ཐ་མལ་ཙནྡན་དུས་མཐའ་དང༌། །དམྱལ་མེ་རྣམས་ཀྱང་གོ་རིམ་བཞིན། །དེ་བཞིན་སྡུག་བསྔལ་བདུན་ཕྲག་འགྱུར། །ཞེས་བཤད་པ་ལྟར་རོ། །ཚ་དམྱལ་བརྒྱད་པོ་དེ་དག་གི་ཚེ་ཚད་ནི། མཛོད་ལས།

འདོད་ལྷའི་ཚེ་དང་ཉིན་ཞག་མཉམ། །ཞེས་པས་མི་ལོ་ལྔ་བཅུ་ལྷ་རྒྱལ་ཆེན་རིགས་བཞིའི་ཞག་གཅིག་ཏུ་བརྩིས་པའི་ལྷའི་རང་ལོ་ལྔ་བརྒྱ་དམྱལ་བ་ཡང་སོས་ཀྱི་ཞག་གཅིག་ཏུ་བརྩིས་པས་རང་ལོ་ལྔ་བརྒྱ་ཐུབ་བོ། །དེ་བཞིན་དུ་མི་ལོ་བརྒྱ། ཉིས་བརྒྱ། བཞི་བརྒྱ། བརྒྱད་བརྒྱ། སྟོང་དྲུག་བརྒྱ་རྣམས་ལྷ་སུམ་ཅུ་རྩ་གསུམ། འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་རྣམས་ཀྱི་ཞག་གཅིག་ཏུ་བརྩིས་པས་རང་ལོ་སྟོང༌། ཉིས་སྟོང༌། བཞི་སྟོང༌། བརྒྱད་སྟོང༌། ཁྲི་དྲུག་སྟོང་རྣམས་དམྱལ་བ་ཐིག་ནག བསྡུས་འཇོམས། ངུ་འབོད། ངུ་འབོད་ཆེན་པོ། ཚ་བ་རྣམས་ཀྱི་ཞག་རེར་བརྩིས་པའི་རང་ལོ་སྟོང༌། ཉིས་སྟོང༌། བཞི་སྟོང༌། བརྒྱད་སྟོང༌། ཁྲི་དྲུག་སྟོང་རྣམས་ཐུབ་ཅིང༌། རབ་ཏུ་ཚ་བས་བར་བསྐལ་ཕྱེད་དང༌། མནར་མེད་པས་བར་བསྐལ་གཅིག་ཐུབ་བོ།།

གཉིས་པ་ཉེ་འཁོར་ལྷག་མ་བཅུ་དྲུག་གི་སྡུག་བསྔལ་བཤད་པ་ནི།

སྡུག་བསྔལ་ཉིད་ལས་དབུགས་འབྱིན་ཀུན་རྟོག་གིས། །ཉེ་འཁོར་སྒོ་འཕར་བྱེ་བ་མདག་མེའི་འོབས།།

རོ་མྱགས་འདམ་རྫབ་སྟུག་དང་རལ་གྲིའི་ནགས། །ཆུ་བོ་རབས་མེད་གཤིན་རྗེའི་ཁ་བས་ཐུ།།

མཛའ་བཅུགས་དམ་བཅའ་དྲན་ནས་བསྙེགས་པའི་ལམ།།

ཚེར་མ་རྣོན་པོས་ཚབས་ཆེན་ཕུག་པའི་ལུས།།

འབར་ཞིང་རྩུབ་པའི་ལྕགས་ཀྱི་བུད་མེད་ཀྱིས།།

འཁྱུད་མཐར་ཁྭ་དང་བྱ་རྒོད་མིག་ལ་འདྲུ།།

དེ་ནས་དམྱལ་བའི་གནས་བརྒྱད་པོ་རང་རང་གི་རྩ་བའི་སྡུག་བསྔལ་ཕལ་ཆེར་མྱོང་སྟོབས་ཀྱིས་སྲབ་ནས་གནས་དེ་ཉིད་ལས་ཐར་ཏེ་དབུགས་འབྱིན་པའི་སྣང་བ་ཤར་ནས་འབྲོས་པའི་ཀུན་རྟོག་གིས་སོང་བ་ན། སོ་སོའི་ཕྱོགས་བཞི་ན་ཉེ་ཞིང་འཁོར་གྱི་ཚུལ་དུ་ཡོད་པས་དེ་སྐད་ཅེས་བྱ་ཞིང་རྩ་བའི་སྡུག་བསྔལ་གྱི་ལྷག་མ་མྱོང་བའི་གནས་ཡིན་པས་སམ། སོ་སོར་སྡུག་བསྔལ་མི་འདྲ་བ་ལྷག་པ་རེ་ཡོད་པས་དང༌། ཕྱོགས་རེ་རེར་བཞི་རེ་ཡོད་པས་ལྷག་པ་བཅུ་དྲུག་ཅེས་བྱ་སྟེ། གནས་དེ་དག་གི་སྒོ་འཕར་ཕྱེ་བ་བཞིན་སྣང་བའི་ཚེ། ཆུ་ཀླུང་བསིལ་བ་ཡོད་པའི་འདུ་ཤེས་ཀྱིས་དེར་བསྙེགས་པའི་ལམ་དུ་ལྕགས་ཀྱི་ཁྱི་རལ་པ་ཅན་གྱིས་དེད་ནས་མདག་མེ་འབར་བའི་འོབས་སུ་པུས་མོ་ནུབ་ཙམ་དུ་ཚུད་ནས་སྡུག་བསྔལ་བ་དང༌། ཡང་གྲིབ་བསིལ་ཉམས་བདེ་བ་མཐོང་ནས་སོང་བས། རོ་མྱགས་ཤིང་རུལ་བ་དང་ཕྱི་སའི་འདམ་རྫབ་སྟུག་པོར་ལྷུང་ནས་སྲོག་ཆགས་མགོ་གནག་ལ་ལུས་དཀར་བ་མཆུ་རྣོན་ཅན་མང་པོས་པགས་པ་འབིགས་པ་དང༌། ཡང་ཐང་ཡིད་དུ་འོང་བ་མཐོང་ནས་སོང་བས་སྤུ་གྲིའི་སོས་གཏམས་ཤིང་བསྣད་པའི་སྡུག་བསྔལ་མྱོང་བཞིན་ལམ་དེ་ལས་ཐལ་ནས་ནགས་ཚལ་སྔོ་ལྗང་མཐོང་བ་ལ་དེར་འདུ་ཤེས་བསྙེགས་ཏེ་སོང་བ་ན་ཡལ་ག་དང་ལོ་མ་ཐམས་ཅད་རལ་གྲིའི་རང་བཞིན་དུ་ཡོད་པའི་ནགས་སུ་ཕྱིན་ནས་ལས་ཀྱི་རླུང་གིས་ཤིང་ཐམས་ཅད་བསྐྱོད་དེ་མཚོན་ཆའི་ཆར་གྱིས་ལུས་དབད་དེ་དུམ་བུར་གཏོར་ནས་ངུ་འབོད་བྱེད་པ་ཙམ་ལས་གཞན་གྱི་བཤེས་དང་བྲལ་བའི་སྡུག་བསྔལ་མྱོང་བ་དང༌། ཡང་ཆུ་ཀླུང་སྔོ་བསིལ་དལ་གྱིས་འབབ་པ་མཐོང་ནས་སོང་ཙ་ན། ཆུ་བོ་རབ་མེད་ཅིང་ངོ་བོ་མེ་རུ་འདུག་པ་དེར་བྱིང་ནས་ལུས་ཚིག་སྟེ་ཤ་རུས་སོ་སོར་ཕྱེ་ཞིང་འཕྲད་པ་ཙམ་གྱིས་འཇོམས་པ་གཤིན་རྗེའི་ཁ་བས་ཀྱང་ཐུ་བའི་སྡུག་བསྔལ་མྱོང་བར་འགྱུར་རོ། །སྤུ་གྲིའི་ཐང་ནི་དེ་དག་ཏུ་འགྲོ་བའི་ལམ་ཡིན་པར་བཤད་པས་སོ་སོར་མི་བགྲང་ངོ༌། །ཡང་ལས་ཀྱི་བྱེ་བྲག་གིས་དེ་དག་རེ་རེ་ཙམ་དུ་སྐྱེ་བར་ཡང་གསུངས་ཏེ། འདོད་ལོག་སྤྱད་པས་རོ་མྱགས་ཀྱི་འདམ་དང༌། སེམས་ཅན་ལ་མཚོན་ཆས་སྡུག་བསྔལ་བར་བྱས་པས་རལ་གྲིའི་ནགས་དང༌། མ་སྨིན་པའི་གཞོན་ནུ་མ་ལ་བསྟེན་པ་དང༌། དགེ་འདུན་གྱི་རྫས་ལ་རློམ་སེམས་བྱས་པ་དང༌། ཆུ་ལ་གནས་པའི་ཉ་སྲམ་སོགས་སྲོག་ཆགས་རྣམས་བདས་པས་ཆུ་བོ་རབ་མེད་དོ། །གཞན་ཡང་དམྱལ་བའི་གནས་དེ་དག་གི་མཚམས་བཞིར་ལྕགས་ཀྱི་ཤལ་མ་ལི་གནོད་པའི་རང་བཞིན་ཅན་ཡོད་པ་དེ་ཉམས་དགའ་བར་མངོན་པའི་རྩེ་མོ་ནས་སྔོན་འཁྲིག་པའི་ཆོས་བརྟེན་པའམ། མཛའ་ཞིང་ཡིད་གཅུག་པར་གྱུར་པ་དག་གིས་འབོད་པར་མཐོང་སྟེ་སྔར་དེ་ལ་ཆགས་ཤིང་དགའ་མགུར་སྤྱད་པའི་དམ་བཅའ་དྲན་ནས་དེར་བསྙེགས་པས་ལམ་དུ་ཁྱི་དང་ཅེ་སྤྱང་སོགས་ཀྱིས་དེད་ནས་ལྕགས་ཀྱི་ཚེར་མ་རྣོན་པོ་སོར་བཅུ་དྲུག་པ་ཙམ་མང་པོ་གཟེངས་པ་ལས་ཀྱི་རླུང་གིས་བསྐྱོད་དེ་མདུན་ནས་རྒྱབ་ཏུ་ཐལ་མར་ཚབས་ཆེ་བར་ཕུག་ཅིང་ཤ་ཁྲག་ཐམས་ཅད་ཟག་བཞིན་པའི་ལུས་དེ་རྩེ་མོར་སོན་པའི་ཚེ། སྔར་གྱི་མཛའ་གཅུགས་དེ་མ་ཡིན་པར་མེ་འབར་ཞིང་རེག་བྱ་རྩུབ་པའི་ལྕགས་ཀྱི་བུད་མེད་སོགས་ཀྱིས་དམ་དུ་བཟུང་སྟེ་འཁྱུད་པས་ལུས་ཚིག་ཅིང་ཤ་ཁྲག་འཐོར་བ་དང་མགོ་མུར་བས་ཀླད་པ་ཚིལ་གྱིས་ཕྱུང་བ་ལ་སོགས་པའི་ཚོར་བ་མྱོང་བའི་མཐར་ཡང་རྩ་བར་འབོད་པའི་སྣང་བ་ཤར་བ་ན་སྔར་འདོད་པ་བརྟེན་པའི་དུས་ཆོག་ཤེས་པ་མེད་པའི་རྒྱུ་མཐུན་གྱིས་དེའི་ཚེ་ན་ཡང་སྡུག་བསྔལ་དེ་ཙམ་གྱིས་ཀྱང་མི་སུན་པར་མར་བསྙེགས་པ་ན་ཚེར་མའི་ཁར་སྔར་བཞིན་གདུང་ནས་དྲན་པ་ཉམས་ཏེ་གཡང་སར་ལྷུང་བ་ན། ཁྭ་ཏ་རྡོ་རྗེའི་མཆུ་ཅན་དང༌། བྱ་རྒོད་དང༌། དུར་བྱ་སོགས་ཀྱིས་མིག་ལ་འདྲུ་ཞིང་རྒྱུ་ལྟོ་འདྲེན་པ་ལ་སོགས་པའི་སྡུག་བསྔལ་བཟོད་དཀའ་བ་མྱོང་བར་འགྱུར་ཏེ། དྲན་པ་ཉེ་བར་བཞག་པའི་ཚིག་ལེའུར་བྱས་པ་ལས།

བྱི་བོ་བྱེད་པ་ཤལ་མ་ལིར། །འཛེག་ཅིང་ལྕགས་ཀྱི་བུད་མེད་འཚེ། །ཞེས་སོ། །ཤལ་མ་ལིའི་སྡོང་པོ་འདི་ཡང་མཚོན་ཆའི་རིགས་ཡིན་པས་རལ་གྲིའི་ནགས་སུ་བསྡུས་ཏེ་ཉེ་འཁོར་ལྷག་པ་བཅུ་དྲུག་ཏུ་བྱས་སོ། །འདི་དག་གི་ཚེ་ཚད་ལ་ངེས་པ་མེད་པར་སའི་དངོས་གཞི་ལས་གསུངས་སོ།།

གསུམ་པ་གྲང་དམྱལ་བརྒྱད་བཤད་པ་ནི།

བུ་ཡུག་སྦྲེབས་པ་འདར་བའི་ཐག་པ་ཡིས། །བཅིངས་ཏེ་བསྐྱོད་པར་མི་ནུས་བཞིན་གསོན་ཡང༌།།

རླུང་གི་མཚོན་ཆས་རུས་པའི་གཏིང་ཕུག་པའི། །གྲང་རེག་སོ་ཡི་བར་དུ་འཚིར་ལྟར་གདུངས།།

ཆུ་བུར་ཅན་དང་ཆུ་བུར་བརྡོལ་བ་དང༌། །ཨ་ཆུའི་སྨྲེ་སྔགས་ཀྱི་ཧུད་སོ་འཐམ་ཅན།།

ཨུཏྤ་ལ་ལྟར་པགས་པ་དྲུག་ཚལ་འགས། །པདྨ་དང་ནི་པདྨ་ཆེན་པོ་ལྟར།།

བརྒྱད་དང་བཅུ་དྲུག་གྲངས་མེད་གས་པའི་རྨ།།

སྲོག་ཆགས་མཆུ་རྣོན་ཅན་གྱིས་འབིགས་ཤིང་བཟའ།།

གྲང་བའི་དམྱལ་བ་པ་རྣམས་ཀྱི་སྤྱི་མཐུན་གྱི་སྡུག་བསྔལ་ནི། གནས་ཐམས་ཅད་གངས་དང་ཆབ་རོམ་གྱིས་གང་བ་ལ་སྤང་ལྗོངས་ཀྱི་རྣམ་པ་ལག་མཐིལ་ཙམ་ཡང་མེད་ཅིང་རྟག་ཏུ་མུན་པ་འཐིབས་པའི་གཅོང་རོང་ཡ་ང་བ་དེར་སྟེང་དང་ཕྱོགས་མཚམས་ཐམས་ཅད་ནས་ཁ་ཆར་དང་རླུང་འཐབས་པའི་བུ་ཡུག་གིས་སྦྲེབས་པས་ལུས་གདུངས་ཤིང་འདར་བའི་ཐག་པ་ལྟ་བུ་ཡིས་བཅིངས་ཏེ་ཕན་ཚུན་བསྒུལ་བསྐྱོད་བྱེད་པར་མི་ནུས་ཤིང་ཀུམ་ཀུམ་པོར་འགྱུར་བཞིན་སྡུག་བསྔལ་གྱི་ཚོར་བ་ལ་རྣམ་པར་ཤེས་པ་འཐོགས་ནས་གསོན་པའི་གནས་སྐབས་ལས་མི་ཡོལ་བར་ཡང་ཡང་དཔེས་མཚོན་དུ་མེད་པའི་རླུང་གི་མཚོན་ཆ་རྣོ་ངར་ཅན་དེས་རུས་པའི་གཏིང་དུ་ཕུག་པའི་སྟོབས་ཀྱིས་གྲང་བའི་རེག་བྱ་ལུས་ཀྱི་ཕྱི་ནང་ཐམས་ཅད་ལ་བཏབ་པ་ནི་དཔེར་ན་སོ་ཡི་བར་དུ་ཏིལ་འབྲུ་ཞིག་འཚིར་ན་ཅུང་ཟད་ཀྱང་མི་ཐོགས་པར་སོ་ཡན་མན་ཕྲད་པ་ལྟར་གྲང་རེག་ཕན་ཚུན་ལུས་ལ་ཁྱབ་ཅིང་འཐབས་ཏེ་གདུང་བར་འགྱུར་རོ།།

སོ་སོའི་ཁྱད་པར་ནི། ཧ་ཅང་གྲང་ཆེས་པས་ལུས་ཆུ་བུར་གྱིས་གང་བ་ཆུ་བུར་ཅན་དང༌། དེ་ནས་ཆུ་བུར་རྡོལ་ཏེ་རྨར་གྱུར་པ་དང༌། གྲང་བའི་ཚོར་བ་མི་བཟོད་ནས་ཨ་ཆུའི་སྨྲེ་སྔགས་ནར་མར་འབྱིན་པ་དང༌། དེ་ཙམ་ཡང་བརྗོད་མི་ནུས་པར་སྐད་ཀྱི་གདངས་ཆགས་པས་ཀྱི་ཧུད་ཅེས་ཤུགས་རིང་འདོན་པ་ཙམ་དང༌། དེའང་འདོན་མ་ནུས་པར་སོ་ཐམ་ཐམ་པར་བྱེད་ཅིང་སྐྲ་དང་སྤུ་རྣམས་གཡེང་ནས་ལུས་སེམས་བློང་བློང་པོར་འགྱུར་བ་སོ་འཐམ་པ་ཅན་དང༌། དེ་ནས་ཨུཏྤལ་ལྟར་པགས་པའི་མདོག་སྔོན་པོར་གྱུར་ནས་དྲུག་ཚལ་དུ་གས་པ་དང༌། པདྨ་དང་ནི་པདྨ་ཆེན་པོ་ལྟར་གས་པ་གཉིས་ནི་རིམ་པ་བཞིན། བརྒྱད་ཚལ་དུ་གས་ནས་རྨ་ཕྱིར་འགྱུར་བ་དང༌། དེ་ལྟར་གས་པ་རེ་རེ་ཡང་བཅུ་དྲུག་ནས་གྲངས་མེད་པའི་བར་དུ་གས་པའོ། །དེ་ལྟར་གས་པའི་རྨ་ནང་ནས་ཁྲག་དང་ཆུ་སེར་དང་ཞག་དང་རྐང་མར་ཀྱང་འཛག་ཅིང་སྲོག་ཆགས་མཆུ་རྣོན་པོ་ཅན་མང་པོ་སྐྱེས་ཤིང་དེ་ཀུན་གྱིས་འབིགས་ཤིང་བཟའ་བར་བྱེད་པའི་སྡུག་བསྔལ་བཟོད་པར་དཀའ་བ་མྱོང་བ་སྟེ། འདི་དག་གི་གནས་ཀྱང་གཞུང་འགའ་ཞིག་ན་སྡུག་བསྔལ་གྱི་རྣམ་གྲངས་ཇེ་ཆེར་སོང་བ་ལ་བརྒྱད་དུ་བཏགས་པ་ལས་ཐ་དད་པ་མེད་པར་གསུངས་ཤིང༌། ཕལ་ཆེ་བར་ཡང་སོས་ཀྱི་ཐད་ན་ཆུ་བུར་ཅན་ནས་ཚ་དམྱལ་རྣམས་ལ་འགྲན་པ་བཞིན་རིམ་པར་འོག་ནས་འོག་ཏུ་བརྩེགས་མར་གནས་པར་གསུངས་སོ། །གྲང་དམྱལ་བརྒྱད་པོ་དེ་དག་གི་ཚེ་ཚད་ནི་ཡུལ་ཀོ་ས་ལའི་ཏིལ་ཁལ་ཉི་ཤུ་ཤོང་བའི་ཏིལ་སྦྱངས་ནས་ལོ་བརྒྱ་རེ་ལ་ཏིལ་ཉག་མ་རེ་ཕྱུང་བས་ཟད་པ་ན་ཆུ་བུར་ཅན་གྱི་ཚེ་ཚད་རྫོགས་པ་ཡིན་ལ་ལྷག་མ་རྣམས་ཉི་ཤུ་ཉི་ཤུར་འགྱུར་རོ། །དེ་ཡང་དམྱལ་གནས་དེ་དག་གི་ཚེ་ཚད་ངེས་པ་ལྟར་བཤད་པ་ནི་ཐེག་དམན་རང་ལུགས་ཉིད་དེ། ཐེག་པ་ཆེན་པོའི་ལུགས་སུ་ནི་གྱད་པག་ཤི་ཏ་དང༌། མཛའ་བོའི་བུ་མོ་ལྟར་གཉེན་པོ་སྟོབས་ལྡན་སྐྱེས་པས་གློ་བུར་དུ་ཐར་པ་དང༌། རྡོ་རྗེའི་བླ་མ་ལ་བརྙས་པ་དང༌། དམ་པའི་ཆོས་སྤངས་པ་ལ་སོགས་པས་བསྐལ་ཆེན་དུ་མར་མི་འཕོ་བར་ཡང་བཤད་པས་མ་ངེས་སོ།།

བཞི་པ་ཉི་ཚེ་བའི་སྡུག་བསྔལ་བཤད་པ་ནི།

མགལ་རྡུམ་བཅད་དང་སྒོ་འཕར་མེད་ལ་འཐུམས། །སྒོ་དང་ཀ་བ་ཐབ་དང་ཐག་པ་སོགས།།

སྣ་ཚོགས་ལས་ཀྱིས་སྤྲུལ་པའི་རང་གཟུགས་ལ།།

ཉེ་བར་ལེན་པའི་སྡུག་བསྔལ་ཟད་མི་ཤེས།།

ཉི་ཚེ་བ་འདི་དག་གི་གནས་ཀྱང་རི་བྲག་གམ། ཆུ་དང༌། ཤིང་དང༌། མེ་དང༌། ནམ་མཁའ་སོགས་ངེས་པ་མེད་ལ། གྲངས་ནི་མང་པོ་འདུས་པའམ། གཅིག་པུར་གྱུར་པའམ། ཉུང་ཟད་དུ་གནས་པ་སྟེ། དེའི་སྡུག་བསྔལ་དང་ཚེ་ཚད་ཀྱང་མ་ངེས་པ་བཀྲེས་སྐོམ་ཚ་གྲང་བརྡེག་བཙོག་གཤགས་གཏུབས་སོགས་ཡུན་རིང་པོའམ་ཐུང་ངུར་མྱོང་བ་ཡོད་པའི་ཕྱིར་མ་ངེས་པས་ཉི་ཚེ་བ་ཞེས་བྱ་ལ། དེ་ཡང་མགལ་རྡུམ་སོགས་ལ་ལུས་སུ་འདུ་ཤེས་པས། དེ་བཅད་ཅིང་གཤགས་པ་སོགས་བྱས་པས་སྡུག་བསྔལ་བ་དང༌། སྒོ་འཕར་མེད་པ་རྡོ་བ་ཆུང་ངུ་དང༌། ཕ་ཝང་སོགས་ཆེན་པོ་ལ་རྟག་ཏུ་འཐུམས་ནས་སྡུག་བསྔལ་བ་དང༌། དེ་བཞིན་དུ་སྒོ་ལྟ་བུ་དང༌། ཀ་བ་ལྟ་བུ་དང༌། ཐབ་ཀ་ལྟ་བུ་དང༌། ཐག་པ་ལྟ་བུ་དང༌། གངས་དང་ཆབ་རོམ་གྱི་ནང་དུ་འཁྱགས་ཤིང་རེངས་པ་དང༌། ཤིང་དང་ལོ་མར་འཐུམས་པ་དང༌། ནམ་མཁར་གཡོ་བ་སོགས་སྔོན་དགེ་འདུན་གྱི་རྫས་དང་གཙུག་ལག་ཁང་གི་ཆ་རྐྱེན་སོགས་ལ་དབང་ཟོས་ཏེ། མི་དབང་བཞིན་ལོངས་སྤྱོད་པ་ལ་སོགས་པ་སྣ་ཚོགས་པའི་མི་དགེ་བའི་ལས་ཀྱི་བག་ཆགས་བརྟས་པའི་དབང་གིས་མེད་བཞིན་སྣང་ཞིང་སྤྲུལ་པའི་དངོས་པོ་དེ་རྣམས་ལ་རང་གི་གཟུགས་ཡིན་པར་འདུ་ཤེས་ནས་དེ་ལ་ཉེར་བར་ལེན་པའི་སྡུག་བསྔལ་ཟད་མི་ཤེས་པ་རྟག་པར་རམ། ཉིན་མཚན་ཕྱེད་མའམ། ཡུད་ཙམ་སོགས་སུ་མྱོང་བ་ཡིན་ཏེ། མོངྒལ་གྱི་བུས།

སྲིད་པ་ན་ནི་བདེ་བ་མེད། །ཉི་ཚེ་བ་བཞིན་འགྲོ་བ་ཀུན། །སོ་སོའི་སྡུག་བསྔལ་རྣམས་ཀྱིས་གདུང༌། །འབར་བའི་ཁྲོད་ན་གནས་པ་འདྲ། །ཞེས་བཤད་དོ། །དེ་ལ་སྤྱིར་དམྱལ་བའི་གནས་རིགས་གྲངས་ངེས་ཀྱི་སྒོ་ནས་བཅོ་བརྒྱད་དུ་བསྡུས་པ་ནི་བསྟན་བཅོས་རྣམས་ལ་གྲགས་ཆེ་ཞིང༌། མདོ་སྡེ་རྣམས་ལས་ནི་ཤིན་ཏུ་མང་པོ་ཞིག་གསུངས་སོ། །གནས་དེ་དག་ལ་སྡོམ་ཁྲིམས་ཉམས་པ་སོགས་སྡིག་ཅན་རྣམས་ནི་དབུགས་འབྱུང་བ་དང་འགག་པ་ཙམ་གྱིས་བར་དུ་ཆོད་པ་ལས་མེད་པས་དེ་འདྲ་བའི་ཚུལ་ལ་མི་འཇིགས་ཤིང་བསམ་མི་ཤེས་པ་རྣམས་ཀྱི་སྙིང་ནི་རྡོ་རྗེ་ལྟར་ཤིན་ཏུ་སྲ་བ་སྟེ། བཤེས་སྤྲིང་ལས།

སྡིག་ཅན་དབུགས་འབྱུང་འགག་པ་ཙམ་ཞིག་གིས། །དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །དམྱལ་བ་བྲིས་པ་མཐོང་དང་ཐོས་པ་དང༌། །དྲན་ནམ་བཀླགས་དང་གཟུགས་སུ་བགྱིས་རྣམས་ཀྱིས། །འཇིགས་པ་སྐྱེ་བར་འགྱུར་ན་མི་བཟོད་པའི། །རྣམ་སྨིན་ཉམས་སུ་མྱོང་རྣམས་སྨོས་ཅི་དགོས། །ཞེས་སོ། །དེས་ན་དེ་དག་གི་སྡུག་བསྔལ་ལ་འཇིགས་ཤིང་སྐྲག་པའི་བློ་བསྐྱེད་དེ། དེར་སྐྱེ་བའི་རྒྱུ་ཚུལ་ཁྲིམས་འཆལ་བ་སོགས་ལ་སྙིང་ཐག་པ་ནས་འགྱོད་པའི་སེམས་ཀྱིས་བཤགས་པ་དང༌། སྡོམ་སེམས་བརྟན་པོ་རེ་ལ་རྒྱུན་དུ་འབད་པར་མ་བྱས་ན་ཆོས་གཟུགས་བཟང་བ་ཙམ་དང༌། ཐོས་རྒྱ་ཆེ་བ་ཙམ་གྱིས་ནི་མངོན་མཐོ་ཙམ་ཡང་ཐོབ་པར་མི་འགྱུར་ན་ངེས་པར་ལེགས་པ་ལྟ་ཅི་སྨོས་ཏེ། ཇི་སྐད་དུ།

ཚུལ་ཁྲིམས་འཆལ་བས་ངན་འགྲོར་དེ་འགྲོ་སྟེ། །དེ་ལ་ཐོས་པ་མང་པོས་སྐྱོབ་མི་འགྱུར། །ཞེས་པ་བཞིན་ནོ། །ངན་སོང་གི་གནས་གཞན་གཉིས་ནི་སྔར་ལེའུ་དང་པོའི་སྐབས་སུ་ཅུང་སྤྲོས་ཏེ་བསྟན་པས་འདིར་མ་བཤད་དོ།།

ལྔ་པ་སྐབས་ཀྱི་དོན་བསྡུ་བ་ནི།

དེ་ཕྱིར་སྐྱེ་བའི་ཤྭ་འོད་སྡུག་བསྔལ་གྱི། །རྦ་རླབས་ཅ་ཅོ་སྒྲོག་འདི་མ་བཟློག་ན།།

ལྷ་བས་ལྷག་པའི་ལུས་རྟེན་ཆུ་ལོན་ཡང༌།།

བསྟན་པ་བྲལ་བའི་མྱ་ངམ་ཐང་དུ་འཁྱམས།།

དེ་ལྟར་ངན་སོང་གི་སྡུག་བསྔལ་ནི་བཟོད་དཀའ་བ་ཉིད་དེ། མཐོ་རིས་ཀྱི་འཇིག་རྟེན་དུ་སོང་ན་བདེ་བ་འབའ་ཞིག་གོ་སྙམ་དུ་སྲེད་པ་ཡང་མི་རིགས་ཏེ་སྲེད་པ་ནི་སྡུག་བསྔལ་ཐམས་ཅད་ཀྱི་ཉེ་བར་ལེན་པ་པོ་སྟེ། དེ་ལས་སྲིད་པ་དང་སྐྱེ་བ་འབྱུང་བ་དེ་ཡི་ཕྱིར་ན་སྐྱེ་བའི་རང་བཞིན་ནི་ཡུལ་ཕྲན་ལ་ཤྭ་འོད་དེ་ཆུ་ལོག་ཆེན་པོ་རྡོལ་བ་ལྟར་ཤུགས་དྲག་ཅིང་རྒྱུན་བརྟན་པ་སྡུག་བསྔལ་སྣ་ཚོགས་ཀྱི་རྦ་རླབས་གཡོ་ཞིང་རྣམ་གྲོལ་གྱི་ལམ་དང་འགལ་བའི་ཅ་ཅོ་མི་བཟད་པ་སྒྲོག་པ་འདི་ཉིད། ད་ལྟ་ཐར་པའི་ལམ་རྣམ་པར་དག་པ་སྒྲུབ་པའི་སྐལ་བ་བཟང་པོ་འཐོབ་པའི་དུས་འདིར་ཚུལ་ཁྲིམས་ཀྱིས་གཞི་བཟུང་ཏིང་ངེ་འཛིན་གྱིས་རྟེན་བྱས་ཏེ་སྲིད་རྩ་མ་རིག་པ་གཅོད་པའི་ཤེས་རབ་ཀྱིས་མ་བཟློག་ན་ཆོས་སྒྲུབ་པའི་རྟེན་ལ་ལྷ་བས་ཀྱང་ལྷག་པའི་དལ་འབྱོར་གྱི་ལུས་རྟེན་འདི། དཔེར་ན་འབབ་ཆུ་གནོད་པ་ཅན་གྱི་ཆུ་ལོན་ཏེ། ཆུ་བཀག་པའི་ར་བ་ཡང་གློ་བུར་དུ་བཤིག་ནས་མེད་པར་བྱེད་པ་བཞིན། འཚོ་བའི་བརྟན་པ་དང་བྲལ་ཏེ་སྐྱེ་བ་ཕྱི་མར་ཉིང་མཚམས་སྦྱར་བའི་དབང་གིས་མྱ་ངམ་གྱི་ཐང་གནོད་པ་དང་སྡུག་བསྔལ་དུ་མའི་རང་བཞིན་ཅན་ངན་སོང་ལ་སོགས་པ་སྲིད་པའི་གནས་སུ་ཡང་དང་ཡང་དུ་འཁྱམས་ཤིང་འཁོར་བར་འགྱུར་རོ།།

གཉིས་པ་མཐོ་རིས་ཀྱི་སྡུག་བསྔལ་བཤད་པ་ལ་གསུམ་སྟེ། ལྷའི་སྡུག་བསྔལ། ལྷ་མ་ཡིན་གྱི་སྡུག་བསྔལ། མིའི་སྡུག་བསྔལ་བཤད་པའོ། །དང་པོ་ལྷའི་སྡུག་བསྔལ་བཤད་པ་ལ་གཉིས་ཏེ། ཁམས་གོང་གི་འཕོ་བའི་སྡུག་བསྔལ་བཤད་པ་དང༌། འདོད་ལྷའི་འཕོ་ལྟུང་གི་སྡུག་བསྔལ་བཤད་པའོ། །དང་པོ་ཁམས་གོང་གི་འཕོ་བའི་སྡུག་བསྔལ་བཤད་པ་ནི།

གཟུགས་མེད་ཏིང་འཛིན་ལུང་མ་བསྟན་པའི་ལས། །ཟད་ནས་སྲིད་པ་ཕྱི་མར་འདུ་བྱེད་དང༌།།

གཟུགས་ཁམས་བསམ་གཏན་སྔ་མའི་ལས་ཟད་དེ།།

འོག་མར་ལྷུང་བ་འགྱུར་བའི་སྡུག་བསྔལ་མྱོང༌།།

འོ་ན་ལྷ་མིའི་གནས་བདེ་འགྲོ་མཐོ་རིས་ཀྱི་གནས་ཞེས་བྱ་ན་དེ་ཡང་སྡུག་བསྔལ་ལས་མ་འདས་པའི་ཚུལ་ཇི་ལྟར་ཞེ་ན། གོང་མའི་ཁམས་གཟུགས་མེད་པའི་གནས་བཞི་པོ་ནི། བདེ་སྡུག་གི་ཚོར་བ་མངོན་གྱུར་བ་མེད་པའི་བཏང་སྙོམས་ཀྱི་རང་བཞིན་ཏིང་ངེ་འཛིན་ལུང་མ་བསྟན་པའི་ངང་ལ་ཡུན་རིང་པོར་གནས་ཀྱང་དེར་འཕེན་བྱེད་ཀྱི་དགེ་བའི་ལས་དང་ཏིང་ངེ་འཛིན་གྱི་ཤུགས་ཟད་ནས་སྔོན་གྱི་ལས་འགའ་ཞིག་ལ་སྲེད་ལེན་གྱིས་གསོས་བཏབ་ནས་ཡང་སྲིད་པ་ཕྱི་མར་སྐྱེ་བ་འདུ་བྱེད་ཅིང་སྡུག་བསྔལ་སྣ་ཚོགས་མངོན་གྱུར་དུ་མྱོང་དགོས་པ་དང༌། ཚངས་རིས་ནས་འབྲས་བུ་ཆེ་བའི་བར་གཟུགས་ཁམས་ཀྱི་ལྷ་རྣམས་བསམ་གཏན་བཞི་ལས་ཐོབ་པའི་དགའ་བདེ་དང༌། ཚེ་དང༌། གཟི་བརྗིད་དང༌། འོད་དང༌། ཁ་དོག་ཕུན་སུམ་ཚོགས་པ་རྣམས་ཀྱང་སྔ་མའི་ཟག་བཅས་དགེ་བའི་ལས་དེ་མྱོང་བའི་སྟོབས་ཀྱིས་ཟད་དེ་ཡང་གནས་འོག་མ་དམྱལ་བ་ལ་སོགས་པར་ལྟུང་བ་ན་སྔར་གྱི་གནས་སྐབས་དེ་འགྱུར་ཞིང༌། མི་དགེ་བའི་ལས་ཀྱི་རྣམ་སྨིན་སྡུག་བསྔལ་མྱོང་དགོས་པའི་གནས་སྐབས་ཁོ་ན་ཐོབ་པར་འགྱུར་བའང་ཡོད་དེ། བཤེས་སྤྲིང་ལས།

ཚངས་རིས་ལ་སོགས་བསམ་གཏན་ལྷུན་གྲུབ་ཀུན། །འོད་དང་ཁ་དོག་གཟི་བརྗིད་མཐའ་ཡས་ཀྱང༌། །བདག་རྟོག་བག་ལ་ཉལ་བ་མ་གཟིགས་ནས། །ཤི་ནས་དམྱལ་བར་སྐྱེ་བ་ཆ་མེད་དམ། །ཞེས་སོ།།

གཉིས་པ་འདོད་ལྷའི་འཕོ་ལྟུང་གི་སྡུག་བསྔལ་བཤད་པ་ནི།

ཚངས་དང་ལྷ་དབང་འཁོར་ལོས་སྒྱུར་བ་ཡང༌། །སྤྲིན་བར་ཉི་བཞིན་དཀར་པོའི་རྣམ་སྨིན་གྱིས།།

སྐབས་བཙལ་སྤངས་པའི་མོད་ལ་མར་མེའི་ལྕེས།།

འཐུངས་པའི་ཞུན་མར་བཞིན་དུ་ཉམས་པར་འགྱུར།།

མནན་ན་ནེམ་པའི་རེག་པ་འཇམ་པོ་དང༌། །ལྷ་ཀླུ་མི་འམ་ཅི་ཡི་ལ་༴ཐོད་ཀྱི།།12

རྐང་པའི་ཆུ་སྐྱེས་དམར་བྱས་དབང་པོ་ཡང༌། །ལྕགས་ཀྱི་གསལ་ཤིང་འབར་བའི་རྩེ་མོར་གདུངས།།

མཐོ་རིས་བུ་མོའི་ནུ་མ་གསར་པ་ལ། །རེག་པའི་འཁྲི་ཤིང་བསྟེན་དེ་དགའ་ཚལ་དང༌།།

གཞལ་མེད་ཁང་མཛེས་མུ་ཏིག་དྲྭ་ཕྱེད་ཅན། །སྤངས་ནས་མེ་མུར་འོབས་ནང་སྤྱིའུ་ཚུགས་ལྟུང༌།།

གོས་བསྟན་མེ་ཏོག་རྙིངས་པའི་ལྷ་མོ་དག །རྡུལ་གྱིས་གདོང་པ་བཀྲུ་བའི་ཟོལ་ཞིག་ནས།།

ཉེ་དུ་རྣམས་ལ་བལྟ་ཞིང་ངུ་བ་ཡི། །འཆི་འཕོའི་སྡུག་བསྔལ་ལྟ་བུ་མི་ལ་མེད།།

གཉའ་ཤིང་འཛིན་རིའི་ས་བླ་༴འགེགས་པ་ལ།13 །གདུགས་གྱུར་སྣང་བྱེད་ཆེན་པོ་ཉི་ཟླ་གཉིས།།

སླན་ཆད་མུན་པའི་སྨག་གི་བཙོན་ར་རུ།།

ལོང་བ་ཆེན་པོའི་གནས་སྐབས་འཐོབ་པར་འགྱུར།།

དེ་ལྟར་འདོད་པའི་འདོད་ཆགས་རྣམ་པར་གནོན་པའི་ཆགས་བྲལ་གྱི་བདེ་དཔལ་ལ་ལོངས་སྤྱོད་པའི་ཚངས་པ་དང༌། འདོད་པའི་ཁམས་པ་ས་གཞི་ལ་བརྟེན་ནོ་ཅོག་གི་ནང་ན་ཆེ་ཞིང་དཔལ་འབྱོར་དང་ལོངས་སྤྱོད་ཕུན་སུམ་ཚོགས་པ་ལྷ་ཡི་དབང་པོ་ཀཽ་ཤི་ཀ་དང༌། རིན་པོ་ཆེ་སྣ་བདུན་གྱིས་མདུན་བདར་ཞིང༌། མགར་གྱིས་མ་བྱས་པའི་འཁོར་ལོ་རིན་པོ་ཆེའི་ཕྱི་ནས་དཔུང་གི་ཚོགས་ཡན་ལག་བཞི་དང་བཅས་གླིང་བཞིའི་འཇིག་རྟེན་དུ་འགྲོ་ཞིང་དབང་སྒྱུར་བར་བྱེད་པའི་འཁོར་ལོས་སྒྱུར་བའི་རྒྱལ་པོར་གྱུར་པ་ལ་སོགས་པ་ཡང་དཔེར་ན་སྤྲིན་བར་གྱི་ཉི་མ་རེ་ཞིག་འོད་ཟེར་བཀྲག་ཏུ་འཚེར་ཡང་སླར་སྤྲིན་གསེབ་ཏུ་ནུབ་ནས་མོག་མོག་པོར་འགྱུར་བ་བཞིན་སྔོན་བསགས་དཀར་པོའི་ལས་ཀྱི་རྣམ་པར་སྨིན་པ་སྟོབས་ལྡན་གྱིས་སྐབས་བཙལ་ཏེ་བདེ་སྐྱིད་ལ་སྤྱོད་ཀྱང་ཅི་ཙམ་བདེ་བ་མྱོང་བ་དེ་ཙམ་གྱིས་སྔ་མའི་དགེ་འབྲས་རྣམས་ཟད་ཅིང་སྤངས་པར་འགྱུར་བས་དེའི་མོད་ལ། དཔེར་ན་མར་མེའི་ལྕེས་རིམ་བཞིན་འཐུངས་པའི་ཞུན་མར་ཟད་པ་ན་མར་མེའི་འོད་ཀྱང་ནུབ་པར་འགྱུར་བ་བཞིན་དུ། བདེ་འབྱོར་མཐའ་དག་ཉམས་ཤིང་ཟད་དེ་གནས་ངན་དུ་ལྷུང་ནས་ཉམ་ཐག་པར་འགྱུར་ཏེ། དེ་ཉིད་ལས།

བརྒྱ་བྱིན་མཆོད་འོས་ཉིད་དུ་གྱུར་ནས་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྷུང༌། །འཁོར་ལོས་སྒྱུར་རྒྱལ་ཉིད་དུ་གྱུར་ནས་ཀྱང༌། །འཁོར་བ་དག་ན་ཡང་བྲན་ཉིད་དུ་འགྱུར། །ཞེས་སོ། །ཇི་ལྟར་ན་རི་རབ་ཀྱི་སྤོ་གྲོང་ཁྱེར་བལྟ་ན་སྡུག་གི་ས་གཞི་ལ་རྐང་པས་མནན་ན་ནེམས་བྱེད་པས་སོར་བཞིའི་དམའ་བར་འགྱུར་ཞིང༌། བཏེགས་ན་དེ་སྙེད་སྤར་བར་བྱེད་པའི་རེག་པ་འཇམ་པོ་ལ་བརྟེན་པ་དང༌། ཉེ་དབང་དང་རྒྱལ་ཆེན་རིས་བཞིའི་ལྷ་རྣམས་དང༌། ཀླུ་དང་མིའམ་ཅི་ཡི་རྒྱལ་པོ་རྣམས་ཀྱི་མགོ་བོའི་རྒྱན་ལྭ་ཐོད་དང་བཅས་པའི་ནོར་བུ་མར་གད་ལ་སོགས་པའི་འོད་ཀྱིས་རྐང་པའི་རྟེན་ཤིན་ཏུ་གཞོན་ཞིང་མཛེས་པའི་ཆུ་སྐྱེས་དམར་པོར་བྱས་པའི་བསྙེན་བཀུར་གྱིས་དྲེགས་ཤིང་རྒྱགས་པའི་ལྷའི་དབང་པོ་བརྒྱ་བྱིན་ཡང་ལས་ཀྱི་འཕེན་པ་ཟད་པས་སླར་ཡང་དམྱལ་བའི་འཇིག་རྟེན་དུ་སྐྱེས་ནས་ལྕགས་ཀྱི་གསལ་ཤིང་མེ་འབར་བའི་རྩེ་མོར་ལུས་བསྐྱོན་ཏེ་སྡུག་བསྔལ་གྱིས་གདུང་བར་འགྱུར་ཏེ། སློབ་སྤྲིང་ལས།

གང་དུ་ལྷ་ཀླུ་མིའམ་ཅི་ཡི་མགོ་རྒྱན་གྱིས། །འོད་ཀྱི་ཚོགས་ཀྱིས་རྐང་རྟེན་དམར་བའི་བརྒྱ་བྱིན་ཡང༌། །ལས་ཀྱི་རླུང་འཁྲུགས་འགྲོ་བ་ངན་པར་འགྲོ་འགྱུར་བ། །དེ་ལ་སྐྱེས་བུ་སུ་ཞིག་འཇིགས་པ་བསྟེན་མི་བྱེད། །ཅེས་སོ། ། འདོད་པའི་ཉེས་དམིགས་གཞན་ཡང་འདི་ལྟར་མཐོ་རིས་ལྷའི་བུ་མོ་ལང་ཚོས་སྒེག་ཅིང་དར་དང་རིན་པོ་ཆེའི་རྒྱན་གྱིས་སྤུད་པ་སྒྱུ་རྩལ་དྲུག་ཅུ་རྩ་བཞི་ལ་མཁས་པ་དུ་མའི་ནུ་མ་ཤིན་ཏུ་གཞོན་ཤ་ཆགས་པའི་གསར་པ་ལ། རེག་པའི་བདེ་བའི་འཁྲི་ཤིང་བསྟེན་ཏེ་ཉམས་སུ་མྱོང་བཞིན་དཔག་བསམ་གྱི་ཤིང་དང༌། བཟའ་བཏུང་གོས་རྒྱན་ཁྲུས་ཀྱི་རྫིང་བུ་རོལ་མོའི་བྱེ་བྲག་དང༌། ལྷའི་བྱ་དང༌། མེ་ཏོག་ལ་སོགས་པའི་བཀོད་པ་སྣ་ཚོགས་ཀྱིས་བརྒྱན་པའི་དགའ་བའི་ཚལ་དང༌། རིན་པོ་ཆེའི་གཞལ་མེད་ཁང་མཛེས་ཤིང་ཡིད་དུ་འོང་བ་མུ་ཏིག་ལ་སོགས་པའི་རིན་པོ་ཆེ་སྣ་ཚོགས་ཀྱི་དྲྭ་བ་དང་དྲྭ་ཕྱེད་འཕྱང་བ། སྟེང་རྒྱན་ལས་དྲིལ་བུའི་སྒྲ་སྙན་པར་སྒྲོག་པ། ནང་དུ་རིན་པོ་ཆེའི་ཁྲི་དང་རེག་འཇམ་གྱི་མལ་སྟན་བཤམས་པ་སོགས་འབྱོར་པ་དུ་མས་བརྒྱན་པ་ཅན། དེ་ལ་རྟག་ཏུ་བརྟེན་ཞིང་དགའ་བདེས་དུས་འདའ་བའི་ལྷའི་བུ་རྣམས་ཀྱང་བསོད་ནམས་ཀྱི་བགོ་སྐལ་ཟད་པའི་ཚེ་ན་བདེ་འབྱོར་དེ་ཐམས་ཅད་ཅིག་ཆར་དུ་སྤངས་ནས་སྔོན་ལས་ངན་པའི་དབང་གིས་མེ་མུར་གྱི་འོབས་དང༌། རལ་གྲིའི་ནགས་དང༌། ཆུ་བོ་རབ་མེད་དང༌། སྐྱབས་མེད་པའི་མུན་ནག་འཐིབས་པོ་ཆེའི་ནང་དུ་སྤྱི་ཚུགས་སུ་ལྷུང་ནས་ཡུན་རིང་པོར་སྡུག་བསྔལ་བར་འགྱུར་ཏེ། སློབ་སྤྲིང་ལས།

དྲིལ་བུ་མཛེས་འཁྲོལ་མུ་ཏིག་ཕྲེང་ཚོགས་ལྷག་གེ་བ། །གཞལ་མེད་ཁང་དུ་ཞུགས་ནས་ལྷ་ཡུལ་བགྲོད་ནས་ཀྱང༌། །མི་བཟད་སྐྱབས་མེད་མུན་ནག་འཐིབས་པོ་དཔག་མེད་པ། །ཕ་མཐའ་མེད་པའི་ནང་དུ་སྤྱི་ཚུགས་ལྟུང་བར་འགྱུར། །ཞེས་སོ། །དེས་ན་མཐོ་རིས་ཀྱི་བདེ་བ་སྲེད་པའི་ཡུལ་དུ་མི་རིགས་པའི་ཚུལ་ཡང༌། བཤེས་སྤྲིང་ལས།

དེ་ལྟར་བསམ་ནས་ཡ་རབས་རྣམས་ཀྱིས་ནི། །ཟད་འགྱུར་མཐོ་རིས་སླད་དུ་སྲེད་མི་བགྱི། །ཞེས་སོ། །འདོད་པའི་ལྷ་དྲུག་ལ་སྤྱི་མཐུན་དུ་ཡོད་པའི་འཕོ་ལྟུང་གི་སྡུག་བསྔལ་ནི། འདི་དག་ལ་གནད་འཆད་པའི་ཚོར་བ་མེད་པས་ལུས་ཀྱི་སྡུག་བསྔལ་མེད་ཀྱང་འཕོ་བའི་སྔ་ལྟས་མཐོང་ནས་སེམས་སྡུག་བསྔལ་ཏེ། ཇི་ལྟར་ཞེ་ན། འཆི་བ་ལ་ཉེ་བ་ན་ལུས་ཀྱི་མདངས་ཡལ་ནས་མི་སྡུག་པར་འགྱུར་བ་དང༌།༡ གོས་ལ་དྲི་མ་ཆགས་པ་དང༌།༢ རང་གི་སྟན་ལ་མི་དགའ་བ་དང༌།༣ མེ་ཏོག་གི་ཕྲེང་བ་རྙིངས་པར་གྱུར་པའི་ཚེ་༤སྔར་ཁྲུས་ལ་སོགས་པའི་བསྙེན་བཀུར་བྱེད་པའི་ལྷ་མོ་དག་གིས། སྔོན་མེད་པའི་རྡུལ་གྱིས་ལྷ་དེའི་ལུས་དང་གདོང་པ་ལ་གོས་པར་གྱུར་ནའང་དེ་བཀྲུ་བའི་ཟོལ་ཏེ་ཚུལ་ཞིག་ནས་དྲུང་དུ་མི་ཉེ་བར་གྱུར་པ་ན། འདུ་ཤེས་ནི་འཁྲུགས། ཕྱི་མའི་སྐྱེ་གནས་ནི་ལྷའི་མིག་གིས་མཐོང་བས་བསྔངས་ཤིང་བརྒྱལ། མཛའ་བཤེས་རྣམས་ཀྱིས་རྒྱང་རིང་པོ་ནས་བོས་ཏེ་མི་དང་ལྷར་སྐྱེ་བར་སྨོན་ལམ་འདེབས་ཀྱང་དེ་ལ་ཉེ་ནི་མི་ནུས་སོ། །དེའི་ཚེ་ན་དེ་སྙིང་རྗེ་ཇི་སྐད་དུ། ཀྱི་ཧུད་དལ་གྱིས་འབབ་པ། ཀྱི་ཧུད་ལྷའི་བུ་མོ་ཞེས་སོགས་ཟེར་བཞིན་ཉེ་དུ་རྣམས་ལ་བལྟ་ཞིང་ངུ་བ་ཡི་སྡུག་བསྔལ་ལྷའི་ཞག་བདུན་དུ་མྱོང་བ་ཡིན་ཏེ། བཤེས་སྤྲིང་ལས།

ལུས་ཀྱི་ཁ་དོག་མི་སྡུག་གྱུར་པ་དང༌། །སྟན་ལ་མི་དགའ་མེ་ཏོག་ཕྲེང་རྙིངས་དང༌། །གོས་ལ་དྲི་མ་ཆགས་དང་ལུས་ལ་ནི། །སྔོན་ཆད་མེད་པའི་རྡུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྦྲོན་བགྱིད་སྔ་ལྟས་ལྔ། །ཞེས་སོ། །དེ་ལྟར་ལྷའི་གནས་དེ་ན་འཆི་ཞིང་གནས་འོག་མར་འཕོ་བའི་སྡུག་བསྔལ་ནི་སྔར་གྱི་བདེ་བ་ལ་སྤྱད་པ་དེ་བས་ཀྱང་ཆེ་བས་དེ་ལྟ་བུ་ནི་མི་རྣམས་ལའང་མེད་དོ། །ཡང་རི་བདུན་གྱི་ནང་མ་རི་རབ་ཀྱི་ཕྱེད་དུ་སླེབས་པའི་གཉའ་ཤིང་འཛིན་རིའི་ས་བླ་སྟེ་སྟེང་གི་ནམ་མཁའ་འགེགས་ནུས་པ་ཡི་རྒྱ་ཁྱོན་དང་ལྡན་པས་རི་དེའི་གདུགས་ལྟ་བུར་གྱུར་ཅིང་གླིང་བཞིའི་འཇིག་རྟེན་གྱི་མུན་པ་ཐམས་ཅད་བསལ་ནུས་པའི་སྣང་བྱེད་ཆེན་པོ་ཉི་མ་དང་ཟླ་བ་གཉིས་པོའི་རྟེན་ས་གཞི་དང་གཞལ་མེད་ཁང་གི་འོད་ཡིན་ནའང༌། སླན་ཆད་ལྷའི་བུ་དེ་གཉིས་དང་དེའི་འཁོར་དུ་གཏོགས་པ་རྣམས་ཚེ་དང་བསོད་ནམས་ཟད་ནས་འཇིག་རྟེན་སོ་སོའི་བར་དག་ན་ཡོད་པའི་མུན་པའི་སྨག་གི་ནང་བཙོན་ར་ལྟ་བུ་རུ་སྣང་བའི་གོ་སྐབས་མེད་པར་བཅིངས་ནས་ལག་པ་བརྐྱང་བསྐུམ་ཡང་མི་མཐོང་བའི་ལོང་བ་ཆེན་པོའི་གནས་སྐབས་འཐོབ་པར་འགྱུར་བའི་དུས་དེ་ལྟ་བུ་ཡང་འོང་བ་ཡིན་ཏེ། བཤེས་སྤྲིང་ལས།

ཉི་མ་ཟླ་བ་ཉིད་ཐོབ་རང་ལུས་ཀྱི། །འོད་ཀྱིས་འཇིག་རྟེན་མཐའ་དག་སྣང་བྱས་ཏེ། །སླར་ཡང་མུན་པའི་སྨག་ཏུ་ཕྱིན་གྱུར་ནས། །རང་གི་ལག་པ་བརྐྱང་བའང་མཐོང་མི་འགྱུར། །ཞེས་སོ། །དེ་ལྟར་ཟག་བཅས་ཀྱི་བདེ་བ་མཐའ་དག་སྡུག་བསྔལ་ཁོ་ནའི་རང་བཞིན་ཅན་ཡིན་ཀྱང་དེ་ལ་ང་རྒྱལ་གྱིས་མངོན་པར་རློམས་པའི་ཉེས་དམིགས་ལས་འཁོར་བའི་སྡུག་བསྔལ་འབའ་ཞིག་ལ་སྤྱོད་པའི་ཚུལ། སློབ་སྤྲིང་ལས།

སྡུག་བསྔལ་མེ་ཚོགས་སྤུངས་པས་འཇིགས་པའི་འཇིག་རྟེན་འདིར། །སྐྱེ་བོ་བདེ་སྙམ་མངོན་པའི་ང་རྒྱལ་བྱེད་པ་གང༌། །དེ་ནི་གཤིན་རྗེའི་ཁ་ཡང་འབྱེད་པར་བྱེད་པ་སྟེ། །དེ་ནི་སྐྱེ་བ་ཕྱི་མའི་ལྗོན་ཤིང་ས་བོན་ཡིན། །ཞེས་སོ། །ལྷའི་གནས་རིགས་དེ་དག་གི་རྒྱུ་འབྲས་ཀྱང༌། དྲན་པ་ཉེར་བཞག་ལས་བཏུས་པར།

གང་ཞིག་བདག་མེད་མི་འདོད་ཅིང༌། །ཡོངས་སུ་བཟུང་ལ་མི་དགའ་བ། །དེ་ནི་བཟའ་རྣམས་དག་གི་མཆོག །རྒྱལ་ཆེན་བཞི་པ་དག་ཏུ་འགྱུར། །ཕ་མ་ཕ་ཚན་གཙོ་བོ་ལ། །བཀུར་བྱེད་བསྟོད་ལྡན་བཟོད་པར་བྱེད། །འཐབ་མོ་ལ་ནི་དགའ་བ་དང༌། །དེ་ནི་སུམ་ཅུ་རྩ་གསུམ་སྐྱེ། །རྩོད་དང་འཐབ་མོར་མི་དགའ་ཞིང༌། །གཅིག་ཏུ་དགེ་ལ་བརྩོན་པ་གང༌། །དེ་དག་འཐབ་བྲལ་ཉིད་དུ་འགྲོ། །ཐོས་པ་མང་དང་ཆོས་འཛིན་དང༌། །ཤེས་རབ་ལྡན་ཞིང་ཐར་པ་འདོད། །ཡོན་ཏན་དགའ་རྣམས་དགའ་ལྡན་འགྲོ། །རང་ཉིད་དུལ་བ་ལ་ཞུགས་ཤིང༌། །ཚུལ་ཁྲིམས་འབོགས་པར་སྤྲོ་བ་གང༌། །གདོན་མི་ཟ་བར་འཕྲུལ་དགར་འགྲོ། །སེམས་ཅན་གང་དག་སྨད་མིན་མཆོག །སྦྱིན་དང་དུལ་དང་ཡང་དག་སྡོམ། །ཕུལ་བྱུང་ཡོན་ཏན་ལྷག་གྱུར་ཏེ། །ངེས་པར་གཞན་འཕྲུལ་དབང་བྱེད་དོ། །ཞེས་དང༌། དགེ་རྩ་དེ་དག་བསླབ་པ་གསུམ་ལྡན་དུ་ཉམས་སུ་བླངས་པའི་འབྲས་བུ་ཡང༌། དེ་ཉིད་ལས།

ཚུལ་ཁྲིམས་ཀྱིས་ནི་མཐོ་རིས་ཐོབ། །བསམ་གཏན་གྱིས་ནི་ཁྱད་པར་འགྱུར། །ཡང་དག་ཇི་བཞིན་ཡོངས་ཤེས་པས། །མཐར་ནི་ཡང་སྲིད་མེད་པར་འགྱུར། །ཞེས་སོ།།

གཉིས་པ་ལྷ་མ་ཡིན་གྱི་སྡུག་བསྔལ་བཤད་པ་ནི།

ལྷ་ཡི་དཔལ་ལ་སྡང་བའི་ཕྲག་དོག་གི །དགྲ་སྟྭས་རང་སྙིང་ཚལ་པར་བཀས་ནས་སླར།།

དཔུང་པ་གཏུམ་པོའི་གཡུལ་ངོར་བདག་ཉིད་ཀྱི།།

མགོ་དང་ཡན་ལག་གཏུབས་པས་ལྷ་མིན་མནར།།

འདི་ལྟར་ལྷ་མ་ཡིན་རྣམས་ནི་རང་བཞིན་གྱིས་སྙེམས་པའི་ང་རྒྱལ་ལས་སྐྱེས་པའི་ང་རྒྱལ་ཡོད་པས་ནི་ཉོན་མོངས་པས་ཀུན་ནས་ཉོན་མོངས་པ་དང༌། རང་སྡེའང་འཐབ་ཅིང་རྩོད་པ་དང༌། ཁྱད་པར་དུ་གསེར་གྱི་ས་གཞི་ལ་བརྟེན་པའི་ལྷ་མ་ཡིན་གྱི་དབང་པོ་ཐག་བཟང་རིས་ཀྱི་ཁང་བཟང་གདམས་པ་ཅན་དང༌། གྲོང་ཁྱེར་གསེར་ལྡན་དང༌། འདུན་ས་ནོར་བཟང་སོགས་འབྱོར་པ་དུ་མ་དང་ལྡན་པས་སྙེམས་ནའང༌། སུམ་ཅུ་རྩ་གསུམ་པའི་ལྷ་ཡི་གནས་ན་རྣམ་པར་རྒྱལ་བའི་ཁང་བཟང་དང༌། གྲོང་ཁྱེར་བལྟ་ན་སྡུག་དང༌། འདུན་ས་ཆོས་བཟང་སོགས་དེ་ལས་ཀྱང་ཆེས་ལྷག་པའི་དཔལ་དང་འབྱོར་པ་ཕུན་སུམ་ཚོགས་པ་ཡོད་པ་ལ་མི་བཟོད་ཅིང་སྡང་བའི་ཕྲག་དོག་གི་དགྲ་སྟྭ་མ་རུངས་པས་རང་ཉིད་ཀྱི་ཤེས་རྒྱུད་ཚལ་པར་བཀས་ཏེ་ཉམས་པར་བྱས་ནས་རྟག་ཏུ་ཡིད་གདུང་ཞིང་སྡུག་བསྔལ་བའི་སྟེང་སླར་ཡང་ལྷ་རྣམས་དང་འཐབ་པའི་ཚེ་ན་ལྷའི་དཔུང་བརྡར་བ་ནི་ཤིན་ཏུ་གཏུམ་སྟེ་ལྷ་མ་ཡིན་ལས་ཆེས་འཕགས་ཤིང༌། ནམ་མཁའི་དཀྱིལ་རལ་བ་ལྟ་བུའི་སྒྲ་དང༌། མཚོན་ཆའི་ཆར་དང༌། ལུས་ཀྱི་འོད་དང༌། གཟི་བྱིན་དང༌། སྤྱུགས་པའི་འཐོར་རླུང་ཆེན་པོའི་སྒྲ་ལ་སོགས་པའི་སྟོབས་དང་མཐུ་ཆེན་པོའི་གཡུལ་ངོར་འཕྲད་པ་ན་ལྷ་རྣམས་ནི་མགོ་བོ་ཆད་པ་མ་གཏོགས་ཡན་ལག་བཅད་ནའང་འཕྲལ་དུ་སོས་ནས་རྨ་མེད་ལ། ལྷ་མ་ཡིན་རྣམས་ནི་མི་བཞིན་དུ་བདག་ཉིད་ཀྱི་གནད་ཆེ་སར་ཕོག་ན་འཆི་བར་འགྱུར་པས་ལྷའི་མཚོན་ཆ་དྲག་པོས་མགོ་དང་ཡན་ལག་གཏུབས་པ་ལ་སོགས་པའི་སྡུག་བསྔལ་གྱིས་ལྷ་མིན་རྣམས་མནར་བར་འགྱུར་རོ། །དེ་ལྟར་རྩོད་པའི་རྒྱུ་ནི་དྲན་པ་ཉེར་བཞག་ལས།

འཛམ་བུའི་གླིང་པ་རྣམས་ཀྱིས་བསོད་ནམས་མ་ཡིན་པའི་ལས་སྟོབས་ཆེན་བསགས་པས་ཡིན་པར་བཤད་ཅིང༌། ས་སྡེ་ལས།

ལྷ་རྣམས་ལྷ་མིན་གྱི་བུ་མོ་ལ་བལྟ་བའི་ཕྲག་དོག་དང༌། ལྷ་མིན་རྣམས་ལྷའི་བདུད་རྩི་ལ་ཆགས་པའི་དབང་གིས་དང༌། མདོ་གཞན་ལས།

དཔག་བསམ་ཤིང་གི་རྩ་བ་ལྷ་མིན་དུ་ཡོད་ཀྱང་མེ་ཏོག་དང་འབྲས་བུའི་དཔལ་ལྷ་ཡུལ་དུ་རྒྱས་པ་མ་བཟོད་ནས་རྩོད་པ་འབྱུང་བར་བཤད་དོ། །དེ་ཡང་སྲིད་སྡེ་སོ་སོར་བཅད་ནས་རྩོད་པའི་ཚུལ་ཅུང་ཟད་བསྡུས་ཏེ་བརྗོད་ན།

དཀར་ནག་ཀླུ་རྩོད་རང་རང་ཕྱོགས་ཕམ་ན། །བར་སྣང་ལྷ་སྦྲོན་ནགས་ཕྱོགས་ཀླུ་ཕམ་པས། །སྒྲ་གཅན་སྦྲན་ནས་འཐབ་ཚེ་རྒྱལ་གྱུར་ན། རྒྱལ་ཆེན་རིགས་བཞིའི་དཔུང་སྦྲན་ལྷ་མིན་ཕམ། །མགུལ་ཕྲེང་ཅན་གྱིས་འཐབ་ཚེ་དེ་ཡང་ཕམ། །དེ་ནས་ཐགས་བཟང་ཁྲོས་ནས་ས་གཞིི་ལ། །རྐང་ལག་བརྡབས་པས་ས་གཡོ་རི་འགུལ་ཞིང༌། །དབང་པོའི་སྟན་ཡང་གཡོས་ཚེ་འདི་སྙམ་དུ། །གཡོ་བའི་རྒྱུ་ནི་གང་ཞེས་བརྟགས་པ་ན། །འགྱེད་པར་ཤེས་ནས་མདུན་སར་བསྒོ་བ་ནི། །འཆི་ལྟས་བྱུང་ནས། མཆན།

དུས་ལ་བབ་པ་རྣམས་ནི་རང་གནས་སུ། །གཞན་རྣམས་གཡུལ་ལ་སྤྲོ་བར་གྱིས་ཤིག་ཅེས། །བྱང་སོང་མཚན་མ་ཁོང་དུ་ཆུད་བྱས་ནས། །རྫིང་བུར་གོ་བགོས་གླང་པོ་རབ་བརྟན་ཞོན། །དེ་ཡང་མགོ་བོ་སུམ་ཅུ་རྩ་གསུམ་སྟེང༌། །དེ་ལྟའི་དབང་པོ་མིག་མཛེས་ཞེས་བྱ་དང༌། །སྟོབས་མཆོག་ལ་སོགས་ཉེ་དབང་སོ་གཉིས་གནས། །མགོ་བོ་མཆེ་བ་སྐྱེད་ཚལ་རྫིང་བུ་དང༌། །བུ་མོ་བྲན་མོ་སིལ་སྙན་བདུན་བདུན་དུ། །སྤྲུལ་ཚེ་ཆགས་ཅན་དགའ་མའི་སྒྱུ་རྩལ་གྱིས། །མྱོས་ནས་རྡོ་རྗེ་ལ་སོགས་མཚོན་ཆས་འཇོམས། །ལྷའི་ལུས་བདུན་འཕགས་ཐགས་བཟང་རིས་ཀྱི་ཤིང་རྟ་དཔག་ཚད། མཆན། བདུན་པ་ལྷའི་དབང་པོས་གཡོན་དུ་འཛིན་ནུས་ཤིང༌། །རི་རབ་དུམ་བྱས་རོལ་མཚོ་དམར་པོར་འགྱུར། །ཕོག་ཚད་འཆི་འགྱུར་མཚོན་རྡུལ་ནམ་མཁར་འཁྲིགས། །སྒྲ་འོད་ཉི་ཟླ་འཛིན་དང་ས་གཡོ་སོགས། །ཞེས་པའོ། །ལྷ་མ་ཡིན་དེ་རྣམས་དུས་ལ་ལར་དགེ་མི་དགེ་ལ་དཔྱོད་པའི་བློ་གྲོས་ཡོད་ནའང་གནས་རིགས་དེའི་འགྲོ་བའི་སྒྲིབ་པས་ཉམས་པས་ཉན་རང་གི་མཐོང་ལམ་མི་ཐོབ་སྟེ། མགོན་པོ་ཀླུས།

ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་བའི་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ཡང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་སོ། །དེ་ལྟ་མོད་ཀྱི་ཐེག་པ་ཆེན་པོའི་སྡེ་སྣོད་ནི་བསམ་གྱིས་མི་ཁྱབ་པས་དེ་དང་མི་འདྲ་སྟེ། དཀོན་མཆོག་བརྩེགས་པ་ལས།

དེའི་ཚེ་ཆོས་ཀྱི་རྣམ་གྲངས་འདི་བཤད་པ་ན། ལྷ་དང༌། ཀླུ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་བགྲང་བ་ལས་འདས་པ་དག་གིས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་དང་བྲལ་བ་ཐོབ་བོ། །ཞེས་བཤད་པ་ལྟར་རོ། །རྒྱུ་ནི། ལྷ་མ་ཡིན་གྱི་རབས་ལས།

རྟག་ཏུ་གཡོ་དང་སྒྱུ་སྤྱོད་ཅིང༌། །སྡིག་པ་དག་ནི་མ་བྱས་ལ། །འཐབ་ལ་དགའ་ཞིང་སྦྱིན་བྱེད་པ། །དེ་ནི་ལྷ་མིན་དབང་ཕྱུག་འགྱུར། །ཞེས་སོ།།

གསུམ་པ་མིའི་སྡུག་བསྔལ་བཤད་པ་ལ་གཉིས་ཏེ། རྩ་བའི་སྡུག་བསྔལ་དང༌། ཡན་ལག་གི་སྡུག་བསྔལ་བཤད་པའོ། །དང་པོ་རྩ་བའི་སྡུག་བསྔལ་བཤད་པ་ལ་གསུམ་སྟེ། སྡུག་བསྔལ་གྱི་སྡུག་བསྔལ་དང༌། འགྱུར་བའི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་བཤད་པའོ། །དང་པོ་སྡུག་བསྔལ་གྱི་སྡུག་བསྔལ་བཤད་པ་ནི།

འཚོ་བ་ཆུ་བུར་ལྟ་བུར་གཡོ་བ་ཡི། །༴མི་དག་14ཡིད་མི་བདེ་དང་འཁྲུགས་པ་སོགས།།

སྡུག་བསྔལ་སྔ་མས་ཕྱི་མ་ཉེ་བར་ལེན།།

མཛེ་ཅན་ཕོལ་གྱི་ཐོག་ཏུ་རྨས་གཏུགས་བཞིན།།

སྤྱིར་འགྲོ་བ་རྣམས་ཀྱི་སྲོག་གི་འཚོ་བ་སྐད་ཅིག་གིས་འགྱུར་ཞིང་ཟད་པར་འགྱུར་བ་ཡིན་ལ། ཁྱད་པར་དུ་སྔོན་བསྐལ་པ་བཟང་པོར་གྱུར་པའི་དུས་དང༌། སྒྲ་མི་སྙན་པ་ལ་སོགས་པའི་མིའི་འགྲོ་བ་ལ་ལྟོས་ན་ལྷོ་གླིང་འདིར་ད་ལྟ་ཚེའི་སྙིགས་མར་གྱུར་པའི་དབང་གིས་ཆུའི་ཆུ་བུར་ད་ལྟ་ཡོད་འཕྲོ་ལ་ཞིག་འགྲོ་བ་ལྟ་བུར་གཡོ་ཞིང་འགྱུར་བས་ཚེ་ཐུང་ཞིང་དུས་མ་ཡིན་པར་འཆི་བའི་རྐྱེན་མང་པོས་གཞན་དབང་དུ་སོང་བའི་འཛམ་བུའི་གླིང་པ་ཡི་མི་དག་ནི་འདོད་དོན་མ་འགྲུབ་པ་དང་མི་འདོད་པ་དུ་མའི་རྐྱེན་གྱིས་ཡིད་མི་བདེ་བ་དང༌། ཕན་ཚུན་འཁྲུགས་པ་ལ་སོགས་པའི་སྡུག་བསྔལ་དང་མི་འབྲལ་བའི་སྟེང༌། གློ་བུར་དུ་མི་ཤི་བའི་སྟེང་ཕྱུགས་དགྲས་དེད་པ་དང༌། ལོ་ཉེས་པའི་སྟེང་གནས་ཁང་མེས་ཚིག་པ་སོགས་ནད་དང་གདོན་དང་དགྲ་དང་འབྱུང་བའི་གནོད་པ་ལ་སོགས་པའི་སྡུག་བསྔལ་སྔ་མས་ཕྱི་མ་དག་ཉེ་བར་ལེན་པ་ནི། དཔེར་ན་མཛེ་ནད་ཀྱིས་ཟིན་ནས་སྡུག་བསྔལ་བ་ཅན་གྱི་གང་ཟག་ལ་ཕོལ་མིག་གི་རྨ་བྱུང་བའི་སྡུག་བསྔལ་གྱིས་བརྩེགས་ཤིང་ད་དུང་དེའི་ཐོག་ཏུ་རྨས་ཟུག་རྔུ་དེ་གཏུགས་ནས་སྡུག་བསྔལ་བ་བཞིན་ནོ།།

གཉིས་པ་འགྱུར་བའི་སྡུག་བསྔལ་བཤད་པ་ནི།

མངོན་མཐོའི་ཡོན་ཏན་རྫོགས་པའི་སྐྱེད་ཚལ་དུ། །འདོད་པའི་རོ་ལ་གདུང་བ་དུག་ཅན་གྱི།།

བཟའ་བས་རྣམ་པར་༴སྨ་བབ་15དཀའ་ཐུབ་ལུས།།

མིག་འཕྲུལ་ལྟ་བུར་ཐོབ་འདི་འགྱུར་བ་ཅན།།

མངོན་པར་མཐོ་བའི་གནས་འདི་ན་ཡུལ་གྱི་ཡོན་ཏན་ས་གཞི་དང༌། ཆུ་དང༌། སྐྱེད་ཚལ་དང༌། ལོ་ཏོག་དང༌། ཕྱུགས་དང༌། དར་གོས་དང༌། རིན་པོ་ཆེ་སོགས་གཟུགས་སྒྲ་དྲི་རོ་རེག་བྱའི་ཡོ་བྱད་མཁོ་དགུའི་འབྱོར་ཞིང་ཡོངས་སུ་རྫོགས་པའི་རང་བཞིན་ལྷའི་སྐྱེད་ཚལ་དང་འགྲན་བཟོད་པ་ཙམ་དུ་ཡོད་ནའང༌། འདོད་པའི་ཡུལ་ལྔ་པོའི་རོ་ལ་སྲེད་ཅིང་གདུང་བས་ལོངས་སྤྱད་པ་ན། འཕྲལ་དུ་བདེ་བ་ལྟར་སྣང་ཡང་དཔེར་ན་སྦྱར་བ་ལས་བྱུང་བའི་དུག་ཅན་གྱི་བཟའ་བ་ཁོང་དུ་སོང་བས་རེ་ཞིག་རོ་བདའ་བ་དང་ལྟོ་འགྲངས་པ་སོགས་བདེ་བར་མངོན་ཀྱང་མཐར་དུག་ནད་ཀྱིས་གཟིར་ནས་རྣམ་པར་སྨ་ཕབ་སྟེ་ལུས་ཀྱི་མདངས་ཉམས། མིག་གི་འཕང་སྨད་མལ་དུ་འགྲེ་ཞིང་ལྡོག་པའི་དཀའ་ཐུབ་སྟེ་སྡུག་བསྔལ་བའི་ལུས་རིད་རིད་པོར་གྱུར་པ་བཞིན་དུ་སྔོན་ལས་དང་འཕྲལ་རྐྱེན་འགའ་ཞིག་གིས་འཕྲལ་སྣང་ཙམ་ལ་མིག་འཕྲུལ་ལྟ་བུར་ཐོབ་པའི་བདེ་དཔལ་འདི་ནི་ཁང་བཟང་ལ་སོགས་པར་རྩེད་འཇོ་དང་བཟའ་བཏུང་དང་གླུ་གར་གྱིས་བག་ཕེབས་བདོ་བའི་མོད་ལ་ས་གཡོས་ཏེ་གནས་ཁང་འགྱེལ་བ་སོགས་སྡུག་བསྔལ་བར་འགྱུར་བའི་རང་བཞིན་ཅན་ནོ།།

གསུམ་པ་ཁྱབ་པ་འདུ་བྱེད་ཀྱི་སྡུག་བསྔལ་བཤད་པ་ནི།

རྐང་པའི་རེག་པ་ཁུར་དུ་མི་བཟོད་པའི། །ངལ་བཅས་སེམས་ཀྱི་གླང་པོའི་གཉར་འཛེགས་ཀྱང༌།།

དེ་ཡི་བསམ་པ་རྩེ་དགས་རྒོད་གྱུར་ནས།།

གཡང་སར་སྨད་པས་འདུ་བྱེད་སྡུག་བསྔལ་མཚོན།།

ཡུལ་འོད་ལྡན་ཞེས་བྱ་བའི་རྒྱལ་པོ་རབ་གསལ་གྱིས་རྐང་པའི་རེག་པ་ས་ལ་བརྟེན་ནས་འགྲོ་བ་ཁུར་དུ་མི་བཟོད་པའི་མངའ་ཐང་གིས་གླང་པོ་འདུལ་སྦྱོང་མཁན་ལ་གླང་པོ་ཆེ་འདུལ་དུ་བཅུག་པས། དེས་དེ་ལྕགས་ཀྱི་ཐོ་ལུམ་མེ་འབར་བའང་སྣས་ཚམ་ཚོམ་མེད་པར་ལེན་པ་དེ་ཙམ་དུ་བསྒོ་བ་ཉན་པ་དེ་སྲིད་དུ་འདུལ་བར་བྱས་ནས་ཕུལ་བ་ན། རྒྱལ་པོ་དེ་རྐང་པས་འགྲོ་བ་ནི་ངལ་བ་དང་བཅས་པའོ་སྙམ་པའི་སེམས་ཀྱིས་གླང་པོ་ཆེའི་གཉའ་བར་འཛེགས་ནས་བདེ་བདེ་ལྟར་སོང་ཀྱང༌། གླང་པོ་དེ་ཡི་བསམ་པ་ཐུབ་པ་མཆོག་གི་བསྟན་པ་ཉོན་མོངས་པ་འདུལ་བའི་སྡོམ་པས་མ་བཏུལ་བས་གླང་མོའི་དྲི་སྣོམ་པའི་མོད་ལ་རྩེ་དགས་ཡིད་རབ་ཏུ་རྒོད་པར་གྱུར་ནས། ས་གཞི་ཐམས་ཅད་ཤིང་རྟའི་འཕང་ལོ་བསྐོར་བ་ལྟར་རྒྱུག་པས་གཡང་སར་སྨད་དེ་སྲོག་དང་བྲལ་བར་ཉེ་བ་ལ་ཐུག་པས་སྡུག་བསྔལ་བར་གྱུར་པ་ནི་ཁྱབ་པ་འདུ་བྱེད་ཀྱི་སྡུག་བསྔལ་གྱི་མཚོན་དཔེ་སྟེ། ད་ལྟ་ཀུན་གཞིའི་ཁམས་ན་སྡུག་བསྔལ་གྱི་རྒྱུ་ལས་དུ་མ་ཡོད་པ་དང༌། བདེ་བའི་དོན་དུ་ལས་བྱས་པ་ཕལ་ཆེར་མ་འོངས་པའི་སྡུག་བསྔལ་འདུ་བྱེད་པའི་རྒྱུ་ཡིན་ཡང་ད་ལྟ་མངོན་དུ་མི་སྣང་བ་རྣམས་སོ།།

གཉིས་པ་ཡན་ལག་གི་སྡུག་བསྔལ་བརྒྱད་བཤད་པ་ལ་གཉིས་ཏེ། མདོར་བསྟན་པ་དང༌། རྒྱས་པར་བཤད་པའོ། །དང་པོ་མདོར་བསྟན་པ་ནི།

དེ་ལྟར་སྡུག་བསྔལ་ཉིད་གསུམ་འབྲོག་དགོན་ན། །སྐྱེ་རྒ་ན་འཆིའི་ཚོར་བ་རྣམ་པར་འཁྱམས།།

སྨོན་པ་མེད་པའི་མི་སྡུག་དགྲ་དང་ཕྲད། །སྡུག་པ་ཡིད་ལ་གོམས་བྱས་གནས་མིན་ཕྱོགས།།

འདོད་པའི་ཡུལ་ལ་༴འབྱོར་པས་16ངོ་ཚར་བྱས། །ཉེར་ལེན་ཕུང་པོའི་སྟེང་དུ་དཀའ་ཐུབ་འདུས།།

རྣམ་པ་བརྒྱད་ཀྱི་སྡུག་བསྔལ་རྟུལ་ཕོད་པས།།

མི་ཡི་སྐྱེ་བའི་འཁྲི་ཤིང་རྟག་ཏུ་གཙེར།།

དེ་ལྟར་རྩ་བའི་སྡུག་བསྔལ་ཆེན་པོའི་བདག་ཉིད་རྣམ་པ་གསུམ་ནི་སེམས་ཅན་རྣམས་རང་རང་གི་ལས་དང་མཐུན་པར་ཁྱབ་ཅིང་ཉམས་མི་དགའ་བར་བྱེད་པས་འབྲོག་དགོན་པ་ལྟ་བུར་གྱུར་པ་ན། དང་པོ་མངལ་ནས་སྐྱེ་བ་དང༌། འདུ་བྱེད་རྙིང་པས་རྒ་བ་དང༌། འདུ་བ་འཁྲུགས་ཏེ་ན་བ་དང༌། སྲོག་འགགས་པས་འཆི་བའི་ཚོར་བ་དག་ནི་རྟག་ཏུ་དཀྱུ་ཞིང་རྣམ་པར་འཁྱམས་པ་ལྟ་བུའི་སྒོ་ནས་སེམས་ཅན་འགའ་ཞིག་ནི་སྐྱེ་ཞིང༌། འགའ་ཞིག་ནི་ན་ལ། ལ་ལ་ནི་རྒ་ཞིང༌། ལ་ལ་ནི་འཆི་བ་སྟེ་ཕན་ཚུན་ཀུན་ཏུ་འཁོར་ཞིང་ཀུན་ནས་འཚེ་བར་བྱེད་དོ། །དེ་དག་གི་སྟེང་དུ་ཡིད་ལ་མི་དགའ་ཞིང་འཕྲད་པར་སྨོན་པ་སྟེ་འདུན་པ་མེད་པའི་མི་སྡུག་པའི་དགྲ་དང་གློ་བུར་དུ་འཕྲད་ནས་སྡུག་བསྔལ་བ་དང༌། སྙིང་དུ་སྡུག་པའི་མཛའ་བཤེས་སྲེད་ཞེན་གྱིས་ཡིད་ལ་དགའ་ཞིང་མཐུན་པར་གོམས་པར་བྱས་པ་རྣམས་གནས་མིན་པ་གཞན་དུ་ཕྱོགས་ཏེ་འགྲོ་བའམ་ཤི་བར་འགྱུར་བ་དང༌། ཟས་ནོར་ཡོ་བྱད་གཉེན་གྲོགས་མངའ་ཐང་སོགས་མང་པོ་འདོད་ནས་རྩོལ་བས་བསྒྲུབ་ནའང་དེས་ཇི་ལྟར་བསྒྲུབ་པའི་ཡུལ་དེ་དག་ལ་འབྱོར་ཞིང་འོང་བ་ཅི་ཡང་མེད་པས་ངོ་ཚ་བར་འགྱུར་བ་བཞིན་བྱས་པ་དང༌། ཉེ་བར་ལེན་པའི་ཕུང་པོ་ལྔའི་སྟེང་དུ་མི་འདོད་བཞིན་དུ་དཀའ་ཐུབ་སྟེ་སྡུག་བསྔལ་སྣ་ཚོགས་འདུས་ཤིང་འབབ་པར་འགྱུར་བ་སྟེ། དེ་ལྟར་ཡན་ལག་རྣམ་པ་བརྒྱད་ཀྱི་སྡུག་བསྔལ་རྟུལ་ཕོད་པ་སྟེ་སྟོབས་ཆེན་པོ་དག་གིས། མི་ཡི་སྐྱེ་བ་སྡུག་བསྔལ་སྣ་ཚོགས་པའི་འཁྲི་ཤིང་འདི་ཉིད་རྟག་ཏུ་གཙེར་ཏེ་གདུང་བར་འགྱུར་རོ།།

གཉིས་པ་རྒྱས་པར་བཤད་པ་ལ་བདུན་ཏེ། སྐྱེ་བའི་སྡུག་བསྔལ། རྒ་བའི་སྡུག་བསྔལ། ན་བའི་སྡུག་བསྔལ། འཆི་བའི་སྡུག་བསྔལ། དགྲ་སྡང་བ་དང་འཕྲད་པའི་སྡུག་བསྔལ། གཉེན་བྱམས་པ་དང་བྲལ་བའི་སྡུག་བསྔལ། འདོད་དང་མི་འདོད་ལོག་པར་འབྱུང་བའི་སྡུག་བསྔལ་ལོ། །དང་པོ་སྐྱེ་བའི་སྡུག་བསྔལ་ནི།

ཤིན་ཏུ་དྲ་ིང་མི་གཙང་རྙོག་མ་ཅན། །ཀུན་ནས་དོག་པ་མུན་ནག་འཐིབས་པོའི་ཁྲོད།།

མངལ་གནས་ལྕགས་ཁྱིམ་སྒོ་འཕར་སྤངས་ལྟའི་ནང༌། །མ་རིག་རྣམ་ཤེས་ཁུ་ཁྲག་དབུས་ན་བརྟེན།།

མེར་མེར་ནུར་ནུར་ལྟར་ལྟར་མཁྲང་གོར་ཉ། །རུས་སྦལ་བཞིན་ཏེ་བདུན་ཕྲག་བདུན་རྩ་དྲུག།

གནས་འགྱུར་ཡིད་མི་འོང་བའི་རྣམ་པ་ལ། །དབང་པོ་ཡན་ལག་བ་སྤུ་ལ་སོགས་འགྲུབ།།

བདུན་ཕྲག་སུམ་ཅུ་རྩ་བདུན་གྲངས་སྙེད་ཚེ། །བརྟས་དང་ཆེར་བསྐྱེད་གཡོ་ཞིང་ཚོར་བས་གདུང༌།།

མ་ཡི་སྤྱོད་ལམ་བཀྲེས་སྐོམ་ཚ་གྲང་གི །རྣམ་འགྱུར་ལས་བྱུང་སྡུག་བསྔལ་དཔག་ཏུ་མེད།།

བཙའ་བའི་དུས་ཀྱི་རྗེས་འགྲོ་དེ་ཡི་ལུས། །བཟོད་དཀའི་སྡུས་འཇོམས་ཁུར་དུ་འཕོས་པ་ལྟའི།།

སྡུག་བསྔལ་ཉེ་བར་སྤྱད་པས་མཐོ་བཙམས་ནས། །མ་བུ་གཉིས་ཀ་མོད་ལ་སྲོག་འདོར་རམ།།

གཅིག་ཤོས་གནོད་པ་བདེ་བའི་ཁུར་གྱིས་བཙའ། །མངལ་གནས་རློན་པས་དཀྲིས་ཤིང་དྲ་ིང་བ།།

སྲན་མི་བཟོད་པ་ཤ་རྨེན་ཞིག་པ་ལྟས། །སྔོན་གྱི་དྲན་པའི་སྟོབས་རྣམས་ཉམས་བྱས་ཤིང༌།།

རེག་པའི་རྣམ་པས་གཟིར་བའི་སྡུག་བསྔལ་མྱོང༌།།

བར་མ་དོའི་རྣམ་པར་ཤེས་པ་དྲི་ཟ་ཉེ་བར་ལེན་པ་དེས་སྐྱེ་བའི་གནས་ཚོལ་བ་ན་སྔོན་ལས་དང་འཕྲལ་གྱི་སྲེད་པས་མཚམས་སྦྱར་ཏེ་མའི་མངལ་དུ་ཆུད་པ་ན། ཤིན་ཏུ་དྲི་ང་ཞིང་འདམ་རྫབ་ལྟ་བུ་མི་གཙང་བའི་རྙོག་མ་ཅན་ཡངས་པ་མི་མངོན་པར་ཀུན་ནས་དོག་པ་སྣང་བའི་གོ་སྐབས་མེད་པ་མུན་ནག་འཐིབས་པོས་སྒྲིབ་པའི་རང་བཞིན་ཅན་གྱི་ཁྲོད་མ་ཡི་མངལ་གནས་དེ་ནི་དཔེར་ན་ལྕགས་ཀྱི་ཁྱིམ་སྒོ་འཕར་སྤངས་པ་སྟེ་སྒོ་མེད་པའི་ནང་དུ་ཚུད་ན་རང་གིས་འདོད་བཞིན་ཕྱིར་འགྲོ་ས་མེད་པ་ལྟ་བུའི་ནང་དུ་མ་རིག་པ་དང་མཚུངས་པར་ལྡན་པའི་རྣམ་པར་ཤེས་པ་དེ་ཕ་མའི་ཁུ་ཁྲག་འདྲེས་པའི་དབུས་ན་བརྟེན་པ་ཡིན་ལ། དེ་ཡང་བདུན་ཕྲག་དང་པོ་ལ་ནི། མེར་མེར་བ་སྟེ་གྱུ་གྱུ་བ་དངུལ་ཆུའི་རྣམ་པ་ལྟ་བུ་དང༌། གཉིས་པ་ལ་ནུར་ནུར་བ་བལ་སྣབས་ཀྱི་རྣམ་པ་ལྟ་བུ་དང༌། གསུམ་པ་ལ་ལྟར་ལྟར་པོ་མཛུབ་མོའི་རྣམ་པ་ལྟ་བུ་དང༌། བཞི་པ་ལ་མཁྲང་གྱུར་སྒོ་ངའི་རྣམ་པ་ལྟ་བུ་དང༌། ལྔ་པ་ལ་གོར་གོར་པོ་ཁུར་བའི་རྣམ་པ་ལྟ་བུ་དང༌། དྲུག་པ་ལ་ཁྱབ་འཇུག་ཉ་ཡི་རྣམ་པ་ལྟ་བུ་དང༌། བདུན་པ་ལ་རུས་སྦལ་བཞིན་མགོ་དང་རྐང་ལག་ཅུང་ཟད་མངོན་པ་ཡིན་ཏེ། དེ་ལྟར་བདུན་ཕྲག་བདུན་སོང་བ་དེ་ནས་བདུན་ཕྲག་ཉི་ཤུ་རྩ་དྲུག་གི་བར་དུ་གནས་འགྱུར་ཏེ། མི་གཙང་བའི་ནང་གི་སྲིན་བུ་བཞིན་ཡིད་དུ་མི་འོང་བའི་རྣམ་པ་ལ། མིག་ལ་སོགས་པའི་དབང་པོ་ལྔའི་རྟེན་དང༌། ཡན་ལག་དང༌། ཉིང་ལག་དང༌། ནང་གི་དོན་ལྔ་སྣོད་དྲུག་དང༌། རྩ་དང༌། རླུང་དང༌། ཁམས་དྭངས་མ་དང༌། ཁྲག་དང༌། ཆུ་སེར་དང༌། སྐྲ་དང༌། བ་སྤུ་དང༌། ཕོ་མོའི་དབང་པོ་ལ་སོགས་པའི་སྐྱེ་མཆེད་ཡོངས་སུ་རྫོགས་པ་འགྲུབ་ཅིང༌། དེ་ནས་བདུན་ཕྲག་སུམ་ཅུ་རྩ་བདུན་གྱི་གྲངས་དེ་སྙེད་ཀྱི་ཚེ་མའི་བཟའ་བཏུང་གི་དྭངས་མ་བུའི་ལྟེ་ཐག་བརྒྱུད་དེ་ལུས་ཟུངས་ཉམས་བརྟས་པ་དང་ཆེར་བསྐྱེད་ནས་སྐབས་སྐབས་སུ་འཕར་གཡོ་བྱེད་པས་མ་ཡང་ལུས་མི་བདེ་བ་ཙམ་དུ་འབྱུང་ཞིང་དེའི་ཚེ་ན་དོག་ཅིང་སྐྱུག་བྲོ་བ་དང༌། མུན་གནག་ཅིང་འཁུམས་པ་ལ་སོགས་པའི་ཚོར་བས་གདུང་ཞིང༌། མ་ཡི་སྤྱོད་ལམ་ལ་བརྟེན་ནས་ཚོར་བས་གདུང་བ་ཡང༌། མ་ཉིད་བཀྲེས་ན་ནི་གཡང་ལ་ལྷུང་བ་ལྟ་བུ་དང༌། སྐོམ་ན་ནི་ལུས་སྐམ་པ་ལྟ་བུ་དང༌། མའི་ལུས་ཉི་མ་ལ་སོགས་པའི་རྐྱེན་གྱིས་ཚ་བར་གྱུར་ན་ནི་ལུས་ཚིག་སྙམ་པ་དང༌། གྲང་ཆེས་ན་ནི་ཆབ་རོམ་གྱི་ནང་དུ་རེངས་པ་ལྟ་བུ་དང༌། འགྲང་ཐལ་ན་ནི་རི་ཡིས་མནན་པ་ལྟ་བུ་དང༌། བསྒུལ་བསྐྱོད་དྲག་པོ་བྱས་ཚེ་ནི་གཡང་སར་མགོ་མཇུག་བཟློག་པ་སྙམ་བྱེད་པ་སྟེ། དེ་ལྟར་མ་དེའི་སྤྱོད་ལམ་སྣ་ཚོགས་པ་དག་གི་རྣམ་འགྱུར་ལས་བྱུང་བའི་སྡུག་བསྔལ་ནི་དཔག་ཏུ་མེད་དེ། སློབ་སྤྲིང་ལས།

ཤིན་ཏུ་མི་བཟད་དྲི་ང་མི་གཙང་གཅེར་བས་འགགས། །རབ་ཏུ་དོག་པའི་མུན་ནག་འཐིབས་པོར་འདུག་པ་ཡི། །མངལ་གནས་དམྱལ་བ་ལྟ་བུའི་ནང་དུ་དེ་ཞུགས་ནས། །ལུས་ཡོངས་བསྐུམ་ལ་སྡུག་བསྔལ་ཆེན་པོ་བརྣག་དགོས་སོ། །ཞེས་སོ། །དེའི་ཚེ་འདུ་ཤེས་ལྔ་འབྱུང་བར་བཤད་དེ། མི་གཙང་བའི་འདུ་ཤེས་དང༌། དྲི་མི་ཞིམ་པ་དང༌། བཙོན་ར་དང༌། མུན་ནག་དང༌། ཕྱིར་འབྱུང་བའི་འདུ་ཤེས་སོ། །དེའང་ཁྱེའུ་རྣམས་ནི་མའི་གློ་གཡས་ནས་ཁ་ནང་དུ་བལྟས་ཏེ་ཐལ་མོ་གཉིས་ཀྱིས་གདོང་བཀབ་ནས་གནས་ལ། བུ་མོ་རྣམས་ནི་གཡོན་ནས་ཕྱིར་བལྟ་བས་གནས་ཤིང༌། ནུ་ཞོས་བརྟག་པའང་ཡན་ལག་བརྒྱད་པའི་རྒྱུད་ལས།

དེ་ཡང་རྩིབ་ལོགས་ལ་བརྟེན་དཀུ་གཡས་མཐོ། །ནུ་ཞོ་གཡས་པ་སྔར་འབྱུང་ཁྱེའུ་སྐྱེ། །ཞེས་དང༌། ཅིག་ཤོས་གོ་ལྡོག་པར་བཤད་དོ། །དེ་ནས་ཟླ་བ་དགུ་དང་ཞག་བཅུ་ཐལ་ནས་སམ། དགའ་བོ་མངལ་འཇུག་གི་མདོ་ལས་ནི། ཞག་བདུན་ཕྲག་སུམ་ཅུ་རྩ་བརྒྱད་འདས་ནས་འབྱུང་བར་བཤད་པས། དེ་ཡན་ཆད་དུ་ཟླ་བ་བརྒྱད་དང་ཞག་ཉེར་དྲུག་འདས་པས་དེ་ནས་བཙའ་བའི་དུས་ཀྱི་རྗེས་སུ་འགྲོ་བ་དེའི་ཚེ་ན་ལས་ཀྱི་རླུང་གིས་དེ་ཡི་ལུས་མགོ་མཇུག་ལྡོག་སྟེ་རུས་པའི་འཕྲུལ་འཁོར་གྱི་བར་དུ་བཙིར་ནས་བཟོད་དཀའ་བའི་བསྡུས་འཇོམས་ཀྱི་རི་བོ་ཕན་ཚུན་འཐབས་ནས་ལུས་བཙིར་ཞིང་འཐག་པའི་སྡུག་བསྔལ་དེ་ཁུར་དུ་འཕོས་པ་སྟེ་སྟེང་དུ་བབས་པ་ལྟ་བུའི་སྡུག་བསྔལ་གྱི་ཉེ་བར་སྤྱད་པས་མཐོ་བཙམས་པར་བྱས་ནས་མ་དང་བུ་གཉིས་ཀ་དེ་ཡི་མོད་ལ་སྲོག་འདོར་རམ། ཡང་ན་ཅིག་ཤོས་ཏེ་མ་བུ་གང་རུང་འཆི་བའམ། གཉིས་ཀ་ཤི་ལ་ཐུག་པ་ཙམ་གྱི་གནོད་པ་བདོ་བའི་སྡུག་བསྔལ་གྱི་ཁུར་གྱི་ནོན་བཞིན་བཙའ་བར་འགྱུར་ཏེ། ཨོ་རྒྱན་ཆེན་པོའི་ཞལ་ནས།

མ་ཡི་ཁ་རུས་མ་གཏོགས་རུས་ཚིགས་ཕྱེ། །མ་བུ་གཉིས་ཀ་གཤིན་ཡུལ་གོམ་གསུམ་བོར། །ཞེས་སོ། །དེ་ལྟར་བཙས་པའི་ལུས་དེ་མངལ་གནས་ནས་བྱུང་བའི་ཕྲུ་མ་རློན་པས་དཀྲིས་ཤིང་དྲི་ང་བ་དེ་སྟན་དུ་ལྷུང་བ་ན་ཚེར་དོང་དུ་ལྷུང་སྙམ་པའི་འཇིགས་སྐྲག་དང༌། ཕྲུ་མ་བཤུས་པ་ན་བསྲན་མི་བཟོད་པ་པགས་པ་བཤུས་པ་ལྟ་བུ་དང༌། ཁྲུས་དང་འཚོག་མར་བསྐུ་བ་སོགས་ཀྱི་ཚེ་ཤ་རྨེན་ཏེ་ཤའུ་ཆུང་ཞིག་པ་ལྟ་བུའི་ཚོར་བས་གདུང་བ་ན། སྔོན་མའི་མངལ་ན་གནས་པའི་སྡུག་བསྔལ་གྱི་ཚོར་བ་དག་བརྗེད་ཅིང་དྲན་པའི་སྟོབས་རྣམས་ཉམས་ནས་བརྒྱལ་ལ་ཁད་པར་བྱས་ཤིང༌། དེ་ལྟར་རེག་པའི་རྣམ་པས་ལུས་གཟིར་ཞིང་སེམས་ལ་འཇིགས་སྣང་དང་སྡུག་བསྔལ་དཔག་ཏུ་མེད་པ་འབྱུང་ཞིང༌། དེ་ནས་ཀྱང་བྱིས་པ་ཆུང་ངུ་དེའི་ལུས་མི་གཙང་བའི་ནང་དུ་ཟུག་ཅིང༌། ནད་དང་ཚ་གྲང་བཀྲེས་སྐོམ་སོགས་ཅི་བྱུང་ན་ཡང་ངུ་ངག་འདོན་པ་ཙམ་ལས་བརྗོད་མི་ཤེས་པ་སོགས་སྡུག་བསྔལ་འབའ་ཞིག་མྱོང་བས་དུས་འདའ་བ་ལས་མེད་དོ།།

གཉིས་པ་རྒ་བའི་སྡུག་བསྔལ་ནི།

རྒ་བའི་ཆད་པས་ནོན་པའི་ལང་ཚོ་ལ། །ཉམས་དང་ཡིད་མི་བདེ་བའི་ཁུར་བབས་པས།།

བསྐྱོད་པའི་མཐུ་ཉམས་འཁར་བའི་གཞན་དབང་ཅན།།

འགྲོ་ལྡོག་གཡོ་བའི་ལྷུ་ཚིགས་༴རྣམ་པར་འཁུར།།17

དབང་པོ་རྒུད་ནས་འདོད་པའི་ཡོན་ཏན་དང༌། །ཡུལ་གྱི་ལོངས་སྤྱོད་སྤྲིན་གྱིས་བཀབ་པ་ཡི།།

ཚ་ཟེར་བཞིན་དུ་རྨོངས་དང་མཐུ་ཉམས་པའི།།

འདུ་ཤེས་འཁྲུགས་པའི་མལ་དུ་ཤིན་ཏུ་འཁྱམས།།

དེ་ནས་ཡང་འདི་ལྟར་སྤྱིར་འདུས་བྱས་ཀྱི་དངོས་པོ་ཐམས་ཅད་རྟག་ཏུ་འགྱུར་ཞིང་རྒུད་པའི་ཆོས་ཉིད་ལས་མ་འདས་ཤིང༌། ཁྱད་པར་དུ་མི་རྣམས་ཀྱི་ན་ཚོད་གཞོན་ཞིང་དར་ལ་བབ་པའི་གནས་སྐབས་ཀྱི་བཀྲག་མདངས་དང༌། གཟི་བྱིན་ཐམས་ཅད་རྒུད་པར་བྱེད་པ་རྒ་བའི་ཆད་པ་དྲག་པོས་ནོན་པའི་ཚེ་ན་ལང་ཚོ་ལ་དཀར་དམར་གྱི་མདངས་དང་ཤ་ཉམས་རྒྱས་པ་སོགས་མཛེས་པའི་ཆ་ཇི་སྙེད་ཡོད་པ་ཐམས་ཅད་ཉམས་ནས་བཞིན་གཉེར་མས་གང༌། ཁའི་སོ་ཕྲེང་ཟག སྐྲ་དཀར་པོར་གྱུར་པ་སོགས་དང༌། རང་ལ་དབང་མེད་ཅིང་གཞན་གྱིས་བརྙས་པ་དང་སུན་འབྱིན་པ་སོགས་ཀྱིས་ཡིད་མི་བདེ་བའི་ཁུར་སྟེང་དུ་བབས་པས་བློ་སྲབས་པ་དང༌། ལུས་ཀྱི་འབྱུང་བ་རྒུད་པས་ཚོར་བ་ཡིད་དུ་མི་འོང་བ་སྣ་ཚོགས་མྱོང་ཞིང༌། བཤང་གཅི་འདོར་བའི་སར་བསྐྱོད་པའི་མཐུ་ཙམ་ཡང་ཉམས་ཏེ་འཁར་བ་ལ་བརྟེན་ནས་འགྲོ་དགོས་པས་དེའི་གཞན་དབང་ཅན་ཕར་འགྲོ་ཞིང་ཚུར་ལྡོག་པ་དང༌། འགྲེང་འདུག་དང་བརྐྱང་བསྐུམ་སོགས་གཡོ་ཞིང་འགུལ་བའི་ཚེ་ལྷུ་ཚིགས་རྣམ་པར་འགྱུར་ནས་ས་ལ་འགྱེལ་བ་དང༌། དབང་པོ་རྣམས་རྒུད་ནས་མིག་འགྲིབ། རྣ་བ་སྲ། ལྕེ་ལྡིབས་པར་འགྱུར་ཞིང༌། བུད་མེད་བསྟེན་པ་སོགས་འདོད་པའི་ཡོན་ཏན་དེའི་བདེ་བ་ལ་སྤྱོད་པ་དང༌། གཟུགས་མཛེས་པ་ལ་བལྟ་བ་སོགས་ཡུལ་གྱི་ལོངས་སྤྱོད་ཐམས་ཅད་ཀྱིས་ཉམས་མི་དགའ་ཞིང༌། གལ་ཏེ་དགའ་ཞིང་སྤྱོད་ནའང་སྤྲིན་གྱིས་བཀབ་པ་ཡི་ཚ་ཟེར་ཏེ་ཉི་མའི་འོད་བཞིན་དུ་ཡུལ་དེ་རྣམས་མྱོང་བའི་ཤེས་པ་རྨོངས་པས་དགའ་བ་མྱོང་བར་མི་འགྱུར་བ་དང༌། ལུས་ཀྱི་མེ་དྲོད་སོགས་ཀྱི་མཐུ་ཉམས་པའི་དབང་གིས་བཟའ་བཏུང་མི་འཇུ་ཞིང་ཚ་གྲང་གང་ཡང་མི་བཟོད་ལ་འདུ་ཤེས་འཁྲུགས་པའི་དབང་གིས་ཉིན་མཚན་གོ་ནོར། རང་གཞན་གྱི་མི་སུ་ཡིན་ངོ་མི་ཤེས་པར་གྱུར་ཏེ། རྟག་པར་མལ་ས་ཁོ་ནའི་ནང་དུ་མི་དགའ་བཞིན་སྡོད་དགོས་པས་ཤིན་ཏུ་འཁྱམས་ཞེས་བྱ་ལ། དེས་ན་རྒན་པ་ལ་བཀུར་སྟི་བྱས་པ་ལའང་ཕན་ཡོན་ཆེ་བར་ཡང་བསྔགས་ཏེ། ཨོ་རྒྱན་ཆེན་པོའི་ཞལ་ནས།

རྒས་པ་ཡི་མུག་མ་འཇུག་བཀུར་སྟིས་སྐྱོང༌། །ཞེས་དང༌། སློབ་དཔོན་ཆེན་པོ་མ་ཏི་ཙི་ཏྲས།

སྐྱེ་བ་ཅན་ལ་ངེས་པར་ནི། །རྒ་དང་འཆི་དང་ན་མཆིས་ན། །མ་བགྲེས་མ་བསྙུངས་མ་འགྲོངས་ཞེས། །ལེགས་སྨོན་གསོལ་ཡང་ཅི་ལ་ཕན། །ཞེས་དང༌།

འདི་ལྟར་གང་ཞིག་མི་འཚལ་བ། །དེ་ཉིད་ཀྱིས་ནི་སྡུག་བསྔལ་ཏེ། །མཁས་པ་སུ་ཞིག་མགར་བ་ལྟར། །ཚིག་པ་ལ་ནི་ཡང་བསྲེག་བཞིན། །ཞེས་པ་དག་གི་ཤུགས་ཀྱིས་དེ་ལ་བསྙེན་བཀུར་བ་བསོད་ནམས་ཆེ་བར་བསྟན་ཏོ།།

གསུམ་པ་ན་བའི་སྡུག་བསྔལ་ནི།

རང་བཞིན་སྙོམས་ལྡན་འདུ་བའི་རྫིང་བུ་ནི། །རྙོག་པ་ཅན་བགྱིད་ན་བའི་ཚོར་བ་ཡིས།།

ཕུང་པོ་ལྔ་ཡི་ཉེར་ལེན་དུབ་བྱས་ཏེ།།

འཚོ་བའི་བརྟན་པ་བྲལ་བའི་དོགས་པས་སྐྲག།

འདི་ལྟར་འབྱུང་བ་བཞིས་བསྡུས་པའི་ལུས་ཅན་ལ། རང་བཞིན་གྱིས་རླུང་དང༌། མཁྲིས་པ་དང༌། བད་ཀན་ཏེ་དེ་དག་ཆ་སྙོམས་པ་དང་ལྡན་པའི་འདུ་བའི་ལུས་རྫིང་བུ་དྭངས་པ་ལྟ་བུ་ནི། དེ་དག་ཆ་མི་མཉམ་པའམ། འདུས་པའམ། གཅིག་ལ་གཅིག་ལྡན་ཏེ་འདྲེས་པ་གང་ཡང་རུང་བའི་དབང་གིས་རྙོག་པ་ཅན་དུ་བགྱིད་དེ་ན་བའི་ཚོར་བ་དྲག་པོ་ཡིས་གཟིར་ཞིང༌། དེ་ཡང་གཟུགས་ཕུང་ལ་ན་ཚའི་སྡུག་བསྔལ་བྱུང་བ་ན་ཚོར་བས་དེ་ཉམས་སུ་མྱོང་ཚེ་འདུ་ཤེས་ཀྱིས་འདི་ནི་སྡུག་བསྔལ་ལོ་སྙམ་དུ་ཤེས་ཤིང་འདུ་བྱེད་ཀྱིས་རིགས་འདྲ་ཕྱི་མ་འདུ་བྱེད་པ་ལ་རྣམ་ཤེས་ཀྱིས་དེ་ཐམས་ཅད་ཉེ་བར་ལེན་པར་བྱེད་པས་ཕུང་པོ་ལྔ་ཡི་རང་བཞིན་ཉེ་བར་ལེན་པ་པོ་འདི་ཉིད་ནད་ཀྱིས་མནར་ཞིང་དུབ་པར་བྱས་པ་དེས་སེམས་འཁྲུགས་ཏེ་དགའ་བའི་ཡུལ་ཐམས་ཅད་ཕྱིན་ཅི་ལོག་ཏུ་གྱུར་ནས། ཟས་ཡི་གར་མི་འོང༌། མལ་དུ་འགྲེ་ལྡོག་བྱེད། མཚན་མོ་གཉིད་མི་བྲོ། ན་བ་ནི་ངེས་པར་འཆི་བའི་སྔོན་དུ་འགྲོ་བའོ་སྙམ་དུ་འཚོ་བའི་བརྟན་པ་བྲལ་ཏེ་འཆི་བར་འགྱུར་བའི་གནས་ལ་དོགས་པས་སྐྲག་ཅིང་ཡིད་མི་བདེ་བར་འགྱུར་བ་ལ་སོགས་པས་སྡུག་བསྔལ་ལོ།།

བཞི་པ་འཆི་བའི་སྡུག་བསྔལ་ནི།

སྲིད་པ་འདི་ན་སྲོག་གི་རིན་ཐང་ལ། །ཐུག་པ་མེད་པས་འཆི་བའི་སྡུག་བསྔལ་གྱིས།།

རྣམ་པར་གཏུགས་པའི་སྐྱེས་བུ་གཉེན་འདུན་དང༌།།

ལོངས་སྤྱོད་ལས་ཐལ་ས་ཚུགས་མེད་པར་འགྲོ།།

སྲིད་པ་འདི་ན་འཇིག་རྟེན་གྱི་དཔལ་འབྱོར་ཡོད་དགུ་ཐམས་ཅད་སྤུངས་ཀྱང་དེ་ལ་འདི་སྙམ་དུ་དེ་ཙམ་གྱིས་ནི་སྲོག་གི་རིན་ཐང་འོང་བས་དེ་ནི་མོད་ལ་སྲོག་འདོར་ཡང་སླ་བསམ་པའི་སྲོག་རིན་ཐུག་པ་སྟེ་རི་བ་མེད་པས་གཅེས་ཤིང་ཤིན་ཏུ་ཕངས་ནའང་འཆི་བའི་སྡུག་བསྔལ་གྱིས་བཏང་བ་ནི་སུ་ཡང་མེད་པས། དེ་ཉིད་ཐོག་ཏུ་བབ་ཅིང་རྣམ་པར་གཏུགས་པའི་ཚེ་ན་ནི་སྐྱེས་བུ་དེ་ཉིད་མལ་གྱི་ཐ་མ་རུ་ཉལ་བ་ན་སྐྱས་ཆེན་པོ་འདེགས་པའི་དུས་ལ་བབ་པ་ཡིན་པས། དེ་ལ་མངའ་རིས་དང་ལོངས་སྤྱོད་གནས་ཁང་དང་གཉེན་གྲོགས་སོགས་ཅི་ཡོད་ཀྱང་བློས་ནི་མི་ཐོངས། རྗེས་སུ་ནི་མི་འབྲང༌། ཕྱི་མ་ལ་ནི་མི་དབང༌། གནད་གཅོད་ཀྱི་སྡུག་བསྔལ་ནི་རང་གཅིག་པུས་མྱོང་བ་ལས་བགོ་བཤའ་བྱེད་དུ་མེད་པ་ལ་སོགས་པས་སྙིང་མི་དགའ་བཞིན་པའི་ངང་ལ་འདུ་ཤེས་འཁྲུལ། དྲན་པ་ཉམས། དབུགས་ཆད་དེ། གཉེན་འདུན་དང་ལོངས་སྤྱོད་ཡོད་དགུ་ལས་མར་གྱི་དཀྱིལ་ནས་སྤུ་བཏོན་པ་བཞིན་ཐལ་ནས་འགྲོ་བ་དྲུག་པོ་གང་དུའང་མི་ཐེ་བའི་སྲིད་པ་བར་མ་དོར་འཁྱམས་པའི་ཚེ་ན་གནས་འདི་རུ་འགྲོ་དང༌། དུས་འདི་ཙམ་དུ་འགྲོ་དང༌། ཡུལ་འདི་ཀར་འདུག་ཞེས་པའི་ས་ཚུགས་མེད་པར་འགྲོ་དགོས་པའི་དུས་ལ་བབ་པས་སྐྱབས་དང་མགོན་མེད་པར་ཡིད་ལུས་བག་ཆགས་ཀྱི་བྱད་གཟུགས་ཙམ་ལ་བརྟེན་ནས་ཚོར་བ་ཐམས་ཅད་སྡུག་བསྔལ། སྣང་བ་ཐམས་ཅད་འཇིགས་སྐྲག་ཏུ་འཆར་བའི་ཚེ་གཅེས་པར་བསྐྱངས་པའི་ལུས་ནི་ཐ་གུས་བཅིངས། རྡོག་པས་བརྫིས། ཡོལ་བས་བསྒྲིབས་ནས་མཐར་ཆུར་བསྐྱུར་བའམ། དུར་ཁྲོད་དུ་འཕེན་པ་སོགས་བྱེད་ཅིང༌། དེའི་དུས་སུ་འཁོར་ལོས་སྒྱུར་བའི་ལོངས་སྤྱོད་ཡོད་ཀྱང་དྲི་ཟ་བའི་དུས་ལ་བབ་པ་ན་རྗེས་སུ་འབྲང་བ་ནི་ལས་དང་བག་ཆགས་གཉིས་པོ་ལས་མེད་ན་ཅིའི་ཕྱིར་སྐྱོ་བར་མི་བྱེད་དེ། ཀ་ནི་ཀའི་ཕྲིན་ཡིག་ལས།

འཆི་བདག་གིས་ནི་དྲངས་པ་ན། །དགེ་དང་སྡིག་པ་མ་གཏོགས་པ། །འགྲོ་བ་ཐམས་ཅད་ཕྱིར་ལོག་ནས། །འགའ་ཡང་ཁྱོད་རྗེས་མི་འབྲང་བར། །མཁྱེན་པར་མཛོད་ལ་ལེགས་པར་སྤྱོད། །ཅེས་སོ།།

ལྔ་པ་དགྲ་སྡང་བ་དང་འཕྲད་པའི་སྡུག་བསྔལ་ནི།

མི་སྡུག་ཡུལ་དང་ཕྲད་པའི་སྡུག་བསྔལ་གྱི། །ཕོ་ཉས་རྣམ་པར་གཟིར་ཞིང་སྨད་པ་རྣམས།།

བདེ་བའི་འབབ་སྟེགས་ཞིག་པའི་ངལ་གསོ་ལྟར།།

དབུགས་འབྱིན་ཐོབ་པ་མེད་པས་ལྷག་པར་ཉེན།།

འདི་ལྟར་སེམས་ཅན་རྣམས་ཀྱི་རང་བཞིན་བྱ་བ་མ་ཡིན་པ་ལ་གོམས་ཤིང༌། ངོ་ཚ་ཁྲེལ་ཡོད་ཀྱིས་བླང་དོར་དང་དམ་པའི་མགོན་གྱིས་ཟིན་པ་ཉུང་བས་རང་གཞན་གྱི་བདེ་འབྲས་འཇོམས་པའི་ལས་ལྷུར་ལེན་པས་ན། དེ་ལ་མི་དང་མི་མ་ཡིན་པ་ལ་སོགས་པའི་གཟུགས་ཅན་དང་གཟུགས་མེད་པའི་གནོད་བྱེད་དུ་མས་རྟག་ཏུ་འཚེ་བར་འགྱུར་བ་ཆོས་ཉིད་ཡིན་པས། དེ་འདྲ་བའི་སྐྱེ་བོ་དག་བདེ་བ་མངོན་པར་སྒྲུབ་པའི་ཐབས་ལ་བརྩོན་ཀྱང་ཐབས་མ་ཡིན་པས་མི་སྡུག་པའི་ཡུལ་དགྲ་དང་གདོན་བགེགས་ལ་སོགས་པ་དང་འཕྲད་པའི་ཚེ་ན་ལུས་སེམས་སྡུག་བསྔལ་གྱི་ཕོ་ཉ་སྟེ། ཚོར་བས་རྣམ་པར་གཟིར་ཞིང་ཉམས་སྨད་པར་འགྱུར་བ་རྣམས་ནི་དཔེར་ན་ཁུར་གྱིས་དུབ་པའི་གང་ཟག་ཞིག་གིས་ངལ་སོས་པའི་བདེ་བ་བརྟེན་པའི་ཕྱིར་འབབ་སྟེགས་ལ་བསྡད་པ་ན་དེ་ཞིག་སྟེ་ལུས་བསྣད་པའི་སྡུག་བསྔལ་མྱོང་བ་ལས་ངལ་གསོ་བའི་བདེ་བ་མེད་པ་ལྟར། བྱིས་པའི་གྲོགས་དང་ཡུལ་གྱི་ཉེས་དམིགས་ལ་བཟོད་པའི་དཀའ་ཐུབ་ནི་མེད། མཁས་པའི་ཤེས་རབ་ཀྱིས་བསྲུང་བའི་ཚུལ་ལ་ནི་མི་མཁས་པས་བདེ་བའི་དབུགས་འབྱིན་ཐོབ་པ་མེད་པར་མ་ཟད་ལོངས་སྤྱོད་དང་སྲོག་ལ་མ་རུངས་པར་གྱུར་ནས་ཡིད་གདུང་བ་ཆེན་པོས་ལྷག་པར་ཉེན་པར་འགྱུར་རོ།།

དྲུག་པ་གཉེན་བྱམས་པ་དང་བྲལ་བའི་སྡུག་བསྔལ་ནི།

བྱམས་སྡུག་འདུ་འབྲལ་གསར་པར་བཀོད་པ་ཡི།།

གདུང་བས་ཉམས་པའི་དཀའ་ཐུབ་གཟུགས་གྱུར་ན།།

ནོར་བཟང་དྲི་ཟ་མོ་ཡི་དབང་གྱུར་པའི།།

ལམ་ཕྲང་འཚེ་བས་བཀབ་ལས་ལས་མཐའ་རིང༌།།

བདག་ཉིད་ལ་བྱམས་ཤིང་ཕན་གདགས་པའི་ཕ་མ་སོགས་མཛའ་བཤེས་སྙིང་དུ་སྡུག་པ་རྣམས་དང་ལྷན་ཅིག་དུ་འདུ་ཞིང་འགྲོགས་ཏེ་གཅིག་གིས་གཅིག་ལ་བརྩེ་ཞིང་དགའ་བཞིན་ཡོད་པའི་འཕྲོ་ལ་འགའ་ཞིག་ཤི་བའམ་གནས་གཞན་དུ་ཕྱོགས་པ་སོགས་འབྲལ་བའི་ངང་ཚུལ་གསར་པར་བཀོད་པ་ཡི་ཚེ་ན། དེའི་ཡོན་ཏན་དང༌། སྤྱོད་ལམ་དང༌། རྣམ་འགྱུར་དྲན་ནས་སེམས་ཤིན་ཏུ་གདུང་བས་ཉམས་པའི་དཀའ་ཐུབ་སྟེ་སྡུག་བསྔལ་གྱི་དངོས་པོ་དེ་གལ་ཏེ་གཟུགས་སུ་གྱུར་པའམ་བལྟ་རུ་ཡོད་ན་སྔོན་གྱི་དུས་སུ་རྒྱལ་པོའི་བུ་ནོར་བུ་བཟང་པོ་ཞེས་བྱ་བ་དྲི་ཟའི་བུ་མོ་ཡིད་འཕྲོག་མ་ལ་ཆགས་པ་ཡི་དབང་དུ་གྱུར་ནས་རྗེས་བསྙེགས་ཏེ་སོང་བའི་ཚེ་ལམ་འཕྲང་ཐམས་ཅད་གཅན་གཟན་དང་མི་མ་ཡིན་ལ་སོགས་པའི་འཚེ་བ་མང་པོས་བཀབ་པ་ལ་བགྲོད་ནས་སོང་བ་ལས་ནི་ལས་ཀྱི་མཐའ་རིང་སྟེ་སྔར་དང་ཕྱི་མའི་མུ་མཐའ་མེད་པར་མྱོང་དགོས་པའི་ཕྱིར་རོ།།

དེ་ཡང་འདི་ལྟར་སྔོན་གྱི་དུས་ཤིག་ན་ཡུལ་ལྔ་ལེན་པར་རྒྱལ་པོ་གཉིས་ཤིག་ཡོད་པ་ལས། བྱང་ཕྱོགས་ན་གྲོང་ཁྱེར་གླང་པོའི་ཁྱིམ་ཞེས་བྱ་བ་ལ་དབང་བྱེད་པའི་རྒྱལ་པོ་ནོར་ཅན་ཞེས་བྱ་བ་དེས་རྒྱལ་སྲིད་ཆོས་བཞིན་བྱེད་པ་དང༌། དེར་གནས་པའི་ཀླུ་སྐྱེ་བ་སྣ་ཚོགས་ཞེས་བྱ་བ་ཞིག་ཡོད་པ་དེས་ཀྱང་དུས་དུས་སུ་ཆར་ཕབ་པ་ལ་སོགས་པའི་མཐུས་ཡུལ་དེར་ལོ་ལེགས་ཤིང་ནད་མེད་ལ་འབྱོར་པ་རྒྱས་སོ། །ལྷོ་ཕྱོགས་ལྔ་ལེན་པའི་རྒྱལ་པོ་ནི་ཤིན་ཏུ་གཏུམས་ཤིང་གཟུ་ལུམ་ཅན་ཞིག་པས་ཡུལ་མི་རྣམས་རིམ་གྱིས་བྱང་གི་ཡུལ་ཁམས་དེར་སོང་བས་རང་གི་རྒྱལ་ཁམས་བྲི་བ་མཐོང་ནས་གསེར་ཐུམ་རྒྱལ་མཚན་གྱི་རྩེར་བཅིངས་ནས་ཡུལ་འདི་ན་བྱང་ཕྱོགས་པའི་ཀླུ་དེ་བཀུག་ནུས་པ་སུ་ཡོད་པ་དེ་ལ་འདི་སྦྱིན་ཞེས་བསྒྲགས་པ་ན་སྦྲུལ་ཁས་བསྡིག་པ་ཞིག་གིས་ཁས་བླངས་ཏེ་སོང་བ་ཀླུ་དེས་གོ་ནས། མཚོ་ཁར་གནས་པའི་རྔོན་པ་གཉིས་ལས་སྲན་ཅན་ཞེས་བྱ་བ་ནི་ཤི་ཟིན་པས་སྤང་ལེབ་ཅན་ལ་སྨྲས་པ། ཁོ་བོ་ཕ་མ་དང་འབྲལ་བའི་འཇིགས་པ་ལས་སྐྱོབ་པའི་ཕྱིར་ཁྱོད་ལ་རེ་ཡི་སྔགས་པ་དེས་དང་པོ་དཀྱིལ་འཁོར་བྱས་ནས་གྲྭ་བཞིར་སེང་ཕུར་བཙུགས་ནས་ཚོན་སྐུད་ཀྱིས་བྲེས་ཏེ་གསང་སྔགས་སྒྲུབ་པའི་ཚེ་དུག་མདས་གནད་དུ་གཟིར་ལ་མ་ཤི་གོང་གསང་སྔགས་སྡུས་ཤིག་པར་བསྡིགས་ལ་སོད་ཅིག་ཅེས་བྱས་པས། དེས་ཀྱང་ཇི་ལྟར་བསྒོ་བ་བཞིན་བྱས་པ་ན་ཀླུས་རང་གི་གནས་སུ་ཁྲིད་དེ་རིན་པོ་ཆེ་སྣ་ཚོགས་བྱིན་ནས་རྔོན་པ་དེ་མི་ཡུལ་དུ་འོང་བ་ལ་དྲང་སོང་བྱམས་པ་དང་ལྡན་པ་ཞིག་གིས་དོན་ཡོད་པའི་ཞགས་པ་སློང་ཞིང་བྱས་པས། དེས་ཀྱང་སླར་སོང་སྟེ་དེ་བསླངས་པས་ཐོབ་ཅིང༌། ཕྱིས་ཞིག་ན་རི་བོ་གཞན་ཞིག་ཏུ་སོང་བ་ན་དེར་དྲང་སྲོང་ཞིག་གནས་པ་དེའི་ཡུལ་དེ་ན་ཚངས་པ་འདུ་བའི་རྫིང་ཞེས་བྱ་བ་ཞིག་ཡོད་པ་དེར་མིའམ་ཅིའི་རྒྱལ་པོ་ལྗོན་པའི་བུ་མོ་ཡིད་འཕྲོག་མ་འཁོར་ལྔ་བརྒྱ་དང་བཅས་ཚེས་བཅོ་ལྔ་ལ་ཁྲུས་བྱེད་དུ་འོང་ངོ་ཞེས་བསྙད་པས། དེས་རེ་ཞིག་ན་བུ་མོ་དེ་དེར་འོང་བ་ཞགས་པས་བཏབ་ནས་བཟུང་ངོ༌། །བུ་མོ་དེས་བདག་ཁྱོད་ལ་མི་འོས་ཀྱང་གཙུག་གི་ནོར་བུ་འདི་གང་གི་ལག་ཏུ་གནས་པ་དེ་ལ་དབང་ངོ་ཞེས་སྨྲས་པ་ན་རྒྱལ་པོ་ནོར་ཅན་གྱི་བུ་ནོར་བཟང་ཞེས་བྱ་བ་གཟུགས་བྱད་ཕུན་སུམ་ཚོགས་པ་ཞིག་ཡོད་པ་དེ་ལ་ཕུལ་ལོ། །དེར་བྲམ་ཟེ་གཉིས་ཤིག་འོང་བའི་གཅིག་རྒྱལ་པོའི་མདུན་ན་འདོན་དུ་བཞག ཅིག་ཤོས་རྒྱལ་བུའི་དྲུང་དུ་བཞག་ནས་ཕྱིས་རྒྱལ་བུ་རྒྱལ་སར་འཁོད་དུས་མདུན་ན་འདོན་དུ་འཇོག་པར་ཆད་བྱས་སོ། །དེའི་ཚེ་རྒྱལ་པོ་འདིའི་དགྲར་གྱུར་པའི་རི་འོར་བ་ཞིག་ཡོད་པ་དེ་ལན་མང་དུ་ཕབ་ཀྱང་མ་ཐུབ་པ་ན། བྲམ་ཟེ་མདུན་ན་འདོན་གྱིས་ཅིག་ཤོས་ལ་ཕྲག་དོག་གིས་རྒྱལ་བུ་མེད་པའི་ཐབས་སུ་རི་འོར་བ་དེ་ཕབ་ཏུ་འགྲོ་བའི་ཐབས་བྱས་ནས་དེས་བུ་མོའི་གཙུག་ནོར་མ་ལ་བཅོལ་ཏེ་སོང་བ་ལ་རྣམ་ཐོས་བུས་གནོད་སྦྱིན་ལྔ་ལེན་གྲོགས་སུ་སྦྲན་ནས། རི་འོར་བའི་སྲོག་ཆགས་སུ་ལའང་མ་གནོད་པར་སྟོབས་ཀྱིས་ཕབ་པར་བྱས་སོ། །དེའི་ཚེ་རྒྱལ་པོའི་རྨི་ལམ་ན་བྱ་རྒོད་ཞིག་གིས་རང་གི་ལྟོ་དྲལ་ཏེ་རྒྱུ་མ་གཟིངས་ནས་གྲོང་ཁྱེར་བསྐོར་བ་དང༌། རིན་ཆེན་བདུན་གྱིས་ཁྱིམ་གང་བ་རྨིས་པ་ན། མདུན་ན་འདོན་དེས་ཤེས་བཞིན་དུ་ངན་གཡོའི་དབང་གིས། སྨྲས་པ་རྨིས་ལྟས་ངན་པ་དེ་བཟློག་པའི་ཕྱིར་རྫིང་བུ་རི་དྭགས་ཕྲ་མོའི་ཁྲག་གིས་བཀང་བ་ལ་ཁྲུས་བྱས་ཏེ་མི་མ་ཡིན་གྱི་ཚིལ་བདུག་ན་ཕན་ནོ་ཞེས་ཡིད་འཕྲོག་མ་གསོད་པའི་ཐབས་བྱས་པ་བུ་མོས་གོ་ནས་གཙུག་ནོར་བསླངས་ཏེ། སྔར་གྱི་དྲང་སྲོང་དེ་ལ་སོར་གདུབ་ཀྱང་བཅོལ། ལམ་འཕྲང་བརྒལ་བའི་ཚུར་རི་ནག་པོ་དགུ་དང་དེའི་ཕ་རོལ་ན་གངས་ཅན་ལ་སོགས་པའི་རི་ཆེན་པོ་བཅུ་གཉིས་དང་ཡང་སེང་ལྡེང་ཅན་ལ་སོགས་པའི་རི་བཞི་དང་བཅས་པ་བགྲོད་པའི་ཕ་རོལ་ན། སྲིན་པོ་དང་སྦྲུལ་ཁ་ཆུའི་རྒྱུན་ཆེན་པོའི་ཤུགས་ཀྱིས་རྒྱུག་པ་དང༌། ཀློང་དྲག་ཏུ་འཁྱིལ་བ་དང༌། གནོད་སྦྱིན་དང༌། སྲིན་མོ་དང༌། ཆུ་བོ་མང་པོ་སོགས་ཡོད་ཀྱིས་མ་འོང་ཞིག་ཅེས་བཤོལ་ཐོབ་ལ་ཟློག་ཅིག གལ་ཏེ་མ་བཟློག་པར་འོང་ན། སྨན་དང༌། གསང་སྔགས་དང༌། དུག་སེལ་གྱི་སྨན་འདི་དང་འདི་གྱིས་ཤིག་ཅེས་འཕྲིན་བཞག་སྟེ་སོང་ངོ༌། །གཞོན་ནུ་ཁྱིམ་དུ་འོང་ན་བུ་མོ་མེད་པའི་མྱ་ངན་གྱིས་གདུང་བཞིན་རྗེས་བསྙེགས་ཏེ་འཕྲིན་བཞག་པ་བཞིན་འཇིགས་པ་དེ་ཐམས་ཅད་ལས་རྒྱལ་བར་བྱས་ནས་མིའམ་ཅིའི་གྲོང་ཁྱེར་ཉམས་དགའ་བར་ཕྱིན་ནོ། །དེར་མིའམ་ཅིའི་བུ་མོ་མང་པོས་ཆུ་ལེན་པ་ལ་རྒྱུ་མཚན་དྲིས་པས་ཡིད་འཕྲོག་མ་མིའི་དྲི་མས་གོས་པ་འཁྲུ་བའི་ཕྱིར་ཟེར། དེས་མི་ཚོར་བར་གདུ་བུའི་རྒྱ་བུམ་པར་འཕངས་པ་ཡིད་འཕྲོག་མའི་པང་དུ་ལྷུང་བས་དེ་འོང་བ་ཤེས་ཏེ་དབེན་པར་ཞོག་ཅིག་ཅེས་སྨྲས་ནས་ཕ་ལ་ཁོ་མོའི་ཁྱོ་པོ་དེ་འདི་འོང་ན་ཁྱོད་ཀྱིས་ཇི་ལྟར་བགྱི་ཞེས་དྲིས་པས་ཁྲོས་ཏེ་དུམ་བུ་བདུན་དུ་གཏོར་རོ་ཞེས་སྨྲས། ཀུན་ནས་དཀྲིས་པ་དང་བྲལ་ནས་གལ་ཏེ་འོང་སྲིད་ན་ཁྱོད་དང་བུ་མོ་སྟོང་ལོངས་སྤྱོད་དང་བཅས་སྦྱིན་ནོ་ཞེས་ཁས་བླངས་སོ། །དེ་ནས་གཞོན་ནུ་དེ་བསྟན་པ་ན་གཟུགས་བྱད་ཤིན་ཏུ་ལེགས་པས་ངོ་མཚར། ཚོད་བགམ་པའི་ཕྱིར་གསེར་གྱི་སྡོང་པོ་བདུན། ཤིང་ཏ་ལ་བདུན། རྔ་བོ་ཆེ་བདུན། ཕག་བདུན་བཞག་པ། གཞོན་ནུའི་རལ་གྲི་ཨུཏྤལ་ལྟར་སྔོ་བས་གསེར་སྡོང་ཐམས་ཅད་ཐལ་བར་བྱས། གཞན་རྣམས་མདས་ཐལ་མར་ཕིག་པར་བྱས་པས་ཤིན་ཏུ་ཡ་མཚན་ཏེ། རྒྱལ་པོ་རང་གིས་ཁས་བླངས་པ་བཞིན་བུ་མོ་ཕུལ་ཏེ་ཕོ་བྲང་དུ་འབྱོར་པ་ཆེན་པོས་གནས་སོ། །ཕྱིས་ཞིག་ན་གཞོན་ནུས་ཕ་མ་དྲན་ཏེ་བཙུན་མོ་འཁོར་སྟོང་དང་ལོངས་སྤྱོད་རྒྱ་ཆེན་པོ་དང་བཅས་མིའམ་ཅིའི་ཤུགས་ཀྱིས་ནམ་མཁའ་ནས་གྲོང་ཁྱེར་གླང་པོའི་ཁྱིམ་དུ་ཕྱིན་པའི་ཚེ། རྒྱལ་པོ་ནོར་ཅན་དགའ་ཞིང་ངོ་མཚར་ཏེ་རྒྱལ་སྲིད་དུ་བཞག རྒྱལ་པོ་ནོར་བཟང་དེས་ལོ་བཅུ་གཉིས་ལ་གཏན་པ་མེད་པའི་མཆོད་སྦྱིན་རྒྱ་ཆེན་བྱས་ནས་བྱང་ཆུབ་ཏུ་སྨོན་ལམ་བཏབ་བོ། །དེ་ཡང་དམ་པ་རྣམས་ནི་འཇིག་རྟེན་པའི་ཚུལ་ལ་བརྟེན་ནས་འཇིག་རྟེན་ལས་འདས་པའི་ལམ་ལ་གཞན་དག་ཁ་དྲང་བའི་ཕྱིར་དེ་ལྟར་མཛད་པ་ཡིན་པར་ཤེས་དགོས་སོ།།

བདུན་པ་འདོད་དང་མི་འདོད་ཕྱིན་ཅི་ལོག་ཏུ་འབྱུང་བའི་སྡུག་བསྔལ་བཤད་པ་ནི།

འདོད་པས་ཕོངས་དང་དབུལ་བའི་སྐྱེས་བུ་རྣམས། །བཀྲེས་སྐོམ་དོན་མ་གྲུབ་པའི་རེ་དོགས་ཀྱིས།།

གཞན་དབང་ཁོ་ནར་ལུས་ངག་ཆུད་གསོན་པའི།།

སྡུག་བསྔལ་ས་ལ་རྒྱུ་བའི་ཡི་དྭགས་དངོས།།

དེ་ཡང་སྤྱིར་འདོད་པའི་ཉེས་དམིགས་ལ་ཡིད་འབྱུང་མ་སྐྱེས་པ་དེ་སྲིད་དུ་སྨོན་པའི་དོན་གྲུབ་པ་དང་མ་གྲུབ་པའི་རེ་དོགས་ཀྱིས་འཇིག་རྟེན་འཆིང་བ་ཆོས་ཉིད་ཡིན་པས། དམན་པ་རྣམས་རང་གི་འདོད་པའི་དངོས་པོ་རྩོལ་བས་བསྒྲུབས་ཀྱང་མི་རྙེད་པས་ཕོངས་པ་དང༌། རང་ལ་དབང་བའི་ལོངས་སྤྱོད་མེད་པས་དབུལ་བའི་སྐྱེས་བུ་དེ་རྣམས་ནི་དུས་དང་རྣམ་པ་ཐམས་ཅད་དུ་བགོ་བའི་གོས་མེད་པས་ཚ་གྲང་དང༌། བཟའ་བཏུང་གི་ལོངས་སྤྱོད་མེད་པས་བཀྲེས་པ་དང་སྐོམ་པས་གདུང་ཞིང་དེ་དག་སེལ་བའི་ཐབས་སྣ་ཚོགས་བསྒྲུབ་པ་ན། དེའི་དོན་གྲུབ་ན་ཅི་མ་རུང་སྙམ་དུ་བསམ་ནས་འདོད་བཞིན་གྲུབ་པ་དང་མ་གྲུབ་པའི་རེ་བ་དང་དོགས་པ་གཉིས་ཀྱིས་ཚོང་ཁེ་སྐྱེད། མཉེད་གླ་གྱོང་འཕུར། འཚོ་རྫི་ལུགས། ཞིང་རྨོ་སྐོར། རྩྭ་འཐུ་ཤིང་བྲེགས། བཤས་ཉོ་བཤས་ཚོང་སོགས་ཆོས་དང་མི་མཐུན་ཞིང་ཕྱི་མར་མི་ཕན་པའི་བག་མེད་སྡིག་པའི་ལས་ཀྱི་གཞན་དབང་ཁོ་ནར་སོང་ནས་དམ་ཆོས་སྒྲུབ་པའི་རྟེན་བཟང་ལུས་ངག་གཉིས་པོ་ཆུད་གསོན་པར་བྱེད་པའི་ངལ་བ་དང༌། སྡུག་བསྔལ་བར་མ་ཆད་པས་དུས་འདའ་བ་དང༌། རང་ལ་ལོངས་སྤྱོད་ཡོད་པ་རྣམས་ཀྱིས་ཀྱང་ཆོག་ཤེས་མེད་པས་ཡོངས་སུ་ཚོལ་བའི་སྡུག་བསྔལ་གྱིས་གདུང་བ་ནི་རྟག་ཏུ་ཟས་སྐོམ་ཁོ་ན་ཡིད་ལ་བཏགས་ཏེ་ལས་ཀྱི་དབང་གིས་དལ་ཁོམ་མེད་པར་ས་ལ་རྒྱུ་ཞིང་འགྲོ་བའི་ཡི་དྭགས་དངོས་ཡིན་ནོ་ཞེས་པའི་དོན་ཏོ།།

གཉིས་པ་བདེན་པ་ལྷག་མ་གསུམ་རྒྱས་པར་བཤད་པ་ལ་གསུམ་སྟེ། ཀུན་འབྱུང་གི་བདེན་པ། ལམ་གྱི་བདེན་པ། འགོག་པའི་བདེན་པ་བཤད་པའོ། །དང་པོ་ཀུན་འབྱུང་གི་བདེན་པ་བཤད་པ་ནི།

གཟུགས་ལ་རྟེན་བཅས་ཚོར་བས་རང་བཞིན་ཤེས། །འདུ་ཤེས་ལས་དེ་རྒྱུན་ཆགས་འདུ་བྱེད་ཀྱི།།

ཕྱིན་ཆད་ས་བོན་བསྐྲུན་དང་རྣམ་ཤེས་ཀྱི། །སྡུག་བསྔལ་ཉམས་སུ་མྱོང་བའི་ཉེ་བར་ལེན།།

ཕུང་པོ་ལྔ་པོ་འདི་དག་སྡུག་བསྔལ་རྣམས། །ཀུན་གྱིས་འབྱུང་གནས་ཀུན་གྱི་རྟེན་དང་སྣོད།།

ཀུན་གྱི་རྒྱུ་འབྲས་བདག་པོར་མཁྱེན་འཚལ་ནས།།

ཀུན་འབྱུང་ལས་དང་ཉོན་མོངས་སྤང་འཚལ་ལོ།།

སྡུག་བསྔལ་དེ་དག་ཐམས་ཅད་ཀྱི་རྟེན་ཉེ་བར་ལེན་པའི་ཕུང་པོ་ལྔ་ཡིན་ཏེ། རྣམ་པར་སྨིན་པའི་གཟུགས་ཡོད་པ་དང༌། དེ་ལ་འདི་ནི་བདག་གི་གཟུགས་སོ་སྙམ་དུ་བདེན་པར་བཟུང་ཞིང་ཞེན་པ་ན། དེ་ལ་རྟེན་བཅས་ནས་སྡུག་བསྔལ་གང་ཡང་རུང་བ་བྱུང་བ་ལ་ཚོར་བས་དེ་ལྟར་ཉམས་སུ་མྱོང་བའི་སྒོ་ནས་དེ་ཡི་རང་བཞིན་ཤེས་ཤིང༌། འདུ་ཤེས་ཀྱིས་དེ་མི་འདོད་པའི་མཚན་མར་བཟུང་ནས་བསལ་བའི་བསམ་པས་ལས་དེ་རྒྱུན་ཆགས་སུ་འཆིང་ཞིང༌། འདུ་བྱེད་ཀྱིས་ཕྱིན་ཆད་ཀྱི་སྡུག་བསྔལ་མཐའ་དག་པའི་ས་བོན་ནམ་རྒྱུ་བསྐྲུན་པ་དང༌། རྣམ་ཤེས་ཀྱིས་འདི་ནི་སྡུག་བསྔལ་ལོ། །སྡུག་བསྔལ་ནི་བདག་གི་འོ་ལ་སོགས་པའི་སྒོ་ནས་དེ་ཐམས་ཅད་བདག་གིར་བྱས་ཏེ་ཉམས་སུ་མྱོང་བའི་ཉེ་བར་ལེན་པ་པོར་བྱེད་དོ། །ཚོགས་གཞན་གཉིས་ལའང་དེ་བཞིན་ལས་བདེ་བ་ལ་འདོད་པའི་མཚན་མར་བཟུང་ནས་དེ་སྒྲུབ་པ་དང༌། བཏང་སྙོམས་ལ་གཉིས་ཀ་མ་ཡིན་པའི་མཚན་མར་བཟུང་ནས་རང་དགར་འཇོག་གོ །དེས་ན་ཉེར་ལེན་གྱི་ཕུང་པོ་ལྔ་པོ་འདི་དག་མ་རིག་པ་དང་མཚུངས་པར་ལྡན་པའི་ཆ་ནས་སྡུག་བསྔལ་རྒྱུ་འབྲས་ཐམས་ཅད་ཀྱི་གཞིར་གྱུར་ཅིང་དེ་ཡོད་པའི་དབང་གིས་བྱུང་བས་ན། འཁོར་བའི་སྡུག་བསྔལ་རྣམས་ཇི་སྙེད་ཡོད་པ་དེ་ཀུན་གྱི་འབྱུང་གནས་ཡིན་ཞིང༌། ཕུང་པོ་དེ་དག་རྒྱུན་མ་ཆད་པ་དེ་སྲིད་དུ་སྡུག་བསྔལ་ཀྱང་རྒྱུན་མི་འཆད་པས་ཀུན་གྱི་རྟེན་དང༌། ས་བོན་དང་རྣམ་སྨིན་གྱི་ཆ་འཛིན་པས་སྣོད་དང༌། ཟག་བཅས་རྒྱུར་གྱུར་གྱི་ཕུང་པོ་ནི་ཡང་སྲིད་ཕྱི་མ་ཀུན་གྱི་རྒྱུ་དང༌། འབྲས་གྱུར་གྱི་ཕུང་པོ་ནི་སྔ་མའི་འབྲས་བུ་དང༌། ད་ལྟ་སྡུག་བསྔལ་ཉེ་བར་ལེན་པ་པོའམ་བདག་པོར་གྱུར་བས་སམ། ཡང་ན་གཟུགས་ལ་བརྟེན་ནས་འབྱུང་བས་འབྱུང་གནས། ཚོར་བས་ཉམས་སུ་མྱོང་བས་རྟེན་དང༌། འདུ་ཤེས་ཀྱིས་རྒྱུན་ཆགས་སུ་འཛིན་པས་སྣོད་དང༌། འདུ་བྱེད་ཀྱིས་རྒྱུ་ལས་འདུ་བྱེད་པས་རྒྱུ་དང༌། རྣམ་ཤེས་ནི་ལས་དེས་འཕངས་པའི་འབྲས་བུ་དང༌། ཉམས་སུ་མྱོང་བ་པོའི་བདག་པོ་ཡིན་ཞེས་པའོ། །དེས་ན་ཇི་སྐད་བཤད་པའི་ཚུལ་དེ་མཁྱེན་པར་འཚལ་བ་སྟེ་ཤེས་པར་བྱས་ནས། ཉེ་བར་ལེན་པའི་ཕུང་པོ་ལྔ་ཡི་མཚན་ཉིད་ཅན་གྱི་སྐྱེ་བ་སྡུག་བསྔལ་གྱི་བདེན་པ་འཁོར་བའི་རང་བཞིན་འདི་ལ་ཡིད་འབྱུང་ནས། དེའི་རྒྱུ་སྲིད་པ་ལ་དགའ་བའི་སྲེད་པས་དྲངས་པའི་ཉོན་མོངས་པས་ཀུན་ནས་བསླངས་ཏེ་དགེ་མི་དགེ་མི་གཡོ་བའི་ལས་ཇི་སྙེད་བསགས་པ་ཐམས་ཅད་འཁོར་བར་འཕེན་བྱེད་ཀྱི་རྒྱུ་ཡིན་པས་ན་འཁོར་བའི་སྡུག་བསྔལ་ཀུན་གྱི་འབྱུང་གནས་ལས་དང་ཉོན་མོངས་པ་དག་གི་རྩ་བ་བདག་ཏུ་འཛིན་པ་དྲུངས་ནས་ཕྱུང་བའི་ཚུལ་གྱིས་སྤངས་པར་འཚལ་ལོ་ཞེས་ཏེ་གྱིས་ཤིག་ཅེས་པའོ།།

འདིའི་སྐབས་སུ་སྡུག་བསྔལ་དང་ཀུན་འབྱུང་གཉིས་ཀར་གཏོགས་པའི་ཕུང་པོ་ལྔ་ཅུང་ཟད་སྤྲོད་ཏེ་བཤད་པ་ལ། མཚན་ཉིད་དང༌། དབྱེ་བ་གཉིས།

དང་པོ་མཚན་ཉིད་ནི། གཟུགས་སུ་རུང་བ་གཟུགས་ཀྱི་མཚན་ཉིད། ཉམས་སུ་མྱོང་བ་ཚོར་བའི་མཚན་ཉིད། མཚན་མར་འཛིན་པ་འདུ་ཤེས་ཀྱི་མཚན་ཉིད། ཕུང་པོ་བཞི་ལས་གཞན་པའི་རྒྱུ་རྐྱེན་གྱིས་འདུ་བྱེད་པ་འདུ་བྱེད་ཀྱི་མཚན་ཉིད། ཡུལ་དོན་རིག་པ་རྣམ་ཤེས་ཀྱི་མཚན་ཉིད་དོ།།

གཉིས་པ་དབྱེ་བ་ནི། གཟུགས་ལ་དབྱེ་ན་རྒྱུ་གཟུགས་ས་ཆུ་མེ་རླུང་བཞི། འབྲས་གཟུགས་དབང་པོ་ལྔ་དང་ཡུལ་ལྔ། རྣམ་པར་རིག་བྱེད་མ་ཡིན་པའི་གཟུགས་དང་བཅུ་གཅིག་ལས་གཞན་གོ་སླ་ལ། རྣམ་པར་རིག་བྱེད་མ་ཡིན་པ་ནི། མཛོད་ལས།

རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། །ཞེས་པ་ལྟར་དགེ་བ་ལ་དམ་བཅས་པ་སྡོམ་པ། མི་དགེ་བ་ལ་དམ་བཅས་པ་སྡོམ་མིན། དམ་བཅས་པ་མེད་པའི་དགེ་བ་དང་མི་དགེ་བ་རྣམས་བར་མ་སྟེ། དེ་དག་ཀྱང་ལུས་ངག་གི་འབྱུང་བ་ཆེན་པོ་རྣམས་ལས་སྐྱེས་པ། སེམས་མེད་པ་དང་ཡེངས་པའི་གནས་སྐབས་རྣམས་སུའང་རྟག་ཏུ་རྗེས་སུ་འབྲང་བ་སྟེ། འདི་བྱེ་བྲག་སྨྲ་བ་ཁོ་ནས་འདོད་ཀྱི། མདོ་སྡེ་པ་ཡན་ཆད་རྣམ་པར་རིག་བྱེད་མ་ཡིན་པའི་གཟུགས་མི་འདོད་དོ། །ཚོར་བ་ནི་བདེ་སྡུག་བར་མ་གསུམ་མོ། །འདུ་ཤེས་ནི་རྒྱ་ཆེ་ཆུང་བར་མ་གསུམ་མོ། །འདུ་བྱེད་ནི་ལྡན་པའི་འདུ་བྱེད་སེམས་བྱུང་ལྔ་བཅུ་རྩ་གཅིག་ལས་ཚོར་བ་དང་འདུ་ཤེས་གཉིས་མ་གཏོགས་འདུ་བྱེད་ཞེ་དགུའོ། །ལྡན་མིན་འདུ་བྱེད་ཉེར་གསུམ་ཡོད་དོ།།

སེམས་བྱུང་ལྔ་བཅུ་རྩ་གཅིག་ནི། ཚོར་འདུ་སེམས་པ་རེག་ཡིད་བྱེད། །འདི་དག་ཀུན་འགྲོ་ལྔ་ཡིན་ནོ། །འདུན་མོས་དྲན་ཏིང་ཤེས་རབ་སྟེ། །ཡུལ་ནི་སོ་སོར་ངེས་པ་ལྔ། །དད་དང་ངོ་ཚ་ཤེས་ཁྲེལ་ཡོད། །མ་ཆགས་མི་སྡང་གཏི་མུག་མེད། །བརྩོན་འགྲུས་ཤིན་སྦྱང་བག་ཡོད་པ། །བཏང་སྙོམས་རྣམ་པར་མི་འཚེ་བ། །འདི་དག་དགེ་བ་བཅུ་གཅིག་གོ །འདོད་ཆགས་ཁོང་ཁྲོ་ང་རྒྱལ་དང༌། །མ་རིག་ལྟ་བ་ཐེ་ཚོམ་སྟེ། །རྩ་བའི་ཉོན་མོངས་དྲུག་ཡིན་ནོ། །ཁྲོ་བ་འཁོན་འཛིན་འཆབ་དང་འཚིག །ཕྲག་དོག་སེར་སྣ་སྒྱུ་གཡོ་རྒྱགས། །རྣམ་འཚེ་ངོ་ཚ་ཁྲེལ་མེད་རྨུགས། །རྒོད་པ་མ་དད་ལེ་ལོ་དང༌། །བག་མེད་བརྗེད་ངེས་རྣམ་པར་གཡེང༌། །ཤེས་བཞིན་མ་ཡིན་ཉེ་ཉི་ཤུ། །གཉིད་འགྱོད་རྟོག་དཔྱོད་གཞན་འགྱུར་བཞི། །ཞེས་སོ། །དེ་ཐམས་ཅད་ཀྱང་སེམས་ལས་རྫས་ཐ་དད་ཅིང༌། རྟེན་དང༌། དམིགས་པ། རྣམ་པ། དུས་དང༌། རྫས་ཏེ་མཚུངས་པ་ལྔའི་སྒོ་ནས་མཚུངས་པ་ཡིན་ནོ། །དེ་གཉིས་ཀྱང་རྟེན་དབང་པོ་གཅིག་ལ་བརྟེན་པ་དང༌། ཡུལ་གཅིག་ལ་དམིགས་པ་དང༌། གཉིས་ཀས་ཀྱང་རྣམ་པ་གཅིག་འཛིན་པ་དང༌། དུས་གཅིག་ཏུ་སྐྱེ་བ་དང༌། རྫས་རེ་རེ་བར་མཉམ་པའོ། །དེ་དག་ཀྱང་སེམས་གཅིག་གི་འཁོར་ན་སེམས་བྱུང་མང་དུ་ཡོད་པའི་གཙོ་འཁོར་ཕན་ཚུན་མཚུངས་པ་ལྔས་མཚུངས་པས་ན་མཚུངས་ལྡན་ཞེས་བྱའོ། །རྣམ་པར་ཤེས་པའི་ཕུང་པོ་ནི། ཉན་ཐོས་རྣམས་དང་དབུ་མ་པ་ཕལ་ཆེར་ལྟར་ན་ཚོགས་དྲུག་དང༌། སེམས་ཙམ་དང་དབུ་མ་པ་ཁ་ཅིག་དང་གསང་སྔགས་པ་རྣམས་ལྟར་ན་ཉོན་ཡིད་དང་ཀུན་གཞི་གཉིས་བསྣན་ནས་ཚོགས་བརྒྱད་དུ་འདོད། དེ་ལ་ཚོགས་དྲུག་ནི། མིག་གི་རྣམ་ཤེས། རྣ་བའི་རྣམ་ཤེས། སྣའི་རྣམ་ཤེས། ལྕེའི་རྣམ་ཤེས། ལུས་ཀྱི་རྣམ་ཤེས་དང་ལྔ་ནི་སྒོ་ལྔའི་རྣམ་ཤེས་ཡིན་ལ། དེའི་སྟེང་དུ་ཡུལ་རྣམས་ལ་དེ་དང་དེར་འཛིན་པ་ནི་ཡིད་ཀྱི་རྣམ་ཤེས་ཏེ་དྲུག་གོ །ཉོན་ཡིད་ནི། ཁ་ནང་བལྟས་ཀུན་གཞི་ལ་དམིགས་ནས་དུས་རྟག་ཏུ་ངའོ་སྙམ་དུ་བདག་གི་རྣམ་པར་རློམ་སེམས་པ་སྟེ། འཕགས་པའི་མཉམ་བཞག་གི་དུས་མིན་པར་སོ་སྐྱེའི་སར་ནམ་ཡང་མི་འགག་པའོ། །ཀུན་གཞིའི་རྣམ་ཤེས་ནི་ཤེས་ཙམ་གསལ་རིག་ཏུ་གནས་པ་མི་གསལ་བ་སྣོད་བཅུད་རྒྱ་ཆེན་པོ་ལ་དམིགས་པའོ། །དེ་ལྟ་བུའི་ཉེར་ལེན་གྱི་ཕུང་པོ་ལྔ་ནི་ཚེ་ཕྱི་མའི་སྡུག་བསྔལ་གྱི་རྒྱུ་བྱེད་པའི་ཆ་ནས་ཀུན་འབྱུང་དང༌། སྔ་མའི་ལས་ཀྱིས་བསྐྱེད་པའི་ཆ་ནས་སྡུག་བསྔལ་གྱི་བདེན་པའི་མཚན་གཞི་ཡིན་ཏེ། ཟག་བཅས་རྒྱུར་གྱུར་པའི་ཕུང་པོ་ལྔ་ཀུན་འབྱུང་དང༌། ཟག་བཅས་འབྲས་བུར་གྱུར་པའི་ཕུང་པོ་ལྔ་ལ་སྡུག་བསྔལ་ཞེས་བྱའོ། །དེས་ན་ཀུན་འབྱུང་ལ་སྡུག་བསྔལ་གྱིས་ཁྱབ་ཀྱང་སྡུག་བསྔལ་ལ་ཀུན་འབྱུང་གིས་མ་ཁྱབ་སྟེ་སྣོད་ཀྱི་འཇིག་རྟེན་ལ་སོགས་པའོ།།

གཉིས་པ་ལམ་གྱི་བདེན་པ་བཤད་པ་ནི།

དེ་ལྟར་སྤངས་ནས་སྐྱེས་བུ་འབྲིང་གི་ལམ།།

བདེན་པ་བཞི་ཡི་ཤིང་རྟ་ལ་ཞོན་རྣམས།།

དེ་ལྟར་ཀུན་འབྱུང་གི་རྩ་བ་བདག་དང་བདག་གིར་འཛིན་པའི་མ་རིག་པ་སྤངས་པས་སྡུག་བསྔལ་གྱི་རང་བཞིན་ཁམས་གསུམ་གྱིས་བསྡུས་པའི་ཉེར་ལེན་གྱི་ཕུང་པོའི་རྒྱུན་ཆད་ནས་འགོག་པ་མངོན་དུ་འགྱུར་བའི་ཐབས་ནི་སྐྱེས་བུ་སྲིད་བདེ་ལ་མི་ཞེན་ཅིང་གཞན་དོན་འབའ་ཞིག་ཀྱང་དོན་དུ་མི་གཉེར་བས་འབྲིང་དུ་གྱུར་པ་ཉན་ཐོས་དང་རང་སངས་རྒྱས་དག་གི་ལམ་སྟེ། དེ་གང་ཞེ་ན་སྲིད་པས་བསྡུས་པའི་སྣོད་བཅུད་ཐམས་ཅད་སྨིག་རྒྱུའི་གཡོ་བ་དང༌། གློག་གི་འགྱུར་བ་དང༌། མགལ་མེའི་འཁོར་ལོ་བཞིན་སྐད་ཅིག་གིས་འགྱུར་ཞིང་མི་བརྟན་པ་འདི་ཉིད་སྡུག་བསྔལ་གྱི་ངོ་བོ་ཡིན་ལ་དེ་གང་ཟག་གི་བདག་གིས་སྟོང་པའི་ཚུལ་ཤེས་ནས། དེ་ལ་ཕྱིན་ཅི་ལོག་ཏུ་བཟུང་བའི་མ་རིག་པ་སུན་ཕྱུང་སྟེ་ལས་དང་ཉོན་མོངས་པ་ཐམས་ཅད་རྒྱུན་ཆད་ནས་མྱ་ངན་ལས་འདས་པའི་ས་ལ་རེག་པའི་ཐབས་སུ་ལམ་གྱི་བདེན་པ་བདག་མེད་རྟོགས་པའི་ཤེས་རབ་རྒྱུད་ལ་བསྟེན་པ་སྟེ། བཤེས་སྤྲིང་ལས།

སྐྱེ་འདི་སྡུག་བསྔལ་སྲེད་པ་ཞེས་བགྱི་བ། །འདི་ནི་དེ་ཡི་ཀུན་འབྱུང་རྒྱ་ཆེན་ཏེ། །འདི་འགོག་པ་ནི་ཐར་པ་ལགས་ཏེ་དེ། །འཐོབ་བགྱིད་འཕགས་ལམ་ཡན་ལག་དེ་བརྒྱད་ལགས། །ཞེས་སོ། །དེ་ལྟར་ཤེས་སྤང་མངོན་དུ་བྱ་བ་དང་དེའི་ཐབས་བསྟེན་པ་སྟེ་བཞི་པོ་ཡི་ཚུལ་གྱིས་སྐྱེས་བུ་གང་ཞིག་ཤིང་རྟ་ལ་ཞོན་ནས་འདོད་པའི་སར་འགྲོ་བ་བཞིན། ལམ་ལྔ་རིམ་གྱིས་བགྲོད་པ་རྣམས་ཀྱིས་ཉམས་སུ་ལེན་ཚུལ་འདི་ནི་ཐེག་ཆེན་དང་ཐུན་མོང་བའི་ལམ་ཡིན་པས་ཤེས་པར་བྱ་དགོས་ཏེ། དེ་ཡང་དབྱིག་གཉེན་གྱིས།

ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་སོ་སོར་ཐར་པའི་སྡོམ་པས་རྒྱུད་བསྡམས་ཏེ། རང་ལམ་གྱི་ཉམས་ལེན་སྤྱི་དང༌། ཁྱད་པར་བདག་མེད་པའི་དོན་ལ་ཐོས་བསམ་གྱིས་ངེས་པ་གཏིང་ནས་རྙེད་པར་བྱ་བ་སྟེ། དེའི་ཚུལ་བཤེས་སྤྲིང་ལས།

གཟུགས་ནི་བདག་མ་ཡིན་ཞེས་གསུངས་ཏེ་བདག །གཟུགས་དང་མི་ལྡན་བདག་ལ་གཟུགས་གནས་མིན། །གཟུགས་ལ་བདག་མི་གནས་ཏེ་དེ་བཞིན་དུ། །ཕུང་པོ་ལྷག་མ་བཞི་ཡང་སྟོང་རྟོགས་ཀྱིས། །ཞེས་བཤད་པའི་དོན་ལ་ལེགས་པར་བརྟགས་ཏེ་འཇིག་ཚོགས་ཕུང་པོ་ལ་བདག་ཏུ་ལྟ་བ་ཉི་ཤུ་པོ་མངོན་པར་གཞོམ་པར་བྱ་བ་ཡིན་པར་གཏན་ལ་དབབ་ནས་འཕགས་པའི་ལམ་ཡན་ལག་བརྒྱད་བསྒོམས་ཏེ། དེ་ལ་ཡང་དག་པའི་ལྟ་བ་ནི་ཟག་པ་མེད་པའི་ཤེས་རབ་དང༌། ཡང་དག་པའི་འཚོ་བ་ནི་ལོག་འཚོ་མེད་པ་དང༌། རྩོལ་བ་ནི་བརྩོན་བགྲུས་ཏེ་ཡང་དག་སྤོང་བཞིའོ། །དྲན་པ་ནི་དམིགས་རྣམ་མི་བརྗེད་པ་སྟེ་དྲན་པ་ཉེ་བར་བཞག་པ་བཞིའོ། །ཏིང་འཛིན་ནི་བསམ་གཏན་བཞི་པ་ལ་སོགས་པ་འཕགས་པའི་ལམ་གྱི་རྟེན་གཞིའོ། །ངག་ནི་ངག་གི་ལས་ལམ་བཞིའོ། །ལས་མཐའ་ནི་ལུས་ཀྱི་མི་དགེ་བ་གསུམ་སྤོང་བའི་རང་བཞིན་ནོ། །རྟོག་པ་ནི་གནོད་སེམས་སོགས་མེད་པ་སྟེ་དགེ་བའི་རྟོག་པ་དུ་མའོ།།

གསུམ་པ་འགོག་བདེན་བཤད་པ་ནི།

འགོག་པ་མངོན་གྱུར་མྱ་ངན་འདས་པའི་ཁམས།།

ཐར་པ་མཆོག་གི་གོ་འཕང་ཉིད་དུ་འགྲོ།།

དེ་ལྟ་བུའི་རྣམ་པར་གྲོལ་བའི་ལམ་དེ་ལ་བསླབ་པས་མཐོང་བ་དང་སྒོམ་པས་སྤང་བར་བྱ་བ་མ་ལུས་པ་ཟད་པའི་འགོག་པ་དམ་པ་མངོན་དུ་གྱུར་ཏེ། ཟད་པ་དང་མི་སྐྱེ་བ་ཤེས་པའི་ཡེ་ཤེས་བརྙེས་ནས་ཕུང་པོ་ལྷག་མ་དང་བཅས་པ་དང༌། ལྷག་མ་མེད་པའི་མྱ་ངན་ལས་འདས་ཤིང་ཟག་པ་མེད་པའི་ཁམས་ཕྱི་རོལ་པས་ཐར་པ་མ་ཡིན་པ་ལ་ཐར་པར་བཟུང་བ་ལྟ་བུ་དང༌། གནས་སྐབས་ཉོན་མོངས་དང་སྡུག་བསྔལ་རགས་པ་འགགས་པའི་མངོན་མཐོ་ཙམ་མ་ཡིན་པར་གཏན་དུ་ཐར་པ་མཆོག་གི་གོ་འཕང་ཉིད་དུ་འགྲོ་བ་ཡིན་ཞིང༌། དེ་ཡང་རང་གིས་བརྩོན་པའི་སྟོབས་འབའ་ཞིག་ལ་རག་ལས་ཏེ། དེ་ཉིད་ལས།

ཐར་པ་རང་ལ་རག་ལས་འདི་ལ་ནི། །གཞན་གྱིས་གྲོགས་བགྱིར་ཅི་ཡང་མ་མཆིས་པས། །ཐོས་དང་ཚུལ་ཁྲིམས་བསམ་གཏན་ལྡན་པ་ཡིས། །བདེན་པ་རྣམ་པ་བཞི་ལ་འབད་པར་མཛོད། །ཅེས་སོ། །དེ་ཡང་བདེན་པ་བཞི་པོ་དེས་ཤེས་བྱའི་ཆོས་ཐམས་ཅད་བསྡུས་སམ་ཞེ་ན། མ་བསྡུས་ཏེ། ནམ་མཁའ་དང་སོ་སོར་བརྟགས་མིན་གྱི་འགོག་པ་སོགས་འགའ་ཞིག་མ་བསྡུས་ཞེས་བཞེད་ལ། འོ་ན་ཤེས་བྱའི་ཆོས་ཐམས་ཅད་གང་གིས་བསྡུས་ཞེ་ན། གཟུགས་ཀྱི་ཕུང་པོ་དང༌། ཡིད་ཀྱི་སྐྱེ་མཆེད་དང༌། ཆོས་ཀྱི་ཁམས་གསུམ་གྱིས་བསྡུས་པ་ཡིན་ནོ། །འཕགས་པའི་ལམ་གྱི་མངོན་རྟོགས་ཐམས་ཅད་བདེན་པ་བཞིས་བསྡུས་སམ་ཞེ་ན་བསྡུས་པར་འདོད་དགོས་པ་ཡིན་ནོ། །དེས་ན་བདེན་བཞིའི་ནང་ཚན་གྱི་འགོག་པ་ནི་སོ་སོར་བརྟགས་འགོག་ཁོ་ན་ཡིན་པས། བརྟག་མིན་འགོག་པ་དང༌། འགོག་པའི་སྙོམས་འཇུག་འགོག་བདེན་དུ་མི་གཏོགས་པར་ཤེས་དགོས་སོ། །དེ་ལྟར་རང་ལམ་ཁོ་ནས་དགྲ་བཅོམ་ཐོབ་པ་དེ་དག་ལྷག་མེད་དུ་འདས་ནས་འགོག་པའི་དབྱིངས་ལ་བཞུགས་པ་ཉིད། རང་གི་ལུགས་ལ་གཏན་དུ་བར་འདོད་ཀྱང་ཐེག་ཆེན་པས་གཞལ་ན་སྔར་ཚོགས་ཇི་ཙམ་བསགས་པའི་ཡུན་དུ་བློའི་འཇུག་པ་ཞི་བར་ཐིམ་ཡང༌། དེ་ནས་བདེ་བ་ཅན་ལ་སོགས་པའི་དག་ཞིང་དུ་པདྨོའི་སྦུབས་སུ་སྐྱེ་བ་བཟུང་ནས་མ་རིག་པའི་བག་ཆགས་དང༌། ཤེས་བྱའི་སྒྲིབ་པ་ཕྲ་མོའི་མཐུས་ལོ་བདུན་དུ་ཁ་ཟུམ་ནས་གནས་པ་ལ། ཞིང་དེའི་སངས་རྒྱས་ཀྱི་ཐུགས་རྗེས་པདྨོ་ཁ་འབྱེད་ཅིང་ཏིང་ངེ་འཛིན་དེ་ལས་བསླང་བས་ཐེག་པ་ཆེན་པོ་ལ་འཇུག་པའི་སྤྲོ་བ་སྐྱེས་ནས་ལམ་བསྒོམས་པས་སྐུ་ཚེ་དེ་ཉིད་ལ་སངས་རྒྱ་བ་ནི། པདྨ་དཀར་པོ་ལས།

ཉན་ཐོས་དེ་དག་ཇི་སྲིད་དུ། །སངས་རྒྱས་རྣམས་ཀྱིས་མ་བསྐུལ་བ། །དེ་སྲིད་ཡེ་ཤེས་ལུས་གཅིག་གིས། །ཏིང་འཛིན་མྱོས་པས་བརྒྱལ་ཏེ་གནས། །བསྐུལ་ནས་སྣ་ཚོགས་གཟུགས་ཀྱིས་ནི། །སེམས་ཅན་དོན་ལ་ཆགས་འབྱུང་ཞིང༌། །བསོད་ནམས་ཡེ་ཤེས་ཚོགས་བསགས་ཏེ། །སངས་རྒྱས་བྱང་ཆུབ་ཐོབ་པར་འགྱུར། །ཞེས་པ་དང་མཐུན་པར་ལང་ཀར་གཤེགས་པ་ལས་ཀྱང་བཤད་དོ།།

གཉིས་པ་རྟེན་འབྲེལ་ཡན་ལག་བཅུ་གཉིས་བཤད་པ་ལ་གཉིས་ཏེ། སྤྱིའི་དོན་དང༌། གཞུང་གི་དོན་ནོ། །དང་པོ་སྤྱི་དོན་ལ་ལྔ་སྟེ། དགོས་པ། སོ་སོའི་ངོ་བོ། རྣམ་གཞག ཚེ་དུ་ལ་རྫོགས། སྒོམ་ཚུལ་ལོ། །དང་པོ་ནི།

འཁོར་འདས་ཀྱི་ཆོས་ཐམས་ཅད་རྟེན་འབྲེལ་སྒྱུ་མའི་སྣང་བ་ཙམ་དུ་ཤེས་ནས་ལྟ་བ་ངན་པ་ལ་མི་འཇུག་ཅིང༌། མཐར་ཐུག་མྱ་ངན་ལས་འདའ་བའི་དགོས་པ་ཡོད་དོ། །དེ་ཡང་མདོ་ལས།

འདི་ཡོད་པས་འདི་འབྱུང༌། འདི་སྐྱེས་པས་འདི་སྐྱེ་སྟེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་ཅེས་པ་ལ་སོགས་པ་གསུངས་ཏེ། འདི་ཡོད་པས་འདི་འབྱུང་ཞེས་གསུངས་པས། ཆོས་ཐམས་ཅད་རྒྱུ་ཡོད་པ་ཁོ་ན་ལས་སྐྱེ་བར་བསྟན་པས་རྒྱུ་མེད་པ་ལས་སྐྱེ་བར་འདོད་པ་འགོག འདི་སྐྱེས་པས་འདི་སྐྱེ་ཞེས་གསུངས་པས་རྒྱུ་དེ་ཡང་རྐྱེན་ལས་སྐྱེ་བར་བསྟན་པས་རྒྱུ་རྟག་པ་ལས་སྐྱེ་བར་འདོད་པ་འགོག འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་སོགས་གསུངས་པས་བློ་ཡི་གཡོ་བ་སྔོན་དུ་བཏང་བའི་དབང་ཕྱུག་ལ་སོགས་པའི་རྒྱུ་ལས་བྱུང་བར་འདོད་པ་འགོག་གོ།

གཉིས་པ་སོ་སོའི་ངོ་བོ་ནི།

མ་རིག་པ་ནི་བདེན་བཞི་དང་ལས་འབྲས་ཀྱི་རང་བཞིན་ལ་རྨོངས་ནས་བདག་ཏུ་འཛིན་པའོ། །འདུ་བྱེད་ནི་དེ་ལྟར་བདག་ཏུ་བཟུང་བས་བདག་ལ་ཆགས་པའི་དབང་གིས་ལས་དགེ་བ་བསོད་ནམས་ཆ་མཐུན་དང༌། མི་དགེ་བ་དང༌། ཁམས་གོང་མར་སྐྱེ་བའི་རྒྱུ་མི་གཡོ་བའི་ལས་དང་གསུམ་གསོག་པའོ། །རྣམ་ཤེས་ནི། ལས་དེས་རྣམ་པར་ཤེས་པ་ཕྱི་མའི་གནས་སུ་འཕེན་པ་སྟེ། འདི་ལ་ལས་གསོག་དུས་ཀྱི་རྣམ་ཤེས་རྒྱུ་དུས་ཀྱི་རྣམ་ཤེས་དང༌། འབྲས་བུ་མྱོང་དུས་ཀྱི་རྣམ་ཤེས་འབྲས་དུས་ཀྱི་རྣམ་ཤེས་ཏེ་གཉིས་ཡོད། མིང་གཟུགས་ནི། རྣམ་ཤེས་མའི་མངལ་ལ་སོགས་པར་ཞུགས་པ་ནས་ཕུང་པོ་རིམ་གྱིས་འགྲུབ་པའི་གནས་སྐབས་ཏེ། ཚོར་བ་འདུ་ཤེས་འདུ་བྱེད་རྣམ་ཤེས་ཏེ་མིང་བཞི་དང་གཟུགས་སོ། །སྐྱེ་མཆེད་ནི། མིག་རྣ་བ་སྣ་ལྕེ་ལུས་ཡིད་དེ་ནང་གི་སྐྱེ་མཆེད་དྲུག་གོ། རེག་པ་ནི། ཕྱིའི་ཡུལ་ནང་གི་རྣམ་ཤེས་བར་གྱི་དབང་པོ་གསུམ་འདུས་ནས་ཡུལ་གཅོད་པའོ། །ཚོར་བ་ནི། དེ་ལྟར་ཡུལ་དང་དུ་བླངས་པས་ཚོར་བ་བདེ་སྡུག་བར་མ་གསུམ་སྐྱེས་པའོ། །སྲེད་པ་ནི། དེའི་ཚེ་ཚོར་བ་བདེ་བ་ལ་དང་དུ་ལེན་འདོད་ཀྱི་སྲེད་པ་དང༌། སྡུག་བསྔལ་ལ་སྤོང་འདོད་ཀྱི་སྲེད་པ་སྐྱེས་པའོ། །ལེན་པ་ནི། སྲེད་པ་སྐྱེས་པས་འདོད་པའི་ཡུལ་དང་དུ་ལེན་པའི་ཕྱིར་རྒྱུག་པའོ། །སྲིད་པ་ནི། སྲེད་ལེན་གྱིས་གསོས་བཏབ་པས་ཚེ་ཕྱི་མ་འགྲུབ་ངེས་ཀྱི་ལས་གྲུབ་པའོ། །སྐྱེ་བ་ནི། ལས་དེའི་རྒྱུས་ཡང་ཕྱི་མའི་གནས་རིགས་སུ་སྐྱེས་པའོ། །རྒ་ཤི་ནི། སྐྱེས་པའི་གནས་སྐབས་ནས་བརྩམས་ཏེ་འཆི་བའི་བར་རྒ་བ་དང༌། དེ་ནས་འཆི་བ་ནི་ཤི་བའོ། །འདི་གཉིས་ཡན་ལག་གཅིག་ཏུ་བཞག་པ་ནི་མ་རྒས་པར་འཆི་བའང་ཡོད་པས་ཐམས་ཅད་ལ་རིམ་གྱིས་འབྱུང་བར་མ་ངེས་པའོ། །གཞན་ཡང་མི་འདོད་པ་བྱུང་བས་ཡིད་གདུང་བ་མྱ་ངན་དང༌། མྱ་ངན་དེ་ལས་སྐྱེས་པ་ངག་གི་བརྗོད་པ་སྨྲེ་སྔགས་དང༌། ལུས་ལ་སྡུག་བསྔལ་བྱུང་བ་སྡུག་བསྔལ་བ་དང༌། སེམས་ལ་སྡུག་བསྔལ་སྐྱེས་པ་ཡིད་མི་བདེ་བ་དང༌། ཕན་ཚུན་མི་མཐུན་པར་རྩོད་པས་འཁྲུགས་པ་ལ་སོགས་པའང་ཐམས་ཅད་ལ་འབྱུང་བར་མ་ངེས་པས་ཡན་ལག་ཏུ་མ་བཞག་ལ་སྐྱོ་བ་བསྐྱེད་པའི་ཕྱིར་རྒ་ཤིའི་འཁོར་དུ་གསུངས་པའོ།།

གསུམ་པ་རྣམ་པར་བཞག་པ་ལ་བཞི།

དང་པོ་ནི་སྔོན་གྱི་མཐའ་མི་ཤེས་པ་དང༌། ཕྱི་མའི་མཐའ་མི་ཤེས་པ་དང༌། ད་ལྟར་བྱུང་བ་མི་ཤེས་པ་སྟེ་རྨོངས་པ་གསུམ་བཟློག་པའི་དོན་དུ་རྟེན་འབྲེལ་ཡན་ལག་བཅུ་གཉིས་སུ་བཞག་སྟེ། མ་རིག་འདུ་བྱེད་གཉིས་སྐྱེ་བ་སྔོན་མའི་སྐབས་དང༌། སྐྱེ་བ་རྒ་ཤི་གཉིས་ཕྱི་མའི་སྐབས་དང༌། བར་གྱི་བརྒྱད་ད་ལྟའི་སྐབས་ཏེ་དེ་གསུམ་ལ་རྨོངས་པ་བཟློག་གོ།

གཉིས་པ་ལམ་གསུམ་དུ་རྣམ་པར་བཞག་པ་ནི། དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་པ་ལས་ཡིན་ཏེ། །ལྷག་མ་རྣམས་ནི་སྡུག་བསྔལ་ལོ། །ཞེས་གསུངས་པ་ལྟར་ཉོན་མོངས་པའི་ལམ་གསུམ། ལས་ཀྱི་ལམ་གཉིས། སྡུག་བསྔལ་གྱི་ལམ་བདུན་ནོ།།

གསུམ་པ་སྐྱེ་བ་འགྲུབ་པའི་རྒྱུ་འབྲས་ཀྱི་དབང་དུ་བཞག་ན། ལས་གཉིས་ཉོན་མོངས་པ་གསུམ་དང་ལྔ་རྒྱུ་དུས་ཀྱི་རྣམ་ཤེས་དང་དྲུག་ནི་རྒྱུ་ཡིན་ལ། མིང་གཟུགས་སོགས་སྡུག་བསྔལ་དྲུག་འབྲས་དུས་ཀྱི་རྣམ་ཤེས་དང་བདུན་ནི་འབྲས་བུའོ། །ཡང་རྣམ་ཤེས་རྒྱུར་བགྲངས་ནས་རྒྱུ་དྲུག་དང་འབྲས་བུ་དྲུག་ཅེས་ཀྱང་ཟེར་རོ། །འདི་དག་སྔ་མ་སྔ་མ་ལས་ཕྱི་མ་ཕྱི་མ་སྐྱེ་བས་ཐམས་ཅད་ལ་རྒྱུ་འབྲས་གཉིས་ཀའི་ཆ་ཡོད་ཀྱང་འདིར་སྐྱེ་བ་འགྲུབ་པའི་རྒྱུ་འབྲས་ཀྱི་དབང་དུ་བྱས་པའོ།།

བཞི་པ་འཕེན་བྱེད་སོགས་ཀྱི་སྒོ་ནས་བཞག་ན། མ་རིག་པ་བདག་འཛིན་མཚུངས་ལྡན་དང་བཅས་པས་ཀུན་ནས་བསླངས་ཏེ་འདུ་བྱེད་ཀྱི་ལས་བསགས་པས་སྐྱེ་བ་ཕྱི་མར་འཕེན་པས་ན་འཕེན་བྱེད་ཡིན་ལ། རྣམ་ཤེས་ལ་རྒྱུ་དུས་ཀྱི་རྣམ་ཤེས་འཕེན་བྱེད་དང༌། འབྲས་དུས་ཀྱི་རྣམ་ཤེས་འཕངས་པ་ཡིན་ནོ། །འབྲས་དུས་ཀྱི་རྣམ་ཤེས་དེ་དང་བཅས་པ་ཚོར་བ་ཡན་ལྔ་ལས་དེས་འཕངས་པའི་འབྲས་བུ་ཡིན་པས་འཕངས་པའོ། །སྲེད་ལེན་སྲིད་པ་གསུམ་ནི་སྐྱེ་བ་ཕྱི་མ་འགྲུབ་བྱེད་དང༌། སྐྱེ་བ་རྒ་ཤི་གཉིས་ནི་གྲུབ་པ་སྟེ་འཕེན་བྱེད་གཉིས། འཕངས་པ་ལྔ། འགྲུབ་བྱེད་གསུམ། གྲུབ་པ་གཉིས་སོ།།

བཞི་པ་ཚེ་དུ་ལ་རྫོགས་པ་ནི།

རིང་བའི་དབང་དུ་བྱས་ན་ཚེ་གསུམ་ལ་རྫོགས་ཏེ། འཕེན་བྱེད་གཉིས་ཚེ་གཅིག འགྲུབ་བྱེད་གསུམ་ཚེ་གཅིག འཕངས་པ་ལྔ་དང་གྲུབ་པ་གཉིས་ཚེ་གཅིག་གོ །དེ་ལྟར་ན་སྐྱེ་བ་རེ་རེའི་སྐབས་སུའང་མ་རིག་པའི་སྒོ་ནས་ལས་གསོག་པ་ནི་ཕྱི་མའི་སྐྱེ་བ་འཕེན་བྱེད་ཡིན་པས་རྟེན་འབྲེལ་གཞན་གྱི་མགོ་ཡིན་ལ། སྔ་མའི་འཕེན་བྱེད་ཀྱིས་ད་ལྟའི་མིང་གཟུགས་སོགས་ལྔ་པོ་འདི་འཕངས་པ་ནི་རྟེན་འབྲེལ་གཞན་གྱི་རྐེད་པ་ཡིན། ཡང་ཚེ་རབས་སྔ་མའི་སྔ་མ་དེའི་ལས་ཀྱིས་སྔ་མ་དེ་འཕངས་ནས། སྐབས་དེའི་འགྲུབ་བྱེད་ཀྱིས་ད་ལྟའི་སྐྱེ་ཤི་འདི་གཉིས་གྲུབ་པ་ནི་རྟེན་འབྲེལ་གཞན་གྱི་མཇུག་ཡིན་པས་དེ་ལྟར་ཐོག་མ་མེད་པ་ནས་འཁོར་རོ། །ཡང་ཉེ་བའི་དབང་དུ་བྱས་ན་ཚེ་གཉིས་ལ་རྫོགས་པར་འདོད་དེ། འཕེན་བྱེད་གཉིས་ཀྱིས་ལས་བསགས་པ་དེ་ཉིད་སྲེད་ལེན་གྱིས་གསོས་བཏབ་པས་སྐྱེ་བ་ཕྱི་མ་འགྲུབ་ངེས་སུ་བྱས་པ་ནི་སྲིད་པ་ཡིན་པས་རྒྱུ་དུས་ཀྱི་རྣམ་ཤེས་དང་བཅས་པ་དྲུག་ཚེ་གཅིག་ལ་རྫོགས་ལ། རྒྱུ་དེས་ཕྱི་མའི་གནས་སུ་སྐྱེས་ནས་མིང་གཟུགས་སོགས་བཞི་རིམ་པས་འགྲུབ་ནས་ཤི་བས་འབྲས་བུ་དྲུག་ཚེ་གཅིག་ལ་རྫོགས་པའོ། །དེ་ཡང་འཕེན་བྱེད་ཀྱི་ལས་ཡོད་ཀྱང་འཆི་ཁ་ཚུན་སྲེད་ལེན་གྱིས་གསོས་མ་བཏབ་ན་སྐྱེ་བ་ཕྱི་མ་མི་འགྲུབ་པས་འཕེན་བྱེད་དང་འགྲུབ་བྱེད་ཚེ་གཅིག་ལ་རྫོགས་དགོས་ལ། འཕངས་པ་དེ་ཡང་སྐྱེ་དགོས་པ་དང༌། དེ་ལ་འཆི་བ་ཡོད་པས་འཕངས་པ་དང་གྲུབ་པ་ཡང་ལྷན་ཅིག་གོ །འཕེན་བྱེད་དང་འགྲུབ་བྱེད་གཉིས་ཀྱི་བར་དུ་ནི་ཚེ་དུ་མས་ཆོད་པ་སྲིད་ལ། འགྲུབ་བྱེད་དང་གྲུབ་པ་གཉིས་ཀྱི་བར་དུ་ཚེ་རབས་གཞན་གྱིས་ཆོད་པ་མི་སྲིད་དོ། །དེ་ལྟར་ན་ཚེ་གསུམ་གྱིས་མ་རྫོགས་སོ་ཞེ་ན་འཕེན་འགྲུབ་ཀྱི་བར་དུ་ཚེ་རབས་དུ་མས་ཆོད་ཀྱང་དེ་དག་རྟེན་འབྲེལ་གཞན་གྱི་ཚེ་ཡིན་པས་སྐྱོན་མེད་དོ། །དེས་ན་ཚེ་གསུམ་དང་གཉིས་ཀྱི་རྫོགས་པ་གཉིས་ཀ་ཡོད་ལ། དེ་ལས་ལྷག་པ་ནི་མི་སྲིད་དོ། །དེ་དག་ནི་འཕེན་བྱེད་ཀྱི་ལས་གཅིག་གིས་སྐྱེ་བ་གཅིག་འགྲུབ་པའི་རྟེན་འབྲེལ་གྱི་དབང་དུ་བྱས་པ་ཡིན་ནོ། །དོན་འདི་དག་ལ་ལེགས་པར་དཔྱད་ནས་འཁོར་བར་སྐྱེ་བ་འགྲུབ་བྱེད་ཀྱི་རྩ་བ་སྲེད་ལེན་ཡིན་པ་དང༌། སྲེད་ལེན་གྱི་རྩ་བ་ཆོད་ན་ལས་ཡོད་ཀྱང་སྐྱེ་བ་མི་ལེན་པ་དང༌། དུས་ཐམས་ཅད་དུ་སྡུག་བསྔལ་ཅི་སྐྱེས་སྲེད་ལེན་ཀུན་འབྱུང་གིས་མཚམས་སྦྱར་ནས་ཉམས་སུ་མྱོང་བ་སོགས་ལ་གོ་བའི་གཏིང་རྙེད་པར་བྱའོ།།

ལྔ་པ་སྒོམ་ཚུལ་ནི།

ལུགས་འབྱུང་ལྡོག་གི་སྒོ་ནས་སྒོམ་པ་སྟེ། ལུགས་འབྱུང་ལྡོག་འདི་ལ་འཇོག་ཚུལ་གཉིས་ཏེ། འཁོར་བར་སྐྱེ་བའི་རིམ་པ་ལ་ལུགས་འབྱུང༌། འཁོར་བ་འགགས་པའི་རིམ་པ་ལ་ལུགས་ལྡོག་ཏུ་བཞག་པ་ཞིག་དང༌། མ་རིག་པ་ནས་རིམ་པས་བགྲངས་ན་སྐྱེ་རིམ་དང༌། འགག་རིམ་གང་ཡིན་ཡང་ལུགས་འབྱུང་དང༌། རྒ་ཤི་ནས་རིམ་མིན་དུ་ཡར་བགྲངས་ན་སྐྱེ་རིམ་དང་འགག་རིམ་གང་ཡིན་ཡང་ལུགས་ལྡོག་ཏུ་བཞེད་པ་གཉིས་སོ། །དང་པོ་ལྟར་ན་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་ཤེས་ལ་སོགས་པའམ། རྒ་ཤི་ཅི་ལས་བྱུང་ན་སྐྱེ་བ་ལས་བྱུང་སོགས། གང་ལྟར་ཡིན་ཡང་ལུགས་འབྱུང་དུ་བཞེད། མ་རིག་པ་འགགས་པས་འདུ་བྱེད་འགག འདུ་བྱེད་འགགས་པས་རྣམ་ཤེས་འགག་སོགས་སམ། རྒ་ཤི་གང་གིས་འགག་ན་སྐྱེ་བ་འགགས་པས་འགག་སོགས་གཉིས་ཀ་ལུགས་ལྡོག་ཏུ་བཞེད། ཕྱི་མ་ལྟར་ན་མ་རིག་པའི་རྐྱེན་གྱིས་འདུ་བྱེད་སོགས་སམ་མ་རིག་པ་འགགས་པས་འདུ་བྱེད་འགག་སོགས་གང་ཡིན་ཀྱང་ལུགས་འབྱུང་དང༌། རྒ་ཤི་གང་ལས་བྱུང་ན་སྐྱེ་བ་ལས་བྱུང་སོགས་སམ། སྐྱེ་བ་འགགས་པས་རྒ་ཤི་འགག སྲིད་པ་འགགས་པས་སྐྱེ་བ་འགག་སོགས་གང་ཡིན་ཀྱང་ལུགས་ལྡོག་ཏུ་བཞེད། ལུགས་འབྱུང་ལྡོག་ཕྱི་མ་འདི་ལྟར་ལ་བདེན་བཞི་ཤེས་པའི་གོ་རིམ་དང་སྦྱར་བ་མངོན་པ་ཀུན་བཏུས་ལས་བྱུང་བ་ལྟར་ན། སྐྱེ་རིམ་ལུགས་འབྱུང་དང་སྦྱར་ན་ཀུན་འབྱུང་གི་བདེན་པ་གཏན་ལ་ཕེབས་ལ། སྐྱེ་རིམ་ལུགས་ལྡོག་དང་སྦྱར་ན་སྡུག་བདེན་གཏན་ལ་ཕེབས། དེ་བཞིན་དུ་འགག་རིམ་ལུགས་འབྱུང་ལྡོག་གཉིས་ཀྱིས་ལམ་དང་འགོག་པ་གཉིས་གཏན་ལ་ཕེབས་ཏེ། དེའང་ཀུན་འབྱུང་ཉོན་མོངས་པ་ཐམས་ཅད་ཀྱི་རྩ་བ་མ་རིག་པ་ཡིན་ལ། དེ་ལས་འདུ་བྱེད་ཀྱི་ལས་བསགས་པའི་ཕྱིར་དང་པོ་ཀུན་འབྱུང་ལས་ཉོན་གཉིས་ལས་བརྩམས་ཏེ། མ་རིག་པའི་རྐྱེན་གྱིས་འདུ་བྱེད་སོགས་ཤེས་རབ་ཀྱི་གཏན་ལ་འབེབས་པ་ནི། ཀུན་ནས་ཉོན་མོངས་ཕྱོགས་ཀྱི་རྒྱུ་ཀུན་འབྱུང་གཏན་ལ་འབེབས་པ་ཡིན་ལ། ཡང་འཁོར་བའི་སྡུག་བསྔལ་ཐམས་ཅད་ཀྱི་གཙོ་བོ་སྐྱེ་བ་དང་རྒ་ཤི་གཉིས་ཡིན་ལ། དེས་ན་རྒ་ཤི་ཅི་ལས་བྱུང་ན་སྐྱེ་བ་ལས་བྱུང་སོགས་ལུགས་ལྡོག་དང་སྦྱར་ནས་ཀུན་ཉོན་ཕྱོགས་ཀྱི་འབྲས་བུ་སྡུག་བདེན་གཏན་ལ་འབེབས། ཡང་ཀུན་འབྱུང་མ་རིག་པའི་རྩ་བ་ལམ་བདེན་གྱི་ངོ་བོ་བདག་མེད་རྟོགས་པའི་ཤེས་རབ་ཀྱིས་བཅད་པས། མ་རིག་པ་འགགས་པས་འདུ་བྱེད་འགག་སོགས་འགག་རིམ་ལུགས་འབྱུང་གཏན་ལ་ཕབས་པས། རྣམ་བྱང་ཕྱོགས་ཀྱི་རྒྱུ་ལམ་བདེན་གཏན་ལ་ཕེབས། ཡང་སྤང་བྱ་འཁོར་བའི་སྡུག་བསྔལ་གྱི་གཙོ་བོ་སྐྱེ་ཤི་གཉིས་འགོག་པ་ནི་འགོག་བདེན་ཡིན་ལ། དེས་ན་སྐྱེ་བ་འགགས་པས་རྒ་ཤི་འགག་སོགས་མ་རིག་པ་འགག་གི་བར་དུ་བསམ་པས་རྣམ་བྱང་གི་འབྲས་བུ་འགོག་བདེན་གཏན་ལ་ཕེབས་པ་ཡིན་ནོ། །འདི་དག་ལ་ཞིབ་ཏུ་བརྟགས་ནས་འཁོར་བའི་སྡུག་བསྔལ་གྱི་ཕུང་པོ་ཆེན་པོ་འདིའི་རྩ་བ་བདག་འཛིན་མ་རིག་པ་ལས་བྱུང་བ་དང༌། ལམ་ཐམས་ཅད་ཀྱི་རྩ་བ་བདག་མེད་རྟོགས་པའི་ཤེས་རབ་ཡིན་པ་སོགས་ཀྱི་དོན་ཐོས་བྱུང་ལས་འདས་ནས་བསམ་བྱུང་གི་ངེས་པ་རྙེད་པ་ལ་འབད་དགོས་ཏེ་རྟེན་ཅིང་འབྲེལ་བར་འབྱུང་བ་འདི་ནི་རྒྱལ་བ་བདེན་པར་སྨྲ་བའི་གསུང་གི་མཛོད་ཟབ་མོའི་གཅེས་པ་ཡིན་པའི་ཕྱིར་རོ།།

གཉིས་པ་གཞུང་གི་དོན་ནི།

རྟེན་ཆོས་ཀུན་གྱི་རྩ་བ་མ་རིག་པ། །དེ་ལས་འདུ་བྱེད་རྣམ་ཤེས་མིང་དང་གཟུགས།།

དེ་ལས་སྐྱེ་ཞིང་མཆེད་པ་རྣམ་པ་དྲུག །དེ་ལས་རེག་པ་རེག་ལས་ཚོར་བ་སྟེ།།

དེ་ལས་སྲེད་པ་སྲེད་ལས་ལེན་པ་དང༌། །དེ་ལས་སྲིད་པ་སྲིད་ལས་སྐྱེ་བ་སྟེ།།

སྐྱེ་བ་ཡོད་ན་འདོད་པས་ཕོངས་པ་དང༌། །མྱ་ངན་ན་རྒ་འཆི་སོགས་སྡུག་བསྔལ་གྱི།།

ཕུང་པོ་ཤིན་ཏུ་ཆེ་བ་གྲུབ་པའི་ཕྱིར། །སྐྱེ་བ་འགགས་པས་ཐམས་ཅད་འགག་འགྱུར་བའི།།

རྟེན་ཅིང་འབྲེལ་འབྱུང་རྒྱུ་འབྲས་ཟབ་མོ་ནི། །རྒྱལ་བ་བདེན་པར་སྨྲ་བའི་གསུང་གི་མཛོད།།

རྟེན་ཅིང་འབྲེལ་བར་འབྱུང་བའི་ཆོས་འཁོར་བ་དང་མྱ་ངན་ལས་འདས་པའི་རྣམ་པར་སྣང་བ་ཀུན་གྱི་རྩ་བ་ནི་མ་རིག་པ་དང་དེ་ལྡོག་པ་གཉིས་པོ་འདི་ཁོ་ན་ཡིན་ཏེ། ཇི་ལྟར་ཞེ་ན། བདེན་པའི་དོན་ལ་རྨོངས་ནས་བདག་ཏུ་འཛིན་པའི་མ་རིག་པ་ཡོད་ན་དེ་ལས་འཁོར་བར་འཕེན་བྱེད་ཀྱི་ལས་དགེ་བ་དང༌། མི་དགེ་བ་དང༌། མི་གཡོ་བ་གསུམ་འདུ་བྱེད་དེ། རྩ་ཤེས་ལས།

མ་རིག་སྒྲིབ་པས་ཡང་སྲིད་ཕྱིར། །འདུ་བྱེད་རྣམ་པ་གསུམ་པོ་དག །མངོན་པར་འདུ་བྱེད་གང་ཡིན་པའི། །ལས་དེ་དག་གིས་འགྲོ་བར་འགྲོ། །ཞེས་སོ། །དེ་ལས་ལས་དེས་འཕངས་པའི་འགྲོ་བ་ཕྱི་མ་གང་རུང་དུ་འགྲོ་བའི་རྣམ་པར་ཤེས་པ་འབྱུང་ཞིང༌། དེའི་རྐྱེན་གྱིས་མིང་དང་གཟུགས་འབྱུང་སྟེ་རྣམ་ཤེས་སྐྱེ་གནས་སུ་ཉིང་མཚམས་སྦྱོར་དུས་ཀྱི་ཚོར་བ་འདུ་ཤེས་འདུ་བྱེད་རྣམ་ཤེས་ཏེ་གཟུགས་ཅན་མ་ཡིན་པའི་ཕུང་པོ་བཞི་ནི་མིང་ཡིན་ཏེ་ཡུལ་ལ་འགྲོ་བ་ཉིད་དང་ཡང་སྲིད་པར་འཁྲིད་པའི་ཕྱིར་རོ། །དེའི་སྐབས་ཀྱི་ཁུ་རྡུལ་རླུང་དང་བཅས་པའི་ཆ་ནི་གཟུགས་ཡིན་ཏེ་ཚ་གྲང་ལ་སོགས་པས་འགྱུར་བ་བསྐྱེད་པའི་ཕྱིར་རོ། །དེ་ཉིད་རྣམ་པར་འཕེལ་བ་ལས་མིག་ལ་སོགས་པའི་རྣམ་པར་ཤེས་པ་སྐྱེ་ཞིང་མཆེད་པའི་སྒོ་རྣམ་པ་དྲུག་རྫོགས་ཤིང་དེ་ལས་ནི་དབང་པོ་དང༌། ཡིད་ལ་བྱེད་པ་དང༌། ཡུལ་གསུམ་འདུས་ཤིང་མངོན་དུ་གྱུར་པ་ལས་རེག་པ་སྐྱེ་སྟེ་མིག་གི་འདུས་ཏེ་རེག་པ་ལ་སོགས་པ་སྐྱེ་བའི་རྟེན་ནོ། །རེག་པ་དེ་ལས་བདེ་བ་དང་སྡུག་བསྔལ་དང༌། བཏང་སྙོམས་ཀྱི་ཚོར་བ་གང་རུང་སྐྱེ་བར་འགྱུར་བ་སྟེ། ཡུལ་གྱི་རྣམ་པ་དེ་གསུམ་པོ་གང་རུང་གི་སྒོ་ནས་ཉམས་སུ་མྱོང་ངོ་། །དེ་ལས་སྲེད་པ་སྐྱེ་སྟེ། བདེ་བ་མི་འབྲལ་བར་འདོད་པ་དང༌། སྡུག་བསྔལ་བྲལ་བར་འདོད་པ་དང༌། བར་མ་རྣམས་གཉིས་ཀར་མི་འདོད་པའི་ཚུལ་གྱིས་སོ། །དེ་ཡང་མདོ་ལས།

འདོད་པ་དང༌། གཟུགས་དང༌། གཟུགས་མེད་པ་ན་སྤྱད་པའི་བྱེ་བྲག་གིས་རྣམ་པ་གསུམ་དུ་བསྟན་ཏོ། །སྲེད་པ་ལས་ནི་ལེན་པ་འབྱུང་སྟེ་འདོད་པ་ལ་སོགས་པ་ལ་འདུན་པའི་འདོད་ཆགས་དང་བཅས་པ་གང་ཡིན་པའོ། །མདོ་ལས་ནི།

དམིགས་པའི་བྱེ་བྲག་གིས། འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བའི་ཉེ་བར་ལེན་པ་བཞིར་བསྟན་ཏེ། འདུན་པའི་འདོད་ཆགས་དེས་འདོད་པ་ལ་སོགས་པ་ཉེ་བར་བླངས་པར་འགྱུར་བས་སོ། །འདི་གཉིས་ཀྱི་ཁྱད་ནི་མངོན་པར་འདོད་པ་ཙམ་ནི་སྲེད་པ་དང༌། ཁྱད་པར་དུ་མངོན་པར་འདོད་པ་ནི་ལེན་པའོ། །ཡང་ན་རིང་བའི་རྒྱུ་ནི་སྲེད་པ་དང༌། ཉེ་བའི་རྒྱུ་ལེན་པའོ། །འདུ་བྱེད་ཀྱི་ས་བོན་སྲེད་ལེན་གྱིས་མངོན་པར་བརླན་པ་དེ་ཉིད་ལས་འབྲས་བུ་བསྐྱེད་པར་མངོན་དུ་ཕྱོགས་པ་ནི་སྲིད་པ་སྟེ་ཕུང་པོ་ལྔའོ། མདོ་ལས་ཁམས་གསུམ་པའི་སྲིད་པ་ཞེས་གསུངས་སོ། །འདིར་ནི་འདས་པའི་སྲིད་པ་ཡིན་པར་བཟུང་ངོ༌། །སྲིད་པ་ལས་ནི་ཡང་སྲིད་ཕྱི་མར་སྐྱེ་བ་འབྱུང་བ་སྟེ། སྐྱེ་བ་ཡོད་ན་ནི་འདོད་པའི་ལོངས་སྤྱོད་ཀྱིས་ཕོངས་པ་དང༌། སེམས་མྱ་ངན་གྱིས་གདུང་བ་དང༌། འབྱུང་བ་འཁྲུགས་པས་ན་བ་དང༌། འདུ་བྱེད་རྙིངས་པའི་རྒ་བ་དང༌། སྲོག་དང་བྲལ་བའི་འཆི་བ་དང༌། ཡིད་མི་བདེ་བ་དང༌། ལུས་སྡུག་བསྔལ་བ་དང༌། དེའི་དབང་གི་ངག་གིས་སྨྲེ་སྔགས་འདོན་པ་དང༌། ཕན་ཚུན་རྩོད་ཅིང་འཁྲུགས་པ་སོགས་སྡུག་བསྔལ་གྱི་ཕུང་པོ་ཤིན་ཏུ་ཆེ་བ་འདི་རྣམས་གྲུབ་པ་ཡིན་པའི་ཕྱིར་ཏེ། བཤེས་སྤྲིང་ལས།

སྐྱེ་བ་བཟང་པོ་མ་ལགས་སྐྱེ་བ་ནི། །གནོད་པ་དུ་མའི་སྣོད་གྱུར་ལེགས་མཁྱེན་མཛོད། །ཅེས་སོ། །དེ་ལྟར་ནང་གི་རྟེན་ཅིང་འབྲེལ་བར་འབྱུང་བའི་དབང་གིས་ཕྱི་རོལ་དུ་སྣང་བའི་རྟེན་འབྲེལ་ནི། ས་བོན་ལས་མྱུ་གུ་སོགས་རྒྱུ་དང་འབྲེལ་བ་དྲུག་དང༌། འབྱུང་ལྔ་དུས་ཀྱི་འགྱུར་བ་དང་བཅས་རྐྱེན་དང་འབྲེལ་བ་དྲུག་སྟེ་བཅུ་གཉིས་སོ། །དེ་ལྟར་ཕྱི་ནང་གི་རྟེན་འབྲེལ་གཉིས་སུ་འཁོར་ཞིང་སྣང་བ་འདི་ནི་དམན་ལམ་གྱིས་དགྲ་བཅོམ་ཐོབ་པ་དང༌། ཐེག་པ་ཆེན་པོའི་ལམ་གྱིས་ས་ཐོབ་པའི་ཚེ་ན། མ་རིག་པའི་དབང་གིས་འཁོར་བར་འཕེན་བྱེད་ཀྱི་ལས་བསགས་པ་ནས་རྒ་ཤིའི་བར་གྱི་སྲིད་པའི་རྟེན་འབྲེལ་རགས་པ་བཅུ་གཉིས་པོ་རྒྱུན་འཆད་པར་འགྱུར་ནའང༌། ད་དུང་དེ་དག་ལ་མ་རིག་བག་ཆགས་ཀྱི་ས་དང༌། ཟག་མེད་ཀྱི་ལས་ལ་བརྟེན་ནས་ཡིད་ཀྱི་རང་བཞིན་གྱི་ལུས། བསམ་མི་ཁྱབ་འགྱུར་གྱི་འཆི་འཕོར་སྣང་བ་ཡོད་པའི་ཕྱིར་རྟེན་འབྲེལ་ཕྲ་བའི་རྒྱུན་ཙམ་ཞིག་ནི་བག་ཆགས་ཐམས་ཅད་དབྱིངས་སུ་མ་དག་པ་དེ་སྲིད་དུ་རྒྱུན་མི་འཆད་པར་སྣང་ངོ༌། །དེས་ན་སྲིད་པའི་གནས་འདིར་སྐྱེ་བ་རང་མཚན་པ་ལེན་པའི་རྒྱུན་འགགས་པས་ནི་སྡུག་བསྔལ་གྱི་ཕུང་པོ་དེ་ཐམས་ཅད་འགག་པར་འགྱུར་ཞིང་སྐྱེ་བ་དེ་ཡང་སྲིད་པ་ལ་སོགས་པ་ཀུན་གྱི་རྩ་བ་མ་རིག་པ་ལྡོག་སྟེ་རྒྱུན་ཆད་པ་ཁོ་ནས་མི་འབྱུང་བའི་ཕྱིར་མྱ་ངན་ལས་འདས་པའི་ཆོས་ཐམས་ཅད་ཀྱང་མ་རིག་པ་འགགས་ཏེ་སྲིད་པའི་རྟེན་འབྲེལ་རྒྱུན་ཆད་པ་ལ་བཏགས་པ་ཙམ་དུ་ཟད་དེ། ཉོན་མོངས་པ་ཅན་གྱི་རྟེན་འབྲེལ་རྒྱུན་ཆད་པས་ཐེག་དམན་མྱང་འདས་དང༌། ཉོན་མོངས་ཅན་མ་ཡིན་པའི་རྟེན་འབྲེལ་གཉིས་སྣང་ཕྲ་བ་རྒྱུན་ཆད་པས་རང་བཞིན་ཡེ་ནས་དག་པའི་ཆོས་ཉིད་མངོན་དུ་གྱུར་པའི་ཆོས་སྐུ་དག་པ་གཉིས་ལྡན་ལས་མ་གཡོས་བཞིན་གཟུགས་སྐུའི་སྣང་བ་སྟོན་པ་ལ་མི་གནས་པའི་མྱ་ངན་ལས་འདས་པ་ཞེས་བརྗོད་པའི་ཕྱིར་རོ། །དེ་བས་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་དོན་དམ་པར་རང་གི་ངོ་བོ་ཅིར་ཡང་མ་གྲུབ་བཞིན་ཐ་སྙད་ཙམ་དུ་སྒྱུ་མ་དང་རྨི་ལམ་གྱི་སྣང་བ་ལྟར་རྟེན་ཅིང་འབྲེལ་བར་འབྱུང་བའི་རྒྱུ་འབྲས་མུ་སྟེགས་བྱེད་ལ་སོགས་པས་ཤིན་ཏུ་རྟོགས་དཀའ་བའི་ཟབ་མོ་འདི་ནི། མ་རྟོགས་པ་དང་ལོག་པར་རྟོག་པའི་ཕྱོགས་ཐམས་ཅད་ལས་རྣམ་པར་རྒྱལ་ཞིང་ཤེས་བྱ་ཀུན་ལ་ཚད་མར་གྱུར་པའི་མཁྱེན་པ་མངའ་བ་རྫུན་སྨྲ་བའི་རྒྱུ་བཞི་ཟད་པས་བདེན་པར་སྨྲ་བ་སངས་རྒྱས་བཅོམ་ལྡན་འདས་དེའི་གསུང་རབ་མཐའ་དག་གི་མཛོད་ཡིན་ཏེ། འདི་ལ་བརྟེན་ནས་ཆོས་ཀྱི་དེ་ཉིད་རྣམ་པར་རིག་ཅིང་གྲུབ་པའི་མཐའ་ཐམས་ཅད་གཏན་ལ་ཕེབས་པའི་ཕྱིར་ཏེ། ཇི་སྐད་དུ།

དགེ་སློང་དག གང་གིས་སཱ་ལུ་ལྗངས་པ་འདི་ཤེས་པ་དེས་རྟེན་ཅིང་འབྲེལ་བར་འབྱུང་བ་ཤེས་སོ། །གང་གིས་རྟེན་ཅིང་འབྲེལ་བར་འབྱུང་བ་ཤེས་པ་དེས་ཆོས་ཤེས་སོ། །གང་ཆོས་ཤེས་པ་དེས་སངས་རྒྱས་ཤེས་སོ། །ཞེས་སོ།།

རྩ་བའི་ས་བཅད་གཉིས་པ་དེ་ཉིད་སྐྱེ་མེད་དུ་ཤེས་པས་དོན་བསྡུ་བ་ནི།

དེ་ལྟ་མོད་ཀྱི་སྲིད་པར་འདུ་བྱེད་པའི། །མཐོ་དམན་ལས་དང་དཀར་ནག་རྒྱུ་འབྲས་ཆོས།།

ཀུན་ལས་འདས་པ་ཞི་བ་དམ་པའི་དངོས།།

སྐྱེ་བ་མེད་པའི་ཆོས་ཉིད་རྟོགས་ལས་འབྱུང༌།།

དེ་ལྟ་ན་ཉན་རང་གིས་ཀྱང་རྟེན་འབྲེལ་གྱི་དོན་ཁོང་དུ་ཆུད་པས་ཐེག་ཆེན་པ་དང་རྟོགས་པ་མཉམ་པར་འགྱུར་བའི་ཕྱིར་ཐོབ་བྱ་ལའང་ཁྱད་པར་མེད་དོ་ཞེ་ན། སྤྱིར་རྟེན་འབྲེལ་དང་སྟོང་ཉིད་དོན་གཅིག་པ་དང༌། དེ་ཡུལ་དུ་བྱས་ནས་བདག་མེད་པའི་རྟོགས་པ་སྐྱེ་བ་ཙམ་དུ་མཚུངས་མོད་ཀྱི་རྣམ་པ་ཐམས་ཅད་དུ་ཁྱད་པར་མེད་པ་མ་ཡིན་ཏེ། ཉན་རང་རྣམས་ཀྱིས་ནི་སྲིད་པར་འདུ་བྱེད་པའི་རྒྱུའི་གཙོ་བོ་འཇིག་ཚོགས་ལ་བདག་ཏུ་ལྟ་བའི་མ་རིག་པ་ཡིན་ལ་དེའི་དབང་གིས་འཁོར་བའི་གནས་མཐོ་དམན་དང་བདེ་སྡུག་ཏུ་སྣང་བ་ནི་ཉོན་མོངས་པས་ཀུན་ནས་བསླང་བའི་དགེ་མི་དགེའི་ལས་སུ་ཤེས་པ་དང༌། དཀར་པོ་རྣམ་པར་བྱང་བའི་རྒྱུ་འབྲས་ལམ་འགོག་གཉིས་དང༌། ནག་པོ་ཀུན་ནས་ཉོན་མོངས་པའི་ཕྱོགས་ཀྱི་རྒྱུ་འབྲས་ཀུན་འབྱུང་དང་སྡུག་བསྔལ་ཏེ་བདེན་པ་བཞིའི་ཆོས་ལ་སྲིད་རྩ་མ་རིག་པ་གཅོད་པའི་སྒོ་ནས་བླང་དོར་དུ་ཞེན་པ་ཡོད་པས་རྟེན་འབྲེལ་གྱི་ཆོས་རྣམས་ཀྱི་གཤིས་ལུགས་ཇི་བཞིན་པ་མི་རྟོགས་ཏེ། འོད་སྲུང་གིས་ཞུས་པ་ལས།

དེ་དག་གིས་རྟོགས་པའི་སྟོང་པ་ཉིད་ནི་ཡུངས་འབྲུ་སྲིན་གྱིས་ཟོས་པའི་ནང་གི་ནམ་མཁའ་ལྟ་བུའོ། །ཞེས་སོ། །དེས་ན་དམན་པའི་ལམ་དེ་དག་ཐེག་པ་ཆེན་པོའི་ལམ་སྟེགས་ཙམ་ཡིན་ཀྱང༌། འབྲས་བུ་མཐར་ཐུག་ནི་འོག་མའི་བློས་སྒྲོ་བཏགས་པའི་རྒྱུ་འབྲས་བླང་དོར་སོགས་འདུས་བྱས་ཀྱི་མཚན་ཉིད་ཅན་སེམས་དང་སེམས་བྱུང་ཡུལ་དང་བཅས་པ་ཀུན་ལས་འདས་ཤིང་སྲིད་པ་དང་ཞི་བའི་མཐའ་གཉིས་ལ་མི་གནས་པའི་མྱ་ངན་ལས་འདས་པ་ཉིད་ཡིན་ལ། དེས་ན་དོན་དམ་པའི་བདེན་པ་མཐར་ཐུག་པའི་རང་བཞིན་དེ་ཐོབ་བྱའི་དངོས་གཞི་ཡིན་པས། ཐོབ་བྱའི་འབྲས་བུ་དེ་ཉིད། བདེན་པ་བཞི་དང་རྟེན་འབྲེལ་སོགས་སུ་སྣང་ཞིང་སྒྲོ་བཏགས་པའི་ཆོས་ཐམས་ཅད་གདོད་མ་ནས་སྐྱེ་བ་མེད་པ་སྟེ་ཡོད་མ་མྱོང་བའི་ཆོས་ཉིད་བློ་ལས་འདས་པར་སོ་སོ་རང་གི་རིག་པའི་ཡེ་ཤེས་ཀྱིས་ཡུལ་ཡུལ་ཅན་གྱི་སྤྲོས་པ་མཐའ་དག་ཞི་བའི་ཚུལ་གྱིས་རྟོགས་པ་ལས་འབྱུང་བ་ཡིན་ནོ། །འོ་ན་དེ་དག་མ་གྲུབ་པའི་ཚུལ་ཇི་ལྟར་ཞེ་ན། དོན་དམ་པར་རྟེན་འབྲེལ་ལ་ངོ་བོ་མེད་པས་སྡུག་བསྔལ་མ་གྲུབ་སྟེ། རྩ་ཤེས་ལས།

རྟེན་ཅིང་འབྲེལ་འབྱུང་མ་ཡིན་པས། །སྡུག་བསྔལ་ཡོད་པར་ག་ལ་འགྱུར། །མི་རྟག་སྡུག་བསྔལ་གསུངས་པ་དེ། །རང་བཞིན་ཉིད་ལ་ཡོད་མ་ཡིན། །ཞེས་སོ། །འབྲས་བུ་འབྱུང་བ་མེད་པས་ཀུན་འབྱུང་མ་གྲུབ་སྟེ། དེ་ཉིད་ལས།

རང་བཞིན་ལས་ནི་ཡོད་ཡིན་ན། །ཅི་ཞིག་ཀུན་ཏུ་འབྱུང་བར་འགྱུར། །ཞེས་དང༌། རང་བཞིན་གྱིས་གྲུབ་པ་ལ་འགོག་པ་མི་འཐད་དེ།

སྡུག་བསྔལ་རང་བཞིན་གྱིས་ཡོད་ལ། །འགོག་པ་འཐད་པ་མ་ཡིན་ནོ། །ཞེས་དང༌། སྤང་གཉེན་ཕྲད་པ་མེད་པས་ལམ་མི་འཐད་དེ། དེ་སྐད་དུ།

སྔ་ཕྱི་གཉིས་ཀྱིས་ཕྲད་པ་ན། །སྐད་ཅིག་དུས་ཆ་གཉིས་སུ་འགྱུར། །གཉིས་པོ་དག་ནི་དུས་མཉམ་ན། །བསྐལ་པ་སྐད་ཅིག་གཅིག་པར་འགྱུར། །ཞེས་སོ། །བདེན་པ་བཞི་ཆར་ཡང་མ་གྲུབ་སྟེ། ལང་ཀར་གཤེགས་པ་ལས།

སྐྱེ་བ་མེད་པ་བདེན་པ་གཅིག་ཡིན་ཏེ། །བྱིས་པ་རྣམས་ནི་བདེན་པ་བཞི་ཞེས་སྨྲ། །བྱང་ཆུབ་སྙིང་པོར་ཞུགས་ན་བདེན་གཅིག་ཀྱང༌། །གྲུབ་པ་མེད་ན་བཞི་ལྟ་ག་ལ་ཡོད། །ཅེས་སོ། །རྟེན་ཅིང་འབྲེལ་བར་འབྱུང་བ་ཡང་འཁྲུལ་ངོར་སྣང་ཙམ་ལས་རང་བཞིན་རྣམ་པར་དག་པ་སྟེ། ཡུམ་ལས་རྟེན་ཅིང་འབྲེལ་བར་འབྱུང་བ་རྣམས་ཀྱང་རང་བཞིན་གྱིས་རྣམ་པར་དག་གོ །ཞེས་སོ། །དེ་ལྟ་བུའི་ཚུལ་ཤེས་ནས་སྣང་ཙམ་ལ་བླང་དོར་དུ་བྱེད་ཅིང་གང་ལའང་མ་ཞེན་པར་བྱའོ།།

ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས།།

འཁོར་བ་སྡུག་བསྔལ་གྱི་ཚོམས་ཏེ་ལེའུ་བཞི་པའོ།། །།

ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས །འཁོར་བ་སྡུག་བསྔལ་གྱི་ཚོམས་ཏེ་ལེའུ་བཞི་པའི་འགྲེལ་པའོ།།