༄༅། །དཔལ་སྤྱི་མདོ་དགོངས་པ་འདུས་པའི་འགྲེལ་པ་རྣལ་འབྱོར་ཉི་མ་གསལ་བར་བྱེད་པའི་ལེགས་བཤད་གཟི་ལྡན་འཆར་ཁའི་འོད་སྣང་ཞེས་བྱ་བ་བཞུགས་སོ།།

༄༅། །ན་མོ་གུ་རུ་དྷརྨཱ་སཱ་རཱ་ཡ། ཇི་བཞིན་ཡེ་གནས་ཆེ་བ་ལྔ་ལྡན་དབྱིངས། །རང་བཞིན་ལྷུན་གྲུབ་འོད་གསལ་རིག་པའིཁམས། །དབྱེར་མེད་བདེ་ཆེན་སྲས་མཆོག་བྱང་ཆུབ་སེམས། །གཉུག་མ་དོན་གྱི་གཤིས་ལ་གུས་ཕྱག་འཚལ། །ཆོས་སྐུ་ཀུན་བཟང་རྒྱལ་ཚབ་སྐྱེས་བུ་དང༌། །ལོངས་སྐུ་རིགས་ལྔ་སྤྲུལ་སྐུ་ཐུབ་པའི་༼༢༽དབང༌། །རིགས་གསུམ་སེམས་དཔའ་གསང་བའི་སྐུ་མཆོག་སྟེ། །དགོངས་བརྒྱུད་རྒྱལ་བ་རྣམས་ལ་གུས་ཕྱག་འཚལ། །རྒྱལ་སྲས་གཉིས་ཀྱིས་ལྷ་ཀླུའི་རིག་འཛིན་དང༌། །གསང་བའི་བདག་པོས་དྲག་ཤུལ་ཅན་གྱི་རྩེར། །དམ་པ་ལྔ་ལ་གསང་བའི་མཛོད་བགྲོས་པའི། །རིག་བརྒྱུད་རིག་འཛིན་རྣམས་ལ་གུས་ཕྱག་འཚལ། །སྤྲུལ་པའི་གླེགས་བམ་དངོས་སྣང་རྒྱལ་པོ་ཛཿ། །ཨིནྡྲ་ནཱ་ག་གུ་ཧྱ་པུ་ཏྲི་གསུམ། །ཀུ་ཀུ་རཱ་ཛ་རིག་འཛིན་སར་གཤེགས་པའི། །རྣ་བརྒྱུད་གང་ཟག་རྣམས་ལ་གུས་ཕྱག་འཚལ། །རོ་ལང་བདེ་བ་རྡོ་རྗེ་བཞད་པ་རྩལ། །པྲ་བྷ་ཧསྟི་ཤཱཀྱ་སེང་གེ་དང༌། །ཤཱཀྱ་མུ་ཏྲ་ཤཱཀྱ་པྲ་བྷ་གསུམ། །བཀའ་བབ་རྩལ་འཆང་རྣམས་ལ་གུས་ཕྱག་འཚལ། །དཱ་ན་རཀྵི་ཧཱུྃ་མཛད་བློ་གྲོས་བརྟན། །བདེ་བ་གསལ་མཛད་དྷརྨ་བྷོ་དྷི་དང༌། །བ་སུ་དྷ་ར་མཁན་ཆེན་ཆོས་རྒྱལ་སྐྱོང༌། །འཕགས་བལ་པཎ་གྲུབ་རྣམས་ལ་གུས་ཕྱག་འཚལ། །གངས་ལྗོངས་མིག་གཅིག་བཻ་རོ་ཙ་ན་དང༌། །དཔལ་བརྩེགས་ཀླུ་ཡི་རྒྱལ་མཚན་ཆེ་བཙན་སྐྱེས། །མདོ་སྒྱུའི་མངའ་བདག་གནུབས་ཆེན་མཁྱེན་པའི་གཏེར། །སྒྲ་བསྒྱུར་ལོ་ཙཱ་རྣམས་ལ་གུས་ཕྱག་འཚལ། །ཡོན་ཏན་རྒྱ་མཚོ་ཡེ་ཤེས་རྒྱ་མཚོ་དང༌། །བློ་གྲོས་བྱང་ཆུབ་ཐོ་གར་ནམ་མཁའ་ལྡེ། །དཔལ་ཆེན་དངོས་སྣང་ཟུར་ཆེན་ཤཱཀྱ་འབྱུང༌། །བསྟན་པའི་མངའ་བདག་རྣམས་ལ་གུས་ཕྱག་འཚལ། །བདེ་གཤེགས་ཟུར་ཆུང་པ་དང་ཀ་བ་བཞི། །གསང་བདག་ཆེན་པོ་མདའ་ཚ་ཧོར་པོའི་ཞབས། །ལྷ་རྗེ་1སྨྲ་དང་གཙང་པ་འགྲོ་བའི་མགོན། །གསང་ཆེན་བསྟན་འཛིན་རྣམས་ལ་གུས་ཕྱག་འཚལ། །འཇམ་དབྱངས་བླ་མ་ཀུན་མཁྱེན་ཀཿཐོག་པ། །ཕྱག་ན་པདྨ་ཆོས་རྗེ་གཙང་༼༣༽སྟོན་མཆོག །རྡོ་རྗེ་འཛིན་དངོས་བྱམས་པ་འབུམ་པའི་ཞབས། །རྒྱལ་བ་ཡབ་སྲས་རྣམས་ལ་གུས་ཕྱག་འཚལ། །ནམ་མཁའ་རྡོ་རྗེ་ཐུགས་རྗེ་ཡེ་ཤེས་དང༌། །སྟོན་པ་དབང་འབྱོར་དཔལ་འབར་ནམ་མཁའི་མཚན། །མགོན་པོ་རྒྱལ་མཚན་ཚུལ་ཁྲིམས་རྒྱལ་མཚན་མཆོག །བསྟན་པའི་མཛོད་འཛིན་རྣམས་ལ་གུས་ཕྱག་འཚལ། །བྲ་བོ་ཆོས་འབུམ་ཡེ་ཤེས་རྒྱལ་མཚན་པ། །རྡོ་རྗེ་བཟང་པོ་ནམ་མཁའ་རྒྱ་མཚོ་དང༌། །ནམ་མཁའ་དཔལ་བ་ནམ་མཁའ་རྒྱ་མཚོའི་སྡེ། །བརྒྱུད་པའི་སྲོལ་འཛིན་རྣམས་ལ་གུས་ཕྱག་འཚལ། །ཧོར་པོ་ཆོས་དབང་ནམ་མཁའ་རྡོ་རྗེ་དང༌། །ཆོས་ཀྱི་འབྱུང་གནས་པདྨ་བཀྲ་ཤིས་ཞབས། །རིན་ཆེན་རྡོ་རྗེ་ཐུགས་མཆོག་དྲག་པོ་རྩལ། །འགྲན་བྲལ་སྐྱེས་ཆེན་རྣམས་ལ་གུས་ཕྱག་འཚལ།།

ཡང་ལུང་གི་བརྒྱུད་པ་ལྟར་ན་ཁ་བ་དཀར་པོ་ཡན་འདྲ་ལ་དེ་ནས། བསོད་ནམས་རྒྱ་མཚོ་བསོད་ནམས་རྡོ་རྗེ་དང༌། །སྟོན་པ་སེང་གེ་བཀྲ་ཤིས་རིན་ཆེན་ཞབས། །རིན་ཆེན་རྡོ་རྗེ་མན་འདྲའོ། །ཀུན་བཟང་རྒྱ་མཚོ་ཁྱབ་གདལ་ཀློང་ཡངས་དང༌། །ལྷུན་གྲུབ་རྒྱ་མཚོ་པདྨ་ནོར་བུ་དང༌། །ཀརྨ་བཀྲ་ཤིས་པདྨ་སྦྱིན་པ་སྟེ། །སྨིན་གྲོལ་མཛོད་འཛིན་རྣམས་ལ་གུས་ཕྱག་འཚལ། །ཀརྨ་ལྷ་དབང་པདྨ་བཟོད་པ་དང༌། །མདོ་སྔགས་བསྟན་འཛིན་ཆོས་ཀྱི་ཉི་མ་མཆོག །རྒྱལ་མཚན་འོད་ཟེར་པདྨ་རྒྱལ་མཚན་ཏེ། །བསྟན་འཛིན་སྐྱེས་མཆོག་རྣམས་ལ་གུས་ཕྱག་འཚལ། །གཞན་ཡང་ཀུན་མཁྱེན་རོང་ཀློང་རྣམ་གཉིས་དང༌། །འགྱུར་མེད་རྡོ་རྗེ་ལོ་ཆེན་དྷརྨ་ཤྲཱི། །པདྨ་ཕྲིན་ལས་རིག་འཛིན་འཇིགས་བྲལ་གླིང༌། །ངེས་དོན་གསལ་མཛད་རྣམས་ལ་གུས་ཕྱག་འཚལ། །འཇམ་མགོན་མཁྱེན་བརྩེའི་དབང་དང་མཆོག་གྱུར་གླིང༌། །ཡོན་ཏན་རྒྱ་མཚོ་ཆོས་ཀྱི་དབང་པོ་དང༌། །སྨྲ་བའི་ཉི་མ་མི་ཕམ་ཆོས་ཀྱི་རྗེ། །ཟླ་བྲལ་མཁས་གྲུབ་རྣམས་ལ་གུས་ཕྱག་འཚལ། །ཁྱད་པར་དུས་འདིར་དཔག་དཀའི་ཆོས་གཏེར་གྱིས། །རྒྱལ་བསྟན་སྤྱི་དང་ལུང་ཆེན་འདུས་པ་མདོའི། །བསྟན་པའི་སྒོ་འབྱེད་མཁས་བཙུན་གྲུབ་པའི་དབང༌། །ཆོས་ཀྱི་རྒྱ་མཚོའི་སྤྲིན་ལ་གུས་ཕྱག་འཚལ། །འགྲོ་འདུལ་རིག་འཛིན་སྣ་ཚོགས་རང་གྲོལ་དང༌། །ཆོས་ཀྱི་རྡོ་རྗེ་མཁན་ཆེན་དཔལ་གྱི་མཚན། །སྤོབས་པའི་གཏེར་མཛོད་པདྨ་བི་ཛ་སོགས། །བཀའ་༼༤༽དྲིན་མཉམ་མེད་རྣམས་ལ་གུས་ཕྱག་འཚལ། །ལས་རབ་གླིང་པ་ངག་དབང་ཀུན་ཏུ་བཟང༌། །གྲུབ་པའི་དབང་མཆོག་བྱམས་པ་ཆོས་འཛིན་རྗེ། །བློ་གྲོས་རྒྱ་མཚོ་རྡོ་རྗེ་ལེགས་བཤད་རྩལ། །འཁོར་ལོའི་མགོན་པོ་རྣམས་ལ་གུས་ཕྱག་འཚལ། །དེ་ལྟར་བཀའ་རྒྱུད་ནོར་བུའི་ཕྲེང་བ་ལ། །སྒོ་གསུམ་གུས་པའི་ཕྱག་གིས་བཏུད་བྱས་ཏེ། །བཀའ་རྣམས་ཀུན་གྱི་དེམས་གྱུར་མདོ་ཆེན་པོ། །རྒྱལ་ཀུན་དགོངས་པའི་མཛོད་འདི་དགྲོལ་བྱེད་ན། །བླ་མ་མཆོག་དང་རྩ་གསུམ་སྲུང་མ་ཡིས། །སྒྲིབ་མེད་མཁྱེན་པའི་སྤྱན་གྱིས་རྗེས་དགོངས་ཏེ། །བདག་རྒྱུད་དད་པའི་མེ་ལོང་དྭངས་པ་ལ། །ཡེ་ཤེས་ཐུགས་རྗེའི་གཟུགས་བརྙན་སྣང་བར་མཛོད། །ཅེས་མཆོད་པར་བརྗོད་པའི་མེ་ཏོག་གིས་མདུན་བསུས་ཏེ། རིག་འཛིན་ཆེན་པོ་དཔལ་གྱི་སེང་གེས་རིན་པོ་ཆེའི་རྒྱན་ལས། རྩོམ་རྒྱུ་ཤེས་རབ་སྙིང་རྗེ་སྟེ། །ལུང་དང་མན་ངག་ཐོབ་པས་འགྲུབ། །གནས་ལུགས་མངོན་སུམ་རྟོགས་པ་རབ། །ཡི་དམ་མཁའ་འགྲོ་བླ་མ་ལས། །ལུང་བསྟན་ཐོབ་པ་འབྲིང་པོ་ཡིན། །ལ་ཤན་བཀའ་ལུང་ཚིག་ལ་མཁས། །བྱེ་བྲག་ཕྱེད་པ་ཐ་མ་ཡིན། །ཞེས་གསུངས་པ་ལྟར་མཚུངས་མེད་བླ་མ་རྣམས་ཀྱིས་བཀའ་ལུང་གསེར་གྱི་ཅོད་པཎ་སྤྱི་བོར་བཅིངས་ཤིང་བསྐུལ་བར་མཛད་པ་དང༌། སྤྱིར་ཐེག་པ་རིམ་པ་དགུའི་བྱེ་བྲག་མ་འདྲེས་པར་ཕྱེད་ཅིང༌། ཁྱད་པར་དུ་སྐྱབས་རྗེ་ཐམས་ཅད་མཁྱེན་པ་དོན་གྱི་སླད་དུ་མཚན་ནས་སྨོས་ཏེ་བྱམས་ཆེན་ཆོས་ཀྱི་རྒྱ་མཚོ་ཨོ་རྒྱན་བསྟན་འཛིན་ཆོས་ཀྱི་རྒྱལ་མཚན་ཕྱོགས་ལས་རྣམ་རྒྱལ་དཔལ་བཟང་པོའི་བཀའ་དྲིན་གྱིས་འདུས་པ་མདོའི་ཕྱག་དཔེ་གསར་དུ་དྲངས་པ་རྣམས་མཇལ་བའི་སྐལ་བཟང་དུ་གྱུར་པས། སློབ་དཔོན་ཆེན་པོ་དྷརྨ་བྷོ་དྷིས་དོན་བསྡུས་ལས། རྒྱལ་བའི་དགོངས་པ་ཀུན་འདུས་ལས། །མདོ་དོན་ཆོས་ཀྱི་རྣམ་གྲོལ་སྒོ། །དེ་ཤེས་དེ་འཇུག་བདེ་སྒྲུབ་ཕྱིར། །མི་འགལ་ཙམ་དུ་བསྡུས་ཏེ་བཤད། །ཅེས་གསུངས་པ་དང་ཚུལ་མཐུན་པར་ལེགས་བཤད་ཀུན་གྱི་བཅུད་བསྡུས་ཏེ། ལེའུ་ང་གཅིག་པ་ལས། བཀའ་དོན་གཏན་ཚིགས་རིགས་པ་བཞིས། །སྣང་དང་མི་འགལ་རྒྱས་འཐད་སྦྱར། །ཞེས་པ་ལྟར་རང་གཞུང་ལ་ཟློ་ཞིང་གཞན་གྱི་གྲུབ་མཐའ་ཤན་འབྱེད་པའི་བཀའ་ཡི་ཚིག་ལ་སྒྲོ་སྐུར་མེད་པར་སྣང་བ་དང༌། དོན་དང་མི་འགལ་བར། གཏན་ཚིགས་ཀྱིས་རྒྱས་ཤིང་རིགས་པས་འཐད་པའི་ཚུལ་ལ་བློ་གྲོས་ཀྱི་འཇུག་པ་ཅུང་ཟད་ཐོབ་པས། ཆོས་རྗེ་དམ་པ་རིན་པོ་ཆེས། སྟོན་པའི་བསྟན་པ་རྟོགས་སླའི་ཕྱིར། །ཚིག་ཟུར་བཅོས་༼༥༽ཕྱིར་ངེས་ཚིག་འགྲུབ། །ཅེས་གསུངས་པ་ལྟར། རང་དང་སྐལ་བ་མཉམ་པའི་བློ་གྲོས་ཀྱི་རྩལ་ཞན་པ་རྣམས་ལ་སྨན་པར་འདོད་པའི་ལྷག་བསམ་དང་ལྡན་པའི་བློས་དམན་པ་བདག་ཀྱང་ཚུལ་འདི་ལ་གུས་པས་ཞུགས་པ་ཡིན་ནོ།།

དེ་ལ་སངས་རྒྱས་ཐམས་ཅད་ཀྱི་དགོངས་པ་འདུས་པའི་མདོ། རྣལ་འབྱོར་གྲུབ་པའི་ལུང༌། ཐེག་པ་ཐམས་ཅད་ཀྱི་ཡང་རྩེ། བསྟན་པ་ཐམས་ཅད་ཀྱི་འབྱུང་གནས། རྒྱུད་ཐམས་ཅད་ཀྱི་རྒྱལ་པོ། ལུང་ཐམས་ཅད་ཀྱི་སྤྱི་འགྲེལ། མན་ངག་ཐམས་ཅད་ཀྱི་རྩ་བ། དོན་ཐམས་ཅད་ཀྱི་མཇུག་སྡུད། ཆོས་ཐམས་ཅད་ཀྱི་མེ་ལོང༌། དེ་བཞིན་གཤེགས་པ་ཐམས་ཅད་ཀྱི་དགོངས་པའི་ཞེ་ཕུགས། འབྲས་བུ་ཐམས་ཅད་ཀྱི་ཐུག་ས། རྒྱལ་བ་ཐམས་ཅད་ཀྱི་གཤེགས་ཤུལ། མ་འོངས་དང་ད་ལྟར་གྱི་རྣལ་འབྱོར་པ་རྣམས་ཀྱི་ལམ་ཆེན་པོ། གསང་བ་བས་ཀྱང་ཆེས་གསང་བ། ཡང་གསང་རྨད་དུ་བྱུང་བའི་བཀའ་ཁྱད་པར་ཅན། མདོ་རྒྱུད་ཆེན་པོ་ཆོས་ཀྱི་མེ་ལོང་འདི་ལ་དོན་གསུམ་གྱིས་བསྟན་ཏེ།

ཀླད་ཀྱི་དོན་དང༌། གཞུང་གི་དོན་དང༌། མཇུག་གི་དོན་ནོ། །དང་པོ་ལ་གཉིས་ཏེ། མཚན་བསྟན་པ་དང༌། ཕྱག་འཚལ་བའོ། །དང་པོ་ནི།

2རྒྱ་གར་སྐད་དུ། སརྦ་ཏ་ཐཱ་ག་ཏ་ཙིཏྟ་ཛྙཱ་ན་གུ་ཧྱ་ཨརྠ་གརྦྷ་བྱཱུ་ཧ་བཛྲ་ཏནྟྲ། སིདྡྷི་ཡོ་ག་ཨཱ་ག་མ་ས་མཱ་ཛ་སརྦ་བིདྱཱ་སཱུ་ཏྲ་མ་ཧཱ་ཡཱ་ན་ཨ་བྷི་ས་མ་ཡ་དྷརྨ་པརྱ་ཡ་བི་བྱཱུ་ཧ་ནཱ་མ་སཱུ་ཏྲྃ། བྲུ་ཞའི་སྐད་དུ། ཧོན་པན་རིལ་ཏིལ་པི་པུ་པི་ཏིལ་ཏི་ཏ་སིད་འུན་འུབ་ཧང་པང་རིལ་འུབ་པི་སུ་བད་རི་ཞེ་ཧལ་པའི་མ་ཀྱང་ཀུའི་དང་རོད་ཏི། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་ཡེ་ཤེས་དོན་གྱི་སྙིང་པོ་རྡོ་རྗེ་བཀོད་པའི་རྒྱུད་རྣལ་འབྱོར་གྲུབ་པའི་ལུང༌ཀུན་འདུས་རིག་པའི་མདོ་ཐེག་པ་ཆེན་པོ་མངོན་པར་རྟོགས་པ་ཆོས་ཀྱི་རྣམ་གྲངས་རྣམ་པར་བཀོད་པ་ཞེས་བྱ་བའི་མདོ།

རྒྱ་གར་གྱི་སྐད་དུ། སརྦ་ཏ་ཐཱ་ག་ཏ་ཙིཏྟ་ཛྙཱ་ན་གུ་ཧྱ་ཨརྠ་གརྦྷ་བྱཱུ་ཧ་བཛྲ་ཏནྟྲ། སིདྡྷི་ཡོ་ག་ཨ་ག་མ་ས་མཱ་ཛ་སརྦ་3བིདྱཱ་སཱུ་ཏྲ་མ་ཧཱ་ཡཱ་ན་ཨ་བྷི་ས་མ་ཡ་དྷརྨ་པ་ཡ་བི་བྱཱུ་ཧ་ནཱ་མ་སཱུ་ཏྲྃ། 4བྲུ་ཤའི་སྐད་དུ། ཧོན་པན་རིལ་ཏིལ། པི་པུ་པི་ཏིལ། ཏི་ཏ་སིང༌། འུན་འུབ། ཧང་པང་རིལ། འུབ་པི་སུ། པང་རི་ཞེ་ཧལ་པི། མང་ཀྱང་ཀུའི་དང་རོད་ཏི། དེ་གཉིས་བོད་སྐད་དུ་བསྒྱུར་ན། དེ་བཞིན་གཤེགས་པ་ཐམས་ཅད་ཀྱི་ཐུགས། གསང་བའི་ཡེ་ཤེས། དོན་གྱི་སྙིང་པོ། རྡོ་རྗེ་བཀོད་པའི་རྒྱུད། རྣལ་འབྱོར་གྲུབ་པའི་ལུང༌། ཀུན་འདུས་རིག་པའི་མདོ། ཐེག་པ་ཆེན་པོ་མངོན་པར་རྟོགས་པ། ཆོས་ཀྱི་རྣམ་གྲངས་རྣམ་པར་བཀོད་པ་ཞེས་བྱ་བའི་མདོ། ཞེས་བྱ་བའོ། །དེ་ལྟར་མཚན་བསྟན་པ་འདི་ནི་སེང་གེའི་མཆོངས་པ་ལྟ་བུའི་བཤད་པའི་དབང་དུ། རྣལ་འབྱོར་བྱ་བ་མེད་པའི་གོ་ལུགས་དང་པོ་བསྟན་པ་སྟེ།

འདི་ལའང་གཉིས་ཏེ། སྒྲའི་ཤན་སྦྱར་བ་དང༌། དོན་གྱི་ངོ་བོ་བསྟན་པའོ། །དང་པོ་ནི། རྒྱ་གར་དང༌། བྲུ་ཤ་དང༌། བོད་ཀྱི་མཚན་རྣམས་ཤན་སྦྱར་ཏེ་བསྟན་པས་གོ་བའི་ཚུལ་ནི་ཇི་ལྟར་ཡིན་ཞེ་ན། ལེགས་སྦྱར་གྱི་སྐད་དུ། སརྦ་ཏ་ཐཱ་ག་ཏ་ཙིཏྟ་དང༌། བྲུ་ཤའི་སྐད་དུ། ཧོན་པན་རིལ་ཏིལ་ནི། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་ཐུགས། དེ་བཞིན་དུ། ཛྙཱ་ན་གུ་ཧྱ་དང༌། པི་པུ་པི་ཏིལ་ནི། གསང་བའི་༼༦༽ཡེ་ཤེས། ཨརྠ་གརྦྷ་དང༌། ཏི་ཏ་སིང་ནི། དོན་གྱི་སྙིང་པོ། བྱཱུ་ཧ་བཛྲ་ཏནྟྲ་དང༌། འུན་འུབ་ནི། རྡོ་རྗེ་བཀོད་པའི་རྒྱུད། སིདྡྷི་ཡོ་ག་ཨ་གཱ་མ་དང༌། ཧང་པང་རིལ་ནི། རྣལ་འབྱོར་གྲུབ་པའི་ལུང༌། ས་མཱ་ཛ་སརྦ་བིདྱཱ་སཱུ་ཏྲ་དང༌། འུབ་པི་སུ་ནི། ཀུན་འདུས་རིག་པའི་མདོ། མ་ཧཱ་ཡཱ་ན་ཨ་བྷི་ས་མ་ཡ་དང༌། པང་རི་ཞེ་ཧལ་པི་ནི། ཐེག་པ་ཆེན་པོ་མངོན་པར་རྟོགས་པ། དྷརྨ་པ་ཡ་བི་བྱཱུ་ཧ་ནཱ་མ་སཱུ་ཏྲཾ་དང༌། མང་ཀྱང་ཀུ་འི་དང་རོད་ཏི་ནི། ཆོས་ཀྱི་རྣམ་གྲངས་རྣམ་པར་བཀོད་པ་ཞེས་བྱ་བའི་མདོ། ཞེས་བསྒྱུར་བ་སྟེ། ལེགས་སྦྱར་དང་བསྟུན་ན་ཐད་ལོག་ཏུ་བསྒྱུར་ཞིང༌། བྲུ་ཤ་དང་མཐུན་པར་བསྒྱུར་བའོ། །འོ་ན་འགྲེལ་ཆེན་ལས། བྲུ་ཤ་དང་བོད་སྐད་དུ་བསྒྱུར་ཚུལ་བཤད་པའི་སྐབས་སུ་ཚིག་གཅིག་གིས་ཐད་ལོག་ཏུའང་འགྱུར་ཏེ། གཞན་ནི། གོ་རིམ་བཞིན་ཀྱང༌། རྒྱ་གར་གྱི་སྐད་དུ། བཛྲ་ཀུ་ལ་ཏནྟྲ། བྷྱི་དྷ་ཏྱ་ཐ། བྷྱི་དྷ་སུ། སིདྡྷི་ཡོ་གི ཞེས་པ་ལ་བྲུ་ཤིའི་སྐད་དུ། འུན་འུབ། ཧང་པང་རིལ། འུབ་པི་སུ། ཞེས་པ་དང༌། བོད་སྐད་དུ་ནི། རྡོ་རྗེ་བཀོད་པའི་རྒྱུད། རྣལ་འབྱོར་གྲུབ་པའི་ལུང༌། ཀུན་འདུས་རིག་པའི་མདོ། ཞེས་ཤན་སྦྱར་བ་ཐད་ལོག་ཏུ་འགྱུར་ཏེ། འདུག་ས་བསྣོལ་དགོས་པའི་ཕྱིར་རོ། །ཞེས་གསུངས་པ་ཇི་ལྟར་ཡིན་སྙམ་ན། དེ་ནི་ཡིག་རྙིང་ཕལ་མོ་ཆེའི་དབུ་ན་བཞུགས་པ་ལྟར་ཏེ། དེ་ལྟར་ན། རྒྱ་གར་སྐད་དུ། སརྦ་ཏ་ཐཱ་ག་ཏ་ཙིཏྟ། གུ་ཧྱ་ཛྙཱ་ན། གརྦྷ། བཛྲ་ཀུ་ལ་ཏནྟྲ། བྷྱི་དྷ་ཏྱ་ཐ་བྷྱི་དྷ་སུ། སིདྡྷི་ཡོ་གི མ་ཧཱ་ཡཱ་ན། ས་ན་ཨརྦི། དྷརྨ་ནི་སུ་ཏྲ། ཞེས་བཞུགས་ཤིང༌། བྲུ་ཤ་གོང་དང་མཐུན་པས། བོད་ཀྱི་སྐད་དུ། དེ་བཞིན་གཤེགས་པ་ཐམས་ཅད་ཀྱི་ཐུགས། གསང་བའི་ཡེ་ཤེས། དོན་གྱི་སྙིང་པོ། རྡོ་རྗེ་བཀོད་པའི་རྒྱུད། ཀུན་འདུས་རིག་པའི་མདོ། རྣལ་འབྱོར་གྲུབ་པའི་ལུང༌། ཐེག་པ་ཆེན་པོ་མངོན་པར་རྟོགས་པ། ཆོས་ཀྱི་རྣམ་གྲངས་རྣམ་པར་བཀོད་པ་ཞེས་བྱ་བའི་མདོ། ཞེས་སུ་འགྱུར་ཡང༌། རྡོ་རྗེ་བཀོད་པའི་རྒྱུད། རྣལ་འབྱོར་གྲུབ་པའི་ལུང༌། ཀུན་འདུས་རིག་པའི་མདོ། ཞེས་སུ་བསྒྱུར་བས། གཞན་གོ་རིམ་བཞིན་ཡིན་ཀྱང་ཚིག་གཅིག་གིས་ཐད་ལོག་ཏུ་གྱུར་པའི་ཕྱིར་དེ་ལྟར་གསུངས་སོ།།

དེ་ལ་མཚན་གྱི་སྐད་གསུམ་ནི། པཎྜི་ཏ་དྷརྨ་བྷོ་དྷི་དང༌། ལོ་ཙཱ་བ་ཆེ་བཙན་སྐྱེས་ཀྱིས་རྒྱ་གར་ལས་བྲུ་ཤིའི་སྐད་དུ་བསྒྱུར་ཞིང༌། སླར་པཎྜི་ཏ་དཱ་ན་རཀྵི་ཏ་དང་ཆེ་བཙན་སྐྱེས་ཀྱི་བོད་སྐད་དུ་བསྒྱུར་བས་ན། ཚུལ་དེའི་ལོ་རྒྱུས་སྨོས་པས་ཡིད་ཆེས་པར་བྱ་བའི་ཕྱིར་དང༌། རང་སྐད་ཀྱིས་འཇལ་བར་བྱ་བའི་ཕྱིར་རིམ་པར་བསྒྱུར་༼༧༽བ་ལྟར་གསུམ་ཀ་སྨོས་པའོ།།

དེས་ན་མཚན་གསུམ་ཀླད་དུ་བྱུང་བའི་དགོས་པ་ཡང༌། རྒྱ་གར་གྱི་སྐད་ནི། ཁུངས་བཙུན་པའི་ཕྱིར་ཐེ་ཚོམ་མི་ཟ་བར་ཡིད་ཆེས་པརབྱ་བའི་ཆེད་དང༌། བྲུ་ཤའི་སྐད་ནི། ལོ་ཙཱ་བ་ཆེ་བཙན་སྐྱེས་ཀྱིས། རྒྱ་གར་དུ་བྱོན་ནས་གསང་སྔགས་མདོ་རྒྱུད་ཀྱི་དོན་ལ་སྦྱངས་ནས། བོད་ཡུལ་དུ་བསྒྱུར་བར་བཞེད་པ་ན་དུས་དེར་རྒྱལ་པོ་གླང་དར་མ་འཆལ་བའི་རིང་ལ་དམ་པའི་ཆོས་བསྣུབས་ནས་བསྒྱུར་དབང་མ་བྱུང་བས་བྲུ་ཤའི་ཡུལ་དུ་བྱོན་ཏེ། བྲུ་ཤའི་ཡུལ་ཁྲོམ་དུ་བོད་སྐད་དུ་བསྒྱུར་བས་ཡུལ་མི་ལ་དྲིན་ལ་ལན་གྱིས་བླན་པའི་ཆེད་དུ་སྨོས་ལ། བོད་སྐད་ནི། བརྡ་འཇལ་བར་བྱ་བའི་ཕྱིར་སྨོས་པས་སྐད་གསུམ་འབྱུང་བའོ། །དེ་ལ་མཚན་གྱི་འབྲུ་ཉིད་བོད་སྐད་ལྟར་མནན་ཏེ། གཉིས་པ་དོན་བཤད་པས་གོ་བས་ཚུལ་ནི། དཔེར་ན་རྟ་དཀྱུས་ཀྱི་ས་བསྟན་པ་དང་འདྲ་བར། ཚིག་ཉུང་ངུར་ཀླད་དུ་སྨོས་པས་དབུ་ཞབས་ཀྱི་དོན་ཐམས་ཅད་གོ་བར་སྟོན་ཏེ། དེ་ཡང་མཚན་གྱི་ཚིག་བདུན་གྱི་དངོས་དོན་ནི། ཇི་བཞིན་པ་དེ་ཁོ་ན་ཉིད་ཀྱི་རྣམ་གྲངས་ཡིན་པའི་ཕྱིར་འདིའི་དོན་དཀྱིལ་འཁོར་གསུམ་པོ་ཨཱ་ཧཱུྃ་མཱུྃ་གྱི་དོན་འཇལ་བས་རིལ་གྱི་དོན་འཇལ་བར་འགྱུར་རོ།།

དེ་ལ་རྣམ་གྲངས་བདུན་ནི། གཞི་ཇི་བཞིན་པ་ཉིད་དུ་རྟོགས་པ་མཐར་སོན་ནས་གདུལ་བྱ་ལ་སྐུ་ཐ་དད་པར་སྣང་བའི་སངས་རྒྱས་ཀུན་གྱི་དགོངས་པ་ནི། སེམས་ཀྱི་དཀྱིལ་འཁོར་འོད་གསལ་བ་དེ་ཁོ་ན་ཉིད་ཇི་བཞིན་པ་བརྟགས་ན་མེད་ལ་བསམ་ན་སྣང་ཡང་མཚན་ཉིད་ཡོངས་སུ་ལྡན་པར་མ་ཟིན་པས་ལམ་པའི་བློས་རེག་པར་དཀའ་བའི་ཡེ་ཤེས་ཆེན་པོ་ལས་གཡོ་བ་མེད་པ་འདི་ལ་འདུས་ཤིང་ལྷུན་གྱིས་རྫོགས་པས་རྒྱལ་བ་རིལ་དགོངས་པ་དེ་ལས་མི་འདའ་བའི་ཕྱིར། དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་ཡེ་ཤེས་ཞེས་བྱའོ། །གནས་ལུགས་དོན་གྱི་རྩ་བ་ནི། དམིགས་པའི་སྤྱོད་ཡུལ་དང་བྲལ་ཡང་ཤེས་པར་བྱ་བ་དང༌། སྒྲུབ་པར་བྱ་བ་ཇི་སྙེད་པའི་བདག་ཉིད་ལྟ་བ་དང་འབྲས་བུ་ཐམས་ཅད་དུ་རང་ཤར་ཞིང་འབྱུང་བས་དོན་གྱི་སྙིང་པོ་ཞེས་བྱའོ། །སྐད་ཅིག་མའི་རྒྱུན་དང་སྐྱེ་བའི་ཡུལ་ཀུན་བྲལ་བའི་གཉིས་སུ་མེད་པའི་ཡེ་ཤེས་མི་ཕྱེད་པ་ཆེན་པོས་སྒྲིབ་པའི་ཕུང་པོ་ཇི་སྙེད་པ་ཀ་ནས་དག་པར་བྱེད་ཅིང་ཇི་ལྟ་བའི་ངོ་བོ་ལ་ཇི་སྙེད་པའི་ཡེ་ཤེས་ཐམས་ཅད་ལྷུན་རྫོགས་སུ་གསལ་ཞིང་འདུ་འབྲལ་མེད་པས་རྡོ་རྗེ་བཀོད་པའི་རྒྱུད་ཅེས་བྱའོ། །གང་དོན་ཆེན་པོ་ལ་རྣལ་དུ་འབྱོར་ནས་ཇི་ལྟ་བའི་ངེས་པ་ཟབ་མོ་རྙེད་ཅིང་གྲུབ་པའི་གདེངས་ཆེན་པོ་ཐོབ་པ་ན་སྐྱེས་བུ་དམ་པར་ལུང་སྟོན་པ་༼༨༽ལ་སོགས་པའི་ཕྱིར་རྣལ་འབྱོར་གྲུབ་པའི་ལུང་ཞེས་བྱའོ། །ལྷུན་གྱིས་རྫོགས་པའི་ཐེག་མཆོག་དམ་པ་ནི་བཀའ་ཀུན་གྱི་ཕྱི་མོ་དང་འཕགས་པ་ཐམས་ཅད་ཀྱི་ཡུམ་ཡིན་པས་རྒྱུ་འབྲས་ཀྱི་ཐེག་པ་ཀུན་གྱི་དོན་འདུས་ཤིང༌། ལོག་པའི་ལམ་ཡན་ཆད་མ་བཀོལ་བར་སོ་སོའི་ཤན་མ་འདྲེས་པར་རིག་ཀྱང་མདོ་དོན་གྱི་ཆེ་བ་འདི་ཉིད་དུ་གཅིག་པས་ཀུན་འདུས་རིག་པའི་མདོ་ཞེས་བྱའོ། །གང་ཡང་སྤངས་པ་དང་དོར་བ་མེད་པར་རང་གསལ་དུ་རྫོགས་པའི་ངོ་བོ་ནི། སྣང་མི་སྣང་གི་མཐའ་ལས་གྲོལ་བའི་གསང་སྔགས་ཇི་བཞིན་པའི་ཆོས་ཉིད་དེ་དངོས་ཐེག་པ་ཆེན་པོ་མཆོག་ཏུ་གསང་བའོ། །དེ་ལྟ་བུའི་ཟབ་དོན་དེ་ཉིད་དམ་པ་རྣམས་ཀྱིས་རང་རིག་པའི་མངོན་སུམ་དུ་ཡུལ་ལས་འདས་པར་རྟོགས་ཏེ་མ་མཐོང་བའི་མཐོང་བ་ཆེན་པོར་ཡང་དག་པར་འཆར་བའི་ཐབས་དང་དོན་གཉིས་ཀ་འདི་ཉིད་ཡིན་པས་ཐེག་པ་ཆེན་པོ་མངོན་པར་རྟོགས་པ་ཞེས་བྱའོ། །མདོ་རྒྱུད་ཀྱི་རིམ་པ་ཀུན་དང༌། ཆ་མཐུན་གྱི་ལོག་ལྟ་ལ་སོགས་པ་ཀུན་མ་འདྲེས་པར་གསལ་ཏེ་ངོ་བོ་ཇི་བཞིན་པ་ལ་ཡོངས་སུ་རྫོགས་པའི་ཕྱིར་རྣམ་གྲངས་ཀྱི་ཆོས་ཇི་སྙེད་པའི་རྗོད་བྱེད་ཀྱི་ཡི་གེ་དང་བཅས་པ་ཐམས་ཅད་འདི་ཉིད་ལས་འཕྲོས་ཏེ་ཀུན་ཏུ་འགོད་པས་ན་མདོའི་ཆིངས་ཆེན་པོ་ཡིན་པས་ཆོས་ཀྱི་རྣམ་གྲངས་རྣམ་པར་བཀོད་པ་ཞེས་བྱ་བའི་མདོ། ཞེས་པའི་མཚན་དུ་བསྟན་པའོ། །དེའི་ཚུལ་རྒྱས་པར་བཀྲོལ་ན་བཤད་ལུགས་བདུན་ཏེ། རྒྱུད་ལུང་མན་ངག་གསུམ་དང་སྦྱར་ཏེ་བཤད་པ། ཆེ་བ་བདུན་དང་སྦྱར་ཏེ་བཤད་པ། བྱུང་ཚུལ་བཅུ་གཉིས་དང་སྦྱར་ཏེ་བཤད་པ། ལེའུ་བདུན་ཅུ་རྩ་ལྔ་དང་སྦྱར་ཏེ་བཤད་པ། མཚོན་པ་དཔེ་དང་སྦྱར་ཏེ་བཤད་པ། སྣོད་བཞི་ལ་བསྟན་པ་བཞི་རུ་གསུངས་པ་དང་སྦྱར་ཏེ་བཤད་པ། མཚན་གཏན་ཚིགས་ཀྱི་སྒོ་ནས་བཤད་པའོ། །དང་པོ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས། གསང་བའི་ཡེ་ཤེས། དོན་གྱི་སྙིང་པོ་རྣམས་ནི་མན་ངག་གི་མཚན་ནོ། །རྣལ་འབྱོར་གྲུབ་པའི་ལུང་དང༌། ཀུན་འདུས་རིག་པའི་མདོ་ནི་ལུང་གི་མཚན་ནོ། །རྡོ་རྗེ་བཀོད་པའི་རྒྱུད། ཐེག་པ་ཆེན་པོ་མངོན་པར་རྟོགས་པ། ཆོས་ཀྱི་རྣམ་གྲངས་རྣམ་པར་བཀོད་པ་རྣམས་རྒྱུད་ཀྱི་མཚན་དུ་བསྟན་ཏོ།།

གཉིས་པ་བསྟན་པ་གཞན་ལས་འཕགས་པའི་ཆེ་བ་བདུན་ཡང་དེ་ཁོ་ན་ཉིད་ཀྱི་ཁྱད་པར་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས། གསང་བའི་ཡེ་ཤེས་ནི་སངས་རྒྱས་ཐམས་ཅད་ཀྱི་དགོངས་པའི་ཞེ་ཕུགས་ཡིན་ཞིང་དེར་སྐལ་དམན་གྱི་རིམ་གྱིས་བགྲོད་ལ་འདིར་ཅིག་ཆར་དུ་སྟོན་པས་ཐེག་པའི་ཡང་རྩེ་ཡིན་པའི་ཆེ་བའོ། །༼༩༽དོན་གྱི་སྙིང་པོ་ནི་དེ་ཁོ་ན་ཉིད་ཡིན་ལ། དེ་ཉིད་ཇི་ལྟ་བ་བཞིན་དུ་སྟོན་པས་མན་ངག་གི་རྩ་བ་ཡིན་པའི་ཆེ་བའོ། །རྡོ་རྗེ་བཀོད་པའི་རྒྱུད་ནི་རིག་པའི་བྱེ་བྲག་ཐམས་ཅད་ཀྱི་བདག་ཉིད་དུ་གྱུར་པས་རྒྱུད་ཐམས་ཅད་ཀྱི་རྒྱལ་པོ་ཡིན་པའི་ཆེ་བའོ། །རྣལ་འབྱོར་གྲུབ་པའི་ལུང་ནི། ལུང་དོན་ཐམས་ཅད་འདིས་གཏན་ལ་འབེབས་པས་ན་ལུང་གི་སྤྱི་འགྲེལ་ཡིན་པའི་ཆེ་བའོ། །ཀུན་འདུས་རིག་པའི་མདོ་ནི། བསྟན་པ་རིལ་གྱི་དོན་འདི་ལ་འདུས་ཤིང་འདིས་གཅོད་པས། དོན་གྱི་མཇུག་སྡུད་ཡིན་པའི་ཆེ་བའོ། །ཐེག་པ་ཆེན་པོ་མངོན་པར་རྟོགས་པ་ནི། གསང་སྔགས་ཇི་བཞིན་པའི་དོན་ཉིད་རྒྱུད་འདིས་ཇི་ལྟ་བར་མཐོང་བར་བྱེད་པས། ཆོས་ཀྱི་མེ་ལོང་ཡིན་པའི་ཆེ་བའོ། །ཆོས་ཀྱི་རྣམ་གྲངས་རྣམ་པར་བཀོད་པ་ནི། བཀའ་རྒྱུད་ཐམས་ཅད་ཀྱི་ལྷུན་གྱིས་གྲུབ་པ་འདི་ལས་སྣང་བའི་ཕྱིར་བསྟན་པའི་འབྱུང་གནས་ཡིན་པའི་ཆེ་བའོ།།

གསུམ་པ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་ཡེ་ཤེས། ཞེས་པ་རྨོངས་པ་གདུང་བ་སེལ་བ་དང༌། བྱིན་གྱིས་རླབས་ཀྱི་བྱུང་ཚུལ་ལོ། །དོན་གྱི་སྙིང་པོ། ཞེས་པ་སྙིང་པོ་བྱང་ཆུབ་ཏུ་ངེས་པའི་བྱུང་ཚུལ་ལོ། །རྡོ་རྗེ་བཀོད་པའི་རྒྱུད། ཅེས་པ་སྒྲོན་མ་ཡོངས་སུ་བཀོད་པ་དང༌། དགོངས་པ་ངེས་པར་འགྲེལ་བའི་བྱུང་ཚུལ་ལོ། །རྣལ་འབྱོར་གྲུབ་པའི་ལུང༌། ཞེས་པ་གང་གིས་ངེས་པ་རྙེད་པ་དང༌། གདུལ་བྱའི་སྐབས་ལ་བབ་པའི་བྱུང་ཚུལ་ལོ། །ཀུན་འདུས་རིག་པའི་མདོ། ཞེས་པ་བརྒྱུད་པ་ཐབས་ཀྱི་གྲགས་པ་དང༌། ལས་རྒྱུན་ཡོངས་སུ་གཅོད་པའི་བྱུང་ཚུལ་ལོ། །ཐེག་པ་ཆེན་པོ་མངོན་པར་རྟོགས་པ། ཞེས་པ་གང་གི་ཆེད་དུ་མཛད་པ་དང༌། ལུང་ཆེན་ངེས་པར་བསྟན་པའི་བྱུང་ཚུལ་ལོ། །ཆོས་ཀྱི་རྣམ་གྲངས་རྣམ་པར་བཀོད་པ། ཞེས་པ་དགོངས་པ་རྣམ་པར་བགྲོ་བའི་བྱུང་ཚུལ་ལོ།།

བཞི་པ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ཞེས་པར། ལེའུ་དང་པོ་དང་བདུན་པ་འདུས་སོ། །གསང་བའི་ཡེ་ཤེས་ཞེས་པར། ལེའུ་གཉིས་པ་ནས་དྲུག་པའི་བར་དང་བརྒྱད་པ་དང་དགུ་པ་འདུས། དོན་གྱི་སྙིང་པོ་ཞེས་པར། ལེའུ་བཅོ་ལྔ་པ་འདུས། རྡོ་རྗེ་བཀོད་པའི་རྒྱུད་ཅེས་པར། ལེའུ་བཅུ་དྲུག་པ་ནས་བཅུ་དགུའི་བར་དང༌། སོ་གཉིས་པ་ནས་ཞེ་གཉིས་པའི་བར་འདུས། རྣལ་འབྱོར་གྲུབ་པའི་ལུང་ཞེས་པར། བཅུ་པ་ནས་བཅུ་བཞི་པའི་བར་དང༌། ཉི་ཤུ་པ་ནས་སོ་གཅིག་པའི་བར་འདུས། ཀུན་འདུས་རིག་པའི་མདོ་ཞེས་པར། རེ་དྲུག་པ་ནས་དོན་ལྔ་པ་ཡན་༼༡༠༽ཆད་འདུས། ཐེག་པ་ཆེན་པོ་མངོན་པར་རྟོགས་པ་ཞེས་པར། ཞེ་བཞི་པ་དང་ཞེ་གསུམ་པ་འདུས། ཆོས་ཀྱི་རྣམ་གྲངས་རྣམ་པར་བཀོད་པ་ཞེས་པར། ཞེ་ལྔ་པ་ནས། དྲུག་ཅུ་རེ་ལྔ་པ་ཡན་ཆད་འདུས་སོ།།

ལྔ་པ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ནི་ངོས་བཟུང་མེད་ཅིང་བསམ་གྱིས་མི་ཁྱབ་པས་དཔེར་ན་ནམ་མཁའ་ལྟ་བུ། གསང་བའི་ཡེ་ཤེས་ནི་རང་ལ་ཡོད་ཀྱང་རྟོགས་པར་དཀའ་བས་དབུལ་པོའི་ཁྱིམ་གྱི་གཏེར་ལྟ་བུ། དོན་གྱི་སྙིང་པོ་ནི་ཤེས་སྒྲིབ་ཀྱི་བཅུད་ཐམས་ཅད་འདུས་པས་གཟི་ལྡན་ཉི་མའི་དཀྱིལ་འཁོར་ལྟ་བུ། རྡོ་རྗེ་བཀོད་པའི་རྒྱུད་ནི་རིམ་པ་དགུའི་དོན་ཐམས་ཅད་མཛེས་པར་བཀོད་པས་གསེར་མིག་ལ་གཡུས་སྤྲས་པ་ལྟ་བུ། རྣལ་འབྱོར་གྲུབ་པའི་ལུང་ནི་དེ་ཁོ་ན་ཉིད་མ་བསླད་པར་ཇི་བཞིན་དུ་བསྟན་ཏེ་དངོས་གྲུབ་ཐོབ་པ་ལ་མངའ་དབང་བསྒྱུར་བས་འཁོར་སྒྱུར་གྱི་བཀའ་ལུང་ཐོབ་པའི་བློན་པོ་ལྟ་བུ། ཀུན་འདུས་རིག་པའི་མདོ་ནི་བྱུང་ཚུལ་བཅུ་གཉིས་ཀྱི་དོན་ཐམས་ཅད་མ་འདྲེས་ལ་ཡོངས་སུ་རྫོགས་པར་སྟོན་པས་རྒྱ་མཚོ་ལ་གཟའ་སྐར་ཤར་བ་ལྟ་བུ། ཐེག་པ་ཆེན་པོ་མངོན་པར་རྟོགས་པ་ནི་ཐེག་པ་མཆོག་གི་དོན་གསལ་ཞིང་མཐས་མ་སྒྲིབ་པར་མཐོང་བས་འཕྲུལ་གྱི་མེ་ལོང་ལ་གཟུགས་བརྙན་གསལ་བ་ལྟ་བུ། འདི་ལ་སེང་གེའི་དཔེ་བཀོད་པ་ལྟར་ན། ཐེག་ཆེན་གསང་སྔགས་ཀྱི་གནས་ལུགས་ཇི་བཞིན་པར་རྟོགས་ནས་གཞན་ཟིལ་གྱིས་གནོན་པས་རྩལ་གྱི་རྒྱལ་པོ་སེང་གེ་ལྟ་བུ་ཞེས་སྦྱར། ཆོས་ཀྱི་རྣམ་གྲངས་རྣམ་པར་བཀོད་པ་ནི་གསང་སྒོ་མཚོན་པའི་ཐབས་ཀྱི་རྣམ་པ་ཐམས་ཅད་མ་འདྲེས་པར་གསལ་བས་པདྨ་བཀྲམ་པ་ལྟ་བུའོ།།

དྲུག་པ་ལ་བཞི་ལས། དང་པོ་ཞེན་ཆགས་ཅན་ལ་འདོད་པ་རང་རྐྱེན་གྱི་ཚིག་ཏུ་བཤད་པ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ཞེས་པ། ཡབ་ཡུམ་གྱི་རྩ་ས་ཡ་ཕྲག་བཅུ་གསུམ་གྱི་བཅུད་ཡབ་ཡུམ་གཉིས་ཀྱི་ཐིག་ལེའི་བདེ་བ་རང་བཞིན་ལྷན་ཅིག་སྐྱེས་པའི་ཡེ་ཤེས་སོ། །གསང་བའི་ཡེ་ཤེས་ཞེས་པ། བྱིས་པ་རྣམ་གཉིས་དང་མ་ནིང་ལ་སོགས་པའི་སྤྱོད་ཡུལ་དུ་མ་གྱུར་པའོ། །དོན་གྱི་སྙིང་པོ་ཞེས་པ། ཡབ་ཡུམ་གྱི་ཐིག་ལེ་རྡོ་རྗེ་དང་པདྨའི་རྩེར་འདུས་པ་ལ་བདེ་བ་ཐམས་ཅད་ཀྱི་བཅུད་འདུས་པའོ། །རྡོ་རྗེ་བཀོད་པའི་རྒྱུད་ཅེས་པ། ལྷན་ཅིག་སྐྱེས་པའི་ཡེ་ཤེས་རྡོ་རྗེ་ལྟ་བུ་ལ་ཡེ་ཤེས་ཐམས་ཅད་ཚང་འབྲེལ་དུ་གནས་པའོ། །རྣལ་འབྱོར་གྲུབ་པའི་ལུང་ཞེས་པ། ཆགས་པ་ཐབས་ཀྱིས་ཟིན་པས་འབྲས་བུ་གྲུབ་པར་བྱེད་པ་སྟེ་གསང་བའི་སྐུའི་གསུང་ངོ༌། །ཀུན་འདུས་རིག་པའི་མདོ་༼༡༡༽ཞེས་པ། ཡབ་ཡུམ་གྱི་ཐིག་ལེ་ལ་བདེ་བ་ཀུན་འདུས་པས་དོན་རིག་པར་བྱེད་པའོ། །ཐེག་པ་ཆེན་པོ་མངོན་པར་རྟོགས་པ་ཞེས་པ། རང་བཞིན་ལྷན་ཅིག་སྐྱེས་པའི་ཡེ་ཤེས་ཐབས་ཀྱིས་ཟིན་པས་དངོས་པོ་ལྷན་ཅིག་སྐྱེས་པའི་བདེ་བར་གསལ་བའོ། །ཆོས་ཀྱི་རྣམ་གྲངས་རྣམ་པར་བཀོད་པ་ཞེས་བྱ་བའི་མདོ་ཞེས་པ། ཆགས་པ་ཐབས་ཀྱིས་མ་ཟིན་ན་འཁོར་བའི་ཆོས་ཐམས་ཅད་འབྱུང་ལ། ཐབས་ཀྱིས་ཟིན་ན་མྱ་ངན་ལས་འདས་པའི་ལམ་དང་འབྲས་བུའི་ཆོས་ཐམས་ཅད་འབྱུང་བའོ། །གཉིས་པ་ལོག་སྲེད་ཅན་ལ་བཀྲི་དྲང་བརྒྱུད་པའི་ཚིག་ཏུ་བཤད་པ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ཞེས་པ། རྟག་པར་ལྟ་བ་དང་ཆད་པར་ལྟ་བ་གཉིས་རྒྱལ་བའི་ཐུགས་ཡིན་བྱས་པས། ཚིག་དེས་བརྒྱུད་ནས་ངོ་བོ་ཉིད་མི་འགྱུར་བ་དང་རང་བཞིན་མེད་པར་རྟོགས་པར་བྱེད་པའོ། །གསང་བའི་ཡེ་ཤེས་ཞེས་པ། རྟག་ཆད་ཀྱི་ལྟ་བ་དེ་ཀུན་གྱི་སྤྱོད་ཡུལ་མ་ཡིན་པའོ་བྱས་པས། ཚིག་དེས་བརྒྱུད་ནས་རང་བྱུང་ཡེ་ཤེས་ཀུན་གྱི་སྤྱོད་ཡུལ་མ་ཡིན་པ་རྟོགས་པར་བྱེད་པའོ། །དོན་གྱི་སྙིང་པོ་ཞེས་པ། ལྟ་བ་རྟག་ཆད་དང་སྤྱོད་པ་ཕྱིན་ཅི་ལོག་ལ་ཤེས་བྱ་དང་བསྒྲུབ་བྱ་ཐམས་ཅད་ཀྱི་བཅུད་འདུས་བྱས་པས། ཚིག་དེས་བརྒྱུད་ནས་རང་བྱུང་ཡེ་ཤེས་ལ་ཤེས་སྒྲུབ་ཀྱི་བཅུད་འདུས་པ་རྟོགས་པར་བྱེད་པའོ། །རྡོ་རྗེ་བཀོད་པའི་རྒྱུད་ཅེས་པ། ལོག་པར་ལྟ་བ་ལ་ཡེ་ཤེས་ཐམས་ཅད་ཚང་འབྲེལ་དུ་གནས་སོ་བྱས་པས། ཚིག་དེས་བརྒྱུད་ནས་རང་བྱུང་ཡེ་ཤེས་ལ་ཡེ་ཤེས་ཐམས་ཅད་ཚང་འབྲེལ་དུ་གནས་པ་རྟོགས་པར་བྱེད་པའོ། །རྣལ་འབྱོར་གྲུབ་པའི་ལུང་ཞེས་པ། བདག་ཏུ་འཛིན་པའི་ཏིང་ངེ་འཛིན་གྱིས་འབྲས་བུ་གྲུབ་པ་ནི་ལུང་མ་ནོར་བ་ཡིན་བྱས་པས། ཚིག་དེས་བརྒྱུད་ནས་སྤྱོད་ཡུལ་དང་བྲལ་བའི་དགོངས་པས་འབྲས་བུ་གྲུབ་པར་བྱེད་པ་རྟོགས་པར་བྱེད་པའོ། །ཀུན་འདུས་རིག་པའི་མདོ་ཞེས་པ། རྟག་ཆད་གཉིས་སུ་ལོག་ལྟ་ཐམས་ཅད་འདུས་པ་དེས་དོན་རིག་པར་བྱེད་དོ་བྱས་པས། ཚིག་དེས་བརྒྱུད་ནས་རང་བྱུང་ཡེ་ཤེས་ལ་ཆོས་ཐམས་ཅད་འདུས་པས། ཐམས་ཅད་མཁྱེན་པའི་ལྟ་བ་རྟོགས་པར་བྱེད་པའོ། །ཐེག་པ་ཆེན་པོ་མངོན་པར་རྟོགས་པ་ཞེས་པ། རྟག་པར་ལྟ་བ་རྟོགས་ན་མཐོ་རིས་སུ་འདེགས་པར་བྱེད་བྱས་པས། ཚིག་དེས་བརྒྱུད་ནས་རང་བྱུང་ཡེ་ཤེས་གཉེན་པོ་མེད་པར་རྟོགས་ནས་གྲོལ་ཞིང་ཐར་པ་རྟོགས་པར་བྱེད་པའོ། །ཆོས་ཀྱི་རྣམ་གྲངས་རྣམ་པར་བཀོད་པ་ཞེས་པ། རྟག་ཆད་གཉིས་༼༡༢༽ལས་ལོག་པའི་ལྟ་བ་སུམ་བརྒྱ་དྲུག་ཅུ་ལ་སོགས་པ་བཀོད་པར་བསྟན་པས། ཚིག་དེས་བརྒྱུད་ནས་རང་བྱུང་ཡེ་ཤེས་དེ་ཁོ་ན་ཉིད་ལ་ཆོས་ཐམས་ཅད་མ་འདྲེས་ལ་ཡོངས་སུ་རྫོགས་པ་ཤེས་པར་བྱེད་པའོ།།

གསུམ་པ་རིགས་རྒྱུད་ཅན་ལ་ལྡེམ་དགོངས་སྦྱོར་བའི་ཚིག་ཏུ་བཤད་པ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ཞེས་པ། དམ་ཚིག་ཏིང་འཛིན་ཤེས་རབ་དང༌། །བྱང་ཆུབ་སེམས་དང་སྙིང་རྗེ་ལྔ། །བར་མཚམས་མེད་པར་རྒྱུན་མི་གཅད། །འདི་ནི་མཚམས་མེད་དམ་ཚིག་ཡིན། །ཞེས་ཡང་དག་པའི་མཚམས་མེད་ལྔ་ལ་དགོངས་ནས། མཚམས་མེད་པ་ལྔ་ལ་སྤྱོད་པ་ཉིད་དེ་བཞིན་གཤེགས་པ་ཐམས་ཅད་ཀྱི་ཐུགས་ཡིན་ཞེས་བྱའོ། །གསང་བའི་ཡེ་ཤེས་ཞེས་པ། ཡང་དག་པའི་མཚམས་མེད་ལྔ་རྟོགས་པའམ་སྤྱད་དཀའ་བ་ལ་དགོངས་ནས་ལོག་པའི་མཚམས་མེད་ལྔ་པོ་དེ་ཀུན་གྱི་སྤྱོད་ཡུལ་མ་ཡིན་པར་སྟོན་པའོ། །དོན་གྱི་སྙིང་པོ་ཞེས་པ། ཡང་དག་པའི་ལྟ་སྤྱོད་ལ་ཤེས་སྒྲུབ་ཀྱི་བཅུད་འདུས་པ་ལ་དགོངས་ནས་མཚམས་མེད་པ་ལྔ་དང་སྦྱོར་སྒྲོལ་རང་ཀ་མ་ལ་ཐམས་ཅད་ཀྱི་བཅུད་འདུས་པར་སྟོན་པའོ། །རྡོ་རྗེ་བཀོད་པའི་རྒྱུད་ཅེས་པ། རང་བྱུང་གི་ཡེ་ཤེས་ལ་ཡེ་ཤེས་ཐམས་ཅད་ཚང་འབྲེལ་དུ་གནས་པ་ལ་དགོངས་ནས། སེམས་ཅན་གྱི་སེམས་ལ་རྣམ་རྟོག་ཐམས་ཅད་ཚང་འབྲེལ་དུ་གནས་པར་སྟོན་པའོ། །རྣལ་འབྱོར་གྲུབ་པའི་ལུང་5ནི། སེམས་ཀྱི་རང་བཞིན་མི་གཡོ་བ་ལ་དགོངས་ནས། བྱིང་རྒོད་ཀྱི་ཏིང་ངེ་འཛིན་གྱིས་འབྲས་བུ་འགྲུབ་ཅེས་སྟོན་པའོ། །ཀུན་འདུས་རིག་པའི་མདོ་ཞེས་པ། ཆོས་ཐམས་ཅད་བྱང་ཆུབ་ཀྱི་སེམས་སུ་གཅིག་པ་ལ་དགོངས་ནས། རྟོག་བཅས་ཀྱི་སེམས་ལ་སྤྲོས་པའི་ཆོས་ཐམས་ཅད་འདུས་པར་སྟོན་པའོ། །ཐེག་པ་ཆེན་པོ་མངོན་པར་རྟོགས་པ་ཞེས་པ། གསང་སྔགས་ཐེག་པ་ཆེན་པོས། ཆོས་ཐམས་ཅད་སེམས་ཉིད་དུ་རྟོགས་པ་ལ་དགོངས་ནས། མཚམས་མེད་པ་ལྔ་ལ་སོགས་པ་ལོག་པའི་སྤྱོད་པ་ཉིད་ཐེག་པ་ཆེན་པོར་སྟོན་པའོ། །ཆོས་ཀྱི་རྣམ་གྲངས་རྣམ་པར་བཀོད་པ་ཞེས་པ། ཆོས་ཐམས་ཅད་སེམས་ཉིད་ལ་མ་འདྲེས་ཡོངས་སུ་རྫོགས་པ་ལ་དགོངས་ནས། རྒྱུད་འདི་ལ་མཚམས་མེད་ལྔ་དང་མི་དགེ་བཅུ་ལ་སོགས་པ་ཐམས་ཅད་ཚང་བར་སྟོན་པའོ། །བཞི་པ་བློ་གྲོས་ཅན་ལ་དོན་དམ་ངེས་པའི་ཚིག་ཏུ་བཤད་པ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ཞེས་པ། སེམས་ཅན་ཐམས་ཅད་ཀྱི་སེམས་འཁྲུལ་པ་འདི་ཉིད་དངོས་པོ་ལ་མ་བཅོས་མ་བསླད་པར་དབྱེར་མེད་པ་ནི་༼༡༣༽རྒྱལ་བའི་ཐུགས་ཏེ། འདི་ཉིད་ལས། གསང་སྔགས་རྡོ་རྗེ་ཐེག་པ་འདི། །དེ་བཞིན་གཤེགས་པ་ཉིད་དུ་གསལ། །ཅི་ཕྱིར་རྡོ་རྗེ་གསང་སྔགས་དང༌། །སངས་རྒྱས་སེམས་ཅན་ཐ་མི་དད། །ཅེས་སོ། །གསང་བའི་ཡེ་ཤེས་ཞེས་པ། སེམས་ཉིད་རང་བྱུང་གི་ཡེ་ཤེས་རྟོགས་པར་བཀའ་བ་སྟེ། དཔེའམ་ཚད་མའམ་གཏན་ཚིགས་སམ། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ཏེ། །དམུས་ལོང་མཁའ་ལ་མཐོས་འཇལ་འདྲ། །ཞེས་སོ། །དོན་གྱི་སྙིང་པོ་ཞེས་པ། དཀྱིལ་འཁོར་རྣམ་གསུམ་དབྱེར་མེད་པའི་དོན་ལ་ཤེས་བྱ་དང་བསྒྲུབ་བྱ་ཐམས་ཅད་ཀྱི་བཅུད་འདུས་པར་སྟོན་པ་སྟེ། ཡང༌། ཐམས་ཅད་དེ་ཉིད་དེར་གཅིག་པས། །ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིན། །བྱ་བ་མེད་པའི་དཀྱིལ་འཁོར་གསུམ། །ཡེ་ནས་གྲུབ་ཟིན་ལྷུན་གྱིས་གྲུབ། །ཅེས་སོ། །རྡོ་རྗེ་བཀོད་པའི་རྒྱུད་ཅེས་པ། ཡེ་ཤེས་ཐམས་ཅད་ཀྱི་བྱེད་ལས་དང་ངོ་བོ་ནི་རྡོ་རྗེ་ལྟ་བུ་སྟེ་དེ་ལ་རྒྱུད་ཀྱི་ཡན་ལག་དྲུག་ཚང་བར་ངེས་ཏེ། བཅས་གཞི་གཏམ་རྒྱུད་ལས་རྒྱུད་དང༌། །རྟོག་ཆེན་ཡན་ལག་འབྲེལ་བཅས་རྒྱུད། །ཅེས་སོ། །རྣལ་འབྱོར་གྲུབ་པའི་ལུང་ཞེས་པ། རང་བཞིན་གྱི་རྣལ་འབྱོར་ཡེ་ནས་གྲུབ་པའམ། འབྲས་བུའི་རྣལ་འབྱོར་གྲུབ་པར་བྱེད་པའི་ལུང་འདི་ཉིད་དེ། ཡང་། ཐིག་ལེ་གཅིག་གིས་ཀུན་ལ་ཁྱབ། །ཐམས་ཅད་ལུང་ཆེན་ངེས་པར་བསྟན། །ཞེས་སོ། །ཀུན་འདུས་རིག་པའི་མདོ་ཞེས་པ། ཆོས་ཐམས་ཅད་སེམས་ཉིད་དུ་འདུས་ལ་དེས་དོན་རིག་པར་བྱེད་པ་སྟེ། ཐམས་ཅད་འདིར་འདུས་འདི་ལས་བྱུང༌། །ཀུན་གྱི་རྩ་བ་འདི་ཤེས་ན། །ཀུན་ཀྱང་མ་བཅོས་6ཅི་བཞིན་པ། །དེ་བཞིན་ཉིད་དེ་ཀུན་གྱི་མདོ། །ཞེས་སོ། །ཐེག་པ་ཆེན་པོ་མངོན་པར་རྟོགས་པ་ཞེས་པ། རྒྱུད་འདིས་གདུལ་བྱ་ཀུན་འདྲེན་ཅིང་ཆོས་ཐམས་ཅད་གསལ་བར་སྟོན་པ་སྟེ། ཀུན་ཤོང་ཀུན་འཇུག་འདིར་བདེ་བས། །ཐེག་པ་ཆེན་པོར་བརྗོད་པ་ཡིན། །ཇི་སྙེད་ཐེག་པའི་རྣམ་གྲངས་ཀུན། །དེ་ཉིད་ཆེན་པོ་ཉིད་མཐོང་གསལ། །ཞེས་སོ། །ཆོས་ཀྱི་རྣམ་གྲངས་རྣམ་པར་བཀོད་པའི་མདོ་ཞེས་པ། འཁོར་འདས་ཀྱི་ཆོས་ཐམས་ཅད་རིག་པ་བྱང་ཆུབ་སེམས་སུ་མ་འདྲེས་ཡོངས་སུ་རྫོགས་པ་རྒྱུད་འདི་ཉིད་དེ། ཡང༌། རབ་འབྱམས་རྨད་དུ་གྲགས་པ་འདི། །བཀའ་ཡི་རབ་རྒྱུད་དམ་པ་ཉིད། །སྡེ་མཛོད་དམ་པའི་བཀའ་ལུང་རྣམས། །འབྱུང་གནས་གཏན་ལ་ངེས་པར་འབེབས། །ཞེས་སོ།།

བདུན་པ་ནི། གཏན་ཚིགས་ཀྱིས་༼༡༤༽རྒྱས་ཐེབས་ཤིང་ལུང་ལས་སྣང་བར་བཤད་པ་ལེའུ་རེ་དྲུག་པ་ལས། ལང་ཀའི་བདག་པོ་དེ་ལ་རྣམ་གྲངས་བརྒྱད་གང་ཞེ་ན། སངས་རྒྱས་ཀུན་གྱི་དགོངས་པ་འདུས་པའི་མདོ་ཞེས་ཀྱང་བྱའོ། །དོན་གྱི་སྙིང་པོ་ཞེས་ཀྱང་བྱའོ། །རྡོ་རྗེ་བཀོད་པའི་རྒྱུད་ཅེས་ཀྱང་བྱའོ། །རྣལ་འབྱོར་གྲུབ་པའི་ལུང་ཞེས་ཀྱང་བྱའོ། །ཀུན་འདུས་རིག་པའི་མདོ་ཞེས་ཀྱང་བྱའོ། །ཐེག་པ་ཆེན་པོ་མངོན་པར་རྟོགས་པ་ཞེས་ཀྱང་བྱའོ། །ཆོས་ཀྱི་རྣམ་གྲངས་རྣམ་པར་བཀོད་པ་ཞེས་ཀྱང་བྱའོ། །ཐེག་པ་ཆེན་པོའི་བྱུང་ཚུལ་བསྟན་པའི་མདོ་ཞེས་ཀྱང་བྱའོ། །དེ་ཅིའི་ཕྱིར་ཞེ་ན། ལངྐའི་བདག་པོ་གང་ལ་དགོངས་པ་དེ་ཉིད་ལས་མི་འདའ་བ་དང༌། གང་གི་སྤྱོད་ཡུལ་མ་ཡིན་ཞིང་མེད་ལས་ཐམས་ཅད་འབྱུང་བ་དང༌། གང་གི་ཡེ་ཤེས་ཡོངས་སུ་བཀོད་པ་དང༌། འདི་ལྟར་གང་ངེས་པ་རྣལ་འབྱོར་དུ་ལུང་སྟོན་པ་དང༌། འདིར་ཀུན་ནས་རུབ་པ་དང༌། དམ་པ་རྣམས་ཀྱི་མངོན་པར་ཆུད་པ་དང༌། གང་ལ་མ་འདས་པར་བཀོད་པ་དང༌། གནས་སྐབས་བཅུ་གཉིས་སུ་ངེས་པར་བྱུང་ཞིང་འབྱུང་བའི་ཕྱིར་རོ། །ཞེས་གསུངས་ཏེ། དེ་ལྟར་གཏན་ཚིགས་དང་སྦྲགས་མར་བརྗོད་པས་ཡིད་ཆེས་པར་འགྱུར་ཏེ། ཇི་ལྟར་ན། གཞི་ཇི་བཞིན་པ་ཉིད་དུ་རྟོགས་པ་མཐར་སོན་པས་གདུལ་བྱ་ལ་སྐུ་ཐ་དད་པར་སྣང་བའི་རྒྱལ་བ་རིལ་གྱི་དགོངས་པ་ནི། སེམས་ཀྱི་དཀྱིལ་འཁོར་རང་གི་རང་བཞིན་གྱིས་འོད་གསལ་བ། དེ་ཁོ་ན་ཉིད་ཇི་བཞིན་པ་བརྟགས་ན་མེད་ལ་བསམ་ན་སྣང་ཡང་མཚན་ཉིད་ཡོངས་སུ་ལྡན་པར་མ་ཟིན་པས་ལམ་པའི་བསམ་པས་རེག་པར་དཀའ་བའི་ཡེ་ཤེས་ཆེན་པོ་ལས་དུས་གསུམ་དུ་གཡོ་བ་མེད་པ་འདི་ཉིད་ཡིན་ལ། དེ་ལ་དགོངས་པ་ཇི་སྙེད་པ་དང༌། ཏིང་ངེ་འཛིན་གྱི་སྒོ་འབུམ་ཕྲག་ཐམས་ཅད་ལྷུན་གྱིས་རྫོགས་པས་དགོངས་པ་འདུས་པ་ཞེས་ཀྱང་བརྗོད་དེ། རྒྱལ་བ་རིལ་དགོངས་པ་དེ་ལས་མི་འདའ་བའི་ཕྱིར་མཚན་དང་པོའི་དོན་ཏོ། །དོན་གྱི་གནས་ལུགས་ནི། ཤེས་པར་བྱ་བ་དང༌། བསྒྲུབ་པར་བྱ་བ་ཇི་སྙེད་པའི་བདག་ཉིད་ཡིན་པའི་ཕྱིར། དམིགས་པའི་སྤྱོད་ཡུལ་དང་བྲལ་བཞིན་དུ་ལྟ་བ་དང་འབྲས་བུ་ཐམས་ཅད་དུ་རང་ཤར་ཞིང་རང་བྱུང་བས་དོན་གྱི་སྙིང་པོའམ་རྩ་བར་གྱུར་པ་ནི་མཚན་གཉིས་པའི་དོན་ཏོ། །གཉིས་སུ་མེད་པའི་ཡེ་ཤེས་ཆེན་པོ་ནི་སྐད་ཅིག་མའི་རྒྱུན་དུ་སྐྱེ་བའི་ཡུལ་ཐམས་ཅད་དང་བྲལ་བས་སྒྲིབ་པའི་ཕུང་པོ་ཇི་སྙེད་པ་ཀ་ནས་དག་པར་བྱེད་པའི་ཇི་ལྟ་བའི་ངོ་བོ་ལ། ཇི་སྙེད་པའི་ཡེ་ཤེས་ཐམས་ཅད་༼༡༥༽ལྷུན་གྱིས་རྫོགས་པས་རྡོ་རྗེ་བཀོད་པའང་ཡིན་པས་མཚན་གསུམ་པའི་དོན་ཏོ། །གང་དོན་ཆེན་པོ་ལ་རྣལ་དུ་འབྱོར་ནས་གནས་ཤིང་གོམས་པར་བྱེད་པ་རྣམས་ཀྱིས་ཇི་ལྟ་བའི་དོན་ཟབ་མོ་རྙེད་ཅིང་གྲུབ་པའི་གདེང་ཆེན་པོ་ཐོབ་པ་ན་སྐྱེས་བུ་དམ་པར་ལུང་སྟོན་པར་བྱེད་དེ། རྒྱལ་ཚབ་ལྔ་ལུང་བསྟན་པ་ལ་སོགས་པའི་ཕྱིར་མཚན་བཞི་པའོ། །ལྷུན་གྱིས་རྫོགས་པའི་ཐེག་པ་ཆེན་པོ་ནི་བཀའ་ཀུན་གྱི་ཕྱི་མོ་ཉིད་ཡིན་པས་འཕགས་པ་རིལ་གྱི་ཡུམ་ཡིན་པའི་ཕྱིར་རྒྱུ་འབྲས་ཀྱི་ཐེག་པ་ཀུན་གྱི་དོན་ཐམས་ཅད་འདུས་ཤིང༌། ལོག་པའི་ལམ་ཡན་ཆད་མ་བཀོལ་བར་སོ་སོའི་ཤན་མ་འདྲེས་པར་གསལ་ཞིང་རིག་པའི་ཕྱིར་མདོ་དོན་གྱི་ཆེ་བ་འདིར་གཅིག་པས་མཚན་ལྔ་པ་གྲུབ་བོ། །གང་ཡང་སྤངས་པ་དོར་བ་མེད་པའི་ངོ་བོ་ནི། སྣང་བ་དང་མི་སྣང་བའི་མཐའ་གཉིས་ལས་གྲོལ་ཏེ་གསང་སྔགས་ཇི་བཞིན་པ་ཉིད་དེ་དངོས་ཐེག་པ་ཆེན་པོའོ། །དེ་ལྟ་བུའི་གསང་བ་ཟབ་མོའི་དོན་དེ་ཉིད་དམ་པ་རྣམས་ཀྱིས་རང་རིག་པའི་མངོན་སུམ་དུ་ཡུལ་ལས་འདས་པར་རྟོགས་ཏེ། མཐོང་བ་མེད་པའི་ཚུལ་གྱིས་མཐོང་བར་བྱེད་པའི་ཐབས་དང་དོན་གཉིས་ཀ་འདི་ཉིད་ཡིན་པས་མཚན་དྲུག་པ་ཉིད་དོ། །རྒྱུ་འབྲས་ཀྱི་ཐེག་པ་དང༌། ཆ་མཐུན་གྱི་ལོག་ལྟ་ལ་སོགས་པ་རིལ་མ་འདྲེས་པར་གསལ་ཏེ་ངོ་བོ་ཇི་བཞིན་པ་ལ་རྫོགས་པའི་ཕྱིར་ཆོས་ཀྱི་རྣམ་གྲངས་རྗོད་བྱེད་ཀྱི་ཡི་གེ་དང་བཅས་པ་རྣམ་པར་བཀོད་པ་ཉིད་ནི་མཚན་བདུན་པའི་དོན་ཏོ། །དེ་དག་ནི་མཚན་གྱི་རྣམ་གྲངས་བདུན་ཏེ་དབུའི་དོན་ནོ། །བརྒྱད་ཀྱི་དབང་དུ་བྱས་ན། གནས་སྐབས་བཅུ་གཉིས་སུའང་ཐུན་མོང་མ་ཡིན་པའི་དོན་འདི་ཉིད་སྣང་བས་བྱ་བ་རྫོགས་པར་བྱེད་པའི་ཕྱིར་བྱུང་ཚུལ་བསྟན་པ་ཞེས་ཀྱང་བྱའོ། །དེ་ནི་བྱུང་ཚུལ་བཅུ་གཉིས་ཀྱི་ཚུལ་བསྟན་པའི་ལེའུ་བདུན་ཅུ་རྩ་ལྔས་ཇི་ལྟར་བསྟན་ཀྱང་རིམ་གྱིས་པ་དང་ཅིག་ཆར་བ་གཉིས་ཀྱིས་གོ་ཞིང་འཇུག་པས་སྒྲུབ་པར་བྱ་རྒྱུ་ནི། དངོས་པོ་རྣམས་ཀྱི་དེ་ཁོ་ན་ཉིད་ལས་གཞན་མི་སྣང་ལ། དེས་ན་མཚན་གྱི་ཁྱད་པར་བརྒྱད་བདུན་དུ་བསྡུས་ནས་བསྟན་པ་དེའི་དོན་ཚུལ་བཞིན་དུ་རིག་པས་དཀྱིལ་འཁོར་གསུམ་གྱི་དོན་མ་འདྲེས་ཡོངས་རྫོགས་སུ་རིག་པར་འགྱུར་རོ།།

འོ་ན་སྤྱིར་རྒྱུད་འདི་ལ་མཚན་བཞིར་བྱུང་བ་ཟློས་སམ་སྙམ་ན་མི་ཟློས་ཏེ། ལེའུ་དང་པོ་དང་རེ་དྲུག་པའི་མཚན་ནི། ལུང་བསྟན་བརྒྱུད་པའི་རྒྱུད་ཀྱི་མཚན་ཡིན་ལ། དེ་ཡང་ལེའུ་དང་པོའི་མཚན་ནི་ལོ་ཙྭ་བས་ཀླད་དུ་བཀོད་པའོ། །རེ་དྲུག་༼༡༦༽པའི་མཚན་ནི། གསང་བདག་ཉིད་ཀྱིས་མ་ལ་ཡར་གསུངས་པའོ། །ཞེ་བརྒྱད་པའི། དེ་བཞིན་གཤེགས་པ་ཀུན་གྱི་ཐུགས་ཆེན་པོ། །ཡེ་ཤེས་སྙིང་པོ་དོན་གྱི་མཆོག་དང་ལྡན། །རྣལ་འབྱོར་ཐེག་ཆེན་རྡོ་རྗེ་ཀུན་འདུས་ལུང༌། །འདུས་པའི་ཚོགས་ལ་རྒྱ་ཆེར་བཤད་དུ་གསོལ། །ཞེས་དང༌། ཡང་དོན་གྱི་བཀོད་པ། རྟགས་ཀྱི་རོལ་པ། གསང་བའི་ངེས་པ། བཀའི་འགྲེལ་པ། ཆོས་ཀྱི་མེ་ལོང༌། གཏན་ཚིགས་ཀྱི་འབྱུང་གནས། དགོངས་པ་ཀུན་འདུས། རྡོ་རྗེ་རྣམ་པར་བསྒྱིངས་པའི་གཞུང་རྣམས་ནི་བྱིན་རླབས་འབྱུང་བའི་རྒྱུད་ཀྱི་མཚན་ཏེ། གོང་མ་ནི་ཞུས་ཚིག་དང༌། འོག་མ་ནི་ལན་གྱི་ཚིག་སྟེ་སྟོན་པས་གསུངས་བར་ཞལ་གྱིས་བཞེས་པའོ།།

བམ་པོ་དང་པོ་སྟེ། ཞེས་པ་ནི་དོན་གྱི་བམ་པོ་དང་ཚིག་གི་བམ་པོ་གཉིས་ལས་འདིར་ཚིག་གཙོ་བོར་བྱས་ནས་ཤྭ་ལོ་ཀ་སུམ་བརྒྱ་ནི་བམ་པོ་གཅིག་སྟེ། དེ་ཉིད་ཀྱི་གྲངས་ཀྱི་ཐོག་མར་ཟུག་པར་བསྟན་པའོ།།

གཉིས་པ་ཕྱག་འཚལ་བ་ནི།

བཅོམ་ལྡན་འདས་དཔལ་སྒྲོལ་བྱེད་ཐུགས་རྗེའི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ལོ།།

ཞེས་པ་སྟེ། བྱིན་རླབས་འབྱུང་བའི་རྒྱུད་ལྟར་ན། སྡུད་པ་པོ་ཕྱག་ན་རྡོ་རྗེས་སྟོན་པ་རིགས་ཀྱི་བདག་པོ་ཉིད་ལ་མཆོད་པར་བརྗོད་པ་སྟེ། རྣལ་འབྱོར་ལྔའི་མཐར་སོན་པའི་ཡེ་ཤེས་ཆེན་པོ་ནི། བྱ་བ་ཐམས་ཅད་བྱས་ཟིན་ཏེ། རང་བྱུང་ཡེ་ཤེས་ཀྱི་ངོ་བོ་ལ་ཆོས་ཐམས་ཅད་རང་སྣང་དུ་རྫོགས་པའི་དངོས་གཞིར་བཞུགས་ཏེ། སྤྱོད་ཡུལ་ཀ་ནས་དག་པས་སྡུག་བསྔལ་གྱི་ས་བོན་མེད་པས་ཉོན་མོངས་པའི་བདུད་བཅོམ། དེའི་ཕྱིར་ལྔ་ཕུང་གི་ངོ་བོ་མི་སྣང་བས་ཕུང་པོའི་བདུད་བཅོམ། དེ་ལ་འཆི་འཕོ་བའི་ཆོས་ཀྱི་འཕོ་འགྱུར་བྲལ་བས་འཆི་བདག་གི་བདུད་བཅོམ། དེ་ལྟ་བུའི་བདག་ཉིད་ལ་བར་ཆད་རིལ་མ་དམིགས་པས་ལྷའི་བུའི་བདུད་བཅོམ་པས་བཅོམ་ཞེས་བྱ་ཞིང་། ལེགས་པའི་ཡོན་ཏན་དྲུག་དང་ལྡན་པའི་བདག་ཉིད་ཆེན་པོར་བཞུགས་ཀྱང༌། མཐའ་ཐམས་ཅད་ལས་འདས་ཤིང་གྲོལ་བས་དངོས་གཞི་བསྟན་དཀའ་བ་ནི་ཆོས་ཀྱི་སྐུ་ཆེན་པོ་ཉིད་དོ། །དེ་ལྟར་ཆོས་ཀྱི་སྐུར་བཞུགས་པ་ནི་དཀྱིལ་འཁོར་གསུམ་གྱི་རང་བཞིན་ཇི་ལྟ་བར་མངོན་དུ་གྱུར་པས་རྟོགས་པ་བདག་གི་དཔལ་ཡིན་ལ། དེའི་ངང་ལས་མི་གཡོ་བར་གདུལ་བྱ་གསུམ་མཛད་པའི་ཐེག་པ་གསུམ་གྱིས་ཆུ་བོ་བཞི་ལས་མཐར་སོན་པར་བྱེད་པས་སྒྲོལ་བྱེད་ཆེན་པོར་གྱུར་པ་ནི་ཐུགས་རྗེ་གཞན་གྱི་དཔལ་ཏེ་སྤྲུལ་པའི་སྐུའི་བདག་ཉིད་དོ། །དེ་ཉིད་ཀྱི་དགོངས་པ་དེ་བཞིན་ཉིད་དུས་གསུམ་དུ་འབྱུང་འཇུག་༼༡༧༽བྲལ་ཏེ། ལྷན་ནེ་ལྷམ་མེ་ལྷང་ངེ་བར་རྣལ་མའི་དོན་བཞིན་དུ་མཛད་པའི་ཐུགས་རྗེའི་བྱིན་རླབས་རྒྱུན་མི་འཆད་པའི་ངོ་བོར་མངའ་ཐང་ཡོངས་སུ་རྫོགས་པའི་སྐུའི་རྒྱལ་པོ་ཆེན་པོར་བཞུགས་པ་ནི་ལོངས་སྤྱོད་རྫོགས་པའི་སྐུ་ཉིད་དོ། །དེ་ལྟ་བུའི་ངོ་བོ་ཤིན་ཏུ་རྣམ་པར་གྲོལ་བའི་བདག་ཉིད་ནི་ཡེ་ནས་འཆིང་བ་ཐམས་ཅད་དང་བྲལ་ཞིང་ཐབས་དམ་པའི་ངོ་བོར་བཞུགས་པས་ཐོགས་པ་ མེད་པ་ཉིད། ངོ་བོ་ཉིད་དང་གསང་བའི་སྐུ་སྟེ། སྐུ་ལྔ་ཡོངས་སུ་རྫོགས་པའི་ངོ་བོའི་བདག ་ཉིད་ནི་ཀུན་ཏུ་བཟང་པོ་སངས་རྒྱས་ཧེ་རུ་ཀ་ཆེན་པོ་ཉིད་དེ། ཐུན་མོང་མ་ཡིན་པའི་ཕྱག་གི་ཡུལ་ལོ། །དེ་ཉིད་སྐྱེ་བུ་ཉིད་དང་གཅིག་དང་དུ་མ་བྲལ་བའི་ཚུལ་དུ་རིག་པ་ནི་མཆོད་ཅིང་འདུད་པའི་མཆོག་ཡིན་པས་དམན་པས་ལུས་ངག་གིས་མོས་པ་ལྟ་བུ་ནི་མིན་ནོ། །གཞན་དུ་ལུང་བསྟན་བརྒྱུད་པ་ལྟར་ན། སྡུད་པ་པོ་བློ་གྲོས་ཐབས་ལྡན་གྱིས་འཆད་པའི་སྐྱེས་བུ་སྟོན་པ་གསང་བའི་བདག་པོ་ལ་སྒོ་གསུམ་གུས་པས་ཕྱག་འཚལ་ལོ་ཞེས་བཏུད་དེ་མཆོད་པར་མཛད་པའོ།།

ལེའུ་དང་པོ་ཐུན་མོང་བཅའ་གཞི།

གཉིས་པ་གཞུང་གི་དོན་ལ་གཉིས་ཏེ། རྩ་བའི་རྒྱུད་དང༌། བཤད་པའི་རྒྱུད་དོ། །དང་པོ་ལ་གསུམ་སྟེ། རྒྱུ་གླེང་གཞི། རྐྱེན་གླེང་བསླང་བ། རྒྱུད་ཀྱི་དོན་དངོས་སོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། བྱེ་བྲག་གི་མཇུག་བསྡུ་བའོ། །དང་པོ་ནི།

འདི་སྐད་བགྲོ་བ་བདག་གིས། ཞེས་པ་ནས། རྣམ་པར་བགྲོ་བ་འདི་ལྟ་སྟེ། ཞེས་པའི་བར་གྱིས་བསྟན་ཏེ།

འདི་སྐད་བདག་གིས་ཐོས་པ་དུས་གཅིག་ན། དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས་གསང་བ་པའི་བདག་པོ་རྡོ་རྗེ་འཛིན་པ་ཆེན་པོ། ཇི་སྐད་དུ་རྣམ་པར་བགྲོ་བའི་སྐྱེས་བུ་སྨྲ་བའི་སེང་གེ་དེ། འདི་ལྟར་སངས་རྒྱས་ཀྱི་ཞིང་བསམ་གྱིས་མི་ཁྱབ་པ་ན་འཁོད་ཅིང་། སེམས་ཅན་གྱི་རིགས་ཐ་དད་པ་ན་བཞུགས་ཏེ། བསམ་གྱིས་མི་ཁྱབ་པ་བསམ་དུ་མེད་པའི་ཆོས་དཔག་ཏུ་མེད་པའི་རྒྱལ་བ་ཀུན་གྱིས་བསྔགས་པའི་འདུ་བྲལ་མེད་པའི་གཟུངས། ཐམས་ཅད་རིག་པ་གསང་སྔགས་ཀྱི་ངོ་བོ་ཇི་སྙེད་པའི་ཇི་བཞིན་པ། ཆོས་ཐམས་ཅད་ཀྱི་མེ་ལོང་དེ་ཉིད་མི་འགལ་བར་ཉན་ཅིང་། མ་ནོར་བར་སྟོན་ཏེ། རྣམ་པར་གྲོལ་བ་ནི་འདི་ལྟ་སྟེ།

བྱིན་རླབས་འབྱུང་བའི་དབང་དུ་ན། འདི་སྐད་ཅེས་ཉེ་བར་མཚོན་པ་ནི་བསྟན་པ་སྟེ་རྒྱུད་འདི་ཉིད་དོ། །གསལ་བར་བགྲོ་བ་ནི་སྟོན་པ་སྟེ། ཞིང་ཁམས་དང་གནས་ཐ་དད་ན་སྟོན་པ་རྣམས་ཀྱིས་བགྲོ་བར་བྱེད་པའོ། །བདག་གིས་ཐོས་པ་ནི་བྱུང་ཁུངས་གླེང་གཞིའི་སྡུད་པ་ཕྱག་ན་རྡོ་རྗེ་ཉིད་ཀྱིས་གསན་པ་སྟེ། སྐུ་ཐ་དད་པ་རིགས་ལྔ་དང༌། གཅིག་ཉིད་ཀུན་ཏུ་བཟང་པོ་དང༌། ཕྱོགས་བཅུའི་བུདྡྷ་ལའང་ཐོས་ལ། སྐུ་བཞི་ལའང་སོ་སོར་ཐོས་པས་རྣམ་པ་བཞིའི་ཚུལ་དུ་ཐོས་ཏེ། ཐོས་བྱ་ནི་བསྟན་པའོ། །དུས་ནི་བྱུང་ཚུལ་བཅུ་གཉིས་ཀྱི་ཚེ་དང་སྐུ་བཞིས་བསྟན་པའི་དུས་བཞི་སྟེ་ཚེ་སྐབས་ཀྱི་དུས་དེར་ཐོས་པའོ་ཞེས་བགྲོས་པའོ། །ལུང་བསྟན་བརྒྱུད་པའི་དབང་དུ་ན། སྟོན་པ་ཕྱག་ན་རྡོ་རྗེས་ཞིང་ཐ་དད་པ་ན་རང་གི་སྟོན་པ་ལ་ཉན་ནས་ཉེ་འཁོར་ལ་རྒྱུད་འདི་སྐད་ཅེས་བགྲོ་བ་ལང་ཀ་མགྲིན་བཅུ་བདག་གིས་ཐོས་པའི་དུས་གཅིག་ན་ཞེས་ཤཱཀྱ་ཐུབ་པ་འདས་༼༡༨༽ནས་ལོ་ཉི་ཤུ་རྩ་བརྒྱད་ཀྱིི་ཚེ་མི་ཡུལ་འདིར་ཐོས་ཏེ་ཡི་གེར་བྲིས་ནས་བསྡུ་བ་མཛད་པའོ། །འདི་ལ་ཐ་སྙད་དྲུག་སྟེ་འདི་སྐད་ཐོས་ཀྱི་མ་ཕྲི་མ་བསྣན་ནོ་བྱས་པས་སྒྲོ་སྐུར་གྱི་སེལ་མེད་པར་བསྟན། འདི་སྐད་བགྲོ་བ་བདག་གིས་ཐོས་ཀྱི་གཞན་ལས་མ་བརྒྱུད་དོ་བྱས་པས་སྡུད་པ་པོ་ཚད་མའི་ཞལ་དུ་བསྟན། བདག་གིས་འདི་སྐད་ཐོས། གཞན་གྱིས་གཞན་སྐད་ཐོས་བྱས་པས་བཀའ་རྒྱ་མ་ཆད་པར་བསྟན། དུས་གཅིག་ཁོ་ནར་ཐོས་ཀྱི་ཡང་ཡང་བལྡབ་ཀྱིན་མ་ཡིན་བྱས་པས་བཀའ་འབྱུང་དཀོན་པར་བསྟན། དུས་འདི་རུ་འདི་སྐད་ཐོས། གཞན་དུ་གཞན་སྐད་ཐོས་བྱས་པས་སྡུད་པ་པོ་ཐོས་རྒྱ་ཆེ་བར་བསྟན། དུས་གཅིག་ཏུ་འདི་སྐད་ཀྱང་ཐོས་ལ། གཞན་དུ་གཞན་སྐད་ཀྱང་ཐོས་བྱས་པས་སྡུད་པ་པོ་བློ་རྣོ་བར་བསྟན་པའོ། །གླེང་གཞི་རྣམ་གཉིས་ཀྱི་ངོ་བོ་ཐུན་མོང་དུ་བསྟན་པའི་ཕྱིར། དེ་ནས་དུས་གསུམ་གྱི་དེ་བཞིན་གཤེགས་པ་མང་པོ་བསྡུས་པའི་སྒྲ་ཐམས་ཅད་ཀྱི་བདག་ཉིད་ནི་བཅོམ་ལྡན་འདས་རིགས་ཀྱི་གཙོ་བོ་དྲུག་པ་སྟེ། མཚན་གསང་བའི་བདག་པོ་རྡོ་རྗེ་འཛིན་པ་ཆེན་པོ་ཞེས་ཀྱང་བྱའོ། །ཞེས་བྱིན་རླབས་འབྱུང་བ་དང༌། རྣམ་པ་གཅིག་ཏུ། ལུང་བསྟན་བརྒྱུད་པའི་དབང་དུ་དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས་ནི་དངོས་གསང་བའི་བདག་པོ་ཕྱག་ན་རྡོ་རྗེ་ཉིད་དེ་དབང་ཐོབ་པས་རྒྱ་གྲམ་འཁོར་ལོ་ལག་ན་བསྣམས་པས་མཚན་རྡོ་རྗེ་འཛིན་པ་ཞེས་བྱའོ། །དོན་སྟོན་པ་ལས་ཇི་སྐད་ཐོས་པ་ལྟར་དུ་དམན་པའི་ལུས་ཅན་ལ་རྣམ་པར་བགྲོས་ཏེ་གསལ་བར་སྟོན་པའི་འཆད་པའི་སྐྱེས་བུ་འཇིགས་ཤིང་ཞུམ་པ་མེད་པར་ཐམས་ཅད་ཟིལ་གྱིས་གནོན་པས་སྨྲ་བའི་སེང་གེ་བརླ་བཀྱལ་གྱི་སྤོབས་པ་ཅན་དེ་སྟོན་པའི་ཐུགས་ཀྱི་བྱིན་རླབས་ཐོབ་པས་འཁོར་གྱི་ནང་དུ་འགྱིང་བག་ཀྱི་འཁོར་ལོ་བསྐོར་བ་དང༌། སེང་གེ་རོལ་པའི་ག་ཞ་མཛད་པའི་ཕྱིར་སེང་གེར་བརྗོད་པ་ཉིད་དོ། །སྤྱིར་བསྟན་པའི་ལུས་ནི། བྱུང་ཁུངས་ཀྱི་དོན་འདི་ལྟར་གནས་ནི་སངས་རྒྱས་ཀྱི་ཞིང་ཁམས་བསམ་གྱིས་མི་ཁྱབ་པ་ན། སྟོན་པ་ཕྱོགས་བཅུའི་རྒྱལ་བ་ལ་སོགས་པའི་སྤྱན་སྔར་འཁོད་ཅིང༌། དེ་ན་སེམས་ཅན་གྱི་གནས་རིས་ཐ་དད་པ་ན་ཇི་ལྟར་འདུལ་བའི་སྐུར་བཞུགས་ཏེ་མཛད་པའི་ཕྲིན་ལས་ཀྱིས་ཆོས་སྟོན་ཏེ་གདུལ་བྱ་སྨིན་པར་མཛད་པ་ཡང༌། ཤིན་ཏུ་ཟབ་པས་བསམ་གྱིས་མི་ཁྱབ་ཅིང༌། མཐའ་དང་མུ་མེད་པས་བསམ་དུ་མེད་པའི་ཆོས། གྲངས་ལས་འདས་ཤིང་༼༡༩༽དཔག་ཏུ་མེད་པའི་རྒྱལ་བ་ཀུན་གྱིས་དགོངས་པའི་ཞེ་ཕུགས་མཐར་ཐུག་ཏུ་བསྔགས་པ་དུས་གསུམ་དུ་སྐད་ཅིག་ཀྱང་མི་འབྲལ་བས་འདུ་འབྲལ་མེད་པར་ཀུན་ལ་ཁྱབ་པའི་གཟུངས། ཆོས་ཐམས་ཅད་ཆོས་ཀྱི་དབྱིངས་དང་རིག་པའི་ཡེ་ཤེས་སུ་མ་འདྲེས་ཡོངས་སུ་རྫོགས་པར་རང་གསལ་བས་རིག་པ། སྨྲར་མེད་ཅིང་སྤྱོད་ཡུལ་དུ་མ་གྱུར་པས་གསང་སྔགས། ཡོན་ཏན་ཀུན་འབྱུང་བའི་གནས་ཀྱི་མཚན་ཉིད་བསྟན་དུ་ཡོད་ལ་ངོ་བོ་དམིགས་སུ་མེད་པས་བླ་དྭགས་ཐམས་ཅད་དང་བྲལ་བ། ཆོས་སོ་ཅོག་ཇི་སྙེད་པའི་དེ་ཁོ་ན་ཉིད་མ་བཅོས་མ་བསླད་པས་ཇི་བཞིན་པ། གཞི་དངོས་པོ་གཉིས་ཀྱི་ཆོས་རིལ་དང༌། ལམ་རྣལ་འབྱོར་གསུམ་པོ་མཐའ་དག་གསལ་བར་སྟོན་པའི་ཐམས་ཅད་སྣང་ལ་དངོས་གཞི་མེད་པས་ཆོས་ཀྱི་མེ་ལོང་ཉིད་དེ་བཀའ་ཐམས་ཅད་ཀྱི་རྒྱལ་པོ་འདི་ལས་གཞན་མ་ཡིན་པ་ཉིད་དོ། །དེར་སྡུད་པ་པོ་ཕྱག་ན་རྡོ་རྗེས་ཞིང་ཁམས་སོ་སོའི་རྒྱལ་བ་ལ་གུས་པས་མི་འགལ་བར་ཉན་ཅིང་དམན་པའི་ལུས་ཅན་དག་ལ་མ་ནོར་བར་སྟོན་པས་འཆད་པ་པོ་ཡང་ཡིན་ཏེ། དེས་རང་གི་འཁོར་ལ་ཞིང་ཁམས་ཐ་དད་ན་རྣམ་པར་བགྲོ་ཞིང་གསང་བ་དམ་པ་འཆད་པའི་ཚུལ་ནི་འདི་ལྟ་སྟེ་ཞེས་ཉེ་བར་བསྟན་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། གླེང་གཞི་སྤྱིར་བསྟན་པ་དང༌། འཁོར་བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། ཆོས་སྐུའི་གླེང་གཞི། ལོངས་སྐུའི་གླེང་གཞི། སྤྲུལ་སྐུའི་གླེང་གཞི་བསྟན་པའོ། །དང་པོ་ནི།

འོག་ནས། དེ་བཞིན་དུ་ཆོས་ཀྱི་སྐུའི་ཞིང་ཁམས་སོགས་ནས་ངེས་པར་འགྲེལ་ཏོ། །ཞེས་པའི་བར་གྱིས་བསྟན་ཏེ།

དེ་བཞིན་དུ་ཆོས་ཀྱི་སྐུའི་ཞིང་ཁམས་སྙིང་པོ་བྱང་ཆུབ་ཅེས་བྱ་བ་ན། རྒྱལ་ཚབ་སྐྱེས་བུ་ཞེས་བྱ་བར། རྒྱལ་ཚབ་སྐྱེས་བུ་བསམ་གྱིས་མི་ཁྱབ་པའི་འཁོར་དང་བཅས་ཏེ། སེམས་ཀྱི་རང་བཞིན་ཡེ་ནས་སངས་རྒྱས་པར་གྱུར་པ། གསང་སྔགས་ཀྱི་ངོ་བོ་དེ་ཉིད་ལ་དགོངས་པ་ངེས་པར་འགྲེལ་ཏོ།།

རྡོ་རྗེ་སེམས་དཔའི་ཆོས་སྐུའི་བཀོད་པ་དེ་ཁོ་ན་ཉིད་ཇི་ལྟ་བ་བཞིན་དུ་གདལ་ཁྱབ་ཆེན་པོ་དབུས་མཐའ་དང་བྲལ་བའི་ཆོས་ཀྱི་སྐུའི་ཞིང་ཁམས་འོག་མིན་ཆེན་པོ་ཆོས་ཐམས་ཅད་ཀྱི་དེ་བཞིན་ཉིད་མངོན་དུ་གྱུར་པས་བྱང་ཆུབ་སྙིང་པོ་ཞེས་བྱ་བ་ན། འཁོར་རིགས་ལྔ་ལ་སོགས་པ་དང༌། གསང་བ་པོ་ཡང་སྐུ་ལྔ་པ་རྒྱལ་ཚབ་སྐྱེས་བུ་ཞེས་བྱ་བར་གྱུར་ཏེ་གཅིག་དང་དུ་མ་བྲལ་བའི་ཚུལ་གྱིས་བཞུགས་ནས། བྱང་ཆུབ་སེམས་དཔའ་རྩལ་ཆེན་རྫོགས་པ་རྒྱལ་ཚབ་སྐྱེས་བུ་བསམ་གྱིས་མི་ཁྱབ་པའི་འཁོར་དང་བཅས་ཏེ་སེམས་ཀྱི་རང་བཞིན་ཡེ་ཇི་བཞིན་པ་གདོད་ནས་ལྷུན་གྱིས་གྲུབ་པས་སངས་རྒྱས་པར་གྱུར་པ། གཉིས་སུ་མེད་པས་གསང་སྔགས་ཀྱི་ངོ་བོ་དེ་ཉིད་ཇི་ལྟ་བ་བཞིན་ལ་ཚིག་ཏུ་མ་བྱུང་བར་དགོངས་པ་ཆོས་ཉིད་ཀྱི་ནམ་མཁའ་ལ། ཡེ་ཤེས་ཀྱི་ཉི་མ་རང་གསལ་ཏེ་ངེས་པར་འགྲེལ་ཏོ། །དེ་ལྟ་བས་ན་ཆོས་ཀྱི་སྐུ་ལས་ཀྱང་ཐོས་སོ།།

གཉིས་པ་ལོངས་སྐུའི་གླེང་གཞི་ལ་རིགས་ལྔ་སྟེ། དང་༼༢༠༽པོ་རྡོ་རྗེ་སེམས་དཔའི་ཐུགས་ཀྱི་འོད་ཟེར་སྣང་བའི་ཞིང་ཁམས་ཀྱི་བཀོད་པ་བསྟན་པ་ནི།

སངས་རྒྱས་མི་སྐྱོད་པའི་ཞིང་ཁམས། ཞེས་པ་ནས། བགྲོ་བར་བྱེད་དོ། །ཞེས་པའི་བར་གྱིས་བསྟན་ཏེ།

སངས་རྒྱས་མི་བསྐྱོད་པའི་ཞིང་ཁམས་མངོན་པར་དགའ་བ་ཞེས་བྱ་བ། རྡོ་རྗེའི་འོད་ཟེར་གྱིས་རྣམ་པར་བརྒྱན་པ་ན། རྡོ་རྗེ་ཕུང་པོའི་རི་བོ་ལ་སྐྱེས་བུ་ཆེན་པོ་སེམས་དཔའ་རྡོ་རྗེ་ཞེས་བྱ་བར། བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ། སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་ལ་ཉན་ཅིང་། རང་གི་ཉེ་འཁོར་ལ་དེ་བཞིན་ཉིད་སྟོན་ཏེ། ཡོངས་སུ་འདས་ནས་ཀྱང་དེ་བཞིན་ཉིད་དུ་བསྙད་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

སྤངས་རྟོགས་མཐར་ཕྱིན་པས་སངས་རྒྱས། མཐའ་ཡི་རྟོག་པས་མི་བསྐྱོད་པའི་སྟོན་པ་ལོངས་སྤྱོད་རྫོགས་པ་དེའི་ཞིང་ཁམས་ནི་བཞུགས་པ་དང་འདུལ་བ་གཉིས་ཏེ་གནས་དང་གདུལ་བྱའོ། །རྒྱལ་བ་མི་བསྐྱོད་པ་དེ་དང་པོ་དེ་བཞིན་གཤེགས་པ་རྡོ་རྗེ་འཆང་ཆེན་པོ་ལ་བྱང་ཆུབ་མཆོག་ཏུ་སེམས་བསྐྱེད་པའི་དུས་སུ་ཞིང་ཁམས་འདིར་མཚན་དེ་སྐད་ཅེས་བྱ་བར་འགྱུར་བའི་ལུང་བསྟན་ཐོབ་པའི་ཕྱིར་མངོན་པར་དགའ་བ་ཞེས་བྱའོ། །གནས་དེ་ནི་ཡངས་ཤིང་མཉམ་པ་ལ་རིན་པོ་ཆེའི་གཅལ་བཀྲམ་པ། ཆུ་ཡན་ལག་བརྒྱད་དང་ལྡན་པ། ཤིང་ཡལ་ག་ཕྱོགས་བཞིར་གྱེས་པ། དུས་བཞིའི་དགྲ་ལས་སྐྱོབ་པ། ཟོས་ན་ནད་ཞི་བ། དེར་སྐྱེས་པ་ཐམས་ཅད་སེམས་མངོན་པར་དགའ་བར་བྱེད་པས་ན་མཚན་ངེས་པའོ། །ཞེས་སྤྱིར་བསྟན་པ་ཡིན་ལ། ཞིང་དེའི་བྱེ་བྲག་གི་ཡོན་ཏན་ནི། ཡེ་ཤེས་ལྔའི་ངོ་བོར་གསལ་བའི་ཕྱིར། རྡོ་རྗེ་དྲྭ་བའི་འོད་ཟེར་གྱིས་རྣམ་པར་བརྒྱན་པ་དང་ལྡན་པ་ན། ཞེས་པ་འདི་ལ། ཀུན་མཁྱེན་དམ་པ་རིན་པོ་ཆེའི་ཕྱག་མཆན་ན། འདི་རྒྱལ་ཚབ་རྒྱུད་ཀྱི་སྟོན་པའི་གནས་འདྲ་སྟེ་འགྲེལ་པ་དང་མན་ངག་གང་ནའང་གསལ་བ་མེད་གསུང༌། འདི་ལ་ལེགས་པར་དཔྱད་ན་གནད་ཆེན་པོ་མང་ཞིག་གོ་རྒྱུ་ཡོད་པར་མངོན་ནོ། །རི་དེ་ལ་ས་ཕྱོགས་གང་ནས་བལྟས་ཀྱང་རྡོ་རྗེའི་ཕུང་པོ་སྤུངས་པ་དང༌། རྡོ་རྗེའི་རྩེ་མོའི་དབྱིབས་སུ་སྣང་བས་རྡོ་རྗེའི་ཕུང་པོའི་རི་བོ་ལ། དེ་ཁོ་ན་ཉིད་དང་སྟོན་པའི་ལུང་དང༌། འཁོར་གྱི་བསམ་པ་གསུམ་དང་མཐུན་པར་ལུང་བསྟན་པས་འཆད་པའི་སྐྱེས་བུ་ཆེན་པོ་གཉིས་མེད་ཀྱི་དོན་ལས་མི་ཕྱེད་པས་སེམས་དཔའ་རྡོ་རྗེ་ཞེས་བྱ་བར་གྱུར་པ་དེ་ནི་གླེང་གཞི་གཉིས་ཀྱི་དོན་གྱིས་ཞིང་ཁམས་འདིར་མི་སྐྱོད་པ་དང་ཕྱག་ན་རྡོ་རྗེ་གཉིས་ཀའི་མཚན་དུ་སྦྱར་རོ། །རྡོ་རྗེའི་རིགས་ཀྱི་བྱང་ཆུབ་སེམས་དཔའ་ལམ་ལྔ་དང་རྣལ་འབྱོར་ལྔ་ལ་གནས་པ་བྱེ་བ་ཕྲག་ས་ཡའི་གྲངས་ཀྱི་འཁོར་ཕུན་སུམ་ཚོགས་པ་དང་བཅས་ཏེ་བསྟན་པ་ནི། བྱང་ཆུབ་ཀྱི་སེམས་ལྷུན་གྱིས་རྫོགས་པས་སེམས་ཀྱི་དཀྱིལ་འཁོར་སྤྲོས་པ་གང་དང་ཡང་ལྷན་ཅིག་མི་གནས་པས་སྒྲིབ་བྱེད་ངང་གིས་མེད་པར་འོད་གསལ་བ། ཡོངས་སུ་གཟུང་བར་དཀའ་བས་གསང་སྔགས་ཀྱི་ངོ་བོ་དེ་ཉིད་ནི་དངོས་སུ་རྒྱུད་འདི་ཉིད་དོ། །དེ་སྡུད་པ་པོ་ཕྱག་ན་རྡོ་རྗེས་རང་གི་སྟོན་པ་མི་༼༢༡༽བསྐྱོད་པ་ལ་ཉན་ཅིང་འཆད་པའི་སྐྱེས་བུར་སྣང་བས་རང་གི་ཉེ་འཁོར་གྱི་བྱང་ཆུབ་སེམས་དཔའ་རྣམས་ལ་དེ་བཞིན་དུ་སྟོན་ཏེ། སྤྱིར་ཆོས་སྐུའི་ཞིང་ཁམས་ཀྱི་ཁོངས་ན་ལོངས་སྐུའི་ཞིང་ཁམས་དུ་མ་ཡོད་ལ། ལོངས་སྐུའི་ཞིང་ཁམས་ཀྱི་ཁོངས་ན་སྤྲུལ་སྐུའི་ཞིང་ཁམས་དུ་མ་ཡོད་པས། དེ་བཞིན་གཤེགས་པ་དེའི་སྤྲུལ་པའི་སྐུ་ཡོངས་སུ་མྱ་ངན་ལས་འདས་ནས་ཀྱང༌། ཞིང་དེར་ཆོས་ཐམས་ཅད་ཀྱི་དེ་བཞིན་ཉིད་ཇི་བཞིན་པ་དེ་ཁོ་ན་ཉིད་དོན་དང་མཐུན་པར་བསྙད་པའི་སྒོ་ནས་དམན་པའི་ལུས་ཅན་གྱི་འཁོར་ལ་དེ་ལྟར་རྣམ་པར་བགྲོ་བར་བྱེད་དོ།།

འོ་ན་ཞིང་ཁམས་གཅིག་ཏུ་སྟོན་པ་གཉིས་མི་སྲིད་པས་ཆོས་དང་འགལ་ལོ་ཞེ་ན། ཞིང་དེའི་སྟོན་པ་ནི་མི་བསྐྱོད་པ་ཉིད་ཡིན་ལ། ཕྱག་ན་རྡོ་རྗེ་ནི་དེ་ཙམ་ན་འཁོར་གྱི་གཙོ་བོ་བྱང་ཆུབ་སེམས་དཔའི་ཆ་བྱད་དུ་སྣང་བའི་ཕྱིར་རྒྱལ་བ་ཉིད་མ་ཡིན་པས་འགལ་བ་མེད་དོ། །དེ་ཡང་ཡོངས་སུ་འདས་ནས་ཀྱང༌། ཞེས་པ་སྟོན་པའི་བཤད་པ་འདས་པ་ཡིན་ན་རིགས་ལྔ་དང་དག་པའི་ཞིང་ན་བཞུགས་པའི་སངས་རྒྱས་ལ་ཆོས་ཉན་པའི་དུས་ན་འདས་ནས་ཀྱང་བྱ་བ་འདུག་ལ་ཆོས་སྐུ་དང་མ་དག་པའི་ཞིང་ན་བཞུགས་པའི་སངས་རྒྱས་དང་ཐུབ་པའི་དབང་པོ་ལ་ཉན་པའི་སྐབས་ན་འདས་ནས་ཀྱང་བྱ་བ་མེད་པས། དེ་རྣམས་དུས་གཅིག་ཏུ་སོ་སྒྲིལ་ཏེ་འཆད་དགོས་པའི་སྐྱོན་འོང་ལ། ཡང་ལོངས་སྐུ་མྱ་ངན་ལས་འདས་པ་ཡིན་ན་ལོངས་སྐུའི་འཁོར་འདས་པས་འདུལ་བ་མེད་པས་མི་འཐད་དོ། །ཡང་ལོངས་སྐུའི་ཆ་བྱད་ཀྱི་རིགས་ལྔ་སྤྲུལ་སྐུ་ཡིན་པས་སྐུ་འདས་ཟེར་ན་འོ་ན་སྤྲུལ་སྐུ་ལ་རིགས་ལྔ་དང་དག་པའི་ཞིང་ན་བཞུགས་པ། མ་དག་པའི་ཞིང་ན་བཞུགས་པ། ཐུབ་པའི་དབང་པོ་ཉིད་དང་གླེང་གཞི་ཆ་བརྒྱད་བྱུང་ལ། ལོངས་སྐུའི་གླེང་གཞི་མེད་པའི་སྐྱོན་འོང་ངོ༌། །དེས་ན་ངེས་པར་གང་ལ་བཞག་ན་བཤད་མ་ཐག་པ་ལྟར་རིགས་གཞན་བཞི་ལའང་ཤེས་པར་བྱའོ།།

གཉིས་པ་རྡོ་རྗེ་སེམས་དཔའ་ཡོན་ཏན་གྱི་ཆེ་བ་ཡོངས་སུ་བཀོད་པའི་ཞིང་ཁམས་བསྟན་པ་ནི།

སངས་རྒྱས་རིན་ཆེན། ཞེས་པ་ནས། བགྲོ་བར་བྱེད་དོ། །ཞེས་པའི་བར་གྱིས་བསྟན་ཏེ།

སངས་རྒྱས་རིན་ཆེན་འབྱུང་བའི་ཞིང་ཁམས་དཔལ་དང་ལྡན་པ་ཞེས་བྱ་བ། རིན་པོ་ཆེའི་ཕུང་པོ་རྣམ་པར་བཀོད་པ་ན། བཻ་ཌཱུརྱའི་འོད་མཐོ་བ་ཞེས་བྱ་བའི་རི་བོ་ལ་སྐྱེས་བུ་ཆེན་པོོ་རྡོ་རྗེ་རིན་ཆེན་ཞེས་བྱ་བར། བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ། སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་ལ་ཉན་ཅིང་། རང་གི་ཉེ་འཁོར་ལ་དེ་བཞིན་ཉིད་སྟོན་ཏེ། ཡོངས་སུ་འདས་ནས་ཀྱང་ཇི་བཞིན་པར་བསྙད་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

སངས་རྒྱས་རིན་ཆེན་དབང་གི་རྒྱལ་པོ་ལྟར་འདོད་པ་འབྱུང་བའི་ཞིང་ཁམས་གདུལ་བྱའི་ལོངས་སྤྱོད་ཇི་ལྟར་འདོད་པ་ལྟར་འབྱུང་ཞིང་ཚེ་དང་བསོད་ནམས་མཆོག་ཏུ་གྱུར་པས་དཔལ་དང་ལྡན་པ་ཞེས་བྱ་བ་རིན་པོ་ཆེ་སྣ་ཚོགས་ཀྱི་ཕུང་པོ་ཞིང་དེ་ལ་བཀོད་པས་རིན་པོ་ཆེའི་ཕུང་པོ་རྣམ་པར་བཀོད་པ་ན། ནོར་བུ་བཻ་ཌཱུརྱའི་རི་ཤིན་ཏུ་འོད་འབར་ཞིང་རྩེ་མོ་མཐོ་བ་དང་ལྡན་པ་ཞེས་བྱ་བའི་རི་བོ་ལ་སྐྱེས་བུ་ཆེན་པོ་གཉིས་མེད་རྟོགས་པའི་ཡོན་ཏན་དང་ལྡན་པས་རྡོ་རྗེ་རིན་ཆེན་ཞེས་བྱ་བར། རིན་ཆེན་རིགས་ཀྱི་བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ་བསྟན་པ་སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་རིན་ཆེན་འབྱུང་བ་ལ་ཉན་ཅིང༌། རང་གི་ཉེ་འཁོར་ལ་དེ་བཞིན་དུ་སྟོན་ཏེ། སྤྲུལ་པའི་སྐུ་ཡོངས་སུ་འདས་ནས་ཀྱང་རྣལ་མ་མ་བསླད་པ་ཇི་བཞིན་པར་བསྙད་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

གསུམ་པ་རྡོ་རྗེ་སེམས་དཔའི་གསུང་གི་སྒྲ་དབྱངས་ཀྱི་སྣང་བ་ཡོངས་སུ་བཀོད་པའི་ཞིང་ཁམས་བསྟན་པ་ནི།

སངས་རྒྱས་འོད་དཔག ཅེས་པ་ནས། བགྲོ་བར་བྱེད་དོ། །ཞེས་པའི་བར་གྱིས་བསྟན་ཏེ།

སངས་རྒྱས་འོད་དཔག་མེད་པའི་ཞིང་ཁམས་བདེ་བ་ཅན་ཞེས་བྱ་བ། པདྨོ་མཛེས་པར་བཀོད་པ་ན། པདྨོའི་ཕུང་པོའི་རི་བོ་ལ་སྐྱེས་བུ་ཆེན་པོ་ཆོས་ཀྱི་སྤྲིན་ཞེས་བྱ་བར། བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ། སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་ལ་ཉན་ཅིང་། རང་གི་ཉེ་འཁོར་ལ་དེ་བཞིན་སྟོན་ཏེ། དེ་ཡོངས་སུ་འདས་ནས་ཀྱང་ཇི་ལྟ་བར་བསྙད་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

སངས་རྒྱས་ཐུགས་རྗེ་དང་མཁྱེན་པ་ཚད་མེད་པའི་ཕྱིར་འོད་དཔག་མེད་ཀྱི་ཞིང་ཁམས་སེམས་ཅན་ཆེན་པོ་ཐམས་ཅད་པདྨོ་ལས་བརྫུས་ཏེ་སྐྱེ་ཞིང་བདེ་བ་དང་ལྡན་པས་བར་མ་དོར་འཆི་བ་དང་འཐབ་རྩོད་དང་ཟས་སྐོམ་དང་ཁུར་དང་སྡུག་བསྔལ་དུ་བྱ་བ་མེད་པའི་ཕྱིར་བདེ་བ་ཅན་ཞེས་བྱ་བ། ཞིང་དེ་ལ་པདྨོ་སྣ་ཚོགས་ཀྱིས་མཛེས་པ་པདྨོས་མཛེས་པར་བཀོད་པ་ན། རིའི་དབྱིབས་པདྨ་བརྩེགས་པ་ལྟ་བུར་སྣང་བས། པདྨའི་ཕུང་པོའི་རི་བོ་ལ་སྐྱེས་བུ་ཆེན་པོ་གདུལ་བྱ་ལ་ཆོས་ཀྱི་ཆར་འབེབས་པས་ཆོས་ཀྱི་སྤྲིན་ཞེས་བྱ་བར་པདྨའི་རིགས་ཀྱི་བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ་བསྟན་པ་སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་འོད་དཔག་མེད་ལ་ཉན་ཅིང་རང་གི་ཉེ་འཁོར་ལ་དེ་བཞིན་དུ་སྟོན་ཏེ། སྤྲུལ་སྐུ་ཡོངས་སུ་འདས་ནས་ཀྱང༌། ཇི་བཞིན་པ་རང་གསལ་བར་བསྙད་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

བཞི་པ་རྡོ་རྗེ་སེམས་དཔའི་ཕྲིན་ལས་རྒྱ་མཚོའི་སྣང་བ་ཡོངས་སུ་བཀོད་པའི་ཞིང་ཁམས་བསྟན་པ་ནི།

སངས་རྒྱས་གདོན་མི་ཟ། ཞེས་པ་ནས། བགྲོ་བར་བྱེད་དོ། །ཞེས་པའི་བར་གྱིས་བསྟན་ཏེ།

སངས་རྒྱས་གདོན་མི་ཟ་བར་གྲུབ་པའི་ཞིང་ཁམས་རྣམ་པར་དག་པ་ཞེས་བྱ་བ། ཨིན་དྲ་ནཱི་ལའི་དྲ་བས་བརྒྱན་པ་ན། རིན་པོ་ཆེ་སྣ་ཚོགས་བཀོད་པའི་སྤོ་ཞེས་བྱ་བའི་རི་བོ་ལ་སྐྱེས་བུ་ཆེན་པོ་རྡོ་རྗེ་ལས་ཞེས་བྱ་བར། བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ། སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་ལ་ཉན་ཅིང་། རང་གི་ཉེ་འཁོར་ལ་དེ་བཞིན་སྟོན་ཏེ། ཡོངས་སུ་འདས་ནས་ཀྱང་མ་ནོར་བར་བཏགས་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

སངས་རྒྱས་བདག་གཞན་གྱི་བྱ་བ་མ་ལུས་པར་གདོན་མི་ཟ་བར་གྲུབ་པའི་ཞིང་ཁམས་ཞིང་དེར་ལས་དག་པའི་སེམས་ཅན་རྣམས་སྐྱེ་སྟེ་ངན་པའི་ལས་ལམ་མི་སྤྱོད་པ་ཤ་སྟག་ཏུ་ངེས་པས་ཤིན་ཏུ་དག་པའི་ལས་ལམ་སྤྱོད་པ་ལ་མོས་པའི་ཕྱིར་རྣམ་པར་དག་པ་ཞེས་བྱ་བ། དེ་ལ་རིན་པོ་ཆེ་ཨིནྡྲ་ནཱི་ལ་ཤིན་ཏུ་མཛེས་པའི་བརྒྱན་པས་ཨིནྜི་ནཱི་ལའི་དྲྭ་བས་བརྒྱན་པ་ན། རིན་པོ་ཆེ་སྣ་ཚོགས་ཀྱི་ཕྲ་བཀོད་པའི་ཉེ་བར་མཛེས་པས་རིན་པོ་ཆེ་སྣ་ཚོགས་བཀོད་པའི་སྤོ་ཞེས་བྱ་བའི་རི་བོ་ལ་སྐྱེས་བུ་༼༢༣༽ཆེན་པོ་ཕྲིན་ལས་ཕུན་སུམ་ཚོགས་པའི་གཞན་དོན་བྱེད་པས་རྡོ་རྗེ་ལས་ཞེས་བྱ་བར། ལས་ཀྱི་རིགས་ཀྱི་བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ། བསྟན་པ་སེམས་ཀྱི་དཀྱིལ་འཁོར་འོད་གསལ་བ། གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་གདོན་མི་ཟ་བར་གྲུབ་པ་ལ་ཉན་ཅིང་རང་གི་ཉེ་འཁོར་ལ་དེ་བཞིན་དུ་སྟོན་ཏེ། སྤྲུལ་སྐུ་ཡོངས་སུ་འདས་ནས་ཀྱང་མ་ནོར་བར་ཐ་སྙད་བཏགས་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

ལྔ་པ་རྡོ་རྗེ་སེམས་དཔའི་སྐུའི་ཆོ་འཕྲུལ་གྱི་སྣང་བ་ཡོངས་སུ་བཀོད་པའི་ཞིང་ཁམས་བསྟན་པ་ནི།

སངས་རྒྱས་རྣམ་པར་སྣང་མཛད། ཅེས་པ་ནས། བགྲོ་བར་བྱེད་དོ། །ཞེས་པའི་བར་གྱིས་བསྟན་ཏེ།

སངས་རྒྱས་རྣམ་པར་སྣང་མཛད་ཀྱི་ཞིང་ཁམས་བྱང་ཆུབ་ཀྱི་སྙིང་པོ་ཅན་ཞེས་བྱ་བ། སེམས་སྣ་ཚོགས་ཀྱིས་བརྒྱན་པ་ན། ཆོས་ཀྱིས་མཐོ་བ་ཞེས་བྱ་བའི་རི་བོ་ལ། སྐྱེས་བུ་ཆེན་པོ་རྡོ་རྗེ་འཛིན་པ་ཞེས་བྱ་བར། བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ། སེམས་ཀྱི་རང་བཞིན་འོད་གསལ་བ། གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་ལ་ཉན་ཅིང་། རང་གི་ཉེ་འཁོར་ལ་དེ་བཞིན་སྟོན་ཏེ། ཡོངས་སུ་འདས་ནས་ཀྱང་དེ་ཁོ་ན་ཉིད་དུ་ངེས་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

སངས་རྒྱས་བཅོམ་ལྡན་འདས་འཁོར་གྱི་སེམས་ཀྱི་དཀྱིལ་འཁོར་རྣམ་པར་སྣང་བར་མཛད་པ་ཉིད་ཀྱི་ཞིང་ཁམས་དེའི་འཁོར་གྱི་བྱང་ཆུབ་སེམས་དཔའ་ཐམས་ཅད་བྱང་ཆུབ་ཀྱི་ས་ནོན་ཅིང་ལུང་བསྟན་ཐོབ་པ་ཤ་སྟག་ཏུ་ངེས་པར་བྱང་ཆུབ་ཀྱི་སྙིང་པོ་ཅན་ཞེས་བྱ་བ། གདུལ་བྱའི་བསམ་པ་རྣམ་པར་དག་ཅིང་ཏིང་ངེ་འཛིན་གྱི་སྒོ་འབུམ་ཕྲག་མང་པོ་རྫོགས་པས་སེམས་སྣ་ཚོགས་ཀྱིས་བརྒྱན་པ་ན། ཟག་པ་མེད་པའི་འབྲས་བུ་དང་དགོངས་པ་མི་གཡོ་བ་ཁྱད་པར་ཆེན་པོས་འཕགས་པས་ཆོས་ཀྱིས་མཐོ་བ་ཞེས་བྱ་བའི་རི་བོ་འོག་མིན་གྱི་གནས་དེ་ལ། སྐྱེས་བུ་ཆེན་པོ་གཉིས་མེད་ཀྱི་དོན་རྟོགས་ནས་མི་གཏོང་བས་རྡོ་རྗེ་འཛིན་པ་ཞེས་བྱ་བར། དེ་བཞིན་རིགས་ཀྱི་བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ་བསྟན་པ་སེམས་ཀྱི་རང་བཞིན་འོད་གསལ་བ་གསང་སྔགས་ཀྱི་ངོ་བོ་དེ་ཉིད། རང་གི་སྟོན་པ་རྣམ་སྣང་ལ་ཉན་ཅིང༌། རང་གི་ཉེ་འཁོར་ལ་དེ་བཞིན་དུ་སྟོན་ཏེ། སྤྲུལ་སྐུ་ཡོངས་སུ་འདས་ནས་ཀྱང༌། སེམས་ཀྱི་དེ་ཁོ་ན་ཉིད་དུ་མ་ནོར་མི་བསླུ་བར་ངེས་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

གསུམ་པ་སྤྲུལ་སྐུའི་གླེང་གཞི་ལ་གསུམ་སྟེ། ཤཱཀ་ཐུབ་ཀྱི་གླེང་གཞི། དག་པའི་ཞིང་ན་བཞུགས་པའི་གླེང་གཞི། མ་དག་པའི་ཞིང་ན་བཞུགས་པའི་གླེང་གཞིའོ། །དང་པོ་ནི།

སངས་རྒྱས་ཐུབ་པའི་དབང་པོའི་ཞིང༌། ཞེས་པ་ནས། ཉེ་འཁོར་ལ་དེ་བཞིན་སྟོན་ཏོ། །ཞེས་པའི་བར་གྱིས་བསྟན་ཏེ།

སངས་རྒྱས་ཐུབ་པའི་དབང་པོའི་ཞིང་ཁམས་མོས་པ་ཅན་མི་མཇེད་ཀྱི་འཇིག་རྟེན་དྲུག་གི་ཕྱོགས་བཅུ་ཞེས་བྱ་བ། རྡོ་རྗེ་གདན་གྱིས་རྣམ་པར་བརྒྱན་པ། གནོད་སྦྱིན་གྱི་གནས་ལྕང་ལོ་ཅན་གྱི་ཕོ་བྲང་ན་སྐྱེས་བུ་ཆེན་པོ་གསང་བ་པའི་བདག་པོ་ཞེས་བྱ་བར། བྱང་ཆུབ་སེམས་དཔའ་བྱེ་བ་ཕྲག་ས་ཡ་གནོད་སྦྱིན་གྱི་རིགས་ཅན་མང་པོའི་འཁོར་དང་བཅས་ཏེ། སེམས་ཀྱི་རང་བཞིན་འོད་གསལ་བ་གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་ལ་ཉན་ཅིང་། རང་གི་ཉེ་འཁོར་ལ་དེ་བཞིན་སྟོན་ཏོ།།

འདིས་ནི་རྡོ་རྗེ་སེམས་དཔའི་སྤྲུལ་པ་སྤྱིར་ཐུབ་པ་དྲུག་དང་བྱེ་བྲག་ཐུབ་པའི་དབང་པོ་བྱེ་བ་ས་ཡ་སྣང་བའི་ཞིང་ཁམས་ཡོངས་སུ་བཀོད་པ་ཉིད་དེ། སངས་རྒྱས་སྤྲུལ་པའི་སྐུ་འཁོར་བའི་དཔུང་བཅོམ་ཞིང་རིགས་༼༢༤༽དྲུག་ལ་དབང་བསྒྱུར་བས་ཐུབ་པའི་དབང་པོའི་ཞིང་ཁམས། ཞིང་དེར་མོས་པ་སྤྱོད་པའི་བྱང་ཆུབ་སེམས་དཔའ་མང་ཞིང་འཁོར་རྣམས་མོས་བརྩོན་དང་ལྡན་པ་ཤ་སྟག་ཏུ་གནས་པས་མོས་པ་ཅན་འདོད་ཆགས་ཞེ་སྡང་གཏི་མུག་ལ་སོགས་པ་ལ་སེམས་མི་མཇེད་པས་མི་མཇེད་ཀྱི་འཇིག་རྟེན་ཕྱོགས་ཆ་དྲུག་གི་གནས་དྲུག་རེ་རེ་ལའང་ཕྱོགས་བཅུ་དང་ལྡན་པ་ཞེས་བྱ་བ་རྡོ་རྗེའི་གདན་དཔག་ཚད་བརྒྱད་ཅུ་གསེར་ལས་གྲུབ་ཅིང་སྲ་བ་སྟེ་འོག་རྡོ་རྗེའི་བྲག་ཏུ་སྣང་བ་ཉིད་ཀྱིས་རྣམ་པར་བརྒྱན་པ་ན། བྱ་རྒོད་ཕུང་པོའི་རི་བོ་ཞེས་བྱ་བར། འཆད་པའི་སྐྱེས་བུ་ཕྱག་ན་རྡོ་རྗེ་བཞུགས་པའི་གནོད་སྦྱིན་གྱི་གནས་ལྕང་ལོ་ཅན་གྱི་ཕོ་བྲང་ན། དམ་པའི་མཛོད་གསུམ་ལ་མངའ་དབང་མཛད་པར་དབང་བསྐུར་བས་སྐྱེས་བུ་ཆེན་པོ་གསང་བའི་བདག་པོ་ཞེས་བྱ་བར། གནོད་འདུལ་ཉིད་དང་རིགས་མཐུན་པས་གསང་སྔགས་ལ་མོས་པའི་བྱང་ཆུབ་སེམས་དཔའ་བྱེ་བ་ས་ཡའི་གནོད་སྦྱིན་གྱི་རིགས་ཅན་མང་པོའི་འཁོར་དང་བཅས་ཏེ་བསྟན་པ་སེམས་ཀྱི་རང་བཞིན་འོད་གསལ་བ་གསང་སྔགས་ཀྱི་ངོ་བོ་དེ་ཉིད་རང་གི་སྟོན་པ་ཤཱཀྱ་ཐུབ་པ་ལ་བརྗོད་པ་ཚིག་གི་སྒོ་ནས་ཉན་ཅིང་རང་གི་ཉེ་འཁོར་དམན་པའི་ལུས་ཅན་རྣམས་ལ་དེ་བཞིན་དུ་སྟོན་ཏོ།།

འོ་ན་ཤཱཀྱ་ཐུབ་པ་ཞལ་བཞུགས་པའི་དུས་སུ་གསང་སྔགས་གསུངས་སམ་མ་གསུངས། གསུངས་ན་ལེའུ་གཉིས་པར། ངེས་པའི་ཐེག་ཆེན་ཡོང་མ་གསུངས། །ཞེས་དང༌། ལེའུ་ཞེ་གསུམ་པ་ནས་གསང་སྔགས་ཕྱིས་འབྱུང་བར་ལུང་བསྟན་པ་དང་འགལ་ལ། མ་གསུངས་ན། གླེང་གཞི་འདི་དང་འགལ་ལོ་ཞེ་ན། ཐུབ་པའི་དབང་པོས་རྒྱུའི་བྱང་ཆུབ་སེམས་དཔའ་དང་ལྷ་མི་སྐལ་བ་ཅན་ལ་སོགས་པ་ལ་རྒྱུའི་འཁོར་ལོའི་ཚིག་ཏུ་བསྐོར་ནས། འདུས་པ་ཕལ་མོ་ཆེའི་འཁོར་རྣམས་གསང་སྔགས་ཀྱིས་འདུལ་བའི་དུས་ལ་མ་བབ་པས་ཕྱིས་འབྱུང་བར་ལུང་བསྟན་པ་ཡིན་པས་ལེའུ་གཉིས་པ་དང་མི་འགལ་ལ། འབྲས་བུའི་བྱང་ཆུབ་སེམས་དཔའ་དང་རིག་འཛིན་ཁྱད་པར་ཅན་རྣམས་ལ་གཞན་གྱི་ཡིད་ཚོད་མ་ཡིན་པར་གསང་སྔགས་ཇི་བཞིན་དུ་བསྟན་པས་ལེའུ་འདི་དང་མི་འགལ་ལོ། །དེར་མ་ཟད་སྤྲུལ་སྐུའི་ཞིང་ཁམས་བྱེ་བྲག་པ་འདིའི་ལུང་བསྟན་བརྒྱུད་པའི་དབང་དུ་ན་རྩ་བའི་རྒྱུད་ཀྱང་སྟོན་པའི་ཞལ་ནས་གསུངས་པས་ཤིན་ཏུ་འབྲེལ་ལོ།།

གཉིས་པ་དག་པའི་ཞིང་ན་བཞུགས་པའི་གླེང་གཞི་ནི།

དེ་བཞིན་དུ་སངས་རྒྱས་བསམ་གྱིས་མི་ཁྱབ། །ཅེས་པ་ནས། རྣམ་པར་བགྲོ་བར་བྱེད་དོ། །ཞེས་པའི་༼༢༥༽བར་གྱིས་བསྟན་ཏེ།

དེ་བཞིན་དུ་སངས་རྒྱས་བསམ་གྱིས་མི་ཁྱབ་པའི་ཞིང་ཁམས་དཔག་ཏུ་མེད་པ་ན། གྲངས་མེད་པའི་སྐྱེས་བུ་ཆེན་པོ་ཞེས་བྱ་བར། བྱང་ཆུབ་སེམས་དཔའ་བྱེ་བ་ཕྲག་ས་ཡ་བརྗོད་ཀྱིས་མི་ལང་བའི་འཁོར་དང་བཅས་ཏེ། སེམས་ཀྱི་རང་བཞིན་འོད་གསལ་བ་གསང་སྔགས་ཀྱི་ངོ་བོ་མཐའ་ཡས་པ་དེ་ཉིད་རང་རང་གི་སྟོན་པ་དག་ལ་ཉན་ཅིང་། རང་རང་གི་ཉེ་འཁོར་དག་ལ་དེ་བཞིན་སྟོན་ཏེ། ཡོངས་སུ་འདས་ནས་ཀྱང་ངེས་པར་བརྟགས་པའི་སྒོ་ནས་དེ་རྣམ་པར་བགྲོ་བར་བྱེད་དོ།།

འདིས་ནི་རྡོ་རྗེ་སེམས་དཔའི་མཛད་པ་མཐའ་ཡས་པར་སྣང་བའི་ཞིང་ཁམས་བཀོད་པར་བསྟན་པ་སྟེ། དེ་བཞིན་དུ་སྤྲུལ་པའི་སྐུའི་སངས་རྒྱས་བསམ་གྱིས་མི་ཁྱབ་པ་བཞུགས་པའི་དག་པའི་ཞིང་ཁམས་དཔག་ཏུ་ མེད་པ་ན། གསང་བའི་བདག ་པོའི་མཚན་གྲངས་མེད་པར་སོ་སོར་གྲགས་པའི་སྐྱེས་བུ་ཆེན་པོ་ཞེས་བྱ་བར་སྣང་ནས། བྱང་ཆུབ་སེམས་དཔའ་བྱེ་བ་ས་ཡ་དང་རྡོ་རྗེ་རྣོན་པོ་དང་རྡོ་རྗེ་མྱུར་བ་ལ་སོགས་པ་བརྗོད་ཀྱིས་མི་ལང་བའི་འཁོར་དང་བཅས་ཏེ་བསྟན་པ་སེམས་ཀྱི་རང་བཞིན་འོད་གསལ་བ་གསང་སྔགས་ཀྱི་ངོ་བོ་མཐའ་ཡས་པ་དེ་ཉིད་རང་རང་གི་སྟོན་པ་དག་ལ་དངོས་སུ་ཉན་ཅིང༌། རང་རང་གི་ཉེ་འཁོར་དག་ལ་དེ་བཞིན་དུ་སྟོན་ཏེ། སྤྲུལ་པའི་སྐུ་དེ་དག་ཡོངས་སུ་འདས་ནས་ཀྱང་ཞེས་སྤྲུལ་སྐུ་བསྟན་པ་སྣ་ཚོགས་འབྱུང་བ་དག་ཞལ་བཞུགས་པའི་དུས་སུ་ཐུན་མོང་གི་འཁོར་ལ་གསང་སྔགས་ཡོངས་སུ་གྲགས་པར་མི་གསུངས་པས། མྱ་ངན་ལས་འདས་པ་ན། འཆད་པའི་སྐྱེས་བུ་གསང་སྔགས་ཀྱི་སྣོད་ངེས་པར་བརྟགས་པའི་སྒོ་ནས་གསང་བའི་དོན་དེ་རྣམ་པར་བགྲོ་བར་བྱེད་དོ།།

གསུམ་པ་མ་དག་པའི་ཞིང་ན་བཞུགས་པའི་གླེང་གཞི་ནི།

དེ་བཞིན་དུ་སེམས་ཅན་གྱི་རིས། ཞེས་པ་ནས། ཉེ་འཁོར་ལ་དེ་བཞིན་དུ་སྟོན་ཏོ། །ཞེས་པའི་བར་གྱིས་བསྟན་ཏེ།

དེ་བཞིན་དུ་སེམས་ཅན་གྱི་རིགས་བསམ་གྱིས་མི་ཁྱབ་པ། ལྷའི་རིས་དང་། ལྷ་མ་ཡིན་གྱི་རིས་དང་། ཀླུའི་རིས་དང་། མིའི་རིས་དང་། གནོད་སྦྱིན་གྱི་རིས་དང་། སྲིན་པོའི་རིས་དང་། བྱོལ་སོང་གི་རིས་དང་། ཡི་དྭགས་ཀྱི་རིས་དང་། དམྱལ་བའི་རིས་ལ་སོགས་པ། འཇིག་རྟེན་དག་གི་ཕྱོགས་བཅུའི་ཐ་དད་པ་ན། དེད་དཔོན་ཐ་དད་པའི་སྐྱེས་བུར་གཟུགས་ཐ་དད་པར་རྣམ་པར་སྣང་བ་དག རང་རང་གི་ལུས་ཀྱི་འཁོར་ཐ་དད་པ་དང་བཅས་ཏེ། སེམས་ཀྱི་མེ་ལོང་འོད་གསལ་བ་གསང་སྔགས་ཀྱི་ངོ་བོ་དེ་ཉིད་རང་རང་གི་ཐུབ་པའི་དབང་པོ་ལ། རང་རང་གི་སྐད་དང་། བརྡ་དང་། མོས་པ་སྣ་ཚོགས་ཀྱིས་ཉན་ཅིང་། མིང་དང་མཚན་མར་བཏགས་པའི་སྒོ་ནས་རང་རང་གི་ཉེ་འཁོར་ལ་དེ་བཞིན་སྟོན་ཏོ།།

འདིས་རྡོ་རྗེ་སེམས་དཔའི་རང་བཞིན་གྱིས་ཞིང་ཁམས་བཀོད་དེ་སྤྲུལ་པའི་སྤྲིན་ཡོངས་སུ་སྤྲོ་བར་སྟོན་པ་སྟེ། དེ་བཞིན་དུ་སེམས་ཅན་གྱི་རིས་སྣ་ཚོགས་སུ་སྣང་བ་བསམ་གྱིས་མི་ཁྱབ་པར་གྱུར་པ་ཇི་སྙེད་པའི་གནས་ཀྱི་ཁྱད་པར། ཚངས་པ་དང་བརྒྱ་བྱིན་ལ་སོགས་པ་ལྷའི་རིས་དང༌། ཐག་བཟང་རིས་ལ་སོགས་པ་ལྷ་མ་ཡིན་གྱི་རིས་དང༌། འཇོག་པོ་ལ་སོགས་པ་ཀླུའི་རིས་དང༌། ལི་ཙ་བྱི་དྲི་མེད་གྲགས་པ་ལ་སོགས་པ་མིའི་རིས་དང༌། སྐར་མདའ་གདོང་ལ་སོགས་པ་གནོད་སྦྱིན་གྱི་རིས་དང༌། ལང་ཀ་མགྲིན་བཅུ་ལ་སོགས་པ་སྲིན་པོའི་རིས་དང༌། སེང་གེ་ཡི་དམ་བརྟན་པ་སོགས་བྱོལ་སོང་གི་རིས་དང༌། ཁ་འབར་མ་སོགས་ཡི་དྭགས་ཀྱི་རིས་དང་། གཤིན་པོའི་རྗེ་ལ་སོགས་པ་དམྱལ་བའི་རིས་ཏེ། དེ་ལ་སོགས་པ་འཇིག་རྟེན་དྲུག་གི་ཕྱོགས་བཅུ་ཐ་དད་པ་ཀུན་ན། སྟོན་པའི་སྐུ་ཇི་ལྟར་མོས་ཤིང་འདུལ་བ་ལྟར་ཐུབ་པ་དྲུག་ལ་སོགས་པར་སྣང་བས་ཆ་མཐུན་པའི་འཁོར་ལ་སོ་སོའི་སྐད་དུ་ཆོས་སྟོན་ཏེ། ཕྱག་ན་རྡོ་རྗེ་ཉིད་དེད་དཔོན་ཐ་དད་པའི་སྐྱེས་བུ་གཟུགས་ཐ་དད་པར་རྣམ་པར་སྣང་ཞིང་མཚན་མི་འདྲ་བར་གྲགས་པ་དག་༼༢༦༽རང་རང་གི་ལུས་ཅན་གྱི་འཁོར་ཐ་དད་པ་དང་བཅས་ཏེ་བསྟན་པ་སེམས་ཀྱི་མེ་ལོང་འོད་གསལ་བ། གསང་སྔགས་ཀྱི་ངོ་བོ་དེ་ཉིད་རང་རང་གི་ཐུབ་པའི་དབང་པོ་རྣམས་ལ་འགྲོ་བ་རིགས་དྲུག་རང་རང་གི་སྐད་དང༌། མཚོན་པས་བརྡའ་དང༌། ཐེག་པ་གང་ལ་མོས་པ་དང་མཐུན་པར་ཐབས་སྣ་ཚོགས་ཀྱིས་ཇི་ལྟར་འདུལ་བ་རྣམས་སོ་སོར་ཉན་ཅིང༌། སྟོན་པ་དེ་དག་འདས་ནས་ཀྱང་འཆད་པའི་སྐྱེས་བུ་སྟོན་པ་གསང་བའི་བདག་པོ་མཚན་ཐ་དད་པར་བྱུང་བ་རྣམས་ཀྱིས་སྐད་སྣ་ཚོགས་ཀྱིས་རང་རང་དང་མཐུན་པར་དོན་གྱི་ངོ་བོ་བརྡ་སྤྲོད་པས་མིང་དང་དོན་གྱི་ཁྱད་པར་སྟོན་པའི་ཚིག་གིས་མཚན་མར་བཏགས་པའི་སྒོ་ནས། རང་རང་གི་ཉེ་འཁོར་རྣམས་ལ་དེ་བཞིན་དུ་སྟོན་ཏོ། །དེས་ན་གནས་དེ་རྣམས་སུ་རང་རང་གི་བློ་དང་མཐུན་པར་རང་རང་གི་སྐད་དུ་ཆོས་སྟོན་པས་ངན་འགྲོའི་གནས་ཀྱི་སྐལ་པ་ཅན་དག་ལ་སོ་སོའི་ཐུབ་པར་སྣང་བས་སྡུག་བསྔལ་དེ་དག་གྲོལ་བར་བྱེད་པའོ། །འོ་ན་ངན་སོང་གསུམ་གྱི་གནས་ན་དམ་པའི་ཆོས་ཡོད་དམ་མེད། ཡོད་ན་མི་ཁོམས་པའི་གནས་སུ་མི་འགྲོ་ལ། ཆོས་མེད་ན་ལེའུ་འདི་དང་འགལ་ལོ་ཞེ་ན། རྣམ་པར་གྲོལ་བའི་ཆོས་ལྟ་བ་དང་སྒོམ་པ་དང་སྤྱོད་པ་ལ་སོགས་པ་མེད་པས་མི་ཁོམས་པའི་གནས་སུ་འགྲོ་ལ། དམྱལ་བ་ལ་ཚེ་སྔ་ཕྱི་དྲན་པ་ཙམ། ཡི་དྭགས་ལ་བསྔོས་པས་ཚིམ་པ་ཙམ། བྱོལ་སོང་ལ་རིག་པ་ཕྲ་མོའི་ཆོས་ཙམ་སྟོན་པས་ཐུབ་པའི་དབང་པོ་ལ་ཉན་ཅེས་བྱའོ། །དེས་ན་བཤད་རྒྱུད་མདོ་བཅུ་ལས། གཏི་མུག་བྱོལ་སོང་གནས་རིས་སུ། །རིག་པ་ཤེས་པའི་ཆོས་ཀྱང་བསྟན། །སེར་སྣ་ཡི་དྭགས་གནས་རིས་སུ། །མ་ཆགས་ཚིམ་པའི་ཆོས་ཀྱང་བསྟན། །སྡུག་བསྔལ་དམྱལ་བའི་གནས་རིས་སུ། །སྔ་ཕྱི་དྲན་པས་ཞེན་པ་བཟློག །ཅེས་སོ། །དེར་མ་ཟད་མཐོ་རིས་གནས་གསུམ་དུའང་སྐལ་དམན་ལ་བློ་དང་མཐུན་པར་སྟོན་ཏེ། དེ་ཉིད་ལས། ལྷ་དང་ལྷ་མིན་གནས་རིས་སུ། །ཆེ་བ་ང་རྒྱལ་འཇོམས་པར་བསྟན། །ཤེས་པ་མི་ཡི་གནས་རིས་སུ། །དགེ་སྡིག་རྒྱུ་འབྲས་སྡེ་སྣོད་བཤད། །ཅེས་སོ། །འོ་ན་ཆོས་ཚུལ་ཕྲ་མོ་དེ་གསང་སྔགས་ཀྱི་བསྟན་པར་མི་འགྲོའོ་ཞེ་ན། དེ་ནི་བློ་ཆུང་ལ་གསང་སྔགས་བརྒྱུད་ནས་བསྟན་པས་ན་རིམ་གྱིས་བསྟན་པ་ཡིན་ལ། རིག་པ་ཁྱད་པར་ཅན་གྱི་འཁོར་ལ་ནི་ཅིག་ཆར་དུ་སྟོན་པ་སྟེ། ལེའུ་བདུན་པ་ལས། གསང་སྔགས་ཀྱི་ངོ་བོ་དེ་ཕྱིན་ཅི་མ་ལོག་པར་རིམ་གྱིས་དང་ཅིག་ཆར་སྟོན་ཏོ། །ཞེས་སོ། །འོན་ཀྱང་སེམས་ཀྱི་མེ་༼༢༧༽ལོང་འོད་གསལ་བ། །ཞེས་གསུངས་པས་འགལ་ལོ་ཞེ་ན། དེ་ནི་སེམས་ཀྱི་དཀྱིལ་འཁོར་གཞིར་བཞག་པ་ཡིན་ཏེ། ཐམས་ཅད་དེ་ལས་སྣང༌། དེ་ལས་འབྱུང༌། དེ་ཡིས་གཏན་ལ་འབེབས་པས་སོ།།

གཉིས་པ་འཁོར་བྱེ་བྲག་ཏུ་བཤད་པ་ལ་གཉིས་ཏེ། མདོར་བསྟན་པ་དང༌། རྒྱས་པར་བཤད་པའོ། །དང་པོ་ནི།

དེ་ལྟ་བུའི་བྱང་ཆུབ་སེམས་དཔའ། ཞེས་པ་ནས། བྱང་ཆུབ་ཆེན་པོ་དག་གོ །ཞེས་པའི་བར་གྱིས་བསྟན་ཏེ།

དེ་ལྟ་བུའི་བྱང་ཆུབ་སེམས་དཔའ་དེ་དག་ཀྱང་། ལ་ལ་ནི་བྱང་ཆུབ་ཀྱི་རིས་ཅན་དག་གོ །ལ་ལ་ནི་བྱང་ཆུབ་པ་དག་གོ །ལ་ལ་ནི་བྱང་ཆུབ་སེམས་དཔའ་དག་གོ །ལ་ལ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་གོ །ལ་ལ་ནི་བྱང་ཆུབ་ཆེན་པོ་དག་གོ།

དེ་ལྟ་བུའི་འཁོར་གྱི་བྱང་ཆུབ་སེམས་དཔའ་དེ་དག་ཀྱང་ས་མཐོ་དམན་དང་སྐལ་པ་ཆེ་ཆུང་ཡོད་པའི་ཕྱིར་ལྔ་ཕྲག་བཅུ་གསུམ་གྱིས་རྣམ་པར་དབྱེ་བས་བསྟན་ཏེ། འདི་དག་ཐམས་ཅད་ལམ་ལ་གནས་པ་ཤ་སྟག་ཡིན་ལ། དེ་ཡང་ཐུན་མོང་གི་ལམ་དང་ཁྱད་པར་གྱི་ལམ་གཉིས་འདིར་ཐུན་མོང་དུ་བསྟན་ཀྱང་དོན་གྱིས་ཐུན་མོང་མ་ཡིན་པའི་ལམ་དུ་འཇལ་བར་བྱ་སྟེ་གསང་སྔགས་ཉན་པའི་ཕྱིར་རོ། །ལ་ལ་ཞེས་དགར་བའི་ཚིག་བརྗོད་པ་ནི་ནང་རིས་སོ་སོར་འབྱེད་པ་སྟེ་འདུན་པར་བྱེད་པས་བརྒྱུད་ནས་ངེས་པར་འབྱུང་བ་དང་ལྡན་པས་བྱང་ཆུབ་ཀྱི་རིགས་ཅན་དག་གོ །འདི་རྣམས་ཚོགས་ལམ་འདུན་པ་སེམས་པའི་རྣལ་འབྱོར་ལ་གནས་པའོ། །ལ་ལ་ནི་བསླབ་པས་དོན་ཁོང་དུ་ཆུད་དེ་གོམས་རྟོགས་རྙེད་ནས་མཐོང་ལམ་རག་པས་བྱང་ཆུབ་པ་དག་གོ །འདི་རྣམས་སྦྱོར་ལམ་རིགས་ཆེན་འབྱེད་པའོ། །ལ་ལ་ནི་སྔ་མ་མཐོང་བའི་དོན་ཇི་ལྟ་བར་མངོན་སུམ་དུ་མཐོང་བས་དོན་དང་ཤེས་རབ་མི་ཕྱེད་པས་བྱང་ཆུབ་སེམས་དཔའ་དག་གོ །འདི་རྣམས་མཐོང་ལམ་དབུགས་ཆེན་འབྱིན་པའོ། །ལ་ལ་ནི་རྟོགས་པའི་དོན་ལ་ཏིང་ངེ་འཛིན་གྱིས་ཡང་ཡང་གོམས་པས་བདག་དོན་དུ་མི་གཡོ་བ་ཐོབ་ནས་གཞན་དོན་དུ་སྤྲུལ་པ་མང་པོས་གདུལ་བར་མཛད་པས་བྱང་ཆུབ་སེམས་དཔའ་སེམས་དཔའ་ཆེན་པོ་དག་གོ །འདི་རྣམས་སྒོམ་ལམ་ལུང་ཆེན་ཐོབ་པའོ། །ལ་ལ་ནི་གོམས་པ་མཐར་ཕྱིན་ནས་ལྟོས་པའི་བྱ་བ་ཡོངས་སུ་རྫོགས་པས་ལྷུན་གྱིས་གྲུབ་པའི་བྱང་ཆུབ་ཀྱི་སེམས་ཤར་བ་བྱང་ཆུབ་ཆེན་པོ་དག་གོ །འདི་རྣམས་མཐར་ལམ་པ་རྩལ་ཆེན་རྫོགས་པའི་རྣལ་འབྱོར་ཐོབ་པའོ།།

གཉིས་པ་རྒྱས་པར་བཤད་པ་ནི།

དེ་བཞིན་དུ་གཞི་ལྔ་ནས་བཏགས་པ་ཐ་དད་དུ་གྲགས་པ་ནི་འདི་ལྟ་སྟེ།

དེ་བཞིན་དུ་སྐལ་བ་རང་ཐད་དུ་མཉམ་པའི་གཞི་ལམ་ལྔ་ལས་བཏགས་པ་མཚན་གྱི་རྣམ་པ་ཐ་དད་དུ་གྲགས་པ་རྣམས་ནི་འདི་ལྟ་སྟེ་ཞེས་སོ་སོར་བཤད་པ་ལ་རྣམ་གྲངས་བཅུ་གཉིས་ཏེ།

ལམ་གྱི་ཡོན་ཏན་གྱི་སྒོ་ནས་བཏགས་པ། དུས་ཀྱི་སྒོ་ནས་བཏགས་པ། དཔེའི་སྒོ་ནས་བཏགས་པ། སེམས་བསྐྱེད་ལུགས་ཀྱི་སྒོ་ནས་བཏགས་པ། སློབ་རིམ་གྱི་སྒོ་ནས་བཏགས་༼༢༨༽པ། རྒྱུད་དུ་འབྱུང་ལུགས་ཀྱི་སྒོ་ནས་བཏགས་པ། རིགས་ཀྱི་སྒོ་ནས་བཏགས་པ། ལམ་རང་གི་ངོ་བོའི་སྒོ་ནས་བཏགས་པ། ཏིང་ངེ་འཛིན་གྱི་སྒོ་ནས་བཏགས་པ། རྟོགས་ཚུལ་གྱི་སྒོ་ནས་བཏགས་པ། དོན་གྱི་སྒོ་ནས་བཏགས་པ། རིག་འཛིན་གྱི་སྒོ་ནས་བཏགས་པའོ། །དང་པོ་ནི།

རྗེས་སུ་ཡི་རང་བ། ཞེས་པ་ནས། ལུང་བསྟན་ཐོབ་པ་དག་དང༌། ཞེས་པའི་བར་གྱིས་བསྟན་ཏེ།

རྗེས་སུ་ཡི་རངས་པ་དག་དང་། མ་སྐྱེས་པའི་ཆོས་ལ་བཟོད་པ་ཐོབ་པ་དག་དང་། ཆོས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་དང་། ཕྱིར་མི་ལྡོག་པའི་ས་ལ་གནས་པ་དག་དང་། ལུང་བསྟན་པ་ཐོབ་པ་དག་དང་།

འདུན་པའི་རྣལ་འབྱོར་དུ་གནས་པས་རྟོགས་པའི་མཐུ་ཁྱད་པར་ཅན་དུ་མ་གྱུར་ཀྱང་གསང་སྔགས་ཐུན་མོང་མ་ཡིན་པའི་དོན་ལ་རྗེས་སུ་ཡི་རང་བས་རྩོལ་བས་སྒྲུབ་པ་རྗེས་སུ་ཡི་རང་བ་དག་དང༌། མཉམ་པ་ཆེན་པོའི་ངོ་བོ་གང་དུའང་མི་ཟིན་པའི་དོན་བསྟན་པ་ལ་མི་སྐྲག་ཅིང་མི་སྔངས་པར་གྱུར་པས་མ་སྐྱེས་པའི་ཆོས་ལ་བཟོད་པ་ཐོབ་པ་དག་དང༌། ཇི་བཞིན་པ་མཐོང་བའི་ཤེས་རབ་ཀྱི་སྤྱན་དང་ལྡན་པས་ལྟ་ངན་དང་སྒྲིབ་པ་དང་ཉོན་མོངས་པའི་རྡུལ་དང་དྲི་མ་དག་པས་ཆོས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་དག་དང༌། ཡང་ནས་ཡང་དུ་གོམས་པས་མཚན་མ་ལ་སོགས་པར་སླར་མི་ལྡོག་པས་མི་གཡོ་བ་ཐོབ་པ། ཕྱིར་མི་ལྡོག་པའི་ས་ལ་གནས་པ་དག་དང༌། བསླབ་པ་མཐར་ཕྱིན་པས་སངས་རྒྱས་ཀྱི་མཚན་དང་ཞིང་ཁམས་ཀྱི་ལུང་བསྟན་ཐོབ་པས་ལུང་བསྟན་པ་ཐོབ་པ་དག་དང་ལྔའོ།།

གཉིས་པ་དུས་ཀྱི་སྒོ་ནས་བཏགས་པ་ནི།

འདུན་པས་ཕྱོགས་པ། ཞེས་པ་ནས། སྲིད་པ་ཐ་མ་པ་དག་དང༌། ཞེས་པའི་བར་གྱིས་བསྟན་ཏེ།

འདུན་པས་ཕྱོགས་པ་དག་དང་། དད་པས་མོས་པ་དག་དང་། ཡོངས་སུ་བསྟི་གནས་པ་དག་དང་། སྐྱེ་བ་གཅིག་གི་ཐོགས་པ་དག་དང་། སྲིད་པ་ཐ་མ་པ་དག་དང་།

ཡང་གཞི་རྣལ་འབྱོར་ལྔ་ལས་ཐ་དད་དུ་སྣང་བ་ནི། བླ་མ་དང་གསང་སྔགས་ལ་འདུན་པའི་རྒྱུས་ཡང་དག་པའི་དོན་ལ་ཕྱོགས་པས་རྣལ་འབྱོར་དང་པོ་པ་འདུན་པས་ཕྱོགས་པ་དག་དང༌། ཐེག་པ་ཆེན་པོ་ལ་ཞུགས་ནས་མི་འགྱུར་བའི་དད་པས་དོན་རང་གི་མཚན་ཉིད་ལ་མོས་ཤིང་རྩལ་སྦྱོང་བས་དད་པས་མོས་པ་དག་དང༌། ཆོས་ཇི་ལྟ་བར་མཐོང་བས་དབུགས་ཕྱིན་ནས་ངལ་སོས་པས་བསྟི་གནས་ཐོས་པ་ཡོངས་སུ་བསྟི་གནས་པ་དག་དང༌། སྐྱེ་བ་ཕྱི་མ་ལ་མཛད་པ་མཐར་ཕྱུང་ནས་འཚང་རྒྱ་བ་རྗེ་བཙུན་བྱམས་པ་ལྟ་བུ་སྐྱེ་བ་གཅིག་གིས་ཐོགས་པ་དག་དང༌། སྐྱེ་བ་འདི་ཉིད་ཀྱིས་མཛད་པ་མཐར་དབྱུང་ནས་འཚང་རྒྱ་བ་རྒྱལ་བུ་དོན་གྲུབ་ལྟ་བུ་སྲིད་པ་ཐ་མ་དག་དང་ལྔའོ།།

གསུམ་པ་དཔེའི་སྒོ་ནས་བཏགས་པ་ནི།

ལམ་དུ་འཇུག་པ་དག་དང༌། ཞེས་པ་ནས། གནས་པ་དག་དང༌། ཞེས་པའི་བར་གྱིས་བསྟན་ཏེ།

ལམ་དུ་འཇུག་པ་དག་དང་། འགྲོ་བ་དག་དང་། ཕྱིན་པ་དག་དང་། ཕྱིར་འོང་བ་དག་དང་། གནས་པ་དག་དང་།

ཀུན་གཞིའི་སྐབས་ལྔ་ལས་གཞི་ཉིད་རྒྱུའི་ཀུན་གཞིའི་སྟོབས་ཀྱིས་སེམས་རྒྱུ་གཉིས་དང་རྐྱེན་བཞི་སྟེ་དྲུག་གིས་ལམ་དམ་༼༢༩༽པ་ལ་འཇུག་པས་ལམ་དུ་འཇུག་པ་དག་དང༌། སྦྱོར་བ་འདུན་པའི་ཀུན་གཞིའི་སྟོབས་ཀྱིས་བསླབ་པ་ལ་ཞུགས་ནས་གོང་མ་ལ་སྦྱོར་ཞིང་སྐྱེད་དུ་འགྲོ་བས་འགྲོ་བ་དག་དང༌། སྣང་བ་དོན་གྱི་ཀུན་གཞིའི་སྟོབས་ཀྱིས་ཇི་བཞིན་པ་ཉིད་དུ་རིག་ཅིང་འཇལ་བས་ངལ་སོས་ཏེ་འཛིན་པ་དང་བྲལ་ནས་འཇིགས་པ་མེད་པར་གྱུར་པ་ཕྱིན་པ་པ་དག་དང༌། འགྱུར་བ་མེད་པའི་ཀུན་གཞིའི་སྟོབས་ཀྱིས་དགོངས་པ་ལས་མི་གཡོ་བར་ཕྱིེར་འགྲོ་དོན་ལ་སྤྲུལ་པའི་ལུས་ཀྱིས་སྐྱེ་བ་ཐ་དད་པ་རང་དབང་དུ་བཞེས་པས་ཕྱིར་འོང་བ་དག་དང༌། བཙལ་མེད་གནས་པའི་ཀུན་གཞིའི་སྟོབས་ཀྱིས་བྱ་བ་མེད་པར་གནས་པས་7གནས་པ་དག་དང་། འཇུག་རིམ་ལྔའོ།།

བཞི་པ་སེམས་བསྐྱེད་ལུགས་ཀྱི་སྒོ་ནས་བཏགས་པ་ནི།

སྨོན་པ་དག་དང༌། ཞེས་པ་ནས། རྫོགས་པ་པ་དང༌། ཞེས་པའི་བར་གྱིས་བསྟན་ཏེ།

སྨོན་པ་དག་དང་། ལྡང་བ་པ་དང་། འཇུག་པ་པ་དང་། གནས་པ་པ་དང་། རྫོགས་པ་པ་དང་།

བྱང་ཆུབ་འདོད་པ་ཤེས་པའི་ཕྱིར་བླ་མ་ལ་དད་ཅིང་གསང་སྔགས་ཀྱི་དོན་རྟོགས་པར་སྨོན་པའི་སེམས་སྐྱེས་པས་སྨོན་པ་དག་དང༌། ཆོས་ཀྱི་རྣམ་པ་ཤེས་པའི་ཕྱིར་དེ་ལ་མི་གནས་པར་དད་པ་དང་རྩོལ་བས་ལངས་ཏེ་དོན་རང་གི་མཚན་ཉིད་པ་སྦྱོར་བར་སེམས་པས་ལྡང་བ་པ་དང༌། ལྟ་བས་དོན་ཐམས་ཅད་ཤེས་པའི་ཕྱིར་དོན་ལ་རིག་པ་གཉིས་མེད་དུ་འཇུག་པའི་སེམས་ཀྱིས་མི་ཕྱེད་པར་ངེས་པས་འཇུག་པ་པ་དང༌། ལམ་ཡོངས་སུ་ཤེས་པའི་ཕྱིར་དེ་བཞིན་ཉིད་ལས་མི་གཡོ་བའི་གཉིས་མེད་ཀྱི་ཏིང་ངེ་འཛིན་ལ་གནས་པའི་སེམས་ཀྱིས་གནས་པ་པ་དང༌། ཤེས་པ་ཆེན་པོ་མཐར་ཐུག་པའི་ཡེ་ཤེས་མངའ་བའི་ཕྱིར་བསླབ་པ་རྫོགས་ཏེ་མཐར་ཕྱིན་པའི་སེམས་ཀྱིས་རྫོགས་པ་པ་དང་ལྔ་སྟེ་སེམས་ལྔའི་རིམ་པའོ།།

ལྔ་པ་སློབ་རིམ་གྱི་སྒོ་ནས་བཏགས་པ་ནི།

རྩོལ་བ་པ་དང༌། ཞེས་པ་ནས། མངོན་དུ་གྱུར་པ་པ་དང༌། ཞེས་པའི་བར་གྱིས་བསྟན་ཏེ།

རྩོལ་བ་པ་དང་། སློབ་པ་པ་དང་། མི་སློབ་པ་པ་དང་། གོམས་པ་པ་དང་། མངོན་དུ་གྱུར་པ་པ་དང་།

ལས་སྦྱོང་བའི་བསྟི་གནས་ཚོགས་གཉིས་ཀྱིས་བསྡུས་པའི་བསླབ་པ་ལ་སྒོ་གསུམ་གྱིས་རྩོལ་བས་རྩོལ་བ་པ་དང༌། བསླབ་པ་སྦྱོང་བའི་བསྟི་གནས་བསླབ་པའི་མཐའ་བཅུ་ལ་མི་འབྲལ་བར་སློབ་པས་སློབ་པ་པ་དང༌། མཚན་མའི་རྒྱུད་སྦྱོང་བའི་བསྟི་གནས་བདེན་པ་མཐོང་བའི་ཕྱིར་ཟག་བཅས་ལ་མི་སློབ་པས་མི་སློབ་པ་པ་དང༌། སྒྱུ་མས་སྦྱོང་བའི་བསྟི་གནས་བསླབ་པ་རྣམས་སྣང་ལ་རང་བཞིན་མེད་པར་རྟོགས་པའི་ཏིང་ངེ་འཛིན་ཡང་ནས་ཡང་དུ་སྒོམ་པའི་ཕྱིར་གོམས་པ་པ་དང༌། ཡེ་ཤེས་རྩལ་གྱི་བསྟི་གནས་རྡོ་རྗེ་ལྟ་བུའི་གཉིས་མེད་ཀྱི་དོན་ཆུབ་པའམ། མི་ཟད་པ་རྒྱན་གྱི་འཁོར་ལོ་རང་རིག་པས་མངོན་དུ་གྱུར་པ་པ་༼༣༠༽དང་ལྔ་སྟེ་བསྟི་གནས་ལྔའོ།།

དྲུག་པ་རྒྱུད་དུ་འབྱུང་ལུགས་ཀྱི་སྒོ་ནས་བཏགས་པ་ནི།

རྒྱུད་དུ་འབྱུང་བ་པ་དང༌། ཞེས་པ་ནས། རྒྱལ་ཚབ་པ་དང༌། ཞེས་པའི་བར་གྱིས་བསྟན་ཏེ།

རྒྱུད་དུ་བྱུང་བ་པ་དང་། རིགས་སུ་ངེས་པ་དང་། ཆོས་སུ་ཤེས་པ་དང་། ཆོས་ལུགས་པ་དང་། རྒྱལ་ཚབ་པ་དང་།

གཡོ་བའི་སེམས་ཀྱིས་བསླབ་པ་ལ་འབད་པས་སེམས་བསྐྱེད་པའི་རིགས་ཅན་ཡིན་པའི་ཕྱིར་རྒྱུད་དུ་འབྱུང་བ་པ་དང༌། ནན་ཏན་དང་དོན་ལ་ཡིད་ཆེས་པས་བྱང་ཆུབ་པའི་རིགས་སུ་ངེས་པ་ཡིན་པའི་ཕྱིར་རིགས་སུ་ངེས་པ་དང༌། བདེན་དོན་མཐོང་བས་བྱང་ཆུབ་སེམས་དཔའ་ཡིན་པའི་ཕྱིར་ཆོས་སུ་ཤེས་པ་དང༌། བྱང་ཆུབ་རྣམ་གཉིས་ལ་གནས་ཏེ་མཉམ་པར་བཞག་སྟེ་བསྒོམས་པས་སེམས་དཔའ་སེམས་དཔའ་ཆེན་པོ་ཡིན་པའི་ཕྱིར་ཆོས་ལུགས་པ་དང༌། སྐུ་བཞིའམ་ལྔའི་འཁོར་དུ་གྱུར་པའི་བྱང་ཆུབ་ཆེན་པོ་ཡིན་པས་ཉེ་འཁོར་ལ་ཆོས་སྟོན་ནུས་པའི་ཕྱིར་རྒྱལ་ཚབ་པ་དང་ལྔ་སྟེ་བྱང་ཆུབ་ལྔའོ།།

བདུན་པ་རིགས་ཀྱི་སྒོ་ནས་བཏགས་པ་ནི།

རིགས་ཐམས་ཅད་པ་དང༌། ཞེས་པ་ནས། རིགས་གསུམ་པ་བཞི་པ་ལྔ་པ་དང༌། ཞེས་པའི་བར་གྱིས་བསྟན་ཏེ།

རིགས་ཐམས་ཅད་པ་དང་། གཟུངས་སྔགས་པ་དང་། རིག་སྔགས་པ་དང་།

གསང་སྔགས་པ་དང་། རིགས་གསུམ་པ་དང་། བཞི་པ་དང་། ལྔ་པ་དང་།

འགྱུར་དབང་མ་ངེས་པའི་ས་པ་ས་བོན་ནམ་རས་བལ་དང་འདྲ་བར་དོན་ལ་ངེས་པ་མ་རྙེད་པས་གང་དུའང་འགྱུར་དུ་བཏུབ་པའི་ཕྱིར་རིགས་ཐམས་ཅད་པ་དང༌། མྱུ་གུའམ་སྣམ་བུ་དང་འདྲ་བར་དོན་ལ་ངེས་པར་ཞུགས་པས་ངན་སོང་དུ་མི་འཆོར་བའི་ཕྱིར་གཟུངས་སྔགས་པ་དང༌། འདབ་མའམ་བཀྲུ་བཅག་ལྟ་བུར་སྦྱངས་པས་དོན་མཐོང་བས་འཁོར་བར་མི་ལྡོག་པའི་ངེས་པ་ཐོབ་པའི་ཕྱིར་རིགས་སྔགས་པ་དང༌། མེ་ཏོག་གམ་འཇེན་ཚུར་ལྟར་གོམས་པས་འབྲས་བུར་བྱེད་པའི་དོན་མཐོང་དཀའ་བའི་ཕྱིར་གསང་སྔགས་པ་དང༌། འབྲས་བུ་དང་ཆོས་ཀྱི་ཁ་དོག་ཏུ་འགྱུར་བ་དང་འདྲ་སྟེ། ཀྲི་ཡའི་རིགས་གསུམ་པ་དང༌། ཨུ་པས་རིགས་བཞི་པ་དང༌། རྣལ་འབྱོར་དང་ནང་པས་རིགས་ལྔ་པའི་ཡོན་ཏན་མང་པོ་ལྡན་པའི་ཕྱིར་རམ་ཡང་ན་རིགས་འདི་དག་གི་རྒྱལ་ཚབ་བྱེད་པས་རིགས་གསུམ་པ་བཞི་པ་ལྔ་པ་དང་ལྔ་སྟེ་ས་ལྔའོ།།

བརྒྱད་པ་ལམ་རང་གི་ངོ་བོའི་སྒོ་ནས་བཏགས་པ་ནི།

ཚོགས་པ་པ་དང༌། ཞེས་པ་ནས། མཐར་ཕྱིན་པ་པ་དང༌། ཞེས་པའི་བར་གྱིས་བསྟན་ཏེ།

ཚོགས་པ་པ་དང་། སྦྱོར་བ་པ་དང་། མཐོང་བ་པ་དང་། བསྒོམ་པ་པ་དང་། མཐར་ཕྱིན་པ་པ་དང་།

འབད་རྩོལ་གྱིས་ལམ་མཐར་ཕྱིན་པར་བྱེད་པའི་ཕྱིར་ཚོགས་པ་བ་དང༌། བསླབ་པ་མཐར་ཕྱིན་ནས་མཐོང་ལམ་ལ་སྦྱོར་བའི་ཕྱིར་སྦྱོར་བ་པ་དང༌། ཟག་མེད་ཀྱི་བདེན་པ་མཐོང་བ་མཐར་ཕྱིན་པའི་ཕྱིར་མཐོང་བ་པ་དང༌། ཏིང་ངེ་འཛིན་གྱིས་དེ་བཞིན་ཉིད་ལ་གོམས་པ་མཐར་ཕྱིན་པའི་ཕྱིར་བསྒོམ་པ་བ་དང༌། ལམ་གཞན་ལ་བགྲོད་དུ་མེད་པས་གྲུབ་པ་མཐར་ཕྱིན་པའི་ཕྱིར་མཐར་ཕྱིན་པ་པ་དང་ལྔ་སྟེ་མཐར་ཕྱིན་ལམ་ལྔའོ།།

དགུ་པ་ཏིང་ངེ་འཛིན་གྱི་སྒོ་ནས་བཏགས་པ་ནི།

༼༣༡༽འདུན་པའི་རྣལ་འབྱོར་པ་དང༌། ཞེས་པ་ནས། རྩལ་ཆེན་རྫོགས་པའི་རྣལ་འབྱོར་པ་དང༌། ཞེས་པའི་བར་གྱིས་བསྟན་ཏེ།

འདུན་པའི་རྣལ་འབྱོར་པ་དང་། རིགས་ཆེན་འབྱེད་པའི་རྣལ་འབྱོར་པ་དང་། དབུགས་ཆེན་འབྱིན་པའི་རྣལ་འབྱོར་པ་དང་། ལུང་ཆེན་ཐོབ་པའི་རྣལ་འབྱོར་པ་དང་། རྩལ་ཆེན་རྫོགས་པའི་རྣལ་འབྱོར་པ་དང་།

ཡིད་ལ་བྱེད་པའི་ཏིང་ངེ་འཛིན་ཐོབ་པའི་ཕྱིར་ལྟ་བ་ཆོས་ཉིད་ལ་འདུན་པར་གནས་པ་འདུན་པའི་རྣལ་འབྱོར་པ་དང༌། འཕྲོ་འདུ་གཅིག་པའི་ཏིང་ངེ་འཛིན་ཐོབ་པས་ཡང་དག་པའི་རིགས་སུ་འགྲོ་བའི་ཕྱིར་རིགས་ཆེན་འབྱེད་པའི་རྣལ་འབྱོར་པ་དང་། ཡོངས་སུ་མི་ལྡོག་པའི་ཏིང་ངེ་འཛིན་ཐོབ་པས་དབུགས་དང་པོ་ཕྱིན་པ་དབུགས་ཆེན་འབྱིན་པའི་རྣལ་འབྱོར་པ་དང༌། དེ་བཞིན་ཉིད་ཀྱི་ཏིང་ངེ་འཛིན་ཐོབ་པས་རྒྱལ་བའི་བཀའ་ལུང་ཐོབ་པ་ལུང་ཆེན་ཐོབ་པའི་རྣལ་འབྱོར་པ་དང༌། ཀུན་ཏུ་སྣང་བའི་ཏིང་ངེ་འཛིན་ཐོབ་པས་བདག་གཞན་གྱི་བྱ་བ་རྫོགས་པར་བྱེད་པས་རྩལ་ཆེན་རྫོགས་པའི་རྣལ་འབྱོར་པ་དང་ལྔ་ནི་ཏིང་ངེ་འཛིན་ལྔའོ།།

བཅུ་པ་རྟོགས་ཚུལ་གྱི་སྒོ་ནས་བཏགས་པ་ནི།

ཚིག་གི་ཚོགས་པ་དང༌། ཞེས་པ་ནས། གསང་སྔགས་ཀྱི་ངོ་བོ་ཉིད་ལ་འཇུག་གོ །ཞེས་པའི་བར་གྱིས་བསྟན་ཏེ།

ཚིག་གི་ཚོགས་པ་དང་། ཡི་གེའི་ཚོགས་པ་དང་། མིང་གི་ཚོགས་པ་དང་། བརྡའི་ཚོགས་པ་དང་། ཐ་སྙད་ཀྱི་ཚོགས་པ་ལ་སོགས་པ་ཤ་དག་གོ །དེ་དག་ལས་གཞི་གསུམ་པ་ནི་གསང་སྔགས་ཀྱི་ངོ་བོ་ཉིད་ལ་འཇུག་གོ།

བསླབ་བྱ་ཡུལ་དུ་བྱས་ནས་ཚིག་དང་སྒྲ་ལ་སློབ་པའི་ཕྱིར་ཚིག་གི་ཚོགས་པ་དང༌། དོན་ལ་མི་འགྱུར་བར་རྟོགས་ནས་ཡི་གེ་འཕྲོ་འདུ་ལ་གནས་པའི་ཕྱིར་ཡི་གེའི་ཚོགས་པ་དང༌། བཏགས་པ་ཙམ་དུ་རྟོགས་པས་ཐམས་ཅད་མིང་ཙམ་ལས་ངོ་བོ་མེད་པར་ཤེས་པའི་ཕྱིར་མིང་གི་ཚོགས་པ་དང༌། བརྡ་དང་ཏིང་ངེ་འཛིན་གྱིས་གྲོལ་བའི་ཕྱིར་བརྡའི་ཚོགས་པ་དང༌། དབྱིངས་དང་ཡེ་ཤེས་ཐ་སྙད་ཙམ་ལས་ངོ་བོ་གཉིས་མེད་ཐུགས་སུ་ཆུད་པས་བྱང་ཆུབ་སེམས་ཀྱི་དོན་དུ་འཇལ་བའི་ཕྱིར་ཐ་སྙད་ཀྱི་ཚོགས་པ་ལ་སོགས་པ་ཤེ་དག་གོ །དེ་དག་ལས་སྤྱོད་ཡུལ་གྱི་གཞི་གསུམ་པ་མཐོང་ལམ་ནི་གསང་སྔགས་ཀྱི་ངོ་བོ་ཉིད་ལ་འཇུག་གོ་ཞེས་གསུངས་པ་ནི། མཐོང་བ་མཐར་ཕྱིན་པ་བདེན་པ་མཐོང་བའི་སྐབས་ལས་བཏགས་ཀྱི་དབུགས་མཐའ་མར་ཕྱིན་པ་ནི་མ་ཡིན་ནོ། །དེ་རྣམས་ནི་ཚོགས་པ་ལྔའོ།།

བཅུ་གཅིག་པ་དོན་གྱི་སྒོ་ནས་བཏགས་པ་ནི།

སྤྱོད་པ་དང༌། ཞེས་པ་ནས། ཡོངས་སུ་རྫོགས་པའོ། །ཞེས་པའི་བར་གྱིས་བསྟན་ཏེ།

སྤྱོད་པ་དང་། གནས་པ་དང་། ཐོབ་པ་དང་། ཕྱིར་ལྟ་བ་དང་། ཡོངས་སུ་རྫོགས་པའོ།།

ཚོགས་ལ་གནས་པས་ལུས་ངག་གི་སྤྱོད་པ་གཙོ་བོར་བྱེད་པའི་ཕྱིར་སྤྱོད་པ་དང༌། མོས་པས་ཤེས་རབ་དང་ཏིང་ངེ་འཛིན་ལ་གནས་པའི་ཕྱིར་གནས་པ་དང༌། དེས་རང་དོན་དུ་རང་རིག་པའི་མངོན་སུམ་དུ་མཐོང་བའམ་ཐོས་པའི་ཕྱིར་ཐོབ་པ་དང༌། གཞན་དོན་དུ་བྱང་ཆུབ་ཀྱི་ཐབས་སྤྲོ་བར་སེམས་པའི་ཕྱིར་ཕྱིར་ལྟ་བ་དང༌། བསླབ་པ་མཐར་ཕྱིན་པར་རྫོགས་པའི་ཕྱིར་ཡོངས་སུ་རྫོགས་པའོ། །དེ་རྣམས་ནི་༼༣༢༽དོན་གྱི་ཆོས་ལྔའོ།།

བཅུ་གཉིས་པ་རིག་འཛིན་གྱི་སྒོ་ནས་བཏགས་པ་ནི།

དེ་ཀུན་ཏུ་སྒྲ་ལ་གནས་པ་དང༌། ཞེས་པ་ནས། ལྷུན་གྱིས་གྲུབ་པར་གྱུར་པ་འབའ་ཞིག་གོ །ཞེས་པའི་བར་གྱིས་བསྟན་ཏེ།

དེ་ཀུན་ཏུ་སྒྲ་ལ་གནས་པ་དང་། ས་ལ་གནས་པ་དང་། ཚེ་ལ་གནས་པ་དང་།

ཕྱག་རྒྱ་ཆེན་པོ་དང་། ལྷུན་གྱིས་གྲུབ་པར་གྱུར་པ་འབའ་ཞིག་གོ།

དེ་ལྟར་རྣལ་འབྱོར་ལྔའི་ལམ་ལ་གནས་པའི་སྐབས་ཀུན་ཏུ་རིག་པ་འཛིན་པ་ལྔར་འགྱུར་ཏེ། མཚན་མ་ཚིག་གི་རྣལ་འབྱོར་པ་དོན་ཡིད་ལ་བྱེད་པ་ཙམ་སྟེ་སར་ཆུད་པ་པ་ཚིག་གི་ཚོགས་པས་སྒྲ་ལ་གནས་པ་དང༌། རིགས་སུ་ངེས་པས་རྣལ་འབྱོར་གཉིས་ལ་རྩོལ་ཞིང་གནས་པས་ས་ལ་གནས་པའི་རིག་འཛིན་ཐོབ་པའི་ས་ལ་གནས་པ་དང༌། དོན་རྟོགས་པས་འཇིགས་པ་ལྔ་སྤང་བའི་ཕྱིར་ཚེ་ལ་དབང་ཐོབ་པས་ཚེའི་རིག་འཛིན་ནི་ཚེ་ལ་གནས་པ་དང༌། ལུང་ངེས་པར་ཐོབ་སྟེ་རྣལ་འབྱོར་ལ་གནས་པས་མཚན་དང་དཔེ་བྱད་ཀྱི་སྐུ་མཆོག་མངོན་དུ་སྣང་བའི་ཕྱིར་ཕྱག་རྒྱ་ཆེན་པོ་དང༌། བསླབ་པ་མཐར་ཕྱིན་ཏེ་སྐད་ཅིག་སྔ་ཕྱིར་རག་ལས་པ་ཙམ་ལས་རྩོལ་བ་མེད་པའི་ཕྱིར་མི་ཟད་པ་རྒྱན་གྱི་འཁོར་ལོ་ཅི་མངའ་བ་ཐོབ་སྟེ་ལྷུན་གྱིས་གྲུབ་པར་གྱུར་པ་འབའ་ཞིག་གོ །དེ་ལྟར་འཁོར་ལྔ་ཕྲག་བཅུ་གསུམ་པོ་དེ་རྩ་བ་ལམ་ལྔ་རུ་འདུས་ལ་མཚོན་ཚུལ་ཐ་དད་དུ་བསྟན་པ་སྟེ། དཔེར་ན་མི་ལྔ་ལ། ཞྭའི་ངོས་ནས་ཐང་ཞུ་ཅན་ལྔ་ཞེས་བྱ། གོས་ཀྱི་ངོས་ནས་རས་ཕྲུག་ཅན་ལྔ་ཞེས་བྱ། ཡུལ་གྱི་ངོས་ནས་གཙང་བ་ལྔ། ཆོས་ཉན་པའི་ངོས་ནས་གྲྭ་པ་ལྔ་ཞེས་པ་ལྟ་བུ་དང་འདྲའོ། །འདིར་གཞི་ལྔ་ལས་ནང་རིས་དེ་དག་ཏུ་ཕྱེ་ཞིང་བསྟན་ཅི་དགོས་ལྔ་ཕྲག་གཅིག་གིས་ཆོག་མོད་ཅེ་ན། དེ་ནི་མདོ་སྔགས་ཀྱི་གྲགས་ལུགས་དང་སངས་རྒྱས་ཀྱི་ཞིང་ཐ་དད་པའི་ཕྱིར་དོན་གཅིག་ལ་སྒྲ་ཐ་དད་པར་ཤེས་པར་བྱ་བའི་ཕྱིར་བཀོད་པའོ། །འོན་ཀྱང་འདི་རྣམས་ནི་རྒྱུད་འདི་ཉིད་ཀྱི་ལམ་ལ་གནས་པ་རྣམས་ལ་མཚན་ཐ་དད་དུ་བསྟན་པར་འཇལ་ཏེ་ལམ་པ་དེ་དག་ལ་གསང་སྔགས་དེ་ཁོ་ན་ཉིད་ཀྱི་ཆོས་ཀྱི་འཁོར་ལོ་བསྐོར་བས་ས་ནས་སར་འཕར་བར་བྱེད་པའི་ཁྱད་པར་གྱི་བསྟན་པས་སོ། །དེ་རྣམས་སྐུ་གསུམ་དང་སྦྱར་ན། ཚོགས་སྦྱོར་མཐོང་ལམ་པ་གསུམ་ནི་སྤྲུལ་སྐུའི་འཁོར་རོ། །སྒོམ་ལམ་པ་ནི་ལོངས་སྐུའི་འཁོར་རོ། །མཐར་ལམ་པ་ནི་ཆོས་སྐུའི་འཁོར་ཏེ། དེ་ཡང་ཕལ་ཆེ་བའི་དབང་དུ་སྨོས་ཀྱི་རྒྱ་ཆད་པ་མེད་པར་ཤེས་པར་བྱའོ།།

གསུམ་པ་བྱེ་བྲག་གི་མཇུག་བསྡུ་བ་ནི།

དེ་ལྟར་ན་འཇིག་རྟེན་གྱི་ཁམས། ཞེས་པ་ནས། ཡོངས་སུ་གྲགས་ཤིང་རྣམ་པར་སྣང་ངོ༌། །ཞེས་པའི་བར་གྱིས་བསྟན་ཏེ།

དེ་ལྟར་ན་འཇིག་རྟེན་གྱི་ཁམས་ཐ་དད་པ་བསམ་གྱིས་མི་ཁྱབ་པའི་འཛམ་བུ་གླིང་ཐ་དད་པ་བྱེ་བ་བསམ་གྱིས་མི་ཁྱབ་པའི་འཇིག་རྟེན་དྲུག་གི་ཕྱོགས་བཅུ་དང་བཅས་པ་མཐའ་ཡས་པར། འཇིག་རྟེན་གྱི་སྒྲོན་མ་བྱེ་བ་མཐའ་ཡས་པར་ཤར་བ་དེ་དག་ཀྱང་། འཁོར་བ་ཐོག་མ་ཐ་མ་མེད་པ་བརྗོད་ཀྱིས་མི་ལང་བའི་ཁམས་སུ། བསྐལ་པ་ཐོག་མ་ཐ་མ་མེད་པ་བརྗོད་ཀྱིས་མི་ལང་བའི་སྐབས་ལ། རྟག་པར་རྒྱུན་གྱི་འཁོར་མོར་འབྱུང་ཞིང་། སྒྲོན་མའི་བྱ་བས་ལྷ་མིའི་འཇིག་རྟེན་གྱི་མུན་པ་བསལ་ནས། སེམས་ཀྱི་དཀྱིལ་འཁོར་གསལ་བར་བྱས་ཏེ། ཉི་ཟླའི་དཀྱིལ་འཁོར་ནུབ་པ་ལྟར་ཡོངས་སུ་མྱ་ངན་ལས་འདའ་འོ་ཞེས། ཐམས་ཅད་ནས་ཐམས་ཅད་དུ་ཡོངས་སུ་གྲགས་ཤིང་རྣམ་པར་སྣང་ངོ་།།

དེ་༼༣༣༽ལྟར་ན་འཇིག་རྟེན་གྱི་ཁམས་ཐ་དད་པའི་གནས་རིས་ཇི་སྙེད་པ་བསམ་གྱིས་མི་ཁྱབ་པའི་འཛམ་བུའི་གླིང་ཐ་དད་པ་བྱེ་བ་བསམ་གྱིས་མི་ཁྱབ་པའི་འཇིག་རྟེན་དྲུག་གི་ཕྱོགས་བཅུ་དང་བཅས་པ་མཐའ་ཡས་པར་སྣང་བ་རྣམས་སུ་འཇིག་རྟེན་གྱི་སྒྲོན་མ་སྟོན་པ་ཐུབ་པའི་དབང་པོ་འཆད་པའི་སྐྱེས་བུ་དང་བཅས་པ་དེ་སྙེད་དུ་བྱུང་ནས་བྱེ་བ་མཐའ་ཡས་པར་ཤར་བ་དེ་དག་ཀྱང་འཁོར་བ་ཐོག་མ་དང་ཐ་མ་མེད་པར་བརྗོད་ཀྱིས་མི་ལང་བའི་ཞིང་ཁམས་རྣམས་སུ། བསྐལ་པ་ཐོག་མ་དང་ཐ་མ་མེད་པ་བརྗོད་ཀྱིས་མི་ལོང་བའི་སྐབས་དོན་ལ་མེད་བཞིན་དུ་སྣང་བ་དེ་དག་ལ་རྟག་པར་རྒྱུན་གྱི་འཁོར་མོར་ཡང་ནས་ཡང་དུ་རྒྱུན་མི་འཆད་པར་འབྱུང་ཞིང་། བསྟན་པ་ཆོས་ཀྱི་འཁོར་ལོ་བསྐོར་ནས་སྒྲོན་མའི་བྱ་བ་བྱས་པས་ལྷ་མིའི་འཇིག་རྟེན་གྱི་གདུལ་བྱའི་གཙོ་བོ་རྣམས་ཀྱི་རྒྱུད་ལ་སྒྲིབ་པའི་མ་རིག་པའི་ལིང་ཏོག་གི་མུན་པ་མཐའ་དག་བསལ་ནས་རིམ་དང་ཅིག་ཅར་གྱིས་སེམས་ཀྱི་དཀྱིལ་འཁོར་འོད་གསལ་བ་རྟོགས་པར་བྱས་ཏེ་སྐུ་དངོས་ཀྱི་མཛད་པ་ཐམས་ཅད་རྫོགས་པ་ན་དངོས་པོ་ལ་ནུབ་པ་མེད་ཀྱང་གདུལ་བྱའི་ངོ་ལ་སྤྲུལ་པའི་སྐུ་དེ་དག་ཉི་ཟླའི་དཀྱིལ་འཁོར་ནུབ་པ་ལྟར་སྐུ་ཡོངས་སུ་མྱ་ངན་ལས་འདའོ་ཞེས་དུས་སྔ་ཕྱིར་ཞིང་དེ་དག་ཏུ་ཐམས་ཅད་ནས་ཐམས་ཅད་དུ་ཡོངས་སུ་གྲགས་ཤིང་གདུལ་བྱའི་ངོ་ལའང་རྣམ་པ་སྣང་ངོ༌། །དེ་ལྟ་བས་ན་ཞིང་འདིར་ཐུབ་པའི་དབང་པོ་མྱ་ངན་ལས་འདའ་བའི་སྒྲ་དང་འདས་པ་ལྟར་སྣང་བའང་དུས་འཁོར་མོར་འབྱུང་བའི་སྐབས་གཅིག་བཟུང་བ་ཡིན་ནོ།།

ལེའུ་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཐུན་མོང་བཅའ་གཞིའི་ལེའུ་སྟེ་དང་པོའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་ཐེག་པ་ཆེ་ཆུང་དང་གསང་སྔགས་ཐུན་མོང་གི་བཅས་གཞིར་གྱུར་པའི་བྱིན་རླབས་འབྱུང་བ་དང་ལུང་བསྟན་བརྒྱུད་པའི་གཏན་ཚིགས་བྱུང་ཁུངས་བསྟན་པས་གཉིས་ཀའི་གླེང་གཞིའི་སྐབས་བཤད་པའི་ལེའུ་སྟེ་དང་པོའོ། །ཞེས་དཔེར་ན་གོས་དང་འདྲ་བར་དོན་གྱི་ཚོམས་རྣམས་སོ་སོར་མ་འདྲེས་པར་སྟོན་པའི་ཕྱིར་ལེའུ་སྟེ་དེའི་ཐོག་མའི་གྲངས་ཀྱི་དོན་གསལ་བར་བཀྲོལ་བའོ། །མདོའི་ཀ་བ་ལྷ་རྗེ་ཡང་ཁྱེད་བླ་མས་སྐུ་ལྔའི་གླེང་གཞི་དང་སྦྱར་བར་གསུངས་པ་ནི། བྱིན་རླབས་འབྱུང་བའི་དངོས་དོན་ཏེ་གླེང་གཞི་འགའ་ཞིག་འོག་ནས་འབྱུང་བ་ནི་རྒྱུད་དཀྲུག་པ་ཡིན་ལ་ལུང་བསྟན་བརྒྱུད་པའི་གཏན་ཚིགས་བྱུང་ཁུངས་ཀྱི་གླེང་གཞིར་ངེས་པས་བྱེ་བྲག་གི་གླེང་སློང་དང་རྩ་རྒྱུད་ལེའུ་གཉིས་པས་སྟོན་པས་ཤིན་ཏུ་གནད་ཆེའོ།། །།

ལེའུ་གཉིས་པ་གདམས་ངག་ངེས་པར་གཞག་པ།

༈ གཉིས་པ་རྐྱེན་གླེང་བསླང་བ་ལ་གཉིས་ཏེ། སྟོན་པས་མདུན་བསུས་ཏེ་གླེང་བསླང་བ། འཁོར་གྱིས་གུས་པས་དྲིས་ཏེ་གླེང་༼༣༤༽བསླང་བའོ། །དང་པོ་ལ་གསུམ་སྟེ། སྟོན་པས་འཁོར་སྡུས་ཤིག་པར་བསྐུལ་བ། འཁོར་གྱིས་བསྡུས་པས་འདུས་པ། སྟོན་པས་ཐེ་ཚོམ་ཆོད་ཅིག་པར་གདམས་པའོ། །དང་པོ་ནི།

དེ་ནས་ཇི་ལྟར། ཞེས་པས་ནས། ཞེས་གསུངས་པ་དང༌། ཞེས་པའི་བར་གྱིས་བསྟན་ཏེ།

དེ་ནས་ཇི་ལྟར་དེ་ལྟར་འདི་ལྟར་མི་མཇེད་ཅེས་བྱ་བའི་འཇིག་རྟེན་གྱི་ཁམས་ན་བཞུགས་པའི་སྟོན་པ་རྡོ་རྗེ་ཐུབ་པའི་དབང་པོ་དེ་སྐྱེ་དགུའི་ཚེ་ལོ་བརྒྱ་པ་ལ་བྱུང་སྟེ། ཡུན་ཧ་ཅང་མི་རིང་བ་ཞིག་བཞུགས་ཏེ། ཡོངས་སུ་མྱ་ངན་ལས་འདའ་བར་དགོངས་ནས། ཡུལ་ཡངས་པ་ཅན་ཞེས་བྱ་བར་འཁོར་མང་པོ་དང་ཐབས་ཅིག་ཏུ་བཞུགས་པར་དབྱར་གྱི་ངོ་གསུམ་འདས་ནས། འཇིག་རྟེན་གྱི་སློབ་མ་ལ་གདམས་ངག་གསུམ་གཞག་པའི་སླད་དུ། འཁོར་འདུས་པ་རྣམས་ཀྱི་ནང་ན་རྫུ་འཕྲུལ་ཆེར་སྤྱོད་པ་ལ་བཀའ་བསྩལ་པ། རྫུ་འཕྲུལ་ཅན་ཁྱོད་དེང་ལ་འཇིག་རྟེན་དྲུག་གི་ཕྱོགས་བཅུ་ན་ངའི་སློབ་མ་གང་དག་འཁོད་པ། འདི་པར་ཕྱོགས་པ་དག་གང་ཇི་སྙེད་པ་བསྡུས་ཤིག ངེས་པར་གཞག་པར་བྱ་བ་དག་ཡོད་དོ་ཞེས་གསུངས་པ་དང་།

ལེའུ་འདིས་སྤྱིར་དྲང་དོན་དང་ངེས་དོན་གཉིས་ཀ་སྟོན་ལ། བློ་ཆུང་ལ་དྲང་དོན་ཤས་ཆེ་ཞིང་བློ་ཆེ་བ་ལ་ངེས་དོན་ཤས་ཆེའོ། །དེ་ནས་ཐུན་མོང་ཕྱོགས་གཅིག་གི་ལུང་བསྟན་བརྒྱུད་པའི་བསྟན་པ་བཤད་རྒྱུད་ཀྱིས་གསལ་བར་སྟོན་ཅིང་ཡོངས་སུ་གྲགས་པར་འགྱུར་བའི་གླེང་གཞིི་རྒྱུའི་རྒྱུ་ཡང་ཤེས་པར་བྱ་བའི་ཕྱིར་རྩ་བ་རྒྱུད་གདམས་ངག་ཞལ་ཆེམས་ཀྱི་ཚུལ་དུ་བཀའ་སྩལ་ཏེ་སྐུ་མྱ་ངན་ལས་འདའ་བའི་ཚུལ་འཆད་དེ་གླེང་གཞི་བསྟན་པ་དེ་ནས་སྤྲུལ་པའི་སྐུ་ལ་དོན་ལ་འཆར་ནུབ་མེད་ཀྱང་གདུལ་བྱའི་ངོ་ལ་འཆར་ནུབ་ལྟར་སྣང་བ་ཉི་ཟླའི་དཔེས་ཇི་ལྟར་བྱུང་བའི་ཚུལ་བསྟན་པའི་སྔ་མའི་ལོ་རྒྱུས་དེ་ལྟར་ཆ་གཅིག་བཟུང་སྟེ་ཉེ་བར་སྟོན་པར་འབྱུང་བ་འདི་ལྟར་དུག་གསུམ་ལས་སེམས་མི་འཕྲོ་བས་མི་མཇེད་ཅེས་བྱ་བའི་འཇིག་རྟེན་གྱི་ཁམས་སྒྲོན་མའི་ཞིང་འདི་ན་བཞུགས་པའི་སྟོན་པ་རྡོ་རྗེ་ལྟར་སྐུ་ཤིན་ཏུ་སྲ་ཞིང་བདུད་ཀྱི་དཔུང་བཅོམ་པས་ཐུབ་པའི་དབང་པོ་ཤཱཀྱ་སེང་གེ་དེ་ཉིད་ཉི་ཟླའི་དཀྱིལ་འཁོར་ཤར་བ་ལྟར་སྐྱེ་རྒུའི་བྱེ་བྲག་མི་རྣམས་ཀྱི་ཚེ་ལོ་བརྒྱ་པ་འདི་ལ་སྤྲུལ་པའི་སྐུར་བྱུང་སྟེ་ཡུན་ཧ་ཅང་ཡང་མི་རིང་བ་ལོ་བརྒྱད་ཅུ་རྩ་གཉིས་ཀྱི་གྲངས་ཚད་ཞིག་ཏུ་གདུལ་བྱ་དང་མཐུན་པར་བཞུགས་ཏེ། ལེ་ལོ་ཅན་བརྩོན་འགྲུས་ལ་བསྐུལ་བ་དང་རྟག་པར་རེ་བ་སུན་དབྱུང་བའི་ཕྱིར་རྡོ་རྗེ་ལྟ་བུའི་སྐུ་མཆོག་ཉི་ཟླ་ནུབ་པར་ལྟར་འཇིག་རྟེན་དུ་མི་སྣང་བར་ཡོངས་སུ་མྱ་ངན་ལས་འདའ་བར་དགོངས་ནས། རྒྱ་གར་གྱི་ཡུལ་ལི་ཙ་བྱི་གྱད་ཡིན་པས་སྐུ་གདུང་བགོས་ན་བར་ཆད་མི་འོང་བས་གྲོང་ཁྱེར་ཡངས་པ་ཅན་ཞེས་བྱ་བར་འཁོར་རྣམ་པ་བཞི་ལ་སོགས་པ་མང་པོ་དང་ཐབས་གཅིག་ཏུ་བཞུགས་པར། དབྱར་གྱི་ངོ་བོ་ཟླ་བ་གསུམ་འདས་ནས་སྟོན་ཟླ་ར་བའི་ཉ་ལ་ཡོངས་སུ་འདའ་བས་འཇིག་རྟེན་གྱི་སློབ་མ་ལ་བསྟན་པ་གདམས་ངག་གསུམ་ཞལ་ཆེམས་སུ་བཞག་པའི་སླད་དུ་ཐུན་མོང་གི་འཁོར་འདུས་པ་ཉན་ཐོས་རྣམས་ཀྱི་ནང་ནས་ཁྱད་པར་གྱི་རྫུ་འཕྲུལ་ཆེར་སྤྱོད་པ་མོའུ་གལ་གྱི་བུ་ཆེན་པོ་ལ་འཁོར་བསྡུ་བར་བཀའ་སྩལ་པ། རྫུ་འཕྲུལ་ཅན་ཁྱོད་དེང་བའམ་སོང་ལ་འཇིག་རྟེན་དྲུག་གི་ཕྱོགས་བཅུ་ན། ངའི་སློབ་མ་གང་དག་འཁོད་པ་སངས་རྒྱས་པའི་༼༣༥༽གྲུབ་མཐའ་འདི་པར་ཕྱོགས་ཤིང་ངའི་བཀའ་ལ་མོས་པ་དག་གང་ཇི་སྙེད་ཞིག་ཡོད་པ་རྣམས་བསྡུས་ཤིག སྤྱན་སྔར་འདུས་པའི་བློ་ལ་ངེས་པར་བཞག་པར་བྱ་བ་གདམས་ངག་དག་ཡོད་དོ། །ཞེས་གསུངས་ཏེ་ཞལ་ཆེམས་བོར་བར་བཀའ་སྩལ་པ་དང༌། ཞེས་སོ།།

གཉིས་པ་འཁོར་གྱིས་བསྡུས་པས་འདུས་པ་ནི།

རྫུ་འཕྲུལ་ཅན་དེས། ཞེས་པ་ནས། གཞན་ཐམས་ཅད་འདུས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

རྫུ་འཕྲུལ་ཅན་དེས་ཆོས་ཀྱི་སྐད་ཅིག་གིས་གོ་བར་བསྒྲགས་ནས། ཐམས་ཅད་འདུས་པ་ནི་འདི་ལྟ་སྟེ། རྒྱལ་བའི་ཞིང་འགྱུར་རིས་དྲུག་གང་སུ་དག །འདི་པར་ངེས་ཤིང་ཕྱོགས་པ་ཀུན་ཉོན་ཅིག །དེང་འདིར་རྒྱལ་བ་བདུད་རྩི་གསུམ་འཇོག་གིས། །དུག་གསུམ་འཇོམས་པར་འདོད་པ་ཀུན་འདུས་ཤིག །དེ་སྐད་ཅེས་གྲགས་པས། དམ་པའི་རིགས་ཅན་ལྔ་མ་གཏོགས་པ་ནི་འདི་ལྟ་སྟེ། སྔགས་ཀྱི་བསམ་གཏན་ཆེན་པོའི་ནང་དུ་ཡང་དག་འཇོག་པ། བསྐུལ་བ་ཆེན་པོ་ལང་ཀའི་མངའ་བདག བློ་གྲོས་ཐབས་ལྡན་ལ་སོགས་པ་ལས།

གཞན་ཐམས་ཅད་འདུས་པར་གྱུར་ཏོ།།

དེ་ནས་རྫུ་འཕྲུལ་ཅན་དེས། ཡུང་དཀར་བསྐོར་བའི་ཡུན་ཙམ་གྱིས་ཆོས་ཀྱི་སྐད་ཅིག་གིས་ཀུན་གྱི་གོ་བར་ནུས་པའི་དག་གི་རྫུ་འཕྲུལ་གྱིས་ཚིག་བཞི་བསྒྲགས་ནས་ཐམས་ཅད་བསྡུས་པ་ནི་འདི་ལྟར་སྟེ། རྒྱལ་བའི་གདུལ་ཞིང་དུ་གྱུར་པའི་རིགས་དྲུག་གི་གནས་ན་གདུལ་བར་བྱ་བ་གང་སུ་དག་ཆོས་འདི་པར་ངེས་ཤིང་དོན་རྟོགས་པ་ལ་མོས་པས་ཕྱོགས་པ་ཀུན་གྱིས་ཉོན་ཅིག དེང་འདིར་རྒྱལ་བ་ཐུབ་པའི་དབང་པོས་ཞི་གནས་དང་ལྷག་མཐོང་དང་ཟུང་དུ་འབྲེལ་བའི་བདུད་རྩི་གསུམ་ཞལ་ཆེམས་སུ་འཇོག་གིས། ཞི་གནས་ཀྱིས་ཞེ་སྡང༌། ལྷག་མཐོང་གིས་གཏི་མུག ལས་ཀྱི་མཐས་འདོད་ཆགས་ཏེ་དུག་གསུམ་འཇོམས་པར་འདོད་པ་ཀུན་འདུས་པར་གྱིས་ཤིག དེ་སྐད་ཅེས་བསྒྲགས་པས། དམ་པའི་རིགས་ཅན་རྣམ་པ་ལྔ་འདུ་བ་ལ་མ་གཏོགས་པ་ནི་འདི་ལྟ་སྟེ། ཆོས་ཉིད་ཟབ་མོ་བསྒོམས་པས་སྔགས་ཀྱི་བསམ་གཏན་ཆེན་པོའི་ནང་དུ་ཡང་དག་པར་མཉམ་པར་འཇོག་པ་ཐེག་པ་ཆེན་པོར་རིགས་ངེས་པས་བསྐུལ་བ་ཆེན་པོ་ལང་ཀའི་མངའ་བདག་བློ་གྲོས་ཐབས་ལྡན་དང༌། ལ་སོགས་པ་ཞེས་ཀླུའི་རྒྱལ་པོ་གཙུག་ན་རིན་ཆེན་ཡོད་པས་འཇོག་པོ་སྟེ་བློ་གྲོས་རྒྱ་མཚོ་དང༌། ཚངས་པ་དུང་གི་གཙུག་ཕུད་ཅན་བློ་གྲོས་མཐའ་ཡས་དང༌། གནོད་སྦྱིན་སྐར་མདའ་གདོང་བློ་གྲོས་དད་སེལ་དང༌། དགེ་བསྙེན་དྲི་མ་མེད་པར་གྲགས་པ་བློ་གྲོས་རབ་ཞི་དང་ལྔ་ནི་སྟོན་པ་ལ་སྐྱེ་འཇིག་མེད་པར་མཁྱེན་པས་སྤྱན་སྔར་མ་འདུས་ཏེ། དེ་ལྔ་ལས་གཞན་པའི་འཁོར་ཐུན་མོང་བ་ཐམས་ཅད་རྒྱལ་བ་འདའ་བའི་ཞལ་ཆེམས་འབྱུང་བར་གོ་ནས་འདུས་པར་གྱུར་ཏོ།།

གསུམ་པ་སྟོན་པས་ཐེ་ཚོམ་ཆོད་ཅིག་པར་གདམས་པ་ནི།

དེ་ནས་འདུས་པ། ཞེས་པ་ནས། བཀའ་སྩལ་པ་དང༌། ཞེས་པའི་བར་གྱིས་བསྟན་ཏེ།

དེ་ནས་འདུས་པ་དེ་དག་ལ་བཀའ་བསྩལ་པ། ཀྱེ་གྲོགས་པོ་དག་ཤེས་པར་གྱིས་ཤིག ཆོས་ཐམས་ཅད་ནི་མི་རྟག་པའོ། །འབྱོར་པ་ཐམས་ཅད་ནི་མཐར་རྒུད་པའོ། །དངོས་པོ་ཐམས་ཅད་ནི་ངེས་པར་འཇིག་པའོ། །གང་ཟག་གི་སྲོག་གི་དབང་པོ་ལ་སྐྱེ་ཤི་ཡོད་པའི་ཕྱིར་ང་ཡོངས་སུ་མྱ་ངན་ལས་འདའ་བས། སུ་དག་ཐེ་ཚོམ་མ་ཆོད་པ་རྣམས་དྲི་བ་གྱིས་ཤིག དེ་སྐད་ཅེས་བཀའ་སྩལ་པ་དང་།

དེ་ནས་འདུས་པ་དེ་དག་ལ་སྟོན་པས་བཀའ་སྩལ་པ། ཀྱེ་ཞེས་བོས་ནས་ཞལ་བསྐྱུངས་པ་དང་རང་བཞིན་ལ་དགོངས་ཏེ་གྲོགས་པོ་དག་ཤེས་པར་གྱིས་ཤིག འཁོར་བའི་ཆོས་ཐམས་ཅད་ནི་བྱས་པའི་ཕྱིར་མི་རྟག་པའོ། །འབྱོར་པ་ཐམས་ཅད་ནི་འཐར་རྒུད་པའོ། །རྒྱུ་རྐྱེན་ལས་སྐྱེས་༼༣༦༽པའི་དངོས་པོ་ཐམས་ཅད་ནི་ངེས་པར་འཇིག་པའོ། །གདུལ་བྱ་གང་ཟག་གི་སྲོག་གི་དབང་པོ་ལ་སྐྱེ་ཤི་ཡོད་པའི་ཕྱིར་གདུལ་བྱའི་སྣང་བ་དང་མཐུན་པར་ཐུབ་པ་ང་ཡང་ཡོངས་སུ་མྱ་ངན་ལས་འདའ་བས་འཁོར་སུ་དག་རང་རང་གི་ཐེ་ཚོམ་མ་ཆོད་པ་རྣམས་འདིར་དྲི་བར་བྱོས་ལ་ཐེ་ཚོམ་ཆོད་པར་གྱིས་ཤིག དེ་སྐད་ཅེས་བཀའ་སྩལ་པ་དང༌། ཞེས་པའོ།།

གཉིས་པ་འཁོར་གྱི་གུས་པས་དྲིས་ཏེ་གླེང་བསླང་བ་ལ་གཉིས་ཏེ། ཞུ་བའི་ཆ་ལུགས་དང༌། ཞུ་བ་དངོས་སོ། །དང་པོ་ནི།

འཁོར་དེར་འདུས་པར་གྱུར་པ། ཞེས་པ་ནས། འདི་སྐད་ཅེས་གསོལ་ཏོ། །ཞེས་པའི་བར་གྱིས་བསྟན་ཏེ།

འཁོར་དེར་འདུས་པར་གྱུར་པའི་རིག་འཛིན་གྱི་རྒྱལ་པོར་གྱུར་པ་ཀུན་ཛ་ར་ཞེས་བྱ་བ་དེ་རང་གི་སྟན་ལས་ལངས་ཏེ། སེང་གེའི་ལྟ་སྟངས་ཀྱིས་སྟོན་པའི་ཞལ་དུ་བལྟས་ནས་འདི་སྐད་ཅེས་གསོལ་ཏོ།།

དེ་ནས་འཁོར་དེར་འདུས་པར་གྱུར་པ་རིག་འཛིན་གྱི་རྒྱལ་པོ་དྲང་སྲོང་ཀུཉྫ་ར་ཞེས་བྱ་བ་ཐུན་མོང་ལྟར་ན་ཀུན་དགའ་བོ་དང༌། ཐུན་མིན་ལྟར་ན་ཕྱག་ན་རྡོ་རྗེ་ཡིན་ལ། དེ་ཉིད་རང་གི་སྟན་ལས་ལངས་ཏེ། གྱེན་དུ་ལྟ་བ་དང༌། འཇིགས་པ་མེད་པ་དང༌། ཟིལ་གྱིས་གནོན་པ་དང༌། བག་དང་ལྡན་པ་བཞིའི་སྒོ་ནས་སེང་གེའི་ལྟ་སྟངས་ཀྱི་ཚུལ་གྱིས་སྟོན་པའི་ཞལ་དུ་བལྟས་ནས་ཚིག་འདི་སྐད་ཅེས་གསོལ་ཏོ།། ཞེས་པའོ།།

གཉིས་པ་ཞུ་བ་དངོས་ལ་ལྔ་སྟེ། སྔར་མདོ་ལས་གསང་སྔགས་མ་གསུངས་པས་ཕྱིས་ཇི་ལྟར་འབྱུང་ཚུལ་དོན་གྱིས་ཞུས་པ། གདམས་ངག་གསུམ་ཞུས་པ། རྣམ་ཐར་གྱི་ཐེག་པ་བསྡུ་ལུགས་ཞུས་པ། སྟོན་པ་འདས་ནས་སྒྲོན་མར་གང་8འོང་ཞུས་པ། ལོག་ལྟ་ཚར་གང་གིས་གཅོད་ཞུས་པའོ། །དང་པོ་ནི།

ཁྱོད་ནི་ནམ་མཁའི་རང་བཞིན་ཏེ། །ཞེས་པ་ནས། ངེས་པའི་ཐེག་ཆེན་ཡོང་མ་གསུངས། །ཞེས་པའི་བར་གྱི་བསྟན་ཏེ།

ཁྱོད་ནི་ནམ་མཁའ་རང་བཞིན་ཏེ། །འདའ་དང་མི་འདའ་ཡོངས་མི་མངའ། །འཇིག་རྟེན་པ་ལ་མཐུན་འཇུག་ཏུ།། འདའ་བས་ཡོངས་སུ་འདུལ་བར་དགོངས། །ཁྱོད་ནི་འཇིག་རྟེན་སྒྲོན་མར་ཤར། །ལྷ་མི་འཇིག་རྟེན་ཐམས་ཅད་ཀྱི།།

མུན་པའི་དཀྱིལ་འཁོར་ཀུན་བསལ་ནས། །སེམས་ཀྱི་དཀྱིལ་འཁོར་གསལ་མཛད་དེ། །ས་དང་རྣམ་ཐར་ལ་སྤྱོད་པས། །བྱང་ཆུབ་ཐོབ་པར་འགྱུར་བ་ཡི། །འདྲེན་པའི་ཐེག་པ་རྣམ་གསུམ་ལ། །གང་དག་རིམ་པར་བཀོད་ལགས་ན། །མཉམ་པས་བླང་དོར་མེད་སྤྱོད་ཅིང་། །བྱང་ཆུབ་གཞན་ནས་མི་འཚོལ་བའི། །ཐབས་མཆོག་དཔག་གིས་མི་ལང་བའི། །ངེས་པའི་ཐེག་ཆེན་ཡོངས་མ་གསུངས།།

སྟོན་པ་ཁྱོད་ཀྱི་ངོ་བོ་ནི་ནམ་མཁའི་རང་བཞིན་ལྟར་ཏེ་འདུས་མ་བྱས་ཆོས་ཀྱི་སྐུར་ཞུགས་པས་འདའ་བ་དང་མི་འདའ་བའི་སྤྲོས་པ་མེད་ཅིང༌། དེ་ལས་མ་གཡོས་པར་གདུལ་བྱ་རྒྱུད་དག་པ་ལ་ལོངས་སྤྱོད་རྫོགས་སྐུར་སྣང་བས་ཡོངས་སུ་འདའ་བ་མི་མངའ་ཡང་གདུལ་བྱ་འཇིག་རྟེན་པ་རྣམས་ལ་མཐུན་འཇུག་གྱི་ཚུལ་དུ་སྤྲུལ་པའི་སྐུ་མྱ་ངན་ལས་འདའ་བའི་མཛད་པ་བསྟན་ནས་ཡོངས་སུ་འདུལ་བའི་ཐབས་ཀྱིས་དོན་བྱ་བར་དགོངས་པ་ཡིན་ནོ་ཞེས་རང་བཞིན་མི་འགྱུར་ཡང་མཐུན་འཇུག་གི་ཐབས་ཀྱིས་གདུལ་བ་ལ་བསྔགས་ཤིང་ཐུབ་པ་ཁྱོད་ནི་འཇིག་རྟེན་གྱི་ཁམས་འདིའི་གདུལ་བྱ་རྣམས་ཀྱི་མ་རིག་པའི་མུན་པ་སེལ་བའི་སྒྲོན་མར་ཤར་བས་ལྷ་མིའི་འཇིག་རྟེན་ཐམས་ཅད་ཀྱི་མ་རིག་པའི་མུན་པའི་དཀྱིལ་འཁོར་རྒྱ་ཆེ་ལ་དབྱིངས་འཐུག་པ་ཀུན་དང༌། ལས་ཉོན་ཤེས་བྱའི་སྒྲིབ་པ་ཐམས་ཅད་བསལ་ནས་སེམས་ཀྱི་དཀྱིལ་༼༣༧༽འཁོར་འོད་གསལ་ཞིང་རང་བཞིན་གྱིས་རྣམ་པར་དག་པ་གསལ་བར་མཛད་དེ་ཞེས་དཔེའི་སྒོ་ནས་མཛད་པའི་བྱེད་ལས་ལ་བསྔགས་པ་སྔོན་དུ་བཏང་ནས་དྲི་བ་དངོས་ནི། ས་བཅུ་དང་རྣམ་པར་ཐར་པ་བཞིའམ་བརྒྱད་ལ་སྤྱད་པས་འབྲས་བུ་བྱང་ཆུབ་གསུམ་གྱི་གོ་འཕང་ཐོབ་པར་གྱུར་པ་ཡི་ཀུན་འབྱུང་འདྲེན་པའི་ཐེག་པ་རྣམ་པ་གསུམ་ལ་ཉན་རང་བྱང་ཆུབ་སེམས་དཔའི་རིགས་ཅན་གྱི་གདུལ་བྱ་གང་དག་རིམ་པར་བཀོད་དེ་ཉན་ཐོས་རང་རྒྱལ་བྱང་ཆུབ་སེམས་དཔའ་གསུམ་གྱིས་ས་ལ་གནས་པའི་བྱ་བ་ཡོངས་སུ་རྫོགས་པར་མཛད་ལགས་ན་ཡང༌། ལྟ་བ་མཉམ་ཉིད་ཆེན་པོ་ཇི་བཞིན་པར་རྟོགས་ནས་སྤྱོད་པ་བླང་དོར་མེད་པར་སྤྱོད་ཅིང༌། འབྲས་བུ་བྱང་ཆུབ་ཆེན་པོ་སེམས་ཀྱི་ཆོས་ཉིད་ལས་གཞན་ནས་མི་ཚོལ་བས་འཆི་བའི་དུག་གི་ནད་འཇོམས་པའི་ལྷུན་གྱིས་རྫོགས་པའི་ཐབས་མཆོག་ཁྱད་པར་ཅན། ཐབས་མང་བ་དང༌། ཆེ་བ་དང༌། མཁས་པ་དང༌། ཡས་པ་དང༌། ཡངས་པ་དང༌། སླ་བ་དང༌། མྱུར་བའི་སྒོ་ནས་ཐབས་ཀྱི་ཁྱད་པར་དཔག་གིས་མི་ལང་བའི་དོན་སྟོན་པས་ངེས་པའི་ཐེག་ཆེན་གསང་སྔགས་ཀྱི་སྡེ་སྣོད་ཕུལ་དུ་བྱུང་བ་ཉིད་སྔར་ཐུན་མོང་གི་འཁོར་ལ་ཡོང་ཡེ་མ་གསུངས་པས་དེ་ཉིད་གསུངས་པར་འཚལ་ཞེས་ཞུ་བ་དང་པོ་ཕུལ་བའོ།།

གཉིས་པ་གདམས་ངག་གསུམ་ཞུས་པ་ནི།

རྒྱལ་བའི་དགོངས་པ་ཚིག་གསུམ་པོ། །ཞེས་པ་ནས། ངེས་པའི་བློ་གྲོས་གང་ལ་བཞག །ཅེས་པའི་བར་གྱིས་བསྟན་ཏེ།

རྒྱལ་བའི་དགོངས་པ་ཚིག་གསུམ་པོ། །གདམས་ངག་ལུང་དུ་མ་གཞག་ན།།

བློ་ཆུང་མུན་པས་རྨོངས་པ་རྣམས། །ངེས་པའི་བློ་གྲོས་གང་ལ་གཞག།

རྒྱལ་བའི་དགོངས་པ་ཟབ་མོ་ཞི་གནས་ལྷག་མཐོང་ལས་མཐའ་གསུམ་གྱི་དོན་སྟོན་པས་ཚིག་གི་རྗོད་བྱེད་གསུམ་པོ། གདམས་ངག་གི་ཡི་གེར་ལུང་དུ་བསྟན་ཏེ་སྔར་མ་བཞག་ན། ཕྱི་རབས་ཀྱི་བློ་ཆུང་མུན་པས་རྨོངས་པར་གྱུར་པ་རྣམས་ཀྱིས་ངེས་པའི་དོན་གྱི་བློ་གྲོས་གང་ལ་བཞག ཅེས་ཞུ་བ་གཉིས་པ་ཕུལ་བའོ།།

གསུམ་པ་རྣམ་ཐར་གྱི་ཐེག་པ་བསྡུ་ལུགས་ཞུས་པ་ནི།

རྣམ་པར་ཐར་པའི་ཐེག་པ་གསུམ། །གར་བསྡུ་གང་ལ་གང་གིས་བསྡུ། །ཞེས་པས་བསྟན་ཏེ།

རྣམ་པར་ཐར་པའི་ཐེག་པ་གསུམ། །གར་བསྡུ་གང་ལ་གང་གིས་བསྡུ།།

འཁོར་བ་དང་མཐའ་གཉིས་ལས་རྣམ་པར་ཐར་པའི་ཐེག་པ་སྡེ་སྣོད་རིན་པོ་ཆེ་རྣམ་པ་གསུམ་དོན་གྱི་ངོ་བོ་གར་བསྡུ། གཞི་གང་ཞིག་ལ་བསྡུ། བྱེད་པ་པོ་གང་གིས་བསྡུ་བར་འགྱུར་ཞེས་ཞུ་བ་གསུམ་པ་ཕུལ་བའོ།།

བཞི་པ་སྟོན་པ་འདས་ནས་སྒྲོན་མར་གང་འོས་ཞུས་པ་ནི།

འཇིག་རྟེན་གསལ་བའི་ཉི་ནུབ་ན། །སྒྲོན་མ་གང་གིས་མཛད་པར་འགྱུར། །ཞེས་པས་བསྟན་ཏེ།

འཇིག་རྟེན་གསལ་བའི་ཉི་ནུབ་ན། །སྒྲོན་མ་གང་གིས་མཛད་པར་འགྱུར།།

འཇིག་རྟེན་གསལ་བར་བྱེད་པའི་ཉི་མ་ནུབ་སྟེ་སྟོན་པ་འདས་པར་གྱུར་ན། ཕྱིས་དོན་ཇི་བཞིན་དུ་སྟོན་པས་སྒྲོན་མ་རྒྱལ་༼༣༨༽ཚབ་གང་གིས་མཛད་པར་འགྱུར། ཞེས་ཞུ་བ་བཞི་པ་ཕུལ་བའོ།།

ལྔ་པ་ལོག་ལྟ་ཚར་གང་གིས་གཅོད་ཞུས་པ་ནི།

བསྟན་པ་འཇིག་པའི་ལོག་སྡེ་པའི། །རྒོལ་བ་གང་གིས་ཚར་གཅོད་འགྱུར། །ཞེས་པས་བསྟན་ཏེ།

བསྟན་པའི་འཇིག་རྟེན་ལོག་སྡེ་བའི། །རྒོལ་བ་གང་གིས་ཚར་གཅོད་འགྱུར། །དེ་སྐད་ཅེས་གསོལ་བ་དང་།

སྟོན་པ་མི་བཞུགས་ན་བསྟན་པ་འཇིག་པར་བྱེད་པའི་ལོག་པར་ལྟ་བའི་སྡེ་པར་གྱུར་པའི་བདུད་དང་མུ་སྟེགས་ལ་སོགས་པ་ཕྱི་ནང་གི་རྒོལ་བ་རྣམས་སྐྱེས་བུ་གང་གིས་ཚར་གཅོད་པའི་གཉེན་པོ་བྱེད་པར་འགྱུར། ཞེས་ཞུ་བ་ལྔ་པ་ཕུལ་ནས་དེ་སྐད་ཅེས་གསོལ་བ་ལས། ཞེས་པའོ།།

གསུམ་པ་རྒྱུད་ཀྱི་དོན་དངོས་ལ་གཉིས་ཏེ། ལེགས་པར་བྱིན་ཏེ་ཉེ་བར་བསྟན་པ། རྒྱུད་དོན་རྒྱས་པ་དངོས་སོ། །དང་པོ་ནི།

བཅོམ་ལྡན་འདས་ཀྱིས་བཀའ་སྩལ་པ། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

བཅོམ་ལྡན་འདས་ཀྱིས་བཀའ་སྩལ་པ། རིག་པ་འཛིན་པ་ཆེན་པོ་ལེགས་སོ།།

ཁྱོད་ཀྱིས་དྲི་བ་ལྔ་དྲིས་པ་ནི་ཤིན་ཏུ་ལེགས་སོ། །འདི་ལྟ་སྟེ།

དེ་ནས་བཅོམ་ལྡན་འདས་ཀྱིས་བཀའ་སྩལ་པ། རིག་པ་འཛིན་པ་ཆེན་པོ་ཀུཉྫ་ར་ཁྱོད་ཀྱིས་ལེགས་པར་ཞ་ུབ་དེ་ནི་བདག་དོན་དུ་ལེགས་སོ། །ཁྱོད་ཀྱིས་དྲི་བ་ལྔ་དྲིས་པ་ནི་གཞན་དོན་དུ་ཤིན་ཏུ་ལེགས་སོ། །དེས་ན་ལན་ཀྱང་འདི་ལྟ་སྟེ། ཞེས་གནང་བ་ཐོབ་པའོ།།

གཉིས་པ་རྒྱུད་དོན་རྒྱས་པ་དངོས་ལ་བཞི་སྟེ། དྲི་བ་དང་པོའི་ལན་སྔགས་བྱུང་ཚུལ་བཅུ་གཉིས་སུ་འབྱུང་བ། དྲི་བ་གཉིས་པའི་ལན་གདམས་ངག་གསུམ་བསྟན་པ། དྲི་བ་གསུམ་པའི་ལན་རྣམ་ཐར་གྱི་ཐེག་པའི་བསྡུ་ལུགས། དྲི་བ་བཞི་པ་དང་ལྔ་པའི་ལན་ཐུན་མོང་དུ་དམ་པའི་རིགས་ཅན་གྱིས་བྱེད་པར་བསྟན་པའོ། །དང་པོ་ནི།

དེ་ཁོ་ན་ཉིད་ངེས་པའི། ཞེས་པ་ནས། དྲི་བ་དང་པོའི་རྟོག་པ་ཡོངས་སུ་ཆད་དོ། །ཞེས་པའི་བར་གྱིས་བསྟན་ཏེ།

དེ་ཁོ་ན་ཉིད་ངེས་པའི་ཐེག་པ་ཆེན་པོ་སྟེ། གནས་སྐབས་གཉིས་དང་བཅུར་བྱུང་བ་སྟེ། ༡༽གང་དུ་རྨོངས་པ་གདུང་བ་སེལ་བ་ན་ཡང་འབྱུང་། ༢༽གང་འཇིག་རྟེན་གྱི་སྒྲོན་མ་ཡོངས་སུ་བཀོད་པ་ན་འབྱུང་། ༣༽གང་གི་ངེས་པ་རྙེད་པ་ན་འབྱུང་། ༤༽སྙིང་པོ་བྱང་ཆུབ་ཉིད་དུ་ངེས་པ་ན་ཡང་འབྱུང་། ༥༽དགོངས་པ་ངེས་པར་འགྲེལ་པ་ན་ཡང་འབྱུང་། ༦༽འདུལ་བའི་སྐབས་ལ་བབ་པའི་ཆེད་ན་ཡང་འབྱུང་། ༧༽བྱིན་གྱིས་རླབས་ལས་སྣང་བ་ན་ཡང་འབྱུང་། ༨༽བརྒྱུད་པ་ཐབས་ཀྱིས་གྲགས་པ་ན་ཡང་འབྱུང་། ༩༽གང་གི་ཆེད་དུ་མཛད་པ་ན་ཡང་འབྱུང་། ༡༠༽ལུང་ཆེན་ངེས་པར་བསྟན་པ་ན་ཡང་འབྱུང་། ༡༡༽ལས་རྒྱུད་ཡོངས་སུ་གཅོད་པ་ན་ཡང་འབྱུང་། ༡༢༽དགོངས་པ་རྣམ་པར་བགྲོ་བ་ན་ཡང་འབྱུང་སྟེ། དེ་དག་ནི་ཐམས་ཅད་ཀྱི་ཐམས་ཅད་ནས་ཐམས་ཅད་དུ་ཀུན་ཏུ་ཡོངས་སུ་རྣམ་པར་སྣང་ངོ་། །སྣང་བར་འགྱུར་ཏོ། །སྣང་བར་འགྱུར་རོ། །ཞེས་བཀའ་སྩལ་པས།

དྲི་བ་དང་པོའི་ཡོངས་སུ་རྟོག་པ་ཆད་དོ།།

དེ་ཁོ་ན་ཉིད་ངེས་པའི་9གསང་སྔགས་ཀྱི་ཐེག་པ་ཆེན་པོ་དེ་བློ་ཆེ་ཆུང་གི་དུས་དང་བསྟན་པ་གཉིས་ཀར་འགྱུར་བས་གནས་སྐབས་གཉིས་དང་བཅུར་འབྱུང་བ་སྟེ་དེ་ལས་གཞན་དུ་མི་སྲིད་དོ། །དེས་ན་བཅུ་གཉིས་པོ་ནི་དུས་ཀྱི་ངོ་བོ་སྟེ་དེ་རྣམས་ལ་གང་འབྱུང་བ་ནི་རྒྱུད་གཅིག་པོ་འདི་ཡི་དོན་ཁོ་ན་སྟེ་གསང་སྔགས་ཀྱི་ཐེག་པ་ཐམས་ཅད་ཀྱི་བདག་ཉིད་དོ། །དེའི་ཕྱིར་ཞིང་འདིར་ཡང་སྟོན་པ་ཤཱཀྱ་ཐུབ་པས་དུས་འདི་དག་ཏུ་འབྱུང་བར་སྤྱིའི་ལོ་རྒྱུས་ཀྱི་ཚུལ་དུ་བཤད་གཞིར་གསུངས་པས་ཕྱིས་སོ་སོར་བཤད་དེ་དོན་གསལ་བར་འབྱུང་བར་ལུང་སྟོན་པར་སྨོས་ཏེ། མ་ལ་ཡའི་རྩེ་ལ་གང་རྨོངས་པ་དམན་པའི་ལུས་ཅན་རྣམས་ཀྱིས་གདུང་བ་ཉི་ཤུ་རྩ་གསུམ་བཏོན་པ་དེ་དག་གསང་བ་པས་སེལ་བའམ་བསལ་བའི་དུས་ཀྱི་ཚེ་ན་ཡང་གསང་སྔགས་འབྱུང་ངོ༌། །དེའི་དོན་ལེའུ་དྲུག་པ་ཡན་ཆད་ཀྱིས་སྟོན་ཏོ། །རྡོ་རྗེ་༼༣༩༽སེམས་དཔའི་སྤྲུལ་པའི་ཞིང་ཁམས་སོ་སོར་གང་འདུལ་གྱིས་འཇིག་རྟེན་གྱི་སྒྲོན་མ་ཡོངས་སུ་བཀོད་དེ་ཆོས་སྟོན་པའི་སྤྲུལ་པ་རྣམས་མྱ་ངན་ལས་འདས་པའི་རྗེས་ཐོག་གི་དུས་ན་ཡང་གསང་སྔགས་འབྱུང་ངོ༌། །དེའི་དོན་ལེའུ་བདུན་པ་དང་བརྒྱད་པས་སྟོན་ཏོ། །དམ་པའི་ཁྱེའུ་ལྔ་ལ་སོགས་པ་གང་གིས་གསང་སྔགས་ཀྱི་དོན་ལ་ངེས་པ་རྙེད་དེ་ཐ་མའི་དབུགས་ཆེན་པོ་ཕྱིན་པ་ན་ཡང་འབྱུང་བ་ནི་བསྐལ་པ་མངོན་དགའི་དུས་ཏེ། དེའི་དོན་ལེའུ་དགུ་པ་ནས་བཅུ་བཞི་པའི་བར་གྱིས་བསྟན་ཏོ། །སྐྱེས་བུ་དམ་པ་ཐུབ་དཀའ་གཞོན་ནུ་ལ་སོགས་པ་སྙིང་པོ་བྱང་ཆུབ་ཉིད་དུ་སོན་ཏེ་ངེས་པ་རྙེད་པའི་དུས་ན་ཡང་འབྱུང་སྟེ་དེ་ནི་ལེའུ་བཅོ་ལྔ་པ་ཉིད་ཀྱི་སྟོན་ཏེ་རུ་ཏྲ་སྣང་བའི་བསྐལ་པ་དང་གཅིག་གོ །དེ་བཞིན་གཤེགས་པ་ཐམས་ཅད་ཀྱི་དགོངས་པ་སྙིང་པོ་བྱང་ཆུབ་ཀྱི་དོན་སྐྱེ་བ་བཞིས་ངེས་པར་འགྲེལ་པ་གང་གི་དུས་ན་ཡང་འབྱུང་སྟེ། ལེའུ་བཅུ་དྲུག་པ་ནས་བཅུ་དགུ་པའི་བར་གྱིས་སྟོན་ཏོ། །དགེ་སློང་ཐར་པ་ནག་པོ་རུ་ཏྲར་གྱུར་ཏེ་རྩལ་ཆེན་པས་གདུལ་བྱའི་ཡུལ་དེ་ཐབས་ཀྱིས་གདུལ་བའི་སྐབས་ལ་བབ་པའི་དགོས་ཆེད་ཁྱད་པར་ཅན་དུ་གྱུར་པའི་དུས་ན་ཡང་གསང་སྔགས་འབྱུང་སྟེ། ལེའུ་ཉི་ཤུ་པ་ནས་སོ་གཅིག་པའི་བར་གྱིས་བསྟན་ཏོ། །སྐུ་གསུང་ཐུགས་དང་སྤྱོད་པའི་བྱིན་གྱིས་བརླབས་ལས་འབྲས་བུ་མངོན་པར་སྣང་བ་དེའི་ཚེ་ན་ཡང་འབྱུང་སྟེ། སོ་གཅིག་པ་ནས་སོ་ལྔ་པའི་བར་གྱིས་བསྟན་ཏོ། །གསང་བའི་བདག་པོས་དགོངས་པ་དང་ཚིག་གིས་བརྒྱུད་པ་ཐབས་ལ་མཁས་པའི་ཁྱད་པར་གྱིས་སྔགས་སྤྱོད་པའི་ལོ་རྒྱུས་ཀྱི་སྒོ་ནས་ལྷ་མིའི་འཇིག་རྟེན་དུ་ཡོངས་སུ་གྲགས་པ་ཉིད་ཀྱི་དུས་ན་ཡང་འབྱུང་སྟེ། ལེའུ་སོ་དྲུག་པ་ནས་སོ་བརྒྱད་པའི་བར་གྱི་གསལ་བར་སྟོན་ཏོ། །གྲོང་ཁྱེར་གསུམ་གང་གི་ཆེད་དུ་ཡུལ་དང་མཐུན་པར་མཛད་པ་བཞི་སྣང་ཞིང་དོན་མཛད་པའི་ཚེ་ན་ཡང་འབྱུང་སྟེ། སོ་དགུ་པ་ནས་ཞེ་གཉིས་པའི་བར་གྱིས་སྟོན་ཏོ། །རྒྱལ་བ་རྣམས་ཀྱིས་ཉིད་ཀྱི་བསྟན་པ་རེ་ལ་གསང་སྔགས་ཕྱིས་འབྱུང་བར་ལུང་ཆེན་ངེས་པར་བསྟན་པ་གང་གི་ཚེ་ན་ཡང་འབྱུང་སྟེ། ལེའུ་ཞེ་གསུམ་པས་གསལ་བར་སྟོན་ཏོ། །ཐེག་པ་གསུམ་གྱིས་གདུལ་བྱ་གསུམ་གྱི་ལས་གསུམ་གྱི་རྒྱུད་གདུལ་ཐབས་གསུམ་གྱིས་ཡོངས་སུ་གཅོད་པ་དེའི་དུས་ན་ཡང་འབྱུང་སྟེ། ལེའུ་ཞེ་བཞི་པས་གསལ་བར་སྟོན་ཏོ། །མ་ལ་ཡར་གསང་བའི་བདག་པོས་རྒྱལ་བ་ཀུན་གྱི་དགོངས་པ་འདུས་པའི་མདོ་ཆེན་པོ་རྣམ་༼༤༠༽པར་བགྲོ་ཞིང་གསུངས་པ་གང་གི་ཚེ་ན་ཡང་གསང་སྔགས་འབྱུང་སྟེ། དེའི་དོན་ལེའུ་ཞེ་ལྔ་པ་ནས་དོན་ལྔ་པའི་བར་གྱིས་གསལ་བར་སྟོན་ཏོ། །དེ་དག་ནི་སྔར་འདས་པའི་དུས་ཐམས་ཅད་ཀྱི་ཚེ་དང༌། ད་ལྟར་གྱི་དུས་ཐམས་ཅད་ནས་མ་འོངས་པའི་དུས་ཐམས་ཅད་དུ་ཞིང་ཀུན་ཏུ་གདུལ་བྱ་རྣམས་ལ་ཡོངས་སུ་གྲགས་ཏེ། སྔར་རྣམ་པར་སྣང་ངོ༌། །ད་ལྟ་སྣང་བར་གྱུར་ཏོ། །མ་འོངས་པ་ན་སྣང་བར་འགྱུར་རོ། །དེ་ལྟ་བས་ན་དུས་གསུམ་ཀར་བྱུང་ཚུལ་བཅུ་གཉིས་ཚང་བའི་དབང་གིས་གསང་སྔགས་ཀྱི་ཐེག་པ་མཆོག་ཉིད་འབྱུང་བའི་ཕྱིར། ད་ལྟར་གྱི་དུས་འདིར་ཡང་བྱུང་ཚུལ་བཅུ་གཉིས་ཀྱི་ཚུལ་མཛེས་པ་ལས་བསྟན་པ་དམ་པ་འདི་ཉིད་སྣང་བར་འཇལ་ཏོ། །དེ་ཅིའི་ཕྱིར་ཞེ་ན། བྱུང་ཚུལ་དང་པོའང་བསྐལ་པ་འདི་ཉིད་ལ་མ་ལ་ཡའི་རྩེར་གདུང་བ་བསལ་ལོ། །གཉིས་པའི་སྒྲོན་མའང་ཞིང་འདིར་ཐུབ་པའི་དབང་པོས་བཀོད་དེ་ཐེག་ཆེན་གསང་སྔགས་ཀྱི་བྱུང་ཚུལ་དང་འབྲེལ་དགོས་པས་རྩ་རྒྱུད་ཞལ་ནས་གསུངས་པའང་གསལ་ལོ། །གསུམ་པ་ཁྱེའུ་ལྔ་སངས་རྒྱས་ཏེ་ངེས་པ་ཆེན་པོ་རྙེད་པའང་བསྐལ་པ་འདི་ཉིད་དེ། སྙིང་པོའི་གླེང་གཞི་ལྟར་གཅིག་དང་དུ་མ་བྲལ་བས་གནད་ཀྱིས་ཤེས་པར་བྱ་སྟེ་གཞུང་གི་དགོངས་པར་ཡང་གསལ་ལོ། །བཞི་པ་ཁྱེའུ་ལྔས་སྙིང་པོ་བྱང་ཆུབ་ཏུ་ངེས་པས་འགྲོ་བའི་གཉེན་པོར་གྱུར་པའང་དུས་འདིའོ། །ལྔ་པ་ཁྱེའུ་ལྔའམ་སྐྱེས་བུ་དམ་པ་ཉིད་དུ་ངེས་པ་དག་དགོངས་པ་ངེས་པར་འགྲེལ་པའང་དུས་འདི་ལ་གོང་དང་མཚུངས་པར་བཅུ་དྲུག་པའི་སྟོད་ན་གསལ་ལོ། །དྲུག་པ་རུ་ཏྲ་མ་ལ་ཡའི་རྩེ་ལ་དུས་འདི་ཉིད་ལའང་བབ་བོ། །བདུན་པ་བྱིན་རླབས་ཀྱང་རུ་ཏྲ་ལ་སོགས་པ་འབྲས་བུ་ཐོབ་པའི་ཕྱིར་ཐུབ་དཀའི་བྱིན་རླབས་སྣང་བར་བསྟན་པའང་གཅིག་དང་དུ་མ་བྲལ་བའི་ཚུལ་གྱིས་བསྐལ་པ་འདི་ཉིད་དོ། །བརྒྱད་པའང་སྙིང་པོ་བྱང་ཆུབ་ནས་དགོངས་པས་བརྒྱུད་པའི་རྒྱལ་ཚབ་སྐྱེས་བུས་འཇིག་རྟེན་དུ་གྲགས་པའང་དུས་འདི་ཉིད་ན་འབྱུང་ངོ༌། །དགུ་པ་གྲོང་ཁྱེར་གསུམ་གྱི་ཆེད་དུ་མཛད་པ་བཞི་བསྐལ་པ་འདི་ལའང་མཛད་དོ། །བཅུ་པ་རྒྱལ་བ་ཐུབ་པའི་དབང་པོས་ལུང་བསྟན་པའང་འདི་ཉིད་ལས་གསུངས་སོ། །བཅུ་གཅིག་པ་མཛད་པ་གསུམ་གྱིས་ལས་རྒྱུད་བསྐལ་པ་འདི་ལའང་བཅད་པའི་ཕྱིར་རོ། །གཅུ་གཉིས་པ་ཐ་མ་སོ་སོའི་དགོངས་པ་ཞིང་སོ་སོ་ནས་བགྲོ་བ་ཡང་ར་ིམ་ལ་༼༤༡༽ཡའི་རྩེར་བགྲོས་པ་དང༌། ལང་ཀས་བསྐུལ་བས་གསང་བ་པས་སྐུ་བཞི་ལས་ཐོས་པའི་དོན་བགྲོས་པའང་བསྐལ་པ་འདི་ཉིད་ཀྱི་ཕྱིར་རོ། །དེ་ལྟ་བས་ན་བསྐལ་པ་གཅིག་ལའང་བྱུང་ཚུལ་བཅུ་གཉིས་ཚང་ངོ༌། །འོ་ན་བསྐལ་པ་གཅིག་ལ་བྱུང་ཚུལ་བཅུ་གཉིས་སྨོས་ཅི་དགོས། གཅིག་གིས་ཆོག་མོད་ཅེས་དྲི་ན། དགོས་པ་སོ་སོར་ངེས་པའི་ཕྱིར་བསྟན་པ་གཅིག་ལའང་དེ་ལྟར་འབྱུང་ངོ༌། །དེ་དག་གི་གཏན་ཚིགས་ནི་སོ་སོའི་ལེའུ་རྣམས་ཀྱི་ཚོམས་བསྡུས་པ་ལས་ཤིན་ཏུ་གསལ་བར་འཆད་པར་འགྱུར་རོ། །འོན་ཀྱང་བྱེ་བྲག་གི་དབང་དུ་དུས་གཅིག་གམ་ཐ་དད་ཞེ་ན། སྟོན་པས་གསུངས་པའི་དུས་གཅིག་ལ། ཚུལ་ཐ་དད་ཡིན་ཞེས་བྱའོ། །དེ་བས་ན་བྱུང་ཚུལ་རང་གི་ངོ་བོ་ལ་ཡང་ལ་ལ་དུས་གཅིག་པའང་ཡོད་ཅིང༌། ལ་ལ་ཐ་དད་པའང་ཡོད་ཅེས་བྱའོ། །དེས་ན་གསང་སྔགས་ཐེག་པ་ཆེན་པོ་ཉིད་ཕྱིས་བསྐལ་པ་འདི་ཉིད་ལ་སྟོན་པའི་རྗེས་ཐོག་ཏུ་འབྱུང་བར་ལེའུ་བདུན་པ་ལས་སྔར་སྟོན་པས་བཀའ་སྩལ་བའི་བྱུང་ཚུལ་ལུང་བསྟན་དུ་གསལ་བས་དེའི་བཤད་རྒྱུད་དུ་ངེས་པའི་ཕྱིར་ཐེ་ཚོམ་དང་པོ་ཆོད་དོ། །སྟོན་པ་གཅིག་མྱ་ངན་ལས་འདས་མ་ཐག་པར་འབྱུང་བ་ལས་བྱུང་ཚུལ་རིལ་སྨོས་པས་ཀྱང༌། དུས་གསུམ་ཀར་འབྱུང་བ་འདི་ལའང་ཚང་བར་མངོན་ནོ། །ཞེས་སྟོན་པས་དེ་ལྟ་བུའི་ཚུལ་གྱིས་ལན་དང་པོ་བཀའ་སྩལ་པས། དྲི་བ་དང་པོ་གསང་སྔགས་མི་འབྱུང་ངམ་སྙམ་པའི་རྟོག་པ་ཡོངས་སུ་ཆད་དེ་ཐེ་ཚོམ་དང་བྲལ་ནས་ངེས་པ་རྙེད་དོ། །དེས་ན་འདི་ཉིད་རྩ་རྒྱུད་དུ་བྱེད་པའི་སྐབས་སུ། འཁོར་ཕལ་པ་བློ་ཆུང་རྣམས་ལ་སྔགས་བྱུང་ཚུལ་གྱི་དུས་སུ་ཕྱིས་འབྱུང་བར་བསྟན་ལ། འཁོར་རིག་འཛིན་ལ་སོགས་པ་བློ་ཆེ་བ་ལ་བྱུང་ཚུལ་བཅུ་གཉིས་པོ་དེ་ཉིད་རྒྱུད་དོན་དུ་བཀའ་སྩལ་པའོ། །དེ་ཡང་བྱུང་ཚུལ་བཅུ་གཉིས་ལ། བྱུང་ཚུལ་བསྡུས་པ་ལས་གསུངས་པ་ལྟར། མཚོན་ཚུལ་ལྔ་རུ་ཤེས་པ་བྱ་སྟེ། སྙིང་པོ་བྱང་ཆུབ་ཀྱི་བྱུང་ཚུལ་དང༌། གདམས་ངག་དཔོག་པའི་བྱུང་ཚུལ་དང༌། དབང་བསྐུར་ཐབས་ཀྱི་བྱུང་ཚུལ་དང༌། ཁྱད་པར་རྩལ་འཕང་གི་བྱུང་ཚུལ་དང༌། རྒྱུད་གནས་ལུགས་ཀྱི་བྱུང་ཚུལ་ལོ། །དང་པོ་ལ་གཉིས་ཏེ། སྙིང་པོ་བྱང་ཆུབ་ཀྱི་གནས་ལུགས་ལ་བྱུང་ཚུལ་བཅུ་གཉིས་ཚུལ་གྱི་རྩི་བ་དང༌། སྙིང་པོ་བྱང་ཆུབ་ཀྱི་རྟོགས་ཚུལ་ལ་སྦྱོར་བའོ། །གཉིས་པ་ནི། སློབ་མ་ལས་དང་སྐལ་བར་འཛོམ་པ་གཅིག་ལ་བླ་མ་དམ་པས་གདམས་ངག་དཔོག་པ་ལ་བྱུང་ཚུལ་བཅུ་༼༤༢༽གཉིས་ཚུལ་གྱི་རྩི་བའོ། །གསུམ་པ་ནི། བླ་མ་དམ་པས་སློབ་མ་སྣོད་ལྡན་ལ་དབང་བསྐུར་བ་ལ་བྱུང་ཚུལ་བཅུ་གཉིས་ཀྱི་ཚུལ་དུ་སྦྱར་བའོ། །བཞི་པ་ནི། ལམ་དང་འབྲས་བུ་སྟེ། ལམ་ལ་བྱུང་ཚུལ་དྲུག་སྟེ། རྨོངས་པ་གདུང་སེལ་དང༌། སྒྲོན་མ་བཀོད་པ་གཉིས་ཚོགས་ལམ་ཡིན་ཏེ། རྨོངས་པ་གདུང་སེལ་ནི་ཚོགས་པའི་སྔོན་དུ་སེམས་བསྐྱེད་པ་ཡིན་པས། དོན་བསྡུས་ཆུང་ངུ་ལས། རྨོངས་པ་གསང་ཕྱིར་སེམས་བསྐྱེད་དེ། །ངོ་མཚར་ཚིག་གིས་འདུ་ཤེས་བསྒྱུར། །ཞེས་སོ། །སྒྲོན་མ་བཀོད་པ་ནི། ལེའུ་བདུན་པ་བསོད་ནམས་ཀྱི་ཚོགས་གསོག བརྒྱད་པ་ཡེ་ཤེས་ཀྱི་ཚོགས་གསོག་པས་ལམ་དངོས་སོ། །གང་གི་ངེས་པ་རྙེད་པ་ནི། རྒྱལ་ཚབ་སྐྱེས་བུ་ཁྱེའུ་ལྔ་བློ་ཆོས་ཉིད་དུ་འབྱོར་བས་སྦྱོར་ལམ་མོ། །སྙིང་པོ་བྱང་ཆུབ་ཏུ་ངེས་པ་ནི་སྟོད་མཐོང་ལམ། སྨད་སྒོམ་ལམ་གྱི་བདག་དོན་ཏེ། བཅོ་ལྔ་པ་ལས། དགོངས་པ་ཆོས་ཉིད་ཀྱི་ནམ་མཁའ་ལ། འགྲེལ་པ་ཡེ་ཤེས་ཀྱི་ཉི་མ་གདལ། ཞེས་སོ། །དགོངས་པ་ངེས་པར་འགྲེལ་པ་ནི། སྒོམ་ལམ་གཞན་དོན་ཏེ། རྒྱལ་བའི་དགོངས་པ་ཆོ་འཕྲུལ་བཞིར་བཀྲལ་བའོ། །གདུལ་བྱ་སྐབས་ལ་བབ་པ་ནི། གཉེན་པོ་རྡོ་རྗེ་ལྟ་བུས་བདུད་བཏུལ་བ་མཐར་ལམ་མོ། །འབྲས་བུ་ལ་བྱུང་ཚུལ་དྲུག་སྟེ། བྱིན་གྱིས་བརླབས་ཀྱི་སྣང་བ་ནི། སྐུ་གསུང་ཐུགས་ཡོན་ཏན་ཕྲིན་ལས་ལྔ་སྟེ་བདག་དོན་གྲུབ་པའོ། །གཞན་དོན་མཛད་པ་ལ་ལྔ་སྟེ། བརྒྱུད་པ་ཐབས་ཀྱི་གྲགས་པ་ནི། ཐབས་ལ་མཁས་པའི་མཛད་པའོ། །གང་གི་ཆེད་དུ་མཛད་པ་ནི། ཡུལ་དང་མཐུན་པའི་མཛད་པའོ། །ལུང་ཆེན་ངེས་པར་བསྟན་པ་ནི། རྨད་བྱུང་ཆེ་བའི་མཛད་པའོ། །ལས་རྒྱུད་ཡོངས་སུ་གཅོད་པ་ནི། ལས་རྒྱུན་གཅོད་པའི་མཛད་པའོ། །དགོངས་པ་རྣམ་པར་བགྲོ་བ་ནི། བསྟན་པ་འཆད་པའི་མཛད་པའོ།།

ལྔ་པ་ནི། དཀྱུས་ཇི་ལྟ་བ་བཞིན་ཏེ། དཔེ་དང་སྦྱར་ན། རྨོངས་པ་གདུང་བ་སེལ་བའི་བྱུང་ཚུལ། མ་རིག་མུན་སེལ་གྱི་ལྟ་བ་མ་དང་བུ་འཕྲད་པར་ལྟ་བུ་སྟེ། ཨ་ནུའི་ལུང་གི་རྩ་བ་དགོངས་པ་གསང་བའི་རྒྱུད་ལས། འགྲོ་གང་གདུང་སེལ་བྱུང་བའི་ཚུལ། །མ་རིག་མུན་སེལ་ལྟ་བ་ནི། །དཔེར་ན་མ་བུ་འཕྲད་པ་བཞིན། །ཞེས་དང༌། རྒྱལ་པོ་ཛཿས་བྱུང་ཚུལ་གསལ་བྱེད་ལས། རྨོངས་པ་གདུང་སེལ་བྱུང་ཚུལ་ནི། །མ་རིག་མུན་སེལ་ལྟ་བ་སྟེ། །མ་བུ་འཕྲད་པ་ལྟར་བཤད་པའོ། །ཞེས་སོ། །སྒྲོན་མ་བཀོད་པའི་༼༤༣༽བྱུང་ཚུལ། ཡེ་ཤེས་རང་གསལ་གྱི་ལྟ་བ་ཉི་མའི་སྙིང་པོ་ལྟ་བུ་སྟེ། གསང་རྒྱུད་ལས། སྒྲོན་མ་བཀོད་པ་བྱུང་བའི་ཚུལ། །ཡེ་ཤེས་རང་གསལ་ལྟ་བ་སྟེ། །དཔེར་ན་ཉི་མའི་སྙིང་པོ་བཞིན། །ཞེས་དང༌། རྒྱལ་པོ་ཛཿ ས། སྒྲོན་མ་ཡོངས་སུ་བཀོད་པ་ནི། །ཡེ་ཤེས་རང་སྣང་ལྟ་བ་སྟེ། །ཉི་མའི་སྙིང་པོ་ལྟར་བཤད་པའོ། །ཞེས་སོ། །གང་གི་ངེས་པ་རྙེད་པའི་བྱུང་ཚུལ། །མ་ནོར་དོན་རྙེད་ཀྱི་ལྟ་བ་དབུལ་མོས་གཏེར་རྙེད་པ་ལྟ་བུ་སྟེ། གསང་རྒྱུད་ལས། ངེས་པ་རྙེད་པ་བྱུང་བ་ནི། །མ་ནོར་དོན་གྱི་ལྟ་བ་སྟེ། །དབུལ་མོ་དག་གིས་གཏེར་རྙེད་བཞིན། །ཞེས་དང༌། རྒྱལ་པོ་ཛཿས། གང་ངེས་རྙེད་པའི་བྱུང་ཚུལ་ནི། །མ་ནོར་ངེས་རྙེད་ཀྱི་ལྟ་བ། །དབུལ་མོས་གཏེར་རྙེད་ལྟར་བཤད་པའོ། །ཞེས་སོ། །སྙིང་པོ་བྱང་ཆུབ་ཏུ་ངེས་པའི་བྱུང་ཚུལ། དེ་ཁོ་ན་ཉིད་ཀྱི་ལྟ་བ་ནམ་མཁའི་དཀྱིལ་ལྟ་བུ་སྟེ། གསང་རྒྱུད་ལས། སྙིང་པོ་བྱང་ཆུབ་དག་ཏུ་ངེས། །དེ་ཉིད་དོན་གྱི་ལྟ་བ་ནི། །ནམ་མཁའ་ལྟ་བུར་བཤད་པའོ། །ཞེས་དང༌། རྒྱལ་པོ་ཛཿ ས། སྙིང་པོ་བྱང་ཆུབ་ཉིད་ངེས་ཚུལ། །དངོས་པོ་ཁོ་ན་ཉིད་ཀྱི་ལྟ། །ནམ་མཁའི་དཀྱིལ་ལྟར་བཤད་པའོ། །ཞེས་སོ། །དགོངས་པ་ངེས་པར་འགྲེལ་པའི་བྱུང་ཚུལ། མ་འདྲེས་ཡོངས་རྫོགས་ཀྱི་ལྟ་བ་རྒྱ་མཚོའི་གཟུགས་བརྙན་ལྟ་བུ་སྟེ། གསང་རྒྱུད་ལས། སངས་རྒྱས་དགོངས་པ་རྣམ་པར་བཀྲོལ། །མ་འདྲེས་པ་ལ་ཡོངས་སུ་རྫོགས། །དཔེར་ན་རྒྱ་མཚོའི་གཟུགས་བརྙན་འདྲ། །ཞེས་དང༌། རྒྱལ་པོ་ཛཿ ས། དགོངས་པ་ངེས་འགྲེལ་བྱུང་ཚུལ་ནི། །མ་འདྲེས་ཡོངས་རྫོགས་ལྟ་བ་སྟེ། །ཆུ་ཡི་ཟླ་བ་ལྟར་བཤད་པའོ། །ཞེས་སོ། །གདུལ་བྱ་སྐབས་ལ་བབ་པའི་བྱུང་ཚུལ། མཚན་མ་རང་ཞིའི་ལྟ་བ་དཔའ་བོས་དགྲ་ཐུལ་བ་ལྟ་བུ་སྟེ། གསང་རྒྱུད་ལས། སྐབས་ལ་བབ་པ་གདུལ་བྱའི་ཚུལ། །མཚན་མའི་རྟོག་པ་རང་ཞིའི་ལྟ། །དཔའ་བོས་གདུལ་དཀའ་ཐུལ་བ་ལྟར། །ཞེས་དང༌། རྒྱལ་པོ་ཛཿ ས། གདུལ་བྱ་སྐབས་བབ་བྱུང་ཚུལ་ནི། །མཚན་མ་རང་ཞིའི་ལྟ་བ་སྟེ། །དཔའ་དགྲ་ཐུབ་པ་ལྟར་བཤད་པའོ། །ཞེས་སོ། །བྱིན་གྱིས་བརླབས་ཀྱི་སྣང་བའི་བྱུང་ཚུལ། བྱིན་རླབས་འབྱུང་བའི་ལྟ་བ་ནམ་མཁའི་ངང་ལས་ཆོ་འཕྲུལ་འབྱུང་བའམ། རྒྱ་མཚོ་ལ་གཟའ་སྐར་ཤར་བ་ལྟ་བུ་སྟེ། གསང་རྒྱུད་ལས། རྒྱལ་བའི་བྱིན་རླབས་སྣང་བའི་ཚུལ། །གང་ཡང་མི་འགོག་སྣང་བ་༼༤༤༽སྟེ། །གཟའ་སྐར་རྒྱ་མཚོར་ཤར་ལྟ་བུ། །ཞེས་དང༌། རྒྱལ་པོ་ཛཿས། བྱིན་རླབས་སྣང་བའི་བྱུང་ཚུལ་ནི། །བྱིན་རླབས་མི་འགག་ལྟ་བ་སྟེ། །རྒྱ་མཚོའི་རྦ་རླབས་ལྟར་བཤད་པའོ། །ཞེས་སོ། །བརྒྱུད་པ་ཐབས་ཀྱི་གྲགས་པའི་བྱུང་ཚུལ། མི་མཐུན་སྐྱོན་སེལ་གྱི་ལྟ་བ་སྟག་མོས་ཚང་སྐྱོན་སེལ་བའམ། ལྡུམ་རའི་དུག་སེལ་བ་ལྟ་བུ་སྟེ། གསང་རྒྱུད་ལས། བརྒྱུད་པ་ཐབས་ཀྱི་གྲགས་པའི་ཚུལ། །མི་མཐུན་པ་ཡི་སྐྱོན་རྣམས་སེལ། །དཔེར་ན་ཚང་ངམ་དེ་སྐྱོན་སེལ། །ཞེས་དང༌། རྒྱལ་པོ་ཛཿས། བརྒྱུད་ཐབས་གྲགས་པའི་བྱུང་ཚུལ་ནི། །མི་མཐུན་སྐྱོན་སེལ་ལྟ་བ་སྟེ། །སྟག་མོ་ཚང་སེལ་ལྟ་བུའོ། །ཞེས་སོ། །གང་གི་ཆེད་དུ་མཛད་པའི་བྱུང་ཚུལ། གྲོལ་བ་དོན་མཐུན་གྱི་ལྟ་བ་སྨན་པ་མཁས་པས་ནད་གསོ་བ་ལྟ་བུ་སྟེ། གསང་རྒྱུད་ལས། གདུལ་བྱ་གང་གི་ཆེད་མཛད་པ། །གྲོལ་བ་དོན་མཐུན་ལྟ་བ་སྟེ། །མཁས་པས་ནད་རྣམས་གསོ་མཛད་བཞིན། །ཞེས་དང༌། རྒྱལ་པོ་ཛཿས། གང་ཆེད་མཛད་པའི་བྱུང་ཚུལ་ནི། །གྲོལ་བ་དོན་མཐུན་ལྟ་བ་སྟེ། །སྨན་པས་ནད་གསོ་ལྟར་བཤད་པའོ། །ཞེས་སོ། །ལུང་ཆེན་ངེས་པར་བསྟན་པའི་བྱུང་ཚུལ། ངེས་པ་ཕྱིས་འབྱུང་གི་ལྟ་བ་བློན་པོ་རིག་པ་ཅན་གྱི་ཁ་ཆེམས་ལྟ་བུ་སྟེ། གསང་རྒྱུད་ལས། བདེ་གཤེགས་ལུང་གིས་ངེས་པར་བསྟན། །གསང་སྔགས་ཕྱིས་འབྱུང་ལྟ་བ་ནི། །ཇི་ལྟར་རིག་པའི་གཏམ་བཞིན་ཏེ། །ཞེས་དང༌། རྒྱལ་པོ་ཛཿས། ལུང་ཆེན་ངེས་བསྟན་བྱུང་ཚུལ་ནི། །ངེས་པ་ཕྱིས་འབྱུང་གི་ལྟ་བ། །བློན་པོ་རིགས་རྒྱུད་ཞལ་ཆེམས་འདྲ། །ཞེས་སོ། །ལས་རྒྱུད་ཡོངས་སུ་གཅོད་པའི་བྱུང་ཚུལ། །བག་ཆགས་རང་དག་གི་ལྟ་བའམ། སྲིད་པ་སྤྱི་བླུགས་ཀྱི་ལྟ་བ་ཁྲུས་མཁན་མཁས་པས་ཁྲུས་བྱས་པ་ལྟ་བུ་སྟེ། གསང་རྒྱུད་ལས། ལས་ངན་མྱུར་དུ་རྒྱུན་གཅོད་པ། །སྲིད་པ་སྤྱི་བླུགས་ལྟ་བ་སྟེ། །དཔེར་ན་ཁྲུས་མཁན་ཁྲུས་བྱེད་བཞིན། །ཞེས་དང༌། རྒྱལ་པོ་ཛཿས། ལས་རྒྱུད་ཡོངས་གཅོད་བྱུང་ཚུལ་ནི། །སྲིད་པ་སྤྱི་བླུགས་ལྟ་བ་སྟེ། །ཁྲུས་མཁན་ཁྲུས་བྱེད་པ་ལྟར་བཤད། །ཅེས་སོ། །དགོངས་པ་རྣམ་པར་བགྲོ་བའི་བྱུང་ཚུལ། དོན་གཏན་ལ་འབེབས་པའི་ལྟ་བ་བླ་བློན་ཚོགས་ནས་རྒྱལ་པོའི་ཆབ་སྲིད་འཛིན་པ་ལྟ་བུ་སྟེ། དགོངས་པ་གསང་བའི་རྒྱུད་ལས། སངས་རྒྱས་དགོངས་པ་བགྲོ་བ་ནི། །ངེས་པར་གཏན་ལ་འབེབས་པར་བྱེད། །རྒྱལ་པོའི་ཆབ་སྲིད་འཛིན་པ་བཞིན། །ཞེས་དང༌། རྒྱལ་པོ་ཛཿས། དགོངས་པ་བགྲོ་བའི་བྱུང་ཚུལ་༼༤༥༽ནི། །ངེས་དོན་གཏན་ལ་འབེབས་པའི་ལྟ། །བླ་བློན་ཚོགས་ནས་གྲོས་བྱེད་འདྲ། །ཞེས་སོ། །དེ་ལྟར་ལེའུ་གཉིས་པ་རྩ་རྒྱུད་དུ་བྱེད་པ་ལ་སྐྱོན་གཞན་མི་རྙེད་ཀྱང༌། འདི་སྐད་བརྗོད་པ་འོང་སྟེ། མདོ་ལ་སོགས་པ་སྔགས་ནང་པ་ཐུན་མོང་མིན་པའི་གཞུང་གིས་སྤྲུལ་སྐུས་མཚན་ཉིད་གསུངས། ལོངས་སྐུས་ཀྲི་ཡོག ཆོས་སྐུས་ནང་པ་གསུམ་གསུངས་པར་བཞེད་པས། ལེའུ་གཉིས་པ་སྤྲུལ་སྐུས་གསུངས་པས་སྔགས་ཀྱི་རྒྱུད་མིན་པའི་སྐྱོན་འོང་ཟེར་ན། སྤྲུལ་སྐུས་མཚན་ཉིད་གསུངས་པ་ལ་སོགས་པ་དེ་ཕྱོགས་རེ་ཙམ་ནས་མཚོན་པ་ཡིན་གྱི། དོན་ལ་རྒྱ་ཆད་པ་མེད་པས་སྤྲུལ་སྐུས་གསང་སྔགས་གསུངས་ཀྱང་མི་སྟོ་སྟེ། སྐུ་གསུམ་དབྱེར་མེད་དུ་བཞུགས་པས་དེར་སྐུ་ཉིད་ཆོས་སྐུ་རུ་སྣང་ནས་བསྐྱེད་རྫོགས་གསུམ་གསུངས་ཏེ། ལེའུ་དྲུག་པ་ནས། མི་བསྐྱོད་རྡོ་རྗེ་ཐུགས་མཆོག་ཀྱང༌། །ཐུགས་རྗེ་སྤྲུལ་པའི་བྱིན་རླབས་ཀྱིས། །འཇིག་རྟེན་ཁམས་ནི་དཔག་མེད་དུ། །མུན་སྣང་རང་བྱུང་རང་ཞི་ཡིན། །ཞེས་སོ། །སྤྲུལ་སྐུའི་ཡང་གསུངས་པར་དོན་བསྡུས་ལས། བྱིན་རླབས་སྐུ་བཞིའི་བསྟན་པ་དག །ཅེས་འབྱུང་ངོ༌། །ཤིན་ཏུ་སྤྲོས་པས་ཆོག་གོ།

སྤྱིར་མདོའི་ལུགས་ལ་རྩ་བཤད་ལ་བཞེད་ཚུལ་གཉིས་ཏེ། ལུང་བསྟན་གྱི་ཆོས་སྐོར་གྱི་ལུགས་ཀྱི་རྒྱུད་འདི་ཉིད་ལ་རྩ་བའི་རྒྱུད་དང༌། རྒྱུད་ཕྱི་མ་དང༌། ཕྱི་མའི་ཕྱི་མ་གསུམ་དུ་བཞེད་དེ། ལེའུ་གཉིས་པ་གདམས་ངག་ངེས་པར་བཞག་པ་ནི། རྩ་བའི་རྒྱུད་དང༌། གསུམ་པ་མན་ཆད་རྒྱུད་ཕྱི་མ་དང་ཕྱི་མའི་ཕྱི་མ་ནི་བཤད་པའི་རྒྱུད་དེ། དོན་བསྡུས་ལས། གདམས་ངག་ལུང་བསྟན་རྩ་བའི་རྒྱུད། །ཅེས་དང༌། བྱུང་ཚུལ་བསྡུས་པ་ལས། གསུམ་པ་ནས་བྱུང་དྲུག་ཅུ་རྩ་ལྔའི་བར། །གཉིས་པའི་རྩ་བ་ལེགས་པར་བཤད་པ་ཡིན། །ཞེས་སོ། །དེའང་ལེའུ་གསུམ་པ་ནས་དྲུག་ཅུ་རྩ་ལྔ་ཡན་ཆད་རྒྱུད་ཕྱི་མ་སྟེ། དེ་ཉིད་ལས། དང་པོའི་དོན་ལས་བྱུང་བས་ཕྱི་མ་སྟེ། །སྔ་མའི་དོན་དེ་གསལ་བས་ཕྱིས་འཆད་ཅིང༌། །འབྲེལ་ཞིང་ཐེ་ཚོམ་གཅོད་དང་དོན་འཆད་པས། །འདི་ནི་རྒྱུད་ཀྱི་ཕྱི་མར་བསྟན་པ་ཡིན། །ཞེས་སོ། །ལེའུ་དྲུག་ཅུ་རེ་དྲུག་པ་ནས་བདུན་ཅུ་དོན་ལྔ་པ་ཡན་ཆད་བསླབ་པའི་མཐའ་བཅུ་ནི་རྒྱུད་ཕྱི་མའི་ཕྱི་མ་སྟེ། དེ་ཉིད་ལས། རྣལ་འབྱོར་ལེགས་པར་སྒྲུབ་ཅིང་ངེས་པར་གནས་པ་ལས། །བསླབ་པའི་མཐའ་བཅུས་དོན་ནི་རྫོགས་པའི་ཕྱིར། །འདི་ནི་ཕྱི་མའི་ཕྱི་མར་བསྟན་པ་ཡིན། །ཞེས་པས་གསལ་ལོ། །འགྲེལ་ཆེན་མུན་པའི་གོ་ཆ་༼༤༦༽ལ་སོགས་པའི་ལུགས་ཀྱིས། ཀུན་འདུས་རྩ་བའི་རྒྱུད། དགོངས་འདུས་བཤད་པའི་རྒྱུད་དུ་བཞེད་དེ། ལེའུ་དང་པོ་ནི་གཏན་ཚིགས་བྱུང་ཁུངས་ཀྱི་གླེང་གཞིའོ། །གཉིས་པར་གདམས་ངག་བཞག་ནས་སྟོན་པ་འདས་པ་ནི་ལུང་བསྟན་བརྒྱུད་པའི་གླེང་གཞིའི་རྒྱུའི་རྒྱུའོ། །ལེའུ་གསུམ་པ་གདུང་བ་བཏོན་པ་ནི་རྒྱུ་དངོས་སོ། །ལེའུ་བཞི་པར་གདུང་བ་སོལ་ཞིག་པར་བསྐུལ་ནས་བསལ་བར་ཞལ་གྱིས་བཞེས་པ་ནི་གླེང་གཞིའི་རྐྱེན་ནོ། །ལེའུ་ལྔ་པའི་སྟོད་ནི་གླེང་གཞི་རང་གི་ངོ་བོའོ། །ལྔ་པའི་སྨད་ནི་རྐྱེན་གླེང་བསླང་བའོ། །དྲུག་པ་མན་ཆད་རྒྱུད་ཀྱི་དོན་བྱུང་ཚུལ་བཅུ་གཉིས་སོ།།

ཟུར་ལུགས་ཀྱི་བླ་མ་དམ་པ་རྣམས་ཀྱང་དེ་ལྟར་བཞེད་དོ། །འདི་ལ་ཀུན་མཁྱེན་ཀཿཐོག་པ་ཆེན་པོས། མདོ་སྔགས་གཞན་གྱི་ལྟོ་དང་སྦྱར་ན། དགོངས་འདུས་ཉིད་ལ་རྩ་རྒྱུད་བཤད་རྒྱུད་དུ་འཐད་པར་གོ་བའོ། །ཞེས་གསུངས་ཏེ། དུར་ཁྲོད་རྨད་བྱུང་གི་རྒྱུད་ལས། ཐོག་མར་གསུངས་པ་རྩ་བའི་རྒྱུད། །ཕྱིས་ནས་གསུངས་པ་བཤད་པའི་རྒྱུད། །མདོ་ཙམ་བརྗོད་པ་རྩ་བ་ལ། །གསལ་བར་བྱེད་པ་བཤད་པའི་རྒྱུད། །ཅེས་སོགས་བཀའ་ལུང་མང་པོ་དང་མཐུན་ཞིང་བྱུང་ཚུལ་བཅུ་གཉིས་ཀྱི་དོན་ཁོ་ན་དྲི་བ་དང་ལན་གྱིས་གསལ་བར་བཤད་པའི་ཕྱིར་འཆད་ཚུལ་བླ་ན་མེད་པའོ། །འོན་ཀྱང་དེ་གཉིས་མཐར་ཐུག་གི་དོན་ལ་དགོངས་གནད་གཅིག་ཏུ་འབབ་སྟེ། དུས་འདིར་ལུང་བསྟན་བརྒྱུད་པའི་བསྟན་པ་དབང་བཙན་པར་བྱ་བའི་ཕྱིར་བཤད་མ་ཐག་པ་ལྟར་ངེས་ཀྱང༌། བྱིན་རླབས་འབྱུང་བའི་བསྟན་པའི་རང་སྐབས་དང༌། ལེའུ་ཞེ་གསུམ་པ་ལུང་ཆེན་ངེས་པར་བསྟན་པའི་རང་དུས་སོགས་དང་སྦྱར་ན། ཀུན་འདུས་རྩ་རྒྱུད་དུ་བཞེད་པའང་གཞུང་གི་དགོངས་པར་གསལ་བའི་ཕྱིར་འགྲེལ་ཆེན་ལས་དེ་ལྟར་གསུངས་པའང་དེ་ཡི་གནད་ཀྱིས་ཡིན་ནོ།།

གཉིས་པ་དྲི་བ་གཉིས་པའི་ལན་གདམས་ངག་གསུམ་བསྟན་པ་ལ་གཉིས་ཏེ། སྤྱིའི་གདམས་ངག་གསུམ་དང༌། སྡོམ་པའི་གདམས་ངག་གོ །དང་པོ་ནི།

དེ་ནས་ཡང་སྟོན་པས། ཞེས་པ་ནས། ཐབས་ཀྱིས་ཟིན་པར་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་སྟོན་པས་དྲི་བ་གཉིས་པ་བཀའ་སྩལ་པ། རིག་པ་འཛིན་པ་ཆེན་པོ་བློ་དང་ལྡན་པར་བྱའོ།།

གྲོས་ཀྱིས་ཆོད་པར་བྱའོ། །ཐབས་ཀྱིས་ཟིན་པར་བྱའོ།།

དེ་ནས་ཡང་སྟོན་པས་དྲི་བ་གཉིས་པ་ལ་ལན་བཀའ་སྩལ་པ། རིག་པ་འཛིན་པ་ཆེན་པོ་ཞེས་བོས་ནས། འཁོར་རྣམས་ལ་སྤྱིའི་གདམས་ངག་གསུམ་གྱི་དོན་བསྟན་ཏེ། བསླབ་པར་བྱ་བ་རྣམས་ལ་སྤྱོད་པས་ཞི་གནས་དང་ཤེས་རབ་ཀྱི་བློ་དང་ལྡན་པར་བྱའོ། །དེ་ནས་ཤེས་རབ་འབྱོངས་ཏེ་རྣོ་མྱུར་ཟབ་ཡངས་ཞིབ་པར་གྱུར་པས། སྐྱེ་བ་མེད་པར་ཇི་༼༤༧༽བཞིན་པར་མཐོང་བའི་གདེང་རྙེད་དེ། ལྷག་མཐོང་གི་གྲོས་ཀྱིས་ཐག་ཆོད་པར་བྱའོ། །དེ་ལྟར་ཐག་ཆོད་པ་ལ་བློ་མི་གཡོ་བར་འཇོག་པས་ཟུང་དུ་འབྲེལ་བའི་སྤྱོད་ལམ་མམ་ལས་ཀྱི་མཐའ་རྣམ་པར་དག་པའི་ཐབས་ཀྱིས་ཟིན་པར་བྱའོ། །ཞེས་པའོ། །རྣམ་པ་གཞན་དུ་ན་ཤེས་རབ་ཀྱི་གདམས་ངག་ཏུའང་མི་འཐད་པ་མ་ཡིན་ནོ།།

གཉིས་པ་སྡོམ་པའི་གདམས་ངག་ལ་གཉིས་ཏེ། མདོར་བསྟན་པ་དང༌། རྒྱས་པར་བཤད་པའོ། །དང་པོ་ནི།

བསམ་པ་དག་པར། ཞེས་པ་ནས། ལེགས་པར་སྤྱད་དོ། །ཞེས་པའི་བར་གྱིས་བསྟན་ཏེ།

བསམ་པ་དག་པར་བྱའོ། །བརྗོད་པ་དྲང་བར་བྱའོ། །སྤྱོད་པ་ལེགས་པར་སྤྱད་དོ།།

འདི་གསུམ་ནི་སྡོམ་པ་སྤྱོད་པའི་གདམས་ངག་གསུམ་སྟེ། ཐུན་མོང་དང་སྦྱར་ན། སྒོ་གསུམ་གཡོ་སྒྱུ་མེད་པས་སེམས་ཀྱི་བསམ་པ་རང་བཞིན་དང་རྣམ་པ་གཉིས་ཀ་དག་པར་བྱའོ། །སྒྲོ་སྐུར་མེད་ཅིང་བསམ་པ་ཇི་བཞིན་དུ་སྨྲ་བས་ངག་གི་བརྗོད་པ་དྲང་པོར་བྱའོ། །བདག་གཞན་གྱི་དོན་དུ་འགྱུར་བ་མ་ཡིན་པ་རྣམ་པར་གནོན་པས་ལུས་ཀྱི་སྤྱོད་པ་ལེགས་པར་སྤྱད་པར་བྱའོ། །ཞེས་པའོ། །ཐུན་མོང་མ་ཡིན་པ་དང་སྦྱར་ན། དྲན་རྟོག་ཐམས་ཅད་དོན་དམ་པར་དེ་བཞིན་ཉིད་རང་བྱུང་གི་ཡེ་ཤེས་སུ་ཤར་བས་ལོག་པར་མི་དམིགས་པ་བསམ་པ་དག་པ། དོན་དམ་པར་བརྗོད་པ་དང་བྲལ་བ་རྒྱལ་བའི་གསུང་ལ་སྐྱོན་བཞི་མ་སྤངས་བྲལ་བར་རྟོགས་པས་བརྗོད་པ་དྲང་པོ། དོན་དམ་པར་རིལ་རྒྱལ་བའི་མཛད་པ་ལ་ལེགས་ཉེས་བྲལ་བ་ནི། སྤྱོད་པ་ལེགས་པར་སྤྱད་པ་སྟེ། དེ་དག་ལ་སྤྱོད་པ་མི་འགོག་ཅིང་འཆིང་བར་སྤྱད་པ་མེད་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། སེམས་ལ་ཤེས་རབ་བསྐྱེད་པའི་གདམས་ངག ངག་ལ་བརྗོད་པ་དྲང་པོའི་གདམས་ངག བྱ་བ་བྱེད་པ་སྤྱོད་པའི་གདམས་ངག་གོ །དང་པོ་ནི།

དོན་བཙལ་བར། ཞེས་པ་ནས། རྙེད་པར་བྱའོ། །ཞེས་པའི་བར་གྱིས་བསྟན་ཏེ།

དོན་བཙལ་བར་བྱའོ། །དགོས་ཆེད་བརྟག་པར་བྱའོ། །ངེས་པ་རྙེད་པར་བྱའོ།།

དེ་ཡང་ཤེས་རབ་ལྟ་བའི་གདམས་ངག་གསུམ་སྟེ། ཐོས་པའི་ཤེས་རབ་ཀྱིས་ཇི་བཞིན་པ་དེ་ཁོ་ན་ཉིད་ཀྱི་དོན་ཐབས་ཁྱད་པར་ཅན་གྱི་གཏན་ཚིགས་ལ་བརྟེན་ནས་བཙལ་བ་ལ་འབད་པར་བྱའོ། །བསམ་པའི་ཤེས་རབ་ཀྱིས་དེ་ལ་དགོས་ཆེད་ཅི་ཡོད་པ་ཐམས་ཅད་ཤེས་པར་བྱས་ཏེ་དོན་ལ་ངེས་པར་བརྟགས་པར་བྱའོ། །སྒོམ་པའི་ཤེས་རབ་ཀྱིས་དེ་ལྟར་བཙལ་བས་ལྟ་བའི་གནད་ཚུད་དེ་གདེང་ལ་ངེས་པ་རྙེད་པས་དོན་མཐོང་བར་བྱའོ། །ཞེས་པའོ།།

གཉིས་པ་ངག་ལ་བརྗོད་པ་དྲང་པོའི་གདམས་ངག་ནི།

བདེན་པར་སྨྲ་བར། ཞེས་པས་ནས། སྨྲས་པ་བཞིན་དུ་བྱའོ། །ཞེས་པའི་བར་གྱིས་བསྟན་ཏེ།

བདེན་པར་སྨྲ་བར་བྱའོ། །ཚིག་མི་འགྱུར་བར་བྱའོ། །ཇི་སྐད་སྨྲས་པ་བཞིན་དུ་བྱའོ།།

ངག་གི་གདམས་ངག་གསུམ་ནི་སྤྱོད་༼༤༨༽པར་འགྱུར་ཏེ། དོན་རྗེས་ཚིག་གིས་འཚོབ་པས་བརྗོད་པ་ཅི་ལའང་རྫུན་པ་སྤངས་ཏེ་བདེན་པར་སྨྲ་བར་བྱའོ། །ཚིག་རྗེས་ཚིག་གིས་འཚོབ་སྟེ་ངག་གི་བརྗོད་པ་བཞིན་ཕྱིས་རྗེས་སུ་སྙོག་པས་ཚིག་མི་འགྱུར་བར་བྱའོ། །ཚིག་རྗེས་དོན་གྱིས་འཚོབ་པས་ངག་གིས་ཇི་སྐད་སྨྲས་པ་བཞིན་དུ་སྒོ་གསུམ་གྱིས་སྤྱོད་པར་བྱ་བའོ།།

གསུམ་པ་བྱ་བ་བྱེད་པ་སྤྱོད་པའི་གདམས་ངག་ནི།

སྒོ་གསུམ་ལ་མཁས་པར། ཞེས་པ་ནས། ཡོངས་སུ་རྟོག་པ་ཆད་དོ། །ཞེས་པའི་བར་གྱིས་བསྟན་ཏེ།

སྒོ་གསུམ་ལ་མཁས་པར་བྱའོ། །སྔགས་གསུམ་ལ་བསླབ་པར་བྱའོ། །གྲོང་ཁྱེར་གསུམ་གཤིག་པར་བྱའོ།།

ཞེས་བཀའ་སྕལ་པས། དྲི་བ་གཉིས་པའི་ཡོངས་སུ་རྟོག་པ་ཆད་དོ།།

བྱ་བ་བྱེད་པ་མདོ་སྔགས་ཐུན་མོང་གི་སྤྱོད་པའི་གདམས་ངག་གསུམ་སྟེ། གང་ལ་བསླབ་པ་ཤེས་པར་བྱ་བའི་ཕྱིར་དཀའ་ཐུབ་སྡོམ་པའི་སྒོ་སྤྱོད་པ་དང༌། རྟོགས་པ་ཤེས་རབ་ཀྱི་སྒོ་ལྟ་བ་དང༌། གོམས་པ་ཏིང་ངེ་འཛིན་གྱི་སྒོ་སྒོམ་པའོ། །གོལ་ས་ཤེས་པར་བྱ་བའི་ཕྱིར་རྩོལ་བས་འཇུག་པའི་སྒོ་དང༌། གྲུབ་པ་ཐབས་ཀྱི་སྒོ་དང༌། མཐར་ཕྱིན་འབྲས་བུའི་སྒོ་མོའོ། །སྤྱིར་ཤེས་པར་བྱ་བའི་ཕྱིར་སྟོང་པ་ཉིད་ཀྱི་རྣམ་པར་ཐར་པའི་སྒོ་དང༌། མཚན་མ་མེད་པའི་སྒོ་དང༌། སྨོན་པ་མེད་པའི་སྒོ་མོ་སྟེ་དེ་ལྟར་སྒོ་གསུམ་ལ་མཁས་པར་བྱའོ། །སྔགས་ཀྱི་སྡེ་སྣོད་གསུམ་ཕྱིས་འབྱུང་བ་ལ་སློབ་པར་གྱིས་ཤིག་པའམ། གནས་སྐབས་བཅུ་གཉིས་སུ་འབྱུང་བའི་གསང་སྔགས་དེ་ཁོ་ན་ཉིད་ཇི་བཞིན་པའི་ངོ་བོ་ལ་གསུམ་གྱི་མིང་གི་རྣམ་གྲངས་ནི། ཡི་གེ་ཨཱ་མཱུྃ་ཧཱུྃ་གི་དོན་གསུམ་སྟེ་རང་བཞིན་ལྷུན་གྱིས་གྲུབ་པ་བདེ་བར་གཤེགས་པའི་སྙིང་པོ་ཉིད་དང༌། ཡེ་ཇི་བཞིན་པ་རིལ་དང་ངོ་བོ་མི་ཕྱེད་པ་དང༌། རྩ་བ་བྱང་ཆུབ་ཀྱི་སེམས་སྤྱོད་ཡུལ་དང་བྲལ་བ་བློས་རེག་དཀའ་བ་དེ་ཉིད་དེ། དེ་དག་ནི་སྔགས་གསུམ་སྟེ་དེ་ལ་ཅིར་ཡང་མི་བསམ་མི་དཔྱད་གཡོ་བ་མེད་དེ། མི་བསྒོམ་པའི་སྒོམ་པ་ལ་བསླབ་པ་མེད་པའི་བསླབ་པར་བྱའོ། །ཡང་ན་ཕྱིས་འབྱུང་བའི་རིག་སྔགས་གསང་སྔགས་གཟུངས་སྔགས་གསུམ་ལ་སློབ་པར་གྱིས་ཤིག་པའམ། མདོ་ཉིད་ལས་གྲགས་པའི་རིག་སྔགས་རང་བཞིན་ལྷུན་གྲུབ། གཟུངས་སྔགས་ཡེ་ཇི་བཞིན་པ། གསང་སྔགས་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཏེ་དེ་ལྟར་སྔགས་གསུམ་ལ་བསླབ་པར་བྱའོ། །དེ་ལྟར་སྒོམ་པས་གོལ་ས་སྒྲིབ་པ་ནི་གྲོང་ཁྱེར་གསུམ་སྟེ། རྒྱུད་ཐ་དད་པས་འདོད་ཁམས་གཟུགས་ཁམས་གཟུགས་མེད་ཁམས་གསུམ་དང༌། རྒྱུད་གཅིག་པས་ལུས་སྣང་བ་འདོད་ཁམས། ངག་ཕྱེད་སྣང་གཟུགས་ཁམས། ཡིད་མི་སྣང་བ་གཟུགས་མེད་ཀྱི་ཁམས་གསུམ་དང༌། ཤེས་པ་རྟོག་པའི་རྒྱུད་ཚོགས་དྲུག་རང་ཡུལ་རྣམས་འདོད་པས་༼༤༩༽འདོད་ཁམས། ཉོན་ཡིད་ངའམ་བདག་གི་བར་རློམས་སེམས་པས་གཟུགས་ཁམས། ཀུན་གཞི་བལྟར་དངོས་སུ་མེད་པས་གཟུགས་མེད་ཁམས་ཏེ་དེ་ལྟར་གྲོང་ཁྱེར་གསུམ་བཤིག་པར་བྱའོ། །འོ་ན་འདིར་གསུམ་ཚོ་ལྔ་ཡོད་པས་གདམས་ངག་གསུམ་དུ་འཇོག་བཏུབ་བམ་ཞེ་ན། དེ་ནི་བཅོ་ལྔར་སྣང་ཡང་རྩ་བའི་དབང་གིས་གསུམ་ཞེས་པ་མི་འགལ་ཏེ་དཔེར་ན་རིམས་ཉིན་བཞི་པའམ། སྦྲུལ་གོམ་པ་བདུན་པ་དང༌། ཤིང་འདབ་མ་བདུན་པ་ལྟ་བུའོ། །དེ་དག་ཀྱང་བློ་ཆུང་བའི་ངོར་རྒྱུའི་ཐེག་པའི་ངེས་པར་བཞག་པ་གསུམ་ཡིན་ཀྱང༌། བློ་ཆེ་བ་ལ། ལེའུ་དྲུག་པ་ལས། རྒྱལ་བའི་དགོངས་པ་ཚིག་གསུམ་པོ། །འཕྲུལ་གྱི་བློ་དང་གྲོས་མཆོག་སྟེ། །ཡུན་གྱི་དོན་སྲིད་ཆེན་པོ་པས། །བློ་གྲོས་དམ་པའི་ཡུལ་དུ་སྣང༌། །ཞེས་དང༌། ལེའུ་ལྔ་བཅུ་ང་དྲུག་པ་ལས། ཀུན་ནས་འདུས་པའི་དགོངས་པ་ཚིག་གསུམ་པོ། །ཡིད་ཆེས་ངེས་པས་བློ་ཡི་གདེངས་སུ་བྱ། །ཚིག་གསུམ་དོན་ལ་ངེས་རྙེད་མངོན་གྱུར་ན། །ངེས་པའི་དོན་ནི་རང་རིག་ཁོ་ནར་ཟད། །ཅེས་གསུངས་པས། གསང་སྔགས་ཐེག་པ་མཆོག་གི་ངོ་བོ་རྩ་བའི་རྒྱུད་ཀྱི་དངོས་གཞི་སྟེ། སྤྲོས་པས་ཆོག་གོ །ཞེས་དེ་སྐད་སྟོན་པས་བཀའ་སྩལ་པས། དྲི་བ་གཉིས་པའི་ཡོངས་སུ་རྟོག་པ་ཆད་དོ།།

གསུམ་པ་དྲི་བ་གསུམ་པའི་ལན་རྣམ་ཐར་གྱི་ཐེག་པའི་བསྡུ་ལུགས་ནི།

དེ་ནས་ཡང་སྟོན་པས། ཞེས་པ་ནས། ཡོངས་སུ་རྟོག་པ་ཆད་དོ། །ཞེས་པའི་བར་གྱིས་བསྟན་ཏེ།

དེ་ནས་ཡང་སྟོན་པས་དྲི་བ་གསུམ་པ་བཀའ་སྩལ་པ། རིག་པ་འཛིན་པ་འདི་ལྟ་སྟེ། ང་ཡིས་སྒྲོན་མ་གང་བཞག་པ། །སྣོད་གསུམ་དག་ཏུ་སྣང་བ་སྟེ། །ཞི་གནས་ལྷག་མཐོང་ལས་མཐའ་གསུམ། །དང་པོར་ཤེས་པའི་རྒྱུད་གསུམ་ལ། །དེ་ནས་ཡི་གེའི་ཚོགས་ཉིད་ལའོ། །ཆེ་ཆུང་རིམ་པའི་བློ་ཡོད་ཕྱིར། །ཐེག་པ་རིམ་པའང་དེ་བཞིན་ཏེ། །བསྡུ་བའང་ཆེ་ཆུང་གཉིས་ཀྱིས་སོ། །རྣམ་པ་གཉིས་ཀྱི་ཁྱད་པར་ལས། །འཇུག་པའི་ཡུལ་ཡང་དེ་ཁོ་ན། །གང་ལ་མོས་པ་དེ་ཉིད་དུའོ། །ཞེས་བཀའ་སྩལ་པས། དྲི་བ་གསུམ་པའི་ཡོངས་སུ་རྟོག་པ་ཆད་དོ།།

དེ་ནས་ཡང་སྟོན་པས་དྲི་བ་གསུམ་པ་ལ་ལན་བཀའ་སྩལ་པ། རིག་པ་འཛིན་པ་ཆེན་པོ་ཞེས་བོས་ནས། དེའི་དོན་ནི་འདི་ལྟ་སྟེ། སྟོན་པ་ཐུབ་པའི་དབང་པོ་ང་ཡིས་ཡི་གེའི་སྒྲོན་མ་བསྟན་པ་ཕུན་སུམ་ཚོགས་པ་གསུམ་དུ་གང་བཞག་པ་དེ་ནི་སྣོད་ཀྱི་རིམ་པ་རབ་འབྲིང་ཐ་མ་གསུམ་དག་ལ་རང་རང་གི་མོས་པ་ལྟར་དུ་སྣང་བ་སྟེ་དེའི་ཕྱིར་སྤྱིའི་ངོ་བོ་ནི་སྡེ་སྣོད་རིན་པོ་ཆེ་རྣམ་པ་གསུམ་དུ་བསྡུའོ། །དེའི་དོན་གྱི་བསྡུ་ལུགས་ནི་ཞི་གནས་ལྷག་མཐོང་ལས་མཐའ་གསུམ་དུ་བསྡུའོ། །དེ་ཡང་འདུལ་བའི་དབང་གིས་དང་པོ་ཤེས་པའི་རྒྱུད་གསུམ་སྒོ་གསུམ་མམ་ཐོས་བསམ་སྒོམ་གསུམ་གྱི་ཤེས་རབ་གསུམ་ལ་བསྡུའོ། །རྣམ་པ་གཞན་དུ་གང་ཟག་གཅིག་གི་ཀུན་གཞི་ཉོན་ཡིད་དེ་ཤེས་པ་གསུམ་ལའང་བསྡུའོ། །འཇུག་པའི་སྐལ་བ་ཆུང་བས་ཡི་གེ་ལ་མ་བརྟེན་པར་མི་གོ་བའི་ཕྱིར་དེ་ནས་ཡི་གེའི་ཚོགས་ཏེ་སྡེ་སྣོད་ཀྱི་གླེགས་བམ་ཉིད་ལའང་བསྡུའོ། །གང་གིས་བསྡུ་ན་གང་ཟག་ལ་ཆེ་ཆུང་གི་རིམ་པའི་བློ་ཡི་ཁྱད་པར་ཡོད་པའི་ཕྱིར་ན་དེ་གཉིས་ཀྱི་ཆེད་དུ་ཐེག་པའི་༼༥༠༽རིམ་པའང་དེ་བཞིན་དུ་མཐོ་དམན་གཉིས་སུ་བྱས་ཏེ། བསྡུ་བའང་བློ་ཆུང་འབྲིང་གི་ངོར་སྣང་བ་ཐེག་པ་ཆུང་ངུ་ཉན་ཐོས་ཀྱིལུགས་སུ་འོད་སྲུང་ལ་སོགས་པས་བསྡུ་བ་དང༌། བློ་ཆེན་པོའི་ངོར་སྣང་བ་ཐེག་པ་ཆེན་པོ་དབུ་མའི་ལུགས་སུ་ཀུན་དགའ་བོའམ་ཕྱག་ན་རྡོ་རྗེ་ལ་སོགས་པ་སོ་སོའི་སྡུད་པ་པོས་ཆེ་ཆུང་གི་རིམ་པ་གཉིས་ཀྱིས་བསྡུ་བས་སོ། །གཞི་གང་ལ་བསྡུ་ན་དེ་ལྟར་བློ་ཆེ་ཆུང་རྣམ་པ་གཉིས་ཀྱི་ཁྱད་པར་ལས་བློ་ཡིས་འཇུག་པའི་ཡུལ་ཐེག་པའི་ཆོས་ཀྱི་རིམ་པ་ཡང་ལྟ་སྤྱོད་ལ་སོགས་པ་མཐོ་དམན་གྱི་ཁྱད་པར། དེ་ཁོ་ན་བཞིན་དུ་བཀའ་སྩལ་པའོ། །དེས་ན་གདུལ་བྱ་རང་རང་གང་ལ་མོས་པ་དེ་ཉིད་དང་མཐུན་པར་འདུལ་བར་འགྱུར་བས་ཆེ་ཆུང་གཉིས་ཉིད་དུ་བསྡུ་བར་བྱའོ། །ཞེས་བཀའ་སྩལ་པས། དྲི་བ་གསུམ་པའི་ཡོངས་སུ་རྟོག་པ་ཆད་དོ།།

བཞི་པ་དྲི་བ་བཞི་པ་དང་ལྔ་པའི་ལན་ཐུན་མོང་དུ་དམ་པའི་རིགས་ཅན་གྱིས་བྱེད་པར་བསྟན་པ་ནི།

དེ་ནས་ཡང་སྟོན་པས། ཞེས་པ་ནས། མྱ་ངན་ལས་འདས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཡང་སྟོན་པས་དྲི་བ་བཞི་པ་དང་ལྔ་པའི་ཚིག་ལེའུ་གཅིག་པ་བཀའ་སྩལ་པ། གཞན་ཡང་དྲི་བ་ཐ་མ་གཉིས། །གཅིག་གིས་ཡོངས་སུ་ཆོད་པར་བྱས། །ཆོས་ཀྱི་སྤུན་དུ་བྱས་པ་ཡི། །རིག་པ་འཛིན་པ་ཁྱོད་ཉོན་ཅིག །སྒྲོན་མ་བྱེད་པའི་བྱ་བ་ཡང་། །སྔོན་དུ་བྱུང་བའི་ལུང་བསྟན་པའི། །འགྲོ་བ་ལུས་ཀྱི་སེམས་དཔའ་དག །བྱུང་ནས་གསལ་བྱེད་ལོག་སུན་འབྱིན། །དེ་སྐད་ཅེས་བཀའ་སྩལ་པས། དྲི་བ་བཞི་པ་དང་ལྔ་པའི་ཡོངས་སུ་རྟོག་པ་ཆད་དེ། ཡོངས་སུ་མྱ་ངན་ལས་འདས་པར་གྱུར་ཏོ།།

དེ་ནས་ཡང་སྟོན་པས་དྲི་བ་བཞི་པ་དང་ལྔ་པ་གཉིས་ཀྱི་ལན་ཚིག་ལེའུ་གཅིག་པ་བཀའ་སྩལ་པ་ནི། ལན་གཞན་ཡང་དྲི་བ་ཐ་མ་གཉིས་ཀྱི་ལན་ཚིག་གཅིག་གིས་ཡོངས་སུ་ཆོད་པར་བྱ་སྟེ། བདེ་གཤེགས་སྙིང་པོས་བསྡུས་པའི་ཆོས་ཀྱི་སྦུན་དུ་བྱས་པ་ཡི། རིག་པ་འཛིན་པ་ཀུཉྫ་ར་ཁྱོད་ཉོན་ཅིག་ཅེས་བོས་ནས་གདམས་ཏེ། སྟོན་པ་སྐུ་མྱ་ངན་ལས་འདས་པའི་འོག་ཏུ་སྟོན་པའི་རྒྱལ་ཚབ་ཀྱི་སྒྲོན་མ་བྱེད་ཅིང་གསང་སྔགས་ཡོངས་སུ་གྲགས་པར་གསུང་པའི་བྱ་བ་ཡང༌། སྐུ་མ་འདས་པའི་སྔོན་དུ་བྱུང་བའི་རྒྱལ་པོ་ཛཿ ལ་ཕྱིས་གསང་སྔགས་འབྱུང་བར་ལུང་བསྟན་པའི་དུས་ལ་བབ་པ་ན། འགྲོ་བ་དམན་པའི་ལུས་ཀྱི་སེམས་དཔའ་ཆེན་པོ་དམ་པའི་རིགས་ཅན་ལྔ་ལ་སོགས་པ་དག་བྱུང་ནས་དྲག་ཤུལ་ཅན་གྱི་རྩེར་གསོལ་བ་བཏབ་པས་གསང་བའི་བདག་པོ་ཕྱག་ན་རྡོ་རྗེ་དངོས་སུ་བྱོན་ཏེ་དེ་དག་ལ་གསང་སྔགས་རྡོ་རྗེའི་ཐེག་པ་ཉིད་ཇི་བཞིན་པར་སྟོན་ཅིང་དེ་དག་གིས་ཀྱང་སོ་སོར་རང་རང་གི་མཐུན་པའི་གནས་རིས་སུ་སྟོན་པར་མཛད་ཅིང་སྤྲོས་ནས་གསལ་བར་བྱེད་པ་དང༌། ལོག་པའི་སྡེ་པའང་སུན་འབྱིན་ཞིང་ཚར་གཅོད་པར་བྱེད་དོ། །འདིའི་ཤུགས་ཀྱིས་པདྨ་ལ་སོགས་པ་ཡང་མཚོན་པར་ཆོས་རྗེའི་ཕྱག་མཆན་ལས་གསུངས་སོ། །དེ་སྐད་ཅེས་བཀའ་སྩལ་པས་དྲི་བ་བཞི་པ་དང་ལྔ་པའི་ཡོངས་སུ་རྟོག་པ་ཆད་དེ་སྟོན་ཟླ་ར་བའི་ཉ་ལ་སྐུ་ཡོངས་སུ་མྱ་ངན་ལས་འདས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

གདམས་ངག་ངེས་པར་གཞག་པའི་ལེའུ་སྟེ་གཉིས་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་ཇི་སྐད་༼༥༡༽གསུངས་པའི་ལན་ལྔ་དང་གདམས་ངག་གསུམ་ངེས་པར་བཞག་པའི་ལེའུ་སྟེ་གཉིས་པ་གསལ་བར་བཤད་པའོ། །ཨེ་མ་རྒྱུད་ལུང་མན་ངག་ཀུན་གྱི་མཛོད། །བསྟན་པའི་དབྱིག་མཆོག་ལུང་ཆེན་འདུས་པ་མདོའི། །བཀའ་ཡི་ངེས་གསང་རྩ་བའི་རྒྱུད་ཆེན་གྱི། །དགོངས་དོན་མན་ངག་ཚད་མས་དེང་འདིར་གསལ། །ཟླ་འོད་ཟེར་གྱིས་ཀུནྡའི་གེ་སར་བཀྲ། །འོད་སྟོང་ལྡན་པས་པད་དཀར་འདབ་བརྒྱ་གྲོལ། །ལུང་རིགས་གསལ་བས་ཆོས་ཀྱི་མེ་ལོང་འགྲེལ། །བློ་མཆོག་ཟབ་དོན་བཞེད་རྣམས་དགའ་བས་ལོངས། །ཞེས་ཀྱང་སྨྲས་སོ།།

ལེའུ་གསུམ་པ་ཐོག་མར་དམ་པས་གདུང་བ་བཏོན་པ།

༈ གཉིས་པ་བཤད་པའི་རྒྱུད་ལ་གསུམ་སྟེ། རྒྱུ་གླེང་གཞི། རྐྱེན་གླེང་བསླང་བ། རྒྱུད་ཀྱི་དོན་དངོས་སོ། །དང་པོ་ལ་གསུམ་སྟེ། གླེང་གཞིའི་རྒྱུ། གླེང་གཞིའི་རྐྱེན། གླེང་གཞི་རང་གི་ངོ་བོའོ། །དང་པོ་ལ་གསུམ་སྟེ། འཁོར་གདུང་བ་ཡོད་མེད་ཀྱི་བྱེ་བྲག སྟོན་པ་འདས་པའི་ཉེས་དམིགས། གདུང་བ་བཏོན་པ་དངོས་སོ། །དང་པོ་ནི།

དེའི་ཚེ། ཞེས་པ་ནས། རྟག་པར་རབ་ཏུ་ངུའོ། །ཞེས་པའི་བར་གྱིས་བསྟན་ཏེ།

དེའི་ཚེ་དེའི་དུས་ན་གང་དག་མི་ཆེན་པོ་རྣམས་ནི་ཡོངས་སུ་གདུང་བ་མེད་པར་ནང་དུ་ཡང་དག་འཇོག་གོ།

བྱིས་པ་རྣམས་ནི་ཡོངས་སུ་གདུང་བར་འགྱུར་ཏེ། བློ་ཡ་ཡ་པོར་གྱུར་ཅིང་ཤིན་ཏུ་བློང་ནས་རྟག་པར་རབ་ཏུ་ངུའོ།།

ལེའུ་འདིས་དྲང་དོན་སྟོན་ལ། བཤད་ཚུལ་རྗེས་སུ་མཐུན་པར་བསྟན་པའི་གླེང་གཞིའི་རྒྱུ་བཤད་པ་ནི། གདམས་ངག་བཞག་ནས་སྐུ་འདས་པ་དེའི་ཚེ་དེའི་དུས་ན་སྐྱེས་བུ་གང་དག་དོན་ལ་ཤེད་བྱེ་བའི་བསོད་ནམས་དང་རྟོགས་པ་ཆེ་བས་མི་ཆེན་པོ་དམ་པའི་རིགས་ཅན་ལྔ་ལ་སོགས་པ་སེམས་དཔའ་ཆེན་པོ་དང་རིག་པ་འཛིན་པ་རྣམས་ནི། སྟོན་པའི་སྐུ་ལ་འདའ་བ་དང་མི་འདའ་མེད་ཅིང་སེམས་ལ་སྐྱེ་ཤི་མེད་པར་ཤེས་པའི་དབང་གིས་ཡོངས་སུ་གདུང་བ་མེད་པར་ནང་དུ་མི་གཡོ་བའི་བསམ་གཏན་ལ་ཡང་དག་པར་མཉམ་པར་འཇོག་གོ །དོན་ཆེན་པོ་ལ་ཤེད་མ་བྱེ་བའི་ཉན་ཐོས་དང་འཇིག་རྟེན་པ་ལ་སོགས་པའི་བྱིས་པ་གཟུགས་སྐུ་སྐྱེ་འཇིག་ཏུ་མཐོང་བའི་ལྟ་བ་ཅན་རྣམས་ནི་སྟོན་པ་སྐུ་འདས་པར་མཐོང་ནས་སེམས་མྱ་ངན་གྱིས་ཡོངས་སུ་གདུང་བར་གྱུར་ཏེ། བློ་འཇིགས་ཤིང་སྐྱི་བུང་བས་ཡ་ཡ་བོར་གྱུར་ཅིང་དྲན་པ་ཉམས་པས་ཤིན་ཏུ་བློང་ནས་རྟག་པར་སྨྲེ་སྔགས་འདོན་ཏེ་རབ་ཏུ་ངུའོ།།

གཉིས་པ་སྟོན་པ་འདས་པའི་ཉེས་དམིགས་ལ་གཉིས་ཏེ། ལོ་ཀ་པ་དང་སངས་རྒྱས་པ་གདུང་བས་ཟིན་པ། གཞན་གྱི་སྡེ་པ་བཅས་ཀའི་ཚིག་སྒྲོགས་པའོ། །དང་པོ་ནི།

འཇིག་རྟེན་པ། ཞེས་པ་ནས། ནག་པོར་གྱུར་ཏོ། །ཞེས་པའི་བར་གྱིས་བསྟན་ཏེ།

འཇིག་རྟེན་པ་ལ་ལ་ནི་ཤི་བ་ལ་ཐུག་པར་གྱུར། ལ་ལ་ནི་བརྒྱལ་ཞིང་འབོག་པར་གྱུར། ལ་ལ་ནི་འཁམས་ནས་རོ་བམ་པ་བཞིན་དུ་གྱུར་ཏོ། །དེ་བཞིན་དུ་ཐམས་ཅད་ཁུ་ཆོ་མང་པོ་ཕ་ཤི་བ་བཞིན་དུ་ཀྱི་ཧུད་ཀྱི་ཧུད་ཅེས་གདུང་བའི་སྒྲ་སྒྲོགས་སོ། །ལྷ་དང་བཅས་པའི་འཇིག་རྟེན་ཡང་སྣོད་ནི་ཡིད་དུ་མི་འོང་བར་འགྱུར་ཏོ། །བཅུད་ཀྱང་སེམས་ཀྱི་དཀྱིལ་འཁོར་མོག་མོག་པོར་གྱུར་ཏོ། །ཆོས་འདི་པར་ཕྱོགས་པ་རྣམས་ནི་མདངས་ནག་པོར་གྱུར་ཏོ།།

འཇིག་རྟེན་པ་ཕལ་པར་གྱུར་པ་ལ་ལ་ནི་ཤིན་ཏུ་གདུང་བས་ཤི་བ་ལ་ཐུག་པར་གྱུར་ལ་ལ་ནི་སྨྲ་ཞིང་འགྱེལ་བས་བརྒྱལ་ཞིང་ལ་ལ་ནི་མི་སྨྲ་བར་འགྱེལ་བས་འབོག་པར་གྱུར། ༼༥༢༽ལ་ལ་ནི་སེམས་ཀྱི་ཁམས་སྟོར་ནས་ལུས་ཀྱི་མདངས་ཉམས་ཏེ་རོ་བམ་པ་བཞིན་དུ་གྱུར་ཏོ། །དེ་བཞིན་དུ་འཁོར་གྱི་ཉན་ཐོས་ཐམས་ཅད་ཀྱང་གུ་ལྗོ་སྟེ་བྱིས་པ་མང་པོ་ཕ་ཤི་བ་བཞིན་དུ་ངག་ནས་ཀྱི་ཧུད་ཀྱི་ཧུད་ཅེས་སྡུག་བསྔལ་གྱིས་གདུང་བའི་སྒྲ་སྒྲོགས་སོ། །ལྷ་དང་བཅས་པའི་འཇིག་རྟེན་ཡང་སྣོད་རྣམས་ནི་རྩི་ཤིང་སྐམས་པ་དང༌། རླུང་དང་ཁ་ཆར་ལ་སོགས་པ་བྱུང་ནས་ཡིད་དུ་མི་འོང་བར་གྱུར་ཏོ། །བཅུད་ཀྱི་སེམས་ཅན་རྣམས་ཀྱང་སྟོན་པ་ལ་མོས་པ་རྣམས་ནི་སེམས་ཀྱི་དཀྱིལ་འཁོར་འཐིབས་ཏེ་མི་གསལ་བས་མོག་མོག་པོར་གྱུར་ཏོ། །སངས་རྒྱས་པའི་ཆོས་འདི་པར་ཕྱོགས་པ་རྣམས་ནི་མི་དགའ་བས་མདངས་ནག་པོར་གྱུར་ཏོ།།

གཉིས་པ་གཞན་གྱི་སྡེ་པ་བཅས་ཀའི་ཚིག་སྒྲོགས་པ་ནི།

བདུད་ཀྱི་ཆ་འཛིན། ཞེས་པ་ནས། སྒྲོགས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

བདུད་ཀྱི་ཆ་འཛིན་ཅིང་གཞན་གྱི་སྡེ་པ་རྣམས་ནི་བཞིན་གྱི་དཀྱིལ་འཁོར་དཀར་པོར་གྱུར་ཏེ།

ཀུན་ཀྱང་བཅས་ཀའི་ཚིག་སྒྲོག་པར་གྱུར་ཏོ།།

སྐུ་འདས་པ་ལ་དགའ་བ་བྱེ་བ་དུང་ཕྱུར་ལ་སོགས་པ་བདུད་ཀྱི་ཆ་འཛིན་ཅིང་གཞན་གྱི་སྡེ་པ་མུ་སྟེགས་བྱེད་རྣམས་ནི། སེམས་དགའ་ནས་བཞིན་གྱི་དཀྱིལ་འཁོར་དཀར་པོར་གྱུར་ཏེ། ཀུན་ཀྱང་གོ་ཏ་མའི་རྡོ་རྗེའི་སྐུ་འདས་ནས་བསྟན་པ་ནི་མེ་ཤི་བའི་དུད་པ་ལྟར་དུ་གྱུར་ཏོ། །ཞེས་ལོག་པར་ལྟ་བས་མི་སྙན་པ་བརྗོད་དེ་བཅས་ཀའམ་ཡ་ཀའི་ཚིག་སྒྲོགས་པར་གྱུར་ཏོ།།

གསུམ་པ་གདུང་བ་བཏོན་པ་དངོས་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས་ལོ་བརྒྱད་དང༌། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

དེ་ནས་ལོ་10བརྒྱད་བརྒྱ་དང་བཅུ་གཉིས་འདས་པ་ན། དམ་པའི་རིགས་ཅན་སེམས་དཔའ་ཆེན་པོ་དག་ནང་དུ་ཡང་དག་འཇོག་ལས་ལངས་པ་དང་། འཇིག་རྟེན་སྟོན་པ་ནུབ་པར་གྱུར་པས་རྨད་ག་ཆད་པར་ངུས་ནས། ཀུན་ཀྱང་རང་རང་གི་མངོན་པར་ཤེས་པས་ལང་ཀའི་ཡུལ་གྱི་གྲོང་བརྡལ་གྱི་མཚོ་གླིང་། རི་མ་ལ་ཡ་གནམ་ལྕགས་ཡོད་པའི་རྩེ་ལ། རྫུ་འཕྲུལ་གྱི་བྱ་བས་མངོན་པར་རབ་ཏུ་འདུས་སོ། །ཡོངས་སུ་འདུས་ནས་འདུས་པ་དེ་ཀུན་ཀྱང་མགྲིན་གཅིག་ཏུ་ཤིན་ཏུ་ཉམ་ཐག་པའི་ང་རོས་སྨྲེ་སྔགས་ཀྱི་གདུང་བ་བཏོན་པ་ནི་འདི་ལྟ་སྟེ།

དེ་ནས་ལོ་བརྒྱད་དང་བཅུ་ཚན་གཉིས་འདས་པ་ན། དམ་པའི་རིགས་ཅན་ལང་ཀའི་བདག་པོ་ལ་སོགས་པ་སེམས་དཔའ་ཆེན་པོ་དག ནང་དུ་ཡང་དག་པར་འཇོག་པ་དགོངས་པའི་ཏིང་ངེ་འཛིན་ལས་ལངས་པ་དང༌། འཇིག་རྟེན་གྱི་སྟོན་པ་ནུབ་པར་གྱུར་པ་མཐོང་བས་སྟོན་པ་མེད་པ་དང༌། བསྟན་པ་ཇི་ལྟར་འགྱུར་དང༌། གདུལ་བྱའི་བྱ་བ་སྒྲུབ་ཚུལ་ལ་སེམས་ཏེ་གཞན་དོན་དུ་ཡུལ་སོ་སོ་ནས་རྨ་ག་ཆད་པ་སྟེ་ཕལ་ཆེ་བར་ངུས་ནས། དེ་ནས་རིག་པ་འཛིན་པ་ཀུན་ཀྱང་གདུང་བ་འདོན་པ་དང་བགྲོ་བའི་ཕྱིར་རང་རང་གི་མངོན་པར་ཤེས་པས། ལང་ཀའི་ཡུལ་གྱི་གྲོང་རྡལ་གྱི་མཚོ་གླིང་ཡོན་ཏན་མང་པོས་མངོན་པར་མཐོ་བའི་རི་མ་ལ་ཡ་གནམ་ལྕགས་ཡོད་པའི་རྩེ་ལ། ཕྱག་ན་རྡོ་རྗེས་གསང་སྔགས་སྟོན་པར་མཐོང་ནས། ས་ལ་འཛུལ་ཞིང་མཁའ་ལ་འགྲོ་བའི་རྫུ་འཕྲུལ་གྱི་བྱ་བས་མངོན་པར་རབ་ཏུ་འདུས་སོ། །ཡོངས་སུ་འདུས་པར་གྱུར་ནས་འདུས་པ་དེ་དག་ཀུན་ཀྱང༌། སེམས་བསྐྱེད་དང་ངག་མཐུན་པས་མགྲིན་གཅིག་ཏུ་ཤིན་ཏུ་ཉམ་ཐག་པའི་ང་རོས། རྒྱལ་བ་རྣམས་ཡིད་ལ་བྱས་ཏེ། སྨྲེ་སྔགས་ཀྱི་གདུང་བ་ཉི་ཤུ་རྩ་གསུམ་བཏོན་པ་ནི་འདི་ལྟ་སྟེ། ཞེས་པའོ།།

གཉིས་པ་རྒྱས་པར་བཤད་པ་ལ་ཉི་ཤུ་རྩ་གསུམ་སྟེ། སྒྲོན་མ་ནུབ་པས་མུན་པ་གང་གིས་སེལ་གདུང་ཞིང་དྲིས་པ། ཚད་མའི་ཞལ་མེད་པས་གཏན་ལ་ཕེབས་སམ་ཞེས་གདུང་བ། ཡེ་ཤེས་ཀྱི་སྤྱན་ཟུམ་པས་ལོག་སྟོབས་མི་འཕེལ་ལམ་ཞེས་གདུང་བ། ཉི་ཟླ་ནུབ་པས་མུན་པར་མི་འཁྱམས་སམ་ཞེས་གདུང་བ། གདུག་པ་སུས་འདུལ་ཞེས་ཞུས་པ། བསྟན་པ་གསལ་བར་སུས་བྱེད་ཞུས་པ། བསླབ་པ་སུས་འཛིན་པར་ཞུས་པ། སློབ་མ་ལ་ལུང་བསྟན་ཇི་ལྟར་འབྱུང་བ་ཞུས་པ། རྩོད་པ་མི་འཕེལ་ལམ་ཞེས་གདུང་བ། བཀའ་བསླད་ཅིང་མི་འཆོས་སམ་ཞེས་གདུང་བ། ཆོས་དང་ནོར་མི་བརྗེའམ་ཞེས་ཞུས་པ། བསྟན་པ་ལ་དགྲ་དར་བར་མི་འགྱུར་རམ་ཞེས་ཞུས་པ། བསྟན་པ་གནས་པའི་ཡུན་དྲིས་པ། དུས་ཇི་ལྟར་འགྱུར་བ་ཞུས་པ། བསྟན་པའི་མཐའ་ཇི་ལྟར་འགྱུར་ཞུས་པ། སློབ་མའི་མཐའ་ཇི་ལྟར་འགྱུར་ཞུས་པ། འདི་ནས་གང་དུ་གཤེགས་ཤིང་གང་ན་བཞུགས་ཞུས་པ། ད་འཇིག་རྟེན་གྱི་མགོན་དུ་གང་འོང་བ་ཞུས་པ། བློ་གྲོས་གང་ནས་བཙལ་ཞུས་པ། ངེས་དོན་གང་ལ་བཟུང་ཞུས་པ། སྐུ་གདུང་ཇི་ལྟར་འབྱུང་ཞུས་པ། སླད་ཀྱིས་མཆོད་གནས་གང་ལ་བྱ་བ་ཞུས་པ། སྟོན་པའི་གདུང་འཚོབ་འབྱུང་ངམ་ཞེས་གདུང་ཞིང་དྲིས་པའོ། །དང་པོ་ནི།

ཨེ་མའོ། ཞེས་པ་ནས། གང་གིས་སེལ། ཞེས་པའི་བར་གྱིས་བསྟན་ཏེ།

ཨེ་མའོ་ཀྱི་ཧུད་ཨེ་མའོ་ཀློང་། །སྟོན་པའི་སྒྲོན་མའི་འོད་ནུབ་ན། །འཇིག་རྟེན་མུན་པ་གང་གི་སེལ།།

འདི་དག་རྒྱུ་དང་རྐྱེན་ཐུན་མོང་དུའང་འགྱུར་ཏེ། བྱང་ཆུབ་སེམས་དཔའ་དེ་དག་ལ་མངོན་ཤེས་ཡོད་པས་སྙིང་པོ་བྱང་ཆུབ་ཀྱི་རྒྱལ་བ་ལ་དོན་གྱིས་བསྐུལ་བར་ཡང་འགྱུར་བའི་ཕྱིར་རོ། །བདག་དོན་དུ་སྡུག་བསྔལ་གྱི་སྒྲ་ཨེ་མའོ་ཀྱི་ཧུད་ཅེས་དང༌། གཞན་དོན་དུ་དྲན་པ་ཉམས་པས་ཨེ་མའོ་བློང་ཞེས་གདུང་བའི་སྨྲེ་སྔགས་ཕྱུང་སྟེ། སྟོན་པ་ཐུབ་པའི་དབང་པོའི་སྒྲོན་མའི་འོད་ཀྱི་སྣང་བ་ནུབ་པར་གྱུར་ན། ཕྱིས་ནས་འཇིག་རྟེན་གྱི་མ་རིག་པའི་མུན་པ་བསྟན་པ་དང་སྟོན་པ་གང་གིས་སེལ་བར་འགྱུར་ཞེས་ཞུས་པའོ། །སྤྱིར་སྟོན་པ་ལ་བཞི་སྟེ་རྒྱལ་ཚབ་རྒྱུད་ཀྱི་སྟོན་པ་མི་ཕམ་བྱམས་པ་མགོན་པོ་ལྟ་བུ། བྱིན་རླབས་སྤྲུལ་པའི་སྟོན་པ་ཐུབ་པ་དྲུག འདྲེན་པ་རང་བྱུང་གི་སྟོན་པ་ཤཱཀྱ་ཐུབ་པ། བསོད་ནམས་རྟེན་གྱི་སྟོན་པ་ལ་གསུམ་སྟེ། སྐུ་དང་ཐུགས་ཀྱི་གཟུགས་བརྙན་གྱི་རྣམ་པ། གསུང་གི་གླེགས་བམ་ཟབ་མོ། དོན་ལ་ལྷག་ཆད་མེད་པར་སྟོན་པའི་གང་ཟག་ཆོས་ཀྱི་མིག་ཅན་རྣམས་ལས་འདིར་གསུམ་པའོ།།

༼༥༤༽གཉིས་པ་ཚད་མའི་ཞལ་མེད་པས་གཏན་ལ་ཕེབས་སམ་ཞེས་གདུང་བ་ནི།

ཚད་མའི་ཞལ། ཞེས་པ་ནས། འགྱུར་ཞིག་གུ །ཞེས་པའི་བར་གྱིས་བསྟན་ཏེ།

ཚད་མའི་ཞལ་དེ་མི་བཞུགས་པས། །ཚད་མ་གསུངས་པའི་བསྟན་པ་ལ། །འཇུག་པར་འཚལ་བའི་འགྲོ་བ་རྣམས།།

ལོག་པར་འཇུག་པར་མི་འགྱུར་རམ། །ཚད་མར་དམ་བཅས་གང་ཟག་གིས། །ངེས་མ་རྙེད་པའི་གང་ཟག་ལ།།

ཕན་པར་བྱ་ཕྱིར་བཀའ་བཀྲོལ་བ། །གཏན་ལ་ཕེབས་པར་འགྱུར་ཞིག་གུ།

བདེན་ཞིང་མི་བསླུ་བས་ཚད་མའི་ཞལ་དེ་མི་བཞུགས་པས། ཉིད་ཀྱི་ཚད་མས་གསུངས་པའི་བསྟན་པ་རིན་པོ་ཆེ་ལ་ཡང་དག་པར་འཇུག་པར་འཚལ་བའམ་འདོད་པའི་འགྲོ་བ་རྣམས་ལྟ་བ་ཇི་ལྟ་བར་རྟོགས་མི་ནུས་པར་ཕྱིན་ཅི་ལོག་པར་འཇུག་སྟེ་གོལ་བར་མི་འགྱུར་རམ། ཚད་མར་དམ་བཅས་པའི་སློབ་མ་གང་ཟག་ཆོས་ཀྱི་མིག་ཅན་དག་གིས་ངེས་པ་མ་རྙེད་པའི་གང་ཟག་སློབ་བུ་གཞན་ལ་ཕན་གདགས་པར་བྱ་བའི་ཕྱིར་སྟོན་པའི་བཀའ་ཡི་དོན་བཀྲོལ་བ་ན། ཇི་བཞིན་དུ་གཏན་ལ་ཕེབས་ནུས་པར་འགྱུར་ཞིག་གུ ཞེས་གདུང་ཞིང་དྲིས་པའོ།།

གསུམ་པ་ཡེ་ཤེས་ཀྱི་སྤྱན་ཟུམ་པས་ལོག་སྟོབས་མི་འཕེལ་ལམ་ཞེས་གདུང་བ་ནི།

ལེགས་ཉེས། ཞེས་པ་ནས། མི་འགྱུར་རམ། ཞེས་པའི་བར་གྱིས་བསྟན་ཏེ།

ལེགས་ཉེས་འབྱེད་པའི་སྤྱན་བཟུམ་པས། །བཀའ་ཉིད་ཁྱད་དུ་གསད་པ་ཡི།།

སྐྱོན་གྱི་སྤྱི་གཙུག་མཐར་ཕྱིན་པས། །ལོག་རྟོགས་འཕེལ་བར་མི་འགྱུར་རམ།།

སྟོན་པ་ལེགས་ཉེས་ཀྱི་ཁྱད་པར་ཅི་བཞིན་དུ་འབྱེད་པའི་ཡེ་ཤེས་ཀྱི་སྤྱན་ཅན་ཟུམ་སྟེ་མི་བཞུགས་པས། མུ་སྟེགས་སོགས་སམ་ལོག་པའི་ང་རྒྱལ་སྐྱེས་ནས་བཀའ་ཉིད་ཁྱད་དུ་གསོད་པ་ཡི་ལོག་པར་ལྟ་བས་སྐྱོན་གྱི་སྤྱི་གཙུག་མཐར་ཕྱིན་པས་མགོ་རྟིང་ལོག་པ་ལྟ་བུར་གྱུར་ཏེ། ལོག་སྟོབས་འཕེལ་བར་མི་འགྱུར་རམ་ཞེས་གདུང་ཞིང་དྲིས་པའོ།།

བཞི་པ་ཉི་ཟླ་ནུབ་པས་མུན་པར་མི་འཁྱམས་སམ་ཞེས་གདུང་བ་ནི།

ལོག་པའི། ཞེས་པ་ནས། མི་འགྱུར་རམ། །ཞེས་པའི་བར་གྱིས་བསྟན་ཏེ།

ལོག་པའི་བསྟན་པའི་སྤྲིན་འཁྲིགས་པས། །བདེན་པ་གཉིས་ཀྱི་ཉི་ཟླ་ནུབ།།

འགྲོ་བ་གང་ཞིག་ལམ་ཚོལ་བ། །མུན་པར་འཁྱམས་པར་མི་འགྱུར་རམ།།

སྟོན་པ་ཚད་མའི་སྐྱེས་བུ་མི་བཞུགས་ན། ཐར་ལམ་ལས་ཕྱིན་ཅི་ལོག་ཏུ་གྱུར་པའི་བསྟན་པ་ངན་པའི་སྤྲིན་འཁྲིགས་པ་ལྟ་བུས་ཁེབས་པས། བསྟན་པའི་དོན་བདེན་པ་གཉིས་ཀྱི་ཉི་ཟླ་ལྟ་བུ་ནུབ་པར་གྱུར་ཏེ་འགྲོ་བ་གང་ཞིག་ཡང་དག་པའི་ལམ་ཚོལ་བ་རྣམས་ཀྱང་མ་རིག་པས་ནོན་ཏེ་མུན་པར་འཁྱམས་པར་མི་འགྱུར་རམ་ཞེས་གདུང་ཞིང་དྲིས་པའོ།།

ལྔ་པ་གདུག་པ་སུས་འདུལ་ཞེས་ཞུས་པ་ནི།

སྟོན་པ། ཞེས་པ་ནས། སུས་འདུལ་འགྱུར། །ཞེས་པའི་བར་གྱིས་བསྟན་ཏེ།

སྟོན་པ་མྱ་ངན་འདས་འོག་ཏུ། །བདུད་དང་སྲིན་པོ་མུ་སྟེགས་དང་།།

གནོད་སྦྱིན་འབྱུང་པོ་མི་མ་ཡིན། །མ་རུངས་གདུག་པ་སུས་འདུལ་འགྱུར།།

སྟོན་པ་མི་འཇིགས་བཞིའི་བདག་ཉིད་མྱ་ངན་ལས་འདས་པའི་འོག་ཏུ་བསྟན་པ་ལ་འཚེ་བའི་ཕྱི་ནང་གི་བདུད་དང་སྲིན་པོ་དང་མུ་སྟེགས་བྱེད་དང༌། གནོད་སྦྱིན་དང་འབྱུང་པོ་དང་མི་མ་ཡིན་གྱི་རིགས་མ་རུང་པའི་གདུག་པ་ཅན་རྣམས་ཕྱིས་སུ་སྟོབས་ཀྱི་མངའ་བདག་སུས་འདུལ་བར་འགྱུར་ཞེས་གདུང་ཞིང་དྲིས་པའོ།།

དྲུག་པ་བསྟན་པ་གསལ་བར་སུས་བྱེད་ཞུས་པ་ནི།

དྲི་མེད། ཅེས་པ་ནས། བྱེད་པར་འགྱུར། །ཞེས་པའི་བར་གྱིས་བསྟན་ཏེ།

དྲི་མེད་བསྟན་པའི་བདུད་རྩི་འདི། །ནུབ་ན་ཤིན་ཏུ་མི་རུང་ན།།

རྩལ་དང་ལྡན་པ་སུ་ཞིག་གིས། །འབར་ཞིང་སྣང་བ་བྱེད་པར་འགྱུར།།

རང་བཞིན་གྱིས་དག་ཅིང་འཁྲུལ་པའི་གཉེན་པོར་གྱུར་པས་དྲི་མ་མེད་པ་བསྟན་པའི་བདུད་རྩི་ཆེན་པོ་འདི་ཉིད་གལ་ཏེ་ནུབ་པར་གྱུར་ན་ཤིན་ཏུ་མ་རུང་བར་ངེས་ན། ཤེས་རབ་ཀྱི་རྩལ་དང་ལྡན་པ་སུ་ཞིག་གིས། གསལ་བར་འབར་ཞིང་ཀུན་ཏུ་སྣང་བར་བྱེད་པར་༼༥༥༽འགྱུར་ཞེས་གདུང་ཞིང་དྲིས་པའོ།།

བདུན་པ་བསླབ་པ་སུས་འཛིན་པར་ཞུས་པ་ནི།

བསླབ་པ། ཞེས་པ་ནས། བྱེད་པར་འགྱུར། ཞེས་པའི་བར་གྱིས་བསྟན་ཏེ།

བསླབ་པ་དམ་པ་རིན་པོ་ཆེ། །བྲལ་ན་ཤིན་ཏུ་མ་རུང་ན།།

སྐྱེས་བུ་དམ་པ་གང་ཞིག་གིས། །ཚུལ་རྣམས་འཛིན་པར་བྱེད་པར་འགྱུར།།

ཤེས་རབ་དང་ཏིང་ངེ་འཛིན་དང་ཚུལ་ཁྲིམས་ཀྱི་བསླབ་པ་དམ་པ་རིན་པོ་ཆེ་རྣམ་པ་གསུམ་པོ་དང་བྲལ་བར་གྱུར་ན་ཤིན་ཏུ་མ་རུང་བར་ངེས་ན། ཕྱིས་སུ་སྐྱེས་བུ་དམ་པ་གང་ཞིག་གིས་བསླབ་པའི་ཚུལ་རྣམས་ཇི་བཞིན་དུ་འཛིན་པར་བྱེད་པར་འགྱུར་ཞེས་གདུང་ཞིང་དྲིས་པའོ།།

བརྒྱད་པ་སློབ་མ་ལ་ལུང་བསྟན་ཇི་ལྟར་འབྱུང་བ་ཞུས་པ་ནི།

སྟོན་པ། ཞེས་པ་ནས། གང་དུ་ཞིག །ཅེས་པའི་བར་གྱིས་བསྟན་ཏེ།

སྟོན་པ་མི་བཞུགས་དེ་རྗེས་ན། །སྟོན་པའི་སློབ་མ་ཇི་སྙེད་པ།།

འཕགས་དང་གང་ཟག་ཐ་དད་པ། །ལུང་བསྟན་འབྱུང་བ་གང་དུ་ཞིག།

སྟོན་པ་ཐུགས་རྗེའི་མངའ་བདག་མི་བཞུགས་པ་དེ་ཡི་རྗེས་ན། སྟོན་པའི་སློབ་མ་གང་ཇི་སྙེད་པ་རྣམས་ཀྱི་ལ་ལ་ས་ནོན་པས་འཕགས་པ་དང༌། ལ་ལ་ཟག་པ་དང་བཅས་པས་གང་ཟག་ཐ་དད་པ་རྣམས་ལ་རང་རང་དང་མཐུན་པར་ལུང་བསྟན་གསལ་བར་འབྱུང་བ་གནས་སྐབས་གང་དུ་སུ་ཞིག་གིས་སྟོན་པར་འགྱུར་ཞེས་གདུང་ཞིང་དྲིས་པའོ།།

དགུ་པ་རྩོད་པ་མི་འཕེལ་ལམ་ཞེས་གདུང་བ་ནི།

བསྟན་པ། ཞེས་པ་ནས། མི་འགྱུར་རམ། །ཞེས་པའི་བར་གྱིས་བསྟན་ཏེ།

བསྟན་པ་ནམ་འཁའ་འདྲ་བ་ལ། །མོས་པ་ཐ་དད་པར་བཟུང་ནས།།

ཡིན་དང་མ་ཡིན་ཆ་འཛིན་ཅིང་། །རྩོད་པ་འཕེལ་བར་མི་འགྱུར་རམ།།

བསྟན་པ་རིན་པོ་ཆེ་ནི་ཕྱོགས་རིས་མེད་པ་ནམ་མཁའ་དང་འདྲ་བ་ཡིན་པ་ལ། རང་རང་གི་མོས་པ་ཐ་དད་པ་ལྟར་ཕྱོགས་རིས་སུ་བཟུང་ནས། རང་གི་ལུགས་ཡིན་པ་དང་གཞན་གྱི་ལྟར་མ་ཡིན་པས་དགག་སྒྲུབ་ཀྱི་ཆ་སོ་སོར་འཛིན་ཅིང་རྩོད་པ་འཕེལ་ཞིང་ཀུན་ཏུ་འཁྲུགས་པར་མི་འགྱུར་རམ་ཞེས་གདུང་ཞིང་དྲིས་པའོ།།

བཅུ་པ་བཀའ་བསླད་ཅིང་མི་འཆོས་སམ་ཞེས་གདུང་བ་ནི།

དེ་ཉིད། ཅེས་པ་ནས། མི་འགྱུར་རམ། །ཞེས་པའི་བར་གྱིས་བསྟན་ཏེ།

དེ་ཉིད་ངེས་པར་རིགས་གཅིག་ལ། །ལུགས་མི་མཐུན་པར་ཐ་དད་སྤྱོད།།

རིགས་གཉིས་ཐ་དད་རིགས་རྣམས་སུ། །བསླད་ཅིང་བཅོས་པར་མི་འགྱུར་རམ།།

བསྟན་པའི་དེ་ཁོ་ན་ཉིད་ངེས་པར་ཐེག་པ་ཆེན་པོ་གསང་སྔགས་སུ་རིགས་གཅིག་པར་གནས་པ་ལ། མི་ཤེས་པ་རྣམས་ཀྱིས་ལུགས་མི་མཐུན་པར་བཟུང་ནས་ཐ་དད་དུ་སྤྱོད་པས་རིགས་གཅིག་ལ་ཐ་སྙད་ཐ་དད་དུ་བཞག་སྟེ་རིགས་སྣ་ཚོགས་རྣམས་སུ་མུ་སྟེགས་པ་ལ་སོགས་པས་བསླད་ཅིང་བཅོས་པར་མི་འགྱུར་རམ་ཞེས་གདུང་ཞིང་དྲིས་པའོ།།

བཅུ་གཅིག་པ་ཆོས་དང་ནོར་མི་བརྗེའམ་ཞེས་ཞུས་པ་ནི།

རིན་ཐང༌། ཞེས་པ་ནས། མི་འགྱུར་རམ། །ཞེས་པའི་བར་གྱིས་བསྟན་ཏེ།

རིན་ཐང་མེད་པའི་རིན་པོ་ཆེ། །མི་མཁས་གང་ཟག་ཐ་དད་པས།།

ཉོན་མོངས་འདོད་པའི་ཁྲིད་དབང་གིས། །དུག་དང་བརྗེ་བར་མི་འགྱུར་རམ།།

རིན་ཐང་ཚད་མེད་པའི་དམ་པའི་ཆོས་རིན་པོ་ཆེ་ཉིད། མི་མཁས་བཞིན་དུ་སློབ་དཔོན་གྱི་གོ་ས་ཐོབ་པའི་གང་ཟག་ཐ་དད་དུ་གྱུར་པས། རང་རྒྱུད་ཉོན་མོངས་དང་འདོད་པས་གཟིར་ཞིང་ཁྲིད་པའི་དབང་གིས་ནོར་རྫས་ཀྱི་དངོས་པོ་རྣམ་སྨིན་དབལ་ཚ་བས་དུག་དང་འདྲ་བ་ལ་བརྗེ་བར་མི་འགྱུར་རམ་ཞེས་གདུང་ཞིང་དྲིས་པའོ།།

བཅུ་གཉིས་པ་བསྟན་པ་ལ་དགྲ་དར་བར་མི་འགྱུར་རམ་ཞེས་ཞུས་པ་ནི།

ཆོས་ཀྱི། ཞེས་པ་ནས། མི་འགྱུར་རམ། །ཞེས་པའི་བར་གྱིས་བསྟན་ཏེ།

ཆོས་ཀྱི་རྒྱལ་པོ་སྟོན་པ་སྟེ། །འདི་སྔོན་ཕན་ཆོད་ཞལ་བཞུགས་ཏེ།།

མ་རུངས་པ་རྣམས་འཚེ་བགྱིད་ན། །གདུག་པར་དར་བར་མི་འགྱུར་རམ།།

ཆོས་ཀྱི་རྒྱལ་པོ་སྟོན་པ་སྟོབས་བཅུའི་དབང་ཕྱུག་༼༥༦༽དེ་ཉིད་དུས་འདི་ཡི་སྔོན་ཕན་ཆད་དུ་ཞལ་བཞུགས་ཏེ་དངོས་སུ་ཆོས་སྟོན་པའི་སྐབས་ནའང་བདུད་དང་མུ་སྟེགས་ལ་སོགས་པས་མ་རུང་པ་རྣམས་ཀྱིས་བསྟན་པ་ལ་འཚེ་བར་བགྱིད་ན། སྟོན་པ་མི་བཞུགས་ན་བསྟན་པ་ལ་ཕྱིའི་དགྲ་གདུག་ཅིང་མི་སྲུན་པ་དར་བ་མི་འགྱུར་རམ་ཞེས་གདུང་ཞིང་དྲིས་པའོ།།

བཅུ་གསུམ་པ་བསྟན་པ་གནས་པའི་ཡུན་དྲིས་པ་ནི།

གང་འདིར། ཞེས་པ་ནས། གནས་པར་འགྱུར། །ཞེས་པའི་བར་གྱིས་བསྟན་ཏེ།

གང་འདིར་བསྟན་པ་གནས་པའི་ཡུན། །ཇི་སྲིད་ཅིག་ཏུ་གནས་པར་འགྱུར།།

ད་ལྟའི་དུས་གང་འདིར་སངས་རྒྱས་ཀྱི་བསྟན་པ་རིན་པོ་ཆེ་འབྱུང་བ་འདི་ཉིད་གནས་པའི་ཡུན་ཅི་སྲིད་ཅིག་ཏུ་གནས་པར་འགྱུར་ཞེས་གདུང་ཞིང་དྲིས་པའོ།།

བཅུ་བཞི་པ་དུས་ཇི་ལྟར་འགྱུར་བ་ཞུས་པ་ནི།

གང་འདིར། ཞེས་པ་ནས། ཇི་ལྟར་འགྱུར། །ཞེས་པའི་བར་གྱིས་བསྟན་ཏེ།

གང་འདིར་སྔར་བྱུང་གང་སྔར་བྱུང་། །ཕྱིས་བྱུང་དུས་འདི་ཇི་ལྟར་འགྱུར།།

ད་ལྟའི་དུས་གང་འདིར་བསྟན་པ་རིན་པོ་ཆེ་འབྱུང་བའང་སྔར་བྱུང་བ་འདས་པའི་དུས་སུ་ཇི་ལྟར་བྱུང༌། ད་ལྟ་གོང་སྔར་བྱུང་ཟིན་པ་འདིའི་དོན་ཇི་ལྟར་འབྱུང༌། ཕྱིས་མ་འོངས་པ་ན་བསྟན་པ་འདི་ནུབ་ནས་གཞན་བྱུང་བའི་དུས་སུ་འདི་ཉིད་ཇི་ལྟར་འགྱུར་ཞེས་གདུང་ཞིང་དྲིས་པའོ།།

བཅོ་ལྔ་པ་བསྟན་པའི་མཐའ་ཇི་ལྟར་འགྱུར་ཞུས་པ་ནི།

སྟོན་པའི། ཞེས་པ་ནས། འགྱུར་ཞིག་གུ །ཞེས་པའི་བར་གྱིས་བསྟན་ཏེ།

སྟོན་པའི་བསྟན་པ་ཐ་མའི་ཚེ། །ངེས་པར་ཇི་ལྟར་འགྱུར་ཞིག་གུ།

སྟོན་པའི་བསྟན་པ་འདི་ཉིད་དུས་ཐ་མའི་ཚེ་ན། ངེས་པར་ནུབ་པའམ་མི་ནུབ་པ་ཇི་ལྟར་དུ་འགྱུར་ཞིག་གུ་ཞེས་གདུང་ཞིང་དྲིས་པའོ།།

བཅུ་དྲུག་པ་སློབ་མའི་མཐའ་ཇི་ལྟར་འགྱུར་ཞུས་པ་ནི།

བསླབ་པ། ཞེས་པ་ནས། འགྱུར་ཞིག་གུ །ཞེས་པའི་བར་གྱིས་བསྟན་ཏེ།

བསླབ་པ་འཛིན་པའི་སློབ་མ་རྣམས། །ཐ་མ་ཇི་ལྟར་འགྱུར་ཞིག་གུ།

བསླབ་པ་གསུམ་དང་བཅུ་པོ་རྣམས་འཛིན་པའི་སློབ་མ་རྣམས། དུས་ཀྱི་ཐ་མ་ལ་ཇི་ལྟར་འགྱུར་ཞིག་གུ་ཞེས་གདུང་ཞིང་དྲིས་པའོ།།

བཅུ་བདུན་པ་འདི་ནས་གང་དུ་གཤེགས་ཤིང་གང་ན་བཞུགས་ཞུས་པ་ནི།

འདི་ནས། ཞེས་པ་ནས། ཇི་ཞིག་སྒྲོགས། །ཞེས་པའི་བར་གྱིས་བསྟན་ཏེ།

འདི་ནས་མྱ་ངན་འདས་འོག་ཏུ། །གང་ལྟར་སུ་ཡི་སྟོན་པར་གཤེགས།།

ཞིང་ཁམས་ཕྱོགས་ནི་གང་ན་བཞུགས། །དེ་ན་བསྟན་པ་ཅི་ཞིག་སྒྲོགས།།

སྟོན་པ་དེ་ཉིད་འདི་ནས་མྱ་ངན་ལས་འདས་པའི་འོག་ཏུ་ཚུལ་གང་ལྟར་གདུལ་བྱ་སུ་ཡི་སྟོན་པར་གཤེགས་ཏེ། ཞིང་ཁམས་ཀྱི་ཕྱོགས་ནི་གང་ཞིག་ན་བཞུགས་ནས་ཞིང་དེ་ན་བསྟན་པ་དམ་པ་ཇི་ལྟ་བུ་ཞིག་སྒྲོགས་པར་མཛད་པ་ལགས་ཞེས་གདུང་ཞིང་དྲིས་པའོ།།

བཅོ་བརྒྱད་པ་ད་འཇིག་རྟེན་གྱི་མགོན་དུ་གང་འོང་བ་ཞུས་པ་ནི།

ད་ཡོང༌། ཞེས་པ་ནས། གང་ཞིག་འགྱུར། །ཞེས་པའི་བར་གྱིས་བསྟན་ཏེ།

ད་ཡོང་འཇིག་རྟེན་མགོན་མེད་རྣམས། །མགོན་དང་སྐྱབས་སུ་གང་ཞིག་འགྱུར།།

སྟོན་པ་མི་བཞུགས་ཀྱང་ད་ཡོང་འཇིག་རྟེན་འདིར་མགོན་སྐྱབས་མེད་པ་རྣམས་ཀྱི་མགོན་དང་སྐྱབས་སུ་རྒྱལ་ཚབ་སྐྱེས་བུ་གང་ཞིག་འབྱུང་བར་འགྱུར་ཞེས་གདུང་ཞིང་དྲིས་པའོ།།

བཅུ་དགུ་པ་བློ་གྲོས་གང་ནས་བཙལ་ཞུས་པ་ནི།

འཕྲུལ་གྱི། ཞེས་པ་ནས། གང་ནས་བཙལ། །ཞེས་པའི་བར་གྱིས་བསྟན་ཏེ།

འཕྲུལ་གྱི་བློ་དང་གྲོས་སྟོར་ན། །བློ་དང་གྲོས་ནི་གང་ནས་བཙལ།།

རིན་ཆེན་འཕྲུལ་གྱི་མེ་ལོང་ལྟ་བུའི་མན་ངག་གི་རྩ་བ་ཞི་བར་གནས་པས་བློ་དང་ལྷག་གེར་མཐོང་བས་གྲོས་དམ་པ་སྟོར་ནས་མ་རྙེད་ན་༼༥༧༽ཀུན་ལ་ཕན་པའི་བློ་དང་གྲོས་ནི་གང་ནས་བཙལ་བར་བྱ་ཞེས་གདུང་ཞིང་དྲིས་པའོ།།

ཉི་ཤུ་པ་ངེས་དོན་གང་ལ་བཟུང་ཞུས་པ་ནི།

ངེས་པའི། ཞེས་པ་ནས། གང་ལ་གཟུང༌། །ཞེས་པའི་བར་གྱིས་བསྟན་ཏེ།

ངེས་པའི་དོན་འདི་མ་རྙེད་ན། །ད་ཡོང་ངེས་དོན་གང་ལ་གཟུང་།།

མན་ངག་གིས་རྟོགས་པར་བྱ་བ་ངེས་པའི་དོན་གྱི་སྙིང་པོ་གསང་བ་དམ་པ་འདི་ཉིད་མ་དད་པ་དང་ཡིད་གཉིས་དང་ལེ་ལོའི་དབང་གིས་ངེས་པར་མ་རྙེད་ན། ད་ཡོང་ངེས་དོན་ཟབ་མོ་གང་ལ་གཟུང་བར་བགྱི་ཞེས་གདུང་ཞིང་དྲིས་པའོ།།

ཉེར་གཅིག་པ་སྐུ་གདུང་ཇི་ལྟར་འབྱུང་ཞུས་པ་ནི།

མཆོད་གནས། ཞེས་པ་ནས། འགྱུར་ཞིག་གུ །ཞེས་པའི་བར་གྱིས་བསྟན་ཏེ།

མཆོད་གནས་ཡིད་རྟེན་མི་བཞུགས་ན།།

སྐུ་གདུང་ཇི་ལྟར་འགྱུར་ཞིག་གུ།

མཆོད་པའི་གནས་དང་ཡིད་མོས་པའི་རྟེན་དུ་གྱུར་པ་སྟོན་པ་འགྲོ་བའི་མགོན་པོ་ཉིད་མི་བཞུགས་ན། བསོད་ནམས་ཀྱི་གནས་སྐུ་གདུང་རིང་བསྲེལ་འབྱུང་ངམ་མི་འབྱུང་ཇི་ལྟར་འགྱུར་ཞིག་གུ་ཞེས་གདུང་ཞིང་དྲིས་པའོ།།

ཉེར་གཉིས་པ་སླད་ཀྱིས་མཆོད་གནས་གང་ལ་བྱ་བ་ཞུས་པ་ནི།

སླད་ཀྱིས་མཆོད་གནས་ཅི་ལ་བགྱི། །ཞེས་པས་བསྟན་ཏེ།

སླད་ཀྱིས་མཆོད་གནས་ཅི་ལ་བགྱི།།

གལ་ཏེ་རིང་བསྲེལ་མ་བྱུང་ན་སླད་ཀྱིས་གུས་པས་མཆོད་གནས་ཅི་ལ་བགྱི་ཞེས་གདུང་ཞིང་དྲིས་པའོ།།

ཉེར་གསུམ་པ་སྟོན་པའི་གདུང་འཚོབ་འབྱུང་ངམ་ཞེས་གདུང་ཞིང་དྲིས་པ་ནི།

ད་ལྟར། ཞེས་པ་ནས། བཏོན་ཏོ། །ཞེས་པའི་བར་གྱིས་བསྟན་ཏེ།

ད་ལྟར་སྟོན་པ་འདས་འོག་ཏུ། །གདུང་འཚོབ་སྐྱེས་བུ་འབྱུང་འགྱུར་རམ།།

ཨེ་མའོ་ཀྱི་ཧུད་ཨེ་མ་ཀློང་། །ཞེས་ཡོངས་སུ་གདུང་བ་བསྟན་ཏོ།།

ད་ལྟར་ཞིང་འདིར་སྟོན་པ་འདས་པའི་འོག་ཏུ་སྟོན་པའི་གདུང་འཚོབ་ནུས་པའི་རྒྱལ་ཚབ་ཀྱི་སྐྱེས་བུ་དམ་པ་འབྱུང་བར་འགྱུར་རམ་ཞེས་དྲིས་ཤིང་ཞུས་ཏེ། ཨེ་མའོ་ཀྱི་ཧུད་ཨེ་མའོ་བློང༌། ཞེས་ཡོངས་སུ་གདུང་བ་བཏོན་ཏོ།།

ལེའུ་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཐོག་མར་དམ་པས་གདུང་བ་བཏོན་པའི་ལེའུ་སྟེ་གསུམ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གསང་སྔགས་ཡོངས་གྲགས་སུ་མ་བྱུང་བའི་ཐོག་མར་བཤད་པའི་རྒྱུད་ཀྱི་གླེང་གཞིའི་རྒྱུར་གྱུར་པ་དམན་པས་མི་སྤོབས་པས་དམ་པས་གདུང་བ་བཏོན་པའི་ལེའུ་སྟེ་གསུམ་པ་རྣམ་པར་བཤད་པའོ།། །།

ལེའུ་བཞི་པ་གང་གི་གདུང་བ་སེལ་བར་བགྲོས་པ།

༈ གཉིས་པ་གླེང་གཞིའི་རྐྱེན་ལ་གཉིས་ཏེ། རྒྱལ་བ་རྣམས་ཀྱི་གསང་བདག་ལ་བསྐུལ་བ། གསང་བདག་གིས་ཞལ་གྱིས་བཞེས་པའོ། །དང་པོ་ལ་གསུམ་སྟེ། གདུང་བ་གསན་ནས་ལྕང་ལོ་ཅན་དུ་འདུས་པ། སྔོན་དམ་བཅས་པའི་སྒོ་ནས་གདུང་བ་སོལ་ཞིག་པར་བསྐུལ་བ། མཐུན་པའི་འདུ་ཤེས་བསྒྱུར་ལ་སྔགས་ལ་ཁོད་ཅིག་པར་བསྐུལ་བའོ། །དང་པོ་ནི།

དེ་སྐད་སྨྲས་ཏེ། ཞེས་པ་ནས། གནས་སུ་འདུས། །ཞེས་པའི་བར་གྱིས་བསྟན་ཏེ།

དེ་སྐད་སྨྲས་ཏེ་གདུངས་པ་ལས། །སྲིད་གསུམ་འགྲོ་བའི་གཉེན་གཅིག་པུ། །རྒྱལ་བ་རྒྱ་མཚོ་རྣམས་ཀྱིས་གསན།།

སྙིང་རྗེའི་བདག་པོ་དེ་དག་ཀུན། །ལྕང་ལོ་ཅན་གྱི་ཕོ་བྲང་དུ། །གསང་བའི་བདག་པོའི་གནས་སུ་འདུས།།

ལེའུ་འདིས་དྲང་དོན་སྟོན་ལ། དེ་ལྟར་གདུང་བ་གསན་པས་དེ་ཉིད་སེལ་བར་བགྲོ་བ་མཛད་ནས་སྟོན་པ་ཕྱག་ན་རྡོ་རྗེ་ལ་བསྐུལ་བའི་རྐྱེན་དུ་གྱུར་བའི་དོན་བསྟན་པའི་ཕྱིར་དེ་སྐད་སྨྲས་ཏེ་གདུང་བ་བཏོན་པ་ལས་སྲིད་པ་གསུམ་གྱི་འགྲོ་བ་མ་ལུས་པ་ལ་ཕན་འདོགས་པའི་གཉེན་གཅིག་པ་ལྟ་བུར་གྱུར་པའི་ཕྱོགས་བཅུའི་རྒྱལ་བ་༼༥༨༽གྲངས་མང་ལ་མི་དཔོགས་པས་རྒྱ་མཚོ་ལྟ་བུ་རྣམས་ཀྱིས་གསན་ནས་སྙིང་རྗེ་གསུམ་དབྱེར་མེད་པའི་རང་གི་ངོ་བོ་མངོན་དུ་གྱུར་པས་སྙིང་རྗེའི་བདག་པོ་དེ་དག་ཀུན་ཀྱང༌། ངེས་པའི་དོན་དུ། གསང་བ་སྒྲ་རྒྱུད་ལས།

དེ་ནས་ལྕང་ལོ་ཅན་གྱི་གནས། །ཀུན་གཟིགས་རྣམ་པར་སྣང་མཛད་ཀྱིས། །འདི་ཉིད་གཟུང་བས་རིགས་ལྔར་སྨིན། །ཞེས་གསུངས་པ་ལྟར་ངེས་ཀྱང༌། དྲང་དོན་དུ། ཉན་ཐོས་མེད་ཅིང་གནོད་སྦྱིན་གོས་སྔོན་ཅན་རྣམས་གདུལ་བས་ལྕང་ལོ་ཅན་གྱི་ཕོ་བྲང་ཉིད་དུ་གཤེགས་ཏེ་གསང་བའི་བདག་པོའི་བཞུགས་གནས་སུ་འདུས་པར་གྱུར་ཏོ།།

གཉིས་པ་སྔོན་དམ་བཅས་པའི་སྒོ་ནས་གདུང་བ་སོལ་ཞིག་པར་བསྐུལ་བ་ནི།

བསྐུལ་བ་ཆེན་པོ། ཞེས་པ་ནས། བསལ་བའི་རིགས། །ཞེས་པའི་བར་གྱིས་བསྟན་ཏེ།

བསྐུལ་བ་ཆེན་པོ་འདི་སྐད་གསུངས། །གསང་བ་པ་ཡི་བདག་པོ་ཁྱོད། །སྔོན་གྱི་གོ་ཆ་ཡལ་ལམ་ཅི། །འཇིག་རྟེན་སྡུག་བསྔལ་མི་ཤེས་སམ། །སྙིང་རྗེའི་ས་ལ་བབས་ནས་ཀྱང་། །འཇིག་རྟེན་གདུང་བ་བསལ་བའི་རིགས།།

དེ་ནས་ཕྱོགས་བཅུའི་རྒྱལ་བས་གསང་བདག་ལ་བསྐུལ་བ་ཆེན་པོ་འདི་སྐད་ཅེས་གསུངས་ཏེ། གསང་བ་པ་ཡི་བདག་པོ་ཁྱོད་ཀྱིས་དང་པོ་བྱང་ཆུབ་མཆོག་ཏུ་སེམས་བསྐྱེད་པའི་དུས་ན་འགྲོ་བའི་སྡུག་བསྔལ་སེལ་བར་དམ་བཅས་པས་སྔོན་གྱི་གོ་ཆ་བསྒོས་པ་ཡལ་ལམ་ཅི་དེ་བས་ན་འཇིག་རྟེན་གྱི་སྡུག་བསྔལ་རྣམས་བརྩོན་པ་དང་དམ་བཅས་ཀྱི་གོ་ཆ་གྱོན་པ་ཁྱོད་ཀྱིས་མི་ཤེས་སམ་ཞེས་ཐུགས་དམ་གནད་ནས་བསྐུལ་ཏེ་ཐུགས་སྙིང་རྗེའི་མངའ་བདག་ཁྱོད་ཉིད་འཛམ་བུའི་གླིང་གི་མི་ཡུལ་གྱི་ས་རི་མ་ལ་ཡ་ལ་བབས་ནས་ཀྱང༌། གསང་སྔགས་བགྲོས་ཏེ་འཇིག་རྟེན་དང་དམ་པའི་རིགས་ཅན་རྣམས་ཀྱི་གདུང་བ་བསལ་བའི་རིགས་སོ། །ཞེས་པའོ།།

གསུམ་པ་མཐུན་པའི་འདུ་ཤེས་བསྒྱུར་ལ་སྔགས་ལ་ཁོད་ཅིག་པར་བསྐུལ་བ་ནི།

སོ་སོའི། ཞེས་པ་ནས། བསྐུལ་བ་ལས། །ཞེས་པའི་བར་གྱིས་བསྟན་ཏེ།

སོ་སོའི་རིགས་ཀྱི་ཆ་བཟུང་ནས། །མ་རུངས་པ་དག་ཀུན་བཏུལ་ཏེ། །འདོད་འཁྲིག་ཐབས་སུ་ཚིག་རྣམས་ཀྱིས།།

ལས་ཀྱི་ཆ་དང་སྤྱོད་མཐུན་པར། །འདུ་ཤེས་བསྒྱུར་བ་བྱས་ནས་ནི། །བཀའ་ཡི་འགྲོ་བ་བཤད་སྦྱར་ནས།།

ཡང་དག་དོན་ལ་དགོད་པའི་རིགས། །དེ་སྐད་རྣམ་པར་བསྐུལ་བ་ལས།།

བདུད་དང་མུ་སྟེགས་ལོག་པའི་ཚོགས་བཏུལ་བ་ལ་གདུལ་བྱ་སོ་སོའི་རིགས་ཀྱི་ཆ་དང་མཐུན་པར་བཟུང་ནས་རྡོ་རྗེའི་རིགས་ཀྱིས་དྲི་ཟ། རིན་ཆེན་རིགས་ཀྱིས་གཤིན་རྗེ་འདུལ་བ་ལ་སོགས་པ་མ་རུངས་པ་དག་ཀུན་ཐབས་འཛུད་བསྲེ་བ་དང་ཆ་མཐུན་སྦྱོར་བས་བཏུལ་ཏེ། ལྡེམ་དགོངས་སྦྱོར་བ་དང༌། འདོད་པ་རང་རྐྱེན་དང་བཀྲི་དྲང་བརྒྱུད་པའི་སྒོ་ནས་རང་རང་གི་འདོད་ཚུལ་དང་མཐུན་པར་ཁྲིད་ནས་དོན་དམ་ངེས་པའི་ཐབས་སུ་གསུང་གི་སྒྲོན་མ་ཚིག་གི་གསང་བ་རྣམས་ཀྱིས་མཚོན་ཞིང༌། ཐབས་འཛུད་བསྲེ་བའི་ལས་ཀྱི་ཆ་དང་མཐུན་འཇུག་གི་སྤྱོད་པ་དང་ཚུལ་མཐུན་པར་སྦྱར་ཏེ། གདུལ་བྱའི་རྒྱུད་ཀྱི་འདུ་ཤེས་ཡང་དག་པར་བསྒྱུར་བ་བྱས་ནས་ནི། གསང་སྔགས་ཐེག་པ་མཆོག་གི་བཀའ་ཡི་བགྲོ་བ་བསྟན་པ་དམ་པ་དེ་ཉིད་བཤད་དེ་ཚུལ་བཞིན་དུ་དོན་གོ་བ་ལ་སྦྱར་བར་བྱས་ནས་ཡང་དག་པའི་དོན་གསང་སྔགས་ཀྱི་ལམ་དང་འབྲས་བུ་ལ་དགོད་པར་བྱེད་པའི་ཐབས་མཆོག་མཛད་པར་༼༥༩༽རིགས་སོ། །ཞེས་དེ་སྐད་རྒྱལ་བ་རྣམས་ཀྱིས་རྣམ་པར་བསྐུལ་བ་ལས། ཞེས་པའོ།།

གཉིས་པ་གསང་བདག་གིས་ཞལ་གྱིས་བཞེས་པ་ལ་གཉིས་ཏེ། སྤྲུལ་པས་ལུང་བསྟན་པ་ལྟར་གསུང་བར་ཞལ་གྱིས་བཞེས་པ། རི་མ་ལ་ཡར་སྔར་གྱི་རྒྱལ་བ་ལྟར་བསྐུལ་བའི་ཚེ་ཞལ་གྱིས་བཞེས་པའོ། །དང་པོ་ནི།

དཔའ་བོ། ཞེས་པ་ནས། བགྲོ་བར་བྱའོ། །ཞེས་པའི་བར་གྱིས་བསྟན་ཏེ།

དཔའ་བོ་རྡོ་རྗེ་འཛིན་རྒྱལ་པོས། །གདུལ་དཀའ་འདུལ་ལ་མཁས་པ་པོ། །འཇིག་རྟེན་ཀུན་ལས་རྒྱལ་བའི་མཆོག།

གསང་བའི་རྟགས་འཛིན་རྡོ་རྗེ་ཅན། །དགྱེས་ཤིང་གདན་ལས་བཞེངས་ནས་ནི། །ཆོ་འཕྲུལ་ཆེན་པོ་ཀུན་བསྟན་ནས། །འཇིག་རྟེན་ལོག་པའི་གཙོ་བོ་རྣམས། །སྐལ་དང་ལྡན་པར་ལུང་བསྟན་པ། །ལས་དང་སྐལ་བར་རབ་ལྡན་ཞིང་། །རྒྱལ་བས་འབྱུང་བའི་ལུང་བསྟན་པའི། །བསོད་ནམས་ཆེན་པོའི་སྐལ་ཅན་རྣམས། །སྤྲུལ་པས་ཇི་ལྟར་ལུང་བསྟན་བཞིན། །ད་ལྟར་དུས་ལ་འདིར་བབ་ཀྱིས། །འཁོར་བའི་སྙིང་པོ་ལུང་བསྟན་ཕྱིར། །ཆོ་འཕྲུལ་རྣམས་ཀྱི་བྱིན་རླབས་ཀྱིས། །བསྟན་པའི་སྙིང་པོ་དམ་པ་ཞིག །ཇི་ལྟར་བཤད་ཅིང་ལུང་བསྟན་བཞིན།།

སྐལ་ལྡན་ཅན་ལ་བགྲོ་བར་བྱའོ།།

མདོར་བསྟན་པའི་ཚུལ་གྱིས་དཔའ་བོ་རྡོ་རྗེ་འཛིན་རྒྱལ་པོ་ཞེས་གསུངས་པ་ཉིད་ཚིག་གསུམ་གྱིས་རྒྱས་པར་བཤད་དེ། བདུད་ལ་སོགས་པ་གདུལ་བར་དཀའ་བ་རྣམས་འདུལ་བའི་ཐབས་ལ་མཁས་ཤིང་ལོག་པའི་དཔུང་ཚོགས་མ་ལུས་པ་བཅོམ་པའི་མཐུ་མངའ་བས་དཔའ་བོ་ཆེན་པོ། འཁོར་བའི་དགྲ་དཔུང་བསྙིལ་བར་མཛད་པས་འཇིག་རྟེན་ཀུན་གྱི་ཉོན་མོངས་བག་ཆགས་དང་བཅས་པ་ལས་རྒྱལ་བའི་མཆོག་ཏུ་གྱུར་པ། རྒྱལ་བ་ཀུན་གྱིས་གསང་བའི་བདག་པོར་དབང་བསྐུར་བའི་རྟགས་སུ་རྡོ་རྗེ་རྒྱ་གྲམ་འཛིན་པས་རྡོ་རྗེ་ཅན་ནམ་རྡོ་རྗེ་འཛིན་པ་ཞེས་སུ་གྲགས་པ་དེ་ཉིད། བདག་དོན་གྱི་དགོངས་པ་མཐར་ཕྱིན་ནས་ཐུགས་རྗེས་གཞན་དོན་ལ་བསྐུལ་བས་དགྱེས་ཤིང༌། དོན་གྱི་གདན་དགོངས་པ་མི་གཡོ་བའམ་རྟགས་ཀྱི་གདན་ལས་བཞེངས་ནས་ནི། སྟོབས་བཅུ་མངའ་བའི་རྟགས་སུ་ཕྱོགས་བཞིར་གོམ་པ་བཅུ་བཅུ་དོར་བས་ས་གཡོ་བ་དང༌། འོད་ཟེར་འགྱེད་པ་དང༌། འོད་ཀྱིས་སྣང་བ་དག་པར་བྱས་ཤིང་ཐམས་ཅད་སྣོད་དུ་རུང་བར་བྱས་པ་དང༌། འོད་ཐམས་ཅད་ཚུར་བསྡུས་པ་ལ་སོགས་པ་ཆོ་འཕྲུལ་ཆེན་པོ་ཀུན་ཏུ་བསྟན་ནས་བྱིན་རླབས་སྣང་བར་མཛད་དེ། སྲིན་པོ་དང་ཀླུ་ལ་སོགས་པ་འཇིག་རྟེན་ལོག་པའི་གཙོ་བོ་དམ་པའི་རིགས་ཅན་རྣམས། སྔགས་ཀྱི་སྐལ་བ་དང་ལྡན་པར་སྤྲུལ་པས་ལུང་བསྟན་པ་བཞིན་དུ་ཚོགས་བསགས་པས་ལས་དག་པ་དང༌། རྒྱུད་སྦྱངས་པས་སྐལ་བ་ཕུན་སུམ་ཚོགས་པར་རབ་ཏུ་ལྡན་པའི་ཕྱིར། རྒྱལ་བ་རྣམ་འདྲེན་དམ་པས་གསང་སྔགས་ཕྱིས་འབྱུང་བར་ལུང་བསྟན་པའི་ཚུལ་དང་མཐུན་པར་སྔགས་ཀྱི་དོན་ལ་ལོངས་སྤྱོད་པས་བསོད་ནམས་ཆེན་པོ་དང་སྐལ་བ་ཆེན་པོ་ངེས་པར་ལྡན་པའི་འཁོར་རྣམས་ཀྱང་མཛོམ་པས་ན། ཐུབ་པ་སྤྲུལ་པའི་སྐུ་ཡིས་བྱུང་ཚུལ་བཅུ་གཉིས་དང་གདམས་ངག་གསུམ་བཀའ་སྩལ་པས་རྩ་རྒྱུད་གསུངས་ཏེ། དེ་དག་གི་དོན་གསལ་བར་ཕྱིས་སུ་བཤད་རྒྱུད་ཀྱིས་བསྟན་པ་ཇི་ལྟར་ལུང་བསྟན་པ་བཞིན་དུ་ད་ལྟའི་དུས་ལ་དེང་འདིར་ངེས་པར་བབ་ཀྱིས། གསང་སྔགས་ཀྱིས་བརྗོད་བྱ་དོན་གྱི་མཚན་ཉིད་འཁོར་བ་ཉིད་མ་སྤང་བར་ཆོས་ཉིད་ཀྱི་སྙིང་པོར་༼༦༠༽ཡེ་ནས་གནས་པར་ལུང་བསྟན་པའི་ཕྱིར། ཆོ་འཕྲུལ་བཞིའི་མངའ་བདག་ཕྱོགས་བཅུའི་རྒྱལ་བ་རྣམས་ཀྱི་བྱིན་རླབས་ཀྱིས་བཤད་པ་ལྟར་སྤྱིར་གསང་སྔགས་ཐམས་ཅད་དང་ཁྱད་པར་དུ་སངས་རྒྱས་ཀུན་གྱི་དགོངས་པ་འདུས་པས་བསྟན་པའི་སྙིང་པོ་དམ་པ་རྨད་དུ་བྱུང་བ་ཞིག་སྔར་ཕྱག་ན་རྡོ་རྗེ་བདག་གིས་རྒྱལ་བ་ཀུན་ལས་ཐོས་པ་བཞིའི་ཚུལ་དུ་ཐོས་ནས་ཇི་ལྟར་བཤད་ཅིང་བསྟན་པ་དེ་ཉིད་ད་ལྟར་ཡང་ལུང་བསྟན་པ་བཞིན་དུ། སྐལ་ལྡན་རིགས་ཅན་ལྔ་ལ་སོགས་པ་ལ་བགྲོ་བར་བྱའོ། །ཞེས་པ་སྟེ། རིན་པོ་ཆེའི་རྒྱན་ལས། མ་བརྒྱུད་བདག་གིས་མངོན་སུམ་དུ། །ཐོས་ཙམ་ཚད་མར་མི་རུང་བས། །ངེས་པར་བཤད་དེ་བསྟན་པ་དང༌། །སྡུད་པ་དགོངས་པ་ཅིག་ཆོད་ཡིན། །ཞེས་སོ། །ཡང་ན་སྔར་གྱི་སྤྲུལ་པའི་སྐུ་རྣམས་ཀྱིས་ཇི་ལྟར་བཤད་ཅིང་གསང་སྔགས་ཕྱིས་འབྱུང་བར་ལུང་བསྟན་པ་བཞིན་དུ་ཞེས་སྦྱར་བར་བྱའོ།།

གཉིས་པ་རི་མ་ལ་ཡར་སྔར་གྱི་རྒྱལ་བ་ལྟར་བསྐུལ་བའི་ཚེ་ཞལ་གྱིས་བཞེས་པ་ནི།

དྲག་ཤུལ། ཞེས་པ་ནས། ཞེས་བགྲོས་སོ། །ཞེས་པའི་བར་གྱིས་བསྟན་ཏེ།

དྲག་ཤུལ་ཅན་ཞེས་བྱ་བའི་རི། །དགོན་པ་ཆེན་པོའི་གནས་འདི་ནི། །ཡེ་ཤེས་སྙིང་པོ་ཅན་རྣམས་ཀྱི།།

ཐེག་ཆེན་གསང་བ་འབྱུང་བའི་གནས། །ཐོག་མ་ཐ་མའི་དུས་མེད་པར། །དམ་པ་རྣམས་ཀྱིས་བསྔགས་པ་ཡིན།།

ཐོག་མ་ཐ་མ་མེད་པ་ཡི། །རྒྱལ་བ་དཔག་ཏུ་མེད་པ་ཡིས། །དམ་པའི་དགོན་གནས་ཆེན་པོ་དེར།།

སེམས་ཀྱི་དཀྱིལ་འཁོར་མེ་ལོང་བཞིན། །བསྟན་པ་དེ་ལྟར་ བདག་གིས་ཀྱང་། །ཐོག་མ་ཐ་མ་མེད་པ ་རུ།།

བསྐུལ་བའི་དུས་ནི་གར་བྱུང་བར། །བདག་ཀྱང་དེ་བཞིན་ཆོ་འཕྲུལ་སྣང་། །ཞེས་བགྲོས་སོ།།

སྲིན་པོའི་གླིང༌། མཚོའི་དོ། གཅན་གཟན་སྣ་ཚོགས་ཀྱི་འཁྲ་ས། རྩེ་ལ་གནམ་ལྕགས་ཀྱི་ཐོག་ཡོད་པས་རེ་ཞིག་རྟེན་ཅན་གྱི་མཚན་རྟེན་ལ་བཏགས་ཏེ་མཚན་དྲག་ཤུལ་ཅན་ཞེས་བྱ་བར་གྲགས་པའི་རི། ཐ་མལ་གྱིས་བགྲོད་དཀའ་བས་དགོན་པ་ཆེན་པོའི་གནས་ཤིན་ཏུ་དབེན་པ་འདི་ནི། དུས་གསུམ་གྱི་བདེ་བར་གཤེགས་པ་ཡེ་ཤེས་ཀྱི་སྙིང་པོ་ཅན་རྣམས་ཀྱི་ཐེག་པ་ཆེན་པོ་གསང་བ་དེ་ཉིད་འབྱུང་བའི་གནས་སུ་ཐོག་མ་དང་ཐ་མའི་དུས་མེད་པར་རྒྱལ་བ་དམ་པ་རྣམས་ཀྱིས་རིའི་ཡོན་ཏན་བསྔགས་པ་ཡིན་ཏེ་རྡོ་རྗེ་གདན་དང་འདྲ་བར་མི་འཇིག་པར་གསང་སྔགས་ནས་གསུངས་པ་སོགས་སོ།།

དེ་ལྟར་ཐོག་མ་དང་ཐ་མ་མེད་པ་ཡི་རྒྱལ་བ་དཔག་ཏུ་མེད་པའི་བསྟན་པ་ལ་གསང་སྔགས་འབྱུང་བའང་འདི་ལྟ་བུའི་གནས་སུ་སྟོན་པར་གསུངས་པས། ས་འཛིན་དབེན་པ་དམ་པའི་དགོན་གནས་ཆེན་པོ་དེར་བསྟན་པར་བྱ་ལ། སྟོན་པ་པོ་ཡང་ཐོག་མཐའ་རིལ་དུ་རྒྱལ་བ་ཇི་སྙེད་པས་སོ་སོའི་ཞིང་ཁམས་ཀྱི་གནས་སུ་སེམས་ཀྱི་དཀྱིལ་འཁོར་རང་བཞིན་གྱིས་འོད་གསལ་བ་ཉིད་མེ་ལོང་གི་གཟུགས་བརྙན་བཞིན་དུ་མ་འདྲེས་ཡོངས་རྫོགས་སུ་སྟོན་པའི་གསང་སྔགས་ཐེག་པའི་རྒྱལ་པོ་སྤྲུལ་པ་དེ་དག་འདས་པའི་རྗེས་སུ་འབྱུང་བར་ལུང་བསྟན་པ་དེ་ལྟར་རྡོ་རྗེ་འཛིན་པ་ བདག་གིས་ཀྱང་དུས་འདིར་རུ་མ་ཟད་ཐོག་མ་དང་ཐ་མ་མེད་པ ་རུ་བསྐུལ་བའི་དུས་ནི་གང་བྱུང་བར་ཡང་ཆོ་འཕྲུལ་གྱིས་༼༦༡༽གསང་སྔགས་བསྟན་པ་ཡིན་པའི་ཕྱིར། ད་ལྟའི་དུས་འདིར་ཡང་བསྐུལ་བ་པོ་བྱུང་བས་བདག་ཀྱང་སྔར་གྱི་བཀོད་པ་དེ་བཞིན་དུ་ཆོ་འཕྲུལ་དང་བཅས་ཏེ་སྣང་བར་མཛད་དེ་སྟོན་པར་བྱེད་དོ། །ཞེས་བགྲོས་ཏེ་བཀའ་སྩལ་པར་ཞལ་གྱིས་འཆེས་སོ། །ཚིག་འདི་དག་གིས་གསང་བདག་སངས་རྒྱས་ཉིད་དུ་གསལ་བར་མངོན་ནོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

གང་གི་གདུང་བ་སེལ་བར་བགྲོས་པའི་ལེའུ་སྟེ་བཞི་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། དམན་པའི་ལུས་ཅན་དམ་པ་གང་དག་གི་གདུང་བ་དེ་དག་རྒྱལ་བ་རིལ་དང་གསང་བ་པོས་སེལ་བར་བཀའ་བགྲོས་པ་དང༌། བསྐུལ་བས་ཞལ་གྱིས་འཆེས་པའི་ལེའུ་སྟེ་བཞི་པ་གསལ་བར་བཤད་པའོ།། །།

ལེའུ་ལྔ་པ་ལུང་དམ་པ་བགྲོལ་བར་གསོལ་བ་བཏབ་པ།

༈ གསུམ་པ་གླེང་གཞི་རང་གི་ངོ་བོ་ལ་གཉིས་ཏེ། སྤྱིར་བསྟན་པ། སྟོན་པའི་དྲིས་ལན་བྱེ་བྲག་ཏུ་བསྟན་པའོ། །དང་པོ་ལ་གཉིས་ཏེ། གླེང་གཞི་དངོས་འཚོགས་པ། བྱིན་རླབས་རྒྱལ་པོ་ཛཿ ལ་རྨི་ལྟས་སུ་ཤར་བའོ། །དང་པོ་ནི།

དེ་ནས། ཞེས་པ་ནས། བདེ་བར་སྣང༌། །ཞེས་པའི་བར་གྱིས་བསྟན་ཏེ།

དེ་ནས་དེའི་ཚེ་དེ་ཉིད་དུ། །གནོད་འདུལ་རྒྱལ་པོས་དེ་གསུངས་ནས། །མི་གནས་པ་ཡི་འཇིག་རྟེན་ཁམས།། གླིང་བཞི་པ་ལས་འཛམ་གླིང་གི །དྲག་ཤུལ་ཅན་ཞེས་བྱ་བའི་རི། །གནོད་སྦྱིན་འདུ་བའི་ས་ཡིན་ཏེ།།

ཆོས་འཛིན་རིགས་ཀྱི་གྲུབ་གནས་སུ། །ཐུགས་རྗེ་ས་ལ་མངོན་སྤྲུལ་གཤེགས། །ས་རྣམས་ཡོངས་སུ་གཡོས་གྱུར་ཏེ།།

རྨད་དུ་བྱུང་བའི་ཆོ་འཕྲུལ་གྱིས། །ཐམས་ཅད་སྦྱངས་ཏེ་བདེ་བར་སྣང་།།

ལེའུ་འདིས་དྲང་དོན་སྟོན་ལ། གོང་དུ་སྙེགས་པས་དེ་ནས་འདྲེན་པའི་ཞལ་གྱིས་བཞེས་པ་དེ་ཚེ་དུས་དང་གནས་དེ་ཉིད་དུ། སྟོན་པ་གནོད་འདུལ་རྒྱལ་པོས་དེ་ལྟར་གསུངས་ནས། གནས་ཕུན་སུམ་ཚོགས་པ་མི་ཡི་ཡུལ་གྱི་གནས་ཀྱི་འཇིག་རྟེན་གྱི་ཁམས། གླིང་བཞི་པ་ཇི་སྙེད་པ་ལས་ཁྱད་པར་གྱི་གནས་མཆོག་འཛམ་བུའི་གླིང་གི་བྱེ་བྲག་དྲག་ཤུལ་ཅན་ཞེས་བྱ་བའི་རི་བོ་མ་ལ་ཡར་གྲགས་པ་དེ་ནི། སྤྱིར་གནོད་སྦྱིན་རྣམས་འདུ་ཞིང་ཁྱད་པར་དུ་སྟོན་པ་གསང་བའི་བདག་པོ་གནོད་འདུལ་ཉིད་བྱོན་ཏེ་གསང་སྔགས་སྟོན་པའི་ས་འཛིན་ཡིན་ཏེ། དེ་ལྟ་བུའི་གསང་སྔགས་ཀྱི་ཆོས་འཛིན་ཞིང་རིགས་ཀྱི་གྲུབ་པ་བརྙེས་པའི་ཆོས་ཀྱི་གནས་དམ་པ་ཕལ་པས་མི་བགྲོད་ཅིང་བྱིན་ཆེ་ལ་བཀྲ་ཤིས་ཤིང་ཉམས་དགའ་བའི་བསྟི་གནས་སུ་ཐུགས་རྗེ་ཆེན་པོའི་ཤུགས་ཀྱིས་འགྲོ་བ་མང་པོ་གསང་སྔགས་ཀྱིས་འདུལ་བས་འཁོར་བའི་གནས་ཀྱི་ས་དེ་ལ་མངོན་པར་སྤྲུལ་ཏེ་གཤེགས་པས་སྐུ་གདུལ་བྱའི་ངོར་སྣང་བར་གྱུར་ཏོ། །དེའི་བྱིན་རླབས་ཀྱིས་ཕྱི་ལྟར་ས་དངོས་སུ་གཡོས་ཤིང་ནང་གི་ས་རྣམས་འོག་ནས་གོང་དུ་འཕར་བས་ཡོངས་སུ་གཡོས་པར་གྱུར་ཏེ། འོག་ཏུ་གླེང་བསླང་ནས་འབྱུང་བ་ལྟར་རྨད་དུ་བྱུང་བའི་ཆོ་འཕྲུལ་རྣམས་ཀྱིས་ཕྱི་ཞིང་ཁམས་རྣམ་པར་དག་པར་བྱས་ཤིང་ནང་དུ་ཏིང་ངེ་འཛིན་བསྐྱེད་དེ་གདུལ་བྱའི་རྟོག་སྒྲིབ་ཐམས་ཅད་སྦྱངས་ཏེ་དོན་གསང་མཆོག་བདེ་བ་ཆེན་པོར་གསལ་བར་སྣང་བར་གྱུར་ཏོ།།

གཉིས་པ་བྱིན་རླབས་རྒྱལ་པོ་ཛཿ ལ་རྨི་ལྟས་སུ་ཤར་བ་ནི།

༼༦༢༽སྔོན་དུ། ཞེས་པ་ནས། ལྟས་སུ་ཤར། །ཞེས་པའི་བར་གྱིས་བསྟན་ཏེ།

སྔོན་དུ་སྣང་བའི་སྐལ་ལྡན་ཅན། །དམན་པའི་ལུས་འཛིན་དམ་པའི་རིགས།།

མི་ལ་རྒྱལ་རིགས་དྲ་མ་ཆེ། །རྒྱལ་བུ་བརྒྱ་བྱིན་བལྟས་སུ་ཤར།།

སྔོན་ཐུབ་པའི་དབང་པོ་ཉིད་སྐུ་མ་འདས་པར་བཞུགས་པའི་དུས་ཉིད་དུ། གསང་སྔགས་ཐེག་པ་ཆེན་པོ་རྒྱལ་པོ་འདི་ཉིད་ལ་སྣང་བར་འགྱུར་བའི་ལུང་བསྟན་ཐོབ་པས་སྐལ་བ་མཆོག་དང་ལྡན་པ་ཅན། ལུས་འགྲོ་བ་དམན་པའི་མི་ལུས་འཛིན་ཀྱང་སེམས་གསང་སྔགས་རྟོགས་པས་དམ་པའི་རིགས་སུ་ངེས་པ། མི་རིགས་བཞི་ལས་མཆོག་ཏུ་གྱུར་པ་རྒྱལ་པོའི་རིགས་ཅན་ཡ་རབ་ཀྱི་ངང་ཚུལ་ཁྲེལ་བག་དང་ལྡན་པས་དྲྭ་མ་ཆེ་བའམ་ཆེན་པོ། རྒྱལ་བུ་ཛཿ ཞེས་བྱ་བ་དེ་ལ་རྒྱལ་བས་ལུང་བསྟན་དང་གསང་སྔགས་ཀྱི་གླེང་གཞི་འཚོགས་པའི་བྱིན་རླབས་ཀྱིས་སྐུ་གསུང་ཐུགས་རྟགས་ཐིམ་པ་སོགས་བདུན་པོ་རྣམས་རྨི་ལམ་གྱི་ལྟས་སུ་ཤར་ཏེ་སྣང་ངོ༌། །རྒྱལ་པོ་འདི་ལ་བརྒྱ་བྱིན་བུ་ཞེས་ཀྱང་བྱ་གསུང༌།

གཉིས་པ་སྟོན་པའི་དྲིས་ལན་བྱེ་བྲག་ཏུ་བསྟན་པ་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

དེ་ཚེ། ཞེས་པ་ནས། ཅི་ཞེས་དྲིས། །ཞེས་པའི་བར་གྱིས་བསྟན་ཏེ།

དེ་ཚེ་དམ་པའི་རིགས་ཅན་རྣམས། །དགའ་བ་དང་བཅས་ཐེ་ཚོམ་སྐྱེས། །སྤོབས་པ་ཆེན་པོའི་དྲི་བ་དྲིས།།

ཨེ་མ་ངོ་མཚར་རྨད་རེ་ཆེ། །སྐྱེས་བུ་ཆེན་པོ་ཁྱོད་སུ་ཞིག །གང་ནས་བྱོན་ཏེ་གང་ལྟར་བྱུང་།།

གང་ལ་བརྟེན་ནས་གང་དུ་བྱོན། །དོན་གྱི་ཆེད་ཀ་ཅི་ཞེས་དྲིས།།

གསང་སྔགས་འབྱུང་བའི་གླེང་གཞི་འཚོགས་ནས་སྟོན་པ་མཐོང་བ་དེ་ཡི་ཚེ་ལང་ཀ་ལ་སོགས་པ་དམ་པའི་རིགས་ཅན་རྣམས། གདུང་ཚིག་གི་དོན་ཡོད་པ་དང༌། གསང་བདག་བྱོན་པ་དང༌། གསང་སྔགས་འབྱུང་བར་ཤེས་ནས་སེམས་དགའ་བ་དང་བཅས་ཏེ་སྟོན་པ་ཡིན་མིན་གྱི་ཐེ་ཚོམ་སྐྱེས་ཏེ། སྟོན་པ་གང་ཡིན་ངོ་ཤེས་པར་བྱ་བའི་ཕྱིར་སྤོབས་པ་ཆེན་པོའི་དྲི་བ་དྲུག་དྲིས་ཏེ། དམ་པའི་ཚུལ་གྱིས་ཨེ་མའོ་ངོ་མཚར་རྨད་རེ་ཆེ་སྟེ། སྐྱེས་བུ་ཆེན་པོ་ཁྱོད་ཀྱི་ངོ་བོ་སུ་ཞིག་ཡིན། ཡུལ་གང་ནས་བྱོན་ཏེ། ཉིད་ཀྱི་ལམ་གང་ལྟར་ལས་བྱུང་བ་ལགས། རྟེན་གང་ལ་བརྟེན་ནས་བྱོན་ས་གང་དུ་བྱོན་པ་དང༌། དོན་གྱི་ཆེད་ཀ་ཅི་ཡི་ཕྱིར་དུ་བྱོན་ཞེས་དྲ་ིབ་དྲིས་སོ།།

གཉིས་པ་ལན་ལ། དྲུག་པོའི་ལན་སོ་སོར་སྦྱར་ཏེ་འཁྲུགས་སྡེབ་ཀྱིས་གསལ་བར་བཤད་པ་དང༌། གོ་རིམ་བཞིན་དུ་སྟོན་པས་མདུན་བསུས་ཏེ་གླེང་སླང་བ་ཡན་ཆད་དོན་བཅུ་བདུན་གྱི་ལོ་རྒྱུས་ཞིབ་ཏུ་བརྗོད་དེ་ཁྲིའུར་དུ་ལན་གདབ་ཚུལ་གཉིས་ལས། དང་པོ་ལ་དྲུག་སྟེ། སུ་ཡིན་གྱི་ལན་རྡོ་རྗེ་སེམས་དཔའ་སྲིད་གསུམ་གྱི་གཉེན་པོ་ཡིན་པ། གང་ནས་བྱོན་གྱི་ལན་སྟོང་པ་ཆེན་པོ་འཁོར་འདས་དབྱེར་མེད་ནས་བྱོན་པ། གང་ལྟར་བྱུང་བའི་ལན་ཉིད་དང་ཤུལ་གཉིས་ཀྱི་སྒོ་ནས་གདབ་པ། གང་ལ་བརྟེན་གྱི་ལན་བླ་མ་དང་ཐེག་ཆེན་ལ་བརྟེན་ནས་འོང་བ། གང་དུ་བྱོན་གྱི་ལན་དགེ་སྡིག་འདྲེས་མར་སྤྱོད་པའི་འདོད་ཁམས་སུ་བྱོན་པ། དོན་ཆེད་ཀྱི་ལན་འཁོར་གྱི་སེམས་ཉིད་བཙལ་བའི་༼༦༣༽ཆེད་དུ་བྱོན་པའོ། །དང་པོ་ནི།

ཆོ་འཕྲུལ་ཆེན་པོས། ཞེས་པ་ནས། གཉེན་གཅིག་པོ། །ཞེས་པའི་བར་གྱིས་བསྟན་ཏེ།

ཆོ་འཕྲུལ་ཆེན་པོས་འདི་སྐད་དུ། །ང་ནི་ཅིས་ཀྱང་མི་བསྐྱོད་དེ། །མི་འཁྲུགས་རྡོ་རྗེ་སེམས་དཔའ་ཡིན།།

སྙིང་རྗེས་གཡོ་ཞིང་བསྐྱོད་པས་ན། །སྲིད་པ་གསུམ་གྱི་གཉེན་གཅིག་པུའོ།།

ཆོ་འཕྲུལ་གྱི་བདག་ཉིད་གསང་བདག་ཆེན་པོས་འདི་སྐད་ཅེས་ལན་དུ་བརྗོད་དེ། བདག་དོན་གྱི་ངོ་བོ་ང་ནི་མཐའ་ཡི་རྟོག་པ་ཅིས་ཀྱང་མི་བསྐྱོད་དེ། དཔལ་ཉོན་མོངས་པས་མི་འཁྲུགས་པ་རྡོ་རྗེ་སེམས་དཔའ་ཞེས་བྱ་བ་ཡིན་ལ། གཞན་དོན་མཛད་པའི་ངོ་བོ་ཐུགས་སྙིང་རྗེས་གཡོ་ཞིང་བསྐྱོད་པས་ན་སྲིད་པ་གསུམ་གྱི་གཉེན་གཅིག་དང་སྐྱབས་མགོན་ཆེན་པོ་ཡིན་ནོ།།

གཉིས་པ་གང་ནས་བྱོན་གྱི་ལན་སྟོང་པ་ཆེན་པོ་འཁོར་འདས་དབྱེར་མེད་ནས་བྱོན་པ་ནི།

སྟོང་པ་ཆེན་པོ་ང་ཡི་ཡུལ། །ཞེས་དང༌།

སྟོང་པ་ཆེན་པོ་ང་ཡི་ཡུལ།།

འོག་ནས། མུན་སྣང་གཉིས་ཀྱི་ཁམས་ནས་འོངས། །ཞེས་པའི་རྐང་པ་གཉིས་ཀྱིས་བསྟན་ཏེ།

མུན་སྣང་གཉིས་ཀྱི་ཁམས་ནས་འོངས།།

དོན་གྱི་འོག་མིན་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཆེན་པོ་ནི་ང་ཡི་ཡུལ་ཡིན་ཏེ། མུན་པ་འཁོར་བ་དང་སྣང་བ་མྱང་འདས་གཉིས་སུ་དབྱེ་བ་མེད་པའི་ཆོས་ཀྱི་དབྱིངས་ཀྱི་ཞིང་ཁམས་ནས་འདིར་འོངས་པ་ཡིན་ནོ།།

གསུམ་པ་གང་ལྟར་བྱུང་བའི་ལན་ཉིད་དང་ཤུལ་གཉིས་ཀྱི་སྒོ་ནས་གདབ་པ་ལ་གཉིས་ཏེ། ཉིད་རང་གང་ལྟར་བྱུང་ན་རྡོ་རྗེའི་རིགས་ཐབས་དང་ཤེས་རབ་གཉིས་མེད་ལས་བྱུང་བ། ཤུལ་གང་ལྟར་བྱུང་བའོ། །དང་པོ་ནི།

རྡོ་རྗེ། ཞེས་པ་ནས། བརྗོད་ལས་འདས། །ཞེས་པའི་བར་གྱིས་བསྟན་ཏེ།

རྡོ་རྗེ་རིགས་ཆེན་ང་ཡི་གདུང་། །ཕ་ནི་ཐབས་མཆོག་དཔག་ཏུ་མེད།།

མ་ནི་ཤེས་རབ་བརྗོད་ལས་འདས།།

གཉིས་སུ་མེད་པས་མི་ཕྱེད་པ་རྡོ་རྗེ་རིགས་ཆེན་དམ་པ་ནི་ང་ཡི་གདུང་ཡིན་ལ། ཕ་ནི་རིག་པའི་ཡེ་ཤེས་མ་འགག་པས་ཐབས་མཆོག་དཔག་ཏུ་མེད་པ་ཡིན་ཞིང༌། མ་ནི་དབྱིངས་ཀྱི་ཆོས་ཉིད་མ་སྐྱེས་པས་ཤེས་རབ་བརྗོད་པ་ལས་འདས་པ་ཡིན་ནོ།།

གཉིས་པ་ཤུལ་གང་ལྟར་བྱུང་བ་ལ་ལྔ་སྟེ། ཉིད་ཀྱིས་ཆོས་ཉིད་མ་རྟོགས་པའི་ལོ་རྒྱུས། ཉིད་ཀྱི་བླ་མས་ཚོལ་ཅིག་པར་བསྐུལ་བ། ཇི་ལྟར་བཙལ་བའི་ཐབས་ཞུས་པ། ཐབས་ཀྱི་མཆོག་གི་ལམ་བསྟན་པ། བསྟན་པ་བཞིན་བགྲོད་པས་གཞན་ནས་མ་བྱུང་བར་རང་ལས་རྙེད་པར་བསྟན་པའོ། །དང་པོ་ནི།

ཐོག་མ། ཞེས་པ་ནས། དེ་མ་ཤེས། །ཞེས་པའི་བར་གྱིས་བསྟན་ཏེ།

ཐོག་མ་མེད་པའི་དུས་ཀྱི་ཚེ། །ང་ཡི་ཡིད་བཞིན་ནོར་བུ་སྟོར། །ནོར་བུ་རིན་ཆེན་བདུད་རྩི་དེ།།

ཡོད་པར་མ་ཤེས་སྟོར་བར་ཚོར། །དེ་ཚེ་ཀུན་ནས་དབུལ་བ་དང་། །ཐར་མེད་ནད་ཀྱིས་གཟིར་གྱུར་ཅིང་།།

མུན་པ་མུན་ནག་སྨག་ཏུ་འཁྱམས། །བགྲོད་པར་བྱ་བའི་ལམ་ཡང་སྟོར། །གདུངས་པར་གྱུར་ཀྱང་དེར་མ་ཤེས།།

བསྐལ་པ་ཀུན་དགའ་ལྟ་བུ་ཐོག་མ་མེད་པའི་དུས་ཀྱི་ཚེ། ང་ཡི་རྒྱུན་དུ་མི་འབྲལ་བར་འཆང་བའི་ཡིད་བཞིན་གྱི་ནོར་བུ་བྱང་ཆུབ་ཀྱི་སེམས་སྟོར་ཏེ། མ་རྟོགས་ཀྱང་དགོས་པ་འབྱུང་བས་ནོར་བུ་རིན་ཆེན་རྟོགས་ན་ཉོན་མོངས་འཇོམས་པས་བདུད་རྩི་དེ་ཉིད་རང་ལ་ཡོད་པར་མ་ཤེས་ཀྱང་སྟོར་བར་ཚོར་བ་དེ་ཡི་ཚེ་བྱང་སེམས་ཀྱི་ཆེ་བའི་ཡོན་ཏན་མེད་པས་ཀུན་ནས་དབུལ་ཞིང་ལྟོགས་པ་དང༌། འཁོར་བ་ལས་ཐར་པ་མེད་པར་སྡུག་བསྔལ་གྱི་ནད་དང་ཉོན་མོངས་རྣམས་ཀྱི་གཟིར་བར་གྱུར་ཞིང༌། ཉི་མ་དང་འདྲ་བའི་གསང་སྔགས་རྟོགས་པའི་ཡེ་ཤེས་ཀྱི་དབེན་༼༦༤༽པས་མུན་པ། ཟླ་བ་དང་འདྲ་བར་ཐེག་པ་ཆེན་པོའི་ཤེས་རབ་ཀྱི་དབེན་པས་མུན་ནག སྐར་མ་དང་འདྲ་བའི་ཐེག་དམན་གྱི་ཤེས་རབ་ཀྱི་དབེན་པས་སྨག་རུམ་དུ་འཁྱམས་ནས། ཐར་པའི་ལམ་དུ་བགྲོད་པར་བྱ་བའི་ལམ་ཡང་སྟོར་ཏེ། འཁོར་བའི་སྡུག་བསྔལ་གྱིས་གདུང་བར་གྱུར་ཀྱང་དེ་ཉིད་ཇི་ལྟར་ཡིན་པ་ནི་མ་ཤེས་སོ།།

གཉིས་པ་ཉིད་ཀྱི་བླ་མས་ཚོལ་ཅིག་པར་བསྐུལ་བ་ནི།

དེ་ཚེ། ཞེས་པ་ནས། མཆོག་དེས་སྦྲན། །ཞེས་པའི་བར་གྱིས་བསྟན་ཏེ།

དེ་ཚེ་ང་ཡི་བཤེས་གཉེན་མཆོག །བྱམས་མགོན་དམ་པ་ཞིག་གིས་བསྟན། །ཨེ་མའོ་ཁྱོད་ཅི་མི་ཤེས་སམ།།

མཐོང་ཡུན་ཀུན་ཏུ་བདེ་བ་ཡི། །དོན་སྲིད་ཆེན་པོ་འབྱུང་འགྱུར་བའི། །ནོར་བུ་རིན་ཆེན་མ་བརླག་གམ།།

འོན་ཏེ་ཡོད་པར་མི་ཤེས་སམ། །འདི་ཅི་ཆད་པར་འདུག་གམ་ཅི། །དེ་སྐད་བཤེས་གཉེན་མཆོག་དེས་སྤྲན།།

དགེ་སློང་ཐུབ་དཀའ་གཞོན་ནུ་ལྟ་བུ། དེ་ཡི་ཚེ་ང་ཡི་བཤེས་གཉེན་མཆོག་ཏུ་གྱུར་པ་རྡོ་རྗེ་སེམས་དཔའ་ཞེས་སུ་གྲགས་པའི་བྱམས་མགོན་དམ་པ་ཞིག་གིས་འདི་སྐད་བསྟན་ཏེ། ཨེ་མའོ་ཁྱོད་ཀྱིས་ཅི་ཞིག་ནོར་བུ་རིན་པོ་ཆེ་རང་ལ་ཡོད་པར་མི་ཤེས་སམ། མཐོང་བ་ཚེ་འདི་དང་ཕྱི་མ་ཕན་ཆད་ཡུན་གྱི་དུས་ཀུན་ཏུ་བདེ་བ་མཆོག་ཉིད་སྟེར་བ་ཡི་ངོ་བོ་རྟོགས་ན་འབྲས་བུ་རྒྱ་ཆེ་ཞིང་མྱུར་དུ་ཕན་པས་དོན་སྲིད་ཆེན་པོ་ཞར་བྱུང་དུ་འབྱུང་བར་འགྱུར་བའི་ནོར་བུ་རིན་ཆེན་བྱང་ཆུབ་ཀྱི་སེམས་དེ་མ་བརླག་གམ། འོན་ཏེ་རང་ལ་ཆོས་ཉིད་དུ་ཡོད་པར་མི་ཤེས་སམ། འདི་ཅི་ཞིག་རིགས་ཆད་པ་ཡིན་པར་འདུག་གམ་ཅི་སྟེ། དེས་ན་མ་འདུག་པར་ཚོལ་ཞིག་པའོ། །དེ་སྐད་བཤེས་གཉེན་མཆོག་དེས་བདག་ལ་སྦྲན་ནོ།།

གསུམ་པ་ཇི་ལྟར་བཙལ་བའི་ཐབས་ཞུས་པ་ནི།

དེ་ཚེ། ཞེས་པ་ནས། ལུང་སྟོན་ཅིག །ཅེས་པའི་བར་གྱིས་བསྟན་ཏེ།

དེ་ཚེ་ང་ཡིས་སླར་སླན་པ། །དོན་སྲིད་ཆེན་པོ་འབྱུང་བ་དེ། །ཡོད་པར་མ་ཤེས་སྟོར་བར་ཚོར།།

འདི་དང་ཕྲད་པར་བྱ་བའི་ཐབས། །བཤེས་གཉེན་ཁྱོད་ཀྱིས་ལུང་སྟོན་ཅིག།

དེ་ཡི་ཚེ་གསང་བདག་ང་ཡིས་སླར་ལན་སྦྲན་པ་དོན་སྲིད་ཆེན་པོ་འབྱུང་བར་གྱུར་པ་དེ་ཉིད་རང་ལ་ཡོད་པར་མ་ཤེས་ཀྱང་སྟོར་བར་གྱུར་པ་ཚོར་བས་ན། འདི་ཉིད་དང་འཕྲད་པར་བྱ་བའི་ཐབས་ཀུན་གྱི་མཆོག་ཏུ་གྱུར་པ་ཞིག་སྟོན་པ་བཤེས་གཉེན་ཁྱོད་ཀྱིས་ལུང་སྟོན་པར་མཛོད་ཅིག་ཅེས་ཞུས་སོ།།

བཞི་པ་ཐབས་ཀྱི་མཆོག་གི་ལམ་བསྟན་པ་ནི།

དམ་པ། ཞེས་པ་ནས། རྙེད་གནས་ཡིན། །ཞེས་པའི་བར་གྱིས་བསྟན་ཏེ།

དམ་པ་དེ་ཡིས་དམིགས་བསྟན་པ། །དེ་དང་མྱུར་དུ་འཕྲད་འདོད་ན། །བཙལ་བའི་ཐབས་ལ་བརྩོན་བྱ་དགོས། །ས་མཁན་དམ་པས་དམིགས་མཚོན་ཏེ། །མུན་སྣང་ཁམས་དང་ས་ཁམས་དང་། །སྣ་ཚོགས་ལམ་རྣམས་བགྲོད་བྱས་ན། །བཙལ་ཡང་གཞན་ནས་མི་རྙེད་དེ། །རང་གི་ས་ཁམས་ཉིད་ནས་བྱུང་། །དེ་ནི་རིན་ཆེན་སྔར་རྙེད་པའི།།

དམ་པ་རྣམས་ཀྱི་ཁྱིམ་ཡིན་ཏེ། །དེ་ནི་སྔར་རྙེད་རྙེད་འགྱུར་བའི། །རྙེད་པ་རྣམས་ཀྱི་རྙེད་གནས་ཡིན།།

དེ་ནས་སྟོན་པ་དམ་པ་དེ་ཡིས་རང་ལ་ཡོད་པ་མངོན་པར་འབྱུང་བའི་ཤེས་རབ་ཀྱི་དམིགས་བུ་བསྟན་པ། དེ་དང་མྱུར་དུ་འཕྲད་པར་འདོད་པ་ཉིད་ན། བཙལ་བར་བྱ་བའི་ཐབས་ལ་ཤེས་རབ་གསུམ་གྱིས་བརྩོན་པར་བྱ་དགོས་ཏེ། སྟོན་པའམ་བཤེས་གཉེན་ལྟ་བུ་ས་མཁན་དམ་པས་ཤེས་རབ་ཟབ་མོའི་དམིགས་རྐྱེན་རྒྱལ་བའི་དགོངས་པ་གསལ་བར་སྟོན་ཞིང་སེམས་ཀྱི་གནས་ལུགས་ཇི་བཞིན་པར་མཚོན་པས་ལུང་ལ་བརྟེན་ཏེ། མུན་པ་འཁོར་བ་དང་སྣང་བ་འདས་པའི་ཁམས་དང་བྱང་ཆུབ་སེམས་དཔའི་ཟག་མེད་ཀྱི་རིགས་ས་ཁམས་ཉིད་དང༌། ཐེག་པ་སྣ་ཚོགས་ཀྱི་ལམ་རྣམས་བགྲོད་པར་བྱས་ནས་བཙལ་བར་བྱས་༼༦༥༽ཀྱང་གཞན་གང་ནས་ཀྱང་མི་རྙེད་དེ། རང་གི་རིགས་ཀྱི་ས་ཁམས་སེམས་ཉིད་རང་བཞིན་གྱིས་འོད་གསལ་བར་རང་གིས་རིག་ནས་རང་ལས་བྱུང་བར་འགྱུར་ཏེ་རང་སྣང་ཉིད་དུ་གྲོལ་བས་སོ། །དེ་ལྟར་རྙེད་པ་ནི་སེམས་ཀྱི་རིན་ཆེན་རང་རིག་པའི་ཡེ་ཤེས་ཉིད་ཇི་བཞིན་དུ་སྔར་རྙེད་པར་གྱུར་པའི་འདས་པའི་སངས་རྒྱས་དམ་པ་རྣམས་ཀྱི་ཆོས་ཉིད་དབྱིངས་ཀྱི་ཁྱིམ་ཡིན་ཏེ། དེ་ཉིད་ནི་སྔར་རྙེད་པར་གྱུར་པ་ཡི་རྙེད་ཟིན་པ་ཇི་སྙེད་པ་རྣམས་ཀྱི་རྙེད་པའི་གནས་རང་གི་སེམས་ཉིད་ཁོ་ན་ཡིན་པའི་ཕྱིར་རོ།།

ལྔ་པ་བསྟན་པ་བཞིན་བགྲོད་པས་གཞན་ནས་མ་བྱུང་བར་རང་ལས་རྙེད་པར་བསྟན་པ་ནི།

དེ་སྐད་ཐོས་ནས་དེ་ཚེ་ངས། །ཞེས་པ་དང༌།

དེ་སྐད་ཐོས་ནས་དེ་ཚེ་ངས།།

འོག་ནས། གཅན་འཕྲང༌། ཞེས་པ་ནས། དུས་ནས་སོ། །ཞེས་པའི་བར་གྱིས་བསྟན་ཏེ།

གཅན་འཕྲང་ཆུ་བོ་བཞི་རྒལ་ཏེ། །སྣ་ཚོགས་ལམ་བགྲོད་ཀུན་བཙལ་ནས། །དམ་པ་རྣམས་ཀྱི་ལམ་དུ་ཞུགས། །ས་དང་རྣམ་ཐར་ལམ་བགྲོད་དེ། །མྱ་ངན་འདས་པའི་གྲོང་ཁྱེར་སྙེགས། །ནོར་བུ་རིན་ཆེན་རྩད་བཅད་ནས། །མ་བྱུང་མ་རྙེད་རང་ཉིད་ཀྱི། །ཆོས་ཉིད་དབྱིངས་ཀྱི་ཁྱིམ་ནས་རྙེད། །རྙེད་པ་ཉིད་ན་རྙེད་མེད་དེ། །སྟོར་བ་ཉིད་ནའང་སྟོར་བྲལ་མེད། །ཡོད་མིན་མེད་མིན་སྟོར་རྙེད་མེད། །གཞན་ནས་མ་བྱུང་རང་བྱུང་བར། །ཤེས་ལ་རྙེད་བཏགས་མ་ཤེས་ལ། །སྟོར་ཞེས་ཐ་སྙད་བཏགས་པར་ཟད། །ཡོད་དང་སྟོར་དང་རྙེད་པའི་དུས། །ཐོག་མ་མེད་པའི་དུས་ནས་སོ།།

དེ་སྐད་སྟོན་པས་བཀའ་སྩལ་པ་ཐོས་ནས་དེ་ཚེ་གསང་བའི་བདག་པོ་ངས། འཁོར་བའི་གཅན་འཕྲང་སྐྱེ་རྒ་ན་འཆི་བཞིའམ། མ་རིག་པ། ཉོན་མོངས་པ། ལས་དང༌། སྡུག་བསྔལ་གྱི་ཆུ་བོ་བཞི་བརྒལ་ཏེ། ཐེག་པ་སྣ་ཚོགས་ཀྱི་ལམ་རྣམས་བགྲོད་ཅིང་ཀུན་ཏུ་བཙལ་ནས། འདྲེན་པ་དམ་པ་སངས་རྒྱས་རྣམས་ཀྱི་ལམ་དུ་ཞུགས་ཤིང༌། ས་བཅུ་དང་རྣམ་པར་ཐར་པ་བཞིའམ་བརྒྱད་ཀྱི་ལམ་བགྲོད་དེ། མྱ་ངན་ལས་འདས་པའི་གྲོང་ཁྱེར་བསྙགས་ཏེ་ནོར་བུ་རིན་ཆེན་བྱང་ཆུབ་ཀྱི་སེམས་དེ་ཉིད་ཇི་ལྟར་རྙེད་པའི་ཐབས་ལ་འབད་དེ་རྩད་བཅད་པར་བྱས་སོ། །དེ་ལྟར་ཐབས་སྣ་ཚོགས་ལ་བརྩོན་པས་སྒོ་ཀུན་ནས་བསྡུར་ཏེ་བཙལ་ཀྱང༌། ལུང་ཆེན་རྒྱུད་ཀྱི་རྒྱལ་པོའི་དགོངས་དོན་ལྟར་གཞན་ལས་མ་བྱུང་ཞིང་ཡུལ་ནས་མ་རྙེད་པར་རང་ཉིད་ཀྱི་སེམས་ཀྱི་ཆོས་ཉིད་ཡེ་ནས་འདུས་མ་བྱས་པས་ཆེ་བ་ལྔ་དང་ལྡན་པའི་དབྱིངས་ཀྱི་ཁྱིམ་ནས་རྙེད་དེ་ཆེ་བའི་ཡོན་ཏན་རྣམས་ལྷུན་གྱིས་གྲུབ་བོ། །དེ་ལྟར་རྙེད་པ་ཉིད་ན་ཡང་དངོས་པོ་ངོས་བཟུང་ཅན་དུ་རྙེད་པ་མེད་དེ། སྟོར་བ་ཉིད་ནའང་གཏིང་ནས་གཞན་དུ་སྟོར་བྲལ་དུ་གྱུར་པ་མེད་དོ།།

འོ་ན་སྟོར་རྙེད་དུ་བརྗོད་པ་ཇི་ལྟ་བུ་ཞེ་ན། ངོ་བོ་ཡེ་ཇི་བཞིན་པའི་ཆོས་ཉིད་གང་དུའང་མ་གྲུབ་པས་ཡོད་པ་མིན་ཞིང༌། རང་བཞིན་ལྷུན་གྱིས་གྲུབ་པར་ཀུན་ཏུ་འོད་གསལ་བས་མེད་པ་མིན་ལ་རྩ་བ་གཉིས་སུ་མེད་པས་བྱང་ཆུབ་སེམས་ཀྱི་དཀྱིལ་འཁོར་ལ་སྟོར་རྙེད་གཉིས་སུ་ཡོད་པ་མིན་ཀྱང༌། གཞན་ནས་མ་བྱུང་བར་རང་ལས་བྱུང་བར་ངོ་ཤེས་པ་ལ་རྙེད་ཅེས་བཏགས་ཤིང༌། ངོ་མ་ཤེས་པ་ལ་སྟོར་ཞེས་པའི་ཐ་སྙད་བཏགས་པར་ཟད་དོ། །དེས་ན་དང་པོ་ཡོད་པ་དང༌། བར་དུ་སྟོར་བ་དང༌། ཐ་མ་རྙེད་པའི་དུས་གསུམ་གྱི་རང་བཞིན་མཐོང་ཚེ་གཞི་རྩ་དང་བྲལ་བས་ཐོག་མ་མེད་པའི་དུས་ནས་སོ། །ཞེས་གསུངས་ཏེ། ༼༦༦༽ཨ་ནུའི་རང་ལུགས་མདོ་ཆེན་པོའི་དགོངས་པ་ཐུན་མོང་མིན་པ་ལྟར་ཤེས་པར་བྱའོ། །འདི་དག་གི་སྤྱི་རྒྱ་གཅོད་ན། ཡེ་ཇི་བཞིན་པའི་རྡོ་རྗེ་སེམས་དཔའ་ཆོས་རྣམས་ཀྱི་ཆོས་ཉིད་དེ་བཞིན་ཉིད་མ་ནོར་མ་བཅོས་མ་བསླད་པ་སྙིང་པོ་བྱང་ཆུབ་ཏུ་ཡེ་ནས་གནས་པ་ལ་བཏགས་པ་དང༌། རྒྱུད་དག་པའི་རྡོ་རྗེ་སེམས་དཔའ་སེམས་ཅན་ཀུན་གྱི་སེམས་ཀྱི་ཆོས་ཉིད་ཇི་བཞིན་དུ་མཐོང་བའི་སྐབས་ལ་བཏགས་པའི་ཚུལ་གྱིས་གོང་འོག་ཀུན་དང་སྦྱོར་ཤེས་པར་བྱའོ།།

བཞི་པ་གང་ལ་བརྟེན་གྱི་ལན་བླ་མ་དང་ཐེག་ཆེན་ལ་བརྟེན་ནས་འོང་བ་ནི།

དམ་པ་དེ་ལ། ཞེས་པ་ནས། དེ་ཞོན་ཏེ། །ཞེས་པའི་བར་གྱིས་བསྟན་ཏེ།

དམ་པ་དེ་ལ་ལམ་བལྟོས་ཏེ། །བློ་གྲོས་དམ་པས་ངེས་བཤད་ནས། །ཐེག་ཆེན་ཅང་ཤེས་དེ་ཞོན་ཏེ།།

སྟོན་པའམ་བླ་མ་དམ་པ་དེ་ལ་ལམ་གྱི་གཞིར་རེ་ལྟོས་བཅས་ཏེ་བརྟེན་ཞིང་རང་གིས་ཞི་གནས་དང་ལྷག་མཐོང་གི་བློ་གྲོས་དམ་པས་ངེས་པར་ཐེ་ཚོམ་རྣམས་བཅད་དེ་ལྟ་བ་རྟོགས་པར་བྱས་ནས། ཐེག་ཆེན་གསང་མཆོག་རྒྱལ་པོའི་ཅང་ཤེས་ཀྱི་རྟ་དེ་ལ་དོན་ཉམས་སུ་ལེན་པས་ཞོན་ཅིང་བརྟེན་ཏེ་འདིར་འོང་བ་ཡིན་ནོ།།

ལྔ་པ་གང་དུ་བྱོན་གྱི་ལན་དགེ་སྡིག་འདྲེས་མར་སྤྱོད་པའི་འདོད་ཁམས་སུ་བྱོན་པ་ནི།

དེ་ལྟར། ཞེས་པ་ནས། ཁམས་འདིར་འོངས། །ཞེས་པའི་བར་གྱིས་བསྟན་ཏེ།

དེ་ལྟར་ཆོས་ཉིད་མེད་པ་ལས། །སྤྲུལ་པ་སྣང་བའི་དུས་འདིར་ནི། །མུན་སྣང་གཉིས་ཀྱི་ཁམས་འདིར་འོངས།།

དེ་ལྟར་ཆོས་ཉིད་བསམ་བརྗོད་ལས་འདས་ཤིང་སྤྲོས་པ་མེད་པ་དེའི་ངང་ལས། སྤྲུལ་པ་ཐུབ་པའི་དབང་པོ་སྣང་ནས་འདས་པའི་དུས་འདིར་ནི། སྡིག་པ་སྤྱོད་པས་མུན་པ་དང༌། དགེ་བ་སྤྱོད་པས་སྣང་བ་གཉིས་འདྲེས་མར་སྤྱོད་པས་འདོད་པའི་འཇིག་རྟེན་གྱི་ཁམས་མ་ལ་ཡ་འདིར་འོངས་པ་ཡིན་ནོ།།

དྲུག་པ་དོན་ཆེད་ཀྱི་ལན་འཁོར་གྱི་སེམས་ཉིད་བཙལ་བའི་ཆེད་དུ་བྱོན་པ་ནི།

གང་ཚེ་བཙལ་བའི་ཆེད་ཕྱིར་དུ། །ཞེས་པས་བསྟན་ཏེ།

གང་ཚེ་བཙལ་བའི་ཆེད་ཕྱིར་དུ།།

དུས་གང་གི་ཚེ་འཁོར་རྣམས་ཀྱིས་སེམས་ཉིད་སྟོར་བ་དེ་བཙལ་བ་ལ་ཞུགས་པ་ན་ཐབས་དམ་པས་མཚོན་ཏེ་རྙེད་པར་འགྱུར་བའི་དགོས་ཆེད་ཁྱད་པར་ཅན་གྱི་ཕྱིར་དུ་འོངས་པ་ཡིན་ནོ། །དེ་ལྟར་བཤད་པ་ནི་འགྲེལ་པ་ལུང་བསྟན་མའི་ལུགས་སོ།།

གཉིས་པ་རྐྱེན་གླེང་བསླང་བ་ལ་གཉིས་ཏེ། སྟོན་པས་མདུན་བསུས་ཏེ་གླེང་བསླང་བ། འཁོར་གྱིས་གུས་པས་དྲིས་ཏེ་གླེང་བསླང་བའོ། །དང་པོ་ལ་གཉིས་ཏེ། ཐབས་བཅུ་གཅིག་གི་སྒོ་ནས་དོན་བྱེད་པས་ཉིད་ལ་འདུན་ཞིག་པར་བསྐུལ་བ། གདམས་ངག་བསྟན་པའོ། །དང་པོ་ལ་བཅུ་གཅིག་སྟེ། མཉན་པ། མིག་མཁན། སྨན་པ། ས་མཁན། ཐུགས་རྗེའི་སྤྱན་རས། རྡོ་རྗེའི་རྫོང་ཆེན། ཚོང་དཔོན། སྒྲོན་མ། ཡིད་བཞིན་ནོར་བུ། ལྡེ་མིག བཀའ་ཡི་འགྲེལ་པའི་སྒོ་ནས་དོན་བྱེད་པས་ཉིད་ལ་འདུན་ཞིག་པར་བསྐུལ་བའོ། །དང་པོ་ནི།

ང་ནི། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་ཐབས་ཀྱི་མཉན་པ་མཁན། །འཁོར་བའི་ཆུ་བོ་མཐའ་མེད་ལས།།

སྲིད་གསུམ་བསྒྲལ་བར་དམ་བཅས་ཀྱིས། །ཐར་པར་འདོད་པ་ལམ་འདིར་ཤོག།

འདི་དག་རེ་རེ་ལའང་ཞལ་བཞེས་དང་གདམས་ངག་གསུམ་༼༦༧༽གསུམ་དུ་སྦྱར་ཏེ། སྟོན་པ་ང་ནི་ཐབས་ཀྱི་ བདག་པོ་མཉན་པའམ་གྲུ་མཁན་ཏེ། གང་ཞིག་འཁོར་བའི་སྐྱེ་རྒ་ན་འཆི་བཞིའི་ཆུ་བོ་མཐའ་མེད་པ ་ལས། སྲིད་གསུམ་གྱི་སེམས་ཅན་རྣམས་ཕྲིན་ལས་ཀྱིས་བསྒྲལ་བར་དམ་བཅས་ཀྱིས། ཐར་པ་དང་གྲོལ་བར་འདོད་པ་རྣམས་གདམས་ངག་གི་ལམ་འདིར་ཤོག་ཅིག

གཉིས་པ་མིག་མཁན་ནི།

ང་ནི། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་ཐབས་ཀྱི་མིག་མཁན་ཏེ། །འཇིག་རྟེན་ལོང་བ་དཔག་མེད་རྣམས།།

ལིང་ཏོག་བསལ་བར་དམ་བཅས་ཀྱིས། །གང་ཞིག་མཐོང་འདོད་ལམ་འདིར་ཤོག།

ང་ནི་ཐབས་ཀྱི་དབང་ཕྱུག་མིག་འབྱེད་མཁན་ཏེ་འཇིག་རྟེན་གྱི་ཤེས་རབ་དང་བྲལ་བས་ལོང་བ་དཔག་ཏུ་མེད་པ་རྣམས་ཀྱི་མ་རིག་པའི་ལིང་ཏོག་བསལ་བར་དམ་བཅས་ཀྱིས། གང་ཞིག་མ་བཅོས་པའི་དོན་མཐོང་བར་འདོད་པ་རྣམས་ལམ་འདིར་ཤོག་ཅིག

གསུམ་པ་སྨན་པ་ནི།

ང་ནི། ཞེས་པས་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་ཐབས་ཀྱི་སྨན་པ་སྟེ། །གྲོང་ཁྲེར་གསུམ་གྱི་ནད་པ་རྣམས།།

གཅོང་རྙིང་སྦྱང་བར་དམ་བཅས་ཀྱིས། །གང་ཞིག་བདེ་འདོད་ལམ་འདིར་ཤོག།

ང་ནི་ཐབས་ཀྱི་མངའ་བདག་སྨན་པ་མཆོག་སྟེ། ཁམས་གསུམ་མམ་གྲོང་ཁྱེར་གསུམ་གྱི་དུག་གསུམ་གྱིས་མནར་བའི་ནད་པ་རྣམས། ཐོག་མ་མེད་པའི་རྣམ་རྟོག་གི་གཅོང་རྙིང་སྦྱང་བར་དམ་བཅས་ཀྱིས། གང་ཞིག་ནད་མེད་བདེ་བར་འདོད་པ་རྣམས་ལམ་འདིར་ཤོག་ཅིག

བཞི་པ་ས་མཁན་ནི།

ང་ནི། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་ཐབས་ཀྱི་ས་མཁན་ཏེ། །འགྲོ་བ་ལམ་ལོག་ལམ་སྟོར་རྣམས།།

མ་ནོར་འཁྲིད་པར་དམ་བཅས་ཀྱིས། །ཡང་དག་ལམ་འདོད་ལམ་འདིར་ཤོག།

ང་ནི་ཐབས་ཀྱི་འདྲེན་པ་ས་ལམ་མཁན་ཏེ། འགྲོ་བ་ལམ་ཕྱིན་ཅི་ལོག་ཏུ་གོལ་ནས་ཡང་དག་པའི་ལམ་སྟོར་བ་རྣམས། མ་ནོར་བའི་ལམ་དུ་ཁྲིད་པར་དམ་བཅས་ཀྱིས། གསང་བ་སྔགས་ཀྱི་ཡང་དག་པའི་ཉེ་ལམ་འདོད་པ་རྣམས་ལམ་འདིར་ཤོག་ཅིག

ལྔ་པ་ཐུགས་རྗེའི་སྤྱན་རས་ནི།

ང་ནི་ཐུགས་རྗེ། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་ཐུགས་རྗེའི་སྤྱན་རས་མཁན། །འཁོར་བའི་དགྲ་དཔུང་འཇིགས་པ་ལས།།

ཐམས་ཅད་བསྐྱབ་པར་དམ་བཅས་ཀྱིས། །འཇིགས་དང་བྲལ་འདོད་ལམ་འདིར་ཤོག།

ང་ནི་ཐུགས་རྗེ་ཆེན་པོའི་སྤྱན་རས་ཀྱི་གཟིགས་པས་སོ་པ་མཁན་ཏེ། འཁོར་བའི་དགྲ་དཔུང་བདག་འཛིན་ལས་ཉོན་གྱི་འཇིགས་པ་ལས། གདུལ་བྱ་ཐམས་ཅད་བསྐྱབ་པར་དམ་བཅས་ཀྱིས། སྲིད་པའི་འཇིག་པ་དང་བྲལ་བར་འདོད་པ་རྣམས་ལམ་འདིར་ཤོག་ཅིག

དྲུག་པ་རྡོ་རྗེའི་རྫོང་ཆེན་ནི།

ང་ནི། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་རྡོ་རྗེ་རྫོང་ཆེན་ཏེ། །འཁོར་བའི་གཡུལ་ཆེན་དམག་དཔུང་ལས།།

འགྲོ་བའི་འཁྲ་སར་དམ་བཅས་ཀྱིས། །གང་ཞིག་མཁར་འདོད་ལམ་འདིར་ཤོག།

ང་ནི་ཐེག་པའི་རྒྱལ་པོའི་རྡོ་རྗེའི་རྫོང་མཁར་ཆེན་པོ་སྟེ། འཁོར་བའི་གཡུལ་ཆེན་བྱིངས་ཆགས་པའི་དམག་དཔུང་ལས་འགྲོ་བའི་འཇིགས་པས་མི་ཚུགས་པའི་ཐབས་ཀྱི་འཁྲ་སར་དམ་བཅས་ཀྱིས། གང་ཞིག་སྙིང་པོ་བྱང་ཆུབ་ཀྱི་མཁར་རྫོང་འདོད་པ་རྣམས་ལམ་འདིར་ཤོག་ཅིག

བདུན་པ་ཚོང་དཔོན་ནི།

ང་ནི། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་ཐབས་ཀྱི་ཚོང་དཔོན་ཏེ། །འདོད་པ་རྒྱ་མཚོས་མི་ངོམས་རྣམས།།

གཏེར་ཆེན་བྱིན་པར་དམ་བཅས་ཀྱིས། །གང་ཞིག་གཏེར་འདོད་ལམ་འདིར་ཤོག།

ང་ནི་ཐབས་ཀྱི་མཛོད་འཛིན་ཚོང་དཔོན་ཆེན་པོ་སྟེ། འདོད་༼༦༨༽པའི་ཡོན་ཏན་ལྔ་ལ་ཇི་ལྟར་སྤྱོད་ཀྱང་འདོད་པ་རྒྱ་མཚོས་མི་ངོམས་པ་རྣམས་ལ། ཆོས་ཀྱི་གཏེར་ཆེན་གཅིག་གིས་འདོད་རྒུ་ཐམས་ཅད་སྦྱིན་པར་དམ་བཅས་ཀྱིས། གང་ཞིག་རང་གནས་སེམས་ཀྱི་གཏེར་ལ་སྤྱོད་པར་འདོད་པ་རྣམས་ལམ་འདིར་ཤོག་ཅིག

བརྒྱད་པ་སྒྲོན་མ་ནི།

ང་ནི། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་ཐབས་ཀྱི་སྒྲོན་མ་སྟེ། །མུན་ནག་སྨག་ཏུ་འཐོམས་པ་རྣམས།།

མུན་ནག་བསལ་བར་དམ་བཅས་ཀྱིས། །གང་ཞིག་སྣང་འདོད་ལམ་འདིར་ཤོག།

ང་ནི་ཐབས་ཀྱི་གསལ་བྱེད་སྒྲོན་མ་དམ་པ་སྟེ། འཁོར་བའི་གནས་སུ་ལྷན་ཅིག་སྐྱེས་པའི་མུན་ནག་དང་ཀུན་ཏུ་བརྟགས་པའི་སྨག་ཏུ་འཕྱན་ནས་ལས་ཉོན་གྱིས་འཁྱམས་པ་རྣམས་ཀྱི། ཀུན་ཏུ་རྨོངས་པའི་མུན་ནག་བསལ་བར་དམ་བཅས་ཀྱིས། གང་ཞིག་རང་རིག་ཡེ་ཤེས་ཀྱི་སྣང་བ་འདོད་པ་རྣམས་ལམ་འདིར་ཤོག་ཅིག

དགུ་པ་ཡིད་བཞིན་ནོར་བུ་ནི།

ང་ནི། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་ཡིད་བཞིན་ནོར་བུ་སྟེ། །གང་དག་ཡིད་བཞིན་འདོད་པ་རྣམས།།

ཡིད་བཞིན་བསྐང་བར་དམ་བཅས་ཀྱིས། །ལྷུན་གྱིས་གྲུབ་འདོད་ལམ་འདིར་ཤོག།

ང་ནི་གང་འདོད་འབྱུང་བའི་ཡིད་བཞིན་གྱི་ནོར་བུ་སྟེ། གང་དག་བྱང་ཆུབ་སེམས་ཀྱི་ཡིད་བཞིན་གྱི་ནོར་བུ་རྙེད་པར་འདོད་པ་རྣམས་ཀྱི། ཡིད་བཞིན་དུ་འདོད་པ་བསྐང་སྟེ་ལུང་གིས་སྟོན་པར་དམ་བཅས་ཀྱིས། ཡོན་ཏན་ལྷུན་གྱིས་གྲུབ་པར་འདོད་པ་རྣམས་ལམ་འདིར་ཤོག་ཅིག

བཅུ་པ་ལྡེ་མིག་ནི།

ང་ནི། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་བཀའ་ཡི་ལྡེ་མིག་སྟེ། །བཀའ་སྒྲོམ་ཐ་རམ་གསང་བ་རྣམས།།

རྣམ་པར་འབྱེད་པར་དམ་བཅས་ཀྱིས། །གང་ཞིག་གྲོལ་འདོད་ལམ་འདིར་ཤོག།

ང་ནི་བཀའ་ཡི་གསང་སྒོ་འབྱེད་པའི་འཕྲུལ་གྱི་ལྡེའུ་མིག་སྟེ། བཀའ་ཡི་མཛོད་སྒྲོམ་རྣམས་ཀྱི་སྒོ་ལྕགས་ལྟ་བུའི་ལུང་གི་ཐ་རམ་གསང་བ་རྣམས་མ་ནོར་བར་རྣམ་པར་འབྱེད་པར་དམ་བཅས་ཀྱིས། གང་ཞིག་དཀའ་གནད་ཁྲོལ་ནས་རྒྱུད་གྲོལ་བར་འདོད་པ་རྣམས་ལམ་འདིར་ཤོག་ཅིག

བཅུ་གཅིག་པ་བཀའ་ཡི་འགྲེལ་པའི་སྒོ་ནས་དོན་བྱེད་པས་ཉིད་ལ་འདུན་ཞིག་པར་བསྐུལ་བ་ནི།

ང་ནི། ཞེས་པ་ནས། ལམ་འདིར་ཤོག །ཅེས་པའི་བར་གྱིས་བསྟན་ཏེ།

ང་ནི་བཀའ་ཡི་འགྲེལ་པ་སྟེ། །གསུང་གི་གླེགས་བམ་ཟབ་མོ་རྣམས།།

ངེས་པར་དགྲོལ་བར་དམ་བཅས་ཀྱིས། །གང་དག་ཤེས་འདོད་ལམ་འདིར་ཤོག།

སྟོན་པ་ང་ནི་བཀའ་ཡི་ངེས་དོན་གསལ་བའི་འགྲེལ་པ་སྟེ། ཐུབ་པའི་གསུང་གི་གླེགས་བམ་ཟབ་མོ་རྒྱུད་ལུང་གི་པོ་ཏི་རྣམས། ཇི་བཞིན་དུ་ངེས་པར་དགྲོལ་བར་དམ་བཅས་ཀྱིས། གང་དག་མ་ནོར་བར་ཤེས་པར་འདོད་པ་རྣམས་ལམ་འདིར་ཤོག་ཅིག

གཉིས་པ་གདམས་ངག་བསྟན་པ་ལ་གསུམ་སྟེ། ལམ་ལ་བརྩོན་པར་གདམས་པ། བཀའ་གྲགས་པར་འགྱུར་བར་གདམས་པ། གདུང་བ་མ་བསྐྱེད་ཅིག་པར་གདམས་པའོ། །དང་པོ་ནི།

རྣམ་དག ཅེས་པ་ནས། སངས་རྒྱས་ཡིན། །ཞེས་པའི་བར་གྱིས་བསྟན་ཏེ།

རྣམ་དག་ལམ་ཆེན་ཀུན་སྒྲོལ་འདིར། །སྐལ་ལྡན་གང་ཞིག་སུ་ཞུགས་པ། །ནོར་བུ་རིན་ཆེན་འོད་འབར་བ།།

ངེས་པར་འཆར་གྱིས་བརྩོན་པར་གྱིས། །དེ་ཉིད་སེམས་ཀྱི་མེ་ལོང་དེ། །མངོན་སུམ་གསལ་བ་རྟོགས་མ་ཐག།

འགྲོ་བའི་ལུས་ལ་སངས་རྒྱས་ཡིན།།

ཁམས་གསུམ་ཆོས་ཉིད་དུ་དག་པ་དང༌། གཟུང་འཛིན་གཉིས་མེད་དུ་དག་པ་དང༌། ལམ་གྱིས་རྩོལ་བ་ཐམས་ཅད་ཐེག་པ་འདིར་དག་པས། རྣམ་པ་ཐ་དད་པ་ཀུན་ཆོས་དབྱིངས་གསང་བའི་ངོ་བོར་དག་པས་ལམ་ཆེན་འདི་ལ་གནས་པ་ཀུན་གཞི་༼༦༩༽ལམ་གྱི་ཉེས་པ་ལས་ངེས་པར་སྒྲོལ་བས་རྒྱུད་ལུང་མན་ངག་གི་གསང་མཛོད་ཆེན་པོ་འདིར་སྐལ་ལྡན་གང་ཞིག་སུ་ཡང་རུང་བ་བཞུགས་པར་གྱུར་པ་རྣམས་ལ་བྱང་ཆུབ་ཀྱི་སེམས་ནོར་བུ་རིན་ཆེན་འོད་འབར་བ་དེ་ཉིད་ངེས་པར་རང་སེམས་ལས་འཆར་བར་འགྱུར་གྱིས་འདི་ལ་བརྩོན་པར་གྱིས་ཤིག་པའོ། །དེ་ལྟར་རང་རིག་བྱང་ཆུབ་ཀྱི་སེམས་འདི་ཉིད་ནི་སེམས་ཀྱི་རང་བཞིན་འོད་གསལ་བ་གསང་སྔགས་ཀྱི་ངོ་བོ་ཆོས་ཐམས་ཅད་ཀྱི་མེ་ལོང་ཡིན་པས་ཇི་བཞིན་དུ་མཐོང་སྟེ་མངོན་སུམ་དུ་གསལ་བར་རྟོགས་པ་དེ་མ་ཐག་ནས་དམན་པ་འགྲོ་བའི་ལུས་ལ་སེམས་སངས་རྒྱས་སུ་གྱུར་པ་ཡིན་ནོ། །ཇི་སྐད་དུ། རྟོགས་པའི་བློ་དང་གང་ལྡན་པ། །བུད་མེད་བུ་ཡང་རྒྱལ་བའི་སྲས། །ཀོ་བའི་སྟན་ཡང་སེང་གེའི་ཁྲི། །འགྲོ་བའི་ལུས་ལ་སངས་རྒྱས་ཡིན། །ཞེས་གྲགས་སོ།།

གཉིས་པ་བཀའ་གྲགས་པར་འགྱུར་བར་གདམས་པ་ནི།

རྡོ་རྗེ་གསང་ཆེན། ཞེས་པ་ནས། གྲགས་པར་འགྱུར། །ཞེས་པའི་བར་གྱིས་བསྟན་ཏེ།

རྡོ་རྗེ་གསང་ཆེན་གསང་བ་ཡི། །ངེས་དོན་དམ་པའི་མཛོད་མཆོག་རྣམས། །འདིར་བགྲོས་གསལ་བར་བཤད་སྦྱར་བས། །ལྷ་དང་མི་ཡི་རིགས་འཛིན་ལས། །རིམ་པར་བརྒྱུད་དེ་གྲགས་པར་འགྱུར།།

ལུང་ཐམས་ཅད་ཀྱི་སྤྱི་འགྲེལ་རྡོ་རྗེ་གསང་བ་ཆེན་པོ་རྒྱུད་ཀུན་གྱི་རྒྱལ་པོ་གསང་བ་བཀའ་ཡི་གཞི་མ་མན་ངག་ཐམས་ཅད་ཀྱི་རྩ་བ་ངེས་དོན་དམ་པའི་མཛོད་མཆོག་གསུམ་པོ་རྣམས་དུས་འདིར་རྡོ་རྗེ་འཛིན་པ་བདག་གིས་གདུལ་བྱ་རྣམས་ལ་བགྲོས་ཏེ་གསལ་བར་བཤད་དེ་ལུང་ཆེན་ཐེག་པའི་གསང་མཛོད་ལ་སྦྱར་བས། རྒྱལ་བ་རྣམས་ལ་དགོངས་པས་བརྒྱུད་པ་ཉིད། ལྷ་ཚངས་པ་གཙུག་ཕུད་དང་མི་དྲི་མེད་གྲགས་པ་ལ་སོགས་པ་ཡི་རིག་འཛིན་རྣམས་ལ་རིག་པས་བརྒྱུད་ནས་རིམ་པར་གང་ཟག་རྣམས་ལ་རྣ་བར་བརྒྱུད་དེ་ལྷ་མིའི་ཡུལ་ཀུན་ཏུ་ཡོངས་སུ་གྲགས་པར་འགྱུར་རོ།།

གསུམ་པ་གདུང་བ་མ་བསྐྱེད་ཅིག་པར་གདམས་པ་ནི།

ལྷ་མིའི། ཞེས་པ་ནས། སྒྲ་བྱུང་བས། །ཞེས་པའི་བར་གྱིས་བསྟན་ཏེ།

ལྷ་མིའི་འཇིག་རྟེན་ཐམས་ཅད་ཀྱི། །མུན་པའི་གདུང་བ་ཀུན་བསལ་ནས། །སེམས་ཀྱི་དཀྱིལ་འཁོར་གསལ་བར་འགྱུར། །ཅི་ཕྱིར་གདུང་བའི་མུན་པར་ཞུགས། །ཐུབ་པ་མྱ་ངན་འདས་གདུང་བ། །དེ་ནི་ནམ་མཁའི་སྐུ་མངའ་བ། །འདའ་དང་མི་འདའ་མི་མངའ་སྟེ། །འཕོ་འགྱུར་མེད་པས་ནམ་མཁའ་བཞིན། །དེ་སྐད་སྤྲུལ་པའི་སྒྲ་བྱུང་བས།།

ལྷ་དང་མིའི་འཇིག་རྟེན་ན་གདུལ་བྱ་ཐམས་ཅད་ཀྱི་རྒྱུད་ལ་ཡོད་པས་མ་རིག་པ་གཉིས་ཀྱི་མུན་པ་དང་ཉོན་མོངས་པའི་གདུང་བ་མ་ལུས་པ་ཀུན་བསལ་བར་བྱས་ནས་སེམས་ཀྱི་དཀྱིལ་འཁོར་རང་བཞིན་གྱིས་འོད་གསལ་བ་རྟོགས་པར་འགྱུར་བས་ན་ཁྱེད་ཅག་ཅི་ཡི་ཕྱིར་གདུང་བའི་མུན་པར་ཞུགས་པ་ཡིན་ཏེ་གདུང་བའི་གཞི་དང་བྲལ་བས་སོ། །གལ་ཏེ་ཐུབ་པ་མྱ་ངན་ལས་འདས་པ་ལ་གདུང་བ་ཡིན་ནོ་ཞེ་ན། ཐུབ་པ་དེ་ནི་རྡོ་རྗེ་ལྟ་བུ་ནམ་མཁའི་སྐུ་མངའ་བ་ཡིན་པས་འདའ་བ་དང་མི་འདའ་བའི་སྤྲོས་པ་མི་མངའ་སྟེ་ཆོས་ཀྱི་སྐུ་འཕོ་འགྱུར་མེད་པས་ནམ་མཁའ་བཞིན་ཡིན་ན་གདུང་བ་སྐྱེད་པ་རིགས་པ་མ་ཡིན་ནོ། །དེ་སྐད་ཅེས་སྤྲུལ་པའི་ཞལ་ནས་གསང་བའི་སྒྲ་བྱུང་སྟེ་སྟོན་པས་མདུན་བསུ་བའི་གླེང་སློང་ཉིད་བཀའ་སྩལ་ཏོ། །གཉིས་པ་འགྲེལ་ཆེན་༼༧༠༽གྱི་དགོངས་པ་ལྟར་སྟོན་པས་དོན་བཅུ་བདུན་གྱི་ལོ་རྒྱུས་ཞིབ་ཏུ་བརྗོད་དེ་ལན་ཁྲིའུར་དུ་གདབ་པའི་ཚུལ་ལ། ཆོ་འཕྲུལ། ཞེས་པ་ནས། བརྗོད་ལས་འདས། །ཞེས་པའི་བར་ནི་དྲི་བ་དང་པོ་སུ་ཡིན་གྱི་ལན་ཏེ། སྟོན་པ་ཆོ་འཕྲུལ་གྱི་བདག་ཉིད་གསང་བདག་ཆེན་པོས་ལན་དུ། དང་པོ། ང་ནི་ཅིས་ཀྱང་སོགས་རྐང་པ་གཉིས་ནི་མཚན་ཅི་ཡིན་པ་གསུངས་པ་དང༌། གཉིས་པ། སྙིང་རྗེས་སོགས་རྐང་པ་གཉིས་ནི་ཐུགས་རྗེ་སྐྱབས་ཀྱི་བདག་པོ་ཡིན་པ་དང༌། གསུམ་པ། སྟོང་པ་སོགས་རྐང་པ་གཅིག་ནི་བཞུགས་ཡུལ་དང༌། བཞི་པ། རྡོ་རྗེ་སོགས་རྐང་གཅིག་ནི་གདུང་ཅི་ཡིན་པ་དང༌། ལྔ་པ། ཕ་ནི་སོགས་རྐང་པ་གཅིག་གིས་ཡབ་བསྟན་པ་དང༌། དྲུག་པ། མ་ནི་སོགས་རྐང་པ་གཅིག་གིས་ཡུམ་བསྟན་པའོ། །དེ་ནས་བདུན་པ་ནས་བཅུ་གཅིག་གི་བར་ནི། དྲི་བ་གསུམ་པ་གང་ལྟར་བྱུང་གི་ལན་ཏེ། བདུན་པ། ཐོག་མ་མེད་པའི། ཞེས་པ་ནས། སྟོར་བར་ཚོར། ཞེས་པའི་བར་ནི་དོན་མ་རིག་པའི་ལོ་རྒྱུས་དང༌། བརྒྱད་པ། དེ་ཚེ་ཀུན་ནས། ཞེས་པ་ནས། སྨག་ཏུ་འཁྱམས། ཞེས་པའི་བར་ནི་སེམས་ཀྱི་དོན་མ་རྟོགས་པར་མཁྱེན་ནས་སྡུག་བསྔལ་བརྒྱུད་པར་བསྟན་པ་དང༌། དགུ་པ། བགྲོད་པར་བྱ་བའི་སོགས་རྐང་པ་གཉིས་ནི་ལམ་བརྩལ་བས་མ་རྙེད་པའི་ལོ་རྒྱུས་གསུམ་པ་དང༌། བཅུ་པ། དེ་ཚེ་ང་ཡི། ཞེས་པ་ནས། མཆོག་དེས་སྦྲན། ཞེས་པའི་བར་ནི་དུས་དེར་སྟོན་པ་རྡོ་རྗེ་སེམས་དཔས་བསྟན་པའི་ཚིག་གིས་སེམས་ཀྱི་ནོར་བུ་རང་ལ་ཡོད་པར་མི་ཤེས་ན་ཡལ་བར་མ་འདུག་ཅིག་པར་བསྐུལ་བའི་ལོ་རྒྱུས་བཀའ་སྩལ་པ་དང༌། བཅུ་གཅིག་པ། དེ་ཚེ་ང་ཡིས། ཞེས་པ་ནས། རྙེད་གནས་ཡིན། ཞེས་པའི་བར་ནི་གསང་བ་པོ་ཉིད་ཀྱིས་སེམས་ཇི་བཞིན་པར་རྟོགས་པའི་ཐབས་ཞུས་པ་ན། སྟོན་པས་རང་ཉིད་ལས་ཚོལ་ཞིག་པར་གསུངས་པའི་ལོ་རྒྱུས་བརྗོད་པ་སྟེ་ཤུལ་གང་ལྟར་བྱུང་གི་ལན་གཅིག་གིས་གདབ་པའོ། །བཅུ་གཉིས་པ་ཡིས་དྲི་བ་གསུམ་གྱི་ལན་བསྟན་ཏེ། དང་པོ་དེ་སྐད་ཐོས་ནས། ཞེས་པ་ནས། དུས་ནས་སོ། །ཞེས་པའི་བར་གྱིས་དྲི་བ་བཞི་པ་གང་ལ་བརྟེན་ནས་བྱོན་གྱི་ལན་གདབ་སྟེ། བཀའ་གསང་བདག་ཉིད་ཀྱིས་ཐོས་པས་སྟོན་པ་ཉིད་ལ་བརྟེན་ནས་ཐེག་པ་ཆེན་པོའི་སྒོར་ཞུགས་ཏེ་བགྲོད་པས་འཁོར་བའི་སྐྱེ་རྒ་ན་འཆི་བསྒྲལ་ཞིང༌། སྒོ་ཀུན་ནས་བསྡུར་ཏེ་ཐེག་པ་ཆེན་པོའི་ཡང་ཆེན་པོར་ཞུགས་ནས་ས་བགྲོད་དེ་བཙལ་བས་བྱང་ཆུབ་རང་རིག་པ་ཉིད་ལས་མ་རྙེད་པར་རྙེད་དེ། ཇི་ལྟ་བའི་འབྲས་བུ་ཐོབ་པ་༼༧༡༽མེད་པར་ཐོབ་ནས་བྱོན་པ་ཡིན་ནོ། །ཞེས་བླ་མ་དང་ཐེག་མཆོག་རྒྱལ་པོར་བརྟེན་ནས་སྙིང་པོ་བྱང་ཆུབ་ཉིད་མངོན་དུ་བྱས་པ་གང་ལ་བརྟེན་ནས་བྱོན་པའོ། །གཉིས་པ་དེ་ལྟར་ཞེས་རྐང་པ་གཅིག་གིས་དྲི་བ་གཉིས་པ་ཡུལ་གང་ནས་བྱོན་གྱི་ལན་བསྟན་ཏེ། ཡེ་ཇི་བཞིན་པའི་ཆོས་ཉིད་གང་དུའང་མ་གྲུབ་པ་ཉིད་མངོན་དུ་གྱུར་ཏེ་རང་སྣང་ལྷུན་གྱིས་གྲུབ་པའི་ངང་ལས་བྱོན་པ་ཡིན་ནོ། །གསུམ་པ་སྤྲུལ་པ་སོགས། རྐང་པ་གཉིས་ཀྱིས་དྲི་བ་ལྔ་པ་གང་དུ་བྱོན་གྱི་ལན་བསྟན་ཏེ། ཐུབ་པའི་དབང་པོ་སྤྲུལ་པ་སྣང་བའི་དུས་འདིར་དགེ་སྡིག་སྤྱོད་པའི་གནས་འདིར་འགྲོ་འོང་མེད་པར་འོངས་པ་ཡིན་ནོ། །བཅུ་གསུམ་པ། ང་ནི་ཐབས་ཀྱི་ཞེས་པ་ནས། ལམ་འདིར་ཤོག ཅེས་པའི་བར་གྱིས་དྲི་བ་དྲུག་པ་དོན་གྱི་ཆེད་ཀ་ཅི་ལ་བྱོན་གྱི་ལན་བསྟན་ཏེ། འགྲོ་བ་བསྒྲལ་བའི་ཆེད་དུ་ཡོན་ཏན་བཅུ་གཅིག་དང་ལྡན་པའི་མཛད་ཐབས་བཅུ་གཅིག་གིས་གདུལ་བྱ་ཐར་བར་བྱ་བའི་ཕྱིར་བྱོན་ནོ་ཞེས་ལན་གདབ་སྟེ་འདི་ནས་བཟུང་འཁོར་གྱིས་མ་ཞུས་པར་སྟོན་པས་སྦྲན་ནས་གླེང་བསླང་བའི་དོན་གཉིས་ལས་སྟོན་པས་མདུན་བསུ་བར་ཡང་སྦྱར་རོ། །བཅུ་བཞི་པ། རྣམ་དག་ལམ་ཆེན། ཞེས་པ་ནས། སངས་རྒྱས་ཡིན། །ཞེས་པའི་བར་འདིའང་དྲི་བ་ཐ་མའི་ལན་ཏེ། ཐེག་པ་ཆེན་པོ་འདིར་སུ་ཞུགས་པ་འབྲས་བུ་རང་ལ་འཆར་ཏེ་བརྩོན་པས་རྟོགས་པ་ཉིད་སངས་རྒྱས་ཡིན་པས་འབད་ཅིག་པར་གསུངས་སོ། །བཅོ་ལྔ་པ། རྡོ་རྗེ་གསང་ཆེན། ཞེས་པ་ནས། གྲགས་པར་འགྱུར། །ཞེས་པའི་བར་ནི་ངོ་བོ་ཇི་བཞིན་པ་དངོས་པོ་རྣམས་ཀྱི་དེ་ཁོ་ན་ཉིད་མི་ཕྱེད་མི་འགྱུར་རྒྱུ་རྐྱེན་བྲལ་བའི་དོན་ཉིད་མཐོང་དཀའ་བ་ནི་རྡོ་རྗེ་གསང་སྔགས་ཏེ། རྒྱུད་ལུང་མན་ངག་གི་མཛོད་རྒྱལ་བ་རིལ་གྱི་ཡུམ་དུ་གྱུར་པའི་ཐེག་པ་དག་འདིར་བཤད་པས་ཚངས་པ་གཙུག་ཕུད་དང་དྲི་མ་མེད་པར་གྲགས་པ་ལ་སོགས་པ་རྣམས་ལས་སྔ་ཕྱིར་བརྒྱུད་དེ་ལྷ་མིའི་ཡུལ་དུ་རྒྱས་ཤིང་སྣང་བར་གསུངས་པ་སྟེ་འདིའང་གསུམ་པ་དང་ལྔ་པའི་ལན་ནོ། །བཅུ་དྲུག་པ། ལྷ་མིའི་འཇིག་རྟེན། ཞེས་པ་ནས། གསལ་བར་འགྱུར། ཞེས་པའི་བར་ནི་གདུལ་བྱ་དེ་དག་གི་མ་རིག་པ་གཉིས་དང་གདུང་བ་རྩ་གསུམ་ལ་སོགས་པ་བསལ་ནས་རང་རིག་པ་རང་གི་རང་བཞིན་གྱི་འོད་གསལ་བ་རྟོགས་པར་འགྱུར་བར་གསུངས་པའོ། །བཅུ་བདུན་པ། ཅི་ཕྱིར་གདུང་བའི། ཞེས་པ་ནས། སྒྲ་བྱུང་བས། །ཞེས་པའི་བར་ནི་དམ་པའི་རིགས་ཅན་ཁྱོད་རྣམས་དགོས་པ་གང་གི་ཆེད་དུ་གདུང་བ་ཉི་ཤུ་རྩ་གསུམ་གྱིས་གཞན་དུ་ཚོལ་བའི་མྱ་ངན་གྱི་མུན་པར་ཞུགས་པ་ཡིན་ཞེས་དྲིས་ནས་སྟོན་༼༧༢༽པ་འདས་པ་ལ་མྱ་ངན་བྱ་བར་རིགས་པ་མིན་ཏེ། དེ་ནི་ཆོས་ཀྱི་སྐུའི་བདག་ཉིད་སྐུ་ལྔ་ལྷུན་གྱིས་རྫོགས་པ་རྡོ་རྗེའི་སྐུ་བརྙེས་ཏེ། འདས་མ་འདས་མེད་པས་མ་གདུང་ཞིག་པའི་ལན་བཀའ་སྩལ་པ་སྟེ། འདི་གཉིས་ཀྱང་ཐ་མའི་ལན་ནོ།།

གཉིས་པ་འཁོར་གྱིས་གུས་པས་དྲིས་ཏེ་གླེང་བསླང་བ་ལ་གསུམ་སྟེ། ཞུ་བའི་ཆ་ལུགས། ཞུ་བའི་སྦྱོར་བ། ཞུས་པ་དངོས་སོ། །དང་པོ་ནི།

སྔོན་དུ་བྱུང་བའི། ཞེས་པ་ནས། འདི་སྐད་གསོལ། །ཞེས་པའི་བར་གྱིས་བསྟན་ཏེ།

སྔོན་དུ་བྱུང་བའི་རིགས་ཅན་རྣམས། །མཆོག་ཏུ་དགའ་བ་ཆེར་སྐྱེས་ཏེ། །དགའ་མགུ་རངས་པའི་བསམ་པ་ཡིས།།

ལུས་བཏུད་ཤིན་ཏུ་གུས་སྦྱར་ནས། །སྤྱན་སྔར་འདུག་སྟེ་འདི་སྐད་གསོལ།།

དེ་ནས་ཐུབ་པའི་དབང་པོ་མ་འདས་པའི་སྔོན་དུ་བྱུང་བའི་དམ་པའི་རིགས་ཅན་རྣམས། སྟོན་པ་གསང་བདག་ཆེན་པོས་གསང་སྔགས་ཐེག་པའི་རྒྱལ་པོ་ཐབས་ཆེན་ལུང་གི་དགོངས་མཛོད་དམ་པ་གསུང་བར་ཞལ་གྱིས་བཞེས་ཏེ་གླེང་བསླང་བའི་དོན་ལ་མཆོག་ཏུ་དགའ་བ་ཆེས་ཆེར་སྐྱེས་ཏེ་སྟོན་པ་ངོ་ཤེས་པས་སེམས་དགའ་ཞིང་ཡིད་མགུ་ནས་ཡི་རངས་པའི་བསམ་པ་ཡིས་ལུས་བཏུད་དེ་སྒོ་གསུམ་ཤིན་ཏུ་གུས་པ་ལ་སྦྱར་ནས་སྤྱན་སྔར་འདུག་སྟེ་སྤོབས་པ་ཆེན་པོས་ཞུ་བ་འདིསྐད་ཅེས་གསོལ་ཏོ།།

གཉིས་པ་ཞུ་བའི་སྦྱོར་བ་འདི་ལའང༌། འཁྲུགས་སུ་བྱས་ནས་སྐུ་གསུང་ཐུགས་ཡོན་ཏན་ཕྲིན་ལས་ལ་བསྟོད་པ་དང༌། འཁྲུགས་མེད་དུ་ནོར་བུ་ལུགས་སུ་བསྟོད་པར་འགྲེལ་པའི་ལུགས་གཉིས་ལས། དང་པོ་ལྟར་ན་ལྔ་སྟེ། སྐུ་གསལ་བའི་ཉི་མ་ལ་སོགས་པར་བསྟོད་པ། གསུང་བཀའི་འགྲེལ་པར་བསྟོད་པ། ཐུགས་གསང་བའི་བདག་པོར་བསྟོད་པ། ཡོན་ཏན་སྨན་པའི་རྒྱལ་པོར་བསྟོད་པ། ཕྲིན་ལས་བདུད་ཀྱི་ཡང་བདུད་དུ་བསྟོད་པའོ། །དང་པོ་ལ་གཉིས་ཏེ། སྐུ་ལ་སྤྱིར་བསྟོད་པ། སྐུ་གསུམ་བྱེ་བྲག་ཏུ་ཕྱེ་སྟེ་བསྟོད་པའོ། །དང་པོ་ནི།

སེམས་ཀྱི་དཀྱིལ་འཁོར། ཞེས་པ་ནས། ཉི་མར་གྲགས། །ཞེས་པའི་བར་གྱིས་བསྟན་ཏེ།

སེམས་ཀྱི་དཀྱིལ་འཁོར་ཐམས་ཅད་ལ། །མཛོད་གསུམ་གསང་བའི་ཉི་ཤར་བས།།

ཤེས་བྱའི་མུན་པ་ཀུན་བསལ་ཕྱིར། །ཁྱོད་ནི་གསལ་བའི་ཉི་མར་གྲགས།།

བདག་ཅག་རིགས་ཅན་ལྔ་ལ་སོགས་པའི་གདུལ་བྱའི་སེམས་ཀྱི་དཀྱིལ་འཁོར་ཐམས་ཅད་ལ། དམ་པའི་མཛོད་གསུམ། ལྟ་སྒོམ་སྤྱོད་པའམ་ལྟ་སྤྱོད་དམ་ཚིག་གི་གསང་བའི་ཉི་མ་ཤར་བས། བསམ་གྱིས་མི་ཁྱབ་པའི་ཆོས་ཉིད་དང༌། ལྟ་བ་དང༌། རང་བྱུང་དེ་ཁོ་ན་ཉིད་ལ་སྒྲིབ་པས་ཤེས་བྱའི་མུན་པ་ཀུན་དང་ཉོན་མོངས་པ་དང༌། ལས་ཀྱི་སྒྲིབ་པ་དང་བཅས་པ་མ་ལུས་པ་དུས་གཅིག་ལ་བསལ་བར་མཛད་པའི་ཕྱིར་སྟོན་པ་ཁྱོད་ནི་གསལ་བའི་ཉི་མར་ཀུན་ཏུ་གྲགས་སོ། །འདི་ནིཆོས་རྗེ་དམ་པ་རིན་པོ་ཆེས་ཐབས་ཀྱི་སྒྲོན་མ་ལ་བསྟོད་པར་གསུངས་ཤིང་བཞེད་པ་གཞན་ཡང་མཐུན་ནོ།།

གཉིས་པ་སྐུ་གསུམ་བྱེ་བྲག་ཏུ་ཕྱེ་སྟེ་བསྟོད་པ་ལ་གསུམ་སྟེ། ཆོས་སྐུ་གསལ་བའི་མེ་ལོང་དུ་བསྟོད་པ། ལོངས་སྐུ་གདུང་བ་སེལ་བར་བསྟོད་པ། སྤྲུལ་སྐུ་ཡིད་བཞིན་ནོར་བུར་༼༧༣༽བསྟོད་པའོ། །དང་པོ་ནི།

དེ་བཞིན་ཉིད་ཀྱི། ཞེས་པ་ནས། ཞེས་ཀྱང་གྲགས། །ཞེས་པའི་བར་གྱིས་བསྟན་ཏེ།

དེ་བཞིན་ཉིད་ཀྱི་ངོ་བོ་ཉིད། །སེམས་ནི་རང་བཞིན་འོད་གསལ་བ།།

ཆོས་ཀུན་གཟུགས་བརྙན་སྣང་བས་ན། །ཆོས་ཀྱི་མེ་ལོང་ཞེས་ཀྱང་གྲགས།།

ཆོས་རྣམས་ཀྱི་ཆོས་ཉིད་དེ་བཞིན་ཉིད་ཀྱི་ངོ་བོ་དམིགས་པ་མེད་ཅིང་སྟོང་པ་ཉིད་སེམས་ཀྱི་རང་བཞིན་རང་རིག་པའི་ཡེ་ཤེས་འོད་གསལ་བ་ཉིད་དང་གཉིས་སུ་མེད་པས་འགག་པ་མེད་པར་ཆོས་ཀུན་གྱི་གཟུགས་བརྙན་སྣང་ལ་རང་བཞིན་མེད་པར་སྣང་བར་མཛད་པས་ན། སྟོན་པ་ཁྱོད་ལ་ཆོས་ཀྱི་མེ་ལོང་ཞེས་ཀྱང་གྲགས་སོ། །འདི་ཉིད་དམ་པ་རིན་པོ་ཆེས་ཐབས་ཀྱི་མིག་མཁན་ལ་བསྟོད་པར་བཞེད་ལ། གཞན་མིག་མཁན་དང་ས་མཁན་གཉིས་ལ་བསྟོད་པ་བཞེད་པའང་ཡོད་དོ།།

གཉིས་པ་ལོངས་སྐུ་གདུང་བ་སེལ་བར་བསྟོད་པ་ནི།

དགའ་མགུ ཞེས་པ་ནས། སེལ་བར་གྲགས། །ཞེས་པའི་བར་གྱིས་བསྟན་ཏེ།

དགའ་མགུ་རངས་པའི་མཛད་པས་ན། །ཁྱོད་ནི་གདུང་བ་སེལ་བར་གྲགས།།

ཆུང་འབྲིང་ཆེ་གསུམ་མམ་སེམས་དགའ་ཞིང་ཡིད་མགུ་ལ་བསམ་པ་རངས་པར་མཛད་པས་ན། སྟོན་པ་ཁྱོད་ནི་གདུལ་བྱ་ཀུན་གྱི་གདུང་བ་སེལ་བར་གྲགས་སོ། །ཆོས་རྗེས་མཉན་པ་དང་སྤྱན་རས་མཁན་གཉིས་ལ་བསྟོད་པར་བཞེད་ཅིང༌། གཞན་གདམས་ངག་གསུམ་བསྟན་པ་ལ་བསྟོད་པར་བཞེད་པའང་ཡོད་དོ།།

གསུམ་པ་སྤྲུལ་སྐུ་ཡིད་བཞིན་ནོར་བུར་བསྟོད་པ་ནི།

འདོད་པ། ཞེས་པ་ནས། ནོར་བུར་གྲགས། །ཞེས་པའི་བར་གྱིས་བསྟན་ཏེ།

འདོད་པ་ཡིད་བཞིན་སྐོང་བས་ན། །ཁྱོད་ནི་ཡིད་བཞིན་ནོར་བུར་གྲགས།།

འགྲོ་བ་ཀུན་གྱི་གནས་སྐབས་དང་མཐར་ཐུག་གི་འདོད་པ་ཐམས་ཅད་ཡིད་བཞིན་དུ་སྐོང་བར་མཛད་པས་ན། སྟོན་པ་ཁྱོད་ནི་ཡིད་བཞིན་གྱི་ནོར་བུར་ཡོངས་སུ་གྲགས་སོ། །དམ་པ་རིན་པོ་ཆེས་ཚོང་དཔོན་དང་ནོར་བུ་གཉིས་ལ་བསྟོད་པར་བཞེད་ལ་གཞན་ཡང་མཐུན་ནོ།།

གཉིས་པ་གསུང་བཀའི་འགྲེལ་པར་བསྟོད་པ་ནི།

བཀའ་རྣམས་བགྲོ་བར། ཞེས་པ་ནས། ཆེན་པོར་གྲགས། །ཞེས་པའི་བར་གྱིས་བསྟན་ཏེ།

བཀའ་རྣམས་བགྲོ་བར་ཁྱོད་བསྔགས་པས། །ཁྱོད་ནི་བཀའ་འགྲེལ་ཆེན་པོར་གྲགས།།

རྒྱལ་བ་ཀུན་གྱི་གསང་མཛོད་ཟབ་མོའི་བཀའ་རྣམས་བགྲོ་བར་ཁྱོད་ལ་བསྔགས་པར་མཛད་པས་ན། སྟོན་པ་ཁྱོད་ནི་བཀའ་ཡི་དགོངས་པ་འགྲེལ་པའི་གསལ་བྱེད་ཆེན་པོར་གྲགས་སོ། །ཆོས་རྗེས་ལྡེ་མིག་དང་འགྲེལ་པ་གཉིས་ལ་བསྟོད་པར་བཞེད་ཅིང་གཞན་ཡང་མཐུན་ནོ།།

གསུམ་པ་ཐུགས་གསང་བའི་བདག་པོར་བསྟོད་པ་ནི།

མཚན་མོ། ཞེས་པ་ནས། བདག་པོར་གྲགས། །ཞེས་པའི་བར་གྱིས་བསྟན་ཏེ།

མཚན་མོ་མུན་ནག་སྤྲིན་རུམ་ནས། །གློག་འགྱུར་བར་སྣང་སྟོན་ལྟ་བུ། །ཐོག་མ་ཐ་མ་མེད་པ་ཡི།།

དེ་བཞིན་ཉིད་ཀྱི་དབྱིངས་ཉིད་ལས། །རྣམ་དག་ལམ་ཆེན་དེ་ཉིད་དུ། །བྱུང་བའི་སྐྱེས་བུ་དོན་གྲུབ་ཁྱོད།།

དམ་པ་རྣམས་ཀྱི་གསང་འཛིན་ཅིང་། །གསང་བ་པོ་ཡི་བདག་པོར་གྲགས།།

དཔེར་ན་མཚན་མོ་མུན་ནག་གི་སྤྲིན་རུམ་ནས། གློག་གསལ་བར་འགྱུས་པས་བར་དུ་སྣང་བ་རྣམས་མཐོང་བར་སྟོན་པ་ལྟ་བུས། དོན་གྱི་གནས་ལུགས་ཐོག་མ་དང་ཐ་མ་མེད་པ་ཡི་ཆོས་ཉིད་དེ་བཞིན་ཉིད་ཀྱི་དབྱིངས་ཉིད་ལས། གསང་ཆེན་སྔགས་ཀྱི་དགོངས་པ་ཐབས་མཆོག་རྣམ་པར་དག་པའི་ཉེ་ལམ་ཆེན་པོ་དེ་ཉིད་མཐར་ཕྱིན་ནས་རང་དོན་དུ་རྟོགས་པའི་དོན་ལས་མི་གཡོ་༼༧༤༽བར་གཞན་དོན་དུ་མངོན་པར་བྱུང་བའི་སྐྱེས་བུ་ཆེན་པོ་དོན་གཉིས་གྲུབ་པ་ཁྱོད་ཉིད། འདྲེན་པ་དམ་པ་སངས་རྒྱས་རྣམས་ཀྱི་གསང་བའི་མཛོད་འཛིན་ཅིང༌། གསང་བ་མ་ལུས་པ་ཡི་བདག་པོ་ཆེན་པོར་གྲགས་སོ། །དམ་པ་རིན་པོ་ཆེས་ས་མཁན་ལ་བསྟོད་པར་བཞེད་ལ་གཞན་མཉན་པ་མཁན་ལ་བསྟོད་པར་བཞེད་པའང་ཡོད་དེ་རྒྱ་མཚོ་ལས་ནོར་བུ་ལེན་པ་ལ་སྦྱར་བར་མངོན་ནོ།།

བཞི་པ་ཡོན་ཏན་སྨན་པའི་རྒྱལ་པོར་བསྟོད་པ་ནི།

དུག་འཇོམས་སྨན་གྱི། ཞེས་པ་ནས། རྒྱལ་པོར་གྲགས། །ཞེས་པའི་བར་གྱིས་བསྟན་ཏེ།

དུག་འཇོམས་སྨན་གྱི་དཀྱིལ་འཁོར་གྱིས། །ཟུག་རྔུ་འབྱིན་པ་བླ་ན་མེད།།

ནད་དོ་ཅོག་གི་དགྲར་གྱུར་པས། །ཁྱོད་ནི་སྨན་གྱི་རྒྱལ་པོར་གྲགས།།

ཉོན་མོངས་པའི་དུག་རྣམས་འཇོམས་པའི་ཐབས་སྣ་ཚོགས་དང་ལྡན་པས་སྨན་གྱི་དཀྱིལ་འཁོར་གསང་བའི་ཐེག་པ་ཉིད་ཀྱིས་ཉོན་མོངས་པའི་ཚོགས་ཀྱི་རང་བཞིན་ཤེས་པས་ཉིད་ཀྱིས་ཉིད་གྲོལ་ཏེ་ཟུག་རྔུ་འབྱིན་པ་བླ་ན་མེད་པར་ངེས་པས། ཕྱི་ནང་གི་ནད་དོ་ཅོག་གི་དགྲར་གྱུར་པ་ཡི་སྟོན་པ་ཁྱོད་ནི་སྨན་གྱི་རྒྱལ་པོར་གྲགས་སོ། །འདི་ཉིད་ཆོས་རྗེས་སྨན་པ་ལ་བསྟོད་པར་བཞེད་དེ་གཞན་ཡང་མཐུན་ནོ།།

ལྔ་པ་ཕྲིན་ལས་བདུད་ཀྱི་ཡང་བདུད་དུ་བསྟོད་པ་ནི།

གདུལ་དཀའ་མ་ལུས། ཞེས་པ་ནས། བདུད་དུ་གྲགས། །ཞེས་པའི་བར་གྱིས་བསྟན་ཏེ།

གདུལ་དཀའ་མ་ལུས་ཀུན་འདུལ་ཞིང་། །བདུད་ཀྱི་བདུད་དེ་བདུད་རྣམས་འཇོམས།།

འཇིགས་པའི་ཚོགས་ཀྱང་འཇོམས་བྱེད་པས། ཁྱོད་ནི་བདུད་ཀྱི་བདུད་དུ་གྲགས།།

ཕྱིའི་བདུད་དྲེགས་བྱེད་དང༌། ནང་ཉོན་མོངས་པ་སོགས་གདུལ་དཀའ་མ་ལུས་པ་ཀུན་འདུལ་ཞིང༌། བདུད་བཞི་དང་ལོག་སྡེ་ཀུན་གྱི་ཡང་བདུད་དུ་གྱུར་པ་རྡོ་རྗེ་འཆང་ཧེ་རུ་ཀ་སྟེ་བདུད་ཀྱི་དཔུང་ཚོགས་མ་ལུས་པ་རྣམས་འཇོམས་ཤིང་རུ་ཏྲ་ལ་སོགས་པ་འཇིགས་པའི་ཚོགས་ཀྱང་ཕྲིན་ལས་སྣ་ཚོགས་ཀྱིས་འཇོམས་པར་བྱེད་པས་སྟོན་པ་ཁྱོད་ནི་བདུད་ཀྱིའང་བདུད་དུ་གྲགས་སོ། །དམ་པ་རིན་པོ་ཆེས་རྡོ་རྗེའི་རྫོང་ཆེན་ལ་བསྟོད་པར་བཞེད་ཅིང་གཞན་རྫོང་ཆེན་དང་སྤྱན་རས་མཁན་གཉིས་ལ་བསྟོད་པར་བཞེད་པའང་ཡོད་དོ།།

གཉིས་པ་འཁྲུགས་མེད་དུ་ནོར་བུ་ལུགས་སུ་བསྟོད་པར་འགྲེལ་པའི་ལུགས་ལྟར་ན།

རིགས་ཅན་རྣམས་ཀྱིས་རྒྱུད་དོན་ཞུ་བའི་ཕྱིར་སྟོན་པ་སྐྱེས་བུའི་མཚན་གྱི་རྣམ་གྲངས་ལས་བསྟོད་པ་བརྒྱད་བྱས་པ་སྟེ། དང་པོ། མཚན་མོ། ཞེས་པ་ནས། བདག་པོར་གྲགས། །ཞེས་པའི་བར་གྱིས་ཁྱོད་གསང་བའི་དོན་གྱི་བདག་པོ་སྐུ་ཤིན་ཏུ་བཀོད་པའང་རྒྱལ་བ་རིལ་གྱི་དགོངས་པའི་མངའ་བདག་ཡིན་ནོ་བར་བསྟོད་པ་ནི་ཐབས་བཅུ་བཞི་པའི་ཡོན་ཏན་གྱི་སྒོ་ནས་བསྟོད་པའོ། །གཉིས་པ། བཀའ་རྣམས། ཞེས་པ་ནས། ཆེན་པོར་གྲགས། །ཞེས་པའི་བར་གྱིས་བཀའ་ཐམས་ཅད་ཀྱི་དགོངས་པ་འགྲེལ་པ་པོར་བསྟོད་པ་ནི་ཐབས་བཅུ་པ་དང་བཅུ་གཅིག་པའི་ཡོན་ཏན་གྱི་སྒོ་ནས་བསྟོད་པའོ། །གསུམ་པ། སེམས་ཀྱི། ཞེས་པ་ནས། ཉི་མར་གྲགས། །ཞེས་པའི་བར་གྱིས་གདུལ་བྱའི་བསམ་པ་རིལ་ལ་གསང་བ་གསུམ་གྱི་དོན་ཤར་བར་༼༧༥༽མཛད་ནས་སྒྲིབ་པའི་མུན་པ་སེལ་བའི་ཉི་མ་ཡིན་ནོ་བར་བསྟོད་པ་ནི་ཐབས་བརྒྱད་པའི་ཡོན་ཏན་གྱི་སྒོ་ནས་བསྟོད་པའོ། །བཞི་པ། གདུལ་དཀའ། ཞེས་པ་ནས། བདུད་དུ་གྲགས། །ཞེས་པའི་བར་གྱིས་ལོག་ལྟ་དང་ལོག་ལྟ་ཅན་རིལ་གྱིས་མི་ཚུགས་ཤིང་འཇོམས་པས་བདུད་ཀྱི་ཡང་བདུད་ཁྱོད་ཡིན་ནོ་བར་བསྟོད་པ་ནི་ཐབས་དྲུག་པའི་ཡོན་ཏན་ལ་བསྟོད་པའོ། །ལྔ་པ། དེ་བཞིན། ཞེས་པ་ནས། ཞེས་ཀྱང་གྲགས། །ཞེས་པའི་བར་གྱིས་ཆོས་རིལ་མ་འདྲེས་ལ་ཡོངས་སུ་རྫོགས་པར་གསལ་བར་མཛད་པས་ཆོས་ཀྱི་མེ་ལོང་ཁྱོད་ཡིན་ནོ་བར་བསྟོད་པ་ནི་ཐབས་གཉིས་པའི་ཡོན་ཏན་གྱིས་བསྟོད་པའོ། །དྲུག་པ། དུག་འཇོམས། ཞེས་པ་ནས། རྒྱལ་པོར་གྲགས། །ཞེས་པའི་བར་གྱིས་གདུལ་བྱའི་ནང་གི་གཅོང་རྙིང་འབྱིན་པའི་སྨན་པའི་རྒྱལ་པོ་ཁྱོད་ཡིན་ནོ་བར་བསྟོད་པ་ནི་ཐབས་གསུམ་པའི་སྒོ་ནས་བསྟོད་པའོ། །བདུན་པ། དགའ་མགུ ཞེས་པ་ནས། སེལ་བར་གྲགས། །ཞེས་པའི་བར་གྱིས་གདུལ་བྱ་རིལ་གྱི་བསམ་པ་དང་མཐུན་པར་དོན་མཛད་པས་སྒོ་གསུམ་གྱི་གདུང་བ་སེལ་བ་ལ་བཤེས་གཉེན་མགོན་ཡིན་ནོ་བར་བསྟོད་པ་ནི། མཛད་པ་དང་པོ་དང་བཞི་པ་དང་ལྔ་པའི་སྒོ་ནས་བསྟོད་པའོ། །བརྒྱད་པ། འདོད་པ། ཞེས་པ་ནས། ནོར་བུར་གྲགས། །ཞེས་པའི་བར་གྱིས་གདུལ་བྱའི་བསམ་པའི་རེ་འདོད་རིལ་སྐོང་བས་ནོར་བུ་རིན་པོ་ཆེ་ཁྱོད་ཡིན་ནོ་བར་བསྟོད་པ་ནི། ཐབས་བདུན་པ་དང་དགུ་པའི་ཡོན་ཏན་གྱི་སྒོ་ནས་བསྟོད་པའོ།།

གསུམ་པ་ཞུས་པ་དངོས་ནི།

དམ་པ་རྣམས་དང༌། ཞེས་པ་ནས། བཏབ་བོ། །ཞེས་པའི་བར་གྱིས་བསྟན་ཏེ།

དམ་པ་རྣམས་དང་མཐུན་མཛོད་ལ། །བདག་ཅག་རིག་པ་འཛིན་རྣམས་ལ། །དམ་པའི་སྤྲུལ་པ་གང་ལྟར་ནུབ།།

དམ་པའི་སྒྲོན་མ་ཇི་ལྟར་བཀོད། །དམ་པའི་གསང་ལུང་ཇི་ལྟར་འབྱུང་། །གསང་བ་བརྒྱུད་པའི་བགྲོ་བ་མཛོད།།

དགོངས་པའི་ཚིག་གསུམ་བགྲོ་བ་མཛོད། །ནམ་མཁའི་རྡོ་རྗེ་བགྲོ་བ་མཛོད། །ཅེས་གསོལ་བ་བཏབ་བོ།།

དེ་ལྟར་མཉེས་པའི་རྒྱུ་སྔོན་དུ་བཏང་ནས་ཞུ་བ་དངོས་ནི། སྔར་གྱི་སྟོན་པ་དམ་པ་རྣམས་དང་དགོངས་པ་དང་མཛད་པ་མཐུན་པར་མཛོད་ལ། བདག་ཅག་དམན་པའི་ལུས་ཅན་གྱི་འཁོར་ལང་ཀ་ལ་སོགས་པ་རིག་པ་འཛིན་པ་རྣམས་ལ། དམ་པའི་སྤྲུལ་པ་ཐུབ་པའི་དབང་པོ་ཉིད་གང་ལྟར་ནུབ་སྟེ་མྱ་ངན་ལས་འདས་པར་ཞུས་ཏེ། འདི་ཉིད་ལྷ་རྗེ་ཡང་ཁྱེད་བླ་མས་རྨོངས་པ་གདུང་བ་སེལ་བའི་བྱུང་ཚུལ་ཞུས་པར་བཞེད་ལ། ཞིང་ཁམས་སོ་སོར་དམ་པའི་སྒྲོན་མ་ཇི་ལྟར་བཀོད་པ་ཞུས་ཏེ། ལྷ་རྗེ་ཡང་ཁྱེད། སྒྲོན་མ་བཀོད་པ། ངེས་པ་རྙེད་པ། དགོངས་པ་འགྲེལ་པ་གསུམ་དྲིས་པར་བཞེད་ཅིང༌། གསང་སྔགས་ཐེག་པ་ཆེན་པོ་དམ་པའི་གསང་ལུང་ཇི་ལྟར་བྱུང་བ་ཞུས་ཏེ། ལྷ་རྗེ་ཡང་ཁྱེད། གདུལ་བྱའི་སྐབས་ལ་བབ་པ། བརྒྱུད་པ་ཐབས་ཀྱི་གྲགས་པ། ལུང་ཆེན་ངེས་པར་བསྟན་པ་གསུམ་ཞུས་པར་བཞེད་དེ། ༼༧༦༽དེ་ལྟར་གསུམ་ཞུས་ནས་གསང་བ་ཆེན་པོ་སྔགས་ཀྱི་ཐེག་པ་རྒྱུད་ཀྱི་རྒྱལ་པོ་བགྲོ་བའམ་བཤད་པར་མཛོད་ཅིག་ཅེས་གསོལ་བ་གདབ་སྟེ། ལྷ་རྗེ་ཡང་ཁྱེད། བྱིན་རླབས་སྣང་བ་དང༌། དགོངས་པ་བགྲོ་བ་གཉིས་ཞུས་པར་བཞེད་ཅིང༌། ངེས་དོན་དགོངས་པའི་དྲིས་ཚིག་གསུམ་པོ་བགྲོ་བར་མཛོད་ཅིག་ཅེས་གསོལ་བ་གདབ་སྟེ། ལྷ་རྗེ་ཡང་ཁྱེད། གང་གི་ཆེད་དུ་མཛད་པ་དང༌། ལས་རྒྱུད་གཅོད་པ་གཉིས་དྲིས་པར་བཞེད་ལ། ཡེ་ཇི་བཞིན་པ་ནམ་མཁའི་རྡོ་རྗེ་ངེས་པའི་གསང་བ་མཆོག་གི་དོན་ཉིད་བགྲོ་བའམ་སྟོན་པར་མཛོད་ཅིག་ཅེས་གསོལ་བ་གདབ་སྟེ། ལྷ་རྗེ་ཡང་ཁྱེད། སྙིང་པོ་བྱང་ཆུབ་ཏུ་ངེས་པའི་བྱུང་ཚུལ་ཞུས་པར་བཞེད་དོ། །དེ་ལྟར་བསྐུལ་ཞིང་གུས་པས་གསོལ་བ་གསུམ་བཏབ་བོ།།

ལེའུའི་མཚན་ནི།

སངས་རྒྱས་ཀུན་གྱིདགོངས་པ་འདུས་པའི་མདོ་ཆེན་པོ་ལས།

ལུང་དམ་པ་བགྲོལ་བར་གསོལ་བ་བཏབ་པའི་ལེའུ་སྟེ་ལྔ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། བཤད་མ་ཐག་པ་ལྟར་ལུང་དམ་པ་བགྲོ་བར་གསོལ་བ་བཏབ་པའི་ལེའུ་སྟེ་ལྔ་པ་རྣམ་པར་བཤད་པའོ།། །།

ལེའུ་དྲུག་པ་གང་རྨོངས་པ་གདུང་བ་སེལ་བའི་གཏམ་རྒྱུད་བརྗོད་པ།

༈ གསུམ་པ་རྒྱུད་ཀྱི་དོན་དངོས་ལ་གཉིས་ཏེ། བཤད་པར་དམ་བཅས་ཏེ་ཉོན་ཅིག་པར་གདམས་པ། རྒྱུད་ཀྱི་དོན་དངོས་རྒྱས་པར་བཤད་པའོ། །དང་པོ་ནི།

དེ་སྐད་ཅེས། ཞེས་པ་ནས། དགྲོལ་གྱིས་ཉོན། །ཞེས་པའི་བར་གྱིས་བསྟན་ཏེ།

དེ་སྐད་ཅེས་གསོལ་པ་ལས། གསང་བ་པའི་བདག་པོས་བཀའ་སྩལ་པ། སྔོན་དུ་བྱུང་བར་ལུང་བསྟན་པའི།།

འགྲོ་བ་ལུས་ཀྱི་སེམས་དཔའ་རྣམས། །གདུང་སྔགས་དྲི་བ་དང་བཅས་པའི། །སྒྱུ་མའི་རྟོག་པ་དགྲོལ་གྱིས་ཉོན།།

གོང་དུ་བསྟན་མ་ཐག་པ་དེ་སྐད་ཅེས་གསོལ་བ་བཏབ་པ་ལས། སྟོན་པ་གསང་བ་པའི་བདག་པོས་བཤད་པར་ཞལ་གྱིས་བཞེས་ཏེ་བཀའ་སྩལ་པ། སྟོན་པ་མ་འདས་པའི་སྔོན་དུ་བྱུང་ནས་བྱུང་ཚུལ་བཅུ་གཉིས་ཀྱི་ཚུལ་གྱིས་གསང་སྔགས་ཐབས་ཀྱི་ཐེག་པ་ཁྱེད་རྣམས་ལ་བགྲོ་བར་ཐུབ་པས་ལུང་བསྟན་མཛད་པའི། འགྲོ་བ་ལུས་ཀྱི་དམ་ཚིག་གི་སེམས་དཔའ་རྣམས་ཀྱིས་གདུང་སྔགས་ཉེར་གསུམ་དང་དྲི་བ་དྲུག་དང་བཅས་པའི་ཞུ་བ་ཕུལ་བ་རྣམས་ནི་སྒྱུ་མའི་རྟོག་པ་ཡིན་པས་དགྲོལ་དགོས་ལ་དགྲོལ་ཡང་ནུས་པས་ན། རྒྱལ་བ་རྣམས་ཀྱི་བཀའ་ལུང་བཞིན་དུ་གསལ་བར་བགྲོས་ཏེ་དགྲོལ་བར་བྱེད་ཀྱིས་ལེགས་པར་ཉོན་ལ་ཡིད་ལ་ཟུངས་ཤིག་པའོ།།

གཉིས་པ་རྒྱུད་ཀྱི་དོན་དངོས་རྒྱས་པར་བཤད་པ་ལ་བྱུང་ཚུལ་བཅུ་གཉིས་ཀྱིས་བསྟན་པ་ལས། དང་པོ་རྨོངས་པ་གདུང་བ་སེལ་བ་ལ་ལྔ་སྟེ། གདུང་བ་ཉི་ཤུ་རྩ་གསུམ་བསལ་བའི་ལན། གདུང་བ་སྐྱེ་བའི་རྒྱུ་མེད་པས་མ་སྐྱེད་ཅིག་པར་གདམས་པ། གདུང་བ་སེལ་བའི་ཡོན་ཏན། གདུང་བ་སེལ་བའི་ཚད། གདུང་བ་ཡོད་མེད་ཀྱི་ཁྱད་པར་རོ། །དང་པོ་ལ་ཉི་ཤུ་རྩ་གསུམ་སྟེ། སྒྲོན་མ་མི་ནུབ་པར་མུན་པ་རང་བཞིན་གྱིས་སེལ་བ། ཤེས་བྱ་ཉིད་ཚད་མར་གྱུར་པས་གཏན་ལ་ཕེབས་པ། སྤྱན་ལ་ཟུམ་པ་མེད་༼༧༧༽པས་ལོག་སྟོབས་མི་འཕེལ་བ། ཉི་ཟླ་མ་ནུབ་པས་མུན་པར་མི་འགྱུར་བ། སྟོན་པ་མི་འདའ་ཞིང་གདུག་ པ་བདག་མེད ་པས་འདུལ་བ། བསྟན་པ་ཤེས་རབ་རྩལ་ཅན་གྱིས་གསལ་བར་བྱེད་པ། བསླབ་པ་ས་ནོན་པ་ཕྱིས་འབྱུང་བས་འཛིན་པ། སྙིང་པོ་བྱང་ཆུབ་ཏུ་གནས་པས་བཙལ་དུ་མེད་པར་ལུང་བསྟན་པ། མི་མཁས་པས་རྩོད་ཅིང་མཁས་པས་མི་རྩོད་པ། མ་རྟོགས་པས་ཐ་དད་དུ་བསླད་ཅིང་འཆོས་པ། རྨོངས་པས་ཆོས་དང་ནོར་བརྗེ་བས་གཉིས་ཀ་སྲེག་པ། སྟོན་པ་སེམས་ཉིད་ལ་འཕོ་འགྱུར་མེད་པས་བསྟན་པ་ལ་དགྲ་མི་འོང་བ། བསྟན་པའི་ཡུན་བྱང་ཆུབ་སྙིང་པོ་དང་མཉམ་པར་གནས་པ། དུས་གསུམ་མཉམ་པས་སྔ་ཕྱི་མེད་དེ་མི་འགྱུར་བ། བསྟན་པའི་མཐའ་བརྗོད་པ་དང་བྲལ་བར་འགྱུར་བ། སློབ་མའི་མཐའ་དེ་བཞིན་ཉིད་ལས་མི་འགྱུར་བ། འདི་ནས་དེ་བཞིན་ཉིད་དུ་གཤེགས་ཤིང་མེ་ཏོག་བཀོད་པར་སྣང་བ། འགྲོ་བའི་མགོན་དུ་བདེ་གཤེགས་སྙིང་པོ་འོང་བ། བློ་གྲོས་དགོངས་པ་ཚིག་གསུམ་ལ་བཙལ་བ། ངེས་དོན་ཇི་བཞིན་པ་བློ་ལ་བཞག་ལ་གཟུང་བ། སྐུ་གདུང་དངོས་པོ་མེད་ཀྱང་གདུལ་བྱ་ལ་འབྱུང་བ། མཆོད་གནས་མཁས་པ་དང་སྐུ་གསུང་ཐུགས་ཀྱི་གཟུགས་བརྙན་ལ་བྱ་བ། གདུང་འཚོབ་སྐྱེས་བུ་སེམས་ཅན་ལ་འབྱུང་བར་བསྟན་པའོ། །དང་པོ་ནི།

སེམས་ཀྱི། ཞེས་པ་ནས། དེ་ཉིད་སེལ། །ཅེས་པའི་བར་གྱིས་བསྟན་ཏེ།

སེམས་ཀྱི་དཀྱིལ་འཁོར་དེ་བཞིན་ཉིད། །ནམ་མཁའ་བཞིན་དུ་ནུབ་པ་མེད།།

རང་བཞིན་ཡེ་ནས་འོད་གསལ་བས། །དེ་ལ་གང་སྒྲིབ་དེ་ཉིད་སེལ།།

སྤྱིར་ལེའུ་འདིས་ངེས་དོན་སྟོན་ལ། དམ་པའི་སྤྲུལ་པ་གང་ལྟར་ནུབ་ཀྱི་ལན་ཏེ། ཁྱད་པར་རྩལ་འཕངས་ལས་ཚོགས་ལམ་སེམས་བསྐྱེད་པ། རྒྱུད་གནས་ལུགས་ལས་རྨོངས་པ་གདུང་བ་སེལ་བའི་བྱུང་ཚུལ་མ་རིག་མུན་སེལ་གྱི་ལྟ་བ་མ་དང་བུ་འཕྲད་པ་ལྟ་བུ་ཉིད་རྒྱས་པར་སྟོན་ནོ། །སེམས་ཀྱི་དཀྱིལ་འཁོར་རང་བཞིན་གྱི་འོད་གསལ་བའི་ངོ་བོ་ཆོས་ཉིད་དེ་བཞིན་ཉིད་ཀྱི་དབྱིངས་དེ་ཉིད་སྟོན་པ་ཡིན་པས་དོན་ལ་སྟོན་པ་རྡོ་རྗེའི་སྐུ་མངའ་བ་དེ་ནི་འདུས་མ་བྱས་ནམ་མཁའ་བཞིན་དུ་ནུབ་པ་མེད་དེ་གསང་སྔགས་ཀྱི་རང་བཞིན་ཡེ་ནས་འོད་གསལ་བ་ཇི་བཞིན་པའི་དོན་དུ་ཤར་བས། དེ་ལ་གང་གིས་སྒྲིབ་སྟེ་འགྲོ་བའི་མུན་པ་མ་སྤང་བར་ཞི་བས་གདུལ་བྱའི་རྒྱུད་ཀྱི་མུན་པ་དེ་ཡང་སེམས་ཉིད་རང་སྣང་དུ་རྟོགས་པ་ཉིད་ཀྱིས་སེལ་ཏེ་མེ་དང་ཤིང་བལ་ལྟ་བུའོ་ཞེས་ལན་བཏབ་པས་དྲི་བ་དང་པོའི་གདུང་བ་སངས་སོ།།

གཉིས་པ་ཤེས་བྱ་ཉིད་ཚད་མར་གྱུར་པས་གཏན་ལ་ཕེབས་པ་ནི།

ཚད་མ། ཞེས་པ་ནས། ཚད་མར་འགྱུར། །ཞེས་པའི་བར་གྱིས་བསྟན་ཏེ།

ཚད་མ་གཉིས་ཀྱིས་གང་གཞལ་བ། །ཤེས་བྱ་དེ་ཡང་ཚད་མར་འགྱུར།

ཐུབ་པའི་དབང་པོ་དང་གསང་སྔགས་ཀྱི་ངོ་བོ་ནི་གཅིག་དང་དུ་མ་ལས་གྲོལ་བའི་ཕྱིར་ཕྱིས་གསང་༼༧༨༽སྔགས་ཐུན་མོང་མ་ཡིན་པའི་ཐབས་ལ་མངོན་སུམ་དང་རྗེས་དཔག་གཉིས་སུ་བྱུང་ཞིང་གཉིས་པོ་ལའང་ལུང་དང་མན་ངག་གི་ཚད་མ་གཉིས་ཀྱིས་གང་ཤར་ཡང་བྱང་ཆུབ་ཀྱི་སེམས་དཀྱིལ་འཁོར་གསུམ་གྱི་བདག་ཉིད་དུ་གཞལ་བྱར་བྱས་པ་ན་དེ་ལྟར་རྟོགས་པའི་གང་ཟག་གིས་ཀྱང་དོན་གཏན་ལ་ཕེབས་པས། ཤེས་བྱ་དངོས་པོ་སྣ་ཚོགས་པ་ཀུན་ཀྱང་གསང་སྔགས་ཀྱི་ངོ་བོར་གྱུར་ཏེ། མེ་རང་ཉིད་ཚ་ཞིང་གཞན་སྲེག་པ་ལྟར་ཤེས་བྱ་དེ་ཡང་རང་བཞིན་གྱི་སྣང་བར་ཤར་ནས་རང་གི་ངོ་བོས་ཚད་མར་འགྱུར་བས་ལོག་པར་མི་འགྱུར་རོ་ཞེས་ལན་གསུངས་པས་གདུང་བ་གཉིས་པ་སངས་སོ།།

གསུམ་པ་སྤྱན་ལ་ཟུམ་པ་མེད་པས་ལོག་སྟོབས་མི་འཕེལ་བ་ནི།

ལེགས་ཉེས། ཞེས་པ་ནས། འགྱུར་མེད་པས། །ཞེས་པའི་བར་གྱིས་བསྟན་ཏེ།

ཉེས་ལེགས་རྩ་བའང་དེ་ཉིད་པས། །དེ་ཉིད་དེ་ལ་འགྱུར་བ་མེད།།

སྟོན་པ་འདས་ཀྱང་ལེགས་ཉེས་སམ་ནོར་བ་དང་མ་ནོར་བའི་རྩ་བ་ནི་མ་རིག་པ་ཡིན་ལ་དེ་ཡི་ངོ་བོའང་སེམས་ཉིད་ཡེ་ཇི་བཞིན་པ་དེ་ཉིད་ཡིན་པས། དེ་ལྟར་གཏན་ལ་འབེབས་པའི་གཞི་ཚད་མ་གཉིས་ཀྱིས་བསྟན་པ་ལ་ཞུགས་ནས་དེ་ཁོ་ན་ཉིད་ཡང་དག་པར་རྟོགས་པ་དེ་ལ་འགྱུར་བ་མེད་ཅིང་ཡེ་ཤེས་ཀྱི་སྤྱན་ལ་ཟུམ་པ་མེད་པས་རྒོལ་བ་ཚར་གཅོད་དེ་ལོག་སྟོབས་འཕེལ་བར་མི་འགྱུར་རོ། །ཞེས་ལན་བཏབ་པས་གདུང་བ་གསུམ་པ་སངས་སོ།།

བཞི་པ་ཉི་ཟླ་མ་ནུབ་པས་མུན་པར་མི་འགྱུར་བ་ནི།

སེམས་ཀྱི། ཞེས་པ་ནས། གནག་པའི་མུན་པ་སེལ་བ་མེད། །ཅེས་པའི་བར་གྱིས་བསྟན་ཏེ།

སེམས་ཀྱི་རང་བཞིན་འོད་གསལ་བ། །དཀར་བས་དཀར་བའི་ཉི་ཟླ་མེད། །གནག་པའི་མུན་པ་སེལ་བའང་མེད།།

གསང་སྔགས་དེ་ཁོན་ཉིད་ཀྱི་ལུགས་ཀྱིས་ཀུན་གཞི་དགུ་པ་སེམས་ཀྱི་རང་བཞིན་འོད་གསལ་བ་ཉིད་ཡེ་ནས་བདེན་པ་གཉིས་སུ་མེད་པར་རང་ཤར་བས་ན་མཐས་མ་སྒྲིབ་པར་གདོད་ནས་དཀར་བས་གཉེན་པོ་དང་བྲལ་བ་ལ་འཕྲལ་དུ་ལམ་པས་ཐ་དད་དང་གཅིག་པར་དཀར་བར་བྱེད་པའི་གློ་བུར་བའི་ཉི་ཟླ་ཡང་མེད་པས། གནག་པའི་མུན་པ་གོལ་ས་ཡང་མ་དམིགས་པ་ལ་གཞན་གྱིས་སེལ་བའང་མེད་དེ་སྤང་གཉེན་ལས་གྲོལ་བའི་ཕྱིར་བསྟན་པ་ལོག་པའི་སྤྲིན་འཁྲིགས་ནས་མུན་པར་འཁྱམས་པར་མི་འགྱུར་རོ། །ཞེས་ལན་མཛད་པས་གདུང་བ་བཞི་པ་སངས་སོ།།

འདི་ལ་སྡེ་སྤར་དང་ཕྱག་དཔེ་གཞན་ཀུན་ན་རྐང་པ་གཉིས་ལས་མི་བཞུགས་ཀྱང༌། ཆོས་རྗེ་རིན་པོ་ཆེའི་ཕྱག་མཆན་བཞུགས་པའི་དཔེ་དང་ཕྱག་དཔེ་གཞན་གཅིག་ལའང་གསུམ་སྣང་བས་འགྲེལ་ཆེན་གྱི་སྒྲོས་ལ་བརྟགས་ན་ཆད་པར་མངོན་ནོ།།

ལྔ་པ་སྟོན་པ་མི་འདའ་ཞིང་གདུག་ པ་བདག་མེད ་པས་འདུལ་བ་ནི།

སངས་རྒྱས། ཞེས་པ་ནས། སྟོབས་ཀྱི་འདུལ། །ཞེས་པའི་བར་གྱིས་བསྟན་ཏེ།

སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །ལེ་ལོ་ཅན་ལ་ཕན་གདགས་ཕྱིར།།

སྤྲུལ་པ་རྣམས་ནི་འདའ་ཚུལ་སྟོན། །ཇི་ལྟར་ནམ་མཁའ་ཞིག་གྱུར་ན། །དེ་ཚེ་མྱ་ངན་འདའ་བར་འགྱུར།།

གང་དག་གདུག་པ་མ་རུངས་པ། །བདག་མེད་སྟོང་པའི་སྟོབས་ཀྱིས་འདུལ།།

བཤད་པ་བཞིན་དུ་འཕོ་འགྱུར་མི་མངའ་བས་སངས་རྒྱས་རྡོ་རྗེའི་སྐུ་མྱ་༼༧༩༽ངན་ལས་ཡོངས་སུ་མི་འདའ་ལ། དེའི་ཞལ་ནས་གསུངས་པའི་དམ་པའི་ཆོས་ཀྱང་ཇི་སྲིད་འཁོར་བ་གནས་ཀྱི་བར་དུ་ནུབ་པར་མི་འགྱུར་ཏེ། ལྷུན་གྱིས་གྲུབ་པའི་བསྟན་པ་ལ་ཤར་ནུབ་མེད་པས་སོ། །དེ་ལྟ་བས་ན་སེམས་ཅན་གང་དག་ལེ་ལོ་ཅན་ལ་ཕན་གདགས་པའི་ཕྱིར་སྤྲུལ་པ་རྣམས་ནི་མྱ་ངན་ལས་འདའ་བའི་ཚུལ་སྟོན་ཏེ་དེ་ཡིས་འདུལ་བས་སོ། །དོན་ལ་མི་འདའ་བའི་ཚད་ཇི་ལྟར་ནམ་མཁའ་ཉིད་ཞིག་པར་གྱུར་ན། དེ་ཚེ་སངས་རྒྱས་ཀྱི་ངོ་བོ་ཉིད་ཀྱང་མྱ་ངན་ལས་འདའ་བར་འགྱུར་ཏེ་སྐྱེ་ཤི་མེད་པར་འདྲ་བས་སོ། །གང་དག་ཕྱི་ནང་གི་གདུག་པ་མ་རུངས་པ་ལོག་སྲེད་ཅན་དང་ཉོན་མོངས་པ་ལ་སོགས་ པ་རྣམས་ནི་བདག་མེད ་གཉིས་ཀྱི་རང་བཞིན་མཐའ་བྲལ་སྟོང་པ་ཆེན་པོ་གཉིས་སུ་མེད་པའི་གཤིས་ཀྱི་ཡིན་ལུགས་རྟོགས་ནས་ངང་ལས་མི་འདའ་བས་ལྟ་སྒོམ་གྱི་སྟོབས་ཀྱིས་འདུལ་ཞིང་རང་ཞི་བར་འགྱུར་ཏེ། དཔེར་ན་ཐབ་ཀྱི་མེ་བསད་ན་རྩིག་མིག་གི་དུ་བ་འཆད་པ་བཞིན་ནོ། །ཞེས་ལན་བཀའ་སྩལ་པས་གདུང་བ་ལྔ་པ་སངས་སོ།།

དྲུག་པ་བསྟན་པ་ཤེས་རབ་རྩལ་ཅན་གྱིས་གསལ་བར་བྱེད་པ་ནི།

རང་བཞིན། ཞེས་པ་ནས། སྣང་བར་བྱེད། །ཅེས་པའི་བར་གྱིས་བསྟན་ཏེ།

རང་བཞིན་འོད་གསལ་སྤྲོས་བྲལ་བའི། །བསྟན་པ་རྒྱ་མཚོ་དེ་ཉིད་པས།།

རང་བྱུང་སེང་གེ་རྩལ་ཅན་གྱིས། །ཀུན་ཏུ་འབར་ཞིང་སྣང་བར་བྱེད།།

རྒྱུ་རྐྱེན་མེད་པར་རང་བཞིན་གྱིས་འོད་གསལ་བའི་ཡེ་ཤེས་ནི་སྣང་བ་དང་སྟོང་པ་དང་གཉིས་སུ་མེད་པའི་སྤྲོས་པ་གསུམ་མ་སྤང་བར་བྲལ་བའི་མི་གཡོ་བ་ཆེན་པོ་སྟེ་གསུང་ལྔའི་ངོ་བོ་བསྟན་པ་རྒྱ་མཚོའང་དེ་ཉིད་ཡིན་པས། རང་བྱུང་གི་ཡེ་ཤེས་དེའི་དོན་ཇི་ལྟ་བར་སོན་པའི་འགྱིང་བག་གིས་ཆོས་སྟོན་པས་སྨྲ་བའི་སེང་གེ་རྩལ་ཆེན་པོ་རྫོགས་པས་གསང་བདག་རྡོ་རྗེ་འཛིན་པ་ཉིད་དང་ལང་ཀ་ལ་སོགས་པ་རྣམས་ཀྱིས་བསྟན་པ་ཁྱད་པར་ཅན་ཀུན་ཏུ་འབར་ཞིང་སྣང་བར་བྱེད་དེ་རྒྱས་ཤིང་འཕེལ་བར་མཛད་པའོ། །ཞེས་ལན་གསུངས་པས་གདུང་བ་དྲུག་པ་སངས་སོ།།

བདུན་པ་བསླབ་པ་ས་ནོན་པ་ཕྱིས་འབྱུང་བས་འཛིན་པ་ནི།

བསླབ་པའང༌། ཞེས་པ་ནས། སེམས་དཔའ་འཛིན། །ཞེས་པའི་བར་གྱིས་བསྟན་ཏེ།

བསླབ་པ་ལྷག་པའི་སེམས་ཉིད་པས། །བསྒྲུབ་པ་ཀུན་གྱི་མཆོག་འདི་ནི།།

ས་རབ་སྣང་བ་ཕྱིས་འབྱུང་བའི། །འགྲོ་བ་ལུས་ཀྱི་སེམས་དཔས་འཛིན།།

ལྷག་པའི་བསླབ་པ་རིན་པོ་ཆེའང་ཐེག་པ་ཆེན་པོ་རང་རིག་པས་ལྷག་པའི་སེམས་ཉིད་ཡིན་པས་དོན་དུ་གཉེར་བའི་སྒྲུབ་པ་ཀུན་གྱི་མཆོག་གསང་བ་སྔགས་ཀྱི་བསླབ་པ་འདི་ནི། རིག་པ་འཛིན་པས་ས་མཆོག་རབ་ཏུ་གསང་བ་དེ་ཉིད་སྣང་ཞིང་ནོན་པ་བཀའ་ལུང་དམ་པ་འདི་ཉིད་བགྲོས་པས་མཐུ་ལས་ཕྱིས་སུ་འབྱུང་བར་འགྱུར་བའི་འགྲོ་བ་ལུས་ཀྱི་སེམས་དཔའ་ཆེན་པོ་དམ་པའི་རིགས་ཅན་ལང་ཀ་ལ་སོགས་པ་རྣམས་ཀྱིས་འཛིན་པར་འགྱུར་རོ། །ཞེས་ལན་བཏབ་པས་གདུང་བ་བདུན་པ་སངས་སོ།།

༼༨༠༽བརྒྱད་པ་སྙིང་པོ་བྱང་ཆུབ་ཏུ་གནས་པས་བཙལ་དུ་མེད་པར་ལུང་བསྟན་པ་ནི།

མཐའ་ཐུག ཅེས་པ་ནས། དེ་ལུང་སྟོན། །ཞེས་པའི་བར་གྱིས་བསྟན་ཏེ།

མཐར་ཐུག་མེད་པའི་སེམས་ཅན་རྣམས། །བྱང་ཆུབ་སྙིང་པོར་ཡེ་གནས་པས།།

དེ་བཞིན་ཉིད་དུ་རྒྱུད་ངེས་ཕྱིར། །ཀུན་ཀྱང་མི་སློབ་དེ་ལུང་བསྟན།།

འཁོར་བ་ཐོག་མ་དང་ཐ་མའི་མཐའ་ལ་ཐུག་པ་མེད་པའི་འགྲོ་བ་སེམས་ཅན་རྣམས་རྩ་བ་བྱང་ཆུབ་ཀྱི་སྙིང་པོར་ཡེ་ནས་གནས་པ་ཡིན་པས། རིགས་མི་འགྱུར་བར་དེ་བཞིན་ཉིད་དུ་རྒྱུད་གཅིག་པར་ངེས་པའི་ཕྱིར། རྨད་དུ་བྱུང་བའི་ཐེག་པ་འདིས་ཀུན་ཀྱང་མི་སློབ་པ་དེ་ཉིད་དུ་བྱ་བ་མེད་པའི་སངས་རྒྱས་སུ་ལུང་སྟོན་པར་བྱེད་དོ། །ཞེས་ལན་གསུངས་པས་གདུང་བ་བརྒྱད་པ་སངས་སོ།།

དགུ་པ་མི་མཁས་པས་རྩོད་ཅིང་མཁས་པས་མི་རྩོད་པ་ནི།

སེམས་ཉིད། ཅེས་པ་ནས། ཚིག་མི་བརྗོད། །ཅེས་པའི་བར་གྱིས་བསྟན་ཏེ།

སེམས་ཉིད་ཡོད་དང་མེད་དོ་ཞེས། །བྱིས་པ་རྣམས་ནི་རྩོད་པར་བྱེད།།

མཁས་པ་ཡེ་ནས་རྩོད་དང་བྲལ། །ཡོད་མེད་རྟོག་པའི་ཚིག་མི་བརྗོད།།

སེམས་འདི་ཉིད་ཡང་དག་པར་ཡོད་པ་དང་དོན་ལ་གྲུབ་པ་མེད་དོ་ཞེས་ཐུན་མོང་མ་ཡིན་པ་གཉིས་སུ་མེད་པའི་དོན་ལ་ཤེས་མ་བྱེ་བའི་དབུ་མ་པ་ལ་སོགས་པ་བྱིས་པ་རྣམས་ནི་མཐའ་ཡོད་མེད་ལ་རྩོད་པར་བྱེད་ཀྱང༌། དོན་ཆེན་པོ་ལ་ཤེད་བྱེ་བའི་འབྲས་བུ་གསང་སྔགས་ལ་མཁས་པས་དམ་པ་དག་ནི་ཡེ་ནས་མཐའ་དང་བྲལ་བ་ལ་དེ་ཉིད་དུའང་འཛིན་ཅིང་རྟོག་པ་མེད་པའི་ཕྱིར་རྩོད་པ་དང་བྲལ་ཞིང་ཡོད་མེད་ལ་སོགས་པར་གཉིས་སུ་རྟོགས་པའི་ཚིག་ཀྱང་མི་བརྗོད་དོ། །ཅེས་ལན་མཛད་པས་གདུང་བ་དགུ་པ་སངས་སོ།།

བཅུ་པ་མ་རྟོགས་པས་ཐ་དད་དུ་བསླད་ཅིང་འཆོས་པ་ནི།

ང་ཡི། ཞེས་པ་ནས། ཐ་དད་འབྱུང༌། །ཞེས་པའི་བར་གྱིས་བསྟན་ཏེ།

ང་ཡི་གསང་སྔགས་གསང་བ་འདི། །སངས་རྒྱས་ཀུན་གྱི་གསང་ཡིན་ཕྱིར།།

གང་མི་དཔོགས་པར་གཞན་དཔགས་པའི། །གསང་བར་སྒྲ་གཅིག་ཐ་དད་འབྱུང་།།

སྟོན་པ་ང་ཡི་གསང་སྔགས་ངེས་པའི་གསང་དོན་དངོས་པོ་རྣམས་ཀྱི་དེ་ཁོ་ན་ཉིད་ལྷུན་གྱིས་གྲུབ་པ་འདི་ནི། སངས་རྒྱས་ཀུན་གྱི་དགོངས་པའི་ཞེ་ཕུགས་ཐུགས་ཀྱི་གསང་བ་ཡིན་པའི་ཕྱིར་ཤིན་ཏུ་བརྟགས་པར་དཀའ་བས། གང་བློས་མཐོང་བའི་སྐལ་བ་མེད་པ་དག་གིས་སྔགས་ཀྱི་དགོངས་དོན་ཟབ་མོ་ཇི་ལྟ་བར་མི་དཔོགས་ཤིང་རྟོགས་པར་མི་ནུས་པས་གཞན་ཐུན་མོང་གི་ཚད་མ་གཉིས་ཀྱི་ཚོལ་ཞིང་དཔོགས་པར་བྱེད་པ་ན། དེ་ལྟར་བརྟགས་པས་མཐོང་བ་ཐ་དད་ཀྱི་ཕྱིར། ངེས་པའི་གསང་བར་སྒྲ་གཅིག་ཀྱང་དོན་ཐ་དད་དུ་འཕེལ་ཞིང་ལྟ་བས་ཕྱོགས་རིས་སུ་འཛིན་པ་འབྱུང་ཡང་གསང་དོན་ཇི་བཞིན་དུ་མཐོང་སྟེ། རྟགས་རྨི་ལམ་གྱིས་འཛིན། ཚུལ་རིག་པ་ལ་མངོན། དོན་དཔེ་ཡིས་མཚོན། ཐོག་ཏུ་དྲོད་ཚད་ཀྱིས་དབབ་པ་རྣམས་ནི་བཀའ་ཡི་དོན་ལ་ཚུལ་བཞིན་དུ་གནས་པར་འགྱུར་རོ། །ཞེས་ལན་བཀའ་སྩལ་པས་གདུང་བ་བཅུ་པ་སངས་སོ།།

བཅུ་གཅིག་པ་རྨོངས་པས་ཆོས་དང་ནོར་བརྗེ་བས་གཉིས་ཀ་སྲེག་པ་ནི།

དམ་པ། ཞེས་པ་ནས། སྲེག་པར་འགྱུར། །ཞེས་པའི་བར་གྱིས་བསྟན་ཏེ།

དམ་པ་རྣམས་ཀྱི་གསང་ལུང་འདི། །གང་དག་མི་ཤེས་རྨོངས་འཆར་བས།།

དུག་དང་བདུད་རྩི་བརྗེ་བས་ན། །ཕུང་བྱེད་གཉིས་ཀ་སྲེག་པར་འགྱུར།།

རྨད་དུ་བྱུང་བའི་བཀའ་སྒྲོ་སྐུར་དང་བྲལ་ཞིང་༼༨༡༽སངས་རྒྱས་དང་རིག་འཛིན་དམ་པ་རྣམས་ཀྱི་བྱ་བྲལ་རྫོགས་པའི་གསང་ལུང་འདི་ཉིད་ཀྱི་དོན་འཁྲུལ་པའི་གང་ཟག་གང་དག་གིས་ཇི་བཞིན་དུ་མི་ཤེས་ཤིང་མ་རྙེད་པའི་དབང་གིས་སེམས་རྨོངས་ཏེ་ཡིད་འདོད་པས་གཡེམ་ཞིང་འཕྱར་བས་འཕྱོན་མིའི་སེམས་ལྟ་བུས། དོན་མེད་པའི་སྙན་ངག་གི་ཆོས་དང་ཟང་ཟིང་གི་ནོར་རྫས་དུག་ལྟ་བུ་དང་ཁྱད་པར་ལྷག་པའི་བཀའ་ཟབ་མོའི་དམ་པའི་ཆོས་ཀྱི་བདུད་རྩི་གཉིས་བརྗེ་བར་བྱེད་པ་འབྱུང་སྟེ། དེ་རྣམས་ནི་འདི་ཕྱི་ཀུན་ཏུ་ཕུང་བར་བྱེད་ཅིང་གཙུབ་ཤིང་གཙུབ་སྟན་ལྟར་གཉིས་ཀ་སྲེག་པར་འགྱུར་བས་བག་ཡོད་པར་བྱའོ། །ཞེས་ལན་གསུངས་པས་གདུང་བ་བཅུ་གཅིག་པ་སངས་སོ།།

བཅུ་གཉིས་པ་སྟོན་པ་སེམས་ཉིད་ལ་འཕོ་འགྱུར་མེད་པས་བསྟན་པ་ལ་དགྲ་མི་འོང་བ་ནི།

ཀུན་གསལ། ཞེས་པ་ནས། སྤྲིན་བཞིན་མེད། །ཅེས་པའི་བར་གྱིས་བསྟན་ཏེ།

ཀུན་གསལ་མེ་ལོང་འོད་པོ་ཆེ། །མ་འདྲེས་ཡོངས་རྫོགས་སྟོན་པ་དེ།།

མཁའ་ལྟར་འཕོ་འགྱུར་མེད་པས་ན། །འཚེ་བའང་གློག་འབྱུང་སྤྲིན་བཞིན་མེད།།

སེམས་ཉིད་བདེ་བ་ཆེན་པོའི་ཡེ་ཀློང་ཡངས་པ་ནི་དངོས་པོ་གཉིས་ཀྱིས་བསྡུས་པའི་ཆོས་ཀུན་མ་བཀོལ་བར་ཡེ་ཤེས་བདེ་བ་ཆེན་པོར་རང་གསལ་བས་མེ་ལོང་འོད་པོ་ཆེ་དེ་ཉིད་ཐེག་མཆོག་རྒྱལ་པོ་འདིས་གཅིག་དང་ཐ་དད་ལས་གྲོལ་བའི་ཕྱིར་མ་འདྲེས་ཡོངས་རྫོགས་སུ་སྟོན་པ་ཉིད་དེ། དེ་ལྟ་བུའི་ཀློང་ལ་ཐུབ་པའི་དབང་པོའང་དཔེ་ནམ་མཁའ་ལྟར་འཕོ་འགྱུར་མེད་པར་བཞུགས་པའོ། །དེ་བས་ན་མ་རུངས་པའི་འཚེ་བར་བྱེད་པའང་ལྷུན་གྲུབ་ཀྱི་ཀློང་ལ་སྣང་ཡང་མི་དམིགས་ཏེ་ངོ་བོ་མི་ཟིན་པས་དཔེར་ན་གློག་འགྱུ་བ་ན་སྤྲིན་གྱི་མུན་པ་རང་དག་ཏུ་གསལ་བ་བཞིན་དུ་གནོད་པར་མི་ནུས་པའམ། ཡང་ན་སྤྲིན་མེད་ན་གློག་ཀྱང་མེད་པ་ལྟར་མ་རིག་པ་མེད་ན་ཡེ་ཤེས་ཀྱང་མེད་པས། འཚེ་བར་བྱེད་པའང་རྟོགས་པའི་བོགས་འདོན་དུ་གྱུར་ཏེ་སྐབས་ཚོལ་བར་མེད་པའོ། །ཞེས་ལན་མཛད་པས་གདུང་བ་བཅུ་གཉིས་པ་སངས་སོ།།

བཅུ་གསུམ་པ་བསྟན་པའི་ཡུན་བྱང་ཆུབ་སྙིང་པོ་དང་མཉམ་པར་གནས་པ་ནི།

བྱང་ཆུབ། ཅེས་པ་ནས། གནས་པ་ཡིན། །ཞེས་པར་བར་གྱིས་བསྟན་ཏེ།

བྱང་ཆུབ་སྙིང་པོ་ཡོད་པའི་བར། །དེ་སྲིད་བསྟན་པ་གནས་པ་ཡིན།།

ཇི་སྲིད་བྱང་ཆུབ་ཀྱི་སྙིང་པོ་དེ་ཁོ་ན་ཉིད་ཇི་ཙམ་དུ་གནས་ཤིང་ཡོད་ཀྱི་བར་དེ་སྲིད་དུ་དེ་དང་ཐ་མི་དད་པའི་ཕྱིར་མཚོན་བྱ་དོན་གྱི་བསྟན་པ་ཡང་གནས་པར་འགྱུར་བ་ཡིན་ནོ། །ཞེས་ལན་བཏབ་པས་གདུང་བ་བཅུ་གསུམ་པ་སངས་སོ།།

བཅུ་བཞི་པ་དུས་གསུམ་མཉམ་པས་སྔ་ཕྱི་མེད་དེ་མི་འགྱུར་བ་ནི།

ཐོག་མ། ཞེས་པ་ནས། ཡོད་མ་ཡིན། །ཞེས་པའི་བར་གྱིས་བསྟན་ཏེ།

ཐོག་མ་ཐ་མ་མེད་པ་ནས། །བྱུང་བས་སྔ་ཕྱི་ཡོད་མ་ཡིན།།

བསྟན་པ་རིན་པོ་ཆེ་ནི་དུས་རིལ་དུ་ཤར་ཏེ་སྔར་བྱུང་ངོ་ད་ལྟ་འབྱུང་ངོ་མ་འོངས་པ་ན་འབྱུང་བར་འགྱུར་རོ། །དེ་ཡང་དོན་གྱི་དབང་དུ་ན་ཡེ་ཐོག་མ་དང་ཐ་མ་བརྗོད་དུ་མེད་པ་ན་རང་ཤར་དུ་བྱུང་བས་དུས་གསུམ་མཉམ་པ་ཉིད་ལ་སྔ་ཕྱི་ཡོད་པ་༼༨༢༽མ་ཡིན་ཏེ། དུས་གསུམ་གྱི་རྒྱུད་ལས་གྲོལ་བས་ངོ་བོ་ཇི་བཞིན་པ་ལ་དགོངས་ཏེ་ལན་མཛད་པས་གདུང་བ་བཅུ་བཞི་པ་སངས་སོ།།

བཅོ་ལྔ་པ་བསྟན་པའི་མཐའ་བརྗོད་པ་དང་བྲལ་བར་འགྱུར་བ་ནི།

དང་པོ། ཞེས་པ་ནས། མེད་པར་འགྱུར། །ཞེས་པའི་བར་གྱིས་བསྟན་ཏེ།

དང་པོ་མེད་ལས་བྱུང་བརྗོད་པས། །ཐ་མའང་བརྗོད་བྲལ་མེད་པར་འགྱུར།།

བསྟན་པ་དམ་པ་དང་པོ་སྣང་བའི་ཚེ་ནའང་གཞི་དངོས་པོ་མེད་པ་ཇི་བཞིན་པའི་ངང་ལས་འགྲོ་འོང་མེད་པར་རང་བྱུང་བར་བརྗོད་པས་ཐ་མའང་ཚིག་དང་ཡི་གེས་བརྗོད་པ་དང་བྲལ་ཏེ་དམིགས་པ་མེད་པ་རང་བཞིན་གྱིས་སྟོང་པར་འགྱུར་ཏེ་གཞི་ཇི་བཞིན་པ་ལས་གཞན་དུ་མ་ཡིན་པའི་ཕྱིར་རོ། །ཞེས་ལན་བཀའ་སྩལ་པས་གདུང་བ་བཅོ་ལྔ་པ་སངས་སོ།།

བཅུ་དྲུག་པ་སློབ་མའི་མཐའ་དེ་བཞིན་ཉིད་ལས་མི་འགྱུར་བ་ནི།

གདུང་འཛིན། ཞེས་པ་ནས། གཞན་མི་འགྱུར། །ཞེས་པའི་བར་གྱིས་བསྟན་ཏེ།

གདུང་འཛིན་ཐོག་མའང་དེ་བཞིན་ཉིད། །ཐ་མའང་དེ་ལས་གཞན་མི་འགྱུར།།

བསྟན་པའི་གདུང་འཛིན་པའི་རིགས་ཅན་དག་ཀྱང་ཐོག་མའང་མ་བཅོས་པའི་དེ་བཞིན་ཉིད་ཀྱི་ངོ་བོ་ཡིན་པའི་ཕྱིར། ཐ་མའང་དེ་ཁོ་ན་ཉིད་ལས་གཞན་དུ་མི་འགྱུར་ཏེ་ཐ་སྙད་དུ་འཕོ་འགྱུར་མེད་པས་སོ། །ཞེས་ལན་གསུངས་པས་གདུང་བ་བཅུ་དྲུག་པ་སངས་སོ།།

བཅུ་བདུན་པ་འདི་ནས་དེ་བཞིན་ཉིད་དུ་གཤེགས་ཤིང་མེ་ཏོག་བཀོད་པར་སྣང་བ་ནི།

འདི་ནས། ཞེས་པ་ནས། རང་ཞི་ཡིན། །ཞེས་པའི་བར་གྱིས་བསྟན་ཏེ།

འདི་ནས་དེ་བཞིན་ཉིད་འདིར་གཤེགས། །བདལ་ཁྱབ་ཆེན་པོའི་ཞིང་ན་བཞུགས། །སེམས་ཀྱི་དཀྱིལ་འཁོར་འོད་གསལ་བ། །དེ་བཞིན་ཉིད་དུ་རྣམ་པར་སྣང་། །བྱིས་པའི་ཆེད་དུ་ཆོ་འཕྲུལ་ཞིག །མེ་ཏོག་བཀོད་པའི་འཇིག་རྟེན་ན། །མ་གྲགས་པ་ཞེས་བྱ་བར་སྣང་། །སྣང་བ་ཉིད་ནའང་སྣང་བ་མེད། །དེ་བཞིན་ཞིང་ཁམས་གང་དག་ཏུ།།

སྤྲུལ་པའི་སངས་རྒྱས་སྣང་མཛད་པ། །སྒྱུ་མའི་སྤྲུལ་པ་ཇི་བཞིན་དུ། །མི་སྣང་འོན་ཀྱང་གཞན་ན་སྣང་།།

མི་བསྐྱོད་རྡོ་རྗེ་ཐུགས་མཆོག་ཀྱང་། །ཐུགས་རྗེ་སྤྲུལ་པའི་བྱིན་བརླབས་ཀྱིས།།

འཇིག་རྟེན་ཁམས་ནི་དཔག་མེད་དུ། །ནུབ་སྣང་རང་བྱུང་རང་ཞི་ཡིན།།

དོན་ལ་ཆོས་ཐམས་ཅད་དེ་བཞིན་ཉིད་དུ་རང་གསལ་བ་ལ་འགྲོ་འོང་མ་དམིགས་ཀྱང་གདུལ་བྱའི་ངོ་ཙམ་དུ་བཏགས་ཏེ། མི་མཇེད་འདི་ནས་དེ་བཞིན་ཉིད་ཆོས་ཀྱི་དབྱིངས་འདིར་གཤེགས་ཏེ། ཡེ་ནས་མ་བཅོས་པ་གདལ་ཁྱབ་ཆེན་པོའི་ཞིང་ན་ཆོས་ཀྱི་སྐུ་སྣང་བ་མེད་པར་བཞུགས་ལ། དེའང་ངོ་བོ་ཇི་ལྟ་བུར་བཞུགས་ན། རང་དོན་དུ་སེམས་ཀྱི་ཆོས་ཉིད་རིག་པའི་ཀློང་མཐའ་དབུས་མེད་པས་དཀྱིལ་འཁོར་རང་བཞིན་གྱིས་འོད་གསལ་བ་ཉིད་དུ་བཞུགས་ཏེ། ཆོས་ཐམས་ཅད་རང་བྱུང་གི་ཡེ་ཤེས་དེ་བཞིན་ཉིད་ཀྱི་ངོ་བོ་ཡེ་ཇི་བཞིན་པ་ཉིད་དུ་རྣམ་པར་སྣང་སྟེ་རང་གསལ་བའི་ཕྱིར་རོ། །དེ་ལྟར་འདས་ནས་དོན་བརྡ་མ་གོ་བའི་ཕྱིར་གཞན་དོན་དུ་མོས་པ་སྤྱོད་པའི་ས་པ་ལ་སོགས་པ་བྱིས་པའི་གདུལ་བྱ་རྣམས་ཀྱི་ཆེད་དུ་སྐུས་འདུལ་བས་སྤྲུལ་པའི་ཆོ་འཕྲུལ་ཞིག མེ་ཏོག་བཀོད་པའི་འཇིག་རྟེན་ཞེས་བྱ་བ་ན། མཚན་ངེས་པར་གཅིག་ཏུ་མ་གྲགས་པ་ཞེས་བྱ་བ་བསམ་གྱིས་མི་ཁྱབ་པར་སྣང་ངོ། །འོ་ན་དེ་ཁོ་ན་ལྟར་འབྱུང་འཇུག་ཏུ་སྣང་བ་ཡོད་དམ་ཞེ་ན། དེ་ལྟར་སྣང་བ་ཉིད་ནའང་སྣང་བ་མེད་དེ། སྣང་སྟོང་གི་མཐའ་ལས་གྲོལ་བས་སོ། །ཐུབ་པའི་དབང་པོའི་ཚུལ་དང་བཀོད་པ་དེ་བཞིན་དུ་ཞིང་ཁམས་ཐ་དད་པ་གང་དག་ཏུ་སྤྲུལ་པའི་སངས་རྒྱས་ཇི་སྙེད་ཅིག་སྣང་བར་མཛད་༼༨༣༽པ་ཀུན་ཀྱང་དཔེར་ན་སྒྱུ་མའི་མཁན་པོས་རྫས་ལས་རྟ་གླང་སོགས་སུ་སྤྲུལ་པ་ཇི་ལྟ་བ་བཞིན་དུ་ཞིང་ལ་ལར་སྐུ་འདས་ནས་མི་སྣང་ལ། འོན་ཀྱང་ཞིང་གཞན་དུ་སྔ་མའི་མཚན་དང་སྐུ་མ་ཡིན་པར་ཇི་ལྟར་འདུལ་བ་ལྟར་སྣང་ནས་དོན་མཛད་དོ། །གང་གིས་སྤྲུལ་པ་ཡིན་ན། སྟོན་པ་མི་བསྐྱོད་པ་རྡོ་རྗེ་སེམས་དཔའ་དེ་ཁོ་ན་ཉིད་ཀྱི་ཐུགས་མཆོག་མངའ་བ་ཉིད་ཀྱང༌། སྣང་བའི་རྒྱུ་ཐུགས་རྗེ་སྤྲུལ་པའི་བྱིན་རླབས་ཀྱིས་མཐུ་ལས། འཇིག་རྟེན་གྱི་ཁམས་ནི་དཔག་ཏུ་མེད་པའི་ཞིང་ཇི་སྙེད་དུ་མྱ་ངན་ལས་འདས་ནས་ནུབ་སྟེ་མུན་པར་གྱུར་པ་དང༌། སྐུ་སྣང་ནས་སྒྲོན་མར་བཀོད་པ་ཇི་ལྟར་དུ་མཛད་ཀྱང་གཅིག་དང་དུ་མ་ལས་སྤྲུལ་པ་རིལ་གྲོལ་བའི་ཕྱིར། སྐུ་གསུམ་དབྱེར་མེད་མཛད་པ་ལྷུན་གྲུབ་ཆེན་པོའི་ངང་ལས་རང་བྱུང་ཞིང་སླར་ཡང་དེ་ཉིད་དུ་རང་ཞི་བ་ཡིན་ཏེ། སྟོན་པའི་རྒྱུད་གཅིག་ལ་འབྱུང་འཇུག་ཅན་གྱི་ཆོས་ནི་མ་དམིགས་པའི་ཕྱིར་རོ། །ཞེས་ལན་མཛད་པས་གདུང་བ་བཅུ་བདུན་པ་སངས་སོ། །ཕྱག་དཔེ་ལ་ལར་ནུབ་སྣང་ཞེས་འབྱུང་ངོ་།།

བཅོ་བརྒྱད་པ་འགྲོ་བའི་མགོན་དུ་བདེ་གཤེགས་སྙིང་པོ་འོང་བ་ནི།

སྐྱེ་མེད། ཅེས་པ་ནས། སྐྱབས་ཆེན་ཡིན། །ཞེས་པའི་བར་གྱིས་བསྟན་ཏེ།

སྐྱེ་མེད་ཡེ་ཤེས་ཉིད་ཀྱི་དབྱིངས། །གདོད་ནས་བདེར་གཤེགས་སྙིང་པོ་ལས།།

རྣམ་རྟོག་གློ་བུར་ལས་ཀྱིས་བསྒྲིབས། །དེ་ཉིད་འགྲོ་མགོན་སྐྱབས་ཆེན་ཡིན།།

ངོ་བོ་གང་དུའང་མི་ཟིན་པས་སྐྱེ་བ་མེད་ཅིང་སྒྲིབ་བྱེད་དང་བྲལ་བས་རང་བྱུང་གི་ཡེ་ཤེས་ཆོས་སྐུ་དེ་བཞིན་ཉིད་ཀྱི་དབྱིངས་དེ་ནི་གདོད་མ་ནས་སེམས་ཉིད་བདེ་བར་གཤེགས་པའི་སྙིང་པོ་ཡིན་ལ། དེ་ལྟར་མ་རྟོགས་པའི་དབང་ལས། སེམས་ཅན་རྣམས་ཀྱི་རྣམ་རྟོག་གློ་བུར་བས་ཀུན་ནས་བསླང་བའི་ལས་ཀྱིས་བསྒྲིབས་པས་མིག་གིས་མིག་མ་མཐོང་བ་བཞིན་དུ་གྱུར་ཀྱང༌། རིལ་དེའི་བདག་ཉིད་དུ་གྱུར་པས་མགོན་སྐྱབས་དམ་པའང་དེ་ལས་གཞན་ན་མེད་པས། རང་གི་སྙིང་པོ་བྱང་ཆུབ་ཀྱི་སེམས་དེ་ཁོ་ན་ཉིད་གང་དེ་འགྲོ་བ་རྣམས་ཀྱི་མགོན་དང་སྐྱབས་ཆེན་པོ་ཡིན་ནོ། །ཞེས་ལན་བཏབ་པས་གདུང་བ་བཅོ་བརྒྱད་པ་སངས་སོ།།

བཅུ་དགུ་པ་བློ་གྲོས་དགོངས་པ་ཚིག་གསུམ་ལ་བཙལ་བ་ནི།

རྒྱལ་བའི། ཞེས་པ་ནས། ཡུལ་དུ་སྣང༌། །ཞེས་པའི་བར་གྱིས་བསྟན་ཏེ།

རྒྱལ་བའི་དགོངས་པ་ཚིག་གསུམ་པོ། །འཕྲུལ་གྱི་བློ་དང་གྲོས་མཆོག་སྟེ།།

ཡུན་གྱི་དོན་སྲིད་ཆེན་པོ་བས། །བློ་གྲོས་དམ་པའི་ཡུལ་དུ་སྣང་།།

ཐུབ་མཆོག་རྒྱལ་བའི་དབང་པོས་དགོངས་པ་ཚིག་གསུམ་ནི་མགོ་བྱ་ཚ་བ་སྟོན་པས་མདུན་བསུ་བའི་གདམས་ངག་གསུམ་དུ་བཞེད་སྐད་ཀྱང༌། འདིར་ནི་འགྲེལ་ཆེན་ལས་དཀྱིལ་འཁོར་གསུམ་དང་སྔགས་གསུམ་གྱི་དོན་དུ་གསུངས་ཤིང་སོ་ཡེ་ཤེས་དབང་ཕྱུག་གིས་དཀྱིལ་འཁོར་གསུམ་དབྱེར་ མེད་པའི་དོན་དུ་བཞེད་པ་དང༌། གསང་བདག ་ཆེན་པོ་སྒྲོ་ཕུག་པས་མདའ་གླན་ཡང་ཁྱེད་གསུམ་གྱི་གསུང་སྒྲོས་དང་མཐུན་པར། ཞི་ལྷག་ཟུང་འཇུག དཀྱིལ་༼༨༤༽འཁོར་གསུམ། སྔགས་གསུམ་དུ་བཞེད་པ་ལྟར་ཏེ། དེ་གསུམ་གྱི་དོན་གྱི་ངོ་བོ་ཇི་བཞིན་པ་ནི་ཐེག་རིམ་དགུ་པོ་ཀུན་གྱིས་རྟོགས་པར་བྱ་བའི་དེ་ཁོ་ན་ཉིད་མ་འདྲེས་ཡོངས་རྫོགས་སུ་འཆར་བར་བྱེད་པའི་མན་ངག་འཕྲུལ་གྱི་གསང་སྒོ་ལ་བརྟེན་ནས་ལེའུ་ཞེ་ལྔ་པ་ལས་རྩ་བ་གསུམ་དུ་གསུང་པའི་དོན་ལ་སོགས་པ་བཞིན་དུ་བློ་དང་གྲོས་དང་ཐབས་ཀྱི་མཆོག་སྟེ་ཡུན་གྱི་དོན་སྲིད་ཆེན་པོ་དང་གསུམ་གྱིས་རྟོགས་པར་ངེས་པས། ལམ་པའི་ངོར་ཏིང་ངེ་འཛིན་དང་ཤེས་རབ་དང་དེ་གཉིས་སུ་མེད་པ་གསུམ་སྟེ། དེ་ནི་ལེའུ་ང་དྲུག་པ་ལས་གསུངས་པ་ལྟར། རྣལ་འབྱོར་མཆོག་གི་བློ་གྲོས་དམ་པའི་སྤྱོད་ཡུལ་དུ་སྣང་བ་ཁོ་ན་ཡིན་པའི་ཕྱིར་རང་ལས་བཙལ་ན་རྙེད་པར་འགྱུར་རོ། །ཞེས་ལན་བཀའ་སྩལ་པས་གདུང་བ་བཅུ་དགུ་པ་སངས་སོ།།

ཉི་ཤུ་པ་ངེས་དོན་ཇི་བཞིན་པ་བློ་ལ་བཞག་ལ་གཟུང་བ་ནི།

རྒྱལ་བ། ཞེས་པ་ནས། ངེས་པ་ཡིན། །ཞེས་པའི་བར་གྱིས་བསྟན་ཏེ།

རྒྱལ་བ་ཀུན་གྱི་ཐུགས་འཇུག་པ། །ཇི་བཞིན་པ་ཡི་དེ་ཁོ་ན།།

ཉིད་དུ་ངེས་པའི་ངོ་བོ་ལ། །བློ་བཞག་དེ་ཉིད་ངེས་པ་ཡིན།།

རྒྱལ་བ་ཀུན་གྱི་ཐུགས་ཀྱི་གསང་བ་རྣམ་པར་མི་རྟོག་པའི་ཡེ་ཤེས་ཀྱིས་དངོས་པོ་ཐམས་ཅད་ཀྱི་ཆོས་ཉིད་གནས་ལུགས་ཀྱི་དོན་ལ་ཡུལ་དང་ཡུལ་ཅན་མེད་པར་འཇུག་པ་ནི་རང་བྱུང་གི་ཡེ་ཤེས་དེ་བཞིན་ཉིད་དེ། དེ་ལ་འབྱུང་འཇུག་གི་དུས་བྲལ་བའི་ཕྱིར་བསམ་དུ་མེད་པའི་ཆོས་ཉིད་ཇི་བཞིན་པ་ཡི་དེ་ཁོ་ན་ཉིད་དུ་རྟོགས་གོམས་མཐར་ཕྱིན་པའི་ཚུལ་གྱིས་ཡང་དག་པར་ངེས་པའི་ངོ་བོ་ཉིད་ལ། ཅིར་ཡང་མི་བསམ་པར་བློ་བཞག་པ་དེ་ཉིད་ངེས་པ་དོན་གྱི་ལྟ་སྒོམ་ཕུལ་དུ་བྱུང་བ་ཡིན་ནོ། །ཞེས་ལན་མཛད་པས་གདུང་བ་ཉི་ཤུ་པ་སངས་སོ།།

ཉེར་གཅིག་པ་སྐུ་གདུང་དངོས་པོ་མེད་ཀྱང་གདུལ་བྱ་ལ་འབྱུང་བ་ནི།

ཆོས་ཀུན། ཞེས་པ་ནས། ཡོད་པར་འགྱུར། །ཞེས་པའི་བར་གྱིས་བསྟན་ཏེ།

ཆོས་ཀུན་ནམ་མཁའི་མཚན་ཉིད་དེ། །ཡེ་ཤེས་སྐུ་ཅན་རྒྱལ་བ་རྣམས། །སྐུ་ལ་གདོས་བཅས་དངོས་མེད་པར། །སྐུ་གདུང་རིང་བསྲེལ་ཇི་ལྟར་འབྱུང་། །སེམས་ཅན་རྣམས་ལ་ཕན་དོན་དུ། །མེད་པ་ཉིད་ལས་སྤྲུལ་པ་ཡིན། །སྒྱུ་མའི་རིང་བསྲེལ་ཡུངས་འབྲུ་ཙམ། །ཐུགས་རྗེ་ཐབས་ཀྱིས་གཞག་ཚུལ་བསྟན། །ངེས་པར་རིང་བསྲེལ་གང་འདོད་པ། །བྱེ་མ་དག་ལས་མར་འདོད་འདྲ། །གང་ཚེ་འབྲས་བཏབ་ཏིལ་འབྲུ་སྨིན། །དེ་ཚེ་རིང་བསྲེལ་ཡོད་པར་འགྱུར།།

ཆོས་སོ་ཅོག་ཀུན་གྱི་མཚན་ཉིད་སྣང་ལ་མ་གྲུབ་པ་དང་མེད་ལ་ཟད་མི་ཤེས་པ་དང་སྟོང་ལ་ཐམས་ཅད་འབྱུང་བས་ནམ་མཁའི་མཚན་ཉིད་དང་མཐུན་པར་ཇི་བཞིན་པ་དེ་ཁོ་ན་ཉིད་ཀྱི་ཕྱིར་མཐའ་ཀུན་དང་བྲལ་བའི་ཡེ་ཤེས་ཀྱི་སྐུ་ཅན་རྒྱལ་བ་རྫོགས་པའི་སངས་རྒྱས་རྣམས་ཀྱི་ཆོས་ཉིད་ཀྱི་སྐུ་ལ་གདོས་བཅས་དང་དངོས་པོ་གཉིས་དང་བྲལ་ཏེ་སྣང་བ་མེད་པར་དཀྱིལ་འཁོར་གསུམ་གྱི་ངོ་བོ་ཉིད་ལ་དོན་དུ་འབྱུང་མི་འབྱུང་མི་མངའ་བས་སྐུ་གདུང་རིང་བསྲེལ་ཇི་ལྟར་འབྱུང་ཞེས་གདུང་བར་རིགས་པ་མ་ཡིན་ནོ། །འོན་ཀྱང་དྲང་དོན་དུ་སྣང་བ་མི་འགོག་པས། གདུལ་བྱའི་སེམས་ཅན་སྐུ་གདུང་ལ་མོས་པ་རྣམས་ལ་མཆོད་ཡུལ་དུ་སྣང་ནས་ཕན་གདགས་པའི་དོན་དུ། དངོས་པོ་མེད་ཅིང་གང་ཡང་རྫོགས་པ་ཉིད་ཀྱི་བྱིན་རླབས་ལས་སྤྲུལ་པ་ཡི་སྒྱུ་མའི་རིང་༼༨༥༽བསྲེལ་ཡུངས་འབྲུ་ཙམ་ལ་སོགས་པ་འཆད་འགྱུར་གྱི་ཚད་ལྟར་ཐུགས་རྗེ་ཆེན་པོས་འདུལ་ཐབས་ཀྱིས་བཞག་ཚུལ་བསྟན་པར་མཛད་དོ། །འོ་ན་དེ་བཙལ་བས་འབྱུང་ཞིང་རྙེད་དམ་ཞེ་ན། ངེས་པར་རིང་བསྲེལ་ནི་འདོད་པ་མེད་པའི་བྱིན་རླབས་ཡིན་པས་གང་འདོད་པ་ཐ་དད་ཀྱིས་བཙལ་བས་མི་རྙེད་པ་ནི་དཔེར་ན་བྱེ་མ་དག་ལ་མར་འདོད་ནས་བཙལ་བ་དང་འདྲའོ། །དེས་ན་ངེས་པའི་དོན་དུ་མི་འབྱུང་བའི་དཔེ། དུས་གང་གི་ཚེ་ན་ས་བོན་ལ་འབྲས་བཏབ་པས་འབྲས་བུ་ཏིལ་འབྲུར་སྨིན་པ་དེ་ཡི་ཚེ་རིང་བསྲེལ་ཡོད་པར་འགྱུར་རོ། །ཞེས་ལན་གསུངས་པས་གདུང་བ་ཉེར་གཅིག་པ་སངས་སོ།།

ཉེར་གཉིས་པ་མཆོད་གནས་མཁས་པ་དང་སྐུ་གསུང་ཐུགས་ཀྱི་གཟུགས་བརྙན་ལ་བྱ་བ་ནི།

གཟུགས་སྣང༌། ཞེས་པ་ནས། སེམས་དཔས་བཤད། །ཅེས་པའི་བར་གྱིས་བསྟན་ཏེ།

གཟུགས་སྣང་ཟབ་སྒྲོགས་སྙིང་པོ་ཅན། །སྐུ་དང་གསུང་ཐུགས་རྡོ་རྗེ་གསུམ།།

མཆོད་གནས་ཡིད་རྟེན་དམ་པ་ཞེས། །འགྲོ་མགོན་རྡོ་རྗེ་སེམས་དཔས་བཤད།།

སྐུ་གདུལ་བྱའི་གང་ཟག་གི་ངོ་ལ་འགྲོ་བའི་གཟུགས་སུ་སྣང་ཞིང་གསུང་ཐེག་ཆེན་མདོ་སྔགས་ཀྱི་ཟབ་དོན་ལུང་རིགས་མན་ངག་དང་མཐུན་པར་སྒྲོགས་པས་ཆོས་ཀྱི་མིག་མངའ་བ་ཐུགས་ལོ་རྒྱུས་ལ་མཁས་པས་ཡིད་ཆེས་ཀྱི་ཚད་མ་དང་འབྲེལ་ཏེ་མན་ངག་གི་དོན་ལ་ངེས་པའི་གདེང་རྙེད་པས་སྙིང་པོ་ཅན་ནི་རྡོ་རྗེ་གསུམ་གྱི་བདག་ཉིད་བླ་མ་སློབ་དཔོན་དམ་པ་སྟེ། རྒྱལ་བ་རིལ་གྱི་ཡང་སྟོན་པ་དང་ཡབ་ཡུམ་ཡིན་པའི་ཕྱིར་རམ། སྐུ་ཡི་གཟུགས་བརྙན་དང༌། གསུང་གི་གླེགས་བམ་དང༌། ཐུགས་རྟེན་རྡོ་རྗེ་ལ་སོགས་པ་གསུམ་ནི་མཆོད་པའི་གནས་ཡིད་རྟེན་དམ་པ་ཡིན་ཞེས། སྟོན་པ་འགྲོ་བའི་མགོན་པོ་རྡོ་རྗེ་སེམས་དཔས་བཤད་དོ། །ཞེས་ལན་བཏབ་པས་གདུང་བ་ཉེར་གཉིས་པ་སངས་སོ།།

ཉེར་གསུམ་པ་གདུང་འཚོབ་སྐྱེས་བུ་སེམས་ཅན་ལ་འབྱུང་བར་བསྟན་པ་ནི།

དཔག་ཏུ། ཞེས་པ་ནས། ཆད་པ་ཡིན། །ཞེས་པའི་བར་གྱིས་བསྟན་ཏེ།

དཔག་ཏུ་མེད་པའི་རྒྱལ་བ་རྣམས། །འཁོར་བའི་སེམས་ཅན་རྒྱུད་ལས་བྱུང་།།

འཁོར་བའི་སེམསཅན་རྒྱུན་ཆད་ན། །སངས་རྒྱས་རྒྱུན་ཡང་ཆད་པ་ཡིན།།

སྤྲུལ་ པ་དང་ལོངས་སྤྱོད་དཔག་ཏུ་མེད་པའི་རྒྱལ་བ་སྐུ་གསུམ་གྱི་བདག ་ཉིད་ཇི་སྙེད་པ་རྣམས་ཀྱང་འཁོར་བའི་སེམས་ཅན་གྱི་རྒྱུད་དག་པ་ལས་བྱུང་བའི་ཕྱིར་གཞི་ལ་སངས་རྒྱས་དང་སེམས་ཅན་དབྱེར་མེད་པས་རང་བཞིན་དང་རྒྱུ་འབྲས་དབང་བཙན་པར་བྱས་ན་འཁོར་བའི་སེམས་ཅན་གྱི་རྒྱུན་བཅད་པར་གྱུར་ན་དེའི་ངོ་བོའམ་དེ་ལ་ལྟོས་པས་སངས་རྒྱས་ཀྱི་རྒྱུན་ཡང་ཆད་པ་ཡིན་པས་གདུང་འཚོབ་ནི་འགྲོ་བ་སྐལ་བ་ཅན་གྱི་རིགས་ལས་བྱུང་བའི་སྐྱེས་བུ་དམ་པ་རྣམས་ཀྱིས་འཛིན་པས་བརྒྱུད་མར་འབྱུང་བར་འགྱུར་རོ། །དེ་ལྟ་བས་ན་འཁོར་བ་མེད་ན་རྒྱལ་བའང་མི་འབྱུང་ནའང་དེ་ཡོད་པས་དེ་འབྱུང་བའི་ཕྱིར་རོ། །ཞེས་ལན་བཀའ་སྩལ་པས་གདུང་བ་ཉེར་གསུམ་པ་སངས་སོ།།

༼༨༦༽གཉིས་པ་གདུང་བ་སྐྱེ་བའི་རྒྱུ་མེད་པས་མ་སྐྱེད་ཅིག་པར་གདམས་པ་ནི།

དཔེར་ན། ཞེས་པ་ནས། འཁྲུལ་ཞིག་གུ །ཞེས་པའི་བར་གྱིས་བསྟན་ཏེ།

དཔེར་ན་ནམ་མཁའི་འཇའ་ཚོན་ནི། །དང་པོ་གཞན་ནས་འོངས་པ་དང་། །ཐ་མ་གཞན་དུ་སོང་བ་མེད།།

དེ་ཉིད་རང་བྱུང་རང་ཞི་ལྟར། །སྤྲུལ་པ་རང་བྱུང་རང་ཞི་བས། །དེ་ཉིད་དེ་ལ་ནུབ་པ་མེད།།

འདས་ཀྱང་མ་བྲལ་ཐ་དད་ཡིན། །མ་འདས་པ་ནའང་གཅིག་མིན་ཏེ། །འདའ་དང་མི་འདའ་ལས་འདས་པས།།

བྲལ་དང་མ་བྲལ་ག་ལ་ཡོད། །དེས་ན་གང་ལ་ཅི་ཕྱིར་གདུང་། །གདུང་བ་རྨོངས་པས་འཁྲུལ་པ་ཡིན།།

ཨེ་མའོ་ངོ་མཚར་ཇི་ལྟ་བུ། །འདི་གོ་ཇི་ལྟར་འཁྲུལ་ཞིག་གུ།

དེ་བཞིན་གཤེགས་པའི་སྤྲུལ་པ་མྱ་ངན་ལས་འདས་པ་ནི་ངོ་བོ་ཉིད་མེད་པ་སྟེ། དཔེར་ན་ནམ་མཁའི་འཇའ་ཚོན་བཞིན་ཏེ་དེ་ཉིད་དང་པོ་གཞན་ནས་འོངས་པ་དང༌། ཐ་མ་གཞན་དུ་སོང་བ་མེད་པར་ནམ་མཁའ་དེ་ཉིད་ལས་རང་བྱུང་ཞིང་རང་ཞི་བ་ལྟར་དུ། དོན་ལ་རྒྱལ་བའི་སྤྲུལ་པ་ཐུབ་པའི་དབང་པོའི་སྐུ་ཡང་ཆོས་ཉིད་ལས་རང་བྱུང་ནས་སླར་ཡང་ཆོས་ཉིད་དུ་རང་ཞི་བས། རྒྱལ་བ་དེ་ཉིད་ཆོས་ཉིད་དེ་ཡི་ངང་ལ་ནུབ་པ་མེད་དེ། སྐུ་མྱ་ངན་ལས་འདས་པར་གྱུར་ཀྱང་ཆོས་ཉིད་དང་མ་བྲལ་བས་ཐ་དད་པ་མིན་ལ། སྐུ་མ་འདས་པར་བཞུགས་པ་ནའང་ཆོས་ཉིད་དང་བྲལ་ཏེ་ཐ་དད་པ་མིན་ཀྱང་གདུལ་བྱ་རྣམས་ལ་མཚན་ཉིད་སྣ་ཚོགས་ཀྱི་བཀོད་པ་སྟོན་པས་གཅིག་ཀྱང་མིན་ཏེ། དེས་ན་འདའ་བ་དང་མི་འདའ་བ་ལས་འདས་པས་ན་བྲལ་དང་མ་བྲལ་གྱི་ཐ་སྙད་ག་ལ་ཡོད་དེ་མེད་དོ། །རྒྱུ་མཚན་དེས་ན་དེ་ལྟ་བུའི་དོན་གང་ལ་འཁོར་ཁྱེད་རྣམས་ཅི་ཡི་ཕྱིར་གདུང་བར་བྱེད་དེ། གདུང་བའི་གཞི་མེད་ཅིང་རྒྱུ་དང་དགོས་པ་མ་དམིགས་པའི་ཕྱིར་རོ། །སྤྲུལ་པ་འདས་པར་མཐོང་ནས་གདུང་བ་ནི་ཇི་བཞིན་པ་ལ་རྨོངས་ནས་མ་རིག་པས་འཁྲུལ་པ་ཁོ་ན་ཡིན་ནོ། །དེ་ལྟར་མྱ་ངན་བྱར་མེད་པ་ལ་གདུང་བར་བྱེད་པ་ནི་ཨེ་མའོ་ངོ་མཚར་ཆེ་བ་ཇི་ལྟ་བུ་ཞིག་སྟེ། འདི་གོ་ཇི་ལྟར་ཡང་བློ་ནོར་བའི་ཉེས་པས་འཁྲུལ་ཞིག་གུ་ཞེས་སོ།།

གསུམ་པ་གདུང་བ་སེལ་བའི་ཡོན་ཏན་ནི།

ཞེས་གསང་བ་པའི། ཞེས་པ་ནས། གསལ་བར་གྱུར་ཏོ། །ཞེས་པའི་བར་གྱིས་བསྟན་ཏེ།

ཞེས་གསང་བའི་བདག་པོ་དེས་སེང་གེ་རྣམ་པར་ལྟ་བའི་ཚུལ་གྱིས་ག་ཞས་བཏབ་པས། རྨོངས་པས་གདུང་བ་རྣམས་དགའ་མགུ་རངས་ནས་གདུང་པ་ཡོངས་སུ་སངས་ཏེ། སེམས་མ་བཅོས་པར་གནས་པས་གནས་ཏེ། བཞིན་གྱི་དཀྱིལ་འཁོར་ཐམས་ཅད་འོད་གསལ་བར་གྱུར་ཏོ།།

ཞེས་གང་གིས་ན་སྟོན་པ་གསང་བ་པའི་བདག་པོ་དེས། ཚུལ་ཇི་ལྟར་ན་སྐྱེས་བུ་སྐུ་འགྱིང་བག་གི་སེང་གེ་རྣམ་པར་ལྟ་བའི་ལྟ་སྟངས་ཀྱི་ཚུལ་གྱིས་གཟིགས་ཏེ། བྲུ་ཤའི་སྐད་ཀྱི་ཁྲེལ་བའི་གད་མོ་སྟེ་བོད་སྐད་དུའང་གྲགས་པ་ལྟར་ག་ཞས་བཏབ་སྟེ་བཞད་མོ་མཛད་པས། 11གང་ལ་ན་འཁོར་རྨོངས་པས་གདུང་བ་རྣམས་སེམས་དགའ་ཡིད་མགུ་བསམ་པ་རངས་པར་གྱུར་ནས། མྱ་ངན་དང་བྲལ་བས་གདུང་བ་ཡོངས་སུ་སངས་ཏེ། ཆོས་ཐམས་ཅད་ཀྱི་རང་བཞིན་རང་སྣང་ལྷུན་གྲུབ་ཀྱི་དཀྱིལ་འཁོར་མ་འདྲེས་ཡོངས་རྫོགས་སུ་མཐོང་སྟེ། སྐྱེ་ཤི་མེད་པའི་དོན་རྟོགས་པས། སེམས་མ་བཅོས་པར་གནས་ཏེ་བཞིན་གྱི་དཀྱིལ་འཁོར་ཐམས་ཅད་མདངས་དང་ལྡན་པས་འོད་གསལ་བར་གྱུར་ཏོ། །དེ་དག་ནི་དྲི་བ་དྲུག་གི་གསུམ་པ་དང༌། གསོལ་གདབ་དྲུག་གི་དང་པོ་དང༌། གདུང་བ་ཉེར་གསུམ་གྱི་ལན་དུས་གཅིག་ཏུ་སྨོས་པ་སྟེ་སོ་སོའི་རང་༼༨༧༽ངོ་དང་སྦྱར་ཏེ་ཤེས་པར་བྱའོ།།

བཞི་པ་གདུང་བ་སེལ་བའི་ཚད་ནི།

དེ་ནས། ཞེས་པ་ནས། འགྱུར་རོ། །ཞེས་པའི་བར་གྱིས་བསྟན་ཏེ།

དེ་ནས་ལས་ཀའི་བདག་པོས། གསང་བ་པའི་བདག་པོ་ལ་གསོལ་པ། གསང་བ་པའི་བདག་པོ་ཆེན་པོ་གདུང་བ་ཐམས་ཅད་སེལ་ཏམ། འོན་ཏེ་མི་མཇེད་ཀྱི་འཇིག་རྟེན་གྱི་གདུང་བ་འབའ་ཞིག་སེལ། གསང་བ་པའི་བདག་པོས་སྨྲས་པ། ལང་ཀའི་བདག་པོ། ཁོ་བོས་ནི་གདུང་བ་ཐམས་ཅད་སེལ་བ་སྟེ། འདས་པའི་དུས་ཀྱི་གདུང་བ་ཇི་སྙེད་པ་ཡང་བསལ་ཏོ། །ད་ལྟར་གྱི་མི་མཇེད་ཀྱི་འཇིག་རྟེན་ཀྱི་ཁམས་འདིའི་གདུང་བ་ཡང་བསལ། འཇིག་རྟེན་གྱི་ཁམས་གཞན་རྡུལ་སྙེད་ཀྱི་གདུང་བ་ཡང་བསལ། མ་འོངས་པའི་དུས་ཀྱི་གདུང་བ་ཇི་སྙེད་པ་སེལ་བར་འགྱུར་རོ།།

དེ་ནས་ལང་ཀའི་བདག་པོས་གསང་བ་པའི་བདག་པོ་ལ་གསོལ་པ། གསང་བ་པའི་བདག་པོ་ཆེན་པོ། འཇིག་རྟེན་གྱི་ཁམས་ཀུན་དང་དུས་རིལ་གྱི་གདུང་བ་ཐམས་ཅད་སེལ་ཏམ། འོན་ཏེ་མི་མཇེད་ཀྱི་འཇིག་རྟེན་འདིའི་ད་ལྟར་གྱི་གདུང་བ་འབའ་ཞིག་སེལ་བ་ལགས། གསང་བ་པའི་བདག་པོས་སྨྲས་པ། ལང་ཀའི་བདག་པོ་ཁོ་བོ་ནི་གདུང་བ་ཐམས་ཅད་སེལ་བ་སྟེ། ལེའུ་བཞི་པ་ལས། བསྐུལ་བའི་དུས་ནི་གང་བྱུང་བར། །བདག་ཀྱང་དེ་བཞིན་ཆོ་འཕྲུལ་སྣང༌། །ཞེས་པས། འདས་པའི་དུས་ཀྱི་གདུང་བ་ཇི་སྙེད་པ་ཡང་སྔར་བསལ་ཏོ། །ད་ལྟ་མི་མཇེད་ཀྱི་འཇིག་རྟེན་གྱི་ཁམས་འདིའི་གདུང་བ་ཡང་བསལ་ཞིང་འཇིག་རྟེན་གྱི་ཁམས་གཞན་རྡུལ་སྙེད་ཀྱི་གདུང་བ་ཡང་དེ་བཞིན་དུ་བསལ་ལ། མ་འོངས་པའི་དུས་ཀྱི་འཇིག་རྟེན་གྱི་ཁམས་ཀུན་གྱི་གདུང་བ་ཇི་སྙེད་པ་ཡང་སེལ་བར་འགྱུར་རོ།།

ལྔ་པ་གདུང་བ་ཡོད་མེད་ཀྱི་ཁྱད་པར་ནི།

དེ་བས་ན། ཞེས་པ་ནས། སངས་སོ། །ཞེས་པའི་བར་གྱིས་བསྟན་ཏེ།

དེ་བས་ན་གང་དག་ཡོངས་སུ་གདུང་བ་རྣམས་ནི་མི་ཤེས་པ། རྨོངས་པ། ཤེད་མ་བྱེ་བ་ཁོ་ན་ཡིན་གྱི། ཤེས་པ། མ་རྨོངས་པ། མཁས་པ། ཤེད་བྱེ་བ་རྣམས་ནི། གང་དུ་ཡང་གདུང་བ་མེད་པ། གདུང་བ་དང་བྲལ་བ་ཡིན་ནོ་ཞེས་ཐོས་པས། ལང་ཀའི་བདག་པོ་ལ་སོགས་པ་འགྲོ་བ་ལུས་ཀྱི་སེམས་དཔའ་རྣམས་ཡོངས་སུ་གདུང་བ་ལས་སངས་སོ།།

འོ་ན་གདུང་བ་གང་ལ་ཡོད་ཅེ་ན། དེ་ལྟ་བས་ན་གང་དག་ཡོངས་སུ་གདུང་བ་རྣམས་ནི། དོན་སྐྱེ་འགག་མེད་པའི་གནས་ལུགས་མི་ཤེས་པ། བློ་མ་བཅོས་པའི་རིག་པ་ལ་རྨོངས་པ། ཤེད་མ་བྱེ་བ་ཁོ་ན་ཡིན་གྱི། དོན་དང་བློ་ཤེས་པས་ཇི་བཞིན་པ་ལ་མ་རྨོངས་པ་མཁས་པ་ཤེད་བྱེ་བ་རྣམས་ནི་དེ་ཁོ་ན་ཉིད་ཀྱི་ངང་དུ་བློ་མ་བཅོས་པར་གནས་པས་གང་དུ་ཡང་གདུང་བ་ མེད་པ་གདུང་བ་དང་བྲལ་བ་ཡིན་ནོ། །ཞེས་ཐོས་པས་ལང་ཀའི་བདག ་པོ་ལ་སོགས་པ། འགྲོ་བ་ལུས་ཀྱི་སེམས་དཔའ་རྣམས་ཡོངས་སུ་གདུང་བ་ལས་གྲོལ་ཏེ་མྱ་ངན་སངས་སོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གང་རྨོངས་པ་གདུང་བ་སེལ་བ་ཞེས་བྱ་བའི་ལེའུ་སྟེ་དྲུག་པའོ། །ཐེག་པ་ཆེན་པོ་ངེས་པར་བྱུང་བའི་ཚུལ་ལས། གང་རྨོངས་པ་གདུང་བ་སེལ་བའི་གཏམ་རྒྱུད་བརྗོད་པ་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ། བྱུང་བའི་ཚུལ་བསྟན་པ་དང་པོའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། བཤད་ཟིན་པ་ལྟར་རྨོངས་པ་གདུང་བ་སེལ་བ་ཞེས་བྱ་བའི་ལེའུ་སྟེ་དྲུག་པ་གསལ་བར་བཤད་པའོ། །དེ་དག་གིས་ཐེག་པ་ཆེན་པོ་ངེས་པར་འབྱུང་བའི་ཚུལ་ལས་གང་རྨོངས་པ་གདུང་བ་སེལ་བའི་གཏམ་རྒྱུད་བརྗོད་པ། ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ། བྱུང་ཚུལ་བསྟན་པ་དང་པོ་རྣམ་པར་བཤད་དེ་དོན་རྒྱས་པར་བཀྲོལ་བའོ།། །།

ལེའུ་བདུན་པ་རྡོ་རྗེ་སེམས་དཔའི་ཆོ་འཕྲུལ་ཡོངས་སུ་བཀོད་པ།

༈ གཉིས་པ་སྒྲོན་མ་བཀོད་པའི་བྱུང་ཚུལ་ལ་གཉིས་ཏེ། བྱུང་ཚུལ་གྱི་དྲིས་ལན་སྤྱིར་བསྟན་པ་དང༌། བྱུང་ཚུལ་གཉིས་པ་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། དྲིས་པ་དང༌། ༼༨༨༽ལན་ནོ། །དང་པོ་ནི།

དེ་ནས། ཞེས་པ་ནས། དྲིས་པ་ལས། ཞེས་པའི་བར་གྱིས་བསྟན་ཏེ།

དེ་ནས་ལང་ཀའི་བདག་པོས་སྔོན་དུ་གནང་བའི་ཚིག་བཅུ་གཉིས་པའི་གཉིས་པ། གང་དུ་སྒྲོན་མ་ཡོངས་སུ་བཀོད་པ་ན་ཡང་བྱུང་། ཞེས་ལུང་བསྟན་པ་ཡོངས་སུ་དྲི་བའི་ཕྱིར། གསང་བ་པའི་བདག་པོ་ལ་གསོལ་པ། གསང་བ་པའི་བདག་པོ་སྔོན་བདག་གིས་ཕྱིན་ཅི་མ་ལོག་པར་ཐོས་པ། གང་རྨོངས་པ་རྣམས་ཀྱི་གདུང་བ་སེལ་ཅིང་། སེམས་ཅན་རྣམས་ཀྱི་སེམས་ཀྱི་དཀྱིལ་འཁོར་གསལ་བར་བྱེད་པ། བྱང་ཆུབ་སེམས་དཔའ་ཆེན་པོ་རྣམས་ཀྱི་བློ་གྲོས་དམ་པའི་མཛོད། དེ་བཞིན་གཤེགས་པ་རྣམས་ཀྱི་དགོངས་པ། དེ་ཁོ་ན་ཉིད་གསང་བ་དམ་པ། ཕྱིན་ཅི་མ་ལོག་པ། ཡང་དག་པའི་ལྟ་བ། སངས་རྒྱས་ཀུན་གྱིས་བསྔགས་པའི་ཐེག་པ་ཆེན་པོ་དེ་གདེག་པའི་ཡུལ་ཚད་མ་ནུབ་པར་གྱུར་ཕན་ཆད་དུ་འབྱུང་བར་འགྱུར་ཞིག་གུ་ཞེས་དྲིས་པ་ལས།

སྤྱིར་བྱུང་ཚུལ་འདི་ཉིད་དམ་པའི་སྒྲོན་མ་ཇི་ལྟར་བཀོད་ཀྱི་ལན་ཏེ། ཁྱད་པར་རྩལ་འཕངས་ལས་ཚོགས་ལམ། རྒྱུད་གནས་ལུགས་ལས་སྒྲོན་མ་བཀོད་པའི་བྱུང་ཚུལ་ཡེ་ཤེས་རང་གསལ་གྱི་ལྟ་བ་ཉི་མའི་སྙིང་པོ་ལྟ་བུ་རྒྱས་པར་སྟོན་ནོ། །དེ་ནས་ལང་ཀའི་བདག་པོས། སྔོན་ཐུབ་པའི་དབང་པོ་ཤཱཀྱ་སེང་གེ་དེ་ཉིད་འཇིག་རྟེན་དུ་བཞུགས་པ་ན་ཞལ་ནས་དངོས་སུ་ལུང་བསྟན་པ་གནང་བའི་ཚིག་དྲུག་གཉིས་སམ་བཅུ་གཉིས་པའི་གཉིས་པ། གང་དུ་སྒྲོན་མ་ཡོངས་སུ་བཀོད་པ་ན་ཡང་འབྱུང་ཞེས་ལུང་བསྟན་པ་སྐབས་ལས་འཕྲོས་ཏེ་ཡོངས་སུ་དྲི་བའི་ཕྱིར། གསང་བ་པའི་བདག་པོ་ལ་གསོལ་བ། གསང་བ་པའི་བདག་པོ་སྔོན་བདག་གིས་དམ་པ་རྣམས་ལས་ཕྱིན་ཅི་མ་ལོག་པར་ཐོས་པ། གང་དོན་ལ་ཤེས་མ་བྱེ་བའི་རྨོངས་པ་རྣམས་ཀྱི། འཇིག་རྟེན་པ་མ་རིག་པས་སྡུག་བསྔལ་གྱིས་གདུང་ཞིང༌། ལམ་ལ་གནས་པ་རྣམས་ལམ་རིང་བ་དང་རྩོལ་བ་དང་ཡུལ་དུ་བྱས་པས་གདུང་བ་རྣམས་སེལ་བར་བྱེད་ཅིང༌། འཁྲུལ་པ་ཡོངས་སུ་གཅོད་པའི་ཁྱད་པར། སེམས་ཅན་རྣམས་ཀྱི་སེམས་ཀྱི་དཀྱིལ་འཁོར་ཇི་བཞིན་དུ་གསལ་བར་བྱེད་པ་གནས་ལུགས་རང་གསལ་དུ་སྟོན་པའི་ཁྱད་པར། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བློ་གྲོས་དམ་པའི་མཛོད་དུ་གྱུར་པས་ཐབས་ཀྱི་གསང་བ་ཀུན་རྫོགས་པའི་ཁྱད་པར། དེ་བཞིན་གཤེགས་པ་རྣམས་ཀྱི་དགོངས་པ་དེ་ཁོ་ན་ཉིད་གསང་བ་དམ་པ་ཡིན་པས་རྒྱལ་བ་ཀུན་གྱི་དགོངས་པའི་ཞེ་ཕུགས་སུ་གྱུར་པའི་ཁྱད་པར་ཏེ། ཕྱིན་ཅི་མ་ལོག་པ་ཡང་དག་པའི་ལྟ་བ་ཁྱད་པར་བཞི་དང་ལྡན་པས་སངས་རྒྱས་ཀུན་གྱིས་བསྔགས་པ། ཐེག་པ་ཆེན་པོ་གསང་སྔགས་ལུང་གི་ཡང་བཅུད་ཆོས་ཀྱི་མེ་ལོང་དེ་ཉིད། འདེགས་པའི་ཡུལ་སྤྲུལ་པའི་སྐྱེས་བུ་ཚད་མ་ཐུབ་པའི་དབང་པོ་འདས་ནས་ནུབ་པར་གྱུར་ཕན་ཆད་དུ་ལྷ་མི་ཕལ་པ་ལ་འབྱུང་བར་འགྱུར་ཞིག་གུ ཞེས་དྲིས་པ་ལས།

གཉིས་པ་ལན་ནི།

གསང་བ་པའི། ཞེས་པ་ནས། སྨྲས་པ་ལས། ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་སྨྲས་པ། ལང་ཀའི་བདག་པོ་ཇི་ག་འདི་ཇི་སྙམ་དུ་སེམས། ཁྱོད་མི་ཤེས་སམ། ཡུལ་ཚད་མ་གཉིས་ཀྱིས་བཀའ་སྩལ་གྱིས། ཀུན་ཛ་ར་ཆོས་ཀྱི་སྤུན་ལ་བཀའ་སྩལ་པ་འདི་ལྟ་སྟེ། རིག་པ་འཛིན་པ་ཁྱོད་ཀྱི་དྲི་བ་འདི་ལྟ་སྟེ། དེ་ཁོ་ན་ཉིད་གསང་བ་དམ་པ་དེ་ནི་སྐབས་གཉིས་དང་བཅུར་བྱུང་བ་སྟེ། གང་དུ་རྨོངས་པ་གདུང་བ་སེལ་བ་ན་ཡང་བྱུང་། གང་འཇིག་རྟེན་གྱི་སྒྲོན་མ་ཡོངས་སུ་བཀོད་པ་ན་ཡང་བྱུང་། གང་གིས་ངེས་པ་རྙེད་པ་ན་ཡང་བྱུང་། སྙིང་པོ་བྱང་ཆུབ་ཉིད་དུ་ངེས་པ་ན་ཡང་བྱུང་། དགོངས་པ་ངེས་པར་འགྲེལ་ན་ཡང་བྱུང་། གདུལ་བྱ་སྐབས་ལ་བབ་པའི་ཚེ་ན་ཡང་བྱུང་། བྱིན་གྱིས་བརླབས་ལས་སྣང་བ་ན་ཡང་བྱུང་། བརྒྱུད་པ་ཐབས་ཀྱིས་གྲགས་པ་ན་ཡང་བྱུང་། གང་གི་ཆེད་དུ་མཛད་པ་ན་ཡང་བྱུང་། ལུང་ཆེན་ངེས་པར་བསྟན་པ་ན་ཡང་བྱུང་། ལས་རྒྱུད་ཡོངས་སུ་གཅོད་པ་ན་ཡང་བྱུང་། དགོངས་པ་རྣམ་པར་བགྲོ་བ་ན་ཡང་བྱུང་སྟེ། དེ་དག་ནི་ཐམས་ཅད་ཀྱི་ཐམས་ཅད་ནས་ཐམས་ཅད་དུ་ཡོངས་སུ་རྣམ་པར་སྣང་ངོ་། །སྣང་བར་གྱུར་ཏོ། །སྣང་བར་འགྱུར་རོ། །ཞེས་ལུང་བསྟན་པ་གང་དུ་གྲགས་པ་མི་ཤེས་སམ་ཞེས་སྨྲས་པ་ལས།

གསང་བ་པའི་བདག་པོས་སྨྲས་པ། ལང་ཀའི་བདག་པོ་ཇི་ག་འདི་ཅི་སྙམ་དུ་སེམས། ཁྱོད་ཀྱིས་མི་ཤེས་སམ། ཡུལ་ཚད་མ་ཐུབ་པ་ཉིད་ཀྱི་མ་འདས་པའི་དུས་སུ་བཀའ་སྩལ་གྱིས། རིག་འཛིན་གྱི་རྒྱལ་པོ་ཀུནྫ་ར་ཞེས་བྱ་བ་ཆོས་ཉིད་མཉམ་པ་ཉིད་ལ་༼༨༩༽དགོངས་པ་དང༌། སྟོན་པའི་སྤུན་ཡིན་པས་འཁོར་ཆེ་བ་སྐྱེད་ཅིང༌། གདུལ་བྱ་སྤྲོ་བ་བསྐྱེད་པའི་ཕྱིར་ཁོ་བོ་ཅག་གི་ཆོས་ཀྱི་སྤུན་དུ་གྱུར་པ་ལ་དངོས་སུ་བཀའ་སྩལ་པ་འདི་ལྟ་སྟེ། རིག་པ་འཛིན་པ་ཁྱོད་ཀྱིས་དྲི་བ་འདི་ལྟ་སྟེ། དེ་ཁོ་ན་ཉིད་གསང་བ་དམ་པ་དེ་ནི་སྐབས་གཉིས་དང་བཅུར་འབྱུང་བ་སྟེ། གང་རྨོངས་པ་གདུང་བ་སེལ་བ་ན་ཡང་འབྱུང༌། གང་འཇིག་རྟེན་གྱི་སྒྲོན་མ་ཡོངས་སུ་བཀོད་པ་ན་ཡང་འབྱུང༌། གང་གིས་ངེས་པ་རྙེད་པ་ན་ཡང་འབྱུང༌། སྙིང་པོ་བྱང་ཆུབ་ཉིད་དུ་ངེས་པ་ན་ཡང་འབྱུང༌། དགོངས་པ་ངེས་པར་འགྲེལ་པ་ན་ཡང་འབྱུང༌། གདུལ་བྱ་སྐབས་ལ་བབ་པའི་ཆེད་ན་ཡང་འབྱུང༌། བྱིན་གྱིས་རླབས་ཀྱིས་སྣང་བ་ན་ཡང་འབྱུང༌། བརྒྱུད་པ་ཐབས་ཀྱིས་གྲགས་པ་ན་ཡང་འབྱུང༌། གང་གི་ཆེད་དུ་མཛད་པ་ན་ཡང་འབྱུང༌། ལུང་ཆེན་ངེས་པར་བསྟན་པ་ན་ཡང་འབྱུང༌། ལས་རྒྱུད་ཡོངས་སུ་གཅོད་པ་ན་ཡང་འབྱུང༌། དགོངས་པ་རྣམ་པར་བགྲོ་བ་ན་ཡང་འབྱུང་སྟེ། དེ་དག་ནི་ཐམས་ཅད་ཀྱི་ཐམས་ཅད་ནས་ཐམས་ཅད་དུ་ཡོངས་སུ་རྣམ་པར་སྣང་ངོ་། །སྣང་བར་གྱུར་ཏོ། །སྣང་བར་འགྱུར་རོ། །ཞེས་མཆོག་གི་སྤྲུལ་སྐུ་ཤཱཀྱ་ཐུབ་པས་ལུང་བསྟན་པ་གང་དེ་ཞིང་འདི་ཉིད་དུ་གྲགས་པར་གསུངས་པ་ཁྱོད་ཀྱིས་མི་ཤེས་སམ་ཞེས་སྨྲས་ཏེ་བཀའ་སྩལ་པ་ལས་ཞེས་སོ། །དེའི་དོན་ལང་ཀ་ནང་དུ་ཡང་དག་པར་འཇོག་པས་ཐུབ་པའི་དབང་པོ་ལས་ཚུལ་བཅུ་གཉིས་མ་ཐོས་པའི་ཕྱིར་དྲིས་པར་འཇལ་ཏོ། །ཚིག་འདིས་ནི་ཕྱིས་ཀྱི་ལུང་བསྟན་ཙམ་ལས་དངོས་སུ་བཀའ་སྩལ་བ་མ་ཡིན་པའི་ཕྱིར་ཡང་ཐུབ་པའི་དབང་པོ་ནི་རྒྱུད་འདིའི་སྟོན་པ་མ་ཡིན་པར་ཡིད་ཆེས་ཏེ་ཀུན་འདུས་རྩ་རྒྱུད་དུ་བཞེད་པའང་ལམ་ཀློང་དུ་གྱུར་པ་ཡོན་ཏན་གྱི་གཞིར་བསྟན་པ་སོགས་དང་བསྟུན་ན་གཞུང་གི་དཀའ་གནད་མང་པོ་མ་འདྲེས་པར་གསལ་བའི་འཆད་ཚུལ་ངོ་མཚར་རྨད་དུ་བྱུང་བའོ། །འོན་ཀྱང་ལང་ཀའི་བདག་པོས་སྐབས་འབྱེད་པའི་ཚིག་གིས་མདུན་བསུས་ཏེ་དྲིས་པས། གསང་བདག་ཆེན་པོས་སྔར་ཐུབ་པས་བཀའ་སྩལ་པའི་བྱུང་ཚུལ་བཅུ་གཉིས་གསུངས་ཏེ། ཞིང་འདིར་གྲགས་པར་ལུང་བསྟན་པའི་ལན་མཛད་པ་ན་དང་པོའི་དོན་རྟོགས་ཟིན་པས་གཉིས་པ་ནས་དྲི་བ་དང་ལན་གྱིས་གསལ་བར་བཤད་པའི་ཕྱིར་རྒྱུད་ཆེན་པོ་རང་ཉིད་ལ་རྩ་བཤད་དུ་བཞག་པའང་བྱིན་རླབས་འབྱུང་བའི་བསྟན་པའི་ཁུངས་དང་འབྲེལ་བར་ད་ལྟའི་སྒྲོན་མ་སྟོན་མཆོག་ཤཱཀྱ་ཐུབ་པས་ལུང་བསྟན་བརྒྱུད་པའི་བསྟན་པ་རིན་པོ་ཆེ་གསང་ཆེན་ལུང་གི་༼༩༠༽མཛོད་ཁང་མདོ་ཆེན་པོའི་གཞུང་དོན་མཐའ་དག་ཡོངས་སུ་རྫོགས་པར་གསལ་བའི་འཆད་ཚུལ་ངོ་མཚར་བླ་ན་མེད་པའོ། །དེས་ན་དེ་གཉིས་པོ་མཐར་ཐུག་གི་དོན་ལ་དགོངས་གནད་གཅིག་ཏུ་འབབ་པའི་ཚུལ་ལ་བློ་གྲོས་ཀྱི་འཇུག་པ་ཐོབ་སྟེ་མདོ་རྒྱུད་ཆེན་པོའི་ཟབ་དོན་དངོས་བསྟན་ཇི་སྙེད་པ་ཐམས་ཅད་མ་འདྲེས་ཡོངས་རྫོགས་སུ་མཐོང་ནས་གསང་བའི་སྤྱི་རྒྱ་གཅོད་པ་ལ་མཁས་པར་གྱུར་ན་ཆེ་བ་བདུན་དང་ལྡན་པའི་བཀའ་དམ་པ་རྒྱལ་བ་ཀུན་གྱི་དགོངས་པ་འདུས་པའི་མདོ་ཆེན་པོ་འདིའི་དཀྱུས་དོན་མ་ལུས་པ་ཇི་བཞིན་དུ་ཁྲོལ་ནས་ཆོས་ཀྱི་མིག་དང་ལྡན་ཏེ་རྒྱུད་ལུང་མན་ངག་ཀུན་གྱི་དགོངས་པའི་མཐིལ་རྙེད་དེ་དོན་གྱི་ནོར་བུ་སྣང་བ་དམ་པ་དང་འཕྲད་པར་འགྱུར་རོ།།

ཨེ་མ་མདོ་རྒྱུད་ཆོས་ཀྱི་མེ་ལོང་འདི། །བཀའ་རྣམས་ཀུན་གྱི་དེམས་སུ་ངེས་པའི་ཕྱིར། །ཕྱོགས་བཅུའི་རྒྱལ་བ་སྐུ་ལྔའི་སྟོན་མཆོག་དང༌། ཞིང་འདིའི་སྒྲོན་མ་བུ་རམ་ཤིང་པའི་བཀའ། །གསང་ཆེན་གསང་བ་ཟབ་མོའི་མཛོད་ཀྱི་བདག །རྒྱལ་ཚབ་རྒྱུད་ཀྱི་སྟོན་པ་རྡོ་རྗེ་ཅན། །གང་གིས་རིགས་ཅན་སྤྲུལ་པའི་རྒྱལ་སྲས་ལ། །ལེགས་པར་བགྲོས་པའི་ངེས་དོན་སྙིང་པོའི་དཔྱིད། །སྔོན་དུས་ཆོས་རྒྱལ་ལུང་བསྟན་རྡོ་རྗེ་ལ། །ཐུབ་པའི་ལུང་བཞིན་སྣང་ནས་གསལ་བར་བཤད། །ལྗོངས་འདིར་གནུབས་ཆེན་ཡང་དབང་གཏེར་ཉིད་ཀྱིས། །རྒྱས་པར་སྤེལ་ཏེ་རྡོ་རྗེའི་ཐ་རམ་བཀྲོལ། །མཚུངས་མེད་ཟུང་དང་འཕགས་བོད་མཁས་གྲུབ་ཀྱི། །བཀའ་སྲོལ་བཞིན་དུ་ཀུན་མཁྱེན་ཀཿཐོག་པས། །ཁམས་ཀྱི་ཡུལ་གྲུར་ཆོས་ཀྱི་ཐང་མར་བརྡལ། །ཟག་བྲལ་འཇའ་སྐུའི་རིག་འཛིན་བརྒྱུད་མར་བྱོན། །འོན་ཀྱང་རེ་ཞིག་གདུལ་བྱའི་སྐལ་བ་ཡིས། །འདེགས་པར་མ་ནུས་འགྲེལ་བའི་དཔེ་ཡང་ཡིབ། །དེ་ཚེ་པཎ་ཆེན་ཆོས་ཀྱི་རྒྱ་མཚོ་ཡིས། །དཔེ་གཏེར་བཞེས་ཏེ་གསང་བའི་མཛོད་སྒོ་ཕྱེས། །གང་དེ་རྒྱ་ཆད་ཕྱོགས་ལྷུང་མེད་པ་ཡི། །གཞུང་དོན་མ་འདྲེས་ཡོངས་སུ་རྫོགས་ཚུལ་དུ། །ལུང་རིགས་མན་ངག་ཚད་མས་འདིར་སྤྲོས་པས། །ཚུལ་བཞིན་བློ་གྲོས་མིག་གིས་ལེགས་མཐོང་ན། །གྲོང་ཁྱེར་གསུམ་གྱི་གནས་ན་བཞུགས་པའི་མགོན། །ཁྱེའུ་སྣང་བ་དམ་པ་དངོས་མཇལ་ཏེ། །དབྱིངས་ཀྱི་ཁྱིམ་དུ་ཐབས་ཤེས་ཡབ་ཡུམ་དང༌། །འཕྲད་ནས་བདེ་ཆེན་དཔལ་ལ་སྤྱོད་པར་ངེས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །འོ་ན་འདི་ཉིད་ལེའུ་གཉིས་པ་དང་བལྡབ་བོ་ཞེ་ན། མ་བལྡབ་སྟེ། ལེའུ་གཉིས་པར་ཞུ་བ་པོ་ནི་རིག་འཛིན་གྱི་རྒྱལ་པོ་ཀུཉྫ་ར་ཡིན་ལ། ལན་༼༩༡༽འདེབས་པ་པོ་ནི་སྟོན་པ་ཤཱཀྱ་ཐུབ་པ་ཉིད་སྐུ་མ་འདས་པའི་དུས་སུའོ། །ལེའུ་འདིར་ནི། ཞུ་བ་པོ་ལང་ཀའི་བདག་པོ་ཡིན་ལ། ལན་འདེབས་པ་པོ་ནི་གསང་བའི་བདག་པོས་དུས་སྟོན་པ་འདས་ནས་ལོ་བརྒྱད་དང་བཅུ་གཉིས་ན་ལན་བཏབ་པ་ཡིན་ཏེ་སྔོན་གྱི་ལོ་རྒྱུས་གསུངས་པའོ།།

གཉིས་པ་བྱུང་ཚུལ་གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། རྡོ་རྗེ་སེམས་དཔའི་ཆོ་འཕྲུལ་བཀོད་པ། དེའི་གཞི་གསང་སྔགས་རང་གི་ངོ་བོའོ། དང་པོ་ལ་གཉིས་ཏེ། དྲིས་པ་དང༌། ལན་ནོ། །དང་པོནི།

ལང་ཀའི། ཞེས་པ་ནས། དྲིས་པ་ལས། ཞེས་པའི་བར་གྱིས་བསྟན་ཏེ།

ལང་ཀའི་བདག་པོས་སྨྲས་པ། ཨེ་མའོ་གསང་བའི་བདག་པོ། དེ་ནི་བདག་གིས་ཐོས་པ་དམ་པ་ཐོས་སོ། །ཐོས་པའི་མཆོག་ཐོས་སོ། །གསང་བ་པའི་བདག་པོ་ཡོངས་སུ་རྨོངས་པའི་གདུང་བ་ནི་སངས་པ་ལྟ་ན། སྒྲོན་མ་ཡོངས་སུ་བཀོད་པ་ན་ཡང་བྱུང་བ་ཇི་ལྟ་བུ་ཞིག་ཏུ་གྲགས་པ་ལགས། མི་མཇེད་ཀྱི་འཇིག་རྟེན་གྱི་ཁམས་འདིར་ད་ལྟར་ཡོངས་སུ་འདས་པ་འདི་ནི་སྒྲོན་མ་བཀོད་པ་ཞེས་བྱ་བར་འགྱུར་རམ། འདས་པ་འདི་ཡང་མི་མཇེད་ཀྱི་འཇིག་རྟེན་གྱི་ཁམས་འདི་འབའ་ཞིག་གི་སྒྲོན་མ་སངས་རྒྱས་མྱ་ངན་ལས་འདས་སམ། འོན་ཏེ་འཇིག་རྟེན་གྱི་ཁམས་མཐའ་དག་ན་ཞིང་ཁམས་ཇི་སྙེད་པའི་སྒྲོན་མ་བཀོད་པའི་སངས་རྒྱས་མྱ་ངན་ལས་འདས་པར་འགྱུར་ཞེས་དྲིས་པ་ལས།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །ཡང་ལང་ཀའི་བདག་པོས་སྨྲས་པ། ཨེ་མའོ། གསང་བ་པའི་བདག་པོ། ཐུབ་པའི་དབང་པོ་ལས་མ་ཐོས་ཀྱང་གསང་བདག་ཉིད་ལས་ཐོས་པ་དེ་ནི་བདག་གིས་ཐོས་པ་དམ་པ་ཕྱིན་ཅི་མ་ལོག་པར་ཐོས་སོ། །ཟབ་པར་ཁོང་དུ་ཆུད་པས་ཐོས་པའི་མཆོག་ཐོས་སོ། །གསང་བ་པའི་བདག་པོ། ཚུལ་དང་པོའི་ཐེ་ཚོམ་ཆོད་པས། ཡོངས་སུ་རྨོངས་པ་གདུང་བ་ནི་སངས་པ་ལྟ་ན། གཉིས་པའི་ཚུལ་སྒྲོན་མ་ཡོངས་སུ་བཀོད་པ་ན་ཡང་འབྱུང་བར། ཇི་ལྟ་བ་ཞིག་ཏུ་ཡོངས་སུ་གྲགས་པ་ལགས། མི་མཇེད་ཀྱི་འཇིག་རྟེན་གྱི་ཁམས་འདིར། ད་ལྟར་ཡོངས་སུ་འདས་པ་འདི། སྒྲོན་མ་བཀོད་པ་ཞེས་བྱ་བར་འགྱུར་རམ། འདས་པ་འདི་ཡང༌། མི་མཇེད་ཀྱི་འཇིག་རྟེན་གྱི་ཞིང་ཁམས་འདི་འབའ་ཞིག་གི་སྒྲོན་མ་སངས་རྒྱས་མྱ་ངན་ལས་འདས་སམ། འོན་ཏེ་འཇིག་རྟེན་གྱི་ཁམས་མཐའ་དག་ན། ཞིང་ཁམས་ཇི་སྙེད་པའི་སྒྲོན་མ་བཀོད་པའི་སངས་རྒྱས་མྱ་ངན་ལས་འདས་པར་གྱུར། ཞེས་དྲི་བ་གསུམ་དྲིས་པ་ལས།

གཉིས་པ་ལན་ལ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ལ་བཞི་སྟེ། ཞིང་ཁམས་གང་གི་སྤྲུལ་པ་ཡིན་པ། སངས་རྒྱས་གང་གི་སྤྲུལ་པ་ཡིན་པ། ཐུབ་པའི་ངེས་ཚིག སྤྲུལ་པའི་དབྱེ་བ་བསྟན་པའོ། །དང་པོ་ནི།

གསང་བ་པའི། ཞེས་པ་ནས། བཞིན་དུ་བལྟའོ། །ཞེས་པའི་བར་གྱི་བསྟན་ཏེ།

གསང་བ་པའི་བདག་པོས་སྨྲས་པ། ལང་ཀའི་བདག་པོ་དེ་ཇི་སྙམ་དུ་སེམས། འདི་ཡང་སྒྲོན་མ་ཞེས་སམ། ད་ལྟར་འདས་པ་ནི་ཞིང་ཁམས་མཐའ་དག་གི་སངས་རྒྱས་ལྟ་ཞོག འཛམ་བུ་གླིང་བྱེ་བ་ཕྲག་ས་ཡའི་སངས་རྒྱས་ལྟ་ཡང་ཞོག འཛམ་བུ་གླིང་གཅིག་གི་སངས་རྒྱས་གཅིག་ཡོངས་སུ་མྱ་ངན་ལས་འདས་པར་ཟུང་ཞིག དེ་ཅིའི་ཕྱིར་ཞེ་ན། ཞིང་ཁམས་འདི་ནི་སྤྲུལ་པའི་སངས་རྒྱས་ཉག་གཅིག་གི་ཞིང་ཁམས་ཡིན་པའི་ཕྱིར་རོ། །དེ་བཞིན་དུ་བསམ་གྱིས་མི་ཁྱབ་པའི་སངས་རྒྱས་ཇི་སྙེད་པ་འཇིག་རྟེན་གྱི་ཁམས་གཞལ་དུ་མེད་པ་ན་སྒྲོན་མའི་བྱ་བ་མཛད་དོ། །དེ་དག་ཇི་ལྟ་བ་དེ་ལྟ་དེ་ལྟར། སྤྲུལ་པའི་སངས་རྒྱས་རྡུལ་སྙེད་ཀྱང་དེ་བཞིན་དུ་ལྟའོ།།

གསང་བ་པའི་བདག་པོས་སྨྲས་པ། དྲི་བ་དང་པོའི་ལན་དུ་ལང་ཀའི་བདག་པོ་འདི་ཇི་སྙམ་དུ་སེམས། ཐུབ་པའི་དབང་པོ་འདས་པ་འདི་ཡང་སྒྲོན་མ་ཞེས་བྱ་སྟེ་སྤྲུལ་པ་གཅིག་གིས་འདུལ་ཐབས་ཡིན་པས་སོ། །དྲི་བ་གཉིས་པའི་ལན་དུ། ད་ལྟར་སྟོན་པ་འདས་པ་ནི། ཞིང་ཁམས་མཐའ་དག་གི་སངས་རྒྱས་ལྟ་ཞོག འཛམ་བུ་གླིང་བྱེ་བ་ཕྲག་ས་ཡའི་༼༩༢༽སངས་རྒྱས་ལྟ་ཡང་ཞོག གཞན་དག་ལས་བྱེ་བ་ཕྲག་བརྒྱ་ཟེར་ཡང་འདིར་ནི་འཛམ་བུའི་གླིང་གཅིག་གི་སངས་རྒྱས་གཅིག་ཡོངས་སུ་མྱ་ངན་ལས་འདས་པར་ཟུངས་ཤིག དེ་ཅིའི་ཕྱིར་ཞེ་ན། མི་མཇེད་ཀྱི་ཞིང་ཁམས་འདི་ནི། སྤྲུལ་པའི་སྐུ་སངས་རྒྱས་ཤཱཀྱ་ཐུབ་པ་ཉག་གཅིག་གི་ཞིང་ཁམས་ཡིན་པའི་ཕྱིར་རོ། །དྲི་བ་གསུམ་པའི་ལན་དུ། དེ་བཞིན་དུ་སྟོང་ཆེན་གྱི་མི་མཇེད་ཀྱི་འཛམ་བུའི་གླིང་གི་སྒྲོན་མ་ཤཱཀ་ཐུབ་ཡིན་པས། བསམ་གྱིས་མི་ཁྱབ་པའི་སངས་རྒྱས་ཇི་སྙེད་པ། འཇིག་རྟེན་གྱི་ཁམས་གཞལ་དུ་མེད་པ་ན་སྒྲོན་མའི་བྱ་བ་མཛད་དོ། །ཞིང་འདིར་སྟོན་པ་ཤཱཀ་ཐུབ་འདས་ནས་གཞན་དུ་སྒྲོན་མ་མཛད་པ་དེ་དག་ཇི་ལྟ་བ་དེ་ལྟར་སྤྲུལ་པའི་སངས་རྒྱས་རྡུལ་སྙེད་ཀྱང༌། ཞིང་སོ་སོ་ན་འདའ་བ་དང་སྒྲོན་མ་མཛད་ཚུལ་དེ་བཞིན་དུ་བལྟ་བར་བྱའོ། །འོ་ན་ཤཱཀ་ཐུབ་ཀྱི་ཞིང་ཁམས་སྟོང་གསུམ་གྱི་སྟོང་ཆེན་པོ་གཅིག་ཡིན་ནམ་འཛམ་བུའི་གླིང་གཅིག་ཡིན། སྔ་མ་ལྟར་ན། ཞིང་ཁམས་མཐའ་དག་གི་སངས་རྒྱས་ལྟ་ཞོག འཛམ་གླིང་བྱེ་བ་ཕྲག་ས་ཡའི་སངས་རྒྱས་12ལྟ་ཞོག འཛམ་བུ་གླིང་གཅིག་གི་སངས་རྒྱས་ཉག་གཅིག་མྱ་ངན་ལས་འདས་པར་ཟུངས་ཤིག ཅེས་པ་དང་འགལ་ལ། ཕྱི་མ་ལྟར་ན། སྟོང་གསུམ་གྱི་སྟོང་ཆེན་པོ་མི་མཇེད་ཞེས་བྱ་བ་འདི་ན། སངས་རྒྱས་ཐུབ་པའི་དབང་པོ་ཞེས་བྱ་བར་བསྟན་ནས། ཞེས་པ་དང་འགལ་ལོ་ཞེ་ན། དེ་ནི་འདི་ལྟར་ཤེས་པར་བྱ་སྟེ། སྟོང་གསུམ་གྱི་སྟོང་ཆེན་པོ་གཅིག་ན། སྤྲུལ་པའི་གཞི་མ་ཤཱཀྱ་ཐུབ་པ་གཅིག་བཞུགས་པ་དེ་ལ། གདུལ་བྱའི་མཐོང་སྟངས་ཀྱིས་འཛམ་བུའི་གླིང་རེ་ན་སྤྲུལ་པའི་སྐུ་རེ་རེ་བཞུགས་པའམ་འདས་པར་མཐོང་བ་ལ་འགལ་བ་མེད་དེ། དཔེར་ན་ནམ་མཁའ་ལ་ཉི་མ་གཅིག་ལས་མེད་པ་ལ་ཆུ་ཐ་དད་པའི་ནང་ན་ཉི་མའི་གཟུགས་བརྙན་ཐ་དད་པར་སྣང་བ་བཞིན་ནོ། །དེ་ཡང་འདི་ཉིད་ལས། ཅི་ལྟར་ཉི་མའི་དཀྱིལ་འཁོར་གྱི་གཟུགས་གཞལ་མེད་ཁང་ལས་མ་གཡོས་བཞིན་དུ་ཆུ་ཐ་དད་པའི་ནང་དུ་གཟུགས་བརྙན་སྣང་བ་བཞིན་དུ་སངས་རྒྱས་རྡོ་རྗེ་སེམས་དཔའ་ཉིད་ལས་མ་གཡོས་བཞིན་དུ། ཞིང་ཁམས་དཔག་ཏུ་མེད་པར་སངས་རྒྱས་མཐའ་ཡས་པར་སྣང་ངོ༌། །ཞེས་སོ།།

གཉིས་པ་སངས་རྒྱས་གང་གི་སྤྲུལ་པ་ཡིན་པ་ནི།

དེ་ནས། ཞེས་པ་ནས། ཟུངས་ཤིག ཅེས་པའི་བར་གྱིས་བསྟན་ཏེ།

དེ་ནས་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོས་དྲིས་པ། གསང་བ་པའི་བདག་པོ་མི་མཇེད་ཀྱི་ཞིང་ཁམས་འཛམ་བུ་གླིང་གཅིག་གིས་སྤྲུལ་པའི་སངས་རྒྱས་ཉག་གཅིག་མྱ་ངན་ལས་འདས་པ་འདི་སངས་རྒྱས་གང་གི་སྤྲུལ་པར་ཡོངས་སུ་གཟུང་བར་བགྱི། གསང་བ་པའི་བདག་པོས་སྨྲས་པ། ལང་ཀའི་བདག་པོ་འདི་ནི་རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པ་ལས་སྤྲུལ་པ་ཆ་གཅིག་འབའ་ཞིག་ཁོ་ནར་ཟུང་ཞིག

དེ་ནས་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོས་དྲིས་པ། གསང་བ་པའི་བདག་པོ། མི་མཇེད་ཀྱི་འཇིག་རྟེན་གྱི་ཞིང་ཁམས་འཛམ་བུ་གླིང་གཅིག་གི་སྤྲུལ་པའི་སངས་རྒྱས་༼༩༣༽ཉག་གཅིག་མྱ་ངན་ལས་འདས་པ་འདི་སངས་རྒྱས་གང་གི་སྤྲུལ་པར་ཡོངས་སུ་གཟུང་བར་བགྱི། གསང་བ་པའི་བདག་པོས་སྨྲས་པ། ལང་ཀའི་བདག་པོ། འདི་ནི་རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པ་ལས་སྤྲུལ་པ་ཆ་གཅིག་འབའ་ཞིག་ཁོ་ནར་ཟུངས་ཤིག

གསུམ་པ་ཐུབ་པའི་ངེས་ཚིག་ནི།

སྨྲས་པ། ཞེས་པ་ནས། གྲགས་སོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ་ཞིང་ཁམས་འདིར་ཤཀྱཱ་ཐུབ་པ་ཞེས་བྱ་བར་གྲགས་ན།

སྨྲས་པ། གསང་བ་པའི་བདག་པོ། ཞིང་ཁམས་འདིར་ཤཱཀྱ་ཐུབ་པ་ཞེས་བྱ་བར་གྲགས་ན། འདི་ཅི་ལྟར་ཡོངས་སུ་གཟུང་བར་བགྱི། སྨྲས་པ། ལང་ཀའི་བདག་པོ། དེ་རྡོ་རྗེ་སེམས་དཔའི་སྤྲུལ་པའི་བླ་དྭགས་འབའ་ཞིག་གོ །ལང་ཀའི་བདག་པོ། དེ་ཅིའི་ཕྱིར་ཞེ་ན། རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པ་ཇི་སྙེད་པས། བདག་གཞན་གྱི་འཁོར་བ་བསམ་གྱིས་མི་ཁྱབ་པའི་དཔུང་གཏན་དུ་བཅོམ་པའི་ཕྱིར་མཚན་ཐུབ་པ་ཆེན་པོ་ཞེས་ཐ་སྙད་དུ་ཡོངས་སུ་གྲགས་སོ།།

བཞི་པ་སྤྲུལ་པའི་དབྱེ་བ་བསྟན་པ་ནི།

ཇི་ལྟར། ཞེས་པ་ནས། གྲགས་སོ། །ཞེས་པའི་བར་གྱིས་བསྟན་ཏེ།

འདི་ཇི་ལྟར་ཡོངས་སུ་ཤེས་པར་བགྱི། སྨྲས་པ། ལང་ཀའི་བདག་པོ་དེ་རྡོ་རྗེ་སེམས་དཔའི་སྤྲུལ་པ་བླ་དྭགས་འབའ་ཞིག་གོ །ལང་ཀའི་བདག་པོ་དེ་ཅིའི་ཕྱིར་ཞེ་ན། རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པས་འཁོར་བ་བསམ་གྱིས་མི་ཁྱབ་པའི་དཔུང་གཏན་བཅོམ་པའི་ཕྱིར། ཐུབ་པ་ཆེན་པོ་ཞེས་ཡོངས་སུ་གྲགས་སོ། །ཇི་ལྟར་འཇིག་རྟེན་དྲུག་གི་ཕྱོགས་བཅུར་ཡང་ཐུབ་པ་ཆེན་པོ་ཞེས་བྱ་བར་ཡང་གྲགས་པ་ནི་འདི་ལྟ་སྟེ། ལྷའི་གནས་སུ་ཐུབ་པ་ཆེན་པོ་སྲིད་ཐུབ་འཛིན་ཞེས་བྱ་བར་གྲགས་སོ། །ལྷ་མ་ཡིན་གྱི་གནས་སུ་ཐུབ་པ་ཆེན་པོ་རྣམ་པར་རྒྱལ་བ་ཞེས་བྱ་བར་གྲགས་སོ། །མིའི་གནསསུ་ཐུབ་པ་ཆེན་པོ་ཤཀྱཱ་སེང་གེ་ཞེས་བྱ་བར་གྲགས་སོ། །བྱོལ་སོང་གི་གནས་སུ་ཐུབ་པ་ཆེན་པོ་རྣམ་པར་གནོན་པ་ཞེས་བྱ་བར་གྲགས་སོ། །ཡི་དྭགས་ཀྱི་གནས་སུ་ཐུབ་པ་ཆེན་པོ་རྣམ་པར་སྣང་བྱེད་ཅེས་བྱ་བར་གྲགས་སོ། །དམྱལ་བའི་གནས་སུ་ཐུབ་པ་ཆེན་པོ་ཆོས་ཀྱི་རྒྱལ་པོ་ཞེས་བྱ་བར་གྲགས་སོ།།

དེའང་ཇི་ལྟར་འདུལ་བའི་དབང་གིས་འཇིག་རྟེན་དྲུག་གི་གནས་རེ་རེའི་ཕྱོགས་བཅུར་ཡང༌། མཚན་མཐུན་པར་ཐུབ་པ་ཆེན་པོ་ཞེས་བྱ་བར་ཡང་གྲགས་པ་ནི། འདི་ལྟ་སྟེ། ལྷ་ཡི་གནས་སུ་ཐུབ་པ་ཆེན་པོ་བརྒྱ་བྱིན་ལྷ་ཡི་རྒྱལ་སྲིད་ལ་མངའ་དབང་སྒྱུར་བའམ་ཆོས་ཀྱི་སྲིད་འཛིན་པས་སྲིད་ཐུབ་འཛིན་ཅེས་བྱ་བར་གྲགས་སོ། །ལྷ་མ་ཡིན་གྱི་གནས་སུ་ཐུབ་པ་ཆེན་པོ་ཐག་བཟང་རིས་སམ་མཐའི་གཡུལ་ལས་རྣམ་པར་རྒྱལ་བ་ཞེས་བྱ་བར་གྲགས་སོ། །མི་ཡི་གནས་སུ་ཐུབ་པ་ཆེན་པོ་ཤཱཀྱའི་རིགས་ལས་མི་འཇིགས་པར་ཆོས་སྟོན་པས་ཤཱཀྱ་སེང་གེ་ཞེས་བྱ་བར་གྲགས་སོ། །བྱོལ་སོང་གི་གནས་སུ་ཐུབ་པ་ཆེན་པོ་སེང་གེ་ཡི་དམ་བརྟན་པའམ་སྟོབས་ཀྱིས་རྣམ་པར་གནོན་པ་ཞེས་བྱ་བར་གྲགས་སོ། །ཡི་དྭགས་ཀྱི་གནས་སུ་ཐུབ་པ་ཆེན་པོ་ཁ་འབར་དེ་བའམ་ཡིད་བཞིན་རྣམ་པར་སྣང་བྱེད་ཅེས་བྱ་བར་གྲགས་སོ། །དམྱལ་བའི་གནས་སུ་ཐུབ་པ་ཆེན་པོ་གཤིན་རྗེ་བུའམ་ཆོས་ཀྱི་རྒྱལ་པོ་ཞེས་བྱ་བར་གྲགས་སོ།།

གཉིས་པ་རྒྱས་པར་བཤད་པ་ལ་བདུན་ཏེ། སྤྲུལ་པའི་ཞིང་ཁམས། སྤྲུལ་པའི་མཛད་པ། སྤྲུལ་པའི་ཆ་ལུགས། ཆ་ལུགས་སོ་སོར་བསྟན་པའི་དགོས་ཆེད། མཚན་གྱི་ཁྱད་པར། ཆོས་སྟོན་ཚུལ། ཚེ་དང་ལོངས་སྤྱོད་ཀྱི་ཚད་དོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཀྱེ་ལང་ཀའི། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

ཀྱེ་ལང་ཀའི་བདག་པོ་དེར་ཡང་མ་ཟད་དེ། དེ་ཇི་ལྟ་བ་དེ་ལྟར་དེ་བཞིན་དུ་མི་མཇེད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཐུབ་པ་དྲུག་གི་སྒྲོན་མ་ཡོངས་སུ་སྣང་བ་དེ་ལྟ་དེ་ལྟར། རྡུལ་སྙེད་ཀྱི་འཇིག་རྟེན་གྱི་ཁམས་བསམ་གྱིས་མི་ཁྱབ་པའི་འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ན། རྡུལ་སྙེད་ཀྱི་ཐུབ་པ་དྲུག་གི་སྒྲོན་མ་མཐའ་ཡས་པར་སྣང་བ་ཡང་འདི་ལྟ་སྟེ།

ཀྱེ་ལང་ཀའི་བདག་པོ་ཞིང་འདིའི་འཇིག་རྟེན་དྲུག་གི་ཐུབ་པ་དྲུག་པོ་དེར་ཡང་མ་༼༩༤༽ཟད་དེ། དེ་ཇི་ལྟ་བ་དེ་ལྟར་དེ་བཞིན་དུ་སྟོང་གསུམ་གྱི་སྟོང་ཆེན་པོའི་མི་མཇེད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཐུབ་པ་དྲུག་གི་སྒྲོན་མ་ཡོངས་སུ་སྣང་བ་དེ་ལྟ་དེ་ལྟར། རྡུལ་སྙེད་ཀྱི་འཇིག་རྟེན་གྱི་ཁམས་བསམ་གྱིས་མི་ཁྱབ་པའི་འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ན། རྡུལ་སྙེད་ཀྱི་ཐུབ་པ་དྲུག་གི་སྒྲོན་མ་མཐའ་ཡས་པར་སྣང་བ་ཡང་འདི་ལྟ་སྟེ།

གཉིས་པ་རྒྱས་པར་བཤད་པ་ལ་གསུམ་སྟེ། ཕྱོགས་མཚམས་ཀྱི་ཞིང་ཁམས་བརྒྱད་དུ་སྣང་ཞིང་གྲགས་པ། རྣམ་པར་སྣང་བ་ལ་སོགས་པའི་ཞིང་ཁམས་ཞེ་གཅིག་ཏུ་སྣང་ཞིང་གྲགས་པ། མི་མཇེད་ཀྱི་སྟོང་གསུམ་དུ་ཐུབ་པའི་དཔང་པོར་སྣང་ཞིང་གྲགས་པའོ། །དང་པོ་ནི།

ཤར་ཕྱོགས། ཞེས་པ་ནས། ཆོས་སྟོན་ཏོ། །ཞེས་པའི་བར་གྱིས་བསྟན་ཏེ།

ཤར་ཕྱོགས་ཀྱི་འཇིག་རྟེན་གྱི་ཁམས་གླིང་བཞི་པ་སྟོང་ཕྲག་བཅུ་གཉིས་འདས་པ་ན། འཇིག་རྟེན་གྱི་ཁམས་དྲི་མ་མེད་པ་ཞེས་བྱ་བའི་ཞིང་ཁམས་དེ་ཐམས་ཅད་རིན་པོ་ཆེ་སྣ་ཚོགས་ལས་གྲུབ་པ། དེ་ན་གནས་པའི་འགྲོ་བ་རྣམས་ཚེ་དང་ལོངས་སྤྱོད་ཐམས་ཅད་སུམ་ཅུ་རྩ་གསུམ་དང་མཉམ་པ། བར་མ་དོར་འཆི་བ་མེད་ཅིང་། རྫུས་ནས་སྐྱེ་བ་ཤ་སྟག་ཀྱང་འདོད་པ་ཐམས་ཅད་བསམས་པས་འགྲུབ་སྟེ། དེ་ན་སྦྱིན་པ་ཡང་མེད། གཏོང་བ་ཡང་མེད། ལེན་པ་དང་སློང་བ་པོ་ཡང་མེད་དེ། འཇིག་རྟེན་གྱི་ཁམས་གཞན་དག་ན་ཡང་གཏོང་སློང་ཡོད་པ་དག་གི་གཏམ་ཐོས་པ་ན། དེ་ལ་ཡོངས་སུ་སྨོན་པ་ཡིན་ཏེ། དེ་ན་རྡོ་རྗེ་སེམས་དཔའི་སྤྲུལ་པ་ཐུབ་པའི་དབང་པོ་དེ་དེ་བཞིན་གཤེགས་པ་ཤཱཀྱ་ཐུབ་པ་དྲི་མེད་སྒྲ་ཞེས་བྱ་བར་བསྟན་ནས། ཐེག་པ་ཆེན་པོའི་ཆོས་སེམས་ཀྱི་དཀྱིལ་འཁོར་འོད་གསལ་བ། གསང་སྔགས་ཀྱི་ངོ་བོ་དེ་ཉིད་སྒྲོན་མ་ཆེན་པོ་ཡོངས་སུ་སྣང་ངོ་། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང་ཐུབ་པ་དྲུག་གི་སྒྲོན་མ་སྣང་བས། འགྲོ་བ་དྲུག་གི་སེམས་ཀྱི་དཀྱིལ་འཁོར་ཡོངས་སུ་གསལ་བར་བྱེད་དོ། །ཡང་ཐུབ་པའི་དབང་པོ་དེ་ལྷོ་ཕྱོགས་ཀྱི་འཇིག་རྟེན་གྱི་ཁམས་སྟོང་ཕྲག་བརྒྱད་འདས་པ་ན། འཇིག་རྟེན་གྱི་ཁམས་ཡོན་ཏན་འབྱུང་བ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་དཀོན་མཆོག་སྤྲིན་ཞེས་བྱ་བར་སྤྲུལ་ནས། སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་ཡོངས་སུ་སྣང་བར་བྱེད་དོ། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་དག་ན་ཡང་ཐུབ་པ་ཆེན་པོ་དྲུག་གི་སྒྲོན་མ་སྣང་བས། འགྲོ་བ་དྲུག་གི་སེམས་ཀྱི་དཀྱིལ་འཁོར་གསལ་བར་བྱེད་དོ། །ཡང་ཐུབ་པའི་དབང་པོ་དེ་ནུབ་ཕྱོགས་ཀྱི་འཇིག་རྟེན་གྱི་ཁམས་སྟོང་ཕྲག་ཉི་ཤུ་འདས་པ་ན། འཇིག་རྟེན་གྱི་ཁམས་རྒྱན་ཤིན་ཏུ་བཀྲམ་པ་ཞེས་བྱ་བ་ན། གང་ཟག་རྫུས་ན་སྐྱེ་བ་ཤ་སྟག་སྟེ། ཚེ་ལོ་བརྒྱད་ཁྲི་བཞི་སྟོང་གནས་པའི་ཞིང་ཁམས་དེ་ན། དེ་བཞིན་གཤེགས་པ་ཤཱཀྱ་ཐུབ་པ་ཡོན་ཏན་འབྱུང་གནས་ཞེས་བྱ་བར་བསྟན་ནས། སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་སྟོན་ཏོ། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང་ཐུབ་པ་དྲུག་གི་སྒྲོན་མ་སྣང་བས། འགྲོ་བ་དྲུག་གི་སེམས་ཀྱི་དཀྱིལ་འཁོར་གསལ་བར་བྱེད་དོ། །ཡང་ཐུབ་པའི་དབང་པོ་དེ་བྱང་ཕྱོགས་ཀྱི་འཇིག་རྟེན་གྱི་ཁམས་སྟོང་ཕྲག་སུམ་ཅུ་འདས་པ་ན། འཇིག་རྟེན་གྱི་ཁམས་བག་ཚ་བ་མེད་པ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་སེང་གེ་སྒྲ་ཞེས་བྱ་བར་བསྟན་ནས། སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་སྟོན་ཏོ། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང་ཐུབ་པ་དྲུག་གི་སྒྲོན་མ་སྣང་བས། འགྲོ་བ་དྲུག་གི་སེམས་ཀྱི་དཀྱིལ་འཁོར་གསལ་བར་བྱེད་དོ། །དེ་བཞིན་དུ་ཐུབ་པའི་དབང་པོ་དེ་ཤར་ལྷོའི་འཇིག་རྟེན་གྱི་ཁམས་སྟོང་ཕྲག་བརྒྱད་ཅུ་རྩ་བཞི་འདས་པ་ན། འཇིག་རྟེན་གྱི་ཁམས་རྣམ་པར་མཛེས་པ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་མཛེས་པའི་ཏོག་ཅེས་བྱ་བར་བསྟན་ནས། གོང་མ་བཞིན་དུ་ཆོས་སྟོན་ཏོ། །ལྷོ་ནུབ་མཚམས་ཀྱི་འཇིག་རྟེན་གྱི་ཁམས་སྟོང་ཕྲག་བདུན་ཅུ་འདས་པ་ན། འཇིག་རྟེན་གྱི་ཁམས་རབ་ཏུ་སྣང་བ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་དེ་གཟི་བརྗིད་རྒྱན་ཞེས་བྱ་བར་བསྟན་ནས། གོང་མ་བཞིན་དུ་ཆོས་སྟོན་ཏོ། །ནུབ་བྱང་མཚམས་ཀྱི་འཇིག་རྟེན་གྱི་ཁམས་སྟོང་ཕྲག་ལྔ་བཅུ་འདས་པ་ན། འཇིག་རྟེན་གྱི་ཁམས་རབ་ཏུ་དང་བ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་དེ་ཙན་དན་དྲི་མཆོག་དཔལ་ཞེས་བྱ་བར་བསྟན་ནས། གོང་མ་བཞིན་དུ་ཆོས་སྟོན་ཏོ། །བྱང་ཤར་མཚམས་ཀྱི་འཇིག་རྟེན་གྱི་ཁམས་སྟོང་ཕྲག་བཞི་བཅུ་རྩ་བཞི་འདས་པ་ན། འཇིག་རྟེན་གྱི་ཁམས་གདུང་བ་སེལ་བ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་དེ་སྙིང་རྗེའི་རྒྱལ་པོ་ཞེས་བྱ་བར་བསྟན་ནས། གོང་མ་བཞིན་དུ་ཆོས་སྟོན་ཏོ།།

དེ་ལྟར་ཞིང་བསམ་གྱིས་མི་ཁྱབ་པ་ན་བཞུགས་པ་དང༌། མི་མཇེད་འདི་ན་སྣང་བའི་ཚུལ་གྱིས་ཁྱད་པར་གྱི་ཞིང་ཁམས་བཅུ་ཕྲག་ལྔ་བསྟན་ཏེ་འདི་དག་གི་རྒྱལ་བ་རྣམས་ཀྱི་དགོངས་པ་ནི་ལེའུ་ཐ་མའི་དགོངས་མདོར་གསུངས་པ་དག་ཀྱང་རིམ་པ་བཞིན་རིགས་པས་འཐད་དེ། སློབ་དཔོན་བདེ་བ་གསལ་མཛད་ཀྱི་ཊི་ཀ་བཞིན་ཞེས་གསུངས་པ་ལྟར་སྦྱར་ཏེ་བཤད་ན། ཕྱོགས་མཚམས་བརྒྱད་ལས་དང་པོ་མི་མཇེད་ཀྱི་འཇིག་རྟེན་སྟོང་གསུམ་པོ་འདིའི་ཕ་མཐའ་ནས་ཕར་བགྲངས་པས་ཤར་ཕྱོགས་ཀྱི་འཇིག་རྟེན་གྱི་ཁམས་གླིང་བཞི་རི་རབ་དང་བཅས་པ་འདི་ལྟ་བུའི་གྲངས་སྟོང་ཕྲག་བཅུ་གཉིས་འདས་པ་ཡི་ཕ་རོལ་ན། འཇིག་རྟེན་གྱི་ཁམས་དེར་སྐྱེས་པའི་སེམས་ཅན་རྣམས་གཟུང་འཛིན་དང་བྲལ་བའི་ཡེ་ཤེས་ལ་རང་བཞིན་གྱིས་ཉོན་མོངས་པ་དང་ནག་པོའི་ལས་ལམ་མི་སྤྱོད་པས་མཚན་དྲི་མ་མེད་པ་ཞེས་བྱ་བ་ཞིང་ཁམས་དེ་ཐམས་ཅད་རྒྱུ་རིན་པོ་ཆེ་སྣ་ཚོགས་ལས་གྲུབ་པ། དེ་ན་གནས་པའི་འགྲོ་བ་རྣམས་ཚེ་དང་ལོངས་སྤྱོད་ཐམས་ཅད་སུམ་ཅུ་རྩ་གསུམ་དང་མཉམ་པ། བར་མ་དོར་འཆི་བ་མེད་ཅིང༌། བརྫུས་ནས་སྐྱེ་བ་ཤ་སྟག་ཀྱང༌། འདོད་པ་ཐམས་ཅད་བསམ་པས་འགྲུབ་སྟེ། དེ་ན་སྦྱིན་པ་ཡང་མེད། གཏོང་བ་ཡང་མེད། ལེན་པ་དང་སློང་བ་པོ་ཡང་མེད་དེ། འཇིག་རྟེན་གྱི་ཁམས་གཞན་དག་ན་གཏོང་སློང་ཡོད་པ་དག་གི་གཏམ་ཐོས་པ་ན། དེ་དག་ལ་ཚོགས་གསོག་པའི་སྒོ་ཡོད་དོ་ཞེས་ཡོངས་སུ་སྨོན་པ་ཡིན་ཏེ། ཞིང་དེ་ན་སངས་རྒྱས་རྡོ་རྗེ་སེམས་དཔའི་སྤྲུལ་པ་ཐུབ་པའི་དབང་པོ་དེ། དེ་བཞིན་གཤེགས་པ་ཤཱཀྱ་ཐུབ་པ་དྲི་མེད་སྒྲ་ཞེས་བྱ་བར་བསྟན་ནས། ཡོད་མཐོང་སྣང་གྲགས་ཆོས་སོ་ཅོག །ཐ་དད་སྣ་ཚོགས་མཐའ་ཡས་ཀྱང་། ༼༩༥༽།རང་བཞིན་མ་བཅོས་དེ་བཞིན་ཉིད། །མ་བསྒྲིབས་འོད་གསལ་རྣམ་དག་ཞིང༌། །ཞེས་པའི་དགོངས་པ་རྣམ་པར་བཤད་དེ། ཐེག་པ་ཆེན་པོའི་ཆོས་སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་སྐལ་ལྡན་ལ་སྟོན་པས་སྒྲོན་མ་ཆེན་པོ་ཡོངས་སུ་སྣང་ངོ༌། །ཤར་ཕྱོགས་ཀྱི་ཞིང་དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང༌། ཐུབ་པ་དྲུག་གི་སྒྲོན་མ་སྣང་བས་འགྲོ་བ་དྲུག་གི་སེམས་ཀྱི་དཀྱིལ་འཁོར་ཡོངས་སུ་གསལ་བར་བྱེད་དོ། །འོ་ན་དྲི་མེད་སྒྲ་ཉིད་ཐུབ་པ་དྲུག་གི་ཆའམ་བདུན་དུ་འགྱུར་ཞེ་ན། མི་ལས་གྲགས་པ་གཙོར་བྱས་པའི་དབང་ཡིན་པས་བདུན་དུ་མི་འགྱུར་ཏེ་འཆད་པ་རིལ་ལ་དེ་བཞིན་དུ་སྦྱར་ཏེ། ཞིང་ཁམས་དང་མཚན་ནི་ཐུབ་པ་སོ་སོའི་དགོངས་པ་ལས་དཔོགས་ཤེས་པར་བྱའོ། །གཉིས་པ་ཡང་ཐུབ་པའི་དབང་པོ་དེ། ལྷོ་ཕྱོགས་ཀྱི་འཇིག་རྟེན་གྱི་ཁམས་སྟོང་ཕྲག་བརྒྱ་༼བརྒྱད་ཡང་སྣང༌། མཆན།༽འདས་པ་ན། འཇིག་རྟེན་གྱི་ཁམས་ཡོན་ཏན་འབྱུང་བ་ཞེས་བྱ་བ་ན་སྟོན་པ་དེ་བཞིན་གཤེགས་པ་ཤཱཀྱ་ཐུབ་པ་དཀོན་མཆོག་སྤྲིན་ཞེས་བྱ་བར་སྤྲུལ་ནས། ཀུན་དུ་སྣང་བའི་ཡེ་ཤེས་འདི། །སུས་ཀྱང་མ་བྱས་རང་བྱུང་སྟེ། །ཐམས་ཅད་འབྱུང་བའི་རྩ་བས་ན། །རང་ལས་བྱུང་བའི་དཀྱིལ་འཁོར་རྫོགས། །ཞེས་པའི་དགོངས་པ་ལྟར་བསྟན་པ་སེམས་ཀྱི་དཀྱིལ་འཁོར་འོད་གསལ་བ། གསང་སྔགས་ཀྱི་ངོ་བོ་དེ་ཉིད་རིམ་དང་ཅིག་ཆར་གྱིས་ཡོངས་སུ་སྣང་བར་བྱེད་དོ། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང༌། ཐུབ་པ་ཆེན་པོ་དྲུག་གི་སྒྲོན་མ་སྣང་བས་འགྲོ་བ་དྲུག་གི་སེམས་ཀྱི་དཀྱིལ་འཁོར་འོད་གསལ་བར་བྱེད་དོ། །གསུམ་པ་ཡང་ཐུབ་པའི་དབང་པོ་དེ། ནུབ་ཕྱོགས་ཀྱི་འཇིག་རྟེན་གྱི་ཁམས་སྟོང་ཕྲག་ཉི་ཤུ་འདས་པ་ན། འཇིག་རྟེན་གྱི་ཁམས་མེ་ཏོག་གིས་རྒྱན་སྣ་ཚོགས་ཤིན་ཏུ་བཀྲམ་པ་ཞེས་བྱ་བ་ན། གང་ཟག་བརྫུས་ནས་སྐྱེ་བ་ཤ་སྟག་སྟེ། ཚེ་ལོ་བརྒྱད་ཁྲི་བཞི་སྟོང་གནས་པའི་ཞིང་ཁམས་དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཡོན་ཏན་འབྱུང་གནས་ཞེས་བྱ་བར་བསྟན་ནས། ཡེ་ནས་མ་བཅོས་ཇི་བཞིན་པ། །ཆོས་སོ་ཅོག་གི་སྙིང་པོ་སྟེ། །མེད་པ་ལས་བྱུང་སྣ་ཚོགས་སྣང༌། །སྣང་མེད་དེ་བཞིན་དཀྱིལ་འཁོར་རྫོགས། །ཞེས་པའི་དགོངས་པ་ལྟར་སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་སྟོན་ཏོ། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང༌། ཐུབ་པ་དྲུག་གི་སྒྲོན་མ་སྣང་བས་སེམས་ཀྱི་དཀྱིལ་འཁོར་འོད་གསལ་བར་བྱེད་དོ། །བཞི་པ་༼༩༦༽ཡང་ཐུབ་པའི་དབང་པོ་དེ། བྱང་ཕྱོགས་ཀྱི་འཇིག་རྟེན་གྱི་ཁམས་སྟོང་ཕྲག་སུམ་ཅུ་འདས་པ་ན། འཇིག་རྟེན་གྱི་ཁམས་མཉམ་ཉིད་རྟོགས་པས་བག་ཚ་བ་མེད་པ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་སེང་གེའི་སྒྲ་ཞེས་བྱ་བར་བསྟན་ནས། རང་བྱུང་རིག་པའི་སེམས་ཉིད་ཀྱིས། །མ་བཅོས་ཆོས་ཉིད་དབྱིངས་ཀྱི་དོན། །ལྷུན་གྲུབ་ཐབས་དང་ཤེས་རབ་ལས། །ཡང་དག་རང་བཞིན་དཀྱིལ་འཁོར་གསལ། །ཞེས་པའི་དགོངས་པས་སེམས་ཀྱི་དཀྱིལ་འཁོར་འོད་གསལ་བ། གསང་སྔགས་ཀྱི་ངོ་བོ་དེ་ཉིད་སྟོན་ཏོ། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང་ཐུབ་པ་དྲུག་གི་སྒྲོན་མ་སྣང་བས། འགྲོ་བ་དྲུག་གི་སེམས་ཀྱི་དཀྱིལ་འཁོར་གསལ་བར་བྱེད་དོ། །ལྔ་པ་དེ་བཞིན་དུ་ཐུབ་པའི་དབང་པོ་དེ་ཉིད། ཤར་ལྷོའི་འཇིག་རྟེན་གྱི་ཁམས་སྟོང་ཕྲག་བརྒྱད་ཅུ་རྩ་བཞི་༼བརྒྱད་ཡང་སྣང༌།༽འདས་པ་ན། འཇིག་རྟེན་གྱི་ཁམས་རིན་པོ་ཆེ་ལ་སོགས་པས་རྣམ་པར་མཛེས་པ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་མཛེས་པའི་ཏོག་ཅེས་བྱ་བར་བསྟན་ནས། འཇིག་རྟེན་འཇིག་རྟེན་འདས་པ་ཡི། །བདེ་དང་མི་བདེའི་རྣམ་པ་ཀུན། །དེ་བཞིན་ཉིད་དུ་རོ་གཅིག་པས། ཚོར་བ་བདེ་སྡུག་གང་ཡང་མེད། །ཅེས་པའི་དགོངས་པས་གོང་མ་བཞིན་དུ་ཆོས་སྟོན་ཏོ། །དྲུག་པ་ལྷོ་ནུབ་ཀྱི་མཚམས་ཀྱི་འཇིག་རྟེན་གྱི་ཁམས་སྟོང་ཕྲག་བདུན་ཅུ་འདས་པ་ན། འཇིག་རྟེན་གྱི་ཁམས་རྟོགས་པ་གསལ་བས་རབ་ཏུ་སྣང་བ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་དེ་ཉིད་གཟི་བརྗིད་རྒྱན་ཞེས་བྱ་བར་བསྟན་ནས། དེ་བཞིན་ཉིད་ཀྱིས་དོན་བསྟན་དུ། །དེ་བཞིན་ཉིད་དུ་ཀུན་གཅིག་པས། །གང་གིས་གང་ལ་གང་ཞིག་བསྟན། །ཉིད་ལ་ཉིད་གླེང་ཁོ་ནར་ཟད། །ཅེས་གོང་མ་བཞིན་དུ་ཆོས་སྟོན་ཏོ། །བདུན་པ་ནུབ་བྱང་གི་མཚམས་ཀྱི་འཇིག་རྟེན་གྱི་ཁམས་སྟོང་ཕྲག་ལྔ་བཅུ་འདས་པ་ན། འཇིག་རྟེན་གྱི་ཁམས་ཡིད་རབ་ཏུ་དང་བ་ཅན་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་ཙན་དན་དྲི་མཆོག་དཔལ་ཞེས་བྱ་བར་བསྟན་ནས། དེ་བཞིན་ཉིད་ཀྱི་དབྱིངས་ཉིད་ལ། །དུས་གསུམ་དུས་བཞིར་མི་དམིགས་ཏེ། །ཡེ་ཤེས་རིག་པའི་ཁྱད་པར་ལས། །སྐད་ཅིག་བསྐལ་པ་དེ་གཅིག་ཚུལ། །ཞེས་གོང་མ་བཞིན་དུ་ཆོས་སྟོན་ཏོ། །བརྒྱད་པ་བྱང་ཤར་གྱི་མཚམས་ཀྱི་འཇིག་རྟེན་གྱི་ཁམས་སྟོང་ཕྲག་བཞི་བཅུ་རྩ་བཞི་འདས་པ་ན། འཇིག་རྟེན་གྱི་ཁམས་ཆོས་ཀྱི་སྒྲས་གདུང་བ་སེལ་བ་ཞེས་བྱ་བ་ན། དེ་བཞིན་གཤེགས་པ་ཤཱཀྱ་ཐུབ་པ་དེ་སྙིང་རྗེའི་རྒྱལ་པོ་ཞེས་བྱ་བར་བསྟན་ནས། འཁོར་བ་མྱ་ངན་འདས་རྟག་པ། །དེ་བཞིན་ཉིད་ཀྱི་དབྱིངས་ཉིད་དུ། །ཡེ་ནས་༼༩༧༽མྱ་ངན་འདས་པས་ན། །རང་བཞིན་ལྷུན་གྲུབ་ཚོགས་གཉིས་རྫོགས། །ཞེས་གོང་མ་བཞིན་དུ་ཆོས་སྟོན་ཏོ།།

གཉིས་པ་རྣམ་པར་སྣང་བ་ལ་སོགས་པའི་ཞིང་ཁམས་ཞེ་གཅིག་ཏུ་སྣང་ཞིང་གྲགས་པ་ནི།

དེ་བཞིན་དུ། ཞེས་པ་ནས། ཆོས་སྟོན་ཏོ། །ཞེས་པའི་བར་གྱིས་བསྟན་ཏེ།

དེ་བཞིན་དུ་རྣམ་པར་སྣང་བའི། འཇིག་རྟེན་གྱི་ཁམས་ཞེས་བྱ་བ་ན། སངས་རྒྱས་མྱུར་དུ་འཛིན་པ་ཞེས་བྱ་བར་བསྟན་ནས། ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རིན་ཆེན་བཀོད་པའི་འཇིག་རྟེན་གྱི་ཁམས་ན། སངས་རྒྱས་དགའ་བའི་སྤྱན་ཞེས་བྱ་བར་བསྟན་ནས། ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྣམ་པར་བཀྲམ་པ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་ཡོངས་སུ་དགོངས་པའི་རྒྱལ་པོ་ཞེས་བྱ་བར་བསྟན་ནས། ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་བཻཌཱུརྱའི་སྙིང་པོ་ཞེས་བྱ་བའི་འཇིག་རྟེན་གྱི་ཁམས་ན། སངས་རྒྱས་གསེར་གྱི་འོད་ཟེར་ཞེས་བྱ་བར་བསྟན་ནས། ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་འོད་དམ་པ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་འོད་ཀྱི་དཔལ་ཞེས་བྱ་བར་བསྟན་ནས། ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྣམ་པར་ཞི་བ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་ཞི་བའི་དབང་པོ་ཞེས་བྱ་བར་བསྟན་ནས། ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སྤྲིན་རྣམ་པར་བཀོད་པ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་སྤྲིན་གྱིས་དཔལ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཡིད་མངོན་པར་དགའ་བ་ཞེས་བྱ་བའི་ཞིང་ཁམས་ན། སངས་རྒྱས་ཡིད་དུ་འོང་བའི་དབྱངས་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་མེ་ལོང་གི་དཀྱིལ་འཁོར་ཤིན་ཏུ་སྦྱངས་པ་ཞེས་བྱ་བ་ན། སངས་རྒྱས་མེ་ལོང་གི་འོད་སྣང་བ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཟླ་བས་བརྒྱན་པ་ཞེས་བྱ་བའི་ཞིང་ཁམས་ན། སངས་རྒྱས་ཟླ་འོད་དཔལ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཉི་མའི་འོད་ཟེར་བརྒྱན་པ་ཞེས་བྱ་བའི་ཞིང་ཁམས་ན། དེ་བཞིན་གཤེགས་པ་ཉི་མའི་སྙིང་པོའི་དཔལ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སྤོས་དྲི་ངད་ལྡང་ཞེས་བྱ་བའི་ཞིང་ཁམས་ན། སངས་རྒྱས་སྤོས་ཀྱི་རྒྱལ་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྣམ་པར་སྤྲོས་པའི་རྒྱན་ཞེས་བྱ་བའི་ཞིང་ཁམས་ན། སངས་རྒྱས་མངོན་པར་སྤྲོ་བའི་རྒྱལ་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རིན་པོ་ཆེ་སྤྲོས་པ་ཞེས་བྱ་བའི་ཞིང་ཁམས་ན། སངས་རྒྱས་རིན་ཆེན་རྒྱལ་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་འོད་ཟེར་འབྱུང་བ་ཞེས་བྱ་བའི་ཞིང་ཁམས་ན། སངས་རྒྱས་འོད་ཟེར་དཔལ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་དཀའ་བ་རྣམ་པར་སྤྱོད་པ་ཞེས་བྱ་བའི་ཞིང་ཁམས་ན། སངས་རྒྱས་དཀའ་ཐུབ་རྒྱལ་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་གཙུག་ཏོར་བཀོད་པ་ཞེས་བྱ་བའི་ཞིང་ཁམས་ན། སངས་རྒྱས་གཙུག་ཏོར་སྙིང་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ངེས་པ་ཅན་ཞེས་བྱ་བའི་ཞིང་ཁམས་ན། སངས་རྒྱས་ངེས་པར་གཤེགས་པ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ངེས་པར་འཕགས་པ་ཞེས་བྱ་བའི་ཞིང་ཁམས་ན། སངས་རྒྱས་ངེས་པར་གསུང་བ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་བདེ་སྤྱོད་ཅེས་བྱ་བའི་ཞིང་ཁམས་ན། སངས་རྒྱས་བདེ་བ་ཆེན་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་མེ་ཏོག་བཀྲམ་པ་ཞེས་བྱ་བའི་ཞིང་ཁམས་ན། སངས་རྒྱས་མེ་ཏོག་དབང་པོའི་དབྱངས་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཡོངས་སུ་གྲགས་པ་ཞེས་བྱ་བའི་ཞིང་ཁམས་ན། སངས་རྒྱས་གྲགས་པའི་དཔལ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་བཞིན་དུ་ཆོས་སྟོན་ཏོ། །ཡང་རྣམ་པར་འཕྲུལ་པ་ཞེས་བྱ་བའི་ཞིང་ཁམས་ན། སངས་རྒྱས་སྤྲུལ་པའི་རྒྱལ་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྣམ་པར་སྦྱང་བ་ཞེས་བྱ་བའི་ཞིང་ཁམས་ན། སངས་རྒྱས་སྒྲ་དབྱངས་མི་ཟད་པ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སྨན་གྱིས་རྒྱན་པ་ཞེས་བྱ་བའི་ཞིང་ཁམས་ན། སངས་རྒྱས་སྨན་གྱི་རྒྱལ་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་གསེར་གྱི་འོད་སྣང་བ་ཞེས་བྱ་བའི་ཞིང་ཁམས། སངས་རྒྱས་གསེར་གྱི་འོད་འཕྲོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་འོད་ཟེར་བཀོད་པ་ཞེས་བྱ་བའི་ཞིང་ཁམས་ན། སངས་རྒྱས་བཀོད་པའི་རྒྱལ་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟན་ཏོ། །ཡང་གསེར་གྱི་འབྱུང་གནས་ཞེས་བྱ་བའི་ཞིང་ཁམས་ན། སངས་རྒྱས་གསེར་གྱི་གཟུ་བ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་དཔལ་གྱི་འབྱུང་གནས་ཞེས་བྱ་བའི་ཞིང་ཁམས་ན། སངས་རྒྱས་དཔལ་གྱི་རྒྱལ་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཅོས་སྟོན་ཏོ། །ཡང་སྣང་བ་དམ་པ་ཞེས་བྱ་བའི་ཞིང་ཁམས་ན། སངས་རྒྱས་སྣང་བ་བརྩེགས་པའི་དཔལ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་མྱ་ངན་མེད་པ་ཞེས་བྱ་བའི་ཞིང་ཁམས་ན། སངས་རྒྱས་མྱ་ངན་མེད་པའི་དཔལ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་དགའ་བའི་མདངས་ཞེས་བྱ་བའི་ཞིང་ཁམས་ན། སངས་རྒྱས་དགའ་མཆོག་དཔལ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་བསྟན་ཏོ། །ཡང་གཟི་བརྗིད་འབྱུང་བ་ཞེས་བྱ་བའི་ཞིང་ཁམས་ན། སངས་རྒྱས་གཟི་བརྗིད་དཔལ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སངས་རྒྱས་མང་པོ་འདུ་བ་ཞེས་བྱ་བའི་ཞིང་ཁམས་ན། སངས་རྒྱས་ཀུན་གྱི་དགེ་བའི་བཤེས་གཉེན་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཡོངས་སུ་སྦྱོང་བ་ཞེས་བྱ་བའི་ཞིང་ཁམས་ན། སངས་རྒྱས་ངན་སོང་ཐམས་ཅད་སྦྱོང་བ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཐ་དད་སྤྱོད་པ་ཞེས་བྱ་བའི་ཞིང་ཁམས་ན། སངས་རྒྱས་འཇིག་རྟེན་ཀུན་གྱི་སློབ་དཔོན་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྒྱལ་མཚན་གྱི་རྩེ་མོ་དཔུང་རྒྱན་ཞེས་བྱ་བའི་ཞིང་ཁམས་ན། སངས་རྒྱས་རྣམ་པར་རྒྱལ་བ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་མེ་ཏོག་མཛེས་པའི་རྒྱན་ཅེས་བྱ་བའི་ཞིང་ཁམས་ན། སངས་རྒྱས་མེ་ཏོག་བཀོད་པའི་རྒྱལ་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་མཛེས་པར་སྣང་བ་ཞེས་བྱ་བའི་ཞིང་ཁམས་ན། སངས་རྒྱས་ཐམས་ཅད་སྣང་བ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཙན་དན་བཀོད་པ་ཞེས་བྱ་བའི་ཞིང་ཁམས་ན། སངས་རྒྱས་ཙན་དན་དྲི་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སེང་གེ་འབྱུང་གནས་ཞེས་བྱ་བའི་ཞིང་ཁམས་ན། སངས་རྒྱས་སེང་གེ་འབུམ་གཟུགས་ཞེས་བྱ་བར་བསྟན་ནས། ཡང་དག་པ་ཇིལྟ་བ་དེ་བཞིན་དུ་ཆོས་སྟོན་ཏོ།།

དེ་ལ་ཞིང་ཁམས་བཞི་བཅུ་ཞེ་གཅིག་ལས། དང་པོ། དེ་བཞིན་དུ་རྣམ་པར་སྣང་བ་ཞེས་བྱ་བའི་འཇིག་རྟེན་གྱི་ཁམས་ན། སངས་རྒྱས་མྱུར་དུ་འཛིན་པ་ཞེས་བྱ་བར་བསྟན་ནས། དེ་བཞིན་ཉིད་ཀྱི་དབྱིངས་འདི་ལ། །འཁོར་དང་མྱ་ངན་འདས་དང་རྟག །ཡེ་ནས་རྣམ་པར་དག་པས་ན། །རང་སྣང་ལྷུན་གྲུབ་ཚོགས་ཆེན་རྫོགས། །ཞེས་ཇི་ལྟ་བ་དེ་བཞིན་དུ་ཆོས་སྟོན་ཏོ། །གཉིས་པ། ཡང་རིན་ཆེན་སྣ་ཚོགས་བཀོད་པའི་འཇིག་རྟེན་གྱི་ཁམས་ན། སངས་རྒྱས་དགའ་བའི་སྤྱན་ཞེས་བྱ་བར་བསྟན་ནས། ཆོས་སོ་ཅོག་གི་རང་བཞིན་ནི། །མ་སྐྱེས་པ་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །རིག་མཆོག་རྡོ་རྗེ་སྐྱེ་གནས་དམ། །ཞེས་ཇི་ལྟ་བ་དེ་བཞིནདུ་ཆོས་སྟོན་ཏོ། །གསུམ་པ། ཡང་རིན་པོ་ཆེ་གཅལ་དུ་བཀྲམ་པས་རྣམ་པར་བཀྲམ་པ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་ཡོངས་སུ་དགོངས་པའི་རྒྱལ་པོ་ཞེས་བྱ་བར་བསྟན་ནས། དེ་བཞིན་ཉིད་དུ་ཀུན་རིག་ན། །དེས་ཁྱབ་གར་གནས་སངས་རྒྱས་ཞིང༌། །ཡོན་ཏན་རིན་ཆེན་སྤྲིན་བཀོད་པ། །བགྲོད་པར་བྱ་བ་ཅི་ཡང་མེད། །ཅེས་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཞི་པ། ཡང་མདོག་སྔོ་བས་བཻཌཱུརྱའི་སྙིང་པོ་ཞེས་བྱ་བའི་འཇིག་རྟེན་གྱི་ཁམས་ན། སངས་རྒྱས་གསེར་གྱི་འོད་ཟེར་ཞེས་བྱ་བར་བསྟན་ནས། དཔག་ཏུ་མེད་པའི་རྒྱལ་བ་རྣམས། །ཇི་བཞིན་དེ་བཞིན་ཉིད་ལ་བཞུགས། །དེ་བཞིན་ཉིད་དང་ཐམས་ཅད་ཀྱང༌། །གཉིས་མེད་དེ་བཞིན་དེ་ཉིད་དོ། །ཞེས་ཇི་ལྟ་བ་དེ་བཞིན་དུ་ཆོས་སྟོན་ཏོ། །ལྔ་པ། ཡང་འོད་རང་ཆས་སུ་ཡོད་པས་འོད་དམ་པ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་འོད་ཀྱི་དཔལ་ཞེས་བྱ་བར་བསྟན་ནས། འཁོར་བ་དང་ནི་མྱ་ངན་འདས། །སོ་སོར་སྣང་བ་མ་ཡིན་ཏེ། །ཇི་བཞིན་དེ་བཞིན་ཉིད་ངེས་ན། །དེ་ལ་འཁོར་བའི་རང་བཞིན་མེད། །ཅེས་ཇི་ལྟ་བ་དེ་བཞིན་དུ་ཆོས་སྟོན་ཏོ། །དྲུག་པ། ཡང་སེམས་ཅན་རྣམས་སེམས་ཞི་བས་རྣམ་པར་ཞི་བ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་ཞི་བའི་དབང་པོ་ཞེས་བྱ་བར་བསྟན་ནས། དེ་བཞིན་ཉིད་ཀྱི་དེ་ཉིད་ནི། །དཔག་མེད་གཞལ་བར་མཐའ་ཡས་པས། །དཔག་མེད་རྒྱལ་བའི་ཕོ་བྲང་ཡིན། །དེ་ན་ཀུན་བཀོད་དེར་གཅིག་གནས། །ཞེས་ཇི་ལྟ་བ་དེ་བཞིན་དུ་ཆོས་སྟོན་ཏོ། །བདུན་པ། ཡང་ཐུགས་རྗེ་ཆར་རྒྱུན་ལྟ་བུས་སྤྲིན་༼༩༨༽རྣམ་པར་བཀོད་པ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་སྤྲིན་གྱི་དཔལ་ཞེས་བྱ་བར་བསྟན་ནས། ཐམས་ཅད་འབྱུང་བའི་ཆོ་འཕྲུལ་ཡང༌། །ཅིར་ཡང་འགྱུར་བའི་ཡེ་ཤེས་ཏེ། །གདོས་པར་གྱུར་པའི་ཆོས་མེད་པས། །ཇི་ལྟར་དམིགས་པ་བཞིན་དུ་འབྱུང༌། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བརྒྱད་པ། ཡང་ངོ་བོ་ཉིད་ཀྱིས་ཡིད་མངོན་པར་དགའ་བ་ཞེས་བྱ་བའི་ཞིང་ཁམས་ན། སངས་རྒྱས་ཡིད་དུ་འོང་བའི་དབྱངས་ཞེས་བྱ་བར་བསྟན་ནས། འཇིག་རྟེན་འཁོར་བའི་ཁ་བརྒྱུད་པ། །མ་རིག་ངོ་བོ་དེ་བཞིན་པས། །གཞི་རྩ་མེད་པའི་སྐད་ཅིག་མ། །དེ་ཉིད་རིག་ན་བདེ་ཆེན་གནས། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །དགུ་པ། ཡང་ས་གཞི་ཐམས་ཅད་ལ་གཟུགས་བརྙན་འཆར་བས་མེ་ལོང་གི་དཀྱིལ་འཁོར་ཤིན་ཏུ་སྦྱངས་པ་ཞེས་བྱ་བའི་ཞིང་ཁམས་ན། སངས་རྒྱས་མེ་ལོང་གི་འོད་སྣང་བ་ཞེས་བྱ་བར་བསྟན་ནས། ཉོན་མོངས་ཡེ་ཤེས་ལྔར་རྟོག་པ། །ཇི་བཞིན་དེ་ལ་གཉིས་ཀས་སྒྲིབ། །རྟོག་དང་མི་རྟོག་གཉིས་མེད་དེ། །རྟོག་པ་དེ་ཉིད་ཡང་དག་ལམ། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅུ་པ། ཡང་ས་གཞི་ལ་ཟླ་བ་ལྟ་བུའི་འོད་མང་བས་ཟླ་བས་བརྒྱན་པ་ཞེས་བྱ་བའི་ཞིང་ཁམས་ན། སངས་རྒྱས་ཟླ་འོད་དཔལ་ཞེས་བྱ་བར་བསྟན་ནས། ཐེག་པ་དཔག་མེད་བསྟན་པ་ཡང༌། །ཇི་ལྟར་མོས་པ་ཐ་དད་པ། །ཁྲིད་པར་བྱ་པའི་ཐབས་སུ་ཟད། །རྡོ་རྗེ་ཐེག་པ་ཉིད་ལས་མེད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅུ་གཅིག་པ། འདི་ཡང་ས་གཞི་ལ་ཉི་མ་ལྟ་བུའི་འོད་མང་བས་ཉི་མའི་འོད་ཟེར་བརྒྱན་པ་ཞེས་བྱ་བའི་ཞིང་ཁམས་ན། དེ་བཞིན་གཤེགས་པ་ཉི་མའི་སྙིང་པོའི་དཔལ་ཞེས་བྱ་བར་བསྟན་ནས། གང་གིས་དེ་ལྟར་མཐོང་མ་ཐག །མི་ཤེས་ཆོད་པའི་དྲྭ་བ་གཅོད། །ཁྱུང་དང་སེང་གེ་ཇི་བཞིན་དུ། །མངལ་ལྟར་ལུས་ཀྱི་མངལ་གྱིས་བསྒྲིབས། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅུ་གཉིས་པ། ཡང་ཞིང་ལ་སྤོས་ངད་ལྡང་བས་སྤོས་དྲི་ངད་ལྡང་ཞེས་བྱ་བའི་ཞིང་ཁམས་ན། སངས་རྒྱས་སྤོས་ཀྱི་རྒྱལ་པོ་ཞེས་བྱ་བར་བསྟན་ནས། དབང་བསྒྱུར་ཐབས་ཀྱི་ཡེ་ཤེས་ཀྱིས། །སྒྱུ་མའི་ཆོས་ལ་དབང་ཐོབ་པས། །མུན་ལ་སྣང་འབྱུང་ཇི་བཞིན་དུ། །ཐམས་ཅད་དབང་བསྒྱུར་རང་རིག་ཡིན། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅུ་གསུམ་པ། ཡང་ལོངས་སྤྱོད་ཆོས་དང་མཐུན་པས་རྣམ་པར་སྤྲོས་པའི་རྒྱན་ཞེས་བྱ་བའི་ཞིང་ཁམས་ན། སངས་རྒྱས་༼༩༩༽རྣམ་པར་སྤྲོས་པའི་རྒྱལ་པོ་ཞེས་བྱ་བར་བསྟན་ནས། རྣམ་དག་ཡེ་ཤེས་སྒྱུ་མ་དང༌། །ལོག་རྟོག་མཚན་མའི་སྒྱུ་མ་གཉིས། །དེ་བཞིན་དེ་ཉིད་གཅིག་པས་ན། །གཉིས་སུ་ཤེས་པ་ཉིད་ཚོགས་རྫོགས། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅུ་བཞི་པ། ཡང་རིན་པོ་ཆེ་སྣ་ཚོགས་ཀྱིས་སྤྲས་པ་ཞེས་བྱ་བའི་ཞིང་ཁམས་ན། སངས་རྒྱས་རིན་ཆེན་རྒྱལ་པོ་ཞེས་བྱ་བར་བསྟན་ནས། བསམ་གྱིས་མི་ཁྱབ་ཆོས་འདི་རྣམས། །དེ་བཞིན་ཉིད་དུ་གཅིག་པས་ན། །གང་གིས་དེ་བཞིན་དེ་ཤེས་ན། །ཀུན་ལ་དབང་བསྒྱུར་ཐོབ་པ་ཡིན། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅོ་ལྔ་པ། ཡང་རང་བཞིན་གྱིས་ཞིང་ལ་འོད་འཁྲིགས་པས་འོད་ཟེར་འབྱུང་བ་ཞེས་བྱ་བའི་ཞིང་ཁམས་ན། སངས་རྒྱས་འོད་ཟེར་དཔལ་ཞེས་བྱ་བར་བསྟན་ནས། སངས་རྒྱས་རྣམས་ཀྱི་དགོངས་པ་འདི། །ཤེས་ནས་དེ་ལ་གང་གནས་པ། །རང་རིག་ཉིད་ལ་དབང་ཐོབ་པའི། །དེ་བཞིན་རིགས་ཆེན་འཛིན་པ་ཉིད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅུ་དྲུག་པ། ཡང་བྱ་དཀའ་བ་ལ་སྒྲུབས་པས་རྣམ་པར་སྤྱོད་པ་ཞེས་བྱ་བའི་ཞིང་ཁམས་ན། སངས་རྒྱས་དཀའ་ཐུབ་རྒྱལ་པོ་ཞེས་བྱ་བར་བསྟན་ནས། དེ་ཉིད་ཇི་བཞིན་མངོན་གྱུར་ན། །མེད་ལ་མི་ཟད་འབྱུང་བ་ཡི། །ཆེ་བའི་ཡོན་ཏན་རྒྱུན་མི་འཆད། །ཅིར་སྣང་ཀུན་འབྱུང་རིན་ཆེན་གཏེར། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅུ་བདུན་པ། ཡང་ཐེག་པའི་རྩེ་མོ་སྟོན་པས་གཙུག་ཏོར་བཀོད་པ་ཞེས་བྱ་བའི་ཞིང་ཁམས་ན། སངས་རྒྱས་གཙུག་ཏོར་སྙིང་པོ་ཞེས་བྱ་བར་བསྟན་ནས། ཇི་བཞིན་མ་བཅོས་དེ་ཉིད་ལ། །དེ་བཞིན་པ་ཡི་བློ་བཞག་པ། །དེ་བཞིན་དེ་ཉིད་མ་ཡིན་པའི། །སྒྲུབ་དང་བསྒྲུབ་པ་ག་ལ་ཡོད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅོ་བརྒྱད་པ། ཡང་ཐམས་ཅད་རིགས་ཐེག་ཆེན་དུ་ངེས་པས་ངེས་པ་ཅན་ཞེས་བྱ་བའི་ཞིང་ཁམས་ན། སངས་རྒྱས་ངེས་པར་གཤེགས་པ་ཞེས་བྱ་བར་བསྟན་ནས། མཁའ་ལ་གློ་བུར་སྤྲིན་འཐིབས་ལྟར། །དེ་བཞིན་གློ་བུར་རྟོག་པས་སྒྲིབས། །མཁའ་དག་ནང་དུ་སྤྲིན་སངས་ལྟར། །རྣམ་རྟོག་སྟོང་པས་ངང་གིས་སངས། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཅུ་དགུ་པ། ཡང་འབྲས་བུ་ལ་སྦྱོར་བས་ངེས་པར་འཕགས་པ་ཞེས་བྱ་བའི་ཞིང་ཁམས་ན། སངས་རྒྱས་ངེས་པར་གསུང་བ་ཞེས་བྱ་བར་བསྟན་ནས། ཇི་སྙེད་དག་པའི་གསུང་བརྗོད་ཀྱང༌། །རྡོ་རྗེའི་གསུང་ལ་སྤྲོས་པ་མེད། །སྤྲོས་མེད་གསུང་ཉིད་ཀུན་གསལ་ཁྱབ། །མ་གསུངས་པ་ཉིད་རྒྱ་ཆེར་བཤད། །༼༡༠༠༽ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉི་ཤུ་པ། ཡང་གསང་བ་མཆོག་གི་ཐབས་ཀྱི་བདག་ཉིད་བདེ་སྤྱོད་ཞེས་བྱ་བའི་ཞིང་ཁམས་ན། སངས་རྒྱས་བདེ་བ་ཆེན་པོ་ཞེས་བྱ་བར་བསྟན་ནས། ཐམས་ཅད་ཡུལ་ལ་འཇུག་པ་ཡི། །ཐོགས་མེད་མ་ཆགས་དེ་བཞིན་བློས། །ཇི་སྙེད་དེ་བཞིན་ཉིད་དུ་བསྒྱུར། །ཟད་མེད་གཏེར་ལྡན་རིན་ཆེན་འབྱུང༌། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉེར་གཅིག་པ། ཡང་དངོས་སུ་མེ་ཏོག་སྣ་ཚོགས་བཀྲ་བས་མེ་ཏོག་བཀྲམ་པ་ཞེས་བྱ་བའི་ཞིང་ཁམས་ན། སངས་རྒྱས་མེ་ཏོག་དབང་པོའི་དབྱངས་ཞེས་བྱ་བར་བསྟན་ནས། ཇི་བཞིན་ཉིད་ལ་ཞུགས་པས་ན། །འདི་ཞེས་ཚིག་ཏུ་མ་གསུངས་ཀྱང༌། །ཁྱབ་པས་གཅིག་པའི་བྱིན་རླབས་ཀྱིས། །ཇི་ལྟར་འདོད་པ་སོ་སོར་འཇལ། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉེར་གཉིས་པ། ཡང་འཇིག་རྟེན་ཐམས་ཅད་དུ་ཡོངས་སུ་གྲགས་པ་ཞེས་བྱ་བའི་ཞིང་ཁམས་ན། སངས་རྒྱས་གྲགས་པའི་དཔལ་ཞེས་བྱ་བར་བསྟན་ནས། སངས་རྒྱས་སེམས་ཅན་ལ་སོགས་པ། །ཐམས་ཅད་མ་ལུས་ལུས་པ་མེད། །རང་རིག་མ་རིག་རྟོག་པ་ཉིད། །ཀུན་ཀྱང་རང་བྱུང་ཡེ་ཤེས་ཉིད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉེར་གསུམ་པ། ཡང་ཆོ་འཕྲུལ་གྱིས་རྣམ་པར་འཕྲུལ་པ་ཞེས་བྱ་བའི་ཞིང་ཁམས་ན། སངས་རྒྱས་སྤྲུལ་པའི་རྒྱལ་པོ་ཞེས་བྱ་བར་བསྟན་ནས། ཡི་གེ་ཕྱག་རྒྱ་ཡེ་ཤེས་ཀྱང༌། །ཚིག་ལམ་འབྱུང་བའི་གཞི་ཡིན་ཏེ། །དེ་ཉིད་དག་པས་ཐམས་ཅད་དག །གསུང་ལ་གསུང་ཉིད་མི་གནས་པའོ། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉེར་བཞི་པ། ཡང་ཞིང་དག་པར་ཐམས་ཅད་ངག་སྙན་པས་རྣམ་པར་སྦྱངས་པ་ཞེས་བྱ་བའི་ཞིང་ཁམས་ན། སངས་རྒྱས་སྒྲ་དབྱངས་མི་ཟད་པ་ཞེས་བྱ་བར་བསྟན་ནས། དེ་བཞིན་ཉིད་ཀྱི་རང་བཞིན་དུ། །ལྔ་ཕུང་ཉོན་མོངས་རྣམ་པར་དག །རྣམ་རྟོག་རྡུལ་བྲལ་སྐྱེ་འགག་མེད། །ཐམས་ཅད་ངོ་བོ་ཉིད་དུ་བཅོམ། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉེར་ལྔ་པ། ཡང་ཉོན་མོངས་པས་གདུང་བ་ཐབས་ཀྱིས་ཞི་བས་སྨན་གྱིས་བརྒྱན་པ་ཞེས་བྱ་བའི་ཞིང་ཁམས་ན། སངས་རྒྱས་སྨན་གྱི་རྒྱལ་པོ་ཞེས་བྱ་བར་བསྟན་ནས། དཔག་མེད་འཇིག་རྟེན་རྡུལ་སྙེད་ན། །འགྲོ་བ་རྡུལ་ཕྲན་བསམ་ཡས་ལ། །ཁྱད་པར་དེ་བཞིན་ཉིད་སྣང་བས། །ཏིལ་འབྲུ་མར་གྱིས་ཁྱབ་ལྟར་གནས། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉེར་དྲུག་པ། ཡང་དངོས་སུ་གསེར་འོད་ལྡན་པས་གསེར་གྱི་འོད་སྣང་བ་ཞེས་བྱ་༼༡༠༡༽བའི་ཞིང་ཁམས་ན། སངས་རྒྱས་གསེར་གྱི་འོད་འཕྲོ་ཞེས་བྱ་བར་བསྟན་ནས། རྡུལ་ཕྲན་གཅིག་ཙམ་གང་ཟག་ལ། །དགོངས་ཏེ་མདུན་དུ་གསུང་བརྗོད་པ། །དཔག་མེད་མཐའ་ཡས་རྡུལ་སྙེད་ཙམ། །དེ་སྙེད་ཀུན་ཐོས་རྣམ་པར་གྲོལ། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉེར་བདུན་པ། ཡང་འོད་ཟེར་སྣ་ཚོགས་བཀོད་པ་ལྟ་བུ་ཞེས་བྱ་བའི་ཞིང་ཁམས་ན། སངས་རྒྱས་བཀོད་པའི་རྒྱལ་པོ་ཞེས་བྱ་བར་བསྟན་ནས། གསུང་གཅིག་མི་ཟད་མཐའ་ཡས་གསུང༌། །མཐའ་དང་དབུས་མེད་ཀུན་ཏུ་ཁྱབ། །ཁྱབ་དང་ཁྱབ་མེད་རྡོ་རྗེའི་གསུང༌། །སྣ་ཚོགས་དངོས་མེད་དེ་བཞིན་ཉིད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉེར་བརྒྱད་པ། ཡང་དངོས་སུ་གསེར་འབྱུང་བས་གསེར་གྱི་འབྱུང་གནས་ཞེས་བྱ་བའི་ཞིང་ཁམས་ན། སངས་རྒྱས་གསེར་གྱི་གཟུ་བ་ཞེས་བྱ་བ་བསྟན་ནས། གང་ཡང་མ་བཅོས་དེ་ཉིད་ལ། །ཕྱོགས་དང་སྔ་ཕྱི་དུས་མེད་དེ། །ཐམས་ཅད་དེ་བཞིན་ཉིད་ཀྱི་དབྱིངས། །དེ་ཉིད་རང་བྱུང་དེ་ཉིད་དོ། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཉེར་དགུ་པ། ཡང་མཆོག་གི་བསྒྲུབ་པ་དམ་པས་དཔལ་གྱི་འབྱུང་གནས་ཞེས་བྱ་བའི་ཞིང་ཁམས་ན། སངས་རྒྱས་དཔལ་གྱི་རྒྱལ་པོ་ཞེས་བྱ་བར་བསྟན་ནས། དེ་ཉིད་དེ་སྙེད་རང་བཞིན་ཏེ། །དེ་སྙེད་དེ་ཉིད་ཡིན་པ་ལ། །བྱིས་པ་རྣམས་ཀྱིས་གཉིས་སུ་བཟུང༌། །དེ་ལ་གཉིས་སུ་དབྱེ་བྱར་མེད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སུམ་ཅུ་པ། ཡང་དབྱེར་མེད་སྟོན་པས་སྣང་བ་དམ་པ་ཞེས་བྱ་བའི་ཞིང་ཁམས་ན། སངས་རྒྱས་སྣང་བ་བརྩེགས་པའི་དཔལ་ཞེས་བྱ་བར་བསྟན་ནས། སྟོང་ཉིད་ནམ་མཁའི་རང་བཞིན་དུ། །མི་མཐུན་པ་དང་གཉེན་པོ་གཉིས། །ཡེ་ནས་དབྱེར་མེད་གཅིག་པས་ན། །གནོད་པས་འཇིགས་པ་ག་ལ་ཡོད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སོ་གཅིག་པ། ཡང་བདེན་པ་མཐོང་བས་མྱ་ངན་མེད་པ་ཞེས་བྱ་བའི་ཞིང་ཁམས་ན། སངས་རྒྱས་མྱ་ངན་མེད་པའི་དཔལ་ཞེས་བྱ་བར་བསྟན་ནས། མི་འགྱུར་ནམ་མཁའི་རང་བཞིན་ཏེ། །དག་པ་དག་ལ་དག་པ་ཉིད། །རྟོག་པ་དག་ལ་རྟོག་པར་སྣང༌། །ཅིས་འདུལ་དེར་སྣང་ཅི་ཡང་མེད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སོ་གཉིས་པ། ཡང་དོན་ཁོང་དུ་ཆུད་པས་དགའ་བའི་མདངས་ཞེས་བྱ་བའི་ཞིང་ཁམས་ན། སངས་རྒྱས་དགའ་མཆོག་དཔལ་ཞེས་བྱ་བར་བསྟན་ནས། རང་བཞིན་ངང་གིས་མ་བཅོས་པ། །ཡོངས་ཀྱིས་འོད་གསལ་དེ་བཞིན་ཉིད། །ཀུན་གྱི་སྙིང་པོ་དེ་ཉིད་པས། །ཅེས་ཀྱང་མ་བསྒྲིབས་༼༡༠༢༽ནམ་མཁའ་ཆེ། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སོ་གསུམ་པ། ཡང་སེམས་ཅན་རྣམས་མཚན་དཔེ་དང་ལྡན་པས་གཟི་བརྗིད་འབྱུང་བ་ཞེས་བྱ་བའི་ཞིང་ཁམས་ན། སངས་རྒྱས་གཟི་བརྗིད་དཔལ་ཞེས་བྱ་བར་བསྟན་ནས། ཇི་བཞིན་པ་ཉིད་ས་མཆོག་སྟེ། །དེ་རིག་ཡེ་ཤེས་བླ་མའི་ས། །ཡེ་ནས་དེ་བཞིན་ཉིད་ལ་གནས། །ད་གདོད་བགྲོད་དུ་ག་ལ་ཡོད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སོ་བཞི་པ། ཡང་དངོས་སུ་རྒྱལ་བ་རྣམས་འདུ་བས་སངས་རྒྱས་མང་པོ་འདུ་བ་ཞེས་བྱ་བའི་ཞིང་ཁམས་ན། སངས་རྒྱས་ཀུན་གྱི་དགེ་བའི་བཤེས་གཉེན་ཞེས་བྱ་བར་བསྟན་ནས། སྟོང་པ་ཉིད་ཀྱི་སྙིང་པོ་ལ། །སྣ་ཚོགས་སྣང་བའི་འཁོར་གྱིས་བསྐོར། །སུས་ཀྱང་མ་བྱས་རང་བྱུང་བ། །ཇི་བཞིན་པ་ཡི་དཀྱིལ་འཁོར་ཉིད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སོ་ལྔ་པ། ཡང་ལས་ཀྱི་སྒྲིབ་པ་སྦྱོང་བས་ཡོངས་སུ་སྦྱོང་བ་ཞེས་བྱ་བའི་ཞིང་ཁམས་ན། སངས་རྒྱས་ངན་སོང་ཐམས་ཅད་སྦྱོང་བ་ཞེས་བྱ་བར་བསྟན་ནས། ཟག་མེད་ཡེ་ཤེས་དངོས་གྲུབ་ནི། །དེ་བཞིན་ཉིད་དུ་དངོས་གྲུབ་པས། །ཟད་པ་མེད་ཅིང་འཕེལ་བ་མེད། །ད་གདོད་བསྒྲུབ་ཏུ་ག་ལ་ཡོད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སོ་དྲུག་པ། ཡང་མོས་པ་སྣ་ཚོགས་པས་ཐ་དད་སྤྱོད་པ་ཞེས་བྱ་བའི་ཞིང་ཁམས་ན། སངས་རྒྱས་འཇིག་རྟེན་ཀུན་གྱི་སློབ་དཔོན་ཞེས་བྱ་བར་བསྟན་ནས། ཆོས་ཀུན་རང་བཞིན་མེད་པ་ཉིད། །མྱ་ངན་འདས་ཞེས་དེ་ལ་བྱ། །སྟོང་ཉིང་རང་བཞིན་རྣམ་དག་པ། །དེ་ཉིད་མི་གནས་བྱང་ཆུབ་སེམས། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སོ་བདུན་པ། ཡང་རྒྱལ་མཚན་གྱི་རྩེ་མོ་དཔུང་རྒྱན་ཞེས་བྱ་བའི་ཞིང་ཁམས་ན། སངས་རྒྱས་རྣམ་པར་རྒྱལ་བ་ཞེས་བྱ་བར་བསྟན་ནས། རྣམ་རྟོག་ཆུ་བོའི་རྐ་མགོ་དེ། །སྟོང་ཉིད་ཞིང་དུ་མ་བསྒྱུར་ན། །འཁོར་བའི་རྒྱ་མཚོར་གཡེངས་འགྱུར་བ། །དེ་མི་ཤེས་ལ་དེ་ལྟར་སྣང༌། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སོ་བརྒྱད་པ། ཡང་དངོས་སུ་གེ་སར་མེ་ཏ་ཞེས་བྱ་བས་བརྒྱན་པས་མེ་ཏོག་མཛེས་པའི་རྒྱན་ཞེས་བྱ་བའི་ཞིང་ཁམས་ན། སངས་རྒྱས་མེ་ཏོག་བཀོད་པའི་རྒྱལ་པོ་ཞེས་བྱ་བར་བསྟན་ནས། ཇི་བཞིན་པ་ཡི་དེ་བཞིན་ཉིད། །ཐམས་ཅད་འབྱུང་བའི་མ་ཡིན་པས། །ཀུན་བཟང་ཤེས་རབ་ཕ་རོལ་ཕྱིན། །སེམས་ཅན་སངས་རྒྱས་ཀུན་གྱི་གནས། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །སོ་དགུ་པ། ཡང་སྤྱོད་ཡུལ་ཐམས་ཅད་༼༡༠༣༽མཛེས་པར་སྣང་བ་ཞེས་བྱ་བའི་ཞིང་ཁམས་ན། སངས་རྒྱས་ཐམས་ཅད་སྣང་བ་ཞེས་བྱ་བར་བསྟན་ནས། སྟུག་པོ་བཀོད་པའི་སངས་རྒྱས་དང༌། །སེམས་ཅན་རྣམ་པ་ཐམས་ཅད་དག །དངོས་པོ་བརྟན་གཡོ་ལ་སོགས་པ། །དེ་ཉིད་ལས་བྱུང་དངོས་མེད་སྐུ། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །བཞི་བཅུ་པ། ཡང་ཙན་དན་བཀོད་པ་ཞེས་བྱ་བའི་ཞིང་ཁམས་ན། སངས་རྒྱས་ཙན་དན་དྲི་ཞེས་བྱ་བར་བསྟན་ནས། རང་བྱུང་ཡེ་ཤེས་རྩ་བ་ནི། །བྱང་ཆུབ་སེམས་ཉིད་ཡིན་པས་ན། །དེ་ཡི་རྩ་བ་སྙིང་རྗེ་སྟེ། །ཕ་རོལ་ཕྱིན་པར་ཐབས་ཀྱིས་སོ། །ཞེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཞེ་གཅིག་པ། ཡང་སེང་གེ་འབྱུང་གནས་ཞེས་བྱ་བའི་ཞིང་ཁམས་ན། སངས་རྒྱས་སེང་གེ་འབུམ་གཟུགས་ཞེས་བྱ་བར་བསྟན་ནས། ཇི་སྙེད་ཇི་བཞིན་ཉིད་ཀྱི་དོན། །ཡི་གེ་མིང་ཚིག་སྒྲས་མཚོན་པ། །མིང་ཚིག་སྒྲ་ལ་མ་བརྟེན་པར། །ཉམས་དྲོད་བློ་ཡིས་རིག་པ་མེད། །ཅེས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ།།

གསུམ་པ་མི་མཇེད་ཀྱི་སྟོང་གསུམ་དུ་ཐུབ་པའི་དཔང་པོར་སྣང་ཞིང་གྲགས་པ་ནི།

ཡང་སྟོང་གསུམ། ཞེས་པ་ནི། ཆོས་སྟོན་ཏོ། །ཞེས་པའི་བར་གྱིས་བསྟན་ཏེ།

ཡང་སྟོང་གསུམ་གྱི་སྟོང་ཆེན་པོ་མི་མཇེད་ཅེས་བྱ་བ་འདི་ན། སངས་རྒྱས་ཐུབ་པ་ཆེན་པོ་ཞེས་བྱ་བར་བསྟན་ནས། ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ།།

ཡང་སྟོང་གསུམ་གྱི་སྟོང་ཆེན་པོ་མི་མཇེད་ཀྱི་ཞིང་ཁམས་ཞེས་བྱ་བ་འདི་ན། སྤྲུལ་པའི་སྐུ་མཆོག་ད་ལྟར་གྱི་སྟོན་པ་སངས་རྒྱས་ཐུབ་པའི་དབང་པོ་ཤཱཀྱ་སེང་གེ་དོན་ཀུན་གྲུབ་པ་ཞེས་བྱ་བར་བསྟན་ནས། ཆོས་ཀུན་ཆོས་ཀྱི་རང་བཞིན་ནི། །དེ་བཞིན་ཉིད་ལས་མི་གཞན་པས། །དེ་ཉིད་བྱང་ཆུབ་ལམ་ཉིད་དེ། །ལམ་དེ་སྟུག་པོ་བཀོད་པའི་གནས། །ཞེས་དེ་བཞིན་ཉིད་ཀྱི་དགོངས་པ་ཟབ་མོ་ལས་བརྩམས་ཏེ་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །དེ་ལྟར་དགོངས་མདོ་རྣམས་བདེ་བ་གསལ་མཛད་ཀྱི་ཊི་ཀ་མ་མཇལ་ཞིང་དམ་པ་རིན་པོ་ཆེའི་ཕྱག་མཆན་ན་མི་གསལ་ཡང༌། ཀུན་མཁྱེན་རོང་ཟོམ་ཆེན་པོའི་ཞལ་སློབ་རུ་ཡོང་རིན་ཆེན་འབར་ལས། མཁས་པ་འབྲོམ་སྟོན་གྱིས་ཞུས་ཏེ་ཕྱག་དཔེ་གསར་བཞེངས་མཛད་པའི་མཆན་རྙིང་དང་བསྟུན་ན་སངས་རྒྱས་མྱུར་དུ་འཛིན་པ་མ་གཏོགས་རང་གཞུང་དང་འགྲིགས་པས། བཀའ་ལུང་ལ་སྣང་བ་དང༌། དོན་དང་མི་འགལ་བར་རིགས་པས་འཐད་པའི་ཚུལ་ལ་ཡིད་ཆེས་ཀྱིས་ངེས་པ་རྙེད་ནའང་མཆན་ལ་ལ་ན་ཅུང་ཟད་འདྲ་མིན་འདུག་གོ།

གཉིས་པ་སྤྲུལ་པའི་མཛད་པ་ནི།

དེ་བཞིན་དུ། ཞེས་པ་ནས། སྒྲོན་མར་སྣང༌། ཞེས་པའི་བར་གྱིས་བསྟན་ཏེ།

དེ་བཞིན་དུ་འཇིག་རྟེན་གྱི་ཁམས་བྱེ་བ་ས་ཡར། རྡོ་རྗེ་སེམས་དཔའི་མཚན་བྱེ་བ་ས་ཡར་བསྟན་ནས། ཆོས་ཡང་དག་པ་ཇི་ལྟ་བ་དེ་བཞིན་དུ་སྣང་བར་མཛད་དེ། ལ་ལར་ནི་མངོན་པར་རྫོགས་པར་སངས་རྒྱས། ལ་ལར་ནི་ད་དུང་ཡུམ་གྱི་ལྷུམས་སུ་བཞུགས། ལ་ལར་ནི་དགའ་ལྡན་གྱི་གནས་ན་བཞུགས། ལ་ལར་ནི་ཡོངས་སུ་མྱ་ངན་ལས་འདས་སོ། །ལ་ལར་ནི་འདའ་བའི་ཚུལ་བསྟན་ནས། འཇིག་རྟེན་གྱི་ཁམས་གཞན་ནས་གཞན་གྱི་སྒྲོན་མར་སྣང་།

དེ་དག་ཏུ་མ་ཟད་དེ་དེ་བཞིན་དུ་འཇིག་རྟེན་གྱི་ཁམས་བྱེ་བ་ས་ཡར་རྡོ་རྗེ་སེམས་དཔའི་སྐུ་དང་མཚན་བྱེ་བ་ས་ཡར་བསྟན་ནས། ཆོས་ཡང་དག་པ་ཇི་ལྟ་བ་བཞིན་དུ་༼༡༠༤༽སྣང་བར་མཛད་དེ་ཇི་ལྟར་འདུལ་བ་བཞིན་དོན་མཛད་པའང་འགྲོ་འོང་མེད་པར་སྣང་བས་ཆུ་ལ་ཟླ་བ་ལྟ་བུའོ། །དེ་དག་ལ་དུས་གཅིག་ཏུ་ཆོས་སྟོན་པ་མ་ཡིན་ཏེ། འཁོར་མོར་རྒྱུན་མ་ཆད་པའི་ཕྱིར་ལ་ལར་ནི་འོག་མིན་དང་དེ་ཉིད་དུ་མངོན་པར་རྫོགས་པར་སངས་རྒྱས། གནས་དང་དུས་ལ་ལར་ནི་ད་དུང་ཡུམ་གྱི་ལྷུམས་ན་བཞུགས། ལ་ལར་ནི་དགའ་ལྡན་གྱི་གནས་ན་བཞུགས། ལ་ལར་ནི་ཐུབ་པ་ལྟ་བུ་སྐུ་ཡོངས་སུ་མྱ་ངན་ལས་འདས་སོ། །ལ་ལར་ནི་འདའ་བའི་ཚུལ་བསྟན་ནས། འཇིག་རྟེན་གྱི་ཁམས་གཞན་ནས་གཞན་གྱི་སྒྲོན་མར་སྣང་སྟེ་ཆོས་སྟོན་པར་མཛད་པའོ། །དེའང་སྤྲུལ་པ་ལ་སོ་སོར་ངོས་བཟུང་བ་འཐད་པ་མིན་ཏེ། གདུལ་བྱའི་མཐོང་སྟངས་ལྟར་ཚུལ་བརྩི་བ་མི་འགལ་བས་སོ།།

གསུམ་པ་སྤྲུལ་པའི་ཆ་ལུགས་ནི།

ལ་ལར་ནི། ཞེས་པ་ནས། ཆོས་སྟོན་ཏོ། །ཞེས་པའི་བར་གྱིས་བསྟན་ཏེ།

ལ་ལར་ནི་འཁོར་ལོས་སྒྱུར་བའི་རྒྱལ་པོའི་ཆ་ལུགས་ཀྱིས་ཐེག་པ་ཆེན་པོའི་ཆོས་སྟོན། ལ་ལར་ནི་ཉན་ཐོས་ཀྱི་ཆ་བྱད་ཀྱིས་ཐེག་པ་ཆུང་ངུའི་ཆོས་སྟོན། ལ་ལར་ནི་རང་སངས་རྒྱས་ཀྱི་ཆ་བྱད་ཀྱིས་རྫུ་འཕྲུལ་གྱིས་ཆོས་སྟོན། ལ་ལར་ནི་སྙིང་པོ་བྱང་ཆུབ་ན་བཞུགས། ལ་ལར་ནི་བསྐུལ་བའི་ས་ལ་གཞེས། ལ་ལར་ནི་ཐར་པའི་ཆ་ལུགས་ཀྱིས་སོ། །ལ་ལར་ནི་ཁྱིམ་པའི་ཆ་ལུགས་ཀྱིས་སོ། །ལ་ལར་ནི་ལྷའི་ཆ་བྱད་ཀྱིས་སོ། །ལ་ལར་ནི་ཀླུའི་ཆ་བྱད་ཀྱིས་སོ། །ལ་ལར་ནི་ལྷ་མ་ཡིན་གྱི་ཆ་བྱད་ཀྱིས་སོ། །ལ་ལར་ནི་བདུད་ཀྱི་ཆ་བྱད་ཀྱིས་སོ། །ལ་ལར་ནི་གནོད་སྦྱིན་གྱི་ཆ་བྱད་ཀྱིས་སོ། །ལ་ལར་ནི་སྲིན་པོའི་ཆ་བྱད་ཀྱིས་སོ། །ལ་ལར་ནི་འབྱུང་པོའི་ཆ་བྱད་ཀྱིས་སོ། །ལ་ལར་ནི་ནམ་མཁའི་ལྡིང་གི་ཆ་བྱད་ཀྱིས་སོ། །ལ་ལར་ནི་ཡ་མཚན་ཅན་གྱི་ཆ་བྱད་ཀྱིས་སོ། །ལ་ལར་ནི་བྱོལ་སོང་གི་ཆ་བྱད་ཀྱིས་སོ། །ལ་ལར་ནི་ཡི་དྭགས་ཀྱི་ཆ་བྱད་ཀྱིས་སོ། །ལ་ལར་ནི་བཟོད་ལྡན་གྱི་ཆ་བྱད་ཀྱིས་སོ། །ལ་ལར་ནི་གཤན་པའི་ཆ་བྱད་ཀྱིས་སོ། །ལ་ལར་ནི་སྨད་འཚོང་མའི་ཆ་བྱད་ཀྱིས་སོ། །ལ་ལར་ནི་ན་ཆུང་མའི་ཆ་བྱད་ཀྱིས་སོ། །ལ་ལར་ནི་སྐུ་གདུང་ལྟ་བུར་སྣང་ངོ་། །ལ་ལར་ནི་རིང་བསྲེལ་ལྟ་བུར་སྣང་ངོ་། །ལ་ལར་ནི་རྡོ་རྗེ་སེམས་དཔའ་ཉིད་ལྟ་བུར་སྣང་ངོ་། །ལ་ལར་ནི་རྣམ་པར་སྣང་མཛད་ལྟ་བུར་སྣང་ངོ་། །ལ་ལར་ནི་རིན་ཆེན་འབྱུང་ལྡན་ལྟ་བུར་སྣང་ངོ་། །ལ་ལར་ནི་སྣང་བ་མཐའ་ཡས་ལྟ་བུར་སྣང་ངོ་། །ལ་ལར་ནི་དོན་ཡོད་གྲུབ་པ་ལྟ་བུར་སྣང་སྟེ། དེ་ཀུན་ཀྱང་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ།།

འདིར་ཡང་སྤྲུལ་པ་ཐ་དད་སེམས་ཅན་བཟང་ངན་གྱི་ཆ་ལུགས་ཀྱིས་ཀྱང་ཆོས་སྟོན་ཏེ་ལ་ལར་ནི། རིན་ཆེན་བདུན་དང་དཔུང་ཚོགས་བཞི་ལྡན་ཞིང་ལོངས་སྤྱོད་བཙུན་མོ་དང་བཅས་ཏེ་འཁོར་ལོས་སྒྱུར་བའི་ཆ་ལུགས་ཀྱིས་ཐེག་པ་ཆེན་པོའི་ཆོས་གསང་བ་དམ་པ་སྟོན་ཏོ། །ལ་ལར་ནི་ཉན་ཐོས་ཀྱི་ཆ་བྱད་ཀྱིས་ཐེག་པ་ཆུང་ངུའི་ཆོས་སྟོན་ཏོ། །ལ་ལར་ནི་རང་སངས་རྒྱས་ཀྱི་ཆ་བྱད་ཀྱིས་རྫུ་འཕྲུལ་གྱིས་ཆོས་སྟོན་ཏོ། །ལ་ལར་ནི་སྙིང་པོ་བྱང་ཆུབ་བརྙེས་ནས་ཤིང་དྲུང་ན་དགོངས་པ་མཛད་དེ་བཞུགས། ལ་ལར་ནི་བསྐུལ་བའི་ས་ལ་གཞེས་ཏེ་འོག་མིན་ཆེན་པོ་དང་དེ་ཉིད་དུ་ཆོས་ཀྱི་འཁོར་ལོ་བསྐོར། ལ་ལར་ནི་ཁྱིམ་མེད་པར་རབ་ཏུ་བྱུང་སྟེ་ཐར་པའི་ཆ་ལུགས་ཀྱིས་སོ། །ལ་ལར་ནི་ལུས་ཀྱི་ཆ་བྱད་ཁྱིམ་པའི་ཆ་ལུགས་ཀྱིས་སོ། །ལ་ལར་ནི་ལྷ་ཡི་ཆ་བྱད་ཀྱིས་སོ། །ལ་ལར་ནི་ཀླུ་ཡི་ཆ་བྱད་ཀྱིས་སོ། །ལ་ལར་ནི་ལྷ་མ་ཡིན་གྱི་ཆ་བྱད་ཀྱིས་སོ། །ལ་ལར་ནི་བར་ཆོད་བྱེད་པ་བདུད་ཀྱི་ཆ་བྱད་ཀྱིས་སོ། །ལ་ལར་ནི་གནོད་སྦྱིན་གྱི་ཆ་བྱད་ཀྱིས་སོ། །ལ་ལར་ནི་སྲིན་པོའི་ཆ་བྱད་ཀྱིས་སོ། །ལ་ལར་ནི་འབྱུང་པོའི་ཆ་བྱད་ཀྱིས་སོ། །ལ་ལར་ནི་ནམ་མཁའ་ལྡིང་གསེར་མིག་གི་ཆ་བྱད་ཀྱིས་སོ། །ལ་ལར་ནི་མགོ་ལུས་མི་འཚམས་པའམ་མུ་སྟེགས་གཅེར་བུ་པ་ལྟ་བུ་ཡ་མཚན་ཅན་གྱི་ཆ་བྱད་ཀྱིས་སོ། །ལ་ལར་ནི་བྱོལ་སོང་གི་ཆ་བྱད་ཀྱིས་སོ། །ལ་ལར་ནི་ཡི་དྭགས་ཀྱི་ཆ་བྱད་ཀྱིས་སོ། །ལ་ལར་ནི་དམྱལ་བ་ལྟ་བུ་བཟོད་ལྡན་གྱི་ཆ་བྱད་ཀྱིས་སོ། །ལ་ལར་ནི་སྲོག་གཅོད་པས་ཤན་པའི་ཆ་བྱད་ཀྱིས་སོ། །ལ་ལར་ནི་ལུས་ཀྱིས་འདོད་པ་ཚོལ་བས་སྨད་འཚོང་མའི་ཆ་བྱད་ཀྱིས་སོ། །ལ་ལར་ནི་ཆགས་པ་ལ་13སེམས་པས་ན་ཆུང་གི་ཆ་བྱད་ཀྱིས་སོ། །ལ་ལར་ནི་སྐུ་གདུང་ཤ་རི་རམ་མམ་མདུན་ན་བཞུགས་པའི་སངས་རྒྱས་ལྟ་བུར་ཡང་སྣང་ངོ༌། །ལ་ལར་ནི་རུས་༼༡༠༥༽པའི་སྐུའི་རིང་སྲེལ་ལམ་ཆོས་ཀྱི་རིང་བསྲེལ་ལྟ་བུར་ཡང་སྣང་ངོ་། །སྤྲུལ་སྐུ་རིགས་ལྔའི་ཆ་ལུགས་ཅན་ལ་ལར་ནི་རྡོ་རྗེ་སེམས་དཔའ་ཉིད་དུ་སྣང་ངོ་། །ལ་ལར་ནི་རྣམ་པར་སྣང་མཛད་ལྟ་བུར་སྣང་ངོ༌། །ལ་ལར་ནི་རིན་ཆེན་འབྱུང་ལྡན་ལྟ་བུར་སྣང་ངོ་། །ལ་ལར་ནི་སྣང་བ་མཐའ་ཡས་ལྟ་བུར་སྣང་ངོ་། །ལ་ལར་ནི་དོན་ཡོད་གྲུབ་པ་ལྟ་བུར་སྣང་སྟེ། དེ་དག་ཀུན་ཀྱང་ཡང་དག་པ་ཇི་ལྟ་བ་བཞིན་དུ་ཆོས་སྟོན་ཏོ།།

བཞི་པ་ཆ་ལུགས་སོ་སོར་བསྟན་པའི་དགོས་ཆེད་ནི།

གཞན་ཡང༌། ཞེས་པ་ནས། སྣང་ངོ་། །ཞེས་པའི་བར་གྱིས་བསྟན་ཏེ།

གཞན་ཡང་གཏི་མུག་གི་རྒྱལ་པོ་དགྲོལ་བར་བྱ་བའི་ཕྱིར། ཚངས་པའི་གཟུགས་ལྟ་བུར་སྣང་ངོ་། །ཞེས་སྡང་གི་རྒྱལ་པོ་དགྲོལ་བར་བྱ་བའི་ཕྱིར། ཁྱབ་འཇུག་གི་གཟུགས་ལྟ་བུར་སྣང་ངོ་། །འདོད་ཆགས་ཀྱི་རྒྱལ་པོ་དགྲོལ་བར་བྱ་བའི་ཕྱིར། དྲག་པོའི་གཟུགས་ལྟ་བུར་སྣང་ངོ་། །ང་རྒྱལ་གྱི་རྒྱལ་པོ་དགྲོལ་བར་བྱ་བའི་ཕྱིར། ཚོགས་བདག་ལྟ་བུར་སྣང་ངོ་། །ཕྲག་དོག་གི་བདག་པོ་དགྲོལ་བར་བྱ་བའི་ཕྱིར། དབང་པོ་ལྟ་བུར་སྣང་ངོ་། །དེ་བཞིན་དུ་སྐྱེ་བ་ཐམས་ཅད་ཀྱི་གཟུགས་སུ་སྣང་བ་ནི། འཇུག་སྲེད་དང་། སྲེད་མེད་དང་། དབང་ཕྱུག་དང་། སྟོབས་ལྡན་དང་། ནོར་འཛིན་དང་། སྤྲེའུ་དང་། ར་དང་། ལུ་འདི་དང་། ཁྱི་དང་། སྦྲང་མ་དང་། བྱ་རོག་དང་། མེ་ཁྱེར་དང་། སྲོག་ཆགས་དང་། གང་ཟིན་པ་དེ་དང་དེའི་གཟུགས་སུ་སྣང་བར་མཛད་ཅིང་། དེའི་ཆ་བྱད་ཀྱིས་གང་དག་ཇི་ལྟར་མོས་པ་རྣམས་ལ་དེ་བཞིན་དུ་སྣང་སྟེ། ཇི་ལྟར་ཉི་མའི་དཀྱིལ་འཁོར་གྱི་གཟུགས་གཞལ་མེད་ཁང་ལས་མ་གཡོས་པར་ཆུ་ཐ་དད་པའི་ནང་དུ་གཟུགས་བརྙན་ཐ་དད་པར་སྣང་བ་བཞིན་དུ། སངས་རྒྱས་རྡོ་རྗེ་སེམས་དཔའ་ཉིད་ལས་མ་གཡོས་བཞིན་དུ། ཞིང་ཁམས་དཔག་ཏུ་མེད་པར་སངས་རྒྱས་མཐའ་ཡས་པར་སྣང་ངོ་།།

གཞན་ཡང་སྐྱེ་བ་ཐ་དད་པའི་གཟུགས་འདི་དག་ལ་རང་རྒྱུད་པ་དང་སྤྲུལ་པ་གཉིས་གཉིས་ཡོད་དེ་རང་རྒྱུད་པ་སྐལ་པ་ཅན་རྣམས་དེ་དང་མཐུན་པའི་སྤྲུལ་པས་གདུལ་བ་སྟེ། གཏི་མུག་གི་རྒྱལ་པོ་གྲོལ་བར་བྱ་བའི་ཕྱིར། གདུལ་བྱ་དང་འདྲ་བར་ཟིལ་གྱིས་གནོན་པས་ཚངས་པའི་གཟུགས་ལྟ་བུར་སྣང་ངོ་། །ཞེ་སྡང་གི་རྒྱལ་པོ་དགྲོལ་བར་བྱ་བའི་ཕྱིར་འཁོར་ལོ་ནག་པོ་ཅན་ཁྱབ་འཇུག་གི་གཟུགས་ལྟ་བུར་སྣང་ངོ་། །འདོད་ཆགས་ཀྱི་རྒྱལ་པོ་དགྲོལ་བར་བྱ་བའི་ཕྱིར། མ་ཧཱ་དེ་བ་དྲག་པོའི་གཟུགས་ལྟ་བུར་སྣང་ངོ་། །ང་རྒྱལ་གྱི་རྒྱལ་པོ་དགྲོལ་བར་བྱ་བའི་ཕྱིར་དྲེགས་པ་ཚོགས་བདག་ལྟ་བུར་སྣང་ངོ་། །ཕྲ་དོག་གི་བདག་པོ་དགྲོལ་བར་བྱ་བའི་ཕྱིར། བརྒྱ་བྱིན་ལྷ་ཡི་དབང་པོ་ལྟ་བུར་སྣང་ངོ་། །འདི་ས་བཞི་པ་ཡན་ཆད་ལའང་འབྱུང་གསུང་ངོ་། །དེ་བཞིན་དུ་རྒྱུད་ཐ་དད་པའི་སྐྱེ་བ་ཐམས་ཅད་ཀྱི་གཟུགས་སུ་སྣང་བ་ནི། འཇུག་སྲེད་དང༌། ར་ཧུ་ལ་སྲེད་མེད་དེ་འདི་གཉིས་གཟའ་དང༌། འདོད་པའི་དབང་ཕྱུག་དང༌། ས་བདག་སྟོབས་ལྡན་དང༌། གནོད་སྦྱིན་ནོར་འཛིན་དང༌། སྤྲེའུ་དང༌། ར་དང༌། དམྱལ་བའི་ཁྱི་ལུ་འདེ་དང༌། ཁྱི་དང༌། སྦྲང་མ་དང༌། བྱ་རོག་དང༌། སྲིན་བུ་མེ་ཁྱེར་རམ་ལྷམ་བུ་ཆུ་གཤེར་དང༌། སྲོག་ཆགས་ལྡེམ་བུ་སྟེ་ཕྱེ་མ་ལེབ་དང༌། གང་ཟིན་པ་དེ་དང་དེའི་གཟུགས་སུ་སྦྲུལ་པ་སྣང་བར་མཛད་ཅིང༌། དེའི་ཆ་བྱད་ཀྱིས་གང་དག་ཇི་ལྟར་མོས་པ་རྣམས་ལ་དེ་བཞིན་དུ་སྣང་སྟེ། ཇི་ལྟར་ཉི་ཟླའི་དཀྱིལ་འཁོར་གྱི་གཟུགས་གཞལ་མེད་ཁང་ལས་མ་གཡོས་པར། ཆུ་ཐ་དད་པའི་ནང་དུ་གཟུགས་བརྙན་ཆུའི་གྲངས་ལྟར་ཐ་དད་པར་སྣང་བ་བཞིན་དུ། དོན་སངས་རྒྱས་རྡོ་རྗེ་སེམས་དཔའ་ཉིད་ལས་མ་གཡོས་བཞིན་དུ་ཞིང་ཁམས་དཔག་ཏུ་མེད་པར་སངས་རྒྱས་མཐའ་ཡས་པར་སྣང་སྟེ་དགོས་ཆེད་བསམ་གྱིས་མི་ཁྱབ་པ་དང་འབྲེལ་བར་འབྱུང་ངོ་།།

ལྔ་པ་མཚན་གྱི་ཁྱད་པར་ལ་གཉིས་ཏེ། མཚན་མཐའ་ཡས་པར་བསྟན་པ། མཚན་ཐོས་པའི་ཡོན་ཏན་ནོ། །དང་པོ་ནི།

དེ་ལྟར་ན། ༼༡༠༦༽ཞེས་པ་ནས། མྱོས་པར་འགྱུར་རོ། །ཞེས་པའི་བར་གྱིས་བསྟན་ཏེ།

དེ་ལྟར་ན་གང་མིང་སྣ་ཚོགས་སུ་བཏགས་པའི་སངས་རྒྱས་ཀྱི་ཞིང་ཁམས་མཐའ་ཡས་པ་ན་འཁོད་པའི་སེམས་ཅན་རྣམས་ཀྱིས། སངས་རྒྱས་རྡོ་རྗེ་སེམས་དཔའི་མཚན་སྣ་ཚོགས་པ་ཤེས་པ་ནི་བརྗོད་ཀྱིས་མི་ལང་བའི་བསྐལ་པར་སྨྲས་ཀྱང་། ཤར་ཕྱོགས་གཅིག་པུའི་སངས་རྒྱས་ཀྱི་ཞིང་ན་བཞུགས་པའི་མཚན་གྱི་མཐའ་ཡང་མི་རྫོགས་སོ། །དེ་བཞིན་དུ་ཕྱོགས་ཐམས་ཅད་ཀྱི་སངས་རྒྱས་ཀྱི་ཞིང་ན་འཁོད་པའི་སེམས་ཅན་རྣམས་ཀྱིས་བརྗོད་ཀྱིས་མི་ལང་བའི་བསྐལ་པར་སྨྲས་ཀྱང་མཚན་གྱི་མཐའ་ནི་མི་རྫོགས་སོ། །ཇི་ལྟར་སེམས་ཅན་མོས་པ་ཆུང་ངུ་རྣམས་ཀྱིས་རྡོ་རྗེ་སེམས་དཔའི་ཞིང་ཁམས་ཚད་མེད་པ་དང་མཚན་མཐའ་ཡས་པ་ཐོས་ན་བློ་ག་ཆད་པ་དང་མྱོས་པར་འགྱུར་རོ།།

དེ་ལྟར་ན་གང་མིང་སྣ་ཚོགས་སུ་བཏགས་པའི་སངས་རྒྱས་ཀྱི་ཞིང་ཁམས་མཐའ་ཡས་པ་ན་འཁོད་པའི་སེམས་ཅན་རྣམས་ཀྱིས་སངས་རྒྱས་རྡོ་རྗེ་སེམས་དཔའ་ནི་ཡེ་ཇི་བཞིན་པ་དང་རྒྱུད་དག་པ་གཉིས་ཀ་ཡིན་ནའང་རྒྱུད་དག་པའི་རྡོ་རྗེ་སེམས་དཔའི་མཚན་ཁོ་ན་སྣ་ཚོགས་པར་ཤེས་པ་ནི་བརྗོད་ཀྱིས་མི་ལང་བའི་བསྐལ་པར་སྨྲས་ཀྱང་ཤར་ཕྱོགས་གཅིག་པུའི་སངས་རྒྱས་ཀྱི་ཞིང་ན་བཞུགས་པའི་མཚན་གྱི་མཐའ་ཡང་མི་རྫོགས་སོ། །དེ་བཞིན་དུ་ཕྱོགས་ཐམས་ཅད་ཀྱི་སངས་རྒྱས་ཀྱི་ཞིང་ན་འཁོད་པའི་སེམས་ཅན་རྣམས་ཀྱིས། བརྗོད་ཀྱིས་མི་ལང་བའི་བསྐལ་པར་སྨྲས་ཀྱང་མཚན་གྱི་མཐའ་ནི་མི་རྫོགས་སོ། །ཇི་ལྟར་སེམས་ཅན་མོས་པ་ཆུང་ངུ་རྣམས་ཀྱིས་རྡོ་རྗེ་སེམས་དཔའི་ཞིང་ཁམས་ཚད་མེད་པ་དང་མཚན་མཐའ་ཡས་པ་ཐོས་ན་བློ་ལ་མི་ཤོང་བས་འཇུག་མི་ནུས་པར་བློ་ག་ཆད་པ་དང་དྲན་པ་ཉམས་ཏེ་མྱོས་པར་འགྱུར་རོ།།

གཉིས་པ་མཚན་ཐོས་པའི་ཡོན་ཏན་ནི།

འོག་ནས། སངས་རྒྱས་རྡོ་རྗེ་སེམས་དཔའི། ཞེས་པ་ནས། ཡིན་ནོ། །ཞེས་པའི་བར་གྱིས་བསྟན་ཏེ།

སངས་རྒྱས་རྡོ་རྗེ་སེམས་དཔའི་མཚན་གང་གི་ཐོས་པ་དེས་རྒྱལ་བ་མང་པོ་ལ་སྔོན་དུ་བྱ་བ་བྱས་པ་ཡིན་ནོ། །རྡོ་རྗེ་སེམས་དཔའི་ཞིང་ཁམས་ཉིད་དུ་ངེས་པར་འབྱུང་བ་ཡིན་ནོ། །རྒྱལ་བ་རྣམས་ཀྱིས་བྱིན་གྱིས་བརླབས་པ་ཡིན་ནོ། །ཐེག་པ་ཆེན་པོར་ངེས་པར་འབྱུང་བ་དག་ཡིན་ནོ། །མངོན་པར་ཤེས་པ་དག་དང་ལྡན་པ་ཡིན་ནོ། །སངས་རྒྱས་ཀྱི་སྲས་སུ་ངེས་པ་དག་ཡིན་ནོ། །ལྷག་མཐོང་གི་མིག་དང་ལྡན་པ་དག་ཡིན་ནོ།།

སངས་རྒྱས་རྡོ་རྗེ་སེམས་དཔའི་མཚན་གང་གིས་ཐོས་པ་དེས་ཡོན་ཏན་འདི་དག་འཛིན་ཏེ། རྒྱལ་བ་ཐམས་ཅད་ཀྱི་དངོས་གཞི་ཡིན་པའི་ཕྱིར་དང༌། ལམ་པའི་དབང་དུ་ན་དོན་གཞན་ལ་དགོངས་ཏེ་རྒྱལ་བ་མང་པོ་ལ་སྔོན་དུ་བྱ་བ་བྱས་པ་ཡིན་ནོ། །སྙིང་པོ་བྱང་ཆུབ་ལས་མི་འགྱུར་བར་ངེས་པའམ་ཕྱིས་སྣང་བའི་སྐལ་བ་ངེས་པ་ཅན་ཡིན་པའི་ཕྱིར་རྡོ་རྗེ་སེམས་དཔའི་ཞིང་ཁམས་ཉིད་དུ་ངེས་པར་འབྱུང་བ་ཡིན་ནོ། །བདེ་གཤེགས་མང་པོས་སྔར་བྱིན་གྱིས་བརླབས་ཏེ་བདག་ཉིད་བྱིན་རླབས་ཀྱི་བདག་པོ་ཡིན་པའི་ཕྱིར་སྒྲོན་མ་བཀོད་པའི་རྒྱལ་བ་རྣམས་ཀྱིས་བྱིན་གྱིས་བརླབས་པ་ཡིན་ནོ། །ཐེག་པ་ཆེད་པོ་གསང་བ་མཆོག་གིས་ངེས་པར་འབྱུང་བ་ཡིན་ནོ། །མངོན་པར་ཤེས་པ་དག་དང་ལྡན་པ་ཡིན་ནོ། །སངས་རྒྱས་ཀྱི་ཐུགས་ཀྱི་སྲས་སུ་ངེས་པ་ཡིན་ནོ། །ལྷག་མཐོང་གི་མིག་དང་ལྡན་པ་དག་ཡིན་ནོ། །ཞེས་དབང་པོ་མཆོག་དང་ལྡན་པ་ལ་ཡོན་ཏན་དེ་དག་རིལ་ཐོབ་པ་ཡིན་ཀྱང༌། དབང་པོ་དམན་པའི་དབང་དུ་ན། གཉིས་པའི་ཟུར་ཕྱི་མ་དང༌། བཞི་པ་ནས་མར་ལྔ་ཀ་ཐམས་ཅད་དུས་གཞན་ལ་དགོངས་པ་ཡིན་ནོ།།

དྲུག་པ་ཆོས་སྟོན་ཚུལ་ནི།

སྔར་གྱིས་འཕྲོས་ཇི་ལྟར། ཞེས་པ་ནས། སྣང་ངོ། །ཞེས་པའི་བར་གྱིས་བསྟན་ཏེ།

ཇི་ལྟར་རྡོ་རྗེ་སེམས་དཔའི་ཞིང་ཁམས་དེ་དག་ཐམས་ཅད་ན་སེམས་ཀྱི་དཀྱིལ་འཁོར་འོད་གསལ་བ། གསང་སྔགས་ཀྱི་ངོ་བོ་དེ་ཉིད་འབའ་ཞིག་ཡང་དག་པ་ཇི་ལྟ་བ་བཞིན་དུ་ཕྱིན་ཅི་མ་ལོག་པར་རིམ་གྱིས་དང་ཅིག་ཅར་བར་སྟོན་ཏོ། །དེ་ཅིའི་ཕྱིར་ཞེ་ན། རྡོ་རྗེ་སེམས་དཔའི་ཞིང་ཁམས་ན་འཁོད་པའི་སེམས་ཅན་ཆེན་པོ་དེ་དག་ནི་སེམས་ཀྱི་རང་བཞིན་སྣ་ཚོགས་པའི་ཕྱིར་བློ་ཤིན་ཏུ་ཟབ་པ་དང་། མི་ཟབ་པ་དང་། ཡངས་པ་དང་། དོག་པ་དང་། བརྟན་པ་དང་། འགྱུར་བ་དང་། རྣོ་བ་དང་། རྟུལ་བ་དང་། མྱུར་བ་དང་། བུལ་བ་དང་། སྣ་ཚོགས་དང་། གཅིག་པ་ཤ་སྟག་པས། གསང་སྔགས་ཀྱི་ངོ་བོ་དེ་ཉིད་ཀྱི་གཏམ་རིམ་གྱིས་པ་དང་ཅིག་ཅར་བར་ཐོས་ནས། དེ་གང་ལ་ཡང་མི་སྐྲག་མི་དངང་གིས། དགའ་ཞིང་མགུ་བ་དང་རངས་པར་འགྱུར་བའི་ཕྱིར་སྣ་ཚོགས་སུ་སྣང་ངོ་།།

ཇི་ལྟར་རྡོ་རྗེ་སེམས་དཔའི་ཞིང་ཁམས་དེ་དག་གི་སྤྲུལ་པའི་དབང་དུ་ན་ཕན་ཚུན་སྨོས་པ་ལས་ཡན་མན་གསལ་བར་མ་བསྟན་ཀྱང༌། འདིར་ཕྱོགས་བཅུ་ཀར་འཇལ་བར་༼༡༠༧༽བྱ་སྟེ་བྱེ་བ་ས་ཡར་སྣང་བའི་ཕྱིར་དེ་ལྟར་ཞིང་དེ་རྣམས་ཐམས་ཅད་ན། སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་འབའ་ཞིག་ཡང་དག་པ་ཇི་ལྟ་བ་བཞིན་དུ། ཕྱིན་ཅི་མ་ལོག་པར། རྒྱུའི་ཐེག་པས་རིམ་གྱིས་དང་སྔགས་ཀྱི་ཐེག་པས་ཅིག་ཆར་བར་སྟོན་ཏོ། །འོ་ན་ཆོས་སྟོན་ལུགས་གཉིས་ཁོ་ནར་སྨོས་པ་ཇི་ཞེ་ན། དེའི་གཏན་ཚིགས་སུ། དེ་ཅིའི་ཕྱིར་ཞེ་ན། རྡོ་རྗེ་སེམས་དཔའི་ཞིང་ཁམས་ན་འཁོད་པའི་འགྲོ་བ་སེམས་ཅན་རྣམས་ནི། ཐེག་པ་ཆེན་པོ་གསང་སྔགས་ཀྱི་སྐལ་བ་དང་ལྡན་པའི་ཕྱིར་ཆེན་པོ་ཞེས་ཁྱད་པར་གྱི་སྒྲར་བརྗོད་དེ་དེ་དག་ནི་ཆོས་ཅན་སེམས་ཀྱི་རང་བཞིན་ཡིད་ཀྱི་ཤེས་པ་དང་ཉོན་མོངས་ཅན་གྱི་ཡིད་ལ་སོགས་པ་ཀུན་གཞིའི་རྒྱུད་ལ་ཁམས་སྣ་ཚོགས་པའི་ཁྱད་པར་ཡོད་པའི་ཕྱིར། དེ་ཉིད་ལ་ཤེས་རབ་ཇི་བཞིན་པ་མཐོང་བའི་མཐུ་ཅན་རྒྱ་མཚོ་ལྟ་བུ་བློ་ཤིན་ཏུ་ཟབ་པ་དང༌། དེ་ཁོ་ན་ཉིད་ཀྱི་མུ་མཐའ་ཚོལ་བ་ལྡེང་ཀའམ་མཁྲོན་པ་ལྟ་བུ་བློ་མི་ཟབ་པ་དང༌། གང་ལ་ཡང་མི་སྐྲག་ཅིང་ཐེག་པས་ལུང་དོན་ཇི་བཞིན་དུ་ཤོང་བ་བར་སྣང་ལྟ་བུ་བློ་ཡངས་པ་དང༌། དེ་ལྟར་དོན་ཟབ་མོ་མི་ཤོང་བ་རི་བྲག་ལྟ་བུ་དོག་པ་དང༌། ངེས་པ་ཇི་བཞིན་པར་རྙེད་དེ་ནམ་ཡང་མི་འགྱུར་བ་རི་རབ་ལྟ་བུ་བློ་བརྟན་པ་དང༌། དེ་ལྟར་མ་ངེས་པའི་བློ་ཅན་ཆུ་བོ་ལྟ་བུ་ཀུན་འགྱུར་བ་དང༌། དོན་ཇི་ལྟ་བར་ཐག་ཆོད་པ་རལ་གྲི་ལྟ་བུ་བློ་ཤིན་ཏུ་རྣོ་བ་དང༌། དེ་ལྟར་དོན་ཐག་མི་ཆོད་པ་བྱང་གྲི་སྟེ་ཁྲབ་བྱང་གི་གྲི་ལྟ་བུ་རྟུལ་བ་དང༌། ལན་མང་དུ་ཐེབས་ཤིང་ཡུལ་དོན་ལ་དེ་མ་ཐག་པར་འཇུག་པ་གློག་ལྟ་བུ་བློ་མྱུར་བ་དང༌། ལན་དོན་ཐོགས་པ་དང་བཅས་པ་བུ་ཆུང་ལྟ་བུ་བུལ་བ་སྟེ་སྣ་ཚོགས་པ་དང་གཅིག་པ་ཤ་སྟག་པས་གསང་སྔགས་ཀྱི་ངོ་བོ་ཉིད་ཀྱི་གཏམ་དེར་ཡང་བློ་དམན་རྣམས་ནི་རིམ་གྱིས་པ་དང༌། བློ་བཟང་རྣམས་ནི་ཅིག་ཆར་བར་ངེས་པ་སྟེ། དེ་ལྟར་ཆ་གཉིས་ལས་གཞན་པ་བཀག་པའོ། །དེ་ལྟ་བུར་བློ་དམན་པ་དང་མཆོག་གིས་རིམ་པ་བཞིན་གསང་སྔགས་ལ་འཇུག་ལུགས་གཉིས་སུ་ཐོས་ནས་ཀྱང་ཡེ་ནས་དབང་པོ་གཅིག་ཆོད་དམ་དམན་པས་སྦྱངས་པ་ལས་གྱུར་པའང་རུང་སྟེ་རིགས་ཅན་དུ་གྱུར་པ་དེ་དག་གང་ལའང་མི་སྐྲག་མི་དངང་གི ཆོས་ལ་བཟོད་པ་ཐོབ་ནས་དགའ་ཤིང་མགུ་བ་དང༌། རངས་པར་འགྱུར་བའི་ཕྱིར་བློ་དང་ཆོས་སྣ་ཚོགས་སུ་སྣང་ངོ།།

བདུན་པ་ཚེ་དང་ལོངས་སྤྱོད་ཀྱི་ཚད་ནི།

དེ་ན། ཞེས་པ་ནས། ཤ་སྟག་གོ །ཞེས་པ་བར་གྱིས་བསྟན་ཏེ།

དེ་ན་གནས་པའི་ཚེའི་ཚད་ཀྱང་ཐུང་བ་དང་། རིང་བ་དང་། དཔག་ཏུ་མེད་པ་དང་། བརྒྱ་པ་དང་།

བརྒྱད་ཁྲི་བཞི་སྟོང་ཐུབ་པ་ཡིན་ནོ། །ལོངས་སྤྱོད་ནི་ཇི་ལྟར་བསམ་པ་བཞིན་དུ་འབྱུང་བ་ཡང་ཡོད།

དཀའ་བས་འབྱོངས་པ་དང་མི་འབྱོངས་པ་ཡང་ཡོད། ཀུན་ཀྱང་ལུང་བསྟན་པ་ཐོབ་པ་ཤ་སྟག་གོ།

རྡོ་རྗེ་སེམས་དཔའི་ཞིང་ཁམས་དེ་ན་གནས་པའི་འགྲོ་བ་རྣམས་ནི་ལས་དང་བསོད་ནམས་ཐ་དད་པས་ཚེའི་ཚད་ཀྱང་གཅིག་ཏུ་མ་ངེས་ཏེ་ཐུང་བ་དང༌། ༼༡༠༨༽རིང་བ་དང༌། དཔག་ཏུ་མེད་པ་དང༌། ཞིང་འདིར་ད་ལྟར་གྱི་སྤྲུལ་པ་ཉག་གཅིག་གི་དབང་གིས་བརྒྱ་པ་དང༌། བརྒྱད་ཁྲི་བཞི་སྟོང་ཐུབ་པས་སྣ་ཚོགས་པ་ཡིན་ནོ། །རྒྱུ་དེས་ན་ལོངས་སྤྱོད་ཀྱང་ནི། ཇི་ལྟར་བསམ་པ་བཞིན་དུ་འབྱུང་བ་ཡང་ཡོད། སོ་ནམས་དང་ཁེ་སྤོགས་སོགས་དཀའ་བས་འབྱོངས་པ་དང༌། མི་འབྱུང་བ་ཡང་ཡོད་དོ། །དེ་དག་ཀུན་ཀྱང་རིལ་སྙིང་པོ་བྱང་ཆུབ་ཀྱི་ངོ་བོ་ཉིད་ཀྱིས་བསྣུམས་པའི་ཕྱིར་རང་བཞིན་མཉམ་པ་ཉིད་ལ་དགོངས་པའམ་མཐའ་ཁོབ་ཀྱི་མི་དང་འབུ་ཅོར་སྡེ་ལ་སོགས་པ་རེ་ཞིག་སྐལ་བ་མེད་པའང་ངོ་བོ་ཉིད་གསང་སྔགས་སུ་མ་གྱུར་པ་མེད་པ་ལ་མདོངས་པ་དང་ཕལ་ཆེ་བའི་ཕྱིར་དུས་གཞན་ལ་དགོངས་ཏེ་གསང་སྔགས་ལ་སྤྱོད་པར་ལུང་བསྟན་པ་ཐོབ་པ་ཤ་སྟག་གོ།

གསུམ་པ་མཇུག་བསྡུ་བ་ནི།

ཀྱེ་ལང་ཀའི། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་པ་སྟེ།

ཀྱེ་ལངྐའི་བདག་པོ་དེའི་ཕྱིར་འཛམ་བུ་གླིང་གཅིག་གི་སངས་རྒྱས་ཉག་གཅིག་འདི་མྱ་ངན་ལས་འདས་པ་ཡིན་ནོ། །དེ་བཞིན་དུ་རྡོ་རྗེ་སེམས་དཔའི་སྤྲུལ་པའི་སངས་རྒྱས་མཐའ་དག་ལ་མྱ་ངན་ལས་འདས་པ་ཡང་ཡོད། མ་འདས་པ་ཡང་ཡོད་དོ་སྨྲས་པ། འགྲོ་བ་ལུས་ཀྱི་སེམས་དཔའ་དེ་དག་ཡིད་ཡོངས་སུ་རངས་པར་གྱུར་ཏོ།།

ཀྱེ་ལང་ཀའི་བདག་པོ། རྒྱས་པར་བརྗོད་པ་གཏན་ཚིགས་སུ་གྱུར་པ་དེའི་ཕྱིར། འཛམ་བུའི་གླིང་གཅིག་གིས་སངས་རྒྱས་ཉག་གཅིག་འདི་མྱ་ངན་ལས་འདས་པ་ཡིན་ནོ། །དེ་ལྟ་བས་ན་དེ་བཞིན་དུ་རྡོ་རྗེ་སེམས་པའི་སྤྲུལ་པ་སངས་རྒྱས་དེ་སྙེད་མཐའ་དག་ལ། ཐུབ་པ་ལྟ་བུ་མྱ་ངན་ལས་འདས་པ་ཡང་ཡོད། གཞན་དག་ན་མ་འདས་པར་བཞུགས་པ་ཡང་ཡོད་དོ། །ཞེས་སྨྲས་པས། དམན་པའི་ལུས་ཀྱི་སེམས་དཔའ་དེ་དག་ཞིང་འདིར་སྤྲུལ་པ་གཅིག་འདུལ་དབང་གིས་འདས་པར་བསྟན་ཀྱང་ཐུབ་པའི་དབང་པོའི་སྤྲུལ་པའི་སྒྲོན་མ་ངོས་ཟིན་ནས་ཐེ་ཚོམ་ཆོད་དེ་ཡིད་མགུ་ཞིང་ཡོངས་སུ་རངས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་དུས་པའི་མདོ་ཆེན་པོ་ལས།

རྡོ་རྗེ་སེམས་དཔའི་ཆོ་འཕྲུལ་ཡོངས་སུ་བཀོད་པའི་ལེའུ་སྟེ་བདུན་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྡོ་རྗེ་སེམས་དཔའི་སྤྲུལ་པའི་སྐུའི་སྒྲོན་མའི་ཆོ་འཕྲུལ་འཇིག་རྟེན་གྱི་ཁམས་དམ་པར་ཡོངས་སུ་བཀོད་པའི་ལེའུ་སྟེེ་བདུན་པ་གསལ་བར་བཤད་པའོ།། །།

ལེའུ་བརྒྱད་པ་གསང་སྔགས་རང་གི་ངོ་བོ་བསྟན་པ།

༈ གཉིས་པ་སྒྲོན་མའི་གཞི་གསང་སྔགས་རང་གི་ངོ་བོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། ཉིད་ལ་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ལངྐའི་བདག་པོས་དྲིས་པ། གསང་བ་པའི་བདག་པོ་རྡོ་རྗེ་སེམས་དཔའ་ཞེས་དངོས་གང་ལ་བགྱི། གསང་བ་པའི་བདག་པོས་སྨྲས་པ། ལངྐའི་བདག་པོ་རྡོ་རྗེ་སེམས་དཔའ་ནི་སེམས་ཀྱི་དཀྱིལ་འཁོར་འོད་གསལ་བ། གསང་སྔགས་ཀྱི་ངོ་བོ་ཇི་བཞིན་པ་དེ་ཁོ་ན་ཉིད་ལ་བྱའོ།།

ལེའུ་འདིས་ངེས་དོན་སྟོན་ནོ། །དེའང་སྒྲོན་མ་བཀོད་པའི་དུས་སུ་སྤྲུལ་པ་ཐམས་ཅད་རྡོ་རྗེ་སེམས་དཔའི་རྣམ་འཕྲུལ་དུ་བས་ན་དེའི་ངོ་བོ་རང་གང་ཡིན་དྲིས་པ་ལས། དེ་ནི་རྣལ་འབྱོར་དང་པོའི་དོན་ཏེ་སྤྲུལ་པའི་སྒྲོན་མ་འབྱུང་བའི་གཞིའི་ངོ་བོར་བསྟན་པ་སྟེ། དེ་ནས་ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ། རྡོ་རྗེ་སེམས་དཔའ་ཞེས་དངོས་དེ་ཉིད་གང་ལ་༼༡༠༩༽བགྱི་ཞེས་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ། རྡོ་རྗེ་སེམས་དཔའ་ནི་རང་གི་བྱང་ཆུབ་སེམས་ཀྱི་དཀྱིལ་འཁོར་རིལ་ལེན་ཅིང་སྡུད་པས་སྙིང་པོར་གྱུར་པ་ལ་སྒྲིབ་བྱེད་ངང་གིས་བྲལ་བས་འོད་གསལ་བ། ཐུན་མོང་མ་ཡིན་པས་གསང་སྔགས་ཀྱི་ངོ་བོ་མ་བཅོས་པས་ཇི་བཞིན་པ་མ་བསླད་པས་དེ་བཞིན་པ་མ་ནོར་བས་དེ་ཁོ་ན་ཉིད་ལ་བྱའོ་ཞེས་གཞན་ཕྱོགས་བཅད་པ་ཉིད་དུ་བཀའ་སྩོལ་ཏོ།།

གཉིས་པ་རྒྱས་པར་བཤད་པ་ལ་བདུན་ཏེ། རྡོ་རྗེ་སེམས་དཔའི་ངོ་བོ། ངེས་ཚིག མིང་གི་རྣམས་གྲངས། མིང་མ་གྲུབ་པ། མིང་གི་གཞི་མ་གྲུབ་པ། དེ་སྟོང་པ་ཉིད་དུ་གནས་པ། དེ་བྱམས་དང་སྙིང་རྗེ་ལ་གནས་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་གི་ཚིགས་བཅད་རྣམས་མདོར་བསྟན་དུ་བྱས་ཏེ་སྦྱར་དགོས་པས། ལང་ཀའི་བདག་པོ་དེ་ལྟ་བས་ན་འདི་ལྟ་སྟེ། ཞེས་པ་དང༌།

ལངྐའི་བདག་པོ་དེ་ལྟ་བས་ན་འདི་ལྟ་སྟེ།

ཆོས་ཉིད་ནམ་མཁའི། ཞེས་པ་ནས། རྣམ་པར་སྣང༌། །ཞེས་པའི་བར་གྱིས་བསྟན་ཏེ།

ཆོས་ཉིད་ནམ་མཁའི་དཀྱིལ་ཡངས་ནས། །ཡེ་ཤེས་ཉི་མའི་སྐུ་གསལ་བས།།

ཐུགས་རྗེ་སྒྲོན་མའི་འོད་ཟེར་གྱིས། །གཏི་མུག་མུན་བསལ་རྣམ་པར་སྣང་།།

དེ་ཡང་ཚིག་ཤད་ཀྱི་ཚུལ་གྱིས་སྔགས་ཀྱི་མདོ་ཞེས་པ་མིང་འགྲུབ་སྟེ། དོན་ལྷག་པ་མིན་ཀྱང་ལྷུག་པ་དང་ཚིག་ཤད་གཉིས་མདོ་རྒྱས་སུ་འབྱུང་པའི་ཕྱིར་ཏེ་ཆ་མཐུན་འཆད་པ་དག་ཀྱང་སྦྱར་རོ། །དེས་ན་ལང་ཀའི་བདག་པོ་ཞེས་སྡུད་པ་པོ་ལ་བོས་ནས། གཞུང་གི་གོ་རིམ་ལྟར་ན། སྔར་རྒྱས་པར་བསྟན་པའི་ཚུལ་དེ་ལྟ་བས་ན་ཞེས་པར་འགྱུར་ཡང༌། འདིར། མདོར་བསྟན་པ་དང༌། རྒྱས་བཤད་ཆ་མཐུན་དུ་སྦྱར་ཏེ་སྟོན་པ་དེ་ལྟ་བས་ན་མདོར་བརྗོད་པ་འདི་ལྟ་སྟེ། གང་དེ་བཞིན་ཉིད་སྟོང་ལ་ཟད་མི་ཤེས་པ་མེད་ལ་ཐམས་ཅད་འབྱུང་ཞིང་ཁྱབ་པར་སྣང་ལ་མི་འགག་པ་ཆོས་ཉིད་ཀྱི་གནས་ལུགས་ནི་དཔེར་ན་ནམ་མཁའི་དཀྱིལ་ཡངས་ཤིང་དྭངས་པ་ལྟ་བུ་སྟེ་གཞི་ཆོས་ཀྱི་སྐུ་ཡིན་ལ། དེ་ལ་མཐའ་མ་དམིགས་པས་བླ་དྭགས་ཙམ་དུ་མ་ཆུད་པ་མེད་པར་དེ་ཉིད་ཀྱི་ངང་ནས་རང་བྱུང་གི་ཡེ་ཤེས་རིལ་གྱི་དངོས་གཞི་འབྱུང་བའི་གནས་སུ་རང་ཤར་བ་ནི་དཔེར་ན་ཉི་མའི་དཀྱིལ་འཁོར་བཀྲག་དང་ལྡན་པ་ལྟ་བུ་ལོངས་སྤྱོད་རྫོགས་པའི་སྐུ་རུ་གསལ་ལ། དེ་ལྟ་བུའི་བདག་པོའི་རྐྱེན་བྱས་པས་ཐུགས་རྗེ་ཆེན་པོའི་བདག་ཉིད་གང་ལ་གང་འདུལ་དུ་སྤྲོ་བ་ནི་དཔེར་ན་ཀུན་གསལ་སྒྲོན་མ་ཉི་མའི་འོད་ཟེར་རམ་མེ་འོད་དང་འདྲ་བར་སྤྲུལ་པའི་སྐུ་ཉིད་ཀྱིས་གདུལ་བྱའི་རྒྱུད་ཀྱི་གཏི་མུག་གམ་མ་རིག་པ་གཉིས་ཀྱི་མུན་པ་ཐམས་ཅད་ཀ་ནས་བསལ་བའམ་སྦྱངས་པས་རིལ་སྤྱོད་ཡུལ་དག་པ་ཉིད་དུ་རྣམ་པར་སྣང་ཤིང་ཡེ་ཤེས་སུ་གསལ་ལོ།།

གཉིས་༼༡༡༠༽པ་རྒྱས་པར་བཤད་པ་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་སེམས་ཀྱི་དྲིས་ལེན་ནོ། །དང་པོ་ནི།

ཡང་ལང་ཀའི། ཞེས་པ་ནས། མི་འགྱུར་བ་ལ་བྱའོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། ཀྱེ་གསང་བ་པའི་བདག་པོ་སེམས་ཀྱི་དཀྱིལ་འཁོར་ཞེས་བགྱི་བ་ནི་གང་། དེ་བཞིན་དུ་འོད་གསལ་བ་ཞེས་བྱ་བ་དང་། གསང་སྔགས་ཀྱི་ངོ་བོ་ཞེས་བྱ་བ་དང་། ཇི་བཞིན་པ་དེ་བཞིན་པ་དེ་ཁོ་ན་ཉིད་ཅེས་གང་ལ་བྱ། གསང་བ་པའི་བདག་པོས་སྨྲས་པ། ལངྐའི་བདག་པོ་སེམས་ཞེས་བྱ་བ་ནི་མ་བྱས་པ་མ་བཅོས་པ། སྣ་ཚོགས་འབྱུང་བའོ། །དཀྱིལ་འཁོར་ཅེས་བྱ་བ་ནི་ཐིག་ལེ་གང་ཡིན་པ་ཉིད་དོ། །འོད་ཅེས་བྱ་བ་ནི་སྣང་བའོ། །གསལ་བ་ཞེས་བྱ་བ་ནི་གང་མི་ཤེས་པ་ལས་གཞན་གང་གིས་ཀྱང་མ་བསྒྲིབས་པའོ། །གསང་བ་ཞེས་བྱ་བ་ནི་སྨྲར་མེད་པ་སྤྱོད་ཡུལ་དུ་མ་གྱུར་པ་ལ་བྱའོ། །སྔགས་ཞེས་བྱ་བ་ནི་ཡོན་ཏན་གྱི་འབྱུང་གནས་བརྗོད་པ་ལ་བྱའོ། །ངོ་བོ་ཉིད་ཅེས་བྱ་བ་ནི་དངོས་པོ་མེད་པ་མི་དམིགས་པ་ཀུན་འབྱུང་བའི་གཞི་ལ་བྱའོ། །ཇི་བཞིན་པ་ཞེས་བྱ་བ་ནི་མ་བཅོས་མ་བསླད་པ་ལ་བྱའོ། །དེ་བཞིན་པ་ཞེས་བྱ་བ་ནི་མ་བྱས་མ་བཏགས་པ་ལ་བྱའོ། །དེ་ཁོ་ན་ཉིད་ཅེས་བྱ་བ་ནི་མ་ནོར་མི་འགྱུར་བ་ལ་བྱའོ།།

ཡང་ལང་ཀའི་བདག་པོས་དྲིས་པ། ངེས་པར་རྟོགས་ཤིང་ཁོངས་དུ་ཆུད་པར་བྱ་བའི་ཕྱིར་བཞི་པོ་རེ་རེ་ནས་དྲིས་ཏེ། ཀྱེ་གསང་བ་པའི་བདག་པོ། སེམས་ཀྱི་དཀྱིལ་འཁོར་ཞེས་བགྱི་བ་ནི་གང༌། དེ་བཞིན་དུ་འོད་གསལ་བ་ཞེས་བྱ་བ་དང༌། གསང་སྔགས་ཀྱི་ངོ་བོ་ཞེས་བྱ་བ་དང༌། ཇི་བཞིན་པ་དེ་བཞིན་པ་དེ་ཁོ་ཉིད་ཅེས་གང་ལ་བགྱི། ཞེས་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ། གང་རྒྱུ་རྐྱེན་འདུས་པ་ལས་འཕྲལ་དུ་མ་གྲུབ་པའི་ཡེ་ཤེས་ལ་སེམས་ཞེས་བྱ་བ་སྟེ་དེ་ཉིད་ནི་ངོ་བོ་ལ་བྱེད་པ་པོ་ཀ་ནས་དག་པས་མ་བྱས་པ། མཚན་ཉིད་རྒྱུ་རྐྱེན་ལ་རག་མ་ལས་པས་མ་བཅོས་པ། རོལ་པ་ཇི་སྙེད་པའི་ཆོས་སུ་མ་འགགས་པར་རང་ཤར་བས་སྣ་ཚོགས་སུ་འབྱུང་བ་སྟེ། ཁྱུང་ཆེན་ལས། བརྟགས་ན་མེད་ལ་བཞག་ན་སྣ་ཚོགས་འབྱུང་བའི་ལེགས་པ་ཆེ། །དངོས་པོ་མེད་པར་ཆགས་པའི་ཆགས་ལུགས་ཀུན་ལ་སྟོན། །ཞེས་གསུངས་པ་ལྟ་བུའོ། །བདེ་བ་ཆེན་པོ་ཇི་བཞིན་པའི་ཀློང་ལ་མཐའ་དབུས་མེད་པས་དཀྱིལ་འཁོར་ཞེས་བྱ་ནི། རིལ་གྱི་དངོས་གཞི་བས་ཐེག་རིམ་དགུའི་ཐ་སྙད་གཞན་ཐམས་ཅད་འདུས་ལ་མ་དམིགས་པའི་ཕྱིར་ཐིག་ལེ་གང་ཡིན་པ་དཔེར་ན་འབྲས་ཀྱི་ཕུང་པོ་བཞིན་དུ་མར་སྣང་ཡང་གདལ་ཁྱབ་མཉམ་པ་ཉིད་དོ། །དེ་དག་ནི་རྩ་བ་བཞིའི་དང་པོའི་ལན་ནོ། །འོད་ཅེས་བྱ་བ་ནི་གང་དུའང་སྣང་མ་མྱོང་ཡང་ངོ་བོ་དང་དྲི་མ་བྲལ་བས་ཕྱོགས་མེད་ཡེ་ཤེས་ཀྱི་སྣང་བའོ། །གསལ་བ་ཞེས་བྱ་ནི། གང་མ་རིག་པའམ་མི་ཤེས་པ་ལས་གཞན་གང་གིས་ཀྱང་མ་བསྒྲིབས་པས་ངོ་བོས་དེ་ཉིད་ཀྱང་ཡེ་ཤེས་ཆེན་པོའི་དོན་དུ་ངེས་པའོ། །ཞེས་ལན་གཉིས་པའོ། །གསང་བ་ཞེས་བྱ་བ་ནི། ཇི་སྐད་བརྗོད་པ་མཐར་གྱུར་པས་བསྟན་དུ་མི་བཏུབ་པས་སྨྲར་མེད་པ་དང་ཡུལ་ལས་གྲོལ་ཞིང་བརྟགས་པར་དཀའ་བས་སྤྱོད་ཡུལ་དུ་མ་གྱུར་པ་ལ་བྱའོ། །སྔགས་ཞེས་བྱ་བ་ནི་བྱིན་རླབས་ཀྱི་གཞིར་གྱུར་པའི་ཕྱིར་རྒྱལ་བ་ཐམས་ཅད་དང་ཉེ། སྒྲིབ་པ་ཐམས་ཅད་འཇོམས། འབྲས་བུ་ཐམས་ཅད་འཐོབ་པས་ཡོན་ཏན་གྱི་འབྱུང་གནས་སུ་བརྗོད་པ་ལ་བྱའོ། །ངོ་བོ་ཉིད་ཅེས་བྱ་བ་ནི། ངོ་བོ་ཡོངས་སུ་མི་ཟིན་པས་དངོས་པོ་མེད་པ་གཟའ་གཏད་དང་བྲལ་བས་མི་དམིགས་པ་དངོས་པོ་གཉིས་པའི་ཆོས་རྣམས་ཀྱི་རྩ་བར་གྱུར་པས་ཀུན་འབྱུང་བའི་གཞི་ལ་བྱའོ། །ཞེས་གསུམ་པའི་ལན་ནོ། །ཇི་༼༡༡༡༽བཞིན་པ་ཞེས་བྱ་བ་ནི། མིན་པ་ལ་ཡིན་པར་འཕྲལ་དུ་ལམ་པས་གཏན་ཚིགས་ཀྱིས་མ་བསྒྱུར་བས་མ་བཅོས་སྩོལ་བ་དང་བསམ་དཔྱོད་ཀྱིས་སེལ་མ་ཞུགས་པས་མ་བསླད་པ་ལ་བྱའོ། །དེ་བཞིན་པ་ཞེས་བྱ་བ་ནི་ཡེ་ནས་དེ་ཉིད་པས་གློ་བུར་དུ་རྒྱུ་རྐྱེན་གཞན་གྱིས་ངོ་བོ་བསྒྲུབས་པ་མིན་པས་མ་བྱས་པ་མིང་གི་ཐ་སྙད་མ་བཀོལ་བར་སྒྲོ་མ་བཏགས་པས་རང་བྲལ་བའི་དོན་དམ་པ་ལ་བྱའོ། །དེ་ཁོ་ན་ཉིད་ཅེས་བྱ་བ་ནི། དེ་ཉིད་ལ་གོལ་ས་མེད་པས་མ་ནོར། གཉེན་པོས་བྱ་བ་མེད་པས་མི་འགྱུར་བ། འགྲེ་ལྡོག་སྤྱིའུ་ཚུགས་གར་འགྲོས་ཀྱང་སྙིང་པོ་བྱང་ཆུབ་ཉིད་པའི་ཕྱིར་ངོ་བོ་ངེས་པར་གྲུབ་པ་ལ་བྱའོ། །ཞེས་བཞི་པའི་ལན་ནོ།།

གཉིས་པ་བྱེ་བྲག་ཏུ་སེམས་ཀྱི་དྲིས་ལེན་ནི།

ཡང་ལང་ཀའི། ཞེས་པ་ནས། ལྟ་བུའོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། གསང་བ་པའི་བདག་པོ་མ་བྱས་མ་བཅོས་ཞེས་བྱ་བ་ནི་གང་། སྣ་ཚོགས་འབྱུང་བ་ཞེས་བྱ་བ་ནི་ཇི་ལྟ་བུ། གསང་བ་པའི་ བདག་པོས་སྨྲས་པ། ལངྐའི་བདག་པོ་བྱེད་པ་པོ་མེད ་ལ་བྱ་བས་བཙལ་དུ་མེད་པའི་ཕྱིར་མ་བྱས་པའོ། །གཞི་ཇི་བཞིན་པའི་ཕྱིར་མ་བཅོས་པའོ། །གང་མེད་པ་ལས་རྒྱུན་དུ་འབྱུང་ཞིང་ཡུལ་ཐ་དད་པ་ལ་འགྲོ་བ་ལེགས་པ་དང་། ཉེས་པ་དང་། གཉིས་ཀ་མ་ཡིན་པ་སྣ་ཚོགས་འབྱུང་བ་སྟེ། གང་དེ་ཉིད་ནི་ནམ་མཁའ་ལྟ་བུའོ། །དེའི་རྒྱུན་ནི་འབྱུང་བ་སྟེ། སྤྲིན་དང་ཁུ་རླབས་ལྟ་བུ་དང་།

འཇའ་བརླན་ལ་སོགས་པ་ལྟ་བུའོ།།

ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ། མ་བྱས་མ་བཅོས་པ་ཞེས་བྱ་བ་ནི་གང༌། སྣ་ཚོགས་འབྱུང་བ་ཞེས་བྱ་བ་ནི་ཇི་ལྟ་བུ་ཞེས་དྲི་བ་གཉིས་དྲིས་ཏེ་སྔ་མའི་སེམས་ཀྱི་དྲི་བའོ། །གསང་བ་པའི་བདག་པོས་སྨྲས་པ། ལང་ཀའི་བདག་པོ། མ་ལུས་པའི་ཆོས་ཐིག་ལེ་ཆེན་པོར་རྒྱས་ཐེབས་པ་ལ། བྱེད་པ་པོ་མཁན་པོ་མེད་ལ། དེའི་ལས་སུ་བྱ་བས་བཙལ་དུ་མེད་པའི་ཕྱིར་གཉིས་ཀར་ཡང་མ་དམིགས་པས་དེས་ངོ་བོ་ཞིག་བསྒྲུབ་ཏུའང་མི་བཏུབ་པའི་ཕྱིར་མ་བྱས་པའོ། །གཞི་ཕྱི་མོའི་ཆོས་ཉིད་ཅི་བཞིན་པའི་ཕྱིར་གང་དུའང་མ་གཡོས་པས་མ་བཅོས་པའོ། །གང་རང་གི་ངོ་བོ་བསྟན་དུ་མེད་པ་ལས་རང་བཞིན་ཐམས་ཅད་པའི་ཕྱིར་རྒྱུན་དུ་འབྱུང་ཞིང་དུས་གསུམ་རིལ་དུ་མཚན་མ་ཐ་དད་ཐམས་ཅད་ལ་ཞེན་པས་མ་བསྒོས་པར་ཁྱབ་གདལ་དུ་འགྲོ་བ་ལེགས་པ་དགེ་བ་དང༌། ཉེས་པ་སྡིག་པ་དང་གཉིས་ཀ་མ་ཡིན་པ་ལུང་དུ་མ་བསྟན་པ་སྟེ་དངོས་པོ་གཞི་གསུམ་གྱི་བསྡུས་པས་ཐ་དད་སྣ་ཚོགས་པར་རང་བྱུང་བའམ་སྣང་བའི་ཕྱིར་རང་བཞིན་ཀུན་ཏུ་གསལ་བའི་དབྱིངས་ཏེ་རྣམ་ཤེས་དགུ་པ་གང་དེ་ཉིད་ནི་དཔེ་ནམ་མཁའ་ལྟ་བུའོ། །དེའི་རྒྱུན་ནམ་སྦྱོར་བ་དོན་གྱི་ཀུན་གཞི་ནི་དེ་ཉིད་དུས་གསུམ་གྱི་རྒྱུན་དུ་སྣང་བས་ནམ་མཁའ་ལས་ཆོ་འཕྲུལ་འབྱུང་བ་ལྟ་བུ་སྟེ་གློ་བུར་བའི་ཕྱིར་རོ། །དེ་ལས་སོ་སོར་སྣང་བ་ཉོན་ཡིད་སྤྲིན་ལྟ་བུ་དང༌། ཡིད་ཤེས་ཁུ་རླངས་ལྟ་བུ་དང༌། སྒོ་ལྔ་འཇའ་ཚོན་ལ་སོགས་པ་ལྟ་བུའོ། །ཕྱི་མ་འདི་ལ་འཇའ་རླན་ཡང་སྣང་ངོ་།།

གཉིས་པ་ངེས་ཚིག་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ང་ོབོ་དང་མཐུན་པ་ལས་ཚིག་གཞན་མེད་ཀྱང༌། ཆོས་ཉིད་སྐུ་གསུམ་༼༡༡༢༽དབྱེར་མེད་འདུས་མ་བྱས་པའི་ངོ་བོ་ཡེ་ཤེས་སུ་གསལ་བས་མ་རིག་པ་གཉིས་པོ་བག་ཆགས་དང་བཅས་པ་ཟིལ་གྱིས་གནོན་པས་ངེས་ཚིག་གི་གོ་དོན་བླང་ངོ༌།།

གཉིས་པ་རྒྱས་པར་བཤད་པ་ནི།

ཡང་དྲིས་པ། ཞེས་པ་ནས། ཞེས་བྱའོ། །ཞེས་པའི་བར་གྱིས་བསྟན་ཏེ།

ཡང་དྲིས་པ། གསང་བ་པའི་བདག་པོ་དེ་ལ་ཅིའི་ཕྱིར་རྡོ་རྗེ་སེམས་དཔའ་ཞེས་བགྱི། སྨྲས་པ། ལངྐའི་བདག་པོ་དེ་ཁོ་ན་ཉིད་ཇི་བཞིན་པ་དེ་ནི། ཐམས་ཅད་ནས་ཐམས་ཅད་དུ་གཉེན་པོ་མེད་པ། འཕོ་འགྱུར་མེད་པ། སྐྱེ་འགག་མེད་པ། དེ་ཁོ་ན་ཉིད་སེམས་རང་རིག་པ། དགོངས་པ་ངེས་པར་འགྲེལ་པ་ལས། ཆོ་འཕྲུལ་སྣ་ཚོགས་འབྱུང་བའི་དངོས་པོ་མེད་པ་ཉིད་དུ་བཅོམ་པའི་ཕྱིར་རྡོ་རྗེ་སེམས་དཔའ་ཞེས་བྱའོ།།

ངེས་ཚིག་དྲི་བའི་ཕྱིར་ཡང་དྲིས་པ། གསང་བ་པའི་བདག་པོ་དེ་ལ་ཅིའི་ཕྱིར་རྡོ་རྗེ་སེམས་དཔའ་ཞེས་བགྱི། སྨྲས་པ། ལང་ཀའི་བདག་པོ་དེ་ཁོ་ན་ཉིད་ཅི་བཞིན་པ་དེ་ནི་གཏན་ཚིགས་བདུན་གྱིས་རྡོ་རྗེ་སེམས་དཔའ་ཞེས་སུ་འགྲུབ་སྟེ། རྡོ་རྗེ་སེམས་དཔའ་མ་བསླད་པའི་དེ་བཞིན་ཉིད་ཆེན་པོ་ནི་དུས་སྔ་ཕྱི་ཐམས་ཅད་ནས་ཐམས་ཅད་དུ་དེ་བཤིག་པ་པོས་གཉེན་པོ་ མེད་པ་དང༌། བདག ་གཞན་གྱི་སྤྲོས་པ་དང་བྲལ་བས་འཕོ་འགྱུར་མེད་པ། རྒྱུ་རྐྱེན་ལས་འདས་པས་སྐྱེ་འགག་མེད་པ། མ་ནོར་མི་འགྱུར་བས་དེ་ཁོ་ན་ཉིད་དང༌། མི་གཡོ་ཞིང་མ་བསྒྲིབས་པར་གསལ་བས་སེམས་རང་རིག་པ། དོན་ཆེན་པོ་ཇི་ལྟ་བར་ཡེ་མངོན་དུ་བྱས་པའི་ངོ་བོར་གྱུར་པས་དགོངས་པ་ངེས་པར་འགྲེལ་པ་ལས། ཆོ་འཕྲུལ་སྣ་ཚོགས་འབྱུང་བའི་མཚན་གཞི་ཅིར་ཡང་སྣང་བ་རིལ་མཉམ་པ་ཆེན་པོར་མ་བཀག་ལ་མ་དམིགས་པར་གཏན་ནས་སྦྱངས་པའམ་དངོས་པོ་མེད་པ་ཉིད་དུ་བཅོམ་པའི་ཕྱིར་རྡོ་རྗེ་སེམས་དཔའ་ཞེས་བྱ་བའི་མཚན་ངེས་པར་བསྟན་པའོ། །དང་པོ་ནས་གསུམ་པའི་བར་ནི་མཚན་དང་པོའི་དོན་དང༌། བཞི་པ་ནས་དྲུག་པའི་བར་ནི་བར་པའི་དོན་དང༌། ཐ་མ་ནི་ཐ་མའི་དོན་ཏོ།།

གསུམ་པ་མིང་གི་རྣམ་གྲངས་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

མཐའ་ཡས། ཞེས་པ་ནས། ཆོས་རྣམས་ཀུན། །ཞེས་པའི་བར་རྐང་པ་གཉིས་ཀྱིས་བསྟན་ཏེ།

མཐའ་ཡས་མིང་དུ་བཏགས་པ་ཡི། །ཡོད་མཐོང་སྣང་གྲགས་ཆོས་རྣམས་ཀུན།།

མཐའ་ཡས་པའི་མིང་དུ་བཏགས་ཏེ་ཞེན་ཡུལ་དུ་སྣང་བ་ཡི་དངོས་པོ་བཟང་ངན་གྱི་ཡུལ་དྲུག་ལ་སོགས་པ་ཡོད་མཐོང་སྣང་གྲགས་ཀྱི་ཆོས་རྣམས་ཀུན་ཀྱང་གཉིས་མེད་ཀྱི་ངོ་བོ་ལས་མ་བཀོལ་བས་མ་འདྲེས་ལ་ཡོངས་སུ་རྫོགས་པའོ།།

གཉིས་པ་རྒྱས་པར་བཤད་པ་ནི།

ལང་ཀའི། ཞེས་པ་ནས༌། ཞེས་ཀྱང་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ནི་བླ་ན་མེད་པའི་བྱང་ཆུབ་ཀྱི་སེམས་ཞེས་ཀྱང་བྱའོ། །ཆོས་རྣམས་ཀྱི་ཆོས་ཉིད་དེ་བཞིན་ཉིད་ཅེས་ཀྱང་བྱའོ། །སེམས་ཀྱི་སྟོང་པ་ཉིད་ཅེས་ཀྱང་བྱའོ། །མཐའ་ལས་འདས་པ་ཞེས་ཀྱང་བྱའོ།།

དབུ་མར་མི་དམིགས་པ་ཞེས་ཀྱང་བྱའོ། །སངས་རྒྱས་ཀུན་གྱི་དངོས་གཞི་ཞེས་ཀྱང་བྱའོ།།

སྤྲུལ་པ་ཀུན་གྱི་འབྱུང་གནས་ཞེས་ཀྱང་བྱའོ། །སངས་རྒྱས་ཀུན་གྱི་དགེ་བའི་བཤེས་གཉེན་ཞེས་ཀྱང་བྱའོ།།

ཞིང་ཁམས་ཀུན་གྱི་སྒྲོན་མ་ཞེས་ཀྱང་བྱའོ། །ཐུགས་རྗེ་ཐབས་ཀྱི་འབྱུང་གནས་ཞེས་ཀྱང་བྱའོ།།

ཆོས་ཐམས་ཅད་ཀྱི་གཟུགས་བརྙན་སྣང་བ་ཞེས་ཀྱང་བྱའོ།།

རྡོ་རྗེ་སེམས་དཔའི་མཚན་སྒྲ་དུ་མར་སྣང་བའི་རྩ་བ་བཅུ་གཅིག་བསྟན་པ་གང་ཞེ་ན། ལང་ཀའི་བདག་པོ། རྡོ་རྗེ་སེམས་དཔའི་དེ་ཁོ་ན་ཉིད་དེ་ལ་ནི་ཆེ་བ་རིལ་གྱི་བདག་ཉིད་པས་བླ་ན་མེད་པ། ཟླ་མེད་ཅིང་དྲི་མ་མ་སྤངས་ལ་དག་པས་བྱང༌། ཡོན་ཏན་རང་སྣང་དུ་ལྷུན་གྱིས་གྲུབ་པས་ཆུབ། གཉིས་མེད་ཀྱི་ངོ་བོ་གསལ་ལ་མི་གཡོ་བས་སེམས་ཞེས་ཀྱང་བྱའོ། །བཤད་མ་ཐག་པ་ལྟར་ཆོས་བཞིས་བསྡུས་པ་རིལ་གྱི་ངོ་བོ་ཕྱོགས་རིས་དང་བྲལ་བས་ཆོས་རྣམས་ཀྱི་ཆོས་ཉིད་མ་བཅོས་པ་ཆེན་པོའི་ཕྱིར་དེ་བཞིན་ཉིད་ཅེས་ཀྱང་བྱའོ། །༼༡༡༣༽ངོ་བོ་མ་སྤངས་ལ་མ་གྲུབ་པའི་ཕྱིར་སེམས་ཀྱི་སྟོང་པ་ཉིད་ཅེས་ཀྱང་བྱའོ། །ཚིག་གིས་བརྗོད་དུ་མི་བཏུབ་ཅིང་གང་ལའང་མི་གནས་པས་མཐའ་ལས་འདས་པ་ཞེས་ཀྱང་བྱའོ། །མཐའ་མི་སྤོང་ཞིང་དབུས་ཡུལ་དུ་མི་བྱེད་པས་དེ་ཉིད་དུའང་འཛིན་པ་དང་བྲལ་བས་དབུ་མར་མི་དམིགས་པ་ཞེས་ཀྱང་བྱའོ། །ནོར་བུ་རིན་པོ་ཆེ་ལྟར་རྒྱལ་བ་རིལ་གྱི་ངོ་བོར་བཞུགས་ཏེ་གང་མོས་སུ་སྣང་བས་སངས་རྒྱས་ཀུན་གྱི་དངོས་གཞི་ཞེས་ཀྱང་བྱའོ། །འགྲོ་འོང་མེད་པར་ཇི་ལྟར་འདུལ་བ་བཞིན་རང་སྣང་བས་སྤྲུལ་པ་ཀུན་གྱི་འབྱུང་གནས་ཞེས་ཀྱང་བྱའོ། །སངས་རྒྱས་ཀུན་འདིས་གྲོལ་བར་བྱེད་པས་སངས་རྒྱས་ཀུན་གྱི་དགེ་བའི་བཤེས་གཉེན་ཞེས་ཀྱང་བྱའོ། །རྟོགས་ན་མུན་པ་སེལ་ཞིང་སྤྲུལ་པ་ཐམས་ཅད་པ་ཡིན་པས་ཞིང་ཁམས་ཀུན་གྱི་སྒྲོན་མ་ཞེས་ཀྱང་བྱའོ། །བྱིན་རླབས་མི་འགོག་པར་ཅིར་ཡང་འཆར་ལ་རང་སྣང་ཡེ་ཤེས་ཆེན་པོས་ཟིན་པས་ཐུགས་རྗེ་ཐབས་ཀྱི་འབྱུང་གནས་ཞེས་ཀྱང་བྱའོ། །ཕྲ་བཀོད་ལས། སེམས་ནི་གཟུགས་བྲལ་གཟུགས་ཀྱང་རྫོགས། །ཞེས་གསུངས་པའི་དོན་ལྟར། རིལ་མ་འདྲེས་པར་ཡོངས་སུ་རྫོགས་པའི་ཕྱིར་ཆོས་ཐམས་ཅད་ཀྱི་གཟུགས་བརྙན་སྣང་བ་ཞེས་ཀྱང་བྱའོ།།

བཞི་པ་མིང་མ་གྲུབ་པ་ལ་གསུམ་སྟེ། མིང་བླ་དྭགས་ཡིན་པ། བླ་དྭགས་བློ་བུར་བ་ཡིན་པ། དེས་ན་མིང་མ་གྲུབ་པར་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

བླ་དྭགས་ཙམ་དུ་བཏགས་པར་ཟད། །ཅེས་པས་བསྟན་ཏེ།

བླ་དྭགས་ཙམ་དུ་བཏགས་པར་ཟད།།

འཁོར་འདས་ཀྱི་ཆོས་རིལ་ཅིའང་མ་ཡིན་པ་ལས་བླ་དྭགས་ཙམ་དུ་ཅིར་ཡང་བཏགས་པ་ལྟར་སྣང་བར་ཟད་དེ་ངོ་བོ་མི་ཟིན་པའོ།།

གཉིས་པ་རྒྱས་པར་བཤད་པ་ནི།

ལང་ཀའི། ཞེས་པ་ནས། རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ཀྱང་གང་གི་དོན་དུ་དེ་ལྟར་བཏགས་ཀྱི། དེ་ཁོ་ན་ཉིད་ལ་ནི་མིང་དུ་བཏགས་ པ་མེད་དེ།

དེ་དག་ནི་བླ་དྭགས་ཉིད་དུ་རིག་པར་བྱའོ།།

ལང་ཀའི་བདག ་པོ། མཚན་དེ་དག་བསྟན་པའི་དགོས་ཆེད་ཀྱང་མོས་པ་ཅན་དྲང་བ་གང་གི་དོན་དུ་རིགས་ཐ་དད་ནས་བྱ་བའི་སྒོར་དེ་ལྟར་བཏགས་ཀྱི། དེ་ཁོ་ན་ཉིད་ཀྱི་ངོ་བོ་ལ་ནི་མིང་དུ་བཏགས་པ་མེད་དོ། །དེས་ན་གློ་བུར་བ་དང་ལྷག་པར་འབྱུང་བ་དེ་དག་ནི་བླ་དྭགས་ཉིད་དུ་རིག་ཅིང་རྟོགས་པར་བྱའོ། །ཞེས་གདམས་སོ། །ལང་ཀའི་བདག་པོ། དེའི་ཕྱིར་ན་སངས་རྒྱས་སུ་བཏགས་པ་ནི་བླ་དྭགས་སོ། །ཆོས་ཀྱང་བླ་དྭགས་སོ། །བྱང་ཆུབ་ཀྱང་བླ་དྭགས་སོ། །དེ་བཞིན་དུ་དབྱིངས་དང་ཡེ་ཤེས་དང་ཆོས་ཀྱི་སྐུ་དང་སྐུ་ཐ་དད་པ་དང༌། ཁམས་གསུམ་གྱི་སེམས་ཅན་དང༌། འཇིག་རྟེན་བརྟན་གཡོ་ལ་སོགས་པ་མིང་ཐ་དད་དུ་བཏགས་པ་ལྟར་ཆགས་པར་སྣང་བ་ཇི་སྙེད་པ་དག་ཐ་སྙད་ཀྱི་བླ་དྭགས་འབའ་ཞིག་ཏུ་རིག་པར་བྱའོ།།

༼༡༡༤༽གཉིས་པ་བླ་དྭགས་བློ་བུར་བ་ཡིན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

མི་སྣང་བ་ལས། ཞེས་པ་ནས། གློ་བུར་སྣང༌། །ཞེས་པའི་བར་རྐང་པ་གཉིས་ཀྱིས་བསྟན་ཏེ།

མི་སྣང་བ་ལས་ཀུན་སྣང་བ། །ཐམས་ཅད་ཐམས་ཅད་བློ་བུར་སྣང་།།

ཆོས་ཉིད་བྱང་ཆུབ་ཀྱི་སེམས་ནི་མཐའ་གང་དུའང་སྣང་མ་མྱོང་བས་མི་སྣང་བ་ལས་ཐམས་ཅད་ཀུན་གྱི་དངོས་གཞི་བས་ཞེན་པས་ཇི་ལྟར་བསམ་པ་ལྟར་སྣང་བ་ལ་འཁོར་བ་ཐམས་ཅད་དང་མྱང་འདས་ཐམས་ཅད་དེ་བཟང་ངན་རིལ་བཤད་པ་ལྟར་ལྟོས་པའི་གློ་བུར་དུ་སྣང་བ་ཁོ་ནའོ།།

གཉིས་པ་རྒྱས་པར་བཤད་པ་ནི།

ལང་ཀའི། ཞེས་པ་ནས། བླ་དྭགས་སུ་རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེའི་ཕྱིར་ན་སངས་རྒྱས་ནི་བླ་དྭགས་སོ། །ཆོས་ཀྱང་བླ་དགས་སོ། །བྱང་ཆུབ་ཀྱང་བླ་དྭགས་སོ། །དེ་བཞིན་དུ་དབྱིངས་དང་། ཡེ་ཤེས་དང་། ཆོས་ཀྱི་སྐུ་དང་། སྐུ་ཐ་དད་པ་དང་། སེམས་ཅན་དང་། འཇིག་རྟེན་ལ་སོགས་པ་ཐམས་ཅད་དུ་བཏགས་ཤིང་ཆགས་པ་ཇི་སྙེད་པ་དག་བླ་དྭགས་འབའ་ཞིག་ཏུ་རིག་པར་བྱའོ། །ལངྐའི་བདག་པོ་བླ་དྭགས་གང་ཡིན་པ་དེ་ནི་བློ་བུར་དུ་བཏགས་པ་སྟེ། ཡེ་ནས་ལྡན་པ་ནི་མ་ཡིན་ནོ། །ལངྐའི་བདག་པོ་གལ་ཏེ་ཡེ་ནས་ལྡན་པ་ཞིག་ཡིན་ན་ནི། གང་བློ་བུར་བ་ཐམས་ཅད་མི་འབྱུང་བར་འགྱུར་རོ། །ལངྐའི་བདག་པོ་བློ་བུར་ནི་སྤྲིན་བཞིན་ཏེ་ཐེར་ཟུག་པ་མ་ཡིན། ཡེ་ནས་ལྡན་པ་མ་ཡིན། བརྟག་བཟོད་པ་མ་ཡིན་ནོ། །ལངྐའི་བདག་པོ་དེའི་ཕྱིར་མིང་དང་། བརྡ་དང་། ཐ་སྙད་དང་། མཚན་མ་དང་། བཏགས་པ་དང་། ལས་དང་། ལས་ཀྱི་རྣམ་པར་སྨིན་པ་ཐམས་ཅད་ནི་བློ་བུར་བ་སྟེ། འབྱུང་བ་དང་། སངས་པ་དང་། སྒྲིབ་པ་དང་། དང་བར་རིག་པར་བྱའོ། །ལངྐའི་བདག་པོ་གལ་ཏེ་ལས་དང་ལས་ཀྱི་རྣམ་པར་སྨིན་པ་ལ་སོགས་པ་གློ་བུར་དུ་བཏགས་པ་ཡོད་ན་ནི། དེ་བཞིན་ཉིད་ཅེས་བྱ་བ་དེ་དེ་ལྟར་མི་རུང་བ་ཞིག་ན། ལངྐའི་བདག་པོ་དེ་བཞིན་ཉིད་དེ་ནི་གང་གི་དབང་དུ་མི་འགྱུར་བའི་བླ་དྭགས་སུ་རིག་པར་བྱའོ།།

བླ་དྭགས་ཀྱི་མཚན་ཉིད་བསྟན་པའི་ཕྱིར་ལང་ཀའི་བདག་པོ། བླ་དྭགས་གང་ཡིན་པ་ནི་གློ་བུར་དུ་བཏགས་ཏེ་དེ་བཞིན་ཉིད་ལ་རྟོག་ཀྱང་དངོས་པོ་གཉིས་ཡེ་ཐོག་མ་ནས་ལྡན་པ་ཅན་ནི་མ་ཡིན་ནོ། །བླ་དྭགས་ཀྱི་མཚན་ཉིད་དེ་ལས་གཞན་ཞིག་ལྡན་པའི་སྐྱོན་ནི། ལང་ཀའི་བདག་པོ་གལ་ཏེ་བླ་དྭགས་ཉིད་ཡེ་ནས་ལྡན་པ་དེ་བཞིན་ཉིད་དང་མཚུངས་སྟེ་གློ་བུར་བ་མ་ཡིན་པ་ཞིག་ན་ནི། གང་གློ་བུར་བ་འཁོར་འདས་དང་དགེ་སྡིག་ལ་སོགས་པ་དངོས་པོ་གཉིས་པའི་ཆོས་ཐམས་ཅད་མི་འབྱུང་བར་སྣང་བ་གོ་འགག་པ་དང༌། སྒྲིབ་པ་སྦྱངས་ཀྱང་དག་པར་མི་ནུས་པའི་སྐྱོན་དུ་འགྱུར་རོ།།

ལང་ཀའི་བདག་པོ། གློ་བུར་གྱི་མཚན་ཉིད་ནི་དཔེར་ན་སྤྲིན་བཞིན་ཏེ། ཐེར་ཟུག་ཏུ་གནས་པ་མ་ཡིན། ཡེ་ནས་ལྡན་པ་མ་ཡིན། བརྟགས་བཟོད་པ་མ་ཡིན་པའི་གཏན་ཚིགས་གསུམ་གྱིས་ངེས་པ་ཡིན་ནོ། །ལང་ཀའི་བདག་པོ། དེ་ལྟར་གློ་བུར་གྱི་ངོ་བོ་ཡིན་པ་དེའི་ཕྱིར། མིང་གིས་བཏགས་པའི་ཆོས་རྣམས་དང༌། བརྡ་ཡིས་མཚོན་ཏེ་14ཞེན་བློས་ཕྱི་རོལ་དུ་སྣང་བའི་མཐུ་ཅན་དག་དང༌། མིང་ཙམ་པ་དེའི་སྒྲའི་སྤྱི་ཚིག་གི་ཐ་སྙད་དང༌། འདུ་ཤེས་ཀྱིས་མཚན་མ་སྣ་ཚོགས་སུ་གདུང་བ་དོན་གྱི་སྤྱི་དང༌། སྒྲ་རང་གི་མཚན་ཉིད་བློས་ངང་གིས་བརྟགས་ཏེ་རྗོད་བྱེད་དུ་བཏགས་པ་དང༌། བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བའི་ལས་གསུམ་དང༌། ལས་ཀྱི་རྣམ་པར་སྨིན་པ་ཁམས་གསུམ་ལ་སོགས་པ་ཐམས་ཅད་ནི་ངོ་བོ་གློ་བུར་བ་སྟེ། དེའི་མཚན་ཉིད་ཞེན་པ་པོ་ལ་རྒྱུ་རྐྱེན་ལས་འབྱུང་བར་སྣང་བ་དང༌། ཞེན་པས་འདོག་པ་དེ་ཉིད་དག་པས་སངས་བར་གྱུར་པ་དང༌། དོན་མཐོང་དུ་མི་སྟེར་བས་སྒྲིབ་པ་དང༌། མཚན་མ་དེ་ཉིད་འབྱོངས་པས་སྒྲིབ་པ་རྣམས་རང་སར་དྭང་བར་རིག་པར་བྱ་སྟེ་གློ་བུར་གྱི་གཏན་ཚིགས་བཞིར་འགྱུར་བའོ།།

འོ་ན་གོང་གི་དཀོན་མཆོག་གསུམ་ལ་སོགས་པ་ནི་བསྒྲུབ་བྱ་ཉིད་པས་གློ་བུར་དུ་མི་འགྱུར་རོ་༼༡༡༥༽ཞེ་ན། དེ་དག་ནི་ངོ་བོ་ཉིད་མ་སྤངས་བྲལ་བའི་ཕྱིར། ལམ་པས་དེར་འདོད་ན་ཆེད་དུ་བྱས་པའི་ཞེན་པ་སྟེ། ཆུ་བོ་བརྒལ་བའི་གྲུ་བཞིན་དེ་དག་ཏུ་འཛིན་པ་ཉིད་ཀྱང་འདོར་བར་རིགས་པའི་ཕྱིར་རོ། །གློ་བུར་མིན་ན་སྐྱོན་གསུམ་བཤད་པ་དེའི་ངོ་བོ་བསྟན་པའི་ཕྱིར་ལང་ཀའི་བདག་པོ་གལ་ཏེ་རྒྱུ་ལས་དང་འབྲས་བུ་ལས་ཀྱི་རྣམ་པར་སྨིན་པ་ལ་སོགས་པ་ཆོས་དེ་རྣམས་གློ་བུར་དུ་མ་བཏགས་པར་གྱུར་ན་ནི་དེ་བཞིན་ཉིད་དམ་དེ་ཁོ་ན་ཉིད་ཀྱང་དྲི་མ་ཅན་པས་མཚན་ཉིད་གོང་དུ་བཤད་པ་དེ་ལྟར་གནས་ལུགས་སུ་མི་རུང་བ་ཞིག་ཏུ་འགྱུར་ན་ཡང༌། ལང་ཀའི་བདག་པོ། དེ་བཞིན་ཉིད་དེ་ནི་ཕྱི་མོའི་ཆོས་ཉིད་གང་གི་དབང་དུ་ཡང་མི་འགྱུར་བའི་བླ་དྭགས་སུ་རིག་པར་བྱའོ།།

གསུམ་པ་དེས་ན་མིང་མ་གྲུབ་པར་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ཉིད་ལ་ནི། ཞེས་པ་ནས། བརྗོད་པ་མེད། །ཅེས་པའི་བར་གྱིས་བསྟན་ཏེ།

དེ་ཉིད་ལ་ནི་སངས་རྒྱས་དང་། །བྱང་ཆུབ་ཆོས་ཉིད་ལ་སོགས་པའི།།

ཐ་སྙད་མིང་གི་བླ་དགས་རྣམས། །མིང་མེད་ཚིག་ཏུ་བརྗོད་པ་མེད།།

གསང་སྔགས་དེ་ཁོ་ན་ཉིད་ལ་ནི་ཡེ་ནས་རྣམ་པ་མ་དམིགས་པས་སངས་རྒྱས་དང༌། བྱང་ཆུབ་དང་ཆོས་ཉིད་ལ་སོགས་པའི་སྒོ་ནས་ཐ་དད་དུ་བཏགས་པའི་མིང་གི་བླ་དྭགས་འདི་རྣམས་མིང་གི་ཐ་སྙད་ཙམ་དུའང་གྲུབ་པ་མེད་པས་དེ་ལྟར་ཚིག་ཏུ་བརྗོད་དེ་སྨྲ་བའང་དོན་ལ་མེད་དོ།།

གཉིས་པ་རྒྱས་པར་བཤད་པ་ནི།

ལང་ཀའི། ཞེས་པ་ནས། ཆད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེའི་ཕྱིར་ཆོས་ཐམས་ཅད་ནི་མིང་མེད། ཚིག་མེད། བརྗོད་དུ་མེད། ཚིག་གི་ལམ་ཆད་པའོ།།

ལང་ཀའི་བདག་པོ། བཤད་པ་བཞིན་གཏན་ཚིགས་ཀྱི་གྲུབ་པ་དེའི་ཕྱིར་ཆོས་ཐམས་ཅད་ཀྱི་དངོས་པོ་གཤིས་ཀྱི་གནས་ལུགས་ནི་ཡེ་ཇི་བཞིན་པའི་ངང་ཉིད་དེ་མིང་གི་རྣམ་པས་བཏགས་པ་མེད་ལ། སྒྲ་ཉིད་མ་དམིགས་པས་ཚིག་གི་མཚོན་པར་བྱེད་པ་མེད་ཅིང་ངོ་བོ་གང་དུའང་ལྡན་པ་མེད་པ་ལ་ཚིག་གིས་བརྗོད་དེ་བསྟན་དུ་མེད་པས་ངོ་བོ་ཉིད་ནི་གང་གིས་ཀྱང་མཚོན་པར་མི་ནུས་པར་ཚིག་ལམ་ཆད་དེ་བསམ་བརྗོད་དང་བྲལ་བའོ།།

ལྔ་པ་མིང་གི་གཞི་མ་གྲུབ་པ་ལ་གཉིས་ཏེ། གཞིའི་དོན་ཙམ་དུའང་མ་གྲུབ་པ། ཐ་སྙད་སྣ་ཚོགས་དེ་ཁོ་ན་ཉིད་ལ་མེད་ཀྱང་བློ་ཆུང་བའི་དབང་དུ་བསྟན་པའོ། །དང་པོ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི།

དེ་ལ་དངོས་གཞི་ག་ལ་ཡོད། །ཅེས་པས་བསྟན་ཏེ།

དེ་ལ་དངོས་གཞི་ག་ལ་ཡོད།།

ངོ་བོ་དེ་ལ་དངོས་གཞི་རང་རྒྱུད་དུ་གྲུབ་པ་ག་ལ་ཡོད་དེ་གཞིའི་དོན་ཙམ་དུའང་མ་གྲུབ་པས་སོ།།

གཉིས་པ་རྒྱས་པར་བཤད་པ་ནི།

སྨྲས་པ། ཞེས་པ་ནས། མི་བརྙེས་སོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ་གང་མིང་དུ་བཏགས་པའི་གཞི་ལ་གཞིའི་དོན་ཙམ་དུ་ཡང་མི་རྟོག་གམ། སྨྲས་པ། ལངྐའི་བདག་པོ་གཞིའི་དོན་ཙམ་དུ་ཡང་མི་རྟོག་རྣམ་པར་མི་རྟོག་གོ །དེ་ཅིའི་ཕྱིར་ཞེ་ན། གཞིའི་དོན་ཙམ་ཞིག་ནི་འདི་ཞེས་སངས་རྒྱས་ཉིད་ཀྱིས་བཙལ་ཀྱང་མི་རྙེད་དོ།།

ལང་ཀས་ཇི་བཞིན་པ་ཉིད་དུ་བློས་གཟུང་དུ་ཡོད་ མེད་དྲིས་པ་བསྟན་པའི་ཕྱིར། སྨྲས་པ་གསང་བ་པའི་བདག ་པོ། གང་མིང་དུ་བཏགས་པའི་གཞི་ཅི་བཞིན་པ་ཉིད་ལ་བཏགས་པ་བྲལ་བའི་གཞིའི་དོན་ཙམ་དུ་ཡང་རྣམ་པར་མི་རྟོག་གམ། ཞེས་དྲིས་པ་ན། སྨྲས་པ་༼༡༡༦༽ལང་ཀའི་བདག་པོ། གཞི་ཅི་བཞིན་པའི་ངང་ལ་རྟོག་བྱ་རྟོག་བྱེད་ལ་དམིགས་པས་གཞིའི་དོན་ཙམ་ཉིད་དུ་རྟོག་ན་ཡང་ནད་ཡིན་པའི་ཕྱིར་སྤྱིར་མི་རྟོག་བྱེ་བྲག་ཏུ་རྣམ་པར་མི་རྟོག་གོ །དེ་ཅིའི་ཕྱིར་ཞེ་ན། དེ་ལས་གཞན་པའི་གཏན་ཚིགས་ཀྱིས་དེའི་ངོ་བོ་ལ་ལྡན་པར་མི་རྙེད་པའི་ཕྱིར། གཞིའི་དོན་ཙམ་ཞིག་ནི་དེ་ལྟ་བུ་ཞེས་སངས་རྒྱས་ཉིད་ཀྱིས་བཙལ་ཡང་མི་བརྙེས་ཏེ་ངོ་བོ་ལ་གཉིས་སུ་མེད་ཅིང་ངོས་གཟུང་དང་བྲལ་བས་སོ། །ཞེས་བཀའ་སྩོལ་ཏོ།།

གཉིས་པ་ཐ་སྙད་སྣ་ཚོགས་དེ་ཁོ་ན་ཉིད་ལ་མེད་ཀྱང་བློ་ཆུང་བའི་དབང་དུ་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གང་ལ་མིང་དུ། ཞེས་པ་ནས། སྣང་བ་ཡིན། །ཞེས་པའི་བར་རྐང་པ་གསུམ་དང༌།

གང་ལ་མིང་དུ་བཏགས་པའི་གཞི། །མེད་རྒྱུ་བཏགས་ཆགས་བསྒྲུབ་འགྲུབ་ཅིང་། །གང་དུ་ལྟས་པར་སྣང་བ་ཡིན།།

སངས་རྒྱས། ཞེས་པ་ནས། བསྟན་ཕྱིར་བཏགས། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

སངས་རྒྱས་མེད་ལས་སངས་རྒྱས་དང་། །བྱང་ཆུབ་ཆོས་ཉིད་ལ་སོགས་པ།།

ཐ་སྙད་མིང་གི་བླ་དགས་རྣམས། །མི་ཤེས་རྨོངས་ལ་བསྟན་ཕྱིར་བཏགས།།

འོ་ན་གང་མེད་པ་ལས་སྣང་ན་རི་བོང་གི་རྭ་དང་ནམ་མཁའི་མེ་ཏོག་ཀྱང་འབྱུང་བར་རིགས་སོ་ཞེ་ན། དེ་ཁོ་ན་ཉིད་གང་ལ་སྣང་བ་ཐ་དད་ལྟར་མིང་དུ་མ་སྣ་ཚོགས་སུ་བཏགས་པའི་གཞི་ནི། མཚན་ཉིད་ཐམས་ཅད་པ་ལ་མཚན་ཉིད་མེད་པ། རྣམ་པ་ཀུན་ལྡན་རྣམ་པ་བྲལ་བ། བརྗོད་པ་ཀུན་འབྱུང་བརྗོད་པ་མེད་པ་ནི། གང་ཡང་མ་བཀོལ་བས་རྣམ་པའི་ཕྱོགས་བྲལ་བའི་ཕྱིར་ངོ་བོ་དངོས་པོར་མེད་ཅིང་ལྷུན་གྱིས་གྲུབ་པའི་རྒྱུ་ལས་ཇི་ལྟར་བཏགས་ཤིང་བསྙད་པ་ལྟར་ཆགས་ལ་བསྒྲུབ་པ་ལྟར་འགྲུབ་ཅིང༌། བསམ་པས་གང་དུ་བལྟས་པར་སྣང་སྟེ་ཀུན་ཏུ་བཏགས་པའི་ངོར་མཚན་མ་ལྟར་ཡོད་པ་ཡིན་པས་རི་བོང་གི་རྭ་དང་མི་མཚུངས་ཏེ། ནམ་མཁའ་ཆེ་ལས། རང་བཞིན་གཅིག་ཏུ་མ་ངེས་པས། །ཇི་ལྟར་བལྟས་པ་དེ་ལྟར་སྣང༌། །ཞེས་དང༌། ཀུན་འདུས་ལས།

མདོར་ན་ཇི་ལྟར་བཏགས་བསམ་བཞིན། །འགྱུར་བས་ཐམས་ཅད་ངོ་བོར་སྣང༌། །ཞེས་སོ། །དེས་ན་གཞི་ཉིད་གང་ཡང་ལྷུན་གྱིས་གྲུབ་པའི་ཕྱིར་རྣམ་པའི་ཆོས་སངས་རྒྱས་ལ་སོགས་པ་གང་དུའང་མེད་པ་ལས་སངས་རྒྱས་དང་བྱང་ཆུབ་དང་ཆོས་ཉིད་ལ་སོགས་པའི་ཐ་དད་ཀྱི་མིང་གི་བླ་དྭགས་བཟང་ཕྱོགས་སུ་བཏགས་པ་རྣམས་ནི་དོན་མི་ཤེས་པར་རྨོངས་པ་རྣམས་ལ་བསྟན་པའི་ཕྱིར་བཏགས་པ་ཡིན་ཏེ། བརྒྱུད་ནས་དྲང་བའི་དགོས་པ་ཡོད་པས་སོ།།

གཉིས་པ་རྒྱས་པར་བཤད་པ་ནི།

དེ་བས་ན། ཞེས་པ་ནས། རྟོག་པར་བྱེད་དོ། །ཞེས་པའི་བར་གྱིས་བསྟན་ཏེ།

དེ་བས་ན་བློ་བུར་གྱི་རྟོག་པ་དང་མི་རྟོག་པ་ལ་སངས་རྒྱས་དང་སེམས་ཅན་ཞེས་བཏགས་པར་ཟད་ཀྱིས། དེ་བཞིན་ཉིད་དེ་ལ་ནི་སངས་རྒྱས་དང་སེམས་ཅན་དུ་ཅུང་ཟད་མེད་དོ། །འོན་ཀྱང་བྱིས་པ་རྣམས་ནི་བློ་བུར་དག་གི་སྤྲིན་གྱིས་བསྒྲིབས་པས་བློ་བུར་གྱི་ཆོས་དག་ཆེད་དུ་བྱེད་ཅིང་འཁོར་བ་དང་བྱང་ཆུབ་གཉིས་སུ་རྟོག་པར་བྱེད་དོ། །སེམས་ཅན་དང་སངས་རྒྱས་གཉིས་སུ་རྟོག་པར་བྱེད་དོ།།

གོང་དུ་བཤད་པ་དེ་ལྟ་བས་ན་དོན་གྱིས་གློ་བུར་གྱི་རྟོག་པ་ཀུན་ཏུ་འཁྲུལ་པ་ངན་པ་དང༌། དེ་ལྟར་མི་རྟོག་པ་བཟང་པོར་གྱུར་པ་ལས་སངས་རྒྱས་དང་སེམས་ཅན་ཞེས་གཉིས་སུ་བཏགས་པས་ཞེན་པ་གཉིས་ཀྱིས་དེ་ལྟར་མཐོང་བར་ཟད་ཀྱི། དེ་བཞིན་ཉིད་ཀྱི་ངོ་བོ་དེ་ལ་ནི་༼༡༡༧༽སངས་རྒྱས་དང་སེམས་ཅན་ཐ་དད་དུ་གདགས་པ་ཅུང་ཟད་ཀྱང་མེད་དོ། །འོན་ཀྱང་དོན་ཆེན་པོ་མ་རིག་པའི་བྱིས་པ་རྒྱུའི་ཐེག་པ་པ་རྣམས་ནི་གློ་བུར་བའི་རྟོག་པ་དག་གི་སྤྲིན་གྱིས་ཡང་དག་པའི་དོན་ལ་བསྒྲིབས་པས་དོན་ཇི་བཞིན་པ་མཐོང་དུ་མི་སྟེར་བའི་ཕྱིར། གློ་བུར་གྱི་ཆོས་ཀུན་རྫོབ་པ་དེ་དག་ལ་སླར་ཡང་དོན་དུ་གཉེར་ཏེ་ཆེད་དུ་བྱེད་ཅིང་རྒྱུ་འབྲས་ལ་སོགས་པར་འཛིན་པས་འཁྲུལ་ནས་རྒྱུ་འཁོར་བ་དང་འབྲས་བུ་བྱང་ཆུབ་གཉིས་སུ་རྟོག་པར་བྱེད་དོ། །དེ་བཞིན་དུ་མ་དག་པ་སེམས་ཅན་དང་དག་པ་སངས་རྒྱས་གཉིས་སུ་ཡང་རྟོག་པར་བྱེད་དོ།།

དྲུག་པ་དེ་སྟོང་པ་ཉིད་དུ་གནས་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

སྣང་ཉིད། ཅེས་པ་ནས། དམིགས་པ་མེད། །ཅེས་རྐང་པ་གཉིས་ཀྱིས་བསྟན་ཏེ།

སྣང་ཉིད་མེད་པའི་སྙིང་པོ་སྟེ། །ཡོད་མེད་གཉིས་སུའང་དམིགས་པ་མེད།།

དེ་ཡང་བཏགས་པ་ལྟར་ཆགས་ཤིང་བསྒྲུབ་པ་ལྟར་འགྲུབ་པའི་སྣང་བ་ཉིད་ཀྱང་དོན་ལ་དངོས་པོར་མེད་པའི་སྙིང་པོ་དེ་ཁོ་ན་ཉིད་དུ་རང་གསལ་བ་སྟེ་དེ་ལས་གཞན་པ་མེད་པའི་ཕྱིར་རིལ་ཡོད་མེད་སོགས་མཐའ་གཉིས་སུའང་དམིགས་པ་མེད་དེ་ཀུན་ཏུ་གྲོལ་བའོ།།

གཉིས་པ་རྒྱས་པར་བཤད་པ་ནི།

སྨྲས་པ། ཞེས་པ་ནས། མི་གནས་སོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ། འོ་ན་སེམས་ཅན་དང་སངས་རྒྱས་འདི་གཉིས་ཇི་ལྟར་ཤེས་པར་བྱ། སྨྲས་པ། ལངྐའི་བདག་པོ་སྟོང་པ་ཉིད་དུ་ཤེས་པར་བྱའོ། །སྨྲས་པ། གསང་བ་པའི་བདག་པོ་སྟོང་པ་ཉིད་དེ་ཅི་ལ་གནས། སྨྲས་པ། ལངྐའི་བདག་པོ་སྟོང་པ་ཉིད་ནི་ཆོས་ཐམས་ཅད་ལ་གནས་སོ། །སྨྲས་པ། གསང་བ་པའི་བདག་པོ་ཆོས་ཐམས་ཅད་ནི་ཅི་ལ་གནས། སྨྲས་པ། ལངྐའི་བདག་པོ་ཆོས་ཐམས་ཅད་ནི་སྟོང་པ་ཁོ་ནའི་ཕྱིར་ཅི་ལ་ཡང་མི་གནས་སོ།།

དེ་དག་གི་རང་བཞིན་རྟོགས་པར་བྱ་བའི་ཕྱིར། སྨྲས་པ། གསང་བ་པའི་བདག་པོ། འོ་ན་སེམས་ཅན་དང་སངས་རྒྱས་འདི་གཉིས་ཇི་ལྟར་ཤེས་པར་བྱ། སྨྲས་པ། ལང་ཀའི་བདག་པོ། རང་རིག་པ་འོད་གསལ་བའི་ངོ་བོ་ལ་སངས་རྒྱས་དང་སེམས་ཅན་གྱི་ངོ་བོ་མ་དམིགས་པས་སྟོང་པ་ཉིད་དུ་ཤེས་པར་བྱའོ། །སྨྲས་པ། གསང་བ་པའི་བདག་པོ། སྟོང་པ་ཉིད་ཅི་ལ་གནས། སྨྲས་པ། ལང་ཀའི་བདག་པོ། སྟོང་པ་ཉིད་ནི་ཆོས་སོ་ཅོག་གི་མཚན་ཉིད་ཡིན་པས། རིལ་ལ་ཁྱབ་སྟེ་ཆོས་ཐམས་ཅད་ལ་གནས་སོ། །སྨྲས་པ། གསང་བ་པའི་བདག་པོ། ཆོས་ཐམས་ཅད་ཅི་ལ་གནས། སྨྲས་པ། ལང་ཀའི་བདག་པོ། ཆོས་ཐམས་ཅད་ནི་སྟོང་པ་ཁོ་ནའི་ཕྱིར་སྤྱོད་ཡུལ་རྟེན་དང་རྟེན་ཅན་ལས་གྲོལ་བས་གང་ལའང་རྟེན་མི་འཆའ་བས་མཐའ་ཐམས་ཅད་དང་བྲལ་ཏེ་ཅི་ལའང་མི་གནས་སོ།།

བདུན་པ་དེ་བྱམས་པ་དང་སྙིང་རྗེ་ལ་གནས་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེས་ན་བྱས་མེད་བྱས་པ་ཟིན། །ཞེས་པས་བསྟན་ཏེ།

དེས་ན་བྱ་མེད་བྱེད་པ་ཟིན།།

སྟོང་པ་ཉིད་ཀྱི་བཏན་ཚིགས་དེས་ན་ཆེད་དུ་བྱས་པ་མེད་པར་ཕྲིན་ལས་ཀྱིས་དོན་ཡེ་ནས་བྱས་ཏེ་མཛད་པ་རྫོགས་ཟིན་པས་རིལ་ལྷུན་གྱིས་གྲུབ་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། བྱམས་པ་དང་སྙིང་རྗེ་ལ་༼༡༡༨༽གནས་པ་དངོས་དང༌། དྲིས་ལན་འཕྲོས་སུ་བསྟན་པའོ། །དང་པོ་ནི།

སྨྲས་པ། ཞེས་ པ་ནས། མེད་པའི་ཕྱིར་རོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག ་པོ་སྟོང་པ་ཉིད་ལ་གནས་པ་ཅི་ལ་གནས་པ་ལགས། སྨྲས་པ། ལངྐའི་བདག་པོ་སྟོང་པ་ཉིད་ལ་གནས་པ་ནི་བྱམས་པ་ཆེན་པོ་ལ་གནས་པ་སྟེ། གང་སྟོང་པ་ཉིད་དེས་སེམས་ཅན་གྱི་དོན་ཡོངས་སུ་རྫོགས་པར་གནས་པའོ། །དེ་ཅིའི་ཕྱིར་ཞེ་ན། སངས་རྒྱས་དང་སེམས་ཅན་ལ་སྟོང་ པ་ཉིད་ལས་དོན་ཅི་ཡང་མེད་པའི་ཕྱིར་རོ།།

སྨྲས་པ། གསང་བ་པའི་བདག ་པོ། སྟོང་པ་ཉིད་ལ་གནས་པ་ཇི་ལ་གནས་པ་ལགས། སྨྲས་པ། ལང་ཀའི་ བདག་པོ། གཞན་དོན་བྱ་བྱེད་མེད་པར་རྟོགས་ཚུལ་བསྟན་པའི་ཕྱིར་སྟོང་པ ་ཉིད་ལ་གནས་པ་ནི་བྱེད་པ་མེད་ལ་བྱ་བ་རྫོགས་པས་བྱམས་པ་དང་སྙིང་རྗེ་ཆེན་པོ་ལ་གནས་པ་སྟེ། གང་སྟོང་པ་ཉིད་དེས་ཀུན་ལ་ཁྱབ་ཟིན་པས་སེམས་ཅན་གྱི་དོན་ཀུན་བྱེད་པ་མེད་པར་བྱ་བ་ཡོངས་སུ་རྫོགས་ཏེ་བྱམས་དང་སྙིང་རྗེའི་དམིགས་ཡུལ་དང་བྲལ་བར་གནས་པའོ། །དེ་ཅིའི་ཕྱིར་ཞེ་ན། དོན་བྱེད་པ་པོའི་སངས་རྒྱས་དང་བྱ་བའི་ཡུལ་སེམས་ཅན་ཐམས་ཅད་ལ་སྟོང་པ་ཉིད་ལས་ལྷག་པའི་དོན་བྱེད་པ་དང་བྱ་བ་ཅི་ཡང་མེད་པར་རྒྱས་ཐེབས་པས་གཞན་ནས་མི་རྙེད་པའི་ཕྱིར་རོ།།

གཉིས་པ་དྲིས་ལན་འཕྲོས་སུ་བསྟན་པནི།

སྨྲས་པ། ཞེས་པ་ནས། རིག་པར་བྱའོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ། སངས་རྒྱས་དང་སེམས་ཅན་ཀུན་སྟོང་ན། གང་གིས་ཐུགས་རྗེ་ཆེན་པོས་གང་ལ་ཇི་ལྟར་མཛད། ཐུགས་རྗེ་ཆེན་པོ་དེ་གང་གི་ཚིག་བླ་དྭགས་ལགས། སྨྲས་པ། ལངྐའི་བདག་པོ་ཆོས་ཐམས་ཅད་སྟོང་པ་ཉིད་ལ་རང་བཞིན་གྱིས་གནས་པས་ན། གཉིས་སུ་མ་མཐོང་བས་སྙིང་རྗེའི་ཡུལ་མེད་པ་ནི་ཐམས་ཅད་སྙིང་པོ་བྱང་ཆུབ་ཏུ་ཡོངས་སུ་བསྒྲལ་བའི་ཕྱིར་སྙིང་རྗེ་ཆེན་པོ་ཡིན་ལ། བྱིས་པའི་སྙིང་རྗེ་དག་གིས་ནི་སྟོང་གསུམ་གྱི་སྟོང་ཆེན་པོའི་སེམས་ཅན་སྲོག་བཏོན་པ་དང་། གང་ཐར་པར་བཏོན་པ་དེ་ནི་སྙིང་རྗེ་ཆུང་ངུར་རིག་པར་བྱའོ། །ལངྐའི་བདག་པོ་དེ་བས་ན་སྙིང་རྗེ་ཆེན་པོ་ལ་རྒྱུན་དུ་གནས་པས་གནས་པར་བྱའོ། །ལངྐའི་བདག་པོ་གང་སྙིང་རྗེ་ཆེན་པོ་ལ་གནས་པ་དག་ནི་སེམས་ཅན། འགའ་ཡང་གྲོལ་བར་མི་བྱེད་འཆིང་བར་མི་བྱེད་དེ། རྡོ་རྗེ་མཚོན་གྱིས་དངོས་སུ་བསད་པ་མེད་པར་བསད་པ་ཁོ་ནའོ། །དེ་ཅིའི་ཕྱིར་ཞེ་ན། སེམས་ཅན་མེད་པ་ལས་སེམས་ཅན་དུ་བཏགས་པའི་ཕྱིར་རོ། །སྙིང་རྗེ་ཆེན་པོ་དེ་ནི་དེ་བཞིན་ཉིད་དང་བློ་བུར་བ་གཉིས་ཀྱི་ཁྱད་པར་གྱི་ཚིག་བླ་དྭགས་སུ་རིག་པར་བྱའོ།།

ཡང་སྨྲས་པ། གསང་བ་པའི་བདག་པོ། སངས་རྒྱས་དང་སེམས་ཅན་ཀུན་སྟོང་པ་ཉིད་ཡིན་ན། སངས་རྒྱས་གང་གི་ཐུགས་རྗེ་ཆེན་པོས། གདུལ་བྱ་སེམས་ཅན་གང་ལ་དོན་ཇི་ལྟར་མཛད་དེ་ནམ་མཁའ་དང་འདྲ་བས་སོ། །ཐུགས་རྗེ་ཆེན་པོ་ཞེས་སུ་གྲགས་པ་དེ་ཡང་གང་གི་ཚིག་བླ་དྭགས་ལགས། ཞེས་དྲི་བ་གཉིས་དྲིས་པ་ལས། ལན་སྨྲས་པ། ལང་ཀའི་བདག་པོ། དངོས་པོ་གཉིས་པའི་ཆོས་ཐམས་ཅད་མཐའ་དང་བྲལ་བའི་སྟོང་པ་ཉིད་ཆེན་པོ་ལ་རང་བཞིན་གྱིས་གནས་པས་ན། དེའི་ངོ་བོར་མ་བགྲོད་པར་རྒྱས་བཏབ་སྟེ་སངས་རྒྱས་དང་སེམས་ཅན་གཉིས་སུ་མ་མཐོང་བས་སྙིང་རྗེའི་ཡུལ་སེམས་ཅན་གུད་ན་མེད་པར་དོན་གྱི་གནས་ལུགས་ཅིའང་མ་མཐོང་ཞིང་མ་རིག་པའི་ཚུལ་གྱིས་མཐོང་ཞིང་རིག་པར་གྱུར་པ་ནི་འགྲོ་དོན་མ་བྱས་པར་རྫོགས་ཏེ་ཐམས་ཅད་སྙིང་པོ་བྱང་ཆུབ་ཏུ་ཡོ་བསྒྲལ་བའི་ཕྱིར་དམིགས་པ་མེད་པའི་སྙིང་རྗེ་ཆེན་པོ་ཡིན་ལ། དེ་ལྟ་བུའི་ངེས་དོན་ཟབ་མོ་མ་རྙེད་པར་ཐེག་པ་དམན་པས་བྱིས་པའི་སྙིང་རྗེ་དག་གིས། གང་སྟོང་གསུམ་གྱི་སྟོང་ཆེན་པོའི་སེམས་ཅན་ཐམས་ཅད་ཀྱི་སྲོག་བཏོན་ཏེ་བསྐྱབ་པ་དང༌། གང་ཐར་པར་བཏོན་ཏེ་མྱ་ངན་ལས་འདས་པ་ལ་བཀོད་པ་དེ་ནི་གཉིས་སུ་བཟུང་བས་སྙིང་རྗེ་ཆུང་ངུར་རིག་པར་བྱ་སྟེ། དམིགས་པས་བྱ་བའི་ལས་སུ་གྱུར་པ་དང༌། འཇིག་རྟེན་མཐའ་མེད་ལ་ལྟོས་ནས་བ་སྤུའི་ཆའི་དོན་ཙམ་ཡང་མེད་པ་དང༌། སླར་ཡང་འཆི་བ་ཡོད་པའི་ཕྱིར་དང༌། དེ་དག་གི་རྩ་བ་ཡང་སྙིང་རྗེ་ཆེན་པོ་ཡིན་པའི་ཕྱིར་ནའོ། །ལང་ཀའི་བདག་པོ། དེ་བས་༼༡༡༩༽ན་སྙིང་རྗེ་ཆེན་པོ་ལ་དམིགས་པས་གནས་པར་མི་འདོད་པའི་ཚུལ་གྱིས་རྒྱུན་དུ་གནས་པ་དང་མི་འབྲལ་བའི་ངང་ལ་མི་གནས་པས་གནས་པར་བསླབ་སྟེ་ལྟ་བར་བྱའོ། །ལང་ཀའི་བདག་པོ། གང་སྙིང་རྗེ་ཆེན་པོ་ལ་གནས་པའི་རྣལ་འབྱོར་ཆེན་པོ་དག་གི་མཛད་པ་ནི། སེམས་ཅན་ཇི་སྙེད་པ་འགའ་ཡང༌། གློ་བུར་དུ་འཆིང་བ་གཅོད་དེ་གྲོལ་བར་ཡང་མི་བྱེད། དེ་ཉིད་སྡོམ་སྟེ་འཆིང་བར་ཡང་མི་བྱེད་དེ། ཡེ་ནས་འཆིང་གྲོལ་མ་དམིགས་པ་ལ། དོན་དེའི་རྗེས་སུ་ཤེས་པ་འབྲང་བའང་མེད་པ་ནི། བྱ་བ་དང་རྩོལ་བའི་ཐེག་པ་རིལ་གཅོད་པས་རྡོ་རྗེ་མཚོན་ཆ་ཆེན་པོ་སྟེ། དེ་ཉིད་ཀྱིས་གདུལ་བྱར་སྣང་བ་མ་འགགས་ལ་མི་དམིགས་པས་དངོས་སུ་ཆེད་དུ་བསད་པ་མེད་པར་གཉིས་མེད་རྟོགས་ཤིང་གོམས་པས་ཡོ་བསྒྲལ་ཏེ་བསད་པ་ཆེན་པོ་ཁོ་ནའོ། །དེ་ཉིད་གཏན་ཚིགས་ཀྱིས་སྒྲུབ་པ་དེ་ཅིའི་ཕྱིར་ཞེ་ན། གཞི་ལ་འགྲོ་བ་སེམས་ཅན་རང་རྒྱུད་པ་མེད་པ་ལས་ཞེན་རྟོག་སྣང་བ་ལ་སེམས་ཅན་དུ་བཏགས་པའི་ཡོད་པ་ཙམ་གྱི་ཕྱིར་རོ། །ཞེས་དང་པོའི་ལན་ནོ། །ཐུགས་རྗེ་ཆེན་པོའམ་སྙིང་རྗེ་ཆེན་པོ་དེའི་མིང་ངེས་པར་གང་ལས་གྲུབ་ཅེ་ན། དེ་ནི་དེ་བཞིན་ཉིད་དང༌། གློ་བུར་གཉིས་ཀྱིས་ཁྱད་པར་གྱི་གཉིས་ཀ་ལས་བཏགས་ཏེ། ཡེ་གཉིས་སུ་མེད་པས་ཟིན་པ་དང༌། ཐ་སྙད་དེ་ཉིད་དུ་དག་པ་ཙམ་ལ་ཚིག་བླ་དྭགས་སུ་བཏགས་པ་ཡིན་པར་རིག་པར་བྱའོ། །ཞེས་གཉིས་པའི་ལན་ནོ།།

གསུམ་པ་མཇུག་བསྡུ་བ་ནི།

ཞེས་སྨྲས་པས། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

ཞེས་སྨྲས་པས། ལངྐའི་བདག་པོ་ལ་སོགས་པ་འགྲོ་བ་ལུས་ཀྱི་སེམས་དཔའ་རྣམས་གཞན་ལ་རེ་རྩོལ་མེད་པར་དབུགས་ཕྱིན་པར་གྱུར་ཏོ།།

ཞེས་གསང་བདག་ཆེན་པོས་དེ་སྐད་ཅེས་སྨྲས་ཏེ་བཀའ་སྩལ་པས། ལང་ཀའི་བདག་པོ་ལ་སོགས་པ། འགྲོ་བ་ལུས་ཀྱི་སེམས་དཔའ་རྣམས་དོན་དེ་ཐོས་པས་ལམ་དང་འབྲས་བུ་གཞན་ན་མེད་པར་རྟོགས་པས་གཞན་ལ་རེ་རྩོལ་མེད་པར་ཐ་མའི་དབུགས་ཕྱིན་ཏེ་གསང་སྔགས་གཉིས་མེད་ཀྱི་དོན་ལ་མངའ་བརྙེས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གསང་སྔགས་རང་གི་ངོ་བོ་བསྟན་པའི་ལེའུ་སྟེ་བརྒྱད་པའོ། །ཐེག་པ་ཆེན་པོ་ངེས་པར་བྱུང་བའི་ཚུལ་ལས་སྒྲོན་མ་ཡོངས་སུ་བཀོད་པའི་གཏམ་རྒྱུད་བརྗོད་པ། ཆོས་ཀྱི་ཕྱག་རྒྱ་ཡེ་ཤེས་རྣམ་པར་བགྲོས་པ་སྟེ། བྱུང་ཚུལ་བསྟན་པ་གཉིས་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྒྲོན་མའི་གཞི་གསང་སྔགས་རང་གི་ངོ་བོ་ཇི་བཞིན་པ་ཉིད་ཀྱི་མཚན་ཉིད་བདག་ཉིད་ཆེན་པོའི་རྣལ་འབྱོར་དང༌། ལྷུན་གྱིས་གྲུབ་པའི་རྣལ་འབྱོར་དང༌། ཀློང་ཡངས་ཆུབ་པའི་རྣལ་འབྱོར་གྱི་སྤྱོད་ཡུལ་ཆོས་ཐམས་ཅད་ཀྱི་རང་བཞིན་ཟབ་ཅིང་གཏིང་དཔགས་དཀའ་བ་ཉིད་གསལ་བར་བསྟན་པའི་ལེའུ་སྟེ་བརྒྱད་པ་རྣམ་པར་བཤད་པའོ། །དེ་དག་གིས་ཐེག་པ་ཆེན་པོ་བླ་ན་མེད་པའི་དོན་ངེས་པར་འབྱུང་བའི་ཚུལ་ལས། སྒྲོན་མ་ཡོངས་སུ་བཀོད་པའི་གཏམ་༼༡༢༠༽རྒྱུད་བརྗོད་པའི་གསུང་ཆོས་ཀྱི་ཕྱག་རྒྱའི་ཡི་གེའི་ཚོགས་ཀྱིས་རང་བྱུང་གི་ཡེ་ཤེས་རྣམ་པར་བགྲོས་པ་སྟེ། བྱུང་ཚུལ་བསྟན་པ་གཉིས་པའི་དོན་རྒྱས་པར་བཀྲོལ་བའོ།། །།

ལེའུ་དགུ་པ་རྡོ་རྗེ་སེམས་དཔའི་དེ་ཁོ་ན་ཉིད་བསྟན་པ།

༈ བམ་པོ་གཉིས་པར་ཟུག་པའོ། །གསུམ་པ་གང་གིས་ངེས་པ་རྙེད་པའི་བྱུང་ཚུལ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

དེ་ནས། ཞེས་པ་ནས། ཉིད་ལ་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ལངྐའི་བདག་པོས། ཡང་གསང་བ་པའི་བདག་པོ་ལ་སྔོན་དུ་བྱུང་བའི་ཚུལ་བཅུ་གཉིས་པའི་གསུམ་པ། གང་གིས་ངེས་པ་རྙེད་པ་ན་ཡང་བྱུང་། ཞེས་བསྟན་པ་དྲིས་པ། ཀྱེ་གསང་བ་པའི་བདག་པོ་ཉིད་ཀྱིས་ཐེག་པ་ཆེན་པོ་གསང་བ་དམ་པའི་བྱུང་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། གང་གིས་ངེས་པ་རྙེད་པ་ན་ཡང་བྱུང་། ཞེས་བཀོད་པ་ཇི་ལྟ་བ་ཞིག་ཏུ་རྙེད་དེ་གྲགས་པ་ལགས། སྨྲས་པ། ལངྐའི་བདག་པོ་གང་གིས་གསང་སྔགས་ཀྱི་ངོ་བོ་རྡོ་རྗེ་སེམས་དཔའ་དེ་ཁོ་ན་ཉིད་ཀྱི་ངེས་པ་ཕྱིན་ཅི་མ་ལོག་པར་རྙེད་པ་དེ་ཁོ་ན་ཉིད་ལ་བྱའོ།།

དེ་ནས་ལང་ཀའི་བདག་པོས་ཡང་གསང་བ་པའི་བདག་པོ་ལ། སྔོན་དུ་བྱུང་བའི་ཚིག་བཅུ་གཉིས་པའི་གསུམ་པ། གང་གིས་ངེས་པ་རྙེད་པ་ན་ཡང་འབྱུང༌། ཞེས་སྔོན་ཐུབ་པས་བསྟན་པ་དྲིས་པ། ཀྱེ་གསང་བ་པའི་བདག་པོ་ཞེས་བོས་ནས། ཉིད་ཀྱིས་ཐེག་པ་ཆེན་པོ་དམ་པ་རྣམས་ཀྱི་དགོངས་པ་གསང་བ་དམ་པ་ཉིད་གདུལ་བྱའི་སྣང་ངོར་བྱུང་སྟེ་བཀོད་པའི་ཚུལ། སྟོན་པ་ཤཱཀྱ་ཐུབ་པས་ལུང་བསྟན་པ་གཏམ་རྒྱུད་དུ་བརྗོད་པའི་སྐབས་སུ། སྐྱེས་བུ་གང་གིས་ཡུལ་གང་ལས་ངེས་པ་ཅི་ཞིག་དུས་ནམ་གྱི་ཚེ་རྙེད་པ་ན་ཡང་འབྱུང་ཞེས་བཀོད་པ་དེ། ཚུལ་ཇི་ལྟ་བ་ཞིག་ཏུ་རྙེད་དེ་གྲགས་པ་ལགས། སྨྲས་པ། ལང་ཀའི་བདག་པོ། སུ་གང་ཡང་རུང་བ་དག་གིས་རྙེད་པར་བྱ་བ་ནི་གསང་སྔགས་ཀྱི་ངོ་བོ་རྡོ་རྗེ་སེམས་དཔའི་དེ་ཁོ་ན་ཉིད་ཀྱི་ངེས་པ་ཇི་བཞིན་དུ་རྙེད་ཅིང་གོ་བས་གསང་སྔགས་ཐོབ་པ་ཡིན་ལ། གང་གིས་དེ་ལྟར་ཕྱིན་ཅི་མ་ལོགས་པར་རྙེད་པ་དེ་ཁོ་ན་ཉིད་ལ་བྱའོ།།

སྤྱིར་བྱུང་ཚུལ་འདིའང་དམ་པའི་སྒྲོན་མ་ཇི་ལྟར་བཀོད་ཀྱི་ལན་ཏེ། ཁྱད་པར་རྩལ་འཕངས་ལས་སྦྱོར་ལམ། རྒྱུད་གནས་ལུགས་ལས་ངེས་པ་རྙེད་པའི་བྱུང་ཚུལ་མ་ནོར་དོན་རྙེད་ཀྱི་ལྟ་བ་དབུལ་མོས་གཏེར་རྙེད་པ་ལྟ་བུ་ཉིད་རྒྱས་པར་སྟོན་ནོ།།

གཉིས་པ་རྒྱས་པར་བཤད་པ་ལ་དྲུག་སྟེ། ངེས་པ་རྙེད་བྱ་ཤེས་བྱ་དེ་ཁོ་ན་ཉིད། ཐེག་པ་གཞན་ལས་འཕགས་སྟེ་ཆེ་བ། དེ་ལམ་པ་དང་ངེས་པ་རྙེད་བྱེད་ཀྱི་ཐབས་ཀྱིས་རྙེད་དཀའ་བ། དབུགས་དབྱུང་ཞིང་ངེས་པ་རྙེད་པ་དངོས། ལམ་གྱི་ཆ་རྐྱེན་དབང་བསྐུར་བ། ངེས་པ་རྙེད་པའི་ཡོན་ཏན་སངས་རྒྱས་སུ་ལུང་བསྟན་པའོ། །དང་པོ་ལ་གསུམ་སྟེ། དྲིས་ལན་སྤྱིར་བསྟན་པ། བྱེ་བྲག་ཏུ་བཤད་པ། མཇུག་བསྡུ་བའོ། །དང་པོ་ནི།

སྨྲས་པ། ཞེས་པ་ནས། དག་པར་བྱུང་ངོ་། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ་གསང་སྔགས་ཀྱི་ངོ་བོ་རྡོ་རྗེ་སེམས་དཔའ་དེ་གང་ནས་བྱུང་། གང་ན་གནས། གང་དུ་སྣང་། ཇི་ལྟར་བྱུང་། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ཀྱེ་ལངྐའི་བདག་པོ་གསང་སྔགས་ཀྱི་ངོ་བོ་རྡོ་རྗེ་སེམས་དཔའ་དེ་ནི་འཁོར་བ་དང་མྱ་ངན་ལས་འདས་པ་ཉིད་ཀྱི་ཁམས་ནས་བྱུང་ངོ་། སངས་རྒྱས་ཀུན་གྱི་ཐུགས་དང་། སེམས་ཅན་ཀུན་གྱི་སེམས་ལ་གནས་སོ། །ཞིང་ཁམས་མཐའ་ཡས་པར་སྣང་ངོ་། །ཡེ་ཇི་བཞིན་པ་དང་རྒྱུད་དག་པར་རང་བྱུང་ངོ་།།

ལེའུ་འདིས་ངེས་དོན་སྟོན་ནོ། །ཡང་སྨྲས་པ། གསང་བ་པའི་བདག་པོ། གསང་སྔགས་ཀྱི་ངོ་བོ་རྡོ་རྗེ་སེམས་དཔའ་དེ་ཁོ་ན་ཉིད་རྙེད་པར་བྱུང་བ་དེ། རྒྱུ་གང་ནས་བྱུང༌། རྟེན་གང་ན་གནས། ༼༡༢༡༽ཡུལ་གང་དུ་སྣང༌། ཚུལ་ཇི་ལྟར་བྱུང་ལགས། དེ་སྐད་ཅེས་དྲིས་པས། གསང་བ་པའི་བདག་པོས་ངེས་དོན་དྲིས་པའི་ལན་སྨྲས་པ། ཀྱེ་ལང་ཀའི་བདག་པོ། གསང་སྔགས་ཀྱི་ངོ་བོ་རྡོ་རྗེ་སེམས་དཔའ་དེ་ནི་གཞན་ན་མེད་པའི་ཕྱིར། འཁོར་བ་དང་མྱ་ངན་ལས་འདས་པ་མུན་སྣང་གི་དངོས་པོ་གཉིས་ཀྱི་ཁམས་ནས་དེ་ཁོ་ན་ཉིད་དུ་རང་བྱུང་སྟེ་རང་བཞིན་ཀུན་ཏུ་སྣང་ངོ༌། །རྟེན་གཞི་དབྱེར་མེད་དུ་གནས་པས་སངས་རྒྱས་ཀུན་གྱི་ཐུགས་ལ་ཡེ་ཉིད་ནས་རང་བྱུང་ཡེ་ཤེས་ཀྱི་དགོངས་པར་གནས་པ་དང༌། སེམས་ཅན་ཀུན་གྱི་སེམས་ལོག་པར་རྟོག་པ་ལ་ཆོས་ཉིད་དུ་གནས་ཏེ། བསམ་པ་ལྷུན་གྱིས་གྲུབ་ཅིང་མཐར་སོན་པ་ན་སྣང་བས་སོ། །སངས་རྒྱས་ལོངས་སྤྱོད་རྫོགས་སྐུ་དང་སྤྲུལ་སྐུའི་ཞིང་ཁམས་མཐའ་ཡས་སུ་སེམས་ཅན་གྱི་འཇིག་རྟེན་ཐ་དད་པར་སྐུ་བསྟན་པའི་གཟུགས་བརྙན་གྱིས་མཚོན་ནས་བྱིན་རླབས་སྒྲོན་མར་རང་སྣང་ངོ༌། །ཡེ་ཇི་བཞིན་པ་ངོ་བོ་ཉིད་རང་བཞིན་ལྷུན་གྱིས་གྲུབ་པ་དང༌། དེ་ཉིད་རྟོགས་པའི་ཞེན་པས་བསམ་རྒྱུད་དག་པར་གྱུར་པ་གཉིས་ལྟ་བུར་བྱུང་ངོ༌། །ཞེས་གསུངས་སོ།།

གཉིས་པ་བྱེ་བྲག་ཏུ་བཤད་པ་ལ་བཞི་སྟེ། རྡོ་རྗེ་སེམས་དཔའ་རང་གི་ངོ་བོ། རྡོ་རྗེ་སེམས་དཔའི་མཚན་ཉིད། དེ་ཁོ་ན་ཉིད་ཤེས་པར་གདམས་པ། སེམས་རྟོགས་མ་རྟོགས་ཀྱི་སྐྱོན་ཡོན་ནོ། །དང་པོ་ནི།

ཡང་ལང་ཀའི། ཞེས་པ་ནས། གཞག་པར་བྱའོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། གསང་བ་པའི་བདག་པོ་རྡོ་རྗེ་སེམས་དཔའ་ཉིད་དུ་ངེས་པ་གང་ལ་བཞག་པར་བགྱི། གསང་བ་བའི་བདག་པོས་སྨྲས་པ། ལངྐའི་བདག་པོ་རྡོ་རྗེ་སེམས་དཔའ་ནི་གཅིག་དང་ཐ་དད་པའི་ངོ་བོ་ཉིད་ལས་གྲོལ་ཏེ། ཆོས་རྣམས་ཀྱི་ཆོས་ཉིད་མ་བཅོས། མ་བསླད། སྙིང་པོ་བྱང་ཆུབ་ཏུ་ཡེ་ནས་གནས་པ་དེ་ལ། ཡེ་ཇི་བཞིན་པའི་རྡོ་རྗེ་སེམས་དཔའ་ཞེས་བཏགས་སོ། །སེམས་ཅན་ཀུན་གྱི་སེམས་ཀྱི་ཆོས་ཉིད་གང་གིས་མཐོང་བའི་གནས་སྐབས་དེ་ལ་ནི། རྒྱུད་དག་པའི་རྡོ་རྗེ་སེམས་དཔའ་ཞེས་གདགས་སོ། །དེ་བཞིན་དུ་སངས་རྒྱས་ཐམས་ཅད་ཀྱང་ཡེ་ཇི་བཞིན་པ་དང་། རྒྱུད་དག་པའི་སངས་རྒྱས་སུ་རྣམ་པར་སྣང་ངོ་། །དེ་བས་ན་རྡོ་རྗེ་སེམས་དཔའི་ངེས་པ་ནི་ཐམས་ཅད་ཀྱི་ཡེ་ཇི་བཞིན་པ་དེ་ཁོ་ན་ཉིད་ལ་གཞག་པར་བྱའོ།།

ཡང་ལང་ཀའི་བདག་པོས་དྲིས་ལན་ཐ་མའི་ངེས་པ་ཉིད་དྲིས་པ། གསང་བ་པའི་བདག་པོ། རྡོ་རྗེ་སེམས་དཔའ་ཉིད་དུ་ངེས་པ་གང་ལ་གཞག་པར་བགྱི། གསང་བ་པའི་བདག་པོས་སྨྲས་པ། ལང་ཀའི་བདག་པོ། ཞིང་ཁམས་ཐ་དད་པའི་སྒྲོན་མ་ཡང་སྤྲུལ་པ་དང་བཅས་པ་ལ་སོགས་པར་སྣང་བའི་ངོ་བོ་རྡོ་རྗེ་སེམས་དཔའ་ནི་ཕྱོགས་མེད་དུ་མ་འགགས་པར་འཆར་བས་གཅིག་གི་ངོ་བོ་དང༌། ཐམས་ཅད་སེམས་ཉིད་དེ་ཁོ་ན་ཉིད་ཡིན་པས་ཐ་དད་པའི་ངོ་བོ་ཉིད་ལས་གྲོལ་ཏེ་བླ་དྭགས་ཙམ་དུ་མཐའི་འཆིང་བ་ཡེ་བྲལ་བའི་ཆོས་རྣམས་ཀྱི་ཆོས་ཉིད་ཇི་བཞིན་པ་ལམ་པ་དང་འབད་རྩོལ་གྱི་བྱེད་པས་མ་བཅོས་རྒྱུ་རྐྱེན་གྱིས་མ་བསླད། སྙིང་པོ་བྱང་ཆུབ་ཏུ་ཡེ་ནས་རིལ་གྱིས་འབྲས་བུའི་རྩ་བར་གནས་པའི་གནས་ལུགས་ཡེ་སངས་རྒྱས་པར་རྟོགས་སུ་ཡོད་ལ་ངོ་བོ་འདི་འདྲར་བསྟན་དུ་མེད་པ་དེ་ལ་ཡེ་ཇི་བཞིན་པའི་རྡོ་རྗེ་སེམས་དཔའ་ཞེས་གདགས་སོ། །དེ་ཁོ་ན་འགྲོ་བ་སེམས་ཅན་ཀུན་གྱི་སེམས་ཀྱི་ཆོས་ཉིད་ཇི་བཞིན་པར་གནས་པས་དེ་ཉིད་མ་མཐོང་བ་དང་མི་འདྲ་བར་གང་ལམ་གྱིས་སྒྲུབས་པས་ཇི་ལྟ་བར་མཐོང་བར་གྱུར་ཏེ་རྟོགས་པ་ཚད་དུ་ཕྱིན་པའི་༼༡༢༢༽གནས་སྐབས་གློ་བུར་གྱི་ཞེན་པ་དང་རང་གི་ངོ་བོ་གཉིས་ཀ་དང་བྲལ་བ་ལ་ནི། རྒྱུད་དག་པའི་རྡོ་རྗེ་སེམས་དཔའ་ཞེས་ངེས་པར་གདགས་སོ། །རིལ་གྱི་སྤྱི་མེས་ཆེན་པོ་དེ་ལྟ་བས་ན་དེ་བཞིན་དུ་སྲས་ཀྱི་སངས་རྒྱས་ངོ་བོའི་སྐུ་ཐམས་ཅད་ཀྱང་བསམ་དབང་གིས་ཡེ་ཇི་བཞིན་པ་དང༌། རྒྱུད་དག་པའི་སངས་རྒྱས་གཉིས་སུ་མ་འགགས་པར་རྣམ་པར་གསལ་ཏེ་སྣང་ངོ་། །གཏན་ཚིགས་དེ་བས་ན་རྡོ་རྗེ་སེམས་དཔའི་ངེས་པ་ནི། རྟོགས་མ་རྟོགས་གཉིས་ཀྱི་སྣང་བས་འཁོར་འདས་སུ་ཕྱེ་བ་ལས་ཆོས་ཐམས་ཅད་ཀྱི་ངོ་བོ་ལ་ཐ་དད་མེད་པས་གསང་སྔགས་ཡེ་ཇི་བཞིན་པ་དེ་ཁོ་ན་ཉིད་ལ་ངེས་པར་གཞག་པར་བྱའོ།།

གཉིས་པ་རྡོ་རྗེ་སེམས་དཔའི་མཚན་ཉིད་ལ་གསུམ་སྟེ། གདགས་སུ་མེད་པ། དམིགས་སུ་མེད་པ། དབྱེར་མེད་པའོ། །དང་པོ་ནི།

ཡང་ལང་ཀའི། ཞེས་པ་ནས། བཙལ་བར་བྱའོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། གསང་བ་པའི་བདག་པོ་སེམས་ཅན་གྱི་སེམས་ཀྱི་ཆོས་ཉིད་དེ་གང་ལགས། གང་ཞིག་མཐོང་ན་དེ་མཐོང་བ་ལགས། དེ་སྐད་ཅེས་དྲིས་པ་ལ། གསང་བ་པའི་བདག་པོས་སྨྲས་པ། ལངྐའི་བདག་པོ་སེམས་ཅན་ཀུན་གྱི་ཇི་བཞིན་པ་དེ་མཐོང་ན་མཐོང་བ་ཡིན་ནོ། །སེམས་ཅན་ཀུན་གྱི་ཇི་བཞིན་པ་དེ་ནི་བླ་ན་མེད་པའི་བྱང་ཆུབ་ཡིན་ནོ། །དེ་ལ་ནི་ཆོས་རྡུལ་ཙམ་ཡང་མི་དམིགས་སོ། །དེ་ནི་ནམ་མཁའི་མཚན་ཉིད་དོ། །དེ་ལ་ནི་བྱང་ཆུབ་པ་ཡང་མེད་ལ། བྱང་ཆུབ་པར་བྱ་བ་ཡང་མེད་དོ། །དེ་ལ་ནི་སེམས་ཅན་ཡང་མེད་ལ། སེམས་ཅན་དུ་གདགས་པ་ཡང་མེད་དོ། །ཆོས་ཅན་ཡང་མེད་ལ། ཆོས་ཅན་དུ་གདགས་པ་ཡང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་བྱང་ཆུབ་ཀྱི་མཚན་ཉིད་ཡིན་ལ། བྱང་ཆུབ་ནི་ནམ་མཁའི་མཚན་ཉིད་དེ། ནམ་མཁའི་མཚན་ཉིད་ཐམས་ཅད་དང་བྲལ་བའོ། །དེའི་ཕྱིར་བྱང་ཆུབ་ནི་སེམས་ལས་བཙལ་བར་བྱའོ།།

ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ། རྒྱུད་དག་པའི་རྡོ་རྗེ་སེམས་དཔའ་ལ་དྲི་བའི་ཕྱིར་ཞལ་གྱིས་འཆེས་པའི་སེམས་ཅན་ཀུན་གྱི་སེམས་ཀྱི་ཆོས་ཉིད་དེ་ཡི་ངོ་བོ་གང་ལགས། དོན་གང་ཞིག་མཐོང་ན་ངོ་བོ་དེ་ཉིད་མཐོང་བའམ་རྟོགས་པར་འཇོག་པ་ལགས། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ། འགྲོ་བ་སེམས་ཅན་ཀུན་གྱི་སེམས་ཀྱི་ཆོས་ཉིད་ཇི་ལྟ་བ་དེ་ཉིད་ཅི་ཡང་མ་རྙེད་པར་རྙེད་དེ་དཀྱིལ་འཁོར་གསུམ་དབྱེར་མེད་པར་མཐོང་ན་དོན་དེ་ལས་གཞན་མེད་པའི་ཕྱིར་ཆོས་རིལ་གྱི་གནས་ལུགས་མཐོང་བ་ཡིན་ནོ། །སེམས་ཅན་ཀུན་གྱི་ཇི་ལྟ་བ་དེ་ཁོ་ན་ཉིད་ནི་ཆོས་སྐུ་ཆེན་པོ་ཉིད་པས་བླ་ན་མེད་པའི་བྱང་ཆུབ་ཡིན་ནོ། །དེ་ལ་ནི་མཚན་མ་དང་སྤྲོས་པའི་ཆོས་རྡུལ་ཙམ་ཡང་མི་དམིགས་པས་རྟོག་དཔྱོད་ཀྱི་བློས་བཙལ་ཡང་རྙེད་པ་མ་ཡིན་ཏེ་ཕྱོགས་མེད་པས་སོ། །ཅིའི་ཕྱིར་ཞེ་ན། ཕྱོགས་ལྷུང་དང་བྲལ་བ་དེ་ནི་དཔེར་ན་ནམ་མཁའི་མཚན་ཉིད་ཇི་ལྟ་བ་ཉིད་དེ། དེ་ལྟར་དངོས་གཞི་ཐམས་ཅད་དང་བྲལ་བ་ལ་ནི་ཡུལ་དང་ཡུལ་ཅན་བསྒྲུབ་བྱ་དང་སྒྲུབ་བྱེད་གང་ཡང་མེད་པ་བྱང་ཆུབ་པ་ཡང་མེད་ལ། བྱང་ཆུབ་པར་བྱ་བ་ཡང་མེད་དོ། །དེ་ཡང་མཐའ་གང་དུའང་མ་བྱུང་བས། ཡེ་ཉིད་ནས་འབྲས་བུར་རྣམ་པར་དག་པ་ལ་དེ་ཉིད་ཀྱི་ཐ་སྙད་ཙམ་ཡང་མེད་པས། འགྲོ་བ་སེམས་ཅན་གྱི་ངོ་བོ་ཡང་མེད་ལ། དེ་ལ་སེམས་ཅན་དུ་མིང་གིས་གདགས་པ་ཡང་མེད་དེ་གཞི་བྲལ་བ་ཉིད་དོ། །དེ་བཞིན་དུ་དངོས་པོ་རྣམས་ཀྱི་ཆོས་ཅན་གྱི་ངོ་བོ་ཡང་མེད་ལ། ཆོས་ཅན་དུ་མིང་གིས་གདགས་པ་ཡང་མེད་དེ་གདགས་གཞི་མ་གྲུབ་པ་གང་ལ་རྒྱལ་བས་བཙལ་ཀྱང་མི་རྙེད་པ་༼༡༢༣༽ཉིད་དོ། །དེའི་གཏན་ཚིགས་བརྗོད་པའི་ཕྱིར། དེ་ཅིའི་ཕྱིར་ཞེ་ན། འགྲོ་བ་དང་ཆོས་ཅན་སོ་སོར་གསལ་བ་མིན་ཏེ། འཁོར་འདས་ཀྱི་ཆོས་ཐམས་ཅད་ནི་སེམས་ཀྱི་རང་བཞིན་ཡེ་ཤེས་འོད་གསལ་བའི་ངོ་བོ་དབྱེར་མེད་བྱང་ཆུབ་ཀྱི་མཚན་ཉིད་ཡིན་ལ། བྱང་ཆུབ་ཆེན་པོ་དེ་ནི་རང་རིག་པའི་ནམ་མཁའི་མཚན་ཉིད་དེ། རང་རིག་པའི་ནམ་མཁའ་དེའི་མཚན་ཉིད་ནི། ཡེ་ཤེས་གསང་བ་ལས། དངོས་འཛིན་ཞེན་པའི་རང་རིག་གིས། །ལྷུན་གྲུབ་རང་རིག་དོན་མི་མཐོང༌། །ཞེས་པ་ལྟར་རང་རིག་ལྷུན་གྲུབ་ཆེན་པོ་མཚན་ཉིད་ཐམས་ཅད་པ་ཡིན་པའི་ཕྱིར་ཕྱོགས་ཀྱི་རྣམ་པའི་མཚན་ཉིད་ཐམས་ཅད་དང་བྲལ་ཏེ་གང་ཡང་མ་ཡིན་པའོ། །དོན་དེའི་ཕྱིར་འབྲས་བུ་བྱང་ཆུབ་ཆེན་པོ་ནི་གཞན་ནས་མི་རྙེད་པས་བདག་རང་གི་སེམས་ཀྱི་ཆོས་ཉིད་བྱང་ཆུབ་ཀྱི་སེམས་ལས་མི་བཙལ་བའི་བཙལ་བ་ཆེན་པོར་བཙལ་བར་བྱའོ།།

གཉིས་པ་དམིགས་སུ་མེད་པ་ནི།

སེམས་དེ་ནི། ཞེས་པ་ནས། མེད་པའི་ཕྱིར་རོ། །ཞེས་པའི་བར་གྱིས་བསྟན་ཏེ།

སེམས་དེ་ནི་རང་བཞིན་གྱིས་ཡོངས་སུ་དག་པའི་ཕྱིར་ནང་ན་ཡང་མེད། ཕྱི་རོལ་ན་ཡང་མེད། གཉིས་ཀར་མེད་པར་ཡང་མི་དམིགས་སོ། །སེམས་དེ་ནི་སངས་རྒྱས་ཀྱིས་མ་གཟིགས། མི་གཟིགས། གཟིགས་པར་མི་འགྱུར་རོ། །དེ་ཇི་ལྟར་མ་གཟིགས་ན་ཁ་དོག་ཏུ་མ་གཟིགས་སོ། །དབྱིབས་སུ་མ་གཟིགས་སོ། །མུན་པར་མ་གཟིགས་སོ། །སྣང་བར་མ་གཟིགས་སོ། །ཕོ་མོར་མ་གཟིགས་སོ། །མ་ནིང་དུ་མ་གཟིགས་སོ། །ཁམས་གསུམ་གྱི་རང་བཞིན་དུ་མ་གཟིགས་སོ། །ལྷའི་སེམས་སུ་མ་གཟིགས་སོ། །ཀླུའི་སེམས་སུ་མ་གཟིགས་སོ། །དེ་བཞིན་དུ་གནོད་སྦྱིན་གྱི་སེམས་དང་། དྲི་ཟའི་སེམས་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དང་། བྱོལ་སོང་དང་། ཡི་དྭགས་དང་། དམྱལ་བ་ལ་སོགས་པ་འགྲོ་བ་རིས་ཐ་དད་པའི་སེམས་སུ་མ་གཟིགས་སོ། །རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་བའོ། །དེ་ཅིའི་ཕྱིར་ཞེ་ན། སེམས་ཀྱི་རང་བཞིན་གང་ཡིན་པ་དེ་ནི་རྡོ་རྗེ་སེམས་དཔའི་རང་བྱུང་གི་ཡེ་ཤེས་ཡིན་ལ། ཡེ་ཤེས་དེ་ནི་ནམ་མཁའི་རང་བཞིན་ཏེ། རང་བཞིན་མེད་པའི་ཕྱིར་རོ།།

འོ་ན་འབྲས་བུ་དེ་རང་རིག་པ་ལ་ཚུལ་ཇི་ལྟར་གནས་ཞེ་ན། སེམས་དེ་ནི་ཇི་ལྟར་བཙལ་ན་རང་བཞིན་དང་ཚིག་གི་གཏན་ཚིགས་གཉིས་ལས་འདིར་རང་བཞིན་གྱིས་ཡོངས་སུ་དག་པའི་ཕྱིར། སེམས་ལས་གཞན་པའི་ཆོས་མེད་ལ་སེམས་ཉིད་རང་རིག་ཏུ་ལྷུན་གྱིས་གྲུབ་པ་དེས་ན་སེམས་ནི་འབྲས་བུའི་མཚན་ཉིད་དེ། དངོས་པོ་གསུམ་ཀར་ཡང་སྣང་ལ་མ་གྲུབ་པས། ནང་ན་ཡང་མེད། ཕྱི་རོལ་ན་ཡང་མེད། གཉིས་ཀར་ཡང་མི་དམིགས་སོ། །འོ་ན་ངོ་བོ་གང་ཞིག་གཏན་ནས་མི་རྙེད་དམ་ཞེ་ན། སེམས་དེ་ནི་སངས་རྒྱས་རྣམས་ཀྱིས་ཀྱང་དུས་གསུམ་དུ་མ་མཐོང་བས། སྔར་མ་གཟིགས། ད་ལྟར་མི་གཟིགས། ཕྱིས་གཟིགས་པར་མི་འགྱུར་རོ། །དེའི་ཚུལ་རྒྱས་པ་ནི། དེ་ཇི་ལྟར་མ་གཟིགས་ན། སེམས་ལ་གཟུགས་མེད་པས་ཁ་དོག་ཉི་ཤུ་རྩ་ལྔ་ཉིད་དུ་མ་གཟིགས་སོ། །དབྱིབས་བཅུ་པོ་རྣམས་མ་གཟིགས༌སོ། །འཁོར་འདས་དབྱེར་མེད་པས་མུན་པར་མ་གཟིགས། སྣང་བར་མ་གཟིགས་སོ། མཚན་ཐ་དད་མེད་པས་ཕོ་མོར་མ་གཟིགས་སོ། །མ་ནིང་དུ་མ་གཟིགས་སོ། །རང་བཞིན་ཐ་དད་མེད་པས་ཁམས་གསུམ་ཐམས་ཅད་ཀྱི་བདག་ཉིད་དམ་རང་བཞིན་དུ་མ་གཟིགས་སོ། །དེ་དག་ལས་གཞན་མ་ཡིན་པར་ཆོས་སོ་ཅོག་གི་ངོ་བོའི་གཞི་རྩ་ཡིན་པའི་ཕྱིར་རྣམ་པའི་ཕྱོགས་ཆ་ཐམས་ཅད་དང་བྲལ་བས། ཕྱོགས་ཆར་སྨོས་པ་རྣམས་སུ་ནམ་དུའང་མ་གཟིགས་པས་ངོ་བོས་སྣང་མ་མྱོང་བ་ཉིད་ཀྱང་ཡིན་ཏེ། འཆད་པར་འགྱུར་བ་ཀུན་ཀྱང་རྗེས་སུ་༼༡༢༤༽མཐུན་ནོ། །འོ་ན་རྣམ་པར་ངེས་ན་ཅི་སྐྱོན་ནམ་ཞེ་ན། དེ་ནི་རྣམ་པ་གཅིག་ཏུ་ངེས་ན་རྣམ་པ་ཇི་སྙེད་པ་འགགས་པ་དང༌། གཞན་དང་མ་འབྲེལ་བར་བཀོལ་བའི་སྐྱོན་དུ་འགྱུར་ཏེ། གཏན་ནས་འཁྲུལ་ལོ། །འདི་དག་དངོས་སམ་ཆོས་མཐུན་པའང་རུང་སྟེ། རྒྱུད་ཞི་བར་གྱུར་པ་ལྷ་ཡི་སེམས་སུ་མ་གཟིགས་སོ། །གཏི་མུག་ཆེ་ཞིང་ལོངས་སྤྱོད་ལ་འཆེལ་བ་ཀླུ་ཡི་སེམས་སུ་མ་གཟིགས་སོ། །དེ་བཞིན་དུ། ཕྲ་དོག་ཆེ་ཞིང་གཞན་ལ་གནོད་པ་གནོད་སྦྱིན་གྱི་སེམས་དང༌། འདོད་པ་ཆེ་བ་དྲི་ཟའི་སེམས་དང༌། འཁོར་ལ་སྨོད་ཅིང་རྩོད་པ་ལ་དགའ་བ་ལྷ་མ་ཡིན་དང༌། ཕྱོགས་འཛིན་ཆེ་བ་ནམ་མཁའ་ལྡིང་དང༌། ཞེ་སྡང་ཆེ་བ་མིའམ་ཅི་དང༌། གདུག་སེམས་ཆེ་བ་ལྟོ་འཕྱེ་ཆེན་པོ་དང༌། ཆོག་ཤེས་མེད་པ་མི་དང༌། དུག་གསུམ་རགས་ལ་འདོད་པ་ཆེ་བ་མི་མ་ཡིན་པ་དང༌། རྨུགས་པ་བྱོལ་སོང་དང༌། གདུང་བ་ཡི་དྭགས་དང༌། སྡུག་བསྔལ་མི་བཟད་པ་དམྱལ་བ་ལ་སོགས་པ་འཆད་པར་འགྱུར་ཏེ། འགྲོ་བ་སེམས་ཅན་གྱི་རིགས་ཐ་དད་སྣ་ཚོགས་པའི་རྒྱུད་ཀྱི་རྣམ་པའི་སེམས་སུ་མ་གཟིགས་སོ། །དེས་ན་ངོ་བོ་ཉིད་གཟུང་བའམ་སྤྱིའི་རྟོག་པ་དང༌། འཛིན་པའམ་བྱེ་བྲག་གི་རྣམ་པར་རྟོག་པ་ཐམས་ཅད་དང་བྲལ་བར་བཞུགས་པའོ། །དེ་གཏན་ཚིགས་ཀྱི་ཡིད་ཆེས་པས་འགྲུབ་པའི་དོན་བསྟན་པ་ནི། དེ་ཅིའི་ཕྱིར་ཞེ་ན། གང་འགྲོ་བ་རིལ་གྱི་སེམས་ཀྱི་རང་བཞིན་ཇི་བཞིན་པ་གང་ཡིན་པ་དེ་ནི། རྒྱུ་རྐྱེན་ལ་རག་མ་ལས་པས་རྡོ་རྗེ་སེམས་དཔའི་རང་བྱུང་གི་ཡེ་ཤེས་ཡིན་ལ། ཡེ་ཤེས་དེ་ཉིད་ནི། མཚན་ཉིད་ཐམས་ཅད་མ་སྤངས་ལ་ཕྱོགས་མེད་དུ་གསལ་བས་ནམ་མཁའི་རང་བཞིན་ཏེ་གཅིག་དང་དུ་མའི་རང་བཞིན་གང་ཡང་མེད་པའི་ཕྱིར་རོ།།

གསུམ་པ་དབྱེར་མེད་པ་ལ་གསུམ་སྟེ། དམ་བཅའ་བ། དེའི་གཏན་ཚིགས། དབྱེར་མེད་པའི་ཚད་དང་གྲུབ་མཐའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཡང་ལང་ཀའི། ཞེས་ པ་ནས། བྱར་མེད་དོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག ་པོས་དྲིས་པ། ཀྱེ་གསང་བ་པའི་བདག་པོ་སེམས་ཅན་གྱི་སེམས་དེ་ཅིའི་ཕྱིར་རྡོ་རྗེ་སེམས་དཔའི་རང་བྱུང་གི་ཡེ་ཤེས་ཡིན། གསང་བ་པའི་བདག་པོས་སྨྲས་པ། ལངྐའི་བདག་པོ་སེམས་ཅན་གྱི་སེམས་ཀྱི་དེ་བཞིན་ཉིད་གང་ཡིན་པ་དང་། རྡོ་རྗེ་སེམས་དཔའི་དེ་བཞིན་ཉིད་གང་ཡིན་ པ་དེ་ནི་འདི་ལ་གཉིས་སུ་མེད་ཅིང་གཉིས་སུ་བྱར་མེད་དོ།།

ཡང་ལང་ཀའི་བདག ་པོས་དྲིས་པ། ཀྱེ་གསང་བ་པའི་བདག་པོ། སེམས་ཅན་གྱི་སེམས་དེ་ཅིའི་ཕྱིར། རྒྱུ་རྐྱེན་བྲལ་བས་རྡོ་རྗེ་སེམས་དཔའི་རང་བྱུང་གི་ཡེ་ཤེས་ཡིན། གསང་བ་པའི་བདག་པོས་སྨྲས་པ། ལང་ཀའི་བདག་པོ། སེམས་ཅན་རྣམས་ཀྱི་ཐ་སྙད་སྣ་ཚོགས་ཀྱི་སེམས་ཀྱི་དེ་བཞིན་ཉིད་གང་ཡིན་པ་དང༌། རྡོ་རྗེ་སེམས་དཔའི་དེ་བཞིན་ཉིད་རང་བྱུང་གི་ཡེ་ཤེས་གང་ཡིན་པ་འདི་ལ་ངོ་བོས་གཉིས་སུ་མེད་ཅིང་གཉིས་སུ་བྱར་མེད་དོ།།

༼༡༢༥༽གཉིས་པ་རྒྱས་པར་བཤད་པ་ནི།

དེ་ཇི་ལྟ་ཞེ་ན། ཞེས་པ་ནས། ཁོ་ན་ཉིད་དོ། །ཞེས་པའི་བར་གྱིས་བསྟན་ཏེ།

དེ་ཇི་ལྟ་ཞེ་ན། འདི་ལྟ་སྟེ། གང་ཆགས་པའི་སེམས་ཀྱི་དེ་བཞིན་ཉིད་གང་ཡིན་པ་དེ་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་གང་ཡིན་པ་དེ་ནི་དེ་ཁོ་ན་ཉིད་དོ། །གང་ཆགས་པ་མེད་པའི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཞེ་སྡང་གི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་བྱམས་པའི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་གཏི་མུག་གི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཤེས་རབ་ཆེན་པོའི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཐེ་ཚོམ་གྱི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ངེས་པའི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་མུན་པའི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ནི་དེ་ཁོ་ན་ཉིད་དོ། །གང་སྣང་བའི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ང་རྒྱལ་གྱི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཕྲག་དོག་གི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་བསྡུ་བའི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །དེ་བཞིན་དུ་སྤྲོ་བའི་སེམས་ཀྱི་དེ་ཁོ་ན་ཉིད་དང་། འབྱེད་པའི་སེམས་ཀྱི་དེ་ཁོ་ན་ཉིད་དང་། འཁྲུག་པའི་སེམས་ཀྱི་དེ་ཁོ་ན་ཉིད་དང་། ཞི་བའི་སེམས་ཀྱི་དེ་ཁོ་ན་ཉིད་དང་། འཐབ་པའི་སེམས་ཀྱི་དེ་ཁོ་ན་ཉིད་དང་། འཇར་བའི་སེམས་ཀྱི་དེ་ཁོ་ན་ཉིད་དང་། རྩོད་པའི་སེམས་ཀྱི་དེ་ཁོ་ན་ཉིད་དང་། འཐུན་པའི་སེམས་ཀྱི་དེ་ཁོ་ན་ཉིད་དང་། བརྗོད་པའི་སེམས་ཀྱི་དེ་ཁོ་ན་ཉིད་དང་། བརྗོད་པ་མེད་པའི་སེམས་ཀྱི་དེ་ཁོ་ན་ཉིད་དང་། ལྷའི་སེམས་ཀྱི་དེ་ཁོ་ན་ཉིད་དང་། ཀླུའི་སེམས་ཀྱི་དེ་ཁོ་ན་ཉིད་དང་། བདུད་ཀྱི་སེམས་ཀྱི་དེ་ཁོ་ན་ཉིད་དང་། ལྷ་མ་ཡིན་གྱི་སེམས་ཀྱི་དེ་ཁོ་ན་ཉིད་དང་། གནོད་སྦྱིན་གྱི་སེམས་ཀྱི་དེ་ཁོ་ན་ཉིད་དང་། མིའི་སེམས་ཀྱི་དེ་ཁོ་ན་ཉིད་དང་། ལྟོ་འཕྱེ་ཆེན་པོའི་སེམས་ཀྱི་དེ་ཁོ་ན་ཉིད་དང་། འབྱུང་པོའི་སེམས་ཀྱི་དེ་ཁོ་ན་ཉིད་དང་། ནམ་མཁའ་ལྡིང་གི་སེམས་ཀྱི་དེ་ཁོ་ན་ཉིད་དང་། དྲི་ཟའི་སེམས་ཀྱི་དེ་ཁོ་ན་ཉིད་དང་། གྲུལ་བུམ་གྱི་སེམས་ཀྱི་དེ་ཁོ་ན་ཉིད་དང་། སྐྱེས་པའི་སེམས་ཀྱི་དེ་ཁོ་ན་ཉིད་དང་། བུད་མེད་ཀྱི་སེམས་ཀྱི་དེ་ཁོ་ན་ཉིད་དང་། མ་ནིང་གི་སེམས་ཀྱི་དེ་ཁོ་ན་ཉིད་དང་། བདག་གི་སེམས་ཀྱི་དེ་ཁོ་ན་ཉིད་དང་། གཞན་གྱི་སེམས་ཀྱི་དེ་ཁོ་ན་ཉིད་དང་། ཕའི་སེམས་ཀྱི་དེ་ཁོ་ན་ཉིད་དང་། མའི་སེམས་ཀྱི་དེ་ཁོ་ན་ཉིད་དང་། བུའི་སེམས་ཀྱི་དེ་ཁོ་ན་ཉིད་དང་། ཕོ་ནུའི་སེམས་ཀྱི་དེ་ཁོ་ན་ཉིད་དང་། དགྲ་བོའི་སེམས་ཀྱི་དེ་ཁོ་ན་ཉིད་དང་། དབང་ཕྱུག་གི་སེམས་ཀྱི་དེ་ཁོ་ན་ཉིད་དང་། ཚངས་པའི་སེམས་ཀྱི་དེ་ཁོ་ན་ཉིད་དང་། རྟོགས་འདོད་ཀྱི་སེམས་ཀྱི་དེ་ཁོ་ན་ཉིད་དང་། དབང་པོའི་སེམས་ཀྱི་དེ་ཁོ་ན་ཉིད་དང་། ཚོགས་བདག་གི་སེམས་ཀྱི་དེ་ཁོ་ན་ཉིད་དང་། ཀུན་ཏུ་རྒྱུ་བའི་སེམས་ཀྱི་དེ་ཁོ་ན་ཉིད་དང་། ཚོང་པའི་སེམས་ཀྱི་དེ་ཁོ་ན་ཉིད་དང་། ཞིང་པའི་སེམས་ཀྱི་དེ་ཁོ་ན་ཉིད་དང་། ཆུ་བོ་ལྟ་བུའི་སེམས་ཀྱི་དེ་ཁོ་ན་ཉིད་དང་། ལྟེང་ཀ་ལྟ་བུའི་སེམས་ཀྱི་དེ་ཁོ་ན་ཉིད་དང་། ཁྲོན་པ་ལྟ་བུའི་སེམས་ཀྱི་དེ་ཁོ་ན་ཉིད་དང་། བཀོད་མ་ལྟ་བུའི་སེམས་ཀྱི་དེ་ཁོ་ན་ཉིད་དང་། ཁོར་མོ་ལྟ་བུའི་སེམས་ཀྱི་དེ་ཁོ་ན་ཉིད་དང་། ཟོ་ཆུ་ལྟ་བུའི་སེམས་ཀྱི་དེ་ཁོ་ན་ཉིད་དང་། བསྐོལ་ཆུ་ལྟ་བུའི་སེམས་ཀྱི་དེ་ཁོ་ན་ཉིད་དང་། གསེར་ཆུ་ལྟ་བུའི་སེམས་ཀྱི་དེ་ཁོ་ན་ཉིད་དང་། ཀུན་ཏུ་བསྲུང་བའི་སེམས་ཀྱི་དེ་ཁོ་ན་ཉིད་དང་། སེར་སྣའི་སེམས་ཀྱི་དེ་ཁོ་ན་ཉིད་དང་། གཏོང་བ་ལྟ་བུའི་སེམས་ཀྱི་དེ་ཁོ་ན་ཉིད་དང་། བྱི་ལ་ལྟ་བུའི་སེམས་ཀྱི་དེ་ཁོ་ན་ཉིད་དང་། བྱི་བ་ལྟ་བུའི་སེམས་ཀྱི་དེ་ཁོ་ན་ཉིད་དང་། ཁྱི་ལྟ་བུའི་སེམས་ཀྱི་དེ་ཁོ་ན་ཉིད་དང་། གླུ་ལྟ་བུའི་སེམས་ཀྱི་དེ་ཁོ་ན་ཉིད་དང་། གར་ལྟ་བུའི་སེམས་ཀྱི་དེ་ཁོ་ན་ཉིད་དང་། སིལ་སྙན་ལྟ་བུའི་སེམས་ཀྱི་དེ་ཁོ་ན་ཉིད་དང་། རྨ་བྱ་ལྟ་བུའི་སེམས་ཀྱི་དེ་ཁོ་ན་ཉིད་དང་། རྔ་སྒྲ་ལྟ་བུའི་སེམས་ཀྱི་དེ་ཁོ་ན་ཉིད་དང་། ལྕེ་འབབ་པ་ལྟ་བུའི་སེམས་ཀྱི་དེ་ཁོ་ན་ཉིད་དང་། གློག་ལྟ་བུའི་སེམས་ཀྱི་དེ་ཁོ་ན་ཉིད་དང་། སྤྲིན་ལྟ་བུའི་སེམས་ཀྱི་དེ་ཁོ་ན་ཉིད་དང་། འབྲུག་ལྟ་བུའི་སེམས་དང་། སེང་གེ་ལྟ་བུའི་སེམས་དང་། བུང་བ་ལྟ་བུའི་སེམས་དང་། སྦྲང་མ་ལྟ་བུའི་སེམས་དང་། ཆུ་སྲིན་ལྟ་བུའི་སེམས་དང་། རུ་སྦལ་ལྟ་བུའིསེམས་དང་། སྦྲུལ་ལྟ་བུའི་སེམས་དང་། མ་ཧེ་ལྟ་བུའི་སེམས་དང་། འུག་པ་ལྟ་བུའི་སེམས་དང་། སྤྲེའུ་ལྟ་བུའི་སེམས་དང་། བྱ་རོག་ལྟ་བུའི་སེམས་དང་། རྟ་ལྟ་བུའི་སེམས་དང་། བཞད་ལྟ་བུའི་སེམས་དང་། ཀང་ཀ་ལྟ་བུའི་སེམས་དང་། སྤྱང་ཀི་ལྟ་བུའི་སེམས་དང་། ཝ་ལྟ་བུའི་སེམས་དང་། གླང་པོ་ལྟ་བུའི་སེམས་དང་། ལུག་ལྟ་བུའི་སེམས་དང་། ཁྲ་ལྟ་བུའི་སེམས་དང་། ཁྱིམ་གྱི་སེམས་དང་། ཁྱིམ་མེད་པའི་སེམས་དང་། ཐར་པའི་སེམས་དང་། མ་ཐར་པའི་སེམས་དང་། སྲིན་པོའི་སེམས་དང་། མི་རྒོད་ཀྱི་སེམས་དང་། ན་ཆུང་གི་སེམས་དང་། རྒྱལ་པོའི་སེམས་དང་། སྨད་འཚོང་མའི་སེམས་དང་། འཕྱོན་མའི་སེམས་དང་། བྲམ་ཟེའི་སེམས་དང་། གཤན་པའི་སེམས་དང་། ཡི་དྭགས་ཀྱི་སེམས་དང་། དམྱལ་བའི་སེམས་དང་། ཚེར་མའི་སེམས་དང་། ཤིང་བལ་གྱི་སེམས་དང་། ས་འོག་གི་སེམས་དང་། ནམ་མཁའི་སེམས་དང་། དྲ་བའི་སེམས་དང་། རྒྱའི་སེམས་དང་། ཞགས་པའི་སེམས་དང་། ལིག་རིའི་སེམས་དང་། ལྕགས་ཀྱུའི་སེམས་དང་། ཐོ་བའི་སེམས་དང་། ཇུ་དུར་གྱི་སེམས་དང་། སྣོད་ཀྱི་སེམས་དང་། ཁྲི་མོན་གྱི་སེམས་དང་། མེ་ལྕེའི་སེམས་དང་། ཐུ་ལུམ་གྱི་སེམས་དང་། མར་མེའི་སེམས་དང་། ཉི་མའི་སེམས་དང་། ཟླ་བའི་སེམས་དང་། དངུལ་གྱི་སེམས་དང་། གསེར་གྱི་སེམས་དང་། མེ་སྟག་གི་སེམས་དང་། རླུང་གི་སེམས་དང་། ཆུའི་སེམས་དང་། མདུང་ཤིང་གི་སེམས་དང་། གཏུན་ཤིན་གི་སེམས་དང་། སྒོའི་སེམས་དང་། ཤིང་ལེབ་ཀྱི་སེམས་དང་། མེའི་སེམས་དང་། སའི་སེམས་དང་། འདམ་གྱི་སེམས་དང་། རྙོག་ཆུའི་སེམས་དང་། ཚོན་རྩིའི་སེམས་དང་། ནོར་བའི་སེམས་དང་། དུག་གི་སེམས་དང་། སྨན་གྱི་སེམས་དང་། ཁ་ཟས་ཀྱི་སེམས་དང་། ཆུ་དོང་གི་སེམས་དང་། མདའི་སེམས་དང་། རལ་གྲིའི་སེམས་དང་། འཁོར་ལོའི་སེམས་དང་། གཞུའི་སེམས་དང་། སྒྲོག་གི་སེམས་དང་། ཤིང་གི་སེམས་དང་། ལན་ཚྭའི་སེམས་དང་། སྤུ་གྲིའི་སེམས་དང་། ཐིག་གི་སེམས་དང་། རྡོ་རྗེའི་སེམས་དང་། རི་རབ་ཀྱི་སེམས་དང་། རྒྱ་མཚོའི་སེམས་དང་། ཕ་བོང་གི་སེམས་དང་། ཞིང་གི་སེམས་དང་། ཕུག་གི་སེམས་དང་། སྐྱེ་བའི་སེམས་དང་། མེ་དོང་གི་སེམས་དང་། འབྲས་བུའི་སེམས་དང་། རྩ་བའི་སེམས་དང་། ཡལ་གའི་སེམས་དང་། སྡོང་བུའི་སེམས་དང་། དངར་བའི་སེམས་དང་། ཁ་བའི་སེམས་དང་། སྐྱུར་བའི་སེམས་དང་། ཚ་བའི་སེམས་དང་། སླེག་པའི་སེམས་དང་། སྐ་བའི་སེམས་དང་། ཡི་གེའི་སེམས་དང་། ཚ་ཚའི་སེམས་དང་། ལྡེ་མིག་གི་སེམས་དང་། བྱ་གག་ལྟ་བུའི་སེམས་དང་། ཀུན་དགའ་ར་བ་ལྟ་བུའི་སེམས་དང་། སྦྱར་སྤྱིན་ལྟ་བུའི་སེམས་དང་། མེ་ལོང་ལྟ་བུའི་སེམས་དང་། ཏིལ་མར་ཁུ་བ་ལྟ་བུའི་སེམས་དང་། རྒུན་ཆང་ལྟ་བུའི་སེམས་ལ་སོགས་པ་མཐའ་ཡས་པའི་སེམས་ཀྱི་དེ་བཞིན་ཉིད་གང་ཡིན་པ་དེ་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་གང་ཡིན་པ་དེ་ནི་ཇི་བཞིན་པའི་དེ་ཁོ་ན་ཉིད་དོ།།

སེམས་ཀྱི་ཐ་སྙད་གྲགས་པ་བརྒྱ་དང་བརྒྱད་བཅུ་པོ་དེ་དག་ཀྱང་སེམས་ཀྱི་ངོ་བོ་དང་དཔེ་བརྗོད་པ་ཐུན་མོང་དུ་འཇལ་བར་བྱའོ། །དེ་ཡང་ཇི་ལྟ་བུ་ཞེ་ན། འདི་ལྟ་སྟེ། གང་བདག་དང༌། གཞན་དང༌། གཉིས་ཀ་དང༌། ཉེ་དུ་དང༌། འཁྲིག་པ་དང༌། འདོད་པ་ལ་ཆགས་པའི་སེམས་ཀྱི་དེ་བཞིན་ཉིད་གང་ཡིན་པ་དེ་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་གང་ཡིན་པ་དེ་ནི་མ་འདྲེས་ལ་ཡོངས་སུ་རྫོགས་པས་དངོས་པོ་རྣམས་ཀྱི་དེ་ཁོ་ན་ཉིད་དོ། །གང་དེ་ལྟར་ཆགས་པ་མེད་པའི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཀུན་ནས་མནར་བར་སེམས་པ་ཞེ་སྡང་གི་སེམས་ཀྱི་དེ་བཞིན་ཉིད་ནི། དེ་ལྟར་སྣང་བཞིན་པ་ན་སེམས་ཉིད་སྟོང་པ་ཉིད་ལས་མ་འདས་པས། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །འོ་ན་ཞེ་སྡང་ཀམ་གྱིས་སྐྱེས་པ་དེ་ཆོས་ཉིད་ཡིན་ནམ། ཞེ་སྡང་གི་དེ་བཞིན་ཉིད་དབྱེར་མེད་དེ་ཆོས་ཉིད་ཡིན། དང་པོ་ལྟར་ཞེ་སྡང་རང་ཆོས་ཉིད་ཡིན་ན། སེམས་ཅན་གྱི་སེམས་དང༌། རྒྱལ་བའི་ཐུགས་དབྱེར་མེད་པར་འགྱུར་རོ། །འདོད་ཐོག་ཟེར་ན། སེམས་ཅན་སྡུག་བསྔལ་བ་བཞིན་རྒྱལ་བའི་ཐུགས་ཀྱང་སྡུག་བསྔལ་བར་འགྱུར་བའམ། རྒྱལ་བའི་ཐུགས་བདེ་བའི་ཡེ་ཤེས་སམ་མངོན་ཤེས་དང་ལྡན་པ་བཞིན་སེམས་ཅན་གྱི་སེམས་ཀྱང་དེ་བཞིན་དུ་ཐལ་བར་འགྱུར་རོ། །གཉིས་པ་ལྟར་ཞེ་སྡང་དང་ཆོས་ཉིད་དབྱེར་མེད་ན། ཞེ་སྡང་ཀུན་ནས་མནར་སེམས་པ་བཞིན་ཆོས་ཉིད་ཀྱང་ཀུན་ནས་མནར་སེམས་པར་འགྱུར་བའམ། ཆོས་ཉིད་ཡེ་ནས་མ་བཅོས་པར་གནས་པ་བཞིན་ཞེ་སྡང་ཡང་ཡེ་ནས་མ་བཅོས་པར་གནས་པར་འགྱུར་རོ། །ད་འདི་ལྟར་ཤེས་པར་བྱ་སྟེ། ཡིན་ཚུལ་ནས་གཞལ་ན། ཞེ་སྡང་ཀམ་གྱིས་སྐྱེས་པ་དེ་ཆོས་ཉིད་ཡིན་ཞེས་བྱ་སྟེ། འདི་ཉིད་ལས། ཞེ་སྡང་མ་འདྲེས་མནར་སེམས་པ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཞེས་སོ། །འོ་ན་གོང་གི་སྐྱོན་འོང་ངོ་ཞེ་ན། མི་འོང་སྟེ། ཞེ་སྡང་དང་ཆོས་ཉིད་དངོས་པོ་ལ་དབྱེར་མེད་ཡིན་ཀྱང༌། སེམས་ཅན་དང་སངས་རྒྱས་རྟོགས་པ་དང་མ་རྟོགས་པའི་རྐྱེན་གྱིས་ཁྱད་པར་ཡོད་པའོ། །དཔེར་ན་ག་བུར་ལ་སྨན་དུག་དབྱེར་མེད་ཀྱང༌། ནད་ཚ་གྲང་གི་རྐྱེན་གྱིས་ཕན་གནོད་ཐ་དད་པ་བཞིན་ནོ། །ཡང་ཞེ་སྡང་དང་ཆོས་ཉིད་དངོས་པོ་ལ་དབྱེར་མེད་ཡིན་ཀྱང༌། ཆོས་ཉིད་ལ་མནར་སེམས་མེད་དེ། འཁྲུལ་ངོ་ལ་མནར་སེམས་མེད་བཞིན་ཡོད་པར་གཟུང་བའི་ཕྱིར་དང༌། ཆོས་ཉིད་མ་བཅོས་པར་ཡེ་ནས་གནས་པ་བཞིན་ཞེ་སྡང་མི་གནས་ཏེ། ཞེ་སྡང་གློ་བུར་དུ་སྐྱེས་པའི་ཕྱིར་རོ། ༼༡༢༦༽།དེས་ན་ཞེ་སྡང་གི་དེ་བཞིན་ཉིད་མ་བཅོས་པ་དེ་ཆོས་ཉིད་ཡིན་པ་ལྟ་ཅི་སྨོས། དེས་དུག་ལྔ་ལ་སོགས་པ་གོང་འོག་ཀུན་ལ་འགྲེའོ། །དེ་ནི་ཉོན་མོངས་པ་ཆོས་ཉིད་ཡིན་ལུགས་སོ།།

ད་ཉོན་མོངས་པ་ལམ་དུ་ཇི་ལྟར་བྱེད་ཅེ་ན། བརྟགས་པ་རྣམ་པ་ལྔ་སྟེ། ཞེ་སྡང་ཀམ་པོ་དེ་ཁྱེར་རམ། ཞེ་སྡང་ཀམ་པོ་དེ་སྤངས་ནས་གཉེན་པོ་བྱམས་པ་ལྟ་བུ་དེ་ཁྱེར་རམ། ཞེ་སྡང་གཏན་ཚིགས་ཀྱིས་གཞིགས་ནས་རང་བཞིན་མེད་པ་དེ་ཁྱེར་རམ། ཞེ་སྡང་སྐྱེས་པ་དེ་འགགས་ནས་རྟིང་ལ་ད་ཅིའི་ཞེ་སྡང་དེ་རང་ཆོས་ཉིད་དོ་སྙམ་པའི་རྗེས་ཐོགས་ཀྱི་ཤེས་པ་དེ་ལམ་དུ་ཁྱེར་རམ། ཞེ་སྡང་གི་སེམས་དང་ཆོས་ཉིད་ཐ་དད་དུ་གནས་སམ་ཞེས་བྱ། དེ་ལ་ཞེ་སྡང་ཀམ་པོ་རང་ལམ་དུ་ཁྱེར་ན། ཕ་བསད་ཀྱི་བུ་ལྟ་བུ་ཞེ་སྡང་གང་ཆེ་བ་དེ་གྲོལ་ཐར་བའི་སྐྱོན་འོང༌། ཞེ་སྡང་ཀམ་པོ་དེ་སྤངས་ནས་དེའི་གཉེན་པོ་ལམ་དུ་ཁྱེར་ན། ཞེ་སྡང་ལམ་དུ་ཁྱེར་བ་མ་སོང་སྟེ་ཐེག་པ་ཆུང་ངུ་དང་ཁྱད་མེད་པར་འགྱུར་རོ། །ཞེ་སྡང་གཏན་ཚིགས་ཀྱིས་གཞིགས་ནས་རང་བཞིན་མེད་པ་དེ་ལམ་དུ་ཁྱེར་ན། དེ་ནི་ཞེ་སྡང་ལམ་དུ་ཁྱེར་བ་མ་ཡིན་ཏེ། སྟོང་པ་ལམ་དུ་ཁྱེར་བ་ཡིན་པས་དབུ་མ་པ་དང་ཁྱད་མེད་པར་འགྱུར་རོ། །ཞེ་སྡང་འགག་ནས་རྗེས་ཐོགས་ཀྱིས་ཤེས་པ་ལམ་དུ་ཁྱེར་ན། ཡེ་ཤེས་གསར་སྐྱེ་རུ་འགྲོ་སྟེ། ཞེ་སྡང་འགག་པས་ཞེ་སྡང་ལམ་དུ་ཁྱེར་བ་མ་ཡིན་ནོ། །གང་ཟག་གཅིག་གི་རྒྱུད་ལ་ཞེ་སྡང་དང་ཆོས་ཉིད་ཐ་དད་དུ་གནས་ན། འགྲོ་ལ་སེམས་རྒྱུད་གཉིས་མི་འཆང༌། །ཞེས་པས་བསལ་ལོ། །གལ་ཏེ་གཉིས་འཆང་ན། ཞེ་སྡང་ཅན་གྱིས་ལྟ་བ་རྟོགས་ཀྱང་སངས་རྒྱས་ཀྱི་འབྲས་བུ་མི་ཐོབ་པའི་སྐྱོན་འོང་སྟེ། གཞི་ལ་ཐ་དད་པའི་ཕྱིར་རོ། །ད་འདི་ལྟར་ཤེས་པར་བྱ་སྟེ། ཞེ་སྡང་ཀམ་གྱིས་སྐྱེས་པ་དེ་ཉིད་མ་སྤངས་པར་སྣང་སྟོང་དབྱེར་མེད་དུ་རྟོགས་ནས་ལམ་དུ་ཁྱེར་བའོ། །འདི་ཉིད་ཀྱི་ང་བཞི་པ་ལས། དེ་ཉིད་མཐོང་བའི་ཁྱད་པར་ལས། །སྤྱོད་ལམ་དངོས་གཞི་གང་སྤྱད་ཀྱང༌། །འཆིང་བར་མི་འགྱུར་གྲོལ་འགྱུར་ཐབས། །ཐམས་ཅད་དེར་སྦྱངས་ལམ་གནས་མཆོག །ཅེས་དང༌། ཉེར་དྲུག་པ་ལས། སྡུག་བསྔལ་བྱང་ཆུབ་ལམ་དུ་མཛད། །ལམ་ཉིད་རང་བྱུང་ཡེ་ཤེས་འགྲེལ། །ཞེས་དང༌། སྒྱུ་འཕྲུལ་རྒྱས་པ་ལས། ཉོན་མོངས་རང་དང་སྤྱིར་བསྟན་པ། །མཚན་ཉིད་མ་ནོར་དོན་རྟོགས་ན། །རྣམ་པར་བྱང་བའི་ལམ་དུ་འགྱུར། །ཞེས་པས་སོ། །ཕ་བསད་ཀྱི་བུ་ལྟ་བུ་གྲོལ་ཐར་བར་མི་འགྱུར་ཏེ། དེས་ཞེ་སྡང་ཆོས་ཉིད་དུ་ངོ་མ་ཤེས་པ་དང༌། ཕྱོགས་གཅིག་ཏུ་བཟུང་བའི་ཕྱིར་རོ། །དེས་ན་ཉོན་མོངས་༼༡༢༧༽པ་ཆོས་ཉིད་དུ་རྟོགས་ནས་ལམ་དུ་ཁྱེར་བའོ། །དེ་ལྟར་ཀུན་ལ་འགྲེ་ཤེས་པར་བྱའོ། །གང་གཞན་ལ་ཕན་པར་བྱེད་པ་བྱམས་པའི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་རྟོག་དཔྱོད་མེད་པ་གཏི་མུག་གི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཐམས་ཅད་སོ་སོར་རྟོག་ཅིང་འབྱེད་པ་ཤེས་རབ་ཆེན་པོའི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ངེས་པ་མ་རྙེད་པར་བློ་རྩེ་གཉིས་སུ་འཇུག་པ་ཐེ་ཚོམ་གྱི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་བཀའ་གཞུང་བཞིན་སྒྲོ་འདོགས་གཅོད་ཅིང་གཏན་ལ་ཕེབས་པ་ངེས་པའི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་མི་གསལ་བས་ཆོས་ལ་སོམ་ཉི་བྱེད་པ་མུན་པའི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་གསལ་བས་སོམ་ཉི་མེད་པར་ཤེས་པ་སྣང་བའི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཅི་ལ་ཡང་གེར་དུ་འཛུགས་པ་ང་རྒྱལ་གྱི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་དེ་ཁོ་ན་ཉིད་དོ། །གང་གཞན་ཁྱད་དུ་གསོད་ཅིང་རང་དམས་སུ་དོགས་པ་ཕྲག་དོག་གི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་དུ་མ་མང་པོ་ལ་གཅིག་ཏུ་སེམས་པའི་བསྡུ་བའི་སེམས་ཀྱི་དེ་བཞིན་ཉིད་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །སེམས་འདི་ཚོ་གང་ཟག་གཅིག་གི་ཤེས་པའི་རྒྱུད་ཡིན་ནམ་ཐ་དད་ཡིན་ཞེ་ན༌། གཅིག་གི་རྒྱུད་ལའང་ལྡན་ལ། ཐ་དད་ཀྱང་ཡིན་ཏེ་དེ་ཁོ་ན་ཉིད་ནི་གཅིག་དང་དུ་མ་བྲལ་བའོ། །དེ་བཞིན་དུ་གང་གཅིག་ལ་བྱེ་བྲག་མང་པོར་དབྱེ་བས་སྤྲོ་བའི་སེམས་ཀྱི་དེ་ཁོ་ན་ཉིད་དང༌། ཕན་ཚུན་སོ་སོར་ཕྱེ་བས་འབྱེད་པའི་སེམས་ཀྱི་དེ་ཁོ་ན་ཉིད་དང༌། གཅིག་ལ་གཅིག་འབྱེད་པས་འཁྲུག་པའི་སེམས་ཀྱི་དེ་ཁོ་ན་ཉིད་༼༡༢༨༽དང༌། རྒྱུད་འཇམ་པས་ཕ་རོལ་ལ་ལྷན་པ་ཞི་བའི་སེམས་ཀྱི་དེ་ཁོ་ན་ཉིད་དང༌། ཕན་ཚུན་རྩོད་པས་འཐབ་པའི་སེམས་ཀྱི་དེ་ཁོ་ན་ཉིད་དང༌། གཞན་དང་མཐུན་པར་མཛའ་བས་འཇར་བའི་སེམས་ཀྱི་དེ་ཁོ་ན་ཉིད་དང༌། འཐབ་པ་ལ་དགའ་བས་རྩོད་པའི་སེམས་ཀྱི་དེ་ཁོ་ན་ཉིད་དང༌། མཉམ་པས་མཚུངས་པར་ལྟ་སྟེ་ངག་འཇམ་པས་མཐུན་པའི་སེམས་ཀྱི་དེ་ཁོ་ན་ཉིད་དང༌། ཚིག་ཏུ་སྨྲ་ལ་དགའ་བས་བརྗོད་པའི་སེམས་ཀྱི་དེ་ཁོ་ན་ཉིད་དང༌། ཚིག་ཏུ་སྨྲ་བར་མི་ཤེས་པ་བརྗོད་ པ་མེད་པའི་སེམས་ཀྱི་དེ་ཁོ་ན་ཉིད་དང༌། བདག ་ཉིད་ལ་བཟང་བར་རློམ་པས་ལྷ་ཡི་སེམས་ཀྱི་དེ་ཁོ་ན་ཉིད་དང༌། ལོངས་སྤྱོད་འབའ་ཞིག་གི་ཕྱིར་སེམས་པས་ཀླུ་ཡི་སེམས་ཀྱི་དེ་ཁོ་ན་ཉིད་དང༌། ཕ་རོལ་གྱི་བར་དུ་གཅོད་པར་དགའ་བས་བདུད་ཀྱི་སེམས་ཀྱི་དེ་ཁོ་ན་ཉིད་དང༌། གོང་དུ་ཤོར་ལ་དོག་ཅིང་སྨོད་པས་ཕྲག་དོག་པ་ལྷ་མ་ཡིན་གྱི་སེམས་ཀྱི་དེ་ཁོ་ན་ཉིད་དང༌། གཞན་དག་ལ་གནོད་པར་སེམས་པས་གནོད་སྦྱིན་གྱི་སེམས་ཀྱི་དེ་ཁོ་ན་ཉིད་དང༌། གང་ཅིར་ཡང་ལས་ཀྱི་དོན་དུ་སེམས་པས་མི་ཡི་སེམས་ཀྱི་དེ་ཁོ་ན་ཉིད་དང༌། ཤིན་ཏུ་གདུག་པར་སེམས་པས་ལྟོ་འཕྱེ་ཆེན་པོའི་སེམས་ཀྱི་དེ་ཁོ་ན་ཉིད་དང༌། གཞན་ལ་གནོད་འགལ་བཙལ་བར་སེམས་པས་འབྱུང་པོའི་སེམས་ཀྱི་དེ་ཁོ་ན་ཉིད་དང༌། ཕྱོགས་འཛིན་ཆེ་བས་གཞན་བརྟེན་པ་ནམ་མཁའ་ལྡིང་གི་སེམས་ཀྱི་དེ་ཁོ་ན་ཉིད་དང༌། གང་དྲི་ལ་ཆགས་པས་གནོད་པར་སེམས་པ་དྲི་ཟའི་སེམས་ཀྱི་དེ་ཁོ་ན་ཉིད་དང༌། བདག་དང་མི་འདྲ་བར་སེམས་པས་གྲུལ་བུམ་གྱི་སེམས་ཀྱི་དེ་ཁོ་ན་ཉིད་དང༌། བདག་བཙན་ཞིང་བཟང་བར་སེམས་པས་སྐྱེས་པའི་སེམས་ཀྱི་དེ་ཁོ་ན་ཉིད་དང༌། གང་འདོད་པ་འཁྲིག་པའི་ཕྱིར་ཆོས་བརྟེན་པས་བུད་མེད་ཀྱི་སེམས་ཀྱི་དེ་ཁོ་ན་ཉིད་དང༌། གཞན་ལས་རིགས་ཀྱི་དམན་པར་སེམས་པས་མ་ནིང་གི་སེམས་ཀྱི་དེ་ཁོ་ན་ཉིད་དང༌། མུ་སྟེགས་པ་ལྟར་བདག་ཡོད་པའི་དབང་གིས་ངར་འཛིན་པ་བདག་གི་སེམས་ཀྱི་དེ་ཁོ་ན་ཉིད་དང༌། གང་བདག་ལས་ཕྱི་རོལ་ན་སྣང་བར་སེམས་པས་གཞན་གྱི་སེམས་ཀྱི་དེ་ཁོ་ན་ཉིད་དང༌། གང་བསྲེལ་ཞིང་ཕན་པར་སེམས་པས་ཕ་ཡི་སེམས་ཀྱི་དེ་ཁོ་ན་ཉིད་དང༌། གང་སེམས་ཅན་ལ་བྱམས་ཞིང་གསོ་བར་སེམས་པས་མ་ཡི་སེམས་ཀྱི་དེ་ཁོ་ན་ཉིད་དང༌། ཕ་མས་ཕན་པར་བྱ་བར་སེམས་ཤིང་ལན་གླན་པར་དགའ་བས་བུའི་སེམས་ཀྱི་དེ་ཁོ་ན་ཉིད་དང༌། གཅིག་ལ་གཅིག་བསྟུན་ཏེ་སྲིད་བཙའ་བར་སེམས་པས་ཕུ་ནུའི་སེམས་ཀྱི་དེ་ཁོ་ན་ཉིད་དང༌། ངན་པའི་ལན་ཕ་རོལ་ལ་གླན་པར་སེམས་༼༡༢༩༽པས་དགྲ་བོའི་སེམས་ཀྱི་དེ་ཁོ་ན་ཉིད་དང༌། ཐམས་ཅད་བདག་གིར་བྱའོ་བར་སེམས་པས་དབང་ཕྱུག་གི་སེམས་ཀྱི་དེ་ཁོ་ན་ཉིད་དང༌། ཐམས་ཅད་བདག་གིས་བསྐྱེད་དོ་བར་སེམས་པས་ཚངས་པའི་སེམས་ཀྱི་དེ་ཁོ་ན་ཉིད་དང༌། ཐམས་ཅད་ཀྱི་ཁོང་དུ་འགྲོ་བར་དགའ་བས་གཏོགས་འདོད་ཀྱི་སེམས་ཀྱི་དེ་ཁོ་ན་ཉིད་དང༌། ཐམས་ཅད་བདག་གིས་དབང་དུ་བྱ་བར་སེམས་པས་དབང་པོའི་སེམས་ཀྱི་དེ་ཁོ་ན་ཉིད་དང༌། རིལ་བདག་གིས་སྡུད་དོ་བར་སེམས་པས་ཚོགས་བདག་གི་སེམས་ཀྱི་དེ་ཁོ་ན་ཉིད་དང༌། ཡུལ་ཀུན་ཏུ་འགྲོ་བར་སེམས་པས་བསམ་པ་མ་ངེས་པ་ཀུན་ཏུ་རྒྱུ་བའི་སེམས་ཀྱི་དེ་ཁོ་ན་ཉིད་དང༌། གང་བསྡུས་པ་ཁེ་སྤེལ་བའི་ཕྱིར་ཀུན་ཏུ་བགྲོད་པར་སེམས་པས་ཚོང་པའི་སེམས་ཀྱི་དེ་ཁོ་ན་ཉིད་དང༌། གང་ཐོབ་པ་དུ་མ་ཚོལ་བའི་ཕྱིར་སྐྱེད་དོ་བར་སེམས་པས་ལས་བརྟེན་པ་ཞིང་པའི་སེམས་ཀྱི་དེ་ཁོ་ན་ཉིད་དང༌། གང་མཐའ་གཉིས་ལ་ལྟོས་ཤིང་རྟེན་པ་ཆུ་བོ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་སྲེད་པ་ཆུང་ངུར་བརྟེན་པས་ལྡེང་ཀ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་མི་ཟབ་པར་ཟབ་པོ་བར་སེམས་པས་ཁྲོན་པ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་རང་གི་ཆེད་དུ་མི་སེམས་པར་ཀུན་ལ་ཕན་གདགས་པར་སེམས་པས་བཀོད་མ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་ཡང་ནས་ཡང་དུ་གཅིག་ཁོ་ནར་སེམས་པས་འཁོར་མོ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་སེམས་པ་དེ་ལས་སྦྱར་ཏེ་བསྐྱར་ཞིང་ཁྱད་པར་སེམས་པས་ཟོ་ཆུན་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་སེམས་པ་དེ་དང་དེ་ཉིད་དུ་གདུང་བར་སེམས་པས་བསྐལ་ཆུ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་སེམས་པ་དེར་ཕ་རོལ་གྱི་སེམས་ལེགས་པར་སྒྱུར་བར་སེམས་པས་གསེར་ཆུ་ལྟ་བུའི་སེམས་ཀྱི་དེ་ཁོ་ན་ཉིད་དང་བརྒྱད་པོ་དེ་དཔེ་ཡི་སྒོ་ནས་བསྟན་པའོ། །གང་འདི་ཉིད་ལ་འཚེ་བས་མི་ཚུགས་པར་བྱའོ་ཞེས་སེམས་པས་ཀུན་ཏུ་བསྲུང་བའི་སེམས་ཀྱི་དེ་ཁོ་ན་ཉིད་དང༌། གང་ལྷག་པར་ཆགས་པས་གཞན་ལ་མི་སྟེར་བར་སྡོམ་པ་སེར་སྣའི་སེམས་ཀྱི་དེ་ཁོ་ན་ཉིད་དང༌། ཀུན་ཚིམ་པར་དགའ་བས་མ་ཆགས་ཏེ་ཁྱབ་པར་བྱ་བར་སེམས་པས་གཏོང་བ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་རང་གི་རྩལ་ལ་ལྟོས་པ་བྱི་ལ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་བཅིང་བ་ཐམས་ཅད་བཅད་པར་སེམས་པས་བྱི་བ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་ཆུང་ངུ་བག་ཙམ་བྱིན་པས་ཀྱང་མགུ་ཞིང་ཆུང་ངུས་ཁྲོ་བ་ཁྱི་ལྟ་བུའི་སེམས་ཀྱི་༼༡༣༠༽དེ་ཁོ་ན་ཉིད་དང༌། གང་ཀུན་དགའ་ཞིང་རྟེན་པས་གླུ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་དྲན་པ་སྣ་ཚོགས་མ་ངེས་པར་མྱུར་བས་གར་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་མཐུན་པར་གྲགས་པས་ཚིམ་པར་བྱ་བར་སེམས་པས་སིལ་སྙན་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་བདག་ལ་བཟང་བར་སེམས་ཤིང་མཛེས་སྡུག་ཏུ་དམིགས་པས་རྨ་བྱ་ལྟ་བུའི་སེམས་ཀྱི་དེ་ཁོ་ན་ཉིད་དང༌། གང་སྒྲའི་ཕྱིར་སེམས་པས་རྔ་སྒྲ་ལྟ་བུའི་སེམས་ཀྱི་དེ་ཁོ་ན་ཉིད་དང༌། དེ་དག་གི་དེ་ཁོ་ན་ཉིད་ནི་ཆོས་ཅན་གྱི་སྒོ་ནས་མ་འདྲེས་ལ་ངོ་བོས་ཇི་བཞིན་པ་ཉིད་དུ་གཅིག་པའི་ཕྱིར་གཅིག་དུ་མ་ལས་གྲོལ་བར་དེ་ཉིད་ཀྱིས་གསལ་ལོ། །དེ་ལྟ་བས་ན་འཆད་པ་རྣམས་ཀྱང་དེ་ཁོ་ན་ཉིད་རྗེས་སུ་སྦྱར་རོ། །འདིར་རྩ་བ་རྣམས་ལ་གོ་རིམས་འདྲ་མིན་ཅུང་ཟད་བཞུགས་ཀྱང་འགྲེལ་ཆེན་ལྟར་བཀོད་དེ། གང་གཞན་ཐོགས་པ་མེད་པར་གཞོམ་པར་སེམས་པས་ལྕེ་འབབ་པ་ལྟ་བུའི་སེམས་དང༌། ཡུད་ཙམ་དུ་གཞན་གསལ་བར་བྱ་བར་སེམས་པས་གློག་ལྟ་བུའི་སེམས་དང༌། གང་གཅིག་ཏུ་མི་རྟག་པར་སྒྲིབ་པར་སེམས་པས་སྤྲིན་ལྟ་བུའི་སེམས་དང༌། གང་སྤྲོ་བ་སྐྱེད་པར་སེམས་པས་དུས་ཀྱི་འབྲུག་སྒྲ་ལྟ་བུའི་སེམས་དང༌། ཐམས་ཅད་ཟིལ་གྱིས་གནོན་པར་སེམས་པས་སེང་གེ་ལྟ་བུའི་སེམས་དང༌། གང་བདག་གིར་བྱ་བར་སེམས་པས་བུང་བ་ལྟ་བུའི་སེམས་དང༌། གང་ཆུང་བར་སེམས་པས་སྦྲང་མ་ལྟ་བུའི་སེམས་དང༌། གང་ཟིན་པ་མི་གཏོང་བར་སེམས་པས་ཆུ་སྲིན་ལྟ་བུའི་སེམས་དང༌། གང་གནས་པ་བརྟན་པར་སེམས་པས་རུས་སྦལ་ལྟ་བུའི་སེམས་དང༌། གང་ཅིར་ཡང་སྣང་བར་བྱ་བར་སེམས་པས་སྤྲུལ་པ་ལྟ་བུའི་སེམས་དང༌། གང་མི་གཡོ་བར་སེམས་པས་ཁེངས་པ་མ་ཧེ་ལྟ་བུའི་སེམས་དང༌། གང་ཡུལ་ལ་བྱེ་བྲག་ཏུ་སེམས་པས་འུག་པ་ལྟ་བུའི་སེམས་དང༌། གང་ཕ་རོལ་ལ་གཅམ་པར་སེམས་པས་སྤྲེའུ་ལྟ་བུའི་སེམས་དང༌། གང་ཐམས་ཅད་ལ་སྐྲག་པས་རང་བག་ཟོན་བྱ་བར་སེམས་པས་བྱ་རོག་ལྟ་བུའི་སེམས་དང༌། གང་བགྲོད་པ་མྱུར་བར་ཕྱིན་པར་བྱ་བར་སེམས་པས་རྟ་ལྟ་བུའི་སེམས་དང༌། གང་བཅུད་དབྱུང་བར་སེམས་པས་བཞད་ལྟ་བུའི་སེམས་དང༌། གར་སྐྲག་པར་བྱ་བར་སེམས་པས་ཀང་ཀ་ལྟ་བུའི་སེམས་དང༌། གཞན་བཟའ་བར་སེམས་པས་སྤྱང་ཀི་ལྟ་བུ་སེམས་དང༌། གང་ལ་འཛེམ་པས་འཇིགས་པར་སེམས་པ་ཝ་ཡི་སེམས་དང༌། གང་སྟོབས་དང་ལྡན་པར་སེམས་པས་གླང་པོ་ལྟ་བུའི་སེམས་དང༌། ༼༡༣༡༽གང་བླུན་པར་སེམས་པས་ལུག་ལྟ་བུའི་སེམས་དང༌། གང་གཟེ་བས་གཟུང་བར་སེམས་པས་ཁྲ་ལྟ་བུའི་སེམས་དང༌། བདག་འབའ་ཞིག་གི་ཆེད་དུ་བྱ་བར་སེམས་པས་ཁྱིམ་གྱི་སེམས་དང༌།  བདག་གིས་ཆེད་དུ་མི་སེམས་པས་ཁྱིམ་མེད་པའི་སེམས་དང༌། བཙོན་ར་ལས་བརྒལ་བས་བདེ་བར་སེམས་པ ་ཐར་པའི་སེམས་དང༌། བཙོན་ར་ལས་མ་བརྒལ་བས་སྡུག་བསྔལ་བར་སེམས་པ་མ་ཐར་པའི་སེམས་དང༌། གང་ཆགས་སྡང་གིས་བསད་ཅིང་བཟའ་བར་སེམས་པས་སྲིན་པོའི་སེམས་དང༌། གང་ཕན་ཚུན་གཞོམ་པར་སེམས་པས་མི་རྒོད་ཀྱི་སེམས་དང༌། གཞན་ལ་མཛེས་པར་འདོད་པ་སྟོན་པར་སེམས་པ་ན་ཆུང་གི་སེམས་དང༌། ཐམས་ཅད་ལ་དབང་བྱ་བར་སེམས་པས་རྒྱལ་པོའི་སེམས་དང༌། གང་ཆགས་པས་འདོད་པ་བཙལ་བར་སེམས་པས་སྨད་འཚོང་མའི་སེམས་དང༌། གང་འདོད་པ་གཅིག་ཏུ་མ་ངེས་པར་སེམས་པས་འཕྱོན་མའི་སེམས་དང༌། གང་གཙང་བར་སེམས་པས་བྲམ་ཟེའི་སེམས་དང༌། གང་བསད་པས་འཚོ་བར་སེམས་པས་ཤན་པའི་སེམས་དང༌། གང་འདོད་པ་ཡིད་གདུང་བར་སེམས་པས་ཡི་དྭགས་ཀྱི་སེམས་དང༌། གང་སྡུག་བསྔལ་གྱིས་ཉམ་ཐག་པར་སེམས་པས་དམྱལ་བའི་སེམས་དང༌། གང་ཐམས་ཅད་ལ་འཛུག་པར་སེམས་པས་ཚེར་མའི་སེམས་དང༌། ཐམས་ཅད་དུ་ཡང་པར་སེམས་པས་ཤིང་བལ་གྱི་སེམས་དང༌། ཐམས་ཅད་དུ་དམའ་བར་སེམས་པས་ས་འོག་གི་སེམས་དང༌། གང་ཉམ་ང་བ་མེད་པར་སེམས་པས་ནམ་མཁའ་ལྡིང་གི་སེམས་དང༌། གང་སྡུད་ཅིང་གསལ་བར་སེམས་པས་དྲྭ་བའི་སེམས་དང༌། གང་བཏུམ་པར་སེམས་པས་རྒྱ་ཡི་སེམས་དང༌། གཞན་བཅིང་བར་སེམས་པས་ཞགས་པའི་སེམས་དང༌། ཐམས་ཅད་དུ་བརྐྱང་བར་སེམས་པས་ལིག་རིའི་སེམས་དང༌། ཡང་ན། རྐྱོང་བ། གཅུ་པ། བཅིང་བ་གསུམ་ཀྱང་གསུངས་ཏེ་ཕོ་ལོང་ལྟ་བུའི་ལི་རིའི་དོན་ཏོ། །གཞན་དག་གཟུང་བར་སེམས་པས་ལྕགས་ཀྱུའི་སེམས་དང༌། བརྡུང་བར་སེམས་པས་ཐོ་བའི་སེམས་དང༌། ཐམས་ཅད་བླང་བར་སེམས་པས་ཇུ་ཐུར་གྱི་སེམས་དང༌། གང་བསགས་པར་སེམས་པས་སྣོད་ཀྱི་སེམས་དང༌། རྨུགས་པར་སེམས་པས་ཁྲི་མོན་གྱི་སེམས་དང༌། བསྲེག་པར་སེམས་པས་མེ་ལྕེའི་སེམས་དང༌། བརླག་པར་བྱ་བར་སེམས་པས་ཐུ་ལུམ་གྱི་སེམས་དང༌། ཐམས་ཅད་དུ་གསལ་བར་བྱ་བར་སེམས་པས་མར་མེའི་སེམས་དང༌། ཐམས་ཅད་དུ་ཁྱབ་པར་དྲོ་བར་བྱ་༼༡༣༢༽བར་སེམས་པས་ཉི་མའི་སེམས་དང༌། ཐམས་ཅད་དུ་བསིལ་བས་གདུང་བ་སེལ་བར་སེམས་པས་ཟླ་བའི་སེམས་དང༌། ཐམས་ཅད་དུ་མཉེན་པར་སེམས་པས་དངུལ་གྱི་སེམས་དང༌། མི་འགྱུར་བར་བརྟན་པར་སེམས་པས་གསེར་གྱི་སེམས་དང༌། འཕྲོ་བར་སེམས་པས་མེ་སྟག་གི་སེམས་དང༌། ཐམས་ཅད་དུ་འབྱུང་བར་སེམས་པས་རླུང་གི་སེམས་དང༌། ཐམས་ཅད་བརླན་པར་སེམས་པས་ཆུའི་སེམས་དང༌། དྲང་པོར་བྱ་བར་སེམས་པས་མདུང་ཤིང་གི་སེམས་དང༌། གཞིབ་མོར་བྱ་བར་སེམས་པས་གཏུན་ཤིང་གི་སེམས་དང༌། གཞན་བསྡམ་ཞིང་མཐུན་པར་འཇུག་པར་སེམས་པས་སྒོའི་སེམས་དང༌། གཞན་བསྐྱབ་ཅིང་སེམས་ཕྱོགས་གཉིས་ཀ་དང་ལྡན་པར་སེམས་པས་ཤིང་ལེབ་ཀྱི་སེམས་དང༌། གང་གདུང་བར་སེམས་པས་མེའི་སེམས་དང་། རྟོག་ པ་མེད་པར་གཞིར་སེམས་པའམ་ཐམས་ཅད་བརྡེགས་ཤིང་བསྐྲད་པར་སེམས་པས་སའི་སེམས་དང་། བདག ་གི་ཉེས་པ་གཞན་ལ་བསྐུའོ་བར་སེམས་པས་འདམ་གྱི་སེམས་དང་། ཕ་རོལ་གྱི་ཉེས་པ་འཛིན་ཅིང་སེམས་རྟོག་སྐྱེད་པས་སམ་དྲི་མ་སློང་བས་རྙོག་ཆུའི་སེམས་དང༌། སེམས་གར་འཇུག་པའི་ཡུལ་ལ་ཆགས་ཤིང་འཛིན་པར་སེམས་པས་ཚོན་རྩིའི་སེམས་དང༌། ལོག་པ་ལ་མ་ལོག་པར་སེམས་པས་ནོར་བའི་སེམས་དང༌། གནོད་པ་ཆེད་དུ་བྱ་བར་སེམས་པས་དུག་གི་སེམས་དང༌། ཕན་པ་ཉི་ཚེ་བར་སེམས་པས་སྨན་གྱི་སེམས་དང༌། གང་བརྟས་པར་བྱ་བར་སེམས་པས་ཁ་ཟས་ཀྱི་སེམས་དང༌། རྒྱ་ཆུང་ངུས་རླན་པར་སེམས་པས་ཆུ་དོང་གི་སེམས་དང༌། གང་མི་འགྱུར་བར་དྲང་པོར་གཅིག་ཏུ་ཕིགས་པར་བྱ་བར་སེམས་པས་མདའི་སེམས་དང༌། གང་གཉིས་སུ་བཅད་པར་སེམས་པས་རལ་གྲིའི་སེམས་དང༌། གང་ཀུན་གྱི་བྱ་བ་དེ་བསྐྱར་བར་སེམས་པས་འཁོར་ལོའི་སེམས་དང༌། གང་གྱོང་བ་ལ་ཕྱོགས་གཅིག་ཏུ་རྒྱུད་མཉེན་པར་སེམས་པས་གཞུའི་སེམས་དང༌། གང་དག་བསྡམ་པར་སེམས་པས་སྒྲོག་གི་སེམས་དང༌། གང་གྱོང་ཞིང་བསྒྱུར་དཀའ་བར་སེམས་པས་ཤིང་གི་སེམས་དང༌། གང་གིས་གང་ཞིག་སེམས་པ་དེ་ལ་ཡང་སེམས་དེ་ཐམས་ཅད་གཏན་ནོར་དུ་རུང་བར་ཀུན་ལ་ཕན་པར་བྱ་བར་སེམས་པའམ་ཚོད་ཟིན་པས་ལན་ཚྭའི་སེམས་དང༌། གང་བསམ་པ་ལས་ཡུལ་གཞན་དུ་མི་འཇུག་པར་བཞར་བར་སེམས་པས་སྤུ་གྲིའི་སེམས་དང༌། གང་དྲང་ཞིང་མི་འགྱུར་བར་སེམས་པས་ཐིག་གི་སེམས་དང༌། ༼༡༣༣༽གང་མི་འགྱུར་བར་གཞོམ་པར་སེམས་པས་རྡོ་རྗེའི་སེམས་དང༌། གང་བརྟན་པར་སེམས་པས་རི་རབ་ཀྱི་སེམས་དང༌། གང་མི་གཡོ་བར་ཟབ་པར་སེམས་པས་རྒྱ་མཚོའི་སེམས་དང༌། གང་ཡང་མི་བྱ་བར་འདུག་པར་སེམས་པས་ཕ་བོང་གི་སེམས་དང༌། གང་རང་སྐྱོང་བར་སེམས་པས་ཞིང་གི་སེམས་དང༌། གང་སྔར་སེམས་པ་དེ་ལ་ཕྱིས་མི་འགྱུར་བར་གཏད་པར་སེམས་པས་ཕུག་གི་སེམས་དང༌། གཅིག་ཏུ་མི་གནས་པར་འདུ་བྱེད་དང་འགྲོགས་ཏེ་འགྲོ་བས་སྐྱེ་བའི་སེམས་དང༌། གང་གི་སེམས་དྭང་བ་སྐྱེད་པ་མེ་ཏོག་གི་སེམས་དང༌། གང་དོན་ཡོད་པས་མཐར་ཐུག་པར་སེམས་པ་འབྲས་བུའི་སེམས་དང༌། གང་སེམས་མང་པོ་གཅིག་ཏུ་ཆུད་པར་སེམས་པས་རྩ་བའི་སེམས་དང༌། གཅིག་ལས་མང་པོར་སེམས་པས་ཡན་ལག་གི་སེམས་དང༌། ཡན་ལག་ཀུན་གཅིག་ཏུ་བསྲུང་བར་སེམས་པས་སྡོང་བུའི་སེམས་དང༌། གང་ཞིམ་པས་མི་གནོད་པར་སེམས་པས་མངར་བའི་སེམས་དང༌། གང་མི་མཐུན་པར་སེམས་པས་ཁ་བའི་སེམས་དང༌། ཡིད་དང་མི་མཐུན་པར་ཁྲོ་བར་སེམས་པས་སྐྱུར་བའི་སེམས་དང༌། གཞན་གདུང་བའམ་ཡང་ནས་ཡང་དུ་སེམས་པས་ཚ་བའི་སེམས་དང༌། གང་ཡང་མི་སེམས་པའམ་དྲན་པ་བཏང་སྙོམས་པར་སེམས་པས་བླེག་པའི་སེམས་དང༌། འདི་ལ་སླ་བ་སོགས་ཀྱང་འདུག་གོ །གང་གཞན་གྱི་མ་བསླད་པར་སེམས་པས་བསྐ་བའི་སེམས་དང༌། དོན་མི་འགྱུར་བ་དེ་གཞན་གྱིས་མི་འགྲུབ་པས་ཡི་གེའི་སེམས་དང༌། ཡི་གེ་ནི་མི་འགྱུར་ཏེ་ཨའི་དོན་ཉིད་ཨ་ཉིད་ལས་གཞན་གྱིས་མཚོན་དུ་མི་བཏུབ་པ་བཞིན་ནོ། །ཅིར་ཡང་འཕྲོ་བས་ཚ་ཚའི་སེམས་དང༌། བྱ་བ་ཀུན་སྒོ་དབྱེ་བར་འབྱེད་པས་ལྡེ་མིག་གི་སེམས་དང༌། ནུས་པ་ཆུང་བས་མི་འཇུག་པར་སེམས་པས་བྱ་གག་ལྟ་བུའི་སེམས་དང༌། ཀུན་སྤྲོ་བ་སྐྱེད་དེ་སྡུད་པར་སེམས་པས་ཀུན་དགའ་ར་བ་ལྟ་བུའི་སེམས་དང༌། གང་ཡང་སྦྱར་ཏེ་མི་ཕྱེད་པར་བྱེད་པས་སྦྱར་སྦྱིན་ལྟ་བུའི་སེམས་དང༌། གང་གོ་གསལ་བར་བྱེད་པས་མེ་ལོང་ལྟ་བུའི་སེམས་དང༌། གང་ཁྱབ་པས་ཕན་གདགས་པར་སེམས་པས་ཏིལ་གྱི་མར་ཁུ་ལྟ་བུའི་སེམས་དང༌། གང་གཅིག་གིས་མཐུན་པ་གཉིས་ལ་མཐུན་ཏེ་ཚ་གྲང་གཉིས་ཀ་དང་མཐུན་པ་བཞིན་དུ་སེམས་པས་རྒུན་ཆང་ལྟ་བུའི་སེམས་ཏེ། གང་གཞན་ཞིག་མི་མཐུན་པའི་གཞི་གང་དུའང་མཐུན་པ་བཞིན་ནོ། །དེ་དག་ལ་སོགས་པ་དངོས་པོ་གཞན་བསྡུ་བ་ནི་གཡོ་༼༡༣༤༽འགུལ་དང་དངོས་པོ་མ་འདྲེས་པ་སྣ་ཚོགས་ཀྱི་སེམས་ཐམས་ཅད་དོ། །དེ་ལྟར་མཐའ་ཡས་པའི་སེམས་ཀྱི་དེ་བཞིན་ཉིད་ཡེ་མ་བཅོས་མ་བསླད་པ་གང་ཡིན་པ་དེ་ནི། རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་གང་ཡིན་པ་དེ་ནི་ཇི་བཞིན་པའི་དེ་ཁོ་ན་ཉིད་དེ་ཐ་དད་པ་གཞི་ནས་མེད་དོ། །སྤྱིར་འདྲ་བའི་གཅིག་པ། ངོ་བོའི་གཅིག་པ། ཚོགས་པའི་གཅིག་པ། དབྱེར་མེད་པའི་གཅིག་པ་བཞི་ལས་ཐ་མའོ།།

གཉིས་པ་དེའི་གཏན་ཚིགས་ནི།

ཀྱེ་ལང་ཀའི། ཞེས་པ་ནས། ཕྱིར་རོ། །ཞེས་པའི་བར་གྱིས་བསྟན་ཏེ།

ཀྱེ་ལངྐའི་བདག་པོ་དེ་ཅིའི་ཕྱིར་ཞེ་ན། རྡོ་རྗེ་སེམས་དཔའི་དེ་བཞིན་ཉིད་ནི་མ་བཅོས། མ་བསླད། མ་བྱས།

མ་བཏགས་ཇི་བཞིན་པ་ཡིན་ལ། སེམས་ཅན་ཀུན་གྱི་སེམས་ཀྱི་དེ་བཞིན་ཉིད་གང་ཡིན་པ་དེེ་ཡང་མ་བཅོས། མ་བསླད། མ་བྱས། མ་བཏགས་ཇི་བཞིན་པ་དེ་ཁོ་ན་ཉིད་ཡིན་པའི་ཕྱིར་རོ།།

དེ་དག་གི་གཏན་ཚིགས་ནི། ཀྱེ་ལང་ཀའི་བདག་པོ། དེ་ཅིའི་ཕྱིར་ཞེ་ན། རྡོ་རྗེ་སེམས་དཔའི་དེ་ཁོ་ན་ཡེ་ཇི་བཞིན་པའི་ངོ་བོ་ཉིད་ནི། བྱེད་པ་པོ་མེད་པའི་ཕྱིར་མ་བཅོས། ཡེ་ཉིད་གསལ་བ་ཆེན་པོ་ལ་རྟོག་པས་སེལ་མེད་པའི་ཕྱིར་མ་བསླད། རྒྱུ་རྐྱེན་ལ་རག་མ་ལས་ཤིང་མཁན་པོ་མེད་པས་མ་བྱས། བླ་དྭགས་ཐམས་ཅད་དང་བྲལ་བས། མཐའི་ཐ་སྙད་གང་དུའང་མ་བཏགས་པས་ཁྱད་པར་གྱི་ཆོས་བཞི་དང་ལྡན་པའི་ཡེ་ཇི་བཞིན་པ་ཉིད་ཡིན་ལ། དེ་ལྟར་འགྲོ་བ་སེམས་ཅན་ཀུན་གྱི་སེམས་ཀྱི་དེ་བཞིན་ཉིད་གང་ཡིན་པ་དེ་ཡང་བྱེད་པ་པོས་མ་བཅོས། ལོག་རྟོག་གིས་མ་བསླད། རྒྱུ་རྐྱེན་གྱིས་མ་བྱས། མིང་འདི་ཁོ་ན་བར་མ་བཏགས་ཏེ་རྣལ་མ་ཇི་བཞིན་པ་དེ་ཁོ་ན་ཉིད་ཡིན་པའི་ཕྱིར་རོ།།

གསུམ་པ་དབྱེར་མེད་པའི་ཚད་དང་གྲུབ་མཐའ་ནི།

གང་ཐམས་ཅད། ཅེས་པ་ནས། མི་འགྱུར་རོ། །ཞེས་པའི་བར་གྱིས་བསྟན་ཏེ།

གང་ཐམས་ཅད་མཁྱེན་པའི་སྤྱན་གྱིས་ཀྱང་དེ་གཉིས་ཀྱི་རང་བཞིན་ནི་སོ་སོར་མ་གཟིགས། མི་གཟིགས། གཟིགས་པར་མི་འགྱུར་རོ། །བྱ་བ་བྱེད་པའི་རྣལ་འབྱོར་པ་ལྟར། མ་གཟིགས། མི་གཟིགས། གཟིགས་པར་མི་འགྱུར་རོ། །གང་རྒྱལ་ཚབ་སྐྱེས་བུ་རྣམས་ཀྱིས་སོ་སོར་རྟོགས་པའི་ཤེས་རབ་ཀྱིས་ཀྱང་སོ་སོར་མ་ཕྱེད། མི་ཕྱེད། ཕྱེད་པར་མི་འགྱུར་རོ།།

གང་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཐམས་ཅད་མཁྱེན་པའི་སྤྱན་གྱིས་ཀྱང༌། དེ་གཉིས་ཀྱི་རང་བཞིན་སོ་སོར་སྔར་ཡང་མ་གཟིགས། ད་ལྟར་མི་གཟིགས། ཕྱིས་སུ་གཟིགས་པར་མི་འགྱུར་རོ། །གང་རྒྱལ་ཚབ་སྐྱེས་བུ་རིགས་ལྔ་ལ་སོགས་པ་རྣམས་ཀྱིས་སོ་སོར་རྟོག་པའི་ཤེས་རབ་ཀྱིས་ཀྱང༌། སྔར་སོ་སོར་མ་ཕྱེད། ད་ལྟར་མི་ཕྱེད། ཕྱིས་སུ་ཕྱེད་པར་མི་འགྱུར་ཏེ། གཞན་དང་གཞན་པ་བཙལ་གྱིས་མི་རྙེད་པའི་ཕྱིར་རོ།།

གསུམ་པ་དེ་ཁོ་ན་ཉིད་ཤེས་པར་གདམས་པ་ལ་གཉིས་ཏེ། གདམས་པའི་ཡོན་ཏན། འཇུག་བསྡུ་བའོ། །དང་པོ་ནི།

ཀྱེ་ལང་ཀའི། ཞེས་པ་ནས། ཆེན་པོ་ཡིན་ནོ། །ཞེས་པའི་བར་གྱིས་བསྟན་ཏེ།

ཀྱེ་ལངྐའི་བདག་པོ་གང་གསང་སྔགས་ཀྱི་ངེས་པ་རྙེད་པར་འདོད་པ་རྣམས་ཀྱིས་སེམས་ཀྱི་དེ་ཁོ་ན་ཉིད་ངོ་ཤེས་པར་བྱའོ། །དེ་ཅིའི་ཕྱིར་ཞེ་ན། བྱ་བའི་རྣལ་འབྱོར་པ་ལྟར་སེམས་ཐ་དད་པར་སྣང་བ་རྣམས་བྱ་བ་བྱེད་པའི་རྣལ་འབྱོར་པ་ལྟར་སེམས་དེ་ཁོ་ན་ཉིད་གཅིག་ཏུ་སྣང་ལ། དེ་ཁོ་ན་ཉིད་གཅིག་ནི་དེ་ཁོ་ན་ཉིད་གསང་བ་དམ་པ་ཡིན་པའི་ཕྱིར། སངས་རྒྱས་ཐམས་ཅད་ཀྱི་ཐུགས་རྡོ་རྗེ་སེམས་དཔས་ཀྱང་། སེམས་ཀྱི་དེ་ཁོ་ན་ཉིད་ཐུགས་སུ་ཆུད་པས་གསང་སྔགས་ཀྱི་ངེས་པ་བརྙེས་སོ། །དེ་ཇི་ལྟ་ཞེ་ན། སེམས་ཀྱི་དེ་ཁོ་ན་ཉིད་ནི་རྣམ་པར་དག་པའི་སྒོ་ཡིན་ནོ། །ཆོས་སྣང་བའི་སྒོ་ཡིན་ནོ། །ཆོས་ཀྱི་དབྱིངས་ཡིན་ནོ། །ཆོས་ཀྱི་གླེགས་བམ་ཆེན་པོ་ཡིན་ནོ།།

ཆོས་ཀྱི་རྒྱུན་གྱི་ཏིང་ངེ་འཛིན་ཆེན་པོ་ཡིན་ནོ།།

ཀྱེ་ལང་ཀའི་བདག་པོ། གང་གསང་སྔགས་ཀྱི་དོན་ལ་ངེས་པ་རྙེད་པར་འདོད་པ་རྣམས་ཀྱིས། སེམས་ཀྱི་དེ་ཁོ་ན་ཉིད་དོན་དམ་པ་དེ་ངོ་ཤེས་ཤིང་རྟོགས་པར་བྱའོ། །དེ་ཅིའི་ཕྱིར་ཞེ་ན། རྣལ་འབྱོར་གཉིས་པོ་འདི་ནི་བྱ་བ་བྱེད་པ་དང་བྱ་བ་མེད་པའི་རྣལ་འབྱོར་གྱི་ལམ་གྱི་ཁྱད་པར་ཏེ་བཤད་པའི་གཞི་དང་འབྲས་བུ་ལ་ཐལ་བར་མི་འགྱུར་རོ། །༼༡༤༥༽གང་གཞན་དོན་དུ་རྩོལ་བ་ཆེད་དུ་བྱེད་པ་དབུ་མ་པ་མན་ཆད་ཀྱི་བྱ་བའི་རྣལ་འབྱོར་པ་ལྟར་བདེན་པ་སོ་སོའི་རྣམ་པས་སེམས་ཐ་དད་པའམ་གང་ཟག་གི་རྒྱུད་དང་རྒྱལ་བའི་ཐུགས་རྒྱུད་ཐ་དད་པར་སྣང་བར་མཐོང་བ་རྣམས་ཀྱང༌། གསང་སྔགས་ལུང་གི་སྤྱི་མཛོད་འདིར་རྟོགས་བྱའི་ངོ་བོ་འབྲས་བུ་ཉིད་དུ་ཤེས་པས་བྱ་བ་མེད་པའི་རྣལ་འབྱོར་མཆོག་མན་ངག་གི་རྩ་བ་ཨ་ཏི་ཡོ་གའི་རང་གཞུང་གི་སྐབས་སུ་བསྟན་པ་ལྟར་གཉིས་མེད་ཀྱི་དོན་ཆེན་པོ་སེམས་དེ་ཁོ་ན་ཉིད་གཅིག་ཏུ་སྣང་ལ། དེ་ཁོ་ན་ཉིད་ཐིག་ལེ་ཉག་གཅིག་དེའི་ངོ་བོ་ནི་གསང་སྔགས་ཇི་ལྟ་བ་དེ་ཁོ་ན་ཉིད་གསང་བ་དམ་པ་མ་བསླད་པ་ཉིད་ཡིན་པའི་ཕྱིར་རོ། །གཏན་ཚིགས་དེས་ན་སངས་རྒྱས་ཐམས་ཅད་ཀྱི་ཐུགས་རྡོ་རྗེ་སེམས་དཔས་ཀྱང་སེམས་ཀྱི་དེ་ཁོ་ན་ཉིད་ཀྱི་དོན་འདི་རྟོགས་ཏེ་ཐུགས་སུ་ཆུད་པས་གསང་སྔགས་ཀྱི་ངེས་པ་རྙེད་དེ་སངས་རྒྱས་ནས་མཐར་ཐུག་གི་ལམ་དམ་པ་བརྙེས་པའོ། །དེ་ཇི་ལྟ་བུ་ཞེ་ན། བརྟགས་ཞེན་གྱི་ངོ་བོ་ལས་གྲོལ་བས་བྱང་ཆུབ་སེམས་ཀྱི་དེ་ཁོ་ན་ཉིད་ནི་ལོག་ལྟ་ཀ་ནས་བྲལ་བའི་ཕྱིར་རྣམ་པར་དག་པའི་སྒོ་ཡིན་ནོ། །བསྟན་པ་རིལ་འདིའི་བྱིན་རླབས་ལས་སྣང་བའི་ཕྱིར་ཆོས་སྣང་བའི་སྒོ་ཡིན་ནོ། །མུ་མཐའ་བྲལ་བའི་ཀློང་ལས་ཀུན་འབྱུང་བ་དང་སྡུད་པའི་ངོ་བོ་འབྲས་བུའི་བདག་ཉིད་ཀྱི་ཕྱིར་ཆོས་ཀྱི་དབྱིངས་ཡིན་ནོ། །སྡེ་སྣོད་རྒྱུད་དང་གལ་པོ་ཐམས་ཅད་རྫོགས་པའི་ཕྱིར་བསྟན་པའི་དོན་ཀུན་སྟོན་པས་ཆོས་ཀྱི་གླེགས་བམ་ཆེན་པོ་ཡིན་ནོ། །དུས་གསུམ་ཀུན་ཏུ་ཡེངས་བྲལ་མེད་པའི་ཕྱིར་ཆོས་ཀྱི་རྒྱུན་གྱི་ཏིང་ངེ་འཛིན་ཆེན་པོ་ཡིན་པས་སྟོན་པ་ཉིད་ཀྱང་འདིས་མཐར་སོན་པ་བརྙེས་པ་ཡིན་ནོ།།

གཉིས་པ་འཇུག་བསྡུ་བ་ནི།

ཀྱེ་ལང་ཀའི། ཞེས་པས་ནས། ཐོབ་པ་ཡིན། །ཞེས་པའི་བར་གྱིས་བསྟན་ཏེ།

ཀྱེ་ལངྐའི་བདག་པོ། དེ་ཡང་འདི་ལྟ་སྟེ། གང་གི་སེམས་ཀྱི་དེ་ཁོ་ན། གསང་བའི་སྙིང་པོ་ངེས་རྙེད་ན། །འདྲེན་པའི་ཚིག་གིས་མ་བཀྲོལ་ཡང་། །སེམས་ལས་ཆོས་བྱུང་འབུམ་ཕྲག་ཡས། །སྨྲ་བའི་སྒོ་མོར་ཐམས་ཅད་གསལ།།

དོན་ལ་ངེས་པའི་གཏན་ཚིགས་ནི། །ཚིག་ཏུ་མཚོན་ཏེ་འབྱིན་པར་ནུས། །ཆོས་རྒྱུན་ཏིང་འཛིན་ཐོབ་པ་ཡིན།།

ཀྱེ་ལང་ཀའི་བདག་པོ། དེ་ལྟར་རྟོགས་པའི་ཡོན་ཏན་དང་ལྟས་བསྟན་པ་ཡང་འདི་ལྟ་སྟེ། ལམ་པ་སྐལ་བ་དང༌ལྡན་པ་གང་སུ་ཞིག་གིས་སེམས་ཀྱི་དེ་ཁོ་ན་ཉིད་གསང་སྔགས་ཡེ་ཇི་བཞིན་པའི་དོན་གྱི་སྙིང་པོ་ཡང་དག་པར་མཐོང་ནས་ཐབས་ཀྱིས་ངེས་པ་རྙེད་པར་གྱུར་ན། ཆོས་ཐམས་ཅད་དེར་གསལ་བའི་ཕྱིར་བརྗོད་པ་རིལ་ངེས་དོན་མ་ནོར་བར་མཚོན་པའི་སྒོར་འཆར་བས་ཐུན་མོང་གི་སྒྲ་ཚད་ལ་སོགས་པ་འདྲེན་པའི་ཚིག་ཉི་ཚེ་བ་དག་གིས་གཞན་གྱིས་མ་བཀྲོལ་བས་ཐོས་པའི་རྒྱུ་ལ་འཕྲལ་དུ་མ་ལྟོས་ན་ཡང་རང་གི་སེམས་ལས་ཆོས་ཀྱི་ཚིག་དོན་བདེན་པ་ཇི་སྙེད་པ་ཐམས་ཅད་འབྱུང་ཞིང་ཟབ་རྒྱས་འབུམ་ཕྲག་མཐའ་ཡས་པ་ཀུན་ལ་ཆོས་ཀྱི་སྤྱན་ཐོབ་ནས་རང་དོན་རྫོགས་ལ། ༼༡༣༦༽དེ་ལྟར་ཐེག་པ་ཀུན་གྱི་ཚིག་དོན་ལ་མཁས་པས་སྐལ་ལྡན་རྣམས་ལ་ཚུལ་བཞིན་དུ་སྨྲ་ཞིང་འབེལ་བའི་ཆོས་སྒོ་ཟབ་མོར་ཐམས་ཅད་རང་གསལ་ཞིང་སྒྲིབ་མེད་དུ་གྱུར་ཏེ་གཞན་དོན་རྫོགས་པར་ཐོབ་བོ། །དེའང་དེ་ཁོ་ན་ཉིད་ཀྱི་དོན་མ་འདྲེས་ཡོངས་སུ་རྫོགས་པའི་བརྗོད་བྱ་གང་ལ་ལུང་དང་མན་ངག་རིགས་པ་གསུམ་གྱིས་མ་ནོར་བར་ངེས་པའི་གཏན་ཚིགས་འཁྲུལ་པ་མེད་པ་རྣམས་ནི་རྗོད་བྱེད་ཀྱི་ཚིག་ཏུ་བརྗོད་པས་མཚོན་ཏེ་དོན་གབ་སྦས་མེད་པར་འབྱིན་པར་ནུས་པ་དེ་ནི་དོན་ལ་ངེས་པ་ཐོབ་པའི་ལྟས་དམ་པ་སྟེ་དེ་ལྟར་རྟོགས་པའི་ཀློང་ལ་རྒྱུན་ཆད་མེད་བཞིན་དོན་སྟོན་ནུས་པའི་ཆོས་རྒྱུན་གྱི་ཏིང་ངེ་འཛིན་ཆེན་པོ་ཐོབ་པ་ཡིན་པས་དེ་ལ་ཡེངས་བྲལ་དང་ཡལ་བར་འདུག་པ་གང་ཡང་མེད་དོ།།

བཞི་པ་སེམས་རྟོགས་མ་རྟོགས་ཀྱི་སྐྱོན་ཡོན་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ཀྱེ་ལང་ཀའི། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

ཀྱེ་ལངྐའི་བདག་པོ་དེ་ལྟར་ན་སེམས་ཀྱི་དེ་ཁོ་ན་ཉིད་ནི་བྱང་ཆུབ་ཆེན་པོ་ཡིན་ལ། བྱང་ཆུབ་ནི་རྡོ་རྗེ་སེམས་དཔའ་སྟེ། དེ་ཡང་སངས་རྒྱས་ཀུན་གྱི་བདུད་རྩིར་གྱུར་པ་ནི་འདི་ལྟ་སྟེ།

ཀྱེ་ལང་ཀའི་བདག་པོ་དེ་ལྟར་ན་སེམས་ཀྱི་ཐ་སྙད་གྲགས་པ་བརྒྱ་དང་བརྒྱད་ཅུ་ལ་སོགས་པ་སེམས་ཇི་སྙེད་པ་ཐམས་ཅད་ཀྱི་དེ་ཁོ་ན་ཉིད་ནི་གདོད་མ་ནས་བྱང་ཆུབ་ཆེན་པོ་ཡིན་ལ། བྱང་ཆུབ་ཆེན་པོ་གང་ཡིན་པ་དེ་ནི་སྟོན་པ་རྡོ་རྗེ་སེམས་དཔའ་དང་བླ་ན་མེད་པའི་ཆོས་སྐུ་ཆེན་པོར་ལྷུན་རྫོགས་ཐིག་ལེ་ཉག་གཅིག་སྟེ། དོན་འདི་ཉིད་མ་རྟོགས་ན་ལམ་གཞན་གྱིས་སངས་མི་རྒྱ་བས་དཀྱིལ་འཁོར་གསུམ་དབྱེར་མེད་པའི་རང་རིག་ལྷུན་གྱིས་གྲུབ་པའི་དེ་ཁོ་ན་ཉིད་སྒྲོ་སྐུར་མེད་པར་རྟོགས་པ་ཉིད་སངས་རྒྱས་ཀུན་གྱི་བདུད་རྩིར་གྱུར་པས་རྩོལ་བའི་ནད་གསོ་ཞིང་ཕྱོགས་ལྷུང་གི་དྲི་མ་འཁྲུད་པའི་སྨན་དང་ཁྲུས་ཆེན་པོར་བསྟན་པ་ནི་འདི་ལྟ་སྟེ།

གཉིས་པ་རྒྱས་པར་བཤད་པ་ནི།

བྱང་ཆུབ། ཅེས་པ་ནས། དམ་པར་བསྔགས། །ཞེས་པའི་བར་གྱིས་བསྟན་ཏེ།

བྱང་ཆུབ་སེམས་ཀྱི་ཆུ་མེད་ན། །རྒྱལ་བ་རྣམས་ཀྱང་བསྐམས་པར་འགྱུར། །བྱང་ཆུབ་སེམས་ཀྱི་ཆུ་བོ་འདིས།།

སྔོན་ཞེན་མཐའ་དང་དངོས་བསྐམས་བརླན། །སེམས་ཀྱི་རང་བཞིན་སྟོང་ཉིད་པས། །དེ་ལས་བྱུང་བ་ཐམས་ཅད་སྟོང་། །དེ་སྟོང་པས་ན་བྱང་ཆུབ་ཀྱང་། །སྟོང་ཉིད་སྙིང་པོ་དེ་ཁོ་ན། །རང་བྱུང་ཡེ་ཤེས་ཆུ་ཆེན་པོ། །རྨད་བྱུང་རྒྱ་མཚོའི་ཀློང་དཀྱིལ་ནས། །བྱང་ཆུབ་བདུད་རྩིའི་ཆུ་བྱུང་བས། །རྒྱལ་བ་ཐམས་ཅད་བསིལ་བར་མཛད།།

འདི་ནི་གསང་བའི་སྙིང་པོ་སྟེ། །རྡོ་རྗེ་སེམས་དཔའ་དེ་ཁོ་ན། །ཉིད་དུ་ངེས་པའི་ངོ་བོ་ཡིན།།

རྒྱལ་བ་ཀུན་གྱིས་དམ་པར་བསྔགས།།

ཆོས་ཉིད་བྱང་ཆུབ་སེམས་ཀྱི་རང་བཞིན་ཇི་བཞིན་པ་རྟོགས་པའི་རིག་པ་རྒྱུན་ཆད་མེད་པའི་དགོངས་ཀླུང་ཡེ་ཤེས་ཀྱི་ཆུ་རྒྱུན་མེད་ན། ཡེ་ཇི་བཞིན་པའི་རྒྱལ་བ་རྣམས་ཀྱང་སྐུ་དང་ཡེ་ཤེས་ཀྱི་ལོ་ཏོག་མི་སྐྱེ་བས་སྐམས་པར་འགྱུར་ནའང་བྱ་བ་མེད་པར་མཛད་པའི་མཚན་ཉིད་ཀྱི་ངོ་བོ་བྱང་ཆུབ་སེམས་ཀྱི་རང་རྩལ་རྫོགས་པའི་ཆུ་བོ་ཆེན་པོ་འདིས་བཀྲུས་ནས་གང་ཞིག་སྔོན་མཐའ་ཐོག་མ་མེད་པ་ནས་ལས་ཀྱིས་བརྟགས་པའི་རྟོག་པ་གཉིས་ཀྱི་ཞེན་མཐའ་དང་ཡེ་ནས་བྱང་ཆུབ་སེམས་ཀྱི་མྱུ་གུར་སྔོ་ལྗང་དུ་སྨིན་ཀྱང་ལམ་དང་འབྲས་བུ་གཞན་དུ་ཚོལ་བས་སྐམས་པར་གྱུར་པ་ཉིད་དོན་གྱི་རང་རིག་གསལ་མེད་པ་དག་གིས་བརླན་པར་༼༡༣༧༽བྱེད་དོ། །ཆོས་ཉིད་སེམས་ཀྱི་རང་བཞིན་རང་རིག་པ་ནི་མཐའ་ཐམས་ཅད་དག་པའི་ཕྱིར་རྣམ་པའི་མཆོག་ཐམས་ཅད་དང་ལྡན་པའི་སྟོང་པ་ཉིད་ཡིན་པས། མཚལ་དང་ཁུ་བ་ལྟར་སེམས་དེ་ལས་བྱུང་བ་སྣང་བའི་དངོས་པོའི་ཆོས་ཐམས་ཅད་ཀྱང་སྣང་ཙམ་ན་མཁའ་དང་འཇའ་ཚོན་ལྟར་སྟོང་པ་ཆེན་པོ་མཐའ་དང་བྲལ་བར་གནས་ལ། དེ་ལྟར་སེམས་དང་སེམས་ལས་བྱུང་བ་ཐམས་ཅད་ངོ་བོས་སྟོང་པ་དེ་ལྟ་བས་ན་རྣམ་པ་ཐམས་ཅད་མཁྱེན་པ་རང་བྱུང་གི་ཡེ་ཤེས་བྱང་ཆུབ་ཆེན་པོའི་མཚན་ཉིད་ཀྱང་སྟོང་ཉིད་ཆེན་པོ་རིལ་གྱི་རྩ་བ་དང་བཅུད་དུ་གྱུར་པས་དོན་གྱི་སྙིང་པོ་དེ་ཁོ་ན་ཉིད་དུ་ངེས་པར་གཟུང་ངོ་། །ཡེ་ཤེས་གསང་བ་ལས།

རང་བྱུང་ཉིད་ལ་རྒྱུ་མེད་པས། །རྒྱུ་ཡིས་སྐྱེད་པའི་ཡེ་ཤེས་མིན། །ཞེས་གསུངས་པ་ལྟར་རྒྱུ་རྐྱེན་དང་བྲལ་བས་གང་དུའང་རག་མ་ལས་པར་རང་བྱུང་ཞིང་ཀུན་གྱི་ཐོག་མར་རང་ཤར་དུ་གསལ་བའི་ཡེ་ཤེས་ཀྱི་ཆུ་ཆེན་པོ་ནི། རིལ་རིག་པའི་རྒྱ་མཚོར་ཆུད་ཅིང་བརླན་པའི་ཕྱིར་དཔེར་ན་རྒྱ་མཚོ་ཆེན་པོ་ལ། དཔགས་དཀའ་བ། གཏིང་ཟབ་པ། རྒྱ་ཆེ་བ། རླབས་འབྱུང་བའི་ཆོས་བཞི་ཡོད་པ་ལྟར། རྟོགས་པས་ལྟ་བ་དགོངས་པ་ཏིང་ངེ་འཛིན་ཁྱབ་གདལ་གྱི་ཡེ་ཤེས་སྤྱོད་ལམ་དང་འབྲེལ་བ་རང་རྩལ་དུ་བར་མ་ཆད་པས་ལྟ་སྒོམ་འབྲས་སྤྱོད་ཐམས་ཅད་རྨད་དུ་བྱུང་བའི་རྒྱ་མཚོའི་ཀློང་དཀྱིལ་དབྱིངས་དང་ཡེ་ཤེས་གཉིས་སུ་མེད་པ་ནས་བྱང་ཆུབ་ཀྱི་སེམས་རང་བྱུང་གི་ཡེ་ཤེས་འབའ་ཞིག་ལ་ཕྱི་རོལ་གྱི་ཆོས་མ་སྤངས་ཡང་མ་དམིགས་པའི་ངང་ལས་དེ་ཉིད་ཇི་ལྟ་བར་རིག་པ་ལ་ཤར་བ་ནི་རྟོག་པ་ཉིད་སྨན་དུ་བསྒྱུར་བས་ལོག་རྟོག་དང་མ་འདྲེས་པར་བདུད་རྩིའི་ཆུ་རྒྱུན་བྱུང་བའམ་ཆར་དུ་ཕབ་པས་རིགས་ཀྱི་ཆར་གཏོགས་པ་ཡན་ཆད་ཀྱི་རྟགས་སུ་གནང་བའི་རྒྱལ་བ་ཐམས་ཅད་ཀྱིས་ལྟ་བ་ཚོལ་བ་སོགས་གདུང་བའི་མཐའ་ཐམས་ཅད་དེ་ཡིས་དག་ཅིང་བསིལ་བར་མཛད་དོ། །ཇི་སྐད་བསྟན་པའི་དགོངས་པ་འདི་ནི་གསང་སྔགས་བླ་ན་མེད་པའི་གཞི་དང་རྩ་བར་གྱུར་པས་སྙིང་པོ་མཐར་ཐུག་པ་སྟེ་སྟོན་པ་རྡོ་རྗེ་སེམས་དཔའི་དེ་ཁོ་ན་ཉིད་ཡེ་ཇི་བཞིན་དུ་རྟོགས་ཤིང་རིག་པས་རྒྱུད་དག་པར་ངེས་པའི་ངོ་བོ་ཡིན་པས་རྒྱལ་བ་མ་ལུས་པ་ཀུན་གྱིས་གཞི་ལམ་འབྲས་བུའི་མཆོག་དམ་པར་ཤིན་ཏུ་བསྔགས་པར་གྱུར་པའོ།།

གསུམ་པ་མཇུག་བསྡུ་བ་ནི།

དེ་བས་ན། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

དེ་བས་དེའི་ཕྱིར་ལངྐའི་བདག་པོ་སེམས་ཀྱི་དེ་ཁོ་ན་ཉིད་ངོ་ཤེས་པར་བྱ་བ་ནི་ཡུན་གྱི་དོན་སྲིད་ཆེན་པོའོ། །ཞེས་གསང་བ་པའི་བདག་པོ་དེས་དེ་སྐད་ཅེས་སྨྲས་པས། ཐམས་ཅད་རྡོ་རྗེ་སེམས་དཔའི་དེ་ཁོ་ན་ཉིད་དུ་རྣམ་པར་གྲོལ་བའི་ལམ་དུ་གྱུར་ཏོ།།

དེ་ལྟ་བས་ན་གཏན་ཚིགས་དེའི་ཕྱིར་ལང་ཀའི་བདག་པོ་དོན་ཆེན་པོ་སེམས་ཀྱི་དེ་ཁོ་༼༡༣༨༽ན་ཉིད་ངོ་ཤེས་ཏེ་མཐོང་བར་བྱ་བ་ནི་མཐའི་ཕུག་དང་ཡུན་གྱི་དོན་སྲིད་ཆེན་པོ་ཡིན་པས་དོན་དེ་རྟོགས་པར་གྱིས་ཤིག་པར་གདམས་པའོ། །ཞེས་གསང་བ་པའི་བདག་པོ་ཕྱག་ན་རྡོ་རྗེ་དེས་དེ་སྐད་ཅེས་སྨྲས་ཏེ་བཀའ་སྩལ་པས། འཁོར་རྣམས་ཀྱིས་གསང་སྔགས་ཇི་བཞིན་པའི་དོན་རྟོགས་ཏེ་ཆོས་ཐམས་ཅད་རྡོ་རྗེ་སེམས་དཔའི་དེ་ཁོ་ན་ཉིད་དུ་རྣམ་པར་གྲོལ་བའི་ལམ་དུ་གྱུར་ཏོ།།

ལེའིུ་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྡོ་རྗེ་སེམས་དཔའི་དེ་ཁོ་ན་ཉིད་བསྟན་པའི་ལེའུ་སྟེ་དགུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྡོ་རྗེ་སེམས་དཔའི་མ་བཅོས་པའི་ཆོས་ཉིད་དེ་ཁོ་ན་ཉིད་རྣལ་འབྱོར་དང་པོའི་དོན་ལམ་པ་བྱ་བ་མེད་པ་དག་གི་ཡུལ་བསྟན་པའི་ལེའུ་སྟེ་དགུ་པ་གསལ་བར་བཤད་པའོ།། །།

ལེའུ་བཅུ་པ་ཁྱད་པར་དམ་པ།

༈ གཉིས་པ་དེ་ཁོ་ན་ཉིད་ཐེག་པ་གཞན་ལས་འཕགས་ཏེ་ཆེ་བ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས། ཞེས་པ་ནས། བྲལ་བའི་ཕྱིར་རོ། །ཞེས་པའི་བར་གྱིས་བསྟན་ཏེ།

དེ་ནས་ལངྐའི་བདག་པོས། གསང་བ་པའི་བདག་པོ་ལ་དྲིས་པ། གསང་བ་པའི་བདག་པོ་གསང་སྔགས་ཀྱི་ངོ་བོ་སེམས་ཀྱི་དེ་ཁོ་ན་ཉིད་དེ་གང་གི་སྤྱོད་ཡུལ་དུ་གྱུར། སྨྲས་པ། ལངྐའི་བདག་པོ་དེ་ནི་སངས་རྒྱས་བཅོམ་ལྡན་འདས་རྣམས་ཀྱི་སྤྱོད་ཡུལ་དུ་གྱུར་ཀྱི། ས་དང་ས་ལ་གནས་པ་རྣམས་ཀྱི་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་བརྟག་པར་དཀའ་ཞིང་བསྟན་པར་དཀའ་ལ། བརྗོད་པའི་ཐ་སྙད་རྣམས་དང་བྲལ་བའི་ཕྱིར་རོ།།

ལེའུ་འདིས་དྲང་དོན་ངེས་དོན་གཉིས་ཀ་སྟོན་ཏོ། །དེ་ནས་ཡང་ལང་ཀའི་བདག་པོས། གསང་བ་པའི་བདག་པོ་ལ་དྲིས་པ། གསང་བ་པའི་བདག་པོ། གསང་སྔགས་ཀྱི་ངོ་བོ་སེམས་ཀྱི་དེ་ཁོ་ན་ཉིད་དེ་བློ་གང་གི་སྤྱོད་ཡུལ་དུ་གྱུར་ཞེས་དྲིས་ཏེ་སྤྱོད་ཡུལ་བཞི་ལས་རང་རིག་པའི་མངོན་སུམ་གཙོར་བྱས་པའོ། །ལན་སྨྲས་པ། ལང་ཀའི་བདག་པོ། དེ་ནི་སངས་རྒྱས་བཅོམ་ལྡན་འདས་རྒྱལ་བ་རྣམས་ཀྱི་མངོན་སུམ་གྱི་སྤྱོད་ཡུལ་དུ་གྱུར་གྱི། འཇིག་རྟེན་པའི་ས་དང་གསང་བ་ནའང་གང་སེམས་སྐྱེས་པ་དང༌། གཞི་ལ་གནས་པ་དང༌། བརྒྱུད་ནས་བགྲོད་པའི་ཉན་རང་ནས་ས་བཅུ་པའི་སེམས་དཔའ་ཆེན་པོ་མན་ཆད་ས་ལ་གནས་པ་རྣམས་ཀྱི་སྤྱོད་ཡུལ་ནི་མ་ཡིན་ནོ། །དེའི་གཏན་ཚིགས་དེ་ཅིའི་ཕྱིར་ཞེ་ན། གསང་སྔགས་ཇི་བཞིན་པ་དེ་ནི་འདི་ལྟར་རྣམ་པ་ཐམས་ཅད་པ་ཡིན་པས་བློས་བརྟགས་པར་དཀའ་ཞིང༌། མཚན་ཉིད་གང་དུའང་མ་ངེས་པས་གཞན་ལ་བསྟན་པར་དཀའ་ལ། རང་གི་ངོ་བོ་བརྗོད་པ་ཐམས་ཅད་ཀྱིས་ཐོག་ཏུ་མི་ཕེབས་པའི་ཕྱིར་བརྗོད་པའི་ཐ་སྙད་ཀུན་དང་ཡང་བྲལ་བའི་ཕྱིར་རོ།།

གཉིས་པ་རྒྱས་པར་བཤད་པ་ལ་གཉིས་ཏེ། བརྩད་པའི་དྲིས་པ། དེའི་ལན་ནོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་ནས། ཞེས་སེམས་ལ། ཞེས་པ་ནས། མ་ཡིན་ཞེས་སྨྲ། ཞེས་པའི་བར་གྱིས་བསྟན་ཏེ།

ཞེས་སེམས་ལ་གནས་པ། སེམས་ལ་སྤྱོད་པ། སེམས་ལ་དབང་བ། སེམས་ལ་བལྟ་བ། སེམས་མཐོང་བ།

སེམས་ངོ་ཤེས་པ་ལགས་ན། གསང་བ་པའི་བདག་པོ་ཅིའི་ཕྱིར་དམ་པ་འབའ་ཞིག་གི་སྤྱོད་ཡུལ་ཡིན་གྱི།

ས་པ་རྣམས་ཀྱི་མ་ཡིན་ཞེས་སྨྲ།

རྒྱུར་འདོད་པ་རྣམས་ཀྱང་སེམས་ཞེས་བྱ་བ་ཡེ་༼༡༣༩༽ནས་མ་སྐྱེས་པར་མཐོང་བའི་ཏིང་ངེ་འཛིན་སྒོམ་པས་སེམས་ལ་གནས་ཏེ་འདུག་པ་དང༌། སེམས་གཏན་ལ་འབེབས་པའི་ཐབས་ཀྱིས་དཔྱོད་ཅིང་དོན་ལ་འདྲིས་གོམས་བྱེད་པ་དང༌། དོན་དེ་ཉིད་ཐོབ་པས་སེམས་ལ་དབང་བ་དང༌། སེམས་དེ་ལ་ཤེས་རབ་ཀྱིས་དམིགས་ཏེ་ལྟ་བ་དང༌། རང་བཞིན་རྟོགས་པའི་ཕྱིར་སེམས་མཐོང་བ་དང༌། སེམས་ཀྱི་དོན་བརྡ་འཇལ་བས་ངོ་ཤེས་པ་ལགས་ན། གསང་བ་པའི་བདག་པོ་ཅིའི་ཕྱིར་རྒྱལ་བ་དམ་པ་ཉིད་ཁོ་ན་འབའ་ཞིག་གི་སྤྱོད་ཡུལ་ཡིན་གྱི། ས་པ་དེ་རྣམས་ཀྱིས་རྟོགས་པ་མ་ཡིན་ཞེས་སྨྲ་ཞིང་བཀའ་སྩལ་བ་དེ་མི་འགལ་ལམ་ཞེས་དྲིས་སོ།།

གཉིས་པ་རྒྱས་པར་བཤད་པ་ལ་དྲུག་སྟེ། སེམས་ལ་དཔྱོད་པ། སེམས་ལ་ལྟ་བ། སེམས་མཐོང་བ། སེམས་ལ་གནས་པ། སེམས་ལ་དབང་བ། སེམས་ངོ་ཤེས་པའོ། །དང་པོ་ནི།

གོང་གི ལང་ཀའི། ཞེས་པ་ནས། སྐྱེ་མཆེད་ལ་མ་མཐོང༌། ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། གསང་བ་པའི་བདག་པོ་སེམས་ཀྱི་དེ་ཁོ་ན་ཉིད་གསང་སྔགས་ཀྱི་ངོ་བོ་དེ་གང་དམ་པ་རྣམས་ཀྱི་སྤྱོད་ཡུལ་ལས་མ་གཏོགས་པ་གཞན་དང་ཐུན་མོང་མ་ལགས་ན་ནི། འོ་ན་གང་བྱ་བའི་རྣལ་འབྱོར་པ་རྣམས་ཀྱང་སེམས་ཀྱི་དེ་ཁོ་ན་ཉིད་ལ་ལྟ་ཞིང་། སེམས་ཀྱི་རྒྱུད་ཀུན་ཏུ་བཙལ་ན་གང་དེའི་ཚེ་ནང་གི་སེམས་ཀྱང་མ་མཐོང་ཕྱིའི་སེམས་ཀྱང་མ་མཐོང་། ནང་དང་ཕྱིའི་སེམས་ཀྱང་མ་མཐོང་། གང་ཕུང་པོ་ལ་སེམས་མ་མཐོང་། ཁམས་ལ་མ་མཐོང་། འདུ་མཆེད་ལ་མ་མཐོང་།།

ཡང་ལང་ཀའི་བདག་པོས་དྲིས་པ། ཀྱེ་གསང་བ་པའི་བདག་པོ། སེམས་ཀྱི་དེ་ཁོ་ན་ཉིད་གསང་སྔགས་ཀྱི་ངོ་བོ་དེ་ཉིད། གང་དམ་པ་རྒྱལ་བ་རྣམས་ཀྱི་སྤྱོད་ཡུལ་ཁོ་ན་ལས་མ་གཏོགས་པ་གཞན་ས་ལ་གནས་པ་རྣམས་དང་ཡང་ཐུན་མོང་གི་སྤྱོད་ཡུལ་དུ་གྱུར་པ་མ་ལགས་ན་ནི། འོ་ན་གང་རྩོལ་བ་ཆེད་དུ་བྱེད་པའི་དབུ་མ་པ་བྱང་ཆུབ་སེམས་དཔའི་མདོ་སྡེའམ་བྱ་བའི་རྣལ་འབྱོར་པ་རྣམས་ཀྱང༌། དོན་དམ་པ་སེམས་ཀྱི་དེ་ཁོ་ན་ཉིད་ཡུལ་དུ་མ་དམིགས་པས་སྟོང་པ་ཉིད་ལ་ཀུན་རྫོབ་ཙམ་དུ་དམིགས་ཤིང་དཔྱོད་དེ་བལྟ་ཞིང་དེས་སོ་སོར་རྟོག་པའི་ཤེས་རབ་ཀྱིས་སེམས་ཀྱི་རྒྱུད་ཀུན་ཏུ་བཙལ་ཏེ་བལྟས་ན། གང་དེའི་ཚེ་ལུས་ལ་ནང་གི་སེམས་ཀྱང་མ་མཐོང༌། འབྱུང་བ་ལྔ་དང་ཡུལ་ལྔ་ལ་ཕྱིའི་སེམས་ཀྱང་མ་མཐོང༌། གཉིས་ཀའམ་ནང་དང་ཕྱིའི་རྣམ་པར་ཤེས་པས་སེམས་ཀྱང་མ་མཐོང༌། དེ་བས་ན་གང་ཕུང་པོ་ལྔ་ལ་སེམས་མ་མཐོང༌། ཁམས་བཅོ་བརྒྱད་ལ་ཡང་མ་མཐོང༌། དབང་པོའི་འདུ་བ་ཡུལ་ལ་མཆེད་པས་སྐྱེ་མཆེད་བཅུ་གཉིས་ལ་ཡང་སེམས་དངོས་པོ་འདི་འདྲར་མ་མཐོང་སྟེ། དོན་དམ་པར་མ་སྐྱེས་པའི་ངོ་བོ་ཉིད་ཡིན་པའི་ཕྱིར། རྡོ་རྗེ་གཅོད་པ་ལས། རབ་འབྱོར་འདས་པའི་སེམས་ཀྱང་དམིགས་སུ་མེད། མ་འོངས་པའི་སེམས་ཀྱང་དམིགས་སུ་མེད། ད་ལྟར་བྱུང་བའི་སེམས་ཀྱང་དམིགས་སུ་མེད་དོ། །ཞེས་སོ།།

གཉིས་པ་སེམས་ལ་ལྟ་བ་ནི།

དེས་༼༡༤༠༽སེམས་མ་མཐོང༌། ཞེས་པ་ནས། ཞེས་བལྟས་ནས། ཞེས་པའི་བར་གྱིས་བསྟན་ཏེ།

དེས་སེམས་མ་མཐོང་བ་དང་། སེམས་དེ་གང་ལས་བྱུང་ཞེས་བལྟས་ན།

དེས་དེ་ལྟར་དོན་དམ་པར་སེམས་ཀྱི་ངོ་བོ་མ་མཐོང་བ་དང་དེའི་རང་བཞིན་མཐོང་བར་འདོད་པས་སེམས་འདི་གང་ནས་བྱུང་ཞེས་བལྟས་ན། དེ་འདི་ལྟར་ཡིད་ལ་བྱེད་ཅིང་སེམས་སོ། །གང་དམིགས་པ་ཡུལ་ཡོད་དེ་རྐྱེན་བཞི་འཛོམས་པས་ན་སེམས་བྱུང་སྟེ་ཤེས་པ་སྐྱེ་བ་ཡང་རྒན་པོ་འཁར་བ་ལ་བརྟེན་པ་ལྟར་མཉམ་དུ་ལྡང་ཞིང་སྐྱེ་བར་མཐོང་ངོ༌། །དེ་ནས་ཡང་ཡུལ་དང་ཤེས་པ་དེ་གཉིས་གཅིག་གམ་ཐ་དད་བརྟགས་ཏེ་འདི་ལྟར་སེམས་སོ། །གང་ཉན་ཐོས་པ་ལྟར་དམིགས་པ་དེའང་གཞན་ནམ་ཅི། སེམས་པ་དེའང་གཞན་ནམ་གང༌། ཞེས་ཐ་དད་པ་དང༌། གང་སེམས་ཙམ་པ་ལྟར་དམིགས་པ་དེ་ཉིད་སེམས་ཡིན་ནམ། སེམས་པ་དེ་ཉིད་དམིགས་པའམ་ཞེས་གཅིག་ཏུ་བརྟགས་ན། གལ་ཏེ་སྔ་མ་ལྟར་དམིགས་པ་དེ་ཡང་གཞན། སེམས་པ་དེ་ཡང་གཞན་ན་ནི་དེ་ཁོ་ན་ཉིད་ཆོས་ཇི་བཞིན་པར་མི་ཅིག་སྟེ་མ་འདུས་པས་ཡུལ་སེམས་གཉིས་སུ་ཐ་དད་པར་གནས་པའི་སྐྱོན་དུ་འགྱུར་རོ། །འོན་ཏེ་ཕྱི་མ་ལྟར་ཡུལ་ཉིད་ཤེས་པ་ལ་ཤེས་པ་ཉིད་ཡུལ་དུ་སྣང་སྟེ་གཅིག་པ་ཞིག་ཡིན་ན་ནི། སེམས་རང་ལ་སེམས་རང་ཉིད་ཀྱིས་རྗེས་སུ་ལྟ་ཞིང་སེམས་རང་གིས་རང་ལ་དམིགས་ཏེ་མཐོང་བ་མི་རིགས་སོ། །དེའང་འདི་ལྟ་སྟེ་དཔེར་ན། རལ་གྲི་དེས་དེ་ཉིད་གཅོད་པར་མི་ནུས་པ་དང༌། སོར་མོའི་རྩེ་མོ་དེས་དེ་ཉིད་ལ་རེག་པར་མི་ནུས་པ་བཞིན། སེམས་དེ་ལ་སེམས་དེས་དམིགས་པར་མི་ནུས་སོ། །ཞེས་བལྟས་ནས་བརྟགས་པའི་རྒྱུས་དོན་དམ་པར་རང་བཞིན་ཡང་སྟོང་པ་ཉིད་དུ་ལྟའོ།།

གསུམ་པ་སེམས་མཐོང་བ་ནི།

འདི་ལྟར། ཞེས་པ་ནས། མཐོང་ངོ་། །ཞེས་པའི་བར་གྱིས་བསྟན་ཏེ།

དེ་འདི་ལྟར་སེམས་སོ། །གང་དམིགས་པ་ཡོད་པས་ན་སེམས་འབྱུང་ངོ་། །དེ་ཡང་འདི་ལྟར་སེམས་སོ། །དམིགས་པ་དེ་ཡང་གཞན་ནམ་ཅི། །སེམས་པ་དེ་ཡང་གཞན་ནམ་གང་། །དམིགས་པ་དེ་ཉིད་སེམས་ཡིན་ནམ། །སེམས་པ་དེ་ཉིད་དམིགས་པ་འམ། །གལ་ཏེ་གམིགས་པ་དེ་ཡང་གཞན། །སེམས་པ་དེ་ཡང་གཞན་ན་ནི། །དེ་ཁོ་ན་ཉིད་མི་གཅིག་སྟེ་གཉིས་སུ་འགྱུར་རོ། །འོན་ཏེ་གཅིག་པ་ཞིག་ཡིན་ན་ནི་སེམས་ལ་སེམས་ཀྱི་རྗེས་སུ་བལྟ་བས། སེམས་ཀྱིས་སེམས་མཐོང་བ་མི་རིགས་སོ། །འདི་ལྟ་སྟེ། དཔེར་ན་རལ་གྲི་དེས་དེ་ཉིད་གཅོད་མི་ནུས་པ་དང་། སོར་མོའི་རྩེ་མོ་དེས་དེ་ཉིད་ལ་རེག་པར་མི་ནུས་པ་བཞིན། སེམས་དེ་ལ་སེམས་དེས་དམིགས་མི་ནུས་སོ། །ཞེས་ལྟས་ནས་འདི་ལྟར་མཐོང་སྟེ། གང་རག་མ་ལུས་པ་སེམས་ལ་གནས་མེད་པ། རྟེན་མེད་པ། ཆད་པར་མ་ཡིན། རྟག་པར་མ་ཡིན། སྤུངས་པར་མ་ཡིན། རྒྱུ་ལས་མ་བྱུང་། རྐྱེན་ལས་མ་ཡིན། དེ་ལས་མ་ཡིན། གཞན་ལས་མ་ཡིན། དེ་ཉིད་མ་ཡིན། གཞན་མ་ཡིན། རིགས་མེད་པ། རྒྱུད་མེད་པ། མི་འཕྲོ་བ། མི་སྣང་བ། ངོ་བོ་ཉིད་མེད་པ། ཇི་བཞིན་པ་དེ་བཞིན་དུ་མཐོང་ངོ་།།

དེ་ནས་ཚུལ་ཇི་ལྟར་མཐོང་ན། འདི་ལྟར་ཐ་སྙད་བཅུ་བདུན་ལས་གྲོལ་བས་དོན་དམ་པའི་རང་བཞིན་འབའ་ཞིག་ཏུ་མཐོང་སྟེ་གང་མི་འགྱུར་བར་ཡོངས་སུ་གྲུབ་པས་མ་སྐྱེས་པ་དེ་རྒྱུ་རྐྱེན་ལ་རག་མ་ལས་པ་དང༌། དེ་ལ་གཞི་རྟེན་དང་བྲལ་བས་སེམས་ལ་གནས་མེད་པ་དང༌། རྩ་བ་མེད་པས་དམིགས་པའི་རྟེན་མེད་པ་དང༌། དྲན་པ་སྣ་ཚོགས་ཀྱི་རྒྱུན་སྒྱུ་མ་ལྟར་སྣང་བས་ཆད་པར་མ་ཡིན་པ་དང༌། སྐད་ཅིག་མ་ལ་ཐེར་ཟུག་པ་དང་གང་ཟག་གི་ བདག་མེད་པས་རྟག་པར་མ་ཡིན་པ ་དང༌། རང་བཞིན་འདུས་མ་བྱས་པའི་ཕྱིར་དུ་མ་འདུས་པས་སྤུངས་པར་མ་ཡིན་པ་དང༌། དེ་ཉིད་མ་ཡིན་པར་རྒྱ་ཆད་པའི་༼༡༤༡༽ཡོད་མེད་ལས་མ་སྐྱེས་པས་ཐོག་མ་རྒྱུ་ལས་མ་བྱུང་བ་དང༌། གཞི་དང་བྲལ་བ་ལ་གློ་བུར་བའི་སྐྱེད་བྱེད་གཞན་ན་མེད་པས་བར་དུ་རྐྱེན་གྱིས་མ་བསྐྱེད་དང༌། རྒྱུ་རྐྱེན་གྱི་དངོས་པོ་དེ་ཉིད་ལས་སྐྱེད་པ་མ་ཡིན་པ་དང༌། རྒྱུ་རྐྱེན་མིན་པ་གཞན་ལས་སྐྱེད་པ་མ་ཡིན་པ་དང༌། རྒྱུ་རྐྱེན་གྱི་ངོ་བོ་དེ་ཉིད་ཁོ་ན་ཡང་མ་ཡིན་པ་དང༌། རྒྱུ་རྐྱེན་དེ་ལས་གཞན་ཡང་མ་ཡིན་པ་དང༌། དེ་ལ་རྣམ་པའི་རྒྱུན་འཛིན་པ་མིན་པས་རིགས་མེད་པ་དང༌། ལོང་བཏགས་ནས་རྗེས་སུ་འབྱུང་ཞིང་ངེས་པ་མ་ཡིན་པས་རྒྱུད་མེད་པ་དང༌། མཐའ་གར་ཡང་མི་སྣང་བས་མི་འཕོ་བ་དང༌། ངོ་བོ་གང་དུའང་མི་གཟིགས་པས་མི་སྣང་བ་དང༌། དངོས་གཞི་འདི་འདྲ་བར་གང་ཡང་མིན་པས་ངོ་བོ་ཉིད་མེད་པ། གཞི་མ་བཅོས་མ་བསླད་པའི་སྟོང་པ་ཉིད་ཇི་ལྟ་བ་དེ་བཞིན་དུ་ལམ་པའི་ཤེས་རབ་ཀྱི་དབང་པོས་མཐོང་ངོ་། །དེའང་ཆོས་འབྱུང་བ་མེད་པའི་མདོ་ལས། འཇམ་དཔལ་གང་གིས་ཆོས་ཐམས་ཅད་སྐྱེ་བ་དང་འཇིག་པ་བྲལ་ཞིང་ཤེས་པ་དང་མི་ཤེས་པ་དང་བྲལ་ཏེ་རང་བཞིན་གྱིས་སྟོང་པར་མཐོང་ན་དེ་ནི་ཤེས་རབ་ཀྱི་དབང་པོའོ། །ཞེས་སོ།།

བཞི་པ་སེམས་ལ་གནས་པ་ནི།

ཡང་དག་པ། ཞེས་པ་ནས། ཉིད་དོ། །ཞེས་པའི་བར་གྱིས་བསྟན་ཏེ།

ཡང་དག་པ། མི་གཡོ་བ། དབེན་པ། ཅུང་ཟད་ཀྱང་མ་མཐོང་། རྣམ་པར་མ་མཐོང་། མི་རྟོག རྣམ་པར་མི་རྟོག མི་བསྐྱོད། མི་སེམས། མི་སྤྲོ། སེམས་གཟུགས་མེད་པ། གང་བྱུང་བ་ཡང་གཟུགས་མེད་པ། གང་ལ་གཟུགས་མེད་པས། བྱང་ཆུབ་ལ་ཡང་གཟུགས་མེད་དོ། །སེམས་ཀྱི་རང་བཞིན་ནི་བྱང་ཆུབ་བོ། །བྱང་ཆུབ་ཀྱི་རང་བཞིན་ནི་ཆོས་ཐམས་ཅད་དོ། །ཆོས་ཐམས་ཅད་ཀྱི་རང་བཞིན་ནི་དེ་ཁོ་ན་ཉིད་དོ།།

མཉམ་པར་བཞག་པའི་སེམས་ལ་གནས་པའི་དུས་ནའང་ཐ་སྙད་བཅུ་གཉིས་གྲོལ་བར་བསྟན་ཏེ། ཇི་ལྟ་བ་དེ་ཁོ་ན་ཉིད་སྟོང་པ་དེ་ནི། རྟོག་པའི་བློས་མ་བཅོས་ཏེ་མི་བསླུ་བས་ཡང་དག་པ། རང་བཞིན་མ་ནོར་བའི་ཕྱིར་བརྟགས་པས་ཡུལ་ལ་མི་གཡོ་བ། རིལ་མ་སྐྱེས་པ་འབའ་ཞིག་པའི་ཕྱིར་ཅིའང་མི་འབྱུང་བས་མཐས་མ་རེག་སྟེ་དབེན་པ། སྤྲོས་པ་བརྒྱད་དང་གསུམ་ལས་རིང་དུ་གྱུར་པས་ངོ་བོ་ཅུང་ཟད་ཀྱང་མ་མཐོང་བ། བྱེ་བྲག་ཐ་དད་པའི་ཆོས་ཀྱི་རང་གི་ངོ་བོར་མི་རྙེད་པས་རྣམ་པར་མ་མཐོང་བ། ཕྱོགས་ཆར་མི་ཟིན་པས་མི་རྟོག་པ། ཅིའང་མ་དམིགས་ཤིང་དེ་ཉིད་དུའང་མི་འཛིན་པས་རྣམ་པར་མི་རྟོག་པ། རི་དང་འདྲ་བར་ལོག་པའི་ཆོས་ཀྱིས་མི་བསྒུལ་བས་ཡུལ་གྱིས་མི་བསྐྱོད་པ། གང་ཡང་ཡིད་ལ་མི་བྱེད་པས་ཡུལ་དུ་མི་སེམས་པ། ངོ་བོ་ཐ་དད་དུ་མི་འབྱུང་བས་ཡུལ་སྣ་ཚོགས་ལ་མི་སྤྲོ་བ། ཤེས་པ་ལ་དབྱིབས་དང་ཁ་དོག་གི་རྣམ་པ་མེད་པས་སེམས་ལ་གཟུགས་མེད་པ། དེ་ལས་སྣང་བའི་ཆོས་རྣམས་ཀྱང་སྟོང་པས་གང་བྱུང་བ་ལ་ཡང་གཟུགས་མེད་པ། ཡུལ་༼༡༤༢༽སེམས་ཀྱི་རྣམ་པ་གཉིས་ཀ་གང་ལ་ཡང་གཟུགས་མེད་པས་བླ་ན་མེད་པའི་བྱང་ཆུབ་ཆེན་པོ་ལ་ཡང་གཟུགས་མེད་དེ་མ་སྐྱེས་པ་སྟོང་པ་ཉིད་དོ། །དེའི་གཏན་ཚིགས་དེ་ལྟ་བས་ན་སེམས་ཀྱི་རང་བཞིན་ནི་ལྷག་པའི་ཆོས་ཀྱི་སྐུ་བླ་ན་མེད་པའི་བྱང་ཆུབ་བོ། །བྱང་ཆུབ་ཆེན་པོ་ཉིད་ཀྱི་རང་བཞིན་ནི་ཆོས་ཐམས་ཅད་མ་སྐྱེས་པ་དེ་ཁོ་ན་ཉིད་དེ་གཟུགས་མེད་དོ། །དེ་བས་ན་རྡོ་རྗེ་གཅོད་པ་ལས། གང་དག་ང་ལ་གཟུགས་སུ་མཐོང༌། །གང་དག་ང་ལ་སྒྲར་ཤེས་པ། །ལོག་པར་སྤྲོས་ལ་ཞུགས་པ་སྟེ། །སྐྱེ་བོ་དེ་ཡིས་ང་མི་མཐོང༌། །སངས་རྒྱས་རྣམས་ནི་ཆོས་ཀྱི་སྐུ། །འདྲེན་པ་རྣམས་ནི་ཆོས་ཉིད་ལྟ། །ཞེས་འབྱུང་ངོ་། །ཆོས་ཐམས་ཅད་ཀྱི་རང་བཞིན་སྟོང་པ་ཉིད་ནི་གཞན་མ་ཡིན་ཏེ་རང་གི་སེམས་ཀྱི་དེ་ཁོ་ན་ཉིད་དོ། །དེས་ན་དོན་དམ་པར་སེམས་དང་ཆོས་ནི་ཐམས་ཅད་དུ་མི་ཕྱེད་པས་མ་སྐྱེས་པ་དེ་ཁོ་ན་ཉིད་དུ་རྟོགས་སོ།།

ལྔ་པ་སེམས་ལ་དབང་བ༌ནི།

སེམས་འདི་ནི། ཞེས་པ་ནས། སེམས་དེ་ཁོ་ན་བར་ཤེས་པ། ཞེས་པའི་བར་གྱིས་བསྟན་ཏེ།

སེམས་འདི་ནི་འདི་ལྟར་མྱུར་བ། རབ་ཏུ་མྱུར་བ། མི་གནས་པ། རྒྱུ་བ། སྤྲེའུ་ལྟ་བུ། རླུང་ལྟ་བུ། སྨིག་རྒྱུ་ལྟ་བུ། ཆུའི་རྒྱུན་ལྟ་བུ། མར་མེ་ལྟ་བུ། ལུས་གཟུགས་མེད་པ། རིང་དུ་འགྲོ་བ། གར་ཡང་མི་གཡོ་བ། སླར་ལྡོག་པ། ཡུལ་ལ་གནས་པ། དྲུག་གི་སྤྱོད་ཡུལ་བ། ཀུན་ཤེས་པ། གཅིག་ཏུ་ཐུབ་པ། མི་འབྱུང་བ། ཐམས་ཅད་འབྱུང་བ། ཞི་གནས་པ། ཐ་དད་པ། གཅིག་པ། མི་གཡེང་བ། ཀུན་ཏུ་གཡེངས་པ། སེམས་དུས་གསུམ་དུ་མཉམ་པར་ཤེས་པ།

སེམས་དེ་ཁོ་ན་བར་ཤེས་པ།

སེམས་ཀྱི་མཚན་ཉིད་ཉེར་ལྔ་གྲོལ་བ་ལས་གཞན་མ་ཡིན་པར་ཡང་མཐོང་སྟེ། སེམས་དེ་ལྟར་རྟོགས་པ་འདི་ཉིད་ཀྱང་ནི་འདི་ལྟར་སྐད་ཅིག་ལ་ཐོགས་པ་མེད་པར་འབྱུང་བ་གློག་དང་འདྲ་བས་མྱུར་བ། ཆེས་ཤིན་ཏུ་ཡང་ཐོགས་པ་མེད་པས་རབ་ཏུ་མྱུར་བ། མཚན་ཉིད་གཅིག་ཏུ་མི་དམིགས་པས་ཕྱོགས་གཅིག་ལ་མི་གནས་པ། ཡུལ་ལ་སྣ་ཚོགས་སུ་འགྲོ་བས་རྒྱུ་བ། སྒོ་ཀུན་ཏུ་འབྱུང་བས་སྤྲེའུ་ལྟ་བུ། འདུ་བྱེད་ལྔ་བཅུས་བསྐྱོད་དེ་གཡེངས་པས་རླུང་ལྟ་བུ། ཀུན་ཏུ་འགྲོ་བར་སྣང་ལ་རང་བཞིན་མེད་པས་སྨིག་རྒྱུ་ལྟ་བུ། སྔ་ཕྱི་རྒྱུན་མི་ཆད་ཅིང་སྐད་ཅིག་མའི་ཕྲེང་བར་ངོས་འབྱར་བས་ཆུའི་རྒྱུན་ལྟ་བུ། རྒྱུ་རྐྱེན་ལས་འབྱུང་ཞིང་གསལ་བའི་ཕྱིར་མར་མེ་ལྟ་བུ། དབྱིབས་དང་ཁ་དོག་གིས་གདོས་པས་མ་ཟིན་པས་ལུས་གཟུགས་མེད་པ། ཐོག་རྡུགས་མེད་པར་རྒྱང་རིང་དུ་འགྱུ་བས་རིང་དུ་འགྲོ་བ། དོན་དམ་པར་མ་སྐྱེས་པས་རང་བཞིན་འབྱུང་འཇུག་བྲལ་བས་གར་ཡང་མི་གཡོ་བ། བརྟགས་པའི་དངོས་པོའི་ཡུལ་བཅད་ནས་སླར་ནང་དུ་འཇུག་པས་སླར་ལྡོག་པ། སྒྲ་དོན་སྤྱིའི་ཡུལ་དང་མི་ཕྱེད་པས་ཡུལ་ལ་གནས་པ། ཚོགས་དྲུག་གི་ཡུལ་ཀུན་ཏུ་སྣང་བས་དྲུག་གི་སྤྱོད་ཡུལ་བ། སྣང་བ་རིལ་གསལ་བར་རིག་པས་ཀུན་ཤེས་པ། རྩེ་གཅིག་ཏུ་ཞི་བར་གནས་པས་མི་འཕྲོ་བའི་ཕྱིར་གཅིག་ཏུ་ཐུབ་པ། དོན་དམ་པར་ངོ་བོ་གང་དུའང་མི་སྣང་བས་རང་བཞིན་སྟོང་པ་ཉིད་ཀྱི་ཕྱིར་༼༡༤༣༽མི་འབྱུང་བ། རྟོགས་མ་རྟོགས་ལས་ཅིར་ཡང་སྣང་བས་དེ་ཉིད་ལས་ཐམས་ཅད་འབྱུང་བ། དོན་དམ་པར་བྱིང་རྒོད་དང་བྲལ་ཏེ་རང་བཞིན་མི་གཡོ་བར་ཇི་བཞིན་པའི་ཕྱིར་གཞི་གནས་པ། ལས་ཀྱི་ཁྱད་པར་གྱིས་བརྟགས་པ་སྣ་ཚོགས་ཏེ་ངོ་བོ་མི་གཅིག་པས་ཐ་དད་པ། ཤེས་ཤིང་རིག་པའི་རིགས་སུ་འདུས་པས་རིགས་གཅིག་པ། དོན་དམ་པར་ངོ་བོ་ཐ་དད་མེད་ཅིང་རང་བཞིན་འདུ་བྱེད་དང་བྲལ་བས་མི་གཡེང་བ། ཐུན་མོང་དང་ཐུན་མོང་མ་ཡིན་པའི་འཁོར་དང་མཚུངས་པར་འདུ་བྱེད་པས་ཀུན་ཏུ་གཡེང་བ། དོན་དམ་པར་སྔ་ཕྱི་དང་ད་ལྟར་དུའང་རང་བཞིན་མ་སྐྱེས་ཏེ་སེམས་དུས་གསུམ་དུ་མཉམ་པར་ཤེས་པ། རྣམ་པ་མེད་ལ་སྙིང་པོ་མེད་ཅིང་བཟང་ངན་དང་བྲལ་བས་སེམས་བཏང་སྙོམས་སུ་དེ་ཁོ་ན་བར་ཤེས་ཏེ་སེམས་ལ་དབང་ཐོབ་པ་ཡིན་ནོ། །འདི་དག་དབུ་མ་པའི་དོན་དམ་དང་ཀུན་རྫོབ་ཀྱི་འདོད་ལུགས་ཇི་ལྟ་བ་བཞིན་དུ་བསྟན་པ་སྟེ། ལྔ་ནི་དོན་དམ་མཉམ་བཞག་ལ། གཞན་རྣམས་ནི་ཀུན་རྫོབ་རྗེས་ཤེས་ཀྱི་སྐབས་སོ།།

དྲུག་པ་སེམས་ངོ་ཤེས་པ་ནི།

ཇི་ལྟར། ཞེས་པ་ནས། མ་ཡིན་ནོ། །ཞེས་པའི་བར་གྱིས་བསྟན་ཏེ།

ཇི་ལྟར་རང་གི་སེམས་ཤེས་པ་དེ་ལྟར་གཞན་གྱི་སེམས་ཀྱང་རབ་ཏུ་ཤེས་སོ། །བདག་གི་སེམས་ཇི་ལྟར་སྟོང་པ་དེ་ལྟར་ཐམས་ཅད་ཀྱི་སེམས་ཀྱང་སྟོང་པར་རབ་ཏུ་ཤེས་སོ། །རང་གི་སེམས་མཉམ་པར་ཤེས་པ་དེ་བཞིན་དུ་ཐམས་ཅད་ཀྱི་སེམས་ཀྱང་མཉམ་པར་རབ་ཏུ་ཤེས་སོ། །དེས་ཆོས་ཐམས་ཅད་མཉམ་པར་རབ་ཏུ་ཤེས་སོ། །ཆོས་ཐམས་ཅད་མཉམ་པས་བྱང་ཆུབ་ཀྱང་མཉམ་པར་རབ་ཏུ་ཤེས་སོ། །དེས་ཆོས་ཐམས་ཅད་ཀྱི་དབྱིངས་སུ་རབ་ཏུ་ཤེས་སོ། །ཆོས་ཐམས་ཅད་ཀྱི་དབྱིངས་དེ་ནི་ཀུན་གྱི་ཐུན་མོང་མ་ཡིན་ནོ།།

ཇི་ལྟར་རང་གི་སེམས་ཀྱི་ཆོས་ཉིད་སྐྱེ་བ་མེད་པའི་ངོ་བོ་མ་ནོར་བ་མི་འགྱུར་བའི་རང་བཞིན་དུ་རྟོགས་ཤིང་ཤེས་ཏེ་སེམས་ལ་དབང་ཐོབ་པ་དེ་ལྟར་འགྲོ་བ་གཞན་གྱི་སེམས་ཀྱང་རབ་ཏུ་ཤེས་སོ། །གང་བདག་གི་སེམས་ཇི་ལྟར་སྟོང་པ་ཉིད་དུ་ཤེས་པ་དེ་ལྟར། གཞན་ཐམས་ཅད་ཀྱི་སེམས་ཀྱང་སྟོང་པ་ཡིན་པར་རབ་ཏུ་ཤེས་སོ། །རང་གི་སེམས་སྟོང་པ་དེའང་མཉམ་པ་ཉིད་ཡིན་པར་ཤེས་ཤིང་རྟོགས་པ་དེ་བཞིན་དུ་གཞན་ཐམས་ཅད་ཀྱི་སེམས་ཀྱང་དེ་ལྟར་མཉམ་པ་ཉིད་ཡིན་པར་རབ་ཏུ་ཤེས་ཏེ་ངོ་བོས་ཐ་མི་དད་པའི་ཕྱིར་བདག་རྟོགས་པས་གཞན་ཤེས་སུ་རུང་བར་འཐད་པས་སོ། །དེ་ལྟར་བདག་གཞན་ཤེས་པ་དེས་ཆོས་ཐམས་ཅད་ཀྱང་རང་བཞིན་མཉམ་པར་རབ་ཏུ་ཤེས་སོ། །ཆོས་ཐམས་ཅད་རང་བཞིན་མཉམ་པས་བྱང་ཆུབ་ཆེན་པོའང་མཉམ་པ་ཉིད་ཡིན་པར་རབ་ཏུ་ཤེས་ཏེ། གཅིག་དང་དུ་མ་ལས་གྲོལ་བས་སོ། །དེ་ལྟ་བུར་རྟོགས་པ་དེས་སེམས་མ་སྐྱེས་པ་དེ་ཉིད་ཆོས་ཐམས་ཅད་ཀྱི་དབྱིངས་སུ་ཡང་དག་པར་རབ་ཏུ་ཤེས་སོ། །ཆོས་ཐམས་ཅད་ཀྱི་དབྱིངས་དེ་ནི་ཀུན་གྱིས་ཐུན་མོང་མ་ཡིན་པས་དམན་པ་དག་གི་ཡུལ་མ་ཡིན་ནོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་སོ། །དེ་ལྟ་བས་ན་ཅིའི་ཕྱིར་རྒྱལ་བ་ཉག་གཅིག་གི་སྤྱོད་ཡུལ་དུ་བཀའ་སྩལ་པ་༼༡༤༤༽ལགས་ཞེས་དྲིས་པའོ།།

གཉིས་པ་ལན་ལ་གསུམ་སྟེ། སེམས་འབྲས་བུར་མ་ཤེས་པས་ཁྱད་པར་ཡོད་པར་དམ་བཅའ། དེའི་གཏན་ཚིགས་གསལ་བར་བཤད། དེ་ལས་འཕྲོས་པའི་དྲི་ལན་གྱིས་ཐེ་ཚོམ་ཆོད་པའོ། །དང་པོ་ནི།

གསང་བ་པའི། ཞེས་པ་ནས། མི་ཤེས་སོ། །ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་སྨྲས་པ། ལངྐའི་བདག་པོ་དེ་དེ་ལྟ་ཡིན་མོད་ཀྱི། དེ་དག་ནི་ཐམས་ཅད་ནས་ཐམས་ཅད་དུ་སེམས་ཀྱི་དེ་ཁོ་ན་ཉིད་ལ་རྒྱུའི་མཚན་ཉིད་འབའ་ཞིག་ཏུ་ཤེས་པར་ཟད་ཀྱི། འབྲས་བུ་ཉིད་དུ་ཡོངས་སུ་མི་ཤེས་སོ།།

གསང་བ་པའི་བདག་པོས་སྨྲས་པ། ལང་ཀའི་བདག་པོ། དེ་དེ་ལྟ་ཡིན་མོད་ཀྱི། ས་བཅུ་པ་མན་ཆད་ཀྱི་བྱང་ཆུབ་སེམས་དཔའ་དེ་དག་ནི་ཐམས་ཅད་ནས་ཐམས་ཅད་དུ་དུས་སྔ་ཕྱིར་སེམས་ཀྱི་དེ་ཁོ་ན་ཉིད་རང་རིག་པ་དོན་དམ་པའི་བདེན་པ་ལ་རྒྱུའི་མཚན་ཉིད་འབའ་ཞིག་ཙམ་དུ་ཤེས་ཤིང་མཐོང་བས་མཉམ་པར་འཇོག་པ་ཡོད་དེ་བདེན་པ་རེས་མོས་སུ་གྱུར་པར་ཟད་ཀྱི། གཉིས་མེད་ཀྱི་དོན་བརྩལ་བ་དང་བྲལ་བར་མ་མཐོང་བས་འབྲས་བུ་ཉིད་ཡོངས་སུ་མི་ཤེས་སོ།།

གཉིས་པ་དེའི་གཏན་ཚིག་གསལ་བར་བཤད་པ་ནི།

དེ་ཅིའི་ཕྱིར། ཞེས་པ་ནས། ལྟ་ཅི་སྨོས། ཞེས་པའི་བར་གྱིས་བསྟན་ཏེ།

དེ་ཅིའི་ཕྱིར་ཞེ་ན། འདི་ལྟ་སྟེ། གང་ས་པ་དང་། ས་པ་རྣམས་ནི་དྲ་བ་བཞིའི་རྒྱར་ཡོངས་སུ་ཆུད་པ་སྟེ། བཞི་གང་ཞེ་ན། ༡༽གང་དྲ་བ་ཆེན་པོ་དང་། ༢༽དྲ་བ་དང་། ༣༽དྲ་བ་ཕྱེད་པ་དང་། ༤༽དྲ་བ་གཅིག་པའོ། །༡༽དེ་ཡང་བྱིས་པ་རྣམས་དང་། ༢༽སྨྱོན་པ་དང་། ༣༽འདུ་ཤེས་ཆུང་བ་རྣམས་དང་། ༤༽འདུ་ཤེས་གཅིག་པ་རྣམས་ཁོ་ན་སྟེ། གང་ས་པ་རྣམས་ནི། སེམས་རྒྱུ་འབའ་ཞིག་ལས་མི་ཤེས་པའི་ཕྱིར་འདུ་ཤེས་གཅིག་པ་སྟེ། དེ་དག་ནི་དྲ་བར་ཆུད་པ། དྲ་བས་བཅིངས་པ་ཤ་སྟག་པས། འབྲས་བུའི་ངེས་པ་རྙེད་པ་ཤིན་ཏུ་དཀའ་བ་ཡིན་ནོ། །དེ་ཅིའི་ཕྱིར་ཞེ་ན། ལངྐའི་བདག་པོ་འདི་ལྟར་སེམས་འབྲས་བུའི་དེ་ཁོ་ན་ཉིད་གང་ཡིན་པ་དེ་ནི། སངས་རྒྱས་རྣམས་ཀྱིས་ཀྱང་གསུང་དུ་མེད་པ། རྡོ་རྗེ་སེམས་དཔས་ཀྱང་མཚོན་དུ་མེད་པ་ཡིན་ན། བྱང་ཆུབ་སེམས་དཔའ་རྣམས་ཀྱིས་ལྟ་ཅི་སྨོས།

འོ་ན་དེ་ལྟར་མ་མཐོང་བ་རྒྱུ་ཅི་ལས་གྱུར་པའམ་ཅིའི་ཕྱིར་ཞེ་ན། དེའི་གཏན་ཚིགས་འདི་ལྟ་སྟེ། གང་འཇིག་རྟེན་པའི་ས་པ་མ་རྟོགས་པའི་འཇིག་རྟེན་པ་དང༌། ལོག་པར་རྟོག་པ་ཐེག་པ་ཆུང་ངུ་བ་དང༌། འཇིག་རྟེན་ལས་འདས་པའི་ས་པ། ཕྱོགས་ཙམ་རྟོགས་པ་སེམས་སྐྱེས་པའི་ས་ལ་གནས་པ་དང༌། ཡང་དག་པ་ཉིད་མ་རྟོགས་པ་བཅུ་ལ་གནས་པ་རྣམས་ནི་འཆིང་བའི་དྲྭ་བ་བཞིའི་རྒྱར་ཡོངས་སུ་ཆུད་པ་སྟེ། བཞི་གང་ཞེ་ན། གང་དོན་ལ་ཤེད་མ་བྱེ་བའི་སྦྲམ་པོའི་ཕྱིར་དྲྭ་བ་ཆེན་པོ་གཟུང་འཛིན་གྱི་རྟོག་པ་དང༌། དམིགས་པ་ལོག་པར་དཔྱོད་པས་བཅིངས་ཏེ་ནན་གྱིས་རྟོག་ པ་དྲྭ་བ་ལོག་རྟོག་ཙམ་དང༌། གང་འདུ་ཤེས་རྒྱ་ཆུང་ངུས་གང་ཟག་གི་བདག་མེད ་དང་གཟུང་བ་ཙམ་རང་བཞིན་མེད་པར་མཐོང་བས་ཕྱོགས་གཅིག་པའི་མྱང་འདས་ལ་གནས་པ་སྔ་མ་ལ་ལྟོས་ན་དྲྭ་བ་ཕྱེད་པ་ཆོས་ཀྱི་ བདག་མེད་མ་རྟོགས་པ ་དང༌། གང་དོན་དམ་པ་ཕྱོགས་གཅིག་པའི་སྤྲོས་བྲལ་ལ་འདུ་ཤེས་དམིགས་པས་མཐའ་སེལ་ཞིང་མི་རྟོག་པས་དྲྭ་བ་གཅིག་པ་སྟེ་གཉིས་མེད་མ་མཐོང་བའི་ཕྱིར་ནའོ། །དེ་ཡང་སྐྱེ་བོ་བྱིས་པ་རྣམས་དང༌། མུ་སྟེགས་བྱེད་སྨྱོན་པ་རྣམས་དང༌། ཉན་རང་འདུ་ཤེས་ཆུང་བ་རྣམས་དང་། དབུ་མ་པ་འདུ་ཤེས་གཅིག་པ་རྣམས་ཁོ་ན་སྟེ། འདིར་ཕྱག་མཆན་ཞིག་ན་ཐེག་པ་ཆུང་ངུ་དང་སེམས་སྐྱེས་པའི་ས་ལ་གནས་པ་གཉིས་གོ་༼༡༤༥༽རིམ་ལྟར་མ་སྦྱར་བའང་འདུག་སྟེ་སྔ་མ་ལ་འཇིག་རྟེན་པའི་ཐེག་པར་གཏོགས་པའང་འཆིང་བའི་དྲྭ་བར་ཆུད་ན་གཞན་ལྟ་ཅི་སྨོས་ པ་དང༌། ཕྱི་མ་ལའང་ཉན་ཐོས་ཀྱིས་ཆོས་ཀྱི་བདག་མེད ་མ་རྟོགས་ཤིང་རང་རྒྱལ་གྱིས་ཀྱང་འཛིན་སེམས་མ་རྟོགས་པས་གོ་རིམ་ལྟར་བྱས་ཀྱང་ངེས་ཚིག་ལེགས་པར་མངོན་ནོ། །དེ་བས་ན་གང་ཐ་མའི་དོན་གྱི་བྱང་ཆུབ་སེམས་དཔའ་ས་པ་རྣམས་ནི་སེམས་ཉིད་སངས་རྒྱས་ཀྱི་རྒྱུ་འབའ་ཞིག་ལས་འབྲས་བུར་མ་རྟོགས་ཏེ་མི་ཤེས་པའི་ཕྱིར་འདུ་ཤེས་གཅིག་པ་ཁོ་ན་སྟེ། དེ་དག་ནི་དྲྭ་བར་ཆུད་པ། དྲྭ་བས་བཅིངས་པ་ཤ་སྟག་པས་གསང་སྔགས་འབྲས་བུའི་དེ་ཁོ་ན་ཉིད་ལ་ངེས་པ་རྙེད་པར་ཤིན་ཏུ་དཀའ་བ་ཡིན་ནོ། །འབྲས་བུར་མ་རྟོགས་པའི་གཏན་ཚིགས་གང་སྙམ་པ་ལ། དེ་ཅིའི་ཕྱིར་ཞེ་ན། ལང་ཀའི་བདག་པོ། འདི་ལྟར་སེམས་འབྲས་བུའི་དེ་ཁོ་ན་ཉིད་མཐར་ཐུག་པས་སྐྱེད་དུ་བྱ་བ་མེད་པའི་ངོ་བོ་མ་ནོར་བ་གང་ཡིན་པ་དེ་ནི། ཚིག་གིས་མི་ཕེབས་ཤིང་ངོ་བོ་བསྟན་དུ་མེད་པས། སངས་རྒྱས་རྣམས་ཀྱིས་ཀྱང་གསུང་དུ་མེད་ལ། རྡོ་རྗེ་སེམས་དཔས་དཔེ་ཡིས་ཀྱང་མཚོན་དུ་མེད་པ་ཡིན་པ་དེ་ལྟ་བས་ན་བྱང་ཆུབ་སེམས་དཔའ་དོན་དམ་པ་འབའ་ཞིག་ལ་དམིགས་པ་རྣམས་ཀྱིས་མ་གོ་ཞིང་མ་རིག་པ་ལྟ་ཅི་སྨོས་པའི་ཕྱིར་རོ།།

གསུམ་པ་དེ་ལས་འཕྲོས་པའི་དྲི་ལན་གྱིས་ཐེ་ཚོམ་ཆོད་པ་ནི།

ཡང་ལང་ཀའི། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། གསང་བ་པའི་བདག་པོ་ཅི་ཁྱོད་ཀྱིས་ཀྱང་སེམས་འབྲས་བུའི་དེ་ཁོ་ན་ཉིད་དུ་ངེས་པ་དེ་མ་རྙེད་དམ། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ལངྐའི་བདག་པོ་ཁོ་བོས་ཀྱང་ད་དུང་ངེས་པ་མ་རྙེད་པའི་ཕྱིར། གཞན་ལ་བསྟན་པར་རབ་ཏུ་དཀའ་འོ། །དེ་ཅིའི་ཕྱིར་ཞེ་ན། དེ་ནི་བཅོམ་ལྡན་འདས་རྡོ་རྗེ་སེམས་དཔའ་ཉག་གཅིག་གི་དགོངས་པའི་སྤྱོད་ཡུལ་དུ་གྱུར་པའོ། །ཞེས་གསང་བ་པའི་བདག་པོ་དེས་དེ་སྐད་ཅེས་སྨྲས་པས། ཐམས་ཅད་བྱང་ཆུབ་ལས་འཁྲུལ་པའི་ཡེ་རྔམ་ཡོངས་སུ་ཆད་པར་གྱུར་ཏོ།།

ཡང་ལག་ཀའི་བདག་པོས་དྲིས་པ། གསང་བ་པའི་ བདག་པོ། དེ་ལྟར་བརྗོད་དུ་མེད་པ ་དང་རྟོགས་དཀའ་བ་ལགས་ན་ཅི་གསང་བའི་མངའ་བདག་ཕྱག་ན་རྡོ་རྗེ་ཁྱེད་ཉིད་ཀྱིས་ཀྱང་སེམས་ཉིད་གསང་སྔགས་འབྲས་བུའི་དེ་ཁོ་ན་ཉིད་དུ་ད་དུང་མ་རྟོགས་པའམ་ངེས་པ་མ་རྙེད་དམ། ཞེས་དེ་སྐད་ཅེས་སྨྲས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ། དོན་ལ་དགོངས་ཏེ་བསྐུལ་བའི་ཆེད་དུ་ཁོ་བོས་ཀྱང་ད་དུང་ངེས་པ་ཅན་དུ་མ་རྙེད་པའི་ཕྱིར། གཞན་ལ་ངེས་ཅན་དུ་བསྟན་པར་རབ་ཏུ་དཀའོ། །ཞེས་དགོངས་པ་ཅན་གྱིས་བཤད་པས་མ་མཐོང་བ་སྐད་དུ་བསྟན་ཏེ། དེ་ཅིའི་ཕྱིར་ཞེ་ན། དེ་ནི་བཅོམ་ལྡན་འདས་རྒྱལ་བའི་སྤྱི་མེས་རྡོ་རྗེ་སེམས་དཔའ་ཉག་གཅིག་གི་དགོངས་པའི་སྤྱོད་ཡུལ་དུ་གྱུར་ཏེ་དོན་སེམས་ལས་གཞན་དུ་རྟོགས་སུ་མེད་པའོ། །ཞེས་གསང་བ་པའི་བདག་པོ་དེས་དེ་སྐད་ཅེས་སྨྲས་ཏེ་བཀའ་སྩལ་པས། འཁོར་ཐམས་ཅད་ཡེ་ནས་བྱང་ཆུབ་ལ་འཁྲུལ་པས་རྒྱུ་འབྲས་ཐ་དད་དུ་འཛིན་པའི་དབང་གིས་བྱང་ཆུབ་གཞན་དུ་ཚོལ་༼༡༤༦༽བའི་འབྲས་བུ་ལ་ཡེ་ངམ་ཡོངས་སུ་ཆད་དེ་རྔམ་ཆགས་དང་བྲལ་བར་གྱུར་ཏོ། །འདི་ཉིད་གསང་བདག་གི་འཁོར་ཡིན་གྱི་རྒྱལ་ཚབ་སྐྱེས་བུ་མིན་ནོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཁྱད་པར་དམ་པའི་ལེའུ་སྟེ་བཅུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། མདོ་སྔགས་ཀྱི་ཁྱད་པར་དང་གསང་ཆེན་དམ་པའི་ངོ་བོ་བརྗོད་དེ་རྒྱུའི་ཐེག་པ་ས་བཅུ་མན་ཆད་ཀྱིས་ཀྱང་ད་དུང་གསང་སྔགས་ཇི་བཞིན་པ་མངོན་དུ་མ་གྱུར་པས་ཐེག་པ་ཆེན་པོ་གསང་སྔགས་འཕགས་པར་བསྟན་པའི་ལེའུ་སྟེ་བཅུ་པ་རྣམ་པར་བཤད་པའོ། །འོ་ན་བཤད་པ་དག་ལས་གཞིའི་གསུམ་པ་ནི་གསང་སྔགས་ལ་འཇུག་ལ། འདིར་ས་བཅུ་པས་ཀྱང་མ་མཐོང་བས་འགལ་ལོ་ཞེས་དྲི་ན། བཤད་པའི་གཞི་གསུམ་པ་ནི། ཁྱད་པར་གྱི་ལམ་དེ་ཉིད་ཀྱི་སྐབས་སུ་དོན་མཐོང་བ་ལ་བཏགས་པའི་ཕྱིར་དང༌། འདིར་ཐུན་མོང་གི་ལམ་མཐར་ཕྱིན་པ་བས་མ་མཐོང་བར་བསྟན་པའི་མི་འགལ་བའི་ཕྱིར་རོ། །དེས་ན་ཐུན་མོང་ཉིད་བཙན་པའི་དབང་དུ་ན་གསང་སྔགས་ཇི་བཞིན་པ་ནི་བདེན་པ་གཉིས་ཀའི་ཕྱིར་གཞི་གསུམ་པས་ཕྱོགས་གཅིག་ལ་ཞུགས་ལ། བཅུ་པ་ནི་གཉིས་མེད་ཡུལ་དང་བྲལ་བའང་མ་མཐོང་བའི་ཕྱིར་ཤེས་བྱ་ད་དུང་མ་སྤངས་པའོ།།

ལེའུ་བཅུ་གཅིག་པ་རྒྱུད་དག་པའི་སྐྱེ་རྒྱུད་བསྟན་པ།

༈ གསུམ་པ་དེ་ལམ་པ་དང་ངེས་པ་རྙེད་བྱེད་ཀྱི་ཐབས་ཀྱིས་རྙེད་དཀའ་བ་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

དེ་ནས། ཞེས་པ་ནས། སྨྲས་པ་ལས། ཞེས་པའི་བར་གྱིས་བསྟན་ཏེ།

དེ་ནས་ལངྐའི་བདག་པོ་ལ་སོགས་པ། འགྲོ་བ་ལུས་ཀྱི་སེམས་དཔའ་ངོ་མཚར་དུ་གྱུར། རྨད་དུ་གྱུར་ཏེ། འདི་སྐད་ཅེས་སྨྲས་སོ། །ཀྱེ་གསང་བ་པའི་བདག་པོ་སངས་རྒྱས་བཅོམ་ལྡན་འདས་ཐམས་ཅད་ཀྱིས་བཀའ་སྩལ་པ་ལྟར་ན། གསང་བ་པའི་བདག་པོ་ནི་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་སེམས་དཔའི་གསང་བ་དམ་པ་མ་ནོར་བ་དེ་ཁོ་ན་ཉིད་ཐེ་ཚོམ་ཐམས་ཅད་གཅོད་པ་ལགས་ན། འབྲས་བུའི་དེ་ཁོ་ན་ཉིད་གསང་བ་དམ་པ་སྟོན་མི་སྤྱོད་པ་སྟེ། ཤིན་ཏུ་ངོ་མཚར་ཆེ་བ་ལྟར་ན། བདག་ཅག་གིས་ནམ་ངེས་པ་རྙེད་པར་འགྱུར་ཞིག་གུ་ཞེས་སྨྲས་པ་ལས།

ལེའུ་འདིས་དྲང་དོན་ཤས་ཆེ་བར་སྟོན་ནོ། །གསང་སྔགས་ཀྱི་དོན་མ་རྙེད་པ་དང༌། རྙེད་པའི་ལོ་རྒྱུས་རྗེས་མཐུན་དུ་འཆད་པ་གང་ཞེ་ན། དེ་ནས་ཡང་ལང་ཀའི་བདག་པོ་ལ་སོགས་པ་འགྲོ་བ་དམན་པའི་ལུས་འཛིན་པས་རིགས་ཅན་གྱི་སེམས་དཔའ་དེ་རྣམས། གསང་སྔགས་རྒྱུ་འབྲས་གཉིས་སུ་མེད་པའི་དོན་གསང་བ་པོ་ཉིད་ཀྱིས་ཀྱང་སྟོན་མི་སྤྱོད་པ་ལ་ངོ་མཚར་དུ་གྱུར། རྨད་དུ་གྱུར་ཏེ་འདི་སྐད་ཅེས་སྨྲས་སོ། །ཀྱེ་གསང་བ་པའི་བདག་པོ། སངས་རྒྱས་བཅོམ་ལྡན་འདས་རྣམས་ཀྱིས་བཀའ་སྩལ་པ་ལྟར་ན། གསང་བ་པའི་བདག་པོ་ནི། དེ་བཞིན་གཤེགས་པ་ཐམས་ཅད་ཀྱི་བདག་པོའམ་ངོ་བོ། རྡོ་རྗེ་སེམས་དཔའི་ཆོས་ཉིད་རྟོགས་དཀའ་བས་གསང་བ། དངོས་པོ་དང་བྲལ་བས་དམ་པ་དོན་ཇི་བཞིན་པས་མ་ནོར་བ་ངོ་བོ་མི་འགྱུར་བས་དེ་ཁོ་ན་ཉིད་གང་དང་གང་གི་ཡང་ཐེ་ཚོམ་ཐམས་ཅད་རིམ་དང་ཅིག་ཆར་གྱིས་གཅོད་པ་ལ་མཆོག་ཏུ་བསྔགས་པ་ལགས་ན། དེས་ཀྱང་འབྲས་བུའི་དེ་༼༡༤༧༽ཁོ་ན་ཉིད་གསང་བ་དམ་པ་སྟོན་མི་སྤྱོད་པ་དེ་ནི་ཤིན་ཏུ་རྟོགས་པར་དཀའ་བས་ངོ་མཚར་ཆེ་བ་ལར་ཡེ་མི་སྲིད་པ་ལྟར་ན། བདག་ཅག་གིས་ནམ་ཞིག་ན་ངེས་པ་རྙེད་པར་འགྱུར་ཞིག་གུ་ཞེས་གདུངས་པའི་ཚུལ་གྱིས་སྨྲས་པ་ལས་ཞེས་པའོ།།

གཉིས་པ་ལན་ལ་བཞི་སྟེ། རྡོ་རྗེ་སེམས་དཔས་ཀྱང་དེ་ཁོ་ན་ཉིད་མ་རྟོགས་པར་དཀའ་བ་སྤྱད་ཀྱང་ངེས་པ་མ་རྙེད་པ། རྒྱུད་དག་པའི་སྒྲོན་མ་ཀུན་གྱིས་ཀྱང་དེ་ཁོ་ན་ཉིད་མ་རྟོགས་པར་ངེས་པ་མ་རྙེད་པ། རྒྱལ་ཚབ་སྐྱེས་བུས་ལམ་བགྲོད་ཀྱང་ངེས་པ་མ་རྙེད་པ། ངེས་པ་རྙེད་པར་བྱ་བའི་ཕྱིར་ཞུས་ལན་ནོ། །དང་པོ་ནི།

གསང་བ་པའི། ཞེས་པ་ནས། མ་མཁྱེན་ཏོ། །ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་སྨྲས་པ། ཀྱེ་དམན་པའི་ལུས་ཀྱི་སེམས་དཔའ་དག དེ་བཞིན་གཤེགས་པ་ཐམས་ཅད་ཀྱི་མངའ་བདག་རྡོ་རྗེ་སེམས་དཔའ་ཉིད་ཀྱིས་ཀྱང་། གསང་སྔགས་ཀྱི་དེ་ཁོ་ན་ཉིད་མ་རྙེད་ཀྱི་བར་དུ་བསྐལ་པ་གྲངས་མེད་པ་གསུམ་སྙེད་དུ་དཔག་ཏུ་མེད་པའི་དཀའ་བ་སྤྱད་ཀྱང་། རྣམ་པ་ཐམས་ཅད་མ་མཁྱེན་ནོ།།

གསང་བ་པའི་བདག་པོས་སྨྲས་པ། ཀྱེ་དམན་པའི་ལུས་ཀྱི་སེམས་དཔའ་དག དེ་བཞིན་གཤེགས་པ་ཐམས་ཅད་ཀྱི་མངའ་བདག་སྟོན་པ་རྡོ་རྗེ་སེམས་དཔའ་ཉིད་ཀྱིས་ཀྱང་གསང་སྔགས་ཀྱི་དེ་ཁོ་ན་ཉིད་མ་རྙེད་ཀྱི་བར་དུ་སྔོན་རྒྱུ་ལ་གནས་པའི་དུས་སུ་བསྐལ་པ་གཅིག་ནས་གྲངས་མེད་པ་ལ་ཐུག་གི་བར་གྱི་ཡུན་སུམ་འགྱུར་དུ་བྱས་པས་གྲངས་མེད་པ་གསུམ་སྙེད་དུ། ཐུན་མོང་གི་ཐེག་པའི་སྒོ་ནས་དཔག་ཏུ་མེད་པའི་དཀའ་བ་སྤྱད་ཀྱང༌། གསང་བ་དེ་ཁོ་ན་ཉིད་ཐུགས་སུ་མ་ཆུད་པས་རྣམ་པ་ཐམས་ཅད་མ་མཁྱེན་ཏོ།།

གཉིས་པ་རྒྱུད་དག་པའི་སྒྲོན་མ་ཀུན་གྱིས་ཀྱང་དེ་ཁོ་ན་ཉིད་མ་རྟོགས་པར་ངེས་པ་མ་རྙེད་པ་ལ་གཉིས་ཏེ། ངེས་པ་མ་རྙེད་པ་དངོས། ཞར་ལ་དེ་ཁོ་ན་ཉིད་རྟོགས་མ་ཐག་ངེས་པ་རྙེད་པའོ། །དང་པོ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ཇི་ལྟར། ཞེས་པ་ནས། སྤྱོད་པ་སྟེ། ཞེས་པའི་བར་གྱིས་བསྟན་ཏེ།

དེ་ཇི་ལྟ་ཞེ་ན། ཇི་ལྟ་ཇི་ལྟར་རྒྱུད་ཡོངས་སུ་དག་པའི་སངས་རྒྱས་དཔག་ཏུ་མེད་པ་བྱུང་བ་དང་།

འབྱུང་བ་ཡང་དེ་ཁོ་ན་ཉིད་ཀྱི་ངེས་པ་མ་རྙེད་ཀྱི་བར་དུ་དཀའ་བ་སྤྱོད་པ་སྟེ།

དེའི་ཚུལ་བསྟན་པ་ཇི་ལྟར་ཞེ་ན། སངས་རྒྱས་དུས་ཀྱི་སྒོ་ནས་དཀོན་པས། དུས་སྔ་ཕྱི་ཇི་ལྟ་ཇི་ལྟར་རྒྱུད་ཡོངས་སུ་དག་པའི་ཐུན་མོང་གི་སངས་རྒྱས་ཀུན་ཏུ་འོད་ཀྱི་ས་ལ་གནས་པ་དཔག་ཏུ་མེད་པ་སྔར་བྱུང་བ་དང༌། ཕྱིས་འབྱུང་བར་འགྱུར་བ་ཡང་གསང་སྔགས་དེ་ཁོ་ན་ཉིད་ཀྱི་ངེས་པ་མ་རྙེད་བར་དུ་དཀའ་བ་སྤྱོད་ཅིང་རྩོལ་བ་ལ་གནས་པ་སྟེ།

གཉིས་པ་རྒྱས་པར་བཤད་པ་ནི།

འདི་ལྟར། ཞེས་པ་ནས། མི་འགྱུར་རོ། །ཞེས་པའི་བར་གྱིས་བསྟན་ཏེ།

འདི་ལྟར་བསྐལ་པ་བཟང་པོ་འདིའི་འོག་ཏུ་མཐའ་འཁོབ་ཀྱི་བསྐལ་པ་རིགས་ངན་དྲུག་ཅུ་འབྱུང་ངོ་། །དེའི་འོག་ཏུ་བསྐལ་པ་གྲགས་ལྡན་ཞེས་བྱ་བ་ལ། སངས་རྒྱས་སྟོང་ཕྲག་བཅུ་འབྱུང་ངོ་། །དེའི་འོག་ཏུ་རིགས་ངན་གྱི་བསྐལ་པ་སྟོང་ཕྲག་བརྒྱད་ཅུ་འབྱུང་ངོ་། །དེའི་འོག་ཏུ་བསྐལ་པ་སྐར་མ་བཀྲམ་པ་ལྟ་བུ་ལ་སངས་རྒྱས་སྟོང་ཕྲག་བརྒྱད་ཅུ་འབྱུང་ངོ་། །དེའི་འོག་ཏུ་མུན་པའི་བསྐལ་པ་སུམ་བརྒྱ་འབྱུང་ངོ་། །དེའི་འོག་ཏུ་བསྐལ་པ་མཛེས་ལྡན་རྒྱན་ཅེས་བྱ་བ་ལ་སངས་རྒྱས་སྟོང་ཕྲག་བརྒྱད་ཅུ་རྩ་ལྔ་འབྱུང་ངོ་། །དེ་བཞིན་དུ་མཐའ་ཐུག་པ་མེད་པར་སྒྲོན་མའི་བསྐལ་པ་དང་། མུན་པའི་བསྐལ་པ་རྟག་པར་རྒྱུན་གྱི་ཁོར་མོར་འདྲེན་མར་འབྱུང་ངོ་། །དེ་ལྟར་ན་བསྐལ་པ་བཟང་པོ་འདི་ཉིད་ལ་སངས་རྒྱས་སྟོང་རྩ་གཉིས་འབྱུང་ངོ་། །བསྐལ་པ་བཟང་པོ་འདིའི་སྔོན་དུ་ཡང་མུན་པའི་བསྐལ་པ་བརྒྱ་འབྱུང་ངོ་། །དེའི་སྔོན་དུ་བསྐལ་པ་རྫོགས་ལྡན་ཞེས་བྱ་བ་ལ་སངས་རྒྱས་བྱེ་བ་ཕྲག་བརྒྱ་བྱུང་ངོ་། །དེ་འདས་པའི་སྔོན་དུ་མཐའ་འཁོབ་ཀྱི་བསྐལ་པ་བརྒྱ་བྱུང་ངོ་། །དེ་འདས་པའི་སྔོན་དུ་བསྐལ་པ་བཟང་རྒྱན་ཞེས་བྱ་བ་ལ་སངས་རྒྱས་བྱེ་བ་ཕྲག་བརྒྱད་ཅུ་རྩ་བཞི་བྱུང་ངོ་། །དེ་འདས་པའི་སྔོན་དུ་མུན་པའི་བསྐལ་པ་ལྔ་བརྒྱ་བྱུང་ངོ་། །དེ་འདས་པའི་སྔོན་དུ་བསྐལ་པ་མཐོང་དགའ་ཞེས་བྱ་བ་ལ་སངས་རྒྱས་བྱེ་བ་ཕྲག་བཅུ་བྱུང་ངོ་། །དེ་འདས་པའི་སྔོན་དུ་མུན་པའི་བསྐལ་པ་བདུན་བརྒྱ་བྱུང་ངོ་། །དེ་འདས་པའི་སྔོན་དུ་བསྐལ་པ་དགའ་བ་ཞེས་བྱ་བ་ལ། སངས་རྒྱས་སྟོང་ཕྲག་དྲུག་ཅུ་བྱུང་ངོ་། །དེ་ལ་སོགས་པ་མཐའ་ཡས་པར་མུན་པ་དང་། སྒྲོན་མའི་བསྐལ་པ་འདྲེན་མར་ཐོག་མ་དང་ཐ་མ་མེད་པར་བྱུང་ཞིང་འབྱུང་སྟེ། གང་སྒྲོན་མ་ཇི་སྙེད་པ་བྱུང་ཞིང་འབྱུང་བ་རྣམས་ཀྱང་གསང་སྔགས་ཀྱི་ངེས་པ་དེ་ཁོ་ན་ཉིད་མ་རྙེད་ཀྱི་བར་དུ་དཔག་ཏུ་མེད་པའི་དཀའ་བ་སྤྱད་ཀྱང་། རྣམ་པ་ཐམས་ཅད་མ་མཁྱེན། མི་མཁྱེན། མཁྱེན་པར་མི་འགྱུར་རོ།།

འདི་ལྟར་ད་ལྟར་གྱི་བསྐལ་པ་བཟང་པོ་འདི་ཡི་སྤྲུལ་པ་སྟོང་རྩ་གཉིས་རྫོགས་པའི་འོག་ཏུ་སྲིད་པ་འཇིག་སྟོངས་ཆགས་གནས་བྱས་ཏེ། ཆགས་པ་དེ་ལ་སངས་རྒྱས་མི་བྱོན་ཞིང་དམ་པའི་ཆོས་མེད་པས་མཐའ་འཁོབ་ཀྱི་བསྐལ་པ་ཆེན་པོ་མི་དགེ་བ་སྤྱོད་པས་རིགས་ངན་པ་ཡུན་དྲུག་ཅུ་འབྱུང་ངོ་། །དེའང་སྟོང་གི་འཇིག་རྟེན་སྤྲུལ་པ་ཉག་གཅིག་གི་གོ་ཤུལ་བརྩིས་པ་ལས་གཞན་དུ་མིན་ནོ། །དེའི་འོག་ཏུ་ཡོན་ཏན་གྱི་ཕྱོགས་ཀུན་ནས་བརྗོད་པས་༼༡༤༨༽བསྐལ་པ་གྲགས་ལྡན་བྱ་བ་ལ། སངས་རྒྱས་སྟོང་ཕྲག་བཅུ་བསྐལ་པ་གཅིག་གིས་རྫོགས་པར་འབྱུང་ངོ་། །དེའི་འོག་ཏུ་ལས་གཅིག་པུས་འཚོ་ཞིང་སྤྱོད་དེ་ཆོས་དང་ཡ་རབས་ཀྱི་མིང་ཡང་མེད་པས་རིགས་ངན་གྱི་བསྐལ་པ་སྟོང་ཕྲག་བརྒྱད་ཅུ་འབྱུང་ངོ༌། །དེའི་འོག་ཏུ་རྒྱ་ཆེ་ཞིང་གསལ་ལ་ཆོས་དང་ལྡན་པས་བསྐལ་པ་སྐར་མ་བཀྲམ་པ་ལྟ་བུ་ལ་སངས་རྒྱས་སྟོང་ཕྲག་བརྒྱད་ཅུ་འབྱུང་ངོ༌། །དེའི་འོག་ཏུ་སྣང་བ་མེད་པ་གླིང་བར་གྱི་དུད་འགྲོ་ལྟ་བུ་དང་ཆོས་ཀྱང་མེད་པས་མུན་པའི་བསྐལ་པ་སུམ་བརྒྱ་འབྱུང་ངོ༌། །དེའི་འོག་ཏུ་མི་རྣམས་མཚན་སུམ་ཅུ་པ་ཤ་སྟག་པས་བསྐལ་པ་མཛེས་ལྡན་རྒྱན་ཞེས་བྱ་བ་ལ། སངས་རྒྱས་སྟོང་ཕྲག་བརྒྱད་ཅུ་རྩ་ལྔ་འབྱུང་ངོ༌། །དེ་བཞིན་དུ་མཐའ་ཐུག་པ་མེད་པར་སྤྲུལ་པ་དང་ཆོས་ཀྱིས་གསལ་བའི་སྒྲོན་མའི་བསྐལ་པ་དང༌། དེ་གཉིས་མེད་པས་མུན་པའི་བསྐལ་པ་རྟག་པ་རྒྱུན་གྱི་འཁོར་མོར་འདྲེན་མར་འབྱུང་ངོ༌། །དེ་ལྟར་འབྱུང་བ་ན་ད་ལྟར་གྱི་བསྐལ་པ་འདི་ཉིད་ཆགས་པའི་ཚེ་སྟོང་གསུམ་གྱི་སྟོང་ཆེན་པོ་རྒྱ་མཚོར་གྱུར་པ་ལ་པད་མ་སྟོང་བྱུང་བ་སངས་རྒྱས་སྟོང་གི་བརྡར་ཤར་བས་ལྷ་གོང་མ་གཙང་མའི་རིས་རྣམས་ཀྱིས་བསྐལ་པ་བཟང་པོ་ཞེས་བརྗོད་པས་དེ་ལྟར་གྲགས་ལ། དེའང་རྒྱལ་བ་སྟོང་གི་རེ་རེ་སངས་རྒྱས་པ་ན་སེང་ཁྲི་པད་མ་ཅན་སྟོང་སྟོང་འབྱུང་བ་ལ་རང་གར་བབ་པའི་ས་ན་བཞུགས་པས་གཞན་མ་རྣམས་ཕུར་ཏེ་མི་སྣང་བར་འགྱུར་ལ། དེ་ལྟར་བསྐལ་པ་བཟང་པོ་འདི་ཉིད་ལ་སངས་རྒྱས་སྟོང་རྩ་གཉིས་འབྱུང་ངོ༌། །འདི་ནས་གྱེན་དུ་འདས་པ་བརྩིས་ན། བསྐལ་པ་བཟང་པོ་འདིའི་སྔོན་དུ། མུན་པའི་བསྐལ་པ་བརྒྱ་བྱུང་ངོ༌། །དེའི་སྔོན་དུ་ཡོན་ཏན་རྫོགས་པས་བསྐལ་པ་རྫོགས་ལྡན་ཞེས་བྱ་བ་ལ། སངས་རྒྱས་བྱེ་བ་ཕྲག་བརྒྱ་བྱོན་ཏེ་ཐ་མ་དཀོན་མཆོག་དཔལ་བྱུང་ངོ༌། །དེ་འདས་པའི་སྔོན་རོལ་དུ་མཐའ་འཁོབ་ཀྱི་བསྐལ་པ་བརྒྱ་བྱུང་ངོ༌། །དེ་འདས་པའི་སྔོན་དུ་གདུལ་བྱ་རྣམས་བསྐལ་པ་བཟང་བས་བསྐལ་པ་བཟང་རྒྱན་ཞེས་བྱ་བ་ལ། སངས་རྒྱས་བྱེ་བ་ཕྲག་བརྒྱད་ཅུ་རྩ་བཞི་བྱོན་ཏེ་ཐ་མར་བཟང་རྒྱན་དཔལ་བྱུང་ངོ༌། །དེ་འདས་པའི་སྔོན་དུ་མུན་པའི་བསྐལ་པ་ལྔ་བརྒྱ་བྱུང་ངོ༌། །དེ་འདས་པའི་སྔོན་དུ་དགེ་བཅུ་ལ་སྤྱོད་པས་བསྐལ་པ་མཐོང་དགའ་ཞེས་བྱ་བ་ལ། སངས་རྒྱས་བྱེ་བ་ཕྲག་བཅུ་བྱུང་ངོ༌། །དེ་འདས་པའི་སྔོན་དུ་མུན་པའི་བསྐལ་པ་བདུན་བརྒྱ་བྱུང་ངོ༌། །དེ་འདས་པའི་སྔོན་དུ་མི་རྣམས་ཡིད་དགའ་བས་བསྐལ་པ་དགའ་བ་ཞེས་བྱ་བ་ལ། སངས་རྒྱས་སྟོང་ཕྲག་དྲུག་བཅུ་༼༡༤༩༽བྱུང་ངོ༌། །དེ་ལ་སོགས་པ་འདས་པའི་དུས་དང་མ་འོངས་པའི་དུས་མཐའ་ཡས་པར་མུན་པ་དང་སྒྲོན་མའི་བསྐལ་པ་འདྲེན་མར་ཐོག་མ་དང་ཐ་མ་མེད་པར་བྱུང་ཞིང་འབྱུང་སྟེ། གང་སྒྲོན་མ་སངས་རྒྱས་ཇི་སྙེད་པ་སྔར་བྱུང་ཞིང་ཕྱིས་འབྱུང་བ་རྣམས་ཀྱང༌། གསང་སྔགས་ཀྱི་ངེས་པ་དེ་ཁོ་ན་ཉིད་མ་རྙེད་ཀྱི་བར་དུ་དཔག་ཏུ་མེད་པའི་དཀའ་བ་སྤྱོད་ཀྱང་རྣམ་པ་ཐམས་ཅད་མ་མཁྱེན། མི་མཁྱེན། མཁྱེན་པར་མི་འགྱུར་རོ།།

གཉིས་པ་ཞར་ལ་དེ་ཁོ་ན་ཉིད་རྟོགས་མ་ཐག་ངེས་པ་རྙེད་པ་ནི།

གང་གསང་སྔགས། ཞེས་པ་ནས། འགྱུར་རོ། །ཞེས་པའི་བར་གྱིས་བསྟན་ཏེ།

གང་གསང་སྔགས་ཀྱི་ངེས་པ་དེ་ཁོ་ན་ཉིད་རྙེད་མ་ཐག་པར་རྣམ་པ་ཐམས་ཅད་མཁྱེན་ཏོ།།

མཁྱེན་ནོ། །མཁྱེན་པར་འགྱུར་རོ།།

དེ་བས་ན་རྒྱལ་བ་རིལ་གྱི་ལམ་འདིར་གཅིག་པས་གང་གསང་སྔགས་ཀྱི་ངེས་པ་དེ་ཁོ་ན་ཉིད་དེ་དུས་སམ་ལམ་གྱི་སྐབས་ནམ་དུ་རྙེད་མ་ཐག་པར་སྔར་ཡང་འབྲས་བུ་ཡེ་ཤེས་ཐོབ་པས་རྣམ་པ་ཐམས་ཅད་མཁྱེན་ཏོ། །ད་ལྟར་ཡང་འབྲས་བུ་ཡེ་ཤེས་བརྙེས་ཏེ་རྣམ་པ་ཐམས་ཅད་མཁྱེན་ནོ། །ཕྱི་དུས་སུ་ཡང་འབྲས་བུ་ཡེ་ཤེས་ཐོབ་ནས་རྣམ་པ་ཐམས་ཅད་མཁྱེན་པར་འགྱུར་རོ། །དེའང་ཚོགས་ལམ་ནས་ངེས་པ་རྙེད་པའང་ཡོད་ལ། སྦྱོར་ལམ་ནས་དང༌། མཐོང་ལམ་ནས་ས་བཅུ་རིམ་པ་བཞིན་དུའང་རྙེད་པ་ཡོད་ཅིང༌། ས་བཅུ་མཐར་ཕྱིན་པ་ནི་གསང་སྔགས་སོ།།

གསུམ་པ་རྒྱལ་ཚབ་སྐྱེས་བུས་ལམ་བགྲོད་ཀྱང་ངེས་པ་མ་རྙེད་པ་ལ་གཉིས་ཏེ། ལམ་ལྔ་ཕྲག་གཉིས་སུ་བགྲོད་པ། བགྲོད་ཀྱང་ངེས་པ་མ་རྙེད་པའོ། །དང་པོ་ལ་གཉིས་ཏེ། བདག་དོན་དུ་ཐུན་མོང་གི་ལམ་ནས་བགྲོད་པ། གཞན་དོན་དུ་མདོ་ཁྱད་པར་གྱི་ལམ་ནས་བགྲོད་པའོ། །དང་པོ་ལ་གཉིས་ཏེ། ལམ་པའི་གང་ཟག་འབྱུང་བའི་དུས། ངོ་བོ་ལམ་བགྲོད་ཚུལ་དངོས་སོ། །དང་པོ་ནི།

དེ་བཞིན་དུ། ཞེས་པ་ནས། ཞེས་བྱའོ། །ཞེས་པའི་བར་གྱིས་བསྟན་ཏེ།

དེ་བཞིན་དུ་སྔོན་གྱི་བསྐལ་པ་གྲངས་མེད་པ། གྲངས་མེད་པ་ལས་ཀྱང་གྲངས་མེད་པར་འདས་པ། མང་པོ་ཚད་མེད་པ། བསམ་གྱིས་མི་ཁྱབ་པ་ན། བསྐལ་པ་ཆེན་པོ་མངོན་པར་དགའ་བ་ཞེས་བྱ་བ་ལ་སངས་རྒྱས་ཁྲི་སུམ་སྟོང་བྱུང་བའི་དུས་ན། ཐོག་མའི་སངས་རྒྱས་ཀུན་ཏུ་བཟང་པོ་ཞེས་བྱ་བའི་བསྟན་པ་ལ། རྒྱལ་རིགས་དང་། བྲམ་ཟེའི་རིགས་དང་། རྗེའུ་རིགས་དང་། དམངས་རིགས་དང་། གདོལ་པའི་རིགས་དང་ལྔ་ལས། མཆོག་ཆེན་པོ་ལྔ་བྱུང་བ་ནི། འདི་ལྟ་སྟེ། ཁྱེའུ་བདེ་སྐྱོབ་ཅེས་བྱ་བ་དང་། ཁྱེའུ་དྲ་ལི་ཏ་ཞེས་བྱ་བ་དང་། ཁྱེའུ་དཔལ་བྱིན་ཞེས་བྱ་བ་དང་། ཁྱེའུ་ལས་བྱིན་ཞེས་བྱ་བ་དང་། ཁྱེའུ་དུམ་བུ་ར་ཞེས་བྱ་བ་བྱུང་ངོ་། །དེའི་ཚེ་དེའི་དུས་ན་སངས་རྒྱས་རྡོ་རྗེ་སེམས་དཔའ་ནི་ཁྱེའུ་བདེ་སྐྱོབ་ཅེས་བྱའོ། །དེའི་ཚེ་དེའི་དུས་ན་སངས་རྒྱས་ཚེ་མཐའ་ཡས་ནི་ཁྱེའུ་ཏྲ་ལི་ཏ་ཞེས་བྱའོ། །དེའི་ཚེ་དེའི་དུས་ན་སངས་རྒྱས་རིན་ཆེན་འབྱུང་ལྡན་ནི་ཁྱེའུ་དཔས་སྦྱིན་ཞེས་བྱའོ། །དེའི་ཚེ་དེའི་དུས་ན་སངས་རྒྱས་རྣམ་པར་སྣང་མཛད་ནི་ཁྱེའུ་ལས་བྱིན་ཞེས་བྱའོ། །དེའི་ཚེ་དེའི་དུས་ན་སངས་རྒྱས་དོན་ཡོད་གྲུབ་པ་ནི་ཁྱེའུ་དུམ་བུ་ར་ཞེས་བྱའོ།།

དེ་ལྟ་བས་ན་དེ་ལས་ཆ་གཅིག་ངེས་པར་གཟུང་བར་བསྟན་པས་ཡིད་ཆེས་པར་བྱ་བའི་ཕྱིར་དེ་བཞིན་དུ་རིགས་ལྔས་གསང་སྔགས་མ་རྟོགས་པ་དང་རྟོགས་པས་འབྲས་བུ་བརྙེས་པ་དང༌། དང་པོ་སེམས་བསྐྱེད་པ་ནས་མཐར་ཐུག་གི་བར་སྟོན་ཏེ། དེ་ཡང་དུས་ཀྱི་དབང་དུ་སྔོན་གྱི་བསྐལ་པ་གྲངས་མེད་པ་ལས་ཀྱང་གྲངས་མེད་པར་འདས་པ་མང་པོ་ཚད་མེད་པ་བསམ་གྱིས་མི་ཁྱབ་པ་ན། བསྐལ་པ་ཆེན་པོ་མངོན་པར་དགའ་བ་ཞེས་བྱ་བ་ལ། སངས་རྒྱས་སུམ་ཁྲི་སུམ་སྟོང་ངམ་ཁྲི་སུམ་སྟོང་ཡང་གསུངས་ཏེ་དེ་ལྟར་བྱུང་བའི་དུས་ན། བསྟན་པ་དང་སློབ་དཔོན་གྱི་དབང་དུ་ཕྱི་མ་ལྟར་ན་ཁྲི་ཉིས་སྟོང་བརྒྱད་བརྒྱ་དགུ་བཅུ་གོ་དགུ་སོང་བའི་ཐ་མའི་སངས་རྒྱས་ཀུན་ཏུ་བཟང་པོ་ཞེས་བྱ་བའི་བསྟན་པ་ལ། ཐམས་ཅད་མཁྱེན་པའི་གོ་འཕང་ལ་འཇུག་པར་༼༡༥༠༽འདོད་པའི་གང་ཟག་ལྔ་སྟེ་རིགས་ཀྱི་སྒོ་ནས་རྒྱལ་རིགས་དང༌། བྲམ་ཟེའི་རིགས་དང༌། རྗེའུ་རིགས་དང༌། དམངས་རིགས་དང༌། གདོལ་པའི་རིགས་དང་ལྔ་བྱུང་བས་དགེ་འདུན་རིགས་ཀྱི་སྒོ་ནས་ཀྱང་དཀོན་ལ། ངོ་བོའི་དབང་དུ་མཆོག་ཆེན་པོ་ལྔ་བྱུང་བ་ནི། འདི་ལྟ་སྟེ། ལས་དང་པོ་པའི་མཚན་ཁྱེའུ་བདེ་སྐྱོབ་ཅེས་བྱ་བ་དང༌། ཁྱེའུ་ཏྲ་ལི་ཏ་ཞེས་བྱ་བ་དང༌། ཁྱེའུ་དཔས་བྱིན་ཞེས་བྱ་བ་དང༌། ཁྱེའུ་ལས་སྦྱིན་ཞེས་བྱ་བ་དང༌། ཁྱེའུ་དུམ་བུ་ར་ཞེས་བྱ་བ་བྱུང་ངོ༌། །དང་པོའི་ཁྱེའུ་ལྔ་ད་ལྟར་གྱི་རྒྱལ་བ་རིགས་ལྔར་ངོས་བཟུང་བ། བསྟན་པ་ཤར་བ་དེའི་ཚེ་མཆོག་ཆེན་པོ་ལྔ་བྱུང་བ་དེའི་དུས་ན། སངས་རྒྱས་རྡོ་རྗེ་སེམས་དཔའ་ནི་ཁྱེའུ་བདེ་སྐྱོབ་ཅེས་བྱའོ། །དེའི་ཚེ་དེའི་དུས་ན་སངས་རྒྱས་ཚེ་མཐའ་ཡས་པ་ནི། ཁྱེའུ་ཏྲ་ལི་ཏ་ཞེས་བྱའོ། །དེའི་ཚེ་དེའི་དུས་ན་སངས་རྒྱས་རིན་ཆེན་འབྱུང་ལྡན་ནི། ཁྱེའུ་དཔས་བྱིན་ཞེས་བྱའོ། །དེའི་ཚེ་དེའི་དུས་ན་སངས་རྒྱས་རྣམ་པར་སྣང་མཛད་ནི། ཁྱེའུ་ལས་སྦྱིན་ཞེས་བྱའོ། །དེའི་ཚེ་དེའི་དུས་ན་སངས་རྒྱས་དོན་ཡོད་གྲུབ་པ་ནི། ཁྱེའུ་དུམ་བུ་ར་ཞེས་བྱའོ། །ཅིའིཕྱིར་ལྔ་རུ་བཤད་ན། ཇི་སྐད་དུ། དུས་གསུམ་སངས་རྒྱས་ཐམས་ཅད་ལ། །སྐུ་གསུང་ཐུགས་དང་ཡོན་ཏན་དང༌། །མཛད་པའི་ཕྲིན་ལས་ཉིད་དང་ལྔ། །དེ་ལས་བྱུང་ཞིང་དེར་འདུས་པས། །ལྔ་ཞེས་ངེས་པར་བསྟན་པ་ཡིན། །ཞེས་སོ།།

གཉིས་པ་ངོ་བོ་ལམ་བགྲོད་ཚུལ་དངོས་ལ་ལྔ་སྟེ། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མཐར་ལམ་མོ། །དང་པོ་ནི།

དེའི་ཚེ། ཞེས་པ་ནས། མ་རྙེད་དོ། །ཞེས་པའི་བར་གྱིས་བསྟན་ཏེ།

དེའི་ཚེ་དེའི་དུས་ན་ཁྱེའུ་དེ་རྣམས་ཀྱིས་སངས་རྒྱས་ཀུན་ཏུ་བཟང་པོ་དེ་ལ་རྣལ་འབྱོར་མཆོག་ཏུ་སེམས་བསྐྱེད་པའི་དུས། འཇིག་རྟེན་གྱི་སྐབས་ན་སེམས་བརྒྱད་བསྐྱེད་ཅིང་། འཇིག་རྟེན་པའི་ལམ་བརྒྱད་ནས་བགྲོད་དེ། འགྱུར་དབང་མ་ངེས་པའི་ས་པར་གནས་སོ། །དེའི་ཚེ་སངས་རྒྱས་སུམ་ཁྲི་སུམ་སྟོང་ལ་ཐེ་ཚོམ་བཅད་ཀྱང་ངེས་པ་མ་རྙེད་དོ། །ལས་དང་པོའི་སྐབས་ན་སེམས་གསུམ་བསྐྱེད་ཅིང་། མཐའ་བཅུ་ཆུབ་ནས་བརྟེན་པས་གཞིའི་ས་པར་གནས་སོ། །དེའི་ཚེ་དེའི་དུས་ན་སངས་རྒྱས་བཞི་ཁྲི་བཞི་སྟོང་ལ་ཐེ་ཚོམ་བཅད་ཀྱང་ངེས་པ་མ་རྙེད་དོ།།

དེའང་སེམས་བསྐྱེད་པ་ནས་རིམ་པར་བསྟན་ཏེ། སྟོན་པ་དང་ཁྱེའུ་ལྔའི་དབང་གིས་དེའི་ཚེ་དེའི་དུས་ན། ཁྱེའུ་དེ་རྣམས་ཀྱིས་སངས་རྒྱས་ཀུན་ཏུ་བཟང་པོ་དེ་ལ་རང་བཞིན་ལྷན་ཅིག་སྐྱེས་པ་རྒྱུ་དང༌། ལྷན་ཅིག་བྱེད་པའི་རྐྱེན་ཡོན་ཏན་མཐོང་ཐོས་དང་བྱིན་རླབས་ཐབས་ཀྱི་འགྲེལ་པ་འཛོམ་པ་ལས་རྣལ་འབྱོར་མཆོག་ཏུ་སེམས་བསྐྱེད་དེ་དཔེར་ན་མུན་པའི་ཟེར་རམ་རྩྭ་མེ་ལྟར་གཡོ་བའི་སེམས་སྐྱེ་བའི་དུས་དང་པོ་གྲུབ་མཐས་བློ་མ་བསྒྱུར་བ་འཇིག་རྟེན་གྱི་ས་ལ་གནས་པའི་སྐབས་ན། ཕལ་པའི་སེམས་བརྒྱད་བསྐྱེད་ཅིང་འཇིག་རྟེན་པའི་ལམ་བརྒྱད་ནས་བགྲོད་དེ་འཇུག་པའི་ཚུལ་ནི། ལམ་དང་སེམས་ངོ་བོ་ཐུན་མོང་བ་སྟེ། གསང་བདག་དགའ་རབ་དཔའ་བོས་མཛད་པའི་བསྒོམ་ཐབས་སྒྲོན་མ་ལས། བསྙུང་བར་གནས་པའི་སེམས་དང་ས་བོན་ལྟར། །བཅོས་མའི་སྙིང་རྗེའི་གནས་༼༡༥༡༽གཏོང་སོང་ལྟ་བུ། །ཕྲ་མེན་དགེ་སྦྱོང་ལ་གཏོང་ལོ་མ་ལྟར། །ཚུལ་འཛིན་ལྷུག་པར་གཏོང་སེམས་མེ་ཏོག་ལྟར། །མོས་པས་ཁྲིམས་སྲུང་སེམས་བསྐྱེད་གསོས་སུ་འགྱུར། །དགེ་བར་འདུན་པ་ལྷ་མཆོད་འཇིག་རྟེན་ལམ། །ཞེས་གསུངས་པས། སོ་སོའི་སྐྱེ་བོ་ཕྱུགས་དང་འདྲ་བ་ལས། བརྒྱ་ལམ་རེ་ན་ཆོས་ཀྱི་འདུ་ཤེས་འབྱུང་བ་ནི་བསྙུང་བར་གནས་པའི་སེམས་ཏེ་ས་བོན་ལྟ་བུ་དང༌། ཕ་མ་དང་ཉེ་དུ་ལྟ་བུ་ལ་སྦྱིན་པ་བྱེད་དེ་མྱུ་གུ་ལྟ་བུ་དང༌། སྦྱིན་གནས་ཇི་སྙེད་པ་དག་ལ་གཏོང་སྟེ་སྡོང་བུ་ལྟ་བུ་དང༌། བྲམ་ཟེ་དང་དགེ་སློང་དག་ལའང་གཏོང་བ་ལོ་མ་ལྟ་བུ་དང༌། བླ་མ་དང་རོལ་མོ་མཁན་ལ་སོགས་པ་ལ་ལྷུག་པར་གཏོང་བ་མེ་ཏོག་ལྟ་བུ་དང༌། གང་དང་གང་འདོད་པ་གཏོང་བས་ཡིད་དགའ་བར་བྱེད་པ་འབྲས་བུ་ལྟ་བུ་སྟེ་སྦྱིན་པའི་བསླབ་པ་དྲུག་དང༌། སྦྱིན་པ་དེས་རྒྱུ་བྱས་ནས་ཚུལ་ཁྲིམས་ལ་མོས་པ་སྐྱེ་སྟེ་བསྲུང་བ་གསོས་སུ་གྱུར་པ་ལྟ་བུ་དང༌། དེ་བས་འཇིག་རྟེན་པའི་ལྷ་ཆེན་པོ་ལ་མཆོད་པ་ཕུལ་བ་ཤེས་སྟོབས་ཅན་དུ་འགྱུར་སྙམ་ནས་ཚངས་པ་ལ་སོགས་པ་མཆོད་པ་ནི་སྟོབས་སུ་གྱུར་པ་སྟེ་བརྒྱད་དོ། །ཞེས་རྣམ་པར་སྣང་མཛད་མངོན་པར་བྱང་ཆུབ་པའི་ཏནྟྲ་ལས་བྱུང་བ་ལྟར་རོ། །དེ་ལྟར་རིམ་པར་བསྐྱེད་པའང་འདི་ལྟར་རྣལ་འབྱོར་ལྔའི་རིམ་པར་གནས་པས་སྤྱད་དེ། འདུན་པ་སེམས་པའི་རྣལ་འབྱོར་གྱི་སྐབས་ལ། གསང་སྔགས་ཡིད་ལ་བྱེད་པའི་ཏིང་ངེ་འཛིན་ཙམ་བསྒོམ་སྟེ་རས་བལ་ལམ་ས་བོན་དང་འདྲ་སྟེ་གང་དུའང་འབྱུང་བའི་རྒྱུར་གྱུར་པས་རྐྱེན་ལ་རག་ལས་ཏེ་ངེས་པ་མེད་པའི་ཕྱིར་ས་དང་པོ་འགྱུར་དབང་མ་ངེས་པའི་ས་པར་གནས་སོ། །དེའི་ཚེ་སངས་རྒྱས་སུམ་ཁྲི་སུམ་སྟོང་ལ་ཐེ་ཚོམ་བཅད་ཀྱང་གསང་སྔགས་ལ་ངེས་པ་མ་རྙེད་དོ། །འདི་དང་འོག་མའི་བུདྡྷའི་གྲངས་རྣམས་བསྐལ་པ་ཡུན་རིང་བ་ལ་བསྙེན་པ་ཡིན་ཏེ་ཡུན་ཐུང་བ་ལ་གཤིབ་པ་མིན་གསུང༌། ཚོམས་སུ་བཅད་པ་ནི་ལམ་ལྔའི་གྲངས་ཀྱི་ངོས་ནས་སོ། །འདི་དག་ནི་སྐབས་ཀྱིས་ཀྱང་ཐུན་མོང་གི་ལམ་དུ་སྦྱར་ལ། སྤྱིར་ན་གཞི་དང་པོ་དང་སྐབས་ཀྱི་དང་པོ་གཉིས་ལས། འདིར་གཞི་སྟེ་སྔར་མ་སྦྱང་བའི་ལས་དམ་པ་གསང་སྔགས་ཀྱི་བསླབ་པ་ལ་ཐོག་མར་རྩོམ་པའི་ཕྱིར་རོ། །དེ་ལྟར་ལས་དང་པོ་པའི་སྐབས་བཀའ་སྡོད་ལས་ཀྱི་རྣལ་འབྱོར་གྱི་དུས་ན། དང་པོའི་རྣལ་འབྱོར་དང༌། བསླབ་པ་སྦྱོང་བའི་རྣལ་འབྱོར་དང༌། ངེས་པའི་རྣལ་འབྱོར་གྱིས་སེམས་གསུམ་བསྐྱེད་ཅིང་ཟག་བཅས་ཀྱི་བསླབ་པའི་མཐའ་བཅུ་ཆུབ་༼༡༥༢༽པས་འགྲུབ་པར་ཁོང་དུ་ཆུད་ནས་སེམས་གསུམ་དང་བསླབ་པ་བཅུ་དང༌། གསང་སྔགས་ལ་སོགས་པ་ཐུན་མོང་གི་སེམས་གཡོ་བ། སྨོན་པ། མོས་པ་གསུམ་ལ་བརྟེན་པས་ངེས་པར་འབྱུང་བའི་ཕྱིར་བག་ཆགས་དང་པོ་དག་ནས་དགེ་བའི་ཆོས་ཐམས་ཅད་ཀྱི་རྟེན་གཞིར་གྱུར་པས་ས་གཉིས་པ་རྟེན་པ་གཞིའི་ས་པར་གནས་སོ། །དེའི་ཚེ་དེའི་དུས་ན། སངས་རྒྱས་བཞི་ཁྲི་བཞི་སྟོང་ལ་ཐེ་ཚོམ་བཅད་ཀྱང་ངེས་པ་མ་རྙེད་དོ། །ཡང་ན་འདི་རྣམས་སྤྲུལ་པའི་སློབ་དཔོན་ཡིན་ཀྱང་རུང་ངོ་།།

གཉིས་པ་སྦྱོར་ལམ་ནི།

རིགས་ཆེན། ཞེས་པ་ནས། མ་རྙེད་དོ། །ཞེས་པའི་བར་གྱིས་བསྟན་ཏེ།

རིགས་ཆེན་འབྱེད་པའི་སྐབས་སུ་སེམས་བཞི་རྫོགས་ཏེ། མཐའ་བཅུ་ཆུབ་ནས་བསོད་ནམས་གཏེར་གྱི་ས་པར་གྱུར་ཏོ། །དེའི་ཚེ་སངས་རྒྱས་ལྔ་ཁྲི་ལྔ་སྟོང་ལ་ཐེ་ཚོམ་བཅད་ཀྱང་ངེས་པ་མ་རྙེད་དོ།།

ཡང་རིགས་ཆེན་འབྱེད་པའི་རྣལ་འབྱོར་གྱི་སྐབས་སུ་འཇིག་རྟེན་དང་འཇིག་རྟེན་ལས་འདས་པ་དང༌། ཐེག་པ་ཆེ་ཆུང་གི་རིགས་སོ་སོར་ངེས་པར་གྱུར་ནས་རིགས་ཆེན་འབྱེད་པའི་རྣལ་འབྱོར་དང༌། གསང་སྒོ་ལུང་གི་རྣལ་འབྱོར་དང༌། སྤྱོད་པ་རྒྱུན་གྱི་རྣལ་འབྱོར་དང༌། མཚན་མ་རྟགས་ཀྱི་རྣལ་འབྱོར་གྱི་ཏིང་ངེ་འཛིན་དང་སེམས་བཞི་རྫོགས་ཏེ། ཟག་བཅས་ཀྱི་བསླབ་པའི་མཐའ་བཅུ་ཁོང་དུ་ཆུབ་ནས་དོན་ཆེན་པོ་ལ་ལོངས་སྤྱོད་པ་ཟད་པ་མེད་པར་འབྱུང་བའི་ཕྱིར། གསུམ་པ་གལ་ཆེན་སྦྱོང་བའི་ས་དང༌། བཞི་པ་བསླབ་པ་རྒྱུན་གྱི་ས་དང༌། ས་ལྔ་པ་ངེས་པས་བསོད་ནམས་བསགས་ཏེ་ཟག་པ་མེད་པ་ལ་སྦྱོར་བས་མི་ཟད་པའི་གཏེར་གྱི་ཡོན་ཏན་དང་ལྡན་པའི་ས་པར་གྱུར་ཏོ། །འདིར་སེམས་བཞི་ལ། གོང་གི་ཐུན་མོང་གི་སེམས་གསུམ་གཅིག་ཏུ་བརྩིས་པའི་སྟེང་རང་གི་ལྟ་བ། འཇུག་པ། སྦྱོར་བ་གསུམ་ས་གསུམ་དང་སྦྱར་བ་ལ་བཞེད་པའང་ཡོད་དོ། །དེའི་ཚེ་སངས་རྒྱས་ལྔ་ཁྲི་ལྔ་སྟོང་ལ་ཐེ་ཚོམ་བཅད་ཀྱང་ངེས་པ་མ་རྙེད་དོ།།

གསུམ་པ་མཐོང་ལམ་ནི།

ཡང་དབུགས་ཆེན། ཞེས་པ་ནས། ཐེག་པ་སྟོན། །ཞེས་པའི་བར་གྱིས་བསྟན་ཏེ།

ཡང་དབུགས་ཆེན་འབྱིན་པའི་སྐབས་སུ་སེམས་གཅིག་རྫོགས་ཏེ་མཐའ་བཅུ་ཆུབ་ནས་འཇིགས་པ་ལྔ་ལས་འདས་ཏེ། རྟེན་གནས་ཁྱད་པར་འགྲོ་བའི་ས་པར་གནས་སོ། །དེའི་ཚེ་སངས་རྒྱས་དྲུག་ཁྲི་དྲུག་སྟོང་ལ་ཐེ་ཚོམ་བཅད་པས་ཕྱོགས་ཙམ་ཤེས་ཏེ་དབུགས་ཕྱིན་པར་གྱུར་ཏོ། །དེ་ཡང་འདི་ལྟར། སྒྱུ་མ་སྦྱོང་བའི་སྐྱེས་བུ་དེ། །འཁོར་ལོས་སྒྱུར་བའི་ཆ་བྱད་དུ། །རིན་ཆེན་བདུན་དང་དཔུང་ཚོགས་ཀྱིས། །དབང་སྒྱུར་ཐབས་ཀྱི་ཐེག་པ་སྟོན།།

ཡང་ཆོས་ཉིད་རང་གི་མཚན་ཉིད་ཇི་ལྟ་བ་བཞིན་དུ་རྟོགས་པས་དང་པོ་ངལ་སོས་ཏེ་འཁོར་བ་ལས་དབུགས་ཆེན་པོ་འབྱིན་པའི་རྣལ་འབྱོར་གྱི་སྐབས་སུ། ཆོས་ཉིད་མ་སྐྱེས་པར་རྟོགས་པའི་བསམ་གཏན་འབའ་ཞིག་དང་ལྡན་པས་དགའ་བ་བྱང་ཆུབ་ཀྱི་སེམས་གཅིག་ལ་ཉེས་པ་ཟད། ཆོས་ཉིད་མཐོང༌། འཁོར་བས་མི་འཇིགས། ཟག་པ་དང་བྲལ་བའི་ཁྱད་པར་བཞི་རྫོགས་ཏེ། ཟག་པ་མེད་པའི་བསླབ་པའི་མཐའ་བཅུ་ལེགས་པར་ཆུབ་ཅིང་རྟོགས་ནས། ཇི་སྐད་དུ། འཚོ་བ་མེད་དང་མི་བསྔགས་འཁོར་བ་མེད། །འཁོར་གྱིས་འཇིགས་བྲལ་འཆིང་བའི་བག་ཚ་རྣམ་པར་སྤངས། །ཞེས་པ་ལྟར་འཇིགས་པ་ལྔ་ལས་འདས་ཏེ། ༼༡༥༣༽ཇི་ལྟ་བའི་དོན་མཐོང་བ་ལ་བརྟེན་ནས་སྒོམ་པས་འབྲས་བུ་ཁྱད་པར་ཅན་དུ་འགྲོ་བས་ས་དྲུག་པར་གནས་ཏེ་ཆོས་ཉིད་ཀུན་ཏུ་འགྲོ་བའི་དོན་དུ་རྟོགས་སོ། །དུས་དེའི་ཚེ་སངས་རྒྱས་དྲུག་ཁྲི་དྲུག་སྟོང་ལ་ཐེ་ཚོམ་བཅད་པས་རྒྱལ་བ་ལ་ལྟོས་ན་གཉིས་སུ་མེད་པའི་དོན་ཕྱོགས་ཙམ་ཤེས་ཏེ་ས་དང་པོར་དབུགས་ཕྱིན་པར་གྱུར་ཏོ། །དེ་ནས་འགྲོ་དོན་བྱེད་པའི་ཚུལ་ཡང་འདི་ལྟར། ཐམས་ཅད་ཡེ་ཤེས་སྒྱུ་མར་མཐོང་བས་སྒྱུ་མ་ལྟ་བུའི་ལུས་ཀྱིས་དངོས་པོ་དང་མཚན་མའི་རྒྱུད་སྦྱོང་བའི་སྐྱེས་བུ་དེ་ཡིས་གཞན་དོན་ལ་རྩོལ་བ་དེ་ཡང་མི་བསྔགས་པ་མེད་པ་ཐོབ་པས་མཚན་དང་དཔེ་བྱད་ལྡན་པའི་ལྷ་མིའི་རྒྱལ་པོའི་སྐུ་འཁོར་ལོས་བསྒྱུར་བའི་ཆ་བྱད་ཅན་དུ་སྤྲུལ་ནས། བློན་པོ་དང་བཙུན་མོ་ལ་སོགས་པ་རིན་ཆེན་སྣ་བདུན་དང་དཔུང་གི་ཚོགས་བཞི་པོ་རྣམས་ཀྱིས་ཆ་རྐྱེན་དང་ལྡན་པར་རང་གི་འདོད་པ་གསེར་དངུལ་ཟངས་ལྕགས་གང་ཡིན་པའི་འཁོར་ལོས་དབང་བསྐུར་བས་གླིང་བཞི་སོགས་ལ་མངའ་དབང་བསྒྱུར་ཏེ་གདུལ་བྱ་རྣམས་ལ་ཚིག་ཙམ་དུ་ཐབས་ཀྱི་རྒྱལ་པོ་ཐེག་པ་ཆེན་པོའི་ལམ་ཡང་སྟོན་ཅིང་དོན་དགེ་བ་བཅུ་ལ་ལེགས་པར་འགོད་དེ་རིན་ཆེན་བདུན་གྱི་དབང་ཐོབ་པའི་ཕྱིར་རོ།།

བཞི་པ་སྒོམ་ལམ་ནི།

ཡང་ལུང་ཆེན། ཞེས་པ་ནས། ཐབས་མཆོག་སྦྱོར། །ཞེས་པའི་བར་གྱིས་བསྟན་ཏེ།

ཡང་ལུང་ཆེན་ཐོབ་པའི་སྐབས་སུ་སེམས་བདུན་རྫོགས་ཏེ་ལྷན་ཅིག་གནས་པའི་དྲི་མ་དག་པས་རི་བོ་ལས་རྒལ་ཏེ། དམིགས་པས་འབྲས་བུ་སྐྱེ་བའི་ས་པར་གནས་སོ། །དེའི་ཚེ་སངས་རྒྱས་བདུན་ཁྲི་བདུན་སྟོང་གི་ལུང་ཐོབ་པས་རྟོག་ཆེན་ལ་གནས་སོ། །དེ་ཡང་འདི་ལྟར། དེ་ཚེ་སྐྱེས་བུ་དམ་པ་དེ། །འབྲས་བུ་ཉིད་ལ་ལམ་ཤེས་པས། །ལམ་གྱི་ཡན་ལག་བདེ་རྫོགས་ཏེ། །གཞན་དག་སྨིན་པར་བྱ་བའི་ཕྱིར། །ཇི་ལྟར་འདོད་ལྟར་ཐབས་མཆོག་སྦྱོར།།

ཡང་སངས་རྒྱས་རྣམས་ཀྱིས་ལུང་བསྟན་པ་ཆེན་པོ་ཐོབ་པའི་སྐབས་སུ་རྒྱུའི་སྒོམ་ལམ་ས་དགུར་ལུང་བསྟན་པ་དངོས་སུ་འབྱུང་ཞིང་ཐོབ་པ་དང་ལྟ་བ་མཚུངས་པ་མིན་ཀྱང་རྣམ་པ་ཐུན་མོང་དུ་གྱུར་པ་ལྟར་ཤེས་པར་བྱ་སྟེ། དེའང་ས་དྲུག་པ་ལ་རྣལ་འབྱོར་བདུན་དང་བདུན་པ་ལ་གསུམ་དུ་གསུངས་པ་མཚན་ཉིད་ཀྱི་འཕགས་པའི་ས་བཅུ་དང་སྦྱར་ཏེ་ཐ་མ་ལ་ཕྱི་རྒྱུད་གསུམ་གྱི་དོན་ཡང་གནས་པར་མདོ་ཆེན་པོའི་རང་ལུགས་སུ་བཤད་པ་ལྟར་ཏེ། བསྒོམ་ཐབས་སྒྲོན་མ་ལས། དྲུག་པ་ལ་བདུན་དབུགས་ཆེན་འབྱིན་པ་ནི། །བདག་གཉིས་མེད་རྟོགས་མཐོང་ལམ་ས་རབ་དགའོ། །རིགས་ཆེན་འཛིན་པས་གཉིས་པ་དྲི་མ་བྲལ། །མཉམ་རྫོགས་བདེན་པ་གཉིས་མཉམ་གསུམ་པ་བྱེད། །ངེས་སྤྱོད་ཐུགས་ཆུད་དོན་མཛད་བཞི་པ་འཕྲོ། །རྩལ་སྦྱོང་དབྱེར་མེད་སྦྱོང་བས་ས་ལྔ་པ། །རིག་པས་ཆོས་ཉིད་ཡུལ་ལ་འཇུག་པས་དྲུག །རིག་པར་སྦྱོར་བས་ཉོན་མོངས་དག་པས་བདུན། །བདུན་པ་ལ་གསུམ་གྲུབ་པའི་རྣལ་འབྱོར་ནི། །མཚན་མ་ལས་གྲོལ་མི་གཡོར་གནས་པས་བརྒྱད། །ལེགས་པ་ཆེར་ལྡན་རྣལ་འབྱོར་ཆེན་པོ་དགུ། །ངེས་འབྱུང་གཞིར་གནས་༼༡༥༤༽ཆོས་ཀྱི་སྤྲིན་ཆེན་ཏེ། །དམ་ཚིག་ཡེ་ཤེས་འབྱེད་པས་ཕྱི་རྒྱུད་གསུམ། །ཞེས་གསུངས་པ་ལྟར་དབུགས་ཆེན་འབྱིན་པ་ནི་རྒྱུའི་རབ་ཏུ་དགའ་བ་རྣལ་འབྱོར་གསུམ་པ་དང་སྦྱོར་ལ། དེ་ནས་ས་གཉིས་པ་ནས་བརྒྱད་པ་མན་ཆད་ཀྱི་རིགས་ཆེན་འཛིན་པའི་རྣལ་འབྱོར་མི་འགྱུར་བའི་སེམས་དང༌། མཉམ་རྫོགས་ཆེན་པོའི་རྣལ་འབྱོར། ངེས་པར་འབྱིན་པའམ་སྤྱོད་པའི་རྣལ་འབྱོར། རྩལ་ཆེན་སྦྱོང་བའི་རྣལ་འབྱོར། ཡུལ་ལ་འཇུག་པའི་རྣལ་འབྱོར། རིག་པར་སྦྱོང་བའམ་སྦྱོར་བའི་རྣལ་འབྱོར། ས་བདུན་པ་རང་གི་གྲུབ་པའི་རྣལ་འབྱོར་གྱི་བར་སེམས་བདུན་རྫོགས་ཏེ། ལྷན་ཅིག་གནས་པ་གཡོ་བའི་དྲི་མ་ཤེས་བྱ་རགས་པ་དག་ནས། རྟོག་པའི་རི་བོ་དགུ་བཅུའམ་འཛིན་པའི་ཆ་མཐའ་དག་ལས་བརྒལ་ཏེ་དོན་ལ་ཏིང་ངེ་འཛིན་དུ་བྱས་པས་རྣལ་འབྱོར་ཆེན་པོ་དང་ངེས་པར་འབྱུང་བའི་རྣལ་འབྱོར་ཀྱང་ངང་ལ་གནས་པ་དང་མཐར་ལམ་ལ་སྦྱོར་བའི་རྩལ་དུ་རྫོགས་ནས་ཏིང་ངེ་འཛིན་ལ་དམིགས་པས་འབྲས་བུ་སྐྱེ་བའི་ས་བདུན་པར་གནས་སོ། །དེའི་ཚེ་སངས་རྒྱས་བདུན་ཁྲི་བདུན་སྟོང་གི་ལུང་ཐོབ་སྟེ་ཐེ་ཚོམ་བཅད་པས་ཐུན་མོང་ལྟར་ཀྲ་ཡོག་རྣམ་གསུམ་ལ་གནས་ཏེ་ལྷ་ཡི་སྐུར་ཡང་གསལ་བའི་ཕྱིར་ཡང་དག་པའི་རྟོག་ཆེན་རིག་འཛིན་གྱི་ས་ལ་གནས་སོ། །དེ་ཡང་སྒོམ་ལམ་གྱི་གཞན་དོན་བྱེད་ཚུལ་འདི་ལྟར། ལམ་ལ་གོམས་པ་དེ་ཚེ་སྐྱེས་བུ་དམ་པ་དེ་ཡིས་རང་དོན་དུ་འབྲས་བུ་ཉིད་ལ་ལམ་དུ་ཤེས་པས་ཐེག་པ་མཆོག་གི་དོན་མཐོང་བས་རང་གི་རིག་པ་ལ་འབྲས་བུའི་ལམ་གྱི་ཡན་ལག་ཐམས་ཅད་ཤིན་ཏུ་བདེ་བར་རྫོགས་ཏེ་ཉམ་ང་བ་མེད་པ་ལ་གཞན་དོན་དུ་གདུལ་བྱ་དག་སྨིན་པར་བྱ་བའི་ཕྱིར་ཇི་ལྟར་འདོད་པ་ལྟར་རྔོན་པ་དང་སྨད་འཚོང་ལ་སོགས་པ་ཇི་ལྟར་འདུལ་བའི་ཆ་ལུགས་ཀྱིས་འདུལ་ཏེ་ཐབས་ཆེན་མཆོག་གི་སྦྱོར་བས་ཅི་ལྟར་སྤྱད་ཀྱང་མི་གོས་པའི་ཚུལ་གྱིས་དོན་རྫོགས་པར་མཛད་དོ།།

ལྔ་པ་མཐར་ལམ་ནི།

ཡང་རྩལ་ཆེན། ཞེས་པ་ནས། ཆོ་འཕྲུལ་སྣང༌། །ཞེས་པའི་བར་གྱིས་བསྟན་ཏེ།

ཡང་རྩལ་ཆེན་རྫོགས་པའི་སྐབས་སུ་སེམས་གསུམ་བསྐྱེད་ཅིང་མཐའ་དྲུག་ཆུབ་ནས། གནས་པས་མི་འགྱུར་བའི་ས་པར་གནས་སོ། །དེ་ཚེ་སངས་རྒྱས་བརྒྱད་ཁྲི་བརྒྱད་སྟོང་ལས་ལུང་བསྟན་པ་ཐོབ་ནས་གདེང་དུ་གྱུར་ཏོ། །དེ་ཡང་འདི་ལྟར། དེ་ན་རྒྱལ་ཚབ་སྐྱེས་བུ་དེ། །ཆོས་ཀྱི་རྒྱལ་པོ་གང་དེ་ཡི། །གདུང་འཚོབ་དགའ་ལྡན་ཐེག་ཆེན་སྟོན། །མི་གནས་བཅུ་དུས་ཆོ་འཕྲུལ་སྣང་།།

ཡང་མཐར་ལམ་གྱི་རྩལ་ཆེན་དང་པོ་རྫོགས་པའི་སྐབས་སུ། རྨད་བྱུང་རོལ་པའི་རྣལ་འབྱོར་དང༌། ཚོགས་ཆེན་འདུས་པའི་རྣལ་འབྱོར། རྩལ་ཆེན་རྫོགས་པའི་རྣལ་འབྱོར་གསུམ་སྒོམ་སྟེ་སེམས་གསུམ་བསྐྱེད་ཅིང་བསླབ་པའི་མཐའ་ཡས་ནས་བགྲངས་པ་དྲུག་གི་དོན་རྟོགས་ཤིང་ཆུབ་སྟེ་མཐར་ཕྱིན་ནས་དོན་གྱི་ངོ་བོ་གནས་པ་མི་འགྱུར་བའི་ས་བརྒྱད་པར་གནས་སོ། །ལམ་རིམ་ལས། བསླབ་པ་བཅུ་ཡི་སྒྲ་གཅིག་ལ། །ཟག་བཅས་༼༡༥༥༽བཞི་དང་བར་ཆད་མེད། །ཟག་མེད་ལམ་ལྔའི་བསླབ་པ་དག །སློབ་པའི་ལུགས་དང་ལོབས་པ་དང༌། །ནུས་མཐུ་དང་ནི་ངོ་བོ་དག །བསླབ་པའི་ཡུལ་གྱི་ཁྱད་པར་འགྱུར། །ཞེས་ཀྱང་འབྱུང་ངོ༌། །དེའི་ཚེ་སངས་རྒྱས་བརྒྱད་ཁྲི་བརྒྱད་སྟོང་ལས་ལུང་བསྟན་པ་མངོན་སུམ་དུ་ཐོབ་ནས་ཐེ་ཚོམ་བཅད་པས་ཐ་མའི་དོན་ངེས་པའི་ཏིང་ངེ་འཛིན་ལ་ཉམ་མི་ང་བར་གདེང་ཆེན་པོ་རྙེད་དེ་རྟོགས་པ་མཐར་ཕྱིན་པ་ཉིད་དུ་གྱུར་ཏོ། །དེ་ནི་མཚན་ཉིད་ལྟར་ན་ས་བཅུ་རྒྱུན་གྱི་ཐ་མ་སྟེ། དེ་ཡང་འདི་ལྟར། ལོངས་སྤྱོད་རྫོགས་པ་ཆེན་པོའི་འཁོར་དུ་ངེས་པ་དེས་ན་སྟོན་པའི་རྒྱལ་ཚབ་འཆད་པའི་སྐྱེས་བུ་ཉིད་དུ་གྱུར་པ་དེ་ཡིས་ཆོས་ཀྱིས་རྒྱལ་པོ་སྟོན་པ་ཆེན་པོ་མྱ་ངན་ལས་འདས་ནས་མཐར་ལམ་པ་གང་དེ་ཡི་གཞན་དོན་གྱི་སྤྱོད་པས་སྟོན་པའི་གདུང་འཚོབ་སྟེ་རིགས་འཛིན་ཅིང་ད་ལྟ་དགའ་ལྡན་ལྷ་ཡི་གནས་ན་འཁོར་རྣམས་ལ་དད་པ་སྐྱེ་བའི་ཐེག་པ་ཆེན་པོ་སྟོན་ཏེ་བྱམས་པ་ལྟ་བུ་དང་མི་ཡི་གནས་ཚེ་ལོ་བཅུ་པའི་དུས་ཡན་ཆད་དུ་དེའི་མཛད་པ་འབྱུང་སྟེ་ཚིག་དང་བསྟན་པ་ལ་སོགས་པ་ཆོ་འཕྲུལ་ཀུན་ཏུ་སྣང་ངོ༌། །སངས་རྒྱས་ཀྱི་གྲངས་མང་ཉུང་ནི་ས་ནོན་ཅིང་སྒྲིབ་པ་དག་པས་སྤོབས་པ་དང་སྟོབས་ཁྱད་པར་དུ་གྱུར་པའི་ཕྱིར་གྲངས་ཆ་རེས་འཕགས་སོ། །བརྡལ་བ་ཆོས་ཉིད་ཀྱི་ས་དང་རྫོགས་པ་སྤྱིར་ཆིབས་ཀྱི་ས་ནི་ད་དུང་མ་ནོན་ཏེ་ལམ་ཐ་མའི་དབུགས་ཕྱིན་པ་ནའོ། །ལམ་བགྲོད་ཚུལ་འདི་དག་ནི་རྗེས་སུ་འཇུག་པའི་དབང་དུ་ན་ཐེག་པ་དགུ་ཉིད་རྒྱུད་གཅིག་གི་དབང་དུ་གྱུར་པ་སྟེ་བསྐལ་པ་མང་པོས་སྔ་ཕྱིར་བགྲོད་པ་དང༌། གྲུབ་པ་ནས་གྲུབ་པར་ཐུག་པ་མེད་པར་འཇུག་པ་ལྟ་བུ་ནི་མ་ཡིན་གྱི། སོ་སོའི་རྒྱུའི་ལྟ་སྤྱོད་ཏིང་ངེ་འཛིན་ལས་བོགས་སུ་གྱུར་པའི་ཕྱིར་རོ།།

གཉིས་པ་གཞན་དོན་དུ་མདོ་ཁྱད་པར་གྱི་ལམ་ནས་བགྲོད་པ་ལ་གསུམ་སྟེ། སེམས་བསྐྱེད་པའི་དུས། ལམ་པའི་ངོ་བོ། ལམ་རྣལ་འབྱོར་ལྔར་བགྲོད་ཚུལ་ལོ། །དང་པོ་ནི།

ལང་ཀའི། ཞེས་པ་ནས། སེམས་བསྐྱེད་ནས། ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལྟར་ན། ལས་དང་པོ་པའི་རིགས་ཀྱི་བུ་དེ་དག་ནི། རིགས་ལྔར་སྐྱེ་བ་བླངས་པ་དེ་ནས་ཀྱང་བསྐལ་པ་དཔག་ཏུ་མེད་པ་བརྗོད་པ་ལས་འདས་པ་ཐོག་མ་དང་ཐ་མ་མེད་པའི་དུས་ན། སངས་རྒྱས་ལྔ་ལ་བྱང་ཆུབ་མཆོག་ཏུ་སེམས་བསྐྱེད་ནས།

ལང་ཀའི་བདག་པོ་དེ་ལྟར་ན་གཞིའི་ལས་དང་པོ་པའི་རིགས་ཀྱི་བུ་དེ་དག་ནི་མི་བུ་རིགས་ལྔར་སྐྱེ་བ་བླངས་པ་དེ་ནས་ཀྱང༌། སེམས་དང༌། བསླབ་པ་དང༌། ས་ལ་སྙེགས་པས་རིགས་སོ་སོ་ངེས་པ་ནས་ཕྱིས་བསྐལ་པ་གྲངས་མེད་པ་དཔག་ཏུ་མེད་པ་བརྗོད་པ་ལས་འདས་པར་སྔ་ཕྱི་འབྱུང་བའི་ཐོག་མ་དང་ཐ་མ་མེད་པའི་དུས་ན། དང་པོ་གསང་བ་མཆོག་གི་སེམས་བསྐྱེད་པའང་སངས་རྒྱས་རྡོ་རྗེ་༼༡༥༦༽འཆང་ཆེན་པོ་དང༌། སྤྱན་ཆེན་པོ་དང༌། རིན་ཆེན་མང་དང༌། ཆོས་ཀྱི་དབང་ཕྱུག་རྒྱལ་པོ་དང༌། ལས་སྣ་ཚོགས་དང་ལྔ་ལ་རྡོ་རྗེ་སེམས་དཔའ་དང༌། རྣམ་པར་སྣང་མཛད་དང༌། རིན་ཆེན་འབྱུང་ལྡན་དང༌། འོད་དཔག་མེད་དང༌། དོན་ཡོད་གྲུབ་པ་དང་ལྔས་དངོས་པོའི་གནས་ལུགས་དང་མཐུན་པར་བྱང་ཆུབ་མཆོག་ཏུ་སེམས་བསྐྱེད་ནས།

གཉིས་པ་ལམ་པའི་ངོ་བོ་ནི།

འཁོར་ལོས། ཞེས་པ་ནས། ལྔར་གྱུར་ཏེ། ཞེས་པའི་བར་གྱིས་བསྟན་ཏེ།

འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བྱེད་ཀྱི་བུ་ལྔར་སྐྱེས་པ་ནི་འདི་ལྟ་སྟེ།

མཛེས་པའི་མེ་ཏོག་དང་། བསམ་གྱིས་མི་ཁྱབ་པའི་དཔལ་དང་། ནོར་སྦྱིན་འཛིན་དང་།

ཟླ་མཛེས་དཔལ་དང་། ཀུན་ལ་མཛེས་པའི་འོད་ཅེས་བྱ་བ་ལྔར་གྱུར་ཏེ།

དེ་ལྟར་སེམས་བསྐྱེད་ནས་འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བྱེད་ཀྱི་བུ་ལྔར་སྐྱེས་ཏེ་རྒྱལ་བུ་སྤུན་ལྔར་གྱུར་པ་ནི་འདི་ལྟ་སྟེ། སངས་རྒྱས་རྡོ་རྗེ་སེམས་དཔའ་ནི་མཛེས་པའི་མེ་ཏོག་དང༌། སངས་རྒྱས་རྣམ་པར་སྣང་མཛད་ནི་བསམ་གྱིས་མི་ཁྱབ་པའི་དཔལ་དང༌། སངས་རྒྱས་རིན་ཆེན་འབྱུང་ལྡན་ནི་ནོར་སྦྱིན་འཛིན་དང༌། སངས་རྒྱས་འོད་དཔག་མེད་ནི་ཟླ་མཛེས་དཔལ་དང༌། སངས་རྒྱས་དོན་ཡོད་གྲུབ་པ་ནི་ཀུན་ལ་མཛེས་པའི་འོད་ཅེས་བྱ་བ་དང་ལྔར་གྱུར་ཏེ།

གསུམ་པ་ལམ་རྣལ་འབྱོར་ལྔར་བགྲོད་ཚུལ་ནི།

དེ་དག ཅེས་པ་ནས། མཐོང་བར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་དག་ལས་ཀྱི་དང་པོ་འདུན་པའི་རྣལ་འབྱོར་པར་གྱུར་པ་ཉིད་ལ་ཡིད་ལ་བྱེད་པ་ཞེས་བྱ་བ་ཐོབ་བོ། །དེས་ནམ་མཁའ་ལ་འགྲོ་བའི་ལྟས་མཐོང་བར་གྱུར་ཏོ། །དེ་ནས་རིགས་ཆེན་འབྱེད་པའི་རྣལ་འབྱོར་པར་གྱུར་ཏེ་ཉིད་ལ་འཕྲོ་འདུ་གཅིག་པའི་ཏིང་འཛིན་ཐོབ་བོ། །དེས་བདག་ཉིད་ཡི་གེའི་འཕྲེང་བར་སྣང་བའི་ལྟས་མཐོང་བར་གྱུར་ཏོ། །དེ་ནས་དབུགས་ཆེན་ཕྱིན་པའི་རྣལ་འབྱོར་པར་སྣང་བ་ཉིད་ལ་ཡོངས་སུ་མི་ལྡོག་པའི་ཏིང་ངེ་འཛིན་ཐོབ་བོ། །དེས་འཇིག་རྟེན་གྱི་ཁམས་ནོར་བུ་རིན་པོ་ཆེས་གང་བར་སྤྱོད་པའི་ལྟས་མཐོང་བར་གྱུར་ཏོ། །དེ་ནས་ལུང་ཆེན་ཐོབ་པའི་རྣལ་འབྱོར་དུ་སྣང་བ་ཉིད་ལ་དེ་བཞིན་ཉིད་ཀྱི་ཏིང་ངེ་འཛིན་ཐོབ་བོ། །དེས་སེང་གེ་དག་ལ་ཞོན་ཏེ་ཐམས་ཅད་ཟིལ་གྱིས་གནོན་པའི་ལྟས་མཐོང་བར་གྱུར་ཏོ། །དེ་ནས་རྩལ་ཆེན་རྫོགས་པའི་རྣལ་འབྱོར་དུ་སྣང་བ་ཉིད་ལ་ཀུན་ཏུ་སྣང་བའི་ཏིང་ངེ་འཛིན་ཐོབ་སྟེ། དེས་ཉི་ཟླའི་འཁོར་ལོ་བསྐོར་བས་ཐམས་ཅད་འོད་ཀྱིས་གསལ་བར་བྱེད་པའི་ལྟས་མཐོང་བར་གྱུར་ཏོ།།

དེ་ལྟར་རིགས་ལྔ་ཁྱེའུ་ལྔར་གྱུར་པ་དེ་དག་ཆོས་ཐམས་ཅད་བདག་ཉིད་ཆེན་པོར་ལྷུན་གྱིས་གྲུབ་པའི་གསང་ཆེན་མཆོག་གི་ལས་ཀྱི་དང་པོ་གསང་སྔགས་ཐེག་པ་ཆེན་པོ་གཉིས་སུ་མེད་པའི་དོན་ལ་མོས་ཤིང་འདུན་པས་སེམས་པའི་རྣལ་འབྱོར་པར་གྱུར་པ་ཉིད་ལ་གསང་སྔགས་སྤྱིའི་མཚན་ཉིད་ལ་སྒྲའི་རྗེས་སུ་འབྲངས་པས་ངེས་པ་རྙེད་དེ་ཚིག་གི་རྗེས་སུ་དོན་ཡིད་ལ་བྱེད་པ་ཞེས་བྱ་བའི་ལྟ་བ་དང་དེ་ལྟར་མོས་པས་སྒོམ་པའི་ཏིང་ངེ་འཛིན་འཐོབ་བོ། །དེས་ལས་ཀྱི་སྒྲིབ་པ་དག་ནས་སེམས་འཕར་ཏེ་ས་ནས་སར་འབྱུང་བའི་སྐལ་བ་ཅན་དུ་གྱུར་པས་ཆོས་དབྱིངས་ཀྱི་ནམ་འཁའ་ལ་འགྲོ་བའི་རྨི་ལྟས་དག་མཐོང་བར་གྱུར་ཏོ། །དེའི་ཚེ་ཚོགས་གསོག་པ་བྱ་བ་ལས་ཀྱི་སྤྱོད་པ་ལ་གནས་སོ། །དེ་ནས་གཉིས་པ་ལྟུང་བ་དང་མི་ལྟུང་བའམ་ལམ་དང་འབྲས་བུའི་རིགས་ཆེན་པོ་འབྱེད་པའི་རྣལ་འབྱོར་པར་གྱུར་པ་ཉིད་ལ། དེ་ཁོ་ན་ཉིད་མཐོང་མ་རག་པས་བར་ཆད་མེད་པའི་ལྟ་བ་དང༌། སེམས་ཕྱིར་འཕྲོ་བ་དང་ནང་དུ་འདུ་བ་ཡི་གེ་དང་ཕྱག་རྒྱ་གཉིས་ལ་བྱེད་དེ་གང་ཡུལ་དུ་གཏད་པའི་མཚན་མ་ལ་སེམས་རྩེ་གཅིག་ཏུ་གྱུར་པས་ཆོས་མ་འགགས་པ་དང་མི་དམིགས་པ་དབྱེར་མེད་པའི་ཏིང་ངེ་འཛིན་ལས་གཞན་དུ་མི་འགྱུར་བ་འཐོབ་བོ། །དེས་ཡི་གེའི་གཟུངས་༼༡༥༧༽ཐོབ་པའི་ཕྱིར་བདག་ཉིད་ཡི་གེའི་ཕྲེང་བར་སྣང་བའི་རྨི་ལྟས་མཐོང་བར་གྱུར་ཏོ། །དེའི་དུས་སུ་སྤྱོད་པ་ནི་བརྩོན་འགྲུས་ཀྱིས་ཕྱོགས་གཅིག་ལ་གནས་པར་བྱེད་དོ། །དེ་ནས་གསུམ་པ་བདེན་པ་རྣམ་གཉིས་དབྱེར་མེད་པའི་དོན་མངོན་སུམ་དུ་མཐོང་བས་དང་པོར་དབུགས་ཆེན་འབྱིན་པའི་རྣལ་འབྱོར་པར་སྣང་བ་ཉིད་ལ། ཇི་བཞིན་པ་མངོན་སུམ་དུ་རྟོགས་པའི་ལྟ་བས་འཇིགས་པ་ལྔ་དང་བྲལ་ཞིང་ཆུ་སྲིན་གྱི་ཕྱག་རྒྱ་ལྟ་བུར་གྱུར་པས་འཁོར་བའི་གནས་དང༌། ཐེག་པ་དམན་པ་དང་ལྟ་སྤྱོད་དམན་པར་ཡོངས་སུ་མི་ལྡོག་པའི་ཏིང་ངེ་འཛིན་གྱི་གདེངས་ཆེན་པོ་འཐོབ་བོ། །དེས་སྤྱོད་ཡུལ་ཡོངས་སུ་དག་པའི་ཕྱིར་སྣང་བ་ཐམས་ཅད་ཡིད་བཞིན་ལྷ་ཡི་སྐུའམ། འཇིག་རྟེན་གྱི་ཁམས་ནོར་བུ་རིན་པོ་ཆེས་གང་བར་སྤྱོད་པའི་རྨི་ལྟས་མཐོང་བར་གྱུར་ཏོ། །དེ་ནི་འཁོར་ལོས་སྒྱུར་བའི་ཆ་བྱད་ཀྱིས་ཆོས་སྟོན་པའི་ཡང་རྟགས་སོ། །དེའི་ཚེ་ཤེས་རབ་དང་མཐུན་པར་མི་དམིགས་པའི་སྤྱོད་པ་ལ་གནས་སོ། །དེ་ནས་བཞི་པ་རྒྱལ་བ་རྣམས་ལས་ལུང་ཆེན་པོ་ཐོབ་ནས་འབྲས་བུ་ལྷུན་གྱིས་གྲུབ་པའི་རྣལ་འབྱོར་དུ་སྣང་བ་ཉིད་ལ། ཆོས་ཐམས་ཅད་ཆོས་ཀྱི་དབྱིངས་སུ་ལྷུན་གྱིས་གྲུབ་པས་མཚན་མས་མི་གཡོ་བའི་ལྟ་བ་དང༌། རིལ་གཉིས་སུ་མེད་པའི་དེ་བཞིན་ཉིད་ཀྱི་ཏིང་ངེ་འཛིན་ལས་མི་གཡོ་བར་འཐོབ་བོ། །དེས་མཚན་མ་ལ་སོགས་པ་ལྡང་མི་ནུས་པའི་ཕྱིར་སེང་གེ་དག་ལ་ཞོན་ཏེ་ཐམས་ཅད་ཟིལ་གྱིས་གནོན་པའི་རྨི་ལྟས་མཐོང་བར་གྱུར་ཏོ། །དེ་ནི་རྣམ་རྟོག་ཟིལ་གྱིས་གནོན་ཅིང་མི་འཇིགས་བཞི་རྗེས་མཐུན་པ་ཐོབ་པའི་ཡང་ལྟས་སོ། །དེའི་ཚེ་རྔོན་པ་དང་སྨད་འཚོང་ལྟ་བུ་ཡན་ཆད་ཀྱིས་དོན་མཛད་པས་ཐབས་ཀྱི་སྤྱོད་པ་ལ་གནས་སོ། །དེ་ནས་ལྔ་པ་བགྲོད་པ་ལ་ལྟོས་ནས་འབྲས་བུའི་ཆོས་ཀྱི་རྩལ་ཆེན་པོ་དང་པོར་རྫོགས་ཏེ་མཐར་ཕྱིན་པའི་རྣལ་འབྱོར་དུ་སྣང་བ་ཉིད་ལ། ལྟོས་ནས་མཐར་ཐུག་པའི་ལྟ་བ་དང༌། རིལ་རིག་པའི་ཡེ་ཤེས་ཡང་དག་པའི་ཐུགས་རྗེས་ཟིན་པའི་དོན་གསལ་ལ་ཁྱབ་པས་ཀུན་ཏུ་སྣང་གི་ཏིང་ངེ་འཛིན་འཐོབ་སྟེ་ཐུགས་རྗེ་དང་ཡེ་ཤེས་དང་ཆོ་འཕྲུལ་གྱིས་ཡོངས་སུ་ཁྱབ་པར་མཛད་དོ། །དེས་སྟོན་པའི་རྒྱལ་ཚབ་ནུས་པའི་ཡེ་ཤེས་དང་ཐུགས་རྗེ་ཆེན་པོས་འོག་མ་ལྟར་མ་བཙལ་བར་དོན་རྫོགས་པས་ཉི་ཟླའིའཁོར་ལོ་བསྐོར་བས་ཐམས་ཅད་འོད་ཀྱིས་གསལ་བར་བྱེད་པའི་རྨི་ལྟས་མཐོང་བར་གྱུར་ཏོ། །འདི་ཉིད་མཐར་ལམ་དང་པོ་ཡིན་ལ་དེས་མཐར་ལམ་བར་པར་རང་བྱུང་ཡེ་༼༡༥༨༽ཤེས་འོད་གསལ་བའི་ལྟས་ཀྱང་མཐོང་བའོ། །དེའི་ཚེ་བྱ་བ་མེད་པའམ་བཙལ་བ་མེད་པའི་སྤྱོད་པ་ལ་གནས་སོ། །འདིར་རྣལ་འབྱོར་ལྔ་དང༌། ས་བཅུ་ལ་ཏིང་ངེ་འཛིན་གྱི་རྣལ་འབྱོར་བཅུ་དང༌། རྣལ་འབྱོར་སོ་བཞི་གསུངས་པ་རྣམས་སྦྱར་ཏེ་སོ་སོའི་སེམས་བསྐྱེད་དང་ས་ལམ་གྱི་ངོ་བོ་རྒྱས་པར་བཤད་ན་གལ་ཆེ་བར་མངོན་ཡང་ཡི་གེས་འཇིགས་པས་བློ་གསལ་རྣམས་ཀྱིས་ལེའུ་རེ་གཅིག་པ་སའི་སྒྲོན་མ་ལས་རྣལ་འབྱོར་སོ་བཞིའམ་བཞི་བཅུ་འབྱུང་བ་ལྟར་སྦྱར་ཏེ་ཆོས་རྗེ་དམ་པ་རིན་པོ་ཆེའི་གསུང་སྒྲོས་སོགས་གནད་མང་པོ་ཡོད་པ་རྣམས་སློང་ནུས་པར་བྱའོ།།

འོ་ན་འདིར་རིགས་ལྔས་སེམས་བསྐྱེད་པ་ནི་ལྡབ་པར་གྱུར་པའི་དགོས་པ་ཇི་ཞེ་ན། མདོ་སྔགས་ཀྱི་ལུགས་རྣམ་པ་གཉིས་ཀྱི་དབང་དུ་བསྐྱེད་པར་བསྟན་པ་དང་། སེམས་བསྐྱེད་པའི་དུས་དང༌། གྲངས་དང༌། རིམ་པས་ཕྱེ་བ་དང༌། ཐུན་མོང་གི་དབང་དུ་བསྐལ་པ་སྔ་ཕྱིར་སྐྱེ་བའི་རིམ་པས་ཕྱི་མ་ལ་རྒྱུ་ནས་བགྲོད་དེ་མཇུག་ཏུ་སྔགས་སུ་སེམས་བསྐྱེད་པར་བརྒྱུད་པའི་དོན་ཏེ། རིགས་ལྔར་སྐྱེ་བ་བླངས་པ་དེ་ནས་ཀྱང་ཞེས་སྔར་བསྟན་པས་མངོན་ནོ། །དེ་ལྟར་ཁྱེའུ་ལྔས་ལམ་བགྲོད་པ་དེ་སྔོན་བྱུང་སྤྲུལ་པའི་ལམ་ཡིན་ཏེ། རྒྱལ་བ་རིགས་ལྔ་ཁྱེའུ་ལྔར་སྤྲུལ་པའི་ཕྱིར་རོ། །ལམ་ལྔ་ཕྲག་གཉིས་སུ་ལན་གཉིས་བགྲོད་པ་ནི། སྔ་མ་ནི་ཐུན་མོང་གི་ལམ་ཆེན་པོ་ནས་བགྲོད་པ་ཡིན་ལ། ཕྱི་མ་ནི་ཨ་ནུ་ཡོ་གའི་རང་ལམ་ཐུན་མོང་མིན་པ་ནས་བགྲོད་པའོ། །ཡང་སྔ་མ་ནི་བདག་དོན་དུ་བགྲོད་ལ། ཕྱི་མ་ནི་གཞན་དོན་དུ་བགྲོད་པར་གསུངས་སོ། །ལམ་སྔ་ཕྱིའི་བར་ན་བསྐལ་པ་དཔག་ཏུ་མེད་པ་བརྗོད་པ་ལས་འདས་པ། ཞེས་བསྐལ་པ་མང་པོས་བར་ཆོད་པ་དེ་མི་འཐད་ཅེ་ན། ཟུར་སྔ་རབས་པ་རྣམས་དེ་ནི་ལམ་སྔ་མ་བགྲོད་ནས་མཐར་ལམ་དུ་སླེབ་ནས་མཐར་ལམ་གྱི་དགོངས་པའི་ཡུན་བསྐལ་པ་ཚད་མེད་པ་ཡིན་ཏེ། ལེའུ་བཅོ་ལྔ་པ་ལས། བསྐལ་པ་ཚད་མེད་པས་སོ། །ཞེས་པས་གསལ་ལོ་གསུངས།

འདི་ལ་ཀུན་མཁྱེན་ཀཿཐོག་པ་ཆེན་པོས། ཁོ་བོ་ནི་ལམ་སྔ་མ་རྒྱལ་བ་རིགས་ལྔས་ཁྱེའུ་ལྔར་སྐྱེ་བ་བླངས་ནས་འཇིག་རྟེན་ཕལ་པའི་སེམས་བརྒྱད་ནས་བགྲོད་ལ། ཕྱི་མ་ནི་རང་གི་ལམ་ནས་བགྲོད་དེ་དེ་ལྟར་ཐུན་མོང་གི་ལམ་བགྲོད་ནས་མཐར་ལམ་གྱི་བར་དུ་བསྐལ་པ་མང་པོ་ཐོགས་པར་འཐད་དེ། འདི་ཉིད་ལས། ལས་དང་པོ་པའི་རིགས་ཀྱི་བུ་དེ་དག་ནི་རིགས་ལྔར་སྐྱེ་བ་༼༡༥༩༽བླངས་པ་དེ་ནས་ཀྱང་བསྐལ་པ་དཔག་ཏུ་མེད་པ་བརྗོད་པ་ལས་འདས་ པ་ཐོག་མ་དང་ཐ་མ་མེད་པའི་དུས་ན་ཞེས་པས་མངོན་ནོ།།

དེས་ན་ལམ་ལྔ་ཕྲག་གཉིས་བདག ་དོན་གཞན་དོན་ཨ་ཅང་ཆེ་སྟེ་སྔ་མ་ནི་མདོ་ཆེན་པོའི་ལུགས་ཀྱི་རྒྱུ་འབྲས་ཐུན་མོང་གི་སྒོ་ནས་བགྲོད་ལ། ཕྱི་མ་ནི་མདོ་ཆེན་པོའི་རང་ལུགས་ཐུན་མིན་གྱི་སྒོ་ནས་བགྲོད་དེ་གཉིས་ཀ་འབྲས་བུའི་ལམ་ལ་ལྟོས་ན་ལམ་ཐུན་མོང་བའོ། །འབྲས་བུའི་ལམ་དངོས་ནི་རྟོགས་བྱ་མཐར་ཐུག་གི་ངོ་བོ་གསང་སྔགས་ཡིན་པ་དང༌། དབང་བསྐུར་དགོས་པ་རང་གིས་མཐར་ལམ་བར་པ་ནས་གསང་སྔགས་ཅི་བཞིན་པའི་ལམ་དུ་བགྲངས་ཏེ་གསང་སྔགས་ཀྱི་ངོ་བོ་དེ་ཁོ་ན་ཉིད་ཀྱི་ངེས་པ་རྙེད་པ་དེ་ནས་འབྱུང་བར་གསུངས་པས་སོ། །སྤྱིར་སྔགས་ལ་འཇུག་པ་ལ་ངེས་པ་མེད་དེ། ལམ་མཐོ་དམན་གང་ནས་ཀྱང་རུང་ངོ་། །ཞེས་བཀའ་སྩལ་ཏེ་གཞུང་དོན་ཇི་ལྟ་བ་བཞིན་ནོ།།

གཉིས་པ་བགྲོད་ཀྱང་ངེས་པ་མ་རྙེད་པ་ལ་གཉིས་ཏེ། དམ་བཅའ་བ་དང༌། དེའི་གཏན་ཚིགས་སོ། དང་པོ་ནི།

ལང་ཀའི། ཞེས་པ་ནས། མ་ཡིན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལྟར་གྱུར་དུ་ཟིན་ཀྱང་གསང་སྔགས་ཀྱི་ངོ་བོ་དེ་ཁོ་ན་ཉིད་དུ་ངེས་པ་རྙེད་པ་ནི་མ་ཡིན་ནོ།།

ལང་ཀའི་བདག་པོ། དེ་ལྟར་རྩོལ་བ་དང་བཅས་པའི་ལམ་ཐོབ་ཏུ་ཟིན་ཀྱང་ས་ཐ་མ་གཉིས་མ་ནོན་པས་གསང་སྔགས་ཀྱི་ངོ་བོ་ཇི་བཞིན་པ་དེ་ཁོ་ན་ཉིད་ཀྱི་ངེས་པ་རྙེད་པ་ནི་མ་ཡིན་ཏེ་ད་དུང་ཡུལ་དུ་བྱེད་པ་ཡོད་པས་སོ། །ཞེས་གསང་སྔགས་རྩོལ་མེད་ཀྱི་ལམ་ལ་དྲང་བ་དང་རྒྱལ་བའི་དགོངས་པ་ལ་ལྟོས་ནས་ཡིན་ནོ།།

གཉིས་པ་དེའི་གཏན་ཚིགས་ནི།

དེ་ཅིའི་ཕྱིར། ཞེས་པ་ནས། ཕྱིར་རོ། །ཞེས་པའི་བར་གྱིས་བསྟན་ཏེ།

དེ་ཅིའི་ཕྱིར་ཞེ་ན། ལངྐའི་བདག་པོ་གང་ལས་དང་པོ་པའི་རིགས་ཀྱི་བུ་དེ་དག་རྒྱལ་ཚབ་སྐྱེས་བུར་གྱུར་པ་ན། སྐྱེས་བུ་དམ་པ་སེམས་དཔའ་རྡོ་རྗེ་དང་། སྐྱེས་བུ་དམ་པ་རྡོ་རྗེ་རིན་ཆེན་དང་། སྐྱེས་བུ་དམ་པ་རྡོ་རྗེ་ཆོས་དང་། སྐྱེས་བུ་དམ་པ་ལས་ཀྱི་རྡོ་རྗེ་དང་། སྐྱེས་བུ་དམ་པ་རྡོ་རྗེ་དབྱིངས་ཞེས་བྱ་བར་ཞིང་ཁམས་ཐམས་ཅད་དུ་གྲགས་སོ། །དེ་ལ་ཞིང་ཁམས་ལ་ལར་ནི་རྒྱལ་ཚབ་སྐྱེས་བུ་ཞེས་བྱ་བར་བརྗོད་ཅིང་དེ་ལྟར་གྲགས་སོ། །ལ་ལར་ནི་སྲིད་པ་ཐ་མ་པ་ཞེས་བྱ་བར་བརྗོད་ཅིང་དེ་ལྟར་གྲགས་སོ། །ལ་ལར་ནི་ས་ཆེན་པོའི་སངས་རྒྱས་ཞེས་བྱ་བར་བརྗོད་ཅིང་གྲགས་ཀྱང་། སངས་རྒྱས་ཀྱི་དགོངས་པ་གསང་བ་དམ་པ་ད་དུང་ཉམས་སུ་མ་མྱོང་སྟེ། མཉམ་པ་ལ་འཇོག་དགོས་པའི་ཕྱིར་རོ།།

དེའི་གཏན་ཚིགས་བརྗོད་པ་དེ་ཅིའི་ཕྱིར་ཞེ་ན། ལང་ཀའི་བདག་པོ། གང་ལས་དང་པོ་པའི་རིགས་ཀྱི་བུ་དེ་དག་མཐར་ལམ་དང་པོ་ཐོབ་སྟེ་བར་པའི་ལྟས་མཐོང་ནས་རྒྱལ་ཚབ་སྐྱེས་བུར་གྱུར་པ་ན་མཛེས་པའི་མེ་ཏོག་ལ་སྐྱེས་བུ་དམ་པ་རྡོ་རྗེ་སེམས་དཔའ་དང༌། ནོར་སྦྱིན་འཛིན་ལ་སྐྱེས་བུ་དམ་པ་རྡོ་རྗེ་རིན་ཆེན་དང༌། ཟླ་མཛེས་དཔལ་ལ་སྐྱེས་བུ་དམ་པ་རྡོ་རྗེ་ཆོས་དང༌། ཀུན་ལ་མཛེས་པའི་འོད་ལ་སྐྱེས་བུ་དམ་པ་ལས་ཀྱི་རྡོ་རྗེ་དང༌། བསམ་གྱིས་མི་ཁྱབ་པའི་དཔལ་ལ་སྐྱེས་བུ་དམ་པ་རྡོ་རྗེ་དབྱིངས་ཞེས་བྱ་བར་ཕྱོགས་ཐུག་པ་མེད་པའི་ཞིང་ཁམས་ཐམས་ཅད་དུ་གྲགས་སོ། །དེ་ལ་ཞིང་ཁམས་ལ་ལར་ནི་སྐུ་ལྔའམ་རིགས་ལྔའི་རྒྱལ་ཚབ་སྐྱེས་བུ་ཞེས་བྱ་བར་བརྗོད་ཅིང་དེ་ལྟར་གྲགས་སོ། །ལ་ལར་ནི་འཁོར་ལོས་སྒྱུར་བའི་སྐྱེ་བ་ལྟ་བུར་བཞེས་ནས་རྟེན་དེས་བྱང་ཆུབ་ཆེན་པོ་བརྙེས་པས་སྲིད་པ་ཐ་མ་པ་ཞེས་བྱ་༼༡༦༠༽བར་བརྗོད་ཅིང་དེ་ལྟར་གྲགས་སོ། །ལ་ལར་ནི་ལྷུན་གྲུབ་རིག་འཛིན་ས་ཆེན་པོའི་སངས་རྒྱས་ཞེས་བྱ་བར་བརྗོད་ཅིང་རྒྱུད་དག་པའི་སངས་རྒྱས་སུ་གྲགས་ཀྱང༌། གསང་སྔགས་དེ་ཁོ་ན་ཉིད་སྤྱོད་ཡུལ་དང་བྲལ་བས་འབྱུང་འཇུག་མེད་པའི་སངས་རྒྱས་ཀྱི་དགོངས་པ་གསང་བ་དམ་པ་ད་དུང་ཇི་བཞིན་དུ་ཉམས་སུ་མ་མྱོང་སྟེ། གསང་སྔགས་ཡུལ་དུ་བྱེད་པའི་མཉམ་བཞག་ལ་སྒོམ་ལྡང་ཡོད་པས་ངེས་པའི་གནད་མ་ཆུད་དེ་གཞག་ཏུ་མེད་པ་ལ་ཡུལ་དུ་བཟུང་ནས་མཉམ་པ་ལ་འཇོག་དགོས་པའི་ཕྱིར་རོ།།

བཞི་པ་ངེས་པ་རྙེད་པར་བྱ་བའི་ཕྱིར་ཞུས་ལན་ལ་བཞི་སྟེ། ངེས་པ་མ་རྙེད་པ་ཅི་ཉེས་ཞུས་པ། བློ་གྲོས་མ་ཆུབ་པས་ཉེས་པས་ཆུབ་པར་གདམས་པ། བློ་གྲོས་ཆུབ་པའི་ཐབས་ཞུས་པ། དེའི་ལན་བཀའ་སྩལ་པའོ། །དང་པོ་ནི།

དེ་ཅིའི་ཕྱིར། ཞེས་པ་ནས། གསོལ་བ་ལས། ཞེས་པའི་བར་གྱིས་བསྟན་ཏེ།

དེ་ཅིའི་ཕྱིར་ཞེ་ན། སྐྱེས་བུ་དམ་པ་དེ་དག་གིས་ནམ་མཉམ་པ་ལ་མ་གཞག་པའི་བར་དུ། སངས་རྒྱས་ཀྱི་དགོངས་པ་ཉམས་སུ་མ་མྱོང་ནས། ཡང་དག་པའི་རྟོགས་པས། དང་པོའི་སངས་རྒྱས་རྡོ་རྗེ་སེམས་དཔའ་ལ་གསོལ་པ། སངས་རྒྱས་བཅོམ་ལྡན་འདས་རྣམས་ལ་ནི་མཉམ་པར་བཞག་པ་དང་མ་བཞག་པ་མི་མངའ་བར་རྣམ་པ་ཐམས་ཅད་མཁྱེན་ན།  བདག་ཅག་གིས་བསྐལ་པ་དཔག་ཏུ་མེད ་པར་དཀའ་བ་དཔག་ཏུ་མེད་པར་བགྱི་བ་ཐམས་ཅད་རྫོགས་པར་བགྱིས་ཀྱང་། མཉམ་པར་མ་བཞག་བར་དུ་སངས་རྒྱས་ཀྱི་དགོངས་པ་མྱོང་བར་མ་གྱུར་པ་འདི་ངོ་མཚར་ཆེ་ལགས་སོ། །བདེ་བར་གཤེགས་པ་འདི་ངོ་མཚར་ཆེ་ལགས་སོ། །དེ་སྐད་ཅེས་གསོལ་པ་དང་།

དེའང་ཡེ་ཇི་བཞིན་པའི་རྒྱལ་བའི་དགོངས་པ་མ་རྟོགས་པའི་གཏན་ཚིགས་དེ་ཅིའི་ཕྱིར་ཞེ་ན། སྐྱེས་བུ་དམ་པ་དེ་དག་གིས་ནམ་མཉམ་པ་ལ་མ་བཞག་གི་བར་དུ། དུས་ཕྱད་པ་ཆེན་པོ་སངས་རྒྱས་ཀྱི་དགོངས་པ་ཉམས་སུ་མ་མྱོང་ནས་ཏིང་ངེ་འཛིན་གྱི་ཐེ་ཚོམ་གཅོད་པའི་ཕྱིར་གསང་སྔགས་ཡུལ་དུ་བྱེད་པའི་བསམ་པ་ཡང་དག་པའི་རྟོག་པས་ཡེ་ཕྱི་མའི་སྟོན་པ་དང་པོའི་སངས་རྒྱས་རྡོ་རྗེ་སེམས་དཔའ་སངས་རྒྱས་ཀུན་གྱི་དགེ་བའི་བཤེས་གཉེན་ལ་གསོལ་པ། བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ལ་ནི་མཉམ་པར་བཞག་པ་དང་མ་བཞག་པ་མི་མངའ་བར་རྣམ་པ་ཐམས་ཅད་མཁྱེན་པ་ཡིན་ན། སྐྱེས་བུ་ལྔ་པོ་ བདག་ཅག་གིས་བསྐལ་པ་དཔག་ཏུ་མེད ་པར་ཐུན་མོང་རྒྱུ་འབྲས་ཀྱི་ཐེག་པའི་དཀའ་བ་དཔག་ཏུ་མེད་པར་བགྱི་བ་ཐམས་ཅད་ཡོངས་སུ་རྫོགས་པར་བགྱིས་ཀྱང༌། མཉམ་པར་མ་བཞག་གི་བར་དུ་སངས་རྒྱས་ཀྱི་དགོངས་པ་ཉམས་སུ་མྱོང་བར་མ་གྱུར་པ་འདི་ངོ་མཚར་ཆེ་ལགས་སོ། །བདེ་བར་གཤེགས་པ་ངོ་མཚར་ཆེ་ལགས་སོ། །ཞེས་ཡ་མཚན་ཤིན་ཏུ་ཆེ་བས་ལན་གཉིས་བརྗོད་པའོ། །དེ་སྐད་ཅེས་གསོལ་པ་ལས། ཞེས་པའོ།།

སྤྱིར་ས་དང་པོ་མན་ཆད་སྤྲུལ་སྐུའི་འཁོར། སྒོམ་ལམ་པ་ལོངས་སྐུའི་འཁོར། མཐར་ལམ་པ་ཆོས་སྐུའི་འཁོར་ཏེ་ཀུན་ཏུ་བཟང་པོའི་རྒྱལ་ཚབ་བྱེད་པའོ། །དེའི་ཕྱིར་སངས་རྒྱས་ཀུན་གྱི་དགེ་བའི་བཤེས་གཉེན་ཀྱང་སྤྱིར་ན་ཆོས་སྐུ་ཡིན་ལ། གདུལ་བྱའི་ཆེད་དུ་བསྟན་པ་མི་འགགས་པས་གོ་ཕྱེ་བའི་འཁོར་གྱི་དབང་དུ་ལོངས་སྐུའང་མི་འགལ་གསུངས།

གཉིས་པ་བློ་གྲོས་མ་ཆུབ་པས་ཉེས་པས་ཆུབ་པར་གདམས་པ་ནི།

བཅོམ་ལྡན། ཞེས་པ་ནས། བཀའ་སྩལ་༼༡༦༡༽པ་ལས། ཞེས་པའི་བར་གྱིས་བསྟན་ཏེ།

བཅོམ་ལྡན་འདས་རྡོ་རྗེ་སེམས་དཔའ་རྡོ་རྗེ་སྙིང་པོ་དེས་བཀའ་སྩལ་པ། ཀྱེ་སྐྱེས་བུ་དམ་པ་རྣམས། གང་དེ་བཞིན་གཤེགས་པ་ཉིད་དུ་ལྷུན་གྱིས་གྲུབ་པར་འདོད་པ་རྣམས་ཀྱིས་ནི། སངས་རྒྱས་ཀྱི་ཆོས་ཐམས་ཅད་ནས་ཐམས་ཅད་དུ་ཡོངས་སུ་རྫོགས་པར་བྱ་བ་གསུམ་ལས། ཁྱེད་རྣམས་ཀྱིས་གང་བྱ་བ་ཡོངས་སུ་རྫོགས་པར་བྱས། བསྲུང་བ་ཡོངས་སུ་དག་པར་བྱས་སུ་ཟིན་ཀྱང་། ད་དུང་བློ་གྲོས་ཀུན་ཏུ་ཆུབ་པར་མ་བྱས་སོ། །དེ་བས་ན་ད་གདོད་ནས་དམ་པ་རྣམས་ཀྱི་དེ་ཁོ་ན་ཉིད་ལ་བློ་གྲོས་ཀུན་ཏུ་ཆུབ་པར་གྱིས་ཤིག་དང་། དེ་ཡོངས་སུ་ཆུབ་པ་བཞིན་དུ། དམ་པ་རྣམས་ཀྱི་དགོངས་པ་མྱོང་བར་འགྱུར་རོ། །དེ་སྐད་ཅེས་བཀའ་སྩལ་པ་ལས།

བཅོམ་ལྡན་འདས་སེམས་དཔའ་རྡོ་རྗེ་སྙིང་པོ་དེས་བཀའ་སྩལ་པ། ཀྱེ་སྐྱེས་བུ་དམ་པ་རྣམས། གང་དེ་བཞིན་གཤེགས་པ་ཉིད་དུ་ལྷུན་གྱིས་གྲུབ་པར་འདོད་པ་རྣམས་ཀྱིས་སངས་རྒྱས་རྣམས་ཀྱི་ཆོས་དུས་སྔ་ཕྱི་ཐམས་ཅད་ནས་ཐམས་ཅད་དུ་རང་དང་སྤྱིའི་མཚན་ཉིད་ཐམས་ཅད་ཡོངས་སུ་རྫོགས་པའི་རྣམ་པ་ཐམས་ཅད་མཁྱེན་པའི་ཡེ་ཤེས་ཆགས་ཐོགས་དང་བྲལ་བར་བྱ་བ་དམ་པའི་མཛོད་གསུམ་དུ་ངེས་པ་ལས། ཁྱེད་རྣམས་ཀྱིས་གང་བྱ་བ་སྤྱོད་པ་ཡོངས་སུ་རྫོགས་པར་བྱས་ཤིང༌། བསྲུང་བ་དམ་ཚིག་ཡོངས་སུ་དག་པར་བྱས་སུ་ཟིན་ཀྱང༌། ད་དུང་བློ་གྲོས་དམ་པའི་ལྟ་བས་ངེས་པའི་གདེངས་ཆེན་པོ་མ་རྙེད་པས་ཀུན་ཏུ་ཆུབ་པར་མ་བྱས་སོ། །དེ་ལྟ་བས་ན་གསང་སྔགས་ཕྱི་མོའི་ཆོས་ཉིད་གདོད་མ་ནས་དམ་པ་རྣམས་ཀྱི་དེ་ཁོ་ན་ཉིད་དཀྱིལ་འཁོར་གསུམ་དབྱེར་མེད་པའི་དོན་ལ་བློ་གྲོས་ཀུན་ཏུ་ཆུབ་པར་མཛོད་ལ་རྟོགས་པར་གྱིས་ཤིག་དང༌། དེ་ཡོངས་སུ་ཆུབ་པ་བཞིན་དུ་དམ་པ་རྣམས་ཀྱི་དགོངས་པ་ཇི་བཞིན་པ་མྱོང་ནས་མངོན་པར་རྫོགས་པར་སངས་རྒྱས་པར་འགྱུར་རོ། །དེ་སྐད་ཅེས་གདམས་ཤིང་བཀའ་སྩལ་པ་ལས།

གསུམ་པ་བློ་གྲོས་ཆུབ་པའི་ཐབས་ཞུས་པ་ནི།

སྐྱེས་བུ། ཞེས་པ་ནས། གསོལ་པ་ལས། ཞེས་པའི་བར་གྱིས་བསྟན་ཏེ།

སྐྱེས་བུ་དམ་པ་རྣམས་ཀྱིས་གསོལ་པ། ཨེ་མའོ་བཅོམ་ལྡན་འདས་བཅོམ་ལྡན་འདས་ཀྱིས་ནི་བདག་ཅག་རྣམས་ལ་ཤིན་ཏུ་ངོ་མཚར་ཞིང་རྨད་དུ་གྱུར་པ། དཔག་པར་དཀའ་བ། ཐེ་ཚོམ་སྐྱེ་བ། སོམ་ཉི་འཚལ་བར་བཀའ་སྩལ་ན། བློ་གྲོས་ཀུན་ཏུ་ཆུབ་པར་བགྱིད་པའི་དམ་པ་རྣམས་ཀྱི་དེ་ཁོ་ན་ཉིད་ཅེས་བགྱི་བ་གང་ལགས་བཤད་དུ་གསོལ། བདེ་བར་གཤེགས་པ་བཤད་དུ་གསོལ་ཞེས་གསོལ་པ་ལས།

སྐྱེས་བུ་དམ་པ་རྣམས་ཀྱིས་གསོལ་པ། ཨེ་མའོ། །ཞེས་ངོ་མཚར་བའི་ཚིག་གིས་དྲངས་ཏེ། སྟོན་པ་བཅོམ་ལྡན་འདས་ཞེས་བོས་ནས། བཅོམ་ལྡན་འདས་ཀྱིས་ནི་བདག་ཅག་རྣམས་ལ་གསང་བ་ཡ་མཚན་ལྔའི་འབྱུང་གནས་མཆོག་ཏུ་གྱུར་པ་སྣང་ལ་རང་བཞིན་མེད་པས་ཤིན་ཏུ་ངོ་མཚར་ཆེ་ཞིང་གཞན་ལས་ཁྱད་པར་དུ་འཕགས་པ་རྨད་དུ་བྱུང་བ། དོན་ཟབ་ལ་མུ་མཐའ་ཡས་པས་དཔགས་པར་དཀའ་བ། ཕྱོགས་གཅིག་ཏུ་མ་ངེས་པས་ཐེ་ཚོམ་སྐྱེ་སྟེ་ངེས་པར་རྙེད་དཀའ་བ། དོན་འདི་མ་ཡིན་པ་ཞིག་ཀྱང་ཡོད་དམ་སྙམ་པས་སོམ་ཉི་འཚལ་བར་གྱུར་པ་ལ་དོན་འདི་རྟོགས་ཤིང་ཆུབ་པར་གྱིས་ཤིག་པའི་ཚིག་གསུངས་ཏེ་བཀའ་སྩལ་པ་ལགས་ན། ལྟ་བས་བློ་གྲོས་ཀུན་ཏུ་ཆུབ་པར་བགྱིད་པའི་གདལ་ཁྱབ་ཆེན་པོའི་ཡེ་ཤེས་སངས་རྒྱས་དམ་པ་རྣམས་ཀྱི་རང་བཞིན་ཇི་ལྟ་བ་དེ་ཁོ་ན་ཉིད་ཅེས་བགྱི་བ་དེ་གང་ལགས། བདག་དོན་དུ་བཤད་དུ་གསོལ། གཞན་དོན་དུ་བདེ་བར་གཤེགས་པ་བཤད་དུ་གསོལ། ཞེས་གསོལ་པ་ལས།

བཞི་པ་དེའི་ལན་བཀའ་སྩལ་པ་ནི།

སངས་རྒྱས། ཞེས་པ་ནས། ཤེས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

སངས་རྒྱས་ཀུན་གྱི་བཅོམ་ལྡན་འདས་གསང་སྔགས་ཀྱི་ངོ་བོ་དེ་ཁོན་ཉིད་དེས་བཀའ་སྩལ་པ། ཀྱེ་སྐྱེས་བུ་དམ་པ་རྣམས། དམ་པ་རྣམས་ཀྱི་དེ་ཁོ་ན་ཉིད་འདི་ནི་ཐབས་ཆེ་ལ་སྒོ་ཡངས། ཚེགས་ཆུང་ལ་དོན་ཆེ། ཐེག་ཉེ་ལ་བརྟག་དཀའ། ཉེན་ཆེ་ལ་བསྲུང་དཀའ་བའི་ཕྱིར། ངས་ཀྱང་ཁྱེད་ལ་ཕྱིན་ཅི་མ་ལོག་པར་བསྟན་པར་རབ་ཏུ་དཀའ་འོ། །དེ་སྐད་ཅེས་བཀའ་སྩལ་པ་དང་། སྐྱེས་བུ་དམ་པ་དེ་རྣམས་རྨ་ག་ཆད་པར་ངུས་སོ། །ཤིན་ཏུ་རབ་ཏུ་ངུས་ནས། གསང་བའི་སྒོ་བྱེ་བར་གྱུར་ཏེ། གསང་སྔགས་ཀྱི་དངོས་པོ་བརྒྱད་དུ་ཡོངས་སུ་ཤེས་པར་གྱུར་ཏོ།།

རྒྱལ་བ་རིལ་གྱི་ཐེ་༼༡༦༢༽ཚོམ་གཅོད་པའི་ཕྱིར་སངས་རྒྱས་ཀུན་གྱི་བཅོམ་ལྡན་འདས། གསང་སྔགས་ཀྱི་དེ་ཁོ་ན་ཉིད་བསྟན་པ་དང་སྟོན་པ་ཐ་མི་དད་པའི་དབང་གིས་ཡེ་ཇི་བཞིན་པ་དེས་བཀའ་སྩལ་པ། ཀྱེ་སྐྱེས་བུ་དམ་པ་རྣམས་ཀྱི་དེ་ཁོ་ན་ཉིད་འདི་ནི། མ་བཙལ་བར་གྲུབ་ཅིང༌། ཉོན་མོངས་པ་ལམ་དུ་བདེ་བས་ཐབས་ཆེ་ལ། དངོས་པོ་གང་ཡང་བསལ་སྤངས་མེད་པར་ཐབས་ཀུན་ཤོང་བས་སྒོ་ཡངས་པ། རྩོལ་བའི་ཚི་ཆད་པ་མེད་པར་འབྲས་བུ་ལམ་དུ་བྱེད་པས་ཚེགས་ཆུང་ལ། ཁམས་གསུམ་ཡེ་ཤེས་བླ་མའི་སར་གྲུབ་ནས་མཐར་ཐུག་གི་འབྲས་བུ་འབྱུང་བས་དོན་ཆེ་བ། དུས་ལ་རག་མ་ལས་པར་རྟོགས་མ་ཐག་པས་ཆོག་ཅིང་རང་ལ་རྫོགས་ཏེ་བགྲོད་མི་དགོས་པས་ཐག་ཉེ་ལ། ངོ་བོ་ལ་བློས་ཡོངས་སུ་ལྷན་ཏེ་རེག་པ་མེད་པར་དོན་སྤྱོད་ཡུལ་དང་བྲལ་བས་བརྟགས་དཀའ་བ། མ་རྟོགས་པར་སྒྲ་བཞིན་དུ་དཔྱད་ན་སྒོ་དགུ་སོགས་ལྟུང་བའི་ས་མང་ལ་གོལ་ས་ཆེ་བའི་ཕྱིར་ཉེན་ཆེ་ལ། ཞེན་པས་ངོ་བོ་དེ་ལས་མི་གཡོ་བར་བྱ་དཀའ་ཞིང༌། རྩ་བ་དང་ཡན་ལག་ལས་འདས་ན་བརླག་པར་འགྱུར་བས་བསྲུང་དཀའ་བའི་ཕྱིར། སྣོད་དཀོན་ལ་གོ་དཀའ་བའི་དབང་གིས་སམ། ཡང་ན་ཤེས་བརྗོད་དང༌བྲལ་བས་མཚོན་དཀའ། དམིགས་ཡུལ་ལས་འདས་པས་གོ་དཀའ་བས་ན་ངས་ཀྱང་ཁྱེད་ལ་འདི་ཡིན་ནོ་ཞེས་ཅི་འདྲ་བར་ཕྱིན་ཅི་མ་ལོག་པར་བསྟན་པར་རབ་ཏུ་དཀའོ། །དེ་ལྟར་གསལ་བར་སྟོན་མི་སྤྱོད་པ་ལྟར་བྱས་ནས་ཐབས་ཀྱིས་དངོས་སུ་མཚོན་པའོ། །དེ་སྐད་ཅེས་བཀའ་སྩལ་པ་ལས། སྐྱེས་བུ་དམ་པ་དེ་རྣམས་སྟོན་པས་གསང་བ་སྟོན་མི་སྤྱོད་པའི་གནད་ཆུད་དེ་དོན་གོ་དཀའ་ཞིང་བསྟན་དཀའ་བ་ལ་དམིགས་ཏེ་རྨ་ག་ཆད་པར་རང་དོན་དུ་ངུས་སོ། །གཞན་དོན་དུ་ཤིན་ཏུ་རབ་ཏུ་ངུས་ནས་གསང་བའི་སྔགས་ཀྱི་སྒོ་བྱེ་བར་གྱུར་ཏེ་གསང་དོན་རིག་པ་ལ་ཤར་བས་འཁོར་བ་རང་སར་གྲོལ་ནས་དེ་ཁོ་ན་ཉིད་བདེ་བ་ཆེན་པོ་རྟོགས་པས་མཐར་ལམ་བར་པ་ལ་ཟིན་ཏེ་བརྡལ་བ་ཆོས་ཉིད་ཀྱི་ས་ནོན་པས་ཆོས་ཐམས་ཅད་བཤད་མ་ཐག་པའི་གསང་སྔགས་ཀྱི་དངོས་པོ་བརྒྱད་དུ་གནས་པའི་མཚན་ཉིད་ཡོངས་སུ་ཤེས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྒྱུད་དག་པའི་སྐྱེ་རྒྱུད་བསྟན་པའི་ལེའུ་སྟེ་བཅུ་གཅིག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྒྱུད་དག་པའི་རྒྱལ་ཚབ་ལྔའི་སྐད་ཅིག་མའི་རྒྱུན་ལས་ས་ལམ་འཕགས་པའི་སྐྱེ་རྒྱུད་བསྟན་པའི་ལེའུ་སྟེ་བཅུ་གཅིག་པ་རྣམ་པར་བཤད་པའོ།། །།

ལེའུ་བཅུ་གཉིས་པ་དབུགས་ཆེན་པོ་ཡོངས་སུ་ཕྱིན་པ།

༈ བཞི་པ་དབུགས་དབྱུང་ཞིང་ངེས་༼༡༦༣༽པ་རྙེད་པ་དངོས་ལ་གསུམ་སྟེ། གདམས་པ་ཉེ་བར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

དེ་ནས། ཞེས་པ་ནས། ཅིའི་ཕྱིར་དུ། ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས་དམ་པ་རྣམས་ཀྱི་དེ་ཁོ་ན་ཉིད་རྡོ་རྗེ་སེམས་དཔའ་དེས། སྐྱེས་བུ་དམ་པ་དེ་དག་ལ་འདི་སྐད་ཅེས་བཀའ་སྩལ་པ། སྐྱེས་བུ་དམ་པ་རྣམས་མ་ངུ་ཞིག

སྡུག་བསྔལ་གྱི་གདུང་བ་མ་སྐྱེད་ཅིག ཁྱེད་ཅིའི་ཕྱིར་ངུ་།

ལེའུ་འདིས་ངེས་དོན་མདོར་བསྟན་པའོ། །དེ་ནས་དེ་བཞིན་གཤེགས་པ་གཟུགས་སྐུ་ཐམས་ཅད་ཀྱི་ བདག་ཉིད་སྐུ་གསུམ་དབྱེར་མེད་པའི་བཅོམ་ལྡན་འདས་སངས་རྒྱས་དམ་པ ་རྣམས་ཀྱི་རང་བཞིན་ནམ་ངོ་བོ་དེ་ཁོ་ན་ཉིད་རྡོ་རྗེ་སེམས་དཔའ་དེས། སྐྱེས་བུ་དམ་པ་ལྔ་པོ་དེ་དག་ལ་འདི་སྐད་ཅེས་བཀའ་སྩལ་པ། ཀྱེ་སྐྱེས་བུ་དམ་པ་རྣམས་མ་ངུ་ཞིག འབྲས་བུ་ལ་རེ་ཞིང་རྩོལ་བས་སྡུག་བསྔལ་གྱི་གདུང་བ་མ་བསྐྱེད་ཅིག ཁྱེད་རྣམས་རང་ཆས་སུ་ཡོད་བཞིན་དུ་ཅིའི་ཕྱིར་ངུ་བ་ཡིན་ཞེས་མི་ངུ་བའི་ཐབས་བཀའ་སྩལ་ཏོ།།

སྤྱིར་མཐར་ལམ་ཐ་མ་ལ་རྣལ་འབྱོར་གསུམ་དུ་གསུངས་པས་ཀློང་ཡངས་ཆུབ་པའི་རྣལ་འབྱོར་གྱི་སྐབས་སུ་གཟའ་གཏད་མེད་པའི་ལྟ་བ་དང༌། སྣང་གསལ་ཡེ་འཕྱོའི་ཏིང་ངེ་འཛིན་མཐར་ཕྱིན་པ་ན་ངོ་བོ་ཉིད་སྐུའི་འཁོར་ཡིན་པས། དེའི་ཚུལ་རྒྱས་པར་རྫོགས་པ་ཆེན་པོའི་ཀུན་གྲོལ་གྱི་རྒྱུད་ལས་འབྱུང་བ་ལྟར་ཤེས་དགོས་ཀྱང་མདོར་བསྡུས་པ་ཙམ་ལེའུ་ང་དྲུག་པ་སྣང་བ་དག་པའི་སྤྱོད་ཡུལ་བསྟན་པའི་དུས་སུ་འཆད་པར་སྤྲོ་ལ། དེའི་དབང་གིས་མདོ་ཆེན་པོའི་གླེང་གཞི་སྐུ་ལྔ་དང་སྦྱོར་བའང༌། སྐུ་གསུམ་གྱི་སྟེང་དུ་གསང་བའི་སྐུ་དང་ངོ་བོ་ཉིད་སྐུ་ལ་འཇོག་པ་ཡིན་ཏེ་གོ་རིམ་ལ་ངེས་པ་མེད་པ་ནི་དུས་འདིར་ལུང་བསྟན་བརྒྱུད་པའི་བསྟན་པ་དབང་བཙན་པའི་དོན་ཏོ།།

གཉིས་པ་རྒྱས་པར་བཤད་པ་ལ་དྲུག་སྟེ། དབུགས་ཇི་ལྟར་དབྱུང་ཞུས་པ། ཆོས་ཉིད་མ་རྟོགས་པའི་དཔེ་ཡོད་པས་སྡུག་བསྔལ་མ་སྐྱེད་ཅིག་པར་གདམས་པ། དེ་ལ་མོས་ཏེ་རྡོ་རྗེ་སེམས་དཔའ་ལ་ཞུ་བར་ཐེ་ཚོམ་བཅད་པ། དེ་ཁོ་ན་ཉིད་ཞུས་པ་དངོས། དེའི་ལན་དུ་དེ་ཁོ་ན་ཉིད་བསྟན་པ། དེ་ལྟར་རྟོགས་པའི་ཡོན་ཏན་ནོ། །དང་པོ་ནི།

དེ་ནས། ཞེས་པ་ནས། གསོལ་པ་ལས། ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས་རྡོ་རྗེ་སེམས་དཔའ་དེ་ཁོ་ན་ཉིད་ལ། སྐྱེས་བུ་དམ་པ་དེ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡོངས་སུ་ཇི་ལྟར་མི་ངུ་བར་བགྱི། བདག་ཅག་གི་བཙལ་བ་ཚི་ཆད་པར་མ་གྱུར་ཏམ། བཅོམ་ལྡན་འདས་བདག་ཅག་གིས་བློ་གྲོས་ཇི་ལྟར་བགྱི། བདག་ཅག་རྣམས་ཀྱིས་བཤེས་གཉེན་དམ་པ་མཛད་དུ་གསོལ།  བདག་ཅག་གིས་དཔག་ཏུ་མེད་པ ་ཇི་སྙེད་ཅིག་ཏུ་དཀའ་བ་དཔག་ཏུ་མེད་པ་སྤྱད་ནས་ཡོངས་སུ་ཆུབ་པར་འདོད་ན། ད་དུང་གསང་སྔགས་ཀྱི་ངོ་བོ་དེ་ཁོ་ན་ཉིད་མིང་ཙམ་ཡང་ཐོས་པའི་སྐལ་བ་མ་མཆིས་ན། ཡོང་ཇི་ལྟར་བགྱི་ལགས། དེ་སྐད་ཅེས་གསོལ་པ་ལས།

དེ་ནས་དེ་བཞིན་གཤེགས་པ་རྣམས་ཀྱི་བཅོམ་ལྡན་འདས། རྡོ་རྗེ་སེམས་དཔའ་དེ་ཁོ་ན་ཉིད་ལ་སྐྱེས་བུ་དམ་པ་དེ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡོང་ཇི་ལྟར་ཐབས་གང་གིས་མི་ངུ་བར་བགྱི། བདག་ཅག་གིས་རྒྱུའི་སྒོ་ནས་འབྲས་བུ་བསྒྲུབ་པའི་བཙལ་བ་ཇི་སྙེད་པ་རྣམས་ཚི་ཆད་དེ་ངལ་བ་དོན་མེད་པར་ཉོན་མོངས་ཤིང་ཐང་ཆད་དུ་བྱས་ཏེ་གྱོང་བསྐུར་བར་མ་གྱུར་ཏམ། བཅོམ་ལྡན་འདས་བདག་ཅག་གི་བློ་གྲོས་ཀྱིས་དོན་ཇི་ལྟར་རྟོགས་༼༡༦༤༽པར་བགྱི། བདག་ཅག་རྣམས་ཀྱི་བཤེས་གཉེན་དམ་པ་མཛད་དུ་གསོལ།  བདག་ཅག་གིས་བསྐལ་པ་དཔག་ཏུ་མེད་པ ་ཇི་སྙེད་ཞིག་ཏུ་རྒྱུའི་སྒོ་ནས་དཀའ་བ་དཔག་ཏུ་མེད་པ་སྤྱད་ནས་འབྲས་བུ་ཡོངས་སུ་ཆུབ་པར་འདོད་ན་ཡང་ད་དུང་དུ་གསང་སྔགས་ཀྱི་ངོ་བོ་དེ་ཁོ་ན་ཉིད་ཕྱིན་ཅི་མ་ལོག་པར་བསྟན་པར་དཀའོ་ཞེས་སངས་རྒྱས་ལ་ལྟོས་ན་མིང་ཙམ་ཐོས་པའི་སྐལ་བ་ཡང་མ་མཆིས་པས་ཐབས་ཟད་པ་ལྟ་བུར་གྱུར་ན། ད་ཡོང་ཇི་ལྟར་བྱ་བའི་ཐབས་མ་ནོར་བ་གང་ལ་འཇུག་པར་བགྱི་ལགས། དེ་སྐད་ཅེས་གསོལ་པ་ལས།

གཉིས་པ་ཆོས་ཉིད་མ་རྟོགས་པའི་དཔེ་ཡོད་པས་སྡུག་བསྔལ་མ་སྐྱེད་ཅིག་པར་གདམས་པ་ནི།

དེ་བཞིན། ཞེས་པ་ནས། བཀའ་སྩལ་པས། ཞེས་པའི་བར་གྱིས་བསྟན་ཏེ།

དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས་རྡོ་རྗེ་སེམས་དཔའ་དེ་ཁོ་ན་ཉིད་དེས་བཀའ་སྩལ་པ། སྐྱེས་བུ་དམ་པ་རྣམས་དེ་སྐད་མ་ཟེར་ཅིག གསང་སྔགས་ནི་ཀུན་གྱི་ཐུན་མོང་མ་ཡིན་ཏེ། དོན་དེ་ཁོ་ན་ཉིད་ནི། སངས་རྒྱས་ཉག་གཅིག་གི་དགོངས་པ་དམ་པ་སྨྲར་མེད་པ། རྟོག་དཔྱོད་ཐམས་ཅད་དང་བྲལ་བ། འདི་ཞེས་མཚན་དུ་མེད་པ། བརྟག་པར་དཀའ་ཞིང་བསྟན་པར་དཀའ་ལ། བརྗོད་པའི་ཐ་སྙད་རྣམས་དང་བྲལ་བ། དཔེ་དང་བྲལ་བ། ནམ་མཁས་ཀྱང་བསྒྲུན་དུ་ཡོད་པ་མ་ཡིན་པ། ཚད་མེད་པ། ཚད་དང་བྲལ་བ། ཚད་མའམ། གཏན་ཚིགས་སམ། དཔག་པས་མི་དཔོགས་པ་སྟེ། ཁྱེད་ཀྱིས་ཇི་ལྟར་མ་ཤེས་མ་ཐོས་པ་དེ་ལྟར་གང་རྒྱུད་ཡོངས་སུ་དག་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་ད་དུང་གསང་སྔགས་ཀྱི་ངོ་བོ་དེ་ཁོ་ན་ཉིད་མངོན་པར་མ་ཐོབ། མངོན་པར་མ་རྟོགས། མངོན་པར་རྫོགས་པར་སངས་མ་རྒྱས་སོ། །དེ་ཅིའི་ཕྱིར་ཞེ་ན། གསང་སྔགས་ཀྱི་ངོ་བོ་དེ་ཁོ་ན་ཉིད་རྣམ་པར་ཡོངས་སུ་དག་པའི་ཕྱིར། སངས་རྒྱས་དང་བྱང་ཆུབ་སེམས་དཔའ་ཞེས་མི་དམིགས་ཤིང་བཙལ་དུ་མེད་པ་ལས། ས་བཅུ་ལ་གནས་པའི་སྐྱེས་བུ་དམ་པ་རྣམས་ཀྱིས་ནི། དེ་བཞིན་གཤེགས་པའི་སྙིང་པོ་གསང་སྔགས་ཀྱི་ངོ་བོ་དེ་ཁོ་ན་ཉིད་དམ་པ་དེ་རང་ལ་ཡོད་པར་མ་ཤེས་ཏེ། ཆོས་ཉིད་དུ་འཇོག་ཅིང་དཔྱོད་པ་དང་མ་བྲལ། སངས་རྒྱས་རྣམས་ནི་སྙིང་པོ་བྱང་ཆུབ་ལ་མི་རྟོག་པའི་ངང་དུ་མི་གཡོ་བར་གནས་ཏེ། མངོན་པར་འཚང་མི་རྒྱ་བར་གནས་ན། ཁྱེད་ཅིའི་ཕྱིར་ངུ་བར་བྱེད། དེ་སྐད་ཅེས་བཀའ་སྩལ་པས།

དེ་ནས་དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས། རྡོ་རྗེ་སེམས་དཔའ་དེ་ཁོ་ན་ཉིད་དེས་བཀའ་སྩལ་པ། སྐྱེས་བུ་དམ་པ་ལྔ་རྣམས་དེ་སྐད་མ་ཟེར་ཅིག་ཅེས་གདམས་ནས། གསང་སྔགས་ནི་ཉན་རང་དང་བྱང་སེམས་ས་བཅུ་པ་སོགས་ཀུན་གྱི་ཐུན་མོང་མ་ཡིན་ཏེ། ཇི་སྐད་དུ། ཐབས་ཆེ་དཔགས་དཀའ་རྟོག་དཔྱོད་འདས། །དམན་པའི་ཡུལ་དུ་མ་གྱུར་དང༌། །མཆོག་གི་ཡུལ་གྱུར་མཆོག་བྲལ་དང༌། ཐུན་མོང་མ་གྱུར་བླ་ན་མེད། །ཅེས་པ་ལྟར། དོན་དེ་ཁོ་ན་ཉིད་ཀྱི་མཚན་ཉིད་ནི་སངས་རྒྱས་རྡོ་རྗེ་སེམས་དཔའ་ཉག་གཅིག་གི་སྤྱོད་ཡུལ་དུ་གྱུར་པའི་དགོངས་པ་དམ་པ། ངོ་བོ་མེད་ལ་བརྗོད་གཞི་དང་བྲལ་བས་སྨྲར་མེད་པ། ཡུལ་དང་བྲལ་ཞིང་མཚན་ཉིད་མེད་པས་ལམ་པ་མཐའ་དག་གི་རྟོག་དཔྱོད་ཐམས་ཅད་དང་བྲལ་བ། ངེས་པར་དེ་ཁོ་ནའོ་ཞེས་དཔེའམ་ཚིག་གིས་མཚོན་དུ་མེད་པ། བློས་དངོས་པོར་གཞལ་ཏེ་དོན་བཙལ་དུ་མེད་པས་བརྟགས་པར་དཀའ་ཞིང༌། དཔེ་དང་བྲལ་བས་ཚིག་གིས་ཉེ་བར་བསྟན་པར་དཀའ་ལ། ཅི་ཡང་ཡིན་ཕྱིར་གང་དུའང་མ་ངེས་པར་ཚིག་ལམ་དང་བྲལ་བས་བརྗོད་པའི་ཐ་སྙད་རྣམས་དང་བྲལ་བ། བྱང་ཆུབ་སེམས་དང་རྣམ་པ་ཐམས་ཅད་དུ་ཕྱོགས་ཀུན་ནས་མཚུངས་པ་མེད་པས་དཔེ་དང་བྲལ་བ། འོ་ན་ནམ་མཁས་མི་མཚོན་ནམ་ཞེ་ན། རང་རིག་སྟོང་པ་དང༌། རིག་མེད་སྟོང་པའི་ཁྱད་པར་གྱིས་ནམ་མཁའི་ཁོངས་སུ་གསང་བ་མ་འདུས་པས་ནམ་མཁས་དཔེས་ཀྱང་ཕྱོགས་ཐམས་ཅད་ནས་15བསྒྲུན་དུ་ཡོད་པ་མ་ཡིན་པ། དངོས་པོ་དང་བྲལ་བས་ཚད་མེད་པ། མུ་མཐའ་མེད་པས་ཚད་དང་བྲལ་བ། ཆོས་ཉིད་ལ་ངེས་པར་གཟུང་བ་མེད་པས་ཐུན་མོང་གི་མངོན་སུམ་དང་རྗེས་སུ་དཔགས་པའི་ཚད་མའམ། མུ་བཞི་༼༡༦༥༽འགོག་པ་དང༌། རྟེན་ཅིང་འབྲེལ་འབྱུང་ལ་སོགས་པའི་གཏན་ཚིགས་སམ། རང་གི་དོན་དང་གཞན་གྱི་དོན་དུ་རྒྱུ་ལྐོག་ཏུ་གྱུར་པ་དང་རང་བཞིན་ལྐོག་ཏུ་གྱུར་པ་ལ་རྗེས་སུ་དཔགས་པ་རྣམས་ཀྱིས་གཞལ་བས་མི་དཔོགས་ཤིང་མི་རིག་པ་སྟེ། དེའི་ཕྱིར་སྐྱེས་བུ་ལྔ་པོ་ཁྱེད་ཀྱིས་ཡུལ་མ་ཡིན་པས་ཇི་ལྟར་མ་ཤེས་ཤིང་མ་ཐོས་པ་དེ་ལྟར་གང་རྒྱུད་ཡོངས་སུ་དག་པའི་སངས་རྒྱས་ཀུན་ཏུ་འོད་ལ་བཞུགས་པ་དང༌། ས་བཅུ་པ་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་སྔར་བསྐལ་པ་གྲངས་མེད་མང་པོ་ནས་སྦྱངས་ཀྱང་ད་དུང་སྤྱོད་ཡུལ་དུ་མེད་པའི་གསང་སྔགས་ཀྱི་ངོ་བོ་དེ་ཁོ་ན་ཉིད་ཀྱི་འབྲས་བུ་མངོན་པར་མ་ཐོབ། དེའི་དོན་ཤེས་རབ་ཀྱིས་མངོན་པར་མ་རྟོགས། དེ་བས་ན་ཇི་བཞིན་ཉིད་དུ་མ་སོན་ཏེ་མངོན་པར་རྫོགས་པར་སངས་མ་རྒྱས་སོ། །དེ་ཅིའི་ཕྱིར་ཞེ་ན། གསང་སྔགས་ཀྱི་ངོ་བོ་དེ་ཁོ་ན་ཉིད་མཐའ་ཡོད་མེད་དང་རྣམ་པ་བྲལ་མ་བྲལ་ཐམས་ཅད་དཀྱིལ་འཁོར་གསུམ་དབྱེར་མེད་པའི་ཡེ་ཇི་བཞིན་པར་ཡོངས་སུ་དག་པ་དེ་ནི་ཐ་སྙད་རིལ་ངང་གིས་མ་སྤངས་ལ་བྲལ་བའི་ཕྱིར་བཤད་པ་བཞིན་སངས་རྒྱས་དང་བྱང་ཆུབ་སེམས་དཔའ་ཞེས་མིང་གི་བླ་དྭགས་ཙམ་ལས་ངོ་བོ་ལ་རང་རྒྱུད་པ་མི་དམིགས་ཤིང་དེའི་ཕྱིར་དོན་དུ་གཉེར་ཏེ་བཙལ་དུ་མེད་པ་ལ། རྒྱུའི་ས་བཅུ་ལ་གནས་པའི་སྐྱེས་བུ་དམ་པ་རྣམས་ཀྱིས་ནི། དེ་བཞིན་གཤེགས་པའི་སྙིང་པོ་གསང་སྔགས་ཀྱི་ངོ་བོ་དེ་ཁོ་ན་ཉིད་གསང་བ་དམ་པ་དེ་ལྷན་ཅིག་སྐྱེས་པའི་མུན་པས་བསྒྲིབས་པའི་དབང་གིས་མཛུབ་མོའི་རྩེ་མོ་ལྟར་རང་གིས་རང་ལ་རེག་པར་མ་ནུས་པས་རང་ལ་ཡོད་པར་མ་ཤེས་ཏེ་དཀའ་བས་གཞན་དུ་ཚོལ་ནས་ཆོས་ཉིད་ལ་ཆེད་དུ་འཇོག་ཅིང་ཡུལ་དུ་བྱེད་པའི་བློ་ཡིས་དཔྱོད་པ་ལྟ་བའི་རྟོག་སྒྲིབ་དང་མ་བྲལ་བ་དེའི་ཕྱིར་ད་དུང་མ་རྟོགས་ཤིང་མ་ཐོབ་བོ། །ཀུན་ཏུ་འོད་ལ་བཞུགས་པའི་རྒྱུད་དག་པའི་སངས་རྒྱས་རྣམས་ནི་ཤེས་བྱའི་ཚུལ་ཡེ་སྙིང་པོའི་བྱང་ཆུབ་ལ་ཤེས་བྱེད་ཀྱི་ཚུལ་བྱང་ཆུབ་སྙིང་པོ་ཉིད་དུའང་འདུ་ཤེས་ཀྱིས་མི་རྟོག་པའི་ངང་དུ་མི་གཡོ་བར་དགོངས་པ་ལ་གནས་སྟེ་རིག་པ་སྤྱོད་ཡུལ་དང་བྲལ་བར་མྱ་ངན་ལས་འདས་པའི་མཐར་དབྱུང་དགོས་པའི་ཕྱིར་ད་དུང་མངོན་པར་རྫོགས་པར་འཚང་མི་རྒྱ་བར་གནས་ན་ཁྱེད་རྣམས་ཅིའི་ཕྱིར་ངུ་བར་བྱེད། དེ་སྐད་ཅེས་བཀའ་སྩལ་པས།

གསུམ་པ་དེ་ལ་མོས་ཏེ་རྡོ་རྗེ་སེམས་དཔའ་ལ་ཞུ་བ་ཐེ་ཚོམ་བཅད་པ་ནི།

སྐྱེས་བུ། ཞེས་པ་ནས། སྙམ་མོ། །ཞེས་པའི་བར་གྱིས་བསྟན་ཏེ།

སྐྱེས་བུ་དམ་པ་དེ་རྣམས་དགའ་མགུ་རངས་ཏེ་དབུགས་ཕྱིན་ནས་འདི་སྙམ་དུ་སེམས་སོ། །ཇི་ལྟར་སྔོན་དུ་གཤེགས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་། ད་དུང་གསང་སྔགས་ཀྱི་ངོ་བོ་དེ་ཁོ་ན་ཉིད་མངོན་དུ་མ་གྱུར་ན། བདག་ཅག་ལ་སོགས་པས་ལྟ་ཅི་སྨོས། ཡོང་སྟོན་པ་རྡོ་རྗེ་སེམས་དཔའ་དེ་ཁོ་ན་ཉིད་ནི། སངས་རྒྱས་ཀུན་གྱི་དགེ་བའི་བཤེས་གཉེན་དམ་པ་ཉིད་ཁོ་ན་བས། བདག་ཅག་གི་བློ་གྲོས་འདི་ལ་ཆུབ་པར་གོར་མ་ཆག་སྙམ་མོ།།

དེ་ལྟར་གསུངས་པས་༼༡༦༦༽འཁོར་སྐྱེས་བུ་དམ་པ་རིགས་ལྔ་རྣམས་དགའ་མགུ་རངས་པས་ཡིད་བདེ་བ་སྐྱེས་ཏེ་དབུགས་ཕྱིན་ནས་བདག་ཅག་ཁོ་ནས་མ་རྟོགས་པ་མིན་པར་ཐོས་པས་འདི་སྙམ་དུ་སེམས་སོ། །ཇི་ལྟར་བདག་ཅག་གི་སྔོན་དུ་སེམས་བསྐྱེད་དེ་གཤེགས་པའི་སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་ཆེན་པོ་རྣམས་ཀྱིས་ཀྱང་ད་དུང་གསང་སྔགས་ཀྱི་ངོ་བོ་དེ་ཁོ་ཉིད་མངོན་དུ་མ་གྱུར་པར་རྩོལ་བ་ལ་གནས་ན། བདག་ཅག་ལ་སོགས་པ་མཐར་ལམ་དུ་ཞུགས་པས་མི་རྟོགས་པ་ལྟ་ཅི་སྨོས་ཏེ། ངེས་པར་ཡང་སྟོན་པ་རྡོ་རྗེ་སེམས་དཔའ་དེ་ཁོ་ན་ཉིད་འདི་ནི་སངས་རྒྱས་ཀུན་གྱི་ཐེ་ཚོམ་གཅོད་པས་དགེ་བའི་བཤེས་གཉེན་དམ་པ་ཉིད་ཁོ་ན་བས་བདག་ཅག་གི་བློ་གྲོས་འདི་ལ་ཆུབ་སྟེ་གྲོས་ཀྱི་ཆོད་པས་མི་འགྱུར་བ་ཐོབ་པར་གོར་མ་ཆག་སྙམ་མོ།།

བཞི་པ་དེ་ཁོ་ན་ཉིད་ཞུས་པ་དངོས་ནི།

དེ་ནས། ཞེས་པ་ནས། གསོལ་པ་ལས། ཞེས་པའི་བར་གྱིས་བསྟན་ཏེ།

དེ་ནས་སྐྱེས་བུ་དམ་པ་དེ་རྣམས་ཀྱིས། བཅོམ་ལྡན་འདས་དེ་ཁོ་ན་ཉིད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་སྔགས་དམ་པ་དེ་ཁོ་ན་ཉིད་དེ་ནི། གང་ཡོངས་སུ་བརྗོད་པ་ལས་འདས་ཏེ། གསུང་བར་མི་མངའ་བས་བསྟན་ཅིང་བརྟག་པར་རབ་ཏུ་དཀའ་བ་ལགས་ཤེ་ན། འོན་ཀྱང་བཅོམ་ལྡན་འདས་ཉིད་ནི། བློ་གྲོས་ཆེན་པོ་རྣམས་ཀྱི་ཡུལ་དུ་ངེས་ཤིང་ཐེ་ཚོམ་ཐམས་ཅད་གཅོད་པ། དམ་པ་རྣམས་ཀྱི་དམ་པ་ཉིད་ལགས་པས་ན། བདག་ཅག་གི་བློ་གྲོས་ངེས་པར་ཆུབ་པ་དམ་པའི་ཕྱོགས། དགོངས་པ་དམ་པ་མཉམ་པ་ཉིད་བསྟན་དུ་གསོལ། ཞེས་གསོལ་པ་ལས།

དེ་ནས་སྐྱེས་བུ་དམ་པ་རྣམས་ཀྱིས་བཅོམ་ལྡན་འདས་དེ་ཁོ་ན་ཉིད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་སྔགས་དམ་པ་དེ་ཁོ་ན་ཉིད་དེ་ནི། བསྟན་པའི་ཡོན་ཏན་གྱི་སྒོ་ནས་གང་ཡོངས་སུ་བརྗོད་པ་ལས་འདས་ཏེ། གསུང་བར་མི་མངའ་ལ་བརྗོད་པར་མི་ནུས་པར་བསྟན་ཅིང༌། བརྟགས་པར་རབ་ཏུ་དཀའ་བ་ལགས་ཞེ་ན་ཡང༌། སྟོན་པའི་ཡོན་ཏན་གྱི་སྒོ་ནས་བཅོམ་ལྡན་འདས་ཉིད་ནི་གདུལ་བྱ་བློ་གྲོས་ཆེན་པོ་མཐར་ལམ་པ་རྣམས་ཀྱིས་བསྟེན་པའི་སྤྱོད་ཡུལ་དུ་ངེས་ཤིང༌། ཐེ་ཚོམ་ཐམས་ཅད་གཅོད་པར་མཛད་པ། སངས་རྒྱས་དམ་པ་རྣམས་ཀྱིས་ཡང་རྗེ་བཙུན་དམ་པ་ཉིད་དུ་ལགས་པས་ན། བདག་ཅག་གི་བློ་གྲོས་ངེས་པར་ཆུབ་པ་གསང་སྔགས་རྟོགས་བྱ་དམ་པ་རང་གི་ངོ་བོ་ཕྱོགས་རིས་ལས་གྲོལ་བས་ཇི་བཞིན་པའི་ཕྱོགས། སངས་རྒྱས་ཀུན་གྱི་དགོངས་པ་དམ་པ་མཉམ་པ་ཉིད་གང་ཡིན་པ་དེ་ཉིད་ལེགས་པར་བསྟན་དུ་གསོལ། ཞེས་གསོལ་བ་བཏབ་པ་ལས།

ལྔ་པ་དེའི་ལན་དུ་དེ་ཁོ་ན་ཉིད་བསྟན་པ་ནི།

བཅོམ་ལྡན་འདས། ཞེས་པ་ནས། བཀའ་སྩལ་པས། ཞེས་པའི་བར་གྱིས་བསྟན་ཏེ།

བཅོམ་ལྡན་འདས་དེ་ཁོ་ན་ཉིད་དེས་བཀའ་སྩལ་པ། སྐྱེས་བུ་དམ་པ་རྣམས་ལེགས་སོ། །ངེས་སོ། །འདི་ལྟ་སྟེ། གསང་སྔགས་དམ་པ་དེ་ཁོ་ན་ཉིད་དེ་ནི་དཔྱོད་པ་ཐམས་ཅད་དང་བྲལ་བ། མཐའ་དང་དབུས་མི་དམིགས་པ། སྒྲོ་སྐུར་མེད་པ། བླང་དོར་མེད་པ། རྒྱུ་འབྲས་ལས་འདས་པ། ཡེ་ནས་དག་པ། ཡེ་ནས་ཟིན་པ། བྱ་བ་མེད་པ། བསྩལ་བ་མེད་པ། བསྒྲུབ་ཏུ་མེད་པ། བཙལ་དུ་མེད་པ། གཞན་ནས་མི་འབྱུང་བ། གཉེན་པོ་མེད་པ། བྱེད་ པ་པོ་མེད་པ། མ་བྱས་པ། མ་བཏགས་པ། བདག ་མེད་པ། མ་བཅོས་པ། མ་བསླད་པ། དེ་ཡིན་པ། ངེས་པ། མ་ནོར་བ། ཇི་བཞིན་པ། མ་འགགས་པ། མ་སྐྱེས་པ། མི་ནུབ་པ། མི་བརླག་པ། མི་སྣང་བ། མ་བྱུང་བ། མི་འགྲོ་བ། ཡེ་ནས་གནས་པ། ཀུན་ལ་ཁྱབ་པ། མིང་མེད་པ། གཟུགས་མེད་པ། མཚན་མ་མེད་པ། ཐ་སྙད་མེད་པ། བལྟར་མེད་པ། གཟུང་དུ་མེད་པ། མཚོན་དུ་མེད་པ། དཔེ་མེད་པ། ཚད་མེད་པ། བརྟག་ཏུ་མེད་པ། རྟོག་གེ་ལས་འདས་པ། དཔག་ཏུ་མེད་པ། བསམ་དུ་མེད་པ། བསམ་གྱིས་མི་ཁྱབ་པ། ཀུན་གྱི་འབྱུང་གནས། ཐམས་ཅད་ནས་ཐམས་ཅད་དུ་བཏང་སྙོམས་ཆེན་པོ། སྟོང་པ་ཉིད་རིག་པ་རང་བྱུང་བ་ཁོ་ནའོ། །དེ་སྐད་ཅེས་བཀའ་སྩལ་པས།

དེ་ནས་བཅོམ་ལྡན་འདས་དེ་ཁོ་ན་ཉིད་དེས་བཀའ་སྩལ་པ། སྐྱེས་བུ་དམ་པ་རྣམས་ལེགས་སོ། །ངེས་སོ། །ཞེས་ཞུ་བ་བྱས་པ་ལ་གནང་བ་སྩལ་ནས་དོན་ཉེ་བར་བསྟན་པ་ནི་འདི་ལྟ་སྟེ་སྨྲར་མེད་ཅིང་ཡུལ་དུ་མ་གྱུར་པའི་དོན་མཆོག་མ་ནོར་བ་གསང་སྔགས་དམ་པ་དེ་ཁོ་ན་ཉིད་དེ་ནི་འདི་ལྟར་ཐ་སྙད་ལྔ་བཅུ་ལས་གྲོལ་ཏེ། གང་ཞེ་ན། ཡེ་གྲུབ་ཟིན་པ་ལ་ཡུལ་དང་ཡུལ་ཅན་མེད་པའི་ཕྱིར་ཉན་རང་༼༡༦༧༽ཚོགས་སྦྱོར་མཐོང་སྒོམ་མཐར་ལམ་རྣམས་ཀྱིས་སོ་སོར་རྟོག་ཅིང་དཔྱོད་པ་ཐམས་ཅད་དང་བྲལ་བ་སྟེ། མན་ངག་ལས། སོ་སོར་རྟོགས་པའི་ཤེས་རབ་ཀྱིས། །ངང་ལ་རྟོག་དང་རྟོག་བྱ་མེད། །ཅེས་པའི་དོན་ཏོ། །ངོ་བོ་མ་གྲུབ་ལ་ཅིར་ཡང་སྣང་བས་ཡོད་མེད་མེད་ལ་དབུ་མར་ཐ་སྙད་མེད་པའི་ཕྱིར་མཐའ་དང་དབུས་མི་དམིགས་པ་སྟེ། རྡོ་ལ་གསེར་ཞུན་ལས། ཡོད་ལ་ལྟོས་པས་མེད་པའང་མེད་དེ་མེད་པའི་མེད་པའང་མེད། །མཐའ་རྣམས་མེད་ཕྱིར་དབུས་མེད་དབུས་ལའང་གནས་པར་མི་བྱེད་དོ། །ཞེས་སོ། །ཡེ་དངོས་པོའི་གནས་ལུགས་ཀྱི་ཆོས་ཇི་བཞིན་པ་ནི་རྟག་ཆད་ལས་གྲོལ་བས་སྒྲོ་སྐུར་མེད་པ། རིལ་བདེ་བ་ཆེན་པོ་མཉམ་པའི་ཀློང་ལ་བཟང་ངན་མ་དམིགས་པས་བླང་དོར་མེད་པ། ཡེ་ནས་བྱང་ཆུབ་སྙིང་པོ་སངས་རྒྱས་དང་སེམས་ཅན་གཉིས་སུ་མེད་པ་ལ་བསྐྱེད་བྱ་སྐྱེད་བྱེད་ལས་གྲོལ་བས་རྒྱུ་འབྲས་ལས་འདས་པ། སྡུག་བསྔལ་ཆོས་ཉིད་ཀྱི་ལོངས་སྤྱོད། ཉོན་མོངས་པ་བདེ་བ་ཆེན་པོ། ཕྱིན་ཅི་ལོག་བྱང་ཆུབ་ཀྱི་ལམ་མཆོག སྒྲིབ་པ་ཡེ་ཤེས་ཀྱི་ངོ་བོ་ལ་སྦྱང་བར་བྱ་རྒྱུ་གློ་བུར་བ་མེད་པས་ཡེ་ནས་དག་པ། སྟོང་གསུམ་ཇི་སྙེད་སངས་རྒྱས་ཀྱི་ས་ལ་གདོད་མ་ནས་བཀོད་པས་ཡེ་ནས་གྲུབ་ཟིན་པ། འབྲས་བུ་དང་ཕྲིན་ལས་དང་བསྒྲུབ་པ་རིལ་བྱས་ཟིན་པས་བྱ་བ་མེད་པ། དེ་ལྟར་ཟིན་པའི་ཕྱིར་འཕྲལ་དུ་ཐོབ་པར་བྱ་བ་མེད་པས་འབད་རྩོལ་གྱིས་བརྩལ་བ་མེད་པ། སེམས་ལས་ལོགས་ན་འབྲས་བུ་བརྩལ་ཏེ་དོན་དུ་གཉེར་བྱ་མ་དམིགས་པས་བསྒྲུབ་ཏུ་མེད་པ། དོན་དུ་གཉེར་བ་མེད་པའི་ཕྱིར་འཕྲལ་དུ་བྱ་བ་མེད་པས་བརྩལ་དུ་མེད་པ། རང་རིག་པ་ལས་བསྒྲུབ་བྱ་ཞིག་གཞན་ན་མེད་པས་འབྲས་བུ་གཞན་ནས་མི་འབྱུང་བ། མི་མཐུན་པ་དང་བྲལ་བའི་ཕྱིར་ཟླ་མེད་ཅིང་མི་འཇིག་པས་གཉེན་པོ་མེད་པ། ཡེ་ནས་གྲུབ་ཟིན་པའི་ཕྱིར་རང་ལས་གཞན་པའི་བསྒྲུབ་པ་པོ་མེད་པས་བྱེད་པ་པོ་མེད་པ། བྱ་བས་བཙལ་དུ་མི་རྙེད་ཅིང་རྒྱུ་རྐྱེན་མེད་པས་མ་བྱས་པ། ཚིག་གིས་མི་ཕེབས་ཤིང་ངོ་བོ་འདི་འདྲར་མེད་པས་མ་བཏགས་པ། དངོས་གཞི་མ་ངེས་པ་དང་ཡུལ་སེམས་གཉིས་མེད་ལ་ཆོས་དང་གང་ཟག་མ་གྲུབ་པས་ བདག་མེད་པ། ཡེ་ལེགས་པ ་ཆེན་པོར་བཞུགས་པའི་ཕྱིར་ནད་དང་བྲལ་ཞིང་ཇི་བཞིན་པས་མ་བཅོས་པ། ཡེ་ཉིད་དག་པ་ཆེན་པོར་བཞུགས་པའི་ཕྱིར་སེལ་མེད་པ་དང༌། གློ་བུར་བ་མ་ཡིན་པས་ལོག་རྟོག་གིས་མ་བསླད་པ། ངོ་བོ་མ་ནོར་བའི་ཕྱིར་གཞན་༼༡༦༨༽དུ་མ་དམིགས་པས་དེ་ཡིན་པ། འགྱུར་བ་མེད་ཅིང་མི་བསླུ་བའི་ཕྱིར་རྫུན་པ་སྤངས་པས་ཡང་དག་པར་ངེས་པ། ལོག་འཁྲུལ་མེད་ཅིང་ཇི་ལྟ་བར་ངོ་བོ་མ་འཁྲུལ་བར་བྱུང་བས་མ་ནོར་བ། མ་བཅོས་མ་བསླད་པའི་རྣལ་མ་ཕྱིན་མོ་ཉིད་ལས་མ་གཡོས་པས་ཇི་བཞིན་པ། སྒྲིབ་བྱེད་མེད་ཅིང་འོད་གསལ་བ་ལ་ཅིར་ཡང་གོ་མི་འགོག་པས་སྣ་ཚོགས་སུ་འཆར་ཏེ་མ་འགགས་པ། རྒྱུ་རྐྱེན་ལས་མ་བྱས་པར་ངོ་བོ་མེད་པའི་ཕྱིར་འཕྲལ་དུ་མ་བྱུང་བས་མ་སྐྱེས་པ། ཉིན་མཚན་དང་བྲལ་ཞིང་གཉེན་པོ་མེད་པའི་ཕྱིར་ཡེ་ནས་གདལ་ཁྱབ་ཆེན་པོ་ལ་རྐྱེན་གྱིས་མི་ཤིགས་པས་མི་ནུབ་པ། ངོ་བོ་དུས་གསུམ་དུ་འཕོ་འགྱུར་མེད་པར་སྙིང་པོ་ཉིད་དུ་ངེས་པས་མི་བརླག་པ། མཐའ་གང་དུའང་མ་བྱུང་ཞིང་ངོ་བོས་མེད་པས་མི་སྣང་བ། ཕྱོགས་གཅིག་པ་གང་དུའང་མི་སྣང་ལ་དངོས་པོ་མ་སྤངས་པར་བྲལ་བས་མ་བྱུང་བ། ཀུན་ལ་ཁྱབ་ཟིན་ཅིང་ཡུལ་མེད་པ་དང་རྒྱུད་གཅིག་པ་མ་ཡིན་པས་ཡུལ་ལ་མི་འགྲོ་བ། གདོད་ནས་སངས་རྒྱས་དང་སེམས་ཅན་གང་བས་ཀྱང་སྔ་ལ་གློ་བུར་བ་མ་ཡིན་པར་དུས་གསུམ་དུ་རྒྱུན་མ་ཆད་པས་ཡེ་ནས་གནས་པ། ཐམས་ཅད་ཡིན་ཅིང་རིལ་དེས་བསྣུམས་པ་དང༌། དེ་ལས་གཞན་དུ་འདའ་བ་མེད་པས་བགོས་པ་མེད་པར་ཆོས་ཀུན་ལ་ཁྱབ་པ། དབྱིབས་དང་ཁ་དོག་རིལ་མ་སྤངས་ལ་རྣམ་པའི་ཆ་མེད་པས་བཏགས་པའི་མིང་མེད་པ། མཚན་མ་ཐམས་ཅད་པའི་མཚན་མེད་གང་ལ་རྣམ་པ་བསམ་གྱིས་མི་ཁྱབ་པའི་ཕྱིར་གང་དུའང་གཟུགས་སྣང་མེད་པས་གཟུགས་མེད་པ། ཇི་སྙེད་པ་མ་སྤངས་བྲལ་བ་ལ་གྲངས་ལས་གྲོལ་བས་འདུ་ཤེས་ཀྱི་མཚན་མ་མེད་པ། དམིགས་བྱ་དམིགས་བྱེད་མེད་པས་བླ་དྭགས་སུ་གདགས་པའི་ཐ་སྙད་མེད་པ། ཡུལ་གྱི་རྣམ་པའི་ཕྱོགས་རིས་ལས་གྲོལ་བས་བལྟར་མེད་པ། ངོ་བོ་ཉིད་གང་དུའང་མི་གནས་པས་གཟུང་དུ་མེད་པ། དེ་དང་འདྲ་བ་མེད་པས་དཔེའམ་ཚིག་གིས་མཚོན་དུ་མེད་པ། ཉེ་བར་སྦྱོར་བ་པོ་མ་དམིགས་པས་འདྲ་བར་བསྐྲུན་པའི་དཔེ་མེད་པ། མུ་མཐའ་ཡས་པས་འདིའོ་ཞེས་ཚད་གཟུང་དུ་མེད་པ། བཤད་པ་ལྟར་བློས་རེག་དཀའ་བས་བརྟག་ཏུ་མེད་པ། སྤྱོད་ཡུལ་དུ་མ་གྲུབ་པས་རྟོག་གེ་ལས་འདས་པ། བློས་གཏིང་མཐའ་མི་རྙེད་པས་དཔག་ཏུ་མེད་པ། ཡིད་ལ་བྱ་བ་མེད་པས་བསམ་དུ་མེད་པ། ཕྱོགས་སུ་འཛིན་པའི་བསམ་པས་མི་ཆུབ་པར་ཀུན་ཏུ་ཤར་བས་བསམ་གྱིས་མི་ཁྱབ་པ། འཁོར་བ་དང་མྱ་ངན་ལས་འདས་པ་རིལ་གྱིས་གཞིར་གྱུར་པས་ཀུན་གྱི་འབྱུང་གནས། དུས་ཐོག་མཐར་༼༡༦༩༽རྒྱུན་མ་གཡོས་མ་ཉམས་པས་ཐམས་ཅད་ནས་ཐམས་ཅད་དུ་བཏང་སྙོམས་ཆེན་པོ་སྟེ། སྒོམ་ཐབས་སྒྲོན་མ་ལས། སེམས་ཉིད་མ་བཅོས་བདེ་བ་ཆེ། །མཚོན་པར་མི་ནུས་འབྲལ་མི་ནུས། །ཕྱོགས་རིས་མི་མངའ་བཏང་སྙོམས་ཆེ། །རྒྱལ་བའི་དགོངས་པ་ཉིད་རིག་པའོ། །ཞེས་སོ། །དངོས་པོར་མེད་ཅིང་ངོ་བོ་གང་དུའང་མ་གྲུབ་པས་སྟོང་པ་ཉིད་གསལ་བ་ཉིད་རྒྱུ་རྐྱེན་དང་བྱེད་པ་པོ་མེད་པར་མ་བསླད་མ་བཅོས་པར་ཡེ་ཆེ་བཙན་གཅིག་པུར་བྱུང་བས་རིག་པ་རང་བྱུང་བ་དེ་ཁོ་ན་ཉིད་ཀྱི་དོན་ངེས་པར་གཟུང་བའོ། །དེ་སྐད་ཅེས་བཀའ་སྩལ་པས།

དྲུག་པ་དེ་ལྟར་རྟོགས་པའི་ཡོན་ཏན་ལ་བཞི་སྟེ། བླང་དོར་གྱི་ཐེ་ཚོམ་པའི་ཡོན་ཏན། ཡང་དག་པའི་ངེས་པ་རྙེད་པའི་ཡོན་ཏན། ཐ་མའི་དབུགས་འབྱིན་པའི་ཡོན་ཏན། བྱིན་རླབས་གཞན་ལ་སྣང་བའི་ཡོན་ཏན་ནོ། །དང་པོ་ནི།

སྐྱེས་བུ། ཞེས་པ་ནས། གསུངས་པས། ཞེས་པའི་བར་གྱིས་བསྟན་ཏེ།

སྐྱེས་བུ་དམ་པ་རྣམས་ཆོས་ཐམས་ཅད་བླང་དོར་མེད་པར་ཆུད་དེ། ངོ་མཚར་སྐྱེས་ནས་ཐེ་ཚོམ་དུ་གྱུར་ཏོ། །ཨེ་མའོ། །བདག་ཅག་གིས་དམ་པ་རྣམས་ལས་སྔོན་དུ་ཐོས་པ་ལྟར་ན། སྔོན་གྱི་དམ་པ་རྣམས་ནི་བྱང་ཆུབ་བླང་ངོ་། །ཉོན་མོངས་པ་དོར་རོ། །དེ་ནི་བློ་གྲོས་ཡོངས་སུ་ཆུབ་པའོ་ཞེས་ཐོས་ན། སྐྱེས་བུ་ཆེན་པོ་འདི་ནི་ཉོན་མོངས་པ་དང་བྱང་ཆུབ་ལ་གཉིས་སུ་མེད་པས་བླང་དོར་མེད་དོ། །ཞེས་གསུངས་པ་ངོ་མཚར་ཏོ་སྙམ་དུ་ཅང་མི་སྨྲ་བར་གནས་སོ། །དེ་ནས་རྡོ་རྗེ་སེམས་དཔའ་དེ་ཁོ་ན་ཉིད་དེས། སྐྱེས་བུ་དམ་པ་དེ་རྣམས་ཀྱི་ཡོངས་སུ་རྟོག་པ་བསལ་བའི་ཆེད་དུ་ཡང་གསུངས་པ། ཀྱེ་སྐྱེས་བུ་དམ་པ་རྣམས་གང་ཁྱེད་ཐེ་ཚོམ་ཡོངས་སུ་ཟ་བ་ན། ཉོན་མོངས་པའི་རང་བཞིན་གང་ཡིན་གང་ལས་བྱུང་། བྱང་ཆུབ་ཀྱི་རང་བཞིན་གང་ཡིན་གང་ལས་བྱུང་ངེས་པར་རྟོགས་ཤིག་དང་། གང་ཡོངས་སུ་མཐོང་བ་ཉིད་ན་ཐེ་ཚོམ་ཆད་པར་འགྱུར་རོ། །དེ་སྐད་ཅེས་གསུངས་པས།

དེ་ནས་སྐྱེས་བུ་དམ་པ་དེ་རྣམས་སྟོན་པས་གསང་བའི་མཚན་ཉིད་བརྗོད་པས་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་བླང་དོར་མེད་པར་ཇི་བཞིན་པ་ཉིད་རྟོགས་ཤིང་ཐུགས་སུ་ཆུད་དེ། ངོ་བོས་གཉིས་སུ་མེད་པས་གསང་བ་ཟབ་མོ་ལ་ཤིན་ཏུ་ངོ་མཚར་སྐྱེས་ནས། སྔར་གྱི་རྒྱལ་བའི་བཀའ་སྩལ་དང་མ་མཐུན་པས་ཐེ་ཚོམ་དུ་གྱུར་ཏོ། །དེ་ཡང༌། ཨེ་མའོ། །བདག་ཅག་གིས་དམ་པ་རྣམས་ལས་སྔོན་དུ་ཐོས་པ་ལྟར་ན། སྔོན་གྱི་རྒྱལ་བ་དམ་པ་རྣམས་ནི། བྱང་ཆུབ་བླང་ངོ༌། །ཉོན་མོངས་པ་དོར་རོ། །དེ་ནི་བློ་གྲོས་ཡོངས་སུ་ཆུབ་པའོ། །ཞེས་ཐོས་ན། སྐྱེས་བུ་ཆེན་པོ་རྡོ་རྗེ་སེམས་དཔའ་འདི་ནི་ཉོན་མོངས་པ་དང་བྱང་ཆུབ་ལ་གཉིས་སུ་མེད་པས་བླང་དོར་མེད་དོ་ཞེས་གསུངས་པ་ངོ་མཚར་ཏོ། །སྙམ་དུ་ཅང་མི་སྨྲ་བ་གནས་སོ། །དེ་ནས་སྟོན་པ་རྡོ་རྗེ་སེམས་དཔའ་དེ་ཁོ་ན་ཉིད་དེས་སྐྱེས་བུ་དམ་པ་དེ་རྣམས་ཀྱི་ཡོངས་སུ་རྟོགས་པ་བསམ་པའི་ཐེ་ཚོམ་བསལ་བའི་ཆེད་དུ་ཡང་གསུངས་པ། ཀྱེ་སྐྱེས་བུ་དམ་པ་རྣམས་གང་ཐེ་ཚོམ་ཡོངས་སུ་ཟ་བ་ན་དངོས་པོ་ལོ་རྒྱུས་ཀྱི་གཏན་ཚིགས་ཉོན་མོངས་པའི་རང་བཞིན་གང་ཡིན་གང་ལས་བྱུང༌། བྱང་ཆུབ་ཀྱི་རང་བཞིན་གང་ཡིན་གང་ལས་བྱུང༌། ངེས་པར་རྟོགས་པར་གྱིས་ཤིག་དང༌། གང་ཆོས་ཉིད་ཡོངས་སུ་མཐོང་བ་ཉིད་ན་ཐེ་ཚོམ་ཆད་པར་འགྱུར་རོ། །དེ་སྐད་ཅེས་གསུངས་པས།

གཉིས་པ་ཡང་དག་པའི་ངེས་པ་རྙེད་པའི་ཡོན་ཏན་ནི།

སྐྱེས་བུ། ཞེས་པ་ནས། ངུས་སོ། །ཞེས་པའི་བར་གྱིས་བསྟན་ཏེ།

སྐྱེས་བུ་དམ་པ་དེ་རྣམས་ཀྱིས་ཉོན་མོངས་པ་དང་། བྱང་ཆུབ་ཀྱི་རང་བཞིན་གང་ཡིན། གང་ལས་བྱུང་བ་བརྟགས་ན། རང་བཞིན་སྟོང་པར་མཐོང་། རྩ་བ་སེམས་ལས་བྱུང་བར་མཐོང་། སེམས་ཉིད་མ་བྱུང་། མ་སྐྱེས། སྐྱེ་བ་མེད་པ། ཡེ་ཇི་བཞིན་པ། རང་བཞིན་ལྷུན་གྱིས་གྲུབ་པ། རྩ་བ་བྱང་ཆུབ་ཀྱི་སེམས་དམ་པ་ཁོ་ན་ཉིད་དུ་ངེས་པར་ཆུད་དེ། སངས་རྒྱས་ཀྱི་དགོངས་པ་ཉམས་སུ་མྱོང་བ་ནི་འདི་ལྟ་སྟེ། སེམས་དང་སེམས་ལས་བྱུང་བ་ཐམས་ཅད་ནམ་མཁའ་ལྟ་བུར་གྱུར་ཏོ། །མཉམ་པར་བཞག་པ་དང་མ་བཞག་པ་ཐམས་ཅད་འདས་ཏེ་ཐ་མའི་དབུགས་ཕྱིན་ནས། ཡང་དག་པའི་ངེས་པ་ཡོངས་སུ་རྙེད་དོ། །རྙེད་པར་གྱུར་ཏོ། །ཀུན་ཏུ་རབ་ཏུ་རྙེད་ནས། ཡང་སྐྱེས་བུ་དམ་པ་དེ་རྣམས་རྨ་ག་ཆད་པར་ངུས་སོ།།

དེ་ནས་སྐྱེས་བུ་དམ་པ་དེ་རྣམས་ཀྱིས། ཀུན་ནས་ཉོན་མོངས་པ་༼༡༧༠༽འཁོར་བ་དང༌། མྱ་ངན་ལས་འདས་པ་བྱང་ཆུབ་གཉིས་ཀྱི་རང་བཞིན་གང་ཡིན་གང་ལས་བྱུང་བ་ངེས་པར་བརྟགས་པ་ན། མཐའ་གསུམ་གང་དུའང་མ་གྲུབ་པས་རང་བཞིན་སྟོང་པར་མཐོང༌། ཉོན་མོངས་དང་བྱང་ཆུབ་གཉིས་ཀ་རྩ་བ་རང་རིག་ཉིད་ཡིན་པས་སེམས་ལས་བྱུང་བར་མཐོང༌། སེམས་ཉིད་རྒྱུ་ལས་མ་བྱུང༌། རྐྱེན་ལས་མ་སྐྱེས། ངོ་བོ་ཡེ་ནས་སྐྱེ་བ་མེད་པ། སྒྲོ་སྐུར་མེད་པས་ཡེ་ཇི་བཞིན་པ་དབྱིངས་ཀྱི་དཀྱིལ་འཁོར། རང་བཞིན་འགགས་པ་མེད་པས་ལྷུན་གྱིས་གྲུབ་པ་འོད་གསལ་རིག་པའི་དཀྱིལ་འཁོར། སྐྱེ་འགག་གཉིས་སུ་མེད་པས་རྩ་བ་བྱང་ཆུབ་ཀྱི་སེམས་ཀྱི་དཀྱིལ་འཁོར། དམ་པ་གསུམ་དབྱེར་མེད་པའི་ཆོས་ཉིད་དེ་ཁོ་ན་ཉིད་དུ་ངེས་པར་ཆུད་དེ། སངས་རྒྱས་ཀྱི་དགོངས་པ་དམ་པའི་ངོ་བོར་མ་རྟོགས་པར་རྟོགས། མ་མཐོང་བར་མཐོང༌། མ་མྱོང་བར་ཉམས་སུ་མྱོང་བ་ནི་འདི་ལྟ་སྟེ། སེམས་རྣམ་པར་ཤེས་པ་ཚོགས་བརྒྱད་དང་སེམས་ལས་བྱུང་བ་ཚོར་འདུ་འདུ་བྱེད་རྣམས་དང་སྣང་བ་ཐམས་ཅད་མཐའ་དབུས་མེད་པ་ནམ་མཁའ་ལྟ་བུར་མ་འདྲེས་ལ་ཡོངས་རྫོགས་ཏེ་རང་རིག་རང་གསལ་ཆེན་པོ་ལས་མི་གཡོ་བར་གྱུར་ཏོ། །སྤྱོད་ཡུལ་མེད་པའི་དགོངས་པ་ལ་མཉམ་པར་བཞག་པ་དང་མ་བཞག་པའི་སྒོམ་པ་དང་མི་བསྒོམ་པའི་ཏིང་ངེ་འཛིན་ལས་འདས་ཏེ་བཞེངས་བཞུགས་མི་མངའ་བར་མཐར་ལམ་ཐ་མའི་དབུགས་ཆེན་པོ་ཕྱིན་ནས་བཅུ་པ་རྫོགས་པ་སྤྱིར་ཆིབ་ཀྱི་ས་མཐར་ཕྱིན་ཏེ་ལྟ་བའི་སྒྲིབ་པ་དག་པས་གསང་སྔགས་ཇི་བཞིན་པ་ཉིད་དུ་སོན་ཏེ་ཡང་དག་པའི་ངེས་པ་རྩོལ་བ་དང་བྲལ་བའི་གདེང་ཆེན་པོའི་གཡོ་བ་ཡོངས་སུ་རྙེད་དོ། །རྙེད་པ་ཐོབ་པར་གྱུར་ཏོ། །ཐོབ་པ་ཀུན་ཏུ་བརྟན་པར་རབ་ཏུ་རྙེད་ནས། དེ་ཉིད་དུས་ཕྱེད་པ་ཆེན་པོ་ཉམས་བྲལ་མེད་པའི་ཀློང་དུ་གྱུར་ཏོ། །ཡང་སྐྱེས་བུ་དམ་པ་དེ་རྣམས་སྔོན་དུ་སྦྱངས་པ་དང་འདིར་ངལ་སོས་པས་དགའ་ཆེས་ཏེ་ཐབས་ལ་ངམ་ཞིང་གཞན་དོན་དུ་དགོངས་ནས་རྨ་ག་ཆད་པར་རབ་ཏུ་ངུས་སོ།།

གསུམ་པ་ཐ་མའི་དབུགས་འབྱིན་པའི་ཡོན་ཏན་ནི།

ཡང་རྡོ་རྗེ། ཞེས་པ་ནས། གསོལ་ཏེ། ཞེས་པའི་བར་གྱིས་བསྟན་ཏེ།

ཡང་རྡོ་རྗེ་སེམས་དཔའ་དེ་ཁོ་ན་ཉིད་དེས་མཁྱེན་བཞིན་དུ། སྐྱེས་བུ་དམ་པ་དེ་རྣམས་ལ་བཀའ་སྩལ་པ། ཀྱེ་སྐྱེས་བུ་དམ་པ་ཁྱེད་ཅིའི་ཕྱིར་ངུ་། དེ་དག་གིས་གསོལ་པ། བཤེས་གཉེན་དམ་པ་འདི་ལྟ་སྟེ། ལམ་ཀྱི་ནང་ན་ཉེ་ལམ་པ། །ཐབས་ཀྱི་ནང་ན་དམ་པ་འདི། །སྔོན་དུ་མ་ཐོས་སྐལ་བ་ཆུང་། །ཨེ་མའོ་ངོ་མཚར་རྨད་ཀྱི་ཆོས། །ཡུན་གྱི་དོན་སྲིད་འདི་ལྟ་བུ། །དོན་རག་གཞན་ལ་མ་ལས་པར། །གཞན་ལ་རེ་རྩོལ་ཨེ་མའོ་འཁྲུལ། །བྱ་བའི་ལས་ལ་ཤ་ཐང་བར། །མཚན་མའི་རྗེས་སུ་དབེན་སྤྱོད་དེ། །ངལ་ཆད་དོན་མེད་ཚིག་མཐའ་ཡས། །བསྡུ་བས་མ་འདུས་དོན་རེ་ཆུང་། །བཤེས་གཉེན་དམ་པ་དེ་ཉིད་ལས། །ངེས་པ་རྙེད་པས་དབུགས་ཆེན་ཕྱིན། །སངས་རྒྱས་མཉམ་དང་ཉིད་དུ་གྲོལ། །དེ་ཉིད་ཆེན་པོར་ལྷུན་གྱིས་གྲུབ། །ཅེས་གསོལ་ཏེ།

ཡང་རྡོ་རྗེ་སེམས་དཔའ་དེ་ཁོ་ན་ཉིད་དེས་མཁྱེན་བཞིན་དུ། སྐྱེས་བུ་དམ་པ་དེ་རྣམས་ལ་བཀའ་སྩལ་པ། ཀྱེ་སྐྱེས་བུ་དམ་པ་ཁྱེད་ཅག་ཅིའི་ཕྱིར་ངུ༌། དེ་དག་གིས་གསོལ་པ། བཤེས་གཉེན་དམ་པ་འདི་ལྟ་སྟེ། ཚེ་འདི་ལ་འགྲུབ་ཅིང་རྟོགས་པ་ཙམ་གྱིས་ཆོག་པས་བཙལ་མི་དགོས་པའི་ལམ་གྱི་ནང་ན་ཉེ་ལམ་༼༡༧༡༽དུ་གྱུར་པ། ཉོན་མོངས་མ་སྤངས་པར་སངས་རྒྱ་བས་ཐབས་ཀྱི་ནང་ན་ཐབས་དམ་པ་སྩོལ་བ་མེད་པ་ཉིད་ཀྱིས་ཐོབ་པར་བྱེད་པ་འདི་ཉིད་སྔོན་དུ་རྒྱུའི་ཐེག་པ་སོགས་ལ་གནས་པའི་ཚེ་མ་ཐོས་པ་དེ་ལས་འཕྲོ་དང་སྐལ་བ་ཆུང་སྙམ་ནས་ངུ་བ་ལགས། ཨེ་མའོ་ངོ་མཚར་རྨད་དུ་བྱུང་བ་ངེས་པ་དོན་གྱི་ཆོས་གསང་བ་ཟབ་མོ་མཐར་ཐུག་གི་བདེ་བ་ལ་གནས་པའི་ཡུན་གྱི་དོན་སྲིད་ཆེན་པོ་འདི་ལྟ་བུ། སེམས་ཉིད་ལས་ཐབས་དང་ངོ་བོ་ལོགས་སུ་བཙལ་མི་དགོས་པས་དོན་རྟོགས་པ་དང་གྲོལ་བ་དུས་མཉམ་པས་རག་གཞན་ལ་མ་ལས་པར་རང་ལ་རྫོགས་པའི་རྒྱུ་འབྲས་གཉིས་མེད་འདི་ཉིད་མ་རྟོགས་པས་བསྐལ་པ་དེ་སྙེད་དུ་ལམ་ལ་ཞུགས་ནས་རྒྱལ་བ་དེ་སྙེད་ལ་ཐེ་ཚོམ་གཅོད་ཅིང་གཞན་ལ་རེ་རྩོལ་གྱི་ཚོལ་བ་ནི་ཨེ་མའོ་ནོར་ཞིང་འཁྲུལ་སྙམ་ནས་ངུ་བ་ལགས། དེ་ལྟར་རྒྱུའི་ཐེག་པ་ལ་སོགས་པས་རྩོལ་སྒྲུབ་དང་དཀའ་ཐུབ་སྣ་ཚོགས་པས་བྱ་བའི་ཐབས་ཀྱི་ལས་ལ་སྒོ་གསུམ་ཤ་ཐང་ཆད་པར་འབད་ཀྱང་མཚན་མའི་ཚིག་གི་རྗེས་སུ་བསམ་པ་འཕྲོས་ཏེ་རྣམ་པར་གཡེང་བ་སྤྱོད་དེ་ངལ་ཞིང་ཆད་པར་བྱས་པས་དོན་ཇི་བཞིན་པ་མཐོང་བ་མེད་པར་ཚིག་མཐའ་ཡས་པའི་རྗེས་སུ་འབྲངས་པས་བྱ་བ་མ་ཟིན་ནས་རྣམ་གྲངས་སོ་སོར་བཟུང་བ་ཆོས་ཉིད་ཐིག་ལེ་ཉག་གཅིག་ཏུ་བསྡུ་ཞིང་ཇི་བཞིན་པར་ཆུབ་པས་རྟོགས་པར་མ་འདུས་ཏེ་བདག་གཞན་གྱི་དོན་ཀུན་མ་རྫོགས་པས་དོན་རེ་ཆུང་སྙམ་ནས་ངུ་སྟེ་སྔོན་ཆད་བསྒྱངས་པས་སོ། །ད་ལྟ་སྟོན་པ་བཤེས་གཉེན་དམ་པ་གསང་བདག་རྡོ་རྗེ་སེམས་དཔའ་ཁྱེད་ལས་ཇི་བཞིན་པ་དེ་ཉིད་ཐོས་པ་ལས་གསང་བའི་གདེང་དམ་པ་ཐོབ་སྟེ་ངེས་པ་རྙེད་ནས་བྱ་བའི་ལས་དང་བྲལ་ཏེ་ངལ་སོས་པས་དབུགས་ཆེན་པོ་ཕྱིན་པ་ན་ཡང་དག་པར་རྫོགས་པའི་སངས་རྒྱས་རྣམས་ཀྱིས་མཆོག་བླང་དོར་མེད་པ་དང་མཉམ་པས་མཐར་ཕྱིན་པའི་ལམ་དང་མ་བཅོས་བླ་མའི་ས་ཆེན་མ་བགྲོད་པར་ནོན་ཏེ་བཅིངས་པ་ཐམས་ཅད་དབྱིངས་སུ་གྲོལ་བས་མ་བརྩོལ་བར་དེ་ཁོ་ན་ཉིད་ཆེན་པོར་ལྷུན་གྱིས་གྲུབ་པས་ཆེད་དགའ་བ་རྙེད་དེ་ངུ་བ་ལགས། དེའི་ཕྱིར་མཆི་མ་ཟག་པ་ནི་སྔ་མའི་བྱ་བ་ལ་ཁོ་ཐག་ཆོད་པ་དང༌། རང་ངོ་མ་ཤེས་པས་རྒྱུ་གསུམ་དང་ཤེས་པས་རྒྱུ་གཅིག་སྟེ་བཞི་ལ་ངམ་པའོ། །ཞེས་གསོལ་ཏེ་རྒྱལ་བའི་དགོངས་པ་ལྷུན་གྱིས་གྲུབ་བོ།།

བཞི་པ་བྱིན་རླབས་གཞན་ལ་གནང་བའི་ཡོན་ཏན་ནི།

ངོ་མཚར། ཞེས་པ་ནས། སྟོན་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ངོ་མཚར་གྱི་དགའ་བ་ཆེན་པོ་ལས། ཡེ་ཤེས་ཀྱི་འོད་ཉི་མ་འབུམ་ལྟ་བུར་འབྱུང་བས། གང་ས་པ་རྣམས་ནི་རིག་པའི་རྩལ་སྦྱངས། དོན་གྱི་ཆེ་བ་ཕྱུང་། ས་རྣམས་ཀུན་ཏུ་གཡོས་པས། སྤྱོད་པའི་རྣལ་འབྱོར་པ་དག་ངོ་མཚར་བར་གྱུར་ཏེ། རང་རང་གི་སྟོན་པ་ལ་གསོལ་པ། འདི་ལྟ་བུའི་ལྟས་ཡ་མཚན་ཅན་འདི་ཇི་ལྟ་བུ་ཞིག་ལགས། ཞེས་ཞུས་པ་ལས། སོ་སོའི་སྟོན་པ་དཔག་ཏུ་མེད་པས། སོ་སོའི་འཁོར་དཔག་ཏུ་མེད་པ་ལ་བཀའ་སྩལ་པ། རིགས་ཀྱི་བུ་དག་ལྟས་ཆེན་པོ་འདི་ནི་གདལ་ཁྱབ་ཆེན་པོ་ཞེས་བྱ་བའི་ཞིང་ཁམས་ན། སངས་རྒྱས་ཀུན་གྱི་དགེ་བའི་བཤེས་གཉེན་རྡོ་རྗེ་སེམས་དཔའ་དེ་ཁོ་ན་ཉིད་ཅེས་བྱ་བ། ཐེག་པ་ཆེན་པོ་གསང་སྔགས་ཀྱི་དེ་ཁོ་ན་ཉིད་ངེས་པ་ཞེས་བྱ་བའི་ཆོས་སྟོན་ཏེ། སངས་རྒྱས་དེ་ནི་ཐེ་ཚོམ་ཐམས་ཅད་གཅོད་ཅིང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ངེས་པར་སངས་རྒྱས་པར་ལུང་སྟོན་པའི་དགེ་བའི་བཤེས་གཉེན་དམ་པར་གྱུར་པས། སྐྱེས་བུ་དམ་པ་ལྔ་གང་གསང་སྔགས་ཀྱི་ངེས་པ་མ་རྙེད་པས། ཡོངས་སུ་མངོན་པར་རྫོགས་པར་སངས་མ་རྒྱས་པས། དེ་དག་ངེས་པའི་ཐེ་ཚོམ་བཅད་དེ། ལུང་སྟོན་པས་དེ་དག་གི་ལྟས་ཡིན་ནོ་ཞེས་སྟོན་པར་གྱུར་ཏོ།།

དེ་དག་མ་ནོར་བར་མངོན་པར་རྟོགས་པས་སངས་རྒྱས་པའི་༼༡༧༢༽བྱིན་རླབས་དང་ལྟས་ནི། དེ་ལྟར་ངོ་མཚར་གྱི་རྟོགས་པ་ཆེན་པོ་ཐོབ་པ་མེད་པར་ཐོབ་པས་དགྱེས་ཤིང་དགའ་བ་ཆེན་པོ་ཀུན་ནས་རྒྱས་པའི་བྱིན་རླབས་ལས་ཡེ་ཤེས་ཀྱི་འོད་ཟེར་ཉི་མ་འབུམ་ཕྲག་ལྟ་བུ་གདུལ་བྱའི་ངོ་ལ་ཤར་ཏེ། འདི་ནི་སྟོན་པ་ཉིད་ཀྱི་སྐུའི་འོད་ཟེར་ལས་བདེ་གཤེགས་འཁོར་བཅས་སྤྲོ་བ་དང་ཡང་སྦྱར་ལ་རང་བཞིན་གྱི་འོད་དང་ཡང་སྦྱར་རོ། །དེ་ལྟར་བྱུང་བས་དངོས་པོ་གང་དག་བྱང་ཆུབ་སེམས་དཔའ་དང་རིག་པ་འཛིན་པ་ས་པ་རྣམས་ནི་ཤེས་རབ་ཀྱི་རྩལ་རྙེད་པས་རིག་པའི་རྩལ་སྦྱངས། ལྟ་བའི་གདེང་འཕང་བསྟོད་པས་དོན་གྱི་ཆེ་བ་ཕྱུང༌། ས་པའི་རིག་པ་རིལ་གོང་དུ་འཕར་བའི་བྱིན་རླབས་མཐོང་སྟེ་ས་རྣམས་ཀུན་ཏུ་གཡོས་པས། སྔར་གྱི་དམ་པ་དག་ཇི་ལྟར་བར་ཡོངས་སུ་བྱ་བ་གཅིག་མ་རྙེད་པར་གཉིས་ལ་གནས་པས་རྩོལ་བ་ལ་སྤྱོད་པའི་རྣལ་འབྱོར་པ་དམ་པ་ཇི་སྙེད་པ་དག་གིས་ངོ་མཚར་བར་གྱུར་ཏེ། རང་རང་གི་སྟོན་པ་རྣམས་ལ་གསོལ་པ། འདི་ལྟ་བུའི་ལྟས་ཡ་མཚན་ཅན་འདི་ཅི་ལྟ་བུ་ཞིག་ལགས། ཞེས་ཞུས་པས། རང་རང་སོ་སོའི་སྟོན་པ་དཔག་ཏུ་མེད་པས་སོ་སོའི་འཁོར་དཔག་ཏུ་མེད་པ་ལ་བཀའ་སྩལ་པ། རིགས་ཀྱི་བུ་དག་ལྟས་ཆེན་པོ་འདི་ནི། ཞིང་འདིས་ཐམས་ཅད་ལ་ཁྱབ་ཀྱང་རང་རང་གི་རིགས་ཀྱི་ལས་ཀྱིས་བསྐལ་པས་མ་མཐོང་ཡང་དོན་ལ་གདལ་ཁྱབ་ཆེན་པོ་ཞེས་བྱ་བའི་ཞིང་ཁམས་ན། སངས་རྒྱས་ཀུན་གྱི་དགེ་བའི་བཤེས་གཉེན་རྡོ་རྗེ་སེམས་དཔའ་དེ་ཁོ་ན་ཉིད་ཅེས་བྱ་བ། ཐེག་པ་ཆེན་པོ་གསང་སྔགས་ཀྱི་དེ་ཁོ་ན་ཉིད་ངེས་པ་ཞེས་བྱ་བའི་ཆོས་སྟོན་ཏོ། །སངས་རྒྱས་དེ་ནི་ཐེ་ཚོམ་ཐམས་ཅད་གཅོད་ཅིང་ཀུན་ཏུ་འོད་ལ་བཞུགས་པའི་སངས་རྒྱས་དང་ས་བཅུའི་བྱང་ཆུབ་སེམས་དཔའ་ཐམས་ཅད་ངེས་པར་སངས་རྒྱས་པར་ལུང་བསྟན་པའི་དགེ་བའི་བཤེས་གཉེན་དམ་པར་གྱུར་པས། སྐྱེས་བུ་དམ་པ་ལྔ་གང་གསང་སྔགས་ཀྱི་ངེས་པ་མ་རྙེད་པས་ཡོངས་སུ་མངོན་པར་རྫོགས་པར་སངས་མ་རྒྱས་པས། དེ་དག་ངེས་པའི་ཐེ་ཚོམ་བཅད་དེ། ཐ་མའི་ལུང་སྟོན་པས་དེ་དག་གི་ལྟས་ཡིན་ནོ། །ཞེས་སྟོན་པར་གྱུར་ཏོ།།

གསུམ་པ་མཇུག་བསྡུ་བ་ནི།

ལང་ཀའི། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལྟར་ན། སྐྱེས་བུ་དམ་པ་དེ་དག་ནི། དེ་ཁོ་ན་ཉིད་ཀྱི་ཉམས་བརྙེས་མ་ཐག་ཆོས་ཀྱི་རྒྱལ་པོའི་རྒྱལ་ཚབ་སྐྱེས་བུ་དམ་པ་ཞེས་བྱ་བར་ངེས་པར་གྱུར་ཏོ།།

ལང་ཀའི་བདག་པོ། །དེ་ལྟར་ན་སྐྱེས་བུ་དམ་པ་དེ་དག་ནི་དེ་ཁོ་ན་ཉིད་ཀྱི་ཉམས་རྙེད་མ་ཐག་ཏུ་རྒྱལ་ཚབ་གཉིས་ལས་འདིར་ཐ་མའི་དབུགས་ཕྱིན་པ་དེ་དག་གསང་སྔགས་སྟོན་པའི་དབང་ཕྱུག་ཆེན་༼༡༧༣༽པོ་ངེས་པའི་གདེང་རྙེད། རིག་པའི་དོན་རྟོགས། གསང་བའི་ཆོས་ལ་ལོངས་སྤྱོད་པས་མངའ་ཐང་ཡོངས་སུ་རྫོགས་པའི་ཆོས་ཀྱི་རྒྱལ་པོའི་སྟོན་མཆོག་རིགས་ལྔའམ་སྐུ་ལྔའི་རྒྱལ་ཚབ་ཆེན་པོ་སྐྱེས་བུ་དམ་པ་ཞེས་བྱ་བར་ངེས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

དབུགས་ཆེན་པོ་ཡོངས་སུ་ཕྱིན་པའི་ལེའུ་སྟེ་བཅུ་གཉིས་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྩོལ་བ་དང་བྲལ་བའི་དོན་རྟོགས་པས་སྐྱེས་བུ་དམ་པ་ལྔ་དབུགས་ཆེན་པོ་ཡོངས་སུ་ཕྱིན་ཏེ་མངོན་པར་རྫོགས་པར་སངས་རྒྱས་པའི་དོན་དང༌། རྗེས་སུ་འཇུག་པའང་དེ་བཞིན་དུ་ངེས་པར་བསྟན་པའི་ལེའུ་སྟེ་བཅུ་གཉིས་པ་གསལ་བར་བཤད་པའོ།། །།

ལེའུ་བཅུ་གསུམ་པ་སྐྱེས་བུ་དམ་པ་ཐོབ་པ།

༈ ལྔ་པ་ལམ་གྱི་ཆ་རྐྱེན་དབང་བསྐུར་བ་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

དེ་ནས། ཞེས་པ་ནས། གྲགས་པ་ལགས། ཞེས་པའི་བར་གྱིས་བསྟན་ཏེ།

དེ་ནས་ལངྐའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་འདི་སྐད་ཅེས་དྲི་བ་ཡོངས་སུ་དྲིས་སོ། །གསང་བ་པའི་བདག་པོ་སྐྱེས་བུ་དམ་པ་དེ་དག་དམ་པ་རྣམས་ཀྱི་ཞིང་དུ་ཇི་ལྟ་བར་གྲགས་པ་ལགས།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དེ་ནས་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། འདི་སྐད་ཅེས་དྲི་བ་ཡོངས་སུ་དྲིས་པ། གསང་བ་པའི་བདག་པོ། སྐྱེས་བུ་དམ་པ་དེ་དག་དམ་པ་རྣམས་ཀྱི་ཞིང་དུ་ཇི་ལྟར་གྲགས་པ་ལགས་ཞེས་རྒྱུ་མཚན་དྲིས་པའོ།།

གཉིས་པ་ལན་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་པའོ། །དང་པོ་ནི།

གསང་བ་པའི། ཞེས་པ་ནས། གྲགས་སོ། །ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་སྨྲས་པ། ལངྐའི་བདག་པོ་སྐྱེས་བུ་དམ་པ་དེ་དག་ནི། དམ་པ་རྣམས་ཀྱི་ཞིང་དུ་གང་ཆོས་ཀྱི་རྒྱལ་པོའི་རྒྱལ་ཚབ་ཏུ་གྱུར་པའི་ཕྱིར། རྒྱལ་ཚབ་སྐྱེས་བུ་ཞེས་བྱ་བ་ཡོངས་སུ་གྲགས་པར་གྱུར་ཏོ། །དེ་ཅིའི་ཕྱིར་ཞེ་ན། ལང་ཀའི་བདག་པོ་འདི་ལྟ་སྟེ། དཔེར་ན། གང་དྲ་མ་ཆེན་པོ་ཀུན་གྱི་སྤྱི་བོར་གྱུར་པ་དག་རྒྱལ་པོ་རྒྱལ་རིགས་རྒྱུད་དུ་བྱུང་བ་དང་། མཚན་དང་ལྡན་པ་དང་། ཆོས་ཤེས་པ་དང་། འཁོར་དང་ལྡན་པ་དང་། དབང་ཐོབ་པ་དང་ལྡན་ན། མང་པོས་བཀུར་བ་ཐོབ་པ་དེ་བཞིན་དུ། སྐྱེས་བུ་དམ་པ་དེ་དག་ཀྱང་། རྒྱལ་བ་ཀུན་གྱི་བརྒྱུད་དུ་བྱུང་བ་དང་། མཚན་དང་དཔེ་བྱད་ཀྱི་རྟགས་དང་ལྡན་པ་དང་། ཆོས་ཤེས་པ་དང་། བསྡུ་བའི་འཁོར་དང་ལྡན་པ་དང་། དབང་བཅུ་ཐོབ་པ་སྟེ། ཆོས་དེ་དག་དང་ལྡན་པས་ན། དེའི་ཕྱིར་རྒྱལ་ཚབ་སྐྱེས་བུ་ཞེས་བྱ་བར་གྲགས་སོ།།

གསང་བ་པའི་བདག་པོས་སྨྲས་པ། ལང་ཀའི་བདག་པོ། སྐྱེས་བུ་དམ་པ་དེ་དག་ནི་དམ་པ་སངས་རྒྱས་རྣམས་ཀྱི་ཞིང་དུ་གང་ཆོས་གྱི་རྒྱལ་པོའི་རྒྱལ་ཚབ་ཏུ་གྱུར་པའི་ཕྱིར། རྒྱལ་ཚབ་སྐྱེས་བུ་ཞེས་བྱ་བར་ཡོངས་སུ་གྲགས་པར་གྱུར་ཏོ། །དེའང་གཏན་ཚིགས་ཀྱིས་ཡིད་ཆེས་པར་བྱ་བ་དང༌། རྗེས་སུ་འཇུག་པ་པོ་རིམ་པས་རྫོགས་པར་བྱ་བའི་དོན་བསྟན་པའི་ཕྱིར། དེ་ཅི་ཕྱིར་ཞེ་ན། ལང་ཀའི་བདག་པོ། འདི་ལྟ་སྟེ། དཔེར་ན་གང་དྲྭ་མ་ཆེན་པོ་ཀུན་གྱི་སྤྱི་བོར་གྱུར་པ་འཁོར་ལོས་སྒྱུར་བའི་རྒྱལ་པོ་དག་གི་ཕྲུག་གུ་ཆོས་ལྔ་དང་ལྡན་པ་ནི། རྒྱལ་པོ་རྒྱལ་རིགས་ཆེན་པོའི་རིགས་ཀྱི་གདུང་འཛིན་པའི་རྒྱུད་དུ་གྱུར་པ་དང༌། ཐུན་མོང་གི་མཚན་དཔེ་དང་ལྡན་ལ་རྒྱལ་ཡར་ཤིས་པ་དང༌། རྒྱལ་པོའི་ཆོས་ལུགས་ཤེས་པས་མཁས་པ་དང༌། ཕྱི་ནང་གི་འཁོར་འབངས་དང་ལྡན་པ་དང༌། རིན་ཆེན་སྣ་བདུན་ལ་སོགས་པ་རྒྱལ་པོའི་མངའ་དབང་ཐོབ་པའི་སྐལ་བ་དང་ལྡན་ན། གླིང་བཞིའི་མི་ལ་སོགས་པ་མགོ་ནག་མང་པོས་སྤྱི་བོས་ལེན་ཅིང་བཀུར་བ་ཐོབ་ནས་ངེས་པར་འཛིན་པ་ནི་རྒྱལ་བུ་དམ་པར་མཚོན་༼༡༧༤༽པ་དེ་བཞིན་དུ། དོན་གྱི་དབང་དུ། སྐྱེས་བུ་དམ་པ་ལྔ་པོ་དེ་དག་ཀྱང༌། རྒྱལ་བ་ཀུན་གྱི་རིགས་སམ་གདུང་རྒྱུད་དུ་བྱུང་བ་དང༌། ཐུན་མོང་དང་ཐུན་མོང་མིན་པའི་ཡོན་ཏན་མཚན་དང་དཔེ་བྱད་ཀྱི་རྟགས་བརྒྱ་དང་བཅུ་གཉིས་ལྡན་པ་དང༌། ཐེག་པ་ཆེན་པོ་གསང་སྔགས་ཀྱི་ཆོས་ཇི་བཞིན་པ་ཤེས་ཤིང་རྟོགས་པ་མཐར་ཕྱིན་པ་དང༌། ཐུན་མོང་དང་ཐུན་མོང་མ་ཡིན་པར་བསྡུ་བའི་འཁོར་དང་ལྡན་པ་དང༌། ཚེ་དང་ཡོ་བྱེད་ལ་སོགས་པ་དབང་བཅུ་པོ་ཐོབ་པར་གྱུར་པ་སྟེ། ཆོས་ལྔ་པོ་དེ་དག་དང་ལྡན་པས་ན། དེའི་ཕྱིར་རྒྱལ་ཚབ་སྐྱེས་བུ་ཞེས་བྱ་བར་ཞིང་ཁམས་ཐམས་ཅད་དུ་རབ་ཏུ་གྲགས་སོ། །ཞེས་དཔེ་དོན་གཉིས་ཀྱི་སྒོ་ནས་བསྡུས་ཏེ་བསྟན་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། སྡོམ་ཚིག་དང༌། རྒྱས་པ་དངོས་སོ། །དང་པོ་ནི།

ལེའུའི་གཤམ་དུ། ལང་ཀའི། ཞེས་པ་ནས། རྫོགས་པ་ཡིན། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལྟར་ན། དེའི་ཕྱིར་སྐྱེས་བུ་དམ་པ་དེ་དག་ནི་ཆོས་ཀྱི་རྒྱལ་པོ་དམ་པ་ཞེས་བྱ་བར།

དམ་པ་རྣམས་ཀྱི་ཞིང་དུ་ཡོངས་སུ་གྲགས་སོ། །ལངྐའི་བདག་པོ་དབང་གི་ཡང་། །ཡིད་གཅིག་བསྡུས་ཏེ་ཤེས་པར་གྱིས། །ཁུངས་དང་གྲགས་པ་ཆུ་བོ་དང་། །ཡུལ་དང་དབང་པོ་དགོས་པ་དང་། །ཐབས་དང་གནས་དང་རྟགས་དང་དོན། །བསྡུས་པ་འདི་ཡིས་རྫོགས་པ་ཡིན།།

དེའང་འགྲེལ་པ་ལུང་བསྟན་མ་ལས། ཇི་ལྟར་རྒྱལ་སྲས་བཅས་པ་ལ། །མཛེས་པའི་ཡོན་ཏན་རྫོགས་པ་ཡིས། །དབང་བསྐུར་ཁོངས་སུ་ཡིད་ཆེས་ནས། །དམ་པ་བརྒྱུད་པའི་མན་ངག་གིས། །རྗེས་འཇུག་ཏུ་ཡང་ཤེས་པར་བྱ། །ཞེས་པས་དོན་གཉིས་ཏེ། སྔོན་བྱུང་རྒྱལ་བའི་མཛད་སྤྱོད་ཀྱི་སྒོ་ནས་གདུལ་བྱ་སྤྲོ་བ་བསྐྱེད་པའི་དབང་དང༌། རྗེས་འཇུག་གི་གང་ཟག་ཉམས་སུ་ལེན་ཐབས་ཀྱི་སྒོ་ནས་གདུལ་བྱ་ཆུད་མི་ཟ་བར་བསྐུར་ཐབས་ཀྱི་དོན་རྣམ་གྲངས་ཀྱིས་སྟོན་ཏེ། ལང་ཀའི་བདག་པོ་དབང་གི་དོན་གྱི་ལུས་འདི་ལྟར་ཡང་ཡིད་གཅིག་ཏུ་བསྡུས་ཏེ་མ་ཡེངས་པར་ཤེས་པར་གྱིས་ཤིག གང་ཞེ་ན། དབང་བསྐུར་བའི་ཁུངས་དང༌། རྒྱལ་ཚབ་ཏུ་གྲགས་པ་དང༌། རྒྱུན་མ་ཆད་པས་ཆུ་བོ་བཞི་དང༌། བསྐུར་བྱའི་ཡུལ་དང༌། བསྐུར་བའི་དབང་པོ་དང༌། བསྐུར་བའི་དགོས་པ་དང༌། རྫས་ལ་བརྟེན་ཏེ་བསྐུར་ཐབས་དང༌། གང་དུ་བསྐུར་བའི་གནས་དང༌། ཐོབ་པའི་རྟགས་དང༌། དབང་གི་དོན་ཏེ། སྡོམ་དུ་བསྡུས་པ་འདི་ཡིས་ཡོངས་སུ་རྫོགས་པ་ཡིན་ནོ། །ཞེས་དོན་བཅུའི་སྒོ་ནས་བསྟན་པ་འདི་ཉིད་སོ་སོར་རྒྱས་པར་བཤད་པས་སྔོན་བྱུང་གི་དབང་དང་ཐ་མས་ཐུན་མོང་དུ་ཚིག་གི་ཟིན་གྱི་དངོས་སུ་བསྟན་ཅིང་དེས་རྗེས་འཇུག་གི་དབང་ཀྱང་ཤུགས་ཀྱིས་འཕངས་ཏེ། ལུང་བསྟན་མ་ལས། ཇི་ལྟར་སྔོན་དུ་དེ་བཞིན་གཤེགས་པ་དེ་ཉིད་ཇི་ལྟ་བའི་ཐབས་མེད་ན་གདུལ་བྱ་ལ་ཕན་འདོགས་པ་མ་ཡིན་ནོ། །ཞེས་གསུངས་སོ།།

གཉིས་པ་རྒྱས་པ་དངོས་ལ་བཅུ་སྟེ། ཁུངས་༼༡༧༥༽རྒྱལ་བས་དབང་བསྐུར་བ། རྒྱལ་ཚབ་ཏུ་གྲགས་པ། རྒྱུན་མ་ཆད་པ་ཆུ་བོ། ཐོབ་བྱའི་ཡུལ། བསྐུར་བའི་དབང་པོ། བསྐུར་བའི་དགོས་ཆེད། རྫས་ལ་བརྟེན་ཏེ་བསྐུར་ཐབས། དབང་བསྐུར་བའི་གནས། དོན་གྱི་རྟགས། དབང་གི་དོན་ནོ། །དང་པོ་ནི།

ལང་ཀའི། ཞེས་པ་ནས། གསུངས་པ་གཅིག་ཏུ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ཡང་འདི་ལྟ་སྟེ། རྒྱལ་རིགས་བརྒྱུད་དུ་གང་བྱུང་ན། །རྒྱལ་སྲིད་དམངས་ཀྱིས་གང་བསྟབས་པས། །ཚིག་བཙན་ཡུལ་ལ་དབང་སྒྱུར་བའི། །ཀུན་གྱི་སྤྱི་བོར་གྱུར་པ་བཞིན། །རྒྱལ་རྣམས་ཡོངས་སུ་རྫོགས་པས་ན། །ལྷ་དང་བཅས་པའི་འཇིག་རྟེན་པས། །ཆོས་ཀྱི་རྒྱལ་པོར་མངའ་བསྟབས་པས། །དེ་ནས་བྱང་ཆུབ་མངོན་སངས་རྒྱས། །ལངྐའི་བདག་པོ་དེ་ལྟར་ཆོས་ལྔ་དང་ལྡན་པའི་སྐྱེས་བུ་དམ་པ་དེ་དག་དབུགས་ཆེན་པོ་ཡོངས་སུ་ཕྱིན་པའི་གནས་གང་ན་བ་དེར། དམ་པ་རྣམས་ཀྱི་ཞིང་ཁམས་མཐའ་ཐུག་པ་མེད་པས་ན། རྒྱལ་བ་དཔག་ཏུ་མེད་པ་དག་ཇི་ལྟར་མཁའ་ལ་དབྱར་གྱི་སྤྲིན་ཕུང་བཞིན་ཡོངས་སུ་འདུ་བར་འདུས་ནས། ཀུན་ཀྱང་གསུང་གཅིག་ཏུ།

ལང་ཀའི་བདག་པོ། དེ་ཡང་ཁུངས་ངེས་པར་བསྟན་པ་འདི་ལྟར་ཏེ། འཁོར་ལོས་སྒྱུར་བའི་རྒྱལ་པོ་ལ་སྲས་དུ་མ་མངའ་ཡང༌། རིགས་ཀྱི་རྒྱུད་དུ་གང་ངེས་པར་བྱུང་ནས་དབང་ཐོབ་པར་གྱུར་ན། དེ་ལ་རྒྱལ་སྲིད་ཐམས་ཅད་འབངས་རྣམས་ཀྱིས་གང་དེར་བསྟབས་ཤིང་ཕུལ་བས། རྒྱལ་བའི་བཀའ་ལུང་གི་ཚིག་བཙན་ཞིང་གླིང་བཞི་སོགས་རང་ཡུལ་ལ་དབང་བསྒྱུར་བའི་བདག་པོ་གྱུར་ཏེ་མགོ་ནག་ཀུན་གྱིས་བཀུར་གནས་ཀྱི་སྤྱི་བོར་གྱུར་ནས་རྒྱལ་པོ་ཆེན་པོར་འགྱུར་བའི་དཔེ་ཇི་ལྟ་བ་དེ་བཞིན་དུ། རྒྱལ་ཚབ་སྐྱེས་བུ་རྣམས་ཀྱིས་ཆོས་ལྔ་དང་བྱ་བ་གཞན་ཐམས་ཅད་ཡོངས་སུ་རྫོགས་པར་གྱུར་ཏེ་མཐར་ལམ་དུ་ངེས་པ་ན། གདུལ་བར་བྱ་བ་ལྷ་དང་མིར་བཅས་པའི་འཇིག་རྟེན་དང་འཇིག་རྟེན་ལས་འདས་པའི་འཁོར་རྣམས་ཀྱིས་གུས་པར་འདུད་པས་སྟོན་པ་ཆོས་ཀྱི་རྒྱལ་པོར་མངའ་ཐང་བསྟབས་ཏེ་ཕུལ་བར་བྱས་པས་རྒྱལ་ཚབ་ཏུ་གྲགས་པ་དེ་ནས་མཛད་པ་མཐར་ཕྱུངས་ཏེ། བྱང་ཆུབ་མཆོག་ཏུ་མངོན་པར་རྫོགས་པར་སངས་རྒྱས་པར་འགྱུར་རོ། །དེ་ལྟར་ལོ་རྒྱུས་བསྙད་པས་ཡིད་ཆེས་པར་བྱས་ཏེ་ལང་ཀའི་བདག་པོ། གང་ལ་བསྐུར་ན་ད་ལྟར་ཆོས་ལྔ་དང་ལྡན་པའི་སྐྱེས་བུ་དམ་པ་རྒྱལ་བའི་རིགས་རྒྱུད་དུ་ངེས་པ་ལྔ་པོ་དེ་དག་ནི་བསྐུར་བའི་དུས་ཀྱི་རྒྱུའོ། །གང་དུ་བསྐུར་བའི་གནས་ནི། རྩལ་ཆེན་རྫོགས་པས་དབུགས་ཆེན་པོ་ཡོངས་སུ་ཕྱིན་པའི་གནས་འོག་མིན་ཆེན་པོ་ག་ན་བ་དེར། གང་གིས་བསྐུར་བའི་སློབ་དཔོན་ནི་དམ་པ་སངས་རྒྱས་རྣམས་ཀྱི་ཞིང་ཁམས་མཐའ་ཐུག་པ་མེད་པ་ནས་དབང་གི་དགོངས་པ་མཛད་པའིགཟུགས་སྐུའི་རྒྱལ་པ་དཔག་ཏུ་མེད་པ་ཀུན་གྱི་བཤེས་གཉེན་དམ་པ་དག དཔེ་ཇི་ལྟར་ན་ནམ་མཁའ་ལ་དབྱར་གྱི་སྤྲིན་དཔུང་བཞིན་དུ་ཡོངས་སུ་འདུ་བར་འདུས་ནས། ཇི་ལྟར་བསྐུར་བའི་ཐབས་ནི། གོང་དུ་བཤད་པའི་མཚུངས་པ་བཞི་མངའ་བའི་ཕྱིར་དེ་དག་ཀུན་ཀྱང་སྐུ་གསུམ་དབྱེར་མེད་རང་སྣང་ཆོས་ཀྱི་སྐུ་ལས་མ་གཡོས་པར་གསུངས་པ་མགྲིན་གཅིག་ཏུ་སྐུར་བར་༼༡༧༦༽མཛད་དོ། །ཞེས་རྒྱལ་བས་ཇི་ལྟར་བསྐུར་བའི་ཁུངས་བསྟན་པའོ།།

གཉིས་པ་རྒྱལ་ཚབ་ཏུ་གྲགས་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

རྒྱལ་ཚབ། ཅེས་པ་ནས། དབང་བསྐུར་རོ། །ཞེས་པའི་བར་གྱིས་བསྟན་ཏེ།

རྒྱལ་ཚབ་སྐྱེས་བུ་དམ་པ་ཆོས་ཀྱི་རྒྱལ་པོ་ཞེས་བྱ་བའི་མིང་གི་གྲགས་པའི་དབང་གིས་དབང་བསྐུར་རོ།།

སྤྱིར་ཏིང་ངེ་འཛིན་ལ་བརྟན་པ་ཅི་རིགས་ཐོབ་པའི་སློབ་དཔོན་གྱིས་ལྷག་པ་གཟུགས་བརྙན་གྱི་དཀྱིལ་འཁོར་དུ་སྐལ་ལྡན་གྱི་སློབ་མ་ལ་དབང་བསྐུར་བས་མོས་སློབ་ཙམ་གྱི་ནུས་པ་སྐྱེ་རུང་དུ་སྨིན་པ་དང༌། ལམ་ལྔ་གོང་མ་གོང་མ་ཐོབ་པའི་སློབ་དཔོན་གྱིས། སྤྲུལ་པའི་དཀྱིལ་འཁོར་དུ་འོག་མ་འོག་མར་གནས་པའི་སློབ་བུ་ལ་བསྐུར་བས། རང་ལམ་གོང་མར་སྨིན་པ་སོགས་དཀྱིལ་འཁོར་གསུམ་དུ་སློབ་དཔོན་གསུམ་གྱིས་རྒྱལ་སྲས་གསུམ་ལ་དབང་བསྐུར་བ་ནི་ཕྱི་ནང་གི་བཀའ་དུ་མ་ལས་གསུངས་ཏེ། དེས་ན་དེ་དག་ལས་འདིར་ནི་རང་བཞིན་གྱི་དཀྱིལ་འཁོར་དུ་རང་སྣང་ཆོས་ཀྱི་སྐུས་རིམ་པ་ཐ་མས་བྱ་བ་བཞི་རྫོགས་པར་འབྱུང་བ་ལ་དབང་བསྐུར་བས་བྱང་ཆུབ་རྡོ་རྗེ་སྙེད་དེ་ཞིང་ཀུན་ཏུ་གྲགས་པར་འགྱུར་བའི་དབང་དུ་སྟེ། རྗེས་སུ་འཇུག་པའི་ཡང་དོན་གྱིས་གསལ་ལོ། །དེ་ལ་རྒྱལ་ཚབ་ལྔའི་མཚན་གྱི་གྲགས་པ་རང་གི་ངོ་བོ་མདོར་བསྟན་ཏེ། རྒྱལ་ཚབ་སྐྱེས་བུ་དམ་པ་ཆོས་ཀྱི་རྒྱལ་པོ་ཞེས་བྱ་བའི་མིང་དུ་གྲགས་པའི་དབང་གིས་རྒྱལ་ཚབ་སྐྱེས་བུ་ལྔ་ལ་དབང་བསྐུར་རོ།།

གཉིས་པ་རྒྱས་པར་བཤད་པ་ལ་གཉིས་ཏེ། རྒྱལ་ཚབ་སྐྱེས་བུ་ཆོས་ལྔ་དང་ལྡན་པར་གྲགས་པ་ལ་བསྐུར་བ། རྒྱལ་ཚབ་སྐྱེས་བུ་ཉིད་དུ་གྲགས་པ་ལ་བསྐུར་བའོ། །དང་པོ་ལ་ལྔ་སྟེ། རིགས་ལྔའི་རྒྱུད་དུ་འབྱུང་བ། མཚན་དཔེ་དང་ལྡན་པ། ཐུགས་མཁྱེན་པའི་ཆོས་དང་ལྡན་པ། བསྡུ་བའི་འཁོར་དང་ལྡན་པ། དབང་བཅུ་ཐོབ་པར་གྲགས་པའོ། །དང་པོ་ནི།

དེ་ལྟར། ཞེས་པ་ནས། བྱིན་ནོ། །ཞེས་པའི་བར་གྱིས་བསྟན་ཏེ།

དེ་ལྟར་ལ་ལས་ནི་རྡོ་རྗེའི་གདུང་དང་སྡེའི་རྒྱུད་དུ་དབང་གིས་དབང་བྱིན་ནོ། །ལ་ལས་ནི་རིན་པོ་ཆེའི་གདུང་དང་སྡེའི་རྒྱུད་དུ་དབང་གིས་དབང་བྱིན་ནོ། །ལ་ལས་ནི་པདྨོའི་གདུང་དང་སྡེའི་རྒྱུད་དུ་དབང་གིས་དབང་བྱིན་ནོ། །ལ་ལས་ནི་གཞོན་ནུའི་གདུང་དང་སྡེའི་རྒྱུད་དུ་དབང་གིས་དབང་བྱིན་ནོ། །ལ་ལས་ནི་གླང་པོའི་གདུང་དང་སྡེའི་རྒྱུད་དུ་དབང་གིས་དབང་བྱིན་ནོ།།

དེ་རྣམས་སོ་སོར་གྲགས་པ་གང་ཞེ་ན། རྒྱལ་ཚབ་རྒྱུད་ཀྱི་སྟོན་པ་རྒྱལ་བ་རིགས་ལྔར་གྲགས་པའི་དབང་སྟེ། འདས་པ་ལ་སྙེགས་པ་དེ་ལྟར་ངོ་བོ་བསྟན་པ་འདི་ལྟ་སྟེ། ཕྱོགས་བཅུའི་རྒྱལ་བ་ཇི་སྙེད་པ་ཐམས་ཅད་དེ་བཞིན་གཤེགས་པ་རིགས་ལྔའི་སྐུར་མ་འདྲེས་པར་སོ་སོར་སྣང་བར་གྱུར་པའི་སྟོན་པ་རྡོ་རྗེའི་རིགས་མཆོག་ལ་ལས་རྡོ་རྗེའི་རིགས་འཚོབ་ཅིག་རྒྱུད་དུ་འབྱུང་བ་དེའི་ལུང་བསྟན་ཐོབ་པ་ནི། བཀར་བའི་སྒྲས་དམ་པ་ལྔ་ལས་རྡོ་རྗེ་སེམས་དཔའ་སྟེ་སྐལ་བ་དེ་བཞིན་དུ་ལྡན་པས་ཐུགས་རྡོ་རྗེའི་རིགས་ཀྱི་གཙོ་བོ་གདུང་དང༌། དེའི་རིགས་ཀྱི་འཁོར་རྣམས་སྡེའི་རྒྱུད་དུ་ངེས་པར་གྱུར་པའི་མིང་དང་རིགས་ཀྱི་དབང་གིས་དབང་བྱིན་ཅིང་བསྐུར་བས་༼༡༧༧༽རིགས་དེའི་བྱང་ཆུབ་རྡོ་རྗེའི་དེ་བཞིན་གཤེགས་པར་སངས་རྒྱས་ཏེ་ཐོབ་པའི་རྟགས་སུ་ཞིང་ཁམས་ཀུན་ཏུའང་དེ་ལྟར་ཡོངས་སུ་གྲགས་པ་ཡིན་ནོ། །རིགས་གཞན་བཞིའང་དེ་དང་རྗེས་སུ་མཐུན་པར། རཏྣའི་རིགས་མཆོག་ལ་ལས། རིན་པོ་ཆེའི་རིགས་འཚོབ་ཅིང་རྒྱུད་དུ་འབྱུང་བ་དེའི་ལུང་བསྟན་ཐོབ་པ་ནི་རིན་ཆེན་རྡོ་རྗེ་སྟེ་སྐལ་པ་དེ་བཞིན་དུ་ལྡན་པས་ཡོན་ཏན་རིན་པོ་ཆེའི་རིགས་ཀྱི་གདུང་དང་སྡེའི་རྒྱུད་དུ་ངེས་པའི་མིང་དང་རིགས་ཀྱི་དབང་གི་དབང་བྱིན་པས་བྱང་ཆུབ་རྡོ་རྗེར་སངས་རྒྱས་ཏེ་དེ་ལྟར་གྲགས་པའང་ཡིན་ནོ། །པངྨའི་རིགས་མཆོག་ལ་ལས། པངྨའི་རིགས་འཚོབ་ཅིང་རྒྱུད་དུ་འབྱུང་བ་དེའི་ལུང་བསྟན་ཐོབ་པ་ནི་རྡོ་རྗེ་ཆོས་ཏེ་སྐལ་པ་དེ་བཞིན་དུ་ལྡན་པས་གསུང་པངྨོའི་རིགས་ཀྱི་གདུང་དང་སྡེའི་རྒྱུད་དུ་ངེས་པའི་མིང་དང་རིགས་ཀྱི་དབང་གིས་དབང་བྱིན་པས་བྱང་ཆུབ་རྡོ་རྗེར་སངས་རྒྱས་ཏེ་ཡོངས་སུ་གྲགས་པའང་ཡིན་ནོ། །ཕྲིན་ལས་ཀྱི་རིགས་མཆོག་ལ་ལས་ལས་ཀྱི་རིགས་འཚོབ་ཅིང་རྒྱུད་དུ་འབྱུང་བ་དེའི་ལུང་བསྟན་ཐོབ་པ་ནི་ལས་ཀྱི་རྡོ་རྗེ་སྟེ་སྐལ་པ་དེ་བཞིན་དུ་ལྡན་པས་ཕྲིན་ལས་ལས་ཀྱི་རིགས་ཀྱི་གཞོན་ནུའི་གདུང་དང་སྡེའི་རྒྱུད་དུ་ངེས་པའི་མིང་དང་རིགས་ཀྱི་དབང་གིས་དབང་བྱིན་པས་བྱང་ཆུབ་རྡོ་རྗེར་སངས་རྒྱས་ཏེ་དེ་ལྟར་གྲགས་པའང་ཡིན་ནོ། །དེ་བཞིན་གཤེགས་པའི་རིགས་མཆོག་ལ་ལས་དེ་བཞིན་གཤེགས་པའི་རིགས་འཚོབ་ཅིང་རྒྱུད་དུ་འབྱུང་བ་དེའི་ལུང་བསྟན་ཐོབ་པ་ནི་རྡོ་རྗེ་དབྱིངས་ཏེ་སྐལ་བ་དེ་བཞིན་དུ་ལྡན་པས་སྐུ་དེ་བཞིན་གཤེགས་པ་གླང་པོའི་གདུང་དང་སྡེའི་རྒྱུད་དུ་ངེས་པའི་མིང་དང་རིགས་ཀྱི་དབང་གིས་དབང་བྱིན་པས་བྱང་ཆུབ་རྡོ་རྗེར་སངས་རྒྱས་ཏེ་ཞིང་ཀུན་ཏུ་དེ་ལྟར་གྲགས་པའང་ཡིན་ནོ། །སྤྱིར་རིགས་དེ་དག་ལ་ཐབས་གསུམ་གསུམ་སྟེ། དང་པོ་རྒྱལ་ཚབ་ལྔ་པོ་རང་རང་གི་རིགས་དང་མཐུན་པའི་སྟོན་པས་དབང་བསྐུར་བ་དང༌། དེ་ནས་ཕྱོགས་བཅུའི་རྒྱལ་བས་དབང་བསྐུར་བ་དང༌། དེ་ནས་ཕྱོགས་བཅུའི་རྒྱལ་བ་རིགས་དེ་དང་དེར་བསྟན་ནས་དབང་བསྐུར་བ་དང་གསུམ་མོ། །དེ་བཞིན་དུ་ལམ་པ་རྗེས་འཇུག་གི་མིང་གི་དབང་དུའང་སྦྱར་རོ།།

གཉིས་པ་མཚན་དཔེ་དང་ལྡན་པ་ནི།

ལ་ལས་ནི་མཚན་སོགས་ནས་བྱིན་ནོ། །ཞེས་པའི་བར་གྱིས་བསྟན་ཏེ།

ལ་ལས་ནི་མཚན་གྱི་འོད་ཟེར་གྱི་དབང་གིས་དབང་བྱིན་ནོ། །ལ་ལས་ནི་དཔེ་བྱད་ཀྱི་འོད་ཟེར་གྱི་དབང་གིས་དབང་བྱིན་ནོ། །ལ་ལས་ནི་རྒྱན་གྱི་འོད་ཟེར་གྱི་དབང་གིས་དབང་བྱིན་ནོ། །ལ་ལས་ནི་ཁ་དོག་དྲུག་གི་འོད་ཟེར་གྱི་དབང་གིས་དབང་བྱིན་ནོ།།

འདི་དག་དམ་པ་ལྔ་དང་འཆད་པའི་བཞི་ཐུན་མོང་དུ་ཡིན་ལ། གསུང་གིས་བསྐུར་བའི་རྗེས་སུ་སྐུ་ཡིས་བསྐུར་ཏེ་སྐུའི་རྒྱན་དང་ལྡན་པར་གྲགས་པ་སྟེ་ལ་ལས་༼༡༧༨༽ཞེས་བཀར་བ་ནི་རྒྱལ་བ་ཇི་སྙེད་པའི་ཕྱིར་སོ་སོར་དབང་བསྐུར་བ་མ་འདྲེས་པའོ། །དེའང་སྟོན་པའི་མཚན་སུམ་ཅུ་རྩ་གཉིས་ཀྱི་གཙུག་ཏོར་ལྟ་བུ་ལ་སོགས་པ་ནས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་དྲུག་ཅུ་དྲུག་བཅུ་བྱུང་ནས་གདུལ་བྱའི་རྒྱུད་སྦྱངས། ཚུར་འདུས་པས་རྒྱལ་ཚབ་ཀྱི་གནས་དེ་དང་དེར་ཐིམ་པས་བྱིན་གྱིས་བརླབས་ཀྱི་དབང་གིས་དབང་བྱིན་ཏེ་བསྐུར་བས་མཚན་གྱི་ཡོན་ཏན་རྣམས་ཡོངས་སུ་རྫོགས་པ་ཡིན་ནོ། །སྟོན་པ་ལ་ལས་ནི་དཔེ་བྱད་བཟང་པོ་བརྒྱད་ཅུའི་གནས་རྣམས་ཀྱི་འོད་ཟེར་བཀྱེ་ནས་སླར་འདུས་པ་རྒྱལ་ཚབ་ཀྱི་གནས་དེ་དང་དེར་ཐིམ་པས་བྱིན་རླབས་ཀྱི་དབང་གིས་དབང་བྱིན་པས་དཔེ་བྱད་བཟང་པོ་ཡོངས་སུ་རྫོགས་པ་དང་ལྡན་ནོ། །ལ་ལས་ནི་དབུ་རྒྱན་ལ་སོགས་པ་བྱང་ཆུབ་ཀྱི་ཡན་ལག་བདུན། འཕགས་པའི་ལམ་ཡན་ལག་བརྒྱད། སྐུ་གསུང་ཐུགས་ཡོན་ཏན་ཕྲིན་ལས་ལྔའི་རྟགས་དང་ལྡན་པའི་རྒྱན་གྱི་གནས་ལས་བྱུང་བའི་འོད་ཟེར་གྱི་བྱིན་གྱིས་བརླབས་པས་དབང་གིས་དབང་བྱིན་ནོ། །ལ་ལས་ནི་ཡེ་ཤེས་དྲུག་གི་རྟགས་སྔོན་པོ་རྡོ་རྗེའི་རིགས་དང་སེར་པོ་རཏྣའི་རིགས་སོགས་ཁ་དོག་དྲུག་གི་གནས་ལས་བྱུང་བའི་འོད་ཟེར་གྱི་དབང་གིས་རིགས་ལྔའི་སྐུ་མདོག་དང་འོད་སྣ་ཚོགས་ཀྱི་དབང་བྱིན་པས་མཐུན་པ་དང་མི་མཐུན་པ་གཉིས་ཀའི་ཡོན་ཏན་ཡོངས་སུ་རྫོགས་པ་དང་ལྡན་ནོ།།

གསུམ་པ་ཐུགས་མཁྱེན་པའི་ཆོས་དང་ལྡན་པ་ནི།

ལ་ལས་ནི་ཆོས་མ་འདྲེས་ཞེས་པ་ནས། བྱིན་ནོ། །ཞེས་པའི་བར་གྱིས་བསྟན་ཏེ།

ལ་ལས་ནི་ཆོས་མ་འདྲེས་པའི་དབང་གིས་དབང་བྱིན་ནོ། །ལ་ལས་ནི་སྟོབས་བཅུའི་དབང་གིས་དབང་བྱིན་ནོ། །ལ་ལས་ནི་མི་འཇིགས་པ་བཞིའི་དབང་གིས་དབང་བྱིན་ནོ། །ལ་ལས་ནི་སོ་སོ་ཡང་དག་པར་རིག་པའི་དབང་གིས་དབང་བྱིན་ནོ།།

གསུང་དང་ཐུགས་ཀྱིས་བསྐུར་པ་ཐུན་མོང་དུ་བསྟན་ཏེ། མཁྱེན་པའི་ཐུགས་དང་ལྡན་པར་གྲགས་པའི་དབང་སྟེ། ལ་ལས་ནི་རྫོགས་པའི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཡོངས་སུ་རྫོགས་པའི་དབང་གིས་དབང་དམ་པ་བྱིན་ནོ། །ལ་ལས་ནི་མཁྱེན་པ་ཆགས་ཐོགས་མེད་པས་སྟོབས་བཅུའི་དབང་གིས་དབང་བྱིན་ནོ། །ལ་ལས་ནི་མི་འཇིགས་པའི་བཞིའི་དབང་གིས་དབང་མཆོག་བྱིན་ནོ། །ལ་ལས་ནི་ཐུན་མོང་མིན་པས་སོ་སོ་ཡང་དག་པར་རིག་པ་བཞིའི་དབང་གིས་དབང་བྱིན་ཏེ་དེ་དག་གི་དོན་བརྡ་འཇལ་ཞིང་ཐོབ་པར་བྱས་པ་ཡིན་ནོ། །འདི་དག་ཐུགས་ཀའི་འོད་ཀྱིས་ཀྱང་བསྐུར་ཞིང་ཐོབ་པ་ཡིན་ལ། ཕྱི་མ་གསུམ་གླང་པོ་ཆེ་དང༌། སེང་གེ་དང༌། ཤང་ཤང་ཏེའུའི་ཁྲི་ཡི་རྟགས་དང་ཡང་སྦྱར་ཏེ་གཞན་གཉིས་ཀྱང་མཚོན་ནོ།།

བཞི་པ་བསྡུ་བའི་འཁོར་དང་ལྡན་པ་ནི།

ལ་ལས་ནི་མཐུན་པས། ཞེས་པ་ནས། བྱིན་ནོ། །ཞེས་པའི་བར་གྱིས་བསྟན་ཏེ།

ལ་ལས་ནི་མཐུན་པས་བསྡུ་བའི་དབང་གིས་དབང་བྱིན་ནོ། །ལ་ལས་ནི་ཕྱོགས་མེད་པར་བསྡུ་བའི་དབང་གིས་དབང་བྱིན་ནོ། །ལ་ལས་ནི་གཏོང་བས་བསྡུ་བའི་དབང་གིས་དབང་བྱིན་ནོ། །ལ་ལས་ནི་སྤྱོད་པས་བསྡུ་བའི་དབང་གིས་དབང་བྱིན་ནོ། །ལ་ལས་ནི་སྤྱོད་པ་འཐུན་པའི་དབང་གིས་དབང་བྱིན་ནོ། །ལ་ལས་ནི་འདྲེན་པས་བསྡུ་བའི་དབང་གིས་དབང་བྱིན་ནོ། །ལ་ལས་ནི་དབང་གིས་བསྡུ་བའི་དབང་གིས་དབང་བྱིན་ནོ། །ལ་ལས་ནི་མཉམ་པས་བསྡུ་བའི་དབང་གིས་དབང་བྱིན་ནོ། །ལ་ལས་ནི་རག་ལས་པས་བསྡུ་བའི་དབང་གིས་དབང་བྱིན་ནོ། །ལ་ལས་ནི་རྒྱུས་བསྡུ་བའི་དབང་གིས་དབང་བྱིན་ནོ། །ལ་ལས་ནི་འབྲས་བུས་བསྡུ་བའི་དབང་གིས་དབང་བྱིན་ནོ།།

སྤྱོད་པ་དང་ཕྲིན་ལས་འདྲེན་མར་གྲགས་པའི་བསྡུ་བའི་དངོས་༼༡༧༩༽པོ་བཞིས་དབང་བསྐུར་བ་སྟེ། ལ་ལས་ནི་གདུལ་བྱ་དང་ཆོས་ལུགས་དོན་མཐུན་པར་གྱུར་པས་འཁོར་རྣམས་བསྡུ་བའི་དབང་གིས་དབང་བྱིན་ནོ། །ལ་ལས་ནི་སྙན་པར་སྨྲ་བས་ཕྱོགས་མེད་ཅིང་རིས་མི་འབྱེད་པར་བསྡུ་བའི་དབང་གིས་དབང་བྱིན་ནོ། །ལ་ལས་ནི་ཕྱི་ནང་གི་དངོས་པོ་གང་ལའང་མ་ཆགས་པར་གཏོང་བའི་སྦྱིན་པས་བསྡུ་བའི་དབང་གིས་དབང་བྱིན་ནོ། །ལ་ལས་ནི་བདག་ཉིད་དོན་དང་མཐུན་པར་སྤྱོད་པས་འཁོར་བསྡུ་བའི་དབང་གིས་དབང་བྱིན་ནོ། །ལ་ལས་ནི་ལུས་ངག་གི་མཛད་སྤྱོད་གདུལ་བྱའི་བསམ་པ་དང་ཆ་མཐུན་པས་དད་ཅིང་འཁོར་དང་ལོངས་སྤྱོད་སྐྱོན་མེད་པར་དབང་དུ་སྡུད་པའི་དབང་གིས་དབང་བྱིན་ནོ། །ལ་ལས་ནི་སྙན་པར་སྨྲ་བ་དང་གདམས་ངག་ནན་ཏན་གྱི་ལུང་ལྟ་བུ་ཐབས་ཀྱིས་འདྲེན་པར་མཛད་པས་བསྡུ་བའི་དབང་གིས་དབང་བྱིན་ནོ། །ལ་ལས་ནི་ཕྲིན་ལས་བཞིའི་དབང་གིས་མངའ་དབང་དུ་རང་དབང་མེད་པར་བསྡུ་བར་བྱེད་པའི་དབང་གིས་དབང་བྱིན་ནོ། །ལ་ལས་ནི་བླང་དོར་རིས་མི་འབྱེད་པར་མཉམ་པའི་ངང་ལ་བཟང་ངན་དུ་མི་འཛིན་པས་བསྡུ་བའི་དབང་གིས་དབང་བྱིན་ནོ། །དེ་ཡང་དོན་སྤྱོད་པ་དང་མཐུན་པའི་རིམ་པའོ། །ལ་ལས་ནི་འབྲས་བུ་དང་ཡོན་ཏན་གྱི་བདག་ཉིད་ཆེན་པོས་ཆེ་བ་ཀུན་དང་ལྡན་ཀྱང་གཞན་གྱི་ཐུགས་རྗེ་དང་རྟོགས་པ་ལ་རག་ལས་པར་གྱུར་པས་བསྡུ་བའི་དབང་གིས་དབང་བྱིན་ནོ། །ལ་ལས་ནི་མཚན་ཉིད་ཀྱི་ཐེག་པའི་དོན་བསྟན་ཏེ་རྒྱུས་བསྡུ་བའི་དབང་གིས་དབང་བྱིན་ནོ། །ལ་ལས་ནི་གསང་སྔགས་རྡོ་རྗེའི་ཐེག་པའི་དོན་བསྟན་ཏེ་འབྲས་བུས་བསྡུ་བའི་དབང་གིས་དབང་བྱིན་ནོ། །དེ་གཉིས་ནི་སྦྱིན་དང་སྙན་པར་སྨྲ་བ་དང་དོན་སྤྱོད་པའོ། །འོ་ན་བསྡུ་བ་བཞི་ལ་བཅུ་གཅིག་ཏུ་བརྗོད་པ་ཅི་ཞེ་ན། སྤྱིར་རྒྱལ་བ་ཐ་དད་རེ་རེས་བསྐུར་བའི་ཕྱིར་དང་རྩ་བ་བཞིའང་བསྡུ་བའི་ཡོན་ཏན་གྱི་སྒོ་ནས་སྤྱོད་པ་དང་ཕྲིན་ལས་ཐ་དད་ཀྱིས་འཁོར་དང་གདུལ་བྱ་སྡུད་པའི་བྱེ་བྲག་ཐ་དད་པའི་ཕྱིར་ཏེ་ཕྱོགས་གཅིག་ཏུ་འགྲུབ་པར་བསྟན་དཀའོ།།

ལྔ་པ་དབང་བཅུ་ཐོབ་པར་གྲགས་པ་ནི།

ལ་ལས་ནི་གང་དུ། ཞེས་པ་ནས། བྱིན་ནོ། །ཞེས་པའི་བར་གྱིས་བསྟན་ཏེ།

ལ་ལས་ནི་གང་དུ་དབང་བའི་དབང་གིས་དབང་བྱིན་ནོ། །ལ་ལས་ནི་རྣམ་པར་རིག་པའི་དབང་གིས་དབང་བྱིན་ནོ། །ལ་ལས་ནི་དགའ་བའི་དབང་དུ་འབྱུང་བའི་དབང་གིས་དབང་བྱིན་ནོ། །ལ་ལས་ནི་ཡོངས་སུ་བཀོད་པའི་དབང་གིས་དབང་བྱིན་ནོ། །ལ་ལས་ནི་ཀུན་ལ་འཇུག་པའི་དབང་གིས་དབང་བྱིན་ནོ། །ལ་ལས་ནི་ཀུན་ཏུ་མྱུར་བའི་དབང་གིས་དབང་བྱིན་ནོ། །ལ་ལས་ནི་ཇི་ལྟར་གནས་པའི་དབང་གིས་དབང་བྱིན་ནོ། །ལ་ལས་ནི་ཇི་ལྟ་བ་བཞིན་དུ་སྤྱོད་པའི་དབང་གིས་དབང་བྱིན་ནོ། །ལ་ལས་ནི་སྐྱེ་འགག་མེད་པར་མཐོང་བའི་དབང་གིས་དབང་བྱིན་ནོ། །ལ་ལས་ནི་ཅིར་ཡང་སྣང་བས་དབང་གིས་དབང་བྱིན་ནོ།།

རྒྱལ་བ་དེ་སྙེད་པས་དབང་བཅུའི་དབང་བསྐུར་བས་དབང་བཅུ་ཐོབ་པར་གྲགས་པའི་དབང་སྟེ། ལ་ལས་ནི་བདག་ཉིད་གནས་གང་དུ་ཅི་ཙམ་གནས་པར་འདོད་པའི་བར་དུ་བཞུགས་ཀྱང་སྐྱོན་གྱིས་མི་གོས་པར་གནས་པས་ཚེ་ལ་དབང་བའི་དབང་གིས་དབང་བྱིན་ནོ། །ལ་ལས་ནི་ཤེས་བྱ་རྣམ་པར་ཤེས་ཤིང་འགྲོ་བ་ཀུན་གྱི་སེམས་རྒྱུད་༼༡༨༠༽རིག་པས་བློ་གྲོས་དང་ཉོན་མོངས་ཆེ་ཆུང་མཁྱེན་པ་སེམས་ལ་དབང་བའི་དབང་གིས་དབང་བྱིན་ནོ། །ལ་ལས་ནི་རང་ཉིད་གང་དུ་སྐྱེ་བ་ལ་དགའ་བ་དེར་སྐྱེ་བ་བཞིར་བསྟན་ཏེ་གདུལ་བྱ་རྣམས་བསྒྲལ་བ་དང༌། སྐྱེ་བས་མ་གོས་པས་སྐྱེ་བ་ལ་རང་དབང་དུ་གྱུར་པའི་དབང་གིས་དབང་བྱིན་ནོ། །ལ་ལས་ནི་འདོད་ཡོན་ལྔ་ལ་ཇི་ལྟར་འདོད་པར་སྤྱོད་པ་ཡོངས་སུ་བཀོད་དེ་བདག་གཞན་གྱི་དོན་རྫོགས་པར་སྦྱོར་ཞིང་འབྱིན་ནུས་པས་རྒྱུ་རྫོགས་པ་ཡོ་བྱད་ལ་དབང་བའི་དབང་གིས་དབང་བྱིན་ནོ། །ལ་ལས་ནི་ཐེག་པའི་སྒོ་ཀུན་ལ་རབ་ཏུ་འཇུག་པ་གསུང་རབ་རྒྱ་མཚོ་དང་ཆོས་ཀྱི་ཕུང་པོ་དཔག་ཏུ་མེད་པ་ལ་མངའ་བརྙེས་པས་ཆོས་ལ་དབང་བའི་དབང་གིས་དབང་བྱིན་ནོ། །ལ་ལས་ནི་སྐུ་གསུང་ཐུགས་ཀྱི་སྤྲུལ་པས་སྐད་ཅིག་གིས་བྱ་བ་བྱེད་ནུས་པས་ཀུན་ཏུ་མྱུར་བ་རྫུ་འཕྲུལ་ལ་དབང་བའི་དབང་གིས་དབང་བྱིན་ནོ། །ལ་ལས་ནི་གདུལ་བྱའི་བསམ་པ་ཇི་ལྟར་གནས་པའི་མོས་པ་དང་མཐུན་པར་སྐུ་གསུང་ཐུགས་ཀྱི་སྣང་བ་སྣ་ཚོགས་སྟོན་པ་ལ་མངའ་བསྒྱུར་བས་མོས་པ་ལ་དབང་བའི་དབང་གིས་དབང་བྱིན་ནོ། །ལ་ལས་ནི་བདག་གཞན་གྱི་དོན་ཇི་ལྟ་བ་བཞིན་དུ་དགའ་མགུར་སྤྱོད་པའི་ཕྲིན་ལས་བཞི་ལ་མངའ་བརྙེས་པས་ལས་ལ་དབང་བའི་དབང་གིས་དབང་བྱིན་ནོ། །ཁྱེའུ་ལྔ་ནི་རེ་རེ་ལའང་བཞི་ཀ་དང་ལྡན་པར་དབང་བསྐུར་རོ། །ལ་ལས་ནི་སངས་རྒྱས་ཀུན་གྱི་ཐུགས་ཆོས་ཉིད་སྐྱེ་འགག་མེད་པ་ཇི་བཞིན་པར་མཐོང་ནས་ཇི་སྙེད་པའི་ཆོས་མ་འདྲེས་པར་མཁྱེན་པས་ཡེ་ཤེས་ལ་དབང་བའི་དབང་གིས་དབང་བྱིན་ནོ། །ལ་ལས་ནི་ཐུགས་རྗེའི་དབང་གིས་ཅིར་ཡང་སྣང་བ་འདོད་པ་ཐ་དད་གྲུབ་པས་སྨོན་ལམ་ལ་དབང་བའི་དབང་གིས་དབང་བྱིན་ནོ། །དེའང་དགར་བའི་སྒྲས་དེ་རྣམས་ཀྱི་ཡོན་ཏན་མངའ་བའི་རྒྱལ་བ་རེ་རེས་བསྐུར་ཏེ་དབྱར་གྱི་སྤྲིན་ཕུང་ཇི་སྙེད་ལ་ངོས་གཟུང་བར་དཀའོ། །འདི་དག་སྐྱེས་བུ་ལྔ་ལ་ནི་ཐུན་མོང་བར་ཤེས་པར་བྱའོ། །དམ་པ་ཏོག་དཀར་པོ་དང༌། དོན་གྲུབ་དང༌། ཤཱཀྱ་ཐུབ་པ་དང༌། ཕྱག་ན་རྡོ་རྗེ་བཞི་ལ་ནི་ཕལ་ཆེ་བའི་དབང་ནས་སོ་སོར་མང་ཉུང་བསྟན་པར་ཡངས་པའི་རིམ་པས་ཕྱེ་བའི་སྐལ་བས་བསྟན་དུའང་རུང་ན་དེ་དག་ཀྱང་ཐུན་མོང་དུ་སྨྲའོ།།

གཉིས་པ་རྒྱལ་ཚབ་སྐྱེས་བུ་ཉིད་དུ་གྲགས་པ་ལ་བསྐུར་བ་ནི།

ལ་ལས་ནི་རྒྱལ་ཚབ། ཅེས་པ་ནས། བྱིན་ནོ། །ཞེས་པའི་བར་གྱིས་བསྟན་ཏེ།

ལ་ལས་ནི་རྒྱལ་ཚབ་སྐྱེས་བུའི་དབང་གིས་དབང་བྱིན་ནོ། །ལ་ལས་ནི་བྱིན་གྱིས་བརླབས་ཀྱི་དབང་གིས་དབང་བྱིན་ནོ། །ལ་ལས་ནི་ལུང་སྟོན་པའི་དབང་གིས་དབང་བྱིན་ནོ། །ལ་ལས་ནི་རྩལ་ཆེན་ནུས་པའི་དབང་གིས་དབང་བྱིན་ནོ།།

དེའང་རྒྱལ་ཚབ་ཉིད་དུ་གྲགས་པ་བཞིའི་དབང་འདི་ཉིད་སྐྱེས་བུ་ལྔའི་དབང་དུ་ཐུན་མོང་དུ་ཤེས་པར་བྱ་ལ། བཀའ་སྤྱི་གཞུང་གི་སྐྱེས་བུ་བཞི་པོ་དག་གི་དབང་༼༡༨༡༽དུ་ཚིག་དོན་གྱི་གྲངས་ཀྱང་རྗེས་སུ་མཐུན་པར་འབྱུང་བས་སོ་སོར་ཤེས་པར་བྱ་སྟེ། ལ་ལས་ནི་དམ་པ་ལྔ་ལ་སྤྲུལ་པའི་རྒྱལ་ཚབ་ཀྱི་སྐྱེས་བུའི་དབང་གིས་དབང་བྱིན་པས་ཞིང་ཀུན་ཏུ་སྤྲུལ་སྐུའི་རྒྱལ་ཚབ་ཏུ་གྲགས་པ་ཡིན་ནོ། །ཚུལ་བསྟན་གྱི་དབང་དུ་དང་པོར་བྱང་ཆུབ་སེམས་དཔའ་དམ་པ་ཏོག་དཀར་པོ་ཞེས་བྱ་བ་དེ་ནི་ཆོས་ཀྱི་རྒྱལ་སར་འབྱུང་བའི་དུས་ལ་བབ་པའི་ཕྱིར་དགའ་ལྡན་གྱི་གནས་སུ་ཕྱོགས་བཅུའི་རྒྱལ་བས་ཆོས་ཀྱི་རྒྱལ་པོ་ལྟ་བུར་བསྟན་ནས་རིན་པོ་ཆེ་འོད་སྟོང་འབར་བའི་རྫས་ལ་བརྟེན་ཏེ་ཆོས་ཀྱི་རྒྱལ་པོའི་དབང་དང༌། སྟོན་པའི་རིགས་འཚོབ་པས་རྒྱུད་ཀྱི་ཆུ་བོའི་དབང་དང༌། རྒྱལ་ཚབ་སྐྱེས་བུའི་དབང་བྱིན་ཏེ་ཐོབ་པས་ཆོས་ཀྱི་རྒྱལ་ཚབ་ཉིད་དུ་གྱུར་པའི་རྟགས་མངོན་དུ་སྣང་བར་གྱུར་ཏོ། །དེ་ནིརྒྱལ་ཚབ་ཀྱི་དབང་སྟེ་དོན་བདུན་ནི་འཆད་པ་རྣམས་ལའང་སྦྱར་རོ། །ལ་ལས་ནི་མངོན་པར་བྱང་ཆུབ་པ་ལྔས་བྱིན་གྱི་རླབས་ཀྱིས་ལོངས་སྤྱོད་རྫོགས་སྐུར་རིགས་ལྔར་སངས་རྒྱས་པའི་དབང་གིས་དབང་བྱིན་པས་ལོངས་སྐུའི་རྒྱལ་ཚབ་ཏུ་གྲགས་པ་ཡིན་ནོ། །ཚུལ་བསྟན་གྱི་དབང་དུ་མི་ཡུལ་དུ་རྒྱལ་བུ་དོན་གྲུབ་ཏུ་མཚན་གྲགས་པ་དེ་ལོངས་སྤྱོད་རྫོགས་པའི་སྐུ་རྣམ་པར་སྣང་མཛད་གཉིས་པར་འཚང་རྒྱ་བའི་དུས་ལ་བབ་པའི་ཕྱིར་འོག་མིན་ཁང་བུ་བརྩེགས་པའི་གཞལ་ཡས་སུ། རྒྱལ་བ་རིལ་རིགས་ལྔའི་སྐུར་སྣང་བས་ནཻ་རཉྫ་ནར་དཀའ་ཐུབ་བྱེད་པ་ལ་བསྐུལ་ཏེ་ཡེ་ཤེས་ཀྱི་ལུས་འོག་མིན་དུ་གཤེགས་པ་ལས་ཉི་ཟླ་རྡོ་རྗེ་འབར་བའི་རྫས་ལ་བརྟེན་ནས་མངོན་པར་བྱང་ཆུབ་པ་ལྔས་བསྟབས་ཏེ། ལོངས་སྤྱོད་རྫོགས་པར་བྱིན་གྱིས་བརླབས་ནས་ལོངས་སྤྱོད་རྫོགས་པའི་དབང་ཉིད་དང༌། ལོངས་སྤྱོད་རྫོགས་པར་འབྱུང་བའི་ཆུ་བོ་དང༌། ཐབས་ལྔས་སྣང་མཛད་དུ་བྱིན་གྱིས་བརླབས་པས་རྟགས་ནི་ལོངས་སྤྱོད་རྫོགས་པ་ཉིད་དུ་གྱུར་ཏོ། །དེས་སྒྲོན་མེའི་རྒྱལ་ཚབ་ཤཱཀྱ་ཐུབ་པ་ཉིད་སྤྲུལ་ནུས་པའོ། །ལ་ལས་ནི་རིགས་ལྔའི་རྒྱལ་བར་ལུང་བསྟན་པའི་དབང་གིས་དབང་བྱིན་པས་ཞིང་རྣམས་ཀྱི་སྒྲོན་མའི་རྒྱལ་ཚབ་ཏུ་གྲགས་པ་ཡིན་ནོ། །ཚུལ་བསྟན་དུ། བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་མཚན་གྲགས་པ་དེ་ཆོས་ཀྱི་སྒྲོན་མར་ལུང་མངོན་དུ་ཐོབ་པའི་ཕྱིར་སྙིང་པོ་བྱང་ཆུབ་འོག་མིན་ཆེན་པོར་ཕྱོགས་བཅུའི་རྒྱལ་བ་མང་པོས་འཁོར་ལོ་ལ་སོགས་པའི་རིགས་ཀྱི་ཕྱག་རྒྱ་མང་པོའི་རྫས་ལ་བརྟེན་ནས་ཆོས་ཀྱི་སྒྲོན་མའི་བྱ་བ་བྱེད་པའི་དབང་དང༌། ཞིང་ཁམས་ཀུན་ཏུ་ཐུབ་པའི་དབང་པོར་གྲགས་པའི་ཆུ་བོ་དང་༼༡༨༢༽ཆོས་ཀྱི་སྒྲོན་མར་ལུང་སྟོན་པའི་དབང་བྱིན་པས་རྟགས་ཆོས་ཀྱི་མངའ་དབང་ཉིད་དུ་གྱུར་ནས་འཁོོར་ལོ་བསྐོར་རོ། །ལ་ལས་ནི་གསང་བ་དམ་པ་འཆད་ཅིང་འཛིན་པའི་རྩལ་ཆེན་ནུས་པའི་དབང་གིས་དབང་བྱིན་པས་གསང་བ་དམ་པའི་བདག་པོར་ཞིང་རྣམས་སུ་གྲགས་པ་ཡིན་ནོ། །ཚུལ་བསྟན་ལྟར་ན། གསང་བདག་ཕྱག་ན་རྡོ་རྗེ་དེ་གསང་སྔགས་རྡོ་རྗེ་ཐེག་པའི་མཛོད་ཟབ་མོ་མཐའ་དག་འཛིན་པའི་དུས་ལ་བབ་པའི་ཕྱིར་དབང་བསྒྱུར་གྱི་ཁང་བཟང་དང༌། གྱད་ཡུལ་དུ་ལོངས་སྤྱོད་རྫོགས་པ་དང་སྤྲུལ་པའི་སྐུས་རྡོ་རྗེ་ཕ་ལམ་ལྟ་བུའི་རྫས་ལ་བརྟེན་ནས་གསང་བའི་མཛོད་ཀྱི་བདག་པོ་བྱེད་པ་དང༌། དོན་ཟབ་མོ་མཐར་རྫོགས་པའི་ཆུ་བོ་དང༌། མཐུ་སྟོབས་ཁྱད་པར་ཅན་དུ་གྱུར་པས་གསང་བ་འཛིན་ཅིང་སྟོན་པས་ལོག་སྡེ་ཚར་གཅོད་པའི་དབང་བྱིན་པས་གསང་བདག་ཉིད་དུ་མངོན་དུ་གྱུར་པའི་རྟགས་དང་ལྡན་ནོ། །འོ་ན་དམ་པ་ཏོག་དཀར་སྤྲུལ་པའི་རྒྱལ་ཚབ་ཏུ་དབང་བསྐུར་བ་དང་ཤཱཀ་ཐུབ་སྒྲོན་མའི་རྒྱལ་ཚབ་ཏུ་དབང་བསྐུར་བ་ལ་ཁྱད་པར་ཅི་ཡོད་ཅེ་ན། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའི་ཚུལ་གྱིས་སྐྱེ་བ་སྤྲུལ་པའི་སྐུར་དབང་བསྐུར་བ་དང་བྱང་ཆུབ་ཆེན་པོ་སངས་རྒྱས་ཉིད་དུ་དབང་བསྐུར་བའི་ཁྱད་པར་རོ། །རྗེས་འཇུག་གི་དབང་གི་ཆུ་བོ་བཞི་ནི། ཕྱིའི་ཕན་དབང་དང༌། བྱང་ཆུབ་སེམས་ཀྱི་དབང་དང༌། ཤེས་རབ་ཡེ་ཤེས་དང༌། བདེ་བ་ཆེན་པོར་བསྙད་དོ། །འདི་དག་ཨ་ནུའི་རང་ལམ་དུ་བླ་མ་དམ་པས་སློབ་མ་སྐྱེས་བུ་བཞི་བྱིན་གྱིས་བརླབས་པ་དང་ཡང་སྦྱར་རོ།།

གསུམ་པ་རྒྱུན་མ་ཆད་ཆུ་བོ་ནི།

ལ་ལས་ནི་རྒྱུད་ཀྱི། ཞེས་པ་ནས། བྱིན་ནོ། །ཞེས་པའི་བར་གྱིས་བསྟན་ཏེ།

ལ་ལས་ནི་རྒྱུད་ཀྱི་ཆུ་བོའི་དབང་གིས་དབང་བྱིན་ནོ། །ལ་ལས་ནི་འབྱུང་བའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་གྲགས་པའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་རྫོགས་པའི་ཆུ་བོའི་དབང་གིས་དབང་བྱིན་ནོ།།

དེའང་རྒྱལ་ཚབ་སྐྱེས་བུ་ལྔ་ལ་ཐུན་མོང་དུ་བསྐུར་བ་ཡིན་ལ། ཚུལ་བསྟན་གྱི་དབང་དུ་དམ་པ་བཞི་ལ་ཕལ་ཆེར་སྐལ་བ་ཆེ་ཆུང་གིས་བསྐུར་བས་ཐུན་མོང་མ་ཡིན་པ་སྟེ། དེ་རྣམས་བཤད་པས་སྔ་མ་རྣམས་ཀྱང་མཐར་ལམ་གསུམ་རྫོགས་པའི་ཚུལ་གྱིས་ཆོས་ཀྱི་རྒྱལ་པོ་དམ་པར་ཞིང་ཀུན་ཏུ་ཡོངས་སུ་གྲགས་པར་རྟོགས་ནུས་པར་བྱའོ། །ལ་ལས་ནི་དམ་པ་ཏོག་དཀར་པོ་ཉིད་སྤྲུལ་པའི་རྒྱལ་བ་མཐར་ཐུག་པ་མེད་པར་རྒྱུན་དུ་འབྱུང་བས་རྣམ་འདྲེན་སྟོང་གི་རྒྱུད་དུ་བྱུང་བ་དཔེ་ཆུ་བོ་དང་འདྲ་བར་རྒྱུད་ཀྱི་ཆུ་བོ་དབང་གིས་དབང་བྱིན་ནོ། །ལ་ལས་ནི་དོན་ཀུན་གྲུབ་པ་ཉིད་ཆོས་ཀྱི་རྒྱལ་པོ་ལོངས་སྤྱོད་རྫོགས་པ་ཆེན་པོ་ཞིང་དག་པ་དང་འཁོར་སྨིན་པ་རྒྱ་མཚོ་བར་མ་ཆད་པར་འབྱུང་བའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་ཤཱཀྱ་ཐུབ་པ་ཉིད་སྟོང་གསུམ་གྱི་སྟོང་༼༡༨༣༽ཆེན་པོ་རེ་རེར་སྤྲུལ་པ་རེ་རེས་ཞིང་ཁམས་ཀྱི་སྒྲོན་མར་རྒྱུན་དུ་གྲགས་པས་ཞིང་ཁམས་ཐ་དད་དུ་སྒྲོན་མར་གྱུར་པའམ་གྲགས་པའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་ཕྱག་ན་རྡོ་རྗེ་ཉིད་རྒྱལ་བ་ཀུན་གྱི་གསང་བ་གསུམ་གྱི་རྩལ་རྫོགས་པས་གསང་བའི་མཛོད་ཀྱི་བདག་པོར་བྱིན་གྱིས་བརླབས་ཏེ་གསང་བ་མཆོག་གི་དོན་ཀུན་རྫོགས་པའི་ཆུ་བོའི་དབང་གིས་དབང་བྱིན་ནོ། །དེའང་ཀུན་འདུས་ལས། འདུས་པ་ཆེན་པོའི་རྣལ་འབྱོར་པ། །སྲིད་པ་གསུམ་གྱིས་ཕྱག་བྱས་པའི། །བླ་མའི་ས་ལ་གནས་པ་ཡི། །དབང་མཆོག་སུམ་ཅུ་རྩ་དྲུག་ཡིན། །ཕྱི་ཡི་དབང་དང་ནང་གི་དབང༌། །སྒྲུབ་པའི་དབང་དང་གསང་བའི་དབང༌། །བཅུ་དང་བཅུ་གཅིག་བཅུ་གསུམ་དང༌། །རྣམ་པ་གཉིས་ཀྱིས་རྫོགས་པར་འགྱུར། །ཞེས་དང༌། བཤད་རྒྱུད་རྔམ་གློག་ལས་ཀྱང༌། དང་པོ་ཕྱི་ཡི་དབང་བཅུ་བསྐུར། །དེ་ནས་ནང་དབང་བཅུ་དང་གཅིག །དེ་ནས་སྒྲུབ་དབང་བཅུ་དང་སུམ། །ཐ་མར་གསང་བ་རྣམ་པ་གཉིས། །བཅུ་ཕྲག་གསུམ་དང་དྲུག་དག་གིས། །དབང་མཆོག་དམ་པ་བསྐུར་བ་ཡིན། །ཞེས་གསུངས་པ་ལྟར་དཔལ་ལྡན་འདུས་པ་མདོའི་ཆུ་བོ་ཆེན་པོ་བཞིའི་དབང་སྟེ་སྤྱིར་དབང་ལ་རྒྱུ་ལམ་འབྲས་བུའི་དབང་གསུམ་ལས་འདིར་འབྲས་དུས་ཀྱི་དབང་གི་རིགས་སུ་འདུ་བ་ཡིན་ནོ།།

བཞི་པ་ཐོབ་བྱའི་ཡུལ་ནི།

ལང་ཀའི། ཞེས་པ་ནས། བྱིན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་སྐྱེས་བུ་དམ་པ་དེ་དག་ཀྱང་། ལ་ལ་ནི་ཆོས་ཀྱི་རྒྱལ་པོར་དབང་བྱིན་ནོ།།

ལ་ལ་ནི་བྱིན་གྱིས་བརླབས་ཀྱིས་དབང་ཕྱུག་ཏུ་དབང་བྱིན་ནོ། །ལ་ལ་ནི་སྒྲོན་མ་བྱེད་པའི་བྱ་བར་དབང་བྱིན་ནོ།།

ལ་ལ་ནི་གསང་བ་འཛིན་པར་དབང་བསྐུར་རོ།།

དེའང་དབང་གང་ལ་བསྐུར་ཞིང་ཐོབ་པར་བྱ་བའི་ཡུལ་རྣམས་ཏེ། ལང་ཀའི་བདག་པོ། སྐྱེས་བུ་དམ་པ་དེ་དག་ཀྱང༌། ལ་ལ་ཞེས་དགར་བའི་སྒྲས་དམ་པ་ཏོག་དཀར་པོ་ལ་ནི་སྤྲུལ་པའི་རྒྱལ་ཚབ་དགའ་ལྡན་ལྷ་ཡི་ཆོས་ཀྱི་རྒྱལ་པོར་དབང་བྱིན་ནོ། །ལ་ལ་ཞེས་དོན་གྲུབ་ལ་ནི་རྒྱལ་བ་ཀུན་གྱི་མངོན་པར་བྱང་ཆུབ་པ་ལྔས་བྱིན་གྱིས་བརླབས་ཀྱི་ལོངས་སྐུའི་དབང་ཕྱུག་ཏུ་དབང་བྱིན་ནོ། །ལ་ལ་ཞེས་ཤཱཀ་ཐུབ་ལ་ནི་ཞིང་ཐ་དད་དུ་འཛམ་གླིང་ཀུན་གྱི་སྒྲོན་མ་བྱེད་པའི་བྱ་བའི་དབང་བྱིན་ནོ། །ལ་ལ་ཞེས་ཕྱག་ན་རྡོ་རྗེ་ལ་ནི་གསང་བ་ཀུན་གྱི་མཛོད་གསུམ་ལ་དབང་རྫོགས་ཤིང་དེས་གཞན་ལ་ཕན་འདོགས་པས་གསང་བ་དམ་པ་འཛིན་པར་དབང་བྱིན་ནོ།།

ལྔ་པ་བསྐུར་བའི་དབང་པོ་ནི།

ལ་ལ་ནི་ཆོས་ཀྱི། ཞེས་པ་ནས། བསྐུར་རོ། །ཞེས་པའི་བར་གྱིས་བསྟན་ཏེ།

ལ་ལ་ནི་ཆོས་ཀྱི་རྒྱལ་པོ་ཉིད་ལྟ་བར་བསྟན་ནས་དབང་བསྐུར་རོ། །ལ་ལ་ནི་རིགས་ཀྱི་སངས་རྒྱས་ལྟ་བུར་བསྟན་ནས་དབང་བསྐུར་རོ། །ལ་ལ་ནི་རྒྱལ་བ་དཔག་ཏུ་མེད་པ་སྙེད་དུ་བསྟན་ནས་དབང་བསྐུར་རོ།།

ལ་ལ་ནི་གཟུགས་སྐུ་གཉིས་ལྟ་བུར་བསྟན་ནས་དབང་བསྐུར་རོ།།

གང་གིས་བསྐུར་བའི་དབང་པོ་རྣམས་ཏེ། ཕྱོགས་བཅུའི་རྒྱལ་བ་ལ་ལ་ནི་འོད་སྲུང་དང་མར་མེ་མཛད་སོགས་ཆོས་ཀྱི་རྒྱལ་པོ་ཉིད་ལྟ་བུར་བསྟན་ནས་དམ་པ་ཏོག་ལ་སྤྲུལ་པའི་རྒྱལ་ཚབ་ཀྱི་དབང་༼༡༨༤༽བསྐུར་རོ། །དེ་ཡིས་ཤཱཀ་ཐུབ་ཀྱིས་མི་ཕམ་མགོན་ལ་བསྐུར་བའང་མཚོན་ནོ། །རྒྱལ་བ་ལ་ལ་ནི་རིགས་ཀྱི་སངས་རྒྱས་ལྔ་ལྟ་བུར་བསྟན་ནས་དོན་གྲུབ་ལ་ལོངས་སྐུའི་རྒྱལ་ཚབ་ཏུ་དབང་བསྐུར་རོ། །སངས་རྒྱས་ལ་ལ་ནི་གཟུགས་སྐུའི་རྒྱལ་བ་དཔག་ཏུ་མེད་པ་ཉིད་དུ་བསྟན་ནས་ཤཱཀྱ་ཐུབ་པ་ལ་སྒྲོན་མའི་རྒྱལ་ཚབ་ཏུ་དབང་བསྐུར་རོ། །རྒྱལ་བ་ལ་ལ་ནི་འོག་མིན་དུ་རྣམ་པར་སྣང་མཛད་དང་འདིར་ཤཱཀ་ཐུབ་ལ་སོགས་པ་གཟུགས་སྐུ་གཉིས་ལྟ་བུར་བསྟན་ནས་གསང་བའི་བདག་པོ་ལ་སྔགས་ཕྱི་ནང་གི་སྟོན་པ་དང་སྡུད་པ་པོར་དབང་བསྐུར་རོ།།

དྲུག་པ་བསྐུར་བའི་དགོས་ཆེད་ནི།

ལ་ལ་ནི་རྒྱལ་སར། ཞེས་པ་ནས། བསྐུར་རོ། །ཞེས་པའི་བར་གྱིས་བསྟན་ཏེ།

ལ་ལ་ནི་རྒྱལ་བར་བྱུང་བའི་དུས་ལ་བབ་པའི་ཕྱིར་དབང་བསྐུར་རོ། །ལ་ལ་ནི་གཟུགས་སུ་སངས་རྒྱས་པའི་དུས་ལ་བབ་པའི་ཕྱིར་དབང་བསྐུར་རོ། །ལ་ལ་ནི་ལུང་ངེས་པར་ཐོབ་པའི་དུས་ལ་བབ་པའི་ཕྱིར་དབང་བསྐུར་རོ།།

ལ་ལ་ནི་གསང་བའི་སྙིང་པོ་ངེས་པར་དུས་ལ་བབ་པའི་ཕྱིར་དབང་བསྐུར་རོ།།

ལ་ལ་ཞེས་དམ་པ་ཏོག་ལ་ནི་སྤྲུལ་པའི་རྒྱལ་ཚབ་ཀྱི་རྒྱལ་སར་བྱུང་བའི་དུས་ལ་བབ་པའི་ཕྱིར་སྤྲུལ་པའི་རྒྱུད་དུ་དབང་བསྐུར། །ལ་ལ་ཞེས་དོན་གྲུབ་ལ་ནི་ལོངས་སྤྱོད་རྫོགས་པའི་གཟུགས་སུ་སངས་རྒྱས་པའི་དུས་ལ་བབ་པའི་ཕྱིར་ས་ཐ་མའི་འགྲོ་བ་སྒྲོལ་བར་བྱ་བའི་དབང་བསྐུར། །ལ་ལ་ཞེས་ཤཱཀྱ་ཐུབ་པ་ལ་ནི་ཞིང་ཁམས་ཀྱི་སྒྲོན་མ་གྱིས་ཤིག་པར་ལུང་ངེས་པར་ཐོབ་པའི་དུས་ལ་བབ་པའི་ཕྱིར་སྙིང་པོ་བྱང་ཆུབ་ཀྱི་སྒྲོན་མར་དབང་བསྐུར། ལ་ལ་ཞེས་ཕྱག་ན་རྡོ་རྗེ་ལ་ནི་གསང་བས་གདུལ་བ་ལ་ཕན་གདགས་པ་དང༌། རྒྱལ་བས་གསུངས་པའི་གསང་བ་མི་ནུས་པར་བྱ་བས་གསང་བའི་སྙིང་པོར་ངེས་པའི་དུས་ལ་བབ་པའི་ཕྱིར་གསང་བ་ཆེན་པོའི་མཛོད་འཛིན་པར་དབང་བསྐུར་རོ།།

བདུན་པ་རྫས་ལ་བརྟེན་ཏེ་བསྐུར་ཐབས་ནི།

ལ་ལ་ནི་རིན། ཞེས་པ་ནས། དབང་བྱིན། ཞེས་པའི་བར་གྱིས་བསྟན་ཏེ།

ལ་ལ་ནི་རིན་པོ་ཆེ་ཏོག་ལྟ་བུའི་དབང་གིས་དབང་བྱིན། ལ་ལ་ནི་ཉི་ཟླ་རྡོ་རྗེ་འབར་བའི་དབང་གིས་དབང་བྱིན། ལ་ལ་ནི་རིགས་ཀྱི་ཕྱག་རྒྱ་ལྟ་བའི་དབང་གིས་དབང་བྱིན། ལ་ལ་ནི་རྡོ་རྗེ་ཕ་ལམ་ལྟ་བུའི་དབང་གིས་དབང་བྱིན།

ལ་ལ་ཞེས་དམ་པ་ཏོག་ལ་ནི་ཐབས་ཀྱི་རྫས་རིན་པོ་ཆེ་ཡི་དབུ་རྒྱན་ཏོག་དང་བཅས་པ་ལྟ་བུའི་ཆོས་ཀྱི་ཅོད་པན་གྱི་དབང་གིས་དབང་བྱིན་ནོ། །ལ་ལ་ཞེས་དོན་གྲུབ་ལ་ནི་ཐབས་ཤེས་རྡོར་དྲིལ་དང་གསང་བ་ཉི་ཟླའི་རྟགས་ཀྱིས་ཉི་ཟླ་རྡོ་རྗེ་འབར་བ་གསང་སྔགས་ནང་པའི་དབང་གིས་དབང་བྱིན་ནོ། །འདི་ཉིད་དོན་གྲུབ་བཙུན་མོའི་ནང་ན་བཞུགས་པའི་ཚེ་ཐབས་ཤེས་ཉི་ཟླའི་དབང་ངམ་ཡང་ན་ཕྱོགས་བཅུའི་རྒྱལ་བས་ཉི་མ་སྤྱི་བོར་བསྟིམ། ཟླ་བ་ཞབས་ལ་བསྟིམ། རྡོ་རྗེ་ཕྱག་ཏུའོ། །ལ་ལ་ཞེས་ཤཱཀ་ཐུབ་ལ་ནི་རིགས་ཀྱི་ཕྱག་རྒྱ་ལྔ་ལྟ་བུའི་རྫས་ཀྱིས་རྡོ་རྗེ་གདན་གྱི་བྱང་ཆུབ་སྙིང་པོར་དབང་གི་མཛད་པས་བདུད་བཞི་བཏུལ་བའི་དབང་གིས་དབང་བྱིན་ནོ། །ལ་ལ་ཞེས་ཕྱག་རྡོར་ལ་ནི་རྡོ་རྗེ་ཕ་ལམ་ལྟ་བུའི་རྫས་གསང་བདག་ཆེན་པོའི་རྡོ་རྗེ་རྒྱ་གྲམ་མུ་ཁྱུད་ཅན་དེ་ཉིད། གྱད་ཡུལ་དུ་ཕྱོགས་བཅུའི་སྤྲུལ་༼༡༨༥༽སྐུས་རྡོ་རྗེ་ཕྱག་ལ་གྲིམ་བྱས་ཏེ་གསང་མཛོད་འཛིན་པའི་དབང་གིས་དབང་བྱིན་ནོ།།

བརྒྱད་པ་དབང་བསྐུར་བའི་གནས་ནི།

ལ་ལ་ནི་དགའ་ལྡན། ཞེས་པ་ནས། དབང་བྱིན། ཞེས་པའི་བར་གྱིས་བསྟན་ཏེ།

ལ་ལ་ནི་དགའ་ལྡན་ལྟ་བུ་ཤ་སྟག་ཏུ་དབང་བྱིན། ལ་ལ་ནི་འོག་མིན་ལྟ་བུ་ཤ་སྟག་ཏུ་དབང་བྱིན། ལ་ལ་ནི་སྙིང་པོ་བྱང་ཆུབ་ཀྱི་གནས་གང་ན་བར་དབང་བྱིན། ལ་ལ་ནི་དབང་སྒྱུར་གྱི་ཁང་བཟངས་ལ་སོགས་པ་ལྟ་བུར་དབང་བྱིན།

ལ་ལ་ཞེས་དམ་པ་ཏོག་ལ་ནི་སྒྲོན་མའི་ཞིང་ཁམས་ན་གྲངས་མང་བ་ལ་ལྟོས་ཏེ་དགའ་ལྡན་ལྟ་བུ་ཤ་སྟག་ཏུ་དབང་བྱིན་ནོ། །ལ་ལ་ཞེས་དོན་གྲུབ་ལ་ནི་བཀོད་པ་སྣ་ཚོགས་དང་བསྟུན་པའི་འོག་མིན་ཆེན་པོ་ལྟ་བུ་ཤ་སྟག་ཏུ་དབང་བྱིན་ནོ། །ལ་ལ་ཞེས་ཤཱཀྱ་ཐུབ་པ་ལ་ནི་སྙིང་པོ་བྱང་ཆུབ་ཀྱི་གནས་དམ་པ། ཇི་སྐད་དུ།

ཤཱཀྱ་ཐུབ་པ་རྡོ་རྗེ་གདན། །འདིར་ནི་དེ་བཞིན་ཉིད་བདེར་གཤེགས། །གདལ་ཁྱབ་ཆེན་པོའི་ཞིང་ན་བཞུགས། །སེམས་ཀྱི་དཀྱིལ་འཁོར་འོད་གསལ་བ། །དེ་བཞིན་ཉིད་དུ་རྣམ་པར་སྣང༌། །ཞེས་གསུངས་པ་ལྟར། འོག་མིན་བླ་ན་མེད་པ་བྱང་ཆུབ་ཀྱི་ཤིང་དྲུང་ག་ན་བར་དབང་བྱིན་ནོ། །ལུང་འདི་ཉིད་སྔར་དང་མཐུན་པར་འབྲོམ་སྟོན་གྱིས་ཕྱག་མཚན་ན་བཞུགས་པས་རྡོ་རྗེ་སེམས་དཔའི་སྤྲུལ་བའི་བཀོད་པ་བྱེ་བྲག་པ་སྟོང་ཆེན་པོའི་སྒྲོན་མར་ཇི་ལྟར་སྤྲོས་པའི་ཚུལ་གྱིས་མདོ་ཆེན་པོའི་གླེང་གཞི་དང་འབྲེལ་བར་དབང་དོན་གྱི་ཟབ་གནད་སློང་ནུས་པས་ངེས་པ་སྟེར་བ་འདི་འདྲ་པཎ་གྲུབ་སྔ་མ་ལ་16མ་གྲགས་ཤིང་ཀུན་མཁྱེན་རོང་ཟོམ་ཆེན་པོའི་གསུང་སྒྲོས་ཡིན་པར་གོར་མ་ཆག་སྙམ་མོ། །ལ་ལ་ཞེས་ཕྱག་ན་རྡོ་རྗེ་ལ་ནི་འོག་མིན་དེ་ཉིད་རྣམ་མཛེས་སམ་དབང་བསྒྱུར་གྱི་ཁང་བཟང་དང༌། ལ་སོགས་པ་ཞེས་ལྷོ་ཕྱོགས་ཐེག་པ་གྱད་ཀྱི་ཡུལ་ལྟ་བུར་དབང་བྱིན་ནོ།།

དགུ་པ་དོན་གྱི་རྟགས་ནི།

ལ་ལ་ནི་ཆོས་ཀྱི། ཞེས་པ་ནས། ལྟ་བུ་བྱིན། ཞེས་པའི་བར་གྱིས་བསྟན་ཏེ།

ལ་ལ་ནི་ཆོས་ཀྱི་རྒྱལ་ཚབ་ལྟ་བུ་བྱིན། ལ་ལ་ནི་རྫོགས་པའི་ལོངས་སྤྱོད་ལྟ་བུ་བྱིན།

ལ་ལ་ནི་ཆོས་ཀྱི་མངའ་བདག་ཉིད་ལྟ་བུ་བྱིན། ལ་ལ་ནི་གསང་བའི་བདག་པོ་ལྟ་བུ་བྱིན།

ལ་ལ་ཞེས་དམ་པ་ཏོག་དཀར་ནི་སྤྲུལ་པའི་ཆོས་ཀྱི་རྒྱལ་ཚབ་ཏུ་གྱུར་པ་ལྟ་བུ་རྟགས་མངོན་དུ་སྣང་བའི་དབང་བྱིན༌། ལ་ལ་ཞེས་དོན་གྲུབ་ནི་རྫོགས་པའི་ལོངས་སྤྱོད་ལྟ་བུ་ལོངས་སྤྱོད་རྫོགས་སྐུའི་རྟགས་མངོན་དུ་སྣང་བའི་དབང་བྱིན། ལ་ལ་ཞེས་ཤཱཀྱ་ཐུབ་པ་ནི་སྒྲོན་མའི་བྱ་བ་མཛད་པས་ཆོས་ཀྱི་མངའ་བདག་ཉིད་དུ་གྱུར་བ་ལྟ་བུ་ཐོབ་པའི་རྟགས་མངོན་དུ་སྣང་བའི་དབང་བྱིན། ལ་ལ་ཞེས་ཕྱག་ན་རྡོ་རྗེ་ནི་གསང་བ་འཆད་པའི་སྟོན་པ་མཛོད་གསུམ་འཛིན་པའི་བདག་པོ་ཉིད་དུ་གྱུར་པ་ལྟ་བུ་ཐོབ་པའི་རྟགས་མངོན་པར་སྣང་བའི་དབང་བྱིན་ནོ།།

བཅུ་པ་དབང་གི་དོན་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། བསྡུས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དབང་གི་དོན། །རྒྱུ་དང་འཐོབ་དང་མི་འཐོབ་དང་།།

ཡུལ་དང་སྣོད་དང་ཁྱད་པར་རྟགས། །བདུན་གྱིས་འདིའི་དོན་བསྡུས་པའོ།།

ཐ་མའི་དོན་ལ་རྗེས་སུ་འཇུག་པ་དང་ཐུན་མོང་༼༡༨༦༽བའི་དབང་དུ་ཕྱེ་བ་གང་ཞེ་ན། ལང་ཀའི་བདག་པོ་དེ་ཡང་འདི་ལྟར་དབང་གི་དོན་ལ། རྒྱུ་ནི་ལམ་དང༌། འཐོབ་པའི་ཚད་དང༌། མི་ཐོབ་པའི་གེགས་དང་སྔོན་བྱུང་དུ་རྒྱལ་བ་ལྟ་བུ་ཐོབ་པའི་ཡུལ་དང༌། སྣོད་དུ་གྱུར་པ་སློབ་མ་དང༌། ཐོབ་པའི་ཁྱད་པར་དང༌། མངོན་དུ་གྱུར་པ་རྟགས་ཏེ་བདུན་གྱིས་དབང་འདིའི་དོན་བསྡུས་པའོ། །ཞེས་གྲངས་ཀྱི་ངོ་བོ་བསྟན་པའོ།།

གཉིས་པ་རྒྱས་པར་བཤད་པ་ལ་བདུན་ཏེ། གང་ལ་བསྐུར་བའི་རྒྱུ། ཐོབ་པའི་ཚད། མི་ཐོབ་པའི་གེགས། ཐོབ་བྱའི་ཡུལ། བསྐུར་དུ་རུང་བའི་སྣོད། ཐོབ་པའི་ཁྱད་པར། མངོན་དུ་སྣང་བའི་རྟགས་སོ། །དང་པོ་ནི།

ལང་ཀའི། ཞེས་པ་ནས། བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་རྒྱུ་ནི། རྣལ་འབྱོར་ཆེན་པོ་ལྔ་སྟེ། འདུན་པའི་རྣལ་འབྱོར་དང་། རིགས་ཆེན་འབྱེད་པའི་རྣལ་འབྱོར་དང་། དབུགས་ཆེན་ཕྱིན་པའི་རྣལ་འབྱོར་དང་། ལུང་ཆེན་ཐོབ་པའི་རྣལ་འབྱོར་དང་།

རྩལ་ཆེན་རྫོགས་པའི་རྣལ་འབྱོར་པ་རྣམས་སུ་རིག་པར་བྱའོ།།

ལང་ཀའི་བདག་པོ་དེ་ལ་རྒྱུ་ནི་རྣལ་འབྱོར་ཆེན་པོ་ལྔ་སྟེ། གསང་བའི་དོན་ཟབ་མོ་ལ་སེམས་སྐྱེས་ཏེ་ཞུགས་པས་མོས་པའི་སྒོ་ནས་ཡིད་ལ་བྱེད་པ་འདུན་པ་སེམས་པའི་རྣལ་འབྱོར་ཚོགས་ལམ་དང༌། ཐེག་པ་ཆེན་པོའི་སྒོར་འཇུག་ལྡོག་དང་ལྟུང་མི་ལྟུང་རིགས་འབྱེད་པས་རིགས་ཆེན་འབྱེད་པའི་རྣལ་འབྱོར་སྦྱོར་ལམ་དང༌། གཉིས་མེད་ཀྱི་དོན་དང་པོར་མཐོང་བས་དབུགས་ཆེན་འབྱིན་པའི་རྣལ་འབྱོར་མཐོང་ལམ་དང༌། མངོན་སུམ་དུ་ལུང་ཐོབ་པས་ལུང་ཆེན་ཐོབ་པའི་རྣལ་འབྱོར་སྒོམ་ལམ་དང༌། རིག་པའི་རྩལ་རྫོགས་པས་རྩལ་ཆེན་རྫོགས་པའི་རྣལ་འབྱོར་མཐར་ལམ་པ་ཆེན་པོ་པ་སྟེ་འདི་དག་ཀྱང་སྔོན་གོམས་པའི་ཚད་མ་བཅོས་པའི་དོན་སྣང་ཞིང་བསམ་པར་བྱེད་པ་དང༌། རིག་པ་དུས་ཀྱི་ཚད་ཆོས་ཉིད་རིག་པ། ཤེས་རབ་ལ་ཟློ་བའི་ཚད་གྲུབ་པ་ཐོབ་པས་གཟུངས་མང་པོ་ཐོབ་པ། མན་ངག་ལུང་གི་ཚད་བླ་མ་དམ་པའི་ལུང་སྣོད་དུ་ལོན་པ། ཡོན་ཏན་རྫོགས་པའི་ཚད་ཡོན་ཏན་གྱི་ཆོས་མཐར་ཕྱིན་པ་ལྔ་དང་ལྡན་པ་རྣམས་སུ་རིག་པར་བྱའོ།།

གཉིས་པ་ཐོབ་པའི་ཚད་ནི།

ལང་ཀའི། ཞེས་པ་ནས། བྲལ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཐོབ་པའི་ཚད་ནི་འདི་ལྟ་སྟེ། བསླབ་པ་ཡོངས་སུ་ཆུབ་པ་དང་། དེ་ཁོ་ན་ཉིད་མཐོང་བ་དང་། ཤེས་བྱ་གང་ལ་ཉམ་མི་ང་བ་དང་། གང་གིས་འཇིགས་པ་དང་བྲལ་བའོ།།

ལང་ཀའི་བདག་པོ་ཆུ་བོ་བཞིའི་དབང་བསྐུར་བས་ཐོབ་པའི་ཚད་དང་ལྡན་པ་ནི་འདི་ལྟ་སྟེ། ལམ་རྣལ་འབྱོར་ལྔ་དང་རིམ་པར་སྦྱར་ན། གང་ཟག་བཅས་ཀྱི་བསླབ་པ་ཡོངས་སུ་ཆུབ་པ་དང་པོ་གཉིས་མཐར་ཕྱིན་པའི་ཚད་དང༌། དེ་ཁོ་ན་ཉིད་བདེན་པ་མཐོང་བའི་ཚད་དང་ལྡན་པ་དང༌། ཤེས་བྱ་གང་ཅི་ལའང་ཉམ་མི་ང་བར་ཤེས་པའི་ཚད་མངའ་བ་དང༌། གང་གི་ཐེ་ཚོམ་ལ་སོགས་པའི་འཇིགས་པ་དང་བྲལ་བའི་ཚད་དུ་ཕྱིན་ན། ལས་ཀྱི་དབང་དང་བསྙེན་བསྒྲུབ་སྒོམ་པའི་དབང་དང༌། རྡོ་རྗེ་རྒྱལ་པོ་རབ་འབྱམས་ཀྱི་དབང་༼༡༨༧༽དང༌། ཆད་པའི་དབང་བསྐུར་དུ་རུང་ངོ་། །ཡང་ན་གླེགས་བམ་བཅུ་གཉིས་དང༌། ཉི་ཟླ་གཉིས་སྦྱིན་པ་ལ་སོགས་པའི་འཆད་པ་དག་གོ།

འདི་དག་ཚད་དུ་ཕྱིན་པས་བསྐུར་བའི་དུས་ལ་བབ་པར་འགྱུར་གྱི། འཆད་པའི་མི་འཐོབ་པའི་ཟླ་ལ་ལྟོས་པས་ཀྱང་ཐོབ་ཟིན་པའི་ཚད་ནི་མ་ཡིན་ནོ། །རྣལ་འབྱོར་གྱི་དབང་དུ་དང་པོ་གཉིས་གཅིག་ཏུ་བརྩིས་ཏེ་དབང་བཞི་དང་རིམ་པ་བཞིན་ནོ། །རང་བཞིན་གྱི་དབང་དུ་འབྲས་བུ་དང་སྦྱར་ན་དམ་པ་ཏོག་དཀར་པོ་བསླབ་པ་བཅུ་མཐར་ཕྱིན་པར་ཡོངས་སུ་ཆུབ་སྟེ་ཉམ་ང་མེད་པ་དང༌། དོན་གྲུབ་གསང་བ་ཇི་ལྟ་བའི་དེ་ཁོ་ན་ཉིད་མཐོང་སྟེ་མངའ་དབང་ཆེན་པོ་ཐོབ་པ་དང༌། ཤཱཀྱ་ཐུབ་པ་ཤེས་བྱ་གང་ཡང་མི་མཁྱེན་པ་མེད་ལ་ཏིང་ངེ་འཛིན་གྱི་སྒོ་འབུམ་ཕྲག་དུ་མ་རྫོགས་ཏེ་ཉམ་མི་ང་བའི་ཡེ་ཤེས་ཐོབ་པ་དང༌། ཕྱག་ན་རྡོ་རྗེ་འཁོར་བ་ཡེ་ཤེས་སུ་རྟོགས་ནས་གང་གི་འཇིགས་པ་དང་བྲལ་ཏེ་གསང་བའི་རྩལ་ཆེན་པོ་རྫོགས་པའོ།།

གསུམ་པ་མི་ཐོབ་པའི་གེགས་ནི།

གང་མི་འཐོབ། ཅེས་པ་ནས། མི་འབྱུང་བའོ། །ཞེས་པའི་བར་གྱིས་བསྟན་ཏེ།

གང་མི་འཐོབ་པ་ནི། གང་རློམ་པ་དང་། གང་དག་མ་ངེས་པ་དང་།

གང་ལ་དམ་པར་དམིགས་པ་དང་། གང་དུ་མི་འབྱུང་བའོ།།

གང་མི་འཐོབ་པ་ནི་ཆུ་བོ་བཞིའི་དབང་གི་རིམ་པ་དང་སྦྱར་ཏེ། གང་བསླབ་པའི་དོན་ཆུད་པར་གྲགས་པའི་ཚུལ་གྱིས་རང་གི་ཡོན་ཏན་ལ་ང་རྒྱལ་ཏེ་རློམ་སེམས་སུ་བྱེད་པ་དང༌། གང་དག་དོན་ངེས་པར་མ་རྟོགས་ཏེ་བསམ་སྦྱོར་དང་ཐེག་པའི་རིགས་མ་ངེས་པ་དང༌། གང་བསྒོམ་པའི་དོན་དང་ཤེས་བྱ་ལ་དམ་པར་དམིགས་ཏེ་ལྟ་བས་མཉམ་པར་མ་རྟོགས་པས་ཆེད་བྱས་ལ་འཛིན་པ་དང༌། སྒྲིབ་པས་ཆོད་དེ་སྐྱོན་ཚང་བ་གང་དུ་ཡེ་ཤེས་དང་ཡོན་ཏན་གྱི་རྩལ་གང་ཡང་མི་འབྱུང་སྟེ་མི་སྣང་བའོ། །འཆད་པའི་དོན་བཞི་བཞིར་སྣང་བའང་རྗེས་སུ་མཐུན་ནོ།།

བཞི་པ་ཐོབ་བྱའི་ཡུལ་ནི།

ལང་ཀའི། ཞེས་པ་ནས། ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡུལ་ནི་མཆོད་རྟེན་དང་། སྒྲ་བརྙན་དང་། ཚད་མ་དང་། ངེས་པའོ།།

ལང་ཀའི་བདག་པོ་དབང་གང་ལས་ལེན་པའི་ཡུལ་ནི། ལམ་གྱི་དབང་དུ་བླ་མ་སྟེ་ངོ་མཚར་གྱི་རྫས་རྙེད་ཅིང་ཀུན་གྱིས་མཆོད་པའི་རྟེན་གནས་སུ་གྱུར་པའི་བྱིན་སྟོབས་ཅན་བདེན་པའི་དོན་མཐོང་བ་དང༌། དངོས་སུ་སྒྲ་སྙན་གྱིས་ལུང་བསྟན་པ་ཐོབ་པ་དང༌། རྩལ་ཆེན་རྫོགས་པས་བློ་གྲོས་ངེས་པའི་ཚད་མ་ཅན་བདེ་གཤེགས་ཀྱི་ཞལ་མཐོང་བ་དང༌། ཡང་དག་པའི་ཆེད་དུ་ངེས་པ་རྙེད་ཟིན་པའི་རྒྱལ་བ་ཉིད་དོ། །ས་ལྔ་པོ་གང་སྔ་རོལ་པའི་སློབ་མ་ལ་ཕྱི་རོལ་པས་བསྐུར་བའི་ཕྱིར་ས་དེ་ཉིད་ཀྱིས་དེ་ཉིད་ལ་བསྐུར་བ་ནི་བྱིན་རླབས་སྣང་བར་ནུས་པ་ཆུང་ངོ༌། །རང་བཞིན་གྱི་དབང་དུ། དམ་པ་ཏོག་དཀར་༼༡༨༨༽གྱིས་བླང་བའི་ཡུལ་ཆོས་ཀྱི་རྒྱལ་པོ་ཉིད་དང༌། དོན་གྲུབ་ཀྱིས་རིགས་ལྔ་དང༌། ཤཱཀྱ་ཐུབ་པས་ཕྱོགས་བཅུའི་རྒྱལ་བ་དང༌། ཕྱག་ན་རྡོ་རྗེས་གཟུགས་སྐུ་གཉིས་ཏེ། རིལ་གྱི་བདག་པོ་ཆེན་པོ་མཆོད་པའི་རྟེན་དུ་ངེས་པའི་ཕྱིར་དང༌། མངོན་པར་བྱང་ཆུབ་པ་ལྔའི་སྒྲ་སྙན་པར་འབྱུང་བའི་ཕྱིར་དང༌། སྐུ་གསུང་ཐུགས་མི་བསླུ་བར་བདེན་པས་ཚད་མ་མཐར་ཕྱིན་པའི་ཕྱིར་དང༌། གསང་སྔགས་ངེས་པ་དོན་གྱི་མཛོད་དམ་པ་སྟེར་བའི་ཕྱིར་རིམ་པར་བསྟན་པའོ།།

ལྔ་པ་བསྐུར་དུ་རུང་བའི་སྣོད་ནི།

ལང་ཀའི། ཞེས་པ་ནས། འགྱུར་བའོ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་སྣོད་དུ་གྱུར་པ་ནི། རྒྱུད་དུ་བྱུང་བ་དང་། རྩལ་རྫོགས་པ་དང་།

ཐུགས་རྗེ་འབྱུང་བ་དང་། གཞན་པ་དབང་དུ་གྱུར་པའོ།།

ལང་ཀའིབདག་པོ། གང་ཆུ་བོ་བཞིའི་སྣོད་དུ་གྱུར་པ་ནི། གང་ཡིད་ལ་བྱེད་པ་དང་འཕྲོ་འདུ་གཅིག་པ་ལ་སྦྱངས་ནས་རྒྱལ་བའི་གདུང་འཛིན་པའི་རྒྱུད་དུ་བྱུང་བ་དང༌། གང་དོན་རྟོགས་ཏེ་རྩལ་རྫོགས་པའི་ཕྱིར་འཇིགས་པ་ལྔ་དང་བྲལ་བ་དང༌། གང་ལུང་ཐོབ་ཅིང་གདེང་དང་ལྡན་པས་ཐུགས་རྗེ་ཆེན་པོས་གཞན་དོན་དུ་ཕྱིས་འབྱུང་བ་དང༌། གང་རྩལ་ཆེན་རྫོགས་པས་གཞན་རིལ་དབང་དུ་གྱུར་པ་ལ་སྦྱིན་པར་བྱའོ། །རང་བཞིན་སྔོན་བྱུང་གི་དབང་དུ་ནི། གང་དམ་པ་ཏོག་དཀར་པོ་ནི་ཆོས་ཀྱི་རྒྱལ་ཚབ་བྱེད་པའི་ཕྱིར་སྤྲུལ་པའི་རྒྱུད་དུ་བྱུང་བ་དང༌། དོན་ཀུན་གྲུབ་པ་ནི་འོག་མིན་དུ་རྩལ་རྫོགས་པའི་སྐལ་བ་དང་ལྡན་པ་དང༌། ཤཱཀྱ་ཐུབ་པ་སྤྲུལ་པའི་སྐུས་འགྲོ་བ་གཞན་སྒྲོལ་བའི་ཕྱིར་ཐུགས་རྗེ་འབྱུང་བ་དང༌། ཕྱག་ན་རྡོ་རྗེ་ལོག་སྡེ་འདུལ་སྟོབས་ཅན་གྱི་ཕྱིར་དྲག་ཤུལ་གྱི་ཐབས་ཀྱིས་ཀུན་ཏུ་བསྒྱུར་ནས་གཞན་ཀུན་དབང་དུ་བསྡུས་ཀྱང་དུལ་བ་དང་ལྡན་པར་གྱུར་པའོ།།

དྲུག་པ་ཐོབ་པའི་ཁྱད་པར་ནི།

ལང་ཀའི། ཞེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཁྱད་པར་ནི། འདི་ལྟར་རྩལ་གྱིས་ཐོབ་པ་དང་། བསྐུར་བས་ཐོབ་པའོ། །ལངྐའི་བདག་པོ་རྩལ་གྱིས་ཐོབ་པ་ནི་འདི་ལྟ་སྟེ། རྒྱལ་བ་རྣམས་ཀྱི་གསང་བའི་ཐུགས། །རྟོགས་ནས་གང་ལ་གསལ་བྱེད་པ། །དབང་རྣམས་ཀུན་གྱི་མཆོག་ཡིན་ཏེ། །སྲིད་པ་གསུམ་གྱིས་དེ་དབང་བསྐུར། །ལངྐའི་བདག་པོ་གང་དབང་བསྐུར་བས་ཐོབ་པ་ནི། གང་ལ་ཕན་པ་དང་། གང་གིས་ནུས་པ་ཙམ་དུ་ཤེས་པར་བྱའོ།།

ལང་ཀའི་བདག་པོ། དབང་གི་ཁྱད་པར་གྱི་གྲངས་ནི་འདི་ལྟར་གཉིས་ཏེ། ཅིག་ཆར་བའི་དབང་དུ། རིག་པ་རྩལ་གྱིས་ཐོབ་པ་དང༌། རིམ་གྱིས་པའི་དབང་དུ་བསྐུར་བས་ཐོབ་པའོ། །ལང་ཀའི་བདག་པོ། ལམ་པ་ཅིག་ཆར་བས་རྩལ་གྱིས་ཐོབ་པ་ནི། འདི་ལྟ་སྟེ། རྒྱལ་བ་རྣམས་ཀྱི་གསང་བའི་ཐུགས་དཀྱིལ་འཁོར་གསུམ་དབྱེར་མེད་པའི་གསང་སྔགས་ཇི་ལྟ་བའི་དོན་ཕུལ་དུ་བྱུང་བ་ཉིད། ཚིག་ཙམ་མིན་པར་ཤེས་རབ་ཀྱི་རྩལ་གྱིས་ཐོབ་སྟེ་ཡང་དག་པར་རྟོགས་ཤིང་མཐོང་བས་རང་དོན་རྫོགས་ནས་གཞན་གང་ལ་དོན་དང་མཐུན་པར་ཇི་ལྟ་བ་བཞིན་དུ་གསལ་བར་སྟོན་པའི་རྩལ་དང་ནུས་པ་རྫོགས་པས་ཀུན་ཏུ་སྒྲོལ་བར་བྱེད་པ་༼༡༨༩༽ནི་དབང་རྣམས་ཀུན་གྱི་མཆོག་ཏུ་གྱུར་པ་ཐོབ་པ་ཡིན་ཏེ། སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས། ཟབ་པ་དོན་གྱི་དབང་མཆོག་ནི། །རིག་པའི་རྩལ་དབང་ཐོབ་པ་སྟེ། །ཆོས་ཉིད་རྟོགས་པས་དབང་ཞེས་བྱ། །ཡེ་ཤེས་དབང་བསྐུར་ཅོད་པན་ཅན། །ཞེས་སོ། །དེས་ན་ཆོས་ཀྱི་རྒྱལ་པོའི་རིགས་འཚོབ་པའི་ཕྱིར་སྡེ་བརྒྱད་དང༌། སྲིད་པ་གསུམ་དང༌། ལམ་པ་རིལ་གྱིས་དམ་པ་དེ་ཉིད་ལ་བདག་པོ་ཆེན་པོར་དབང་བསྐུར་ཞིང་འདྲེན་པའི་དབང་པོར་བསྟབ་སྟེ་བཀའ་ལ་གུས་པས་ཉན་པའོ། །ལང་ཀའི་བདག་པོ། གང་ལམ་པ་རིམ་གྱིས་པར་བསྐུར་བས་ཐོབ་པ་ནི། བསོད་ནམས་ཀྱི་ས་བོན་དུ་གྱུར་པས། ས་བོན་ངན་པ་སྤོང་བས་གང་ཕྱི་མ་ལ་ཕན་པ་ཙམ་དང༌། གང་གིས་སྒོ་གསུམ་གྱི་རྩལ་གྱིས་བདག་དང་གཞན་གྱི་དོན་ནུས་པ་ཙམ་དུ་ཤེས་པར་བྱ་སྟེ། དེའང་བུམ་པའི་དབང་ལ་སོགས་པ་དང༌། རབ་འབྱམས་འཆད་པ་ལ་སོགས་པའོ།།

བདུན་པ་མངོན་དུ་སྣང་བའི་རྟགས་ནི།

ལང་ཀའི། ཞེས་པ་ནས། རྒྱས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་རྟགས་ནི་འདི་ལྟ་སྟེ། གཙུག་ཏོར་དམ་པ་འབྱུང་བ་དང་། །གང་ལ་མ་གཞག་ལྷན་ནེ་བ་དང་།།

ལྷུན་གྱིས་ཡོངས་སུ་གྲུབ་པ་དང་། །འོད་ཟེར་མཐའ་ཡས་རྒྱས་པའོ།།

ལང་ཀའི་བདག་པོ། མངོན་དུ་གྱུར་པའི་རྟགས་ནི་འདི་ལྟ་སྟེ། རང་བཞིན་སྔོན་བྱུང་གི་དབང་དུ་དམ་པ་ཏོག་དཀར་པོ་ཀུན་གྱིས་བསྐུར་བས་དབུ་ལ་གཙུག་ཏོར་ལྟར་མི་མངོན་པས་དམ་པ་འབྱུང་བ་དང༌། དོན་ཀུན་གྲུབ་པ་མཉམ་པ་ཉིད་རྡོ་རྗེ་ལྟ་བུའི་ཏིང་ངེ་འཛིན་གང་ལ་མཉམ་པར་མ་བཞག་པར་རྣམ་པར་མི་རྟོག་པའི་ཡེ་ཤེས་ལྷན་ནེ་བ་ལས་མི་གཡོ་བ་ཐོབ་པ་དང༌། ཤཱཀྱ་ཐུབ་པ་འབད་རྩོལ་མེད་པར་འབྲས་བུའི་ཆོས་ཀྱི་ཡོན་ཏན་ཇི་སྙེད་པ་ལྷུན་གྱིས་ཡོངས་སུ་གྲུབ་པར་གྱུར་པ་དང༌། ཕྱག་ན་རྡོ་རྗེ་ཐེག་པ་ཆེན་པོ་གསང་བའི་ཐུགས་རྗེ་ཀུན་ལ་ཁྱབ་པ་ཐོབ་པས་འོད་ཟེར་དང་རྫུ་འཕྲུལ་མཐའ་ཡས་པ་ཀུན་ནས་རྒྱས་པར་གྱུར་པའོ། །ཞེས་སྐྱེས་བུ་དམ་པ་བཞི་རིམ་པ་བཞིན་ནོ། །རྗེས་འཇུག་གི་དབང་དུ་ན་རྣལ་འབྱོར་དང་པོ་གཉིས་སམ་ངེས་པ་ལས་གྱེན་དུ་འཕགས་ཏེ་མཐོང་ལམ་ཕྱིར་མི་ལྡོག་པ་ཐོབ་ཅིང་ཕལ་པའི་སྐྱེ་བོ་ཀུན་གྱིས་སྤྱི་བོར་བཀུར་བའི་ཕྱིར་གཙུག་ཏོར་དམ་པ་འབྱུང་བ་དང༌། དབུགས་ཆེན་པས་མཐོང་བའི་དོན་ལས་བསྒོམ་པའི་ལམ་གྱི་ཏིང་ངེ་འཛིན་གང་ལ་མ་བཞག་ལྷན་ནེ་བའི་ཡེ་ཤེས་མི་རྟོག་པ་ལས་མི་གཡོ་བ་ཐོབ་པ་དང༌། ལུང་ཆེན་པས་ལུང་དམ་པ་ཐོབ་ནས་རྩལ་ཆེན་རྫོགས་པའི་ས་མཆོག་ལྷུན་གྱིས་ཡོངས་སུ་གྲུབ་པར་གྱུར་པ་དང༌། རྩལ་ཆེན་པས་ཡང་དག་པར་རྫོགས་པའི་ས་ཆེན་པོ་༼༡༩༠༽ཐོབ་སྟེ་རང་ལུས་ལ་འོད་ཟེར་དང་རྫུ་འཕྲུལ་མཐའ་ཡས་པར་རྒྱས་པ་མངོན་པར་གྲུབ་པའོ།།

སློབ་དཔོན་ཧཱུྃ་མཛད་ཀྱིས། ཀུན་འདུས་བཀའ་འགྲེལ་དུ། ཚོགས་སྦྱོར་གཉིས་སོ་སོར་ཕྱི་ནས་ཆུ་བོ་བཞི་དང་སྦྱར་ཞིང་མཐར་ལམ་པ་དབང་གི་འབྲས་བུར་བཤད་དེ། དེ་སྐད་དུའང༌། དབང་འདི་དག་ཀྱང་རྣལ་འབྱོར་པའི་དབང་དུ་སྟེ། འདུན་པའི་རྣལ་འབྱོར་པ་ལ་ནི་ཕྱིའི་དབང་ངོ་། །རིགས་ཆེན་འབྱེད་པ་ལ་ནི་ནང་གི་དབང་ངོ་། །དབུགས་ཆེན་འབྱིན་པ་ལ་ནི་སྒྲུབ་པའི་དབང་ངོ་། །ལུང་ཆེན་ཐོབ་པ་ལ་ནི་གསང་བའི་དབང་ངོ་། །རྩལ་ཆེན་རྫོགས་པ་ནི་དབང་གི་འབྲས་བུའོ། །ཞེས་གསུངས་ཏེ། རྒྱུའི་དབང་སྔོན་དུ་སོང་ནས་གོང་དུ་བཤད་པའི་ལམ་དབང་དང་སྦྱར་ཏེ་མཐར་ལམ་པ་འབྲས་བུར་བཞག་པ་ལ་སྔོན་བྱུང་གི་དབང་བསྐུར་བའི་ངེས་པ་དང་བསྟུན་ན་མདོ་ཆེན་པོའི་རང་ལུགས་ཀྱི་ཆུ་བོ་བཞིའི་དབང་གི་སྤྱི་འགྲོས་ཀྱི་དཀའ་གནད་མང་པོ་ཁྲོལ་བར་མཐོང་ངོ༌། །དེ་ལྟར་སྔོན་བྱུང་གི་མཛད་སྤྱོད་ཀྱིས་གདུལ་བྱ་སྤྲོ་བ་བསྐྱེད་དེ། དེས་ནི་རྗེས་འཇུག་ཉམས་ལེན་གྱི་སྒོ་ནས་གདུལ་བྱ་ཆུད་མི་གསན་པར་བསྐུར་ཐབས་ཤུགས་ལ་འཕངས་པས་དོན་གྱི་གནད་ཟིན་པར་བྱའོ།།

འདི་ལ་ཀུན་མཁྱེན་དམ་པ་རིན་པོ་ཆེས། དབང་འདི་རྣམས་ཁུངས་དང་གྲགས་པ་ལ་སོགས་པ་དོན་དགུ་པོ་ནི། སྔོན་བྱུང་དུ་དམ་པ་ཏོག་དཀར་པོ་དང༌། རྒྱལ་བུ་དོན་གྲུབ་དང༌། ཤཱཀྱ་ཐུབ་པ་དང༌། ཕྱག་ན་རྡོ་རྗེ་དང་བཞི་ལ་དབང་བསྐུར་ཞིང༌། དེ་བཞིན་དུ་རྒྱལ་ཚབ་སྐྱེས་བུ་ཁྱེའུ་ལྔ་ལ་དབང་བསྐུར་བ་ཡིན་ནོ། །ཁུངས་དང་གྲགས་པ་ལ་སོགས་པའི་དོན་བཅུའི་ཐ་མ་དབང་གི་དོན་ལ་བདུན་དུ་བསྟན་པ་དེ་སྔོན་བྱུང་རྗེས་འཇུག་གཉིས་ཆར་དུ་གསུངས་ན། ཁོ་བོ་ནི་ཁུངས་དང་གྲགས་པ་ལ་སོགས་པ་དོན་དགུ་པོ་ནི་སྔོན་བྱུང་གི་དབང་ཡིན་ལ་དོན་བཅུའི་ཐ་མ་དབང་གི་དོན་ནི་རྗེས་འཇུག་གི་དབང་ཡིན་པར་འཐད་དོ། །དེ་ཅིས་འཐད་ཅེ་ན། རྣལ་འབྱོར་ལྔ་ལ་དབང་བསྐུར་བའི་ཕྱིར་རོ། །ཞེས་གསུངས་པ་ནི། རྒྱུ་རྣལ་འབྱོར་ལྔས་མཚོན་ཏེ་དོན་བདུན་པོ་རྗེས་འཇུག་ལམ་པའི་དབང་དངོས་བསྟན་དུ་གྱུར་པ་ལ་དགོངས་པས་གཞུང་དོན་ཇི་ལྟ་བའོ། །ཐོབ་པའི་ཚད་ལ་སོགས་པ་སྔོན་བྱུང་དང་ཡང་སྦྱར་བ་རྣམས་ལམ་མཐར་ཕྱིན་པ་ན་བྱེ་བྲག་དོན་མཐུན་དུ་འགྱུར་བའི་ཕྱིར་གནད་གཅིག་སྟེ་སྤྲོས་པས་ཆོག་གོ།

དེ་ལྟ་ནའང་སློབ་དཔོན་བདེ་བ་གསལ་མཛད་ཀྱིས། ཁུངས་སོགས་དང་པོ་གསུམ་བཏང་སྙོམས་སུ་མཛད་ནས། དེ་ཕྱིན་ཡུལ་༼༡༩༡༽སོགས་དྲུག་གིས་སྔོན་བྱུང་དང༌། བཅུ་པ་དོན་ལ་ནང་གསེས་ཀྱི་བདུན་དུ་ཕྱེ་བས་རྗེས་འཇུག་ལམ་པའི་དབང་བསྟན་པ་ཤས་ཆེ་བའི་དབང་དུ་མཛད་ནས། སྔོན་བྱུང་དང་རྗེས་འཇུག་ལམ་པའི་དབང་གཉིས་སྡོམ་གྱི་དོན་བཅུས་དངོས་སུ་བསྡུས་པར་བཀྲལ་ཞིང༌། དེས་དཔགས་ཏེ་རྗེས་འཇུག་ལས་དང་པོ་པ་མ་སྨིན་པ་སྨིན་པར་བྱེད་པའི་དབང་གི་རིམ་པ་གཙོ་བོར་བསྟན་པ་ཆུ་བོ་བཞིས་བསྡུས་པའང་ཤུགས་ལས་བསྟན་པར་བཞེད་དེ། དབང་དོན་བསྡུས་པ་ལས། སེམས་ཅན་རྣམས་ཀྱི་དོན་ཆེད་དུ། །དབང་གི་དོན་རྣམས་བསྡུ་བར་བྱ། །ཆུ་བོ་ཆེན་པོ་བཞི་རྣམས་ལ། །སྔོན་བྱུང་དང་ནི་རྗེས་སུ་འཇུག །སྔོན་བྱུང་ཆུ་བོ་རྣམ་བཞི་ལ། །ཡུལ་དང་དབང་པོ་དགོས་ཆེད་དང༌། །ཐབས་དང་རྟགས་དང་གནས་དང་དྲུག །རྗེས་འཇུག་ལམ་པ་དང་པོ་གཉིས། །ལམ་པ་ཆུ་བོ་རྣམ་བཞི་ལ། །རྒྱུ་དང་ཐོབ་དང་མི་ཐོབ་དང༌། །ཡུལ་དང་སྣོད་དང་ཁྱད་པར་རྟགས། །བདུན་གྱིས་འདི་ཡི་དོན་བསྡུས་པའོ། །རྗེས་འཇུག་ལས་ཀྱི་དང་པོ་ལ། །ཆུ་བོ་བཞི་ཡི་དབང་བསྐུར་བ། །ཡོ་ག་ལ་སོགས་ཐེག་དྲུག་ལ། །ཕྱི་དབང་རྒྱུད་ཀྱི་ཆུ་བོས་བྱ། །བསྐྱེད་པ་མ་ཧཱ་ཡོ་ག་ལ། །ནང་དབང་འབྱུང་བའི་ཆུ་བོས་བྱ། །རྫོགས་པ་ཨ་ནུ་ཡོ་ག་ལ། །སྒྲུབ་དབང་གྲགས་པའི་ཆུ་བོས་བྱ། །རྫོགས་ཆེན་ཨ་ཏི་ཡོ་ག་ལ། །གསང་དབང་རྫོགས་པའི་ཆུ་བོས་བྱ། །བཅུ་དང་བཅུ་གཅིག་བཅུ་གསུམ་དང༌། །རྣམ་པ་གཉིས་ཀྱིས་རྫོགས་པ་འོ། །སུམ་ཅུ་རྩ་དྲུག་ལེགས་དབང་བསྐུར། །ཞེས་སྡོམས་སུ་བསྟན་པ་དེ་ཉིད་དབང་དོན་རྣམ་པར་འབྱེད་པ་ལས་སོ་སོར་བཀྲལ་ཏེ་གསུངས་པ་ལྟར་ཤེས་དགོས་ཀྱང་འདིར་སྔོན་བྱུང་དང་རྗེས་འཇུག་ལམ་པའི་དབང་སྔར་བཤད་པ་རྣམས་དང་སྦྱར་ལ། རྗེས་འཇུག་ལས་དང་པོ་པའི་དབང་ལ། དང་པོ་རྒྱལ་པོ་བཀའ་རྟགས་དབང༌། །ཞེས་སོགས་ཀྱིས་བསྟན་པར་བྱ་བ་རྩ་རྒྱུད་ཀུན་འདུས་རིག་པ་ལས་དངོས་སུ་གསུངས་པའི་དབང་ཆོག་སོ་དྲུག་གི་གྲངས་ཙམ་འཆད་དེ། དེ་ནས་ཡང་སེམས་དཔའ་རྡོ་རྗེ་དེས་ཡོངས་སུ་རྫོགས་པ་དབང་གི་ལེའུ་འདི་གསུངས་སོ། །འདུས་པ་ཆེན་པོའི་རྣལ་འབྱོར་པ། །ཞེས་པ་ནས། རྣམ་པ་གཉིས་ཀྱིས་རྫོགས་པར་འགྱུར། །ཞེས་པའི་བར་གྱིས་མདོར་བསྟན་ནས། དེའི་དོན་རྒྱས་པར་བཤད་པ་ལ། ཆུ་བོ་བཞི་ལས། དང་པོ་ཕྱི་དབང་རྒྱུད་ཀྱི་ཆུ་བོ་ནི། རྒྱུད་ལས། དེ་ལ་དང་པོར་སྦྱིན་པའི་དབང་ནི་འདི་ཡིན་ཏེ། ༀ་ཧཱུྃ་སྭཱ་ཧྲཱིཿཧཱ། ཀུན་གྱིས་༼༡༩༢༽འདའ་བར་དཀའ་བ་ཡི། །ཚིག་བཙན་ཡུལ་ལ་དབང་བསྒྱུར་བ། །རྒྱལ་པོ་བཀའ་རྟགས་ཕྱག་རྒྱའི་དབང༌། །སྐུ་ལྔ་ཡོངས་སུ་རྫོགས་པར་འགྱུར། །ཞེས་པ་ནས། འཇིག་རྟེན་ཀུན་ལ་ཁ་ལོ་བསྒྱུར་བ་ཡི། །དབང་མཆོག་རྒྱལ་པོ་འདི་ཡང་སྦྱིན་པར་བྱ། །ཞེས་པའི་བར་གྱིས་བཀའ་རྟགས་ཕྱག་རྒྱའི་དབང་དང༌། རྟགས་ཀྱི་མཚན་མའི་དབང་དང༌། ཤེས་རབ་གཟུངས་ཀྱི་དབང་དང༌། བཀྲ་ཤིས་བུམ་པའི་དབང་དང༌། བཀྲ་ཤིས་རྫས་བརྒྱད་ཀྱི་དབང་དང༌། རིན་ཆེན་སྣ་བདུན་གྱི་དབང་དང༌། ཁྱད་པར་གདན་ཁྲིའི་དབང་དང༌། རྒྱན་ཆ་རྟགས་ཀྱི་དབང་དང༌། རྡོ་རྗེ་མིང་གི་དབང་དང༌། རིན་ཆེན་འཁོར་ལོའི་དབང་སྟེ་ཕན་དབང་ངམ་ཕྱི་དབང་བཅུ་བསྐུར་ཚུལ་བཤད་དོ།།

གཉིས་པ་ནང་དབང་འབྱུང་བའི་ཆུ་བོ་ནི། ཕྱི་འཁོར་སྐྱོང་བའི་རྒྱལ་པོར་གྱུར་ཕན་ཆད། །བླ་མེད་མཆོག་གི་རྟགས་དང་ལྡན་འགྱུར་པས། །གསང་སྒོ་ཕྱེ་ནས་ནང་དུ་གཞུག་པར་བྱ། །ཤིན་ཏུ་གསང་བའི་རྫས་དང་ལྡན་གྱུར་ནས། །གསང་སྒོ་གང་ལས་འདོད་པའི་དོན་རྣམས་ཞུ། །གནང་བ་ཆེན་པོའི་རྟགས་སུ་བྱིན་གྱིས་བརླབས། །ཞེས་པས་ཕྱི་དབང་ཐོབ་ནས་སྣོད་རུང་དུ་བྱས་པ་དེ་ནང་གི་དཀྱིལ་འཁོར་དུ་གཞུག་ཅིང་རང་བློ་དང་ཐེག་ཚད་ཀྱི་དབང་བསྐུར་ཚུར་མདོར་བསྟན་པས་མཚམས་སྦྱར་ནས། བསྐུར་ཐབས་རྒྱས་པར་བཤད་པ་ནི། གསང་བའི་དོན་ལ་ཉན་ཅིང་སློབ་པའི་དབང༌། །དབང་ཐོབ་སྐལ་ཅན་དེ་ལ་སྦྱིན་པར་བྱ། །ཞེས་པ་ནས། རྩལ་གྱི་ཐིག་ལེ་རྡོ་རྗེ་བྱིན། །ཞེས་པའི་བར་གྱིས་གསང་བ་ཉན་ཅིང་ཀློག་པའི་དབང་དང༌། རྣམ་བཞི་ལས་ཀྱི་དབང་དང༌། རྒྱལ་ཐེབས་འཆད་པའི་དབང་དང༌། རྡོ་རྗེ་རྒྱལ་པོའི་དབང་དང༌། ཟིལ་གནོན་གདན་གྱི་དབང་དང༌། ཁྱད་པར་རིན་ཆེན་སྣ་བདུན་གྱི་དབང་དང༌། ཕྱག་རྒྱ་གཟུགས་བརྙན་གྱི་དབང་དང༌། ཡེ་ཤེས་ཐུགས་ཀྱི་དབང་དང༌། སྐུ་གསུང་ཐུགས་ཀྱི་དབང་དང༌། བདུད་འདུལ་བཀྲ་ཤིས་རྫས་ཀྱི་དབང་དང༌། གསང་བ་མིང་གི་དབང་སྟེ་ནང་ནུས་པའི་དབང་བཅུ་གཅིག་བསྐུར་ཚུལ་བཤད་དོ།།

གསུམ་པ་སྒྲུབ་དབང་གྲགས་པའི་ཆུ་བོ་ནི། ནང་དུ་འཇུག་པའི་དབང་ཐོབ་ནས། །དེ་དག་ཀུན་ལ་སྤྱོད་སྒྲུབ་པའི། །དབང་མཆོག་དམ་སྦྱིན་པར་བྱ། །ཞེས་ནང་དབང་ཐོབ་ནས། དེ་དག་གི་དོན་ཁྱད་པར་ཅན་སྒྲུབ་པའི་ཐབས་སྤྱོད་པའི་དབང་སྦྱིན་ཚུལ་མདོར་བསྟན་པས་མཚམས་༼༡༩༣༽སྦྱར་ནས་བསྐུར་ཐབས་རྒྱས་པར་བཤད་པ་ནི། སྐྱེ་མེད་ཆོས་ཀྱི་དབྱིངས་ཉིད་ལ། །སེམས་ཀྱིས་དབང་བསྐུར་ཐོབ་པ་ཡི། །ཤེས་རབ་ཆེན་པོ་རིག་པའི་དབང༌། །སེམས་ལོན་དོན་གྱི་གཏན་ཚིགས་སྦྱིན། །ཞེས་པ་ནས། རྡོ་རྗེ་མིང་ནི་སྦྱིན་པར་བྱ། །ཞེས་པའི་བར་གྱིས་ཤེས་རབ་རིག་པའི་དབང་དང༌། སྙིང་རྗེ་རྟགས་ཀྱི་དབང་དང༌། འགྲོ་དོན་རྫོགས་པའི་དབང་དང༌། དུག་གསུམ་གཏིང་ནས་སྤྲུགས་པའི་དབང་དང༌། སྲིད་གསུམ་སྒྲོལ་བའི་དབང་དང༌། སྐྱོན་གྱིས་མ་གོས་པའི་དབང་དང༌། ལས་རྣམས་རྫོགས་པའི་དབང་དང༌། གཉིས་མེད་འཁྲིལ་བའི་དབང་དང༌། གསང་བ་སྦྱོར་བའི་དབང་དང༌། འདོད་ཡོན་ལོངས་སྤྱོད་ཀྱི་དབང་དང༌། སྒྲུབ་པའི་རྒྱལ་པོའི་དབང་དང༌། སྒྲུབ་རྫས་ཐམས་ཅད་ཀྱི་དབང་དང༌། གཉིས་མེད་མིང་གི་དབང་སྟེ་སྒྲུབ་དབང་བཅུ་གསུམ་བསྐུར་ཚུལ་བཤད་དེ། ཆུ་བོ་བཞི་པོ་ཕན་ནུས་ཟབ་མོའི་དབང་གསུམ་དུ་བསྡུ་བའི་ཚེ་འདི་ནི་ནུས་དབང་གི་ནང་ཚན་ནོ།།

བཞི་པ་གསང་དབང་རྫོགས་པའི་ཆུ་བོ་ནི། སྒྲུབ་པའི་དབང་མཆོག་ཐོབ་པ་དང༌། །གསང་བའི་བདག་པོ་ཡིན་པས་ན། །གསང་བའི་དབང་མཆོག་སྦྱིན་པར་བྱ། །ཞེས་པས་མཚམས་སྦྱར་ཏེ། དགའ་བ་བྱང་ཆུབ་སེམས་ཆེན་པོ། །ཀུན་ཏུ་ཚིམ་པར་བྱེད་པ་ཡི། །དཀར་དམར་ལྷག་པའི་བྱང་ཆུབ་སེམས། །དབང་ཐོབ་དེ་ཡི་ལྕེ་ལ་བཞག །བརྩལ་མེད་བྱང་ཆུབ་སེམས་ཆེན་པོ། །ཤེས་རབ་ཆེན་པོའི་རྩལ་གྱི་ནི། །ཆོས་ཀུན་སྒྱུ་མར་དབང་བསྒྱུར་ནས། །རྩལ་ཆེན་རྫོགས་པའི་དབང་ཡིན་པས། །རྫས་དང་ཚིག་དང་གང་ཟག་དང༌། །ཀུན་རྫོབ་དབང་དེ་མ་ཐོབ་ཀྱང༌། །ཆོས་ལ་སེམས་ཀྱི་དབང་ཐོབ་ན། །རྒྱལ་བ་རིགས་འཛིན་ཐམས་ཅད་དང༌། །སྲིད་གསུམ་དབང་ཅན་ཐམས་ཅད་ཀུན། །དེ་ལ་དབང་མཆོག་བསྐུར་བར་འགྱུར། །ཞེས་གསུངས་པ་ལྟར་ཀུན་རྫོབ་བྱང་སེམས་ཀྱི་དབང་ལུས་དང༌། དོན་དམ་བྱང་སེམས་ཀྱི་དབང་སེམས་ལ་བསྐུར་ཚུལ་བཤད་དོ། །དེ་བཞིན་དུ་བཤད་རྒྱུད་རྔམ་ལོག་ལས་ཀྱང་དབང་སོ་དྲུག་གི་རྐང་གྲངས་གསལ་བར་བསྟན་ནོ། །དེ་ལས་ཡན་ལག་གི་དབྱེ་བ་དབང་དོན་རྒྱ་ཆེར་བྱེད་པ་ལས། ཆུ་བོ་བཞིའི་དབང་གིས་རིམ་པ་ལས། །དང་པོ་རྒྱུད་ཀྱི་ཆུ་བོ་རྣམ་གྲངས་བཅུ། །དང་པོ་རྒྱལ་པོ་བཀའ་རྟགས་ཉི་ཤུ་དང༌། །ཞེས་སོགས་ཀྱིས་མདོར་བསྟན། དང་པོ་རྒྱལ་པོ་བཀའ་རྟགས་ཉི་ཤུ་ནི། །ཅོད་པཎ་ལྷ་མོ་སེང་གེ་གླང་པོ་ཆེ། ༼༡༩༤༽ཞེས་སོགས་ཀྱིས་རྒྱས་པར་བཤད་དེ་མདོ་དབང་རྩ་བ་སོ་དྲུག་ལས་ཡན་ལག་རགས་པ་བརྒྱད་བརྒྱ་སོ་གཅིག་ཏུ་ཕྱེ་ནས་བསྐུར་ཚུལ་ནི་སློབ་དཔོན་ཆེན་པོ་བདེ་བ་གསལ་མཛད་ཀྱིས་ལས་ཐོའི་དགོངས་པ་ཡིན་པས་མན་ངག་གི་ལུགས་ཞེས་བྱ་སྟེ། འདིར་ཆོས་རྗེ་དམ་པ་རིན་པོ་ཆེས་ཕྱག་ཆེན་ལས་ཟག་བཅས་ལས་དང་པོ་པར་ཆུ་བོ་བཞིར་བསྐུར་ལུགས་འདིར་བསྡེབས་ཞེས་གསུངས་པས་རྒྱུད་དང་མན་ངག་གི་ལུགས་ཀྱི་རྐང་གྲངས་མདོ་ཙམ་བཤད་པར་ཟད་ཀྱི་རྒྱས་པར་དབང་ཆོག་རྣམས་ལས་ཤེས་པར་བྱའོ།།

གསུམ་པ་མཇུག་བསྡུ་བ་ནི།

ལང་ཀའི། ཞེས་པ་ནས། གྲགས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལྟར་ན། དེའི་ཕྱིར་སྐྱེས་བུ་དམ་པ་དེ་དག་ནི་ཆོས་ཀྱི་རྒྱལ་པོ་དམ་པ་ཞེས་བྱ་བར།

དམ་པ་རྣམས་ཀྱི་ཞིང་དུ་ཡོངས་སུ་གྲགས་སོ།།

ལང་ཀའི་བདག་པོ་ཞེས་སྡུད་པ་པོ་ལ་བོས་ནས་དེ་ལྟར་ན་དེའི་ཕྱིར་ཞེས་དབང་བསྐུར་བའི་དོན་རྒྱས་པ་ལ་སྙེགས་པའི་ཚུལ་ནི། སྐྱེས་བུ་དགུ་པོ་ལས་སྐྱེས་བུ་དམ་པ་ལྔ་གཙོར་བྱས་ཏེ་དེ་དག་ནི་དབང་ཐོབ་པས་ཆོས་ཀྱི་རྒྱལ་པོ་དམ་པ་ཞེས་བྱ་བར། རྒྱལ་བ་དམ་པ་རྣམས་ཀྱི་ཞིང་དུ་ཡོངས་སུ་གྲགས་སོ། །འོ་ན་སྐྱེས་བུ་དམ་པ་དག་ཐ་མའི་དབུགས་ཕྱིན་ནས་གཟོད་དབང་ཐོབ་པས་གྲགས་སམ་ཞེ་ན། མཚོན་པའི་ཚིག་གིས་གྲལ་ཙམ་དུ་དབང་ཐོབ་པས་ཐ་མའི་དབུགས་ཕྱིན་པ་སྟེ། དབང་སྔ་རོལ་དུ་སྦྱར་རོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

སྐྱེས་བུ་དམ་པ་དབང་ཐོབ་པའི་ལེའུ་སྟེ་བཅུ་གསུམ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྐྱེས་བུ་དམ་པ་ལྔ་བཞི་གཙོ་བོར་བསྟན་པ་འབྲས་བུ་ལ་གནས་པ་དང༌། རྒྱུའི་སྐྱེས་བུ་ལྔས་དབང་ཐོབ་པའི་དོན་བསྟན་པའི་ལེའུ་སྟེ་བཅུ་གསུམ་པ་གསལ་བར་བཤད་པའོ།། །།

ལེའུ་བཅུ་བཞི་པ་སྐྱེས་བུ་དམ་པ་ལུང་བསྟན་པ།

༈ དྲུག་པ་ངེས་པ་རྙེད་པའི་ཡོན་ཏན་སངས་རྒྱས་སུ་ལུང་བསྟན་པ་ལ་ལྔ་སྟེ། སྐྱེས་བུ་དམ་པ་དེ་རྣམས་ཞིང་ཁམས་ལྔར་སངས་རྒྱས་པར་ལུང་བསྟན་པ། ཞིང་ཁམས་དེའི་ཡོན་ཏན། རིག་འཛིན་ཀུན་གཏན་ཚིགས་ཀྱིས་རིགས་ལྔར་བསྟན་པ། དོན་གསང་བར་ངེས་པས་ངེས་པ་རྙེད་པར་དཀོན་པ། དོན་ལ་བརྩད་པའི་སྐྱོན་སྤང་བའོ། །དང་པོ་ནི།

དེ་ནས། ཞེས་པ་ནས། འགྱུར་རོ། །ཞེས་པའི་བར་གྱིས་བསྟན་ཏེ།

དེ་ནས་རྡོ་རྗེ་སེམས་དཔའ་དེ་ཁོ་ན་ཉིད་དེས། སྐྱེས་བུ་དམ་པ་དེ་དག་ཡོངས་སུ་རྫོགས་པར་ལུང་བསྟན་པ་ནི་འདི་ལྟ་སྟེ། སྐྱེས་བུ་དམ་པ་དེང་ཁྱེད་ནི་ཐོག་མ་དང་ཐ་མ་མེད་པའི་དུས་ནས་མངོན་པར་རྫོགས་པར་སངས་རྒྱས་པ་འབའ་ཞིག་ཏུ་གྱུར་ཏེ། སྐྱེས་བུ་དམ་པ་སེམས་དཔའ་རྡོ་རྗེ་ཞེས་བྱ་བ་དེ་ནི། འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བར། སངས་རྒྱས་མི་འཁྲུགས་པ་ཞེས་བྱ་བར་འགྱུར་རོ། །སྐྱེས་བུ་དམ་པ་རྡོ་རྗེ་རིན་ཆེན་ཞེས་བྱ་བ་དེ་ནི། འཇིག་རྟེན་གྱི་ཁམས་དཔལ་དང་ལྡན་པ་ཞེས་བྱ་བར། སངས་རྒྱས་རིན་ཆེན་འབྱུང་བ་ཞེས་བྱ་བར་འབྱུང་བར་འགྱུར་རོ། །སྐྱེས་བུ་དམ་པ་རྡོ་རྗེ་ཆོས་ཞེས་བྱ་བ་དེ་ནི། འཇིག་རྟེན་གྱི་ཁམས་བདེ་བ་ཅན་ཞེས་བྱ་བར། སངས་རྒྱས་འོད་མཐའ་ཡས་ཞེས་བྱ་བར་འབྱུང་བར་འགྱུར་རོ། །སྐྱེས་བུ་དམ་པ་རྡོ་རྗེའི་དབྱིངས་ཞེས་བྱ་བ་དེ་ནི་འཇིག་རྟེན་གྱི་ཁམས་བྱང་ཆུབ་ཀྱིས་བརྒྱན་པ་ཞེས་བྱ་བར། སངས་རྒྱས་རྣམ་པར་སྣང་མཛད་ཅེས་བྱ་བར་འབྱུང་བར་འགྱུར་རོ། །སྐྱེས་བུ་དམ་པ་རྡོ་རྗེ་སྣ་ཚོགས་ཞེས་བྱ་བ་དེ་ནི། འཇིག་རྟེན་གྱི་ཁམས་རྣམ་པར་དག་པ་ཞེས་བྱ་བར། སངས་རྒྱས་གདོན་མི་ཟ་བར་གྲུབ་པ་ཞེས་བྱ་བར་འབྱུང་བར་འགྱུར་རོ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །རིམ་པ་ཡོངས་སུ་རྫོགས་པ་ན། འབྲས་བུ་མཐར་ཕྱིན་པར་ལུང་སྟོན་པ་དང༌། སྐབས་ཀྱིས་འབྲེལ་བས་དེ་ནས་རྡོ་རྗེ་སེམས་དཔའ་དེ་ཁོ་ན་ཉིད་དེས། སྐྱེས་བུ་དམ་པ་ལྔ་པོ་དེ་དག ཞིང་ཁམས་དང༌། མཛད་པ་དང༌། དབང་གི་ཆུ་བོ་ཡོངས་སུ་རྫོགས་པར་གྱུར་པ་ན་ཞིང་ཁམས་ལྔར་ཡང་དག་པར་རྫོགས་པའི་སངས་རྒྱས་རིགས་ལྔའི་བྱང་ཆུབ་ཆེན་པོའི་འབྲས་བུར་མངོན་དུ་ལུང་བསྟན་༼༡༩༥༽པ་ནི་འདི་ལྟ་སྟེ། སྐྱེས་བུ་དམ་པ་དེ་དག་དང་འཁོར་འདུས་པ་ཕལ་མོ་ཆེ་ཁྱེད་ནི་ཞེས་པའི་ཚིག་འདིས་ཁྱེའུ་ལྔ་ལམ་པ་འདྲ་བའི་སྤྲུལ་པར་གསུངས་པ་ལྟར་འཁོར་དེ་རྣམས་ཀྱང་མཚུངས་པས་དམ་པའི་རིགས་ཅན་རྣམས་ཀྱང་མཚོན་པ་ཡིན་ལ། ཡང་ན་རང་བཞིན་མཉམ་པ་ཉིད་ལ་དགོངས་པའོ། །ཞེས་འབྱུང་ཀྱང་གཞུང་དོན་སྔ་མའོ། །སྤྱིར་ལུང་བསྟན་པ་ལ། མངོན་སུམ་དུ་ལུང་བསྟན་པ་སྒོམ་ལམ་ལུང་ཆེན་ཐོབ་པ་ལྟ་བུ། ཤུགས་ལས་ལུང་བསྟན་པ་འོད་གསལ་བདེ་བ་ཆེན་པོའི་ལུང་ཐོབ་པ་མཐོང་ལམ་ཡིན་པ་ལྟ་བུ། ཞར་ལ་ལུང་བསྟན་པ་ཟབ་དོན་རྟོགས་ཤིང་སྨྲ་བ་དེ་སྲས་དམ་པ་ཡིན་པར་ལུང་ཐོབ་པ་གསང་སྙིང་ལེའུ་ཐ་མ་ནས་བསྟན་པ་ལྟ་བུ། དུས་ཀྱི་ཐ་མར་སྐད་ཅིག་གིས་ལུང་བསྟན་པ་རྒྱལ་ཚབ་ཆོས་ཀྱི་རྒྱལ་པོར་ལོངས་སྐུའི་རིགས་ལྔའི་སངས་རྒྱས་སུ་ལུང་ཐོབ་པ་ལྟ་བུ་ལས་འདིར་ཐ་མའོ། །དེའང་རང་བྱུང་གི་ཡེ་ཤེས་ཀྱི་ངོ་བོ་ཡེ་ཇི་བཞིན་པའི་རྡོ་རྗེ་སེམས་དཔའ་ཐོག་མ་དང་ཐ་མ་མེད་པའི་དུས་ནས་ཡེ་སངས་རྒྱས་པ་དེ་ཉིད་ཇི་བཞིན་པར་རྟོགས་པ་མཐར་ཕྱིན་ནས་མངོན་པར་རྫོགས་པར་སངས་རྒྱས་པས་རྒྱུད་དག་པའི་རྡོ་རྗེ་སེམས་དཔའ་དག་པ་གཉིས་ལྡན་པ་འབའ་ཞིག་ཏུ་གྱུར་ཏེ། སྐྱེས་བུ་དམ་པ་སེམས་དཔའ་རྡོ་རྗེ་ཞེས་བྱ་བ་དེ་ནི། འཇིག་རྟེན་གྱི་ཁམས་ཤར་ཕྱོགས་མངོན་པར་དགའ་བ་ཞེས་བྱ་བར། སངས་རྒྱས་མི་འཁྲུགས་པ་ཞེས་བྱ་བར་འབྱུང་བར་འགྱུར་རོ། །སྐྱེས་བུ་དམ་པ་རྡོ་རྗེ་རིན་ཆེན་ཞེས་བྱ་བ་དེ་ནི། འཇིག་རྟེན་གྱི་ཁམས་ལྷོ་ཕྱོགས་དཔལ་དང་ལྡན་པ་ཞེས་བྱ་བར། སངས་རྒྱས་རིན་ཆེན་འབྱུང་བ་ཞེས་བྱ་བར་འབྱུང་བར་འགྱུར་རོ། །སྐྱེས་བུ་དམ་པ་རྡོ་རྗེ་ཆོས་ཞེས་བྱ་བ་དེ་ནི། འཇིག་རྟེན་གྱི་ཁམས་ནུབ་ཕྱོགས་བདེ་བ་ཅན་ཞེས་བྱ་བར། སངས་རྒྱས་འོད་སྣང་མཐའ་ཡས་ཞེས་བྱ་བར་འབྱུང་བར་འགྱུར་རོ། །སྐྱེས་བུ་དམ་པ་རྡོ་རྗེ་དབྱིངས་ཞེས་བྱ་བ་དེ་ནི། འཇིག་རྟེན་གྱི་ཁམས་དབུས་ཕྱོགས་བྱང་ཆུབ་ཀྱིས་བརྒྱན་པ་ཞེས་བྱ་བར། སངས་རྒྱས་རྣམ་པར་སྣང་མཛད་ཅེས་བྱ་བར་འབྱུང་བར་འགྱུར་རོ། །སྐྱེས་བུ་དམ་པ་རྡོ་རྗེ་སྣ་ཚོགས་ཞེས་བྱ་དེ་ནི། འཇིག་རྟེན་གྱི་ཁམས་བྱང་ཕྱོགས་རྣམ་པར་དག་པ་ཞེས་བྱ་བར། སངས་རྒྱས་དོན་མི་ཟ་བར་དོན་ཡོད་གྲུབ་པ་ཞེས་བྱ་བར་འབྱུང་བར་འགྱུར་རོ་ཞེས་ལུང་བསྟན་ཏེ་ལེའུ་དང་པོ་དང་སྦྱར་རོ།།

གཉིས་པ་ཞིང་ཁམས་དེའི་ཡོན་ཏན་ནི།

ཞིང་ཁམས། ཞེས་པ་ནས། སྤྱོད་དོ། །ཞེས་པའི་བར་གྱིས་བསྟན་ཏེ།

ཞིང་ཁམས་དེ་དག་ཀུན་གྱི་ཡོན་ཏན་ནི། ཡོངས་སུ་བརྗོད་པར་བྱ་བའི་དཔེ་ལས་འདས་ཏེ། དཔེ་མེད་པའི་ཕྱིར་བརྗོད་ཀྱིས་མི་ལང་ངོ་། །སྐུའི་ཚེའི་ཚད་ནི་དཔག་ཏུ་མེད་པ་འབའ་ཞིག་གོ །ཞིང་ཁམས་དེར་འཁོད་པའི་སེམས་ཅན་ཆེན་པོ་རྣམས་ནི་རིགས་འཛིན་ཆེན་པོ་འབའ་ཞིག་གོ །ཚེའི་ཚད་ཀྱང་དེ་ཉིད་ཀྱི་རིག་པ་འཛིན་པའི་མཚན་ཉིད་དོ། །འཇིག་རྟེན་གྱིས་ཁམས་གཞན་ནས་མིན་པའི་རིགས་འཛིན་མཐའ་ཐུག་པ་མེད་པ་རྣམས་ཀྱང་། ཞིང་ཁམས་དེ་དག་དུ་རྣམ་པར་སྣང་ངོ་། །དེ་དག་ན་ཆོས་ཉན་པ་དང་། སྨྲ་བ་དང་རྣམ་པར་འགྲོལ་བ་ནི། ཏིང་ངེ་འཛིན་འབའ་ཞིག་གིས་སོ། །ཆོས་ཀྱང་བྱ་བ་མེད་པའི་ཆོས་དེ་ཁོ་ན་ཉིད་གསང་བ་དམ་པ་འབའ་ཞིག་གོ །ལོངས་སྤྱོད་ཀྱང་ཆོས་ཉིད་ཟབ་མོ་འབའ་ཞིག་ལ་སྤྱོད་དོ།།

ཞིང་ཁམས་དེ་དག་ཀུན་གྱི་ཡོན་ཏན་ནི། ཟག་པ་མེད་པའི་ཡེ་ཤེས་རང་སྣང་བའི་༼༡༩༦༽ཕྱིར་ཡོངས་སུ་བརྗོད་པར་བྱ་བའི་དཔེ་ལས་འདས་ཏེ། ཐུབ་པའི་ཞིང་གིས་17བསྒྲུན་མི་ནུས་པས་དཔེ་མེད་པའི་ཕྱིར་ཚད་དང་བྲལ་བས་ལོངས་སྐུའི་ཞིང་གི་བཀོད་པ་ཐམས་ཅད་བརྗོད་ཀྱིས་མིང་ལང་ངོ་། །སྟོན་པ་རིགས་ལྔའི་སྐུ་ཚེའི་ཚད་ནི་མྱ་ངན་ལས་འདས་པ་མི་མངའ་བས་དཔག་ཏུ་མེད་པ་འབའ་ཞིག་གོ །འདུལ་བའི་ཞིང་ནི་བཞུགས་པའི་ཞིང་ན་གནས་ཏེ་ཞིང་ཁམས་དེར་འཁོད་པའི་སེམས་ཅན་རྣམས་ནི་ས་ནོན་པས་རྒྱལ་སར་བསྙེན་པ་རིག་འཛིན་ཆེན་པོ་འབའ་ཞིག་གོ།

འདིར་ཆོས་རྗེའི་ཕྱག་མཆན་ན། ཕྱག་རྒྱ་ཆེན་པོ་ཡང་གསུང་ལ་ལྷུན་གྲུབ་ཀྱང་ཞེས་བཞུགས་པས། དངོས་སུ་ཕྱག་རྒྱ་ཆེན་པོའི་རིག་འཛིན་ལ། སྒྱུ་འཕྲུལ་མན་ཆད་ཀྱི་ལྷུན་གྲུབ་རིག་འཛིན་ཀྱང་ཡིན་ཏེ་ཟུར་གྱི་བཀའ་སྲོལ་ལྟར་གཟུང་ངོ་། །འཁོར་དེ་རྣམས་ཀྱི་ཚེའི་ཚད་ཀྱང་ཚེ་ལ་དབང་ཐོབ་པས་སྟོན་པ་དེ་ཉིད་ཀྱི་རིགས་འཛིན་པའི་ཚེ་ཚད་དང་ལྡན་ཏེ་རང་དོན་དུ་དཔག་ཏུ་མེད་ལ་གཞན་དོན་དུ་ཅིར་ཡང་སྣང་བས་མ་ངེས་པ་ཉིད་དོ། །སྤྲུལ་པའི་ཞིང་གི་འཇིག་རྟེན་ཁམས་གཞན་དག་ནས་སྨིན་པའི་རིགས་འཛིན་མཐའ་ཐུག་པ་མེད་པ་རྣམས་ཀྱང་ཞིང་ཁམས་དེ་དག་ཏུ་རྣམ་པར་སྣང་ཞིང་ཀུན་ཏུ་འབྱུང་ངོ་། །ཞིང་དེ་དག་ན་ཆོས་ཉན་པ་དང༌། སྟོན་ཅིང་སྨྲ་བ་དང༌། རྣམ་པར་བགྲོ་བ་ནི་ཏིང་ངེ་འཛིན་གྱི་དགོངས་པ་འབའ་ཞིག་གིས་སྟོན་ཅིང་རྟོགས་པ་ཤ་སྟག་གོ །བསྟན་པ་དམ་པའི་ཆོས་ཀྱང་གསང་སྔགས་ཇི་བཞིན་པ་བྱ་བ་མེད་པའི་ཆོས་དེ་ཁོ་ན་ཉིད་གསང་བ་དམ་པ་འབའ་ཞིག་ལས་གཞན་གྱིས་སེལ་མེད་པའི་སྒྲས་རྒྱུའི་ཐེག་པ་བཀག་གོ །སྟོན་པ་དང་འཁོར་ཀུན་གྱི་ལོངས་སྤྱོད་ཀྱང་ཐུན་མོང་དུ་ཆོས་ཉིད་ཟབ་མོ་འབའ་ཞིག་ལ་སྤྱོད་དོ། །ཚིག་འདི་དག་གིས་ལོངས་སྤྱོད་རྫོགས་པའི་ཞིང་དུ་གསལ་བས་ལེའུ་དང་པོའི་རྒྱལ་བ་རིགས་ལྔ་ལོངས་སྤྱོད་རྫོགས་སྐུར་ངེས་སོ།།

གསུམ་པ་རིག་འཛིན་ཀུན་གཏན་ཚིགས་ཀྱིས་རིགས་ལྔར་བསྟན་པ་ལ་གཉིས་ཏེ། མདོར་བསྟན་པ་དང༌། གཏན་ཚིགས་ཀྱིས་རྒྱས་པར་བཤད་པའོ། །དང་པོ་ནི།

རིགས་འཛིན། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

རིགས་འཛིན་དེ་དག་ཀུན་ཀྱང་རིགས་ལྔ་པ་འབའ་ཞིག་སྟེ། དེ་ཅིའི་ཕྱིར་ཞེ་ན། ཐམས་ཅད་ཀྱང་རིགས་ལས་བྱུང་ཞིང་། ལྔར་སྣང་ལ། ལྔར་སྨིན་པ་སྟེ། ལྔ་ལས་གྱུར་པས། ལྔར་ངེས་པ་ནི། འདི་ལྟ་སྟེ།

རིགས་དང་ཞིང་ཁམས་ཀྱི་བྱེ་བྲག་གི་རིག་འཛིན་པ་དེ་དག་ཀུན་ཀྱང་རྒྱུ་དང་འབྲས་བུ་གཉིས་ཀའི་སྒོ་ནས་སེམས་ཅན་དང་རྒྱལ་བ་རིལ་ཡང་རིགས་ལྔ་པ་འབའ་ཞིག་སྟེ། དེ་ཅིའི་ཕྱིར་ཞེ་ན། དེ་དག་ཐམས་ཅད་ཀྱང་རྒྱུ་ཉོན་མོངས་པ་རིགས་ལྔ་ལས་བྱུང་ཞིང༌། འགྲོ་བ་ལྔར་སྣང་ལ། དེ་ལས་བསྐལ་པ་བོགས་སུ་གྱུར་པའི་མི་བུ་རིགས་ལྔར་སྨིན་པ་སྟེ། ལམ་ལྔའམ་ཡེ་ཤེས་ལྔ་ལས་གྱུར་པས་༼༡༩༧༽རིགས་ཀྱི་སངས་རྒྱས་ལྔར་ངེས་པ་ནི། འདི་ལྟ་སྟེ། ཞེས་གཏན་ཚིགས་ཀྱི་མདོ་བསྟན་པའོ།།

གཉིས་པ་གཏན་ཚིགས་ཀྱིས་རྒྱས་པར་བཤད་པ་ནི།

གང་ཞེ་སྡང༌། ཞེས་པ་ནས། འབའ་ཞིག་གོ །ཞེས་པའི་བར་གྱིས་བསྟན་ཏེ།

གང་ཞེ་སྡང་རིགས་དང་། ང་རྒྱལ་གྱི་རིགས་དང་། འདོད་ཆགས་ཀྱི་རིགས་དང་། རྒྱལ་རིགས་དང་། རྗེའུ་རིགས་དང་། བྲམ་ཟེའི་རིགས་དང་། གདོལ་པའི་རིགས་དང་། ཀུན་སྣང་གི་རིགས་དང་། རིགས་གཅིག་པའི་རིགས་དང་། ཐ་དད་པའི་རིགས་དང་། བྱ་བ་བྱེད་པའི་རིགས་དང་། ཐམས་ཅད་འབྱུང་བའི་རིགས་དང་། རྡོ་རྗེའི་གདུང་དང་སྡེའི་རིགས་དང་། ནོར་བུའི་གདུང་དང་སྡེའི་རིགས་དང་། པདྨའི་གདུང་དང་སྡེའི་རིགས་དང་། གཞོན་ནུའི་གདུང་དང་སྡེའི་རིགས་དང་། གླང་པོའི་གདུང་དང་སྡེའི་རིགས་འབའ་ཞིག་གོ །དེ་བཞིན་དུ་ཐམས་ཅད་ནས་ཐམས་ཅད་དུ་སྣང་བའི་སངས་རྒྱས་དང་བྱང་ཆུབ་སེམས་དཔའ་མཐའ་ཐུག་པ་མེད་པ་རྣམས་ཀྱང་། ལས་དང་འཇུག་པའི་དབང་གིས་རིགས་ལྔ་འབའ་ཞིག་གོ།

ལོག་པ་དང་མ་ལོག་པའི་ཉོན་མོངས་ལྔ་ཐུན་མོང་དུ་སྦྱར་ཏེ། གང་ཞེ་སྡང་གི་རིགས་དང༌། ང་རྒྱལ་གྱི་རིགས་དང༌། འདོད་ཆགས་ཀྱི་དང༌། ཕྲག་དོག་གི་རིགས་དང༌། གཏི་མུག་གི་རིགས་དང༌། མི་བཟད་པའི་སྡུག་བསྔལ་ཅན་བཟོད་ལྡན་གྱི་རིགས་དམྱལ་བ་དང༌། ཤིན་ཏུ་ཡིད་གདུང་བས་ཀུན་གདུང་གི་རིགས་ཡི་དྭགས་དང༌། རྐང་གཅིག་རྐང་གཉིས་རྐང་བཞི། རྐང་དྲུག་རྐང་མང་རྐང་མེད་དེ་ནང་རིགས་གཅིག་ལ་དྲུག་ཏུ་འབྱུང་བའམ། རིགས་དྲུག་ཀའི་གནས་སུ་འབྱུང་བས་དྲུག་འབྱུང་གི་རིགས་བྱོལ་སོང་དང༌། བྱང་ཆུབ་ཀྱི་བསམ་རྒྱུད་ཅན་མང་བས་རྒྱུད་ལྡན་གྱི་རིགས་མི་དང༌། གནས་ཁྱད་པར་མཐོ་བའི་བདེ་བ་ཅན་གནས་ལྡན་གྱི་རིགས་ལྷ་དང་འགྲོ་བ་ལྔ་སྟེ། ལྷ་མིན་ནི་ཤིང་རྟ་ཆེན་པོ་ཐོགས་མེད་ཀྱིས་སྟོད་རིགས་ལྷ་དང་སྨད་རིགས་དུད་འགྲོར་བསྡུས་ལ། ཀུན་ཏུ་བཟང་པོ་ཀློང་དྲུག་པའི་འགྲེལ་པ་དང་ཡིད་བཞིན་རིན་པོ་ཆེའི་མཛོད་དུ་རིགས་བཞིའམ་ལྔར་གསུངས་ཀྱང་ལྷ་དང་དུད་འགྲོ་ཡི་དྭགས་གསུམ་གྱི་འགྲོ་བར་གཏོགས་ཤིང༌། འདིར་འགྲེལ་ཆེན་དུ་སྟོད་རིགས་ལྷ་དང་སྨད་རིགས་ཡི་དྭགས་སུ་བསྡུས་པའི་ཕྱིར་རོ། །འཚོ་ཐབས་ཀྱི་མི་བུ་ལྔ་ནི། དམངས་རིགས་དང༌། རྒྱལ་རིགས་དང་རྗེའུ་རིགས་དང༌། བྲམ་ཟེའི་རིགས་དང༌། གདོལ་པའི་རིགས་དང་ལྔའོ། །སྐབས་འདིར་འགྲེལ་ཆེན་ལས། ལམ་པ་འདི་དག་ནི་ཐེག་པ་སོ་སོ་བར་གྱུར་ན་ཏིང་ངེ་འཛིན་གྱིས་ཆོས་ཉན་པའི་སྐལ་པ་ཅན་དུ་མི་རིགས་པའི་ཕྱིར་མི་སྦྱར་ཏེ། འདིར་ཐུན་མོང་མ་ཡིན་པའི་ལས་དང་པོ་པ་དང༌། རིགས་འབྱེད་པ་དང༌། བདེན་པ་མཐོང་བ་དང༌། བསྒོམ་ལམ་པ་དང༌། མཐར་ཕྱིན་པའོ། །རིགས་ཀྱི་དབང་དུ་དེ་བཞིན་གཤེགས་པའི་རིགས་སུ་འབྱུང་བ་ལ་མ་རག་པ་དང༌། དེ་བཞིན་དུ་རྡོ་རྗེའི་རིགས་དང་པདྨའི་རིགས་དང༌། ལས་ཀྱི་རིགས་དང༌། རིན་པོ་ཆེའི་རིགས་ཀྱི་རིགས་འཛིན་དུ་གྱུར་པ་དངོས་སོ་ཞེས་གཞན་དག་འདོད་ན་ཁྲོ་བོ་ནི་ཡེ་ཤེས་ལྔར་སྨྲ་སྟེ་ཡེ་ཤེས་ལྔ་ལས་རིགས་ལྔར་གྱུར་པའི་ཕྱིར་རོ། །ཞེས་གསུངས་ཤིང༌། ཆོས་རྗེ་དམ་པ་རིན་པོ་ཆེའི་ཕྱག་མཆན་སོགས་ཀྱང་དེ་ལྟར་བཞུགས་པས། ཀུན་སྣང་གི་རིགས་མེ་ལོང་ལྟ་བུའི་ཡེ་ཤེས་དང༌། རིགས་གཅིག་༼༡༩༨༽པའི་རིགས་མཉམ་པ་ཉིད་ཀྱི་ཡེ་ཤེས་དང༌། ཐ་དད་པའི་རིགས་སོ་སོར་རྟོག་པའི་ཡེ་ཤེས་དང༌། བྱ་བ་བྱེད་པའི་རིགས་བྱ་བ་ནན་ཏན་གྱི་ཡེ་ཤེས་དང༌། ཐམས་ཅད་འབྱུང་བའི་རིགས་ཆོས་དབྱིངས་ཡེ་ཤེས་སམ་སྟོང་པ་ཉིད་ཀྱི་ཡེ་ཤེས་རྣམས་ཏེ། སྦྱོར་བ་དོན་གྱི་ཀུན་གཞི་དང༌། ཉོན་ཡིད་དང༌། ཡིད་ཤེས་དང་། སྒོ་ལྔའི་རྣམ་ཤེས་དང༌། ཡེ་དོན་གྱི་ཀུན་གཞི་རྣམས་ཀྱི་ཕྱིན་ཅི་མ་ལོག་པའི་རང་བཞིན་ནོ། །རིགས་ལྔའི་རྒྱུད་འཛིན་ཅིང་འཚོབ་པའི་ཕྱིར་རིགས་ལྔ་དངོས་ཐོབ་པའི་ངེས་པ་སྟེ། རྡོ་རྗེའི་རིགས་ཀྱི་གཙོ་བོ་གདུང་དང་འཁོར་རྡོ་རྗེ་སེམས་དཔའ། རྒྱལ་པོ། ཆགས་པ། ལེགས་པ་རྣམས་སྡེའི་རིགས་དང༌། རིན་པོ་ཆེའམ་ནོར་བུའི་རིགས་ཀྱི་གཙོ་བོ་གདུང་དང༌། འཁོར་རྡོ་རྗེ་རིན་ཆེན། ཉི་མ། རྒྱལ་མཚན། བཞད་པ་རྣམས་སྡེའི་རིགས་དང༌། པདྨོའི་རིགས་ཀྱི་གཙོ་བོ་གདུང་དང༌། འཁོར་རྡོ་རྗེ་ཆོས། རྣོན་པོ། འཁོར་ལོ། སྨྲ་བ་རྣམས་སྡེའི་རིགས་དང༌། ལས་ཀྱིའམ་གཞོན་ནུའི་རིགས་ཀྱི་གཙོ་བོ་གདུང་དང༌། རྡོ་རྗེ་ལས། གནོད་སྦྱིན། གོ་ཆ། ཁུ་ཚུར་ཏེ་འཁོར་རྣམས་སྡེའི་རིགས་དང༌། དེ་བཞིན་གཤེགས་པའམ་གླང་པོའི་རིགས་ཀྱི་གཙོ་བོ་གདུང་དང༌། སེམས་དཔའ་རྡོ་རྗེ། རཏྣ་རྡོ་རྗེ། ཆོས་རྡོ་རྗེ། ལས་རྡོ་རྗེ། རྣམས་ནི་སྡེའི་རིགས་ཏེ་འབའ་ཞིག་གོ །ཞེས་སེལ་མེད་པ་ནི་དེར་མ་འདུས་པ་མེད་པའི་དོན་ཏོ། །ལྔར་ངེས་པ་ཅིའི་ཕྱིར་ཞེ་ན། དེ་བཞིན་དུ་དུས་ཐམས་ཅད་ནས་གནས་སྐབས་ཐམས་ཅད་དུ་སྣང་བའི་ཐོག་མཐའ་མེད་པའི་སངས་རྒྱས་རིལ་དང༌། བྱང་ཆུབ་སེམས་དཔའ་མཐའ་ཐུག་པ་མེད་པ་རྣམས་ཀྱང༌། རྒྱལ་བ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་མཛད་པའི་ལས་དང༌། སེམས་དཔའ་རྣམས་ཀྱི་འཇུག་པའི་སྒོ་ངེས་པའི་དབང་གིས་རིགས་ལྔ་འབའ་ཞིག་གོ་ཞེས་སོ་སོའི་སྐལ་བའི་ཁྱད་པར་གྱིས་གྲངས་ལྔར་ངེས་པ་ཁོ་ན་སྟེ། གཞི་ལ་དེ་ལྟར་རིལ་ལྔར་ཡོད་པའི་ཕྱིར་དང༌། བཤད་པའི་བྱུང་སྣང་སྨིན་པ་ལྟར་གྱི་རྒྱུ་ནས་མཐར་ཐུག་རིགས་སོ་སོར་འབྱུང་ཞིང་འཚང་རྒྱ་བའི་སྐལ་བ་ཅན་པས་སོ། །དེ་ནི་རྒྱལ་བ་གཅིག་ལ་འཁོར་ལྔ་ནི་མ་ཡིན་ཏེ། རིགས་བཙན་པས་སོ་སོར་ངེས་པའི་ཕྱིར་སྒྲ་དེ་དག་ཀྱང་ཞིང་སོ་སོར་གྲགས་པའོ། །འོན་ཀྱང་མཐར་ཕྱིན་ནས་ཐ་དད་དུ་ལྟ་བ་ནི་མ་ཡིན་ནོ།།

བཞི་པ་དོན་གསང་བར་ངེས་པས་ངེས་པ་རྙེད་པར་དཀོན་པ་ལ་གཉིས་ཏེ། དོན་གསང་བར་ངེས་པ། གཏན་ཚིགས་ཀྱི་རྙེད་པར་དཀའ་བར་བསྟན་པའོ། །དང་པོ་ནི།

ཇི་བཞིན་པའི། ཞེས་པ་ནས། བསྟན་པ་དང༌། ཞེས་པའི་བར་གྱིས་བསྟན་ཏེ།

ཇི་བཞིན་པའི་དབང་གིས་ན་ཐམས་ཅད་ནས་ཐམས་ཅད་དུ་རིགས་ཀྱི་མཚན་མ་མེད་དོ། །ཐ་སྙད་མེད་དོ། །རྣམ་པ་མེད་དོ། །ཡུལ་མེད་དོ། །འཇུག་པ་མེད་དོ། །སངས་རྒྱས་པ་མེད་དོ། །ལུང་བསྟན་པ་མེད་དོ། །ངེས་པ་རྙེད་པ་མེད་དོ། །ཐམས་ཅད་ནས་ཐམས་ཅད་དུ་བྱང་ཆུབ་ཉིད་དོ། །སྙིང་པོ་ཉིད་དོ། །དེ་ཁོ་ན་ཉིད་དོ། །ཡང་དག་པ་ཉིད་དོ། །ངེས་པ་དམ་པ་ཉིད་དོ། །གཞན་མ་ཡིན་པ་ཉིད་དོ། །སྐྱེ་བ་མེད་པ་ཉིད་དོ། །འགག་པ་མེད་པ་ཉིད་དོ། །དེ་བཞིན་ཉིད་དོ། །མ་ནོར་བ་ཉིད་དོ། །ཆོས་ཉིད་དོ། །ཆོས་ཀྱི་དབྱིངས་ཉིད་དོ། །བསམ་གྱིས་མི་ཁྱབ་པས་བསམ་དུ་མེད་པ་ཉིད་དོ། །ཡང་དག་པའི་མཐའ་ཉིད་དོ། །ཞེས་ལུང་བསྟན་པ་དང་།

དེ་ལྟར་ལྔར་ངེས་པར་༼༡༩༩༽བསྟན་པའང་ལམ་པའི་ངོ་བཙན་ཙམ་ལས། ཡེ་ཇི་བཞིན་པའི་ཕྱི་མོའི་ཆོས་ཉིད་མ་བཅོས་པ་ནི་མཐའ་ལས་གྲོལ་བའི་དབང་གིས་ན། སྔར་གྱི་དུས་ཐམས་ཅད་ནས་ཕྱིས་ཀྱི་གནས་སྐབས་ཐམས་ཅད་ཀྱི་ཐོག་མཐའ་རིལ་དུ་རིགས་ལྔ་ཐ་དད་ཀྱི་མཚན་མ་མེད་པས་གཟུང་ཆ་གཉིས་སུ་མ་འདྲེས་པར་རང་རྒྱུད་དུ་གཟུང་བ་དང་བྲལ་བ་ཉིད་དོ། །གང་གི་ཉོན་མོངས་ལྔ་ནས་རིགས་ལྔའི་བར་གྱི་མཚན་མ་མེད་ཚུལ་རྒྱས་པར་གསུང་ངོ༌། །དེ་བཞིན་དུ་བཏགས་པའི་མིང་གི་ཐ་སྙད་མེད་དོ། །གདགས་གཞི་ངོ་བོ་མ་འདྲེས་པའི་རྣམ་པ་ཅན་དུ་མེད་དོ། །འཇུག་པའི་ཡུལ་ལམ་ཡང་མེད་དོ། །ལམ་པས་འཇུག་པ་མེད་དོ། །གྲུབ་པ་མཐར་ཕྱིན་མ་ཕྱིན་མ་དམིགས་པས་སངས་རྒྱས་པ་མེད་དོ། །བཤད་པའི་འབྱུང་མཐའ་ལྔ་གྲོལ་ཏེ། དེའི་ཕྱིར་ཕྱིས་གང་དུ་འགྱུར་བར་ལུང་བསྟན་པ་མེད་དོ། །དོན་ལ་ངེས་པ་རྙེད་དེ་གྲུབ་པ་མི་འགྱུར་བའི་ཐ་སྙད་ཀྱང་མེད་དོ། །དེ་ལྟར་མེད་དོ་ཞེས་བཀོལ་བའང་མེད་དོ།།

འོ་ན་ཇི་བཞིན་པ་དེའི་མཚན་ཉིད་ཇི་ལྟ་བུ་ཞེ་ན། བཅུ་བཞི་དང་ལྡན་པའི་ཕྱིར་ཏེ། སྔ་ཕྱིའི་ཆོས་སོ་ཅོག་གི་མཐའ་མ་སྤངས་བྲལ་ཞིང་ལྷུན་གྱིས་གྲུབ་པའི་ཕྱིར་ཐམས་ཅད་ནས་ཐམས་ཅད་དུ་དབྱེར་མེད་པས་བྱང་ཆུབ་པ་ཉིད་དོ། །འབྲས་བུའི་རྩི་བཅུད་ཡིན་པའི་ཕྱིར་སྙིང་པོ་ཉིད་དོ། །དོན་མ་ནོར་ངེས་པ་གཟུང་བ་ཉིད་ཡིན་པའི་ཕྱིར་དེ་ཁོ་ན་ཉིད་དོ། །ཕྱིན་ཅི་མ་ལོག་པ་ལམ་དུ་ཤར་བ་ཉིད་ཀྱི་ཕྱིར་ཡང་དག་པ་ཉིད་དོ། །དོན་མཐར་ཐུག་པ་ཉིད་ཡིན་པའི་ཕྱིར་ངེས་པ་དམ་པ་ཉིད་དོ། །བྱ་རྩོལ་གྱི་མི་རྙེད་པའི་ཕྱིར་གཞན་མ་ཡིན་པ་ཉིད་དོ། །རྟེན་དང་གྲོགས་མེད་པས་དངོས་གཞི་མི་ཟིན་པའི་ཕྱིར་སྐྱེ་བ་མེད་པ་ཉིད་དོ། །མཚན་ཉིད་མ་ངེས་པས་ཅིར་ཡང་སྣང་བའི་ཕྱིར་འགག་པ་མེད་པ་ཉིད་དོ། །ཡེ་ཇི་བཞིན་པ་བཅོས་བསླད་མེད་པའི་ཕྱིར་དེ་བཞིན་ཉིད་དོ། །འཁྲུལ་གཞི་ཀ་ནས་དག་པའི་ཕྱིར་མ་ནོར་བ་ཉིད་དོ། །མཐའ་མེད་ཅིང་མི་གཡོ་བའི་ཕྱིར་སྤྲོས་པ་དང་བྲལ་བའི་ཆོས་ཉིད་དོ། །མུ་མཐའ་ལས་འདས་པའི་ཕྱིར་ཆོས་ཀྱི་དབྱིངས་ཉིད་དོ། །རྟོག་གེ་བས་བརྟག་དཔྱད་ལས་གྲོལ་བའི་ཕྱིར་བསམ་གྱིས་མི་ཁྱབ་པས་རྒྱ་ཆེ་ཞིང་ཟབ་པས་བསམ་དུ་མེད་པ་ཉིད་དོ། །དགོངས་པ་དོན་གྱི་ཞེ་ཕུགས་སུ་གྱུར་བའི་ཕྱིར་ཡང་དག་པའི་མཐའ་ཉིད་དོ། །ཞེས་གསུངས་ཏེ་ལུང་བསྟན་པ་དང༌།

གཉིས་པ་གཏན་ཚིགས་ཀྱི་རྙེད་པར་དཀའ་བར་བསྟན་པ་ནི།

དེ་ཁོ་ན། ཞེས་པ་ནས། དེ་ལྟ་བུའོ། །ཞེས་པའི་བར་གྱིས་བསྟན་ཏེ།

དེ་ཁོ་ན་ཉིད་གསང་བ་དམ་པའི་སྒྲ་དཔལ་རྡོ་རྗེ་སེམས་དཔའི་དེ་ཁོ་ན་ཉིད་སྟོང་པ་ཉིད་ལས་གྲགས་པས། སྐྱེས་བུ་དམ་པ་རྣམས་ཐམས་ཅད་ནས་ཐམས་ཅད་དུ་བྱང་ཆུབ་ཀྱི་སྙིང་པོ་ཉིད་དུ་ངེས་པ་རྙེད་དོ། །ཀྱེ་ལངྐའི་བདག་པོ་བྱང་ཆུབ་ཀྱི་སེམས་དེ་ཁོ་ན་ཉིད་གསང་བ་དམ་པ་དེ། འདི་ལྟར་དཀའ་བ། འདི་ལྟར་ཟབ་པ། འདི་ལྟར་རྒྱ་ཆེ་བ། འདི་ལྟར་བསམ་དུ་མེད་པ། བསམ་གྱིས་མི་ཁྱབ་པའི་ཕྱིར། གང་གིས་ངེས་པ་རྙེད་པར་དཀའ་བ་ནི་དེ་ལྟ་བུའོ།།

༼༢༠༠༽དེ་ལྟར་དེ་ཁོ་ན་ཉིད་གསང་བ་དམ་པའི་སྒྲ་སྟོན་པ་དཔལ་རྡོ་རྗེ་སེམས་དཔའི་ངོ་བོ་དེ་ཁོ་ན་ཉིད་སྟོང་པ་ཆེན་པོར་ཡེ་ནས་མཉམ་པ་ཉིད་དུ་བཞུགས་པ་ལས་གྲགས་པས་འཁོར་སྐྱེས་བུ་དམ་པ་དེ་རྣམས་ཐམས་ཅད་ནས་ཐམས་ཅད་དུ་རིགས་ཆེན་པོ་ལྔར་དུས་རིལ་དུ་བྱང་ཆུབ་ཀྱི་སྙིང་པོ་ཉིད་དུ་ལྷུན་གྱིས་གྲུབ་པར་མངོན་དུ་གྱུར་ཏེ་ངེས་པ་དམ་པ་རྙེད་དོ། །ཀྱེ་ལང་ཀའི་བདག་པོ་ཞེས་གསང་བདག་གིས་སྡུད་པ་པོ་ལ་བོས་ཏེ། བྱང་ཆུབ་ཀྱི་སེམས་དེ་ཁོ་ན་ཉིད་གསང་སྔགས་གསང་བ་དམ་པ་ཇི་བཞིན་པ་དེ་ནི། འདི་ལྟར་འཇིག་རྟེན་པས་མ་ཤེས་པས་ཤེས་ཤིང་བརྟག་པར་དཀའ་བ། འདི་ལྟར་འདས་པས་མ་ཤེས་པས་གཏིང་དཔག་དཀའ་ལ་ཟབ་པ། འདི་ལྟ་ངོ་བོ་མུ་མཐའ་མེད་ཅིང་ཁྱབ་པས་རྒྱ་ཆེ་བ། འདི་ལྟར་ངོས་གཟུང་མེད་ཅིང་སྤྱོད་ཡུལ་དང་བྲལ་བས་བསམ་དུ་མེད་པ། ཡུལ་དུ་ཡིད་ལ་དམིགས་པས་མ་ཁྱབ་པས་བསམ་གྱིས་མི་ཁྱབ་པའི་ཕྱིར། གང་གིས་རྟོགས་ཤིང་གྲུབ་ནས་ངེས་པ་རྙེད་པར་དཀའ་བ་ནི་དེ་ལྟ་བུའོ། །ཞེས་བཀའ་སྩལ་ཏོ།།

ལྔ་པ་དོན་ལ་བརྩད་པའི་སྐྱོན་སྤང་བ་ལ་གསུམ་སྟེ། རྩོད་པའི་དྲིས་ལན་དངོས། དེ་ལས་འཕྲོས་ཏེ་རྒྱས་པའི་དྲིས་ལན། དེ་ལས་འཕྲོས་ཏེ་ཤིན་ཏུ་རྒྱས་པའི་དྲིས་ལན་ནོ། །དང་པོ་ནི།

དེ་ནས་ཡང༌། ཞེས་པ་ནས། བཅས་པའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོས་དྲིས་པ། ཀྱེ་གསང་བ་པའི་བདག་པོ་བྱང་ཆུབ་ཀྱི་སེམས་དེ་ཁོ་ན་ཉིད་གསང་བ་དམ་པ་འདི་རྒྱུན་དང་བཅས་པ་ཞིག་གམ། འོན་ཏེ་རྒྱུན་ཆད་པ་ཞིག གལ་ཏེ་རྒྱུན་དང་བཅས་པ་ཞིག་ན་ནི། ཡེ་ཤེས་ཆེན་པོ་སྐྱེ་འགག་དང་བཅས་པ་ཡིན་ནོ། །འོན་ཏེ་རྒྱུན་ཆད་པ་ཞིག་ན་ནི། །ཡེ་ཤེས་ཡེ་ཤེས་ཀྱི་ཁྱད་པར་དང་། དགོངས་ པ་དགོངས་པའི་གོ་འཕང་མེད་པར་འགྱུར་རོ། །དེ་སྐད་ཅེས་དྲིས་པ་དང་། གསང་བ་པའི་བདག ་པོས་སྨྲས་པ། ཀྱེ་ལངྐའི་བདག་པོ་བྱང་ཆུབ་ཀྱི་སེམས་དེ་ཁོ་ན་ཉིད་གསང་བ་དམ་པ་དེ་ནི་སྐྱེ་འགག་མེད་པར་རྒྱུན་དང་བཅས་པའོ།།

ལེའུ་དྲུག་གིས་གཏན་ལ་དབབ་པའི་གསང་བ་མཆོག་གི་ངོ་བོ་ལ་གཏར་ཀ་གེགས་སེལ་གྱི་ཚུལ་དུ། དེ་ནས་ཡང་ལང་ཀའི་བདག་པོས་དྲིས་པ། ཀྱེ་གསང་བ་པའི་བདག་པོ། བྱང་ཆུབ་ཀྱི་སེམས་དེ་ཁོ་ན་ཉིད་གསང་སྔགས་ཀྱི་ངོ་བོ་གསང་བ་དམ་པ་འདི་ཉིད། སྐད་ཅིག་མའི་རྒྱུན་དང་བཅས་པ་ཞིག་གམ། འོན་ཏེ་རྒྱུན་ཆད་དེ་མེད་པ་ཞིག་ཡིན། གལ་ཏེ་སྐད་ཅིག་གི་རྒྱུན་དང་བཅས་པ་ཞིག་ཡིན་ན་ནི། ཡེ་ཤེས་ཆེན་པོ་སྐྱེ་འགག་དང་བཅས་པའི་སྐྱོན་དུ་འགྱུར་བ་ཡིན་ནོ། །འོན་ཏེ་རྒྱུན་ཆད་པ་ཞིག་ན་ནི། ལམ་པའི་ཡེ་ཤེས་དང་སངས་རྒྱས་ཀྱི་ཡེ་ཤེས་ཀྱི་ཁྱད་པར་དང༌། ལམ་གོང་མ་གོང་མའི་དགོངས་པ་དང༌། རྒྱལ་བའི་དགོངས་པའི་གོ་འཕང་གི་ཁྱད་པར་མེད་པར་འགྱུར་རོ། །ཞེས་དེ་སྐད་ཅེས་དྲིས་པ་དང༌། གསང་བ་པའི་བདག་པོས་སྨྲས་པ། ཀྱེ་ལང་ཀའི་བདག་པོ། བྱང་ཆུབ་ཀྱི་སེམས་དེ་ཁོ་ན་ཉིད་གསང་བ་དམ་པ་དེ་ནི་རྒྱུ་རྐྱེན་བཞི་དང་བྲལ་བས་ངོ་བོ་མ་གྲུབ་པའི་ཕྱིར་དང༌། ཡེ་ཤེས་ཆེན་པོ་གང་ཡང་སྣང་བ་མི་འགོག་པའི་ཕྱིར་ཡོངས་རྫོགས་ལ་སྐྱེ་འགག་གི་མཐའ་གཉིས་དག་༼༢༠༡༽པས་སྐད་ཅིག་མ་མེད་པར་མ་འདྲེས་པ་ལ་རང་བཞིན་རྒྱུན་དང་བཅས་པའོ།།

གཉིས་པ་དེ་ལས་འཕྲོས་ཏེ་རྒྱས་པའི་དྲིས་ལན་ནི།

དྲིས་པ། ཞེས་པ་ནས། འབྱུང་བའི་ཕྱིར་རོ། །ཞེས་པའི་བར་གྱིས་བསྟན་ཏེ།

དྲིས་པ། གསང་བ་པའི་བདག་པོ་གང་གི་རྒྱུན་དང་བཅས་པ་ལགས། སྨྲས་པ། ལངྐའི་བདག་པོ་ཡེ་ཤེས་རྒྱུན་དང་བཅས་པའོ། །སྙིང་རྗེ་རྒྱུན་དང་བཅས་པའོ། །འཕྲིན་ལས་རྒྱུན་དང་བཅས་པའོ། །ཡོན་ཏན་རྒྱུན་དང་བཅས་པའོ། །བྱིན་རླབས་རྒྱུན་དང་བཅས་པའོ། །སྨོན་ལམ་རྒྱུན་དང་བཅས་པའི་ཕྱིར་རྒྱུན་མ་ཆད་པའོ། །དྲིས་པ། གསང་བ་པའི་བདག་པོ་དེ་དག་ལ་ཅིའི་ཕྱིར་རྒྱུན་ཞེས་བྱ། སྨྲས་པ། ལངྐའི་བདག་པོ་རྒྱུན་གྱི་རང་བཞིན་དུ་འབྱུང་བའི་ཕྱིར་རོ།།

ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ། གང་གི་རྒྱུན་དང་བཅས་པ་ལགས། གསང་བའི་བདག་པོས་སྨྲས་པ། ལང་ཀའི་བདག་པོ། འགྲོ་བ་དང་འོང་བ་མེད་པར་ཡེ་ཤེས་རྒྱུན་དང་བཅས་པའོ། །སྙིང་རྗེ་རྒྱུན་དང་བཅས་པའོ། །ཕྲིན་ལས་རྒྱུན་དང་བཅས་པའོ། །ཡོན་ཏན་རྒྱུན་དང་བཅས་པའོ། །བྱིན་རླབས་རྒྱུན་དང་བཅས་པའོ། །སྨོན་ལམ་རྒྱུན་དང་བཅས་པའི་ཕྱིར་དྲུག་པོ་གདུལ་བྱ་ལ་འབྱུང་བས་རྒྱུན་མ་ཆད་པའོ། །དེ་ལྟར་སྐད་ཅིག་མའི་མི་རྟག་པ་དག་པས་རྒྱུའི་ཐེག་པ་ལས་འཕགས་པར་གསལ་ལོ། །དེ་ནས་ངེས་ཚིག་དྲིས་པ། གསང་བ་པའི་བདག་པོ། དེ་དག་ལ་ཅིའི་ཕྱིར་རྒྱུན་ཞེས་བྱ། ལན་སྨྲས་པ། ལང་ཀའི་བདག་པོ། དུས་དང་སྐད་ཅིག་མ་གཉིས་ལས། འདིར་སེམས་ཀྱི་ཆོས་ཉིད་བྱང་ཆུབ་ཀྱི་སེམས་དེ་དུས་གསུམ་དུ་རྒྱ་མ་ཆད་པར་རྒྱུན་གྱི་རང་བཞིན་དྲུག་ཏུ་འབྱུང་བའི་ཕྱིར་རོ། །ཞེས་རྒྱུན་གྱི་མིང་གི་ངེས་ཚིག་གྲུབ་པའོ། །འདི་རྣམས་རྒྱས་པར་ཡོངས་རྫོགས་ལ་དཀྱིལ་འཁོར་གསུམ་དུ་དབྱེར་མེད་ཀྱང༌། མ་འདྲེས་པའི་སྐབས་དོན་ལེའུ་དགུ་པ་ནས་བཅུ་བཞི་པའི་བར་གྱི་སོ་སོའི་ངེས་གསང་ལ་བརྟེན་ནས་རྟོགས་པར་བྱའོ།།

གསུམ་པ་དེ་ལས་འཕྲོས་ཏེ་ཤིན་ཏུ་རྒྱས་པའི་དྲིས་ལན་ནི།

དྲིས་པ། ཞེས་པ་ནས། འདས་པའོ། །ཞེས་པའི་བར་གྱིས་བསྟན་ཏེ།

དྲིས་པ། རྒྱུན་གྱི་རང་བཞིན་གང་། སྨྲས་པ། ལངྐའི་ བདག་པོ་གང་མེད་པ ་ཉིད་རྒྱུན་གྱི་རང་བཞིན་ཏེ། འདི་ལྟ་སྟེ།

རྒྱུན་དང་བཅས་པའི་བྱང་ཆུབ་སེམས། །མེད་རྒྱུ་བཏགས་ཆགས་བལྟས་པར་སྣང་། །སྣང་འདོད་སྡུག་བསྔལ་ཆེན་པོའི་ནད། །དེ་ཉིད་ཆེ་ཡོན་རྒྱུན་མི་འཆད། །ཀུན་ཏུ་རྒྱུན་དང་བཅས་པ་ཡི། །གསང་བ་དམ་པ་དེ་ཁོ་ན། །སྒྲོན་མ་དམ་པ་གང་དག་གི །སྐྱེས་བུ་དམ་པ་གང་དག་ལ། །དེ་ཉིད་ཆེན་པོར་དེ་ཉིད་རྒྱུད། །དགོངས་པ་སྣང་བ་མ་གཏོགས་པ། །བརྗོད་པས་བསྟན་ཡོད་མ་ཡིན་ཏེ། །མེད་རྒྱུ་སྣང་མེད་གང་མཐོང་བ། །ཡེ་བཏང་མ་བཅོས་ཇི་བཞིན་ཏེ།།

ཉིད་དུ་ངེས་པ་དེ་ཁོ་ན། །ཅིར་ཡང་མི་སྣང་སྤྱོད་དང་བྲལ། །བསམ་མེད་ཡུལ་ལས་འདས་པའོ།།

ཡང་དྲིས་པ། རྒྱུན་གྱི་རང་བཞིན་གང་ལགས། ལན་སྨྲས་པ། ལང་ཀའི་ བདག་པོ། གང་ངོ་བོ་འདི་ལྟར་མི་ཟིན་པས་དངོས་པོ་མེད་པ ་ཉིད་རྒྱུན་གྱི་རང་བཞིན་ཡིན་ཏེ། རིག་འཛིན་ཆེན་པོ་ཤྲཱི་སིངྷས། རིན་པོ་ཆེ་འོད་ལས །སྣང་གསལ་འཁོར་ལོ་རིག་པ་འདི། །ངོ་བོ་མ་གྲུབ་མེ་ཤེལ་འདྲ། །དངོས་མེད་ཡེ་ཤེས་མཐོང་བས་གྲོལ། །གཟུགས་སོགས་སྣང་བ་བཏགས་པ་ཡིན། །ཞེས་སོ། །དེའང་དངོས་གང་ཞེ་ན། འདི་ལྟ་སྟེ། དུས་གསུམ་དུ་རྒྱ་ཆད་ཕྱོགས་ལྷུང་མེད་པར་དྲུག་ཉིད་བར་མ་ཆད་པ་དང་ལྡན་པས་རྒྱུན་དང་བཅས་པའི་ཆོས་ཉིད་ཀྱི་དབྱིངས་བྱང་ཆུབ་ཀྱི་སེམས་ནི། རང་བཞིན་ཐམས་ཅད་པའི་ཕྱིར་ངོ་བོ་མེད་པ་ཉིད་ཐམས་ཅད་འབྱུང་བའི་རྒྱུ་ཡིན་པས་དེ་ཉིད་ལ་རྣམ་པར་རྟོག་པས་གང་ལྟར་བཏགས་པ་ལྟར་ཆགས་ཤིང་རིག་པ་ལ་ཕྱོགས་མེད་པས་གང་དུ་བལྟས་ཏེ་བསམ་པར་བྱས་པ་ལྟར་སྣང་བ་ཡིན་ཀྱང༌། སྐྱེ་བོ་དང་ལམ་པ་དག་གིས་སྣང་༼༢༠༢༽བ་དེ་ཉིད་ཡང་དག་པར་འདོད་ཅིང་ཡུལ་གྱི་དངོས་པོར་འཛིན་ཞེན་བྱེད་ན་དོན་གྱི་གནས་ལུགས་མཐོང་དུ་མི་སྟེར་བས་གཅོང་རྙིང་སྡུག་བསྔལ་ཆེན་པོའི་ནད་ཀྱིས་གདུང་བར་འགྱུར་ལ། དེ་ཉིད་རོལ་པ་རང་སྣང་དུ་རྟོགས་ན་ཆེ་བའི་ཡོན་ཏན་རྒྱུན་མི་འཆད་པའི་སྣང་བ་ཡིན་ཏེ། ཟག་པ་མེད་པའི་ཡེ་ཤེས་རང་སྣང་བའི་ཕྱིར་རོ།།

དེ་འཁོར་ལ་བསྟན་པའི་ཚུལ་ནི། མ་རྟོགས་ནའང་དགོས་པ་སྐོང་བས་ཆོས་ཉིད་ཀུན་ཏུ་རྒྱུན་དང་བཅས་པ་ཡི་གསང་སྔགས་དོན་གྱི་གནས་ལུགས་ཐུན་མོང་གི་ས་པ་དང་རྒྱུད་དག་པས་ཀྱང་ཇི་བཞིན་དུ་མ་རྟོགས་པས་གསང་བ་དམ་པ་ཡིན་དོན་མ་ནོར་བའི་དེ་ཁོ་ན་ཉིད་གང་དེ། རྡོ་རྗེ་སེམས་དཔའི་སྒྲོན་མ་བཀོད་པའི་རྒྱལ་བ་དམ་པ་གང་དག་གིས་གསང་བའི་བདག་པོ་སོགས་སྐྱེས་བུ་དམ་པ་གང་དག་ལ་གསང་མཆོག་དེ་ཁོ་ན་ཉིད་ཆེན་པོར་རྟོགས་པ་མཐར་ཕྱིན་ཏེ་དེ་བཞིན་ཉིད་དུ་བརྒྱུད་པ་ནི་ཆུ་དྭངས་པ་དང་ཉི་ཟླའི་ཚུལ་དུ་སྟོན་པའི་དགོངས་པ་ཟབ་མོ་བློ་ཆེ་བ་ལ་རང་གསལ་དུ་སྣང་བ་མ་གཏོགས་པ། ཚིག་ཏུ་བརྗོད་པས་ཇི་ལྟ་བར་བསྟན་དུ་ཡོད་པ་མ་ཡིན་ཏེ། དངོས་པོ་མེད་པ་ཉིད་ཆོས་ཐམས་ཅད་ཀྱི་རྒྱུ་རུ་གྱུར་ཀྱང་ངོ་བོ་ཕྱོགས་གཅིག་པའི་སྣང་བ་གང་ཡང་མེད་པའི་ཆོས་ཉིད་བསམ་གྱིས་མི་ཁྱབ་པ་དབྱིངས་དང་འདུ་འབྲལ་མེད་པའི་ཡེ་ཤེས་མ་བཅོས་པ་དེ་ཉིད་སྐལ་ལྡན་གང་གིས་མ་ནོར་བར་རྟོགས་པ་ནི་མདོར་ན་ཐུན་མོང་མིན་པའི་བདེན་པ་མཐོང་བ་ཉིད་དོ།།

འདི་ལ་ཞིབ་མོར་དབྱེ་ན་རྒྱལ་བ་ལ་དགོངས་བརྒྱུད། རིགས་འཛིན་ལ་རིག་བརྒྱུད། གང་ཟག་ལ་རྣ་བར་བརྒྱུད་པའི་ཚུལ་གྱིས་དོན་དང་སྦྱོར་ཤེས་པར་བྱའོ། །ཇི་སྐད་དུ། གསང་བདག་དགའ་རབ་དཔའ་བོས་དམ་ཚིག་གི་ཀློང་ལས། བྱང་ཆུབ་སེམས་ཉིད་རྣམ་པར་དག །ཡེ་ནས་ལྷུན་གྱིས་རྫོགས་པས་ན། །ངང་ལ་གནས་པའང་རྣམ་པར་དག །དེ་ལྟ་མིན་ན་དྲི་མར་བཅས། །ཞེས་གསུངས་པ་ལྟར། བྱང་ཆུབ་ཀྱི་སེམས་དཀྱིལ་འཁོར་གསུམ་དབྱེར་མེད་པའི་ངོ་བོར་ཡེ་ནས་སངས་རྒྱས་པའི་དོན་ལ་བློ་བྱ་རྩོལ་ཀྱི་འདུ་ཤེས་བཏང་ལ་མ་བཅོས་ཇི་བཞིན་པའི་ངང་དུ་གནས་ཏེ་བརྟན་པ་ཐོབ་ན་སྙིང་པོ་བྱང་ཆུབ་ཉིད་དུ་ངེས་པ་རྙེད་ནས་དགོངས་པ་དེ་ཁོ་ཉིད་དུ་རྣམ་པར་དག་པ་ཡིན་ཏེ། དེ་ལྟར་མིན་ན་གཞི་དབྱིངས་རང་བཞིན་རྣམ་དག་མིན་པར་འགྱུར་ལ། དེ་ལྟ་བུའི་གནས་ལུགས་དེ་བཞིན་ཉིད་ལ་ཡུལ་དང་ངོ་བོ་མེད་པས་མཐའ་གང་ཅིར་ཡང་མི་སྣང་བར་རྟོག་དཔྱོད་ཐམས་ཅད་དང་བྲལ་ཏེ་བློས་ཅིར་ཡང་བསམ་དུ་མེད་ཅིང་དམིགས་པའི་ཡུལ་ལས་འདས་པས་འདུ་ཤེས་གང་ཡང་མ་གཡོས་ན་སྒོམ་དུ་མེད་པ་བསྒོམ་པའི་མཆོག་དམ་༼༢༠༣༽པའོ།།

གསུམ་པ་མཇུག་བསྡུ་བ་ནི།

ཀྱེ་ལང་ཀའི། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

ཀྱེ་ལངྐའི་བདག་པོ། སངས་རྒྱས་ཀུན་གྱི་དམ་པ་གསང་བའི་སྙིང་པོ་འདི་ལ་ཐམས་ཅད་ནས་ཐམས་ཅད་དུ་གནས་པར་བྱའོ། །དེ་ཅིའི་ཕྱིར་ཞེ་ན། གང་ལས་ཀྱི་ཆོས་ཀྱིས་བརྒྱངས་པ་རྣམས་ཀྱིས་བྱེ་བ་སྙེད་ཀྱི་བསྐལ་པར་ལས་དཀའ་བ་དཔག་ཏུ་མེད་པས་འབད་ཅིང་བཙལ་ཀྱང་དམ་པ་མ་ཐོབ་པ་གང་དག་གིས་བྱ་བ་མེད་པའི་དོན་གྱིས་ཐང་ཅིག་ཡུད་ཙམ་དམ་པ་གསང་བ་འདི་ལ་མོས་པ་ཙམ་གྱིས་གདོན་མི་ཟ་བར་དམ་པ་ཐོབ་པར་འགྱུར་རོ། །དེའི་ཕྱིར་ལངྐའི་བདག་པོ་འདི་ལ་གནས་པར་བྱའོ། །འདི་ལས་མི་འདའ་བར་བྱའོ། །དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་རྣམས་བློ་གྲོས་དམ་པའི་ངེས་པ་རྙེད་པར་གྱུར་ཏོ།།

ཀྱེ་ལང་ཀའི་བདག་པོ། སངས་རྒྱས་ཀུན་གྱི་དགོངས་པ་དམ་པ་གསང་བའི་སྙིང་པོ་འདི་ལ། ཞེས་ལེའུ་དགུ་པ་སྡུད་ལ། མི་གནས་པས་ཐེག་པ་འོག་མ་ལྟར་མིན་པར་གསང་སྔགས་པ་ལྟར་ཐམས་ཅད་ནས་ཐམས་ཅད་དུ་གནས་པར་བྱའོ། །ཞེས་ལེའུ་བཅུ་པ་སྡུད་དེ་དེ་ལྟར་བསྒོམ་པར་གདམས་པའོ། །དེ་ཅིའི་ཕྱིར་ཞེ་ན། གང་ལས་ཀྱི་ཆོས་ཀྱིས་བསྒྱངས་པ་རྩོལ་བས་རིང་དུ་སོང་བ་རྒྱུའི་ཐེག་པ་བ་རྣམས་ཀྱིས། རྙེད་དང་མ་རྙེད་ཀྱི་རིམ་པས་བྱེ་བ་སྙེད་ཀྱི་བསྐལ་པར་ལས་དཀའ་བ་དཔག་ཏུ་མེད་པས་འབད་ཅིང་བརྩལ་བར་བྱས་ཀྱང་དམ་པ་མ་ཐོབ་པ་གང་དག་གིས། ཞེས་ལེའུ་བཅུ་གཅིག་པ་སྡུད་ཅིང༌། གསང་སྔགས་བྱ་བ་མེད་པའི་དོན་གྱིས་ཐང་ཅིག་ཡུད་ཙམ་དུའང་དམ་པ་གསང་བ་འདི་ལ་གཉིས་སུ་མེད་པར་མོས་པ་ཙམ་གྱིས་དབུགས་ཕྱིན་ཏེ་ཞེས་ལེའུ་བཅུ་གཉིས་པ་སྡུད་ལ། གདོན་མི་ཟ་བར་དབང་དམ་པ་ཐོབ་སྟེ་ཞེས་ལེའུ་བཅུ་གསུམ་པ་སྡུད་དེ་ལུང་སྟོན་པར་འགྱུར་རོ། །ཞེས་ལེའུ་བཅུ་བཞི་པ་བསྡུས་པའོ། །དེའི་ཕྱིར་ལང་ཀའི་བདག་པོ། མ་བརྩལ་ན་དེ་ཉིད་མཐོང་མ་ཐག་ཏུ་གྲུབ་པས་གསང་བ་འདི་ལ་གནས་པར་བྱའོ། །དུས་ཀུན་ཏུ་འདི་ལས་མི་འདའ་བར་བྱའོ། ཞེས་གདམས་སོ། །དེ་སྐད་ཅེས་སྨྲས་པས། ལང་ཀའི་བདག་པོ་ལ་སོགས་པ་རྣམས། ལན་གྱི་སྒོ་ནས་བློ་གྲོས་དམ་པའི་ངེས་པ་རྙེད་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྐྱེས་བུ་དམ་པ་ལུང་བསྟན་པའི་ལེའུ་སྟེ་བཅུ་བཞི་པའོ། །ཐེག་པ་ཆེན་པོ་ངེས་པར་བྱུང་བའི་ཚུལ་ལས། གང་གིས་ངེས་པ་རྙེད་པའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ། བྱུང་ཚུལ་བསྟན་པ་གསུམ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྒྱལ་ཚབ་སྐྱེས་བུ་དམ་པ་ལྔ་རིགས་ལྔའི་རྒྱལ་བར་ལུང་བསྟན་པའི་ལེའུ་སྟེ་བཅུ་བཞི་པ་རྣམ་པར་བཤད་པའོ། །དེ་དག་གིས་ཐེག་པ་ཆེན་པོ་ངེས་པར་འབྱུང་བའི་ཚུལ་ལས། གང་གིས་ངེས་པ་རྙེད་པའི་གཏམ་རྒྱུད་བརྗོད་པ། ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་གསུམ་པའི་དོན་གསལ་བར་བཤད་དེ་རྒྱས་པར་བཀྲོལ་བའོ།། །།

ལེའུ་བཅོ་ལྔ་པ་གསང་བ་དམ་པ་དེ་ཁོ་ན་ཉིད་དུ་ངེས་པ།

༈ བཞི་པ་སྙིང་པོ་བྱང་ཆུབ་ཏུ་ངེས་པའི་བྱུང་ཚུལ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

དེ་ནས། ཞེས་པ་ནས། སྣང་བའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོས། གསང་བ་པའི་བདག་པོ་ལ་སྔོན་དུ་བྱུང་བའི་ཚིག་བཅུ་གཉིས་པའི་བཞི་པ། སྙིང་པོ་བྱང་ཆུབ་ཉིད་དུ་ངེས་པ་ན་ཡང་བྱུང་། ཞེས་ལུང་བསྟན་པ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ་ཉིད་ཀྱི་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་གཏམ་དུ་བརྗོད་པའི་སྐབས་སུ། སྙིང་པོ་བྱང་ཆུབ་ཉིད་དུ་ངེས་པ་ན་ཡང་བྱུང་། ཞེས་བཀོད་པ་དེ་ཇི་ལྟ་བུ་ཞིག་ཏུ་ངེས་ཏེ་བྱུང་བ་ལགས། སྨྲས་པ། ལངྐའི་བདག་པོ་གང་དམ་པ་དག་ཐམས་ཅད་ནས་ཐམས་ཅད་དུ་སྙིང་པོ་བྱང་ཆུབ་ཉིད་དུ་སྣང་བའོ།།

སྤྱིར་ལེའུ་འདིས་ངེས་དོན་སྟོན་ལ། ནམ་མཁའ་རྡོ་རྗེ་བགྲོ་བར་མཛོད་ཀྱི་ལན་ཏེ། ཁྱད་པར་རྩལ་འཕངས་ལས་སྟོད་མཐོང་ལམ་སྨད་སྒོམ་ལམ་བདག་དོན། རྒྱུད་གནས་ལུགས་ལས་སྙིང་པོ་བྱང་ཆུབ་ཀྱི་བྱུང་ཚུལ་དེ་ཁོ་ན་ཉིད་ཀྱི་ལྟ་བ་ནམ་མཁའ་ལྟ་བུ་༼༢༠༤༽ཉིད་རྒྱས་པར་སྟོན་ནོ། །དེ་ནས་ཡང་སྡུད་པ་པོ་ལང་ཀའི་བདག་པོས། སྟོན་པ་གསང་བ་པའི་བདག་པོ་ལ། སྔོན་དུ་བྱུང་བའི་ཚིག་བཅུ་གཉིས་པའི་བཞི་པ། སྙིང་པོ་བྱང་ཆུབ་ཏུ་ངེས་པ་ན་ཡང་འབྱུང་ཞེས་ལུང་བསྟན་པ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ་ཉིད་ཀྱི་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་གཏམ་དུ་བརྗོད་པའི་སྐབས་སུ། སྙིང་པོ་བྱང་ཆུབ་ཉིད་དུ་ངེས་པ་ན་ཡང་འབྱུང་ཞེས་བཀོད་པ་དེ། ཇི་ལྟ་བུ་ཞིག་ཏུ་ངེས་ཏེ་བྱུང་བ་ལགས། ལན་མདོར་སྨྲས་ཏེ་བཀའ་སྩལ་པ། ལང་ཀའི་བདག་པོ། གང་མཐར་ཐུག་གི་རྒྱལ་བ་དམ་པ་དག་ལ་འཇིག་རྟེན་པའི་དུས་ཐམས་ཅད་ནས་འཇིག་རྟེན་ལས་འདས་པའི་དུས་ཐམས་ཅད་དུ་སྙིང་པོ་བྱང་ཆུབ་ཀྱི་ངོ་བོ་འབྱུང་འཇུག་མེད་པ་ཉིད་མི་སྣང་བར་ཐམས་ཅད་དུ་རང་སྣང་བར་ངེས་པས་མཉམ་པར་བཞག་མ་བཞག་མི་མངའ་བའོ།།

གཉིས་པ་རྒྱས་པར་བཤད་པ་ལ་བདུན་ཏེ། སྙིང་པོ་བྱང་ཆུབ་ཀྱི་ངོ་བོ་བསྟན་པ། གནས་ཚད་དང་མཚན་ཉིད་དང་རང་བཞིན་བཤད་པ། དྲིས་ལན་མང་པོའི་སྒོ་ནས་བསྟན་པ། མཚོན་པའི་དཔེ་བཤད་པ། མིང་གི་རྣམ་གྲངས་བཤད་པ། ཆོས་ཐམས་ཅད་ཀྱི་གཞིར་བསྟན་པ། སྙིང་པོ་བྱང་ཆུབ་ཏུ་ངེས་པ་ན་གདུལ་བྱ་སྐབས་ལ་བབ་ཚུལ་ལོ། །དངཔོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

སྨྲས་པ། ཞེས་པ་ནས། མ་དམིགས་སོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ་སྐྱེས་བུ་དམ་᪍་ᨵᩏ་᩶ᨵ་᫗ᨕᩏ᫥་སུ་ངེས་པ་རྙེད་དེ་སྙིང་པོ་བྱང་ཆུབ་ཏུ་ངེས་པ་ན། ཐམས་ཅད་ནས་ཐམས་ཅད་དུ་ཇི་ལྟར་སྣང་། གང་སྣང་བ་ཞིག་ན་ནི་མ་བྱུང་མ་སྐྱེས་པར་མི་རུང་བ་ཞིག མི་སྣང་བ་ཞིག་ན་ནི་རྒྱུན་གྱི་ཡེ་ཤེས་དང་། རྒྱུན་གྱི་སྙིང་རྗེ་འབྱུང་བར་མི་རུང་བ་ཞིག་ན། འདི་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ཀྱེ་ལངྐའི་བདག་པོ་དེ་ནི་འདི་ལྟ་སྟེ། སྙིང་པོ་བྱང་ཆུབ་ཇི་ལྟ་བ་ལ་སྐྱེས་བུ་དམ་པ་དེ་བཞིན་ཉིད་དེ། སྙིང་པོ་བྱང་ཆུབ་གང་ཡིན་པ་དེ་ནི་སྐྱེས་བུ་དམ་པ་ཉིད་ལ། སྐྱེས་བུ་དམ་པ་གང་ཡིན་པ་དེ་ནི་སྙིང་པོ་བྱང་ཆུབ་ཉིད་དེ། སྐྱེས་བུ་དམ་པ་ཞེས་ནི་མ་མཐོང་ལ། སྙིང་པོ་བྱང་ཆུབ་ཅེས་ནི་མི་དམིགས་སོ།།

ཡང་ལང་ཀའི་བདག་པོས་སྨྲས་པ། གསང་བ་པའི་བདག་པོ། སྐྱེས་བུ་དམ་པ་རིགས་ལྔ་ལ་སོགས་པ་གང་དག་ཡོངས་སུ་ངེས་པ་རྙེད་དེ་སྙིང་པོ་བྱང་ཆུབ་ཏུ་གནས་པ་ན། སྔ་མའི་དུས་ཐམས་ཅད་ནས་ཕྱི་མའི་དུས་ཐམས་ཅད་དུ་དགོངས་པ་དམ་པ་དེ་ཉིད་ཇི་ལྟར་སྣང་སྟེ། གང་ཡུལ་དུ་སྣང་བ་ཞིག་ཡིན་ན་ནི། མ་བྱུང་མ་སྐྱེས་པར་མི་རུང་བ་ཞིག་ལ། འོན་ཏེ་མི་སྣང་བ་ཞིག་ན་ནི། རྒྱུན་གྱི་ཡེ་ཤེས་དང༌། རྒྱུན་གྱི་སྙིང་རྗེ་འབྱུང་བར་མི་རུང་བ་ཞིག་ན། འདི་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ཀྱེ་ལང་ཀའི་བདག་པོ། དེ་ནི་འདི་ལྟ་སྟེ། སྙིང་པོ་བྱང་ཆུབ་ནི་ཆོས་ཉིད་ཇི་ལྟ་བ་ཉིད་ལ། སྐྱེས་བུ་དམ་པ་ནི་སེམས་ཉིད་དེ་བཞིན་དུ་རྟོགས་པ་ཉིད་དེ། དེས་ན་ཆོས་ཉིད་དང་སེམས་ཉིད་ཐ་མི་དད་པས་སྙིང་པོ་བྱང་ཆུབ་གང་ཡིན་པ་དེ་ནི་སྐྱེས་བུ་དམ་པ་དེ་ཉིད་ལ། སྐྱེས་བུ་དམ་པ་གང་ཡིན་པ་དེ་ནི་སྙིང་པོ་བྱང་ཆུབ་ཉིད་དེ་ངོ་བོ་དབྱེར་མེད་དུ་༼༢༠༥༽བཞུགས་པས་སྤྱོད་ཡུལ་དང་བྲལ་བར་ངེས་ཏེ་སྐྱེས་བུ་དམ་པ་ཞེས་ནི་དམིགས་བྱེད་དུ་མ་མཐོང་ལ། སྙིང་པོ་བྱང་ཆུབ་ཞེས་ནི་ཡུལ་དུ་མ་དམིགས་པར་སྣང་མི་སྣང་ལས་གྲོལ་བས་སོ། །ཞེས་བསྟན་ཏོ།།

གཉིས་པ་རྒྱས་པར་བཤད་པ་ནི།

དྲིས་པ། ཞེས་པ་ནས། ལྷན་ནེ་བའོ། །ཞེས་པའི་བར་གྱིས་བསྟན་ཏེ།

དྲིས་པ། གང་མ་མཐོང་མ་དམིགས་ན་ནི། དམ་པ་རྣམས་ཀྱིས་གསུངས་པ་ལྟར་ན། གང་དེ་ཉིད་མཐོང་བ་དེས་ཆོས་ཐམས་ཅད་མཐོང་ངོ་། །ཆོས་ཐམས་ཅད་མཐོང་བ་དེས་སྙིང་པོ་བྱང་ཆུབ་མཐོང་ངོ་ཞེས་གསུངས་པ་དང་། གང་དེ་ཁོ་ན་ཉིད་ངེས་པ་རྙེད་པ་དེས་ངེས་པ་རྙེད་དོ། །ཞེས་གསུངས་པ་ལས་འགལ་བར་གྱུར་ན། འདི་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་དྲིས་པ་ལས། སྨྲས་པ། ཀྱེ་ལངྐའི་བདག་པོ་འདི་ལྟ་སྟེ། གཟུགས་སྣང་གང་མཐོང་རྫས་རྙེད་མེད། །མ་མཐོང་དེ་མཐོང་ཉིད་ངེས་པ། །བརྗོད་མེད་གང་རིགས་ཉམ་རྙེད་ལ། །མཐོང་རྙེད་ཐ་སྙད་ཙམ་དུ་བརྗོད། །རྣམ་དག་ལམ་ཆེན་དེ་ཉིད་དུ། །བྱུང་བའི་སྐྱེས་བུ་དམ་པ་དག །དོན་ཆེན་རབ་ཏུ་ངེས་རྙེད་དེ། །མི་དམིགས་པ་ཡི་ངང་ཉིད་ལ། །མི་གཡོ་མི་རྟོག་པ་ཡི་ཚེ། །མི་གནས་ཆོས་སྐུ་ངོ་བོ་ཉིད། །རང་བྱུང་ཡེ་ཤེས་ནམ་མཁའ་ཆེ། །མ་འདྲེས་ཡོངས་སུ་རྫོགས་པའི་ངང་། །མི་སྐྱེ་མི་འགག་དེ་བཞིན་ཉིད། །སྨྲ་བསམ་བརྗོད་མེད་རྟོག་ལས་འདས། །སོ་སོ་རང་རིག་སྤྱོད་ཡུལ་དེ། །དབུས་མཐར་མི་དམིགས་ཇི་བཞིན་ཉིད། །སྙིང་པོ་བྱང་ཆུབ་ཀུན་ཡུལ་ལ། །མ་སྤྲོས་དེ་བཞིན་ལྷན་ནེ་བའོ།།

ཡང་དྲིས་པ། གང་སྤྱོད་ཡུལ་དང་བྲལ་ཏེ་འཛིན་ཆ་གང་ཡང་མ་མཐོང་ལ་གཟུང་ཡུལ་ཅིར་ཡང་མ་དམིགས་ན་ནི། ལེའུ་དགུ་པ་དང་བཅུ་གཅིག་པ་སོགས་ལས་དམ་པ་རྣམས་ཀྱིས་གསུངས་པ་ལྟར་ན། གང་སེམས་ཀྱི་དེ་ཉིད་མཐོང་བ་དེས་ཆོས་ཐམས་ཅད་མཐོང་ངོ་། །ཆོས་ཐམས་ཅད་མཐོང་བ་དེས་སྙིང་པོ་བྱང་ཆུབ་མཐོང་ངོ་། །ཞེས་གསུངས་པ་དང༌། གང་དེ་ཁོ་ན་ཉིད་ལ་ངེས་པ་རྙེད་པ་དེས་སེམས་ཀྱི་ཆོས་ཉིད་རྟོགས་ནས་ངེས་པ་རྙེད་དོ། །ཞེས་གསུངས་པ་རྣམས་ལས་དངོས་སུ་འགལ་བར་གྱུར་ན། འདི་ཉིད་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་དྲིས་པ་ལས། ལན་སྨྲས་པ། ཀྱེ་ལང་ཀའི་བདག་པོ་འདི་ལྟ་སྟེ། མིག་གིས་གཟུགས་ཀྱི་ཡུལ་སྣང་གཅོད་པ་ལྟར་གང་ཡང་དག་པའི་བདེན་དོན་མཐོང་བ་ནི་རྫས་ཀྱི་རྣམ་པར་ལོགས་ནས་རྙེད་དེ་རྟོགས་ཤིང་ཐོབ་པ་མིན་ཏེ། དེ་ནི་ཅིར་ཡང་མ་ངེས་པས་གང་དུའང་མཐོང་བྱར་མེད་པའི་མ་མཐོང་བའི་དོན་དེ་ཉིད་རང་གསལ་དུ་མཐོང་བ་ན་དེ་ཁོ་ན་ཉིད་ངེས་པ་ཡིན་ལ། དེ་བས་ན་བརྗོད་དུ་མེད་པའི་དོན་དང་མཐུན་པར་རང་རིག་ལྷུན་གྲུབ་ཆེན་པོའི་དགོངས་ཉམས་རྙེད་པ་ལ། བདེན་དོན་མཐོང་བ་དང་ངེས་པ་རྙེད་དོ་ཞེས་བླ་དྭགས་ཀྱི་ཐ་སྙད་ཙམ་དུ་བརྗོད་པ་ལས་ངོ་བོ་ཉིད་ཀྱིས་ཡུལ་དང་ཡུལ་ཅན་དུ་མཐོང་བ་མེད་པར་ལ་བཟླ་སྟེ། ཇི་སྐད་དུ། ཆོས་ཅན་མི་མཐོང་ཆོས་ཉིད་ཀྱང༌། །མི་མཐོང་སེམས་ཅན་སེམས་མི་མཐོང༌། །སངས་རྒྱས་མི་མཐོང་གང་མཐོང་བ། །དེས་ནི་ཡང་དག་བདེན་པ་མཐོང༌། །ཞེས་འབྱུང་ངོ། །དེའི་ཚུལ་ཇི་ལྟ་བུ་ཞེ་ན། མཐའ་ཀུན་མ་སྤངས་པར་སེལ་བས་རྣམ་པར་དག་པའི་ཉེ་ལམ་ཆེན་པོ་དེ་ཁོ་ན་ཉིད་དམ་པ་ཐེག་པའི་རྒྱལ་པོའི་གསང་སྒོ་རྨད་དུ་བྱུང་བ་གང་དེ་ངེས་པར་སྣང་བའི་སྐྱེས་བུ་དམ་པ་རིགས་ལྔ་ལ་སོགས་པ་དེ་དག་གསང་སྔགས་བྱ་བ་མེད་པའི་དོན་ཆེན་པོ་རབ་ཏུ་ངེས་པའི་གདེང་རྙེད་དེ་མཐའ་གང་དུའང་མི་དམིགས་པ་ཡི་རིག་པ་གཉིས་སུ་མེད་པའི་ངང་ཉིད་དུ་གསལ་བ་ལ་ཡུལ་གྱིས་མི་གཡོ་ཞིང་བློ་ཡིས་ཀུན་ཏུ་མི་རྟོག་པ་ཡི་ཚེ་ན་མཐའ་ལ་མི་གནས་པའི་རིག་པ་དེ་ཉིད་འོད་༼༢༠༦༽གསལ་ཆོས་ཀྱི་སྐུ་རང་བྱུང་ཡེ་ཤེས་ལྷུན་གྱིས་གྲུབ་པའི་ངོ་བོ་ཉིད་ཡིན་ནོ། །དེར་མ་ཟད་སྐད་ཅིག་མའི་མི་རྟག་པ་བྲལ་ལ་རྒྱུ་རྐྱེན་མེད་པས་རང་བྱུང་རང་གསལ་བས་ཡེ་ཤེས་ངོས་བཟུང་མེད་པས་ནམ་མཁའ་ལྟ་བུ་ལ་ཆེ་བའི་ཡོན་ཏན་ཐམས་ཅད་རྫོགས་པས་རྣམ་པ་མ་འདྲེས་ལ་ཆོས་ཉིད་དུ་ཡོངས་སུ་རྫོགས་པའི་ངང་ཉིད་རྒྱུ་ལས་མི་སྐྱེ་རྐྱེན་གྱིས་མི་འགག་པར་གཉིས་སུ་མེད་པའི་དེ་བཞིན་ཉིད་ངོ་བོ་བསྟན་དུ་མེད་པས་སྨྲ་བསམ་ལས་གྲོལ་ཏེ་ངག་གིས་བརྗོད་དུ་མེད་ཅིང་ཡིད་ཀྱི་རྟོག་པ་ལས་འདས་པས་མ་བཅོས་ཡོངས་གྲོལ་ཆེན་པོའི་དགོངས་པ་སྟེ། ཀུན་འདུས་ལས། རང་བྱུང་ཞི་བ་མ་བཀག་ཆོས། །ཡེ་ནས་མ་བཅོས་དོན་གྱིས་གསལ། །མ་སྐྱེས་རྣམ་དག་བྱང་ཆུབ་སེམས། །མི་གནས་ཡེ་ཤེས་ཐུགས་དང་མཉམ། །ཞེས་སོ། །དེ་ལྟར་དེ་ཁོ་ན་ཉིད་ཡུལ་མེད་པའི་ཡུལ་ཆེན་པོ་ནི་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་རྒྱལ་བའི་དགོངས་པ་དམ་པ་ཡིན་ཏེ། དེ་ལ་བཤད་པ་བཞིན་བདེན་པའི་དབུས་དང་མི་བདེན་པའི་མཐའ་ཡི་ཐ་སྙད་ཙམ་ཡང་མི་དམིགས་ཤིང་མཚན་ཉིད་གཟའ་གཏད་མེད་པས་ཇི་བཞིན་པ་ཉིད་དེ་ཐམས་ཅད་ཀྱི་གཞི་རྩར་གྱུར་པས་སྙིང་པོ་བྱང་ཆུབ་དམ་པ་འདུས་མ་བྱས་པ་ནི། རྒྱལ་བ་ཀུན་གྱི་འབྱུང་གནས་དང་བསྐྱེད་པའི་ཡུམ་དུ་གནས་ལ་དེ་ཉིད་གང་དུ་འང་མ་འགག་པར་གསལ་བས་མ་སྤྲོས་ཀུན་ལ་ཁྱབ་པའི་ཐིག་ལེ་ཆེན་པོ་དེ་བཞིན་ཉིད་ལས་མ་གཡོས་པར་དགོངས་པ་ལྷན་ནེ་བར་བཞུགས་པ་ལ་སྤྱོད་ཡུལ་གྱི་ཐ་སྙད་ཙམ་ཡང་མེད་པའོ།།

གཉིས་པ་གནས་ཚད་དང་མཚན་ཉིད་དང་རང་བཞིན་བཤད་པ་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

ཡང་ལང་ཀའི། ཞེས་པ་ནས། ཅི་ལགས། ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། གསང་བ་པའི་བདག་པོ་བྱང་ཆུབ་ཀྱི་སྙིང་པོ་དེ་ཁོ་ན་ཉིད་དེ་ཇི་ཙམ་གྱིས་ན་གནས་པར་འགྱུར། མཚན་ཉིད་དང་རང་བཞིན་ཅི་ལགས།

ཡང་ལང་ཀའི་བདག་པོས་དྲིས་པ། གསང་བ་པའི་ བདག་པོ། བྱང་ཆུབ་ཀྱི་སྙིང་པོ་དེ་ཁོ་ན་ཉིད་དེ་རང་སྣང་ལ་དུས་དང་ཐ་དད་མེད་པ ་ཉིད་ན་ཡུན་ཇི་ཙམ་གྱི་ཚད་ཀྱིས་ན་གདུལ་བྱའི་ངོར་སྣང་ཞིང་གནས་པར་འགྱུར། དེའི་མཚན་ཉིད་དང་རང་བཞིན་ཅི་ལྟ་བུ་ལགས།

གཉིས་པ་ལན་ལ་གཉིས་ཏེ། གནས་པའི་ཚད་བསྟན་པ། མཚན་ཉིད་དང་རང་བཞིན་བཤད་པའོ། །དང་པོ་ནི།

སྨྲས་པ། ཞེས་ པ་ནས། ཚད་མེད་པས་སོ། །ཞེས་པའི་བར་གྱིས་བསྟན་ཏེ།

སྨྲས་པ། ལངྐའི་བདག ་པོ་ཀུན་ཏུ་མ་ངེས་ཏེ། དུས་ཚིགས་དང་། ཟླ་བ་དང་། ཟླ་བ་ཕྱེད་པ་དང་། ཞག་དང་།

ཉི་མ་དང་། ཐུན་དང་། ཐུན་ཕྱེད་དང་། སྐད་ཅིག་དང་། ཐང་ཅིག་དང་། ཡུད་ཙམ་དང་། དེ་མ་ཐག་པ་དང་།

ཡེ་དེ་ཁོ་ན་ཉིད་དུ་བ་དང་། བསྐལ་པ་དང་། བསྐལ་ པ་ཚད་མེད་པས་སོ།།

ལན་སྨྲས་པ། ལང་ཀའི་བདག ་པོ། གནས་པའི་ཡུན་གྱི་དུས་ནི་ཀུན་ཏུ་ངེས་ཏེ། ལུང་ཆེན་པའམ་དབུགས་ཆེན་པས། དུས་ཚིགས་བཞི་ལོ་དང་། ཟླ་བ་དང༌། ཟླ་བ་ཕྱེད་ཀྱི་བར་དུ་གནས་པ་དང༌། དབུགས་ཆེན་པས། ཡུད་ཙམ་སུམ་༼༢༠༧༽ཅུ་ཞག་གཅིག་དང༌། ཡུད་ཙམ་བཅོ་ལྔ་ལྟ་བུ་ཉི་མ་གཅིག་ཏུ་གནས་པ་དང༌། རིགས་ཆེན་པས། ཆུ་ཚོད་བཅུ་ལྟ་བུ་ཐུན་དང༌། དེའི་ཕྱེད་དམ་ཡུད་ཙམ་ཕྱེད་གསུམ་ལྟ་བུ་ཐུན་ཕྱེད་དུ་གནས་པ་དང༌། འདུན་པ་སེམས་པས། སེ་གོལ་ལམ་ཡུངས་ཀར་བསྐོར་བ་ལྟ་བུ་སྐད་ཅིག་དང༌། སེ་གོལ་གཅིག་གི་ཡུན་ལ་དྲུག་ཅུ་འདའ་བས་དུས་མཐའི་སྐད་ཅིག་མ་བརྒྱ་དང་ཉི་ཤུ་དེའི་སྐད་ཅིག དེ་དྲུག་ཅུ་ཐང་ཅིག་གཅིག་དང༌། དེ་སུམ་ཅུ་ཡུད་ཙམ་གཅིག་དང༌། སྔ་མ་གང་རུང་གི་རྗེས་ཐོག་དེ་མ་ཐག་པའི་ཡུན་དུ་གནས་པ་དང༌། སངས་རྒྱས་རྣམས་དུས་བཞི་མཉམ་པ་ཉིད་དུས་གསུམ་དུ་འགྱུར་བ་མེད་པས་དེ་ཁོ་ན་ཉིད་དུ་བཞུགས་པ་དང༌། ལུང་ཆེན་པའམ་མཐར་ལམ་དང་པོ་པས། བསྐལ་ཕྲན་བརྒྱད་ཅུ་གཅིག་ཏུ་བརྩིས་པས་བསྐལ་པ་ཆེན་པོར་གནས་པ་དང༌། རྩལ་ཆེན་པར། བསྐལ་པ་འབུམ་དང་དྲུག་ཁྲི་སོགས་ཀྱིས་ཚད་མེད་དེ་བདེ་བ་ཆེན་པོར་ལྷུན་གྱིས་གྲུབ་པས་སོ། །ཞེས་ཆོས་རྗེ་དམ་པ་རིན་པོ་ཆེའི་ཕྱག་མཆན་འདི་དང་བསྟུན་ན། མཐར་ལམ་བར་པ་ནས་འོག་མ་ལྟ་བུའི་མཉམ་རྗེས་མེད་ཅིང༌། ཐ་མ་ནས་མཉམ་པར་བཞག་པ་དང་མ་བཞག་པ་མེད་པའི་དགོངས་པ་ཐོབ་ནས། དེ་ཉིད་ཀྱིས་བྱང་ཆུབ་ཆེན་པོ་ལ་སྦྱོར་བས་བསྐལ་པའི་ཚད་ཀྱིས་གཞལ་བ་ལས་འདས་པར་བསྟན་པར་ཡིན་ནོ་སྙམ་མོ། །དེ་དག་ཏུ་སྣང་བ་གནས་པ་ནི་གཞི་དང་ལམ་དང་འབྲས་བུ་ཐུན་མོང་བའོ།།

གཉིས་པ་མཚན་ཉིད་དང་རང་བཞིན་བཤད་པ་ལ་གཉིས་ཏེ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

མཚན་ཉིད་དང༌། ཞེས་པ་ནས། མ་སྐྱེས་པ་ཡིན་ན། ཞེས་པའི་བར་གྱིས་བསྟན་ཏེ།

མཚན་ཉིད་དང་རང་བཞིན་ནི་མེད་པའོ། །མི་དམིགས་པའོ། །གོམས་པར་བྱས་པའོ། །ངེས་པར་བརྟག་པའོ། །ཡོངས་སུ་དཔྱད་པའོ། །ཅིར་ཡང་སྣང་བའོ། །ཡིན་པར་ངེས་པའོ། །ཀུན་ནས་འབྱུང་བའོ། །ཐམས་ཅད་འདུས་པའོ། །ཡོངས་ལ་ཁྱབ་པའོ། །ཡོང་གི་སྐྱེ་བའོ། །རྣམ་པར་དག་པའོ། །གར་ཡང་མ་གྲུབ་པའོ། །ཁྱབ་པ་མེད་པ། མ་ཁྱབ་པ་མེད་པ། མཐོ་དམན་མེད་པ། ཆེ་ཆུང་མེད་པ། བཟང་ངན་མེད་པ། ཡངས་དོག་མེད་པ། རྒྱུ་འབྲས་མེད་པ། ཕོ་མོ་མེད་པ། རིགས་བརྒྱུད་མེད་པ། གཟུགས་མེད་པ། ལས་དང་རྣམ་སྨིན་མེད་པ། ཕྱི་ནང་མེད་པ། སྐྱེ་བ་མེད་པ། འཕོ་འགྱུར་མེད་པ། མུན་སྣང་མེད་པ། སྔ་ཕྱི་མེད་པ། མཐའ་དབུས་མེད་པ། བདག་གཞན་མེད་པ། རྩོལ་སྒྲུབ་མེད་པ། བླང་དོར་མེད་པ། ངང་གིས་མ་བཅོས་པ། ཡོང་གི་འོད་གསལ་བ། མ་བསླད་པ། མ་བྱུང་བ། མ་སྐྱེས་པ་ཡིན་ན།

མ་འགག་པའི་ཆ་ཡི་མཚན་ཉིད་དང༌། མ་སྐྱེས་པའི་ཆ་ཡི་རང་བཞིན་གཉིས་ཡེ་ནས་དབྱེར་མེད་པས་འདི་འདྲར་གཟུང་དུ་མེད་པའོ། །ཡུལ་དང་བྲལ་བས་མི་དམིགས་པའོ། །ཡེ་བདག་དང་མི་ཕྱེད་པའི་ངང་ལ་མཉམ་པས་གོམས་པར་བྱས་པའོ། །ངོ་བོ་ཉིད་གྲུབ་ཟིན་ཏེ་སྒྲོ་སྐུར་མེད་པར་གསལ་བས་ངེས་པར་བརྟགས་པའོ། །ཅི་སྤྱད་དེའི་ངང་ཡིན་པས་ཡོངས་སུ་སྤྱད་པའོ། །འགྲོ་འོང་མེད་ཀྱང་རང་བཞིན་ས་མ་ཟིན་པས་ཅིར་ཡང་སྣང་བའོ། །འཁྲུལ་པ་མེད་ཅིང་མི་འགྱུར་བས་ཡིན་དོན་མ་ནོར་བར་ངེས་པའོ། །ངོ་བོ་ཅིར་ཡང་ཤར་བས་བྱིན་རླབས་ཀུན་ནས་འབྱུང་བའོ། །རིལ་དེ་ཉིད་ལས་མ་འདས་པས་འཁོར་འདས་ཐམས་ཅད་འདུས་པའོ། །ཆོས་ཐམས་ཅད་བསྣུམས་པས་ཡོངས་ལ་ཁྱབ་པའོ། །སྒོ་གང་ཡང་མི་འགོག་པར་རང་བཞིན་ཀུན་ཏུ་སྣང་བས་༼༢༠༨༽ཡོངས་ཀྱིས་སྐྱེ་བའོ། །དྲི་མའི་ས་བོན་ངང་གིས་མེད་པར་མཐའ་ཡིས་མ་གོས་པས་རྣམ་པར་དག་པའོ། །མཚན་ཉིད་དང་ངོ་བོ་ཐམས་ཅད་པའི་ཕྱིར་དང༌། ཕན་ཚུན་ཡངས་པས་སྣུམ་པར་བྱེད་པས་རང་བཞིན་གར་ཡང་མ་གྲུབ་པའོ། །བྱ་བ་མེད་པས་བགོས་པ་ཅན་དུ་ཁྱབ་པ་མེད་པ། ཐམས་ཅད་དེ་ཉིད་ཡིན་པས་མ་ཁྱབ་པ་མེད་པ། མཐོ་དམན་མ་སྤངས་བྲལ་བའི་ངོ་བོ་ལ་གྲངས་ཀྱི་རིམ་པ་མ་དམིགས་པས་མཐོ་དམན་མེད་པ། སྙིང་པོ་བྱང་ཆུབ་དེ་ཁོ་ན་ཉིད་ལ་ཟླ་མེད་ཅིང་ཀུན་གྱི་བྲན་དུ་གྱུར་པས་ཆེ་ཆུང་མེད་པ། ཡེ་ཇི་བཞིན་པ་ལ་འཁོར་བ་དང་མྱ་ངན་ལས་འདས་པའི་མཐའ་གཉིས་མ་སྤངས་བྲལ་བས་བཟང་ངན་མེད་པ། རང་བྱུང་རྒྱ་མཚོའི་ཀློང་ལ་གང་ཡང་མ་སྤངས་ཤིང་ལོག་རྟོག་གི་མིང་ཡང་མ་གྲུབ་པས་ཡངས་དོག་མེད་པ། ཡེ་ཉིད་འབྲས་བུར་ལྷུན་གྱིས་གྲུབ་པ་ལ་རྩོལ་བའི་དུས་སྔ་ཕྱི་བྲལ་བས་རྒྱུ་འབྲས་མེད་པ།

གཉིས་ཀར་སྣང་ལ་མ་གྲུབ་པས་ཕོ་མོ་མེད་པ། འགྲོ་བའི་རྣམ་པའི་རྒྱུད་དུ་མ་ངེས་པས་རིགས་རྒྱུད་མེད་པ། དབྱིབས་དང་ཁ་དོག་ཐམས་ཅད་པ་ལ་རྣམ་པ་མ་དམིགས་པས་གཟུགས་མེད་པ། ཅི་སྤྱད་ཅི་མཛད་ལ་འཛིན་ཆགས་མ་དམིགས་པས་ལས་དང་རྣམ་སྨིན་མེད་པ། རིལ་ཡེ་ཤེས་ཆེན་པོའི་ཁོབ་འོག་ཏུ་ཆུབ་པས་ཡེ་ནས་ཡུལ་གྱི་རྣམ་པ་ངང་གིས་བྲལ་ཏེ་ཐ་སྙད་མ་གྲུབ་པས་ཕྱི་ནང་གི་སྤྱོད་ཡུལ་མེད་པ།

རྐྱེན་བཞི་དང་བྲལ་བས་སྐྱེ་བ་ མེད་པ། བདག་གཞན་མ་དམིགས་པས་རང་རིག་མ་སྐྱེས་པ ་ལ་འཕོ་འགྱུར་མེད་པ། རིག་མ་རིག་དབྱེར་མེད་ཆེན་པོར་ཡེ་ཤེས་ཀྱི་ཉི་མ་ཡེ་ཤར་ལ་ནུབ་པ་བྲལ་བས་མུན་སྣང་མེད་པ། རྒྱུན་དུ་མ་སྐྱེས་ཏེ་རིལ་རང་རིག་པར་གསལ་བས་སྔ་ཕྱི་མེད་པ། སྣང་སྟོང་དབྱེར་མེད་གསུམ་གྱི་ཐ་སྙད་ཡེ་ནས་བྲལ་བས་མཐའ་དབུས་མེད་པ། རྣམ་པ་མེད་ཅིང་གཅིག་དང་དུ་མ་ལས་གྲོལ་བས་ བདག་གཞན་མེད་པ། ཡེ་གྲུབ་ཟིན་པ ་ལ་བཙལ་བས་མི་རྙེད་པར་འབྲས་བུར་ལྷུན་གྱིས་གྲུབ་པས་རྩོལ་སྒྲུབ་མེད་པ། སྐྱོན་ཡོན་དབྱེར་མེད་ལ་བཟང་ངན་མེད་པས་བླང་དོར་མེད་པ། རང་བཞིན་གྱི་གཏན་ཚིགས་ཀྱིས་དབྱེར་མེད་ཀྱི་ངོ་བོ་ཉིད་ལ་བྱེད་པ་པོ་དང་བྲལ་བས་ངང་གིས་མ་བཅོས་པ། སྒྲིབ་བྱེད་མེད་པར་འཆར་ནུབ་བྲལ་བས་ཡོང་གིས་འོད་གསལ་བ། སེལ་མེད་པས་མ་བསླད་པ། རྒྱུ་ལས་མ་བྱུང་བ། རྐྱེན་ལས་མ་སྐྱེས་ཏེ་ཐ་སྙད་དུ་གྲངས་ཀྱི་རྣམ་པ་སུམ་ཅུ་རྩ་བརྒྱད་དང་ལྡན་པ་ཡིན་ན། ཡེ་ནས་རྣམ་དབྱེ་མེད་པའི་མཐའ་བྲལ་འོད་གསལ་ཆེན་༼༢༠༩༽པོའ་ོཞེས་དྲི་བ་ཐ་མ་གཉིས་ཐུན་མོང་གི་ལན་ནོ།།

གཉིས་པ་མཇུག་བསྡུ་བ་ནི།

ལང་ཀའི། ཞེས་པ་ནས། མ་དམིགས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཅི་མཚན་ཉིད་དང་རང་བཞིན་ཅི་ཞེས་འདྲི། བྱང་ཆུབ་སྙིང་པོ་ནི་སྣང་དང་མི་སྣང་ལས་འདས་ཏེ། མཚན་ཉིད་དང་རང་བཞིན་མི་དམིགས་སོ།།

ལང་ཀའི་བདག་པོ། དེ་ལྟ་བུ་ལ་ཅི་ལྟ་བུའི་མཚན་ཉིད་ཅན་དང༌། རང་བཞིན་ཅི་ལྟར་ཡིན་ཞེས་འདྲི་བར་བྱ་བ་ཅི་ཡོད་དེ། བྱང་ཆུབ་ཀྱི་སྙིང་པོ་ནི་མ་གྲུབ་ལ་མི་འགོག་པའི་ཕྱིར་སྣང་བ་དང་མི་སྣང་བའོ་ཞེས་པའི་ཐ་སྙད་ལས་འདས་ཏེ་མཚན་ཉིད་དང་རང་བཞིན་འདི་འདྲར་མེད་པར་མཐའ་གང་དུའང་མ་དམིགས་པས་སོ།།

གསུམ་པ་དྲིས་ལན་མང་པོའི་སྒོ་ནས་བསྟན་པ་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ལྟར་ན། ཞེས་པ་ནས། སྙིང་པོར་མཐོང་ལགས་སོ། །ཞེས་པའི་བར་གྱིས་བསྟན་ཏེ།

དེ་ལྟར་ན་ལངྐའི་བདག་པོ་གང་སྐྱེས་བུ་དམ་པ་དག་སྙིང་པོ་བྱང་ཆུབ་ཏུ་གནས་ཏེ་མི་དམིགས་པ་དེ་ལ་རྡོ་རྗེ་སེམས་དཔའ་སྟོང་པ་ཉིད་དེ་ཁོ་ན་ཉིད་དམ་པ་དེ་ལས། དེ་དག་བགམ་པའི་ཕྱིར་འདི་སྐད་ཅེས་འབྱུང་ངོ་། །ཀྱེ་སྐྱེས་བུ་དམ་པ་དག གང་སྙིང་པོ་བྱང་ཆུབ་མཐོང་ངམ། སྐྱེས་བུ་དམ་པ་རྣམས་སྙིང་པོ་བྱང་ཆུབ་དེ་ཁོ་ན་ཉིད་དེ་ལས་འདི་སྐད་འབྱུང་ངོ་། །ཀྱེ་བཤེས་གཉེན་དམ་པ་བྱང་ཆུབ་ཀྱི་སྙིང་པོ་ནི་བདག་ཅག་གིས་མ་མཐོང་བར་མཐོང་ལགས་སོ། །བཀའ་སྩལ་པ། ཇི་ལྟར་མ་མཐོང་བར་མཐོང་། གསོལ་པ། བྱང་ཆུབ་ཀྱི་སྙིང་པོར་མ་མཐོང་བར་ཐམས་ཅད་བྱང་ཆུབ་ཀྱི་སྙིང་པོར་རང་མཐོང་ལགས་སོ།།

དེ་ལྟར་ན་ལང་ཀའི་བདག་པོ། གང་སྐྱེས་བུ་དམ་པ་དག་སྙིང་པོ་བྱང་ཆུབ་ཏུ་གནས་ཏེ་མི་དམིགས་པར་ལྷུན་གྱིས་གྲུབ་ཟིན་པ་དེ་དག་ལ་རྡོ་རྗེ་སེམས་དཔའ་སྟོང་པ་ཉིད་དེ་ཁོ་ན་ཉིད་དམ་པ་དེ་ལས་དེ་དག་གིས་བྱང་ཆུབ་སྙིང་པོའི་དོན་ཅི་འདྲ་བའི་ལན་ཐེབས་སམ་མི་ཐེབས་ལྟ་ཞིང་བགམ་པའི་ཕྱིར། རྟོགས་པ་ཉུག་པའི་དགོས་ཆེད་ཀྱིས་དྲི་བ་འདི་སྐད་ཅེས་བཀའ་སྩལ་པ་འབྱུང་ངོ༌། །ཀྱེ་སྐྱེས་བུ་དམ་པ་རིགས་ལྔ་ལ་སོགས་དག ཅེས་བོས་ནས། གང་སྙིང་པོ་བྱང་ཆུབ་ཇི་ལྟ་བ་དེ་མཐོང་ངམ། ཞེས་དྲིས་པས༌། སྐྱེས་བུ་དམ་པ་རྣམས། སྙིང་པོ་བྱང་ཆུབ་དེ་ཁོ་ན་ཉིད་དུ་ལྷུན་གྱིས་གྲུབ་པ་དེ་ལས་འདི་སྐད་ཅེས་ལན་བཏབ་པ་འབྱུང་ངོ༌། །ཀྱེ་རྡོ་རྗེ་སེམས་དཔའ་བཤེས་གཉེན་དམ་པ་ལགས། བྱང་ཆུབ་ཀྱི་སྙིང་པོ་ནི་ཡུལ་དུ་བྱར་ མེད་པ་ལ་དགོངས་ནས་བདག ་ཅག་གིས་ངོ་བོ་ཅི་ཡང་མ་ཡིན་པར་བསམ་པ་ཅིར་ཡང་མི་རྟོག་པའི་ཤེས་རབ་ཀྱི་སྤྱན་དམ་པས་དངོས་མཐའ་གང་དུའང་མ་མཐོང་བར་དཀྱིལ་འཁོར་གསུམ་དབྱེར་མེད་པའི་སྙིང་པོར་མཐོང་ལགས་སོ། །ཡང་བཀའ་སྩལ་པ། ཇི་ལྟར་མ་མཐོང་བར་མཐོང་ཞེས་དེ་ཉིད་ཀྱི་ཚུལ་དྲིས་པས། ལན་དུ་གསོལ་པ། དངོས་པོར་གྲགས་སོ་ཅོག་དེར་སྐྱས་ཡེ་ཐེབས་པས་བྱང་ཆུབ་ཀྱི་སྙིང་པོ་གུད་དུ་མ་མཐོང་བར་ཆོས་ཐམས་ཅད་འདི་འདྲར་མེད་པའི་ངོ་བོ་བྱང་ཆུབ་ཀྱི་སྙིང་པོར་མ་འདྲེས་ཡོངས་རྫོགས་སུ་མཐོང་ལགས་སོ།།

གཉིས་པ་རྒྱས་པར་བཤད་པ་ནི།

བཀའ་སྩལ་པ། ཞེས་པ་ནས། ཕྱིར་ལགས་སོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། བྱང་ཆུབ་ཀྱི་སྙིང་པོ་ཞེས་གང་ལ་བྱ། གསོལ་པ། བཤེས་གཉེན་དམ་པ་བྱང་ཆུབ་ཀྱི་སྙིང་པོ་ནི་སངས་རྒྱས་ཀུན་གྱི་གསང་བ་དགོངས་པ་དམ་པ་ལ་བགྱིའོ། །བཀའ་སྩལ་པ། སྐྱེས་བུ་དམ་པ་དགོངས་པ་དམ་པ་ཞེས་གང་ལ་བྱ། གསོལ་པ། ཐམས་ཅད་ཀྱི་རང་བཞིན་གང་ལགས་པ་དེ་ཁོ་ན་ཉིད་དོ། །བཀའ་སྩལ་པ། ཅིའི་ཕྱིར་ཐམས་ཅད་ཀྱི་རང་བཞིན་ལ་གསང་སྔགས་ཞེས་བྱ། གསོལ་པ། ཐམས་ཅད་ཀྱི་རང་བཞིན་གང་ལགས་པ་དེ་ནི། གང་གིས་ཀྱང་མི་མཐོང་། མི་རྟོགས། སྤྱོད་ཡུལ་དུ་མ་གྱུར། སྨྲར་མེད་པ། བརྗོད་པ་ལས་འདས་པ། བསམ་དུ་མེད་པ། བསམ་གྱིས་མི་ཁྱབ་པ། བརྟག་པར་དཀའ་ཞིང་བསྟན་པར་དཀའ་བའི་ཕྱིར་ལགས་སོ།།

སྟོན་པས་བཀའ་སྩལ་པ། བྱང་ཆུབ་ཀྱི་སྙིང་པོ་ཞེས་ངོ་བོ་གང་ལ་བྱ། གསོལ་པ། བཤེས་༼༢༡༠༽གཉེན་དམ་པ་བྱང་ཆུབ་ཀྱི་སྙིང་པོ་ནི། སངས་རྒྱས་ཀུན་གྱི་གསང་བ་དགོངས་པ་དམ་པ་ལ་བགྱིའོ། །ཞེས་ངོ་བོ་སྨྲས་པའོ། །སླར་ཡང་བཀའ་སྩལ་པ། སྐྱེས་བུ་དམ་པ། དགོངས་པ་དམ་པ་ཞེས་གང་ལ་བགྱི། ལན་གསོལ་པ། ཆོས་ཐམས་ཅད་ཀྱི་རང་བཞིན་གང་ལགས་པ་ཡེ་ཇི་བཞིན་པ་དངོས་པོ་རྣམས་ཀྱི་དེ་ཁོ་ན་ཉིད་དོ། །ཞེས་ལན་བཏབ་བོ། །བཀའ་སྩལ་པ། ཅིའི་ཕྱིར་ཆོས་ཐམས་ཅད་ཀྱི་རང་བཞིན་ལ་གསང་སྔགས་ཞེས་བྱ་ཞེས་གསང་སྔགས་ཀྱི་ངེས་ཚིག་དྲིས་པ་ལ། གསོལ་པ། ཆོས་ཐམས་ཅད་ཀྱི་རང་བཞིན་སྐྱེ་བ་མེད་པའི་ཆོས་ཉིད་གང་ལགས་པ་དེ་ནི། གཏན་ཚིགས་ཀྱི་ཆོས་དགུ་དང་ལྡན་པའི་ཕྱིར་གསང་སྔགས་ཞེས་བྱ་སྟེ། གང་གིས་ཀྱང་མ་མཐོང༌། འདི་འདྲར་མི་རྟོགས། བློའི་སྤྱོད་ཡུལ་དུ་མ་གྱུར། སྨྲར་མེད་པ། དོན་བརྗོད་པ་ལས་འདས་པ། ཡིད་ཀྱིས་བསམ་དུ་མེད་པ། ཀུན་ལ་ཁྱབ་པས་བསམ་གྱིས་མི་ཁྱབ་པ། བློ་ཡིས་བརྟག་པར་དཀའ་ཞིང༌། ཚིག་གིས་བསྟན་པར་དཀའ་བའི་ཕྱིར་ལགས་སོ་ཞེས་བཤད་ཟིན་པ་རྣམས་ལས་ཤེས་པར་བྱའོ།།

གཉིས་པ་བྱེ་བྲག་ཏུ་བཤད་པ་ལ་གསུམ་སྟེ། གཞི་དང༌། ལམ་དང༌། འབྲས་བུའོ། །དང་པོ་ལ་གསུམ་སྟེ། ཡེ་ཇི་བཞིན་པའི་དཀྱིལ་འཁོར་གྱི་ཞུས་ལན། རང་བཞིན་ལྷུན་གྱིས་གྲུབ་པའི་དཀྱིལ་འཁོར་གྱི་ཞུས་ལན། རྩ་བ་བྱང་ཆུབ་སེམས་ཀྱི་དཀྱིལ་འཁོར་གྱི་ཞུས་ལན་ནོ། དང་པོ་ནི།

བཀའ་སྩལ་པ། ཞེས་པ་ནས། དཀྱིལ་འཁོར་དུ་མཐོང་ལགས་སོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་ཐམས་ཅད་ཀྱི་རང་བཞིན་མཐོང་ངམ། གསོལ་པ། བཤེས་གཉེན་དམ་པ་ཐམས་ཅད་ཀྱི་རང་བཞིན་ནི་བདག་ཅག་གིས་མ་མཐོང་ལགས་སོ། །བཀའ་སྩལ་པ། ཅིའི་ཕྱིར་མ་མཐོང་། གསོལ་པ། མི་དམིགས་པའི་སླད་དུའོ། །བཀའ་སྩལ་པ། སྐྱེས་བུ་དམ་པ་ཁྱེད་ཀྱིས་ཐམས་ཅད་ཀྱི་རང་བཞིན་མ་མཐོང་ངམ། གསོལ་པ། བཤེས་གཉེན་དམ་པ་བདག་ཅག་གིས་མཐོང་ལགས་སོ། །བཀའ་སྩལ་པ། སྐྱེས་བུ་དམ་པ་ཇི་ལྟར་མཐོང་། གསོལ་པ། ཐམས་ཅད་ཀྱི་རང་བཞིན་གང་ལགས་པ་དེ་མ་བཅོས། མ་བསླད། མ་བྱུང་། མ་སྐྱེས།

ཇི་བཞིན་པ། དེ་ཁོ་ན་ཉིད། ཡེ་ཇི་བཞིན་པའི་དཀྱིལ་འཁོར་དུ་མཐོང་ལགས་སོ།།

སྟོན་པས་བཀའ་སྩལ་པ། སྐྱེས་བུ་དམ་པ་ཐམས་ཅད་ཀྱི་རང་བཞིན་ཡེ་ཇི་བཞིན་པའི་དཀྱིལ་འཁོར་མཐོང་ངམ། སྐྱེས་བུ་དག་གིས་གསོལ་པ། བཤེས་གཉེན་དམ་པ་ཐམས་ཅད་ཀྱི་རང་བཞིན་ནི་བདག་ཅག་གིས་མ་མཐོང་ལགས་སོ། །བཀའ་སྩལ་པ། ཅིའི་ཕྱིར་མ་མཐོང༌། གསོལ་པ། ངོ་བོ་གང་དུའང་མི་དམིགས་པའི་སླད་དུའོ། །བཀའ་སྩལ་པ། སྐྱེས་བུ་དམ་པ། ཁྱེད་རྣམས་ཀྱིས་ཐམས་ཅད་ཀྱི་རང་བཞིན་མ་མཐོང་ངམ༌། གསོལ་པ། བཤེས་གཉེན་དམ་པ་བདག་ཅག་གིས་མཐོང་ལགས་སོ། །བཀའ་སྩལ་པ། སྐྱེས་བུ་དམ་པ་ཅི་ལྟ་བུར་མཐོང༌། གསོལ་པ། ཐམས་ཅད་ཀྱི་རང་བཞིན་གང་ལགས་པ་དེ་ནི། བྱེད་པ་པོས་མ་བཅོས། རྣམ་རྟོག་གིས་མ་བསླད། རྒྱུ་ལས་མ་བྱུང༌། རྐྱེན་ལས་མ་སྐྱེས། རྣལ་མ་ལ་དབྲི་བསླད་མེད་པས་ཇི་བཞིན་པ། མ་ནོར་བས་དེ་ཁོ་ན་ཉིད་༼༢༡༡༽ཡེ་ཇི་བཞིན་པའི་དཀྱིལ་འཁོར་སྤྲོས་པ་དང་བྲལ་བའི་ངང་དུ་ཡོངས་སུ་རྫོགས་པར་མཐོང་ལགས་སོ།།

གཉིས་པ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གྱི་ཞུས་ལན་ནི།

བཀའ་སྩལ་པ། སངས་རྒྱས་ཞེས་པ་ནས། དཀྱིལ་འཁོར་དུ་མཐོང་ལགས་སོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སངས་རྒྱས་མཐོང་ངམ། གསོལ་པ། མ་མཐོང་ལགས་སོ། །བཀའ་སྩལ་པ། ཅིའི་ཕྱིར་མ་མཐོང་། གསོལ་པ། མི་དམིགས་པའི་སླད་དུའོ། །བཀའ་སྩལ་པ། མ་མཐོང་ངམ། གསོལ་པ། མཐོང་ལགས་སོ།།

བཀའ་སྩལ་པ། ཇི་ལྟར་མཐོང་། ཐམས་ཅད་དེ་བཞིན་ཉིད་དུ་སངས་རྒྱས་ཏེ། ཀུན་ལ་ཁྱབ་པའི་སླད་དུ།

རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ་མཐོང་ལགས་སོ།།

སླར་ཡང་བཀའ་སྩལ་པ། རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཡེ་སངས་རྒྱས་པ་མཐོང་ངམ། གསོལ་པ། མ་མཐོང་ལགས་སོ། །བཀའ་སྩལ་པ། ཅིའི་ཕྱིར་མ་མཐོང༌། གསོལ་པ། ལྡོག་ས་ལས་གྲོལ་ཏེ། མི་དམིགས་པའི་སླད་དུའོ། །བཀའ་སྩལ་པ། མ་མཐོང་ངམ། གསོལ་པ། མཐོང་ལགས་སོ། །བཀའ་སྩལ་པ། ཅི་ལྟ་བུར་མཐོང༌། གསོལ་པ། ཐམས་ཅད་མ་བཅོས་པར་དེ་བཞིན་ཉིད་དུ་སངས་རྒྱས་ཏེ་ཀུན་ལ་ཁྱབ་པའི་སླད་དུ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཡེ་ཤེས་འོད་གསལ་གྱི་ངང་དུ་མ་འདྲེས་ལ་མཐའ་དང་བྲལ་བར་མཐོང་ལགས་སོ།།

གསུམ་པ་རྩ་བ་བྱང་ཆུབ་སེམས་ཀྱི་དཀྱིལ་འཁོར་གྱི་ཞུས་ལན་ནི།

བཀའ་སྩལ་པ། སེམས་ཅན། ཞེས་པ་ནས། དཀྱིལ་འཁོར་དུ་མཐོང་ལགས་སོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སེམས་ཅན་མཐོང་ངམ། གསོལ་པ། མ་མཐོང་ལགས་སོ། །བཀའ་སྩལ་པ། ཅིའི་ཕྱིར་མ་མཐོང་། གསོལ་པ། མི་དམིགས་པའི་སླད་དུའོ། །བཀའ་སྩལ་པ། མ་མཐོང་ངམ། གསོལ་པ། མཐོང་ལགས་སོ། །བཀའ་སྩལ་པ། ཇི་ལྟ་བུར་མཐོང་། གསོལ་པ། ཐམས་ཅད་རྩ་བ་བྱང་ཆུབ་ཀྱི་སེམས་ཀྱི་དཀྱིལ་འཁོར་དུ་མཐོང་ལགས་སོ།།

ཡང་བཀའ་སྩལ་པ། རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་འཁྲུལ་པའི་སེམས་ཅན་མཐོང་ངམ། གསོལ་པ། མ་མཐོང་ལགས་སོ། །བཀའ་སྩལ་པ། ཅིའི་ཕྱིར་མ་མཐོང་གསོལ་པ། ཡེ་ནས་གཉིས་སུ་མི་དམིགས་པའི་སླད་དུའོ། །བཀའ་སྩལ་པ། མ་མཐོང་ངམ། གསོལ་པ། མཐོང་ལགས་སོ། །བཀའ་སྩལ་པ། ཇི་ལྟ་བུར་མཐོང༌། གསོལ་པ། ཐམས་ཅད་ཡེ་ནས་གཉིས་སུ་མེད་པའི་རྩ་བ་བྱང་ཆུབ་སེམས་ཀྱི་དཀྱིལ་འཁོར་སེམས་ཉིད་སྣང་སྟོང་དབྱེར་མེད་ཀྱི་ངང་དུ་རང་སྣང་མཉམ་པ་ཉིད་དུ་མཐོང་ལགས་སོ། །འདི་ཉིད་ཨ་ནུ་ཡོ་གའི་ལྟ་བ་མཐར་ཐུག་པའོ།།

གཉིས་པ་ལམ་ལ་གཉིས་ཏེ། ལྟ་བ་བཙལ་ཐབས་ཀྱི་དྲིས་ལན། ཏིང་ངེ་འཛིན་གསུམ་གྱི་དྲིས་ལན་ནོ། །དང་པོ་ནི།

ཞུས་ལན་ཚན་གཅིག་གི་འོག་ནས། བཀའ་སྩལ་པ། སྐྱེས་བུ། ཞེས་པ་ནས། མི་གནས་སོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་བྱང་ཆུབ་ཀྱི་སྙིང་པོ་གང་ནས་བཙལ། གསོལ་པ།

གང་ནས་ཀྱང་མི་འཚོལ་ལོ། །བཀའ་སྩལ་པ། ཅིའི་ཕྱིར་མི་འཚོལ། གསོལ་པ།

ཐམས་ཅད་བྱང་ཆུབ་ཀྱི་སྙིང་པོ་ཉིད་དེ་གང་ན་ཡང་མི་གནས་སོ།།

བཀའ་སྩལ་པ། སྐྱེས་བུ་དམ་པ་ལྟ་བས་གཏན་ལ་དབབ་པའི་བྱང་ཆུབ་ཀྱི་སྙིང་པོ་གང་ནས་བཙལ། གསོལ་པ། གང་ནས་ཀྱང་མི་ཚོལ་ལོ། །བཀའ་སྩལ་པ། ཅིའི་ཕྱིར་མི་ཚོལ། གསོལ་པ། ཆོས་ཐམས་ཅད་ཡེ་ནས་བྱང་ཆུབ་ཀྱི་སྙིང་པོ་དེ་ཁོ་ན་ཉིད་དེ། དེ་ལས་ལོགས་སུ་གང་ན་ཡང་མི་གནས་ཏེ་བཙལ་དུ་མེད་པ་ལ་འདི་ན་གནས་བྱ་བའི་༼༢༡༢༽ངེས་པ་མེད་པས་སོ།།

གཉིས་པ་ཏིང་ངེ་འཛིན་གསུམ་གྱི་དྲིས་ལན་ལ་གསུམ་སྟེ། དེ་བཞིན་ཉིད་ཀྱི་ཏིང་ངེ་འཛིན་རྩོལ་བ་མེད་པའི་དྲིས་ལན། སྙིང་རྗེ་ཆེན་པོ་བསྒོམ་པའི་རྩོལ་བ་མེད་པའི་དྲིས་ལན། རྒྱུའི་ཏིང་ངེ་འཛིན་རྩོལ་བ་མེད་པའི་དྲིས་ལན་ནོ། །དང་པོ་ནི།

ཞུས་ལན་གཅིག་གི་འོག་ནས། བཀའ་སྩལ་པ། སྐྱེས་བུ་དམ་པ། མི་གཡོ། ཞེས་པ་ནས། མི་རྟོག་པའི་སླད་དུའོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་མི་གཡོ་བ་ལ་མི་རྟོག་པ་ཉིད་དུ་གནས་སམ། གསོལ་པ། མི་རྟོག་པ་ལ་མི་འཇུག་ལགས་སོ། །བཀའ་སྩལ་པ། ཅིའི་ཕྱིར་མི་འཇུག གསོལ་པ། བདག་ཉིད་མི་རྟོག་པས་ད་གདོད་མི་རྟོག་པ་ལ་འཇུག་མི་འཚལ་བའི་སླད་དུའོ། །གལ་ཏེ་བདག་ཡེ་ནས་རྣམ་པར་མི་རྟོག་པ་མ་ལགས་ན་ནི། རྣམ་པར་མི་རྟོག་པ་ལ་བདག་འཇུག་པ་ཞིག་ན། ཐམས་ཅད་ཡེ་ནས་རྣམ་པར་མི་རྟོག་པའི་སླད་དུའོ།།

ཡང་བཀའ་སྩལ་པ། སྐྱེས་བུ་དམ་པ་ཆོས་ཉིད་མི་གཡོ་བ་ལ་བློ་མི་རྟོག་པ་ཉིད་དུ་གནས་སམ། གསོལ་པ། མི་རྟོག་པ་ལ་མི་འཇུག་ལགས་སོ། །བཀའ་སྩལ་པ། ཅིའི་ཕྱིར་མི་འཇུག གསོལ་པ། བདག་ཉིད་ཀྱི་སེམས་ཀྱི་རང་བཞིན་ཡེ་ནས་མི་རྟོག་པ་ཉིད་པས། ད་གདོད་མི་རྟོག་ པ་ལ་འཇུག་ཏུ་མི་འཚལ་ཏེ་ཡུལ་དང་ཡུལ་ཅན་མེད་པའི་སླད་དུའོ། །གལ་ཏེ་བདག ་གི་སེམས་ཉིད་ཡེ་ནས་རྣམ་པར་མི་རྟོག་པ་མ་ལགས་ན་ནི། །གདོད་རྣམ་པར་མི་རྟོག་པ་ལ་བདག་འཇུག་པ་ཞིག་ན། ཐམས་ཅད་ཡེ་ནས་རྣམ་པར་མི་རྟོག་པར་གནས་པས་འཇུག་མི་འཇུག་ལས་འདས་པའི་སླད་དུའོ།།

གཉིས་པ་སྙིང་རྗེ་ཆེན་པོ་བསྒོམ་པའི་རྩོལ་བ་མེད་པའི་དྲིས་ལན་ནི།

བཀའ་སྩལ་པ། སྐྱེས་བུ་དམ་པ། སྙིང་རྗེ། ཞེས་པ་ནས། ཕྱིར་རོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་སྙིང་རྗེ་ཆེན་པོ་འབྱུང་བར་འདོད་དམ། གསོལ་པ། འབྱུང་བར་མི་འདོད་ལགས་སོ། །བཀའ་སྩལ་པ། ཅིའི་ཕྱིར་མི་འདོད། གསོལ་པ། ཀུན་ཏུ་མི་གཡོ་ལགས་སོ། །བཀའ་སྩལ་པ། ཅིའི་ཕྱིར་མི་གཡོ། གསོལ་པ། ཐམས་ཅད་སངས་རྒྱས་པ་ཉིད་ཁོ་ན་བས་སྙིང་རྗེའི་ཡུལ་མི་དམིགས་པའི་ཕྱིར་རོ།།

བཀའ་སྩལ་པ། སྐྱེས་བུ་དམ་པ། རྣམ་གསུམ་དབྱེར་མེད་པས་སྙིང་རྗེ་ཆེན་པོ་ཀུན་ཏུ་སྣང་སྟེ་འབྱུང་བར་འདོད་དམ། གསོལ་པ། འབྱུང་བར་མི་འདོད་ལགས་སོ། །བཀའ་སྩལ་པ། ཅིའི་ཕྱིར་མི་འདོད། གསོལ་པ། མཉམ་པ་ཉིད་ལས་འོག་མ་ལྟར་ཡུལ་ལ་ཀུན་ཏུ་མི་གཡོ་ལགས་སོ། །བཀའ་སྩལ་པ། ཅིའི་ཕྱིར་མི་གཡོ། གསོལ་པ། ཐམས་ཅད་ཡེ་ནས་སངས་རྒྱས་པ་ཉིད་ཁོ་ན་བས་སྙིང་རྗེའི་ཡུལ་མི་དམིགས་པའི་ཕྱིར་རོ།།

གསུམ་པ་རྒྱུའི་ཏིང་ངེ་འཛིན་རྩོལ་བ་མེད་པའི་དྲིས་ལན་ནི།

བཀའ་སྩལ་པ། སྐྱེས་བུ་དམ་པ། སེམས་ཅན། ཞེས་པ་ནས། ཁོ་ནའི་སླད་དུའོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་སེམས་ཅན་རྣམས་ཀྱི་དོན་ཆེད་དུ་སྤྱོད་དམ། གསོལ་པ། མི་སྤྱོད་ལགས་སོ།།

བཀའ་སྩལ་པ། ཅིའི་ཕྱིར་མི་སྤྱོད། གསོལ་པ། ཐམས་ཅད་ཡེ་ནས་དེ་བཞིན་ཉིད་ཁོ་ནའི་སླད་དུའོ།།

བཀའ་སྩལ་པ། སྐྱེས་བུ་དམ་པ་རྒྱུའི་ཏིང་ངེ་འཛིན་གྱིས་ལྷ་བསྐྱེད་ནས་ཕྲིན་ལས་བཞིས་སེམས་ཅན་རྣམས་ཀྱི་དོན་ཆེད་དུ་སྤྱོད་དམ། གསོལ་པ། མི་སྤྱོད་ལགས་སོ། །བཀའ་སྩལ་པ། ཅིའི་ཕྱིར་མི་སྤྱོད། །གསོལ་པ། དོན་བྱ་བའི་ཡུལ་མེད་པར་ཐམས་ཅད་ཡེ་ནས་དེ་བཞིན་ཉིད་ཁོ་ནའི་སླད་དུའོ།།

གསུམ་པ་འབྲས་བུ་ལ་གཉིས་ཏེ། ལྟོས་པའི་ཆོས་སྐུ་མི་འདོད་པའི་དྲིས་ལན། ངོ་བོ་ལྷུན་གྱིས་གྲུབ་པའི་དྲིས་ལན་ནོ། །དང་པོ་ནི།

བཀའ་སྩལ་པ། ཞེས་པ་ནས། བྱུང་བའི་སླད་དུའོ། །ཞེས་པའི་༼༢༡༣༽བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་ཆོས་ཀྱི་སྐུ་ལྷུན་གྱིས་གྲུབ་པར་འདོད་དམ། གསོལ་པ། གྲུབ་པར་མི་འཚལ་ལོ། །བཀའ་སྩལ་པ། ཅིའི་ཕྱིར་གྲུབ་པར་མི་འདོད། གསོལ་པ། འདུས་པ་ལས་བྱུང་བའི་སླད་དུའོ།།

ཡང་བཀའ་སྩལ་པ། སྐྱེས་བུ་དམ་པ། སྒྱུ་འཕྲུལ་མན་ཆད་ཀྱི་ལུགས་ལྟར་འབྲས་བུ་ཀུན་ཏུ་འོད་ཆོས་ཀྱི་སྐུ་རུ་ལྷུན་གྱིས་གྲུབ་པར་འདོད་དམ། གསོལ་པ། གྲུབ་པར་མི་འཚལ་ལོ། །བཀའ་སྩལ་པ། ཅིའི་ཕྱིར་གྲུབ་པར་མི་འདོད། གསོལ་པ། ལྟོས་པའི་ཆོས་ཀྱི་སྐུ་དེ་ཉིད་ལམ་པའི་དབང་དུ་ཚོགས་གཉིས་ལས་གྲུབ་པའམ་དབྱིངས་དང་ཡེ་ཤེས་འདུས་པ་ལས་བྱུང་བའི་སླད་དུའོ། །དེའི་ཕྱིར་འདིར་དང་དུ་མི་ལེན་ཏེ། འཆད་པར་ཡང་འགྱུར་ལ། རྒྱས་པར་ངེས་པ་དོན་གྱི་བཀའ་དང་དགོངས་འགྲེལ་ལྟར་ཤེས་པར་བྱའོ།།

གཉིས་པ་ངོ་བོ་ལྷུན་གྱིས་གྲུབ་པའི་དྲིས་ལན་ལ་གསུམ་སྟེ། བྱང་ཆུབ་སྙིང་པོར་ལྷུན་གྱིས་གྲུབ་པའི་དྲིས་ལན། ཞིང་ཁམས་ལྷུན་གྱིས་གྲུབ་པའི་དྲིས་ལན། སངས་རྒྱས་ཀྱི་ས་ལྷུན་གྱིས་གྲུབ་པའི་དྲིས་ལན་ནོ། །དང་པོ་ནི།

སྔར་གྱི་འཕྲོ་ལས། བཀའ་སྩལ་པ། སྐྱེས་བུ་དམ་པ་ཁྱེད། ཅེས་པ་ནས། མ་གཡོས་པའོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་ཁྱེད་བྱང་ཆུབ་ཀྱི་སྙིང་པོར་འདོད་དམ། གསོལ་པ། བཤེས་གཉེན་དམ་པ་ཡོངས་སུ་མི་འདོད་དོ། །བཀའ་སྩལ་པ། ཅིའི་ཕྱིར་མི་འདོད། གསོལ་པ། གང་སྐྱེས་བུ་དམ་པ་ཞེས་བགྱི་བ་ཉིད་དང་། སེམས་ཅན་སེམས་ཅན་ཞེས་བགྱི་བ་ཉིད་བྱང་ཆུབ་ཀྱི་སྙིང་པོ་ལས་མ་གཡོས་པའོ། །ཐམས་ཅད་ཀྱང་དེ་བཞིན་ཉིད་ལས་མ་གཡོས་པའོ།།

ཡང་བཀའ་སྩལ་པ། སྐྱེས་བུ་དམ་པ་ཁྱེད་རྣམས་བྱང་ཆུབ་ཀྱི་སྙིང་པོར་གྲུབ་པར་འདོད་དམ། གསོལ་པ། བཤེས་གཉེན་དམ་པ་ཡོངས་སུ་མི་འདོད་དེ་སྨིན་ཟིན་ཏོ། །བཀའ་སྩལ་པ། ཅིའི་ཕྱིར་མི་འདོད། གསོལ་པ། གང་སྐྱེས་བུ་དམ་པ་ཞེས་བགྱི་བ་མྱ་ངན་ལས་འདས་པ་ཉིད་དང༌། གང་སེམས་ཅན་སེམས་ཅན་ཞེས་བགྱི་བ་འཁོར་བའི་སྲིད་པ་ཉིད་ཡེ་ནས་དབྱེར་མེད་པའི་བྱང་ཆུབ་ཀྱི་སྙིང་པོ་ལས་མ་གཡོས་པའོ། །དེའི་ཕྱིར་ཆོས་ཐམས་ཅད་ཀྱང་ཆོས་ཉིད་དེ་བཞིན་ཉིད་མ་བཅོས་པའི་ངང་ལས་མ་གཡོས་པར་ཡང་དག་པར་རྫོགས་པའོ།།

གཉིས་པ་ཞིང་ཁམས་ལྷུན་གྱིས་གྲུབ་པའི་དྲིས་ལན་ནི།

ལྟ་བའི་ཞུས་ལན་གྱི་འོག་ནས། བཀའ་སྩལ་པ། ཞེས་པ་ནས། ཉིད་ཀྱི་སླད་དུའོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་རྣམས་སངས་རྒྱས་ཀྱི་ཞིང་ཁམས་ཡོངས་སུ་བགྲོད་པར་འདོད་དམ། གསོལ་པ། ཡོངས་སུ་བགྲོད་པར་མི་འདོད་དོ། །བཀའ་སྩལ་པ། ཅིའི་ཕྱིར་བགྲོད་པར་མི་བྱེད། གསོལ་པ། སེམས་ཅན་གྱི་རིགས་མཐའ་དག་སངས་རྒྱས་ཀྱི་ཞིང་རྣམ་པར་དག་པ་ཉིད་ཀྱི་སླད་དུའོ།།

ཡང་བཀའ་སྩལ་པ། སྐྱེས་བུ་དམ་པ་རྣམས་སངས་རྒྱས་ཀྱི་ཞིང་ཁམས་ཡོངས་སུ་བགྲོད་པར་འདོད་དམ། གསོལ་པ། ཡོངས་སུ་བགྲོད་པར་མི་བགྱིད་དོ། །བཀའ་སྩལ་པ། ཅིའི་ཕྱིར་བགྲོད་པར་མི་བྱེད། གསོལ་པ། གནས་ལུགས་ཇི་བཞིན་པར་རྟོགས་ན་སེམས་ཅན་གྱི་རིས་མཐའ་དག་ཡེ་ནས་སངས་རྒྱས་ཀྱི་ཞིང་ཁམས་རྣམ་པར་དག་པ་ཉིད་ཀྱི་སླད་དུའོ།།

གསུམ་པ་སངས་རྒྱས་ཀྱི་ས་ལྷུན་གྱིས་གྲུབ་པའི་དྲིས་ལན་ནི།

འོག་ནས། བཀའ་སྩལ་པ། ཞེས་པ་ནས། ཕྱིན་པའི་ཕྱིར་རོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པས་རྣམས་ཡོངས་སུ་བགྲོད་པར་འདོད་དམ། གསོལ་པ། ཡོངས་སུ་བགྲོད་པར་མི་བགྱིད་ལགས་སོ། །བཀའ་སྩལ་པ། ཅིའི་ཕྱིར་མི་བགྲོད། གསོལ་པ། ཐམས་ཅད་སངས་རྒྱས་ཀྱི་ས་ལམ་མ་བགྲོད་པར་བཀོད་པའི་ཕྱིར་རོ།།

ཡང་བཀའ་སྩལ་པ། སྐྱེས་བུ་དམ་པ་ས་བཅུ་པོ་རྣམས་ཡོངས་སུ་བགྲོད་པར་འདོད་དམ། གསོལ་པ། ཡོངས་སུ་བགྲོད་པར་མི་༼༢༡༤༽བགྱིད་ལགས་སོ། །བཀའ་སྩལ་པ། ཅིའི་ཕྱིར་མི་བགྲོད། གསོལ་པ། ཐམས་ཅད་སངས་རྒྱས་ཀྱི་ས་ལ་མ་བགྲོད་པར་ཡེ་ནས་ཕྱིན་པའི་ཕྱིར། ཡེ་ཤེས་གསང་བ་ལས། དེས་ན་མ་བཅོས་རྫོགས་པའི་ས། །རང་བྱུང་ལྷུན་རྫོགས་ཁྱད་པར་སྣང༌། །ས་ཡི་ཁྱད་པར་ཅི་བསྟན་ཀྱང༌། །མ་བཅོས་རྫོགས་པའི་ས་ལ་འདུས། །ཞེས་གསུངས་པ་ལྟར་རོ།།

བཞི་པ་མཚོན་པའི་དཔེ་བཤད་པ་ནི།

བཀའ་སྩལ་པ། ཞེས་པ་ནས། ལྟ་བུ་ལགས་སོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་སྙིང་པོ་བྱང་ཆུབ་དེ་དཔེ་གང་གིས་བསྟན། གསོལ་པ། བཤེས་གཉེན་དམ་པ་འཐུན་པའི་དཔེ་ནི་གང་ཡང་མ་མཆིས་ཏེ། དཔེ་གང་གིས་ཀྱང་བསྐྲུན་དུ་མ་མཆིས་པ་ལགས་སོ། །བཀའ་སྩལ་པ། དཔེས་མཚོན་དུ་མེད་དམ། གསོལ་པ། ཅུང་ཟད་དུ་འཐུན་པའི་དཔེ་གཟུང་ན། འདི་ལྟ་སྟེ། ནམ་མཁའ་དང་། ཉི་མ་དང་། ནོར་བུ་རིན་པོ་ཆེ་དང་། རིན་པོ་ཆེ་གསེར་དང་། སྒྲོན་མ་དང་། དུག་འགྱུར་རྩི་དང་། གསེར་འགྱུར་རྩི་དང་། བཻ་ཌཱུརྱ་དང་། རྒྱ་མཚོ་ཆེན་པོ་དང་། རྡོ་རྗེ་སྙིང་པོ་དང་། རྩལ་གྱིས་གནོན་པ་དང་། ཡུལ་ལ་འཇུག་པ་དང་། གསེར་རྡོ་རིན་པོ་ཆེ་དང་། མངོན་པར་སྤྲོ་བ་སྐྱེད་པ་ལྟ་བུ་ལགས་སོ།།

ཡང་བཀའ་སྩལ་པ། སྐྱེས་བུ་དམ་པ། སྙིང་པོ་བྱང་ཆུབ་དེ་དཔེ་གང་གིས་བསྟན། གསོལ་པ། བཤེས་གཉེན་དམ་པ། ཕྱོགས་ཐམས་ཅད་ནས་མཐུན་པའི་དཔེ་ནི་གང་ཡང་མ་མཆིས་ཏེ། དཔེ་རྣམས་ནི་ཕྱོགས་རེ་བ་ཡིན་ལ་དོན་ནི་ཕྱོགས་མེད་ཡིན་པས། དཔེ་གང་གིས་ཀྱང་བསྒྲུན་དུ་མ་མཆིས་པ་ལགས་སོ། །བཀའ་སྩལ་པ། དཔེས་མཚོན་དུ་ཡེ་མེད་དམ། གསོལ་པ། འོན་ཀྱང་ཅུང་ཟད་ཙམ་དུ་ཕྱོགས་རེ་ནས་མཐུན་པའི་དཔེ་བཟུང་ན་དཔེའི་རྩ་བ་བཅུ་བཞི་འདི་ལྟ་སྟེ། མཐའ་དབུས་མེད་པར་ཁྱབ་ལ་མ་འགག་པས་དུས་ཐམས་ཅད་པར་གྱུར་པ་ནམ་མཁའ་ལྟ་བུ་དང༌། ཕྱོགས་རིས་མེད་པར་ཀུན་ལ་གསལ་ཞིང་བླང་དོར་མེད་པས་ཉི་མ་ལྟ་བུ་དང༌། རྟོག་པ་མེད་པར་དགོས་འདོད་འབྱུང་ལ་ཟད་འཕེལ་མེད་ཅིང་མུན་པ་སེལ་ཏེ་ཆུ་དྭངས་པས་ཡིད་བཞིན་ནོར་བུ་རིན་པོ་ཆེ་དབང་གི་རྒྱལ་པོ་ཀླུའི་གོ་ཆ་ལྟ་བུ་དང༌། ཐོག་མཐར་མི་འགྱུར་ཞིང་གཡའ་འམ་དྲི་མ་མེད་པས་རིན་པོ་ཆེ་གསེར་ལྟ་བུ་དང༌། མུན་པ་བསལ་ནས་དངོས་པོ་སྟོན་ཞིང་གསལ་བར་མཐོང་བས་སྒྲོན་མ་ལྟ་བུ་དང༌། ཉོན་མོངས་པ་ཡེ་ཤེས་སུ་བསྒྱུར་ཞིང་སྡུག་བསྔལ་བདེ་བ་ཆེན་པོར་བསྒྱུར་བས་དུག་འགྱུར་རྩི་ལྟ་བུ་དང༌། འདི་ལ་དུག་ཤེས་ནས་འབྲོས་པ་དང་འདྲ་བའི་ཉན་ཐོས། མི་རེག་པ་དང་འདྲ་བའི་རང་རྒྱལ། བསྲུང་བ་འཆང་བས་མི་གནོད་པ་དང་འདྲ་བའི་བྱང་སེམས། སྔགས་ཀྱིས་བཅོམ་པ་དང་འདྲ་བར་སྐུ་གསུང་ཐུགས་ལྷའི་ཆ་ལུགས་ཅན་ཕྱི་པ། སྨན་སྔགས་ཀྱིས་བདུད་རྩིར་བསྒྱུར་བ་དང་འདྲ་བའི་ནང་པའོ། །ཞེས་པའི་སྟོང་ཐུན་ཀྱང་ཆོས་རྗེའི་ཕྱག་མཆན་ན་བཞུགས་སོ། །རྟོག་པ་ཡེ་ཤེས་ཀྱི་ཀློང་དུ་བསྒྱུར་བས་གསེར་འགྱུར་གྱི་རྩི་ལྟ་བུ་དང༌། རང་བཞིན་གྱིས་དྲི་མ་མེད་ཅིང་མི་འགྱུར་བས་བཻ་ཌཱུརྱ་ལྟ་བུ་དང༌། གཏིང་ཟབ་ཅིང་ཡོན་ཏན་གྱི་རླབས་ལ་ཟད་འཕེལ་མེད་པས་རྒྱ་མཚོ་ཆེན་པོ་ལྟ་བུ་དང༌། ངོ་བོ་མི་འགྱུར་ལ་སེལ་༼༢༡༥༽མེད་ཅིང་གཉེན་པོ་དང་བྲལ་ཏེ་མི་འཇིག་པས་རྡོ་རྗེའི་སྙིང་པོ་ལྟ་བུ་དང༌། འདི་ལ་ཕྱག་དཔེ་ལ་ལར། སེལ་མེད་པའམ་མི་འགྱུར་བས་རྡོའི་སྙིང་པོ་ཞེས་ཀྱང་བཞུགས། རྣམ་རྟོག་ཟིལ་གྱིས་གནོན་པས་རྩལ་གྱིས་གནོན་པ་སེང་གེ་ལྟ་བུ་དང༌། ཤེས་རབ་ཀྱིས་འཇུག་ཏུ་མེད་པའི་ཚུལ་གྱིས་འཇུག་སྟེ་རིག་ཅིང་གསལ་ལ་བར་ཆད་མེད་པས་ཡུལ་ལ་འཇུག་པ་རྣམ་ཤེས་ལྟ་བུ་དང༌། སེལ་དང་བྲལ་ཏེ་ཐམས་ཅད་ཆོས་ཉིད་གཅིག་ཏུ་འཁྱིལ་བས་གསེར་རྡོ་རིན་པོ་ཆེ་ལྟ་བུ་དང༌། མ་འདྲེས་པར་གསལ་ལ་སྟོང་པས་མངོན་པར་སྤྲོ་བ་སྐྱེད་པ་ངོ་མཚར་གྱི་རྫས་འཇའ་ཚོན་ནམ་རི་མོའི་རྣམ་པ་ལྟ་བུ་ལགས་སོ། །དེ་དག་ཆོས་དུ་དང་ལྡན་པའི་དཔེར་གྱུར་པས་ཕལ་ཆེར་འཆད་པར་འགྱུར་ཡང་ཀུན་གྱི་དོན་ལའང་སྦྱར་རོ།།

ལྔ་པ་མིང་གི་རྣམ་གྲངས་བཤད་པ་ནི།

བཀའ་སྩལ་པ། ཞེས་པ་ནས། གྲགས་པ་ལགས་སོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་སྙིང་པོ་བྱང་ཆུབ་དེ་མཚོན་པའི་མིང་ཇི་ལྟར་གྲགས། གསོལ་པ། བཤེས་གཉེན་དམ་པ་མིང་ནི་གང་གི་བླ་དྭགས་ཏེ། མིང་དེ་ལ་ངེས་པ་གང་ཡང་མ་མཆིས་ལགས་སོ། །བཀའ་སྩལ་པ། མིང་གིས་མཚོན་དུ་མེད་དམ། གསོལ་པ། གང་ཡོངས་སུ་མི་དམིགས་པ་ལས་བརྗོད་པའི་དབང་དུ་མཚོན་ན། མིང་གི་རྣམ་གྲངས་སུ་བཏགས་པ་ནི། ཐ་དད་པ་ཇི་ལྟར་བཏགས་པ་དེ་ལྟར་ཆགས་པར་གྲགས་ཏེ། སྙིང་པོ་བྱང་ཆུབ་ཉིད་དང་། དེ་ཉིད་དང་། དེ་ཁོ་ན་ཉིད་དང་། དེ་བཞིན་ཉིད་དང་། ཇི་བཞིན་དང་། མ་ནོར་བ་དང་། མ་བཅོས་པ་དང་། གཞན་མ་ཡིན་པ་དང་། ཆོས་ཉིད་དང་། ཆོས་ཀྱི་དབྱིངས་དང་། བསམ་གྱིས་མི་ཁྱབ་པ་དང་། ཡང་དག་པའི་མཐའ་དང་། གསང་སྔགས་དང་། གཟུངས་སྔགས་དང་། རིག་སྔགས་དང་། ཐེག་པ་ཆེན་པོ་ཞེས་ཡོངས་སུ་གྲགས་པ་ལགས་སོ།།

ཡང་བཀའ་སྩལ་པ། སྐྱེས་བུ་དམ་པ་སྙིང་པོ་བྱང་ཆུབ་དེ་མཚོན་པའི་མིང་ཇི་ལྟར་གྲགས། གསོལ་པ། བཤེས་གཉེན་དམ་པ་མིང་ནི་ཚིག་གི་བླ་དྭགས་ཏེ། མིང་ལ་ངེས་པ་གང་ཡང་མ་མཆིས་པས། མིང་ཚིག་རྣམས་ནི་མཐའ་ཅན་ཡིན་ཕྱིར། དོན་ནི་མཐའ་དབུས་མེད་པ་ལ་སྨྲ་བརྗོད་དང་བྲལ་བ་ལགས་སོ། །བཀའ་སྩལ་པ། ཡེ་མིང་གིས་མཚོན་དུ་མེད་དམ། གསོལ་པ། གང་ཡོངས་སུ་མི་དམིགས་པ་ལས། བློ་ཆུང་བ་ལ་ཕྱོགས་རེ་ནས་བརྗོད་པའི་དབང་དུ་མཚོན་ན། མིང་གི་རྣམ་གྲངས་སུ་བཏགས་པ་ནི། ཐ་དད་པ་ཇི་ལྟར་བཏགས་པ་དེ་ལྟར་ཆགས་པ་ལགས་པས་མཚན་གྱི་ཁྱད་པར་བཅུ་དྲུག་ཏུའང་གྲགས་ཏེ། མཐའ་དབུས་མེད་པས་སྙིང་པོ་བྱང་ཆུབ་ཉིད་དང༌། གཞན་དུ་མེད་པས་དེ་ཉིད་དང༌། མ་ནོར་བས་དེ་ཁོ་ན་ཉིད་དང༌། མ་བཅོས་པས་དེ་བཞིན་ཉིད་དང༌། རྣལ་མར་ངེས་པས་ཇི་བཞིན་པ་དང༌། མ་འཁྲུལ་བས་མ་ནོར་བ་དང༌། ཡེ་ནས་གནས་པས་མ་བཅོས་པ་དང༌། བྱ་རྩོལ་གྱིས་མི་རྙེད་པས་གཞན་མ་ཡིན་པ་དང༌། སྤྲོས་པ་བྲལ་བས་ཆོས་ཉིད་དང༌། མུ་མཐའ་མེད་པས་ཆོས་ཀྱི་དབྱིངས་དང༌། རྟོག་གེ་བས་མི་རྟོགས་པས་བསམ་གྱིས་མི་ཁྱབ་པ་དང༌། སངས་རྒྱས་རྣམས་ཀྱི་དགོངས་པའི་ཞེ་ཕུགས་ཡིན་པས་ཡང་དག་པའི་མཐའ་དང༌། ཟབ་ཅིང་རྟོགས་པར་དཀའ་བའི་ཡོན་ཏན་དང་ལྡན་པས་གསང་སྔགས་དང༌། དོན་དང་མི་འབྲལ་བའི་ཡོན་ཏན་དང་ལྡན་པས་གཟུངས་སྔགས་དང༌། དོན་རིག་པའི་༼༢༡༦༽ཡོན་ཏན་དང་ལྡན་པས་རིག་སྔགས་དང༌། མ་ཤོང་བ་མེད་པས་ཐེག་པ་ཆེན་པོ་ཞེས་ཡོངས་སུ་གྲགས་པ་ལགས་སོ། །འོ་ན་བཤད་པ་དང་འཆད་པའི་དྲི་ལན་བཞི་བཅུ་རྩ་བཞི་པོ་འདི་དག་སྟོན་པ་དང་འཁོར་གང་གིས་གང་ལ་གསུངས་ཞེ་ན། ཕྱག་ན་རྡོ་རྗེ་སྐྱེས་བུས་ནི་འཁོར་ལ་སྔར་སྟོན་པ་ལས་ཐོས་པའི་དོན་བརྗོད་ལ། འདི་ཉིད་རྡོ་རྗེ་སེམས་དཔའ་ཆེན་པོ་དང༌། རིགས་ལྔ་ལྟ་བུར་སྣང་བའང་སྟོང་པ་ཉིད་ལས་སྒྲ་དུས་གཅིག་ཏུ་སྣང་བའི་ཕྱིར་རྡོ་རྗེ་འཛིན་པ་ཆེན་པོར་ལྷུན་གྱིས་གྲུབ་པའི་ངོ་བོས་གཉི་ག་བཀའ་སྩལ་པའོ། དེ་ལ་སྐྱེས་བུ་དང་སྟོན་པ་ཡང་སྙིང་པོ་བྱང་ཆུབ་ཉིད་ཀྱིས་ཕྱིར་གསང་བ་པོས་ཀྱང་སྟོན་པ་རྡོ་རྗེ་འཆང་གཅིག་ལས་ཐོས་པར་ཡང་བསྙད་དོ།།

དྲུག་པ་ཆོས་ཐམས་ཅད་ཀྱི་གཞིར་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

བཀའ་སྩལ་པ། ཞེས་པ་ནས། སྣང་ལགས་སོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་དག་སྙིང་པོ་བྱང་ཆུབ་དེ་ཇི་ལྟར་སྣང་། གསོལ་པ། སྙིང་པོ་བྱང་ཆུབ་ནི་སྐད་ཅིག་ཀྱང་སྣང་མི་སྲིད་ལགས་སོ། །བཀའ་སྩལ་པ། ཅི་གང་དུ་ཡང་མི་སྣང་ངམ། གསོལ་པ། ཇི་ལྟར་བལྟས་པ་དེ་ལྟར་སྣང་ལགས་སོ།།

ཡང་བཀའ་སྩལ་པ། སྐྱེས་བུ་དམ་པ་སྙིང་པོ་བྱང་ཆུབ་དེ་ཇི་ལྟར་སྣང༌། གསོལ་པ། སྙིང་པོ་བྱང་ཆུབ་ནི་མ་སྐྱེས་པ་ཉིད་དེ་སྐད་ཅིག་ཀྱང་དངོས་པོ་དང་མཐའ་གང་དུའང་སྣང་མི་སྲིད་པ་ལགས་སོ། བཀའ་སྩལ་པ། ཅི་གང་དུའང་མི་སྣང་ངམ། གསོལ་པ། འོན་ཀྱང་ཆད་པ་ལྟ་བུ་མིན་ཏེ་ཐམས་ཅད་ཀྱི་དངོས་གཞི་བས་ཇི་ལྟར་བལྟས་པ་དེ་ལྟར་སྣང་ལགས་སོ།།

གཉིས་པ་རྒྱས་པར་བཤད་པ་ལ་གཉིས་ཏེ། ཅིག་ཆར་འཇུག་པ་ལམ་གྱི་གཞིར་བསྟན་པ། ལམ་ཀློང་དུ་གྱུར་པ་ཡོན་ཏན་གྱི་གཞིར་བསྟན་པའོ། །དང་པོ་ནི།

བཀའ་སྩལ་པ། ཞེས་པ་ནས། སྣང་བ་ཉིད་དོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། དེ་ཇི་ལྟར་ཡོངས་སུ་སྣང་། གསོལ་པ། འདི་ལྟ་སྟེ། ཀུན་ལ་ཁྱབ་ཀྱང་སྣང་བ་མེད་པ་ཉིད་དོ། །གར་ཡང་མ་སྦས་མཐོང་བ་མེད་པ་ཉིད་དོ། །ཡེ་ནས་མ་བྲལ་ངོ་མ་ཤེས་པ་ཉིད་དོ། །བརྟགས་ན་མ་མཐོང་ཅིར་ཡང་སྣང་བ་ཉིད་དོ། །སྣ་ཚོགས་སྣང་ཡང་དངོས་པོ་མེད་པ་ཉིད་དོ། །བསྐལ་པར་འཁྱམས་ཀྱང་སྟོར་བྲལ་མེད་པ་ཉིད་དོ། །སྣ་ཚོགས་བསྒོ་ཡང་འགྱུར་བ་མེད་པ་ཉིད་དོ། །རྡུལ་ཆ་མེད་པར་སྣང་སྲིད་ཁྱབ་པ་ཉིད་དོ། །སྟོང་པ་ཉིད་ལས་སྣ་ཚོགས་འབྱུང་བ་ཉིད་དོ། །དངོས་གཞི་མེད་པར་ཅིར་ཡང་བཏགས་ཆགས་པ་ཉིད་དོ། །བཙལ་གནས་མེད་པར་ཅི་བསྒྲུབ་འགྲུབ་པ་ཉིད་དོ། །གཟུགས་མཚན་མེད་པར་ཅིར་ལྟས་སྣང་བ་ཉིད་དོ། །ཅི་ཡང་མེད་པར་ཅིར་ཡང་རིག་པ་ཉིད་དོ། །ཁྱབ་བརྡལ་འུབ་ཆུབ་གཅིག་མཐའ་ཡས་པ་ཉིད་དོ། །ཀུན་བྲལ་ཉག་གཅིག་ཇི་མ་སྤངས་པ་ཉིད་དོ། །ཕྱི་དང་ནང་མེད་ཀུན་ཏུ་ནང་པ་ཉིད་དོ། །མཐའ་ཡས་བྱུང་ཡང་ཟད་པ་མེད་པ་ཉིད་དོ། །མ་གཟུང་མ་བཏགས་གང་དུ་ཆགས་པ་ཉིད་དོ། །གདོས་པ་མེད་པར་རྟག་པར་ལྟུང་བ་ཉིད་དོ། །འདེགས་པ་མེད་པར་མཁའ་ལ་འགྲོ་བ་ཉིད་དོ། །ཡན་ལག་མེད་པར་ས་རྣམས་བགྲོད་པ་ཉིད་དོ། །གར་ཡང་མ་གཡོས་ཀུན་ཏུ་ཕྱིན་པ་ཉིད་དོ། །བསྐྱོད་པ་མེད་པར་ཐོགས་མེད་མྱུར་བ་ཉིད་དོ། །ཐ་དད་སྤྲོས་ཀྱང་གཅིག་ལས་མ་གཡོས་པ་ཉིད་དོ། །གཅིག་ལས་མ་གཡོས་སྣ་ཚོགས་སྣང་བ་ཉིད་དོ།།

བྱང་ཆུབ་སེམས་ཀྱི་མཚན་ཉིད་བདུན་ཅུ་རྩ་གསུམ་གྱིས་སེམས་སྣང་བའི་ཆོས་གྲུབ་པར་བྱེད་དེ། སྙིང་པོ་བྱང་ཆུབ་ནི་རྒྱ་ཆད་ཕྱོགས་ལྷུང་ཐམས་ཅད་དང་བྲལ་ཏེ་མ་འདྲེས་ཡོངས་རྫོགས་ཀྱི་ངོ་བོ་སྟེ། བཀའ་སྩལ་པ། སྙིང་པོ་བྱང་ཆུབ་དེ་ཇི་ལྟར་ཡོངས་སུ་སྣང༌། གསོལ་པ། འདི་ལྟ་སྟེ། སྙིང་པོ་བྱང་ཆུབ་ཀྱི་སེམས་ནི་བཤད་པ་ལྟར་རིལ་བསྣུམས་ཏེ་ཀུན་ལ་ཁྱབ་པས་རྣམ་པ་ཐམས་ཅད་པའི་ཕྱིར་ཕྱོགས་གཅིག་པའི་རྣམ་པ་ཀུན་དང་བྲལ་བས་སྣང་བ་མེད་པ་ཉིད་དོ། །དེ་ནི་མི་མཐུན་པ་དང་མཐུན་པའི་གཏན་ཚིགས་གཉིས་ལས། མི་མཐུན་པའི་གཏན་ཚིགས་ཀྱིས་བསྟན་པ་སྟེ་རྗེས་སུ་མཐུན་པ་དག་ཀྱང་སྦྱར་རོ། །ཡེ་ནས་བདག་ཉིད་ཆེན་པོ་ལ་མ་བསྐུངས་པར་ལྐོག་ཏུ་མ་གྱུར་པས་གང་དུ་ཡང་མ་སྦས་ལ། མིག་གིས་མིག་མི་མཐོང་བ་ལྟར། དེ་ཉིད་ལྷན་སྐྱེས་དང་ཀུན་བརྟགས་གཉིས་ཀྱིས་༼༢༡༧༽བསྒྲིབས་ཏེ་ཇི་བཞིན་དུ་མཐོང་བ་མེད་པ་ཉིད་དོ། །དུས་གསུམ་དུ་རང་རིག་དང་མི་ཕྱེད་པས་ཡེ་ནས་མ་བྲལ་ལ་རྒྱལ་བུ་དྭའུ་ལྟར་བདག་ཞལ་མ་མཐོང་བས་ངོ་མ་ཤེས་པ་ཉིད་དོ། །སོ་སོར་རྟོག་པའི་ཤེས་རབ་ཀྱིས་ངོ་བོ་མི་ཟིན་པས་བརྟགས་ན་མ་མཐོང་ལ་ཇི་ལྟར་བསམ་པ་ལྟར་འབྱུང་བས་ཅིར་ཡང་སྣང་བ་ཉིད་དོ། །ངོ་བོ་མི་མཐུན་པ་ཐ་དད་དུ་སྣང་བས་སྣ་ཚོགས་སུ་སྣང་ཡང་དེ་ཉིད་རང་རིག་པ་ཉིད་དུ་རྫོགས་ཏེ་མཐའ་གྲོལ་བས་དངོས་པོ་མེད་པ་ཉིད་དོ། །ཇི་སྙེད་འཁོར་བའི་ཁ་བརྒྱུད་དེ་བསྐལ་པར་འཁྱམས་ཀྱང་གཞན་མ་ཡིན་པའི་ཕྱིར་མ་བརླག་མ་ཕྱེ་བས་སྟོར་བྲལ་མེད་པ་ཉིད་དོ། །མཚན་རྟོག་ཇི་སྙེད་པ་ལས་མ་བཀོལ་བར་སྣ་ཚོགས་བསྒོ་ཡང་བྱང་ཆུབ་སེམས་ཀྱི་ངོ་བོ་རྣམ་པའི་ཕྱོགས་སུ་མ་གཡོས་པས་འགྱུར་བ་མེད་པ་ཉིད་དོ། །དངོས་གཞི་བཙལ་ན་ཆ་ཙམ་མི་རྙེད་པས་རྡུལ་ཆ་མེད་པར་སྣོད་བཅུད་ལ་སོན་པས་སྣང་སྲིད་ཁྱབ་པ་ཉིད་དོ། ངོ་བོ་མཐའ་གསུམ་དང་བྲལ་བས་སྟོང་པ་ཉིད་ལས་ཇི་སྙེད་དུ་སྣང་བས་སྣ་ཚོགས་འབྱུང་བ་ཉིད་དོ། །ངོ་བོའི་རྣམ་པ་མི་རྙེད་པས་དངོས་གཞི་མེད་པར་ཐ་སྙད་ཇི་སྙེད་ཀྱི་མིང་དུ་གྲགས་པས་ཅིར་བཏགས་ཆགས་པ་ཉིད་དོ། །གྲུབ་མཐའི་ཕྱོགས་ཀྱིས་བརྩལ་གནས་མེད་པར་ཐེག་པ་སོ་སོའི་ཇི་ལྟར་གཉེར་བའི་འབྲས་བུར་སྣང་བས་ཅིར་བསྒྲུབ་འགྲུབ་པ་ཉིད་དོ། །དབྱིབས་དང་ཁ་དོག་གི་རྣམ་པ་བྲལ་བས་གཟུགས་མཚན་མེད་པར་དངོས་པོ་བཟང་ངན་ཇི་ལྟར་མནོས་པ་ལྟར་སྣང་བས་ཅིར་བལྟས་སྣང་བ་ཉིད་དོ། །ངོ་བོ་མེད་ལ་ཡུལ་དང་བྲལ་བས་ཅི་ཡང་མེད་པར་རིལ་མ་འདྲེས་རྫོགས་པར་གསལ་བས་ཅིར་ཡང་རིག་པ་ཉིད་དོ། །མཐའ་མ་དམིགས་ལ་མ་འགགས་པས་ཁྱབ་གདལ་འུབ་ཆུབ་ཆེན་པོར་གཅིག་དང་དུ་མ་ལས་གྲོལ་བས་གཅིག་མཐའ་ཡས་པ་ཉིད་དོ། །མཐའ་གང་གིས་ཀྱང་མ་རེག་ལ་ཆ་མེད་ཉིད་པས་ཀུན་བྲལ་ཉག་གཅིག་ལ། རིལ་མ་བཀོལ་བར་ལྷུན་གྱིས་གྲུབ་པས་ཅི་མ་སྤངས་པ་ཉིད་དོ། །རིལ་རང་བྱུང་ཡེ་ཤེས་ཀྱི་ཀློང་དུ་གསལ་བས་ཕྱི་དང་ནང་མེད་པར་དེ་ཉིད་མ་སྤངས་བྲལ་བས་ཀུན་ཏུ་ནང་ཉིད་དོ། །མཛད་པ་དང་ཡོན་ཏན་གྲངས་ལས་འདས་པར་ཤར་བས་མཐའ་ཡས་བྱུང་ཡང་རྒྱུན་ཆད་པ་དང་འཕེལ་འགྲིབ་བྲལ་བས་ཟད་པ་མེད་པ་ཉིད་དོ། །ངོ་བོ་བློ་དང་མིང་གིས་མ་བརྟགས་མ་བསྙད་དེ་བསམ་བརྗོད་མེད་པས་མ་བཟུང་མ་བཏགས་ཀྱང་བློ་དང་སྒྲ་བརྗོད་མ་བཀོལ་བས་གང་དུ་ཆགས་པ་ཉིད་དོ། །དངོས་པོ་དང་ཐེར་༼༢༡༨༽ཟུག་ལས་གྲོལ་བས་གདོས་པ་མེད་པར་ངོ་བོ་ཉིད་མི་འགྱུར་བས་རྟག་པར་ལྷུང་བ་ཉིད་དོ། འདི་ནི་ཐེར་ཟུག་དང་རྒྱུན་གྱི་རྟག་པ་གཉིས་ལས་འདས་པས་ཇི་བཞིན་པ་འདུས་མ་བྱས་པའི་ངོ་བོ་ཉིད་དེ། ལ་ཤན་ལྟ་བའི་མེ་ལོང་ལས།

གང་གིས་དོན་འདི་མཐོང་གྱུར་ན། །དེ་བཞིན་གཤེགས་པ་ཁོ་ནའི་ཕྱིར། །ཇི་བཞིན་པ་ཡི་དངོས་དེ་བཞིན། །རྟག་གཉིས་གྲོལ་བའི་ཡེ་ཤེས་སྐུ། །ངོ་བོ་ཉིད་རྟག་བརྗོད་ལས་འདས། །ཞེས་སོ། །སུས་ཀྱང་མ་བཏེགས་པས་འདེགས་པ་མེད་པར་རང་བཞིན་གསལ་ལ་མ་བསྒྲིབས་པས་མཁའ་ལ་འགྲོ་བ་ཉིད་དོ། །བགྲོད་པའི་ཐབས་ལ་མ་བརྟེན་པས་ཡན་ལག་མེད་པར་དབྱེ་བ་མེད་པའི་ས་ཉིད་ནོན་པས་ས་རྣམས་བགྲོད་པ་ཉིད་དོ། །ཆོས་ཉིད་ལ་འགྲོ་འོང་མེད་པས་གར་ཡང་མ་གཡོས་ལ་ཐམས་ཅད་དུ་སོན་ཏེ་རིལ་གྱི་ བདག་ཉིད་དུ་གྱུར་པས་ཀུན་ཏུ་ཕྱིན་པ་ཉིད་དོ། །གཡོ་བ་བྲལ་བས་བསྐྱོད་པ་མེད ་པར་ཅིར་ཡང་སྣང་བས་ཐོགས་མེད་མྱུར་བ་ཉིད་དོ། །ཇི་སྙེད་དུ་སྣང་བས་ཐ་དད་སྤྲོས་ཀྱང་རང་བྱུང་རྒྱ་མཚོར་གཅིག་པའི་ཕྱིར་ཏེ་འགྲེ་ལྡོག་སྤྱི་ཚུགས་གར་འགྲོས་ཀྱང་སྙིང་པོའི་དོན་ལས་མི་འདའ་བས་གཅིག་ལས་མ་གཡོས་པ་ཉིད་དོ། །ངོ་བོ་ཐིག་ལེ་ཆེན་པོར་འགྲོ་འོང་ཡེ་བྲལ་བས་གཅིག་ལས་མ་གཡོས་པར་དེ་ཉིད་རིལ་གྱི་དངོས་གཞིར་གྱུར་ཏེ་ཅི་ལྟར་ཡང་ཤར་བས་སྣ་ཚོགས་སུ་སྣང་བ་ཉིད་དོ།།

གཉིས་པ་ལམ་ཀློང་དུ་གྱུར་པ་ཡོན་ཏན་གྱི་གཞིར་བསྟན་པ་ལ་བཞི་སྟེ། ཆོས་ཐམས་ཅད་ཀྱི་གཞིར་བསྟན་པ། མྱ་ངན་ལས་འདས་པའི་གཞིར་བསྟན་པ། དེ་དང་འདྲ་བའི་གཞིར་བསྟན་པ། བསྙེན་བསྒྲུབ་ཀྱི་གཞིར་བསྟན་པའོ། །དང་པོ་ནི།

ཐམས་ཅད། ཅེས་པ་ནས། རྩ་བ་ཉིད་དོ། །ཞེས་པའི་བར་གྱིས་བསྟན་ཏེ།

ཐམས་ཅད་འཇུག་པས་ལམ་ཉིད་དོ། །གང་ཡང་མ་སྤངས་པས་འཁོར་བ་ཉིད་དོ། །མ་ཤེས་འཁྲུལ་པས་སེམས་ཅན་ཉིད་དོ། །ཆུ་བོ་བཞི་སྒྲོལ་བས་གྲུ་ཉིད་དོ། །རྣམ་པར་བསྐྱོད་པས་བགྲོད་པའོ། །དམིགས་པ་མེད་པས་བྱང་ཆུབ་བོ། །རྣམ་པ་སྣ་ཚོགས་པས་སེམས་ཉིད་དོ། །ཀུན་ལ་མཁས་པས་ཤེས་རབ་བོ། །ཐམས་ཅད་གསལ་བས་ཏིང་ངེ་འཛིན་ནོ། །མ་བགྲོད་པར་ཕྱིན་པས་གནས་ཉིད་དོ། །ཟླ་མེད་པས་རབ་ཉིད་དོ། །ངོ་མཚར་བས་མཆོག་ཉིད་དོ། །རྣམ་པར་འཕགས་པས་ཕུལ་ཉིད་དོ། །དབང་དང་གཉེན་པོ་མེད་པས་བླ་ན་མེད་པ་ཉིད་དོ། །གཏིང་མི་རྙེད་པས་ཟབ་པ་ཉིད་དོ། །དཔག་ཏུ་མེད་པས་གསང་བ་ཉིད་དོ། །ཕྲ་བས་མི་གསལ་བ་ཉིད་དོ། །ཐམས་ཅད་འབྱུང་བས་ཆོས་སོ། །མི་འགྱུར་བས་དེ་ཁོ་ན་ཉིད་དོ། །གོ་འཕང་ཉིད་པས་བྱང་ཆུབ་སེམས་དཔའ་འོ། །རྒྱུན་སངས་ཁྱབ་པས་སངས་རྒྱས་ཉིད་དོ། །གཞིར་གྱུར་པས་རྩ་བ་ཉིད་དོ། །ཐམས་ཅད་སྐྱེས་པས་ཡུམ་ཉིད་དོ། །དེ་ལས་བྱུང་བས་ཡབ་ཉིད་དོ། །གདུང་བརྒྱུད་འཛིན་པས་སྲས་ཉིད་དོ། །རང་བྱུང་བ་ཉིད་པས་དབང་བདག་གོ །དེ་བཞིན་ཉིད་པས་གདུང་ཆེེན་པོ་ཉིད་དོ། །འདའ་བར་དཀའ་བས་ཐུགས་དམ་ཆེན་པོ་ཉིད་དོ། །རྣམ་པར་འཚོ་བས་སྲོག་ཉིད་དོ། །ཟད་མི་ཤེས་པས་གཏེར་ཆེན་པོ་ཉིད་དོ། །འདོད་པ་གྲུབ་པས་ནོར་ཉིད་དོ། །རྒྱུན་གྱི་སྙིང་རྗེ་ཀུན་གྱི་བྱ་བ་བྱེད་པས་བྲན་ཉིད་དོ། །རྣམ་པར་བརྗིད་པས་སྐུ་ཉིད་དོ། །སྨྲ་བརྗོད་བྱུང་བས་གསུང་ཉིད་དོ།།

ཚིག་གཅིག་ཀྱང་གཏན་ཚིགས་དང་དོན་ཕྱེད་མར་འགྲེལ་ཏེ། ཀུན་འདུས་ལས། འཇུག་པའི་ཕྱིར་ནི་ལམ་མོ། །འཁྲུལ་པའི་ཕྱིར་ནི་འཁོར་བའོ། །ཞེས་སོགས་གསུངས་པ་ལྟར། སྙིང་པོ་བྱང་ཆུབ་ཀྱི་དོན་ལ་ལམ་པ་ཐམས་ཅད་གནས་ཏེ་ཕྱིན་པ་མེད་པར་ཕྱིན་པའི་ཚུལ་གྱིས་འཇུག་པས་དུས་གསུམ་གྱི་ཤུལ་ལམ་མ་ནོར་བ་ཉིད་དོ། །དངོས་པོ་ངན་པ་གང་ཡང་མ་བཀོལ་བའམ་མ་སྤངས་པར་དེའི་ངོ་བོར་སྣང་བས་འཁོར་བ་ཉིད་དོ། །ཆོས་ཉིད་ཡེ་ནས་མ་བྲལ་ཡང་ངོ་མ་ཤེས་པར་འཁྲུལ་ཏེ་ནོར་བར་སྣང་བའང་དེ་ཉིད་ཡིན་པས་སེམས་ཅན་ཉིད་དོ། །ནང་གི་ཆུ་བོ་སྐྱེ་རྒ་ན་འཆི་བཞི་ལས་སྒྲོལ་བ་པོ་ཡང་དེ་ཉིད་མཐོང་བ་ཡིན་པས་གྲུ་ཆེན་ཉིད་དོ། །ས་དང་ཐེག་པའི་ངོ་བོར་ཤར་ཏེ་མྱང་འདས་ལ་རྣམ་པར་༼༢༡༩༽བསྐྱོད་པས་བགྲོད་པ་ཉིད་དོ། །ངོ་བོ་བདེ་ཆེན་ཉིད་ལ་གཉིས་སུ་དམིགས་པ་མེད་པས་ཆོས་སྐུ་ཆེན་པོར་བྱང་ཆུབ་བོ། །དྲན་རིག་ཇི་སྙེད་པར་རང་ཤར་ཏེ་རྣམ་པ་སྣ་ཚོགས་སུ་ངེས་པས་སེམས་ཉིད་དོ། །རིལ་མ་འདྲེས་པར་གསལ་ཏེ་ཤེས་བྱ་ཀུན་ལ་མཁས་པས་ཤེས་རབ་བོ། །ཐམས་ཅད་ཀྱི་ངོ་བོ་གསལ་ལ་ངང་ལས་མི་གཡོ་བས་ཏིང་ངེ་འཛིན་ནོ། །རིལ་མ་བགྲོད་པར་འགྲོ་འོང་བྲལ་ཏེ་ཇི་བཞིན་པར་ཕྱིན་པས་གནས་ཉིད་དོ། །འགྲན་གྱི་དོ་ཟླ་མེད་པས་རབ་ཉིད་དོ། །ཡ་མཚན་ལྔའི་བདག་ཉིད་ངོ་མཚར་བའི་གནས་སུ་གྱུར་པས་མཆོག་ཉིད་དོ། །ཆེ་བཙན་གཅིག་པུར་བྱུང་སྟེ་རྣམ་པར་འཕགས་པས་ཕུལ་ཉིད་དོ། །སྙིང་པོ་བྱང་ཆུབ་ལ་དབང་དུ་བྱེད་པའི་རྗེ་བོ་དང་ཟིལ་གྱིས་གནོན་པའི་གཉེན་པོ་མེད་པས་བླ་ན་མེད་པ་ཉིད་དོ། །མུ་མཐའ་བྲལ་ཏེ་གཏིང་མི་རྙེད་པས་ཟབ་པ་ཉིད་དོ། །བསམ་བློས་ངོ་བོར་མི་རེག་སྟེ་དཔག་ཏུ་མེད་པས་ན་གབ་པའི་ཕྱིར་གསང་བ་ཉིད་དོ། །ངོ་བོ་གཟུང་དཀའ་ཞིང་ཕྲ་སྟེ་ལྟ་བ་པོ་ལ་ཕྱོགས་སུ་མི་མངོན་པས་མི་གསལ་བ་ཉིད་དོ། །དངོས་པོ་གཉིས་པ་རིལ་མི་འགོག་པར་ཐམས་ཅད་འབྱུང་བས་ཆོས་སོ། །གཞི་ལམ་མཐར་ཐུག་པས་ངོ་བོ་མ་བརྗེས་ཏེ་མི་འགྱུར་བས་དེ་ཁོ་ན་ཉིད་དོ། །བསྒྲུབ་བྱའི་མཆོག་ཏུ་གྱུར་པའི་གོ་འཕང་གི་ས་ཉིད་ནོན་པས་བྱང་ཆུབ་སེམས་དཔའ་འོ། །ཞེན་པ་གཉིས་ཀྱི་སྐད་ཅིག་མ་མ་སྤངས་བྲལ་ཏེ་རྒྱུན་སངས་ཤིང་རྣམ་ཀུན་མཁྱེན་པའི་ཡེ་ཤེས་ཤེས་བྱའི་ཆོས་སོ་ཅོག་ལ་ཁྱབ་པས་སངས་རྒྱས་ཉིད་དོ། །ཐམས་ཅད་གནས་པའི་རྟེན་གཞིར་གྱུར་པས་རྩ་བ་ཉིད་དོ།།

གཉིས་པ་མྱ་ངན་ལས་འདས་པའི་གཞིར་བསྟན་པ་ནི།

ཐམས་ཅད་བསྐྱེད། ཅེས་པ་ནས། ཕྲིན་ལས་ཉིད་དོ། །ཞེས་པའི་བར་གྱིས་བསྟན་ཏེ།

ཐམས་ཅད་མཁྱེན་པས་ཐུགས་ཉིད་དོ། །འདོད་དགུ་འབྱུང་བས་ཡོན་ཏན་ཉིད་དོ།།

བྱ་བ་བྱེད་པས་འཕྲིན་ལས་ཉིད་དོ།།

ཇི་བཞིན་པའི་དེ་ཁོ་ན་ཉིད་ཤེས་རབ་ཆེན་པོའི་དབྱིངས་ལས་འཁོར་འདས་ཀྱི་ཆོས་ཐམས་ཅད་ཤར་ཞིང་སྐྱེད་པས་མའམ་ཡུམ་ཉིད་དོ། །གཞི་དེ་ལས་ཐབས་ཆེན་པོའི་ཡེ་ཤེས་རང་བྱུང་ཞིང་སྣང་བས་ཕའམ་ཡབ་ཉིད་དོ། །རྒྱལ་བའི་གདུང་རྒྱུད་ཡིན་ལ་བྱང་ཆུབ་ཆེན་པོ་འཛིན་པས་སྲས་ཉིད་དོ། །གཞན་ལ་རག་མ་ལས་པར་ཡེ་ནས་རང་བྱུང་བ་ཉིད་པས་དབང་རིལ་གྱི་སྡོང་པོའི་བདག་ཉིད་དོ། །དུས་གསུམ་དུ་མི་འགྱུར་ཞིང་མ་ཆད་པར་དེ་བཞིན་ཉིད་པས་གདུང་ཆེན་པོ་ཉིད་དོ། དལ་པོས་མཆོངས་ཀྱང་ཁང་ཐོག་སྟེ་མགྱོགས་པས་བྲོས་ཀྱང་དེ་ལས་གཞན་དུ་མི་ཕྱིན་པར་འདའ་བར་དཀའ་བས་ཐུགས་དམ་ཆེན་པོ་ཉིད་དོ། །རྒྱལ་བ་དང་ལམ་ལ་གནས་པ་རིལ་ཞེའམ་དངོས་པོ་རིལ་དེས་བཟུང་སྟེ་རྣམ་པར་འཚོ་བས་སྲོག་ཉིད་དོ། །རྒྱལ་བའི་ཡོན་ཏན་དང་འཁོར་བའི་ལོངས་༼༢༢༠༽སྤྱོད་རིལ་ཟད་པ་མེད་པར་ཤར་ཏེ་ཟད་མི་ཤེས་པས་གཏེར་ཆེན་པོ་ཉིད་དོ། །རིལ་གྱི་རེ་བ་སྐོངས་ཏེ་འདོད་པ་སྒྲུབས་པས་ནོར་ཉིད་དོ། །དུས་གསུམ་དུ་རྒྱུན་གྱིས་འབྱུང་བའི་སྙིང་རྗེས་ཀུན་གྱི་དོན་མཛད་ཅིང་བྱ་བ་བྱེད་པས་བྲན་ཉིད་དོ། །དེ་ཁོ་ན་ཉིད་ཀྱི་རྟེན་གཞི་མི་འགྱུར་བར་རྣམ་པར་བརྗིད་པའི་ལྷུན་པོར་བཞུགས་པས་སྐུ་ཉིད་དོ། །བརྗོད་མེད་ཀྱི་ངང་ལས་སྨྲ་བརྗོད་ཀུན་འབྱུང་སྟེ་དོན་འཇལ་བར་བྱེད་པས་གསུང་ཉིད་དོ། །རིལ་མ་འདྲེས་རྫོགས་པར་གསལ་ལ་མི་རྟོག་པར་ཐམས་ཅད་མཁྱེན་པས་ཐུགས་ཉིད་དོ། །དངོས་གྲུབ་དང་འབྲས་བུའི་གཞིར་གྱུར་ཏེ་འདོད་རྒུ་འབྱུང་བས་ཡོན་ཏན་ཉིད་དོ། །ཐམས་ཅད་ཀྱི་དོན་རྒྱུན་ཆད་མེད་པར་མཛད་པ་ཆེན་པོའི་བྱ་བ་བྱེད་ཅིང་དོན་མཛད་པས་ཕྲིན་ལས་ཉིད་དོ།།

གསུམ་པ་དེ་དང་འདྲ་བའི་གཞིར་བསྟན་པ་ནི།

ཡུལ་ལ། ཞེས་པ་ནས། ཕྱག་རྒྱ་ཉིད་དོ། །ཞེས་པའི་བར་གྱིས་བསྟན་ཏེ།

ཡུལ་ལ་འགྲོ་བས་འདོད་པ་ཉིད་དོ། །དེ་ཉིད་ལ་སྤྱོད་པས་ལོངས་སྤྱོད་ཆེན་པོ་ཉིད་དོ། །རྒྱུར་གྱུར་པས་ཡོ་བྱད་ཆེན་པོའོ། །དགོས་པ་ཚང་བས་ཚོགས་ཆེན་པོའོ། །བྱ་བཙལ་མེད་པས་དོན་ཐམས་ཅད་གྲུབ་པའོ།།

སྣ་ཚོགས་འཕྲུལ་པས་ཆོ་འཕྲུལ་ཉིད་དོ། །མཚན་མར་བྱུང་བས་ཕྱག་རྒྱ་ཉིད་དོ།།

འདོད་པ་སྣ་ཚོགས་པའི་ཡུལ་རིལ་ལ་ཀུན་ཏུ་འགྲོ་བས་འདོད་པ་ཉིད་དོ། །འཁོར་འདས་གཉིས་ལ་ཡུལ་དང་བྲལ་བར་རོལ་ཏེ་དེ་ཉིད་ལ་སྤྱོད་པས་ལོངས་སྤྱོད་ཆེན་པོ་ཉིད་དོ། །རིལ་གྱི་རྒྱུར་གྱུར་པ་སྤྱད་བྱ་ཉིད་དུ་སྣང་བས་ཡོ་བྱད་ཆེན་པོའོ། །འདོད་པའི་རྐྱེན་རིལ་དབྱིངས་ལ་རྫོགས་ཏེ་དགོས་པ་ཚང་བས་ཚོགས་ཆེན་པོའོ། །བྱ་བ་མ་སྤངས་ལ་བྱ་བརྩལ་མེད་པའི་སྙིང་པོར་གནས་པས་དོན་ཐམས་ཅད་གྲུབ་པའོ། །དངོས་ལ་ཅིར་ཡང་ཤར་ཏེ་སྣ་ཚོགས་སུ་འཕྲུལ་ཡང་མཚན་ཉིད་མ་ངེས་པས་ཆོ་འཕྲུལ་ཉིད་དོ། །སྐུ་ཕྱག་རྒྱ་ལ་སོགས་པར་རྐྱེན་ལ་རག་མ་ལས་པར་ཤར་ཏེ་མཚན་མར་བྱུང་བས་ཕྱག་རྒྱ་ཉིད་དོ།།

བཞི་པ་བསྙེན་བསྒྲུབ་ཀྱི་གཞིར་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གཞན་ནས། ཞེས་པ་ནས། བསྒྲུབ་པ་ཆེན་པོའོ། །ཞེས་པའི་བར་གྱིས་བསྟན་ཏེ།

གཞན་ནས་མི་འཚོལ་བས་བསྙེན་པ་ཉིད་དོ། །རང་ལས་བྱུང་བས་ཉེ་བར་བསྙེན་པ་ཉིད་དོ།།

སྙིང་པོ་ཉིད་ལས་བསྒྲུབ་པའོ། །འབྲས་བུ་ཉིད་པས་བསྒྲུབ་པ་ཆེན་པོའོ།།

གོ་འཕང་ལོགས་ནས་མི་གཉེར་བས་གཞིའི་ཕྱིར་གཞན་ནས་མི་ཚོལ་བས་བསྙེན་པ་ཉིད་དོ། །དེ་ལས་ཐོབ་བྱ་རང་རིག་པ་ཉིད་ཡིན་པས་དོན་གཞན་ནས་མ་བྱུང་བའི་ཕྱིར་རང་ལས་བྱུང་བས་ཉེ་བའི་བསྙེན་པ་ཉིད་དོ། །རྒྱུ་འབྲས་གཉིས་སུ་མེད་པར་འབྲས་བུ་ཉིད་ལམ་ཡིན་པའི་ཕྱིར་སྙིང་པོ་ཉིད་པས་བསྒྲུབ་པའོ། །གྲུབ་མཐའ་ཆེན་པོར་རང་ཉིད་ཡེ་གྲུབ་ཟིན་པའི་ཕྱིར་འབྲས་བུ་ཉིད་པས་བསྒྲུབ་པ་ཆེན་པོའོ།།

གཉིས་པ་རྒྱས་པར་བཤད་པ་ནི།

བཀའ་སྩལ། ཞེས་པ་ནས། གང་དུ་ཡང་མེད་དོ། །ཞེས་པའི་བར་གྱིས་བསྟན་ཏེ།

བཀའ་སྩལ་པ། སྐྱེས་བུ་དམ་པ་དག་བྱང་ཆུབ་ཀྱི་སྙིང་པོ་དེ་ཇི་ལྟར་བསྒྲུབ། གསོལ་པ། བསྒྲུབ་ཏུ་མ་མཆིས་ལགས་སོ། །བཀའ་སྩལ་པ། ཇི་ལྟར་བསྒྲུབ་ཏུ་མེད། གསོལ་པ། ཡེ་ནས་གྲུབ་པ་ཉིད་ཀྱི་སླད་དུའོ། །བཀའ་སྩལ་པ། དེ་ཡེ་ནས་ཇི་ལྟར་གྲུབ། གསོལ་པ། གཞན་ནས་མི་འབྱུང་བ་དང་། རང་ལས་བྱུང་བ་དང་། བྱ་བཙལ་མེད་པ་དང་། རང་བྱུང་བའི་ཕྱིར་ཡེ་ཉམས་སུ་ལོན་པ་ཉིད་དུ་ངེས་པའོ། །ཞེས་དེ་ལྟ་དེ་ལྟར་སྟོང་པ་ཉིད་ལས་སྒྲ་བྱུང་བས། དེ་ཁོ་ན་ཉིད་དེ་དེ་ཁོ་ན་ཉིད་དུ་ངེས་པར་ཐམས་ཅད་ནས་ཐམས་ཅད་དུ་སྙིང་པོ་བྱང་ཆུབ་ཉིད་ལས་མ་གཏོགས་པ་གང་ཡང་མེད་དོ།།

དེ་ལྟ་བས་ན་གཞི་ལམ་མཐའ་རིལ་དུ་སྙིང་པོ་བྱང་ཆུབ་འགྲོ་འོང་མེད་པར་སྣང་བར་ལ་གཅད་དེ། ༼༢༢༡༽བཀའ་སྩལ་པ། སྐྱེས་བུ་དམ་པ་དག བྱང་ཆུབ་ཀྱི་སྙིང་པོ་དེ་ཇི་ལྟར་བསྒྲུབ། གསོལ་པ། བསྒྲུབ་ཏུ་མ་མཆིས་ལགས་སོ། །བཀའ་སྩལ་པ། ཇི་ལྟར་བསྒྲུབ་ཏུ་མེད། གསོལ་པ། གནས་ལུགས་ཡེ་ནས་འབྲས་བུ་ཡེ་སངས་རྒྱས་པར་གྲུབ་པ་གང་དེ་བྱང་ཆུབ་སྙིང་པོ་ཉིད་ཀྱི་སླད་དུའོ། །བཀའ་སྩལ་པ། ཡེ་ནས་ཇི་ལྟར་གྲུབ། གསོལ་པ། ཡེ་གྲུབ་ཟིན་པའི་གཏན་ཚིགས་བཞི་སྟེ་འབྲས་བུ་གཞན་ནས་མི་འབྱུང་བ་དང༌། རང་རིག་པ་ལས་འབྱུང་བ་དང༌། རྩོལ་བའི་བྱ་བརྩལ་མེད་པ་དང༌། རྒྱུ་རྐྱེན་མེད་པར་རང་བྱུང་བའི་ཕྱིར། ཡེ་ནས་ཉམས་སུ་ལེན་པ་ཉིད་དུ་ངེས་པའོ། །ཞེས་དོན་དེ་ལྟ་དཔེ་དེ་ལྟར་སྟོང་པ་ཉིད་ཆེན་པོ་སྙིང་པོ་བྱང་ཆུབ་ཀྱི་བྱིན་རླབས་ལས་སྒྲ་བྱུང་བས། དེ་ཁོ་ན་ཉིད་དེ་ཁོ་ན་ཉིད་དུ་ངེས་པར་དོན་གྱི་ངོ་བོ་ལས་གཞན་པ་མེད་པས་ཐམས་ཅད་ནས་ཐམས་ཅད་དུ་སྙིང་པོ་བྱང་ཆུབ་ཉིད་ལས་མ་གཏོགས་པ་གང་དུ་ཡང་མེད་དོ།།

བདུན་པ་སྙིང་པོ་བྱང་ཆུབ་ཏུ་ངེས་པ་ན་གདུལ་བྱ་སྐབས་ལ་བབ་ཚུལ་ལ་གསུམ་སྟེ། སྙིང་པོ་བྱང་ཆུབ་ཏུ་ངེས་པ་དངོས། རུ་ཏྲ་བཏུལ་བའི་ཚེ་སྐུ་ལྔར་བཞེངས་པར་བསྐུལ་བ། སྐུ་ལྔར་བཞེངས་པའི་ཚུལ་བཤད་པའོ། །དང་པོ་ནི།

ལང་ཀའི། ཞེས་པ་ནས། འགྲེལ་ཏོ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལྟར་སྐྱེས་བུ་དམ་པ་སྙིང་པོ་བྱང་ཆུབ་ཉིད་དུ་ངེས་པ་དག མི་གཡོ་བའི་ངང་ལ་མི་རྟོག་པ་ཉིད་དུ་ཞི་བར་ལྷག་པར་གནས་པ་དེའི་ཚེ་དེའི་དུས་ན། དགོངས་པ་ཆོས་ཉིད་ཀྱི་ནམ་མཁའ་ལ་འགྲེལ་པ་ཡེ་ཤེས་ཀྱི་ཉི་མ་བདལ་ཏེ། ཐམས་ཅད་དེ་ཁོ་ན་ཉིད་ངེས་པ་ཉིད་དུ་འགྲེལ་ཏོ།།

ལང་ཀའི་བདག་པོ། དེ་ལྟར་སྐྱེས་བུ་དམ་པ་དངོས་པོའི་གནས་ལུགས་སྙིང་པོ་བྱང་ཆུབ་ཉིད་དུ་ངེས་པ་དེ་དག་ཆོས་ཉིད་བདེ་བ་ཆེན་པོ་ཀུན་ཏུ་མི་གཡོ་བའི་ངང་ལས་རྣམ་པར་མི་རྟོག་པ་ཉིད་དུ་ཞི་བ་ལྷན་ནེ་བར་གནས་པ་དེའི་ཚེ་དེའི་དུས་ན་དགོངས་པ་ཆོས་ཉིད་ཀྱི་ནམ་མཁའ་ལ་འགྲེལ་པ་ཡེ་ཤེས་ཀྱི་ཉི་མ་གདལ་ཏེ་ཐམས་ཅད་དེ་ཁོ་ན་ཉིད་དུ་ངེས་པར་གདེངས་སུ་གྱུར་ཏེ་མ་འདྲེས་ལ་ཡོངས་སུ་རྫོགས་པ་ཉིད་དུ་ཡང་དག་པར་འགྲེལ་ཏོ།།

གཉིས་པ་རུ་ཏྲ་བཏུལ་བའི་ཚེ་སྐུ་ལྔར་བཞེངས་པར་བསྐུལ་བ་ནི།

དེའི་ཚེ། ཞེས་པ་ནས། རིག་པས་བསྐུལ་ཏེ། ཞེས་པའི་བར་གྱིས་བསྟན་ཏེ།

དེའི་ཚེ་དེའི་དུས་ན་གསང་སྔགས་འབྱུང་བའི་རྒྱུ། གདུལ་བྱ་ཁྱད་པར་དུ་བྱུང་བ། འཇིག་རྟེན་གསུང་སྲེག་པར་བྱེད་པ། ཁྲོ་བོའི་ཚུལ་ཅན་གདུལ་བྱའི་དུས་ལ་ངེས་པར་བབ་པའི་ཚེ། ཕྱོགས་དུས་ཀུན་གྱི་སངས་རྒྱས་ཐམས་ཅད་སྙིང་པོ་བྱང་ཆུབ་གང་ན་བར་འདུས་ནས། སྐྱེས་བུ་དམ་པ་དག ལ་ལ་ནི་བྱང་ཆུབ་ཆེན་པོར་རྣམ་པར་བསྐུལ། ལ་ལ་ནི་ཆོ་འཕྲུལ་ཆེན་པོར་རྣམ་པར་བསྐུལ། ལ་ལ་ནི་ཆོ་ག་རྫོགས་པར་བསྐུལ། ལ་ལ་ནི་ཏིང་ངེ་འཛིན་གྱིས་བསྐུལ། ལ་ལ་ནི་རྣམ་གྲོལ་རིག་པས་བསྐུལ་ཏེ།

སྙིང་པོ་བྱང་ཆུབ་ཏུ་ངེས་པ་དང་གདུལ་བྱའི་སྐབས་ལ་བབ་པ་དུས་གཅིག་པའི་ཁུངས་ཏེ། ཐུབ་དཀའ་གཞོན་ནུ་དང་སྐྱེས་བུ་ལྔ་དག་ཇི་བཞིན་པར་སོན་ཞིང་ངེས་པ་རྙེད་པ་དེའི་ཚེ་དེའི་དུས་ནི་དངོས་སུ་ན་རུ་ཏྲ་སྣང་བའི་བསྐལ་པའི་དུས་ཉིད་དེ་སྙིང་པོ་བྱང་ཆུབ་ནི་དུས་གསུམ་མ་འགགས་བྲལ་བ་ལ་ཚེ་སྐབས་མེད་ཀྱང་གདུལ་བྱའི་ངོ་བཙན་ནོ། །གདུལ་བྱ་ལ་སྔོན་གྱི་གླེང་གཞི་སྨོས་པའང་འདིའི་ཕྱིར་ཏེ། གསང་སྔགས་འབྱུང་བའི་རྒྱུ་ཁྱད་པར་དུ་གྱུར་པ་ཐར་པ་ནག་པོ། རྐྱེན་ཁྱད་པར་དུ་གྱུར་པ་༼༢༢༢༽གསང་སྔགས་ཀྱི་སྤྱོད་པ། རྟེན་སྟོབས་ཁྱད་པར་དུ་གྱུར་པ་ཐུབ་བཀའ་གཞོན་ནུ། ལས་ཁྱད་པར་དུ་གྱུར་པ་སྦྱོར་སྒྲོལ་རང་ཀ་མ། འབྲས་བུ་ཁྱད་པར་དུ་གྱུར་པ་རུ་ཏྲ་ཉིད་གདུལ་བར་བྱ་བའི་ཞིང་ཁྱད་པར་དུ་བྱུང་བ། འཇིག་རྟེན་གྱི་ཁམས་གསུམ་པོ་སྲེག་པར་བྱེད་པ། ཁྲོ་བོའི་ཚུལ་ཅན་གདུལ་བྱའི་དུས་ལ་ངེས་པར་བབ་པའི་ཚེ། འདི་བྱུང་བས་འདི་འབྱུང་བའི་ཕྱིར་ཕྱོགས་དུས་ཀུན་གྱི་སངས་རྒྱས་ཐམས་ཅད་སྙིང་པོ་བྱང་ཆུབ་གང་ན་བར་འདུས་ནས་ཞེས་པ་གདུལ་བྱའི་ངོ་སྟེ་ངོ་བོ་ཉིད་དེར་མ་འདྲེས་རྫོགས་པའོ།།

དེས་ན་གདུལ་བྱའི་ངོར་འོག་མིན་ན་བཞུགས་པ་དེ་དག་གིས། རུ་ཏྲ་འདུལ་བའི་ཕྱིར་ཐུབ་དཀའ་གཞོན་ནུ་བྱང་ཆུབ་སྙིང་པོ་ན་བཞུགས་པ་སྐུ་ལྔའི་སྒོ་ནས་བསྐུལ་བ་དང༌། སྐྱེས་བུ་ཐ་དད་ལ་སོ་སོ་ནས་བསྐུལ་བ་ནི་སྤྱི་དང་ཁྱད་པར་གྱི་དབང་སྟེ་གཉིས་ཀ་དང་ཐུན་མོང་དུ་འགྱུར་བས་སྐྱེས་བུ་དམ་པ་དེ་དག ལ་ལ་ཞེས་བཀར་བ་ནི་སྐྱེས་བུ་དང་བསྐུལ་བྱེད་ཐུན་མོང་དུ་སྦྱར་ཏེ་བླ་ན་མེད་པའི་བྱང་ཆུབ་ཆེན་པོར་ངོ་བོ་ཉིད་ཀྱི་སྐུར་འཚང་རྒྱ་བ་ལས་བཞེངས་པར་རྣམ་པར་བསྐུལ་བ་དང༌། ལ་ལ་ནི་གསང་བའི་སྐུ་རོལ་པ་ཉི་ཤུ་རྩ་ལྔ་ལྟ་བུ་ལ་སོགས་པའི་ཆོ་འཕྲུལ་ཆེན་པོར་མཛོད་ཅིག་པར་རྣམ་པར་བསྐུལ་བ་དང༌། ལ་ལ་ནི་སྤྲུལ་པའི་སྐུ་རྫུ་འཕྲུལ་གྱི་བྱ་བའམ་ཆོ་ག་རྫོགས་པར་གྱིས་ཤིག་པར་རྣམ་པར་བསྐུལ་བ་དང༌། ལ་ལ་ནི་ལོངས་སྤྱོད་རྫོགས་པའི་སྐུའི་སྒོ་ནས་ཏིང་ངེ་འཛིན་གྱི་དགོངས་པ་དང་སྐུའི་མཛད་པ་ཉིད་ཀྱིས་དོན་མཛོད་ཅིག་པར་རྣམ་པར་བསྐུལ་བ་དང༌། ལ་ལ་ནི་ཆོས་ཀྱི་སྐུ་མཐའ་དང་བྲལ་བའི་ཡེ་ཤེས་ཆེན་པོའི་སྒོ་ནས་རྣམ་གྲོལ་རིག་པས་ཆོས་ཉིད་ཀྱི་སྐུར་བཞེངས་པར་རྣམ་པར་བསྐུལ་བར་གྱུར་ཏེ།

གསུམ་པ་སྐུ་ལྔར་བཞེངས་པའི་ཚུལ་བཤད་པ་ནི།

དེས་གང་སྟོང་པ། ཞེས་པ་ནས། འབའ་ཞིག་གོ །ཞེས་པའི་བར་གྱིས་བསྟན་ཏེ།

དེས་གང་སྟོང་པ་ཉིད་གང་ན་བ་ལས་ལངས་ཏེ་རྫོགས་ལོངས་སྤྱོད་པ་དང་། རྣམ་པར་འཕྲུལ་པ་རྣམ་པར་བཀོད་པ་ནི། ཇི་ལྟ་ཇི་ལྟར་རྡོ་རྗེ་སེམས་དཔའ་དེ་ཁོ་ན་ཉིད་ངེས་པའི་རྣམ་པར་འཕྲུལ་པ་སྒྲོན་མ་ཡོངས་སུ་བཀོད་པ་ལྟར་སྣང་ངོ་། །འདི་ལྟར་ཡོངས་སུ་དག་པ་བརྟགས་པའི་སངས་རྒྱས་བརྗོད་ལས་འདས་པ་ཐ་དད་པ་དག ཞིང་ཁམས་ཐ་དད་པར་འཁོར་ལོས་སྒྱུར་བའི་རྒྱལ་པོ་ཐ་དད་པ་དང་། ལྷ་གནས་གསུམ་ཐ་དད་པར་རྫོགས་ལོངས་སྤྱོད་པ་དང་། རྒྱལ་ཚབ་ཆོས་ཀྱི་རྒྱལ་པོ་དང་། སྤྲུལ་པའི་བརྒྱ་བྱིན་ལྷའི་བླ་མ་ཐ་དད་པ་དང་། ཐ་མའི་དུས་ཐ་དད་པར་ཆོ་འཕྲུལ་ཐ་དད་པར་སྣང་བ་དང་། ཡུམ་གཙུག་ཏོར་འཁོར་ལོས་སྒྱུར་བའི་ལྷུམས་ཐ་དད་པ་ན་གསང་བའི་སྐུ་ཐ་དད་པར་སྣང་བ་དང་། ཞིང་ཁམས་ཐ་དད་པ་ན་སྤྲུལ་པའི་སྒྲོན་མ་ཐ་དད་པར་སྣང་བ་དང་། ཐུགས་སྙིང་པོ་བྱང་ཆུབ་ན་མི་གཡོ་བ་དང་། སྐུ་ཐ་དད་པ་འཇིག་རྟེན་ཐ་དད་པ་ན་བསམ་གཏན་ལ་སྙོམས་པར་ཞུགས་ཏེ་མཛད་པ་མཐར་ཕྱིན་པ་དང་། རྡོ་རྗེ་གདན་ཐ་དད་པ་ལ་གཤེགས་ཏེ། ཐ་དད་པའི་བདུད་བཏུལ་ཏེ་འཁོར་ལོ་ཡོངས་སུ་བསྐོར་ནས་མངོན་པར་རྫོགས་པར་བྱང་ཆུབ་ལ་འབའ་ཞིག་གོ།

དེ་ལྟར་བསྐུལ་བ་དེས་གདུལ་བྱའི་སྣང་ངོར་གང་སྙིང་པོ་བྱང་ཆུབ་སྟོང་པ་ཉིད་ཆེན་པོ་གང་ན་བ་རང་དོན་གྱི་དགོངས་པ་མི་གཡོ་བ་ལས་ལངས་ཏེ་གཞན་དོན་དུ་གཟུགས་ཀྱི་སྐུ་རྫོགས་ལོངས་སྤྱོད་པ་དང༌། རྣམ་པར་སྤྲུལ་པ་གཉིས་སུ་རྣམ་པར་བཀོད་པ་ནི། ཇི་ལྟ་ཇི་ལྟར་རྡོ་རྗེ་སེམས་དཔའི་དེ་ཁོ་ན་ཉིད་ངེས་པའི་རྣམ་པར་འཕྲུལ་པ་གདུལ་བྱ་སོ་སོའི་གནས་སུ་སྒྲོན་མ་ཡོངས་སུ་བཀོད་དེ་ཆོས་སྟོན་པས་བྱུང་ཚུལ་ལས་བཤད་པ་ལྟར་ཀུན་ཏུ་སྣང་བས་དེའི་དོན་དུའང་འགྱུར་ཏེ་ཞི་ཁྲོ་གཉིས་ཀར་གཟུང་ངོ་། །དེ་དག་གི་དོན་མཛད་ལུགས་ཅི་ཞེ་ན། འདི་ལྟར་ཡོངས་སུ་དག་པ་ངོ་བོ་ཉིད་ཆོས་ཀྱི་སྐུར་༼༢༢༣༽བཞུགས་པས་གདུལ་བྱ་མེད་ན་ཡང༌། ལྷུན་གྱིས་གྲུབ་པ་དེ་ཉིད་གདུལ་བྱ་ལ་མཚན་ཐ་དད་པར་བཏགས་པའི་སངས་རྒྱས་བརྗོད་པ་ལས་འདས་པར་གྲགས་ཤིང་སྐུ་སྣང་བ་ཐ་དད་པ་མཐའ་དག རྒྱལ་བའི་ཞིང་ཁམས་བཤད་པ་བཞིན་མཚན་ཐ་དད་པར་བཀོད་པས་འཇིག་རྟེན་གྱི་འཛམ་བུ་གླིང་རྣམས་ན། སྤྲུལ་པ་འཁོར་ལོས་སྒྱུར་བའི་རྒྱལ་པོ་ལྟ་བུ་ཆ་བྱད་ཐ་དད་པ་དག་གིས་ཐེག་པ་དེ་ཉིད་ཀྱི་དོན་བཅུ་སྟོན་པ་དང༌། ལྷ་གནས་གསུམ་ཐ་དད་པར། གཙང་མའི་རིགས་ཀྱི་འོག་མིན་ཆེན་པོ་ན་རྫོགས་ལོངས་སྤྱོད་པ་རིགས་ལྔའི་རྒྱལ་བ་དང༌། དགའ་ལྡན་དུ། སྤྲུལ་པའི་རྒྱལ་ཚབ་ཆོས་ཀྱི་རྒྱལ་པོ་དམ་པ་ཏོག་དཀར་པོ་དང༌། སུམ་ཅུ་རྩ་གསུམ་དུ་སྤྲུལ་པའི་བརྒྱ་བྱིན་ལྷའི་བླ་མ་ལྟ་བུ་ཐ་དད་པ་དག་གིས་ཆོས་སོ་སོར་སྟོན་པ་དང༌། སྲིད་པ་ཐ་མའི་དུས་ཐ་དད་པར་མི་ཡུལ་ལ་སོགས་པ་ལ་རྒྱལ་བའི་ཆོ་འཕྲུལ་ལས་རྒྱུན་གཅོད་པའི་མཛད་པ་ལྔ་ཐ་དད་པར་སྣང་བ་དང༌། ཡུམ་གྱི་བྷ་ག་དང་གསང་བའི་རྡོ་རྗེ་གཉིས་འཕྲད་པའི་དབུ་ཞབས་བདེ་བ་ཆེན་པོའི་རོས་གང་བ་ཡན་མན་དུ་དབང་བསྒྱུར་ནས་སྣང་བའི་གནས་ཡུམ་གཙུག་ཏོར་འཁོར་ལོས་སྒྱུར་བའི་ལྷུམས་ཐ་དད་པ་ན། གསང་བའི་སྐུ་ཐིག་ལེ་གཉིས་སུ་མེད་པའི་བདེ་བ་ཆེན་པོ་འདུས་པའི་སྐུ་ལས་མཛད་པ་ཅིར་ཡང་མཛད་དེ་ཐ་དད་པར་སྣང་བ་དང༌། མིའི་གནས་ཞིང་ཁམས་ཐ་དད་པ་ན། སྤྲུལ་པའི་མཚན་སྒྲོན་མ་བཀོད་པ་ལྟ་བུར་ཐ་དད་པར་སྣང་བས་དོན་མཛད་པ་དང༌། དོན་ཐམས་ཅད་གྲུབ་པ་ལྟ་བུའི་ཐུགས་འོག་མིན་དུ་སངས་རྒྱས་པས་དགོངས་པ་སྙིང་པོ་བྱང་ཆུབ་ཆེན་པོ་ན་བཞུགས་ཏེ་མི་གཡོ་བ་དང༌། དེའི་སྐུ་ཐ་དད་པ་འཛམ་བུའི་གླིང་གི་འཇིག་རྟེན་ཐ་དད་པ་ན་ནཻ་རཉྫ་ནར་དཀའ་ཐུབ་ཀྱི་ཁོག་པར་བཞུགས་ནས་བསམ་གཏན་ལ་སྙོམས་པར་ཞུགས་ཏེ་གནས་པ་དང༌། ཧེ་རུ་ཀ་གལ་པོ་ལས། སངས་རྒྱས་སྤྲུལ་པའི་སྐུ་རྣམས་ལ། །མི་ཡི་ཡུལ་དུ་འདུལ་མཛད་པ། །བཅོམ་ལྡན་ཤཱཀྱ་སེང་གེ་ཡིས། །མཛད་པ་ཉི་ཤུས་བྱང་ཆུབ་བོ། །ཞེས་གསུངས་པ་ལྟར་རྒྱ་ཆེར་རོལ་པར་གསུངས་པ་ལ་ཁ་བསྐང་སྟེ། དང་པོར་དགའ་ལྡན་གནས་ནས་གཤེགས། །དེ་ནས་འཆི་འཕོའི་ཚུལ་བསྟན་པ། །ཡུམ་གྱི་ལྷུམས་སུ་ཞུགས་པ་དང༌། །དེ་བཞིན་ལྷུམས་ན་གནས་པ་དང༌། ལྷུམས་ནས་བལྟམས་པར་གྱུར་པ་དང༌། །ཚངས་དང་བརྒྱ་བྱིན་གྱིས་བླངས་དང༌། །ཀ་ཤིའི་རས་ཀྱིས་དཀྲིས་པ་དང༌། །ཀླུ་ཡིས་སྐུ་ཁྲུས་གསོལ་བ་དང༌། །མཚན་མཁན་རྣམས་ཀྱིས་མཚན་༼༢༢༤༽བརྟགས་དང༌། །ཕྱོགས་བཞིར་གོམ་པ་བདུན་བོར་དང༌། །གྱད་ཟླ་རྣམས་དང་གྱད་བཀྱེ་དང༌། །ཡི་གེ་འཕོང་དང་བཟོ་བསླབ་དང༌། །ཁབ་དང་རྒྱལ་སྲིད་བཞེས་པ་དང༌། །རབ་བྱུང་འཁོར་རྣམས་མི་དགའ་དང༌། །འཁོར་རྣམས་ཀུན་གྱིས་བསྲུངས་པ་དང༌། །ནཻ་རཉྫ་ནར་དཀའ་ཐུབ་དང༌། །སྤྲེ་འུས་སྦྲང་རྩི་ཕུལ་བ་དང༌། །ཤིང་དྲུང་རྡོ་རྗེའི་གདན་སྟེངས་སུ། །མངོན་པར་བྱང་ནི་ཆུབ་པ་སྟེ། །ཆོས་འཁོར་བསྐོར་དང་མྱང་འདས་སོ། །རྣམ་པ་ཉི་ཤུ་ཐམ་པར་འདོད། །ཅེས་ལོ་ཙཱ་བས་18གལྤོའི་མཆན་ལས་འབྱུང་བ་སོགས་མཛད་པ་ཉི་ཤུ་དང་ཡོངས་གྲགས་ལྟར་བཅུ་གཉིས་མཐར་ཕྱིན་ཏེ་རྫོགས་པ་ལྟ་བུ་དང༌། སོ་སོའི་རྡོ་རྗེ་གདན་ཐ་དད་པ་ལ་གཤེགས་ཏེ་འཚང་རྒྱ་བ་དང༌། གྲོང་ཁྱེར་རྩྭ་མཆོག་ལ་སོགས་པར་ཐ་དད་པའི་བདུད་བཏུལ་ཏེ། ཝཱ་རཱ་ཎ་སཱི་ལ་སོགས་པར་ཆོས་ཀྱི་འཁོར་ལོ་ཡོངས་སུ་བསྐོར་བར་མཛད་ནས། གདན་ཉིད་ལ་མངོན་པར་རྫོགས་པར་བྱང་ཆུབ་སྟེ་སངས་རྒྱས་པ་ལྟ་བུ་ལ་སོགས་པར་སྣ་ཚོགས་སུ་སྣང་སྟེ། མདོར་ན་ཆོས་ངེས་པའི་བྱིན་རླབས་ཀྱིས་ཞིང་ཁམས་ཐ་དད་པར་སྐུ་ཐ་དད་པས་མཛད་པ་ཐ་དད་པ་མཛད་ནས་ཐ་དད་པའི་བདུད་བཏུལ་ཏེ་གསང་སྔགས་ཀྱི་ཆོས་ཀྱི་འཁོར་ལོ་ཐ་དད་པར་བསྐོར་བས་སྙིང་པོ་བྱང་ཆུབ་ཉིད་དུ་ངེས་པ་ན་ཡང་གསང་སྔགས་ངེས་པར་འབྱུང་བ་འབའ་ཞིག་གོ།

གསུམ་པ་མཇུག་བསྡུ་བ་ནི།

དེ་སྐད། ཅེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས།

སྙིང་པོ་བྱང་ཆུབ་གསང་བ་དམ་པ་དེ་ཁོ་ན་ཉིད་དུ་ངེས་པར་གྱུར་ཏོ།།

དེ་སྐད་ཅེས་སྨྲས་ཏེ་བཀའ་སྩལ་པས། ལང་ཀའི་བདག་པོ་ལ་སོགས་པ། འགྲོ་བ་དམན་པའི་ལུས་ཅན་གྱི་སེམས་དཔའ་ཆེན་པོ་རྣམས་ཀྱིས། སྙིང་པོ་བྱང་ཆུབ་གསང་བ་དམ་པ་དེ་ཁོ་ན་ཉིད་མངོན་དུ་གྱུར་ཏེ། དེ་ལྟར་ངེས་པའི་བྱིན་རླབས་ལས་དེ་ཉིད་ཀྱི་དུས་སུ་མི་ཡུལ་དུ་གསང་བ་སྣང་བར་ཡོངས་སུ་ཤེས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གསང་བ་དམ་པ་དེ་ཁོ་ན་ཉིད་དུ་ངེས་པའི་ལེའུ་སྟེ་བཅོ་ལྔ་པའོ། །ཐེག་པ་ཆེན་པོ་ངེས་པར་བྱུང་བའི་ཚུལ་ལས། སྙིང་པོ་བྱང་ཆུབ་ཉིད་དུ་ངེས་པའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་བཞི་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ལྔ་དང་བཞི་དང་ཐུབ་དཀའ་གཞོན་ནུ་དང༌། སྐྱེས་བུ་བཅུ་ལ་སོགས་པ་གསང་བ་དམ་པ་དེ་ཁོ་ན་ཉིད་དུ་ངོ་བོ་ངེས་པར་གྱུར་པའི་དོན་བསྟན་པའི་ལེའུ་སྟེ་བཅོ་ལྔ་པ་རྣམ་པར་བཤད་པའོ། །དེ་དག་གི་སྒོ་ནས་ཐེག་པ་ཆེན་པོ་ངེས་པར་འབྱུང་བའི་ཚུལ་ལས། སྙིང་པོ་བྱང་ཆུབ་ཉིད་དུ་ངེས་པའི་གཏམ་རྒྱུད་བརྗོད་པའི་གསུང་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་བཞི་པ་ཉིད་ལེགས་པར་བཤད་དེ་རྒྱས་པར་བཀྲོལ་བའོ།། །།

ལེའུ་བཅུ་དྲུག་པ་རྫུ་འཕྲུལ་གྱི་ཆོ་འཕྲུལ་བསྟན་པ།

༈ བམ་པོ་༼༢༢༥༽གསུམ་པར་ཟུག་པ། ལྔ་པ་དགོངས་པ་ངེས་པར་འགྲེལ་བའི་བྱུང་ཚུལ་ལ་གསུམ་སྟེ། སྤྱིར་བསྟན་པ། བྱེ་བྲག་ཏུ་རྒྱས་པར་བཤད་པ། ཞབས་བསྡུ་བས་འཁོར་གྱིས་གོ་བའི་ཡོན་ཏན་ནོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུས་ཏེ་དགོངས་པ་ངོས་གཟུང་བའོ། །དང་པོ་ནི།

དེ་ནས། ཞེས་པ་ནས། ཉིད་ལ་བྱའོ། །ཞེས་པའི་བར་གྱིས་བསྟན་ཏེ།

བམ་པོ་གསུམ་པར་ཟུག་པའོ། །དེ་ནས་ཡང་ལངྐའི་བདག་པོ་དེས། གསང་བ་པའི་བདག་པོ་ལ་སྔོན་དུ་བྱུང་བའི་ཚིག་བཅུ་གཉིས་པའི་ལྔ་པ། དགོངས་པ་ངེས་པར་འགྲེལ་པ་ན་ཡང་བྱུང་། ཞེས་བྱུང་བ་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། དགོངས་པ་ངེས་པར་འགྲེལ་པ་ན་ཡང་བྱུང་། ཞེས་བཀོད་པ་དེ། ཇི་ལྟ་བ་ཞིག་ཏུ་དགོངས་པ་དེ་ལས་ངེས་པར་འགྲེལ་པ་ཞིག་གྲགས་པ་ལགས། སྨྲས་པ། ལངྐའི་བདག་པོ་གང་སྐྱེས་བུ་དམ་པ་ཉིད་དུ་ངེས་པ་དེ་དག་སྙིང་པོ་བྱང་ཆུབ་ལ་དགོངས་པ་དེའི་ཚེ་དེའི་དུས་ཉིད་ལ་བྱའོ།།

སྤྱིར་བྱུང་ཚུལ་འདིའང་དམ་པའི་སྒྲོན་མ་ཇི་ལྟར་བཀོད་ཀྱི་ལན་ཏེ། ཁྱད་པར་རྩལ་འཕངས་ལས་སྒོམ་ལམ་གཞན་དོན། རྒྱུད་གནས་ལུགས་ལས་དགོངས་པ་ངེས་པར་འགྲེལ་བའི་བྱུང་ཚུལ་མ་འདྲེས་ཡོངས་རྫོགས་ཀྱི་ལྟ་བ་རྒྱ་མཚོའི་གཟུགས་བརྙན་ལྟ་བུ་ཉིད་རྒྱས་པར་སྟོན་ཏོ། །དེ་ནས་ཡང་ལང་ཀའི་བདག་པོས། གསང་བ་པའི་བདག་པོ་ལ། སྔོན་དུ་བྱུང་བའི་ཚིག་བཅུ་གཉིས་པའི་ལྔ་པ་དགོངས་པ་ངེས་པར་འགྲེལ་པ་ན་ཡང་བྱུང་ཞེས་འབྱུང་བ་དེ་ཉིད་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། དགོངས་པ་ངེས་པར་འགྲེལ་པ་ན་ཡང་འབྱུང་ཞེས་བཀོད་པ་དེ། ཇི་ལྟ་བ་ཞིག་ཏུ་དགོངས་པ་ངེས་པར་འགྲེལ་བ་ཞིག་གྲགས་པ་ལགས། ལན་སྨྲས་ཏེ་བཀའ་སྩལ་པ། ལང་ཀའི་བདག་པོ། དེའི་དུས་ངེས་པ་ནི་བྱུང་ཚུལ་བཞི་པ་དང་གཅིག་པས། གང་སྐྱེས་བུ་དམ་པ་ཉིད་དུ་ངེས་པ་དེ་དག་སྙིང་པོ་བྱང་ཆུབ་ལ་དགོངས་པ་མཉམ་བཞག་དང་རྗེས་ཐོབ་མེད་པར་གྱུར་པ་དེའི་ཚེ་དེའི་དུས་ཉིད་ལ་བྱའོ།།

གཉིས་པ་རྒྱས་པར་བཤད་པ་ནི།

སྨྲས་པ། ཞེས་པ་ནས། རྫོགས་པར་འགྲེལ་ཏོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ་གང་སྐྱེས་བུ་དམ་པ་ཉིད་དུ་ངེས་པ་དེ་དག སྙིང་པོ་བྱང་ཆུབ་ལ་ཇི་ལྟར་དགོངས། དེ་གང་གི་ཚིག་བླ་དྭགས་ལགས། སྨྲས་པ། ལངྐའི་བདག་པོ་སྙིང་པོ་ནི་རྩ་བ་ལ་བྱའོ། །བྱང་ཆུབ་ནི་རང་བཞིན་ལ་བྱའོ། །དགོངས་པ་ནི་ཆོས་ཉིད་ལ་བྱའོ། །ངེས་པ་ནི་མ་ནོར་བ་ལ་བྱའོ། །འགྲེལ་པ་ནི་ཡེ་ཤེས་ལ་བྱའོ། །དེ་ནི་ཇི་བཞིན་པ་དང་། དེ་བཞིན་པའི་ཚིག་བླ་དྭགས་སོ། །གསོལ་པ། གསང་བ་པའི་བདག་པོ་དེས་དེ་ཇི་ལྟར་འགྲེལ་པ་ལགས། སྨྲས་པ། ལངྐའི་བདག་པོ་མ་འདྲེས་པ་དང་། ཡོངས་སུ་རྫོགས་པར་འགྲེལ་ཏོ།།

དེ་ལྟ་ནའང་ངོ་བོ་ནི་སོ་སོར་མ་འདྲེས་པའི་ཕྱིར། ལང་ཀའི་བདག་པོས་སྨྲས་པ། གསང་བ་པའི་བདག་པོ། གང་སྐྱེས་བུ་དམ་པ་ཐ་མའི་དབུགས་ཕྱིན་ཏེ་དམ་པ་ཉིད་དུ་ངེས་པ་དེ་དག་སྙིང་པོ་བྱང་ཆུབ་ལ་ཇི་ལྟར་དགོངས། སྙིང་པོ་བྱང་ཆུབ་ལ་དགོངས་པ་ངེས་པར་འགྲེལ་ཞེས་པའི་ངོ་བོ་དེ་ཉིད་གང་གི་ཚིག་བླ་དྭགས་ལགས། ཞེས་མཚན་ཅི་ལས་བཏགས་པ་དྲིས་པ་དང༌། ལན་སྨྲས་པ། ལང་ཀའི་བདག་པོ། སྙིང་པོ་ནི་དངོས་པོ་གཉིས་ཀྱི་གཞིར་གྱུར་པས་རྩ་བ་ལ་བྱའོ། །བྱང་ཆུབ་ནི་གཉིས་མེད་ཇི་བཞིན་པས་རང་བཞིན་ལ་བྱའོ། །དགོངས་པ་ནི་རང་གི་རིག་པའི་ངོ་བོ་ངང་གིས་མ་གཡོས་པས་ཆོས་ཉིད་ལ་བྱའོ། །དེ་གསུམ་ནི་ཞི་གནས་སུ་འདུའོ། །ངེས་པ་ནི་འཁྲུལ་པ་མེད་པའི་ཐོག་ཏུ་ཕེབས་པས་མ་ནོར་བ་ཉིད་ལ་བྱའོ། །དེ་ནི་ཞི་གནས་༼༢༢༦༽དང་ལྷག་མཐོང་དབྱེར་མེད་པའོ། །འགྲེལ་པ་ནི་ཇི་ལྟ་བར་མངོན་དུ་བྱས་པའི་དོན་རང་གསལ་བས་ཡེ་ཤེས་ལ་བྱའོ། །དེ་ནི་ལྷག་མཐོང་ཉིད་དོ། །དེ་དག་གི་ངོ་བོ་ནི་མ་བཅོས་པས་ཇི་བཞིན་པ་དང༌། མ་བསླད་པས་དེ་བཞིན་པའི་དོན་ཏེ་དེ་ཉིད་ངེས་པར་མཚོན་པས་གློ་བུར་གྱི་ཐ་སྙད་ནི་ཚིག་གི་བླ་དྭགས་སོ། །ཡང་གསོལ་པ། གསང་བ་པའི་བདག་པོ། ལྔ་པོ་དེས་དགོངས་པ་དེ་ཇི་ལྟར་འགྲེལ་བ་ལགས། ལན་སྨྲས་པ། ལང་ཀའི་བདག་པོ། དཔེར་ན། རྒྱ་མཚོ་ཆེན་པོའི་གཟུགས་བརྙན་ལྟར་མ་འདྲེས་པ་དང༌། མཚོ་ཆེན་པོ་དེའི་ཀློང་ལྟར་ཡོངས་སུ་རྫོགས་པར་འགྲེལ་ཏོ།།

གསུམ་པ་ཞབས་བསྡུས་ཏེ་དགོངས་པ་ངོས་གཟུང་བ་ནི།

དྲིས་པ། ཞེས་པ་ནས། དགོངས་པའོ། །ཞེས་པའི་བར་གྱིས་བསྟན་ཏེ།

དྲིས་པ། གསང་བ་པའི་བདག་པོ་དེ་ཇི་ལྟ་ཡོངས་སུ་ཤེས་པར་བགྱི། སྨྲས་པ། ལངྐའི་བདག་པོ་ཞི་གནས་དང་ལྷག་མཐོང་དེ་ཉིད་དེ། ཐམས་ཅད་སྐྱེ་བ་བཞིར་འདུས་ཤིང་སྐྱེ་བ་བཞིར་འགྲེལ་པ་ནི་འདི་ལྟ་སྟེ། དེ་བཞིན་གཤེགས་པ་ནི་གང་ཅི་ཡང་རུང་། དགོངས་པ་དང་། གསུང་བ་དང་། མཛད་པ་ཐམས་ཅད་གང་ལ་དགོངས་པ་ཅན་ཏེ། དེ་ནི་འདི་ལྟར་ཆོས་ཐམས་ཅད་ཆོ་འཕྲུལ་བཞིར་འདུས་པར་དགོངས་པའོ།།

སླར་ཡང་དྲིས་པ། གསང་བ་པའི་བདག་པོ། དེ་ཉིད་ཇི་ལྟར་ཡོངས་སུ་ཤེས་པར་བགྱི། ལན་སྨྲས་པ། ལང་ཀའི་བདག་པོ། དེ་ཡི་ངོ་བོ་བསྟན་པ་ནི་གཉིས་ཏེ། མི་གཡོ་བ་ཞི་གནས་དང༌། གསལ་བ་ལྷག་མཐོང་ཉིད་དེ། གཞི་མ་འདྲེས་ཡོངས་རྫོགས་ཀྱི་གནས་ལུགས་དང༌། ལམ་མི་གཡོ་ཞིང་གསལ་བ་དང༌། འབྲས་བུ་རྣམ་པར་མི་རྟོག་ཅིང་དག་གསལ་དུ་མཁྱེན་པའི་ཇི་ལྟ་ཇི་སྙེད་ཀྱི་ཡེ་ཤེས་རྣམས་ལས་འདིར་ལམ་གྱི་དང་མཐར་ཐུག་པ་ཐུན་མོང་དུ་སྦྱར་རོ། །སློབ་དཔོན་བདེ་བ་གསལ་མཛད་ཀྱིས། ཆོ་འཕྲུལ་རྩ་བ་བཞིའི་གཞི་དང༌། ངོ་བོ་སྣང་བ་གཉིས་ལ་སྦྱར་བའང་མི་འཐད་པ་མ་ཡིན་ནོ།།

གང་སྐྱེས་བུ་ལྔའི་དགོངས་པ་ལྟ་བུའི་གཞི་རྩ་ལས་འགྲེལ་བའི་ངོ་བོ་སྣང་བའི་ཕྱིར་སྐྱེ་བ་སྟེ་ཐམས་ཅད་ངོ་བོ་སྐྱེ་བ་བཞིར་ཡོངས་རྫོགས་སུ་འདུས་ཤིང་སྐྱེ་བ་བཞིར་ཤར་བ་མ་འདྲེས་པར་འགྲེལ་པ་ནི། འདི་ལྟ་སྟེ། སྐྱེ་བ་བཞི་མ་འདྲེས་ཡོངས་རྫོགས་ཀྱི་དོན་དུ་འགྲེལ་ཏོ། །འོ་ན་སྐྱེ་བ་བཞི་སངས་རྒྱས་ཀྱི་དགོངས་པ་ཡིན་ནམ་སྙམ་པ་ལ། དེ་བཞིན་གཤེགས་པ་རྣམས་ནི་གདུལ་བྱའི་དོན་མཛད་ཚུལ་གང་ཅི་ཡང་རུང༌། ཐུགས་ལ་དགོངས་པ་དང༌། བསྟན་པ་གསུང་པ་དང༌། སྐུའི་མཛད་པ་ཐམས་ཅད་གང་ལའང་དགོངས་པ་ཅན་ཏེ། དེ་ནི་འདི་ལྟར་འཁོར་འདས་ཀྱི་ཆོས་དངོས་པོ་གཉིས་པ་ཐམས་ཅད་ཆོ་འཕྲུལ་གྱི་སྣང་བ་བཞིར་འདུས་ལ། དེ་ཉིད་སྙིང་པོ་བྱང་ཆུབ་ལ་མ་འདྲེས་ཡོངས་སུ་རྫོགས་པར་གསལ་བ་ལ་དགོངས་པའི་ཕྱིར་དེ་བསྟན་པའོ།།

གཉིས་པ་བྱེ་བྲག་ཏུ་རྒྱས་པར་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཆོ་འཕྲུལ་ལོ། །ཞེས་པའི་བར་༼༢༢༧༽གྱིས་བསྟན་ཏེ།

ལངྐའི་ བདག་པོ། བཞི་གང་ཞེ་ན། འདི་ལྟ་སྟེ། ཆོས་གང་སྐྱེ་བ་མེད་པ ་ལས་སྐྱེ་བའི་ཆོ་འཕྲུལ་འབྱུང་བ་ནི། ལས་ཀྱི་རྫུ་འཕྲུལ་ལས་སྐྱེ་བའི་ཆོ་འཕྲུལ་དང་། བསམ་གཏན་གྱི་རྫུ་འཕྲུལ་ལས་སྐྱེ་བའི་འཕྲུལ་དང་། ཆོས་ཉིད་ཀྱི་རྫུ་འཕྲུལ་ལས་སྐྱེ་བའི་ཆོ་འཕྲུལ་དང་། ཐུགས་རྗེའི་རྫུ་འཕྲུལ་ལས་སྐྱེ་བའི་ཆོ་འཕྲུལ་ལོ།།

ལང་ཀའི་ བདག་པོ། བཞི་གང་ཞེ་ན། འདི་ལྟ་སྟེ། ཆོས་གང་ཡོངས་སུ་རྫོགས་པ་སྐྱེ་བ་མེད་པ ་ལས། སྐྱེ་བའི་ཆོ་འཕྲུལ་མ་འདྲེས་པའི་སྣང་བ་འབྱུང་བ་ནི། སེམས་ཅན་གྱི་ལས་ཀྱི་རྫུ་འཕྲུལ་ལས་འཁྲུལ་པའི་སྣང་བ་སྐྱེ་བའི་ཆོ་འཕྲུལ་དང༌། ལམ་བསམ་གཏན་གྱི་རྫུ་འཕྲུལ་ལས་གདུལ་བྱའི་སྣང་བ་སྐྱེ་བའི་ཆོ་འཕྲུལ་དང༌། གཞི་ཆོས་ཉིད་ཀྱི་རྫུ་འཕྲུལ་ལས་རང་བཞིན་གྱི་སྣང་བ་སྐྱེ་བའི་ཆོ་འཕྲུལ་དང༌། འབྲས་བུ་ཐུགས་རྗེའི་རྫུ་འཕྲུལ་ལས་དེ་བཞིན་གཤེགས་པའི་སྣང་བ་སྐྱེ་བའི་ཆོ་འཕྲུལ་ལོ།།

གཉིས་པ་རྒྱས་པར་བཤད་པ་ལ་བཞི་སྟེ། ལས་ཀྱི་རྫུ་འཕྲུལ་ལས་སྐྱེ་བའི་ཆོ་འཕྲུལ། བསམ་གཏན་གྱི་རྫུ་འཕྲུལ་ལས་སྐྱེ་བའི་ཆོ་འཕྲུལ། ཆོས་ཉིད་ཀྱི་རྫུ་འཕྲུལ་ལས་སྐྱེ་བའི་ཆོ་འཕྲུལ། ཐུགས་རྗེའི་རྫུ་འཕྲུལ་ལས་སྐྱེ་བའི་ཆོ་འཕྲུལ་ལོ། །དང་པོ་ནི།

ལང་ཀའི། ཞེས་པ་ནས། ཐམས་ཅད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ལས་ཀྱི་རྫུ་འཕྲུལ་ལས་སྐྱེ་བའི་ཆོ་འཕྲུལ་ནི་འདི་ལྟ་སྟེ།

གང་སྐྱེ་བ་རྣམ་བཞིར་སྣང་བ་ཐམས་ཅད་དོ།།

ལང་ཀའི་བདག་པོ། དེ་ལ་གང་ལས་གསུམ་གྱི་བྱ་བ་བྱེད་ནུས་པའི་རྫུ་འཕྲུལ་ལས་ནི། ཁམས་གསུམ་གྱི་འགྲོ་བ་ཐ་དད་ཅིར་ཡང་སྣང་བས་དངོས་པོ་གཉིས་མ་འདྲེས་པར་སྲིད་པར་སྐྱེ་བའི་ཆོ་འཕྲུལ་སྣ་ཚོགས་བཀོད་པ་ནི་འདི་ལྟ་སྟེ། དེ་ཉིད་དངོས་སུ་ན་མི་ལ་སོགས་པ་མངལ་ནས་སྐྱེ་བ་དང༌། གྲོག་སྦུར་ལ་སོགས་པ་དྲོད་གཤེར་དང༌། སྦྲུལ་དང་འདབ་ཆགས་ལ་སོགས་པ་སྒོ་ང་དང༌། ལྷ་དང་བར་མ་དོ་དང་དམྱལ་བ་ལ་སོགས་པ་བརྫུས་ནས་སྐྱེ་བ་སྟེ་གང་སྐྱེ་བ་རྣམ་བཞིར་སྣང་བ་ཐམས་ཅད་དེ་བཞིའི་ཆ་འཛིན་པར་སྨོས་པ་ནི་ཐ་མ་འདོད་པའི་ཁམས་ཉིད་དོ།།

གཉིས་པ་བསམ་གཏན་གྱི་རྫུ་འཕྲུལ་ལས་སྐྱེ་བའི་ཆོ་འཕྲུལ་ནི།

ལང་ཀའི། ཞེས་པ་ནས། སྐྱེ་བ་ཐམས་ཅད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། བསམ་གཏན་གྱི་རྫུ་འཕྲུལ་ལས་སྐྱེས་པའི་ཆོ་འཕྲུལ་ནི་གང་ཞེ་ན། འདི་ལྟ་སྟེ།

གང་བསམ་གཏན་མུ་བཞི་ལས་སྐྱེས་པ་ཐམས་ཅད་དོ།།

ལང་ཀའི་བདག་པོ། གང་ཡང་དག་པའི་ཏིང་ངེ་འཛིན་བསམ་གཏན་གྱི་ནུས་པའི་རྩལ་ཅིར་ཡང་འབྱུང་བའི་རྫུ་འཕྲུལ་གྱི་རྒྱུ་ལས་ལམ་སྣང་གི་སྐྱེ་བའི་ཆོ་འཕྲུལ་སྣ་ཚོགས་སུ་བཀོད་པ་ཉིད་གང་ཞེ་ན། འདི་ལྟ་སྟེ། གང་གསལ་ལ་མི་གཡོ་བའི་བསམ་གཏན་གྱི་མུ་བཞི་གཡོ་ཐོབ་གོམས་བརྟན་ལས་དྲོད་དང་རྟགས་དང་ཆོ་འཕྲུལ་དང་མངོན་པར་ཤེས་པ་སྐྱེ་བ་ཐམས་ཅད་དོ། །གཞན་དུ་ན། སྣང་བ་མ་ངེས་པ་བཞི་ནི། བརྟགས་པས་ཤེས་རབ་སྐྱེ་བ་དང༌། །བརྩལ་བས་གོམས་པ་སྐྱེ་བ་དང༌། བསྒྲུབས་པས་འབྲས་བུ་སྐྱེ་བ་དང༌། །བསྒོམས་པས་དྲོད་དང་རྟགས་རྣམས་སྐྱེ་བའོ།།

གསུམ་པ་ཆོས་ཉིད་ཀྱི་རྫུ་འཕྲུལ་ལས་སྐྱེ་བའི་ཆོ་འཕྲུལ་ནི།

ལང་ཀའི། ཞེས་པ་ནས། ཐམས་ཅད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། ཆོས་ཉིད་ཀྱི་རྫུ་འཕྲུལ་ལས་སྐྱེ་བའི་ཆོ་འཕྲུལ་གང་ཞེ་ན། འདི་ལྟ་སྟེ།

གང་རང་བཞིན་གྱི་ཆོ་འཕྲུལ་བཞིར་སྣང་བ་ཐམས་ཅད་དོ།།

ལང་ཀའི་༼༢༢༨༽བདག་པོ། གང་ཆོས་ཉིད་ཇི་བཞིན་པ་ཐམས་ཅད་ཀྱི་བདག་ཉིད་པའི་ཕྱིར་དེ་ཉིད་ཅིར་ཡང་སྣང་དུ་བཏུབ་པའི་གཞིའི་རྫུ་འཕྲུལ་ལས་སྐྱེ་བའི་ཆོ་འཕྲུལ་གང་ཞེ་ན། འདི་ལྟ་སྟེ། གང་གཞི་མ་ངེས་པའི་རང་བཞིན་གྱི་སྣང་བ་ཆོ་འཕྲུལ་བཞིར་ཐ་དད་པར་སྣང་ཞིང་བཀོད་པ་ཐམས་ཅད་དེ། ནམ་མཁའི་ངང་ལས་འབྱུང་བའི་ཆོ་འཕྲུལ་ཐ་དད་སྣང་བ་དང་། སེམས་ཀྱི་ངང་ལས་སེམས་ལས་བྱུང་བའི་ཆོ་འཕྲུལ་སྐྱེ་བ་དང༌། ཆོས་ཉིད་ཀྱི་ངང་ལས་ཆོས་ཅན་གྱི་ཆོ་འཕྲུལ་སྐྱེ་བ་དང༌། ཞི་གནས་ཇི་བཞིན་པའི་ངང་ལས་ལྷག་མཐོང་གི་ཆོ་འཕྲུལ་ཤེས་རབ་རང་འཆར་བ་དང་བཞི་པོ་ཉིད་དོ།།

བཞི་པ་ཐུགས་རྗེའི་རྫུ་འཕྲུལ་ལས་སྐྱེ་བའི་ཆོ་འཕྲུལ་ལ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། སྣང་བ་ཐམས་ཅད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་སྙིང་རྗེའི་རྫུ་འཕྲུལ་ལས་སྐྱེ་བའི་ཆོ་འཕྲུལ་གང་ཞེ་ན། འདི་ལྟ་སྟེ། གང་ཆོ་འཕྲུལ་བཞིར་སྣང་བ་སྟེ། རྫུ་འཕྲུལ་གྱི་ཆོ་འཕྲུལ་དང་། ཆོས་སྣང་བའི་ཆོ་འཕྲུལ་དང་། ཀུན་བརྗོད་པའི་ཆོ་འཕྲུལ་དང་། རྗེས་སུ་བསྟན་པའི་ཆོ་འཕྲུལ་བཞིར་སྣང་བ་ཐམས་ཅད་དོ།།

ལང་ཀའི་བདག་པོ། གང་རང་བྱུང་གི་ཡེ་ཤེས་ཐུགས་རྗེའམ་སྙིང་རྗེ་ཆེན་པོའི་ཐབས་ཀྱི་མཛད་པ་ལྷུན་གྱིས་གྲུབ་པའི་རྫུ་འཕྲུལ་གྱི་གཞི་ལས་སྐྱེ་བའི་ཆོ་འཕྲུལ་གདུལ་བྱ་ལ་གང་གིས་འདུལ་བ་བཞིན་ཅིར་ཡང་སྣང་བ་གང་ཞེ་ན། འདི་ལྟ་སྟེ། གང་རྒྱལ་བ་རྣམས་ཀྱི་གཞན་དོན་གྱི་མཛད་པ་ཆོ་འཕྲུལ་བཞིར་སྣང་བ་སྟེ། ཞི་བ་དང་ཁྲོ་བོའི་རྫུ་འཕྲུལ་གྱི་ཆོ་འཕྲུལ་དང༌། ཡི་གེའི་སྒོ་ཆོས་སྣང་བའི་ཆོ་འཕྲུལ་དང༌། མ་འདྲེས་ཡོངས་རྫོགས་ཀུན་བརྗོད་པའི་ཆོ་འཕྲུལ་དང༌། དགོངས་པ་འགྲེལ་པ་རྗེས་སུ་བསྟན་པའི་ཆོ་འཕྲུལ་དང་བཞིར་སྣང་བ་ཐམས་ཅད་དོ། །དེ་རེ་རེའང་རྟག་པ་རྒྱུན་གྱིས་སྐྱེ་བ་དང༌། རང་བཞིན་ཤུགས་ཀྱིས་སྐྱེ་བ་དང༌། བསྐུལ་ཞིང་གསོལ་བ་བཏབ་པས་སྐྱེ་བ་དང༌། ཡུལ་དང་འཕྲད་པས་སྐྱེ་བ་སྟེ་སྐྱེ་བའི་དུས་དང་ངོ་བོའི་རྒྱུར་སྦྱར་རོ།།

འདི་དག་ཀུན་འདུས་ལེའུ་གསུམ་པ་ལས་གསུངས་པ་འདིར་ལེའུ་རེ་རེས་རྒྱས་པར་སྟོན་པའི་ཕྱིར་བཤད་པའི་རྒྱུད་དུ་ཡང་ཁས་ལེན་ཏེ། དེ་དང་རྗེས་སུ་མཐུན་པར་སྐུ་བཞིའི་བསྟན་པ་གསང་ཆེན་ལུང་གི་སྐབས་དོན་འཆད་པ་དག་ལའང་སྦྱར་ཏེ་སངས་རྒྱས་ཀུན་གྱི་དགོངས་པ་འདུས་པས་ཆོས་ཐམས་ཅད་ཀྱི་མེ་ལོང་དུ་གྱུར་པའི་མདོ་ཆེན་པོའི་གཞུང་དོན་མ་འདྲེས་ཡོངས་སུ་རྫོགས་པའི་གནད་ཟིན་པར་བྱའོ། །བྱིན་རླབས་སྐུ་བཞིའི་བསྟན་པ་རིན་པོ་ཆེ། །ཀུན་གྱི་དགོངས་པ་འདུས་པའི་སྤྱི་མདོ་འདི། །རྣམ་འདྲེན་བཞི་པས་ལུང་བསྟན་བརྒྱུད་པ་ཡི། །བསྟན་པའི་གསང་ལུང་ཆེན་པོར་བདག་གིས་འཚལ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ།།

གཉིས་པ་རྒྱས་པར་བཤད་པ་ལ་བཞི་སྟེ། རྫུ་འཕྲུལ་གྱི་ཆོ་༼༢༢༩༽འཕྲུལ། ཆོས་སྣང་བའི་ཆོ་འཕྲུལ། ཀུན་བརྗོད་པའི་ཆོ་འཕྲུལ། རྗེས་སུ་བསྟན་པའི་ཆོ་འཕྲུལ་ལོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

ལང་ཀའི། ཞེས་པ་ནས། ཆོ་འཕྲུལ་ལོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་རྫུ་འཕྲུལ་གྱི་ཆོ་འཕྲུལ་ནི་འདི་ལྟ་སྟེ། གང་སྣང་བར་མཛད་པའི་ཆོ་འཕྲུལ་དང་།

གང་རྣམ་པར་བསྒྱུར་བའི་ཆོ་འཕྲུལ་ལོ།།

ལེའུ་འདིས་དྲང་དོན་སྟོན་ནོ། །ལང་ཀའི་བདག་པོ། །དེ་ལ་རྫུ་འཕྲུལ་གྱི་ཆོ་འཕྲུལ་ནི། འདི་ལྟ་སྟེ། གང་སྐུ་མ་འགག་པའི་ངང་ལས་ཞི་བ་སྣང་བར་མཛད་པའི་ཆོ་འཕྲུལ་ཅི་བཞིན་པས་འདུལ་བ་དང༌། གཞི་དེ་ལས་གང་དུ་རྣམ་པར་བསྒྱུར་བའི་ཆོ་འཕྲུལ་གདུལ་བྱ་ལ་མི་མཐུན་པར་སྣང་བས་འདུལ་བ་ཁྲོ་བའི་ཚུལ་ལོ།།

གཉིས་པ་རྒྱས་པར་བཤད་པ་ལ་གཉིས་ཏེ། ཞི་བ་དང༌། ཁྲོ་བོའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི་བདག་པོ། ཞེས་པ་ནས། ཆོ་འཕྲུལ་ལོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་སྣང་བར་མཛད་པའི་ཆོ་འཕྲུལ་ནི་འདི་ལྟ་སྟེ། གང་ལ་མཚོན་པས་འདུལ་བ་ལ་དགོངས་པའི་ཆོ་འཕྲུལ་དང་། གང་གིས་མཚོན་པས་འདུལ་བ་ལ་དགོངས་པའི་ཆོ་འཕྲུལ་དང་། གང་གིས་གྱུར་པས་འདུལ་བ་ལ་དགོངས་པའི་ཆོ་འཕྲུལ་དང་། གང་ཐེག་པས་འདུལ་བ་ལ་དགོངས་པའི་ཆོ་འཕྲུལ་དང་།

གང་ལྟར་མཛེས་པས་འདུལ་བ་ལ་དགོངས་པའི་ཆོ་འཕྲུལ་ལོ།།

ལང་ཀའི་བདག་པོ། གང་སྣང་བར་མཛད་པའི་ཆོ་འཕྲུལ་ནི། འདི་ལྟ་སྟེ། དེ་ལ་ལྔར་སྣང་བ་ནི་ལྷ་རྒྱུད་ཀྱི་རྟོག་པ་ཆེན་པོ་ལས། རྟོག་འཇོམས་སྤྱོད་པ་མཐུན་པས་འགྲོ་འདུལ་ཞིང༌། །བརྡའ་ཅན་ཡང་དག་ལེན་པས་དོན་གོ་ལ། །ལྷ་རྒྱུད་བརྗོད་པས་དངོས་གྲུབ་ཀུན་དང་འབྲེལ། །བཀའ་དོན་གཏན་ཚིགས་རིགས་པས་བརྗོད་པར་འོས། །ཞེས་གསུངས་པ་ལྟར། དངོས་པོ་གང་ཡང་རུང་བ་འབྱུང་བ་དག་ནི་བརྡའི་དོན་དུ་འཆད་དེ། གང་ལ་མཚོན་པས་འདུལ་བ་ལ་དགོངས་པའི་ཆོ་འཕྲུལ་ནི་སྐུ་མདོག་སྟེ་གཞིའི་དོན་དང༌། གང་གིས་མཚོན་པས་འདུལ་བ་ལ་དགོངས་པའི་ཆོ་འཕྲུལ་ནི་ཕྱག་དང་ཕྱག་མཚན་ཏེ་ཡན་ལག་མཚོན་པའི་དོན་དང༌། གང་གིར་གྱུར་པས་འདུལ་བ་ལ་དགོངས་པའི་ཆོ་འཕྲུལ་ནི་བཞུགས་ཐབས་ཏེ། གཉིས་ཀྱིས་འདུལ་བས་གདུལ་བྱ་ལ་དགོངས་པ་དང༌། ཐབས་ཚུལ་ཐ་དད་པས་འདུལ་བའི་དོན་དང༌། གང་ཐེག་པས་འདུལ་བ་ལ་དགོངས་པའི་ཆོ་འཕྲུལ་ནི་གདན་ཁྲི་སྟེ་དེ་ཉིད་ཀྱི་ལས་དང་ཡོན་ཏན་གྱིས་འདུལ་བའི་དོན་དང༌། གང་ལྟར་མཛེས་པས་འདུལ་བ་ལ་དགོངས་པའི་ཆོ་འཕྲུལ་ནི་རྒྱན་ཆས་སུ་འཇལ་ཏེ། ཡིད་ཚིམ་ཞིང་དགའ་བར་བྱེད་པས་འདུལ་བ་ལ་དགོངས་པའི་ཕྱིར་ལྔ་པོ་སོ་སོའི་མིང་གི་གཏན་ཚིགས་སུ་ཡང་འགྱུར་བའི་ཚུལ་ལོ།།

གཉིས་པ་རྒྱས་པར་བཤད་པ་ལ་ལྔ་སྟེ། སྐུ་མདོག་གི་དོན། ཕྱག་གི་དོན། བཞུགས་ཐབས་ཀྱི་དོན། གདན་ཁྲིའི་དོན། རྒྱན་ཆས་ཀྱི་དོན་ནོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་༼༢༣༠༽བཤད་པའོ། །དང་པོ་ནི།

ལང་ཀའི། ཞེས་པ་ནས། དགོངས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་གང་ལ་མཚོན་པས་འདུལ་བ་ལ་དགོངས་པའི་ཆོ་འཕྲུལ་ནི་འདི་ལྟ་སྟེ།

མ་བཅོས་པས་འདུལ་བ་ལ་དགོངས་པ་དང་། བསྒྱུར་བས་འདུལ་བ་ལ་དགོངས་པའོ།།

ལང་ཀའི་བདག་པོ། དེ་ལ་གང་ལ་མཚོན་པས་འདུལ་བ་ལ་དགོངས་པའི་ཆོ་འཕྲུལ་ནི། འདི་ལྟ་སྟེ། གང་ཞི་བ་སྤྱིའི་རང་བཞིན་གྱི་སྐུ་མདོག་མ་བཅོས་པས་འདུལ་བ་ལ་དགོངས་པ་དང༌། གདུལ་བྱ་ལ་སྣང་བའི་རིགས་ཐ་དད་ཀྱི་སྐུ་མདོག་གང་ལ་མོས་པ་ལྟར་བསྒྱུར་བས་འདུལ་བ་ལ་དགོངས་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། རང་བཞིན་གྱི་སྐུ་མདོག རིགས་ཀྱི་སྐུ་མདོག་གོ །དང་པོ་ནི།

ལང་ཀའི། ཞེས་པ་ནས། ཉི་མ་ལྟ་བུའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་མ་བཅོས་པའི་འདུལ་བ་དགོངས་པ་ནི། དུང་ལྟ་བུ་དང་། ཀུ་མུ་ད་ལྟ་བུ་དང་།

ཟླ་བ་ལྟ་བུ་དང་། ཉི་མ་ལྟ་བུའོ།།

ལང་ཀའི་བདག་པོ། དེ་ལ་མ་བཅོས་པས་འདུལ་བ་ལ་དགོངས་པ་བཞི་ནི་ལྷ་གཅིག་ལའང་ལྡན་ཏེ། ཉོན་མོངས་པ་མེད་པའི་རྟགས་སུ་ཡེ་ནས་རང་བཞིན་གྱིས་དག་ཅིང་དྲི་མ་མེད་པས་དུང་ལྟ་བུ་དང༌། གཟི་མདངས་དང་ལྡན་པའི་རྟགས་སུ་སྣུམ་ལ་འབྲེལ་བ་ཀུ་མུ་ཏ་ལྟ་བུ་དང༌། ཀུན་ལ་སྣང་བའི་རྟགས་སུ་དྭངས་ཤིང་རྙོགས་པ་མེད་པ་ཟླ་བ་ལྟ་བུ་དང༌། རང་བཞིན་གྱིས་འོད་གསལ་བའི་རྟགས་སུ་ཤིན་ཏུ་གསལ་ཞིང་འཚེར་བ་ཉི་མ་ལྟ་བུའོ། །བཞི་པོ་དེས་ཡེ་ནས་ལྷ་ཀུན་གྱི་སྐུ་མདོག་ལ་ཁྱབ་པའི་ཕྱིར་མ་བཅོས་པས་འདུལ་བ་ཞེས་པའི་མིང་འགྲུབ་བོ།།

གཉིས་པ་རིགས་ཀྱི་སྐུ་མདོག་ནི།

ལང་ཀའི། ཞེས་པ་ནས། ལྟ་བུའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་བསྒྱུར་བས་འདུལ་བ་ལ་དགོངས་པ་ནི་འདི་ལྟ་སྟེ། བཻཌཱུརྱ་ལྟ་བུ་དང་། ཀང་ཀ་རི་ལྟ་བུ་དང་།

ལེ་བརྒན་ལྟ་བུ་དང་། གསེར་སྦྱངས་པ་ལྟ་བུ་དང་། སྣ་ཚོགས་ལྟ་བུའོ།།

ལང་ཀའི་བདག་པོ། རིགས་གང་ལ་མོས་པ་ལྟར་སྣང་བས་སོ་སོར་བསྒྱུར་བས་འདུལ་བ་ལ་དགོངས་པ་ནི། འདི་ལྟ་སྟེ། རྡོ་རྗེའི་རིགས་བཻཌཱུརྱ་ལྟ་བུ་རྐྱེན་གྱིས་མི་འགྱུར་བས་མཐིང་ག་དང༌། དེ་བཞིན་གཤེགས་པའི་རིགས་ཀང་ཀ་རི་ལྟ་བུ་དྲི་མས་མ་བསླད་པས་དཀར་པོ་དང༌། པདྨའི་རིགས་ལེ་བརྒན་ལྟ་བུ་ཆགས་པ་མེད་པས་དམར་བ་དང༌། རིན་པོ་ཆེའི་རིགས་གསེར་སྦྱངས་པ་ལྟ་བུ་ཡེ་ཤེས་རྒྱས་པས་སེར་པོ་དང༌། ལས་ཀྱི་རིགས་སྣ་ཚོགས་པ་ལྟ་བུ་ཕྲིན་ལས་ཅིར་ཡང་མཛད་པས་ལྗང་གུའོ། །དེའང་རིགས་ལྔ་དང་ཡེ་ཤེས་ལྔ་དང་ཁ་དོག་ལྔ་དང་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལ་སྦྱར་བའི་ཚུལ་ནི་རྒྱུད་ཀུན་ན་གསལ་ལ། དེ་ལྟར་སྐུ་མདོག་ལ་རང་བཞིན་བཞི་དང་རིགས་ལྔ་སྟེ་ཡན་ལག་དགུ་བཤད་པའོ།།

གཉིས་པ་ཕྱག་གི་དོན་ལ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། འགྱུར་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་གི་མཚོན་པས་འདུལ་བ་ལ་དགོངས་པའི་ཆོ་འཕྲུལ་ནི་འདི་ལྟ་སྟེ།

གང་བྱུང་བ་དང་། གང་སྣང་བ་དང་། གང་ལྟར་འགྱུར་བའོ།།

ལང་ཀའི་བདག་པོ། གང་གིས་མཚོན་པས་འདུལ་བ་ལ་དགོངས་པའི་ཆོ་འཕྲུལ་ནི། འདི་༼༢༣༡༽ལྟ་སྟེ། གང་བྱུང་བ་ཕྱག་དང༌། གང་སྣང་བ་ཕྱག་མཚན་དང༌། གང་ལྟར་འགྱུར་བ་ཕྱག་རྒྱ་སྟེ་རང་རང་གི་ངོ་བོས་མིང་ཡང་འགྲུབ་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཕྱག་གི་དོན། ཕྱག་མཚན་གྱི་དོན། ཕྱག་རྒྱའི་དོན་བཤད་པའོ། །དང་པོ་ནི།

ལང་ཀའི། ཞེས་པ་ནས། དྲུག་ལ་དགོངས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་གང་བྱུང་བ་ནི། གཉིས་སམ་དྲུག་དགོངས་པའོ།།

ལང་ཀའི་བདག་པོ། དེ་ལ་གང་བྱུང་བ་ནི། ཞལ་ཕྱག་གི་དོན་ཏེ། ཞི་བ་ལྷ་རྒྱུད་ཆེན་པོ་ལས། ཞལ་ཕྱག་འདུལ་བར་དགོངས་པ་ལ། །ཆོས་སྐུ་སྤྲོས་པ་མེད་པའི་ཕྱིར། །ཞལ་ནི་གཅིག་ཏུ་བསྟན་པ་ཡིན། །དབྱིངས་དང་ཡེ་ཤེས་འབྲེལ་བའི་ཕྱིར། །ཕྱག་ནི་གཉིས་སུ་བསྟན་པ་ཡིན། །ཐབས་དང་ཤེས་རབ་མཉམ་པས་ན། །ཞབས་ཀྱང་རྡོ་རྗེའི་སྐྱིལ་ཀྲུང་བཞུགས། །ཞེས་གསུངས་པ་ལྟར། དབྱིངས་དང་ཡེ་ཤེས་སམ། ཐབས་དང་ཤེས་རབ་གཉིས་མཚོན་པས་ཕྱག་གི་གྲངས་གཉིས་སམ། ཡང་དེ་ཉིད་ལས། བཀྲི་དྲང་འབྲས་བུ་རྣམ་ཐར་གསུམ། །ངེས་དོན་འབྲས་བུ་སྐུ་གསུམ་སྣང༌། །དེ་ཕྱིར་ཞལ་ཡང་གསུམ་དུ་བསྟན། །ངེས་པར་ཆོས་ཉིད་ཞལ་ལས་འདས། །ཕ་རོལ་ཕྱིན་དྲུག་སྣང་བ་ཡང༌། །སྦྱིན་པ་བཏང་ཞིང་ཚུལ་ཁྲིམས་སྲུངས། །བརྩོན་འགྲུས་བརྩམས་ཤིང་བསམ་གཏན་བསྒོམས། །བཟོད་པ་བསྒོམས་ནས་ཤེས་རབ་རྟོགས། །རྒྱུ་ཡི་ལམ་ནས་བགྲོད་འདུལ་བ། །རྡོ་རྗེའི་ཕྱག་ཀྱང་དྲུག་ཏུ་བྱུང༌། །ཞེས་གསུངས་པ་ལྟར། ཕ་རོལ་དུ་ཕྱིན་པ་དྲུག་གམ། ཡེ་ཤེས་དྲུག་མཚོན་པ་ལ་དགོངས་ཏེ་ཕྱག་གི་གྲངས་ཀྱང་དྲུག་ཏུ་བྱུང་བ་ལ་དགོངས་པའོ།།

གཉིས་པ་ཕྱག་མཚན་གྱི་དོན་ནི།

དེ་བཞིན་དུ། ཞེས་པ་ནས། དགོངས་པའོ། །ཞེས་པའི་བར་གྱིས་བསྟན་ཏེ།

དེ་བཞིན་དུ་གང་སྣང་བ་ཡང་དེ་ལ་དགོངས་པའོ།།

དེ་བཞིན་དུ་གང་སྣང་བ་ཕྱག་མཚན་ཡང༌། སྔ་མ་ལས། སྟོང་པ་ཉིད་ཀྱི་ཡེ་ཤེས་དང༌། །ཆོས་དབྱིངས་མེ་ལོང་ལྟ་བུ་དང༌། །སོ་སོར་རྟོག་དང་མཉམ་པ་ཉིད། །བྱ་བ་གྲུབ་པར་མཐར་ཕྱིན་ཏེ། །འབྲས་བུའི་སྒོ་ནས་མཐར་ཕྱིན་པས། །རྡོ་རྗེའི་ཕྱག་མཚན་དྲུག་པོ་རྣམས། །ཞེས་གསུངས་པ་ལྟར་ཡེ་ཤེས་དྲུག་གི་དོན་མཚོན་པ་དེ་ལ་དགོངས་པས་ཕྱག་དང་རྗེས་སུ་མཐུན་ཏེ་ཡེ་ཤེས་དྲུག་གི་རོལ་པས་འགྲོ་བ་སྒྲོལ་བའི་ཕྱིར་རྡོ་རྗེ་ལ་སོགས་པ་དྲུག་བསྣམས་པའོ། །འོ་ན་ཡེ་ཤེས་དྲུག་གི་དོན་མཚོན་པ་ལ་འདྲ་བས་ཕྱག་དང་ཕྱག་མཚན་ལ་ཁྱད་པར་ཅི་ཡོད་ཅེ་ན། རྒྱལ་བ་ཡེ་ཤེས་ཀྱི་སྐུ་ཅན་ལ། ཕྱག་ལྷན་སྐྱེས་སུ་ཡོད་ཅིང་ཕྱག་མཚན་དེའི་བྱིན་རླབས་གཞན་ལ་སྣང་ནས་དོན་བྱེད་པའི་ཆ་ནས་དབྱེ་བའོ།།

༼༢༣༢༽གསུམ་པ་ཕྱག་རྒྱའི་དོན་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། དག་གོ །ཞེས་པའི་བར་གྱིས་བསྟན་ཏེ།

ལངྐའ་བདག་པོ་གང་ལྟར་འགྱུར་བ་ནི་འདི་ལྟ་སྟེ། མ་བཅོས་པ་དང་།

མི་འདའ་བ་དང་། མ་ངེས་པ་དང་། འབྲེལ་བ་དག་གོ།

ལང་ཀའི་བདག་པོ། གང་ལྟར་འགྱུར་བ་ནི། འདི་ལྟ་སྟེ། མ་བཅོས་པ་ནི་སྐུ་ཕྱག་རྒྱ་ཆེན་པོ་སྟེ་གཞི་ཇི་བཞིན་པ་ལས་མ་གཡོས་པར་བཞུགས་པའི་ཕྱིར་དང༌། མི་འདའ་བ་ནི། དམ་ཚིག་གི་ཕྱག་རྒྱ་སྟེ། གང་དོན་ལས་མི་འདའ་བའི་ཕྱིར་དང༌། མ་ངེས་པ་ནི་ཆོས་ཀྱི་ཕྱག་རྒྱ་སྟེ། འདུལ་དབང་གིས་ཐ་དད་དུ་སྟོན་པའི་ཕྱིར་དང༌། འབྲེལ་བ་ནི་ལས་ཀྱི་ཕྱག་རྒྱ་སྟེ་བྱ་བ་གང་འབྲེལ་བ་ཡོད་པའི་ཕྱིར་ཕྱག་རྒྱ་བཞི་པོ་དག་གོ།

གཉིས་པ་རྒྱས་པར་བཤད་པ་ལ་བཞི་སྟེ། སྐུ་ཕྱག་རྒྱ་ཆེན་པོ། དམ་ཚིག་གི་ཕྱག་རྒྱ། ཆོས་ཀྱི་ཕྱག་རྒྱ། ལས་ཀྱི་ཕྱག་རྒྱའོ། །དང་པོ་ནི།

ལང་ཀའི། ཞེས་པ་ནས། བརྟགས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མ་བཅོས་པ་ནི་འདི་ལྟ་སྟེ། །མ་སྐྱེས་པ་དང་། མ་འགགས་པའོ། །དེ་ལ་མ་འགགས་པ་གང་ཞེ་ན། འདི་ལྟ་སྟེ། ཡུལ་དང་། མཚོན་པ་དང་། མཚན་མ་དང་། ཉེ་བར་བརྟགས་པའོ།།

ལང་ཀའི་བདག་པོ། གང་མ་བཅོས་པ་ཕྱག་རྒྱ་ཆེན་པོ་ནི་འདི་ལྟ་སྟེ། རྒྱུ་རྐྱེན་དང་བྲལ་བས་མ་སྐྱེས་པ་ཆོས་ཀྱི་སྐུ་ཕྱག་རྒྱ་ཆེན་པོ་དང༌། དེའི་ཚུལ་གདུལ་བྱ་ལ་མ་འགགས་པར་སྣང་བ་གཟུགས་ཀྱི་སྐུ་ཕྱག་རྒྱ་ཆེན་པོའི་རྣམ་པ་སྟེ། རང་གི་མཚན་ཉིད་ཀྱིས་མིང་ཡང་གྲུབ་པའོ། །དེ་ལ་མ་འགགས་པ་གང་ཞེ་ན། འདི་ལྟ་སྟེ། ཞེས་གཟུགས་སྐུ་ལ་ཕྱེ་བ་བཞི་སྟེ། རང་བཞིན་གཟུགས་ཀྱི་སྐུ་འོག་མིན་ན་བཞུགས་པ་མཚོན་བྱའི་ཡུལ་མ་འགགས་པ་འབྲས་བུ་མཐར་ཕྱིན་པའི་ཡེ་ཤེས་ཉིད་དེ། ཡོན་ཏན་རྫོགས་པའི་གཞིར་གྱུར་པའི་ཕྱིར་དང༌། དེ་ཉིད་ཀྱི་སྐུ་གསུང་ཐུགས་ཀྱི་གཟུགས་བརྙན་ལྡེར་སོ་ལ་སོགས་པ་མཚོན་པ་མ་འགགས་པའི་རྣམ་པ་ཉིད་དེ། དེ་རྨོངས་པ་ལ་བསྟན་པའི་དོན་དུ་བྱས་པའི་ཕྱིར་དང༌། རིང་བསྲེལ་གྱི་སྐུ་ལ་སོགས་པ་མཚན་མ་མ་འགགས་པའི་གཟུགས་བརྙན་གྱི་བཀོད་པ་རྣམས་ཏེ། གྲུབ་པའི་རྟགས་སུ་གྱུར་པའི་ཕྱིར་དང༌། ཡི་དམ་གྱི་ལྷ་སྒོམ་པའི་ཏིང་ངེ་འཛིན་ལས་ཉེ་བར་བརྟགས་པ་མ་འགགས་པ་ཕྱག་རྒྱའི་སྐུར་གསལ་བ་ཉིད་དེ། རང་གིས་བསམ་པས་བྱས་པའི་ཕྱིར་དེ་ལྟར་ཕྱག་རྒྱ་ཆེན་པོའི་རྣམ་པ་བཞིའོ།།

གཉིས་པ་དམ་ཚིག་གི་ཕྱག་རྒྱ་ནི།

ལང་ཀའི། ཞེས་པ་ནས། མི་བསྐྱོད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མི་འདའ་བ་ནི་འདི་ལྟ་སྟེ། ཟིན་པ་དང་། མཛད་པ་དང་། མི་བསྐྱོད་པའོ།།

ལང་ཀའི་བདག་པོ། གང་དོན་ལས་མི་འདའ་བ་ནི་འདི་ལྟ་སྟེ། ཞེས་དམ་ཚིག་གི་ཕྱག་རྒྱའི་རྣམ་གྲངས་སྟོན་ཏེ། རང་རྟགས་ཀྱིས་ཟིན་པ་འཛིན་པ་དམ་ཚིག་གི་ཕྱག་རྒྱ་ཐུགས་ཀྱི་རྟགས་རྡོ་རྗེ་རྩེ་ལྔ་ལ་སོགས་པ་བསྣམས་པ་དང༌། ཐུགས་རྗེ་ལས་མི་འདའ་༼༢༣༣༽བར་འགྲོ་དོན་མཛད་པའི་རྟགས་བཅའ་བ་དམ་ཚིག་གི་ཕྱག་རྒྱ་ཕྱག་གིས་བྱེད་པ་དང༌། དགོངས་པ་རྩེ་གཅིག་ལས་མི་བསྐྱོད་པ་བསམ་པ་དམ་ཚིག་གི་ཕྱག་རྒྱ་གང་བསམ་པ་ལས་གཞན་དུ་མི་འགྱུར་བའི་ཕྱིར་སོ་སོའི་མིང་ཡང་འགྲུབ་པའོ།།

གསུམ་པ་ཆོས་ཀྱི་ཕྱག་རྒྱ་ནི།

ལང་ཀའི། ཞེས་པ་ནས། སྣང་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མ་ངེས་པ་གང་ཞེ་ན། འདི་ལྟ་སྟེ། འདུལ་བའི་དབང་གི་ཕྱིར་མཐའ་ཡས་ཐ་དད་པར་སྣང་བའོ།།

ལང་ཀའི་བདག་པོ། མ་ངེས་པ་གང་ཞེ་ན། འདི་ལྟ་སྟེ། གསུང་ཆོས་ཀྱི་ཕྱག་རྒྱ་འགྲོ་བ་འདུལ་བའི་དབང་གི་ཕྱིར་གདུལ་བྱའི་བསམ་པ་མཐའ་ཡས་བསམ་གྱིས་མི་ཁྱབ་པ་དང་མཐུན་པའི་སྒོ་ཆོས་ཀྱི་ཕྱག་རྒྱ་ཡི་གེ་ཐ་དད་པ་བསམ་གྱིས་མི་ཁྱབ་པར་སྣང་ཞིང་སྟོན་པའི་ཕྱིར་ཏེ། དེ་ལའང་རང་བཞིན་དང༌། བསམ་པ་དང༌། བཟླས་པའི་འཕྲོ་འདུ་གསུམ་ལས་འདིར་ཐ་མའི་དབང་དུ་བྱས་པའོ།།

བཞི་པ་ལས་ཀྱི་ཕྱག་རྒྱ་ནི།

ལང་ཀའི། ཞེས་པ་ནས། དགོངས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འབྲེལ་བ་གང་ཞེ་ན་འདི་ལྟ་སྟེ། དམ་པར་འབྲེལ་བར་དགོངས་པ་དང་།

ལས་སུ་འབྲེལ་བར་དགོངས་པའོ།།

ལང་ཀའི་ བདག་པོ། འབྲེལ་བ་གང་ཞེ་ན། འདི་ལྟ་སྟེ། ཆོས་ཐམས་ཅད་ཟག་པ་མེད་པ ་ཆོས་ཀྱི་དབྱིངས་སུ་འབྲེལ་བས་དགའ་བ་ཁྱད་པར་ཅན་དུ་གྱུར་པ་ལས་ཀྱི་ཕྱག་རྒྱ་སྟེ། དེའང་དམ་པར་འབྲེལ་བར་དགོངས་པ་བཅའ་བ་ལས་དང་དམ་ཚིག་ཐུན་མོང་དུ་བསྟན་པ་དང༌། ཡབ་ཀྱི་ཕྱག་གཡོན་ཡུམ་དམ་ཚིག་མ་ལ་བརྟན་པའི་ཚུལ་དང་ཡང་སྦྱོར་བར་བྱ་ལ། ལས་སུ་འབྲེལ་བར་དགོངས་པ་ཆོས་དང་ལས་འབྲེལ་བ་ཉིད་དུ་བསྟན་པའི་ཕྱིར་བདེ་བ་སྐྱེད་པར་བྱེད་པའི་ཐབས་ཁྱད་པར་ཅན་ཏེ་ཐབས་དང་ཤེས་རབ་ཕྱག་རྒྱ་བཞིས་རོལ་པའི་ཕྲིན་ལས་ཆོས་ཀྱི་ཕྱག་རྒྱ་དང༌། ཡུམ་གྱི་ཕྱག་གཡས་ཡབ་ལ་ལས་སུ་འཁྲིལ་བའི་ཚུལ་དང་ཡང་སྦྱར་བར་བྱའོ། །དེ་ལྟར་གཉིས་པ་ལ་ཉིང་ལག་བཅུ་བཞིར་བསྟན་པའོ།།

གསུམ་པ་བཞུགས་ཐབས་ཀྱི་དོན་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་གིས་གྱུར་པས་འདུལ་བར་དགོངས་པའི་ཆོ་འཕྲུལ་གང་ཞེ་ན་འདི་ལྟ་སྟེ།

ཐབས་དང་། གནས་དང་། ཚུལ་ཉིད་དོ།།

ལང་ཀའི་བདག་པོ། གང་གིར་གྱུར་པས་འདུལ་བ་ལ་དགོངས་པའི་ཆོ་འཕྲུལ་ནི། གང་ཞེ་ན། འདི་ལྟ་སྟེ། བཞུགས་ཐབས་དང༌། བཞུགས་གནས་གཞལ་ཡས་ཁང་དང༌། བཞུགས་ཚུལ་ཉིད་དོ།།

གཉིས་པ་རྒྱས་པར་བཤད་པ་ལ་གསུམ་སྟེ། བཞུགས་ཐབས། བཞུགས་པའི་གནས། སྐུའི་ཚུལ་བཤད་པའོ། །དང་པོ་ནི།

ལང་ཀའི། ཞེས་པ་ནས། དགོངས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཐབས་གང་ཞེ་ན། འདི་ལྟ་སྟེ། རང་བཞིན་ལ་དགོངས་པ་དང་། ཁྱད་པར་ལ་དགོངས་པའོ།།

ལང་ཀའི་བདག་པོ། ཐབས་གང་ཞེ་ན། འདི་ལྟ་སྟེ། གྲལ་དང་སྐུའི་ཐབས་གཉིས་ལས་ཕྱི་མ་སྟེ། འགྲེལ་ཆེན་མུན་པའི་གོ་ཆ་ལས། འདིར་སྐུའི་ཐབས་དགོངས་པ་༼༢༣༤༽མི་གཡོ་བ་གཞི་དང་མཐུན་པའི་ཕྱིར་འགྲེང་བུ་དང༌། ཁྱད་པར་གང་དག་པར་སྣང་བས་སྐྱིལ་ཀྲུང་དང༌། ཕྱེད་སྐྱིལ་དང༌། འབབ་ཚུལ་ལ་སོགས་པའོ། །ཞེས་གསུངས་ལ། ཆོས་རྗེ་དམ་པ་རིན་པོ་ཆེའི་ཕྱག་མཆན་སོགས་ལས། རང་བཞིན་མཉམ་པ་ཉིད་ལ་དགོངས་པ་གཙོ་བོ་རྫོགས་པའི་སྐྱིལ་མོ་ཀྲུང་དང༌། གཙོ་འཁོར་གྱི་ཁྱད་པར་ལ་དགོངས་པ་འཁོར་ཕྱེད་སྐྱིལ་ལ་སོགས་པའོ། །ཞེས་གསུངས་པས། ལྷ་རྒྱུད་ལས།

བཞུགས་ཐབས་འདུལ་བར་དགོངས་པ་ལ། །སངས་རྒྱས་རྣམས་ནི་ཡབ་ཡིན་པས། །རྡོ་རྗེའི་སྐྱིལ་མོ་ཀྲུང་དུ་བཞུགས། །རིག་མ་གཟུངས་མ་ཡུམ་རྣམས་ནི། །པདྨའི་སྐྱིལ་མོ་ཀྲུང་དུ་བཞུགས། །བྱང་ཆུབ་སེམས་དཔའ་ཡབ་ཡུམ་རྣམས། །སེམས་དཔའི་སྐྱིལ་མོ་ཀྲུང་དུ་བཞུགས། །ཐུབ་པ་འགྲོ་བའི་དོན་མཛད་པས། །བཞེངས་ནས་གདུལ་བྱར་མཐུན་པར་བཞུགས། །སྒོ་བ་གདུག་པ་འདུལ་བས་ན། །ཡབ་ཡུམ་བརྐྱངས་བསྐུམ་དོར་ཐབས་བཞུགས། །ཞེས་པ་ལྟར་རོ།།

གཉིས་པ་བཞུགས་པའི་གནས་ནི།

ལང་ཀའི། ཞེས་པ་ནས། གྱུར་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གནས་གང་ཞེ་ན། འདི་ལྟ་སྟེ། ཕྱི་དང་ནང་མེད་ཀུན་ཏུའང་ནང་དུ་གྱུར་པའོ།།

ལང་ཀའི་ བདག་པོ། གནས་གང་ཞེ་ན། འདི་ལྟ་སྟེ། གཟུང་རྟོག་མེད་པས་ཕྱི་དང་འཛིན་པ ་བྲལ་བས་ནང་མེད་པར་ཡེ་ཤེས་ཡུལ་དང་ཡུལ་ཅན་ལས་གྲོལ་བས་ཀུན་ཏུའང་ནང་དུ་གྱུར་པ་སྟེ། ཇི་སྐད་དུ། དེ་བཞིན་ཉིད་དུ་ཀུན་ཆུབ་ཕྱིར། །ཕྱིར་དང་ནང་དང་དབྱེ་བ་མེད། །རིག་པའི་ཡེ་ཤེས་བརྡལ་བའི་ཕྱིར། །ཀུན་ཏུ་ནང་དུ་གྱུར་པ་ཡིན། །ཞེས་སོ། །གདུལ་བྱ་ལ་སྣང་བའི་གནས་ཀྱང་སྒྲ་བཞིན་ཏེ། ལྷ་རྒྱུད་ལས། གདོས་པ་ཅན་ལས་རབ་གྲོལ་བས། །ཕྱི་ནང་མེད་པར་གསལ་བ་ནི། །ཤེལ་གྱི་ཕོར་པར་བཅུད་བཞག་འདྲ། །ཁྱད་པར་ཞིང་ཁམས་ལྔར་ཡང་སྣང༌། །ཞེས་པ་ལྟ་བུའོ།།

གསུམ་པ་སྐུའི་ཚུལ་བཤད་པ་ནི།

ལང་ཀའི། ཞེས་པ་ནས། ཚུལ་ལོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཚུལ་གང་ཞེ་ན། འདི་ལྟ་སྟེ། བཞུགས་པའི་ཚུལ་དང་། བཞེངས་པའི་ཚུལ་དང་། གཤེགས་པའི་ཚུལ་དང་། གཟིགས་པའི་ཚུལ་དང་། མཉེན་པའི་ཚུལ་དང་། ལྕུག་པའི་ཚུལ་དང་། འཁྲིལ་བའི་ཚུལ་དང་། ལྡེམ་པའི་ཚུལ་དང་། གཞོན་ནུའི་ཚུལ་དང་། གསལ་བའི་ཚུལ་དང་། འཚེར་བའི་ཚུལ་དང་། ལྷུན་སྟུག་པའི་ཚུལ་དང་། གཟི་བྱིན་འབར་བའི་ཚུལ་དང་། འཁྱུག་པའི་ཚུལ་དང་། དགོངས་པའི་ཚུལ་དང་། བརྟན་པའི་ཚུལ་དང་། རྟེན་པའི་ཚུལ་དང་། འབྱོ་བའི་ཚུལ་དང་། མདུད་པའི་ཚུལ་དང་། ཅམ་མེ་བའི་ཚུལ་དང་། མ་ལེ་བའི་ཚུལ་དང་། ལྷན་ནེ་བའི་ཚུལ་དང་། ས་ལེ་བའི་ཚུལ་ལོ།།

ལང་ཀའི་བདག་པོ། བཞུགས་ཚུལ་གང་ཞེ་ན། འདི་ལྟ་སྟེ། སོ་སོའི་གཏན་ཚིགས་ཀྱིས། རིགས་ལྔ་ཆོས་སྐུའི་ངང་ལ་བཞུགས་པའི་ཕྱིར་བླ་ཕབ་ནས་མི་གཡོ་བར་བཞུགས་པའི་ཚུལ་དང༌། སེམས་དཔའ་ཡབ་ཡུམ་དེ་ལྟར་བཞུགས་པའི་ཚུལ་ལམ། ཡང་ན་སྐུ་བཏེགས་ཏེ་སྨོན་ལམ་དང་ཐུགས་རྗེའི་གཟུགས་སྐུར་བཞེངས་པའི་ཚུལ་དང༌། འདི་ཉིད་འགྲེལ་ཆེན་གྱི་གོང་གི་བཞུགས་ཐབས་ལྟར་ན་རིགས་ལྔར་ཡང་རུང་ངོ་། །ཐུབ་པ་དང་སྒོ་བ་ཡབ་ཡུམ་བཞུད་ལ་མ་རག་པ་ཐུགས་རྗེའི་དབང་གིས་འགྲོ་དོན་ལ་གཤེགས་པའི་ཚུལ་དང༌། རྣམ་པ་ཐམས་ཅད་མཁྱེན་པའི་ཕྱིར་སྤྱན་༼༢༣༥༽འགྱུར་བས་གཟིགས་པའི་ཚུལ་དང༌། སྐུའི་ཚུལ་དགུ་དང་ལྡན་ཏེ། ཞེ་སྡང་དག་པས་སྐུ་ལ་19གྱོང་བ་དང་བྲལ་བ་ལྟ་བུ་མཉེན་པའི་ཚུལ་དང༌། ང་རྒྱལ་དག་པས་སྐུ་ཅིར་ཡང་དྲང་དུ་རུང་བ་ལྟ་བུའམ་ཕྱག་ཞབས་ཀྱི་སོར་མོ་སོགས་ལྕུག་པའི་ཚུལ་དང༌། འདོད་ཆགས་དག་པས་ཐབས་དང་ཤེས་རབ་འབྲེལ་བའི་ཕྱིར་ཡབ་ཡུམ་འཁྲིལ་བའི་ཚུལ་དང༌། ཕྲག་དོག་དག་པས་རྐེད་སྐབས་ཕྱེད་པར་ཕྲ་བ་ལྟ་བུ་ལྡེམ་པའི་ཚུལ་དང༌། གཏི་མུག་དག་པས་སྐུ་ཤ་རྒྱས་ལ་འཇམ་པ་ལྟ་བུ་གཞོན་ནུའི་ཚུལ་དང༌། ཐུགས་ལ་མ་རིག་པ་མེད་པས་གཟི་མདངས་ལྡན་པ་གསལ་བའི་ཚུལ་དང༌། ཡེ་ཤེས་ཤིན་ཏུ་གསལ་བས་རིགས་ལྔ་དང་ཐབས་ཤེས་སོགས་སྐུ་མདོག་སོ་སོ་ན་འཚེར་བའི་ཚུལ་དང༌། དགོངས་པ་མི་གཡོ་བས་བརྗིད་དང་ལྡན་པ་ལྷུན་སྡུག་པའི་ཚུལ་དང༌། ལྷུན་གྱིས་རྫོགས་པའི་ཡོན་ཏན་མངའ་ཞིང་གཞན་ཟིལ་གྱིས་གནོན་པས་ཤིན་ཏུ་བྱིན་ཆེ་བ་གཟི་བྱིན་འབར་བའི་ཚུལ་དང༌། དགུ་པོ་ཡབ་ལ་བཞི་དང་ཡུམ་ལ་ལྔར་ཡང་གསུངས་ཏེ། ལྷ་རྒྱུད་ལས།

ཞི་བའི་མཛད་པས་འདུལ་དོན་དུ། །ཡབ་ཀྱི་སྐུ་ཡི་ཚུལ་བཞི་ནི། །གསལ་འཚེར་ལྷུན་སྡུག་གཟི་བྱིན་ལྡན། །ཡུམ་གྱི་ཚུལ་ལྔ་ལྡན་པས་ན། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །ཞེས་སོ། །ཤེས་རབ་ཆེན་པོ་མངའ་བས་ཕྱག་ཞབས་གང་དུའང་ཐོགས་པ་མེད་པ་ལྟ་བུའམ་སྨིན་མ་འཁྱུགས་པའི་ཚུལ་དང༌། ཐུགས་མཉམ་པའི་ངང་ལས་མི་གཡོ་བས་གཙོ་བོ་དང་སེམས་དཔའ་སྤྱན་ཕྱེ་ཙམ་དུ་ཤངས་རྩེར་དབབ་སྟེ་བཞུགས་པ་དགོངས་པའི་ཚུལ་དང༌། ཆོས་སྐུའི་དགོངས་པ་མཐའ་ཡིས་མི་གཡོ་བས་སྐུ་མི་འགྱུར་བར་བརྟན་པའི་ཚུལ་དང༌། བྱང་སེམས་ལ་རྟེན་པས་ཕན་ཚུན་རྒྱབ་ཡོལ་དང་གདན་ལ་རྟེན་པའི་ཚུལ་དང༌། ཐབས་དང་ཤེས་རབ་འབྲེལ་བའི་ཕྱིར་ཡབ་ཡུམ་གྱི་དབུ་གཡས་གཡོན་དུ་འཕྱོ་བའམ། ཡབ་ཀྱི་དབུ་འབྱོ་བའི་ཚུལ་དང༌། མོས་ཤིང་གདུང་བའི་ཕྱིར་གཅིག་ལ་གཅིག་དབུ་བཏུད་པ་ལྟ་བུའམ་ཡུམ་གྱི་དབུ་འདུད་པའི་ཚུལ་དང༌། ལོངས་སྤྱོད་དང་ལྡན་པའི་ཕྱིར་ཡབ་ཡུམ་དང་མངའ་ཐང་རྐྱེན་ལོངས་སྤྱོད་ཐམས་ཅད་རྫོགས་པ་ལྟ་བུ་ཙམ་མེ་བའི་ཚུལ་དང༌། ཉོན་མོངས་པ་དག་པས་ཐུགས་ཞི་བ་མ་ལེ་བའི་ཚུལ་དང༌། ཡེངས་པ་མེད་པས་དགོངས་པ་ལས་མི་གཡོ་བས་ལྷན་ནེ་བའི་ཚུལ་དང༌། སྒྲིབ་པ་མེད་པར་ཐམས་ཅད་མཁྱེན་པས་མ་འགགས་པར་གསལ་བའི་མངོན་ཤེས་མངའ་བ་ས་ལེ་བའི་ཚུལ་ལོ། །དེ་ལྟར་རྩ་གསུམ་དང་༼༢༣༦༽ཐབས་ཀྱི་གཉིས་དང་གནས་ཀྱི་གཅིག་སྟེ་གསུམ་པའི་ཉིང་ལག་རྩ་དྲུག་བཤད་པའོ།།

བཞི་པ་གདན་ཁྲིའི་དོན་ནི།

ལང་ཀའི། ཞེས་པ་ནས། སྤྱོམ་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་ཐེག་པས་འདུལ་བ་ལ་དགོངས་པའི་ཆོ་འཕྲུལ་ནི་འདི་ལྟ་སྟེ། ཆོས་ཀྱི་འཁོར་ལོ་བསྐོར་བ་དང་། སའི་ཁྱད་པར་བགྲོད་པ་དང་། ཡོན་ཏན་གྱི་ཆེ་བ་སྤྱོམ་པའོ།།

ལང་ཀའི་བདག་པོ། གང་ཐེག་པས་འདུལ་བ་ལ་དགོངས་པའི་ཆོ་འཕྲུལ་ནི་འདི་ལྟ་སྟེ། ཞེས་གདན་ཁྲིའི་དོན་ཏེ། ཆོས་ཀྱི་འཁོར་ལོ་བསྐོར་བའི་ཕྱིར་འོག་གཞི་འཁོར་ལོ་རྩིབས་བཞི་དང་ལྡན་པ་སྟེ། ལྷ་རྒྱུད་ལས། གདན་ཁྲིས་འདུལ་བར་དགོངས་པ་ལ། །ཆོས་ཀྱི་འཁོར་ལོ་བསྐོར་བའི་གདན། །འོག་གཞི་འཁོར་ལོ་རྩིབས་བཞི་འབར། །ཞེས་གསུངས་པ་ལྟར་དང༌། སའི་ཁྱད་པར་བཞིན་བགྲོད་ཟིན་པའི་ཕྱིར་ཐེམ་སྐས་དང་ཉི་ཟླ་པདྨའི་གདན་ཏེ། སྔ་མ་ལས།

དགོས་འདོད་རེ་བ་སྐོང་བས་ན། །ཡིད་བཞིན་རིན་ཆེན་ཁྲི་རྐང་བརྩེགས། །ཞེས་དང༌། ས་ཡི་ཁྱད་པར་བགྲོད་པས་ན། །ཉི་མ་ཟླ་བ་པདྨའི་གདན། །འབྲས་བུའི་ས་གསུམ་གནོན་པའོ། །ཞེས་གསུངས་པ་ལྟར་དང༌། ཡོན་ཏན་ཐམས་ཅད་ཀྱི་ཆེ་བ་དུས་གཅིག་ལ་རྫོགས་ཏེ་སྤྱོམ་པའི་ཕྱིར་སེམས་ཅན་གྱི་གདན་དུ་སྣང་བ་སྟེ། དེ་ཉིད་ལས།

ཡོན་ཏན་ཆེ་བས་སྤྱོམ་པས་ན། །སྟོབས་བཅུ་ཚང་བ་གླང་པོའི་གདན། །མི་འཇིགས་བཞིས་བཅོམ་སེང་གེ་ཉིད། །རྫུ་འཕྲུལ་རྐང་བཞི་རྟ་ཡི་གདན། །དབང་བཅུ་མཚོན་པས་རྨ་བྱ་ལ། །ཕྲིན་ལས་ཐོགས་མེད་ནམ་མཁའ་ལྡིང༌། །ཞེས་གསུངས་པ་ལྟར་གདན་ཁྲི་རྣམས་སྣང་བའོ།།

ལྔ་པ་རྒྱན་ཆས་ཀྱི་དོན་ལ་བཞི་སྟེ། བྱང་ཆུབ་ཀྱི་ཡན་ལག་གི་རྒྱན་ཆ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱན་ཆ། མཚན་དང་དཔེ་བྱད་ཀྱི་རྒྱན་ཆ། ལམ་གྱི་ཡན་ལག་བཀྲ་ཤིས་རྫས་བརྒྱད་ཀྱི་རྒྱན་ཆའོ། །དང་པོ་ནི།

ལང་ཀའི། ཞེས་པ་ནས། བཀོད་པར་དགོངས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་ལྟར་མཛེས་པས་འདུལ་བ་དགོངས་པའི་ཆོ་འཕྲུལ་ནི་འདི་ལྟ་སྟེ། ཆོས་རྣམ་པར་འབྱེད་པ་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་དང་། དྲན་པ་དང་། བཏང་སྙོམས་དང་།

བརྩོན་འགྲུས་ཀྱིས་མཛེས་པའི་ཕྱིར། རྒྱན་ཆེན་པོས་རྣམ་པར་བཀོད་པར་དགོངས་པའོ།།

ལང་ཀའི་བདག་པོ། གང་ལྟར་མཛེས་པས་འདུལ་བ་ལ་དགོངས་པའི་ཆོ་འཕྲུལ་ནི། འདི་ལྟ་སྟེ། ཞེས་རྒྱན་ཆས་ཀྱི་དོན་ཏེ། ཐུན་མོང་མ་ཡིན་པའི་བྱང་ཆུབ་ཀྱི་ཡན་ལག་བདུན་རྫོགས་པའི་རྟགས་སུ། ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག་དང་ཆོས་མཐུན་པའི་དབུ་རྒྱན་ལྔ་པོ་མ་འདྲེས་པའི་རྒྱན་དང༌། དེ་བཞིན་དུ་ཆོས་ཉན་པ་ལ་དགའ་བ་སྙན་ཆ་དང༌། བསམ་པ་ཤིན་ཏུ་སྦྱངས་པ་དོ་ཤལ་དང༌། ཟག་མེད་ཀྱིས་སྟེ་ཏིང་ངེ་འཛིན་མགུར་ཆུ་དང༌། དེ་ཉིད་མི་བརྗེད་པའི་དྲན་པ་ཕྲེང་བ་དང༌། འདིར་སེ་མོ་དོ་ནི་དོ་ཤལ་ལ་བཏགས་པའི་རིན་པོ་ཆེའི་རྒྱན་ཡིན་པས་དེ་མེད་ཀྱང་དོ་ཤལ་མི་མཛེས་པར་མི་འགྲོ་བས་བཏང་སྙོམས་སུ་འཇུག་པ་ལྟར། ༼༢༣༧༽གང་ཡང་དང་དུ་མི་ལེན་པའི་བཏང་སྙོམས་སེ་མོ་དོ་དང༌། བར་མི་ཆད་པའི་བརྩོན་འགྲུས་ཕྱག་ཞབས་ཀྱི་གདུ་བུ་སྟེ་དེ་རྣམས་ཀྱིས་མཛེས་པས་སོ་སོའི་རྒྱན་གྱི་ལས་དང༌། དབྱིབས་ཀྱི་དོན་དང་ཆོས་མཐུན་ཞིང་མཚོན་དུ་བཏུབ་པའི་ཕྱིར། ཐུགས་ཡེ་ཤེས་རང་སྣང་བའི་རྒྱན་ཆེན་པོས་རྣམ་པར་བཀོད་པར་དགོངས་པའོ།།

གཉིས་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱན་ཆ་ནི།

ལང་ཀའི། ཞེས་པ་ནས། བརྗིད་པར་དགོངས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་སྐུ་དང་། གསུང་དང་། ཐུགས་དང་། ཡོན་ཏན་དང་། འཕྲིན་ལས་ཀྱིས་བསྒྱིངས་པའི་ཕྱིར། ཆ་ལུགས་ཆེན་པོས་བརྗིད་པར་དགོངས་པའོ།།

ལང་ཀའི་བདག་པོ། གཞན་ཡང་སྐུ་གསལ་ལ་བརྗིད་པ་ཆོས་གོས་དང༌། གསུང་ཐུགས་རྗེ་ཆགས་པས་སྨད་དཀྲིས་སམ་ཤམ་ཐབས་དང༌། ཐུགས་ཤེས་བྱ་གསལ་བས་ཅོད་པན་ནམ་ཟི་ལྡིར་དང༌། ཡོན་ཏན་གཟི་འབར་གྱི་སྟོད་གཡོགས་དང༌། ཕྲིན་ལས་གར་གྱི་གསང་གོས་སྐུ་རེག་དང་ཕུ་དུང་རྣམས་ཀྱིས་བསྒྱིངས་པའི་ཕྱིར་ཆ་ལུགས་ཆེན་པོས་བརྗིད་པར་དགོངས་པའོ། །འོ་ན་དེར་ངེས་པ་ཅིའི་ཕྱིར་ཞེ་ན། གདུལ་བྱ་ཕྱོགས་གཅིག་གི་དབང་ལས་མཐའ་གྲོལ་བས་ཐེར་ཟུག་པ་ནི་མ་ཡིན་ཏེ། ལྷ་རྒྱུད་ལས། ཆ་ལུགས་ཆེན་པོས་བརྗིད་པས་ན། །སྐུ་ཡི་སྟོད་གཡོགས་རབ་མཛེས་ཤིང༌། །གསུང་གི་སྨད་དཀྲིས་ལྷུབ་དང་ལྡན། །ཐུགས་ཀྱི་ཟེའུ་ལྡིར་རྣམ་པར་བགོས། །ཡོན་ཏན་ཆོས་གོས་བསྣམས་ནས་ནི། །མཛད་པ་ལས་ཀྱི་ཕུ་དུང་ལྡན། །ཞེས་སོགས་མང་དུ་བཞུགས་ཀྱང༌། འདིར་སྐུ་གཞིར་གྱུར་པའི་ཕྱིར་དང༌། གསུང་མཛེས་པའི་ཕྱིར་དང༌། ཐུགས་ཤིན་ཏུ་བརྗིད་པའི་ཕྱིར་དང༌། ཡོན་ཏན་མངོན་པར་མཐོ་བའི་ཕྱིར་དང༌། ཕྲིན་ལས་བྱ་བ་དང་བཅས་པའི་ཕྱིར་རོ།།

གསུམ་པ་མཚན་དང་དཔེ་བྱད་ཀྱི་རྒྱན་ཆ་ནི།

ལང་ཀའི། ཞེས་པ་ནས། བརྒྱན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་མཚན་གྱི་མེ་ཏོག་གིས་མཛེས་ཤིང་དཔེ་བྱད་ཀྱི་འབྲས་བུས་སྤྲས་པའི་ཕྱིར།

སྲས་ཀྱི་ཚོགས་ཀྱིས་ཀུན་ནས་བརྒྱན་པའོ།།

ལང་ཀའི་བདག་པོ། གཞན་ཡང༌། སེམས་དཔའ་ཡབ་ཡུམ་བཅུ་ཚན་གསུམ་དང་གཉིས་ཏེ་ཐུན་མོང་མ་ཡིན་པའི་མཚན་གྱི་མེ་ཏོག་གིས་རྒྱས་པར་མཛེས་ཤིང༌། སེམས་དཔའ་རེ་རེ་ལའང་དབུ་རྒྱན་རིགས་ལྔ་ལྔ་སྟེ་བཅུ་དྲུག་པ་ལྔ་ཡིས་དཔེ་བྱད་ཀྱི་ཟེའུ་འབྲུས་སྤྲས་པའི་ཕྱིར་སྲས་ཀྱི་ཚོགས་ཀྱིས་ཀུན་ནས་བརྒྱན་པའོ། །སེམས་མ་ནི་གྲངས་ལས་འདས་པའི་དོན་ཏེ་མ་བརྗོད་དོ།།

བཞི་པ་ལམ་གྱི་ཡན་ལག་བཀྲ་ཤིས་རྫས་བརྒྱད་ཀྱི་རྒྱན་ཆ་ནི།

ལང་ཀའི། ཞེས་པ་ནས། འབར་བར་དགོངས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་ཏིང་ངེ་འཛིན་དང་། རྩོལ་བ་དང་། ངག་དང་། རྟོག་པ་དང་། ལས་ཀྱི་མཐའ་དང་། ལྟ་བ་དང་། འཚོ་བ་དང་། དྲན་པས་འཁྱིལ་བའི་ཕྱིར། བཀྲ་ཤིས་འཁྱིལ་བས་འབར་བར་དགོངས་པའོ།།

ལང་ཀའི་བདག་པོ། གཞན་ཡང་ཐུན་མོང་མ་ཡིན་པའི་འཕགས་པའི་ལམ་ཡན་ལག་བརྒྱད་རྫོགས་པའི་ཕྱིར། ཡང་དག་པའི་ཏིང་ངེ་འཛིན་ལ་གོམས་པ་ཐུགས་ཀའི་དཔལ་བེའུ་སྟེ་རྒྱུའི་ཐེག་པས་བྲང་རུས་ལ་ཡོད་པར་འདོད་ཀྱང་འདི་བས་ཐུགས་ལ་རྡོ་རྗེ་དང་གཉིས་ཀ་ཡོད་༼༢༣༨༽པར་བཞེད་པ་དང༌། བསླབ་པའི་མཐའ་བཅུའི་དོན་ལ་རྩོལ་བ་མཐར་ཕྱིན་པས་ཕྱག་ཞབས་ཀྱི་འཁོར་ལོ་དང༌། བདེན་པ་དང་ཆོས་དང་བཟླས་པའི་གསུང་གི་ཡང་དག་པའི་ངག་མངའ་བས་ལྗགས་ཀྱི་པདྨ་དང༌། དམ་པ་རྣམས་ཀྱི་དེ་ཁོ་ན་ཉིད་ལ་རྟོག་ཅིང་དཔྱོད་པས་སྐུའི་རྒྱལ་མཚན་བརྗིད་པ་དང༌། སྒོ་གསུམ་གྱི་སྤྱོད་པ་ལས་ཀྱི་མཐའ་ལས་ངེས་པར་འབྱུང་ཞིང་ཉི་མས་ཚད་པ་སེལ་བ་ལྟར་ཉོན་མོངས་ཀྱིས་གདུང་བ་བསིལ་བས་དབུ་སྐྲ་གདུགས་དང༌། མ་ནོར་བའི་ལྟ་བ་རྟོགས་པས་མགུར་གྱི་བུམ་པ་ཟླུམ་པ་དང༌། དམ་པའི་ཡོ་བྱད་ལྔས་ཡུན་རིང་དུ་འཚོ་བ་ཕྱག་ཞབས་བཞི་ཉ་དང༌། དམ་པའི་ཆོས་སྒྲ་དྲན་ཞིང་འཆང་བས་སྙན་གཉིས་དུང་ངམ་མགྲིན་པའམ་སྤྱི་གཙུག་གཡས་སུ་འཁྱིལ་བ་རྣམས་དང་ལྡན་པའི་ཕྱིར། ལྷ་རྒྱུད་ལས། འཕགས་ལམ་ཡན་ལག་བརྒྱད་ལྡན་པས། །བཀྲ་ཤིས་རྟགས་བརྒྱད་ལུས་ལ་རྫོགས། །ཞེས་པ་ལྟར་ལས་དང་དབྱིབས་ཀྱི་ཆོས་མཐུན་སྦྱར་ཏེ་བཀྲ་ཤིས་འཁྱིལ་བས་འབར་བར་དགོངས་པའོ། །དེ་ལྟར་བཞི་པའི་གསུམ་དང་ལྔ་པའི་རྒྱན་ཉི་ཤུ་སྟེ་ཉིང་ལག་རྩ་གསུམ་དུ་ཕྱེ་བས་བཤད་པའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། མཐོང་བར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི། གང་སྣང་བར་མཛད་པའི་ཆོ་འཕྲུལ་ཞེས་བྱ་སྟེ། དེ་དག་ནི་དེ་ཁོ་ན་ཉིད་དུ་སོ་སོ་མ་འདྲེས་པར་གཅིག་ཏུ་ཡོངས་སུ་འགྲེལ་ཏོ། །གསང་བ་པའི་བདག་པོས་དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས། ཆོས་ཐམས་ཅད་ཆོ་འཕྲུལ་གྱི་རྣམ་པར་སྣང་བ་ཙམ་དུ་མཐོང་བར་གྱུར་ཏོ།།

ལང་ཀའི་བདག་པོ། སྤྱིར་ཉིང་ལག་བདུན་ཅུ་རྩ་གཉིས་ཀྱིས་ཞི་བའི་རྟོག་པ་བཤད་པ་དེ་དག་ནི། དངོས་པོ་གང་གདུལ་བྱ་ལ་སྣང་ན་དེ་དག་སྣང་བས་ཞི་བའི་སྐུ་ཡིས་གདུལ་བའི་དོན་སྣང་བར་མཛད་པའི་ཆོ་འཕྲུལ་ཞེས་བྱ་སྟེ། དེ་དག་གི་དེ་ཁོ་ན་ཉིད་སྙིང་པོ་བྱང་ཆུབ་ཀྱི་ངང་དུ་མཚན་ཉིད་མ་འདྲེས་ལ་ཡོངས་སུ་རྫོགས་པའི་ཕྱིར། སྐུ་གཅིག་ལའང་སྣང་སྟེ། གཅིག་དང་དུ་མ་ལས་གྲོལ་བར་བསྟན་པས་སྣང་ཆ་སོ་སོར་མ་འདྲེས་པར་དབྱིངས་གཅིག་ཏུ་ཡོངས་སུ་འགྲེལ་ཏོ། །ཚུལ་དེ་ནི་ཁྲོ་བོ་ལའང་རྗེས་སུ་མཐུན་ནོ། །གསང་བ་པའི་བདག་པོས་དེ་སྐད་ཅེས་སྨྲས་པས། ལང་ཀའི་བདག་པོ་ལ་སོགས་པ། དམན་པའི་ལུས་ཀྱི་སེམས་དཔའ་ཆེན་པོ་རྣམས། ཆོས་ཐམས་ཅད་ཐུགས་རྗེའི་ཆོ་འཕྲུལ་གྱི་རྣམ་པར་སྣང་བ་ཙམ་དུ་མཐོང་ནས་གཅིག་དང་དུ་མའི་མཐའ་ལས་གྲོལ་བར་གྱུར་ཏོ།།

གཉིས་པ་ཁྲོ་བོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས། ཞེས་པ་ནས། བརྩོན་པར་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས་སྨྲས་པ། ཀྱེ་ལངྐའི་བདག་པོ་གང་དུ་རྣམ་པར་བསྒྱུར་བའི་ཆོ་འཕྲུལ་ནི་འདི་ལྟ་སྟེ། རྣམ་པར་རྟོག་པའི་རི་བོ་བཅུའོ། །བཅུ་གང་ཞེ་ན། འདི་ལྟ་སྟེ། སྦྱོར་བའི་རྟོག་པ་དང་། ཞེན་པའི་རྟོག་པ་དང་། དངོས་གཞིའི་རྟོག་པ་དང་། བསྐྱེད་པའི་རྟོག་པ་དང་། རྐྱེན་གྱི་རྟོག་པ་དང་། ལས་ཀྱི་རྟོག་པ་དང་། མཚན་མའི་རྟོག་པ་དང་། མངོན་པའི་རྟོག་པ་དང་། སྤྱོད་པའི་རྟོག་པ་དང་། རྟགས་ཀྱི་རྟོག་པའོ། །ལངྐའི་བདག་པོ་རྩ་བའི་རྟོག་པ་འདི་བཅུ་ལས། རྟོག་པའི་རི་བོ་དགུ་བཅུའམ། བརྒྱད་ཅུ་རྩ་གཅིག་གིས། རྣལ་འབྱོར་གྱི་ལམ་དམ་པ་རྣམ་པར་བཅད་པས་བགྲོད་པར་དཀའ་བའི་ཕྱིར་ཡོངས་སུ་སྦྱང་བར་བྱ་བ་ལ་བརྩོན་པར་བྱའོ།།

དེ་ནས་ཡང་གསང་བ་པའི་བདག་པོས་སྨྲས་པ། ཀྱེ་ལང་ཀའི་བདག་པོ། གང་དུ་དེ་ཉིད་ཀྱིས་མི་འདུལ་པའི་གདུལ་༼༢༣༩༽བྱའི་ངོ་ལ་སྣང་བའི་ཕྲིན་ལས་སྔ་མ་ཞི་བ་ལས་ཕྱི་མ་ཁྲོ་བོའི་རྣམ་པར་བསྒྱུར་བའི་ཆོ་འཕྲུལ་ནི། འདི་ལྟ་སྟེ། ལམ་པའི་དབང་དུ་འཛིན་པ་གཞིལ་དཀའ་ལ་20ཚན་ཆེ་ཞིང་འཐུག་པའི་ཕྱིར་རྣམ་པར་རྟོག་པའི་རི་བོ་བཅུའོ།།

བཅུ་གང་ཞེ་ན། འདི་ལྟ་སྟེ། ཡང་དག་པའི་ས་ལ་སྦྱོར་བའི་ཕྱིར་སྦྱོར་བའི་རྟོག་པ་དང༌། ངོ་བོ་མི་ཕྱེད་པའི་ཕྱིར་ཞེན་པའི་རྟོག་པ་དང༌། ཕྱི་མོའི་ངོ་བོ་ཐ་མི་དད་པར་ངེས་པར་ཟིན་པའི་ཕྱིར་དངོས་གཞིའི་རྟོག་པ་དང༌། སྐུ་ཕྱག་རྒྱར་སྣང་བའི་ཕྱིར་སྐྱེད་པའི་རྟོག་པ་དང༌། བར་དུ་གཅོད་པ་བདུད་འཇོམས་པའི་ཕྱིར་རྐྱེན་གྱི་རྟོག་པ་དང༌། གང་རྐྱེན་དུ་འཚམས་པས་འདུལ་བའི་ཕྱིར་ལས་ཀྱི་རྟོག་པ་དང༌། ཡོན་ཏན་མཚོན་པར་འབྱུང་བའི་ཕྱིར་མཚན་མའི་རྟོག་པ་དང༌། གདུལ་བྱ་ལ་མངོན་པར་སྣང་བའི་ཕྱིར་མངོན་པའི་རྟོག་པ་དང༌། མཛད་པ་མི་འགོག་པར་མཛད་པའི་ཕྱིར་སྤྱོད་པའི་རྟོག་པ་དང༌། ནང་གི་དོན་ཕྱི་རུ་སྣང་བའི་ཕྱིར་རྟགས་ཀྱི་རྟོག་པ་སྟེ་གཏན་ཚིགས་རྣམས་ཀྱིས་ཕྱོགས་ཙམ་དུ་བསྟན་པའོ། །ལང་ཀའི་བདག་པོ། རྩ་བའི་རྟོག་པ་འདི་བཅུ་ལས། རེ་རེ་ལའང་འོག་གི་མིང་གི་རྟོག་པ་སོགས་དགུ་དགུར་ཕྱེ་བས་རྟོག་པའི་རི་བོ་དགུ་བཅུའམ། གསུམ་པ་ཡན་ཆད་ལ་གསུམ་གསུམ། བཞི་པ་ལ་བཅོ་ལྔ། ལྔ་པ་ལ་བཞི། དྲུག་པ་ལ་དྲུག བདུན་པ་ལ་གསུམ། བརྒྱད་པ་ལ་བཅུ་དྲུག དགུ་པ་ལ་ཉི་ཤུ། བཅུ་པ་ལ་བདུན་ཏེ་བརྟགས་པའི་རྟོག་པ་གཅིག་དང་ཉིང་ལག་བརྒྱད་ཅུ་རྩ་གཅིག་གིས་འགྱུར་བས་གྲངས་ཕྲག་གཉིས་པོ་ལ་ངེས་པར་འཛིན་པ་ནི། ལམ་ལྔ་ལ་གནས་པའི་རྣལ་འབྱོར་རྣམས་ཀྱི་གཉིས་པ་མན་ཆད་ལ་སྒྲིབ་སྟེ་ཤིན་ཏུ་ཆ་ཕྲ་བའི་རིམ་པས་ལམ་གོང་མའི་རྟོགས་པ་དམ་པ་རྣམ་པར་བཅད་པས་མཐར་ལམ་ལ་བགྲོད་པར་དཀའ་བའི་ཕྱིར། དེ་ངོ་ཤེས་ནས་བསལ་བའི་ཆེད་དུ་བསྟན་པས་ཡོངས་སུ་སྦྱང་བར་བྱ་བ་ལ་བརྩོན་པར་བྱའོ། །ཞེས་གདམས་པའང་མཛད་དོ།།

གཉིས་པ་རྒྱས་པར་བཤད་པ་ལ་གཉིས་ཏེ། རྟོག་པའི་རི་བོ་དགུ་བཅུ་ངོས་གཟུང་བ། བརྒྱད་ཅུ་ཤིན་ཏུ་རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། བཅུ་དགུ་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དགུ་གང་ཞེ་ན། འདི་ལྟ་སྟེ། མིང་གི་རྟོག་པ་དང་། མཚན་མའི་རྟོག་པ་དང་། བརྡའི་རྟོག་པ་དང་། ཐ་སྙད་ཀྱི་རྟོག་པ་དང་། ཡོད་པའི་རྟོག་པ་དང་། མེད་པའི་རྟོག་པ་དང་། ཐེ་ཚོམ་གྱི་རྟོག་པ་དང་། ངེས་པར་གཞོག་པའི་རྟོག་པ་དང་། དཔྱོད་པའི་རྟོག་པ་སྟེ། འདི་དག་ནི་རྣམ་པ་བཅུར་འགྱུར་བའི་གྱུར་པས་རི་བོ་བཅུ་དགུ་པའོ།།

ལང་ཀའི་བདག་པོ། དེ་ལ་གྲངས་དང་པོའི་དབང་དུ་དགུ་གང་ཞེ་ན། འདི་ལྟ་སྟེ། གོང་གི་སྦྱོར་བ་ལ་སོགས་པ་བཅུ་པོ་རེ་རེར་ཡང་སྦྱོར་བའི་མིང་གི་རྟོག་པ་དང༌། དེ་བཞིན་དུ་མཚན་མའི་རྟོག་པ་དང༌། བརྡའི་རྟོག་པ་དང༌། ཐ་སྙད་ཀྱི་རྟོག་པ་དང༌། ཡོད་པའི་རྟོག་པ་དང༌། མེད་༼༢༤༠༽པའི་རྟོག་པ་དང༌། ཐེ་ཚོམ་གྱི་རྟོག་པ་དང༌། ངེས་པར་འཇོག་པའི་རྟོག་པ་དང༌། དཔྱོད་པའི་རྟོག་པ་སྟེ་དགུ་ཡི་ངོ་བོ་ནི་སྦྱོར་བ་ལྟ་བུའི་མིང་ལ་སོགས་པའི་མཚན་མ་བསྡུས་པ་དགུ་ཡུལ་དུ་བྱེད་པའི་ཞེན་རྟོག་ངེས་པར་འཛིན་པ་དགུའོ། །དེས་ན་དགུ་པོ་འདི་དག་ནི་སྔ་མའི་རྣམ་པ་བཅུ་རེ་རེའང་དགུ་རེར་འགྱུར་བའི་ངེས་འཛིན་གྱི་རྟོག་པར་གྱུར་པས་རྟོག་པའི་རི་བོ་བཅུ་ཕྲག་དགུ་སྟེ་དགུ་བཅུ་ཐམ་པར་གྲངས་ངེས་པའོ།།

གཉིས་པ་བརྒྱད་ཅུ་ཤིན་ཏུ་རྒྱས་པར་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། གཅིག་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་བཅུ་བརྒྱད་དང་། གཅིག་གང་ཞེ་ན། འདི་ལྟ་སྟེ། གསུམ་གསུམ་དུ་གསུམ། ལྔ་གསུམ་དུ་བཞི། བཞི་གཅིག་དུ་ལྔ། དྲུག་གཅིག་ཏུ་དྲུག །གསུམ་གཅིག་ཏུ་བདུན། ལྔ་གཉིས་དང་དྲུག་གཅིག་ཏུ་བརྒྱད། བཅུ་གཉིས་གཅིག་ཏུ་དགུ། བདུན་གཅིག་ཏུ་བཅུ་སྟེ། དེ་ལྟར་སྤྱིར་བཅུ་བརྒྱད་དེ། བརྟགས་པའི་རྟོག་པ་ནི་གཅིག་པའོ།།

ལང་ཀའི་བདག་པོ། དེ་ལ་བཅུ་ཕྲག་བརྒྱད་པ་དང༌། གཅིག་གི་གྲངས་སུ་ངེས་པ་གང་ཞེ་ན། འདི་ལྟ་སྟེ། བཤད་པ་ལྟར། རྟོག་པ་གསུམ་ཕྲག་དང་པོ་ལ་གསུམ་རེ་ཉིད་དུ་བརྩིས་པ་སྤྱི་གྲངས་གསུམ་སྟེ། སྦྱོར་ཞེན་དངོས་གཞི་ཡན་ལག་དགུ་དང་བཅས་པ། རྩ་བའི་དབང་དུ་བྱས་པའི་ཡན་ལག་མཚོན་པ་དང༌། བསྐྱེད་པའི་རྟོག་པ་ལྔ་གསུམ་བཅོ་ལྔ་ལ་གཅིག་ཏུ་བརྩིས་པས་སྤྱི་གྲངས་བཞི་པ་སྟེ། ཡན་ལག་ཉི་ཤུ་རྩ་བཞིའོ། །རྐྱེན་གྱི་རྟོག་པ་བཞི་གཅིག་ཏུ་བརྩིས་པས་སྤྱི་གྲངས་ལྔ་པ་སྟེ་ཡན་ལག་ཉི་ཤུ་རྩ་བརྒྱད་དེ། ལས་ཀྱི་རྟོག་པ་དྲུག་གཅིག་ཏུ་བསྡོམ་པ་དང་སྤྱི་གྲངས་དྲུག་པ་སྟེ་ཡན་ལག་སུམ་ཅུ་རྩ་བཞིའོ། །མཚན་མའི་རྟོག་པ་གསུམ་གཅིག་ཏུ་བྱས་པས་བདུན་པ་སྟེ་ཡན་ལག་སུམ་ཅུ་རྩ་བདུན་ནོ། །མངོན་པའི་རྟོག་པ་ལྔ་གཉིས་དང་དྲུག་སྟེ་བཅུ་དྲུག་གཅིག་ཏུ་བསྡོམ་པས་སྤྱི་གྲངས་བརྒྱད་པ་སྟེ་ཡན་ལག་ལྔ་བཅུ་རྩ་གསུམ་མོ། །སྤྱོད་པའི་རྟོག་པ་བཅུ་ཕྲག་གཉིས་ཏེ་ཉི་ཤུ་གཅིག་ཏུ་བརྩིས་པ་དང་སྤྱི་གྲངས་དགུ་སྟེ་ཡན་ལག་བདུན་ཅུ་རྩ་གསུམ་མོ། །རྟགས་ཀྱི་རྟོག་པ་བདུན་གཅིག་ཏུ་བསྡོམ་པས་སྤྱི་གྲངས་རྩ་བ་བཅུ་པ་སྟེ་ཡན་ལག་བརྒྱད་ཅུ་ཐམ་པར་ངེས་པས་དེ་ལྟར་ན་སྤྱིར་བཅུ་ཕྲག་བརྒྱད་དོ། །དེ་རིལ་ལ་ཡང་བརྟགས་པའི་རྟོག་པ་ངེས་པར་ཞེན་པ་ཡོད་པས་དེ་ནི་གཅིག་ཏུ་བགྲངས་པས་བརྒྱད་ཅུ་རྩ་གཅིག་ཏུ་གྲངས་ངེས་པའོ། །འོ་ན་གྲངས་གཉིས་བསྟན་པ་ཅི་དགོས་ཞེ་ན། རྟོག་པ་རྩ་བ་ལས་ཕྱེ་བ་དང༌། ཡན་ལག་ལས་ཕྱེ་བ་ངོ་ཤེས་པར་བྱ་བའི་ཕྱིར་བཀོད་དེ། སྤྱིར་བསྡོམ་པས་བརྒྱ་དང་བདུན་ཅུ་རྩ་གཅིག་གོ།

ཆོས་རྗེ་དམ་པ་རིན་པོ་ཆེས། རྟོག་པའི་རི་བོ་བརྒྱད་ཅུ་རྩ་གཅིག་དང༌། དགུ་བཅུར་བཤད་པ་དེ། དོན་བསྡུས་ལས་ལམ་གྱི་གོལ་ས་དང་ངོ་བོ་གཉིས་ཀར་བཤད་པས་མཚོན་ཚུལ་འདྲེས་ཞེ་ན། རྟོག་པའི་རི་བོ་འདི་རྣམས་མཐར་ལམ་གྱི་གོལ་སྒྲིབ་ཡིན་ཀྱང་ཟག་བཅས་༼༢༤༡༽པའི་ལམ་གྱི་ངོ་བོར་འགྲོ་ལ་དེས་ན་ལམ་འོག་མའི་ངོ་བོ་ནི་གོང་མའི་གོལ་སྒྲིབ་ཏུ་མི་འགལ་ལོ། །ལམ་གཅིག་ལ་མཚོན་ཚུལ་འདྲེས་ན་སྐྱོན་ཡིན་ནོ། །ཞེས་གསུངས་ཏེ་འདིར་གཞན་དུ་ལྡན་ཆོས་བཤད་པ་སོགས་དང་མ་འདྲེས་པའི་ཨ་ནུའི་རང་ལམ་གྱི་ཁྱད་ཆོས་ངོས་ཟིན་པར་བྱའོ།།

གཉིས་པ་རྒྱས་པར་བཤད་པ་ལ་བཅུ་སྟེ། སྦྱོར་བའི་རྟོག་པ། ཞེན་པའི་རྟོག་པ། དངོས་གཞིའི་རྟོག་པ། སྐྱེད་པའི་རྟོག་པ། རྐྱེན་གྱི་རྟོག་པ། ལས་ཀྱི་རྟོག་པ། མཚན་མའི་རྟོག་པ། མངོན་པའི་རྟོག་པ། སྤྱོད་པའི་རྟོག་པ། རྟགས་ཀྱི་རྟོག་པའོ། །དང་པོ་ནི།

ལང་ཀའི། ཞེས་པ་ནས། མི་འགོག་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་སྦྱོར་བའི་རྟོག་པ་གང་ཞེ་ན། འདི་ལྟ་སྟེ། མི་རྟོག་པ་དང་། མི་རྨོངས་པ་དང་། མི་འགོག་པའོ།།

དེ་དག་བརྒྱད་ཅུ་ལས་ཉིང་ལག་གིས་བརྒྱ་དྲུག་ཅུ་རྩ་དྲུག་ངོ་ཤེས་པར་བྱ་བའི་ཕྱིར། ལང་ཀའི་བདག་པོ། དེ་ལ་སྦྱོར་བའི་རྟོག་པ་གང་ཞེ་ན། འདི་ལྟ་སྟེ། ཆོས་ཀྱི་དབྱིངས་མི་རྟོག་པ་དེ་བཞིན་ཉིད་ཀྱི་ཏིང་ངེ་འཛིན་དང༌། ཡེ་ཤེས་མ་རྨོངས་པ་ཀུན་ཏུ་སྣང་བའི་ཏིང་ངེ་འཛིན་དང༌། ཟུང་འཇུག་མི་འགོག་པ་རྒྱུའི་ཏིང་ངེ་འཛིན་གསུམ་གྱི་ལས་དང་མཚན་ཉིད་དེ་འབྲས་བུ་མཐར་ཕྱིན་ཏེ་ལྷུན་གྱིས་གྲུབ་པར་མངའ་བ་ལ་འཛིན་པའོ། །སྤྱིའི་དབང་དུ། ཞི་གནས་ཆེན་པོ་མི་རྟོག་པ་ནམ་མཁའ་ལྟ་བུ་དང་ལྷག་མཐོང་ཆེན་པོ་མ་རྨོངས་པ་དེ་ལ་གཟའ་སྐར་བཀྲམ་པ་ལྟ་བུ་དང༌། ཟུང་དུ་འབྲེལ་བར་མི་འགོག་པ་མཁའ་དང་གཟའ་སྐར་གྱི་གཟུགས་བརྙན་རྒྱ་མཚོར་གསལ་བ་ལྟ་བུ་སྟེ། ཁྲོ་བོ་ལྷ་རྒྱུད་ཀྱི་རྟོག་པ་ཆེན་པོ་ལས། ཞི་གནས་མི་རྟོག་དངོས་པོ་མཁའ་ཁྱབ་འདྲ། །ལྷག་མཐོང་མ་རྨོངས་མཁའ་ལ་གཟའ་སྐར་བཀྲམ། །རྡོས་བཅས་དོན་དང་བསྟུན་ཞིང་འཚམས་པར་བཤད། །ཏིང་འཛིན་ཤེས་རབ་བཀའ་ལུང་གསུམ་དུ་འདུས། །ཞེས་གསུངས་པའི་ལུང་གསུམ་གྱི་དོན་ལ་རྟོག་པའོ།།

གཉིས་པ་ཞེན་པའི་རྟོག་པ་ནི།

ལང་ཀའི། ཞེས་པ་ནས། མ་སྐྱེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཞེན་པའི་རྟོག་པ་གང་ཞེ་ན། འདི་ལྟ་སྟེ། མི་དམིགས་པ་དང་། མ་གྲུབ་པ་དང་། མ་སྐྱེས་པའོ།།

ལང་ཀའི་བདག་པོ། ཞེན་པའི་རྟོག་པ་གང་ཞེ་ན། འདི་ལྟ་སྟེ། ཁྲོ་བོ་དག་གདུལ་བྱའི་ངོར་བཀོད་པ་ཙམ་ལས་ངོ་བོ་ཉིད་སྤྱོད་ཡུལ་དུ་མ་གྲུབ་པས་མི་དམིགས་པ་དང༌། སེམས་ཀྱི་རྣམ་པར་ཤར་ཡང་ངོ་བོ་གང་དུའང་ས་མ་ཟིན་པས་མ་གྲུབ་པ་དང༌། མཚན་མ་དང་བྲལ་ཏེ་དངོས་གཞི་མི་རྙེད་པས་མ་སྐྱེས་པའི་དོན་ཏེ། སྔ་མ་ལས། བདག་ཏུ་མི་རྟོག་སྤྲུལ་པ་མཛད་ནས་འཐོན། །ཡུལ་དུ་མ་གྲུབ་གཞན་མེད་མཛོད་དུ་གཤེགས། །ཡུལ་སེམས་གཉིས་མེད་མ་སྐྱེས་དབྱིངས་སུ་གཅིག །ཉན་ཐོས་རང་རྒྱལ་སེམས་ཙམ་སྤོང་མན་ངག །ཅེས་མན་༼༢༤༢༽ངག་གསུམ་ལ་ཞེན་པའི་རྟོག་པའོ།།

གསུམ་པ་དངོས་གཞིའི་རྟོག་པ་ནི།

ལང་ཀའི། ཞེས་པ་ནས། གཅིག་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དངོས་གཞིའི་རྟོག་པ་གང་ཞེ་ན། འདི་ལྟ་སྟེ། རྒྱུ་གཅིག་པ་དང་།

སྤྱོད་པ་གཅིག་པ་དང་། རང་བཞིན་གཅིག་པའོ།།

ལང་ཀའི་བདག་པོ། དངོས་གཞིའི་རྟོག་པ་གང་ཞེ་ན། འདི་ལྟ་སྟེ། ཁྲོ་བོ་ཀུན་སྙིང་པོ་བྱང་ཆུབ་ལྷུན་གྱིས་གྲུབ་པའི་ངང་ལས་ཐབས་དང་ཤེས་རབ་རང་སྣང་བའི་ཕྱིར་རྒྱུ་གཅིག་པ་དང༌། ཀུན་གྱིས་མཛད་པ་དྲག་པོའི་ཕྲིེན་ལས་མཛད་པའི་ཕྱིར་སྤྱོད་པ་གཅིག་པ་དང༌། རིལ་ཤེས་རབ་དང་ཐུགས་རྗེས་ཤིན་ཏུ་ཁྲོས་པར་བཞུགས་པས། རང་བཞིན་གཅིག་པ་སྟེ། མེད་རྒྱུ་བཏགས་ཆགས་བསྒྲུབ་འགྲུབ་བལྟས་པར་སྣང༌། །སྤྱོད་མཐུན་ཁྲོ་དྲག་གདུག་པ་དཔའ་བོས་འདུལ། །རྟོག་འཇོམས་སྨད་རྫས་དང་ལེན་དངོས་གྲུབ་རྒྱུ། །འདི་ནི་ཁྲོ་བོ་སྤྱི་ཡི་དོན་དུ་བཤད། །ཅེས་སྤྱི་དོན་གསུམ་ལ་རྟོག་པའོ།།

བཞི་པ་སྐྱེད་པའི་རྟོག་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། གང་གིས་གྱུར་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་བསྐྱེད་པའི་རྟོག་པ་གང་ཞེ་ན། འདི་ལྟ་སྟེ། གང་གྱུར་པ་དང་།

གང་ལ་གྱུར་པ་དང་། གང་གི་ཕྱིར་གྱུར་པ་དང་། གང་གིས་གྱུར་པའོ།།

ལང་ཀའི་བདག་པོ། སྐྱེད་པའི་རྟོག་པ་གང་ཞེ་ན། འདི་ལྟ་སྟེ། བཞི་ནི་རྩ་བ་ཉིད་དེ། གང་ཞིག་ན་རང་རིག་པའི་ཡེ་ཤེས་ཉིད་ཁྲོ་བོར་གྱུར་པ་དང༌། གནས་སམ་གདུལ་བྱ་གང་ལ་ན་དུར་ཁྲོད་ཀྱི་བདག་པོ་ལས་གྱུར་པ་དང༌། དགོས་ཆེད་གང་གི་ཕྱིར་ན་གདུག་པ་འདུལ་བའི་ཕྱིར་གྱུར་པ་དང༌། ཐབས་གང་གིས་ན་དྲག་པོའི་འདུལ་ཐབས་ཀྱིས་ཁྲོ་བོར་གྱུར་པའོ།།

གཉིས་པ་རྒྱས་པར་བཤད་པ་ལ་བཞི་སྟེ། གང་གྱུར་པ། གང་ལ་གྱུར་པ། གང་གི་ཕྱིར་གྱུར་པ། གང་གིས་གྱུར་པ་བཤད་པའོ། །དང་པོ་ནི།

ལང་ཀའི། ཞེས་པ་ནས། བཅོས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་གྱུར་པ་ནི་འདི་ལྟ་སྟེ། ངང་གིས་གྱུར་པ་དང་། ཤུགས་ཀྱིས་གྱུར་པ་དང་།

གྱུར་པ་དང་བཅས་པ་དང་། གྱུར་པར་བཅོས་པའོ།།

ལང་ཀའི་བདག་པོ། གང་གྱུར་པ་ནི་འདི་ལྟ་སྟེ། ཡེ་ཉིད་རང་བཞིན་ལྷུན་གྱིས་གྲུབ་པའི་ཕྱིར་མཉམ་པ་ཉིད་རྟོག་པས་མཚན་རྟོག་ངང་གིས་འཇོམས་པའི་ཁྲོ་བོར་གྱུར་པ་དང༌། ཐུགས་རྗེ་དང་སྨོན་ལམ་གྱིས་གདུལ་བྱ་འདུལ་བའི་ཤུགས་ཀྱིས་ཁྲོ་བོར་གྱུར་པ་དང༌། ཐུགས་རྗེའི་འདུ་འཕྲོ་ཁྲོ་བོར་གྱུར་པ་དང་ལྡན་པ་ཁྲོ་བར་བཅས་པ་དང༌། རུ་ཏྲ་ལྟ་བུའི་གཉེན་པོར་གྱུར་པ་གདུལ་བྱ་ལ་སྤྲུལ་པའི་ཁྲོ་བོ་ལྟར་སྣང་བར་བཅོས་པ་དང་བཞིའོ། །དེའང་དེ་བཞིན་ཉིད་ཀྱི་ཁྲོ་བོ་ཡེ་ལྡན་པ་དང༌། ཕྱི་མ་གསུམ་ཐུགས་རྗེའི་དབང་གིས་གདུལ་བྱ་ལ་སྣང་བ་ཆེད་དུ་བྱས་པའི་ཕྱིར་ཡེ་ཤེས་ཀྱི་ཁྲོ་བོ་དང༌། ཐུགས་རྗེའི་ཁྲོ་བོ་གཉིས་སུ་འདུ་སྟེ། ཁྲོ་བོ་ལྷ་རྒྱུད་ཆེན་པོ་༼༢༤༣༽ལས། ངང་ཁྲོ་ཤུགས་ཁྲོ་ཁྲོ་བར་བཅས་དང་བཅོས། །རྟོགས་པས་ཐུགས་རྗེའི་རང་བཞིན་འདུལ་བའི་དབང༌། །ཞེས་སོ།།

གཉིས་པ་གང་ལ་གྱུར་པ་ནི།

ལང་ཀའི། ཞེས་པ་ནས། འབྲས་བུའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་ལ་གྱུར་པ་ནི་འདི་ལྟ་སྟེ། ཡུལ་ལ་གྱུར་པ་དང་།

གནས་ལ་གྱུར་པ་དང་། གྱུར་པའི་ལས་དང་། གྱུར་པའི་འབྲས་བུའོ།།

ལང་ཀའི་བདག་པོ། གང་ལ་གྱུར་པ་ནི། འདི་ལྟ་སྟེ། ཁྲོ་བོ་དེ་ཡང་ཡུལ་གདུལ་བྱ་རུ་ཏྲ་ལྟ་བུ་དུར་ཁྲོད་ཀྱི་དྲེགས་པ་ཅན་ལ་སྣང་བར་གྱུར་པ་དང༌། དུར་ཁྲོད་ཀྱི་གནས་བམ་རིལ་ཐོད་ལ་མཁར་ལྟ་བུ་ལ་སྣང་བར་གྱུར་པ་དང༌། སྙིང་རྗེ་ཆེན་པོས་དྲག་པོར་གྱུར་པའི་ཕྲིན་ལས་ཀྱིས་སྒྲོལ་བར་མཛད་པ་དང༌། བསྒྲལ་བར་གྱུར་པའི་འབྲས་བུ་ཕུང་པོ་དུར་ཁྲོད་ཀྱི་གནས་སུ་བྱས་ཏེ་ཤེས་པ་བྱང་ཆུབ་ལ་བཀོད་དེ་མི་འཁོར་བ་དང་དམ་ལ་བཏགས་པའོ།།

གསུམ་པ་གང་གི་ཕྱིར་གྱུར་པ་ནི།

ལང་ཀའི། ཞེས་པ་ནས། ཕྱིར་གྱུར་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་གི་ཕྱིར་གྱུར་པ་ནི་འདི་ལྟ་སྟེ། རྒྱུའི་ཕྱིར་གྱུར་པ་དང་། འབྲས་བུའི་ཕྱིར་གྱུར་པའོ།།

ལང་ཀའི་བདག་པོ། གང་གི་ཕྱིར་གྱུར་པ་ནི། འདི་ལྟ་སྟེ། གདུལ་བྱ་དྲག་པོ་དེ་ལྟ་ངན་སྤྱོད་ཅིང་ཉོན་མོངས་ལ་ཞེན་པས་མཚམས་མེད་པ་བྱེད་པའི་རྒྱུའི་གདུག་པ་འདུལ་བའི་དགོས་ཆེད་ཀྱི་ཕྱིར་ཁྲོ་བོར་གྱུར་པ་དང༌། ཤིན་ཏུ་དྲག་པོ་སྐྱེས་པས། བདག་གཞན་གྱི་སྡུག་བསྔལ་གྱི་ས་བོན་འདེབས་པར་སྨིན་ཟིན་པ་འབྲས་བུའི་གདུག་པ་འདུལ་བའི་དགོས་ཆེད་ཀྱི་ཕྱིར་ཁྲོ་བོར་གྱུར་པའོ།།

བཞི་པ་གང་གིས་གྱུར་པ་བཤད་པ་ནི།

ལང་ཀའི། ཞེས་པ་ནས། གྱུར་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་གི་གྱུར་པ་ནི་འདི་ལྟ་སྟེ། རྒྱུ་ཡིས་གྱུར་པ་དང་། གནས་ཀྱིས་གྱུར་པ་དང་།

ཐབས་ཀྱིས་གྱུར་པ་དང་། ལས་ཀྱིས་གྱུར་པ་དང་། འབྲས་བུས་གྱུར་པའོ།།

ལང་ཀའི་བདག་པོ། གང་གིས་གྱུར་པ་ནི། འདི་ལྟ་སྟེ། ཡེ་ཤེས་ཆེན་པོས་རྟོག་མཚན་རིལ་སྒྲོལ་བའི་ཐུགས་རྗེ་མངའ་བའི་ཕྱིར་བསྐྱེད་པའི་སྙིང་པོའི་ཧཱུྃ་ཧ་ཧེ་ཕཊཿ ཅེས་སྔགས་ཀྱི་རྒྱུ་ཡིས་ཁྲོ་བོར་གྱུར་པ་དང༌། ྃ་ལས་དུར་ཁྲོད་ཀྱི་གཞལ་ཡས་ཁང་རྒྱན་དང་ལྡན་པའི་གནས་ཀྱིས་ཁྲོ་བོར་གྱུར་པ་དང༌། ཆོ་ག་གསུམ་གྱི་ཐུགས་རྗེའི་ཐབས་ཀྱིས་བསྒྲལ་ལ་མ་ཐོགས་པ་ལས་ཁྲོ་བོར་གྱུར་པ་དང༌། ཅིར་ཡང་སྣང་བ་མངའ་བས་དྲག་པོའི་ཕྲིན་ལས་ཀྱིས་མཛད་པས་ཁྲོ་བོར་གྱུར་པ་དང༌། གནས་སྤར་བས་སྡུག་བསྔལ་ཚར་བཅད་ནས་བདེ་བའི་ཡེ་ཤེས་ཆེན་པོར་སྦྱོར་བའི་བྱེད་པ་འབྲས་བུས་དབང་ལས་ཁྲོ་བོར་གྱུར་པ་སྟེ། ཁྲོ་བོ་ལྷ་རྒྱུད་ལས། གང་གི་རྒྱུ་ནི་ཧཱུྃ་དང་ཧ་ཧེ་ཕཊཿ། །གནས་ནི་སྟེང་འོག་མཁའ་སྟེ་ཡེ་ཤེས་སྐུ། །བསྐྱེད་ཐབས་ཆོ་འཕྲུལ་གསུམ་པོ་ཁྲོ་བོའི་སྐུ། །འབྲས་བུ་དཔལ་ཆེན་ཕྲ་མེན་འཁོར་གྱིས་བསྐོར། །ཕྲིན་ལས་དྲག་པོས་འགྲོ་བ་ཅིས་འདུལ་མཛད། །ཅེས་གསུངས་པ་ལྟར་དེ་དག་གི་དོན་ལ་རྟོག་པར་ཤེས་པར་བྱའོ།།

ལྔ་པ་རྐྱེན་གྱི་རྟོག་པ་ནི།

ལང་ཀའི། ཞེས་པ་ནས། ༼༢༤༤༽སྟོབས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་རྐྱེན་གྱི་རྟོག་པ་གང་ཞེ་ན། འདི་ལྟ་སྟེ། བརྫིས་པ་དང་། བཤིག་པ་དང་། ཟ་བ་དང་། སྟོབས་པའོ།།

ལང་ཀའི་བདག་པོ། དེ་ལ་རྐྱེན་གྱི་རྟོག་པ་གང་ཞེ་ན། འདི་ལྟ་སྟེ། ལྷའི་བུའི་བདུད་དྲག་པོ་དང་ལྷ་བརྒྱད་བཏུལ་ནས་གདན་དུ་མཛད་དེ་བརྫིས་པ་དང༌། ཕུང་པོའི་བདུད་དེ་མ་དམིགས་པས་རྒས་རྒུད་མེད་པར་མཛད་པས་ཤེས་རབ་ཀྱི་མཚོན་གྱིས་གདུག་པ་ཅན་གྱི་གདོས་བཅས་ཀྱི་ལུས་བྲལ་ཏེ་བཤིགས་པ་དང་། ཉོན་མོངས་པའི་བདུད་མ་དམིགས་པར་བཅོམ་པས་ས་བོན་མེད་པའི་ཕྱིར་དུག་གསུམ་ཟད་ནས་ཤ་རུས་ཁྲག་གསུམ་ཟོས་འཆོས་འཐུང་སྟེ་ཟ་བ་དང༌། སྐྱེ་ཤི་མི་མངའ་བས་ན་འཆི་ བདག་གི་བདུད་བཅོམ་པས་ཤེས་པ་ཟག་མེད ་ཀྱི་ས་ལ་བཀོད་དེ་གནས་སུ་སྟོབས་པ་རྣམས་ལ་རྟོག་པ་སྟེ། ཚམ་རྔམས་དྲག་པོས་ལྷ་ཆེན་འདར་བསྐྱེལ་བརྫིས། །བརྟུལ་ཞུགས་རོལ་པས་གདོས་བཅས་ཕུང་པོ་བཤིགས། །དུག་གསུམ་མི་སྤང་ཤ་རུས་ཁྲག་ལ་ཟ། །རྣམ་ཤེས་འཆི་མེད་རྒྱལ་བའི་གནས་སུ་སྟོབས། །ཞེས་པའོ།།

དྲུག་པ་ལས་ཀྱི་རྟོག་པ་ནི།

ལང་ཀའི། ཞེས་པ་ནས། ལས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ལས་ཀྱི་རྟོག་པ་གང་ཞེ་ན། འདི་ལྟ་སྟེ། སྡུད་པའི་ལས་དང་། བདེ་བའི་ལས་དང་།

སྣང་བའི་ལས་དང་། མཐའ་ཡས་པའི་ལས་དང་། ཐོགས་ པ་མེད་པའི་ལས་དང་། མི་སྐྱོར་བའི་ལས་སོ།།

ལང་ཀའི་བདག ་པོ། ལས་ཀྱི་རྟོག་པ་གང་ཞེ་ན། འདི་ལྟ་སྟེ། དབང་ཕྱུག་ཆེན་པོའི་ཡོན་ཏན་བརྙེས་པའི་ཕྱིར་དུག་ལྔ་དབང་དུ་སྡུད་པར་མཛད་པའི་རྟགས་ལས་མཉེས་པས་ཐོད་ཁྲག་སྟོབས་པ་དང༌། འཇིགས་ཚུལ་སྦྲུལ་གྱི་རྒྱན་ལ་སོགས་པས་བརྗིད་པ་དང༌། བདག་གཞན་གྱི་དཔལ་མངའ་བའི་ཕྱིར་དཔའ་བས་འཇིགས་ཤིང་ཉམ་ང་མེད་པར་བདེ་བ་མཆོག་དང་ལྡན་པའི་རྟགས་ལས་ཁ་ཊྭཱཾ་བསྣམས་པ་སོགས་ཀྱིས་རྔམ་པ་དང༌། མཚན་དང་དཔེ་བྱད་ཀྱི་སྐུ་མཆོག་མངའ་བའི་ཕྱིར་མི་ཐུང་བྱིས་པ། དྲང་སྲོང་ཁྲོས་པ། གནོད་སྦྱིན་རྔམ་བརྗིད། འདུལ་དབང་སྲིན་པོའི་ཚུལ་གྱི་སྐུ་མཐའ་ཡས་པ་སྣང་བའི་རྟགས་ལས་འཁོར་ལོ་བསྣམས་པ་སོགས་ཀྱིས་འཇིགས་པ་དང༌། རིལ་དུ་གྲགས་པ་ཕུན་སུམ་ཚོགས་པ་མངའ་བའི་ཕྱིར་སྐུ་གསུང་ཐུགས་ཆོས་ཀྱི་ཕུང་པོ་གྲགས་པ་མཐའ་ཡས་པའི་རྟགས་ལས་རྔེའུ་ཆུང་བསྣམས་པ་ལ་སོགས་པས་མཛེས་པ་དང་། ཅིས་ཀྱང་མ་གོས་པའི་ཡེ་ཤེས་མངའ་བའི་ཕྱིར་རྣམ་པ་ཐམས་ཅད་མཁྱེན་ཅིང་ཉོན་མོངས་ཀྱི་དྲྭ་བ་གཅོད་པ་ལ་ཐོགས་པ་མེད་པའི་རྟགས་ལས་རལ་གྲི་བསྣམས་པ་སོགས་ཀྱིས་འཕགས་པ་དང༌། དུས་གསུམ་དུ་རྒྱུན་མ་ཆད་པར་གདུལ་བྱ་ཆུད་མི་གསོན་པའི་བརྩོན་འགྲུས་ཆེན་པོའི་གོ་ཆ་མངའ་བའི་ཕྱིར་ཕྲིན་ལས་དུས་གཅིག་གྲུབ་པ་ལས་སླར་ཡང་མི་སྐྱོར་བའི་ནན་ཏན་མཆོག་གི་རྟགས་ལས་རྡོ་རྗེ་རྒྱ་གྲམ་བསྣམས་པ་སོགས་ཀྱིས་གནོན་པ་སྟེ།༼༢༤༥༽དབང་དང་རབ་ཏུ་ལྡན་པ་དང༌། །དཔལ་དང་གཟུགས་དང་གྲགས་པ་དང༌། །ཡེ་ཤེས་དང་ནི་ནན་ཏན་དང༌། །དྲུག་དང་ཡང་དག་ལྡན་ཕྱིར་རོ། །ཞེས་དེ་རྣམས་ལ་རྟོག་པ་རྣམས་སོ།།

བདུན་པ་མཚན་མའི་རྟོག་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཆེ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མཚན་མའི་རྟོག་པ་གང་ཞེ་ན། འདི་ལྟ་སྟེ། མི་འདའ་བ་དང་། རོལ་པ་དང་། ཆེ་བའོ།།

ལང་ཀའི་བདག་པོ། མཚན་མའི་རྟོག་པ་གང་ཞེ་ན། འདི་ལྟ་སྟེ། རྩ་བ་གསུམ་ནི། ན་བཟའ་རྒྱན་གྱི་ལུང་རྒྱན་རྣམས་དོན་གྱི་ངོ་བོ་ལས་མི་འདའ་བ་དང༌། ཡན་ལག་རྟགས་ཀྱི་ལུང་འགྲོ་བའི་དོན་དུ་རོལ་པ་མཛད་པ་དང༌། ཆེ་མཆོག་ཡོན་ཏན་གྱི་ལུང་མཆོག་ཏུ་འཕགས་པའི་ཆེ་བ་དང་ལྡན་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། མི་འདའ་བ་རྒྱན་གྱི་ལུང༌། ཡན་ལག་རྟགས་ཀྱི་ལུང༌། ཆེ་བ་ཡོན་ཏན་གྱི་ལུང་ངོ་། །དང་པོ་ནི།

ལང་ཀའི། ཞེས་པ་ནས། མི་འདའ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་མི་འདའ་བ་གང་ཞེ་ན། འདི་ལྟ་སྟེ། གདུལ་བྱ་ལས་མི་འདའ་བ་དང་། རང་བཞིན་ལས་མི་འདའ་བ་དང་། ཤེས་རབ་ལས་མི་འདའ་བ་དང་། ཐབས་ལས་མི་འདའ་བ་དང་། ཐུགས་དམ་ལས་མི་འདའ་བ་དང་། ཐུགས་རྗེ་ལས་མི་འདའ་བ་དང་། དམ་པ་ལས་མི་འདའ་བ་དང་། འཕྲིན་ལས་ལས་མི་འདའ་བ་དང་། ཡེ་ཤེས་ལས་མི་འདའ་བ་དང་། ཆོས་ཉིད་ལས་མི་འདའ་བ་དང་། དགོངས་པ་ལས་མི་འདའ་བའོ།།

ལང་ཀའི་བདག་པོ། དེ་ལ་མི་འདའ་བ་གང་ཞེ་ན། འདི་ལྟ་སྟེ། ཐུགས་རྗེ་ཆེན་པོས་གདུལ་བྱ་འདུལ་བ་ལས་མི་འདའ་བ་ལྷུན་གྱིས་གྲུབ་པར་དོན་མཛད་དེ་དུས་གསུམ་དུ་གདུལ་བྱ་མི་དོར་བའི་ཕྱིར། གླང་པོའི་ཀོ་རློན་ཏེ། ལྷ་རྒྱུད་ལས།

གླང་ཆེན་འདུལ་སྟོབས་ཐེག་པའི་རྒྱན། །ཞེས་པའི་དོན་དང༌། དཔའ་བའི་རང་བཞིན་ལས་མི་འདའ་བ་ཁྲོ་བོའི་རང་བཞིན་དུ་དཔའ་བའི་ཕྱིར་སྟག་གི་ཤམ་ཐབས་ཏེ། སྟག་ནི་དཔའ་བརྟུལ་ཟ་བྱེད་རྒྱན། །ཞེས་པའི་དོན་དང༌། དབྱིངས་ཤེས་རབ་ལས་མི་འདའ་བ་ཐུགས་ཀྱིས་གཉིས་མེད་དུ་མཁྱེན་པས་མཐའ་རིལ་འཇོམས་པའི་ཕྱིར་སྦྲུལ་གྱི་ཆུན་པོའི་ཆས་བརྒྱད་དེ། སྦྲུལ་ཆུན་དཔའ་བརྗིད་མཉེན་ལྕུག་རྒྱན། །ཞེས་པའི་དོན་དང༌། འགྲེལ་པ་ལུང་བསྟན་མ་ལས། ཟབ་མོ་ཡུམ་གྱི་རྟགས་སྦྲུལ་བཞི། །ཞེས་གསུངས། དུག་གསུམ་སྐུ་གསུམ་དུ་དབང་བསྒྱུར་བའི་ཐབས་ལས་མི་འདའ་བ་ཐབས་མཆོག་དཔག་གིས་མི་ལང་བས་འཁོར་བའི་དཔྱིས་ཕྱུང་བའི་ཕྱིར་ཐོད་ཕྲེང་ཚར་གསུམ་སྟེ། ཐོད་ཕྲེང་དབང་སྒྲོལ་འཆད་པའི་རྒྱན། །ཞེས་པའི་དོན་དང༌། འདི་གཉིས་ནི་གདགས་པའི་རྒྱན་གཉིས་སོ། །ཐབས་ཀྱིས་གདུག་པ་སྒྲོལ་བའི་ཐུགས་དམ་ལས་མི་འདའ་བ་སྔོན་གྱི་གོ་ཆས་གདུལ་བྱ་མི་དོར་བའི་ཕྱིར་ཞིང་གི་གཡང་གཞི་མནབས་པ་སྟེ། གཡང་གཞི་ཚུལ་ཁྲིམས་གོས་ཀྱི་རྒྱན། །ཞེས་པའི་དོན་དང༌། སྔ་མ་གཉིས་དང་འདི་གསུམ་ནི་བགོ་བའི་རྒྱན་གསུམ་མོ། །དམིགས་པ་དག་པའི་ཐུགས་རྗེ་ལས་མི་འདའ་བ་ཤེས་རབ་དང་ཐུགས་རྗེ་ཆེན་པོས་༼༢༤༦༽འཁོར་འདས་ལ་ཆགས་པ་མི་ཕྱེད་པའི་ཕྱིར་རཀྟའི་ཐིག་ལེ་སྟེ། རཀྟ་ཐུགས་རྗེ་ཆགས་པའི་རྒྱན། །ཞེས་པའི་དོན་དང༌། དགོངས་བཅུད་དམ་པ་ལས་མི་འདའ་བ་ཆོས་མཉམ་པའི་དེ་ཁོ་ན་ཉིད་དྲི་མའི་ཟུག་རྔུ་དང་བྲལ་བར་མཁྱེན་པའི་ཕྱིར་ཞག་གི་ཟོ་རིས་ཀྱིས་བརྒྱན་ཏེ། གཟི་ཆེན་དོན་དམ་བཅུད་ཀྱི་རྒྱན། །ཞེས་པའི་དོན་དང༌། སྐུ་གསུམ་གྱིས་དུག་གསུམ་འཇོམས་པའི་ཕྲིན་ལས་ལས་མི་འདའ་བ་མཛད་པས་འགྲོ་བ་སྒྲོལ་བའི་ཕྱིར་ཐལ་ཆེན་གྱི་མཚན་མ་སྟེ། ཐལ་ཆེན་འདུལ་བྱེད་ཕྲིན་ལས་རྒྱན། །ཞེས་པའི་དོན་དང༌། གསུམ་ནི་བྱུགས་པའི་རྒྱན་གསུམ་མོ། །དེ་དག་ནི་ཐུན་མོང་ཡེ་ཤེས་རང་སྣང་གི་རྒྱན་བརྒྱད་དོ། །མཚན་མ་བསྲེགས་པའི་ཡེ་ཤེས་ལས་མི་འདའ་བས་མཐའ་དང་བྲལ་བའི་མེ་ཀློང་ན་བཞུགས་པའི་ཕྱིར་མེ་དཔུང་འབར་བ་སྟེ། ཆོས་སྐུས་ཁྱབ་དང་ཏིང་འཛིན་འཕྲོ། །ཞེས་པའི་དོན་དང༌། དགོངས་པ་ཆོས་ཉིད་ཀུན་ཏུ་ཁྱབ་པ་ལས་མི་འདའ་བར་མ་འདྲེས་པའི་སྤྲུལ་པ་འཕྲོ་བའི་ཕྱིར་རལ་པ་གྱེན་དུ་གཏིབས་པ་སྟེ། ཆོས་ཉིད་དབང་དྲག་སྤྲུལ་པ་འཕྲོ། །ཞེས་པའི་དོན་དང་། དོན་ཤིན་ཏུ་གསལ་བའི་དགོངས་པ་ལས་མི་འདའ་བར་དེ་ཁོ་ན་ཉིད་ལ་འགྱུར་བ་མེད་པར་བཞུགས་པའི་ཕྱིར་སྐུ་མདོག་མཐིང་ནག་འབར་བ་སྟེ། སྐུ་མདོག་མཐིང་ནག་ནམ་མཁའི་རྒྱན། །ཞེས་པའི་དོན་ཏེ། ཇི་སྐད་དུ། གླིང་ལ་དགོངས་པ་འཛམ་གླིང་འདུལ། །དོན་ལ་དགོངས་པ་མཐའ་དབུས་མེད། །ཅེས་སོ། །དེ་ལྟར་བཅུ་གཅིག་ལ་རྟོག་པའོ།།

གཉིས་པ་ཡན་ལག་རྟགས་ཀྱི་ལུང༌ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། མཛད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་རོལ་པ་གང་ཞེ་ན། འདི་ལྟ་སྟེ། གྲུབ་པ་དང་། མཛད་པའོ།།

ལང་ཀའི་བདག་པོ། རོལ་པ་གང་ཞེ་ན། འདི་ལྟ་སྟེ། རང་གི་དོན་གྱི་ངོ་བོ་ཡོངས་སུ་ལྷུན་གྱིས་གྲུབ་པ་དང༌། དེ་ཡིས་གཞན་དོན་སོ་སོའི་འཕྲིན་ལས་མཛད་པར་བསྟན་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། གྲུབ་པ་རྟགས་ཀྱི་ཕྱག་རྒྱ། མཛད་པ་ལས་ཀྱི་ཕྱག་རྒྱའོ། །དང་པོ་ནི།

གྲུབ་པ། ཞེས་པ་ནས། མི་བགྲོད་པའོ། །ཞེས་པའི་བར་གྱིས་བསྟན་ཏེ།

གྲུབ་པ་གང་ཞེ་ན། འདི་ལྟ་སྟེ། མ་སྐྱེས་པ་དང་། མ་རྨོངས་པ་དང་། མི་གཡོ་བ་དང་། མ་འགགས་པ་དང་།

མ་ཆགས་པ་དང་། མ་བཅིངས་པ་དང་། མི་སྐྱོར་བ་དང་། མི་ཐོགས་པ་དང་། མ་ལུས་པ་དང་། མ་བགྲོད་པའོ།།

གྲུབ་པ་གང་ཞེ་ན། འདི་ལྟ་སྟེ། དངོས་གཞི་ཡོངས་སུ་མ་ཟིན་པར་དུག་གསུམ་མ་སྐྱེས་པར་གསལ་བའི་ཡེ་ཤེས་རིལ་གྱི་བླར་གྱུར་པས་དབུར་གྲུབ་པ་སྟེ། དབུ་གསུམ་དུག་གསུམ་སྐུ་གསུམ་ལྷུན་གྱིས་གྲུབ། །ཞེས་གསུངས་པའི་ཕྱིར། དེའང་གཏི་མུག་དག་པས་གཡས་དཀར་སྐུ། འདོད་ཆགས་དག་པས་གཡོན་དམར་གསུང༌། ཞེ་སྡང་དག་པས་དབུས་མཐིང་ཐུགས་དང༌། ཐེག་པའི་21བྱེ་༼༢༤༧༽ཕྲག་དགུ་པོ་མ་འདྲེས་པར་གཟིགས་ཤིང་གཟུགས་སྣང་མཐོ་དམན་ཐམས་ཅད་ཡུལ་མེད་དུ་ཆུ་དང་གཟའ་སྐར་ལྟར་གསལ་བས་ཀུན་ནས་མ་རྨོངས་པས་སྤྱན་དུ་གྲུབ་པ་སྟེ། སྤྱན་དགུས་ས་གསུམ་སྐུ་གསུམ་ཡེ་ཤེས་གསུམ། །ཞེས་གསུངས་པའི་ཕྱིར། དེའང་གཡས་གསུམ་ས། དབུས་གསུམ་སྐུ། གཡོན་གསུམ་ཡེ་ཤེས་དང༌། ཏིང་འཛིན་གསུམ་ལས་མི་ཡེངས་པར་ཐུགས་ལ་འགྲོ་འོང་འབྱུང་འཇུག་གི་ངེས་གསུམ་བྲལ་ཏེ་མི་གཡོ་བས་ཤངས་སུ་གྲུབ་པ་སྟེ། ཤངས་གསུམ་སྲོག་ལ་མངའ་མཛད་ཏིང་འཛིན་གསུམ། །དེ་བཞིན་ཉིད་རྒྱུ་ཀུན་སྣང་ཞེས་བྱའོ། །ཞེས་གསུངས་པའི་ཕྱིར་དང༌།

དེ་གསུམ་ནི་གྲལ་དང་ལས་དང་དབྱིབས་ཀྱི་སྒོ་ནས་བཞག་པའོ། །ཐམས་ཅད་མ་སྒྲིབས་པས་བརྗོད་པ་རིལ་མ་གསན་པར་གསལ་ཏེ་མ་འགག་པའི་ངོ་བོར་བཞུགས་པས་སྙན་དུ་གྲུབ་པ་སྟེ། སྒྲ་ཆེན་ཐ་དད་སྒྲ་སྟེ་ཆོས་སྐུ་ཏིང་འཛིན་སྙན། །ཞེས་གསུང་པའི་ཕྱིར་དང༌། རྣམ་ཐར་གསུམ་གྱིས་ཅི་ལ་རོལ་ཡང་ཞེན་ཆགས་མི་མངའ་བར་མ་ཆགས་པ་དང་ལྡན་པས་ཞལ་དུ་གྲུབ་པ་སྟེ། ཞལ་གསུམ་རྣམ་ཐར་སྒོ་གསུམ་ལྷུན་གྱིས་གྲུབ། །ཅེས་གསུངས་པའི་ཕྱིར། དེའང་སྐུ་སྟོང་པ་ཉིད་གཡས། གསུང་མཚན་མ་མེད་པ་གཡོན། ཐུགས་སྨོན་པ་མེད་པ་དབུས་ཞལ་དང༌། ཐེག་པ་ཀུན་མཁྱེན་པའི་ཡེ་ཤེས་ཉིད་མི་ཤེས་པའི་མདུད་པས་མ་བཅིངས་པའི་བརྗོད་པ་ལྗགས་སུ་གྲུབ་སྟེ། ལྗགས་གསུམ་ཐེག་གསུམ་མཐར་ཕྱིན་ཤེས་རབ་རྟགས། །ཞེས་གསུངས་པའི་ཕྱིར། དེའང་སྐུའི་ཐེག་པ་འཆད་པས་གཡས་དཀར། གསུང་གི་ཐེག་པ་འཆད་པས་གཡོན་དམར། ཐུགས་ཀྱི་ཐེག་པ་འཆད་པས་དབུས་མཐིང་བ་དང༌། ལས་བཞི་དུས་ཚིགས་གཅིག་ལ་ཆེད་དུ་གྲུབ་པར་མཛད་དེ་མི་སྐྱོར་བའི་རྟགས་ལས་མཆེ་བ་བཞི་གྲུབ་པ་སྟེ། མཆེ་བཞི་ཕྲིན་ལས་མཐར་ཕྱིན་བཞི་ཡི་ཚུལ། །ཞེས་གསུངས་པའི་ཕྱིར་དང༌། ཕྲིན་ལས་སྐད་ཅིག་ཙམ་ལ་མཛད་དེ་ཡེ་ཤེས་ཆེན་པོ་གང་ལའང་མི་ཐོགས་པས་ཕྱག་ཏུ་གྲུབ་པ་སྟེ། ཡེ་ཤེས་དྲུག་ནི་མཐར་ཕྱིན་ཕྱག་དྲུག་སྟེ། །ཞེས་གསུངས་པའི་ཕྱིར་དང༌། རིགས་དྲུག་གི་དོན་མཛད་པའི་ཡོན་ཏན་མང་པོ་ཀུན་མ་ལུས་པར་རྫོགས་པས་ཕྱག་མཚན་དུ་གྲུབ་པ་སྟེ། ཕ་རོལ་ཕྱིན་དྲུག་མཐར་ཕྱིན་ཕྱག་མཚན་དྲུག །ཅེས་གསུངས་པའི་ཕྱིར་དང༌། ཐམས་ཅད་ཆོས་དབྱིངས་སུ་གསལ་བས་བགྲོད་པ་མེད་པར་ས་ནོན་ཏེ་མི་བགྲོད་པས་ཞབས་སུ་གྲུབ་པ་སྟེ། ཞབས་བཞིས་ལམ་བཞི་༼༢༤༨༽བགྲོད་པ་མེད་པར་ཐོབ། །ཞེས་གསུངས་པའི་ཕྱིར་དེ་རྣམས་ལ་རྟོག་པའོ།།

གཉིས་པ་མཛད་པ་ལས་ཀྱི་ཕྱག་རྒྱ་ནི།

ལང་ཀའི། ཞེས་པ་ནས། མཛད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མཛད་པ་གང་ཞེ་ན། འདི་ལྟ་སྟེ། འདུལ་བྱ་གཟིགས་པར་མཛད་པ་དང་། སྤྲུལ་པ་འགྱེད་པར་མཛད་པ་དང་། ཅི་གསོལ་གསན་པར་མཛད་པ་དང་། མགོན་སྐྱབས་དམ་པར་མཛད་པ་དང་། དུག་ཆེན་ཟད་པར་མཛད་པ་དང་། ཐེག་མཆོག་སྟོན་པར་མཛད་པ་དང་། སྐྱེ་བཞི་གཅོད་པར་མཛད་པ་དང་། རྒྱུད་དྲུག་འདོན་པར་མཛད་པ་དང་། མཐའ་དྲུག་རྫོགས་པར་མཛད་པ་དང་། ལས་བཞི་སྒྲོལ་བར་མཛད་པའོ།།

ལང་ཀའི་བདག་པོ། མཛད་པ་གང་ཞེ་ན། འདི་ལྟ་སྟེ། ལྷ་རྒྱུད་ལས། སྤྱན་དགུས་ས་དགུ་འདུལ་བའི་བྱེ་བྲག་གཟིགས། །སྤྱན་གསུམ་སྲིད་གསུམ་འགྲོ་རྒྱུད་སོ་སོར་མཁྱེན། །ཞེས་གསུངས་པ་ལྟར་སྤྱན་གྱི་ཕྲིན་ལས་གདུལ་བྱ་ཆེད་དུ་མ་བལྟས་པར་གཟིགས་པར་མཛད་པ་དང༌། ཤངས་ནས་རླུང་བྱུང་སྤྲུལ་པས་སྟོང་གསུམ་འགེངས། །ཞེས་པ་ལྟར་ཤངས་ཀྱི་ཕྲིན་ལས་སྤྲུལ་པའི་འབྱུང་གནས་སུ་གྱུར་པས་སྤྲུལ་པ་འགྱེད་པར་མཛད་པ་དང༌། སྙན་དྲུག་འགྲོ་དྲུག་གནས་ནས་ཅི་གསོལ་གསན། །ཞེས་པ་ལྟར་སྙན་གྱི་ཕྲིན་ལས་ཐུགས་དམ་བསྐུལ་ཞིང་ཅི་གསོལ་བ་རིལ་གསན་ནས་དངོས་གྲུབ་སྣང་བར་མཛད་པ་དང༌། དབུ་གསུམ་སྲིད་གསུམ་མགོན་མཛད་སྐུ་གསུང་ཐུགས། །ཞེས་པ་ལྟར་དབུའི་ཕྲིན་ལས་གདུལ་བྱའི་འགྲོ་བ་རྣམས་ཀྱི་མགོན་སྐྱབས་དམ་པར་མཛད་པ་དང༌། ཞལ་གསུམ་དབྱིངས་སུ་དུག་གསུམ་ཟད་པར་རྔུབ། །ཞེས་པ་ལྟར་ཞལ་གྱི་ཕྲིན་ལས་ཤ་རུས་ཁྲག་ལ་རོལ་ཏེ་དུག་ཆེན་གསུམ་པོ་ཟད་པར་མཛད་པ་དང༌། ལྗགས་གསུམ་ཐེག་གསུམ་བསྟན་པའི་གདངས་ངར་སོགས། །ཞེས་པ་ལྟར་ལྗགས་ཀྱི་ཕྲིན་ལས་གསང་སྔགས་ཐེག་མཆོག་རྒྱལ་པོ་སྟོན་པར་མཛད་པ་དང༌། མཆེ་བཞིས་སྐྱེ་བཞི་རྩད་ནས་གཅོད་པར་བྱེད། །ཞེས་པ་ལྟར་མཆེ་བ་བཞིའི་ཕྲིན་ལས་མངལ་དང་དྲོད་གཤེར་སྒོ་ང་བརྫུས་ནས་སྐྱེ་བའི་ས་བོན་འཇོམས་པས་སྐྱེ་བ་རྣམ་བཞི་གཅོད་པར་མཛད་པ་དང༌། ཕྱག་དྲུག་རྒྱུད་དྲུག་འཁོར་བ་གནས་ནས་འདོན། །ཞེས་པ་ལྟར་ཕྱག་གི་ཕྲིན་ལས་འགྲོ་དྲུག་གནས་ནས་སྒྲོལ་བས་རྒྱུད་དྲུག་གདོན་པར་མཛད་པ་དང༌། ཕྱག་མཚན་ཕ་རོལ་ཕྱིན་དྲུག་འགྲོ་དོན་མཛད། །ཞེས་པ་ལྟར་ཕྱག་མཚན་རྣམས་ཀྱི་ཕྲིན་ལས་ཡེ་ཤེས་དྲུག་དང་འབྲས་བུ་དྲུག་ལྷུན་གྱིས་གྲུབ་པར་རྟོགས་ཏེ་ཡང་དག་པའི་མཐའ་དྲུག་རྫོགས་པར་མཛད་པ་དང༌། ཞབས་བཞིས་ཕྲིན་ལས་རྣམ་བཞིས་བགྲོད་མེད་སྒྲོལ། །ཞེས་པ་ལྟར་ཞབས་ཀྱི་ཕྲིན་ལས་ཞི་རྒྱས་དབང་དྲག་གི་ཕྲིན་ལས་རྣམ་པ་བཞིས་འགྲོ་བ་སྒྲོལ་བར་མཛད་པ་དང་བཅུ་ལ་རྟོག་པའོ།།

གསུམ་པ་ཆེ་བ་ཡོན་ཏན་གྱི་ལུང་ནི།

ལང་ཀའི། ཞེས་པ་ནས། ཆེ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཆེ་བ་གང་ཞེ་ན། འདི་ལྟ་སྟེ། གཉེན་པོ་མེད་པའི་ཆེ་བ་དང་། འགྲན་ཟླ་མེད་པའི་ཆེ་བ་དང་། ཁྱད་དུ་འཕགས་པའི་ཆེ་བ་དང་། ཆེ་བཙན་གཅིག་པུའི་ཆེ་བ་དང་། ཚམ་ངམ་རླབས་ཀྱི་ཆེ་བ་དང་། རྨད་དུ་བྱུང་བའི་ཆེ་བ་དང་། ཐམས་ཅད་དུ་མ་ཕམ་པའི་ཆེ་བ་དང་། མངའ་དབང་རྫོགས་པའི་ཆེ་བ་དང་། ཀུན་ལས་རྒྱལ་བའི་ཆེ་བ་དང་། ཡོངས་སུ་མི་ནུབ་པའི་ཆེ་བའོ།།

ལང་ཀའི་བདག་པོ། ཆེ་བ་གང་ཞེ་ན། འདི་ལྟ་སྟེ། ༼༢༤༩༽ཐུན་མོང་མ་ཡིན་པའི་ཕ་རོལ་ཏུ་ཕྱིན་པ་བཅུ་མངའ་བའི་ཕྱིར་ཏེ། རྡོ་རྗེ་ཡེ་ཤེས་ཕ་རོལ་ཕྱིན་པ་ནི། །རང་བཞིན་མི་འགྱུར་ལས་ནི་འབིགས་ཤིང་འཇོམས། །ཞེས་གཉིས་མེད་ཀྱི་ཡེ་ཤེས་ཆེན་པོ་མངའ་བའི་ཕྱིར་གཉེན་པོ་མེད་པའི་ཆེ་བ་དང་ལྡན་པས་བཛྲ་ཧེ་རུ་ཀའི་གཡས་དང་པོར་རང་རྟགས་ཀྱི་གཉེན་པོ་དང་བྲལ་བའི་རྡོ་རྗེ་བསྣམས་པའོ། །བྷནྡྷ་བཟོད་པའི་ཕ་རོལ་ཕྱིན་པ་ནི། །ཆོས་དབྱིངས་སྤྲོས་མེད་ཡེ་ཤེས་བཞི་དང་ལྡན། །ཞེས་མཉམ་པའི་ངང་ལ་སྡུག་བསྔལ་མ་སྤང་བྲལ་བའི་བཟོད་པ་ཆེན་པོ་མངའ་བས་དོན་བྱེད་པའི་ཕྱིར་འགྲན་ཟླ་མེད་པའི་ཆེ་བ་དང་ལྡན་པས་གཡོན་དང་པོར་ཐུགས་རྗེ་ཡེ་ཤེས་ཀྱིས་འཕགས་པའི་དུང་ཁྲག་བསྣམས་པའོ། །ཁ་ཊྭཱཾ་སྟོབས་ཀྱི་ཕ་རོལ་ཕྱིན་པ་ནི། །དུག་གསུམ་སྒྲོལ་བྱེད་དྲེགས་པའི་ལྷ་བདུད་འཇོམས། །ཞེས་སྟོང་གསུམ་ཡོངས་སྒྲོལ་གྱི་སྟོབས་མཆོག་མངའ་བའི་ཕྱིར། ཁྱད་པར་དུ་འཕགས་པའི་ཆེ་བ་དང་ལྡན་པས་གཡོན་བར་པར་དུག་གསུམ་ལྷ་བདུད་འཇོམས་པའི་ཁ་ཊྭཱཾ་ག་བསྣམས་པའོ།།

ཞིང་ཆེན་སྨོན་ལམ་ཕ་རོལ་ཕྱིན་པ་ནི། །འབོད་པའི་གཡབ་མོས་འཁོར་རྣམས་དབང་དུ་སྡུད། །ཞེས་ཡོན་ཏན་བདག་ལ་རྫོགས་པས་སྨོན་གནས་མཐར་ཕྱིན་པའི་ཕྱིར་གང་ལའང་རག་མ་ལས་པར་ཆེ་བཙན་གཅིག་པུའི་ཆེ་བ་དང་ལྡན་པས་གཡས་བར་པར་དྲེགས་པ་ཅན་བྲན་དུ་འཁོལ་བའི་ཞིང་ཆེན་བསྣམས་པའོ། །ཐོང་གཤོལ་ཐབས་ཀྱི་ཕ་རོལ་ཕྱིན་པ་ནི། །ཉོན་མོངས་ཐུགས་རྗེས་ཐ་བ་སྐུ་གསུམ་འགྲུབ། །ཞེས་ཐབས་མཆོག་དཔག་གིས་མི་ལང་བའི་མཛད་པའི་བྱིན་རླབས་ཀྱིས་ཉོན་མོངས་པའི་ཐ་བ་འདུལ་བའི་ཕྱིར་ཚམ་ངམ་རླབས་ཀྱི་ཆེ་བ་དང་ལྡན་པས་གཡས་ཐ་མར་གདུག་པ་འདུལ་བའི་ཐོང་གཤོལ་བསྣམས་པའོ།།

རྔ་ནི་ཤེས་རབ་ཕ་རོལ་ཕྱིན་བསྟན་པ། །ཡུལ་མེད་ཆོས་སྐུ་རྣམ་དག་རྔ་ལོགས་ལ། །འཛིན་ པ་བདག་མེད ་རིག་པའི་དབྱུག་གུས་བརྡུངས། །གསུང་རབ་རྔ་སྒྲས་འགྲོ་བ་ཤེས་རབ་སྐྱེད། །ཞེས་གསང་སྔགས་ཇི་བཞིན་པ་དེ་ཁོ་ན་ཉིད་དུ་འཛིན་པ་དང་ཡང་བྲལ་བས་མི་དམིགས་པའི་ཤེས་རབ་ཆེན་པོས་རྨད་དུ་བྱུང་བའི་ཐེག་པ་གཞན་ལའང་སྒྲོགས་པའི་ཕྱིར་རྨད་དུ་བྱུང་བའི་ཆེ་བ་དང་ལྡན་པས་གཡོན་ཐ་མར་ཕ་རོལ་ཤེས་རབ་སྐྱེད་པའི་རྔ་ཆུང་བསྣམས་པའོ། །པདྨ་འདམ་སྐྱེས་མ་ཆགས་ཐུགས་རྗེས་སྤྱོད། །ཚུལ་ཁྲིམས་ཕ་རོལ་ཕྱིན་པའི་ངང་དུ་བསྟན། །ཞེས་དུས་གསུམ་དུ་འདའ་ཉམས་བྲལ་བས་ཕམ་ལྟུང་གིས་མི་གོས་པའི་ཚུལ་ཁྲིམས་ཆེན་པོ་༼༢༥༠༽མངའ་བའི་ཕྱིར་ཐམས་ཅད་དུ་མ་ཕམ་པའི་ཆེ་བ་དང་ལྡན་པས་པདྨ་ཧེ་རུ་ཀའི་གཡས་དང་པོར་འཁོར་བའི་དཔུང་གིས་མི་འཇིགས་པའི་པདྨ་བསྣམས་པའོ། །འཁོར་ལོ་བསམ་གཏན་ལྷག་པ་གསུམ་གྱི་མཚན། །ཚུལ་ཁྲིམས་ཏིང་འཛིན་ཤེས་རབ་གསུམ་དང་ལྡན། །ཞེས་སྙིང་པོ་བྱང་ཆུབ་ལྷུན་གྱིས་རྫོགས་པའི་ངང་ལས་དུས་གསུམ་དུ་མི་གཡོ་བ་ཆེན་པོའི་བསམ་གཏན་མངའ་བའི་ཕྱིར་མངའ་དབང་རྫོགས་པའི་ཆེ་བ་དང་ལྡན་པས་བུདྡྷ་ཧེ་རུ་ཀའི་གཡས་དང་པོར་དབང་བཅུ་ཐོབ་པའི་འཁོར་ལོ་བསྣམས་པའོ། །རལ་གྲི་ཡེ་ཤེས་ཐུགས་རྗེས་མཐའ་གཉིས་གཅོད། །རྩེ་གཅིག་ཏིང་འཛིན་གཉིས་ལ་བརྩོན་འགྲུས་མཛད། །ཞེས་བྱ་བྱེད་བྲལ་བས་ཡེངས་པ་མེད་པའི་བརྩོན་འགྲུས་ཀྱི་གོ་མཚོན་ཆེན་པོས་ལེ་ལོའི་སྐྱོན་གྱི་དགྲ་དཔུང་གཏན་ནས་འཇོམས་པའི་ཕྱིར་ཀུན་ལས་རྒྱལ་བའི་ཆེ་བ་དང་ལྡན་པས་ཀརྨ་ཧེ་རུ་ཀའི་གཡས་དང་པོར་ཡེ་ཤེས་ཐུགས་རྗེས་མཐའ་གཉིས་གཅོད་པའི་རལ་གྲི་བསྣམས་པའོ། །བདག་མེད་སེམས་ལས་རིན་ཆེན་དགོས་འདོད་སྐོང༌། །མི་ཟད་པར་ལྡན་སྦྱིན་པའི་ཕ་རོལ་ཕྱིན། །ཞེས་གང་ལའང་མ་ཆགས་པར་ཐམས་ཅད་ཁྱབ་པས་སྦྱིན་པའི་ཡོན་ཏན་ཆེན་པོ་འཕེལ་འགྲིབ་དང་བྲལ་བ་མངའ་བའི་ཕྱིར་ཡོངས་སུ་མི་ནུབ་པའི་ཆེ་བ་དང་ལྡན་པས་རཏྣ་ཧེ་རུ་ཀའི་གཡས་དང་པོར་མི་ཟད་པ་ལྡན་པའི་རིན་པོ་ཆེ་བསྣམས་པ་སྟེ་དེ་རྣམས་ཀྱི་མཚན་མར་རྟོག་པའོ།།

བརྒྱད་པ་མངོན་པའི་རྟོག་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། མངོན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མངོན་པའི་རྟོག་པ་གང་ཞེ་ན། འདི་ལྟ་སྟེ། སྐུའི་རྔོམ་སྤྱོད་བྱེ་བ་ས་ཡར་མངོན་པ་དང་། གསུང་གི་རྔོམ་སྤྱོད་བསྟན་པ་རྒྱ་མཚོར་མངོན་པ་དང་། ཐུགས་ཀྱི་རྔོམ་སྤྱོད་ཆོས་ཉིད་ནམ་མཁར་མངོན་པ་དང་། མཐུའི་རྔོམ་སྤྱོད་ནམ་མཁའི་དབྱིངས་ལྟར་མངོན་པའོ།།

ལང་ཀའི་བདག་པོ། མངོན་པའི་རྟོག་པ་གང་ཞེ་ན། འདི་ལྟ་སྟེ། སྐུའི་རྔམ་སྤྱོམ་བྱེ་བ་ས་ཡར་མངོན་པ་དང༌། གསུང་གི་རྔམ་སྤྱོམ་བསྟན་པ་རྒྱ་མཚོར་མངོན་པ་དང༌། ཐུགས་ཀྱི་རྔམ་སྤྱོམ་ཆོས་ཉིད་ནམ་མཁར་མངོན་པ་དང༌། མཐུའི་རྔམ་སྤྱོམ་ནམ་མཁའི་དབྱིངས་ལྟར་མངོན་པ་སྟེ་རྩ་བ་བཞིའི་ངེས་ཚིག་ཡན་ལག་གིས་འགྲུབ་པའོ།།

གཉིས་པ་རྒྱས་པར་བཤད་པ་ལ་བཞི་སྟེ། སྐུའི་རྔམ་པ། གསུང་གི་རྔམ་པ། ཐུགས་ཀྱི་རྔམ་པ། མཐུའི་རྔམ་པའོ། །དང་པོ་ནི།

ལང་ཀའི། ཞེས་པ་ནས། འགྱིང་བའི་ཚུལ་དང༌། ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ཀྱང་ཚུལ་བཅུ་དང་། དྲུག་གིས་རྫོགས་པར་འགྱུར་ཏེ། དེ་ཡང་གང་ཞེ་ན། འདི་ལྟ་སྟེ། ཇི་ལྟར་སྣང་བ་རི་མོ་ལྟ་བུའི་ཚུལ་དང་། ཅིར་ཡང་འགྱུར་བ་གར་ཐབས་ལྟ་བུའི་ཚུལ་དང་། ཟིན་གྱིས་གནོན་པ་ཁྱད་དུ་བྱུང་བའི་ཚུལ་དང་། ཚམ་རྔམ་ཆེན་པོ་སྟབས་སུ་འགྱིང་བའི་ཚུལ་དང་།

ལང་ཀའི་བདག་པོ། དེ་དག་ཀྱང་ཚུལ་བཅུ་དང་དྲུག་གིས་རྫོགས་པར་འགྱུར་ཏེ། དེ་ཡང་གང་ཞེ་ན། འདི་ལྟ་སྟེ། སྐུ་མདོག་གི་རྔམ་རྒྱལ་བའི་སྐུ་༼༢༥༡༽གདུལ་བྱའི་བསམ་པ་བཞིན་ཇི་ལྟར་ཡང་སྣང་བ་དཔེར་ན་རི་རབ་ལྷུན་པོ་ཕྱོགས་བཞི་ཁ་དོག་སོ་སོར་སྣང་བ་བཞིན་དུ་བསྟན་པའམ། ནམ་མཁའི་རི་མོ་ཕྱག་རྒྱ་སྐུའི་རྔམ་མཁའ་དབྱིངས་དྭངས་པའི་འཇའ་སྤྲིན་སྣ་ཚོགས་སུ་སྣང་ཡང་སླར་ཡང་དེ་རུ་ཞི་བ་ལྟ་བུའི་ཚུལ་དུ་མཚོན་པའི་མདོག་དང༌། བཞུགས་ཐབས་ཀྱི་རྔམ་མཚན་ཉིད་མ་ངེས་པས་ཅིར་ཡང་འགྱུར་ཏེ་གཅིག་དང་དུ་མ་བྲལ་བར་སྣང་བ་དཔེ་གར་ཐབས་མཁན་ལྟ་བུའི་ཚུལ་དང༌། གདན་གྱི་རྔམ་ཐམས་ཅད་ལས་ཆེ་བཙན་གཅིག་པུར་གྱུར་པས་སྲིད་པའི་འཁོར་ལོ་ཟིལ་གྱིས་གནོན་པ་ལྷ་ཆེན་གཙོ་བོ་དག་མནན་ཏེ་ཁྱད་དུ་བྱུང་བའི་ཚུལ་དང༌། ཁྲོ་བོའི་སྟབས་ཀྱི་རྔམ་བདུད་དཔུང་གིས་མི་བརྫི་ཞིང་དེ་ཉིད་འཇོམས་པས་ཚམ་ངམ་ཆེན་པོའི་སྟབས་སུ་ཞབས་འགྱིང་བའི་ཚུལ་དང་བཞི་ནི་སྐུའི་རྔམ་དུ་འགྱུར་ཏེ། དེ་ལ་སྐུ་ཡི་རྔམ་བཞི་ནི། ནམ་མཁའི་རི་མོ་ཕྱག་རྒྱ་རྔམ། །ཅིར་ཡང་འགྱུར་བའི་བཞུགས་སྟབས་རྔམ། །ཟིལ་གྱིས་གནོན་པའི་གདན་ཡང་རྔམ། །ཚམ་ངམ་ཆེན་པོའི་སྟོབས་ལྡན་རྔམ། །ཞེས་སོ།།

གཉིས་པ་གསུང་གི་རྔམ་པ་ནི།

གང་དུ། ཞེས་པ་ནས། སྒྲོགས་པའི་ཚུལ་དང༌། ཞེས་པའི་བར་གྱིས་བསྟན་ཏེ།

གང་དུ་རྔུབ་པ་ཞལ་གྱི་ཚུལ་དང་། ཅིར་ཡང་འགྱུར་བ་ལྗགས་ཀྱི་ཚུལ་དང་། ཡོངས་སུ་གཅོད་པ་ཚེམས་ཀྱི་ཚུལ་དང་། གོ་བར་སྒྲོགས་པ་འབྲུག་སྒྲ་སྒྲོགས་པའི་ཚུལ་དང་།

ཞལ་གྱི་རྔམ་ཧོམ་ལྔ་འབྲེལ་བའི་ཞལ་གང་དུ་རིལ་གསོལ་ཞིང་རྔུབ་པ་ཞལ་གྱི་ཚུལ་དང༌། ལྗགས་ཀྱི་རྔམ་གསུང་སྒྲས་ཟུར་མ་འདྲེས་པར་ཅིར་ཡང་འགྱུར་བ་ལྗགས་ཀྱི་ཚུལ་དང༌། ཚེམས་ཀྱི་རྔམ་སྐྱེ་ཤི་རྩ་བ་ནས་ཡོངས་སུ་གཅོད་པ་ཚེམས་ཀྱི་ཚུལ་དང༌། གསུང་དབྱངས་ཀྱི་རྔམ་གདུལ་བྱའི་བློ་ལ་དོན་གསལ་བར་སྟོན་པ་ཡན་ལག་དྲུག་ཅུའི་དབྱངས་དང་ལྡན་པར་གོ་བར་སྒྲོགས་པ་འབྲུག་སྒྲ་སྒྲོགས་པའི་ཚུལ་དང་བཞི་ནི་གསུང་གི་རྔམ་སྟེ། དེ་ལ་གསུང་གི་རྔམ་བཞི་ལ། །ཧོམ་ལྔར་འབྲེལ་འབྱུང་ཞལ་ཡང་རྔམ། །ཟླ་གམ་ཅིར་སྟོན་ལྗགས་ཀྱང་རྔམ། །སྐྱེ་ཤི་རྩད་གཅོད་མཆེ་བ་རྔམ། །འབྲུག་ལྟར་སྒྲོགས་པའི་གསུང་དབྱངས་རྔམ། །ཞེས་སོ།།

གསུམ་པ་ཐུགས་ཀྱི་རྔམ་པ་ནི།

དགོངས་པ། ཞེས་པ་ནས། ལྟ་བུའི་ཚུལ་དང༌། ཞེས་པའི་བར་གྱིས་བསྟན་ཏེ།

དགོངས་པ་ནམ་མཁའི་སྐར་ཚོགས་ལྟ་བུའི་ཚུལ་དང་། འཕྲིན་ལས་རྒྱ་མཚོའི་དབའ་རླབས་ལྟ་བུའི་ཚུལ་དང་། ཡོན་ཏན་ས་གཞིའི་རྩི་ཤིང་ལྟ་བུའི་ཚུལ་དང་། ཐུགས་རྗེ་གར་གྱི་འཕྲེང་བ་ལྟ་བུའི་ཚུལ་དང་།

དོན་མཁྱེན་པའི་རྔམ་རིལ་མ་འདྲེས་ལ་ཡོངས་སུ་རྫོགས་པར་གསལ་བས་དགོངས་པ་ནམ་མཁའི་སྐར་ཚོགས་ལྟ་བུའི་ལྷག་མཐོང་གི་རྒྱན་མ་གཡོས་པར་རང་སྣང་བའི་ཚུལ་དང༌། དབྱིངས་མཁྱེན་པའི་རྔམ་དགོངས་པ་མི་གཡོ་བའི་ངང་ལས་འགྲོ་དོན་མཛད་པ་མི་འགོག་པས་ཕྲིན་ལས་རྒྱ་མཚོའི་རྦ་རླབས་ལྟ་བུའི་ཞི་གནས་ཀྱི་ཁྱབ་པར་འབྱུང་བའི་ཚུལ་དང༌། ཡེ་ཤེས་མཁྱེན་པའི་རྔམ་སྐུ་དང་ཡེ་ཤེས་ཀྱི་ཡོན་ཏན་རིལ་གྱི་༼༢༥༢༽འབྱུང་གནས་སུ་སྣང་བས་ཡོན་ཏན་ཐམས་ཅད་རྫོགས་པ་དཔེ་ས་གཞིའི་ངོས་ལ་རྩི་ཤིང་འཁྲུངས་པ་ལྟ་བུའི་ལྷག་མཐོང་གི་རྒྱན་ཕན་འདོགས་པའི་ཚུལ་དང༌། ཐབས་མཁྱེན་པའི་རྔམ་རིལ་ཟིན་པའི་ཐུགས་རྗེ་ཆེན་པོ་མངའ་བས་ཐུགས་རྗེ་ལ་རྒྱུན་ཆད་མེད་པ་གར་གྱི་ཕྲེང་བ་ལྟ་བུའི་ལྷག་མཐོང་གིས་ཅིར་ཡང་དགའ་བ་སྐྱེད་པའི་ཚུལ་དང་བཞི་ནི་ཐུགས་ཀྱི་རྔམ་སྟེ། ཐུགས་ཀྱི་རྔམ་ནི་རྣམ་བཞི་ལ། །ཏིང་འཛིན་ནམ་མཁའི་སྐར་ཚོགས་རྔམ། །ཕྲིན་ལས་རྒྱ་མཚོའི་རྦ་རླབས་རྔམ། །ཡོན་ཏན་མི་ཟད་རྩི་ཤིང་རྔམ། །མཛད་པའི་རོལ་མོ་གར་ཐབས་རྔམ། །ཞེས་སོ།།

བཞི་པ་མཐུའི་རྔམ་པ་ནི།

གནས་ཀྱི། ཞེས་པ་ནས། ཚུལ་ལོ། །ཞེས་པའི་བར་གྱིས་བསྟན་ཏེ།

གནས་པར་འབྱུང་ཞིང་སྡུད་པ་དུར་ཁྲོད་ཀྱི་ཚུལ་དང་། གནོན་པའི་ཁྱད་པར་སྤ་བཀོང་པའི་ཚུལ་དང་།

ཞིང་གི་ཁྱད་པར་བླ་ན་མེད་པའི་ཚུལ་དང་། སྤྱོད་པའི་ཁྱད་པར་ཅིག་ཅར་གྲུབ་ལ་མི་སྐྱོར་བའི་ཚུལ་ལོ།།

རུ་དྲ་བཅོམ་པའི་གནས་ཀྱི་རྔམ་དྲེགས་པ་རུ་དྲ་བཅོམ་པའི་སྤྲུལ་པའི་གནས་ཀྱི་ཁྱད་པར་དུ་བྱུང་ཞིང་ཡོན་ཏན་ཐམས་ཅད་འདུ་ཞིང་སྡུད་པ་དུར་ཁྲོད་ཀྱི་གནས་ལྟ་བུའི་ཚུལ་དང༌། ལྷ་ཆེན་གནོན་པའི་གདན་གྱི་རྔམ། དྲེགས་པ་ལྷ་ཆེན་གདན་དུ་མཛད་དེ་གནོན་པའི་ཁྱད་པར་རྒྱལ་པོ་བཙོན་དུ་བཟུང་བ་ལྟ་བུར་གཞན་རྣམས་སྤ་བཀོང་བའི་ཚུལ་དང་། གདུལ་དཀའ་སྒྲོལ་བའི་ཕྲིན་ལས་ཀྱི་རྔམ་ཁམས་གསུམ་བསྒྲལ་བའི་ཞིང་དུ་གྱུར་པས་ཞིང་གི་ཁྱད་པར་སངས་རྒྱས་ཀྱི་ས་ལ་བཀོད་པས་བླ་ན་མེད་པའི་ཚུལ་དང༌། ཅིག་ཆར་སྤྱོད་པའི་བརྟུལ་ཞུགས་ཀྱི་རྔམ་མཛད་སྤྱོད་ཅི་ལའང་ཆིག་ཆོད་དུ་གྲུབ་པས་སྤྱོད་པའི་ཁྱད་པར་ཅིག་ཆར་གྲུབ་པ་ལ་སླར་གནོན་བྱ་མི་དགོས་པས་ཕྱིས་མི་སྐྱོར་བའི་ཚུལ་དང་བཞི་ནི་མཐུའི་རྔམ་སྟེ། དེ་ལ་མཐུ་ཡི་རྔམ་བཞི་ནི། །རུ་དྲ་བཅོམ་པའི་གནས་ཀྱང་རྔམ། །ལྷ་ཆེན་གནོན་པའི་གདན་ཡང་རྔམ། །ཁམས་གསུམ་བསྒྲལ་བའི་ཞིང་རྔམ་ཞིང༌། །རྟོག་འཇོམས་སྤྱོད་པའི་བརྟུལ་ཞུགས་རྔམ། །ཞེས་དེ་ལྟར་གདུལ་བྱ་ལ་མངོན་པར་སྣང་བའི་དོན་ལ་རྟོག་པ་སྟེ། ཞིབ་པར་རྔམ་ཚུལ་སོ་གཉིས་སུ་འགྱུར་བར་ལྷ་རྒྱུད་ན་གསལ་ལོ།།

དགུ་པ་སྤྱོད་པའི་རྟོག་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། དཀྱིལ་འཁོར་ལྟ་བུ་སྟེ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་སྤྱོད་པའི་རྟོག་པ་གང་ཞེ་ན། འདི་ལྟ་སྟེ། སྐུའི་གཟི་བརྗིད་སེང་གེ་འབུམ་གཟུགས་ལྟ་བུ་དང་།

གསུང་གི་གཟི་བརྗིད་འབྲུག་སྟོང་ལྡིར་བ་ལྟ་བུ་དང་། ཐུགས་ཀྱི་གཟི་བརྗིད་ནམ་མཁའི་གཏོས་ཆེན་ལྟ་བུ་དང་། ཡོན་ཏན་གྱི་གཟི་བརྗིད་ནོར་བུ་རིན་པོ་ཆེ་ལྟ་བུ་དང་། འཕྲིན་ལས་ཀྱི་གཟི་བརྗིད་ཆེན་པོའི་དཀྱིལ་འཁོར་ལྟ་བུ་སྟེ།

ལང་ཀའི་བདག་པོ། སྤྱོད་པའི་རྟོག་པ་གང་ཞེ་ན། འདི་ལྟ་སྟེ། སྐུའི་གཟི་བརྗིད་ཟིལ་གྱིས་གནོན་པ་སེང་གེ་འབུམ་གཟུགས་ལྟ་བུ་དང་། གསུང་གི་གཟི་བརྗིད་ཀུན་ཏུ་གྲགས་པ་འབྲུག་སྟོང་ལྡིར་བ་ལྟ་བུ་དང༌། ཐུགས་ཀྱི་གཟི་བརྗིད་ཁྱབ་གདལ་དུ་མཁྱེན་པ་ནམ་མཁའི་གཏོས་ཆེན་ལྟ་བུ་དང༌། ཡོན་ཏན་གྱི་གཟི་བརྗིད་འདོད་རྒུར་འབྱུང་བ་༼༢༥༣༽ནོར་བུ་རིན་པོ་ཆེ་ལྟ་བུ་དང༌། ཕྲིན་ལས་ཀྱི་གཟི་བརྗིད་གང་འདུལ་ལྟར་སྟོན་པ་ཆེན་པོའི་དཀྱིལ་འཁོར་འབྲས་བུ་མཐར་ཕྱིན་པའི་རྒྱལ་བས་བཀོད་པ་ལྟ་བུ་སྟེ།

གཉིས་པ་རྒྱས་པར་བཤད་པ་ལ་ལྔ་སྟེ། སྐུའི་གཟི་བརྗིད། གསུང་གི་གཟི་བརྗིད། ཐུགས་ཀྱི་གཟི་བརྗིད། ཡོན་ཏན་གྱི་གཟི་བརྗིད། ཕྲིན་ལས་ཀྱི་གཟི་བརྗིད་དོ། །དང་པོ་ནི།

ལང་ཀའི། ཞེས་པ་ནས། འཐད་པའི་གཟི་བརྗིད་དང༌། ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་གཟི་བརྗིད་བཅུ་གཉིས་ཀྱིས་རྫོགས་པ་ཡིན་ཏེ། དེ་ཡང་གང་ཞེ་ན། འདི་ལྟ་སྟེ།

སྐུ་ཆེ་ཡན་ལག་རགས་པའི་གཟི་བརྗིད་དང་། གྲངས་མང་རྐྱེན་དང་འཚམ་པའི་གཟི་བརྗིད་དང་།

བཀུར་འོས་གཙོ་བོར་མཐོང་བའི་གཟི་བརྗིད་དང་། ཁྱད་ཞུགས་ཡིད་དང་འཐད་པའི་གཟི་བརྗིད་དང་།

ལང་ཀའི་བདག་པོ། དེ་དག་ནི་གཟི་བརྗིད་བཅུ་ཕྲག་གཉིས་ཀྱིས་རྫོགས་པ་ཡིན་ཏེ། དེ་ཡང་གང་ཞེ་ན། འདི་ལྟ་སྟེ། སྐུའི་བརྗིད་སྐུ་ཡི་བཀོད་པ་ཆེ་ཆུང་ཚད་མེད་པར་སྤྲོ་ཡང་ཆོས་སྐུ་དང་མཉམ་པར་འབྱུང་བའི་སྒོ་ནས་ཆེ་ལ་ཐུགས་རྗེ་དང་མཉམ་པར་འབྱུང་བའི་སྒོ་ནས་ཡན་ལག་རགས་པའི་གཟི་བརྗིད་དང༌། སེམས་ཅན་ཀུན་གྱི་འདུ་བྱེད་དང་མཐུན་པར་སྐུ་ཇི་སྙེད་དུ་སྣང་བས་གྲངས་མང་ལ་སྨོན་ལམ་གྱི་སྒོ་ནས་རིགས་མཐུན་དུ་སྟོན་པས་གདུལ་བྱ་འདུལ་བའི་རྐྱེན་དང་འཚམས་པའི་གཟི་བརྗིད་དང༌། སྤྱོད་ལམ་གྱི་སྒོ་ནས་འཇིག་རྟེན་པས་བཀུར་བར་འོས་ལ། རིགས་བཙུན་པའི་སྒོ་ནས་ས་པ་རྣམས་ཀྱིས་གཙོ་མཆོག་ཚོགས་ཀྱི་བདག་པོར་མཐོང་བའི་གཟི་བརྗིད་དང༌། ཡོན་ཏན་གྲུབ་པའི་སྒོ་ནས་འགྲན་ཟླ་མེད་པས་ཁྱད་ཞུགས་ལ། ཕྲིན་ལས་ཀྱི་སྒོ་ནས་གདུལ་བྱའི་བསམ་པ་དང་མཐུན་པས་ཡིད་དང་འཐད་པའི་གཟི་བརྗིད་དང་བཞི་སྟེ། དེ་ལ་སྐུ་ཡི་བརྗིད་བཞི་ལ། །སྐུ་ཆེ་ཡན་ལག་རགས་པས་བརྗིད། །གྲངས་མང་རྐྱེན་དང་འཚམས་པས་བརྗིད། །བཀུར་འོས་གཙོ་བོར་མཐོང་བས་བརྗིད། །ཁྱད་ཞུགས་ཡིད་དང་འཐད་པས་བརྗིད། །ཆོས་སྐུ་མཉམ་བྱུང་སྒོ་ནས་ཆེ། །ཐུགས་རྗེ་མཉམ་བྱུང་སྒོ་སྤྲུལ་རགས། །འདུ་བྱེད་མཉམ་བྱུང་སྒོ་སྤྲུལ་མང༌། །སྨོན་ལམ་སྒོ་རིགས་མཐུན་རྐྱེན་འཚམས། །སྤྱོད་ལམ་སྒོ་ནས་བཀུར་བར་འོས། །རིགས་བཙུན་པ་ཡི་གཙོ་བོར་མཐོང༌། །རང་བཞིན་གྲུབ་སྒོ་ནས་ཁྱད་ཞུགས། །ཕྲིན་ལས་སྒོ་ནས་ཡིད་དང་འཐད། །ཅེས་སོ།།

གཉིས་པ་གསུང་གི་གཟི་བརྗིད་ནི།

གདངས་ཆེན། ཞེས་པ་ནས། མཐོང་བའི་གཟི་བརྗིད་དང༌། ཞེས་པའི་བར་གྱིས་བསྟན་ཏེ།

གདངས་ཆེ་སྟོང་གསུམ་གང་བའི་གཟི་བརྗིད་དང་། ཚིག་མྱུར་ཐེ་ཚོམ་གཅོད་པའི་གཟི་བརྗིད་དང་།

བདག་ལ་ཉི་ཚེར་སྟོན་པའི་གཟི་བརྗིད་དང་། ཁྱད་པར་ཡོན་ཏན་མཐོང་བའི་གཟི་བརྗིད་དང་།

གསུང་གི་བརྗིད་གདུལ་བྱའི་གནས་རིལ་དུ་ཆོས་སྐུས་ཁྱབ་པར་གསལ་བས་གདངས་ཆེན་པོ་ཉིད་ལ། སྐད་ཅིག་ཙམ་ལ་སྒྲ་ཐ་དད་པར་སྒྲོགས་པས་སྟོང་གསུམ་གང་བའི་གཟི་བརྗིད་དང༌། འཁོར་གྱི་བསམ་པའི་གེགས་ཇི་སྙེད་པ་སྐད་ཀྱི་དབྱངས་ཀྱིས་ཚིག་མྱུར་བར་རེས་མོས་པ་མེད་པར་ཉེ་བར་སེལ་བས་ཐེ་ཚོམ་གཅོད་པར་མཛད་༼༢༥༤༽པའི་གཟི་བརྗིད་དང༌། འཁོར་རྣམས་གཅིག་ཀྱང་བྱམས་པའི་སྒོ་ནས་བདག་ཁོ་ན་ལ་དགོངས་ཤིང་ཐུགས་རྗེའི་སྒོ་ནས་ཆོས་ཉི་ཚེར་སྟོན་ནོ་སྙམ་དུ་སྣང་བའི་གཟི་བརྗིད་དང༌། ཤེས་པའི་བྱེ་བྲག་གི་རིགས་པས་ཁྱད་པར་འཕགས་ལ་ཚིག་གི་ཡོན་ཏན་གྱི་སྒོ་ནས་གསང་སྒོ་མཐོང་བའི་གཟི་བརྗིད་དང་བཞི་སྟེ། དེ་ཡང་གསུང་གི་བརྗིད་བཞི་ལ། །གདངས་ཆེ་སྟོང་གསུམ་གང་བས་བརྗིད། །ཚིག་མྱུར་ཐེ་ཚོམ་གཅོད་པས་བརྗིད། །བདག་ལ་ཉི་ཚེར་སྟོན་པས་བརྗིད། །ཁྱད་ཞུགས་ཡོན་ཏན་མཐོང་བས་བརྗིད། །ཆོས་སྐུས་ཁྱབ་སྒོ་ནས་གདངས་ཆེ། །ཐ་དད་སྒྲ་སྒྲོགས་སྟོང་གསུམ་འགེངས། །དབྱངས་ཀྱི་སྒོ་ནས་གོ་བར་གྱུར། །ཉེ་བར་གྱུར་པས་ཐེ་ཚོམ་གཅོད། །བྱམས་པའི་སྒོ་ནས་བདག་ལ་གཟིགས། །ཐུགས་རྗེའི་སྒོ་ནས་ཉི་ཚེར་སྟོན། ཤེས་པའི་བྱེ་བྲག་སྒོ་ཁྱད་ཞུགས། །ཚིག་གི་ཡོན་ཏན་སྒོ་ཀུན་འདུལ། །ཞེས་སོ།།

གསུམ་པ་ཐུགས་ཀྱི་གཟི་བརྗིད་ནི།

ཡངས་པས། ཞེས་པ་ནས། འདུལ་བའི་གཟི་བརྗིད་དང༌། ཞེས་པའི་བར་གྱིས་བསྟན་ཏེ།

ཡངས་པས་རེ་དོགས་མེད་པའི་གཟི་བརྗིད་དང་། གསལ་བས་མཐའ་གཉིས་སྤངས་པའི་གཟི་བརྗིད་དང་། ཐུགས་རྗེས་ཐུགས་དམ་རྫོགས་པའི་གཟི་བརྗིད་དང་། མ་རྨོངས་ཐབས་ཀྱིས་འདུལ་བའི་གཟི་བརྗིད་དང་།

ཐུགས་ཀྱི་བརྗིད་འཁོར་འདས་གཉིས་ཀ་མ་སྤངས་པར་གཉིས་སུ་མེད་པའི་མཁྱེན་པ་ཡངས་པས་བླང་དོར་བྲལ་ཏེ་རེ་དོགས་མེད་པའི་གཟི་བརྗིད་དང༌། གཉིས་མེད་ལ་གང་གིས་ཀྱང་མ་སྒྲིབ་པར་ལྷག་མཐོང་གསལ་བས་ཞི་གནས་མི་འགྱུར་བར་མཐའ་གཉིས་ངང་གིས་སྤངས་པའི་གཟི་བརྗིད་དང༌། མི་གཡོ་མི་འགོག་པར་རྒྱུན་མི་འཆད་པའི་ཐུགས་རྗེས་འཁོར་བ་མ་སྟོངས་བར་དུ་འགྲོ་བ་སྒྲོལ་བའི་དོན་མཛད་པས་ཐུགས་དམ་རྫོགས་པའི་གཟི་བརྗིད་དང༌། ཐབས་ཀུན་མ་འདྲེས་པར་མཁྱེན་པའི་ཤེས་རབ་ཆེན་པོས་མ་རྨོངས་པར་ཏིང་འཛིན་འབུམ་ཕྲག་མང་པོའི་ཐབས་ཀྱིས་འདུལ་བའི་གཟི་བརྗིད་དང་བཞི་སྟེ། དེ་ཡང་ཐུགས་ཀྱི་བརྗིད་བཞི་ལ། །ཡངས་ལ་རེ་དོགས་མེད་པས་བརྗིད། །གསལ་བ་མཐའ་གཉིས་སྤངས་པས་བརྗིད། །ཐུགས་རྗེ་ཐུགས་དམ་མཐར་ཕྱིན་བརྗིད། །མ་རྨོངས་ཐབས་ཀྱིས་འདུལ་བས་བརྗིད། །གཉིས་སུ་མེད་པའི་སྒོ་ནས་ཡངས། །སྤང་བླང་མེད་སྒོས་རེ་དོགས་མེད། །ལྷག་མཐོང་སྒོ་ནས་དབུ་མར་གསལ། །ཞི་གནས་མི་འགྱུར་མཐའ་རྣམས་སྤངས། །མཛད་རྒྱུན་མི་འཆད་ཐུགས་རྗེ་ཆེ། །ཐུགས་དམ་མཐར་ཕྱིན་ཇི་སྲིད་བཞུགས། །ཤེས་རབ་སྒོ་ནས་མ་རྨོངས་ཤིང༌། །ཏིང་འཛིན་སྒོ་ནས་ཐབས་ཀྱིས་འདུལ། །ཞེས་སོ།།

བཞི་པ་ཡོན་ཏན་གྱི་གཟི་བརྗིད་ནི།

མེད་ལ། ཞེས་པ་ནས། མ་གོས་པའི་གཟི་བརྗིད་དང༌། ཞེས་པའི་བར་གྱིས་བསྟན་ཏེ།

མེད་ལ་ཟད་མི་ཤེས་པའི་གཟི་བརྗིད་དང་། གཅིག་ལ་འདོད་དགུར་སྟོན་པའི་གཟི་བརྗི་དང་།

གནོད་སྦྱོར་ཕན་པར་མཛད་པའི་གཟི་རྗིད་དང་། ཐབས་མཁས་སྐྱོན་གྱིས་མ་གོས་པའི་གཟི་བརྗིད་དང་།

ཡོན་ཏན་གྱི་བརྗིད་༼༢༥༥༽ངོ་བོ་འདི་འདྲར་མ་གྲུབ་པས་ བདག་མེད་ལ། ཀུན་རྫོབ་ཏུ་དངོས་གྲུབ་འགྲིབ་པ ་མེད་པར་འབྱུང་བས་ཟད་མི་ཤེས་པའི་གཟི་བརྗིད་དང༌། ངོ་བོ་ཡེ་ཤེས་སུ་གཅིག་ལ་ལྷུན་གྱིས་གྲུབ་པའི་བྱིན་རླབས་ནོར་བུ་རིན་པོ་ཆེ་ལྟར་སེམས་ཀྱིས་བསམ་དོན་འདོད་རྒུར་སྟོན་པའི་གཟི་བརྗིད་དང༌། སེམས་ཅན་གྱི་ལས་ཀྱི་བསྒྲལ་གནས་ལ་སོགས་པའི་གནོད་སྦྱོར་མཛད་པ་ཡང་གྲུབ་འབྲས་ཀྱི་སྒོ་ནས་སྨན་ཆེན་པོ་ཉིད་དུ་གྱུར་པས་ཕན་པར་མཛད་པའི་གཟི་བརྗིད་དང༌། མཛད་སྤྱོད་གང་ལའང་ཤེས་བྱའི་སྒོ་ནས་ཐབས་ལ་མཁས་པས་ས་བོན་དུ་གྱུར་བ་མེད་པར་སྤྱོད་པའི་སྒོ་ནས་སྐྱོན་གྱིས་མ་གོས་པའི་པདྨ་ལྟ་བུའི་གཟི་བརྗིད་དང་བཞི་སྟེ། དེ་ཡང་ཡོན་ཏན་བརྗིད་བཞི་ལ། །མེད་ལ་ཟད་མི་ཤེས་པས་བརྗིད། །གཅིག་ལས་འདོད་རྒུར་འབྱུང་བས་བརྗིད། །གནོད་སྦྱོར་ཕན་པར་མཛད་པས་བརྗིད། །ཐབས་མཁས་སྐྱོན་གྱིས་མ་གོས་བརྗིད། །བདག་ཏུ་མི་འཛིན་སྒོ་ནས་མེད། །མེད་པའི་སྒོ་ནས་ཟད་མི་ཤེས། །ཡེ་ཤེས་དག་གི་སྒོ་ནས་གཅིག །སེམས་ཀྱི་བསམ་སྒོ་འདོད་རྒུར་སྟོན། །སེམས་ཅན་སྒོ་ནས་གནོད་པར་སྦྱོར། །གྲུབ་རྒྱུའི་སྒོ་ནས་ཕན་པར་མཛད། །ཤེས་བྱའི་སྒོ་ནས་ཐབས་ལ་མཁས། །སྤྱོད་པའི་སྒོ་ནས་སྐྱོན་མ་གོས། །ཞེས་སོ།།

ལྔ་པ་ཕྲིན་ལས་ཀྱི་གཟི་བརྗིད་ནི།

མི་བསྙེངས། ཞེས་པ་ནས། གྲུབ་པའི་གཟི་བརྗིད་དོ། །ཞེས་པའི་བར་གྱིས་བསྟན་ཏེ།

མི་བསྙེངས་ཉམ་ཕག་རོལ་པའི་གཟི་བརྗིད་དང་། འཁོར་བ་ཡུན་རིང་མི་བསྙེལ་བའི་གཟི་བརྗིད་དང་།

མགོན་སྐྱབས་རྒྱུན་དུ་མཛད་པའི་གཟི་བརྗིད་དང་། དགོངས་དོན་ལྷུན་གྱིས་གྲུབ་པའི་གཟི་བརྗིད་དོ།།

ཕྲིན་ལས་ཀྱི་བརྗིད་སྒྱུ་མར་མཁྱེན་པས་བདུད་དཔུང་གིས་བག་ཚ་བ་མེད་པས་མི་བསྙེངས་ལ་རང་བཞིན་མཉམ་པར་མཁྱེན་པའི་གདེངས་མངའ་བས་ཉམ་བག་རོལ་པའི་གཟི་བརྗིད་དང༌། དོན་མཛད་པའི་སྒོ་ནས་འཁོར་བར་ཐོག་མཐའ་མེད་པར་བཞུགས་ལ་ངལ་དུབ་མི་མངའ་བར་བྱ་བ་མེད་པའི་སྒོ་ནས་ཡུན་རིང་མི་བསྙེལ་བའི་གཟི་བརྗིད་དང༌། ཐུགས་རྗེའི་མཐུ་ཡིས་སྒོ་ནས་འགྲོ་བའི་མགོན་སྐྱབས་མཆོག་ཉིད་དམ་བཅའ་བའི་སྒོ་ནས་དུས་ཆད་པ་མེད་པར་རྒྱུན་དུ་མཛད་པའི་གཟི་བརྗིད་དང༌། ཡེ་ཤེས་རྩེ་གཅིག་གི་སྒོ་ནས་འགྲོ་བ་བསྒྲལ་བའི་དགོངས་དོན་བྱ་བ་མཐར་ཕྱིན་པས་ལྷུན་གྱིས་གྲུབ་པའི་གཟི་བརྗིད་དང་བཞི་སྟེ། དེ་ལ་ཕྲིན་ལས་བརྗིད་བཞི་ལ། །མི་དངས་ཉམ་བག་ཆེ་བས་བརྗིད། །འཁོར་བར་ཡུན་རིང་མི་བསྙེལ་བརྗིད། །མགོན་སྐྱབས་རྒྱུན་དུ་མཛད་པས་བརྗིད། །དགོངས་པའི་དོན་རྣམས་བསྒྲུབས་པས་བརྗིད། །སྒྱུ་མར་སྟོན་སྒོ་ནས་མི་དངས། །རང་བཞིན་སྒོ་ནས་ཉམ་བག་རོལ། །དོན་མཛད་འཁོར་བར་༼༢༥༦༽ཡུན་རིང་བཞུགས། །བྱ་མེད་སྒོ་ནས་མི་བསྙེལ་ལ། །མཐུ་ཡི་སྒོ་ནས་མགོན་སྐྱབས་ཆེ། །དམ་བཅས་འགྲོ་དོན་མྱུར་དུ་མཛད། །རྩེ་གཅིག་མཐའ་གཉིས་དོན་ལ་དགོངས། །ནན་ཏན་སྒོ་ནས་བྱ་བ་གྲུབ། །དེ་དག་བརྗིད་ནི་ཉི་ཤུ་སྒོ། །བཞི་བཅུ་དང་ནི་སྤྱིར་དྲུག་ཅུ། །ཞེས་པའི་དོན་རྣམས་ལ་རྟོག་པ་སྟེ་དེས་ཀུན་འདུས་ཀྱི་ལེའུ་དང་པོ་བཤད་ཅིང་འགྲེལ་བ་ནི་རྟོག་པའི་རི་བོ་དང་མཚུངས་པ་ཉིད་དོ།།

བཅུ་པ་རྟགས་ཀྱི་རྟོག་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། མངའ་བའི་རྟགས་ཏེ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་རྟགས་ཀྱི་རྟོག་པ་གང་ཞེ་ན། འདི་ལྟ་སྟེ། ཆོས་ཀྱི་རྒྱལ་པོ་བསྙེངས་པ་མི་མངའ་བའི་དབང་ཆེན་པོ་བརྙེས་པའི་རྟགས་དང་། ཉམ་ཕག་ཆེན་པོ་རོལ་བའི་རྟགས་དང་། གང་གི་དཔུང་གིས་མི་བསྙེངས་པའི་རྟགས་དང་། ཡུན་གྱི་དོན་སྲིད་བརྙེས་པའི་རྟགས་དང་། སྟོབས་ཀྱིས་གཞན་གང་གནོན་པའི་རྟགས་དང་། རྫུ་འཕྲུལ་གྱིས་མི་གནས་པར་བསྐྱོད་པའི་རྟགས་དང་། མི་ཟད་པའི་མཛོད་མངའ་བའི་རྟགས་ཏེ།

ལང་ཀའི་བདག་པོ། རྟགས་ཀྱི་རྟོག་པ་གང་ཞེ་ན། འདི་ལྟ་སྟེ། ཆོས་ཀྱི་མངའ་བདག་ཆེན་པོ་དབང་བཅུ་བརྙེས་པས་ཆོས་ཀྱི་འཁོར་ལོ་བཅུ་བསྐོར་བ་ལ་དབང་བསྒྱུར་བའི་ཆོས་ཀྱི་རྒྱལ་པོ་ཐེ་ཚོམ་གྱིས་བསྙེངས་པ་མི་མངའ་བའི་མངའ་དབང་ཆེན་པོ་བརྙེས་པའི་ཡོན་ཏན་སྣང་ཞིང་མཚོན་པའི་རྟགས་འཁོར་ལོ་རིན་པོ་ཆེ་ཞེས་པའི་མིང་ཡང་འགྲུབ་པ་དང༌། ཡུམ་བཞིས་མཉེས་པ་ཕུལ་ཏེ་ཐབས་དང་ཤེས་རབ་ཀྱི་བདེ་བ་དམ་པའི་ཉམ་བག་ཆེན་པོ་ཕྱག་རྒྱ་བཞི་ལ་རོལ་པའི་ཡོན་ཏན་རྒྱུན་ཆད་མེད་པར་སྣང་ཞིང་མཚོན་པའི་རྟགས་བཙུན་མོ་རིན་པོ་ཆེ་དང༌། གང་གར་དགུའམ་ཚུལ་དགུའི་ཡོན་ཏན་རྫོགས་པའི་མཐུ་དབང་མངའ་བས་བདུད་བཞིའི་སྡེ་ཚོགས་དག་གི་དཔུང་གིས་མི་བསྙེངས་ཞིང་མི་ཐུབ་པར་ཀུན་ནས་འཇོམས་པར་སྣང་བ་མཚོན་པའི་རྟགས་དམག་དཔོན་རིན་པོ་ཆེ་དང༌། འཁོར་བའི་དུས་ཐོག་མཐའ་མེད་པར་ཐུན་མོང་མིན་པའི་ཚད་མེད་བཞིས་དོན་གཉིས་རྫོགས་པའི་ཆབ་སྲིད་འཛིན་པས་ཡུན་གྱི་དོན་སྲིད་ཆེན་པོ་བརྙེས་པའི་རྟགས་ཀྱི་ཁྱིམ་བདག་རིན་པོ་ཆེ་དང༌། ཐུན་མོང་མ་ཡིན་པའི་སྟོབས་མཆོག་བཅུ་མངའ་བས་གཞན་དོན་སྤྱོད་པའི་སྟོབས་ཀྱིས་གཞན་མི་མཐུན་པའི་ཕྱོགས་གང་ཡང་མི་ལྡང་བར་ཟིལ་གྱིས་གནོན་པར་མཛད་པའི་རྟགས་གླང་པོ་རིན་པོ་ཆེ་དང༌། སྐད་ཅིག་མ་ལའང་ཐབས་ཁྱད་པར་ཅན་གྱི་རྐང་པ་བཞིས་བགྲོད་ནས་མཐར་ཐུག་གི་ས་ཆེན་པོར་སླེབ་ཅིང་ནོན་པར་བྱེད་པའི་རྫུ་འཕྲུལ་གྱིས་མི་གནས་པར་བསྐྱོད་པ་མཚོན་པའི་རྟགས་རྟ་མཆོག་རིན་པོ་ཆེ་དང༌། རྣམ་པ་བཞིའི་སྒོ་ནས་རེ་འདོད་སྐོང་བས་མི་ཟད་པའི་མཛོད་དམ་པ་ཡོན་ཏན་འཕེལ་འགྲིབ་མི་མངའ་བར་སྣང་ཞིང་མཚོན་པའི་རྟགས་ནོར་བུ་རིན་པོ་ཆེ་མངའ་བ་རྣམས་ཏེ། ལྷ་རྒྱུད་ལས། རྒྱལ་རྟགས་ནང་ནས་ཕྱི་རོལ་ལ། །ཤར་༼༢༥༧༽མཚོན་རིན་ཆེན་སྣ་བདུན་ནི། །འཁོར་ལོ་དབང་བཅུས་སྐྱེ་བཞི་བསྒྱུར། །བཙུན་མོ་ཡུམ་བཞིས་རྒྱལ་མཉེས་འབུལ། །དམག་དཔོན་ཚུལ་དགུས་དཔུང་ཡང་འཇོམས། །ཁྱིམ་བདག་ཚད་མེད་ཆབ་སྲིད་འཛིན། །གླང་པོ་སྟོབས་བཅུས་བདག་གཞན་དོན། །རྟ་མཆོག་རྐང་བཞིས་བགྲོད་པར་སླེབ། །ཡིད་བཞིན་རྣམ་བཞིས་རེ་འདོད་སྐོང༌། །ཞེས་སོ།།

གཉིས་པ་རྒྱས་པར་བཤད་པ་ལ་བདུན་ཏེ། འཁོར་ལོ་རིན་པོ་ཆེ། བཙུན་མོ་རིན་པོ་ཆེ། དམག་དཔོན་རིན་པོ་ཆེ། ཁྱིམ་བདག་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། ནོར་བུ་རིན་པོ་ཆེའོ། །དང་པོ་ནི།

ལང་ཀའི། ཞེས་པས་ནས། སྨོན་ལམ་ལ་དབང་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་མངའ་དབང་ཆེན་པོ་བརྙེས་པའི་རྟགས་ནི་འདི་ལྟ་སྟེ། གང་དབང་བཅུ་ཡོངས་སུ་རྫོགས་པ་སྟེ། བཅུ་གང་ཞེ་ན། སྐྱེ་བ་དང་། ཡོ་བྱད་དང་། མོས་པ་དང་། རྫུ་འཕྲུལ་དང་། ཆོས་དང་། ཡེ་ཤེས་དང་།

སེམས་དང་། ཚེ་དང་། ལས་དང་། སྨོན་ལམ་ལ་དབང་བའོ།།

དེ་དག་ཡན་ལག་གི་དབང་དུ་རྒྱས་པར་བསྟན་པ་ནི། གང་ཞེ་ན། ལང་ཀའི་བདག་པོ། དེ་ལ་མངའ་དབང་ཆེན་པོ་བརྙེས་པའི་རྟགས་ནི། འདི་ལྟ་སྟེ། གང་དབང་བཅུ་ཡོངས་སུ་རྫོགས་ཏེ་ལྷུན་གྱིས་གྲུབ་པའི་ཡོན་ཏན་སྣང་བའོ། །དེ་ལ་དབང་བཅུ་པོ་གང་ཞེ་ན། མན་ངག་གི་ཚིགས་སུ་ན་སྐྱེ་བ་ལ་དབང་བ་རིགས་ཀྱི་སྤྲུལ་སྐུར་སྟོན་པ་སྟེ། ཁྲོ་བོ་རྟོག་པ་ལྷ་རྒྱུད་ལས། སྐྱེ་བཞི་སྐུར་སྟོན་སྐྱེ་བཞི་སྒྲོལ་མཛད་པ། །ལྷ་མི་སྡིག་སྤྲུལ་སྐྱེ་བ་བཞི་རུ་བསྟན། །ཞེས་པ་ལྟར་དང༌། ཡོ་བྱད་ལ་དབང་བ་འདོད་པ་ལྔ་ལ་རོལ་པ་སྟེ། ཡོ་བྱད་འདོད་པའི་ཡོན་ཏན་ལྔ་དང་ནི། །རྟོག་པ་གཞོམ་ཕྱིར་སྨན་ལྔ་དང་ལེན་རོལ། །ཞེས་པ་དང༌། མོས་པ་ལ་དབང་བ་བདག་གཞན་གྱི་མོས་པ་བཞིན་སྣང་བ་སྟེ། ཇི་ལྟར་མོས་བཞིན་ཚུལ་དགུའི་གཟུགས་སྟོན་པ། །གར་དབང་ཐབས་ཀྱི་ཚུལ་དགུས་རོལ་པ་མཛད། །ཅེས་པ་དང༌། རྫུ་འཕྲུལ་ལ་དབང་བ་འཕྲུལ་གྱི་ཆོ་འཕྲུལ་སྟོན་པ་སྟེ། རྫུ་འཕྲུལ་བ་སྤུའི་དབྱིངས་ནས་ཕྲ་མེན་འཕྲོ། །ལུས་ནི་ཅིར་རྫུ་སེམས་ནི་ཆོ་འཕྲུལ་སྟོན། །ཞེས་དང༌། ཆོས་ལ་དབང་བ་གསུང་གཅིག་གིས་ཆོས་སྐད་སོ་སོར་སྒྲོགས་པ་སྟེ། གད་རྒྱངས་གདངས་ངར་སྣ་ཚོགས་ཕྱོགས་བཅུར་སྒྲོགས། །མཆེ་བས་ཟིལ་གནོན་ཆོས་རྣམས་ཐ་དད་སྟོན། །ཞེས་པ་དང༌། ཡེ་ཤེས་ལ་དབང་བ་ཡེ་ཤེས་ཀུན་ལ་མ་རྨོངས་པ་སྟེ། །ཤེས་རབ་ཐབས་ལྡན་སྤྱན་གྱིས་དབུ་མའི་ངང༌། །དབྱིངས་ལས་མི་གཡོ་ཅིར་ཡང་ས་ལེ་མཁྱེན། །ཞེས་དང༌། སེམས་ལ་དབང་བ་ཏིང་ངེ་འཛིན་གྱི་སྒོ་འབུམ་ཕྲག་ལ་རོལ་པ་སྟེ། སེམས་ཀྱི་བྱེ་བྲག་ཏིང་འཛིན་ས་ཡ་འཕྲོ། །བསམ་གྱིས་མི་ཁྱབ་བཞི་ལ་རོལ་པར་མཛད། །ཅེས་དང༌། ཚེ་ལ་དབང་བ་འཁོར་བ་ཇི་སྲིད་དུ་བཞུགས་པ་སྟེ། རྡོ་རྗེ་སྡེར་མོ་པགས་པ་སྤུ་༼༢༥༨༽ཕྲེང་བརྒྱན། །འཁོར་བ་ཇི་སྲིད་བཞུགས་པའི་ཚེ་ལ་དབང༌། །ཞེས་དང༌། ལས་ལ་དབང་བ་སྦྱོར་སྒྲོལ་གྱི་ཕྲིན་ལས་མཛད་པ་སྟེ། ལྟ་བ་རྣམ་བཞིའི་སྤྱན་ཟུར་གྱིས་བསྐུལ་བས། །ཕྲ་མེན་བཞི་འཕྲོ་ཕྱོགས་བཞིར་ལས་བཞི་མཛད། །ཅེས་དང༌། སྨོན་ལམ་ལ་དབང་བ་རང་དབང་མེད་པར་སྟོན་པ་སྟེ། སྨོན་ལམ་དབང་གིས་དྲག་པོའི་སྐུར་སྟོན་ཞིང༌། །དུས་མཐའི་བསྐལ་པ་བཞིན་དུ་བཤོལ་དུ་མེད། །ཅེས་བྱའོ།།

གཉིས་པ་བཙུན་མོ་རིན་པོ་ཆེ་ནི།

ལང་ཀའི། ཞེས་པ་ནས། རོལ་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཉམ་ཕག་ཆེན་པོ་རོལ་པའི་རྟགས་གང་ཞེ་ན། འདི་ལྟ་སྟེ། ཕྱག་རྒྱ་བཞི་ལ་རོལ་པ་སྟེ། སྐུའི་མཉམ་ཉིད་དང་། ཐུགས་ཀྱི་ཐིགས་པ་དང་། གསུང་གི་འགྲེལ་པ་དང་། འཕྲིན་ལས་ཀྱི་རླབས་ལ་རོལ་པའོ།།

ལང་ཀའི་བདག་པོ། ཉམ་བག་ཆེན་པོར་རོལ་པའི་རྟགས་གང་ཞེ་ན། འདི་ལྟ་སྟེ། ཕྱག་རྒྱ་བཞི་ལ་རོལ་པ་སྟེ། སྐུའི་ཕྱག་རྒྱ་ཆེན་པོ་གཉིས་སུ་མེད་པས་མཉམ་པ་ཉིད་དེ། མ་ཆགས་རྡོ་རྗེའི་གཟུངས་ཀྱི་ཡུམ་གྱིས་འཁྱུད། །ཅེས་དང༌། ཐུགས་དམ་ཚིག་གི་ཕྱག་རྒྱ་དོན་གྱི་དབྱིངས་ལས་མི་འདའ་བར་བརྟན་པའི་ཐིགས་པ་སྟེ། ཞི་གནས་ཏིང་འཛིན་མི་གཡོ་ཡུམ་གྱིས་སྦྱོར། །ཞེས་དང༌། གསུང་ཆོས་ཀྱི་ཕྱག་རྒྱ་བདེ་མཆོག་ཟུང་འཇུག་གི་རོལ་པར་འགྲེལ་བ་སྟེ། ལྷག་མཐོང་ཡེ་ཤེས་ཡུམ་གྱིས་གཉིས་མེད་འབེབས། །ཞེས་དང༌། ཕྲིན་ལས་ལས་ཀྱི་ཕྱག་རྒྱ་བྱང་ཆུབ་ཀྱི་སེམས་གསལ་བའི་རྦ་རླབས་ལ་རོལ་པ་སྟེ། ཐོགས་མེད་ཤུགས་འཆང་དངོས་གྲུབ་ཡུམ་གྱིས་བསྐྱོད། །ཅེས་བྱའོ།།

གསུམ་པ་དམག་དཔོན་རིན་པོ་ཆེ་ནི།

ལང་ཀའི། ཞེས་པ་ནས། ཚུལ་ལོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་གི་དཔུང་གིས་མི་བསྙེངས་པའི་རྟགས་ནི་འདི་ལྟ་སྟེ། སྒེག་པའི་ཚུལ་དང་། དཔའ་བའི་ཚུལ་དང་། འཇིགས་པའི་ཚུལ་དང་། གཤེ་བའི་ཚུལ་དང་། བཞད་པའི་ཚུལ་དང་། སྙིང་རྗེའི་ཚུལ་དང་།

རྔམ་པའི་ཚུལ་དང་། ངོ་མཚར་བའི་ཚུལ་དང་། ཞི་བའི་ཚུལ་ལོ།།

ལང་ཀའི་བདག་པོ། གང་གི་དཔུང་གིས་མི་བསྙེངས་པའི་རྟགས་ནི། འདི་ལྟ་སྟེ། དུར་ཁྲོད་ཀྱི་རྒྱན་དང་ཆ་ལུགས་དང་ལྡན་པས་སྒེག་པའི་ཚུལ་སྟེ། སྒེག་པས་འགྲོ་བ་ཤེས་རབ་སྐྱེད་པའི་ཚུལ། །ཞེས་དང༌། བདུད་བཞིའི་དཔུང་བཅོམ་སྟེ་བག་ཚ་མེད་པར་གདན་དུ་མཛད་པས་དཔའ་བོའི་ཚུལ་སྟེ། ཉམ་ང་མེད་པའི་མཛད་སྤྱོད་དཔའ་བོའི་ཚུལ། །ཞེས་དང༌། ཞལ་དབུས་མཐིང་ལ་རྔམ་བརྗིད་དང་ལྡན་ཞིང་སྐུ་ཆེ་ཡན་ལག་རགས་པས་འཇིགས་པའི་ཚུལ་ཏེ། གདུག་རྩུབ་རྔམ་པས་བརྒྱན་པས་འཇིགས་པའི་ཚུལ། །ཞེས་དང༌། ཞལ་གཡོན་དམར་གདངས་གདུག་པས་གཤེ་བའི་ཚུལ་ཏེ། ལོག་པར་ལྟ་བ་ཞེ་གཅོད་གཤེ་བའི་ཚུལ། །ཞེས་དང༌། ཞལ་གཡས་དཀར་ལ་དགོད་པས་ཐེག་ཆེན་གསང་བ་སྒྲོགས་པས་བཞད་པའི་ཚུལ་ཏེ། རྨད་དུ་བྱུང་བའི་ཆོས་སྒྲོགས་བཞད་པའི་ཚུལ། །ཞེས་དང༌། རྒྱུད་དྲུག་ཐུགས་རྗེས་འདོན་ཅིང་འདུལ་དཀའ་སྒྲོལ་བས་སྙིང་རྗེའི་ཚུལ་ཏེ། ཤིན་ཏུ་གདུལ་དཀའ་༼༢༥༩༽ཁྲོ་བོས་སྙིང་རྗེའི་ཚུལ། །ཞེས་དང༌། དུག་གསུམ་ཞལ་དུ་གསོལ་བས་བདུད་ལ་རྔམ་པའི་ཚུལ་ཏེ། སྨོན་ལམ་དབང་གིས་མི་བཤོལ་རྔམ་པའི་ཚུལ། །ཞེས་དང༌། སྐུ་དང་གསུང་གི་ལས་ལྔ་རྫོགས་པར་མཛད་པས་ཡ་མཚན་ཆེ་བའམ་ངོ་མཚར་བའི་ཚུལ་ཏེ། ཉོན་མོངས་གྲུབ་པའི་རྒྱུར་མཛད་ངོ་མཚར་ཚུལ། །ཞེས་དང༌། དགོངས་པ་ཆོས་ཉིད་ཀྱི་ཀློང་ཆེན་པོ་ཆོས་སྐུ་མཚན་མ་མེད་པར་བཞུགས་པས་ཤིན་ཏུ་ཞི་བའི་ཚུལ་ཏེ། ཁྲོ་དྲག་དབྱིངས་ནས་མི་གཡོ་ཞི་བའི་ཚུལ། །ཞེས་བྱ་སྟེ། དེ་ལ་ཕྱི་ཚུལ་གར་དགུ་ནི། སྒེག་པ་དཔའ་བ་འཇིགས་པའི་སྐུ། །དགོད་དང་གཤེ་དང་རྔམ་པ་གསུང༌། །ངོ་མཚར་སྙིང་རྗེ་ཞི་བའི་ཐུགས། །ཞེས་པའི་ཚུལ་ལོ།།

བཞི་པ་ཁྱིམ་བདག་རིན་པོ་ཆེ་ནི།

ལང་ཀའི། ཞེས་པ་ནས། མདོའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡུན་གྱི་དོན་སྲིད་བརྙེས་པའི་རྟགས་ནི་འདི་ལྟ་སྟེ། བྱམས་པའི་བློ་དང་།

སྙིང་རྗེའི་གྲོས་དང་། དགའ་བའི་ཐབས་དང་། བཏང་སྙོམས་ཀྱི་མདོའོ།།

ལང་ཀའི་བདག་པོ། ཡུན་གྱི་དོན་སྲིད་པ་རྙེས་པའི་རྟགས་ནི། འདི་ལྟ་སྟེ། བྱམས་པའི་བློ་དྲག་པོས་རྗེས་སུ་འཛིན་པ་དང༌། སྙིང་རྗེའི་གྲོས་ཕུང་པོ་རྡོ་རྗེས་གཏམས་པ་དང༌། དགའ་བའི་ཐབས་རྣམ་ཤེས་གནས་སུ་སྟོབས་པ་དང༌། བཏང་སྙོམས་ཀྱི་མདོ་མཉམ་ཆེན་དབྱིངས་ལ་སྦྱོར་བ་སྟེ། ཁྲོ་གཏུམ་ཚད་མེད་བྱམས་པར་སྣང༌། །གསོད་ཆེན་སྙིང་རྗེའི་བདག་ཉིད་དེ། །བསྒྲལ་ཞིང་སྟོབས་པས་དགའ་བའི་མཆོག །ཡལ་བར་མི་འདོར་བཏང་སྙོམས་སོ། །ཞེས་བྱའོ།།

ལྔ་པ་གླང་པོ་རིན་པོ་ཆེ་ནི།

ལང་ཀའི། ཞེས་པ་ནས། སྟོབས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་སྟོབས་ཀྱིས་གཞན་གང་གནོན་པའི་རྟགས་ནི་འདི་ལྟ་སྟེ། སྙིང་རྗེའི་སྟོབས་དང་། ཆོས་ཀྱི་སྟོབས་དང་། མི་འབྱེད་པའི་སྟོབས་དང་། གྲུབ་པའི་སྟོབས་དང་། མ་སྤངས་པའི་སྟོབས་དང་། མ་གཡོས་པའི་སྟོབས་དང་། སྨོན་ལམ་གྱི་སྟོབས་དང་། སྤྲུལ་པའི་སྟོབས་དང་། མི་གཏོང་བའི་སྟོབས་དང་། ཆགས་པའི་སྟོབས་སོ།།

ལང་ཀའི་བདག་པོ། སྟོབས་ཀྱིས་གཞན་གང་གནོན་པའི་རྟགས་ནི། འདི་ལྟ་སྟེ། དྲེགས་པ་ཅན་གྱི་དུག་ལྔ་སྒྲོལ་བས་སྙིང་རྗེའི་སྟོབས་དང༌། དེ་ལ་མཚན་མར་མི་དམིགས་པས་མ་གོས་པ་ཆོས་ཉིད་ཀྱི་སྟོབས་དང༌། དེ་ལྟར་མཁྱེན་ཏེ་སྤྱོད་པས་བླང་དོར་མི་འབྱེད་པའི་སྟོབས་དང༌། དེ་བས་རྣམ་པ་བཞིས་དངོས་གྲུབ་ཀྱི་རྒྱུར་གྲུབ་པའི་སྟོབས་དང༌། དེ་ཉིད་རིལ་སྐུ་ལ་བརྒྱན་ཅིང་ཞལ་དུ་གསོལ་བས་མ་སྤངས་པའི་སྟོབས་དང༌། དེ་ཡིས་སྐྱོན་གྱིས་མི་གོས་པར་དོན་ལས་མ་གཡོས་པའི་སྟོབས་དང༌། དེ་ཡིས་མཛད་པ་མཐར་ཕྱིན་པ་སྨོན་ལམ་གྱི་སྟོབས་དང༌། དེ་ལྟར་བཀོད་པ་དཔག་མེད་སྟོན་པས་སྤྲུལ་པའི་སྟོབས་དང༌། དེ་རྣམས་སླར་ཡང་མི་འཁོར་བས་མི་གཏོང་བའི་སྟོབས་དང༌། དེ་ལྟར་འཕྲལ་དང་ཡུན་དུ་དོན་མཛད་པས་ཆགས་པའི་སྟོབས་དང་བཅུ་སྟེ། སྙིང་རྗེ་ཆེན་པོའི་སྟོབས་ཀྱིས་དྲེགས་པ་སྒྲོལ། །ཆོས་ཉིད་སྟོབས་ནི་མི་དམིགས་ནམ་མཁའི་མདོག །མི་འབྱེད་སྟོབས་ཀྱིས་བརླང་པོའི་རྫས་ལ་རོལ། །༼༢༦༠༽གྲུབ་པའི་སྟོབས་ཀྱིས་བདུད་རྩི་དངོས་གྲུབ་རྒྱུ། །མ་སྤངས་སྟོབས་ཀྱིས་གདོས་བཅས་སྐུ་ལ་བརྒྱན། །མ་གཡོས་སྟོབས་ནི་དོན་མཐུན་གྲོལ་བའི་རྒྱུན། །སྨོན་ལམ་སྟོབས་ནི་བསྐལ་པ་ཡོངས་སྒྲོལ་མཛད། །སྤྲུལ་པའི་སྟོབས་ནི་མགོ་བརྙན་ཕྲ་མེན་འཕྲོ། །འཕྲང་དོག་འཁོར་བར་ལོག་ལྟ་གཅིག་མི་གཏོང༌། །ཆགས་པའི་སྟོབས་ནི་ཡུམ་ཆགས་སྤྱན་དམར་བཟློག །ཅེས་བྱ་བ་རྣམས་སོ།།

དྲུག་པ་རྟ་མཆོག་རིན་པོ་ཆེ་ནི།

ལང་ཀའི། ཞེས་པ་ནས། རྫུ་འཕྲུལ་ལོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་རྫུ་འཕྲུལ་གྱིས་མི་གནས་པར་བསྐྱོད་པའི་རྟགས་གང་ཞེ་ན། འདི་ལྟ་སྟེ། ཆོས་ཉིད་ཀྱི་རྫུ་འཕུལ་དང་། ཡེ་ཤེས་ཀྱི་རྫུ་འཕྲུལ་དང་། ཐུགས་རྗེའི་རྫུ་འཕྲུལ་དང་། སྤྲུལ་པའི་རྫུ་འཕྲུལ་ལོ།།

ལང་ཀའི་བདག་པོ། རྫུ་འཕྲུལ་གྱིས་མི་གནས་པར་བསྐྱོད་པའི་རྟགས་གང་ཞེ་ན། འདི་ལྟ་སྟེ། མི་གཡོ་བའི་ངང་ལ་མ་འདྲེས་ཡོངས་སུ་རྫོགས་པས་ཆོས་ཉིད་ཀྱི་རྫུ་འཕྲུལ་ཏེ། ཆོས་ཉིད་རྫུ་འཕྲུལ་མེད་བཞིན་ཅིར་སྣང་བ། །མཁའ་ལ་འཇའ་ཚོན་བཞིན་ཏེ་རྣམ་པར་བཀྲ། །ཞེས་དང༌། ཆོས་ཀྱི་དབྱིངས་རྟོགས་ནས་མཁྱེན་པ་སྒྲིབ་མེད་དུ་གསལ་བས་ཡེ་ཤེས་ཀྱི་རྫུ་འཕྲུལ་ཏེ། ཡེ་ཤེས་མཚན་ཉིད་མ་སྒྲིབ་དག་པའི་ཕྱིར། །མཁའ་ལ་ཉི་ཤར་འདྲ་སྟེ་གསལ་ལ་སྟོང༌། །ཞེས་དང༌། དཔེར་ན་སྤྲིན་གྱིས་གར་ཁྱབ་ནམ་མཁས་ཁྱབ་པ་ལྟར་བསོད་ནམས་ཀྱིས་གར་ཁྱབ་ཡེ་ཤེས་ཀྱིས་ཁྱབ་ལ། ཡེ་ཤེས་ཀྱིས་གར་ཁྱབ་ཐུགས་རྗེ་མི་གཡོ་བས་ཁྱབ་པར་གདལ་བས་ཐུགས་རྗེའི་རྫུ་འཕྲུལ་ཏེ། ཚོགས་གཉིས་རྫོགས་པའི་རྫུ་འཕྲུལ་བྱེ་བྲག་ནི། །མཁའ་དང་མཉམ་པས་སྤྲིན་ཕུང་བཞིན་དུ་གདལ། །ཞེས་དང༌། འགྲོ་འོང་མེད་པར་གང་ལ་གང་འཚམས་སུ་འདུལ་བས་སྤྲུལ་པའི་རྫུ་འཕྲུལ་ཏེ། སྤྲུལ་པའི་བྱེ་བྲག་འཕྲོ་བའི་རྫུ་འཕྲུལ་ནི། །རོ་གཅིག་ཆར་འབབ་སྣོད་ཀྱི་བྱེ་བྲག་ཕྱེ། །ཅིར་ཡང་སྣང་ཞིང་མ་ངེས་སྣང་ལ་མེད། །དེས་ན་མིང་གི་དོན་བཞི་རྫོགས་པར་བཤད། །ཅེས་པས་གསལ་ལོ།།

བདུན་པ་ནོར་བུ་རིན་པོ་ཆེ་ནི།

ལང་ཀའི། ཞེས་པ་ནས། འཆད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མི་ཟད་པའི་མཛོད་མངའ་བའི་རྟགས་གང་ཞེ་ན། འདི་ལྟ་སྟེ། འདོད་པ་སྐོང་བ་དང་།

མི་ཟད་པར་འབྱུང་བ་དང་། མུན་པ་སེལ་བ་དང་། རྒྱུན་མི་འཆད་པའོ།།

ལང་ཀའི་བདག་པོ། མི་ཟད་པའི་མཛོད་མངའ་བའི་རྟགས་གང་ཞེ་ན། འདི་ལྟ་སྟེ། ལྷུན་གྱིས་རྫོགས་པའི་ཁྲོ་བོའི་ཐུགས་ཡེ་ཤེས་ནི་རིན་པོ་ཆེ་ཉིད་དེ། དཔེ་ནོར་བུ་མཆོག་ལྟ་བུ་བས། རྣམ་པར་གྲོལ་བའི་སྒོ་གདུལ་བྱའི་མོས་པ་ལྟར་སྣང་ནས་འདོད་པ་སྐོང་བ་སྟེ། འགྲོ་རྣམས་ཇི་ལྟར་འདུལ་བཞིན་རེ་འདོད་སྐོང༌། །ཞེས་དང༌། འོ་ན་ཟད་ པ་ཡོད་དམ་ཞེ་ན། དབྱིངས་དང་མཉམ་པས་མི་ཟད་པར་ཡོན་ཏན་འབྱུང་སྟེ། མི་ཟད་བདག་མེད ་གཏེར་ཆེན་ནམ་མཁའི་མཛོད། །ཅེས་དང༌། འོ་ན་དགོས་ཆེད་ཡོད་དམ་ཞེ་ན། ཁམས་གསུམ་གྱི་རྨོངས་པའི་མུན་པ་ཐམས་ཅད་སེལ་བར་བྱེད་༼༢༦༡༽པ་ཅན་ཏེ། སྲིད་གསུམ་མུན་ནག་སེལ་བའི་ཡེ་ཤེས་སྒྲོན། །ཞེས་དང༌། འོ་ན་རྒྱུན་དུ་འབྱུང་ངམ་ཞེ་ན། དུས་ཀུན་ཏུ་རྩོལ་བ་དང་བྲལ་ཏེ་འགགས་པ་མེད་པས་རྒྱུན་མི་འཆད་པར་སྣང་སྟེ། དུས་གསུམ་རྒྱུན་མི་འཆད་པར་རིན་ཆེན་ཕྲེང༌། །ཞེས་བྱ་བའོ། །དེ་ལྟ་བུའི་ཡོན་ཏན་རྩ་བ་དང་ཡན་ལག་བདུན་དང་ཉིང་ལག་ཞེ་ལྔའི་བདག་ཉིད་དུ་བཞུགས་པ་ནི། ཁྲོ་བོའི་གཉིས་ཏེ། དེ་ལ་འཛིན་པ་ནི་ཆེད་དུ་བྱས་པའི་རྟོག་པ་སྟེ་སྤང་བྱ་ཉིད་དོ།།

གསུམ་པ་མཇུག་བསྡུ་བ་ནི།

ལང་ཀའི། ཞེས་པ་ནས། མཐོང་ངོ༌། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་རྫུ་འཕྲུལ་གྱི་ཆོ་འཕྲུལ་ཞེས་བྱ་སྟེ། ལངྐའི་བདག་པོ་རྫུ་འཕྲུལ་གྱིས་བསྡུས་པའི་རྟོགས་པ་མཐའ་ཡས་ཇི་སྙེད་པ་ཀུན་སོ་སོར་མ་འདྲེས་པར་གཅིག་ཏུ་ཡོངས་སུ་འགྲེལ་ཏོ། །དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས། ཆོས་ཐམས་ཅད་རྫུ་འཕྲུལ་གྱི་ཆོ་འཕྲུལ་ཙམ་དུ་སྣང་བར་མཐོང་ངོ་།།

ལང་ཀའི་བདག་པོ། དེ་དག་གི་དོན་ནི་རྫུ་འཕྲུལ་གྱི་ཆོ་འཕྲུལ་ཞེས་བྱ་སྟེ། ལང་ཀའི་བདག་པོ། རྫུ་འཕྲུལ་གྱི་ཆོ་འཕྲུལ་གྱིས་བསྡུས་པའི་རྟོག་པ་མཐའ་ཡས་ཇི་སྙེད་པ་ཀུན་སྣང་ཆ་ནས་སོ་སོར་མ་འདྲེས་པར་ངོ་བོ་ཐ་མི་དད་པ་གཅིག་ཏུ་ཡོངས་སུ་རྫོགས་པར་འགྲེལ་ཏོ། །དེ་སྐད་ཅེས་ཆོ་འཕྲུལ་དང་པོའི་དོན་སྨྲས་པས། ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས། ཆོས་ཐམས་ཅད་མ་འདྲེས་ལ་ཡོངས་སུ་རྫོགས་པར་རྫུ་འཕྲུལ་གྱི་ཆོ་འཕྲུལ་ཙམ་དུ་རིག་པ་ལ་སྣང་བ་གསལ་བར་མཐོང་ངོ༌།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྫུ་འཕྲུལ་གྱི་ཆོ་འཕྲུལ་བསྟན་པའི་ལེའུ་སྟེ་བཅུ་དྲུག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྫུ་འཕྲུལ་གྱི་ཆོ་འཕྲུལ་བསྟན་པའི་ལེའུ་སྟེ་བཅུ་དྲུག་པ་གསལ་བར་བཀྲོལ་བའོ།། །།

ལེའུ་བཅུ་བདུན་པ་ཆོས་སྣང་བའི་ཆོ་འཕྲུལ་བསྟན་པ།

༈ གཉིས་པ་ཆོས་སྣང་བའི་ཆོ་འཕྲུལ་ལ་གསུམ་སྟེ། ཆོས་སྣང་བའི་ཆོ་འཕྲུལ་གྱི་ཡོན་ཏན། ཆོས་སྣང་བ་དངོས། ཞབས་བསྡུ་བའོ། །དང་པོ་ནི།

དེ་ནས། ཞེས་པ་ནས། སྣང་བ་ནི། འདི་ལྟ་སྟེ། ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས། ལངྐའི་བདག་པོ་ལ་བོས་ཏེ་སྨྲས་པ། ཀྱེ་ལངྐའི་བདག་པོ་ཆོས་སྣང་བའི་ཆོ་འཕྲུལ་གང་ཞེ་ན། འདི་ལྟ་སྟེ། གང་གི་གང་དུ་ཆོས་སྣང་བར་ངེས་པའི་ཆོ་འཕྲུལ་བསྟན་པས། དེ་དང་དེར་འཇིག་རྟེན་གྱི་ཁམས་དེ་དང་དེ་དག་ཐམས་ཅད་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། ལྡེག རབ་ཏུ་ལྡེག ཀུན་ཏུ་རབ་ཏུ་ལྡེག འུར། རབ་ཏུ་འུར། ཀུན་ཏུ་རབ་ཏུ་འུར། ཆེམ། རབ་ཏུ་ཆེམ། ཀུན་ཏུ་རབ་ཏུ་ཆེམ། མཐའ་མཐོ་ན་དབུས་དམའ། དབུས་མཐོ་ན་མཐའ་དམའ། ཤར་མཐོ་ན་ནུབ་དམའ། ནུབ་མཐོ་ན་ཤར་དམའ། ལྷོ་མཐོ་ན་བྱང་དམའ། བྱང་མཐོ་ན་ལྷོ་དམའ་བར་གྱུར་ཏེ། ཕྱི་ནང་གི་མུན་པ་ཐམས་ཅད་སྦྱངས་ནས། འགྲོ་བ་མཐའ་ཐུག་པ་མེད་པ་དག་སྤྲོ་བའི་ངོ་མཚར་བསྐྱེད། སེམས་ཀྱི་དཀྱིལ་འཁོར་གསལ། ཐེག་པ་ཆེན་པོའི་ཆོས་ཉིད་ཀྱི་དགའ་བའི་རོ་ཚོར། ཐམས་ཅད་རེ་ཞིང་ངམ་པའི་ཆོས་ཉིད་དུ་སྣང་བའི་སྣང་བ་ནི་འདི་ལྟ་སྟེ།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དེ་ནས་ཡང་གསང་བ་པའི་བདག་པོས། ཆོ་འཕྲུལ་གཉིས་པ་བསྟན་པར་དགོངས་ནས། ལང་ཀའི་བདག་པོ་ལ་བོས་ཏེ། སྨྲས་པ། ཀྱེ་ལང་ཀའི་བདག་པོ། ཆོས་སྣང་བའི་ཆོ་འཕྲུལ་གང་ཞེ་ན། འདི་ལྟ་སྟེ། སྟོན་པ་གང་གིས་གནས་ཐ་དད་པ་གང་དུ། གདུལ་བྱ་ལ་ཆོས་སྣང་བར་ངེས་པའི་ཆོ་འཕྲུལ་བསྟན་པས་འགྲོ་བའི་རྒྱུད་ལ་དེ་ལྟར་ཆོས་སྣང་བའི་ཆོ་འཕྲུལ་སྣང་སྟེ། སྣོད་བཅུད་ཀྱི་གནས་དེ་དང་དེར་སྟོང་ཆེན་པོའི་འཇིག་རྟེན་གྱི་ཁམས་དེ་དག་ཐམས་ཅད་ཀུན་ཏུ་དེ་ཡི་བྱིན་རླབས་དང་མཐུ་ཡིས་ཕྱི་ལྟར་ན་སྒྲ་ཇི་བཞིན་དུ་དངོས་སུ་ཚབ་ཆེ་ཆུང་དང་ཁྱབ་པར་གཡོས་པ་ལ་སོགས་པའི་ལྟས་ཆེན་པོར་སྣང་བས། ཆུང་ངུར་གཡོས། ༼༢༦༢༽འབྲིང་དུ་རབ་ཏུ་གཡོས། ཆེན་པོར་ཀུན་ཏུ་རབ་ཏུ་གཡོས་ལ། འདས་པ་དག་བརྡར་གྱུར་པས་ནང་ལྟར་ན་བྱང་ཆུབ་ཀྱི་སེམས་གཡོས་ཚབ་ཆེ་ཆུང་གསུམ་མཐར་ལམ་པ་མན་ཆད་ལ་འབྱུང་བས་འདུན་པ་སེམས་པའི་རྣལ་འབྱོར་གྱི་ཏིང་ངེ་འཛིན་གཡོ་བ་དང༌། ཐོབ་པ་དང༌། བརྟན་པ་གསུམ་གྱིས་འཕར་ལ། དེ་བཞིན་དུ། ཕྱི་ལྟར་ན་ཆུང་ངུར་འགུལ། འབྲིང་དུ་རབ་ཏུ་འགུལ། ཆེན་པོར་ཀུན་ཏུ་རབ་ཏུ་འགུལ་ཏེ། ནང་ལྟར་ན། རིགས་ཆེན་འབྱེད་པའི་ཏིང་ངེ་འཛིན་གཡོ་ཐོབ་བརྟན་གསུམ་དུ་གྱུར་པ་དང༌། ཕྱི་ལྟར་ན། ཆུང་ངུར་ལྡེག འབྲིང་རབ་ཏུ་ལྡེག ཆེན་པོར་ཀུན་ཏུ་རབ་ཏུ་ལྡེག་སྟེ། ནང་ལྟར་ན། དབུགས་ཆེན་འབྱིན་པའི་རྣལ་འབྱོར་གྱི་ཏིང་ངེ་འཛིན་གཡོ་ཐོབ་བརྟན་གསུམ་དུ་གྱུར་པ་དང༌། ཕྱི་ལྟར་ན། ཆུང་ངུར་འུར། འབྲིང་རབ་ཏུ་འུར། ཆེན་པོར་ཀུན་ཏུ་རབ་ཏུ་འུར་ཏེ། ནང་ལྟར་ན། ལུང་ཆེན་ཐོབ་པའི་ཏིང་ངེ་འཛིན་གཡོ་ཐོབ་བརྟན་གསུམ་དུ་གྱུར་ཞིང༌། ཕྱི་ལྟར་ན། ཆུང་ངུར་ཆེམ། འབྲིང་དུ་རབ་ཏུ་ཆེམ། ཆེན་པོར་ཀུན་ཏུ་རབ་ཏུ་ཆེམ་སྟེ། ནང་ལྟར་ན། རྩལ་ཆེན་རྫོགས་པའི་ཏིང་ངེ་འཛིན་གཡོ་ཐོབ་བརྟན་གསུམ་དུ་རྟོགས་པའི་རྩལ་འཕར་བར་གྱུར་པ་དང༌། ཕྱི་ལྟར་ན། དངོས་སུ་མཐའ་མཐོ་ན་དབུས་དམའ། དབུས་མཐོ་ན་མཐའ་དམའ། ཤར་མཐོ་ན་ནུབ་དམའ་བ་སོགས་ཚབ་ཆེ་བ་དང་ཁྱབ་པར་གཡོས་ཏེ། ནང་ལྟར་ན། བྱང་ཆུབ་ཀྱི་སེམས་གཡོ་ཚབ་ཆེ་ཆུང་གསུམ་བྱུང་བ་དེས་རང་རང་གི་ས་ལ་མི་གནས་པར་དོན་གོང་མ་ལ་འཇུག་པ་དང༌། ཞུགས་པས་རང་རང་གི་ཞེན་པ་མི་བརྟན་པར་གྱུར་ཏེ་ལས་བཞིའི་དོན་རྫོགས་པས་ཆོས་ཉིད་ཀྱི་མཐའ་མཐོ་ན་རྟོག་པའི་དབུས་དམའ་ལ། ལྷུན་གྱིས་གྲུབ་པའི་དོན་རྫོགས་ཏེ་ཡེ་ཤེས་ཀྱི་དབུས་མཐོ་ན་འཁོར་བའི་མཐའ་དམའ་བར་གྱུར་ཞིང༌། ཞི་བའི་དོན་རྫོགས་ཏེ་ཡེ་ཤེས་ཤར་བའི་ཕྱོགས་མཐོ་ན་རྟོག་པའི་ནུབ་དམའ་བར་གྱུར་པ་དང༌། དབང་གི་དོན་རྫོགས་ཏེ་རྟོག་པ་ནུབ་པའི་ཕྱོགས་མཐོ་ན་ཡེ་ཤེས་ལ་ཞེན་པའི་ཤར་དམའ་བར་གྱུར་ལ། རྒྱས་པའི་དོན་རྫོགས་ཏེ་ཡོན་ཏན་རྒྱས་པའི་ལྷོ་ཡི་ཕྱོགས་མཐོ་ན་སྒྲིབ་པའི་བྱང་དམའ་བར་གྱུར་ཞིང༌། དྲག་པོའི་དོན་རྫོགས་ཏེ་སྒྲིབ་པ་བྱང་བའི་ཕྱོགས་མཐོ་ན་ཡོན་ཏན་ལ་ཞེན་པའི་ལྷོ་དམའ་བར་གྱུར་ཏེ་ཆོས་ཇི་བཞིན་པ་རིག་པ་ལ་འཇལ་བ་ནི་བརྗོད་པ་དང་འདྲ་བར་གྲགས་པའོ། །དེ་ལྟར་སའི་སྒྲིབ་པ་ཤིན་ཏུ་འཇོམས་པ་ཚབ་ཆེ་༼༢༦༣༽ཆུང་དང༌། དེས་སྙིང་པོ་བྱང་ཆུབ་མཚན་ཉིད་ཅིར་ཡང་སྣང་ལ་མ་ངེས་པ་ཉིད་དུ་སོན་པར་མཛད་པ་སྟེ། དངོས་སུ་ཕྱི་ནང་གི་མུན་པ་གཟུང་འཛིན་རྣམ་གཉིས་རྒྱུད་དང༌། ཆེད་དུ་བྱས་པ་ཕྲ་རགས་ཐམས་ཅད་སྦྱངས་ནས། རྒྱུད་དག་པའི་རིམ་པ་བཞིན་ཡིད་ཆེས་པ་ནི། འགྲོ་བ་མཐའ་ཐུག་པ་མེད་པ་དག་འཇིག་རྟེན་པའི་ས་ནས་སེམས་སྐྱེས་ཏེ་དགའ་ཞིང་སྤྲོ་བའི་ངོ་མཚར་བསྐྱེད། དེ་བཞིན་དུ་སེམས་དང་པོ་པ་རྣམས་སེམས་ཀྱི་དཀྱིལ་འཁོར་རིག་པ་འོད་གསལ་བར་བྱས་ཏེ་རྨད་དུ་བྱུང་བ་ལ་འཇུག་ཅིང་ཞུགས། ཐེག་པ་ཆེན་པོའི་སྦྱོར་ལམ་ལ་བརྟེན་པས་བདེན་པ་མཐོང་ནས་ཆོས་ཉིད་ཀྱི་དགའ་བའི་རོ་ཚོར་ཏེ་ས་ནས་ས་འཕར་བས་རྩལ་ཆེན་རྫོགས་པ་སྙིང་པོ་བྱང་ཆུབ་ཏུ་གྱུར་ཏོ། །དེ་ལྟར་སྣང་བས་འགྲོ་བ་དང་ས་པ་ཐམས་ཅད་འབྲས་བུ་གོང་མ་ལ་འདོད་པ་སྐྱེ་ཞིང་དོན་སྣང་བ་ལ་རེ་ཞིང་ངམ་པའི་གནས་དམ་པ་ཆོས་ཉིད་ཇེ་གསལ་དུ་གྱུར་ཏེ་ཤིན་ཏུ་ཡ་མཚན་པར་སྣང་བར་བྱེད་པའི་ཆོས་དངོས་གཞི་བར་བསྟན་པ་ནི། འདི་ལྟ་སྟེ།

གཉིས་པ་ཆོས་སྣང་བ་དངོས་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འཇིག་རྟེན། ཞེས་པ་ནས། གསལ་བར་སྣང་། །ཞེས་པའི་བར་གྱིས་བསྟན་ཏེ།

འཇིག་རྟེན་མཐས་ཡས་རྡུལ་སྙེད་དུ། །སྤྲུལ་པ་མཐའ་ཡས་རྡུལ་སྙེད་སྤྲོས། །མུན་བསལ་དངོས་པོ་ཀུན་སྦྱངས་ཏེ།།

ཐམས་ཅད་མ་བཅོས་དེ་བཞིན་སྣང་། །སྤྲུལ་པའི་དོན་ནི་རྡུལ་སྙེད་ལས། །ཆོས་ཉིད་ངེས་པར་སྣང་བའི་སྒོ།

གཉིས་ལས་བཅུ་བཞི་སྣང་བ་ནི། །ཡི་གེའི་འབྲུ་ཚོགས་གསལ་བར་སྣང་།།

དེ་ལྟར་འཇིག་རྟེན་གྱི་ཁམས་མཐའ་ཡས་ཤིང་རྡུལ་སྙེད་ཀྱི་གནས་དེ་དག་ཀུན་ཏུ་དོན་མཛད་པ་པོ་དེ་བཞིན་གཤེགས་པའི་སྤྲུལ་པ་ཡང་མཐའ་ཡས་རྡུལ་སྙེད་གྲངས་ལས་འདས་པར་སྤྲོས་ཏེ་སྣང་ནས་ཡི་གེའི་སྒྲའི་ཆོས་སྣང་བའི་ཆོ་འཕྲུལ་བསྟན་པས། ཡོན་ཏན་ནི་བཤད་པ་ལྟར། རྨོངས་པའི་མུན་པ་བསལ་ཞིང་གཟུང་དང་འཛིན་པའི་དངོས་པོ་སྒྲིབ་པའི་ཕུང་པོ་ཇི་སྙེད་ཀུན་ཆོས་ཉིད་དུ་སྦྱངས་ཏེ་འབྲས་བུ་ཆོས་ཐམས་ཅད་སྙིང་པོ་བྱང་ཆུབ་མ་བཅོས་པའི་དེ་བཞིན་ཉིད་རང་བཞིན་ཀུན་ཏུ་སྣང་བའི་དབྱིངས་ལ་རིམ་པར་བཀོད་དོ། །དེས་ན་མ་འགགས་པའི་ཆོས་སྣང་བའི་སྤྲུལ་པ་ཀུན་གྱིས་གདུལ་བར་བྱ་བའི་དོན་མཛད་པའི་ཐབས་ནི་རྡུལ་སྙེད་དང་མཉམ་པ་རྣམས་ལས་ཆོ་འཕྲུལ་གྱི་ངོ་བོ་ཆོས་ཉིད་ངེས་པར་སྣང་བའི་སྒོ་ཡི་ངོ་བོ་ནི་རྩ་བ་ཨ་ཧཱུྃ་གཉིས་སམ་དབྱིངས་དང་ཡེ་ཤེས་གཉིས་ཀྱི་རྒྱུ་ལས་ཡི་གེ་བཅུ་ཚན་བཞིར་སྣང་བ་ནི་སྔགས་ཀྱི་ཡི་གེའི་འབྲུ་ཚོགས་རྣམས་ཏེ། དེས་མཚོན་པའི་ལྷ་དང་དོན་ཐམས་ཅད་གསལ་བར་སྣང་བའོ། །སྤྱིར་ཕོ་བྲང་ལྷ་ཡི་ཡི་གེ ལུས་གནས་རྩ་ཡི་ཡི་གེ ཞིང་ཁམས་ཆོ་འཕྲུལ་གྱི་ཡི་གེ་ཐམས་ཅད་དོ།།

གཉིས་པ་རྒྱས་པར་བཤད་པ་ལ་གཉིས་ཏེ། མ་འགག་པའི་ཆོས་སྣང་བ། མ་བཅོས་པའི་༼༢༦༤༽ཆོས་སྣང་བའོ། །དང་པོ་ལ་གཉིས་ཏེ། རྒྱས་པར་བཤད་པ། ཞབས་བསྡུ་བའོ། །དང་པོ་ལ་བདུན་ཏེ། ལྷ་བཞི་བཅུ་རྩ་གཉིས་མཚོན་པ། གཞལ་ཡས་ཁང་མཚོན་པ། ལས་བཞི་མཚོན་པ། ཆོ་གའི་རིམ་པ་མཚོན་པ། མཚན་ཉིད་གསུམ་མཚོན་པ། འཁོར་འདས་མཚོན་པ། དཀྱིལ་འཁོར་གསུམ་མཚོན་པའི་ཡི་གེ་མ་འགག་པའོ། །དང་པོ་ནི།

ལང་ཀའི། ཞེས་པ་ནས། དྲན་པའི་ཆོས་ཉིད་རྣམ་པར་སྣང་བའི་སྒོའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། ཨ་ཆོས་ཀྱི་དབྱིངས་ཉིད་རྣམ་པར་སྣང་བའི་སྒོའོ། །ཧཱུཾ་ཡེ་ཤེས་ཀྱི་ཆོས་ཉིད་རྣམ་པར་སྣང་བའི་སྒོའོ། །ཧཱུཾ་མི་གཡོ་བའི་ཆོས་ཉིད་ཡོངས་སུ་སྣང་བའི་སྒོའོ། །ༀ་ཅིར་ཡང་སྣང་བའི་ཆོས་ཉིད་རྣམ་པར་སྣང་བའི་སྒོའོ། །སྭཾ་སྣ་ཚོགས་འབྱུང་བའི་ཆོས་ཉིད་རྣམ་པར་སྣང་བའི་སྒོའོ། །ཨཾ་མཐའ་ཡས་སྟོན་པའི་ཆོས་ཉིད་རྣམ་པར་སྣང་བའི་སྒོའོ། །ཧཾ་དོན་ཡོད་གྲུབ་པའི་ཆོས་ཉིད་རྣམ་པར་སྣང་བའི་སྒོའོ། །མུཾ་བརྗོད་པ་ལས་འདས་པའི་ཆོས་ཉིད་རྣམ་པར་སྣང་བའི་སྒོའོ། །ལཾ་སྐྱེ་འགག་མེད་པའི་ཆོས་ཉིད་རྣམ་པར་སྣང་བའི་སྒོའོ། །མཾ་མི་ཟད་པའི་ཆོས་ཉིད་རྣམ་པར་སྣང་བའི་སྒོའོ། །བྱཾ་སྐྱོན་མེད་པའི་ཆོས་ཉིད་རྣམ་པར་སྣང་བའི་སྒོའོ། །ཏཾ་ཐོགས་པ་མེད་པའི་ཆོས་ཉིད་རྣམ་པར་སྣང་བའི་སྒོའོ། །དྷྲི་གསུང་འཛིན་པའི་ཆོས་ཉིད་རྣམ་པར་སྣང་བའི་སྒོའོ། །ཏྲཾ་གོ་འབྱེད་པའི་ཆོས་ཉིད་རྣམ་པར་སྣང་བའི་སྒོའོ། །ཀྴི་མཐོང་པའི་ཆོས་ཉིད་རྣམ་པར་སྣང་བའི་སྒོའོ། །ཛཱ་འཇོམས་པའི་ཆོས་ཉིད་རྣམ་པར་སྣང་བའི་སྒོའོ། །ཧཱུཾ་རྩ་བ་བྱང་ཆུབ་སེམས་ཀྱི་ཆོས་ཉིད་རྣམ་པར་སྣང་བའི་སྒོའོ། །ཊྲཾ་ཅིར་ཡང་འབྱུང་བའི་ཆོས་ཉིད་རྣམ་པར་སྣང་བའི་སྒོའོ། །དྷྲི་སྒྲ་སྒྲོག་པའི་ཆོས་ཉིད་རྣམ་པར་སྣང་བའི་སྒོའོ། །ཨཱ་ཅིར་ཡང་མ་ངེས་བའི་ཆོས་ཉིད་རྣམ་པར་སྣང་བའི་སྒོའོ། །མཻ་བྱམས་པ་ཆེན་པོའི་ཆོས་ཉིད་རྣམ་པར་སྣང་བའི་སྒོའོ། ཐ་སྙིང་རྗེ་ཆེན་པོའི་ཆོས་ཉིད་རྣམ་པར་སྣང་བའི་སྒོའོ། །ཧཱུཾ་དགའ་བ་ཆེན་པོའི་ཆོས་ཉིད་རྣམ་པར་སྣང་བའི་སྒོའོ། །མཾ་བཏང་སྙོམས་ཆེན་པོའི་ཆོས་ཉིད་རྣམ་པར་སྣང་བའི་སྒོའོ། །དུ་ཏིང་ངེ་འཛིན་གྱི་ཆོ་འཕྲུལ་གྱི་ཆོས་ཉིད་རྣམ་པར་སྣང་བའི་སྒོའོ། །པུ་དབང་བསྐུར་བའི་ཆོ་འཕྲུལ་གྱི་ཆོས་ཉིད་རྣམ་པར་བའི་སྒོའོ། །བཾ་བྱིན་གྱིས་བརླབས་ཀྱི་ཆོ་འཕྲུལ་གྱི་ཆོས་ཉིད་རྣམ་པར་སྣང་བའི་སྒོའོ། །ཧོ་མཆོད་པའི་ཆོ་འཕྲུལ་གྱི་ཆོས་ཉིད་རྣམ་པར་སྣང་བའི་སྒོའོ། །ཡ་སྟོང་པ་ཉིད་ཀྱི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོའོ། །ཐཱ་མཚན་མ་མེད་པའི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོའོ། །དྷྲི་སྨོན་པ་མེད་པའི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོའོ། །ཧཱུཾ་ཐབས་ལ་མཁས་པའི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོའོ། །ཛཿ དོན་འདྲེན་པའི་ཆོས་ཉིད་རྣམ་པར་སྣང་བའི་སྒོའོ། །ཧཱུཾ་དོན་བརྗོད་པའི་ཆོས་ཉིད་རྣམ་པར་སྣང་བའི་སྒོའོ། །བཾ་དོན་སྤྱོད་པའི་ཆོས་ཉིད་རྣམ་པར་སྣང་བའི་སྒོའོ། །ཧོ་དོན་མཐུན་པའི་ཆོས་ཉིད་རྣམ་པར་སྣང་བའི་སྒོའོ། །ཀྲ་བྱང་ཆུབ་ཀྱི་ཆོས་ཉིད་རྣམ་པར་སྣང་བའི་སྒོའོ། །དྲུཾ་སྟོབས་ཀྱི་ཆོས་ཉིད་རྣམ་པར་སྣང་བའི་སྒོའོ། །སྲུཾ་དབང་པོའི་ཆོས་ཉིད་རྣམ་པར་སྣང་བའི་སྒོའོ། །བྲཾ་རྫུ་འཕྲུལ་གྱི་ཆོས་ཉིད་རྣམ་པར་སྣང་བའི་སྒོའོ། །ཀྵཾ་སྤོང་བའི་མཚན་ཉིད་རྣམ་པར་སྣང་བའི་སྒོའོ། །ཡེ་དྲན་པའི་ཆོས་ཉིད་རྣམ་པར་སྣང་བའི་སྒོའོ།།

ལང་ཀའི་བདག་པོ། ཕོ་བྲང་ལྷ་ཡི་ཡི་གེ་ནི་འདི་ལྟ་སྟེ། མཚན་བརྗོད་ལས། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། །ཞེས་དང༌། ཀུན་འདུས་རིག་པ་ལས། དབྱིངས་ལས་ཨ་བྱུང་ཨ་ལས་ནི། །ཡི་གེའི་ཚོགས་བྱུང་སྣ་ཚོགས་འཕྲོས། །ཨ་ནི་རང་བཞིན་ཡི་གེ་སྟེ། །རྟེན་དང་བྲལ་བས་རྒྱུ་རྐྱེན་མེད། །ཀུན་ལ་ཁྱབ་པས་ནམ་མཁའ་འདྲ། །ཨ་ནི་ཆོས་ཉིད་ཆོ་འཕྲུལ་ཏེ། །ཆོས་ཉིད་ཟབ་མོའི་ངང་ལས་ནི། །ཆོ་འཕྲུལ་ཡི་གེ་ཨ་བྱུང་བས། །ཨས་ནི་ཆོས་ཉིད་མཚོན་པར་བྱེད། །ཨ་ལས་ཡིག་འབྲུའི་ཚོགས་འཕྲོས་ཏེ། །ཚིག་ཚོགས་བསྟན་པ་རྒྱ་མཚོར་གྲགས། །ཡི་གེའི་སྒྲ་སྐད་ཀུན་བཟུང་སྟེ། སྣ་ཚོགས་ཡི་གེའི་སྐད་དུ་བསྒྱུར། །ཡིག་འབྲུ་ཡན་ལག་མང་པོ་རྣམས། །རང་བཞིན་ཨ་ཡི་ངང་དུ་འདུས། །ཞེས་དང༌། ཨ་ལས་ཆོ་འཕྲུལ་འོད་འཕྲོས་པས། །ཡི་གེའི་ཕྲེང་བ་ཚོགས་བྱུང་སྟེ། །ཡི་གེའི་ཡན་ལག་ཡེ་ཤེས་ལ། །སངས་རྒྱས་སྐུ་ཡི་ས་བོན་བྱུང༌། །ཞེས་གསུངས་པ་ལྟར། ལྷ་བཞི་བཅུ་རྩ་གཉིས་ཀྱི་ངོ་བོ་ཉིད་ཀྱང་ཡི་གེ་སྔགས་ཀྱི་སྒྲ་ལས་སྣང་བའི་ཕྱིར་ཏེ། ཨ་ནི་ཨ་བྷ་དྲ་ས་མནྟ་ཞེས་པའི་སྔགས་སུ་གྱུར་པས་ཆོས་ཀྱི་དབྱིངས་རྣམ་པར་དག་པའི་ཆོས་ཉིད་ཀྱི་ངོ་བོ་རིལ་གྱི་འབྱུང་གནས་ཡུམ་ཀུན་ཏུ་བཟང་མོར་གསལ་བར་བྱུང་ཞིང་སྣང་བའི་སྒོ འོ། །དེའང་སྒྲ་ལ་ཁྱབ་པ་ནི་ཡི་གེ་དང་སྒྲ་ཐམས་ཅད་ཀྱི་ཁོང་ན་ཨ་ཡོད་ཅིང༌། དོན་ལ་ཁྱབ་པ་ནི་ཆོས་ཀྱི་དབྱིངས་ཀྱིས་ཆོས་ཐམས་ཅད་དང་ཡེ་ཤེས་ཐམས་ཅད་ལའང་ཁྱབ་ལ། ལྷ་ལ་ཁྱབ་པ་ནི་ཀུན་ཏུ་བཟང་མོས་ལྷ་ཐམས་ཅད་ལ་ཁྱབ་པའོ། །ཧཱུཾ་ནི་ཧཱུཾ་བཛྲ་ཙིཏྟའི་སྔགས་ཀྱིས་རང་བྱུང་ཡེ་ཤེས་ཀྱི་ངོ་བོ་མ་བཅོས་པ་ཀུན་ཏུ་བཟང་པོའི་སྐུར་བྱུང་བ་རང་རིག་པའི་ཆོས་ཉིད་རྣམ་པར་སྣང་ཞིང་གསལ་བར་བྱེད་པའི་སྒོ འོ། །དེའང་སྔ་མ་ལ་ཀུན་ཏུ་བཟང་མོ་ཆོས་ཀྱི་དབྱིངས་ཆོས་ཁམས་གསུམ་སྦྱར་ཞིང༌། ཕྱི་མ་ལ་ཀུན་༼༢༦༥༽ཏུ་བཟང་པོ། རང་བྱུང་ཡེ་ཤེས། ཡིད་ཀྱི་ཤེས་པ་གསུམ་སྦྱར་རོ། །ཆོས་ཉིད་ཐམས་ཅད་ལ་མ་འགག་པའི་ཆོས་ཉིད་དང་རང་བཞིན་གྱི་ཆོས་ཉིད་གཉིས་ཀུན་ལ་སྦྱར་ཏེ་མ་འགག་པ་ནི་ལྷ་དང་ཡེ་ཤེས་གཉིས་དང་། རང་བཞིན་ནི་ཆོས་ཀྱི་དབྱིངས་སོ། །ཧཱུྃ་ནི་ཧཱུྃ་བཛྲ་དྷྲིཀ་གི་སྔགས་ལས་རྡོ་རྗེ་འཛིན་པ་མི་བསྐྱོད་པའམ་མི་གཡོ་བའི་སེམས་ཀྱི་ཆོས་ཉིད་ཡོངས་སུ་སྣང་བར་བྱེད་པའི་སྒོ འོ། །དེའང་མི་བསྐྱོད་པ། ཆོས་དབྱིངས་ཡེ་ཤེས་སམ་མི་གཡོ་བའི་སེམས་ཀྱི་ཆོས་ཉིད། རྣམ་ཤེས་ཀྱི་ཕུང་པོ་གསུམ་སྦྱར་ཏེ་འོག་མ་རྣམས་ལའང་འགྲེ་ཤེས་པར་བྱའོ། །ཨ་ནི་ཨ་ཛ་ན་ཛིཀ་ཅེས་པའི་དོན་རང་རིག་ཅིར་ཡང་སྣང་ཞིང་ཤར་བའི་དོན་གྱི་ཆོས་ཉིད་གང་དེ་རྣམ་པར་སྣང་མཛད་དུ་སྣང་བར་བྱེད་པའི་སྒོ འོ། །དེའང་རྣམ་པར་སྣང་བ་རྣམས་ནི་མ་འགག་པའམ། བརྡ་སྤྲོད་པའམ། གོ་བའོ། །སྒོ་ནི་འབྱུང་བའི་གཞིའོ། །དེ་ལྟར་ཀུན་ལ་འགྲེའོ། །སྭཱ་ནི་སྭཱ་རཏྣ་དྷྲིཀ་ཅེས་པས་ཡོན་ཏན་སྣ་ཚོགས་ཇི་སྙེད་པ་འབྱུང་བའི་རིན་ཆེན་འབྱུང་ལྡན་ཏེ་སེམས་ཉིད་ལ་ཡོན་ཏན་ལྷུན་གྱིས་རྫོགས་པའི་ཆོས་ཉིད་རྣམ་པར་སྣང་བར་བྱེད་པའི་སྒོའོ། །ཨཱཾ་ནི་ཨཱཾ་ཨ་རོ་ལིཀ་ཅེས་པའི་དོན་སྣང་བ་མཐའ་ཡས་ཀྱི་བཀོད་པ་སྟོན་པའི་ཆོས་ཉིད་གསལ་ལ་མ་གཡོས་པ་སྟེ་འཁོར་བའི་འགྲོ་བ་དང་ས་པའི་རིག་པ་ལ་ཡེ་གྲུབ་པ་ཉིད་རྣམ་པར་སྣང་ཞིང་གསལ་བར་བྱེད་པའི་སྒོ འོ། །ཧཱ་ནི་ཧཱ་པྲ་ཛྙཱ་དྷྲིཀ་གི་དོན་གྱིས་ཤེས་རབ་ཀྱི་དོན་དང་མ་བྲལ་བས་བདག་གཞན་གྱི་བྱ་བ་རྫོགས་པ་དོན་ཡོད་གྲུབ་པའི་ཆོས་ཉིད་གང་དེ་རྣམ་པར་སྣང་ཞིང་གསལ་བར་བྱེད་པའི་སྒོ འོ། །དེ་ལ་སྔགས་ནི་ལམ་པས་བསྐྱེད་པ་དང༌། སྒྲ་དོན་དང་ལྡན་པས་མཚོན་པའི་དབང་སྟེ་འཆད་པར་འགྱུར་བ་རྣམས་ལའང་སྦྱར་རོ། །ལྷ་ཡི་དབང་དུ་ཡབ་རྣམས་མ་འགག་པའམ་ཡེ་ཤེས་ཀྱི་རྣམ་པ་དང༌། ཡུམ་རྣམ་རང་བཞིན་ནམ་དབྱིངས་ཀྱི་རྣམ་པའོ། །མཱུཾ་ནི་མཱུཾ་དྷཱ་ཏྭཱེ་ཤྭཱ་རཱིའི་སྔགས་དོན་གྱིས་ཆོས་ཀྱི་དབྱིངས་མ་སྐྱེས་པ་ཚིག་གིས་བརྗོད་པ་ལས་འདས་ཤིང་གྲོལ་བས་གང་ཡང་མི་འགོག་པར་ཁྱབ་པའི་ཆོས་ཉིད་རྡོ་རྗེ་དབྱིངས་ཀྱི་དབྱིངས་ཕྱུག་མར་རྣམ་པར་སྣང་བའི་སྒོའོ། །དེའང་དབྱིངས་ཕྱུག་མ་ཆོས་དབྱིངས་ཡེ་ཤེས་ཀྱི་ཡུལ་དོན་གྱི་ཀུན་གཞིའི་དབྱིངས་ནམ་མཁའི་ཁམས་གསུམ་སྦྱར་ཏེ་འོག་མ་རྣམས་ལའང་འགྲེའོ། །ལཱཾ་ནི་ལཱཾ་ཏྭེ་ཥ་ར་ཏིའི་སྔགས་དོན་གྱིས་ས་ཉིད་རང་རིག་མ་བྱུང་མ་བརླག་ངོ་བོ་མི་འགྱུར་བར་སྐྱེ་འགག་མེད་པའི་ཆོས་ཉིད་༼༢༦༦༽རང་གསལ་བར་སངས་རྒྱས་སྤྱན་མར་རྣམ་པར་སྣང་བའི་སྒོའོ། །ཞེས་མེ་ལོང་ཡེ་ཤེས་ཀྱི་དབྱིངས་སོ། །མཱཾ་ནི་མཱཾ་མོ་ཧ་ར་ཏིའི་སྔགས་དོན་ལས་འབྱུང་བ་ཆུ་ཡི་ངོ་བོ་དེ་བཞིན་ཉིད་ཡོན་ཏན་འཕེལ་འགྲིབ་མེད་པར་འབྱུང་བ་མི་ཟད་པའི་ཆོས་ཉིད་མ་མཱ་ཀིར་རྣམ་པར་སྣང་བའི་སྒོའོ། །ཞེས་མཉམ་ཉིད་ཀྱི་དབྱིངས་སོ། །པཱྃ་ནི་པཱྃ་རཱ་ག་ར་ཏིའི་སྔགས་དོན་གྱིས་འབྱུང་བ་མེ་རང་རིག་པ་མཐའ་མ་སྒྲིབ་དག་པས་སྐྱོན་མེད་པའི་ཆོས་ཉིད་གོས་དཀར་མོར་རྣམ་པར་སྣང་བའི་སྒོའོ། །ཞེས་སོ་སོར་ཀུན་རྟོག་གི་དབྱིངས་སོ། །ཏཱྃ་ནི་ཏཱཾ་བཛྲ་ར་ཏིའི་སྔགས་དོན་གྱིས་འབྱུང་བ་རླུང་གི་དེ་བཞིན་ཉིད་ཀྱི་ངོ་བོ་མཚན་ཉིད་གང་དུའང་མི་ཟིན་པར་སྐད་ཅིག་ལའང་འགྲོ་དོན་མི་འགོག་པར་མཛད་པས་ཐོགས་པ་མེད་པའི་ཆོས་ཉིད་དམ་ཚིག་སྒྲོལ་མར་རྣམ་པར་སྣང་ཞིང་ལྷུན་གྱིས་གྲུབ་པར་བྱེད་པའི་སྒོའོ། །ཞེས་བྱ་གྲུབ་ཡེ་ཤེས་ཀྱི་དབྱིངས་སོ། །ཧྲིཿནི་ཧྲཱི་ཧ་ཧཱུྃ་པདྨ་པཱ་ད་མའི་སྔགས་ལས་སྤྱན་རས་གཟིགས་དབང་ཕྱུག་དེ་བཞིན་གཤེགས་པའི་གསུང་གི་རིགས་འཛིན་པའི་ཆོས་ཉིད་རྣམ་པར་སྣང་བའི་སྒོའོ། །རྟོག་པའི་དབང་དུ་རྣ་བས་གསུང་གི་བརྗོད་པ་འཛིན་པས་སོ། །ཏྲཱྃ་ནི་ཏྲཱཾ་ཨཱ་གརྦྷ་ཡའི་སྔགས་ལས་ནམ་མཁའི་སྙིང་པོ་ནམ་མཁས་དངོས་པོའི་གོ་འབྱེད་པ་ལྟར་ཡོན་ཏན་ཅིའང་མི་འགོག་པའི་ཆོས་ཉིད་རྣམ་པར་སྣང་བའི་སྒོའོ། །སྣས་དྲིའི་གོ་འབྱེད་པས་སོ། །ཀྵཱ་ནི་ཀྵཱ་ཧི་རཱ་ཛ་ཡའི་སྔགས་ལས་སའི་སྙིང་པོ་འགྲོ་བའི་མིག་དག་པ་སྟེ་མེ་ལོང་ལྟ་བུའི་ཡེ་ཤེས་ཀྱི་ངོ་བོ་ཅིའང་མ་འདྲེས་ལ་མི་རྟོག་པར་མཐོང་བ་གསལ་བའི་ཆོས་ཉིད་རྣམ་པར་སྣང་བའི་སྒོ འོ། །ས་མཐོང་བའི་ཡུལ་ཡིན་པའམ་མིག་གིས་གཟུགས་མཐོང་བས་སོ། །ཛཱ་ནི་ཛཱ་ཀུ་རུ་པ་ཎིའི་སྔགས་ལས་ཕྱག་ན་རྡོ་རྗེ་གསང་བའི་མཐུ་སྟོབས་ཀྱི་བདག་ཉིད་པས་གནོད་བྱེད་འདུལ་ཞིང་འཇོམས་པའི་ཆོས་ཉིད་རྣམ་པར་སྣང་བའི་སྒོའོ། །ལྕེས་རོ་དྲུག་འཇོམས་པས་སོ། །དེ་དག་ངོ་བོ་མི་མཐུན་པ་བཞིའི་ཆར་སྣང་བའི་ཆོས་ཉིད་ཡི་གེས་སྣང་བར་བྱེད་པའོ། །ཧཱུྃ་ནི་ཧཱུྃ་ལཱ་སྱེ་ས་མ་ཡའི་སྔགས་ལས་རང་རིག་པ་རིལ་ལྷུན་གྱིས་རྫོགས་ཏེ་མ་འགག་ལ་གསལ་བས་རྩ་བ་བྱང་ཆུབ་སེམས་ཀྱི་ཆོས་ཉིད་ལཱ་སྱེ་སྟེ་སྒེག་མོ་མེ་ལོང་ཅན་དུ་རྣམ་པར་སྣང་བའི་སྒོའོ། །ཏྲཱྃ་ནི་ཏྲཱཾ་མཱ་ལེ་ས་མ་ཡའི་སྔགས་ལས་རྒྱལ་བའི་ཡོན་ཏན་སྣ་ཚོགས་རྒྱུན་ཆད་མེད་པར་སྣང་བས་ཅིར་ཡང་འབྱུང་བའི་ཆོས་ཉིད་མཱ་ལེ་ཕྲེང་བ་ཅན་དུ་རྣམ་པར་སྣང་བའི་སྒོའོ། །ཧྲཱིཿནི་ཧྲཱི་གཱི་ཏི་ར་གོའི་༼༢༦༧༽སྔགས་ལས་ཆོས་ཀྱི་སྒྲ་དབྱངས་ཇི་ལྟར་འདུལ་བ་ལྟར་སྟོན་ཅིང་སྒྲོག་པའི་ཆོས་ཉིད་གཱིརྟི་གླུ་དབྱངས་མར་རྣམ་པར་སྣང་བའི་སྒོའོ། །ཨྃ་ནི་ཨ་ནཱིརྟི་རཱ་ག་ཡཱ་མིའི་སྔགས་ལས་ཕྲིན་ལས་སྣ་ཚོགས་ཀྱིས་འགྲོ་དོན་མཛད་པས་ཅིར་ཡང་མ་ངེས་པའི་ཆོས་ཉིད་ནཱིརྟི་གར་བསྒྱུར་མར་རྣམ་པར་སྣང་བའི་སྒོའོ། །མཻ་ནི་མཻ་དྷ་ར་ཎིའི་སྔགས་ལས་ཐམས་ཅད་གཉིས་སུ་མེད་པར་མཁྱེན་པས་འབྱེད་པའི་ཕྱོགས་རིས་མེད་པར་ཕན་འདོགས་པ་བྱམས་པ་ཆེན་པོའི་ཆོས་ཉིད་བྱམས་པར་རྣམ་པར་སྣང་བའི་སྒོའོ། །ཐླྷིᨗ་ནི་ཐླྷིᨗ་ནི་སྶ་རཾ་པ་ཡའི་སྔགས་ལས་ཐུགས་རྗེ་ཆེན་པོས་ཟིན་པས་དངོས་སུ་སྐྱོབ་པའམ་དེས་སྒྲིབ་པ་སེལ་བས་སྙིང་རྗེ་ཆེན་པོའི་ཆོས་ཉིད་སྒྲིབ་པ་རྣམ་སེལ་དུ་རྣམ་པར་སྣང་བའི་སྒོའོ། །ཧཱུྃ་ན་ཧཱུྃ་སྭ་རཱ་ཛ་ཡའི་སྔགས་ལས་ཐུགས་རྗེ་ཆེན་པོས་སྤྱོད་ཡུལ་དག་པས་ཀུན་ཏུ་བཟང་ཞིང་དོན་མཛད་པ་ལ་འགྱོད་པ་དང་བྲལ་བས་དགའ་བ་ཆེན་པོའི་ཆོས་ཉིད་ཀུན་ཏུ་བཟང་པོར་རྣམ་པར་སྣང་བའི་སྒོ འོ། །མཱུྃ་ནི་མཱུཾ་ཤྲཱི་ཨ་རཱ་གཱ་ཡའི་སྔགས་ལས་ཡེ་ཤེས་ཆེན་པོ་ཟུག་རྔུ་དང་བྲལ་ཏེ་འཇམ་པའམ་མཉམ་པས་འདུལ་བ་བཏང་སྙོམས་ཆེན་པོའི་ཆོས་ཉིད་འཇམ་དཔལ་དུ་རྣམ་པར་སྣང་བའི་སྒོ འོ།།

དེ་ལྟར་སྔགས་ཀྱི་སྒྲ་དོན་གྱིས་ཚད་མེད་བཞི་དང་སྦྱར་རོ། །ί་ནི་ཛཿί་པེ་པྲ་བེ་ཤའི་སྔགས་ལས་ཆེས་ཚིམ་པར་བྱེད་པའི་ཏིང་ངེ་འཛིན་གྱི་ཆོ་འཕྲུལ་གྱི་ཆོས་ཉིད་ί་པྤེ་མར་རྣམ་པར་སྣང་བའི་སྒོ འོ། །པུ་ནི་ཧཱུྃ་པུཥྤེ་ཨ་བེ་ཤའི་སྔགས་ལས་གོ་བར་བྱེད་པས་དབང་བསྐུར་བའི་ཆོ་འཕྲུལ་གྱི་ཆོས་ཉིད་པུཥྤེ་མར་རྣམ་པར་སྣང་བའི་སྒོ འོ། །བྃ་ནི་བྃ་དཱི་པ་སུ་གི་རཱིའི་སྔགས་ལས་གཞན་ལ་སྣང་བར་བྱེད་པས་བྱིན་གྱི་རླབས་ཀྱི་ཆོ་འཕྲུལ་གྱི་ཆོས་ཉིད་ཨཱ་ལོ་ཀེར་རྣམ་པར་སྣང་བའི་སྒོ འོ། །ཧོ་ནི་ཧོ་གནྡྷེ་ཙིཏྟའི་སྔགས་ལས་མཉེས་པར་བྱེད་པས་མཆོད་པའི་ཆོ་འཕྲུལ་གྱི་ཆོས་ཉིད་གནྡྷེ་མར་རྣམ་པར་སྣང་བའི་སྒོ འོ།།

སྒོའི་དོན་ནི། འགྲོ་བ་ལམ་ལ་འཇུག་པ་ན་དང་པོ་རྣམ་ཐར་བཞིའི་སྒོ་ནས་ཐེ་ཚོམ་དང་སྒྲོ་འདོགས་ཐམས་ཅད་གཅོད་ཅིང༌། བར་དུ་དེ་ལྟར་སྒོམས་ནས། མཐར་འབྲས་བུའི་ངོ་བོར་ལྷུན་གྱིས་གྲུབ་པ་ཡིན་ལ། སངས་རྒྱས་རྣམས་ཀྱིས་གཞན་དོན་ཡང་དེའི་སྒོ་ནས་མཛད་པས་ན་སྒོ་དང་སྦྱར་རོ། །ཡ་ནི་ཆོས་ཐམས་ཅད་ཀྱི་ངོ་བོ་སྟོང་པ་ཉིད་ཀྱི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོ་སྟེ། ཁྲོ་བོ་ཡ་མནྟ་ཀྲི་ཏ་གཤིན་རྗེ་གཤེད་པོ་སྟེ། མཐའ་ཡི་གཤིན་རྗེ་འཇོམས་པས་སྟོང་ཉིད་སྒོ་ལ་གནས། །ཞེས་པའོ། །ཐཱ་ནི་སྣང་སྟོང་གི་མཚན་མ་མེད་པའི་རྣམ་པར་ཐར་པའི་ཆོས་༼༢༦༨༽ཉིད་རྣམ་པར་སྣང་བའི་སྒོ་སྟེ། ཁྲོ་བོ་སྟོབས་ཆེན་སྟོང་འཛིན་མཚན་མ་འཇོམས། །དེ་ཕྱིར་མཚན་མེད་རྣམ་ཐར་སྒོ་ལ་གནས། །ཞེས་པའོ། །ཧྲཱིཿ ནི་ཡེ་ནས་བྱང་ཆུབ་ཀྱི་སེམས་ལ་རྫོགས་པས་སྨོན་པ་མེད་པའི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོ་སྟེ། རྟ་མགྲིན་རེ་སྨོན་རྟོག་པས་རྩོལ་བ་བཅོམ། །དེ་ཕྱིར་བདག་རྫོགས་སྨོན་མེད་སྒོ་ལ་གནས། །ཞེས་པའོ། །ཧཱུྃ་ནི་བྱ་བ་མེད་པར་འོད་གསལ་བས་ཐབས་ལ་མཁས་པའི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོ་སྟེ། བདུད་རྩི་འཁྱིལ་བ་ཡང་དག་ཞེན་བགེགས་འཇོམས། །དེ་ཕྱིར་བྱ་མེད་ཐབས་ཆེན་རང་བཞིན་འོད་གསལ་སྒོ། །ཡེ་ནས་བདག་ལ་ལྷུན་རྫོགས་ཁྲོ་བོའི་ཆོས། །ཡི་གེའི་ཆོས་ཉིད་མཛད་པས་རིག་ལ་སྣང་བར་བྱེད། །ཅེས་པའོ།།

འབྲོམ་གྱི་ཕྱག་མཆན་ན། ཡ་ཡ་མནྟ་ཀྲིཏ། ཧ་བིགྷྣ་ཏ་ཀྲིཏ། ཧྲཱིཿཔདྨ་ཏ་ཀྲིཏ། ཧཱུྃ་པྲཛྙཱ་ཏ་ཀྲིཏ་ཞེས་པའི་སྔགས་དོན་དུ་གསུངས་སོ། །ཛཿ ནི་སྦྱིན་པའི་ཐབས་ཀྱིས་འགྲོ་བ་དོན་ལ་འདྲེན་པའི་ཆོས་ཉིད་རྣམ་པར་སྣང་བའི་སྒོ་སྟེ། ལྕགས་ཀྱུའི་ཆོས་ཉིད་སྦྱིན་པས་འགྲོ་བ་འདྲེན་པའི་སྒོ། །ཞེས་པའོ། །ཧཱུྃ་ནི་སྙན་པར་སྨྲ་བས་གསང་དོན་བརྗོད་པའི་ཆོས་ཉིད་རྣམ་པར་སྣང་བའི་སྒོ་སྟེ། ཞགས་པའི་ཆོས་ཉིད་སྙན་པའི་དོན་བརྗོད་སྒོ་མས་ལས་ངན་འཆིང༌། །ཞེས་པའོ། །བྃ་ནི་གདུལ་བྱའི་དོན་ཡང་དག་པར་སྤྱོད་པའི་ཆོས་ཉིད་རྣམ་པར་སྣང་བའི་སྒོ་སྟེ། ལྕགས་སྒྲོག་ཆོས་ཉིད་འགྲོ་བའི་དོན་སྤྱོད་ལོག་སྡོམ་སྒོ། །ཞེས་པའོ། །ཧོཿནི་མ་འདྲེས་ཡོངས་རྫོགས་ཀྱི་དོན་དང་མཐུན་པའི་ཆོས་ཉིད་རྣམ་པར་སྣང་བའི་སྒོ་སྟེ། དྲིལ་བུའི་ཆོས་ཉིད་འགྲོ་དོན་མཐུན་པས་དགའ་བྱེད་སྒོ། །བསྡུ་བ་རྣམ་ཐར་སྒོ་བཞིར་ཡབ་ཡུམ་བརྒྱད་རྣམས་བཞུགས། །ལོག་སྐྱོན་ཚོགས་བརྒྱད་ཡེ་བཅོམ་བསྲུང་བའི་ངོ་བོར་གནས། །ཞེས་པའོ། །ཀྲ་ནི་ཐུན་མོང་མ་ཡིན་པའི་བྱང་ཆུབ་ཡན་ལག་བདུན་གྱི་ངོ་བོས་རང་བཞིན་ཞི་བ་ཆེན་པོའི་ཕྱིར་ལྷའི་ཐུབ་པའི་ཆོས་ཉིད་རྣམ་པར་སྣང་བའི་སྒོ འོ།།

ཆོས་རྗེ་དམ་པ་རིན་པོ་ཆེའི་ཕྱག་མཆན་ལས། ལྷའི་ཐུབ་པ་རྒྱུད་ཞི་བའམ། བརྒྱ་བྱིན་གྱིས་བྱང་ཆུབ་ཀྱི་ལམ་སྟོན་ལ། གསང་སྟེ་གསང་སྔགས་ཀྱང་སྟོན་པས་སོ་གསུངས། དྲུཾ་ནི་སྟོབས་ལྔའམ་བཅུའི་ངོ་བོས་རྩོད་པ་ལྟ་བུར་བྱེད་པ་འདུལ་བའི་ཕྱིར་ལྷ་མིན་གྱི་ཐུབ་པའི་ཆོས་ཉིད་རྣམ་པར་སྣང་བའི་སྒོ འོ། །ཆོས་རྗེས། ལྷ་མ་ཡིན་སྟོབས་ཆེ་བའམ་འཐབ་པ་ལ་དགའ་བས་སོ། །གསུངས། སྲུཾ་༼༢༦༩༽ནི་དབང་པོ་ལྔའི་ངོ་བོས་འདོད་པ་རང་དགའ་བ་དང་དབང་པོའི་སྒོ་སྡོམ་པས་འདུལ་བའི་ཕྱིར་མིའི་ཐུབ་པའི་ཆོས་ཉིད་རྣམ་པར་སྣང་བའི་སྒོ འོ། །ཆོས་རྗེས། མི་དབང་ཤཱཀྱ་ཐུབ་པའམ་ཡང་ན་མི་དབང་པོ་ལྔ་གསལ་ལ་རིག་པ་རྣོ་བས་སོ། །གསུངས། བྲཾ་ནི་རྫུ་འཕྲུལ་གྱི་རྐང་པ་བཞིའི་ངོ་བོས་རྐང་བཞི་ལ་སོགས་པ་མ་རིག་པ་ལས་ཆོས་ཉིད་ཀྱིས་བསྐྱོད་པར་འདུལ་བའི་ཕྱིར་བྱོལ་སོང་གི་ཐུབ་པའི་ཆོས་ཉིད་རྣམ་པར་སྣང་བའི་སྒོ འོ། །ཀྵཾ་ནི་ཡང་དག་པར་སྤོང་བ་བཞིའི་ངོ་བོས་འདོད་པ་སྤོང་བས་འབྲས་བུ་མི་འབྱུང་བར་འདུལ་བའི་ཕྱིར་ཡི་དྭགས་ཀྱི་ཐུབ་པའི་ཆོས་ཉིད་རྣམ་པར་སྣང་བའི་སྒོ འོ། །ཡེ་ནི་དྲན་པ་ཉེ་བར་བཞག་པ་བཞིའི་ངོ་བོས་སྔ་མའི་ལས་དྲན་ཏེ་ལོག་ལྟ་འཐིབས་པོ་བསལ་ནས་སྡུག་བསྔལ་གྱིས་མྱོས་པ་སྒྲོལ་བར་འདུལ་བའི་ཕྱིར་དམྱལ་བའི་ཐུབ་པའི་ཆོས་ཉིད་རྣམ་པར་སྣང་བའི་སྒོ འོ།།

གཉིས་པ་གཞལ་ཡས་ཁང་མཚོན་པ་ནི།

བྷྲཱུྃ་སྟོང་པ། ཞེས་པ་ནས། སྒོ འོ། །ཞེས་པ་དང་།

བྲུཾ་སྟོང་པ་ཉིད་ཀྱི་ཆོས་ཉིད་རྣམ་པར་སྣང་བའི་སྒོའོ།།

ཕྲིན་ལས་བཞིའི་འོག་ནས། ཤྭ་ཕྱི་ནང༌། ཞེས་པ་ནས། ཆོས་འབྱུང་བའི་ཆོས་ཉིད་རྣམ་པར་སྣང་བའི་སྒོ འོ། །ཞེས་པའི་བར་གྱིས་བསྟན་ཏེ།

ཤྭཱ་ཕྱི་ནང་འབྱུང་བའི་ཆོས་ཉིད་རྣམ་པར་སྣང་བའི་སྒོའོ།།

དྷ་ཆོས་འབྱུང་བའི་ཆོས་ཉིད་རྣམ་པར་སྣང་བའི་སྣང་བའི་སྒོའོ།།

དེ་བཞིན་གཤེགས་པ་དེ་དག་ཀུན་གང་ན་བཞུགས་ན་བྷྲཱུྃ་ནི་སྟོང་པ་ཉིད་བཅོ་བརྒྱད་དབྱིངས་ཀྱི་ངོ་བོར་ལྷུན་གྱིས་རྫོགས་པའི་གཞལ་ཡས་ཁང་གི་ཆོས་ཉིད་མཚོན་ཅིང་དེ་ཉིད་ལ་གནས་པར་རྣམ་པར་སྣང་བའི་སྒོ འོ། །ཤྭ་ནི་ཤྭ་ས་ནིའི་སྒྲས་གནས་ཕྱི་ནང་སྣ་ཚོགས་དང་འབྱུང་བ་རིམ་པར་བརྩེགས་པའི་ཆོས་ཉིད་རྣམ་པར་སྣང་བའི་སྒོ འོ། །དྷ་ནི་དྷརྨ་དྷ་ཏུ་སྟེ་ཆོས་ཀྱི་འབྱུང་གནས་གསང་བའི་ནམ་མཁའ་དབྱིངས་ཀྱི་བྷ་གའི་ཆོས་ཉིད་རྣམ་པར་སྣང་བའི་སྒོ འོ། །ཕྱི་མ་འདི་གཉིས་མར་བཏགས་ནས་ཡེ་ཤེས་ལྔར་ལྕགས་འགྲེལ་གྱིས་བཤད་དེ། །དེ་ལྟར་ན་མ་དང་ཧ་ནི་ཁྱད་པར་གྱི་ཚིག་ཏུ་སྦྱར་ལ། ལྔ་པོ། སྟོང་ཉིད་ཡེ་ཤེས་དང་མེ་ལོང་ལྟ་བུ་ལ་སོགས་པར་སྔགས་ཀྱི་འབྲུ་བསྡེབ་ནས་བཤད་དོ།།

གསུམ་པ་ལས་བཞི་མཚོན་པ་ནི།

གོང་གི་ཨེ་ཁྲོ་བོའི། ཞེས་པ་ནས། སྡུད་པའི་ཆོས་ཉིད་རྣམ་པར་སྣང་བའི་སྒོ འོ། །ཞེས་པའི་བར་གྱིས་བསྟན་ཏེ།

ཨེ་ཁྲོ་བོའི་ཆོས་ཉིད་རྣམ་པར་སྣང་བའི་སྒོའོ། །བཾ་ཞི་བའི་ཆོས་ཉིད་རྣམ་པར་སྣང་བའི་སྒོའོ།།

མཱ་མཐའ་རྒྱས་པའི་ཆོས་ཉིད་རྣམ་པར་སྣང་བའི་སྒོའོ། །ཡཱ་སྡུད་པའི་ཆོས་ཉིད་རྣམ་པར་སྣང་བའི་སྒོའོ།།

ཨེ་ནི་དྲག་པོ་ཁྲོ་བོའི་ཆོས་ཉིད་རྣམ་པར་སྣང་བའི་སྒོ འོ། །ཝཾ་ནི་མཐའ་ཀུན་ཞི་བའི་ཆོས་ཉིད་རྣམ་པར་སྣང་བའི་སྒོ འོ། །མ་ནི་མཐའ་བཞི་རྒྱས་པའི་ཆོས་ཉིད་རྣམ་པར་སྣང་བའི་སྒོ འོ། །ཡ་ནི་དབང་དུ་སྡུད་པའི་ཆོས་ཉིད་རྣམ་པར་སྣང་བའི་སྒོ འོ། །དེ་ལྟར་ཡང༌། ཨེ་ནི་དྲག་པོའི་ལས་ཏེ་ཝཾ་ཞི་བ། །མ་ནི་རྒྱས་པའི་ཕྲིན་ལས་ཡ་དབང་སྡུད། །ཡི་གེ་བཞི་༼༢༧༠༽དབྱིབས་སོ་སོས་ལས་བཞི་བསྟན། །དེ་ཉིད་ཡེ་ནས་གནས་པའི་ཡི་གེར་སྣང༌། །ཞེས་སོ།།

བཞི་པ་ཆོ་གའི་རིམ་པ་མཚོན་པ་ནི།

མ་དྲན་པའི། ཞེས་པ་ནས། ཤེས་པའི་ཆོས་ཉིད་རྣམ་པར་སྣང་བའི་སྒོ འོ། །ཞེས་པའི་བར་གྱིས་བསྟན་ཏེ།

མཱ་དྲན་པའི་ཆོས་ཉིད་རྣམ་པར་སྣང་བའི་སྒོའོ། །ཧྭ་བོད་པའི་ཆོས་ཉིད་རྣམ་པར་སྣང་བའི་སྒོའོ།།

པྲཱ་སྤྲོ་བའི་ཆོས་ཉིད་རྣམ་པར་སྣང་བའི་སྒོའོ། །ཀྴ་ནི་མཐར་ཟད་ཀྱི་ཆོས་ཉིད་རྣམ་པར་སྣང་བའི་སྒོའོ།།

ཛྙཱ་ཤེས་པའི་ཆོས་ཉིད་རྣམ་པར་སྣང་བའི་སྒོའོ།།

མ་ནི་མ་ནུ་སྟེ་དྲན་ཞིང་རིག་པའི་ཏིང་ངེ་འཛིན་གྱི་ཆོས་ཉིད་རྣམ་པར་སྣང་བའི་སྒོ འོ། །ཧཱ་ནི་ཧྱ་ཧི་ཀྱེ་སྟེ་སྤྱན་དྲངས་པའམ་བོད་པའི་ཆོས་ཉིད་རྣམ་པར་སྣང་བའི་སྒོ འོ། །པྲ་ནི་པྲ་པ་སྟེ་འོད་ཟེར་སྤྲོ་བའི་ཆོས་ཉིད་རྣམ་པར་སྣང་བའི་སྒོ འོ། །ཀྵ་ནི་ཀྵ་ཡ་ཏ་ན་མཐའ་ཟད་པ་སྟེ་དཀྱིལ་འཁོར་བསྡུ་བའི་ལས་ཟིན་པའམ་མཐའ་ཡི་སྒྲིབ་པ་ཟད་པའི་ཆོས་ཉིད་རྣམ་པར་སྣང་བའི་སྒོ འོ། །ཛྙཱ་ནི་ཛྙཱ་ན་སྟེ་ཤེས་པའི་ཚོགས་བརྒྱད་ཀྱི་ཆོས་ཉིད་རྣམ་པར་སྣང་བའི་སྒོ འོ།།

ལྔ་པ་མཚན་ཉིད་གསུམ་མཚོན་པ་ནི།

ཧེ་རྒྱུའི། ཞེས་པ་ནས། རྐྱེན་གྱི་ཆོས་ཉིད་རྣམ་པར་སྣང་བའི་སྒོ འོ། །ཞེས་པའི་བར་གྱིས་བསྟན་ཏེ།

ཧེ་རྒྱུའི་ཆོས་ཉིད་རྣམ་པར་སྣང་བའི་སྒོའོ། །སྭཱཾ་འབྲས་བུའི་ཆོས་ཉིད་རྣམ་པར་སྣང་བའི་སྒོའོ།།

ཐཱཾ་རྐྱེན་གྱི་ཆོས་ཉིད་རྣམ་པར་སྣང་བའི་སྒོའོ།།

ཧེ་ནི་ཧེ་ཏུ་ན་རྒྱུའི་ཆོས་ཉིད་རྣམ་པར་སྣང་བའི་སྒོ འོ། །སྭཱཾ་ནི་སྭཱ་བྷཱ་བ་ན་འབྲས་བུའི་ཆོས་ཉིད་རྣམ་པར་སྣང་བའི་སྒོ འོ། །ཐཾ་ནི་ཐཾ་ཀ་ན་རྐྱེན་བཞི་པོ་རྣམས་ཀྱི་ཆོས་ཉིད་རྣམ་པར་སྣང་བའི་སྒོ འོ།།

དྲུག་པ་འཁོར་འདས་མཚོན་པ་ནི།

སྐ་ཕུང་པོའི། ཞེས་པ་ནས། །དཀར་པོའི་ཆོས་ཉིད་རྣམ་པར་སྣང་བའི་སྒོ འོ། །ཞེས་པའི་བར་གྱིས་བསྟན་ཏེ།

སྐུ་ཕུང་པོའི་ཆོས་ཉིད་རྣམ་པར་སྣང་བའི་སྒོའོ། །ཀྲ་ལས་ཀྱི་ཆོས་ཉིད་རྣམ་པར་སྣང་བའི་སྒོའོ།།

པཱཾ་ནག་པོའི་ཆོས་ཉིད་རྣམ་པར་སྣང་བའི་སྒོའོ། །ཏྲ་དཀར་པོའི་ཆོས་ཉིད་རྣམ་པར་སྣང་བའི་སྒོའོ།།

སྐ་ནི་སྐནྡྷ་པཉྩ་ན་ཕུང་པོ་ལྔའི་ཆོས་ཉིད་རྣམ་པར་སྣང་བའི་སྒོ འོ། །སྦས་པ་ལྟར་ན། ཤཱི་ལ་སྐནྡྷཿ ཚུལ་ཁྲིམས་ཀྱི་ཕུང་པོ། །ས་མཱ་ཏི་སྐནྡྷ་ཏིང་ངེ་འཛིན་གྱི་ཕུང་པོ། པྲཛྙཱ་སྐནྡྷཿ ཤེས་རབ་ཀྱི་ཕུང་པོ། བི་མུཀྟི་སྐནྡྷཿ རྣམ་པར་གྲོལ་བའི་ཕུང་པོ། བི་མུཀྟི་ཛྙཱ་ན་དྷརྵ་སྐནྡྷཿ རྣམ་གྲོལ་ཡེ་ཤེས་མཐོང་བའི་ཕུང་པོའོ། །ཀྲ་ནི་ཀརྨ་ན་ལས་ཀྱི་ཆོས་ཉིད་རྣམ་པར་སྣང་བའི་སྒོ འོ། །བྃ་ནི་བཾ་ཀཱ་ལ་ན་ནག་པོའི་ཆོས་ཉིད་རྣམ་པར་སྣང་བའི་སྒོ འོ། །ཏྲ་ནི་ཏྲ་ཡེ་ན་དཀར་པོའི་ཆོས་ཉིད་རྣམ་པར་སྣང་བའི་སྒོ འོ། །དེ་དག་ནི་སྣ་ཚོགས་སྣང་བའི་ཆོས་ཉིད་ཀྱི་ཟུར་འདྲེན་པ་སྟེ་ཐ་མ་གཉིས་ཀྱིས་ལྷའི་སྐུ་མདོག་གི་ཆོས་ཉིད་ཀྱི་ཟུར་ཡང་འདྲེན་ནོ།།

བདུན་པ་དཀྱིལ་འཁོར་གསུམ་མཚོན་པའི་ཡི་གེ་མ་འགག་པ་ནི།

ཨ་རང་གྲུབ་པའི། ཞེས་པ་ནས། སྣང་བའི་སྒོའོ། །ཞེས་པའི་བར་གྱིས་བསྟན་ཏེ།

ༀ་རང་གྲུབ་པའི་ཆོས་ཉིད་རྣམ་པར་སྣང་བའི་སྒོའོ། །ཧཱུཾ་རྩ་བའི་ཆོས་ཉིད་རྣམ་པར་སྣང་བའི་སྒོའོ།།

མཱུཾ་ཇི་བཞིན་པའི་ཆོས་ཉིད་རྣམ་པར་སྣང་བའི་སྒོའོ།།

ཨཱ་ནི་ཡོན་ཏན་རྫོགས་པའི་ཕྱིར་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གྱི་ཆོས་ཉིད་རྣམ་པར་སྣང་བའི་ཡི་གེའི་སྒོ འོ། །ཧཱུྃ་ནི་ཆོས་རིལ་གྱི་འབྱུང་གནས་རང་གི་བྱང་ཆུབ་སེམས་ཀྱི་དཀྱིལ་འཁོར་རྩ་བའི་ཆོས་ཉིད་རྣམ་པར་སྣང་བའི་ཡི་གེའི་སྒོ འོ། །མཱུཾ་ནི་ཆོས་ཉིད་ཀྱི་ཕྱི་མོ་མ་བསླད་མ་བཅོས་ཏེ་ཡེ་ཇི་བཞིན་པའི་དཀྱིལ་འཁོར་གྱི་ཆོས་ཉིད་རྣམ་པར་སྣང་བའི་༼༢༧༡༽ཡི་གེའི་སྒོ འོ།།

གཉིས་པ་ཞབས་བསྡུ་བ་ནི།

ལང་ཀའི། ཞེས་པ་ནས། རྣམ་པར་སྣང་ངོ༌། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་ཡི་གེའི་ཆོ་འཕྲུལ་ལས་ཆོས་རྣམ་པར་སྣང་བའོ། །དེ་ཅིའི་ཕྱིར་ཞེ་ན། ལངྐའི་བདག་པོ་ཡི་གེའི་སྒོ་ནས་ཆོས་ཐམས་ཅད་ནམ་མཁའ་དང་འདྲ་བར་ཁོང་དུ་ཆུད་པར་འགྱུར་རོ། །གཟུངས་དང་། སྒྲ་དང་། དྲན་པ་དང་། བློ་གྲོས་དང་། རྟོགས་པ་དང་། གསལ་བ་ཐོབ་པར་འགྱུར་རོ། །དེ་བཞིན་དུ་ཡི་གེའི་ནི་ཆོས་ཐམས་ཅད་ཀྱི་སྒོ་ཡང་འབྱེད་པར་འགྱུར་རོ། །དོན་ཡང་མཚོན་པར་བྱེད་དོ། །རང་བཞིན་ཡང་རྟོགས་པར་བྱེད་དོ།།

ལངྐའི་བདག་པོ་དེ་དག་ནི་ཡི་གེའི་ཆོ་འཕྲུལ་གྱི་སྒོ་ནས་ཆོས་ཉིད་དུ་རྣམ་པར་སྣང་བའོ།།

ལང་ཀའི་བདག་པོ། དེ་ལྟར་དོན་བཤད་པ་དག་ནི་ཡི་གེའི་ཆོ་འཕྲུལ་ལས་ཆོས་རྣམ་པར་སྣང་བར་བྱས་པའོ། །དེའི་གཏན་ཚིགས་དེ་ཅིའི་ཕྱིར་ཞེ་ན། ལང་ཀའི་བདག་པོ། ཡི་གེའི་སྒོ་ལ་བརྟེན་པའི་སྒྲས་དྲངས་པ་དང་སྦྱར་བ་དང༌། བསྒྱུར་བས་མཚོན་ནས་ཆོས་ཉིད་ཇི་བཞིན་པའི་དོན་མཐོང་སྟེ་ཆོས་ཐམས་ཅད་ནམ་མཁའ་དང་འདྲ་བར་ཁོང་དུ་ཆུད་པར་འགྱུར་རོ། །དེ་བཞིན་དུ་མི་བརྗེད་པའི་གཟུངས་ཐོབ་པ་དང༌། གཞན་ལ་བརྗོད་པའི་སྒྲ་ལ་མཁས་པ་དང༌། དྲན་པ་ཐོབ་པས་ཤེས་བྱ་གསལ་བ་དང༌། མཁས་པར་ཆུབ་པས་བློ་གྲོས་ཡངས་པ་དང༌། དོན་ཐག་ཆོད་པས་རྟོགས་པ་གདེང་དང་ལྡན་པ་དང༌། དགོངས་པའི་ཏིང་ངེ་འཛིན་གསལ་བ་དང་བདུན་ཐོབ་པར་འགྱུར་བའི་ཕྱིར་རོ། །དེ་བཞིན་དུ་དེར་ཡང་མ་ཟད། དཔེས་མཚོན་ཚིག་གི་ལྡེ་མིག་གིས། །མཉམ་ཉིད་རིག་པའི་སྒོ་དབྱེར་འོས། །ཞེས་པ་ལྟར་ཡི་གེས་ནི་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་ཀྱི་དོན་གྱི་སྒོ་ཡང་འབྱེད་ཅིང་བརྡ་རིལ་ཡང་གསལ་བར་འགྱུར་རོ། །མིང་ཚིག་སྒྲོན་མས་དོན་གྱི་གསེར་མཚོན་ལྟར། །ཞེས་དང༌། ཡི་གེའི་རྗེས་སུ་དོན་དཔགས་ན། །ཡི་གེས་དོན་རྣམས་སྟོན་པར་འགྱུར། །ཞེས་པ་ལྟར་དོན་ཡང་མཚོན་པར་བྱེད་དོ། །ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཞེས་དང༌། ཨ་ནི་མ་སྐྱེས་ཡེ་ཤེས་ཡིན། །རང་བཞིན་ཐམས་ཅད་སྟོང་པར་སྟོན། །ཅེས་ཨའི་སྒྲས་སྐྱེ་བ་མེད་པའི་རང་བཞིན་ཡང་རྟོགས་པར་བྱེད་དོ། །དེས་གཞན་ལའང་འགྲེའོ། །དེ་ལྟར་ཡི་གེས་མཚོན་ནས་ཇི་ལྟ་བ་ཉིད་མཐོང་ཞིང་ཤེས་པར་བྱེད་དེ། དེ་དག་ནི་འཆད་པ་ལ་ལྟོས་ནས་བཅོས་པའི་ཆོ་འཕྲུལ་ལོ། །སྤྱིར་ལུས་གནས་རྩའི་ཡི་གེ་ནི། རང་བྱུང་གི་ཡི་གེ་བཞི་ལས་ཆོ་འཕྲུལ་ཡི་གེར་གནས་པ་སྟེ། ལྷ་རྒྱུད་ལས། རྩ་གནས་དཀྱིལ་འཁོར་གྲུབ་པའི་གཞལ་ཡས་ནས། །ཁམས་ཀྱི་བདུད་རྩི་སངས་རྒྱས་སྐུར་བཞུགས་ཤིང༌། །གྲུབ་པ་སྔགས་ཀྱི་ནུས་མཐུ་ངག་ལ་འཆར། །སྙིང་པོ་རླུང་གི་ཐུགས་ཀྱིས་ཡོངས་ལ་ཁྱབ། །ཞེས་སོགས་ལུང་རྣམས་དང་སྦྱོར་ལ། ཞིང་ཁམས་ཆོ་འཕྲུལ་གྱི་ཡི་གེ་ནི། སྤྲུལ་པའི་ཡི་གེ་འཇིག་རྟེན་ཐ་དད་དུ་འཆོལ་བར་སྤྲོས་པས་གདུལ་བྱ་སྤྲོ་བ་སྐྱེད་པ་སྟེ། ཀུན་འདུས་ལས། གསུང་གིས་འདུལ་བའི་དུས་བྱུང་ན། །དབྱངས་ཀྱི་ཡན་ལག་༼༢༧༢༽དྲུག་ཅུ་ལ། །སོགས་པའི་སྒྲ་སྐད་ཐམས་ཅད་དང༌། །ཡི་གེའི་གཟུགས་སུ་བསྟན་ནས་ནི། །འཁོར་བའི་ཁམས་སུ་སྣང་བར་བྱེད། །ཅེས་སོ། །ལང་ཀའི་བདག་པོ། དེ་དག་ནི་ཡི་གེའི་ཆོ་འཕྲུལ་གྱི་སྒོ་ནས་ཆོས་ཉིད་དུ་རྣམ་པར་སྣང་བ་སྟེ་བཅོས་པའི་ཐབས་ལས་རྟོགས་པའོ།།

གཉིས་པ་མ་བཅོས་པའི་ཆོས་སྣང་བ་ནི།

ལང་ཀའི། ཞེས་པ་ནས། གྲགས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་མ་བཅོས་པར་ཆོས་སྣང་བའི་ཆོ་འཕྲུལ་གང་ཞེ་ན། འདི་ལྟ་སྟེ། ཆོས་ཅན་མཚན་མར་སྣང་བའི་རང་བཞིན་རྣམས། །ཆོས་ཉིད་མཚན་མ་མེད་པའི་ངང་དུ་སྣང་། །སེམས་ཅན་དངོས་པོར་སྣང་བའི་རང་བཞིན་རྣམས། །སེམས་ཉིད་དངོས་པོ་མེད་པའི་ངང་དུ་སྣང་། །ཇི་སྙེད་རྣམ་པར་སྣང་བའི་རང་བཞིན་རྣམས། །ཇི་བཞིན་དེ་བཞིན་ཉིད་ཀྱི་ངང་དུ་སྣང་། །ཉོན་མོངས་དུག་ལྔར་སྣང་བའི་རང་བཞིན་རྣམས། །རྣམ་གྲོལ་ཡེ་ཤེས་ལྔ་ཡི་ངང་དུ་སྣང་། །དུག་གསུམ་རྩ་བར་སྣང་བའི་རང་བཞིན་རྣམས། །སྐུ་གསུམ་ལྷུན་གྱིས་གྲུབ་པའི་ངང་དུ་སྣང་། །གཟུང་འཛིན་རྟོག་པར་སྣང་བའི་རང་བཞིན་རྣམས། །དབྱིངས་དང་ཡེ་ཤེས་གཉིས་མེད་ངང་དུ་སྣང་། །བྱ་དང་བྱེད་པར་སྣང་བའི་རང་བཞིན་རྣམས། །ཐབས་དང་ཤེས་རབ་འབྲེལ་བའི་ངང་དུ་སྣང་། །འཇིག་ཚོགས་ཕུང་པོར་སྣང་བའི་རང་བཞིན་རྣམས། །རྣམ་གྲོལ་ཟག་མེད་ཕུང་པོའི་ངང་དུ་སྣང་། །ཀུན་ནས་ཉོན་མོངས་འཁོར་བའི་རང་བཞིན་རྣམས། །རྣམ་བྱང་མྱ་ངན་འདས་པའི་ངང་དུ་སྣང་། །འཇིག་རྟེན་གཡོ་རྡུལ་མི་གཡོའི་རང་བཞིན་རྣམས། །རྒྱལ་བ་བཞི་བཅུ་གཉིས་ཀྱི་ངང་དུ་སྣང་། །མྱ་ངན་འདས་དང་འཁོར་བའི་རང་བཞིན་རྣམས། །བཙལ་མེད་མ་བཅོས་དེ་ཉིད་ངང་དུ་སྣང་། །ཞེས་ཡོངས་སུ་གྲགས་ཤིང་གྲགས་པར་གྱུར་ཏོ།།

ལང་ཀའི་བདག་པོ། གང་གཞི་ཇི་བཞིན་པ་ཆོས་ཉིད་མ་བཅོས་པ་ལས་ཅིར་སྣང་ཡང་ཅིར་སྲིད་ཀྱང་མཚན་ཉིད་མ་ངེས་པར་དེ་ཁོ་ན་ཉིད་ཀྱི་རང་བཞིན་དུ་སྣང་བའི་ཆོ་འཕྲུལ་བསྟན་པ་གང་ཞེ་ན། འདི་ལྟ་སྟེ། རང་བཞིན་གྱི་ཆོས་སྣང་ལུགས་བཅུ་པོ་འདི་སྒྲ་ཇི་བཞིན་པར་མི་ལྟ་ཞིང་ཆོས་བཅུ་གཅིག་བསལ་ནས་དོན་བཅུ་གཅིག་ཏུ་སྣང་བའང་མ་ཡིན་པར་ཕྱོགས་རིས་མེད་ལ་ལྡོག་ས་མི་འཚོལ་བའི་དོན་དུ་ཤེས་པར་བྱ་སྟེ། ཆོས་དང་ལྡན་པས་ཆོས་ཅན་རྒྱ་ཆེ་བ་ཇི་སྙེད་པར་ཞེན་བློའི་ངོ་ལ་འཁྲུལ་པའི་མཚན་མར་སྣང་བའི་རང་བཞིན་རྣམས། དཔེར་ན་རྒྱལ་པོའི་ཕྲུག་གུ་རྒྱལ་པོ་ལས་ནོར་ཡང་ངོ་བོ་རྒྱལ་པོ་ལས་མ་གཡོས་པ་དང་འདྲ་བ་ཙམ་གྱི་ཕྱིར་ཆོས་ཉིད་ཟབ་མོ་མཚན་མ་མེད་པའི་ངང་ཉིད་དུ་གསལ་བར་སྣང་ངོ༌། །འགྲོ་བ་སེམས་ཅན་ལུས་ངག་ཡིད་གསུམ་དང་ལྡན་པའི་དངོས་པོར་སྣང་བའི་རང་བཞིན་རྣམས་ཀྱང༌། སྣང་བ་ཉིད་ན་ཉི་མའི་ཟེར་བཞིན་པས་རང་རིག་པ་མཐའ་དང་བྲལ་བ་ཉིད་བརྡ་དང་ཐ་སྙད་མང་པོར་བཏགས་པ་ལ་སྣང་བ་དེ་དག་ཅིར་སྣང་ཡང་སྣང་བ་མི་འགོག་ལ་སྣང་བ་མེད་དེ་སེམས་ཉིད་དངོས་པོ་མེད་པ་ཡེ་མ་བཅོས་པའི་ངང་དུ་སྣང་བ་ཉིད་དོ། །ཐ་སྙད་སྣ་ཚོགས་ཇི་སྙེད་པར་རྣམ་པར་སྣང་བའི་རང་བཞིན་རྣམས་ཀྱང༌། དོན་ལ་དབྱེར་མེད་པས་ཆོས་ཉིད་ཇི་བཞིན་པ་དེ་བཞིན་ཉིད་ཀྱི་ངང་དུ་མཉམ་པར་སྣང་ངོ༌། །འགྲོ་བ་ལྔའི་སྡུག་བསྔལ་གྱི་རྒྱུ་འདུ་བྱེད་ལྔ་འཁྲུལ་པ་ལ་ཉོན་མོངས་པ་དུག་ལྔར་སྣང་བའི་རང་བཞིན་རྣམས་ཀྱང་སྤུ་མ་བརྗེས་མདོག་མ་བསྒྱུར་བཟོས་མ་བྱས་པར་རྣམ་གྲོལ་ཡེ་ཤེས་ལྔ་ཡི་ངང་དུ་སྣང་སྟེ། གཏི་མུག་སྟོང་པའི་ཡེ་ཤེས། ཞེ་སྡང་མེ་ལོང་ཡེ་ཤེས། ང་རྒྱལ་མཉམ་ཉིད་ཡེ་ཤེས། འདོད་ཆགས་སོར་རྟོག་ཡེ་ཤེས། ཕྲག་དོག་བྱ་གྲུབ་ཡེ་ཤེས་སོ། །ཉོན་མོངས་པ་དུག་གསུམ་ཉིད་ཁམས་གསུམ་གྱི་གཞིའམ་རྩ་བར་སྣང་བའི་རང་བཞིན་རྣམས་ཀྱང་ཡེ་ནས་ངོ་བོ་སྣང་ལ་མེད་པས་སྐུ་གསུམ་ལྷུན་གྱིས་གྲུབ་པའི་ངང་དུ་སྣང་སྟེ། གཏི་མུག་ཆོས་སྐུ། འདོད་ཆགས་ལོངས་སྐུ། ཞེ་སྡང་སྤྲུལ་སྐུའོ། །འགྲོ་བའི་ཡུལ་སེམས་༼༢༧༣༽ལ་གཟུང་འཛིན་གྱི་རྟོག་པ་གཉིས་སུ་འཁྲུལ་པར་སྣང་བའི་རང་བཞིན་རྣམས་ཀྱང༌། ཡེ་ནས་དབྱིངས་དང་ཡེ་ཤེས་གཉིས་སུ་མེད་པའི་ངང་དུ་བརྡལ་བར་སྣང་ངོ༌། །སྐྱེ་འགྲོའི་བྱ་བ་ཡུལ་དང་བྱེད་པ་ཤེས་པར་ཅིར་ཡང་སྣང་བའི་རང་བཞིན་རྣམས་ཀྱང༌། ཐེར་ཟུག་དང་རྒྱུན་མེད་པར་ཐབས་དང་ཤེས་རབ་བདག་ཉིད་ཆེན་པོར་འབྲེལ་ཏེ་དབྱེར་མེད་པའི་ངང་དུ་རྣམ་པར་སྣང་ངོ་། །མཚན་ཉིད་མི་རྟག་པས་འཇིག་པའི་ཚོགས་ཅན་ཕུང་པོ་ལྔའི་དངོས་པོར་སྣང་བའི་རང་བཞིན་རྣམས་ཀྱང་མ་སྤངས་པར་འཁོར་བ་ལས་རྣམ་པར་གྲོལ་བའི་ཟག་པ་མེད་པ་ཚུལ་ཁྲིམས་ཏིང་འཛིན་ཤེས་རབ། རྣམ་གྲོལ། རྣམ་གྲོལ་ཡེ་ཤེས་མཐོང་བའི་ཕུང་པོའི་ངང་དུ་སངས་རྒྱས་ཏེ་རིགས་ཀྱི་རྒྱལ་བ་ལྔར་སྣང་བ་ཉིད་དོ། །ཀུན་ནས་ཉོན་མོངས་པ་འཁོར་བའི་རང་བཞིན་དུ་སྣང་བ་རྣམས་ཀྱང་འཁོར་བ་རང་རྒྱུད་ཀ་ནས་བྲལ་བས་དེ་ཉིད་རྣམ་པར་བྱང་བ་མྱ་ངན་ལས་འདས་པའི་ངང་དུ་ཡང་དག་པར་སྣང་ངོ་། །འཇིག་པའི་རྟེན་དུ་གྱུར་པའི་ནང་བཅུད་གཡོ་བའི་རྡུལ་དང་ཕྱི་སྣོད་མི་གཡོ་བའི་རྡུལ་དུ་སྣང་བའི་རང་བཞིན་རྣམས་ཀྱང་རང་རིག་རང་སྣང་བས་རྒྱལ་བ་བཞི་བཅུ་རྩ་གཉིས་ཀྱི་དཀྱིལ་འཁོར་གཅིག་དང་དུ་མ་ལས་གྲོལ་བའི་ངང་ཉིད་དུ་རྣམ་པར་སྣང་ངོ། །མྱ་ངན་ལས་འདས་པ་དང་འཁོར་བའི་རང་བཞིན་གྱི་དངོས་པོ་གཉིས་པ་རིལ་དུ་གྱུར་པ་རྣམས་ཡེ་ནས་ལྷུན་གྱིས་གྲུབ་པས་བརྩལ་བ་མེད་པར་མ་བསླད་པས་མ་བཅོས་ཤིང་ཇི་བཞིན་པ་དེ་བཞིན་ཉིད་ཀྱི་ངང་དུ་བསམ་གྱིས་མི་ཁྱབ་པའི་རྣམ་པར་སྣང་བ་ཉིད་དོ། །ཞེས་དེ་དག་ཐམས་ཅད་དེ་བཞིན་གཤེགས་པའི་ཐུགས་རྗེའི་ཆོ་འཕྲུལ་གྱི་སྒྲར་སྔོན་བྱུང་དུ་ཡོངས་སུ་གྲགས་ཤིང་ད་ལྟར་ཡང་གྲགས་པར་གྱུར་ཏོ། །དེ་དག་ནི་བྱེད་པ་མེད་པར་རང་སྣང་ལ་མ་ངེས་པས་ཇི་བཞིན་པ་ཉིད་ཀྱི་ཕྱིར་མིང་ངེས་པར་འགྲུབ་བོ། །སྣང་བའང་སྣང་བ་ཡོད་པའི་ཕྱོགས་ལས་བཏགས་པའི་ཐ་སྙད་དེ་ངོ་བོ་ནི་སྣང་མི་སྣང་ལས་གྲོལ་བའོ། །དེ་འཁོར་གྱི་རིག་པ་ལ་བརྗོད་པ་དང་འདྲ་བར་གྲགས་ཤིང་འཇལ་བའང་ཞིང་རིལ་དུའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། འགྲེལ་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ནི་ཆོས་སྣང་བའི་ཆོ་འཕྲུལ་ཏེ། དེ་དག་ཀྱང་སོ་སོ་མ་འདྲེས་པར་གཅིག་ཏུ་ཡོངས་སུ་འགྲེལ་ཏོ།།

ལང་ཀའི་བདག་པོ་དེ་དག་ནི་ཆོས་སྣང་བའི་ཆོ་འཕྲུལ་ཏེ། དེ་དག་ཀྱང་སོ་སོར་མ་འདྲེས་པར་དབྱིངས་ཀྱི་ཆོས་ཉིད་གཅིག་ཏུ་ཡོངས་སུ་རྫོགས་པར་འགྲེལ་ཏོ། །དེས་ཀྱང་བྱུང་ཚུལ་གྱི་དོན་གསལ་བར་བསྟན་པའོ། །དེ་ལྟར་ཆོས་སྣང་བའི་ཆོ་འཕྲུལ་༼༢༧༤༽གྱི་དོན་འདི་ཉིད་ཨ་ནུ་ཡོ་གའི་རང་ལུགས་ཇི་ལྟ་བ་བཞིན་དུ་མདོ་ཆེན་པོའི་དགོངས་དོན་ཐུན་མོང་མིན་པར་རྒྱུད་ལས་འབྱུང་བ་དང་མན་ངག་དང་འགྲེལ་པ་ཀུན་གྱིས་ཇི་ལྟར་བཀྲལ་བ་བཞིན་མ་འདྲེས་འདུས་གསལ་དུ་བཀོད་པར་བྱས་པས་སྤྱིར་ཁྲོ་བོ་ལྷ་རྒྱུད་ཆེན་པོ་ལས་གསུངས་པ་ལྟར་ཐེག་པ་རིམ་པ་དགུ་དང་བྱེ་བྲག་ཏུ།

རྣལ་འབྱོར་ཆེན་པོ་ནང་པ་ནི། རང་བྱུང་འོད་གསལ་ཆོས་ཀྱི་སྐུ། །རྒྱལ་དྲུག་ཡུམ་དང་འདུ་འབྲལ་མེད། །ཐུན་མོང་དྲུག་ཁྱད་ཁྲོ་ཕྱིར་སྤྲུལ། །རྫོགས་པ་རྗེས་སུ་རྣལ་འབྱོར་ནི། །དབྱིངས་ཤེས་འདུ་འབྲལ་མེད་སྲས་བདེ། །ཀུན་བཟང་ཡུམ་དང་འདུ་འབྲལ་མེད། །ཐུབ་ཁྱད་འཕྲོ་སྤྲུལ་ཡི་གེ་འཁོར། །རྫོགས་ཆེན་ཐེག་པའི་ཡང་རྩེ་ནི། །ཡེ་ཇི་བཞིན་སྨྲ་བསམ་འདས་ཆོས། །ཐུན་མོང་ལྷུན་གྲུབ་ལོངས་སྤྱོད་རྫོགས། །ཅིར་ཡང་སྣང་བ་དེ་ཁོ་ན། །སྐུ་གསུམ་ཁྱད་ཆེ་སེམས་བསྐྱེད་ཚུལ། །ཞེས་གསུངས་པ་ལྟར། མ་ཧཱ་ལས་འཕགས་ཤིང་ཨ་ཏི་ཡོ་གའི་ཁྱད་ཆོས་རྣམས་ཀྱི་གེགས་བསལ་བའི་ཚུལ་གྱིས་སྐུ་གསུམ་གྱི་ཆོས་སྣང་བ་དང་སྦྱོར་ཏེ་སྤྱི་རྒྱ་ལེགས་པར་གཅོད་ཅིང་སྐབས་ཀྱི་དགོངས་གནད་ནོར་འཁྲུལ་དང་བྲལ་བ་རྙེད་པར་བྱ་སྟེ་འདིར་ཡི་གེས་འཇིགས་སོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཆོས་སྣང་བའི་ཆོ་འཕྲུལ་བསྟན་པའི་ལེའུ་སྟེ་བཅུ་བདུན་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཆོས་སྣང་བའི་ཆོ་འཕྲུལ་གྱི་དོན་བསྟན་པ་ཞེས་བྱ་བའི་ལེའུ་སྟེ་བཅུ་བདུན་པ་རྣམ་པར་བཤད་པའོ།། །།

ལེའུ་བཅོ་བརྒྱད་པ་ཀུན་བརྗོད་པའི་ཆོ་འཕྲུལ་བསྟན་པ།

༈ གསུམ་པ་ཀུན་བརྗོད་པའི་ཆོ་འཕྲུལ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

ལང་ཀའི། ཞེས་པ་ནས། དེ་ཉིད་ཡིན། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཀུན་བརྗོད་པའི་ཆོ་འཕྲུལ་གང་ཞེ་ན། འདི་ལྟ་སྟེ། ཆོས་ཀུན་མ་འདྲེས་ཡོངས་རྫོགས་པ།།

ངེས་པར་ཇི་ལྟར་ཡིན་པའི་དོན། །ཕྱིན་ཅི་མ་ལོག་ཉིད་བརྗོད་པ། །དེ་ཉིད་རྣམ་དག་ལམ་ཆེན་ཡིན།།

སྐུ་དང་གསུང་ཐུགས་རང་བཞིན་ཡང་། །གང་ནའང་མེད་དེ་དེ་ཁོ་ན།།

དཔག་མེད་རྒྱལ་བ་མཐའ་ཡས་ཀྱང་། །གཞན་ན་མེད་དེ་དེ་ཉིད་ཡིན།

ལེའུ་འདིས་ངེས་དོན་སྟོན་ནོ། །ལང་ཀའི་བདག་པོ། ཆོས་ཀུན་གྱི་དོན་བརྗོད་པའི་ཆོ་འཕྲུལ་ཞེས་ངེས་ཚིག་གིས་ཉེ་བར་བརྗོད་པ་དེ་ཉིད་གང་ཞེ་ན། འདི་ལྟ་སྟེ། རྟོགས་པ་དང་མ་རྟོགས་པའི་ཆོས་ཀུན་གྱི་སྤྱི་དང་རང་གི་མཚན་ཉིད་གཉིས་བྱང་ཆུབ་ཀྱི་སེམས་སུ་མ་འདྲེས་ལ་ཡོངས་སུ་རྫོགས་པ་ཉིད་དེ། ཆོས་ཉིད་དེ་ཁོ་ན་ཉིད་དུ་ངེས་པར་གནས་པའི་གཞིའི་བཞུགས་ཚུལ་ཇི་ལྟར་ཡིན་པའི་དོན་དེ་ཉིད་ཇི་ལྟ་བ་བཞིན་དུ་སྒྲོ་སྐུར་མེད་པར་ཕྱིན་ཅི་མ་ལོག་པ་ཉིད་དུ་ངེས་དོན་གྱི་ཚིག་ཏུ་ཕྱུང་ནས་བརྗོད་པ་དེས་ན་ངེས་པའི་ཚིག་ཀྱང་འགྲུབ་སྟེ་དེ་ཉིད་མཐའི་སྤྲོས་པ་མ་སྤངས་རྣམ་པར་དག་པའི་ལམ་ཆེན་པོ་མ་ནོར་བ་ཡང་དག་པ་ཉིད་ཡིན་པར་ངེས་པར་བཞག་གོ །དེ་བས་ན་མྱ་ངན་ལས་འདས་པའི་འབྲས་བུ་མཐར་ཐུག་པ་སྐུ་དང་གསུང་དང་ཐུགས་ཀྱི་༼༢༧༥༽རང་བཞིན་དེ་ཡང་དོན་དེ་ལས་གཞན་གང་ནའང་མེད་དེ་མ་འདྲེས་ཡོངས་རྫོགས་ཀྱི་བྱང་ཆུབ་ཀྱི་སེམས་དེ་ཁོ་ན་ཉིད་མངོན་དུ་གྱུར་པ་ཡིན་ལ། དེས་ན་སྒྲོན་མ་བཀོད་པ་ལྟ་བུ་འཁོར་བའི་དཔུང་བཅོམ་པས་དཔག་ཏུ་མེད་པའི་རྒྱལ་བ་མཐའ་ཡས་པ་རྣམས་ཀྱང་གཞན་ན་མེད་དེ། རང་གི་སེམས་ཀྱི་ཆོས་ཉིད་དེ་ཁོ་ན་ཉིད་ཡིན་པས་གཅིག་དང་དུ་མ་ལས་གྲོལ་བར་བསྟན་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཀུན་བརྗོད་པ་དངོས། གང་གི་སྤྱོད་ཡུལ་ཡིན་པ། རྟོགས་མ་རྟོགས་ཀྱི་སྐྱོན་ཡོན་ནོ། །དང་པོ་ལ་གསུམ་སྟེ། འཁོར་བ་མ་འདྲེས་ལ་ཡོངས་སུ་རྫོགས་པ། མྱ་ངན་ལས་འདས་པ་མ་འདྲེས་ལ་ཡོངས་སུ་རྫོགས་པ། འཁོར་འདས་ཐམས་ཅད་མ་འདྲེས་ཡོངས་སུ་རྫོགས་པའོ། །དང་པོ་ལ་ལྔ་སྟེ། ཉོན་མོངས་པ་ལྔ་མ་འདྲེས་ཡོངས་རྫོགས། ཕུང་པོ་ལྔ་མ་འདྲེས་ཡོངས་རྫོགས། ཁམས་རྣམས་མ་འདྲེས་ཡོངས་རྫོགས། སྐྱེ་མཆེད་མ་འདྲེས་ཡོངས་རྫོགས། རྟེན་འབྲེལ་མ་འདྲེས་ཡོངས་རྫོགས་སོ། །དང་པོ་ནི།

གཏི་མུག ཅེས་པ་ནས། ཉིད་ཁོ་ན། ཞེས་པའི་བར་ཚིགས་བཅད་ལྔས་བསྟན་ཏེ།

གཏི་མུག་མ་འདྲེས་ཀུན་ནས་རྨོངས། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཞེ་སྡང་མ་འདྲེས་མནར་སེམས་པ། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ང་རྒྱལ་མ་འདྲེས་རི་བོ་ཆེ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །འདོད་ཆགས་མ་འདྲེས་ཀུན་ཏུ་ཞེན། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན།།

མ་བཅོས་དེ་བཞིན་ཉིད་ཁོ་ན། །ཕྲག་དོག་མ་འདྲེས་ཀུན་ནས་འཁྲུག །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

དངོས་པོ་འཁྲུལ་པ་དང་ལམ་དང་འབྲས་བུ་ཇི་སྙེད་བརྗོད་པའི་དང་པོ་བསྟན་པ་གང་སྙམ་པ་ལ། གཞལ་བྱའི་ངོ་ཏི་མ་རིག་པའམ་གཏི་མུག་རང་གི་མཚན་ཉིད་ཆོས་གཞན་དང་མ་འདྲེས་པར་གསལ་བ་ནི། དུས་དང་སྐབས་རིལ་དུ་དོན་མི་ཤེས་ཏེ་ཀུན་ནས་རྨོངས་པས་འབྱེད་པ་མེད་པའོ། །དེ་ཉིད་ཡེ་ནས་རིག་པ་བྱང་ཆུབ་ཀྱི་སེམས་ཉིད་དུ་ཡོངས་སུ་རྫོགས་པས་ཡེ་ཤེས་རང་གསལ་བའི་ངོ་བོ་ལ་མ་རིག་པ་མ་སྤངས་ལ་མ་གྲུབ་པས་སྟོང་སྟེ་བརྟགས་པའི་ བདག་བྲལ་ཏེ་མེད་པ ་ནི་སྤྱིའི་མཚན་ཉིད་དོ། །དེ་ལྟར་སྤྱི་དང་རང་གི་མཚན་ཉིད་གཉིས་པོ་དེ་ཉིད་སོ་སོར་སྣང་བ་མ་འགགས་བཞིན་དུ་ངོ་བོ་བསྟན་དུ་ཡང་མེད་པས་མཐའ་གཉིས་ལས་གྲོལ་བའི་ཕྱིར་མ་འདྲེས་ཡོངས་རྫོགས་ངོ་བོ་གཉིས་མེད་དུ་གྱུར་ན། དེ་ཉིད་གནས་ལུགས་མིན་པ་ལ་ཡིན་པར་མ་བྱས་པར་གཏི་མུག་ཉིད་ཆོས་ཐམས་ཅད་ཀྱི་ཇི་བཞིན་པ་ཡིན་པར་སངས་རྒྱས་པས་ན་ཡེ་ནས་མ་བཅོས་པའི་དེ་བཞིན་ཉིད་དེ་མ་ནོར་བ་དེ་ཁོ་ན་ཉིད་དུ་གསལ་བས་གཏི་མུག་ཉིད་སྟོང་པ་ཉིད་ཀྱི་ཡེ་ཤེས་སོ། །དེ་བཞིན་དུ་ཞེ་སྡང་གི་རང་མཚན་གཞན་དང་མ་འདྲེས་པར་ཕ་རོལ་ལ་ཀུན་ནས་མནར་སེམས་པ་དེ་ཉིད་རིག་པ་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་ཞེ་སྡང་མ་སྤངས་ལ་མ་གྲུབ་པས་སྟོང་ཞིང་བརྟགས་༼༢༧༦༽པའི་ བདག་མེད་པ ་ནི་སྤྱིའི་མཚན་ཉིད་དེ། དེ་ལྟར་རང་དང་སྤྱིའི་མཚན་ཉིད་གཉིས་པོ་དེ་ཉིད་མཐའ་གཉིས་ལས་གྲོལ་ཏེ་མ་འདྲེས་ཡོངས་རྫོགས་ངོ་བོ་དབྱེར་མེད་དུ་རང་གསལ་ལ་ཡུལ་དང་བྲལ་བ་ན། ཡེ་ནས་མ་བཅོས་པར་ཆོས་ཉིད་དེ་བཞིན་ཉིད་དེ་ཁོ་ན་ཉིད་དེ་ཞེ་སྡང་ཉིད་མེ་ལོང་ཡེ་ཤེས་སུ་གསལ་ལོ། །ང་རྒྱལ་གྱི་རང་མཚན་གཞན་དང་མ་འདྲེས་པར་མྱོང་ཞིང་ཁེངས་པས་རི་བོ་གཞན་ཟིལ་གྱིས་གནོན་པས་ཆེ་བར་རློམ་པ་དེ་ཉིད་རིག་པ་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་ང་རྒྱལ་མ་སྤངས་ལ་མ་གྲུབ་པས་སྟོང་ཞིང་བརྟགས་པའི་ བདག་མེད་པ ་ནི་སྤྱིའི་མཚན་ཉིད་དེ། དེ་ལྟར་མཚན་ཉིད་གཉིས་པོ་དེ་ཉིད་མཐའ་དང་བྲལ་ཏེ་མ་འདྲེས་ཡོངས་རྫོགས་ངོ་བོ་གཉིས་མེད་དུ་མཉམ་པར་གྱུར་ན་ཡེ་ནས་མ་བཅོས་པར་ཆོས་ཉིད་དེ་བཞིན་ཉིད་མི་བསླུ་བས་དེ་ཁོ་ན་ཉིད་དེ་ང་རྒྱལ་ཉིད་མཉམ་ཉིད་ཡེ་ཤེས་སུ་རྒྱས་སོ། །ཉོན་མོངས་པ་འདོད་ཆགས་ཀྱི་རང་མཚན་གཞན་དང་མ་འདྲེས་པར་འདོད་པའི་ཡུལ་ལ་ཀུན་ཏུ་ཞེན་ཏེ་མི་གཏོང་བ་དེ་ཉིད་རིག་པ་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་འདོད་ཆགས་མ་སྤངས་ལ་མ་གྲུབ་པས་སྟོང་ཞིང་བརྟགས་པའི་ བདག་མེད་པ ་ནི་སྤྱིའི་མཚན་ཉིད་དེ། དེ་ལྟར་མཚན་ཉིད་གཉིས་ཉིད་མཐའ་དང་བྲལ་ཏེ་མ་འདྲེས་ཡོངས་རྫོགས་ངོ་བོ་དབྱེར་མེད་དུ་གྱུར་ཏེ་ཀུན་མཁྱེན་པ་ན་ཡེ་ནས་མ་བཅོས་པར་ཆོས་ཉིད་དེ་བཞིན་ཉིད་དེ་ཁོ་ན་ཉིད་དེ་འདོད་ཆགས་ཉིད་ཀུན་རྟོག་ཡེ་ཤེས་སུ་འབར་རོ། །ཕྲག་དོག་གི་རང་མཚན་གཞན་དང་མ་འདྲེས་པར་གཞན་གྱི་ཕུན་ཚོགས་ལ་མི་བཟོད་པར་ཀུན་ནས་འཁྲུག་སྟེ་མི་ཤོང་བ་དེ་ཉིད་རིག་པ་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་ཕྲག་དོག་མ་སྤངས་ལ་མ་གྲུབ་པས་སྟོང་ཞིང་བརྟགས་པའི་ བདག་མེད་པ ་ནི་སྤྱི་མཚན་ཏེ། གཉིས་པོ་དེ་ཉིད་མཐའ་དང་བྲལ་ཏེ་མ་འདྲེས་ཡོངས་རྫོགས་ངོ་བོ་དབྱེར་མེད་དུ་བྱ་རྩོལ་བྲལ་བར་ལྷུན་གྱིས་གྲུབ་ན་ཡེ་ནས་མ་བཅོས་པར་ཆོས་ཉིད་དེ་བཞིན་ཉིད་དེ་ཁོ་ན་ཉིད་དེ་ཕྲག་དོག་ཉིད་བྱ་གྲུབ་ཡེ་ཤེས་སུ་ཤར་རོ།།

གཉིས་པ་ཕུང་པོ་ལྔ་མ་འདྲེས་ཡོངས་རྫོགས་ནི།

གཟུགས་ནི། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་དྲུག་གིས་བསྟན་ཏེ།

གཟུགས་ནི་མ་འདྲེས་འཇིག་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཚོར་བ་མ་འདྲེས་མྱོང་བ་ཉིད། །ཡོངས་སུ་རྫོགས་པ་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །འདུ་ཤེས་མ་འདྲེས་འཛིན་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །འདུ་བྱེད་མ་འདྲེས་མངོན་དུ་བྱེད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །རྣམ་རིག་མ་འདྲེས་ཐ་དད་ཤེས། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །སྡུག་བསྔལ་མ་འདྲེས་ཀུན་གདུང་བ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

གཟུགས་ཀྱི་ཕུང་པོའི་རང་མཚན་ནི་གཞན་དང་མ་འདྲེས་པར་རྐྱེན་གྱིས་འཇིག་ཅིང་གཞོམ་དུ་རུང་བ་དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་གཉིས་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་སྣང་ན། ཡེ་ནས་༼༢༧༧༽མ་བཅོས་པར་རང་སྣང་དེ་བཞིན་ཉིད་དེ་ཁོ་ན་ཉིད་དེ་གཟུགས་ཕུང་ཉིད་རྣམ་པར་སྣང་མཛད་དུ་ཕྱི་ནང་མེད་པར་སྣང་ངོ་། །དེ་བཞིན་དུ་ཚོར་བའི་ཕུང་པོའི་རང་མཚན་སྣང་བ་གཞན་དང་མ་འདྲེས་པར་གཉིས་མེད་ཀྱི་རྣམ་པར་ཉམས་སུ་མྱོང་བ་ཉིད་དེ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་གཉིས་ཉིད་མ་འདྲེས་ཡོངས་རྫོགས་ངོ་བ་ོདབྱེར་མེད་དུ་མཉམ་ན། ཡེ་ནས་མ་བཅོས་པར་རང་སྣང་དེ་བཞིན་ཉིད་དེ་ཁོ་ན་ཉིད་དེ་ཚོར་ཕུང་ཉིད་ཕྱོགས་རིས་མེད་པར་རིན་ཆེན་འབྱུང་ལྡན་དུ་གདལ་ལོ། །འདུ་ཤེས་ཀྱི་རང་མཚན་གཞན་དང་མ་འདྲེས་པར་མཚན་མར་འཛིན་པ་དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་གཉིས་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་གསལ་ན། ཡེ་ནས་མ་བཅོས་པར་རང་སྣང་དེ་བཞིན་ཉིད་དེ་ཁོ་ན་ཉིད་དེ་འདུ་ཤེས་ཀྱི་ཕུང་པོ་ཉིད་གཟུང་འཛིན་མེད་པར་སྣང་བ་མཐའ་ཡས་སུ་ཤར་རོ། །འདུ་བྱེད་ཀྱི་ཕུང་པོའི་རང་མཚན་གཞན་དང་མ་འདྲེས་པར་སེམས་པས་ཡུལ་མངོན་དུ་འདུ་བར་བྱེད་དེ་རང་དབང་མེད་པར་རྗེས་སུ་འབྲང་བ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་གཉིས་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་གྲོལ་ན། ཡེ་ནས་མ་བཅོས་པར་རང་སྣང་དེ་བཞིན་ཉིད་དེ་ཁོ་ན་ཉིད་དེ་འདུ་བྱེད་ཀྱི་ཕུང་པོ་དོན་ཡོད་གྲུབ་པར་འགྲོ་འོང་མེད་པར་དག་གོ །རྣམ་ཤེས་རིག་པའི་རང་མཚན་གཞན་དང་མ་འདྲེས་པར་ཡུལ་དུས་རྣམ་པ་ཐ་དད་དུ་ཤེས་པ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་གཉིས་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་རིག་ན། ཡེ་ནས་མ་བཅོས་པར་རང་སྣང་དེ་བཞིན་ཉིད་དེ་ཁོ་ན་ཉིད་དེ་རྣམ་ཤེས་ཀྱི་ཕུང་པོ་ཉིད་མཐའ་དབུས་མེད་པར་རྡོ་རྗེ་མི་བསྐྱོད་པར་གསལ་ལོ། །ཚོར་བའི་བྱེ་བྲག་སྡུག་བསྔལ་གྱི་རང་མཚན་གཞན་དང་མ་འདྲེས་པར་སྒོ་གསུམ་ཀུན་ནས་གདུང་བ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་གཉིས་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་མཉམ་ན། ཡེ་ནས་མ་བཅོས་པར་རང་སྣང་དེ་བཞིན་ཉིད་དེ་ཁོ་ན་ཉིད་དུ་བརྡལ་བའོ།།

གསུམ་པ་ཁམས་རྣམས་མ་འདྲེས་ཡོངས་རྫོགས་ནི།

ཁམས་ནི། ཞེས་པ་ནས། ཉིད་༼༢༧༨༽ཁོ་ན། ཞེས་པའི་བར་ཚིགས་བཅད་གཅིག་གིས་བསྟན་ཏེ།

ཁམས་ནི་མ་འདྲེས་ས་བོན་ཉིད། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

ཁམས་བཅོ་བརྒྱད་ཀྱི་རང་གི་མཚན་ཉིད་ནི་གཞན་དང་མ་འདྲེས་པར་བྱེད་པ་མེད་པར་རང་གི་རིགས་འཛིན་པའམ་སྐྱེད་པར་བྱེད་པའི་ནུས་པ་ཅན་ས་བོན་ཉིད་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་ཆུབ་ན། ཡེ་ནས་མ་བཅོས་པར་ཆོས་དབྱིངས་དེ་བཞིན་ཉིད་དེ་ཁོ་ན་ཉིད་མུ་མཐའ་མེད་པར་ཁྱབ་པའོ།།

བཞི་པ་སྐྱེ་མཆེད་མ་འདྲེས་ཡོངས་རྫོགས་ནི།

སྐྱེ་མཆེད། ཅེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

འདུ་མཆེད་མ་འདྲེས་སྐྱེ་བའི་སྒོ །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

སྐྱེ་མཆེད་བཅུ་གཉིས་ཀྱི་རང་མཚན་གཞན་དང་མ་འདྲེས་པར་ཤེས་པ་ཡུལ་ལ་སྐྱེ་ཞིང་མཆེད་པའི་སྒོ་ཉིད་དེ། དེ་ཉིད་རང་རིག་པ་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་གནས་ན། ཡེ་ནས་མ་བཅོས་པར་རང་གསལ་དེ་བཞིན་ཉིད་དེ་ཁོ་ན་ཉིད་ཀྱི་བདག་ཉིད་དོ།།

ལྔ་པ་རྟེན་འབྲེལ་མ་འདྲེས་ཡོངས་རྫོགས་ནི།

རྒྱུ་རྐྱེན། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

རྒྱུ་རྐྱེན་མ་འདྲེས་འདུ་འཕྲོད་ཉིད། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

དང་པོ་བརྒྱད་པ་དགུ་པ་གསུམ་རྒྱུ་དང༌། གཉིས་དང་བཅུ་པ་རྐྱེན་ཏེ། ལྷག་མ་བདུན་འབྲས་བུའི་ཚུལ་དུ་རྟེན་ཅིང་འབྲེལ་བར་འབྱུང་བའི་རང་མཚན་ཀུན་ནས་མ་འདྲེས་པར་འདུ་ཞིང་འཕྲད་པས་རྟེན་ཅིང་འབྱུང་བ་ཉིད་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་འདུས་མ་བྱས་པའི་ངང་ཀློང་དུ་གྲོལ་ན། ཡེ་ནས་མ་བཅོས་པར་གནས་ལུགས་དེ་བཞིན་ཉིད་བསླུ་མེད་དེ་ཁོ་ན་ཉིད་དེ་འགྱུར་བ་མེད་པའོ། །ཇི་སྐད་བཤད་པའི་ཆོས་དེ་དག་གི་འཁོར་བ་ཉིད་མྱ་ངན་ལས་འདས་པར་གནས་ཀྱི། དེ་དག་སྤངས་པའི་ཕ་རོལ་ན་མྱ་ངན་ལས་འདས་པ་མེད་པར་སྟོན་ནོ།།

གཉིས་པ་མྱ་ངན་ལས་འདས་པ་མ་འདྲེས་ལ་ཡོངས་སུ་རྫོགས་པ་ལ་གཉིས་ཏེ། ལམ་དང༌། འབྲས་བུའོ། །དང་པོ་ལ་བཞི་སྟེ། ཕ་རོལ་ཕྱིན་དྲུག་མ་འདྲེས་ཡོངས་རྫོགས། ཚད་མེད་སྙོམས་འཇུག་མ་འདྲེས་ཡོངས་རྫོགས། རྣམ་ཐར་གྱི་སྒོ་མ་འདྲེས་ཡོངས་རྫོགས། རྣམ་ཐར་བརྒྱད་མ་འདྲེས་ཡོངས་རྫོགས་སོ། །དང་པོ་ནི།

མ་ཆགས། ཞེས་པ་ནས། ཉིད་ཁོ་ན། ཞེས་པའི་བར་ཚིགས་བཅད་དྲུག་གིས་བསྟན་ཏེ།

མ་ཆགས་མ་འདྲེས་གཏོང་བ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །དག་པ་མ་འདྲེས་གདུང་བ་མེད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །མི་གཡོ་མ་འདྲེས་མི་འཁྲུག་པ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །བརྩོན་འགྲུས་མ་འདྲེས་ཐུབ་པ་མེད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །བསམ་པ་མ་འདྲེས་སྡུད་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །གཅོད་པ་མ་འདྲེས་ཆགས་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

ཟས་ནོར་སོགས་ལ་མ་ཆགས་པ་སྦྱིན་པའི་ཕ་རོལ་ཏུ་ཕྱིན་པའི་རང་མཚན་༼༢༧༩༽གཞན་དང་མ་འདྲེས་པར་ཀུན་ནས་གཏོང་བ་ཉིད་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་རྟོགས་ན། ཡེ་མ་བཅོས་པར་དེ་བཞིན་ཉིད་དུ་མཐར་ཕྱིན་པའི་ལམ་གྱི་དེ་ཁོ་ན་ཉིད་དོ། །སྒོ་གསུམ་དག་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རང་མཚན་གཞན་དང་མ་འདྲེས་པར་འཆལ་བའམ་ཉོན་མོངས་པའི་གདུང་བ་མེད་པ་ཉིད་དེ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་རྟོགས་ན། ཡེ་མ་བཅོས་པར་དེ་བཞིན་ཉིད་དུ་མཐར་ཕྱིན་པའི་ལམ་གྱི་དེ་ཁོ་ན་ཉིད་དོ། །མི་མཐུན་པས་མི་གཡོ་བ་བཟོད་པའི་ཕ་རོལ་ཏུ་ཕྱིན་པའི་རང་མཚན་གཞན་དང་མ་འདྲེས་པར་སེམས་མི་འཁྲུག་པ་ཉིད་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་རྟོགས་ན། ཡེ་མ་བཅོས་པར་དེ་བཞིན་ཉིད་དུ་མཐར་ཕྱིན་པའི་ལམ་གྱི་དེ་ཁོ་ན་ཉིད་དོ། །དོན་དང་ལྡན་པའི་ཡོན་ཏན་སྒྲུབ་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་མཚན་གཞན་དང་མ་འདྲེས་པར་བར་ཆད་ཀྱིས་ཐུབ་པ་མེད་པའམ་དོན་དུ་འགྱུར་བའི་ལས་ལ་ངལ་ཞིང་དུབ་པ་མེད་པ་ཉིད་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་རྟོགས་ན། ཡེ་མ་བཅོས་པར་དེ་བཞིན་ཉིད་དུ་མཐར་ཕྱིན་པའི་ལམ་གྱི་དེ་ཁོ་ན་ཉིད་དོ། །བསམ་བྱ་དེ་ཁོ་ན་ཉིད་ཀྱི་དོན་ལ་བརྟན་པ་ཐོབ་པ་བསམ་གཏན་གྱི་ཕ་རོལ་ཏུ་ཕྱིན་པའི་རང་མཚན་གཞན་དང་མ་འདྲེས་པར་སེམས་ཡུལ་ལ་མི་འཕྲོ་བར་སྡུད་པ་ཉིད་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་རྟོགས་ན། ཡེ་མ་བཅོས་པར་དེ་བཞིན་ཉིད་དུ་མཐར་ཕྱིན་པའི་ལམ་གྱི་དེ་ཁོ་ན་ཉིད་དོ། །ཟབ་པ་དང་རྒྱ་ཆེ་བའི་ཆོས་རྣམས་ཀྱི་མཚན་ཉིད་རྣམ་པར་འབྱེད་ཅིང་ལྷག་པར་གཅོད་པ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་མཚན་གཞན་དང་མ་འདྲེས་པར་ཆགས་པ་དང་ཐོགས་པ་མེད་པ་ཉིད་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་༼༢༨༠༽དབྱེར་མེད་དུ་རྟོགས་ན། ཡེ་ནས་མ་བཅོས་པར་དེ་བཞིན་ཉིད་ཀྱི་ངང་དུ་མཐར་ཕྱིན་པའི་ལམ་གྱི་དེ་ཁོ་ན་ཉིད་དོ།།

གཉིས་པ་ཚད་མེད་སྙོམས་འཇུག་མ་འདྲེས་ཡོངས་རྫོགས་ནི།

བསམ་པ། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

བསམ་པ་ཚད་མེད་སྙོམས་འཇུག་བཞི། །མ་འདྲེས་མི་འཁྲུགས་ཡོངས་རྫོགས་པས།།

སྟོང་ པ་བདག་མེད ་ཆོས་ཉིད་དེ། །མ་བཅོས་དེ་བཞིན་ཉིད་ཁོ་ན།།

གཟུགས་ཀྱི་ས་པ་བསམ་གཏན་རྣམ་པ་བཞི་དང༌། ཚད་མེད་པ་བཞི་དང༌། གཟུགས་མེད་པའི་སྙོམས་འཇུག་བཞི་སྟེ་བཅུ་གཉིས་ཀྱི་རང་མཚན་གཞན་དང་མ་འདྲེས་པར་དེ་དག་གཡོ་བ་མེད་པས་མི་འཁྲུག་པ་ཉིད་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་པ་དང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ཀྱི་ཆོས་ཉིད་ངོ་བོ་དབྱེར་མེད་མཉམ་པ་ཉིད་དུ་གྱུར་པ་དེ་ངེས་པར་མཐོང་ན་ཡེ་ནས་མ་བཅོས་པར་དེ་བཞིན་ཉིད་ཀྱི་ངང་དེ་ཁོ་ན་ཉིད་ཀྱི་རང་བཞིན་དམ་པའོ།།

གསུམ་པ་རྣམ་ཐར་གྱི་སྒོ་མ་འདྲེས་ཡོངས་རྫོགས་ལ་གཉིས་ཏེ། སྤྱིར་བསྟན་པ། སྒོ་གསུམ་བྱེ་བྲག་ཏུ་བཤད་པའོ། །དང་པོ་ནི།

ཀུན་ཀྱང༌། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

ཀུན་ཀྱང་མ་འདྲེས་འབྱུང་བ་ཉིད། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

སྤྱིར་རྣམ་པར་ཐར་པའི་སྒོ་བཞི་པོ་ཀུན་ཀྱང་རང་མཚན་གཞན་དང་མ་འདྲེས་པར་འཁོར་འདས་དང་མཚན་ཉིད་ཀྱི་མཐའ་ཀུན་ལས་ངེས་པར་འབྱུང་བ་ཉིད་ལ། དེ་ཉིད་ཇི་བཞིན་པའི་བྱང་ཆུབ་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ལྟར་མཚན་ཉིད་གཉིས་པོ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་ཡེ་རྫོགས་ཀྱི་བདག་ཉིད་ཆེན་པོར་རྟོགས་ན། ཡེ་མ་བཅོས་པར་ཆོས་ཉིད་དེ་བཞིན་ཉིད་རང་བྱུང་གི་ཡེ་ཤེས་དེ་ཁོ་ན་ཉིད་དོ། །འདི་ཉིད་འགྲེལ་ཆེན་ལས་ཁམས་གཉིས་ཀྱི་ཉོན་མོངས་པ་ཀུན་ལས་འབྱུང་བའི་དོན་དུ་བཤད་ཅིང༌། ཕྱག་མཆན་ལ་ལར་དོན་དང་ཚིག་དང་སྔགས་དང་ཡི་གེའི་སྒོ་བཞི་ཀུན་ཏུ་འབྱུང་བ་ལའང་གསུངས་སོ།།

གཉིས་པ་སྒོ་གསུམ་བྱེ་བྲག་ཏུ་བཤད་པ་ནི།

སྟོང་ཉིད། ཅེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་དང་རྐང་པ་གཉིས་ཀྱིས་བསྟན་ཏེ།

སྟོང་ཉིད་རྣམ་ཐར་མ་འདྲེས་དབེན། །མཚན་མེད་མ་འདྲེས་ཞི་བ་ཉིད།།

སྨོན་མེད་མ་འདྲེས་སྡུག་བསྔལ་སེལ། །ཡོངས་སུ་རྫོགས་པས་སྟོང་བདག་མེད།།

22དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

སྟོང་པ་ཉིད་ཀྱི་རྣམ་པར་ཐར་པའི་སྒོ་ཡི་རང་མཚན་གཞན་དང་མ་འདྲེས་པར་ངོ་བོས་དབེན་པ་ཉིད་ཡིན་ཞིང༌། མཚན་མ་མེད་པའི་རྣམ་པར་ཐར་པའི་སྒོའི་རང་མཚན་གཞན་དང་མ་འདྲེས་པར་དམིགས་མཚན་ཞི་བ་ཉིད་ཡིན་ལ། སྨོན་པ་མེད་པའི་རྣམ་པར་ཐར་པའི་སྒོའི་རང་མཚན་གཞན་དང་མ་འདྲེས་པར་སྡུག་བསྔལ་བྲལ་བའམ་སེལ་བའི་རང་རང་གི་རྣམ་ཆ་ཅན་ཉིད། རྩ་བ་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་དེ་དང་དེའི་༼༢༨༡༽མཐའི་རྣམ་པས་སྟོང་ཞིང་ བདག་མེད་པ ་ཉིད་དེ། དེ་དག་ཉིད་ཀྱང་མ་འདྲེས་ཡོངས་རྫོགས་ངོ་བོ་དབྱེར་མེད་ཀུན་གྲོལ་ཆེན་པོར་གསལ་བར་རྟོགས་ན། ཡེ་ནས་མ་བཅོས་པར་གཉུག་མ་དོན་གྱི་དེ་བཞིན་ཉིད་སེམས་ཀྱི་རང་བཞིན་དེ་ཁོ་ན་ཉིད་དོ།།

བཞི་པ་རྣམ་ཐར་བརྒྱད་མ་འདྲེས་ཡོངས་རྫོགས་ནི།

རྣམ་ཐར། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

རྣམ་ཐར་མ་འདྲེས་རྣམ་པར་འགྲེལ། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

རྣམ་པར་ཐར་པ་བརྒྱད་ཀྱི་རང་གི་མཚན་ཉིད་མ་འདྲེས་པར་རང་སའི་སྒྲིབ་པ་ལས་གྲོལ་ཏེ་ས་ལམ་གོང་ནས་གོང་དུ་འཕགས་པས་རྣམ་པར་འགྲེལ་པ་ཉིད་ཡིན་ལ། དེ་རྣམས་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་ཇི་བཞིན་པར་རྟོགས་ན་ཡེ་ནས་མ་བཅོས་པར་ཆོས་དབྱིངས་དེ་བཞིན་ཉིད་དེ་ཁོ་ན་ཉིད་དུ་གྲོལ་བའོ།།

གཉིས་པ་འབྲས་བུ་ལ་བཅུ་སྟེ། སྟོབས་བཅུ་མ་འདྲེས་ཡོངས་རྫོགས། མི་འཇིགས་པ་མ་འདྲེས་ཡོངས་རྫོགས། འབྲས་བུའི་ཚད་མེད་བཞི་མ་འདྲེས་ཡོངས་རྫོགས། གཟུངས་ཀྱི་སྒོ་མ་འདྲེས་ཡོངས་རྫོགས། ཏིང་ངེ་འཛིན་གྱི་སྒོ་མ་འདྲེས་ཡོངས་རྫོགས། སངས་རྒྱས་ཀྱི་ཆོས་མ་འདྲེས་པ་མ་འདྲེས་ཡོངས་རྫོགས། མངོན་ཤེས་དྲུག་མ་འདྲེས་ཡོངས་རྫོགས། ཡེ་ཤེས་མ་འདྲེས་ཡོངས་རྫོགས། དབྱིངས་མ་འདྲེས་ཡོངས་རྫོགས། སྐུ་གསུམ་མ་འདྲེས་ཡོངས་རྫོགས་སོ། །དང་པོ་ནི།

སྟོབས་ནི། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

སྟོབས་ནི་མ་འདྲེས་གདོན་མི་ཟ། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

རྒྱལ་བ་རྣམས་ཀྱི་སྟོབས་བཅུ་པོ་རྣམས་ཀྱི་རང་མཚན་ནི་ཀུན་ནས་མ་འདྲེས་པར་གདོན་མི་ཟ་བར་ཟིལ་གྱིས་གནོན་པ་ཉིད་དེ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་ལ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་མཁྱེན་པ་མཐར་ཕྱིན་པས་ན། ཡེ་ནས་མ་བཅོས་པའི་དེ་བཞིན་ཉིད་གདལ་ཁྱབ་ཆེན་པོའི་དེ་ཁོ་ན་ཉིད་མངོན་དུ་གྱུར་པའོ།།

གཉིས་པ་མི་འཇིགས་པ་མ་འདྲེས་ཡོངས་རྫོགས་ནི།

མི་འཇིགས། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

མི་འཇིགས་མ་འདྲེས་ཤིན་ཏུ་བརྟན། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

མི་འཇིགས་པ་བཞིའི་རང་མཚན་ཀུན་ནས་མ་འདྲེས་པར་ཡེ་ཤེས་ཤིན་ཏུ་བརྟན་པ་ཉིད་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་པས། དེ་ཉིད་མ་འདྲེས་ཡོངས་རྫོགས་ངོ་བོ་༼༢༨༢༽དབྱེར་མེད་དུ་གཟིགས་པ་དག་ཅིང་དོན་གཉིས་མཐར་ཕྱིན་པས་ན། ཡེ་ནས་མ་བཅོས་པའི་དེ་བཞིན་ཉིད་སེམས་ཀྱི་དཀྱིལ་འཁོར་འོད་གསལ་བའི་དེ་ཁོ་ན་ཉིད་མངོན་དུ་གྱུར་པའོ།།

གསུམ་པ་འབྲས་བུའི་ཚད་མེད་བཞི་མ་འདྲེས་ཡོངས་རྫོགས་ནི།

སྙིང་རྗེ། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་བཞིས་བསྟན་ཏེ།

སྙིང་རྗེ་མ་འདྲེས་སྐྱོབ་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན།།

མ་བཅོས་དེ་བཞིན་ཉིད་ཁོ་ན། །བྱམས་པ་མ་འདྲེས་ཕན་འདོགས་པ། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །དགའ་བ་མ་འདྲེས་འགྱོད་པ་མེད།།

ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

བཏང་སྙོམས་མ་འདྲེས་ཡངས་པ་ཉིད། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

སྙིང་རྗེ་ཆེན་པོའི་རང་མཚན་ཀུན་ནས་མ་འདྲེས་པར་འགྲོ་བ་ཀུན་སྡུག་བསྔལ་ལས་སྐྱོབ་པ་ཉིད་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་མཁྱེན་པ་མཐར་ཕྱིན་པས་ན། ཡེ་ནས་མ་བཅོས་པའི་དེ་བཞིན་ཉིད་དག་པ་གཉིས་ལྡན་གྱི་དེ་ཁོ་ན་ཉིད་དོ། །བྱམས་པ་ཆེན་པོའི་རང་མཚན་ཀུན་ནས་མ་འདྲེས་པར་གཞན་ལ་དངོས་སུ་ཕན་འདོགས་པ་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་མཁྱེན་པ་མཐར་ཕྱིན་པས་ན། ཡེ་ནས་མ་བཅོས་པའི་དེ་བཞིན་ཉིད་དག་པ་གཉིས་ལྡན་གྱི་དེ་ཁོ་ན་ཉིད་དོ། །དགའ་བ་ཆེན་པོའི་རང་མཚན་ཀུན་ནས་མ་འདྲེས་པར་སྔར་གྱི་དོན་ལ་ཕྱིས་འགྱོད་པ་མེད་པར་གསལ་བ་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་མཁྱེན་པ་མཐར་ཕྱིན་པས་ན། ཡེ་ནས་མ་བཅོས་པའི་དེ་བཞིན་ཉིད་དག་པ་གཉིས་ལྡན་གྱི་དེ་ཁོ་ན་ཉིད་དོ། །བཏང་སྙོམས་ཆེན་པོའི་རང་མཚན་ཀུན་ནས་མ་འདྲེས་པར་དོག་པ་མེད་པར་ཡངས་པས་མཉམ་པ་ཉིད་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་གཉིས་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་མཁྱེན་པ་མཐར་ཕྱིན་པས་ན། ཡེ་ནས་མ་བཅོས་པའི་དེ་བཞིན་ཉིད་དག་པ་གཉིས་ལྡན་གྱི་དེ་ཁོ་ན་ཉིད་དོ།།

བཞི་པ་གཟུངས་ཀྱི་སྒོ་མ་འདྲེས་ཡོངས་རྫོགས་ནི།

གཟུངས་ནི། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

གཟུངས་ནི་མ་འདྲེས་འབྲེལ་བ་ཉིད། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

གཟུངས་ཀྱི་སྒོ་ལྔ་བརྒྱ་རྣམས་ཀྱི་རང་མཚན་ནི་ཀུན་ནས་མ་འདྲེས་པར་དོན་དང་འབྲེལ་བ་ཉིད་ཡིན་ལ། དེ་རྣམས་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་པས་དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་མཁྱེན་པ་མཐར་ཕྱིན་ཏེ་བསྙེལ་བ་མི་མངའ་བས་ན། ༼༢༨༣༽ཡེ་ནས་མ་བཅོས་པའི་དེ་བཞིན་ཉིད་ངེས་པ་དོན་གྱི་དེ་ཁོ་ན་ཉིད་དོ།།

ལྔ་པ་ཏིང་ངེ་འཛིན་གྱི་སྒོ་མ་འདྲེས་ཡོངས་རྫོགས་ནི།

ཏིང་འཛིན། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

ཏིང་འཛིན་མ་འདྲེས་མི་གཡེང་བ། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

ཏིང་ངེ་འཛིན་གྱི་སྒོ་འབུམ་ཕྲག་རྣམས་ཀྱི་རང་མཚན་ཀུན་ནས་མ་འདྲེས་པར་དོན་ལས་གཞན་དུ་མི་གཡེང་བས་ཡུལ་གྱིས་མི་འཕྲོག་པ་ཡིན་ལ། དེ་རྣམས་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་པས། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་མཁྱེན་ཏེ་ངང་ལས་མི་གཡོ་བས་ན། ཡེ་ནས་མ་བཅོས་པའི་དེ་བཞིན་ཉིད་དགོངས་པ་ཚད་དུ་ཕྱིན་པའི་དེ་ཁོ་ན་ཉིད་དོ།།

དྲུག་པ་སངས་རྒྱས་ཀྱི་ཆོས་མ་འདྲེས་པ་མ་འདྲེས་ཡོངས་རྫོགས་ནི།

མ་འདྲེས། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

མ་འདྲེས་པ་ཉིད་མི་འཕྲོགས་པ། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་རང་གི་མཚན་ཉིད་གང་དང་ཡང་མ་འདྲེས་པར་གཞན་གྱིས་མི་འཕྲོག་པ་ཁྱད་པར་དང་ལྡན་པ་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་པས། དེ་ཉིད་མ་འདྲེས་ཡོོངས་རྫོགས་ངོ་བོ་དབྱེར་མེད་དུ་མངའ་དབང་ཐོབ་པས་ན། ཡེ་ནས་མ་བཅོས་པའི་དེ་བཞིན་ཉིད་དགོངས་པའི་མཁྱེན་སྤྱོད་མཐར་ཕྱིན་པའི་དེ་ཁོ་ན་ཉིད་ཡང་དག་པའོ།།

བདུན་པ་མངོན་ཤེས་དྲུག་མ་འདྲེས་ཡོངས་རྫོགས་ནི།

ཀུན་གྲོལ། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཉིས་ཀྱིས་བསྟན་ཏེ།

ཀུན་གྲོལ་མ་འདྲེས་མངོན་སུམ་པ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན།།

མ་བཅོས་དེ་བཞིན་ཉིད་ཁོ་ན། །ཆོས་ཅན་མ་འདྲེས་སྣ་ཚོགས་པ། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

སྒྲིབ་པ་ཀུན་ནས་གྲོལ་བས་མངོན་པར་ཤེས་པ་ཆེན་པོ་དྲུག་གི་རང་མཚན་རྣམ་ཀུན་མ་འདྲེས་པར་མངོན་སུམ་དུ་གསལ་བ་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་པས། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་གསལ་བས་ན། ཡེ་ནས་མ་བཅོས་པའི་དེ་བཞིན་ཉིད་གསལ་ཞིང་དག་པའི་དེ་ཁོ་ན་ཉིད་དོ། །མངོན་པར་ཤེས་པ་རྣམས་ཀྱི་ཡུལ་ཆོས་ཅན་ཇི་སྙེད་པ་ཐམས་ཅད་ཀྱི་རང་མཚན་ཀུན་ནས་མ་འདྲེས་པར་རྣམ་པ་སྣ་ཚོགས་པ་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་པས། དེ་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་དུ་གསལ་འགྲིབ་མེད་པར་མཁྱེན་པ་མཐར་ཕྱིན་པས་ན། ཡེ་ནས་མ་བཅོས་པའི་དེ་བཞིན་ཉིད་རང་སྣང་བའི་དེ་ཁོ་ན་ཉིད་དོ། །འདི་གཉིས་མདོ་སྒྱུ་ལ་གྲགས་པ་ལྟར་ཀ་དག་ཆེན་པོ་དང་ལྷུན་གྲུབ་ཆེན་པོ་ལ་བཞེད་པའང་ཡོད་༼༢༨༤༽པར་མངོན་ནོ།།

བརྒྱད་པ་ཡེ་ཤེས་མ་འདྲེས་ཡོངས་རྫོགས་ནི།

ཡེ་ཤེས། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

ཡེ་ཤེས་ཀུན་མཁྱེན་སྐྱེ་འགག་མེད། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

ཤེས་བྱའི་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་རང་མཚན་ཀུན་ནས་མ་འདྲེས་པར་ཇི་ལྟ་ཇི་སྙེད་ཀྱི་རྣམ་པ་ཀུན་སྐད་ཅིག་གིས་མཁྱེན་ལ་ངོ་བོ་ལ་སྐད་ཅིག་གི་སྐྱེ་འགག་མེད་པ་ཉིད་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་པས། དེ་ལྟར་རང་སྤྱི་གཉིས་པོ་ཉིད་མ་འདྲེས་ཡོངས་རྫོགས་རང་བཞིན་གཉིས་སུ་མེད་པར་མཁྱེན་པ་སྒྲིབ་མེད་དུ་གསལ་བས་ན། ཡེ་ནས་མ་བཅོས་པའི་ཆོས་ཉིད་དེ་བཞིན་ཉིད་རང་གསལ་རིག་པའི་དེ་ཁོ་ན་ཉིད་མཐར་ཕྱིན་པའོ། །སྔ་མའི་ཚིགས་བཅད་ཕྱི་མ་དང་འདི་གཉིས་ཆོས་ཅན་དེའི་ཆོས་ཉིད་གཟིགས་པས་ཇི་ལྟ་ཇི་སྙེད་མཁྱེན་པའི་ཡེ་ཤེས་གཉིས་ལ་སྦྱར་བའང་བཞུགས་སོ།།

དགུ་པ་དབྱིངས་མ་འདྲེས་ཡོངས་རྫོགས་ནི།

དབྱིངས་ཉིད། ཅེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

དབྱིངས་ཉིད་མེད་ལ་མི་ཟད་པ། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

ཆོས་ཀྱི་དབྱིངས་ཉིད་ཀྱི་རང་མཚན་དངོས་པོ་མེད་ལ་ཇི་ལྟར་བལྟས་པ་ལྟར་མི་ཟད་པར་འབྱུང་བ་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་ཡིན་པས། དེ་ལྟར་མཚན་ཉིད་གཉིས་པོ་མ་འདྲེས་ཡོངས་རྫོགས་ངོ་བོ་དབྱེར་མེད་ཀློང་ཆེན་པོ་གཅིག་གི་དབྱིངས་སུ་མཉམ་པར་གྱུར་པས་ན། ཡེ་ནས་མ་བཅོས་པའི་ཆོས་ཉིད་དབྱིངས་ཀྱི་དེ་བཞིན་ཉིད་མི་བསླུ་བའི་དེ་ཁོ་ན་ཉིད་མངོན་དུ་གྱུར་པའོ།།

བཅུ་པ་སྐུ་གསུམ་མ་འདྲེས་ཡོངས་རྫོགས་ནི།

སྤྲུལ་པ། ཞེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གསུམ་གྱིས་བསྟན་ཏེ།

སྤྲུལ་ པ་མེད་འབྱུང་རྒྱུན་མི་འཆད། །ཡོངས་སུ་རྫོགས་པས་སྟོང་བདག ་མེད། །དེ་ཉིད་མ་འདྲེས་ཡོངས་རྫོགས་ན།།

མ་བཅོས་དེ་བཞིན་ཉིད་ཁོ་ན། །རྫོགས་སྐུ་མ་འདྲེས་ཕུན་སུམ་ཚོགས། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཆོས་སྐུ་རྣམ་པར་དག་པ་ཉིད།།

ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

འབྲས་བུ་མཐར་ཐུག་སྤྲུལ་པ་ཡི་སྐུའི་རང་མཚན་ཀུན་ནས་མ་འདྲེས་པར་དངོས་པོ་མེད་པར་འགྲོ་བའི་དོན་དུ་གང་འདུལ་ལྟར་འབྱུང་ཞིང་རྒྱུན་མི་འཆད་པ་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ལྟར་རང་སྤྱི་གཉིས་ཉིད་མ་འདྲེས་ཡོངས་རྫོགས་ངོ་བོ་དབྱེར་མེད་པའི་ཐུགས་རྗེ་ཆེན་པོར་གསལ་བས་ན། ཡེ་ནས་མ་བཅོས་པའི་དེ་བཞིན་ཉིད་རང་རིག་པ་དེ་ཁོ་ན་ཉིད་ཀྱི་རོལ་པ་འགག་པ་མེད་པའོ། །ལོངས་སྤྱོད་རྫོགས་པའི་སྐུ་ཡི་རང་མཚན་ཀུན་ནས་མ་འདྲེས་པར་ཞིང་དང་ལོངས་སྤྱོད་ཀྱི་ཡོན་ཏན་ཕུན་སུམ་ཚོགས་པ་ཉིད་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་༼༢༨༥༽སྟོང་ཞིང་ བདག་མེད་པ ་ཉིད་དེ། དེ་ལྟར་རང་སྤྱིའི་མཚན་ཉིད་གཉིས་པོ་མ་འདྲེས་ཡོངས་རྫོགས་ངོ་བོ་དབྱེར་མེད་དུ་མཐའ་བྲལ་གསལ་དག་ཏུ་རྫོགས་པས་ན། ཡེ་ནས་མ་བཅོས་པའི་རང་སྣང་དེ་བཞིན་ཉིད་རང་རིག་བདེ་བ་ཆེན་པོའི་དེ་ཁོ་ན་ཉིད་མཐར་ཕྱིན་པའོ། །རྣམ་གྲོལ་ཆོས་ཀྱི་སྐུ་ཡི་རང་མཚན་ཀུན་ནས་མ་འདྲེས་པར་སྤྲོས་པ་ཐམས་ཅད་དང་བྲལ་ཏེ་དབྱིངས་དང་ཡེ་ཤེས་སུ་འཛིན་པ་ཙམ་ཡང་རྣམ་པར་དག་པ་རང་བྱུང་གི་ཡེ་ཤེས་ཉིད་ཡིན་ལ། དེ་ཉིད་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་སྟོང་ཞིང་ བདག་མེད་པ ་ཉིད་དེ། དེ་ལྟར་མཚན་ཉིད་གཉིས་པོ་མཐའ་དང་བྲལ་ཏེ་མ་འདྲེས་ཡོངས་རྫོགས་ངོ་བོ་དབྱེར་མེད་ཐིག་ལེ་ཉག་གཅིག་ཏུ་གསལ་བ་ན། ཡེ་ནས་མ་བཅོས་པའི་དྲི་མེད་དག་པའི་དེ་བཞིན་ཉིད་རང་བྱུང་རིག་པའི་དེ་ཁོ་ན་ཉིད་ཇི་ལྟ་བ་བཞིན་དུ་མངོན་དུ་གྱུར་པའོ།།

གསུམ་པ་འཁོར་འདས་ཐམས་ཅད་མ་འདྲེས་ཡོངས་སུ་རྫོགས་པ་ནི།

ཐམས་ཅད། ཅེས་པ་ནས། ཉིད་ཁོ་ན། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

ཐམས་ཅད་མ་འདྲེས་ཐ་དད་པ། །ཡོངས་སུ་རྫོགས་པས་སྟོང་བདག་མེད།།

དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན།།

མདོར་ན་ལམ་དང་རྒྱལ་བའི་ཡོན་ཏན་ཐམས་ཅད་དང༌། འགྲོ་བ་རིགས་དྲུག་གིས་བསྡུས་པའི་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱི་རང་མཚན་གཞན་དང་མ་འདྲེས་པར་སོ་སོར་བྱ་བ་བྱེད་པས་ཐ་དད་པ་ཉིད་ཡིན་ལ། དེ་དག་ཀུན་ཀྱང་ཡེ་ནས་དཀྱིལ་འཁོར་གསུམ་དབྱེར་མེད་པའི་བྱང་ཆུབ་ཀྱི་སེམས་ལ་ཡོངས་སུ་རྫོགས་པས་སྤྱི་མཚན་འཁོར་འདས་མ་སྤངས་ལ་མ་གྲུབ་པས་སྟོང་ཞིང་བརྟགས་པའི་ བདག་མེད་པ ་ཉིད་དུ་གནས་ཏེ། དེ་ལྟར་རང་དང་སྤྱིའི་མཚན་ཉིད་གཉིས་པོ་མ་འདྲེས་ཡོངས་རྫོགས་ངོ་བོ་དབྱེར་མེད་ཆེན་པོར་ལྷུན་གྱིས་གྲུབ་པར་གྱུར་པ་ན། ཡེ་ནས་མ་བཅོས་པར་ཆོས་ཉིད་གདོད་མའི་གཤིས་ལུགས་གཉུག་མ་དོན་གྱི་དེ་བཞིན་ཉིད་དབྱིངས་དང་ཡེ་ཤེས་གཉིས་སུ་མེད་པའི་དེ་ཁོ་ན་ཉིད་ཡེ་ཇི་བཞིན་པའི་གསང་བ་དམ་པའོ།།

གཉིས་པ་གང་གི་སྤྱོད་ཡུལ་ཡིན་པ་ནི།

ཆོས་ཀུན། ཞེས་པ་ནས། ཐ་དད་མིན། །ཞེས་པའི་བར་གྱིས་བསྟན་ཏེ།

ཆོས་ཀུན་བརྗོད་པའི་ཆོ་འཕྲུལ་ལས། །མ་བཅོས་དེ་བཞིན་ཉིད་སྣང་བ། །དབུ་མར་མི་དམིགས་གསང་བ་ཉིད།།

སྐྱེས་བུ་དམ་པའི་སྤྱོད་ཡུལ་ཡིན། །གསང་སྔགས་རྡོ་རྗེ་ཐེག་པ་འདི། །དེ་བཞིན་གཤེགས་པ་ཉིད་དུ་གསལ།།

ཅི་ཕྱིར་རྡོ་རྗེ་གསང་སྔགས་དང་། །སེམས་ཅན་སངས་རྒྱས་ཐ་དད་མིན།།

དེ་ལྟར་ཆོས་ཀུན་གྱི་དོན་བརྗོད་པའི་ཆོ་འཕྲུལ་གྱི་ཐབས་ལས། སྐབས་འདིར་འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་ཡེ་ནས་མ་བཅོས་པར་ཆོས་ཉིད་དེ་བཞིན་ཉིད་དུ་རང་སྣང་ཞིང་རང་རིག་དེ་ཁོ་ན་ཉིད་དུ་གསལ་བ་ནི། མ་འདྲེས་ཡོངས་རྫོགས་གཉིས་སུ་མེད་པའི་ཐབས་བྱུང་དོན་གྱི་གནས་ལུགས་སོ། །འོ་ན་གཉིས་སུ་མེད་པར་འདོད་དམ་ཞེ་ན། མཐའ་གཉིས་ལས་གྲོལ་བའི་དོན་ལ་དབུ་མར་ཡང་མི་དམིགས་པས་༼༢༨༦༽མུ་བཞི་མཐའ་དྲུག་གི་སྤྲོས་པ་ཀུན་དང་བྲལ་བའི་འོད་གསལ་བསམ་གྱིས་མི་ཁྱབ་པ་སྙིང་པོ་དོན་གྱི་གསང་བ་མཐར་ཐུག་པ་ཉིད་དེ། རྒྱལ་བ་རྫོགས་པའི་སངས་རྒྱས་དང༌། རྒྱལ་ཚབ་སྐྱེས་བུ་དམ་པའི་ཡུལ་དུ་གྱུར་པ་དབང་པོ་ཡང་རབ་མཆོག་དང་ལྡན་པ་དག་གིས་སྤྱོད་ཡུལ་ཁོ་ན་ཡིན་ཏེ། སློབ་དཔོན་ཆེན་པོ་རྡོ་རྗེ་བཞད་པས། རྣལ་འབྱོར་རིག་པའི་ཉི་མ་ལས། འོ་ན་བྱང་ཆུབ་ཀྱི་སེམས་སྣང་བ་འབའ་ཞིག་ཏུ་ལྟའོ་ཞེ་ན། དེ་ནི་རྟོག་གེ་བ་རྣམས་ཚིག་གང་ལྟར་བརྗོད་པ་ལྟར་བློ་སྐྱེ་བ་སྟེ་མཐའ་དང་བྲལ་ཞེས་བརྗོད་ན་ཡང་མཐའ་དང་བྲལ་བ་ཞིག་ཏུ་བློ་ལ་སྐྱེ་བར་བྱེད་དེ་མཐའ་མ་སྤངས་པ་མ་མཐོང༌། ཐམས་ཅད་མཁྱེན་པ་ཞེས་བརྗོད་ན་ཡང་སྣང་བ་གསལ་གསལ་པོ་ཞིག་ཏུ་ལྟ་བར་བྱེད་དེ། དེའི་ངོ་བོ་དམིགས་སུ་མེད་པ་མ་མཐོང༌། མ་འདྲེས་ལ་ཡོངས་སུ་རྫོགས་པ་ཞེས་བརྗོད་ན་ཡང༌། མ་འདྲེས་པས་གཅིག་བསལ། ཡོངས་སུ་རྫོགས་པས་དུ་མ་བསལ་ཏེ། གཅིག་དང་དུ་མ་དང་བྲལ་བར་ལྟ་སྟེ། དེ་ཉིད་ནི་གཅིག་དུ་མ་ཀུན་དངོས་ཉག་གཅིག་ཇི་མ་སྤངས་པ་ཡན་ལག་མེད་པར་རྩིས་ལས་འདས་པས་སྨྲ་བསམ་ལས་འདས་པ་མ་མཐོང་ངོ༌། །ཞེས་དང༌། སྐྱེས་བུ་ཡང་རབ་རྣམས་ནི་གང་བརྗོད་པ་ཐམས་ཅད་དེ་དང་མི་མཐུན་པ་དགྲོལ་བའི་དགོས་ཆེད་རེ་ཡི་ཕྱིར་བརྗོད་པས། ཕྱོགས་རེའི་དོན་མཚོན་པར་ཆུད་པས། དེ་དག་ལྟར་ཕྱོགས་ལ་བློ་མི་གཏོད་དེ། དེ་བས་ན་ལྟ་བ་ལ་གཟའ་གཏད་མེད་དེ། གང་གཟའ་བ་ནི་རྩོལ་བ་བྱེད་པའོ། །གཏད་པ་ནི་དམིགས་པ་སྟེ་འདི་ལ་རྒྱུ་འབྲས་གཉིས་སུ་མེད་པའི་ཕྱིར་ཐོབ་པར་རྩོལ་བ་དང༌། དབྱིངས་དང་ཡེ་ཤེས་གཉིས་སུ་མེད་པའི་ཕྱིར་དམིགས་གཏད་དང་བྲལ་བའོ། །འོན་ཀྱང་གཟའ་གཏད་དམིགས་པའི་ལྟ་བ་གྲོལ་བར་བྱ་བའི་ཕྱིར་བརྗོད་ཀྱི། ངེས་པར་གཟའ་གཏད་དང་བྲལ་བར་འདོད་པ་ཡང་མེད་དོ། །དེ་ཅིའི་ཕྱིར་ཞེ་ན། གཟའ་གཏད་དང་བྲལ་བར་འདོད་པ་ཉིད་གཟའ་གཏད་ཡིན་པའི་ཕྱིར་རོ། །ཞེས་འབྱུང་བས། འདིའི་དོན་མཐར་ཐུག་པ་ཨ་ནུའི་ཨ་ཏིའི་དགོངས་པར་ཤེས་དགོས་ཏེ། དེ་ལྟར་ན་ཨ་ཏིའི་ཨ་ནུ་དང་གནད་གཅིག་པས། གསང་བདག་དགའ་རབ་དཔའ་བོས། ལྟ་བའི་ཀློང་ལས། བྱང་སེམས་ཀུན་མཁྱེན་ཡེ་ཤེས་དེས། །ཀུན་མཁྱེན་ཡུལ་མེད་རང་གསལ་བ། །དགོས་པ་ཅིར་བརྟགས་དེར་མི་རྟོག །མ་འདྲེས་ཡོངས་རྫོགས་རང་གྲོལ་བའོ། །ཞེས་༼༢༨༧༽གསུངས་པ་ལྟར་འོད་གསལ་རྫོགས་པ་ཆེན་པོར་ལ་བཟླ་བར་བྱའོ། །དེ་བས་ན་ཐེག་པའི་རྒྱལ་པོ་གསང་སྔགས་རྡོ་རྗེའི་ཐེག་པ་ལུང་ཆེན་པོ་འདི་ཡི་ལུགས་ཀྱིས། ཆོས་ཐམས་ཅད་ཡེ་ནས་དེ་བཞིན་གཤེགས་པ་ཉིད་དུ་མ་འདྲེས་ཡོངས་རྫོགས་སུ་མཐའ་དང་བྲལ་ཏེ་རང་གསལ་བར་བསྟན་ནོ། །དེའི་གཏན་ཚིགས་དེ་ཅི་ཡི་ཕྱིར་ཞེ་ན། རྡོ་རྗེ་ལྟར་མི་ཕྱེད་པས་གསང་སྔགས་དོན་གྱི་གནས་ལུགས་དང༌། སེམས་ཅན་རྣམས་ཀྱི་སེམས་ཉིད་དང་རྒྱལ་བ་རྫོགས་པའི་སངས་རྒྱས་རྣམས་དངོས་པོ་ལ་ཐ་དད་མིན་པར་དབྱེར་མེད་ཐིག་ལེ་ཉག་གཅིག་ཏུ་ངེས་པའི་ཕྱིར་རོ།།

གསུམ་པ་རྟོགས་མ་རྟོགས་ཀྱི་སྐྱོན་ཡོན་ནི།

གསང་སྔགས། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

གསང་སྔགས་རྡོ་རྗེ་རྣལ་འབྱོར་པ། །སྐྱེས་བུ་ཐབས་ཀྱི་ཕ་རོལ་ཕྱིན། །རྡོ་རྗེ་རྣལ་འབྱོར་མི་ལྡན་ན། །དེ་ཉིད་ཐབས་དང་ཤེས་རབ་བྲལ། །དེ་བས་རྣལ་འབྱོར་ཆེན་པོ་ཡིས། །རྡོ་རྗེ་གསང་སྔགས་དམ་པ་ཡི། །ཆོ་འཕྲུལ་བཞི་ཡི་རང་བཞིན་ལས། །ནམ་ཡང་འདའ་བར་བྱ་བ་མིན། །ཞེས་སྨྲས་པས་མ་འདྲེས་པ་ཡོངས་སུ་རྫོགས་པ་ནི་ཆོས་ཐམས་ཅད་ཀུན་ཏུ་བཟང་པོ་ཉིད་དོ། །ཞེས་ཡོངས་སུ་གྲགས་ཤིང་གྲགས་པར་གྱུར་ཏོ།།

དེས་ན་གསང་སྔགས་རྡོ་རྗེ་ཐེག་པའི་གསང་ལུང་ཆེན་པོ་འདིའི་དོན་ལ་སྤྱོད་པའི་རྣལ་འབྱོར་པ་བློ་དང་ལྡན་པ་དག་ཀྱང་མཐོང་ལམ་ཐོབ་ནས་བཟུང་ལྟ་བ་ཇི་བཞིན་དུ་རྟོགས་ནས་སྐྱེས་བུ་དམ་པ་བྱ་བ་མེད་པའི་ཐབས་ཀྱི་ཕ་རོལ་དུ་ཕྱིན་པས་ཆེད་དུ་མ་བགྲོད་པར་ཡང་ས་མཆོག་དབྱེ་བ་མེད་པ་ཉིད་ནོན་པར་འགྱུར་རོ། །གལ་ཏེ་རྡོ་རྗེ་གསང་བའི་དོན་རྨད་དུ་བྱུང་བ་འདི་ཉིད་ཇི་བཞིན་དུ་མ་རིག་པས་རྟོགས་པའི་རྣལ་འབྱོར་དང་མི་ལྡན་པར་ཚིག་ཙམ་ལ་སྤྱོད་པར་གྱུར་ན། མ་འདྲེས་ཡོངས་རྫོགས་ཀྱི་དེ་ཉིད་མཐོང་བའི་ཐབས་ཀྱི་རྒྱལ་པོ་ཏིང་ངེ་འཛིན་དང་ཤེས་རབ་ཀྱི་སྙིང་པོ་ལྟ་བའི་ངེས་གསང་དང་བྲལ་བས་འཁྲུལ་འཁོར་གྱི་དྲྭ་བ་ལ་གནས་ཤིང་ཀུན་ནས་འཆིང་བར་འགྱུར་ཏེ།

ཀུན་མཁྱེན་དམ་པ་རིན་པོ་ཆེས། ཇི་ལྟའི་དོན་ཉིད་མི་ཤེས་པར། །ཇི་སྙེད་སྣང་བའི་རྩད་བཅད་པས། །རྣལ་འབྱོར་འཁྲུལ་པའི་ལམ་དུ་ཞུགས། །རི་དྭགས་སྨིག་རྒྱུ་སྙོགས་པ་འདྲ། །མ་འདྲེས་ཆོས་རྣམས་མི་ཤེས་པར། །ཡོངས་སུ་རྫོགས་ལ་བློ་གཏོད་པ། །རྣལ་འབྱོར་སྟོང་པའི་ལམ་དུ་ཞུགས། །རྩལ་མེད་མཁའ་ལ་མཆོང་བ་འདྲ། །ཞེས་གསུངས་པ་སོགས་ཤིན་ཏུ་མང་བས་དོན་ལ་མཁས་པར་བྱའོ། །རྒྱུ་མཚན་དེ་བས་ན་སྐལ་བ་དང་ལྡན་ཞིང་བློ་གྲོས་ཡང་རབ་ཏུ་གྱུར་པས་རྣལ་འབྱོར་ཆེན་པོ་སྐྱེས་བུ་དམ་པར་ངེས་པ་ཡིས། རྡོ་རྗེ་ཐེག་པའི་གསང་སྔགས་གསང་བའི་ཡང་བཅུད་རྒྱུད་ལུང་མན་ངག་ཀུན་གྱི་དགོངས་པའི་མཐིལ་དམ་པ་འདི་ཡི་ལུགས་ལ་ཚུལ་བཞིན་དུ་སྤྱོད་པ་དག་གིས་བཤད་པ་དང་འཆད་པའི་ཆོ་འཕྲུལ་ཆེན་པོ་བཞི་ཡི་ཆོས་ཉིད་དོན་གྱི་རང་བཞིན་ལས་ནམ་ཡང་༼༢༨༨༽འདའ་བར་བྱ་བ་མིན་ནོ་ཞེས་བཀའ་སྩལ་པ་ནི་ལྟ་བ་མ་འདྲེས་ལ་ཡོངས་སུ་རྫོགས་པ་ལས་གཞན་གོལ་བར་མི་ལྟ་བའོ། །ཞེས་སྨྲས་པས། མ་འདྲེས་པ་དང་ཡོངས་སུ་རྫོགས་པའི་ཆོས་ཉིད་ཇི་བཞིན་པར་རྟོགས་པ་ནི། ཆོས་ཐམས་ཅད་དགག་སྒྲུབ་མེད་པར་ཀུན་ཏུ་བཟང་པོ་ཉག་གཅིག་ཐིག་ལེའི་ཀློང་དུ་སྤྱོད་ཡུལ་ཡོངས་སུ་དག་སྟེ་དོན་གདེང་དུ་གྱུར་པ་ཉིད་དོ། །ཞེས་སྔར་བྱིན་རླབས་འབྱུང་བའི་བསྟན་པར་ཡོངས་སུ་གྲགས་ཤིང་ད་ལྟར་ལུང་བསྟན་བརྒྱུད་པའི་བསྟན་པར་ཡང་གྲགས་པར་གྱུར་ཏོ།།

གསུམ་པ་མཇུག་བསྡུ་བ་ནི།

ལང་ཀའི། ཞེས་པ་ནས། འགྲེལ་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་ཀུན་བརྗོད་པའི་ཆོ་འཕྲུལ་ཏེ།

དེ་དག་ཀྱང་སོ་སོར་མ་འདྲེས་པར་དེ་ཁོ་ན་ཉིད་གཅིག་ཏུ་ཡོངས་སུ་འགྲེལ་ཏོ།།

ལང་ཀའི་བདག་པོ། དེ་དག་ནི་ཀུན་བརྗོད་པའི་ཆོ་འཕྲུལ་ཏེ། དེ་དག་ཀྱང་ཆོས་རྣམས་ཀྱི་གནས་ལུགས་སོ་སོར་མ་འདྲེས་པར་ཆོས་ཉིད་དེ་ཁོ་ན་ཉིད་གཅིག་ཏུ་ཡོངས་སུ་རྫོགས་པར་འགྲེལ་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཀུན་བརྗོད་པའི་ཆོ་འཕྲུལ་བསྟན་པའི་ལེའུ་སྟེ་བཅོ་བརྒྱད་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། མ་འདྲེས་ལ་ཡོངས་སུ་རྫོགས་པའི་ཀུན་བརྗོད་པའི་ཆོ་འཕྲུལ་བསྟན་པ་ཞེས་བྱ་བའི་ལེའུ་སྟེ་བཅོ་བརྒྱད་པ་གསལ་བར་བཤད་པའོ།། །།

ལེའུ་བཅུ་དགུ་པ་གང་ཡོངས་སུ་རྫོགས་པར་འགྲེལ་པ།

༈ བཞི་པ་རྗེས་སུ་བསྟན་པའི་ཆོ་འཕྲུལ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། འདི་སྐད་འགྲེལ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་རྗེས་སུ་བསྟན་པའི་ཆོ་འཕྲུལ་གང་ཞེ་ན། ཞི་གནས་ཡོངས་སུ་རྫོགས་པར་འགྲེལ་པ་ནི་འདི་ལྟ་སྟེ། ཇི་སྙེད་པ་ཐམས་ཅད་ཇི་བཞིན་པ་ཉིད་དུ་ཡོངས་སུ་རྫོགས་པ་འབའ་ཞིག་གོ །དེ་ཇི་ལྟ་ཞེ་ན། འདི་ལྟ་སྟེ།

དེ་ཉིད་མི་གཡོ་ནམ་མཁའ་ལ། །གཡོ་རྡུལ་ཐ་སྙད་ཇི་སྙེད་པ། །མི་རྟོག་ཡེ་ཤེས་རྒྱ་མཚོ་ཆེ། །གཅིག་ལས་རྣམ་པ་ཡོངས་ཀྱིས་མེད། །རང་བཞིན་ལྷུན་གྲུབ་དཀྱིལ་འཁོར་ཆེ། །དེ་ན་དམན་དང་སེམས་དཔའ་དང་། །སྤྱོད་པའི་རྣལ་འབྱོར་མིང་ཡང་མེད། །ལྷུན་མཉམ་བྱང་ཆུབ་སྙིང་པོ་ལས། །ངེས་པའི་དགོངས་པའི་ཉམ་རྙེས་ནས།།

ཇི་བཞིན་མ་བཅོས་དེ་ཁོ་ན། །ཟབ་མོ་དམ་པ་ངེས་པའི་དོན། །ངོ་མཚར་དམ་པ་ཆེན་པོ་ཡིས།།

རྡོ་རྗེ་སྙིང་པོ་ཉིད་ལ་ཉིད། །དགོངས་པའི་དོན་ལ་འདི་སྐད་འགྲེལ།།

ལེའུ་འདིས་ངེས་དོན་སྟོན་ནོ། །ལང་ཀའི་བདག་པོ། དེ་ལ་ཆོས་ཉིད་ཀྱི་རྗེས་སུ་ཐ་སྙད་ཐམས་ཅད་གསལ་བར་བསྟན་པའི་ཆོ་འཕྲུལ་གང་ཞེ་ན། དེ་ཁོ་ན་ཉིད་མི་གཡོ་བའི་ཞི་གནས་ཀྱི་རྗེས་སུ་ཐ་སྙད་རིལ་ཡོངས་སུ་རྫོགས་པར་གསལ་བར་འགྲེལ་བའི་ཕྱིར་དེ་ཉིད་ཉེ་བར་བསྟན་པ་ནི། འདི་ལྟ་སྟེ། འཁོར་འདས་ཀྱི་ཆོས་འཆད་པར་འགྱུར་བའི་ཐ་སྙད་དེ་ཇི་སྙེད་པ་ཐམས་ཅད་རང་རིག་པའི་ཆོས་ཉིད་ཇི་བཞིན་པ་ཡེ་མ་བཅོས་པའི་ངོ་བོ་ཉིད་དུ་མ་བརྩལ་བར་ཡོངས་སུ་རྫོགས་ཏེ་བྱུང་ཐེབས་པ་ལ་སེལ་མེད་པར་བསྟན་པ་འབའ་ཞིག་གོ །དེའི་ཚུལ་ཇི་ལྟ་བུ་ཞེ་ན། འདི་ལྟ་སྟེ། དབྱིངས་དེ་བཞིན་ཉིད་ཀྱི་ངོ་བོ་གང་དུའང་མི་གཡོ་བའི་རང་གི་སེམས་ཉིད་ཀྱི་ནམ་མཁའ་ཡངས་པ་ལ། གཡོ་བ་བཅུད་ཀྱི་འགྲོ་བ་དང་བརྟན་པ་རྡུལ་ལས་སྣོད་དུ་གྲུབ་པའི་དངོས་པོ་མི་འདྲ་ཞིང་ཐ་དད་པ་སྣ་ཚོགས་ཇི་སྙེད་དུ་སྣང་བ་རྣམས་ཀྱང་ངོ་བོ་མེད་པས་གཏོད་འཛིན་དང་བྲལ་བའི་རྣམ་པར་མི་རྟོག་པའི་རང་བྱུང་གི་ཡེ་ཤེས་གཡོ་བ་མེད་ལ་ཟབ་ཅིང་གཏིང་དཔགས་དཀའ་བ་༼༢༨༩༽དཔེར་ན་རྒྱ་མཚོ་ཆེན་པོ་ལ་གཟའ་སྐར་བཀྲ་བ་ལྟར་ངང་གི་ཐིག་ལེ་བཀྲག་པོ་ཆེ་བདག་ཉིད་ཆེན་པོ་གཅིག་ལ་རྣམ་པ་ཐམས་ཅད་རང་གསལ་དུ་རྫོགས་པ་ལས་ཐ་སྙད་གཞན་པ་ཡོངས་ཀྱིས་མེད་པར་རང་བཞིན་གྱི་གཏན་ཚིགས་ཀྱིས་འགྲུབ་པས་ཡེ་ཇི་བཞིན་པའི་ངང་ལས་རང་བཞིན་ལྷུན་གྱིས་གྲུབ་པའི་རྣམ་པ་མི་འགྱུར་བར་བསྟན་པ་ཉིད་ཀྱང་རྩལ་བ་གཉིས་སུ་མེད་པའི་བྱང་ཆུབ་ཀྱི་སེམས་ལ་རྫོགས་ཏེ་དཀྱིལ་འཁོར་གསུམ་དབྱེར་མེད་པའི་གནས་ལུགས་ཡིད་བཞིན་གྱི་ནོར་བུ་རིན་པོ་ཆེ་ལྟ་བུ་ལ་ལྷུན་གྱིས་རྫོགས་པའོ། །དེས་ན་རང་བཞིན་གྱི་དཀྱིལ་འཁོར་ཡེ་ནས་གནས་པའི་གཞི་དེའི་ངང་རང་གསལ་བའི་ཉག་གཅིག་གི་རྒྱུ་ལ་ཐ་སྙད་སྣ་ཚོགས་པ་ངོ་བོ་ཉིད་དུ་དག་པས་རྒྱུད་ཐ་དད་པའི་གང་ཟག་སྐལ་བ་མེད་པས་མི་མཐོང་བས་ན། མཉམ་པ་ཉིད་ཀྱི་ཀློང་ཆེན་པོ་དེ་ན་དམན་པ་ཉན་རང་སོགས་དང་དབུ་སེམས་ཀྱི་སེམས་དཔའ་རྣམས་དང༌། སྤྱོད་པའི་རྣལ་འབྱོར་ཀྲི་ཡོག་གསུམ་གྱི་མིང་ཡང་མེད་དེ། སྤྱོད་ཡུལ་དེ་དག་ལ་གནས་པ་རྣམས་གསང་སྔགས་ཇི་བཞིན་པ་འདིའི་ཡུལ་དུ་མ་གྱུར་བའི་ཕྱིར་རོ། །དེ་བས་ན་གསང་སྔགས་ལ་སངས་རྒྱས་དང་སེམས་ཅན་ལམ་གྱི་ཐ་སྙད་སོ་སོ་བ་མེད་པར་ཡེ་ནས་ལྷུན་གྱིས་གནས་པར་མཉམ་པའི་འབྲས་བུ་བྱང་ཆུབ་ཀྱི་སྙིང་པོ་དང་རང་བཞིན་ བདག་ཉིད་ཆེན་པོ་གསུམ་དབྱེར་མེད་པའི་ཀློང་ལས་སྣ་ཚོགས་སུ་སྣང་ཡང་བྱང་ཆུབ་ཀྱི་སེམས་ལས་གཡོས་པ ་མེད་དེ། ཡེ་ཤེས་གསང་བ་ལས། ངང་ནི་རིག་པ་གསལ་བ་སྟེ། །རང་བཞིན་རིག་པ་ཅིར་ཡང་སྣང༌། །བདག་ཉིད་སྣང་སྟོང་ཐ་དད་མེད། །བསྒྲུབ་བྱ་དག་གི་རང་བཞིན་ནི། །འཁྲུལ་པ་བྱང་ཆུབ་སེམས་སུ་ཤེས། །ཞེས་སོ། །དེ་ལྟར་གསང་སྔགས་མ་ནོར་བ་ངེས་པའི་དོན་གྱི་དགོངས་པ་དམ་པ་དེ་ཉིད་ཡུལ་དུ་མ་གྲུབ་པས་རྟོགས་པར་བྱར་ཡང་མེད་པའི་དོན་མཆོག་ཕུལ་དུ་བྱུང་བ་ཇི་བཞིན་པའི་ངང་དུ་ཅིར་ཡང་མ་རྙེད་པར་རིག་པས་ཉམས་ཀྱི་གདེང་ཆེན་པོ་རྙེད་ནས་གཞན་དོན་དུ་གསང་སྔགས་སེམས་ཀྱི་དཀྱིལ་འཁོར་འོད་གསལ་བ་ཡེ་མ་བསླད་པས་ཇི་བཞིན་པ་རྒྱུ་རྐྱེན་གྱིས་མ་བྱས་པས་མ་བཅོས་པ་མི་བསླུ་ཞིང་མ་ནོར་བས་དེ་ཁོ་ན་ཉིད་རྟོགས་པར་དཀའ་ལ་གཏིང་དཔགས་དཀའ་བས་ཟབ་མོ་དམ་པ་མཐའ་དང་བྲལ་བས་ངེས་པའི་དོན་སྐུ་ལྔ་དང་ཡེ་ཤེས་ལྔ་ལ་སོགས་པ་ངོ་མཚར་ཆེ་ཞིང་ཡ་མཚན་རྨད་དུ་བྱུང་བས་གནས་དམ་པ་རྣམས་མ་འདྲེས་ཡོངས་༼༢༩༠༽སུ་རྫོགས་པའི་ངང་ངམ་བྱིན་རླབས་ཀྱི་ཤུགས་ཆེན་པོ་ཡིས་བྱང་ཆུབ་སྙིང་པོར་ལྷུན་གྱིས་མཉམ་པའི་ཕྱིར་སྟོན་པ་དང་འཁོར་སྣང་ལ་མི་ཕྱེད་པས་རྡོ་རྗེ་སྙིང་པོ་སྟོན་འཁོར་གཉིས་སུ་མེད་པར་ཉིད་ལ་ཉིད་ཀྱིས་བཀའ་སྩལ་ཏེ་དགོངས་པའི་དོན་ལ་འདི་སྐད་འགྲེལ་ཏེ་ཉེ་བར་གསལ་བར་སྟོན་ནོ། །ཞེས་པའི་ཚིག་གསང་བ་པས་བཀའ་སྩལ་ཏོ།།

གཉིས་པ་རྒྱས་པར་བཤད་པ་ལ་བདུན་ཏེ། ཡེ་ཤེས་ལྔར་བསྟན་པ། ཐིག་ལེ་དྲུག་ཏུ་བསྟན་པ། ཆེ་བ་ལྔར་བསྟན་པ། བསྙེན་བསྒྲུབ་བཞིར་བསྟན་པ། གསང་བའི་རྒྱུད་དྲུག་ཏུ་བསྟན་པ། ཐེག་པ་རིམ་པ་དགུར་བསྟན་པ། བཀའ་རྟགས་ཀྱི་ཕྱག་རྒྱ་བཞིར་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་ནས། དེ་དག་དེ་ཉིད་ངང་གྲོལ་ན། །ཞེས་པ་ནས། སྙིང་པོར་ཤར། །ཞེས་པའི་བར་གྱིས་བསྟན་ཏེ།

དེ་དག་དེ་ཉིད་ངང་གྲོལ་ཏེ། །གསང་སྔགས་མཐོང་བ་སངས་རྒྱས་ཏེ། །ཀུན་ཁྱབ་བདེ་ཆེན་བྱང་ཆུབ་སེམས།།

རྟོག་བྲལ་དྲི་མེད་རྣམ་པར་དག །བདེ་ཆེན་ཉིད་ལ་བདེ་ཆེན་རྫོགས། །ཡེ་ཤེས་ཉི་མའི་སྙིང་པོ་ཤར།།

ཐ་སྙད་ཇི་སྙེད་པར་སྣང་བའི་དངོས་པོ་དེ་དག་ཀུན་ཀྱང་ཆོས་དབྱིངས་དེ་བཞིན་ཉིད་ཀྱི་ངང་དུ་བྱས་པ་མེད་པར་རང་གྲོལ་བས་ན། ངོ་བོ་མ་དམིགས་པ་ཉིད་དངོས་པོ་ཀུན་གྱི་དེ་ཁོ་ན་ཉིད་དུ་རྟོག་པ་མེད་པར་རང་གསལ་བའི་གསང་སྔགས་ཀྱི་ཟབ་དོན་ཇི་ལྟ་བ་དེ་ལྟར་མེ་ལོང་གི་གཟུགས་བརྙན་ལྟར་རིག་ཅིང་མཐོང་བ་དེ་ནི་སངས་རྒྱས་ཉིད་ཡིན་ཏེ། དེ་ལ་སྤྱོད་ཡུལ་ཀུན་ཀྱང་ཕྱོགས་རིས་དང་རྩོལ་བ་མེད་པར་བདེ་བ་ཆེན་པོ་བྱང་ཆུབ་ཀྱི་སེམས་སུ་མཉམ་པར་གྱུར་པས། ཀློང་དེ་ལ་སྙིང་པོ་དེ་ཁོ་ན་ཉིད་དུ་འཛིན་པའམ་ཆེད་དུ་བྱས་པའི་རྟོག་པ་ཉིད་ཀྱང་བྲལ་ཏེ་མཐའ་ཡི་དྲི་མ་མེད་ཅིང་སོ་སོར་མ་འདྲེས་པར་གསལ་ལ་གཟུང་འཛིན་རྣམ་པར་དག་སྟེ་རང་རིག་པ་བདེ་བ་ཆེན་པོ་ཉིད་ལ་རང་བཞིན་བདེ་བ་ཆེན་པོ་མ་བསྡུས་པར་རྫོགས་ཏེ་རང་གཞན་གྱི་བྱ་བ་ཀུན་ལྷུན་གྱིས་གྲུབ་པས་རང་བྱུང་གི་རིག་པ་ཡེ་ཤེས་ལྔར་ཉི་མའི་སྙིང་པོ་ལྟར་དུས་ཕྱེད་པར་གསལ་འགྲིབ་མེད་པར་ཤར་རོ།།

གཉིས་པ་རྒྱས་པར་བཤད་པ་ནི།

སྔར་གྱི་འཕྲོ་ནས། ཨེ་མ་ངོ་མཚར། ཞེས་པ་ནས། འགྲོ་འོང་ཉིད་ནའང་འགྲོ་འོང་མེད། །ཅེས་པའི་བར་གྱིས་བསྟན་ཏེ།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས།།

སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས།།

རྫོགས་པའི་སངས་རྒྱས་ཀུན་གྱི་གསང་། །མི་དམིགས་པ་ལས་ཐམས་ཅད་དམིགས།།

དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

མི་གནས་པ་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས།།

རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་འོང་ཉིད། །འགྲོ་འོང་ཉིད་ན་འགྲོ་འོང་མེད།།

འགྲེལ་ལུགས་ཁས་བླངས་པ་གང་སྙམ་པ་ལ། གསང་སྔགས་ཀྱི་དགོངས་འགྲེལ་སུམ་ཅུ་རྩ་བདུན་གྱིས་སྟོན་ཏེ། འདི་དག་ཐམས་ཅད་གཉིས་སུ་མེད་པ་མཐའ་རྣམས་མ་སྤངས་བྲལ་བས་མཚན་ཉིད་གཟུང་བར་དཀའ་ཞིང་སྨྲ་བསམ་ལས་འདས་པར་འགྲེལ་ལ། ཚིགས་བཅད་རེ་རེ་ཞིང་གོང་མ་༼༢༩༡༽གཉིས་ཀྱིས་གསང་བ་དང༌། འོག་མ་གཉིས་ཀྱིས་སྔགས་ཀྱི་དོན་སྟོན་ཏེ། དེའང་གསང་བ་ལ་དགོངས་པ་དང་སྔགས་ལ་འགྲེལ་པ་ཞེས་བྱ་བས་དོན་དུ་དགོངས་འགྲེལ་ཞེས་བྱའོ། །དེ་ལ་དང་པོ་སྟོང་པ་ཉིད་ཀྱི་ཡེ་ཤེས་སྟོན་ཏེ། སྐྱེས་པ་དང་མ་སྐྱེས་པ་གཉིས་སུ་མེད་པའི་ངོ་བོ་ནི། ཨེ་མའོ་ཞེས་ཤིན་ཏུ་ངམ་ཞིང་ཡ་མཚན་ཆེ་ལ་ངོ་མཚར་མཆོག་གི་གནས་དམ་པ་སྟེ། དེ་ལྟར་གཉིས་མེད་ཀྱི་དོན་དེ་ནི་ལྷུན་གྱིས་རྫོགས་པ་ཉིད་ཡིན་པས་རྨད་དུ་བྱུང་བ་གནས་ལུགས་དོན་གྱི་ཆོས་ཉིད་ཇི་བཞིན་པ་ཉིད་དེ། དེ་ཉིད་ཐེག་པ་གཞན་ལས་ཁྱད་པར་དུ་འཕགས་ཤིང༌། ཀུན་གྱི་སྤྱོད་ཡུལ་མ་ཡིན་པར་རྒྱལ་བ་རྫོགས་པའི་སངས་རྒྱས་མ་ལུས་པ་ཚོགས་གཉིས་ཀྱི་མངའ་བདག་ཀུན་གྱི་ཡང་ཐུགས་ཀྱི་བརྣག་པར་བྱ་བ་མཐར་ཐུག་པ་ཤིན་ཏུ་གསང་བའི་དགོངས་པ་བློས་རེག་ཅིང་ངོ་བོ་གཟུང་བར་དཀའ་བ་སྟེ། འཆད་པ་རིལ་ཡང་རང་རང་གི་སྐབས་ཀྱི་དོན་དང་སྦྱར་ཞིང་རྗེས་སུ་མཐུན་པར་འགྲེལ་ཏོ།།

ངོ་བོ་གང་ཞེ་ན། ཆོས་ཉིད་བྱང་ཆུབ་སེམས་ཀྱི་ངོ་ཏི་ནི། ཡེ་གང་དུའང་སྣང་བ་མེད་པས་སྐྱེ་བ་མེད་ལ་དེ་ཉིད་རིལ་གྱི་འབྱུང་གནས་སུ་གྱུར་པ་ལས་ཆོས་ཐམས་ཅད་ཅིར་ཡང་སྣང་ཞིང་འབྱུང་བས་སྐྱེས་པ་སྟེ་འགོག་རྒྱུ་ཡང་མེད་ལ། དེ་ལྟར་སྐྱེས་པ་ཉིད་ཙམ་ན་ངོ་བོ་རྣམ་པ་ཐམས་ཅད་པའི་ཕྱིར་འདི་འདྲར་མི་ཟིན་པས་སྐྱེ་བ་མེད་དེ་མཐའ་གྲོལ་བ་ནི་གསང་སྔགས་དོན་གྱི་གཤིས་ལུགས་སོ། །དེ་བས་ན་འཆད་པར་འགྱུར་བའི་ཤྭ་ལོ་ཀ་སུམ་ཅུ་རྩ་བདུན་ཡང་གསང་སྔགས་ཀྱི་དོན་ལ་སྐབས་སྐབས་སུ་ཕྱེད་མར་འགྲེལ་ཏེ། གཅིག་ནི་དགོངས་པ་གསང་བ་ལས་བརྒྱུད་པའི་ཐབས་སུ་ཤར་བ་སྟེ་དེ་ཡང་དོན་ལ་བཀོལ་བ་མེད་དོ། །དེས་ན་དགོངས་འགྲེལ་ཀུན་ལ་རྗོད་བྱེད་ཀྱི་ཚིག་དང༌། བརྗོད་བྱ་དོན་དང༌། ཇི་བཞིན་པ་སེམས་ཀྱི་ཆོས་ཉིད་དང་གསུམ་གསུམ་དུ་སྦྱར་ལ། ངམ་ཞིང་ངོ་མཚར་བ་ཐམས་ཅད་སོ་སོའི་དོན་མཚོན་པས་ཚིག་དང་དོན་གྱི་ཡིན་ཚུལ་གཉིས་ལའོ། །ཡང་ན། ཨེ་མའོ་ཞེས་ཤིན་ཏུ་ངམ་པས་དབུ་དྲང་སྟེ་སོ་སོའི་ཚིག་ལ་ངོ་མཚར་ཞིང་དོན་ལ་རྨད་ཀྱི་ཆོས་སུ་ཤེས་པར་བྱའོ།།

གཉིས་པ་མེ་ལོང་ཡེ་ཤེས་ནི། འགག་པ་དང་མ་འགག་པ་གཉིས་སུ་མེད་པའི་ངོ་བོ་ལ། ཨེ་མའོ་ཞེས་ཤིན་ཏུ་ངམ་ཞིང་ངོ་མཚར་ཆེ་བ་སྟེ། དོན་དེ་ནི་ལྷུན་གྱིས་རྫོགས་པས་རྨད་དུ་བྱུང་བ་མ་བཅོས་ཡུལ་མེད་དུ་གསལ་བའི་དོན་གྱི་ཆོས་ཉིད་ཇི་བཞིན་པ་ཉིད་དེ། འགལ་བ་ཐམས་ཅད་མི་འགལ་བར་སྟོན་པས་ཀུན་༼༢༩༢༽གྱི་སྤྱོད་ཡུལ་མ་ཡིན་པར་རྒྱལ་བ་རྫོགས་པའི་སངས་རྒྱས་སྐུ་གསུམ་གྱི་བདག་ཉིད་ཀུན་གྱི་ཐུགས་ཀྱི་གསང་བ་དམ་པའོ། །དེའི་ངོ་བོ་གང་ཞེ་ན། ཡེ་ཇི་བཞིན་པ་ནི་སྐད་ཅིག་མ་མིན་པས་རང་བཞིན་འགག་ པ་མེད་ལ་སྐྱེ་ཤིའི་རྒྱུན་ལས་གྲོལ་བའི་བདག ་ཉིད་དེ་ལྷུན་གྱིས་རྫོགས་ཤིང་ཆོས་ཐམས་ཅད་ཀྱི་གཞི་ཡིན་པས་འབྱུང་ཁུངས་ལྟ་བུ་སྟེ་ཞེན་བློ་ལ་འགག་པའི་ཆོས་སུ་ཡང་སྣང་ལ། དེ་ལྟར་འགག་པ་ལྟར་སྣང་བ་ཉིད་ནའང་ངོ་བོ་ཅིར་ཡང་མི་ཟིན་པས་འགག་བདོ་བ་ལ་འགག་པ་མ་གྲུབ་པས་དབྱེར་མེད་པ་ནི་ནམ་མཁའི་རི་བོང་ཅན་ལྟ་བུའོ།།

གསུམ་པ་མཉམ་ཉིད་ཡེ་ཤེས་ནི། དམིགས་པ་དང་མི་དམིགས་པ་གཉིས་སུ་མེད་པའི་ངོ་བོ་ལ། ཨེ་མའོ་ཞེས་ངམ་ཞིང་ངོ་མཚར་ཆེ་བ་སྟེ། དོན་དེ་ནི་ཡེ་ནས་ལྷུན་གྱིས་རྫོགས་པ་རྨད་དུ་བྱུང་བའི་དབྱིངས་མཉམ་པ་ཉིད་ཀྱི་ཆོས་ཉིད་དེ་ཀུན་གྱི་སྤྱོད་ཡུལ་མ་ཡིན་པར་རྒྱལ་བ་རྫོགས་པའི་སངས་རྒྱས་སྐུ་གསུམ་གྱི་བདག་ཉིད་ཀུན་གྱི་ཐུགས་ཀྱི་གསང་བ་དམ་པའོ། །དེའི་ངོ་ཏི་གང་ཞེ་ན། སྙིང་པོ་བྱང་ཆུབ་ཡུལ་དང་བྲལ་ཏེ་དམིགས་པ་མེད་པ་ལས་ཞེན་པ་གཉིས་ལ་གནས་པའི་ས་པ་དང་འགྲོ་བ་ཐམས་ཅད་ནི་རོལ་པར་སྣང་བ་ལ་ཡུལ་དུ་དམིགས་ཤིང་འཛིན་པའི་རྣམ་པར་སྣང་ལ། དེ་ལྟར་སྣ་ཚོགས་སུ་དམིགས་བདོ་བ་ཙམ་ཉིད་ནའང་ངོ་བོ་སྤྱོད་པ་དང་ཡུལ་སྣང་དབྱེར་མེད་པས་གཏོད་འཛིན་དང་ངང་གིས་བྲལ་ཏེ་དམིགས་པ་མེད་པར་ངང་དུ་གཅིག་པའོ།།

བཞི་པ་སོར་རྟོག་ཡེ་ཤེས་ནི། གནས་པ་དང་མི་གནས་པ་གཉིས་སུ་མེད་པའི་ངོ་བོ་ལ། ཨེ་མའོ་ཞེས་ཤིན་ཏུ་ངམ་ཞིང་ངོ་མཚར་ཆེ་བ་སྟེ་དོན་དེ་ནི་ཡེ་ནས་ལྷུན་གྱིས་རྫོགས་ཏེ་རྨད་དུ་བྱུང་བར་མ་འདྲེས་ལ་སྤྲོས་མེད་དུ་གསལ་བའི་དོན་གྱི་ཆོས་ཉིད་དེ་ཀུན་གྱི་སྤྱོད་ཡུལ་མ་ཡིན་པར་རྒྱལ་བ་རྫོགས་པའི་སངས་རྒྱས་སྐུ་གསུམ་གྱི་བདག་ཉིད་ཀུན་གྱི་ཐུགས་ཀྱི་གསང་བ་དམ་པའོ། །དེའི་ངོ་བོ་ཇི་ལྟ་བུ་ཞེ་ན། དེ་ཁོ་ན་ཉིད་སྣང་བ་དམ་པ་ནི། རྟེན་དང་རྟེན་ཅན་གྱི་ངོ་བོ་མ་གྲུབ་པས་ཕྱོགས་དང་རིས་སུ་མི་གནས་པ་ཉིད་དེ། དེ་ཉིད་འབྱུང་ཁུངས་ལྟ་བུ་ལས་ཞེན་པ་དག་ལ་ཐམས་ཅད་ཕྱོགས་རིས་སུ་གནས་ཏེ་ཡོད་པ་ལྟར་སྣང་ལ། དེ་ལྟར་གནས་པ་ལྟར་སྣང་བ་ཉིད་ཀྱི་དུས་ན། ངོ་བོ་འདི་འདྲ་བར་མེད་པས་གནས་པ་མེད་པར་ཀུན་གསལ་རང་གྲོལ་དུ་མཁྱེན་པ་ནི་རྨ་བྱའི་མདོངས་རྩེ་ལྟ་བུའོ།།

ལྔ་པ་བྱ་གྲུབ་ཡེ་ཤེས་ནི། འགྲོ་འོང་དང་འགྲོ་འོང་བྲལ་བ་གཉིས་སུ་མེད་པའི་༼༢༩༣༽ངོ་བོ་ལ། ཨེ་མའོ་ཞེས་ཤིན་ཏུ་ངམ་ཞིང་ངོ་མཚར་བ་སྟེ། དོན་དེ་ནི་ཡེ་ནས་ལྷུན་གྱིས་རྫོགས་པ་རྨད་དུ་བྱུང་བའི་ཀུན་གྲོལ་གྱི་ཆོས་ཉིད་དེ། ཀུན་གྱི་སྤྱོད་ཡུལ་མ་ཡིན་པར་རྒྱལ་བ་རྫོགས་པའི་སངས་རྒྱས་སྐུ་གསུམ་གྱི་བདག་ཉིད་ཀུན་གྱི་ཐུགས་ཀྱི་གསང་བ་དམ་པའོ། །དེའི་ངོ་བོ་གང་ཞེ་ན། གསང་སྔགས་འོད་གསལ་གྱི་རང་བཞིན་བྱང་ཆུབ་སེམས་ཀྱི་རྣམ་པ་ནི་རིལ་ལ་བསྣུམས་པས་ཕན་ཚུན་ཡན་མན་བྲལ་བས་འགྲོ་བ་དང་འོང་བ་མེད་པའི་ངང་འབྱུང་ཁུངས་ལྟ་བུ་ལས་བརྟགས་པའི་རྟོག་པ་ཅན་དག་ལ་སེམས་ཀྱི་ཆོ་འཕྲུལ་འགྲོ་བ་དང་འོང་བ་ལྟར་སྣང་ལ། དེ་ལྟར་འགྲོ་འོང་ལྟར་མ་འགགས་པར་སྣང་བཞིན་པ་ཉིད་ནའང་དོན་ལ་འགྲོ་འོང་དང་བྲལ་ཏེ་དབྱེར་མེད་པར་ཐུགས་རྗེ་བྱ་རྩོལ་དང་བྲལ་བར་གྲུབ་པའོ།།

གཉིས་པ་ཐིག་ལེ་དྲུག་ཏུ་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་ནས། མ་ལུས་མཐའ་དག ཅེས་པ་ནས། གོལ་ས་མེད། །ཅེས་པའི་བར་གྱིས་བསྟན་ཏེ།

མ་ལུས་མཐའ་དག་ཐིག་ལེ་རྒྱ། །ཡེ་ནས་བཙལ་མེད་བཙལ་མི་དགོས། །རྒྱུ་འབྲས་དབྱེར་མེད་དེ་ཉིད་དེ།།

མི་གཡོ་མི་རྟོག་ཡུལ་འདས་པ། །རྒྱུ་དང་འབྲས་བུ་རྟོག་འཛིན་གྱི། །ཐམས་ཅད་སྒྱུ་མ་འཁྲུལ་པས་བཅིངས།།

རང་བྱུང་ཡེ་ཤེས་ཉི་མ་ཉིད། །མ་བཅོས་ཇི་བཞིན་སྣང་བས་ན། །སྙིང་པོ་ཉིད་དེ་གོལ་ས་མེད།།

འཁོར་བ་དང་མྱ་ངན་ལས་འདས་པའི་ཆོས་མ་ལུས་པ་ཀུན་ལ་མུ་མཐའ་རྣམ་པར་དག་པའི་དབྱིངས་བྱང་ཆུབ་ཀྱི་སེམས་ཉག་གཅིག་སྤྲོས་པ་དང་བྲལ་བའི་ཐིག་ལེའི་རྒྱ་ཡིས་ཡེ་ནས་ཐེབས་ཏེ་ལྷུན་གྱིས་གྲུབ་པའི་ཕྱིར་སྔར་མ་གྲུབ་པ་སླར་ཡང་གྲུབ་པར་བྱ་ཞིང་གཞན་ནས་བཙལ་དུ་མེད་ལ། བརྩལ་ཡང་མི་དགོས་ཏེ་རྒྱུ་དང་འབྲས་བུ་ལ་སྔ་ཕྱི་དང་བྲལ་བར་དབྱེར་མེད་པ་དེ་ནི་ཆོས་ཉིད་དེ་ཁོ་ན་ཉིད་དོ། །དེ་བས་རང་གི་བློ་ཇི་བཞིན་པའི་རྗེས་སུའང་མི་འབྲང་སྟེ་མི་གཡོ་ངེས་པར་མི་འཛིན་ཏེ་མི་རྟོག་པ་ནི་ཡུལ་ལས་འདས་པའི་དབྱིངས་ཏེ་བདག་གི་དེ་ཁོ་ན་ཉིད་ལ་གཞན་དུ་དམིགས་བྱར་མེད་པའི་ཕྱིར་རོ། །དེ་ལྟར་ཀུན་ཏུ་བཟང་པོ་ཇི་བཞིན་པའི་ངང་ལས་གོལ་ཏེ་རྒྱུ་དང་འབྲས་བུར་སྔ་ཕྱིར་བཟུང་ནས་རྒྱུ་ཡིས་གྲུབ་པར་རྟོག་ཅིང་འབྲས་བུ་ལ་ངེས་པར་འཛིན་པས་མུན་སྤྲུལ་གྱི་བློ་ཅན་རྣམས་ཀྱིས་ཆོས་ཐམས་ཅད་རང་གི་རྟོག་པ་མེད་བཞིན་དུ་སྣང་བའི་སྒྱུ་མ་ལྟ་བུ། རྒྱུ་འབྲས་དབྱེར་མེད་པའི་དོན་ལ་སོ་སོར་མཐོང་ནས་ལམ་པ་དེ་དག་ནོར་ཞིང་འཁྲུལ་པའི་རྟོག་པས་རང་བཅིངས་ཏེ་གྲོལ་བར་མ་གྱུར་ཏོ། །དེ་བས་ན་གང་ལའང་རག་མ་ལས་པའི་རང་བྱུང་གི་ཡེ་ཤེས་ཉི་མ་ལྟ་བུར་ཡེ་ནས་གསལ་བ་ཉིད་དུས་གསུམ་དུ་གདལ་ཁྱབ་ཆེན་པོར་རང་ཤར་བ་ཁོ་ན་བས་ཡེ་མ་བྱས་པས་མ་བཅོས་ལ་མ་བསླད་པས་ཇི་བཞིན་པ་ཉིད་ཀྱི་ངོ་བོ་༼༢༩༤༽དགག་ཏུ་མེད་པར་རང་སྣང་བས་ན་ཐམས་ཅད་ཐིག་ལེ་ལས་མི་འདའ་བར་སྙིང་པོ་ཉིད་དུ་ངེས་པས་དེ་ལ་གོལ་ས་མེད་པར་ལ་བཟླ་བར་བྱའོ།།

གཉིས་པ་རྒྱས་པར་བཤད་པ་ནི།

སྔར་གྱི་འཕྲོ་ནས། ཨེ་མའོ་ངོ་མཚར། ཞེས་པ་ནས། བྱང་ཆུབ་ཉིད་དེ་ལོག་རྒྱུན་ཆད། །ཅེས་པའི་བར་གྱིས་བསྟན་ཏེ།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །མ་བཅོས་མ་བསླད་བྱས་པ་མེད།།

ཇི་བཞིན་རང་བཞིན་རྣམ་པར་དག །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

རང་བཞིན་མེད་པའི་རང་བཞིན་ལས། །བདེ་བ་ཆེན་པོ་ལྷུན་གྱིས་གྲུབ། །ཨེ་མའོ་ངོ་མཚར་རྨད་ཀྱི་ཆོས།།

རྫོགས་པའི་སངས་རྒྱས་ཀུན་གྱི་གསང་། །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན།།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྟོང་པ་མ་ཡིན་མི་སྟོང་མིན།།

དབུ་མ་དམིགས་སུ་ཡོད་མ་ཡིན། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

ངེས་པར་རྟག་ན་རྟག་པ་ཉིད། །རྟག་ཆེན་དེ་ཉིད་གཉེན་པོ་མེད། །ཨེ་མའོ་ངོ་མཚར་རྨད་ཀྱི་ཆོས།།

རྫོགས་པའི་སངས་རྒྱས་ཀུན་གྱི་གསང་། །ངེས་པར་ཆད་ན་ཆད་པ་ཉིད། །བྱང་ཆུབ་ཉིད་དེ་ལོག་རྒྱུན་ཆད།།

འདི་ཉིད་ཀུན་མཁྱེན་དམ་པ་རིན་པོ་ཆེས། རེས་གཅིག་ལ་འཁྲུགས་མཛད་དེ་གསུངས། གཞན་དུ་འཁྲུགས་མི་མཛད་པར་བཀའ་སྩལ་པའང་ཡོད་པར་གསུངས་པ་ལས། སྔ་མ་ལྟར་ཏེ། ཕྱག་མཆན་གཞན་ཀུན་དང་ཡང་མཐུན་པར། དང་པོ་དབྱིངས་རྣམ་པར་དག་པའི་ཐིག་ལེ་སྟོན་ཏེ། ཡེ་ཇི་བཞིན་པའི་ངོ་བོ་ཕྱོགས་རིས་མཐའ་དག་ལས་གྲོལ་བ་ལ་ཤིན་ཏུ་ངམ་པས་ཨེ་མའོ་ངོ་མཚར་ཆེ་ཞིང་རྨད་ཀྱི་ཆོས་དབྱིངས་ཀྱི་བཞུགས་ཚུལ་དམ་པ་རྒྱལ་བ་རྫོགས་པའི་སངས་རྒྱས་ཀུན་གྱི་གསང་བ་བསམ་གྱིས་མི་ཁྱབ་པ་ཉིད་དེ། ཡེ་ཇི་བཞིན་པས་མ་བཅོས་ལ་སེམས་ཉིད་གདོད་ནས་དག་པས་བསླད་ཅིང་བྱས་པ་མེད་པར་ཡེ་སངས་རྒྱས་པ་ཉིད་གང་དུའང་མ་གཡོས་པར་ཇི་བཞིན་པའི་ངང་ལས་ཅིར་སྣང་ཅིར་སྲིད་ཀྱང་མཐའ་མ་སྤངས་བྲལ་བའི་ཕྱིར་དྲི་མ་དང་རྡུལ་ཡེ་ནས་མེད་པར་རང་བཞིན་རྣམ་པར་དག་པའི་གཤིས་ཀྱི་ཡིན་ལུགས་སོ།།

གཉིས་པ་ལྷུན་གྱིས་གྲུབ་པའི་ཐིག་ལེ་ནི། ཡེ་ནས་རྒྱན་དང་རྣམ་པ་མ་བརྩལ་བར་ལྷུན་གྱིས་རྫོགས་པ་ལ་ཤིན་ཏུ་ངམ་པས། ཨེ་མའོ་ངོ་མཚར་ཆེ་ཞིང་རྨད་ཀྱི་ཆོས་ལྷུན་མཉམ་གདལ་ཁྱབ་ཆེན་པོ། རྒྱལ་བ་རྫོགས་པའི་སངས་རྒྱས་ཀུན་གྱི་གསང་བ་བསམ་གྱིས་མི་ཁྱབ་པ་ཉིད་དེ། བརྟགས་པའི་རང་བཞིན་ཡེ་ནས་ངང་གིས་བྲལ་ཏེ་མེད་པའི་ངོ་བོ་ཉིད་ཀྱི་རང་བཞིན་ལས་སྡུག་བསྔལ་ཀ་ནས་དག་པས་རྩོལ་བ་མེད་པར་བདེ་བ་ཆེན་པོ་གཉིས་སུ་མེད་པའི་ངོ་བོར་ལྷུན་གྱིས་གྲུབ་པར་བཞུགས་པའི་གཤིས་ཀྱི་གནས་ལུགས་ཡོན་ཏན་འགག་པ་མེད་པའོ།།

གསུམ་པ་དབྱིངས་ཀྱི་ཐིག་ལེ་ནི། གཉིས་སུ་མེད་པའི་ངང་ལས་རོལ་པ་འགག་མེད་དུ་འཆར་བའི་ངོ་བོ་ལ་ཤིན་ཏུ་ངམ་པས། ཨེ་མའོ་ངོ་མཚར་རྨད་ཀྱི་ཆོས་དབྱིངས་ཀྱི་རང་སྣང་ཟད་པ་མེད་པ། རྒྱལ་བ་རྫོགས་པའི་སངས་རྒྱས་ཀུན་གྱི་གསང་བ་བསམ་གྱིས་མི་ཁྱབ་པ་ཉིད་དེ། རང་རིག་པ་སྐྱེད་པའི་གཞི་དང་རྟེན་གནས་ཀྱི་རྩ་བ་མེད་པའི་སེམས་ཉིད་འགག་པ་མེད་པ་ནི། རིལ་མི་འགོག་པར་ཇི་ལྟར་བསམ་པ་ལྟར་འཆར་བའི་ཕྱིར་ཆོས་རྣམས་ཀུན་གྱི་རྩ་བ་འཁོར་འདས་འབྱུང་བའི་གནས་གཞི་ཡིན་པས་དབྱིངས་ཀྱི་༼༢༩༥༽རྣམ་པ་ཚད་དང་བྲལ་བའོ།།

བཞི་པ་ཡེ་ཤེས་ཆེན་པོའི་ཐིག་ལེ་ནི། རང་བྱུང་འོད་གསལ་གྱི་ངོ་བོ་གསལ་རྐྱེན་དང་བྲལ་བ་ལ་ཤིན་ཏུ་ངམ་ཞིང༌། ཨེ་མའོ་ཞེས་ངོ་མཚར་རྨད་ཀྱི་ཆོས་ཇི་བཞིན་པར་ཡེ་ནས་གསལ་བའི་མཁྱེན་པ། རྒྱལ་བ་རྫོགས་པའི་སངས་རྒྱས་ཀུན་གྱི་གསང་བ་བསམ་གྱིས་མི་ཁྱབ་པ་ཉིད་དེ། དེ་ཁོ་ན་ཉིད་ནི་ངོ་བོ་གསལ་བས་ཉི་ཚེ་བའི་སྟོང་པ་མ་ཡིན་ལ་འབྲས་བུར་བཞག་ཀྱང་མཚན་ཉིད་མི་རྙེད་པས་མི་སྟོང་པའང་མིན་པར་མཐའ་ཐམས་ཅད་གྲོལ་བ་ལ་དབུས་ཀྱི་ཐ་སྙད་གདགས་པའི་གཞི་ཡང་བྲལ་བས་དབུ་མ་ཙམ་དུའང་དམིགས་སུ་ཡོད་པ་མ་ཡིན་ཏེ་སེམས་ཉིད་དོན་གྱི་མེ་ལོང་འོད་གསལ་འདུས་མ་བྱས་པའོ།།

ལྔ་པ་ཆོས་ཉིད་ཀྱི་ཐིག་ལེ་ནི། མ་བཅོས་བྱང་ཆུབ་སེམས་ཀྱི་ངོ་བོ་ཡེ་ནས་གནས་པ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས་གཡོ་མེད་དབྱིངས་ཀྱི་23རང་ངོ་། །རྒྱལ་བ་རྫོགས་པའི་སངས་རྒྱས་ཀུན་གྱི་གསང་བ་བསམ་གྱིས་མི་ཁྱབ་པ་ཉིད་དེ། ཡེ་ཤེས་ཆེན་པོ་རྒྱུད་དུ་མི་སྐྱེ་བས་དོན་དེ་ལ་ངེས་པར་བརྟག་སྟེ་དཔྱད་པས་དཔྱད་ན་ངོ་བོ་མི་འགྱུར་བས་རྟག་པ་ཉིད་དེ། ཐེར་ཟུག་དང་རྒྱུན་ལས་གྲོལ་བས་སྟོང་པའི་རང་བཞིན་རྟག་པ་ཆེན་པོ་དེ་ཉིད་ཟིལ་གྱིས་གནོན་ཅིང་འཇོམས་པར་བྱེད་པའི་གཉེན་པོ་གང་ཡང་མེད་པའི་ཕྱིར་གཤིས་ཀྱི་ངོ་ཏི་འཕོ་འགྱུར་དང་བྲལ་བའོ།།

དྲུག་པ་ཀུན་ཏུ་བཟང་པོའི་ཐིག་ལེ་ནི། རྣམ་གྲོལ་ཀུན་ནས་དག་པའི་དགོངས་པ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས་སྤྱོད་ཡུལ་ཡོངས་སུ་དག་པའི་གཟིགས་པ། རྒྱལ་བ་རྗོགས་པའི་སངས་རྒྱས་ཀུན་གྱི་གསང་བ་བསམ་གྱིས་མི་ཁྱབ་པ་ཉིད་དེ། དོན་མི་འགྱུར་བའི་ངོ་བོ་གང་དུའང་མ་གྲུབ་པ་ལ་ངེས་པར་ཆད་ན་ཡེ་ནས་ཆད་པ་ཉིད་དེ་བཀོལ་བའང་མེད་པས་བྱང་ཆུབ་ཆེན་པོ་ཀུན་ནས་དག་པའི་ངང་ཉིད་དེ། ཡོད་པ་ལས་མེད་པར་གྱུར་ན་ཆད་པའི་མཐའ་ཡིན་ཀྱང་ཀུན་བཟང་བདེ་བ་ཆེན་པོ་ལ་ལོག་རྟོག་ཡེ་ནས་མི་གནས་པས་རྒྱུན་ལས་གྲོལ་ཏེ་ལོག་ལྟའི་ཆད་པ་ངང་གིས་དག་པ་ངོ་བོའི་ཡོན་ཏན་སྒྲིབ་པ་ཀུན་དང་བྲལ་བའོ། །དེ་ལྟར་ཡང༌། ཡེ་ཤེས་གསང་བ་ལས།

རིག་པའི་ཡེ་ཤེས་ཐིག་ལེ་དྲུག །ལྟ་སྤྱོད་དགོངས་པའི་རང་བཞིན་ནོ། །མ་འཕྲོས་ཟླ་བའི་དཀྱིལ་འཁོར་ལྟར། །མི་གཡོ་སེམས་ཉིད་མ་འཕྲོས་པ། །ཆོས་ཉིད་སྤྲོས་བྲལ་ཡེ་སངས་རྒྱས། །བྱང་༼༢༩༦༽ཆུབ་སེམས་ཀྱི་ཁྱད་པར་ཆེ། །ཞེས་གསུངས་པ་ལྟར་ལ་བཟླ་བར་བྱའོ།།

གསུམ་པ་ཆེ་བ་ལྔར་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་ནས། ཐམས་ཅད་བྱང་ཆུབ། ཅེས་པ་ནས། དེ་ལ་འགྲིབ་པ་མེད། །ཅེས་པའི་བར་གྱིས་བསྟན་ཏེ།

ཐམས་ཅད་བྱང་ཆུབ་སྙིང་པོ་བས། །ཀུན་ཀྱང་མ་བཙལ་བདེ་བར་མནོས། །སྣང་སྲིད་འཁོར་བའི་ཁ་རྒྱུད་ཀྱང་།།

སྙིང་པོ་དབྱིངས་ལས་གར་མ་ཕྱིན། །མཐའ་ཐུག་མེད་པའི་ཞིང་བགྲོད་ཀྱང་། །སྙིང་པོ་དེ་ལས་གཡོས་པ་མེད།།

དཔག་མེད་རྒྱལ་བ་ཀུན་བསྐྲུན་ཡང་། །སྙིང་པོ་ཡོངས་སུ་འཕེལ་བ་མེད།།

སེམས་ཅན་མཐའ་ཐུག་མེད་འབྱུང་ཡང་། །དེ་ཉིད་དེ་ལ་འགྲིབ་པ་མེད།།

ཆོས་ཐམས་ཅད་རིལ་ཆོས་ཉིད་ལ་བྱ་རྒྱུ་མེད་པས་བྱང་ཆུབ་སྙིང་པོ་དེ་ཉིད་མངོན་དུ་བྱེད་པའི་འདུ་ཤེས་ཀྱང་བྲལ་ཏེ་མངོན་སུམ་དུ་གསལ་བས་ཉན་རང་ལས་འཕགས་ལ། དེ་ལྟར་ཡུལ་མེད་པས་ན་ཀུན་ཀྱང་སེམས་ལས་གཞན་དུ་མ་བརྩལ་བར་ཡེ་གནས་པའི་བདག་ཉིད་ཆེན་པོ་ལ་བདེ་བར་མནོས་ཤིག་ཅེས་གདམས་ཏེ་ཀྲི་ཡོག་ལས་འཕགས་ཤིང༌།

དེ་ཅིའི་ཕྱིར་ཞེ་ན། ཇི་ག་སྣང་སྲིད་འཁོར་བའི་ཁ་བརྒྱུད་དེ་ཇི་སྙེད་དུ་བཙལ་ཀྱང་དོན་སྙིང་པོ་བྱང་ཆུབ་སེམས་ཀྱི་དབྱིངས་དེ་ཉིད་ལས་གཞན་དུ་འདས་ཏེ་གར་ཡང་མ་ཕྱིན་པའི་ཕྱིར་དང༌། མཐའ་ལ་ཐུག་པ་མེད་པའི་རྒྱལ་བའི་ཞིང་ཁམས་རྣམས་བགྲོད་ཀྱང་དོན་གྱི་སྙིང་པོ་དེ་ལས་མ་འཕགས་པས་གཞན་དུ་གཡོས་པ་མེད་པར་དེ་ཉིད་ཡིན་པས་སེམས་ཙམ་དང་དབུ་མ་ལས་འཕགས་ལ། དཔག་ཏུ་མེད་པའི་རྒྱལ་བ་རིལ་གྱི་སྐུ་གསུང་ཐུགས་ཀུན་བསྐྲུན་ཏེ་གྲུབ་པར་གྱུར་ཅིང་མཐོང་ན་ཡང༌། སྙིང་པོ་དེ་ཁོ་ན་ཉིད་ལས་ཡོངས་སུ་འཕེལ་ཏེ་མང་ཞིང་རགས་པར་གྱུར་པ་མེད་དེ་ཆོས་ཀྱི་དབྱིངས་དང་མཉམ་པས་སྐྱེ་བོ་དང་མུ་སྟེགས་ལས་འཕགས་ཏེ། སྡུག་བསྔལ་ཅན་གྱི་སེམས་ཅན་མཐའ་ལ་ཐུག་པ་མེད་པའི་འགྲོ་བ་ཇི་སྙེད་དུ་བྱུང་ཞིང་ཤར་ཡང༌། སེམས་ཀྱི་དེ་ཁོ་ན་ཉིད་དེ་ལས་འགྲིབ་སྟེ་ཉུང་བ་དང་ཕྲ་བར་གྱུར་པ་མེད་དེ་སེམས་ཉིད་རང་བྱུང་གི་ཡེ་ཤེས་ལས་གཞན་དུ་སངས་རྒྱས་ཞེས་བརྩལ་དུ་མེད་པའི་ཆེ་བ་དང་ལྡན་པས་མ་ཧཱ་དང་ཨ་ནུའི་རྒྱུད་ལུང་ལས་འཕགས་པའོ།།

གཉིས་པ་རྒྱས་པར་བཤད་པ་ནི།

སྔར་གྱི་འཕྲོར། ཨེ་མའོ་ངོ་མཚར། ཞེས་པ་ནས། མ་གཏོགས་གང་ཡང་ཡོད་མ་ཡིན། །ཞེས་པའི་བར་གྱིས་བསྟན་ཏེ།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཆོས་སོ་ཅོག་གི་རང་བཞིན་ནི།།

སངས་རྒྱས་ཉིད་ལས་གཞན་མ་ཡིན། །ཨེ་མའི་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཨེ་མའོ་ངོ་མཚར་རྨད་ཀྱི་ཆོས།།

རྫོགས་པའི་སངས་རྒྱས་ཀུན་གྱི་གསང་། །རབ་འབྱམས་མཐའ་ཡས་གང་ནས་ཀྱང་། རྫོགས་པའི་སངས་རྒྱས་ཡོངས་མི་འཚོལ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སེམས་ཉིད་རྟོགས་པ་སངས་རྒྱས་ཏེ། །དེ་ལས་གཞན་དུ་ཡོད་མ་ཡིན། །ཨེ་མའོ་ངོ་མཚར་རྨད་ཀྱི་ཆོས། རྫོགས་པའི་སངས་རྒྱས་ཀུན་གྱི་གསང་། །སྲིད་གསུམ་ཡེ་ནས་སྙིང་པོ་ཉིད། །མ་ནོར་མ་བཅོས་ལྷུན་གྱིས་གྲུབ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །རང་བཞིན་ལྷུན་གྱིས་གྲུབ་པའི་དབྱིངས། །བཙལ་བ་མེད་པར་རྫོགས་སངས་རྒྱས། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཀུན་ནས་ཀུན་ཏུ་ངང་བཟང་པོ། །ཐམས་ཅད་ཡེ་འབྱམས་རྨད་དུ་གྲགས། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྙིང་པོ་བྱང་ཆུབ་དེ་ཉིད་ལས། །མ་གཏོགས་གང་ཡང་ཡོད་མ་ཡིན།།

དེ་ལ་དང་པོ་སྤངས་གར་ཡང་མ་སྤངས་པར་མངོན་སུམ་པར་སངས་རྒྱས་པའི་ཆེ་བ་ནི། སྣང་གྲགས་སྲིད་པའི་ཆོས་ཐམས་ཅད་བྱང་ཆུབ་སེམས་ཀྱི་ངོ་བོར་ཡེ་སངས་རྒྱས་པར་རྫོགས་པ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས་བདེ་བ་ཆེན་པོའི་ཀློང་ལ་གཞན་གྱིས་སེལ་མེད་པ། རྒྱལ་བ་རྫོགས་པའི་སངས་རྒྱས་ཀུན་གྱི་སྐུ་༼༢༩༧༽གསུང་ཐུགས་བསམ་གྱིས་མི་ཁྱབ་པའི་གསང་བ་ཟབ་མོ་སྟེ། ཕྱི་ནང་དུ་སྣང་ཞིང་གྲགས་པའི་ཆོས་སོ་ཅོག་གི་རང་བཞིན་ནི་ཡེ་ཉིད་ནས་སེམས་ཉིད་འོད་གསལ་བའི་ངོ་བོ་ཡིན་པའི་ཕྱིར་སངས་རྒྱས་ཉིད་ལས་གཞན་མ་ཡིན་པར་རྒྱལ་བའི་གོ་འཕང་དམ་པ་ཉིད་དོ། །འོ་ན་དེ་ཉིད་ཡིན་པ་ཅིའི་ཕྱིར་ཏེ་སུ་ཡི་སྤྱོད་ཡུལ་དུ་ངེས་པ་ཡིན་ཞེ་ན། རྒྱལ་བའི་སྤྱོད་ཡུལ་གསང་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་རྨད་ཀྱི་ཆོས་རིན་པོ་ཆེ་གསེར་གླིང་དང་འདྲ་བའི་དགོངས་པ། རྒྱལ་བ་རྫོགས་པའི་སངས་རྒྱས་ཀུན་གྱི་སྐུ་གསུང་ཐུགས་བསམ་གྱིས་མི་ཁྱབ་པའི་གསང་བ་ཟབ་མོ་སྟེ། སངས་རྒྱས་ཉིད་ལས་དངོས་པོ་གཞན་དུ་གྱུར་བའི་ཆོས་གཞན་པ་ཞིག་རྒྱལ་བ་སངས་རྒྱས་ཉིད་ཀྱིས་ཀྱང་མི་བརྙེས་ཏེ་སྤྱོད་ཡུལ་ཡོངས་སུ་དག་པར་མངོན་དུ་གསལ་བས་སོ། །དེ་བས་ན་ངོ་བོ་བཙལ་དུ་ མེད་པར་ལ་གཅད་དོ།།

གཉིས་པ་རག་གང་དུའང་མ་ལས་པར་བདག ་ཉིད་ཆེན་པོར་སངས་རྒྱས་པའི་ཆེ་བ་ནི། གཞན་ལས་མི་འབྱུང་བར་རང་བྱུང་བྱ་རྩོལ་བྲལ་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས་ཡེ་རྫོགས་ཐོག་མཐའ་མེད་པའི་ཀློང༌། རྒྱལ་བ་རྫོགས་པའི་སངས་རྒྱས་ཀུན་གྱི་སྐུ་གསུང་ཐུགས་བསམ་གྱིས་མི་ཁྱབ་པའི་གསང་བ་ཟབ་མོ་སྟེ། འཇིག་རྟེན་གྱི་ཁམས་རབ་འབྱམས་མཐར་ཐུག་པ་མེད་ཅིང་མཐའ་ཡས་པ་གང་ནས་ཀྱང་རྫོགས་པའི་སངས་རྒྱས་ཀྱི་གོ་འཕང་དམ་པ་དེ་ཉིད་ཡོང་ཡེ་མི་ཚོལ་ཞིང་དོན་དུ་མི་གཉེར་བར་བྱ་བ་དང་བྲལ་ལོ། །དེ་ཅིའི་ཕྱིར་ཞེ་ན། སེམས་ཉིད་ཡེ་ནས་བྱང་ཆུབ་སྙིང་པོར་རྫོགས་པ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས་རང་རིག་ཕྱོགས་མེད་དུ་གསལ་བའི་དགོངས་པ། རྒྱལ་བ་རྫོགས་པའི་སངས་རྒྱས་ཀུན་གྱི་སྐུ་གསུང་ཐུགས་བསམ་གྱིས་མི་ཁྱབ་པའི་གསང་བ་ཟབ་མོ་སྟེ། སེམས་ཀྱི་ཆོས་ཉིད་བཤད་པ་ལྟ་བུའི་མཚན་ཉིད་གསང་བ་ཆེན་པོ་དེ་ཉིད་ཇི་བཞིན་དུ་གོ་ཞིང་རྟོགས་པ་ཉིད་རྫོགས་པའི་སངས་རྒྱས་ཀྱི་གོ་འཕང་མཆོག་ཏུ་ངེས་ཏེ། དེ་ལས་གཞན་དུ་བླ་ན་མེད་པའི་བྱང་ཆུབ་དམ་པ་ཡོད་པ་མ་ཡིན་པའི་ཕྱིར་རོ།།

གསུམ་པ་ལྟོས་གང་ལ་ཡང་མི་ལྟོས་པར་དེ་ཉིད་ཡིན་པར་སངས་རྒྱས་པའི་ཆེ་བ་ནི། ཡེ་ནས་བླང་དོར་དང་ཕྱོགས་ཆ་བྲལ་ཏེ་ཇི་བཞིན་པར་གསལ་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ཐམས་ཅད་བྱང་ཆུབ་སེམས་སུ་གསལ་༼༢༩༨༽བའི་དགོངས་པ། རྒྱལ་བ་རྫོགས་པའི་སངས་རྒྱས་ཀུན་གྱི་སྐུ་གསུང་ཐུགས་བསམ་གྱིས་མི་ཁྱབ་པའི་གསང་བ་ཟབ་མོ་སྟེ། འདི་ཕྱི་བར་དོ་གསུམ་དང༌། འདོད་པ་དང༌། གཟུགས་དང༌། གཟུགས་མེད་དེ་སྲིད་པ་ཁམས་གསུམ་གྱི་ངོ་བོ་ཡེ་ཕྱི་མོ་ནས་བྱང་ཆུབ་སྙིང་པོ་རང་སྣང་བ་ཉིད་ཡིན་པ་ལ་འཁྲུལ་པའི་ལོག་སྐྱོན་ངང་གིས་མ་དམིགས་ཏེ་ཤེས་བྱ་དང་བསྒྲུབ་བྱའི་དེ་ཁོ་ན་ཉིད་མ་ནོར་བ་གདོད་ནས་མ་བཅོས་པར་ལྷུན་གྱི་གྲུབ་པས་རྫོགས་པ་ཆེན་པོ་ཉིད་དོ།།

བཞི་པ་གནས་གང་ལའང་མི་གནས་པར་ཆོས་ཀྱི་དབྱིངས་སུ་སངས་རྒྱས་པའི་ཆེ་བ་ནི། ཆོས་ཉིད་ཀུན་མཉམ་གྱི་དབྱིངས་རང་བཞིན་རྣམ་དག་ཆེན་པོ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ཡེ་མཉམ་ཀུན་གྲོལ་གྱི་ཀློང་ཆེན། རྒྱལ་བ་རྫོགས་པའི་སངས་རྒྱས་ཀུན་གྱི་སྐུ་གསུང་ཐུགས་བསམ་གྱིས་མི་ཁྱབ་པའི་གསང་བ་ཟབ་མོ་སྟེ། སེམས་ཀྱི་རང་བཞིན་མཉམ་ཆེན་ཡངས་པ་ལ་འབྲས་བུ་ཡེ་རྫོགས་སུ་ལྷུན་གྱིས་གྲུབ་པའི་དབྱིངས་ཀྱི་ཡོན་ཏན་ཟད་པ་མེད་པའི་ཆ་ནས་བཞག་པ་ལས་འཕྲལ་དུ་འབད་ཅིང་བརྩལ་བ་མེད་པར་ཚོགས་གཉིས་རྫོགས་པའི་སངས་རྒྱས་སྤངས་རྟོགས་མཐར་ཕྱིན་པའི་ངོ་བོར་ཡེ་ནས་བཞུགས་པའོ།།

ལྔ་པ་གཞི་ལམ་འབྲས་བུའི་ཐ་སྙད་ལས་འདས་པས་སངས་རྒྱས་མེད་པའི་ཆེ་བ་ནི། བྱ་བྱེད་དང་བྲལ་བས་མཐའ་བྲལ་འོད་གསལ་ཆེན་པོ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། སངས་རྒྱས་པ་དང་མ་རྒྱས་པའི་ཐ་སྙད་ལས་གྲོལ་བའི་དགོངས་པ། རྒྱལ་བ་རྫོགས་པའི་སངས་རྒྱས་ཀུན་གྱི་སྐུ་གསུང་ཐུགས་བསམ་གྱིས་མི་ཁྱབ་པའི་གསང་བ་ཟབ་མོ་སྟེ། སྔ་མའི་དུས་ཀུན་ནས་ཕྱིས་ཀྱི་དུས་ཀུན་ཏུ་རིག་པའི་ཀློང་ཉིད་ཀྱིས་མ་ཁྱབ་པ་མེད་པས་ངང་བཟང་པོ་ཉིད་ལ་བཟང་ངན་དང་བླང་དོར་གྱི་ཆོས་དང་བྲལ་ཏེ། ངོ་བོ་མེད་པ་ལ་སྐྱོན་གྱི་རྣམ་པ་རང་གྲོལ་བས་ཐམས་ཅད་ཡེ་ཐོག་མ་ནས་གསང་སྔགས་ཇི་བཞིན་པར་རབ་ཏུ་འབྱམས་ཤིང་རྨད་དུ་བྱུང་བར་གྲགས་པའི་ཆོས་མ་ཡིན་པ་གཞན་མེད་པས་སེམས་ཅན་སྤོང་ལ་སངས་རྒྱས་ལེན་པའི་ཐ་སྙད་དང་བྲལ་བའོ། །འོ་ན་བླང་དོར་མེད་ན་གཉིས་འཛིན་ཇི་ལྟར་དག་སྙམ་ན། གང་ཅིར་སྣང་ཡང་གདོད་ནས་སྙིང་པོ་བྱང་ཆུབ་ཏུ་རང་བྱུང་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ཀུན་བྲལ་ཉག་གཅིག་ཅི་མ་སྤངས་༼༢༩༩༽པའི་ངོ་བོ། རྒྱལ་བ་རྫོགས་པའི་སངས་རྒྱས་ཀུན་གྱི་སྐུ་གསུང་ཐུགས་བསམ་གྱིས་མི་ཁྱབ་པའི་གསང་བ་ཟབ་མོ། ཆོས་ཐམས་ཅད་སྙིང་པོ་བྱང་ཆུབ་ཀྱི་ངང་དུ་ཡེ་ནས་སངས་རྒྱས་པ་དེ་ཉིད་ཁོ་ན་ལས། དེ་ལ་མ་གཏོགས་པའི་མཐའི་སྐྱོན་གང་ཡང་ཡོད་པར་མ་ཡིན་པར་གསེར་ས་ལེ་སྦྲམ་ལྟ་བུ་སྟེ། ལ་ཤན་ལྟ་བའི་སྒྲོན་མ་ལས། རང་བྱུང་ཡེ་ཤེས་མངོན་བྱས་པའི། །ཉི་མ་བྱེ་བའི་འོད་བརྡལ་ཡང༌། །དུས་དང་རྣམ་པ་ཐམས་ཅད་དུ། །སངས་མ་རྒྱས་པར་བྱ་བྱེད་པའི། །ཆོས་ནི་རྡུལ་ཙམ་ཡོད་མིན་པས། སངས་རྒྱས་མེད་པའི་ཆེ་བར་གསུངས། །ཞེས་སོ། །དེ་ལྟར་ཆེ་བ་ལྔ་པོ་འདིའི་རང་ངོ་ནི། བྱང་ཆུབ་ཀྱི་སེམས་ཡིད་སྐྱོབ་ལས། མ་སྤངས་མི་གནས་མི་ལྟོས་རག་མ་ལས། །ཐ་སྙད་ཀུན་དང་བྲལ་བའི་འབྲས་བུ་སྟེ། །རང་བྱུང་ལྷུན་གྲུབ་འདུས་མ་བྱས་པས་ན། །འབྲས་བུའི་རྒྱལ་པོ་ཁྱད་པར་འཕགས་ཏེ་ཆེ། །ཞེས་གསུངས་པ་ལྟར་ལ་བཟླ་བར་བྱའོ། །འདི་ལྟར་ཐིག་ལེ་དྲུག་དང་ཆེ་བ་ལྔ་ཉིད་མདོ་ཆེན་པོ་འདིའི་རང་ལུགས་ཇི་ལྟ་བ་བཞིན་དུ་རྒྱུད་ལུང་མན་ངག་དགོངས་འགྲེལ་དང་བཅས་པ་ཀུན་གྱི་དགོངས་པ་མཐར་ཐུག་དང་མཐུན་པར་ཉུང་གསལ་གནད་དྲིལ་དུ་བཤད་པས། ཇི་བཞིན་དུ་མཐོང་བའི་བློ་གྲོས་དང་ལྡན་ན། སེམས་ཕྱོགས་རྒྱ་མཚོའི་སྐབས་དོན་ཐུན་མོང་མ་ཡིན་པ་ལའང་གཞན་དྲིང་མི་འཇོག་པའི་ངེས་པ་རྙེད་པར་འགྱུར་རོ།།

བཞི་པ་བསྙེན་བསྒྲུབ་བཞིར་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་ནས། སྐྱེ་བཞི་རྒྱུད་ལྔར། ཞེས་པ་ནས། བསྒྲུབས་ཟིན་ལྷུན་གྱིས་གྲུབ། །ཅེས་པའི་བར་གྱིས་བསྟན་ཏེ།

སྐྱེ་བཞི་རྒྱུད་ལྔ་གར་སྣང་བ། །སངས་རྒྱས་ཉིད་དེ་ཡེ་ཤེས་སྐུ། །ཐམས་ཅད་དེ་ཉིད་དེ་གཅིག་པས།།

ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིན།།

བྱ་བ་མེད་པའི་དཀྱིལ་འཁོར་གསུམ། །ཡེ་ནས་བསྒྲུབས་ཟིན་ལྷུན་གྱིས་གྲུབ།།

དེ་ཡང་སྐྱེ་བ་བཞི་དང་ལམ་རྒྱུད་ལྔར་གང་སྣང་བ་དེ་ཉིད་ཡེ་ནས་སངས་རྒྱས་པ་ཉིད་ལས་གཞན་དུ་མི་ཚོལ་བས་བསྙེན་པ་ཡིན་ལ། དེ་ཉིད་རང་རིག་པའི་ཡེ་ཤེས་ཆོས་སྐུ་ཆེན་པོར་གྲུབ་པ་ནི་ཉེ་བར་བསྙེན་པ་དང༌། འཁོར་འདས་ཀྱི་ཆོས་ཐམས་ཅད་རྒྱུ་འབྲས་གཉིས་སུ་མེད་པའི་དེ་ཁོ་ན་ཉིད་ཀྱི་ངོ་བོ་དེར་རོ་གཅིག་ཏུ་གནས་པས་དངོས་པོ་གཉིས་པའི་རྣམ་པ་མེད་པར་ཡེ་ནས་སངས་རྒྱས་པའི་བདེ་བ་ཆེན་པོ་ཉིད་ཀྱི་ལྷུན་ལ་བཞུགས་ཏེ་སྐྱེ་འགག་དང་འཕོ་འགྱུར་མེད་པའི་སྙིང་པོ་ཡིན་པས་འཕེལ་འགྲིབ་དང་བྲལ་བ་ནི་སྒྲུབ་པ་ཉིད་ཡིན་ལ། ཡི་གེ་ཧཱུྃ་མཱུྃ་ཨཱ་གསུམ་གྱི་དོན་བྱ་བ་མེད་པའི་དཀྱིལ་འཁོར་གསུམ་དུ་ཤར་བ་དེ། འཕྲལ་དུ་ལམ་པས་མ་བྱས་པར་ཡེ་ནས་༼༣༠༠༽འབྲས་བུར་ཐོབ་སྟེ་བསྒྲུབས་ཟིན་པའི་ཕྱིར་ལྷུན་གྱིས་གྲུབ་པ་ནི། བསྒྲུབ་པ་ཆེན་པོ འོ།།

གཉིས་པ་རྒྱས་པར་བཤད་པ་ནི།

སྔར་གྱི་འཕྲོར། ཨེ་མའོ་ངོ་མཚར། ཞེས་པ་ནས། ཐོབ་པར་བྱ་བ་ག་ལ་ཡོད། །ཅེས་པའི་བར་གྱིས་བསྟན་ཏེ།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཐམས་ཅད་སངས་རྒྱས་ཡིན་པ་ལ།།

རྟོག་པས་བསྒྲིབས་པས་དེ་མ་ཤེས། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

རྟོགས་པ་ཉིད་ན་རྟོག་མེད་ཕྱིར། །བདེ་གཤེགས་སྙིང་པོ་གཞན་ནས་མིན། །ཨེ་མའོ་ངོ་མཚར་རྨད་ཀྱི་ཆོས།།

རྫོགས་པའོ་སངས་རྒྱས་ཀུན་གྱི་གསང་། །ཀུན་གྱི་སྙིང་པོ་བྱང་ཆུབ་ལ། །ཡེ་ནས་དགོངས་པ་ལྷུན་གྱིས་གྲུབ།།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །རྡོ་རྗེ་གསང་བའི་སྙིང་པོ་ལ།།

བསྒྲུབ་དང་བསྒྲུབ་པར་བྱ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

ཡེ་ཉིད་འབྲས་བུ་དམ་པ་ལ། །ཐོབ་པར་བྱ་བ་ག་ལ་ཡོད།།

འོ་ན་འཁྲུལ་པའི་སེམས་ཅན་འབྱུང་བའི་སྙད་ཅི་ཡོད་ཅེ་ན། དང་པོ་བསྙེན་པ་ཉིད་སྟོན་ཏེ། ཀུན་ནས་སྒྲིབ་མེད་དུ་གསལ་ཡང་རང་གསང་ཐབས་ཀྱིས་ཆོད་པ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། འཁྲུལ་པར་བརྟགས་ཀྱང་ངོ་བོ་ཡེ་ནས་དག་པ། རྒྱལ་བ་རྫོགས་པའི་སངས་རྒྱས་སྐུ་བཞིའི་བདག་ཉིད་ཀུན་གྱི་གསང་བ་དམ་པ་ཉིད་དེ། སྐྱེ་བཞི་རྒྱུད་ལྔར་སྣང་བ་ཐམས་ཅད་ཡེ་ནས་གར་ཡང་མ་སྦས་པར་སངས་རྒྱས་པ་ཉིད་ཡིན་པ་ལ་ཐག་པ་ལ་སྦྲུལ་དུ་མཐོང་བ་ལྟར་རྟོག་པས་བསྒྲིབས་པས་རང་གི་དེ་ཁོ་ན་ཉིད་ངོ་མ་ཤེས་པའམ་མ་མཐོང་བའི་དོན་གྱིས་ཡུལ་དུ་མ་གྱུར་པས་བརྟག་ཏུ་མི་བཏུབ་པ་ནི་ལྷན་ཅིག་སྐྱེས་པའི་མ་རིག་པ་སྟེ། དཔེར་མཚོན་རྣོན་པོ་རང་གིས་རང་མི་ཆོད་པ་ལྟ་བུའི་ཕྱིར་རོ། །འོ་ན་དེ་དག་སྙིང་པོ་བྱང་ཆུབ་ལས་འདས་སམ་ཞེ་ན། གཉིས་པ་ཉེ་བའི་བསྙེན་པ་སྟོན་ཏེ། དེ་ཉིད་སྤང་དུ་མེད་པར་རང་སྣང་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། སངས་རྒྱས་གཞན་ནས་མི་འབྱུང་བར་རང་དུ་ཤེས་པ། རྒྱལ་བ་རྫོགས་པའི་སངས་རྒྱས་སྐུ་བཞིའི་བདག་ཉིད་ཀུན་གྱི་གསང་བ་དམ་པ་ཉིད་དེ། དེ་ལྟར་རྟོག་པ་ཉིད་འཁྲུལ་ཞིང་འཛིན་པའི་ངོ་བོ་ཉིད་དུ་སྣང་བ་ན་ཡང་བཤད་པ་བཞིན་གློ་བུར་གྱི་མཚན་ཉིད་པས་རྟོག་པ་ཐེར་ཟུག་དང་བྲལ་ཏེ་སྣང་ལ་མེད་པའི་ཕྱིར་དཔེ་གསེར་ལས་བྱས་པའི་རྫས་བཞིན་བདེ་བར་གཤེགས་པའི་སྙིང་པོ་བྱང་ཆུབ་མཆོག་ཉིད་ཡིན་གྱི་གཞན་གང་ནས་ཀྱང་རྙེད་པ་མིན་ནོ། །དེས་ན་བླ་མའི་གདམས་ངག་གིས་དེ་ཁོ་ན་ཉིད་ཀྱི་དོན་རྟོགས་ན་རྟོག་པ་ཉིད་ཆོས་ཉིད་ཡིན་པས་ན། གསུམ་པ་བསྒྲུབ་པ་སྟོན་ཏེ། བྱང་ཆུབ་ཡེ་རྫོགས་ཆེན་པོ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ཆོས་སྐུ་རང་བབ་ཀྱི་ངོ་བོ། རྒྱལ་བ་རྫོགས་པའི་སངས་རྒྱས་སྐུ་བཞིའི་བདག་ཉིད་ཀུན་གྱི་གསང་བ་དམ་པ་ཉིད་དེ། དངོས་པོ་གྲགས་སོ་ཅོག་ཀུན་གྱི་རྩ་བ་སྙིང་པོ་བྱང་ཆུབ་ཆོས་ཀྱི་སྐུ་ཆེན་པོ་ལ། ཡེ་གདོད་མ་ནས་རྒྱལ་བའི་དགོངས་པ་འབྲས་བུའི་བདག་ཉིད་རང་རྫོགས་སུ་ལྷུན་གྱིས་གྲུབ་པས་རྒྱུ་འབྲས་གཉིས་སུ་མེད་པའོ། །དེ་ཅིའི་ཕྱིར་ཞེ་ན། བྱ་བྱེད་༼༣༠༡༽ལས་འདས་པའི་དོན་གྱིས་བཞི་པ་བསྒྲུབ་པ་ཆེན་པོ་སྟོན་ཏེ། དཀྱིལ་འཁོར་གསུམ་དབྱེར་མེད་པའི་ངོ་བོ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། གདལ་ཁྱབ་གཉིས་མེད་ཀྱི་དགོངས་པ། རྒྱལ་བ་རྫོགས་པའི་སངས་རྒྱས་སྐུ་བཞིའི་ བདག་ཉིད་ཀུན་གྱི་གསང་བ་དམ་པ་ཉིད་དེ། བརྩལ་བ་མེད་པ ་དང༌། འདུས་མ་བྱས་པ་དང༌། སྐྱེ་འཇིག་མེད་པ་དང༌། མི་ཕྱེད་པ་དང༌། འཇོམས་པར་བྱེད་པའི་ངོ་བོའི་ཕྱིར་རྡོ་རྗེ་ནི་ཡེ་ཤེས་ཆེན་པོ་ཕྲ་ཞིང་ཟབ་པ་རིལ་གྱི་འབྲས་བུ་གསང་བའི་སྙིང་པོ་ཉིད་དེ། དེ་ལ་ནི་སྔར་མ་གྲུབ་པ་ཞིག་དོན་དུ་གཉེར་ཏེ་སྒྲུབ་པར་བྱེད་པ་དང་ཐོབ་ཅིང་བསྒྲུབ་པར་བྱ་བ་གཉིས་ཀྱི་མིང་ཡང་ཡེ་ནས་མེད་པ་ལ་དེ་ཉིད་ཀྱི་ཐ་སྙད་དང་ཡང་བྲལ་བའོ། །འོ་ན་དེ་ཅིའི་ཕྱིར་ཏེ་བསྒྲུབ་ཏུ་མེད་ན་འབྲས་བུ་ཇི་ལྟར་འབྱུང་ཞེ་ན། དེ་ཉིད་ཀྱི་འཐད་པ་སྟོན་ཏེ། ཡེ་གྲོལ་དོན་གྱི་གནས་ལུགས་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ཡེ་གསལ་ཕྱོགས་གྲོལ་གྱི་དགོངས་ཀློང༌། རྒྱལ་བ་རྫོགས་པའི་སངས་རྒྱས་སྐུ་བཞིའི་བདག་ཉིད་ཀུན་གྱི་གསང་བ་དམ་པ་ཉིད་དེ། གནས་ལུགས་སྙིང་པོ་བྱང་ཆུབ་ནི་ཚོགས་ལས་བྱས་པ་མ་ཡིན་པར་ཡེ་ཐོག་མ་ཉིད་ནས་འབྲས་བུ་དམ་པ་དེ་ཉིད་ཀྱི་ངོ་བོར་བཞུགས་པ་ལ་ལྟོས་པའི་རྒྱུ་འབྲས་ཀྱི་མིང་གི་བླ་དྭགས་ཙམ་ཡང་བྲལ་བས་རྒྱུ་རྐྱེན་གྱིས་གསར་དུ་ཐོབ་ཅིང་རྙེད་པར་བྱ་བ་ག་ལ་ཡོད་དེ་འདུས་བྱས་ཀྱི་ཆོས་གང་ཡང་མ་དམིགས་པར་རང་གསལ་འདུས་མ་བྱས་པས་སོ།།

ལྔ་པ་གསང་བའི་རྒྱུད་དྲུག་ཏུ་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་ནས། བསྒྲུབ་པ་འདི་ལ། ཞེས་པ་ནས། སྐལ་བ་བཟང༌། །ཞེས་པའི་བར་གྱིས་བསྟན་ཏེ།

བསྒྲུབས་པ་འདི་ལ་གང་གནས་པ། །རྣལ་འབྱོར་དེ་ཉིད་སྐལ་བ་བཟང་།།

ཐུན་མོང་མ་ཡིན་པའི་རྒྱུད་རྡོ་རྗེ་གསང་བའི་སྙིང་པོ་རྒྱུད་ལྔ་པོ་ཀུན་གྱི་དངོས་གཞིར་ངེས་པ་གང་གིས་ལོགས་ནས་བསྒྲུབ་ཏུ་མེད་པར་ཤེས་པའི་ངོ་བོ་ཉིད་དམ་པ་འདི་ཉིད་ལ་གང་ཡང་དོན་དུ་མི་གཉེར་བར་བསྒྲུབ་པ་ཆེན་པོ་ལ་གནས་པ་ཡི་རྣལ་འབྱོར་དབང་ཕྱུག་དེ་ཉིད་ནི་སྐལ་བ་ཤིན་ཏུ་བཟང་པོ་སྟེ། སྙིང་པོའི་ངོ་བོ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ཡོན་ཏན་རྫོགས་ཏེ་ཐབས་ཆེན་ལམ་གྱི་མཆོག་ཉིད་ཡིན་པའི་ཕྱིར་རོ།།

གཉིས་པ་རྒྱས་པར་བཤད་པ་ལ་གཉིས་ཏེ། གཞི་གསང་བའི་སྙིང་པོར་བསྟན་པ། སྐུ་གསུང་ཐུགས་ཡོན་ཏན་ཕྲིན་ལས་ལྔའི་རྒྱུད་ལྔར་བསྟན་པའོ། །དང་པོ་ནི།

སྔར་གྱི་འཕྲོར། ཨེ་མའོ་ངོ་མཚར་༼༣༠༢༽ཞེས་པ་ནས། སངས་རྒྱས་སེམས་ཅན་ཀུན་གྱི་གསང༌། །ཞེས་པའི་བར་དང༌།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

གསང་སྔགས་གསང་བའི་སྙིང་པོ་འདི། །སངས་རྒྱས་སེམས་ཅན་ཀུན་གྱི་གསང་། །ཞེས་དང་།

ཚིགས་བཅད་གཅིག་གི་འོག་ནས། ཨེ་མའོ་ངོ་མཚར། ཞེས་པ་ནས། སངས་རྒྱས་ཀུན་གྱི་ངེས་པའོ། །ཞེས་པའི་བར་ཚིགས་བཅད་གཉིས་ཀྱིས་བསྟན་ཏེ།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

གསང་བ་དམ་པ་སྙིང་པོ་ཉིད། །སངས་རྒྱས་ཀུན་གྱི་ངེས་པའོ།།

དང་པོ་དག་མཉམ་དབྱེར་མེད་སྤྱོད་ཡུལ་དང་བྲལ་བའི་དབྱིངས་ཡེ་ལྷུན་རྫོགས་ཆེན་པོ་འཁོར་འདས་ཀུན་གྱི་གཞིའི་གནས་ལུགས་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། རྒྱུད་སྡེ་ཆེན་པོ་དྲུག་གི་ཡང་གཞི་དང་རྩ་བ། རྒྱལ་བ་རྫོགས་པའི་སངས་རྒྱས་ཀུན་གྱི་དགོངས་པ་དོན་གྱི་གསང་བ་མཐར་ཐུག་པ། བྱང་ཆུབ་ཀྱི་སེམས་གསང་སྔགས་གསང་བའི་སྙིང་པོ་དེ་ཁོ་ན་ཉིད་ཤིན་ཏུ་མཐོང་དཀའ་བ་འབྲས་བུའི་ངོ་བོ་འདི་ཉིད་ནི། རྒྱལ་བ་རྫོགས་པའི་སངས་རྒྱས་དང་འགྲོ་བ་སེམས་ཅན་ཀུན་གྱི་ངོ་བོ་དེར་གཅིག་པའི་གཞི་དབྱིངས་གཉུག་མའི་ཆོས་ཉིད་ཀུན་གྱི་སྤྱོད་ཡུལ་མ་ཡིན་པས་གསང་བ་དམ་པའོ། །འདི་ལ་གཞི་དབྱིངས་དོན་གྱི་སྙིང་པོ་འདི་ཉིད་འཁོར་འདས་ཀུན་གྱི་གསང་བ་རྟོགས་པར་བྱ་བའི་དམ་པ་ཡིན་ཀྱང་ལོག་པའི་སྲད་བུ་བཅུ་ཡིས་བླ་མའི་ཞབས་ལ་རེག་པའི་ཡུལ་མིན་པས་གསང་བ་ཞེས་ཀྱང་གསུངས་སོ། །དེའི་ཕྱིར་ལམ་གྱི་བསྟན་པ་རིལ་གྱི་ངོ་བོ་ཡང༌། འདིའི་མཚན་གྱི་རྣམ་གྲངས་སྣང་བས་ཡོན་ཏན་ཆ་རེ་མཚོན་པ་ལས་བཏགས་ཏེ། གང་ཞེ་ན། རྒྱུད་སྡེ་ཆེན་པོ་དྲུག་ཏུ་བསྟན་པ་ལས། གཉིས་པ་གཞི་དབྱིངས་དེ་ཉིད་ཇི་བཞིན་དུ་སྟོན་པའི་གཞིའི་རྒྱུད་དམ་སྤྱིའི་རྒྱུད་ཀྱི་ངོ་བོ་ཡིན་པར་སྟོན་ཏེ། བསྟན་པ་ཀུན་གྱི་ཡང་བཅུད་གསང་ཆེན་དོན་གྱི་ངོ་བོ་ལ་ཤིན་ཏུ་ངམ་པས། ཨེ་མའོ་ངོ་མཚར་ཆེ་ཞིང་རྨད་ཀྱི་ཆོས། ཡེ་ནས་ལྷུན་གྱིས་རྫོགས་པའི་སྤྱོད་ཡུལ་སྟོན་པའི། རྒྱལ་བ་རྫོགས་པའི་སངས་རྒྱས་འབྲས་ཆོས་ལྔའི་མངའ་བདག་ཀུན་གྱི་དགོངས་པ་གསང་བ་དམ་པ། ཤིན་ཏུ་དཔགས་པར་དཀའ་བ་བསྟན་པ་ཐམས་ཅད་ཀྱི་གསང་བ་དམ་པའི་སྙིང་པོ་འདི་ཉིད་ནི། མི་བསྟན་པར་བྱའོ་ཅོག་གི་མཆོག་ཏུ་གྱུར་པ་ཡིན་ཏེ། ཆོས་ཐམས་ཅད་ཀྱི་སྲོག་སྙིང་ཤིན་ཏུ་མ་ནོར་བའི་དོན་གྱི་གནས་ལུགས་རྒྱལ་བ་རྫོགས་པའི་སངས་རྒྱས་ཀུན་གྱི་དགོངས་པའི་ཞེ་ཕུགས་མཐར་ཐུག་ཏུ་ངེས་པ་ཡིན་པས་གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་ཀྱང་བྱའོ།།

གཉིས་པ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་རྒྱུད་ལྔར་བསྟན་པ་ནི།

གོང་གི ཨེ་མའོ་ངོ་མཚར། ཞེས་པ་ནས། རྡོ་རྗེ་སྙིང་པོ་འདུས་པ་ཉིད། །ཅེས་པའི་༼༣༠༣༽བར་དང༌།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

འདུས་པ་གསང་བ་རྨད་བྱུང་བ། །རྡོ་རྗེ་སྙིང་པོ་འདུས་པ་ཉིད། །ཅེས་དང་།

ཚིགས་བཅད་གཅིག་གི་འོག་ནས། ཨེ་མའོ་ངོ་མཚར། ཞེས་པ་ནས། མཐའ་གཉིས་འཛིན་པའི་ཞགས་པ་འབྱུང༌། །ཞེས་པའི་བརགྱིས་བསྟན་ཏེ།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཟླ་བ་གསང་བ་ལས་བྱུང་བ། །གསུང་གི་ཐིག་ལེ་ཟབ་མོ་བྱུང་། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སངས་རྒྱས་ཀུན་དང་མཉམ་སྦྱོར་བས། །གཟུགས་སྣང་མཁར་ལ་འཇའ་ལྟར་གསལ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྣང་སྲིད་སྒྱུ་མའི་ཡེ་ཤེས་ལས། །སྤྲུལ་པའི་དྲ་བ་སྤྲིན་ཕུང་བྱུང་། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྤྲུལ་པ་ཐབས་ཀྱི་དྲ་བ་ལས། །མཐའ་གཉིས་འཛིན་པའི་ཞགས་པ་བྱུང་།།

དང་པོ་རྒྱལ་བ་ཀུན་གྱི་དགོངས་པ་འདུས་པའི་ཐུགས་ཀྱི་གསང་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། མཐའ་བྲལ་ཀུན་གསལ་གྱི་དགོངས་པ། རྒྱལ་བ་རྫོགས་པའི་སངས་རྒྱས་ཐུགས་ལྔའི་མངའ་ བདག་ཀུན་གྱི་ཐུགས་ཀྱི་གསང་བ་བསམ་གྱིས་མི་ཁྱབ་པ། གཉིས་སུ་མེད་པའི་བྱང་ཆུབ་ཀྱི་སེམས་སུ་བཤད་པ ་ལྟར་རིལ་མ་འདྲེས་ལ་ཡོངས་སུ་རྫོགས་པར་འདུས་པ་ངོ་བོ་ཟབ་ཅིང་ཕྲ་བའི་དོན་མཆོག་གསང་བ་རྨད་དུ་བྱུང་བ། དེ་ཁོ་ན་ཉིད་རྡོ་རྗེ་རྣམ་པ་གསུམ་གྱི་སྙིང་པོ་སེམས་ཉིད་གཉིས་མེད་ལ་འདུས་པས་གྲུབ་མཐའི་བཅུད་དུ་གྱུར་པ་ཉིད་དུ་ངེས་པས། གསང་བ་འདུས་པ་ཡང་ཡིན་ཏེ། རྒྱུད་ཕྱི་མ་ལས། གསང་བ་ཞེས་སུ་བསྟན་པ་ནི། །སྐུ་གསུང་ཐུགས་ནི་རྣམ་པ་གསུམ། །འདུས་པ་ཞེས་བྱ་འདུས་པར་གསུངས། །ཞེས་འབྱུང་བའོ། །གཉིས་པ་རྒྱལ་བ་ཀུན་གྱི་བསྟན་པ་འབྱུང་བའི་གསུང་གི་གསང་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ཉེ་རིང་མེད་པར་རང་སྐད་དང་འཚམས་པར་གྲགས་ཀྱང་ངོས་བཟུང་མི་གནས་པ། རྒྱལ་བ་རྫོགས་པའི་སངས་རྒྱས་གསུང་ལྔའི་མངའ་བདག་ཀུན་གྱི་གསུང་གི་གསང་བ་བསམ་གྱིས་མི་ཁྱབ་པ། རང་རིག་པ་ནི་མཐའི་དྲི་མ་དྭངས་པས་ཟླ་བ་ལྟར་ངོ་བོ་མ་བསྒྲིབ་པར་གསལ་ཡང་བསམ་དཀའ་བས་གསང་བ་དམ་པ་དེ་ཉིད་ལས་བྱུང་བའི་མ་འགགས་ལ་མ་འདྲེས་པར་རང་ཤར་བའི་གསུང་གི་ཐིག་ལེ་སྤྲོས་ཀུན་བྲལ་ཞིང་མུ་མཐའ་མི་རྙེད་པས་ཟབ་མོ་ཚངས་དབྱངས་ཀྱི་རྣམ་པར་འབྱུང་བས་ན། ཟླ་གསང་ཐིག་ལེའང་ཡིན་ནོ། །གསུམ་པ་རྒྱལ་བ་ཀུན་གྱི་བཀོད་པ་སྟོན་པའི་སྐུའི་གསང་བ་ལ་ཤིན་ཏུ་ངམ་པས། ཨེ་མའོ་ངོ་མཚར་ཆེ་ཞིང་རྨད་ཀྱི་ཆོས། གང་ལ་གང་འདུལ་དུ་སྣང་ཡང་ངོ་བོ་མི་རྙེད་པ། རྒྱལ་བ་རྫོགས་པའི་སངས་རྒྱས་སྐུ་ལྔའི་མངའ་བདག་ཀུན་གྱི་སྐུའི་གསང་བ་བསམ་གྱིས་མི་ཁྱབ་པ། ཡེ་ཇི་བཞིན་པ་དང༌། རྒྱུད་དག་པའི་རྒྱལ་བ་རྫོགས་པའི་སངས་རྒྱས་མ་ལུས་པ་ཀུན་དང་ངོ་བོ་མི་ཕྱེད་པར་མཉམ་པར་སྦྱོར་བས། རྒྱལ་བའི་གཟུགས་སྐུར་སྣང་བ་ཇི་སྙེད་པ་དཔེར་ན་མཁའ་ལ་འཇའ་ཚོན་ཤར་བ་ལྟར་སྣང་ལ་རང་བཞིན་མེད་དེ་མ་འདྲེས་ལ་ཡོངས་སུ་རྫོགས་པར་༼༣༠༤༽གཅིག་དང་དུ་མ་བྲལ་བར་གསལ་བའི་ཕྱིར་སངས་རྒྱས་མཉམ་སྦྱོར་ཡང་ཡིན་ནོ། །བཞི་པ་རྒྱལ་བ་ཀུན་གྱི་ཆེ་བའི་ཁྱད་པར་ཡོན་ཏན་གྱི་གསང་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། འབྲས་བུའི་ཆོས་ཀྱི་མངའ་ཐང་ཀུན་ལ་རང་དབང་བསྒྱུར་ཏེ་ཟད་ པ་མེད་པ། རྒྱལ་བ་རྫོགས་པའི་སངས་རྒྱས་ཡོན་ཏན་ལྔའི་མངའ་བདག ་ཀུན་གྱི་ཡོན་ཏན་གྱི་གསང་བ་བསམ་གྱིས་མི་ཁྱབ་པ། སྣང་སྲིད་སྣོད་བཅུད་ཀྱི་ཆོས་ཐམས་ཅད་སྒྱུ་མའི་མཚན་ཉིད་ལྟར་སྣང་ཡང་གྲུབ་པ་མེད་པ་ཡེ་ཤེས་ཆེན་པོའི་ངོ་བོར་ལྷུན་གྱིས་གྲུབ་པ་ལས་འགྲོ་འོང་མེད་པར་ཇི་སྙེད་པའི་ཆོས་སུ་རྣམ་པར་འཕྲུལ་ཏེ་གཉིས་སུ་མེད་པའི་དྲྭ་བ་ཚད་དང་བྲལ་བས་སྤྲིན་གྱི་ཕུང་པོར་བྱུང་ཡང་། དོན་ལ་དབྱེར་མེད་པའི་ཕྱིར་སྒྱུ་འཕྲུལ་དྲྭ་བའང་ཡིན་ནོ། །འདི་ཉིད་ཡོན་ཏན་གྱི་ཆ་ནས་བཞག་པས་རྣམ་སྣང་སྒྱུ་འཕྲུལ་དྲྭ་བ་ཡིན་པར་གསུངས་སོ། །ལྔ་པ་རྒྱལ་བ་ཀུན་གྱི་མཛད་པའི་རྣམ་རོལ་ཕྲིན་ལས་ཀྱི་གསང་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། མཛད་པ་དུས་ལས་མི་ཡོལ་བར་གང་ཡང་ཐབས་ཀྱི་རོལ་མོར་འཆར་བ། རྒྱལ་བ་རྫོགས་པའི་སངས་རྒྱས་ཕྲིན་ལས་ལྔའི་མངའ་བདག་ཀུན་གྱི་ཕྲིན་ལས་ཀྱི་གསང་བ་བསམ་གྱིས་མི་ཁྱབ་པ། རང་རིག་པ་ཅིར་ཡང་སྣང་བའི་སྤྲུལ་པའི་མཛད་པ་ཐབས་ཀྱི་དྲྭ་བ་ཆེན་པོའི་རོལ་པ་ལས་འཁོར་འདས་དང་ཡོད་མེད་ལ་སོགས་པའི་མཐའ་གཉིས་སུ་སྣང་བ་རིལ་མ་སྤང་པར་དེ་ཉིད་དུ་འཛིན་པར་མཛད་པའི་ཞགས་པ་དང་འདྲ་བར་བྱུང་བའི་ཕྱིར་ཐབས་ཀྱི་ཞགས་པ་ཡང་ཡིན་ནོ། །དེ་ཡན་ཆད་ནི་ཐོབ་པར་བྱ་བའི་དོན་གྱི་རང་བཞིན་ནོ།།

དྲུག་པ་ཐེག་པ་རིམ་པ་དགུར་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་ནས། ཇི་ལྟར་སྒོམ་སྒྲུབ། ཅེས་པ་ནས། དོན་གྱི་མཆོག །ཅེས་པའི་བར་རྐང་པ་གཉིས་ཀྱིས་བསྟན་ཏེ།

ཇི་ལྟར་བསྒོམ་བསྒྲུབ་ཅི་དཔྱད་ཀྱང་། །དེ་ཉིད་ཡིན་ཏེ་དོན་གྱི་མཆོག།

དེ་ལྟར་གཞན་ནས་བསྒྲུབ་ཏུ་མེད་པར་ཤེས་པ་དེ་ནི་ཐབས་དང་ལས་ཁྱད་པར་ཅན་ཡིན་པས། དེ་ཉིད་ཇི་ལྟ་བ་བཞིན་དུ་ཐག་ཆོད་པ་ལྟར་གནས་ཏེ་ཐེག་པའི་རིམ་པ་དགུའི་རྩོལ་བའི་མཐའ་ཡི་སྒོམ་པ་དང་སྒྲུབ་པའི་ལས་ཀྱི་རིམ་པ་གང་ཅིར་ཡང་མི་འགོག་པར་སྤྱད་ཀྱང༌། བྱས་པ་ལ་བྱས་འཛིན་མེད་པས་སེམས་ཀྱི་དེ་ཁོ་ན་ཉིད་དེར་མཐར་ཐུག་པ་ཡིན་ཏེ། དོན་ཆེན་པོ་གཏན་ལ་ཕེབས་པའི་ལམ་གྱི་མཆོག་དམ་པ་ལས་མ་ཉམས་པའི་ཕྱིར་རོ།།

གཉིས་པ་རྒྱས་པར་བཤད་པ་ལ་གཉིས་༼༣༠༥༽ཏེ། ཐེག་པ་དགུའི་ངོ་བོ་བསྟན་པ། དེས་ན་བསྟན་པའི་འབྱུང་གནས་དང་ལུང་གི་སྤྱི་འགྲེལ་དུ་བསྟན་པའོ། །དང་པོ་ནི།

སྔར་གྱི་འཕྲོར། ཨེ་མའོ་ངོ་མཚར། ཞེས་པ་ནས། དག་པའི་མཐའ་གཉིས་ངེས་པར་འབྱུང༌། །ཞེས་པའི་བར་གྱིས་བསྟན་ཏེ།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །བྱ་བྲལ་རྣམ་གྲོལ་འཐུན་འཇུག་སྤྱོད།།

སྦྱོར་ཐབས་བྱ་བ་ལས་རྒྱུད་འབྱུང་། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

ལྷག་པར་མཐོང་དང་ཞི་བར་གནས། །དག་པའི་མཐའ་གཉིས་ངེས་པར་འབྱུང་།།

དམ་པའི་མཛོད་གསུམ་དང་ཐབས་ཀྱི་གསང་བ་ཆེན་པོར་ཤར་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ངེས་པ་དོན་གྱི་དགོངས་པའི་ཐབས་ཀྱི་གསང་མཛོད། རྒྱལ་བ་རྫོགས་པའི་སངས་རྒྱས་ལྷུན་རྫོགས་ཆོས་སྐུའི་ངོ་བོར་བཞུགས་ཤིང་མཚན་དཔེ་གསལ་རྫོགས་ཀྱི་ལོངས་སྐུར་བཀོད་པ་ཀུན་གྱི་དགོངས་པ་གསང་བ་དམ་པ། ཡེ་ནས་ལྷུན་གྱིས་གྲུབ་པས་བྱ་རྩོལ་དང་བྲལ་བའི་ཕྱིར་བྱ་བྲལ་རྫོགས་པའི་རྒྱུད་ཨ་ཏི་ཡོ་ག་དང༌། དབྱིངས་དང་ཡེ་ཤེས་ཀྱི་ངོ་བོ་འཆིང་བ་དང་བྲལ་བའི་ཕྱིར་རྣམ་གྲོལ་རིག་པའི་རྒྱུད་ཨ་ནུ་ཡོ་ག་དང༌། ཆགས་སྡང་ཅན་ལ་སྤྱོད་པ་མཐུན་འཇུག་ཏུ་སྣང་བའི་ཕྱིར་མཐུན་འཇུག་སྤྱོད་པའི་རྒྱུད་མ་ཧཱ་ཡོ་ག་སྟེ་བསྐྱེད་རྫོགས་གསུམ་དུ་ཡང་ཤར་རོ། །དཀའ་ཐུབ་རིག་བྱེད་ཀྱི་གསང་བ་གསུམ་དུ་ཤར་བ་ཡང༌། ངང་གིས་མི་གཡོ་ཞིང་ཞི་བའི་ཏིང་ངེ་འཛིན་དུ་ཞུགས་པའི་ཕྱིར་ཞི་གནས་སྦྱོར་བའི་རྒྱུད་དང༌། ལྟ་སྤྱོད་གོང་འོག་གི་ཐབས་ལ་བརྟེན་པའི་ཕྱིར་མཐར་ཕྱིན་ཐབས་ཀྱི་རྒྱུད་དང༌། སྒོ་གསུམ་ས་ལ་འགོང་པའི་ཐབས་ཀྱི་བྱ་བའི་ལས་གཙོ་བོར་བྱེད་པའི་ཕྱིར་བྱ་བ་ལས་ཀྱི་རྒྱུད་དེ། ཡོ་ག་དང༌། ཨུ་པ་ཡ་དང༌། ཀྲི་ཡ་གསུམ་དུ་འབྱུང་བའོ། །དེ་བས་ན་རྒྱུད་ཀྱི་ཡན་ལག་དྲུག་ཀྱང་ཡིན་ནོ། །དེར་ཡང་མ་ཟད་ངེས་པར་འབྱུང་བའི་གདུལ་བྱ་ལ་བློ་དང་འཚམས་པར་བརྒྱུད་པའི་ཐབས་སུ་ཤར་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ཐུགས་རྗེ་དང་ཐབས་ལ་མཁས་པའི་གདུལ་ཐབས། རྒྱལ་བ་རྫོགས་པའི་སངས་རྒྱས་ཐུབ་པ་སྤྲུལ་པའི་སྐུ་མཆོག་ཀུན་གྱིས་བརྒྱུད་ནས་འདྲེན་པའི་ཐབས་ཀྱི་གསང་བ་མཐར་ཐུག་ངེས་པའི་དོན་ལ་གཞོལ་བ། ཀུན་རྫོབ་སྒྱུ་མ་དང་། དོན་དམ་པའི་ངོ་བོ་གཉིས་མ་འགགས་པར་ཤར་བས། སྐྱེ་བོ་དང་མུ་སྟེགས་ལས་འཕགས་ཏེ་བདེན་བཞིའི་ཆོས་ཉིད་ལྷག་པར་མཐོང་བ་ཉན་ཐོས་དང༌། དེ་ཉིད་ཇི་ལྟ་བ་ལ་གཟུང་རྟོག་དང་བྲལ་བས་བྱིང་རྒོད་ལ་སོགས་པ་མེད་དེ་མི་བསྒུལ་བས་ཞི་བར་གནས་པ་རང་རྒྱལ་དང༌། མཐའ་བཞི་དང་སྤྲོས་༼༣༠༦༽པའི་མཐའ་བརྒྱད་སྟོང་གཞི་ཡོད་པའམ་མེད་པའི་ཚུལ་གྱིས་ཡེ་དག་པས། དོན་དམ་པར་མ་སྐྱེས་པར་རྟོགས་པའི་དབུ་མའི་ལམ་གྱིས་མཐའ་གཉིས་ལས་ངེས་པར་འབྱུང་བའི་ཐེག་པ་སེམས་ཙམ་དང་དབུ་མ་སྟེ། དེ་བས་ན་སྡེ་སྣོད་གསུམ་དུའང་ཤར་རོ།།

གཉིས་པ་དེས་ན་བསྟན་པའི་འབྱུང་གནས་དང་ལུང་གི་སྤྱི་འགྲེལ་དུ་བསྟན་པ་ནི།

ཨེ་མའོ་ངོ་མཚར། ཞེས་པ་ནས། འབྱུང་གནས་གཏན་ལ་ངེས་པར་འབེབས། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

སྡེ་མཛོད་དམ་པའི་བཀའ་ལུང་རྣམས། །འབྱུང་གནས་གཏན་ལ་ངེས་པར་འབེབས།།

དེ་ལྟར་ཡོངས་རྫོགས་ཀྱི་ངོ་བོ་ལས་ཐེག་པ་ཀུན་ཏུ་མ་འདྲེས་པར་ཤར་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། གདུལ་བྱའི་བློ་རིམ་ལྟར་སྣང་བའི་ཐབས་ཀྱི་གསང་སྒོ། རྒྱལ་བ་རྫོགས་པའི་སངས་རྒྱས་སྐུ་གསུམ་གྱི་བདག་ཉིད་ཀུན་གྱི་དགོངས་པ་གསང་བ་དམ་པ། སྤྲུལ་སྐུའི་ཆོས་མཛོད་སྡེ་སྣོད་རིན་པོ་ཆེ་གསུམ་དང༌། ལོངས་སྐུའི་གསང་མཛོད་སྔགས་རྒྱུད་ཕྱི་པ་གསུམ་དང༌། ཆོས་སྐུའི་དགོངས་པ་དམ་པའི་མཛོད་ཆེན་གསུམ་སྟེ། མདོ་སྔགས་ཀྱི་བཀའ་ལུང་ཇི་སྙེད་པའི་ངོ་བོར་བཞུགས་པ། དེ་རྣམས་ཀྱི་དོན་རྫོགས་པ་དང༌། ཕྱོགས་ཆ་མཚོན་པའི་བཀའི་ཚིག་དང༌། ཡི་གེར་ཡང་བྱིན་རླབས་ཀྱིས་ཤར་བས་ཀུན་གྱི་འབྱུང་གནས་ཀྱི་གཞི་ཡང་ཡིན་ལ། དེ་དག་གིས་དེ་ཁོ་ན་ཉིད་ཀྱི་དོན་མངོན་སུམ་དང་རྗེས་དཔགས། རིམ་གྱིས་དང་གཅིག་ཆར། དངོས་སུ་དང༌། བརྡ་ཐབས་ཀྱི་བརྒྱུད་པས་ཡང་དག་པར་གཏན་ལ་ངེས་པར་འབེབས་ཏེ། མདོར་བསྟན་པ་ཀུན་འདིས་ནོར་དུ་རུང་བར་བྱེད་པའོ། །དེ་བས་ན་བཀའ་ཐམས་ཅད་ཀྱང་སྙིང་པོ་བྱང་ཆུབ་འདི་ཉིད་དོ།།

བདུན་པ་བཀའ་རྟགས་ཀྱི་ཕྱག་རྒྱ་བཞིར་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་ནས། རྒྱལ་བ་ཀུན་གྱི། ཞེས་པ་ནས། རྣམས་ཀྱི་ཡུམ། །ཞེས་པའི་བར་གྱིས་བསྟན་ཏེ།

རྒྱལ་བ་ཀུན་གྱི་སྙིང་པོ་ཉིད། །བྱིན་རླབས་ངོ་མཚར་རྒྱ་ཆེར་འབྱུང་། །རྒྱལ་བ་རྒྱ་མཚོ་རྣམས་ཀྱི་ཡུམ།།

གང་བདུད་ཀྱི་དཔུང་ལས་རྒྱལ་ཏེ་ཆེ་བར་གྱུར་པ་ཀུན་གྱི་སྙིང་པོ་འབྲས་བུ་དམ་པ་ཉིད་ཡེ་ནས་ལྷུན་གྱིས་གྲུབ་པར་མངའ་བའི་བྱིན་རླབས་རང་སྣང་བ་ནི། མདོ་སྐུ་གསུང་ཐུགས་ཡོན་ཏན་ཕྲིན་ལས་ལྔ་སྟེ། ཡ་མཚན་ཆེ་ཞིང་ངོ་མཚར་རྒྱ་ཆེར་འབྱུང་བ་དེ་དག་ཇི་བཞིན་པ་ལས་བྱུང་བ་མེད་པར་འཆར་རོ། །དེའི་ཕྱིར་རྒྱལ་བ་རྒྱ་མཚོ་མ་ལུས་པ་རྣམས་ཀྱི་སྐྱེད་པར་བྱེད་པའི་ཡུམ་དུ་གྱུར་པ་ཉིད་དོ།།

གཉིས་པ་རྒྱས་པར་བཤད་པ་ནི།

སྔར་གྱི་འཕྲོར། ཨེ་མའོ་ངོ་མཚར། ཞེས་པ་ནས། སངས་རྒྱས་འབྱུང་བའི་སྙིང་པོ་ཡུམ། །ཞེས་པའི་བར་གྱིས་༼༣༠༧༽བསྟན་ཏེ།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གདུལ་བྱའི་ཡུལ་ནི་ཇི་སྙེད་པའི།།

གསུང་གི་སྒོ་ཡང་དེ་སྙེད་འབྱུང་། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

རབ་འབྱམས་རྨད་དུ་གྲགས་པ་འདི། །བཀའ་ཡི་རང་རྒྱུད་དམ་པ་ཉིད། །ཨེ་མའོ་ངོ་མཚར་རྨད་ཀྱི་ཆོས།།

རྫོགས་པའི་སངས་རྒྱས་ཀུན་གྱི་གསང་། །ཇི་བཞིན་པ་ཡི་དེ་ཁོ་ན། །བསྟན་པ་འབྱུང་བའི་སྙིང་པོ་མཆོག།

ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་།།

ཟབ་མོ་འདུས་པའི་གཏན་ཚིག་འདི། །སངས་རྒྱས་འབྱུང་བའི་སྙིང་པོའི་ཡུམ།།

འོ་ན་བཀའ་རྟགས་ཀྱི་ཕྱག་རྒྱ་བཞི་དང་ཇི་ལྟར་ལྡན་སྙམ་ན། དང་པོ་དོན་དང་མི་འགལ་བར་སྟོན་ཏེ། རྒྱལ་བ་སྐུ་གསུམ་གྱི་བཀའ་ཇི་སྙེད་དུ་ཤར་ཡང་དོན་གྱི་ངོ་བོར་རྒྱ་ཆད་ཕྱོགས་ལྷུང་མེད་པར་གྱུར་པ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས་མ་འདྲེས་ཡོངས་རྫོགས་ཀྱི་དེ་ཉིད། རྒྱལ་བ་རྫོགས་པའི་སངས་རྒྱས་སྐུ་གསུམ་གྱི་མངའ་བདག་ཀུན་གྱི་དགོངས་པ་གསང་བ་དམ་པ་ཕུལ་དུ་བྱུང་བ་ཉིད་དེ། གདུལ་བྱའི་ཡུལ་གྱི་ཁམས་དབང་བསམ་པའི་ཁྱད་པར་སྣ་ཚོགས་པ་ནི་རབ་འབྲིང་ཐ་མ་བྱེ་བྲག་དང་བཅས་པར་འབྱུང་བ་ཇི་སྙེད་པ་ཀུན་གྱི་དོན་དུ་རང་རང་གི་རྒྱུད་དང་འཚམས་པའི་གདུལ་བའི་ཐབས་ཀྱི་གསུང་གི་འཇུག་སྒོ་བསྟན་པ་རིན་པོ་ཆེ་ཡང་དེ་སྙེད་དུ་སྣང་ཞིང་གྲགས་པར་འབྱུང་སྟེ། དེ་ལྟར་ལྷུན་གྱིས་གྲུབ་པའི་ཕྱིར་དོན་དང་མི་འགལ་བར་སྣང་དུ་བཏུབ་པའོ། །དེ་བས་ན་རྒྱུད་འདི་ལྟ་བུ་ཉིད་ཀྱང་ཇི་ལྟར་སྣང་ཡང༌། ངོ་བོའི་དབང་དུ་སྟོན་པ་ཉག་གཅིག་གི་བྱིན་རླབས་སྣང་བ་ཡིན་ནོ། །གཉིས་པ་བཀའ་ལུང་ལ་སྣང་བར་སྟོན་ཏེ། བཀའ་ཡི་དམ་པ་དོན་གྱི་སྙིང་པོ་ཉིད། ཇི་བཞིན་དུ་མ་ནོར་བར་འགྲེལ་བའི་གསང་བ་མཆོག་གི་སྒོར་ཤར་བ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། བསྟན་པའི་ཡང་རྩེ་ངེས་པ་དོན་གྱི་དགོངས་པ། རྒྱལ་བ་རྫོགས་པའི་སངས་རྒྱས་སྐུ་གསུམ་གྱི་མངའ་བདག་ཀུན་གྱི་བཀའ་ལུང་གསང་བ་དམ་པ་རྒྱུད་ཀྱི་རྒྱལ་པོ་ཉིད་དེ། ཆེ་བ་བདུན་དང་ལྡན་པའི་རྒྱུད་ལུང་མན་ངག་གི་སྤྱི་མཛོད་རབ་འབྱམས་རྨད་དུ་བྱུང་བར་གྲགས་པ་དོན་དང་ཚིག་ཁྱད་པར་ཅན་དུ་གདུལ་བྱ་ལ་སྣང་བའི་དགོངས་པ་འདུས་པ་ཆོས་ཀྱི་མེ་ལོང་དུ་ཉེ་བར་གཟུང་བ་འདི་ཉིད་མདོ་སྔགས་ཀྱི་བཀའ་ལུང་ཐེག་པའི་སྒོ་ཡི་རིམ་པ་དེ་སྙེད་དུ་བསྒྲངས་པའི་རབ་རྒྱུད་དམ་པ་མཆོག་ཏུ་གསང་བ་ཉིད་དེ། སྙིང་པོ་བྱང་ཆུབ་ཉིད་ཇི་ལྟ་བར་མཚོན་པའི་སྒྲོ་སྐུར་མེད་པར་ཚིག་ཏུ་སྣང་བ་འདི་ཉིད་ཁོ་ནའོ། །འོ་ན་དམ་པར་བརྗོད་པའི་གཏན་ཚིགས་གང་ཞེ་ན། གསུམ་པ་རིགས་པས་འཐད་པར་སྟོན་ཏེ། བསྟན་པ་རྒྱ་མཚོ་འབྱུང་བའི་གཞི་རྩ་ཡེ་རྫོགས་སྙིང་པོའི་ཚད་མ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ཐེག་པ་ཀུན་གྱི་དགོངས་བཅུད། རྒྱལ་བ་རྫོགས་པའི་སངས་རྒྱས་སྐུ་གསུམ་གྱི་མངའ་བདག་ཀུན་གྱི་དགོངས་༼༣༠༨༽པ་གསང་བ་འཁྲུལ་མེད་དུ་སྟོན་པ། སྙིང་པོ་བྱང་ཆུབ་ཀྱི་ངོ་བོ་ཆོས་ཉིད་ཇི་བཞིན་པ་ཡི་དེ་ཁོ་ན་ཉིད་དུ་ངེས་པའི་ཕྱིར་རྒྱུད་ཀྱི་རྒྱལ་པོ་འདི་ལས་བཀའ་དེ་སྙེད་ཀྱི་བསྟན་པ་འབྱུང་བའི་རྒྱུ་ཡི་སྙིང་པོ་མཆོག་ཏུ་འཕགས་པ་ཉིད་དེ། བསྟན་པ་ཐམས་ཅད་ཀྱི་འབྱུང་གནས་ཡིན་པའི་ཆེ་བ་དང་ལྡན་པའི་ཕྱིར་རོ། །དེའི་ཚུལ་དང་མཐུན་པར། བཞི་པ་གཏན་ཚིགས་ཀྱིས་རྒྱས་པར་སྟོན་ཏེ། རྒྱུད་ལུང་མན་ངག་གི་དོན་གནས་ཐམས་ཅད་འདུས་པའི་ཚད་མ་ལ་ཤིན་ཏུ་ངམ་པས། ཨེ་མའོ་ཞེས་ངོ་མཚར་ཆེ་ཞིང་རྨད་ཀྱི་ཆོས། ཤེས་སྒྲུབ་ཀུན་གྱི་ཡང་བཅུད། རྒྱལ་བ་རྫོགས་པའི་སངས་རྒྱས་སྐུ་གསུམ་གྱི་མངའ་བདག་ཀུན་གྱི་རྟོགས་བྱ་དོན་གྱི་གསང་བ་མཐར་ཐུག་པ། དོན་ཚིག་གཏིང་དཔགས་དཀའ་བ་ཟབ་མོ་མཐའ་དག་ཀུན་འདུས་པའི་ངང་དང༌། རང་བཞིན་ལ་སོགས་པའི་གཏན་ཚིགས་ཐམས་ཅད་ཀྱི་གསང་བཅུད་སྟོན་པའི་རྒྱུད་ལུང་ཆེན་པོ་འདི་ཉིད་རྟོགས་པ་ཁོ་ན་ལས། རྒྱལ་བ་རྫོགས་པའི་སངས་རྒྱས་ཀུན་འབྱུང་བའི་སྙིང་པོ་དོན་གྱི་ཕྱི་མོར་ངེས་པས། བདེ་བར་གཤེགས་པ་ཐམས་ཅད་ཀྱི་ཡུམ་དུ་གྱུར་པའི་ཁྱད་པར་དང་ལྡན་པའི་ཕྱིར་རོ། །དེ་རྣམས་ཀྱིས་ཐོབ་བྱེད་ཐབས་ཀྱི་ཁྱད་པར་བསྟན་པའོ།།

གསུམ་པ་ཐུགས་རྗེའི་ཆོ་འཕྲུལ་གྱི་ཞབས་བསྡུ་བ་ལ་གཉིས་ཏེ། མཇུག་བསྡུ་བ། ཤིན་ཏུ་བསྡུས་པའོ། །དང་པོ་ལ་བཞི་སྟེ། ལེའུ་བཅུ་དྲུག་པའི་བསྡུ་བ། བཅུ་བདུན་པའི་བསྡུ་བ། བཅོ་བརྒྱད་པའི་བསྡུ་བ། བཅུ་དགུ་པའི་བསྡུ་བའོ། །དང་པོ་ནི།

རྣམ་པ་སྣ་ཚོགས། ཞེས་པ་ནས། ཐུགས་ཀྱི་དཀྱིལ་འཁོར་ཤར། །ཞེས་པའི་བར་གྱིས་བསྟན་ཏེ།

རྣམ་པ་སྣ་ཚོགས་སྣང་བ་མཛད། །མི་འགྱུར་མི་ཤིགས་རྡོ་རྗེ་སེམས། །དཔག་ཏུ་མེད་པ་གསུང་མཐའ་ཡས།།

ཡོན་ཏན་རིན་ཆེན་སྣ་ཚོགས་འབྱུང་། །མཐའ་དག་ལྷུན་གྲུབ་གདོན་མི་ཟ།།

རྡོ་རྗེ་སྙིང་པོ་ཉིད་ལ་ཉིད། །ཉི་མ་ཐུགས་ཀྱི་དཀྱིལ་འཁོར་ཤར།།

རྒྱལ་བའི་སྐུ་ཡི་བཀོད་པ་ཡོན་ཏན་རྣམ་པ་སྣ་ཚོགས་ཇི་སྙེད་པ་ཐམས་ཅད་མི་འགོག་པར་སྣང་བར་མཛད་པས་ན་རྣམ་པར་སྣང་མཛད་དེ། ཀུན་འདུས་ལས། སྐུ་ཡི་སྤྲུལ་པ་ཐམས་ཅད་ནི། །དེ་བཞིན་རིགས་ཀྱི་གདུང་རྒྱུད་འཛིན། །ཞེས་སོ། །ངོ་བོ་མི་འགྱུར་ཞིང་གཉེན་པོ་དང་བྲལ་བས་མི་ཤིགས་པའི་ཐུགས་ལ་གཡོ་བ་མེད་པས་རྡོ་རྗེ་སེམས་དཔའ་སྟེ། སྔ་མ་ལས། ཐུགས་ལས་སྤྲུལ་པའི་སངས་རྒྱས་ནི། །རྡོ་རྗེ་རིགས་ཀྱི་གདུང་རྒྱུད་འཛིན། །ཞེས་སོ། །གྲགས་མཐའ་དཔག་ཏུ་མེད་པ་ཇི་སྙེད་པར་གསལ་བས་རྒྱལ་བའི་གསུང་དུ་ཤར་བར་སྣང་བ་༼༣༠༩༽མཐའ་ཡས་ཏེ། གསུང་ལས་སྤྲུལ་པའི་སངས་རྒྱས་རྣམས། །པདྨ་རིགས་ཀྱི་གདུང་རྒྱུད་འཛིན། །ཞེས་སོ། །མཚན་དང་དཔེ་བྱད་དང་དངོས་གྲུབ་ཇི་སྙེད་པའི་ཡོན་ཏན་ཀུན་གྱི་འབྱུང་གནས་སུ་གྱུར་པས་དཔེ་ནོར་བུ་རིན་ཆེན་དབང་གི་རྒྱལ་པོ་ལྟར་སངས་རྒྱས་རྣམས་ཀྱི་ཆེ་བའི་ཡོན་ཏན་སྣ་ཚོགས་པ་ཀུན་འབྱུང་བས་རིན་ཆེན་འབྱུང་ལྡན་ཏེ། ཡོན་ཏན་ཡུལ་གྱི་སངས་རྒྱས་རྣམས། །རིན་ཆེན་རིགས་ཀྱི་གདུང་རྒྱུད་འཛིན། །ཞེས་སོ། །གདུལ་བྱ་མཐའ་དག་གི་དོན་ཐམས་ཅད་མ་བརྩལ་བར་ལྷུན་གྱིས་གྲུབ་པའི་ངང་ནས་རྫོགས་པར་མཛད་པས་གདོན་མི་ཟ་བའམ་དོན་ཡོད་གྲུབ་པ་སྟེ། མཛད་པ་སྤྲུལ་པའི་སངས་རྒྱས་རྣམས། །ཕྲིན་ལས་རིགས་ཀྱི་གདུང་རྒྱུད་འཛིན། །ཞེས་དང༌། དེས་ན་ལྔ་ཞེས་ངེས་པར་བཤད། །ཅི་ཕྱིར་ཞེ་ན་སངས་རྒྱས་ཀུན། །ལྔ་པོ་དེ་ལས་མ་གཏོགས་པ། །གཞན་ལས་བྱུང་ཞིང་གཞན་ན་མེད། །ཅེས་སོ། །འོ་ན་སངས་རྒྱས་ལྔར་སྣང་བས་གཅིག་པར་མི་འགྱུར་ཏེ་ཐ་དད་དོ་ཅེ་ན། ཆོས་ཉིད་ཀྱི་ངང་ལ་སྟོན་འཁོར་ཐ་མི་དད་པར་རྡོ་རྗེ་སྙིང་པོ་ཉིད་ལ་ཉིད་འཆར་ཞིང་སྣང་བའི་ཚུལ་གྱིས་དཔེར་ན་ཉི་མ་འོད་དུ་ཤར་བ་བཞིན་ཡེ་ཤེས་ཐུགས་ཀྱི་དཀྱིལ་འཁོར་ཆོས་སྐུ་སྐྱེ་མེད་དོན་གྱི་གསུང་རིག་པ་རང་གསལ་དུ་ཤར་བ་ཁོ་ནའོ། །དེས་ན་རང་བྱུང་གི་ཡེ་ཤེས་ལས་དང་ངོ་བོས་རྡོ་རྗེ་སྟེ་ཡེ་ཤེས་རིལ་གྱི་རྩ་བ་ཉིད་དེ། དེ་ཉིད་ཀྱི་བྱིན་རླབས་ཡེ་ཤེས་ལྔའི་ངོ་བོ་རིགས་ལྔར་ཤར་བས་རང་བྱུང་ཡེ་ཤེས་ཉིད་དང་དྲུག་གི་ཕྱིར་རིགས་ཀྱང་རྗེས་སུ་མཐུན་ཏེ། ལྷ་རྒྱུད་ཆེན་པོ་ལས། སྐུ་ལྔའང་ཀུན་བཟང་དབྱེར་མེད་པས། །རྒྱལ་བ་དྲུག་པ་ཞེས་བྱའོ། །རིགས་ལྔ་ཀུན་བཟང་དབྱེར་མེད་པས། །རིགས་དྲུག་པ་ཞེས་བྱ་བ་ཡིན། །ཞེས་སོ། །དེ་བས་ན་རྒྱལ་བ་མ་ལུས་པའི་ཡུམ་དུའང་མངོན་ནོ།།

གཉིས་པ་བཅུ་བདུན་པའི་བསྡུ་བ་ནི།

བསམ་མེད་བསམ་གྱིས། ཞེས་པ་ནས། སྒོ་ཡང་དེ་ལས་མེད། །ཅེས་པའི་བར་གྱིས་བསྟན་ཏེ།

བསམ་མེད་བསམ་གྱིས་མི་ཁྱབ་པའི། །དཔག་མེད་བརྒྱད་ཁྲི་བཞི་སྟོང་སྒོ། །གྲགས་པའི་རྣམ་གྲངས་བསམ་ཡས་ཀྱང་། །ངེས་པའི་ཐེག་པ་གཅིག་ལས་མེད། །གསང་ཉིད་མ་ངེས་འཇུག་བར་དུ། །ཐེག་པའི་སྒོ་ཡང་བསམ་མི་ཁྱབ། །གསང་ཉིད་ངེས་པར་སྣང་མ་ཐག །ཐེག་པའི་སྒོ་ཡང་དེ་ལས་མེད།།

ལེའུའི་སྟོད་མ་འགགས་པར་སྣང་བའི་སྒོ་བསྡུ་སྟེ། སྙིང་པོ་བྱང་ཆུབ་ངོ་བོ་བསམ་དུ་མེད་ཅིང་བསམ་གྱིས་མི་ཁྱབ་པའི་ངང་ལས། ཆོས་ཀྱི་སྒོ་མོ་དཔག་ཏུ་མེད་ལ་གྲངས་ལས་འདས་པར་སྣང་བའང༌། མདོར་ཉོན་མོངས་པ་འདུལ་དབང་གིས་སྟོང་ཕྲག་བརྒྱད་ཅུའམ་བརྒྱད་ཁྲི་དང་བཞི་སྟོང་དུ་གདུལ་བྱ་རྣམས་འཇུག་པའི་སྒོ་རུ་བསྟན་ཞིང་གྲགས་པར་གྱུར་པའི་རྣམ་གྲངས་བསམ་ཡས་པར་བཞུགས་ཀྱང༌། ལེའུའི་སྨད་མ་སྐྱེས་༼༣༡༠༽པར་སྣང་བ་སྡུད་དེ། སེམས་ཀྱི་དེ་ཁོ་ན་ཉིད་ཇི་བཞིན་པར་མ་ནོར་བར་ངེས་པའི་གསང་བ་མཆོག་གི་ཐེག་པ་གཅིག་ལས་མེད་དེ། དངོས་སུ་སེམས་ཀྱི་དཀྱིལ་འཁོར་འོད་གསལ་བར་སྟོན་པའི་རྒྱུད་ཆེན་པོ་ཆོས་ཀྱི་མེ་ལོང་འདི་ཉིད་དོ། །འོ་ན་དོན་གཅིག་ལ་ཐ་དད་དུ་བསྟན་པ་ཇི་ལྟར་འབྱུང་ཞེ་ན། གསང་བ་མཆོག་གི་ཐེག་པ་འདི་ཉིད་དུ་རིགས་མ་ངེས་ཏེ་དོན་མ་རྟོགས་པར་ཤ་ཐང་བས་རྩོལ་བ་དང་བཅས་ཏེ་འཇུག་པའི་བར་དུ་ལམ་སྟེགས་ཀྱི་ཐེག་པའི་སྒོ་ཡང་བློ་རིམ་ལྟར་བསམ་གྱིས་མི་ཁྱབ་པར་ཤིན་ཏུ་མང་ལ། འདི་ཉིད་དང་འཕྲད་དེ། གསང་དོན་ཟབ་མོ་ཉིད་ངེས་པར་སྣང་ནས་རྟོགས་མ་ཐག་ཏུ། ཐེག་པའི་འཇུག་སྒོ་ཡང་མདོ་གཅིག་པོ་དེ་ལས་ལྷག་པ་མེད་པའི་ཕྱིར་སྒོ་ཀུན་ནས་བསྡུར་བའི་བསླབ་པའང་ཤིན་ཏུ་གཅེས་སོ། །དེ་བས་ན་ཐེག་པ་ཐམས་ཅད་ཀྱི་ཡུམ་དུའང་མངོན་ནོ།།

གསུམ་པ་བཅོ་བརྒྱད་པའི་བསྡུ་བ་ནི།

བརྗོད་དང་བསྟན་པའི། ཞེས་པ་ནས། དོན་ཏེ་དེ་ཉིད་མིན། །ཞེས་པའི་བར་གྱིས་བསྟན་ཏེ།

བརྗོད་དང་བསྟན་པའི་རྣམ་གྲངས་ཀུན། །བཀྲི་བའི་དོན་ཏེ་དེ་ཉིད་མེད།།

དེས་ན་ཀུན་བརྗོད་པ་དང་བསྟན་པའི་རྣམ་གྲངས་ཇི་སྙེད་དུ་གྲགས་པ་ཀུན་ཀྱང་འགྲོ་བ་བརྒྱུད་ནས་དྲང་ཞིང་བཀྲི་བའི་དོན་དུ་བརྡས་མཚོན་པ་ཁོ་ན་ཡིན་ཏེ། ཚིག་ཉིད་ངེས་པ་དོན་གྱི་དེ་ཁོ་ན་ཉིད་མིན་པས་སོ།།

བཞི་པ་བཅུ་དགུ་པའི་བསྡུ་བ་ནི།

ཚིག་བརྡའ་བརྗོད་པས། ཞེས་པ་ནས། ལུང་ཆེན་ངེས་པར་བསྟན། །ཞེས་པའི་བར་གྱིས་བསྟན་ཏེ།

ཚིག་བརྡ་བརྗོད་པས་དོན་རྙེད་པ། །སྒྲོན་མེས་མུན་ཁུང་གསེར་འཚོལ་ལྟར།།

གསང་བའི་སྙིང་པོ་མཛོད་བརྟོལ་ཏེ། །དམ་པ་རྣམས་ཀྱི་གཏེར་ཆེན་འབྱིན།།

ཐིག་ལེ་གཅིག་གིས་ཀུན་ལ་ཁྱབ། །ཐམས་ཅད་ལུང་ཆེན་ངེས་པར་བསྟན།།

དེ་ལྟར་མཚོན་བྱེད་ཚིག་གི་བརྡའ་ཐབས་བརྗོད་པ་ལ་བརྟེན་པས་ཡུན་གྱི་དོན་སྲིད་ཆེན་པོ་དེ་ཁོ་ན་ཉིད་རྙེད་ཅིང་རྟོགས་པར་བྱེད་པ་ནི། དཔེར་ན་གསལ་བྱེད་སྒྲོན་མས་མུན་པ་བསལ་ནས་ཁང་པའི་ནང་གི་གསེར་ཚོལ་ན་རྙེད་པ་ལྟར་དུ། ཇི་བཞིན་དུ་མཚོན་པའི་ཐབས་ཀྱི་སྒོ་ལ་བརྟེན་ནས། དོན་དབྱིངས་རིག་བདེ་བ་ཆེན་པོ་གསང་བའི་སྙིང་པོའི་ཀློང་མཛོད་བརྡོལ་བར་བྱས་ཏེ། དམ་པ་རྣམས་ཀྱི་སྤྱོད་ཡུལ་བྱང་ཆུབ་སེམས་ཀྱི་གཏེར་ཆེན་པོ་ཡུལ་མེད་རང་གསལ་དུ་འབྱིན་པ་ཁོ་ནའོ། །དེས་ན། རང་རིག་པ་ངང་གི་ཐིག་ལེ་ཆོས་ཉིད་བྱང་ཆུབ་ཀྱི་སེམས། བདག་ཉིད་ཆེན་པོ་གཅིག་གིས་དངོས་པོ་ཀུན་ལ་ཁྱབ་པའི་ཕྱིར། ཆོས་ཐམས་ཅད་གསང་སྔགས་དོན་གྱི་གནས་ལུགས་ཡེ་ཇི་བཞིན་པ་ཉིད་དུ་ལུང་ཆེན་པོ་ངེས་པར་བསྟན་པ་ཡིན་པས་ན། ཤེས་བྱ་ཀུན་གྱི་དེ་ཁོ་ན་ཉིད་མཐར་ཐུག་ཏུ་ངེས་པ་ཡིན་ནོ། །དེ་བས་ན། ལུང་ཆེན་པོར་བསྟན་པ་ཀུན་གྱི་ཡུམ་དུའང་མངོན་ནོ།།

གཉིས་པ་ཤིན་ཏུ་བསྡུས་པ་ནི།

འོག་ནས། ༼༣༡༡༽སངས་རྒྱས་བདེ་ཆེན། ཞེས་པ་ནས། ཀུན་ཏུ་བཟང་པོ་ཉིད་དོ། །ཞེས་པའི་བར་གྱིས་བསྟན་ཏེ།

སངས་རྒྱས་བདེ་ཆེན་དེ་ལས་འབྱུང་། །མ་ལུས་ཀུན་གྱི་སྙིང་པོ་འདི། །སྤྲོས་མེད་ཐིག་ལེར་གནས་པ་ལས།།

རྒྱལ་སྲས་སེམས་ཅན་ཀུན་གྱི་ཕྱིར། །ཉིད་ལ་འཆད་ཅིང་ཉིད་ལ་འགྲེལ། །ཞི་གནས་མི་རྟོག་མཁའ་ཁྱབ་ལ།།

ལྷག་མཐོང་མ་རྨོངས་འཇའ་ཚོན་གསལ། །མ་འདྲེས་ཡོངས་སུ་རྫོགས་པ་ལ། །དགོངས་པ་ངེས་པར་འགྲེལ་པར་བཤད། །ལངྐའི་བདག་པོ་སྟོང་པ་ཉིད་ལས་དེ་སྐད་དུ་སྒྲ་བརྙན་བྱུང་བས། ཐམས་ཅད་མ་འདྲེས་པ་དང་ཡོངས་སུ་རྫོགས་པར་འགྲེལ་པ་ནི་ཀུན་ཏུ་བཟང་པོ་ཉིད་དོ།།

བཅུ་དྲུག་པའི་བསྡུ་བ་རྣམ་པར་སྣ་ཚོགས་ཞེས་པ་སྡུད་དེ། དེ་བས་སངས་རྒྱས་ལོངས་སྤྱོད་རྫོགས་པ་དང་སྤྲུལ་པའི་སྐུ་རིལ་ངང་གི་ཐིག་ལེ་བདེ་བ་ཆེན་པོ་དེ་ལས་འབྱུང་སྟེ་སྣང་བའི་ཕྱིར། བཅུ་བདུན་པའི་བསྡུ་བ་བསམ་མེད་ཅེས་པ་སྡུད་དེ། རྩ་བ་ཆེན་པོ་འཁོར་འདས་མ་ལུས་པ་ཀུན་གྱི་སྙིང་པོ་དེ་བཞིན་ཉིད་ཀྱི་ཡེ་ཤེས་འདི་ཉིད་ཡེ་ནས་མཐའ་ཐམས་ཅད་དང་བྲལ་བའི་ངོ་བོ་སྤྲོས་པ་མེད་པའི་ཐིག་ལེར་གནས་ཤིང་བཞུགས་པ་ལས། བཅོ་བརྒྱད་པའི་བསྡུ་བ་བརྗོད་དང་ཞེས་པ་སྡུད་དེ། རྒྱལ་བའི་གདུང་འཚོབ་པའི་རྒྱལ་སྲས་སེམས་ཅན་ཆེན་པོ་ཀུན་གྱི་དོན་རྟོགས་པར་བྱ་བའི་ཕྱིར་དུ་སྟོན་པ་ཉིད་ལ་འཆད་ཅིང་ཉིད་ལ་ངེས་པར་འགྲེལ་ཏེ་གསལ་བར་བྱེད་དོ། །བཅུ་དགུ་པའི་བསྡུ་བ་ཚིག་བརྡའ་ཞེས་པ་སྡུད་དེ། རང་བཞིན་གྱི་ཞི་གནས་གང་དུའང་གཡོ་བ་དང་འཛིན་པ་མེད་པར་མི་རྟོག་པའི་ངང་ནས་དམ་པ་ཇི་བཞིན་པའི་ནམ་མཁའ་ཁྱབ་པའི་དབྱིངས་ལ་ངོ་བོ་ཉིད་ཀྱི་ལྷག་མཐོང་རང་རིག་པའི་མངོན་སུམ་ཀུན་ནས་མ་རྨོངས་པར་འཇའ་ཚོན་ལྟར་ཡེ་གསལ་བ་ཆེན་པོ་བཤད་པ་བཞིན་མ་འདྲེས་ལ་ཡོངས་སུ་རྫོགས་ཏེ་ངོ་བོ་གཅིག་དང་དུ་མ་ཡོད་མེད་རྟག་ཆད་ལ་སོགས་པ་མ་སྤངས་པར་གྲོལ་བའི་དོན་གྱི་གསང་བ་མཐར་ཐུག་པ་ཞི་གནས་དང་ལྷག་མཐོང་ཟུང་དུ་འབྲེལ་བའི་རང་བཞིན་མ་ནོར་བ་ལ་དགོངས་པ་ངེས་པར་འགྲེལ་ཏེ་ལེགས་པར་བཤད་དོ་ཞེས་ཐ་སྙད་དུ་བསྙད་པར་མཛད་དོ། །ལང་ཀའི་བདག་པོ། སྟོང་ཉིད་ལས་དེ་སྐད་དུ་ཚིག་གི་སྒྲ་བརྙན་བྱུང་བས། དོན་གྲུབ་པའི་ངོ་བོ་ཐམས་ཅད་མ་འདྲེས་པ་དང་ཡོངས་སུ་རྫོགས་པར་འགྲེལ་བར་བསྟན་པ་ནི། སྤྱོད་ཡུལ་ཡོངས་སུ་དག་པས་ཀུན་ཏུ་བཟང་པོ་ཉིད་དོ།།

གསུམ་པ་ཞབས་བསྡུ་བས་འཁོར་གྱི་གོ་བའི་ཡོན་ཏན་ནི།

ལང་ཀའི། ཞེས་པ་ནས། དབུགས་ཕྱིན་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལྟར་ན་གང་གིས་དགོངས་པ་ངེས་པར་འགྲེལ་པ་དེ་དག་ཀྱང་གཞི་དང་། འཇུག་པ་དང་། སྦྱོར་བ་དང་། རྩ་བ་དང་། ངེས་པ་འབའ་ཞིག་ལས་གྱུར་པ་དང་། སྣང་བ་དང་། བརྗོད་པ་དང་། བསྟན་པར་རིག་པར་བྱའོ། །དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཡི་རངས་ཏེ། ཐམས་ཅད་མ་འདྲེས་པ་དང་ཡོངས་སུ་རྫོགས་ པ་ཐུགས་སུ་ཆུད་ནས། མཐའ་དང་དབུས་མེད་པར་གྲོལ་ཏེ་དབུགས་ཕྱིན་པར་གྱུར་ཏོ།།

ལང་ཀའི་བདག ་པོ། དེ་ལྟར་ན་བཤད་པ་ལ་སྙེགས་པའི་དོན་གྱིས་རྗེས་སུ་མཐུན་པར་གང་གིས་དགོངས་པ་ངེས་པར་འགྲེལ་པ་རྒྱས་པར་བསྟན་པ་དེ་དག་ཀྱང༌། ལས་ཀྱི་རྫུ་འཕྲུལ་གཞི་རང་བཞིན་ཇི་བཞིན་པ་དང༌། བསམ་གཏན་གྱི་རྫུ་འཕྲུལ་ལམ་པའི་འཇུག་པ་དང༌། ཆོས་ཉིད་ཀྱི་རྫུ་འཕྲུལ་འབྲས་བུ་ལ་༼༣༡༢༽སྦྱོར་བ་དང༌། ཐུགས་རྗེའི་རྫུ་འཕྲུལ་ངེས་དོན་སེལ་མེད་པའི་རྩ་བ་དང་ཆོ་འཕྲུལ་བཞིའི་དོན་འཁྲུལ་པ་དང་ལམ་དང་རང་བཞིན་དང་འབྲས་བུའི་སྣང་བ་བཞིར་བསྟན་པ་ལས། ཕྱི་མ་ལ་གཞི་ལྷུན་གྱིས་གྲུབ་པ་ལས། ཇི་བཞིན་པར་ངེས་པ་ཞི་བའི་བཀོད་པ་དང༌། དེ་འབའ་ཞིག་ལས་གྱུར་བ་ཁྲོ་བོར་སྣང་བ་རྫུ་འཕྲུལ་གྱི་ཆོ་འཕྲུལ་དང༌། གདུལ་བྱ་དོན་ལ་འཇུག་པའི་ཕྱིར་ཆོས་སྣང་བ་དང༌། དོན་དང་སྦྱོར་བས་ཀུན་བརྗོད་པ་དང༌། ཇི་བཞིན་ལ་རྩ་བའི་རྗེས་སུ་བསྟན་པ་དང་བཞིར་ངེས་པར་ཇི་ལྟ་བ་བཞིན་དུ་རིག་པར་བྱའོ། །དེ་སྐད་ཅེས་གདམས་ངག་གི་མདོ་སྨྲས་ཏེ་བཀའ་སྩལ་པས། འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས་དེའི་དོན་རྟོགས་པས་ཡི་རངས་ཏེ། ཐམས་ཅད་མ་འདྲེས་པ་དང༌། ཡོངས་སུ་རྫོགས་པར་ཐུགས་སུ་ཆུད་ནས། མཐའ་དབུས་མེད་པར་གྲོལ་ཏེ་དབུགས་ཆེན་པོ་ཕྱིན་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

གང་ཡོངས་སུ་རྫོགས་པར་འགྲེལ་པའི་ལེའུ་སྟེ་བཅུ་དགུ་པའོ།།

ཐེག་པ་ཆེན་པོ་ངེས་པར་བྱུང་བའི་ཚུལ་ལས། སངས་རྒྱས་ཀུན་གྱི་དགོངས་པ་ངེས་པར་འགྲེལ་པའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་ལྔ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གང་འཁོར་འདས་ཀྱི་ཆོས་ཀུན་བྱང་ཆུབ་ཀྱི་སེམས་ལ་ཡོངས་སུ་རྫོགས་པར་འགྲེལ་བའི་ལེའུ་སྟེ་བཅུ་དགུ་པ་གསལ་བར་བཤད་པའོ། །དེ་དག་གི་སྒོ་ནས་ཐེག་པ་ཆེན་པོ་ངེས་པར་འབྱུང་བའི་ཚུལ་ལས། སྙིང་པོ་བྱང་ཆུབ་ཀྱི་ངོ་བོ་ཀུན་ཏུ་བཟང་པོས། སངས་རྒྱས་ཀུན་གྱི་དགོངས་པ་དམ་པ་ཉིད་ལ་ཉིད་ཀྱིས་ངེས་པར་འགྲེལ་བའི་ཚུལ་ཟབ་མོ་རྣམས་དུས་འདིར་གསང་བ་པས་གཏམ་རྒྱུད་དུ་ཐོས་པ་བརྗོད་པའི་ཕྱིར་གསུང་ཆོས་ཀྱི་ཕྱག་རྒྱའི་ཡེ་ཤེས་སྒྲིབ་པ་མེད་པར་རྣམ་པར་བགྲོས་པ་སྟེ། བྱུང་ཚུལ་བསྟན་པ་ལྔ་པ་ཉིད་ཤིན་ཏུ་གསལ་བར་བཀྲོལ་བའོ།། །།

ལེའུ་ཉི་ཤུ་པ་གང་ཡོངས་སུ་མ་དག་པའི་སྐྱེ་རྒྱུད་བསྟན་པ།

༈ དྲུག་པ་གདུལ་བྱ་སྐབས་ལ་བབ་པའི་བྱུང་ཚུལ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས་ཡང༌། ཞེས་པ་ནས། བྱུང་ཞིང་གྲགས་སོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་སྔོན་དུ་བྱུང་བའི་ཚིག་བཅུ་གཉིས་པའི་དྲུག་པ་གདུལ་བྱའི་སྐབས་ལ་བབས་པའི་ཚེ་ན་ཡང་བྱུང་ཞེས་འབྱུང་བའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཉིད་ཀྱི་ཐེག་པ་ཆེན་པོ། གསང་བ་དམ་པ་འབྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། གདུལ་བྱའི་སྐབས་ལ་བབ་པའི་ཚེ་ན་ཡང་བྱུང་ཞེས་བཀོད་པ་དེ། འཇིག་རྟེན་པ་གང་ཞིག་གདུལ་བྱའི་སྐབས་ལ་བབས་ནས། ཡོངས་སུ་བཏུལ་བར་གྲགས་པ་ལགས། སྨྲས་པ། ལངྐའི་བདག་པོ་གསང་སྔགས་འབྱུང་བའི་རྒྱུ། གདུལ་བྱ་ཁྱད་པར་ཅན་འཇིག་རྟེན་སྲེག་པར་བྱེད་པ། ཁྲོ་ཚུལ་རྔམ་པ་གདུལ་བྱའི་དུས་ལ་ངེས་པར་བབ་པའི་ཚེ་ཡོངས་སུ་བཏུལ་བ་ན། ཕྱོགས་དུས་ཀུན་གྱི་སངས་རྒྱས་ཐམས་ཅད་སྙིང་པོ་བྱང་ཆུབ་གང་ན་བ་དེར་འདུས་ནས། སྐྱེས་བུ་དམ་པ་དག་ལ་རྣམ་པར་བསྐུལ་བས། ཇི་ལྟ་ཇི་ལྟར་རྡོ་རྗེ་སེམས་དཔའི་སྤྲུལ་པའི་སྒྲོན་མ་ཡོངས་སུ་བཀོད་པ་ལྟ་བུའི་ཁྲོ་བོའི་སྤྲིན་ཕུང་རྣམ་པར་འཇིགས་པ། རྡུལ་སྙེད་ཀྱི་བཏུལ་བ་དེ་ཁོ་ནའི་ཚེ། དེ་ཁོ་ནའི་དུས་ཉིད་དུ་བྱུང་ཞིང་གྲགས་སོ།།

སྤྱིར་བྱུང་ཚུལ་འདི་ཉིད་དམ་པའི་གསང་ལུང་ཇི་ལྟར་བྱུང་གི་ལན་ཏེ། ཁྱད་པར་རྩལ་འཕངས་ལས་མཐར་ལམ། རྒྱུད་གནས་ལུགས་ལས་གདུལ་བྱ་སྐབས་ལ་བབ་པའི་བྱུང་ཚུལ་མཚན་མ་རང་ཞིའི་ལྟ་བ་དཔའ་བོས་དགྲ་ཐུལ་བ་ལྟ་བུ་ཉིད་རྒྱས་པར་སྟོན་ནོ། །དེ་ནས་ཡང་སྡུད་པ་པོ། ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། །སྟོན་པ་གསང་བ་པའི་བདག་པོ་༼༣༡༣༽ལ་སྔོན་དུ་བྱུང་བའི་ཚིག་བཅུ་གཉིས་པའི་དྲུག་པ། གདུལ་བྱ་སྐབས་ལ་བབ་པའི་ཆེད་ནའང་འབྱུང༌། ཞེས་འབྱུང་བའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱི་ཐེག་པ་ཆེན་པོ་གསང་བ་དམ་པ་འབྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། །གདུལ་བྱའི་སྐབས་ལ་བབ་པའི་ཚེ་ན་ཡང་འབྱུང༌། ཞེས་བཀོད་པ་དེ། འཇིག་རྟེན་པ་གང་ཞིག་གདུལ་བྱའི་སྐབས་ལ་བབ་པ་ནས། ཡོངས་སུ་བཏུལ་བར་གྲགས་པ་ལགས། ཞེས་དྲིས་པ་ལ། ལན་སྨྲས་པ། ལང་ཀའི་བདག་པོ། གསང་སྔགས་འབྱུང་བའི་རྒྱུ་ཕྱི་པས་མི་འདུལ་བའི་གདུལ་བྱ་ལས་དང་རྩལ་ཤིན་ཏུ་དྲག་པས་ཁྱད་པར་ཅན་ཁམས་གསུམ་གྱི་བྱང་ཆུབ་སེམས་ཀྱི་ས་བོན་རླག་པར་བྱེད་པས་འཇིག་རྟེན་གསུམ་སྲེག་པར་བྱེད་པ། ཁྲོ་བོ་ཆེན་པོ་དང་ཆ་ལུགས་ཚུལ་མཐུན་པར། ལས་ཀྱི་ཁྲོ་བོའི་ངོ་བོ་དང་ལས་དང་ཆ་ལུགས་ཀྱི་ཚུལ་གཏུམ་ཞིང་རྔམ་པ་དེ་ཉིད་འདུལ་བའི་གདུལ་བྱའི་དུས་ལ་ངེས་པར་བབ་ནས་ཐུགས་རྗེ་འབྱུང་བའི་དུས་སུ་ཕྱིན་ཏེ་སྨིན་པའི་ཚེ་ཡོངས་སུ་བཏུལ་བར་མཛད་པ་ན། དེའི་ཕྱིར་ཕྱོགས་དུས་ཀུན་གྱི་སངས་རྒྱས་བདུད་བཞིའི་གཡུལ་ལས་རྒྱལ་བ་ཐམས་ཅད་གནས་ཆེན་པོ་སྙིང་པོ་བྱང་ཆུབ་ཉིད་ག་ལ་བ་དེར་འདུས་ནས། སྐྱེས་བུ་དམ་པ་ཐུབ་དཀའ་དང་དན་ཕག་དག་འཆད་པ་བཞིན་དུ་གྱུར་པ་ལ་རྣམ་པར་བསྐུལ་བར་མཛད་དེ། སྤྱིར་ཆ་འདྲ་བས་གཅིག་དང་དུ་མ་ལས་གྲོལ་གྱིས་ཀྱང༌། དང་པོ་འདུལ་བའི་དཔོན་དུ་གྱུར་པ་དང་གཡོག་ཡིན་པས་ཁྱད་པར་གྱིས་ཐུགས་རྗེ་འབྱུང་བའི་ཡུལ་དང་གཉེན་པོར་གྱུར་པས་སོ། །དེ་ཡང་དཔེ་ཇི་ལྟ་ཇི་ལྟར་རྡོ་རྗེ་སེམས་དཔའི་སྤྲུལ་པའི་སྒྲོན་མ་ཞི་བའི་ཞིང་ཁམས་ཡོངས་སུ་བཀོད་པ་ལྟ་བུའི་གྲངས་དང་མཉམ་པ་ཤིན་ཏུ་ཕྲ་བ་རྐང་དང་སྲི་ལ་གནས་པའི་བདུད་བཞི་པོ་ཀུན་འཇོམས་པས་ཁྲོ་བོའི་སྤྲིན་རྣམ་པར་འཇིགས་པ་རྣམས་ཀྱི་ཕྲིན་ལས་ཀྱི་མཛད་པ་གཉེན་པོ་རྡུལ་སྙེད་ཀྱིས་བཏུལ་བར་གྱུར་པ་དེ་ཁོ་ནའི་ཚེ༌། དེ་ཁོ་ནའི་དུས་ཉིད་དུ་ཐེག་པ་ཆེན་པོ་འདི་ཡང་བྱུང་ཞིང་གྲགས་སོ།།

གཉིས་པ་རྒྱས་པར་བཤད་པ་ལ་གཉིས་ཏེ། གདུལ་བྱ་རུ་ཏྲ་བཤད་པ། གཉེན་པོས་བདུད་བཏུལ་ཚུལ་བསྟན་པའོ། །དང་པོ་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

སྨྲས་པ། ཞེས་པ་ནས། གསོལ་པ་ལས། ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ་གདུལ་བྱ་དེ་གང་ལས་བྱུང་། དེ་ལས་དང་སྐྱེ་བ་ཇི་ལྟར་ལགས།

གསང་སྔགས་འབྱུང་བའི་རྒྱུ་ཇི་ལྟར་འགྱུར། དེ་སྐད་ཅེས་གསོལ་པ་དང་།

ཡང་ལང་ཀའི་བདག་པོས་སྨྲས་པ། གསང་བ་པའི་བདག་པོ། གདུལ་བྱ་དེ་གོལ་གཞིའི་རྒྱུ་གང་ལས་བྱུང༌། དེའི་རྐྱེན་ལས་༼༣༡༤༽ཇི་ཞིག་སྤྱད་པ་དང་། སྐྱེ་བ་བརྒྱུད་དེ་ཇི་ལྟར་བླངས་པ་ལགས་ཞེས་ངོ་བོ་དང༌། དེ་ཉིད་གསང་སྔགས་འབྱུང་བའི་རྒྱུར་ཇི་ལྟར་གྱུར་ཞེས་རུ་ཏྲའི་རྒྱུ་རྐྱེན་དང༌། སྐྱེ་རྒྱུད་དང༌། གསང་བའི་རྒྱུ་རུ་ཇི་ལྟར་བྱུང་བ་དང་དྲི་བ་གསུམ་པོ་དེ་སྐད་ཅེས་གསོལ་བ་ལས།

གཉིས་པ་ལན་ལ་བཞི་སྟེ། གོལ་གཞི་གང་ལས་བྱུང་བ། ལས་ཅི་སྤྱད་པ། སྐྱེ་བ་ཇི་ལྟར་བླང་བ། སྔགས་ཀྱི་རྒྱུར་ཇི་ལྟར་འགྱུར་བའོ། །དང་པོ་ནི།

གསང་བ་པའི་བདག་པོས། ཞེས་པ་ནས། ཞེས་གསོལ་ཏེ། ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་སྨྲས་པ། ཀྱེ་ལངྐའི་ བདག་པོ་དེ་ནི་འདི་ལྟ་སྟེ། དྲན་པ་དཔག་ཏུ་མེད་པ ་འདས་པའི་དུས་ན་སྔོན་བྱུང་བ་ནི། སངས་རྒྱས་མི་བསྐྱོད་པ་ཞེས་བྱ་བ། བསྐལ་པ་ཀུན་དགའ་ཞེས་བྱ་བ་ལ། ཞིང་ཁམས་མངོན་པར་དགའ་བ་ཞེས་བྱ་བར་བྱུང་བའི་བསྟན་པ་ལ་རབ་ཏུ་བྱུང་བའི་དགེ་སློང་ཐུབ་དཀའ་གཞོན་ནུ་ཞེས་བྱ་བ། གང་ཇི་ལྟ་བ་བཞིན་དུ། ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་བ། ཐམས་ཅད་ནས་ཐམས་ཅད་དུ་མ་བཅོས་མ་བསླད་པའི་རྣལ་འབྱོར་དུ་གནས་པ། སྐྱེས་བུ་དམ་པར་ཆུད་པ་ཞིག་བྱུང་བ་དེས། སེམས་ཅན་ཐམས་ཅད་རྒྱལ་བའི་སྲས་སུ་མཐོང་ཞིང་། དེ་དག་ཡོངས་སུ་བསྐུལ་བ་ལ་བརྩོན་པ་འབའ་ཞིག་གོ །དེའི་ཚེ་དེའི་དུས་ན། འཁོར་བ་ཐོག་མ་དང་ཐ་མ་མེད་པར། སྐྱེ་བ་ཐོག་མ་དང་ཐ་མ་མེད་པར་ལས་སྐྱེ་བ་དཔག་ཏུ་མེད་པ་དག་ནི་བརྗོད་ཀྱིས་མི་རྫོགས་ཏེ། ལས་སྐབས་གཅིག་གི་སྐྱེ་བ་ཆ་གཅིག་ལ་བཟུང་ན། འདི་ལྟ་སྟེ། ཉེ་འཁོར་དེར་ཁྱིམ་བདག་ཀེའུ་ཀ་ཡ་ཞེས་བྱ་བ་ཞིག་ལ། བུ་ཐར་པ་ནག་པོ་ཞེས་བྱ་བ་ཞིག་ཡོད་དེ། བུ་དེ་ལ་གཡོག་པོ་དན་ཕག་ཅེས་བྱ་བ་ཞིག་ཡོད་དོ། །དེའི་ཚེ་དེའི་དུས་ན། མིང་གང་དག་དགེ་སློང་ཐུབ་དཀའ་གཞོན་ནུ་ལ་རྣལ་འབྱོར་གྱི་ལམ་བསླབས་ཏེ། ཀུན་ཀྱང་རྣལ་འབྱོར་ལ་བསླབས་ཤིང་། རྣལ་འབྱོར་ལ་སྤྱོད་པར་གྱུར་ཏོ། །དེའི་ཚེ་དེའི་དུས་ན། ཐར་པ་ནག་པོ་དེ་འདི་ལྟར་རྟོག་གོ །དགེ་སློང་ཐུབ་དཀའ་གཞོན་ནུ་དེས། ཐམས་ཅད་ཇི་ལྟར་བ་བཞིན་སྟོན་པར་ཐོས་ནས། ཐམས་ཅད་ཅི་དགར་སྤྱོད་བཞིན་དུ་ལམ་སྟོན་པའི་ཆོས་དག་འབྱུང་ངམ་ཞེས་རྟོག་ལ། གང་དག་ལ་ཡང་དྲིས་པ་ལས། ཐམས་ཅད་ཀྱིས་དེ་ལྟར་འབྱུང་བར་སྨྲས་སོ། །དེ་ནས་གཡོག་དང་བཅས་པས་དགེ་སློང་ག་ལ་བར་ཞུགས་ཏེ་གནས་སུ་ཕྱིན་ཏེ་འདུན་པ་ལེགས་པར་འདུན་ནས་གསོལ་པ། དགེ་སློང་ཆེན་པོ་ཐམས་ཅད་ཇི་ལྟ་བར་སྤྱོད་པ་བཞིན་དུ་ལམ་སྟོན་པའི་ཐབས་མཁས་པར་ཐོས་ནས། དེ་ད་ལྟ་ཉིད་དུ་ངེས་སམ། དེ་སྐད་ཅེས་གསོལ་པ་ལས། སྨྲས་པ། རིགས་ཀྱི་བུ། དེ་ད་ལྟ་ཉིད་དུ་འབྱུང་བ་དག་ཡོད་པར་རུང་ངོ་། །དེ་སྐད་ཅེས་སྨྲས་པས། ཐར་པ་ནག་པོ་གཡོག་དང་བཅས་པ་དགའ་དགུ་ཡི་རངས་ཏེ། བདག་གཡོག་དང་བཅས་པ་འདི། ཁྱོད་ཉིད་ཀྱིས་བཀའ་བར་གཟུང་དུ་གསོལ། བདག་ཀྱང་ཁྱོད་ལ་ཐམས་ཅད་མི་འགག་པའི་ལམ་བླངས་ཏེ་རྣལ་འབྱོར་དུ་གནས་པར་འཚལ་བས། དམ་པ་ཉིད་དུ་ངེས་པར་གཟུང་དུ་གསོལ་ཞེས་འདུན་པ་ལས། དགེ་སློང་དེས་སྨྲས་པ། ཡིན་ནོ། །ལེགས་སོ། །དེ་ལྟར་བྱའོ། །ཞེས་ལེགས་པར་བྱིན་ནས། ཐར་པ་ནག་པོ་རབ་ཏུ་བྱུང་ནས་དམ་པར་བཟུང་། དན་ཕག་ནི་དུས་འཛིན་དུ་བཟུང་སྟེ། དགེ་སློང་ཐར་པའི་གཡོག་ཏུ་བྱས་སོ། །དེ་ནས་ཐར་པ་དགེ་སློང་གིས་གསོལ་པ། དགེ་སློང་ཆེན་པོ་ཐམས་ཅད་ཇི་ལྟ་བའི་ལམ་དམ་པ་དེ་གང་ལགས། སྨྲས་པ། ཇི་བཞིན་ཉིད་དེ་མ་བཅོས་ན། །དངོས་པོ་གཞི་ལ་གནས་སྤྱད་ནས། །ནམ་མཁའ་ལ་ནི་སྤྲིན་བཞིན་ཏེ། །འདི་ནི་རྣལ་འབྱོར་དམ་པའི་ལམ། །དེ་སྐད་ཅེས་སྨྲས་པས། ཐར་པ་གཡོག་དང་བཅས་པ་ཡི་རངས་ཏེ། ཨེ་མའོ་ཐབས་ལ་མཁས་སོ། །ངེས་སོ། །ཡིན་ནོ། །བསྟོད་དོ། །བདག་ཐམས་ཅད་དུ་དེ་ལ་གནས་སོ་ཞེས་གསོལ་ཏེ།

ལེའུ་འདིས་དྲང་དོན་སྟོན་ནོ། །དེ་ནས་གསང་བ་པའི་བདག་པོས་ལན་སྨྲས་པ། དེ་ལ་ལྷན་ཅིག་བྱེད་པའི་རྒྱུ་དྲག་པོ་ཉིད་གསོགས་པའི་དུས་གང་ཞེ་ན། ཀྱེ་ལང་ཀའི་བདག་པོ། དེ་དག་ནི་འདི་ལྟ་སྟེ། དེ་ཡང་རྒྱུ་གསོགས་པའི་དུས་དང་ངོ་བོ་གཉིས་ཏེ། དྲན་པ་བསྐལ་པ་དཔག་ཏུ་མེད་པ་འདས་པའི་དུས་ན་སྔོན་བྱུང་བ་ནི། བསྐལ་པ་དང་བསྟན་པའི་སྒོ་ནས་སློབ་དཔོན་གྱི་ཡོན་ཏན་བསྟན་པ་སྟེ། སྟོན་པ་སངས་རྒྱས་མི་བསྐྱོད་པ་ཞེས་བྱ་བ། བསྐལ་པ་ཀུན་དགའ་ཞེས་བྱ་བ་ལ། ཞིང་ཁམས་མངོན་པར་དགའ་བ་ཞེས་བྱ་བར་བྱུང་བའི་བསྟན་པ་ལ། ཆ་ལུགས་རབ་ཏུ་བྱུང་བའི་དགེ་སློང་ཐུགས་གསང་སྔགས་ཀྱི་དོན་དང་ལྡན་པ་ཐུབ་དཀའ་གཞོན་ནུ་ཞེས་བྱ་བ། གང་གདུལ་བྱའི་བློའི་མོས་པ་ཇི་ལྟ་བ་བཞིན་དུ་ཆོས་ཉིད་ཇི་བཞིན་པ་མ་ནོར་བར་གསང་སྔགས་ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་བ། དུས་ཐམས་ཅད་ནས་གནས་སྐབས་ཐམས་ཅད་དུ། སེམས་ཀྱི་ཆོས་ཉིད་མ་བཅོས་མ་བསླད་པར་ལྟ་སྒོམ་སྤྱོད་པའི་རྣལ་འབྱོར་དུ་གནས་པ། སྐྱེས་བུ་དམ་པར་ངེས་ཏེ་དགོངས་པ་སངས་རྒྱས་ཀྱི་སར་ཆུད་པ་ཞིག་བྱུང་བ་དེས། སེམས་ཅན་ཐམས་ཅད་རྒྱལ་བའི་སྲས་སུ་མཐོང་ཞིང༌། དེ་དག་ཐར་པ་ལ་ཡོངས་སུ་བསྐུལ་ཏེ་སྨིན་པ་ལ་བརྩོན་པ་འབའ་ཞིག་བྱེད་དོ། །དེའི་ཚེ་དེའི་དུས་ན། འཁོར་བ་ཐོག་མ་དང་ཐ་མ་མེད་པར་སྐྱེ་བ་ཐོག་མ་དང་ཐ་མ་མེད་པའི་ལས་དང་སྐྱེ་བ་དཔག་ཏུ་མེད་པ་ནི་བརྗོད་ཀྱི་མི་ལང་ཞིང་ངོ་བོ་མི་རྫོགས་ཏེ། འདིར་ལས་དང་པོའི་དུས་ན་བླ་མ་གང་ལ་སེམས་ཇི་ལྟར་བསྐྱེད་ཅིང་བསྟན་པ་ལ་ལོག་པར་ཞུགས་པས་ལས་སྐབས་གཅིག་གིས་དྲག་པོའི་ལས་གསོགས་པའི་སྐྱེ་བ་ཆ་གཅིག་ལ་བཟུང་ན། འདི་ལྟ་སྟེ། ཐུབ་དཀའི་ཉེ་འཁོར་དུ་བློན་པོའི་རིགས་ཀྱི་ཁྱིམ་བདག་ཀེའུ་ཀ་ཡ་ཞེས་བྱ་བ་ཞིག་ལ། བུ་ཐར་པ་ནག་པོ་ཞེས་བྱ་༼༣༡༥༽བ་ཞིག་ཡོད་དེ། བུ་དེ་ལ་གཡོག་དན་ཕག་ཞེས་བྱ་བ་ཞིག་ཡོད་དོ། །དེའི་ཚེ་དེའི་དུས་ན། མི་གང་དག་དགེ་སློང་ཐུབ་དཀའ་གཞོན་ནུ་ལ་རྣལ་འབྱོར་དམ་པ་སྔགས་ཀྱི་ལམ་བསླབས་ཏེ། ཀུན་ཀྱང་རྣལ་མ་ལ་བློ་འབྱོར་བའི་དོན་གྱི་ལམ་ལ་གནས་ཤིང་རྣལ་འབྱོར་ལ་སྤྱོད་པར་གྱུར་ཏོ། །དེའི་ཚེ་དེའི་དུས་ན། ཐར་པ་ནག་པོ་འདི་ལྟར་རྟོག་གོ །དགེ་སློང་ཐུབ་དཀའ་གཞོན་ནུ་འདིས། གདུལ་བྱ་ཐམས་ཅད་རང་རང་གང་ལ་མོས་པ་ཇི་ལྟ་བ་བཞིན་སྟོན་པར་ཐོས་ནས། ཐར་པ་ནག་པོ་ལྟ་བ་གོལ་བའི་གཞིའི་དང་པོར། ཐམས་ཅད་ཅི་དགའ་བར་སྤྱོད་པ་བཞིན་དུ་ལམ་ཡོད་པའི་ཆོས་དག་འབྱུང་ངམ་ཞེས་རྟོག་ལ། གཞན་གང་དག་ལ་ཡང་དྲིས་པ་ལས། ཐམས་ཅད་ཀྱིས་ལྟ་བ་རྟོགས་པ་ལ་བསམ་ནས་དེ་ལྟར་འབྱུང་བར་སྨྲས་སོ། །དེ་ནས་གཡོག་དང་བཅས་པ་དགེ་སློང་ག་ལ་བ་དེར་ཞུགས་ཏེ། གནས་སུ་ཕྱིན་ཏེ་འདུན་པ་ལེགས་པར་འདུན་ནས་གསོལ་པ། དགེ་སློང་ཆེན་པོ་ཐམས་ཅད་ཇི་ལྟ་བར་སྤྱོད་པ་དེ་བཞིན་དུ་ལམ་སྟོན་པའི་ཐབས་ལ་མཁས་པར་ཐོས་ན། དེ་དེ་ལྟ་ཉིད་དུ་ངེས་སམ། དེ་སྐད་ཅེས་གསོལ་བ་ལས། སྨྲས་པ། རིགས་ཀྱི་བུ་ལྟ་བ་རྟོགས་ནས་སྤྱོད་པ་ཡངས་པ་ལ་དགོངས་ནས་དེ་དེ་ལྟ་ཉིད་དུ་ངེས་པར་འབྱུང་བ་དག་ཡོད་པར་རུང་ངོ༌། །དེ་སྐད་ཅེས་སྨྲས་པས། ཐར་པ་ནག་པོ་གཡོག་དང་བཅས་པ་དགའ་མགུ་ཡི་རངས་ཏེ། བདག་གཡོག་དང་བཅས་པ་འདི་ཁྱོད་ཉིད་ཀྱི་བཀའ་ལ་གནས་པར་གཟུང་དུ་གསོལ། བདག་ཀྱང་ཁྱེད་ལ་ཐམས་ཅད་མི་འགོག་པའི་ལམ་བླངས་ཏེ་རྣལ་འབྱོར་དུ་གནས་པར་འཚལ་བས། དམ་པ་ཉིད་དུ་ངེས་པར་གཟུང་དུ་གསོལ་ཞེས་ཞུས་ཏེ་འདུན་པ་ལས། དགེ་སློང་དེས་གནང་སྟེ་སྨྲས་པ། ཁྱོད་ཉིད་བཀའ་བ་ཡིན་ནོ། །རྣལ་འབྱོར་དུ་གནས་པ་ལེགས་སོ། །དེ་བས་ན་དེ་ལྟར་བྱའོ། །ཞེས་ལེགས་པ་བྱིན་ནས། ཐར་པ་ནག་པོ་རབ་ཏུ་བྱུང་ནས་དགེ་སློང་དམ་པར་བྱས་ཏེ་སློབ་དཔོན་དུ་བཟུང༌། དན་ཕག་ནི་དེའི་དུས་འཛིན་དུ་དགེ་བསྙེན་གྱི་ཁྲིམས་ལ་བཅུག་སྟེ་དགེ་སློང་ཐར་པའི་གཡོག་ཏུ་བྱས་སོ། །དེ་ནས་ཐར་པ་ནག་པོ་དགེ་སློང་གིས་གསོལ་པ། དགེ་སློང་ཐུབ་དཀའ་ཆེན་པོ། ཐམས་ཅད་ཇི་ལྟ་བའི་ལམ་དམ་པ་དེ་གང་ལགས། ལན་སྨྲས་པ། གཞི་ཆོས་ཉིད་ཇི་བཞིན་དཀྱིལ་འཁོར་རང་གི་སེམས་ཉིད་འོད་གསལ་བ་དེ་ཉིད་རྟོགས་ཏེ་མ་བཅོས་པར་གནས་ན། འཁོར་བའི་དངོས་པོ། སྤྱད་པ་ལྔ༌། དང་དུ་བླང་༼༣༡༦༽བ་ལྔ༌། མི་སྤང་བ་ལྔ། འདོད་ཡོན་ལྔ་སྟེ་བཞི་པོ་རྣམས་ལ་གནས་ཏེ་སྤྱོད་ཀྱང་དོན་ཆོས་ཉིད་ཇི་བཞིན་པ་ཡིན་པས་དཔེར་ན་ནམ་མཁའ་ལ་ནི་སྤྲིན་གྱི་ཚོགས་རང་བྱུང་ཞིང་ཞི་བ་བཞིན་ཏེ། འདི་ལྟར་གོམས་པ་ནི་རྣལ་འབྱོར་དམ་པའི་ལམ་མཆོག་གསང་བ་ཆེན་པོའོ། །དེ་སྐད་ཅེས་སྨྲས་པས། ཐར་པས་ལོག་པའི་སྤྱོད་པ་རང་གར་གོ །དན་ཕག་གིས་དོན་གྱི་གཞི་ལ་གོ་ནས། ཐར་པ་གཡོག་དང་བཅས་པ་གཉིས་ཀ་ཡིད་རངས་ཏེ། ཨེ་མའོ། །འཁོར་བའི་ཆོས་ལ་སྤྱད་ཀྱང་འབྲས་བུ་ཐོབ་པས་ཐབས་ལ་མཁས་སོ། །ངེས་སོ། །ཡིན་ནོ། །བསྟོད་དོ། །བདག་ཅག་གཉིས་ཐམས་ཅད་དུ་དེ་ལ་ཡོངས་སུ་གནས་སོ། །ཞེས་གསོལ་ཏེ།

གཉིས་པ་ལས་ཅི་སྤྱད་པ་ནི།

སྒྲ་ཇི་ལྟ་བ་དེ་བཞིན། ཞེས་པ་ནས། ཡོངས་སུ་འདས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

སྒྲ་ཇི་ལྟ་བ་དེ་བཞིན་དུ་དཔྱད་པ་ལས། ཐར་པ་དགེ་སློང་ནི་གྲོས་ཀྱི་ངེས་པ་མ་རྙེད་དེ། སྒྲ་འབའ་ཞིག་ལ་ཕྱོགས་པས། དངོས་པོ་བཞི་ཁོ་ནར་དཔྱད་དེ་ཞེན་ནས་ལུས་དམ་པའི་ཆ་བྱད་དུ་བཅུག་ནས། སེམས་ངན་འགྲོའི་ལམ་དུ་ཞུགས་སོ། །གཡོག་དན་ཕག་ནི་སྒྲའི་གཞི་དོན་གྱི་ངེེས་པ་རྙེད་ནས། བློ་གྲོས་དམ་པར་འགྲེལ་ཏེ། དོན་འབའ་ཞིག་ལ་ཕྱོགས་པས་ཇི་ལྟ་བ་ཁོ་ནར་སྤྱད་དེ་ཞེན་ནས་ཡོངས་སུ་རྣལ་འབྱོར་པས། ལུས་མ་རབས་ཀྱི་ཆ་བྱད་དུ་བཅུག་ནས། སེམས་དམ་པར་ངེས་པའི་ལམ་དུ་ཞུགས་སོ། །དེ་ནས་ཐར་པ་གཡོག་དང་ལྟ་བ་མ་མཐུན་ཏེ། སྨྲས་པ། བདག་ཅག་གཉིས་ནི་དཔོན་གཅིག་ལས་སྒྲ་གཅིག་ཏུ་འབྱུང་བ་འདི་ལ། སོ་སོར་མ་མཐུན་པ་འདི་ཇི་ལྟ་ཞིག དན་ཕག་གིས་སྨྲས་པ། བདག་གིས་ནི་ད་ལྟར་ངེས་པ་རྫོགས་པ་འདི་ཁོ་ན་ལས་གཞན་མ་ཐོས་ལགས་སོ། །སྨྲས་པ། བདག་གིས་ཀྱང་ད་ལྟར་ངེས་པ་རྙེད་པ་དེ། སྤྱོད་པ་འདི་ཁོ་ན་ལས་གཞན་མ་ཐོས་སོ་ཞེས་སྨྲས་པས། དེ་ལས་རྩོད་པ་ཆེར་གྱུར་ཏེ། ལྟ་བ་མི་མཐུན་པས་གཡོག་དང་སོ་སོར་བསྐལ་ཏེ། མ་མཐོང་མ་འཕྲད་པར་དམ་བཅས་ནས། གཡོག་ཁམས་རིང་པོར་བཤུགས་ཏེ་སྤངས་སོ། །དེ་ནས་ཐར་པ་དགེ་སློང་དེས་མངོན་པའི་ང་རྒྱལ་ལོག་པའི་རི་བོར་སྐྱེས་ཏེ། དཔོན་ལ་སོ་སོའི་ངེས་པ་རྙེད་པ་གསོལ་པ་ལས། དགེ་སློང་ཐུབ་དཀའ་གཞོན་ནུ་མ་བཅོས་མ་བསླད་པའི་རྣལ་མར་སྤྱོད་པས་ཁ་གསག་མེད་དེ། རང་བཞིན་གསོང་པོར་སྨྲ་བས་ན། དན་ཕག་ལྟར་ངེས་སོ་ཞེས་བསྒོ་བས། ཐར་པ་ཀུན་ནས་འཁྲུགས་ཏེ་སྨྲས་པ། དཔོན་དུ་བྱས་པར་འདྲ་ན་གཉིས་ཀ་ལྟར་རོ་ཞེས་ཀྱང་མ་བསྙམས་པས། ངེས་པར་བདག་བཀར་བཅག་པ་དང་སུན་ཕྱུང་བ་འདི་བྱས་པས། དཔོན་འདི་ཡང་ཁམས་འདིར་མ་ཆགས་པར་བྱས་ལ། འདི་དག་བདག་གི་ཁམས་སུ་བྱའོ་ཞེས་དམ་བཅས་ནས། ཆེ་བའི་ང་རྒྱལ་སྐྱེས་ཏེ། དཔོན་ཡང་ཁམས་རིང་པོར་བཤུགས་ཏེ་ཡོངས་སུ་སྤངས་སོ། །དེ་ནས་ཐར་པ་དེ་བཞིན་གཤེགས་པའི་གསུང་གི་སྒོ་གྲངས་མང་ཞིང་རྒྱ་ཆེ་བར་གྱུར་པས། ཐམས་ཅད་དུ་སྟོན་པ། དཔག་པར་དཀའ་བའི་ཕྱིར་ཡོངས་སུ་མ་ཆུད་དེ། གཞལ་བ་གཉིས་ཀྱིས་གཞལ་བ་མ་བྱས་པར། ཐར་པ་རང་གི་ངེས་པ་ཚད་མ་ལ་ཞེན་ཕྱོགས་སུ་དྲངས་ནས་ཐམས་ཅད་ཀྱང་ལོག་པར་བསྒྱུར། ཉིད་ཀྱང་ལོག་པའི་རྒྱ་མཚོར་ཞུགས་ཏེ། ལོག་པའི་དཀའ་ཐུབ་དྲག་པོ་དང་། ལོག་པའི་བརྟུལ་ཞུགས་ཆེན་པོ་ལ་ཞུགས་པ་ནི། དུར་ཁྲོད་ཀྱི་མི་རོ་དག་བླངས་ཏེ་ཁ་ཟས་སུ་བྱེད་ཅིང་། པགས་པ་དག་བཤུས་ཏེ་གཡང་གཞིར་གྱོན་ཏེ་ལོངས་སྤྱོད་པ། ལྕེ་སྤྱང་ནག་པོ་དང་། ཕར་བ་རྐན་རྡེབ་པ་དང་། དྲེད་མོ་ལག་རྡེབ་དང་། བྱ་གཅན་གསོད་བྱེད་དང་། དུར་བྱ་ཀང་ཀ་དང་། ཟ་བྱེད་དུར་ཕག་ལ་སོགས་པའི་གསོན་མ་མང་པོ་བརྟེན་ཏེ། ཐམས་ཅད་སྲོག་གཅོད་ཅིང་ཤ་ཁྲག་ལ་ལོངས་སྤྱོད་པར་བྱེད་ཅིང་། སྨད་འཚོང་མའི་ཚོགས་མང་པོ་བསྡུས་ཏེ་ཆགས་པ་ཆེན་པོར་སྤྱོད་པ། དངོས་པོ་བཞི་ལས་མི་འདའ་བར། དངོས་པོ་བཞིའི་རང་བཞིན་ཇི་བཞིན་པ་དེ་ཁོ་ན་ཉིད་ལས་ཡོངས་སུ་འདས་གྱུར་ཏོ།།

དེ་ནས་དཔོན་གཡོག་གཉིས་སྒྲ་ཇི་ལྟ་བ་དེ་བཞིན་དུ་ལྟ་བ་གོལ་མ་གོལ་གྱིས་ཕྱིན་ཅི་ལོག་པ་དང་མ་ལོག་པའི་ཚུལ་དུ་སྤྱད་པ་ལས། ཐར་པ་དགེ་སློང་ནི་བློ་གྲོས་ཀྱི་ངེས་པ་མ་རྙེད་དེ་བླ་མེད་མི་སྤངས་པའི་དམ་ལས་ཉམས་ནས་སྒྲ་འབའ་ཞིག་ལ་ཕྱོགས་པས། རྒྱུ་ཉེ་བར་བཟུང་བ་འདིར་ལྷན་ཅིག་བྱེད་པའི་རྒྱུ་དང༌། རྐྱེན་ཐུན་མོང་དུ་གྱུར་པ་སྟེ་སྦྱོར་སྒྲོལ་དང༌། ངག་བརླང་པོ་དང༌། རྫུན་དང༌། ཚིག་རྩུབ་མོ་སྟེ་སྤྱད་པར་བྱ་བ་ལྔ་དང༌། ཤ་ལྔ་དང༌། དམ་རྫས་ལྔ་སྟེ་དང་དུ་བླང་བ་ལྔ་དང༌། ཉོན་མོངས་པ་ལྔ་དང༌། འདོད་ཡོན་ལྔ་སྟེ་ལྔ་ཕྲག་གི་དངོས་པོ་བཞི་ཁོ་ན་ལ་སྤྱོད་དེ་ཞེན་ནས་དོན་མ་གོ་བར་ཚིག་གི་རྗེས་སུ་འབྲངས་ཏེ་ལུས་དགེ་སློང་དམ་པའིཆ་བྱད་དུ་བཅུག་ནས། སེམས་ལོག་པ་ངན་འགྲོའི་ལམ་དུ་ཞུགས་སོ། །གཡོག་དན་ཕག་ནི་སྒྲའི་གཞི་དོན་གྱི་ངེས་པ་རྙེད་ནས་སྤྱོད་ཀྱང་མི་འཛིན་པས་བློ་གྲོས་དམ་པར་འབྲེལ་ཏེ། ལྟ་བ་གཉིས་སུ་མེད་པ་རྟོགས་པའི་དོན་འབའ་ཞིག་ལ་ཕྱོགས་པས་ཇི་བཞིན་པ་སྣང་ལ་ཞེན་པ་མེད་པ་ཁོ་ནར་སྤྱད་དེ། གོམས་པ་ལ་ཞེན་ནས་ཡོངས་སུ་གནས་པས་ལྟ་སྤྱོད་འདྲེས་ཏེ་རྣལ་མ་ལ་བློ་འབྱོར་པས་ལུས་དགེ་བསྙེན་གྱི་ཚུལ་མ་རབས་ཀྱི་ཆ་བྱད་དུ་བཅུག་ནས། སེམས་དམ་པར་ངེས་པའི་ལམ་དུ་ཞུགས་སོ། །དེ་ནས་ཐར་པ་གཡོག་དང་ལྟ་བ་མ་མཐུན་ཏེ། སྨྲས་པ། བདག་ཅག་གཉིས་ནི་དཔོན་གཅིག་ལ། སྒྲ་གཅིག་ཏུ་བྱུང་བ་འདི་ལ། སོ་སོར་མ་མཐུན་པ་འདི་ཇི་ལྟ་བུ་ཞིག དན་ཕག་གིས་སྨྲས་པ། བདག་གིས་ནི། ད་ལྟར་ལྟ་བའི་ངང་ལ་ངེས་པར་འཇོག་པ་འདི་ཁོ་ན་ལས་གཞན་མ་ཐོས་༼༣༡༧༽ལགས་སོ། །སྨྲས་པ། དོན་རྟོགས་ པ་མེད་པའི་ཚིག་ཏུ་སོང་ནས་བདག ་གིས་ཀྱང་དེ་ལྟར་ངེས་པ་རྙེད་དེ་སྤྱོད་པ་འདི་ཁོ་ན་ལས་གཞན་མ་ཐོས་སོ། །ཞེས་སྨྲས་པས། དེ་ལས་རྩོད་པ་ཆེན་པོར་གྱུར་ཏོ། །དེ་ལྟར་ལྟ་བ་མ་མཐུན་པས་རྩོད་པ་ནི་མཚམས་མེད་གསོག་པའི་རྒྱུ་སྟེ་གཡོག་དང་སོ་སོར་བསྐལ་ཏེ་མ་མཐོང་མ་ཕྲད་པར་དམ་བཅས་ནས་གཡོག་ཉིད་ཁམས་རིང་པོར་སྤྱུགས་ཏེ་སྤངས་པས་ཡང་དག་ལམ་དུ་ཞུགས་པ་ལ་བྱམས་པའི་དམ་ཉམས་སོ། །དེ་ནས་ཐར་པ་དགེ་སློང་དེ། མངོན་པའི་ང་རྒྱལ་ལོག་པའི་རི་བོ་སྐྱེས་ཏེ། དཔོན་ལ་རང་དང་གཡོག་པོའི་ལྟ་བ་མ་མཐུན་ཏེ་སོ་སོའི་ངེས་པ་རྙེད་པ་གསོལ་བ་ལས། དགེ་སློང་ཐུབ་དཀའ་གཞོན་ནུ་མ་བཅོས་མ་བསླད་པའི་རྣལ་མར་སྤྱོད་པས་ཁ་གསག་མེད་དེ་རང་བཞིན་གསོང་པོར་སྨྲ་བས་ན། དན་ཕག་ལྟར་ངེས་སོ་ཞེས་བསྒོ་སྟེ་ལྟངས་བཅད་པས། ཐར་པ་ཀུན་ནས་འཁྲུགས་པས། སློབ་དཔོན་ལ་ཁྲོས་ཏེ་སྤོང་ནས་སྨྲས་པ། དཔོན་ཡིན་པར་འདྲ་ན། གཉིས་ཀ་ལྟར་རོ་ཞེས་ཀྱང་མ་བསྙམས་པས། ངེས་པར་བདག་བཀར་བ་བཅག་པ་དང༌། སུན་དབྱུང་བ་འདིས་བྱས་པས། དཔོན་འདི་ཡང་ཁམས་འདིར་མ་ཆགས་པར་བྱས་ལ། འདི་དག་བདག་གི་ཁམས་སུ་བྱའོ་ཞེས་དམ་བཅས་ནས། ཆེ་བའི་ང་རྒྱལ་སྐྱེས་ཏེ། དཔོན་ཡང་ཁམས་རིང་པོར་སྤྱུགས་ཏེ་ཡོངས་སུ་སྤངས་པས་བླ་མ་བཀུར་བའི་དམ་ཉམས་སོ། །དེ་ལྟར་མཚམས་མེད་པའི་རྒྱུ་དང་རྩ་བ་ཉམས་པ་དེ་ཡང་ལྷན་ཅིག་བྱེད་པའི་རྒྱུ་དང་རྐྱེན་ནོ། །དེ་ནས་ཐར་པ་ནག་པོ་མཚུངས་པར་ལྡན་པའི་རྒྱུ་ལྷན་ཅིག་སྐྱེས་པའི་མ་རིག་པས་བསྒྲིབས་པས་དེ་བཞིན་གཤེགས་པའི་གསུང་གི་སྒོ་གྲངས་མང་ཞིང་རྒྱ་ཆེ་བར་གྱུར་པས། ཐམས་ཅད་དུ་སྟོན་པ་དཔགས་པར་དཀའ་བའི་ཕྱིར་གསང་བའི་དོན་མ་གོ་བ་སྟེ་ཡོངས་སུ་མ་ཆུད་དེ་གབ་པའི་གསང་བ་མ་རྟོགས་པར། གཏན་ཚིགས་ཀྱིས་གཞལ་བར་བྱ་བ་ལུང་དང་མན་ངག་གི་ཚད་མ་ཟབ་མོ་གཉིས་ཀྱིས་གཞལ་ཏེ་གཏན་ལ་དབབ་པ་མ་བྱས་པར། ཐར་པ་རང་གི་ལོག་ཞེན་གྱིས་འཐད་པར་ངེས་པའི་ཚད་མ་ཡིན་པར་གཟུང་བ་ལ་ཞེན་ཕྱོགས་སུ་དྲངས་ནས་རས་ཆོད་དང་གཟུ་ལུམ་བྱས་ཏེ་སྦས་པའི་གསང་བ་ལ་འཆེལ་བས་གསང་དོན་མི་སྨྲ་བའི་དམ་ཉམས་ཏེ་གསང་བ་གཞན་ལ་སྤེལ་ནས་གདུལ་ཞིང་ཐམས་ཅད་ཀྱང་ལོག་པར་སྒྱུར་ཞིང༌། རང་ཉིད་ཀྱང་ལོག་པའི་རྒྱ་མཚོར་ཞུགས་ཏེ། ༼༣༡༨༽ཕྱིན་ཅི་ལོག་གི་ལམ་ལ་མ་ནོར་བ་ཡིན་པར་རྫུན་དུ་སྨྲས་པས་བྱང་སྡོམ་ལས་ཉམས་ལ། སྔགས་དང་ཕྱག་རྒྱ་རྒྱུན་མི་བཅད་པ་ལས་ཉམས་ཏེ་ལོག་པའི་དཀའ་ཐུབ་དྲག་པོ་དང༌། ལོག་པའི་བརྟུལ་ཞུགས་ཆེན་པོ་ལ་ཞུགས་པ་ནི་ལྷན་ཅིག་བྱེད་པའི་རྐྱེན་ཏེ་དུར་ཁྲོད་ཀྱི་མི་རོ་དག་བླངས་ཏེ་ཁ་ཟས་སུ་བྱེད་ཅིང༌། པགས་པ་དག་བཤུས་ཏེ་གཡང་གཞིར་གྱོན་ཏེ་ལོངས་སྤྱོད་པ་དང༌། གཞན་སྲོག་གཅོད་པའི་ཅེ་སྤྱང་ནག་པོ་དང༌། འཕར་བ་རྐང་རྡེབས་དང༌། དྲེད་མོ་ལག་རྡེབས་དང༌། བྱ་གཅན་གསོད་བྱེད་དང༌། དུར་བྱ་ཀང་ཀ་དང༌། ཟ་བྱེད་དུར་ཕག་ལ་སོགས་པའི་གསོན་མ་མང་པོ་བསྟེན་ཏེ། ཐམས་ཅད་ཀྱི་སྲོག་གཅོད་ཅིང༌། ཤ་ཁྲག་ལ་ལོངས་སྤྱོད་པར་བྱེད་པ། སྨད་འཚོང་མའི་ཚོགས་མང་པོ་བསྡུས་ཏེ་ཆགས་པ་ཆེན་པོར་སྤྱོད་པ་དང༌། ཐུན་མོང་གི་དངོས་པོ་བཞི་རྫུན། མ་བྱིན་ལེན། འདོད་ལོག སྲོག་གཅོད་པ་རྣམས་ལས་མི་འདའ་བར་དངོས་པོ་བཞིའི་རང་བཞིན་ཆོས་ཉིད་ཇི་བཞིན་པ་དེ་ཁོ་ན་ཉིད་རྟོགས་པ་ལས་ཡོངས་སུ་འདས་པར་གྱུར་ཏོ།།

གསུམ་པ་སྐྱེ་བ་ཇི་ལྟར་བླང་བ་ལ་བཞི་སྟེ། དུད་འགྲོའི་སྐྱེ་བ་བླང་བ། དམྱལ་བའི་སྐྱེ་བ་བླང་བ། དེ་ལས་ཐར་ནས་སྐྱེ་བ་བླངས་པ། ཐ་མ་སྲིན་པོའི་སྐྱེ་བ་བླངས་པའོ། །དང་པོ་ནི།

དེ་ནས་སྐྱེ་བ། ཞེས་པ་ནས། དེ་ལ་བྱེད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ནས་སྐྱེ་བ་དེ་འཕོས་པར་གྱུར། དེ་སྐྱེ་བ་དེའི་ཕྱི་མ་ལ་ཅེ་སྤྱང་ནག་པོའི་ལུས་སུ་སྐྱེ་བ་ལྔ་བརྒྱ་བླངས་ཏེ། སྲོག་ཆགས་འབའ་ཞིག་གསོད་པའི་ལས་སྤྱོད་ཅིང་། ཤ་དང་ཁྲག་དྲོན་པོ་ཟ་བར་གྱུར་ཏོ། །སྐྱེ་བ་དེའི་ཕྱི་མ་དག་ལ། ཁྱེའུ་འདི་ལ་སོགས་པ་གདུག་པས་གསོད་པའི་ལས་ཅན་ཤ་ཁྲག་ཟས་སུ་བྱེད་པ། ཐ་དད་པའི་ལུས་སུ་སྐྱེ་བ་ལྔ་བརྒྱ་བླངས་ཤིང་། གཞན་གྱིས་བསད་ཅིང་སྐྱེ་བ་འཕོ་བ་ཤ་སྟག་ཏུ་གྱུར་ཏོ། །སྐྱེ་བ་དེའི་ཕྱི་མ་དག་ལ། བྱ་ནེ་ལེ་ཤ་ཟན་དང་། ཁྲག་འཐུང་མཆུ་དམར་དང་། དུར་བྱ་ཀང་ཀ་དང་། རུ་རྩེ་རྐང་ལྡག་ལ་སོགས་པ་ཐ་དད་པའི་ལུས་བླངས་ཤིང་། གཞན་གྱིས་བསད་ཅིང་སྐྱེ་བ་འཕོ་བར་ཤ་སྟག་ཏུ་གྱུར་རོ། །སྐྱེ་བ་དེ་དག་གི་ཕྱི་མ་དག་ལ། སྦྲང་བུ་ཏྲེ་མ་ཏ་དང་། སྲིན་བུ་བུ་ཀ་དང་། རོ་ཟ་རྐང་འཇིབ་ལ་སོགས་པ། འབུ་དང་། ཤིན་ཏུ་འབུ་ཆེན་ཐ་དད་པའི་ལུས་སུ་སྐྱེ་བ་བླངས་ཤིང་། དེ་དག་ཀྱང་གཉེན་པོོས་བསད་ཅིང་སྐྱེ་བ་འཕོ་བ་ཤ་སྟག་ཏུ་གྱུར་ཏོ། །སྐྱེ་བ་དེའི་ཕྱི་མ་དག་ལ། ངན་སྐྱུགས་ཀྱི་འདམ་ན་གནས་པའི་སྐྱེ་བོར་སྐྱེ་བ་ལྔ་བརྒྱ་བླངས་ཏེ། གཉེན་པོས་བསད་ཅིང་སྐྱེ་བ་འཕོ་བ་ཤ་སྟག་ཏུ་གྱུར་ཏོ། །སྐྱེ་བ་དེ་དག་གི་ཕྱི་མ་ལ་སྲོག་ཆགས་དག་གི་ལུས་ལ་གནས་ཤིང་། ཟས་ཀྱང་དེ་ལ་བྱེད་པའི་སྐྱེ་བོར་སྐྱེ་བ་ལྔ་བརྒྱ་བླངས་ཏེ། གཉེན་པོས་བསད་ཅིང་སྐྱེ་བ་འཕོ་བ་ཤ་སྟག་ཏུ་གྱུར་ཏོ།།

དེ་ནས་ཐར་པ་ནག་པོའི་སྐྱེ་བ་དེ་འཕོས་པར་གྱུར་ཏེ། དེ་སྐྱེ་བ་དེའིཕྱི་མ་ཐར་པ་འཕོས་མ་ཐག་པའི་སྐྱེ་བ་དང་པོ་ལ་སྤྱོད་པ་རྒྱུ་མཐུན་ལས་ཅེ་སྤྱང་ནག་པོའི་ལུས་སུ་སྐྱེ་བ་ལྔ་བརྒྱ་བླངས་ཏེ། སྲོག་ཆགས་འབའ་ཞིག་གསོད་པའི་ལས་སྤྱོད་ཅིང༌། ཤ་དང་ཁྲག་དྲོན་མོ་ཟ་བར་གྱུར་ཏོ། །སྐྱེ་བ་དེའི་ཕྱི་མ་གཉིས་པ་ལ་དམྱལ་བའི་ཁྱི་ལུ་འདེ་ལ་སོགས་པ་གདུག་པས་གསོད་པའི་ལས་ཅན་ཤ་ཁྲག་ཟས་སུ་བྱེད་པ། ཐ་དད་པའི་ལུས་སུ་སྐྱེ་བ་ལྔ་བརྒྱ་བླངས་ཤིང༌། མྱོང་བ་རྒྱུ་མཐུན་གཞན་གྱིས་བསད་ཅིང་སྐྱེ་བ་འཕོས་པ་ཤ་སྟག་ཏུ་གྱུར་ཏོ། །སྐྱེ་བ་དེའི་ཕྱི་མ་གསུམ་པ་ལ་བྱ་ནེ་ལེ་ཤ་ཟན་དང༌། ཁྲག་འཐུང་མཆུ་དམར་དང༌། དུར་བྱ་ཀང་ཀ་དང༌། རུ་རྩེ་རྐང་ལྡག་ཞེས་ཕྱི་མ་འདི་གཉིས་བོད་ན་མེད་གསུངས། དེ་ལ་སོགས་པ་ཐ་དད་པའི་ལུས་བླངས་ཤིང༌། གཞན་གྱིས་བསད་ཅིང་སྐྱེ་བ་འཕོ་བ་ཤ་སྟག་ཏུ་གྱུར་ཏོ། །སྐྱེ་བ་དེ་དག་གི་ཕྱི་མ་བཞི་པ་དག་ལ་སྦྲང་བུ་ཏྲེ་མ་དང༌། སྲིན་བུ་པུ་ཀ་དང༌། རོ་ཟ་རྐང་འཇིབས་ལ་སོགས་པ་འབུ་དང༌། སྦྲུལ་ལྟ་བུ་འབུ་ཤིན་ཏུ་ཆེན་༼༣༡༩༽པོ་ཐ་དད་པའི་ལུས་སུ་སྐྱེ་བ་བླངས་ཤིང༌། དེ་དག་ཀྱང་གཉེན་པོས་བསད་ཅིང་སྐྱེ་བ་འཕོ་བ་ཤ་སྟག་ཏུ་གྱུར་ཏོ། །སྐྱེ་བ་དེའི་ཕྱི་མ་ལྔ་པ་དག་ལ། ངན་སྐྱུགས་ཀྱི་འདམ་ན་གནས་པའིསྐྱེ་བོར་སྐྱེས་པ་སྐྱེ་བ་ལྔ་བརྒྱ་བླངས་ཏེ། མྱོང་བ་རྒྱུ་མཐུན་གཉེན་པོས་བསད་ཅིང་སྐྱེ་བ་འཕོ་བ་ཤ་སྟག་ཏུ་གྱུར་ཏོ། །སྐྱེ་བ་དེ་དག་གི་ཕྱི་མ་དྲུག་པ་ལ། སྲོག་ཆགས་དག་གི་ལུས་ལ་གནས་ཤིང༌། ཟས་ཀྱང་དེ་དག་ལ་བྱེད་པའི་སྐྱེ་བོར་ལྔ་བརྒྱ་བླངས་ཏེ། གཉེན་པོས་བསད་ཅིང་སྐྱེ་བ་འཕོ་བ་ཤ་སྟག་ཏུ་གྱུར་ཏོ། །ཡང་སྐྱེ་བ་དེའི་ཕྱི་མ་བདུན་པ་དག་ལ། བསད་པའི་ཤ་དང༌། ཤི་བའི་རོ་དང༌། རྣམ་པར་རུལ་བ་དང༌། ལུང་པ་ཐ་དད་པ་དང༌། རྡོ་དང༌། ཀམ་བྲག་དང༌། ཤིང་འབུ་ལྟ་བུ་སྡོང་ཆེན་ལ་སོགས་པའི་ནང་དུ་གནས་པའི་སྐྱེ་བོར་གྱུར་ཏོ། །དེ་དག་ལ་གནས་ཤིང་ཟས་ཀྱང་དེས་འཚོ་བ། གཉེན་པོས་བསད་ཅིང་སྐྱེ་བ་འཕོ་བ་འབའ་ཞིག་ཏུ་གྱུར་ཏོ། །སྐྱེ་བ་དེའིཕྱི་མ་བརྒྱད་པ་དག་ལ། མངལ་གྱི་གྲོང་ཁྱེར་ན་གནས་པའི་སྐྱེ་བོར་སྐྱེ་བ་ལྔ་བརྒྱར་གནས་ཏེ། གནས་དང་འཚོ་བ་ཡང་དེ་ལ་བྱེད་པར་གྱུར་ཏོ། །དེ་ཡན་ཆད་དུ་སྤྱོད་པ་རྒྱུ་མཐུན་པའི་འབྲས་བུ་སྟེ། རྣམ་གྲངས་ནི་སྐྱེ་བ་བརྒྱད་པ་ཡན་ཆད་ལ་སྐྱེ་བ་བཞི་སྟོང་དུ་དོན་གྱིས་བརྩིས་པའོ། །དེ་ཅིའི་ཕྱིར་ཞེ་ན། སྐྱེ་བ་གསུམ་པ་དང༌། བཞི་པ་དང༌། བདུན་པ་ལ་གྲངས་ངེས་པ་མ་སྨོས་ཀྱང༌། ཐ་དད་པའི་ལུས་བླངས་ཞེས་པ་དང༌། གོང་འོག་གི་སྒྲ་ངེས་པས་བརྩིའོ།།

གཉིས་པ་དམྱལ་བའི་སྐྱེ་བ་བླང་བ་ནི།

ཡང་སྐྱེ་བ་དེའི། ཞེས་པ་ནས། དམྱལ་བ་རྣམས་སུ་དེ་ལྟར་འཕེན་ནོ། །ཞེས་པའི་བར་གྱིས་བསྟན་ཏེ།

ཡང་སྐྱེ་བ་དེའི་ཕྱི་མ་དག་ལ་བསད་པའི་ཤ་དང་། ཤི་བའི་རོ་དང་། རྣམ་པར་རུལ་བ་དང་། ལུང་པ་ཐ་དད་རྡོ་དང་། གམ་བྲག་དང་། སྡོང་ཆེན་ལ་སོགས་པའི་ནང་དུ་གནས་པའི་སྐྱེ་བོར་གྱུར་ཏོ། །དེ་ལ་གནས་ཤིང་ཟས་ཀྱང་དེས་འཚོ་བ། གཉེན་པོས་བསད་ཅིང་སྐྱེ་བ་འཕོ་བ་འབའ་ཞིག་ཏུ་གྱུར་ཏོ། །སྐྱེ་བ་དེའི་ཕྱི་མ་ལ། མངལ་གྱི་གྲོང་ཁྱེར་ན་གནས་པའི་སྐྱེ་བོར་སྐྱེ་བ་ལྔ་བརྒྱར་བླངས་ཏེ། གནས་དང་འཚོ་བ་ཡང་དེ་ལས་བྱེད་པར་གྱུར་ཏོ། །ཡང་སྐྱེ་བ་དེའི་ཕྱི་མ་ལ། མནར་མེད་པའི་གནས་རྡོ་རྗེའི་དམྱལ་བ་ཞེས་བྱ་བར་དེ་ཉིད་ཀྱི་ཚེའི་ཚད་བརྒྱད་ཁྲིའི་བར་དུ་གནས་ཏེ། དམྱལ་བ་དེའི་སྡུག་བསྔལ་གྱི་ཚད་ནི་བརྗོད་དུ་མི་རུང་ངོ་། །དེ་ཅིའི་ཕྱིར་ཞེ་ན། གང་གི་མདུན་དུ་སྡུག་བསྔལ་གྱི་ཚད་དེ་བརྗོད་ན་གང་གིས་ཐོས་པ་དེ་བརྒྱལ་བར་འགྱུར་རོ། །དེའི་ཚེ་དེའི་དུས་ན་དམྱལ་བ་དེས། ཨེ་མའོ་འདི་ཅི་ངེས་ཞེས་སྨྲས་པའི་སྐད་ཅིག་གཅིག་ཕྱིན་པར་གྱུར་ཏོ། །རྡོ་རྗེ་སེམས་དཔའ་ཐུབ་པའི་དབང་པོ་ཆོས་ཀྱི་རྒྱལ་པོ་དེས། ཁོ་ན་ཉིད་ཀྱི་ལས་ཡིན་གྱིས་ཞེས་ཆོས་བསྟན་པ་ལས། ལས་ཡིད་ལ་བྱས་པས་ཡོངས་སུ་ཤེས་ཏེ་འགྱོད་པར་གྱུར་ཏོ། །འགྱོད་པ་ཙམ་གྱིས་གནས་དེ་ནས་འཕོས་ནས། རབ་ཏུ་ཚ་བའི་དམྱལ་བའི་གནས་སུ་ཡང་དེ་ཉིད་ཀྱི་ཚེ་ཚད་བརྒྱད་ཁྲི་གནས་ཏེ། མནར་མེད་པ་ཇི་ལྟ་བ་བཞིན་ནོ། །དེ་ནས་ཡང་འཕོས་ནས་ཚ་བ་ཆུང་ངུ་དང་། ངུ་འབོད་ཆེན་པོ་དང་། ངུ་འབོད་དང་། བསྡུས་འཇོམས་དང་། ཐིག་ནག་དང་། འབར་བ་དང་། ཡང་སོས་ལ་སོགས་པའི་དམྱལ་བའི་གནས་སུ་ཡང་དེ་དག་གི་ཚེ་ཚད་བརྒྱད་ཁྲི་བརྒྱད་ཁྲིར་གནས་ཏེ། མནར་མེད་པ་དང་། རབ་ཏུ་ཚ་བ་ཇི་ལྟ་བ་བཞིན་ནོ། །དེ་དག་ནམ་ཞིག་པ་ན་ཡང་། འཇིག་རྟེན་གྱི་ཁམས་གཞན་གྱི་དམྱལ་བའི་གནས་རྣམས་སུ་དེ་ལྟར་འཕེན་ནོ།།

ཡང་སྐྱེ་བ་དེའི་ཕྱི་མ་དགུ་པ་ལ། མནར་མེད་པའི་གནས་རྡོ་རྗེ་དམྱལ་བ་ཞེས་བྱ་བར། དེ་ཉིད་ཀྱི་ཚེའི་ཚད་བརྒྱད་ཁྲིའི་བར་དུ་གནས་ཏེ། དམྱལ་བ་དེའི་སྡུག་བསྔལ་གྱི་ཚད་ནི་བརྗོད་དུ་མི་རུང་ངོ༌། །དེ་ཅིའི་ཕྱིར་ཞེ་ན། གང་གི་མདུན་དུ་སྡུག་བསྔལ་གྱི་ཚད་དེ་བརྗོད་ན་གང་གིས་ཐོས་པ་དེ་བརྒྱལ་བར་འགྱུར་རོ། །དེའི་ཚེ་དེའི་དུས་ན། དམྱལ་བ་པ་དེས། ཨེ་མའོ་འདི་ཅི་ཉེས་ཞེས་སྨྲས་པའི་ལན་གསུངས་པའི་རྡོ་རྗེ་སེམས་དཔའ་འབྱོན་པ་དང༌། དམྱལ་བ་པ་དེ་ཚེ་འཕོ་བའི་ཡུན་གཉིས་སྐད་ཅིག་གཅིག་གིས་ཕྱིན་པར་གྱུར་ཏོ། །དེའང་དགེ་སློང་ཐུབ་དཀའ་གནས་གྱུར་ཏེ་རྡོ་རྗེ་སེམས་དཔའ་ཐུབ་པའི་དབང་པོ་ཉིད་དུ་སངས་རྒྱས་ནས་དམྱལ་བ་པ་དེའི་ངོ་ལ་ཆོས་ཀྱི་རྒྱལ་པོ་གཤིན་རྗེར་སྣང་བས་དེ་༼༣༢༠༽འདུལ་བར་མཛད་པ་དེས། ཁོ་ན་ཉིད་ཀྱི་ལས་ཡིན་ནོ་ཞེས་ཆོས་བསྟན་པས། ལས་དེ་ཡིད་ལ་བྱས་པས་ཡོངས་སུ་ཤེས་ཏེ། སྔར་བྱས་ལ་འགྱོད་པར་གྱུར་ཏོ། །འགྱོད་པ་ཙམ་གྱིས་གནས་དེ་ནས་ཤི་འཕོས་ནས། བཅུ་པ་རབ་ཏུ་ཚ་བའི་དམྱལ་བའི་གནས་སུ་ཡང་དེ་ཉིད་ཀྱི་ཚེའི་ཚད་བསྐལ་པ་བརྒྱད་ཁྲིར་གནས་ཏེ། མནར་མེད་པ་ཇི་ལྟ་བ་བཞིན་ནོ། །དེར་ཡང་སྡུག་བསྔལ་དྲིས་པས་ཐུབ་པས་ལན་བཏབ་སྟེ་དེ་ནས་ཡང་འཕོས་ནས། བཅུ་གཅིག་པ་ཚ་བ་ཆུང་ངུ་དང༌། བཅུ་གཉིས་པ་ངུ་འབོད་ཆེན་པོ་དང༌། བཅུ་གསུམ་པ་ངུ་འབོད་དང༌། བཅུ་བཞི་པ་སྡུད་འཇོམས་དང༌། བཅོ་ལྔ་པ་ཐིག་ནག་དང༌། བཅུ་དྲུག་པ་འབར་བ་དང༌། བཅུ་བདུན་པ་ཡང་སོས་དང་ལ་སོགས་པ་ཞེས་པས་གྲང་དམྱལ་བརྒྱད་ཀྱང་གསང་སྙིང་ལྟར་ཏེ། ཐུབ་པས་ལུང་བསྟན་ནས་འགྱོད་པའི་རྒྱུས་གྱེན་དུ་འབྱུང་ཏེ་དམྱལ་བའི་གནས་རྣམས་སུ་ཡང་དེ་དག་གི་ཚེ་ཚད་བརྒྱད་ཁྲི་བརྒྱད་ཁྲིར་གནས་ཏེ། མནར་མེད་པ་དང་རབ་ཏུ་ཚ་བ་ཇི་ལྟ་བ་བཞིན་ནོ། །དམྱལ་བ་ཚེ་རིང་བས་འཇིག་རྟེན་ཞིག་པར་འགྱུར་ཞེ་ན། དེ་ནམ་ཞིག་པ་ན་ཡང༌། འཇིག་རྟེན་གྱི་ཁམས་གཞན་གྱི་དམྱལ་བ་རྣམས་སུ་དེ་ལྟར་འཕེན་ནོ། །འདི་དག་གི་ལས་ནི་མ་རྫོགས་པ་རྫོགས་པར་བྱེད་པའི་ཕྱིར་སྐྱེ་བ་བརྒྱད་ཡན་ཆད་ཀྱི་ལས་ལས་གྱུར་ཏེ་ཡོངས་སུ་རྫོགས་པར་བྱེད་པའི་རྐྱེན་དང་འཕེན་པའི་ལས་ཞེས་བྱ་སྟེ་རྒྱུ་དང་ཐུན་མོང་ངོ༌། །དམྱལ་བ་རྣམས་ནི་འབྲས་བུ་གསུམ་ལས་རྣམ་པར་སྨིན་པའི་འབྲས་བུའོ། །དེ་ལྟར་སྐྱེ་བ་ཕྲག་བརྒྱད་དང་དགུར་འབུམ་ཕྲག་བརྒྱད་དུ་བརྒྱུད་པའོ།།

གསུམ་པ་དེ་ལས་ཐར་ནས་སྐྱེ་བ་བླངས་པ་ནི།

དེ་དག་ལས་འཕོས་ནས། ཞེས་པ་ནས། གཏོགས་འདོད་ཅན་ཞེས་བྱ་བར་སྐྱེ་བ་བླངས་སོ། །ཞེས་པའི་བར་གྱིས་བསྟན་ཏེ།

དེ་དག་ལས་འཕོས་ནས་ཀྱང་། གང་འཇིག་པའི་བསྐལ་པའི་མུ་གེ་དང་། ནད་དང་། མཚོན་གང་དུ་འབྱུང་བ་དེ་དང་དེར་སྐྱེ་བར་བྱེད་དོ། །འཇིག་པ་དེ་དག་གིས་དེ་དག་གང་སྟོངས་ན་ཡང་། གཞན་དག་གང་འཇིག་པའི་དུས་སུ་ཡང་དེར་སྐྱེ་བ་ལེན་པར་འགྱུར་རོ། །དེ་དག་ལས་ཐར་ནས་ཀྱང་ཤ་དང་རུས་པའི་ཆེད་དུ་གསོད་པའི་སྐྱེ་བའི་རིགས་སུ་བསྐལ་པ་བརྒྱད་ཁྲིར་སྐྱེ་བ་ལེན་ཅིང་འཕོ་བར་འགྱུར་རོ། །དེ་ལས་ཐར་ནས་གཤིན་རྗེའི་འཇིག་རྟེན་གྱི་ཁམས་སུ་སྐྱེ་བ་ལྔ་བརྒྱར་གདུང་བར་གྱུར་ཏོ། །དེ་ལས་འཕོས་ནས་ལུས་སྲུལ་པོའི་རིགས་སུ་སྐྱེ་བ་བླངས་སོ།།

སྐྱེ་བ་དེའི་ཕྱི་མ་ལ་ཤ་ཟ་བའི་རིགས་སུ་སྐྱེ་བ་བླངས་སོ། །སྐྱེ་བ་དེའི་ཕྱི་མ་ལ་སྲུལ་པོའི་རིགས་སུ་སྐྱེ་བ་བླངས་ཏེ། སྲུལ་པོ་གཉའ་དྲེག་ཅན་ཞེས་བྱ་བའི་བུ། སྲུལ་པོ་གཏོགས་འདོད་ཅན་ཞེས་བྱ་བར་སྐྱེ་བ་བླངས་སོ།།

དེ་དག་ལས་འཕོས་ནས་ཀྱང་ཐར་པ་ནག་པོ་ལས་བརྩིས་པས་སྐྱེ་བ་བཅུ་དགུ་པ་དག་ལ་བསྐལ་པའི་སྙིགས་མ་གསུམ་དུ་སྡུག་བསྔལ་མྱོང་བ་ནི། གང་འཇིག་པའི་བསྐལ་པ་མུ་གེ་དང་ནད་དང་མཚོན་གང་དང་གང་འབྱུང་བ་དེ་དང་དེར་སྐྱེ་བར་བྱེད་དོ། །འདིའང་གོང་འོག་གིས་འགྲེ་བས་བརྒྱད་ཁྲིའོ། །འཇིག་པ་དེ་དག་གིས་དེ་དག་གང་སྟོངས་ན་ཡང༌། གཞན་དག་གང་འཇིག་པའི་དུས་སུ་ཡང་ལས་ཀྱི་དབང་གིས་དེར་སྐྱེ་བ་ལེན་པར་འགྱུར་རོ། །དེ་དག་ནི་མྱོང་བ་རྒྱུ་མཐུན་གྱི་འབྲས་བུའོ། །དེ་དག་ལས་ཐར་ནས་ཀྱང་ཉི་ཤུ་པ་ཤ་དང་རུས་པ་ཟ་བའི་ཆེད་དུ་འདོད་པས་གསོད་པའི་སྐྱེ་༼༣༢༡༽བའི་རིགས་སུ་བསྐལ་པ་བརྒྱད་ཁྲིར་སྐྱེ་བ་ལེན་ཅིང་འཕོ་བར་གྱུར་ཏོ། །དེ་དག་ནི་སྤྱོད་པ་རྒྱུ་མཐུན་དུ་རྟོགས་ཏེ་ལས་ངན་དེར་ཡང་གསོག་གོ །དེ་ལས་ཐར་ནས་ཉེར་གཅིག་པ་གཤིན་རྗེའི་འཇིག་རྟེན་གྱི་ཁམས་ཡི་དྭགས་བཞིའི་རིགས་སུ་སྐྱེ་བ་ལྔ་བརྒྱར་གདུང་བར་གྱུར་ཏོ། །འདི་ནི་དབང་གི་འབྲས་བུར་ཡང་འགྱུར་རོ། །དེ་ལས་འཕོས་ནས་ཉེར་གཉིས་པ་ལུས་སྲུལ་རིགས་སུ་པོའི་སྐྱེ་བ་བླངས་སོ། །སྐྱེ་བ་དེའི་ཕྱི་མ་ཉེར་གསུམ་པ་ལ་དྲི་དང་ཤ་རྗེན་ཟ་བས་ཤ་ཟའི་རིགས་སུ་སྐྱེ་བ་བླངས་སོ། །སྐྱེ་བ་དེའི་ཕྱི་མ་ཉེར་བཞི་པ་ལ་ལུས་སྲུལ་པོའི་རིགས་སུ་སྐྱེ་བ་བླངས་ཏེ། སྲུལ་པོ་གཉའ་དྲག་ཅན་ཞེས་བྱ་བའི་བུ། སྲུལ་པོ་གཏོགས་འདོད་ཅན་ཞེས་བྱ་བ་སྐྱེ་བར་བླངས་སོ། །སྐྱེ་བ་འདི་གསུམ་ལ་ཚེ་ཚད་བསྟན་པ་མེད་ལ་དབང་གི་འབྲས་བུར་ཡང་འགྱུར་རོ། །མདོར་ན་གོང་འོག་གི་སྐྱེ་བ་བཞི་སྟོང་ལྔ་བརྒྱ་དང་གསུམ་སྟེ་དམྱལ་བར་བརྒྱུད་པའི་སྐྱེ་བ་བཅུ་གཅིག་བརྒྱད་ཁྲིར་མཚུངས་པ་ལ། ཚེ་ཚད་བསྐལ་པ་འབུམ་ཕྲག་དགུ་དང་དྲུག་ཁྲི་སྙེད་དུ་བརྒྱུད་ནས་ལང་ཀའི་ཡུལ་དུ་སྐྱེས་སོ།།

བཞི་པ་ཐ་མ་སྲིན་པོའི་སྐྱེ་བ་བླངས་པ་ལ་གཉིས་ཏེ། མ་ཟན་མ་ཏང་ཀར་གྲགས་པ། ལུས་དང་མཐུའི་མཚན་ཉིད་དོ། །དང་པོ་ནི།

སྐྱེ་བ་དེའི་ཕྱི་མ་ལ་ཡུལ་ལང་ཀ ཞེས་པ་ནས། ཡོངས་སུ་གྲགས་སོ། །ཞེས་པའི་བར་གྱིས་བསྟན་ཏེ།

སྐྱེ་བ་དེའི་ཕྱི་མ་ལ། ཡུལ་ལང་ཀ་སྤུ་རང་ཞེས་བྱ་བའི་སྨད་འཚོང་མ་ཞིག་གི་མངལ་དུ་ཆགས་ཏེ་སྐྱེ་བར་སྨིན་ཏོ། །དེ་དེར་སྐྱེ་བ་བླངས་ཏེ་ཟླ་བ་དགུ་ན་མ་ཤི་བར་གྱུར་པ་དང་། མི་གང་དེ་དག་གིས་དྭ་བུ་ལྐོག་བུ་འདི་གསོ་བར་བྱར་ཡུལ་གང་སྨེ་བར་འགྱུར་བར། མའི་མཆན་དུ་གཞག་པར་རིགས་སོ་ཞེས་གླེངས་ནས། དུག་ཤིང་ནལ་བྱི་ཞེས་བྱ་བའི་རྩ་ན། དུར་ཕག་གཏི་མུག་གི་ཚང་བཅས་པ། བར་ན་དུག་སྦྲུལ་ཞེ་གི་འཁྲ་སར་བྱེད་པ། ཁ་ལ་འདོད་ཆགས་དུག་བྱའི་ཚང་བཅས་པའི་རྩར་ཀུན་གྱིས་མའི་རོ་ཁང་བརྩིགས་ཏེ། རོ་ཁྱོགས་བླངས་ཏེ་དེར་བཅུག་ནས། བུ་ཡང་མའི་རོ་མཆན་དུ་གཞག་གོ །དྭ་བུ་དེས་མའི་རོ་ལ་འཇུས་ནས་ནུ་མ་ལ་འཇིབས་པས། ཆུ་སེར་དྲངས་ཏེ་ཞག་བདུན་གྱི་འཚོ་བ་བྱས་སོ། །དེ་ནས་ཁྲག་ཏུ་གཞིབས་པས། ཞག་བདུན་གྱི་འཚོ་བས་འཚོའོ། །དེ་ནས་ནུ་མ་གཉིས་ཟོས་པས་ཞག་བཅུའི་འཚོ་བ་འཚོའོ། །དེ་ནས་མའི་ནང་ཁྲོལ་ཟད་པར་ཟོས་པས་འཚོ་བའི་བྱ་བར་གྱུར་ཏོ། །དེ་ནས་ཤ་ཟད་པར་ཟོས་པས་ཟླ་བ་བདུན་གྱི་འཚོ་བའི་བྱ་བ་བྱས་སོ། །དེ་ནས་གཞོན་ནུ་དེ་རྟས་པར་གྱུར་ནས། དུར་ཁྲོད་ཀྱི་རོ་རྣམས་ཀྱིས་འཚོ་བའི་བྱ་བ་བྱས་སོ། །དེ་ནས་ཤིན་ཏུ་རྟས་པར་གྱུར་པ་དང་། རོ་རྣམས་ཟས་སུ་ཟ་ཞིང་། རོ་གོས་དང་། པགས་པ་རྣམས་གྱོན་ཏེ། དུར་ཁྲོད་ཀྱི་མ་མོ་དང་། ཤ་ཟ་དང་། ཡི་དྭགས་ཀྱི་ཚོགས་དང་། མི་མ་ལགས་པའི་ཚོགས་མང་པོ་ཡང་མི་རོ་རྣམས་ཀྱི། ཤ་རྗེན་ཟོས་པའི་རང་བཞིན་གྱི་མཐུས་དབང་དུ་འདུས་ཏེ། དུར་ཁྲོད་ཀྱི་གདུག་པ་ཅན་རྣམས་ཀྱི་བདག་པོར་གྱུར་ཏེ། གཞན་གྱི་གཟི་བྱིན་འཕྲོག་པ། མི་གང་དག་གསོན་པོར་ཟ་བ། མདངས་འཕྲོག་པ། ཤིན་ཏུ་འཇིགས་པའི་གཟུགས་ཅན་མ་རུངས་པར་གྱུར་ཏོ། །མའི་ཤ་རྗེན་ཟོས་པས་ན། མ་ཟན་མ་ཏང་ཀ་ཞེས་མི་གང་དག་གིས་ཡོངས་སུ་གྲགས་སོ།།

སྐྱེ་བ་དེའི་ཕྱི་མ་ཉེར་ལྔ་པ་ལ་རྒྱུ་མཐུན་གྱི་སྤྱོད་པ་རྫོགས་པའི་འབྲས་བུ་རུ་ཏྲ་ཉིད་དུ་སྐྱེས་ཏེ། ཡུལ་ལང་ཀ་པུ་ར་ཞེས་བྱ་བའི་སྨད་འཚོང་མ་ཞིག་གི་མངལ་དུ་ཆགས་ཏེ་སྐྱེ་བ་སྨིན་ཏོ། །དེ་དེར་སྐྱེ་བ་བླངས་ཏེ་སྐྱེ་ནས་ཟླ་བ་དགུ་ན་མ་ཤི་བར་གྱུར་པ་དང༌། མི་གང་དེ་དག་གིས་དྭ་བུ་རྐོག་བུ་འདི་གསོ་བར་བྱར་མི་རུང་སྟེ་ཡུལ་གང་སྨེ་བར་འགྱུར་བས་མའི་མཆན་དུ་བཞག་པར་རིགས་སོ། །ཞེས་གླེང་ནས། དུག་ཤིང་ནལ་བྱི་ཞེས་བྱ་བའི་རྩ་ན། དུར་ཕག་གཏི་མུག་གི་ཚང་ཆགས་པའི་བར་ན་དུག་སྦྲུལ་ཞེ་སྡང་གི་འཁྲ་སར་བྱེད་པ། ཁ་ལ་འདོད་ཆགས་དུར་བྱའི་ཚང་བཅས་པའི་རྩར། འདི་ཉིད་མི་མ་ཡིན་གྱི་གནས་ཏེ་ཆགས་སྡང་སྐྱེ་བའི་ས་ཡིན་ལ། ཤིང་འདི་ཝཱ་རཱ་ཎ་སཱིའི་ཡུལ་གྲ་གཅིག་ནའང་ཡོད་གསུང་སྟེ་རླངས་པ་དང་དྲི་མས་མི་ལ་དུག་བྱེད་ནུས་སྐད། ནང་ལྟར་ན་བདག་འཛིན་གྱི་རུ་ཏྲར་སྨིན་པ་སྟེ། བདེ་གཤེགས་སྙིང་པོ་ལས་གོལ་ནས་བདག་གི་ལུས་ཀྱི་ཕུང་པོའི་དུག་ཤིང་ལ་དུག་གསུམ་ཆགས་པའོ། །མ་རོ་དུར་ཁང་དང་བཅས་པ་ཀུན་གཞི་ལ། བུ་རོ་༼༣༢༢༽མཆན་དུ་བཞག་པ་ཉོན་ཡིད་དེ། ཀུན་གཞི་ལ་བདག་ཏུ་བཟུང་བའོ། །དེ་ནས་སྲིན་པོ་ཀུན་གྱིས་མའི་རོ་ཁང་བརྩིགས་ཏེ། རོ་ཁྱོགས་ལ་བླངས་ཏེ་དེར་བཅུག་ནས་བུ་ཡང་མའི་རོ་མཆན་དུ་བཞག་གོ །དྭ་བུ་དེས་མའི་རོ་ལ་འཇུས་ནས་འཚོ་བའི་ཚུལ་ནུ་མ་ལ་འཇིབས་ནས་ཆུ་སེར་དྲངས་ཏེ་ཞག་བདུན་གྱི་འཚོ་བ་བྱས་སོ། །དེ་ནས་ཁྲག་ཏུ་གཞིབས་པས་ཞག་བདུན་གྱི་འཚོ་བས་འཚོའོ། །དེ་ནས་ནུ་མ་གཉིས་ཟོས་པས་ཞག་བཅུའི་འཚོ་བས་འཚོའོ། །དེ་ནས་མའི་ནང་ཁྲོལ་ཟད་པར་ཟོས་པས་འཚོ་བའི་བྱ་བར་གྱུར་ཏོ། །དེ་ནས་ཤ་ཟད་པར་ཟོས་པས་ཟླ་བ་བདུན་གྱི་འཚོ་བའི་བྱས་སོ། །དེ་ནས་གཞོན་ནུ་དེ་རྟས་པར་གྱུར་ནས། དུར་ཁྲོད་ཀྱི་རོ་རྣམས་ཀྱིས་འཚོ་བའི་བྱ་བ་བྱས་སོ། །སྤྱིར་སྔོན་གྱི་ལས་ཕལ་ཆེར་ཟད་ཀྱང་ལྷག་མ་ཡོད་ལ། སྔོན་ལྷ་སྒོམ་ཞིང་སྔགས་བཟླས་ཏེ་སྤྱོད་པ་རླབས་ཆེ་བ་བརྟེན་སྟོབས་ཀྱིས་འདིར་ནུས་པ་ཆེ་བར་གྱུར་ཏེ། དེ་ནས་ཤིན་ཏུ་བརྟས་པར་གྱུར་པ་དང༌། རོ་རྣམས་ཟས་སུ་ཟ་ཞིང༌། རོ་གོས་དང༌། པགས་པ་རྣམས་གྱོན་ཏེ། དུར་ཁྲོད་ཀྱི་མ་མོ་དང༌། ཤ་ཟ་བ་དང༌། ཡི་དྭགས་ཀྱི་ཚོགས་དང༌། མི་དང་མི་མ་ལགས་པའི་མ་ཡམ་གྱི་ཚོགས་མང་པོ་ཡང༌། མི་རོ་རྣམས་ཀྱི་ཤ་རྗེན་ཟོས་པའི་རང་བཞིན་གྱི་མཐུས་དབང་དུ་འདུས་ཏེ། མྱོང་བ་རྒྱུ་མཐུན་གྱི་འབྲས་བུ་གཞན་ལ་གནོད་པས། དུར་ཁྲོད་ཀྱི་གདུག་པ་ཅན་ཀུན་གྱི་བདག་པོར་གྱུར་ཏེ། གཞན་གྱི་གཟི་བྱིན་འཕྲོག་པའི་ནུས་པ་ཅན་མི་གང་དང་གང་དག་གསོན་པོར་ཟ་ཞིང་མདངས་འཕྲོག་པར་བྱེད་པ། ཤིན་ཏུ་འཇིགས་པའི་གཟུགས་ཅན་མ་རུང་པར་གྱུར་ཏོ། །མའི་ཤ་རྗེན་ཟོས་པས་ན། མ་ཟན་མ་ཏང་ཀ་ཞེས། མི་གང་དག་གིས་རུ་ཏྲའི་མིང་དུ་འབོད་དེ་ཡོངས་སུ་གྲགས་སོ།།

གཉིས་པ་ལུས་དང་མཐུའི་མཚན་ཉིད་ནི།

ཡི་དྭགས་ཆེན་པོ། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

ཡི་དྭགས་ཆེན་པོ་དེའི་ཁ་རླངས་ལས་ནི་ཚ་བའི་ནད་བྱུང་བས་འབྱུང་བས་ཁྱབ་སྟེ། འགྲོ་བ་གང་ལུས་ཅན་རྣམས་ཟུག་རྔུ་དྲག་པོས་གཟིར་བ། སྣ་ནས་གྲང་བའི་ནད་འབྱུང་བས་འབྱུང་བས་ཁྱབ་སྟེ། ཀུན་ཏུ་གདུང་བར་བྱེད་པ། མིག་དུག་གིས་ཕོག་པས་འཆི་བར་ངེས་པ། དྲག་པོའི་སྔགས་གཟེར་འདས་པ་བྱས་པས་ཐམས་ཅད་དབང་དུ་འདུ་བར་གྱུར་པ། ལུས་ཆེན་པོ་ལ་མདོག་ཐལ་ཀ་སྔོ་སྐྱར་འདུག་པ། ཁྲག་དང་ཞག་གི་ཐིག་ལེས་བརྒྱན་པ། ཐོད་པའི་འཕྲེང་བས་སེ་རལ་དུ་ཐོགས་པ། དམར་པོ་ཁྲག་གིས་བསྐུར་པའི་པགས་པ་བཀོད་པ། ཐོད་སྐྱོགས་ཁྲག་གིས་བཀང་བ་རྟག་པར་འཐུང་བ། སྐྲ་རལ་པ་ཁམ་ནག་འབན་ཅིང་ཉིག་པ། འབྲུ་མར་ཐོད་རུས་ཟས་སུ་ཟ་བ། ཐལ་བ་དང་། སྲོ་ཙ་ཨ་ཛ་ནས་ལུས་བརྒྱན་པ། བྱའི་གཤོགས་པ་ལུས་ལས་བྱུང་བ། ནམ་མཁའ་ལ་བྱ་བཞིན་དུ་བྱ་བ་བྱེད་པ། གཅེར་བུ་ཐོགས་མེད་ཐོགས་པ་མེད་པས་ཆུ་ལ་ཉ་བཞིན་བྱ་བ་བྱེད་པ། གང་གིས་མཐོང་བའི་མིག་རྩ་རིག་རིག་སྡང་ཤིང་བརྒྱལ་བར་བྱེད་པ། ལུས་ཕག་གི་སྤུ་ཅན་རྩུབ་ལ་ཡན་ལག་སྦྲུལ་དུ་བྱུང་ཞིང་སྦྲུལ་གྱིས་བརྒྱན་པ། སེན་མོ་ཀང་ཀའི་མཆུ་སྡེར་དུ་བྱུང་བས་གང་ཟིན་པའི་ལུས་ཅན་ཤ་རུས་མྱགས་པར་བྱེད་པ། སྔོན་གོམས་པའི་མཐུས་ལུས་ཅན་ཐ་དད་པ་བསད་པར་དམིགས་པ། གང་མོའི་དབང་པོ་སྡུད་པར་དམིགས་པ། ལུས་ཅན་མཐའ་དག་ཧག་དངངས་ཏེ། ཟིལ་གྱིས་མནན་ནས་འདར་ཡེད་ཡེད་འཇིགས་པ། འཇིག་རྟེན་གྱི་མ་མོ་དང་། འབྱུང་པོ་དང་། གནོད་སྦྱིན་མཐུ་ཅན་གྱིས་ཕྱག་བྱས་ཏེ་གཙོ་བོར་མཐོང་བ། གདུག་པ་ཅན་མཐའ་དག་མངགས་པ་དང་། ཕོ་ཉ་དང་། གཡོག་དང་། ཡང་གཡོག་དང་། བྲན་དང་། ཡང་བྲན་དུ་འཁོལ་ཞིང་། ཀུན་ལ་དབང་སྒྱུར་བའི་དབང་ཕྱུག་ཆེན་པོར་གྱུར་ཏོ།།

ལས་ཀྱི་སྤྱོད་ཚུལ་དང་མཐུའི་ཁྱད་པར་སྔོན་དྲག་སྔགས་བཟླས་པའི་རྒྱུ་མཐུན་གྱི་ཡི་དྭགས་ཆེན་པོ་དེའི་ཁ་རླངས་ལས་ནི་ཚ་བའི་ནད་བྱུང་བས་གང་ལ་ཕོག་པ་ནད་ཀྱི་འབྱུང་བས་ཁྱབ་སྟེ། འགྲོ་བ་གང་ལུས་ཅན་རྣམས་ཟུག་རྔུ་དྲག་པོས་གཟིར་བ། སྣ་ནས་ནི་གྲང་བའི་ནད་བྱུང་བས་གང་ལ་ཕོག་པར་དེའི་འབྱུང་བས་ཁྱབ་སྟེ་ཀུན་ཏུ་གདུང་བར་བྱེད་དོ། །མིག་འབྲི་ཚུགས་སུ་གཏད་ན་མིག་བུག་གིས་ཕོག་པས་ནད་དུ་སོང་ནས་འཆི་བར་ངེས་པ། གང་ལ་དམིགས་ཏེ་དྲག་པོའི་སྔགས་༼༣༢༣༽ཟེར་བཟླས་པར་བྱེད་པས། ཐམས་ཅད་རང་དབང་མེད་པར་དབང་དུ་འདུས་པར་གྱུར་པ། ལུང་ཆེན་པོ་ལ་མདོག་ཐལ་ཀ་སྔོ་སྐྱར་འདུག་པ། ཁྲག་དང་ཞག་གིས་ཐིག་ལེས་བརྒྱན་པ། ཐོད་པའི་ཕྲེང་བ་སེ་རལ་དུ་ཐོགས་པ། དམར་པོ་ཁྲག་གིས་བསྐུས་པའི་པགས་པ་བགོས་པ། ཐོད་པ་མ་དྲངས་པར་བཅག་པའི་འཕྲོ་ཅན་ཐོད་སྐྱོགས་ཁྲག་གིས་བཀང་པ་རྟག་པར་འཐུང་བ། སྐྲ་རལ་པ་ཁམ་ནག་བུངས་ཆེ་བར་འབན་ཅིང་མང་ལ་འཛིང་བར་གཉིགས་པ། ཁྲག་དང་དབང་པོ་ལྔ་བསྲེས་པ་དང་ཀླད་པ་དང་ཚིལ་དང་རྐང་སྟེ་འབྲུ་མར་ཐོད་རུས་ཟས་སུ་ཟ་བ། ཐལ་བ་དང་མི་ཚིལ་ནང་དུ་དྲི་ཆེན་བླུགས་པ་སྲོ་ཙ་ཨན་འཛའ་ནས་ལུས་བརྒྱན་པ། ལ་ལར་སྦྲུལ་དང་བ་སུ་ཏ་ཡང་གསུངས། བྱའི་གཤོག་པ་ལུས་ལས་བྱུང་བས་ནམ་མཁའ་ལ་བྱ་བཞིན་བྱ་བ་བྱེད་པ། གཅེར་བུ་པ་ཐོགས་མེད་ཐོགས་པ་མེད་པས་ཆུ་ལ་ཉ་བཞིན་བྱ་བ་བྱེད་པ། གང་གིས་མཐོང་བ་མིག་རྩ་རིག་རིག་སྔངས་ཞིང་བརྒྱལ་བར་བྱེད་པ། ལུས་ཕག་གི་སྤུ་ཅན་རྩུབ་ལ་ཡན་ལག་སྦྲུལ་དུ་བྱུང་ཞིང་སྦྲུལ་གྱིས་བརྒྱན་པ། སེན་མོ་ཀང་ཀའི་མཆུ་སྡེར་དུ་བྱུང་བས་གང་ཟིན་པའི་ལུས་ཅན་ཤ་རུས་མྱོགས་པར་བྱེད་པ། སྔོན་སྐྱེ་བ་སྔ་མ་རྣམས་ལ་ཐར་པའི་དུས་ཀྱི་སྒྲོལ་བ་སོགས་གོམས་པའི་མཐུས་ལུས་ཅན་ཐ་དད་གསད་པར་དམིགས་པ། གང་མཐོང་བས་ཐར་པའི་དུས་སྦྱོར་བ་ལ་གོམས་པས་མོའི་དབང་པོ་སྡུད་པར་ཆགས་པ། ལུས་ཅན་མཐའ་དག་ཧག་སྔངས་ཏེ་ཟིལ་གྱིས་མནན་ནས་འདར་ཡེད་ཡེད་འཇོག་པ། འཇིག་རྟེན་གྱི་མ་མོ་དང༌། འབྱུང་པོ་དང༌། གནོད་སྦྱིན་མཐུ་ཅན་རྣམས་ཀྱིས་ཕྱག་བྱས་ཏེ་གཙོ་བོར་མཐོང་བ། དབང་ཆེ་བའི་ཚད། གདུག་པ་ཅན་མཐའ་དག་མངག་པ་དང༌། ཕོ་ཉ་དང༌། གཡོག་དང༌། ཡང་གཡོག་དང༌། བྲན་དང༌། ཡང་བྲན་དུ་འཁོལ་ཞིང༌། དང་པོར་ཁྲོ་བོར་བསྒོམ་པ་ཤེས་རབ་ཀྱིས་མ་ཟིན་པ་དང༌། བཀའ་བསྒོ་ལོག་པའི་རྒྱུ་དངོས་སུ་སྣང་བའི་ཕྱིར་ཏེ། འཇིག་རྟེན་གྱི་བདག་པོ་དབང་ཅན་གདུལ་དཀའ་བར་བྱུང་སྟེ་ཁམས་གསུམ་ཀུན་ལ་དབང་བསྒྱུར་བའི་དབང་ཕྱུག་ཆེན་པོར་གྱུར་ཏོ།།

ནང་ལྟར་ན་ཉོན་ཡིད་ཀྱིས་ཀུན་གཞི་ལ་བདག་ཏུ་བཟུང་བས་ཟག་པ་རྒྱས་ཏེ་ཉོན་མོངས་དུག་ལྔ་སྟོབས་འཕེལ་བས་རེག་པ་ལ་སོགས་པ་སེམས་ལས་བྱུང་བ་ཀུན་ཀྱང་དེ་དང་མཚུངས་པར་ལྡན་པའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

གང་ཡོངས་སུ་མ་དག་པའི་སྐྱེ་རྒྱུད་བསྟན་པའི་ལེའུ་སྟེ་ཉི་ཤུ་པའོ།།

སངས་རྒྱས་ཀུན་གྱི་དགོངས་༼༣༢༤༽པ་འདུས་པའི་མདོ་ཆེན་པོ་ལས། གང་ཐར་པ་ནག་པོ་ནས་རུ་ཏྲའི་བར་ཡོངས་སུ་མ་དག་པའི་སྐྱེ་བརྒྱུད་བསྟན་པའི་ལེའུ་སྟེ་ཉི་ཤུ་པ་རྣམ་པར་བཤད་པའོ།། །།

ལེའུ་ཉེར་གཅིག་པ་འདས་པ་སྔོན་བྱུང་བ།

༈ བཞི་པ་སྔགས་འབྱུང་བའི་རྒྱུར་ཇི་ལྟར་འགྱུར་བ་ལ་གཉིས་ཏེ། འཁོར་དང་སྤྱོད་ཡུལ་ལོག་པར་བསྒྱུར་བས་སྔགས་འབྱུང་བའི་རྒྱུར་གྱུར་པ། སྲིད་གསུམ་དབང་དུ་བསྡུ་ལུགས་ཀྱིས་སྔགས་འབྱུང་བའི་རྒྱུར་བསྟན་པའོ། །དང་པོ་ལ་གཉིས་ཏེ། ང་རྒྱལ་གྱི་ཚིག་སྒྲོག་པ། ཇི་ལྟར་ལོག་པར་བསྒྱུར་བའོ། །དང་པོ་ནི།

དེ་ནས་ཡང༌། ཞེས་པ་ནས། སྒྲོགས་སོ། །ཞེས་པའི་བར་གྱིས་བསྟན་ཏེ།

དེ་ནས་ཡི་དྭགས་དྲག་པོ་དེ་ང་རྒྱལ་གྱི་གཏུམ་སྐད་འབྱིན་ཏེ། ཨེ་མའོ་ཐམས་ཅད་ཀྱི་དབང་ཕྱུག་ཆེན་པོ་ནི་བདག་ཡིན་ན། བདག་ལས་གཞན་པའི་དབང་ཕྱུག་དང་། ཕྲུ་མ་ཡོད་ན་དེ་ཡང་བདག་གིར་འགྱུར་ན། བདག་ནི་འགྲན་གྱི་ཟླ་མེད། ཆེ་བཙན་གཅིག་པུར་འབྱུང་ངོ་། །ཞེས་ང་རྒྱལ་གྱི་གདངས་ངར་སྒྲོགས་སོ།།

ལེའུ་འདིས་དྲང་དོན་སྟོན་ནོ། །དེར་སྐྱེས་པའི་ངོ་བོ་དང་རང་སྐལ་གྱི་ལས་ཀྱི་ནུས་མཐུ་གང་ཞེ་ན། དེ་ནས་ཡང་ངོ་བོ་སྲིན་པོར་གྱུར་པའི་ཡི་དྭགས་ཀྱི་སྡེ་དཔོན་དྲག་པོ་དེ་ཡིས། ང་རྒྱལ་ཅན་གྱི་རང་གི་མཐུ་ཡི་ཆེ་བ་རྙེད་པས་གཏུམ་སྐད་འབྱིན་ཏེ། ཨེ་མའོ་ཐམས་ཅད་ཀྱི་དབང་ཕྱུག་ཆེན་པོ་ནི་བདག་ཡིན་ན། བདག་ལས་གཞན་པའི་དབང་ཕྱུག་དང༌། མངའ་འབངས་ཀྱི་ཕྲུ་མ་ཡོད་ན་དེ་ཡང་བདག་གིར་འགྱུར་ཏེ་དབང་དུ་སྡུད་ན། བདག་ནི་འགྲན་གྱི་ཟླ་མེད་ཆེ་བཙན་གཅིག་པུར་བྱུང་ངོ་ཞེས་ང་རྒྱལ་གྱི་གདངས་ངར་སྒྲོགས་སོ། །དོན་དང་སྦྱར་ན། རུ་ཏྲ་ནི་ནང་གི་མུ་སྟེགས་ཏེ། དེའི་བསྟན་པ་ལོག་པ་ལ་ཁམས་གསུམ་བཀོད་པའོ།།

གཉིས་པ་ཇི་ལྟར་ལོག་པར་བསྒྱུར་བ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེའི་ཚེ། ཞེས་པ་ནས། གྲགས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེའི་ཚེ་འགྲོ་བ་རྣམས་ཀྱི་ཚུལ་འདི་ལྟར་བྱུང་སྟེ། ཤེས་བློ་ཐམས་ཅད་མུགས་ཤིང་བདུད་ཀྱིས་བྱིན་གྱིས་བརླབས་པས། ཐམས་ཅད་ཀྱང་ཤིན་ཏུ་སྟོང་པ་རྒྱུན་ཆད་དུ་གྱུར་ཏེ། མཐའ་ཟད་པ་ཤ་སྟག་གོ །བདག་ཏུ་ཞེན་པར་གྱུར་ཏེ། ཐེར་ཟུག་པ་ཤ་སྟག་གོ །འགོག་པ་འཇུག་པར་གྱུར་ཏེ། འགགས་ཤིང་འདས་པ་ཤ་སྟག་གོ །གདུག་ཅིང་གཏུམ་པར་གྱུར་ཏེ། འོ་དོད་འབོད་པར་ལྟུང་བ་ཤ་སྟག་གོ །ལོག་པར་ལྟ་བར་གྱུར་ཏེ། མནར་མེད་པར་ལྟུང་བ་ཤ་སྟག་གོ །བརྐམས་ཤིང་འཇུངས་པར་གྱུར་ཏེ། གཤིན་རྗེའི་འཇིག་རྟེན་དུ་ལྟུང་བ་ཤ་སྟག་གོ །ཤིན་ཏུ་གཡེང་བ་ཆེན་པོར་གྱུར་ཏེ། མི་ཁོམ་པའི་གནས་སུ་ལྟུང་བ་ཤ་སྟག་གོ །ཤིན་ཏུ་གཏི་མུག་རྨོངས་པར་གྱུར་ཏེ། བྱོལ་སོང་གི་གནས་སུ་ལྟུང་བ་ཤ་སྟག་གོ །ཤིན་ཏུ་ཆགས་པས་མྱོས་པར་གྱུར་ཏེ། མངལ་གྱི་ཁམས་སུ་འགྲོ་བ་ཤ་སྟག་གོ །བྱང་ཆུབ་ཀྱི་ཤིང་བསྐམས་པས། སེམས་ཀྱི་རྩ་བ་ཚིག་པ་ཤ་སྟག་གོ །ལང་ཀའི་བདག་པོ་དེ་ཡང་འདི་ལྟར་གྲགས་ཤིང་གྲགས་ཏེ། གྲགས་པར་གྱུར་ཏོ།།

དེའི་ལས་དང་ནུས་མཐུ་ལོག་ལྟ་ཅན་དུ་གྱུར་པ་ནི། རུ་ཏྲ་འཇིག་རྟེན་དུ་བྱུང་བ་དེའི་ཚེ་འགྲོ་བ་རྣམས་ཀྱི་ཚུལ་འདི་ལྟར་བྱུང་སྟེ། རུ་ཏྲས་བསླད་པས་ཤེས་བློ་ཐམས་ཅད་རྨུགས་ཤིང་བདུད་ཀྱིས་བྱིན་གྱིས་བརླབས་པས་རྟགས་སུ་འགྲོ་བའི་སྤྱོད་པ་དང་བློ་ཐམས་ཅད་ཀྱང་ལོག་པར་ལྟ་བ་དགུ་ལ་གནས་ཤིང༌། དེས་དབང་བྱས་པས་ལྟུང་བའི་འབྲས་བུ་དང་བཅས་པར་གྱུར་ཏེ། སྐྱེ་བ་སྔ་ཕྱི་དང་ལས་རྒྱུ་འབྲས་ཀྱི་ཆོས་ཀྱིས་ཤིན་ཏུ་སྟོང་པར་ལྟ་བས་བྱང་ཆུབ་ཀྱི་བསམ་པ་རྒྱུན་ཆད་པ་ཅན་དུ་གྱུར་ཏེ། མཐའ་ཟད་པ་སྟོང་པ་ཉི་ཚེ་བར་གོལ་བ་ཤ་སྟག་གོ །གང་ཟག་གི་བདག་ཏུ་ཞེན་པར་གྱུར་ཏེ། ཐེར་ཟུག་པ་རྟག་ལྟ་ལ་གོལ་བ་ཤ་སྟག་གོ །ཡང་དག་པའི་བསམ་པ་དང་ཚོགས་དྲུག་འགོག་པར་འཇུག་པར་གྱུར་ཏེ་ཚོགས་དྲུག་གི་ཤེས་རྒྱུན་འགགས་ཤིང་དོན་ལས་འདས་ཏེ་མུན་པར་ཞུགས་པ་ཤ་སྟག་གོ །༼༣༢༥༽ཞེ་སྡང་གིས་སེམས་གདུག་ཅིང་ལུས་གཏུམ་པར་གྱུར་ཏེ། འོ་དོད་འབོད་པ་དམྱལ་བར་ལྟུང་བ་ཤ་སྟག་གོ །མཆོག་གསུམ་མེད་ཅེས་ལོག་པར་ལྟ་བར་གྱུར་ཏེ་འབྲས་བུ་མནར་མེད་པར་ལྷུང་བ་ཤ་སྟག་གོ །སེར་སྣའི་དབང་གིས་འདོད་པ་ལ་བརྐམ་ཞིང་འཇུངས་པར་གྱུར་ཏེ། གཤིན་རྗེའི་འཇིག་རྟེན་དུ་ལྟུང་བ་ཤ་སྟག་གོ །ལེ་ལོའི་དབང་གིས་ཤིན་ཏུ་གཡེང་བ་ཆེན་པོར་གྱུར་ཏེ། མི་ཁོམ་པའི་རིས་བརྒྱད་ཀྱི་གནས་སུ་ལྟུང་བ་ཤ་སྟག་གོ །ཤིན་ཏུ་གཏི་མུག་གི་རྨོངས་པར་གྱུར་ཏེ། བྱོལ་སོང་གི་གནས་སུ་ལྟུང་བ་ཤ་སྟག་གོ །འཁྲིག་པ་ལ་ཤིན་ཏུ་ཆགས་པས་མྱོས་པར་གྱུར་ཏེ། མངལ་གྱི་ཁམས་སུ་འགྲོ་བ་ཤ་སྟག་གོ །དེ་ལྟར་ལོག་པར་ལྟ་བ་རྣམས་ཀྱིས་བྱང་ཆུབ་ཀྱི་ཤིང་སྐམས་པས་སེམས་ཀྱི་རྩ་བ་ཚིག་པ་ཤ་སྟག་གོ །ལང་ཀའི་བདག་པོ་དེ་ཡང་རུ་ཏྲ་རྗེས་འབྲང་དང་བཅས་པ་འདི་ལྟར་ལོག་པར་གྲགས་ཤིང་གྲགས་ཏེ། ད་ལྟར་ཡང་གྲགས་པར་གྱུར་ཏོ།།

གཉིས་པ་རྒྱས་པར་བཤད་པ་ལ་དགུ་སྟེ། སྟོང་པ་རྒྱུན་ཆད་དུ་བསྒྱུར་བ། བདག་ཏུ་ཞེན་པར་བསྒྱུར་བ། འགོག་པར་འཇུག་པར་བསྒྱུར་བ། གདུག་ཅིང་གཏུམ་པར་བསྒྱུར་བ། ལོག་པར་ལྟ་བར་བསྒྱུར་བ། བརྐམ་ཞིང་འཇུངས་པར་བསྒྱུར་བ། ཤིན་ཏུ་གཡེངས་པར་བསྒྱུར་བ། གཏི་མུག་རྨོངས་པར་བསྒྱུར་བ། ཆགས་པས་མྱོས་པར་བསྒྱུར་བའོ། །དང་པོ་ནི།

འདས་པའི་དུས་ན། ཞེས་པ་ནས། ལམ་ནི་ཆད་པར་འགྱུར། །ཞེས་པའི་བར་གྱིས་བསྟན་ཏེ།

འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་བརྟག་པ་ན། །དེ་བཞིན་གཤེགས་པའི་གསུང་རབ་ལ།།

འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་སྟོང་པ་ཉིད་ལ་བརྩོན།།

སྟོང་པ་ཉིད་དུ་མུ་ཆད་པས། །ཆད་པའི་ཁམས་ཆེན་ཉིད་དུ་གྱུར།།

དེ་ནས་སླར་ཡང་འཕོས་པ་ཡིས། །གྲོལ་ཐར་ལམ་ནི་འཆད་པར་འགྱུར།།

གོལ་བའི་དུས་བསྐལ་པ་གྲངས་མེད་མང་པོ་འདས་པའི་དུས་ན་སྔོན་དུ་བྱུང་བའི་བསྐལ་པ་མངོན་དགའ་ཞེས་བྱ་བར། ཞིང་ཁམས་ཀུན་དགའ་ཞེས་བྱ་བ་ལ། སངས་རྒྱས་མི་བསྐྱོད་པའི་བསྟན་པ་ལ་ཐར་པ་ནག་པོ་ཞེས་བྱ་བར་བྱུང་བ་དེས། གོལ་བའི་གཞི་རིགས་ཀྱི་བདག་པོ་ཆེན་པོ་ངོ་བོ་མི་འགྱུར་བའི་བཀའ་གསང་རང་བྱུང་འདུས་མ་བྱས་པའི་ བདག་ཉིད་ཟག་པ་མེད་པའི་ཡེ་ཤེས་ཆེན་པོ་ནི་སངས་རྒྱས་ཀུན་གྱི་ངོ་བོ་ཉིད་དེ། དེ་ལས་སྤྲུལ་པ ་རྒྱུན་དུ་འབྱུང་བ་དང༌། ལོངས་སྤྱོད་ཆེན་པོར་བར་མ་ཆད་པ་དང༌། ཆོས་ཀྱི་སྐུ་ལ་སྐྱེ་འགག་མེད་པའི་ཕྱིར། ཇི་སྐད་དུ། བདེ་བ་ཆེན་པོ་རྟག་ཏུ་རྟག །ཅེས་དང༌། བདེ་བ་ཆེན་པོ་དག་ལ་རྟག་བཞུགས་པ། །ཞེས་གསུངས་པ་ལྟར་ཆོས་ཉིད་འཕོ་འགྱུར་དང་བྲལ་བས་རྟག་པ་དམ་པ་ཡི་གནས་ལུགས་ཇི་བཞིན་པ་མ་བཅོས་མ་བསླད་པར་སྟོན་པའི་དེ་བཞིན་གཤེགས་པས་བསྟན་པའི་གསུང་རབ་གསང་སྔགས་ཐེག་པ་ཆེན་པོ་ཇི་ལྟ་བའི་དོན་མ་གོ་བ་ལས་གོལ་༼༣༢༦༽བའི་དངོས་པོར་སྨིན་ཏེ། འགྲོ་བའི་སྡེ་དཔོན་སྲིན་པོའི་ཚུལ་དུ་མ་ཏྲཾ་ཀ་དྲེགས་པ་ཆེན་པོར་སྔོན་བྱུང་བ་ནི། སྤྱིར་འཁོར་བ་ཐོག་མ་དང་ཐ་མ་མེད་པར་འབྱུང་བས་ན། སྐབས་ཀྱི་ཆ་གཅིག་ཏུ་བརྩི་ན་གསང་བའི་ཐེག་པ་མ་བྱུང་གི་གོང་དུ་བསྐལ་པ་འདི་ཉིད་ལའང་འཆད་པ་བཞིན་འབྱུང་ངོ༌། །འོན་ཀྱང་ལེའུ་རྩ་བཞི་པ་ལས། འདས་པའི་དུས་ན་སྔོན་བྱུང་ལྟར། །ད་ལྟ་དུས་འདི་ཉིད་དུ་བྱུང༌། །ཞེས་འབྱུང་བས་འདི་ནི་སྔོན་གྱི་ལོ་རྒྱུས་བརྗོད་པའི་དབང་དུའོ། །དེའི་རྩལ་གྱིས་ལོག་པར་དྲངས་ཏེ་རུ་ཏྲ་བྱུང་བ་དེ་ཡི་ཚེ་འགྲོ་བ་སེམས་ཅན་ཐམས་ཅད་ནི་བློ་དྲེགས་པས་བརླབས་ནས་ཚེ་སྔ་ཕྱི་དང་ལས་དང་འབྲས་བུས་ཤིན་ཏུ་སྟོང་པ་ཉི་ཚེ་བ་ཆད་པའི་ལྟ་བ་ཉིད་ལ་བརྩོན་ཏེ་ལོག་པར་གནས་སོ། །འདི་ནི་ཞིང་ཁམས་མངོན་དགའི་དུས་ཐར་པས་གདུལ་བྱ་རྣམས་དེ་ལྟར་བཙུད་པ་དང༌། རུ་ཏྲའི་དུས་སུ་སེམས་ཅན་རྣམས་དེ་ལྟར་གྱུར་པ་གཉིས་ཀ་ལ་གོ་བར་བྱ་སྟེ་འོག་མ་རྣམས་ལའང་འགྲེའོ། །དེའི་ཉེས་པ་དེ་ལྟར་ཉི་ཚེའི་སྟོང་པ་ཆད་པ་ཉིད་དུ་མུ་བཅད་པས། ལྟ་ངན་གྱི་རྒྱུ་དེས་འབྲས་བུ་རིགས་ཆད་པའི་ཁམས་ཆེན་རྡོ་རྗེ་དམྱལ་བ་ཉིད་དུ་སྐྱེ་བར་གྱུར་ཏོ། །གལ་ཏེ་གནས་ངན་དེ་ནས་སླར་ཡང་འཕོས་ཏེ་མིར་སྐྱེས་པ་ནའང་ལྟ་ངན་དེ་ལ་དགའ་སྟེ་ལོང་འདོགས་པ་ཡིས་རྒྱུ་མཐུན་ལས་གྲོལ་བ་དང་ཐར་པའི་ལམ་ནི་ཆད་པར་འགྱུར་ཞིང་སྐབས་མེད་པའོ། །མདོར་ན་དང་པོ་གོལ་བའི་དུས་དང༌། གཞིའམ་རྒྱུ་དང༌། གོལ་བ་དངོས་པོར་བྱུང་བའི་དུས་དང༌། དེའི་རྩལ་གྱིས་དགེ་བའི་མྱུ་གུ་ཆད་པ་དང༌། རིལ་ལོག་པའི་ལམ་དུ་དྲངས་པས་གནས་ངན་དུ་ལྟུང་བ་དང༌། དེ་ལས་ཐར་ཀྱང་ལྟ་བ་ངན་པའི་ལོང་འདོགས་པ་དང་དྲུག་པོ་འདི་འཆད་པ་རྣམས་ལའང་སྦྱར་བར་བྱའོ།།

གཉིས་པ་བདག་ཏུ་ཞེན་པར་བསྒྱུར་བ་ནི།

འདས་པའི། ཞེས་པ་ནས། དག་ལ་རྨོངས་པར་འགྱུར། །ཞེས་པའི་བར་གྱིས་བསྟན་ཏེ།

འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་བརྟག་པ་ཡི། །དེ་བཞིན་གཤེགས་པའི་གསུང་རབ་ལ།།

འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་བདག་ཏུ་བལྟ་ལ་བརྩོན།།

ཐེར་ཟུག་རྟག་པ་བདག་ཆེན་གྱིས། །ཐམས་ཅད་རྟག་པ་ཉིད་དུ་འགྱུར།།

དེ་ནས་དེ་ཉིད་སླར་བྱུང་བས། །དམ་པ་དག་ལ་རྨོངས་པར་འགྱུར།།

དེའང་ཆོས་དྲུག་པོ་ཀུན་ལ་སྦྱར་ཏེ་གོལ་བའི་དུས་འདས་པའི་དུས་ན་སྔོན་དུ་བྱུང་བ་བསྐལ་པ་ཀུན་དགའ་ལ། ཐར་པ་ནག་པོ་ཞེས་བྱ་བ། གོལ་བའི་གཞི་རིག་པ་བདག་ཉིད་ཆེན་པོ་ཀུན་བྲལ་ཉག་གཅིག་ཅི་མ་སྤང་བ་ངོ་བོ་མི་འགྱུར་བས་རྟག་པ་འདུས་མ་བྱས་པ་ཡི་རང་བཞིན་གསང་བ་དམ་པ་ཉིད་སྟོན་པའི་དེ་བཞིན་གཤེགས་པའི་གསུང་རབ་གསང་ཆེན་ནང་གི་རྒྱུད་ཀྱི་དོན་ཟབ་མོ་མ་གོ་བ་ལས་གོལ་བའི་དངོས་པོ་འགྲོ་བའི་སྡེ་དཔོན་སྲིན་པོའི་ཚུལ་དུ་སྔོན་༼༣༢༧༽རུ་ཏྲ་ཉིད་དུ་བྱུང་བ། དེའི་ཚེ་ན་སེམས་ཅན་ཐམས་ཅད་ཀྱང་ལོག་པའི་རྩལ་གྱིས་བསྒྱུར་བ་ནི་ལྷན་སྐྱེས་ཀྱི་ལྕགས་སྒྲོག་ལ་ཀུན་བཏགས་ཀྱི་གཟེར་བཏབ་ནས་ཤིན་ཏུ་གང་ཟག་ལ་བདག་ཏུ་ལྟ་ཞིང་སྒྲོ་འདོགས་པ་ལ་བརྩོན་ནོ། །དེའི་ཉེས་པས་བརྟགས་པ་ལྟར་ཐེར་ཟུག་རྟག་པའི་བདག་ཆེན་གྱིས་ཞེན་པས་རྒྱུད་འཆིང་སྟེ་ཐམས་ཅད་ཀྱང་འཁོར་བའི་དངོས་པོ་གནས་ངན་ལས་ཐར་པ་ མེད་པར་རྟག་པ་ཉིད་དུ་འཁོར་བར་གྱུར་ཏོ། །དེ་ནས་སྐྱེ་བ་འཕོས་ཀྱང་བདག ་རྟོག་དེ་ཉིད་སླར་བྱུང་ནས་ལོང་བཏགས་པས་ཡང་དག་པའི་ལམ་དམ་པ་ བདག་མེད་ཀྱི་དོན་སྟོན་པ ་དག་ལ་རྨོངས་ཏེ་ལྷག་མཐོང་གི་སྣང་བ་དང་བྲལ་བར་འགྱུར་རོ།།

གསུམ་པ་འགོག་པར་འཇུག་པར་བསྒྱུར་བ་ནི།

འདས་པའི། ཞེས་པ་ནས། ཡོངས་སུ་འདས་པར་འགྱུར། །ཞེས་པའི་བར་གྱིས་བསྟན་ཏེ།

འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་བརྟག་པ་ཡི། །དེ་བཞིན་གཤེགགས་པའི་གསུང་རབ་ལ།།

འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་འགོག་ལ་བརྩོན་པར་འགྱུར།།

ཤིན་ཏུ་འགོས་པའི་སྦྱོར་བ་ཡིས། །འགགས་ཤིང་ཡོངས་སུ་འདས་པར་འགྱུར།།

གོལ་བའི་དུས་འདས་པའི་དུས་ན་སྔོན་གྱི་བསྐལ་པ་ཀུན་དགའ་ལ་དགེ་སློང་ཐར་པར་བྱུང་བ་ཉིད། གོལ་གཞི་རང་རིག་ བདག་ཉིད་ཆེན་པོ་སྣང་མེད་རྣམ་པ ་ཐམས་ཅད་པ་ངོ་བོ་འདུས་མ་བྱས་པས་རྟག་པ་དམ་པ་ཡི་རང་བཞིན་གསང་བ་ཆེན་པོ་ཉིད་གསལ་བར་སྟོན་པའི་དེ་བཞིན་གཤེགས་པའི་གསུང་རབ་གསང་སྔགས་ནང་གི་རྒྱུད་ཀྱི་དོན་མཆོག་གསང་བ་ཇི་བཞིན་དུ་མ་གོ་བ་ལས་གོལ་བའི་དངོས་པོ་འགྲོ་བའི་དབང་ཕྱུག་སྲིན་པོའི་ཚུལ་དུ་རུ་ཏྲར་སྨིན་ཏེ་སྔོན་གྱི་དུས་སུ་བྱུང་བ་ན། དེའི་ཚེ་ལོག་པའི་རྩལ་རྒྱས་པས་སེམས་ཅན་ཐམས་ཅད་ནི་བྱང་ཆུབ་ཀྱི་བསམ་པ་དང་བྲལ་ཏེ་ཚོགས་དྲུག་ཤིན་ཏུ་འགོག་པའི་འདུ་ཤེས་མེད་པ་ལ་བརྩོན་པར་གྱུར་ཏོ། །དེ་ལྟར་ཤིན་ཏུ་འགོག་པའི་སྦྱོར་བ་ལ་གོམས་པ་ཡིས་འབྲས་བུ་ཚོགས་དྲུག་འགག་པའི་གནས་ངན་དུ་འཁྱམས་ཤིང་བྱང་ཆུབ་མཆོག་གི་ལམ་འབྲས་ཀྱི་དོན་ལས་ཡོངས་སུ་འདས་པར་འགྱུར་ཞིང་སླར་ཡང་ལྟ་བ་དེ་ཉིད་ལ་དགའ་སྟེ་ལོང་འདོགས་པས་ཐར་པ་མེད་དོ།།

བཞི་པ་གདུག་ཅིང་གཏུམ་པར་བསྒྱུར་བ་ནི།

འདས་པའི། ཞེས་པ་ནས། འཇིག་རྟེན་འཕོ་བར་བྱེད། །ཅེས་པའི་བར་གྱིས་བསྟན་ཏེ།

འདས་པའི་དུས་ན་སྔོན་བྱུང་བ། །བདག་ཉིད་ཆེན་པོར་བརྟག་པ་ཡིས། །དེ་བཞིན་གཤེགས་པའི་གསུང་རབ་ལ།།

འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་ཁྲོ་གཏུམ་གདུག་པར་འགྱུར། །ཤིན་ཏུ་ཁྲོ་གཏུམ་གདུག་པ་ཡིས། །འོ་དོད་འབོད་པར་ལྟུང་བར་འགྱུར། །དེ་ནས་འཕོས་པའི་སེམས་ཅན་དེ། །བག་ཆགས་ལས་ཀྱི་མཚམས་སྦྱར་བས། །ཤིན་ཏུ་གདུག་པ་ཆེན་པོར་གྱུར། །བློ་ཡང་བདུད་ཀྱིས་བྱིན་བརླབས་ནས། །དུག་ནད་རིམས་ནད་ཕྲ་མེན་མ། །གནོད་པའི་ཟུག་རྔུ་ཟིར་མདའ་འཕྲོ། །བདུད་དང་ལོག་འདྲེན་རྣམ་པར་འཚེ། །ཤིན་ཏུ་གཏུམ་རྔམ་མ་རུངས་པ། །འཇིག་རྟེན་གསུམ་དག་འཇིགས་བྱེད་ཅིང་། །དམ་ཚིག་དག་ལ་ཟ་བ་དང་། །དམ་པའི་ཆུ་བོ་དགའ་ཟློ་སྟེ། །ལྷ་མི་འཇིག་རྟེན་འཕོ་བར་བྱེད།།

འདས་པའི་དུས་ན་སྔོན་གྱི་བསྐལ་པ་ཀུན་དགའ་ལ་བྱུང་བའི་ཐར་པ་ནག་པོ་དེས། རང་རིག་ པ་བདག་ཉིད་ཆེན་པོ་ཕྱོགས་མེད ་ཇི་བཞིན་པའི་གནས་ལུགས་ངོ་བོ་འཕོ་འགྱུར་བྲལ་བས་རྟག་པ་དམ་པ་ཡི་བཀའ་གསང་དེ་བཞིན་གཤེགས་པའི་གསུང་རབ་ནང་རྒྱུད་རིན་པོ་ཆེའི་ངེས་པ་ལས་གོལ་ཏེ་འགྲོ་བའི་སྡེ་དཔོན་དྲེགས་པ་ཆེན་པོའི་ཚུལ་དུ་སྔོན་ཚེ་མ་ཏྲཾ་ཀར་བྱུང་བ་དེ་ཡི་ཚེ་ན་སེམས་ཅན་ཐམས་ཅད་ནི། ༼༣༢༨༽ཤིན་ཏུ་མ་རུངས་པ་ལུས་ཁྲོ་ཞིང་ངག་གཏུམ་ལ་སེམས་གདུག་པར་གྱུར་ཏོ། །དེ་ལྟར་ཤིན་ཏུ་ཁྲོ་གཏུམ་གདུག་པ་ལ་གོམས་པའི་ལས་དེ་ཡིས་རུ་ཏྲའི་སྐྱེ་རྒྱུད་ལྟ་བུ་ངན་སོང་གསུམ་དུ་བརྒྱུད་ཅིང་ལྷག་པར་ཡང་དམྱལ་བའི་གནས་སུ་འོ་དོད་འབོད་པར་ལྟུང་བར་འགྱུར་རོ། །བརྒྱ་ལམ་ན་དེ་ནས་འཕོས་ཏེ་མིར་སྐྱེས་པའི་སེམས་ཅན་དེས་ཀྱང་སྔོན་གྱི་བག་ཆགས་ངན་པའི་ལས་ཀྱིས་འཚམས་སྦྱར་བས་རུ་ཏྲ་ལྟ་བུ་ཤིན་ཏུ་གདུག་པ་ཆེན་པོར་འགྱུར་ལ། བློ་ཡང་ནག་ཕྱོགས་བདུད་རིགས་ཀྱིས་བྱིན་གྱིས་བརླབས་ནས་དུག་ནད་དང་རིམས་དང་ཕྲ་མེན་མ་སོགས་གཞན་ལ་གནོད་པའི་ཟུག་རྔུ་སྣ་ཚོགས་ཀྱི་ཟེར་མདའ་འཕྲོ་ཞིང་ཀུན་ལ་བདུད་དང་ལོག་འདྲེན་གྱི་ཚུལ་དུ་རྣམ་པར་འཚེ་སྟེ་ཤིན་ཏུ་གཏུམ་རྔམ་མ་རུངས་པར་གྱུར་པས་ས་བླ་མན་ཆད་ཀྱི་འཇིག་རྟེན་གསུམ་དག་འཇིག་པར་བྱེད་ཅིང༌། དམ་ལྡན་ལ་སྡང་ཞིང་དམ་ལ་མི་གནས་པར་བྱེད་པས་དམ་ཚིག་དག་ལ་ཟ་བ་དང༌། དགེ་བའི་ལམ་གྱི་དམ་པའི་ཆུ་བོ་རྐ་ནས་བཟློག་སྟེ། ལྷ་མིའི་འཇིག་རྟེན་འཕོ་ཞིང་ཉམས་པར་བྱེད་དོ། །ཡང་ན་རུ་ཏྲ་ལྟ་བུ་ཐམས་ཅད་བསད་ཅིང་སྡུད་པར་སེམས་པའོ། །འདི་ཉིད་རུ་ཏྲ་ཡིན་ན་སེམས་ཅན་ཐམས་ཅད་ཅེས་པ་དང་འགལ་ལ། སེམས་ཅན་ཡིན་ན་ལྷ་མིའི་འཇིག་རྟེན་འཕོ་བར་བྱེད་པ་དང་འགལ་ལོ་ཞེས་བཀོད་ཀྱང་སེམས་ཅན་གྱི་རིས་ལ་རུ་ཏྲ་ལྟ་བུ་གཞན་ཡང་འབྱུང་བར་ངེས་པས་ཤིན་ཏུ་འཐད་པར་མངོན་ནོ།།

ལྔ་པ་ལོག་པར་ལྟ་བར་བསྒྱུར་བ་ནི།

འདས་པའི། ཞེས་པ་ནས། མཉམ་ཉིད་ཆད་པར་འགྱུར། །ཞེས་པའི་བར་གྱིས་བསྟན་ཏེ།

འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་བརྟག་པ་ཡི། །དེ་བཞིན་གཤེགས་པའི་གསུང་རབ་ལ།།

འགྲོ་བའི་ཚུལ་དུ་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ལོག་པར་ལྟ་ལ་གནས་པར་གྱུར།།

ལྟ་བ་ཤིན་ཏུ་ལོག་པ་ཡི། །མནར་མེད་དམྱལ་བ་ཆེན་པོར་ལྟུང་།།

དེ་ནས་གལ་ཏེ་སླར་བྱུང་ན། །དམ་པའི་མཉམ་ཉིད་ཆད་པར་འགྱུར།།

འདས་པའི་དུས་ན་སྔོན་གྱི་བསྐལ་པ་ཀུན་དགའ་ལ་བྱུང་བ་དགེ་སློང་ཐར་པས། རིག་པ་ བདག་ཉིད་ཆེན་པོ་ཀུན་མཉམ་ཡངས་པ་ངོ་བོ་འགྱུར་མེད་རྟག་པ ་དམ་པ་ཡི་བཀའ་གསང་དེ་བཞིན་གཤེགས་པའི་གསུང་རབ་ནང་རྒྱུད་རིན་པོ་ཆེའི་ངེས་པ་ལས་གོལ་ཏེ་འགྲོ་བའི་ཆེ་བཙན་སྲིན་པོའི་ཚུལ་དུ་སྔོན་ཚེ་བྱུང་ནས་རུ་ཏྲར་སྨིན་པ་དེ་ཡི་ཚེ་ན་སེམས་ཅན་ཐམས་ཅད་ནི། སྤྱིར་ན་ཀུན་ལོག་པ་འབའ་ཞིག་ལ་འདིར་ཁྱད་པར་དུ་བརྗོད་དེ་མ་ལོག་པའི་བསྟན་པ་ལ་ཞུགས་པའང་ལོག་པར་ལྟ་བ་ལ་གནས་པར་གྱུར་ཏོ། །དེ་ལྟར་ལྟ་བ་ཤིན་ཏུ་ལོག་པ་ལ་གོམས་པ་ཡིས་མནར་མེད་པའི་སེམས་ཅན་དམྱལ་བ་ཆེན་པོར་ལྟུང་ངོ༌། །དེ་ནས་གལ་ཏེ་བརྒྱ་ལམ་ན་སླར་བྱུང་སྟེ་མིར་སྐྱེས་ན་ཡང༌། ཐར་པ་བྱང་ཆུབ་དམ་པའི་ལམ་གྱི་སྣང་བ་ཉིད་ཆད་པར་འགྱུར་རོ།།

དྲུག་པ་བརྐམ་ཞིང་འཇུངས་པར་བསྒྱུར་བ་ནི།

འདས་པའི། ཞེས་པ་ནས། གསོད་ཅིང་༼༣༢༩༽འཇོམས་པར་འགྱུར། །ཞེས་པའི་བར་གྱིས་བསྟན་ཏེ།

འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་བརྟག་པ་ཡི། །དེ་བཞིན་གཤེགས་པའི་གསུང་རབ་ལ།།

འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་བརྐམས་ཤིང་འཇུངས་པར་འགྱུར།།

ཤིན་ཏུ་གདུངས་འཇུངས་བརྐམས་པ་ཡིས། །ཡི་དྭགས་གཤིན་རྗེའི་ཁམས་སུ་ལྟུང་།།

དེ་ནས་དེ་ཉིད་སླར་བྱུང་བས། །ཤིན་ཏུ་སྐེམ་པོའི་དབུལ་པོར་གྱུར།།

བཀྲེས་སྐོམ་གདུང་བས་ཉེན་པ་ཡིས། །ཕན་ཚུན་གསོད་ཅིང་འཇོམས་པར་འགྱུར།།

འདས་པའི་དུས་ན་སྔོན་གྱི་ཞིང་ཁམས་མངོན་དགའ་ལ་བྱུང་བ་ཐར་པ་ནག་པོས། རང་རིག་ བདག་ཉིད་ཆེན་པོ་རང་བཞིན་ཀུན་ཏུ་སྣང་བའི་དབྱིངས་ངོ་བོ་འགྱུར་མེད་རྟག་ཆེན་འདུས་མ་བྱས་པ ་ཡི་བཀའ་གསང་དེ་བཞིན་གཤེགས་པའི་གསུང་རབ་ནང་རྒྱུད་རིན་པོ་ཆེའི་ངེས་པ་ལས་གོལ་ཏེ་འགྲོ་བའི་དབང་ཕྱུག་སྲིན་པོའི་ཚུལ་དུ་སྔོན་ཚེ་རུ་ཏྲར་བྱུང་བ་དེ་ཡི་ཚེ་ན་སེམས་ཅན་ཐམས་ཅད་ནི་འདོད་པ་ལ་ཤིན་ཏུ་གདུང་བའི་སེར་སྣས་རང་གི་ཡོ་བྱད་ལ་བརྐམས་ཤིང་གཞན་ནོར་ལ་འཇུངས་པར་གྱུར་ཏོ། །དེ་ལྟར་ཤིན་ཏུ་འདོད་པས་གདུངས་ནས་རང་གཞན་གྱི་ཡོ་བྱད་ལ་འཇུངས་ཤིང་བརྐམས་པ་ཡིས། ཡི་དྭགས་ཀྱི་འཇིག་རྟེན་གཤིན་རྗེའི་ཁམས་སུ་ལྟུང་ངོ༌། །དེ་ནས་དེ་ཉིད་སླར་བྱུང་བས་མི་རུ་གྱུར་ཀྱང་ཤིན་ཏུ་སྐེམ་པ་ཕོངས་ཤིང་དབུལ་པོར་འགྱུར་ཞིང༌། བཀྲེས་དང་སྐོམ་པས་ཤིན་ཏུ་གདུང་བ་ཡིས་ཟས་ནོར་གྱི་ཕྱིར་ཕན་ཚུན་གསོད་ཅིང་འཇོམ་པར་འགྱུར་བས་ཐར་པ་དང་བྲལ་ལོ།།

བདུན་པ་ཤིན་ཏུ་གཡེངས་པར་བསྒྱུར་བ་ནི།

འདས་པའི། ཞེས་པ་ནས། གསུམ་གྱིས་བསྐལ་པར་འགྱུར། །ཞེས་པའི་བར་གྱིས་བསྟན་ཏེ།

འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་བརྟག་པ་ཡི། །དེ་བཞིན་གཤེགས་པའི་གསུང་རབ་ལ།།

འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། ཤིན་ཏུ་ལེ་ལོས་གཡེངས་པར་གྱུར།།

ཤིན་ཏུ་གཡེངས་པའི་ལེ་ལོ་ཡིས། །མི་ཁོམ་གནས་སུ་ལྟུང་བར་འགྱུར།།

དེ་ནས་དེ་ཉིད་སླར་བྱུང་བས། །བསྐལ་པ་གསུམ་གྱི་བསྐལ་པར་འགྱུར།།

འདས་པའི་དུས་ན་སྔོན་གྱི་ཞིང་ཁམས་མངོན་དགའ་ལ་བྱུང་བ་དགེ་སློང་ཐར་པས། རིག་ པ་བདག་ཉིད་ཆེན་པོ་བརྩལ་མེད ་ལྷུན་གྱིས་གྲུབ་པས་རྟག་ཆེན་འཕོ་འགྱུར་བྲལ་བ་ཡི་བཀའ་གསང་དེ་བཞིན་གཤེགས་པའི་གསུང་རབ་ནང་རྒྱུད་རིན་པོ་ཆེའི་ངེས་པ་ལས་གོལ་ཏེ་འགྲོ་བའི་དྲེགས་པ་སྲིན་པོའི་ཚུལ་དུ་སྔོན་ཆད་རུ་ཏྲར་བྱུང་བ་དེ་ཡི་ཚེ་ན་སེམས་ཅན་ཐམས་ཅད་ནི། རྒྱུ་དམན་པ་ལ་སྦྱོར་བ་དང་སྙོམས་ལས་འཛིན་པ་གཉིས་ཀྱིས་ཤིན་ཏུ་ལེ་ལོས་གཡེངས་པར་གྱུར་ཏོ། །དེ་ལྟར་ཤིན་ཏུ་གཡེང་བའི་ལེ་ལོ་ཡིས་རྣམ་སྨིན་མི་ཁོམས་པའི་གནས་བརྒྱད་རྣམས་སུ་ལྟུང་བར་གྱུར་ལ། དེ་ནས་དེ་ཉིད་ལས་ཐོན་ནས་སླར་བྱུང་བས་མི་རུ་སྐྱེས་ཀྱང་བསྐལ་པ་གྲངས་མེད་པ་གསུམ་གྱིས་ཡང་དག་པའི་ལམ་ལས་བསྐལ་ཏེ་འགྱང་བར་འགྱུར་རོ། །ཡང་ན་ཡུལ་དུས་རང་བཞིན་གསུམ་གྱིས་གསང་བའི་དོན་ལས་བསྐལ་པ་ལའང་གསུངས་སོ།།

བརྒྱད་པ་གཏི་མུག་རྨོངས་པར་བསྒྱུར་བ་ནི།

འདས་པའི། ཞེས་པ་ནས། ལམ་ཡང་ཆད་པར་འགྱུར། །ཞེས་པའི་བར་གྱིས་བསྟན་ཏེ།

འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་བརྟག་པ་ཡི། །དེ་བཞིན་གཤེགས་པའི་གསུང་རབ་ལ།།

འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་གཏི་མུག་རྨོངས་པར་གྱུར།།

ཤིན་ཏུ་གཏི་མུག་རྨོངས་པ་ཡིས། །གཏི་མུག་བྱོལ་སོང་ཉིད་དུ་ལྟུང་།།

དེ་ནས་དེ་ཉིད་སླར་བྱུང་བས། །མཐོང་སྣང་ལམ་ཡང་ཆད་པར་འགྱུར།།

འདས་པའི་དུས་ན་སྔོན་གྱི་ཞིང་ཁམས་མངོན་དགའ་ལ་བྱུང་བ་དགེ་སློང་ཐར་པས། རང་རིག་ བདག་ཉིད་ཆེན་པོ་མཉམ་ཉིད་བསལ་བཞག་མེད་པའི་རང་བྱུང་༼༣༣༠༽རྟག་པའི་ཆོས་ཉིད་འདུས་མ་བྱས་པ ་ཡི་བཀའ་གསང་དེ་བཞིན་གཤེགས་པའི་གསུང་རབ་ནང་རྒྱུད་རིན་པོ་ཆེའི་ངེས་པ་ལས་གོལ་ཏེ་འགྲོ་བའི་སྡེ་དཔོན་དྲག་པོའི་ཚུལ་དུ་སྔོན་ཚེ་མ་ཟན་མ་ཏང་ཀར་བྱུང་བ་དེ་ཡི་ཚེ་ན་སེམས་ཅན་ཐམས་ཅད་ནི་ལམ་ལེགས་ཉེས་འབྲས་བུ་དང་བཅས་པ་ལ་ཤིན་ཏུ་གཏི་མུག་ཅིང་རྨོངས་པར་གྱུར་ཏོ། །དེ་ལྟར་ཤིན་ཏུ་གཏི་མུག་དང་རྨོངས་པ་དེ་ཡིས། གཏི་མུག་མུན་པའི་སྐྱེ་མཆེད་བྱོལ་སོང་ཉིད་དུ་ལྷུང་བར་གྱུར་ལ། དེ་ནས་དེ་ཉིད་སླར་བྱུང་བས་མཐོ་རིས་སུ་སྐྱེ་ཡང༌། དཀོན་མཆོག་གསུམ་གྱི་མཐོང་སྣང་དང་ཡང་དག་པའི་ལམ་ཡང་ཆད་པར་འགྱུར་བའོ།།

དགུ་པ་ཆགས་པས་མྱོས་པར་བསྒྱུར་བ་ནི།

འདས་པའི། ཞེས་པ་ནས། ཞེས་ཐམས་ཅད་དུ་གྲགས་སོ། །ཞེས་པའི་བར་གྱིས་བསྟན་ཏེ།

འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་བརྟག་པ་ཡི། །དེ་བཞིན་གཤེགས་པའི་གསུང་རབ་ལ།།

འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་ཆགས་པས་མྱོས་པར་འགྱུར།།

ཤིན་ཏུ་ཆགས་པས་མྱོས་པ་ཡིས། །མངལ་གྱི་གྲོང་ཁྱེར་ཉིད་དུ་ལྟུང་། །དེ་ནས་དེ་ཉིད་སླར་བྱུང་བས།།

འདོད་པའི་མེ་ཡིས་གདུངས་པར་འགྱུར། །ཞེས་ཐམས་ཅད་དུ་གྲགས་སོ།།

ཆོས་དྲུག་གི་གོལ་བའི་སྐབས་འདས་པའི་དུས་ན་སྔོན་གྱི་བསྐལ་པ་ཀུན་དགའ་ཞེས་བྱ་བར་བྱུང་བ་དགེ་སློང་ཐར་པར་གྱུར་པའི་དུས་སུ། གོལ་བའི་གཞི་རིག་པ་རང་བྱུང་གི་ཡེ་ཤེས་ བདག་ཉིད་ཆེན་པོ་བདེ་ཆེན་དོན་གྱི་འོད་གསལ་ཟག་མེད་འདུས་མ་བྱས་པས་ངོ་བོ་མི་འགྱུར་པའི་རྟག་པ ་དམ་པ་ཡི་བཀའ་གསང་རྨད་དུ་བྱུང་བ་དེ་བཞིན་གཤེགས་པའི་གསུང་རབ་ནང་རྒྱུད་རིན་པོ་ཆེའི་ངེས་དོན་གསང་བ་ཟབ་མོ་ཇི་ལྟ་བ་བཞིན་མ་གོ་བ་ལས། གོལ་བའི་དངོས་པོ་འགྲོ་བའི་རྗེ་དཔོན་ཡི་དྭགས་སྲིན་པོ་ཆེན་པོའི་ཚུལ་དུ་རུ་ཏྲར་སྨིན་ཏེ་སྔོན་གྱི་དུས་སུ་བྱུང་བ་ན། གོལ་བའི་རྩལ་གྱིས་དེ་ཚེ་འབྱུང་བའི་སེམས་ཅན་ཐམས་ཅད་ནི། གཉིས་ཀྱིས་གཉིས་སྤྲོད་པའི་འཁྲིག་པ་ལ་ཤིན་ཏུ་ཆགས་པས་མྱོས་པར་གྱུར་ཏོ། །དེ་ལྟར་གོལ་བའི་རྩལ་གྱི་ཉེས་པ་ཤིན་ཏུ་ཆགས་པས་མྱོས་པ་ཡིས་རྣམ་པར་སྨིན་པ་མངལ་གྱིས་གྲོང་ཁྱེར་ཉིད་དུ་ལྟུང་བར་གྱུར་ལ། ལོག་པར་གོལ་བའི་རྒྱུ་མཐུན་ལོང་འདོགས་པ་དེ་ནས་དེ་ཉིད་ལས་སླར་བྱུང་བས་རྗེས་སུ་ཡང་སྔར་གོམས་པའི་བྱེད་པས་འདོད་པའི་མེ་ཡིས་ཀུན་ཏུ་གདུང་བར་འགྱུར་བས་གྲོལ་བའི་སྐབས་དང་བྲལ་བའོ། །ཞེས་ཞིང་ཁམས་ཐམས་ཅད་ཀུན་ཏུ་དེ་ལྟར་གྱུར་པར་ཡོངས་སུ་གྲགས་སོ། །བསྡུས་པའི་སྐབས་སུ་བསྟན་པའི་སེམས་ཀྱི་རྩ་ཚིག་ཅེས་པ་རྒྱས་པའི་སྐབས་སུ་སྤྱི་ལ་ཁྱབ་པས་ལོགས་སུ་སྨྲས་ན་ཐ་དད་དུ་འགྱུར་བས་མ་སྨྲས་སོ། །མདོར་ན་རུ་ཏྲ་ནི་རང་བཞིན་དང་བཅས་པའི་ལྟུང་བ་གཉིས་ཀར་གྱུར་ལ། འགྲོ་བ་རྣམས་ནི་རང་བཞིན་གྱི་ལྟུང་བར་གྱུར་པའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།།

འདས་པ་སྔོན་བྱུང་བའི་ལེའུ་སྟེ་ཉི་ཤུ་གཅིག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རུ་ཏྲའི་དུས་ཀྱི་ལོ་རྒྱུས་བསྟན་པས་འདས་པ་སྔོན་བྱུང་བའི་ལེའུ་ཞེས་བྱ་སྟེ་ཉི་ཤུ་རྩ་གཅིག་པ་རྣམ་པར་བཤད་པའོ། །སྤྱིར་རང་རྒྱུད་པའི་གོལ་ས་དགག་ཅིང་བདུད་བཞི་འདུལ་བའི་ཆེད་དུ་དགོས་དགོངས་ཀྱིས་རྒྱལ་བ་ཉིད་བདུད་དུ་སྤྲུལ་པའང་འབྱུང་བས། ལེའུ་འདིས་རྒྱས་བཤད་ཀྱི་གནས་ལས་དེ་ལྟར་ཡང་འཆད་དུ་རུང་ངོ༌།། །།

ལེའུ་ཉེར་གཉིས་པ་རུ་དྲ་ནག་པོའི་སྤྱོད་ཡུལ་བསྟན་པ།

༈ གཉིས་པ་སྲིད་པ་གསུམ་དབང་དུ་བསྡུ་ལུགས་ཀྱིས་སྔགས་འབྱུང་བའི་རྒྱུར་བསྟན་པ་ལ་ལྔ་སྟེ། སྲིན་པོ་དབང་དུ་བསྡུས་པས་སྔགས་འབྱུང་བའི་རྒྱུར་བསྟན་པ། ལྷ་ཡི་ཚོགས་དབང་དུ་བསྡུས་པས་སྔགས་འབྱུང་བའི་རྒྱུར་བསྟན་པ། ལྷ་མི་གཡོ་འགུལ་ཐམས་ཅད་དབང་དུ་བསྡུས་པས་སྔགས་འབྱུང་བའི་རྒྱུར་བསྟན་པ། ཉན་ཐོས་ཀྱི་མཆོག་དང་རྟ་མགྲིན་གྱིས་མ་ཐུལ་བར་བསྟན་པ། དགོས་དགོངས་ཀྱི་ཐར་པ་དཔོན་གཡོག་སྨིན་པའི་དུས་མཚུངས་པར་བསྟན་པའོ། །དང་པོ་ལ་གསུམ་སྟེ། སྲིན་པོའི་གནས་སུ་བབ་པ། སྲིན་པོས་གཞོམ་པར་སད་པས་སླར་ཟིལ་གྱིས་གནོན་པ། སྲིན་པོའི་གཙོ་བོས་འཁོར་ལ་འདུན་པར་གྱིས་ཤིག་པར་བསྒོས་པས་དབང་དུ་བྱས་པའོ། །དང་པོ་ནི།

དེ་ནས། ཞེས་པ་ནས། ཐོས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས་སྨྲས་པ། ལངྐའི་བདག་པོ་དེ་ལྟར་ཡི་དྭགས་དྲག་པོ་དེས། མི་གང་ཇི་སྙེད་དབང་དུ་གྱུར་པའི་ཆེ་སྤྱོམ་ཞིང་། ཨེ་མའོ་དབང་ཕྱུག་བདག་ལས་སུ་དག་ཆེ། སུ་དག་ཡོད་ཅེས་ཉིད་ལ་དམ་པ་དང་། ལངྐའི་ཡུལ་གྱི་གྲོང་རྡལ། མཚོ་རྐོ་ཀ་ཐང་དམར་གྱི་གླིང་། བྱན་ལག་ལྗོངས་ཀྱི་རི་མ་ལ། གནམ་ལྕགས་ཡོད་པའི་རྩེ་ཞེས་བྱ་བ་ན། ལངྐའི་མངའ་བདག་སྲིན་པོའི་རྒྱལ་པོ་ཞེས་བྱ་བ། སངས་རྒྱས་ཐུབ་པའི་དབང་པོ་ཞེས་བྱ་བའི་སློབ་མར་གྱུར་པ། མཐུ་དང་རྩལ་རྨད་དུ་བྱུང་ཞིང་། ངོ་མཚར་དུ་ཆེ་བ། བློ་གྲོས་ཡོངས་སུ་ཆུབ་པ། ཐབས་རྒྱ་མཚོ་དྲ་བའི་སྤྲིན་ལྟ་བུ་བྱུང་བ་ཞིག འཇིག་རྟེན་ན་ཆེའོ་ཞེས་གྲགས་པ་ལས། ཡི་དྭགས་བྱའི་གཤོག་པ་ཅན་དེ། རབ་ཏུ་འཁྲུགས། འཁམས་ནས་རུ་དྲའི་མེ་དཔུང་འབར་ནས། རང་གི་རྫུ་འཕྲུལ་དང་འཕུར་རྩལ་གྱིས། བྱན་ལག་ལྗོངས་པའི་རིའི་རྩེ་མོ་ལ་བབས་ནས། ང་རྒྱལ་གྱིས་གཏུམ་སྐད་རུ་དྲ་མ་ཏྲ་མ་ར་ཏྲ་ཞེས་བསྒྲགས་པས། ལངྐའི་ཡུལ་གྱི་གྲོང་རྡལ་ཤིག་ཤིག རབ་ཏུ་ཤིག་ཤིག ཡམ་ཡོམ་དུ་གྱུར་པས། ལངྐའི་སྲིན་པོ་ཀུན་དང་སྲིན་མོ་ཀུན་ཀྱང་སྐྲག་ཅིང་དངས་ལ། ཨེ་མའོ། །འདི་ལྟ་བུ་ཞིག་ཅེས་མིག་རྩ་རིག་རིག་རྔམ་ཡེད་ཡེད་གནས་པ་དང་། གནོད་སྦྱིན་བྱའི་གཤོག་པ་ཅན་གཏུམ་རྔམ་འཁྲུགས་པ་ཞིག བདག་ཅག་གི་འཁྲ་ས་ན་གནས་པར་མཐོང་ཞིང་ཐོས་པར་གྱུར་ཏོ།།

ལེའུ་འདིས་དྲང་དོན་སྟོན་ནོ། །དེ་ནས་གསང་བ་པའི་བདག་པོས་སྨྲས་པ། ལང་ཀའི་བདག་པོ། དེ་ལྟར་ཡི་དྭགས་དྲག་པོ་དེས། མི་ཡི་འཇིག་རྟེན་གང་ཇི་སྙེད་པ་དབང་དུ་གྱུར་པའི་ཆེ་བ་ལ་ང་རྒྱལ་གྱིས་སྤྱོམ་ཞིང་རློམ་སེམས་སུ་བྱེད་དེ། ཨེ་མའོ། །འཇིག་རྟེན་ན་དབང་ཕྱུག་བདག་ལས་སུ་དག་ཆེ། སུ་དག་ཡོད་ཅེས་རང་ཉིད་ལ་ངམ་པ་དང༌། ཆེ་བ་གཞན་འཇིག་རྟེན་ན་སུ་ཡོད་པ་ཉན་ཅིང་ཕྲག་དོག་གང་ཆེ་བ་དང་དབང་དུ་བསྡུས་ལ་བདག་གིར་བྱའོ་སྙམ་པས་སྐབས་སུ་འདི་ཉིད་འཛམ་གླིང་ལ་གླིང་ཕྲན་སུམ་བརྒྱ་ཡོད་ཟེར་བའི་གཅིག་ཡིན་གསུང་སྟེ། ལང་ཀ་ཡུལ་གྱི་གྲོང་རྡལ་མཚོ་ཀོ་ཀ་ཐང་དམར་གྱི་གླིང༌། བྱན་ལག་གནམ་དུ་མཆོངས་པའི་དབྱིབས་ཀྱི་རི་བོ་མ་ལ་ཡ་རྩ་བ་གསེར་རྩེ་མོ་གནམ་ལྕགས་འཕངས་སུ་དཔག་ཚད་བརྒྱད་ཅུ་ཡོད་པའིརྩེ་ཞེས་བྱ་བ་ན། ལང་ཀའི་མངའ་བདག་སྲིན་པོའི་རྒྱལ་པོ་བློ་གྲོས་ཐབས་ལྡན་ཞེས་བྱ་བ། སངས་རྒྱས་སྤྲུལ་སྐུ་ཐུབ་པའི་དབང་པོ་ཞེས་བྱ་བའི་སློབ་མར་གྱུར་པ། མཐུ་དང་རྩལ་རྨད་དུ་བྱུང་ཞིང་ངོ་མཚར་དུ་ཆེ་བ། བློ་གྲོས་ཡོངས་སུ་ཆུབ་པ། སྤྱིར་ས་བརྒྱད་པ་ཡན་ཆད་ཡིན་ལ་ད་རེས་ཀྱི་འདི་ནི་འཇམ་དཔལ་ཡིན་གསུང༌། ༼༣༣༢༽དགེ་བ་བཅུའི་ཐབས་རྒྱ་མཚོའི་དྲྭ་བ་སྤྲིན་དཔུང་ལྟ་བུ་འབྱུང་བ་ཞིག་འཇིག་རྟེན་ན་ཆེའོ་ཞེས་གྲགས་པ་ལས། ཡི་དྭགས་བྱའི་གཤོག་པ་ཅན་དེས་ཞེ་སྡང་དང་ང་རྒྱལ་གྱིས་རབ་ཏུ་འཁྲུགས་ཤིང་ཁམས་ནས་ཉོན་མོངས་པ་དྲག་པོའི་རུ་ཏྲའི་མེ་དཔུང་དུ་འབར་བ་དང་དངོས་སུའང་ལུས་ལ་མེ་འབར་ནས། རང་གི་རྫུ་འཕྲུལ་དང་འཕུར་རྩལ་གྱིས། བྱན་ལག་མཆོངས་པའི་རིའི་རྩེ་མོ་ལ་བབས་ནས། ང་རྒྱལ་གྱི་གཏུམ་སྐད་དུ། རུ་ཏྲ་མ་ཏྲ་མ་ར་ཏྲ་ཞེས་བསྒྲགས་པས་སྲིན་པོའི་ལྗོངས་ལང་ཀ་ཡུལ་གྱི་གྲོང་རྡལ་ཤིག་ཤིག རབ་ཏུ་ཤིག་ཤིག ཡམ་ཡོམ་དུ་གྱུར་པས། ལང་ཀའི་སྲིན་པོ་ཀུན་དང་སྲིན་མོ་ཀུན་ཀྱང་སྐྲག་ཅིང་སྔངས་ནས། ཨེ་མའོ་འདི་ནི་ཇི་ལྟ་བུ་ཞིག་ཅེས་མིག་རྩ་རིག་རིག་སྔངས་ཡེད་ཡེད་གནས་པ་དང༌། གནོད་སྦྱིན་བྱའི་གཤོག་པ་ཅན་གཏུམ་རྔམ་འཁྲུགས་པ་ཞིག་སྲིན་པོ་བདག་ཅག་གི་འཁྲ་ས་ན་གནས་པ་ལ་ལས་མཐོང་ཞིང་མ་མཐོང་བས་ཀྱང་སྒྲ་སྒྲོགས་པ་ཐོས་པས་སྐྲག་ཅིང་འཇིགས་པར་གྱུར་ཏོ།།

གཉིས་པ་སྲིན་པོས་གཞོམ་པར་སད་པས་སླར་ཟིལ་གྱིས་གནོན་པ་ནི།

དེ་ནས། ཞེས་པ་ནས། ཚོགས་བདག་གོ་ཞེས་སྒྲོགས། ཞེས་པའི་བར་གྱིས་བསྟན་ཏེ།

དེ་ནས་ལངྐའི་མངའ་བདག་ཆེན་པོ་ལ་སོགས་པ་སྲིན་པོའི་ཚོགས་ཀྱིས་དམག་གི་ཚོགས་བསྡུ་བ་བྱས་ཏེ། གཞོམ་པར་སད་ཅིང་འབད་པ་ལས། ཡང་སྲིན་པོ་བྱའི་གཤོག་པ་ཅན་དེས། སྲིན་པོའི་ཚོགས་བག་འཁུམས་པ་ཞེས་བྱ་བའི་རྫུ་འཕྲུལ་གྱི་བྱ་བ་མངོན་དུ་བྱས་ནས། ང་ནི་དབང་ཕྱུག་ཆེན་པོ་སྟེ། །རྒྱལ་ཆེན་རིགས་བཞི་ང་ཡི་གཡོག །ལྷ་སྲིན་སྡེ་བརྒྱད་ང་ཡི་བྲན། །གསང་བ་མཆོག་གི་བདག་ཡིན་པས། །སུ་ཞིག་ང་ལས་འགྲན་ཟླ་ཡོད། །རུ་དྲ་མ་ཏྲ་མ་ར་ཏྲ་ཞེས། ང་རྒྱལ་གྱིས་གཏུམ་སྐད་བསྒྲགས་པས། སྲིན་པོའི་ཚོགས་ཟིལ་གྱིས་ནོན་ཅིང་བག་འཁུམས་ནས། ལ་ལ་ནི་འདི་ནི་སྲིན་པོའི་རྒྱལ་ཁམས་བརྒྱལ་བར་བྱེད་པ་ཞིག་སྟེ། བདག་གི་གཙོ་བོའི་འོས་སོ་ཞེས་སྒྲོགས་སོ། །ལ་ལ་ནི་འདི་ནི་འཇིག་རྟེན་འཇིག་པ་ཞིག་སྟེ། བདག་གི་གཉེན་པོར་གྱུར་པ་ཞིག་གོ་ཞེས་སྒྲོགས། ལ་ལ་དག་འདི་ནི་འཇིག་རྟེན་པའི་དབང་ཕྱུག་ཆེན་པོ་ཞིག་གོ་ཞེས་སྒྲོགས། ལ་ལ་དག་ནི་འདི་ནི་མཁའ་འགྲོའི་ཚོགས་ཀྱི་ཚོགས་བདག་གོ་ཞེས་སྒྲོགས།

དེ་ནས་ལང་ཀའི་མངའ་བདག་ཆེན་པོ་ལ་སོགས་པ་སྲིན་པོའི་ཚོགས་རྣམས་ཀྱིས། དམག་གི་ཚོགས་ཀྱིས་བསྡུ་བ་བྱས་ཏེ་གཞོམ་པར་སད་ཅིང་འབད་པ་ལས། ཡང་སྲིན་པོ་བྱའི་གཤོག་པ་ཅན་དེས། སྲིན་པོའི་ཚོགས་བག་འཁུམས་པ་ཞེས་བྱ་བའི་རྫུ་འཕྲུལ་གྱི་བྱ་བ་འགྱིང་གར་དང་གཏུམ་པོའི་སྔགས་མངོན་དུ་བྱས་ནས། སྨྲས་པ། ང་ནི་དབང་ཕྱུག་ཆེན་པོ་སྟེ། །རྒྱལ་ཆེན་རིགས་བཞི་ང་ཡི་གཡོག །མིའམ་ཅི་སོགས་ལྷ་སྲིན་སྡེ་བརྒྱད་ང་ཡི་བྲན། ཚིག་ལོ་མ་ཅན་གྱི་ངན་སྔགས་དང༌། ལོག་སྡེའི་གསང་སྔགས་སུམ་བརྒྱ་དྲུག་ཅུ་ལ་སོགས་པ་གསང་བ་མཆོག་གི་བདག་པོ་ཆེན་པོ་ཡིན་པས་སུ་ཞིག་ང་ལ་འགྲན་ཟླ་ཡོད། རུ་ཏྲ་མ་ཏྲ་མ་ར་ཏྲ། ཞེས་ང་རྒྱལ་གྱི་གཏུམ་སྐད་བསྒྲགས་པ་ལས། སྲིན་པོ་ཐམས་ཅད་ཟིལ་གྱིས་གནོན་ཅིང་བག་འཁུམས་ནས། ལ་ལ་ནི་འདི་ནི་སྲིན་པོའི་ཁམས་རྒྱལ་བར་བྱེད་པ་ཞིག་སྟེ། བདག་ཅག་གི་གཙོ་བོའི་འོས་སོ། །ཞེས་སྒྲོགས། ལ་ལ་ནི་འདི་ནི་འཇིག་རྟེན་འཇིག་པར་བྱེད་པ་ཞིག་སྟེ། བདག་ཅག་གི་གཉེན་པོར་གྱུར་པ་ཞིག་གོ་ཞེས་སྒྲོགས། ལ་ལ་དག་འདི་ནི་འཇིག་རྟེན་པའི་དབང་ཕྱུག་ཆེན་པོ་ཞིག་གོ །ཞེས་སྒྲོགས། ལ་ལ་དག་འདི་ནི་མཁའ་འགྲོའི་ཚོགས་ཀྱི་ཚོགས་བདག་ཞིག་གོ །ཞེས་སྒྲོགས་པར་བྱེད་དོ།།༼༣༣༣༽

གསུམ་པ་སྲིན་པོའི་གཙོ་བོས་འཁོར་ལ་འདུན་པར་གྱིས་ཤིག་པར་བསྒོས་པས་དབང་དུ་བྱས་པ་ནི།

སྲིན་པོའི་རྒྱལ་པོ། ཞེས་པ་ནས། འཛིན་པར་བྱས་སོ། །ཞེས་པའི་བར་གྱིས་བསྟན་ཏེ།

སྲིན་པོའི་རྒྱལ་པོ་ལངྐའི་མངའ་བདག་ནི། འདི་ནི་འབྱུང་པོའི་བུ་གཏོགས་འདོད་ཅན་ཞེས་བྱ་བ་ཡིན་ཏེ། འཇིག་རྟེན་གསུམ་བསྲེག་པ། དེ་ཁོ་ན་ཉིད་མ་གཏོགས་པ། ཐམས་ཅད་བརླག་ཅིང་དབང་དུ་བྱེད་པ། ལོག་པའི་ཚོགས་བདག་སྟེ། འདི་གཞན་གྱིས་མི་ཐུབ་སྟེ། འདིའི་གཉེན་པོར་སངས་རྒྱས་བཅོམ་ལྡན་འདས་རྣམས་ཀྱིས་མཛད་དེ། སྤྲུལ་པ་རྡོ་རྗེ་ཅན་གྱིས་བཏུལ་ནས་ངེས་པར་དམ་པར་བཀོད་དེ། ཡང་དག་པར་ལུང་སྟོན་པ་ཞིག་པས། འདིའི་རྒྱུས་གསང་སྔགས་དམ་པའི་ངེས་པ། ཐེག་པ་ཆེན་པོ་རྨད་དུ་བྱུང་བའི་ཆོས་འཇིག་རྟེན་དུ་འབྱུང་བར་འགྱུར་ངེས་ཏེ། བདག་ཅག་ཀྱང་འདིའི་གཡོག་ཏུ་བྱས་ན། སངས་རྒྱས་རྡོ་རྗེའི་སྙིང་པོའི་ཞལ་མཐོང་ཞིང་། གསང་སྔགས་དམ་པའི་ངེས་པ་བརྙེད་པར་འགྱུར་བས། འདི་ལ་ངེས་པར་འདུན་པ་འདུན་ཅིག་ཅེས་བསྒོ་བས། སྲིན་པོའི་ཚོགས་རྣམས་ཡི་རངས་ཏེ། རང་གི་དེད་དཔོན་ཅི་སྨྲ་བ་མི་འདོར་བ་དེ་ལྟར་འདུན་པ་ན། ཀུན་སྲིན་པོ་བྱའི་གཤོག་པ་ཅན་དེའི་གཡོག་ཏུ་དོང་སྟེ། ཀུན་གྱིས་སྨྲས་པ། བདག་ཅག་ཀྱང་དབང་ཕྱུག་ཆེན་པོ་ཁོ་ན་ཉིད་ལྟར་འདུན་ནོ་ཞེས་གླེང་སྟེ། གཙོ་བོ་དམ་པར་འཛིན་ཏེ། དེས་ཀྱང་དེ་དག་འཁོར་དུ་འཛིན་པར་བྱས་སོ།།

སྲིན་པོའིརྒྱལ་པོ་ལང་ཀའི་མངའ་བདག་བློ་གྲོས་ཐབས་ལྡན་ནི། རུ་ཏྲའི་ལོ་རྒྱུས་དང་དགོས་པ་གསུམ་གྱི་ཕྱིར་འདུན་ན་ལེགས་པར་ལུང་སྟོན་ཏེ། འདི་ནི་འབྱུང་པོའི་བུ་གཏོགས་འདོད་ཅན་ཞེས་བྱ་བ་ཡིན་ཏེ། འཇིག་རྟེན་གསུམ་སྒྲག་པ་དེ་ཁོ་ན་ཉིད་རྣམ་པར་མི་རྟོག་པའི་ཡེ་ཤེས་སམ། ཆོས་ཉིད་དམ། སངས་རྒྱས་མ་གཏོགས་པ་ཐམས་ཅད་བརླག་ཅིང་དབང་དུ་བྱེད་པ། ལོག་པའི་ཚོགས་བདག་སྟེ། གདུལ་བྱ་ཁྱད་པར་ཅན་འདི་ཉིད་གཞན་གྱིས་མི་ཐུལ་ཏེ། འདིའི་གཉེན་པོ་སངས་རྒྱས་བཅོམ་ལྡན་འདས་རྣམས་ཀྱིས་མཛད་དེ། སྤྲུལ་པ་གསང་བདག་རྡོ་རྗེ་ཅན་གྱིས་བཏུལ་ནས། ངེས་པ་དམ་པར་བཀོད་དེ། ཡང་དག་པར་ལུང་སྟོན་པ་ཞིག་པས། འདིའི་རྒྱུས་གསང་སྔགས་དམ་པའི་ངེས་པ་ཐེག་པ་ཆེན་པོ་རྨད་དུ་བྱུང་བའི་ཆོས་འཇིག་རྟེན་དུ་འབྱུང་བར་འགྱུར་ངེས་ཏེ། བདག་ཅག་ཀྱང་འདིའི་གཡོག་ཏུ་བྱས་ནས། སངས་རྒྱས་རྡོ་རྗེ་སྙིང་པོའི་ཞལ་མཐོང་ཞིང༌། གསང་སྔགས་དམ་པའི་ངེས་པ་རྙེད་པར་འགྱུར་བས། འདི་ལ་ངེས་པར་འདུན་པ་འདུན་ཞིག ཅེས་བསྒོ་ནས། སྲིན་པོའི་ཚོགས་རྣམས་ཡིད་རངས་ཏེ་རང་གི་སྡེ་དཔོན་ཅི་སྨྲ་བ་མི་འདོར་བར་དེ་ལྟར་འདུན་པས་ན། སྲིན་པོ་ཀུན་སྲིན་པོ་བྱའི་གཤོག་པ་ཅན་དེའི་གཡོག་ཏུ་དོང་སྟེ། ཀུན་གྱིས་སྨྲས་པ། བདག་ཅག་ཀྱང་དབང་ཕྱུག་ཆེན་པོ་ཁོ་ན་ཉིད་ལྟར་འདུན་ནོ། །ཞེས་གླེང་སྟེ། གཙོ་བོ་དམ་པར་འཛིན་ཏོ། །དེ་དག་འཁོར་དུ་འཛིན་པར་བྱས་སོ། །ནང་ལྟར་ན། རུ་ཏྲ་ནི་བདག་འཛིན་ཏེ། དེས་ཚོགས་ལམ་ཡང་དབང་དུ་བྱས་པས། ཚོགས་ལམ་གྱི་ཤེས་རབ་འཁོར་དང་བཅས་པས་དེ་ལས་འདའ་མ་ནུས་པར་རྣམ་པར་མི་རྟོག་པའི་ཡེ་ཤེས་ལ་དམིགས་ཀྱང་མོས་པ་དང་ཡིད་ལ་བྱེད་པ་དང་ངོ་ཚ་ཤེས་པ་དང་ཁྲེལ་ཡོད་པ་ལ་སོགས་པ་ཀུན་བདག་འཛིན་གྱི་འཁོར་དུ་སོང་བའོ།།

གཉིས་པ་ལྷ་ཡི་ཚོགས་དབང་དུ་བསྡུས་པས་སྔགས་འབྱུང་བའི་རྒྱུར་བསྟན་པ་ལ་གསུམ་སྟེ། གཙོ་བོ་དབང་དུ་བསྡུས་པ། འཁོར་དབང་དུ་བསྡུས་པ། གཙོ་འཁོར་གཉིས་ཀ་དབང་དུ་བསྡུས་པའོ། །དང་པོ་ནི།

དེ་ནས། ཞེས་པ་ནས། བརྒྱད་དུ་སྣང་ངོ༌། །ཞེས་པའི་བར་གྱིས་བསྟན་ཏེ།

དེ་ནས་སྲིན་པོ་བྱའི་གཤོག་པ་ཅན་དེ། སྲིན་པོ་དེའི་དེད་དཔོན་མ་ཏྲང་ཁ་རུ་ཏྲ་ཞེས་བྱ་བར་གྲགས་པ་དེ། ང་རྒྱལ་གྱིས་ཆེ་བ་སྤྱོམ་སྟེ། བདག་ལས་ཆེ་བ་གང་ཞིག་ཡོད། སུ་ཞིག་ཡིན། རུ་ཏྲ་མ་ཏྲ་མ་ར་ཏྲ་ཞེས་སྒྲ་སྒྲོགས་པ་ལས། ལྷའི་དེད་དཔོན་མ་ཏང་ཀ་རུ་ན་ཞེས་བྱ་བ། མཐུ་དང་རྫུ་འཕྲུལ་ཐབས་དང་ཆེ་བ་ཁྱད་པར་དུ་བྱུང་བ་དེ་དཔགས་སོ་ཞེས་གྲགས་པ་ལས། བདུད་རུ་ཏྲ་ནག་པོ་དེ་ཤིན་ཏུ་ཁམས་འཁྲུག་ནས། ང་རྒྱལ་གྱི་གཏུམ་སྐད་བསྒྲགས། རང་གི་རྫུ་འཕྲུལ་དང་འཕུར་རྩལ་གྱི་མ་ཏང་ཀ་རུ་ནའི་གནས་སུ་བབས་ཏེ། ཡོངས་སུ་སད་པར་ཛམས་ནས། ཇ་ཞ་མར་སབ་པར་མི་འདྲ་ནས། ལུས་ཅན་ཡིན་པས། འུང་ནང་ཐབས་འཐབས་སུ་བྱུང་བའི་ངད་ལ་ཚ་གྲང་དབུགས་ཧམ་ནས། ནད་ཀྱི་མཚོན་ཆ་སྤྲོས་པས། ཁོ་ན་དེའི་ལུས་ལ་ཁྱབ་སྟེ། ལུས་མེ་དབལ་ནག་པོའི་འབྲུམ་བུས་གང་ནས། མི་བཟོད་པའི་ཟུག་རྔུས་གདུངས་ཏེ། ཁོ་ན་དེ་འུང་ཐབས་སུ་བསད་དེ། ཁོ་ན་དེའི་བམ་འཛམ་བུ་ཧང་བ་ལས། དགེ་གནས་ཀྱི་ཡུལ་བརྒྱད་དུ་གནང་ངོ་།།

དེ་ནས་ཡང་སྲིན་པོ་བྱའི་གཤོག་པ་ཅན་དེ་ལ། དུས་དེར་སྲིན་པོ་དེའི་དེད་དཔོན་མ་ཏང་༼༣༣༤༽ཀ་རུ་ཏྲ་ཞེས་བྱ་བར་གྲགས་པ་དེ་ཉིད། ང་རྒྱལ་གྱི་ཆེ་བ་སྤྱོམ་སྟེ། བདག་ལས་ཆེ་བ་གང་ཞིག་ཡོད། སུ་ཞིག་ཡིན། རུ་ཏྲ་མ་ཏྲ་མ་ར་ཏྲ། ཞེས་སྒྲ་སྒྲོགས་པ་ལས། ལྷ་ཡི་དེད་དཔོན་མ་ཏང་ཀ་རུ་ན་ཞེས་བྱ་བ་མཐུ་དང་རྫུ་འཕྲུལ་ཐབས་དང་ཆེ་བ་ཁྱད་པར་དུ་བྱུང་བ་དེ་ཉིད་འཕགས་སོ། །ཞེས་གྲགས་པ་ལས། བདུད་རུ་ཏྲ་ནག་པོ་དེ་ཤིན་ཏུ་ཁམས་འཁྲུགས་ནས། ང་རྒྱལ་གྱི་གཏུམ་སྐད་བསྒྲགས་ཏེ་རང་གི་རྫུ་འཕྲུལ་དང་འཕུར་རྩལ་གྱིས་གཞན་འཕྲུལ་དབང་བྱེད་མ་ཏང་ཀ་རུ་ནའི་གནས་སུ་བབས་ཏེ་ཡོངས་སུ་སད་པར་ཛམས་ན། ཞེས་པ་བྲུ་ཤའི་སྐད་དེ། དབང་དུ་བྱ་བར་བརྩམས་པ་ན། ཇ་ཞ་མར་ཞེས་པའང་བྲུ་ཤའི་སྐད་དེ་བོད་སྐད་དུ་རྣལ་མར་འགྱུར་བས་རྣལ་མར་སོད་པ་མི་འདྲ་ནས་ཞེས་དོན་ལ། རུ་ཏྲས་ལྷ་ཡི་དེད་དཔོན་དབང་དུ་བསྡུ་བར་ཉམས་སད་པས་རྣལ་མར་ཐུབ་པ་མི་འདྲ་ནས། ཁོ་ལུས་ཅན་ཡིན་པས་རུ་ཏྲའི་སྣ་འུང་ནས་བྱུང་བའི་དབུགས་དང་ཁ་རླངས་ཀྱི་དབུགས་གཉིས་ཚ་གྲང་དང་འཐབས་ཐབས་སུ་བྱུང་བའི་ངད་ལ་ཚ་གྲང་གི་དབུགས་ཧམ་པའམ་གཏོར་ནས་ནད་ཀྱི་མཚོན་ཆ་བཞི་བཞིར་སྤྲོས་པས་ལྷའི་རྒྱལ་པོ་ཁོ་ན་དེའི་ལུས་ལ་ཁྱབ་སྟེ་ལུས་མེ་དབལ་ནག་པོའི་འབྲུམ་པས་གང་ནས་མི་བཟོད་པའི་ཟུག་རྔུས་གདུངས་ཏེ། ལྷའི་དེད་དཔོན་ཁོ་ན་ངོ་བོ་དེ་འུང་ཐབས་སམ་འུར་ཐབས་སུ་གློ་བུར་དུ་བཙན་ཐབས་སུ་བསད་དོ། །ཁོ་ན་དེའི་བམ་རོ་འཛམ་བུའི་གླིང་དུ་ཧན་ཞེས་བོར་བའང་བཞག་པ་ལས། དགེ་གནས་ཀྱི་ཡུལ་ཨོ་རྒྱན། སིང་ང༌། བལ་པོའི་ཡུལ་ལ་སོགས་པར་མཆོད་རྟེན་བརྒྱད་དངོས་གྲུབ་བརྒྱད་དང་ལྡན་པར་མ་མོ་བརྒྱད་ཀྱིས་སྲུང་བ་ཉིད་དུ་རྣམ་པར་སྣང་ངོ༌།།

གཉིས་པ་འཁོར་དབང་དུ་བསྡུས་པ་ནི།

འོག་ནས། གདུག་པའི་ཟུག་རྔུ༌། ཞེས་པ་ནས། གྲགས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

གདུག་པའི་ཟུག་རྡུ་མེ་འབར་བས། །ཀུན་ཀྱང་སྡེ་དཔོན་བཞི་ལ་དོང་། །དེ་དག་སྤུ་ཟིང་རབ་འཇིིགས་པར། །དབང་པོ་དག་ལ་སྐྱབས་སུ་དོང་། །དེ་ནས་དབང་པོར་བཅས་པའི་ལྷ། །ཚངས་པའི་སྐྱབས་སུ་ཉེ་བར་དོང་། །ཚངས་པའང་ལྷ་དང་དབང་པོར་བཅས། །གཏོགས་འདོད་ལ་ནི་སྐྱབས་སུ་དོང་། །ཚངས་པ་གཏོགས་འདོད་ལྷ་དབང་བཅས། །དྲག་པོའི་སྐྱབས་སུ་ཉེ་བར་དོང་། །ཚངས་དང་གཏོགས་འདོད་དབང་པོ་དྲག །ཤིན་ཏུ་སྐྲག་ཅིང་འཇིགས་གྱུར་ཏེ། །རྡོ་རྗེ་ཅན་ལ་སྐྱབས་སུ་དོང་། །དེ་བཞིན་གང་ལ་སྐྱབས་ཡོད་པར། །ཉེ་བར་བརྒྱུགས་ཀྱང་མ་ཐར་བར། །འཇིགས་བྱེད་དེ་ཡི་བྲན་དུ་ཇེན། །ཞེས་ཐམས་ཅད་དུ་གྲགས་པར་གྱུར་ཏོ།།

དེ་ནས་རུ་ཏྲའི་གདུག་པའི་ཟུག་རྔུ་མེ་དང་འདྲ་བར་འབར་བས། འཁོར་ཀུན་ཀྱང་རི་རབ་ཀྱི་ཕྱོགས་བཞིའི་སྡེ་དཔོན་རྒྱལ་པོ་ཆེན་པོ་བཞི་ལ་སྐྱབས་སུ་དོང་ལ། དེ་དག་ཀྱང་སྤུ་ཟིངས་བཅས་རབ་ཏུ་འཇིགས་པར། ལྷའི་དབང་པོ་བརྒྱ་བྱིན་དག་ལ་སྐྱབས་སུ་དོང་ཞིང༌། དེ་ནས་དབང་པོར་བཅས་པའི་ལྷ་ཡང༌། ཚངས་པའི་སྐྱབས་སུ་ཉེ་བར་དོང་ལ། དེ་ནས་ཚངས་པ་ལྷ་དང་དབང་པོར་བཅས་པ་ཡང་ལྷ་གཏོགས་འདོད་ཅེས་ཁྱབ་འཇུག་ནག་པོ་ལ་ནི་སྐྱབས་སུ་དོང་ཞིང༌། ཚངས་པ་དང་གཏོགས་འདོད་དང་དབང་པོར་བཅས་པ་ཡང༌། ལྷ་༼༣༣༥༽མ་ཧཱ་དེ་བ་དྲག་པོའི་སྐྱབས་སུ་ཉེ་བར་དོང་ལ། ཚངས་པ་དང་གཏོགས་འདོད་དང་དབང་པོ་དང་དྲག་པོ་ཀུན་ཀྱང་ཤིན་ཏུ་སྐྲག་ཅིང་འཇིགས་པར་གྱུར་ཏེ། གནོད་སྦྱིན་ལག་ན་རྡོ་རྗེ་ཅན་ལ་སྐྱབས་སུ་དོང་ངོ༌། །དེ་བཞིན་དུ་གང་ན་སྐྱབས་ཡོད་པར་ཉེ་བར་བརྒྱུག་ཀྱང་མ་ཐར་བར་འབྲས་བུ་ཆེ་བ་མན་ཆད་འཇིགས་བྱེད་དེ་ཡི་བྲན་དུ་ཇེན་ནས་དབང་དུ་བསྡུས་སོ། །ཞེས་ཐམས་ཅད་དུ་གྲགས་པར་གྱུར་ཏོ།།

གསུམ་པ་གཙོ་འཁོར་གཉིས་ཀ་དབང་དུ་བསྡུས་པ་ནི།

གོང་ནས། འུང་ནས་ཁོ་ན། ཞེས་པ་ནས། རང་གི་ཕྲུ་མར་བྱས། །ཞེས་པའི་བར་གྱིས་བསྟན་ཏེ།

འུང་ནས་ཁོ་ན་ཉིད་སད་པའི་ཁྱོ་མོ་དང་བུ་འཁོར་རྣམས་ན། གནོད་སྦྱིན་བྱའི་གཤོག་པ་ཅན་གྱི་འཁོར་དུ་ཇེན། ལྷ་མ་ཡིན་དང་། ཤ་ཟ་དང་། རོ་ལངས་དང་། རིལ་ཡང་བདུད་དེའི་སར་ཇེན། རྒྱལ་པོ་བཞི་ཡང་གང་གི་སྐྱབས་སུ་བརྒྱུགས་ཀྱང་ཡོངས་སུ་མ་ཐར་པར་དེའི་བྲན་དུ་ཇེན། བརྒྱ་བྱིན་དང་། ཚངས་པ་དང་། ཁྱབ་འཇུག་དྲག་པོ་ལ་སོགས་པ་ཀུན་ཀྱང་གང་གི་སྐྱབས་སུ་བརྒྱུགས་ཀྱང་མ་ཐར་བར་དེའི་བྲན་དུ་ཇེན། དེ་དག་གི་ཁྱོ་མོ་རིལ་ཡང་ཕྲོགས་ནས། ལ་ལ་ནི་ཁྱོ་མོར་བྱས། ལ་ལ་ནི་སླས་སུ་བྱས། ལ་ལ་ནི་བྱི་མོར་བྱས། ལ་ལ་ནི་མཛའ་མོར་བྱས། ལ་ལ་ནི་བྲན་མོར་བྱས། ལ་ལ་ནི་ཕོ་ཉ་དང་མངགས་པར་བྱས། ལྷ་མི་ཡོངས་སུ་སྲིད་བརླག་ནས་ཐམས་ཅད་ནག་པོ་བཀྲག་མེད་ཀྱི་ཁམས་སུ་གྱུར་ཏོ། །དེ་ཡང་འདི་ལྟར་གྲགས་ཤིང་གྲགས་ཏེ་གྲགས་པར་གྱུར་ཏོ། །ནག་པོ་ཁྱུང་གཤོག་འཕུར་རྩལ་ཅན། །གཏུམ་རྔམ་ཤིན་ཏུ་མ་རུངས་པ། །མི་སྡུག་གདོང་མི་སྡུག་གཟུགས་དང་། །མི་སྙན་སྒྲ་ཡི་ཚམ་རྔམ་ཅན། །ཤ་སྤུངས་རུས་སྤུངས་འབུ་དང་རྣག །ཁྲག་དང་བཤང་གཅིའི་ཁུ་བ་ལ། །ལོངས་སྤྱོད་བྱེད་ཅིང་རྟག་ཏུ་འཚོ། །ལོག་པའི་སྡེ་དཔོན་དྲག་པོ་དེས། །འདི་ནི་ལྷ་མའི་སྲིད་བརླག་ནས། །ལྷ་ཡི་སྡེ་དཔོན་ཀ་རུ་ན། །ཁོ་ན་ངོ་བོ་ཉིད་བསད་ནས། །འཁོར་ཡང་རང་གི་ཕྲུ་མ་བྱས།།

འུང་ཞེས་པ་བྲུ་ཤའི་སྐད་དེ་བོད་སྐད་དུ་བྱས་ཞེས་པར་འགྱུར་བས་དེ་ལྟར་བྱས་ནས་ཁོ་ན་ཉིད་བསད་པའི་ཁྱོ་མོ་ཆུང་མ་དང༌། བུ་འཁོར་རྣམས་ནི་གནོད་སྦྱིན་བྱའི་གཤོག་པ་ཅན་དེའི་འཁོར་དུ་ཇེན་ཞེས་པའང་བྲུ་ཤའི་སྐད་དེ་བྱས་སོ། །ལྷ་མ་ཡིན་དང༌། ཤ་ཟ་དང༌། རོ་ལངས་རིལ་ཡང་བདུད་དེའི་སར་ཇེན་ཞེས་འདུས་སོ། །རྒྱལ་པོ་བཞི་ཡང་གང་གི་སྐྱབས་སུ་བརྒྱུགས་ཀྱང་ཡོངས་སུ་མ་ཐར་བར་དེའི་བྲན་དུ་ཇེན་ཞེས་འདུས་སོ། །བརྒྱ་བྱིན་དང༌། ཚངས་པ་དང༌། ཁྱབ་འཇུག་དང༌། དྲག་པོ་ལ་སོགས་པ་ཀུན་ཀྱང་གང་གི་སྐྱབས་སུ་བརྒྱུགས་ཀྱང་མ་ཐར་བར་དེའི་བྲན་དུ་ཇེན་ཞེས་སོང་ངོ༌། །དེ་དག་གི་ཁྱོ་མོ་རིལ་ཡང་ཕྲོགས་ནས། ལ་ལ་ནི་ཁྱོ་མོར་བྱས། ལ་ལ་ནི་སླས་སུ་བྱས། ལ་ལ་ནི་བྱི་མོར་བྱས། ལ་ལ་ནི་མཛའ་མོར་བྱས། ལ་ལ་ནི་བྲན་མོར་བྱས། ལ་ལ་ནི་ཕོ་ཉ་དང་མངག་པར་བྱས། ལྷ་མི་ཡོངས་ཀྱི་དགེ་བ་དང་ཐར་པ་བསྒྲུབ་པའི་སྲིད་བརླག་ནས་ཐམས་ཅད་ནག་པོ་བཀྲག་མེད་ཀྱི་ཁམས་སུ་གྱུར་ཏོ། །དེ་ཡང་འདི་ལྟར་དུས་གསུམ་མམ་ཡང་ན་ཁམས་གསུམ་ལ་གྲགས་ཤིང་གྲགས་ཏེ་གྲགས་པར་གྱུར་ཏོ། །ཁ་དོག་དང་ལས་གཉིས་ཀ་ནག་པས་ནག་པོ་ཁྱུང་གཤོག་འཕུར་རྩལ་ཅན་ལ་ལུས་གཏུམ་ཞིང་ངག་རྔམ་ལ་ཡིད་ཤིན་ཏུ་མ་རུང་པར་གྱུར་པ་ལུས་ཀྱི་བཞིན་མི་སྡུག་པའི་གདོང་ལ་མི་སྡུག་པའི་གཟུགས་སྣ་ཚོགས་དང་མི་སྙན་པའི་སྒྲ་ཡི་ཚམ་ངམ་སྒྲོགས་པ་ཅན་ཤ་སྣ་ཚོགས་སྤུངས་ཤིང་རུས་པ་ཕྱོགས་སུ་སྤུངས་ནས་འབུ་དང་རྣག་དང་ཁྲག་དང་གཤང་གཅི་དང་ཁུ་བ་རྣམས་ལ་ལོངས་སྤྱོད་པར་བྱེད་ཅིང་རྟག་ཏུ་འཚོ་བར་གནས་སོ། །དེ་ལྟར་ལོག་པའི་སྡེ་དཔོན་དྲག་པོ་དེས། འཇིག་རྟེན་འདི་ན་ལྷ་དང་མིའི་དགེ་བའི་སྲིད་བརླག་ནས་ལྷ་ཡི་དེད་དཔོན་ཆེན་པོ་ཀ་རུ་༼༣༣༦༽ན་ཞེས་བྱ་བ་ཁོ་ན་ངོ་བོ་ཉིད་བསད་ཅིང་བསྒྲལ་ནས་འཁོར་མ་ལུས་པ་ཡང་རང་གི་ཕྲུ་མར་ཞེས་པ་བྲུ་ཤའི་སྐད་དེ་འཁོར་དུ་བྱས་ནས་དབང་དུ་བསྡུས་སོ། །ནང་ལྟར་ན་བདག་འཛིན་དེས་སྦྱོར་ལམ་གྱི་དབང་པོ་ལྔ་དང་སྟོབས་ལྔ་ཡང་དབང་དུ་བྱས་ཏེ་ཚོགས་ལམ་ལས་འཕགས་ཀྱང་དྲོད་རྩེ་བཟོད་མཆོག་བཞི་པོ་འཇིག་རྟེན་པའི་ལམ་ལས་མ་འདས་པས་བདག་འཛིན་བགས་ཀྱིས་བཤམས་ཏེ་ཆགས་སྡང་རགས་པའི་ཡུལ་ལས་གྲོལ་ཡང་ཟག་བཅས་ཀྱི་དགེ་རྩ་ཚད་མེད་བཞི། མི་གཡོ་བའི་བསམ་གཏན་བཞི། སྙོམས་འཇུག་བཞི་པོ་ཐམས་ཅད་བདག་ཏུ་འཛིན་པས་དབང་དུ་བྱས་པའོ།།

གསུམ་པ་ལྷ་མི་གཡོ་འགུལ་ཐམས་ཅད་དབང་དུ་བསྡུས་པས་སྔགས་འབྱུང་བའི་རྒྱུར་བསྟན་པ་ནི།

འོག་ནས། འུང་ནས་བདུད་རུ་ཏྲ། ཞེས་པ་ནས། གང་ཞིག་ཡོད། ཅེས་པའི་བར་གྱིས་བསྟན་ཏེ།

འུང་ནས་བདུད་རུ་ཏྲ་ནག་པོ་ལྟས་ཞིག་ལྷ་མི་གཡོ་འགུལ་ཐམས་ཅད་དབང་དུ་མཛད་ནས། ལངྐའི་ཡུལ་གྲོང་རྡལ་མཚོ་རྐོ་ཀ་ཐང་དམར་བྱན་ལག་ལྗོངས་ཀྱི་རི་བམ་རི་ཐོད་པའི་མཁར་ཞེས་བྱ་བར་འཁྲས་ཏེ། བདུད་ཀྱི་རྒྱལ་མཚན་ནི་ཕུགས་སུ་བཙུགས། བདུད་ཀྱི་རུ་མཚོན་ནི་སྒོར་ཕྱར་ཏེ། རང་གི་ཕྲུ་མར་ཡོངས་སུ་བསྐོར་། དྲག་པོ་རང་གི་རྫུ་འཕྲུལ་བསྐྱེད་ནས། རྫུ་འཕྲུལ་གྱིས་རི་རབ་མཛུབ་མོའི་རྩེ་ལ་བཞག་སྟེ། སྤྱི་བོ་ལ་འགྱིང་བག་ཏུ་བསྐོར་ཞིང་། ང་རྒྱལ་གྱི་གཏུམ་སྐད་སྒྲོག་པ་ནི། འདི་ལྟ་སྟེ། རུ་ཏྲ་མ་ཏྲ་མ་ར་ཏྲ། ས་ཁམས་ན་ང་ལས་སུ་ཞིག་ཆེ། གང་ཞིག་ཡོད།

ཡང་འུང་ཞེས་སོང་ནས་བདུད་རུ་ཏྲ་ནག་པོ་ལྟ་ཞིག་གིས་ལྷ་མི་གཡོ་འགུལ་ཐམས་ཅད་དབང་དུ་མཛད་དེ། ལང་ཀ་ཡུལ་གྱི་གྲོང་རྡལ། མཚོ་ཀོ་ཀ་ཐང་དམར་བྱན་ལག་མཆོངས་ཀྱི་རི་བོར་བམ་རི་ཐོད་པ་མཁར་ཞེས་བྱ་བར་འཁྲས་ཏེ་བདུད་ཀྱི་རྒྱལ་མཚན་ཁ་ཊྭཱཾ་རྩེ་གསུམ་ལ་མི་རོ་བཏགས་པ་ནི་ཕུགས་སུ་བཙུགས། བདུད་ཀྱི་རུ་མཚོན་ནི་སྒོར་ཕྱར་ཏེ། རང་གི་འཁོར་རམ་ཕྲུ་མས་ཡོངས་སུ་བསྐོར་ནས་གནས་ལ། ལོག་པའི་སྡེ་དཔོན་དྲག་པོ་དེས་རང་གི་རྫུ་འཕྲུལ་བསྐྱེད་ནས། རྫུ་འཕྲུལ་གྱིས་རི་རབ་མཛུབ་མོའི་རྩེ་ལ་བཞག་སྟེ། སྤྱི་བོ་ལ་འགྱིང་བག་ཏུ་བསྐོར་ནས། ང་རྒྱལ་གྱི་གཏུམ་སྐད་སྒྲོགས་པ་ནི། འདི་ལྟ་སྟེ། རུ་ཏྲ་མ་ཏྲ་མ་ར་ཏྲ། ས་ཁམས་ན་བདག་ལས་སུ་ཞིག་ཆེ། གང་ཞིག་ཡོད། ཅེས་ང་རོ་སྒྲོགས་སོ།།

བཞི་པ་ཉན་ཐོས་ཀྱི་མཆོག་དང་རྟ་མགྲིན་གྱིས་མ་ཐུལ་བར་བསྟན་པ་ནི།

ཨེ་མའོ། །ཞེས་པ་ནས། ཉིད་དུ་ལྟའོ། །ཞེས་པའི་བར་གྱིས་བསྟན་ཏེ།

ཨེ་མའོ་སྔོན་དཔལ་ཤཱཀྱ་ཐུབ་པ་ཞེས་བྱ་བས། འཆི་བདག་གི་བདུད་བཏུལ་བའི་ཚེ། དེའི་བསྟན་པ་ལ་རབ་ཏུ་བྱུང་བའི་མཆོག་ཆེན་པོ་ཉན་ཐོས་རྣམས་ཀྱིས་ཐམས་ཅད་ཞི་བར་ལྡན་པའི་སྨྲ་བས་སྨྲས་ཏེ། ངའི་བཀའ་ཉོན་ཅིག་ཅེས་ཟེར་བ་ལས། བུ་ཆུང་གོས་ཟུ་ཕྲག་ལ་ཁོལ་ལ་རང་གི་དཀའ་ཐུབ་ལ་བདེ་བར་མནོས་ཤིག་ཅེས་བྱས་ནས། མ་ཉན་ནས་དེས་ཀྱང་བདག་དབང་དུ་བྱེད་མ་ནུས་སོ། །དེའི་འུང་ན་དཔལ་རྡོ་རྗེ་སྙིང་པོ་ངག་གི་དབང་ཕྱུག་རྟ་ཞིག་སྣ་ཚོགས་ཀྱི་གཟུགས་སུ་སྤྲུལ་ནས། ཧྲི་ཞེས་དབང་རྒྱུད་དུ་ཉན་ན། ཁོ་ན་ཉིད་ཀྱི་ཐའི་ཁ་རྡབས་པ་བྱས་ནས། མགྲིན་བུ་ཁྱེད་ཀྱང་བདེ་བར་མནོས་ཤིག་ཅེས་བསྒོ་བས། དེ་ཡང་ཐག་ཁོ་དེ་སླར་ཇེན་ནོ། །གནམ་རིམ་ པ་བཅུ་བཞི་ན། དཔལ་རྡོ་རྗེ་སྙིང་པོ་ལྟ་ཞིག་འགྲན་གྱི་ཟླ་མེད་པར་ཐོས་ནས། དེ་ཡང་བདག ་གི་དབང་དུ་བྱས་ལ། ཐམས་ཅད་འུབ་ལ་ཇེན་རྨད་ཅེས་སྒྲོགས་ཤིང་། འགྲན་གྱི་ཟླ་མེད་ཆེ་བཙན་གཅིག་པུ་ཉིད་དུ་ལྟའོ།།

ཨེ་མའོ་སྔོན་དཔལ་ཤཱཀྱ་ཐུབ་པ་ཞེས་བྱ་བས། འཆི་བདག་གི་བདུད་བཏུལ་བའི་ཚེ། དེའི་བསྟན་པ་ལ་རབ་ཏུ་བྱུང་བའི་མཆོག་ཆེན་པོ་ཉན་ཐོས་རྣམས་ཀྱིས་ཐམས་ཅད་ཞི་བ་ལྷམ་མེ་བའམ་ཞི་བར་ལྷན་པའི་སྨྲ་བས་སྨྲས་ཏེ། ངའི་བཀའ་ཉོན་ཅིག་ཅེས་ཟེར་བ་ལས་ཀྱང༌། སྔོན་བསྐལ་པ་ཀུན་དགའི་དུས་སུ་བདག་ཐར་པ་ནག་པོར་གྱུར་པས། བུ་ཆུང་གོ་ཟུ་ཕྲག་པ་ལ་ཁོལ་ལ། རང་གི་དཀའ་ཐུབ་ལ་བདེ་བར་མནོས་ཤིག ཅེས་བྱས་ནས། མ་ཉན་ནས་དེས་ཀྱང་བདག་དབང་དུ་བྱེད་མ་ནུས་སོ། །ཞེས་སྨྲས་པ་འདི་ནི་རུ་ཏྲའི་ཁ་ཕོ་ཡིན་ཏེ་སྤྲུལ་སྐུ་རིས་ལ་ཤཱཀྱ་ཐུབ་པ་ཟེར་བ་ཡིན་སྐད། དེས་ན་ཐར་པ་ནག་༼༣༣༧༽པོའི་དུས་ཀྱི་ལོ་རྒྱུས་བརྗོད་པ་ཡིན་གསུངས། ལར་ད་ལྟར་གྱི་དུས་སུ་སྟོན་པ་ཤཱཀ་ཐུབ་བྱོན་པས་དེ་ཉིད་ཡིན་མིན་དཔྱད་ན། རུ་ཏྲ་སྤྲུལ་པ་པ་དང༌། བྱུང་ཚུལ་གྱི་སྐབས་དོན་ལས་གཞལ་ན་འཆད་པའི་སྒོ་ཤིན་ཏུ་ཡངས་པར་མངོན་ཡང༌།

དཀྱུས་འདིར་རང་རྒྱུད་པ་ལྟར་བཤད་པའི་དབང་དུ་ན། སྔོན་ཐར་པའི་དུས་ཀྱི་སྤྲུལ་སྐུ་ལ་བརྗོད་པ་ཡིན་ནོ། །ལ་ལར་སངས་རྒྱས་ཤཱཀྱ་ཐུབ་པ་ཆེན་པོ་ཡིན་པར་ཡང་གསུངས་སོ། །ཡང་ན་རུ་ཏྲ་རང་གི་དུས་སུ་བྱས་ཀྱང་གཞུང་དང་མཐུན་ནོ། །སྟོན་པ་ཤཱཀྱ་ཐུབ་པ་དེའི་དྲུང་ན་དཔལ་རྡོ་རྗེ་སྙིང་པོ་བྱང་ཆུབ་ངག་གི་དབང་ཕྱུག་སྤྱན་རས་གཟིགས་ཀྱི་སྤྲུལ་པ་ལྟ་ཞིག་མིའི་ལུས་ལ་རྟའི་མགོ་ཅན་དུ་སྣ་ཚོགས་ཀྱི་གཟུགས་སུ་སྤྲུལ་ནས་དབང་གི་སྙིང་པོ་ཧྲཱིཿཞེས་སྒྲོགས་ཏེ་དབང་གི་རྒྱུད་དུ་ཉན་ན་ཉོན་ཅིག ཅེས་ཟེར་བ་ལ། སླར་རུ་ཏྲ་ཁོ་ན་ཉིད་ཀྱིས་ཐའི་ཁ་བརྡབས་པ་ཞེས་ཐལ་མོ་རྡེབ་ཅིང་སྐན་སྒྲ་གཏོགས་པར་བྱས་ནས་མགྲིན་བུ་ཁྱོད་ཀྱང་བདེ་བར་མནོས་ཤིག་ཅེས་བསྒོ་བས་རྟ་མགྲིན་དེ་ཡང་ཐག་ཁོས་ཞེས་པ་བྲུ་ཤའི་སྐད་དེ། བོད་སྐད་དུ་ཡིད་ཆེས་པར་འགྱུར་པས་དབང་གིས་མི་ཐུལ་བར་ཡིད་ཆེས་ཏེ་སླར་ཇེན་ནོ། །ཞེས་པའང་བྲུ་ཤའི་སྐད་དེ་སླར་སོང་ངོ༌། །ཞེས་པ་སྟེ། དོན་ལ་སྔོན་རྟ་མགྲིན་ཧྲཱིཿའི་སྒྲ་སྒྲོགས་ཤིང་དབང་གིས་འདུལ་དུ་འོང་བ་ལ་ང་ཡིས་ཁྱོད་ཀྱིས་མི་ཐུལ་བའི་ངག་སྨྲས་པས་རང་གི་གནས་སུ་ལོག་གོ །ཞེས་པའོ། །གནམ་རིམ་པ་བཅུ་བཞི་ཞེས་པ་ལུང་གི་ས་ཉི་ཤུ་རྩ་གཅིག་གམ་ཉེར་གཉིས་ལས། འཇིག་རྟེན་པའི་ས་དགུ་ལ་གཅིག་ཏུ་བྱས་ན། འདས་པའི་ས་བཅུ་དང་སྐུ་གསུམ་གྱི་ས་གསུམ་སྟེ་བཅུ་བཞི་པ་ན་བཞུགས་པའི་དཔལ་རྡོ་རྗེ་སྙིང་པོའམ་རྡོ་རྗེ་སེམས་དཔའ་ལྟ་ཞིག་འགྲན་གྱི་ཟླ་མེད་པར་ཐོས་ན། དེ་མན་ཆད་ཡང་བདག་གི་དབང་དུ་བྱས་ལ་ཐམས་ཅད་འུབ་ལ་ཞེས་པ་དབང་དུ་བསྡུས་ལ་ཇེན་རྦན། ཞེས་པ་འཁོར་དུ་བྱའོ། །གསོད་དོ། །ཞེས་པའི་སྒྲའོ། །དེ་ལྟར་སྒྲོགས་ཤིང་འགྲན་གྱི་ཟླ་མེད་ཆེ་བཙན་གཅིག་པུ་ཉིད་དུ་ལྟའོ།།

ལྔ་པ་དགོས་དགོངས་ཀྱི་ཐར་པ་དཔོན་གཡོག་སྨིན་པའི་དུས་མཚུངས་པར་བསྟན་པ་ནི།

ཇི་ལྟ་ཇི་ལྟར། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

ཇི་ལྟ་ཇི་ལྟར་ཐར་པ་ནག་པོ་གང་ཡིན་པ་རུ་དྲ་ནག་པོར་སྨིན་པར་གྱུར་པ་དེའི་ཚེ་དེའི་དུས་ན། གང་ཐུབ་དཀའ་གཞོན་ནུ་དེ་ནི། སྙིང་པོ་བྱང་ཆུབ་གང་ན་བར། རྡོ་རྗེ་སེམས་དཔའི་དེ་བཞིན་ཉིད་དུ་གྱུར་ཏོ། །གང་དན་ཕག་དེ་ནི་དེའི་ཚེ་དེའི་དུས་ན། རྩལ་ཆེན་རྫོགས་པའི་སྐྱེས་བུ་དམ་པ་རྡོ་རྗེ་འཛིན་པ་ཞེས་བྱ་བ་ཉིད་དུ་གྱུར་ཏོ།།

ཇི་ལྟ་ཇི་ལྟར་ཐར་པ་ནག་པོ་གང་ཡིན་པ། རུ་ཏྲ་ནག་པོར་སྨིན་པར་གྱུར་པ་དེའི་ཚེ་དེའི་དུས་ན། གང་དང་པོ་བསྐལ་པ་ཀུན་དགའི་དུས་ཀྱི་སློབ་དཔོན་ཐུབ་དཀའ་གཞོན་ནུ་དེ་ནི་ས་མཆོག་བཅུ་བཞི་པ་བརྙེས་ཏེ་བྱང་ཆུབ་སྙིང་པོ་གང་༼༣༣༨༽ན་བར་དཔལ་རྡོ་རྗེ་སེམས་དཔའི་དེ་བཞིན་ཉིད་དུ་གྱུར་ཏོ། །གང་བསྐལ་པ་ཀུན་དགའི་དུས་ཀྱི་གཡོག་དན་ཕག་དེ་ན་དེའི་ཚེ་དེའི་དུས་ན། རྩལ་ཆེན་རྫོགས་པའི་རྒྱལ་ཚབ་སྐྱེས་བུ་དམ་པ་རྡོ་རྗེ་འཛིན་པ་ཞེས་བྱ་བ་ཉིད་དུ་གྱུར་ཏོ། །རུ་ཏྲ་དཔོན་གཡོག་སྨིན་པའི་དུས་གཅིག་པར་བཤད་པ་འདི་ཉིད་ལས་དང་ཐུགས་རྗེའི་འབྲེལ་བ་བརྩི་བའི་དགོས་པ་ལས་སྤྱིར་སྨིན་པའི་དུས་མི་གཅིག་གོ །འོན་ཀྱང་རྒྱུ་ལ་གནས་པའི་དུས་སུ་སྔ་ཕྱིའི་ཐ་སྙད་ཡོད་ཀྱང་འབྲས་བུ་ཐོབ་ནས་དེ་འདྲའི་ཐ་སྙད་མེད་དོ། །འོག་ནས། བཤད་པའི་བསྐུལ་བ་དག་ཁྱད་པར་འདི་གཉིས་སུ་བརྗོད་པའང་དོན་འདིའི་དབང་ངོ༌།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རུ་དྲ་ནག་པོའི་སྤྱོད་ཡུལ་བསྟན་པའི་ལེའུ་སྟེ་ཉི་ཤུ་གཉིས་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གདུལ་ཞིང་རུ་ཏྲ་ནག་པོའི་སྤྱོད་ཡུལ་ལ་ཆེ་བ་སྤྱོམ་པའི་ཚུལ་བསྟན་པའི་ལེའུ་སྟེ་ཉི་ཤུ་རྩ་གཉིས་པ་ལེགས་པར་བཤད་པའོ།། །།

ལེའུ་ཉེར་་གསུམ་པ་གང་གི་ཆོ་འཕྲུལ་བསྐུལ་བ།

༈ བམ་པོ་བཞི་པར་ཟུག་པ། གཉིས་པ་གཉེན་པོས་བདུད་བཏུལ་བ་ལ་གསུམ་སྟེ། བདུད་བཏུལ་བའི་སྔོན་དུ་བྱ་བའི་སྦྱོར་བ། བདུད་བཏུལ་བ་དངོས། སྔགས་ཀྱི་སྒོར་ཞུགས་ནས་དབང་ཐོབ་པའོ། །དང་པོ་ལ་བཞི་སྟེ། ཆོ་འཕྲུལ་བསྐུལ་བ། བཀའ་བགྲོས་མཛད་པ། བཀའ་བགྲོས་བཅད་པ། ལས་ཀྱི་སྐོས་གདབ་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས། ཞེས་པ་ནས། དེ་སྐད་དུ་གྲགས་པ་ལས། ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་གང་ན་བར་འདུས་ནས་སྟོང་པ་ཉིད་དུ་བཤིགས་ནས། སྐྱེས་བུ་དམ་པ་སྟོང་པ་ཉིད་ལ་སྣང་བར་མཛད་དེ། དེ་ཉིད་ཀྱི་སྒྲ་དེ་ཉིད་ལ་བསྒྲགས་པ། སྐྱེས་བུ་དམ་པ་ཁྱོད་ཀྱི་ཞིང་ཁམས་ཀྱི་བྱ་བ་ཡོངས་སུ་མ་རྫོགས་པར། ཅིའི་ཕྱིར་མངོན་པར་རྫོགས་པར་བྱང་ཆུབ་པར་བྱ་སྙམ། སངས་རྒྱས་ཀྱི་མཛད་པ་མ་རྫོགས་པར་ཅིའི་ཕྱིར་མངོན་པར་རྫོགས་པར་བྱང་ཆུབ་པར་བྱ་སྙམ། ཐ་དད་དུ་རྣམ་པར་སྣང་བར་མ་མཛད་པར། ཅིའི་ཕྱིར་མངོན་པར་རྫོགས་པར་བྱང་ཆུབ་པར་བྱ་སྙམ། དེ་སྐད་ཅེས་གྲགས་པ་ལས། སྟོང་པ་ཉིད་དེ་ལས་འདི་སྐད་དུ་གྲག་གོ །ཀྱེ་དེ་བཞིན་གཤེགས་པ་ཐམས་ཅད་དོན་གང་གི་དབང་གིས་ཞིང་ཁམས་ཀྱི་བྱ་བ་ཡོངས་སུ་རྫོགས་པར་འགྱུར། དེ་བཞིན་དུ་སངས་རྒྱས་ཀྱི་མཛད་པ་དང་། ཐ་དད་དུ་རྣམ་པར་སྣང་བར་མཛད་པར་འགྱུར། དེ་སྐད་དུ་གྲགས་པ་ལས།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དེ་ལ་གདུལ་བྱ་རུ་ཏྲ་དེ་ལས་དང་ཐུགས་རྗེར་འབྲེལ་བའི་རྒྱལ་བ་རྣམས་ཀྱིས་གཟིགས་ནས་འདུལ་བར་རྩོམ་པའི་ཚུལ་སྟོན་ཏེ། འདུལ་བའི་གཉེན་པོ་འབྱུང་བའི་རྒྱུ་རྐྱེན་གྱིས་སྣང་བར་བྱེད་པའི་ཕྱིར། དེ་ནས་ཕྱོགས་བཅུ་དུས་བཞིའི་རྒྱལ་བ་དེ་བཞིན་གཤེགས་པ་ཐམས་ཅད་ངོ་བོ་དེ་ཉིད་དུ་གཅིག་པའི་ཕྱིར་གནས་སྙིང་པོ་བྱང་ཆུབ་གང་ན་བར་རོ་གཅིག་གི་དགོངས་པས་འདུས་ནས། ཐུབ་དཀའ་གཞོན་ནུ་སྙིང་པོ་བྱང་ཆུབ་ན་བཞུགས་པ་དང་དན་ཕག་རྡོ་རྗེ་འཛིན་པ་ཆེན་པོར་རྩལ་རྫོགས་པ་ལ་ཆ་མཐུན་གྱིས་བསྐུལ་བའི་ཕྱིར། སོ་སོའི་སྐུ་མི་སྣང་བར་སྟོང་པ་ཉིད་དུ་བཤིགས་ནས་དེ་བཞིན་ཉིད་ལས་མ་གཡོས་པར། དེ་ཉིད་སྐྱེས་བུ་དམ་པ་ཐུབ་དཀའ་གཞོན་ནུ་སྙིང་པོ་བྱང་ཆུབ་དང་དན་ཕག་རྩལ་ཆེན་རྫོགས་པའི་སྙིང་པོར་སྟོང་པ་༼༣༣༩༽ཉིད་དུ་བཞུགས་པ་ལ་སྣང་བར་མཛད་དེ། དོན་གྱི་གསུང་གིས་སྟོང་པ་དེ་ཉིད་ཀྱི་སྒྲ་སྟོང་པ་དེ་ཉིད་ལ་གྲགས་པ་ཞེས་རྒྱལ་བ་རིལ་དང་ཐུབ་དཀའ་གཞོན་ནུ་དང་རྡོ་རྗེ་འཛིན་པ་ངོ་བོ་ཐ་མི་དད་པས་ཉིད་ལ་ཉིད་བསྐུལ་བའོ།།

ཇི་ལྟར་བསྐུལ་བ་དངོས་ནི་སྐྱེས་བུ་དམ་པ་དགེ་སློང་ཐུབ་དཀའ་རྡོ་རྗེ་སྙིང་པོའམ་དན་ཕག་རྡོ་རྗེ་འཛིན་པ་ཁྱེད་ཀྱིས་གདུལ་བྱར་འབྲེལ་བའི་མཐའ་རུ་ཏྲར་གྱུར་པ་མ་བཏུལ་བའམ་འགྲོ་བའི་རྒྱུད་དག་པར་མ་བྱས་ཏེ་ཞིང་ཁམས་ཀྱི་བྱ་བ་ཡོངས་སུ་མ་རྫོགས་པར། ཅིའི་ཕྱིར་མངོན་པར་རྫོགས་པར་བྱང་ཆུབ་པར་བྱ་སྙམ་སྟེ་ཆོས་སྐུ་ལས་གཟུགས་སྐུར་མ་བཞེངས་པས་སོ། །རྒྱལ་བའི་ཕྲིན་ལས་དྲག་པོའི་ལས་ཀྱི་ཡན་ལག་ཀུན་གྱིས་སངས་རྒྱས་ཀྱི་མཛད་པ་མ་རྫོགས་པར་ཅིའི་ཕྱིར་མངོན་པར་རྫོགས་པར་བྱང་ཆུབ་པར་བྱ་སྙམ་སྟེ་གཟུགས་སྐུ་ལས་རིགས་ལྔར་མ་བཞེངས་པས་སོ།།

ཁྲོ་བོའི་སྐུ་ལ་སོགས་པ་སྤྲུལ་པ་མང་པོ་ཐ་དད་དུ་ད་དུང་རྣམ་པར་སྣང་བར་མ་མཛད་པར། ཅིའི་ཕྱིར་མངོན་པར་རྫོགས་པར་བྱང་ཆུབ་པར་བྱ་སྙམ་སྟེ་རིགས་ལྔས་སེམས་ཅན་གྱི་དོན་མ་མཛད་པས་སོ། །དེས་ན་མངོན་པར་སངས་རྒྱ་བའི་དུས་མ་ཡིན་པས་དེ་གསུམ་གྱིས་ཤིག་པའི་ཕྱིར་བསྐུལ་བར་མཛད་པ་དེ་སྐད་ཅེས་གྲགས་པ་ལས། བསྐུལ་བ་གསན་ནས་སྙིང་པོ་བྱང་ཆུབ་དང་རྩལ་ཆེན་རྫོགས་པའི་སྟོང་པ་ཉིད་དེ་ལས་འདི་སྐད་དུ་གྲག་གོ།

ཀྱེ་དེ་བཞིན་གཤེགས་པ་ཐམས་ཅད་དོན་གྱི་དགོངས་པ་དང་དགོས་པ་གང་གི་དབང་གིས་ཞིང་ཁམས་ཀྱི་བྱ་བ་ཡོངས་སུ་རྫོགས་པར་འགྱུར། དེ་བཞིན་དུ་སངས་རྒྱས་ཀྱི་མཛད་པ་གང་གིས་དང༌། ཐ་དད་དུ་རྣམ་པར་སྣང་བར་མཛད་པར་ཇི་ལྟར་འགྱུར་ཞེས་དེ་སྐད་དུ་གྲགས་ཏེ་བསྐུལ་བ་དེ་གསུམ་ཇི་ལྟར་བྱ་བར་ཞུས་པ་ལས།

གཉིས་པ་རྒྱས་པར་བཤད་པ་ལ་གསུམ་སྟེ། ཆོས་སྐུ་ལས་གཟུགས་སྐུར་བཞེངས་པར་བསྐུལ་བས་བཞེངས་པ། གཟུགས་སྐུ་ལས་རིགས་ལྔར་བཞེངས་པར་བསྐུལ་བས་བཞེངས་པ། རིགས་ལྔས་སེམས་ཅན་གྱི་དོན་མཛོད་ཅིག་པར་བསྐུལ་བས་དོན་མཛད་པའོ། །དང་པོ་ལ་གཉིས་ཏེ། བསྐུལ་བས་དེ་བཞིན་དུ་མཛད་པ། དེའི་ཡོན་ཏན་བསྟན་པའོ། །དང་པོ་ལ་གསུམ་སྟེ། དེ་བཞིན་ཉིད་ཀྱི་ཏིང་ངེས་སྣང་བའི་གཞིར་བསྐུལ་བས་དེ་ལྟར་མཛད་པ་ལན་དང་བཅས་པ། སྙིང་རྗེའི་ཏིང་ངེས་རྒྱལ་བའི་ཡུམ་མཛོད་ཅིག་པར་བསྐུལ་བས་མཛད་པ་ལན་དང་བཅས་པ། རྒྱུའི་ཏིང་ངེས་སྐུ་བསྐྱེད་ཅིག་པར་༼༣༤༠༽བསྐུལ་བས་མཛད་པ་ལན་དང་བཅས་པའོ། །དང་པོ་ནི།

ཡང་ཐམས་ཅད་ཀྱི། ཞེས་པ་ནས། རྟོག་པའི་རྒྱུ། །ཞེས་གྲག་གོ །ཞེས་པའི་བར་གྱིས་བསྟན་ཏེ།

ཡང་ཐམས་ཅད་ནི་དེ་ཁོ་ན་ཉིད་ལས་བསྐུལ་བ་གསུམ་གྱིས་བསྐུལ་བའི་དང་པོ་འདི་སྐད་གྲག་གོ།

སྟོང་ཉིད་མི་གཡོ་ནམ་མཁའ་ལ། །མི་བསྐྱོད་བདེ་བར་གཤེགས་མཛད་པ། །མི་དམིགས་མི་རྟོག་དེ་བཞིན་ཉིད།།

རྟོག་པ་སྣ་ཚོགས་བསྐྱེད་པར་མཛད། །ཅེས་གྲག་གོ །དེ་ལ་ཡང་སྐྱེས་བུ་དམ་པ་དེ་ཉིད་ལས་འདི་སྐད་དུ་གྲག་གོ།

མི་རྟོག་ངང་ལས་བརྟག་ཉིད་དུ། །བརྟག་པས་རྟོགས་པ་གང་བྱུང་བ། །དེ་ཉིད་རྟོགས་པ་ཆེན་པོ་སྟེ།།

གང་མི་རྟོག་པ་རྟོག་པའི་རྒྱུ། །ཞེས་གྲག་གོ།

ཡང་རྒྱལ་བ་ཐམས་ཅད་སྙིང་པོ་བྱང་ཆུབ་ཀྱི་དེ་ཁོ་ན་ཉིད་ལ་བཞུགས་པ་ལས་བསྐུལ་བ་མཆོག་གི་ཐབས་ཚུལ་གསུམ་གྱིས་བསྐུལ་བར་བརྗོད་པའི་ཐོག་མ་ལའང་དེ་བཞིན་ཉིད་ཀྱི་སྒོ་ནས་བསྐུལ་བ་ལ་སོགས་པ་ལྔ་བརྗོད་པའི་ཡང་དང་པོ་དེ་བཞིན་ཉིད་དུ་བཞུགས་པ་ལས་བཞེངས་པར་བསྐུལ་ཏེ། རྡོ་རྗེ་སྙིང་པོ་ལ་དེ་བཞིན་ཉིད་ཀྱི་ཏིང་ངེ་འཛིན་གྱི་སྒོ་ནས་བསྐུལ་བ་འདི་སྐད་དུ་གྲག་གོ །ལེའུ་འདིའི་བསྐུལ་བའི་མཁན་པོ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཡིན་ལ། ལན་འདེབས་པ་པོ་ནི་ཐུབ་དཀའ་གཞོན་ནུ་རྡོ་རྗེ་སེམས་དཔར་གྱུར་པ་དང༌། དན་ཕག་ཕྱག་ན་རྡོ་རྗེར་གྱུར་པ་ཡིན་ཏེ་ཀུན་ལ་ཤེས་པར་བྱའོ། །དེ་ཡང་སྟོང་པ་ཉིད་ཆེན་པོ་འབྱུང་འཇུག་དང་བྲལ་ཏེ་མི་གཡོ་བར་རང་གསལ་བའི་ངོ་བོ་ནམ་མཁའ་ལྟ་བུ་ལ་རྟོག་པས་ཡོངས་སུ་མི་བསྐྱོད་པར་བདེ་བ་ཆེན་པོའི་ངང་དུ་ཆོས་ཀྱི་སྐུར་ཡང་དག་པར་གཤེགས་པའི་རང་དོན་གྱི་མཛད་པ་མཐར་ཕྱིན་པར་བརྙེས་པས་སྐྱེས་བུ་ཆེན་པོ་དོན་གྲུབ་པ་ཁྱེད་ཉིད་གཞན་དོན་གྱི་མཛད་པ་ཡུལ་དུ་མི་དམིགས་ཤིང་ངོ་བོ་སེམས་སུ་མི་རྟོག་པའི་ཆོས་དབྱིངས་དེ་བཞིན་ཉིད་ཅིར་ཡང་གཏོད་འཛིན་མེད་དེ་མ་བཅོས་པ་ཆེན་པོའི་ངང་ལས་ཐུགས་རྗེའི་དབང་གིས་ཡང་དག་པའི་རྟོག་པ་བརྒྱད་ཅུ་རྩ་གཅིག་ལ་སོགས་པར་སྣ་ཚོགས་སུ་སྣང་ནས་གདུལ་བྱ་འདུལ་བའི་ཐབས་ཀྱི་རྒྱུར་བསྐྱེད་པར་མཛོད་ཅིག ཅེས་བཞེངས་པར་བསྐུལ་བའི་སྒྲ་གྲག་གོ །དེ་ལ་ལན་ཡང་སྐྱེས་བུ་དམ་པ་སྙིང་པོ་བྱང་ཆུབ་ཀྱི་ཆོས་ཉིད་ལ་བཞུགས་པ་དེ་ཉིད་ལས་འདི་སྐད་དུ་གྲག་གོ །བསྒོམ་པ་དམིགས་སུ་མེད་པའི་མི་རྟོག་པ་ཆེན་པོའི་ངང་ལས་དུས་རྟག་པར་ཐམས་ཅད་དུ་འདའ་བ་མེད་པ་ཉིད་དུ་གསལ་བ་ལ། ཞེན་པས་བཟུང་བས་བརྟགས་པས་རྟོག་པའམ་སྟོང་པ་ཉིད་དུ་གང་བྱུང་བ་དེ་ཉིད་ཐེར་ཟུག་གི་རྟོག་པ་ཆེན་པོ་གཞིལ་བར་དཀའ་བ་སྟེ། དེས་ན་གང་བླ་དྭགས་དང་བྲལ་བའི་དེ་བཞིན་ཉིད་རྣམ་པར་མི་རྟོག་པ་ཆེན་པོ་དམིགས་པ་ཀུན་དང་བྲལ་བར་ལྷུན་གྱིས་གྲུབ་པའི་ངང་ནི་ཡང་དག་པའི་རྟོག་པ་བརྒྱད་ཅུ་རྩ་གཅིག་ལ་སོགས་པའི་རྒྱུ་ཡི་ངོ་བོ་རིལ་མ་འདྲེས་ཡོངས་སུ་རྫོགས་པ་ཉིད་པས་རྟོག་པ་བསྐྱེད་ཅི་དགོས་པར་ལན་བཏབ་བོ། །ཞེས་༼༣༤༡༽དེ་བཞིན་ཉིད་ལས་བཞེངས་པའི་ཞལ་བཞེས་ཉིད་གྲག་གོ །དེ་ལྟར་བསྐུལ་བའང་རྒྱལ་བའི་རིལ་གྱི་ཆོས་ཉིད་ལས་བྱུང་བ་དང༌། ལན་ཡང་སྐྱེས་བུའི་ཆོས་ཉིད་ལས་བྱུང་ནས་ཞལ་གྱིས་བཞེས་པར་འཆད་པ་རིལ་ཡང་རྗེས་སུ་སྦྱར་རོ།།

གཉིས་པ་སྙིང་རྗེའི་ཏིང་ངེས་རྒྱལ་བའི་ཡུམ་མཛོད་ཅིག་པར་བསྐུལ་བས་མཛད་པ་ལན་དང་བཅས་པ་ནི།

ཡང་ཐམས་ཅད། ཞེས་པ་ནས། བསྐྱེད་པའི་ཡུམ། ཞེས་གྲག་གོ །ཞེས་པའི་བར་གྱིས་བསྟན་ཏེ།

ཡང་ཐམས་ཅད་ཀྱིས་དེ་ཉིད་ལས་འདི་སྐད་དུ་གྲག་གོ །ནམ་མཁའི་དབྱིངས་ཀྱི་སྙིང་པོ་ལས། །

རང་བཞིན་ཀུན་ཏུ་སྣང་བའི་འོད། །ཡོངས་ལ་ཁྱབ་པའི་སྙིང་རྗེའི་ཡུམ། །མཐའ་ཡས་རྒྱལ་སྲས་སྐྱེད་པར་མཛད།།

ཅེས་གྲག་གོ །ཡང་སྐྱེས་བུ་དམ་པ་དེ་ཉིད་ལས་འདི་སྐད་དུ་གྲག་གོ །ཀུན་འབྱུང་ཀུན་གཞིའི་ཆོས་ཀྱི་དབྱིངས།།

མ་སྐྱེས་མི་འགགས་ཀུན་ཏུ་སྣང་། །སྨྲ་བསམ་བརྗོད་མེད་ཡུལ་ལས་འདས།།

མཐའ་ཡས་མཐའ་ཡས་བསྐྱེད་པའི་ཡུམ། །ཞེས་གྲག་གོ།

ཡང་རྒྱལ་བ་ཐམས་ཅད་ཀྱི་དེ་ཁོ་ན་ཉིད་ལས་འདི་སྐད་དུ་གྲག་གོ །ཀུན་ཏུ་སྣང་བའི་ཏིང་ངེ་འཛིན་ལས་ཐུགས་རྗེར་བསྐྱེད་ཅིག་པར་སྐུལ་ཏེ། ཡེ་ཤེས་མ་སྒྲིབ་པར་འོད་གསལ་བས་ནམ་མཁའི་དབྱིངས་ཀྱི་སྙིང་པོ་མུ་མཐའ་མེད་པ་ལས་ཡེ་གསལ་གྱི་ངོ་བོར་བརྡལ་བ་ནི་ཆོས་ཀུན་གྱི་རྩ་བ་ཡིན་པའི་ཕྱིར། སེམས་ཀྱི་རང་བཞིན་གྱིས་རིལ་ཟིན་པའི་ཀུན་ཏུ་སྣང་བའི་རང་འོད་ཐུགས་རྗེ་ཆེན་པོ་སྟེ། སེམས་ཅན་ཐམས་ཅད་ཀྱི་དོན་མཛད་ཅིང་ཡོངས་ལ་ཁྱབ་པ་འབྱུང་བའི་སྙིང་རྗེའི་ཡུམ་ཡིན་པས་འགྲོ་བ་མཐའ་ཡས་ཇི་སྙེད་པ་ལས་རྒྱལ་བའི་རིགས་འཛིན་པ་དག་རྒྱལ་སྲས་སུ་སྐྱེད་དེ་ཐུགས་རྗེས་སྨིན་པར་མཛོད་ཅིག་ཅེས་ཀུན་ཏུ་སྣང་བའི་ཏིང་ངེ་འཛིན་གྱིས་བསྐུལ་བར་གྲག་གོ །ཡང་དེའི་ལན་སྐྱེས་བུ་དམ་པ་དེ་ཉིད་ལས་འདི་སྐད་དུ་གྲག་གོ །རྡོ་རྗེ་སྙིང་པོ་ལ་ཆེད་དུ་མ་བྱས་པར་ཀུན་སྣང་གི་སྙིང་རྗེ་ཆེན་པོ་རྫོགས་པ་ལས་བཞེངས་པར་ཞལ་གྱིས་བཞེས་ཏེ། དངོས་པོ་བཟང་ངན་འཁོར་འདས་ཀྱི་ཆོས་ཀུན་འབྱུང་ཞིང་སྣང་ལ་ཀུན་གྱི་རྟེན་གཞི་ཆོས་ཐམས་ཅད་ཀྱི་དེ་བཞིན་ཉིད་མ་བཅོས་པའི་ཆོས་ཉིད་མཉམ་པ་ཆེན་པོའི་དབྱིངས་ངོ་བོ་མ་སྐྱེས་ཤིང་མི་འགག་པས་འདུས་བྱས་ཀྱི་མཚན་ཉིད་དང་བྲལ་ཏེ་ལྡན་པ་མེད་པ་ནི་ཡེ་ཤེས་ཆེན་པོ་ཉིད་དེ་ཐམས་ཅད་ཀུན་ཏུ་སྣང་སྟེ་སྣུམས་ཤིང་གསལ་བ་ལ། ཚིག་དང་བློས་འདི་འདྲར་སྨྲ་བསམ་བརྗོད་པ་དང་བྲལ་ཏེ་དམིགས་པ་མེད་ཅིང་ཡུལ་ལས་འདས་པ་ཡིན་ཀྱང་རྒྱལ་བ་རྫོགས་པའི་སངས་རྒྱས་མཐའ་ཡས་པ་ཀུན་དང་སེམས་ཅན་མཐའ་ཡས་པ་རིལ་24ཐུགས་རྗེ་ཆེན་པོ་དེ་ལས་འཆར་ཞིང་བསྐྱེད་པའི་ཡུམ་ཆེན་པོར་ཡེ་ནས་བཞུགས་པ་ལ་ཆེད་དུ་བསྐྱེད་ཅི་དགོས་ཞེས་ལན་བཏབ་པར་གྲག་གོ།

གསུམ་པ་རྒྱུའི་ཏིང་ངེས་སྐུ་བསྐྱེད་ཅིག་པར་བསྐུལ་བས་མཛད་པ་ལན་དང་བཅས་པ་ལ་གསུམ་སྟེ། གསུང་ཡིག་འབྲུར་བཞེངས་པར་བསྐུལ་བས་བཞེངས་པ་ལན་དང་བཅས་པ། ཐུགས་ཕྱག་རྒྱར་བཞེངས་པར་བསྐུལ་བས་བཞེངས་པ་ལན་དང་བཅས་པ། སྐུ་རྫོགས་༼༣༤༢༽པར་བཞེངས་པར་བསྐུལ་བས་བཞེངས་པ་ལན་དང་བཅས་པའོ། །དང་པོ་ནི།

ཡང་ཐམས་ཅད་ཀྱི། ཞེས་པ་ནས། ཡི་གེ་ཨ། །ཞེས་གྲག་གོ །ཞེས་པའི་བར་གྱིས་བསྟན་ཏེ།

ཡང་ཐམས་ཅད་ཀྱིས་དེ་ཉིད་ལས་འདི་སྐད་ཅེས་གྲག་གོ །ཐ་དད་རྣམ་པར་སྣང་མཛད་ན། །གསུང་གི་ཕྱག་རྒྱའི་ཡེ་ཤེས་ལས། །རྒྱལ་བ་རྣམས་ཀྱི་ཡི་གེར་སྣང་། །ཡི་གེའི་ཡེ་ཤེས་སྐྱེད་པར་མཛོད། །ཅེས་གྲག་གོ །ཡང་སྐྱེས་བུ་དམ་པ་དེ་ཉིད་ལས་འདི་སྐད་དུ་གྲག་གོ །དེ་ཡང་ཡི་གེའི་རང་བཞིན་ཏེ། །རང་བྱུང་ཡི་གེ་མུཾ་དུ་གསལ། །སེམས་ཉིད་ཡེ་གེའི་རང་བཞིན་ཏེ། །སྣ་ཚོགས་ཡི་གེ་ཧཱུཾ་དུ་གསལ། །རྒྱལ་བ་ཡི་གེའི་རང་བཞིན་ཏེ། །ཕྱག་རྒྱའི་ཡི་གེའི་ཨ་ལ་རྫོགས། །ཐམས་ཅད་ཡི་གེའི་རང་བཞིན་ཏེ། །མ་སྐྱེས་གསང་བའི་ཡི་གེ་ཨ། །ཞེས་གྲག་གོ།

ཡང་རྒྱལ་བ་ཐམས་ཅད་ཀྱི་དེ་ཁོ་ན་ཉིད་ལས་འདི་སྐད་དུ་གྲག་གོ །རྒྱུའི་ཡི་གེ་ལས་བཞེངས་ཤིག་པར་བསྐུལ་ཏེ། རྒྱལ་བའི་སྐུ་མི་མཐུན་པ་ཐ་དད་མང་པོ་འགྲོ་བ་ལ་རྣམ་པར་སྣང་བར་མཛད་པ་ན། དེའི་གཞི་ཡི་གེ་ཡིན་པའི་ཕྱིར་རང་སྣང་གསུང་གི་ཕྱག་རྒྱའི་རྣམ་གྲོལ་ཡི་གེའི་ཡེ་ཤེས་སུ་གསལ་བ་ལས། རྒྱལ་བ་རྣམས་ནི་གསུང་ཡི་གེར་ངོ་བོ་ཐ་མི་དད་པར་སྣང་བས་རྒྱུའི་ཏིང་ངེ་འཛིན་ཡི་གེའི་ཡེ་ཤེས་དང་གསུང་གི་ཆོ་གའི་ངོ་བོར་གསལ་ཞིང་བསྐྱེད་པར་མཛོད་ཅིག་ཅེས་རྒྱུ་དང་གསུང་གི་ཆོ་ག་ཐུན་མོང་གིས་བསྐུལ་བར་གྲག་གོ །ལན་དུ་ཡང་སྐྱེས་བུ་དམ་པ་དེ་ཉིད་ལས་འདི་སྐད་དུ་གྲག་གོ །ཡི་གེའང་རང་རིག་ལ་ཡིན་པས་ཐམས་ཅད་ཀྱི་རྒྱུ་ཡིན་པར་བསྟན་ཏེ། ཆོས་རྣམས་ཀྱི་དེ་བཞིན་ཉིད་རང་རིག་པ་ནི་ཡི་གེའི་རང་བཞིན་དུ་ལྷུན་གྱིས་གྲུབ་པར་རང་གསལ་བའི་ངོ་བོ་ཉིད་དེ། དེས་ན་ཆོས་རྣམས་ཀྱི་རང་བཞིན་མ་སྐྱེས་པ་ཉིད་རང་བྱུང་ཡི་གེ་མཱུྃ་གྱི་ངོ་བོ་ཉིད་དུ་དབྱིངས་ཀྱི་དཀྱིལ་འཁོར་དུ་གསལ་བར་ཤར་ལ། སེམས་ཉིད་རང་རིག་པ་ཉིད་བཤད་པ་བཞིན་དུ་ཡི་གེའི་རང་བཞིན་དང་ཐ་མི་དད་པ་ཉིད་དུ་ངེས་ཏེ་གཉིས་སུ་མེད་པས་ཡེ་ཤེས་སྣ་ཚོགས་ཇི་སྙེད་པ་ཀུན་གྱི་ངོ་བོ་ཡི་གེ་ཧཱུྃ་ཉིད་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་གསལ་ཞིང་སྣང་ལ། རྒྱལ་བ་བདེ་བར་གཤེགས་པ་ཀུན་གྱི་ངོ་བོ་ཉིད་ཡོན་ཏན་རིལ་གྱི་བདག་ཉིད་ཀྱང་ཡི་གེའི་རང་བཞིན་ཡིན་ཏེ། དེའི་ཕྱིར་ཕྱག་རྒྱ་གསུང་གི་ཡི་གེ་ཨཱ་ལ་སོགས་པ་བཞི་བཅུ་རྩ་གཉིས་སུ་ཡེ་ནས་གསལ་བར་རྫོགས་པས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་རོ། །དེར་མ་ཟད་ཆོས་སོ་ཅོག་ཐམས་ཅད་ཀུན་ཀྱང་ཡི་གེའི་རང་བཞིན་དང་ངོ་བོ་ཐ་མི་དད་པས་འཕྲལ་ལ་ཐ་དད་དུ་སྐྱེས་པ་མིན་ཏེ། རིལ་མ་སྐྱེས་པའི་ཕྱིར་གསང་བའི་ཡི་གེ་ཨ་ཡི་ངོ་བོར་ཤར་བ་ལ་འཕྲལ་དུ་རྒྱུའི་ཡི་གེ་བསྐྱེད་མི་དགོས་པར་ལན་བཏབ་བོ། །ཞེས་ཞལ་བཞེས་གྲག་གོ།

གཉིས་པ་ཐུགས་ཕྱག་རྒྱར་བཞེངས་པར་བསྐུལ་བས་བཞེངས་པ་ལན་དང་བཅས་པ་ནི།

ཡང་ཐམས་ཅད་ཀྱི། ཞེས་པ་ནས། མཚན་མར་སྣང༌། །ཞེས་གྲག་གོ །ཞེས་པའི་བར་གྱིས་བསྟན་ཏེ།

ཡང་ཐམས་ཅད་ཀྱིས་དེ་ཉིད་ལས་འདི་སྐད་དུ་གྲག་གོ །ཡེ་ཤེས་ཕ་རོལ་ཕྱིན་རྫོགས་པས། །རྣམ་གྲོལ་རིག་པའི་གོ་མཚོན་པ། །ཐུགས་ཀྱི་བརྟགས་སྣང་སྣང་བ་མཛད། །རྣམ་གྲོལ་ཡེ་ཤེས་སྐྱེད་པར་མཛོད། །ཅེས་གྲག་གོ །ཡང་སྐྱེས་བུ་དམ་པ་དེ་ཉིད་ལས་འདི་སྐད་དུ་གྲག་གོ །སངས་རྒྱས་ཀུན་གྱི་ཡེ་ཤེས་ནི། །རྟག་ཏུ་རྣམ་རྟོག་མེད་ལས་བྱུང་། །མི་རྟོག་རྣམ་གྲོལ་ཡེ་ཤེས་ཐུགས། །རྟོག་ལ་རྣམ་རྟོག་མཚན་མར་སྣང་། །ཞེས་གྲག་གོ།

ཡང་རྒྱལ་བ་ཐམས་ཅད་ཀྱི་དེ་བཞིན་ཉིད་ལས་འདི་སྐད་དུ་གྲག་གོ །སྙིང་པོ་བྱང་ཆུབ་ལས་ཐུགས་ཀྱི་ཆོ་གས་ཡི་གེ་ལས་ཕྱག་མཚན་༼༣༤༣༽གྱི་ཕྱག་རྒྱར་བཞེངས་ཤིག་པར་བསྐུལ་ཏེ། རྒྱལ་བའི་ཐུགས་སྙིང་པོ་བྱང་ཆུབ་ལ་ཡེ་ཤེས་རིལ་མ་འདྲེས་ལ་ཕ་རོལ་ཏུ་ཕྱིན་པར་ཡོངས་སུ་རྫོགས་ཤིང་འདུས་པ། དེའི་དོན་རྣལ་འབྱོར་པ་ལམ་པ་རྣམས་ཀྱིས་རྣམ་གྲོལ་གྱི་ངོ་བོར་རིག་ཅིང་རྟོགས་པར་བྱ་བའི་སྒོ་མཚོན་པའི་ཐབས་དམ་པ་ཐུགས་ཡེ་ཤེས་ལྔ་ལ་སོགས་ཀྱི་རང་རྟགས་རྡོ་རྗེ་དང་འཁོར་ལོ་ལ་སོགས་པ་རྣམས་སུ་གསལ་བར་རྒྱལ་བ་རྣམས་ཀྱིས་སྣང་བར་མཛད་པ་ལྟར་དུ། སྐྱེས་བུས་ཀྱང་ཐུགས་རྣམ་གྲོལ་ཡེ་ཤེས་མཚོན་པའི་ཐུགས་མཚན་དམ་ཚིག་གི་ཕྱག་རྒྱ་བསྐྱེད་པར་མཛོད་ཅིག་ཅེས་ཐུགས་ཀྱི་ཆོ་གས་བསྐུལ་བར་གྲག་གོ །ལན་ཡང་སྐྱེས་བུ་དམ་པ་དེ་ཉིད་ལས་འདི་སྐད་དུ་གྲག་གོ །རྡོ་རྗེ་སྙིང་པོ་ཐུགས་མི་གཡོ་བར་སྣང་བའི་ཕྱག་རྒྱ་འབྱུང་བར་ཞལ་གྱིས་བཞེས་ཏེ། ཞེན་པ་གཉིས་མཐར་སྤངས་པས་ཐམས་ཅད་མ་བཀོལ་བའི་ངོ་བོར་བཞུགས་པའི་སངས་རྒྱས་ཀུན་གྱི་ཐུགས་མཁྱེན་པའི་ཡེ་ཤེས་ནི། དུས་གསུམ་ཀུན་ཏུ་མི་འགྱུར་བར་རྟག་ཏུ་མཚན་མའི་རྣམ་པར་རྟོག་པ་གཞི་མེད་དུ་གྲོལ་བའི་གོ་འཕང་དམ་པ་བརྙེས་པ་ལས་འབྱུང་བའི་ཕྱིར་རྣམ་པར་མི་རྟོག་པའི་ཡེ་ཤེས་ཀྱི་ངོ་བོ་གཟུང་འཛིན་རྣམ་རྟོག་གི་མདུད་པ་རང་སར་ཞིག་ཅིང་རྣམ་པར་གྲོལ་བའི་ཡེ་ཤེས་ཆེན་པོ་རང་བྱུང་གི་ཐུགས་སོ། །དེ་བས་ན་འདུལ་བྱ་རྟོག་པ་ཅན་ལ་ཕྱག་མཚན་སྣ་ཚོགས་ཀྱི་ཕྱག་རྒྱའི་མཚན་མར་སྣང་ཡང་ཐུགས་ཡེ་གྲོལ་བ་ལ་མཚོན་པའི་ཕྱག་རྒྱ་བསྐྱེད་མི་དགོས་པར་ལན་བཏབ་བོ། །ཞེས་རྟོག་པ་ཅན་ལ་ཡི་གེ་ལས་ཕྱག་མཚན་འབྱུང་བར་སྟོན་པའི་ཞལ་བཞེས་གྲག་གོ།

གསུམ་པ་སྐུ་རྫོགས་པར་བཞེངས་པར་བསྐུལ་བས་བཞེངས་པ་ལན་དང་བཅས་པ་ནི།

ཡང་ཐམས་ཅད་ཀྱི། ཞེས་པ་ནས། རྣམ་པར་སྣང༌། །ཞེས་གྲག་གོ །ཞེས་པའི་བར་གྱིས་བསྟན་ཏེ།

ཡང་ཐམས་ཅད་ཀྱིས་དེ་ཉིད་ལས་འདི་སྐད་དུ་གྲག་གོ །སྟོང་ཉིད་མི་རྟོག་མེ་ལོང་ལས། །མ་སྐྱེས་མི་འགག་གཟུགས་སྣང་བ། །མཁའ་ལ་འཇའ་སྣང་ཇི་བཞིན་དུ། །དབྱིངས་ལས་ཕྱག་རྒྱར་བཞེངས་སུ་གསོལ། །ཞེས་གྲག་གོ།

ཡང་སྐྱེས་བུ་དམ་པ་དེ་ཉིད་ལས་འདི་སྐད་དུ་གྲག་གོ །དེ་བཞིན་ཉིད་དུ་མི་དམིགས་ཀྱང་། །རང་བཞིན་ཀུན་ཏུ་སྣང་བའི་དབྱིངས། །མ་འདྲེས་ཡོངས་སུ་རྫོགས་པས་ན། །ཕྱག་རྒྱའི་གཟུགས་མཆོག་རྣམ་པར་སྣང་། །ཞེས་གྲག་གོ།

ཡང་རྒྱལ་བ་ཐམས་ཅད་ཀྱི་དེ་བཞིན་ཉིད་ལས་འདི་སྐད་དུ་གྲག་གོ །སྐུ་ཡོངས་སུ་རྫོགས་པར་བཞེངས་ཤིག་པར་བསྐུལ་ཏེ། ཡེ་ཇི་བཞིན་པའི་སྟོང་པ་ཆེན་པོ་དེ་བཞིན་ཉིད་ངོ་བོ་མི་རྟོག་པར་མེ་ལོང་ལྟ་བུར་རང་གསལ་བ་ལས་རང་བཞིན་མ་སྐྱེས་ཀྱང་རྣམ་པ་མི་འགག་པར་ལོངས་སྤྱོད་རྫོགས་པ་དང་སྤྲུལ་པའི་སྐུའི་གཟུགས་སུ་འཆར་ཞིང་སྣང་བར་མཛད་པ་ཡང་དཔེ་ནམ་མཁའ་ལ་འཇའ་ཚོན་སྣང་བ་ཇི་ལྟ་བ་བཞིན་དུ་མི་གཡོ་བའི་ཆོས་སྐུ་ཆེན་པོའི་དབྱིངས་ལས་ཕྱག་མཚན་འོད་དུ་ཞུ་ནས་ཁྲོ་བོའི་ཕྱག་རྒྱར་བཞེངས་སུ་གསོལ་ཞེས་སྐུ་ཡོངས་སུ་རྫོགས་པའི་ཏིང་ངེ་འཛིན་གྱིས་བསྐུལ་བ་ཉིད་གྲག་གོ །དེའི་ལན་༼༣༤༤༽ཡང་སྐྱེས་བུ་དམ་པ་དེ་ཉིད་ལས་འདི་སྐད་དུ་གྲག་གོ །ཐུགས་མི་གཡོ་བ་ལས་སྐུར་བཞེངས་པར་ཞལ་གྱིས་བཞེས་ཏེ། ཡེ་ནས་མ་བཅོས་པའི་དེ་བཞིན་ཉིད་ཀྱི་ངང་དུ་གཟུགས་སྐུའི་རྣམ་པ་མི་དམིགས་པར་ཆོས་ཀྱི་སྐུར་རྣམ་པར་གྲོལ་བ་ཡིན་ཀྱང་རོལ་པའི་རང་བཞིན་ཀུན་ཏུ་སྣང་བ་ལ་གཟུགས་ཀྱི་སྐུ་མི་མཐུན་པ་སྣ་ཚོགས་སུ་འཆར་བའང་མི་འགོག་པར་མུ་མཐའ་མེད་པའི་དབྱིངས་ལས་མི་གཡོ་བར་བཞུགས་སོ། །དེ་བས་ན་མ་འདྲེས་ལ་ཡོངས་སུ་རྫོགས་པས་ངང་ཆེན་པོ་ལ་གཅིག་དང་དུ་མ་བྲལ་བའི་ཚུལ་གྱིས་ལྷུན་གྱིས་གྲུབ་པའི་གཏན་ཚིགས་དེའི་ཕྱིར་ན་ཞི་བ་དང་ཁྲོ་བོའི་སྐུར་མ་འདྲེས་པར་ཕྱག་རྒྱའི་གཟུགས་མཆོག་རྣམ་པར་སྣང་ཞིང་གསལ་བ་ལ་སྐུར་བཞེངས་ཅི་དགོས་ཞེས་ལན་བཏབ་བོ། །ཞེས་གྲག་གོ།

གཉིས་པ་དེའི་ཡོན་ཏན་བསྟན་པ་ནི།

དེ་ལྟར། ཞེས་པ་ནས། གནས་པ་ལས། །ཞེས་པའི་བར་གྱིས་བསྟན་ཏེ།

དེ་ལྟར་བསྐུལ་བ་དང་པོ་དེས་ཡོངས་སུ་རྫོགས་པར་བསྐུལ་བས། སྐྱེས་བུ་དམ་པ་དེ་ཁོ་ན་ཉིད་དེ་སྟོང་པ་ཉིེད་ཀྱི་དབྱིངས་དེ་ལས། སྟོང་པ་ཉིད་ཀྱི་རྣམ་པར་སྣང་བ་ནི། ཇི་ལྟ་ཇི་ལྟར་ཆུ་ཟླའི་དཀྱིལ་འཁོར་སྣང་བའམ། ནམ་མཁའ་ལ་འཇའ་སྣང་བའི་ཚུལ་དུ་བྱུང་ནས། གང་མ་ངེས་པའི་ཡེ་ཤེས་ཀྱིས་གནས་པས་གནས་པ་ལས།

དེ་ལྟར་བསྐུལ་བ་དང་པོ་ལྔ་པོ་དེས་སྐུ་ཡོངས་རྫོགས་པར་གྱིས་ཤིག་པར་བསྐུལ་བས་སྐྱེས་བུ་དམ་པ་དེ་ཁོ་ན་ཉིད་དེ་ཡིས་དོན་གྱིས་ཞལ་གྱིས་བཞེས་ནས་བསྐུལ་བ་གསན་པའི་ཕྱིར་སྟོང་པ་ཉིད་ཀྱི་དབྱིངས་དེ་ལས་འབྱུང་འཇུག་མེད་པར་སྟོང་པ་ཉིད་ཀྱི་སྐུ་རྣམ་པར་སྣང་བ་ནི་དོན་ཇི་ལྟ་དཔེ་ཇི་ལྟར་ཆུ་ཟླའི་དཀྱིལ་འཁོར་སྣང་བའམ། ནམ་མཁའ་ལ་འཇའ་ཚོན་སྣང་བའི་ཚུལ་དུ་བྱུང་ནས་སྐུ་དེ་སྣང་ཡང་བསྐུལ་བའི་ས་ལ་གཞེས་པའི་ཕྱིར་རིགས་དང་ལོངས་སྤྱོད་རྫོགས་པའམ་སྤྲུལ་སྐུ་དང༌། ཞི་བ་དང་ཁྲོ་བོ་གང་དུ་ཡང་མ་ངེས་པར་ཅིར་ཡང་འགྱུར་དུ་རུང་བའི་ཡེ་ཤེས་ཀྱི་སྐུར་གསལ་བར་ཤར་ཏེ་དབྱིངས་ལས་བཞེངས་པར་གནས་པས་གཟུགས་ཀྱི་སྐུར་གནས་ཤིང་བཞུགས་པ་ལ་ཞེས་དེ་ལྟར་སྐུ་སྣང་བས་ཞིང་ཁམས་ཀྱི་གདུལ་བྱ་སྦྱོང་བའི་ཕྱིར་ལན་དང་པོ་བསྟན་ཏོ།།

གཉིས་པ་གཟུགས་སྐུ་ལས་རིགས་ལྔར་བཞེངས་པར་བསྐུལ་བས་བཞེངས་པ་ལ་གཉིས་ཏེ། བསྐུལ་བ་དང༌། བཞེངས་པའོ། །དང་པོ་ལ་གཉིས་ཏེ། ཡབ་ཡུམ་གྱི་སྐུར་བཞེངས་པར་བསྐུལ་བ། རིགས་ལྔའི་སྐུར་བཞེངས་པར་བསྐུལ་བའོ། །དང་པོ་ནི།

དེ་བཞིན་གཤེགས་པ། ཞེས་པ་ནས། ཡབ་ཡུམ་མཛོད། །ཅེས་པའི་བར་གྱིས་བསྟན་ཏེ།

དེ་བཞིན་གཤེགས་པ་ཐམས་ཅད་ཀྱིས་བསྐུལ་བ་གཉིས་པ་འདིས་ངེས་པར་བསྐུལ་བ་ནི་འདི་ལྟ་སྟེ། རང་བཞིན་རང་བྱུང་མ་བཅོས་དེ་བཞིན་ཉིད། །ཡེ་ནས་མི་གཡོ་བདེ་བ་ཆེན་པོའི་ངང་། །བཙལ་ཞིང་གཡོ་བ་འདི་ལ་ཅི་ཡང་མེད། །ཡེ་ཤེས་དབྱིངས་ཉིད་ཚིག་གི་ཐ་སྙད་དེ། །དེ་ཉིད་དངོས་དང་དངོས་མིན་འབྱུང་གནས་ཉིད། །ཅིས་ཀྱང་མི་ཚུགས་མི་ཆོད་མི་ཤིགས་པའི། །ཡེ་ཉིད་ཇི་བཞིན་བདེ་མཆོག་མི་གཡོ་བ། །རྡོ་རྗེ་སེམས་མཆོག་ནམ་མཁའི་སྙིང་པོ་ཆེ། །དུས་གསུམ་བདེ་བར་གཤེགས་པའི་བཤེས་གཉེན་པོ། །འཕགས་རྗེ་སྤྲུལ་པ་མང་པོ་འབྱུང་བའི་གནས། །ཀུན་གྱི་རང་བཞིན་མེ་ལོང་འོད་པོ་ཆེ། །རྒྱལ་བ་མཐའ་ཡས་བསྐྱེད་པའི་ཡབ་ཡུམ་མཛོད།།

ལན་གཉིས་པ་བསྟན་པའི་ཕྱིར། དེ་ནས་རྒྱལ་བ་རྫོགས་པའི་སངས་རྒྱས་དེ་བཞིན་གཤེགས་པ་ཐམས་ཅད་ཀྱིས་སྐྱེས་བུ་དམ་པ་དབྱིངས་དང་ཡེ་ཤེས་ཀྱི་སྐུར་བཞེངས་པ་ལ་བསྐུལ་བ་གཉིས་པ་འདིས་ལོངས་སྤྱོད་རྫོགས་པ་དང་སྤྲུལ་པའི་སྐུར་བཞེངས་ལ་སྒྲོལ་བའི་དོན་མཛོད་ཅིག་པར་ངེས་པར་བསྐུལ་བ་ནི། འདི་ལྟ་སྟེ། ༼༣༤༥༽ཡེ་ཇི་བཞིན་པའི་དཀྱིལ་འཁོར་གྱི་སྒོ་ནས་བསྐུལ་ཏེ། ཆོས་རྣམས་ཀྱི་རང་བཞིན་རྒྱུ་རྐྱེན་མེད་པར་རང་བྱུང་བའི་ཆོས་ཉིད་མ་བཅོས་པའི་དེ་བཞིན་ཉིད་ཡེ་ཇི་བཞིན་པ་དེ་ཉིད་ཇི་ལྟ་བར་མངོན་དུ་གྱུར་ནས་མཐའ་གང་དུའང་སྣང་བ་མེད་པས་མི་གཡོ་བ་ངོ་བོ་ཉིད་ཀྱི་སྐུ་བདེ་བ་ཆེན་པོའི་ངང་ཉིད་ཆེད་དུ་བརྩལ་ཞིང་འགྲོ་འོང་གིས་གཡོ་བ་གང་ཡང་དག་པ་གཉིས་ལྡན་འདི་ལ་ཅི་ཡང་མེད་དེ་མ་དམིགས་པའོ། །དེ་བས་ན་ཐམས་ཅད་མཁྱེན་པའི་ཡེ་ཤེས་དང་ཆོས་ཀྱི་དབྱིངས་གཉིས་སུ་མེད་པའི་ཆོས་ཀྱི་སྐུ་ལ་དེ་ཉིད་དུ་བཏགས་པའང་ཚིག་གི་ཐ་སྙད་ཙམ་ལས་དོན་ལ་མེད་པར་མ་བཅོས་པར་མཐར་ཕྱིན་པའི་དེ་ཁོ་ན་ཉིད་རང་གསལ་ཆོས་ཉིད་ཀྱི་སྐུར་བཞུགས་ཀྱང༌། དེ་ཉིད་ཡུལ་ལམ་འཁོར་བ་དངོས་པོ་དང་སེམས་སམ་མྱ་ངན་ལས་འདས་པ་དངོས་པོ་མིན་པ་རིལ་གྱི་འབྱུང་གནས་ཉིད་ཡིན་པས་ཇི་ལྟར་བསམ་པ་བཞིན་དུ་སྣང་བའོ། །དེ་ཉིད་ལ་སྐྱེ་འཇིག་མེད་པས་ཅིས་ཀྱང་མི་ཚུགས་ཤིང་གཉེན་པོ་དང་བྲལ་བས་མི་ཆོད་མི་ཤིགས་པའི་ངོ་བོ་ནི་མི་འགྱུར་རྡོ་རྗེའི་སྐུ་སྟེ་རྟག་པ་ཆེན་པོར་བཞུགས་པའོ། །དེ་ཁོ་ན་ཉིད་ཡེ་གདོད་མ་ཉིད་ནས་མ་བསླད་པས། ལྷན་སྐྱེས་ཇི་བཞིན་པར་རོལ་པས་བདེ་བ་མཆོག་གི་དགྱེས་པ་ཆེན་པོའི་ཐུགས་ཀྱི་ངོ་བོ་དུས་གསུམ་དུ་མི་གཡོ་ཞིང་མ་འགགས་པའི་བཅུད་ཆེན་པོར་བཞུགས་པ་ནི་གསང་བའི་སྐུ་ཡང་ཡིན་ནོ། །རང་བཞིན་ལྷུན་གྱིས་གྲུབ་པའི་དཀྱིལ་འཁོར་གྱི་སྒོ་ནས་བསྐུལ་ཏེ། དེ་ལྟར་སྐུ་བཞི་དབྱེར་མེད་ཀྱི་ངང་ཉིད་རྡོ་རྗེ་སེམས་མཆོག་ནམ་མཁའི་སྙིང་པོ་དབྱིངས་ཉིད་འོད་གསལ་བ་ལ་ཆེ་བའི་ཡོན་ཏན་ཡོངས་སུ་རྫོགས་པའི་ཆོས་ཀྱི་རྒྱལ་པོ་དུས་གསུམ་གྱི་བདེ་བར་གཤེགས་པའི་རྒྱལ་བ་མ་ལུས་པ་ཀུན་གྱི་དགེ་བའི་བཤེས་གཉེན་ཆེན་པོ་མངའ་དབང་རྫོགས་པའི་སྟོན་པ་དམ་པར་བྱུང་བ་ལ་ལོངས་སྤྱོད་རྫོགས་པའི་སྐུ་ཞེས་བྱའོ། །རྒྱལ་བ་རིལ་གྱི་བཙན་པོ་ཉིད་ཐུགས་རྗེ་ཆེན་པོའི་ངང་ལས་ཐམས་ཅད་དུ་འདུལ་བ་བཞིན་འཕགས་པའི་ཚོགས་ཀྱི་རྗེ་བཙུན་སྤྲུལ་པ་མང་པོ་འབྱུང་ཞིང་སྣང་བའི་གནས་ནི་སྤྲུལ་པའི་སྐུ་ཡང་ཡིན་ནོ། །དེ་ལྟ་བུ་སྐུ་ལྔ་པོ་མ་ལུས་པ་ཀུན་གྱི་རང་བཞིན་གསལ་རྫོགས་ཀྱི་ངོ་བོར་བཞུགས་ལ་མི་རྟོག་མ་འགགས་པ་ཆེན་པོའི་མེ་ལོང་འོད་པོ་ཆེ་ཁྱོད་ཉིད་ཁྲོ་བོའི་སྤྲིན་གྱི་རྒྱལ་བ་མཐའ་ཡས་པ་ཇི་སྙེད་དུ་རོལ་པའི་བཀོད་པ་འབྱུང་ཞིང་བསྐྱེད་པའི་ཁྲོ་བོ་༼༣༤༦༽ཆེན་པོ་ཡབ་ཡུམ་དུ་བཞེངས་པར་མཛོད་ཅིག་ཅེས་གོང་དུ་བཞེངས་ནས་སྐུ་མ་ངེས་པ་ལ་ངེས་པར་བསྐུལ་བའོ།།

གཉིས་པ་རིགས་ལྔའི་སྐུར་བཞེངས་པར་བསྐུལ་བ་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ནི།

གང་དག་བྱང་ཆུབ། ཅེས་པ་ནས། ཉོན་མོངས་སྦྱང་དུ་གསོལ། །ཞེས་པའི་བར་གྱིས་བསྟན་ཏེ།

གང་དག་བྱང་ཆུབ་སྙིང་པོར་མཚུངས་པ་ཡི། །རང་དག་དབྱིངས་ལས་མ་གཡོས་བྱང་ཆུབ་སེམས།།

གང་དུ་དང་པོ་རྣམ་དག་སངས་རྒྱས་ཀུན། །ཁམས་གསུམ་ནས་བྱུང་རྡོ་རྗེ་སྙིང་པོའི་ལུས།།

མཐའ་ཡས་རྟོག་ལས་ཡི་གེ་སྣ་ཚོགས་འཕྲུལ། །སྲས་ཀྱི་ཚོགས་ཀྱིས་མཛེས་པར་བསྐོར་བའི་དཀྱིལ།།

གཟུགས་སྐུར་བསྟན་ནས་ཉོན་མོངས་སྦྱང་དུ་གསོལ།།

རིགས་དྲུག་ལ་སོ་སོར་བསྐུལ་བ་དང༌། སྐྱེས་བུ་ཉིད་ལ་རིགས་དྲུག་གི་དོན་མཛད་པའི་ཚུལ་གྱིས་བསྐུལ་བ་ནི་སྤྱི་དང་ཁྱད་པར་གྱི་དབང་སྟེ། དེ་ཐུན་མོང་དུ་བསྟན་པའི་ཕྱིར། རྩ་བ་བྱང་ཆུབ་སེམས་ཀྱི་དཀྱིལ་འཁོར་གྱི་སྒོ་ནས་བསྐུལ་ཏེ། དེ་ཡང་ཐོག་མར་རིགས་ཀྱི་བདག་པོ་ལ་བསྐུལ་བ་དང་དེའི་ཚུལ་ནས་སྐྱེས་བུ་ལ་བསྐུལ་བ་སྟེ། དེ་བཞིན་གཤེགས་པ་གང་དག་ཇི་སྙེད་པ་རྣམས་བྱང་ཆུབ་སྙིང་པོར་ཐ་མི་དད་པར་མཚུངས་པ་ཡི་རང་བཞིན་རྣམ་པར་དག་པའི་དབྱིངས་ལས་མ་གཡོས་པར་བསྐྱེད་པ་མེད་པའི་བྱང་ཆུབ་ཀྱི་སེམས་ཉིད་དུ་བཞུགས་ཀྱང་གནས་ཐ་དད་པ་གང་དུ་དུས་ཐོག་མའི་དང་པོར་རྒྱལ་བ་རིལ་གྱི་གྲོང་ཁྱེར་གསུམ་མ་སྤངས་བྲལ་ནས་རྒྱུད་རྣམ་པར་དག་པའི་འབྲས་བུ་ཆེན་པོ་བརྙེས་པས་སངས་རྒྱས་ཀུན་གྱི་མཛད་པ་ལྟར་སྐྱེས་བུ་དམ་པ་ཁམས་གསུམ་གྱི་ཞེན་པ་ལས་གྲོལ་ནས་འདུས་མ་བྱས་པར་རང་བྱུང་བའི་སྐྱེ་འཇིག་མི་མངའ་བའི་རྡོ་རྗེ་སྙིང་པོའིལུས་སམ་སྐུ་མཆོག་གི་ངང་ལས་གདུལ་བྱའི་འགྲོ་བ་མང་པོ་མཐའ་ཡས་པ་རྟོག་པ་ཅན་དག་གི་ངོ་བོ་ལ་གསུང་ཡི་གེ་ཐ་དད་པ་སྣ་ཚོགས་སུ་རྣམ་པར་སྤྲུལ་ཞིང་སྣང་བར་མཛད་དེ་དོན་མཛད་ཅིང་ཡི་གེ་དེ་ལས་ཀྱང་སྐུའི་དཀྱིལ་འཁོར་བྱུང་སྟེ་ཐུགས་ཡེ་ཤེས་རང་སྣང་བའི་སྲས་ཀྱི་ཚོགས་ཀྱིས་འཁོར་མང་པོས་མཛེས་པར་བསྐོར་བའི་དཀྱིལ་ལམ་སྤྲུལ་པ་ཇི་སྙེད་པའི་དབུས་ན་གཙོ་བོའི་གཟུགས་ཀྱི་སྐུར་ཁྲོ་བོའི་ཕྱག་རྒྱར་བསྟན་ནས་དཔྱངས་ཐག་ཆད་པའི་གདུལ་བྱ་དྲག་པོའི་གདུང་བའི་ས་བོན་ཉོན་མོངས་པའི་རྟོག་པ་ཐམས་ཅད་སྦྱང་ཞིང་དག་པར་མཛད་དུ་གསོལ། ཞེས་བསྐུལ་ཏེ། སྤྱི་དབང་དུ་རྒྱལ་བ་རིལ་ལ་བསྐུལ་བར་ཡང་འཆད་དོ། །ཁྱད་པར་གྱི་དབང་དུ་ལན་འདེབས་པའི་ཚུལ་གྱིས་རིགས་ཀྱི་བདག་པོ་དང་རྒྱལ་བ་ཇི་སྙེད་པས་དེ་ལྟར་མཛད་པ་ལྟར་སྐྱེས་བུ་ཁྱོད་ཁྲོ་བོའི་སྤྲུལ་པའི་འཁོར་ཚོགས་དང་བཅས་པར་བྱུང་ནས་གདུག་པ་ཅན་གྱི་ལས་སྦྱང་དུ་གསོལ། ཞེས་བསྐུལ་བར་སྦྱར་ཏེ་འཆད་༼༣༤༧༽པ་དག་ཀྱང་རྗེས་སུ་བསྙད་དོ།།

གཉིས་པ་བྱེ་བྲག་ཏུ་བཤད་པ་ལ་ལྔ་སྟེ། རྡོ་རྗེའི་རིགས་སུ་བཞེངས་པར་བསྐུལ་བ། དེ་བཞིན་གཤེགས་པའི་རིགས་སུ་བཞེངས་པར་བསྐུལ་བ། རིན་པོ་ཆེའི་རིགས་སུ་བཞེངས་པར་བསྐུལ་བ། པདྨའི་རིགས་སུ་བཞེངས་པར་བསྐུལ་བ། ལས་ཀྱི་རིགས་སུ་བཞེངས་པར་བསྐུལ་བའོ། །དང་པོ་ནི།

གང་དུ་དང་པོར་རྡོ་རྗེ། ཞེས་པ་ནས། གཟུགས་སྐུར་བསྟན་དུ་གསོལ། །ཞེས་པའི་བར་གྱིས་བསྟན་ཏེ།

གང་དུ་དང་པོ་རྡོ་རྗེ་སྙིང་པོ་ནི། །ཁམས་གསུམ་ནས་བྱུང་བདེ་ཆེན་ལྷུན་གྱིས་གྲུབ། །གཏུམ་ཐུང་གདུག་པ་ཐབས་ཀྱིས་གྲོལ་མཛད་ཕྱིར། །དྲི་མེད་སྣ་ཚོགས་བློས་ནི་ཧཱུཾ་དུ་སྤྲུལ། །འོད་ཟེར་ཚུལ་གྱིས་འཕྲེང་བས་བསྐོར་བའི་དཀྱིལ། །སྔོན་གྱི་སྨོན་ལམ་ཐུགས་དམ་དབང་གིས་ན། །ཅིས་ཀྱང་མི་བསྐྱོད་གཟུགས་སྐུ་བསྟན་དུ་གསོལ།།

རིགས་ལྔའི་ཚུལ་དུ་བཞེངས་ལ་རུ་ཏྲ་ཐུལ་ཞིག་པར་བསྐུལ་བ་ལས་རྡོ་རྗེ་སེམས་དཔར་བསྐུལ་ཏེ། གནས་གང་དུ་དུས་དང་པོར་རྡོ་རྗེ་སྙིང་པོའམ་རྡོ་རྗེ་སེམས་དཔའ་ནི་ཁམས་གསུམ་གྱི་ས་བོན་ཟད་པར་བཏོན་ནས་རང་བྱུང་བདེ་བ་ཆེན་པོར་ལྷུན་གྱིས་གྲུབ་སྟེ་མངོན་པར་རྫོགས་པར་སངས་རྒྱས་པའི་འབྲས་བུ་རྡོ་རྗེའི་རིགས་ཀྱི་གོ་འཕང་དམ་པ་བརྙེས་ནས་གདུལ་བྱ་ལུས་གཏུམ་ཞིང་ངག་དྲག་ལ་ཐུང་བ་སེམས་ཤིན་ཏུ་གདུག་པར་གྱུར་པ་ཞེ་སྡང་ཅན་གང་དེ་རང་མཐུན་འདུལ་ཐབས་ཀྱིས་གྲོལ་བར་མཛད་པའི་ཕྱིར་དགོངས་པ་རྟོག་པའི་དྲི་མ་མེད་པ་མེ་ལོང་ལྟ་བུའི་ཡེ་ཤེས་ཡུལ་མེད་པར་སྣ་ཚོགས་སུ་གསལ་བའི་བློས་ནི་ཡི་གེ་ཧཱུྃ་དུ་སྤྲུལ་ནས་དེ་ལས་རྡོ་རྗེའི་རིགས་ཀྱི་གཙོ་འཁོར་འོད་ཟེར་གྱི་ཚུལ་གྱི་ཕྲེང་བས་མཛེས་པར་ཐུགས་རིགས་ཀྱི་འཁོར་གྱིས་བསྐོར་བའི་དཀྱིལ་ན་སྤྲུལ་པའི་གཙོ་བོར་མཛད་ནས་བཞུགས་པ་ཁྱོད་ཉིད་དང་པོ་བྱང་ཆུབ་མཆོག་ཏུ་ཐུགས་བསྐྱེད་པའི་སྔོན་གྱི་ཐུགས་དམ་དང་སྨོན་ལམ་གྱི་དབང་གིས་ན་ད་ལྟའི་ཐུགས་དམ་ཅིས་ཀྱང་མི་བསྐྱོད་པའི་རྡོ་རྗེའི་རིགས་ཀྱི་བཛྲ་ཧེ་རུ་ཀའི་གཟུགས་སྐུར་བཞེངས་ནས་མཛད་པ་བསྟན་དུ་གསོལ། ཞེས་བསྐུལ་བའོ།།

གཉིས་པ་དེ་བཞིན་གཤེགས་པའི་རིགས་སུ་བཞེངས་པར་བསྐུལ་བ་ནི།

གང་དུ་དང་པོར་རྣམ་པར། ཞེས་པ་ནས། བསྟན་དུ་གསོལ། །ཞེས་པའི་བར་གྱིས་བསྟན་ཏེ།

གང་དུ་དང་པོ་རྣམ་པར་སྣང་མཛད་ནི། །ཁམས་གསུམ་ནས་བྱུང་ཅིར་ཡང་སྣང་བར་མཛད། །རྨོངས་བྱེད་མུན་པ་ཐབས་ཀྱིས་གྲོལ་མཛད་ཕྱིར། །རྣམ་དག་བྱང་ཆུབ་བློ་ནི་ཨ་དུ་སྤྲུལ། །གཟུགས་མང་ཚིལ་གྱིས་འཕྲེང་བས་བསྐོར་བའི་དཀྱིལ། །སྔོན་གྱི་སྨོན་ལམ་ཐུགས་དམ་དབང་གིས་ན། །ཅིར་སྣང་སྣང་བའི་གཟུགས་སྐུ་བསྟན་དུ་གསོལ།།

རྣམ་པར་སྣང་མཛད་ལ་བསྐུལ་ཏེ། ཡུལ་གང་དུ་དུས་དང་པོར་རྣམ་པར་སྣང་མཛད་ནི་ཁམས་གསུམ་གྱི་ས་བོན་ཟད་པར་བཏོན་ནས་རང་བྱུང་འགག་མེད་ཅིར་ཡང་སྣང་བའི་འབྲས་བུ་མངོན་པར་རྫོགས་པར་སངས་རྒྱས་ཏེ་དེ་བཞིན་གཤེགས་པའི་རིགས་ཀྱི་གོ་འཕང་དམ་པ་བརྙེས་པར་མཛད་ནས་གདུལ་བྱ་འཇིག་རྟེན་གསུམ་རྨོངས་པར་བྱེད་པའི་མུན་པ་གཏི་མུག་ཅན་གང་དེ་རང་མཐུན་གྱི་ཐབས་ཀྱིས་གྲོལ་བར་མཛད་པའི་ཕྱིར་དགོངས་པ་སྟོང་པ་ཉིད་ཀྱི་ཡེ་ཤེས་རྣམ་དག་བྱང་ཆུབ་ཀྱི་བློས་ནི་ཡི་གེ་ༀ་དུ་སྤྲུལ་ནས་༼༣༤༨༽དེ་ལས་བདེ་གཤེགས་རིགས་ཀྱི་གཙོ་འཁོར་གཟུགས་མང་པོའི་ཚུལ་གྱིས་ཕྲེང་བས་མཛེས་པར་སྐུའི་རིགས་ཀྱི་འཁོར་གྱིས་བསྐོར་བའི་དཀྱིལ་ན་སྤྲུལ་པའི་གཙོ་བོར་མཛད་ནས་བཞུགས་པ་ཁྱོད་ཉིད་སྔོན་གྱི་བྱང་ཆུབ་མཆོག་ཏུ་སེམས་བསྐྱེད་པའི་ཐུགས་དམ་དང་སྨོན་ལམ་གྱི་དབང་གིས་ན་ད་ལྟའི་ཐུགས་དམ་ཅིར་ཡང་སྣང་བའི་བུདྡྷ་ཧེ་རུ་ཀའི་གཟུགས་སྐུར་བཞེངས་ནས་མཛད་པ་བསྟན་དུ་གསོལ། ཞེས་བསྐུལ་བའོ།།

གསུམ་པ་རིན་པོ་ཆེའི་རིགས་སུ་བཞེངས་པར་བསྐུལ་བ་ནི།

གང་དུ་དང་པོར་ཡོན་ཏན། ཞེས་པ་ནས། བསྟན་དུ་གསོལ། །ཞེས་པའི་བར་གྱིས་བསྟན་ཏེ།

གང་དུ་དང་པོ་ཡོན་ཏན་འབྱུང་གནས་ནི། །ཁམས་གསུམ་ནས་བྱུང་ཡིད་བཞིན་རིན་པོ་ཆེ།།

འདོད་པས་རྨོངས་པ་ཐབས་ཀྱིས་གྲོལ་མཛད་ཕྱིར། །རྣམ་དག་འབྱུང་གནས་བློས་ནི་པྭཾ་དུ་སྤྲུལ།།

རིན་ཆེན་འཕྲེང་བས་མཛེས་པར་བསྐོར་བའི་དཀྱིལ། །སྔོན་གྱི་སྨོན་ལམ་ཐུགས་དམ་དབང་གིས་ནི།།

འདོད་པ་ཀུན་འབྱུང་གཟུགས་སུ་བསྟན་དུ་གསོལ།།

རིན་ཆེན་འབྱུང་ལྡན་ལ་བསྐུལ་ཏེ། ཡུལ་གང་དུ་དུས་དང་པོར་ཡོན་ཏན་རིན་པོ་ཆེའི་འབྱུང་གནས་ནི་ཁམས་གསུམ་གྱི་ས་བོན་ཟད་པར་བཏོན་ནས་རང་བྱུང་ཡིད་བཞིན་རིན་པོ་ཆེ་ཡོན་ཏན་ཀུན་རྫོགས་ཀྱི་འབྲས་བུར་མངོན་པར་རྫོགས་པར་སངས་རྒྱས་ཏེ་རིན་ཆེན་རིགས་ཀྱི་གོ་འཕང་དམ་པ་བརྙེས་ནས་གདུལ་བྱ་འདོད་པ་ལ་ཞེན་ཏེ་ང་རྒྱལ་གྱིས་རྨོངས་པ་རྣམས་རང་མཐུན་གྱི་ཐབས་ཀྱིས་གྲོལ་བར་མཛད་པའི་ཕྱིར་དགོངས་པ་མཉམ་ཉིད་ཡེ་ཤེས་རྣམ་དག་འབྱུང་གནས་ཀྱི་བློས་ནི་ཡི་གེ་སྭཱ་རུ་སྤྲུལ་ནས་དེ་ལས་ཡོན་ཏན་རིགས་ཀྱི་གཙོ་བོ་འཁོར་རིན་ཆེན་ཕྲེང་བས་མཛེས་པར་རང་རིགས་ཀྱི་འཁོར་གྱིས་བསྐོར་བའི་དཀྱིལ་ན་སྤྲུལ་པའི་གཙོ་བོ་མཛད་ནས་བཞུགས་པ་ཁྱོད་ཉིད་སྔོན་གྱི་བྱང་ཆུབ་མཆོག་ཏུ་ཐུགས་བསྐྱེད་པའི་ཐུགས་དམ་དང་སྨོན་ལམ་གྱི་དབང་གིས་ན་ད་ལྟའི་ཐུགས་དམ་འདོད་པ་ཀུན་འབྱུང་རཏྣ་ཧེ་རུ་ཀའི་གཟུགས་སྐུར་བཞེངས་ནས་མཛད་པ་བསྟན་དུ་གསོལ། ཞེས་བསྐུལ་བའོ།།

བཞི་པ་པདྨའི་རིགས་སུ་བཞེངས་པར་བསྐུལ་བ་ནི།

གང་དུ་དང་པོར་འོད་དཔག ཅེས་པ་ནས། བསྟན་དུ་གསོལ། །ཞེས་པའི་བར་གྱིས་བསྟན་ཏེ།

གང་དུ་དང་པོ་འོད་དཔག་མེད་པ་ནི། །ཁམས་གསུམ་ནས་བྱུང་གསུང་རབ་སྣང་མཐའ་ཡས། །ཆགས་པས་རྨོངས་པ་ཐབས་ཀྱིས་གྲོལ་མཛད་ཕྱིར། །རྣམ་དག་མེད་དྲི་མེད་བློས་ནི་ཨ་དུ་སྤྲུལ། །གསུང་སྙན་ཡི་གེ་འཕྲེང་བས་བསྐོར་བའི་དཀྱིལ། །སྔོན་གྱི་སྨོན་ལམ་ཐུགས་དམ་དབང་གིས་ན། །སྣ་ཚོགས་སྟོན་པའི་གཟུགས་སྐུ་བསྟན་དུ་གསོལ།།

འོད་དཔག་མེད་ལ་བསྐུལ་ཏེ། ཡུལ་གང་དུ་དུས་དང་པོར་འོད་དཔག་ཏུ་ མེད་པ་ནི་ཁམས་གསུམ་གྱི་ས་བོན་ཟད་པར་བཏོན་ནས་རང་བྱུང་གསུང་རབ་ཀུན་བདག ་སྣང་བ་མཐའ་ཡས་སུ་མངོན་པར་རྫོགས་པར་སངས་རྒྱས་ཏེ་འབྲས་བུ་བྱང་ཆུབ་ཆེན་པོ་པདྨ་རིགས་ཀྱི་གོ་འཕང་དམ་པ་བརྙེས་ནས་གདུལ་བྱ་འདོད་པ་ལ་ཆགས་པས་རྨོངས་པ་རྣམས་རང་མཐུན་གྱི་ཐབས་ཀྱིས་གྲོལ་བར་མཛད་པའི་ཕྱིར་དུ་དགོངས་པ་སོར་རྟོག་ཡེ་ཤེས་རྣམ་དག་དྲི་མེད་ཀྱི་བློས་ནི་ཡི་གེ་ཨྃ་དུ་སྤྲུལ་ནས་དེ་ལས་པདྨའི་རིགས་ཀྱི་གཙོ་འཁོར་གསུང་སྙན་ཡི་གེའི་ཕྲེང་བས་མཛེས་པར་གསུང་གི་རིགས་ཀྱི་འཁོར་གྱིས་བསྐོར་བའི་༼༣༤༩༽དཀྱིལ་ན་སྤྲུལ་པའི་གཙོ་བོ་མཛད་ནས་བཞུགས་པ་ཁྱོད་ཉིད་སྔོན་གྱི་བྱང་ཆུབ་མཆོག་ཏུ་སེམས་བསྐྱེད་པའི་སྨོན་ལམ་དང་ཐུགས་དམ་གྱི་དབང་གིས་ན་ད་ལྟར་ཐུགས་དམ་སྣ་ཚོགས་སྟོན་པའི་པདྨ་ཧེ་རུ་ཀའི་གཟུགས་སྐུར་བཞེངས་ནས་མཛད་པ་བསྟན་དུ་གསོལ། ཞེས་བསྐུལ་བའོ།།

ལྔ་པ་ལས་ཀྱི་རིགས་སུ་བཞེངས་པར་བསྐུལ་བ་ནི།

གང་དུ་དང་པོར་གདོན་མི། ཞེས་པ་ནས། བསྟན་དུ་གསོལ། །ཞེས་པའི་བར་གྱིས་བསྟན་ཏེ།

གང་དུ་དང་པོ་གདོན་མི་ཟ་བ་ནི། །ཁམས་གསུམ་ནས་བྱུང་སྣ་ཚོགས་ཅིར་ཡང་མཛད། །བྱ་བ་རྨོངས་པ་ཐབས་ཀྱིས་གྲོལ་མཛད་ཕྱིར། །རྣམ་དག་ནན་ཏན་བློས་ནི་ཧཾ་དུ་སྤྲུལ། །མཛད་པ་གར་གྱི་འཕྲེང་བས་བསྐོར་བའི་དཀྱིལ། །སྔོན་གྱི་སྨོན་ལམ་ཐུགས་དམ་དབང་གིས་ན། །ཐམས་ཅད་མཛད་པའི་གཟུགས་སྐུ་བསྟན་དུ་གསོལ།།

གདོན་མི་ཟ་བ་ལ་བསྐུལ་ཏེ། ཡུལ་གང་དུ་དུས་དང་པོར་གདོན་མི་ཟ་བའམ་དོན་ཡོད་གྲུབ་པ་ནི་ཁམས་གསུམ་གྱི་ས་བོན་ཟད་པར་བཏོན་ནས་རང་བྱུང་ཕྲིན་ལས་སྣ་ཚོགས་ཅིར་ཡང་མཛད་པའི་འབྲས་བུར་མངོན་པར་རྫོགས་པར་སངས་རྒྱས་ཏེ་ལས་ཀྱི་རིགས་ཀྱི་གོ་འཕང་དམ་པ་བརྙེས་ནས་གདུལ་བྱ་བདག་གཞན་གྱི་བྱ་བ་ལ་རྨོངས་པ་ཕྲག་དོག་ཅན་རང་མཐུན་གྱི་ཐབས་ཀྱིས་གྲོལ་བར་མཛད་པའི་ཕྱིར་དགོངས་པ་བྱ་གྲུབ་ཡེ་ཤེས་རྣམ་དག་ནན་ཏན་གྱི་བློས་ནི་ཡི་གེ་ཧཾ་དུ་སྤྲུལ་ནས་དེ་ལས་ལས་ཀྱི་རིགས་ཀྱི་གཙོ་འཁོར་མཛད་པ་གར་གྱི་ཕྲེང་བས་མཛད་པར་ཕྲིན་ལས་ཀྱི་རིགས་ཀྱི་འཁོར་གྱིས་བསྐོར་བའི་དཀྱིལ་ན་སྤྲུལ་བའི་གཙོ་བོ་མཛད་ནས་བཞུགས་པ་ཁྱོད་ཉིད་སྔོན་གྱི་བྱང་ཆུབ་མཆོག་ཏུ་སེམས་བསྐྱེད་པའི་སྨོན་ལམ་དང་ཐུགས་དམ་གྱི་དབང་གིས་ན། ད་ལྟའི་ཐུགས་དམ་ཐམས་ཅད་མཛད་པའི་ཀརྨ་ཧེ་རུ་ཀའི་གཟུགས་སྐུར་བཞེངས་ནས་མཛད་པ་བསྟན་དུ་གསོལ། ཞེས་བསྐུལ་བའོ། །འདི་རྣམས་ཀྱི་གང་དུ་དང་པོའི་ཚིག་ནི་སྐྱེས་བུ་ལ་བསྐུལ་བའི་གཏན་ཚིགས་སུ་འགྱུར་རོ། །སྔོན་གྱི་ཐུགས་དམ་དང་སྨོན་ལམ་ནི་རང་རང་ལ་བསྐུལ་བའི་གཉེར་ཏེ། དེའི་ཕྱིར་ཐུན་མོང་དུ་བསྟན་ཏོ།།

གཉིས་པ་བཞེངས་པ་ནི།

ཞེས་བསྐུལ་བ། ཞེས་པ་ནས། སྣང་བར་གནས་པ་ལས། ཞེས་པའི་བར་གྱིས་བསྟན་ཏེ།

ཞེས་བསྐུལ་བ་གཉིས་པ་དེས་ཡོངས་སུ་རྫོགས་པར་བསྐུལ་བས། ཆོས་ཉིད་སྒྱུ་མ་ལས་ཡེ་ཤེས་སྒྱུ་མའི་སྐུར་སྣང་བ་ནི་ཇི་ལྟ་ཇི་ལྟར་མེ་ལོང་གི་དབྱིངས་སུ་བཞིན་གྱི་དཀྱིལ་འཁོར་གསལ་བ་བཞིན་དུ།

ཡེ་ཤེས་རང་སྣང་བར་གནས་པ་ལས།

ཞེས་བསྐུལ་བ་གཉིས་པ་དེས་ཡོངས་སུ་རྫོགས་པར་བསྐུལ་བས་དེའི་ཡོན་ཏན་གྱིས་དེ་ལྟར་གསན་ནས་ཅིར་ཡང་འབྱུང་དུ་རུང་བའི་རིགས་མ་ངེས་པ་ཆོས་ཉིད་སྒྱུ་མ་ལྟ་བུའི་སྐུ་ལས་རིགས་ངེས་པ་ཡེ་ཤེས་ལྔའི་ངང་ལས་སོ་སོའི་རིགས་ཀྱི་སྒྱུ་མའི་སྐུ་སྣང་བ་ནི་དཔེ་ཇི་ལྟ་དོན་ཇི་ལྟར་མེ་ལོང་གི་དབྱིངས་སུ་བཞིན་གྱི་དཀྱིལ་འཁོར་སྣང་ཞིང་གསལ་བ་བཞིན་དུ་རེས་འཇོག་མེད་པར་ཡེ་ཤེས་སྒྱུ་མའི་སྐུར་རང་སྣང་བར་གནས་པ་ལས་ཞེས་དེ་ལྟར་ཡེ་ཤེས་ཀྱི་སྐུ་སྣང་བས་རྒྱལ་བ་ཀུན་གྱི་མཛད་པའི་ཕྲིན་ལས་སྐྱེས་བུས་ཀྱང་མཛད་པར་༼༣༥༠༽འགྱུར་བས་ན་ལན་གཉིས་པར་འགྱུར་རོ།།

གསུམ་པ་རིགས་ལྔས་སེམས་ཅན་གྱི་དོན་མཛོད་ཅིག་པར་བསྐུལ་བས་དོན་མཛད་པ་ལ་གཉིས་ཏེ། བསྐུལ་བ་དང༌། ཡོན་ཏན་ནོ། །དང་པོ་ལ་ལྔ་སྟེ། སྐུ་སྣང་བར་མཛོད་ཅིག་པར་བསྐུལ་བ། ཁམས་གསུམ་གྱི་ནད་སོལ་ཅིག་པར་བསྐུལ་བ། མུན་པ་བསལ་བར་མཛོད་ཅིག་པར་བསྐུལ་བ། འདུལ་བའི་དུས་ལ་བབ་པར་བསྐུལ་བ། རྒྱལ་བ་ཀུན་གྱི་ཐུགས་དམ་བསྐུལ་བའོ། །དང་པོ་ནི།

དེ་བཞིན་གཤེགས་པ། ཞེས་པ་ནས། དོན་དུ་རྣམ་སྣང་མཛད། །ཅེས་པའི་བར་གྱིས་བསྟན་ཏེ།

དེ་བཞིན་གཤེགས་པ་ཐམས་ཅད་ཀྱི་བསྐུལ་བ་གསུམ་པ་འདིས་མངོན་དུ་རྫོགས་པ་ལོངས་སྤྱོད་པར་བསྐུལ་ན་ནི། འདི་ལྟ་སྟེ། དེ་བཞིན་ཉིད་དུ་གཤེགས་པ་ཁྱོད། །འཇིག་རྟེན་མངོན་རྫོགས་རྒྱས་མཛོད་ལ། །སྙིང་པོ་བྱང་ཆུབ་ཇི་བཞིན་པ། །སེམས་ཅན་དོན་དུ་སྣང་བར་མཛོད། །འཇིག་རྟེན་ཁམས་ནི་དཔག་མེད་དུ། །ཇི་སྙེད་བདེ་བར་གཤེགས་པ་ཡི། །སྤྲུལ་པའི་སངས་རྒྱས་ཀུན་གྱིས་ཀྱང་། །མཐའ་དག་དོན་དུ་རྣམ་སྣང་མཛད།།

དེ་ནས་དེ་བཞིན་གཤེགས་པ་ཐམས་ཅད་ཀྱིས་བསྐུལ་བ་གསུམ་པ་འདིས། གསང་བ་ལོངས་སྤྱོད་རྫོགས་པའི་སྐུར་བཞེངས་པའམ། འོན་ཏེ་ཡེ་ཤེས་ཀྱི་སྐུར་མངོན་དུ་རྫོགས་པར་བཀོད་དེ་ཁྲོ་བོའི་ལྷའི་སྐུ་ཕྱག་རྒྱ་ཆེན་པོ་རིགས་ངེས་པའི་ལོངས་སྤྱོད་རྫོགས་པར་བཞེངས་པར་བསྐུལ་བ་ནི། འདི་ལྟ་སྟེ། སྙིང་པོ་བྱང་ཆུབ་དེ་བཞིན་ཉིད་དུ་གཤེགས་ཏེ་མཐར་སོན་པའི་སྐྱེས་བུ་དམ་པ་ཁྱོད་ཅེས་ངེས་པར་གཟུང་བའི་ཕྱིར་ཐུབ་དཀའ་རྡོ་རྗེ་སྙིང་པོར་བསྐུལ་བ་ལ་འཐད་དོ།།

དེ་ཅིའི་ཕྱིར་ཞེ་ན། འཆད་པའི་ཀྱེ་མ་ལ་སོགས་པ་དང༌། རྩ་ལྔ་པ་ལས་ཐུབ་དཀའ་རྡོ་རྗེ་སྙིང་པོ་ལས་སྤྲུལ་པ་འབྱུང་བའི་ཕྱིར་རོ། །འོན་ཀྱང་སྐབས་མཐུན་པ་ངེས་པར་གཟུང་བ་ལས་རྒྱལ་བ་གཞན་དང་ཐ་དད་པར་མི་ལྟ་སྟེ་གདུལ་བྱའི་སྣང་བ་ཙམ་མོ། །དེ་ལྟ་བུ་ཁྱོད་ནི་འཇིག་རྟེན་གྱི་འོག་མིན་ཆེན་པོའི་ཞིང་ཁམས་སུ་མངའ་དབང་རྫོགས་པའི་བདག་ཉིད་དུ་མངོན་པར་རྫོགས་པར་སངས་རྒྱས་པའི་བྱ་བ་མཛོད་ལ། སྙིང་པོ་བྱང་ཆུབ་ཇི་བཞིན་པ་དེ་ཉིད་ལས།

འགྲོ་བ་སེམས་ཅན་ཀུན་གྱི་དོན་དུ་སྐུ་གསུང་ཐུགས་ཀྱི་བཀོད་པ་སྣང་ཞིང་ཤར་བར་མཛོད་ཅིག སྔོན་བྱུང་དུ་ཡང་འཇིག་རྟེན་གྱི་ཁམས་ཀྱི་ཞིང་ཁམས་ནི་དཔག་ཏུ་མེད་པ་མང་པོ་ཉིད་དུ། ཇི་སྙེད་ཅིག་བདེ་བར་གཤེགས་པ་ཡི་རྒྱལ་བ་མ་ལུས་པ་སྤྲུལ་པ་མང་པོས་འགྲོ་དོན་མཛད་པའི་སངས་རྒྱས་ཀུན་གྱིས་ཀྱང་གདུལ་བྱ་མཐའ་དག་གི་དོན་དུ་སྐུ་གསུང་ཐུགས་རྣམ་པར་སྣང་སྟེ་བཀོད་པ་མཛད་པ་ལྟར་སྐྱེས་བུས་ཀྱང་དོན་གྱིས་ཤིག་ཅེས་བསྐུལ་ལོ།།

གཉིས་པ་ཁམས་གསུམ་གྱི་ནད་སོལ་ཅིག་པར་བསྐུལ་བ་ནི།

ཁམས་གསུམ། ཞེས་པ་ནས། བསླང་བར་མཛོད། །ཅེས་པའི་བར་གྱིས་བསྟན་ཏེ།

ཁམས་གསུམ་འཁོར་བའི་ནད་པ་ལ། །གཞན་གྱིས་ཕན་པའི་སྨན་མ་མཆིས། །ཡང་དག་བདུད་རྩིའི་སྨན་སྦྱར་བྱས། །འཁོར་བའི་གཅོང་རྙིང་སྦྱངས་མཛད་པ། །སྡུག་བསྔལ་ཟུག་རྔུའི་ནད་སེལ་བའི། །སྨན་པ་ཆེ་མཆོག་གཙོ་བོར་གཤེགས། །ནད་དོ་ཅོག་གི་དགྲར་གྱུར་པ། །བདུད་རྩི་སྨན་གྱི་རྒྱ་མཚོ་ཡིས། །ལོག་པའི་ནད་དགྲས་གཟིར་བ་ཡི། །ནད་པའི་ཚོགས་ནི་བླང་བར་མཛོད།།

ཁམས་གསུམ་འཁོར་བར་འཁྱམས་པའི་སེམས་ཅན་དུག་དྲག་པོ་ལྔས་ནད་ཀྱིས་གདུང་བར་གྱུར་པ་ལ་གཞན་གྱིས་སོས་ཤིང་ཕན་པར་འགྱུར་བའི་སྨན་མ་མཆིས་པས་མ་ནོར་མི་བསླུ་བའི་དོན་གྱིས་ཡང་དག་བདུད་རྩིའི་སྨན་༼༣༥༡༽དམ་པ་སྦྱར་བས་འཁོར་བའི་གཅོང་རྙིང་མ་རིག་པའི་མུན་པ་གཞི་རྩ་དང་བཅས་པ་སྦྱང་བར་མཛད་པ་དང་སྡུག་བསྔལ་ཟུག་རྔུའི་ནད་ཐམས་ཅད་སེལ་བར་མཛད་པའི་སྨན་པ་ཆེ་མཆོག་གི་གཙོ་བོར་སྐྱེས་བུ་ཁྱེད་ཉིད་གཤེགས་པར་མཛད་ནས་འཁྲུལ་པའི་ནད་དོ་ཅོག་གི་དགྲར་གྱུར་པ་འཚོ་བྱེད་དམ་པ་བདུད་རྩི་སྨན་གྱི་རྒྱ་མཚོ་བྱང་ཆུབ་སེམས་ཀྱི་ཆུ་ཡིས་དུག་ལྔ་ལ་སོགས་པ་ལོག་པའི་ནད་ཀྱི་དགྲས་གཟིར་བ་ཡི་རུ་ཏྲ་ལ་སོགས་པ་གྲོང་ཁྱེར་གསུམ་གྱི་ནད་པའི་ཚོགས་ཀུན་བསླང་བར་མཛོད་ཅིག་ཅེས་བསྐུལ་ལོ།།

གསུམ་པ་མུན་པ་བསལ་བར་མཛོད་ཅིག་པར་བསྐུལ་བ་ནི།

རྩལ་ཆེན། ཞེས་པ་ནས། དགོངས་པ་མཛོད། །ཅེས་པའི་བར་གྱིས་བསྟན་ཏེ།

རྩལ་ཆེན་རྫོགས་པའི་སྐྱེས་བུ་ཉིད། །སྙིང་པོ་བྱང་ཆུབ་ལ་དགོངས་ལ།།

འོད་ཟེར་སྣང་བ་རྒྱས་བཀྱེ་སྟེ། །མུན་པ་གསལ་བའི་དགོངས་པ་མཛོད།།

དན་ཕག་རྡོ་རྗེ་འཛིན་པར་གནས་གྱུར་པ་ལ་བསྐུལ་ཏེ། རྩལ་ཆེན་རྫོགས་པའི་སྐྱེས་བུ་འབྲས་བུ་ལྷུན་གྱིས་གྲུབ་པ་ཁྱོད་ཉིད་ཐུགས་སྙིང་པོ་བྱང་ཆུབ་ཀྱི་ངང་ལ་དགོངས་པ་མི་གཡོ་བར་གནས་པ་ལས་འགྲོ་བའི་དོན་ལ་སྤྲུལ་བའི་འོད་ཟེར་གྱི་སྣང་བ་རྒྱས་པར་བཀྱེ་སྟེ་མ་རིག་པའི་མུན་པ་བསལ་བའི་དགོངས་པ་མཛོད་ཅིག་ཅེས་བསྐུལ་བའོ།།

བཞི་པ་འདུལ་བའི་དུས་ལ་བབ་པར་བསྐུལ་བ་ནི།

ཀྱེ་མ། ཞེས་པ་ནས། དུས་ལ་བབ། །ཅེས་པའི་བར་གྱིས་བསྟན་ཏེ།

ཀྱེ་མ་སྐྱེས་བུ་དོན་གྲུབ་པ། །བྱ་བ་བྱས་ཤིང་བྱེད་པ་བྱས།།

ཁུར་བོར་བདག་དོན་རྗེས་ཐོབ་པ། །གང་འདིར་འདུལ་བའི་དུས་ལ་བབ།།

འབྲས་བུ་ཆེན་པོ་བརྙེས་པ་ལ་ངོ་མཚར་བ་དང་ལྡན་པས། ཀྱེ་མ་སྐྱེས་བུ་ཞེས་བོས་ནས་རྡོ་རྗེ་སྙིང་པོ་མངོན་དུ་བྱས་པས་བསྒྲུབ་བྱ་རིལ་ཆུབ་སྟེ་མཐར་ཐུག་གི་དོན་གྲུབ་པ་བདག་དོན་གྱི་བྱ་བ་བྱས་ཤིང་གཞན་དོན་གྱི་བྱེད་པ་བྱས་པ་སྲིད་ལམ་གྱི་རྩོལ་བས་ཁུར་བོར་གདུང་བ་བྲལ་བ་དང་སྔོན་གྱི་རྒྱལ་བ་བཞིན་དུ་བདག་གི་དོན་སྲིད་ཆེན་པོ་རྗེས་སུ་ཐོབ་ཅིང་བརྙེས་པ་ཁྱེད་ཀྱིས་གང་འདིར་དྲེགས་པ་འདུལ་བའི་དུས་ལ་ངེས་པར་བབ་པས་དགོངས་པར་མཛོད་ཅིག་ཅེས་བསྐུལ་བའོ།།

ལྔ་པ་རྒྱལ་བ་ཀུན་གྱི་ཐུགས་དམ་བསྐུལ་བ་ནི།

གཙང་མའི། ཞེས་པ་ནས། བྱ་བ་མཛོད། །ཅེས་པའི་བར་གྱིས་བསྟན་ཏེ།

གཙང་མའི་གནས་ཕྱོགས་འོག་མིན་གྱི། །ཆོས་ཀྱི་མཐོ་བའི་གཞལ་ཡས་སུ།།

རྫོགས་ལོངས་སྤྱོད་པའི་སྐུར་གཤེགས་ཏེ། །སྙིང་པོ་བསྐུལ་བས་བྱ་བ་མཛོད།།

གཙང་མའི་གནས་ཀྱི་འོག་མིན་ལས་མཆོག་ཏུ་འཕགས་པའི་ཁྱད་པར་གྱི་སྒྲས་འཇིག་རྟེན་གྱི་འོག་མིན་ལས་ཁྱད་པར་དུ་གྱུར་པས་འོག་མིན་གྱི་ཞིང་ཁམས་དེ་ཉིད་རྣམ་པར་མཛེས་པ་ཆེན་པོར་འབྲས་བུས་ཆོས་ཀྱིས་མཐོ་བའི་གཞལ་ཡས་སུ་རིགས་ཀྱི་བདག་པོ་རྫོགས་ལོངས་སྤྱོད་པའི་སྐུར་གཤེགས་པར་མཛད་དེ་སྙིང་པོ་བྱང་ཆུབ་ན་བཞུགས་པའི་རྒྱལ་བ་རིལ་ལ་བསྐུལ་བའི་བྱ་བ་ཡང་ཁྱོད་ཀྱིས་མཛོད་ཅིག་ཅེས་བསྐུལ་ཏེ། དཔེར་ན་འོ་མ་མར་གྱི་རང་བཞིན་ཡང་དེར་མ་བཞག་པར་བསྐུལ་བའི་བྱ་བས་མར་དུ་འགྲོ་བ་བཞིན་དུ་༼༣༥༢༽སེམས་ཅན་ཐམས་ཅད་ཡེ་ཤེས་ཀྱི་སྙིང་པོ་ཅན་ཡིན་ཀྱང་དེར་མ་བཞག་པར་སྙིང་པོ་བསྐུལ་བའི་བྱ་བ་མཛོད་ཅིག་ཅེས་བསྐུལ་བའང་ཤུགས་ལ་གསལ་ལོ།།

གཉིས་པ་ཡོན་ཏན་ནི།

ཅེས་རྣམ་པར་བསྐུལ་བས། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

ཅེས་རྣམ་པར་བསྐུལ་བས། ཇི་ལྟ་ཇི་ལྟར་སྤྲིན་མཐོང་ནས་ཉི་མའི་དཀྱིལ་འཁོར་ཤར་བ་ལྟར། མི་གཡོ་བའི་དབྱིངས་ལས་ནི་གཟུགས་སྐུ་ཉི་མར་ཤར་བ་སྟེ། ཆོས་ཀྱིས་མཐོ་བ་ཞེས་བྱ་བའི་གཞལ་ཡས་སུ་རྣམ་པར་སྣང་བར་གྱུར་ཏོ།།

ཅེས་དེ་སྐད་ཅེས་རྣམ་པར་བསྐུལ་བས། དཔེ་ཇི་ལྟ་དོན་ཇི་ལྟར་སྤྲིན་གྱི་མཐོངས་ནས་ཉི་མའི་དཀྱིལ་འཁོར་ཤར་བ་ལྟར་མི་གཡོ་བ་ཡི་དབྱིངས་ཀྱི་ངང་ཉིད་ལས་གཟུགས་སྐུའི་ཉི་མ་ཤར་བ་སྟེ་ཆོས་ཀྱིས་མཐོ་བ་ཞེས་བྱ་བའི་གཞལ་ཡས་སུ་འགྲོ་འོང་དང་འཆར་ནུབ་མེད་པར་སྨོན་ལམ་དང་ཐུགས་རྗེའི་དབང་གིས་རྡོ་རྗེ་སྙིང་པོ་སྐྱེས་བུ་དེ་ལོངས་སྤྱོད་རྫོགས་པའི་སྐུ་ཆེན་པོར་རྣམ་པར་སྣང་བར་གྱུར་ཏོ། །ཞེས་བསྐུལ་བའི་རྐྱེན་གྱིས་ཐུགས་དམ་གྱི་དབང་གིས་དངོས་སུ་བཞེངས་པའོ། །འདིས་སྐུ་ཐ་དད་འདུལ་བ་བཞིན་སྣང་བར་བྱས་ནས་ལམ་ཞིང་ཁམས་སྦྱོང་བ་རྫོགས་པར་འགྱུར་བས་ལན་ཐ་མའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

གང་གི་ཆོ་འཕྲུལ་བསྐུལ་བའི་ལེའུ་སྟེ་ཉི་ཤུ་གསུམ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྐྱེས་བུ་རྡོ་རྗེ་སྙིང་པོ་གང་གི་ཐུགས་རྗེའི་ཆོ་འཕྲུལ་གྱིས་ཤིག་པར་བསྐུལ་བའི་ལེའུ་ཞེས་བྱ་བ་སྟེ་ཉི་ཤུ་རྩ་གསུམ་པ་གསལ་བར་བཀྲོལ་བའོ།། །།

ལེའུ་ཉེར་བཞི་པ་འདུས་པ་ཆེན་པོས་རྣམ་པར་བགྲོས་པ།

༈ གཉིས་པ་བཀའ་བགྲོས་མཛད་པ་ལ་གཉིས་ཏེ། རྡོ་རྗེ་གོ་འབྱེད་ཀྱིས་མཚན་མས་སངས་རྒྱས་ཐམས་ཅད་བསྡུས་པ། འདུས་པ་དེ་རྣམས་ཀྱིས་བཀའ་བགྲོས་མཛད་པའོ། །དང་པོ་ནི།

དེ་ནས། ཞེས་པ་ནས། འདུས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཆོས་ཀྱི་རྒྱལ་པོ་རྫོགས་ལོངས་སྤྱོད་པ་དེ། རྡོ་རྗེ་གོ་འབྱེད་ཡོངས་སུ་བསྡུ་བའི་མཚན་མ་མཛད་པས། མཐའ་ཐུག་པ་མེད་པའི་ཞིང་ཁམས་སྟུག་པོ་བཀོད་པ་ནས་དཔག་ཏུ་མེད་པའི་རྒྱལ་བ་ཀུན་ནས་ཡོངས་སུ་འདུས་པར་གྱུར་ཏོ།།

ལེའུ་འདིས་དྲང་དོན་སྟོན་ནོ། །དེ་ནས་རྨད་དུ་བྱུང་བས་སྟོན་པ་མཆོག་རིལ་གྱི་ བདག་པོ་ཆོས་ཀྱི་རྒྱལ་པོ་ཚོགས་གཉིས་ཡོངས་སུ་རྫོགས་ཤིང་དངོས་པོ་གཉིས་ལ་དམིགས་པ་མེད ་པར་ལོངས་སྤྱོད་པ་ཆེན་པོ་དེ་ཡིས། ཉིད་ཀྱི་སློབ་མ་རུ་ཏྲ་དེ་ཐབས་གང་གིས་འདུལ་བར་བགྲོ་བའི་ཕྱིར། རྡོ་རྗེ་གོ་འབྱེད་ཡོངས་སུ་བསྡུ་བའི་བརྡ་མཛད་པ་ནི། བཀའ་བགྲོས་ལ་སྤྱན་དྲངས་པའི་ཕྱིར་ཏེ། ས་མ་ཛཿའི་སྒྲས་ཐུགས་དམ་བསྐུལ་ཞིང་ཕྱག་གཡས་གཡོན་བཀྱེད་པ་དང་བསྣོལ་བའི་སེ་གོལ་ནི་འབྱེད་སྡུད་ཀྱི་མཚན་མ་སྟེ་ཕྱག་རྒྱ་དེ་མཛད་པས་མཐའ་ཐུག་པ་མེད་པའི་ཞིང་ཁམས་རྣམ་དག་སྟུག་པོ་བཀོད་པ་ནས་དཔག་ཏུ་མེད་པའི་རྒྱལ་བ་ཐམས་ཅད་བྱོན་ཏེ་གདུལ་བའི་བཀའ་༼༣༥༣༽བགྲོས་མཛད་པའི་ཕྱིར་ཀུན་ནས་ཡོངས་སུ་འདུས་པར་གྱུར་ཏོ། །དེ་ལྟར་མཛད་པའང༌། གོང་དུ། སྙིང་པོ་བསྐུལ་བའི་བྱ་བ་མཛོད། །ཅེས་བསྐུལ་བའི་ཕྱིར་རོ།།

གཉིས་པ་འདུས་པ་དེ་རྣམས་ཀྱིས་བཀའ་བགྲོས་མཛད་པ་ལ་ལྔ་སྟེ། བདེར་གཤེགས་རིགས་ཀྱི་བཀའ་བགྲོ་བ། རྡོ་རྗེའི་རིགས་ཀྱི་བཀའ་བགྲོ་བ། རིན་ཆེན་རིགས་ཀྱི་བཀའ་བགྲོ་བ། པདྨའི་རིགས་ཀྱི་བཀའ་བགྲོ་བ། ལས་ཀྱི་རིགས་ཀྱི་བཀའ་བགྲོ་བའོ། །དང་པོ་ནི།

དེའི་ཚེ། ཞེས་པ་ནས། གཞག་པར་རིགས། །ཞེས་བགྲོས་སོ། །ཞེས་པའི་བར་གྱིས་བསྟན་ཏེ།

དེའི་ཚེ་དེའི་དུས་ན། སངས་རྒྱས་སྙིང་རྗེ་ཡོངས་སུ་རོལ་པའི་ཚོགས་ཀྱི་གཅིག་ཏུ་མཐུན་པར་བགྲོས་པ། ཀྱེ་ཀྱེ་སངས་རྒྱས་རྣམ་པ་མང་པོའི་ཚོགས། །སྣང་ངོ་ཀུན་ཏུ་རབ་ཏུ་འདིར་བྱུང་བ། །སྲིད་པ་ལོག་པའི་གདུག་པ་ཅན། །འཁོར་བའི་ས་བོན་རྩུབ་མོས་འཕངས། །སྡུག་བསྔལ་ཆེན་པོ་ཡི་དྭགས་རྣམས། །ལས་ཀྱི་འཇིག་རྟེན་ཁམས་འདིར་བྱུང་། །དྲག་པོ་ལོག་པའི་དཀའ་ཐུབ་ཀྱིས། །སྲིད་པ་གསུམ་གྱི་བདག་པོར་སྨིན། །དྲེགས་པའི་རུ་དྲའི་གདུག་དབལ་གྱིས། །འགྲོ་རྣམས་མཐའ་ཀློག་འཇོམས་བྱེད་འདི། །འདུལ་བའི་ཞིང་མཆོག་རྨད་དུ་བྱུང་། །སྙིང་རྗེའི་བདག་པོ་ཀུན་འདུས་ནས། །ལས་ངན་ལས་ཀྱི་རྒྱུན་བཅད་དེ། །བདེ་ཆེན་ས་ལ་བཞག་པའི་རིགས། །ཞེས་བགྲོས་སོ།།

སྤྱན་དྲངས་ནས་བྱོན་པ་དེའི་ཚེ་བཀའ་བགྲོས་པ་དེའི་དུས་ན། ཞིང་ཁམས་སོ་སོའི་རྒྱལ་བས་བཀའ་བགྲོས་གསུངས་པ་སོ་སོར་བསྟན་པའི་ཕྱིར་འཇིག་རྟེན་གྱི་ཁམས་གདུང་བ་སེལ་བ་ཞེས་བྱ་བ་ན་བཞུགས་པའི་དེ་བཞིན་གཤེགས་པའི་རིགས་ཀྱི་སངས་རྒྱས་སྙིང་རྗེ་ཡོངས་སུ་རོལ་པའི་ཚོགས་ཀྱི་རྒྱལ་བ་རྣམས་ཀྱིས་གཏི་མུག་ཅན་ཚར་གཅོད་པའི་དོན་དུ་དགོངས་པ་གཅིག་ཏུ་མཐུན་པར་བཀའ་བགྲོས་པ། ཀྱེ་ཀྱེ་ཞེས་རྒྱལ་བ་རྣམས་ལ་བོད་ནས་བཀའ་བགྲོས་ལ་འདུས་པའི་སངས་རྒྱས་རྣམ་པ་མང་པོའི་ཚོགས་རྣམས་གདུལ་བྱར་སྣང་བའི་ངོ་བོ་ཀུན་ཏུ་རྨོངས་ཤིང་རབ་ཏུ་གཏུམ་པ་དུས་འདིར་བྱུང་བ་སྲིད་པ་གསུམ་པོ་ལོག་པར་བསྒྱུར་བའི་གདུག་པ་ཅན་མཚན་ཉིད་ཅི་འདྲ་བའི་རྒྱུ་འབྲས་འཁོར་བའི་ས་བོན་བདག་འཛིན་རྩུབ་མོས་འཕངས་ཏེ་ཀུན་ནས་འཁྲུགས་པའི་སྡུག་བསྔལ་ཆེན་པོའི་མནར་བས་ཡི་དྭགས་ཀྱི་སྡེ་དཔོན་སྲིད་པ་རྣམས་དབང་དུ་སྡུད་པ་ཉིད་ལས་ཀྱིས་དབང་གིས་འཇིག་རྟེན་གྱི་ཁམས་འདིར་བྱུང་བ་གང་གསང་སྔགས་ཀྱི་བརྟུལ་ཞུགས་དྲག་པོ་ལོག་པར་སྤྱད་པའི་དཀའ་ཐུབ་ཀྱིས་མཐུས་སྲིད་པ་གསུམ་གྱི་བདག་པོར་སྨིན་པའོ། །དེའི་སྤྱོད་ཡུལ་གཞན་ལ་གནོད་པས་དྲེགས་པ་རུ་ཏྲའི་གདུག་པའི་དབལ་གྱིས་འགྲོ་བ་རྣམས་རྟག་ཆད་ལ་སོགས་པའི་མཐར་ལྷུང་ནས་རྒྱུད་རློག་ཅིང་འཇོམས་པར་བྱེད་པ་འདི་ཉིད་བཏུལ་བའི་དགོས་པ་ཐབས་ཀྱིས་གདུལ་བའི་ཞིང་མཆོག་རྨད་དུ་བྱུང་བ་སྟེ། དེས་ན་སྙིང་རྗེའི་བདག་པོ་རྒྱལ་བ་ཀུན་འདུས་ནས་བཀའ་བགྲོས་ཀྱིས་བཏུལ་ཏེ། ལས་ངན་ལས་ཀྱི་རྒྱུན་བཅད་དེ། བདེ་བ་ཆེན་པོའི་ས་ལ་བཞག་པར་རིགས་སོ། །ཞེས་བགྲོས་སོ།།

གཉིས་པ་རྡོ་རྗེའི་རིགས་ཀྱི་བཀའ་བགྲོ་བ་ནི།

སངས་རྒྱས། ཞེས་པ་ནས། ཕན་པར་འགྱུར། །ཞེས་བགྲོས་སོ། །༼༣༥༤༽ཞེས་པའི་བར་གྱིས་བསྟན་ཏེ།

སངས་རྒྱས་རྡོ་རྗེའི་གདུང་དང་སྡེའི་ཚོགས་ཀྱིས་གཅིག་པར་བགྲོས་པ། ཀྱེ་མ་འདུས་པའི་སངས་རྒྱས་རྣམས། །འདས་པའི་དུས་ལ་སྔོན་བྱུང་ལྟར། །ད་ལྟར་དུས་འདི་ཉིད་དུ་བྱུང་། །ལུང་ལོག་མངོན་པའི་རི་བོས་བརྩེགས། །རང་རྒྱུད་བསྲེག་པའི་བསླད་པ་ཅན། །བདུད་ཀྱིས་བྱིན་གྱིས་བརླབས་པ་ཡིས། །གླང་ཆེན་མྱོས་པ་དྲག་པོ་ཆེ། །ཤིན་ཏུ་མི་བཟད་དུག་ཆེན་གྱིས། །འོ་དོད་འབོད་པར་བསད་བརླག་པས། །རོ་གླིང་དུར་ཁྲོད་མཐའ་ཞེན་པ། །ཇི་ལྟའི་ཐབས་ཀྱིས་ཕན་པར་འགྱུར། །ཞེས་བགྲོས་སོ།།

སངས་རྒྱས་རྡོ་རྗེའི་རིགས་ཀྱི་གཙོ་བོ་གདུང་དང་འཁོར་སྡེའི་ཚོགས་ཀྱི་རྒྱལ་བ་རྣམས་ཀྱིས་ཞེ་སྡང་ཅན་ཚར་གཅོད་པའི་དོན་དུ་དགོངས་པ་གཅིག་ཏུ་མཐུན་པར་བཀའ་བགྲོས་པ། ཀྱེ་མའོ་ཞེས་བོས་ནས་བཀའ་བགྲོས་ལ་འདུས་པའི་སངས་རྒྱས་རྣམས་གདུལ་བྱའི་ངོ་བོ་འདས་པའི་དུས་ན་སྔོན་བྱུང་བ་ལྟར་ད་ལྟ་དུས་འདི་ཉིད་དུ་ཡང་བྱུང་ལ་མཚན་ཉིད་ཅི་འདྲ་བའི་རྒྱུ་འབྲས་གསང་སྔགས་ཇི་བཞིན་པའི་ལུང་དོན་ལོག་པར་གོ་བའི་བརྟུལ་ཞུགས་དང་མངོན་པའི་ང་རྒྱལ་གྱི་རི་བོར་བརྩེགས་པའི་དབང་གིས་ཞེ་སྡང་གིས་རང་རྒྱུད་བསྲེགས་ཅིང་གཞན་ལ་གནོད་པའི་བློ་ཡིས་བསླད་པ་ཅན་དེའི་སྤྱོད་ཡུལ་བདུད་ཀྱིས་བྱིན་གྱིས་བརླབ་པ་ཡི་མཐུས་གླང་ཆེན་མྱོས་པ་དང་འདྲ་བའི་དྲག་པོ་གཏུམ་རྔམ་ཆེ་བ་ཉིད་འདུལ་བའི་དགོས་པ་གལ་ཏེ་མ་བསྒྲལ་ན་ཤིན་ཏུ་མི་བཟད་པའི་དུག་ཆེན་གྱིས་ཀུན་ནས་བསླང་བའི་ལས་ངན་གྱིས་འོ་དོད་འབོད་པའི་དམྱལ་བར་སེམས་ཅན་མང་པོ་བསད་ཅིང་བརླག་པར་བྱེད་པས་ན་བཀའ་བགྲོས་ཀྱིས་གདུལ་བར་བསྐུལ་བ་རོ་གླིང་གི་དུར་ཁྲོད་ཀྱི་མཐར་ཞེན་ཅིང་གནས་པ་ལ་ཇི་ལྟའི་མཐུན་འཇུག་གི་ཐབས་ཀྱིས་བསྒྲལ་བས་ཕན་བདེའི་གནས་བླ་ན་མེད་པར་འགྱུར་རོ། །ཞེས་བགྲོས་སོ།།

གསུམ་པ་རིན་ཆེན་རིགས་ཀྱི་བཀའ་བགྲོ་བ་ནི།

སངས་རྒྱས། ཞེས་པ་ནས། སྨག་ཏུ་འཁྱམས། །ཞེས་བགྲོས་སོ། །ཞེས་པའི་བར་གྱིས་བསྟན་ཏེ།

སངས་རྒྱས་ནོར་བུའི་གདུང་དང་སྡེའི་ཚོགས་ཀྱིས་གཅིག་ཏུ་འཐུན་པར་བགྲོས་པ། ནག་པོ་གདུག་པ་སྨྱོན་པ་འདི། །ཇི་ལྟར་དེ་དགར་བཞག་གྱུར་ན། །མི་བཟད་དུག་མཚོ་ཆུ་རླབས་ཀྱིས། །ནག་པོའི་ཁམས་སུ་རྒྱས་འགྱུར་བ། །དམ་པ་རྣམས་ཀྱི་རྒྱུད་གཅོད་ཅིང་། །ཉི་མ་སྒྲོན་མ་འཇིག་པར་འགྱུར། །དེ་ཚེ་ལས་ཀྱི་མུན་པ་ཡིས།།

ཐམས་ཅད་མུན་ནག་སྨག་ཏུ་འཁྱམ། །ཞེས་བགྲོས་སོ།།

སངས་རྒྱས་ནོར་བུའི་རིགས་སམ་རིན་ཆེན་རིགས་ཀྱི་གཙོ་བོ་གདུང་དང་འཁོར་སྡེའི་ཚོགས་ཀྱི་རྒྱལ་བ་རྣམས་ཀྱིས་ང་རྒྱལ་ཅན་ཚར་གཅོད་པའི་ཆེད་དུ་དགོངས་པ་གཅིག་ཏུ་མཐུན་པར་བགྲོས་པ། དོན་གྱི་དྲུག་ཀ་ཚང་ཡང་ངོ་གསལ་བ་གསུམ་སྟེ། གདུལ་བྱའི་ངོ་བོ་ལུས་ནག་པོ་སེམས་གདུག་པ་སྨྱོན་པའི་སྤྱོད་པ་ཅན་འདི། སྤྱོད་ཡུལ་གཞན་ལ་གནོད་པ་ཇི་ལྟར་ཁོ་རང་དེ་གར་བཞག་པར་གྱུར་ན་མི་བཟད་པའི་དུག་གི་རྒྱ་མཚོའི་ཆུ་རླབས་ཀྱིས་སྲིད་གསུམ་ནག་པོའི་ཁམས་སུ་རྒྱས་པར་འགྱུར་བས་རྣམ་འདྲེན་དམ་པ་རྣམས་ཀྱི་རྒྱུན་གཅོད་ཅིང་ཡེ་ཤེས་སྣང་བར་བྱེད་པའི་དམ་པའི་ཆོས་ཀྱི་ཉི་མའི་སྒྲོན་མ་འཇིག་པར་འགྱུར་རོ། །དེ་འདུལ་བའི་དགོས་པ་མ་བཏུལ་བ་དེ་ཡི་ཚེ་སྡིག་པའི་ལས་ཀྱི་མུན་པ་ཡིས་ཐམས་ཅད་མུན་ནག་གི་སྨག་རུམ་དུ་འཁྱམས་པར་འགྱུར་བས་བཀའ་བགྲོས་ཀྱིས་གདུལ་བར་རིགས་སོ། །ཞེས་བགྲོས་སོ།།

བཞི་པ་པདྨའི་རིགས་ཀྱི་བཀའ་བགྲོ་བ་ནི།

སངས་རྒྱས་པདྨའི། ཞེས་པ་ནས། དུས་ལ་བབ། །ཅེས་༼༣༥༥༽བགྲོས་སོ། །ཞེས་པའི་བར་གྱིས་བསྟན་ཏེ།

སངས་རྒྱས་པདྨོའི་གདུང་དང་སྡེའི་ཚོགས་ཀྱིས་མགྲིན་གཅིག་ཏུ་འཐུན་པར་བགྲོས་པ། །གང་འདས་དུས་ན་སྔོན་བྱུང་བ། །ལས་ཀྱི་འཁོར་ལོས་འཕངས་པ་ཡིས། །བློ་གྲོས་ལོག་པའི་རུ་ཏྲ་དེ། །སྙིང་པོ་དབྱིངས་ནས་བྱུང་བ་ཡི། །སྐྱེས་བུ་དམ་པའི་སྦྱོར་བ་ཡིས། །བདུད་ཀྱིས་བདུད་བཏུལ་ཉེ་བཀོད་ལྟར། །ད་ལྟར་འདི་ཚོགས་བྱུང་བ་ཡི། །དུག་འགྱུར་བརྩེགས་པའི་རི་བོ་འདི། །རྡོ་རྗེ་ཁྲོས་པའི་ཐོ་ཆེན་གྱིས། །བརླག་ཅིང་གཞོམ་པའི་དུས་ལ་བབ། །ཅེས་བགྲོས་སོ།།

སངས་རྒྱས་པདྨོའི་རིགས་ཀྱི་གཙོ་བོ་གདུང་དང་འཁོར་སྡེའི་ཚོགས་ཀྱི་རྒྱལ་བ་རྣམས་ཀྱིས་འདོད་ཆགས་ཅན་ཚར་གཅོད་པའི་ཆེད་དུ་དགོངས་པ་དང་མགྲིན་གཅིག་ཏུ་མཐུན་པར་བཀའ་བགྲོས་པ། འདིར་ཡང་ངོ་གསལ་བཞི་སྟེ། མཚན་ཉིད་ཅི་འདྲ་བའི་རྒྱུ་འབྲས་གང་འདས་པའི་དུས་ན་སྔོན་བྱུང་བ་ཡི་ལས་ཀྱི་འཁོར་ལོས་འཕངས་པ་ཡི་བློ་གྲོས་ཕྱིན་ཅི་ལོག་པར་རུ་ཏྲ་དེ་ཉིད་དཔེ་ལྟར་བྱུང་བའི་གདུལ་བྱའི་ངོ་བོ་སྔོན་བྱུང་དུ་སྙིང་པོ་བྱང་ཆུབ་ཀྱི་གནས་ལུགས་མངོན་དུ་བྱས་ཏེ། སངས་རྒྱས་པའི་དབྱིངས་ནས་བྱུང་བའི་རྒྱལ་བ་གང་དག་ནི་སྐྱེས་བུ་དམ་པས་བདུད་བཏུལ་བའི་སྦྱོར་བ་ཡིས། བདུད་ཆེན་པོའི་ཚུལ་གྱིས་བདུད་ཀྱི་སྡེ་ཚོགས་བཏུལ་ནས་རིག་འཛིན་གྱི་ས་ལ་ཉེར་ཞེས་ཉེ་བར་བཀོད་པ་ལྟར་ད་ལྟར་དུས་འདི་ཡི་ཚེ་ཡང་བྱུང་བ་ཡི་རྩ་བ་དང་ཉེ་བའི་ཉོན་མོངས་པའམ་དུག་གསུམ་དུག་ལྔས་འགྱུར་བག་བརྩེགས་པའི་རི་བོ་འདི་ཉིད་བཀའ་བགྲོས་ཀྱིས་འདུལ་བར་བསྐུལ་ཏེ་རྡོ་རྗེ་ཁྲོས་པའི་ཐོ་བ་ཆེན་པོ་ཉིད་ཀྱིས་བརླག་ཅིང་གཞོམ་པའི་དུས་ལ་ངེས་པར་བབ་བོ། །ཞེས་བགྲོས་སོ།།

ལྔ་པ་ལས་ཀྱི་རིགས་ཀྱི་བཀའ་བགྲོ་བ་ནི།

སངས་རྒྱས། ཞེས་པ་ནས། བསྟན་པ་མཛོད། །ཅེས་བགྲོས་སོ། །ཞེས་པའི་བར་གྱིས་བསྟན་ཏེ།

སངས་རྒྱས་གཞོན་ནུའི་གདུང་དང་སྡེའི་ཚོགས་ཀྱིས་མགྲིན་གཅིག་ཏུ་འཐུན་པར་བགྲོས་པ། །ཁོང་ནས་འཁྱིལ་བའི་དུག་ཆེན་པོ། །ཐར་མེད་མི་བཟད་ནད་ཀྱིས་ཟིན། །རྟག་ཆད་ཁམས་སུ་ཤི་བའི་རོ། །ལམ་ལོག་ལམ་སྟོར་དམུས་ལོང་འདི། །ཡེ་ཤེས་ཁྲོས་པའི་ཆོ་འཕྲུལ་ལས། །འབར་འཕྲོ་འཁྲུག་པའི་གཟེར་ཆེན་གྱིས། །སྨག་ཆེན་མུན་ནག་གཞོམ་པའི་ཕྱིར། །ཡེ་ཤེས་ཅན་གྱི་སྤྱོད་ཡུལ་ནས། །རྒྱལ་བ་རྒྱ་མཚོ་ཀུན་འདུས་ཏེ། །ཡེ་ཤེས་རྡོ་རྗེ་ཁྲོས་པ་ཡི། །ཆོ་འཕྲུལ་སྤྲིན་ཕུང་འཐིབས་པ་ཡི། །མཐུན་འཇུག་བྱིས་པའི་ཆ་བྱད་ཀྱིས། །རྣམ་པར་རོལ་པའི་མངོན་སྤྱོད་ཀྱིས། །དུག་ཆེན་རྒྱ་མཚོ་མ་བསྐམས་ན། །འདིར་ནི་སྙིང་རྗེ་རྐྱེན་འཚམ་མམ། །ཆོས་ཉིད་སྙིང་རྗེ་ཆེན་པོ་ཡི། །གང་འདིར་དམ་ཚིག་དམ་པའི་ཕྱིར། །དངོས་པོ་བཞི་ཡི་བསྟན་པ་མཛོད། །ཅེས་བགྲོས་སོ།།

སངས་རྒྱས་ལས་ཀྱི་རིགས་སམ་གཞོན་ནུའི་རིགས་ཀྱི་གཙོ་བོ་གདུང་དང་འཁོར་སྡེའི་ཚོགས་ཀྱི་རྒྱལ་བ་རྣམས་ཀྱིས་ཕྲག་དོག་ཅན་ཚར་གཅོད་པའི་ཆེད་དུ་དགོངས་པ་གཅིག་ཏུ་མཐུན་པར་བཀའ་བགྲོས་པ། འདིར་ཡང་ངོ་གསལ་བ་ལྔ་སྟེ། མཚན་ཉིད་ཅི་འདྲ་བའི་རྒྱུ་འབྲས་ བདག་རྟོག་གི་ཁོང་སྲན་ནང་ནས་འཁྱིལ་བའི་དུག་ཆེན་པོ་འཕེལ་བས་ཐར་པ་མེད ་པའི་མི་བཟད་པའི་ནད་ཀྱིས་ཟིན་པས་རྟག་པ་དང་ཆད་པའི་ཁམས་སུ་ཤི་ནས་མཐའི་གཡང་སར་ལྷུང་བའི་རོ་རུ་གྱུར་པ། གདུལ་བྱའི་ངོ་བོ་ལམ་ཕྱིན་ཅི་ལོག་ཏུ་འཕྱན་ནས་ཡང་དག་པའི་ལམ་སྟོར་བའི་དམུས་ལོང་འདི་ཉིད། འདུལ་བའི་དགོས་པ་ཡེ་ཤེས་ཁྲོས་པའི་ཆོ་འཕྲུལ་ལས་བྱུང་བའི་འབར་འཕྲོ་འཁྲུག་པའི་འོད་ཟེར་ཆེན་པོའི་རྩལ་གྱིས་འཁོར་བའི་སྨག་ཆེན་གྱི་མུན་ནག་དྲག་པོ་གཏིབས་པ་གཞོམ་པར་མཛད་པའི་ཕྱིར་བཀའ་བགྲོས་ཀྱིས་གདུལ་བར་བསྐུལ་ཏེ། ཀུན་མཁྱེན་ཡེ་ཤེས་ཅན་གྱི་སྤྱོད་ཡུལ་འོག་མིན་ཆོས་ཀྱི་དབྱིངས་ནས་རྒྱལ་བ་རྒྱ་མཚོ་ཀུན་འདུས་ཏེ་ཡེ་ཤེས་ཆེན་པོའི་རྡོ་རྗེ་ཁྲོས་པ་ཡི་ངང་ལས་ཁྲོ་བོའི་ཆོ་འཕྲུལ་སྤྲིན་ཕུང་༼༣༥༦༽ལྟར་འཐིབས་པ་ཡིས་རུ་ཏྲ་རང་དང་མཐུན་འཇུག་གི་རོལ་པ་བྱིས་པའི་ཆ་བྱད་དང་འདྲ་བའི་ཚུལ་གྱིས་དྲག་པོ་རྣམ་པར་རོལ་པའི་མངོན་སྤྱོད་ཀྱིས་ཐབས་ལས་དུག་ཆེན་ཉོན་མོངས་འཁྱིལ་བའི་རྒྱ་མཚོ་མ་བསྐམས་ན། འདིར་ནི་སྙིང་རྗེ་བྱེད་པ་རྐྱེན་དང་འཚམ་མམ་སྟེ་མི་འཚམས་པས་ན་ཆོས་ཉིད་ཐུགས་རྗེར་བཞེངས་པའི་སྙིང་རྗེ་ཆེན་པོ་ཡི་གང་གི་དུས་འདིར་རྐྱེན་དང་འཚམས་པའི་སྙིང་རྗེའི་དམ་ཚིག་དམ་པ་མཛད་པའི་ཕྱིར་འཁོར་བའི་དངོས་པོ་བཞི་པོ་བཤད་པ་དག་འདིར་སྤང་དུ་མེད་དེ་སྤྱད་པ་ལས་རང་གྲོལ་དུ་བཟློག་པ་ཡི་བསྟན་པ་མཆོག་གི་འོད་སྣང་གསང་བ་དམ་པ་སྤྲོ་བར་མཛོད་ཅིག་ཅེས་བགྲོས་སོ། །དེ་ལྟར་བཀའ་བགྲོས་འདི་རྣམས་རྒྱལ་བ་རྣམས་ལ་བོད་ནས་གདུལ་བྱའི་ངོ་བོ་དང་མཚན་ཉིད་ཅི་འདྲ་བའི་རྒྱུ་འབྲས་བསྟན་པ། དེའི་སྤྱོད་ཡུལ་གཞན་ལ་གནོད་པ། དེ་འདུལ་བའི་དགོས་པ། བཀའ་བགྲོས་ཀྱིས་གདུལ་བ་དྲུག་ཏུ་དོན་གྱིས་འགྲེལ་ཞིང་ངོ་གསལ་ཅི་རིགས་སུ་བཤད་པ་ལྟར་ཤེས་པར་བྱའོ། །དེ་བཞིན་དུ་ཉོན་མོངས་པ་ལྔར་འཆད་པ་རྣམས་ཀྱང་བཤད་པ་ལྟར་རྗེས་སུ་མཐུན་ནོ། །དེ་ལྟར་ཚུལ་ལྔའི་བགྲོ་བར་མཛད་པའི་རྒྱུ་མཚན་ཡང༌། ཇི་སྐད་དུ། མཐའ་ཐུག་མེད་པའི་རྒྱལ་བ་རྣམས། །རེ་རེའང་ལྔ་ལྔར་སྣང་བའི་ཕྱིར། །རིགས་དང་ཡེ་ཤེས་སྐུ་ལ་སོགས། །ལྔ་ལྔས་འགྲོ་བ་དགྲོལ་མཛད་དེ། །གཅིག་དང་དུ་མར་མི་དམིགས་ཀྱང༌། །མོས་དང་ཐུགས་རྗེ་སྨོན་ལམ་མཐུས། །དཔག་ཏུ་མེད་པའི་སྐྱེ་བོ་ལ། །བུ་གཅིག་པ་ལྟར་རྟག་དགོངས་པ། །སྐྱོ་དུབ་བསྙེལ་བ་མི་མངའ་བར། །ནམ་མཁའི་མཐའ་ལྟར་རྟག་བཞུགས་པ། །འཕོ་འགྱུར་མེད་པའི་སྐུ་གསུང་ཐུགས། །ཞེས་གསུངས་པ་ལ་སོགས་པའི་ཕྱིར་རོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

འདུས་པ་ཆེན་པོས་རྣམ་པར་བགྲོས་པའི་ལེའུ་ཉི་ཤུ་བཞི་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཆོས་ཀྱིས་མཐོ་བའི་འོག་མིན་གྱི་གནས་སུ་བྱོན་པའི་རྒྱལ་བ་རིལ་འདུས་པ་ཆེན་པོས་རུ་ཏྲ་གདུལ་བར་རྣམ་པར་བཀའ་བགྲོས་པ་ཞེས་བྱ་བའི་ལེའུ་སྟེ་ཉི་ཤུ་རྩ་བཞི་པ་རྣམ་པར་བཤད་པའོ།། །།

ལེའུ་ཉེར་ལྔ་པ་བཀའ་བགྲོས་དམ་པ་བཅད་པ།

༈ གསུམ་པ་བཀའ་བགྲོས་བཅད་པ་ལ་གསུམ་སྟེ། ཞི་རྒྱས་ཀྱིས་མི་འདུལ་བར་བསྟན་པ། དབང་དྲག་གིས་འདུལ་བར་རིག་པ། རིགས་ནས་བཀའ་བགྲོས་བཅད་པ་དངོས་སོ། །དང་པོ་ནི།

དེ་ལྟར་འདུས་པ། ཞེས་པ་ནས། ཕྱིར་ལོག་གོ །ཞེས་པའི་བར་གྱིས་བསྟན་ཏེ།

དེ་ལྟར་འདུས་པ་ཆེན་པོའི་བཀའ་བགྲོས་ཡོངས་སུ་ཆད་ནས། ལས་རྣམ་བཞི་གང་གིས་འདུལ་བའི་དུས་ལ་བབ་པ་དགོངས་པ་ཡིས། གང་དེ་རྣམ་པར་བརྟག་པའི་ཕྱིར། ཐུབ་དཀའ་གཞོན་ནུ་རྡོ་རྗེ་སྙིང་པོར་གནས་གྱུར་པའི་འོད་ཟེར་ལས་སྤྲུལ་པ་ཐུབ་པའི་དབང་པོ་བྱུང་ནས། དེ་བཞིན་གཤེགས་པ་ཀུན་གྱིས། སྤྲུལ་པ་དེ་ལ་ཡོངས་སུ་བསྒོ་བ། ཐུབ་པའི་དབང་པོའི་དུས་འདི་ལགས། །ཇི་བཞིན་བདེན་པའི་བྱིན་བརླབས་ཀྱིས། །དངོས་པོ་བཞི་ཡི་མེ་དཔུང་བཟློག །བྱང་ཆུབ་སྙིང་པོར་བསྐུལ་བར་མཛོད། །ཅེས་ཡོངས་སུ་བསྐུལ་ནས། ཐུབ་པའི་དབང་པོ་དེས་དུར་ཁྲོད་ཀྱི་བདག་པོ་དེའི་ཕྲུ་མར་སྣང་བར་མཛད་ནས། ཐམས་ཅད་ཞི་བའི་སྨྲ་བས་སྨྲས་པ་ལས། དུར་ཁྲོད་ཀྱི་བདག་པོ་དེས། མཐའི་ཁབ་རྡབས་ནས་འདི་སྐད་དུ་སྨྲས་སོ། །བུ་ཆུང་ཁྱོད་ཀྱིས་བདག་ཐུལ་བ་མ་ཡིན་ཏེ། སྔོན་ང་གནོད་སྦྱིན་གྱི་སྡེ་དཔོན་དྲག་པོ་ཞེས་བྱ་བར་གྱུར་པ་ན། ཁོ་ན་ཉིད་ལྟ་བུ་མང་པོ་བྱུང་ནས་ངའི་བསྟན་པ་ལ་ཞུགས་ཤིང་། ངའི་བཀའ་ཉོན་ཅིག་ཟེར་བ་ལས་ཀྱང་ང་མ་ཉན་ན། ད་ཁྱོད་ཀྱི་དབང་དུ་བདག་ག་ལ་ཇེན། གོས་སུ་སེ་མོ་དོར་བཟོད་ལ་རང་གི་དཀའ་ཐུབ་ལ་བདེ་བར་མནོས་ཤིག་ཅེས་བསྒོ་ནས། བདུད་ཀྱི་དངོས་པོ་བཞིས་ཡོངས་སུ་བཞམས་པས། གཙང་མ་རིགས་ཀྱི་འཕགས་པ་རྟོག་པ་ལ་ཞུགས་ནས་ཕྱིར་ལོག་གོ།

ལེའུ་འདིས་༼༣༥༧༽དྲང་དོན་སྟོན་ནོ། །དེ་ལྟར་འདུས་པ་ཆེན་པོའི་བཀའ་བགྲོས་པ་ཡོངས་སུ་ཆད་དེ་གྲོས་ཐག་ཆོད་ནས་གདུལ་བའི་ཕྲིན་ལས་ལ་འཇུག་པའི་ཕྱིར་ལས་རྣམ་པ་བཞི་གང་གིས་འདུལ་བའི་སྐབས་ལ་བབ་པར་དགོངས་པ་ཡིས་གང་དེ་རྣམ་པར་བརྟགས་པའི་དགོས་ཆེད་ཀྱི་ཕྱིར་དགེ་སློང་ཐུབ་དཀའ་གཞོན་ནུ་དེས་སྙིང་པོ་བྱང་ཆུབ་ཏུ་སོན་ཏེ་མཚན་རྡོ་རྗེ་སེམས་དཔའ་འམ་རྡོ་རྗེ་སྙིང་པོར་གནས་གྱུར་པ་ཉིད་འདིར་ཐུགས་དམ་གྱི་དབང་གིས་ཁྱད་པར་གྱི་གཉེན་པོར་གྱུར་པའི་ཕྱིར་དེའི་འོད་ཟེར་གྱི་བྱིན་རླབས་ལས་སྤྲུལ་པ་ཐུབ་པའི་དབང་པོའམ་ཤཱཀྱ་ཐུབ་པ་སྣང་བར་གྱུར་ནས་དེ་བཞིན་གཤེགས་པ་ཀུན་གྱིས་སྤྲུལ་པ་དེ་ལ་ཡོངས་སུ་བསྒོ་བ། ཐུབ་པའི་དབང་པོ་རུ་ཏྲ་འདུལ་བའི་ཕྲིན་ལས་ལ་བརྟགས་པའི་དུས་འདི་ལགས་ཏེ། ཞི་བའི་ལས་ཀྱིས་ཆོས་ཉིད་ཇི་བཞིན་དུ་བདེན་པའི་བྱིན་རླབས་ཀྱིས་རུ་ཏྲའི་འཁོར་བའི་དངོས་པོ་ལྔ་ཚན་བཞི་ཡི་མེ་དཔུང་གིས་རྒྱུད་བསྲེགས་པ་དེ་བདེན་ཚིག་གིས་བཟློག་ལ་བྱང་ཆུབ་སྙིང་པོ་ཡང་དག་ལ་བསྐུལ་བར་མཛོད་ཅིག་ཅེས་བཀའ་སྩལ་ཏེ་ཡོངས་སུ་བསྐུལ་ནས་སྤྲུལ་པ་ཐུབ་པའི་དབང་པོ་དེས་དུར་ཁྲོད་ཀྱི་བདག་པོ་དྲེགས་པ་དེ་ཡི་ཕྲུ་མར་ཞེས་གནས་ཀྱི་འཁོར་དུ་སྣང་བར་མཛད་ནས་ལས་རྒྱུ་འབྲས་ཀྱི་ཆོས་མི་དགེ་བའི་ལས་མ་བྱེད་ཅིག་པར་བདེན་ཚིག་འཇམ་པས་ཐམས་ཅད་ཞི་བའི་སྨྲ་བར་སྨྲས་པ་ལས་དུར་ཁྲོད་ཀྱི་བདག་པོ་དེས་ཐའི་ཁ་བརྡབས་པ་ཞེས་ཐལ་མོ་རྡེབ་ཅིང་སྐན་སྒྲ་གཏོགས་ནས་མི་ཐུལ་བའི་གཏམ་འདི་སྐད་དུ་སྨྲས་སོ། །བུ་ཆུང་ཁྱོད་ཀྱིས་བདག་ཐུལ་བ་མ་ཡིན་ཏེ། སྔོན་ང་གནོད་སྦྱིན་གྱི་སྡེ་དཔོན་གཞན་ལ་གནོད་པ་སྦྱིན་པར་བྱེད་པ་དངོས་སུ་རུ་ཏྲ་རང་གི་ལུས་ཏེ་མ་ཏང་ཀ་རུ་ཏྲ་དྲག་པོ་ཞེས་བྱ་བར་གྲགས་པར་གྱུར་པ་ན་ཁྱོད་ཁོ་ན་ཉིད་ལྟ་བུ་མང་པོ་བྱུང་ནས་ངའི་བསྟན་པ་ལ་ཞུགས་ཤིག ངའི་བཀའ་ཉོན་ཅིག་ཟེར་བ་ལས་ཀྱང་མ་ཉན་ན། ད་ཁྱོད་ཀྱི་དབང་དུ་བདག་ག་ལ་ཇེན་ནམ་འགྱུར་ཏེ། གོ་ཟུ་སེ་མོ་དོར་གཟོད་ལ་རང་གི་དཀའ་ཐུབ་ལ་བདེ་བར་མནོས་ཤིག་ཅེས་བསྒོ་ནས་བདུད་ཀྱི་དངོས་པོ་སྤྱིའི་དབང་དུ་འདམ་གྱི་འོབས། མདའ་མཚོན། ངག་རྩུབ་མོ། བསླུ་བྱེད་ཀྱི་བུ་མོ་བཞིས་ཡོངས་སུ་ཞམས་ཞེས་པ་བྲུ་ཤའི་སྐད་དེ་བོད་སྐད་དུ་བཏང་ཞེས་པའམ་བསྟབ་ཞེས་པར་འགྱུར་ཏེ། འདིར་དངོས་པོ་བཞི་ཀུན་གྱིས་སྤང་བྱ་ཉིད་ཡིན་པས་དེ་དག་གི་སྤྱོད་པ་ཤཱཀྱ་ཐུབ་པ༼༣༥༨༽ལ་བཏང་བས་རྒྱལ་བ་དྲི་མ་མེད་པ་གཙང་མ་རིགས་ཀྱི་འཕགས་པ་ཉིད་དངོས་པོ་ངན་པར་ཐུགས་རྟོག་པ་ལ་ཞུགས་པ་ལྟ་བུར་མཛད་ནས་ཕྱིར་ལོག་གོ་ཞེས་སླར་བཞུད་པ་ལྟར་རུ་ཏྲའི་ངོ་ལ་སྣང་ངོ༌། །དེས་ཀྱང་ཞི་རྒྱས་ཀྱིས་མི་འདུལ་བར་མཁྱེན་ཏེ་འཆད་དོ།།

གཉིས་པ་དབང་དྲག་གིས་འདུལ་བར་རིག་པ་ནི།

དེ་ནས། ཞེས་པ་ནས། མི་དམིགས་པར་གཤེགས་སོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ཐམས་ཅད་ཀྱིས། ཡང་སངས་རྒྱས་པདྨོའི་གདུང་དང་སྡེའི་སྤྲུལ་པ་ཀུན་ཏུ་སྤྱན་རས་གཟིགས་དབང་ཕྱུག་ལ་ཡོངས་སུ་བསྒོ་བ། རྒྱལ་ལ་ཀུན་གྱི་ཆོས་སྐུ་པདྨོའི་གདུང་། །ཆོས་རྗེ་འོད་དཔག་མེད་པ་རྡོ་རྗེའི་ཆོས། །སྤྱན་རས་གཟིགས་སྤྲུལ་ཧྲི་ལས་རྔམ་ཆེན་སྟོན། །ངག་གི་དབང་ཕྱུག་རྟ་གདོང་ཞལ་གྱིས་གནོན། །ཞེས་ཡོངས་སུ་བསྐུལ་བས། སྤྲུལ་པ་རྡོ་རྗེ་རྟ་གདོང་ཆེན་པོས། དུར་ཁྲོད་ཀྱི་བདག་པོ་ཆེན་པོའི་གནས་སུ་སྣང་བར་མཛད་ནས། ཧ་ཧ་ཧ་ཧི་ཧི་ཧི། ཧུ་ལུ་ཧུ་ལུ་ཧུ། ཞེས་ལྷང་ལྷང་ཙེར་ཙེར་རྟ་སྐད་དྲག་པོའི་སྒྲ་དབྱངས་ཕྱུང་བ་ལས། སྲིན་པོའི་ཕྲུ་མ་ཡོངས་སུ་སྤ་ཞུམ་ཞིང་། བག་འཁུམས་པ་ཙམ་དུ་གྱུར་ཀྱང་། དུར་ཁྲོད་ཀྱི་བདག་པོ་ཁོ་ན་ངོ་བོ་དེ་རང་གི་ང་རྒྱལ་གཏུམ་སྐད་དུ། རུ་ཏྲ་མ་ཏྲ་མ་ར་ཏྲ་ཞེས་བསྒྲགས་ནས་རྣམ་པར་བརྗིད་ཕྱུང་སྟེ། འགྱིངས་པ་ལས་ཟིལ་གྱིས་མ་ནོན་ཏེ། སླར་ཁོ་ན་ངོ་བོ་དེས་སླར་བསྒོ་བ། མགྲིན་བུ་སྔོན་ཡང་ཁྱོད་ལྟ་བུས་བདག་མ་ནོན་པས། ཁྱོད་ཀྱིས་བདག་ཇེན་པ་མ་ཡིན་ཏེ། ཉིད་ཀྱི་གནས་གང་ཡིན་པར་བདེ་བར་མནོས་ཤིག ཅེས་ཐའི་ཁ་བརྡབ་པ་བྱས་ཏེ། ཡང་བདུད་ཀྱི་དངོས་པོ་བཞིས་ཡོངས་སུ་བཞམས་པས། གཙང་མའི་རིས་ཀྱི་འཕགས་པ་རྟོག་པ་སྐྱེས་ནས་ཕྱིར་ལྡོག་སྙམ་པ་ལས། དེ་བཞིན་གཤེགས་པ་ནམ་མཁའ་ལྟ་བུ་ལ་གཙང་སྨེ་མི་མངའ་ནས་མ་ལོག་པར། སླར་ཧན་པ་ལས། ཁོ་ན་ངོ་བོ་དེས་ཐིམ་པར་ཛམས་ནས། དེ་བཞིན་གཤེགས་པ་ངག་གི་དབང་ཕྱུག་དེས། འཐུན་འཇུག་ཏུ་ཁོ་ན་དགའ་བ་ལྟར་ཐིམ་དུ་ཧན་ནོ། །དེ་ནས་དེ་བཞིན་གཤེགས་པ་དེས་དབུ་ཁོ་ནའི་གཙུག་ཏུ་ཕྱུང་། ཞབས་ཁོ་ནའི་མཐིལ་དུ་ཕྱུང་ནས། རྡོ་རྗེ་ཧཱུྃ་ཞེས་རྒྱས་པར་ལུས་ཀུན་ཏུ་རྒྱས་ཏེ། ཁོ་ན་དེས་མ་བཟོད་པའི་ང་རོ་འོ་དོད་ཀྱི་སྒྲ་མཐར་སྟོན་པ་ནི། ཨ་ཙ་མའོ་ཅི་མཛད་མྱུར་བར་མཛོད་ཅེས་སྟོན་ཏོ། །དེ་ནས་དེ་བཞིནགཤེགས་པ་དེས། ཁོ་ན་དེ་སྒྲིབ་པ་སྦྱང་པ་མཛད་ནས། བདེ་བ་ཁོ་ནར་ཁོ་ནའི་གཙུག་ཏུ་བྱུང་སྟེ། ནམ་མཁའ་ལ་རྟའི་དབྱངས་ཕྱུང་བས། སྲིན་པོ་ཁོ་ནའི་ཚོགས་བུར་མེར་ཐོར་ཤིག་ཏུ་གྱུར་ཏེ། ཟོལ་གྱིས་ནོན་ཅིང་བག་འཁུམས་ནས་གསོལ་པ། དཔའ་བོ་ཆེན་པོའི་འབངས་སུ་མཆི། །ཇི་ལྟར་བགྱི་བ་བཀའ་སྩོལ་ཅིག །ཅེས་ཞུས་པས། དེ་བཞིན་གཤེགས་པ་དེས་གསུངས་པ། ངས་ནི་ཁྱོད་མ་བཏུལ་གྱིས། ཁྱོད་ཀྱི་གཉེན་པོ་རྡོ་རྗེ་ཧཱུྃ་ཞེས་བྱ་བ་དེ། དེ་བཞིན་གཤེགས་པ་ཐམས་ཅད་ཀྱིས་དབང་གིས་དབང་བསྐུར་བ་ཤིན་ཏུ་གཏུམ་རྔམ་འཁྲུགས་པ་མ་རུངས་ཤིང་མི་བཟད་པ། བདུད་ཀྱི་བདུད་ཆེན་པོ་འཇིགས་བྱེད་འབར་བ་ཞིག་བྱུང་གིས། དེ་ལ་སྐྱབས་སུ་དོངས་ཤིག་ཅེས་གསུངས་ཏེ། ཆོས་ཀྱི་དབྱིངས་ཕོ་བྲང་དུ་མི་དམིགས་པར་གཤེགས་སོ།།

དེ་ནས་དེ་བཞིན་གཤེགས་པ་རྒྱལ་བ་ཐམས་ཅད་ཀྱིས་ཡང་སངས་རྒྱས་ཀུན་གྱི་པདྨའི་གདུང་དང་སྡེའི་སྤྲུལ་པ་ཀུན་ཏུ་ཐུགས་རྗེའི་མངའ་བདག་འཕགས་པ་སྤྱན་རས་གཟིགས་དབང་ཕྱུག་ལ་ཡོངས་སུ་བསྐུལ་ཏེ་བསྒོ་བ། རྒྱལ་བ་དབང་གི་བདག་པོ་ཀུན་གྱི་ཆོས་ཉིད་དོན་གྱི་སྐུ་གསུང་པདྨའི་རིགས་ཀྱི་གདུང་འཚོབ་ཅིང་འཛིན་པ་ཆོས་ཀྱི་རྒྱལ་པོའམ་རྗེ་བོ་གསུང་གི་དོན་ཇི་སྙེད་པ་མངའ་བས་འོད་དཔག་མེད་པ་རྡོ་རྗེ་ཆོས་གདུལ་བྱ་ཐམས་ཅད་ལ་ཐུགས་རྗེའི་སྤྱན་རས་ཀྱིས་སོ་དང་བྱ་ར་མཛད་ཅིང་གཟིགས་པ་ཁྱོད་ཀྱིས་དབང་གི་ས་བོན་ཧྲཱིཿཡིག་ལས་ཤིན་ཏུ་རྔམ་པར་བྱུང་བའི་ཁྲོ་བོ་ཆེན་པོའི་ཚུལ་སྟོན་པས་ངག་གི་དབང་ཕྱུག་རྟ་ཡི་གདོང་ངམ་མགྲིན་པའི་ཞལ་གྱིས་དྲེགས་པ་རུ་ཏྲ་ནོན་ཞིག་ཐུལ་ཅིག་ཅེས་པའམ་ཡང་ན་རྟ་གདོང་ཞལ་གྱིས་ནོན་ཞེས་དབུའི་སྟེང་ན་རྟ་མགོ་ཡོད་པས་རྟ་གདོང་གི་ཞལ་གྱིས་ནོན་པ་ཁྱོད་ཀྱིས་རུ་ཏྲ་གནོན་ཅིག་ཅེས་ཡོངས་སུ་བསྐུལ་བས། དོན་གྱིས་གསན་ཏེ་སྤྲུལ་པ་རྡོ་རྗེ་རྟ་ཡི་གདོང་ཅན་སྐུ་མི་བཟད་པ་ཆེན་པོས་དུར་ཁྲོད་ཀྱི་བདག་པོའི་གནས་སུ་སྣང་བར་མཛད་ནས་རྔམ་པའི་གད་མོ་ཧ་ཧ་དགྱེས་པའི་གད་མོ་ཧི་ཧི་དབང་གི་ས་ནོན་ཧྲཱིཿ སྐུ་གསུང་ཐུགས་ཀྱིས་དབང་དུ་སྡུད་པ་ཧུ་ལུ་ཧུ་ལུ་ཧུ་ལུ་ཧཱུྃ་ཞེས་ལྷང་ལྷང་ཙེར་ཙེར་རྟ་སྐད་དྲག་པོའི་སྒྲ་དབྱངས་ཕྱུང་བ་ལས། སྲིན་པོའི་འཁོར་ཚོགས་ཕྲུ་མ་རྣམས་ཡོངས་སུ་སྤ་ཞུམ་ཞིང་བག་འཁུམས་པ་ཙམ་དུ་གྱུར་ན་ཡང༌། དུར་ཁྲོད་ཀྱི་བདག་པོ་རུ་ཏྲ་ཁོ་ན་ངོ་བོ་དེ་རང་གི་ཆེ་བའི་ང་རྒྱལ་གྱི་གཏུམ་སྐད་དུ། རུ་ཏྲ་མ་ཏྲ་མ་ར་ཏྲ། ཞེས་བསྒྲགས་ནས། ལུས་རྣམ་པར་བརྗིད་ཕྱུང་སྟེ་འགྱིངས་པ་ལས་ཟིལ་གྱིས་མ་ནོན་ཏེ། སླར་ཡང་རུ་ཏྲ་ཁོ་ན་ངོ་བོ་དེས་རྟ་མགྲིན་ལ་བསྒོ་བ། མགྲིན་བུ་སྔོན་ཡང་ཁྱོད་ལྟ་བུས་བདག་མ་ནོན་པས། ཁྱོད་ཀྱིས་བདག་ཇེན་ཞེས་ཐུལ་བ་མ་ཡིན་ཏེ་རང་ཉིད་ཀྱི་གནས་གང་ཡིན་པར་བདེ་བར་མནོས་ཤིག་ཅེས་བརྗོད་ནས་ཐའི་ཁ་བརྡབ་༼༣༥༩༽པ་བྱས་ཏེ་ཡང་བདུད་ཀྱི་དངོས་པོ་བཞིས་ཡོངས་སུ་ཞམས་པས་རུ་ཏྲས་སྔམ་བཞིན་མི་གཙང་བས་གཙང་མ་རིགས་ཀྱི་འཕགས་པ་རྟ་མགྲིན་ཡང༌། རྟོག་པ་སྐྱེས་ནས་ཕྱིར་ལོག་པར་འགྱུར་སྙམ་པ་ལས། དེ་བཞིན་གཤེགས་པ་དབང་གིས་དབང་དུ་སྡུད་པའི་ཚུལ་སྟོན་པ་ནམ་མཁའ་ལྟ་བུ་ལ་གཙང་སྨེ་མི་མངའ་ནས་ཁྲོ་བོས་འདུལ་ཕྱིར་ཕྱིར་མ་ལོག་པར་སླར་ཧེན་ཞེས་པ་བྲུ་ཤའི་སྐད་དེ་གམ་དུ་འདུག་པ་ལས། རུ་ཏྲ་ཁོ་ན་ངོ་བོ་དེས་ཐིམ་པར་ཛམས་ཞེས་པའང་བྲུ་ཤའི་སྐད་དེ་ཁོང་དུ་མིད་ནས་ཁ་ཟས་སུ་མཛད་པ་ན་དེ་བཞིན་གཤེགས་པ་དག་གི་དབང་ཕྱུག་དེས་དེ་དང་མཐུན་འཇུག་ཏུ་ཁོ་དགའ་བ་ལྟར་ཐིམ་དུ་ཧན་ནོ་ཞེས་ཁོང་དུ་གཤེགས་པའམ་བྱོན་ནོ། །དེ་ནས་དེ་བཞིན་གཤེགས་པ་རྟ་མགྲིན་དེས་དབུ་ཡི་རྟ་མགོ་རུ་ཏྲ་ཁོ་ནའི་སྤྱི་གཙུག་ཏུ་ཕྱུང་ཞབས་ཁོ་ནའི་རྐང་མཐིལ་དུ་ཕྱུང་ནས་རྡོ་རྗེ་ཧཱུྃ་ཞེས་བརྒྱངས་པས་རྟ་མགྲིན་གྱི་སྐུ་ལུས་ཀུན་ཏུ་རྒྱས་པ་རུ་ཏྲའི་ལུས་ཀྱང་ཀུན་ཏུ་རྒྱས་ཏེ། ཁོ་ན་དེས་མ་བཟོད་པའི་ང་རོ་འོ་དོད་ཀྱིས་སྒྲ་མཐར་བཏོན་པ་ནི། ཨ་ཙ་མའོ། །ཅི་མཛད་མྱུར་བར་མཛོད་ལ་སྒྲོལ་ཞིག་ཅེས་གདུང་བ་བཏོན་ནོ། །དེ་ནས་དེ་བཞིན་གཤེགས་པ་དེས་ཁོ་ན་དེ་ཡི་ལས་ཀྱི་སྒྲིབ་པ་སྦྱང་བས་ཚོགས་ལམ་དང་སྐལ་པ་མཉམ་པར་མཛད་ནས། སྡུག་བསྔལ་མེད་པར་བདེ་བ་ཁོ་ནར་རུ་ཏྲ་ཁོ་ནའི་སྤྱི་གཙུག་ཏུ་ཕྱུངས་ཏེ་ནམ་མཁའ་ལ་རྟའི་དབྱངས་ཕྱུང་བ། རུ་ཏྲ་དང་སྲིན་པོའི་ཚོགས་རྣམས་འུར་མེར་ཐོག་ཤིག་ཏུ་གྱུར་ཏེ་ཟིལ་གྱིས་གནོན་ཅིང་བག་འཁུམས་ནས། གསོལ་པ། དཔའ་བོ་ཆེན་པོ་ཁྱེད་ཀྱི་འབངས་སུ་མཆི་ཡིས་ཇི་ལྟར་བགྱི་བ་བཀའ་སྩོལ་ཞིག ཅེས་ཞུས་ཏེ་བཏུད་པས་དེ་བཞིན་གཤེགས་པ་དེས་གཉེན་པོ་ཕྱིས་འབྱུང་ཞིང་དྲག་པོས་འདུལ་བའི་ལུང་བསྟན་གསུངས་པ། ངས་ནི་ཁྱོད་མ་བཏུལ་གྱིས་ཁྱོད་ཀྱི་གཉེན་པོ་རྡོ་རྗེ་ཧཱུྃ་ངམ་གནོད་སྦྱིན་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱི་དབང་གིས་དབང་བསྐུར་བ། ཤིན་ཏུ་སྐུ་གཏུམ་ལ་གསུང་རྔམ་ཞིང་ཐུགས་འཁྲུགས་པ་མ་རུངས་ཤིང་མི་བཟད་པ། བདུད་ཐམས་ཅད་ཀྱི་ཡང་བདུད་ཆེན་པོ། འཇིགས་བྱེད་འབར་བ་ཞིག་འབྱུང་གིས། དེ་ལ་སྐྱབས་སུ་དོང་ཞིག ཅེས་གསུངས་ཏེ་འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ་མི་དམིགས་པར་གཤེགས་སོ། །དེ་ལྟར་ལས་གང་གིས་འདུལ་བརྟགས་པ་ལས་དངོས་སུ་བརྟུལ་བ་མ་ཡིན་༼༣༦༠༽ལ། དེ་ལ་མ་བཟོད་པས་ཞི་རྒྱས་ཀྱིས་མི་ཐུལ་བར་དབང་དྲག་གིས་འདུལ་བར་མཁྱེན་ནོ།།

གསུམ་པ་རིགས་ནས་བཀའ་བགྲོས་བཅད་པ་དངོས་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས་གསང་བ། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

དེ་ནས་གསང་བ་འདིས་པའི་དེ་བཞིན་གཤེགས་པ་ཐམས་ཅད་ཀྱིས། འདུས་པ་ཆེན་པོ་རྣམ་པར་བགྲོས་ནས། འཕྲིན་ལས་བཞིའི་སྒོ་གང་གིས་འདུལ་བའི་སྐབས་ལ་བབ་བརྟགས་ན། གང་ཞི་རྒྱས་ཀྱིས་གདུལ་བ་མི་འདྲ་ནས། དབང་དྲག་གིས་གདུལ་བར་བཀའ་བགྲོས་དམ་པར་ངེས་པར་བཅད་པའི་མདོ་ཡོངས་སུ་གསུངས་པ་ནི་འདི་ལྟ་སྟེ།

དེ་ནས་གསང་བ་འདུས་པའི་དེ་བཞིན་གཤེགས་པ་ཐམས་ཅད་ཀྱིས། དེ་ལྟར་འདུས་པ་ཆེན་པོ་རྣམ་པར་བགྲོས་ནས་ཕྲིན་ལས་བཞིའི་སྒོ་གང་གིས་འདུལ་བའི་སྐབས་ལ་བབ་པ་བརྟགས་པ་ན། གང་ཞི་རྒྱས་ཀྱིས་འདུལ་བ་མི་འདྲ་བར་མཁྱེན་ནས། དབང་དྲག་གིས་འདུལ་བར་བཀའ་བགྲོས་དམ་པར་མཛད་དེ་མཐུན་པའམ་གཉེན་པོས་འདུལ་བར་གྲོས་ཀྱིས་ངེས་པར་བཅད་པའི་མདོ། ཡོངས་སུ་གསུངས་པ་ནི་འདི་ལྟ་སྟེ། ཞེས་ལེའུ་གོང་མ་དང་འདི་གཉིས་བཀའ་བགྲོས་ལྡབ་པ་ནི། གོང་མ་སྤྱིར་འདུལ་བ་ཙམ་དང༌། འདི་ནི་ཁྱད་པར་གྱི་ལས་གང་གིས་འདུལ་བའི་ཕྱིར་མི་འགལ་ལོ།།

གཉིས་པ་རྒྱས་པར་བཤད་པ་ལ་བཞི་སྟེ། ཆོས་སྐུས་འདུལ་བར་བཅད་པ། ངོ་བོ་ཉིད་ཀྱི་སྐུས་འདུལ་བར་བཅད་པ། ལོངས་སྐུས་འདུལ་བར་བཅད་པ། སྤྲུལ་པ་དང་གསང་བའི་སྐུས་འདུལ་བར་བཅད་པའོ། །དང་པོ་ནི།

དེ་ནས་དེ་བཞིན་གཤེགས་པ། ཞེས་པ་ནས། ཇི་བཞིན་མཛོད། །ཅེས་ངེས་པ་དམ་པར་བཅད་དོ། །ཞེས་པའི་བར་གྱིས་བསྟན་ཏེ།

དེ་བཞིན་གཤེགས་པ་རྣམ་གྲོལ་སྤྱོད་པའི་ཚོགསཀྱིས་བཀའ་བཅད་པའི་མདོ་གསུངས་པ་ནི། འདི་ལྟ་སྟེ།

ཤིན་ཏུ་འགོག་པས་ཞི་བ་ལ། །ཁྲོས་པས་ཕན་པར་མི་འགྱུར་ཏེ། །རྣལ་འབྱོར་མ་བཅོས་དེ་ཉིད་ལས། །ཞི་བར་དེ་བཞིན་གཤེགས་ཀུན་མཛོད། །རྣལ་འབྱོར་ཚུལ་ཅན་ཞི་བས་ཀྱང་། །སྲིད་པའི་མྱུ་གུ་འགོག་ནུས་ན། །རྣལ་འབྱོར་ཡོད་མེད་སྟོང་པའི་མཐུས། །འགོག་པ་བསླངས་པ་སྨོས་ཅི་དགོས། །ཤིན་ཏུ་བསྔོ་བསྐམས་བརླན་པ་ལ། །གང་དུ་འགོག་རྣམས་བསླང་བའི་ཕྱིར། །འགག་མེད་སྟོང་པའི་ཆོས་ཉིད་ལས། །སྣ་ཚོགས་མི་འགོག་ཇི་བཞིན་མཛོད།།

ཅེས་ངེས་པ་དམ་པར་བཅད་དོ།།

དེ་ནས་དེ་བཞིན་གཤེགས་པ་ཆོས་ཀྱི་སྐུ་རྣམ་གྲོལ་སྤྱོད་པའི་ཚོགས་ཀྱི་མཚན་དེ་ཉིད་དུ་ངེས་པ་ཇི་སྙེད་པ་རྣམས་ཀྱིས་བཀའ་བཅད་མཛད་དེ་རུ་ཏྲ་གདུལ་ཐབས་དང་རྗེས་འཇུག་གིས་གཞན་དོན་སྤྱོད་ཚུལ་སྟོན་པའི་མདོ་གསུངས་པ། ལེའུ་ཉེར་གཅིག་པ་ལྟར་ཞིང་ཁམས་འདིར་དྲེགས་པ་དང་འགྲོ་བའི་ཚུལ་འདི་ལྟར་དུ་གྱུར་ཏེ། གང་ཞེ་ན། ཤིན་ཏུ་ཡང་དག་པའི་སེམས་འགོག་པས་རེ་ཞིག་གསལ་ཆ་བྲལ་ཏེ་མུན་པའི་ཞི་བར་གདུལ་བྱ་ཆུད་པ་ལ། གདུལ་ཐབས་མི་མཐུན་པའི་ཚུལ་གྱིས་ཁྲོས་པས་བཏུལ་ཡང་ཆད་ལྟ་དེ་ལས་གཏན་དུ་མི་ལྡོག་པས་ན་ཕན་པར་མི་འགྱུར་ཏེ། དེས་ན་རྒྱལ་བ་རྣམས་ཀྱི་ཆ་མཐུན་གྱི་མཛད་པ། རྣལ་འབྱོར་མ་བཅོས་པའི་མཉམ་པ་ཆེན་པོའི་ངང་དེ་ཉིད་ལས་མཐུན་པས་འདུལ་བས་ཞི་བ་ཆེན་པོའི་རྣམ་པར་དེ་བཞིན་གཤེགས་ པ་ཀུན་གྱིས་མཛོད་ཅིག དེ་ཅིའི་ཕྱིར་ཞེ་ན། གང་ཟག་གི་བདག་མེད ་རྟོགས་པའི་རྣལ་འབྱོར་གྱི་ཚུལ་ཅན་ཉན་ཐོས་༼༣༦༡༽རྣམས་ཀྱི་ཆོས་ཀྱི་ བདག་མེད་མ་རྟོགས་པར་འགོག་པ ་ཞི་བ་ཕྱོགས་གཅིག་པས་ཀྱང་སྲིད་པའི་རྩེ་མོ་མན་ཆད་ཀྱི་ས་བོན་སྤངས་ཏེ་འཁོར་བའི་མྱུ་གུ་འགོག་པར་ནུས་ན་གསང་བའི་རྣལ་འབྱོར་ཡོད་མེད་ཀྱི་མཐའ་གཉིས་པོ་ཞི་བས་སྟོང་པའི་ཆོས་ཉིད་ཆེན་པོ་རྟོགས་པའི་མཐུས་ཡང་དག་པའི་སེམས་འགོག་སྟེ་མུན་པར་ཞི་བ་དེ་ལས་བསླང་བར་མཛད་པས་དོན་གྲུབ་པ་སྨོས་ཅི་དགོས་པས་སོ། །དེ་བས་རུ་ཏྲ་ལྟ་བུ་གདུལ་བྱ་ཤིན་ཏུ་མ་རུངས་པ་བྱང་ཆུབ་སེམས་ཀྱི་མྱུ་གུ་སྔོ་སྐམས་སུ་གྱུར་པ་དེ་ཐུགས་རྗེའི་ཆུ་བོས་རླན་པར་མཛད་པ་ལ་མུན་པའི་ཁམས་གང་དུ་རེ་ཞིག་ཚོག་དྲུག་འགོག་པ་རྣམས་བསླང་བར་བྱེད་པའི་དགོས་ཆེད་ཀྱི་ཕྱིར་གཉེན་པོས་འདུལ་བ་གང་ཡང་འགོག་པ་མེད་པར་སྟོང་པའི་ཆོས་ཉིད་མ་འདྲེས་ཡོངས་རྫོགས་ཀྱི་ངང་ལས་མཛད་པ་སྣ་ཚོགས་ཅིར་ཡང་མི་འགོག་པར་སྣང་བས་མཐུན་པའི་ཡོན་ཏན་གྱིས་གདུལ་བྱའི་དོན་ཇི་ལྟ་བ་བཞིན་དུ་མཛོད་ཅིག་ཅེས་རྒྱལ་བ་རྣམས་ལ་བཀའ་བགྲོས་ཏེ་ངེས་པ་དམ་པར་བཅད་དོ། །འདི་དག་གདུལ་བྱ་དང༌། མི་འདུལ་བའི་ལས་དང༌། ཆ་མཐུན་དུ་མཛོད་ཅིག་པར་བསྐུལ་བ་དང༌། མཛད་པས་དོན་གྲུབ་པར་ཐེ་ཚོམ་མི་ཟ་བ་དང༌། དགོས་ཆེད་དང་མཐུན་པའི་ཡོན་ཏན་སྣང་བས་དོན་མཛོད་ཅིག་པར་བསྐུལ་བར་འཆད་པ་དག་ཀྱང་རྗེས་སུ་འགྲེལ་ཏོ།།

གཉིས་པ་ངོ་བོ་ཉིད་ཀྱི་སྐུས་འདུལ་བར་བཅད་པ་ལ་གཉིས་ཏེ། ངོ་བོ་ཉིད་མེད་པས་འདུལ་བར་བཅད་པ། ངོ་བོ་ཉིད་མི་འགྱུར་བས་གདུལ་བར་བཅད་པའོ། །དང་པོ་ནི།

དེ་ནས་དེ་བཞིན། ཞེས་པ་ནས། ཆད་པར་མཛོད། །ཅེས་ངེས་པ་དམ་པར་བཅད་དོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ངོ་བོ་ཉིད་མེད་པའི་ཚོགས་ཀྱིས་བཀའ་བཅད་པའི་མདོ་གསུངས་པ། ཤིན་ཏུ་སྟོང་པ་རྒྱུན་ཆད་ལ། །དངོས་པོས་ཕན་པར་མི་འགྱུར་ཏེ། །རྒྱུན་གྱི་བྱང་ཆུབ་སྟོང་ཉིད་ལས། །མེད་འགྱུར་དེ་བཞིན་གཤེགས་ཀུན་མཛོད། །སྟོང་ཉིད་ཚུལ་ཅན་སྟོང་པས་ཀྱང་། །ཅི་ཡང་མེད་པར་གནས་འགྱུར་ན། །མེད་པ་ལས་བྱུང་རྣལ་འབྱོར་མཐུས། །མཐར་ཟད་མུ་ཟློག་སྨོས་ཅི་དགོས། །ཤིན་ཏུ་རྒྱུན་ཆད་བཟློག་པ་དང་། །གང་དུ་མེད་ལས་སྐྱེས་པའི་ཕྱིར། །རྒྱུན་དང་བཅས་པའི་སྟོང་ཉིད་ལས། །ཆེ་ཡོན་རྒྱུན་མི་འཆད་པར་མཛོད། །ཅེས་ངེས་པ་དམ་པར་བཅད་དོ།།

དེ་ནས་དེ་བཞིན་གཤེགས་པ་ངོ་བོ་ཉིད་ཀྱི་སྐུ་སྤྲོས་པ་མེད་པའི་ཚོགས་ཀྱིས་ཆད་ལྟ་བཟློག་ཅིག་པར་བཀའ་བཅད་མཛད་པའི་མདོ་གསུངས་པ། གདུལ་བྱ་ལས་དང་འབྲས་བུས་ཤིན་ཏུ་སྟོང་པར་ལྟ་བ་བྱང་ཆུབ་ཀྱི་བསམ་པ་རྒྱུན་ཆད་པ་ཅན་ལ་གདུལ་ཐབས་མི་མཐུན་པའི་ཚུལ་གྱིས་དངོས་པོས་བཏུལ་ཡང་ལྟ་ངན་དེ་ལས་གཏན་དུ་མི་ལྡོག་པས་ན་ཕན་པར་མི་འགྱུར་ཏེ་སྔར་བཤད་པ་ལྟར་རྒྱུན་གྱི་བྱང་ཆུབ་ཆེན་པོ་མཐའ་བྲལ་སྟོང་པ་ཉིད་ལས་མཐུན་པས་འདུལ་བ་མེད་རྒྱུར་བཏགས་ཆགས་ཀྱི་རྣམ་པར་དེ་བཞིན་གཤེགས་པ་ཀུན་གྱིས་མཛོད་ཅིག འདུལ་བའི་ཚད་བྱང་ཆུབ་སེམས་དཔའི་མདོ་སྡེ་དོན་དམ་༼༣༦༢༽པར་སྤྲོས་པ་ཀུན་དང་བྲལ་བའི་སྟོང་པ་ཉིད་ཀྱི་ཚུལ་ཅན་དེ་ཡིས་སྔགས་ཀྱི་སྟོང་པ་ཆེན་པོ་མ་མཐོང་ཡང་ཆ་འདྲ་བར་མཐོང་བའི་སྟོང་པ་གང་གི་ནུས་པས་ཀྱང་དངོས་སྣང་ཅི་ཡང་མེད་པར་གནས་པར་འགྱུར་ན། སྐྱེ་བ་མེད་པ་རང་བཞིན་ཀུན་ཏུ་སྣང་བའི་དབྱིངས་ལས་རང་བྱུང་བའི་རྣལ་འབྱོར་མཐར་ཐུག་སྟོང་པ་ཆེན་པོའི་མཐུས་མཐར་ཟད་ཆད་པར་ལྟ་བའི་མུ་ལ་གནས་པ་ལས་བཟློག་པར་ནུས་པ་སྨོས་ཅི་དགོས་ཏེ། དེ་བས་ན་དགོས་པ་ཤིན་ཏུ་སྟོང་པ་རྒྱུན་ཆད་དུ་ལྟ་བ་བཟློག་པ་དང་གང་དུ་མེད་པའི་རྒྱུ་ལས་བཏགས་པར་ཆགས་ཤིང་སྒྲུབས་པ་གྲུབ་པར་བསྐྱེད་པའི་ཕྱིར་གཉེན་པོས་འདུལ་བ་མཐུན་པའི་ཡོན་ཏན་རྒྱུན་དང་བཅས་པའི་སྟོང་པ་ཉིད་ཆེན་པོ་ལས་ཆེ་བའི་ཡོན་ཏན་རྒྱུན་མི་ཆད་པར་འགྱུར་བས་གདུལ་བྱའི་དོན་མཛོད་ཅིག ཅེས་ངེས་པ་དམ་པར་བཅད་དོ།།

གཉིས་པ་ངོ་བོ་ཉིད་མི་འགྱུར་བས་གདུལ་བར་བཅད་པ་ནི།

དེ་ནས། ཞེས་པ་ནས། ཉིད་དུ་མཛོད། །ཅེས་ངེས་པ་དམ་པར་བཅད་དོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ངོ་བོ་ཉིད་མི་འགྱུར་བའི་ཚོགས་ཀྱིས་བཀའ་བཅད་པའི་མདོ་གསུངས་པ། ཤིན་ཏུ་ཐེར་ཟུག་བརྟག་པ་ལ། །མེད་པས་ཕན་པར་མི་འགྱུར་ཏེ། །སྙིང་པོ་བྱང་ཆུབ་དེ་ཉིད་ལས། །བདག་ཉིད་ཆེན་པོར་ཐམས་ཅད་མཛོད། །མི་འགྱུར་ཚུལ་ཅན་བརྟག་པས་ཀྱང་། །དངོས་པོ་བརྟན་གཡོར་བྱེད་ནུས་ན། །བདག་ཉིད་ཆེན་པོ་ལྷུན་གྲུམ་མཐུས། །ཐེར་ཟུག་བཟློག་པ་སྨོས་ཅི་དགོས། །བདག་ཏུ་ཞེན་པ་བཟློག་པ་དང་། །དངོས་འཛིན་བཀའ་བསྒོ་བསྒྱུར་བའི་ཕྱིར། །བདག་མེད་བརྟག་པའི་ཆོས་ཉིད་ལས། །བྱེད་མེད་རང་བཞིན་ཉིད་དུ་མཛོད། །ཅེས་ངེས་པ་དམ་པར་བཅད་དོ།།

དེ་ནས་དེ་བཞིན་གཤེགས་པ་ངོ་བོ་ཉིད་སྐུ་རང་བཞིན་མི་འགྱུར་བའི་ཚོགས་ཀྱི་མཚན་དང་རིགས་དེ་ཉིད་དུ་ངེས་པའི་རྒྱལ་བ་རྣམས་ཀྱིས་བཀའ་བཅད་མཛད་དེ་རྟག་ལྟ་ལས་བཟློག་པའི་མདོ་གསུངས་པ། གདུལ་བྱ་གང་ཟག་གི་བདག་ཤིན་ཏུ་ཐེར་ཟུག་ཏུ་ཞེན་ཅིང་རྟག་པར་ལྟ་བ་ལ། གདུལ་ཐབས་མི་མཐུན་པའི་ཚུལ་གྱིས་མེད་པའི་སྟོང་པ་བསྟན་པས་ལྟ་ངན་གཏན་དུ་མི་ལྡོག་པས་ན་ཕན་པར་མི་འགྱུར་ཏེ། ཆ་མཐུན་གྱི་ཚུལ་དུ་སྙིང་པོ་བྱང་ཆུབ་དེ་ཉིད་ཀྱི་ངང་ལས་གཉིས་མེད་བདག་ཉིད་ཆེན་པོར་ཐམས་ཅད་དུ་མཐུན་པས་འདུལ་བར་མཛོད་ཅིག འདུལ་བའི་ཚད་འགྲོ་བ་རྣམས་ཀྱིས་ཞེན་པ་རྫས་ཅན་དུ་ལྟ་བ་མཐུ་བརྟས་པས་མི་འགྱུར་བའི་ཚུལ་ཅན་རྟག་པས་ཀྱང་དངོས་པོ་བརྟན་གཡོར་སྣང་བར་བྱེད་པར་ནུས་ན། ཡེ་ནས་འཕོ་འགྱུར་ མེད་པར་བདག་ཉིད་ཆེན་པོར་ལྷུན་གྱིས་གྲུབ་པ ་མངོན་དུ་བྱས་པའི་མཐུས་རྟག་པ་ཐེར་ཟུག་ཏུ་ལོག་པར་ལྟ་བ་དེ་ལས་བཟློག་པར་ནུས་པ་སྨོས་ཅི་དགོས་ཏེ། དེ་བས་བདག་ཏུ་ཞེན་པ་བཟློག་པ་དང༌། དངོས་པོར་འཛིན་པའི་རྐ་མགོ་བསྒྱུར་བའི་དགོས་པའི་ཕྱིར། གཉེན་པོས་འདུལ་བ་མཐུན་པའི་ཡོན་ཏན་ལྷུན་གྲུབ་ བདག་མེད་ཆེན་པོ་འགྱུར་མེད་རྟག་པའི་ཆོས་ཉིད་ལས་བྱ་བ་དང་བྱེད་པ ་མེད་པར་རང་བཞིན་ངང་དུ་ཕེབས་པས་སྙིང་པོ་བྱང་ཆུབ་ཉིད་དུ་མཐར་ཕྱིན་པའི་དོན་མཛོད་ཅིག ཅེས་གདུལ་བའི་༼༣༦༣༽ཐབས་མཆོག་ཏུ་ངེས་པ་དམ་པར་བཅད་དོ།།

གསུམ་པ་ལོངས་སྐུས་འདུལ་བར་བཅད་པ་ལ་དྲུག་སྟེ། རྡོ་རྗེའི་རིགས་ཀྱིས་བཀའ་བགྲོས་བཅད་པ། རིགས་ཀྱི་བདག་པོས་བཀའ་བགྲོས་བཅད་པ། རིན་ཆེན་རིགས་ཀྱིས་བཀའ་བགྲོས་བཅད་པ། ལས་ཀྱི་རིགས་ཀྱིས་བཀའ་བགྲོས་བཅད་པ། དེ་བཞིན་རིགས་ཀྱིས་བཀའ་བགྲོས་བཅད་པ། པདྨའི་རིགས་ཀྱིས་བཀའ་བགྲོས་བཅད་པའོ། །དང་པོ་ནི།

དེ་ནས། ཞེས་པ་ནས། ཕྱག་རྒྱར་མཛོད། །ཅེས་ངེས་པ་དམ་པར་བཅད་དོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་རྡོ་རྗེའི་གདུང་དང་སྡེའི་ཚོགས་ཀྱི་བཀའ་བཅད་པའི་མདོ་གསུངས་པ། ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ངོ་བོ་ལས། །ཁྲོ་བོར་དེ་བཞིན་གཤེགས་ཀུན་མཛོད། །ཁྲོ་བོའི་ཚུལ་ཅན་ཁྲོས་པས་ཀྱང་། །འཇིག་རྟེན་གསུམ་དག་སྐྲག་ནུས་ན། །སངས་རྒྱས་ཐུགས་རྗེ་ཁྲོས་པ་ཡི། །ཁམས་གསུམ་མ་ལུས་སྨོས་ཅི་དགོས། །གདུལ་དཀའ་མ་ལུས་འདུལ་བ་དང་། །དམ་ཚིག་ལ་སྡང་རྣམ་བྱང་ཕྱིར། །འབར་བ་ཆེན་པོའི་གར་དགུ་ལས། །དུར་ཁྲོད་གར་གྱི་ཕྱག་རྒྱར་མཛོད། །ཅེས་ངེས་པ་དམ་པར་བཅད་དོ།།

དེ་ནས་དེ་བཞིན་གཤེགས་པ་རྡོ་རྗེའི་རིགས་ཀྱི་གདུང་དང་སྡེའི་ཚོགས་ཀྱིས་གནས་ངན་གྱི་རྒྱུ་ཞེ་སྡང་ལས་བཟློག་ཅིག་པར་བཀའ་བཅད་པའི་མདོ་གསུངས་པ། གདུལ་བྱ་ཤིན་ཏུ་གདུག་ཅིང་གཏུམ་པའི་ལས་ཀྱིས་ངུ་འབོད་ཀྱི་ན་རག་ཏུ་ལྟུང་བ་ལ་གདུལ་ཐབས་མི་མཐུན་པའི་ཚུལ་གྱིས་ཞི་བས་བཏུལ་ཡང་ཕན་པར་མི་འགྱུར་ཏེ། ཆ་དང་མཐུན་པ་སྟོང་པ་ཤེས་རབ་དང་སྣང་བ་ཐབས་ཀྱི་ངོ་བོ་ལས་ཁྲོ་བོ་འཇིགས་པའི་རྣམ་པར་དེ་བཞིན་གཤེགས་པ་ཀུན་གྱིས་མཛོད་ཅིག དེ་ཅིའི་ཕྱིར་ཞེ་ན། ལས་ཀྱི་དབང་གིས་ཁྲོ་བོའི་ཚུལ་ཅན་ཡེ་ཤེས་ཆེན་པོས་སྣང་བ་དང༌། ཐུགས་རྗེ་ཆེན་པོར་བཞེངས་པ་དང་ཆ་འདྲ་བ་རུ་ཏྲ་ལྟ་བུ་ཁྲོས་པས་མཐུས་ཀྱང༌། འཇིག་རྟེན་སྲིད་པ་གསུམ་གྱི་འགྲོ་བ་མཐའ་དག་25སྐྲག་པར་བྱེད་ནུས་ན། ཡང་དག་པའི་སངས་རྒྱས་རྣམས་ཀྱི་ཡེ་ཤེས་དང་ཐུགས་རྗེ་ཆེན་པོ་ཁྲོས་པ་ཡིས། ཁམས་གསུམ་མ་ལུས་པ་བསྒྲལ་བར་མཛད་པས་དོན་གྲུབ་པ་སྨོས་ཅི་དགོས་པས་སོ། །དེ་བས་ན་དགོས་ཆེད་གདུལ་དཀའ་མ་ལུས་པ་འདུལ་བ་དང་དམ་ཚིག་ཅན་ལ་སྡང་བ་རྣམས་སྒྲིབ་པ་རྣམ་པར་སྦྱང་བའི་ཕྱིར་མཐུན་པ་དང་གཉེན་པོ་གཉིས་ཀས་འབར་བ་ཆེན་པོ་ཁྲོ་བོའི་གར་དགུ་ལས། དུར་ཁྲོད་གར་གྱི་ཕྱག་རྒྱར་བཞེངས་པར་མཛོད་ཅིག ཅེས་ངེས་པ་དམ་པར་བཅད་དོ།།

གཉིས་པ་རིགས་ཀྱི་བདག་པོས་བཀའ་བགྲོས་བཅད་པ་ནི།

དེ་ནས་དེ་བཞིན་གཤེགས་པ་རྡོ་རྗེ་སྙིང་པོ། ཞེས་པ་ནས། དམ་པར་བཅད་དོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་རྡོ་རྗེའི་སྙིང་པོ་དེ་ཁོ་ན་ཉིད་དང་ངེས་པ་ཞེས་བྱ་བའི་ཚོགས་ཀྱིས་བཀའ་བཅད་པའི་མདོ་གསུངས་པ། ཤིན་ཏུ་ལོག་པར་ཞེན་པ་ལ། །བདེན་པས་ཕན་པར་མི་འགྱུར་ཏེ། །གསང་ཆེན་སྦྱོར་བའི་ལྡེམ་དགོངས་ལས། །ཐམས་ཅད་འཐུན་འཇུག་ཉིད་དུ་མཛོད། །མཛད་སྤྱོད་ཚུལ་ཅན་སྤྱད་པས་ཀྱང་། །ཐམས་ཅད་བཀའ་ཟློག་བྱེད་ནུས་ན། །ཐུགས་རྗེའི་འཐུན་འཇུག་མཛད་སྤྱོད་ཀྱིས། །ལམ་ལོག་དྲང་སྲོང་སྨོས་ཅི་དགོས། །དངོས་པོས་དངོས་པོ་གྲོལ་བ་དང་། །དུག་གིས་དུག་ནད་བསལ་བའི་ཕྱིར། །ཐབས་མཆོག་དཔག་གིས་མི་ལང་བའི། །མཛད་པ་གར་གྱི་ཕྱག་རྒྱར་མཛོད། །ཅེས་ངེས་པ་དམ་པར་བཅད་དོ།།

དེ་ནས་དེ་བཞིན་གཤེགས་པ་རིགས་ཀྱི་བདག་པོ་རྡོ་རྗེ་སྙིང་པོ་དེ་ཁོ་ན་ཉིད་ངེས་པ་ཞེས་བྱ་བའི་ཚོགས་ཀྱི་མཚན་དང་རིགས་དེ་ཉིད་ཀྱི་བདག་པོ་རྡོ་རྗེ་སེམས་དཔའ་སངས་རྒྱས་ཀུན་གྱི་དགེ་བའི་བཤེས་གཉེན་ཉིད་དེ། དེ་རྣམས་ཀྱིས་ལམ་ལོག་པར་༼༣༦༤༽འཕྱན་པ་མཐུན་འཇུག་གི་ཐབས་ཀྱིས་འདུལ་བར་བཀའ་བཅད་པའི་མདོ་གསུངས་པ། གདུལ་བྱ་མ་ལོག་པའི་བསྟན་པ་ལ་ཞུགས་ཀྱང་ཤིན་ཏུ་ལོག་པར་ཞེན་ནས་རང་འཐད་ལ་སྤྱད་པས་མནར་མེད་པའི་དམྱལ་བར་ལྷུང་ངེས་པ་ལ་གཉེན་པོ་མི་མཐུན་པ་བདེན་ཚིག་འཇམ་པོས་བཀྲོལ་བས་ཕན་པར་མི་འགྱུར་ཏེ། ཆ་མཐུན་གྱི་མཛད་པ་དེ་ཁོ་ན་ཉིད་ཀྱི་ཐེག་པ་གསང་བ་ཆེན་པོ་བསྟན་ཞིང་བརྟགས་པར་དཀའ་བ་དེ་ལ་སྦྱོར་བའི་བརྡ་སྣ་ཚོགས་དང་ལྡེམ་པོ་བཞི་དང་དགོངས་པ་བཞི་ཡི་ཐབས་མང་པོ་ལས་འདིར་ནི་ཐམས་ཅད་མཐུན་འཇུག་གིས་འདུལ་ཐབས་ཀྱིས་ཡང་དག་པ་ཉིད་དུ་ངེས་པར་མཛོད་ཅིག འདུལ་བའི་ཚད་ཐེག་པ་ཆེན་པོ་གསང་སྔགས་ཀྱི་ཕྲིན་ལས་དང་མཚུངས་པའི་མཛད་སྤྱོད་ཀྱི་ཚུལ་ཅན་དངོས་པོ་བཞི་ལ་རང་འཐད་དུ་སྤྱད་པས་ཀྱང་འགྲོ་བ་ཐམས་ཅད་བཀའ་ཡི་དོན་ཇི་བཞིན་པ་ལས་བཟློག་ནས་ལོག་པར་བསྒྱུར་བར་བྱེད་ནུས་པ་རུ་ཏྲའི་སྤྱོད་པ་ལྟ་བུར་ཡང་སྲིད་ན། རྒྱལ་བ་རྣམས་ཀྱི་ཡང་དག་པའི་ཐུགས་རྗེ་དང་ཐབས་ལ་མཁས་པའི་མཐུན་འཇུག་གི་མཛད་སྤྱོད་ཀྱིས་ལམ་ལོག་པ་རྣམས་དྲང་པོར་སྲོང་ནུས་པ་སྨོས་ཅི་དགོས་ཏེ། དེ་བས་ན་དཔེར་ཆང་གིས་ཆང་ནད་བསལ་བ་ལྟ་བུར་དངོས་པོས་དངོས་པོ་གྲོལ་བར་མཛད་པ་དང༌། དེ་ཉིད་ཀྱིས་དེ་ཉིད་འཇོམས་པ་ལྟ་བུར་དུག་གིས་དུག་ནད་ལྔ་པོ་བསལ་བའི་དགོས་ཆེད་ཀྱི་ཕྱིར་མཐུན་པ་དང་གཉེན་པོ་གཉིས་ཀས་རྨད་དུ་བྱུང་བའི་ཐབས་མཆོག་དཔག་གིས་མི་ལང་བའི་སྒོ་ནས་མཛད་པ་གར་གྱི་ཕྱག་རྒྱར་བཞེངས་ལ་གདུལ་བར་མཛོད་ཅིག ཅེས་ངེས་པ་དམ་པར་བཅད་དོ།།

གསུམ་པ་རིན་ཆེན་རིགས་ཀྱིས་བཀའ་བགྲོས་བཅད་པ་ནི།

དེ་ནས་དེ་བཞིན་གཤེགས་པ་ནོར་བུའི། ཞེས་པ་ནས། དམ་པར་བཅད་དོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ནོར་བུའི་གདུང་སྡེའི་ཚོགས་ཀྱིས་བཀའ་བཅད་པའི་མདོ་གསུངས་པ། ཤིན་ཏུ་འཇུངས་ཤིང་བརྐམས་པ་ལ། །བཏང་བས་ཕན་པར་མི་འགྱུར་ཏེ། །མེད་ལ་མི་ཟད་ཀུན་འབྱུང་ལས། །ཐམས་ཅད་མི་ཟད་ནོར་བུར་མཛོད། །དཀའ་ཐུབ་ཚུལ་ཅན་འགགས་པས་ཀྱང་། །ཚེ་གཅིག་འཚོ་བར་བྱེད་ནུས་ན། །མེད་ལ་འདོད་དགུར་འབྱུང་བ་ཡི། །ཁམས་གསུམ་གདུང་བ་སྨོས་ཅི་དགོས། །འཇུངས་བ་ཚིམ་པར་བྱ་བ་དང་། །ཡོངས་སུ་གདུང་བ་བསལ་བའི་ཕྱིར། །ཐེག་ཆེན་གསང་བའི་ལོངས་སྤྱོད་ལས། །ནམ་མཁའ་མཛོད་ཀྱི་ཕྱག་རྒྱར་མཛོད། །ཅེས་ངེས་པ་དམ་པར་བཅད་དོ།།

དེ་ནས་དེ་བཞིན་གཤེགས་པ་ནོར་བུའི་རིགས་ཀྱི་གདུང་དང་སྡེའི་ཚོགས་ཀྱིས་བརྐམ་ཆགས་ཅན་གཤིན་རྗེའི་འཇིག་རྟེན་ལས་དགྲོལ་བར་བཀའ་བཅད་པའི་མདོ་གསུངས་པ། གདུལ་བྱ་ཟས་ནོར་ལ་ཤིན་ཏུ་འཇུངས་ཤིང་བརྐམ་པའི་ལས་ཀྱི་ཡི་དྭགས་གཤིན་རྗེར་ལྟུང་བར་ངེས་པ་ལ་སྦྱིན་པ་བཏང་བས་ཕན་པར་མི་འགྱུར་ཏེ། མཐུན་པས་དོན་ལ་སྦྱོར་བ་དངོས་པོ་མེད་ལ་ཡོན་ཏན་མི་ཟད་པར་ཕྱོགས་ཀུན་ནས་འབྱུང་བ་ལས་ཆོས་ཐམས་ཅད་ལ་དབང་བསྒྱུར་ཏེ་མི་ཟད་པ་ནོར་བུ་ལྟ་བུར་མཛོད་ཅིག དེ་ཅིའི་ཕྱིར་ན། དཀའ་ཐུབ་ཅན་གྱི་༼༣༦༥༽སྡོམ་པའི་ཆ་དང་མཚུངས་པའི་ཚུལ་ཅན་སེར་སྣ་མཆོག་ཏུ་ཆེ་བས་ནོར་རྫས་སྡོམ་སྟེ་གཞན་ལ་གཏོང་བའི་སྒོ་འགགས་པས་ཀྱང༌། ནོར་མ་བཏང་བ་དེའི་སྟོབས་ཀྱིས་རང་ཉིད་ཚེ་གཅིག་གི་བར་དུ་འཚོ་ཞིང་གནས་པར་བྱེད་ནུས་ན། རྒྱལ་བ་ནམ་མཁའི་མཛོད་མངའ་མེད་ལ་འདོད་རྒུར་འབྱུང་བ་ལ་དབང་བསྒྱུར་བ་ཡིས་ཁམས་གསུམ་གྱི་གདུང་བ་བསལ་ནུས་པ་སྨོས་ཅི་དགོས་པས་སོ། །དེ་བས་ན་མཐུན་པས་འདུལ་བ་སེར་སྣས་འཇུངས་པ་ཚིམ་པར་བྱ་བ་དང༌། གཉེན་པོས་འདུལ་བ་འདོད་པས་ཡོངས་སུ་གདུང་བ་བསལ་བའི་ཕྱིར་འདུལ་ཐབས་གཉིས་ཀས་ཐེག་ཆེན་གསང་བ་དམ་པའི་ཐབས་ལ་མཁས་པའི་ལོངས་སྤྱོད་ལས། མི་ཟད་ནམ་མཁའ་མཛོད་ཀྱི་ཕྱག་རྒྱར་བཞེངས་ལ་འདུལ་བར་མཛོད་ཅིག ཅེས་རྐམ་ཆགས་ཅན་ཐུལ་ཞིག་པར་ངེས་པ་དམ་པར་བཅད་དོ།།

བཞི་པ་ལས་ཀྱི་རིགས་ཀྱིས་བཀའ་བགྲོས་བཅད་པ་ནི།

དེ་ནས་དེ་བཞིན་གཤེགས་པ་གཞོན་ནུའི། ཞེས་པ་ནས། དམ་པར་བཅད་དོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་གཞོན་ནུའི་གདུང་དང་སྡེའི་ཚོགས་ཀྱིས་བཀའ་བཅད་པའི་མདོ་གསུངས་པ། ཤིན་ཏུ་ལེ་ལོ་གཡེང་བ་ལ། །བསྐུལ་བས་བརྩོན་པར་མི་འགྱུར་ཏེ། །བྱ་བཙལ་མེད་པའི་ཆོས་ཉིད་ལས།།

ཐམས་ཅད་བྱ་བ་མེད་པར་མཛོད། །མི་གཡོའི་ཚུལ་ཅན་གནས་པས་ཀྱང་། །དམ་པའི་ལས་ལམ་གཅོད་བྱེད་ན།།

བྱ་བྲལ་མི་གཡོ་བདེ་ཆེན་པོས། །འཇིག་རྟེན་གཡེངས་པ་སྨོས་ཅི་དགོས། །མི་ཁོམ་ལམ་རྒྱུད་བཅད་པ་དང་།།

ལེ་ལོ་གཡེང་བའི་དགྲ་གཞོམ་ཕྱིར། །བཏང་སྙོམས་དལ་འབྱོར་ཆེན་པོ་ལས།།

བྱ་མེད་གནས་པར་ཕྱག་རྒྱར་མཛོད། །ཅེས་ངེས་པ་དམ་པར་བཅད་དོ།།

དེ་ནས་དེ་བཞིན་གཤེགས་པ་གཞོན་ནུའི་རིགས་ཀྱི་གདུང་དང་སྡེའི་ཚོགས་ཀྱིས་སྙོམས་ལས་ཅན་ཐུལ་ཞིག་པར་བཀའ་བཅད་པའི་མདོ་གསུངས་པ། གདུལ་བྱ་ཤིན་ཏུ་ལེ་ལོ་དང་རྣམ་གཡེང་ཆེ་བས་མི་ཁོམ་པ་བརྒྱད་དུ་འཁྱམས་པར་འགྱུར་བ་ལ། ཐར་པ་ལ་བསྐུལ་བས་བརྩོན་པར་མི་འགྱུར་ཏེ། མཐུན་པས་འདུལ་བ་བྱ་བརྩལ་མེད་པའི་ཆོས་ཉིད་ཀྱི་ངང་ལས་ཐམས་ཅད་དུ་བྱ་བ་མེད་པ་ངང་གིས་ཐབས་ཀྱིས་གདུལ་བར་མཛོད་ཅིག འདུལ་བའི་ཚད་མི་གཡོ་བའི་བསམ་གཏན་བྱ་རྩོལ་དང་བྲལ་བའི་ཚུལ་དང་མཚུངས་པ་ཅན་སྙོམས་ལས་འཛིན་པའི་ལེ་ལོ་ལ་གནས་ཏེ་ལམ་ལ་བྱ་རྩོལ་མེད་པས་ཀྱང༌། ཐར་པ་དམ་པའི་ལས་ལམ་གཅོད་དེ་བརླག་པར་བྱེད་ནུས་ན། བྱ་བ་དང་བྲལ་བར་ཡང་དག་པའི་དོན་ལས་མི་གཡོ་བའི་འཕོ་མེད་བདེ་བ་ཆེན་པོས་འཇིག་རྟེན་གྱི་ལེ་ལོས་གཡེང་བ་བཟློག་ནུས་པ་སྨོས་ཅི་དགོས་ཏེ། དེ་བས་ན་དགོས་ཆེད་འབྲས་བུ་བཅོམ་པ་མཐུན་པའི་ཆ་མི་ཁོམ་པའི་ལས་ཀྱི་རྒྱུན་གཅོད་པ་དང་། རྒྱུན་གཞོམ་པ་གཉེན་པོའི་ཆ་ལེ་ལོ་གཡེང་བའི་དགྲ་དཔུང་གཞོམ་པའི་ཕྱིར། གཉེན་པོས་འདུལ་བ་མཐུན་པའི་ཡོན་ཏན། ཕྱོགས་རིས་མེད་པའི་བཏང་སྙོམས་ཀྱི་རྣལ་འབྱོར་ཆེན་པོ་ལས། རྒྱལ་བའི་དགོངས་པ་བྱ་བ་མེད་པའི་ཆོས་ཉིད་ལ་གནས་པར་ངེས་པའི་ཕྱག་རྒྱར་བཞེངས་ཏེ་མཛད་པ་དམ་པ་མཛོད་ཅིག ཅེས་ངེས་༼༣༦༦༽པ་དམ་པར་བཅད་དོ།།

ལྔ་པ་དེ་བཞིན་རིགས་ཀྱིས་བཀའ་བགྲོས་བཅད་པ་ནི།

དེ་ནས་དེ་བཞིན་གཤེགས་པ་གླང་པོའི། ཞེས་པ་ནས། དམ་པར་བཅད་དོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་གླང་པོའི་གདུང་དང་སྡེའི་ཚོགས་ཀྱིས་བཀས་བཅད་པའི་མདོ་གསུངས་པ། ཤིན་ཏུ་གཏི་མུག་རྨོངས་པ་ལ། །བསྟན་པས་གོ་བར་མི་འགྱུར་ཏེ། །ཁྱད་པར་ཅིར་ཡང་མཚུངས་པ་ལས། །ཐམས་ཅད་གཏི་མུག་ཆེན་པོར་མཛོད། །གཏི་མུག་ཚུལ་ཅན་རྨོངས་པས་ཀྱང་། །ཐམས་ཅད་མུན་པར་བྱེད་ནུས་ན།།

མི་འབྱེད་བླང་དོར་མེད་པ་ཡིས། །ཁམས་གསུམ་རྨོངས་པ་སྨོས་ཅི་དགོས། །མུན་པའི་སྐྱེ་མཆེད་གཞོམ་པ་དང་།།

རྨོངས་པ་ནམ་མཁར་བྱ་བའི་ཕྱིར། །གཏི་མུག་རྣམ་དག་ཡེ་ཤེས་ལས།།

མ་འདྲེས་ཡོངས་རྫོགས་ཕྱག་རྒྱར་མཛོད། །ཅེས་ངེས་པ་དམ་པར་བཅད་དོ།།

དེ་ནས་དེ་བཞིན་གཤེགས་པ་གླང་པོའི་རིགས་ཀྱི་གདུང་དང་སྡེའི་ཚོགས་ཀྱིས་གཏི་མུག་ཅན་འདུལ་བར་བཀའ་བཅད་པའི་མདོ་གསུངས་པ། གདུལ་བྱ་ཤིན་ཏུ་གཏི་མུག་ཆེ་ཞིང་རྨོངས་པར་གྱུར་པ་བྱོལ་སོང་དུ་ལྟུང་བའི་རིགས་ལ། གཉེན་པོའི་ཆོས་བསྟན་པས་ཤེས་ཤིང་གོ་བར་མི་འགྱུར་ཏེ། མཐུན་པས་འདུལ་བ་ཁྱད་པར་ཅིར་ཡང་འབྱེད་པ་མེད་པར་མཚུངས་པ་ལས་ཐམས་ཅད་ཆོས་ཉིད་ལ་དབྱེ་བསལ་མེད་པའི་གཏི་མུག་ཆེན་པོར་མཛོད་ཅིག འདུལ་བའི་ཚད་ཡང་དག་པའི་གཏི་མུག་དང་མཚུངས་པའི་ཚུལ་ཅན་རྨོངས་པ་མ་རིག་པ་ཆེན་པོས་ནོན་པས་ཀྱང༌། དུས་གསུམ་ཐམས་ཅད་དུ་ཡང་དག་པའི་དོན་མི་མཐོང་བའི་མུན་པར་འཕྱན་པར་བྱེད་ནུས་ན། མི་དམིགས་འབྱེད་པ་མེད་པ་མཉམ་ཉིད་ཆེན་པོ་བླང་དོར་མེད་པ་ཡིས་དགོངས་པ་དམ་པས་ཁམས་གསུམ་གྱི་རྨོངས་པ་ཐམས་ཅད་བསལ་བར་ནུས་པ་སྨོས་ཅི་དགོས་ཏེ།

དེ་བས་ན་གཉེན་པོའི་ཆས་མུན་པའི་སྐྱེ་མཆེད་གཞོམ་པ་དང༌། མཐུན་པས་འདུལ་བ་རྨོངས་པ་རང་དག་ནམ་མཁར་བྱ་བའི་དགོས་པའི་ཕྱིར་ཐབས་ཀྱི་གཉེན་པོ་གཏི་མུག་རྣམ་པར་དག་པའི་ཡེ་ཤེས་ལས། མ་འདྲེས་ཡོངས་རྫོགས་ཀྱི་ཕྱག་རྒྱར་བཞེངས་ཏེ་གདུལ་བར་མཛོད་ཅིག ཅེས་ངེས་པ་དམ་པར་བཅད་དོ།།

དྲུག་པ་པདྨའི་རིགས་ཀྱིས་བཀའ་བགྲོས་བཅད་པ་ནི།

དེ་ནས་དེ་བཞིན་གཤེགས་པ་པདྨོའི། ཞེས་པ་ནས། དམ་པར་བཅད་དོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་པདྨོའི་གདུང་དང་སྡེའི་ཚོགས་ཀྱིས་བཀས་བཅད་པའི་མདོ་གསུངས་པ། ཤིན་ཏུ་ཆགས་ཤིང་ཞེན་པ་ལ། །གཉེན་པོས་ཕན་པར་མི་འགྱུར་ཏེ། །ཆགས་རམ་ཆེན་པོའི་ཡེ་ཤེས་ལས། །ཐམས་ཅད་ཆགས་པ་ཆེན་པོར་མཛོད། །ཆགས་པའི་ཚུལ་ཅན་དཔྱད་པས་ཀྱང་། །ཁམས་གསུམ་ཁྲག་ཏུ་བྱེད་ནུས་ན། །འདོད་ཆགས་རྣམ་དག་ཆགས་སྤྱད་པས། །ཁམས་གསུམ་ཞེན་ཆགས་སྨོས་ཅི་དགོས། །འདོད་ཆགས་ཁྲག་མཚོ་བསྐམས་པ་དང་། །ཆགས་པས་ཆགས་པ་སྤྱད་པའི་ཕྱིར། །འདོད་ཆགས་རྣམ་དག་ཡེ་ཤེས་ལས།།

འདོད་ཆགས་གར་གྱི་ཕྱག་རྒྱར་མཛོད། །ཅེས་ངེས་པ་དམ་པར་བཅད་དོ།།

དེ་ནས་དེ་བཞིན་གཤེགས་པ་པདྨོའི་རིགས་ཀྱི་གདུང་དང་སྡེའི་ཚོགས་ཀྱིས་འདོད་ཆགས་ཅན་ཐུལ་ཞིག་པར་བཀའ་བཅད་པའི་མདོ་གསུངས་པ། གདུལ་བྱ་ཤིན་ཏུ་ཆགས་ཤིང་ཞེན་པ་མངལ་གྱི་སྲིན་བུར་ལྟུང་བར་འགྱུར་བའི་རིགས་ལ། ཆགས་པ་སྤོང་བའི་ཐབས་ཀྱི་གཉེན་པོས་ཕན་པར་མི་འགྱུར་ཏེ། མཐུན་པས་འདུལ་བ་ཆགས་མེད་ཆགས་པའི་ཤེས་རབ་ཆེན་པོའི་ཡེ་ཤེས་ལས། དེ་བཞིན་གཤེགས་པ་ཐམས་ཅད་ཡབ་ཡུམ་རོལ་པའི་ཆགས་པ་ཆེན་པོར་སྣང་བར་མཛོད་ཅིག དེ་ཅིའི་ཕྱིར་ན། ཆགས་མེད་ཆགས་པའི་ཚུལ་ཅན་ཡང་དག་པའི་སྦྱོར་བ་དང་ཆ་འདྲ་བ་ལོག་པའི་འདོད་ཆགས་སུ་ལ་ཡོད་པ་དེས་ཆགས་པ་༼༣༦༧༽སྤྱོད་པས་སྟོབས་ཀྱིས་ཀྱང་ཁམས་གསུམ་གྱི་གྲོང་ཁྱེར་ཐམས་ཅད་ཤིན་ཏུ་ཞེན་པས་མི་འབྲལ་བར་འདོད་ཆགས་ཁྲག་ཏུ་འཁྱིལ་བའི་རྒྱ་མཚོར་བྱེད་ནུས་ན། རྒྱལ་བ་རྣམས་ཀྱིས་འདོད་ཆགས་རྣམ་པར་དག་པའི་ངང་ལས་ཆགས་པའི་ཚུལ་དུ་སྤྱད་པས། ཁམས་གསུམ་གྱི་ཞེན་ཆགས་ཐམས་ཅད་བསལ་བར་ནུས་པ་སྨོས་ཅི་དགོས་པས་སོ། །དེ་བས་ན་དགོས་ཆེད་གཉེན་པོའི་ཆ་འདོད་ཆགས་ཁྲག་མཚོ་བསྐམ་པ་དང༌། མཐུན་པའི་ཆས་ཆགས་པས་ཆགས་པ་གཅོད་པའི་ཕྱིར། མཐུན་པ་དང་གཉེན་པོ་གཉིས་ཀས་འདུལ་བ་འདོད་ཆགས་རྣམ་པར་དག་པའི་ཡེ་ཤེས་ཆེན་པོའི་ངང་ལས། འདོད་ཆགས་གར་གྱི་ཕྱག་རྒྱར་བཞེངས་ཏེ་མཛད་པའི་རོལ་མོ་མཛོད་ཅིག ཅེས་ངེས་པ་དམ་པར་བཅད་དོ། །དེ་ལྟར་བཀའ་བགྲོས་བཅད་པ་དགུ་པོ་ལེའུ་ཉེར་གཅིག་པ་དང་བསྡེབ་ལ་བཤད་དོ།།

བཞི་པ་སྤྲུལ་པ་དང་གསང་བའི་སྐུས་འདུལ་བར་བཅད་པ་ལ་གསུམ་སྟེ། མཐུན་འཇུག་སྤྱིའི་སྤྱོད་པས་འདུལ་བ། མཛད་པ་ཐབས་ཀྱི་སྤྱོད་པ་མཐའ་ཡས་པས་འདུལ་བ། སྐབས་འདིར་ནི་གཉེན་པོས་བཏུལ་བའོ། །དང་པོ་ནི།

དེ་ནས། ཞེས་པ་ནས། བློ་ལོག་སྨོས་ཅི་དགོས། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ཐམས་ཅད་ཀྱིས་བཀས་བཅད་པའི་མདོ་གསུངས་པ། ཤིན་ཏུ་དངོས་པོར་ཞེན་པ་ལ། །བཀག་པས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ངོ་བོ་ལས། །ཐམས་ཅད་འཐུན་འཇུག་སྤྱོད་པར་མཛོད། །མཐུན་འཇུག་ཚུལ་ཅན་ཆ་འཐུན་པས། །ཁམས་གསུམ་ལོག་པར་བྱེད་ནུས་ན།།

ཐུགས་རྗེ་གར་གྱི་མཛད་སྤྱོད་ཀྱི། །འཇིག་རྟེན་བློ་ལོག་སྨོས་ཅི་དགོས།།

དེ་ནས་དེ་བཞིན་གཤེགས་པ་སྤྲུལ་པའི་སྐུ་དང་གསང་བའི་སྐུ་ཐམས་ཅད་ཀྱིས་མཐུན་འཇུག་གི་མཛད་པ་མཐའ་ཡས་པའི་ཚུལ་གྱིས་སྐབས་ཀྱི་གདུལ་བྱ་དྲག་པོས་འདུལ་བར་བཀའ་བཅད་པའི་མདོ་གསུངས་པ། གདུལ་བྱ་ཤིན་ཏུ་གཟུང་བ་དང་འཛིན་པའི་དངོས་པོར་ཞེན་ཅིང་འཐས་པ་ལ། འདུལ་ཐབས་དེ་དང་མི་མཐུན་པར་གཉེན་པོས་བཀག་པས་གཏན་དུ་ལྡོག་མི་ནུས་པ་ཕན་པར་མི་འགྱུར་ཏེ། ཇི་ལྟ་བས་འདུལ་ན་སྤྱོད་པ་རྗེས་འཇུག་དང་མཐུན་པར་དབྱིངས་ཤེས་རབ་དང་ཡེ་ཤེས་ཐབས་ཀྱི་ངོ་བོ་ལས་སྣང་བར་མཛད་ནས། ཕྲིན་ལས་ཐམས་ཅད་གདུལ་བྱ་དང་མཐུན་འཇུག་ཏུ་སྦྱོར་བའི་སྤྱོད་པར་མཛོད་ཅིག འདུལ་བའི་ཚད་དྲེགས་པའི་སྤྱོད་པ་རང་ཁ་མ་ལོག་པར་འཚོ་བས་གང་དགའ་དགའ་ལ་སྤྱོད་པ་ལྟ་བུ་ནི། ཡང་དག་པའི་མཐུན་འཇུག་གི་ཐབས་ཀྱི་སྤྱོད་པ་དང་ཚུལ་འདྲ་བ་ཅན་དུ་ཆ་མཐུན་པར་ལོག་ལྟ་རང་རྒྱུད་ཅན་ལ་ཞེན་ཏེ་རང་འཐད་དུ་སྤྱད་པས་ཀྱང་ཁམས་གསུམ་གྱི་གྲོང་ཁྱེར་ན་གནས་པའི་འགྲོ་བ་ཐམས་ཅད་ལམ་ལོག་པར་བྱེད་ནུས་ན། ཡང་དག་རྫོགས་པའི་སངས་རྒྱས་ཀྱི་ཐུགས་རྗེ་སྤྲུལ་པའི་གར་གྱི་མཛད་སྤྱོད་ཀྱིས་འཇིག་རྟེན་༼༣༦༨༽པ་བློ་ལོག་པ་རྣམས་དྲང་བར་མཛད་པས་དོན་གྲུབ་པ་སྨོས་ཅི་དགོས་ཏེ་ཐེ་ཚོམ་གྱི་གནས་མ་མཆིས་པས། དགོས་ཆེད་དང་མཐུན་པར་ཡོན་ཏན་སྣང་བར་མཛོད་ཅིག་ཅེས་བསྐུལ་བའོ།།

གཉིས་པ་མཛད་པ་ཐབས་ཀྱི་སྤྱོད་པ་མཐའ་ཡས་པས་འདུལ་བ་ལ་གསུམ་སྟེ། ཐབས་སྣ་ཚོགས་ཀྱིས་དོན་ལ་དྲང་བར་བསྐུལ་བ། དེ་འགྲོ་བའི་རིག་པ་ལ་ལྷུན་གྱིས་གྲུབ་པ། ཇི་ལྟར་མོས་པ་ལྟར་དོན་མཛོད་ཅིག་པའོ། །དང་པོ་ནི།

དེ་ལ་སོགས་པ། ཞེས་པ་ནས། མཐའ་ཡས་སྙེད། །ཅེས་པའི་བར་གྱིས་བསྟན་ཏེ།

དེ་ལ་སོགས་པ་མཐའ་ཡས་སྙེད། །འཇིག་རྟེན་འཇིག་རྟེན་མཐའ་ཡས་ཀུན། །འདུལ་བའི་ཐབས་ནི་སྣ་ཚོགས་ཀྱིས། །དྲངས་ཏེ་ཡང་དག་གསང་བར་སྦྱོར། །ཁྲོ་ལ་བྱམས་དང་ཁྲོ་ཚུལ་མཛོད། །ཞི་ལ་ཞི་བ་རླུང་སྦྱོར་ཉིད། །དྲག་ཤུལ་ཅན་ལ་དྲག་པོ་ཉིད། །གཡེམ་ལ་གཡེམ་དང་གཉེན་པོར་མཛོད། །ཆགས་དང་ཆགས་ལ་རྣམ་སྤོང་ཉིད། །གཡེང་ལ་སེམས་སྡུད་གཡེང་བ་ཉིད། །རྨོངས་ལ་ཁྱབ་པར་མཉམ་པ་ཉིད། །རི་ལ་ཏིང་འཛིན་རི་བོ་ཉིད། །ཕྲག་དོག་ཅན་ལ་ཕྲག་དོག་ཚུལ། །དེ་ལ་སོགས་པ་མཐའ་ཡས་རྙེད།།

དེ་ལ་སོགས་པ་ཞེས་སྔ་མ་རྣམས་ལ་སྙེགས་པས་དངོས་པོ་གཞན་བསྡུ་བ་ནི། ཐབས་ཀྱི་སྤྱོད་པ་སྔ་མ་དང་ཕྱི་མར་བསྟན་པའི་འདུལ་བྱེད་མཐའ་ཡས་པ་སྙེད་ཀྱིས་གདུལ་བྱའི་འཇིག་རྟེན་ཇི་སྙེད་པ་ཁམས་དབང་བསམ་པ་མཐའ་ཡས་པའི་རིགས་ཅན་ཀུན་འདུལ་བའི་ཐབས་ནི་མང་ལ་ཡངས་པ་སྣ་ཚོགས་ཀྱིས་གདུལ་ཞིང་ལམ་དུ་དྲངས་ཏེ་ཡང་དག་པའི་གནས་ལུགས་གསང་སྔགས་ཇི་བཞིན་པའི་དོན་ལ་སྦྱོར་བར་བྱོས་ཤིག ཅེས་མདོར་བསྟན་ནས། དེའི་ཚུལ་རྒྱས་པར་གསུངས་པ། དེའང་གདུལ་བྱ་ཁྲོ་བ་ཅན་ལ་ཤས་ཆུང་ན་གཉེན་པོ་བྱམས་པས་འདུལ་བ་དང༌། དྲག་པོར་གྱུར་ན་མཐུན་པས་གདུལ་བ་ཁྲོ་བོའི་ཚུལ་དུ་མཛོད་ཅིག དེ་བཞིན་དུ་ཞི་བའི་རིགས་ལ་ཞི་བའི་གདམས་པས་བཀྲོལ་ཏེ་ལྷག་མཐོང་གི་རྩལ་སློང་ནས་དོན་ལ་སྦྱོར་བ་ཉིད་ཀྱིས་འདུལ་ལ། གདུལ་བྱ་དྲག་ཤུལ་ཅན་ལ་བྱམས་པའམ་ཡང་ན་དྲག་པོ་འབའ་ཞིག་ཉིད་ཀྱིས་གདུལ་ལོ། །གཡེམ་པ་ཅན་ལ་ཤས་ཆུང་ན་མཐུན་པར་གཡེམ་པ་ཉིད་དང་ཤས་ཆེ་ན་མི་ཚངས་སྤྱོད་ཀྱི་གཉེན་པོར་གྱུར་པའི་ཐབས་ཀྱིས་གདུལ་བར་མཛོད་ཅིག སྲིད་པའི་དངོས་པོར་ཆགས་པ་ཅན་ལ་མཐུན་པ་ཆགས་པ་རང་དང་མི་མཐུན་པ་གཉེན་པོས་རྣམ་པར་སྤོང་བ་ཉིད་ཀྱིས་འདུལ་ལ། གདུལ་བྱ་རྣམ་གཡེང་ཅན་ལ་གཉེན་པོ་སེམས་སྡུད་པ་དང་མཐུན་པ་གཡེང་བ་ཉིད་ཀྱིས་འདུལ་བར་འགྱུར་རོ། །གཏི་མུག་གིས་རྨོངས་པ་ལ་གཉེན་པོའི་ཁྱད་པར་གྱིས་འདུལ་བ་རྣམ་པར་འབྱེད་པའི་ཤེས་རབ་སྐྱེད་པ་དང་མཐུན་པ་མཉམ་པ་ཉིད་ཀྱི་ངང་གིས་ཐུལ་ཞིག ང་རྒྱལ་གྱི་རི་བོ་ཅན་ལ་གཉེན་པོས་ཞི་བ་ཏིང་ངེ་འཛིན་དང་མཐུན་པས་འདུལ་བ་རི་བོ་ཉིད་ཀྱི་ཚུལ་གྱིས་དགྲོལ་ལོ། །གདུལ་བྱ་ཕྲག་དོག་ཅན་ལ་མཐུན་པ་ཕྲག་དོག་གི་ཚུལ་གྱིས་མཉམ་པའི་དབྱིངས་ལ་སྦྱོར་ཏེ་གདུལ་བར་བྱའོ། །དེ་ལྟར་རྒྱུད་ལས། ཇི་ལྟར་རྣ་བར་ཆུ་སོང་བ། །སླར་ཡང་ཆུ་གཞན་དག་༼༣༦༩༽གིས་དབྱུང༌། །ཞེས་པ་ལ་སོགས་པ་ལྟར་ཐབས་མུ་མཐའ་ཡས་པར་འདྲེན་པ་ཇི་སྙེད་ཀྱིས་ཐུལ་ཞིག་པའོ།།

གཉིས་པ་དེ་འགྲོ་བའི་རིག་པ་ལ་ལྷུན་གྱིས་གྲུབ་པ་ནི།

ཀུན་གཞི། ཞེས་པ་ནས། རབ་ཏུ་གནས། །ཞེས་པའི་བར་གྱིས་བསྟན་ཏེ།

ཀུན་གཞི་མཉམ་དང་མི་མཉམ་པའི། །ནམ་མཁའ་དབྱིངས་ཀྱི་མཐའ་ཀླས་པ། །ཁྱད་པར་འདོད་པའི་ལུས་ཅན་གྱི།།

ཀུན་གཞི་ཀུན་གྱི་དབྱིངས་ན་དཔལ། །རྡོ་རྗེ་སྙིང་པོ་རབ་ཏུ་གནས།།

ཡེ་དོན་གྱི་ཀུན་གཞི་སྙིང་པོ་བྱང་ཆུབ་ཀྱི་དབྱིངས་མཉམ་པ་བདེ་བར་གཤེགས་པ་དང་མི་མཉམ་ པ་འཁོར་བའི་དངོས་པོ་རིལ་ལ་ཁྱབ་པས་བདག་ཉིད་མུ་མཐའ་མེད ་པའི་ནམ་མཁའ་དབྱིངས་ཀྱི་མཐའ་ཀླས་པར་ངང་གིས་རང་ཤར་བའི་ཚུལ་གྱིས་གང་ནས་གང་དུ་བསྣུམས་པར་རང་རང་གི་ཁྱད་པར་གྱི་སྣང་བ་ཞེན་པ་དང་མ་བྲལ་བའི་ཏིང་ངེ་འཛིན་དང་ཁམས་གསུམ་གྱི་འདོད་པ་དང་བཅས་པའི་ཡིད་དང་འབྱུང་བའི་ཕུང་པོ་དང་ལྡན་པས་ལུས་ཅན་གྱི་འགྲོ་བ་རྣམས་ཀྱིས་སྣང་སེམས་ཀུན་གྱི་གཞི་ཐ་སྙད་གཉིས་ཀྱི་ཆོས་ཀུན་གྱི་ངོ་བོ་རང་བཞིན་གྱི་དབྱིངས་ན་རང་རིག་པར་གསལ་ཏེ། གནས་ལུགས་ངོ་བོ་ཉིད་ཀྱི་དཔལ། རྟོགས་པ་བདག་གི་དཔལ། ཐུགས་རྗེ་གཞན་གྱི་དཔལ་གསུམ་གྱི་བདག་ཉིད་ཆེན་པོར་རྡོ་རྗེ་སྙིང་པོ་བྱང་ཆུབ་ཀྱི་སེམས་ཐབས་དང་མཛད་པ་ཐམས་ཅད་ལྷུན་གྱིས་གྲུབ་པར་ཡེ་ནས་རབ་ཏུ་གནས་པའོ། །འདི་ཡིས་ངོ་བོ་ཉིད་ཀྱིས་དོན་བྱེད་པར་གསལ་ཏེ། རྒྱས་པར་ཡེ་ཤེས་གསང་བ་ལས། ཆོས་སྐུ་འབྲས་བུ་རང་གསལ་ལ། །རིན་ཆེན་འབར་བ་ལྷུན་གྲུབ་ལྟར། །ཐུགས་རྗེའི་བྱིན་རླབས་འདོད་རྒུར་འཆར། །སྐལ་ལྡན་རང་རྐྱེན་ཉི་མ་བཞིན། །སེམས་ཅན་དུས་ན་སྐབས་ཀྱིས་མཐུན། །ལྷུན་གྲུབ་དུས་ན་ཕྱོགས་རིས་མེད། །ཅེས་གསུངས་པ་སོགས་སེམས་ཕྱོགས་ཀྱི་རྒྱུད་དང་མན་ངག་རྣམས་ལས་ཤེས་པར་བྱའོ།།

གསུམ་པ་ཇི་ལྟར་མོས་པ་ལྟར་དོན་མཛོད་ཅིག་པ་ནི།

སེམས་ཅན། ཞེས་པ་ནས། ངེས་པར་མཛོད། །ཅེས་པའི་བར་གྱིས་བསྟན་ཏེ།

སེམས་ཅན་སངས་རྒྱས་ཀུན་གྱི་དབྱིངས། །རྡོ་རྗེ་སེམས་དཔའ་དེ་བཞིན་ཉིད། །ཡེ་ནས་ཡིན་པར་ངེས་པས་ན།།

མཐའ་ཐུག་མེད་པའི་སེམས་ཅན་རྣམས། །ཇི་ལྟར་དགའ་བ་འདོད་པ་བཞིན། །མ་བཀག་མ་བཅོས་ཇི་བཞིན་པར།།

ངེས་པ་ཉིད་དུ་གྱུར་པ་ཡིས། །ཐབས་མཆོག་དཔག་གིས་མི་ལང་བའི། །མཛད་སྤྱོད་གར་ཐབས་སྤྲིན་ཕུང་གིས།།

ཇི་ལྟར་སྦྱོར་པོ་དེ་ཉིད་ལས། །མ་གཡོས་མ་གོལ་དབྱིངས་ན་དཔལ། །ཉིད་དུ་ངེས་པའི་ངོ་བོ་ལས།།

མཐའ་ཡས་དཔག་ཏུ་མེད་པ་ཡི། །སྒོ་ནས་ཐམས་ཅད་མ་བཀག་པར།།

ཅི་དགའ་ཉིད་དུ་བདེ་དྲངས་ཏེ། །དམ་པ་རྣམས་ཀྱིས་ངེས་པར་མཛོད།།

གོང་དུ་བསྟན་མ་ཐག་པ་དེའི་ཕྱིར་སེམས་ཅན་རྣམས་ཀྱི་སེམས་ཉིད་སངས་རྒྱས་ཀྱི་རང་བཞིན་དང་གཉིས་སུ་མེད་པས་ཆོས་ཀུན་གྱི་དབྱིངས་རྡོ་རྗེ་སེམས་དཔའ་སྙིང་པོ་བྱང་ཆུབ་སྤྲོས་པ་དང་བྲལ་བའི་དེ་བཞིན་ཉིད་དུ་ཡེ་ནས་མ་བཅོས་པར་གནས་པའི་དེ་ཁོ་ན་ཉིད་ཡིན་པར་ངེས་པ་དེ་བས་ན་བསྒྲང་བ་ལས་འདས་པས་མཐའ་ཐུག་པ་མེད་པའི་སེམས་ཅན་རྣམས་བསམ་པ་རང་རང་གི་མོས་པ་ལྟར་ཇི་ལྟར་དགའ་བ་དང་འདོད་པ་བཞིན་དུ་ཐབས་ཀྱི་མཛད་པ་གང་ཡང་མ་བཀག་པར་ཇི་ལྟར་སྣང་བ་དང་མཐུན་པར་སྤྱད་དེ་དོན་ལ་དྲངས་པས་ཡེ་ནས་༼༣༧༠༽མ་བཅོས་པས་ཆོས་ཉིད་ཇི་བཞིན་པ་ཡང་དག་པར་ངེས་པ་དེ་ཁོ་ན་ཉིད་དུ་སོན་པར་འགྱུར་བ་ཡིན་ནོ།།

གཏན་ཚིགས་དེའི་ཕྱིར་ན་རྒྱལ་བ་རྣམས་ཀྱིས་གདུལ་བྱ་གདུལ་བའི་ཐབས་མཆོག་ཁྱད་པར་ཅན་གདུལ་བྱ་སོ་སོའི་སྣང་ཚུལ་གྱིས་ཕྱེ་བས་དཔག་གིས་མི་ལང་ཞིང་གྲངས་ལས་འདས་པའི་མཛད་སྤྱོད་ཀྱི་གར་ཐབས་གཅིག་ལས་མ་གཡོས་པར་ཅིར་ཡང་སྣང་བ་སྤྲིན་གྱི་ཕུང་པོ་མང་ཞིང་རྒྱ་ཆེ་བ་ཇི་སྙེད་པ་དག་གིས་གདུལ་བྱའི་བསམ་པ་དང་མཐུན་པར་ཇི་ལྟར་སྤྱད་ཀྱང་མཉམ་པའི་དབྱིངས་དེ་ཁོ་ན་ཉིད་ལས་མ་གཡོས་ཤིང་བསྐྱོད་པ་མེད་པས་ཇི་ལྟར་སྤྱད་ཀྱང་མི་གོས་ཏེ་འཁྲུལ་ནོར་མེད་པས་ལེགས་པར་གྱུར་ཏེ་ཆོས་ཀྱི་དབྱིངས་ན་རང་བཞིན་ལྷུན་གྱིས་གྲུབ་པའི་དཔལ་དུ་རྫོགས་པའི་མཛད་པ་ཡང་དག་པ་ཉིད་དུ་ངེས་པའི་ངོ་བོ་ཉིད་ཀྱི་རང་བཞིན་ལས་མཛད་སྤྱོད་མུ་མཐའ་ཡས་ཤིང་དཔག་ཏུ་མེད་པ་ཡི་ཚུལ་དམ་པ་བློས་མི་འཁྱུད་པའི་སྒོ་གང་ནས་ངེས་པར་དྲངས་ཀྱང་གདུལ་ཐབས་ཐམས་ཅད་གང་ཡང་མ་བཀག་ཅིང་བསྡམ་པ་མེད་པར་ཕྱེ་བས་རང་ཉིད་ཅི་ལ་དགའ་བ་དེ་ཉིད་དང་མཐུན་པའི་ཚུལ་དུ་ཇི་ལྟར་འཚམས་པས་བཏུལ་ནས་བདེ་བར་དྲངས་ཏེ་མཛད་པ་ཐམས་ཅད་དམ་པ་རྣམས་ཀྱི་ཡང་དག་པའི་སྤྱོད་པར་གྱུར་ཏེ་གདུལ་བྱ་རྣམས་སངས་རྒྱས་ཀྱི་ས་ལ་ངེས་པར་འགོད་པའི་ཐབས་ཀྱི་གར་ཐབས་དམ་པ་མཛོད་ལ་ཡལ་བར་མ་བཞག་ཅིག་ཅེས་བསྐུལ་ལོ།།

གསུམ་པ་སྐབས་འདིར་ནི་གཉེན་པོས་བཏུལ་བ་ནི།

འདིར་ནི། ཞེས་པ་ནས། དམ་པར་བཅད་དོ། །ཞེས་པའི་བར་གྱིས་བསྟན་ཏེ།

འདིར་ནི་ནན་ཏན་དྲག་ཤུལ་གྱི། །མི་བཟད་འབར་བའི་ཡེ་ཤེས་ལས། །དུར་ཁྲོད་བདག་པོ་རབ་འཇིགས་པའི།།

ཆེ་མཆོག་འབར་བའི་ཕྱག་རྒྱར་མཛོད། །ཅེས་ངེས་པ་དམ་པར་བཅད་དོ།།

དུས་དང་གནས་སྐབས་ཉེ་བར་བཟུང་བ་འདིར་ནི་གདུལ་བྱ་རུ་ཏྲ་ཉིད་ཤིན་ཏུ་དྲག་པས་བཤད་པ་ལྟར་ཞི་རྒྱས་ཀྱིས་མི་འདུལ་བའི་ཕྱིར། དབང་དྲག་གི་མཛད་པ་རྡོ་རྗེ་འཛིན་པ་ཉིད་ཀྱིས་ཤིན་ཏུ་ནན་ཏན་ངེས་པའི་དྲག་ཤུལ་གྱིས་དེ་དག་གི་ངོ་བོ་ཡེ་ཉིད་ནས་རང་བཞིན་གྱི་ཁྲོས་པའི་རོལ་པའི་དཀྱིལ་འཁོར་འཇིགས་བྱེད་ཆེན་པོ་ཁྲོ་བའི་སྐུ་མི་བཟད་པའི་མེ་དཔུང་འབར་བའི་རང་བྱུང་ཡེ་ཤེས་ཀྱི་ངང་ལས། ལས་ཀྱི་ཁྲོ་བོ་འཇིག་རྟེན་གྱི་སྡེ་དཔོན་དུར་ཁྲོད་ཀྱི་བདག་པོ་རུ་ཏྲ་འཁོར་བཅས་འདུལ་བའི་གཉེན་པོར་རབ་ཏུ་འཇིགས་ཤིང་རྔམ་པའི་ཆེ་མཆོག་ཧེ་རུ་ཀའི་རྣམ་པར་འབར་བའི་ཕྱག་རྒྱ་ཆེན་པོའི་སྐུར་སྣང་བར་མཛོད་ཅིག་ཅེས་བསྐུལ་ནས་ངེས་པ་དམ་པར་བཀའ་གྲོས་ཐག་བཅད་དོ།།

འོ་ན་རྒྱལ་བའི་ཚོགས་རེ་ལ་ཐེར་ཟུག་རྟག་པར་ལྟ་བ་དང་ཤིན་ཏུ་སྟོང་པར་ལྟ་བ་སོགས་གདུལ་བྱ་༼༣༧༡༽མི་མཐུན་པར་སྣང་བ་དང༌། ཁྲོ་ལ་བྱམས་དང་སོགས་རྒྱལ་བ་རིལ་གྱི་བགྲོས་པ་ལ་ཐབས་མཐའ་ཡས་པར་བསྟན་པ་ཇི་ལྟ་བུ་ཞེ་ན། བདེ་བར་གཤེགས་པ་ལ་ངོ་བོ་ཐ་དད་པར་མི་བཞུགས་ཏེ་ཆོས་ཉིད་ཀྱི་ནམ་མཁའ་ལ་ཡེ་ཤེས་ཀྱི་ཉི་མ་བརྡལ་བས་དགོངས་པ་དཀྱིལ་འཁོར་གསུམ་དབྱེར་མེད་པའི་ཀློང་དུ་མཉམ་པར་གྱུར་མོད་ཀྱིས་ཀྱང་རིགས་དང་མཐུན་པའི་ཐབས་ནི་གདུལ་བྱའི་སྣང་བའོ།།

དེ་དག་གི་ལོངས་སྐུ་ལ་སོགས་པ་ཚོགས་རེ་རེའི་ཕྱིར་ཐབས་ཀྱི་གྲངས་ཀྱང་རྗེས་སུ་མཐུན་ལ། རྒྱལ་བ་ཇི་སྙེད་པའི་ཐབས་ཀྱང་དེ་སྙེད་ཀྱི་ཕྱིར་སྨོས་སོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་ལས།

བཀའ་བགྲོས་དམ་པ་བཅད་པའི་ལེའུ་སྟེ་ཉི་ཤུ་ལྔ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། དྲག་པོས་འདུལ་བར་བཀའ་བགྲོས་དམ་པ་ངེས་པར་བཅད་པའི་ལེའུ་སྟེ་ཉི་ཤུ་ལྔ་པ་གསལ་བར་བཀྲོལ་བའོ།། །།

ལེའུ་ཉེར་དྲུག་པ་ལས་བཞི་རྡོ་རྗེ་བསྐོས་པ།

༈ བཞི་པ་ལས་ཀྱི་སྐོས་གདབ་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི་བདག་པོ། ཞེས་པ་ནས། ཞེས་ཉེ་བར་བསྐུལ་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེའི་ཚེ་དེའི་དུས་ན། ཁོ་བོ་འཁོར་དེ་ཉིད་དུ་འདུས་པར་གྱུར་པ་ཞིག་གིས་ཤེས་བཞིན་དུ་གང་ཡོངས་སུ་སད་པའི་ཕྱིར། ཡང་འཁོར་དེར་འཁོད་པར་གྱུར་པའི་བྱང་ཆུབ་སེམས་དཔའ་བསྐུལ་བའི་གོ་ཆ་བློ་གྲོས་ཐབས་ལྡན་ཞེས་བྱ་བ་ཞིག་ལ་ཡོངས་སུ་དྲིས་པ། ཀྱེ་སེམས་དཔའ་ཆེན་པོ། ཡི་དྭགས་ཆེན་པོ་འདི་རྒྱུ་ནི་གང་ལས་བྱུང་། རྐྱེན་ནི་ཅི་ལས་གྱུར། འབྲས་བུ་ནི་ཅིར་སྨིན། རིགས་ནི་གར་གཏོགས། ལས་སྐལ་གྱི་སྤྱོད་པ་ནི་ཅི་སྤྱོད། མ་བཏུལ་ན་ཅི་ཉེས། བཏུལ་ན་ཅི་ཞིག་དགོས། དེ་སྐད་ཅེས་དྲིས་པས་ལས། བསྐུལ་བའི་གོ་ཆ་ཆེན་པོ་དེས་སྨྲས་པ། སེམས་དཔའ་ཆེན་པོ་གསང་བའི་བདག་པོ་ཡི་དྭགས་ཆེན་པོ་འདི་གང་ལེགས་པའི་རྒྱུ་རྐྱེན་ལས་ནི་མ་བྱུང་། ཉེས་པ་འབའ་ཞིག་གི་རྒྱུ་རྐྱེན་ལས་བྱུང་སྟེ། རྒྱུ་ནི་མུན་པའི་རི་བོ་ལས་བྱུང་ངོ་། །རྐྱེན་ནི་བཀའ་བསྒོ་ལོག་པའི་དཀའ་ཐུབ་དྲག་པོ་ལས་བྱུང་ངོ་། །འབྲས་བུ་ནི་སྡུག་བསྔལ་གྱི་རི་བོར་སྨིན་ཏོ། །རིགས་ནི་དམན་རིགས་འཁོར་བ། གདོལ་པ་འབྱུང་པོ་ཡི་དྭགས་སུ་གཏོགས་སོ། །ལས་སྐལ་གྱི་སྤྱོད་པ་ནི་འཁོར་བའི་དངོས་པོ་གཞི་ལ་འཇོལ་ཉག་ཏུ་སྤྱོད་དོ། །འདི་མ་བཏུལ་ན་ལུས་ཅན་གྱི་བྱང་ཆུབ་ཀྱི་སྙིང་པོ་རིང་དུ་ནུབ་པའི་སྐྱོན་དུ་འགྱུར་རོ། །བཏུལ་ན་ནི་ཀུན་གྱི་སྙིང་པོ་འོད་ཀྱི་དཀྱིལ་འཁོར་མངོན་དུ་ཉེ་བར་འཆར་བར་འགྱུར་རོ། །ཞེས་སྨྲས་པ་དང་། ཁོ་བོས་དེ་ལ་འདི་སྐད་ཅེས་སྨྲས་སོ། །ཨེ་མའོ་སེམས་དཔའ་ཆེན་པོ། འོ་ན་འདི་ནི་དུས་ལ་བབ་བོ། །ལས་ནི་ལས་ཀྱི་མཆོག་གོ །གསང་བ་འདི་ནི་གསང་བའི་ཡང་གསང་དམ་པའོ། །ཐུལ་ཀུན་ཏུ་རབ་ཏུ་ཐུལ།།

དུས་ལ་བབ་པའི་སྐབས་ཆེན་འདིར། །ལས་ལ་བབ་པའི་སེམས་ཅན་འདི། །སྟོངས་ལ་བབ་པའི་ཐུགས་རྗེ་ཡིས།།

འདུ་ཤེས་བསྒྱུར་བ་ཐུགས་རྗེའི་མཆོག །སྟོང་གསུམ་མ་ལུས་སྟོན་པ་བས།།

འབུམ་གྱི་ཆར་ཡང་མི་ཕོད་དོ། །ཞེས་ཉེ་བར་བསྐུལ་ཏོ།།

ལེའུ་འདིས་དྲང་དོན་སྟོན་ནོ། །ལང་ཀའི་བདག་པོ། རུ་ཏྲ་འབྱུང་བའི་དུས་དང་བཀའ་བགྲོས་བཅད་པའི་དུས་གཉིས་ངོ་བོ་གཅིག་པར་གྱུར་པ་དེའི་ཚེ་དེའི་དུས་ན། གསང་བའི་བདག་པོ་ཕྱག་ན་རྡོ་རྗེ་ཁོ་བོ་རྒྱལ་བ་དེ་དག་གི་འཁོར་དེ་ཉིད་དུ་འདུས་པར་གྱུར་ཏེ་གསང་བ་འཛིན་པའི་སྡུད་པ་པོ་བྱེད་པ་ཞིག་གིས། རུ་ཏྲའི་མཚན་ཉིད་ཐུགས་ལ་མངའ་ཞིང་ཤེས་བཞིན་དུ་གང་ཡོངས་སུ་སད་ཅིང་ཤེས་པ་ཉུག་པའི་ཕྱིར། ཡང་དུས་དེ་ཙམ་ན་འཁོར་དེར་འདུས་པར་གྱུར་པའི་བྱང་ཆུབ་སེམས་དཔའ་ཆེན་པོ་དོན་དུ་འཇམ་དཔལ་དང་གཉིས་སུ་མེད་པར་བསྐུལ་བའི་གོ་ཆ་ལྡན་པ་ལང་ཀ་མགྲིན་བཅུ་བློ་གྲོས་ཐབས་ལྡན་ཞེས་བྱ་བ་ཞིག་ལ། དེ་ཡིས་ཤེས་སམ་མི་ཤེས་ཉམས་སུ་བླང་སྟེ་བརྟགས་པའི་དགོས་ཆེད་ཀྱི་ཕྱིར་ཡོངས་སུ་དྲིས་པ། ཀྱེ་སེམས་དཔའ་ཆེན་པོ། ཡི་དྭགས་ཆེན་པོ་འདི། རྒྱུ་ནི་གང་ལས་བྱུང༌། རྐྱེན་ནི་ཅི་ལས་གྱུར། འབྲས་བུ་ནི་ཅིར་སྨིན། རིགས་ནི་གར་གཏོགས། ལས་སྐལ་གྱི་སྤྱོད་པ་ནི་ཅི་བྱེད། མ་བཏུལ་ན་ཅི་གནོད། བཏུལ་ན་ཅི་ཞིག་གི་དགོས་པ་ཡོད། དེ་སྐད་ཅེས་དྲི་བ་བདུན་དྲིས་པ་ལས། གསང་བདག་གིས་བསྐུལ་བའི་བརྩོན་འགྲུས་ཀྱིས་གོ་ཆ་ཆེན་པོ་ཅན་དེས་སྨྲས་པ། སེམས་དཔའ་ཆེན་པོ་གསང་བའི་བདག་པོ་ཞེས་གསང་བའི་བཀའི་༼༣༧༢༽སྡུད་པ་པོ་ལ་བོས་ཏེ། ཡི་དྭགས་ཆེན་པོ་འདི་ནི། གང་ལེགས་པའི་རྒྱུ་རྐྱེན་ལས་ནི་མ་བྱུང་བར། ཉེས་པ་འབའ་ཞིག་གི་རྒྱུ་རྐྱེན་ལས་བྱུང་སྟེ། རྒྱུ་ནི་ལྷན་སྐྱེས་དང་ཀུན་བརྟགས་ཀྱི་མ་རིག་པའི་དབང་གིས་དེ་ཁོ་ན་ཉིད་དང་ལས་རྒྱུ་འབྲས་ལ་རྨོངས་པས་མུན་པའི་རི་བོ་ལས་བྱུང་ངོ༌། །རྐྱེན་ནི་གསང་སྔགས་ཀྱི་བཀའ་བསྒོ་ལ་གོ་བ་ལོག་པར་གྱུར་པའི་སྔགས་ཀྱི་དཀའ་ཐུབ་དྲག་པོ་དང་མི་དགེ་བ་སྤྱོད་པའི་བརྟུལ་ཞུགས་ལས་བྱུང་ངོ༌། །འབྲས་བུ་ནི་དང་པོར་ངན་སོང་ཁ་བརྒྱུད་དེ་མཐར་རུ་ཏྲར་སྨིན་པས་སྡུག་བསྔལ་གྱི་རི་བོར་སྨིན་ནོ། །རིགས་ནི་མཐོ་རིས་དང་ཐར་ལམ་ཆད་པས་དམན་རིགས་འཁོར་བ་པ་ལས་ངན་བྱེད་པས་གདོལ་པ་གཞན་ལ་གནོད་པས་འབྱུང་པོ་འདོད་པ་ཡིད་ལ་བཏགས་པས་ཡི་དྭགས་སུ་གཏོགས་སོ། །ལས་སྐལ་གྱི་སྤྱོད་པ་ནི་འཁོར་བའི་དངོས་པོ་ལྔ་ཚན་བཞིའམ་རྩ་བ་བཞི་ལ་ཉིན་མཚན་འཇོལ་ཉོག་ཏུ་སྤྱོད་པའོ། །འདི་མ་བཏུལ་ན། ཁོས་ལོག་ལམ་སྤེལ་བས་ལས་ཅན་རྣམས་ཀྱི་བྱང་ཆུབ་ཀྱི་སྙིང་པོ་ཡུན་རིང་དུ་ནུབ་པའི་སྐྱོན་དུ་འགྱུར་རོ། །ནང་ལྟར་ན་བདག་འཛིན་གྱིས་ཐར་པ་དང་བྱང་ཆུབ་ལ་བར་དུ་གཅོད་པར་ཡང་སྦྱར་རོ། །བཏུལ་ན་ནི་གསང་སྔགས་དར་བས་ཀུན་གྱི་སྙིང་པོ་ཡེ་ཤེས་འོད་གསལ་གྱི་དཀྱིལ་འཁོར་མངོན་དུ་གྱུར་ཏེ་དུས་ཉེ་བར་འཆར་བར་འགྱུར་རོ། །ཞེས་སྨྲས་པ་དང༌། ཁོ་བོས་དེ་ལ་འདི་སྐད་ཅེས་སྨྲས་སོ། །རུ་ཏྲའི་རྒྱུ་འབྲས་སོགས་ལ་ངམ་ནས། ཨེ་མའོ་ཞེས་པས་དྲངས་ཏེ་སེམས་དཔའ་ཆེན་པོ་ཞེས་ལང་ཀ་ལ་བོས་ནས། འོ་ན་དེ་ལྟར་ཡིན་ན་དྲེགས་པ་ཅན་འདུལ་བའི་དུས་ལ་ཚད་མར་ཕྱིན་པས་ད་ལྟའི་དུས་འདི་ནི་བཏུལ་བའི་དུས་ལ་བབ་པའོ། །དེ་ལ་དྲག་པོའི་ལས་མཛད་པ་འདི་ནི་རྨད་དུ་བྱུང་བའི་ཕྲིན་ལས་ཀྱི་མཆོག་གོ །དེའི་དུས་སུ་འབྱུང་བའི་གསང་བ་སྔགས་ཀྱི་དོན་འདི་ནི་ཕྱི་པ་ལས་ཤིན་ཏུ་གསང་བའི་བསྟན་པ་རྒྱལ་བའི་དགོངས་པའི་ཡང་ཞེ་ཕུགས་སུ་གྱུར་པའི་གསང་བ་དམ་པའོ། །དེ་བས་ན་གཙོ་བོ་ཐུལ་ལ་འཁོར་རྣམས་ཀུན་ཏུ་རབ་ཏུ་ཐུལ་ཞིག་ཅེས་བསྐུལ་ཏེ། ད་ལྟར་དུས་ལ་བབ་པའི་སྐབས་ཆེན་པོ་འདིར། དྲག་པོའི་ལས་ཀྱིས་གདུལ་སྐལ་ལ་བབ་པའི་སེམས་ཅན་རུ་ཏྲ་འདི་ཉིད། ཁྲོ་ལ་ཕན་ཆེན་མཛད་པའི་སྟོངས་ལ་བབ་པས་འཕགས་མཆོག་རྒྱལ་བའི་ཐུགས་རྗེ་ཆེན་པོ་ཡིས་སྒྲོལ་བའི་ཐབས་༼༣༧༣༽ཀྱིས་ཕྱིན་ཅི་ལོག་གི་འདུ་ཤེས་བསྒྱུར་ཏེ་ཟག་མེད་ལ་བཀོད་པ་ནི་ཐུགས་རྗེའི་མཆོག་ཏུ་ངེས་པས་སྟོང་གསུམ་གྱི་འགྲོ་བ་མ་ལུས་པ་སྲོག་བཏོན་པ་བས་ཀྱང་བསོད་ནམས་འདི་ཉིད་འབུམ་གྱི་ཆར་ཡང་མི་ཕོད་དོ། །ཞེས་ཉེ་བར་བསྐུལ་ཏོ། །དེ་ལྟར་སེམས་དཔའ་ཆེན་པོ་བློ་གྲོས་ཐབས་ལྡན་དང་ཆོས་ཀྱིས་མཐོ་བའི་གནས་ན་འདུས་པའི་རྒྱལ་བ་མ་ལུས་པ་ལ་བསྐུལ་ཞིང༌། དྲག་པོའི་ལས་ཀྱི་བསོད་ནམས་ཀྱི་ཚད་དང་བཅས་པས་བསྐུལ་བ་ནི་དོན་གྱིས་དེར་འདུས་པའི་འཁོར་གྱིས་ཤེས་པར་བྱ་བ་དང༌། གསང་བ་འབྱུང་བའི་སྒོ་དབྱེ་བ་དང༌། གདུལ་བྱ་དཔྱང་ཐག་ཆད་པའི་རུ་ཏྲ་ཉིད་ཡལ་བར་མི་འདོར་བའི་ཕྱིར་རོ། །དོན་འདིས་ན་འཁོར་བ་ཐོག་མ་དང་ཐ་མ་མེད་པར་གསང་བ་འབྱུང་བའི་སྐབས་སུ་གསང་བདག་ཉིད་དང༌། བསྐུལ་བའི་གོ་ཆ་བློ་གྲོས་ཐབས་ལྡན་ཞེས་པའི་མཚན་འབའ་ཞིག་ཏུ་གྲགས་པ་ལ་འགལ་བ་མེད་པར་འགྱུར་རོ། །འདིར་ནི་གསང་བདག་གིས་འདས་པའི་དུས་ཀྱི་ལོ་རྒྱུས་བརྗོད་པར་ཟད་དོ། །དེ་བས་ན་ཕྱིས་ཀྱང་གསང་བདག་དང་ལང་ཀས་གསང་སྔགས་འབྱུང་བ་ལ་ཐེ་ཚོམ་ མེད་དོ། །དེ་ལྟར་ཡིན་ན་གསང་བདག་གིས་གསང་སྔགས་ཀྱི་བསྟན་པ ་མ་ལ་ཡའི་རྩེར་འདུས་པའི་འཁོར་ལ་བཤད་པ་དང་སྲིན་པོ་མ་ལ་ཡར་བབ་པ་གཉིས་གལ་ཏེ་དུས་གཅིག་ན་ནི་བྱུང་ཚུལ་ཡང་བཅུ་གཅིག་ཏུ་འགྱུར་ལ། བསྟན་པ་གཅིག་ལ་དུས་གཉིས་སྨོས་པ་ལའང་དགོས་པ་མེད་པར་འགྱུར་རོ། །དེ་སྟེ་མིན་ཏེ་ཐ་དད་ཡིན་ན་དུས་གཅིག་ལ་གསང་སྔགས་ལན་གཉིས་འབྱུང་བར་འགྱུར་རོ། །དེ་མ་ཡིན་ན་གཉིས་ཀ་བསྐལ་པ་འདི་ལ་མ་ལ་ཡར་འབྱུང་བའང་འགལ་ལོ་ཞེ་ན། དེ་དག་ནི་ཐོག་མ་དང་ཐ་མ་མེད་པར་སྨོས་པ་ལས་འདིར་འདས་པའི་དུས་རུ་ཏྲ་བཏུལ་བ་དང༌། གསང་བ་འབྱུང་བ་དང༌། ཇི་ལྟར་གསུངས་པའི་ཚུལ་རྣམས་ལོ་རྒྱུས་སུ་སྨོས་པས་དུས་འདིར་ཡང་འབྱུང་སྟེ། གོང་དུ་བཤད་པ་དེ་དག་དུས་གཅིག་པར་འོག་ནས་འཆད་པར་འགྱུར་ཏེ། དགོས་པ་རེ་རེའི་ཕྱིར་བྱུང་ཚུལ་བཅུ་གཉིས་ཐ་དད་དུ་བསྟན་ཀྱང་གསང་བ་མཆོག་གི་བསྟན་པ་ནི་བསྐྱར་ཞིང་མ་གསུངས་ཏེ་འགལ་བ་མེད་པར་ཤིན་ཏུ་གསལ་བས། ལེའུ་ཉེར་བདུན་པ་ལས། སྤྲུལ་པ་རྡོ་རྗེ་འཛིན་རྒྱལ་པོ། །སྔར་བྱུང་རྒྱལ་ཚབ་སྐྱེས་བུ་ཡིས། །ལྷ་གནས་གསུམ་དུ་གྲགས་པ་ཡི། །གསང་མཛོད་ཆེན་པོ་དམ་པའི་ལུང༌། །གསང་༼༣༧༤༽བ་འཛིན་པའི་བདག་པོ་མཛད། །ཅེས་པ་ལ་སོགས་པས་ཐེ་ཚོམ་གྱི་ཁོ་ཐག་ཆོད་དེ་ལུང་ཆེན་ཆེ་བ་བདུན་ལྡན་ལ་གཞན་དྲིང་མི་འཇོག་པས་ངེས་ཤེས་རྙེད་དོ།།

གཉིས་པ་རྒྱས་པར་བཤད་པ་ལ་གཉིས་ཏེ། ལས་ཀྱི་སྐོས་རྒྱལ་བ་རྣམས་ལ་བསྐུལ་བ། བསྐུལ་བ་བཞིན་དུ་མཛད་པའོ། །དང་པོ་ལ་ལྔ་སྟེ། རྒྱལ་བ་རྣམས་ཀྱིས་རྡོ་རྗེ་འཛིན་པ་ལ་ཐུལ་ཞིག་པར་བསྐུལ་བ། ཐུགས་རྗེ་སྐྱེས་ནས་ཞལ་གྱིས་བཞེས་པ། རྡོ་རྗེ་འཛིན་པས་སོ་པ་ལ་བསྐུལ་བ། རྡོ་རྗེ་སེམས་དཔའ་ལ་རྟ་མགྲིན་བསྐུལ་ཞིག་པར་ཞུས་པ། རྒྱལ་བ་ཀུན་ལ་ཁམས་གསུམ་ཡོངས་སྒྲོལ་གྱི་དགོངས་པ་མཛོད་ཅིག་པར་བསྐུལ་བའོ། །དང་པོ་ནི།

དེ་ནས། ཞེས་པ་ནས། ཞེས་ཡོངས་སུ་བསྐུལ་བས། ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ཐམས་ཅད་ཀྱིས་དན་ཕག་གནས་གྱུར་པ། སྐྱེས་བུ་དམ་པ་རྡོ་རྗེ་འཛིན་དུ་སྣང་བ་ཉིད་ལ་ཡོངས་སུ་བསྒོ་བ་མཛད་པ། རྒྱལ་བ་ཀུན་གྱི་གསང་མཛོད་པ། །ཐུགས་ཀྱི་བདག་པོ་རྡོ་རྗེ་འཛིན། །དྲག་པོ་བརྟུལ་ཞུགས་ཆེན་པོ་ཅན། །དཔའ་བོ་འཇིག་རྟེན་གསུམ་ལས་རྒྱལ། །སྔོན་གྱི་གོ་ཆ་ཆེན་པོའི་མཐུས། །སངས་རྒྱས་སངས་རྒྱས་ཐམས་ཅད་ཀྱི། །གདུལ་དཀའ་དྲག་པོ་འདུལ་མཛད་པ། །བདུད་ཀྱི་བདུད་དེ་བདུད་རྣམས་འཇོམས། །སེམས་དཔའ་འབར་བ་སྔོན་པོའི་སྐུ། །འཇིགས་སུ་རུང་བའི་དཔའ་བྱེད་ཅན།།

གཏུམ་རྔམ་འཁྲུག་པའི་ངོ་བོ་ཡིས། །དུར་ཁྲོད་བདག་པོ་རབ་ཏུ་ཆོམས། །ཞེས་ཡོངས་སུ་བསྐུལ་བས།

དེ་ནས་དེ་བཞིན་གཤེགས་པ་ཐམས་ཅད་ཀྱིས་ཐར་པའི་གཡོག་དན་ཕག་དུས་འཛིན་དུ་བཅུག་པ་དེ་ཉིད་ཀྱིས་ངེས་པ་རྙེད་དེ་གནས་གྱུར་པ་རྒྱལ་ཚབ་སྐྱེས་བུ་དམ་པ་གསང་བའི་བདག་པོ་ཕྱག་ན་རྡོ་རྗེའམ་རྡོ་རྗེ་འཛིན་པ་ཆེན་པོ་ཉིད་དུ་སྣང་བར་གྱུར་པ་དེ་ཉིད་ལ་རུ་ཏྲ་ཐུལ་ཞིག་པར་བཀའི་ལས་གཉེར་གཏད་དེ་ཡོངས་སུ་བསྒོ་བར་མཛད་པ། རྒྱལ་བ་ཀུན་གྱི་གསང་བའི་མཛོད་གསུམ་མཐའ་དག་ལ་དབང་བསྒྱུར་ཏེ་འཛིན་པར་མཛད་པ་སྤྱིར་གདུལ་བྱ་ཡོངས་ལ་ཐུགས་རྗེ་མཆོག་གི་ བདག་པོ་ཁྱད་པར་དུ་གཉིས་མེད་དོན་གྱི་ཡེ་ཤེས་མི་ཕྱེད་པར་འཆང་ཞིང་གསང་བའི་མཛོད་ཀུན་འཛིན་པ ་དང་ཐུགས་རྗེ་འཆར་བའི་རྟགས་སུ་ཕྱག་ན་རྡོ་རྗེ་འཛིན་པ་དྲག་པོ་རྔམ་པའི་ཆ་བྱད་ཀྱིས་གདུག་པ་ཐམས་ཅད་འདུལ་བའི་བརྟུལ་ཞུགས་ཆེན་པོ་ཅན་ཕྱི་ནང་གི་འཛིན་པ་མཐའ་དག་འཇོམས་པའི་དཔའ་བོ་འཇིག་རྟེན་གསུམ་ལས་རྣམ་པར་རྒྱལ་བའི་བླར་གྱུར་པ་ཁྱོད་ཀྱིས་སྔོན་གྱི་སྨོན་ལམ་དང་ཐུགས་རྗེའི་སྟོབས་ཀྱི་གོ་ཆ་ཆེན་པོའི་མཐུས། འདས་པའི་སངས་རྒྱས་ཀུན་དང་ད་ལྟར་གྱི་སངས་རྒྱས་ཐམས་ཅད་ཀྱི་རྔམ་བརྗིད་འབར་བའི་ཕྲིན་ལས་ཀྱི་མངའ་བདག་གདུལ་དཀའ་དྲག་པོ་ཐམས་ཅད་འདུལ་བར་མཛད་པ་བདུད་ཀྱི་ཚོགས་རྣམས་འཇིགས་པར་བྱེད་པས་བདུད་ཀྱི་རྗེ་བོ་སྟེ་བདུད་རྣམས་འཇོམས་པར་མཛད་པའི་སེམས་དཔའ་ཆེན་པོ་དགོངས་པ་དབྱིངས་ལས་མི་འགྱུར་བའི་རྟགས་སུ་ཁ་དོག་སྔོན་པོ་བཻཌཱུརྱའི་རི་བོ་ལ་ཉིན་བྱེད་འབུམ་གྱིས་འཁྱུད་པ་ལྟར་གཟི་བྱིན་ཆེ་ཞིང་ཡེ་ཤེས་ཀྱི་མེ་དཔུང་འབར་བའི་ཐུགས་རྗེ་ཆེན་པོའི་ངང་ལས་ཁྲོ་བོར་བཞེངས་པའི་སྐུ་ཆེ་ལ་ཡན་ལག་རགས་པས་འཇིགས་སུ་རུང་བའི་༼༣༧༥༽དཔའ་བྱད་ཅན་སྐུ་གཏུམ་ཞིང་གསུང་རྔམ་ལ་ཐུགས་འཁྲུག་པའི་རྣམ་པ་ངོ་བོ་ཆོས་ཉིད་དབྱིངས་ཀྱི་སྣང་བ་ཡིས་དུར་ཁྲོད་ཀྱི་བདག་པོ་འཁོར་བཅས་རབ་ཏུ་ཆོམས་ཤིག ཅེས་ཡོངས་སུ་བསྐུལ་བས་ན་དོན་འདི་ཉིད་ཀྱིས་གསང་བདག་ཏུ་མངོན་ནོ།།

གཉིས་པ་ཐུགས་རྗེ་སྐྱེས་ནས་ཞལ་གྱིས་བཞེས་པ་ལ་གཉིས་ཏེ། ཐུགས་རྗེ་སྐྱེས་པ། གདུལ་བར་ཞལ་གྱིས་བཞེས་པའོ། །དང་པོ་ནི།

སྐྱེས་བུ་རྡོ་རྗེ། ཞེས་པ་ནས། ཐུགས་རྗེས་གདུང་བ་ནི། །ཞེས་པའི་བར་གྱིས་བསྟན་ཏེ།

སྐྱེས་བུ་རྡོ་རྗེ་འཛིན་པ་དེ། །ལྷ་དང་བཅས་པའི་འཇིག་རྟེན་འདི། །འབྱུང་པོའི་རྒྱལ་པོས་དབང་དུ་བྱས།།

ཤིན་ཏུ་གཏུམ་རྔམ་འཁྲུག་པ་དེས། །ལྷ་མིའི་འཇིག་རྟེན་བརླག་ལ་ཁད། །བཞིན་དང་མདངས་ཀྱང་མི་གསལ་བར།།

ཀུན་ཏུ་མོག་མོག་པོར་གྱུར་ནས། །དུས་མ་ཡིན་པར་མུན་པ་ཡང་། །མུན་ནག་སྨག་ཏུ་གྱུར་པས་འཐིབས།།

ཚ་དང་གྲང་བའི་ནད་དང་རིམས། །མི་ཟད་སྣ་ཚོགས་ཀུན་ཏུ་རྒྱས། །རླུང་དམར་འབྲུག་དང་སེར་བ་དང་།།

རྣག་ཁྲག་རྡོ་དང་མཚོན་ཆའི་ཆར། །དུས་མ་ཡིན་པར་ཀུན་ཏུ་བྱུང་། །སྐྱེ་སྨིན་འཚོ་བའང་ལོག་པར་གྱུར།།

གདུག་པ་སྣ་ཚོགས་སེམས་ཅན་གྱིས། །ཤིན་ཏུ་ཉམ་ཐག་གདུངས་གྱུར་པའི།།

མགོན་མེད་པ་ཡི་འཇིག་རྟེན་དེ། །མཁྱེན་ཏེ་ཐུགས་རྗེས་གདུང་བ་ནི།།

དེ་ལྟར་བསྐུལ་བ་གསན་ནས་སྔོན་གྱི་གོ་ཆའི་དབང་གིས། སྐྱེས་བུ་རྡོ་རྗེ་འཛིན་པ་དེ་ཡིས་ཞལ་གྱིས་བཞེས་ཏེ་གཟིགས་པར་མཛད་པ་ན། ལྷ་དང་བཅས་པའི་འཇིག་རྟེན་འདི་རྣམས་འབྱུང་པོའི་རྒྱལ་པོས་དབང་དུ་བྱས་ནས་སྒོ་གསུམ་ཤིན་ཏུ་ཡང་གཏུམ་རྔམ་འཁྲུག་པ་དེས་ལྷ་མིའི་འཇིག་རྟེན་གྱི་དགེ་བའི་སྲིད་བརླག་ལ་ཁྱད་དུ་གྱུར་ཏེ། ལུས་ཀྱི་བཞིན་གྱི་མདངས་ཀྱང་མི་གསལ་བར་སེམས་ཀུན་ཏུ་མོག་མོག་པོར་གྱུར་ནས། སྤྲིན་སོགས་ཀྱི་དབང་གིས་དུས་མ་ཡིན་པའི་མུན་པར་ཡང་མུན་ནག་སྨག་ཏུ་གྱུར་པས་འཐིབས་ཤིང་ཚ་བ་དང་གྲང་བའི་ནད་དང་རིམས་དྲག་པོ་སོགས་ངེས་པར་སྲོག་འཕྲོགས་པའི་མི་ངས་པའི་ནད་རིགས་སྣ་ཚོགས་ཀུན་ཏུ་རྒྱས་པ་དང༌། རླུང་དམར་དང་འབྲུག་གི་སྒྲ་དང་ཆར་དང་སེར་བ་དྲག་པོ་འབབ་པ་དང༌། རྣག་ཁྲག་རྡོལ་བའི་སྡུག་བསྔལ་སྐྱེད་པས་རྡོ་དང་མཚོན་ཆའི་ཆར་ལ་སོགས་པ་དུས་མ་ཡིན་པར་ཀུན་ཏུ་བྱུང་ལ། དྲེགས་པའི་མཐུས་ཕྱི་ནང་གི་སྐྱེ་བ་ལོག་ཅིང་ལོ་ཉེས་པ་ལ་སོགས་པ་འབྱུང་བས་འབྲས་བུ་དུས་སུ་སྐྱེ་བའམ་དང་པོར་སྐྱེ་བ་དང་སྨིན་པ་ལོག་པས་དེའི་དབང་གིས་འཚོ་བའང་ལོག་པར་འགྱུར་བ་གཟིགས་ཏེ། དེ་ལྟར་གདུག་པ་སྣ་ཚོགས་ཀྱིས་མནར་བའི་སེམས་ཅན་རྣམས་དྲེགས་པའི་སྟོབས་ཀྱིས་ཤིན་ཏུ་ཉམ་ཐག་ཅིང་གདུང་བར་འགྱུར་བས་སྤྱིར་ཁམས་གསུམ་པོ་རུ་ཏྲའི་དབང་དུ་སོང་བ་དང༌། སྒོས་སུ་རུ་ཏྲ་རང་ལམ་ལོག་པར་འཕྱན་པའི་མགོན་མེད་པ་ཡི་འཇིག་རྟེན་དེ་ཉིད་སྡུག་བསྔལ་གྱིས་ཉམ་ཐག་པར་མཁྱེན་ཏེ་ཐུགས་སུ་ཆུད་པས་མི་གཡོ་བའི་ངང་ལས་མི་འགོག་པའི་ཐུགས་རྗེས་གདུང་བར་མཛད་པའི་ཁྱད་པར་ཤིན་ཏུ་འབྲེལ་བའི་བརྩེ་བ་སྟེ་དྲག་པོའི་གནས་སྐབས་སུ་ངེས་པས་ཤིན་ཏུ་ཁྲོས་པའི་ཚུལ་གྱིས་དགོངས་པ་ནི། ཞེས་པའོ།།

ནང་ལྟར་ན། ཤེས་རབ་ཀྱིས་གཟིགས་པ་ན་ལྷར་བཅས་འཇིག་རྟེན་ཐམས་ཅད་རྣམ་རྟོག་བདག་ཏུ་འཛིན་པས་དབང་དུ་བྱས་ཏེ། སྒོ་༼༣༧༦༽གསུམ་པོ་ཟག་བཅས་སུ་གྱུར་ནས་རང་གི་སྙིང་པོ་མ་བྲལ་བཞིན་དུ་མི་མངོན་པར་བརླག་ལ་ཁད་དུ་སོང་བས་སེམས་ཀྱི་ཆོས་ཉིད་མི་གསལ་ཞིང་ལྷན་སྐྱེས་ཀྱིས་མ་རིག་པས་རྨོངས་ནས། དད་བརྩོན་དང་ཤེས་རབ་ཆེན་པོས་ལེགས་པར་བརྟགས་ན་གཟུང་འཛིན་དོན་ལ་མེད་པས་དུས་མ་ཡིན་པར་ཀུན་བརྟགས་ཀྱི་མུན་པ་སྣ་ཚོགས་པར་འཐིབས་ནས་ཞེ་སྡང་དང་འདོད་ཆགས་ཀྱི་ཚ་གྲང་གི་ནད་དང་རྩ་བ་དང་ཉེ་བའི་ཉོན་མོངས་ཀྱི་རིམས་དྲག་པོ་འཚིག་པ་དང་འཁོན་འཛིན་སོགས་གོང་དུ་འཕེལ་བས་རྒྱས་ཤིང་གཡོ་སྒྱུ་དང་འཆབ་པ་སོགས་ཀྱིས་ངག་གི་བཞི་སོགས་ལས་སྣ་ཚོགས་བསླང་སྟེ་ཆར་ལྟར་བབ་པས་རྣམ་པར་སྨིན་པ་སྐྱེ་བ་དང་གནས་པ་དང༌། ཚེ་ཚད་ལོག་པར་གྱུར་ཏེ་སྲིད་པར་ཉམ་ཐག་པ་དེ་ཡང་དག་པར་མཁྱེན་ནས་ཐབས་ཀྱིས་བསྒྲལ་ཏེ་བྱང་ཆུབ་དོན་དུ་གཉེར་བའོ།།

གཉིས་པ་གདུལ་བར་ཞལ་གྱིས་བཞེས་པ་ནི།

ཚིགས་བཅད་ལྔའི་འོག་ནས། མེད་ལ་ཀུན་འབྱུང༌། ཞེས་པ་ནས། ཉིད་ལ་དགོད་པར་བྱ། །ཞེས་པའི་བར་གྱིས་བསྟན་ཏེ།

མེད་ལ་ཀུན་འབྱུང་སྟོང་ཉིད་ལས། །ཇི་བཞིན་པ་ཡི་རྒྱལ་བ་དང་། །སྟུག་པོ་བཀོད་པའི་ཞིང་ཁམས་ན།།

རྣམ་དག་ལམ་གཤེགས་རྒྱལ་བ་རྣམས། །བདག་ནི་བཀའ་ཡི་ལས་མཁན་ཏེ། །བཀའ་ཡི་ལས་ཀྱི་དུས་བྱུང་བས།།

སངས་རྒྱས་ཀུན་གྱིས་གདུལ་དཀའ་བ། །དེ་དག་མ་ལུས་བདག་གིས་འདུལ། །མ་གྲོལ་བ་ཡང་བདག་གིས་སྒྲོལ།།

མ་བསྒྲལ་བ་ཡང་བདག་གིས་བསྒྲལ། །དབུགས་མ་ཕྱུང་བ་དབུགས་ཕྱུང་སྟེ། །ཡང་དག་ཉིད་དུ་དགོད་པར་བགྱི།།

དངོས་པོར་མེད་ལ་ཀུན་འབྱུང་བའི་སྟོང་ཉིད་ཆེན་པོ་ངོ་བོ་ཉིད་སྐུའི་ངང་ལས་ཡེ་ཇི་བཞིན་པའི་རང་སྣང་མངོན་དུ་བྱས་པ་ཡི་རྒྱལ་བ་ཆོས་ཀྱི་སྐུ་དང༌། ལྷུན་རྫོགས་སྟུག་པོ་བཀོད་པའི་ཞིང་ཁམས་ན་རྒྱུད་རྣམ་པར་དག་པའི་ལམ་དུ་གཤེགས་པས་ལོངས་སྐུ་ལས་སྲིད་པ་གསུམ་གྱི་ཁམས་སྦྱོང་བར་མཛད་པས་རྒྱལ་བ་སྤྲུལ་པའི་སྐུའི་སངས་རྒྱས་རྣམས་ཞེས་རང་བཞིན་ལྷུན་གྱིས་གྲུབ་པའི་སངས་རྒྱས་དང་སྟུག་པོ་བཀོད་པའི་རྒྱུད་དག་པའི་རྒྱལ་བ་རྣམས་ལ་བོས་ནས། གསང་བའི་བདག་པོ་རྡོ་རྗེ་འཛིན་པ་བདག་ནི་གདུག་པ་འདུལ་བ་དང་གསང་བ་སྟོན་པ་ལ་སོགས་པ་རྒྱལ་བའི་ཕྲིན་ལས་རིལ་གྱི་བྱེད་པ་པོ་ཡིན་པས་བཀའ་ཡི་ལས་མཁན་མཆོག་ཏུ་ངེས་ཏེ། དེས་ན་བཀའ་ཡི་ལས་ཀྱི་དུས་སྐབས་ལ་བབ་པ་ད་ལྟར་བྱུང་བས་ན། བདག་གིས་དེང་འདིར་བགྱིའོ་ཞེས་ཞལ་གྱིས་འཆེས་པའི་དོན་གྱིས་ཆོས་སྐུ་དང་གཟུགས་སྐུའི་སངས་རྒྱས་རྣམ་གཉིས་ལ་ཡོངས་སུ་རྫོགས་པར་བསྐུལ་ཏེ། སངས་རྒྱས་ཀུན་གྱི་གདུལ་བྱ་གདུལ་བར་དཀའ་བ་དེ་དག་ལ་དྲག་པོའི་སྟོབས་ཀྱིས་དོན་མཛད་པར་བསྐུལ་བ་ལྟར་གདུལ་བྱ་མ་ལུས་ཐམས་ཅད་བདག་གིས་གདུལ་ལ། སྲིད་པ་ལས་མ་གྲོལ་བ་ཡང་བདག་གིས་དགྲོལ་ཞིང་གང་བག་ཆགས་ཀྱི་ས་ལས་མ་བསྒྲལ་བ་ཡང་བདག་གིས་རྣམ་པར་མི་རྟོག་པའི་ཡེ་ཤེས་ཆེན་པོས་༼༣༧༧༽བསྒྲལ་ནས་ངན་འགྲོའི་གནས་ལས་དབུགས་མ་ཕྱུང་བ་ཡང་དབུགས་ཕྱུང་སྟེ་ཡང་དག་པའི་འབྲས་བུ་ཉིད་ལ་དགོད་པར་བྱའོ།།

གསུམ་པ་རྡོ་རྗེ་འཛིན་པས་སོ་པ་ལ་བསྐུལ་བ་ནི།

སྔར་གྱི་འཕྲོར། རབ་ཏུ་རྔམ་པའི། ཞེས་པ་ནས། བྱ་སྦྲོན་ཐོང༌། །ཞེས་པའི་བར་གྱིས་བསྟན་ཏེ།

རབ་ཏུ་རྔམ་པའི་བརྟུལ་ཞུགས་ཀྱིས། །རྡོ་རྗེ་ཆོས་ཀྱི་རྟ་གདོང་ལ། །རྡོ་རྗེའི་ཚིག་ཏུ་འདི་སྐད་དུ།།

ངག་གི་དབང་ཕྱུག་རྡོ་རྗེ་གདོང་། །ལངྐའི་ཡུལ་གྱི་གྲོང་རྡལ་གྱི། །དབུས་ཀྱི་རི་བོ་མ་ལ་ཡཱ།།

རྐོ་རྐ་ཐང་དམར་རྒྱ་མཚོའི་དོ། །དྲག་ཤུལ་ཡོད་པའི་རྩེ་ལ་དོང་། །རྡོ་རྗེ་ཐབས་ཀྱིས་ལྟ་བའི་ཡུལ།།

དུར་ཁྲོད་བདག་པོའི་ཚོགས་དང་བཅས། །མི་ངེས་སྐྱམ་ལིང་ཆེན་པོ་ལ། །ཁམས་གསུམ་རྡོ་རྗེ་བྱ་སྦྲོན་ཐོང་།།

དེ་ནས་ཕྱག་ན་རྡོ་རྗེ་རབ་ཏུ་རྔམ་པའི་བརྟུལ་ཞུགས་ཅན་གྱིས། གསུང་རྡོ་རྗེ་ཆོས་ཀྱི་སྤྲུལ་པ་དཔལ་ལྡན་རྟ་ཡི་གདོང་ངམ་རྟ་མགྲིན་ལ་གདུག་པ་ཅན་གཞོམ་པའི་བཀའ་ལུང་དབང་དང་དྲག་པོ་གཉིས་ལས་དབང་གིས་འདུལ་བའི་ཕྱིར་དུས་ཚོད་གཟུང་བར་གྱིས་ཤིག་པར་རྡོ་རྗེའི་ཚིག་ཏུ་འདི་སྐད་དུ་བསྐུལ་ལོ། །ཁྲོ་བོ་རྟ་མགྲིན་རྒྱལ་བ་ཐམས་ཅད་ཀྱི་གསུང་གི་བདག་ཉིད་ངག་གི་དབང་ཕྱུག་ཡིན་པས་རྟའི་འདུར་གླུ་དང་བཅས་པས་དྲེགས་པ་འཇོམས་པའི་ཞལ་ལམ་རྡོ་རྗེའི་གདོང་ཅན་ཁྱོད་ཀྱིས་ལང་ཀའི་ཡུལ་གྱི་གྲོང་རྡལ་གྱི་དབུས་ཀྱི་རི་བོ་མ་ལ་ཡ་ཞེས་བྱ་བ་ཀོ་ཀ་ཐང་དམར་རྒྱ་མཚོའི་ངོ་ཡི་དོ་ལ་ཆེན་པོ་དྲག་ཤུལ་ཡོད་པའི་རྩེ་མོ་ལ་དོང་ནས། ཆོས་ཉིད་མ་འགག་པའི་རྡོ་རྗེ་ཐབས་ཀྱིས་བྱ་ར་མཛད་ཅིང་ལྟ་བའི་ཡུལ་ནི་དུར་ཁྲོད་ཀྱི་བདག་པོ་དྲེགས་པ་འཁོར་ཚོགས་དང་བཅས་པ་མི་ལ་ཤ་ཁྲག་ཡོད་པས་གསོད་ཅིང་དུད་འགྲོ་དང་ལྷ་མིན་ཡང་དེ་དང་འདྲ་བས་སྲོག་ཆགས་མང་པོའི་སྲོག་འཕྲོགས་པས་མི་ངས་སྐྱམ་ལིང་ཆེན་པོ་རྔོན་བྱེད་པ་ལ་སོང་ནས་སྐབས་ལ་བབ་པའི་དུས་སུ་རྒྱལ་བ་ཐུགས་རྗེ་ཆེན་པོ་ཁམས་གསུམ་གྱི་གྲོང་ཁྱེར་གྱི་མགོན་པོ་གདུག་པ་འཇོམས་པའི་རྡོ་རྗེའི་དགོངས་པ་མངའ་བ་རྣམས་ལ་བྱ་བཏང་བ་དང་སྦྲོན་པ་ཐོང་ལ་དུས་ལ་བབ་པའི་བསྐུལ་བ་གྱིས་ཤིག་པའོ།།

བཞི་པ་རྡོ་རྗེ་སེམས་དཔའ་ལ་རྟ་མགྲིན་བསྐུལ་ཞིག་པར་ཞུས་པ་ནི།

ཅིས་ཀྱང་མི་བསྐྱོད། ཅེས་པ་ནས། སྤྱོད་པ་མཛོད། །ཅེས་པའི་བར་གྱིས་བསྟན་ཏེ།

ཅིས་ཀྱང་མི་སྐྱོད་མི་འཁྲུགས་པའི། །སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་དེ་བཞིན་ཉིད།།

རྡོ་རྗེ་སྙིང་པོ་སྲིད་གསུམ་མགོན། །སྟོང་པ་ཆེན་པོའི་ནམ་མཁའ་ལ། །འབར་བ་ཆེན་པོ་གར་དགུར་མཛོད།།

ཐུགས་རྗེ་ས་ལ་གཤེགས་ནས་ཀྱང་། །མཐུན་འཇུག་བྱིས་པའི་སྤྱོད་པ་མཛོད།།

མཐའ་ཡི་རྟོག་པ་ཅིས་ཀྱང་མི་བསྐྱོད་པས་མི་འཁྲུགས་པ་ཞེས་བྱ་བའི་རྡོ་རྗེ་སེམས་དཔའ་ཡེ་ཇི་བཞིན་པ་དང་རྒྱུད་དག་པའི་སངས་རྒྱས་ཀུན་གྱི་རང་བཞིན་དངོས་སུ་ན་རྡོ་རྗེ་སེམས་དཔའ་དེ་བཞིན་ཉིད་རྡོ་རྗེ་སྙིང་པོ་ཞེས་བྱ་བ་སྲིད་པ་གསུམ་གྱི་མགོན་པོ་ཁྱེད་ཀྱིས་ཆོས་ཀྱི་སྐུ་སྟོང་པ་ཆེན་པོའི་ནམ་མཁའ་ལ་ལོངས་སྤྱོད་རྫོགས་སྐུ་ཞི་བ་ལས་ཁྲོ་བོར་བཞེངས་ཏེ་འབར་བ་ཆེན་པོའི་གར་དགུར་མཛོད་ལ་མཐུ་ཡིས་བསྟངས་ནས་རྟ་མགྲིན་སོ་ལ་བསྐུལ་ཞིག་ཐུགས་རྗེ་སྤྲུལ་སྐུ་མ་ལ་ཡའམ་གདུལ་བྱའི་ཞིང་གི་ས་ལ་གཤེགས་པར་མཛད་ནས་ཀྱང༌། གདུལ་བྱ་དང་མཐུན་འཇུག་གི་མཛད་པ་དཔལ་རྡོ་རྗེ་གཞོན་༼༣༧༨༽ནུའི་རོལ་གར་བྱིས་པའི་སྤྱོད་པ་དང་འདྲ་བར་སྟོན་པ་ལ་གཉིས་སུ་མེད་པའི་དགོངས་པ་མཛོད་ཅིག

ལྔ་པ་རྒྱལ་བ་ཀུན་ལ་ཁམས་གསུམ་ཡོངས་སྒྲོལ་གྱི་དགོངས་པ་མཛོད་ཅིག་པར་བསྐུལ་བ་ནི།

འོག་ནས། དགོངས་པ་གསང་བ། ཞེས་པ་ནས། དྲག་ཏུ་བསྐུལ་བ་ལས། ཞེས་པའི་བར་གྱིས་བསྟན་ཏེ།

དགོངས་པ་གསང་བ་ཀུན་འདུས་ལ། །རྨད་བྱུང་གསང་བའི་དཀྱིལ་འཁོར་གྱི། །མཐའ་ཐུག་མེད་པའི་སེམས་ཅན་རྣམས། །སྙིང་པོ་བསྐུལ་བའི་བྱིན་རླབས་མཛོད། །ཅེས་རྡོ་རྗེ་འཛིན་པ་དེས་དྲག་ཏུ་བསྐུལ་བ་ལས།

སངས་རྒྱས་མ་ལུས་པ་རིལ་གྱི་དགོངས་པ་གསང་བ་ཀུན་ཡོངས་སུ་འདུས་པ་གསང་སྔགས་ལུང་གི་རྒྱུད་ཆེན་པོ་འདི་ཉིད་སྟོན་པའི་རྨད་དུ་བྱུང་བ་གསང་བའི་དཀྱིལ་འཁོར་གྱི་རྒྱལ་བ་ཐུན་མོང་མ་ཡིན་པ་ཐམས་ཅད་ཀྱིས་མཐའ་ཐུག་པ་མེད་པའི་སེམས་ཅན་རྣམས་ཡང་གསང་ངེས་དོན་དམ་པའི་དོན་གྱི་གཏེར་ཤེས་རབ་ཆེན་པོས་རྟོགས་སུ་ཆུག་ལ་སྙིང་པོ་བྱང་ཆུབ་ལ་བསྐུལ་ཏེ་དབྱིངས་དང་ཡེ་ཤེས་དབྱེར་མེད་ཀྱི་ས་ལ་འགོད་པའི་ཐབས་ཀྱི་བྱིན་རླབས་སྣང་བར་ངེས་པའི་གསང་བ་ཟབ་མོ་སྟོན་པའི་དགོངས་པ་མཛོད་ཅིག་ཅེས་རྡོ་རྗེ་འཛིན་པ་དེས་དྲག་ཏུ་བསྐུལ་བ་ལས།

གཉིས་པ་བསྐུལ་བ་བཞིན་དུ་མཛད་པ་ལ་བཞི་སྟེ། རྡོ་རྗེ་སེམས་དཔས་རྟའི་ཚོགས་ལ་བསྐུལ་བ། རྟ་མགྲིན་སོ་ལ་གཤེགས་པ། རྒྱལ་བ་རྣམས་ཀྱིས་ཁམས་གསུམ་ཡོངས་སྒྲོལ་གྱི་དགོངས་པ་མཛད་པ། བདུད་བཏུལ་བའི་སྦྱོར་བ་མཛད་པའོ། །དང་པོ་ནི།

ཆོས་ཀྱི་དབྱིངས་ཀྱི། ཞེས་པ་ནས། ཞེས་དྲག་ཏུ་བསྒོ་བས། ཞེས་པའི་བར་གྱིས་བསྟན་ཏེ།

ཆོས་ཀྱི་དབྱིངས་ཀྱི་ཕོ་བྲང་ནས། དེ་བཞིན་གཤེགས་པ་ཐམས་ཅད་ཡེ་ཤེས་ཆེན་པོའི་མེ་དུས་མཐའི་བསྐལ་པའི་མེ་ལྟར་འབར་བའི་ཐུགས་རྗེའི་སྤྲིན་ཕུང་ནམ་མཁའི་མཐས་ཀླས་པར་འཐིབས་ནས། འབར་བ་ཆེན་པོའི་གར་དགུར་མངོན་སྤྱོད་དུ་མཛད་ནས། རྡོ་རྗེ་རྟའི་ཚོགས་ལ་བཀས་བསྒོ་བ། སོང་སོང་ཀུན་ཏུ་རབ་ཏུ་སོང་། །རྟ་ཡི་རྡོ་རྗེ་སྟབས་དགུ་ཡིས། །འཇིག་རྟེན་བློ་དགུའི་འདོད་པ་སྟོན། །འཇིག་རྟེན་ནག་པོ་གཏུམ་པའི་ཚོགས། །དུར་ཁྲོད་བསྐྱམ་ལིངས་སྤྱོད་པ་ལ། །རྡོ་རྗེ་རྟོག་པའི་བྲ་གྱོན་གྱི། །འཁོར་བ་མ་བསྒྲལ་བར་དུ་འདི། །དམ་བཅས་གོ་ཆ་གྱོན་པ་ཡི། །སྙིང་རྗེ་ཆེན་པོའི་རྟོགས་འཇུག་གིས། །འཁོར་བའི་སོ་མཐའ་ཆོད་པར་གྱིས། །ཞེས་དྲག་ཏུ་བསྒོ་བས།

དེ་ནས་བསྙུལ་བར་མཁྱེན་ནས་འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས་དེ་བཞིན་གཤེགས་ པ་ཐམས་ཅད་ཀྱི་བདག་ཉིད་རྡོ་རྗེ་སེམས་དཔས་འགྲོ་འོང་མེད ་པར་རང་བྱུང་གི་ཡེ་ཤེས་ཆེན་པོའི་མེ་དཔུང་མཐའ་དང་གདུག་པ་སྲེག་པས་དུས་མཐའི་བསྐལ་པའི་མེ་ཀློང་ལྟར་འབར་བའི་ཐུགས་རྗེའི་སྤྲིན་དཔུང་ནམ་མཁའི་མཐའ་ཀླས་པར་གཏིབས་ནས། ཞེས་པའི་ཚིག་འདིས་ཧེ་རུ་ཀའི་སྐུ་ཐམས་ཅད་སྐབས་འདིར་སྣང་བར་བྱས་པ་ཡིན་ནོ། །དེ་ལྟར་འབར་བ་ཆེན་པོའི་གར་དགུའི་མངོན་སྤྱོད་དུ་སྣང་བར་མཛད་ནས། རྡོ་རྗེ་རྟའི་ཚོགས་ལ་བཀས་བསྒོ་བ། སོ་མཐའ་ལ་སོང་ཞིག་འཇིག་རྟེན་ཀུན་ཏུ་རབ་ཏུ་ངེས་པར་སོང་ཞིག དེའི་ཚུལ་ནི་སྒེག་པོ་དཔའ་བོ་ལ་སོགས་པ་ལེའུ་ཉེར་བདུན་པ་ལས་འཆད་པ་ལྟར་ཁམས་གསུམ་ས་དགུ་ལས་བསྒྲལ་བའི་ཕྱིར་རྟ་ཡི་རྡོ་རྗེའི་སྟབས་དགུ་ཡིས་གདུལ་བྱའི་འཇིག་རྟེན་ཤེས་རབ་ཀྱི་བློ་གྲོས་རབ་འབྲིང་ཐ་མ་དགུའི་རང་རང་གི་འདོད་པ་ལྟར་ཐེག་པ་དགུའི་ཆོས་སྟོན་ཅིག འཇིག་རྟེན་༼༣༧༩༽གྱི་རུ་ཏྲ་ནག་པོ་གཏུམ་པོའི་ཚོགས་རྣམས་དུར་ཁྲོད་དུ་སྲོག་ཆགས་གསོད་པའི་སྐྱམ་ལིང་གི་རྔོན་པའི་སྤྱོད་པ་ལ་སོང་བའི་ཚེ་ན་རྡོ་རྗེ་རྟོག་པའི་བྱ་ར་གྱིས་ལ་དུས་སུ་སྒྲོན་པར་གྱིས་ཤིག ཐུགས་དམ་གནད་ནས་བསྐུལ་ཏེ། སྤྱན་རས་ཀྱིས་འཁོར་བ་མཐའ་དག་མ་བསྒྲལ་བའི་བར་དུ་འདི་ལྟར་གཟིགས་ནས་དོན་བྱ་བར་དམ་བཅས་པའི་གོ་ཆ་ཆེན་པོ་གྱོན་པ་ཡི་ཐུགས་རྗེའམ་སྙིང་རྗེ་ཆེན་པོའི་རྒྱུས་རྟོག་ཅིང་འཇུག་པའི་ཚུལ་དག་གིས་སྤྱིར་འཁོར་བའི་འགྲོ་བ་རྣམས་ལ་བྱ་ར་མཛད་དེ་རྒྱུ་འབྲས་ཀྱི་ཐེག་པ་གང་ལྟར་སྤྱོད་པའི་སྐལ་བ་ལྟར་སྟོན་ཅིང་འགྲོ་བ་བདེ་བར་གྱིས་ཤིག ཁྱད་པར་དུ་སྐབས་ཀྱི་དྲེགས་པ་ཅི་བྱེད་པའི་སོ་མཐའ་ཐག་ཆོད་པར་གྱིས་ཤིག ཅེས་དྲག་ཏུ་བསྒོ་བས།

གཉིས་པ་རྟ་མགྲིན་སོ་ལ་གཤེགས་པ་ནི།

རྡོ་རྗེ་ཆོས་རབ། ཅེས་པ་ནས། སྤྱན་རས་གཟིགས། །ཞེས་པའི་བར་གྱིས་བསྟན་ཏེ།

རྡོ་རྗེ་ཆོས་རབ་བཀའ་འཁོར་ལོ། །གཟིགས་དབང་རྡོ་རྗེ་སྤྱན་རབ་སྟེ། །རྡོ་རྗེ་པདྨོ་རབ་དགའ་བར།།

སྣང་མཛད་ངག་གི་དབང་ཕྱུག་ཚོགས། །བྱང་ཆུབ་ཆེན་པོ་ཅང་ཤེས་གཙོ། །སྟབས་ཆེན་དགུ་ཡི་རྫུ་འཕྲུལ་གྱིས།།

རྡོ་རྗེ་རྟ་གདོང་སྤྲུལ་པའི་ཚོགས། །ནམ་མཁའི་ཁམས་ཀུན་ཡོངས་བཀང་ནས། །མ་ལ་ཡ་ཡི་རྩེ་ལ་ལྷགས།།

འཁོར་བ་མ་སྟོང་བར་དུ་ནི། །ཐུགས་རྗེའི་དབང་གིས་སྤྱན་རས་གཟིགས།།

དེ་ལྟར་བསྐུལ་བས་སྤྱན་རས་གཟིགས་རྡོ་རྗེ་ཆོས་རྟའི་གདོང་ཅན་དེ་ཉིད་རབ་ཏུ་དགྱེས་ནས་རྒྱལ་བ་རྣམས་ཀྱི་བཀའ་བཞིན་ཆོས་ཀྱི་འཁོར་ལོ་བསྐོར་བར་དགོངས་ཤིང་གདུལ་བྱ་ལ་རྟག་ཏུ་སྤྱན་རས་ཀྱིས་གཟིགས་ཤིང་འཚོ་བ་ནི་དབང་གི་རིགས་ཏེ་རྡོ་རྗེ་ཐུགས་ཀྱི་སྤྱན་མཆོག་དེ་ཡིས་རབ་ཏུ་གཟིགས་ཏེ་རྡོ་རྗེ་གསུམ་གྱི་སྒོ་ནས་གསུང་གི་གསང་བ་ཆགས་མེད་སྐྱོན་བྲལ་པདྨོ་དམ་པའི་ཆོས་ཀྱི་འཁོར་ལོ་བསྐོར་བར་རབ་ཏུ་དགའ་ཞིང་དགྱེས་པ་ཡིས་སྐུ་མངོན་དུ་སྣང་བར་མཛད་དེ་ངག་གི་དབང་ཕྱུག་སྤྲུལ་པའི་ཚོགས་དེ་ལྟ་བུ་མང་པོས་སྐབས་དང་མཐུན་པར་གང་ལ་གང་འདུལ་དུ་ཆོས་སྟོན་པའི་ཕྱིར་བྱང་ཆུབ་ཆེན་པོ་སྐད་ཅིག་གིས་ནོན་ཞིང་མྱུར་བར་བགྲོད་པའི་ཅང་ཤེས་ཀྱི་གཙོ་བོའི་རྫུ་འཕྲུལ་དང་ལྡན་པས་ཤེས་བྱ་གང་ལ་ཡང་མ་རྨོངས་པར་བྱོལ་སོང་གི་རྒྱལ་པོ་རྟ་ཡི་སྟབས་ཆེན་པོ་དགུ་ཡི་རྫུ་འཕྲུལ་གྱིས་སྐལ་བ་དང་འཚམས་པར་དོན་མཛད་ཅིང༌། རུ་ཏྲ་དབང་དུ་སྡུད་པའི་ཕྱིར། རྡོ་རྗེ་རྟ་ཡི་གདོང་ཅན་དཔལ་རྟ་མགྲིན་གྱི་སྤྲུལ་པའི་ཚོགས་ཀྱིས་ནམ་མཁའི་ཁམས་ཀུན་ཡོངས་སུ་བཀང་བར་མཛད་པ་ནི་དྲེགས་པའི་སྣང་བ་སྟེ་དེ་ནས་སྤྲུལ་པ་དེ་རྣམས་ཀྱིས་སྲིན་པོའི་གནས་མ་ལ་ཡ་ཡི་རིའི་རྩེ་ལ་སོ་བྱ་བར་ལྷགས་ཏེ་སྐད་ཅིག་གིས་བྱོན་ནས་ཡུན་འཁོར་བ་མ་སྟོངས་ཀྱི་བར་དུ་ནི་ཐུགས་རྗེ་ཆེན་པོའི་དབང་གིས་མི་རྟོག་བཞིན་དུ་སྤྱན་རས་ཀྱིས་གཟིགས་ཤིང་བྱ་ར་མཛད་དེ་སྤྱི་དང་བྱེ་བྲག་ལ་དགོངས་པའོ།།

གསུམ་པ་རྒྱལ་བ་རྣམས་ཀྱིས་ཁམས་གསུམ་ཡོངས་སྒྲོལ་གྱི་དགོངས་པ་མཛད་པ་ནི།

༼༣༨༠༽སྟུག་པོ་བཀོད་པའི། ཞེས་པ་ནས། ཆེན་པོར་དགོངས། །ཞེས་པའི་བར་གྱིས་བསྟན་ཏེ།

སྟུག་པོ་བཀོད་པའི་རྒྱལ་བ་ཡང་། །དགོངས་པ་གསང་བ་གཅིག་ཏུ་འདུས། །ཁམས་གསུམ་ཡོངས་སྒྲོལ་སྙིང་པོར་དགོངས། །དུག་གསུམ་གཏན་སྤྲུགས་བྱིན་རླབས་མཛོད། །འཁོར་བ་ཆོས་ཉིད་སྤྱན་རས་གཟིགས།།

སྡུག་བསྔལ་བྱང་ཆུབ་ལམ་དུ་མཛད། །ལས་ཉིད་རང་བྱུང་ཡེ་ཤེས་འབྲེལ། །རྣམ་སྨིན་སུན་བྱུང་རྡོ་རྗེ་ཉིད།།

ཡེ་ནས་ཇི་བཞིན་མ་བཅོས་པའི། །རང་བྱུང་དཀྱིལ་འཁོར་ཆེན་པོར་དགོངས།།

དེའི་དུས་སུ་འོག་མིན་སྟུག་པོ་བཀོད་པའི་ཞིང་གི་རྡུལ་གཅིག་གི་སྟེང་ན་རྡུལ་སྙེད་ཀྱི་རྒྱལ་བ་ཇི་སྙེད་པ་ཡང་རྟའི་ཚོགས་དང་དགོངས་པ་མི་གཉིས་པར་ངོ་བོ་ཆོས་ཉིད་མི་འགག་པའི་གསང་བ་གཅིག་ཏུ་འདུས་པས་བདུད་བཏུལ་བ་དང་ཁམས་ཀྱི་གྲོང་ཁྱེར་གསུམ་པོ་ཀུན་གཉིས་མེད་ཀྱི་ངང་དུ་ཡེ་སྒྲོལ་ཏེ་ཡེ་ཤེས་ཆེན་པོས་གཟུང་འཛིན་ང་ བདག་གི་རང་བཞིན་གཞི་མེད་ཡེ་དག་ཏུ་གྲོལ་བས་བྱང་ཆུབ་སྙིང་པོར་ཡང་དག་པར་དགོད་པའི་དགོངས་པ ་མཛད་དེ། ཆགས་སྡང་གཏི་མུག་གི་དུག་གསུམ་པོ་ས་བོན་རྩ་བ་ནས་ཟད་ཅིང་གཏན་སྤྲུགས་སུ་གཅོད་པའི་སྐུ་གསུང་ཐུགས་ཀྱི་བྱིན་གྱིས་བརླབས་པར་མཛད་ནས། གནས་གཅིག་ཏུ་ཡང་ཡང་འཁོར་བའི་འགྲོ་བ་རྣམས་ཀྱི་སྡུག་བསྔལ་ཐམས་ཅད་ཆོས་ཉིད་མཉམ་པ་ཆེན་པོའི་ངང་དུ་རྣམ་པར་མི་རྟོག་པའི་སྤྱན་རས་ཀྱིས་གཟིགས་སོ། །གང་སྒོ་གསུམ་གདུང་བའི་ངོ་བོ་ཉིད་ཀྱང་ནམ་མཁའི་འཇའ་རླན་དང་འདྲ་ཞིང་ལམ་གཞན་དུ་མ་དམིགས་པ་དེ་ཉིད་ཀྱི་དོན་ལ་རྟོགས་པ་གདེང་ཆུད་པས་མཐར་ཕྱིན་པའི་ཕྱིར་སྡུག་བསྔལ་ཐམས་ཅད་བྱང་ཆུབ་ཀྱི་ལམ་དུ་རང་གྲོལ་བར་མཛད་ཅིང༌། དགེ་སྡིག་གམ་སྨད་པར་བྱ་བའི་ལས་ཉིད་ཀྱང་རིལ་བྱང་ཆུབ་སེམས་ཀྱི་མཛད་པ་ལས་ཐལ་བ་མེད་པས་ཆོས་ཉིད་རང་བྱུང་གི་ཡེ་ཤེས་ཆེན་པོར་རང་གསལ་བར་འགྲེལ་བའི་ཕྱིར། དེས་བསྐྱེད་པའི་རྣམ་པར་སྨིན་པའི་འབྲས་བུ་ལོག་པའི་སྒོ་གསུམ་པོའང་ཡེ་མ་དམིགས་པས་སུན་ཕྱུང་སྟེ་རྡོ་རྗེ་གསུམ་གྱི་ངོ་བོ་ཉིད་དུ་བྱ་བྱེད་མེད་པར་གསལ་བ་ནི། གློ་བུར་དུ་ལམ་པས་བྱས་པ་མིན་ཏེ། ཡེ་ནས་ཇི་བཞིན་པའི་གནས་ལུགས་མ་བཅོས་མ་བྱས་ཏེ་རྒྱུ་རྐྱེན་དང་བྲལ་བའི་ངོ་བོ་རང་བྱུང་དོན་གྱི་དཀྱིལ་འཁོར་ཆེན་པོར་ལྷུན་གྱིས་རྫོགས་པའི་ངང་དུ་དགོངས་པ་དམ་པ་མཛད་དོ། །དེ་ལྟ་བུའི་དོན་ནི་ངོ་བོ་གཉིས་མེད་ལ་དགོངས་པས་གདུལ་བྱའི་སྣང་བ་ལ་རྟའི་ཚོགས་ལ་རྒྱལ་བ་རྣམས་ཀྱིས་མཐུ་བཏང་བ་དང༌། དེ་ཉིད་ཀྱི་མཛད་པ་མི་དོར་བའོ།།

བཞི་པ་བདུད་བཏུལ་བའི་སྦྱོར་བ་མཛད་པ་ནི།

གསང་བདག ཅེས་པ་ནས། བྱིས་པར་བསྟན། །ཞེས་པའི་བར་གྱིས་བསྟན་ཏེ།

གསང་བདག་རྡོ་རྗེ་འཛིན་པ་ཡང་། །སྐུ་དང་གསུང་ཐུགས་རྡོ་རྗེ་ལས། །སྤྲུལ་པའི་སྲས་མཆོག་རྡོ་རྗེ་འཛིན།།

གཞོན་ནུ་བྱེ་བ་ས་ཡར་མཛད། །ཐམས་ཅད་དབྱར་གྱི་སྤྲིན་ཕུང་བཞིན། །ནམ་མཁའ་དབྱིངས་ཀྱི་མཐས་ཀླས་པར།།

མ་ལ་ཡ་ཡི་རྩེ་ལ་ལྷགས། །འཐུན་འཇུག་ཐབས་ཀྱི་ཆ་བྱད་དུ། །གང་འདིར་བྱིས་པའི་སྤྱོད་པ་ཡི།།

བདུད་ཀྱི་སྤྱོད་ཡུལ་ཀུན་མཛད་དེ། །འཇིག་རྟེན་ཁམས་སུ་བྱིས་པར་བསྟན།།

རྟའི་ཚོགས་མ་ལ་ཡའི་རྩེར་སོ་མཛད་པའི་ཚེ་འོག་མིན་གྱི་ཞིང་དུ་དན་ཕག་ཕྱག་ན་རྡོ་རྗེར་གྱུར་པའི་གསང་བདག་རྡོ་རྗེ་འཛིན་པ་༼༣༨༡༽ཆེན་པོ་ཡང་ཐུགས་དམ་གྱི་དབང་གིས་སྐུ་དང་གསུང་དང་ཐུགས་ཀྱི་རྡོ་རྗེ་གསུམ་མི་ཕྱེད་པ་ལས་སྤྲུལ་པའི་སྲས་མཆོག་རྡོ་རྗེ་འཛིན་པའི་བཀོད་པ་དཔལ་ཆེན་པོ་རྡོ་རྗེ་གཞོན་ནུ་བྱིས་པའི་གཟུགས་ཅན་གྲངས་ལས་འདས་པ་བྱེ་བ་ས་ཡར་སྣང་བར་མཛད་པ་ཇི་སྙེད་པ་ཐམས་ཅད་ཀྱང་དབྱར་གྱི་སྤྲིན་དཔུང་གཏིབས་པ་བཞིན་དུ་ནམ་མཁའི་དབྱིངས་ཀྱི་མཐའ་ཀླས་པར་ཁྱབ་ཅིང་གང་བར་མཛད་པ་ཡང༌། གནས་མ་ལ་ཡ་ཡི་རྩེ་དེ་ལ་ལྷགས་ཏེ་སྲིན་པོའི་སྤྱོད་པ་དང་མཐུན་འཇུག་གི་ཐབས་ཀྱི་ཆ་བྱད་ཅན་དུ་བསྟན་ཏེ་གང་འདིར་ཅིར་ཡང་མི་འགོག་པ་མཛད་པའི་ཕྱིར་བྱིས་པའི་སྤྱོད་པ་དང་མཐུན་པའི་གདུལ་ཐབས་ཀྱི་མཛད་པ་ཡིས་བདུད་ཀྱི་སྤྱོད་ཡུལ་ཀུན་ཀྱང་ཆ་མཐུན་དུ་མཛད་དེ་འཇིག་རྟེན་གྱི་ཁམས་སུ་བྱིས་པའི་སྤྱོད་པར་སྣང་བའི་རྣམ་འཕྲུལ་གྱི་བཀོད་པ་བསྟན་པར་མཛད་དོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ལས་བཞི་རྡོ་རྗེ་བསྐོས་ཀྱི་ལེའུ་སྟེ་ཉི་ཤུ་དྲུག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྤྱིའི་དབང་དུ་ལས་བཞི་ལ་དགོངས་ཀྱང་འདིར་གཙོ་ཆེ་བའི་ངོས་ནས་དབང་དང་དྲག་པོའི་ལས་གཉིས་ཁོ་ན་མཛད་པའི་ཕྱིར་གཅིག་ལ་གཅིག་བསྒོ་བ་དང༌། རྟའི་ཚོགས་བསྐུལ་ཏེ་སོ་མཛད་པ་དང༌། སྟུག་པོ་བཀོད་པའི་སངས་རྒྱས་རྣམས་ཀྱིས་དགོངས་པ་མཛད་པ་དང༌། རྡོ་རྗེ་འཛིན་པས་རྡོ་རྗེ་སྙིང་པོ་ཉིད་ལ་བསྐུལ་ཞིང་ཉིད་ཀྱི་ལས་སོ་སོར་བསྐོས་པའི་དོན་སྟོན་པས་གང་གིས་འདུལ་བའི་ལས་བཞི་རྡོ་རྗེ་སྐོས་ཀྱི་ལེའུ་སྟེ་ཉི་ཤུ་རྩ་དྲུག་པ་རྣམ་པར་བཤད་པའོ།། །།

ལེའུ་ཉེར་བདུན་པ་བདུད་ཡོངས་སུ་བཏུལ་བ།

༈ གཉིས་པ་བདུད་བཏུལ་བ་དངོས་ལ་བརྒྱད་དེ། རུ་ཏྲའི་འཁོར་དང་སྤྱོད་ཡུལ་བསྟན་པ། འཁོར་དང་སྤྱོད་ཡུལ་གཞན་དུ་བསྒྱུར་བ། དེ་ལས་མ་རངས་པའི་རྟོག་པ་སྲིན་མོས་བསལ་བ། ལས་ཀྱི་སྲིན་མོ་ལ་རྡོ་རྗེ་སྲིན་པོའི་སྐུ་འཁྲུངས་པ། དེ་ལ་རུ་ཏྲས་དམག་བསགས་པ། བདུད་བཏུལ་བ་རང་གི་ངོ་བོ། སྨྲེ་སྔགས་བཏོན་ཅིང་ལུས་དང་འཁོར་ཕུལ་བ། རང་རྟགས་སྲོག་གི་སྙིང་པོ་ཕུལ་བས་བྱིན་གྱིས་བརླབས་པའོ། །དང་པོ་ནི།

དེ་ནས་མཐུན་འཇུག ཅེས་པ་ནས། དབང་མོ་བརྐམ་མར་གྲགས། །ཞེས་པའི་བར་གྱིས་བསྟན་ཏེ།

དེ་ནས་འཇུག་འཐུན་སྐྱེས་བུ་དེས། །འཐུན་པའི་སྤྱན་གྱིས་གང་གཟིགས་ན། །ལས་ཀྱི་ཡི་དྭགས་དྲག་པོ་དེ། །དངོས་པོ་བཞིས་ནི་དབང་བྱས་པ། །རྣམ་པར་སྨིན་པའི་དངོས་པོ་ནི། །བམ་རི་ཐོད་པ་མཁར་ཀྱི་རྩེར། །ཁྲག་དང་བཤང་གཅི་ཤ་ཆེན་དང་། །རྐང་དང་ཀླད་པ་ཀླད་རྒྱ་དང་། །རྣག་དང་ཆུ་སེར་ལ་སོགས་པའི། །འདམ་གྱི་ཕྲུ་མ་ཡོངས་སུ་བསྐོར། །འབུ་དང་ཤིན་ཏུ་འབུ་ཆེན་པོ། །སྦྲང་མ་སྦྲང་རྒོད་བུང་བ་དང་། །སྦྲུལ་དང་སྡིག་པ་སྡོམ་ལ་སོགས། །ཀང་ཀ་ཁྭ་སྐེགས་འུག་པའི་ཚོགས། །ཅེ་སྤྱང་སྟག་སེང་ལ་སོགས་པའི། །གདུག་པ་ཅན་གྱི་འཁོར་གྱིས་བསྐོར། །ལྷ་ཡི་དེད་དཔོན་ཀ་རུ་ནའི། །བུ་མོ་ཆུང་མ་མ་སྲིང་དང་། །འཇིག་རྟེན་དབང་ཕྱུག་ལྷ་ཆེན་གྱི། །མ་སྲིང་བུ་མོ་ཆུང་མ་རྣམས། །ཕྲོགས་ནས་དབང་དུ་བྱས་པ་ཡིས། །སླས་དང་བྱི་མོ་བྲན་མོའི་ཚུལ། །བཅུ་གཉིས་དང་ནི་བརྒྱད་ལ་སོགས། །མ་མོ་ཕྲ་མེན་གནོད་སྦྱིན་མོ། །སྲིན་མོ་ཤ་ཟ་ཁྲག་འཕྲོག་མ། །བདུད་ཀྱི་མི་འཛིན་བླ་རྐུན་མ། །བློན་མོ་དམག་དཔོན་སྡེ་དཔོན་མ། །རུད་དཔོན་ཕོ་ཉ་མངག་པར་བཅས། །རང་རང་སྟན་དང་ལག་ཆར་བཅས། །ཅི་བགྱི་བཀའ་ཉན་བཀའ་སྡོད་འཁོར། །རྦོད་གཏོང་རྔམ་པའི་ཚུལ་དུ་འཁོད། །སྲིད་པའི་བུ་མོ་དྲི་ཟ་བརྒྱད། །སེང་སྟག་ཝ་སྤྱང་བཞད་ཚོགས་དང་། །དུར་བྱ་བྱ་རོག་འུག་པའི་ཚོགས། །བསྟོད་ཅིང་རྔམ་པའི་ཚུལ་དུ་འཁོད། །སྲིན་པོའི་ཉེ་གནས་ཆེན་མོ་བརྒྱད། །ཀེའུ་རི་རྩེའུ་རི་པྲ་མོ་ཧ། །པེ་ཏ་ལི་དང་པུ་ཀ་སི། །ཀསྨ་རི་དང་སྨ་ཤ་ནི། །ཙན་ད་ལི་ལ་སོགས་པ་ཡི། །གཏུམ་ཞིང་རྔམ་པའི་མ་ཚོགས་མ། །ཤིན་ཏུ་འཇིགས་པའི་གཟུགས་སུ་འཁོད། །དུར་ཁྲོད་ས་ཡི་སྒོ་སྲུང་བཞི། །བརྩོན་མོ་གདོང་མོ་གར་ལོག་མོ། །དེ་བཞིན་འཇུག་མ་ཆེན་མོ་བཞི། །གསང་སྒོ་འཛིན་ཅིང་བཀའ་བསྒོ་བསྲུང་། །དུར་ཁྲོད་བདག་པོའི་གྲུ་འདེགས་མ། །བརྐམ་མ་ཤིན་ཏུ་བརྐམ་མ་དང་། །ར་རོ་མ་དང་ཁྲག་འཐུང་མ། །ཆགས་པས་མྱོས་པའི་མདངས་ཀྱིས་འཁོད། །བམ་རི་ཐོད་པ་བརྩེགས་པའི་དབུས། །གནམ་ལྕགས་འབར་བའི་གཟེར་ཆེན་གྱིས། །བརྟེན་པར་བཏབ་པའི་ནད་བདག་མོ། །ཉེ་གནས་ཀྲོ་ཏི་ཤྭ་རི་མ། །ཐོད་སྐྱོགས་ཁྲག་གིས་བཀང་བ་དང་། །འབྲུ་མར་རྫས་ལྔ་ཆང་སྦྱར་བ། །རྟག་པར་རང་གི་ལོངས་སྤྱོད་འཛིན། །ཆགས་པས་མྱོས་ཤིང་བརྐམས་པས་ན། །འདོད་པའི་དབང་མོ་བརྐམ་མར་གྲགས།།

ལེའུ་འདིས་དྲང་དོན་སྟོན་ནོ། །དེ་ནས་ཞེས་མ་ལ་ཡའི་རྩེར་བྱོན་པ་ལ་སྙེགས་པ་དང་འོག་ནས་འབྱུང་བའི་དོན་འདྲེན་པའི་སྐབས་ཀྱི་འབྲེལ་བའི་ཚིག་སྟེ། རྡོ་རྗེ་འཛིན་པ་ཆེན་པོ་རུ་ཏྲ་དང་༼༣༨༢༽མཐུན་འཇུག་གི་ཚུལ་དུ་ཤིན་ཏུ་ཁྲོས་པས་ཧེ་རུ་ཀར་བྱུང་བའི་རྒྱལ་ཚབས་སྐྱེས་བུ་སྤྲུལ་པ་གཞོན་ནུའི་འབྱུང་གནས་དེས། མཐུན་འཇུག་བྱིས་པའི་སྤྱོད་པ་མཛད་པའི་སྤྱན་གྱིས་གང་དུར་ཁྲོད་བདག་པོའི་དངོས་པོ་རྣམས་ཚུལ་ཇི་ལྟར་གཟིགས་ན་འདི་བཞིན་ཏེ། ལས་ཀྱི་དབང་གིས་སྐྱེས་པའི་ཡི་དྭགས་དྲག་པོ་དེ་ཉིད། འཁོར་བའི་དངོས་པོ་འདམ་མཚན་ལ་སོགས་པ་བཞིས་ནི་རྟག་པར་དབང་དུ་བྱས་པ་ཁོ་ནར་གྱུར་ལ། གདུག་པས་རྣམ་པར་སྨིན་པའི་དངོས་པོ་རུ་ཏྲ་གང་གི་གནས་ཚུལ་ནི། རོ་རུས་བརྩེགས་པས་བམ་རི་ཐོད་པ་མཁར་གྱི་རྩ་བར་འོབས་ཆེན་པོ་ཁྲག་དང་གཅིག་བཤང་བ་དང་གཉིས་གཅི་བ་དང་གསུམ་ཤ་ཆེན་དང་བཞི། རྐང་དང་ལྔ་ཀླད་པ་དང་དེའི་སྲི་ཀླད་རྒྱས་དང་དྲུག་རྣག་དང་བདུན་ཆུ་སེར་དང་བརྒྱད་དེ་ལ་སོགས་ཞེས་པས་དུག་དང་མེ་དང་མཚོན་དང་བཅས་པའི་འདམ་རྣམས་ཀྱིས་ཡོངས་སུ་གང་བའི་འོབས་ཀྱི་ཕྲུ་མས་གྲོང་རྡལ་གྱི་ཚུལ་དུ་ཡོངས་སུ་བསྐོར་ཞིང༌། དེའི་ནང་ན་ས་ལ་གནས་པའི་འབུ་དང་སྦྲུལ་ལྟ་བུ་ཤིན་ཏུ་འབུ་ཆེན་པོ་དང༌། མཁའ་ལ་གནས་པའི་སྦྲང་མ་དང་སྦྲང་རྒོད་དང་བུང་བ་སྣ་ཚོགས་དང༌། གཞན་ཡང་སྦྲུལ་དང་སྡིག་པ་དང་སྡོམ་ལ་སོགས་པ་མང་པོ་དང༌། འདབ་ཆགས་ཀྱི་རིགས་ཀང་ཀ་དང་ཁྭ་དང་རི་སྐེགས་དང་འུག་པའི་ཚོགས་དང༌། གཅན་གཟན་གྱི་རིགས། ཅེ་སྤྱང་དང་སྟག་དང་སེང་གེ་ལ་སོགས་པའི་གདུག་པ་ཅན་གྱི་ཚོགས་རྣམས་ཀྱིས་བསྐོར་བར་གྱུར་ལ། ལྷ་ཡི་སྡེ་དཔོན་ཀ་རུ་ནའི་བུ་མོ་དང་ཆུང་མ་དང་མ་དང་སྲིང་མོ་རྣམས་དང༌། འཇིག་རྟེན་གྱི་དབང་ཕྱུག་ལྷ་ཆེན་པོ་རྣམས་ཀྱི་མ་དང་སྲིང་མོ་ཆུང་མ་དང་བུ་མོ་རྣམས་ཕྲོགས་ནས་དབང་དུ་བྱས་པ་ཡི་སླས་དང་བྱི་མོ་དང་བྲན་མོའི་ཚོགས་ཀྱི་དབང་ཕྱུག་མ་བཅུ་ཕྲག་གཉིས་དང་ནི་བརྒྱད་ལ་སོགས་པའི་མ་མོ་དང་ཕྲ་མེན་མ་གནོད་སྦྱིན་མོ་དང་སྲིན་མོ་ཤ་ཟ་མ་དང་ཁྲག་འཕྲོག་མ་རྣམས་དང༌། གཞན་ཡང་བདུད་ཀྱི་མིང་འཛིན་པས་བརླ་རྐུན་མ་དང༌། དེ་བཞིན་དུ་བློན་གྱི་ཚུལ་བྱེད་པས་བློན་མོ་དང་དམག་དཔོན་བྱེད་མ་དང་ཕྱོགས་བཞི་ལྟ་བུའི་སྡེ་དཔོན་མ་དང་དམག་ཉུང་ངུའི་དཔོན་ལྟ་བུ་རུ་དཔོན་མ་དང་མངག་གཞུག་བྱེད་པ་མོ་དང་ཕོ་ཉར་འགྱེད་པའི་མ་ཚོགས་བཅས་རང་རང་གི་ཞིང་ལ་སོགས་པའི་སྟན་དང་མཚོན་ཆ་སོགས་ལག་ཆར་བཅས་ཏེ་རུ་ཏྲ་ལ་ཅི་བགྱི་ཞེས་བཀའ་ལ་ཉན་པ་དང་བཀའ་བཞིན་སྡོད་པའི་འཁོར་གྱི་ཚོགས་༼༣༨༣༽རྣམས་ཟ་ཟ་རྔམ་རྔམ་ལྟ་བུར་26སྦོད་གཏོད་རྔམ་པའི་ཚུལ་དུ་འཁོད་ཅིང་གནས་སོ། །སྲིད་པའི་དབང་ཕྱུག་སྲིན་པོའི་བུ་མོ་དྲི་ཟ་ཆེན་མོ་ཤ་ཟ་ཞིང་ཁྲག་འཐུང་བའི་ཕྲ་མེན་མ་བརྒྱད་སེང་གེ་དང་སྟག་དང་ཝ་དང་སྤྱང་ཀི་དང་བཞད་གདོང་མའི་ཚོགས་དང༌། དུར་བྱ་དང་བྱ་རོག་དང་འུག་པའི་གདོང་ཅན་གྱི་ཚོགས་འཁོར་དང་བཅས་པ་རྣམས་ལས་ལ་རྟོད་ཅིང་རྔམ་པའི་ཚུལ་དུ་འཁོད་དོ། །སྲིན་པོའི་ཉེ་གནས་མ་མོ་ཆེན་མོ་བརྒྱད་དེ་ཀཽ་རི་མ་དང་ཙཽ་རི་མ་དང་པྲ་མོ་ཧ་དང་བེ་ཏ་ལི་དང་པུཀྐ་སི་དང་གྷསྨ་རི་དང་སྨ་ཤ་ནི་དང་ཙཎྜ་ལི་ལ་སོགས་པ་ཡི་སོ་སོའི་འཁོར་དང་བཅས་ཏེ་གཏུམ་ཞིང་རྔམ་པའི་མ་ཚོགས་མ་རྣམས་ཆ་ལུགས་རྒྱན་དང་ཁ་དོག་བཅས་ཤིན་ཏུ་འཇིགས་པའི་གཟུགས་སུ་འཁོད་དོ། །དུར་ཁྲོད་ཀྱི་ས་ཡི་སྒོ་སྲུང་མ་བཞི་བཙོན་མོ་རྟ་གདོང་མ་དང༌། གདོང་མོ་ཕག་གདོང་མ་དང༌། གར་ལོག་མོ་དྲེད་གདོང་མ་དང༌། འདི་པ་མཆན་ལ་ལར་སེང་གདོང་མར་ཡང་གསུངས། དེ་བཞིན་དུ་འཇུག་མོ་སྤྱང་གདོང་མ་ཆེན་མོ་བཞི་པོ་རྣམས་ལོག་སྡེའི་གསང་སྒོ་འཛིན་ཅིང་རུ་ཏྲའི་བཀའ་སྒོ་སྲུང་ནས་གནས་སོ། །དུར་ཁྲོད་ཀྱི་བདག་མོ་བཞི་ནི་རྒྱལ་པོ་བཞིའི་ཆུང་མ་སྟེ་རི་རབ་ཕྱོགས་ཀྱི་གྲུ་ནས་འདེགས་པའི་ཚུལ་ཅན་མ་གསང་བའི་ཡུམ་བཞི་ཤར་དུ་བརྐམ་མ། ལྷོར་ཤིན་ཏུ་བརྐམ་མ་དང༌། ནུབ་ཏུ་ར་རོ་མ་དང༌། བྱང་དུ་ཁྲག་འཐུང་མ་དང་བཞི་པོ་ཆགས་པས་མྱོས་པའི་མདངས་ཀྱིས་འཁོད་ནས་གནས་སོ། །ཆུང་མ་ཇི་ལྟར་གནས་ན་རོ་སྤུངས་པས་བམ་རི་ཐོད་པ་བརྩེགས་པའི་མཁར་གྱི་དབུས་ན་གནམ་ལྕགས་འབར་བའི་ཐོག་གིས་གཟེར་ཆེན་གྱིས་ཤིན་ཏུ་བརྟན་པར་བཏབ་པའི་ནང་ན། བདག་མོ་ཉེ་གནས་ཀྱི་གཙོ་མོ་ཀྲོ་ཏི་ཤྭ་རི་མ་ཞེས་བྱ་བ། ཐོད་སྐྱོགས་ཁྲག་གིས་བཀང་བ་དང་ཀླད་པ་སོགས་འབྲུ་མར་རྫས་ལྔ་ཆང་དང་སྦྱར་བ་རྟག་པར་རང་གིས་ལོངས་སྤྱོད་ཅིང་འཛིན་ཏེ་གནས་ལ། དེ་ཉིད་ཆགས་པས་མྱོས་ཤིང་གྲོགས་ལ་བརྐམ་པས་ན། འདོད་པའི་དབང་མོ་བརྐམ་མར་ཡོངས་སུ་གྲགས་སོ། །ནང་ལྟར་ན་བམ་རི་ཐོད་མཁར་ནི་རང་གི་ལུས་ཡིན་ལ་ཁྲག་ལ་སོགས་པ་དེ་ལ་ཡོད་པའི་ཆོས་དང་ཀང་ཀ་སོགས་ནི་ནང་རོལ་དང་སླས་སོགས་བདག་འཛིན་དང་མཚུངས་པར་ལྡན་པའི་སེམས་དང་སེམས་བྱུང་ཡིན་ཞིང་ཕྲ་མེན་མ་བརྒྱད་ཡུལ་བརྒྱད་དང༌། ཉེ་གནས་བརྒྱད་ནི་རྣམ་ཤེས་ཚོགས་བརྒྱད། སྒོ་སྲུང་བཞི་ནི་ཕྱིན་ཅི་ལོག་བཞི། གྲུ་འདེགས་མ་བཞི་ནི་བདག་ཏུ་རྨོངས་པ་ཆགས་པ་ང་རྒྱལ་༼༣༨༤༽བ་བདག་ཏུ་ལྟ་བ་བཞི་སྟེ་དེ་རྣམས་ཐབས་ཀྱི་ཡེ་ཤེས་ཆེན་པོས་གྲོལ་བར་མཛད་པའོ།།

གཉིས་པ་འཁོར་དང་སྤྱོད་ཡུལ་གཞན་དུ་བསྒྱུར་བ་ལ་བཞི་སྟེ། སྨེ་བརྩེགས་བཏོན་ཏེ་འོབས་ལྔ་བསྒྱུར་བ། འཁོར་མོ་ལ་ཡེ་ཤེས་ཀྱི་སྤྲུལ་པ་བཞག་པ། སྲིན་མོའི་ལྷུམས་སུ་རྡོ་རྗེ་སྲིན་པོ་བཞག་པ། བསྒྱུར་ནས་སྙིང་པོ་བྱང་ཆུབ་ལ་བཞུགས་ཤིང་སྡུད་པ་པོ་མཛད་པའོ། །དང་པོ་ནི།

རུ་ཏྲའི་ཕྲུ་མ། ཞེས་པ་ནས། སྟོང་ཉིད་རྡོ་རྗེར་སྦྱངས། །ཞེས་པའི་བར་གྱིས་བསྟན་ཏེ།

རུ་དྲའི་ཕྲུ་མ་གྲོང་རྡལ་དེ། །འབར་བ་ཆེན་པོའི་གར་དགུ་ཡིས། །བཅོམ་ནས་དབང་དུ་མཛད་པའི་ཕྱིར། །སྡེ་དཔོན་བཏུལ་བའི་འཁོར་འདུས་པ། །འཇིག་རྟེན་དབང་ཕྱུག་མཐུ་ཆེན་རྣམས། །ཕལ་ཆེར་ལས་ལ་གྲམ་སྐབས་སུ། །དཔལ་ཆེན་རྡོ་རྗེ་འཛིན་པ་དེའི། །དེ་ཉིད་ཡང་དག་དངོས་མིན་པའི། །གཞོན་ནུ་བསྣམ་ནས་སྟོན་པའི་སྲས། །རྡོ་རྗེ་གཞོན་ནུ་སྨེ་བ་བརྩེགས། །མཐིང་ནག་ཁྲོ་གཉེར་རལ་པ་ཅན། །འབར་བ་ཆེན་པོའི་གར་དགུར་མཛད། །དུར་ཁྲོད་བདག་པོ་ཇི་བཞིན་དུ། །དབུ་དང་ཕྱག་ཞབས་དེར་མཛད་དེ། །བདུད་རྩི་ལྔ་ཡི་སྦྱོར་བ་ཡིས། །བཤང་བ་ལྔ་ནི་བདུད་རྩིར་བསྒྱུར། །ཐམས་ཅད་སྟོང་ཉིད་རྡོ་རྗེར་སྦྱངས།།

དེ་ནས་བཏུལ་བར་དགོངས་ཏེ། རུ་ཏྲའི་མངའ་འབང་གི་ཚོགས་ཀྱི་ཕྲུ་མ་གྲོང་རྡལ་དེ་ཉིད་འབར་བ་ཆེན་པོའི་གར་དགུ་ཡིས་བཅོམ་ནས་དབང་དུ་མཛད་པའི་ཕྱིར་དུ་ལྷའི་སྡེ་དཔོན་བཏུལ་བའི་འཁོར་རྣམས་རུ་ཏྲའི་འཁོར་དུ་འདུས་པ་ཡི་འཇིག་རྟེན་པའི་དབང་ཕྱུག་མཐུ་ཆེན་ལྡན་པ་རྣམས་དབང་དུ་བསྡུས་པས་དྲེགས་པ་འཁོར་བཅས་ཀྱི་ཕལ་ཆེར་རང་རང་གི་ལས་ལ་གྲམ་སྟེ་ཕོ་རྣམས་ཕྱོགས་གཅིག་ཏུ་སྐྱམ་ལིང་ལ་སོང་བ་སྐྱེས་བུས་གཟིགས་ཏེ་རང་གི་གནས་ནས་དོང་བའི་སྐབས་སུ་མོ་ལ་སྦྱོར་བས་སྲས་ཀྱིས་འདུལ་བའི་ཆེད་དུ་དཔལ་ཆེན་པོ་རྡོ་རྗེ་འཛིན་པ་ཧེ་རུ་ཀ་དེའི་གསང་བདག་དེ་ཉིད་ཡང་དག་པའི་སྐུ་དངོས་མིན་པར་སྤྲུལ་པའི་རྣམ་རོལ་དུ་རྡོ་རྗེ་གཞོན་ནུ་དེ་ཉིད་ཡུམ་མེད་པའི་ཕྱིར་སྣམ་ནས་བཏོན་པའི་སྲས་ལྟ་བུར་ཆོས་ཉིད་ལས་སྣང་བར་མཛད་དོ། །ཁྲོ་ཆེན་རྡོ་རྗེ་གཞོན་ནུ་དེ་ལ་སྣམ་ནས་བཏོན་པ་དང་མི་གཙང་བའི་འོབས་རྣམས་ཞལ་དུ་གསོལ་བས། མཚན་སྨེ་བ་བརྩེགས་པ་ཞེས་བྱ་བ་སྐུ་མདོག་མཐིང་ནག་ཁྲོ་གཉེར་ཆེན་པོས་བརྗིད་ཅིང་རལ་པ་གྱེན་དུ་བརྫེས་པ་ཅན་སྐུ་འབར་བ་ཆེན་པོའི་གར་དགུར་མཛད་པ་དེ་ཡང་དུར་ཁྲོད་ཀྱི་བདག་པོ་དྲེགས་པ་ཇི་འདྲ་བ་དེ་བཞིན་དུ་མཛད་པ་ནི་སྲིན་མོ་ལ་སྣང་བར་བྱེད་པའི་ཆེད་དུ་སྟེ་སྨེ་བ་བརྩེགས་པའི་དབུ་དང་ཕྱག་ཞབས་ཀྱང་དེར་མཐུན་དུ་མཛད་དེ། བདུད་རྩི་ལྔ་ཡི་སྔགས་ཀྱི་སྦྱོར་བ་ཨ་ཨཱཿ ཧཱུྃ་སརྦ་པཉྩ་ཨ་མྲ་ཏ་ཧཱུྃ་ཧྲཱིཿ ཋ། ཞེས་པའི་ཆོ་འཕྲུལ་དེ་ཡིས་རུ་ཏྲས་མི་གཙང་བའི་ཚོགས་ཀྱིས་འོབས་བཀང་བའི་བཤུང་བ་དམ་རྫས་ལྔ་ནི་ཡེ་ཤེས་རང་སྣང་གི་བདུད་རྩིར་བསྒྱུར་བར་མཛད་དེ་ཞལ་དུ་གསོལ་ནས་མི་གཙང་བའི་འོབས་ལ་སོགས་པ་ཐམས་ཅད་སྟོང་པའི་ཆོས་ཉིད་སྐྱེ་བ་མེད་པའི་རྡོ་རྗེར་སྦྱངས་ནས་མི་སྣང་བར་བྱས་སོ།།

གཉིས་པ་འཁོར་མོ་ལ་ཡེ་ཤེས་ཀྱི་སྤྲུལ་པ་བཞག་པ་ནི།

ཉེ་གནས་ལ་སོགས། ཞེས་པ་ནས། ལ་སོགས་ཡུལ་དུ་སྣང༌། །ཞེས་པའི་༼༣༨༥༽བར་གྱིས་བསྟན་ཏེ།

ཉེ་གནས་ལ་སོགས་འཁོར་མོ་རྣམས། །སྤྱོད་ལ་མ་ཆགས་ཡེ་ཤེས་དང་། །བྱས་ལ་མི་སོགས་འཕྲིན་ལས་ཀྱི། །འཐུན་འཇུག་ཁྲིད་པའི་སྦྱོར་ཐབས་ཀྱིས། །དབང་སྡུད་ངང་སྦྱངས་སྤྲུལ་པ་ནི། །སེམས་དཔའ་ཡེ་ཤེས་སྤྲུལ་པའི་ཚོགས།།

ཀེའུ་རི་ལ་སོགས་མ་ཚོགས་དང་། །སེང་སྟག་ལ་སོགས་ཡུལ་དུ་སྣང་།།

དེ་ནས་ཉེ་གནས་ལས་ཀྱི་ཀཽ་རི་མ་བརྒྱད་དང་ལ་སོགས་པས་བསྡུས་པ་བུ་མོ་ཕྲ་མེན་བརྒྱད་དང་དུར་ཁྲོད་ཀྱི་སྒོ་སྲུང་བཞི་སོགས་འཁོར་མོ་བུད་མེད་ཀྱི་ཚོགས་རྣམས་ལ་འདོད་པ་སྤྱོད་པ་ལྟར་སྣང་ལ་མ་ཆགས་པའི་ཡེ་ཤེས་དང༌། སྦྱོར་བ་བྱས་ལ་སྒྲིབ་པ་མི་གསོགས་པའི་ཕྲིན་ལས་ཀྱིས། འདོད་ཆགས་ཀྱི་མཐུན་འཇུག་གིས་དོན་ལ་ཁྲིད་པའི་སྦྱོར་བའི་ཐབས་ཀྱིས་ཆ་མཐུན་དུ་མཛད་ནས་འཁོར་མོ་རྣམས་དབང་དུ་བསྡུས་ཤིང་ཉོན་མོངས་པ་རྣམས་ངང་གིས་སྦྱངས་ཏེ་དེ་དག་གི་ལྷུམས་སུ་ཐུགས་ཡེ་ཤེས་རང་སྣང་བའི་སྤྲུལ་པ་བཞག་པ་ནི། ཞི་བའི་སྐབས་ཀྱི་སེམས་དཔའ་ཡབ་ཡུམ་སྒོ་མ་བཞི་སོགས་དཔལ་སྨེ་བ་བརྩེགས་པའི་ཡེ་ཤེས་ལས་ཁྲོ་བོའི་དཀྱིལ་འཁོར་དུ་སྤྲུལ་པའི་ཚོགས་རྣམས་དེ་དག་ལས་སྲས་སུ་ཐོན་པ་ན་ཡེ་ཤེས་ཀྱི་ཀེའུ་རི་ཙེའུ་རི་ལ་སོགས་པ་མ་ཚོགས་རྣམས་དང༌། སེང་སྟག་གི་གདོང་ཅན་ལ་སོགས་ཡེ་ཤེས་ཀྱི་ཕྲ་མེན་རྣམས་དང༌། ཡེ་ཤེས་ཀྱི་སྒོ་མ་བཞི་ལ་སོགས་པར་མཐོང་ཡུལ་དུ་སྣང་སྟེ་མཐུན་པས་མཐུན་པ་འདུལ་བའི་ཕྱིར་རོ། །དེ་བས་ན་ལམ་པས་ཞི་བ་ལས་ཁྲོ་བོར་བསྒོམ་པའང་ཚུལ་འདི་དག་གི་ཕྱིར་རོ། །སླས་ལ་སོགས་པ་རྣམས་ཀྱང་ཐབས་ཆེན་པོས་ཤེས་རབ་ལ་རོལ་ཏེ། ཉེར་བརྒྱད་ནི་ཡེ་ཤེས་ཀྱི་དབང་ཕྱུག་མར་བཀོད་ནས་རྡོ་རྗེ་རྩེ་གསུམ་གྱི་པྲོག་ཞུ་ཅན་དུ་བྱས་ཏེ་ཐམས་ཅད་ཆ་བྱད་བསྒྱུར་བར་མཛད་དོ།།

གསུམ་པ་སྲིན་མོའི་ལྷུམས་སུ་རྡོ་རྗེ་སྲིན་པོ་བཞག་པ་ནི།

འདོད་པའི་དབང་མོ། ཞེས་པ་ནས། བྱིན་རླབས་བརྟན་པར་བྱས། །ཞེས་པའི་བར་གྱིས་བསྟན་ཏེ།

འདོད་པའི་དབང་མོ་བརྐམ་མ་དེས། །ཆགས་པའི་དབང་གིས་གང་མཐོང་བ། །སྤྱིར་ནི་རང་གི་ཁྱོ་བདག་ལྟ། །ལྷག་པར་གཟི་ཆེན་འབར་བ་མཐོང་། །སྙམ་པའི་དབང་གིས་ཐེ་ཚོམ་སྐྱེས། །ཨེ་མའོ་བདག་གི་དབའ་བོ་བས། །ཤིན་ཏུ་འོད་འབར་གཟི་བྱིན་ཆེ། །འདི་ཇི་ལྟ་བར་སྤྲུལ་པ་ཞིག །སྙམ་དུ་ཡིད་གཉིས་བརྟགས་པ་ལས། །ཐབས་མཆོག་རྡོ་རྗེ་གཞོན་ནུ་དེས། །སྲིན་སྐད་ཐངས་གསུམ་ཕྱུང་བ་ལས། །ཐེ་ཚོམ་རྟོག་པ་ཆད་པར་གྱུར། །ཆགས་པའི་དབང་གིས་སངས་རྒྱས་ཀྱི། །སྐུ་ལ་ངེས་པར་འཁྲིལ་བ་ནི། །ཙན་དན་སྤྲུལ་གྱི་སྡོང་པོ་ལ། །ཚད་པས་གདུངས་པའི་སྦྲུལ་འཁྲིལ་བས། །མི་རྟོག་ཚད་པའི་གདུང་སེལ་ལྟར། །གང་ལ་ཆགས་པ་མི་མངའ་བར། །གང་གི་གདུང་བ་རྣམ་པར་སེལ། །དེ་ནས་སྨེ་བ་བརྩེགས་པ་དེས། །ཐམས་ཅད་ཅི་དགར་འབྱུང་པ་ཡི། །ཡིད་བཞིན་ནོར་བུའི་སྙིང་པོ་འདི། །ཉེ་བའི་རིག་པ་འདི་བརྗོད་པས། །བྱ་བ་ཐམས་ཅད་བྱེད་པའི་མཆོག །ཨ་བྷུར་ཀུར། ཨི་ཙི། ཀི་པི། ཨུཙྪུཥྨ་ཀྲོ་ཏ་ཧཱུཾ་ཕཊ། ཡང་དག་དངོས་མིན་ཆོ་འཕྲུལ་འདིས། །སྣང་མཛད་ཆེན་པོའི་ཆོ་འཕྲུལ་བསྡུས། །གང་དུ་དང་པོ་སྤྲུལ་པ་ཡི། །ཨ་གྱི་འོད་ཟེར་མངོན་ཕབ་ནས། །དབང་མོ་བརྐམ་མའི་ལྷུམས་སུ་བཞག །གསང་སྔགས་མངོན་པའི་མཐུ་ཆེན་འདིས། །སྲིན་པོའི་ཆ་ལུགས་མི་འདྲ་བར། །ཡི་གེ་དེ་ཡང་དེར་བསྒྱུར་ཏེ། །གང་དེ་མངོན་སུམ་ལྷུམས་སུ་བཞག །རྡོ་རྗེ་ལྗགས་ཀྱི་འོད་གཟེར་ལས། །རཀྵ་ཤྲཱི་ཧེ་རུ་ཀ །རུ་ཏྲ་མ་ཏྲ་ཧ་ཧ་ཧཾ། །བསྐྱེད་རྫོགས་འཇོམས་བྱེད་ཡི་གེ་ཡི། །མཐུ་ཡིས་བྱིན་རླབས་བརྟན་པར་བྱས།།

དེ་ནས་འདོད་པའི་དབང་མོ་བརྐམ་མ་དེས་སྤྲུལ་པ་རྡོ་རྗེ་སྲིན་པོའི་སྐུ་དེ་ལ་རང་གིས་ཆགས་པའི་དབང་གིས་གང་ལྟར་དུ་མཐོང་བ་ནི། སྤྱིར་ནི་རང་གི་ཁྱོ་བདག་རུ་ཏྲ་ལྟ་བུ་ལ་དེ་བས་ཀྱང་ལྷག་པར་གཟི་བརྗིད་ཆེན་པོ་འབར་བར་མཐོང་ངོ་སྙམ་སྟེ་རྟོག་པའི་དབང་གིས་ཐེ་ཚོམ་སྐྱེས་ཏེ། གཟི་བརྗིད་ལ་ངོ་མཚར་བས། ཨེ་མའོ་ཞེས་བདག་གི་བདག་པོ་བས་ཀྱང༌། ཤིན་ཏུ་འོད་འབར་ཞིང་གཟི་བྱིན་ཆེ་བ་འདི་ནི་ཇི་ལྟ་བའི་སྤྲུལ་པ་ཞིག་ཡིན་ཨང་སྙམ་དུ་ཡིད་གཉིས་བྱུང་ནས་བརྟགས་པ་ལས། ཐབས་མཆོག་རྡོ་རྗེ་གཞོན་ནུ་དེས་མཁྱེན་ཏེ་རུ་ཏྲ་མ་ཏྲ་མ་ར་ཏྲ་ཞེས་སྲིན་སྐད་ཐང་གསུམ་ཕྱུང་བ་ལས་ཐེ་ཚོམ་གྱི་རྟོག་པ་ཆད་པར་གྱུར་ཏོ། །དེ་ནས་དབང་མོ་ཆགས་པའི་དབང་གིས་རྟོག་པ་མ་བྱུང་བར་སངས་རྒྱས་ཀྱི་སྐུ་ལ་ངེས་པར་འཁྲིལ་བ་ནི། དཔེར་ན་ཙན་དན་༼༣༨༦༽སྦྲུལ་གྱི་སྙིང་པོའི་སྡོང་པོ་ལ། ཚད་པས་བདས་པའི་སྦྲུལ་འཁྲིལ་བས་སྡོང་པོས་མི་རྟོག་བཞིན་དུ་སྦྲུལ་གྱི་ཚད་པའི་གདུང་བ་སེལ་བ་ལྟར་དུ། ཁྲོ་མཆོག་སངས་རྒྱས་གང་ལ་ཆགས་པ་མི་མངའ་བར་སྲིན་མོ་གང་གི་གདུང་བ་རྣམ་པར་སེལ་བར་གྱུར་ཏོ། །དེ་ནས་སྒྲོལ་བྱེད་ཀྱི་གཉེན་པོ་ཁྲོ་ཆེན་སྨེ་བ་བརྩེགས་པ་དེས་གདུལ་བྱ་ཐམས་ཅད་དང་འཚམས་པར་ཅི་དགར་འབྱུང་བ་ཡི། ཡོན་ཏན་གྱི་དཔེ་ཡིད་བཞིན་ནོར་བུ་ལྟ་བུའི་སྙིང་པོ་དེ་ཉིད་དུས་ཉེ་བར་འབྱུང་བའི་རིག་པ་སྔགས་འདི་བརྗོད་པར་མཛད་པས་གདུག་པ་འདུལ་བའི་ཕྲིན་ལས་ཀྱི་བྱ་བ་ཐམས་ཅད་བྱེད་ཅིང་སྒྲུབ་པའི་སྙིང་པོ་མཆོག་ཏུ་གསང་བ་སྟེ། ཨ་གྱིས་དབུ་དྲང་སྟེ་བྷུར་ཀུར་ཞེས་བསྙེན་པ། ཨི་ཙི་ཉེ་བསྙེན། ཀི་ཕྱི་བསྒྲུབ་པ། ཨུཙཱུ་སྨ་ཀྲོ་ཏ་བསྒྲུབ་ཆེན། ཧཱུྃ་ཕཊཿ མཐའ་བརྟེན་ཏེ། བསྙེན་བསྒྲུབ་བཞིས་བསྡུས་པའོ། །དེ་ལྟར་ཧེ་རུ་ཀ་ལ་ཆགས་པ་མི་མངའ་བས་སྲིན་མོའི་ཆགས་པ་ལ་མ་ཆགས་ཐབས་ཀྱི་སྦྱོར་བ་མཛད་པས་སེལ་བའི་དུས་སུ་རྡོ་རྗེ་འཛིན་པ་ཁྲོ་བོ་ཧེ་རུ་ཀ་ཉིད་ཡང་དག་དངོས་མིན་པར་སྤྲུལ་པའི་སྒྱུ་འཕྲུལ་སྨེ་བ་བརྩེགས་པའི་ཆོ་འཕྲུལ་འདིས་དེ་བཞིན་གཤེགས་པའི་རིགས་ཀྱི་སྐུའི་ཚོགས་རྣམ་པར་སྣང་མཛད་ཆེན་པོའི་གསུང་གི་ཆོ་འཕྲུལ་སྐུ་ལ་བསྡུས་ཏེ། གང་དུ་དང་པོར་རྣམ་པར་སྣང་མཛད་ཉིད་ཨ་ལས་སྤྲུལ་པ་ལྟར། འདིར་ཡང་ས་བོན་ཐམས་ཅད་པའི་ཕྱིར་ལྷག་པའི་ཁུ་བ་དེ་ཡི་རྣམ་པ་ཉིད་སྐུ་ཇི་སྙེད་པ་མངོན་དུ་འབྱུང་བར་བྱེད་པའི་མཐུ་ཅན་ཡི་གེ་ཨ་གྱི་གཟུགས་ལྟར་འོད་ཟེར་ལས་མངོན་པར་ཕབ་ནས་འདོད་པའི་དབང་མོ་བརྐམ་མའི་ལྷུམས་སུ་བཞག་པར་མཛད་ལ། དེ་བས་ན་གསང་སྔགས་ཀྱི་སྙིང་པོ་ཡི་གེ་ཨ་ནི་སྐུ་ཐམས་ཅད་མངོན་པར་སྣང་བའི་མཐུ་ཅན་ཡིན་པས་ཨ་ཁོ་ན་བཞག་པ་འདིས། སྲིན་པོའི་ཆ་ལུགས་ཅི་འདྲ་བར། ཡི་གེ་ཨ་དེ་ཡང་ཁྲོ་ཆེན་རྡོ་རྗེ་སྲིན་པོའི་སྐུ་དེར་བསྒྱུར་ཏེ། གང་དེ་ཉིད་མངོན་སུམ་དུ་སྲིན་མོ་ཀྲོ་ཏི་མའི་མངལ་གྱི་ལྷུམས་སུ་བཞག་པར་མཛད་དོ། །དེ་ནས་རྡོ་རྗེ་ལྗགས་ཀྱི་འོད་ཟེར་ལས་ས་བོན་དེ་བརྟན་པའི་སྔགས་བཀའ་སྩལ་ཏེ། བསྐྱེད་སྔགས་རཀྴཱ་ཤྲཱི་ཧེ་རུ་ཀ འཇོམས་སྔགས་རུ་ཏྲ་མ་ཏྲ་ཧ་ཧ་ཧྃ། ཞེས་སྐུ་མངོན་དུ་བསྐྱེད་པས་རྫོགས་ཤིང་གདུག་པ་འཇོམས་པར་བྱེད་པའི་ཕྱིར་ཡི་གེ་ཕཊཿབརྗོད་པ་ཡི་མཐུ་ཡིས་བྱིན་གྱིས་བརླབ་པས་ཤིན་ཏུ་དྲག་པོ་མཐུ་དང་ལྡན་པར་རབ་ཏུ་ངེས་ཤིང་བརྟན་༼༣༨༧༽པར་བྱས་སོ།།

བཞི་པ་བསྒྱུར་ནས་སྙིང་པོ་བྱང་ཆུབ་ལ་བཞུགས་ཤིང་སྡུད་པ་པོ་མཛད་པ་ནི།

དངོས་མིན་རིག་པའི། ཞེས་པ་ནས། འཛིན་པའི་བདག་པོ་མཛད། །ཅེས་པའི་བར་གྱིས་བསྟན་ཏེ།

དངོས་མིན་རིག་པའི་སྐྱེས་བུ་དེ། །རྡོ་རྗེ་ཡབ་ཀྱི་སྐུ་ལས་བསྡུས། །དྲག་ཤུལ་སྟོབས་ལྡན་སྐྱེས་བུ་དེས།།

སྒྱུ་མ་རྡོ་རྗེ་ཆོ་འཕྲུལ་གྱིས། །སངས་རྒྱས་གདུལ་དཀའ་རྣམས་བཏུལ་བས། །བདུད་དང་འཇིག་རྟེན་ལོག་པའི་ཆ།།

བྱིས་པའི་སྤྱོད་པ་དེ་བོར་ནས། །ཐུགས་ནི་སྙིང་པོ་བྱང་ཆུབ་ལ། །དགོངས་པ་ངེས་པར་འགྲེལ་ཏེ་བཞུགས།།

སྤྲུལ་པ་རྡོ་རྗེ་འཛིན་རྒྱལ་པོ། །སྔར་བྱུང་རྒྱལ་ཚབ་སྐྱེས་བུ་དེས། །ལྷ་གནས་གསུམ་དུ་གྲགས་པ་ཡི།།

གསང་མཛད་ཆེན་པོ་དམ་པའི་ལུང་། །གསང་བ་འཛིན་པའི་རྒྱལ་པོ་མཛད།།

སྤྲུལ་པ་ཡིན་པས་རང་སྣང་གི་སྐུ་དངོས་མིན་པའམ་ཕྱག་དཔེ་ལ་ལར་དངོས་མེད་ཅེས་བཞུགས་པས། ངོ་བོ་མི་ཟིན་པར་ཐམས་ཅད་མཁྱེན་པའི་ཡེ་ཤེས་ཀྱི་ངོ་བོར་བཞུགས་པས་རིག་པའི་སྐྱེས་བུ་སྨེ་བ་བརྩེགས་པ་དེ་ཉིད་རྡོ་རྗེ་འཛིན་པ་ཆེན་པོ་ཧེ་རུ་ཀ་ཡབ་ཀྱི་སྐུ་ལ་བསྡུས་ཏེ་མི་དམིགས་སོ། །དེ་ལྟར་ཕྱག་ན་རྡོ་རྗེ་ཤིན་ཏུ་དྲག་ཤུལ་ཆེ་ཞིང་གཏུམ་རྔམ་འབར་བས་ལོག་སྡེ་འཇོམས་པའི་སྟོབས་དང་ལྡན་པའི་སྐྱེས་བུ་རྡོ་རྗེ་འཛིན་པ་ཧེ་རུ་ཀར་བྱུང་བའི་ངོ་བོ་རྡོ་རྗེ་གཞོན་ནུ་གཞོན་ནུ་རྣམས་ཀྱི་ཡབ་ཉིད་དེ། གང་དེ་ཡིས་དཔེ་སྒྱུ་མ་ལྟར་ཡེ་ཤེས་གསང་བ་མཆོག་གི་སྤྲུལ་པ་རྡོ་རྗེ་གཞོན་ནུ་བྱེ་བ་ས་ཡ་མང་པོར་འགྱེད་པའི་ཆོ་འཕྲུལ་གྱིས། སངས་རྒྱས་ཀུན་གྱི་གདུལ་བར་དཀའ་བ་རྣམས་བཏུལ་བའི་སྦྱོར་བ་མཛད་དེ་བྱ་བ་རྫོགས་ནས་བདུད་དང་སྲིན་པོ་འཇིག་རྟེན་ན་ལོག་པའི་སྡེ་ཡི་ཆ་བྱད་འཛིན་པ་ཐམས་ཅད་འདུལ་བའི་མཛད་སྤྱོད་མཐུན་འཇུག་བྱིས་པའི་སྤྱོད་པ་དེ་ཉིད་བོར་ནས། ཚ་བོ་སྲིན་མོའི་ལྷུམས་སུ་བཞག་ཅིང་ཕྱོགས་བཅུའི་གདུག་པ་བཏུལ་བས་ཐུགས་ཁྲལ་བསྐྱུངས་པའི་ཕྱིར་ཐུགས་ནི་སྙིང་པོ་བྱང་ཆུབ་ཀྱི་ངང་ལ་དགོངས་པ་མ་འདྲེས་ཡོངས་རྫོགས་ལྷུན་གྲུབ་རང་གསལ་ཉིད་དུ་ངེས་པར་འགྲེལ་ཏེ་བཞུགས་སོ། །དེ་ཉིད་གདུལ་བྱའི་སྣང་བ་ལ་སྤྲུལ་པ་གསང་བའི་བདག་པོ་རྡོ་རྗེ་འཛིན་རྒྱལ་ཆེན་པོ་ཕྱག་ན་རྡོ་རྗེ་སྔར་བྱུང་གི་སྟོན་པའི་རྒྱལ་ཚབས་མཛད་པའི་འཆད་པའི་སྐྱེས་བུ་དེ་ཡིས། སུམ་ཅུ་རྩ་གསུམ་དང་དགའ་ལྡན་དང་འོག་མིན་དབང་བསྒྱུར་གྱི་ཁང་བཟང་སྟེ། ལྷ་གནས་གསུམ་དུ་གྲགས་པ་ཡི་གསང་སྔགས་གསང་བའི་མཛོད་ཆེན་པོ་ཆེ་བ་བདུན་དང་ལྡན་པས་དམ་པའི་ལུང་གི་གསང་བ་ཆོས་ཀྱི་མེ་ལོང་འདི་ཉིད་འཛིན་ཅིང་སྟོན་པའི་མངའ་བདག་སྡུད་པ་པོ་མཛད་དེ། དེ་བས་ན་ཧེ་རུ་ཀ་ཉིད་གསང་བདག་དྲག་ཤུལ་ཅན་དན་ཕག་ཏུ་གྱུར་བ་ལ་ཐེ་ཚོམ་མེད་དོ། །འོན་ཀྱང་དེ་ནི་གཅིག་དང་དུ་མ་ལས་གྲོལ་བས་གསང་ བདག་གཉིས་སུ་ཐལ་བའང་མེད་དེ་བསྐལ་པ ་གཅིག་གི་ཆ་བཟུང་བའོ། །ཚུལ་འདིས་རྡོ་རྗེ་སེམས་དཔའི་སྒྲོན་མའི་ཞིང་གི་རྒྱལ་བ་རྣམས་ཀྱི་གསང་ཆེན་ལུང་གི་བསྟན་པ་རིན་པོ་ཆེ་ཐོག་མ་དང་ཐ་མ་མེད་པར་འབྱུང་བའི་ཚུལ་ལ་ངེས་༼༣༨༨༽པ་རྙེད་པར་བྱའོ།།

གསུམ་པ་དེ་ལས་མ་རངས་པའི་རྟོག་པ་སྲིན་མོས་བསལ་བ་ནི།

དེ་ནས་ཡི་དྭགས། ཞེས་པ་ནས། དགའ་བའི་ཐབས་སུ་བཟུང༌། །ཞེས་པའི་བར་གྱིས་བསྟན་ཏེ།

དེ་ནས་ཡི་དྭགས་དྲག་པོ་དེས། །རང་གི་གནས་སུ་འུན་པ་དང་། །རང་གི་གནས་དང་ལོངས་སྤྱོད་དང་། །འཁོར་རྣམས་མི་སྣང་མི་འདྲ་བའི། །སྔོན་མ་མཐོང་བ་ཕལ་ཆེར་སྣང་། །ཁོ་ན་ཤིན་ཏུ་མ་རངས་ཏེ། །ཨེ་མའོ་བདག་གི་ཕྲུ་མ་འདི། །ཇི་ལྟར་གྱུར་ཅེས་རྣམ་པར་རྟོག །དེ་ཚེ་ཉེ་གནས་དབང་མོ་ཡིས། །རང་གི་ཁྱོ་བདག་ལོན་འུན་ཏེ། །ཨེ་མའོ་སྒེག་པོ་དཔའ་བོ་ཁྱོད། །གང་འདིར་ངན་དུ་རྟོག་པའི་ཚིག །འཁོར་གྱི་ནང་དུ་གསུང་ངམ་ཅི། །དཔའ་བོ་ཁྱོད་ཀྱི་དགོངས་པ་གང་། །དེང་ཧུན་ཧན་ཕན་ཉོ་བ་ཏི། །ཁོ་ན་འམ་ཙ་སྨ་ར་ཙ། །དཔའ་བོ་སྒེག་པོ་ཞེ་ཧམ་ཉིད། །ཀུན་ལན་ཏྲ་ཙ་སུ་ཐྲ་ཐ། །གང་དུ་ཅི་ཞིག་ཇི་ལྟར་འཁྲུལ། །དེ་སྐད་ཚིག་ཏུ་ཧོན་པ་ལས། །མདངས་ལ་ཆགས་པས་འདུན་པ་དང་། །ཁོ་ནའི་རིགས་ཉིད་ངེས་འཛིན་པའི། །བརྐམ་ནས་དགའ་བའི་ཐབས་སུ་བཟུང་།།

དེ་ནས་སྲིན་པོའི་སྡེ་དཔོན་ཡི་དྭགས་དྲག་པོ་དེ་ཉིད་སྲོག་ཆགས་ཀྱི་སྐྱམས་ལིངས་ལས་སླར་ལོག་ནས་རང་གི་གནས་སུ་འུན་ཞེས་པ་བྲུ་ཤའི་སྐད་དེ་འོང་བ་དང༌། རང་གི་ཡུལ་ཁམས་ཀྱི་ཐོད་མཁར་དང་འོབས་ལ་སོགས་པ་གནས་དང་ལོངས་སྤྱོད་དང༌། འཁོར་རྣམས་ཕལ་ཆེར་མི་སྣང་ཞིང་སྣང་བ་ཀུན་ཀྱང་སྔ་མ་དང་མི་འདྲ་བ་དང༌། སྔོན་མ་མཐོང་བ་ཡི་ཆོ་འཕྲུལ་ཅན་དུ་འཁོར་མོ་ཕལ་ཆེར་སྣང་ངོ༌། །དེ་ལ་རུ་ཏྲ་ཁོ་ན་ཤིན་ཏུ་མ་རངས་ཤིང་ཡིད་མ་ཆེས་ཏེ་མ་དགའ་བར་འཁྲུགས་པས་ངམ་སྟེ། ཨེ་མའོ་བདག་གི་ཕྲུ་མ་མངའ་འབང་དུ་གནས་པ་འདི་རྣམས་ཇི་ལྟར་གྱུར་པ་ཡིན་ཞེས་རྣམ་པར་རྟོག་ཅིང་སྨྲའོ། །དེ་ཚེ་ཉེ་གནས་དབང་མོ་དེ་ཡིས་རང་གི་ཁྱོ་བདག་ལོན་འུན་ཞེས་པ་བྲུ་ཤའི་སྐད་དེ་བོད་སྐད་དུ་ཡང་འོང་ཞེས་པར་འགྱུར་བས་ཡང་འོང་ངོ་སྙམ་ནས་སྔོན་བསུས་ཏེ། རུ་ཏྲ་ལ་དགའ་བས་ངམ་ནས། ཨེ་མའོ་དུར་ཁྲོད་ཀྱི་རྒྱན་གྱིས་སྒེག་པ་ཆེན་པོ་ཁམས་གསུམ་ན་དཔའ་བོ་གཅིག་པུ་ཁྱོད་གང་འདིར་ངན་དུ་རྟོག་པའི་ཚིག་འཁོར་གྱི་ནང་དུ་གསུང་ངམ་ཅི་སྟེ། དཔའ་བོ་ཁྱོད་ཀྱི་དགོངས་པ་གང༌། །དེང་ཧུན་ཧན་ཕན་ཉོ་བ་ཏི། །ཁོ་ན་འམ་ཙམ་སྨ་ར་ཙ། །དཔའ་བོ་སྒེག་པོ་ཞེའམ་ཉིད། །ཀུ་ལན་ཏྲ་ཙ་བུ་ཐྲ་ཐ། །ཞེས་པའི་རྐང་པ་བཞི་པོ་བྲུ་ཤའི་སྐད་དེ་བོད་སྐད་དུ། དེ་རིང་ཕན་ཆད་བདག་གིས་སྒྲུབས། །བདག་གི་ལྷུམས་ནི་མི་བདེ་སྟེ། །དཔའ་བོ་སྒེག་པོ་ཁྱོད་ཉིད་ཀྱི། །གདུང་རྒྱུད་འཚོབ་པ་བདག་ལགས་ན། །ཞེས་པར་འགྱུར་བས། སྲིན་པོ་མ་རངས་པའི་སེམས་རྟོག་སྐྱེས་པ་ལས་སྲིན་མོས་དཔའ་བོ་ཁྱོད་ཀྱི་ཐུགས་ཀྱི་དགོངས་པ་གང་ལགས་པ་དེ་ཉིད་དེ་རིང་ཕན་ཆད་བདག་གིས་སྒྲུབས་ཏེ་བདག་གི་མངལ་ནི་མི་བདེ་སྟེ། དེ་བས་ན་དཔའ་བོ་སྒེག་པོ་ཆེན་པོ་ཁྱེད་ཉིད་ཀྱི་གདུང་རྒྱུད་ལེགས་པར་འཚོབ་པ་ཡི་སྲས་གཞོན་ནུ་བདག་ལ་ངེས་པར་འབྱུང་ལགས་ན་གནས་གང་དུ་རྒྱུ་ཇི་ཞིག་གིས་ཐུགས་ཇི་ལྟར་འཁྲུལ་ཞེས་དེ་ལྟར་ཚིག་ཏུ་ཧོན་ཞེས་པ་བྲུ་ཤའི་སྐད་དེ་སྨྲས་པ་ལས་སྲིན་པོ་ཡིད་ཆེས་ཏེ་རྟོག་པ་ཆད་དོ། །དེ་ནས་རུ་ཏྲས་ཉེ་གནས་མོ་དཔལ་དང་སྦྱོར་བས་ལྷག་པར་གཟི་མདངས་ཆེ་བ་ལ་ཆགས་ཏེ་དགའ་བས་འདུན་པ་དང་སྲིན་རྗེ་ཁོ་༼༣༨༩༽ནའི་རིགས་ཉིད་ངེས་པར་འཛིན་པའི་སྲས་འབྱུང་ངོ་སྙམ་ནས་དགའ་བའི་ཐབས་སུ་བཟུང་བར་བྱས་སོ།།

བཞི་པ་ལས་ཀྱི་སྲིན་མོ་ལ་རྡོ་རྗེ་སྲིན་པོའི་སྐུ་འཁྲུངས་པ་ནི།

དེ་ནས་དབང་མོ། ཞེས་པ་ནས། བདུད་ལས་རྣམ་པར་གྲགས། །ཞེས་པའི་བར་གྱིས་བསྟན་ཏེ།

དེ་ནས་དབང་མོ་བརྐམ་མ་ལས། །པུ་ཏྲ་མྱུ་གུ་འཐོན་འབྱུང་བའི། །ཐངས་གསུམ་གྲགས་པའི་སྒྲ་བྱུང་བས།།

དཔལ་གྱི་རྔམ་སྐད་གྲགས་པ་ཡིས། །དྲག་པོ་དྲག་མོ་ལ་སོགས་རྒྱལ། །དེ་ལས་སླར་ལོན་མཐོང་བ་ཡིས། །འཇིག་བྱེད་ཆེན་པོ་འབར་བ་ལས། །སྔོ་ནག་རྔམ་པའི་རལ་པ་ཅན། །དབུ་དགུ་ཕྱག་གཉིས་བཅོ་བརྒྱད་པ། །རྡོ་རྗེ་གཤོག་པས་བར་ནང་ཁེངས། །བ་སྤུ་ལྕགས་ཀྱུ་བསྲེགས་འདྲ་བའི། །སྡོམ་དང་སྡིག་དང་སྨིགས་དང་སྤྲུལ། །འཇིགས་པའི་གཟུགས་ཀྱིས་ས་གཞི་ཁེབས། །ཐོད་སྐྱོགས་ཏི་ར་རྒྱུ་བཞག་དང་། །ཉི་ཟླ་ཁྱུང་དང་འུག་པ་ཁྲ། །རྡོ་རྗེ་མདུང་རྩེ་གསུམ་པ་དང་། །ཟ་མ་ཏོག་དང་རྡུལ་ཡབ་རྔ། །རི་རབ་སྤྱི་བསྐོར་སྟོང་གསུམ་འཕེན། །ཀླུ་དབང་འབུམ་གྱིས་བརྒྱན་ཅིང་ཀླུབས། །དུས་མཐའི་བསྐལ་པ་མེ་ལྟར་འབར། །ཁྲོ་གཉེར་སྡང་མིག་འབར་བ་ཡིས། །ཉི་ཤུ་རྩ་བདུན་སྤྱན་རས་གཟིགས། །ཞབས་ཀྱིས་འབར་བའི་ལྷ་བརྒྱད་གནོན། །རྡོ་རྗེ་སྲིན་པོ་ཁྲོ་བོར་གྱུར། །ལྷ་དང་བདུད་ལས་རྣམ་པར་གྲགས།།

དེ་ནས་དབང་མོ་བརྐམ་མ་ལས་པུ་ཏྲ་གཞོན་ནུ་མྱུ་གུར་ཐོན་ཏེ་རྡོ་རྗེ་སྲིན་པོ་སྐུ་འཁྲུངས་ནས་སྣང་བ་འབྱུང་བའི་ཚེ་ན། ཞལ་ནས་ཁྲོ་བོའི་གདངས་སྐད་ཐང་གསུམ་གྲགས་པའི་སྒྲ་བྱུང་བར་མཛད་པས་དཔལ་གྱི་རྔམ་སྐད་དྲག་པོ་ཧཱུྃ་གི་སྒྲ་ཡིས་དྲག་པོ་སྲིན་པོའི་ཚོགས་དང་དྲག་མོ་སྲིན་མོའི་ཚོགས་ལ་སོགས་པ་མ་ལུས་པ་ཐམས་ཅད་བརྒྱལ་བར་གྱུར་ཏོ། །དེ་ནས་སླར་བརྒྱལ་བ་ཉིད་ལོན་ཞེས་པའང་བྲུ་ཤའི་སྐད་དེ་སངས་ནས་བལྟས་པས་མཐོང་བའི་སྣང་བ་ལ། རྡོ་རྗེ་སྲིན་པོ་ཧེ་རུ་ཀ་འཇིགས་བྱེད་ཆེན་པོ་རྔམ་བརྗིད་རབ་ཏུ་འབར་བ་ལ་སྐུ་མདོག་སྔོ་ནག་ཤིན་ཏུ་རྔམ་པའི་ཚུལ་གྱིས་རལ་པ་གྱེན་དུ་བརྫེས་ཤིང་ཁྲོ་བོའི་ཆ་ལུགས་ཅན་དབུ་དགུ་དང་ཕྱག་ནི་བཅོ་བརྒྱད་པ་རྡོ་རྗེ་གཤོག་པས་བར་སྣང་ཁེབས་པ་སོགས་ཁྲོ་བོའི་ཆས་ཀྱིས་བརྒྱན་ཏེ། ཆོས་རྗེ་དམ་པ་རིན་པོ་ཆེའི་ཕྱག་མཆན་ན། ཁྱབ་མཛད་རེ་སྐོང་རྡོ་རྗེ་གཤོག་པའི་ཆས། །གནོད་གདུག་བཟློག་བྱེད་རྒྱ་བྱེའུ་ལྕགས་ཀྱི་ཆས། །ཏིང་འཛིན་དཔའ་བོ་རབ་བརྗིད་སྟག་གི་ཆས། །དབང་གི་བསེ་ཁྲབ་གཟི་འབར་གད་མོའི་ཆས། །སྤ་བརྗིད་མཉེན་ལྕུགས་སྦྲུལ་ནག་འཁྲིལ་བའི་ཆས། །རྡོ་རྗེ་རྩེ་ལྔའི་སླག་པ་རིག་པ་ཏིང་འཛིན་ཆས། །མདངས་གསལ་ཀུ་ཤུན་ཆུ་སྲིན་སྤྲུལ་པའི་ཆས། །ཡེ་ཤེས་སྲེག་བྱེད་རྡོ་རྗེ་མེ་ཡི་ཆས། །ཞེས་པའི་ལུང་དྲངས་པར་མཛད་ལ། རྒྱས་པར་རྡོ་རྗེ་སྲིན་པོའི་ལྷ་རྒྱུད་སོགས་ལས་ཤེས་པར་བྱའོ། །དེ་བཞིན་དུ་སྐུའི་བ་སྤུ་ཐམས་ཅད་ལྕགས་ཀྱུ་བསྲེགས་པ་དང་འདྲ་བར་འབར་བའི་མེ་སྟག་འཕྲོ་བ། ཡེ་ཤེས་ཀྱི་སྤྲུལ་པ་སྡོམ་དང་སྡིག་པ་དང་སྨྱིགས་བུ་དང་སྦྲུལ་ལ་སོགས་པ་མི་བཟད་འཇིགས་པའི་གཟུགས་ཀྱིས་ས་གཞི་ཐམས་ཅད་ཁེབས་པར་གྱུར་ཏོ། །ཕྱག་བཅོ་བརྒྱད་ན། དང་པོ་གཉིས་ཀྱི་གཡས་རྡོ་རྗེ་དང་གཡོན་ཐོད་སྐྱོགས་བསྣམས་པ། གཉིས་པ་གཉིས་ན་སྟི་ར་དང༌། གསུམ་པ་གཉིས་ན་རྒྱུ་ཞགས་བསྡོགས་པ་དང༌། བཞི་པས་གཡས་ཉི་མ་གཡོན་ཟླ་བ་དང༌། ལྔ་པས་གཡས་ན་ཁྱུང་དང་གཡོན་ན་འུག་པ་བསྣམས་པ་༼༣༩༠༽དྲུག་པ་གཉིས་ན་ཁྲ་དང་རྡོ་རྗེ། བདུན་པ་གཉིས་ན་མདུང་རྩེ་གསུམ་པ་དང་ཟ་མ་ཏོག་དང༌། བརྒྱད་པ་གཉིས་ན་རྔུལ་ཡབ་དང་རྔ་བསྣམས་ཤིང༌། །དགུ་པ་གཉིས་ན་གཡས་རི་རབ་སྤྱི་ནས་བསྐོར་ཞིང་གཡོན་ནས་སྟོང་གསུམ་རྒྱངས་མར་འཕེན་པའོ། །ཡང་ན་ཕྱག་དང་པོ་གཉིས་ན་རྡོ་རྗེ་དང་དྲིལ་བུ། གཉིས་པ་གཉིས་ཀྱིས་ཐོད་སྐྱོགས་ཞལ་དུ་གསོལ་བ། གསུམ་པ་གཉིས་ན་སྟི་ར་དང་རྒྱུ་ཞགས། བཞི་པ་མན་ཆད་གོང་ལྟར་གསུངས་སོ། །སྐུ་ལ་ཀླུ་དབང་རྒྱལ་རིགས་དཀར་པོའི་སྦྲུལ་སོགས་འབུམ་གྱིས་བརྒྱན་ཅིང་ཀླུབས་པ་སྟེ་རུ་ཏྲ་འདུལ་བའི་ཕྱིར་དེའི་ངོ་ལ་སྣང་བས་ཀླུ་མང་པོ་ཚད་མེད་པའོ། །མེ་དཔུང་ཆེན་པོ་དུས་མཐའ་བསྐལ་པའི་མེ་ལྟར་འབར་ཞིང་ཁྲོ་གཉེར་འཇིགས་པས་བརྗིད་ལ། སྡང་མིག་འབར་བ་ཡི་ཉི་ཤུ་རྩ་བདུན་གྱི་སྤྱན་རས་ཟླུམ་པོ་གཟིགས་ཏེ། ཞབས་བརྒྱད་ཀྱིས་འབར་བའི་ལྷ་ཆེན་བརྒྱད་གདན་དུ་གནོན་པ་རྡོ་རྗེ་སྲིན་པོ་ཁྲོ་བོ་འཇིགས་བྱེད་ཆེན་པོར་གྱུར་ཏོ། །ཡང་ན་རྡོ་རྗེ་སྲིན་པོ་ཁྲོ་བོ་ཆེ། །དབུ་དགུ་སུམ་བརྩེགས་རལ་པ་འབར། །རྡོ་རྗེའི་གཤོག་གདེངས་བར་སྣང་ཁེབས། །ཉི་ཤུ་རྩ་བདུན་སྤྱན་རས་གཟིགས། །ཞབས་བརྒྱད་ལྷ་ཆེན་བརྒྱད་ལ་གནོན། །བཅོ་བརྒྱད་དང་པོ་གཡས་གཡོན་གྱིས། །རྡོ་རྗེ་ཐོད་ཁྲག་དཀུག་ཅིང་གསོལ། །དེ་འོག་སྟི་ར་རིལ་མིད་མཛད། །དེ་འོག་གཉིས་ནི་རྒྱུ་ཞགས་ལྡོག །བཞི་པ་གཡས་ཡོན་ཉི་ཟླ་འཛིན། །ལྔ་པ་གཉིས་ན་འུག་པ་ཁྲ། །དྲུག་པ་རྡོ་རྗེ་མདུང་རྩེ་གསུམ། །བདུན་པ་ཟ་མ་ཏོག་རྔུལ་ཡབ། །བརྒྱད་པ་རྔ་དང་རི་རབ་བསྐོར། །དགུ་པ་སྟོང་གསུམ་རྒྱངས་མར་འཕེན། །ཀླུ་དབང་འབུམ་གྱིས་སྐུ་ལ་བརྒྱན། །དུར་ཁྲོད་རྒྱན་རྟགས་བཅོ་བརྒྱད་འབར། །དུས་མཐའི་མེ་ལྟར་སྐུ་ལ་འབར། །སྡོམ་སྡིག་སྨྲིགས་སྦྲུལ་སྐུ་ལས་འཕྲོ། །ཞེས་གསུངས་ཏེ་རྡོ་རྗེ་སྲིན་པོའི་ཆ་ལུགས་བཤད་པ་ལྟར་རོ། །དེ་ལྟར་ལྷ་དང་བདུད་ལ་སོགས་པ་ཁམས་གསུམ་གྱི་དྲེགས་བྱེད་ཀུན་གྱིས་མཐོང་ཞིང་ཐོས་པ་ལས་ཁྱད་པར་གྱི་གཉེན་པོར་རྣམ་པར་གྲགས་ཤིང་འཁོར་བའི་གཡུལ་ལས་རྒྱལ་བར་མཛད་དོ། །སྐབས་འདིར་ཕྱག་མཚན་ལ་ཅུང་ཟད་འདྲ་མིན་དུ་བྱུང་བ་རྣམས་ལུང་ལས་འབྱུང་བས་གང་ལྟར་ཡང་ཁྱད་པར་མེད་དེ། ཁྲོ་བོ་ལྷ་རྒྱུད་ཆེན་པོ་ལས། སྤྱི་དང་བྱེ་བྲག་སྣང་བ་ཡང༌། །སྤྱིར་ན་དཔལ་ཆེན་ཧེ་རུ་ཀའི། །༼༣༩༡༽སྐུ་མདོག་ཕྱག་མཚན་མ་ངེས་ཏེ། །གང་ལྟར་བསྒྲུབ་ཀྱང་འགྲུབ་པར་འགྱུར། །ཞེས་སོ། །ནང་ལྟར་ན་ཉོན་མོངས་དང་བདག་འཛིན་ཐབས་ཀྱིས་སྤངས་པ་ཡིན་ཀྱང་འདས་པ་འགགས་ཤིང་མ་འོངས་པ་མ་སྐྱེས་པས་སྤང་དུ་མེད་ལ། ད་ལྟར་ལྷན་ཅིག་སྐྱེས་པས་སྤང་དུ་མི་བཏུབ་བོ། །དེས་ན་མངོན་དུ་མི་སྤོང་ས་བོན་སྤངས་པ་སྟེ། མེ་དང་དུ་བ་ལྟ་བུའོ། །དེའི་ཕྱིར་འདིར་ཡང་རྡོ་རྗེ་གཞོན་ནུའི་བཀོད་པ་ནི། ཀུན་གཞི་ལ་ཆོས་ཉིད་ཀྱི་ཁམས་སམ་ས་བོན་ཡོད་པས་ན་ཐོས་བསམ་སྒོམ་གསུམ་གྱིས་མཐོང་ལམ་རྣམ་པར་མི་རྟོག་པའི་ཡེ་ཤེས་སྐྱེད་པ་དང༌། རྡོ་རྗེ་སྲིན་པོ་ནི། ཀུན་གཞི་ལ་རྣམ་པར་མི་རྟོག་པའི་ཡེ་ཤེས་རང་བྱུང་དུ་སྐྱེས་ཏེ་ང་བདག་དང་སྒྲིབ་པ་བག་ཆགས་བདུད་བཞི་ཤིན་ཏུ་ཕྲ་བ་དང་བཅས་པ་རྩད་ནས་གཅོད་པ་མཐར་ལམ་རྩལ་ཆེན་རྫོགས་པ་སྐྱེད་པའོ།།

ལྔ་པ་དེ་ལ་རུ་ཏྲས་དམག་བསགས་པ་ལ་གསུམ་སྟེ། རུ་ཏྲས་འཁོར་གྱི་དབང་ཕྱུག་རྣམས་ལ་བསྐུལ་བ། དཔའ་བསྐྱེད་ཅིང་གནད་ནས་ཕབས་ཏེ་བསྐུལ་བ། དམག་བསགས་པ་དངོས་སོ། །དང་པོ་ནི།

དེ་ནས་ཡི་དྭགས། ཞེས་པ་ནས། རབ་ཏུ་འདི་ལ་ཐུད། །ཅེས་པའི་བར་གྱིས་བསྟན་ཏེ།

དེ་ནས་ཡི་དྭགས་དྲག་པོ་དེས། །ཁོ་ནའི་སེམས་རྟོག་ལྟས་ནས་ཀྱང་། །ང་རྒྱལ་དྲག་པོའི་གཏུམ་སྐད་ཀྱིས།།

འཁོར་ཀྱི་དབང་ཕྱུག་རྣམ་པར་བསྐུལ། །རུ་ཏྲ་མ་ཏྲ་མ་ར་ཏྲ། །འདུ་འདུ་དབང་ཕྱུག་ཆེན་པོའི་ཚོགས།།

ཀུན་ཏུ་རབ་ཏུ་དམ་ལ་འདུ། །གྲམ་གྲམ་དབང་ཕྱུག་ཆེན་པོའི་ཚོགས། །ཀུན་ཏུ་རབ་ཏུ་ལས་ལ་གྲམ།།

ཐུད་ཐུད་དབང་ཕྱུག་ཆེན་པོའི་ཚོགས། །ཀུན་ཏུ་རབ་ཏུ་འདི་ལ་ཐུད།།

དེ་ནས་ཡི་དྭགས་དྲག་པོ་དེ་ཉིད་ཁོ་ནའི་སེམས་ཀྱི་རྟོག་པ་ཅུང་ཞིག་བརྟས་ནས་ཀྱང༌། ང་རྒྱལ་དྲག་པོའི་གཏུམ་སྐད་ཀྱིས་རང་གི་འཁོར་གྱི་དབང་ཕྱུག་མཐུ་ཆེ་བ་རྣམས་འདི་ལྟར་རྣམ་པར་བསྐུལ་ཏེ། རུ་ཏྲ་མ་ཏྲ་མ་ར་ཏྲ། ཞེས་དམག་ལ་བསྐུལ་བའི་གཏུམ་སྔགས་བརྗོད་ནས། འདུ་ཞིང་འདུ་བར་ལྷ་དང་སྲིན་པོ་དབང་ཕྱུག་ཆེན་པོའི་ཚོགས་རྣམས་བསྡུ་ཡིས་མྱུར་བར་ཀུན་ཏུ་ཤིན་ཏུ་མྱུར་བར་རབ་ཏུ་བདག་ཅག་གི་དམ་ལ་འདུ་བར་གྱིས་ཤིག གྲམ་གྲམ་དུ་འགྱེད་པའི་ལས་ལ་དབང་ཕྱུག་ཆེན་པོའི་ཚོགས་རྣམས་གཏོང་གིས། ཀུན་ཏུ་རབ་ཏུ་ལས་ལ་གྲམ་པའམ་འགྱེད་པར་གྱིས་ཤིག ཐུད་ཐུད་བཅོལ་བའི་ལས་ལ་དབང་ཕྱུག་ཆེན་པོའི་ཚོགས་རྣམས་འགྱེད་ཀྱིས། ཀུན་ཏུ་རབ་ཏུ་བཅོལ་བ་འདི་ལ་ངེས་པར་ཐུད་དེ་བསྐུལ་བ་བཞིན་མཛོད་ཅིག

གཉིས་པ་དཔའ་བསྐྱེད་ཅིང་གནད་ནས་ཕབས་ཏེ་བསྐུལ་བ་ནི།

དབང་ཕྱུག་ང་ཡི། ཞེས་པ་ནས། ལས་རྣམས་དུས་ལ་བབ། །ཅེས་པའི་བར་གྱིས་བསྟན་ཏེ།

དབང་ཕྱུག་ང་ཡི་ཕྲུ་མ་ལ། །གང་འདིར་གདུག་པ་ཆེན་པོ་འདི། །ཁྱེད་ཀྱིས་བརླག་པའི་དུས་ལ་བབ། །གང་འདིར་བྱ་མི་བྱ་རྟོག་ན། །ཁྱེད་ནི་ཤིན་ཏུ་བརླག་ལ་ཁད། །མཛའ་བོ་གང་ལ་བྱ་མི་བྱ་བ་ཡི། །ཡོངས་སུ་རྟོགས་པ་དེ་དག་མེད་ཀྱང་བསླ། །དེ་འདྲའི་མཛའ་བོ་སྒྱུ་མ་ཡིན་པས་ན། །དེ་ལ་མཛའ་ཞེས་སུ་ཞིག་ཟེར། །རྒོལ་བ་གང་ལ་བྱ་མི་བྱ་བ་ཡི། །ཡོངས་སུ་རྟོགས་པ་དེ་དག་མེད་ཀྱང་བསླ། །དེ་འདྲའི་རྒོལ་བ་སྒྱུ་མ་ཡིན་པས་ན། །དེ་ལ་དཔའ་ཞེས་སུ་ཞིག་ཟེར། །དམ་ཚིག་གང་ལ་བསྲུང་མི་བསྲུང་བ་ཡི། །ཡོངས་སུ་རྟོགས་པ་དེ་དག་མེད་ཀྱང་བསླ།།

དེ་འདྲའི་དམ་ཚིག་སྒྱུ་མ་ཡིན་པས་ན། །དེ་ལ་དམ་པ་སུ་ཞིག་འདོགས། །ཐམས་ཅད་བྱ་མི་བྱ་བ་ཡི།།

ཡོངས་སུ་རྟོགས་པ་དེ་དག་མེད་ཀྱང་བསླ། །དེ་འདྲའི་སྤྱོད་པ་སྒྱུ་མ་ཡིན་པས་ན།།

དེ་ལ་བྱེད་ཅེས་སུ་ཞིག་ཟེར། །གང་ལ་གང་འདིར་གང་གི་ལས་རྣམས་དུས་ལ་བབ།།

དབང་ཕྱུག་ཆེན་པོའི་ཚོགས་རྣམས་རུ་ཏྲ་ང་ཡི་ཕྲུ་མ་ལ་གང་འདིར་གདུག་པ་ཆེན་པོ་རྡོ་རྗེ་སྲིན་པོ་འདི་འཇོམས་བྱེད་དུ་བྱུང་བས་འཁོར་ཁྱེད་རྣམས་ཀྱིས་༼༣༩༢༽ངེས་པར་བརླག་པའི་དུས་ལ་བབ་ཀྱིས། འདི་ལ་གང་འདིར་ཕྱིར་རྒོལ་བར་བྱ་འམ་མི་བྱ་ཞེས་རྟོག་པར་བྱེད་ན་ཁྱེད་རྣམས་ནི་འདིས་ཚུར་ལ་ཤིན་ཏུ་བརླག་མའམ་བརླག་ལ་ཁད་དུ་གྱུར་ལ། བཤེས་སམ་མཛའ་བོ་གང་ལ་གྲོགས་བྱ་བ་དང་མི་བྱ་བའི་ཁྱད་པར་ཡོངས་སུ་རྟོག་པ་ཅན་དེ་དག་མེད་ཀྱང་བླ་སྟེ། དེ་འདྲའི་མཛའ་བོ་སླུ་བྱེད་སྒྱུ་མ་ཡིན་པས་ན། དེ་ལ་མཛའ་བོ་ཡིན་ཞེས་སུ་ཞིག་གིས་ཟེར་ཏེ་མིང་ཙམ་ཡང་མེད་དོ། །རྒོལ་བ་གང་ལ་རྩོད་པར་བྱ་བའམ་མི་བྱ་བའི་ཁྱད་པར་ཡོངས་སུ་རྟོག་པ་དེ་འདྲའི་འཁོར་དེ་དག་མེད་ཀྱང་བླ་སྟེ། དེ་འདྲའི་ཕྱིར་རྒོལ་བ་དེ་བསླུ་བྱེད་སྒྱུ་མ་ཡིན་པས་ན་དེ་ལ་དཔའ་བོ་ཡིན་ཞེས་སུ་ཞིག་ཟེར་ཏེ་མིང་ཡང་མེད་དོ། །དམ་ཚིག་གང་ལ་བསྲུང་བ་དང་མི་བསྲུང་བའི་བྱེ་བྲག་ཡོངས་སུ་རྟོག་པ་དེ་དག་མེད་ཀྱང་བླ་སྟེ། དེ་འདྲའི་དམ་ཚིག་སླུ་བྱེད་སྒྱུ་མ་ཡིན་པས་ན་དེ་ལ་དམ་ཚིག་ལྡན་པར་སུ་ཞིག་འདོགས་ཏེ་མིང་ཡང་མེད་དོ། །ལར་བྱ་བ་ཐམས་ཅད་གང་ལ་སྤྱོད་ཀྱང་བྱ་བའམ་མི་བྱ་བ་ཡི་ཁྱད་པར་ཡོངས་སུ་རྟོག་པ་དེ་དག་མེད་ཀྱང་བླ་སྟེ། དེ་འདྲའི་སྤྱོད་པ་སླུ་བྱེད་སྒྱུ་མ་ཡིན་པས་ན། དེ་ལ་བྱ་བ་བྱེད་ཅེས་སུ་ཞིག་ཟེར་ཏེ་མིང་ཡང་མེད་པས་རྡོ་རྗེ་སྲིན་པོ་གང་ལ་དུས་གང་འདིར་བདག་ཅག་གང་གི་དྲག་པོའི་ལས་རྣམས་དུས་ལ་བབ་བོ། །ཞེས་གནད་ནས་བསྐུལ་ཏོ།།

གསུམ་པ་དམག་བསགས་དངོས་ནི།

ཅེས་དབང་ཕྱུག ཅེས་པ་ནས། བསྒྲགས་ནས་སྤགས་པ་ལས། ཞེས་པའི་བར་གྱིས་བསྟན་ཏེ།

ཅེས་དབང་ཕྱུག་ཆེན་པོ་རྣམས་ལ་བསྐུལ་བས། བདུད་ཀྱིས་གཟི་བྱིན་མ་བཟོད་དེ། བདུད་ཀྱི་ཆ་འཛིན་པའི་ལྷའི་བུ་བྱེ་བ་དུང་ཕྱུར་གྱི་དམག་ཚོགས་དང་། དབང་ཕྱུག་ཆེན་པོ་རྣམས་ནི་ཤིན་ཏུ་སྔངས། འཁྲུགས། རྔམས་ནས་རོད་རོད་པོར་གྱུར་ཏེ། མྱ་ངན་གྱི་དུང་ལོ་ཚུབ་མ་བཞིན་བདུད་ཀྱི་ཕྲུ་མར་འདུས་ཏེ། བདུད་ཀྱི་རུ་མཚོན་འཕྱར། མཚོན་ཆའི་སྤྲིན་གཏིབས། བདུད་ཀྱི་སྒྱུ་འཕྲུལ་གྱི་དྲ་བ་བཀྲམ་སྟེ། བསོ་དང་ཆའི་སྒྲ་བསྒྲགས་ནས་སྤགས་པ་ལས།

ཞེས་རུ་ཏྲ་འཇིགས་པའི་གཏུམ་སྐད་ཀྱིས་དབང་ཕྱུག་ཆེན་པོ་རྣམས་ལ་བསྐུལ་བས། བདུད་ཀྱི་སྡེ་དཔོན་གང་གི་གཟི་བྱིན་མ་བཟོད་དེ། བདུད་ཀྱི་ཆ་འཛིན་པའི་ལྷའི་བུ་བྱེ་བ་དུང་ཕྱུར་གྱི་དམག་ཚོགས་དང༌། དབང་ཕྱུག་ཆེན་པོ་རྣམས་དམག་ལ་དྲངས་པས་ཤིན་ཏུ་སྔངས་པ་དང་འཁྲུགས་ཏེ། དྲན་པ་སྟོར་བ་ཙམ་དུ་རྔམ་ནས་སྐྲག་པས་རོད་རོད་པོར་གྱུར་ཏེ། དཔེའི་དབང་དུ་ཤིང་མྱ་ངན་ཅན་གྱི་ལོ་མ་ཕྱོགས་གཅིག་ཏུ་འདུས་ནས་འཚུབ་པའམ་ཁོང་དུ་དུག་སོང་ན་ལོ་མ་གདོང་ལ་འཚུབ་པ་ལྟར། དོན་གྱི་དབང་དུའང་ངམ་གནག་ལ་སྡུག་བསྔལ་སྐྱེས་པས་མྱ་ངན་གྱི་དུག་ལོ་འཚུབ་པ་བཞིན་དུ་ལང་ཀའི་རྩེ་ལ་བདུད་ཀྱི་ཕྲུ་མར་འདུས་ཏེ། ཏྲི་ཤུལ་ལ་རོ་བཏགས་པས་བདུད་ཀྱི་རུ་མཚོན་ཕྱར། མཚོན་ཆའི་རིགས་སྣ་༼༣༩༣༽ཚོགས་ཀྱི་སྤྲིན་གཏིབས། བདུད་ཀྱི་སྒྱུ་འཕྲུལ་གྱི་དྲྭ་བ་ཆོ་འཕྲུལ་ཡོད་ཚད་བཀྲམ་སྟེ། བསོ་དང་ཆའི་སྒྲ་བསྒྲགས་ནས་གྲོང་རྡལ་ལས་མ་ལ་ཡའི་རྩེ་མོའི་འཁྲ་སར་རྒོལ་བ་ལ་སྤགས་པ་ལས།

དྲུག་པ་བདུད་བཏུལ་བ་རང་གི་ངོ་བོ་ལ་གསུམ་སྟེ། རྟའི་འདུར་གླུས་ཁྲོ་བོ་རྣམས་ལ་ཐུལ་ཞིག་པར་བསྐུལ་བ། ཐུགས་རྗེས་ཐེ་ཚོམ་མེད་པར་བཏུལ་བ། ཇི་ལྟར་བཏུལ་བ་དངོས་སོ། །དང་པོ་ནི།

རྡོ་རྗེ་རྟའི། ཞེས་པ་ནས། དབང་མོ་དྲོངས་ཤིག་རབ་དྲོངས་ཤིག །ཅེས་པའི་བར་གྱིས་བསྟན་ཏེ།

རྡོ་རྗེ་རྟའི་ཚོགས་ཀྱིས་རྡོ་རྗེ་ལྟམས་པའི་སྟབས་ཀྱིས། རྫུ་འཕྲུལ་མྱུར་བའི་འདུར་ཤུགས་དྲག་པོས་ཁྲོ་བོ་ཐེག་ཆེན་ཀུན་ཀྱང་འདུར་ཐག་གཅོད་པའི་རྟའི་འདུར་གླུ་འདིས་རྣམ་པར་བསྐུལ་བ། ཧྲཱིཿ སྒེག་པོ་དཔའ་བོ་འཇིགས་སུ་རུང་བ་དང་། །རྒོད་དང་གཤེ་དང་འཇིགས་པར་བྱེད་པ་དང་། །སྙིང་རྗེ་རྔམ་དང་ཞི་བ་ལ་སོགས་པའི། །སྐུ་ཡི་དངོས་པོ་ཤིན་ཏུ་གྱུར་པ་ཡི། །གར་གྱི་ཕྱག་རྒྱ་འབར་བས་དབང་ཕྱུག་གནོན། །ཧྲཱིཿ མྱོས་བྱེད་སྟོང་བས་ལྷག་པར་འདོད་པའི་གཟུགས་སྟོན་ལ། །འདུལ་བའི་དབང་གིས་གཤིན་རྗེ་སྟོང་བས་ལྷག་པར་འཇིགས་གཟུགས་སྟོན། །ཞི་བའི་སྐུར་ཡང་ཚངས་པ་སྟོང་བས་ལྷག་པར་སྟོན། །ཐམས་ཅད་དཀྱིལ་འཁོར་གསུམ་དུ་སྣང་བར་མཛོད། །ཧྲཱིཿ རྣམ་པར་འདུལ་བའི་ངོ་མཐོན་ཐབས་ཀྱིས་གནོན། །ཧོ་ཧོ་ཧ་ཧ་ཧེ་ཧེ་ཧི་ཧི་དགྱེས་པའི་བཞད་མོས་ཁོང་། །དབང་ཕྱུག་ཐམས་ཅད་རབ་ཤིག་རབ་ཏུ་ཤིག །རབ་ཀྱི་རྩལ་གྱི་སྟོབས་ཀྱིས་ངོ་མཐོན་དབང་ཕྱུག་ནོན། །ཧྲིཿ རྩལ་ཆེན་ཧཱུ་ལུ་ཧཱུ་ལུ་མིག་གསུམ་པ་ལས་གསུམ་གྲུབ་དྲོངས། །ཧྲཱིཿ རབ་ཀྱི་རྩལ་གྱི་སྟོབས་ཀྱིས་ངོ་མཐོན་མཐུ་ཆེན་ནོན། །རུ་དྲ་མ་ཏྲའི་སྙིང་ལས་དཔལ་མོས་དྲོངས་ཤིག་རབ་དྲོངས་ཤིག །རབ་ཀྱི་རྩལ་གྱི་སྟོབས་ཀྱིས་ངོ་མཐོན་ཚངས་པ་ནོན། །ཚངས་ལས་སྒྲོལ་མ་དྲོངས་ཤིག་མ་ར་ཏ། །ཧྲཱིཿ རབ་ཀྱི་རྩལ་གྱི་སྟོབས་ཀྱིས་ངོ་མཐོན་དགའ་དབང་ནོན། །སྦྱོར་ཆེན་ཀུན་གྱིས་བདག་ལ་དགའ་དྲོངས་ཤིག །ཧྲཱིཿ རབ་ཀྱི་རྩལ་གྱི་སྟོབས་ཀྱིས་ངོ་མཐོན་རུ་དྲ་ནོན། །སྦྱོར་ཆེན་ཀྲོ་དྷྲི་ཤྭ་རི་དབང་མོ་དྲོངས་ཤིག་རབ་དྲོངས་ཤིག།

དེ་ནས་སྲིན་པོ་རྣམས་སྤ་བཀོང་བའི་ཕྱིར་གོང་དུ་མ་ལ་ཡར་སོ་མཛད་པའི་རྡོ་རྗེ་རྟའི་ཚོགས་ཀྱིས་རྡོ་རྗེ་སྟམ་པ་ནའི་གོམ་སྟབས་ཀྱིས་རྫུ་འཕྲུལ་ཤིན་ཏུ་མྱུར་ཞིང་མགྱོགས་པའི་འདུར་ཤུགས་དྲག་པོས་ཁྲོ་བོ་གཞན་གྱི་བཞོན་པ་ཐེག་ཆེན་ལྡན་པས་རྟ་ལ་སོགས་པ་ཀུན་ཀྱང་རང་དབང་མེད་པར་བདུད་ཀྱི་ངོ་ལ་འདུར་ཐག་གཅོད་པའི་རྟའི་འདུར་གླུ་ཁས་བླངས་པ་འདིས་རྣམ་པར་བསྐུལ་བར་མཛད་པ་ནི། འདི་ལྟ་སྟེ། ཧྲཱིཿ ཞེས་དབང་དུ་སྡུད་པའི་སྙིང་པོས་དྲངས་ཏེ་འབར་བའི་གར་དགུ་ལྡན་པས་དཔལ་གྱི་རྒྱན་ཆས་ཀྱིས་སྒེག་པ་ཆེན་པོ། བདུད་བཅོམ་པས་དཔའ་བོ། སྐུ་ཆེ་ལ་ཡན་ལག་རགས་པས་འཇིགས་སུ་རུང་བ་དང༌། ཞལ་གཡས་དཀར་བ་དགོད་པ་དང༌། གཡོན་དམར་བ་གཤེ་བ་དང༌། དབུས་མཐིང་ནག་འཇིགས་པར་བྱེད་པ་དང༌། རྒྱུད་དྲུག་སྒྲོལ་བས་སྙིང་རྗེ་དང༌། གདུག་པ་ཅན་ཞལ་དུ་གསོལ་བས་རྔམ་པ་དང༌། ཆོས་སྐུ་མཚན་མ་མེད་པས་ཞི་བ་ལ་སོགས་པའི་སྐུ་ཡི་དངོས་པོ་ཤིན་ཏུ་ཁྲོ་ཞིང་རྔམ་པར་བསྒྱུར་བ་ཡི་གར་གྱི་ཕྱག་རྒྱ་དགུ་དང་ལྡན་པའི་སྐུ་ཆེན་པོ་ཅིར་ཡང་སྣང་ལ་མེ་དཔུང་འབར་བས་དབང་ཕྱུག་ཆེན་པོ་མ་ཧཱ་དེ་བ་ནོན་ཅིག་པའོ། །ཧྲཱིཿཞེས་རྩ་བའི་ཡི་གེ་ནི་སྙིང་པོ་སྟེ་དབང་དུ་བསྡུ་བའི་ཕྱིར་མི་གཏོང་བར་བརྗོད་པས་མགོ་འདྲེན་པ་ཀུན་ལ་སྦྱར་ཏེ། འདོད་ཆགས་ཀྱི་དྲན་པ་མྱོས་པར་བྱེད་པ་མ་ཧཱ་དེ་བ་བརྒྱ་ཕྲག་བཅུ་སྟེ་སྟོང་པས་ཀྱང་ལྷག་པར་གྱུར་པའི་འདོད་ཅིང་ཆགས་པའི་སྐུའི་གཟུགས་སུ་སྟོན་པར་མཛོད་ལ་མཐུན་པས་འདུལ་བར་གྱིས་ཤིག འགྲོ་བ་དྲག་པོ་འདུལ་བའི་དབང་གིས་གཤིན་རྗེ་སྟོང་བས་ལྷག་པར་འཇིགས་པའི་ཁྲོ་བོའི་གཟུགས་སྐུར་སྟོན་ལ་གཉེན་པོས་འདུལ་བར་གྱིས་ཤིག་པའོ། །ཞི་བས་འདུལ་བ་ལ་དེ་དང་མཐུན་༼༣༩༤༽པར་མཚན་དཔེ་ལྡན་པ་ཞི་བའི་སྐུར་ཡང་ཚངས་པ་ཆེན་པོ་སྟོང་བས་ལྷག་པར་རབ་ཏུ་སྟོན་ལ་ཐུལ་ཞིག གདུལ་བྱ་ཐམས་ཅད་སྔར་བཤད་པའི་དཀྱིལ་འཁོར་རྣམ་གསུམ་གྱི་ངོ་བོ་ཉིད་དུ་སངས་རྒྱས་པར་ཀུན་ཏུ་སྣང་བར་མཛོད་ཅིག ཧྲཱིཿགདུལ་བྱ་རྣམ་པར་འདུལ་བའི་སྟོབས་ཀྱི་ངོ་མཐོན་དྲག་པོས་མངོན་སུམ་དུ་ལྷ་ཆེན་པོ་དང་དྲེགས་པ་ཅན་ཐབས་ཀྱིས་ཟིལ་གྱིས་གནོན་པར་ཞབས་འོག་ཏུ་ཆུག་ལ་གནད་དུ་ནོན་ཅིག་པའོ། །རྡོ་རྗེའི་གད་མོ་བཞི་ནི། མ་རུངས་ཁྲོས་པའི་གད་མོ་ཧོ་ཧོ་དང༌། ཚམས་ངམ་རྔམ་པའི་གད་མོ་ཧ་ཧ་དང༌། མི་བསྙེངས་རོལ་པའི་གད་མོ་ཧེ་ཧེ་དང༌། དགྱེས་ཤིང་ཚིམ་པའི་གད་མོ་ཧི་ཧི་ཞེས་ཡི་གེ་ཟུང་བཞིའི་རིམ་པ་བཞིན་ནོ། །དེ་ལྟར་དགྱེས་པའི་བཞད་མོས་རྔམ་སྒྲས་ཁོང་ལ་དབང་ཕྱུག་འཁོར་བཅས་ཐམས་ཅད་རབ་ཏུ་ཤིག་པར་ཐུལ་ལ་ཀུན་ཏུ་རབ་ཏུ་ཤིག་པར་ཐུལ་ཞིག རབ་ཀྱི་རྩལ་གྱི་སྟོབས་ཀྱིས་ངོ་མཐོན་དྲག་པོས་དབང་ཕྱུག་མ་ཧཱ་དེ་བའི་ཚོགས་ཆོམས་ལ་དཔུང་བཤིགས་ཏེ་ཞབས་ཀྱི་གདན་དུ་ནོན་ཞིག ཧྲཱིཿརྩལ་ཆེན་མ་ཧཱ་དེ་བ་དེའི་ཆུང་མ་སྒྱུ་རྩལ་ཆེན་པོས་དབང་བྱེད་ཧུ་ལུ་ཧུ་ལུ་མིག་གསུམ་པ་ལས་གསུམ་གྲུབ་ཨུ་མ་དེ་བཱི་དེ་ཡང་སེམས་བསྒྱུར་བས་དྲོངས་ལ་དབང་དུ་གྱིས་ཤིག ཧྲཱིཿ ཁྲོ་བོ་དྲག་པོའི་རབ་ཀྱི་རྩལ་གྱིས་སྟོབས་ཀྱིས་ངོ་མཐོན་དུ་འཇིག་རྟེན་ན་མཐུ་ཆེན་ལྡན་པ་ཁྱབ་འཇུག་ནག་པོ་གདན་དུ་གནོན་པར་གྱིས་ཤིག རུ་ཏྲ་མ་ཏྲའི་བསམ་པ་སྙིང་ལས་ཡང་དག་པར་ཆགས་པས་ལྷ་མི་དགའ་བ་ཁྱབ་འཇུག་གི་ཆུང་མ་དཔལ་མོ་དེ་ཡང་དྲོངས་ཤིག་རབ་ཏུ་དྲོངས་ལ་དབང་དུ་གྱིས་ཤིག ཧྲཱིཿ རབ་ཀྱི་རྩལ་གྱི་སྟོབས་ཀྱིས་ངོ་མཐོན་དྲག་པོས་ལྷ་ཆེན་ཚངས་པ་དེ་ཉིད་གདན་དུ་ནོན་ཞིག ཚངས་པའི་ཆུང་མ་ཚངས་ལས་སྒྲོལ་མ་དྲོངས་ཤིག་སྨ་ར་ཐ་ཞེས་པ་བྲུ་ཤའི་སྐད་དེ་རབ་དྲོངས་ཤིག་ཅེས་རབ་ཏུ་དྲོངས་ལ་དབང་དུ་གྱིས་ཤིག ཧྲཱིཿརབ་ཀྱི་རྩལ་གྱི་སྟོབས་ཀྱིས་ངོ་མཐོན་ཆེན་པོས་དགའ་བྱེད་དབང་ཕྱུག་གདན་དུ་ནོན། བདུད་དཔུང་འདུལ་བའི་སྦྱོར་ཆེན་ཀུན་གྱི་བདག་ཉིད་ལ་དགའ་བྱེད་ཆུང་མ་དེ་ཡང་དྲོངས་ལ་དབང་དུ་གྱིས་ཤིག ཧྲཱིཿརབ་ཀྱི་རྩལ་གྱི་སྟོབས་ཀྱིས་ངོ་མཐོན་དུ་དུར་ཁྲོད་ཀྱི་བདག་པོ་རུ་ཏྲ་དཔུང་ཚོགས་ཆོམས་ལ་ཞབས་ཀྱི་གདན་དུ་ནོན་པར་གྱིས་ཤིག དཔལ་གྱི་སྦྱོར་༼༣༩༥༽ཆེན་རུ་ཏྲའི་ཆུང་མ་ཀྲོ་ཏི་ཤྭ་རི་དབང་མོ་དེ་ཉིད་དྲོངས་ཤིག་རབ་ཏུ་དྲོངས་ལ་27དབྲོག་ནས་དབང་དུ་གྱིས་ཤིག

གཉིས་པ་ཐུགས་རྗེས་ཐེ་ཚོམ་མེད་པར་བཏུལ་བ་ནི།

སྙིང་རྗེ་གང་ལ། ཞེས་པ་ནས། གདུལ་བར་སུ་ཞིག་ཟེར། ཞེས་པའི་བར་གྱིས་བསྟན་ཏེ།

སྙིང་རྗེ་གང་ལ་བྱ་མི་བྱ་བ་ཡིས། །ཡོངས་སུ་རྟོགས་པ་དེ་དག་མེད་ཀྱང་བསླ། །དེ་འདྲའི་སྙིང་རྗེ་སྒྱུ་མ་ཡིན་པས་དེ་ལ་སྙིང་རྗེ་སུ་ཞིག་ཟེར། །གདུལ་བྱ་གདུལ་བར་བྱ་མི་བྱ་བ་ཡིས། །ཡོངས་སུ་རྟོགས་པ་དེ་དག་མེད་ཀྱང་བསླ།།

དེ་འདྲའི་གདུལ་བྱ་སྒྱུ་མ་ཡིན་པས་དེ་ལ་གདུལ་བར་སུ་ཞིག་ཟེར།

བཤད་པའི་དྲེགས་པའི་ངག་དང་མཐུན་པ་ཉིད་དུ་གཅིག་པའི་ཡང་ཕྱིར་ཏེ། གདུག་པ་འདུལ་བའི་ཐུགས་རྗེའམ་སྙིང་རྗེ་མཆོག་གིས་སྒྲོལ་བ་དེ་གདུལ་བྱ་གང་ལ་བྱ་བའམ་མི་བྱ་བ་ཡི་ཡོངས་སུ་རྟོག་པ་དེ་དག་མེད་ཀྱང་སྙིང་རྗེ་ཆེན་པོ་བླ་ན་མེད་ཅིང་མཆོག་ཏུ་གྱུར་པ་ཡིན་ཏེ། དེ་ཅིའི་ཕྱིར་ཞེ་ན། དེ་འདྲའི་སྙིང་རྗེ་དེ་ཉིད་སྣང་ལ་མ་གྲུབ་པས་སྒྱུ་མ་ལྟ་བུ་ཡིན་པས་ན་དེ་ལ་སུ་ཞིག་གིས་སྙིང་རྗེ་ཆེན་པོ་ཟེར་ཏེ་ཐ་སྙད་ཀྱིས་གདགས་པ་མེད་དོ། །དེ་བཞིན་དུ་གདུལ་བྱ་གང་ལ་གདུལ་བར་བྱ་བའམ་མི་བྱ་བ་ཡི་ཁྱད་པར་དབྱེ་ཞིང་འདུལ་མི་འདུལ་གྱི་ཐེ་ཚོམ་དང་ཡོངས་སུ་རྟོག་པ་དེ་དག་མེད་ཀྱང་མཆོག་དང་བླ་ན་མེད་པ་ཡིན་ཏེ། ཅིའི་ཕྱིར་ན། དེ་འདྲའི་གདུལ་བྱ་དྲག་པོ་དེ་ཉིད་སྣང་བཞིན་དུ་མ་གྲུབ་པར་སྒྱུ་མ་ལྟ་བུ་ཡིན་པས་ན་དེ་ལ་ཆེད་དུ་དམིགས་ཏེ་གདུལ་བར་བྱ་ཞེས་སུ་ཞིག་ཟེར་ཏེ་ཐུལ་མི་ཐུལ་མེད་པའི་ཕྱིར་རོ།།

གསུམ་པ་ཇི་ལྟར་བཏུལ་བ་དངོས་ལ་གཉིས་ཏེ། འཁོར་རྣམས་བཏུལ་བ། གཙོ་བོ་བཏུལ་བའོ། །དང་པོ་ལ་གཉིས་ཏེ། དུག་གསུམ་ལ་ཞེན་པ་ཀུན་བཏུལ་བ། ཐུལ་ནས་གསང་ཆེན་བསྟན་པའི་དབུ་ཟུག་པའོ། །དང་པོ་ནི།

ཧྲཱིཿཧ་ཧ་ཧོ་ཧོ། ཞེས་པ་ནས། ཡོངས་རྫོགས་བཞེངས་ཤིག་དགོངས། །ཞེས་པའི་བར་གྱིས་བསྟན་ཏེ།

ཧཱིཿཧ་ཧ་ཧོ་ཧོ་སྤྲུལ་རབ་ཀུན་ཏུ་རབ་ཏུ་སྤྲུལ་སྣང་བར་མཛོད། །གཏུམ་ཐུང་རྔམ་འཁྲུག་འབར་བར་མཛོད། །རྣམ་པ་མང་པོ་སྣ་ཚོགས་ཁྲོ་བོར་ལོག་པར་ལྟ་བ་ཡི། །ཁྲོ་བོར་སྣང་བའི་འགྲོ་རྣམས་རྣམ་མང་པོ། །ཁྲོ་བོ་རྒྱུད་ཀྱི་མ་ལུས་ལུས་པ་མེད་པར་འདུལ་མཁས་པར། །རྒྱལ་བ་ཀུན་ཀྱི་ཐབས་མཆོག་སྒྱུ་མ་རབ་སྤྲུལ་རྣམ་པར་སྤྲུལ། །ཁྲོ་ལ་མ་གཡོས་ཡེ་ཤེས་ཞི་མཆོག་ཀུན་ཏུ་བཞེངས་ཤིག་མནབས། །རྣམ་པ་མང་པོ་སྣ་ཚོགས་འདོད་པར་སྣང་བའི་འགྲོ་བ་རྣམས། །རྣམ་པ་མང་པོས་འདོད་ཆགས་རྒྱུད་ཀྱི་མ་ལུས་ལུས་པ་མེད་པར་འདུལ་མཁས་པར། །རྒྱལ་བ་ཀུན་གྱི་ཐབས་མཆོག་སྒྱུ་མས་རབ་སྤྲུལ་རྣམ་པར་སྤྲུལ། །སྤྱོད་པ་མ་ཆགས་ཡེ་ཤེས་བདེ་མཆོག་ཀུན་ཏུ་མྱང་མཛད་བཞེངས་ཤིང་རོལ། །རྣམ་པ་མང་པོ་སྣ་ཚོགས་རྨོངས་པར་སྣང་བའི་འགྲོ་བ་རྣམས། །རྣམ་པ་མང་པོ་གཏི་མུག་རྒྱུད་ཀྱིས་མ་ལུས་ལུས་པ་མེད་པར་འདུལ་མཁས་པར། །རྒྱལ་བ་ཀུན་གྱི་ཐབས་མཆོག་སྒྱུ་མས་རབ་སྤྲུལ་རྣམ་པར་སྤྲུལ། །མཉམ་ལ་མ་རྨོངས་ཡེ་ཤེས་མ་འདྲེས་ཡོངས་རྫོགས་བཞེངས་ཤིང་དགོངས།།

ཧྲཱིཿ དབང་གི་སྙིང་པོ་དང༌། ཧ་ཧ་ཚམས་ངམ་རྔམ་པའི་གད་མོ། ཧོ་ཧོ་མ་རུངས་ཁྲོས་པའི་གད་མོ་སྟེ་གོང་དང་རྗེས་སུ་མཐུན་ལ། ཁྲོ་བོའི་གཙོ་བོ་སྤྲུལ་ལ་འཁོར་རབ་ཏུ་སྤྲུལ་ཏེ་ཀུན་ཏུ་རབ་ཏུ་སྤྲུལ་པ་གདུལ་བྱ་ལ་སྣང་ཞིང་གསལ་བར་མཛོད་ལ། ཤིན་ཏུ་སྐུ་གཏུམ་ཞིང་གསུང་དྲག་ཅིང་ཐུང་ལ་ཐུགས་རྔམ་པས་འཁྲུགས་ཏེ་མེ་དཔུང་འབར་བའི་རྣམ་པར་ཀུན་ཏུ་སྣང་བར་མཛོད་ཅིག གདུལ་བྱའི་བྱེ་བྲག་རྣམ་པ་མང་པོ་སོ་སོར་མ་འདྲེས་པར་སྣ་ཚོགས་ཇི་སྙེད་པ་ཡི་ལས་ཀྱི་ཁྲོ་བོ་སྲིན་པོར་སྣང་བའི་ལོག་པར་ལྟ་བ་ཅན་དེ་ཡི་རིགས་ཀྱི་ཞེ་སྡང་ཅན་གང་ཆ་བྱད་ཁྲོ་བོར་སྣང་བའི་འགྲོ་བ་རྣམ་པ་མང་པོ་བསམ་ཡས་པ་དེ་དག ཤིན་ཏུ་ཞེ་སྡང་དྲག་པོའི་ཚུལ་གྱིས་༼༣༩༦༽ཁྲོ་བོ་ཆེན་པོར་བཞེངས་པའི་བཛྲ་ཧེ་རུ་ཀ་ཡི་རིགས་དང་རྒྱུད་ཀྱིས་གདུལ་བྱ་སྤྱི་དང་ཁྱད་པར་མ་ལུས་ཤིང་ལུས་པ་མེད་པར་འདུལ་བར་མཛད་པའི་ཐབས་ཚུལ་མང་ཞིང་ཆེ་བ་དང་ལྡན་པ་མཁྱེན་པས་ཐབས་ལ་མཁས་པ་མངའ་བའི་ཕྱིར། རྒྱལ་བ་ཀུན་གྱི་ཐབས་མཆོག་མ་གྲུབ་བཞིན་དུ་སྣང་བས་སྒྱུ་མ་ལྟ་བུར་མཐུན་པར་རབ་ཏུ་སྤྲུལ་ཞིང་གཉེན་པོར་རྣམ་པར་སྤྲུལ་ཏེ་ཅིར་སྣང་ལྟར་དུ་འདོད་པའི་ཕྲིན་ལས་མཆོག་མཛོད་ལ། གདུལ་ཐབས་ཁྲོ་བོར་སྣང་ལ་ངོ་བོ་འགྲོ་འོང་མེད་པའི་དབྱིངས་ལས་མ་གཡོས་པར་རང་བྱུང་གི་ཡེ་ཤེས་ཆེན་པོ་ལ་ཡེ་ཤེས་བཞི་ཡང་ལྷུན་གྱིས་རྫོགས་པར་སྣང་བའི་ཁྲོ་བོ་མཆོག་གིས་དུག་གསུམ་ཞལ་དུ་གསོལ་ལ་ཀུན་ཏུ་བཞེས་ཤིག་བསྒྲལ་བའི་པགས་པ་སྐུ་ལ་མནབས་པར་མཛོད་ཅིག་ཅེས་བསྐུལ་ལོ། །དེ་བཞིན་དུ་གདུལ་བྱ་རྣམ་པ་མང་པོ་སྣ་ཚོགས་ཀུན་ཏུ་འདོད་པར་སྣང་བའི་འགྲོ་བ་འདོད་ཆགས་ཅན་རྣམས། བཀོད་པ་རྣམ་པ་མང་པོའི་འདོད་ཆགས་འབར་བའི་ཚུལ་གྱིས་པདྨ་ཧེ་རུ་ཀའི་རིགས་དང་རྒྱུད་ཀྱིས་གདུལ་བྱ་མ་ལུས་ལུས་པ་མེད་པར་འདུལ་བའི་མང་ལ་ཆེ་བའི་ཐབས་ལ་མཁས་པ་མངའ་བའི་རྒྱལ་བ་ཀུན་གྱི་ཐབས་མཆོག་སྣང་ལ་གྲུབ་པ་མེད་པ་སྒྱུ་མ་ལྟ་བུར་རབ་ཏུ་སྤྲུལ་ཏེ་རྣམ་པར་སྤྲུལ་ཞིང་འདོད་པ་ལ་སྤྱོད་པ་ལྟར་སྣང་ལ་ངོ་བོ་མ་ཆགས་པའི་ཡེ་ཤེས་ཆེན་པོས་བདེ་མཆོག་སྒྱུ་མའི་རོ་ཉིད་ཀུན་ཏུ་མྱོང་བར་མཛད་ནས་བཞེས་ཤིང་རོལ་པའི་གར་ཐབས་མཛོད་ཅིག དེ་དང་མཚུངས་པར་གདུལ་བྱ་རྣམ་པ་མང་པོ་སྣ་ཚོགས་པ་ཀུན་ཏུ་རྨོངས་པར་སྣང་བའི་འགྲོ་བ་གཏི་མུག་ཅན་རྣམས། མཁྱེན་རྩལ་རྣམ་པ་མང་པོ་མི་འབྱེད་གཏི་མུག་ཆེན་པོའི་ཚུལ་གྱིས་བུདྡྷ་ཧེ་རུ་ཀའི་རིགས་དང་རྒྱུད་ཀྱིས་གདུལ་བྱ་མ་ལུས་ཤིང་ལུས་པ་མེད་པར་འདུལ་བའི་མང་ལ་ཆེ་བའི་ཐབས་ལ་མཁས་པ་མངའ་བའི་རྒྱལ་བ་ཀུན་གྱི་ཐབས་མཆོག་སྣང་ལ་སྟོང་པས་སྒྱུ་མས་རབ་ཏུ་སྤྲུལ་ཞིང་རྣམ་པར་སྤྲུལ་ཏེ། ཆོས་ཀུན་འབྲས་བུར་མཉམ་པས་འབྱེད་པ་མེད་པར་རྣམ་པ་ཀུན་ལ་མ་རྨོངས་པར་རང་གསལ་བསལ་བཞག་བྲལ་བར་མཁྱེན་པའི་ཡེ་ཤེས་མ་འདྲེས་ཡོངས་རྫོགས་ཆེན་པོར་བཞེངས་ཤིང་དགོངས་པར་མཛོད་ཅིག་ཅེས་བསྐུལ་བར་མཛད་དོ།།

གཉིས་པ་ཐུལ་ནས་གསང་ཆེན་བསྟན་པའི་དབུ་ཟུག་པ་ནི།

ཞེས་ཁྲོ་བོ་མ་རངས། ཞེས་པ་ནས། སྒྲོགས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ཞེས་ཁྲོ་བོ་མ་རུངས་མི་བསྙེམས་དྲག་པ་དགྱེས་པའི་སྒྲ་འབྲུག་སྟོང་ལྡིར་བ་བྱུང་བས། བདུད་ཀྱི་ཆ་འཛིན་པའི་བདུད་བྱེ་བ་དུང་ཕྱུར་རྣམས་བག་བཞི་བསྐུམས་ཏེ་ཟིལ་གྱིས་ནོན། རུ་མཚོན་ལ་སོགས་པ་མཚོན་ཆའི་སྤྲིན་ཕུང་ན་སྟོང་པ་ཉིད་དུ་སངས་པར་གྱུར། མི་སྙན་པའི་ངག་རྣམས་ནི་མངོན་དུ་གྱུར་ཏེ།

ཐེག་པ་ཆེན་པོ་གསང་སྔགས་ཀྱི་སྒྲ་ནི་དི་རི་རི་སྒྲོགས་པར་གྱུར་ཏོ།།

ཞེས་ཡེ་ཤེས་ཀྱི་ཁྲོ་བོ་ཆེན་པོ་རུ་ཏྲ་ལ་སོགས་པའི་སྤྱོད་ལོག་ལ་མ་རངས་ཏེ་དགྱེས་པ་མེད་ཀྱང་དེས་མི་བསྙེངས་ཏེ་བག་ཚ་བ་མེད་པའི་ཕྱིར་དྲག་པོ་དགྱེས་པའི་གསུང་སྒྲ་འབྲུག་སྟོང་དུས་གཅིག་ཏུ་ལྡིར་བ་ལྟ་བུའི་གདངས་སྐད་བྱུང་བ་བདུད་ཚོགས་ཀྱི་ངོ་ལ་སྣང་བས་བདུད་ཀྱི་ཆ་འཛིན་པའི་བདུད་དམག་བྱེ་བ་དུང་ཕྱུར་རྣམས། བག་བཞི་འཁུམས་ཏེ་ཟིལ་གྱིས་གནོན་པར་གྱུར་པས་རྒོལ་བར་མ་ནུས་ཏེ་རུ་མཚོན་ལ་སོགས་པའི་མཚོན་ཆའི་སྤྲིན་དཔུང་ནི་བྱེད་པ་མི་དམིགས་པས་སྟོང་པ་ཉིད་དུ་སངས་པར་གྱུར་ཅིང༌། བདུད་ཀྱི་སྒྲ་དང་ཨག་ཚར་གྱི་མི་སྙན་པའི་ངག་རྣམས་ནི་ཆོས་ཀྱི་ཚིག་དོན་དུ་ཤར་ནས་ལས་དང་སྐྱེ་བ་དང་མཚན་ཉིད་ཐམས་ཅད་མངོན་དུ་གྱུར་ཏེ། ཐེག་པ་ཆེན་པོ་གསང་སྔགས་ཀྱི་སྒྲ་ནི་དི་རི་རི་སྒྲོགས་པར་གྱུར་ཏོ། །དེ་བས་ན་གསང་བ་མཆོག་གི་བསྟན་པ་འབྱུང་བའི་འགོ་ཚུགས་སོ། །ནང་ལྟར་ན། ཀུན་གཞི་ལ་ཆོས་ཉིད་ཀྱི་གསལ་སྣང་འཕེལ་ཏེ་དུག་གསུམ་ས་བོན་གྱི་ཆ་དང་བཅས་པའི་སྒྲིབ་པ་ཐམས་ཅད་དག་པའི་སྒོམ་ལམ་གྱི་ཡེ་ཤེས་བསྐྱེད་པའོ།།

གཉིས་པ་གཙོ་བོ་བཏུལ་བ་ལ་གཉིས་ཏེ། མཐུ་དང་རྫུ་འཕྲུལ་ཚར་བཅད་པ། བསྒྲལ་ཏེ་དངོས་སུ་བཏུལ་བའོ། །དང་པོ་ནི།

དུར་ཁྲོད་ཀྱི་བདག་པོ། ཞེས་པ་ནས། མྱོས་ཏེ་འགྱེལ་བར་གྱུར། །ཞེས་པའི་བར་གྱིས་བསྟན་ཏེ།

དུར་ཁྲོད་ཀྱི་བདག་པོ་རུ་དྲ་ནག་པོ་ལྟ་ཞིག་རང་གི་འཁོར་གྱིས་ཡོངས་སུ་བོར་ཏེ། རྗེ་བཙན་དམ་པོ་དེ་ལ་སྐྱབས་སུ་དོང་། བློ་གྲོས་ཀུན་གྱི་ཡུལ་དང་བྲལ། ཡི་ཁོས་བསམ་པ་ཆད་ཅིང་ཐབས་བརླག་ནས་ཀུན་ནས་འཁྲུགས་ཏེ་རྣམ་པར་འཁམས་ནས། རང་གི་རུ་དྲ་ལྔའི་ས་བོན་མངོན་དུ་ཕྱུང་བ། རུ་ལུ་རུ་ལུ་བྷྱོ་ཞེས་བརྗོད། །མགོ་གསུམ་ལག་དྲུག་རྐང་བཞི་པ། །ཁྲོས་པའི་ཚུལ་དུ་གྱུར་པ་ལས། །རྗེ་བཙན་རྡོ་རྗེ་སྲིན་པོ་དེས། །ཁོ་ན་ཉིད་དུ་དེར་མཛད་དེ། །བྱིན་རླབས་ཡི་གེ་མི་ཕྱེད་པའི། །དབང་དུ་འཁོར་བའི་ས་བོན་ལྔ། །བྱས་ནས་ངག་གི་སྤྲུལ་པ་ཕྲོགས། །ཁོ་ན་ངག་གི་དབང་པོ་ཉམས། །དེ་ནས་དུར་ཁྲོད་བདག་པོ་དེས། །ར་ལ་ར་ལ་བྷྱོ་བརྗོད་པས།།

མགོ་དགུ་བཅོ་བརྒྱད་ལག་ཏུ་གྱུར། །གང་དེར་རྗེ་བཙན་དམ་པ་དེས། །ངག་གི་སྤྲུལ་པ་ངེས་པར་བཅད།།

ཡང་དེར་དུར་ཁྲོད་བདག་པོ་དེས། །ཧཱུ་ལུ་ཧཱུ་ལུ་བྷྱོ་བརྗོད་པས། །མགོ་ལྔ་བཅུ་དྲུག་ལག་ཏུ་གྱུར།།

དཔལ་ཆེན་རྗེ་བཙན་སྲིན་པོ་དེས། །ཁོ་ན་ཅི་འདྲ་དེར་མཛད་དེ། །དེར་ཡང་ངག་གི་བརྗོད་པ་བཅད།།

གང་དེར་དུར་ཁྲོད་བདག་པོ་དེས། །ཧ་ལ་ཧ་ལ་བྷྱོ་བརྗོད་པས། །ཉི་ཤུ་རྩ་གཅིག་མགོ་བོ་ལ།།

བཞི་བཅུ་རྩ་གཉིས་ལག་ཏུ་གྱུར། །ཡང་དུ་རྡོ་རྗེ་སྲིན་པོ་དེས། །དེ་ཅི་ཁོ་ནར་དེར་མཛད་ནས།།

གང་དེར་སྨྲ་བའི་དབང་པོ་བཅད། །ཡང་དེར་ཁོ་ན་དེ་ཉིད་ཀྱིས། །ར་ལི་ར་ལི་བྷྱོ་བརྗོད་པས།།

ལུས་ནི་ཚད་མེད་ཆེན་པོ་ལ། །ནད་ཀྱི་བསྐལ་པ་ཚུབ་མར་གཏོང་། །གདུག་པའི་མཚོན་ཆས་ལུས་ལ་འགྱེད།།

རྗེ་བཙན་རྡོ་རྗེ་སྲིན་པོ་དེས། །ཁོ་ནར་ཅི་འདྲ་ཉིད་མཛད་དེ། །ངག་ཕྲོགས་ངག་གི་སྤྲུལ་པ་བཅད།།

དཔེར་ན་སྐྱེས་བུ་ལ་ལ་ཞིག །ལྕེ་བཅད་ཁྲག་གིས་བོར་བ་བཞིན། །ཤིན་ཏུ་མྱོས་ཤིང་འགྱེལ་བར་གྱུར།།

དེ་ནས་དུར་ཁྲོད་ཀྱི་བདག་པོ་རུ་ཏྲ་ནག་པོ་གཅིག་པུ་ལྟ་ཞིག་རང་གི་འཁོར་གྱིས་ཡོངས་སུ་བོར་ཏེ་འཁོར་ཐམས་ཅད་འཇིགས་བྱེད་ཆེན་པོ་རྗེ་བཙན་དམ་པ་དེ་ལ་སྐྱབས་སུ་དོངས་ནས་རུ་ཏྲ་གཅིག་པུ་ལས་མི་སྣང་སྟེ། བདུད་ཀྱི་བློ་དང་གྲོས་ཀུན་གྱི་ཡུལ་འཁོར་ཐམས་ཅད་དང་བྲལ་བར་བྱས་པ་ནི་རྟའི་འདུར་གླུའི་མཐུའོ། །དེ་ནས་རུ་ཏྲ་ནག་པོ་རང་གི་འཁོར་ལ་ཡི་ཁོས་བསམ་པ་ཆད་པའམ་ཡི་ཆད་དེ་རེ་བ་མེད་ཅིང་བརྒལ་བའི་ཐབས་ཐམས་ཅད་བརླག་ཅིང་བྲལ་ནས། ཤིན་ཏུ་ཞེ་སྡང་དྲག་པོས་ཀུན་ནས་འཁྲུགས་ཏེ་དེའི་དབང་གིས་དྲན་པ་མེད་པར་རྣམ་པར་28འཁམས་ནས་རྩལ་ཡོད་ཚད་བཏོན་པ་ནི། རང་གི་རུ་ཏྲ་ལྔའི་ས་བོན་མངོན་དུ་ཕྱུངས། ཞེས་པའི་དོན་འགྲེལ་ཆེན་གྱི་ལུགས་ཀྱི་ཉོན་མོངས་པ་དུག་ལྔ་ལ་བཤད་ཅིང༌། ལུང་བསྟན་དང་རུ་ཏྲ་ལམ་སྲོང་གི་ལུགས་ཀྱི་འདི་ལྟར་༼༣༩༨༽བཤད་དེ། བརྟགས་པ་རང་རྒྱུད་ཀྱི་རུ་ཏྲ་མོས་པ་རྗེས་སུ་བཞག་པའི་ཤེས་པ་སྐྱེས་བུ་ཡུལ་གྱི་འདོད་པས་གདུང་བ་ལྟ་བུ་དང༌། སྤྲུལ་པ་འདོད་པ་སྐོངས་པའི་རུ་ཏྲ་བསམ་པ་ཡིད་དང་མཐུན་པའི་ཤེས་པ་སྣ་ཚོགས་མེ་ཏོག་གི་གླིང་ལ་ཕྱིན་པ་ལྟ་བུ་དང༌། ཏིང་ངེ་འཛིན་ཡེ་ཤེས་སུ་ལངས་པའི་རུ་ཏྲ་སྣ་ཚོགས་ཉམས་དང་ལྡན་པའི་ཤེས་པ་རྒྱ་མཚོར་རིན་པོ་ཆེའི་གླིང་ལ་ཕྱིན་པ་ལྟ་བུ་དང༌། རིག་པ་རྣལ་དུ་འཇོག་པའི་རུ་ཏྲ་རང་གསལ་ཕྱོགས་དང་བྲལ་བའི་ཤེས་པ་སྐྱེས་བུ་རང་གི་མཚན་དཔེ་ལ་ལྟ་བ་ལྟ་བུ་དང༌། མ་བཅོས་ལྷུན་གྱིས་གྲུབ་པའི་རུ་ཏྲ་ཀློང་ཡངས་སྙིང་པོར་ཆུབ་པའི་ཤེས་པ་ཐམས་ཅད་ནམ་མཁའི་ངང་དུ་གནས་ཤིང་འབྱུང་འཇུག་མེད་པ་ལྟ་བུའོ། །དེ་ལ་དང་པོ་བརྟགས་པ་རང་རྒྱུད་ཀྱི་རུ་ཏྲ་ནི། རུ་ཏྲ་ལམ་སྲོང་ལས། ཉོན་མོངས་འདོད་དང་གཟུང་འཛིན་གྱིས། །བརྟགས་པས་ཅི་བཞིན་དོན་ལ་སྒྲིབས། །ཅེས་པས་འདིར་གསུམ་སྟེ། ལོག་པའི་དབང་གིས་ཉོན་མོངས་པ་ལྔར་བརྟགས་པ་དང༌། རྟོག་པའི་དབང་གིས་གཟུང་འཛིན་དུ་བརྟགས་པ་དང༌། ཞེན་པའི་དབང་གིས་འདོད་ཡོན་ལྔར་བརྟགས་པའོ། །དེ་ནི་གྲོལ་ཐར་བ་ལ་དད་ཅིང་མོས་པའི་ཤེས་པ་ཙམ་ཡོད་དེ། དཔེར་ན་སྐྱེས་བུ་སྙིང་དུ་སྡུག་པ་ལ་ཆགས་ཤིང་ཞེན་པ་ལྟ་བུའོ། །དེ་ཉིད་ལེའུ་ཉི་ཤུ་པ་ཉེར་གཅིག་པ་ཉེར་གཉིས་པ་གསུམ་གྱིས་སྟོན་ནོ།།

གཉིས་པ་སྤྲུལ་པ་འདོད་པ་སྐོངས་པའི་རུ་ཏྲ་ནི། སྔ་མ་ལས། བྱིན་རླབས་ཉམས་ལྡན་བླ་མ་ཡིས། །རིགས་ངེས་ངད་ལྡན་ཤེས་རབ་སྤྱོད། །ལས་དང་ཐུགས་རྗེར་འཕྲད་རུང་ལ། །རང་བཞིན་དཀའ་བའི་ལས་དབང་གིས། །དུག་གིས་དུག་ནད་བསལ་བ་ལྟར། །ཞེས་པས་འདིར་གསུམ་སྟེ། སྨོན་ལམ་གྱི་དབང་གིས་གང་སྤྲུལ་པ་དང༌། གདུལ་བྱའི་དབང་གིས་གང་ལ་སྤྲུལ་པ་དང༌། འདུལ་བྱེད་ལས་ཀྱི་དབང་གིས་ཇི་ལྟར་སྤྲུལ་པའོ། །དེ་ནི་གདུལ་བྱའི་བསམ་པ་ཡིད་དང་མཐུན་པའི་ཤེས་པ་སྟེ་མེ་ཏོག་སྣ་ཚོགས་ཀྱི་གླིང་ལ་ཕྱིན་ཙམ་ན། མཛེས་ཤིང་ཡིད་དང་མཐུན་པ་ལྟ་བུའོ། །དེ་ཉིད་ལེའུ་ཉེར་གསུམ་པ་ནས་ཉེར་དྲུག་པའི་བར་གྱིས་སྟོན་ནོ།།

གསུམ་པ་ཏིང་ངེ་འཛིན་ཡེ་ཤེས་སུ་ལངས་པའི་རུ་ཏྲ་ནི། དེ་ཉིད་ལས། སྔོན་ནས་ཞེན་པའི་བག་ཆགས་དག །འདས་པའི་དུས་ན་སྔོན་༼༣༩༩༽བྱུང་ལྟར། །བླ་མས་གསལ་བྱས་སེལ་འགྱུར་བས། །ནོར་བས་ཡིད་ཆེས་འགྱོད་པ་ཉིད། །གདུལ་བྱའི་ཞེན་པ་སྔོན་བསལ་ནས། །རང་སེམས་སྙིང་པོ་མཐོང་བའི་རྒྱུ། །ད་ལྟ་ཉིད་དུ་མངོན་པར་སྣང༌། །བླ་མ་དབང་པོ་ཐམས་ཅད་ལ། །མཉེས་ཤིང་ཚོགས་ཀྱིས་གུས་མཆོད་ཅིང༌། །ཞེས་པས་འདིར་གསུམ་སྟེ། གདུལ་བྱེད་དྲག་པོའི་སྟོབས་ཀྱིས་སྔོན་གྱི་ལས་དྲན་ཏེ་ཏིང་ངེ་འཛིན་ཡེ་ཤེས་སུ་ལངས་པ་དང༌། སྨྲེ་སྔགས་དྲག་པོའི་ཤུགས་ཀྱིས་གདུང་བ་ཆད་དེ་ཏིང་ངེ་འཛིན་ཡེ་ཤེས་སུ་ལངས་པ་དང༌། དབང་དང་གདམས་ངག་དྲག་པོའི་བྱིན་རླབས་ཀྱིས་རིག་པའི་ཉམས་འཕེལ་ཏེ་ཏིང་ངེ་འཛིན་ཡེ་ཤེས་སུ་ལངས་པའོ། །དེ་ནི་ཏིང་ངེ་འཛིན་གྱི་ཉམས་འཕེལ་བས་རྒྱ་མཚོའི་གླིང་དུ་ཕྱིན་ཙམ་ན་གང་ལ་བལྟས་པ་ཐམས་ཅད་ནོར་བུ་རིན་པོ་ཆེར་འདུག་པ་ལྟ་བུའོ། །དེ་ཉིད་ཉེར་བདུན་པ་ནས་སུམ་ཅུ་པའི་བར་གྱིས་སྟོན་ནོ།།

བཞི་པ་རིག་པ་རྣལ་དུ་འཇོག་པའི་རུ་ཏྲ་ནི། རྟོགས་ན་མ་བཅོས་རང་བཞིན་ཏེ། །ཆུ་ཡི་རླབས་ལྟར་ཐ་དད་མེད། །ཅིར་སྣང་རང་སེམས་སྐྱེ་མེད་ཅིང༌། །ངོ་བོ་མི་འགྱུར་བཅོས་སུ་མེད། །མཐུན་དང་མི་མཐུན་བྱུང་ཚོར་ནི། །རྒྱུ་རྐྱེན་གཉིས་པོ་དང་བྲལ་བར། །ངོ་བོ་མཐོང་བ་ཡེ་ཤེས་གསལ། །སྔ་ཕྱི་མེད་དེ་དེ་བཞིན་ཉིད། །ཅེས་པས་འདིར་གསུམ་སྟེ། རང་བཞིན་མ་བཅོས་པར་རྣལ་དུ་འཇོག་པ་དང༌། གནས་སྐབས་མི་འགྱུར་བར་རྣལ་དུ་འཇོག་པ་དང༌། མཚན་ཉིད་མ་ལྟོས་པར་རྣལ་དུ་འཇོག་པའོ། །དེ་ནི་རིག་པ་ཡེ་ཤེས་གསལ་བའི་ཡེ་ཤེས་སུ་ཤར་བས་སྐྱེས་བུ་རང་གི་མཚན་དཔེ་རང་ལ་ཡོད་པ་ངོ་མ་ཤེས་པ་མེ་ལོང་དུ་ཤར་ནས་གསལ་བར་མཐོང་བ་ལྟ་བུའོ། དེ་ཉིད་ཉེར་དགུ་པ་ནས་སོ་གཅིག་པའི་བར་གྱིས་འཐོར་བུར་སྟོན་ནོ།།

ལྔ་པ་མ་བཅོས་ལྷུན་གྱིས་གྲུབ་པའི་རུ་ཏྲ་ནི། ལམ་སྲོང་ལས། རིག་པ་ཇི་ལྟར་གང་གསལ་ཀྱང༌། །རང་བྱུང་རང་སྣང་དེ་བཞིན་ཉིད། །མཐོང་རྟོགས་གོམས་པའི་སྐྱེས་བུ་ལ། །སྒོ་གསུམ་མཛད་པ་ཕྱོགས་རིས་མེད། །དེས་ན་ལུང་ཐོབ་བྱིན་རླབས་ལྡན། །ཞེས་པས་འདིར་གསུམ་སྟེ། གནས་ཚུལ་མ་བཅོས་པར་ལྷུན་གྱིས་གྲུབ་པ་དང༌། སྣང་ཚུལ་མ་བཅོས་པར་ལྷུན་གྱིས་གྲུབ་པ་དང༌། འབྲས་བུ་མ་བཅོས་པར་ལྷུན་གྱིས་གྲུབ་པའོ། །དེ་ནི་སྙིང་པོ་བྱང་ཆུབ་ཀྱི་སེམས་མངོན་དུ་གྱུར་པས་ཆོས་ཐམས་ཅད་དབྱིངས་༼༤༠༠༽ཀྱི་ནམ་མཁའ་ལ་གསལ་བའོ། །དེ་ཉིད་ལེའུ་སོ་གཅིག་པས་སྟོན་ནོ། །འདིར་ནི་རུ་ཏྲ་དང་པོ་གོལ་བ་ནས་མཐར་འབྲས་བུ་མངོན་དུ་གྱུར་པའི་བར་གྱི་བྱུང་ཚུལ་འདི་ཡི་སྐབས་དོན་ཡོངས་རྫོགས་ལ་སྦྱར་ནས་འཆད་དོ། །དེ་ལྟར་འཆད་ཚུལ་གཉིས་པོ་གང་ལྟར་ཡང་རང་བཞིན་ཡེ་ཤེས་སུ་གནས་ཀྱང་སྣང་ཆ་བདག་ཏུ་རྟོག་པའི་མཐུས་ཉོན་མོངས་པ་དུག་ལྔར་ཤར་བ་ལ་གཉིས་ཀར་གཏོགས་པའི་ཁམས་ཀྱི་ཆས་ལས་ཀྱི་ཁྲོ་བོར་སྐྱེ་བའི་སྐུ་ཡི་ས་བོན་སྲོག་སྔགས་བརྗོད་ནས་སྟོབས་རྩལ་མངོན་དུ་ཕྱུང་བ་སྟེ། དང་པོ་རུ་ལུ་རུ་ལུ་བྷྱོཿ ཞེས་མངོན་དུ་བརྗོད་པ། རུ་ཏྲ་ཁོ་ཉིད་སྔར་ལས་མགོ་གསུམ་ལ་ལག་པ་དྲུག་ཅན་རྐང་པ་བཞི་པ། ཤིན་ཏུ་ཁྲོས་པའི་ཚུལ་དུ་གྱུར་ནས་ཆེ་བ་བཏོན་པ་ལས། དཔལ་ཆེན་པོ་རྗེ་བཙན་རྡོ་རྗེ་སྲིན་པོ་དེས་ཁོ་ན་ཉིད་ཅི་འདྲ་བ་བཞིན་དུ་དབུ་གསུམ་ཕྱག་དྲུག་ཞབས་བཞི་པ་དེར་མཛད་དེ། ལུས་ཀྱི་མཐུ་འཕྲོག་ཅིང་ཐུགས་ཡེ་ཤེས་ཀྱི་བྱིན་རླབས་སྣང་བའི་རྣམ་པར་ཡི་གེ་ཧཱུྃ་ལ་ངོ་བོ་རྡོ་རྗེ་མི་ཕྱེད་པའི་ཡེ་ཤེས་ཆེན་པོའི་དབང་དུ་ཁོ་ཡི་ངག་བྱས་ཏེ་འཁོར་བའི་ས་བོན་ལྔ་པོ་རུ་ལུ་རུ་ལུ་ཧཱུྃ་བྷྱོཿ ཞེས་སུ་བྱས་ནས་གསུངས་པས་ངག་གི་སྤྲུལ་པ་དེ་ཉིད་འཕྲོགས་ཏེ་རུ་ཏྲ་ཁོ་ན་དེ་ཡི་ངག་གི་དབང་པོ་ཉམས་པར་མཛད་དོ། །དེ་ནས་ཡང་དུར་ཁྲོད་ཀྱི་བདག་པོ་དེས། གཉིས་པ་ར་ལ་ར་ལ་བྷྱོཿ ཞེས་བརྗོད་པས། དེའི་སྟོབས་ཀྱིས་མགོ་དགུ་ལ་བཅོ་བརྒྱད་ལག་ཏུ་གྱུར་པ་ན། གང་དེར་ཡང་དཔའ་བོ་རྗེ་བཙན་དམ་པ་དེས། དབུ་དགུ་བཅོ་བརྒྱད་ཕྱག་ཏུ་མཛད་ནས། རུ་ཏྲ་གང་གི་སྤྲུལ་པ་དེ་ཉིད་ངེས་པར་བཅད་དོ། །ཡང་དེ་ཡང་དུར་ཁྲོད་བདག་པོ་དེས། གསུམ་པ་ཧུ་ལུ་ཧུ་ལུ་བྷྱོཿ ཞེས་བརྗོད་པས། མགོ་བོ་ལྔ་ལ་བཅུ་དྲུག་ལག་ཏུ་གྱུར་ཏེ། དཔལ་ཆེན་རྗེ་བཙན་སྲིན་པོ་དེས་ཀྱང་རུ་ཏྲ་ཁོ་ན་ཅི་འདྲ་བར་དབུ་ལྔ་བཅུ་དྲུག་ཕྱག་དེར་མཛད་དེ། དེར་ཡང་ཁོ་ཡི་ངག་གི་བརྗོད་པ་བཅད་དེ་ཉམས་པར་བྱས་སོ། །འདི་ལ་དཔེ་ལ་ལར་མགོ་བརྒྱད་ཀྱང་འབྱུང་ལ་དོན་ལ་འདི་དང་སྔ་མ་གོ་རིམ་བརྗེ་བར་གསུངས་སོ། །གང་དེར་ཡང་དུར་ཁྲོད་བདག་པོ་དེས། བཞི་པ་ཧ་ལ་ཧ་ལ་བྷྱོཿ ཞེས་བརྗོད་པས། ཉི་ཤུ་རྩ་གཅིག་གི་མགོ་བོ་ལ། བཞི་བཅུ་རྩ་གཉིས་ཀྱི་ལག་པ་ཅན་དུ་གྱུར་ཏོ། །ཡང་དུ་རྡོ་རྗེ་སྲིན་པོ་དེས་ཀྱང་རུ་ཏྲ་དེ་ཅི་འདྲ་བ་ཁོ་ན་ལྟར་དབུ་༼༤༠༡༽ཉེར་གཅིག་ལ་ཕྱག་ཞེ་གཉིས་ཅན་དེར་མཛད་ནས། གང་འདིར་ས་བོན་དེ་སླར་སྨྲ་བའི་ངག་གི་དབང་པོ་བཅད་པར་མཛད་དོ། །ཡང་དེར་རུ་ཏྲ་ཁོ་ན་ཉིད་ཀྱིས། ལྔ་པ་ར་ལི་ར་ལི་བྷྱོཿ ཞེས་བརྗོད་པས། ལུས་ནི་ཚད་མེད་པའི་ཆེན་པོ་དབུ་ཕྱག་གྲངས་མེད་པ་ལ་ནད་ཀྱི་བསྐལ་པ་འཚུབ་མར་གཏོང་ཞིང་གདུག་པའི་མཚོན་ཆ་སྣ་ཚོགས་ལུས་ལས་འགྱེད་པར་བྱེད་དོ། །རྗེ་བཙན་རྡོ་རྗེ་སྲིན་པོ་དེས་ཀྱང་རུ་ཏྲ་ཁོ་ན་དེ་འདྲར་དབུ་ཕྱག་མཐའ་ཡས་པ་ཉིད་མཛད་དེ། ཁོ་ཡི་ངག་འཕྲོགས་པར་མཛད་པས་ངག་གི་སྤྲུལ་པ་ཆད་པར་གྱུར་ཏེ། དཔེར་ན་སྐྱེས་བུ་གང་ལ་ལ་ཞིག་ལྕེ་བཅད་དེ་ཁྲག་གིས་བོར་བ་བཞིན་དུ་ཤིན་ཏུ་མྱོས་ཏེ་འགྱེལ་བར་གྱུར་ཏོ། །དེ་དག་གིས་སྦྱོར་ལམ་དང་སྐལ་བ་མཉམ་པར་མཛད་པར་མངོན་ནོ།།

གཉིས་པ་བསྒྲལ་ཏེ་དངོས་སུ་བཏུལ་བ་ནི།

ཀུན་གྱི་མངའ་བདག ཅེས་པ་ནས། རོལ་ཏེ་ཕྱལ་དུ་སྦྱངས། །ཞེས་པའི་བར་གྱིས་བསྟན་ཏེ།

ཀུན་གྱི་མངའ་བདག་ཆེན་པོ་དེས། །ས་མ་ཡ་ཧོ་གསུང་གྲགས་པས། །སྔོན་བྱུང་དུས་ནས་འབྲེལ་བ་ཡིས།།

སྲོག་གི་དབང་པོས་མ་བཟོད་དེ། །གང་དེར་བདུན་གྱིས་ཕྱོགས་པ་དང་། །རྩེ་གསུམ་ཁ་ཊྭཾ་འབར་བ་ཡིས།།

རུ་དྲའི་རི་བོ་བཅོམ་དབང་གིས། །ཕྱག་རྒྱས་རོལ་ཏེ་ཕྱལ་དུ་སྦྱངས།།

དེ་ནས་འཁོར་འདས་ཀུན་གྱི་མངའ་བདག་འཇིགས་བྱེད་ཆེན་པོ་དཔལ་རྡོ་རྗེ་སྲིན་པོ་དེས་ས་མ་ཡ་ཧོ་ཞེས་དམ་ཚིག་བདར་བའི་སྔགས་གསུངས་ཏེ་དམ་བསྒྲགས་པར་མཛད་པས་རུ་ཏྲ་སྔོན་བྱུང་གི་དུས་བསྐལ་པ་ཀུན་དགའ་ལ་ཐར་པ་ནག་པོར་གྱུར་ཙམ་ན་གསང་སྒོར་ལྷན་དུ་ཞུགས་ནས་མོས་པས་དམ་ཚིག་མནོས་པའི་ལས་དང་ཐུགས་རྗེས་འབྲེལ་བ་ཡི་དབང་གིས་སྲོག་གི་དབང་པོས་མ་བཟོད་དེ་ལམ་ལོག་པར་ཕྱོགས་མ་ཕོད་པར་གང་དེར་ཁྲོ་བོ་ཆེན་པོ་ལ་མདུན་གྱི་ཕྱོགས་ཏེ་ཡིད་འདུན་ཞིང་མོས་པ་བྱས་པ་དང༌། རྩེ་གསུམ་ཁ་ཊྭཱཾ་འབར་བ་ཡིས་དངོས་སུ་བརྒྱབས་ཏེ་བསྒྲལ་བར་བྱས་ནས་རུ་ཏྲའི་ངོ་བོ་བཅོམ་ཞིང་དབང་དུ་བསྡུ་བའི་ཐབས་མཆོག་གང་གིས་མཛད་པ་གར་གྱི་ཕྱག་རྒྱས་རོལ་སྟབས་མཛད་དེ། ཤ་ཟོས་ཁྲག་འཐུང་རུས་པ་འཆོས་ནས་དུག་གསུམ་མཆོད་པར་བཞེས། ཡན་ལག་བཅད་ཅིང་གཏུབ་སྟེ་སྙིང་དང་དབང་པོ་ཀུན་ཕྱུངས། ནང་ཁྲོལ་ཀུན་དྲངས་ཏེ་ཞལ་དུ་མིད་ནས་སྐུའི་ལྟོ་བའི་ཕྱལ་དུ་སྦྱངས་པར་མཛད་ལ། པགས་པ་ནི་སྐུ་ལ་མཁས་ཏེ་གསོལ། ཐོད་པས་སྐྱོགས་བྱས། ཁོའི་དུར་ཁྲོད་ཀྱི་ཆས་བརྒྱད་ཀྱང་རྒྱལ་བྱེད་དཔའ་རྟགས་ཀྱི་རྒྱན་དུ་མཛད་དེ་ཉོན་མོངས་པ་རྣམས་དག་པར་བྱས་སོ། །འདིར་བདུད་བཞི་བཅོམ་པའང་སྦྱར་ཞིང༌། ཤ་ཁྲག་རུས་གསུམ་ཟོས་པ་ནི་དུག་གསུམ་ཟད་པའི་བརྡ་དང༌། ནང་ཁྲོལ་ཀུན་ཟོས་པ་གཟུང་འཛིན་ཟད་པའི་བརྡ་དང༌། དབང་པོ་རྣམས་ཟོས་པ་ཆགས་པ་དང་བྲལ་བའི་བརྡ་དང༌། པགས་པ་གྱོན་ཞིང་ཐོད་༼༤༠༢༽སྐྱོགས་དུང་ཁྲག་མཛད་དེ་རྒྱན་རྣམས་མནབས་ཤིང་བརྒྱན་ཏེ་ཕྱག་ཆ་ཀུན་འཕྲོགས་པ་ནི་ཉོན་མོངས་པ་ཐམས་ཅད་ཀུན་ནས་བསྒྲལ་ཏེ་གནས་གྱུར་བའི་བརྡའོ། །བར་སྐབས་དེར་རུ་ཏྲས་མཐོང་ལམ་དོན་གྱི་ཡེ་ཤེས་མངོན་དུ་བྱས་ཏེ་སྣང་བ་རྣམ་འབྱེད་ཀྱི་རྟོགས་པ་ཐོབ་ནས་ཞེན་པ་ཡོངས་སུ་དག་གོ།

བདུན་པ་སྨྲེ་སྔགས་བཏོན་ཅིང་ལུས་དང་འཁོར་ཕུལ་བ་ལ་བཞི་སྟེ། སྨྲེ་སྔགས་བཏོན་པ། ལུས་ཕུལ་བ། འཁོར་ཕུལ་བ། འཁོར་ལ་གདམས་པ་བྱས་པའོ། །དང་པོ་ནི།

ཉེ་གནས། ཞེས་པ་ནས། བསྒྲལ་ན་ཡུན་དུ་བདེའོ། །ཞེས་པའི་བར་གྱིས་བསྟན་ཏེ།

ཉེ་གནས་དབང་གིས་མཚམས་སྦྱོར་བའི། །རང་གི་དམ་པ་ལ་སོགས་པའི། །མཐའ་ཐུག་མེད་པའི་སངས་རྒྱས་དང་། །དཔག་ཏུ་མེད་པའི་བྱང་ཆུབ་སེམས། །སྟུག་པོ་བཀོད་པ་མཐོང་བའི་མཐུས། །ཐོག་མ་མེད་པའི་དུས་མཐའ་ནས། །ཞེན་པའི་མུན་ནག་སངས་གྱུར་ཏེ། །སྐྱེ་བ་དུས་མཐའ་མེད་རྙེད་དུ། །ལུས་བླངས་ལས་ནི་ཅི་སྤྱད་དྲན། །སྣམ་བུ་སྟོན་དེ་ཞབས་དྲུང་འཁོད། །རབ་དགའ་བཏུད་ནས་གནོང་ཚུལ་དུ། །གང་དེར་ཤིན་ཏུ་ངུས་ཏེ་སྨྲེས།།

ཨེ་མའོ་ཨེ་མའོ་ཨེ་མ་ཡང་། །དཔའ་བོ་ལྷ་རྗེ་ཐུགས་རྗེ་ཆུང་། །ཤིན་ཏུ་བདེ་བའི་གནས་གཅིག་ནས།།

གནམ་དུ་སྟོན་པ་ཐུགས་རྗེ་ཆུང་། །ད་ཡོང་ཅི་མཛད་མྱུར་དུ་མཛོད། །མྱུར་དུ་བསྒྲལ་ན་ཡུན་དུ་བདེའོ།།

སྔོན་བསྐལ་པ་ཀུན་དགའ་ལ་གསང་སྔགས་ལ་མོས་པའི་ལས་ཀྱི་བག་ཆགས་ཀྱི་རྒྱུ་དང་ཉེ་གནས་དམ་པ་རྩལ་ཆེན་རྫོགས་པའི་སྐྱེས་བུར་གྱུར་ཏེ་ཐུགས་རྗེས་འབྲེལ་བའི་རྐྱེན་གྱི་དབང་གིས་མཚམས་སྦྱར་ཏེ་བསྒྲལ་བར་མཛད་པའི་བྱིན་རླབས་ཀྱིས་ཐུབ་དཀའ་རྡོ་རྗེ་སེམས་དཔར་གནས་གྱུར་པའི་རང་གི་བཤེས་གཉེན་དམ་པ་ལ་སོགས་པའི་མཐའ་ལ་ཐུག་པ་མེད་པའི་སངས་རྒྱས་མང་པོ་དང༌། བློ་བྲལ་དཔག་ཏུ་མེད་པའི་བྱང་ཆུབ་ཀྱི་སེམས་ཇི་བཞིན་པར་མངོན་དུ་བྱས་ཏེ་འཁོར་བའི་སེལ་མེད་པས་མི་ཕྱེད་སྟུག་པོ་བཀོད་པའི་ཞིང་ཁམས་དམ་པ་གསལ་བར་མཐོང་བའི་མཐུས། ཐོག་མ་མེད་པའི་དུས་ཀྱི་མཐའ་ནས་ལྷན་ཅིག་སྐྱེས་ཏེ་ཞེན་ཅིང་བག་ཆགས་པའི་མ་རིག་པའི་མུན་ནག་དང་ཉོན་མོངས་པའི་སྒྲིབ་པ་ཐམས་ཅད་སངས་པར་གྱུར་ཏེ་རྣམ་པར་དག་ནས་སྔོན་གྱི་གནས་རྗེས་སུ་དྲན་པ་ཐོབ་པས་སྐྱེ་བ་མང་པོ་ཐོག་མའི་དུས་མཐའ་མེད་པ་སྙེད་དུ་ལུས་བླངས་པ་དང་ལས་སྣ་ཚོགས་པ་ནི་གང་དང་ཅི་ལྟར་སྤྱད་པའི་ཉེས་པ་ཐམས་ཅད་དྲན་པར་གྱུར་ཏོ། །དེ་ནས་དཔལ་ཆེན་ཁྲོ་བོས་ཕྱི་སའི་ཚུལ་དུ་སྣམ་དུ་བཏོན་ཏེ་ཐ་མལ་པའི་ལུས་སུ་རྒྱུར་ནས་ཞབས་དྲུང་དུ་འཁོད་པ་ན། དབུགས་ཆེན་པོ་ཕྱིན་པ་ལ་རབ་ཏུ་དགའ་བས་གུས་པར་བཏུད་ནས་སྔར་གྱི་ལས་དང་སྐྱེ་བ་ལ་ཤིན་ཏུ་གནོང་བའི་ཚུལ་དུ་གང་དེར་ཤིན་ཏུ་ངུས་ནས་སྨྲེངས་པས་ངམ་པ་གསུམ་དུ་བཏོན་ཏེ། སྔ་མའི་ལས་ལོག་མང་པོ་དང༌། རྒྱལ་བའི་ཞལ་མ་མཐོང་བ་དང༌། འབྲས་བུ་བདེ་བ་མ་ཐོབ་པ་ལ་ངམ་ཞིང་འགྱོད་པའམ། ཡང་ན་མར་ལ་ངམ་པ་གཉིས་དང་ཡར་ལ་ངམ་པ་གཅིག་སྟེ། སྔོན་གྱི་ལས་ལ་ངམ་པས་ཨེ་མ་ཞེས་དང༌། བར་དུ་བསྒྲལ་བ་ལ་ངམ་པས་ཨེ་མའོ་ཞེས་དང༌། ཐ་མ་སྣམ་དུ་བཏོན་པ་ལ་ངམ་པས་ཨེ་མ་ཡང༌། དཔའ་བོ་ལྷ་རྗེ་ཐུགས་རྗེ་ཆུང༌། དཔལ་གྱི་ལྟོ་བ་ཤིན་དུ་བདེ་བའི་གནས་གཅིག་ནས་སྣམ་དུ་བཏོན་པ་ཐུགས་རྗེ་ཆུང༌། ༼༤༠༣༽ད་ཡང་མཛད་པ་ཅི་མཛད་མྱུར་དུ་མཛོད་ཅིག མྱུར་དུ་བསྒྲལ་བར་མཛད་ན་སྒྲིབ་པ་སྲེགས་པས་ཡུན་དུ་བདེ་བ་མཆོག་གི་དབང་ཕྱུག་དང་ལྡན་པར་འགྱུར་བའོ། །ཞེས་སྨྲས་སོ།།

གཉིས་པ་ལུས་ཕུལ་བ་ནི།

འབངས་སུ། ཞེས་པ་ནས། ཚིག་པར་འགྱུར། །ཞེས་པའི་བར་གྱིས་བསྟན་ཏེ།

འབངས་སུ་མཆིའོ་བདག་ལུས་འབུལ། །འབངས་ལ་ནན་ཏན་མ་ཆུང་ཞིག །དེང་ནས་སླན་ཆད་བཀའ་བཞིན་དུ།།

བཀའ་ཡི་ལུང་བཞིན་རྗེས་སུ་བསྒྲུབ། །གལ་ཏེ་དེ་བཞིན་མ་བགྱིས་སམ། །དམ་པའི་ལུང་ལས་འགལ་གྱུར་ན།།

བདག་ཅག་རྣམས་ཀྱིས་མགོ་ལུས་སྙིང་། །རུལ་མྱགས་གས་ནས་ཚིག་པར་འགྱུར།།

དེ་ནས་གུས་པས་ལུས་ཕུལ་ཏེ་འབངས་སུ་མཆིའོ་བདག་གི་ལུས་འབུལ་གྱིས་འབངས་སུ་མཛད་པ་ལ་ནན་ཏན་མ་ཆུང་ཞིག དུས་དེང་ནས་སླན་ཆད་ཀུན་ཏུ་དཔལ་རྡོ་རྗེ་སྲིན་པོས་བཀའ་སྩལ་པ་བཞིན་དུ་གསང་རྒྱུད་ལས་ཇི་ལྟར་གྲགས་པའི་བཀའ་ཡི་ལུང་བཞིན་རྗེས་སུ་བསྒྲུབས་པར་བགྱིའོ། །གལ་ཏེ་དཔལ་ཆེན་དངོས་ཀྱི་བཀའ་བཞིན་དུ་མ་བགྱིས་སམ། སྒྲུབ་པ་པོ་དང་གསང་བ་དམ་པའི་ལུང་ལས་འགལ་བར་གྱུར་ན། བདག་ཅག་རྣམས་ཀྱི་མགོ་ལུས་སྙིང་རྣམས་རིམ་པ་བཞིན་དུ་མགོ་རུལ་ནས་ལུས་མྱགས་ཤིང་སྙིང་སྐམ་ནས་ངེས་པར་ཚིག་པར་འགྱུར་རོ།།

གསུམ་པ་འཁོར་ཕུལ་བ་ནི།

མ་སྲིང༌། ཞེས་པ་ནས། བྲོན་ལ་རྩོལ། །ཞེས་པའི་བར་གྱིས་བསྟན་ཏེ།

མ་སྲིང་བུ་མོ་ཆུང་མ་རྣམས། །འབངས་སུ་འབུལ་ལོ་ཚིས་མ་ཆུང་། །དབུས་སུ་མཆིས་སྐལ་མི་ལྡན་གྱིས།།

འབར་བའི་དཀྱིལ་འཁོར་མཐའ་ལ་གཞོག །ཕུད་ལ་འཚལ་སྐལ་མི་ལྡན་གྱིས། །ལྷག་མ་ཞལ་ཆབ་སྦྲོན་ལ་གསོལ།།

འཁོར་གྱི་མ་དང་སྲིང་མོ་དང་བུ་མོ་དང་ཆུང་མ་རྣམས་ཀྱང་འབངས་སུ་འབུལ་ལོ་འབངས་ལ་ནན་ཏན་སོ་ཚིས་མ་ཆུང་ཞིག ལས་ལས་བྱུང་བས་དབུས་སུ་མཆི་བའི་སྐལ་བ་མི་ལྡན་གྱིས། ཁྲོ་བོ་འབར་བའི་ཞལ་མཐོང་བ་དང་བསྒྲལ་ཞིང་དམ་ལ་བཏགས་པས་དཀྱིལ་འཁོར་གྱི་ཁྱམས་ཕྱི་མའི་མཐའ་ལ་ཞོག་ཅིག དམན་མོ་ཡིན་པས་ཕུད་ལ་འཚལ་བའི་སྐལ་བ་མི་ལྡན་གྱིས། དཔལ་གྱི་ལྷག་མ་ལ་དམ་ཚིག་ཡིན་པས་ཞལ་ཆབ་བྲོན་ལ་རྩོལ་བར་མཛོད་ཅིག ནང་ལྟར་ན།  བདག་མེད་མངོན་སུམ་དུ་རྟོགས་ཏེ་མཐོང་ལམ་རྣམ་པར་མི་རྟོག་པའི་ཡེ་ཤེས་སྐྱེས་པ ་ན་ལུས་ཀྱི་ཟག་པ་དང་བྲལ་ནས་རེག་པ་དང་ཡིད་ལ་བྱེད་པ་ལ་སོགས་པ་ཐམས་ཅད་ཡེ་ཤེས་སུ་གྲོལ་བར་གྱུར་པའོ།།

བཞི་པ་འཁོར་ལ་གདམས་པ་བྱས་པ་ལ་གཉིས་ཏེ། རྒྱལ་བའི་བཀའ་ལས་མི་ཉམས་པར་གྱིས་ཤིག་པར་གདམས་པ། རྣལ་འབྱོར་པ་ལ་བརྩེ་གདུང་གྱིས་ཤིག་པར་གདམས་པའོ། །དང་པོ་ནི།

ཉེ་གནས། ཞེས་པ་ནས། ཉམས་ས་རེ། །ཞེས་པའི་བར་གྱིས་བསྟན་ཏེ།

ཉེ་གནས་གདུང་བའི་མིང་སྲིང་རྣམས། །དེང་ནས་རྒྱལ་བའི་འབངས་ཡིན་གྱིས། །ཁྱོད་ཀྱི་ཅི་བགྱིའི་བཀའ་ཡི་ལས་མཁན་ཏེ། །བཀའ་ཡི་ལས་བྱུང་རྟག་པར་མྱུར་དུ་བསྒྲུབ། །བདག་ཀྱང་དེང་སྔོན་ལམ་ལོག་ལས་དཔྱད་པས།།

དཔག་ཏུ་མེད་པའི་འཁོར་བའི་སྡུག་བསྔལ་རྒྱུད། །ད་ནི་ཐུགས་རྗེ་ལས་འཕྲོ་གཉིས་འཕྲད་པས།།

བདེ་བ་ཅན་གྱི་ཞིང་དུ་མྱུར་འགྲོ་ཡིས། །རྗེས་སུ་བསྟན་པའི་བཀའ་ལས་ཉམས་ས་རེ།།

དེ་ནས་རུ་ཏྲས་འཁོར་རྣམས་ལ་གདམས་ངག་ཏུ་བསྟན་པ་སྲུངས་ཤིག་པ་དང་ལས་གྱིས་ཤིག་པར་གདམས་ཏེ། ཉེ་གནས་སུ་གྱུར་བའི་གདུང་ཞིང་འདུད་པའི་མ་སྲིང་ལ་སོགས་པ་རྣམས་དུས་དེང་ནས་རྒྱལ་བའི་འབངས་ཡིན་གྱིས། དེ་བས་ན་ཁྱེད་རྣམས་ནི་བཀའ་ལུང་ཅི་བཞིན་དུ་སྒྲུབས་པར་བགྱི་བའི་བཀའ་ཡི་ལས་མཁན་ཡིན་ཏེ། བཀའ་ཡི་ལས་གང་དང་གང་བྱུང་ཡང་རྟག་པར་མྱུར་དུ་སྒྲུབས་ཤིག རུ་ཏྲ་བདག་ཀྱང་དེ་སྔོན་ཕན་ཆད་ལམ་ལོག་ཅིང་༼༤༠༤༽ལས་ཉེས་པར་སྤྱད་པས་དཔག་ཏུ་མེད་པའི་འཁོར་བའི་སྡུག་བསྔལ་ཁ་བརྒྱུད་ཀྱང༌། ད་ནི་དེ་ཡིས་སུན་ཕྱུང་བས་ལམ་དམ་པ་ལ་ངེས་པར་འཇུག དཔལ་གྱི་ཐུགས་རྗེ་དང་རང་གི་ལས་འཕྲོ་གཉིས་འཕྲད་པས། ལོངས་སྤྱོད་རྫོགས་སྐུ་བདེ་བ་ཅན་གྱི་ཞིང་དུ་མྱུར་བར་འགྲོ་ཡིས། རྒྱལ་བའི་རྗེས་སུ་བསྟན་པའི་བཀའ་ལུང་ནས་བྱུང་བ་རྣམས་ལས་ནམ་ཡང་ཉམས་ས་རེ། ཞེས་ཁས་བླངས་སོ།།

གཉིས་པ་རྣལ་འབྱོར་པ་ལ་བརྩེ་གདུང་གྱིས་ཤིག་པར་གདམས་པ་ནི།

ཇི་ལྟར། ཞེས་པ་ནས། སྐྱབས་སུ་དོང་སྟེ། །ཞེས་པའི་བར་གྱིས་བསྟན་ཏེ།

ཇི་ལྟར་མ་བྱམས་བུ་ལ་གདུང་བ་བཞིན། །དམ་ཚིག་ཅན་ལ་དུང་དུང་གདུང་བར་གྱིས།།

གང་དུ་སྲིང་བྱམས་མིང་ལ་བརྩེ་བ་བཞིན། །ཡལ་གམ་ཅན་ལ་ལྷང་ལྷང་བརྩེ་བར་གྱིས།།

མཛའ་མོ་གྲོགས་ལ་ཇི་ལྟར་གདུང་ཚུལ་དུ། །རྣལ་འབྱོར་ཅན་ལ་ཏྲིལ་ཏྲིལ་བརྩེ་བར་གྱིས།།

ཇི་ལྟར་གཡོག་བྱམས་དཔོན་ལ་སྙིང་བརྩེ་བཞིན། །དམ་པ་རྣམས་ལ་ངེས་པར་ཉེ་བར་གྱིས།།

ཞེས་འཁོར་ཉེ་གནས་རྣམས་ལ་གདམས་ངག་བོར་ནས། དཔའ་བོ་ཆེན་པོ་ལ་སྐྱབས་སུ་དོང་སྟེ།

ཇི་ལྟར་མ་བྱམས་མས་བུ་ལ་གདུང་བ་བཞིན་དུ། སྤྱི་དང་ཁྱད་པར་དུ་སྒྲུབ་པ་པོ་དམ་ཚིག་ཅན་ལ་དུང་དུང་དུ་གདུང་བར་གྱིས་ཤིག གང་དུ་སྲིང་མོ་བྱམས་མས་མིང་པོ་ལ་བརྩེ་བ་བཞིན་དུ། སྤྱི་དང་ལྷག་པར་དུ་སྒྲུབ་པ་པོ་ཡལ་གམ་ཅན་ལ་ལྷང་ལྷང་བརྩེ་བར་གྱིས་ཤིག མཛའ་མོ་དགའ་བའི་གྲོགས་ལ་ཇི་ལྟར་གདུང་ཞིང་ཆགས་པའི་ཚུལ་བཞིན་དུ། གསང་བའི་རྣལ་འབྱོར་ཅན་ལ་ཀྲིལ་ཀྲིལ་དུ་ཆགས་པའི་ཚུལ་གྱིས་བརྩེ་བར་གྱིས་ཤིག ཇི་ལྟར་འཁོར་གཡོག་བྱམས་པས་རང་གི་དཔོན་ལ་སྙིང་བརྩེ་བ་བཞིན་དུ། རྣལ་འབྱོར་དམ་པ་རྣམས་ལ་ངེས་པར་ཉེ་བར་གྱིས་ཤིག ཞེས་འཁོར་གྱི་ཉེ་གནས་རྣམས་ལ་གདམས་ངག་བོར་ནས་ཐམས་ཅད་འཇིགས་བྱེད་དཔའ་བོ་ཆེན་པོ་ལ་སྐྱབས་སུ་དོངས་ཏེ་གནས་སོ།།

བརྒྱད་པ་རང་རྟགས་སྲོག་གི་སྙིང་པོ་ཕུལ་བས་བྱིན་གྱིས་བརླབས་པ་ནི།

བཀའི་ཆེ་བ། ཞེས་པ་ནས། བཞུགས་སོ། །ཞེས་པའི་བར་གྱིས་བསྟན་ཏེ།

བཀའི་ཆེ་བ་ཡོངས་སུ་བསྲུང་བའི་ཕྱིར། རང་རྟགས་སྲོག་གི་སྙིང་པོ་ཕུལ་ཏེ་མནའ་དོར་རོ། །རུ་ལུ་རུ་ལུ་བྷྱོ་ཞེས་རང་གི་སྲོག་ལ་ཚད་བཞག་གོ །དེ་ནས་བཅོམ་ལྡན་འདས་ཀྱིས་ཡོངས་སུ་གནང་བ་ནི་འདིའོ། །ཨ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་བྱིན་གྱིས་བརླབས་ཏེ། བསྲེགས་སྦྱངས་བཏུལ་ནས། དགོངས་ཁྲལ་ཆུང་བར་བཞུགས་སོ།།

བཀའི་ལུང་གི་ཆེ་བ་དང་དབྱུང་སྟེ་གསང་སྔགས་དང་སྒྲུབ་པ་པོ་ཡོངས་སུ་བསྲུང་ཞིང་བསྐྱང་བའི་ཕྱིར་རང་རྟགས་སྲོག་གི་སྙིང་པོ་ཕུལ་ཏེ་མནའ་བོར་རོ། །མནའ་དེའང་འཁོར་བའི་སྙིང་པོ་རུ་ལུ་རུ་ལུ་བྷྱོཿ ཞེས་རང་གི་སྲོག་ལ་ཚད་དུ་བཞག་གོ །དེ་ནས་བཅོམ་ལྡན་འདས་དཔལ་ཆེན་པོ་ཉིད་ཀྱིས་རང་གི་སྲོག་ལ་ཚད་བཞག་པའི་སྲོག་སྙིང་འཁོར་བའི་ས་བོན་དེ་ཉིད་ཨཱ་དང་ཧཱུྃ་གཉིས་ཏེ་གསང་སྔགས་རུ་ལུ་འབྲུ་བརྒྱད་དུ་བསྒྱུར་ཏེ་ཡོངས་སུ་གནང་བ་ནི་འདི་ལྟ་སྟེ། ཨཱ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཞེས་པ་ཡེ་ཤེས་ཀྱི་ས་བོན་དུ་བྱིན་གྱིས་བརླབས་ཏེ། འཇིག་རྟེན་གྱི་འབྲུ་ལྔ་ལ་འདས་པའི་འབྲུ་གསུམ་བསྣན་པས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་འདི་ཡིས་མི་འགྲུབ་པ་གང་ཡང་མེད་ལ། དྲེགས་པའི་སྒོ་གསུམ་གྱི་ས་བོན་དང་དངོས་པོ་ངན་པ་རྣམས་བསྲེགས་ཤིང་སྦྱངས་པས་བཏུལ་ནས་དག་པར་མཛད་དེ། སྒོམ་ལམ་དག་པའི་ས་ལ་བཀོད་ནས་རིགས་ངེས་པའི་སྲས་སུ་མཛད་པས། ཐུགས་ཀྱི་དགོངས་ཁྲལ་ཆུང་བར་བསྐྱུངས་ཏེ་ལྷུན་རྫོགས་བདེ་བ་ཆེན་པོར་བཞུགས་སོ།།༼༤༠༥༽

ལེའུའི་མཚན་ནི།

སངས་རྒྱས་ཀུན་ཀྱི་དགོངས་པ་འདུས་པའི་མདོ་ཆེན་པོ་ལས།

བདུད་ཡོངས་སུ་བཏུལ་བའི་ལེའུ་སྟེ་ཉི་ཤུ་བདུན་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། བདུད་ཡོངས་སུ་བཏུལ་བའི་ལེའུ་སྟེ་ཉི་ཤུ་རྩ་བདུན་པ་གསལ་བར་བཀྲོལ་བའོ།། །།

ལེའུ་ཉེར་བརྒྱད་པ་ཐ་མར་དམན་པའི་གདུང་བ་བསྟན་པ།

༈ གསུམ་པ་སྔགས་ཀྱི་སྒོར་ཞུགས་ནས་དབང་ཐོབ་པ་ལ་གཉིས་ཏེ། རྒྱུད་སྦྱངས་ནས་དཀྱིལ་འཁོར་དུ་འཇུག་པ། ཞུགས་ནས་དབང་ཐོབ་པའི་ཡོན་ཏན་ནོ། །དང་པོ་ལ་གཉིས་ཏེ། རུ་ཏྲ་རྒྱུད་སྦྱངས་ཤིང་དཀྱིལ་འཁོར་དུ་འཇུག་པ། འཁོར་ཕལ་པ་རྒྱུད་སྦྱངས་ཤིང་དཀྱིལ་འཁོར་དུ་འཇུག་པའོ། །དང་པོ་ལ་གཉིས་ཏེ། རྒྱུད་སྦྱངས་པ་དང༌། དཀྱིལ་འཁོར་དུ་འཇུག་པའོ། །དང་པོ་ལ་བཞི་སྟེ། འགྱོད་པས་སྦྱངས་པ། སྤྱོས་པས་སྦྱངས་པ། དོན་གྱིས་སྦྱངས་པ། ཐབས་ཀྱི་ཕྲིན་ལས་ཀྱིས་སྦྱངས་པའོ། །དང་པོ་ལ་གཉིས་ཏེ། འགྱོད་པའི་རྒྱུ་དང༌། སྦྱང་བ་དངོས་སོ། །དང་པོ་ནི།

དེ་ནས་དེའི་ཚེ། ཞེས་པ་ནས། འདྲིལ་བར་འགྱུར་རོ། །ཞེས་པའི་བར་གྱིས་བསྟན་ཏེ།

དེ་ནས་དེའི་ཚེ་དེའི་དུས་ན། དབང་ཕྱུག་ཆེན་པོའི་ཚོགས་རྣམས་འདི་ལྟར་རྟོགས་སྟེ། ཨེ་མའོ་དྲག་པོ་ཆེན་པོ་འདི། འདི་ལྟར་མཐུ་ཆེ་བ། འདི་ལྟར་དྲེགས་པ། འདི་ལྟར་གཏི་མུག་པ། འདི་ལྟར་ཆགས་པ། འདི་ལྟར་ང་རྒྱལ་བ། འདི་ལྟར་གཏུམ་པ་འདི། དཔའ་བོ་ཆེན་པོ་འདིས་རྣམ་པར་གནོན། ངེས་པར་ཡང་དག་པར་གནོན། ཀུན་ཏུ་རབ་ཏུ་གནོན་ཏོ་སྙམ་དུ་རྟོག་གོ །དེའི་ཚེ་དེའི་དུས་ན། དེ་དག་གི་སེམས་ཀྱིས་ཡོངས་སུ་རྟོག་པ། དྲག་པོ་རུ་དྲ་དེའི་སེམས་ཀྱིས་ཡོངས་སུ་ཤེས་ནས་སྨྲས་པ། ཀྱེ་ཉེ་གནས་དམ་པ་རྣམས། གང་དེ་ལྟར་མ་རྟོགས་ཤིག སྔོན་གྱི་ཁོ་བོའི་ལས་ཀྱི་འཕྲོ་དང་འབྲེལ་བའི་ཉེ་གནས་དམ་པ་ཀུན་གྱི་བཤེས་གཉེན་དེ་དང་ཕྲད་པ་ལས་ཤེས་སོ། །སྐྱེ་བ་ཤེས་སོ། །ལས་མཐོང་ངོ་། །སྐྱེ་བ་མཐོང་ངོ་། །ལས་མངོན་དུ་གྱུར་ཏོ། །སྐྱེ་བ་མངོན་དུ་གྱུར་ནས། རང་གི་ལས་ལ་རང་ཐག་ཁོས་པར་གྱུར། གང་སྐད་ཅིག་མར་བདེ་བ་ཆེན་པོའི་གཡུང་དྲུང་གི་ཕོ་བྲང་མཐོང་ནས། གང་འདི་ལྟར་བུད་མེད་དག་སྦྲུམ་མའི་སྡུག་བསྔལ་གྱིས་ཉེན་པར་གྱུར་པས་ན། འདི་སྙམ་དུ་སྡུག་བསྔལ་འདི་ནི་སྔོན་དུ་སྐྱེས་པ་བསྟེན་ཅིང་། མང་དུ་དཔྱད་པའི་ལས་འབའ་ཞིག་ཁོ་ནའོ་སྙམ་དུ་ཡིད་ལ་བྱེད་པ་བཞིན། ཁོ་བོ་ཡང་ལས་འབའ་ཞིག་ལ་ཁོ་ཐག་ཆད་ནས། ཇི་ལྟར་རི་གཟར་རྩེ་ནས་རྦབ་འགྲིལ་བ་གང་གིས་མི་ཟློག་པ་བཞིན་དུ། གདུང་བ་ཆེན་པོའི་ཤུགས་ཀྱིས་འཐོན་པས་ཤིན་ཏུ་གདུངས་པ་ཡིན་ཏེ། ཉེ་གནས་ཁྱེད་ཀྱང་རང་གི་ལས་ཡིད་ལ་གྱིས་ཤིག་དང་། གདུང་བའི་ཤུགས་རྦབ་ལྟར་འགྲིལ་བར་འགྱུར་རོ།།

ལེའུ་འདིས་དྲང་དོན་སྟོན་ནོ། །དེ་ནས་བདུད་བཏུལ་ཏེ་གདན་དུ་བྱས་པ་དེའི་ཚེ་དེའི་དུས་ན་རུ་ཏྲའི་འཁོར་གྱི་མ་ཧཱ་དེ་བ་ལ་སོགས་པའི་དབང་ཕྱུག་ཆེན་པོའི་དཔུང་ཚོགས་ཇི་སྙེད་པ་རྣམས་འདི་ལྟར་སེམས་རྟོག་སྐྱེས་ཏེ། ཨེ་མའོ་ཞེས་ངམ་ནས་བདག་ཅག་གི་གཙོ་མཆོག་རུ་ཏྲ་དྲག་པོ་ཆེན་པོ་འདི་ཉིད། འདི་ལྟར་ནུས་པའི་མཐུ་ཆེ་བ། འདི་ལྟར་ཕྲག་དོག་གིས་དྲེགས་པ། འདི་ལྟར་གཏི་མུག་གིས་ལྡོངས་པ། འདི་ལྟར་འདོད་ཆགས་ཀྱིས་མྱོས་པ། འདི་ལྟར་ང་རྒྱལ་གྱིས་ཁེངས་པ། འདི་ལྟར་ཞེ་སྡང་གིས་གདུག་ཅིང་གཏུམ་པ་འདི་ཡང་དཔའ་བོ་ཆེན་པོ་རྡོ་རྗེ་སྲིན་པོ་འཇིགས་བྱེད་རྔམ་པའི་ཧེ་རུ་ཀ་འདིས་དངོས་སུ་བསྒྲལ་ཏེ་ལུས་ནི་ཁྲོ་བོ་ཆེན་པོའི་ཞབས་འོག་ཏུ་རྣམ་པར་བརྫིས་ཏེ་གནོན་ཞིང༌། ངེས་པར་ཚབས་ཆེ་བར་སེམས་ནི་ཡང་དག་པར་ཕྱིར་མི་ལྡོག་པར་ལེགས་པར་ནོན་ནས། དུས་དང་རྣམ་པ་ཀུན་ཏུ་འཁོར་དང་སྡེ་དཔུང་དུ་བཅས་པ་ཐམས་ཅད་ཟིལ་གྱིས་རབ་ཏུ་ནོན་ཏོ་སྙམ་དུ་རྣམ་པར་རྟོག་གོ །དེའི་ཚེ་དེའི་དུས་ན། འཁོར་དེ་དག་གི་སེམས་ཀྱི་རྟོག་པ་བདེན་པ་མཐོང་བའི་མཐུས་དྲག་པོ་རུ་ཏྲ་དེའི་སེམས་ཀྱིས་ཡོངས་སུ་ཤེས་ནས། དེ་ཉིད་བསལ་བའི་ཕྱིར་སྨྲས་པ། ཀྱེ་ཉེ་གནས་དམ་པ་རྣམས། གང་དེ་ལྟར་མ་རྟོག་ཅིག སྔོན་གསང་སྔགས་ལ་ཞུགས་ཏེ་ཧེ་རུ་ཀ་སྒོམས་པས་ཁོ་བོའི་ལས་ཀྱི་འཕྲོ་དང་འབྲེལ་བ་དེའི་དུས་ཀྱི་ཉེ་གནས་དམ་པ་ད་ལྟ་ཀུན་གྱི་བཤེས་གཉེན་དེ་དང་འཕྲད་པས། དྲེགས་པ་རང་གིས་དང་པོ་བཀའ་བསྒོ་ལོག་པའི་ལས་རྣམས་ཤེས་སོ། །དེའི་༼༤༠༦༽དབང་གིས་སྐྱེ་བ་དུ་བླངས་པ་ཤེས་སོ། །བར་གྱི་ལས་མཐོང་ངོ༌། །སྐྱེ་བ་མཐོང་ངོ༌། །ཐ་མ་ད་ལྟ་ཞེན་པ་དག་པས་དབང་པོའི་མངོན་སུམ་དུ་ལས་མངོན་དུ་གྱུར་ཏོ། །སྐྱེ་བ་མངོན་དུ་གྱུར་ནས་ཤེས་པས་རང་གི་ལས་ལ་རང་ཐག་ཁོས་པའམ་ཡི་ཆད་པར་གྱུར་ལ། སྒྲིབ་པ་དག་པས་སྐད་ཅིག་མར་རྡོ་རྗེ་སྲིན་པོའི་ལྟོ་བར་བདེ་བ་ཆེན་པོའི་གཡུང་དྲུང་གི་བཀོད་པ་རྒྱལ་བ་ལོངས་སྤྱོད་རྫོགས་སྐུའི་ཕོ་བྲང་མཐོང་བས། དཔེར་ན། གང་འདི་ལྟར་བུད་མེད་དག་སྦྲུམ་པའི་སྡུག་བསྔལ་གྱིས་ཉེན་པར་གྱུར་པ་ན། འདི་སྙམ་དུ། སྡུག་བསྔལ་འདི་ནི་སྔོན་དུ་སྐྱེས་པ་བསྟེན་ཅིང་མང་དུ་སྤྱད་པའི་ལས་འབའ་ཞིག་ཁོ་ནའོ། །སྙམ་དུ་ཡིད་ལ་བྱེད་པ་བཞིན་དུ། ཁོ་བོ་ཡང་ལས་འབའ་ཞིག་ལ་ཁོ་ཐག་ཆད་ནས། ཇི་ལྟར་རི་གཟར་གྱི་རྩེ་ནས་རྦབ་འདྲིལ་བ་གང་གིས་ཀྱང་མི་བཟློག་པ་བཞིན། འགྱོད་པས་གདུང་བ་ཆེན་པོའི་ཤུགས་ཀྱིས་ལས་དང་དཔལ་ཆེན་པོ་དང་རྡོ་རྗེ་སེམས་དཔའ་མཐོང་བར་གྱུར་པས་ཤིན་ཏུ་གདུང་བ་ཡིན་ཏེ། ཉེ་གནས་ཁྱེད་རྣམས་ཀྱང་རང་གི་ལས་ཡིད་ལ་གྱིས་ཤིག་དང༌། སྒྲིབ་པ་དག་པས་ལས་དྲན། དེ་ལས་སྡུག་བསྔལ་དྲན། དེའི་དབང་གིས་དཔལ་ཆེན་པོ་ལ་གདུང་བའི་ཤུགས་རྦབ་ལྟར་འདྲིལ་བར་འགྱུར་རོ། །ཞེས་སྨྲས་སོ།།

གཉིས་པ་སྦྱང་བ་དངོས་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ཞེས་སྨྲས་ནས། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

ཞེས་སྨྲས་ནས་སྨ་ག་ཆད་པར་ངུས་ནས་ཤིག་ཏུ་སྨྲེས་ཏེ། ཡོངས་སུ་གདུང་བའི་དོན་འདོན་བ་ནི་འདི་ལྟ་སྟེ།

ཞེས་སྨྲས་ནས། དབང་པོ་འགགས་པ་ཙམ་དུ་རྨ་ག་ཆད་པར་ངུས་ནས། ཤིན་ཏུ་སྨྲེངས་ཏེ་ཡོངས་སུ་གདུང་བའི་དོན་སྨྲེ་སྔགས་སུ་བཏོན་པ་ནི། འདི་ལྟ་སྟེ།

གཉིས་པ་རྒྱས་པར་བཤད་པ་ལ་བདུན་ཏེ། དཔང་པོ་ལ་དགོངས་སུ་གསོལ་བ། ལམ་ལོག་ཅིང་ལས་ངན་སྤྱད་པས་འཁོར་དེ་འགྱོད་པ། ཉོན་མོངས་པ་དང་སྡུག་བསྔལ་མྱོང་བས་འགྱོད་དེ་ཐུགས་རྗེ་བསྐུལ་བ། ལས་ངན་ལས་ཐར་པ་སྟོན་པའི་དྲིན་ཡིན་པས་སྔར་གང་ན་བཞུགས་དྲིས་པ། ལས་ངན་གྱི་འབྲས་བུས་འཇིགས་པས་མངོན་སྤྱོད་མཛོད་ཅིག་པར་བསྐུལ་བ། སྔར་གྱི་ལས་ལ་དོན་མེད་པས་ལས་ཀྱི་རླུང་བཟློག་ཅིག་པར་ཞུས་པ། རྒྱུ་རྐྱེན་ངན་པས་ཉམ་ཐག་པས་ཐུགས་རྗེ་བསྐུལ་ཏེ་ལུས་ཕུལ་བའོ། །དང་པོ་ནི།

ཐུགས་རྗེ་ཆེན་པོ། ཞེས་པ་ནས། དགོངས་སུ་གསོལ། །ཞེས་པའི་བར་གྱིས་བསྟན་ཏེ།

ཐུགས་རྗེ་ཆེན་པོ་བཅོམ་ལྡན་རྡོ་རྗེ་སེམས། །དྲི་མེད་དུང་མདོག་མཆོག་ཏུ་གཟུགས་བཟང་བ།།

རྣམ་དག་འོད་གསལ་ཉི་ཟླ་འབུམ་བརྡལ་བཞིན། །དཔའ་བོ་འོད་ཟེར་སྟོང་ལྡན་ལྷམ་མེ་བ།།

འཇིག་རྟེན་གསུམ་གྱི་ས་མཁན་སྟོན་པར་གྲགས། །ཁམས་གསུམ་འགྲོ་བ་ཀུན་གྱི་གཉེན་གཅིག་པུ།།

བྱམས་མགོན་ཐུགས་རྗེའི་ལྷ་ཁྱོད་དགོངས་སུ་གསོལ།།

སྟོན་པའི་མཚན་ཐུགས་རྗེ་ཆེན་པོ་མངའ་བའི་བཅོམ་ལྡན་འདས་ཐུབ་དཀའ་གཞོན་ནུ་རྒྱུད་དག་པའི་དཔལ་རྡོ་རྗེ་སེམས་དཔའ་ཞེས་བྱ་བ། སྐུའི་ཆ་ལུགས་དྲི་མ་མེད་པའི་དུང་མདོག་ལྟ་བུ་མཚན་དཔེས་སྤྲས་པས་མཆོག་ཏུ་གཟུགས་བཟང་བ་རྣམ་པར་དག་པའི་འོད་མདངས་གསལ་བ་ནི་དཔེ་ཉི་ཟླ་འབུམ་༼༤༠༧༽ཕྲག་གདལ་བ་བཞིན་དུ་ཕྱི་ནང་གི་དགྲ་དཔུང་འཇོམས་པས་དཔའ་བོ་ཆེན་པོ་འོད་ཟེར་སྟོང་ཁམས་ཁྱབ་པར་རབ་ཏུ་འབར་བའི་བསྙེངས་པ་མི་མངའ་བར་མཆོག་ཏུ་ལྷམ་མེ་བར་འཕགས་པས་རང་དོན་རྫོགས་ཤིང༌། གཞན་དོན་གྱི་མཛད་པ་འཇིག་རྟེན་གསུམ་ལ་རྣམ་གྲོལ་གྱི་ལམ་གསལ་བར་བྱེད་པས་ས་མཁན་མཆོག་གི་སྟོན་པར་གྲགས་ཤིང་ཁམས་གསུམ་གྱི་འགྲོ་བ་ཀུན་གྱི་མགོན་དང་དཔུང་གཉེན་གཅིག་པུར་གྱུར་པ་བྱམས་མགོན་ཐུགས་རྗེའི་མངའ་བདག་ལྷག་པའི་ལྷ་མཆོག་ཁྱོད་ཀྱིས་བདག་ལ་གསན་ཞིང་དགོངས་ཏེ་རྟེན་གྱི་སྟོབས་སུ་བཞུགས་པར་མཛད་དུ་གསོལ།

གཉིས་པ་ལམ་ལོག་ཅིང་ལས་ངན་སྤྱད་པས་འཁོར་དེ་འགྱོད་པ་ནི།

བདག་ནི། ཞེས་པ་ནས། རབ་གནོང་འགྱོད། །ཅེས་པའི་བར་གྱིས་བསྟན་ཏེ།

བདག་ནི་ཐོག་མ་མེད་པའི་དུས་མཐའ་ནས། །ལམ་ལོག་ལམ་སྟོར་སྲིད་པའི་འཁོར་ལོར་འཁྱམས།།

སྔོན་ཚེ་ལམ་ལོག་སྡིག་པར་དཔྱད་པས་ནོངས། །སྡིག་པའི་ལས་རྣམས་ཅི་དཔྱད་རབ་གནོང་འགྱོད།།

 བདག་ནི་སྔ་མའི་ལས་ལ་འགྱོད་དེ། སྲིད་པ་ཐོག་མ་མེད ་པའི་དུས་ཀྱི་མཐའ་ནས་ལམ་ལོག་པར་འཕྱན་ཏེ། ཡང་དག་པའི་ལམ་སྟོར་བས་སྲིད་པའི་གྲོང་ཁྱེར་གསུམ་གྱི་འཁོར་བའི་འཁོར་ལོར་ཀུན་ཏུ་འཁྱམས་པས་སྤྱིར་ནོངས་ཤིང༌། བྱེ་བྲག་ཏུ་སྔོན་ཚེ་ཐར་པ་ནག་པོར་གྱུར་ཙ་ན་ཐོག་མར་ལམ་གྱི་བཀའ་བསྒོ་ལོག་ནས་འཁོར་བའི་དངོས་པོ་བཞི་ལ་སོགས་པའི་སྡིག་པའི་ལས་སྣ་ཚོགས་པ་སྤྱད་པས་ཤིན་ཏུ་ནོངས་ཏེ། སྡིག་པའི་ལས་རྣམས་གང་ཅི་ལྟར་སྤྱད་པས་རྣམ་པར་སྨིན་པ་གསལ་བར་དྲན་པས་རབ་ཏུ་གནོང་ཞིང་འགྱོད་དེ་གདུང་བ་འདོན་བཞིན་རྣམ་པར་སུན་འབྱིན་པའི་སྟོབས་ལ་གནས་སོ།།

གསུམ་པ་ཉོན་མོངས་པ་དང་སྡུག་བསྔལ་མྱོང་བས་འགྱོད་དེ་ཐུགས་རྗེ་བསྐུལ་བ་ནི།

དར་ཞིང་དྲགས་པའི། ཞེས་པ་ནས། བཟོད་ལགས་སམ། །ཞེས་པའི་བར་གྱིས་བསྟན་ཏེ།

དར་ཅིང་དྲེགས་པའི་ལས་དབང་དེ་བཙན་ནས། །འཁོར་བའི་སྡུག་བསྔལ་རྒྱ་མཚོར་བྱིང་གྱུར་ཏེ། །ཞེ་སྡང་འབར་བའི་མེས་ནི་རང་རྒྱུད་བསྲེགས། །གཏི་མུག་མུན་པ་འཐིབས་པས་ཤེས་རབ་ལྡོངས། །འདོད་ཆགས་རྒྱ་མཚོའི་འདམ་བུར་རྣམ་ཤེས་བྱིང་། །ང་རྒྱལ་དྲག་པོའི་རི་བོས་ངན་འགྲོར་མནན། །ཕྲག་དོག་རླུང་དམར་འཚུབ་མས་འཁོར་བར་གཡེངས། །བདག་ཏུ་ལྟ་བའི་མདུད་པ་དམ་པོས་བཅིངས། །འདོད་པ་མེ་མདག་དོང་འདྲའི་འོབས་སུ་ལྷུང་། །སྡུག་བསྔལ་དྲག་པོ་མི་བཟད་ཆར་དུ་འབབ། །འདི་འདྲའི་སྡུག་བསྔལ་ཤིག་ཏུ་བཟོད་དཀའ་ཞིང་།།

སྡིག་པའི་ལས་དབང་དྲག་པོ་མེར་འབར་བས། །རྣམ་ཤེས་དབང་པོ་མྱུ་གུ་གདུངས་གྱུར་ཏེ།།

ཕུང་པོ་སྒྱུ་མའི་ལས་ཀྱི་མི་བཟོད་ན། །བྱམས་མགོན་ཐུགས་རྗེ་ཅན་གྱིས་བཟོད་ལགས་སམ།།

ལས་དང་ཉོན་མོངས་པས་འཁོར་བར་ཇི་ལྟར་ལྟུང་བའི་སྒོ་ནས་སྨྲེངས་ཏེ། ཤིན་ཏུ་དྲག་ལ་བདོ་བས་དར་ཞིང་དྲགས་ཏེ་བཟློག་དཀའ་བའི་ལས་ཀྱི་དབང་དུ་སོང་བ་དེ་སྟོབས་བཙན་པར་གྱུར་ནས་གྲོང་ཁྱེར་གསུམ་གྱི་འཁོར་བའི་སྡུག་བསྔལ་གྱི་རྒྱ་མཚོ་ཆེན་པོར་བྱིང་བར་གྱུར་ཏེ། ཞེ་སྡང་འབར་བའི་མེས་ནི་རང་རྒྱུད་བསྲེགས་ཤིང༌། གཏི་མུག་མུན་ནག་ལྟར་རྨོངས་པར་འཐིབས་པས་ཤེས་རབ་ལྡོངས་ནས། སྲིད་པར་ནུབ་པ་དང་ཞེན་པས་རླན་པ་གཉིས་ཀྱིས་འདོད་ཆགས་ཀྱི་རྒྱ་མཚོའི་འདམ་དུ་རྣམ་ཤེས་བྱིང་སྟེ། ང་རྒྱལ་དྲག་པོའི་རི་བོས་ངན་འགྲོར་མནན་བཞིན། ཕྲག་དོག་གི་རླུང་དམར་འཚུབས་མས་འཁོར་བར་སྲིད་པའི་རྒྱ་མཚོའི་རྦ་རླབས་ལ་གཡེང་བར་གྱུར་པའི་བདག་ཏུ་ལྟ་བའི་མདུད་པ་དམ་པོས་རྟག་པར་བཅིངས་ཏེ། འདོད་པ་དུང་དུང་པས་གདུང་བ་མེ་མདག་གི་དོང་དང་འདྲའི་ཞེས་འདྲ་བའི་འོབས་སུ་ལྟུང་བས་རྩ་བ་དང་ཡན་ལག་གི་སྡུག་བསྔལ་མི་བཟད་པ་དྲག་པོ་ཆར་ལྟར་དུ་བབ་པར་གྱུར་ལ། འདི་འདྲའི་སྡུག་༼༤༠༨༽བསྔལ་སྣ་ཚོགས་ཤིན་ཏུ་བཟོད་པར་དཀའ་ཞིང༌། སྡིག་པའི་ལས་དབང་དྲག་པོ་མེ་ལྟར་འབར་བས། རྣམ་པར་ཤེས་པ་དང་དབང་པོ་རྣམས་ཀྱི་མིང་གཟུགས་ཀྱི་མྱུ་གུ་གདུང་བར་གྱུར་ཏེ། འབྱུང་བཞིས་བསྡུས་པའི་ཕུང་པོ་སྒྱུ་མའི་ལུས་ཀྱིས་མི་བཟོད་པར་གདུང་བས་འབོད་ན་བྱམས་མགོན་ཐུགས་རྗེ་ཅན་གྱིས་ཐུགས་ཀྱིས་བཟོད་ལགས་སམ། ཞེས་དྲེགས་པ་ཉིད་ཀྱིས་སྨྲེངས་ཏེ། དུག་ལྔའི་དབང་དུ་སོང་བས་ཉམ་ཐག་པ་ལ་མགོན་མཛོད་ཅིག་པར་བསྐུལ་བ་དང༌། ལྷ་ཆེན་པོའི་ཚོགས་ཀྱིས་སྨྲེངས་པ་ཐུན་མོང་དུ་འགྱུར་རོ།།

བཞི་པ་ལས་ངན་ལས་ཐར་པ་སྟོན་པའི་དྲིན་ཡིན་པས་སྔར་གང་ན་བཞུགས་དྲིས་པ་ནི།

བདག་ནི་བླུན་རྨོངས། ཞེས་པ་ནས། གང་ན་བཞུགས། །ཞེས་པའི་བར་གྱིས་བསྟན་ཏེ།

བདག་ནི་བླུན་རྨོངས་ལས་ངན་སྡིག་པོ་ཆེ། །ལས་ཀྱི་དབང་གིས་འདོད་ཁམས་རུ་དྲར་སྐྱེས། །སྐྱེས་པས་འགྱོད་དེ་ལས་ལ་ཡི་རེ་ཆད། །ཡི་ཆད་འགྱོད་ཀྱང་ལས་དབང་བཅོས་སུ་མེད། །ལས་ཀྱི་ཤུགས་ནི་ཆུ་བོའི་གཞུང་དང་འདྲ། །ལས་དབང་ཆུ་གཞུང་འཕྲལ་དུ་ག་ལ་བཟློག །རྣམ་སྨིན་ཐམས་ཅད་རང་གི་ལས་ལས་བྱུང་། །ལས་ཀྱི་རླུང་དམར་དྲག་པོ་དེས་བདས་པས། །བདག་ནི་དེ་སྔོན་བསྐལ་པ་གྲངས་མེད་དུ། །འཁོར་བའི་བཙོན་ར་མུན་པར་འཁྱམས་པ་ལ། །ཉེ་གནས་ཁྱོད་ཀྱི་ཐུགས་རྗེའི་བྱིན་རླབས་ཀྱིས། །ལས་དང་ཉོན་མོངས་སྒྲིབ་པ་གཏན་སྦྱངས་ནས། །མ་ལྟར་བྱམས་པའི་ཞབས་དྲུང་ད་ལྟར་འཁོད། །ཉི་ལྟར་འོད་འབར་ཟླ་ལྟར་མདངས་དགའ་བའི།།

ཐུགས་རྗེའི་ཞལ་ཉིད་བལྟ་བས་མི་ངོམས་པའི། །ཐོག་མ་མེད་ནས་མ་རིག་ལིང་ཐོག་གིས།།

མདོངས་པའི་ཆུ་བུར་མིག་གིས་མ་མཐོང་ན། །འགྲོ་བའི་མགོན་ཁྱོད་དེ་སྔ་ག་ན་བཞུགས།།

བདག་ནི་བླུན་ཞིང་རྨོངས་པའི་དབང་གིས་ལས་ངན་བསགས་པའི་སྡིག་པོ་ཆེ་སྟེ། ལས་ཀྱི་དབང་གིས་འདོད་པའི་ཁམས་འདིར་རུ་ཏྲར་སྐྱེས་ཤིང༌། སྐྱེས་པས་རྣམ་སྨིན་ལ་གནོང་ཞིང་འགྱོད་དོ་དེའི་རྒྱུ་ལས་ལ་ཡི་རེ་ཆད་དེ་ཡི་ཆད་འགྱོད་ཀྱང་ལས་དབང་དྲག་པོ་བཅོས་སུ་མེད་པས་ལས་ཀྱི་ཤུགས་ནི་དཔེར་ན་ཆུ་བོ་ཆེན་པོའི་གཞུང་དང་འདྲ་ལ། ལས་དབང་ཆུ་ཀླུང་དྲག་པོ་དེ་ཉིད་འཕྲལ་དུ་ག་ལ་ཟློག་སྟེ་བཟློག་མི་ནུས་ཤིང༌། འཁོར་བའི་རྣམ་པར་སྨིན་པ་ཐམས་ཅད་ནི་རང་གི་ལས་སྣ་ཚོགས་ལས་བྱུང་སྟེ། དེ་ལྟར་ལས་ཀྱི་རླུང་དམར་དྲག་པོ་དེས་བདས་པས་ན་ བདག་ནི་དེང་སྔོན་ཕན་ཆད་བསྐལ་པ་གྲངས་མེད ་ཉིད་དུ་འཁོར་བའི་བཙོན་ར་མུན་པའི་གནས་འདིར་རྣམ་པར་འཁྱམས་པ་ལ། སྔོན་གྱི་ཉེ་གནས་དམ་པ་ཁྱོད་ཀྱི་ཐུགས་རྗེའི་བྱིན་རླབས་ཀྱིས་ལས་དང་ཉོན་མོངས་པའི་སྒྲིབ་པ་ཀུན་གཏན་ནས་སྦྱངས་ཤིང་བཅད་པར་མཛད་ནས། ཐར་པ་ལ་བཀོད་པས་མ་ལྟར་བྱམས་པའི་ཞབས་དྲུང་དུ་ད་ལྟར་འཁོད་དེ་ཞལ་མཐོང་ངོ༌། །ཡེ་ཤེས་ཀྱི་སྐུ་ཉི་མ་ལྟར་འོད་འབར་ཞིང་ཟླ་བ་ལྟར་མདངས་གསལ་བའི་ཐུགས་རྗེ་ཆེན་པོའི་ཞལ་གྱི་དཀྱིལ་འཁོར་ཉིད་ལྟ་བས་ཆོག་མི་ཤེས་ཤིང་མི་ངོམས་པའི་ལྷུན་པོའི་རྒྱལ་པོ་ལྟ་བུ་གང་དེ། ཐོག་མ་མེད་པའི་དུས་ནས་མ་རིག་པའི་ལིང་ཏོག་གིས་ལྡོངས་པའི་ཆུ་བུར་གྱི་མིག་གིས་མ་མཐོང་བར་སྒྲིབ་པར་གྱུར་ན་འགྲོ་བའི་མགོན་པོ་དམ་པ་ཁྱེད་ཉིད་དེང་གི་དུས་ཀྱི་སྔོན་ནམ་དེ་སྔ་ཕན་ཆད་གང་ན་བཞུགས་ཞེས་ཡེ་ནས་མ་བྲལ་ཡང་ཕྱིན་ཅི་ལོག་གིས་སྒྲིབ་སྟེ་ངོ་མ་ཤེས་ཤིང་མ་མཐོང་བ་ལ་གདུང་ཞིང་འགྱོད་པའི་དོན་ནོ། །ངོ་བོ་རུ་ཏྲས་སྨྲས་པ་ཡིན་ཀྱང༌། ཀླུ་ཆེན་པོ་རྣམས་དང་གཟི་བྱིན་རྒྱལ་པོའི་མངའ་བདག་གིས་གསོལ་བ་དང་ཡང་ཐུན་མོང་དུ་འགྱུར་རོ།།

ལྔ་པ་ལས་ངན་གྱི་འབྲས་བུས་འཇིགས་པས་མངོན་སྤྱོད་མཛོད་ཅིག་པར་བསྐུལ་བ་ནི།

ལས་དབང་དྲག་པོ། ཞེས་པ་ནས། མངོན་སྤྱོད་༼༤༠༩༽མཛོད། །ཅེས་པའི་བར་གྱིས་བསྟན་ཏེ།

ལས་དབང་དྲག་པོ་ཤིན་ཏུ་མི་བཟད་པས། །ཤིན་ཏུ་སྐྱི་གཡའ་སྐྲག་ཅིང་རབ་འཇིགས་ན། །དུང་དུང་གདུང་བའི་སྨྲ་སྔགས་འདི་འདོན་ཅིང་། །ཉམས་ཐག་འཕོངས་པའི་ང་རོ་འདོན་ལགས་ན། །བྱམས་མགོན་ཐུགས་རྗེས་དུས་འདིར་མ་དགོངས་ན། །ནམ་ཞིག་འཆི་འཕོ་ལུས་དང་བྲལ་བའི་ཚེ། །དགེ་བཤེས་གྲོགས་དང་བྲལ་ནས་གཤིན་རྗེས་ཁྲིད། །དེ་ཚེ་འཇིག་རྟེན་ཉེ་དུས་མི་སྟོང་སྟེ། །ལས་ཀྱི་དབང་གིས་བདག་འདྲ་གཅིག་པུར་ཁྲིད།།

དུས་དེར་བདག་ལ་མགོན་སྐྱབས་མ་མཆིས་ཀྱིས། །གང་གི་ཕྱི་བཤོལ་དུས་ལ་མ་གཞེས་པར།།

ད་ལྟ་ཉིད་དུ་བསྟུན་ཏེ་མངོན་སྤྱོད་མཛོད།།

འདི་ལྟར་ལས་དབང་དྲག་པོ་ཤིན་ཏུ་མི་བཟད་པའི་ཚུལ་འདི་མཐོང་བས་ཤིན་ཏུ་སྐྲག་ཅིང་སྐྱི་གཡའ་ལ་རབ་ཏུ་འཇིགས་པར་གྱུར་ནས་ཡིད་དུང་དུང་དུ་གདུང་བའི་ངག་གིས་སྨྲེ་སྔགས་འདི་ལྟར་འདོན་ཞིང་ཉམ་ཐག་ཅིང་ཕོངས་པའི་ང་རོ་འོ་དོད་འབོད་པའི་ཚིག་ཏུ་གདོན་ཞིང་བསྐུལ་ལགས་ན། བྱམས་མགོན་མཆོག་གི་ཐུགས་རྗེས་དུས་འདིར་མྱུར་བར་མ་དགོངས་ན། ནམ་ཞིག་འཆི་ཞིང་འཕོ་བའི་དུས་ལ་བབ་ནས་ལུས་དང་སེམས་བྲལ་བའི་ཚེ་ན། དགེ་བའི་བཤེས་ཀྱི་གྲོགས་དང་བྲལ་ནས་གསོད་བྱེད་ལས་ཀྱི་གཤིན་རྗེས་ཞགས་པས་ཁྲིད་པ་དེ་ཡི་ཚེ་ན་འཇིག་རྟེན་གྱི་ཉེ་དུས་ཕན་ པ་མེད་པས་མི་སྟོངས་ཤིང་སྐྱོབས་པར་མི་ནུས་ཏེ་ལས་ཀྱི་དབང་གི་བདག ་འདྲ་གཅིག་པུ་ཁོ་ན་མར་ལས་སྤུ་ཉག་བཏོན་པ་ལྟར་ཁྲིད་པའི་དུས་དེར་བདག་ལ་མགོན་དང་སྐྱབས་གནས་ཡོང་ཡེ་མ་མཆིས་པར་ངན་འགྲོ་ལ་ལྟུང་བར་འགྱུར་གྱིས། དེ་བས་ན་དཔའ་བོ་ཐུགས་རྗེའི་མངའ་བདག་གང་གི་ཕྱི་བཤོལ་གྱི་དུས་ལ་མ་གཞེས་པར་ད་ལྟ་ཉིད་དུ་བསྟུན་ཏེ་དྲག་ཤུལ་མངོན་སྤྱོད་མཆོག་གི་ཕྲིན་ལས་ཀྱིས་སྒྲོལ་བར་མཛོད་ཅིག དེ་ལྟར་དྲེགས་པས་སྨྲེངས་ཏེ་སྲིན་པོའི་ཚོགས་གཞན་དང་ཡང་ཐུན་མོང་དུ་འགྱུར་རོ།།

དྲུག་པ་སྔར་གྱི་ལས་ལ་དོན་མེད་པས་ལས་ཀྱི་རླུང་བཟློག་ཅིག་པར་ཞུས་པ་ནི།

ལས་ཀྱིས་མནར་བའི། ཞེས་པ་ནས། བཟློག་ཏུ་གསོལ། །ཞེས་པའི་བར་གྱིས་བསྟན་ཏེ།

ལས་ཀྱིས་མནར་བའི་སྐྱེ་བོ་ བདག་འདྲ་ལ། །ཐོག་མ་མེད་པའི་དུས་ནས་ལོག་རྟོགས་པས། །ཁམས་གསུམ་འཁོར་བའི་གནས་ལས་མ་ཐར་ཏེ། །བསྐལ་པ ་གྲངས་མེད་སྐྱེ་བ་ཇི་སྙེད་དུ། །གདོས་བཅས་ལུས་བླངས་གྲངས་མེད་ཞིག་འགྱུར་ཏེ། །ཤ་རུས་བསགས་ན་འཇིག་རྟེན་གཏོས་དང་མཉམ། །རྣག་ཁྲག་བསགས་ན་རྒྱ་མཚོ་ཆེན་པོ་ཙམ། །ལས་འཕྲོ་བསགས་ན་བསམ་འདས་བརྗོད་མི་ལང་། །ཁམས་གསུམ་བགྲངས་ཤིང་སྐྱེ་ཤིའི་ཁ་བརྒྱུད་ཀྱང་། །བྱས་པའི་ལས་རྣམས་དོན་མེད་ཆུད་རེ་ཟོས། །སྐྱེ་བ་གྲངས་མེད་ཇི་སྙེད་དེ་ཙམ་ལ། །སྐྱེ་བ་གཅིག་ཅིག་ཁོ་ན་ཙམ་གྱི་ལས། །བླ་མེད་བྱང་ཆུབ་དོན་དུ་རབ་དཔྱད་ན། །དེ་ཙམ་བྱས་པའི་ལས་ལ་དོན་ཡོད་པས།།

དོན་གྱི་ཡོང་ཡེ་མྱང་ངན་འདས་ཟིན་ན། །ལས་ཀྱི་དབང་བཙན་ཉོན་མོངས་སྟོབས་ཆེ་བས།།

ཤ་ཁྲག་དྲ་བའི་ལུས་བླངས་འཁོར་བར་འཁྱམས། །སྡུག་བསྔལ་བཟོད་དཀའ་སྲིད་པའི་བཙོན་རར་ཆུད།།

མི་བཟད་སྡུག་བསྔལ་དྲག་པོ་འདི་ལྟ་བུ། །ཉེས་བྱས་ཐམས་ཅད་རང་གི་ལས་ལས་བྱུང་།།

ཐུགས་རྗེ་ཆེན་པོས་ལས་ངན་རྒྱུན་བཅད་དེ། །ཉོན་མོངས་ལས་ཀྱི་རླུང་འདི་བཟློག་ཏུ་གསོལ།།

དེ་བཞིན་དུ་ལས་སྣ་ཚོགས་ཀྱིས་མནར་བའི་སྐྱེ་བོ་རྨོངས་ པ་བདག་འདྲ་བ་ནི་ཐོག་མ་མེད ་པའི་དུས་ནས་ཀུན་ཏུ་རྟོག་པས་ཕྱིན་ཅི་ལོག་ཏུ་བརྟགས་ཏེ་བདག་ཏུ་བཟུང་བས་ཁམས་གསུམ་འཁོར་བའི་གནས་རིས་དྲུག་ནས་མ་ཐར་བར་གཅིག་ནས་གཅིག་ཏུ་ཟོ་ཆུན་བརྒྱུད་པ་ལྟརའཁོར་ཏེ་བསྐལ་པ་གྲངས་མེད་མང་པོ་བརྗོད་པ་ལས་འདས་པར་སྐྱེ་བ་ཅི་སྙེད་ཞིག་ཏུ་གདོས་བཅས་ཀྱི་ལུས་དེ་སྙེད་བླངས་ནས་གྲངས་མེད་མང་པོ་ཞིག་པར་གྱུར་ཏེ། ཤ་དང་རུས་པ་ཕྱོགས་གཅིག་ཏུ་བསགས་ན་འཇིག་རྟེན་ཁམས་ཀྱི་གཏོས་དང་མཉམ་ཞིང༌། རྣག་ཁྲག་བསགས་ན་མཐའ་ཡས་རྒྱ་མཚོ་ཆེན་པོ་ཙམ་དུ་མང་ལ་ལས་འཕྲོ་བསགས་ན་བསམ་ལས་འདས་ཤིང་བརྗོད་དུ་མི་ལང་བ་སྙེད་དུ་ཁམས་གསུམ་འཁོར་བའི་གནས་སུ་ལན་མང་པོར་ཡང་ནས་ཡང་དུ་བགྲངས་ཤིང་སྐྱེ་བ་དང་ཤི་བ་ཁོ་ནར་ཁ་བརྒྱུད་པར་གྱུར་ཀྱང་བྱས་པའི་ལས་རྣམས་ནི་དོན་མེད་ཅིང་ཆུད་རེ་ཟོས་ཏེ་འབྲས་མེད་དུ་སོང་བ་ཁོ་ནར་ཟད་དོ། །དེས་ན་སྐྱེ་བ་གྲངས་མེད་མང་པོ་ཅི་སྙེད་པ་དེ་ཙམ་གྱི་ནང་ལ་སྐྱེ་བ་གཅིག་ཅིག་ཁོ་ན་ཙམ་གྱི་ལས་བསགས་པ་དེ་བླ་ན་མེད་པའི་བྱང་ཆུབ་ཆེན་པོའི་དོན་དུ་ཡང་དག་པར་རབ་ཏུ་༼༤༡༠༽སྤྱད་ན་དེ་ཙམ་བྱས་པའི་ལས་ལ་འབྲས་བུ་འབྱུང་བའི་དོན་བཟང་པོ་ཡོད་པར་ངེས་པས་དོན་གྱི་ཡོང་ཡེ་མྱ་ངན་ལས་འདས་ཏེ་རྣམ་པར་གྲོལ་བ་ཐོབ་ཟིན་པར་ངེས་ན་ཡང་དེ་ལྟ་བུའི་དོན་ཡང་མེད་པར་ལས་ཀྱི་དབང་བཙན་ཞིང་ཉོན་མོངས་པ་སྟོབས་ཆེ་བ་གང་གི་མཐུས་ཤ་ཁྲག་གི་དྲྭ་བའི་ལུས་ཡང་ཡང་བླངས་ཤིང་མྱོང་རིག་སྡུག་བསྔལ་གྱི་ལུས་དང་འགྱུ་བྱེད་ཡིད་ཀྱི་ལུས་དང་སྟོང་པ་ལྟར་སྣང་གི་ལུས་སྣ་ཚོགས་སུ་བརྒྱུད་ནས་འཁོར་བར་འཁྱམས་པས་སྡུག་བསྔལ་བཟོད་པར་དཀའ་བའི་སྲིད་པའི་ཁྲི་མུན་གྱི་བཙོན་རར་ཆུད་དེ་མི་བཟད་པའི་སྡུག་བསྔལ་དྲག་པོ་མྱོང་བ་འདི་ལྟ་བུ་ཉེས་པར་བྱས་པ་ཐམས་ཅད་བྱེད་པོ་གཞན་མེད་པར་རང་གི་ལས་ཁོ་ན་ལས་བྱུང་བས་ན། འདྲེན་མཆོག་ཐུགས་རྗེ་ཆེན་པོས་ལས་ངན་ལས་རྒྱུན་བཅད་དེ་ཉོན་མོངས་རྣམས་དང་ལས་ཀྱི་རླུང་དམར་དྲག་པོ་འདི་ཉིད་བཟློག་པར་མཛད་དུ་གསོལ། འདི་ནི་ལོག་རྟོག་ཅན་རྣམས་ཀྱིས་གསོལ་བ་དང་ཐུན་མོང་དུ་འགྱུར་རོ།།

བདུན་པ་རྒྱུ་རྐྱེན་ངན་པས་ཉམ་ཐག་པས་ཐུགས་རྗེ་བསྐུལ་ཏེ་ལུས་ཕུལ་བ་ནི།

མ་རིག་ལོག་པ། ཞེས་པ་ནས། གདན་ཁྲིར་ཕུལ་ལོ། །ཞེས་པའི་བར་གྱིས་བསྟན་ཏེ།

མ་རིག་ལོག་པའི་ལས་ཀྱི་དབང་བཙན་པས། །མི་ཤེས་མུན་པའི་ནང་དུ་གཏན་འཁྱམས་ན། །ཡེ་ཤེས་སྒྲོན་མའི་གཟེར་གྱིས་མི་སྟོངས་སམ། །ཉེས་བྱས་ལས་ཀྱི་འབྲས་བུ་མི་བཟོད་ན། །ཐུགས་རྗེ་ཆེན་པོའི་འཕྲིན་ལས་མི་མཛད་དམ། །ཕྱིན་ཅི་ལོག་གི་གཡང་སར་ལྷུང་ལགས་ན། །ཐུགས་རྗེ་མྱུར་མགྱོགས་ཕྱག་གིས་མི་འཛིན་ནམ།།

དུག་གསུམ་བཟོད་དཀའི་ནད་ཀྱིས་གདུངས་ལགས་ན། །ཐབས་མཁས་ཐུགས་རྗེའི་སྨན་གྱིས་མི་གསོ་འམ། །ལས་ཀྱི་རྣམ་སྨིན་སྡུག་བསྔལ་མེར་འབར་ན། །ཐུགས་རྗེ་བསིལ་བའི་ཆར་རྒྱུན་མི་འབེབས་སམ། །སྡུག་བསྔལ་འཁོར་བའི་འདམ་དུ་བྱིང་གྱུར་ན། །ཐབས་མཁས་ཐུགས་རྗེའི་ལྕགས་ཀྱུས་མི་འདྲེན་ནམ། །ཁམས་གསུམ་འཁོར་བའི་གནས་སུ་སྦྱང་སྦྱངས་ནས། །ནམ་ཞིག་རང་རིག་འབྲས་བུ་ཐོབ་པའི་ཚེ། །འཕགས་པའི་ཐུགས་རྗེ་ཅི་འཚལ་དོན་མ་མཆིས། །བདག་ཉིད་ལས་འཕྲོ་བཙན་པར་བཞག་ན་ལྟ། །ཐུགས་རྗེ་ཞེས་ནི་སུ་ལ་ཅི་ཞིག་བགྱི། །དཔའ་བོ་ཁྱོད་ལ་ཐུགས་རྗེའི་སྟོབས་མངའ་ཞིང་། །སྔོན་བྱུང་ལས་ཀྱི་འབྲེལ་པ་འཕྲོ་བཙན་ན།།

ཡལ་ཡོལ་བཏང་སྙོམས་ལེ་ལོ་མ་མཛད་པར། །སྙིང་ནས་ད་གཟིགས་ཐུགས་རྗེ་རྒྱལ་བའི་ལྷ།།

ཞེས་རང་གི་ང་རྒྱལ་གྱི་རི་བོ་བཅག་ནས། ལུས་སེང་གེར་མངོན་པར་སྤྲུལ་པ་ཞབས་ཀྱི་གདན་ཁྲིར་ཕུལ་ལོ།།

ད་ལྟ་དོན་མི་མཛད་ན་ཐུགས་རྗེ་མི་མངའོ་ཞེས་གནད་ལ་བོར་བའི་ཚུལ་གྱིས་སྨྲེངས་ཏེ། མ་རིག་པ་དང་ཕྱིན་ཅི་ལོག་པ་ལས་ཀྱི་དབང་འདི་སྟོབས་བཙན་པས། རང་བྱུང་རིག་པའི་དོན་མི་ཤེས་པར་རྨོངས་པ་མ་རིག་པའི་མུན་པའི་ནང་དུ་གཏན་དུ་འཁྱམས་པ་ལགས་ན། ཡེ་ཤེས་གསལ་བའི་སྒྲོན་མའི་འོད་ཟེར་གྱིས་མུན་པ་བསལ་བའི་ཐབས་ཀྱིས་ཕན་གདགས་ཏེ་མི་སྟོངས་སམ་ཅི། ཉེས་པར་བྱས་པའི་ལས་ཀྱི་འབྲས་བུ་སྡུག་བསྔལ་དྲག་པོ་མི་བཟོད་པར་གྱུར་ན། ཐུགས་རྗེ་ཆེན་པོས་སྒྲོལ་བའི་གར་གྱི་ཕྲིན་ལས་མི་མཛད་དམ། མཐར་འཛིན་ལྟ་བས་ཕྱིན་ཅི་ལོག་གི་གཡང་སར་ལྟུང་བ་ལགས་ན། ཐུགས་རྗེ་མྱུར་མགྱོགས་ལྡན་པའི་ཡང་དག་ལྟ་བས་ཕྱག་གིས་མི་འཛིན་ནམ། དོན་དང་མི་མཐུན་པར་ཉོན་མོངས་པ་དུག་གསུམ་བཟོད་པར་དཀའ་བའི་ནད་ཀྱིས་གདུང་ལགས་ན། གཉེན་པོ་ཐབས་ལ་མཁས་པའི་ཐུགས་རྗེའི་བདུད་རྩིའི་སྨན་གྱིས་མི་གསོའམ། ལས་ཀྱི་རྣམ་པར་སྨིན་པ་བཟོད་པར་དཀའ་བའི་སྡུག་བསྔལ་གྱི་མེ་ཀློང་འབར་ན། ཐུགས་རྗེ་བསིལ་བའི་ཆར་རྒྱུན་བཟང་པོ་མི་འབེབས་སམ། སྡུག་བསྔལ་འབྱུང་བའི་འཁོར་བའི་འདམ་དུ་བྱིང་ཞིང་ནུབ་པར་གྱུར་ན། ཐབས་ལ་མཁས་པས་ཐུགས་རྗེའི་ལྕགས་ཀྱུས་ཐར་པར་མི་འདྲེན་ནམ་ཅི། དེས་ན་ཁམས་གསུམ་འཁོར་བའི་གནས་སུ་སྡུག་བསྔལ་སྣ་ཚོགས་པས་གདུང་སྟེ་སྦྱངས་ཤིང་སྦྱངས་ནས་ནམ་ཞིག་གི་དུས་ན་རང་གིས་རིག་པའི་འབྲས་བུ་ཐོབ་པའི་ཚེ་འཕགས་པའི་ཐུགས་རྗེ་ཆེན་པོའི་དགོས་པ་ཅི་ཞིག་འཚལ་ཏེ་དོན་མ་མཆིས་པས། བདག་ཉིད་ལས་ཀྱི་འཕྲོ་གང་དབང་བཙན་པར་བཞག་ནས་སྐྱོབ་པར་མི་མཛད་ན་སྟོན་མཆོག་ཁྱོད་ལྟ་༼༤༡༡༽བུ་ལ་ཐུགས་རྗེ་མངའ་ཡང་དེ་ལ་སྐྱོབ་པའི་ཐུགས་རྗེ་ཞེས་ནི་འགྲོ་བ་སུ་ལ་ལྟས་ནས་རྒྱུ་མཚན་ཅི་ཞིག་གིས་གདགས་པར་བྱ་སྟེ། དེ་བས་དཔའ་བོ་ཁྱོད་ལ་ཐུགས་རྗེ་ཆེན་པོའི་སྟོབས་མངའ་ཞིང་སྔོན་བྱུང་གི་དུས་ནས་འབྲེལ་བའི་ལས་ཀྱི་འཕྲོ་ཡང་དབང་བཙན་པར་གྱུར་ན། ཡལ་ཡོལ་དང་བཏང་སྙོམས་ཀྱི་ལེ་ལོ་མ་མཛད་པར་དགོངས་པ་བྱང་ཆུབ་སྙིང་པོའི་ངང་ནས་ད་ལྟ་ཉིད་དུ་གཟིགས་ཤིག ཐུགས་རྗེ་ཆེ་མངའ་རྒྱལ་བའི་ཕྲིན་ལས་ཀུན་རྫོགས་པའི་ལྷ་ཡི་ཡང་ལྷ་ཀྱེ། འདི་ལྟར་དྲེགས་པས་སྨྲེངས་ཏེ་གསོལ་བ་ལ་འཁོར་གྱ་ིམི་དང་མི་མ་ཡིན་པ་ཀུན་དང་ཡང་ཐུན་མོང་དུ་འགྱུར་རོ། །དེ་དག་ཀུན་ཏུ་སྤྱོད་པའི་སྟོབས་ཏེ་སོར་ཆུད་པའང་དོན་གྱིས་ཚང་ངོ༌། །ཞེས་རང་གི་ང་རྒྱལ་གྱི་རི་བོ་བཅག་ནས་ལུས་སེང་གེར་མངོན་པར་སྤྲུལ་ནས་སྐྱབས་དམ་པར་འགྲོ་བའི་རྟགས་དང༌། ཤེས་བྱའི་སྒྲིབ་པ་སྦྱང་བའི་ཕྱིར་ཞབས་ཀྱི་གདན་ཁྲིར་ཕུལ་ལོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཐ་མར་དམན་པའི་གདུང་བ་བསྟན་པའི་ལེའུ་སྟེ་ཉི་ཤུ་བརྒྱད་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། བདུད་བཏུལ་བས་ཐ་མར་དམན་པའི་གདུང་བ་བཏོན་པའི་ལེའུ་སྟེ་ཉི་ཤུ་རྩ་བརྒྱད་པ་གསལ་བར་བཤད་པའོ།། །།

ལེའུ་ཉི་ཤུ་རྩ་དགུ་པ་རྒྱུད་ཡོངས་སུ་སྦྱངས་པ།

༈ གཉིས་པ་སྤྱོས་པས་སྦྱངས་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

དེ་ནས་རྡོ་རྗེ་སྲིན་པོ་དེས། ལས་ཀྱི་སྲིན་པོ་དེ་ལོག་པར་ལྟ་བ་སུན་ཕྱུང་ནས། ལས་ཀྱི་སྒྲིབ་པ་རྒྱུན་བཅད་པའི་ཕྱིར། སྦྱོ་བ་བརྒྱད་ཆེན་པོས་རྣམ་པར་སྤྱོས་པ་ནི། འདི་ལྟ་སྟེ།

དེ་ནས་དབང་མོ་ཀྲོ་ཏི་ཤྭ་རིའི་ལྷུམས་ནས་བཏོན་པའི་ཡེ་ཤེས་ཀྱི་ཁྲོ་བོ་ཆེན་པོ་དཔལ་རྡོ་རྗེ་སྲིན་པོ་དེས། བཤད་པ་ལྟར་ལས་ཀྱི་སྲིན་པོ་རུ་དྲ་བཏུལ་ཏེ་དེའི་ལོག་པར་ལྟ་བ་དེ་སུན་ཕྱུང་ནས་འགྱོད་པ་སྐྱེས་པ་ན། ལས་ཀྱི་སྒྲིབ་པའི་ས་བོན་དང་བག་ཆགས་ངན་པ་རྒྱུན་གཅད་པའི་ཕྱིར་སྤྱོ་བ་བརྒྱད་ཀྱི་སྒོ་ནས་རང་གི་ཉེས་སོ་ཞེས་སྟོན་པས་སྤྱོ་བ་ཆེན་པོས་རྣམ་པར་སྤྱོས་ནས་གཞན་སྟོབས་ཀྱིས་ཀྱང་སྦྱངས་པར་མཛད་པ་ནི་འདི་ལྟ་སྟེ།

གཉིས་པ་རྒྱས་པར་བཤད་པ་ལ་ལྔ་སྟེ། མ་རིག་པས་ཉེས་པར་སྤྱོས་པ། ༼༢༽བདག་འཛིན་གྱིས་ཉེས་པར་སྤྱོས་པ། བདག་ལ་ཆགས་ཤིང་ཀུན་བརྟགས་ཀྱིས་ཉེས་པར་སྤྱོས་པ། ཉོན་མོངས་པ་ལྔ་ལ་ཞེན་པས་ཉེས་པར་སྤྱོས་པ། ཐུགས་རྗེ་བསྐུལ་བའི་ལན་དུ་གདམས་ངག་མཛད་པའོ། །དང་པོ་ནི།

སྡིག་ཅན་ལོག་པའི། ཞེས་པ་ནས། འཁྱམས་པར་ངེས། །ཞེས་པའི་བར་གྱིས་བསྟན་ཏེ།

སྡིག་ཅན་ལོག་པའི་སྟོབས་ལྡན་འདི། །ཐོག་མ་མེད་པའི་དུས་མཐའ་ནས། །སྲིད་པའི་འཁོར་ལོར་འཁྱམས་པ་དེ།།

ལེའུ་འདིས་དྲང་དོན་སྟོན་ནོ། །སྤྱོ་བ་བརྒྱད་པོ་ལེའུ་གོང་མ་དང་བསྡེབས་ཏེ་སྨྲེ་སྔགས་བཏོན་པའི་ཉེས་པ་རེ་རེ་བཞིན་སྤྱོ་བ་རེ་རེ་སྟེ། བྱེད་པ་པོ་གཞན་གང་ཡང་མེད་པར་རང་གིས་སྡིག་པ་སྤྱད་པའི་ལས་ཀྱིས་ཉེས་པ་ཅན་ལྷན་ཅིག་སྐྱེས་པའི་མ་རིག་པས་གཉིས་མེད་རང་ངོ་མ་ཤེས་པར་དོན་ལས་གོལ་བས་ཕྱིན་ཅི་ལོག་པའི་སྟོབས་ལྡན་འདི་ཐོག་མ་མེད་པའི་དུས་ཀྱི་མཐའ་ནས་སྲིད་པའི་འཁོར་ལོར་དབང་མེད་དུ་འཁྱམས་པར་ངེས་སོ། །དེ་ཉིད་ བདག་ནི་ཐོག་མ་མེད་པའི་སོགས་ཚིགས་བཅད་དང་སྦྱར་རོ།།

གཉིས་པ ་བདག་འཛིན་གྱིས་ཉེས་པར་སྤྱོས་པ་ནི།

ཉེས་བྱས་རྩ་བ། ཞེས་པ་ནས། ཉེས་པར་ངེས། །ཞེས་པའི་བར་གྱིས་བསྟན་ཏེ།

ཉེས་བྱས་རྩ་བ་རང་ཉིད་ལས། །ཐམས་ཅད་འབྱུང་བར་ཉེས་པར་ངེས།།

ཉེས་པར་བྱས་པའི་རྩ་བ་ཡང་རང་གི་བདག་ཏུ་འཛིན་པ་ཉིད་ལས་ཉོན་མོངས་དང་སྡུག་བསྔལ་ཐམས་ཅད་འབྱུང་བས་རང་བྱས་ཀྱི་ཉེས་པར་ངེས་ཀྱི་གཞན་གང་ནས་ཀྱང་བྱུང་བ་མིན་ནོ། །དེ་ནི་དར་ཞིང་དྲགས་པའི་སོགས་རྐང་པ་བཅོ་ལྔ་དང་སྦྱར་རོ།།

གསུམ་པ་བདག་ལ་ཆགས་ཤིང་ཀུན་བརྟགས་ཀྱིས་ཉེས་པར་སྤྱོས་པ་ནི།

བསྐལ་པ་གྲངས་མེད། ཅེས་པ་ནས། མདུད་པས་ཉེས་པར་ངེས། །ཞེས་པའི་བར་གྱིས་བསྟན་ཏེ།

བསྐལ་པ་གྲངས་མེད་དེ་སྙེད་དུ། །སྐྱེ་བ་མང་པོར་ལུས་བླངས་ནས། །གཟུགས་ཕུང་གྲངས་མེད་ཞིག་འགྱུར་ཞིང་། །ཤ་རུས་སྟོང་གསུམ་འཇིག་རྟེན་ཙམ། །རྣག་ཁྲག་རྒྱ་མཚོར་འཁྱིལ་གྱུར་ཀྱང་། དོན་མེད་པར་ནི་ཆུད་ཟོས་པ། །སུས་ཀྱང་མ་བྱས་རང་གི་ལས། །དེ་ཙམ་ཆ་གཅིག་དོན་དཔྱད་ན། །དེ་ཙམ་དོན་གྱིས་སངས་རྒྱས་ཟིན། །ལུས་རྣམས་ཡོངས་སུ་གཏོང་བ་ཡི། །མ་ཆགས་སྟོབས་ལྡན་ཆེན་པོ་རྣམས། །བཀྲེས་པས་ཉེན་པའི་འགྲོ་གང་ལ། །ཤ་རུས་ཁྲག་ཙམ་བཏང་བས་ཀྱང་། །ཟག་མེད་རྣམ་ཐར་བདེ་འཐོབ་ན། །ཟབ་མོའི་དོན་ལྟ་སྨོས་ཅི་དགོས། །རང་ལུས་གཏོང་བར་མ་ཕོད་ཅིང་། །ཆགས་པའི་མཐའ་ལ་མངོན་ཞེན་པ། །ཁམས་གསུམ་འཁོར་བའི་ཁ་རྒྱུད་ཅིང་། །ཟུག་རྔུ་ནད་ཀྱིས་གཟིར་བ་ཡིན། །སྲིད་པའི་བརྩོན་རར་ཆུད་པ་འདི། །མཁའ་ལ་འདུད་པས་ཉེས་པར་ངེས།།

བསྐལ་པ་གྲངས་མེད་པ་མང་པོ་དེ་སྙེད་དུ་སྐྱེ་བ་མང་པོ་དེ་ཙམ་གྱིས་ལུས་ཡོངས་སུ་བླངས་ནས་གཟུགས་ཕུང་གྲངས་མེད་པ་ཞིག་པར་གྱུར་ཞིང༌། ཤ་རུས་བསགས་ན་སྟོང་གསུམ་གྱི་འཇིག་རྟེན་ཙམ་ལ། རྣག་ཁྲག་བསགས་པས་རྒྱ་མཚོ་ཆེན་པོ་འཁྱིལ་བར་གྱུར་ན་ཡང་དེ་དག་དོན་མེད་པར་ནི་ཆུད་ཟོས་པ་དེ་ཡང་སུས་ཀྱང་མ་བྱས་པར་རང་གི་མ་རིག་པས་ཀུན་ཏུ་བརྟགས་པའི་གཟུང་འཛིན་གྱི་ལས་ཁོ་ན་ལས་བྱུང་བ་ཡིན་ལ། དེ་ཙམ་གྱི་ཆ་གཅིག་དགེ་བའི་ལས་བཟང་པོའི་དོན་དུ་ཡང་དག་པར་སྤྱད་ན། ད་ཙམ་དོན་གྱིས་འབྲས་བུ་སངས་རྒྱས་ཐོབ་ཟིན་པར་ངེས་ཏེ། རང་ལུས་ཀྱི་ཆ་རྣམས་སྦྱིན་པར་ཡོངས་སུ་གཏོང་བ་ཡི་མ་ཆགས་པའི་སྟོབས་དང་ལྡན་པས་རྒྱལ་སྲས་ཆེན་པོ་རྣམས་ཀྱིས་བཀྲེས་པས་ཉེན་པའི་འགྲོ་བ་གང་ལ་ཤ་དང་རུས་པ་ཁྲག་ཙམ་གཏོང་བས་ཀྱང་ཟག་པ་མེད་པའི་རྣམ་ཐར་གྱི་བདེ་བ་ཆེན་པོ་ཐོབ་པར་གྱུར་ན། གསང་བ་ཟབ་མོའི་དོན་རྟོགས་པའི་ལྟ་བ་དང་མཐུན་པར་དགེ་བ་སྤྱད་པས་སྨོས་ཅི་དགོས་པས་སོ། །དེའི་ཕྱིར་རང་ལུས་བཏང་བར་མ་ཕོད་ཅིང༌། འདོད་ཅིང་ཆགས་པའི་མཐའ་ལ་མངོན་པར་ཞེན་པས་མཐུས་ཁམས་གསུམ་འཁོར་བའི་ཁ་བརྒྱུད་ཅིང་སྡུག་བསྔལ་ཟུག་རྔུའི་ནད་ཀྱིས་གཟིར་བ་ཡིན་པ་དེ་བས་ན་འཁོར་བ་སྲིད་པའི་བཙོན་རར་ཆུད་པ་འདི་ཆོས་ཉིད་ཀྱི་ནམ་མཁའ་ལ་ཀུན་ཏུ་རྟོག་པས་མདུད་པ་བྱས་ཏེ་རང་བཅིང་པས་ཉེས་པར་ངེས་སོ། །འདི་ཉིད་ལས་ཀྱིས་མནར་བའི་སོགས་ཚིགས་བཅད་ལྔ་དང་རྐང་པ་གཉིས་ལ་སྦྱར་རོ།།

བཞི་པ་ཉོན་མོངས་པ་ལྔ་ལ་ཞེན་པས་ཉེས་པར་སྤྱོས་པ་ནི།

མུན་པའི་ཀློང་དུ། ཞེས་པ་ནས། རླུང་གིས་ཉེས་པར་ངེས། །ཞེས་པའི་བར་གྱིས་བསྟན་ཏེ།

མུན་པའི་ཀློང་དུ་འཁྱམས་པ་འདི། །ཁྱད་པར་རྨོངས་པས་ཉེས་པར་ངེས། ཐར་མེད་འདམ་དུ་བྱིང་བ་འདི། །འདོད་སྲེད་འདུན་པས་ཉེས་པར་ངེས། །བློ་ངན་ཚ་བས་གདུངས་པ་འདི། །ཚ་བའི་ལས་ཀྱིས་ཉེས་པར་ངེས། །སྡུག་བསྔལ་རི་བོས་ནོན་པ་འདི། །ང་རྒྱལ་དྲེགས་པས་ཉེས་པར་ངེས། །འཁོར་བའི་རླུང་སྒོར་ལྷུང་བ་འདི།།

ལས་ཀྱི་རླུང་གིས་ཉེས་པར་ངེས།།

དེ་ལ་སྤྱོ་བ་བཞི་པ་ནི། ཤེས་རབ་མི་གསལ་བས་བློ་ཆུང་རྣམས་འཁོར་བ་མུན་པའི་སྐྱེ་མཆེད་ཟབ་ཅིང་རྒྱ་ཆེ་བའི་ཀློང་དུ་གར་འགྲོ་གཏོལ་མེད་དུ་སྡོད་དབང་མེད་པར་འཁྱམས་པ་འདི་ཉིད་འཁོར་འདས་སོགས་ཀྱི་ཁྱད་པར་མི་འདྲ་བ་དང་བཟང་ངན་གྱི་བླང་དོར་ལ་རྨོངས་པས་གཏི་མུག་གིས་ཉེས་པར་ངེས་སོ། །འདི་ཉིད་མ་རིག་ལོག་པ་སོགས་རྐང་པ་གསུམ་དང་སྦྱར་རོ། །སྤྱོ་བ་ལྔ་པ་ནི། ཐར་པ་མེད་པར་སྲིད་པའི་རྒྱ་མཚོའི་འདམ་དུ་བྱིང་ཞིང་ནུབ་པ་འདི་ནི་འདོད་པའི་ཡོན་ཏན་ལྔ་ལ་སྲེད་པའི་འཁོར་བའི་ཆགས་འཛིན་གྱི་འདུན་པ་དང་ཞེན་པས་དབང་ལས་རང་གིས་ཉེས་པར་ངེས་སོ། །འདི་ཉིད་སྡུག་བསྔལ་འཁོར་བའི་འདམ་དུ་སོགས་རྐང་པ་གཉིས་དང་སྦྱར་རོ། །སྤྱོ་བ་དྲུག་པ་ནི། བློ་ངན་ཕྱིན་ཅི་ལོག་ཏུ་གྱུར་ཏེ་ཤིན་ཏུ་གནག་པོའི་དབང་གིས་དམྱལ་ཁམས་ཀྱི་སྡུག་བསྔལ་དྲག་པོ་བཟོད་པར་དཀའ་བའི་ཚ་བས་གདུང་བ་འདི་ནི། རང་རྒྱུད་ཀྱི་ཞེ་སྡང་མེ་ལྟར་འབར་བའི་ཚ་བའི་ལས་ངན་གྱིས་ཉེས་པར་ངེས་སོ། །འདི་ཉིད་ལས་ཀྱི་རྣམ་སྨིན་སོགས་རྐང་པ་གཉིས་དང་སྦྱར་རོ། །སྤྱོ་བ་བདུན་པ་ནི། ཐར་པར་དཀའ་ཞིང་བདེ་བླག་མེད་པའི་སྡུག་བསྔལ་དྲག་པོའི་རི་བོས་ནོན་པ་འདི་ནི། རང་གི་ང་རྒྱལ་རི་ལྟར་བརྩེགས་པའི་ཁེངས་ཤིང་རྒྱགས་པས་ཉེས་པར་ངེས་སོ། །འདི་ཉིད་དུག་གསུམ་བཟོད་དཀའི་སོགས་རྐང་པ་གཉིས་དང་སྦྱར་ཏེ་ལོག་པའི་ང་རྒྱལ་སོགས་སུ་འགྱུར་བས་སོ། །སྤྱོ་བ་བརྒྱད་པ་ནི། འཁོར་བར་རླུང་དམར་འཚུབས་མས་བདས་ནས་ལེ་ལོ་དང་རྣམ་པར་གཡེང་བའི་སྒོར་ལྷུང་ནས་ཐར་བར་དཀའ་བ་འདི་ནི། ཕྲག་དོག་འཁྲུགས་པའི༼༤༽དབང་གིས་ལས་ཀྱི་རླུང་གིས་ཉེས་པར་ངེས་སོ། །འདི་ཉིད་ཉེས་བྱས་ལས་ཀྱི་སོགས་ཚིགས་བཅད་གཅིག་དང་སྦྱར་རོ།།

ལྔ་པ་ཐུགས་རྗེ་བསྐུལ་བའི་ལན་དུ་གདམས་ངག་མཛད་པ་ལ་གཉིས་ཏེ། ཡེ་ནས་རྒྱལ་སྲས་ཡིན་པ་འཁོར་བར་བཀའ་བསྒོ་ལོག་པས་ཉེས་པར་བསྟན་པ། ཐུགས་རྗེ་སྐྱེས་ཏེ་རྒྱུད་སྦྱང་བར་ཞལ་གྱིས་བཞེས་པའོ། །དང་པོ་ནི།

རང་གིས་མནར་བའི། ཞེས་པ་ནས། འབྲས་བུར་སྨིན། །ཞེས་པའི་བར་གྱིས་བསྟན་ཏེ།

རང་གིས་མནར་བའི་རུ་དྲ་ཁྱོད། །ཡེ་ནས་རྒྱལ་བའི་སྲས་ཡིན་ན། །སྲིད་པའི་འཁོར་ལོར་ཅི་སྟེ་འཁོར། །དེས་ན་རང་གི་ལས་ཡིན་ཏེ། །སེམས་ཉིད་ནམ་མཁའ་ལྟ་བུ་ལ། །གཟུགས་སྣང་གློ་བུར་སྤྲིན་གྱིས་བསྒྲིབས། །གཟུགས་སྣང་རྟོགས་པ་རྣམ་སྦྱངས་ཕྱིར། །ཤེས་རབ་བསྐལ་པའི་རླུང་གིས་གཏོར། །དང་པོ་བཀའ་བསྒོ་ལོག་པར་ངེས། །དེ་ནས་ངན་པའི་རི་བོ་བརྩེགས། །དེ་ནས་ཡིད་བཞིན་ནོར་བུ་བསྲེགས། །ཐ་མར་དངོས་པོ་བཞི་དཔྱད་པས། །རྣལ་འབྱོར་ཐེག་པ་ཆེན་པོའི་དོན། །མ་རྟོགས་པ་དང་ལོག་པར་རྟོགས། །མ་རྟོགས་ཕྱིར་ཡང་༼དག་༽ཉིད་མ་རྟོགས། །ཇི་བཞིན་མ་སྤྱད་ཕྲ་མེན་གྱིས། །ངན་འགྲོའི་ལས་ལམ་རྒྱུན་བཏགས་པས། །སྲིད་པ་ལོག་པའི་འབྲས་བུར་སྨིན།།

རང་གིས་འཁྲུལ་རྟོག་ངན་པས་མནར་བའི་རུ་ཏྲ་ཁྱོད་ཉིད། སྤྱིར་ན་ཡེ་ནས་རིགས་དང་ལྡན་ཞིང་བྱེ་བྲག་ཏུ་ཐུབ་དཀའ་གཞོན་ནུ་ལས་གདམས་ངག་བླང་བས་རྒྱལ་བའི་སྲས་ཡིན་པས་བསྟིང་བ་དང་སྤྱོ་བ་གཉིས་ཀའི་སྒོ་ནས་སྲིད་པའི་འཁོར་ལོར་ཇི་སྟེ་འཁོར་ཏེ་འཁོར་བ་རིགས་པ་དེས་ན་རང་གི་འཁྲུལ་སེམས་ཀྱིས་རང་བཅིང་བའི་ལས་ཀྱི་དབང་གིས་འདི་ལྟར་འཁོར་བ་ཡིན་ཏེ་སེམས་ཀྱི་ཆོས་ཉིད་རང་བཞིན་གྱིས་རྣམ་པར་དག་པ་ནམ་མཁའ་ལྟ་བུ་ལ་འཁྲུལ་པའི་གཟུགས་སྣང་གློ་བུར་བའི་སྤྲིན་གྱིས་བསྒྲིབས་པ་ཡིན་ལ། གཟུགས་སྣང་འཁྲུལ་པའི་རྟོག་པ་དེ་ཉིད་རྣམ་པར་སྦྱང་བའི་ཕྱིར་དུ་ཟག་པ་མེད་པའི་ཤེས་རབ་ཆེན་པོ་བསྐལ་པའི་རླུང་ལྟ་བུ་གང་གིས་ཆོས་དབྱིངས་ནམ་མཁའི་ངང་དུ་འཐོར་དགོས་པ་ཡིན་ཀྱང༌། རུ་ཏྲ་ཁྱོད་ཀྱིས་དང་པོ་སྟོན་པ་ཐུབ་དཀའ་གཞོན་ནུ་ལས་བཀའ་བསྒོ་ལོག་ནས་གོལ་བར་གྱུར་ཅིང་ལས་ངན་སྤྱད་པས་ཉེས་ལ། དེ་ནས་སློབ་དཔོན་དང་གྲོགས་ལ་ཆེ་བ་སྐྱེས་ཏེ་མངོན་པའི་ང་རྒྱལ་གྱི་རི་བོ་བརྩེགས་ཤིང་ཉོན་མོངས་དྲག་པོས་འཁྲུགས་པ་དང༌། དེ་ནས་དམ་ཚིག་རལ་ཏེ་རང་གི་སེམས་ཉིད་ཡིད་བཞིན་གྱི་ནོར་བུ་དང་འདྲ་བ་བྱང་ཆུབ་ཀྱི་སེམས་རིན་པོ་ཆེ་ལོག་ལྟའི་མེ་ཡིས་བསྲེགས་པས་ཚུལ་མིན་ཡིད་བྱེད་ཀྱི་རྟོག་པ་བཞི་ལས་མ་ཐར་བར་འཁོར་བའི་དངོས་པོ་བཞི་ལ་འཆོལ་ཉོག་ཏུ་རང་ཀ་མར་སྤྱད་པས་ཆོས་ཉིད་རྣལ་མ་ལ་བློ་འབྱོར་བས་དངོས་པོ་རྣམས་ཀྱི་དེ་ཁོ་ན་ཉིད་གསང་སྔགས་ཐེག་པ་ཆེན་པོའི་ངེས་པ་དོན་གྱི་ལྟ་བ་མ་རྟོགས་པ་དང༌། དེ་ལྟར་ཐོག་མར་མ་ཤེས་པའི་རྒྱུས་ལྟ་བ་ཇི་བཞིན་པའི་སྒྲ་ཙམ་ལ་དོན་དུ་རློམ་པས་ལོག་པར་རྟོག་སྟེ་རང་ཁ་བ་ཉིད་དུ་མཐོང༌། དེས་ན་སྤྱོད་པ་སྒྲ་ཇི་བཞིན་པའི་ཕྱོགས་རྟོགས་ཏེ་ཤེས་ཀྱང་ལྟ་བ་ཡང་དག་པའི་དོན་ཉིད་མ་རྟོགས་པས་ལྟ་བས་མ་ཟིན་པར་གསང་སྔགས་རྣལ་འབྱོར་ཆེན་པོའི་གཞུང་ཇི་ལྟ་བ་བཞིན་དུ་མ་སྤྱད་པར་བཟང་ངན་འདྲེན་མར་སྤྱོད་པའི་ཕྲ་མེན་གྱིས་ལས་སྣ་ཚོགས་ཀྱི་དབང་གིས་དམན་པ་ངན་འགྲོའི་གནས་སུ་སྐྱེ་བ་བརྒྱུད་པའི་ལས་ཀྱི་ལམ་རྒྱུན་དུ་འབྲེལ་བར་ལོང་བཏགས་པས་རྒྱུ་དེས་འཁོར་བའི་སྲིད་པ་འདིར་སྡུག་བསྔལ་དེ་སྙེད་མྱོང་ནས་མཐར་ལོག་པའི་འབྲས་བུ་རུ་ཏྲར་སྨིན་ཏེ་༼༥༽སྲིན་པོར་སྐྱེས་པའོ།།

གཉིས་པ་ཐུགས་རྗེ་སྐྱེས་ཏེ་རྒྱུད་སྦྱང་བར་ཞལ་གྱིས་བཞེས་པ་ནི།

ཨེ་མའོ། ཞེས་པ་ནས། མཚོན་གྱིས་བསད། །ཅེས་པའི་བར་གྱིས་བསྟན་ཏེ།

ཨེ་མའོ་ལས་ངན་སྙིང་རེ་རྗེ། །ང་ནི་བཀའ་ཡི་ལས་མཁན་ཏེ། །བཀའ་ཡི་ལས་ཀྱི་དུས་བྱུང་བས། །ངན་འགྲོའི་གནས་སུ་འཁྱམས་པ་འདི། །འཁོར་བའི་གནས་ནས་གདོན་པའི་ཕྱིར། །ལས་ངན་ལས་རྒྱུད་གཅད་པར་བྱ། །དངོས་པོར་སྨིན་པའི་རྟོག་པ་འདི། །རྡོ་རྗེ་ནམ་མཁའི་མཚོན་གྱིས་བསད།།

བསྒྲལ་བྱ་ཞིང་ལ་ངམ་པའི་ཚུལ་གྱིས་ཨེ་མའོ་ཞེས་ལས་ངན་གྱི་སེམས་ཅན་སྙིང་རེ་རྗེ་སྟེ། ཐུགས་རྗེ་སྐྱེས་པས་ལས་ཀྱི་རྒྱུན་བཅད་པར་ཞལ་གྱིས་བཞེས་པར་མཛད་དེ། ཡུལ་དང་འཕྲད་པའིཐུགས་རྗེའང་ཞར་ལ་བསྡུའོ། །དེས་ན་དཔལ་ཆེན་པོ་ང་ནི་རྒྱལ་བ་རྣམས་ཀྱི་བཀའ་ཡི་ལས་མཁན་མཆོག་ཏུ་ངེས་ཏེ། བཀའ་ཡི་ལས་ཀྱི་དུས་ལ་བབ་པ་ད་ལྟར་བྱུང་བས་ན་ངན་འགྲོའི་གནས་སུ་འཁྱམས་པའི་དྲེགས་པ་འདི་ཉིད། འཁོར་བའི་གནས་ནས་བཏོན་ཏེ་བདེ་ཆེན་ཐར་པ་མཆོག་ལ་འགོད་པའི་ཕྱིར་ལས་ངན་གྱི་ལས་རྒྱུན་བག་ཆགས་དང་བཅས་པ་བཅད་པར་བྱའོ། །དངོས་པོར་བཟུང་བས་གཟུང་འཛིན་དུ་སྨིན་པའི་དབང་གིས་ལས་ངན་སྤྱད་པའི་སྡིག་པ་འདི་ཉིད། གང་གིས་གཅོད་ན་དབྱིངས་དང་ཡེ་ཤེས་གཉིས་སུ་མེད་པའི་རྡོ་རྗེ་ནམ་མཁའི་མཚོན་གྱིས་ཡེ་བསད་ཆེན་པོར་བསད་དེ་གཉེན་པོ་རྒྱུད་ལ་སྐྱེད་ནས་སྦྱངས་པའོ། །འདི་ཉིད་བདག་ནི་བླུན་རྨོངས་སོགས་ཚིགས་བཅད་བདུན་དང་རྐང་པ་གཉིས་མཇུག་གི་ཁམས་གསུམ་འཁོར་བའི་གནས་སོགས་མན་ཆད་ལ་སྦྱར་རོ།།

གསུམ་པ་གླེགས་བམ་དང་པོའི་འཕྲོས། དོན་གྱིས་སྦྱངས་པ་ནི།

ཤར་ཕྱོགས་ལམ་སྒོའི། ཞེས་པ་ནས། སྟོབས་ཀྱིས་གཞོམ། །ཞེས་པའི་བར་གྱིས་བསྟན་ཏེ།

ཤར་ཕྱོགས་ལམ་སྒོའི་འཇིག་རྟེན་ན། །ཡང་དག་ཐར་ལམ་གཅོད་བྱེད་པ། །འབྱུང་པོ་གཏུམ་པོ་གདོལ་པ་ཅན། །ཁྱོད་ནི་དེ་བཞིན་ཉིད་ལ་སྒྲིབ། །ཡང་དག་ངེས་པའི་བློ་གྲོས་ཀྱིས། །ཁུངས་བཅད་རྩད་བཅད་བདག་ལས་བྱུང་། །བདག་འཛིན་བདག་གིས་རྟོགས་པ་ཡི། །ཕྱིན་ཅི་ལོག་རྟོག་བརྩོན་འགྲུས་ཀྱི། །གནས་ངན་ལེན་པའི་དེད་དཔོན་བྱེད། །དེ་ཉིད་ བདག་རྟོགས་ཡིན་པས་ན། །བདག་མེད་ནམ་མཁའི་སྟོབས་ཀྱིས་གཞོམ།།

ཤར་གྱི་ཕྱོགས་ཞེས་པའི་ངེས་པ ་ནི། སྟོན་པའི་མདུན་ན་རུ་ཏྲ་གནས་པས་སམ། སེམས་ལ་རང་རིག་པའི་ཡེ་ཤེས་འཆར་བས་སམ། ནང་དུ་བདག་མེད་མངོན་སུམ་དུ་རྟོགས་པའི་ལམ་གྱི་སྒོའི་འཁོར་བ་དང་འདས་པའི་མཚམས་ཀྱི་འཇིག་རྟེན་ན་མ་རྟོགས་པའི་ངོ་ལ་རྒྱུད་གཅིག་ལ་གསུམ་ཀ་ཚང་བས་ཡང་དག་མི་བསླུ་བས་ཐར་པའི་ལམ་རྒྱུན་གཅོད་པའི་ལས་བྱེད་པ་གློ་བུར་གྱི་ལས་རྟོག་མང་པོས་བར་གཅོད་བྱེད་པའི་བདག་འཛིན་གསུམ་ནི། ལུས་ངག་ཡིད་ལས་འཁོར་བས་འབྱུང་པོ། གཞོམ་པར་དཀའ་བས་གཏུམ་པོ། ངན་པར་སྤྱོད་པས་གདོལ་པ་ཅན་ཏེ། ཁྱོད་ཀྱི་བྱེད་ལས་ནི་གཉིས་མེད་དེ་བཞིན་ཉིད་ལ་སྒྲིབས་པ་དེས་ན་ཇི་བཞིན་པ་མཐོང་དུ་མི་སྟེར་ཏེ། རུ་ཏྲའི་ཤེས་པ་དང་འགྲོ་བ་ཀུན་གྱི་རྒྱུད་ལ་གནས་པའི་ཕྱིར་གང་གིས་རྟོགས་ནས་གཞོམ་ན་ཡང་དག་ངེས་པའི་བློ་གྲོས་སོ་སོར་རྟོག་པའི་ཤེས་རབ་ཀྱིས་བརྟགས་ནས་ཁུངས་གང་ནས་བྱུང་བའི་རྒྱུའི་རྩད་བཅད་པ་ན་བདག་ཉིད་ཀྱི་ཞེན་པ་ཡིན་པའི་ཕྱིར་བདག་ལས་བྱུང་བས་གཞན་ནས་མ་བྱུང་བར་ཁུངས་ངེས་སོ། །འོ་ན་དེའི་ངོ་བོ་དང་ལས་ཇི་ལྟ་བུ་སྙམ་པ་ལ། བྱེད་པ་པོ་བདག་ཏུ་འཛིན་པ་དང་དེ་ཡིས་གཟུང་བར་བྱ་བ་༼༦༽བདག་གིར་རྟོག་པ་ཡི་ཡུལ་དང་དེ་གཉིས་ཀར་འཛིན་པའི་ཞེན་པ་མཐུ་བརྟས་པས་ཡེ་ནས་ཕྱིན་ཅི་ལོག་པ་དང་གསུམ་གྱི་བྱེད་ལས་ནི་ནུས་པའི་མཐུ་སྟོབས་རྒྱུན་ཆད་མེད་པའི་བརྩོན་འགྲུས་ཀྱིས་དབང་གིས་འཁོར་བའམ་ངན་སོང་གི་གནས་ངན་ལེན་དུ་འཕྱན་ཏེ་སྒོ་གསུམ་སྨད་པར་ལྷུང་བའི་གཙོ་བོ་དེད་དཔོན་ལྟ་བུར་བྱེད་པའོ། །དེ་ཉིད་ཀྱི་ངོ་བོ་བདག་ཏུ་འཛིན་པའི་རྟོག་པ་ཡིན་པས་ན་གཉེན་པོ་ཡུལ་སེམས་གཉིས་སུ་མེད་པར་མཐོང་བས་ བདག་མེད་གཉིས་ཀ་རྟོགས་པའི་ཡེ་ཤེས་སྟོང་ཉིད་ནམ་མཁའི་ངང་དུ་རིག་པ ་གསལ་ལ་མི་རྟོག་པ་ཤར་བའི་སྟོབས་ཀྱིས་གཞོམ་ཞིང་གཞིལ་བར་འགྱུར་རོ།།

བཞི་པ་ཐབས་ཀྱིས་ཕྲིན་ལས་ཀྱིས་སྦྱངས་པ་ལ་བཞི་སྟེ། ཞབས་འོག་ཏུ་མནན་ཏེ་ཐབས་ཀྱིས་བསྒྲལ་བ། དོན་ལ་བསྒྲལ་རྒྱུ་མེད་དེ་གདུལ་བྱའི་ཆེད་དུ་བསྟན་པ། རྣམ་ཤེས་གནས་སྤར་ཏེ་སླར་དབབ་པ། བསྒྲལ་པའི་དོན་གསུངས་པས་མཐོང་ལམ་སྐྱེས་པའོ། །དང་པོ་ནི།

དབང་བསྒྱུར་གནོན་པའི། ཞེས་པ་ནས། ཤ་རུ་ཏྲ་ནཱཾ། ཞེས་པའི་བར་གྱིས་བསྟན་ཏེ།

དབང་སྒྱུར་གནོན་པའི་ཐབས་ཆེན་དང་། །གཅོད་པ་མངོན་པོའི་མཐུ་ཅན་དང་། །གཟིར་བའི་བྱིན་གྱིས་བརླབས་ཆེན་གྱིས། །དུག་གསུམ་བགེགས་ཀྱི་བདག་པོ་ནོན། །ཨ་ན་ཡ་མཧཱ། ཤུ་ནྱ་ཏཱ། ཨ་ཀོ་ཏ་ཡ་ནན། སརྦ་པཱ་པཾ་མ་ཏང་རུ་དྲ་ནན། སརྦ་པཱ་པཾ་ཁ་ཏྲང་ཀ་རུ་ཊ་ནན། སརྦ་པཱ་པཾ་ཨ་ཀར་ཤ་རུ་ཏྲ་ནན།།

དེ་བས་ན་ཤེས་པ་དབང་བསྒྱུར་ཏེ་ཕུང་པོ་ཞབས་འོག་ཏུ་གནོན་ཞིང་མངོན་དུ་བསྒྲལ་བའི་ཐབས་ཆེན་དང་སྐྱེ་ཤི་རྩ་བ་གཅོད་པའི་མཆེ་བ་བཞི་ཡིས་མངོན་པར་སྒྲོལ་བའི་མཐུ་ཅན་དང༌། གདུག་པ་གཟིར་བའི་རལ་གྲི་ཡེ་ཤེས་ཆེན་པོའི་བྱིན་གྱིས་བརླབས་པ་ཅན་གྱིས་ཀུན་ཏུ་སྒྲོལ་བའི་སྟོབས་མཆོག་མངའ་བའི་དཔལ་འབར་སྤྲུལ་པའི་ཁྲོ་བོ་ཆེན་པོས་དུག་གསུམ་གྱི་སྡོང་པོ་བྱང་ཆུབ་ལ་བར་དུ་གཅོད་པའི་བགེགས་ཀྱི་བདག་པོ་རུ་ཏྲ་ནོན་ཞིག་པའོ། །ཨ་ན་ཡ། མ་ཧཱ་ཤཱུ་ནྱ་ཏཱ། ཨ་ཀོ་ཏ་ཡ་ནཱཾ། ཞེས་པ་ནི། ཉོན་ཅིག་རྣམ་པའི་མཆོག་དང་ལྡན་པའི་སྟོང་པ་ཆེན་པོའི་ཐོ་བས་རུ་ཏྲ་གཞོམ་པར་གྱིས། ཞེས་སོ། །སརྦ་པཱ་པཾ་མ་ཏང་ཁ་རུ་ཏྲ་ནཱཾ། ཞེས་གང་ཟག་གི་བདག་ཏུ་འཛིན་པའི་སྒྲིབ་པ་ཐམས་ཅད་གཞོམ་པར་གྱིས། ཞེས་སོ། །སརྦ་པཱ་པཾ་ཁ་ཏྲཾ་ཀ་རུ་ཏྲ་ནཱཾ། ཞེས། ཆོས་ཀྱི་བདག་གཟུང་བའི་རྟོག་པའི་སྒྲིབ་པ་ཐམས་ཅད་གཞོམ་པར་གྱིས། ཞེས་སོ། །སརྦ་པཱ་པཾ་ཨ་ཀར་ཤ་རུ་ཏྲ་ནཱཾ། ཞེས། གཉིས་ཀར་འཛིན་པའི་དངོས་པོར་ཞེན་པའི་སྒྲིབ་པ་ཐམས་ཅད་གཞོམ་པར་གྱིས། ཞེས་པའོ། །དེ་བས་ན་བདུད་རྩི་ཆེན་པོའི་རྒྱུད་ལས། གཟུང་འཛིན་རྐང་པ་བསྣོལ་བ་ཡི། །ཞེས་པ་ལ་སོགས་པས་མངོན་ནོ། །ལུང་འདི། གཟུང་འཛིན་ལོག་པར་ལྟ་བ་ཡིས། །ཁམས་གསུམ་འཁོར་བའི་གནས་སུ་ལྟུང༌། །སྐྱེ་མེད་ཆོས་ཉིད་རྟོགས་ན་བདེ། །གཟུང་འཛིན་མདུད་པ་དཀྲོལ་བྱའི་ཕྱིར། །བདུད་བཞི་ཞབས་ཀྱིས་མནན་པ་ཡང༌། །ས་ཡི་དཀྱིལ་འཁོར་བཞི་ཡི་ཁྱོན། །བདག་པོ་རྐང་པའི་མཐིལ་གྱིས་མནན། །གནས་ཀྱི་སྒོ་འདི་༼༧༽བདག་བཅད་པས། །བདེ་གཤེགས་ཐུགས་རྗེས་གཟུང་དུ་གསོལ། །ཞེས་སོགས་གསུངས་པ་ཡིན་མིན་བརྟགས་པར་བྱའོ། །ཡང་ན། རུ་ཏྲ་གསུམ་ནི། དང་པོ་ཆོས་བདག་གཟུང་རྟོག གཉིས་པ་གཉིས་ཀར་འཛིན་པ། གསུམ་པ་གང་ཟག་གི་བདག་འཛིན་རྟོག་པ་གཞོམ་པ་རྣམས་ལ་སྦྱར་བར་བྱ་སྟེ། དཔལ་འབར་ཁྲོ་མོའི་རྒྱུད་ལས། གཞན་ཡང་རུ་ཏྲ་རྣམ་པ་གསུམ་སྟེ། ཕྱི་གཟུང་བར་བྱ་བའི་ཡུལ་མེད་པ་ལ་གཟུང་བའི་ཡུལ་དུ་འཛིན་པ་མ་ཏྲཾ་ཀ་རུ་ཏྲའོ། །ནང་འཛིན་པར་བྱེད་པའི་སེམས་མེད་པ་ལ། འཛིན་པའི་སེམས་སུ་བཟུང་བ་ནི་ཨ་ཀར་ཤ་རུ་ཏྲའོ། །གཟུང་འཛིན་རྣམ་པ་གཉིས་ཡུལ་སེམས་བརྟས་པ་ལས་གྲུབ་པ་ནི་ཁ་ཏྲཾ་ཁ་རུ་ཏྲའོ། །རུ་ཏྲ་རྣམ་པ་གསུམ་ཡང་སེམས་ཅན་ནོ། །ཞེས་སོ།།

གཉིས་པ་དོན་ལ་བསྒྲལ་རྒྱུ་མེད་དེ་གདུལ་བྱའི་ཆེད་དུ་བསྟན་པ་ནི།

ཐམས་ཅད་སྟོང་ཉིད། ཅེས་པ་ནས། དམ་ཚིག་གོ །ཞེས་པའི་བར་གྱིས་བསྟན་ཏེ།

ཐམས་ཅད་སྟོང་ཉིད་མ་སྐྱེས་པས། །བསད་པས་བསད་པ་མེད་པའི་ཕྱིར།།

སྒྱུ་མ་སྦྱོང་བའི་ཆོ་འཕྲུལ་འདི། །སྙིང་རྗེ་ཆེན་པོའི་དམ་ཚིག་གི།

དེ་ལྟར་རྟོག་པ་གསུམ་པོ་ཐམས་ཅད་ངོ་བོ་མེད་པར་སྟོང་པ་ཉིད་ཡེ་ནས་མ་སྐྱེས་པའི་ཆོས་ཉིད་དུ་གནས་པས་དངོས་གཞི་མ་གྲུབ་པའི་རང་བཞིན་ཡིན་པའི་ཕྱིར་རྡོ་རྗེའི་མཚོན་གྱིས་བསྒྲལ་ཙམ་ན་གཉིས་སུ་མེད་པར་བསད་དེ་བསྒྲལ་བས་ན་རང་ཀ་མ་ར་བསད་ནས་དངོས་སུ་སྲོག་བཅད་པ་མེད་པའི་ཕྱིར་གྱིས་གཏན་ཚིགས་དེ་བས་ན། ལོག་རྟོག་གསུམ་གྱི་ཤེས་པ་མེད་བཞིན་སྣང་བ་སྒྱུ་མ་ལྟ་བུ་དེ་ཉིད་ཐབས་ཀྱི་ཕྲིན་ལས་ཅིར་ཡང་སྣང་བའི་སྒྲིབ་པ་སྦྱོང་བའི་ཆོ་འཕྲུལ་བཀོད་པ་འདི་ནི་སྙིང་རྗེ་ཆེན་པོའམ་ཐུགས་རྗེ་ཆེན་པོའི་ངང་ལས་མི་འདའ་བའི་དམ་ཚིག་གི་མཆོག་གོ།

གསུམ་པ་རྣམ་ཤེས་གནས་སྤར་ཏེ་སླར་དབབ་པ་ནི།

ངེས་པར་བསད་པའི། ཞེས་པ་ནས། ཆེན་པོར་སྦྱངས། །ཞེས་པའི་བར་གྱིས་བསྟན་ཏེ།

ངེས་པར་བསད་པའི་དམ་ཚིག་ནི། །དོན་སྟོན་བསད་པ་མ་ཡིན་ཏེ། །རྣམ་ཤེས་གཟུགས་ཕྲལ་རྡོ་རྗེར་བྱ།།

དེ་ཉིད་སླར་ཕབ་དམ་ཚིག་མཆོག །རྣམ་ཤེས་ཧཱུྃ་གིས་བསྡུས་ནས་ནི། ཁོ་ན་དེ་ཉིད་གཟུགས་ལ་དབབ།།

སྔོན་དུ་གནས་པའི་ཚུལ་བཞིན་དུ། །མ་ཉམས་བདེ་བ་ཆེན་པོར་སྦྱངས།།

ངེས་པར་མི་བསླུ་བར་རྟོག་པ་ཡེ་ཤེས་སུ་བསད་པའམ་བསྒྲལ་བའི་ཐུགས་ཀྱི་དམ་ཚིག་གི་ངོ་བོ་ནི། མངོན་སུམ་ངོ་མཐོན་དུ་རང་ཀ་མས་འཇིག་རྟེན་པ་ལྟར་བསད་དེ་ཕུང་པོ་བཤིག་པ་ནི་མ་ཡིན་ཏེ། སླར་སྐྱེ་བ་མི་ལེན་པར་སྲིད་པའི་དཔུང་ལས་རྒྱལ་བར་བྱས་པའི་ཕྱིར། འོ་ན་དེའི་ངོ་བོ་གང་ཞེ་ན། རྣམ་པར་ཤེས་པ་གཟུགས་ཀྱི་ཕུང་པོ་དང་བྲལ་བ་དེ་ཉིད་ཡི་གེ་གསུམ་གྱིས་སྦྱངས་ནས། ཐབས་མཆོག་ཆོ་ག་གསུམ་གྱིས་རྡོ་རྗེར་ཞེས་དཔལ་རྡོ་རྗེ་སེམས་དཔའི་སྐུར་བསྐྱེད་དེ་རིགས་ངེས་པའི་སྲས་སུ་བྱས་ཏེ་ཁོའི་ཤེས་པ་དེ་ཉིད་སླར་ཕབ་ནས་སྔ་མའི་ལུས་ལ་བསྟིམ་པ་ནི་སྙིང་རྗེས་བསྒྲལ་བའི་དམ་ཚིག་གི་མཆོག་གོ །དེའི་ཚུལ་ཇི་ལྟར་ཞེ་ན། རྣམ་པར་ཤེས་པ་རྡོ་རྗེ་སེམས་དཔར་གསལ་བ་དེ་རྩ་བའི་སྙིང་པོ་ཧཱུྃ་ཞེས་བརྗོད་པའི་ཚིག་གིས་བསྡུས་ཏེ་སྤྱན་དྲངས་ནས་ནི། རུ་ཏྲ་ཁོ་ན་དེ་ཉིད་ཀྱི་སྔར་གྱི་གཟུགས་ཕུང་རྣམ་པར་སྨིན་པའི་ལུས་ལ་དབབ་ཅིང་བསྟིམ་པ་ན་སྔོན་མ་ཤི་བའི་ལུས་༼༨༽ལྟར་དུ་གནས་ཤིང་ཆ་ལུགས་རྫོགས་པའི་ཚུལ་ཇི་ལྟ་བ་བཞིན་དུ་ལུས་མ་ཉམས་པར་སྒོ་གསུམ་ཡང་དག་པའི་ས་ལ་བཀོད་དེ་ལས་དག་པར་མཛད་པས་སེམས་རྟོག་བདེ་བ་ཆེན་པོར་སྦྱངས་ཏེ་མཐོང་ལམ་ཕྱིར་མི་ལྡོག་པ་ལ་གནས་སོ།།

བཞི་པ་བསྒྲལ་པའི་དོན་གསུངས་པས་མཐོང་ལམ་སྐྱེས་པ་ནི།

རོ་ལངས་རྡོ་རྗེའི། ཞེས་པ་ནས། ངེས་པར་མཐོང་ངོ༌། །ཞེས་པའི་བར་གྱིས་བསྟན་ཏེ།

རོ་ལངས་རྡོ་རྗེ་དམ་ཚིག་འདི། །རྒྱལ་བ་ཀུན་གྱི་ཐུགས་དམ་སྟེ། །རྡོ་རྗེ་མཚོན་གྱིས་གང་བསད་པ། །སྲོག་ནི་ལོག་རྟོག་རྡོ་རྗེར་ཤི །ནམས་ཀྱང་ལྡང་བའི་དུས་མེད་པས། །སླར་སྐྱེ་བ་ལྟ་ག་ལ་ཡོད། །རྣམ་ཤེས་གཟུགས་དང་མ་བྲལ་བར། །འཁོར་བའི་གནས་ལས་རྣམ་ཐར་འཕགས། །འཆི་མེད་རྡེ་རྗེ་བྱང་ཆུབ་སེམས། །སྟོང་ཉིད་ཡེ་ཤེས་བདུད་རྩིའི་ཆུ། །དུག་ཆེན་འཐུངས་པ་ཀུན་གྱི་གསོས། །ཤི་བ་ཀུན་སློང་སྨན་པའི་མཆོག །ལངྐའི་བདག་པོས་དེ་སྐད་ཅེས་བཀའ་སྩལ་པས། རུ་དྲ་ནག་པོ་དེ་རྒྱུད་ཡོངས་སུ་བྱང་སྟེ། ལྷག་པའི་དོན་ངེས་པར་མཐོང་ངོ་།།

དེ་ལྟར་ཕབས་ཏེ་བསླང་བ་ནི་དབང་བསྐུར་བ་དང༌། དམ་ལ་བཏགས་པ་དང༌། ལས་གཉེར་གཏད་པའི་ཕྱིར་ཏེ། རོ་ལངས་རྡོ་རྗེའི་དམ་ཚིག་བསད་པ་སླར་གསོ་བའི་ཐུགས་དམ་ཆེན་པོས་བསྒྲལ་ཐབས་འདི་ནི་རྒྱལ་བ་ཀུན་གྱི་སྔོན་གྱི་ཐུགས་དམ་རྨད་དུ་བྱུང་བའི་ཕྲིན་ལས་མཆོག་སྟེ། ཤེས་རབ་དང་ཡེ་ཤེས་ཆེན་པོའི་རྡོ་རྗེའི་མཚོན་གྱིས་གང་ལོག་པའི་ཤེས་པ་གསུམ་བསད་ཅིང་བསྒྲལ་བའི་གདུལ་བྱ་དེའང་ཤེས་པ་གཟུགས་དང་བཅས་པར་གཟུང་བ་དང་འཛིན་པའི་འབྱུང་འཇུག་གི་སྲོག་ནི་ངོ་བོ་ལོག་པར་རྟོག་པའི་རྩ་བ་དེ་མ་སྤངས་པར་རང་བྱུང་གི་ཡེ་ཤེས་དོན་གྱི་རྡོ་རྗེར་ཤི་སྟེ་བཤིག་པ་ལ། ནམ་མཁའ་དང་འདྲ་བར་ལོག་པའི་ས་བོན་མེད་པས་ནམས་ཀྱང་ལྡང་བའི་དུས་མེད་དེ་ཕྱི་མར་སྐྱེ་བར་མི་འགྱུར་བས་སླར་ཡང་སྐྱེ་བ་ལྟ་ག་ལ་ཡོད་དེ་ཀ་ནས་དག་པར་འབྱོངས་བའི་ཕྱིར་ཕྱིར་མི་ལྡོག་པ་ཁོ་ནའོ། །དེས་ན་དྲེགས་པའི་རྣམ་ཤེས་བསྒྲལ་ཡང་ལུས་ཀྱི་གཟུགས་དང་མ་བྲལ་བར་སྔ་མ་བཞིན་སྲིན་པོ་ཉིད་དུ་འདུག་པ་ཞིག་ཡིན་ན་ཡང་འཁོར་བའི་གནས་ལས་རྣམ་པར་ཐར་ཏེ་མྱ་ངན་ལས་འདས་པར་གྱུར་པས་ཁྱད་པར་འཕགས་ཏེ་རྣམ་སྨིན་གྱི་ལུས་དང་རྡོ་རྗེའི་ལུས་མི་མཚུངས་པས་སོ། །དེ་བས་ན་བསྒྲལ་ནས་ཕུང་པོ་དང་བཅས་པར་འཆི་མེད་རྡོ་རྗེ་བྱང་ཆུབ་ཀྱི་སེམས་བདེ་བ་ཆེན་པོ་ལ་བཀོད་པའི་དུས་དེ་ཕྱིན་ཆད་སྐྱེ་ཤིའི་ས་བོན་མེད་དེ་མི་འགྱུར་བའི་ལྷུན་བརྙེས་པའི་ཕྱིར། དེ་ལྟར་བྱང་ཆུབ་ཀྱི་སེམས་མཐའ་ཐམས་ཅད་ལས་འདས་པས་སྟོང་པ་ཉིད་ཀྱི་ཡེ་ཤེས་ཆེན་པོ་ཟག་མེད་དོན་གྱི་བདུད་རྩིའི་དེ་ཁོ་ན་ཉིད་བྱེད་ལས་ཀྱི་སྒོ་ནས་ཆུ་བོ་ཆེན་པོ་ལྟ་བུར་གྱུར་པས་གཟུང་འཛིན་གྱི་དུག་ཆེན་འཐུང་བས་བྱང་ཆུབ་ཀྱི་ཤིང་སྐམས་པ་ཀུན་གྱི་གསོས་སུ་གྱུར་པ་དང༌། ལོག་རྟོག་གི་ངང་དུ་ཤི་བ་ཀུན་སློང་བའི་སྨན་པའི་མཆོག་དམ་པ་ཡིན་ནོ། །ལང་ཀའི་བདག་པོ། དཔལ་རྡོ་རྗེ་སྲིན་པོ་དེས་དེ་སྐད་ཅེས་བཀའ་སྩལ་པས། རུ་ཏྲ་ནག་པོ་དེ་ཡི་རྒྱུད་ཀྱི་ཤེས་བྱའི་སྒྲིབ་པ་ཡོངས་སུ་སྦྱང་སྟེ་སྒོ་གསུམ་རྣམ་པར་དག་པས་གསང་སྔགས་ཇི་བཞིན་པ་ལྷག་པའི་དོན་གྱི་གནས་ལུགས་གང་ས་པ་རྣམས་ཀྱིས་ཀྱང་མ་མཐོང་བ་དེ་ཉིད་མངོན་དུ་རྟོགས་པར་གྱུར་ཏེ་ཡང་དག་པར་ངེས་པར་མཐོང་ངོ༌། །དེ་ལྟར་སྐྱེ་བ་མེད་པའི་དོན་རྟོགས་ནས་རིག་པ་འཛིན་༼༩༽པའི་ས་ལ་གནས་ཏེ་རྒྱུད་ཡོངས་སུ་དག་པས་འཆད་པར་འགྱུར་བའི་དབང་དང་དམ་ཚིག་རྣམས་ཀྱི་སྣོད་དང་ལྡན་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྒྱུད་ཡོངས་སུ་སྦྱངས་པའི་ལེའུ་སྟེ་ཉི་ཤུ་དགུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། དྲེགས་པ་རུ་ཏྲའི་རྒྱུད་ཡོངས་སུ་སྦྱངས་ཏེ་རྣམ་པར་དག་པའི་ལེའུ་སྟེ་ཉི་ཤུ་དགུ་པ་རྣམ་པར་བཤད་པའོ།། །།

ལེའུ་སུམ་ཅུ་པ་སངས་རྒྱས་ཀུན་གྱི་དགོངས་པ་རྣམ་པར་བསྐུལ་བ།

༈ གཉིས་པ་དཀྱིལ་འཁོར་དུ་འཇུག་པ་ལ་གཉིས་ཏེ། འཇུག་པར་བསྐུལ་བ་དང༌། ཞུགས་པའི་རིམ་པའོ། །དང་པོ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས། ཞེས་པ་ནས། རྣམ་པར་བསྐུལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་དེ་ཉིད་དུ་ངེས་པར་ཕྱོགས་པའི་ཕྱིར། ཞབས་ཀྱི་འཁོར་ལོ་སྤྱི་བོས་བཏེག་པའི་འདུན་པས་འདུན་ནས། འདི་སྐད་དུ་ཐམས་ཅད་དུ་རྒྱུད་པ་རྣམ་པར་གྲགས་པ། སངས་རྒྱས་ཀུན་གྱི་དགོངས་པ་བསྐུལ་བ་ཞེས་བྱ་བའི་གླུ་འདིས་རྣམ་པར་བསྐུལ་ཏོ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། དྲེགས་པ་རྒྱུད་སྦྱངས་མ་ཐག་པ་དེ་ནས་གནས་དེ་ཉིད་དུ་འདས་པའི་ཆོས་སྒོམ་ལམ་ཐོབ་པ་དང་མཐར་ལམ་སངས་རྒྱས་ཀྱི་རིགས་སུ་ངེས་པར་ཕྱོགས་པའི་ཕྱིར་སྟོན་པ་ཉིད་ལ་མོས་པའི་དགོས་ཆེད་དུ་ཞབས་ཀྱི་འཁོར་ལོ་སྤྱི་བོས་བཏེགས་ཏེ་གནོང་ཞིང་གུས་པའི་འདུན་པས་འདུན་ནས། འདི་སྐད་དུ། རྒྱལ་བ་རྫོགས་པའི་སངས་རྒྱས་མང་པོ་དང༌། རིག་པ་འཛིན་པ་ཐམས་ཅད་ལ་སྙིང་པོ་བྱང་ཆུབ་ཏུ་ངེས་པ་ནས་ཡང་དག་པར་བརྒྱུད་དེ་གསུངས་པ་ལས་ལྷ་མིའི་འཇིག་རྟེན་ཐམས་ཅད་དུ་རྣམ་པར་གྲགས་པ་སངས་རྒྱས་མ་ལུས་པ་ཀུན་གྱི་དགོངས་པ་མཆོག་གི་ཐུགས་དམ་བསྐུལ་བ་ཞེས་བྱ་བའི་གླུ་ཚིག་འདིས་རྣམ་པར་བསྐུལ་ཏོ།།

གཉིས་པ་རྒྱས་པར་བཤད་པ་ལ་བརྒྱད་དེ། རྒྱལ་བ་ཀུན་ལ་སྲས་སུ་བསྐྱེད་ཅིག་པར་བསྐུལ་བ། ཡོན་ཏན་དང་ཡེ་ཤེས་ཀྱི་བདག་ཉིད་དུ་དབང་བསྐུར་ཅིག་པར་བསྐུལ་བ། སྐུ་གསུང་ཐུགས་ཀྱི་དབང་མཆོག་བསྐུར་ཅིག་པར་བསྐུལ་བ། གཉིས་མེད་དོན་གྱི་རྟོགས་པ་ཕུལ་བ། དཔལ་མི་བསྐྱོད་པ་ལ་དངོས་གྲུབ་རྩོལ་ཅིག་པར་བསྐུལ་བ། ཐབས་ཀྱི་རྡོ་རྗེས་ཐུགས་རྗེར་ཡབ་རྣམས་ལ་བསྐུལ་བ། བདེ་མཆོག་དབྱིངས་སུ་སྦྱོར་བར་ཡུམ་རྣམས་ལ་བསྐུལ་བ། ཕྲིན་ལས་རྣམ་བཞིས་མཛད་པར་རིགས་བཞི་ལ་བསྐུལ་བའོ། །དང་པོ་ནི།

ཨ་ཆོས་ཀུན། ཞེས་པ་ནས། བདག་བསྐྱེད་ཅིག །ཅེས་པའི་བར་གྱིས་བསྟན་ཏེ།

ཨ། ཆོས་ཀུན་རང་བཞིན་དག་པས་ན། །བདག་ཀྱང་རང་བཞིན་རྣམ་པར་དག །དེ་བཞིན་གཤེགས་པ་ཐམས་ཅད་ཀྱི། །ཐུགས་དམ་དབྱིངས་མཆོག་བདག་ཉིད་ནི། །སེམས་ཅན་༼འབྱམས༽ཀླས་མ་ལུས་ཀུན། །མཆོག་ཉིད་བསྒྲུབ་པར་སྦྱོར་བས་ན། །རྒྱལ་བ་རྒྱ་མཚོ་ཀུན་འདུས་ཕྱིར། །སྐུ་ཡི་དབྱིག་ཏུ་བདག་སྐྱེད་ཅིག།

དབང་དམ་ནོད་ནས་དཀྱིལ་འཁོར་དུ་འཇུག་པའི་ཕྱིར། ཨ་ཞེས་སྐུའི་སྙིང་པོས་དྲངས་ཏེ་ཆོས་སོ་ཅོག་ཀུན་ངོ་བོ་ཉིད་ཀྱིས་མཐའ་ལས་གྲོལ་བའི་ཕྱིར་རང་བཞིན་གྱིས་རྣམ་པར་དག་པས་ན་དྲེགས་པ་དག་ཀྱང་མཉམ་པའི་ངང་དུ་དྲི་མ་དང་བྲལ་བས་རང་བཞིན་རྣམ་པར་དག་པ་ལགས་སོ། །དེས་ན་རྒྱལ་བ་དེ་བཞིན་གཤེགས་པ་ཐམས་ཅད་ཀྱིས་ཐུགས་དམ་གྱི་དབྱིག་གམ་སྙིང་པོ་མཆོག་གི་༼༡༠༽བདག་ཉིད་ནི་འགྲོ་བ་སེམས་ཅན་ཚད་མེད་ཅིང་འབྱམས་ཀླས་པར་ཇི་སྙེད་དུ་སྣང་བ་མ་ལུས་པ་ཀུན་ངེས་པར་བསྒྲལ་ཞིང་བདེ་བ་མཆོག་གི་གནས་ཉིད་ལ་བཀོད་དེ་དོན་བསྒྲུབ་པར་མཛད་ནས་འབྲས་བུའི་གོ་འཕང་ལ་སྦྱོར་བར་བྱེད་པའི་ཐུགས་དམ་བཅས་པ་ཡིན་པས་ན། བདེ་བར་གཤེགས་པ་རྒྱལ་བ་རྒྱ་མཚོ་མང་པོའི་ཚོགས་ཀུན་འདུས་པས་རྡོ་རྗེ་གསུམ་གྱི་གཏེར་མཆོག་སྐུ་ཡི་དབྱིག་གི་སྲས་དམ་པ་ཉིད་དུ་རིགས་ངེས་པར་བདག་བསྐྱེད་པར་མཛོད་ཅིག་ཅེས་བསྐུལ་བའོ།།

གཉིས་པ་ཡོན་ཏན་དང་ཡེ་ཤེས་ཀྱི་བདག་ཉིད་དུ་དབང་བསྐུར་ཅིག་པར་བསྐུལ་བ་ནི།

ཡེ་ཤེས་རིན་ཆེན། ཞེས་པ་ནས། རྒྱལ་པོར་བདག་བསྐུར་ཅིག །ཅེས་པའི་བར་གྱིས་བསྟན་ཏེ།

ཡེ་ཤེས་རིན་ཆེན་དབུ་རྒྱན་མཆོག །གཟི་བརྗིད་ཕུང་པོ་བླ་ན་མེད། །སངས་རྒྱས་རིན་ཆེན་ཀུན་འདུས་པའི།།

རྣམ་པར་རྒྱལ་ལ་ཕྱག་འཚལ་ལོ། །དབྱིག་གི་ཡེ་ཤེས་གཙོ་མཆོག་ཉིད། །རྡོ་རྗེ་དམ་པས་མཆོག་འཛིན་པ།།

ཁྱོད་ནི་དམ་ཚིག་གཙོ་ལགས་ཀྱིས། །དབང་ཕྱུག་རྒྱལ་པོར་བདག་བསྐུར་ཅིག།

ཡེ་ཤེས་ཆེན་པོ་ལྔའི་ཡོན་ཏན་རང་སྣང་བ་ནི་ནོར་བུ་རིན་ཆེན་གྱི་དབུ་རྒྱན་ལྟར་མཆོག་དང་བླ་མར་གྱུར་པ་སྟེ། དེ་ལ་དཔག་ཏུ་མེད་པའི་གཟི་བརྗིད་ཉི་ཤུ་འདུས་པའམ་སྤུངས་པས་ཕུང་པོའི་སྡོང་པོ་བླ་ན་མེད་པའི་མཆོག་དམ་པ་མངའ་བའི་རྒྱལ་བ་རྫོགས་པའི་སངས་རྒྱས་ཡོན་ཏན་ཐམས་ཅད་ནོར་བུ་རིན་ཆེན་དབང་གི་རྒྱལ་པོ་ལྟར་ལྷུན་གྱིས་གྲུབ་པ་ཀུན་མ་ལུས་པར་འདུས་པའི་དབང་ཆེན་པོ་དང་ལྡན་པ་རྣམས་ཀྱིས་ཆོས་ཀྱི་འཁོར་ལོ་བསྐོར་བས་བདུད་ཀྱི་དཔུང་ལས་རྣམ་པར་རྒྱལ་བར་མཛད་པ་རྣམས་ལ་གཉིས་སུ་མེད་པའི་སེམས་ཀྱིས་འདུད་དེ་ཕྱག་འཚལ་ལོ། །རྒྱལ་བའི་ཡོན་ཏན་ཇི་སྙེད་པའི་དབྱིག་གི་གཏེར་ཆེན་པོ་ཡེ་ཤེས་རྒྱ་མཚོའི་མངའ་བདག་གཙོ་མཆོག་རྒྱལ་པོ་དཔལ་ཧེ་རུ་ཀ་རྡོ་རྗེ་སྲིན་པོ་ཉིད། སྐུ་གསུང་ཐུགས་ཀྱི་རྡོ་རྗེ་གསུམ་མི་ཕྱེད་པའི་དམ་པ་མཆོག་གི་དོན་དང་མ་བྲལ་བར་འཛིན་པ་ཆེན་པོ་ཁྱོད་ནི་འགྲོ་ཀུན་སྲིད་ལས་འདོན་པའི་ཐུགས་དམ་གདུལ་བྱ་མི་གཏོང་བར་ཐུགས་རྗེས་སྒྲོལ་པའི་དམ་ཚིག་གི་གཙོ་མཆོག་མངའ་བ་ལགས་ཀྱིས། ཁྱོད་ཅི་འདྲ་བའི་ཡོན་ཏན་དང་ཐབས་ཀྱི་དབང་ཕྱུག་གི་རྒྱལ་པོ་ཆེན་པོར་བདག་ཀྱང་ངེས་པར་དབང་བསྐུར་ཏེ་མངའ་ཐང་རྫོགས་པར་མཛོད་ཅིག་ཅེས་གསོལ་བའོ།།

གསུམ་པ་སྐུ་གསུང་ཐུགས་ཀྱི་དབང་མཆོག་བསྐུར་ཅིག་པར་བསྐུལ་བ་ནི།

བདག་ནི། ཞེས་པ་ནས། ཕུན་སུམ་དབང་བསྐུར་ཅིག །ཅེས་པའི་བར་གྱིས་བསྟན་ཏེ།

བདག་ནི་རྡོ་རྗེས་མངོན་སུམ་དབང་བསྐུར་བས། །སངས་རྒྱས་ཀུན་གྱིས་དེ་ཉིད་བདག་དབང་བསྐུར།།

བཅོམ་ལྡན་ཐམས་ཅད་མཆོག་ནི་བདག་ལགས་ཏེ། །མཆོག་ཉིད་བསྒྲུབ་ཕྱིར་རྡོ་རྗེ་བསླང་བར་བགྱི།།

རྡོ་རྗེ་རྒྱལ་པོར་ཁྱོད་བཞུགས་པས། །སྐུ་གསུང་ཐུགས་ཀྱི་རྡོ་རྗེ་སྟེ། །རྡོ་རྗེ་དམ་ཚིག་མཆོག་ཉིད་ཀྱིས།།

གྲུབ་པ་ཕུན་སུམ་དབང་བསྐུར་ཅིག།

དྲེགས་པ་བདག་ལ་ཡང་ནི་དཔའ་བོ་ཁྱེད་ཀྱིས་སྐུ་གསུང་ཐུགས་གསུམ་གྱི་རྡོ་རྗེས་མངོན་དུ་དབང་བསྐུར་བར་མཛད་པས། རྒྱལ་བ་རྫོགས་པའི་སངས་རྒྱས་མ་ལུས་པ་ཀུན་གྱིས་ཀྱང་དེང་གི་དུས་ཉིད་དུ་བདག་ལ་དབང་མཆོག་རྩོལ་ལ་བསྐུར་ཞིག དེས་ན་བཅོམ་ལྡན་འདས་རྒྱལ་བ་ཐམས་ཅད་ཀྱི་ཡོན་ཏན་རིལ་གྱི་ངོ་བོ་མཆོག་ནི་དབང་ཐོབ་པ་ བདག་གི་སྒོ་གསུམ་ཁོ་ན་ཉིད་ལགས་ཏེ། དེ་ཉིད་གཞན་ན་མེད་པའི་དོན་མཆོག་དམ་པ ་ཉིད་སྔར་མ་མཐོང་བ་མཐོང་བར་བྱ་ཞིང་བདག་གིས་མངོན་དུ་བསྒྲུབ་པའི་ཕྱིར་རྡོ་རྗེ་གསུམ་གྱི་དབང་དང་དངོས་གྲུབ་དམ་པ་ཡང་དག་པར་བླང་བར་བགྱིའོ། །༼༡༡༽སྐྱེ་འཇིག་མི་མངའ་བའི་ལྷུན་བརྙེས་པས་རྡོ་རྗེ་རྒྱལ་པོར་གྱུར་ཏེ་རྒྱལ་བ་རིལ་གྱི་བླ་མར་ཧེ་རུ་ཀ་ཁྱོད་ཉིད་བཞུགས་པས་ན་སྐུ་གསུང་ཐུགས་ཀྱི་རྡོ་རྗེ་གསུམ་གྱི་ངོ་བོ་ཁྱོད་ཉིད་ལགས་ཏེ། དེ་བས་ན་སྔོན་གྱི་ཐུགས་དམ་རྡོ་རྗེ་དམ་ཚིག་མཆོག་གི་དབང་ཉིད་ཀྱིས་སྒོ་གསུམ་རྡོ་རྗེ་གསུམ་དུ་གྲུབ་པ་ཡི་ཕུན་སུམ་ཚོགས་པའི་དབང་མཆོག་ བདག་ལ་རྫོགས་པར་བསྐུར་ཞིང་རྩོལ་བར་མཛོད་ཅིག ཅེས་བསྐུལ་བའོ།།

བཞི་པ་གཉིས་མེད ་དོན་གྱི་རྟོགས་པ་ཕུལ་བ་ནི།

ཆོས་ཀུན། ཞེས་པ་ནས། རྡོ་རྗེ་ཉིད་དུ་གསལ། །ཞེས་པའི་བར་གྱིས་བསྟན་ཏེ།

ཆོས་ཀུན་རྡོ་རྗེའི་མཚན་ཉིད་དེ། །རྡོ་རྗེ་ལ་ཡང་མཚན་ཉིད་མེད།།

རྡོ་རྗེ་ལྟ་བུའི་རྣལ་འབྱོར་པས། །དོན་ཀུན་རྡོ་རྗེ་ཉིད་དུ་གསལ།།

འདུས་བྱས་དང་འདུས་མ་བྱས་པའི་ཆོས་ཀུན་རང་རིག་པའི་ཡེ་ཤེས་ཆེན་པོ་གཉིས་སུ་མེད་པའི་རྡོ་རྗེའི་མཚན་ཉིད་དེ་ཁོ་ན་ཉིད་དེ། རྡོ་རྗེ་དེ་ལ་ཡང་མཚན་ཉིད་འདི་འདྲར་བསྟན་དུ་མེད་པའི་ཕྱིར་ན། གཉིས་མེད་ཀྱི་དོན་དེ་ཉིད་རྟོགས་པའི་རྡོ་རྗེ་ལྟ་བུའི་རྣལ་འབྱོར་པས་དགོངས་པའི་དོན་ཀུན་རང་རིག་ཅིའང་མ་ཡིན་པའི་ཡེ་ཤེས་རྡོ་རྗེ་ཉིད་དུ་རང་ཤར་ཏེ་མ་འདྲེས་ཡོངས་རྫོགས་སུ་གསལ་བའོ།།

ལྔ་པ་དཔལ་མི་བསྐྱོད་པ་ལ་དངོས་གྲུབ་རྩོལ་ཅིག་པར་བསྐུལ་བ་ནི།

འདི་ནི། ཞེས་པ་ནས། གསོ་བར་གསོལ། །ཞེས་པའི་བར་གྱིས་བསྟན་ཏེ།

འདི་ནི་སངས་རྒྱས་གསུང་དབྱངས་ཉིད། །ཡེ་ཤེས་སེམས་དཔའི་དམ་ཚིག་རྣམས། །རྡོ་རྗེ་སེམས་དཔའི་དཀའ་ཐུབ་བམ། །རྟག་ཏུ་བདག་གིས་བཅང་བར་བགྱི། །ཧཱུཾ། རྡོ་རྗེ་སེམས་དཔའི་དམ་ཚིག་རྗེས་སུ་བསྲུང་།།

ཡེ་ཤེས་སེམས་དཔའ་ཉེ་བ་ཉིད་དུ་སྤྱོན། །རིག་པའི་རྒྱལ་པོ་བདག་ལ་རྟག་པར་དགོངས།།

གསང་བའི་དབང་ཕྱུག་ བདག་ཉིད་གསོ་བར་གསོལ།།

གཉིས་སུ་མེད་པའི་དོན་འདི་ཉིད་ཇི་ལྟ་བར་གནད་དུ་ཆུད་པ ་ནི་རྒྱལ་བ་རྫོགས་པའི་སངས་རྒྱས་ཀུན་གྱི་གསུང་དབྱངས་ཉིད་ཁོང་དུ་ཆུད་པ་སྟེ། དེ་ཉིད་ལའང་ཆོས་རྟགས་ཀྱི་ཕྱག་རྒྱ་བཞི་དང་མི་འགལ་བའི་ཕྱིར། རང་ལ་གནས་པའི་ཡེ་ཤེས་སེམས་དཔའི་ངོ་བོ་ཉིད་དུ་བཞུགས་པའི་ཐུགས་ཀྱི་དམ་ཚིག་ཆེན་པོ་ཡོངས་སུ་རྫོགས་པས་བསྣམས་པའོ། །དེ་བས་ན་དུས་གསུམ་མཉམ་པའི་ངང་ལས་མི་འདའ་བའི་ཕྱིར་གཉིས་མེད་རྡོ་རྗེ་སེམས་དཔའི་དཀའ་ཐུབ་དམ་པ་ཆེན་པོ་སྟེ། དོན་དེ་ཉིད་དུས་ཕྱེད་པར་རྟག་ཏུ་ བདག་གིས་29ཡེངས་བྲལ་མེད་པར་བཅང་བར་བགྱི་ཞིང་མི་གཏོང་ངོ༌། །ཞེས་སྡོམ་པ ་དམ་བཅས་པ་ལྟ་བུའོ། །ཧཱུྃ་ཞེས་ཐུགས་ཀྱི་སྙིང་པོས་དྲངས་ཏེ། བཅོམ་ལྡན་འདས་རྡོ་རྗེ་མི་བསྐྱོད་པའམ་རྡོ་རྗེ་སེམས་དཔའི་ཐུགས་ཀྱི་དམ་ཚིག་གི་རྗེས་སུ་བདག་ཅག་དྲེགས་པའང་མི་ཉམས་པར་སྲུངས་བར་བགྱིད་པས། ལྷ་མཆོག་ཡེ་ཤེས་སེམས་དཔའ་ཁྱོད་ཀྱིས་དུས་ཉེ་བ་ཉིད་དུ་སྤྱོན་ལ་བདག་ཅག་བྱིན་གྱིས་བརླབས་ཏེ་སྣང་བར་མཛོད་ཅིག འདིར་སྤྱོན་ཞེས་པ་བརྡ་རྙིང་ངོ༌། །ཡེ་ཤེས་ཆེན་པོའི་མངའ་བདག་རིག་པའི་རྒྱལ་པོ་དཔལ་རྡོ་རྗེ་སེམས་དཔས་བདག་ཅག་ལ་བརྟན་པར་དགོངས་ཏེ་འགྱུར་བ་མེད་པར་བྱིན་གྱིས་རློབས་ཤིག སྐུ་གསུང་ཐུགས་ཀྱི་གསང་བ་དམ་པའི་དངོས་གྲུབ་གསུམ་གྱི་བདག་པོ་དབང་ཕྱུག་ཆེན་པོ་ཁྱོད་ཀྱིས་གསང་བ་མཆོག་གི་དངོས་གྲུབ་དེ་ཉིད་རྩོལ་བར་མཛོད་ལ་༼༡༢༽བདག་ཅག་རྟོག་པའི་ནད་ཀྱིས་ཟིན་ཏེ་ལྟ་བ་ངན་པ་རྟག་ཆད་ཀྱི་མཐར་འཛིན་དུ་ཤི་བ་གང་དེ་ཉིད་གསོ་ཞིང་སློང་བར་གསོལ་བ་འདེབས་སོ། །ཞེས་བསྐུལ་ལོ། །འདི་ཉིད་རྗེས་སུ་རྡོ་རྗེ་དྲིལ་བུའི་དབང་གི་ཚིག་ཤད་ཀྱང་ངོ༌།།

དྲུག་པ་ཐབས་ཀྱི་རྡོ་རྗེས་ཐུགས་རྗེར་ཡབ་རྣམས་ལ་བསྐུལ་བ་ནི།

རྟོགས་པ། ཞེས་པ་ནས། མ་བཏང་ཞིག །ཅེས་པའི་བར་གྱིས་བསྟན་ཏེ།

རྟོགས་པ་མཆོག་སྦྱིན་བདག་ལ་དགྱེས་པ་བསྐྱེད། །འདོད་པ་ཀུན་ཞེན་བདག་ལ་ཆགས་པར་མཛོད།།

དང་པོའི་སངས་རྒྱས་མཉམ་ཉིད་ཐུགས་རྗེ་ཅན། །ལས་རྣམས་ཀུན་ལ་བདག་སེམས་དགེ་བར་བསྒྱུར།།

དུས་གསུམ་བདེ་གཤེགས་བདག་གནས་ཐམས་ཅད་དུ། །རྡོ་རྗེ་ཅན་དང་དམ་ཚིག་སེམས་དཔར་བསྒྲུབས།།

དེ་བཞིན་གཤེགས་པ་དགྱེས་པ་དགྱེས་པ་ཀྱེ། །རྡོ་རྗེས་བདག་ཡོངས་གཏན་དུ་མ་གཏང་ཞིག།

ལས་བཅོལ་བའི་ཚུལ་དུ།  བདག་ཅག་གི་གཉིས་མེད་དོན་གྱི་རྟོགས་པ ་ཆེན་པོའི་ངོ་བོ་མཆོག་གི་དངོས་གྲུབ་སྦྱིན་ཅིང་རྩོལ་བར་མཛད་པ་ཁྱོད་ཉིད་བདག་ལ་ཐུགས་དགྱེས་པ་སྐྱེད་ཅིག་པར་བསྐུལ་བ་དང༌། འདོད་པའི་ཡོན་ཏན་ལྔ་ལ་སོགས་པ་ཀུན་མ་སྤངས་རོལ་ཏེ་ཞེན་པ་དག་པར་མཛད་པ་ཁྱོད་བདག་ཅག་ལ་ཐུགས་རྗེས་ཆགས་པར་དགོངས་ཏེ་མི་གཏོང་བར་མཛོད་ཅིག་པར་བསྐུལ་ལ། དང་པོའི་སངས་རྒྱས་ཕྱི་མོ་ཡེ་ཇི་བཞིན་པ་ཉིད་དུ་སོན་པའི་མཉམ་ཉིད་ངོ་བོ་ཉིད་སྐུའི་རྒྱལ་བ་ཁྱོད་ཉིད་ཐུགས་རྗེ་མཆོག་དང་ལྡན་པ་ཅན་ལགས་པས་རྒྱལ་བའི་ཕྲིན་ལས་བསམ་གྱིས་མི་ཁྱབ་པ་རྣམས་ཀུན་ནས་མཛད་པ་ལ་བདག་ཅག་གི་སེམས་སམ་ཤེས་པ་དགེ་བ་ཡང་དག་པར་བསྒྱུར་བར་མཛད་དུ་གསོལ། ཞེས་བསྐུལ་བ་དང༌། དུས་གསུམ་གྱི་བདེ་བར་གཤེགས་པ་ཀུན་གྱི་སྟོན་པར་གྱུར་པ་བླ་མ་རྣམས་ཀྱིས་བདག་ཅག་སྐྱེ་གནས་ཐམས་ཅད་དུ་ཡེ་ཤེས་སེམས་དཔའ་རྡོ་རྗེ་གསུམ་གྱི་བདག་ཉིད་ཅན་དང་དམ་ཚིག་སེམས་དཔར་ཁྱེད་དང་གཉིས་སུ་མེད་པར་སྒྲུབ་པར་མཛོད་ཅིག་པར་བསྐུལ་ཞིང༌། དེ་བཞིན་གཤེགས་པ་བདག་དོན་ལ་དགྱེས་པ་དང་གཞན་དོན་ལ་དགྱེས་པ་མངའ་བའི་རྒྱལ་བ་རྣམས་ལ་ཀྱེ་ཞེས་བོས་ནས། སྐུ་གསུང་ཐུགས་ཀྱི་རྡོ་རྗེ་མཆོག་གི་ཐུགས་རྗེས་བདག་ཅག་ཡོངས་སུ་གཟུང་ལ་ངན་འགྲོར་གཏན་དུ་མ་བཏང་ཞིག ཅེས་པར་བསྐུལ་བའོ།།

བདུན་པ་བདེ་མཆོག་དབྱིངས་སུ་སྦྱོར་བར་ཡུམ་རྣམས་ལ་བསྐུལ་བ་ནི།

ཀྱེ་རྡོ་རྗེ། ཞེས་པ་ནས། གྲུབ་པར་མཛོད། །ཅེས་པའི་བར་གྱིས་བསྟན་ཏེ།

ཀྱེ། རྡོ་རྗེ་ཆོས་དབྱིངས་ཀུན་གྱི་གཙོ། །མི་གནས་ཆགས་པ་ཆེན་མོ་སྟེ། །མ་ལུས་ཀུན་གྱི་འབྱུང་གནས་མཆོག།

བདེ་བ་མཆོག་གི་དམ་པ་ལགས། །ཁྱོད་ནི་དམ་ཚིག་ཀུན་གྱི་གཙོ། །རྡོ་རྗེ་སེམས་དཔའ་བསྐྱེད་མཛད་མ།།

སེམས་ཅན་དོན་སྒྲུབ་འཕྲིན་ལས་ལ། །ཐུགས་རྗེ་མཉམ་སྦྱོར་གྲུབ་པར་མཛོད།།

དབྱིངས་ལྷུན་གྱིས་གྲུབ་པའི་ཡུམ་རྣམས་ལ་ཀྱེ་ཞེས་བོས་ནས། ལྷུན་མཉམ་རྡོ་རྗེ་ཆོས་ཀྱི་དབྱིངས་ཀྱི་ངོ་བོ་ཆོས་ཐམས་ཅད་ཀུན་གྱི་རང་བཞིན་དུ་ངེས་པའི་གཙོ་མཆོག་མཚན་ཉིད་མཐའ་ཀུན་མ་སྤངས་བྲལ་བས་གང་ལའང་མི་གནས་པར་བཀོལ་བ་མེད་པར་ཁྱབ་པས་ཆགས་པ་ཆེན་མོ་སྟེ་དུས་གསུམ་གྱི་རྒྱལ་བ་མ་ལུས་པ་ཐམས་ཅད་བསྐྱེད་པས་ཀུན་གྱི་འབྱུང་གནས་ཡུམ་མཆོག་ཁྱོད་ནི་མ་སྤངས་མི་གནས་པའི་བདེ་བ་མཆོག་གི་ཀློང་ཆེན་པོ་དངོས་པོ་དང་བྲལ་བས་དམ་པ་ཉིད་དུ་བཞུགས་པ་ལགས་པས། ཁྱོད་ཀྱི་ཐུགས་དམ་ནི་རྒྱལ་བ་ཐམས་ཅད་བསྐྱེད་པའི་དམ་ཚིག་ལས་མི་འདའ་བས་ན་སངས་རྒྱས་ཀུན་གྱི་གཙོ་མཆོག་དཔལ་རྡོ་རྗེ་སེམས་དཔའ་མི་བསྐྱོད་པའི་སྐུ་ཡང་བསྐྱེད་པར་མཛད་པའི་ཡུམ་ཆེན་མ་མ་དམ་པ་ལགས་༼༡༣༽པའི་ཕྱིར་འགྲོ་བ་སེམས་ཅན་རྣམས་བདེ་བ་ལ་འགོད་པའི་དོན་སྒྲུབ་པར་བྱེད་པ་མི་དམིགས་པའི་ཕྲིན་ལས་མཆོག་ལ་ཐུགས་རྗེ་ཆེན་པོས་དཔྲི་བཀོལ་མེད་པར་ཡང་དག་པར་མཉམ་པར་སྦྱོར་བའི་ས་མཆོག་ཉིད་དུ་གྲུབ་པར་མཛོད་ལ་ངེས་པར་འཁོད་པར་གྱིས་ཤིག ཅེས་བསྐུལ་བའོ།།

བརྒྱད་པ་ཕྲིན་ལས་རྣམ་བཞིས་མཛད་པར་རིགས་བཞི་ལ་བསྐུལ་བ་ནི།

སངས་རྒྱས། ཞེས་པ་ནས། བྱེད་གྱུར་ཅིག །ཅེས་པའི་བར་གྱིས་བསྟན་ཏེ།

སངས་རྒྱས་ཡོན་ཏན་ཀུན་འབྱུང་ཕྱིར། །རིན་ཆེན་རྡོ་རྗེ་བླ་ན་མེད།།

ཆོས་ཀྱི་རྡོ་རྗེས་གླུ་བླངས་པས། །ལས་ཀྱི་རྡོ་རྗེ་བྱེད་གྱུར་ཅིག།

དེ་བཞིན་གཤེགས་པའི་རིགས་སུ་སངས་རྒྱས་པའི་རྒྱལ་བ་ཐམས་ཅད་ཀྱི་ཡོན་ཏན་ཀུན་འབྱུང་ཞིང་སྣང་བར་མཛད་པའི་ཕྱིར་དང༌། རིན་ཆེན་རྡོ་རྗེ་རིན་པོ་ཆེའི་རིགས་ནི་ཡོན་ཏན་བླའམ་གོང་ན་མེད་པའི་དོན་ལ་བསྐུལ་བ་དང༌། གསུང་པདྨའི་རིགས་རྡོ་རྗེ་ཆོས་ཀྱི་གསུང་དབྱངས་ཀྱི་གླུ་བླངས་པས་འགྲོ་བ་སྒྲོལ་བར་མཛོད་ཅིག་པ་དང༌། དེ་ནས་ལས་ཀྱི་རིགས་ཀྱི་རྡོ་རྗེར་གྱུར་པས་ཀྱང་འགྲོ་བ་རྣམས་སྒྲོལ་བའི་དོན་བྱེད་པར་གྱུར་ཅིག ཅེས་ཕྲིན་ལས་བཞིས་དོན་མཛོད་ཅིག་པར་རིགས་བཞི་ལ་བསྐུལ་ཏེ། དེ་དག་ཀྱང་གོང་གི་ཡུམ་ལས་བསྐྱེད་པས་རྟིང་ལ་བྱུང་བའོ། །མི་བསྐྱོད་པ་ནི་གོང་དུ་སོང་ཞིང་དངོས་སུ་བསྟན་པས་སོ།།

གཉིས་པ་ཞུགས་པའི་རིམ་པ་ལ་བརྒྱད་དེ། དཀྱིལ་འཁོར་གསུམ་དུ་ཞུགས་པ། བགེགས་བསྐྲད་པ། དམ་ཚིག་སྦྱིན་པ། ཆུ་ནན་བྱ་བ། མེ་ཏོག་དོར་བ། ལྷ་དབབ་པ། དཀྱིལ་འཁོར་བསྟན་པ། གསང་མཚན་བཏགས་པའོ། །དང་པོ་ནི།

འོག་ནས། ཨ་ཞེས་རང་བཞིན་ལྷུན་གྱིས་གྲུབ་པའི་སོགས་ནས། དཀྱིལ་འཁོར་དུ་གནས་སོ། །ཞེས་པའི་བར་གྱིས་བསྟན་ཏེ།

ༀ་ཞེས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ་བཅུག་གོ །མཱུཾ་ཞེས་ཡེ་ཇི་བཞིན་པའི་དཀྱིལ་འཁོར་དུ་ཞུགས་སོ། །ཧཱུཾ་ཞེས་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་གནས་སོ།།

ཨ་ཞེས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གཙོ་འཁོར་མ་འགགས་པ་ཉིད་དུ་བཅུག་གོ །མཱུཾ་ཞེས་ཡེ་ཇི་བཞིན་པའི་དཀྱིལ་འཁོར་རང་བཞིན་མ་བཅོས་པའི་དལ་དུ་ཞུགས་སོ། །ཧཱུྃ་ཞེས་རྩ་བ་བྱུང་ཆུབ་སེམས་ཀྱི་དཀྱིལ་འཁོར་ཚོགས་བརྒྱད་གཉིས་མེད་མཉམ་གྲོལ་འདུ་གནས་སོ། །དེ་ལྟར་སྒྲིབ་པ་ཆེ་ཕྲ་རྩད་ནས་སྦྱངས་པས་དོན་གྱི་ཡི་གེ་གསུམ་གྱི་སྒོ་ནས་དཀྱིལ་འཁོར་གསུམ་གྱི་དོན་ཡང་དག་པར་རུ་ཏྲས་མཐོང་སྟེ། གཉིས་སུ་མེད་པར་མཛད་པ་ནི་ཤེས་པ་སྐྱེ་བའི་རིམ་པས་དཀྱིལ་འཁོར་དུ་བཅུག་ཅིང་ཞུགས་ནས་གནས་པར་སྦྱར་རོ།།

གཉིས་པ་བགེགས་བསྐྲད་པ་ནི།

གོང་ནས། ཧཱུྃ་ཧཱུྃ་ཧཱུྃ་བི་ཤྭ་བཛྲ། ཞེས་པ་ནས། སྟོང་པར་སྦྱངས་སོ། །ཞེས་པའི་བར་གྱིས་བསྟན་ཏེ།

ཧཱུཾ་ཧཱུཾ་ཧཱུཾ་བི་ཤྭ་ཀྲོ་དྷ་ཛྭ་ལ་མཎྜ་ལ་ཕཊ། ཧ་ལ་ཧ་ལ་རཾ། ཞེས་འདུལ་སྦྱོང་དྲག་པོའི་དཀྱིལ་འཁོར་དུ་སྦྱངས་སོ། །ཏ་ཀེམ་ཏ་ཀེམ་ཕཊ། ཧ་ལ་ཧ་ལ་རཾ། ཏིག་སྣ་ཏིག་སྣ་ཁ། ཀྲོ་དྷ་ཀྲོ་དྷ་ཡ། ཞེས་དངོས་པོ་ཐམས་ཅད་སྟོང་པར་སྦྱངས་སོ།།

ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྜལ་ཕཊ་ཕཊཿཧ་ལ་ཧ་ལ་རཾ། ཞེས་པའི་སྔགས་བརྗོད་པས་སྣ་ཚོགས་རྡོ་རྗེ་ཁྲོ་བོ་འབར་བའི་དཀྱིལ་འཁོར་གྱི་ངང་ལས་ཁྲོ་བོའི་སྤྲུལ་པ་མེ་སྟག་བ་སྤུ་དང་ཐུགས་ཀ་ནས་འཕྲོས་པས་དྲེགས་པའི་སྒྲིབ་པའི་ཕུང་པོ་བསྲེགས་སྦྱངས་དྲལ་བའི་ཕྱིར་རོ། །ཧ་ལ་ཧ་ལ་རཾ་༼༡༤༽ཞེས་ཕྱི་ནང་གི་དུག་ཐམས་ཅད་སྲེག་པར་མཛད་དོ། །དེ་ལྟར་གདུལ་སྦྱོང་དྲག་པོའི་དཀྱིལ་འཁོར་དུ་སྦྱངས་སོ། །དེ་ཡང་བར་ཆད་བྲལ་ནས་སྒྲིབ་པ་དྲལ་བ་དངོས་ནི། ཏ་ཀ་ཏ་ཀ་ཕཊ། ཅེས་དྲེགས་པའི་བག་ཆགས་ཀྱི་སྒྲིབ་པ་དྲལ་བའི་སྔགས་སོ། །ཧ་ལ་ཧ་ལ་རཾ་ཞེས་ཡེ་ཤེས་ཀྱི་མེས་སྲེག་པའོ། །ཏཱིཀྵྞ་ཏཱིཀྵྞ་ཁཾ། ཆོས་ཉིད་ཀྱི་ཆུས་བཀྲུ་བའོ། །ཀྲོ་དྷ་ཀྲོ་དྷ་ཡཾ། ཞེས་རང་རིག་པའི་རླུང་གིས་འཐོར་བའོ། །འདི་གསུམ་མེ་དཔུང་དང༌། རལ་གྲི་དང༌། ཁྲོ་བོའི་སྐུའི་བྱེད་པར་ཡང་སྦྱར་རོ། །དེ་ལྟར་སྔགས་བརྗོད་པས་ཤིན་ཏུ་དྲག་པོས་མེ་ཆུ་རླུང་གི་ས་བོན་ལས་ཡེ་ཤེས་ཀྱི་འབྱུང་བ་གསུམ་པོ་བྱུང་བས་དྲེགས་པའི་སྒྲིབ་པའི་ཕུང་པོ་བསྲེགས་བཀྲུས་གཏོར་ཏེ་མི་དམིགས་པར་དག་པར་མཛད་དོ། །ཞེས་དངོས་པོ་ཐམས་ཅད་སྟོང་བར་སྦྱངས་བར་བྱས་སོ།།

གསུམ་པ་དམ་ཚིག་སྦྱིན་པ་ལ་གཉིས་ཏེ། བྱིན་པ་དང༌། བླངས་པའོ། །དང་པོ་ནི།

གོང་གི དེ་ནས་ཡང་དག ཅེས་པ་ནས། དམ་པ་བྱིན། ཞེས་པའི་བར་དང༌།

དེ་ནས་ཡང་དག་དངོས་མིན་པའི། །རྡོ་རྗེ་སྨེ་བ་བརྩེགས་པའི་སྲས།།

བདུད་འདུལ་རྡོ་རྗེ་སྲིན་པོ་དེས། །རྡོ་རྗེ་ཤུགས་ཀྱི་དམ་པ་བྱིན།།

འོག་ནས། ཨ་ཨཱཿཧཱུྃ། ཞེས་སྐུ་གསུང་ཐུགས། སོགས་ནས། དབང་དམ་པ་བྱིན་ནོ། །ཞེས་པའི་བར་གྱིས་བསྟན་ཏེ།

ༀ་ཨཱཾཿཧཱུཾ། ཞེས་སྐུ་གསུང་ཐུགས་ཀྱི་བྱིན་རླབས་དམ་པ་བྱིན་ནོ། །ༀ་བཛྲ་ཨ་མྲཏ། ཨ་ཧི་ཧི།

སརྦ་མན་ཧཱུཾ་ཧྲི་སྟ། ཞེས་དབང་དམ་པ་བྱིན་ནོ།།

དེ་ནས་གསང་བདག་ཆེན་པོ་ཡང་དག་དངོས་མིན་པའི་སྤྲུལ་པ་རྡོ་རྗེ་ཁྲོ་བོ་སྨེ་བ་བརྩེགས་པའི་སྲས་མཆོག་གདུག་པ་བདུད་དཔུང་འདུལ་བའི་རྡོ་རྗེ་སྲིན་པོ་དེས་ཀྱང་རུ་ཏྲ་ལ་རང་སྣང་རྡོ་རྗེ་ཤུགས་ཀྱི་དམ་ཚིག་དམ་པ་བྱིན་ཏེ་ཐེག་པ་ཆེན་པོ་གསང་སྔགས་ཀྱི་དམ་ཕོག་གོ །དེའང་གནས་གསུམ་བརླབས་ཤིང་དམ་ཚིག་དབོག་སྟེ་ཨ་ཨཱཿཧཱུྃ་ཞེས་སྐུ་གསུང་ཐུགས་ཀྱི་ཡི་གེ་གསུམ་གནས་གསུམ་དུ་བཀོད་པའི་འོད་ཟེར་གྱིས་རྒྱལ་བའི་སྐུ་གསུང་ཐུགས་བསྡུས་ཏེ་ཐིམ་པ་འོད་དུ་ཞུ་བ་ལས་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་པའི་དམ་ཚིག་དམ་པ་བྱིན་ནོ། །ཨ་བཛྲ་ཨམྲ་ཏ་ཨེ་ཧྱེ་ཧི་སརྦ་མ་ན་ཧཱུྃ་ཧྲཱིཿཋ། ཞེས་རྡོ་རྗེའི་བདུད་རྩི་གཤེགས་ཏེ་ཤེས་པ་ཐམས་ཅད་བྱིན་གྱིས་རློབས་པའི་སྔགས་ཀྱིས་བདུད་རྩི་བྱིན་པས་བཅུད་དམ་རྫས་ལྔས་སྙིང་པོ་ཡེེ་ཤེས་ལྔའི་འོད་ཟེར་གྱི་དབང་དམ་པ་བྱིན་པ་ཡིན་ནོ།།

གཉིས་པ་བླངས་པ་ནི།

གོང་གི ས་མ་ཡ་ཧོཿ ཞེས་པ་ནས། ཀུན་ཏུ་བཅས་སོ། །ཞེས་པའི་བར་གྱིས་བསྟན་ཏེ།

ས་མ་ཡཱ་ཧོ། ཞེས་དམ་ཚིག་ཉེ་བར་བླངས་སོ། །ས་མ་ཡ་སྟྭཾ། ཞེས་དམ་ཀུན་ཏུ་བཅས་སོ། །

ས་མ་ཡ་ཧོཿ ཞེས་པའི་སྔགས་ཀྱིས་གཙོ་བོས་དམ་ཚིག་བྱིན་པ་དེ་དྲེགས་པས་ཉེ་བར་བླངས་སོ། །ས་མ་ཡ་སྟཾ་ཞེས་དམ་ལས་མི་འདའ་བའི་སྔགས་ཀྱིས་དམ་ཚིག་ཀུན་ཏུ་སྲུངས་བར་དམ་བཅས་སོ།།

བཞི་པ་ཆུ་ནན་བྱ་བ་ནི།

ཨི་དན་ཏེ། ཞེས་པ་ནས། དམ་ཚིག་དམ་པ་བྱིན་ནོ། །ཞེས་པའི་བར་གྱིས་བསྟན་ཏེ།

ཨི་ཏམ་ཏེ། ན་ར་གན་ཏེ། བ་རི་ཧྲི་ད་ཡེ། ན་མསྟི་ནན། ས་མ་ཡ་རཀྵ་སི། སི་ཏི་བི་ན་བཛྲ།

ཨ་མྲ་ཏོ་ཏ་ཀན། ཞེས་དམ་ཚིག་དམ་པ་བྱིན་ནོ།།

ཨི་དན་ཏེ། ན་ར་གན་ཏེ། བ་རི་ཧྲ་ད་ཡེ། ༼༡༥༽ནཱ་མ་བ་སྟི་ནཱཾ་ས་མ་ཡ་རཀྵ་སི། སི་ཏི་པི་ན་བཛྲ། ཨམྲ་ཏོ་ཏ་ཀཾ ཞེས་པའི་སྔགས་ནི། དམ་དབོག་སྟེ་ཆུ་ནན་བྱ་བར་དམ་ཆུ་བླུད་པ་སྟེ། བ་རི་མན་ཆད་འདས་ན་རྡོ་རྗེ་སྲིན་པོས་སྲོག་བཅད་ནས་དམྱལ་བར་ཚིག་པའི་ཕྱིར་བདུད་རྩི་ལྔ་བླུད་དོ། །ཞེས་དམ་ཚིག་དམ་པ་བྱིན་པ་ཡིན་ནོ།།

ལྔ་པ་མེ་ཏོག་དོར་བ་ནི།

དེ་ནས་ཡང༌། ཞེས་པ་ནས། ཅེས་བསྐུལ་བས། ཞེས་པའི་བར་གྱིས་བསྟན་ཏེ།

དེ་ནས་ཡང་ལས་ཀྱི་སྲིན་པོ་དེས། རང་གི་རིགས་ཀྱིས་ལྷ་ལ་གསོལ་བ་བཏབ་པ། སྔོན་ཚེ་གོང་ནས་འབྲེལ་བ་ཡི། །བདག་གི་ཉེ་གནས་གང་ལགས་པ། །ལས་འཕྲོ་དང་ནི་ཐུགས་རྗེ་ཡིས།།

ད་ལྟ་ཉིད་དུ་འབབ་པར་ཤོག །ཅེས་བསྐུལ་བས།

དེ་ནས་ཡང་ཡི་དམ་ལྷ་ལ་མེ་ཏོག་དོར་བའི་ཕྱིར་ལས་ཀྱི་སྲིན་པོ་དེས། སྔོན་ནས་འབྲེལ་བའི་རང་གི་རིགས་ཀྱི་ལྷ་ལ་གསོལ་བ་བཏབ་པ་ནི། སྔོན་ཚེ་བསྐལ་ པ་གྲངས་མེད་མང་པོའི་གོང་ནས་བདག ་ཐར་པར་གྱུར་ཙམ་ན་གསང་བའི་སྐོར་ཞུགས་པའི་དུས་ནས་ཐུགས་རྗེ་ལས་སུ་འབྲེལ་བ་ཡི་ད་ལྟ་བདག་གི་ཡི་དམ་སྒྲུབ་ཐག་ཉེ་ཞིང་དངོས་གྲུབ་རྩོལ་བར་གནས་པའི་ལྷ་མཆོག་གང་ལགས་པ་དེ་ལ། ལས་ཀྱི་འཕྲོ་དང་ནི་ཐུགས་རྗེ་གཉིས་ཀ་འཛོམ་པ་ཡིས་སྒོ་ནས་ད་ལྟ་ཉིད་དུ་མེ་ཏོག་འདི་ཉིད་འབབ་པར་ཤོག་ཅིག ཅེས་གཏོར་ཏེ་བསྐུལ་བས། སྤྱིར་ན་རྡོ་རྗེ་སེམས་དཔའ་དང་ཆོས་ཐམས་ཅད་རང་བཞིན་དུ་འབྲེལ། སངས་རྒྱས་དང་སེམས་ཅན་ལས་དང་ཐུགས་རྗེར་འབྲེལ། བྱེ་བྲག་ཏུ་སངས་རྒྱས་ཀུན་ཏུ་བཟང་པོའི་བསྟན་པ་ལ་སྨོན་ལམ་མཐུན་པར་བཏབ་པས་སྨོན་ལམ་གཅིག་ཏུ་འབྲེལ། ཐུབ་དཀའ་དང་ཐར་པ་དཔོན་སློབ་ཏུ་འབྲེལ་བས་རྡོ་རྗེ་སེམས་དཔའ་ལ་བབ་ཀྱང་དོན་ལ་དུས་གསུམ་གྱི་དེ་བཞིན་གཤེགས་པ་ཐམས་ཅད་དང་རུ་ཏྲ་བདག་ཉིད་གཅིག་པའི་ཕྱིར་སྔོན་གྱི་སྨོན་ལམ་དང་ལས་དང་ཐུགས་རྗེར་འབྲེལ་བས་གཅིག་ཐ་དད་ལས་གྲོལ་བའོ།།

དྲུག་པ་ལྷ་དབབ་པ་ནི།

དཔལ་རྡོ་རྗེ་སེམས་དཔའ། ཞེས་པ་ནས། ངེས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དཔལ་རྡོ་རྗེ་སེམས་དཔའ་ནམ་མཁའི་དབྱིངས་ནས། ཉི་མའི་དཀྱིལ་འཁོར་ཧཱུཾ་གི་སྙིང་པོ་འོད་ཟེར་དང་བཅས་པ་ཤར་བས། ཁོ་ན་ཉིད་ཀྱི་སྙིང་ཁར་ཐིམ་པས། རང་གི་རིགས་དམ་པ་ཉིད་དུ་ངེས་པར་གྱུར་ཏོ།།

དཔལ་རྡོ་རྗེ་སེམས་དཔའ་མི་བསྐྱོད་པ་མཉམ་པའི་ཆོས་ཉིད་ནམ་མཁའི་དབྱིངས་ན་བཞུགས་པའི་ཐུགས་ཀ་ནས་ཉི་མའི་དཀྱིལ་འཁོར་གྱི་གདན་ཐོག་ན། རྩ་བའི་ཡི་གེ་ཧཱུྃ་གི་སྙིང་པོ་ལ་བཟླས་པ་སྔགས་ཀྱི་ཡི་གེས་བསྐོར་ཏེ་འོད་ཟེར་དང་བཅས་པར་ཡོད་པ་ལས། ཐུགས་ཀྱི་ཡི་གེ་དེ་ཉིད་ཀྱི་བྱིན་རླབས་ཀྱི་སྣང་བ་ཤར་ནས་དྲེགས་པ་ཁོ་ན་ཉིད་ཀྱི་སྙིང་གར་ཐིམ་པས་རང་གི་ཡི་དམ་གྱི་ལྷ་རྡོ་རྗེའི་རིགས་དམ་པ་ཉིད་དུ་ངེས་པར་གྱུར་ཏོ།།

བདུན་པ་དཀྱིལ་འཁོར་བསྟན་པ་ནི།

ཧྃ་ཞེས་མཐོང་བ། སོགས་ནས། མཐོང་ངོ༌། །ཞེས་པའི་བར་གྱིས་བསྟན་ཏེ།

ཧཾ་ཞེས་མཐོང་བས་ཡོངས་སུ་དག་སྟེ། ཐམས་ཅད་མ་འདྲེས་པ་དང་ཡོངས་སུ་རྫོགས་པར་མཐོང་ངོ་།།

ཧྃ་ཞེས་པའི་ཡི་གེ་དེ་བརྗོད་པས་མཐོང་བ་ཡོངས་སུ་དག་སྟེ་ལྷའི་ཞལ་མཐོང་བས་ལྷའི་ངོ་བོ་ཉིད་ཡོན་ཏན་ཇི་སྙེད་པ་ཐམས་ཅད་མ་འདྲེས་པ་དང་སེམས་ཉིད་དུ་ཡོངས་སུ་རྫོགས་པར་ཤེས་ཏེ་གཅིག་དང་དུ་མ་ལས་གྲོལ་བར་ཡང་༼༡༦༽དག་པར་མཐོང་ངོ༌། །དེ་ལྟར་གསང་བའི་མིག་ཕྱེ་ནས་དོན་གྱི་ལྷ་ངོ་བསྟན་པའོ།།

བརྒྱད་པ་གསང་མཚན་བཏགས་པ་ནི།

རྡོ་རྗེ་ཞེས་པ་ནས། བཞག་གོ །ཞེས་པའི་བར་གྱིས་བསྟན་ཏེ།

རྡོ་རྗེ་མིང་ཞེས་བཏགས་ནས། རྡོ་རྗེ་ཐེག་པའི་གསང་སྒོར་བཞག་གོ།

ལག་ཏུ་རྡོ་རྗེ་གཏད་དེ་མཚན་རྡོ་རྗེ་རོ་ལངས་ཞེས་ཡི་དམ་ལྷ་ལས་དྲངས་ཏེ་མིང་བཏགས་པས་མིང་དབང་བསྐུར་ནས་རྡོ་རྗེ་ཐེག་པའི་གསང་བའི་སྒོར་བཞག་པ་མཐར་ལམ་པའམ་ཡང་ན་སངས་མ་རྒྱས་བར་དུ་ལས་བྱེད་པར་བསྒོ་སྟེ་བཀའ་བསྲུང་དུ་བཅུག་གོ།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

སངས་རྒྱས་ཀུན་གྱི་དགོངས་པ་རྣམ་པར་བསྐུལ་བའི་ལེའུ་སྟེ་སུམ་ཅུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། བཤད་པའི་བསྐུལ་ཚིག་གིས་སངས་རྒྱས་ཀུན་གྱི་དགོངས་པ་བསྐུལ་ཏེ་དཀྱིལ་འཁོར་དུ་ཞུགས་པར་བསྟན་པའི་ལེའུ་སྟེ་སུམ་ཅུ་པ་རྣམ་པར་བཀྲོལ་བའོ།། །།

ལེའུ་སོ་གཅིག་པ་ཐར་པ་ནག་པོ་གོལ་བ་མ་གོལ་བར་ལུང་བསྟན་པ།

༈ གཉིས་པ་འཁོར་ཕལ་པ་རྒྱུད་སྦྱོངས་ཤིང་དཀྱིལ་འཁོར་དུ་འཇུག་པ་ལ་གཉིས་ཏེ། རྒྱུད་སྦྱངས་པ་དང༌། དཀྱིལ་འཁོར་དུ་འཇུག་པའོ། །དང་པོ་ལ་གཉིས་ཏེ། འགྱོད་པས་སྦྱང་བ་དང༌། སྤྱོ་བས་སྦྱང་བའོ། །དང་པོ་ལ་གཉིས་ཏེ། འགྱོད་པའི་རྒྱུ་དང༌། སྦྱང་བ་དངོས་སོ། །དང་པོ་ནི།

དེ་ནས། ཞེས་པ་ནས། ཐེ་ཚོམ་ཆད་པའི་སྒོ་ནས། །ཞེས་པའི་བར་གྱིས་བསྟན་ཏེ།

དེ་ནས་ལས་ཀྱི་སྲིན་པོ་དེའི་ཉེ་གནས་འདུས་པའི་ཚོགས་ཕལ་མོ་ཆེ་རྣམས་རང་རང་གི་ལས་དག་པ་དང་། སངས་རྒྱས་མང་པོ་མཐོང་བ་དང་། བྱིན་རླབས་ཀྱི་འོད་ཟེར་གྱིས་རྒྱུད་སྦྱངས་པས། ལས་དང་ལས་ཀྱི་རྣམ་པར་སྨིན་པའི་རྒྱུ་དང་། སྐྱེ་བ་སྔ་ཕྱི་མཐའ་ཡས་པ་དུས་གཅིག་ཏུ་ཤེས་པར་གྱུར་ཏེ། ཐེ་ཚོམ་ཆོད་པའི་སྒོ་ནས།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །གཙོ་བོ་རུ་ཏྲ་རྒྱུད་སྦྱངས་པ་དེ་ནས་ལས་ཀྱི་སྲིན་པོ་དྲེགས་པ་དེའི་ཉེ་གནས་འདུས་པའི་ཚོགས་ཀྱི་འཁོར་ཕལ་མོ་ཆེ་རྣམས་ཀྱང་རང་རང་གི་སྔ་བར་རྒྱུད་སྦྱང་བའི་ཤེས་རབ་ཀྱི་རྩལ་གྱིས་ལས་ཀྱི་སྒྲིབ་པ་དག་པ་དང༌། སངས་རྒྱས་ཀྱི་ཞལ་མང་པོ་མཐོང་བ་དང༌། རྒྱལ་བ་དེ་རྣམས་ཀྱི་བྱིན་རླབས་དང༌། དཔལ་གྱི་ཐུགས་རྗེའི་འོད་ཟེར་གྱིས་རྒྱུད་སྦྱངས་པར་མཛད་པའི་བྱིན་རླབས་ཀྱིས། སྒྲིབ་པ་དག་པར་གྱུར་པས། དྲེགས་པ་བཞིན་ལས་གསུམ་དང་ལས་ཀྱི་རྣམ་པར་སྨིན་པའི་འབྲས་བུ་རྒྱུད་སོ་སོ་དང་སྐྱེ་བ་སྔ་ཕྱི་མཐའ་ཡས་པ་དུས་སྐད་ཅིག་གཅིག་ཏུ་ཤེས་པར་གྱུར་ཏེ་མངོན་དུ་མཐོང་བས་བཤད་པའི་སེམས་རྟོག་སྐྱེས་པ་རྣམས་དང༌། འཁོར་འདས་ཀྱི་མཚན་ཉིད་དང་། ལས་རྒྱུ་འབྲས་དང༌། ལམ་མ་ནོར་བ་ཡིན་མིན་རྣམས་ལ་ཡིད་ཐེ་ཚོམ་གྱི་ཁོ་ཐག་ཆད་པའི་སྒོ་ནས་ཡང་དག་པར་གོ་ཞིང་རྟོགས་པས། སྔར་མ་ཤེས་པ་ལ་འགྱོད་པ་སྐྱེས་ཏེ་དུས་ནས་སྨྲེ་སྔགས་བཏོན་པ་ནི།

གཉིས་པ་སྦྱང་བ་དངོས་ལ་བདུན་ཏེ། ལྷ་ཆེན་པོས་འགྱོད་པ་ཕུལ་བ། ཀླུས་འགྱོད་པ་ཕུལ་བ། སྲིན་པོས་འགྱོད་པ་ཕུལ་བ། ལོག་སྲེད་ཅན་གྱིས་འགྱོད་པ་ཕུལ་བ། མི་དང་མི་མ་ཡིན་པས་འགྱོད་པ་ཕུལ་བ། གནོད་སྦྱིན་གྱིས་འགྱོད་པ་ཕུལ་བ། འབྱུང་པོས་འགྱོད་པ་ཕུལ་བའོ། །དང་པོ་ནི།

དབང་ཕྱུག་ཆེན་པོ། ཞེས་པ་ནས། གདན་༼༡༧༽ཁྲིར་ཕུལ་ལོ། །ཞེས་པའི་བར་གྱིས་བསྟན་ཏེ།

དབང་ཕྱུག་ཆེན་པོ་ལ་སོགས་པ་ལྷ་ཆེན་པོ་རྣམས་ཀྱིས། ཤིན་ཏུ་ངུས་ནས་སྨྲེས་ཏེ་གསོལ་པ། གར་གྱི་དབང་ཕྱུག་གསན་ཅིང་དགོངས་སུ་གསོལ། །བདག་ཅག་རུ་དྲའི་མཐའ་ལ་ཞེན་པ་རྣམས། །ལས་དང་ལས་ཀྱིས་འཁོར་བའི་དྲ་བ་འདི། །བཀའ་ཡི་གཏན་ཚིགས་ཞིབ་མོས་མ་བཀྲོལ་ཞིང་། །ཤེས་རབ་ཟབ་མོའི་དམིགས་བུས་མ་ཕྱེ་བས། །རང་རིག་ཡེ་ཤེས་བློ་དང་མི་ལྡན་ཞིང་། །ངེས་པར་ལེགས་པའི་གྲོས་ཀྱིས་མ་ཆོད་དེ། །གར་ཐབས་གློག་གི་ཞགས་པས་མ་ཟིན་པས། །རྣམ་ཤེས་ལས་ཀྱི་རྒྱ་མཚོའི་རྦས་བསྒྲིབས་ཏེ། །དེ་ཉིད་དེ་བཞིན་ཉིད་དུ་ངོ་མ་འཚལ། །གཏི་མུག་རང་སེམས་བདག་ཏུ་བཟུང་བས་ནོངས། །ཤིན་ཏུ་འགྱོད་པས་ནོངས་པའི་ཚུལ་བཟུང་ནས། །དཔའ་བོ་ཆེན་པོ་ཁྱོད་ལ་སྐྱབས་སུ་མཆི། །དངོས་པོ་སྦྱང་ཕྱིར་བདག་ལུས་གདན་དུ་འབུལ། །ཐབས་མཁས་ཐུགས་རྗེས་ལུས་འདི་བཞེས་སུ་གསོལ། །ཞེས་རང་རང་གི་ལུས་ཞབས་ཀྱི་གདན་ཁྲིར་ཕུལ་ལོ།།

དེ་ནས་དབང་ཕྱུག་ཆེན་པོ་མ་ཧཱ་དེ་བ་ལ་སོགས་པའི་ལྷ་ཆེན་པོ་རྣམས་ཀྱིས་སྔར་རང་ངོ་མ་ཤེས་པ་ལ་འགྱོད་དེ་ཤིན་ཏུ་ངུས་ནས་སྨྲེངས་ཏེ། སྟོན་པ་དཔལ་ཆེན་པོའི་སྤྱན་སྔར་གསོལ་པ། ལྷ་ཆེན་པོ་རྣམས་ཅིར་ཡང་འཁྲུལ་པ་ལ་དགའ་བ་དང༌། དེའི་ངོས་ནས་བུདྡྷ་རྣམས་བཀོད་པ་མ་ངེས་པར་སྟོན་པས་དཔལ་ཆེན་པོ་སྐུ་ཅིར་ཡང་སྣང་བའི་རྒྱལ་པོ་ཆེན་པོ་མཛད་པ་སྣ་ཚོགས་ལ་མངའ་དབང་བསྒྱུར་བས་གར་གྱི་དབང་ཕྱུག་དཔའ་བོ་ཁྱོད་ཉིད་དཔང་པོ་མཛོད་ལ་གསན་ཅིང་དགོངས་སུ་གསོལ་ཞིག་པའོ། །བདག་ཅག་གཟུང་འཛིན་དུ་འཆེལ་ནས་བདག་ཏུ་རྟོག་པའི་རུ་ཏྲའི་དབང་གི་ང་རྒྱལ་གྱི་མཐའ་ལ་མངོན་པར་ཞེན་ཅིང་ཆགས་པ་རྣམས་ནི། རྒྱུ་ལས་དང་འབྲས་བུ་ལས་ཀྱི་རྣམ་པར་སྨིན་པས་སམ་རྣམ་སྨིན་ལུས་དང་རྒྱུ་ལས་ཀྱི་དབང་གིས་ཐར་དཀའ་བར་སྔ་ཕྱིར་འཁོར་བའི་ཤེས་པ་འཁྲུལ་སེམས་ཀྱིས་རང་གིས་རང་བཅིངས་པའམ། བཏུམས་པའམ། སྒྲིབ་པའམ། རྟོག་པར་འབྲེལ་བའི་དྲ་བ་ལྟ་བུ་འདི་ཉིད། སྔར་རྒྱལ་བ་ཀུན་ཏུ་བཟང་པོའི་བསྟན་པ་ལ་ལུང་གི་གསང་བ་དང་བཀའ་ཡི་གཏན་ཚིགས་ཞིབ་མོས་གསལ་བར་མ་བཀྲོལ་ཞིང་སྦྱང་པ་ཆུང་བ་དང༌། བཀའ་ལ་བརྟེན་པའི་སོ་སོར་རྟོག་པའི་ཤེས་རབ་ཆོས་ཉིད་ཟབ་མོའི་དོན་རྟོགས་སུ་རུང་བའི་དམིགས་བུས་ཡང་དག་པར་མ་ཕྱེ་སྟེ་བྲལ་བར་གྱུར་བས་ཤེས་རབ་ཀྱི་སྤྱན་དང་མི་ལྡན་པ་དང༌། རང་རིག་རྟོགས་པའི་ཡེ་ཤེས་ཀྱི་བློ་དང་མི་ལྡན་ཞིང་། དེས་ན་ངེས་པར་ལེགས་པ་གཉིས་སུ་མེད་པའི་གནས་ལུགས་མཐོང་བའི་ལྟ་བས་གྲོས་ཀྱིས་ཐག་མ་ཆོད་དེ་ངེས་པའི་ཤེས་པ་མ་སྐྱེས་པ་དང༌། ཐུགས་རྗེ་ཆེན་པོ་ཅིར་ཡང་སྣང་བའི་ཐབས་ཀྱི་རྒྱལ་པོ་གློག་དང་འདྲ་བར་མྱུར་ཞིང་གསལ་ཏེ། ཞགས་པ་དང་འདྲ་བས་འཛིན་ལ། ནམ་མཁའ་དང་འདྲ་བར་མེད་པ་ལས་ཅིར་ཡང་འབྱུང་བས་གར་ཐབས་གློག་གི་ཞགས་པས་མ་ཟིན་པས་ན། རང་རིག་པའི་རྒྱ་མཚོ་ཆེན་པོ་དངོས་པོ་བཞི་ལ་རང་འཐད་དུ་སྤྱད་པས་འཁྲུལ་པར་ཞེན་པའི་རྣམ་པར་ཤེས་པ་ལས་ཀྱི་རླུང་གིས་བསྐྱོད་པའི་རྒྱ་མཚོའི་རྦས་ཞེས་རྦ་རླབས་ཀྱིས་རྙོགས་ཤིང་བསྒྲིབས་ཏེ། རྒྱ་མཚོ་དྭངས་པ་ལྟ་བུའི་དེ་ཁོ་ན་ཉིད་རང་བྱུང་རིག་པའི་ཡེ་ཤེས་ཆོས་ཉིད་དེ་བཞིན་ཉིད་དུ་ངོ་མ་འཚལ་བས་སྔར་ཇི་བཞིན་པར་མ་རྟོགས་ཏེ་གཞན་ནས་ཚོལ་བ་ནི་མ་རིག་རྨོངས་པའི་གཏི་མུག་གིས་ནོན་ནས་རང་སེམས་ལ་བདག་ཏུ་བཟུང་བས་རང་བྱས་ཀྱི་ཉེས་པར་མཐོང་བས་ཀུན་ནས་ནོངས་ཤིང་ཤིན་ཏུ་འགྱོད་པས་མཐོལ་ལོ་བཤགས་སོ། །དེས་ན་རང་གིས་སྔར་མ་རྟོགས་པ་དང་ལས་ཀྱིས་སྒྲིབ་པ་ལ་༼༡༨༽རབ་ཏུ་གནོངས་ཤིང་འགྱོད་པའི་ཚུལ་གྱིས་གུས་པ་བཟུང་ནས་དཔའ་བོ་ཆེན་པོ་ཁྱོད་ལ་སྐྱབས་སུ་མཆི་ཞིང་གཟུང་འཛིན་གྱི་དངོས་པོ་ལས་དང་བཅས་པ་སྦྱང་བའི་ཕྱིར་ བདག་ལུས་གདན་དུ་འབུལ་ལགས་པས། ཅིར་ཡང་སྟོན་པའི་ཐབས་ལ་མཁས་པ་དང་དམིགས་པ་མེད ་པའི་ཐུགས་རྗེ་ཆེན་པོས་རྗེས་སུ་དགོངས་ཏེ་བདག་ཅག་གི་ལུས་འདི་གདན་དུ་བཞེས་ཏེ་བཞུགས་སུ་གསོལ། ཞེས་གསོལ་བ་འདེབས་ཤིང་རང་རང་གི་ལུས་ཚོགས་རྫོགས་པ་དང་མི་འབྲལ་བའི་ཕྱིར་ཞབས་ཀྱི་གདན་ཁྲིར་ཕུལ་ལོ།།

གཉིས་པ་ཀླུས་འགྱོད་པ་ཕུལ་བ་ནི།

དེ་ནས། ཞེས་པ་ནས། རྒྱན་དུ་ཕུལ་ལོ། །ཞེས་པའི་བར་གྱིས་བསྟན་ཏེ།

དེ་ནས་མགྲིན་ནག་པོ་ལ་སོགས་པ་ཀླུ་ཆེན་པོ་རྣམས་ཀྱིས་ཤིན་ཏུ་ངུས་ནས་སྨྲེས་ཏེ་གསོལ་པ། གཟི་བརྗིད་རྒྱལ་པོ་མངའ་བདག་དགོངས་སུ་གསོལ། །སྲིད་པའི་དྲ་བར་འཁྱམས་པ་བདག་ཅག་རྣམས། །བཅིངས་པ་ལྔ་ཡིས་ཀུན་ཏུ་བཅིངས་གྱུར་པས། །སུས་ཀྱང་མ་བཅིངས་འཆིང་བར་བྱེད་མེད་དེ། །བདག་ཏུ་འཛིན་པའི་རྣམ་རྟོག་ལས་ཀྱིས་བཅིངས། །སྣ་ཚོགས་ལུས་དང་འདི་ཤེས་གནས་ལ་སོགས། །བདག་འཛིན་གྲོང་ཁྱེར་གསུམ་གྱི་བཙོན་ར་འདིར། འཁོར་བའི་མཚོན་ཆས་རྣམ་ཤེས་བཅིངས་པ་ལ། །བདག་ཏུ་འཛིན་པའི་མདུད་པ་མ་བཀྲོལ་བས། །ཀུན་ཏུ་འཆིང་བའི་མདུད་པ་རྒྱུན་མི་འཆད། །མི་ཤིགས་དགྲོལ་བར་དཀའ་བའི་སྡུག་བསྔལ་ལས། །ཐུགས་རྗེའི་མདུད་འགྲོལ་ཐབས་ཀྱིས་དགྲོལ་དུ་གསོལ། །ཞེས་ལུས་སྐུའི་རྒྱན་དུ་ཕུལ་ལོ།།

དེ་ནས་མགྲིན་ན་ནག་པོ་ཀླུ་ཆུ་སྲིན་ཀ་ལ་ཤ་ར་ལ་སོགས་པ་ཀླུ་ཆེན་པོ་གདུག་པ་ཅན་རྣམས་ཀྱིས་སྔོན་གྱི་ལས་ལ་འགྱོད་དེ་ཤིན་ཏུ་ངུས་ནས་སྨྲེངས་ཏེ་གསོལ་བ། སྦྲུལ་འཇིགས་ཤིང་རེག་མི་བཟོད་ལ་བལྟ་བར་འདོད་པ་ལྟར་དུ། སྟོན་པ་ལའང་དེའི་ཆ་མཐུན་སྐུ་གསུང་ཐུགས་ཡོན་ཏན་ཕྲིན་ལས་མཆོག་གི་གཟི་བརྗིད་ལྡན་ཞིང་བསྙེན་པར་དཀའ་བས་རྒྱལ་པོ་ཐབས་ལ་མཁས་པའི་མངའ་བདག་ཁྱོད་ཉིད་དཔང་པོར་མཛད་དེ་དགོངས་སུ་གསོལ། སྲིད་པའི་གྲོང་ཁྱེར་གསུམ་གྱི་དྲྭ་བར་གར་འགྲོ་གཏོལ་ མེད་དུ་འཁྱམས་པ་བདག ་ཅག་ཀླུའི་ཚོགས་རྣམས། ཉོན་མོངས་པའི་བཅིང་པ་ལྔ་ཡིས་ལུས་ངག་ཡིད་གསུམ་གནས་དུས་ཀུན་ཏུ་བཅིངས་པར་གྱུར་པ་འདི་ཉིད་བཅིང་མཁན་སུས་ཀྱང་མ་བཅིངས་ཤིང་བྱ་བའི་ཡུལ་གྱིས་སམ་ཐག་པ་ལྟ་བུ་བཅིང་བར་བྱེད་ པ་པོ་ཡང་མེད་དེ། འོ་ན་ཇི་ལྟར་འཆིང་ཞེ་ན། དངོས་པོ་མེད་པར་གཟུང་འཛིན་བདག ་ཏུ་འཛིན་པའི་རྣམ་རྟོག་ལས་བྱུང་བའི་ལས་གསུམ་གྱིས་རང་བཅིངས་ཏེ། འབྲས་བུ་སྣ་ཚོགས་པ་ལུས་དང་འདུ་ཤེས་གནས་དང་ལོངས་སྤྱོད་ལ་སོགས་པར་བདག་དང་བདག་གིར་འཛིན་པའི་ཞེན་རྟོག་མང་ལ་རྒྱ་ཆེ་བས་བཅིང་སྟེ་གྲོང་ཁྱེར་གསུམ་གྱི་བཙོན་ར་འདིར་རང་དབང་མེད་པར་གཅིག་ནས་གཅིག་ཏུ་འཁོར་བའི་ཚེ་ནའང་ལོངས་སྤྱོད་དང་ཉེ་དུ་ལ་སོགས་པ་ཆགས་སྡང་གི་ཡུལ་གྱི་བཙོན་ཆས་སྣ་ཚོགས་པས་རྣམ་ཤེས་ཀྱི་ངོ་བོ་དངོས་པོ་མེད་བཞིན་དུ་བཅིངས་པར་གྱུར་པ་ལ། དཔེར་ན་ཐབ་ཀྱི་མེ་མ་བསད་ན་རྩིག་ཁུང་གི་དུ་བ་མི་འཆད་པ་ལྟར་དུ་རྩ་བ་བདག་ཏུ་འཛིན་པའི་མདུད་པ་མ་བཀྲོལ་གྱི་བར་དུ། དུས་དང་གནས་སྐབས་ཀུན་ཏུ་འཁོར་བར་བཅིང་བའི་མདུད་པ་རྒྱུན་མི་འཆད་དེ་ཡང་ཡང་འཁོར་ལ། དེས་ན་འཛིན་པ་ཐ་མལ་པས་མི་ཤིགས་པར་ལམ་འོག་མའི་དུས་སམ་སྤྱིར་ཡང་དགྲོལ་བར་དཀའ་བའི་སྡུག་བསྔལ་མང་པོས་མནར་བ་ལས། དཔའ་བོ་ཆེན་པོའི་ཐུགས་རྗེའི་དགོངས་ཏེ་བདག་ཏུ་ལྟ་༼༡༩༽བའི་མདུད་པ་འགྲོལ་བའི་ཐབས་ཀྱི་གར་ཐབས་སྣ་ཚོགས་ཀྱིས་སྲིད་པར་འཆིང་བའི་འཁྲུལ་སྣང་འདི་ཉིད་ཡང་དག་པར་དགྲོལ་བར་མཛད་དུ་གསོལ། ཞེས་གསོལ་བ་བཏབ་སྟེ་ལུས་སྦྲུལ་གྱི་རྣམ་པ་ཁྲོ་བོ་ཆེན་པོའི་སྐུའི་རྒྱན་དུ་ཕུལ་ལོ།།

གསུམ་པ་སྲིན་པོས་འགྱོད་པ་ཕུལ་བ་ནི།

དེ་ནས། ཞེས་པ་ནས། བཀང་བ་བསྟབས་སོ། །ཞེས་པའི་བར་གྱིས་བསྟན་ཏེ།

དེ་ནས་སྲིན་པོའི་རྒྱལ་པོ་ཤ་ཏྲེང་བསེང་བུ་ལ་སོགས་པ་རྣམས་ཀྱིས་ཤིན་ཏུ་ངུས་ནས་སྨྲེས་ཏེ་གསོལ་པ། དཔའ་བོ་སྒེག་པོ་ཆེན་དགོངས་སུ་གསོལ། །མྱ་ངན་གླིང་དུ་འཁྱམས་པ་བདག་ཅག་རྣམས། །མེ་ཆེན་འབར་བས་གདུངས་ཤིང་བསྲེགས་གྱུར་པ། །སུས་ཀྱང་མ་བསྲེགས་སྲེག་པར་བྱེད་མེད་དེ། །མི་བཟོད་རྣམ་སྨིན་དྲག་པོ་ཉིད་ལས་བྱུང་། །ཞེ་སྡང་འབར་བས་རང་རྒྱུད་བསྲེགས་པ་ལ། །བདག་འཛིན་ཁོང་ནས་མེ་འབར་མ་བསད་པས། །ཀུན་ཏུ་བསྲེག་ཅིང་གདུང་བ་རྒྱུན་མི་འཆད། །མི་ཟློགས་ཞི་བར་དཀའ་བའི་སྡུག་བསྔལ་ལས། །ཐུགས་རྗེ་བསིལ་བའི་ཆར་རྒྱུན་དབབ་ཏུ་གསོལ། །ཇི་ལྟར་ཁབ་ལེན་རྡོ་ལ་ལྕགས་འདུ་ལྟར། །དེ་ནས་བཟུང་སྟེ་དཔའ་བོའི་འབངས་སུ་

མཆི། །ཞེས་སོ་སོའི་ཐོད་པ་ཁྲག་གིས་བཀང་བ་བསྟབས་སོ།།

དེ་ནས་གསོད་གཅོད་ལ་དགའ་བ་སྲིན་པོའི་རྒྱལ་པོ་ཤ་ཏྲེང་གསེང་བུ་ལ་སོགས་པ་རྣམས་ཀྱིས། སྔར་གྱི་ཞེ་སྡང་གི་ལས་ལ་ཤིན་ཏུ་ངུས་ནས་སྨྲེངས་ཏེ་གསོལ་བ། སྲིན་པོ་རྣམས་དུར་ཁྲོད་ཀྱི་རྒྱན་ལ་དགའ་བ་ལྟར་དཔལ་ལའང་མངའ་བས། དཔའ་བོ་རྡོ་རྗེ་སྲིན་པོ་དུར་ཁྲོད་ཀྱི་རྒྱན་དང་ཆས་ཀྱིས་སྒེག་པོ་ཆེན་པོ་ཁྱོད་ཉིད་བདག་ཅག་ལ་དཔང་པོའི་ཚུལ་དུ་དགོངས་སུ་གསོལ། ཁམས་གསུམ་གྱི་མྱ་ངན་གྱི་གླིང་དུ་འཁྱམས་པ་བདག་ཅག་སྲིན་པོའི་ཚོགས་རྣམས། ཞེ་སྡང་གི་མེ་ཆེན་འབར་བས་གདུངས་ཤིང་བསྲེགས་པར་འགྱུར་བ་འདི་ཡང༌། བྱེད་པོ་སུས་ཀྱང་མ་བསྲེགས་ཤིང་བསྲེག་པར་བྱེད་པའི་དངོས་པོའང་མེད་དེ། འོ་ན་གང་གི་དབང་གིས་བྱུང་ཞེ་ན། སྔར་གྱི་ཞེ་སྡང་མི་བཟད་པའི་ལས་ཀྱི་རྣམ་སྨིན་དྲག་པོ་ཉིད་ལས་བྱུང་བ་ཁོ་ན་ཡིན་ལ། དེའང་ཞེ་སྡང་གི་མེ་འབར་བས་རང་རྒྱུད་བསྲེགས་པ་ལ། རྩ་བ་བདག་དང་བདག་གིར་འཛིན་པ་ཁོ་ནའི་དབང་ལས་འབར་བ་ཡིན་པས། དེ་ཉིད་མ་བསད་ཀྱི་བར་དུ་རྗེས་སུ་འབྲེལ་བར་འབྱུང་བས་འཁོར་བར་ཀུན་ཏུ་རྒྱུད་བསྲེགས་ཤིང་སྡུག་བསྔལ་གྱིས་གདུང་བ་རྒྱུན་མི་འཆད་པར་ངེས་ཀྱང༌། ཐ་མལ་གྱི་འཛིན་པས་མི་བཟློག་པས་ལམ་གྱི་དུས་སུའང་ཞི་བར་དཀའ་བའི་སྡུག་བསྔལ་དྲག་པོའི་ཚ་བས་གདུང་བ་ལ། དཔའ་བོ་ཆེན་པོའི་དགོངས་པ་ཇི་བཞིན་པའི་ངང་ལས་ཐུགས་རྗེ་བསིལ་བའི་དངོས་པོ་ཆར་རྒྱུན་ལྟ་བུར་དབབ་སྟེ་ཞི་བར་མཛད་དུ་གསོལ་ཞིག །དཔེ་ཇི་ལྟར་ན་ཁབ་ལེན་གྱི་རྡོ་ལ་ལྕགས་འདུ་བ་ལྟར་དུ། དུས་དེང་ནས་བཟུང་སྟེ་དཔའ་བོ་ཆེན་པོའི་འབངས་སུ་མཆི་ཞིང་གུས་པར་འདུད་དོ། །ཞེས་གསོལ་ཏེ་སྲིན་པོ་སོ་སོའི་ཐོད་པ་ཁྲག་གིས་བཀང་བ་དཔལ་ཆེན་པོའི་ཕྱག་ཆར་བསྟབས་སོ།།

བཞི་པ་ལོག་སྲེད་ཅན་གྱིས་འགྱོད་པ་ཕུལ་བ་ནི།

དེ་ནས། ཞེས་པ་ནས། དམ་པར་དོང་ངོ༌། །ཞེས་པའི་བར་གྱིས་བསྟན་ཏེ།

དེ་ནས་ལོག་སྲེད་ཅན་གྱི་ཚོགས་ཀྱིས་ཤིན་ཏུ་ངུས་ནས་སྨྲེས་ཏེ་གསོལ་པ། །ཀུན་སྣང་མུན་སེལ་སྒྲོན་མ་དགོངས་སུ་གསོལ། །མུན་ནག་སྨག་ཏུ་འཁྱམས་པ་བདག་ཅག་རྣམས། །མ་ནོར་ལམ་སྟོར་ཀུན་ཏུ་འཐོམས་གྱུར་པ། །སུས་ཀྱང་མ་བཀག་འགོག་པར་བྱེད་མེད་དེ། །བདག་ཏུ་རྨོངས་པའི་མ་རིག་མུན་པས་བསྒྲིབས། །རྣམ་ཤེས་གཏི་མུག་མུན་པས་འཐིབས་པ་ལ། །བདག་ཏུ་རྨོངས་པའི་མུན་པ་མ་བསལ་བས། །ཀུན་ནས་སྒྲིབ་པའི་མུན་ནག་རྒྱུན་མི་འཆད། །སྨག་ཆེན་སངས་པར་དཀའ་བའི་སྡུག་བསྔལ་ལ། །མཁྱེན་རབས་གསལ་བའི་སྒྲོན་མ་བསྟན་དུ་གསོལ། །ཞེས་སྐྱབས་དམ་པར་དོང་ངོ་།།

དེ་ནས་རྟག་ཆད་དུ་ལྟ་བས་མུ་སྟེགས་པ་ལོག་སྲེད་ཅན་གྱི་ཚོགས་རྣམས་ཀྱིས། ལམ་ལོག་པ་ལ་ཤིན་ཏུ་ངུས་ནས་སྨྲེངས་ཏེ་གསོལ་བ། ལོག་སྲེད་ཅན་མཐར་འཛིན་ངན་པའི་འདམ་དུ་བྱིང་བ་ལ། སྟོན་པ་ལ་དེ་ཉིད་མ་སྤངས་པར་ཡེ་ཤེས་སུ་གསལ་བའི་ཐབས་མངའ་བའི་ཕྱིར། ཆོས་ཀུན་གྱི་རང་བཞིན་སྣང་བར་མཛད་དེ་རྨོངས་པའི་མུན་པ་སེལ་བའི་སྒྲོན་མ་༼༢༠༽ཆེན་པོ་སྟོན་པ་ཁྱོད་ཉིད་དགོངས་སུ་གསོལ། རྟག་ཆད་ཀྱི་མཐའ་ལ་ལྟ་བ་མུན་ནག་དང་འདྲ་བའི་སྨག་ཏུ་འཁྱམས་པ་བདག་ཅག་རྣམས། ལམ་ནོར་བ་ལ་ཞུགས་ཏེ་ཡང་དག་པའི་ལམ་སྟོར་བས་འཁོར་བར་དབང་མེད་དུ་འཕྱན་ནས་བློ་གྲོས་ཀྱི་མིག་དང་བྲལ་བས་ཀུན་ཏུ་འཐོམས་པར་གྱུར་པ་འདི་ཡང༌། སུས་ཀྱང་ཡང་དག་པའི་ལམ་མ་བཀག་ཅིང་འགོག་པར་བྱེད་ པ་པོ་ཡང་མེད་དེ། འོ་ན་གང་གིས་མཐུ་ཡིན་ཞེ་ན། རྣམ་རྟོག་བདག ་ཏུ་འཛིན་པའི་དབང་གིས་དོན་ལ་རྨོངས་པའི་མ་རིག་པའི་མུན་པས་བསྒྲིབས་པ་ཁོ་ན་ཡིན་ལ། གང་སྒྲིབ་ན་རྣམ་ཤེས་དེ་ཉིད། གང་གིས་སྒྲིབས་ན་གཏི་མུག་གིས་མུན་པས། ཇི་ལྟར་སྒྲིབ་ན་གནས་ལུགས་མི་གསལ་བར་འཐིབས་པའི་ཚུལ་དུ་སྒྲིབ་པ་ལ། རྩ་བ་ལྟ་བུ་བདག་ཏུ་རྨོངས་པའི་མུན་པ་དེ་ཉིད་མ་བསལ་གྱི་བར་དུ་བརྒྱུད་ནས་འབྱུང་བས། འཁོར་བར་ཀུན་ནས་བསྒྲིབས་པའི་མུན་ནག་འདི་ཡང་རྒྱུན་མི་འཆད་པར་འབྱུང་ལ། དེ་ལྟར་ལྟ་བ་ལོག་པའི་སྨག་ཆེན་ལམ་པའི་དུས་སུའང་སངས་པར་དཀའ་བའི་སྡུག་བསྔལ་བརྒྱུད་མས་མནར་བ་ལས་ངེས་པར་གྲོལ་བའི་ཇི་ལྟ་བ་དང་ཇི་སྙེད་པའི་མཁྱེན་རབ་དམ་པ་རང་བྱུང་གི་ཡེ་ཤེས་རབ་ཏུ་གསལ་བའི་སྒྲོན་མ་ལྟ་བུ་གང་དེ་ལེགས་པར་བསྟན་ཏེ་རབ་ཏུ་སྣང་བར་མཛད་དུ་གསོལ། ཞེས་གུས་པས་གསོལ་ཏེ་སྐྱབས་དམ་པར་དོང་ངོ་།།

ལྔ་པ་མི་དང་མི་མ་ཡིན་པས་འགྱོད་པ་ཕུལ་བ་ནི།

དེ་ནས། ཞེས་པ་ནས། འབངས་སུ་ཕུལ་ལོ། །ཞེས་པའི་བར་གྱིས་བསྟན་ཏེ།

དེ་ནས་མི་དང་མི་མ་ཡིན་པའི་ཚོགས་ཀྱིས་ཤིན་ཏུ་ངུས་ཤིང་སྨྲེས་ཏེ་གསོལ་པ། ཐབས་མཁས་ཐུགས་རྗེའི་སྨན་པ་དགོངས་སུ་གསོལ། །གྲོང་ཁྱེར་གསུམ་དུ་འཁྱམས་པ་བདག་ཅག་རྣམས། །འཁོར་བའི་གཅོང་སྙིང་ནད་ཀྱིས་ཟིན་གྱུར་པ། །སུས་ཀྱང་མ་བཟུང་འཛིན་པར་བྱེད་མེད་དེ། །བདག་འཛིན་ཉོན་མོངས་མ་རིག་ནད་ཀྱིས་བཟུང་། །ཟུག་རྔུ་བཟོད་དཀས་རྣམ་ཤེས་གཟིར་བ་ལ། །དངོས་པོར་འཛིན་པའི་གཅོང་རྙིང་མ་སྦྱངས་པས།།

ཀུན་ནས་གདུང་བའི་ཟུག་རྔུ་རྒྱུན་མི་འཆད། །ཐར་མེད་འཚོ་བར་དཀའ་བའི་སྡུག་བསྔལ་ལས།།

ཐབས་མཁས་ཐུགས་རྗེའི་སྨན་གྱིས་སྦྱང་དུ་གསོལ། །ཞེས་ལུས་འབངས་སུ་ཕུལ་ལོ།།

དེ་ནས་མི་དང་མི་མ་ཡིན་པའི་ཚོགས་རྣམས་ཀྱིས། སྲིད་པར་འཁྱམས་པ་ལ་ཤིན་ཏུ་ངུས་ནས་སྨྲེངས་ཏེ་གསོལ་བ། མི་དང་མི་མ་ཡིན་པ་རྣམས་མི་རིགས་པའི་ལས་ཐབས་ལ་མཁས་པ་དང་ཚུལ་མཐུན་པར་ཡང་དག་པའི་ཐབས་ལ་མཁས་པའི་སྟོན་པ་ཐུགས་རྗེའི་མངའ་བདག་ཉོན་མོངས་པའི་ནད་གསོ་བའི་སྨན་པ་མཆོག་ཏུ་གྱུར་པ་ཁྱོད་ཉིད་དཔང་པོར་དགོངས་སུ་གསོལ། ཁམས་ཀྱི་གྲོང་ཁྱེར་གསུམ་དུ་འཁྱམས་པ་ བདག་ཅག་རྣམས། དུས་ཐོག་མ་མེད་པ ་ནས་འཁོར་བའི་གཅོང་རྙིང་གི་ནད་ཀྱིས་ཟིན་པར་གྱུར་པ་འདི་ཡང༌། སུས་ཀྱང་མ་བཟུང་ཞིང་འཛིན་པར་བྱེད་པའི་དངོས་པོ་ཡང་མེད་དེ། འོ་ན་ཇི་ལྟར་འཁོར་ཞེ་ན། བདག་ཏུ་འཛིན་པའི་དབང་གིས་ཉོན་མོངས་པ་སྣ་ཚོགས་སུ་སྣང་བའི་མ་རིག་ནད་ཀྱིས་བཟུང་ནས་ལས་གསུམ་སྤྱད་པས་འཁྱམས་པ་ཡིན་ལ། དེའང་རྩ་བ་དང་ཡན་ལག་གི་སྡུག་བསྔལ་གྱི་ཟུག་རྔུ་བཟོད་པར་དཀས་ཞེས་དཀའ་བས་རྣམ་ཤེས་གདུང་ཞིང་གཟིར་བ་ལ། འཁྲུལ་རྩ་དངོས་པོར་འཛིན་པའི་གཅོང་རྙིང་མ་སྦྱངས་ཀྱི་བར་དུ་ཡང་ཡང་འབྱུང་བས་འཁོར་བའི་སྡུག་༼༢༡༽བསྔལ་གྱིས་ཀུན་ནས་གདུང་བའིི་ཟུག་རྔུ་རྒྱུན་མི་འཆད་པར་འབྱུང་ལ། དེ་ལྟར་དངོས་འཛིན་ཐ་མལ་པ་ཡོད་པ་སྲིད་དུ་ནམ་ཡང་ཐར་པ་མེད་པས་ལམ་མཆོག་འདི་དང་མ་འཕྲད་ན་ལམ་འོག་མས་འཚོ་བར་དཀའ་བའི་སྡུག་བསྔལ་འདི་ལས། ཐབས་ལ་མཁས་པའི་ཐུགས་རྗེའི་སྨན་གྱིས་སྦྱངས་པར་མཛད་དེ་མྱུར་དུ་ཐར་བར་མཛད་དུ་གསོལ། ཞེས་གསོལ་ཏེ་ལུས་འབངས་སུ་ཕུལ་ལོ།།

དྲུག་པ་གནོད་སྦྱིན་གྱིས་འགྱོད་པ་ཕུལ་བ་ནི།

དེ་ནས། ཞེས་པ་ནས། དམ་པར་དོང་ངོ་། །ཞེས་པའི་བར་གྱིས་བསྟན་ཏེ།

དེ་ནས་གནོད་སྦྱིན་གྱི་ཚོགས་ཀྱིས་ཤིན་ཏུ་གདུང་ཞིང་ངུས་ནས་སྨྲེས་ཏེ་གསོལ་པ། ཐབས་མཁས་ཐུགས་རྗེའི་གྲུ་གཟིངས་དགོངས་སུ་གསོལ། །འཁོར་བའི་རྒྱ་མཚོར་འཁྱམས་པ་བདག་ཅག་རྣམས། །སྡུག་བསྔལ་རྦ་གློང་བྱིངས་སུ་བྱིང་གྱུར་པ། །སུས་ཀྱང་མ་མནན་གནོན་པར་བྱེད་མེད་དེ། །རྣམ་རྟོག་དངོས་པོར་འཛིན་པའི་རི་བོས་མནན། །ལས་ཀྱི་ཆུ་བོས་འཁོར་བར་གཡེངས་པ་ལ། །དངོས་པོར་འཛིན་པའི་སྐུ་མགོ་མ་བསྒྱུར་བས། །ལས་དབང་དྲག་པོའི་ཆུ་བོ་རྒྱུན་མི་འཆད། །མི་ཐར་འབོག་པར་དཀའ་བའི་སྡུག་བསྔལ་ལས།།

ཐབས་མཁས་ཐུགས་རྗེའི་གྲུ་ཡིས་བསྒྲལ་དུ་གསོལ། །ཞེས་སྐྱབས་དམ་པར་དོང་ངོ་།།

དེ་ནས་གནོད་སྦྱིན་གྱི་ཚོགས་ཀྱིས། འཁྲུལ་པའི་རྦ་ཀློང་དུ་བྱིང་བ་ལ་ཤིན་ཏུ་ངུས་ནས་སྨྲེངས་ཏེ་གསོལ་པ། གནོད་སྦྱིན་རྣམས་གཞན་ལ་གནོད་ཅིང་འཚེ་བའི་སྦྱོར་ཐབས་ཤེས་པ་ལྟར། དེ་དང་ཆ་མཐུན། རྣམ་པར་གྲོལ་བའི་ཐབས་ལ་མཁས་པའི་སྟོན་པ་དཔའ་བོ་ཆེན་པོ་ཐུགས་རྗེའི་མངའ་བདག་འཁོར་བ་ལས་སྒྲོལ་བའི་གྲུ་གཟིངས་དམ་པ་ཁྱོད་ཉིད་དགོངས་སུ་གསོལ། འཁོར་བའི་རྒྱ་མཚོར་འཁྱམས་པ་བདག་ཅག་གནོད་སྦྱིན་གྱི་ཚོགས་རྣམས། སྡུག་བསྔལ་དྲག་པོའི་རྦ་ཀློང་གི་འཇིངས་སུ་ནུབ་ཅིང་བྱིང་བར་གྱུར་བ་འདིའང༌། བྱེད་པོ་སུས་ཀྱང་མ་མནན་ལ་གནོན་པར་བྱེད་པའི་དངོས་པོའང་མེད་དེ། འོ་ན་གང་གིས་བྱིང་བར་གྱུར་ཞེ་ན། མཚན་མའི་རྣམ་པར་རྟོག་པ་དངོས་པོར་འཛིན་པའི་རི་བོས་རང་མནན་ཏེ། ལས་ཀྱི་ཆུ་བོས་འཁོར་བར་གཡེངས་པ་ཡིན་ལ། དེས་ན་དངོས་པོར་འཛིན་པའི་རྐ་མགོ་མ་བསྒྱུར་བར་ཆུ་བོ་བཞིས་ཀུན་ཏུ་གཡེང་བས་ན། ལས་དབང་དྲག་པོའི་ཆུ་བོ་འདི་ཡང་རྒྱུན་མི་འཆད་པར་འབྱུང་ལ། དེ་ལྟར་ཡུལ་ལ་དངོས་འཛིན་གྱི་བློ་རྟོག་ཡོད་པ་སྲིད་དུ་མི་ཐར་ཞིང་ལམ་འོག་མས་འབོག་པར་དཀའ་བའི་སྡུག་བསྔལ་གྱི་འཇིངས་འདི་ལས། སྟོན་པ་དཔལ་གྱི་ཐབས་ལ་མཁས་པའི་ཐུགས་རྗེའི་གྲུ་ཡིས་མྱུར་དུ་བསྒྲལ་བར་མཛད་དུ་གསོལ། ཞེས་གསོལ་ཏེ་སྐྱབས་དམ་པར་དོང་ངོ་།།

བདུན་པ་འབྱུང་པོས་འགྱོད་པ་ཕུལ་བ་ནི།

དེ་ནས་འབྱུང་པོ། ཞེས་པ་ནས། སྐྱབས་དམ་པར་དོང་ངོ་། །ཞེས་པའི་བར་གྱིས་བསྟན་ཏེ།

དེ་ནས་འབྱུང་པོའི་ཚོགས་ཀྱིས་ཤིན་ཏུ་ངུས་ནས་སྨྲེས་ཏེ་གསོལ་པ། རང་བྱུང་བདུད་རྩིའི་རྒྱལ་པོ་དགོངས་

སུ་གསོལ། །དུག་ཆེན་གླིང་དུ་འཁྱམས་པ་བདག་ཅག་རྣམས། །ཀུན་ནས་མྱོས་པས་མྱོས་ཤིང་ཉམས་གྱུར་པ།།

སུས་ཀྱང་མ་སྦྱར་སྦྱོར་བར་བྱེད་མེད་དེ། །ཕྱིན་ཅི་ལོག་ཏུ་ལྟ་བའི་དུག་གིས་མྱོས། །དུག་ཆེན་ནད་ཀྱིས་རྣམ་ཤེས་གཟིར་བ་ལ། །ཁོང་ནས་འཁྱིལ་བའི་དུག་རྩ་མ་བཅད་པས། །དུག་ནད་འབར་བའི་སྡུག་བསྔལ་རྒྱུན་མི་འཆད།།

མི་བཟད་བཟོད་པར་དཀའ་བའི་སྡུག་བསྔལ་ལ། །རང་བྱུང་དག་པའི་བདུད་རྩིས་བྱུག་ཏུ་གསོལ།།

ཞེས་སྐྱབས་དམ་པར་དོང་ངོ་།།

དེ་ནས་འབྱུང་པོའི་ཚོགས་ཀྱིས་ཉོན་མོངས་པའི་དུག་གིས་མྱོས་པ་ལ། ཤིན་ཏུ་ངུས་ནས་སྨྲེངས་ཏེ་གསོལ་བ། འབྱུང་པོ་རྣམས་ཀྱི་ཕན་གནོད་ཀྱི་རྩི་གཏོང་བའི་ཆ་མཐུན། དཔལ་ཆེན་པོ་རང་བྱུང་དོན་གྱི་བདུད་རྩིའི་མངའ་བདག་སྨན་པའི་རྒྱལ་པོ་ཉོན་མོངས་འཇོམས་པའི་དཔའ་བོ་མཆོག་ཁྱོད་དཔང་པོའི་ཚུལ་གྱིས་དགོངས་ཏེ་གཟིགས་སུ་གསོལ། འདི་ན་ཉོན་མོངས་པའི་དུག་ཆེན་གྱི་གླིང་དུ་དབང་ མེད་དུ་འཁྱམས་པ་བདག ་ཅག་རྣམས་ཀུན་ནས་སེམས་མྱོས་པས་ཡིད་མྱོས་ཤིང་དྲན་པ་ཉམས་པར་གྱུར་པ་འདི་ཡང༌། སུས་༼༢༢༽ཀྱང་མ་སྦྱར་ཞིང་སྦྱོར་བར་བྱེད་པ་པོ་ཡང་མེད་དེ། འོ་ན་གང་གིས་དབང་ལས་བྱུང་ཞེ་ན།  བདག་མེད་པ ་ལ་བདག་ཏུ་འཛིན་པའི་ཕྱིན་ཅི་ལོག་གི་ལྟ་བའི་དུག་གིས་མྱོས་ནས། དུག་ཆེན་གྱི་ནད་ཀྱིས་རྣམ་ཤེས་གཟིར་བ་ཡིན་ལ། དེས་ན་ཁོང་ནས་འཁྱིལ་བའི་དུག་གི་རྩ་བ་བདག་ཏུ་ལྟ་བ་མ་བཅད་ཀྱི་བར་དུ་ཡང་ཡང་མྱོས་པར་འགྱུར་བས། རྣམ་སྨིན་དུག་ནད་འབར་བའི་སྡུག་བསྔལ་དྲག་པོ་འདིའང་རྒྱུན་མི་འཆད་པར་ངེས་ལ། དེ་ལྟར་ཤིན་ཏུ་མི་བཟད་ཅིང་བཟོད་པར་དཀའ་བའི་སྡུག་བསྔལ་དྲག་པོ་འདི་ལས་མྱུར་དུ་དབྱུང་བས་རང་བྱུང་དག་པའི་བདུད་རྩིས་བྱུག་སྟེ་འཚོ་བར་མཛད་དུ་གསོལ། ཞེས་བརྗོད་དེ་སྐྱབས་དམ་པ་དོང་ངོ་།།

གཉིས་པ་སྤྱོ་བས་སྦྱང་བ་ལ་གཉིས་ཏེ། འགྱོད་པ་བདུན་པོ་ལོག་པ་བདུན་གྱིས་ཉེས་པར་བསྟན་པ། ཐུགས་རྗེ་བསྐུལ་བའི་ལན་ནོ། །དང་པོ་ནི།

དེ་ནས་ཡང་རྡོ་རྗེ། ཞེས་པ་ནས། ལྟ་བས་ཁྱོད་རེ་འཚོག །ཅེས་པའི་བར་གྱིས་བསྟན་ཏེ།

དེ་ནས་ཡང་རྡོ་རྗེ་སྲིན་པོ་དེས་བཀའ་སྩལ་པ། ཡིན་ནོ་ལེགས་སོ་རིགས་ཀྱི་བུ། །རུ་དྲ་དག་གིས་ཁྱེད་རེ་འཁོར།།

རུ་དྲ་དག་གིས་ཁྱེད་རེ་འཚོག །བདག་ཏུ་འཛིན་པས་ཁྱེད་རེ་འཁོར། །བདག་ཏུ་འཛིན་པས་ཁྱེད་རེ་འཚོག།

ཞེ་སྡང་དག་གིས་ཁྱེད་རེ་འཁོར། །ཞེ་སྡང་དག་གིས་ཁྱེད་རེ་འཚོག །གཏི་མུག་དག་གིས་ཁྱེད་རེ་འཁོར། །གཏི་མུག་དག་གི་ཁྱེད་རེ་འཚོག །འདོད་ཆགས་དག་གིས་ཁྱེད་རེ་འཁོར། །འདོད་ཆགས་དག་གིས་ཁྱེད་རེ་འཚོག།

ཆུ་བོ་བཞི་ཡིས་ཁྱེད་རེ་འཁོར། །ཆུ་བོ་བཞི་ཡིས་ཁྱེད་རེ་འཚོག །ལོག་པར་ལྟ་བས་ཁྱེད་རེ་འཁོར།།

ལོག་པར་ལྟ་བས་ཁྱེད་རེ་འཚོག།

དེ་ནས་ཡང་དཔལ་ཆེན་པོ་རྡོ་རྗེ་སྲིན་པོ་དེས་བཀའ་སྩལ་པ། ཉེས་པའི་རྩ་བ་རང་ལས་བྱུང་བ་ཡིན་ནོ་ལས་ལ་འགྱོད་དེ་བསྐུལ་བ་ཤིན་ཏུ་ལེགས་སོ་ཀྱེ་གསང་བ་ལ་མོས་ཏེ་གསང་བའི་སེམས་མཆོག་བསྐྱེད་པའི་རིགས་ཀྱི་བུ་རྣམས། དང་པོའི་ལན། དྲེགས་ཤིང་ང་རྒྱལ་ཆེ་བའི་རུ་ཏྲ་དག་གིས་ཁྱོད་རེ་འཁོར་བས་འཁོར་བ་རང་གི་ངོ་བོར་ལྟུང་ལ། དེ་བས་རུ་ཏྲ་དག་གིས་འབྲས་བུའམ་རྣམ་པར་སྨིན་པ་འཁོར་བའི་ཉེས་པ་སྣ་ཚོགས་ཀྱིས་ཁྱོད་རེ་འཚོག་སྟེ་ཀུན་ནས་གདུང་བ་ཡིན་ནོ། །དེ་ལྟར་རྒྱུ་སོ་སོའི་དབང་གིས་འཁོར་ཞིང༌། རང་མཐུན་གྱི་འབྲས་བུས་ཐར་མེད་དུ་མནར་བའི་ཉེས་པ་གཉིས་པོ་འོག་མ་དྲུག་ལ་ཡང་འགྲེ་སྟེ། གཉིས་པའི་ལན། བདག་ཏུ་འཛིན་པའི་དབང་གིས་རང་བྱས་ཀྱི་ཉེས་པས་ཁྱོད་རེ་འཁོར་ལ། བདག་ཏུ་འཛིན་པས་རྣམ་སྨིན་གྱིས་ཁྱོད་རེ་འཚོག་གོ །གསུམ་པའི་ལན། ཞེ་སྡང་དྲག་པོ་དག་གིས་ཁྱོད་རེ་འཁོར་ཏེ། ཞེ་སྡང་དག་གིས་འབྲས་བུས་ཁྱོད་རེ་འཚོག་སྟེ་གདུང་ངོ༌། །བཞི་པའི་ལན། རྨོངས་ཆེན་གཏི་མུག་དག་གིས་ཁྱོད་རེ་འཁོར་ཞིང༌། གཏི་མུག་དག་གིས་མནར་བས་ཁྱོད་རེ་འཚོག་གོ །ལྔ་པའི་ལན། འདོད་ཆགས་དག་གི་དབང་གིས་ཁྱོད་རེ་འཁོར་ལ། འདོད་ཆགས་དག་གིས་འབྲས་བུས་ཁྱོད་རེ་འཚོག་སྟེ་འཇོམས་སོ། །དྲུག་པའི་ལན། མ་རིག་པ་དང༌། ལྟ་བ་དང༌། སྲིད་པ་དང༌། འདོད་པ་བཞིའམ། མ་རིག་པ། ཉོན་མོངས་ལས་སྡུག་བསྔལ་གྱི་ཆུ་བོ་བཞི་ཡིས་ཁྱོད་རེ་འཁོར་ཏེ། ཆུ་བོ་བཞི་ཡིས་རྣམ་པར་སྨིན་པས་ཁྱོད་རེ་འཚོག་གོ །བདུན་པའི་ལན། ལོག་པར་ལྟ་བས་ལས་ཀྱིས་ཁྱོད་རེ་འཁོར་ཞིང༌། ལོག་པར་ལྟ་༼༢༣༽བས་འབྲས་བུས་ཁྱོད་རེ་འཚོག་སྟེ་ཀུན་ཏུ་གདུང་བར་གྱུར་ཏོ།།

གཉིས་པ་ཐུགས་རྗེ་བསྐུལ་བ་ལན་ལ་གཉིས་ཏེ། ཡེ་ནས་རྒྱལ་སྲས་ཡིན་པ་ལ་འཁོར་བ་ལོག་རྟོག་གིས་ཉེས་པར་བསྟན་པ། མ་རྟོགས་པ་ལ་ཐུགས་རྗེ་སྐྱེས་པའོ། །དང་པོ་ནི།

ཇི་ལྟར། ཞེས་པ་ནས། ལས་ཁོ་ནའོ། །ཞེས་པའི་བར་གྱིས་བསྟན་ཏེ།

ཇི་ལྟར་ཁྱེད་ནི་ཐམས་ཅད་དུ། །ཡེ་ནས་རྒྱལ་བའི་སྲས་ཡིན་ན།།

གྲོང་ཁྱེར་གསུམ་དུ་ཅི་སྟེ་འཁོར། །རང་རང་རྣམ་རྟོག་ལས་ཁོ་ན།།

ཇི་ལྟར་སྤྱིར་ན་ཁྱོད་རྣམས་ནི་རྣམ་པ་ཐམས་ཅད་དུ་རིགས་དང་ལྡན་པས་ཡེ་ནས་རྒྱལ་བའི་སྲས་སམ། ཡང་ན་ཐུབ་དཀའ་ལ་གདམས་ངག་བླངས་པ་ཡིན་པས་ན། ཁམས་ཀྱི་གྲོང་ཁྱེར་གསུམ་དུ་ཅི་སྟེ་འཁོར་ཏེ་འཁོར་མི་རིགས་པ་ལ་འདི་ལྟར་དབང་མེད་དུ་འཁྱམས་པ་འདི་ཉིད་སོ་སོ་རང་རང་གི་རྣམ་པར་རྟོག་པའི་དབང་གིས་ལས་བསགས་པ་ཁོ་ན་ལས་རྒྱུན་དུ་འཁོར་བར་ལྟུང་སྟེ་འཁྲུལ་བར་སྣང་བའོ།།

གཉིས་པ་མ་རྟོགས་པ་ལ་ཐུགས་རྗེ་སྐྱེས་པ་ནི།

ལས་ཀྱི་རྒྱ་མཚོའི། ཞེས་པ་ནས། བཀའ་སྩལ་པ་དང༌། ཞེས་པའི་བར་གྱིས་བསྟན་ཏེ།

ལས་ཀྱི་རྒྱ་མཚོའི་རྦ་རླབས་དང་། །བདག་ཏུ་འཛིན་པའི་མདུད་པ་དང་། །ཁོང་ནས་འབར་བའི་མེ་ཆེན་དང་། །ཀུན་ནས་འཐིབས་པའི་མུན་ནག་དང་། །དངོས་པོར་རྟོག་པའི་གཅོང་རྙིང་དང་། །རྣམ་པར་གཡེང་བའི་ཆུ་བོ་དང་། །ཁོང་ནས་འཁྱིལ་བའི་དུག་རྩ་རྣམས། །རང་བྱུང་རྡོ་རྗེས་མ་བྱས་ན། །གཞན་ནས་རེ་གསོལ་གདུང་སྨྲེས་པ། །ཆུ་འདོད་སྨིག་རྒྱུ་སྙེག་པ་འདྲ། །གང་འདིར་ཉིད་བདེར་མ་སྦྱར་ན། །གཞན་གྱིས་བདེ་བར་ག་ལ་འགྱུར། །ཡེ་ནས་བདེ་བར་གནས་བཞིན་དུ། །ད་གདོད་གང་དུ་བདེ་འཚོལ་བ། །བཙལ་བས་རྙེད་པར་ཡོངས་མི་འགྱུར། །སྡུག་བསྔལ་དོར་བའི་སེམས་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུ། །འོ་མ་དག་ལས་མར་བྱུང་བ། །དེ་ཉིད་ཡེ་ནས་མར་མེད་ན། །ཐབས་མཆོག་དཔག་མེད་རྒྱལ་བས་ཀྱང་། །བསྲུབ་པ་མ་གཏོགས་དེ་མི་རྙེད། །དེ་བཞིན་རང་གི་དེ་ཉིད་ལས། །བཙལ་ཀྱང་རྒྱལ་བས་མི་རྙེད་ན། །ཁྱེད་ཅི་གཞན་ལས་བདེ་འདོད་དམ།།

མི་ཤེས་བློ་ཆུང་སྙིང་རེ་རྗེ། །ཞེས་བཀའ་སྩལ་པ་དང་།

གོང་གི་རིམ་པ་བདུན་པོ་ལྟར། རང་བཞིན་གྱི་རྒྱ་མཚོ་ལ་ལས་ཀྱི་རྒྱ་མཚོའི་རྦ་རླབས་དྲག་པོ་དང༌། ཆོས་ཉིད་ཀྱི་ནམ་མཁའ་ལ་བདག་ཏུ་འཛིན་པའི་མདུད་པས་ཉེས་པ་དང༌། རང་བཞིན་གྱིས་ཞི་བ་ལ་ཁོང་ནས་འབར་བའི་ཞེ་སྡང་གི་མེ་ཆེན་འཁྲུགས་པ་དང༌། གདོད་ནས་དག་པ་ལ་ཀུན་ནས་གཏིབས་པའི་མ་རིག་པའི་མུན་ནག་གི་སྒྲིབ་པ་དང༌། ཡེ་ནས་སྟོང་པ་ལ་དངོས་པོར་རྟོག་པའི་གཅོང་རྙིང་གི་ནད་ཀྱིས་ཟིན་པ་དང༌། འདུས་མ་བྱས་པ་ལ་རྣམ་པར་གཡེང་བའི་ཆུ་བོ་བཞིས་བརླན་པ་དང༌། རང་བྱུང་གི་ཡེ་ཤེས་སུ་གནས་ཀྱང་ཁོང་ནས་འཁྱིལ་བའི་ཉོན་མོངས་པའི་དུག་ཆེན་རྩ་བ་བདག་ཏུ་རྟོག་པས་གཟུང་བ་རྣམས། རང་བྱུང་རིག་པའི་ཡེ་ཤེས་ཆོས་ལྔ་དང་ལྡན་པས་བྱང་ཆུབ་སེམས་ཀྱི་རྡོ་རྗེར་མ་སྦྱངས་ན། ཡུལ་གཞན་ལ་རེ་ཞིང་གསོལ་བ་འདེབས་བཞིན་གདུང་བའི་ཚིག་གིས་སྨྲེངས་པ་ནི། དཔེར་ན་ཆུ་འདོད་པས་སྨིག་རྒྱུ་སྙོགས་པ་དང་འདྲའོ། །དེས་ན་ཁྱེད་ཅག་གིས་གང་ཐེག་པ་ཆེན་པོའི་སྒོ་འདིར་སེམས་ཉིད་རང་རིག་པའི་ངོ་བོ་ཡེ་ནས་བདེར་ཞེས་བདེ་བ་ཆེན་པོ་ཆོས་ཀྱི་སྐུ་ཡིན་པའི་དོན་རྟོགས་ནས་ཆོས་ཉིད་ཇི་བཞིན་པར་མ་སྦྱར་ན། ཐབས་གཞན་གྱིས་ལོགས་སུ་བཙལ་བས་སེམས་ཉིད་བདེ་བ་ཆེན་པོ་རྙེད་པར་ག་ལ་འགྱུར་ཏེ་མི་འགྱུར་རོ། །དེའི་ཚུལ་ནི། ཡེ་ནས་རང་སྣང་བདེ་བ་ཆེན་པོ་རང་གི་རིག་པར་གནས་བཞིན་དུ། ད་གདོད་ཡུལ་གང་དུ་ཐབས་གཞན་གྱིས་བདེ་བ་ཆེན་པོ་ཚོལ་བ་ལ་འབད་ཀྱང༌། ངོ་བོ་ཡུལ་དུ་གྲུབ་པ་མེད་པས་གཞན་དུ་བཙལ་བས་རྙེད་པ་ལ་ཡོངས་སུ་མི་འགྱུར་བས་རང་ཉིད་ངལ་བར་ཟད་དོ། །བར་འདིར། ཕྱག་དཔེ་གཉིས་ན། སྡུག་༼༢༤༽བསྔལ་འདོར་བའི་སེམས་ཡོད་ཀྱང༌། །ཞེས་བཞུགས་པས། དེ་བས་ན་སྡུག་བསྔལ་འདོར་བར་འདོད་པའི་སེམས་རྟོག་ཡོད་ཀྱང༌། རང་ག་མ་བཞག་ནས་གཞན་དུ་བཙལ་བས་སླར་ཡང་སྡུག་བསྔལ་ཉིད་ལ་མངོན་པར་རྒྱུ་བ་ལས་དོན་གྱིས་སྟོང་པའོ། །དེ་ཡང་དཔེར་ན་འོ་མ་དག་ལས་མར་བྱུང་བ་ཡིན་ཀྱང༌། དེ་ཉིད་ཀྱི་རང་བཞིན་ཡེ་ནས་མར་གྱི་ བདག་ཉིད་ཅན་དུ་གྱུར་པ་མིན་ན། གཞན་ཐབས་མཆོག་དཔག་ཏུ་མེད ་པའི་མངའ་བདག་རྒྱལ་བ་ཐམས་ཅད་མཁྱེན་པས་ཀྱང་འོ་མ་བསྲུབས་ནས་མར་གྱི་དྭངས་མ་འབྱིན་པ་མ་གཏོགས་པར་ཐབས་གཞན་གྱིས་དེ་ལྟར་མི་བརྙེས་ལ། དཔེ་དེ་བཞིན་དུ་རང་གི་སེམས་ཉིད་རང་བྱུང་བདེ་བ་ཆེན་པོ་དེ་ཉིད་བླ་མས་གདམས་ངག་གི་ཐབས་ཀྱི་གསང་བ་ཟབ་མོས་རང་ལས་རྙེད་པ་མ་གཏོགས་གཞན་དུ་འབད་པས་བཙལ་ཀྱང་ཤེས་བྱ་ཀུན་མཁྱེན་རྒྱལ་བ་ཐབས་ཀྱི་སྒོ་ཀུན་གཟིགས་པས་ཀྱང་མི་བརྙེས་པ་ཡིན་ན། ཁྱེད་རྣམས་ཀྱིས་ཅི་ཞིག་གཞན་ལས་བཙལ་ནས་བདེ་བ་རྙེད་པར་འདོད་དམ། དེས་ན་མ་རིག་པའི་དབང་གིས་དོན་མི་ཤེས་པའི་བློ་ཆུང་གང་དག་རང་གི་ཆོས་ཉིད་གཞན་ནས་རྙེད་པར་སེམས་པ་ནི། སྙིང་རེ་རྗེ་བས་ཐུགས་རྗེའི་གནས་སུ་མཐོང་ངོ༌། །ཞེས་དོན་གྱིས་ཐབས་དམ་པས་ཕན་གདགས་པར་ཞལ་གྱིས་བཞེས་པའོ། །ཞེས་བཀའ་སྩལ་པ་དང༌།

གཉིས་པ་དཀྱིལ་འཁོར་དུ་འཇུག་པ་ལ་གཉིས་ཏེ། འཇུག་པར་བསྐུལ་བ། ཞུགས་པའི་རིམ་པའོ། །དང་པོ་ལ་གཉིས་ཏེ། བསྐུལ་བས་འགྱུར་དབང་མ་ངེས་པའི་ས་ལ་དྲངས་པ། སེམས་བྲོད་པ་སྐྱེད་པའོ། །དང་པོ་ནི།

ལང་ཀའི། ཞེས་པ་ནས། ས་ལ་བཞག །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དབང་ཕྱུག་ཆེན་པོ་ལ་སོགས་པ་འདུས་པ་ཕལ་མོ་ཆེའི་ཚོགས་ཀྱིས་གསོལ་པ། ཀྱེ་སྐྱེས་བུ་ཆེན་པོ་བདག་ཅག་རྣམས་རང་རང་གི་དེ་ཁོ་ན་ཉིད་བལྟ་བར་འཚལ་ན། དེ་ཇི་ལྟར་ཡོངས་སུ་བལྟ་བར་བགྱི། ཞེས་གསོལ་པ་ལས། སྐྱེས་བུ་ཆེན་པོ་དེས་བཀའ་སྩལ་པ། ཀྱེ་འདུས་པའི་ཚོགས་རྒྱལ་བའི་སྲས་རྣམས། རང་རང་གི་དེ་ཁོ་ན་ཉིད་མཐོང་བར་འདོད་ན། དཀྱིལ་འཁོར་ཆེན་པོ་གསུམ་གྱི་སྒོ་འབའ་ཞིག་ཏུ་འཇུག་པར་བྱའོ། །དེ་ཡང་རྩ་བ་བྱང་ཆུབ་སེམས་ཀྱི་དཀྱིལ་འཁོར་འབའ་ཞིག་གི་སྒོར་འཇུག་པར་བྱའོ། །དེ་ཅིའི་ཕྱིར་ཞེ་ན། དཀྱིལ་འཁོར་ཆེན་པོ་གསུམ་དང་། རང་རང་གི་དེ་ཁོ་ན་ཉིད་སོ་སོ་མ་ཡིན་ཐ་མི་དད་དོ། །དེ་ཡང་རྩ་བ་བྱང་ཆུབ་ཀྱི་དཀྱིལ་འཁོར་དུ་འདུས་པའི་ཕྱིར་རོ། །དེ་སྐད་ཅེས་བཀའ་སྩལ་པ་ལས། འདུས་པ་ཆེན་པོའི་ཚོགས་ཀྱིས་གསོལ་པ། །དཔའ་བོ་ཆེན་པོ་བདག་ཅག་དཀྱིལ་འཁོར་ཆེན་པོ་གསུམ་དུ་གཞུག་ཏུ་གསོལ། སྐྱེས་བུ་ཆེན་པོ་ཡང་དག་པར་གཞུག་ཏུ་གསོལ། དེ་སྐད་ཅེས་གསོལ་པ་ལས། སྐྱེས་བུ་ཆེན་པོ་དེས་བཀའ་སྩལ་པ། རྣལ་འབྱོར་འཇུག་པའི་བྱིས་པ་ཁྱེད། །འཇིག་རྟེན་དྲུག་ལ་དྲངས་ནས་ཀྱང་། །འདས་དང་མ་འདས་ས་མཚམས་ཀྱི།།

འགྱུར་བ་མ་ངེས་ས་ལ་གཞག །ཅེས་གསུངས་སོ།།

སྔ་བར་འཇུག་ཐབས་བསྟན་པའི་རྗེས་སུ་ཆོ་གའི་ཡན་ལག་དབང་གི་རིམ་པ་བསྟན་པ་གང་སྙམ་པ་ལ། ལང་ཀའི་བདག་པོ་ཞེས་གསང་བ་པས་སྡུད་པ་པོ་ལ་བོས་ནས། དེ་ནས་དྲེགས་པའི་འཁོར་དབང་ཕྱུག་ཆེན་པོ་ལ་སོགས་པ་འདུས་པ་ཕལ་མོ་ཆེའི་ཚོགས་ཀྱིས་གསང་བའི་དོན་ལ་འཇུག་པར་གསོལ་བ་གདབ་པའི་ཚིག་བྱུང་བ། ཀྱེ་སྐྱེས་བུ་ཆེན་པོ་བདག་ཅག་རྣམས། རང་རང་གི་སེམས་ཀྱི་ཆོས་ཉིད་དེ་ཁོ་ན་ཉིད་དཀྱིལ་འཁོར་གསུམ་གྱི་ངོ་བོ་བལྟ་བར་འཚལ་ན། དེ་ཇི་ལྟར་ཡོངས་སུ་བལྟ་ཞིང་རྟོགས་པར་བགྱི། ཞེས་དེ་སྐད་ཅེས་གསོལ་པ་ལས། སྐྱེས་བུ་ཆེན་པོ་དེས་ལན་དུ་བཀའ་སྩལ་པ། ཀྱེ་འདུས་པའི་ཚོགས་རྒྱལ་བའི་སྲས་རྣམས་ཞེས་བོས་ནས། རང་རང་གི་སེམས་ཀྱི་དེ་ཁོ་ན་ཉིད་མཐོང་བར་འདོད་ན། ཡེ་ཇི་བཞིན་པ། རང་བཞིན་ལྷུན་གྲུབ། རྩ་བ་བྱང་ཆུབ་སེམས་༼༢༥༽ཀྱི་དཀྱིལ་འཁོར་ཆེན་པོ་གསུམ་གྱི་སྒོ་འབའ་ཞིག་ཏུ་འཇུག་པར་བྱའོ། །དེ་ཡང་རྩ་བ་རྣམ་ཤེས་དགུ་པ་རང་གི་བྱང་ཆུབ་ཀྱི་སེམས་ཀྱི་དཀྱིལ་འཁོར་འབའ་ཞིག་གི་སྒོར་འཇུག་པར་བྱའོ། །དེ་ཅིའི་ཕྱིར་ཞེ་ན། གཏན་ཚིགས་བསྟན་པ། དཀྱིལ་འཁོར་ཆེན་པོ་གསུམ་དང༌། རང་རང་གི་ལུས་ངག་སེམས་ཀྱི་དེ་ཁོ་ན་ཉིད་སོ་སོ་མ་ཡིན་ཐ་མི་དད་དོ། །དེ་ཡང་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་འདུས་པའི་ཕྱིར་རོ། །དེ་སྐད་ཅེས་བཀའ་སྩལ་པ་ལས། དེ་དག་གི་དཀྱིལ་འཁོར་གསུམ་གྱི་དོན་དེ་ཐབས་ཀྱི་སྒོ་ནས་མཐོང་བར་བྱ་བའི་ཕྱིར་ཟབ་མོ་དབང་གི་དཀྱིལ་འཁོར་དུ་འཇུག་པར་ཞུ་བ་གང་སྙམ་པ་ལ། ཡང་འདུས་པ་ཆེན་པོའི་ཚོགས་ཀྱིས་གསོལ་པ། དཔའ་བོ་ཆེན་པོ་བདག་ཅག་ཡི་གེ་གསུམ་གྱི་དོན་བཤད་པའི་དཀྱིལ་འཁོར་གསུམ་དུ་ངེས་པར་གཞུག་ཏུ་གསོལ། ཞེས་བདག་དོན་དང༌། སྐྱེས་བུ་ཆེན་པོ་གསང་དོན་མཐོང་བར་ཡང་དག་པར་གཞུག་ཏུ་གསོལ། ཞེས་གཞན་དོན་དུ་གསོལ་བ་བཏབ་སྟེ་དེ་སྐད་ཅེས་གསོལ་པ་ལས། སྐྱེས་བུ་ཆེན་པོ་དེས་དབུགས་དབྱུང་སྟེ་བཀའ་སྩལ་པ། རྣལ་འབྱོར་གྱི་ལམ་དུ་འཇུག་པའི་བྱིས་པ་ཤེས་པ་ཤེད་མ་བྱེ་བ་ཁྱེད་རྣམས། འཇིག་རྟེན་གྱི་འགྲོ་བ་རིགས་དྲུག་ལས་དྲང་ཞིང་བཏོན་ནས་ཀྱང༌། འཇིག་རྟེན་ལས་འདས་པ་དང་མ་འདས་པའི་ས་མཚམས་ཀྱི་སྔགས་ཀྱི་ཡང་དག་པའི་ས་དང་པོ་འགྱུར་དབང་མ་ངེས་པའི་ས་ལ་བཀོད་དེ་ཚོགས་ཀྱི་ལམ་དུ་བཞག་སྟེ་ད་དུང་རིགས་མ་ངེས་པའི་ཕྱིར་རོ། །ཞེས་གསུངས་སོ།།

གཉིས་པ་སེམས་བྲོད་པ་སྐྱེད་པ་ནི།

དེ་ནས་འདུས་པའི། ཞེས་པ་ནས། སླར་མི་ལྡོག །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

དེ་ནས་འདུས་པའི་ཚོགས་ཀྱིས་འདི་སྐད་ཅེས་གསོལ་ཏོ། །དཔའ་བོ་ཆེན་པོ་དགོངས་སུ་གསོལ། །བདག་ཅག་སྐལ་ལྡན་འདུས་བའི་ཚོགས། །སྒོ་འདིར་འཇུག་པར་འཚལ་ལགས་ན། །རྒྱལ་བའི་སྲས་སུ་གཟུང་དུ་གསོལ། །ཞེས་གསོལ་པ་ལས། སྐྱེས་བུ་ཆེན་པོས་བཀའ་སྩལ་པ། སྐལ་ལྡན་འདུས་པའི་ཚོགས་ཆེན་ཁྱེད། །བདེ་བར་འོངས་སོ་ལེགས་པར་འོངས། །གྲུབ་པ་ལུང་གི་གསང་སྒོ་འདིར། །སུ་དག་འོངས་པ་སླར་མི་ལྡོག །ཅེས་གསུངས་སོ།།

དེ་ནས་ཡང་འདུས་པའི་ཚོགས་ཀྱིས་འདི་སྐད་ཅེས་གསོལ་ཏོ། །དཔའ་བོ་ཆེན་པོ་གསང་སྒོ་དབྱེ་བར་ཐུགས་རྗེས་དགོངས་སུ་གསོལ། བདག་ཅག་སྔགས་ཀྱི་སྐལ་པ་དང་ལྡན་པའི་རིགས་མི་འདྲ་བ་མང་པོ་འཁོར་འདུས་པའི་ཚོགས་རྣམས། དཀྱིལ་འཁོར་གསུམ་གྱི་སྒོ་འདིར་ཡང་དག་པར་འཇུག་པར་འཚལ་བ་ལགས་ན། སྔ་མ་ལས་ཀྱང་རིགས་ངེས་པ་གསང་སྔགས་ཕྱིར་མི་ལྡོག་པར་གྱུར་ཏེ་རྒྱལ་བའི་རིགས་འཚོབ་པའི་སྲས་སུ་གཟུང་བར་མཛད་དུ་གསོལ། ཅེས་གསོལ་པ་ལས། སྐྱེས་བུ་ཆེན་པོས་བཀའ་སྩལ་པ། དེ་ལྟར་འཇུག་པར་གནང་སྟེ། དབུགས་ཕྱུངས་པའི་ཚུལ་གྱིས། སྐལ་པ་དང་ལྡན་པའི་འདུས་པའི་ཚོགས་ཆེན་པོ་ཁྱེད་རྣམས། བྱ་བརྩལ་ལས་འདས་པའི་སྒོ་འདིར་བདེ་བར་འོངས་སོ། །འདིར་ནི་ཉོན་མོངས་པའང་ལོགས་སུ་མ་དམིགས་པས་༼༢༦༽ལེགས་པར་འོངས་སོ། །ཨ་ནུ་ཡོ་ག་རྣལ་འབྱོར་གྲུབ་པ་བཀའི་ལུང་གི་གསང་སྔགས་ཟབ་མོའི་འཇུག་སྒོ་འདིར་ནི་སྐྱེས་བུ་སུ་དག་འོངས་ནས་ཚུལ་བཞིན་དུ་ཞུགས་པ་རྣམས་འཁོར་བར་སླར་མི་ལྡོག་པས་ཕྱིར་མི་ལྡོག་པར་ལུང་བསྟན་པའོ། །ཞེས་གསུངས་སོ།།

གཉིས་པ་ཞུགས་པའི་རིམ་པ་ལ་དྲུག་སྟེ། གང་ལ་དགའི་དྲིས་ལན། ཡན་ལག་རྫོགས་ཏེ་སེམས་བསྐྱེད་པ། དམ་ཚིག་དབོག་པ། ཆུ་ནན་བྱ་བ། དམ་ཚིག་བསྒྲགས་པ། དཀྱིལ་འཁོར་བསྟན་པའོ། །དང་པོ་ནི།

འོག་ནས། དེ་ནས་སྐྱེས་བུ་ཆེན་པོས་བཀའ་སྩལ་པ། ཁྱོད་ནི་དགའ་བ། ཞེས་པ་ནས། ཐམས་ཅད་བསྒྲལ་བར་མོས། །ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་སྐྱེས་བུ་ཆེན་པོས་བཀའ་སྩལ་པ། ཁྱེད་ནི་དགའ་བ་ཅི་ལ་དགའ། །ཁྱེད་ནི་དད་པ་ཅི་ལ་དད། །ཁྱེད་ནི་མོས་པ་ཅི་ལ་མོས། །ཁྱེད་ནི་འདོད་པ་ཇི་ལྟ་བ། །དེ་སྐད་ཅེས་བཀའ་སྩལ་པ་དང་། འདུས་པའི་ཚོགས་ཀྱིས་གསོལ་པ། བདག་ཅག་སྐལ་ལྡན་བདེ་ཆེན་པོ། །རབ་དགྱེས་སེམས་ལ་བདག་ཅག་དགའ། །མཆོག་ཉིད་དོན་ལ་བདག་ཅག་དད། །ཨེ་མའོ་བདེ་མཆོག་དགའ་ཚལ་འདིར། །སངས་རྒྱས་མཛད་དཀའ་སྤྱད་ནས་ནི།།

འགྲོ་བ་ཐམས་ཅད་བསྒྲལ་བར་མོས། །ཞེས་གསོལ་ཏོ།།

དེ་ནས་སྐྱེས་བུ་ཆེན་པོས་བཀའ་སྩལ་པ། འདུས་པའི་འཁོར་ཚོགས་ཁྱོད་རྣམས་ནི་ངེས་པར་དགའ་བ་ཅི་ལ་དགའ་སྟེ། ཁྱོད་ནི་དད་པ་ཅི་ལ་དད། དེ་བཞིན་དུ་ཁྱོད་རྣམས་ནི་མོས་པ་ཅི་ལ་མོས་ཤིང༌། ཁྱོད་ནི་འདོད་པ་ཅི་ལྟ་བ་ཡིན་ཞེས་དཀྱིལ་འཁོར་དུ་འཇུག་པའི་ཚེ་ཅི་ལ་དགའ་བ་སྟོན་པས་དྲིས་ཏེ་བཀའ་སྩལ་པ་དང༌། འདུས་པའི་ཚོགས་ཀྱིས་དེའི་ལན་གསོལ་བ། བདག་ཅག་གསང་ཆེན་ལུང་གི་སྐལ་པ་དང་ལྡན་པ་ལགས་ཀྱིས། ཅི་ལ་དགའ་བའི་ལན། བདེ་བ་ཆེན་པོ་རབ་ཏུ་དགྱེས་པའི་གསང་བ་མཆོག་གི་སེམས་ལ་བདག་ཅག་དགའོ། །ཅི་ལ་དད་ཀྱི་ལན། མཆོག་ཏུ་འགྱུར་བ་ མེད་པའི་ཆོས་ཉིད་ཀྱི་སེམས་ལ་བདག་ཅག་དད་དོ། །འདོད་པ ་ཇི་ལྟ་བའི་ལན། ཨེ་མའོ། །ཞེས་ངམ་ནས་བདེ་མཆོག་གསང་བ་དམ་པའི་དགའ་ཚལ་འདིར་ཞུགས་ནས་ཟབ་མོའི་དབང་ནོད་པར་འདོད་ཅིང་ཀུན་ཏུ་དགའོ། །ཅི་ལ་མོས་ཀྱི་ལན། དབང་གིས་སྨིན་ནས་སངས་རྒྱས་རྣམས་ཀྱི་མཛད་པ་དཔག་པར་དཀའ་བ་རྣམས་ཐབས་དང་ལྡན་པར་སྤྱད་ནས་ནི། འགྲོ་བ་སེམས་ཅན་ཐམས་ཅད་འཁོར་བ་ལས་བསྒྲལ་ཏེ་བདེ་མཆོག་ཕྱིར་མི་ལྡོག་པ་ལ་དགོད་པར་མོས་སོ། །ཞེས་དབང་ཐོབ་ནས་འགྲོ་དོན་བྱེད་པ་ལ་དགའ་བར་ལན་བཏབ་པ་དེ་སྐད་ཅེས་གསོལ་ཏོ།།

གཉིས་པ་ཡན་ལག་རྫོགས་ཏེ་སེམས་བསྐྱེད་པ་ལ་བཞི་སྟེ། སྡིག་པ་བཤགས་པ། གསོལ་བ་གདབ་པ། སྐྱབས་སུ་གསོལ་བ། སེམས་བསྐྱེད་པའོ། །དང་པོ་ནི།

ཚན་གཅིག་གི་གོང་ནས། དེ་ནས་ཡང་འདུས་པའི་ཚོགས་ཀྱིས་འདི་སྐད་ཅེས་གསོལ་ཏོ། །ཐོག་མ་མེད། ཅེས་པ་ནས། སོ་སོར་བཤགས། །ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཡང་འདུས་པའི་ཚོགས་ཀྱིས་འདི་སྐད་ཅེས་གསོལ་ཏོ། །ཐོག་མ་མེད་པའི་དུས་མཐའ་ནས། །མ་རིག་ལོག་རྟོག་དབང་གིས་ན། །སྡིག་པ་བགྱིས་པ་ཅི་མཆིས་པ། །དེ་དག་ཐམས་ཅད་སོ་སོར་བཤགས། །ཞེས་གསོལ་ཏོ།།

དེ་ནས་ཡང་འདུས་པའི་ཚོགས་རྣམས་ཀྱིས་བཤགས་པའི་ཚིག་འདི་སྐད་ཅེས་གསོལ་ཏོ། །འཁོར་བ་ཐོག་མ་མེད་པའི་དུས་ཀྱི་མཐའ་༼༢༧༽ནས་བཟུང་སྟེ། མ་རིག་པ་དང་ལོག་པར་རྟོག་པའི་དབང་གིས་ན། བདག་ཅག་གིས་སྡིག་པ་བགྱིས་པ་སྒྲིབ་པའི་ངོ་བོ་ཅི་དང་ཅི་མཆིས་པ་དེ་དག་ཐམས་ཅད་བཤགས་ཐབས་གསུམ་སྟེ་ཡུལ་སོ་སོ་ལ་བཤགས་པ་དང༌། གང་ཟག་སོ་སོས་བཤགས་པ་དང༌། སྡིག་པའི་དངོས་པོ་སོ་སོར་མཐོལ་ཞིང་བཤགས་པ་ལགས་ཀྱིས་དག་ཅིང་ཚངས་པ་རྩལ་དུ་གསོལ། ཞེས་གསོལ་ཏོ།།

གཉིས་པ་གསོལ་བ་གདབ་པ་ནི།

དེ་ནས་ཡང༌། ཞེས་པ་ནས། ཉི་མ་རྩལ་དུ་གསོལ། །ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

ཡང་འདུས་པའི་ཚོགས་དེ་དག་གིས་འདི་སྐད་གསོལ་ཏོ། །རིག་འཛིན་རྡོ་རྗེ་རྒྱལ་བ་ཡིས། །འཁོར་བ་ཇི་ལྟར་བསྒྲལ་བ་ལྟར། །བདག་ཅག་རབ་ཏུ་བསྒྲལ་བའི་ཕྱིར། །རྡོ་རྗེ་ཉི་མ་སྩལ་དུ་གསོལ། །ཞེས་གསོལ་ཏོ།།

དེ་ནས་ཡང་འདུས་པའི་ཚོགས་རྣམས་ཀྱིས་གསོལ་བ་གདབ་པ་འདི་སྐད་ཅེས་གསོལ་ཏོ། །རིག་པ་འཛིན་པ་རྡོ་རྗེ་རྒྱལ་པོ་སྟོན་པ་ཉིད་ཀྱིས་ཐུགས་རྗེ་ཆེན་པོའི་ཐབས་ཀྱི་སྒོ་མང་པོ་ཁམས་དབང་བསམ་པ་དང་མཐུན་པ་ཡིས། འགྲོ་བ་སེམས་ཅན་སྐལ་བ་དང་ལྡན་པ་ཇི་སྙེད་པ་རྣམས་འཁོར་བ་ལས་ཇི་ལྟར་བསྒྲལ་ཞིང་ཐར་པ་དམ་པའི་གོ་འཕང་ལ་བཀོད་པ་ལྟར་བདག་ཅག་དྲེགས་པའི་འཁོར་ཚོགས་རྣམས་རབ་ཏུ་བསྒྲལ་ཏེ། བདེ་མཆོག་གསང་བའི་དཀྱིལ་འཁོར་ལ་འགོད་པའི་ཕྱིར་དུ་གཉིས་སུ་མེད་པའི་ཡེ་ཤེས་འབྱུང་བའི་རྒྱུ་རྟེན་རྡོ་རྗེ་ཉི་མ་ཟླ་བ་བྱང་ཆུབ་སེམས་ཀྱི་དབང་མཆོག་དམ་པ་རྩལ་དུ་གསོལ། ཞེས་གསོལ་ཏོ། །ཡང་ན་འདི་ཉིད་སྐྱབས་སུ་གསོལ་བར་འགྲེལ་ཏེ། འདིར་འགྲེལ་ཆེན་ལྟར་རོ།།

གསུམ་པ་སྐྱབས་སུ་གསོལ་བ་ནི།

གོང་ནས། དེ་ནས་འདུས་པའི་ཚོགས་རྣམས་མགུ་ཞིང་རངས་པའི། ཞེས་པ་ནས། སྐྱབས་སུ་མཆི། །ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་འདུས་པའི་ཚོགས་རྣམས་མགུ་ཞིང་རངས་པའི་སྒོ་ནས། རྣལ་འབྱོར་དུ་རྣམ་པར་འདུན་ནས་འདི་སྐད་ཅེས་གསོལ་ཏོ། །ཕོ་བྲང་རྨད་བྱུང་གཞལ་ཡས་ན། །རྒྱལ་བ་རྒྱ་མཚོ་ཀུན་བཞུགས་ལ།།

རྣལ་འབྱོར་ངེས་པར་ལྷག་པར་མོས། །རྡོ་རྗེ་གདུང་ལ་སྐྱབས་སུ་མཆི། །ཞེས་གསོལ་ཏོ།།

སྐྱབས་སུ་གསོལ་བའི་ཕྱིར་དེ་ནས་འདུས་པའི་ཚོགས་རྣམས་གསང་བའི་དབང་ཐོབ་པར་ངེས་པ་ལ་མགུ་ཞིང་དགའ་བ་དང༌། ཡིད་ཚིམ་ཞིང་རངས་པའི་སྒོ་ནས་རྣལ་འབྱོར་གྲུབ་པའི་ཏིང་ངེ་འཛིན་ཐོབ་པ་ལ་སྤྲོ་བའི་ཚུལ་དུ་རྣམ་པར་འདུན་པའི་མོས་པས་དྲངས་ནས་འདི་སྐད་ཅེས་གསོལ་ཏོ། །རྒྱལ་བ་རིལ་གྱི་བཞུགས་གནས་དེ་བཞིན་གཤེགས་པའི་དགོངས་པ་ཀུན་འདུས་པའི་རང་བཞིན་ལྷུན་གྲུབ་ཀྱི་ཕོ་བྲང་མཐས་མ་རེག་པས་རྩ་བ་གཉིས་སུ་མེད་པ་རྨད་བྱུང་བྱང་ཆུབ་སེམས་ཀྱི་དཀྱིལ་འཁོར་བློས་དཔག་ཏུ་མེད་པས་ཡེ་ཇི་བཞིན་པའི་གཞལ་ཡས་ཁང་དོན་དང་རྟགས་གཉིས་ཀྱིས་ཡུམ་གྱི་མཁའ་ཀློང་རྣམ་པར་དག་པའི་གསང་བའི་སྣ་རྩེ་བདེ་བ་ཆེན་པོའི་གནས་ནས། གཅིག་དང་དུ་མ་བྲལ་བའི་རྒྱལ་བ་རྒྱ་མཚོ་ཇི་སྙེད་པ་ཀུན་ཀྱང་བཞུགས་ པ་ཡིན་ལ། དེར་གཅིག་པར་ཚོགས་པའི་ཕྱིར་བདག་ཅག་ཀུན་ཀྱང་དབྱེར་མེད ་དོན་གྱི་རྣལ་འབྱོར་དུ་ངེས་པར་མཁའ་ཀློང་གཉིས་མེད་ཀྱི་དོན་བསྒོམ་པ་ལ་ལྷག་པར་མོས་ཤིང་དགའ་བས། ཐམས་ཅད་༼༢༨༽རང་བྱུང་ཡེ་ཤེས་ཀྱི་ངང་དུ་གཅིག་པས་རྡོ་རྗེའི་གདུང་དམ་པ་དཔའ་བོ་རྡོ་རྗེ་འཛིན་པ་ཆེན་པོ་ཁྱོད་ལ་སྐྱབས་སུ་མཆིའོ། །ཞེས་གསོལ་ཏོ། །ཡང་ན་འདི་ཉིད་གསོལ་གདབ་ཏུ་འགྲེལ་ལོ།།

བཞི་པ་སེམས་བསྐྱེད་པ་ནི།

གོང་གི་སྔར་གྱི་འཕྲོར། དེ་ནས་འདུས་པའི་ཚོགས། ཞེས་པ་ནས། འཇུག་པར་བགྱི། །ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་འདུས་པའི་ཚོགས་དེ་དག་བྱང་ཆུབ་ཏུ་འགྱུར་བའི་ལྷག་པའི་སེམས་འདི་ལྟར་སྐྱེས་སོ། །བདག་ཅག་མཐའ་ཡས་སེམས་ཅན་རྣམས། །དོན་གྱི་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས།།

བྱང་ཆུབ་མཆོག་ཏུ་སེམས་བསྐྱེད་དོ། །སེམས་ཉིད་སངས་རྒྱས་ཡིན་པ་ལ། །མུན་པས་བསྒྲིབས་པས་དེ་མ་ཤེས།།

བྱང་ཆུབ་སེམས་ཀྱི་ལམ་འདི་ནས། །སངས་རྒྱས་ས་རུ་འཇུག་པར་བགྱི། །ཞེས་གསོལ་ཏོ།།

ལེའུ་སུམ་ཅུ་པར་བཤད་པའི་དབང་གི་ལས་རྗེས་ཐོགས་སུ་བསྟན་པ་གང་ཞེ་ན། དེ་ནས་འདུས་པའི་ཚོགས་དེ་དག་དབང་གི་དུས་སུ་སེམས་བསྐྱེད་ནས་སྔ་བར་གནས་པའི་དབུགས་ཕྱིན་པས་གསང་སྔགས་ཀྱི་དོན་ཇི་བཞིན་པའི་བྱང་ཆུབ་ཆེན་པོའི་ངང་དུ་འགྱུར་བས་རྒྱུ་ཐེག་པ་གཞན་ལས་ཁྱད་པར་དུ་གྱུར་པའི་གསང་དོན་ལ་དྭངས་བས་ལྷག་པའི་སེམས་འདི་ལྟར་སྐྱེས་སོ། །བདག་ཅག་མཐའ་ཡས་པའི་སེམས་ཅན་རྣམས་ནི། ཡེ་ཇི་བཞིན་པ་དོན་གྱི་སངས་རྒྱས་ཡིན་མོད་ཀྱང༌། རང་ངོ་མ་ཤེས་ཏེ་ལོག་པར་རྟོག་པའི་དབང་གིས་འཁོར་བར་འཁྱམས་པ་ལ། རང་བཞིན་གྱི་ངང་རིག་པར་གསལ་བས་བྱང་ཆུབ་མཆོག་ཏུ་སེམས་བསྐྱེད་དོ། །དེ་ལྟར་སེམས་ཉིད་ཡེ་ནས་སངས་རྒྱས་ཡིན་པ་ལས། མ་རིག་པའི་མུན་པས་བསྒྲིབས་པས་དེ་ཉིད་རང་ངོ་མ་ཤེས་པ་ལ། རྩ་བ་བྱང་ཆུབ་སེམས་ཀྱི་དཀྱིལ་འཁོར་དོན་གྱི་ལམ་མཆོག་འདི་ནས་ཡང་དག་སངས་རྒྱས་ཀྱི་ས་ལ་ཕྱིན་ཅི་མ་ལོག་པར་འཇུག་པར་བགྱིའོ། །ཞེས་གསོལ་ཏོ།།

གསུམ་པ་དམ་ཚིག་དབོག་པ་ལ་གསུམ་སྟེ། དཔོག་པར་ཞུས་པ། སྦྱིན་པར་གསུངས་པ། བླང་ཞིང་དམ་བཅའ་བའི་ཚིག་གོ །དང་པོ་ནི།

འོག་ནས། དེ་ནས་ཡང་འདུས་པའི་ཚོགས་ཀྱིས་དམ་ཚིག་བསྐུལ་བར་གསོལ་བ། མི་ཕྱེད། ཅེས་པ་ནས། ནན་ཏན་མཛོད། །ཅེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཡང་འདུས་པའི་ཚོགས་ཀྱིས་དམ་ཚིག་བསྐུལ་བར་གསོལ་པ། མི་ཕྱེད་གསང་བའི་རྣལ་འབྱོར་པ།།

གཉིས་མེད་དོན་གྱི་དབྱིངས་ནས་ཕྱུང་། །དབྱིངས་ནི་མི་འཇིག་རྡོ་རྗེ་སྟེ། །འདུ་འབྲལ་མེད་པར་གཅིག་པས་ན།།

གསང་བ་གསུམ་གྱི་དབྱིངས་ཉིད་དུ། །གཉིས་སུ་མེད་པར་ནན་ཏན་མཛོད། །ཅེས་གསོལ་ཏོ།།

དེ་ནས་ཡང་འདུས་པའི་ཚོགས་རྣམས་ཀྱིས་དམ་ཚིག་བསྐུལ་ཏེ་གནང་བར་གསོལ་བ། ལྟ་སྤྱོད་སྒོམ་གསུམ་མི་ཕྱེད་པའི་དབང་གིས་རྡོ་རྗེ་གསུམ་དབྱེར་མེད་པའི་འབྲས་བུར་ལྷུན་གྱིས་གྲུབ་པ་གསང་བའི་རྣལ་འབྱོར་པ་ཡང༌། བདེན་པ་རྣམ་གཉིས་དབྱེར་མེད་ཀྱི་དོན་ཟབ་མོ་རྟོགས་པའི་ཆོས་ཀྱི་དབྱིངས་ཀྱི་རྒྱུ་ལས་རང་ཤར་དུ་བྱུང་བས་གཉིས་མེད་མཉམ་པའི་ངེས་དོན་མུ་མཐའ་མེད་པའི་དབྱིངས་ནི་དངོས་པོ་དང་བྲལ་བས་རྐྱེན་གྱིས་མི་འཇིག་པར་འགྱུར་མེད་རྡོ་རྗེ་ལྟ་བུ་སྟེ། དེའི་ངང་དུ་ཆོས་ཐམས་ཅད་འདུ་བ་དང་འབྲལ་བ་མེད་པར་ཆོས་ཉིད་མཉམ་ པ་ཉིད་དུ་དབྱེར་མེད་པར་གཅིག་པས་ན། བདག ་ཅག་ཀྱང་སྐུ་གསུང་ཐུགས་ཀྱི་གསང་བ་གསུམ་གྱི་དབྱིངས་ཉིད་དུ་གཉིས་སུ་མེད་པར་དམ་ཚིག་ཆེན་པོ་གསུམ་ལ་ཡང་༼༢༩༽དག་པར་གཟུད་པར་ནན་ཏན་མཛོད་ཅིག ཅེས་གསོལ་ཏོ། །འདིར་བསྡུས་དོན་དུ། འདི་དང་ཆུ་ནན་གོ་བསྣོལ་བ་ལྟ་བུར་སྣང་ཡང་ཡིག་སྐྱོན་ཏེ། ཀ་རྟ་དང་ཕྱག་མཆན་མཐུན་པར་འདི་ལྟར་འབྱུང་བས་འཁྲུལ་མེད་དུ་ངེས་སོ།།

གཉིས་པ་སྦྱིན་པར་གསུངས་པ་ནི།

དེ་ནས་སྐྱེས་བུ། ཞེས་པ་ནས། དུས་མེད་དོ། །ཞེས་བཀའ་སྩལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་སྐྱེས་བུ་ཆེན་པོ་དེས་བཀའ་སྩལ་པ། རྡོ་རྗེ་ཅན་གྱི་རྣལ་འབྱོར་ཁྱེད། །རྡོ་རྗེ་ཅན་དུ་གཅིག་ངེས་ན།།

གསང་བ་གསུམ་དུ་མཉམ་པའི་ཕྱིར། །མི་ཕྱེད་རྡོ་རྗེའི་དམ་ཚིག་སྦྱིན། །མི་ཕྱེད་རྡོ་རྗེའི་དམ་ཚིག་ནི།།

གསང་བ་གསུམ་གྱི་དབྱིངས་ནས་ཕྱུང་། །དཀྱིལ་འཁོར་གསུམ་གྱི་དམ་ཚིག་ནི།།

གྲུབ་ན་འཇིག་པའི་དུས་མེད་དོ། །ཞེས་བཀའ་སྩལ་ཏོ།།

དེ་ནས་ཡང་སྐྱེས་བུ་ཆེན་པོ་དེས་རྗེས་སུ་གནང་སྟེ་དམ་ཚིག་ཕོག་པ་འདི་ཉིད་བཀའ་སྩལ་པ། སྐུ་གསུང་ཐུགས་རྡོ་རྗེ་ཅན་གྱི་རིགས་སུ་ངེས་པས་རྡོ་རྗེ་ཐེག་པའི་དམ་ཚིག་གི་སྐལ་བ་དང་ལྡན་པའིགསང་བའི་རྣལ་འབྱོར་པ་ཁྱེད་རྣམས་རྡོ་རྗེ་གསུམ་གྱི་དམ་པ་དང་ལྡན་པ་ཅན་དུ་བསམ་པ་གཅིག་པར་ངེས་ཏེ་མི་འགྱུར་ན། ངོ་བོ་ཡེ་ནས་རྒྱལ་བའི་སྐུ་གསུང་ཐུགས་ཀྱི་གསང་བ་གསུམ་གྱི་དོན་རྟགས་བསྟན་དཀའ་བའི་རང་བཞིན་དང་མཉམ་པའི་ཕྱིར་གྱིས་གཏན་ཚིགས་དེ་བས་ན། སྤྱི་བོ། ལྕེ་དང༌། སྙིང་ག་གསུམ་དུ་འབྲུ་གསུམ་བཀོད་པའི་འཕྲོ་འདུས་རྒྱལ་བའི་སྐུ་གསུང་ཐུགས་དང་དབྱེར་མི་ཕྱེད་པའི་རྡོ་རྗེའི་དམ་ཚིག་སྦྱིན་ཏེ་བྱིན་གྱིས་བརླབས་ནས་དམ་དཔོག་པར་བྱའོ། །དེ་ལྟར་སྒོ་གསུམ་སྐུ་གསུང་ཐུགས་དང་དབྱེར་མི་ཕྱེད་པའི་རྡོ་རྗེའི་དམ་ཚིག་འདི་ནི། གཞན་ནས་མ་བྱུང་སྟེ། སྐུ་གསུམ་ཡེ་ནས་རྡོ་རྗེའི་གསང་བ་གསུམ་དང་གཉིས་སུ་མེད་པའི་མཉམ་པ་ཆེན་པོའི་རང་བཞིན་གྱི་དབྱིངས་ནས་བྱུང་སྟེ་རང་ལས་ཤར་བའོ། །དེ་ལྟར་སྐུ་གསུང་ཐུགས་ཀྱི་དཀྱིལ་འཁོར་གསུམ་གྱི་དམ་ཚིག་མཆོག་གི་དོན་དེ་ནི་ངེས་པར་མཐོང་སྟེ་རྟོགས་པ་མངོན་དུ་གྱུར་ཞིང་སྒོ་གསུམ་རྡོ་རྗེ་གསུམ་དུ་གྲུབ་པར་གྱུར་ན་དེ་ཕན་ཆད་འཕོ་འགྱུར་ལས་གྲོལ་བས་གཉེན་པོས་འཇིག་པའི་དུས་མེད་པར་འབྲས་བུ་དང་བཅས་པར་ངེས་པ་ཉིད་དོ། །ཞེས་ལེགས་པར་བསྟན་ཞིང་བཀའ་སྩལ་ཏོ།།

གསུམ་པ་བླང་ཞིང་དམ་བཅའ་བའི་ཚིག་ནི།

གོང་གི ཡང་འདུས་པའི་ཚོགས་ཀྱིས་གསོལ་པ། རྒྱལ་མཆོག ཅེས་པ་ནས། ཉིད་དུ་སྦྱོར། །ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

ཡང་འདུས་པའི་ཚོགས་ཀྱིས་གསོལ་པ། རྒྱལ་མཆོག་སྐྱེས་བུ་ཁྱེད་ཅི་འདྲ། །དེ་འདྲ་ཁོ་ནར་སྤྱད་པར་བགྱི། །སྤྱོད་པ་བསམ་ཡས་རྨད་བྱུང་བ། །འགྲོ་ལ་ཕན་པའི་དོན་དུ་སྤྱད། །འཁོར་བའི་མཐའ་རིངས་འཇིག་རྟེན་པ།།

མ་བསྒྲལ་བ་ནི་བསྒྲལ་བར་བགྱི། །མ་གྲོལ་བ་ནི་གྲོལ་བར་བགྱི། །དབུགས་མ་ཕྱུང་བ་དབུགས་ཕྱུང་སྟེ།།

མྱ་ངན་འདས་པའི་ཞིང་ཁམས་སུ། །སྙིང་པོ་བྱང་ཆུབ་ཉིད་དུ་སྦྱར། །ཞེས་གསོལ་ཏོ།།

དེ་ནས་ཡང་འདུས་པའི་ཚོགས་རྣམས་ཀྱིས་དམ་ཚིག་བླང་བ་ལ་ནན་ཏན་དུ་ཞུས་ཤིང་སེམས་མཆོག་བསྐྱེད་པར་དམ་བཅའ་བའི་ཚིག་གསོལ་པ། དཔལ་རྡོ་རྗེ་སྲིན་པོ་རྒྱལ་མཆོག་སྐྱེས་བུ་ཁྱེད་ཉིད་ཅི་འདྲ་བ་དེ་འདྲ་ཁོ་ནར་ཡང་དག་པར་སྤྱད་པར་བགྱིའོ། །གྲངས་སམ་ངོ་བོའི་སྒོ་ནས་སྤྱོད་པ་བསམ་ཡས་པ་གདུལ་བྱའི་འདོད་པ་ལྟར་སྤྱོད་ཀྱང་རྣམ་པར་གྲོལ་བའི་ཐབས་མཆོག་ཏུ་གྱུར་པས་རྨད་དུ་བྱུང་བ་རྣམས་ཀྱང་འགྲོ་བ་ཀུན་ལ་ཕན་པའི་དོན་དུ་ཚུལ་བཞིན་དུ་སྤྱད་དོ། །འཁོར་བ་མཐའ་མེད་པ་༼༣༠༽ལྟར་དུ་ཡུན་རིངས་པོར་འཁྱམས་པའི་འཇིག་རྟེན་པ་འཁོར་བ་ལས་མ་བསྒྲལ་པ་རྣམས་ནི་བསྒྲལ་བར་བགྱི་ཞིང་མྱ་ངན་ལས་འདས་པའི་མཐའ་ལས་མ་གྲོལ་བ་རྣམས་ནི་གྲོལ་བར་བགྱི་ལ། མཐོང་སྒོམ་གྱི་ལམ་གྱིས་དབུགས་མ་ཕྱུང་བ་རྣམས་དབུགས་ཕྱུངས་ཏེ། སངས་རྒྱས་ཀྱི་གོ་འཕང་མི་གནས་པའི་མྱ་ངན་ལས་འདས་པའི་ཞིང་ཁམས་སུ་སྙིང་པོ་བྱང་ཆུབ་ཉིད་དུ་ཡོངས་སུ་སྦྱོར་བར་བགྱིའོ། །ཞེས་གསོལ་ཏོ།།

བཞི་པ་ལ་ཆུ་ནན་བྱ་བ་གཉིས་ཏེ། འཁོར་གྱིས་ཞུས་པ། ཆུ་ནན་བྱ་བའི་ཚིག་གོ །དང་པོ་ནི།

འོག་ནས། ཡང་འདུས་པའི་ཚོགས་ཀྱིས་གསོལ་པ། འདུ་འབྲལ་མེད་པའི། ཞེས་པ་ནས། གསོལ་ཏོ། །ཞེས་པའི་བར་གྱིས་བསྟན་ཏེ།

ཡང་འདུས་པའི་ཚོགས་ཀྱིས་གསོལ་པ། འདུ་འབྲལ་མེད་པ་ཆོས་ཀྱི་སྤུན། །རིགས་མི་འཐུན་པ་དམ་ཚིག་གཅིག །འདའ་བར་དཀའ་བས་བསྡུས་པས་ན། །དམ་ཚིག་ཅན་དུ་ནན་ཏན་མཛོད། །ཅེས་གསོལ་ཏོ།།

དེ་ནས་ཡང་འདུས་པའི་ཚོགས་རྣམས་ཀྱིས་དམ་ཚིག་གི་ཆུ་ནན་བྱ་བར་གསོལ་བ་བཏབ་པ།  བདག་ཅག་འདུ་འབྲལ་མེད་པའི་ཆོས་ཀྱི་སྤུན་དུ་གྱུར་པ ་རྣམས། ལྷ་ཀླུ་གནོད་སྦྱིན་སོགས་རིགས་མི་མཐུན་ན་ཡང་དམ་ཚིག་གཅིག་ཏུ་ངེས་ཏེ་འདའ་བར་དཀའ་བས་ཐ་ཚིག་གཅིག་གིས་བསྡུས་པས་ན། རྡོ་རྗེ་བདུད་རྩིའི་དམ་ཚིག་ཅན་དུ་ནན་ཏན་མཛོད་ལ་གཟུང་བར་གྱིས་ཤིག ཅེས་གསོལ་ཏོ།།

གཉིས་པ་ཆུ་ནན་བྱ་བའི་ཚིག་ནི།

དེ་ནས་ཡང་སྐྱེས་བུ། ཞེས་པ་ནས། དམ་པ་བྱིན་ནོ། །ཞེས་པའི་བར་གྱིས་བསྟན་ཏེ།

དེ་ནས་ཡང་སྐྱེས་བུ་ཆེན་པོ་དེས་ཡང་འདི་སྐད་ཅེས་བཀའ་སྩལ་ཏོ། །གསང་བ་གསུམ་གྱི་དམ་པ་རྣམས།།

ཁྱེད་ཀྱིས་རབ་ཏུ་བསླུས་གྱུར་ན། །དེ་ཀུན་ཁྲོས་ནས་ཁྲག་ཆེན་པོ། །ཉམས་པའི་སྙིང་ནས་དྲངས་ཏེ་འཐུང་།།

ཞེས་དམ་ཚིག་དམ་པ་བྱིན་ནོ།།

དེ་ནས་ཡང་སྐྱེས་བུ་ཆེན་པོ་དེས་དམ་ཆུ་བླུད་དེ་ནན་ཆགས་མཛད་པ་འདི་སྐད་ཅེས་བཀའ་སྩལ་ཏོ། །མནའ་བསྒག་པའི་ཚུལ་གྱིས་དམ་ཚིག་གི་ནན་ཏན་གདམས་ཏེ། དེ་ལྟར་སྐུ་གསུང་ཐུགས་ཀྱི་གསང་བ་གསུམ་གྱི་དམ་ཚིག་དམ་པ་རྣམས་ཁྱེད་ཀྱིས་འདས་ཏེ་རབ་ཏུ་བསླུས་པར་གྱུར་ན། དེ་ཀུན་ངེས་པར་ཁྲོས་ནས་ཁྲག་ཆེན་པོ་ཉམས་པའི་སྙིང་ནས་དྲངས་ཏེ་འཐུང་བར་འགྱུར་རོ། །ཨི་དན་ཏེ། ན་ར་ཀན། ཞེས་དམ་ཚིག་དམ་པ་བྱིན་ནོ།།

ལྔ་པ་དམ་ཚིག་བསྒྲགས་པ་ནི།

དེ་ནས་ཡང་སྐྱེས་བུ། ཞེས་པ་ནས། དམ་པ་བསྒྲགས་སོ། །ཞེས་པའི་བར་གྱིས་བསྟན་ཏེ།

དེ་ནས་ཡང་སྐྱེས་བུ་དམ་པ་དེས་བཀའ་སྩལ་པ། མ་འོངས་སངས་རྒྱས་བློ་ལྡན་ཁྱེད། །བླ་མེད་ཡེ་ཤེས་བསྐྱེད་པའི་ཕྱིར། །རྒྱུད་སྦྱོངས་གསང་བ་གསུམ་དུ་ཞུགས། །རང་གི་མེ་ལོང་ཉིད་ལ་ལྟོས། །གནས་གསུམ་ཉིད་དུ་བཀོད་པ་ཡི། །གསང་ཆེན་གསང་བ་རབ་གསང་བ། །མཐོང་བས་དེ་བཞིན་ཉིད་དུ་འགྱུར། །གཞན་མིན་རང་བྱུང་དེ་ཁོ་ན།། བློ་ཆུང་རྣམས་ལ་མ་སྨྲ་ཞིག །གལ་ཏེ་སྨྲས་པར་གྱུར་ན་ནི། །ཐ་ཚིག་དྲག་པོ་ཉམས་གྱུར་ནས།།

མེ་ཆེན་འབར་བའི་གནས་སུ་བསྲེག །ཅེས་དམ་ཚིག་དམ་པ་བསྒྲགས་སོ།།

དེ་ནས་ཡང་སྐྱེས་བུ་དམ་པ་དེས་དམ་ཚིག་བསྒྲགས་པ་བཀའ་སྩལ་པ། ཕྱི་མ་མ་འོངས་པའི་དུས་སུ་རྒྱལ་བ་སངས་རྒྱས་ཀྱི་རིགས་སུ་ངེས་པའི་བློ་དང་ལྡན་པ་ཁྱོད་རྣམས་ཀྱིས་ཐེག་པ་ཆེན་པོའི་དོན་ཇི་བཞིན་དུ་རྟོགས་ཤིང་བླ་ན་མེད་པའི་ཡེ་ཤེས་བསྐྱེད་པར་བྱ་བའི་ཕྱིར་དུ་ཤེས་པའི་རྒྱུད་སྦྱོང་སྟེ་གྲོལ་བར་གྱིས་ལ་གསང་བ་གསུམ་གྱི་དཀྱིལ་འཁོར་དུ་ཞུགས་ཏེ་རང་གི་མེ་ལོང་སེམས་ཉིད་འོད་གསལ་བའི་དོན་ལ་རིག་པའི་ཤེས་རབ་ཀྱིས་གསལ་བར་ལྟོས་ལ་དེའི་དོན་ཡང་དག་པར་སྒོམས་པར་གྱིས་ཤིག དེའི་ཡོན་ཏན་ནི་བཤད་པའི་འབྲུ་གསུམ་གནས་༼༣༡༽གསུམ་ཉིད་དུ་བཀོད་པ་ཡི་སྒོ་ནས་སྐུ་གསང་ཆེན་མ་ཧཱ་ཡོ་ག་གསུང་གསང་བ་ཨ་ནུ་ཡོ་ག་ཐུགས་རབ་ཏུ་གསང་བ་ཨ་ཏི་ཡོ་གའི་དམ་པའི་མཛོད་ཆེན་པོ་གསུམ་གྱི་དོན་ཡང་དག་པར་མཐོང་ཞིང་རྟོགས་པས་རིག་པ་གཞི་དབྱིངས་དེ་བཞིན་ཉིད་དུ་སོན་པར་འགྱུར་བ་ནི་འབྲས་བུ་གཞན་ལས་སྣང་བ་མིན་ཏེ་རང་བྱུང་གི་ཡེ་ཤེས་རང་ལས་ཤར་བའི་དེ་ཁོ་ན་ཉིད་འབའ་ཞིག་གོ །དེ་ལྟ་བུའི་གསང་བ་ཟབ་མོའི་དོན་འདི་ཉིད་བློོ་ཆུང་ཞིང་སྣོད་མིན་རྣམས་ལ་མ་སྨྲ་ཞིག་ཅེས་གསང་དོན་གཉེར་གཏད་པ་དང༌། གལ་ཏེ་སྨྲས་པར་གྱུར་ན་ནི་དམ་ལ་གནས་པའི་ཐ་ཚིག་དྲག་པོ་ཉམས་པར་གྱུར་ནས་མེ་ཆེན་འབར་བ་དམྱལ་བའི་གནས་སུ་སྲེག་པར་འགྱུར་རོ་ཞེས་ཉམས་པའི་སྐྱོན་རིག་པ་ལ་འཇལ་བར་མཛད་དོ། །འདི་ཉིད་ཐུན་མོང་མ་ཡིན་པའི་དབང་དུ་ན་ཐེག་པ་ཆེན་པོ་པས་གསང་བ་བྱང་ཆུབ་སེམས་ཀྱི་དབང་ཟབ་མོ་ཉིད་ཀྱི་དམ་ཚིག་བསྒྲགས་པ་སྟེ། ཕྱི་མའི་དུས་ཀྱི་རྒྱལ་བ་མ་འོངས་པའི་སངས་རྒྱས་བློ་དང་ལྡན་པ་ཁྱོད་རྣམས་ཐབས་ཟབ་མོའི་སྒོ་ནས་བླ་མེད་རིག་པའི་ཡེ་ཤེས་ཆེན་པོ་བསྐྱེད་ཅིང་གསལ་བར་བྱ་བའི་ཕྱིར་དུ་བྱེད་པ་སྡོམ་པའི་མན་ངག་དང་ཐིག་ལེ་དང་རྩ་ཡི་ཏིང་ངེ་འཛིན་ལ་རྩལ་སྦྱངས་པས་རྒྱུད་སྦྱོང་བར་གྱིས་ལ་གསང་བ་མཆོག་གི་དཀྱིལ་འཁོར་ཐབས་ཤེས་གཉིས་སུ་མེད་པའི་སྤྱོད་པ་གསུམ་དུ་ཞུགས་ལ་དེའི་སྒོ་ནས་རང་གི་རིག་པ་རང་གསལ་མེ་ལོང་ལྟ་བུའི་བདེ་མཆོག་དག་པའི་ཡེ་ཤེས་ཉིད་ལ་གསང་བའི་མིག་གིས་ལྟོས་ལ་བརྟགས་པར་གྱིས་ཤིག ཅེས་གདམས་པའོ། །དེའི་ཡོན་ཏན་ནི་རྡོ་རྗེ་པདྨ་དང་འཕྲད་པའི་དབུས་ཀྱི་ཆ་དང་གནས་གསུམ་ཉིད་དུ་ཉི་ཟླ་གཉིས་ཞུགས་པ་གྱེན་དུ་བསྐྱིལ་བས་བཀོད་པ་ཡི་སྒོ་ནས་ཉི་ཟླ་གཉིས་སུ་མེད་པའི་ངོ་བོ་གསང་ཆེན་ལྷག་པའི་ཀུན་རྫོབ་གསང་བ་མཉམ་པའི་དོན་དམ་རབ་ཏུ་གསང་བ་དབྱེར་མེད་པའི་བདེ་བ་ཆེན་པོ་ཤིན་ཏུ་མཐོང་བར་དཀའ་བའི་དོན་ཟབ་མོ་དེ་དག་རྟེན་ལ་བརྟེན་ནས་རང་ཤར་བར་མཐོང་བས་བརྟེན་ཙམ་ན་རང་རིག་དེ་བཞིན་ཉིད་གཞི་དབྱིངས་ཇི་བཞིན་པའི་ངོ་བོ་ཉིད་དུ་ཕེབས་པར་འགྱུར་བ་ནི་བདག་ཉིད་ཀྱི་ཕུང་པོ་དང་ཁམས་སྐྱེ་མཆེད་ཉིད་ལས་རང་ཤར་བས་གཞན་ནས་བཙལ་དགོས་པ་མིན་པར་རང་བྱུང་དེ་ཁོ་ན་ཉིད་དུ་ངེས་པའོ། །ཞེས་སོ། །དོན་དེ་ཡི་གསང་བ་གཉེར་གཏད་དང་ཉེས་པ་གོང་དང་རྗེས་སུ་མཐུན་ནོ། །ཞེས་དམ་ཚིག་དམ་པ་བསྒྲགས་སོ།།

དྲུག་པ་དཀྱིལ་འཁོར་བསྟན་པ་ལ་གཉིས་ཏེ། ཞུས་པ་དང༌། ལན་ནོ། །དང་པོ་ནི།

གོང་གི་སྔར་གྱི་འཕྲོར། དེ་ནས་ཡང་༼༣༢༽འདུས་པའི་ཚོགས་རྣམས་ཀྱིས་གསོལ་པ། བདེ་ཆེན། ཞེས་པ་ནས། གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཡང་འདུས་པའི་ཚོགས་རྣམས་ཀྱིས་གསོལ་པ། བདེ་ཆེན་ལྷུན་གྲུབ་གཞལ་ཡས་འདིར། །རྣམ་པར་ཐར་པའི་སྒོ་བཞི་ནས། །ཚད་མེད་ཐུགས་རྗེའི་སྒོ་ཕྱེ་ནས། །བྱམས་པའི་ཞལ་བཟང་བསྟན་དུ་གསོལ། །ཞེས་གསོལ་ཏོ།།

དེ་ནས་གསང་བའི་སྒོ་དབྱེ་བར་གསོལ་བ་བཏབ་པའི་ཕྱིར་ཡང་འདུས་པའི་ཚོགས་རྣམས་ཀྱིས་གསོལ་པ། རྩ་བ་བྱང་ཆུབ་ཀྱི་སེམས་བདེ་བ་ཆེན་པོ་རང་བཞིན་ལྷུན་གྱིས་གྲུབ་པ་ཡེ་ཇི་བཞིན་པའི་གཞལ་ཡས་ཁང་ཆེན་པོ་འདིར། སྟོང་པ་ཉིད། མཚན་མ་མེད་པ། སྨོན་མ་མེད་པ། རང་བཞིན་འོད་གསལ་བའི་རྣམ་པར་ཐར་པའི་སྒོ་བཞི་ནས་ངེས་པར་འཇུག་ན། ཚད་མེད་བཞིའི་ཐུགས་རྗེའི་སྒོ་བཞི་ཕྱེ་ནས། བྱམས་པའི་ཞལ་བཟང་གི་དཀྱིལ་འཁོར་དམ་པ་ཡང་དག་པར་བསྟན་དུ་གསོལ། ཞེས་སྒོ་ཕྱེ་ལ་དོན་གྱི་ལྷ་མཆོག་གི་ཞལ་བསྟན་པར་གསོལ་ཏོ།།

གཉིས་པ་ལན་ནི།

དེ་ནས་སྐྱེས་བུ། ཞེས་པ་ནས། དབྱེ་བར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ནས་སྐྱེས་བུ་ཆེན་པོ་དེས་འདི་སྐད་ཅེས་བཀའ་སྩལ་ཏོ། །ཨེ་མའོ་སྐལ་ལྡན་འདུས་པའི་ཚོགས། །འཁོར་བའི་ལམ་སྒོ་ཀུན་བཅད་དེ། །བྱང་ཆུབ་ལམ་ལ་གཟུད་པའི་ཕྱིར། །རྡོ་རྗེ་གསང་སྒོ་དབྱེ་བར་བྱ། །ཞེས་གསུངས་ཏེ། ཞལ་འཛུམ་པའི་མདངས་ལས་འོད་ཟེར་བྱུང་བས། དོན་ལ་ངེས་པར་འཇུག་པའི་སྒོ་བྱེ་བར་གྱུར་ཏོ།།

གནང་བའི་ལན་དུ་ཞལ་གྱིས་འཆེས་པ་གང་སྙམ་པ་ལ། དེ་ནས་ཡང་སྐྱེས་བུ་ཆེན་པོ་དེས། འདི་སྐད་ཅེས་བཀའ་སྩལ་ཏོ། །ཨེ་མའོ་ཞེས་ཁྲོ་བོ་ཆེན་པོས་བོས་ནས། སྐལ་པ་དང་ལྡན་པས་འདུས་པའི་ཚོགས་རྣམས། རིགས་ལྔ་ཡབ་ཡུམ་གྱི་སྙིང་པོ་འབྲུ་བཅུའི་འོད་དང༌། སྙིང་པོ་ལ་གནས་པའི་འོད་ཀྱིས། རང་རྒྱུད་ཀྱི་འོད་དང་རང་རང་གི་ས་བོན་གྱི་ཡི་གེ་བསྲེགས་པས་འཁོར་བར་ལྷུང་བའི་ལམ་སྒོ་ཀུན་བཅད་དེ་བཀག་ནས། ཡང་དག་པའི་དོན་ཐུན་མོང་མ་ཡིན་པ་བྱང་ཆུབ་ཆེན་པོའི་ལམ་མཆོག་དམ་པ་དབང་གི་འཇུག་སྒོ་ལ་གཟུད་ཅིང་གཞུག་པར་བྱ་བའི་ཕྱིར་དུ་རྡོ་རྗེ་ཐེག་པའི་ཟབ་མོ་དབང་གི་གསང་སྒོ་ངེས་པར་དབྱེ་ཞིང་བསྟན་པར་བྱའོ། །ཞེས་གསུངས་ཏེ་ཞལ་གྱིས་བཞེས་པས་སྒྲིབ་པ་དང་བྲལ་བར་ཡང་འགྱུར་རོ། །དེ་ནས་ཁྲོ་བོ་ཆེན་པོ་ཐབས་དང་ཤེས་རབ་འབྲེལ་བས་ཞལ་འཛུམ་པའི་མདངས་དང་བཅས་པ་ལས་སྦྱོར་བའི་རོལ་ཐབས་ལ་བརྟེན་ནས། ཉི་ཟླ་བྱང་ཆུབ་ཀྱི་སེམས་འོད་ཟེར་དང་བཅས་པ་འཐོན་ཏེ་ཕྱུང་ནས་འཁོར་ལ་བསྟིམས་པས། དེའི་བྱིན་རླབས་ཀྱིས་སྒྲིབ་པའི་ས་བོན་སྦྱངས་ཏེ། དོན་ལ་ངེས་པར་འཇུག་པའི་སྒོ་དབྱེ་སྟེ། གཉིས་མེད་ཀྱི་ངོ་བོ་རང་ལས་ཤར་བར་གྱུར་ཏོ། །དེ་ནི་དབང་མཆོག་ཟབ་མོའི་ཡོན་ཏན་ནོ།།

གཉིས་པ་ (པོད་ 1 ཨང་། 555 ལས་འཕྲོས།) དཀྱིལ་འཁོར་དུ་ཞུགས་ནས་དབང་ཐོབ་པའི་ཡོན་ཏན་ལ་གཉིས་ཏེ། དབང་ཐོབ་པའི་ཡོན་ཏན་དངོས། སྟོན་པ་ལ་དྲིན་ལན་ཕུལ་བའོ། །དང་པོ་ལ་ལྔ་སྟེ། འཁོར་རྣམས་སྐལ་པ་བཞིན་རྣལ་འབྱོར་ལྔ་ཐོབ་པའི་ཡོན་ཏན། མིང་གི་དབང་༼༣༣༽བསྐུར་བས་གྲགས་པའི་ཡོན་ཏན། སངས་རྒྱས་སུ་ལུང་བསྟན་པའི་ཡོན་ཏན། བྱིན་རླབས་གཞན་ལ་སྣང་བའི་ཡོན་ཏན། རྟོགས་པ་གོང་དུ་འཕེལ་བའི་ཡོན་ཏན་ནོ། །དང་པོ་ནི།

འོག་ནས། ལང་ཀའི་བདག་པོ། ཞེས་པ་ནས། རྫོགས་པའི་རྣལ་འབྱོར་ལ་གནས་པ་ཤ་སྟག་ཏུ་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདུས་པའི་ཚོགས་དེ་དག་འདི་ལྟར་གསང་བ་གསུམ་གྱི་དམ་པར་ཞུགས་པ་དེའི་ཚེ་དེའི་དུས་ན། ལ་ལ་ནི་འདུན་པའི་རྣལ་འབྱོར་ལ་གནས་པ་ཤ་སྟག་ཏུ་གྱུར་ཏོ། །ལ་ལ་ནི་རིགས་ཆེན་འབྱེད་པའི་རྣལ་འབྱོར་ལ་གནས་པ་ཤ་སྟག་གོ །ལ་ལ་ནི་དབུགས་ཆེན་འབྱིན་པའི་རྣལ་འབྱོར་ལ་གནས་པ་ཤ་སྟག་ཏུ་གྱུར་ཏོ། །ལ་ལ་ནི་ལུང་ཆེན་ཐོབ་པའི་རྣལ་འབྱོར་ལ་གནས་པ་ཤ་སྟག་ཏུ་གྱུར་ཏོ། །ལ་ལ་ནི་རྩལ་ཆེན་རྫོགས་པའི་རྣལ་འབྱོར་ལ་གནས་པ་ཤ་སྟག་ཏུ་གྱུར་ཏོ།།

ལང་ཀའི་བདག་པོ། དྲེགས་པའི་འཁོར་འདུས་པའི་ཚོགས་དེ་དག་ཐམས་ཅད་འདི་ལྟར་གསང་བ་གསུམ་གྱི་དམ་ཚིག་དམ་པར་ཞུགས་ནས་དབང་ཐོབ་པ་དེའི་ཚེ་དེའི་དུས་ན། འཁོར་དེ་དག་ཀྱང་སྐལ་པ་དང༌། ཤེས་རབ་ཀྱི་མཐོ་དམན་ཡོད་པའི་དབང་གི་རིམ་པའི་སྐལ་པ་ཡང་མཐོ་དམན་དུ་ཐོབ་པར་གྱུར་ཏེ། ལ་ལ་ནི་དང་པོ་འདུན་པའི་རྣལ་འབྱོར་ལ་གནས་པས་ཕྱིའི་ཕན་པའི་དབང་འབའ་ཞིག་བསྐུར་ཏེ་ས་དེ་ཉིད་ལ་གནས་པ་ཤ་སྟག་ཏུ་གྱུར་ཏོ། །ཡང་ན་གླེགས་བམ་བཅུ་གཉིས་ཀྱི་དབང་ངོ༌། །ལ་ལ་ནི་གཉིས་པ་རིགས་ཆེན་འབྱེད་པའི་རྣལ་འབྱོར་ལ་གནས་པས་ནང་གི་ནུས་པའི་དབང་ལྔ་བསྐུར་ཏེ་ས་ཡང་དེ་ཉིད་ལ་གནས་པ་ཤ་སྟག་ཏུ་གྱུར་ཏོ། །ཡང་ན་ཉི་ཟླའི་དབང་ངོ༌། །ལ་ལ་ནི་གསུམ་པ་དབུགས་ཆེན་འབྱིན་པའི་རྣལ་འབྱོར་ལ་གནས་པས་གསང་བ་ཐིག་ལེ་ཞུ་བའི་དབང་བསྐུར་ཏེ་ས་ཡང་དེ་ཉིད་ལ་གནས་པ་ཤ་སྟག་ཏུ་གྱུར་ཏོ། །ཡང་ན་རིན་ཆེན་བདུན་གྱི་དབང་ངོ༌། །ལ་ལ་ནི་རྣལ་འབྱོར་བཞི་པ་ལུང་ཆེན་ཐོབ་པའི་རྣལ་འབྱོར་ལ་གནས་པས་ཤེས་རབ་ཡེ་ཤེས་ཀྱི་དབང་བསྐུར་ཏེ་ས་ཡང་དེ་ཉིད་ལ་གནས་པ་ཤ་སྟག་ཏུ་གྱུར་ཏོ། །ཡང་ན་བཀྲ་ཤིས་རྫས་བརྒྱད་ཀྱི་དབང་ངོ༌། །ལ་ལ་ནི་ལྔ་པ་རྩལ་ཆེན་རྫོགས་པའི་རྣལ་འབྱོར་ལ་གནས་པས་བདེ་བ་ཆེན་པོ་དབང་ལྔ་པ་ཐོབ་པར་གྱུར་ཏེ་ས་ཡང་དེ་ཉིད་ལ་གནས་པ་ཤ་སྟག་ཏུ་གྱུར་ཏོ། །ཡང་ན་རིན་པོ་ཆེའི་ཏོག་སྟོང་འབར་བའི་དབང་ངོ༌། །དེ་ལྟ་བས་ན་རྗེས་སུ་འཇུག་པའང་དེ་བཞིན་ནོ། །ཞེས་གཞན་དག་འཆད་ན། འདིར་དབང་འདྲ་ཡང་ཐོབ་པའི་རིམ་པས་འབྲས་བུ་ལམ་ལྔ་སོ་སོ་བར་འཇལ་ཏོ།།

གཉིས་པ་མིང་གི་དབང་བསྐུར་བས་གྲགས་པའི་ཡོན་ཏན་ནི།

དེ་ལྟར་ན་དེའི་ཚེ། ཞེས་པ་ནས། སྲུང་བའི་བྱ་བ་བྱེད་དོ། །ཞེས་པའི་བར་གྱིས་བསྟན་ཏེ།

དེ་ལྟར་ན་དེའི་ཚེ་དེའི་དུས་ཉིད་ན། འདུས་པའི་ཚོགས་ཕལ་མོ་ཆེ་དེ་དག་ནི་རྡོ་རྗེའི་མིང་གིས་དབང་བསྐུར་བས་དབང་བསྐུར་ཏེ། ལ་ལ་ནི་རྡོ་རྗེ་མྱུ་གུ་ཞེས་བྱ་བར་གྲགས་ཤིང་གྲགས་པར་གྱུར་ཏོ། །དེ་བཞིན་དུ་ལ་ལ་ནི་ཆོས་ཀྱི་མྱུ་གུ་ཞེས་བྱ་བར་གྲགས་སོ། །ལ་ལ་ནི་རིན་པོ་ཆེའི་མྱུ་གུ་ཞེས་བྱ་བར་གྲགས་སོ། །ལ་ལ་ནི་ཟླ་བའི་རྩལ་ཞེས་བྱ་བར་གྲགས་སོ། །ལ་ལ་ནི་ཉི་མའི་མདངས་ཞེས་བྱ་བར་གྲགས་སོ། །ལ་ལ་ནི་སེངྒེའི་རྩལ་ཞེས་བྱ་བར་གྲགས་སོ། །ལ་ལ་ནི་ནམ་མཁའི་རྡོ་རྗེ་ཞེས་བྱ་བར་གྲགས་སོ། །དེ་དག་ལས་མ་རུངས་པ་ཁ་ཅིག་ནི། ལ་ལ་ནི་རྡོ་རྗེ་སྤྱང་ཀི་ཞེས་བྱ་བར་གྲགས་སོ། །ལ་ལ་ནི་རྡོ་རྗེ་དུས་འཚམས་ཞེས་བྱ་བར་གྲགས་སོ། །ལ་ལ་ནི་རྡོ་རྗེ་ཕྱོགས་འདུལ་ཞེས་བྱ་བར་གྲགས་སོ། །ལ་ལ་ནི་རྡོ་རྗེ་དུར་ཁྲོད་ཅེས་བྱ་བར་གྲགས་སོ། །རུ་དྲ་ནག་པོ་དེ་ཁོ་ན་ཉིད་ནི་རྡོ་རྗེ་རོ་ལངས་དུར་ཁྲོད་ཀྱི་བདག་པོ་ཞེས་བྱ་བ་དེར་གྲགས་ཏེ། བསྐལ་པ་ཆེན་པོའང་བཟང་པོའི་ཡུན་དུ་གནས་ནས། རྣལ་འབྱོར་ཡོངས་ཀྱི་མགོན་པོ་དགེ་བསྙེན་ལེགས་ལྡན་ནག་པོ་ཞེས་བྱ་བར་གྱུར་ནས། གང་དག་ཆོས་བསྲུང་བ་རྣམས་ཀྱིས་སྲུང་བའི་བྱ་བ་བྱེད་དོ།།

དེ་ལྟར་ན་དབང་ཐོབ་པ་དེའི་ཚེ་ས་ནོན་པ་དེའི་དུས་ཉིད་ན་སྐབས་དེ་ཁོ་ནར་འདུས་པའི་ཚོགས་ཕལ་མོ་ཆེ་དེ་དག་ལ་ནི་རྡོ་རྗེ་མིང་གིས་དབང་བསྐུར་བས་དབང་བསྐུར་ཏེ་རང་རང་གི་ཡི་དམ་ལྷ་ཡི་རིགས་དང༌། ལས་དང་མཐུ་ལས་བཏགས་པ་ཐ་དད་པར། ལ་ལ་ནི་རྡོ་རྗེ་མྱུ་གུ་ཞེས་བྱ་བར་གྲགས་༼༣༤༽པར་གྱུར་ཏོ། །དེ་བཞིན་དུ་ལ་ལ་ནི་ཆོས་ཀྱི་མྱུ་གུ་ཞེས་བྱ་བར་གྲགས་སོ། །ལ་ལ་ནི་རིན་པོ་ཆེའི་མྱུ་གུ་ཞེས་བྱ་བར་གྲགས་སོ། །ལ་ལ་ནི་ཟླ་བའི་རྩལ་ཞེས་བྱ་བར་གྲགས་སོ། །ལ་ལ་ནི་ཉི་མའི་མདངས་ཞེས་བྱ་བར་གྲགས་སོ། །ལ་ལ་ནི་སེང་གེའི་རྩལ་ཞེས་བྱ་བར་གྲགས་སོ། །ལ་ལ་ནི་ནམ་མཁའི་རྡོ་རྗེ་ཞེས་བྱ་བར་གྲགས་སོ། །ཀུན་མཁྱེན་དམ་པ་རིན་པོ་ཆེས་འདི་དག་བདུན་ནི་གསལ་བ་མེད་ཀྱང་གོང་གི་སྡེ་དཔུང་བདུན་གྱི་གཙོ་བོ་ཡིན་པར་དཔྱད་གསུངས། འཁོར་དེ་དག་ལས་མ་རུངས་པ་ཤིན་ཏུ་གདུག་ཅིང་དྲག་རྩལ་ཅན་དུ་གཏོགས་པ་ཁ་ཅིག་ནི། ལ་ལ་ནི་རྡོ་རྗེ་སྤྱང་ཀི་ཞེས་བྱ་བར་གྲགས་སོ། །ལ་ལ་ནི་རྡོ་རྗེ་དུས་མཚམས་ཞེས་བྱ་བར་གྲགས་སོ། །ལ་ལ་ནི་རྡོ་རྗེ་ཕྱོགས་འདུལ་ཞེས་བྱ་བར་གྲགས་སོ། །ལ་ལ་ནི་རྡོ་རྗེ་དུར་ཁྲོད་ཞེས་བྱ་བར་གྲགས་སོ། །ལ་ལ་ནི་རྡོ་རྗེ་ཀིངྐ་ར་ལ་སོགས་པ་ཐ་དད་པ་སྟེ། གིང་བཅོ་བརྒྱད་ཀྱི་མཚན་ལ་སོགས་པ་རྡོ་རྗེའི་མིང་ཐ་དད་དུ་བཏགས་སོ། །རུ་ཏྲ་ནག་པོ་དེ་ཁོ་ན་ཉིད་ནི་ལེའུ་སྔ་མར་ཟུར་སྨོས་པ་ལྟར་བསྒྲལ་བ་ལས་སླར་གསོས་པས་མཚན་ངེས་པར་རྡོ་རྗེ་རོ་ལངས་དུར་ཁྲོད་ཀྱི་བདག་པོ་ཞེས་བྱ་བར་གྲགས་ཏེ། འཇིག་རྟེན་དུ་བསྐལ་པ་ཆེན་པོ་བཟང་པོའི་ཞིང་འདིའི་ཡུན་དུ་གནས་ནས། སྔགས་འཆང་རྣམས་ཀྱི་རྡོ་རྗེའི་སྤུན་དུ་བྱེད་དེ། ནང་ལྟར་ན་རྩལ་ཆེན་རྫོགས་པ་ལ་ཕྱི་ལྟར་ན་རྣལ་འབྱོར་ཡོངས་ཀྱི་མགོན་པོ་དགེ་བསྙེན་ལེགས་ལྡན་ནག་པོ་ཞེས་བྱ་བར་གྱུར་ནས་བསྟན་པ་བསྲུང་བའི་ལས་མཛད་དེ་གང་དག་ཆོས་སྲུང་བ་རྣམས་ཀྱི་སྲུངས་མའི་བྱ་བ་བྱེད་དོ།།

གསུམ་པ་སངས་རྒྱས་སུ་ལུང་བསྟན་པའི་ཡོན་ཏན་ནི།

བསྐལ་པ་དེའི། ཞེས་པ་ནས། ཐོབ་པར་གྱུར་ཏོ། །ཞེས་པའི་བར་གྱིས་བསྟན་ཏེ།

བསྐལ་པ་དེའི་ཕྱི་མ་ལ་འོག་གི་ཕྱོགས་ཀྱི་འཇིག་རྟེན་གྱི་ཁམས་ཐལ་བས་ཁེབས་པ་ཞེས་བྱ་བར། དེ་བཞིན་གཤེགས་པ་ཐལ་བའི་དབང་པོའི་དབྱངས་ཞེས་བྱ་བར་རྫོགས་པར་སངས་རྒྱས་པར་འགྱུར་རོ།།

ཞེས་ལུང་བསྟན་པ་ཐོབ་པར་གྱུར་ཏོ།།

ད་ལྟའི་བསྐལ་པ་འདི་རྫོགས་པ་དང་སློབ་པའི་ལམ་མཐར་ཕྱིན་ནས་དེའི་ཕྱི་མ་ལ་འོག་གི་ཕྱོགས་ཀྱི་འཇིག་རྟེན་གྱི་ཁམས་ཐལ་བས་ཁེབས་པ་ཞེས་བྱ་བར། དེ་བཞིན་གཤེགས་པ་མཚན་ཐལ་བའི་དབང་པོའི་དབྱིངས་ཞེས་བྱ་བར་མངོན་པར་རྫོགས་པར་སངས་རྒྱས་པར་འགྱུར་རོ། །ཞེས་ལུང་བསྟན་པ་ཐོབ་པར་གྱུར་ཏོ།།

བཞི་པ་བྱིན་རླབས་གཞན་ལ་སྣང་བའི་ཡོན་ཏན་ལ་གཉིས་ཏེ། བྱིན་གྱིས་བརླབས་ཀྱི་ཆོ་འཕྲུལ། ཆོས་སྣང་བའི་ཆོ་འཕྲུལ་ལོ། །དང་པོ་ནི།

ལང་ཀའི་བདག་པོ། ཞེས་པ་ནས། བསྟོད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེའི་ཚེ་དེའི་དུས་ན། འཇིག་རྟེན་གྱི་ཁམས་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་པར་གྱུར་ཏོ། །འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། ཤིག རབ་ཏུ་ཤིག ཀུན་ཏུ་རབ་ཏུ་ཤིག་གོ །ལྡེག རབ་ཏུ་ལྡེག ཀུན་ཏུ་རབ་ཏུ་ལྡེག་གོ །འུར། རབ་ཏུ་འུར། ཀུན་ཏུ་རབ་ཏུ་འུར་རོ། །ཆེམ། རབ་ཏུ་ཆེམ། ཀུན་ཏུ་རབ་ཏུ་ཆེམ་མོ། །མཐའ་མཐོ་ན་དབུང་དམའ་འོ། །ཤར་མཐོ་ན་ནུབ་དམའ། ནུབ་མཐོ་ན་ཤར་དམའ། བྱང་མཐོ་ན་ལྷོ་དམའ། ལྷོ་མཐོ་ན་བྱང་དམའ་བར་གྱུར་ཏོ། །འཇིག་རྟེན་པ་ཀུན་ཀྱང་ངོ་མཚར་དུ་གྱུར་ཏེ་མངོན་པར་བསྟོད་དོ།།

ལང་ཀའི་བདག་པོ། དེ་ལྟར་ཐར་པ་འཁོར་བཅས་ལ་མིང་གིས་དབང་བསྐུར་ཞིང་ལུང་བསྟན་ཐོབ་པ་དེའི་ཚེ་དེའི་དུས་ན། དེ་ཁོ་ནའི་བྱིན་རླབས་ཀྱིས་ཕྱི་ནང་རྒྱུད་གཅིག་གམ་ཐ་དད་ཀྱི་ཚུལ་དུ་གཞན་ལའང་ཆོ་འཕྲུལ་རྣམ་པར་སྣང་སྟེ། ཕྱི་ལྟར་ན་འཇིག་རྟེན་གྱི་ཁམས་ཕྱོགས་ཆ་རྣམ་པ་༼༣༥༽དྲུག་ཏུ་ཆུང་ངུར་གཡོས། འབྲིང་རབ་ཏུ་གཡོས། ཆེན་པོར་ཀུན་ཏུ་རབ་ཏུ་གཡོས་པར་གྱུར་ཏེ། ནང་ལྟར་ན། འདུན་པ་སེམས་པའི་རྣལ་འབྱོར་ལ་གཡོ་ཐོབ་བརྟན་གསུམ་དུ་གྱུར་ཏོ། །དེ་བཞིན་དུ་འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏེ་རིགས་ཆེན་འབྱེད་པའི་རྣལ་འབྱོར་ལ་གཡོ་ཐོབ་བརྟན་གསུམ་དུ་གྱུར་ཏོ། །ལྡེག་རབ་ཏུ་ལྡེག ཀུན་ཏུ་རབ་ཏུ་ལྡེག་སྟེ་དབུགས་ཆེན་འབྱིན་པའི་རྣལ་འབྱོར་ལ་གཡོ་ཐོབ་བརྟན་གསུམ་དུ་གྱུར་ཏེ་སྔར་བས་ལྷག་གོ །འུར། རབ་ཏུ་འུར། ཀུན་ཏུ་རབ་ཏུ་འུར་ཏེ་ལུང་ཆེན་ཐོབ་པའི་རྣལ་འབྱོར་ལ་གཡོ་ཐོབ་བརྟན་གསུམ་དུ་གྱུར་ཏེ་གོང་དུ་འཕར་རོ། །ཆེམ། རབ་ཏུ་ཆེམ། ཀུན་ཏུ་རབ་ཏུ་ཆེམ་སྟེ་རྩལ་ཆེན་རྫོགས་པའི་རྣལ་འབྱོར་ལ་གཡོ་ཐོབ་བརྟན་གསུམ་དུ་གྱུར་ཏེ་ཡེ་གསལ་གྱི་ངང་དུ་མཉམ་མོ། །དེ་བཞིན་དུ་ཕྱི་ལྟར་ན། མཐའ་མཐོ་ན་དབུས་དམའོ། །དབུས་མཐོ་ན་མཐའ་དམའོ། །ཤར་མཐོ་ན་ནུབ་དམའ། ནུབ་མཐོ་ན་ཤར་དམའ། བྱང་མཐོ་ན་ལྷོ་དམའ། ལྷོ་མཐོ་ན་བྱང་དམའ་བར་དངོས་སུ་སྣང་བར་གྱུར་ཏོ། །ནང་ལྟར་ན་དངོས་པོ་རྣམས་ཀྱི་དེ་ཁོ་ན་ཉིད་ཡང་དག་པའི་མཐའ་མཐོ་ན་ཕྱིན་ཅི་ལོག་གི་དབུས་དམའོ། །ཡང་དག་པའི་དབུས་མཐོ་ན་མ་རིག་པའི་མཐའ་དམའོ། །ཡེ་ཤེས་ཤར་བའི་ཕྱོགས་མཐོ་ན་མ་རིག་པ་ནུབ་པའི་ཕྱོགས་དམའོ། །ཉོན་མོངས་པ་ནུབ་པའི་ཕྱོགས་མཐོ་ན་ཡེ་ཤེས་ལ་དམིགས་པའི་ཤར་དམའོ། །སྒྲིབ་པ་བྱང་བའི་ཕྱོགས་མཐོ་ན་ཡོན་ཏན་ལ་རྟོག་པའི་ལྷོ་དམའོ། །ཡོན་ཏན་རྒྱས་པའི་ལྷོ་མཐོ་ན་སྒྲིབ་པའི་བྱང་དམའ་བར་གྱུར་ཏོ། །ལྟས་ཆེན་པོ་དེ་ཡིས་འཇིག་རྟེན་པ་ཀུན་ཀྱང་ངོ་མཚར་དུ་གྱུར་ཏེ། དྲེགས་པ་འཁོར་བཅས་ལ་མངོན་པར་བསྟོད་དེ་ཐེག་པ་ཆེན་པོར་སེམས་བསྐྱེད་དོ།།

གཉིས་པ་ཆོས་སྣང་བའི་ཆོ་འཕྲུལ་ནི།

ལྷ་དང་བཅས་པའི། ཞེས་པ་ནས། ཤ་སྟག་ཏུ་གྱུར་ཏོ། །ཞེས་པའི་བར་གྱིས་བསྟན་ཏེ།

ལྷ་དང་བཅས་པའི་འཇིག་རྟེན་པ་ཁ་ཅིག་ནི། དེ་ཁོ་ན་ཉིད་གསང་བ་དམ་པ་ལ་རྗེས་སུ་ཡི་རངས་བར་གྱུར་ཏོ། །ཁ་ཅིག་ནི་མ་སྐྱེས་པའི་ཆོས་ལ་བཟོད་པ་ཐོབ་པར་གྱུར་ཏོ། །ཁ་ཅིག་ནི་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བར་རྣམ་པར་དག་གོ །ཁ་ཅིག་ནི་ཕྱིར་མི་ལྡོག་པའི་ས་ལ་གནས་པར་གྱུར་ཏོ། །ཁ་ཅིག་ནི་ལུང་བསྟན་པ་ཐོབ་པ་ཤ་སྟག་ཏུ་གྱུར་ཏོ།།

ཆོས་སྣང་བའི་ཡོན་ཏན་གྱིས་ལྷ་དང་བཅས་པའི་འཇིག་རྟེན་པ་ལམ་ལ་གནས་པ་ཁ་ཅིག་ནི། དེ་ཁོ་ན་ཉིད་གསང་བ་དམ་པ་ལ་རྗེས་སུ་ཡི་རངས་ཏེ་རྣལ་འབྱོར་དང་པོ་ཐོབ་པར་གྱུར་ཏོ། །ཁ་ཅིག་ནི་ཐེག་པ་ཆེན་པོའི་དོན་ཟབ་མོ་ལ་མི་སྡངས་པར་མ་སྐྱེས་པའི་ཆོས་ལ་བཟོད་པ་ཐོབ་སྟེ་སྦྱོར་ལམ་པར་གྱུར་ཏོ། །ཁ་ཅིག་ནི་མི་ཤེས་པའི་སྒྲིབ་པ་དག་སྟེ་བདེན་པ་མཐོང་ནས་དབུགས་ཆེན་ཕྱིན་པར་གྱུར་ཏེ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །ཁ་ཅིག་ནི་དེའི་༼༣༦༽དོན་ལ་གོམས་པ་རྙེད་ནས་མཚན་མ་ལ་སོགས་པར་ཕྱིར་མི་ལྡོག་པའི་ས་ལ་གནས་ཏེ་བསྒོམ་ལམ་པར་གྱུར་ཏོ། །ཁ་ཅིག་ནི་མངོན་དུ་སངས་རྒྱས་པའི་ལུང་བསྟན་པ་ཐོབ་ནས་རྩལ་ཆེན་རྫོགས་པ་ཤ་སྟག་ཏུ་གྱུར་ཏོ།།

ལྔ་པ་རྟོགས་པ་གོང་དུ་འཕེལ་བའི་ཡོན་ཏན་ནི།

དེའི་ཚེ། ཞེས་པ་ནས། ཤར་བ་སྙམ་མོ། །ཞེས་པའི་བར་གྱིས་བསྟན་ཏེ།

དེའི་ཚེའི་དེའི་དུས་ན། རུ་དྲ་ཐར་པ་ནག་པ་ལ་སོགས་པ་མིའི་ཐོད་པ་ཅན་མ་རུངས་པ་རྣམས། སྐྱེས་བུ་ཆེན་པོ་རྡོ་རྗེ་མ་རུངས་པ་དེ་ལ། ལུས་ཀྱི་བག་བཞི་ས་ལ་ཕབ་པའི་ཕྱག་རྣལ་འབྱོར་ཀྱི་ལུགས་སུ་བྱས་ནས། ཐལ་མོ་སྦྱར་སྤྱི་བོས་བཏུད་ནས་འདི་སྐད་ཅེས་གསོལ་ཏོ། །ཨ་ཧོ་སུཀྴཾ་བརྱ་དེ་བ་ཤི་ཤི ཨེ་མའོ་སྐྱེས་བུ་ཆེན་པོ་གཡོ་བ་ཕུན་སུམ་ཚོགས་པ་བྱུང་ངོ་། །ཆོས་ཉིད་ཀྱི་བྱིན་རླབས་ལགས་སམ། གཟུགས་ཕུན་སུམ་ཚོགས་པ་བྱུང་ངོ་། །གཟུགས་གནས་སུ་དག་གམ། སྙིང་རྗེའི་གཟུགས་ལགས་སམ། སྒྲ་ཕུན་སུམ་ཚོགས་པ་བྱུང་ངོ་། །སྒྲ་གནས་སུ་དག་གམ། ཤེས་རབ་ཀྱི་སྒྲ་ལགས་སམ། དྲི་ཕུན་སུམ་ཚོགས་པ་བྱུང་ངོ་། །དྲི་གནས་སུ་དག་གམ། བྱང་ཆུབ་སེམས་ཀྱི་དྲི་ལགས་སམ། རོ་ཕུན་སུམ་ཚོགས་པ་བྱུང་ངོ་། །རོ་གནས་སུ་དག་གམ། ཏིང་ངེ་འཛིན་གྱི་རོ་ལགས་སམ། རེག་ཕུན་སུམ་ཚོགས་པ་བྱུང་ངོ་། །རེག་གནས་སུ་དག་གམ། དམ་ཚིག་གི་རེག་ལགས་སམ། ཚོར་བ་ཕུན་སུམ་ཚོགས་པ་བྱུང་ངོ་།།

ཚོར་བ་གནས་སུ་དག་གམ། ཚོར་བ་བཏང་སྙོམས་ལགས་སམ། བདག་ཅག་ནི་སྔོན་བས་མཐུ་རྩལ་སྐྱེས་པ་སྙམ་བགྱིད་དོ། །རྫུ་འཕྲུལ་སྐྱེས་པ་སྙམ་བགྱིད་དོ། །དབང་ཐོབ་པ་སྙམ་མོ། །རིག་པ་ཤར་བ་སྙམ་མོ།།

དེ་ལྟར་བྱིན་རླབས་ཀྱི་ཆོ་འཕྲུལ་ཆོས་སྣང་བའི་ཡོན་ཏན་ཐོབ་པ་དེའི་ཚེ་དེའི་དུས་ན། རུ་ཏྲ་ཐར་པ་ནག་པོ་ལ་སོགས་པ་དྲེགས་པ་འཁོར་དང་བཅས་པ་མི་མ་ཡིན་ཡང་མིའི་མགོ་ཅན་དུ་འདུག་པས་མིའི་ཐོད་པ་ཅན་སྲིན་པོ་ལ་སོགས་པ། མ་རུངས་པ་རྣམས་ཀྱིས། སྟོན་པ་སྐྱེས་བུ་ཆེན་པོ་རྡོ་རྗེ་སྲིན་པོ་མ་རུངས་པ་དེ་ལ། ལུས་ཀྱི་བག་བཞིས་ལ་ཕབ་པའི་བརྐྱང་ཕྱག་རྣལ་འབྱོར་གྱི་ལུགས་སུ་བྱས་ནས་འཚལ་ཞིང་ཐལ་མོ་སྦྱར་ཏེ་སྤྱི་བོས་བཏུད་ནས་རང་རང་གི་སྣང་བའི་ཡོན་ཏན་འདི་སྐད་ཅེས་གསོལ་ཏོ། །ཨ་ཧོ་སུ་ཀ་ཀྵྃ་པརྱ་དེ་བ་ཤི་ཤི། ཞེས་ངོ་མཚར་བདེ་མཆོག་སྣང་བ་ཆེས་ཆེར་འཕེལ། ཞེས་པས་བརྡའི་གླུ་བླངས་སོ། །དེ་ལྟར་གླུས་དྲངས་ཏེ་ངམ་པའམ་དབང་ཐོབ་པའི་ནུས་པ་སྐྱེས་པས་ཆོས་མཐོང་བ་སྨྲས་པ། ཨེ་མའོ། །ཞེས་ཕྱི་ནང་གི་གཡོ་བ་ལ་ངམ་ནས་བཤད་པའི་ས་གཡོས་པ་དང༌། དྲེགས་པ་འཁོར་བཅས་ཀྱི་ཤེས་པ་ཐུན་མོང་དུ་གྱུར་ཏེ། དེ་དག་ལ་སྣང་བའི་ཚུལ་ནི། སྐྱེས་བུ་ཆེན་པོ་སྦྱོར་བ་དང་སྒྲོལ་བའི་ཚུལ་གཉིས་ལས་སེམས་གཡོ་བ་ཕུན་སུམ་ཚོགས་པ་བྱུང་ངོ༌། །ཆོས་ཉིད་ཀྱི་ངོ་བོའི་བྱིན་གྱིས་རླབས་ཀྱི་མཐུ་ལགས་སམ། ཞེས་དོན་དུས་གཡོས་པ་ཉིད་ཀྱང་ཆོས་ཉིད་མཉམ་པ་ཆེན་པོའི་མཐུ་ལགས་པས་ཕུང་པོ་ཁམས་སྐྱེ་མཆེད་ལྷའི་དཀྱིལ་འཁོར་དུ་ཤར་བས་མཚན་དང་དཔེ་བྱད་ལྡན་པའི་སྐུར་ཤར་ཏེ་གཟུགས་ཕུན་སུམ་ཚོགས་པ་བྱུང་ངོ༌། །གཟུགས་སྣང་མ་སྤངས་དེ་ཉིད་དུ་གྱུར་ཏེ་གནས་སུ་དག་གམ། ངོ་བོ་སྙིང་རྗེའི་གཟུགས་སྣང་རྒྱལ་བའི་ཐུགས་རྗེའི་སྤྲུལ་སྐུ་ལགས་སམ། ལུང་སྟོན་པ་དང་ཐེག་པ་ཆེན་པོའི་ཆོས་སྒྲར་ཤར་བས་སྒྲ་ཕུན་སུམ་ཚོགས་པ་བྱུང་ངོ༌། །ཟིན་པ་དང་མ་ཟིན་པའི་སྒྲ་ཉིད་གནས་སུ་དག་སྟེ་ཐེག་པ་ཆེན་པོའི་བསྟན་པར་གྲག་གམ། རྒྱལ་བས་ཇི་ལྟར་མཁྱེན་པའི་གསུང་ཤེས་རབ་ཀྱི་སྒྲ་ལགས་སམ། ཏིང་ངེ་འཛིན་གྱི་ངད་ཆོས་ཀྱི་དྲི་ཕུན་སུམ་ཚོགས་པ་བྱུང་ངོ༌། །དེ་ཉིད་བདག་གི་དྲི་བདུན་མ་སྤངས་གནས་སུ་དག་གམ། དེའི་ངོ་བོ་བྱང་ཆུབ་སེམས་ཀྱི་དོན་རྟོགས་པའི་དྲི་ལགས་སམ། ཆོས་ཉིད་ཀྱི་བདེན་པའི་རོ་ཕུན་སུམ་ཚོགས་པ་བྱུང་ངོ༌། །དེ་ཉིད་རོ་དགུ་མ་༼༣༧༽སྤངས་པར་གནས་སུ་དག་གམ། ངོ་བོ་ཏིང་ངེ་འཛིན་གྱི་རོ་ཉམས་སུ་མྱོང་པ་ལགས་སམ། མཉམ་པའི་དོན་གྱི་རེག་བྱ་ཕུན་སུམ་ཚོགས་པ་བྱུང་ངོ༌། །རང་གི་རེག་བྱ་ཉི་ཤུ་རྩ་གཉིས་མ་སྤངས་པར་གནས་སུ་དག་གམ། དམ་ཚིག་གི་དགྱེས་པས་བདེ་བའི་རེག་པ་ལགས་སམ། བདེ་མཆོག་ཇི་ལྟ་བར་རིག་པའི་ཚོར་བ་ཕུན་སུམ་ཚོགས་པ་བྱུང་ངོ༌། །ཚོར་བ་གསུམ་མ་སྤང་པར་བདེ་བ་ཆེན་པོར་གནས་སུ་དག་གམ། འབྱུང་འཇུག་དང་བྲལ་བའི་ཚོར་བ་བཏང་སྙོམས་ལགས་སམ། ཞེས་སྟོན་པ་ལ་དྲིས་ཤིང་རང་རང་ལ་སྣང་བའི་ཡོན་ཏན་བརྗོད་པའོ། །འདི་དག་ནང་ཟབ་མོའི་དབང་ཐོབ་པའི་ཡོན་ཏན་དུ་འགྱུར་རོ། །བདག་ཅག་ནི་སྔོན་བས་མཐུ་རྩལ་སྐྱེས་པ་སྙམ་བགྱིད་དོ། །རྫུ་འཕྲུལ་སྐྱེས་པ་སྙམ་བགྱིད་དོ། །ནུས་པ་ཅན་གྱི་དབང་ཐོབ་པ་སྙམ་མོ། །རིག་པ་ཤར་བ་སྙམ་མོ། །འདིར་སྤྲུལ་པའམ་རང་རྒྱུད་པ་གང་ཡིན་བརྒལ་གསུང་ཡང་རང་རྒྱུད་པ་ལ་ཤིན་ཏུ་འཐད་པར་མངོན་ནོ།།

གཉིས་པ་སྟོན་པ་ལ་དྲིན་ལན་ཕུལ་བ་ལ་གཉིས་ཏེ། གཏང་རག་ཏུ་བསྟོད་པ། མ་འོངས་པའི་ཆེད་དུ་ཆོས་སྐྱོང་བའི་སྲུང་མར་ཁས་བླངས་པའོ། །དང་པོ་ནི།

དེ་ལྟ་བུའི། ཞེས་པ་ནས། འགྲེ་མི་ཟློག་གོ །ཞེས་པའི་བར་གྱིས་བསྟན་ཏེ།

དེ་ལྟ་བུའི་འབྱུང་གནས་སངས་རྒྱས་ཀུན་གྱི་གསང་བ་དམ་པ་འདི་ནི་འདི་ལྟར་ཟབ་པ། འདི་ལྟར་རྒྱ་ཆེ་བ། མཆོག་དམ་པ། གྱ་ནོམ་པ། ཕུལ་དུ་གྱུར་པ། འདི་མཐོང་བར་མཛད་པའི་སྐྱེས་བུ་ཆེན་པོ་ཁྱོད་བདག་ཅག་རྣམས་ཀྱི་ཕ་ལགས་སོ། །བདག་ཅག་རྣམས་ཀྱི་མ་ལགས་སོ། །སྐྱེས་བུ་ཆེན་པོ་ཉིད་ལྟ་མ་ལགས་ཀྱི། དམ་པ་འདི་ལ་གནས་པའི་གང་ཟག་གང་ཞིག་ཀྱང་། བདག་ཅག་རྣམས་ཀྱི་ཕ་ལགས་སོ། །བདག་ཅག་རྣམས་ཀྱི་མ་ལགས་སོ། །སྲིད་པ་བྲེ་བཟློག་ཀྱང་བཀའ་བྲེ་མི་ཟློག་གོ།

དེ་ལྟར་དབང་གི་ཡོན་ཏན་སྣང་བས་གཏང་རག་ཕུལ་བ་གང་སྙམ་པ་ལ། བཤད་པ་དེ་ལྟ་བུའི་ཡོན་ཏན་བདུན་གྱི་འབྱུང་གནས་ཀྱི་ཡུམ་དུ་གྱུར་པའི་དོན་རྒྱལ་བ་རྫོགས་པའི་སངས་རྒྱས་ཀུན་གྱི་དགོངས་པ་མཐར་ཐུག་དབང་གི་ཐབས་ཁྱད་པར་ཅན་གྱིས་མཐོང་བའི་གསང་བ་དམ་པ་ཟབ་མོ་འདི་ནི་ཐབས་གཏིང་དཔག་དཀའ་ཞིང་གང་ཡང་ཤོང་བས་འདི་ལྟར་ཟབ་པ། བསམ་གྱིས་མི་ཁྱབ་པས་འདི་ལྟར་རྒྱ་ཆེ་བ། གོང་ན་གཞན་མེད་པས་མཆོག་དམ་པ། ཡོན་ཏན་ཁྱད་པར་ཅན་གྱིས་མངོན་པར་སྤྲས་པས་གྱ་ནོམ་པ། བརྣག་པར་བྱ་བ་ཤིན་ཏུ་བཟང་ཞིང་ཁྱད་པར་དུ་འཕགས་པས་ཕུལ་དུ་གྱུར་པ། དེ་ལྟ་བུའི་ཐབས་དང་ཐེག་པ་དང་ལམ་དང་སྤྱོད་པ་དང་འབྲས་བུར་ཡང་འགྱུར་ཏེ། མདོར་ན་ཐབས་ལ་དབང་དང་ངོ་བོ་གཉིས་སུ་ཕྱེ་བས་ཡོན་ཏན་གསུམ་གཉིས་ཀྱི་དོན་གསང་བ་རྨད་དུ་བྱུང་བ་འདི་ཉིད་གསལ་བར་སྟོན་ཅིང་ཡང་དག་པར་མཐོང་བར་མཛད་པའི་སྟོན་པ་སྐྱེས་བུ་ཆེན་པོ་ཁྱོད་ནི་བདག་ཅག་གིས་སེམས་བསྐྱེད་ཅིང་འབྲས་བུའི་གཏེར་དང་སྤྲོད་པའི་ཕྱིར་བདག་ཅག་རྣམས་ཀྱི་སྐྱོབ་པར་བྱེད་པའི་ཕ་ལགས་སོ། །བདག་ཅག་རྣམས་ཀྱི་སྐྱེད་པར་བྱེད་པའི་མ་ལགས་སོ། །སྐྱེས་བུ་ཆེན་པོ་ཁྱེད་ཉིད་ཁོ་ན་ལྟ་ཡང་མ་༼༣༨༽ལགས་ཀྱི། གསང་བ་དམ་པ་འདི་ལ་གནས་པའི་གང་ཟག་ཆོས་མིག་དང་ལྡན་པ་གང་ཞིག་ཀྱང་བདག་ཅག་རྣམས་ཀྱི་ཕ་ལགས་སོ། །བདག་ཅག་རྣམས་ཀྱི་མ་ལགས་སོ། །སྲིད་པ་འགྲེ་བཟློག་ཏུ་གྱུར་ཀྱང་སྟོན་པའི་བཀའ་ནི་དོན་ལས་མི་འདའ་བས་འགྲེ་མི་ཟློག་གོ །ཞེས་གསོལ་ཏེ་སྲུང་བར་ཁས་བླངས་སོ།།

གཉིས་པ་མ་འོངས་པའི་ཆེད་དུ་ཆོས་སྐྱོང་བའི་སྲུང་མར་ཁས་བླངས་པ་ལ་ལྔ་སྟེ། རྣལ་འབྱོར་པའི་བྱ་བ་བྲན་བཞིན་དུ་བྱ་བར་ཁས་བླངས་པ། བསྒྲུབ་ངོ་ཤེས་པར་བྱ་བའི་ཕྱིར་བསྟེན་པའི་ཐབས་བརྗོད་པ། བསྒྲུབ་པའི་ཐབས་བསྙེན་བསྒྲུབ་ཀྱི་ཚད་བསྟན་པ། ལོ་རྒྱུས་ཀྱི་ཡིད་ཆེས་པར་བྱ་བའི་ཕྱིར་ཡོན་ཏན་བརྗོད་པ། སྟོན་པས་ལེགས་པ་བྱིན་ནས་བཀའ་ལ་བཏགས་པའོ། །དང་པོ་ནི།

ཀྱེ་མའོ། །ཞེས་པ་ནས། ཡོངས་སུ་རྫོགས་པར་བགྱིའོ། །ཞེས་པའི་བར་གྱིས་བསྟན་ཏེ།

ཀྱེ་མའོ་སྐྱེས་བུ་ཆེན་པོ་ལྟ་ཅི་སྨོས། ཁྱོད་ཀྱི་དམ་པ་འདི་ལ་གནས་པའི་གང་ཟག་ཀྱང་། ཇི་ལྟར་ལྷའི་དབང་པོའི་གཙུག་གི་ནོར་བུ་བཞིན་དུ་སྤྱི་བོས་བཀུར་བར་བགྱིའོ། །དེའི་ཁྱོ་མོ་དང་། བུ་དང་། བུ་མོ་དང་། ནོར་དང་། གཡོག་དང་། ཡང་གཡོག་དང་། འཁོར་དང་། ཉེ་དུ་དང་། སྣག་གི་གཉེན་མཚམས། ཕྲུ་མ་དང་། ཡུལ་འཁོར་དང་། ཡུལ་ཁམས་ཀྱི་སྐྱེ་བོ་གང་ཆོས་ཡོངས་སུ་བསྲུང་བ་རྣམས་ཀྱང་བསྲུང་བ་དང་། བསྐྱབ་པ་དང་། སྦ་བར་བགྱིའོ། །ཆོས་བསྲུང་བའི་མི་དེ་དག་ལ་འཚེ་བའི་མི་དང་། མི་མ་ཡིན་པའང་གང་ལགས་པ་དེ་དག་ཀྱང་ཡོངས་སུ་གཞོམ་ཞིང་བརླག་པར་བགྱིའོ། །མཚམས་བཅད་ཅིང་ས་བཅིང་བར་བགྱིའོ། །དེ་དག་གིས་གང་བསམས་པ་དང་།

ཅི་བཅོལ་བའི་རིལ་ཡང་བྲན་གྱི་བྱ་བས་ཡོངས་སུ་རྫོགས་པར་བགྱིའོ།།

ཀྱེ་མའོ་སྐྱེས་བུ་ཆེན་པོ་ཁྱོད་ཉིད་ལྟ་ཅི་སྨོས་ཏེ། ཁྱོད་ཀྱི་དགོངས་པ་གསང་བ་དམ་པ་འདི་ལ་གནས་པའི་གང་ཟག་དག་ཀྱང༌། ཇི་ལྟར་ལྷའི་དབང་པོའི་གཙུག་གི་ནོར་བུ་བཞིན་སྤྱི་བོས་བཀུར་བར་བགྱིའོ། །དེའི་ཁྱོ་མོ་དང༌། བུ་དང༌། བུ་མོ་དང༌། ནོར་དང༌། གཡོག་དང༌། ཡང་གཡོག་དང༌། འཁོར་དང༌། ཉེ་དུ་དང༌། སྣག་གི་གཉེན་འཚམས་དང༌། རང་གི་ཕྲུ་མ་དང༌། ཡུལ་འཁོར་དང༌། ཡུལ་ཁམས་ཀྱི་སྐྱེ་བོ་གང་ཆོས་ཡོངས་སུ་སྲུང་བ་རྣམས་ཀྱང༌། བསྲུང་བ་དང༌། བསྐྱབ་པ་དང༌། སྦ་བར་བགྱིའོ། །ཆོས་བསྲུང་བ་དེ་དག་ལ་འཚེ་བའི་མི་དང་མི་མ་ཡིན་པ་གང་ལགས་པ་དེ་དག་ཀྱང༌། ཡོངས་སུ་གཞོམ་ཞིང་བརླག་པར་བགྱིའོ། །མཚམས་བཅད་ཅིང་བཅིང་པའམ་ཕྱག་དཔེ་རྙིང་པ་རྣམས་ནས་བཅིང་བར་བགྱིའོ། །ཞེས་བཞུགས། དེ་དག་གི་གང་བསམ་པ་དང༌། ཅི་བཅོལ་བ་རིལ་ཡང་བྲན་གྱི་བྱ་བས་ཡོངས་སུ་རྫོགས་པར་བགྱིའོ།།

གཉིས་པ་བསྒྲུབ་ངོ་ཤེས་པར་བྱ་བའི་ཕྱིར་བསྟེན་པའི་ཐབས་བརྗོད་པ་ནི།

དེ་དག་གིས་ཀྱང༌། ཞེས་པ་ནས། ལགས་པའི་སླད་དུའོ། །ཞེས་པའི་བར་གྱིས་བསྟན་ཏེ།

དེ་དག་གིས་ཀྱང་ཆོས་བསྲུང་ཞིང་ཆོས་བཞིན་དུ་གནས་ནས། བདག་ཅག་རྣམས་ཀྱི་ཅིར་ཡང་ཡིད་བཞིན་དུ་འགྲུབ་པ། ལྷ་ཆེན་པོ་རྣམས་ཀྱིས་གསང་སྔགས་འཇིག་རྟེན་མངོན་རྟགས་ཀྱི་འབྱུང་གནས། །རྡོ་རྗེ་མཐུ་བོ་ཆེས་མངོན་པའི་མཐུ་ཅན་དུ་བརྗོད་པ་དང་། དམ་རྫས་དང་། དགེ་མཚན་དང་། རྟགས་རྟེན་རྣམས་ཀྱང་བདག་ཅག་དང་འབྲེལ་བའི་ཆེད་དུ་བཅང་བར་བགྱི་ལགས་སོ། །དེ་ཅིའི་སླད་དུ་ཞེ་ན། དེ་དག་ནི་བདག་ཅག་གི་དམ་ཚིག་ལགས་པའི་སླད་དུའོ།།

རྣལ་འབྱོར་པ་དེ་དག་གིས་ཀྱང་ཆོས་སྲུང་ཞིང་རྒྱུད་སྒྲུབ་ཐབས་དང་འབྲེལ་བ། སྒྲུབ་ཐབས་ཆོག་ཡིག་དང་འབྲེལ་བ། ཆོག་ཡིག་ཕྱག་བཞེས་དང་འབྲེལ་བ། ཕྱག་བཞེས་གདམས་ངག་དང་འབྲེལ་བར་གསང་སྔགས་ཀྱི་ཆོས་བཞིན་དུ་གནས་ནས། བདག་ཅག་རྣམས་ཀྱི་གསང་སྔགས་ཀྱི་ལས་ཅིར་ཡང་ཡིད་བཞིན་དུ་འགྲུབ་པ། ལྷ་ཆེན་པོ་རྣམས་ཀྱི་གསང་སྔགས། འཇིག་རྟེན་མངོན་རྟགས་ཀྱི་འབྱུང་གནས། རྡོ་རྗེ་མཐུ་བོ་ཆེས་རང་གི་སྙིང་པོ་མངོན་པར་ཕུལ་༼༣༩༽བའི་མཐུ་ཅན་དུ་བརྗོད་པ་དང༌། ཤ་ཆེན་ལ་སོགས་པ་མཐུན་པའི་དམ་རྫས་དང༌། ལག་ཆ་རུ་མཚོན་ནམ་རྫས་ཆའམ་གསང་མཚན་སོགས་དགེ་མཚན་དང༌། རི་མོ་བྲིས་འབུར་གྱི་སྐུ་ལ་སོགས་པ་རྟགས་རྟེན་རྣམས་ཀྱང་དགོས་པ་གསང་སྔགས་ཀྱི་ལམ་ལ་གནས་ནས་བདག་ཅག་དང་འབྲེལ་བའི་ཆེད་དུ་གསང་བའི་རྫས་རྣམས་དང་མི་འབྲལ་བར་བཅང་བར་བགྱི་དགོས་པ་ལགས་ཏེ། ཇི་སྐད་དུ། རྡོ་རྗེ་རོ་ལངས་འཁོར་བཅས་དང༌། །འབྲེལ་ཕྱིར་དེ་དག་དམ་ཚིག་ནི། །མ་ཧཱ་ཙིཏྟ་ཤ་ལ་སོགས། །གསལ་ཤིང་30བེང་དང་ཐོད་ཏྲི་ཤུལ། །རི་མོ་ལུགས་འབུར་བཞོག་བརྐོས་རྒྱ། །ཡན་ལག་བཞི་པ་མཐུ་ཅན་ཉིད། །རྟག་ཏུ་བཅང་བར་བྱ་བ་ཡིན། །ཞེས་སོ། །དེ་ཅིའི་སླད་དུ་ཞེ་ན། །དེ་དག་ནི་བདག་ཅག་གི་དམ་ཚིག་ལགས་པའི་སླད་དུའོ།།

གསུམ་པ་བསྒྲུབ་པའི་ཐབས་བསྙེན་བསྒྲུབ་ཀྱི་ཚད་བསྟན་པ་ནི།

ཀྱེ་མའོ། །ཞེས་པ་ནས། འགྲུབ་ལགས་སོ། །ཞེས་པའི་བར་གྱིས་བསྟན་ཏེ།

ཀྱེ་མའོ་སྐྱེས་བུ་ཆེན་པོ་འདི་ལྟ་སྟེ། བདག་ཅག་རྣམས་ཀྱི་གསང་སྔགས་མངོན་མཐུ་ཅན་འདི་ནི། བསྙེན་བསྒྲུབ་ཡན་ལག་བཞི་དང་བཅས་པ་སྟེ། དེ་ཡང་གང་ཞེ་ན། འདི་ལྟ་སྟེ །ༀ་འབྲུར་ཀུར། མཧཱ་པདྨ། དྷེ་འབྲུར། རྩི་འབྲུར། བྱིན་གེ བི་མ་ན་སེ། ཨེ་ཧོ་ཤི་མོ། ཀྲོ་དྷ་ཧཱུཾ་ཧཱུཾ་ཕཊ་ཕཊ་སྭཱཧཱ། སྐྱེས་བུ་ཆེན་པོ་དེ་ནི་བསྙེན་པའི་ཡན་ལག་ལགས་སོ། །ༀ་བུ་དུ་ཀུརྨ། ཨ་པྲ་རྣ། བུད་ཙི་ཀི་བ་མ་ནི་སེ། ཁ་ཤོ་མོག་ཀྲོ་དྷ་ཧཱུྃ་ཧཱུྃ་ཕཊ་ཕཊ་སྭཱཧཱ། སྐྱེས་བུ་ཆེན་པོ་དེ་ནི་ཉེ་བའི་བསྙེན་པར་རིག་པར་བྱའོ། །ༀ་བུ་དུ་ཀུ་རུ། ཨི་ཙི་ཀི་བི་ཨུཙྪུཥྨ་ཀྲོ་དྷ་ཧཱུྃ་ཕཊ། སྐྱེས་བུ་ཆེན་པོ་འདི་ནི་བསྒྲུབ་པར་རིག་པར་བགྱིའོ། །ༀ་འབུར་ཀུ་ཏི་ཕཊ། སྐྱེས་བུ་ཆེན་པོ་འདི་ནི་བསྒྲུབ་པ་ཆེན་པོར་རིག་པར་བྱའོ། །སྐྱེས་བུ་ཆེན་པོ་འདི་དག་ཀྱང་རེ་རེ་ཞིང་འབུམ་འབུམ་རྫོགས་ནས། གདོད་ཅི་གང་བྱ་བའི་ལས་ལ་འཇུག་ན།

ཐེ་ཚོམ་མ་མཆིས་པར་གྲུབ་པ་ལགས་སོ།།

དེའང་དཀྱིལ་འཁོར་དུ་ཞུགས་པ་ནི་སྔོན་འབྱུང་དང་རྗེས་འཇུག་ཐུན་མོང་སྟེ་ལེའུ་སྔ་ཕྱི་གཉིས་འཁྲུག་པར་ཤེས་པར་འགྱུར་ཏེ་བླ་མའི་ཞལ་ལས་ཤེས་པར་བྱའོ། །ཀྱེ་མའོ། །སྐྱེས་བུ་ཆེན་པོ། གསང་བ་མཆོག་གི་སྒྲུབ་ཐབས་ཀྱི་ཆེ་བ་འདི་ལྟ་སྟེ། །བདག་ཅག་རྣམས་ཀྱི་གསང་སྔགས་མངོན་པའི་མཐུ་ཅན་འདི་ནི། སྒྲུབ་ཐབས་རང་གི་ངོ་བོ་བསྙེན་བསྒྲུབ་ཡན་ལག་བཞི་དང་བཅས་པ་སྟེ། དེའང་གང་ཞེ་ན། བསྙེན་བསྒྲུབ་ཀྱི་རིམ་པ་འདི་ལྟ་སྟེ། དང་པོ་བསྙེན་པའི་སྔགས། ཉོན་མོངས་པ་ལྔ་འཇོམས་པས་སྐུ་ལྔ་ཡེ་ཤེས་ལྔའི་སྙིང་པོ་ཨཱ་ཞེས་པས་དབུ་དྲངས་ཏེ། བྷུར་ཀུར་མ་ཧཱ་པྲ་ཎཱ་ཡ། ཞེས་རྒྱལ་བའམ་པདྨའི་ལས་ཆགས་པ་མེད་པ་ཆེན་པོ། བྷུརྩི་བྷུརྐི་ཞེས་དཔའ་བོ་རོལ་པ་སྟེ། ཉམས་པའི་སྙིང་ལ་རོལ་པས་དཔའ་བའོ། །བྱི་ག་གེ་བི་མ་ན་སེ། ཞེས་རྒྱུན་མི་འཆད་པར་ལས་སམ་དྲི་མ་31བླག་པར་བྱེད་པ། ཨེ་ཧོ་ཤི་མོ་ཨུཙྪུཥྨ་ཀྲོ་ཏ། ཞེས་དེ་ཉིད་ལ་དགའ་བས་མ་རུངས་པར་ཁྲོས་པ། ཧཱུྃ་ཧཱུྃ་ཧཱུྃ་ཕཊཿཕཊཿཕཊ། དེ་ཡིས་སྐུ་གསུང་ཐུགས་གསུམ་གྱིས་ཉོན་མོངས་པ་གསུམ་འཇོམས་པར་གྱིས། སྭཱཧཱ་ཞེས་གཞི་ཚུགས་ཏེ་མཐའ་བརྟེན་ནོ། །ཕྱག་དཔེ་རྙིང་པ་གཅིག་མ་གཏོགས་གཞན་རྣམས་ན་ཧཱུྃ་ཧཱུྃ་ཕཊ་ཕཊཿཞེས་བཞུགས་པས། སྐུ་གསུང་ཐུགས་མི་ཕྱེད་པའི་སྙིང་པོས་ཕྱི་ནང་གི་གདུག་པ་འཇོམས་པའམ་སྲེག་པ་དང་སྒྲོལ་བའོ། །སྐྱེས་བུ་ཆེན་པོ་དེ་ནི་དང་པོ་བསྙེན་པའི་ཡན་ལག་ལགས་སོ།།

དེ་ནས་ཉེ་བསྙེན་གྱི་སྔགས། ཨཱ་ཞེས་ཐུགས་རྗེ་ལྔའི་ངོ་བོ་དྲག་པོའི་སྐུ་ལྔའི་སྙིང་པོས་དབུ་དྲངས་ཏེ། བྷུ་རུ་ཀུརྨ་༼༤༠༽ཨ་པྲ་ཎ། ཞེས་སངས་རྒྱས་ཀྱི་ཕྲིན་ལས་དྲག་པོའི་མངག་པ། བྷུརྩི་ཀི་ཕྱི་མ་ན་སྱེ། ཞེས་དྲག་པོའི་ལས་རྒྱུན་མི་འཆད་པས་མྱུར་བར་རྣོ་ཞིང་དབང་པོ་འབྱིན་པ། ཁ་ཤོ་མོག་ཀྲོ་ཏ། ཞེས་འདུ་ཞིང་ཟ་བས་ཁྲོ་བོས། ཧཱུྃ་ཧཱུྃ་ཕཊ་ཕཊཿསྭཱ་ཧཱ། སྐུ་གསུང་ཐུགས་མི་ཕྱེད་པའི་སྙིང་པོས་ཕྱི་ནང་གི་གདུག་པ་འཇོམས་པའམ་སྲེག་པ་དང་སྒྲོལ་བའོ། །སྐྱེས་བུ་ཆེན་པོ་དེ་ནི་གཉིས་པ་ཉེ་བའི་བསྙེན་པར་རིག་པར་བྱའོ། །དེ་ནས་བསྒྲུབ་པའི་སྔགས། དྲག་པོའི་སྐུ་ལྔའི་གཞི་ལྔ་ལ་བསྐུལ་བའི་སྙིང་པོ། ཨཱ་ཞེས་པས་དབུ་དྲངས་ཏེ། བྷུ་རུ་ཀུ་རུ་སངས་རྒྱས་ཀྱི་ཕྲིན་ལས། ཨི་ཙི་ཀི་ཕྱི། ཞེས་དྲག་པོས་སྙིང་བརླག་པར་བྱེད་པ། ཨུ་ཙྪུསྨ་ཀྲོ་ཏ། ཞེས་མ་རུངས་པར་ཁྲོས་པ། ཧཱུྃ་ཕཊཿཞེས་སྐུ་གསུང་ཐུགས་མི་ཕྱེད་པའི་སྙིང་པོས་སྲེག་པར་གྱིས་ཤིག་པའོ། །སྐྱེས་བུ་ཆེན་པོ་འདི་ནི་གསུམ་པ་བསྒྲུབ་པ་ཡིན་པར་རིག་པར་བྱའོ། །དེ་ནས་བསྒྲུབ་པ་ཆེན་པོའི་སྔགས། སྐུ་ལྔའི་གཞི་ཡེ་ནས་ལྷུན་གྱིས་གྲུབ་པའི་སྙིང་པོ། ཨཱ་ཞེས་པས་དབུ་དྲངས་ཏེ། བྷུརྐུར་ཏི་ཕཊཿཞེས་རྒྱལ་བའི་ཕྲིན་ལས་དྲག་པོའམ་དཔའ་བོ་གདེངས་སུ་གྱུར་པས་དེ་ཉིད་དབང་དུ་སྡུད་པའོ། །སྐྱེས་བུ་ཆེན་པོ་འདི་ནི་བཞི་པ་སྒྲུབ་པ་ཆེན་པོར་རིག་པར་བྱའོ། །སྐྱེས་བུ་ཆེན་པོ་འདི་དག་ནི་བསྙེན་བསྒྲུབ་དངོས་ཏེ་བདག་ཉིད་ཧེ་རུ་ཀ་ཆེན་པོར་གསལ་བས་གསང་བའི་རྫས་རྟེན་ཚོགས་པར་བྱས་ནས་དབེན་པའི་གནས་སུ་བདག་གཞན་གྱི་ཕྱིར་དུས་གཅིག་ཏུའམ་རིམ་པར་བཟླས་ལ་དང་པོར་བསྙེན་པའི་བཟླས་པའི་ཚད་ཀྱང་འབུམ་ཕྲག་གཅིག་གོ །དེ་ནས་ཚད་དེ་ཡིས་བཟུང་བས་རེ་རེ་ཞིང་འབུམ་འབུམ་སྟེ་ཕྱིར་བཞི་འབུམ་རྫོགས་ནས་བསྙེན་པ་གདེངས་སུ་ཆུད་པ་ན། གདོད་ཅིག་གང་ལ་བྱ་བ་དམན་པའི་ལས་མན་ངག་ཏུ་བྱ་བའི་རིམ་པ་རྣམས་དང༌། བསྒྲལ་ཞིང་བཏན་སྤོ་བར་བྱ་བའི་ལས་གང་ལ་འཇུག་ན་ཡང་ཐེ་ཚོམ་མ་མཆིས་པར་བསླུ་བ་མེད་པར་འགྲུབ་ངེས་པ་ལགས་ཏེ། ཇི་སྐད་དུ། ཕན་དང་ཚར་བཅད་བྱ་བ་རྣམས། །གསོ་དང་སྲུང་དང་བཟློག་པ་དང༌། །ཡི་རང་འདོད་པ་སྒྲུབ་པ་རྣམས། །བདག་གཞན་དོན་ཕྱིར་ཚང་ནས་བྱ། །ཞེས་སོ། །དེ་ལྟར་བསྙེན་སྒྲུབ་བཞིའི་སྔགས་དོན་འདི་སྐྱབས་རྗེ་ཐམས་ཅད་མཁྱེན་པའི་ཕྱག་དཔེ་ཡིག་རྙིང་ཚད་མར་ངེས་པ་གཅིག་ན་བཞུགས་པ་ལྟར་ལེགས་པར་བསྡེབས་ན་འདི་ལྟར་ངེས་ཀྱང༌། ཕྱག་དཔེ་གཞན་གང་ལའང་མི་བཞུགས་པས་བློ་ལྡན་རྣམས་ཀྱིས་སྐད་གཉིས་ཤན་སྦྱར་གྱི་སྔགས་དོན་ཁུངས་ལྡན་རྙེད་ན་དཔེ་བསྡུར་དང་ཞུ་དག་ངེས་པར་༼༤༡༽མཛོད་ཅིག

བཞི་པ་ལོ་རྒྱུས་ཀྱི་ཡིད་ཆེས་པར་བྱ་བའི་ཕྱིར་ཡོན་ཏན་བརྗོད་པ་ནི།

དེ་ཅིའི་སླད་དུ། ཞེས་པ་ནས། ཞེས་གསོལ་བ་ལས། ཞེས་པའི་བར་གྱིས་བསྟན་ཏེ།

དེ་ཅིའི་སླད་དུ་ཞེ་ན། དུས་གསུམ་གྱི་སངས་རྒྱས་རྣམས་ཀྱིས་ཀྱང་། མངོན་པའི་མཐུ་ཅན་དུ་བསྔགས་པ་བརྗོད་པ་ལགས་སོ། །རྡོ་རྗེ་མཐུ་ཆེས་ཀྱང་འཇིག་རྟེན་གྱི་མངོན་རྟགས་འདིས་མཛད་པ་ལགས་སོ། །བདག་ཅག་རྣམས་ཀྱིས་ཀྱང་ཆོ་འཕྲུལ་གྱི་མངོན་རྟགས་འདིས་བགྱིད་པ་ལགས་ཏེ། སྐྱེས་བུ་ཆེན་པོ་གསང་སྔགས་འདི་གང་གི་ཆེད་དུ་གཉེར་ནས་མངོན་རྟགས་མ་མཆིས་ན། བདེན་པ་ཡོང་མ་མཆིས་པ་ལགས་སོ། །བཀའ་ཚད་མ་རྣམས་ཀྱང་ངེས་པ་མཆིས་པ་ལགས་སོ། །བདག་ཅག་རྣམས་ཀྱང་རང་རང་གི་ངག་བདེན་པའི་དམ་པ་ལས་ཉམས་པའི་སླད་དུ། མྱགས་ནས་མ་མཆིས་པར་མགོ་འགས་ཤིང་ཁྲག་ཏུ་སྐྱུག་པ་ལགས་སོ། །སྐྱེས་བུ་ཆེན་པོ་དེ་བས་ན་གསང་སྔགས་འདི་ལ་ཐེ་ཚོམ་མ་མཆིས་ཏེ། གང་ཞིག་གང་ལ་ཕན་པ་བསྒྲུབ་ཅིང་ངོ་མཚར་བསྐྱེད་པ་དང་། བླུན་པོ་དག་སངས་རྒྱས་ཀྱི་བཀའ་ལ་ཡིད་ཆེས་པར་བགྱི་བའི་ཐབས་དམ་པར་དམ་པ་རྣམས་ཀྱིས་བཤད་པ་ལགས་ཏེ།

དེ་དག་གིས་ཡན་ལག་བཞི་པ་འདི་རྟག་ཏུ་བསྙེན་ན་ལེགས་སོ་ཞེས་གསོལ་པ་ལས།

གསང་སྔགས་ཀྱི་བྱུང་ཁུངས་དང་མངོན་པའི་མཐུ་ཅན་དུ་ཡིད་ཆེས་པའི་གཏན་ཚིགས་བསྟན་པ། དེ་ཅིའི་སླད་དུ་ཞེ་ན། དུས་གསུམ་གྱི་སངས་རྒྱས་རྣམས་ཀྱིས་ཀྱང་གསང་སྔགས་འདི་ལ་མངོན་པའི་མཐུ་ཅན་དུ་བསྔགས་པ་བརྗོད་པ་ལགས་སོ། །དཔལ་ཕྱག་ན་རྡོ་རྗེ་མཐུ་བོ་ཆེས་ཀྱང་འཇིག་རྟེན་གྱི་ཆེ་བའི་མངོན་རྟགས་འདིས་མཛད་པ་ལགས་སོ། །བདག་ཅག་རྣམས་ཀྱིས་ཀྱང་ཆོ་འཕྲུལ་གྱི་མངོན་རྟགས་འདིས་བགྱིད་པ་ལགས་ཏེ། སྐྱེས་བུ་ཆེན་པོ་གསང་སྔགས་འདི་ཉིད་གང་གིས་ཆེད་དུ་གཉེར་ནས་སྒྲུབ་ཀྱང་མངོན་རྟགས་མ་མཆིས་ན། བདེན་པ་ཡང་མ་མཆིས་པ་ལགས་སོ། །བཀའ་ཚད་མ་རྣམས་ཀྱང་ངེས་པ་མ་མཆིས་པ་ལགས་སོ། །བདག་ཅག་རྣམས་ཀྱང་རང་རང་གི་ངག་བདེན་པའི་དམ་པ་ལས་འདས་ཏེ་ལྟུང་ཞིང་ཉམས་པའི་སླད་དུ། དམྱགས་མ་མཆིས་པར་མགོ་འགས་ཤིང་ཁྲག་ཏུ་སྐྱུག་པ་ལགས་སོ། །ཞེས་ལོ་རྒྱུས་བརྗོད་པས་ཆེ་བ་ཤེས་པ་དང་ཐེ་ཚོམ་བསལ་ཏེ་གྲོགས་བྱེད་པར་ཚད་བཞག་པས་ཡིད་གཉིས་ཀྱང་བསལ་ལོ། །སྐྱེས་བུ་ཆེན་པོ་དེ་བས་ན་གསང་སྔགས་འདི་ལ་ལེགས་པར་དཔྱད་ན་ཐེ་ཚོམ་མ་མཆིས་པར་འགྲུབ་ངེས་ཏེ། བསྙེན་བསྒྲུབ་རྣམ་བཞི་གང་ཞིག་ལས་དངོས་གང་ལ་སྦྱར་བ་དེ་ཡིས་ཕན་པར་བྱ་བ་བསྒྲུབ་ཅིང༌། ངོ་མཚར་བསྐྱེད་པ་དང༌། བླུན་པོ་དག་སངས་རྒྱས་ཀྱི་བཀའ་ལ་ཡིད་ཆེས་པར་བགྱི་བའི་ཐབས་དམ་པར་ཟབ་ཅིང་མྱུར་བ་ཤ་སྟག་ཏུ་དམ་པ་རྣམས་ཀྱིས་བཤད་པ་ལགས་ཏེ། དེ་དག་གིས་བསྙེན་བསྒྲུབ་ཡན་ལག་བཞི་པ་འདི་ཉིད་རྟག་ཏུ་བསྟེན་ན་ལེགས་སོ། །ཞེས་གསོལ་བ་ལས།

ལྔ་པ་སྟོན་པས་ལེགས་པ་བྱིན་ནས་བཀའ་ལ་བཏགས་པ་ནི།

སྐྱེས་བུ་དམ་པ། ཞེས་པ་ནས། དབང་བྱིན་ནོ། །ཞེས་པའི་བར་གྱིས་བསྟན་ཏེ།

སྐྱེས་བུ་དམ་པ་དེས་བཀའ་སྩལ་པ། ཨ་ཧོ་རིགས་སོ། །བསྟོད་དོ། །ཡིན་ནོ། །ངེས་སོ། །བདེན་ནོ། །ལེགས་སོ། །མ་རུངས་པ་ཁྱེད་མ་དང་བཅས། ཆུང་མ་དང་བཅས། བུ་དང་། བུ་མོ་དང་། གཡོག་དང་། ཡང་གཡོག་དང་བཅས་པ་རྣམས་བརྩེ་བ་དང་མ་བྲལ་ན་མར་བྱའོ། །གདུང་བ་དང་མ་བྲལ་ན་སྲིང་མོར་བྱའོ། །བརྩོན་པ་དང་མ་བྲལ་ན་བྲན་དུ་བྱའོ། །བྱང་ཆུབ་སེམས་དང་མ་བྲལ་ན་བུར་བྱའོ། །འདུ་འབྲལ་མེད་ན་སློབ་མར་བྱའོ། །བསྐུལ་བ་ལ་མགྱོགས་ན་ཕོ་ཉར་བྱའོ། །བཀའ་བཞིན་བྱེད་ན་བཀའ་ལ་གདགས་སོ། །ཞེས་རྣལ་འབྱོར་ཆེན་པོའི་གྲལ་དུ་བཞག་སྟེ།

ཆོས་དང་གང་ཆོས་བསྲུང་བ་རྣམས་ཀྱི་བསྲུང་མར་དབང་བྱིན་ནོ།།

སྐྱེས་བུ་དམ་པ་དེས་བཀའ་སྩལ་བ། ཨ་ཧོཿཞེས་དགྱེས་པ་སྩལ་ནས། རིགས་སོ་སོགས་དྲུག་ནི། བསྙེན་པའི་ཡན་ལག་དེ་ལྟར་རིགས་སོ། །ཉེ་བའི་བསྙེན་པར་ངེས་པར་བསྟོད་དོ། །བསྒྲུབ་པའི་ཡན་ལག་དེ་ལྟར་ཡིན་ནོ། །སྒྲུབ་པ་ཆེན་པོ་ཤིན་ཏུ་ངེས་སོ། །དེ་རྣམས་ཀྱིས་ལས་གྲུབ་པ་བདེན་ནོ། །རྣལ་འབྱོར་པས་བྱ་བར་ཤིས་པ་ལེགས་སོ། །ཞེས་ཐ་མ་གཉིས་ནི་བཞིའི་སྤྱི་ཐུན་མོང་དུའང་འགྱུར་རོ། །ཞེས་པའམ། ཡང་ན། སངས་རྒྱས་རྣམས་ཀྱིས་བསྔགས་པར་རིགས་སོ། །ཕྱག་ན་རྡོ་རྗེའི་མངོན་རྟགས་ཀྱི་ཆེ་བར་བསྟོད་དོ། །ཁྱེད་རྣམས་ཀྱིས་ཆོ་འཕྲུལ་འདིས་བགྱིད་པ་ཡིན་ནོ། །མངོན་རྟགས་མེད་ན་བདེན་ངེས་མ་མཆིས་པར་ངེས་སོ། །ཁྱེད་ཅག་བདེན་༼༤༢༽ཚིག་ཉམས་པའི་ཚད་བདེན་ནོ། །ཐེ་ཚོམ་མེད་པར་ཕན་པ་སྒྲུབ་པ་ལེགས་སོ། །ཞེས་པར་འགྲེལ་པར་ཀརྟ་རྣམས་ཀྱིས་གསལ་བར་མཛད་དོ། །མ་རུངས་པ་ཁྱེད་རྣམས་མ་དང་བཅས། ཆུང་མ་དང་བཅས། བུ་དང་བུ་མོ་དང་བཅས། གཡོག་དང་ཡང་གཡོག་དང་བཅས་པ་རྣམས། བརྩེ་བ་དང་མ་བྲལ་ན་མི་འགྱུར་བའི་མར་བྱའོ། །གདུང་བ་དང་མ་བྲལ་ན་སྲིང་མོར་བྱའོ། །བརྩོན་པ་དང་མ་བྲལ་ན་བྲན་དུ་བྱའོ། །བྱང་ཆུབ་སེམས་དང་མ་བྲལ་ན་བུར་བྱའོ། །འདུ་འབྲལ་མེད་ན་སློབ་མར་བྱའོ། །བསྐུལ་བ་ལ་མགྱོགས་ན་ཕོ་ཉར་བྱའོ། །བཀའ་བཞིན་བྱེད་ན་བཀའ་ལ་གདགས་སོ། །ཞེས་རྣལ་འབྱོར་ཆེན་པོའི་གྲལ་དུ་བཞག་སྟེ། ཆོས་དང་གང་ཟག་ཆོས་སྲུང་བ་རྣམས་ཀྱི་སྲུངས་མར་དབང་བྱིན་ནོ། །དེ་ལྟར་ལས་དང་ཟས་དང་གནས་ཀྱི་དབང་བྱིན་ཏེ་བཀའ་ལ་བཏགས་པར་མཛད་དོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཐར་པ་ནག་པོ་གོལ་བ་མ་གོལ་བར་ལུང་བསྟན་པའི་ལེའུ་སྟེ་སུམ་ཅུ་གཅིག་པའོ། །ཐེག་པ་ཆེན་པོ་ངེས་པར་འབྱུང་བའི་ཚུལ་ལས། གདུལ་བྱ་སྐབས་བབས་པའི་ཚེ་ན་རུ་དྲ་ཡོངས་སུ་བཏུལ་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་དྲུག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཐར་པ་ནག་པོ་གོལ་བ་ལ་མ་གོལ་བར་ལུང་བསྟན་པའི་ལེའུ་སྟེ་སུམ་ཅུ་རྩ་གཅིག་པ་གསལ་བར་བཤད་པའོ།། །།

འོ་ན་རུ་ཏྲ་འདི་ཉིད་རང་རྒྱུད་པ་ཡིན་ནམ། སྤྲུལ་པ་བ་ཡིན་ཞེ་ན། སྔར་གྱི་བླ་མ་དམ་པ་རྣམས་འདི་ལྟར་བཞེད་དེ། རང་རྒྱུད་པ་ཁོ་ན་ཡིན་ལ་སྤྲུལ་པ་བ་མིན་ན། དཀྱུས་དང་འགལ་བའི་སྐྱོན་བཞི། རིགས་པ་དང་འགལ་བ་དང་ལྔ། བཀའ་སྤྱི་དང་འགལ་བའི་སྐྱོན་དང་དྲུག་འབྱུང༌། དེའང་དཀྱུས་དང་འགལ་བ་བཞི་ནི། ཉེར་གཅིག་པ་ནས། འགྲོ་བའི་ཚུལ་དུ་སྔོན་བྱུང་བ། །ཞེས་པ་དང༌། ཉེར་གཉིས་པ་ནས། གསང་བ་མཆོག་གི་བདག་ཡིན་པས། །ཞེས་པ་དང༌། ཉེར་གཉིས་པ་དང་ཉེར་ལྔ་པ་ནས། ཉན་ཐོས་ཀྱི་མཆོག་དང་ཤཀ་ཐུབ་དང་རྟ་མགྲིན་གྱིས་མ་ཐུལ་བར་བཤད་པ་དང༌། སུམ་ཅུ་པ་ལས། བདག་ནི་རྡོ་རྗེས་མངོན་དུ་དབང་བསྐུར་བས། །སངས་རྒྱས་ཀུན་གྱི་དེང་ཉིད་བདག་དབང་བསྐུར། །བཅོམ་ལྡན་ཐམས་ཅད་མཆོག་ནི་བདག་ལགས་ཏེ། །ཞེས་པ་དང་བཞིའོ། །རིགས་པ་དང་འགལ་བ་ནི། རུ་ཏྲས་ཚོགས་མ་བསགས་སྒྲིབ་པ་མ་སྦྱང་བར་སངས་རྒྱས་ཀྱི་ཞལ་མཐོང་བར་མི་རིགས་སོ། །བཀའ་སྤྱི་དང་འགལ་བ་ནི། མདོ་སྡེ་མྱ་ངན་ལས་འདས་པ་ལས། རིགས་ཀྱི་བུ་དེའི་ཚེ་དེའི་དུས་ན་བདུད་སྡིག་ཏོ་ཅན་ནི་གཞན་དུ་མ་རྟོག་ཅིག ཟེར་བས་བདུད་ཀྱང་རང་རྒྱུད་པ་མེད་དེ། བཅོམ་ལྡན་འདས་ཉིད་ཀྱི་སྤྲུལ་པ་ཡིན་པར་འདོད་པས། རུ་ཏྲ་ཡང་རང་རྒྱུད་པ་མེད་དེ་སངས་རྒྱས་ཉིད་ཀྱི་སྤྲུལ་པར་འགྲོ འོ།།

༼༤༣༽ཡང་སྤྲུལ་པ་ཁོ་ན་ལས་རང་རྒྱུད་པ་མིན་ན་ཡང་སྐྱོན་དྲུག་འོང་སྟེ། དཀྱུས་དང་འགལ་བ་བཞི་ནི། ཉི་ཤུ་པ་ནས། མ་དག་པའི་སྐྱེ་རྒྱུད་བསྟན་པའི་ལེའུ། ཞེས་པ་དང༌། ཉེར་གཅིག་པ་ནས། སྲིད་གསུམ་ལོག་པའི་ལམ་དུ་བཙུད་པ་དང༌། ཉེར་དྲུག་པ་ལས། རྒྱུ་ནི་མུན་པའི་རི་བོ་ལས་བྱུང་ངོ༌། །རྐྱེན་ནི་གསང་སྔགས་ཀྱི་བཀའ་བསྒོ་ལོག་པའི་དཀའ་ཐུབ་དྲག་པོ་ལས་བྱུང་བའོ། །འབྲས་བུ་ནི་སྡུག་བསྔལ་གྱི་རི་བོར་སྨིན་ཏོ། །རིགས་ནི་དམན་རིགས་གདོལ་པ་འབྱུང་པོ་ཡི་དྭགས་ཀྱི་རིགས་སུ་གཏོགས་པའོ། །ལས་སྐལ་གྱི་སྤྱོད་པ་ནི་འཁོར་བའི་དངོས་པོ་བཞི་ལས་འཇོལ་ཉོག་ཏུ་སྤྱོད་པའོ། །འདི་མ་བཏུལ་ན་ལུས་ཅན་གྱི་བྱང་ཆུབ་ཀྱི་སྙིང་པོ་ཡུན་རིང་དུ་ནུབ་པའི་སྐྱོན་དུ་འགྱུར་རོ། །ཞེས་པ་དང༌། ཉེར་དགུ་པ་ནས། ཁུངས་བྱུང་རྩད་བཅད་བདག་ལས་བྱུང༌། །བདག་འཛིན་བདག་གིར་རྟོག་པ་ཡི། །ཕྱིན་ཅི་ལོག་སྟོབས་བརྩོན་འགྲུས་ཀྱིས། །གནས་ངན་ལེན་པའི་དེད་དཔོན་བྱེད། །ཅེས་པ་དང་བཞིའོ། །རིགས་པ་དང་འགལ་བ་ནི། རང་རྒྱུད་པའི་རུ་ཏྲ་མེད་ན། སྤྲུལ་པ་དོན་མེད་དུ་འགྲོ་བའི་སྐྱོན་འོང་སྟེ། གདུལ་བྱ་མེད་པས་གདུལ་བྱེད་ལ་དགོས་པ་མེད་དོ། །སྔར་རང་རྒྱུད་པ་མ་བྱུང་ཡང་ད་ཕྱིས་འབྱུང་གི་དོགས་ནས་སྤྲུལ་ཟེར་ན། ཁམས་གསུམ་གྱི་སེམས་ཅན་ལ་རུ་ཏྲ་རང་རྒྱུད་པ་སྔར་མ་བྱུང་བས་ད་ཡང་མི་འོང་སྟེ། རྒྱུ་རྐྱེན་ཁྱད་པར་མེད་པའི་ཕྱིར་རོ། །གཏན་ཚིགས་མ་གྲུབ་ཟེར་ན། རྒྱུ་ཁམས་གསུམ་གྱི་སེམས་ཅན་ནི་སྔར་ཡང་ཡོད། རྐྱེན་གསང་སྔགས་མགོ་སྟེ་བཀའ་བསྒོ་ལོག་པ་ནི་སྔར་ཡང་བྱུང་བས། ད་སྔར་རུ་ཏྲ་མ་བྱུང་ན་ད་ཡང་མི་འབྱུང་སྟེ། རྒྱུ་རྐྱེན་ཁྱད་པར་མེད་པའི་གཏན་ཚིགས་གྲུབ་བོ། །འོ་ན་སེམས་ཅན་གྱི་སེམས་ལྟ་བུ་དེ་སྔར་སངས་རྒྱས་སུ་མ་སོང་བས་ད་ཡང་མི་འགྲོ་སྟེ། རྒྱུ་རྐྱེན་ཁྱད་པར་མེད་པའི་ཕྱིར། །ཞེས་མགོ་བགྲེ་ན། དེ་ནི་ཁྱབ་པ་མ་གྲུབ་སྟེ། སྤྱིར་ཁམས་གསུམ་གྱི་སེམས་ཅན་ལ་སངས་རྒྱས་ཀྱི་རྒྱུ་ཡང་ཡོད་ལ། རྐྱེན་དམ་པའི་ཆོས་ཡོད་པས་སྔར་ཡང་སངས་རྒྱས་བྱུང་ཞིང༌། བདག་ལྟ་བུ་ལ་སེམས་ཉིད་ཀྱང་ཡོད་ལ། རྐྱེན་ལམ་གྱིས་ཡོངས་སུ་སྦྱོངས་ན་སངས་རྒྱས་འབྱུང་བར་འཐད་དོ། །དེ་བས་རྒྱུ་མཚན་མི་མཚུངས་པས་མགོ་མི་བགྲེའོ། །དེས་ན་རུ་ཏྲ་ནི་སྔར་སེམས་ཅན་ལ་མ་བྱུང་བས་ད་ཡང་མི་འབྱུང་ངོ༌། །བཀའ་སྤྱི་དང་འགལ་བ་ནི། རུ་ཏྲ་སྤྲུལ་པ་བ་ཁོ་ན་ཡིན་ན། ངན་སོང་གསུམ་པོ་ཡང་སྤྲུལ་པ་བར་འགྲོ་བའི་སྐྱོན་འོང་ངོ༌། །སོང་མོད་སྙམ་པ་ལ། ངན་སོང་གསུམ་པོ་སྤྲུལ་པ་བ་ཁོ་ནར་སོང་ན་༼༤༤༽ལས་དགེ་སྡིག་གི་རྣམ་པར་སྨིན་པ་རྫུན་དུ་འགྲོ་བའི་སྐྱོན་འོང་སྟེ་བཀའ་སྤྱི་དང་འགལ་གསུངས་སོ། །དེས་ན་རུ་ཏྲ་རང་རྒྱུད་པ་དང་སྤྲུལ་པ་བ་གཉིས་ཆར་དུ་བཞེད་དོ། །འདི་ལ་ཀུན་མཁྱེན་ཤེས་རབ་སེང་གེས། ཁོ་བོ་ནི་རུ་ཏྲ་སྤྲུལ་པ་བ་ཡོད་པ་མི་འགོགས་ཏེ། དཀྱུས་འདི་རང་རྒྱུད་པར་བཟུང་ན་འཐད་དོ། །ཞེས་གསུངས་ཏེ་གཞུང་གི་དགོངས་པ་དངོས་སོ། །འོ་ན་གོང་གི་རང་རྒྱུད་པ་ཁོ་ན་ཡིན་ན་སྐྱོན་དྲུག་གསུངས་པ་དེ་འབྱུང་ངམ་ཞེ་ན། དཀྱུས་དང་འགལ་བ་བཞི་མི་འོང་བ་གཞུང་དོན་མཁས་གྲུབ་སྔ་མས་བཀྲལ་བ་ལྟར་གསལ་བར་བཤད་པས་ངེས་ནུས་ལ། རིགས་པ་དང་མི་འགལ་ཏེ། རུ་ཏྲ་ཀུན་ཏུ་བཟང་པོའི་བསྟན་པ་ལ་སྨོན་ལམ་གཅིག་ཏུ་བཏབ་པ་སོགས་ལམ་ལ་ཞུགས་པར་ངེས་ལ། འོན་ཀྱང་བསྐལ་པ་ཀུན་དགའི་དུས་སུ་གསང་བའི་ལུང་གི་བཀའ་བསྒོ་ལོག་སྟེ་གོལ་བའི་ལས་ཀྱིས་ངན་སོང་ཁ་བརྒྱུད་དེ་སྒྲིབ་པ་ཕལ་ཆེ་བ་མྱོང་སྟོབས་ཀྱིས་ཟད་ཅིང༌། མཐར་ལས་དྲག་པོས་རུ་ཏྲར་སྨིན་པ་ནའང་རྒྱལ་བའི་ཐབས་མཁས་ཀྱིས་ལས་སྒྲིབ་རིམ་པར་སྦྱངས་ཤིང་ཐུགས་རྗེ་དང་འབྲེལ་བས་གདུལ་བྱའི་སྐབས་ལ་བབ་པར་གྱུར་པ་ན་དངོས་པོ་བཞིའི་བསྟན་པས་འདུལ་སྐལ་ལྟར་གསང་བ་མཆོག་གི་ཐབས་ཀུན་གྱི་ཁྱད་ཆོས་དང་མཐུན་པར་མཛད་པ་རྨད་དུ་བྱུང་བའི་བཀའི་ལས་དང་འཕྲད་པས་སངས་རྒྱས་ཀྱི་ཞལ་མཐོང་བ་སོགས་ཤིན་ཏུ་འཐད་པར་ལུང་སྤྱི་ལྟར་ངེས་ཤིང༌། བཀའ་སྤྱི་དང་མི་འགལ་ཏེ། རིགས་ཀྱི་བུ་དེའི་ཚེ་དེའི་དུས་ན། ཞེས་པས་ཚིག་གི་ནུས་པ་ལ་སོགས་པ་གཏན་ཚིགས་ཚད་མས་གྲུབ་པའི་ཕྱིར་རོ། །དེས་ན་དཀྱུས་འདིར་རང་རྒྱུད་པའི་མཚན་གཞིར་གསུངས་ཀྱང་སྤྱིར་རུ་ཏྲ་སྤྲུལ་པ་བ་ཡོད་པར་བཞེད་པས། གོང་གི་གཉིས་ཆར་བཞེད་པ་དང་དགོངས་པ་གཅིག་ཏུ་གྱུར་ཏེ་རྒྱུད་ལུང་གི་སྤྱི་གནད་ཟབ་ཅིང་རྒྱ་ཆེ་བ་སློང་བའི་གསུང་གི་གསང་བ་ཕུལ་དུ་བྱུང་བར་མཐོང་བས་ཤིན་ཏུ་སྤྲོས་ཀྱང་ཆོག་གོ །དེ་དག་གིས་ཐེག་པ་ཆེན་པོ་ངེས་པར་འབྱུང་བའི་ཚུལ་ལས། གདུལ་བྱའི་སྐབས་ལ་བབ་པའི་ཚེ་ན་རུ་ཏྲ་ཡོངས་སུ་བཏུལ་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ། བྱུང་ཚུལ་བསྟན་པ་དྲུག་པ་ཉིད་རྣམ་པར་བཀྲོལ་ཏེ་ཡང་དག་པར་བཤད་པའོ།།

ལེའུ་སོ་གཉིས་པ་ཐུགས་ཡེ་ཤེས་སྣང་བའི་རྒྱན་བཀོད་པ།

༈ བམ་པོ་ལྔ་པར་ཟུག་པ། བདུན་པ་བྱིན་གྱིས་བརླབས་ཀྱིས་སྣང་བའི་བྱུང་ཚུལ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

དེ་ནས་ཡང་ལང་ཀའི། ཞེས་པ་ནས། ༼༤༥༽སྣང་བ་དེ་ཁོ་ན་ཉིད་ལ་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ལངྐའི་བདག་པོ་བྱང་ཆུབ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་སྔོན་དུ་བྱུང་བའི་ཚིག་བཅུ་གཉིས་པའི་བདུན་པ་བྱིན་གྱིས་བརླབས་ལས་སྣང་བ་ན་ཡང་འབྱུང་ཞེས་བྱུང་བ་འདི་སྐད་ཅེས་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས། ལུང་བསྟན་པ་གཏམ་དུ་བརྗོད་པའི་སྐབས་སུ། བྱིན་གྱིས་བརླབས་ལས་སྣང་བ་ཡང་འབྱུང་ཞེས་བརྗོད་པ་དེ། ཇི་ལྟ་ཞིག་ཏུ་སྣང་ཞིང་གྲགས་ལགས། སྨྲས་པ། ལངྐའི་བདག་པོ་གང་གདུལ་བྱའི་སྐབས་ལ་བབ་པར་གདུལ་བྱ་ཡོངས་སུ་རྫོགས་པའི་སྐྱེས་བུ་དེ་དག་ཡོངས་སུ་སྣང་བ་དེ་ཁོ་ན་ཉིད་ལ་བྱའོ།།

སྤྱིར་བྱུང་ཚུལ་འདི་ཉིད་གང་གིས་ཞུས་ལན་ཡིན་པར་འགྲེལ་པ་རྣམས་ཀྱིས་མ་ཟིན་ཡང་ལྷ་རྗེ་ཡང་ཁྱེད་བླ་མས་བཞེད་པར། གསང་བ་རྒྱུད་ཀྱི་བགྲོ་བར་མཛོད་ཀྱི་ལན་ཏེ། ཁྱད་པར་རྩལ་འཕངས་ལས་འབྲས་བུ་བདག་དོན་གྲུབ་པ་རྒྱུད་གནས་ལུགས་ལས་བྱིན་རླབས་འབྱུང་བའི་ལྟ་བ་རྒྱ་མཚོའི་རྦ་རླབས་ལྟ་བུའམ། ནམ་མཁའི་ཆོ་འཕྲུལ་ལྟ་བུ་ཉིད་རྒྱས་པར་སྟོན་ནོ། །དེས་ན་ཞུ་བ་དྲུག་གི་ལན་དུ་བྱུང་ཚུལ་བཅུ་གཉིས་སོ་སོར་སྦྱར་བ་ཉིད་མདོའི་ཀ་བ་ཡང་ཁྱེད་བླ་མའི་བཞེད་པ་ལྟར་དམ་པ་རིན་པོ་ཆེས་བཀོད་པ་ཡིན་གྱི། འགྲེལ་པ་རྣམས་ལས་མི་འབྱུང་ངོ༌། །འདི་ཉིད་བར་གྱི་གསལ་བྱེད་ལྟ་བུ་ཡིན་པས་གོང་འོག་གི་སྐབས་ཀུན་ལ་ཤེས་པར་བྱའོ། །དེ་ནས་ཡང་སྡུད་པ་པོ་ལང་ཀའི་བདག་པོ། བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྟོན་པ་གསང་བ་པའི་བདག་པོ་དེ་ལ། སྔོན་དུ་བྱུང་བའི་ཚིག་བཅུ་གཉིས་པའི་བདུན་པ་བྱིན་གྱིས་བརླབས་ལས་སྣང་བ་ན་ཡང་བྱུང་ཞེས་འབྱུང་བའི་འདི་སྐད་ཅེས་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་རྒྱུད་དུ་བརྗོད་པའི་སྐབས་སུ་བྱིན་གྱིས་བརླབས་ལས་སྣང་བ་ན་ཡང་འབྱུང༌། ཞེས་བརྗོད་པ་དེ་ཇི་ལྟ་བུ་ཞིག་ཏུ་སྣང་ཞིང་གྲགས་པ་ལགས། ཞེས་གསོལ་བ་ལ། གསང་བ་པ་ཆེན་པོས་སྨྲས་པ། ལང་ཀའི་བདག་པོ། གང་གདུལ་བྱའི་སྐབས་ལ་བབ་པར་གྱུར་པ་ན་ཁྱེའུ་ལྔ་ངེས་པ་ཇི་བཞིན་དུ་རྙེད་པའམ་དྲེགས་པ་ལ་སོགས་པ་གདུལ་བར་བྱ་བ་ཡོངས་སུ་གྲོལ་ཏེ་མངོན་པར་རྫོགས་པར་སངས་རྒྱས་པར་བྱེད་ཅིང༌། དེ་འདུལ་བའི་སྐྱེས་བུ་ཐུབ་དཀའ་དང་དན་ཕག་རྡོ་རྗེ་སྙིང་པོ་དང་ཕྱག་ན་རྡོ་རྗེར་གནས་གྱུར་པ་དེ་དག་གང་དུ་ཐུན་མོང་གི་བྱིན་རླབས་ཡོངས་སུ་སྣང་བ་དེ་ཁོ་ན་ཉིད་ལ་བྱའོ།།

གཉིས་པ་རྒྱས་པར་བཤད་པ་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུས་ཏེ་ངོ་བོ་ངོས་བཟུང་བའོ། །དང་པོ་ནི།

སྨྲས་པ། ཞེས་པ་ནས། ཡོངས་སུ་སྣང་བར་འགྱུར་རོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ་གང་གདུལ་བྱའི་སྐབས་ལ་བབ་པར་གདུལ་བྱ་ཡོངས་སུ་རྫོགས་པའི་སྐྱེས་བུ་དམ་པ་དེ་དག་གང་དུ་ཇི་ལྟར་སྣང་བར་འགྱུར། དེ་སྐད་ཅེས་སྨྲས་པ་ལས། གསང་བ་པའི་བདག་པོས་འདི་སྐད་ཅེས་སྨྲས་སོ། །ཀྱེ་ལངྐའི་བདག་པོ། གདུལ་བྱ་ཡོངས་སུ་རྫོགས་པའི་སྐྱེས་བུ་དམ་པ་དེ་དག་ནི་ཐམས་ཅད་དུ་ཡོངས་སུ་སྣང་བར་འགྱུར་རོ།།

ཡང་སྨྲས་པ། གསང་བ་པའི་བདག་པོ། གང་གདུལ་བྱའི་སྐབས་ལ་བབ་པར་གདུལ་བྱ་ཡོངས་སུ་རྫོགས་པའི་སྐྱེས་བུ་དམ་པ་དེ་དག་ཐུན་མོང་གི་བྱིན་རླབས་གནས་དུས་གང་དུ་སྣང་༼༤༦༽ལུགས་ཇི་ལྟར་ཡོངས་སུ་སྣང་བར་འགྱུར། དེ་སྐད་ཅེས་དྲིས་པ་ལས། གསང་བ་པའི་བདག་པོས་འདི་སྐད་ཅེས་སྨྲས་སོ། །ཀྱེ་ལང་ཀའི་བདག་པོ། གང་གདུལ་བར་བྱ་བ་དྲེགས་པ་ཆེན་པོ་ལ་སོགས་པ་ཡོངས་སུ་གྲོལ་བ་དང་ཐུབ་དཀའ་དང་དན་ཕག་རྡོ་རྗེ་སྙིང་པོ་དང་ཕྱག་ན་རྡོ་རྗེར་ཡང་དག་པར་རྫོགས་པར་སངས་རྒྱས་པའི་སྐྱེས་བུ་དམ་པ་དེ་དག་གི་ཐུན་མོང་གི་བྱིན་རླབས་ནི། དུས་ཐམས་ཅད་ནས་ཞིང་ཁམས་ཐམས་ཅད་དུ་སྐྱེ་བ་མེད་པའི་ཆོས་ཉིད་ལས་འགག་པ་མེད་པར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་གསང་བ་ཟབ་མོའི་དོན་དུ་མི་སྒྲིབ་པར་ཡོངས་སུ་སྣང་བས་ན་ཆོས་གང་ལའང་སྤོང་ལེན་མེད་པར་འགྱུར་རོ།།

གཉིས་པ་རྒྱས་པར་བཤད་པ་ནི།

དྲིས་པ། ཞེས་པ་ནས། ཆོས་ཐམས་ཅད་དུ་སྣང་ངོ༌། །ཞེས་པའི་བར་གྱིས་བསྟན་ཏེ།

དྲིས་པ། དེ་ཇི་ལྟར་ཡོངས་སུ་སྣང་བར་འགྱུར། སྨྲས་པ། ལངྐའི་བདག་པོ་སྐྱེས་བུ་དམ་པ་དེ་དག་ནི་ཆོས་རྣམས་ཀྱི་ཆོས་ཉིད་དེ་ཁོ་ན་ཉིད་ལས་མི་གཞན་ལ། དེ་ལས་ནི་ཡེ་ཤེས་དང་། སྐུ་དང་། སྤྲུལ་པ་དང་། ཡི་གེ་དང་། ཚིག་དང་། ཆོས་དང་། སྐུ་གདུང་དང་། རིང་བསྲེལ་ལ་སོགས་པ་ཆོས་ཐམས་ཅད་དུ་སྣང་ངོ་།།

ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ། དེ་ཡི་དངོས་གཞི་ཇི་ལྟ་བར་ཡོངས་སུ་སྣང་བར་འགྱུར། གསང་བདག་ཆེན་པོས་སྨྲས་པ། ལང་ཀའི་བདག་པོ། སྐྱེས་བུ་དམ་པ་དེ་དག་རྣམས་ནི་ཆོས་རྣམས་ཀྱི་ཆོས་ཉིད་ཡེ་ཇི་བཞིན་པ་དེ་ཁོ་ན་ཉིད་དབྱེར་མེད་པའི་ངང་ལས་མི་གཞན་ལ། ངང་ཆེན་པོ་དེ་ལས་ནི་ཐུགས་ཀྱི་བྱིན་རླབས་ཡེ་ཤེས་དང༌། སྐུ་ཡི་བྱིན་རླབས་ཆོ་འཕྲུལ་དང་སྤྲུལ་པ་སྣ་ཚོགས་འགོད་པ་དང༌། དེ་ལས་གསུང་གི་བྱིན་རླབས་ཨ་ལ་སོགས་པའི་ཡི་གེ་དང༌། དེ་འདུས་པ་ལས་ཚིག་དང༌། དེ་ལས་བསྟན་པ་དམ་པའི་ཆོས་ཀྱི་སྒྲ་དང༌། ཆོས་ཉིད་རྟོགས་པའི་བྱིན་རླབས་སྐུ་གདུང་ཤ་རི་རམ་ལ་སོགས་པ་དང༌། རིང་བསྲེལ་རུས་པའི་སྐུ་ལ་སོགས་པ་ཡོན་ཏན་ཇི་སྙེད་པ་རྣམས་སུ་འཆར་ཞིང་ཆོས་ཐམས་ཅད་དུ་རང་སྣང་བར་འབྱུང་ངོ༌།།

གསུམ་པ་ཞབས་བསྡུས་ཏེ་ངོ་བོ་ངོས་བཟུང་བ་ནི།

ལང་ཀའི། ཞེས་པ་ནས། གྲགས་ཤིང་གྲགས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ཡང་དེ་ཁོ་ན་ཉིད་ཀྱི་བྱིན་གྱིས་བརླབས་འབའ་ཞིག་ལས་སྣང་བར་འགྱུར་ཏེ། ལངྐའི་བདག་པོ། ཇི་ལྟ་ཇི་ལྟར་ནམ་མཁའི་དབྱིངས་ན་ཉི་ཟླ་སྐར་ཚོགས་མ་གཡོས་པའི་གཟུགས་བརྙན་ཆུ་དངས་པ་ཐ་དད་པ་ན་སྣང་བཞིན། ཆོས་རྣམས་ཀྱི་ཆོས་ཉིད་གསང་བའི་དབྱིངས་རྣམ་པར་དག་པ་ལས་ཆོས་ཐམས་ཅད་སྣང་བ་ཡིན་ལ། ཆོས་ཐམས་ཅད་ནི་སྐུ་གསུང་ཐུགས་ཡོན་ཏན་འཕྲིན་ལས་ལྔ་ཁོ་ནར་ཟད་དེ། དེ་ནི་གང་ཐེག་པ་ཆེན་པོའི་གསང་སྔགས་མཚོན་པར་བྱེད་པའི་སྒོར་སྣང་བ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་རང་བཞིན་གྱི་གསང་བའི་དབྱིངས་གང་ཡིན་པ་དེ་ནི། ཐེག་པ་ཆེན་པོའི་གསང་སྔགས་དེ་ཁོ་ན་ཉིད་ཡིན་པར་ཕྱིན་ཅི་མ་ལོག་པར་ངེས་པའི་ཕྱིར་རོ། །དེ་ལ་ནི་ངོ་བོ་ཉིད་ཀྱི་སྐུ་ཞེས་བྱ་བར་གྲགས་ཤིང་གྲགས་པར་འགྱུར་རོ།།

ལང་ཀའི་བདག་པོ། དེ་ཡང་སྣང་བ་དེ་དག་གཞན་ཞིག་ལས་སྣང་བ་མ་ཡིན་ཏེ། ཡེ་ཇི་བཞིན་པ་ལྷུན་གྱིས་རྫོགས་པའི་དེ་ཁོ་ན་ཉིད་རྟོགས་པའི་གསང་བ་སྔགས་ཀྱི་བྱིན་རླབས་འབའ་ཞིག་ལས་སྣང་བར་གྱུར་ཏེ། སྣ་ཚོགས་ཉི་ཚེ་བར་འབྱུང་ངོ༌། །ལང་ཀའི་བདག་པོ། མཐུན་པའི་དཔེ་ཇི་ལྟ་ཇི་ལྟར་ནམ་མཁའི་དབྱིངས་ན་གནས་པའི་ཉི་ཟླ་དང་སྐར་ཚོགས་ཐམས་ཅད་དེ་ལས་མ་གཡོས་པར་རྣམ་པའི་གཟུགས་བརྙན་ཆུ་དྭང་བ་ཐ་དད་པར་སྣང་ཞིང་གསལ་བར་འཆར་བ་བཞིན་དུ། སྦྱོར་བའི་ཚིག་གཉིས་ཀྱིས་དཔེ་ཉིད་ཀྱི་ཚུལ་དང་དོན་རྗེས་སུ་སྦྱོར་ཏེ་བསྟན་པ་ནི། དངོས་པོའི་ཆོས་རྣམས་ཀྱི་ཆོས་ཉིད་དེ་ཁོ་ན་ཉིད་༼༤༧༽ངོ་བོ་ཟབ་ཅིང་ཕྲ་ལ་རྟོགས་པར་དཀའ་བས་གསང་བའི་དབྱིངས་མུ་མཐའ་ལས་འདས་པས་མཐའི་སྐྱོན་རྣམས་མ་སྤངས་ངང་གིས་བྲལ་ཏེ་རང་བཞིན་གྱིས་རྣམ་པར་དག་པ་ཉིད་ནི་ཀུན་གྱི་འབྱུང་ཁུངས་ལྟ་བུ་ལས་གདུལ་བྱའི་ངོ་ལ་འགྲོ་བ་དང་འོང་བ་མེད་པར་ཆོས་ཐམས་ཅད་དུ་སྣང་བ་ནི་འབྲས་བུའི་ཆོས་ཉིད་གསང་བ་མཆོག་གི་རོལ་པ་རང་སྣང་བ་ཡིན་ལ། དེ་ལྟར་སྣང་བའི་ཆོས་ཐམས་ཅད་ནི་རྩ་བའི་དབང་གིས་བསྡུ་ན་སྐུ་གསུང་ཐུགས་ཡོན་ཏན་ཕྲིན་ལས་ལྔ་ཁོ་ནར་ཡང་དག་པར་འདུ་བར་ཟད་དེ། དེ་དག་ནི་གང་ལྟ་སྤྱོད་རྨད་དུ་བྱུང་བའི་ཐེག་པ་ཆེན་པོ་གསང་སྔགས་ངང་དང་རང་བཞིན་གཉིས་སུ་ མེད་པའི་བདག་ཉིད་ཆེན་པོར་ལྷུན་གྱིས་གྲུབ་པ ་ཉིད་གདུལ་བྱ་ལ་མཚོན་པར་བྱེད་པའི་སྒོར་རང་སྣང་ཞིང་འབྱུང་བ་ཡིན་ནོ། །དེའི་གཏན་ཚིགས། དེ་ཅིའི་ཕྱིར་ཞེ་ན། ཆོས་ཐམས་ཅད་ཀྱི་རང་བཞིན་ཆོས་ཉིད་སྐྱེ་བ་མེད་པ་གསང་བའི་དབྱིངས་གང་ཡིན་པ་དེ་ནི། ཐེག་པ་ཆེན་པོ་གསང་སྔགས་ཀྱི་དེ་ཁོ་ན་ཉིད་ངོ་བོ་དབྱེར་མེད་ཀྱི་གནས་ལུགས་ཡིན་པར་ཕྱིན་ཅི་མ་ལོག་པའི་ཚད་མས་ཡང་དག་པར་ངེས་པའི་ཕྱིར་རོ། །དེ་ཡི་མཚན་ལ་ནི་ངོ་བོ་ཉིད་ཀྱི་སྐུ་ཞེས་བྱ་བར་གདུལ་བྱའི་ངོ་ལ་གྲགས་ཤིང་གྲགས་པར་གྱུར་ཏོ། །ཞེས་བྱུང་ཚུལ་གྱི་སྤྱི་དོན་བསྟན་པའོ།།

གཉིས་པ་བྱེ་བྲག་ཏུ་བཤད་པ་ལ་བཞི་སྟེ། ཐུགས་ཀྱི་བྱིན་རླབས། སྐུའི་བྱིན་རླབས། གསུང་གི་བྱིན་རླབས། ཡོན་ཏན་དང་ཕྲིན་ལས་ཀྱི་བྱིན་རླབས་སོ། །དང་པོ་ལ་གཉིས་ཏེ། རྒྱས་པར་བཤད་པ། ཞབས་བསྡུ་བའོ། །དང་པོ་ལ་ལྔ་སྟེ། སེམས་དེ་ཁོ་ན་ཉིད་མཚོན་བྱེད་ཀྱི་སྒོར་བསྟན་པ། མཚོན་བྱ་དོན་གྱི་ངོ་བོ་བཤད་པ། ཤེས་རབ་གང་གི་ཡུལ་དུ་གྱུར་ཚུལ་བསྟན་པ། མཚོན་བྱེད་ཀྱི་དཔེ་བཤད་པ། ཡེ་ཤེས་ཀྱི་དོན་བསྟན་པའོ། །དང་པོ་ལ་གཉིས་ཏེ། རྒྱས་པར་བཤད་པ། ཞབས་བསྡུ་བའོ། །དང་པོ་ལ་བཞི་སྟེ། སེམས་ཀྱི་ཆོས་ཉིད་ལས་རྣམ་ཤེས་སུ་སྣང་བ། རྣམ་ཤེས་ལས་ཡེ་ཤེས་སུ་སྣང་བ།

ཡེ་ཤེས་ལས་སྐུ་ལྔར་སྣང་བ། སྤྲུལ་སྐུ་ལས་ཚིག་དང་ཡི་གེ་ལ་སོགས་པར་སྣང་བའོ། །དང་པོ་ནི།

ལང་ཀའི། ཞེས་པ་ནས། འཇུག་པའི་རྣམ་པར་ཤེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་སེམས་ཀྱི་ཆོས་ཉིད་ལས་ནི་རྣམ་པར་ཤེས་པ་བཞིར་སྣང་ལ། རྣམ་པར་ཤེས་པ་བཞི་ནི།

རྩ་བའི་རྣམ་པར་ཤེས་པ་དང་། དམིགས་པའི་རྣམ་པར་ཤེས་པ་དང་། ཀུན་ཏུ་སྣང་བའི་རྣམ་ཤེས་པ་དང་།

འཇུག་པའི་རྣམ་པར་ཤེས་པའོ།།

ལེའུ་འདིས་ངེས་དོན་སྟོན་ནོ། །འབྲས་བུ་ལྔས་གསང་བ་མཚོན་པའི་ཐོག་མ་ཐུགས་ཀྱི་བྱིན་རླབས་སྣང་བ་གང་སྙམ་པ་ལ། ལང་ཀའི་བདག་པོ། གང་སེམས་ཀྱི་ཆོས་ཉིད་མ་བསླད་ཅིང་མ་བཅོས་པའི་རང་བཞིན་རྣམ་ཤེས་དགུ་པ་ལས་ནི་ལས་ཀྱི་ཁྱད་པར་གྱིས་རྣམ་པར་ཤེས་པ་བཞིར་སྣང་ལ། རྣམ་པར་ཤེས་པ་བཞི་ནི། ༼༤༨༽བག་ཆགས་ཀྱི་གཞི་རྟེན་རྩ་བའི་རྣམ་པར་ཤེས་པ་ཀུན་གཞི་དང༌། བདག་ཏུ་དམིགས་པའི་རྣམ་པར་ཤེས་པ་ཉོན་མོངས་པ་ཅན་གྱི་ཡིད་དང༌། ཆོས་སྣ་ཚོགས་ཀུན་ཏུ་སྣང་བའི་རྣམ་པར་ཤེས་པ་ཡིད་དང༌། ཡུལ་ལ་འཇུག་པའི་རྣམ་པར་ཤེས་པ་སྒོ་ལྔ འོ།།

གཉིས་པ་རྣམ་ཤེས་ལས་ཡེ་ཤེས་སུ་སྣང་བ་ལ་གཉིས་ཏེ། ཡེ་ཤེས་སུ་ཤར་བ་དངོས་བཤད་པ། བརྩད་པའི་སྐྱོན་དང་བྲལ་བའོ། །དང་པོ་ནི།

རྣམ་པར་ཤེས་པ། ཞེས་པ་ནས། བྱ་བ་གྲུབ་པའི་ཡེ་ཤེས་སུ་སྣང་ངོ་། །ཞེས་པའི་བར་གྱིས་བསྟན་ཏེ།

རྣམ་པར་ཤེས་པ་བཞི་ལས། ཡེ་ཤེས་ཆེན་པོ་ལྔར་སྣང་སྟེ། སེམས་ཀྱི་ཆོས་ཉིད་དེ་ཁོ་ན་ཉིད་ལས།

ཆོས་ཀྱི་དབྱིངས་ཀྱི་ཡེ་ཤེས་སུ་སྣང་ངོ་། །རྩ་བའི་རྣམ་པར་ཤེས་པ་ལས། མེ་ལོང་ལྟ་བུའི་ཡེ་ཤེས་སུ་སྣང་ངོ་།

དམིགས་པའི་རྣམ་པར་ཤེས་པ་ལས། མཉམ་པ་ཉིད་ཀྱི་ཡེ་ཤེས་སུ་སྣང་ངོ་། ཀུན་ཏུ་སྣང་བའི་རྣམ་པར་ཤེས་པ་ལས། སོ་སོར་རྟོག་པའི་ཡེ་ཤེས་སུ་སྣང་ངོ་། །འཇུག་པའི་རྣམ་པར་ཤེས་པ་ལས། བྱ་བ་གྲུབ་པའི་ཡེ་ཤེས་སུ་སྣང་ངོ་།།

རྣམ་པར་ཤེས་པ་བཞི་དང་བཞིའི་ངོ་བོ་རྣམ་ཤེས་དགུ་པ་ཉིད་ཡེ་ནས་མ་བསླད་པར་ཡེ་ཤེས་ཡིན་པའི་ཕྱིར། དེ་ལས་ལམ་གྱི་བློ་ལ་ཡེ་ཤེས་ཆེན་པོ་ལྔར་སྣང་བ་སྟེ། སེམས་ཀྱི་རང་བཞིན་རང་རིག་པ་ཕྱོགས་རིས་དང་བྲལ་བ་མ་ནོར་བའི་དོན་དུ་ངེས་པ་ཡེ་ཕྱི་མོའི་ཆོས་ཉིད། མཚན་ཉིད་ཅིས་ཀྱང་མ་བསྒྲིབས་པར་རང་གསལ་བའི་དེ་ཁོ་ན་ཉིད་ལས་ཆོས་ཀྱི་དབྱིངས་ཀྱི་ཡེ་ཤེས་སུ་སྣང་སྟེ། སྒྱུ་འཕྲུལ་རྒྱས་པ་ལས། རྣམ་རྟོག་ཀུན་གཞི་མ་ཡིན་པའི། །རང་བཞིན་མེད་པ་དོན་གྱི་གཞི། །འདི་ནི་ཆོས་ཀྱི་དབྱིངས་ཞེས་བྱ། །དེ་བཞིན་ཉིད་ཀྱི་ཡེ་ཤེས་སོ། །ཞེས་འབྱུང་ངོ་། །རྣམ་པར་བྱང་བའི་རྟེན་ཀུན་ནས་ཉོན་མོངས་པའི་གཞི་དང་རྩ་བར་གྱུར་པའི་རྣམ་པར་ཤེས་པ་སྦྱོར་བ་དོན་གྱི་ཀུན་གཞི་ལས་ཡེ་ནས་སྤྱོད་ཡུལ་དག་པའི་ངོ་བོ་ཉིད་གསལ་ལ་མི་རྟོག་པ་མེ་ལོང་ལྟ་བུའི་ཡེ་ཤེས་སུ་རང་ཤར་ཞིང་སྣང་ངོ་། །ཀུན་གཞི་ལ་བདག་ཏུ་རློམ་སེམས་པས་དམིགས་པའི་རྣམ་པར་ཤེས་པ་ཁྱད་པར་གྱི་འཁོར་བཞི་དང་བཅས་པ་ཉིད་ལས་ཡེ་ནས་ཆོས་ཉིད་རྣམ་པར་དག་པ་རྟོག་པའི་ངང་ལ་བཟང་ངན་དང་ཕྱོགས་རིས་མེད་པའི་ཕྱིར་མཉམ་པ་ཉིད་ཀྱི་ཡེ་ཤེས་སུ་སྣང་ངོ་། །སྤྱི་དང་ཐུན་མོང་མ་ཡིན་པའི་ཆོས་སུ་སྣང་བའི་ཡུལ་ཀུན་མ་འགག་པར་གསལ་བས་ཀུན་ཏུ་སྣང་བའི་རྣམ་པར་ཤེས་པ་རང་དག་པ་ལས། སྤྱི་དང་རང་གི་མཚན་ཉིད་མ་འདྲེས་པར་གསལ་བའི་སོ་སོར་རྟོག་པའི་ཡེ་ཤེས་སུ་སྣང་ངོ་། །དེའང་སྤྱི་ནི་སྒོ་ལྔ་དང་ཐུན་མོང་སྟེ། སྒོ་ལྔའི་རྗེས་སུ་ཡིད་རྒྱུ་བའི་ཕྱིར་སྒོ་ལྔའི་ཡུལ་ལ་དམིགས་པས་གཟུགས་ལ་སོགས་པ་ལྔའོ། །ཐུན་མོང་མ་ཡིན་པ་ནི་བརྒྱད་དེ། འདུས་བྱས་བཞི་དང༌། འདུས་མ་བྱས་བཞིའོ། །འདུས་བྱས་བཞི་ནི། ཚོར་བ། འདུ་ཤེས། འདུ་བྱེད། རྣམ་པར་རིག་བྱེད་མ་ཡིན་པའི་གཟུགས་སོ། །འདུས་མ་བྱས་བཞི་ནི། ནམ་མཁའ་སྟེ་གཟུགས་གོ་འབྱེད་པ་དང༌། སོ་སོར་བརྟགས་པ་མ་ཡིན་པའི་འགོག་པ་ནི། ༼༤༩༽སྒོ་ལྔའི་ཤེས་པ་རྐྱེན་བཞི་ལས་སྐྱེ་བའི་དེ་མ་ཐག་རྐྱེན་མེད་པས་ཤེས་པ་སྐྱེ་བ་ལ་གེགས་བྱེད་དེ་གཏན་མི་སྐྱེ་བའོ། །སོ་སོར་བརྟགས་པས་འགོག་པ་ནི། སོ་སོར་བརྟགས་པའི་ཤེས་རབ་ཀྱི་འཁོར་བའི་ལས་ཉོན་གཏན་སྤངས་ནས་ཕྱིས་སྐྱེ་བ་མེད་པའོ། །དེ་བཞིན་ཉིད་ནི་ཆོས་ཉིད་རྣམ་པར་དག་པ་སྟེ། ཡེ་ནས་གནས་པའོ། །བཞི་པོ་དེ་ནི་རྒྱུ་འབྲས་ལས་འདས་ཏེ་གོང་གི་རྒྱུ་འབྲས་གང་ཡང་མ་ཡིན་པའི་ཕྱིར་འདུས་མ་བྱས་སོ། །བརྒྱད་པོ་དེ་ནི་སྒོ་ལྔའི་ཡུལ་མ་ཡིན་པས་ཐུན་མོང་མ་ཡིན་པ་ཞེས་བྱའོ། །ཡུལ་ལྔ་ཐ་དད་ལ་རིས་སུ་དབང་བྱེད་པས་འཇུག་པའི་རྣམ་པར་ཤེས་པ་ལྔ་ཉིད་ཡེ་དྲི་མ་དང་བྲལ་བར་རྟོགས་པ་ལས་བདག་གཞན་གྱི་དོན་ཀུན་ལྷུན་གྱིས་རྫོགས་པར་སྒྲུབ་པས་བྱ་བ་གྲུབ་པའི་ཡེ་ཤེས་སུ་སྣང་ངོ་། །མདོར་ན་ཤེས་པ་དང་ཡེ་ཤེས་གཉིས་ཀ་གཅིག་དང་དུ་མ་ལས་གྲོལ་བའི་ངོ་བོའང་མཚན་ཉིད་མཐུན་ཕྱོགས་སུ་སྣང་བར་ཟད་ཀྱི་རྒྱ་ཆད་པ་ནི་མ་ཡིན་ནོ།།

གཉིས་པ་བརྩད་པའི་སྐྱོན་དང་བྲལ་བ་ལ་གཉིས་ཏེ། རྩོལ་བའི་སྐྱོན་དང་བྲལ་བ། གྲངས་ངེས་མ་ངེས་ཀྱི་སྐྱོན་དང་བྲལ་བའོ། །དང་པོ་ནི།

ལང་ཀའི། ཞེས་པ་ནས། སྣང་བ་ཉིད་དུ་ཟད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ཡང་མིན་པ་ཞིག་ཡིན་པར་བསྒྲུབ་པའམ། མི་འདྲ་བ་ཞིག་འདྲ་བར་བཅོས་པ་ནི་མ་ཡིན་གྱི། མ་བཅོས། མ་སླད། མ་བྱས། མ་བརྩམས་པར་ཡེ་ནས་རང་བཞིན་གྱིས་དེ་ལྟར་སྣང་བ་ཉིད་དུ་ཟད་དོ།།

ལང་ཀའི་བདག་པོ། དེ་ཡང་ལམ་པ་དག་འཕྲལ་དུ་དྲི་མ་བསལ་བ་ལས། གཟོད་བྱུང་ངོ་སྙམ་པའི་རྟོག་པ་བསལ་བ་དང༌། ཡེ་ཉིད་ནས་ཡེ་ཤེས་ཡིན་པའི་དོན་རྟོགས་པའི་ཁྱད་པར་གྱིས་དགོས་པ་དང་དགོངས་པ་ཟབ་མོ་ལྡན་པའི་ཕྱིར་གསལ་བར་བསྟན་ཏེ། གང་ཟག་གིས་སྦྱངས་བསགས་བྱས་པས་སྔར་མིན་པ་ཞིག་ཡིན་པར་བསྒྲུབ་པའམ། མི་འདྲ་བ་ཞིག་གཟོད་འདྲ་བར་བཅོས་ཏེ་གསར་དུ་བྱས་པ་ནི་མ་ཡིན་གྱི། རྟོག་པས་མ་བསྒྱུར་བས་རང་བཞིན་མ་བཅོས། རྩོལ་བས་སེལ་མ་ཞུགས་པས་ངོ་བོ་མ་བསླད། རྒྱུ་རྐྱེན་ལས་མ་སྒྲུབས་པས་བྱེད་པ་པོས་མ་བྱས། དུས་འཕྲལ་དུ་མ་བྱས་པས་བྱ་བས་མ་བརྩམས་པར་ཡེ་གདོད་མ་ནས་རང་བཞིན་གྱིས་དེ་ལྟར་སྣང་བ་ཉིད་དུ་ཟད་དོ། །ཞེས་གཏན་ཚིགས་བཞིས་ཁོ་ཐག་ཆོད་དོ།།

གཉིས་པ་གྲངས་ངེས་མ་ངེས་ཀྱི་སྐྱོན་དང་བྲལ་བ་ནི།

དེ་ནས་ཡང༌། ཞེས་པ་ནས། རང་བྱུང་བ་གཅིག་གོ །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོས་དྲིས་པ། གསང་བ་པའི་བདག་པོ་གང་གི་ཡེ་ཤེས་དེ་འདི་ལྟར་ལྔ་ཁོ་ནར་ཟད་དམ། འོན་ཏེ་གཞན་ཐ་དད་པར་ཡང་སྣང་། སྨྲས་པ། ལངྐའི་བདག་པོ། ཡེ་ཤེས་ནི་གང་གི་དབང་གིས་ལྔར་ཡང་སྣང་ལ། བསམ་གྱིས་མི་ཁྱབ་པ་དང་། སྐད་ཅིག་བཅུ་དྲུག་དང་། རིག་པ་གཅིག་དང་། རྣམ་པ་གསུམ་དང་།

དེ་ཁོ་ན་ཉིད་གསུམ་དང་། རྣལ་འབྱོར་བཞི་དང་། རང་བྱུང་བ་གཅིག་གོ།

དེ་ནས་ཡང་སྡུད་པ་པོ་ལང་ཀའི་བདག་པོས་དྲིས་པ། གསང་བ་པའི་བདག་པོ། རྒྱལ་བ་གང་གི་ཡེ་ཤེས་ཀྱི་གྲངས་འདི་ལྟར་ལྔ་ཁོ་ནར་ཟད་དམ། འོན་ཏེ་གཞན་ཐ་དད་པར་ཡང་སྣང་བར་འགྱུར། སྟོན་པས་བཀའ་སྩལ་ཏེ་སྨྲས་པ། ལང་ཀའི་བདག་པོ། ཡེ་ཤེས་ཀྱི་གྲངས་ནི། གང་འབྲས་བུ་ནི་ལམ་གྱི་ཁྱད་པར་དག་གི་རྗེས་སུ་འགྲོ་བས་ཐེག་པ་སྣ་ཚོགས་༼༥༠༽ཀྱི་དབང་གིས་རང་རང་ལ་གྲགས་པའི་གྲངས་ཡང་མ་ངེས་ཏེ། བཤད་མ་ཐག་པའི་ལྔར་ཡང་ནང་གི་ཐེག་པས་འདུལ་བ་ལ་སྣང་ལ། དེར་ཡང་མ་ཟད་དེ། གདུལ་བྱ་ཐ་དད་པའི་ཕྱིར་གྲངས་ལས་འདས་ཏེ་ཐམས་ཅད་ཡེ་ཤེས་སུ་ཤར་བས་བསམ་གྱིས་མི་ཁྱབ་པ་དང༌། འཕགས་པ་ཉན་ཐོས་ཀྱིས་ཡེ་ཤེས་སྐད་ཅིག་བཅུ་དྲུག་དང༌། རང་རྒྱལ་བས་གཟུགས་ཀྱི་ཕུང་པོ་རྟོགས་པའི་ཡེ་ཤེས་རིགས་གཅིག་དང༌། རྣམ་པར་རིག་པའི་མཚན་ཉིད་གསུམ་ཞེའམ། མདོར་བྱང་ཆུབ་སེམས་དཔའི་ལམ་གྱི་ཡེ་ཤེས་སྣང་སྟོང་དབྱེར་མེད་དུ་རྟོགས་པ་རྣམ་པ་གསུམ་དང༌། རིག་སྔགས་ཀྲ་ཡའི་རྒྱུ་འབྲས་དང༌། རྒྱུ་འབྲས་དབྱེར་མེད་པའི་ཡེ་ཤེས་དེ་ཁོ་ན་གསུམ་དང༌། རྣལ་འབྱོར་ཡོ་གས་དོན་དམ་མཚན་མ་མེད་པའི་བྱིན་རླབས་ལས་ཀུན་རྫོབ་ཀྱི་ཡེ་ཤེས་བཞི་དང༌། ལྷག་པའི་རྣལ་འབྱོར་ཨ་ཏི་ཡོ་གའི་རང་བྱུང་གི་ཡེ་ཤེས་རིག་པ་ཐིག་ལེ་ཉག་གཅིག་ལ་སོགས་པ་སྐབས་ཀྱིས་མ་ངེས་པར་ཐ་དད་དུ་གྲགས་པ་དག་གོ།

གསུམ་པ་ཡེ་ཤེས་ལས་སྐུ་ལྔར་སྣང་བ་ནི།

ལང་ཀའི། ཞེས་པ་ནས། སྤྲུལ་པའི་སྐུ་ཐ་དད་པར་སྣང་ངོ་། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ཡེ་ཤེས་ལྔ་སོ་སོར་མ་འདྲེས་པ་ལས་ནི་རིགས་ལྔ་སྣང་ལ། ཡོངས་སུ་རྫོགས་པ་ལས་ནི་སྐུར་བཞིར་སྣང་ངོ་། །འདི་ལྟ་སྟེ། རྩ་བའི་རྣམ་པར་ཤེས་པ་མེ་ལོང་ལྟ་བུའི་ཡེ་ཤེས་ལས་ནི། རྡོ་རྗེའི་གདུང་དང་སྡེའི་སངས་རྒྱས་ཤ་སྟག་ཏུ་སྣང་ངོ་། །སེམས་ཀྱི་ཆོས་ཉིད་ཆོས་ཀྱི་དབྱིངས་ཀྱི་ཡེ་ཤེས་དེ་ཁོ་ན་ཉིད་ལས་ནི། གླང་པོའི་གདུང་དང་སྡེའི་སངས་རྒྱས་ཤ་སྟག་ཏུ་སྣང་ངོ་། །དེ་ཉིད་ལ་ནི་ངོ་བོ་ཉིད་ཀྱི་སྐུ་ཞེས་སྣང་ལ། ཡེ་ཤེས་དེ་གཉིས་འདུས་པ་ལས་ནི་ཆོས་ཀྱི་སྐུར་སྣང་ངོ་། །དམིགས་པའི་རྣམ་པར་ཤེས་པ་མཉམ་པ་ཉིད་ཀྱི་ཡེ་ཤེས་ལས་ནི། ནོར་བུའི་གདུང་དང་སྡེའི་སངས་རྒྱས་ཤ་སྟག་ཏུ་སྣང་ངོ་། །ཀུན་ཏུ་སྣང་བའི་རྣམ་པར་ཤེས་པ་སོ་སོར་རྟོགས་པའི་ཡེ་ཤེས་ལས་ནི། པདྨོའི་གདུང་དང་སྡེའི་སངས་རྒྱས་ཤ་སྟག་ཏུ་སྣང་ངོ་། །ཡེ་ཤེས་དེ་གཉིས་འདུས་པ་ལས་རྫོགས་ལོངས་སྤྱོད་པའི་སྐུར་སྣང་ངོ་། །འཇུག་པའི་རྣམ་པར་ཤེས་པ་བྱ་བ་གྲུབ་པའི་ཡེ་ཤེས་ལས་གཞོན་ནུའི་གདུང་དང་སྡེའི་སངས་རྒྱས་ཤ་སྟག་ཏུ་སྣང་ངོ་། །དེ་ཉིད་ལས་ནི་གསང་བའི་སྐུ་དང་སྤྲུལ་པའི་སྐུ་ཐ་དད་པར་སྣང་ངོ་།།

ལང་ཀའི་བདག་པོ། དེ་ལ་ཡེ་ཤེས་ལྔ་ཉིད་སོ་སོར་མ་འདྲེས་པའི་བྱེད་པ་ལས་ནི་སྟོན་པ་རིགས་ལྔར་སྣང་ལ། དེ་ཉིད་སེམས་ཀྱི་ཆོས་ཉིད་དུ་ཡོངས་སུ་རྫོགས་པ་ལས་ནི་འབྲས་བུ་སྐུ་བཞིར་སྣང་བས་རྣམ་པ་མ་འདྲེས་ཀྱང་ངོ་བོ་དབྱེར་མེད་ཡིན་པ་ནི་ཡེ་ཤེས་ཀྱི་ལས་དང་མཚན་ཉིད་དུ་ཡང་སྣང་ངོ་། །དེ་ཡང་འདི་ལྟ་སྟེ། ཀུན་གཞི་རྩ་བའི་རྣམ་པར་ཤེས་པ་མེ་ལོང་ལྟ་བུའི་ཡེ་ཤེས་ལས་དང་ནུས་པ་ཐམས་ཅད་དུ་གསལ་ལ་མི་འགོག་པ་ལས་ནི། སྒྲིབ་པའི་ཕུང་པོ་ཀ་ནས་བཅོམ་པས་རྡོ་རྗེའི་གདུང་དང་སྡེའི་རིགས་ཀྱི་སངས་རྒྱས་ཤ་སྟག་ཏུ་སྣང་ངོ་། །སེམས་ཀྱི་ཆོས་ཉིད་ཆོས་ཀྱི་དབྱིངས་ཀྱི་ཡེ་ཤེས་དེ་ཁོ་ན་ཉིད་ལས་ནི། ཡེ་ཤེས་བཞི་ཆར་འཆར་བར་མཛད་ཅིང་དབྱིངས་ཉིད་དུ་གཅིག་པས་དེ་བཞིན་རིགས་ཀྱི་གླང་པོའི་གདུང་དང་སྡེའི་སངས་རྒྱས་ཤ་སྟག་ཏུ་སྣང་ངོ་། །ཡེ་ཤེས་དེ་ཉིད་ཡེ་ཕྱི་མོའི་ཆོས་ཉིད་འབྲི་བསྣན་མེད་པའི་དབྱིངས་རང་རིག་པ་ཇི་བཞིན་པར་གནས་པའི་ཕྱིར། དེ་ལ་ནི་འཕོ་འགྱུར་མེད་པར་ཀུན་ལ་ཁྱབ་པས་ངོ་བོ་ཉིད་ཀྱི་སྐུ་ཞེས་སུ་སྣང་བ་ཡིན་ལ། ཡེ་ཤེས་དེ་གཉིས་འདུས་ཏེ། ཆོས་དབྱིངས་ཡེ་ཤེས་ཇི་བཞིན་པ་དེའི་དོན་མེ་ལོང་ལྟ་བུས་རྟོགསཏེ། ཡོངས་རྫོགས་ལ་གཉིས་སུ་མེད་པ་ལས་ནི་ཆོས་ཀྱི་སྐུར་སྣང་ངོ་། །དམིགས་པའི་རྣམ་པར་ཤེས་པ་མཉམ་པ་ཉིད་ཀྱི་ཡེ་ཤེས་ལས་དང་མཐུ་སྡུད་ཅིང་མ་༼༥༡༽འཕྲོས་པ་ལས་ནི་ཡོན་ཏན་རིལ་རྫོགས་པས་རིན་པོ་ཆེའི་རིགས་རྒྱུད་ནོར་བུའི་གདུང་དང་སྡེའི་སངས་རྒྱས་ཤ་སྟག་ཏུ་སྣང་ངོ་། །ཀུན་ཏུ་སྣང་བའི་རྣམ་པར་ཤེས་པ་སོ་སོར་རྟོག་པའི་ཡེ་ཤེས་ལས་དང་མཐུའི་ཆོ་འཕྲུལ་འབྱུང་ཞིང་མ་འཆོལ་བར་གསལ་བ་ལས་ནི། གང་གིས་ཀྱང་མ་ཟིན་པའམ་མ་གོས་པས་པདྨོའི་རིགས་རྒྱུད་ཀྱི་གདུང་དང་སྡེའི་སངས་རྒྱས་ཤ་སྟག་ཏུ་སྣང་ངོ་། །ཡེ་ཤེས་དེ་གཉིས་འདུས་ཏེ་དབྱེར་མེད་པ་ལས་ནི། ཐམས་ཅད་ལོངས་སྤྱོད་དུ་32བསྟེར་ལ་འཛིན་ པ་མེད་པས་རྫོགས་ལོངས་སྤྱོད་པའི་སྐུར་སྣང་སྟེ། གསང་བདག ་དགའ་རབ་དཔའ་བོས་འབྲས་བུའི་ཀློང་ལས། ཡེ་ནས་ངོ་བོ་ཉིད་སྐུའང་དེ་བཞིན་པ། །ཆོས་དབྱིངས་ཡེ་ཤེས་དེ་ཉིད་ཡུལ་མེད་པར། །མངོན་དུ་མཛད་པས་མེ་ལོང་ཡེ་ཤེས་ཉིད། །ཆོས་སྐུ་དེ་ཡིས་ཆོས་ཀུན་བདེ་ཆེན་དུ། །མ་འདྲེས་མཉམ་པར་མངའ་མཛད་ལོངས་སྤྱོད་རྫོགས། །ཞེས་འབྱུང་ངོ་། །འཇུག་པའི་རྣམ་པར་ཤེས་པ་བྱ་བ་གྲུབ་པའི་ཡེ་ཤེས་ལས་དང་ནུས་པ་ཕུན་སུམ་ཚོགས་པ་དང་རྒྱུ་གྱུར་པ་ལས་ནི། དོན་རིལ་མི་འགོག་པར་མཛད་ཅིང་གྲུབ་པས་ལས་ཀྱི་རིགས་རྒྱུད་བསྒྲེས་རྒུད་དང་བྲལ་བ་གཞོན་ནུའི་གདུང་དང་སྡེའི་སངས་རྒྱས་ཤ་སྟག་ཏུ་སྣང་ངོ་། །དེ་ཉིད་ལས་ནི་གསང་དོན་གྱི་རེག་མྱོང་བར་གྲུབ་པ་གསང་བའི་སྐུ་དང༌། སྤྲུལ་པའི་སྐུ་ཐ་དད་པར་སྣང་བས་སྐུ་གཉིས་སུ་ཤར་ཏེ། སྔ་མ་ལས། དེ་ཡི་བྱིན་རླབས་བྱ་བ་ཀུན་གྲུབ་པ། །ཐུགས་རྗེའི་རང་བཞིན་སྤྲུལ་པ་འདོད་རྒུར་ཤར། །མ་འདྲེས་ཡོངས་རྫོགས་ལྷུན་གནས་བདེ་ཆེན་བཞུགས། །ཞེས་འབྱུང་ངོ་། །དེ་ལྟར་ངོ་བོ་ཉིད་གཞིའི་ཕྱིར་གཞིར་བསྟན་པ་སྟེ། དེ་ཉིད་ལས། ངོ་བོ་ཉིད་གནས་ཡེ་ཤེས་ཤར་ཆོས་སྐུ། །དེ་ཡི་འོད་ཤར་རིགས་ལྔ་སྤྲུལ་པར་བཅས། །ཞེས་སོ།།

བཞི་པ་སྤྲུལ་སྐུ་ལས་ཚིག་དང་ཡི་གེ་ལ་སོགས་པར་སྣང་བ་ནི།

སྤྲུལ་པའི་སྐུ། ཞེས་པ་ནས། མཚོན་པར་སྣང་བ་ཡིན་ནོ། །ཞེས་པའི་བར་གྱིས་བསྟན་ཏེ།

སྤྲུལ་པའི་སྐུ་ཐ་དད་པ་ལས་ནི། ཡི་གེ་ཐ་དད་པ་དང་། ཚིག་ཐ་དད་པ་དང་། ཆོས་ཀྱི་སྒོ་དཔག་ཏུ་མེད་པ་དང་།

སྐུ་གདུང་དང་རིང་བསྲེལ་ཐ་དད་པར་སྣང་སྟེ། དེ་དག་ནི་ཐེག་པ་ཆེན་པོ་གསང་སྔགས་ཀྱི་སྒོ་མཚོན་པར་

སྣང་བ་ཡིན་ནོ།།

སྤྲུལ་པའི་སྐུ་ཡི་བྱིན་རླབས་ཐ་དད་པ་ལས་ནི། ཡི་གེ་ཐ་དད་པ་དང༌། ཚིག་ཐ་དད་པ་དང༌། ཆོས་ཀྱི་སྒོ་དཔག་ཏུ་མེད་པ་དང༌། སྐུ་གདུང་དང་རུས་པའི་རིང་བསྲེལ་ཐ་དད་པ་སྣང་སྟེ། དེ་དག་ནི་ཐེག་པ་ཆེན་པོ་གསང་སྔགས་ཀྱི་སྒོ་མཚོན་པར་སྣང་བ་ཡིན་ནོ། །དེ་ལྟར་དེའི་བྱིན་རླབས་ལས་སྣང་བས་བྱུང་ཚུལ་གྱི་དོན་དང་མི་འགལ་ལོ།།

གཉིས་པ་ཞབས་བསྡུ་བ་ལ་གསུམ་སྟེ། དམ་བཅའ་བ། གཏན་ཚིགས་བསྟན་པ། དེ་ལས་གྲུབ་པའི་མཐའོ། །དང་པོ་ནི།

ལང་ཀའི། ཞེས་པ་ནས། སྟོན་པར་མངོན་ནོ། །ཞེས་པའི་བར་༼༥༢༽གྱིས་བསྟན་ཏེ།

ལངྐའི་བདག་པོའི་དེ་བས་ན་གསང་སྔགས་ནི་ཆོས་ཐམས་ཅད་ལ་ཐམས་ཅད་དུ་རང་བཞིན་གྱིས་སྣང་བ་ཡིན་ལ། སྐྱེ་བུ་དམ་པ་རྣམས་ནི་གསང་སྔགས་ཀྱིས་བྱིན་གྱིས་རླབས་ཀྱིས་སྣང་བར་སྟོན་པར་མངོན་པ་ཡིན་ནོ།།

ལང་ཀའི་བདག་པོ། དེ་བས་ན་གསང་སྔགས་ཟབ་མོའི་དོན་ནི་ཆོས་སོ་ཅོག་ཐམས་ཅད་ལ་དུས་ཐམས་ཅད་དུ་ཇི་བཞིན་པ་ཉིད་དུ་གསལ་ལ་མ་གཡོས་པར་སྣང་སྟེ་རང་བཞིན་ངོ་བོ་ཉིད་ཀྱིས་སྣང་བ་ཡིན་ལ། རྒྱུད་དག་པའི་སྐྱེས་བུ་དམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ནི། གསང་སྔགས་ཀྱི་རྟོགས་པ་མཐར་སོན་པའི་བྱིན་གྱིས་བརླབས་ཀྱིས་རང་བཞིན་གྱི་སྣང་བར་གྲུབ་ཅིང་སྐུ་གསུང་ཐུགས་ཡོན་ཏན་ཕྲིན་ལས་ལྔའི་བཀོད་པ་བསམ་ཡས་པ་སྟོན་པར་གདུལ་བྱ་ལ་མངོན་པར་གསལ་བ་ཡིན་ནོ།།

གཉིས་པ་གཏན་ཚིགས་བསྟན་པ་ནི།

ལང་ཀའི། ཞེས་པ་ནས། གོ་བར་སྒྲོགས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ཅིའི་ཕྱིར་ཞེ་ན། གསང་སྔགས་ཀྱིས་མ་ཁྱབ་པ་དང་། མི་གནས་པ་དང་། གསང་སྔགས་སུ་མ་གྱུར་པའི་ཆོས་ནི་གང་ཡང་མེད་དེ། གསང་སྔགས་ཀྱི་ངེས་པ་ཕྱིན་ཅི་མ་ལོག་པར་རྙེད་པའི་སྐྱེ་བུ་དམ་པ་གང་ལ་ལ་དག་གསང་སྔགས་མཐོང་བར་འདོད་པའི་མེ་ལོང་དུ་ནི་ཐམས་ཅད་གྱུར་ནས། ཇི་ལྟ་ཇི་ལྟར་སངས་རྒྱས་ནས། སྲོག་ཆགས་ལྡེམ་བུ་དང་། ནམ་མཁའ་ནས་ཕྲ་རྡུལ་ཡན་ཆད་ཀྱིས། ལྷན་ནེ་ལྷང་ངེ་ལྷག་གེར་གསལ་བར་བྱེད་པའོ། །ཐེ་ཚོམ་ཆད་པར་བྱེད་པའོ། །མཛོད་དམ་པར་གྱུར་པའོ། །གླེགས་བམ་ཆེན་པོར་གྱུར་པའོ།།

རྒྱ་ཆེན་པོར་བཤད་པའོ། །ཡོངས་སུ་གོ་བར་སྒྲོགས་པའོ།།

ལང་ཀའི་བདག་པོ། གསང་སྔགས་ལས་སྐྱེས་བུ་དམ་པ་སྣང་བའི་གཏན་ཚིགས་བརྗོད་དེ། དེ་ཅིའི་ཕྱིར་ཞེ་ན། གསང་སྔགས་ཀྱིས་མ་ཁྱབ་པ་དང༌། མི་གནས་པ་དང༌། གསང་སྔགས་སུ་མ་གྱུར་པའི་ཆོས་དེ་ནི་གང་ཡང་མེད་དོ། །གསང་སྔགས་ཀྱི་ངེས་པ་ཕྱིན་ཅི་མ་ལོག་པར་རྙེད་ནས་རྟོགས་ཟིན་པའི་སྐལ་ལྡན་གྱི་སྐྱེས་བུ་དམ་པ་གང་ལ་ལ་དག རྨད་དུ་འབྱུང་བའི་གསང་སྔགས་ཐེག་པ་ཆེན་པོ་ལུང་གི་རྒྱལ་པོ་འདིར་ངེས་པར་ཞུགས་པ་ན། ཐ་སྙད་ཐམས་ཅད་བྱང་ཆུབ་སེམས་མཆོག་གི་ལམ་ཡིན་པའི་ཕྱིར། ཇི་ལྟར་མཐོང་ཞིང་རྟོགས་པར་འདོད་པས་མཚོན་པར་བྱ་བའི་ཐབས་ཀྱི་མེ་ལོང་དུ་ནི་མཚན་མ་ཐམས་ཅད་འགྱུར་ཏེ། ཇི་ལྟ་ཇི་ལྟར་ཡ་ཐ་རྒྱལ་བ་རྫོགས་པའི་སངས་རྒྱས་མན་ཆད་ནས། མ་ཐ་སྲོག་ཆགས་དམན་པ་ལྡེམ་བུ་དང༌། ཆེ་བ་ནམ་མཁའ་ནས། ཆུང་བ་ཕྲ་རབ་ཀྱི་རྡུལ་ཡན་ཆད་ཀྱིས། གསང་སྔགས་ཇི་བཞིན་པའི་གནས་ལུགས་མི་གཡོ་བར་ལྷན་ནེ། རང་གསལ་བར་ལྷང་ངེ་། སྒྲིབ་མེད་དུ་མངོན་པར་ལྷག་གེར་གྱུར་ཏེ་ཤིན་ཏུ་ཡང་གསལ་བར་བྱེད་པའོ། །ལམ་པས་ཐེ་ཚོམ་གཅོད་ཅིང་རིག་པའི་གདེང་རྙེད་པར་བྱེད་པའོ། །དེ་ཅིའི་ཕྱིར་ཞེ་ན། གསང་དོན་ཆེན་པོ་ནི་རྒྱལ་བ་དང་འགྲོ་བ་ནས་ཐ་སྙད་ཐམས་ཅད་ལ་བསྣུམས་ཚབ་ཆེ་ཆུང་མེད་དེ། གསང་བ་ཇི་བཞིན་པའི་གསུང་ལྔ་རྫོགས་པའི་ཕྱིར། ཆོས་སོ་ཅོག་གསང་སྔགས་འབྱུང་བའི་གཞི་ཡིན་པས་གསང་མཛོད་དམ་པར་གྱུར་བའོ། །གསང་བ་ཇི་བཞིན་པ་སྟོན་པའི་གསུང་རབ་དམ་པར་ངེས་པས་གླེགས་བམ་ཆེན་པར་གྱུར་པའོ། །གསང་དོན་ཇི་ལྟ་བར་འགྲེལ་བས་རྒྱ་ཆེན་པོར་བཤད་པའོ། །གསང་སྔགས་གདུལ་བྱའི་རིག་པ་ལ་འཇལ་བར་བྱེད་པས་ཡོངས་སུ་གོ་བར་སྒྲོགས་༼༥༣༽པའོ། །དེས་ན་ཆོས་འདི་དག་ཐམས་ཅད་ཇི་བཞིན་པ་ཉིད་དེ། ཡེ་ནས་དེ་ཁོ་ན་ཉིད་ཡིན་པས་ན། ཇི་སྐད་དུ། འཇིག་རྟེན་འཇིག་རྟེན་འདས་པ་ཡི། །ཇི་ལྟར་སྣང་གྲགས་གནས་པའི་ཆོས། །སྤྱི་དང་རང་གི་མཚན་ཉིད་ཀུན། །མ་འདྲེས་ཡོངས་སུ་རྫོགས་གསལ་བར། །སྐྱེས་བུ་དམ་པའི་སྤྱོད་ཡུལ་དུ། །གསང་བའི་ངོ་བོར་གསལ་བ་ཡིན། །ཞེས་སོ། །དེ་ལྟ་བས་ན། ཐེག་པ་སོ་སོའི་ཐབས་སུ་གྱུར་ཏོ་ཅོག་འདིའི་བྱིན་རླབས་ལས་སྣང་བ་སྟེ། འདིར་ཕྱོགས་ཀྱིས་ཐབས་ལ་རག་ལས་པ་མེད་དོ།།

གསུམ་པ་དེ་ལས་གྲུབ་པའི་མཐའ་ནི།

ལང་ཀའི། ཞེས་པ་ནས། སྟོན་པར་ཟད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་བས་ན་གསང་སྔགས་ནི་རང་བཞིན་གྱིས་སྣང་བར་ཟད་ལ།

སྐྱེས་བུ་དམ་པ་རྣམས་ཀྱིས་ནི་བྱིན་གྱིས་བརླབས་ཀྱིས་སྟོན་པར་ཟད་དོ།།

ལང་ཀའི་བདག་པོ། དེ་བས་ན་ཞེས་གོང་དུ་སྙེགས་པ་ནི་གཏན་ཚིགས་སུ་འཇལ་ཏེ། གསང་སྔགས་ཀྱི་དོན་ཟབ་མོ་དེ་ཉིད་ནི་ཆོས་ཐམས་ཅད་ལ་བྱེད་པ་པོའམ་རྒྱུ་རྐྱེན་གཞན་མེད་པར་རང་གི་རང་བཞིན་གྱིས་སྣང་བར་ནི། རང་བཞིན་གྱི་གཏན་ཚིགས་དང༌། ཆོས་ཉིད་ཀྱི་རིགས་པས་འགྲུབ་པས། ཡིད་ཆེས་པར་ཟད་ལ། སྐྱེས་བུ་དམ་པ་ཇི་བཞིན་པར་སོན་པའི་རྒྱལ་བ་རྣམས་ཀྱིས་ནི། ཉིད་ཀྱིས་བྱིན་གྱིས་བརླབས་ཀྱིས་ཐེག་པ་ཆེན་པོ་གསང་སྔགས་སྟོན་ཅིང་སྒྲོགས་ཏེ་འདུལ་བྱའི་རྒྱུད་ལ་སྣང་བར་ཟད་དོ།།

གཉིས་པ་མཚོན་བྱ་དོན་གྱི་ངོ་བོ་བཤད་པ་ལ་གཉིས་ཏེ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

ལང་ཀའི། ཞེས་ པ་ན། རྙེད་པའི་གནས་གཞན་ན་མེད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོས་སྨྲས་པ། གསང་བ་པའི་བདག་པོ་ཇི་ག་ཐམས་ཅད་སྣང་བ་དེ་གསང་སྔགས་སམ། འོན་ཏེ་ཐམས་ཅད་ཀྱི་རང་བཞིན་མི་སྣང་བ་དེ་གསང་སྔགས་སམ། ཅི་གཉིས་ཀ་མ་ཡིན་པ་ཞིག་གསང་སྔགས་ཡིན། གསང་བ་པའི་བདག་པོས་སྨྲས་པ། ཀྱེ་ལངྐའི་བདག་པོ་ཐམས་ཅད་སྣང་བ་དེ་ཡང་གསང་སྔགས་མ་ཡིན། གལ་ཏེ་དེ་གསང་སྔགས་ཡིན་ན་ནི། གསང་སྔགས་ཞེས་བརྗོད་པ་ཉིད་འགལ་ལ། གང་སེམས་ཅན་གྱི་འདུ་ཤེས་དང་། སངས་རྒྱས་ཀྱི་དགོངས་པ་ཡང་ཁྱད་པར་མེད་པར་འགྱུར་རོ། །དེ་ལས་གཞན་ན་ཡང་གསང་སྔགས་ཡོད་པ་མ་ཡིན། གལ་ཏེ་དེ་ལས་གཞན་པ་འབའ་ཞིག་གསང་སྔགས་ཡིན་ན་ནི། ཐམས་ཅད་ཆོས་ཉིད་དུ་མ་འདུས་པར་འགྱུར་རོ། །ཐམས་ཅད་ཀྱི་རང་བཞིན་མི་སྣང་བ་དེ་ཡང་གསང་སྔགས་མ་ཡིན། གལ་ཏེ་མི་སྣང་བ་དེ་གསང་སྔགས་ཡིན་ན་ནི། གཞན་མུ་ཆད་པ་དག་ཡང་དག་པར་རྫོགས་པ་ཉིད་དུ་འགྱུར་རོ། །གང་གཉིས་ཀ་མ་ཡིན་པ་དེ་ཡང་གསང་སྔགས་མ་ཡིན། གལ་ཏེ་གཉིས་ཀ་མ་ཡིན་པ་ཞིག་གསང་སྔགས་ཡིན་ན་ནི། གསང་སྔགས་ཞེས་

བྱ་བ་ཞིག་བཙལ་བས་རྙེད་པའི་གནས་གཞན་མེད་དོ།།

ཡང་ལང་ཀའི་བདག་པོས་སྨྲས་པ། གསང་བ་པའི་བདག་པོ། ཇི་ག་ཐམས་ཅད་སྣང་བ་དེ་ཉིད་གསང་སྔགས་སམ། དེ་བས་གཞན་པ་ཞིག་གསང་སྔགས་སམ། འོན་ཏེ་ཐམས་ཅད་ཀྱི་རང་བཞིན་མི་སྣང་བ་དེ་ཉིད་གསང་སྔགས་སམ། ཅི་གཉིས་ཀ་མ་ཡིན་པ་ཞིག་གསང་སྔགས་ཡིན་ཞེས་གསང་བའི་ངོ་བོ་ཇི་ལྟར་ཡིན་པའི་དོན་ལ་ཡིད་ཆེས་པར་བྱ་བའི་ཕྱིར་གེགས་བསལ་པའི་སྒོ་ནས་དྲིས་པ་ལས། གསང་བ་པའི་བདག་པོས་སྨྲས་པ། ཀྱེ་ལང་ཀའི་བདག་པོ། ཐམས་ཅད་སྣང་བ་དེ་ཡང་གསང་སྔགས་མ་ཡིན་ཏེ། གལ་ཏེ་གསང་སྔགས་ཡིན་ན་ནི། དངོས་པོ་འདི་རྣམས་ཐམས་ཅད་ལ་སྣང་བས་གསང་སྔགས་ཞེས་ངེས་ཚིག་བརྗོད་པ་ཉིད་དང་ཡང་འགལ་ལ། དཔེར་ན་མིག་ལ་གཟུགས་སྣང་བ་འདི་ཉིད་སེམས་ཅན་ལའང་སྣང༌། སངས་རྒྱས་ལ་ཡང་སྣང་བས། གང་སེམས་ཅན་གྱི་འདུ་ཤེས་དང༌། སངས་རྒྱས་ཀྱི་དགོངས་པ་ལ་ཡང་ཁྱད་པར་མེད་པར་འགྱུར་རོ། །སྣང་བ་དེ་ལས༼༥༤༽གཞན་ན་ཡང་གསང་སྔགས་ཡོད་པ་མ་ཡིན་ཏེ། གལ་ཏེ་དེ་ལས་གཞན་པ་ཞིག་གསང་སྔགས་ཡིན་ན་ནི། ཆོས་ཐམས་ཅད་གསང་སྔགས་ཀྱི་ཆོས་ཉིད་དུ་མ་འདུས་པར་འགྱུར་རོ། །ཐམས་ཅད་ཀྱི་རང་བཞིན་མི་སྣང་བ་དེ་ཡང་གསང་སྔགས་མ་ཡིན་ཏེ། གལ་ཏེ་མི་སྣང་བ་དེ་གསང་སྔགས་ཡིན་ན་ནི། གཞན་སྟོང་པ་ཕྱོགས་གཅིག་པར་འདོད་པས་མུ་ཆད་པར་ལྟ་བ་དག་ཀྱང་ཡང་དག་པར་རྫོགས་པའི་སངས་རྒྱས་ཀྱི་དགོངས་པ་ཉིད་དུ་གནས་པའི་སྐྱོན་ཡོད་པར་འགྱུར་རོ། །གང་སྣང་བ་དང་མི་སྣང་བ་གཉིས་ཀ་མ་ཡིན་པ་དེ་ཡང་གསང་སྔགས་མ་ཡིན་ཏེ། གལ་ཏེ་གཉིས་ཀ་མ་ཡིན་པ་ཞིག་གསང་སྔགས་ཡིན་ན་ནི། གསང་སྔགས་ཞེས་བྱ་བ་ཞིག་བཙལ་བས་གོང་མ་གཉིས་ལས་མ་གཏོགས་རྙེད་པའི་གནས་གཞན་གང་ན་ཡང་མེད་དེ་སྣང་མི་སྣང་གཉིས་གསང་སྔགས་སུ་མ་འདུས་པའི་སྐྱོན་ཡང་ཡོད་དོ། །ཞེས་གསང་བ་ཟབ་མོའི་དོན་གྱི་རང་གི་མཚན་ཉིད་གེགས་བསལ་བའི་ཚུལ་གྱིས་གསལ་བར་མཛད་པའོ།།

གཉིས་པ་མཇུག་བསྡུ་བ་ནི།

ལང་ཀའི། ཞེས་པ་ནས། དེ་ཁོ་ན་ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོས་སྨྲས་པ། གསང་བ་པའི་བདག་པོ། འོ་ན་ཅི་གསང་སྔགས་ཞེས་བགྱི་བ་ནི་གང་ལགས། གསང་བ་པའི་བདག་པོས་སྨྲས་པ། ལངྐའི་བདག་པོ་གསང་སྔགས་ཞེས་བྱ་བ་ནི། སྣང་བ་དང་མི་སྣང་བ་གཉིས་སུ་མེད་པ། གཉིས་ཀྱི་ངོ་བོ་ལས་གྲོལ་བ། དབུ་མར་མི་དམིགས་པ་གང་ཡིན་པ་དེ་ཁོ་ན་ཉིད་དོ།།

ཡང་ལང་ཀའི་བདག་པོས་སྨྲས་པ། གསང་བ་པའི་བདག་པོ། འོ་ན་ཅི་གསང་སྔགས་ཞེས་བགྱི་བ་གང་ལགས། ཞེས་ངོ་བོ་དངོས་བྱེ་བྱག་ཏུ་དྲིས་པའོ། །གསང་བ་པའི་བདག་པོས་སྨྲས་པ། ངོ་བོ་ངེས་པར་བསྟན་པ་གང་སྙམ་པ་ལ། ལང་ཀའི་བདག་པོ། །གསང་སྔགས་ཞེས་བྱ་བ་ནི་ཇི་སྙེད་པར་བལྟས་པ་དེར་སྣང་ཙམ་ནའང་སྣང་བ་དང་མི་སྣང་བ་གཉིས་སུ་མེད་པས་ངོ་བོ་འདི་འདྲར་བསྟན་དུ་མེད་པ། གཉིས་ཀ་མ་སྤངས་བྲལ་ཞིང་གཉིས་མེད་ཀྱི་ངོ་བོ་ཉིད་ལས་ཀྱང་གྲོལ་བ། དབུ་མར་འཇོག་པའི་བླ་དྭགས་ཙམ་ཡང་མི་དམིགས་པ་གང་ཡིན་པ་ཕྱོགས་རིས་ཐམས་ཅད་དང་བྲལ་བའི་དེ་ཁོ་ན་ཉིད་བསམ་བརྗོད་ལས་འདས་པ་དེ་ལ་བརྗོད་དོ།།

གསུམ་པ་ཤེས་རབ་གང་གི་ཡུལ་དུ་གྱུར་ཚུལ་བསྟན་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། ཆེས་ཟབ་པས་བལྟ་བར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོས་སྨྲས་པ། གསང་བ་པའི་བདག་པོ། འོ་ན་གསང་སྔགས་ཀྱི་ངོ་བོ་དེ་རབ་ཏུ་དཔག་པར་དཀའ་ཞིང་བལྟ་བར་དཀའ་ན། དེ་གང་གིས་བལྟ་བར་བྱ། གསང་བ་པའི་བདག་པོས་སྨྲས་པ། ལངྐའི་བདག་པོ་གསང་སྔགས་ཀྱི་ངོ་བོ་དེ་ནི། གང་གི་བློ་ཞིབ་པ་ཞིབ་པ་བས་ཀྱང་ཆེས་ཞིབ་པ། ཤིན་ཏུ་ཟབ་པ་ཆེས་ཟབ་པས་བལྟ་བར་བྱའོ།།

འོ་ན་དེ་གང་གི་སྤྱོད་ཡུལ་ཡིན་སྙམ་པ་ལ། དེའི་ཚུལ་དྲིས་ལན་གྱིས་བསྟན་པའི་ཕྱིར། ལང་ཀའི་བདག་པོས་སྨྲས་པ། གསང་བ་པའི་བདག་པོ། འོ་ན་གསང་སྔགས་ཀྱི་ངོ་བོ་དེ་ཉིད་རབ་ཏུ་དཔག་པར་དཀའ་ཞིང་ཤིན་ཏུ་བལྟ་བར་དཀའ་ན། དེ་ལ་གང་གིས་བལྟ་བར་བྱ། གསང་བ་པའི་བདག་པོས་སྨྲས་པ། ལང་ཀའི་བདག་པོ། །གསང་སྔགས་ཀྱི་ངོ་བོ་དེ་ནི་༼༥༥༽སྐྱེས་བུ་གང་གི་བློ་ཞིབ་པ་བས་ཀྱང་ཆེས་ཞིབ་པ། ཤིན་ཏུ་ཟབ་པ་བས་ཀྱང་ཆེས་ཟབ་པས་ཡང་དག་པར་བལྟ་བར་བྱའོ།།

གཉིས་པ་རྒྱས་པར་བཤད་པ་ལ་གཉིས་ཏེ། དྲིས་པ་དང་ལན་ནོ། །དང་པོ་ནི།

སྨྲས་པ། ཞེས་པ་ནས། ཟབ་པ་ནི་གང་ལགས། ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ། བློ་ཤིན་ཏུ་ཞིབ་པ་ཆེས་ཞིབ་པ་ནི་གང་ལགས།

ཤིན་ཏུ་ཟབ་པ་ཆེས་ཟབ་པ་ནི་གང་ལགས།

ཡང་སྨྲས་པ། གསང་བ་པའི་བདག་པོ། བློ་ཤིན་ཏུ་ཞིབ་པ་ཆེས་ཞིབ་པ་ནི་གང་ལགས། བློ་ཤིན་ཏུ་ཟབ་པ་ཆེས་ཟབ་པ་ནི་གང་ལགས།

གཉིས་པ་ལན་ལ་གཉིས་ཏེ། ཞིབ་པའི་སྤྱོད་ཡུལ་ཡིན་པ། ཟབ་པའི་སྤྱོད་ཡུལ་ཡིན་པའོ། །དང་པོ་ལ་གཉིས་ཏེ། ཞིབ་ཞིབ་འདྲ་ལ་རྩིང་བའི་ཡུལ་མིན་པ། ཞིབ་པ་ལས་ཆེས་ཞིབ་པའི་ཡུལ་ཡིན་པའོ། །དང་པོ་ནི།

སྨྲས་པ། ཞེས་ པ་ནས། ཡེ་ཤེས་མེད་པའི་ཕྱིར་རོ། །ཞེས་པའི་བར་གྱིས་བསྟན་ཏེ།

སྨྲས་པ། ལངྐའི་བདག ་པོ། བློ་ཤིན་ཏུ་ཞིབ་པ་ཆེས་ཟབ་པ་ནི་འདི་ལྟ་སྟེ། གང་ལ་ལ་དག་ས་ཡི་ཁམས་འདི་ལ་དཔག་ཚད་གཅིག་ལ་རྡུལ་ཕྲ་རབ། མི་འཁྲུགས་ཁྲག་ཁྲིག་གཅིག་དང་། བྱེ་བ་ཁྲག་ཁྲིག་འབུམ་ཁྲག་སུམ་ཅུ་དང་། བྱེ་བ་ཁྲག་ཁྲིག་འབུམ་ཕྲག་སུམ་ཅུ་དང་། བྱེ་བ་དྲུག་ཅུ་ཕྲག་བརྒྱ་དང་། བྱེ་བ་ཕྲག་སུམ་ཅུ་གཉིས་དང་། འབུམ་ཕྲག་ལྔ་དང་། ཁྲི་ཉིས་སྟོང་ཡོད་ལ། དེ་དག་ལ་ཡང་མེ་དང་། ཆུ་དང་། རླུང་གི་རྡུལ་ཕྲ་རབ་ཏུ་ཕྱེ་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ལ། རྡུལ་ཕྲ་རབ་ཏུ་ཡོད་པའི་རྩིས་ཀྱིས་གཅོད་པ་དང་། གཞན་ཡང་ཕྱིའི་ས་ཆེན་པོ་འདི་ལ། དབྱིབས་ཐ་དད་པ་ཐ་ཡས་པ་དག་བརྟགས་ཏེ། འདི་དག་ནི་འབྱུང་བ་འཁྲུགས་པ་དང་། འཁྲུལ་བ་དང་འཕྲིལ་བ་དང་། འཁྱོག་པ་དང་། འཁྲིལ་བ་དང་། འཁྱིལ་བ་དང་། ལྗར་བ་དང་། བཤར་བ་དང་། ཞ་བ་དང་། ལྡེམས་པ་དང་། འབུས་པ་དང་། འཁྲིས་པ་དང་། འཆུས་པ་ལ་སོགས་པ་ཐ་དད་པའི་དབང་གིས་སོ་སོར་རྟོག་པ་དང་། གཞན་ཡང་མིང་དང་། བརྡ་དང་། མཚན་མ་དང་། ཐ་སྙད་དང་། བཏགས་པ་སྣ་ཚོགས་ཀྱི་རྗེས་སུ་འཇུག་ཅིང་། སོ་སོའི་མཚན་ཉིད་མཐའ་ཡས་པའི་རྗེས་སུ་རྟོག་མཐའ་མེད་པ་དང་། དཔྱོད་མཐའ་ཆེར་འགྲོ་བ་དག་གི་རྒྱུས། ཐམས་ཅད་མཁྱེན་པ་དག་གི་རྒྱུར་འགྲོ་ཞེས་ཟེར་བ་དག་ཡོད་དེ། ལངྐའི་བདག་པོ་དེ་དག་ལ་ནི་ཤིན་ཏུ་ཞིབ་པ་ཆེས་ཞིབ་པ་ཞེས་མི་བྱའོ། །དེ་དག་ནི་རྩིང་བ་ཆེས་ཙིང་བ་ཞེས་བྱའོ། །དེ་ཅིའི་ཕྱིར་ཞེ་ན། བླུན་པོ་གང་དག་བྱེ་མ་ལས་གསེར་ཕྱེ་བཙག་པར་འདོད་ན། ལྷང་ཚེར་ལ་གསེར་ཕྱེར་འདུ་ཤེས་ཤིང་ཚོལ་བ་བཞིན། རྣམ་པ་ཐམས་ཅད་མཐོང་ཞིང་རྙེད་པར་མི་འགྱུར་རོ། །དེ་ཅིའི་ཕྱིར་ཞེ་ན། དེ་ལ་རྣམ་ པ་ཐམས་ཅད་ཡོད་དེ། ཡེ་ཤེས་མེད་པའི་ཕྱིར་རོ།།

ལན་སྨྲས་པ། ལང་ཀའི་བདག ་པོ། བློ་ཤིན་ཏུ་ཞིབ་པ་ཆེས་ཞིབ་པ་ནི་འདི་ལྟ་སྟེ། གང་ལ་ལ་དག་སའི་ཁམས་འདི་ལ་དཔག་ཚད་གཅིག་ལ་རྡུལ་ཕྲ་རབ་མི་འཁྲུགས་ཁྲག་ཁྲིག་གཅིག་དང༌། ཞེས་པ་འདི་ཡིས་ཚུལ་གྱིས་མཆོག་རབ་ལྷུན་པོ་ལྟ་བུའི་རྡུལ་ཕྲ་རབ་ཀྱང་གྲངས་ཀྱིས་ཆོད་དེ། དཔག་ཚད་བརྒྱད་ཁྲི་བཞི་སྟོང་ཡོད་པའི་ཚད་ལྟ་བུ་ལ་ཡང༌། དཔག་ཚད་གཅིག་ལ་རྒྱང་གྲགས་བརྒྱད། རྒྱང་གྲགས་གཅིག་ལ་གཞུ་འདོམ་ལྔ་བརྒྱ། འདོམ་གཅིག་ལ་ཁྲུ་བཞི། ཁྲུ་གཅིག་ལ་སོར་བཅུ་དྲུག་ནས་རྡུལ་ཕྲ་རབ་ཀྱི་བར་དུ་རྩིས་ཀྱིས་ཆོད་པ་དང༌། རྡུལ་ཕྲ་རབ་བཅུ་ལ་རྡུལ་ཕྲན་གཅིག་ཏུ་བརྩིས་པས་ནས་ཡར་གྱེན་དུ་གྲངས་ཀྱིས་ཆོད་པས། མཇུག་རི་བོ་ཆེན་པོ་དང༌། སའི་དཀྱིལ་འཁོར་སྟོང་གསུམ་མན་ཆད་ལ་རྩིས་ཀྱིས་གཅོད་པ་ནི། ཕྲ་རབ་རྡུལ་དང་རྡུལ་ཕྲན་དང༌། །ལྕགས་ཆུ་རི་བོང་ལུག་དང་གླང༌། །ཉི་ཟེར་སྲོ་མ་ཤིག་ནས་སོར། །ཞེས་པ་ལྟ་བུ་མངོན་པ་མཛོད་ལས་གསུངས་པ་དང་ཚུལ་མཐུན་པར་རྩིའོ། །དེ་བས་ན་གྲངས་ཀྱི་མུ་ནི། གཅིག་བཅུ་བརྒྱ་དང་བརྒྱ་བཅུ་སྟོང༌། སྟོང་བཅུ་ཁྲི་དང་ཁྲི་བཅུ་འབུམ། །འབུམ་བཅུ་བྱེ་བ་ཕྲག་གཅིག་གོ །བྱེ་བ་བཅུ་ནི་དུང་ཕྱུར་ཆུང༌། །དུང་ཕྱུར་ཆུང་བཅུ་ཆེ་བའོ། །དེ་བཞིན་བཅུ་ཕྲག་རེ་ཞིང་འགྱུར༌། །དེས་ན་ཁྲག་ཁྲིག་ཆེ་ཆུང་དང༌། །འདིར་ཆོས་རྗེས་ཕྱག་མཆན་སོགས་ན་ས་ཡ་གཅིག་ཡིན་ནོ། །དེ་བཅུ། ཞེས་པ་ལྟར་ས་ཡའང་སྣང་ངོ་། །དེ་ནས་མཆོག་ཉལ་མི་བགྲངས་པར་དཀྲིགས་ཆེ་ཆུང་གི་རྗེས་སུ་མི་འཁྲུགས་ཆེ་ཆུང་དུ་བརྩི་བར་མཛད་དོ། །མཆན། དེ་བཞིན་ཤི་རྔོག་ཆེ་ཆུང་གཉིས། །མཆོག་ཉལ་ཆེ་ཆུང་རྒྱལ་ཕྱེས་གཉིས། །བྱེ་བའང་དེ་བཞིན་ནབ་ནུབ་གཉིས། །མཆོག་ཡས་གཉིས་དང་རབ་བཀྲམ་གཉིས། །གཏམས་༼༥༦༽ཆེ་ཆུང་དང་དཀྲིགས་ཆེ་ཆུང༌། །ཁྱད་ཕྱིན་ཆེ་ཆུང་པད་སྟེང་གཉིས། །དད་འདྲེན་གཉིས་དག་མཐའ་སྣང་གཉིས། །རྒྱུ་རིག་ཆེ་ཆུང་འོད་མཛེས་གཉིས། །དབང་པོ་ལེགས་འབྱིན་ཆེ་ཆུང་བཞི། །རྟོག་འགྲོལ་ཆེ་ཆུང་འབྱིང་རྡུལ་གཉིས། །སྟོབས་འཁོར་བརྡར་ཕྱེས་གཉིས་ཆེ་ཆུང༌། །རྣམ་འབྱུང་ཆེ་ཆུང་སྟོབས་མིག་འདྲ། །ཙིག་ཏུ་རྒྱང་ཕྱེད་ཆེ་ཆུང་གཉིས། །ཐིག་འབུམ་ཆེ་ཆུང་འཕྱོར་རྗི་གཉིས། །འབུམ་ལྷམ་མེ་སྟེངས་ཆེ་ཆུང་བཞི། །ལྗོན་ཁྲིམས་གཉིས་གཉིས་ཟིམ་ཆེ་ཆུང༌། །ཁམས་གཉིས་ཡིད་མལ་ཆེ་ཆུང་སྟེ། །ཀུན་ལའང་ཆེ་ཕྲ་གཉིས་གཉིས་སོ། །ཞེས་པའི་དོན་གྱིས་གྲངས་དེ་བསྡོམས་པ་ལས་མི་འཁྲུགས་ཞེས་བྱ་སྟེ། དེ་ཉིད་གཞིར་བཞག་པའི་གྲངས་ཁྲག་ཁྲིག་ནི་མི་འཁྲུགས་ཁྲག་ཁྲིག་གཅིག་གོ །བྱེ་བ་ཁྲག་ཁྲིག་འབུམ་ཕྲག་སུམ་ཅུ་དང༌། ཞེས་པ་དབྱེ་བ་དེ་རིལ་གཅིག་ཏུ་བརྩིས་ནས་གྲངས་བྱེ་བ་གཞིར་བཞག་སྟེ་བགྲངས་པའི་ཁྲག་ཁྲིག་གཅིག་ཏུ་བརྩིས་པ་འབུམ་ཕྲག་སུམ་ཅུ་དང་གྲངས་ཕྲག་གཉིས་སོ། །བྱེ་བ་དྲུག་ཅུ་ཕྲག་བརྒྱ་དང༌། ཞེས་པ་དབྱེ་བ་དེ་རིལ་གཅིག་ཏུ་བརྩིས་པ་བྱེ་བ་དྲུག་ཅུ་ཕྲག་བརྒྱ་དེ་སྙེད་དང་གསུམ་མོ། །བྱེ་བ་ཕྲག་སུམ་ཅུ་རྩ་གཉིས་དག ཞེས་པ་དེ་རིལ་བསྡོམས་ནས་གཅིག་ཏུ་བརྩིས་ཏེ་བསྒྲངས་པ་དེ་སྙེད་དང་གྲངས་ཕྲག་བཞིའོ། །འབུམ་ཕྲག་ལྔ་དང༌། ཞེས་པ་དབྱེ་བ་དེ་རིལ་བསྡོམས་པ་གཅིག་ཏུ་བསྒྲངས་པ་དེ་སྙེད་ཡོད་དེ་གྲངས་ཕྲག་ལྔའོ། །ཁྲི་ཉིས་སྟོང་ཡོད་ལ། ཞེས་པ་དབྱེ་བ་རིལ་གཅིག་ཏུ་བརྩིས་པ་དེ་སྙེད་དེ་གྲངས་ཕྲག་དྲུག་གོ །དེ་དང་ནི་དཔག་ཚད་གཅིག་གི་ཚད་བསྙད་པའོ། །དེ་དག་ལ་ཡང་ས་དང་མེ་དང་ཆུ་དང་རླུང་གི་རྡུལ་ཕྲ་རབ་ཏུ་ཕྱེ་ནས་འབྱུང་བཞིའི་རྡུལ་གྱི་གྲངས་རྩིས་ཀྱིས་གཅོད་པ་དང༌། སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་གཅིག་ལ་རྡུལ་ཕྲ་རབ་དུ་ཡོད་པའི་གྲངས་རྩིས་ཀྱིས་གཅོད་པ་དང༌། གཞན་ཡང་ཕྱིའི་ས་ཆེན་པོ་འདི་ལ། དབྱིབས་ཐ་དད་པ་མཐའ་ཡས་པ་དག་བརྟགས་ཏེ་ཉེ་བར་བསྟན་པ་འདི་དག་རྣམས་ནི་གྲངས་ཀྱིས་རྟོགས་པར་འགྱུར་ཏེ། འབྱུང་བ་སྣ་གཅིག་ནས་གཅིག་ཏུ་འཁྱུགས་པ་དང༌། སླར་འཁྱུལ་བ་དང༌། ཐ་མར་འཁྲིལ་བ་དང༌། ཕན་ཚུན་དུ་འཁྱོགས་པ་དང༌། གཅིག་ལ་གཅིག་འཁྲིལ་བ་དང༌། གཅིག་ཏུ་འཁྱིལ་བ་དང༌། ལོགས་ལ་ལྗར་བ་དང༌། མ་འདྲེས་པར་བཤར་བ་དང༌། གྲྭ་མཐའ་ཞ་བ་དང༌། སྣ་འཕྲོས་པས་ལྡེམས་པ་དང༌། གཡས་གཡོན་དུ་ལུག་པས་འབུས་པ་དང༌། གཅིག་ལ་གཅིག་༼༥༧༽འཁྲིས་པ་དང༌། དབྱིབས་ལུས་བྱིན་དུ་འཆུས་པ་དང༌། ལ་སོགས་པ་ཞེས་པས་དངོས་པོ་གཞན་བསྡུ་བ་ནི་ཐུན་མོང་དུ་གྲགས་པའི་དབྱིབས་བཅུ་ལྟ་བུ་སྟེ་དེ་ལྟར་མི་གཅིག་པ་ཐ་དད་པའི་དབང་གིས་སྣ་ཚོགས་པ་རྣམས་ལ་སོ་སོར་རྟོག་ཅིང་འབྱེད་པ་དང༌། གཞན་ཡང་ཕྱིའི་དབྱིབས་ལས་བཀར་བ་ནི་ནང་གི་རྟོག་ཞེན་ཏེ། ཞེན་པས་ཕྱིའི་ཆོས་སུ་སྣང་བར་བྱེད་ནུས་པ་ངོ་བོ་སྟོན་པ་མིང་དང་མཚོན་པའི་བརྡ་སྣ་ཚོགས་དང༌། ཕྱི་རོལ་དང་ནང་གི་དངོས་པོ་རིལ་འདུ་ཤེས་ཀྱིས་མ་འདྲེས་པར་སོ་སོར་འཛིན་པས་མཚན་མ་དང༌། དངོས་པོར་མ་གྲུབ་ཅིང་བཏགས་པ་ཙམ་གྱིས་མིང་གི་ཐ་སྙད་དང༌། ཆོས་ཇི་སྙེད་པ་ལ་མིང་གིས་བཏགས་པ་སྣ་ཚོགས་ཀྱི་རྗེས་སུ་ཤེས་པ་འཇུག་ཅིང༌། སོ་སོའི་མཚན་ཉིད་མཐའ་ཡས་པའི་རྗེས་སུ་རྟོག་མཐའ་མངས་པ་དང༌། དཔྱོད་མཐའ་མངས་ཤིང་རྒྱ་ཆེར་འགྲོ་བ་དག་གི་རྒྱུས། ཐམས་ཅད་མཁྱེན་པ་དག་གི་རྒྱུར་འགྲོ་ཞེས་ཟེར་བ་རྒྱུའི་ཐེག་པ་བ་དག་ཡོད་དེ། ལང་ཀའི་བདག་པོ་དེ་དག་ལ་ནི་ཤིན་ཏུ་ཞིབ་པ་ཆེས་ཞིབ་པ་ཞེས་མི་བྱའི། །དེ་དག་ནི་རྩིང་བ་བས་ཀྱང་ཆེས་རྩིང་བ་ཞེས་བྱའོ། །དེ་ཅིའི་ཕྱིར་ཞེ་ན། བླུན་པོ་གང་དག་བྱེ་མ་ལས་གསེར་ཕྱེ་བཙགས་པར་འདོད་པ་ན། ལྷང་ཚེར་ལ་གསེར་ཕྱེར་འདུ་ཤེས་ཏེ་ཚོལ་བ་བཞིན་དུ། རྣམ་པ་ཐམས་ཅད་མཐོང་ཞིང་གསང་སྔགས་ཀྱི་གནས་ལུགས་རྙེད་པར་མི་འགྱུར་རོ། །དེ་ཅིའི་ཕྱིར་ཞེ་ན། དེ་དག་ལ་ནི་རྣམ་པ་ཐམས་ཅད་ཡོད་དེ། ཡེ་ཤེས་མེད་པའི་ཕྱིར་རོ།།

གཉིས་པ་ཞིབ་པ་ལས་ཆེས་ཞིབ་པའི་ཡུལ་ཡིན་པ་ནི།

ལང་ཀའི། ཞེས་ པ་ནས། ཆོས་གཅིག་ཀྱང་མེད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ་གང་བློ་ཞིབ་པ་ཆེས་ཞིབ་པ་ནི། འདི་ལྟ་སྟེ། ཆོས་གཅིག་གི་ཆོས་ཉིད་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་སོ། །ཆོས་ཐམས་ཅད་ཀྱི་ཆོས་ཉིད་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་པས། གང་རྡུལ་ཕྲ་རབ་དང་། དབྱིབས་སྣ་ཚོགས་དང་། མིང་དང་། བརྡ་དང་། མཚན་མ་དང་། ཐ་སྙད་དང་། བཏགས་པ་ཐམས་ཅད་ངང་གིས་ཤེས་པར་གྱུར་ཏེ། དེ་ལ་ནི་རྣམ་པ་ཐམས་ཅད་དང་ཡེ་ཤེས་གཉིས་སུ་མེད་པ་གཉིས་ཀྱི་ངོ་བོ་ལས་

གྲོལ་བར་ཡོད་པའི་ཕྱིར། མ་མཐོང་མི་ཤེས་པའི་ཆོས་གཅིག་ཀྱང་ མེད་དོ།།

ལང་ཀའི་བདག་པོ། གང་བློ་ཞིབ་པ ་བས་ཀྱང་ཆེས་ཞིབ་པ་ནི། འདི་ལྟ་སྟེ། ཆོས་གཅིག་གི་གནས་ལུགས་སེམས་ཀྱི་ཆོས་ཉིད་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་ཤིང་རྟོགས་པས་ཆོས་ཐམས་ཅད་ཀྱི་གནས་ལུགས་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་ཤིང་རྟོགས་པར་འགྱུར་བས་ན་དེ་ལྟར་ལེགས་པར་གཟིགས་པ་དེས། གང་རྡུལ་ཕྲ་རབ་དང༌། དབྱིབས་སྣ་ཚོགས་དང༌། མིང་དང༌། བརྡའ་དང༌། མཚན་མ་དང༌། ཐ་སྙད་དང༌། བཏགས་པ་ཐམས་ཅད་སེམས་ཀྱི་ཆོས་ཉིད་དང་དབྱེར་མེད་པར་ངང་གིས་ཤེས་པར་འགྱུར་ཏེ། དེ་ལ་ནི་རྣམ་པ་ཐམས་ཅད་དང༌། ཡེ་ཤེས་གཉིས་སུ་མེད་པ་གཉིས་ཀྱི་ངོ་བོ་ཉིད་ལས་གྲོལ་བར་མཁྱེན་པའི་ཡེ་ཤེས་ཡོད་པའི་ཕྱིར་མ་མཐོང་བ་དང་མི་ཤེས་པའི་ཆོས་གཅིག་ཀྱང་མེད་དོ། །དེ་བས་ན། རྒྱས་པ་༼༥༨༽འབུམ་ལས། གཟུགས་ཀྱི་དེ་བཞིན་ཉིད་ཤེས་ན། ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འགྱུར་རོ། །ཞེས་དང༌། འདི་སྐད་དུ། ཕྱོགས་བྲལ་ཆེན་པོ་གང་སུ་ཞིག །ཕྱོགས་གཅིག་རྟོགས་པས་ཕྱོགས་ཀུན་རྟོགས། །འདི་ནི་ཆོས་ཀྱི་དོན་པོ་མཆོག །ཅེས་པ་ལ་སོགས་ཤིན་ཏུ་མང་ངོ་།།

གཉིས་པ་ཟབ་པའི་སྤྱོད་ཡུལ་ཡིན་པ་ལ་གཉིས་ཏེ། ཟབ་ཟབ་འདྲ་ལ་མི་ཟབ་པའི་ཡུལ་མིན་པ། ཟབ་པ་ལས་ཀྱང་ཆེས་ཟབ་པའི་སྤྱོད་ཡུལ་ཡིན་པའོ། །དང་པོ་ནི།

ལང་ཀའི། ཞེས་ པ་ནས། དབྱེ་བར་ཡང་མེད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ་བློ་ཟབ་པ་ཆེས་ཟབ་པ་ནི་གང་ཞེ་ན། གང་ལ་ལ་དག་ཆོས་ཐམས་ཅད་ལ་མུ་དང་། གཏིང་དང་། མཐའ་དང་། དབུས་འཚོལ་ཞིང་འབྱེད་པ་དག་ཡོད་དེ། དེ་དག་ནི་བློ་ཟབ་པ་ཆེས་ཟབ་པ་ཞེས་མི་བྱའི། ཐུག་པ་ཉིད་དུ་ཐུག་པ་ཞེས་བྱའོ། །དེ་ཅིའི་ཕྱིར་ཞེ་ན། གང་འཁྲུལ་པ་དག་རྨིག་རྒྱུ་ལ་ཆུར་འདུ་ཤེས་ཏེ་སྙེག་པ་འམ། ལྡོངས་པ་དག་ནམ་མཁའི་མཐའ་འཚོལ་བ་བཞིན། ཆོས་ཐམས་ཅད་ཀྱི་མུ་དང་། གཏིང་དང་། མཐའ་དང་། དབུས་བཙལ་བས་ཀྱང་མི་རྙེད་ལ། དབྱེར་ཡང་ མེད་དོ།།

ལང་ཀའི་བདག་པོ། བློ་ཟབ་པ ་བས་ཀྱང་ཆེས་ཟབ་པ་ནི་གང་ཞེ་ན། གང་ཟག་གང་ལ་ལ་བློ་ཟབ་པ་འདྲ་ལ་མི་ཟབ་པ་དག་ཆོས་ཐམས་ཅད་ལ་དམིགས་ནས་མུ་དང༌། གཏིང་དང༌། མཐའ་དང༌། དབུས་ཀྱི་ཆ་སོ་སོར་ཚོལ་ཞིང་འབྱེད་པར་བྱེད་པ་དག་ཡོད་དེ། དེ་དག་ནི་བློ་ཟབ་པ་བས་ཀྱང་ཆེས་ཟབ་པ་ཞེས་མི་བྱའི། མཐའ་ལ་ཐུག་པ་ཉིད་དུ་ཆེས་ཐུག་པ་ཞེས་བྱའོ། །དེ་ཅིའི་ཕྱིར་ཞེ་ན། གང་འཁྲུལ་པ་དག་སྨིག་རྒྱུ་ལ་ཆུར་འདུ་ཤེས་ཏེ་རྗེས་སུ་སྙེག་པའམ། ལྡོངས་པ་དག་ནམ་མཁའི་མཐའ་ཚོལ་ནས་རྙེད་དུ་རེ་བ་བཞིན་དུ། ཆོས་ཐམས་ཅད་ཀྱི་ངོ་བོ་དོན་ཇི་བཞིན་པ་ལ་མུ་དང་གཏིང་དང༌། མཐའ་དང་དབུས་བཙལ་ཀྱང་མི་རྙེད་ལ། དབྱེ་བར་བྱར་ཡང་མེད་དོ།།

གཉིས་པ་ཟབ་པ་ལས་ཀྱང་ཆེས་ཟབ་པའི་སྤྱོད་ཡུལ་ཡིན་པ་ནི།

ལང་ཀའི། ཞེས་པ་ནས། རྟོག་དཔྱོད་དང་བྲལ་བའོ། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ་འོན་ཏང་ན། ཆོས་ཐམས་ཅད་ལ་མུ་དང་གཏིང་མེད་པ། མཐའ་དང་དབུས་མེད་པར་ཆུབ་པ ་གང་ཡིན་པ་དེ་ནི། བློ་ཟབ་པ་ཆེས་ཟབ་པ་ཞེས་བྱའོ། །དེ་ཅིའི་ཕྱིར་ཞེ་ན། སངས་རྒྱས་ཀུན་གྱི་དགོངས་པ་

ཐམས་ཅད་ནི་རྟོག་དཔྱོད་དང་བྲལ་བའོ།།

ལང་ཀའི་བདག་པོ། འོན་ཏང་ན། ཆོས་ཐམས་ཅད་ཆོས་ཉིད་དང་དབྱེར་མེད་པར་རྟོགས་ནས། གནས་ལུགས་མ་འདྲེས་ཡོངས་རྫོགས་ཀྱི་ངོ་བོ་ལ་མུ་དང་གཏིང་མེད་པ། མཐའ་དང་དབུས་མེད་པར་ཁོང་དུ་ཆུབ་པ་གང་ཡིན་པ་དེ་དག་ནི། བློ་ཟབ་པ་ཆེས་ཟབ་པ་ཞེས་བྱའོ། །དེ་ཅིའི་ཕྱིར་ཞེ་ན། ཆོས་རིལ་མུ་གཏིང་མཐའ་དབུས་མེད་པར་རྟོགས་པའི་སངས་རྒྱས་ཀུན་གྱི་དགོངས་པ་རྣམ་པ་ཐམས་ཅད་ལ་ནི་རྟོག་དཔྱོད་དང་བྲལ་ལ་ཡུལ་མེད་ཀུན་གསལ་དུ་མཁྱེན་པའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། བལྟ་བར་བྱའོ། །ཞེས་པའི་བར་གྱིས་བསྟེན་ཏེ།

ལངྐའི་བདག་པོ་དེའི་ཕྱིར་གསང་སྔགས་ཀྱི་ངོ་བོ་ལ་ནི། རབ་ཏུ་དཔག་པར་དཀའ་བའི་ཕྱིར།

བློ་ཞིབ་པ་ཆེས་ཞིབ་པ། ཟབ་པ་ཆེས་ཟབ་པས་བལྟ་བར་བྱའོ།།

ལངཀའི་བདག་པོ། དེའི་ཕྱིར། གསང་སྔགས་ཀྱི་ངོ་བོ་ལ་ནི་ཀུན་རྫོབ་ཀྱི་མུ་དང་དོན་དམ་གྱི་གཏིང་དབྱེ་བ་མེད་ཅིང་མཐའ་དབུས་དང་བྲལ་ཏེ་རབ་ཏུ་དཔག་པར་དཀའ་བའི་ཕྱིར། བློ་ཞིབ་པ་བས་ཀྱང་ཆེས་ཞིབ་པ། ཟབ་པོ་བས་ཀྱང་ཆེས་ཟབ་པས་ཡང་དག་པར་བལྟ་བར་བྱའོ།།

བཞི་པ་མཚོན་བྱེད་ཀྱི་དཔེ་བཤད་པ་ལ་གཉིས་ཏེ། གསང་བའི་དབྱིངས་རང་བྱུང་ཡེ་ཤེས་ཀྱི་དཔེ་བཤད་པ། ཡེ་ཤེས་༼༥༩༽ལྔའི་དཔེ་བསྟན་པའོ། །དང་པོ་ནི།

སྨྲས་པ། ཞེས་པ་ནས། རང་རིག་པའི་དཔེར་ནི་ཕྱོགས་མེད་དོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ། གསང་བའི་དབྱིངས་དེ་དཔེ་གང་ལ་ལྟོས་ཏེ་ཤེས་པར་བྱ། སྨྲས་པ། ལངྐའི་བདག་པོ། གསང་བའི་དབྱིངས་དེའི་དཔེར་བྱ་བ་ནི་འཇིག་རྟེན་ན་མེད་དེ། རེ་ཞིག་དཔེར་ཉེ་བ་མངོན་སུམ་པར་བྱས་ན། ནམ་མཁའ་ལ་གཟུང་བར་བྱ་སྟེ། ནམ་མཁས་ཀྱང་བསྐྲུན་དུ་ཡོད་པ་ནི་མ་ཡིན་ན། འཇིག་རྟེན་མངོན་སུམ་པའི་དཔེར་དེ་ལས་མེད་པའི་ཕྱིར། དཔེ་ནམ་མཁའ་ལ་ལྟོས་ཏེ་ཤེས་པར་བྱའོ། །ཞེས་དམ་པ་རྣམས་ཀྱིས་བཤད་དོ། །སྨྲས་པ། གསང་བ་པའི་བདག་པོ། གསང་བའི་དབྱིངས་དང་ནམ་མཁའ་གཉིས། ཆོས་ཇི་ལྟར་འཐུན་པར་སྦྱར་བའི་བྱ་བ་བྱ། སྨྲས་པ། ལངྐའི་བདག་པོ། གསང་བའི་དབྱིངས་དང་ནམ་མཁའ་གཉིས། ཀུན་ཏུ་ཆོས་འཐུན་པ་ནི་མ་ཡིན་ཏེ། རང་རིག་སྟོང་པ་ཉིད་དང་། རིག་ མེད་སྟོང་པ་ཉིད་ཀྱི་ཕྱིར་རོ། །སྨྲས་པ། གསང་བ་པའི་བདག ་པོ། འོ་ན་ཇི་ག་གསང་བའི་དབྱིངས་དེར་ནམ་མཁའ་མ་འདུས་པ་ཞིག་གམ། སྨྲས་པ། ལངྐའི་བདག་པོ་དེ་ཇི་སྙམ་དུ་སེམས་གསང་བའི་དབྱིངས་དེར་ནི་ནམ་མཁའ་འདུས་ལ། ནམ་མཁའི་ཁོངས་སུ་ནི་གསང་བའི་དབྱིངས་མ་འདུས་སོ། །སྨྲས་པ། གསང་བའི་བདག་པོ། ནམ་མཁའ་གང་ལགས། སྨྲས་པ། ལངྐའི་བདག་པོ་ནམ་མཁའ་ནི་གང་གོ་སྐབས་ཡོད་པ་ཁོ་ནའོ། །སྨྲས་པ། གསང་བ་པའི་བདག་པོ། འོ་ན་ཇི་ག་གསང་བའི་དབྱིངས་དེ་ནམ་མཁའ་ཇི་ལྟར་མཚོན་ཏེ་ཤེས་པར་འགྱུར། སྨྲས་པ། ལངྐའི་ བདག་པོ། ཆོས་འཐུན་པའི་དཔེ་ཉེ་བར་བཟུང་བ་སྟེ། གང་གི་གོ་སྐབས་ཡོད་པ་དང་མེད་པ ་ལ་ཟད་མི་ཤེས་པ་དང་། སྟོང་ལ་ཐམས་ཅད་འབྱུང་བ་སྟེ། ཕྱོགས་ཙམ་དུ་ཆོས་དེ་དག་འཐུན་ཀྱང་། རང་རིག་པའི་དཔེར་ནི་ཕྱོགས་མེད་དོ།།

དེ་ལྟར་ཕལ་གྱི་ཐུན་མོང་མིན་པ་དེ་གང་གིས་མཚོན་ནས་ཤེས་པར་བྱ་སྙམ་པ་ལ། སྨྲས་པ། གསང་བ་པའི་བདག་པོ། གསང་བའི་དབྱིངས་དེ་དཔེ་གང་ལ་ལྟོས་ཏེ་ཤེས་པར་བྱ། སྨྲས་པ། ལང་ཀའི་བདག་པོ། གསང་བའི་དབྱིངས་དེའི་དཔེར་བྱ་བ་རྫོགས་པར་མཚོན་ནུས་པ་ནི་འཇིག་རྟེན་ན་མེད་དེ། རེ་ཞིག་དཔེ་ཉེ་བར་མངོན་སུམ་པར་བྱ་ན། ནམ་མཁའ་ལ་གཟུང་བར་བྱ་སྟེ། ནམ་མཁས་ཀྱང་ཕྱོགས་ཐམས་ཅད་ནས་བསྐྲུན་དུ་ཡོད་པ་མ་ཡིན་ན་ཡང༌། འཇིག་རྟེན་ན་མངོན་སུམ་པའི་དཔེ་དེ་ལས་མེད་པའི་ཕྱིར། དཔེ་ནམ་མཁའ་ལ་ལྟོས་ཏེ་ཤེས་པར་བྱའོ། །ཞེས་དམ་པ་རྣམས་ཀྱིས་བཤད་དེ་ཕྱོགས་མེད་ཀྱི་ངོ་བོ་ཕྱོགས་གཅིག་ནས་མཚོན་པར་ཟད་དོ། །ཡང་སྨྲས་པ། གསང་བ་པའི་བདག་པོ། གསང་བའི་དབྱིངས་དང་ནམ་མཁའ་གཉིས་ཆོས་ཇི་ལྟར་མཐུན་པར་སྦྱར་བར་བྱ། ལན་སྨྲས་པ། ལང་ཀའི་བདག་པོ། གསང་བའི་དབྱིངས་དང༌། ནམ་མཁའ་གཉིས་ཀུན་ཏུ་ཆོས་མཐུན་པ་ནི་མ་ཡིན་ཏེ། གསང་བའི་དབྱིངས་རང་རིག་སྟོང་པ་ཉིད་དང༌། ནམ་མཁའ་རིག་ མེད་སྟོང་པ་ཉིད་ཀྱི་ཕྱིར་རོ། །སྨྲས་པ། གསང་བ་པའི་བདག ་པོ། དཔེ་དོན་མཐུན་མི་མཐུན་ལ་རྩོད་པའི་ཚུལ་གྱིས། འོ་ན་ཅིག་གསང་བའི་དབྱིངས་དེར་ནམ་མཁའ་མ་འདུས་པ་ཞིག་གམ། སྨྲས་པ། ལང་ཀའི་བདག་པོ། དེ་ཇི་སྙམ་དུ་སེམས། རང་རིག་པ་ཉིད་ཀྱི་རྒྱས་བཏབ་པའི་ཕྱིར་གསང་བའི་དབྱིངས་དེར་ནི་ནམ་མཁའ་འདུས་ལ། ནམ་མཁའ་ལས་ཡོན་ཏན་དང་མཛད་པ་མང་པོ་འཆར་མི་ནུས་པའི་ཕྱིར་ནམ་མཁའི་ཁོངས་སུ་ནི་གསང་བའི་དབྱིངས་མ་འདུས་སོ།།

སྨྲས་པ། གསང་བ་པའི་བདག་པོ། འོ་ན་ནམ་མཁའ་གང་ལགས། སྨྲས་པ། ལང་ཀའི་བདག་པོ། ནམ་མཁའ་ནི་གང་དངོས་པོ་ཐམས་ཅད་ཀྱི་གོ་སྐབས་ཡོད་པ་ཁོ་ནའོ། །སྨྲས་པ། གསང་བ་པའི་བདག་པོ། འོ་ན་ཅིག་གསང་བའི་དབྱིངས་དེ། ནམ་མཁས་ཇི་ལྟར་མཚོན་ཏེ་ཤེས་པར་འགྱུར། སྨྲས་པ། ལང་ཀའི་བདག་པོ། གསང་བའི་དབྱིངས་དང་ཆོས་མཐུན་པའི་དཔེ་ཡི་ཁྱད་པར་གསུམ་དང་ལྡན་པས་ནམ་མཁའ་ཉེ་བར་མཚོན་བྱེད་དུ་བཟུང་བ་སྟེ། འབྱུང་བའི་ནམ་མཁའ་ཉིད་རིལ་གསལ་བར་བྱེད་ཅིང་ཤོང་བ་དང༌། ངོ་བོ་མེད་ལ་མཐའ་མི་ཟད་པ་དང༌། རང་གི་མཚན་ཉིད་གཟུང་དུ་མེད་ལ་འཇའ་རླན་ལ་༼༦༠༽སོགས་པ་སྣང་བར་བྱེད་པ་ལྟར། སེམས་ཀྱི་ཆོས་ཉིད་ཀྱང༌། གང་དངོས་པོ་དག་གི་གོ་སྐབས་ཡོད་པ་དང༌། ངོ་བོ་མེད་ལ་མཐའ་ཟད་མི་ཤེས་པ་དང༌། རང་བཞིན་སྟོང་ལ་རོལ་པ་ཐམས་ཅད་འབྱུང་བ་སྟེ། ཕྱོགས་གསུམ་གྱི་ཆ་ཙམ་དུ་ཆོས་དེ་དག་མཐུན་པས་མཚོན་བྱེད་དུ་སྨོས་ཀྱང༌། རང་རིག་ལྷུན་གྲུབ་ཆེན་པོ་ཅིར་ཡང་སྣང་ལ་ངོ་བོ་ཇི་བཞིན་པའི་དཔེར་ནི་ཕྱོགས་ཀྱིས་རྒྱ་ཆད་པ་མེད་དེ་ཀུན་གྱིས་མཚོན་པ་ཉིད་དོ།།

གཉིས་པ་ཡེ་ཤེས་ལྔའི་དཔེ་བསྟན་པ་ལ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ཡེ་ཤེས་ལྔའི་རྣམ་གྲངས་དེའི་འོག་ནས། ལང་ཀའི། ཞེས་པ་ནས། ནོར་བུའི་ཡེ་ཤེས་ཞེས་ཀྱང་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་དག་ལ་ནི་ནམ་མཁའ་ལྟ་བུའི་ཡེ་ཤེས་དང་། མེ་ལོང་ལྟ་བུའི་ཡེ་ཤེས་དང་། ཆེན་པོ་ལྟ་བུའི་ཡེ་ཤེས་དང་། སྣ་ཚོགས་བཀོད་པའི་ཡེ་ཤེས་དང་། ཡིད་བཞིན་ནོར་བུའི་ཡེ་ཤེས་ཞེས་བྱའོ།།

ལང་ཀའི་བདག་པོ་ཞེས་སྡུད་པ་པོ་ལ་བོས་ནས། ཡེ་ཤེས་ལྔ་པོ་དེ་དག་ལ་ནི་དཔེ་ཡིས་མཚོན་པའི་མཚན་ངེས་པར་འགྲུབ་པ་སྟེ། ཇི་ལྟ་ཞེ་ན། འབྱུང་བའི་ནམ་མཁའ་ལྟར་ངོ་བོ་སྟོང་ལ་རིལ་འབྱུང་བའི་ཕྱིར་ནམ་མཁའ་ལྟ་བུའི་ཡེ་ཤེས་དང༌། གཟུགས་མཛེས་ལྟར་གསལ་ལ་མི་རྟོག་པའི་ཕྱིར་མེ་ལོང་ལྟ་བུའི་ཡེ་ཤེས་དང༌། ཆེན་པོ་འབྱུང་བ་བཞི་ལྟ་བུར་སྤོང་ལེན་མེད་པའི་ཕྱིར་ཆེན་པོ་ལྟ་བུའི་ཡེ་ཤེས་དང༌། ཕྱོགས་བཅུ་མི་མཐུན་ཐ་དད་མ་འདྲེས་པར་གསལ་བ་ལྟར་ཤེས་པར་བྱ་བ་ཐམས་ཅད་མཁྱེན་པའི་ཕྱིར་སྣ་ཚོགས་བཀོད་པའི་ཡེ་ཤེས་དང༌། ནོར་བུ་རིན་ཆེན་ལྟར་བདག་གཞན་གྱི་དགོས་པ་འགྲུབ་པའི་ཕྱིར་ཡིད་བཞིན་ནོར་བུའི་ཡེ་ཤེས་ཞེས་ཀྱང་བྱའོ།།

གཉིས་པ་རྒྱས་པར་བཤད་པ་ལ་བཞི་སྟེ། མེ་ལོང་ལྟ་བུའི་ཡེ་ཤེས། ཆེན་པོ་ལྟ་བུའི་ཡེ་ཤེས། ཕྱོགས་བཅུ་ལྟ་བུའི་ཡེ་ཤེས། ཡིད་བཞིན་ནོར་བུའི་ཡེ་ཤེས་སོ། །དང་པོ་ནི།

ལང་ཀའི། ཞེས་ པ་ནས། དཔེར་ནི་ཕྱོགས་མེད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ། མེ་ལོང་ནི་ཆོས་མཐུན་པའི་དཔེ་ཉེ་བར་བཟུང་བ་སྟེ། སྐྱོན་སེལ་བ་དང་། ལེགས་པ་སྐྱེད་པ་དང་། གསལ་བར་བྱེད་པ་དང་། གཟུགས་བརྙན་འབྱུང་བ་དང་། རྩོལ་བ་མེད་པ་དང་། མངོན་པར་འདུ་བྱེད་པ་མེད་པ་དང་། ལྡན་པ་མ་ཡིན་པ་དང་། མི་ལྡན་པ་མ་ཡིན་པ་དང་། མི་ཉེ་བ་དང་། མི་རིང་བ་དང་། ཀུན་ནས་འབྱུང་བ་དང། ཚད་ཡོངས་སུ་མ་ཆད་པ་དང་། གཞན་དུ་མ་ཡིན་པ་དང་། བསྒྲིབས་པ་མ་ཡིན་པ་དང་། མུན་པ་མ་ཡིན་པ་དང་། བསྐལ་པ་མ་ཡིན་པ་སྟེ། ལངྐའི་བདག་པོ་ཕྱོགས་ཙམ་དུ་ཆོས་དེ་དག་འཐུན་ཀྱང་རང་རིག་པ་ཉིད་ཀྱི་དཔེར་ནི་ཕྱོགས་ མེད་དོ།།

ལང་ཀའི་བདག་པོ། སོ་སོ་ནས་མཐའ་མཐུན་པ ་ཉེ་བར་33སྦྱོར་བའི་ཆོས་དུ་དང་ལྡན་པས་མཚོན་ཚུལ་བསྟན་ཏེ། འདིར་མེ་ལོང་ནི་ཆོས་བཅུ་དྲུག་དང་ལྡན་པས་མཐུན་པའི་དཔེ་ཉིད་དུ་ཉེ་བར་བཟུང་བ་སྟེ། གང་ལྟ་བ་པོའི་སྐྱོན་གྱི་དྲི་མ་སེལ་བ་དང༌། དེའི་ཡོན་ཏན་འབྱིན་པས་ལེགས་པ་སྐྱེད་པ་དང༌། མཐོང་བྱ་གསལ་བར་བྱེད་པ་དང༌། དངོས་པོ་གཟུགས་སུ་སྣང་ངོ་ཅོག་གི་གཟུགས་བརྙན་འབྱུང་བ་དང༌། གཟུགས་བརྙན་འབྱུང་བ་ལ་རྩོལ་བ་མེད་པ་དང༌། འཕྲལ་དུ་མངོན་པར་རྩོལ་བའི་འདུ་བྱ་བ་མེད་པ་དང༌། གཟུགས་བརྙན་དང་མཐོང་བྱ་མཐོང་བྱེད་སོ་སོ་མ་ཡིན་པས་ལྡན་པ་མ་ཡིན་པ་དང༌། མེ་ལོང་གི་ནང་ན་གསལ་བས་མི་ལྡན་པ་མ་ཡིན་པ་དང༌། གཟུགས་བརྙན་དངོས་པོ་ཉིད་མ་ཡིན་པས་མི་ཉེ་བ་དང༌། གཟུགས་བརྙན་༼༦༡༽ལས་གཞན་པ་ཞིག་མེད་པས་མི་རིང་བ་དང༌། མེ་ལོང་གི་ཕྱོགས་ཀུན་ནས་ཀྱང་ལྷག་ཆད་མེད་པར་གཟུགས་བརྙན་སྣང་བས་ཀུན་ནས་འབྱུང་བ་དང༌། གཟུགས་བརྙན་གྱིས་མེ་ལོང་གི་རྒྱ་ཕྱོགས་མ་ཆད་པར་གང་བས་ཚད་ཡོངས་སུ་མ་ཆད་པ་དང༌། མེ་ལོང་ལས་གཞན་དུ་སྣང་བ་མ་ཡིན་པ་དང༌། མེ་ལོང་གསལ་བ་དེ་གཡའ་ཡིས་གཡོགས་ཏེ་བསྒྲིབ་པ་མ་ཡིན་པ་དང༌། མེ་ལོང་གསལ་བ་འབའ་ཞིག་པས་མུན་པ་འཐིབས་པ་མ་ཡིན་པ་དང༌། གཟུགས་བརྙན་མེ་ལོང་ལས་གུད་དུ་བསྐལ་ཏེ་བཀོལ་བ་མ་ཡིན་པ་སྟེ། གཞན་ཆུ་དྭང་བ་ལ་སོགས་པ་ནི་སྐབས་ཀྱིས་མ་སྨོས་པའི་ཕྱིར་རོ། །དེ་བས་ན་ཆོས་ཇི་ལྟ་བ་དེ་དག་མེ་ལོང་ཡེ་ཤེས་ལ་ལྡན་ཏེ་རྗེས་སུ་སྦྱར་བར་བྱའོ། །ལང་ཀའི་བདག་པོ། རེ་ཞིག་གདུལ་བྱའི་ངོ་སྐལ་གྱི་མཚོན་ཕྱོགས་ཙམ་དུ་ཆོས་དེ་དག་མཐུན་པར་སྨོས་ཀྱང༌། དོན་གྱི་ངོ་བོ་རང་རིག་པ་རང་འོད་གསལ་བ་ཉིད་ཀྱི་དཔེར་ནི་ཕྱོགས་རིས་མེད་དོ།།

གཉིས་པ་ཆེན་པོ་ལྟ་བུའི་ཡེ་ཤེས་ནི།

ལང་ཀའི་ བདག་པོ་ཆེན་པོ། ཞེས་པ་ནས། དཔེར་ནི་ཕྱོགས་མེད ་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཆེན་པོ་ནི་ཆོས་འཐུན་པའི་དཔེ་ཉེ་བར་བཟུང་བ་སྟེ། ཡོངས་སུ་རྫོགས་པར་རིག་པ་ཉིད་དེ། ཆེ་ཆུང་མེད་པར་ཡོངས་སུ་རྫོགས་པ་དང་། རིང་ཐུང་མེད་པ་དང་། བཟང་ངན་མེད་པ་དང་། སྐྱོན་ཡོན་མེད་པ་དང་། བླང་དོར་མེད་པ་དང་། ལེགས་ཉེས་མེད་པ་དང་། གཙང་སྨེ་མེད་པ་དང་། བདེ་སྡུག་མེད་པ་དང་། མཐོ་དམན་མེད་པ་དང་། ཡངས་དོགས་མེད་Ḃ་དང་། སྒྲོ་སྐུར་མེད་Ḃ་དང་། འདྲེས་ པ་མེད་Ḃ་དང་། མི་ཕྱེད་པར་ཡོངས་སུ་རྫོགས་པ་སྟེ། ལངྐའི་བདག ་པོ་ཕྱོགས་ཙམ་དུ་ཆོས་དེ་དག་འཐུན་ཡང་། རང་རིག་པ་ཉིད་ཀྱི་དཔེར་ནི་ཕྱོགས་མེད་དོ།

ལང་ཀའི་བདག་པོ། འབྱུང་བ་ཆེན་པོ་བཞི་ནི་རེ་ཞིག་ཆོས་བཅུ་གསུམ་དང་ལྡན་པའི་ཕྱིར་མཉམ་པའི་ཡེ་ཤེས་དང་ཆོས་མཐུན་པའི་དཔེ་ཉིད་དུ་ཉེ་བར་བཟུང་ནས་མཚོན་པ་སྟེ། ཆེན་པོ་རྣམས་ལ་འཆད་པ་དག་དབྱེ་བ་མེད་པར་ཡོངས་སུ་རྫོགས་པ་ལྟར། ཡེ་ཤེས་ཀྱང་ཆོས་འདི་དག་བླང་དོར་མེད་པར་རྫོགས་པའི་རིག་པ་དེ་བཞིན་ཉིད་རང་གསལ་བ་ཉིད་དེ། གང་ཞེ་ན། འབྱུང་བ་བཞི་ལ་རྒྱ་ཆེ་ཆུང་གི་དབྱེ་བ་མེད་པར་གཅིག་གི་མཚན་ཉིད་ལ་ཀུན་ལྡན་པས་ཡོངས་སུ་རྫོགས་པ་དང༌། དབྱིབས་རིང་ཐུང་མེད་པ་དང༌། ངོ་བོ་བཟང་ངན་མེད་པ་དང༌། སྐྱོན་དང་ཡོན་ཏན་གྱི་རིས་མེད་པ་དང༌། བཟང་ངན་ལ་སྤོང་ལེན་གྱི་བླང་དོར་མེད་པ་དང༌། གཞིའི་ལས་ལེགས་ཉེས་སུ་འཛིན་པ་མེད་པ་དང༌། དེ་དག་གཙང་མི་གཙང་གི་རིས་སུ་ཆད་དེ་གཙང་དང་སྨེ་བ་མེད་པ་དང༌། ངོ་བོ་ལ་བདེ་བ་དང་སྡུག་བསྔལ་མེད་པ་དང༌། གནས་ཡན་མན་གྱི་མཐོ་དམན་མེད་པ་དང༌། དེ་དག་ལ་ཤོང་མ་ཤོང་གི་ཡངས་དོག་མེད་པ་དང༌། བསྟོད་སྨད་ཀྱི་སྒྲོ་སྐུར་མེད་པ་དང༌། རང་གི་མཚན་ཉིད་འདྲེས་པ་མེད་པ་དང༌། གཅིག་ལ་བཞི་ཀ་ཚང་བས་འདུ་འབྲལ་མེད་པར་མི་ཕྱེད་པར་ཡོངས་སུ་རྫོགས་པ་སྟེ། མཉམ་པ་ཉིད་ཀྱི་ཡེ་ཤེས་ཀྱང་རྗེས་སུ་མཐུན་པར་སྦྱར་རོ། །ལང་ཀའི་བདག་པོ། དེ་བས་ན་ཕྱོགས་ཙམ་དུ་ཆོས་དེ་དག་མཐུན་ཡང༌། རང་རིག་པ་མཉམ་པ་ཉིད་ཀྱི་ངོ་བོ་༼༦༢༽ཡེ་ཤེས་ཐམས་ཅད་པའི་དཔེར་ནི་གང་གིས་ཀྱང་མཚོན་ཏུ་བཏུབ་པས་ཕྱོགས་རིས་མེད་དེ་གདུལ་བྱའི་ངོ་སྐལ་ཙམ་དུ་ཟད་དོ།།

གསུམ་པ་ཕྱོགས་བཅུ་ལྟ་བུའི་ཡེ་ཤེས་ནི།

ལང་ཀའི་ བདག་པོ་སྣ་ཚོགས། ཞེས་པ་ནས། དཔེར་ནི་ཕྱོགས་མེད ་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་སྣ་ཚོགས་བཀོད་པ་ནི། ཆོས་འཐུན་པའི་དཔེ་ཉེ་བར་བཟུང་བ་སྟེ། གནས་དང་། འཇུག་པ་དང་། མ་འདྲེས་པ་དང་། གསལ་བ་དང་། རྣལ་འབྱོར་ཕྱེ་བ་དང་། ལོངས་སྤྱོད་སྣ་ཚོགས་དང་། སྣང་བ་དང་། ཀུན་ཏུ་མ་རྨོངས་པ་སྟེ། ལངྐའི་བདག་པོ་ཕྱོགས་ཙམ་དུ་ཆོས་དེ་དག་འཐུན་ཀྱང་། རང་རིག་པ་ཉིད་ཀྱི་དཔེར་ནི་ཕྱོགས་ མེད་དོ།།

ལང་ཀའི་བདག་པོ་སྣ་ཚོགས་བཀོད་པ ་ཕྱོགས་བཅུས་སོ་སོར་རྟོག་པའི་ཡེ་ཤེས་མཚོན་པ་ནི་ཆོས་བརྒྱད་དང་ལྡན་པས་མཐུན་པའི་དཔེ་ཉིད་དུ་ཉེ་བར་བཟུང་ནས་སྦྱོར་བ་སྟེ། ཕྱོགས་ཀྱི་དངོས་པོ་བཅུ་མ་འདྲེས་པ་དེ་ཡེ་ཉིད་ནས་གནས་པའི་ཚུལ་དུ་ཡོད་པ་དང༌། དངོས་པོ་གང་ལའང་ཕྱོགས་ཚང་ཞིང་གོ་སྐབས་ཡོད་པས་གཅིག་ལའང་ཀུན་འཇུག་ཅིང་ལྡན་པ་དང༌། ངོ་བོ་ཕྱོགས་བཅུ་སོ་སོར་གསལ་བས་མ་འདྲེས་པ་དང༌། རང་རང་གི་གནས་ན་མ་སྒྲིབ་པར་སྣང་བས་གསལ་བ་དང༌། ཕྱོགས་རྣམ་པ་བཅུར་གྲངས་ཀྱི་གསལ་བར་ཕྱེ་བ་དང༌། སྤྱི་དང་བྱེ་བྲག་གི་གསལ་བའི་དབྱེ་བ་གཉིས་དང་འགྲོ་བའི་ལོངས་སྤྱོད་སྣ་ཚོགས་ཇི་སྙེད་པ་ཕྱོགས་ལ་ལྡན་པ་དང༌། ས་ཕྱོགས་གཅིག་ལའང་བཅུར་སྣང་བ་དང༌། དུས་ཐམས་ཅད་དུ་སོ་སོར་གསལ་བའི་ཕྱིར་ཀུན་ཏུ་མ་རྨོངས་པ་སྟེ། སོ་སོར་རྟོག་པའི་ཡེ་ཤེས་ཀྱང་རྗེས་སུ་སྦྱར་རོ། །ལང་ཀའི་བདག་པོ། དེ་ལྟར་ཕྱོགས་ཙམ་དུ་ཆོས་དེ་དག་མཐུན་ཀྱང༌། རང་རིག་པ་མ་འདྲེས་ལ་ཀུན་ཏུ་གསལ་བ་ཉིད་ཀྱི་དཔེར་ནི་ཕྱོགས་རིས་མེད་དོ།།

བཞི་པ་ཡིད་བཞིན་ནོར་བུའི་ཡེ་ཤེས་ནི།

ལང་ཀའི་ བདག་པོ། ནོར་བུ། ཞེས་པ་ནས། དཔེར་ནི་ཕྱོགས་མེད ་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ནོར་བུ་རིན་པོ་ཆེ་ནི། ཆོས་འཐུན་པའི་དཔེ་ཉེ་བར་བཟུང་བ་སྟེ། རྣམ་པར་མི་རྟོག་པ་དང་། བྱ་བ་བྱེད་པ་དང་། འདོད་པ་འབྱུང་བ་དང་། དགོས་པ་ཚང་བ་དང་། རེ་བ་སྐོང་བ་དང་། རྒྱུན་མི་འཆད་པ་དང་། དགའ་བ་སྐྱེད་པ་དང་། མི་ཟད་པ་དང་། བདེ་བ་ལ་འགོད་པ་དང་། ཐམས་ཅད་དུ་གྲུབ་པ་དང་། ཐོགས་པ་མེད་པ་དང་། མི་སྐྱོར་བ་དང་། རབ་ཏུ་སྦྱིན་པ་དང་། དགོངས་པ་གྲུབ་པ་སྟེ། ལངྐའི་བདག་པོ་ཆོས་དེ་དག་ཕྱོགས་ཙམ་དུ་འཐུན་ཡང་། རང་རིག་པ་ཉིད་ཀྱི་དཔེར་ནི་ཕྱོགས་མེད་དོ།།

ལང་ཀའི་བདག་པོ། བྱ་བ་གྲུབ་པའི་ཡེ་ཤེས་ནོར་བུ་རིན་པོ་ཆེ་ཡིས་ཆ་མཚུངས་སུ་སྟོན་པ་ནི་ཆོས་བཅུ་བཞི་དང་ལྡན་པས་མཐུན་པའི་དཔེ་ཉིད་ཉེ་བར་བཟུང་ནས་མཐའ་མཐོང་བར་བྱེད་པའི་ཚུལ་གྱིས་མཚོན་པ་སྟེ། གང་ཞེ་ན། ནོར་བུ་རིན་པོ་ཆེ་ལ་དགོས་འདོད་སྐོང་ངོ་བའི་རྟོག་པ་དང་བྲལ་བས་རྣམ་པར་མ་རྟོག་པ་དང༌། འདོད་པ་ཚིམ་པའི་ལས་བྱེད་པས་བྱ་བ་བྱེད་པ་དང༌། བསམ་པ་དེར་མཐུན་པར་འདོད་པ་འབྱུང་བ་དང༌། ཡོན་ཏན་རྫོགས་པར་ཡོད་པས་དགོས་པ་ཐམས་ཅད་ཚང་བ་དང༌། དེ་ལ་སྤྱོད་པར་དབང་བ་འདོད་པའི་ཡོན་ཏན་གྱིས་ཚིམ་པར་བྱེད་པས་རེ་བ་སྐོང་བ་དང༌། ཡོན་ཏན་སྣང་བ་ལ་དུས་ཀྱི་བར་ཆད་པ་མེད་པས་རྒྱུན་མི་འཆད་པ་དང༌། ལོངས་སྤྱོད་ཀྱིས་སམ་འགྲོ་བ་སྤྲོ་བས་དགའ་བ་བསྐྱེད་པ་དང༌། འདོད་པ་ཇི་སྙེད་པར་འབྱུང་ཡང་འགྲིབ་པ་མེད་པས་དགོས་པ་མི་ཟད་པ་དང༌། སྤྱོད་པའི་འགྲོ་བ་ལོངས་སྤྱོད་ཀྱི་དགའ་བདེ་ལ་དབུལ་པའི་འཇིགས་པ་མེད་པར་བྱེད་པས་༼༦༣༽བདེ་བ་ལ་བཀོད་པ་དང༌། དུས་སྔ་ཕྱི་ངོ་བོ་གྲུབ་ཟིན་པས་ཐམས་ཅད་དུ་གྲུབ་པ་དང༌། ཡོན་ཏན་གྱི་སྣང་བ་འབྱུང་ཡང་ཟིན་པ་མེད་པས་ཐོགས་པ་མེད་པ་དང༌། ཡོན་ཏན་ཟློས་བུར་འབྱུང་མི་དགོས་པར་དུས་གཅིག་ཏུ་གྲུབ་པས་མི་སྐྱོར་བ་དང༌། གང་ལའང་ཆགས་པ་མེད་པར་ཕ་རོལ་ལ་སྣང་བར་བྱེད་པས་རབ་ཏུ་སྦྱིན་པ་དང༌། སྤྱོད་པའི་འགྲོ་བ་དེ་ཡིས་བསམ་པ་བཞིན་དགོས་པ་གྲུབ་པ་སྟེ། བྱ་བ་ནན་ཏན་གྱི་ཡེ་ཤེས་ཀྱང་ཚུལ་དེ་བཞིན་དུ་སྦྱར་བར་བྱའོ། །ལང་ཀའི་ བདག་པོ། ཆོས་དེ་དག་ཕྱོགས་ཙམ་དུ་མཐུན་ན་ཡང༌། རང་རིག་པ་རིས་མེད ་ལྷུན་རྫོགས་ཉིད་ཀྱི་དཔེར་ནི་ཕྱོགས་ཆར་གྱུར་བ་མེད་དོ།།

གསུམ་པ་ཞབས་བསྡུ་བ་ནི།

ཚན་གཅིག་གི་འོག་ནས། ལང་ཀའི་ བདག་པོ་ཡང་འདི་ལྟར། ཞེས་པ་ནས། དཔེར་ནི་ཕྱོགས་མེད ་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་འདི་ལྟར་ནམ་མཁའ་ལྟ་བུར་གྱུར་པ་དང་། འཇའ་ཚོན་ལྟ་བུར་གྱུར་པ་དང་།

དབྱིབས་དང་ཁ་དོག་ལྟ་བུར་གྱུར་པ་དང་། སྤྲིན་རླབས་ལྟ་བུར་གྱུར་པ་དང་། མ་བཅོས་པར་སྣང་བ་སྟེ།

ཕྱོགས་ཙམ་དུ་ཆོས་དེ་དག་འཐུན་ཀྱང་རང་རིག་ པ་ཉིད་ཀྱི་དཔེར་ནི་ཕྱོགས་མེད་དོ།།

གནས་གྱུར་གྱི་དཔེ་བསྟན་པའི་ཕྱིར། ལང་ཀའི་བདག ་པོ། ཡང་འདི་ལྟར་ཡེ་ཤེས་ལྔའི་དཔེ་ཉེ་བར་བསྟན་པ་མི་མཐུན་པ་ནི། ཆོས་སོ་ཅོག་ནམ་མཁའ་ལྟ་བུར་མཐའ་གཉིས་མ་གྲུབ་པར་ཡུལ་མེད་དུ་རང་གསལ་བར་ཤེས་པ་སྟོབས་སུ་གྱུར་ཙ་ན་སྦྱོར་བ་དོན་གྱི་ཀུན་གཞི་མེ་ལོང་ལྟ་བུའི་ཡེ་ཤེས་སུ་གནས་གྱུར་ཅེས་བྱ་བ་དང༌། ཆོས་སོ་ཅོག་གི་སྤྱི་དང་རང་གི་མཚན་ཉིད་འཇའ་ཚོན་ལྟ་བུར་མ་གྲུབ་ལ་མ་འདྲེས་པའི་དོན་དུ་གསལ་བར་རྟོགས་པ་མཐར་ཕྱིན་ཙ་ན་ཡིད་སོ་སོར་རྟོག་པའི་ཡེ་ཤེས་སུ་གྱུར་པ་དང༌། ཆོས་ཐམས་ཅད་དབྱིབས་དང་ཁ་དོག་ལྟ་བུར་གཅིག་དང་ཐ་དད་ལས་གྲོལ་བས་བཟང་ངན་མ་དམིགས་པའི་ངོ་བོར་དེ་བཞིན་ཉིད་དུ་མཉམ་པར་རྟོགས་ཤིང་རིག་ཙ་ན་ཉོན་མོངས་པའི་ཡིད་མཉམ་པ་ཉིད་ཀྱི་ཡེ་ཤེས་སུ་གྱུར་པ་དང༌། བྱུང་ཚོར་དང་སེམས་དང་སེམས་བྱུང་ཅི་སྣང་ཅི་སྲིད་ཐམས་ཅད་སྤྲིན་རླངས་ལྟ་བུར་རང་བྱུང་རང་ཞི་འགྲོ་འོང་མེད་པར་རིག་ཅིང་རྟོགས་པ་ན་སྒོ་ལྔ་བྱ་བ་གྲུབ་པའི་ཡེ་ཤེས་སུ་གྱུར་པ་དང༌། ཆོས་ཇི་སྙེད་པ་དེ་དག་ཀུན་ཀྱང་མཐས་མ་རེག་སྟེ་ཡེ་ཉིད་ནས་མ་བཅོས་པར་སྤུ་མ་བརྗེས་མདོག་མ་བསྒྱུར་རྒྱུ་རྐྱེན་གྱིས་མ་བྱས་པའི་ཇི་བཞིན་པ་ཉིད་དུ་རིག་པ་རང་ཤར་བ་ན། གཞི་དོན་གྱི་ཀུན་གཞི་ཆོས་ཀྱི་དབྱིངས་ཀྱི་ཡེ་ཤེས་སུ་རང་སྣང་བ་སྟེ། རེ་ཞིག་ཕྱོགས་ཙམ་དུ་ཆོས་དེ་དག་དང་མཐུན་པར་མཚོན་ཀྱང་རང་རིག་པ་རང་བྱུང་ཉིད་ཀྱི་དཔེར་ནི་ཕྱོགས་རིས་མེད་དོ། །འོ་ན་ཡེ་ཤེས་ཀྱི་དཔེ་ནི་དངོས་པོ་བེམས་པོ་ལྟ་བུར་གྱུར་པས་དགོས་པ་མེད་དོ་བར་དོགས་པ་ལ། དེ་དག་གི་དོན་ནི་ངོ་བོ་མཚོན་པ་དང༌། གནས་གྱུར་གྱི་༼༦༤༽མཚན་ཉིད་མཚོན་པའི་དགོས་པ་གཉིས་ཀྱི་ཕྱིར་འགལ་བ་ཉིད་དུ་མི་འགྱུར་རོ།།

ལྔ་པ་ཡེ་ཤེས་ཀྱི་དོན་བསྟན་པ་ལ་ལྔ་སྟེ། མིང་གི་རྣམ་གྲངས། ངེས་པའི་ཚིག ཡེ་ཤེས་ཀྱི་ལས། ཡེ་ཤེས་ཀྱི་ཡུལ། ཡེ་ཤེས་ཀྱི་ནུས་པ་བསྟན་པའོ། །དང་པོ་ནི།

སྔར་གོང་གི གསང་བའི་དབྱིངས་དེ་ནི། ཞེས་པ་ནས། གྲུབ་པའི་ཡེ་ཤེས་ཞེས་བྱའོ། །ཞེས་པའི་བར་གྱིས་བསྟན་ཏེ།

གསང་བའི་དབྱིངས་དེ་ནི་ཐམས་ཅད་རང་རིག་པའི་ཕྱིར་རང་བྱུང་གི་ཡེ་ཤེས་ཞེས་བྱ་སྟེ། ཡེ་ཤེས་དེ་ལ་ནི་སྐབས་ཁ་ཅིག་ཏུ་ནི་རྣམ་པར་མི་རྟོག་པའི་ཡེ་ཤེས་ཞེས་བྱའོ། ཁ་ཅིག་ཏུ་ནི་སྟོང་པ་ཉིད་ཀྱི་ཡེ་ཤེས་ཞེས་བྱའོ། ཁ་ཅིག་ཏུ་ནི་ཆོས་ཀྱི་དབྱིངས་ཀྱི་ཡེ་ཤེས་ཞེས་བྱའོ། །ཁ་ཅིག་ཏུ་རྣམ་དག་གསལ་བའི་ཡེ་ཤེས་ཞེས་བྱའོ། །ཁ་ཅིག་ཏུ་ནི་མཉམ་པ་ཉིད་ཀྱི་ཡེ་ཤེས་ཞེས་བྱའོ། །ཁ་ཅིག་ཏུ་ནི་སོ་སོར་རྟོག་པའི་ཡེ་ཤེས་ཞེས་བྱའོ། །ཁ་ཅིག་ཏུ་ནི་བྱ་བ་གྲུབ་པའི་ཡེ་ཤེས་ཞེས་བྱའོ།།

རང་རིག་ཇི་བཞིན་པའི་ངོ་བོ་དེའི་ཡོན་ཏན་གྱི་བྱེ་བྲག་གི་མཚན་ཅིར་ཡང་གྲགས་པ་གང་ཞེ་ན། གསང་བའི་དབྱིངས་དེ་ནི་ཐམས་ཅད་རང་རིག་པའི་ཕྱིར། རང་བྱུང་གི་ཡེ་ཤེས་ཞེས་བྱ་བར་གཏན་ཚིགས་ཀྱིས་གྲུབ་སྟེ། ངོ་བོ་རྒྱུ་རྐྱེན་དང་བྲལ་བ་ཁོ་ན་བས་ཡེ་ཤེས་ཆེན་པོ་གཅིག་ཁོ་ནའོ། །དེ་བས་ན་རང་བྱུང་གི་ཡེ་ཤེས་ནི་ཡེ་ཤེས་ཐམས་ཅད་པའི་ཕྱིར་དེ་ཉིད་ལ་སྐབས་ཁ་ཅིག་ཏུ་ནི་སྤྱོད་ཡུལ་ཡེ་མེད་པ་ལ་འཛིན་པ་དང་བྲལ་བས་རྣམ་པར་མི་རྟོག་པའི་ཡེ་ཤེས་ཞེས་བྱའོ། །ཁ་ཅིག་ཏུ་ནི་མཐའ་གཉིས་དང་བྲལ་བའི་ཆ་ལས་སྟོང་པ་ཉིད་ཀྱི་ཡེ་ཤེས་ཞེས་བྱའོ། །ཁ་ཅིག་ཏུ་ནི་དེ་ཉིད་ལས་ཡེ་ཤེས་དང་ཡོན་ཏན་ཐམས་ཅད་སྣང་བའི་གཞིར་གྱུར་པས་ཆོས་ཀྱི་དབྱིངས་ཀྱི་ཡེ་ཤེས་ཞེས་བྱའོ། །ཁ་ཅིག་ཏུ་ནི་རང་གི་ངོ་བོ་གསལ་ལ་རྟོག་པ་རྣམ་པར་དག་པའི་ཕྱིར་མེ་ལོང་ལྟ་བུའི་ཡེ་ཤེས་ཞེས་བྱའོ། །ཁ་ཅིག་ཏུ་ནི་བླང་དོར་མེད་ཅིང་གཉིས་པ་བྱུང་མ་མྱོང་བའི་ཕྱིར་མཉམ་པ་ཉིད་ཀྱི་ཡེ་ཤེས་ཞེས་བྱའོ། །ཁ་ཅིག་ཏུ་ནི་ཤེས་བྱ་སྤྱི་དང་རང་མཚན་གཉིས་སུ་མ་འདྲེས་པར་གསལ་བའི་ཆ་ལས་སོ་སོར་རྟོག་པའི་ཡེ་ཤེས་ཞེས་བྱའོ། །ཁ་ཅིག་ཏུ་ནི་བསྒྲུབ་བྱ་ཟིན་པའི་ཡོན་ཏན་ལས་བཏགས་ཏེ་བྱ་བ་གྲུབ་པའི་ཡེ་ཤེས་ཞེས་བྱའོ།།

གཉིས་པ་ངེས་པའི་ཚིག་ནི།

འོག་ནས། སྨྲས་པ། གསང་བ་པའི་བདག་པོ། ཞེས་པ་ནས། བླ་དྭགས་སུ་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ་ཡེ་ཤེས་ཞེས་བྱ་བ་དེ་གང་། དོན་གྱི་དབང་ཚིག་གང་གི་བླ་དྭགས་ལགས། སྨྲས་པ། ལངྐའི་ བདག་པོ། ཆོས་ཐམས་ཅད་ཡེ་ཇི་བཞིན་པའི་དོན་ཕྱིན་ཅི་མ་ལོག་པར་སྐྱེ་འགག་མེད་པར་མཁྱེན་པ ་ལས་བཏགས་པས་ན། དེ་ནི་དོན་གྱི་དབང་དེ་ཁོ་ནའི་ཚིག་བླ་དྭགས་སུ་ཤེས་པར་བྱའོ།།

ཡང་སྨྲས་པ། གསང་བ་པའི་བདག་པོ། ཡེ་ཤེས་ཞེས་བྱ་བ་དེ་དག་དོན་གྱི་དབང་གང་གི་ཚིག་བླ་དྭགས་ལགས། ལན་སྨྲས་པ། ལང་ཀའི་བདག་པོ་ཡེ་ཤེས་ཞེས་བྱ་བ་ནི་ཆོས་ཐམས་ཅན་ཡེ་ཇི་བཞིན་པའི་དོན་ཕྱིན་ཅི་མ་ལོག་པར་སྐྱེ་འགག་མེད་པར་མཁྱེན་པ་ལས་བཏགས་པས་ན། ཡེ་ཤེས་དེ་ནི་དོན་གྱི་དབང་དེ་ཁོ་ནའི་མཚན་དུ་ངེས་པའི་ཚིག་བླ་དྭགས་སུ་ཤེས་པར་བྱའོ།།

གསུམ་པ་ཡེ་ཤེས་ཀྱི་ལས་ནི།

འོག་ནས། ལང་ཀའི་བདག་པོ། ཐམས་ཅད་ཞེས་པ་ནས། རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཐམས་ཅད་གསལ་བ་དང་། སྒོ་མི་འགགས་པ་དང་། ཆོ་འཕྲུལ་འབྱུང་བ་དང་།

གཅིག་ཏུ་སྡུད་པ་དང་། ཕུན་སུམ་ཚོགས་པ་སྟེ། དེ་དག་ནི་བྱ་བ་བྱེད་པར་རིག་པར་བྱའོ།།

ལང་ཀའི་བདག་པོ། མེ་ལོང་ལྟ་བུའི་ཡེ་ཤེས་ཀྱིས་ཆོས་རྣམས་ཐམས་ཅད་ཀྱི་ཆོས་ཉིད་གང་དུའང་མི་རྟོག་ཅིང་ཅིར་ཡང་མ་འགགས་པར་གསལ་བར་བྱེད་པ་དང༌། ༼༦༥༽ཆོས་ཀྱི་དབྱིངས་ཀྱི་ཡེ་ཤེས་ཀྱིས་ཡེ་ཤེས་བཞི་ལ་སོགས་པ་ཇི་སྙེད་པའི་ཡོན་ཏན་སྣང་བའི་སྒོ་མི་འགག་པར་གོ་འབྱེད་པར་བྱེད་པ་དང༌། སོ་སོར་རྟོག་པའི་ཡེ་ཤེས་ཀྱིས་སྤྱི་དང་རང་གི་མཚན་ཉིད་གདུལ་བྱའི་བསམ་པ་ལྟར་ཇི་སྙེད་དུ་འཆར་ཞིང་མི་འགོག་པར་ཆོ་འཕྲུལ་སྣང་བར་བྱེད་པ་དང༌། མཉམ་པ་ཉིད་ཀྱི་ཡེ་ཤེས་ཀྱིས་མཐའ་གཉིས་སུ་སྣང་བའི་ཆོས་རྣམས་ངོ་བོ་གཉིས་མེད་དེ་བཞིན་ཉིད་གཅིག་གི་ངང་དུ་སྡུད་པར་བྱེད་ པ་དང༌། བྱ་བ་གྲུབ་པའི་ཡེ་ཤེས་ཀྱིས་འབད་རྩོལ་མེད་པར་བདག ་གཞན་གྱི་བྱ་བ་མ་ལུས་པར་དོན་ཀུན་ཕུན་སུམ་ཚོགས་ཤིང་ཡོངས་སུ་རྫོགས་པར་བྱེད་པ་སྟེ། དེ་དག་ནི་བྱ་བ་བྱེད་པ་ཡེ་ཤེས་ཀྱི་ལས་སུ་མིང་ངེས་པར་བསྟན་པའི་དོན་དུ་རིག་པར་བྱའོ།།

བཞི་པ་ཡེ་ཤེས་ཀྱི་ཡུལ་ནི།

ལང་ཀའི། ཞེས་པ་ནས། སྣང་བར་རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མ་འདྲེས་པ་དང་། ཡོངས་སུ་རྫོགས་པ་དང་། མ་འདྲེས་པར་ཡོངས་སུ་རྫོགས་པ་རིལ་དང་།

རྒྱུན་དང་། དམིགས་པ་ མེད་པ་སྟེ། དེ་དག་ནི་ལྟ་བར་སྣང་བར་རིག་པར་བྱའོ།།

ལང་ཀའི་བདག ་པོ། མེ་ལོང་ལྟ་བུའི་ཡེ་ཤེས་ཀྱི་དངོས་ཡུལ་ཀུན་ཏུ་བཟང་པོ་རོལ་པའི་རྒྱན་དུ་སྣང་བའི་ཆོས་རྣམས་ངོ་བོ་མ་འདྲེས་པར་ཡུལ་མེད་དུ་གསལ་བའི་ཆོས་ཉིད་ཀུན་ནས་མ་སྒྲིབ་པ་དང༌། མཉམ་པ་ཉིད་ཀྱི་ཡེ་ཤེས་ཀྱི་དངོས་ཡུལ་མཐའ་ཀུན་ལས་གྲོལ་བའི་གཉིས་མེད་མཉམ་པ་ཆེན་པོའི་ངོ་བོ་ཡོན་ཏན་ལྷུན་གྱིས་གྲུབ་པར་ཡོངས་སུ་རྫོགས་པ་དང༌། སོ་སོར་རྟོག་པའི་ཡེ་ཤེས་ཀྱི་དངོས་ཡུལ་རང་གི་མཚན་ཉིད་མ་འདྲེས་པ་ལ་སྤྱིའི་མཚན་ཉིད་དེ་བཞིན་ཉིད་གཅིག་ཏུ་ཡོངས་སུ་རྫོགས་པ་ཇི་སྙེད་པའི་ཆོས་རྣམས་རིལ་དང་བྱ་བ་གྲུབ་པའི་ཡེ་ཤེས་ཀྱི་དངོས་ཡུལ་དུས་གསུམ་དུ་རྒྱུན་དང་བཅས་པས་བར་མ་ཆད་པར་བདག་གཞན་གྱི་བྱ་བ་དག་དང༌། ཆོས་ཀྱི་དབྱིངས་ཀྱི་ཡེ་ཤེས་ཀྱི་དངོས་ཡུལ་ཡེ་ནས་སྤྱོད་ཡུལ་དང་བྲལ་བས་ཡུལ་དང་དབང་པོར་དམིགས་པ་མེད་པའི་ཆོས་ཉིད་རྣམ་པར་དག་པ་སྟེ། དེ་དག་ནི་ཡེ་ཤེས་ལྔས་བལྟ་བར་བྱ་བ་ཡུལ་དུ་སྣང་བའི་གཏན་ཚིགས་ཡིན་པར་རིག་པར་བྱའོ།།

ལྔ་པ་ཡེ་ཤེས་ཀྱི་ནུས་པ་བསྟན་པ་ནི།

ལང་ཀའི། ཞེས་པ་ནས། ནུས་པར་རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མ་འགགས་པ་དང་། མ་འཕྲོས་པ་དང་། མ་འཆོལ་བ་དང་། མ་ལུས་པ་དང་། རྒྱུར་གྱུར་པ་སྟེ།

དེ་དག་ནི་རྩལ་གྱི་ནུས་པར་རིག་པར་བྱའོ།།

ལང་ཀའི་བདག་པོ། མེ་ལོང་ལྟ་བུའི་ཡེ་ཤེས་ཀྱི་རྩལ་ནི། ངོ་བོ་གསལ་ལ་མི་རྟོག་པས་ཆོས་ཉིད་མ་བཅོས་པའི་གཟུགས་བརྙན་ཀུན་ཏུ་མ་འགག་པར་སྒྲིབ་མེད་དུ་མཁྱེན་པ་དང༌། མཉམ་པ་ཉིད་ཀྱི་ཡེ་ཤེས་ཀྱི་རྩལ་ཐ་དད་པའི་མཐར་སྤྲོས་པ་བཅོམ་པས་མཉམ་པའི་དབྱིངས་ལས་མ་འཕྲོས་པ་དང༌། སོ་སོར་རྟོག་པའི་ཡེ་ཤེས་ཀྱི་རྩལ་རང་སྤྱིའི་མཚན་ཉིད་མ་འདྲེས་པར་གཟིགས་ཏེ་མ་འཆོལ་བས་ངོ་མ་ཤེས་པའི་སྒྲིབ་པ་སྦྱང་བ་དང༌། བྱ་བ་གྲུབ་པའི་ཡེ་ཤེས་ཀྱི་རྩལ་༼༦༦༽བདག་དང་གཞན་གྱི་བསྒྲུབ་བྱ་མ་ལུས་པ་རྣམས་ཡལ་བར་གྱུར་བ་བསལ་བ་དང༌། ཆོས་ཀྱི་དབྱིངས་ཀྱི་ཡེ་ཤེས་ཀྱི་རྩལ་སྣང་དུ་མི་འདོད་པ་བསལ་ཏེ་ཡེ་ཤེས་བཞི་ཡང་འབྱིན་པའི་རྒྱུར་གྱུར་པའི་རྩལ་དང་ལྡན་པ་སྟེ། དེ་བས་ན་སྒྲིབ་པ་ལྔ་དག་པའི་ངོ་བོ་རྩལ་གྱི་ནུས་པ་དེ་དག་ཉིད་དང་ལྡན་པར་བཞུགས་པའོ། །བཤད་པ་དེ་དག་ནི་རྩལ་གྱི་ནུས་པའི་མཐུར་ཡང་དག་པ་ངེས་པའི་དོན་བསྟན་པར་རིག་པར་བྱའོ། །དེ་ལྟར་ཡེ་ཤེས་ལྔ་པོ་རང་བྱུང་གི་ཡེ་ཤེས་ཉག་གཅིག་གི་ཡོན་ཏན་དུ་བསྒྲངས་ཀྱང་ངོ་བོ་རང་རིག་པའི་ཐིག་ལེ་ཆེན་པོ་གཅིག་ཏུ་འདུས་ཏེ། ཡེ་ཤེས་སྣང་བ་ལས། རང་བྱུང་ཡེ་ཤེས་ཉག་གཅིག་ལས། །གདུལ་བྱའོ་མོས་དང་མཐུ་དག་གིས། །ཁྱད་པར་བྱེ་བྲག་ལ་སོགས་སྣང༌། །རིགས་རྒྱུད་དོན་ལ་གཅིག་ཏུ་གནས། །ཞེས་དང༌། ཆོས་དབྱིངས་མ་བཅོས་གཅིག་ཏུ་གནས། །མེ་ལོང་གསལ་བའི་རང་བཞིན་ཅན། །མཉམ་ཉིད་ཡེ་ཤེས་གཅིག་ཏུ་གནས། །སོ་སོར་རྟོག་པ་མ་འདྲེས་པས། །བྱ་བ་ནན་ཏན་མཐར་ཕྱིན་པའོ། །ཞེས་སོ། །

གཉིས་པ་ཞབས་བསྡུ་བ་ནི།

ལང་ཀའི་བདག་པོ་དེ་ལྟར། ཞེས་པ་ནས། ཐེ་ཚོམ་ཆད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལྟར་ན། སེམས་ལས་ནི་སེམས་སྣང་བ་ཡིན་ལ། སྣང་བ་ནི་ཡེ་ཤེས་སུ་ངོས་ཟིན་པར་བྱ་སྟེ། དེ་དག་ཀྱང་གསང་བ་དམ་པ་དེ་ཁོ་ན་ཉིད་ཀྱི་བྱིན་གྱིས་རླབས་ལས་སྣང་བར་རིག་པར་བྱའོ་ཞེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཡོངས་སུ་རྟོག་པའི་ཐེ་ཚོམ་ཆད་དོ།།

ལང་ཀའི་བདག་པོ། དེ་ལྟར་ཞེས་ཡེ་ཤེས་ལ་བསྙེགས་པའི་དོན་དེས་ན་སེམས་རང་རིག་པའི་མཛད་པ་ལས་ནི། རིལ་སེམས་ཉིད་དུ་གསལ་ཞིང་རྣམ་ཤེས་ཚོགས་བརྒྱད་དུ་སྣང་བ་ཡིན་ལ། དེ་ལྟར་སེམས་ཉིད་དུ་གསལ་ཞིང་སྣང་བ་དེ་དག་ཐམས་ཅད་ནི་རང་རིག་པའི་ཡེ་ཤེས་སུ་ངོས་ཟིན་ནས་དོན་མཐོང་ཞིང་ཤེས་པར་བྱ་བ་ཡིན་ཏེ། བཤད་པ་དེ་དག་རྣམས་ཀྱང་གསང་བ་དམ་པ་དེ་ཁོ་ན་ཉིད་རིག་པའི་ཡེ་ཤེས་ཇི་བཞིན་པ་ཉིད་ཀྱི་བྱིན་རླབས་ལས་རྒྱ་མཚོའི་རླབས་ལྟར་རང་སྣང་ཞིང་ཤར་བར་ཁོང་དུ་ཆུད་ཅིང་ཡང་དག་པར་རིག་པར་བྱའོ། །ཞེས་སྨྲས་ཏེ་བཀའ་སྩལ་པས། ལང་ཀའི་བདག་པོ་ལ་སོགས་པ་འཁོར་དམན་པའི་ལུས་ཀྱི་སེམས་དཔའ་རྣམས་ཐུགས་ཀྱི་བྱིན་རླབས་སྣང་བའི་དོན་ལ་ཡོངས་སུ་རྟོག་པའི་ཐེ་ཚོམ་ཆད་པར་གྱུར་ཏེ་གསང་བའི་ཡེ་ཤེས་ཤར་བ་ནི་བསྟན་པ་དམ་པའི་ཡོན་ཏན་ཉིད་དོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཐུགས་ཡེ་ཤེས་སྣང་བའི་རྒྱན་བཀོད་པའི་ལེའུ་སྟེ་སུམ་ཅུ་གཉིས་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཐུགས་ཀྱི་ངོ་བོ་ཡེ་ཤེས་ཡིན་པས་དེ་ཉིད་ཡེ་ཤེས་ལྔར་རང་སྣང་བ་ནི་རིལ་གྱི་ཡང་མཆོག་ཏུ་གྱུར་པས་དམ་པའི་རྒྱན་བཀོད་པ་གང་ཡེ་ཤེས་ཆེན་པོ་ལ་མ་འདྲེས་གསལ་བར་རྫོགས་པས་གཅིག་དང་དུ་མ་ལས་གྲོལ་བར་བསྟན་པའི་ལེའུ་སྟེ་སུམ་ཅུ་རྩ་གཉིས་པ་གསལ་བར་བཤད་པའོ།། །།

ལེའུ་སོ་གསུམ་པ་སྐུ་ཡོངས་སུ་སྣང་བ་དམ་པ་རྒྱན་བཀོད་པ།

༈ གཉིས་༼༦༧༽པ་སྐུའི་བྱིན་རླབས་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། འབྱུང་འཇུག་སྣང་བའི་གཞིའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་དྲིས་པ། གསང་བ་པའི་བདག་པོ་སེམས་ཀྱི་དེ་ཁོ་ན་ཉིད་ནི་གང་ལགས། རྣམ་པར་ཤེས་པ་ནི་གང་ལགས། ཡེ་ཤེས་ནི་གང་ལགས། སྐུ་ཞེས་གང་ལ་བགྱི། གསང་བ་པའི་བདག་པོས་སྨྲས་པ། ལངྐའི་བདག་པོ་གང་འདྲི་བ་དེ་བཞིན་ནི་འདི་སྐད་དུ་ཐོས་སོ། །སེམས་ནི་སེམས་དང་། སེམས་སྣང་བ་དང་། སེམས་ལས་བྱུང་བ་སྟེ། དེ་ཉིད་དང་། དེ་འཇུག་དང་། དེ་རྒྱུན་ནོ། །རྣམ་པར་ཤེས་པ་ནི་ཀུན་གཞི་དང་། འཇུག་པར་བྱེད་པའི་ཡིད་དང་། རྒྱུན་དུ་འབྱུང་བའི་སྒོ་ལྔའོ། །ཡེ་ཤེས་ནི་གང་དེ་ཉིད་དུ་ངོས་ཟིན་པའོ། །སྐུ་ནི་གང་གི་འབྱུང་འཇུག་སྣང་བའི་གཞིའོ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །ཐུགས་ཀྱི་བྱིན་རླབས་བཤད་པའི་རྗེས་ཐོག་དེ་ནས་ཡང་སྡུད་པ་པོ་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྟོན་པ་གསང་བ་པའི་བདག་པོ་ལ་སྐུའི་དྲི་བ་བཞི་དྲིས་པ། གསང་བ་པའི་བདག་པོ། ངོ་བོའི་ཚུལ་ནས། སེམས་ཀྱི་དེ་ཁོ་ན་ཉིད་ནི་གང་ལགས། ཡུལ་ཅན་གྱི་ཚུལ་ནས་རྣམ་པར་ཤེས་པ་ནི་གང་ལགས། ཀུན་ཏུ་གསལ་བའི་ཚུལ་ནས་ཡེ་ཤེས་ནི་གང་ལགས། གཞི་རྟེན་གྱི་ཚུལ་ནས་སྐུ་ཞེས་གང་ལ་བགྱི། ཞེས་གསོལ་པ་ལས། གསང་བ་པའི་བདག་པོས་ལན་སྨྲས་པ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། གང་དྲི་བ་དེ་བཞི་ནི་འདི་སྐད་དུ་ཐོས་སོ། །ཞེས་སྔར་སྟོན་པ་གཞན་ལས་ཐོས་པའི་དོན་ལོ་རྒྱུས་སུ་བརྗོད་པ་ལན་དུ་བཀའ་སྩལ་བར་མཛད་དེ། སེམས་ཀྱི་དེ་ཁོ་ན་ཉིད་ནི། སེམས་ཚོགས་བརྒྱད་དང་དྲུག་དང་གཅིག་སྟེ་ངོ་བོ་དང༌། སེམས་སྣང་བ་ཡུལ་རྣམས་ཉམས་སུ་མྱོང་ཞིང་ཚིམ་པ་ལ་སོགས་ཏེ་རང་བཞིན་དང༌། སེམས་ལས་བྱུང་བ་ནི་འདུ་བྱེད་ཀྱི་དབང་གིས་ཡུལ་སོ་སོ་ལྟར་སྣང་བ་སྟེ། གཞི་གཅིག་མ་ངེས་ཅིར་ཡང་སྣང་བས་ན་དེ་ཉིད་ཆོས་ཀྱི་སྐུ་དང༌། དེ་ཡི་འཇུག་པ་ལོངས་སྤྱོད་རྫོགས་སྐུ་དང་དེ་ཅིར་ཡང་སྣང་བའི་རྒྱུན་སྤྲུལ་པའི་སྐུ་དང་གསུམ་ཡིན་ནོ། །ཡང་ན། ཀུན་གཞི་དང༌། ཉོན་མོངས་པ་ཅན་གྱི་ཡིད་དང༌ཚོགས་དྲུག་རྣམས་བྱང་ཆུབ་ཀྱི་སེམས་སུ་མ་འདྲེས་ཡོངས་སུ་རྫོགས་པ་སྟེ། གསང་བདག་དགའ་རབ་དཔའ་བོས་དབང་གི་ཀློང་ལས། བདག་ཉིད་རྫོགས་པའི་དཀྱིལ་འཁོར་ནི། །ཀུན་གཞི་ཆོས་སྐུ་ཆེན་པོ་ཡིན། །ལོངས་སྤྱོད་རྫོགས་པ་མ་འདྲེས་ཡིད། །ཚོགས་དྲུག་སྤྲུལ་པ་རྒྱ་ཆེན་པོ། །ཞེས་སོ། །རྣམ་པར་ཤེས་པ་ནི། དེ་ཉིད་ཀུན་གཞི་དང༌། དམིགས་པ་ལ་འཇུག་པར་བྱེད་པ་ཡིད་དང༌། ཀུན་ནས་རྒྱུན་དུ་འབྱུང་བའི་སྒོ་ལྔའོ། །ཕྱི་མ་འདི་གསུམ་ནི་བཤད་པའི་ངོ་བོ་དང་རྣམ་ཤེས་ཐུན་མོང་དུ་ཡང་འགྱུར་རོ། །ཡེ་ཤེས་ནི་གང་སེམས་དང་སེམས་སྣང་བ་དང་སེམས་ལས་བྱུང་བ་དེ་ཉིད་སྐུ་གསུམ་དུ་ངོས་ཟིན་པའམ་ཚོགས་བརྒྱད་པོ་གང་དེ་ཡེ་ཤེས་ལྔ་ཉིད་དུ་ཇི་ལྟ་བ་བཞིན་མཐོང་བའོ། །སྐུ་ནི་གང་གི་འབྱུང་འཇུག་སྣང་བའི་གཞི་སྤྲུལ་བ་དང༌། ལོངས་སྤྱོད་དང༌། ཆོས་དང་ངོ་བོ་ཉིད་ཀྱི་སྐུའོ།།

གཉིས་པ་རྒྱས་པར་བཤད་པ་ལ་༼༦༨༽བདུན་ཏེ། སྐུའི་ངོ་བོ། སྐུའི་དབྱེ་བ། སྐུའི་མཚན་ཉིད། རྣམ་གྲངས་མ་ངེས་པ། མཐུན་པའི་དཔེ། རྟོགས་མ་རྟོགས་ཀྱི་སྣང་ཚུལ། ཕུན་སུམ་ཚོགས་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཤིན་ཏུ་ཡང་རྒྱས་པར་བཤད་པའོ། །དང་པོ་ནི།

ཡང་ལང་ཀའི། ཞེས་ པ་ནས། དངོས་པོ་མེད་པའི་ངོ་བོ་ཉིད་ཀྱི་ཕྱིར་རོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག ་པོས་དྲིས་པ། གསང་བ་པའི་བདག་པོ་ངོས་ཟིན་པ་ནི་གང་། འབྱུང་བ་ནི་གང་། འཇུག་པ་ནི་གང་། སྣང་བ་ནི་གང་། གཞི་ནི་གང་། གསང་བ་པའི་བདག་པོས་སྨྲས་པ། ལངྐའི་བདག་པོ་གང་འདྲི་བ་དེ་ལྔ་ནི། འདི་སྐད་དུ་ཐོས་སོ། །གང་ངོས་ཟིན་པ་ནི་གཞན་ནས་མ་བྱུང་བར་ཟིན་པ་ཉིད་དོ། །དེ་ཅིའི་ཕྱིར་ཞེ་ན། ལངྐའི་བདག་པོ་གལ་ཏེ་གཞན་ནས་བྱུང་བ་ཞིག་ན་ནི་གློ་བུར་བ་སྟེ། ཡེ་ཤེས་ཞེས་བྱ་བ་དེ་ཉིད་དེ་ལྟར་མི་རུང་ངོ་། འབྱུང་བ་ནི་སྤྲུལ་པ་ལ་བྱའོ། །དེ་ཅིའི་ཕྱིར་ཞེ་ན། སྤྲུལ་པ་ནི་མ་བྱུང་། མ་མྱོང་། གང་དུ་རྒྱུན་དུ་བྱུང་བའོ། །འཇུག་པ་ནི་རྫོགས་ལོངས་སྤྱོད་པ་སྟེ། དེ་ཅིའི་ཕྱིར་ཞེ་ན། དེ་ནི་ནང་དུ་ཡང་དག་གནས་པ་ཉིད་དུ་གང་གི་རྣལ་འབྱོར་འཇུག་པར་བྱེད་པ་ཉིད་དོ། །སྣང་བ་ནི་ཆོས་ཀྱི་སྐུ་སྟེ། དེ་ཅིའི་ཕྱིར་ཞེ་ན། གཉིས་འདུས་པ་ལས་གཉིས་འབྱུང་བའི་རང་བཞིན་དུ་སྣང་བའོ། །གཞི་ནི་ངོ་བོ་ཉིད་ཀྱི་སྐུ་སྟེ། དེ་ཅིའི་ཕྱིར་ཞེ་ན། ཆོས་ཐམས་ཅད་འབྱུང་བའི་གཞི། དངོས་པོ་མེད་པའི་ངོ་བོ་ཉིད་ཀྱི་ཕྱིར་རོ།།

ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ། ངོས་ཟིན་པ་ནི་གང༌། འབྱུང་བ་ནི་གང༌། འཇུག་པ་ནི་གང༌། སྣང་བ་ནི་གང༌། གཞི་ནི་གང་ལགས་ཞེས་སྐུ་དང་ཡེ་ཤེས་ཀྱི་ངོ་བོ་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ། གང་དྲི་བ་དེ་ལྔ་ནི་འདི་སྐད་དུ་ཐོས་སོ། །ཞེས་ལོ་རྒྱུས་བརྗོད་པ། གང་དེ་ཉིད་དུ་ངོས་ཟིན་པ་ནི། ཡེ་ཤེས་གསང་སྒྲོན་ལས། གནས་པའི་དོན་ཤེས་ཡེ་ཤེས་པས། །དེ་ལས་འདས་པའི་གོང་མ་བཅད། །ཅེས་གསུངས་པ་ལྟར། གཞན་ནས་མ་བྱུང་བར་རང་ལ་ཡེ་ནས་གནས་པའི་དོན་དམ་པ་དེ་རྟོགས་ནས་ཇི་བཞིན་དུ་ངོས་ཟིན་པས་མཁྱེན་པ་བླ་ན་ མེད་པ་ཉིད་དོ། །དེའི་གཏན་ཚིགས་དེ་ཅིའི་ཕྱིར་ཞེ་ན། ལང་ཀའི་བདག ་པོ། ཡེ་ཤེས་གསང་བ་ལས། རང་གསལ་ཡེ་ནས་མ་བཅོས་པ། །དོན་དེ་ཤེས་པས་ཡེ་ཤེས་ཡིན། །ཞེས་པ་ལྟར། སེམས་ཀྱི་ཆོས་ཉིད་ངོ་ཤེས་ཏེ་རང་ལས་བྱུང་བས། ཡེ་ཤེས་ཀྱི་ངེས་ཚིག་ཡང་དག་པར་གྲུབ་ཀྱི། གལ་ཏེ་གཞན་ནས་བྱུང་བ་ཞིག་ཡིན་ན་ནི། སྐྱོན་གློ་བུར་དུ་བྱུང་བར་འགྱུར་བ་སྟེ། ཡེ་ཤེས་ཞེས་བྱ་བ་དེ་ཉིད་དེ་ལྟར་མི་རུང་ངོ༌། །དེས་ན་གཞན་ནས་བྱུང་ན་སྐྱོན་དུ་འགྱུར་བ་ནི་གཏན་ཚིགས་སུ་ངེས་པར་འགྱུར་ཏེ་སྐུའི་གཞིའོ། །གདུལ་བྱ་ལ་དུས་ཀྱི་རྒྱུན་དུ་གང་ལ་གང་འདུལ་དུ་འབྱུང་བ་ནི་སྤྲུལ་པའི་སྐུ་སྣ་ཚོགས་སུ་སྣང་བ་ལ་བྱའོ། །དེ་ཅིའི་ཕྱིར་ཞེ་ན། སྤྲུལ་པ་ནི་དུས་ལ་བབ་པ་ན་གདུལ་བྱ་ལ་མི་སྣང་བའམ། མ་བྱུང་བར་མ་མྱོང་སྟེ་ཡུལ་དུས་གང་དུའང་རྒྱུན་དུ་སྣང་ཞིང་འབྱུང་བ་ཁོ་ནས་གཏན་ཚིགས་ཀྱིས་འགྲུབ་པའོ། །དེ་བས་སེམས་ཅན་སྤྱི་བཙན་གྱི་དབང་དུ་གསུངས་སོ། །འཇུག་པའི་ངོ་བོ་བསྟན་པ་ནི་རྫོགས་ལོངས་སྤྱོད་པ་སྟེ། དེ་ཅིའི་ཕྱིར་ཞེ་ན། སྐུ་དེ་ནི་དུས་གསུམ་ཀུན་ཏུ་ཡེ་ཤེས་དང་འོད་དང་མི་རྟོག་པའི་དོན་ལ་ནང་དུ་ཡང་དག་པར་གནས་པ་མཉམ་བཞག་ཆེན་པོའི་ངང་ཉིད་དུ་ཏིང་ངེ་འཛིན་གང་གི་དགོངས་པ་མཆོག་ལ་རྣལ་འབྱོར་དུ་འཇུག་པར་བྱེད་ཅིང་རྩོལ་བ་དང་བྲལ་ཏེ་མི་འཁྲུག་ཅིང་མ་ཡེངས་པར་བཞུགས་པ་ཉིད་དོ། །ཞེས་གཏན་ཚིགས་ཀྱིས་གསལ་༼༦༩༽ལོ། །སྣང་བ་ནི་ཆོས་ཀྱི་སྐུ་སྟེ། དེའི་གཏན་ཚིགས་དེ་ཅིའི་ཕྱིར་ཞེ་ན། སྐུ་དེ་ནི་ཚོགས་གཉིས་དང་དབྱིངས་དང་ཡེ་ཤེས་གཉིས་འདུས་ཏེ་ཡེ་ནས་གཉིས་སུ་མེད་པ་ལས་ངོ་བོ་གྲུབ་ཅིང་གཟུགས་སྐུ་གཉིས་འབྱུང་བའི་རང་བཞིན་དུ་སྣང་བས་ལོངས་སྤྱོད་རྫོགས་པ་དང་སྤྲུལ་པའི་སྐུའི་གཞིར་གྱུར་པའོ། །གཞི་ནི་ངོ་བོ་ཉིད་ཀྱི་སྐུ་སྟེ་དོན་དེའི་གཏན་ཚིགས་ནི། དེ་ཅིའི་ཕྱིར་ཞེ་ན། ངོ་བོ་མེད་པར་ཇི་ལྟར་བསམ་པ་ལྟར་སྣང་བས་ཆོས་ཐམས་ཅད་འབྱུང་བའི་གཞི་དངོས་པོ་འདི་འདྲར་མེད་པར་ཇི་བཞིན་པའི་ཆོས་ཉིད་ངོ་བོ་བསྟན་དུ་མེད་པ་ཉིད་ཀྱི་ཕྱིར་རོ།།

གཉིས་པ་རྒྱས་པར་བཤད་པ་ནི།

ཡང་ལང་ཀའི། ཞེས་པ་ནས། ཇི་བཞིན་པ་དེ་ཉིད་ལ་བྱའོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོོས་དྲིས་པ། གསང་བ་པའི་བདག་པོ་སྤྲུལ་པ་ནི་གང་། རྫོགས་ལོངས་སྤྱོད་པ་ནི་གང་། ཆོས་སྐུ་ནི་གང་། ངོ་བོ་ཉིད་ནི་གང་། གསང་བ་པའི་བདག་པོས་སྨྲས་པ། ལངྐའི་ བདག་པོ་གང་འདི་ལྟར་འདྲི་བ་དེ་བཞི་ནི་འདི་སྐད་དུ་ཐོས་སོ། །སྤྲུལ་པ་ནི་གང་མེད་པ ་ལ་རྒྱུན་གྱིས་འབྱུང་བ་ལ་བྱའོ། །རྫོགས་ལོངས་སྤྱོད་པ་ནི་སྨིན་པ་ཕུན་སུམ་ཚོགས་པ་ལ་བྱའོ། །ཆོས་ཀྱི་སྐུ་ནི་ཡོངས་སུ་རྣམ་པར་དག་པ་ལ་བྱའོ། །ངོ་བོ་ཉིད་ནི་ཇི་བཞིན་པ་དེ་ཉིད་ལ་བྱའོ།།

ཡང་ལང་ཀའི་བདག་པོས་སྐུ་བཞིའི་དངོས་པོ་དྲིས་པ། གསང་བ་པའི་བདག་པོ། སྤྲུལ་པ་ནི་གང༌། རྫོགས་ལོངས་སྤྱོད་པ་ནི་གང༌། ཆོས་ཀྱི་སྐུ་ནི་གང༌། ངོ་བོ་ཉིད་སྐུ་ནི་གང༌། ཞེས་གསོལ་བ་ལས། གསང་བ་པའི་བདག་པོས་ལན་སྨྲས་པ། ལང་ཀའི་བདག་པོ། གང་འདི་ལྟར་དྲི་བ་བཞི་པོ་ནི་འདི་སྐད་དུ་ཐོས་སོ། །སྤྲུལ་པ་ནི་གང་རང་རྒྱུད་པའི་ངོ་བོ་མེད་པ་ལས་དངོས་པོ་ཅིར་ཡང་རུང་བ་རྒྱུན་མི་འཆད་པར་དུས་ཐམས་ཅད་དུ་སྤྲུལ་པར་སྣང་སྟེ་རྒྱུན་གྱི་འབྱུང་ཞིང་ཁྱབ་པ་དང་མཛད་པས་འགྲོ་བ་འདུལ་བ་པོ་ལ་བྱའོ། །རྫོགས་ལོངས་སྤྱོད་པ་ནི། མཚན་དང་དཔེ་བྱེད་ཀྱི་སྐུ་ལོངས་སྤྱོད་དང་བདེ་བ་དང་ཡེ་ཤེས་མཆོག་དང་ལྡན་ཞིང་མཛད་པ་ཁྱད་པར་ཅན་གྱིས་འཁོར་སྨིན་པ་ཕུན་སུམ་ཚོགས་པ་རྣམས་འདུལ་བ་པོ་ལ་བྱའོ། །ཆོས་ཀྱི་སྐུ་ནི། དབྱིངས་དང་ཡེ་ཤེས་གཉིས་སུ་མེད་པའི་ངོ་བོ་ཉོན་མོངས་པ་དང་ཤེས་བྱ་དང་ལྟ་བ་དང་དེ་ཁོ་ན་ཉིད་བདེ་བ་ཆེན་པོའི་སྒྲིབ་པ་མཐའི་སྤྲོས་པའི་དྲི་མ་དང་བྲལ་བས་ཡོངས་སུ་རྣམ་པར་དག་པ་ལ་བྱའོ། །ངོ་བོ་ཉིད་ཀྱི་སྐུ་ནི་ཡེ་ནས་མ་བསླད་པས་ཆོས་ཉིད་ཇི་བཞིན་པ་དག་མ་དག་གཉིས་ཀའི་བདག་ཉིད་གཉིས་ཀའི་མཐའ་ལ་མི་གནས་པའི་རང་བཞིན་མ་བཅོས་པ་དེ་ཉིད་ལ་བྱའོ།།

གསུམ་པ་ཤིན་ཏུ་ཡང་རྒྱས་པར་བཤད་པ་ནི།

ཡང་ལང་ཀའི། ཞེས་པ་ནས། དེ་ཉིད་ནི་སེམས་ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོས་དྲིས་པ། གསང་བ་པའི་བདག་པོ་རྒྱུན་གྱི་འབྱུང་བ་ནི་གང་། སྨིན་པ་ཕུན་སུམ་ཚོགས་པ་ནི་གང་། ཡོངས་སུ་རྣམ་པར་དག་པ་ནི་གང་། །ཇི་བཞིན་པ་དེ་ཉིད་ནི་གང་། གསང་བ་པའི་བདག་པོས་སྨྲས་པ། །ལངྐའི་བདག་པོ་འདི་ལྟར་དྲི་བ་བཞི་ནི་འདི་ལྟ་སྟེ། རྒྱུན་གྱི་བྱུང་བ་ནི་སེམས་ལས་གྱུར་པ་རྒྱུན་མི་འཆད་པའོ། །སྨིན་པ་ཕུན་སུམ་ཚོགས་པ་ནི་སེམས་ལས་བྱུང་བའོ། །ཡོངས་སུ་རྣམ་པར་དག་པ་ནི་སེམས་སྣང་བའོ། །ཇི་བཞིན་པ་དེ་ཉིད་ནི་སེམས་ཉིད་དོ།།

ཡང་ལང་ཀའི་བདག་པོས་སྐུའི་ངོ་བོ་དངོས་པོ་ལ་གནས་པའི་ཚུལ་དྲིས་པ། གསང་བ་པའི་བདག་པོ། རྒྱུན་གྱི་འབྱུང་བ་ནི་གང༌། སྨིན་པ་ཕུན་སུམ་ཚོགས་པ་ནི་གང༌། ཡོངས་སུ་རྣམ་པར་དག་པ་ནི་གང༌། ཇི་བཞིན་པ་དེ་ཉིད་ནི་གང༌། ཞེས་གསོལ་བས། གསང་བ་པའི་བདག་པོས་དེ་ཉིད་ཀྱི་ལན་སྨྲས་པ། ལང་ཀའི་བདག་པོ། འདི་ལྟར་དྲི་བ་བཞི་ཡི་༼༧༠༽དོན་ནི་འདི་ལྟ་སྟེ། གང་རྒྱུན་གྱི་འབྱུང་བ་སྤྲུལ་པའི་སྐུ་ནི་སེམས་ཀྱི་སྤྱོད་པ་ལས་སྣང་བའི་འདུ་བྱེད་ལས་ཀྱི་བདག་ཉིད་སེམས་ལས་གྱུར་པ་བསྒྲུབ་པའི་ཡུལ་དང་བཅས་ཏེ་རྩོལ་བ་རྣམ་པར་དག་པའི་ངོ་བོ་ཉིད་སྤྲུལ་པ་རྒྱུན་མི་འཆད་པར་སྣང་བའོ། །ཏིང་ངེ་འཛིན་དང་འཁོར་སྨིན་པ་ཕུན་སུམ་ཚོགས་པ་ལོངས་སྤྱོད་རྫོགས་སྐུ་ནི། སེམས་ཀྱི་འདུ་བྱེད་ལྔ་བཅུ་རྩ་གཅིག་ལ་སོགས་པ་སེམས་ལས་བྱུང་བ་རྣམས་ཀྱིས་བསྒྲུབ་པའི་ཆོས་ཐམས་ཅད་དང་ཉོན་མོངས་པའི་ངོ་བོ་ཉིད་རྣམ་པར་དག་སྟེ་ལྷར་སྨིན་པའོ། །ཡོངས་སུ་རྣམ་པར་དག་པ་ཆོས་ཀྱི་སྐུ་ནི་སེམས་ཀྱི་སྤྱོད་ཡུལ་ཡེ་ནས་གཉིས་སུ་མེད་པ་རང་སྣང་དུ་ཤར་ཏེ་རྒྱུད་དག་པར་གྱུར་པའོ། །ཇི་བཞིན་པ་དེ་ཁོ་ན་ཉིད་ངོ་བོ་ཉིད་ཀྱི་སྐུ་ནི། རང་རིག་པ་མ་བསླད་པའི་ཆོས་ཉིད་འཁོར་འདས་ཀྱི་དངོས་པོ་རྣམས་ཀྱི་གནས་ལུགས་སེམས་ཉིད་རང་བཞིན་གྱི་རྣམ་པར་དག་པ་དེ་ཁོ་ན་ཉིད་དོ། །དེ་བས་ན་རྟོག་པའི་སྒྲིབ་པ་དེ་ཉིད་དག་པ་ལས་སྐུ་དེ་ཉིད་ཀྱི་ངོ་བོ་སྣང་བར་འགྱུར་བར་འཆད་དོ།།

གཉིས་པ་སྐུའི་དབྱེ་བ་ལ་བཞི་སྟེ། གྲུབ་པའི་སྒོ་ནས་དབྱེ་བ། མུ་བཞིའི་སྒོ་ནས་དབྱེ་བ། ངོ་བོའི་སྒོ་ནས་དབྱེ་བ། གཅིག་དང་དུ་མའི་སྒོ་ནས་དབྱེ་བའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། ཐམས་ཅད་དུ་དག་ པ་མེད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ། དེ་ཅིའི་ཕྱིར་ཞེ་ན། གང་གྱུར་པ་མུན་པ་སངས་ན། སྤྲུལ་པ་མངོན་དུ་སྣང་ངོ་། །གང་བྱུང་བ་མུན་པ་སངས་ན། རྫོགས་ལོངས་སྤྱོད་པ་མངོན་དུ་སྣང་ངོ་། །གང་སྣང་བ་མུན་པ་སངས་ན། ཆོས་ཀྱི་སྐུ་མངོན་དུ་སྣང་ངོ་། །ངོ་བོ་ཉིད་ལ་ནི་མུན་པ་དང་། སྣང་བ་དང་། སངས་པ་དང་། འཐིབས་པ་ལས་འདས་པའི་ཕྱིར། ཚིག་གི་ལམ་དང་ཡོངས་སུ་བྲལ་བ་ཉིད་དོ། །ལངྐའི་བདག་པོ་དེ་དག་ལ་ནི། སྙིང་པོ་གསང་བའི་ཁྱད་པར་གྱིས། དག་པ་དང་མ་དག་པ་ཡོད་པར་རིག་པར་བྱའོ། །སྨས་པ། གསང་བ་པའི་བདག་པོ། དག་པ་ནི་གང་ལགས། མ་དག་པ་ནི་གང་ལགས། སྨྲས་པ། ལངྐའི་བདག་པོ་འདི་ལྟ་སྟེ། གང་དུ་དག་པ་དང་། ཕྱོགས་སུ་དག་པ་དང་། ཡོངས་སུ་རྣམ་པར་དག་པ་དང་། ཐམས་ཅད་ནས་ཐམས་ཅད་དུ་དག་ པ་མེད་པའོ།།

ལང་ཀའི་བདག ་པོ། ཁས་བླངས་པ་དེ་དག་གཏན་ཚིགས་ཅིའི་ཕྱིར་གྲུབ་ཅེ་ན། ལམ་ལ་གནས་པ་སུ་ཞིག་གང་སེམས་ལས་གྱུར་པ་འདུ་བྱེད་ལས་ཀྱི་སྒྲིབ་པའི་མུན་པ་རྣམ་པར་དག་སྟེ་སངས་པར་གྱུར་ན་མི་ཁོམས་པའི་གནས་དང་བྲལ་བས་སྤྲུལ་པ་སྐུའི་ཞལ་མཐོང་ནས་མངོན་དུ་གྱུར་པར་སྣང་ངོ་། །གང་སེམས་ལས་བྱུང་བ་འདུ་བྱེད་ཉོན་མོངས་པ་ཕྲ་རགས་ཀྱི་སྒྲིབ་པའི་མུན་པ་ཡོངས་སུ་དག་སྟེ་སངས་པར་གྱུར་ན་འཁོར་བའི་ས་བོན་བྲལ་ཞིང་ས་ནོན་པས་རྫོགས་ལོངས་སྤྱོད་པའི་རྒྱལ་བ་མཆོག་གི་སྐུ་མཐོང་ནས་མངོན་དུ་གྱུར་པར་སྣང་ངོ་། །གང་སྤྱོད་ཡུལ་རང་རིག་ཏུ་ཤེས་ཏེ་གཉིས་སུ་སྣང་བ་མེད་པ་ཤེས་བྱའི་སྒྲིབ་པའི་མུན་པ་རང་དག་ཏུ་སངས་པར་གྱུར་ན་རང་སྣང་ཆོས་ཀྱི་སྐུ་འདུས་བྱས་ལས་གྲོལ་བར་མངོན་དུ་གྱུར་ཏེ་སྣང་ངོ་། །གཞིའི་སྐུ་ངོ་བོ་ཉིད་ལ་ནི། ཐམས་ཅད་ཇི་བཞིན་པའི་ཕྱིར། མ་རིག་པའི་མུན་པ་དང༌། རིག་པའི་ཡེ་ཤེས་སྣང་བ་དང་ཀུན་ཏུ་དག་སྟེ་སངས་པ་དང༌། སྒྲིབ་པས་ནོན་ཏེ་འཐིབས་པ་ལ་སོགས་པ་ཐ་སྙད་ཐམས་ཅད་ལས་གདོད་ནས་འདས་ཏེ་དམིགས་པ་མེད་པའི་གཏན་ཚིགས་དེའི་ཕྱིར་ན་བརྗོད་དུ་མེད་པས༼༧༡༽ཚིག་གི་ལམ་དང་ཡོངས་སུ་བྲལ་ནས་རིལ་མ་བསལ་བར་དག་པའི་ངོ་བོ་ཡང་དག་པ་ཉིད་དོ། །ལང་ཀའི་བདག་པོ། སྐུ་བཞི་པོ་དེ་དག་ཉིད་ལའང་དབྱེ་བ་ནི་གདུལ་བྱ་རྣམས་ལ་སྙིང་པོ་བྱང་ཆུབ་གསང་བའི་དབྱིངས་ཇི་བཞིན་པ་ཉིད་དུ་ཡེ་ཟིན་པ་དང་རྩོལ་བས་མཐོང་བའི་ཁྱད་པར་གྱིས་བྱ་བྱེད་ཀྱི་སྐྱོན་དག་པ་དང་མ་དག་པ་ཡི་རྣམ་དབྱེ་ཡོད་པར་རིག་ཅིང་ཤེས་པར་བྱའོ། །ཡང་སྨྲས་པ། གསང་བ་པའི་བདག་པོ། དག་པ་ནི་གང་ལགས། མ་དག་པ་ནི་གང་ལགས། ཞེས་དྲིས་པ་ན། ལན་སྨྲས་པ། ལང་ཀའི་བདག་པོ། ཞེས་བོས་ནས། དག་པ་དང་མ་དག་པ་གང་ཡིན་པའི་ཁྱད་པར་བསྟན་པ་འདི་ལྟ་སྟེ། གང་དུ་དག་པ་སྤྲུལ་སྐུ་དང༌། ཕྱོགས་སུ་དག་པ་ལོངས་སྐུ་དང༌། ཡོངས་སུ་རྣམ་པར་དག་པ་ཆོས་སྐུ་དང༌། ཐམས་ཅད་ནས་ཐམས་ཅད་དུ་དག་པ་མེད་པ་ངོ་བོ་ཉིད་སྐུའོ། །ཞེས་མ་དག་པ་གསུམ་དང་དག་པ་གཅིག་སྟེ་བཞིའོ།།

གཉིས་པ་རྒྱས་པར་བཤད་པ་ནི།

ལང་ཀའི། ཞེས་པ་ནས། ཅིར་ཡང་འབྱུང་བ་ནི་རྒྱུན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་གང་དུ་དག་པ་ནི། འདི་ལྟ་སྟེ། གང་གསུམ་དུ་སྣང་བ། ཞི་བ་ནི་རྣམ་པར་དག་པའོ། །ཆོས་ཀྱི་དབང་ཕྱུག་ནི་སྨིན་པའོ། །ཆོས་ཀྱི་རྒྱལ་ཚབ་ནི་རྒྱུན་ནོ། །ཕྱོགས་སུ་དག་པ་ནི་འདི་ལྟ་སྟེ། གང་ལ་མ་རིག་པར་རིག་པ་ནི་རྣམ་པར་དག་པའོ། །བདེ་བར་ཞུགས་པ་ནི་སྨིན་པའོ། །གང་དུ་སྣང་བ་ནི་རྒྱུན་ནོ། །ཡོངས་སུ་རྣམ་པར་དག་པ་ནི་འདི་ལྟ་སྟེ། གང་ནམ་མཁའ་ཉིད་ནི་རྣམ་པར་དག་པའོ། །བདེ་བ་ལ་ལོངས་སྤྱོད་པ་ནི་སྨིན་པའོ། །ཡོངས་སུ་བསྒྱུར་བ་ནི་རྒྱུན་ནོ། །ཐམས་ཅད་ནས་ཐམས་ཅད་དུ་དག་པ་མེད་པ་ནི་འདི་ལྟ་སྟེ། གང་གཞིར་སྣང་བ། གང་མ་སླད་པ་ནི་དེ་ཉིད་དོ། །གང་སྐུ་མེད་པ་ནི་རྣམ་པར་དག་པའོ། །ཡོངས་སུ་རྫོགས་པ་ནི་སྨིན་པའོ། །ཅིར་ཡང་འབྱུང་བ་ནི་རྒྱུན་ནོ།།

དེ་ལྟར་གྲངས་ཉེ་བར་བསྟན་པའི་མ་དག་པ་གསུམ་ལའང་གསུམ་གསུམ་དགུར་དབྱེ་སྟེ་བཤད་པའི་ཕྱིར། ལང་ཀའི་བདག་པོ། དེ་ལ་གང་དུ་དག་པ་མཚན་ཉིད་ཐེག་པའི་བཞེད་པ་ནི་འདི་ལྟ་སྟེ། གང་བག་ཆགས་ལྔའི་དང་པོ་རྐྱེན་གྱིས་འགྱུར་བ་ལས་ཀྱི་བག་ཆགས་དག་པས་སྦྱོར་ལམ་པ་རྣམས་ཀྱིས་མཐོང་བའི་སྤྲུལ་པའི་སྐུ་ལ་གསུམ་དུ་ཚང་བར་སྣང་བ་དེ་བསྟན་པ། སྤྲུལ་པའི་ཐུགས་སམ་རང་བཞིན་ཟུག་རྔུ་དང་བྲལ་བས་ཞི་བ་ནི་རྣམ་པར་དག་པ་ཡེ་ཤེས་ཆོས་ཀྱི་སྐུའོ། །ཤཱཀྱ་ཐུབ་པ་ལྟ་བུ་ཐེག་པ་ཆེན་པོའི་ཆོས་ཀྱི་ཕུང་པོ་ལ་ལོངས་སྤྱོད་ཅིང་མཚན་དཔེས་བརྒྱན་པའི་སྐུས་ཆོས་སྟོན་པའི་དབང་ཕྱུག་ནི་སྤྲུལ་པའི་སྨིན་པ་ལོངས་སྤྱོད་རྫོགས་པའི་སྐུའོ། །སྤྲུལ་པའི་སྐུའི་ཆོས་ཀྱི་རྒྱལ་ཚབ་བྱམས་པ་ལ་སོགས་པ་ནི་སྤྲུལ་པའི་སྤྲུལ་པ་སྟེ་རྒྱུན་ནོ། །དེ་དག་སྐུ་གསུམ་དུ་འཇོག་པའི་ངེས་པ་ནི། ཡེ་ནས་རྣམ་པར་དག་པར་མཁྱེན་པ་དང༌། ཐེག་པ་མཆོག་ལ་དབང་བསྒྱུར་བའི་བདག་པོ་དང༌། ཀུན་ནས་རྒྱུན་དུ་འབྱུང་བའི་གཏན་ཚིགས་གསུམ་གྱི་ཕྱིར་རོ། །དེ་ལ་ཕྱོགས་སུ་དག་པ་ཡོ་ག་ཕྱི་པའི་བཞེད་པ་དང་མཐུན་པ་ནི་འདི་ལྟ་སྟེ། གཉིས་པ་མངོན་དུ་རྒྱུ་བའི་བག་ཆགས། གསུམ་པ་ཀུན་ཏུ་རྒྱུ་བའི་བག་ཆགས། བཞི་པ་ལྷན་ཅིག་སྐྱེས་པའི་བག་ཆགས་གསུམ་དག་པས་ས་པ་རྣམས་ཀྱིས་མཐོང་བའི་ལོངས་སྤྱོད་རྫོགས་པ་ལའང་སྐུ་གསུམ་ཚང་བ་ཉེ་བར་བསྟན་པ། ཆོས་སོ་ཅོག་གི་དངོས་པོ་ལ་སྤྱོད་ཡུལ་མེད་པར་ལྷུན་གྱིས་གྲུབ་པར་རྟོགས་ཏེ་མི་ཤེས་པ་༼༧༢༽ཤེས་པར་བྱར་མེད་པས་གང་ལ་ཡང་མ་རག་པའམ་རག་མ་ལས་པར་ངོ་བོ་མེད་པར་རང་རིག་པས་ཅིར་ཡང་མ་མཐོང་བར་མཐོང་བ་དམ་པའི་ཡེ་ཤེས་ནི་ལོངས་སྤྱོད་རྫོགས་པའི་ཆོས་ཀྱི་སྐུ་རྣམ་པར་དག་པའོ། །འདི་ཉིད་ཀུན་ཏུ་འོད་ལ་བྱ་བར་ཡང་གསུངས་སོ། །འཁོར་འདས་སམ་སྣང་སྟོང་ངམ་བདེན་པ་རྣམ་གཉིས་ལ་ཡུལ་དང་བྲལ་ཏེ་དུས་གཅིག་བར་མ་ཆད་པར་རོལ་པས་བདེ་བ་དམ་པར་བཞུགས་པ་རྣམ་པར་སྣང་མཛད་ཆེན་པོ་ནི་ལོངས་སྤྱོད་ཀྱི་སྨིན་པ་ལོངས་སྤྱོད་རྫོགས་སྐུའོ། །སྐུ་དེ་ཉིད་ཀྱི་གང་གིས་འདུལ་བའི་གདུལ་བྱ་ལ་ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་ལྡན་པའི་རིགས་ལྔ་ལ་སོགས་པར་ཐ་དད་དུ་སྣང་བ་ནི་ལོངས་སྤྱོད་རྫོགས་པའི་སྤྲུལ་སྐུ་སྟེ་རྒྱུན་ནོ། །དེ་ལ་ཡོངས་སུ་རྣམ་པར་དག་པ་སྔགས་ནང་པ་གཉིས་ཀྱི་བཞེད་པ་དང་མཐུན་པ་ནི་འདི་ལྟ་སྟེ། ལྔ་པ་བག་ལ་ཉལ་གྱི་བག་ཆགས་དག་པས་ཡང་དག་པར་མཐོང་བའི་ཆོས་ཀྱི་སྐུ་ལ་སྐུ་གསུམ་ཚང་བར་བསྟན་པ། གང་རང་རིག་པའི་ནམ་མཁའ་ཡེ་ནས་གཉིས་མེད་དུ་རྟོགས་པའི་ཡེ་ཤེས་སྟོང་ཞིང་རྣམ་པར་དག་པའི་ཇི་བཞིན་ཉིད་དུ་གདལ་བ་ནི་ཆོས་སྐུའི་ཆོས་སྐུ་རྣམ་པར་དག་པའོ། །ཆོས་ཉིད་རྟེན་དང་བྲལ་བས་གདུང་བ་ཐམས་ཅད་ཀྱི་ཟུག་རྔུ་མེད་པའི་དབྱེར་མེད་ཆེན་པོའི་བདེ་བ་ལ་ཡེ་ནས་རོལ་ཞིང་ལོངས་སྤྱོད་པ་ནི་ཆོས་སྐུའི་སྨིན་པ་ལོངས་སྤྱོད་རྫོགས་པའོ། །ཆོས་ཀྱི་སྐུ་ཡོན་ཏན་ལྷུན་གྱིས་གྲུབ་པས་སྐུ་ཅིར་ཡང་འཕྲུལ་ཅིང་སྣང་བའི་གཞིའི་ངོ་བོར་བཞུགས་པ་ལས་ཡོངས་སུ་བསྒྱུར་ཏེ་ཞི་ཁྲོ་ཅིར་ཡང་སྟོན་པ་ནི་ཆོས་ཀྱི་སྐུའི་སྤྲུལ་པ་སྟེ་རྒྱུན་ནོ། །དག་པའི་ལན་གང་ཞེ་ན། སྔར་གྱི་དུས་ཐམས་ཅད་ནས་ཕྱིས་ཀྱི་དུས་ཐམས་ཅད་དུ་ཡེ་ནས་དག་པ་ལས་རྩོལ་བས་སྦྱང་དུ་མེད་པའི་ངོ་བོ་ཉིད་ཀྱི་སྐུ་ཨ་ཏི་ཡོ་གའི་དགོངས་པ་ཉེ་བར་བསྟན་པ་ནི་འདི་ལྟ་སྟེ། གང་སྐུ་བཞིར་སྣང་བ་འབྱུང་བའི་གཞི་ཡེ་ཉིད་ནས་ཆོས་ཉིད་ཀྱི་གནས་ལུགས་གང་ཞིག་སྣང་སྟོང་གི་མཐས་སེལ་མེད་པས་མ་བསླད་པའི་ཇི་བཞིན་པ་ནི་ངོ་བོ་ཉིད་ཀྱི་ངོ་བོ་ཉིད་སྐུ་དེ་ཉིད་དོ། །གང་དེ་ལ་སྐུ་ཡི་ངོ་བོར་གྲུབ་པ་མེད་པས་རྡུལ་མེད་ཅིང་རྣམ་པར་དག་པ་བསྟན་དུ་མེད་པ་ནི་ངོ་བོ་ཉིད་ཀྱི་ཆོས་སྐུ་རྣམ་པར་དག་པའོ། །གང་དམྱལ་བའི་ལོངས་སྤྱོད་ནས་རྒྱལ་བའི་ལོངས་སྤྱོད་མན་ཆད་སེམས་ཉིད་བདེ་བ་ཆེན་པོ་ལ་མ་བརྩལ་ལྷུན་གྱིས་གྲུབ་པར་ཡོངས་སུ་རྫོགས་པ་རོལ་པ་ཅིར་ཡང་མི་འཛིན་པ་ནི་ངོ་བོ་ཉིད་སྐུའི་སྨིན་པ་ལོངས་སྤྱོད་རྫོགས་པའོ། །མཚན་གཞི་མ་ངེས་པ་ལས་ཇི་ལྟར་བརྟགས་པ་ལྟར་སྣང་ཞིང་ཅིར་ཡང་འཕྲུལ་པ་འབྱུང་བ་ནི་ངོ་བོ་༼༧༣༽ཉིད་སྐུའི་སྤྲུལ་པ་སྟེ་རྒྱུན་མི་འཆད་པའི་དབྱིངས་སྣང་གི་དོན་ནོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་ པ་ནས། རྒྱུ་ཅི་ཡང་མེད་པའི་ཕྱིར་རོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ་དེ་ལ་གང་དུ་དག་པ་དང་། ཕྱོགས་སུ་དག་པ་དང་། ཡོངས་སུ་རྣམ་པར་དག་པ་ནི་མ་དག་པ་ཞེས་བྱའོ། །དེ་ཅིའི་ཕྱིར་ཞེ་ན། ཐམས་ཅད་དུ་དག་པར་བྱར་ མེད་པ་ལ། དག་པར་འདོད་ཅིང་དག་པར་བྱེད་པའི་ཕྱིར་རོ། །སྨྲས་པ། གསང་བ་པའི་བདག ་པོ་ཇི་ག་དེ་ལ་གང་དུ་དག་པ་དང་། ཕྱོགས་སུ་དག་པ་དང་། ཡོངས་སུ་རྣམ་པར་དག་པ་ཞེས་ཅིའི་ཕྱིར་བརྗོད། སྨྲས་པ། ལངྐའི་བདག་པོ་དེ་དག་ནི་གང་ཡོངས་སུ་སྒྲིབ་པ་ལས། གང་དུ་སངས་པ་དང་། ཕྱོགས་སུ་སངས་པ་དང་། ཡོངས་སུ་རྣམ་པར་དག་པ་སངས་པའི་ཕྱིར་རོ། །ལངྐའི་ བདག་པོ་ཐམས་ཅད་ནས་ཐམས་ཅད་དུ་དག་པ་མེད་པ ་ལ་ནི་དག་པ་ཞེས་བྱའོ། །དེ་ཅིའི་ཕྱིར་ཞེ་ན། དེ་ལ་ནི་དག་པར་བྱ་བའི་རྒྱུ་ཅི་ཡང་ མེད་པའི་ཕྱིར་རོ།།

ལང་ཀའི་བདག་པོ་ཞེས་སྡུད་པ ་པོ་ལ་བོས་ནས། དེ་ལ་གང་དུ་དག་པ་གཞི་མ་ཉིད་དག་པའི་ཕྱིར་དང༌། ཕྱོགས་སུ་དག་པ་གཉིས་ཀྱི་ཕྱོགས་གཅིག་བྱང་བའི་ཕྱིར་དང༌། ཡོངས་སུ་རྣམ་པར་དག་པ་ཀུན་གཏན་དུ་བར་བྱང་བའི་ཕྱིར་དེ་སྐད་བརྗོད་དེ་འཆད་པར་འགྱུར་རོ། །འདི་ལྟར་སྐུ་གསུམ་དུ་རྩོལ་བ་ཉིད་ནི་དྲི་མ་ཡིན་པའི་ཕྱིར་མ་དག་པ་ཞེས་བརྗོད་པར་བྱའོ། །དེ་ཅིའི་ཕྱིར་ཞེ་ན། ཡེ་ནས་བྱ་རྩོལ་དང་བྲལ་ཏེ་ཐམས་ཅད་དུ་དག་པར་བྱར་མེད་པ་ལ། བློ་ཡིས་དག་པར་འདོད་ཅིང་ཐབས་ཀྱིས་དག་པར་བྱེད་པའི་ཕྱིར་རོ། །ཇི་ག་སྐུ་གསུམ་ནི་འབྲས་བུ་ཉིད་དེ་ལས་བྱས་ཟིན་པ་ཡིན་ན། ད་གདོད་སྦྱོང་བར་འདོད་པ་དང་བྱེད་པ་ག་ལ་ཡོད་དེ་མེད་པ་ལ་མ་དག་པར་བརྗོད་པ་ཉིད་འགལ་ཏེ། ཐུག་པ་མེད་པར་སྤྱོད་པའི་སྐྱོན་དུ་འགྱུར་རོ་ཞེ་ན། འདི་དག་ནི་ཐུག་པ་མེད་པར་སྤྱོད་པ་མ་ཡིན་གྱི། བྱ་བ་མེད་པ་ལ་བྱས་ཤིང་བརྩལ་བ་ལས་བྱུང་བའི་ཕྱིར་དང༌། འབྲས་བུའི་མིང་རྒྱུ་ལ་བཏགས་པའི་ཕྱིར་དང༌། དག་པ་ལ་ལྟོས་པའི་ཕྱིར་ན་འགལ་བར་མི་འགྱུར་ཏེ། སྒོམ་ཐབས་སྒྲོན་མ་ལས། ཆེ་བས་ཆེ་བ་ཟབ་མོ་ཡི། །ཡོན་ཏན་ཅིར་ཡང་བསྔགས་པ་མེད། །དོན་རྣམས་ཇི་བཞིན་མི་བསྐྱོད་དེ། །བྱ་བ་མེད་པས་གྲོལ་བའང་གྲོལ། །ཞེས་པ་ལ་སོགས་པ་ལྟར་རོ། །ཡང་མིང་གི་ངེས་ཚིག་དྲི་བའི་ཕྱིར་སྨྲས་པ། གསང་བ་པའི་བདག་པོ། ཇི་ག་རྩོལ་བའི་དྲི་མ་དང་བཅས་པའི་དག་པ་གསུམ་པོ་དེ་ལ་གང་དུ་དག་པ་དང༌། ཕྱོགས་སུ་དག་པ་དང༌། ཡོངས་སུ་རྣམ་པར་དག་པ་ཞེས་ཅིའི་ཕྱིར་བརྗོད་ཅེས་དྲིས་པ་ལས། ལན་སྨྲས་པ། ལང་ཀའི་བདག་པོ། དག་པ་གསུམ་པོ་དེ་དག་ནི། གང་འཁོར་བའི་སེམས་ཅན་རྣམས་ཀྱི་ཤེས་རབ་ཀྱི་མིག་ཡོངས་སུ་མདོངས་པར་བྱས་ཏེ་བསྒྲིབས་པ་དང་བཅས་ཤིང་འཁོར་བའི་གནས་སུ་འཁྱམས་པ་ལས། གང་དང་པོའི་རྒྱུ་ཉིད་དུ་གནས་པའི་ལས་ཀྱི་སྒྲིབ་པ་སངས་ཏེ་འཁོར་བའི་གནས་སྦྱང་བ་དང༌། དེ་ལས་ཕྱོགས་སུ་འཛིན་པ་ཉོན་མོངས་པའི་སྒྲིབ་པ་སངས་ཏེ་རྣམ་པར་བྱང་བས་ས་ནོན་ཞིང་མྱ་ངན་ལས་འདས་པའི་ཕྱོགས་སུ་རིགས་ངེས་པ་དང༌། ཐ་མར་ཤེས་བྱའི་སྒྲིབ་པ་གཏན་ནས་ཡོངས་སུ་བྱང་སྟེ་རྣམ་པར་སངས་བའི་ཕྱིར་རོ། །ཞེས་ཁས་བླངས་པའི་དོན་བཤད་པའོ། །ལང་ཀའི་ བདག་པོ། ཐམས་ཅད་ནས་ཐམས་ཅད་དུ་༼༧༤༽དག་པར་བྱར་མེད་པ ་ལ་ནི་ཤིན་ཏུ་རྣམ་པར་དག་པ་ཞེས་བྱའོ། །དེ་ཅིའི་ཕྱིར་ཞེ་ན། གདོད་ནས་རང་དག་པའི་ངོ་བོ་ཉིད་དེ་ལ་ནི་རྩོལ་བས་རྣམ་པར་དག་པར་བྱ་བའི་རྒྱུ་ཅི་ཡང་མེད་པའི་ཕྱིར་ཏེ་སྒྲིབ་པ་ཡེ་མ་དམིགས་པའི་བླ་དྭགས་སུ་འགྱུར་རོ།།

གཉིས་པ་མུ་བཞིའི་སྒོ་ནས་དབྱེ་བ་ནི།

ཡང་ལང་ཀའི། ཞེས་པ་ནས། གཉིས་ཀ་མ་ཡིན་པ་ནི་རྣམ་པར་དག་པའོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། གསང་བ་པའི་བདག་པོ་རྒྱུན་ཡིན་ལ་སྨིན་པ་མ་ཡིན་པ་ནི་གང་། སྨིན་པ་ཡིན་ལ་རྒྱུན་མ་ཡིན་པ་ནི་གང་། གཉིས་ཀ་ཡིན་པ་ནི་གང་། གཉིས་ཀ་མ་ཡིན་པ་ནི་གང་ཞེས་དྲིས་པ་ལས། སྨྲས་པ། ལངྐའི་བདག་པོ། ཇི་སྐད་དུ་དྲི་བ་བཞི་ནི་འདི་ལྟ་སྟེ། རྒྱུན་ཡིན་ལ་སྨིན་པ་མ་ཡིན་པ་ནི། གང་འདས་ཀྱང་པདྨའི་དབང་གིས་འཁོར་ན་དཔག་ཏུ་མེད་པ་ལ་ཕན་འདོགས་པའོ། །སྨིན་པ་ཡིན་ལ་རྒྱུན་མ་ཡིན་པ་ནི། སའི་སྔ་རོལ་ཉིད་དོ། །གཉིས་ཀ་ཡིན་པ་ནི་གང་ལྷག་མ་དང་བཅས་པར་འདས་པའོ། །གཉིས་ཀ་མ་ཡིན་པ་ནི་རྣམ་པར་དག་པའོ།།

ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ། རྒྱུན་སྤྲུལ་པ་ཡིན་ལ་སྨིན་པ་ལོངས་སྤྱོད་མ་ཡིན་པ་ནི་གང༌། སྨིན་པ་ལོངས་སྤྱོད་ཡིན་ལ་རྒྱུན་སྤྲུལ་པ་མ་ཡིན་པ་ནི་གང༌། གཉིས་ཀ་ཡིན་པ་ནི་གང༌། གཉིས་ཀ་མ་ཡིན་པ་ནི་གང༌། ཞེས་དྲིས་པ་ལས། ལན་སྨྲས་པ། ལང་ཀའི་བདག་པོ། ཇི་སྐད་དུ་དྲི་བ་བཞི་ནི་འདི་ལྟ་སྟེ། རྒྱུན་སྤྲུལ་པའི་སྐུ་ཡིན་ལ་སྨིན་པ་ལོངས་སྤྱོད་རྫོགས་པའི་སྐུ་མ་ཡིན་པ་ནི། གང་དངོས་པོ་ཉིད་ཀྱི་མྱ་ངན་ལས་འདས་པ་ཐོབ་ཟིན་ཀྱང་ཐུགས་རྗེ་ཆེན་པོས་རྗེས་སུ་དགོངས་ཏེ་མ་ཆགས་ཐབས་ཀྱི་སྤྱོད་པ་པདྨོའི་བརྟུལ་ཞུགས་ལྟ་བུའི་དབང་གིས་འཁོར་བའི་འགྲོ་བ་དཔག་ཏུ་མེད་པ་ལ་བསྒྲལ་ཞིང་འདུལ་བའི་ཐབས་ཀྱི་མཛད་པས་ཕན་འདོགས་པ་པོ་ལུང་ཆེན་ཐོབ་པའོ། །སྨིན་པ་ལོངས་སྤྱོད་རྫོགས་པའི་སྐུ་ཡིན་ལ་རྒྱུན་སྤྲུལ་པ་མ་ཡིན་པ་ནི་གང་ཡང་དག་པར་རྫོགས་པའི་སངས་རྒྱས་ཀྱི་སའི་འབྲས་བུ་གསང་སྔགས་ཀྱི་ས་གསུམ་མ་ཐོབ་པའམ་དུས་ཀྱི་ཐ་མར་སྐད་ཅིག་གིས་ལུང་ཐོབ་པའི་སྔ་རོལ་གང་འབྲས་བུའི་སེམས་དཔར་གྱུར་པ་ལ་སྣང་བ་རྩལ་རྫོགས་པའི་སྐུ་རྒྱལ་ཚབ་ལྔར་སྣང་བ་ཉིད་དོ། །ལོངས་སྤྱོད་དང་སྤྲུལ་པ་གཉིས་ཀ་ཡིན་པ་ནི་གང་ཕུང་པོ་ལྷག་མ་དང་བཅས་པས་མྱ་ངན་ལས་འདས་པར་གཤེགས་པ་ཕྱག་རྒྱ་ཆེན་པོའི་རིག་འཛིན་ཏེ་རིགས་ལྔ་འཛིན་པའི་སྤྲུལ་པའི་སྐྱེས་བུ་ལོངས་སྤྱོད་རྫོགས་སྐུའི་ཆ་ལུགས་ཐོབ་པ་དང༌། འགྲོ་དོན་སྣ་ཚོགས་སྤྱོད་པའི་ཕྱིར་གཉིས་ཀའོ། །འདི་ཉིད་སྤྲུལ་པ་ལོངས་སྐུའི་ཆ་བྱད་ཅན་ཡིན་པས་སམ་མཚན་ཉིད་ནས་བཤད་པའི་ལྷག་བཅས་དང་བསྟུན་ན་ལེགས་སམ་སྙམ་ཞེས་ཀྱང་གསུངས། གཟུགས་སྐུ་གཉིས་ཀ་མ་ཡིན་པ་ནི་སྐྱེ་བ་མེད་པ་རང་བཞིན་གྱིས་རྣམ་པར་དག་པ་ཆོས་ཀྱི་སྐུའོ།།

གསུམ་པ་ངོ་བོའི་སྒོ་ནས་དབྱེ་བ་ནི།

ཡང་ལང་ཀའི། ཞེས་པ་ནས། སངས་རྒྱས་ཀུན་གྱི་འབྱུང་གནས་ཏེ་དེ་ཉིད་དོ། །ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། གསང་བ་པའི་བདག་པོ། དེ་དག་གི་མཛད་པ་ནི་གང་ལགས། སྐུ་ནི་གང་ལགས། དགོངས་པ་ནི་གང་ལགས། གཞི་ནི་གང་ལགས། སྨྲས་པ། ལངྐའི་བདག་པོ་དེ་དག་གི་མཛད་པ་ནི། སངས་རྒྱས་ཀུན་གྱི་མཛད་པ་སྟེ། རྒྱུན་གྱི་བྱ་བ་ཅིར་ཡར་སྣང་བའོ། །སྐུ་ནི་སངས་རྒྱས་ཀུན་གྱི་སྐུ་སྟེ། ཡོངས་སུ་སྨིན་པའོ། །དགོངས་པ་ནི་སངས་རྒྱས་ཀུན་གྱི་དགོངས་པ་སྟེ། རྣམ་པར་དག་པའོ། །གཞི་ནི་སངས་རྒྱས་ཀུན་གྱི་འབྱུང་གནས་ཏེ། དེ་ཉིད་དོ།།

ཡང་ལང་ཀའི་བདག་པོས་དྲིས་པ། གསང་བ་བའི་བདག་པོ། སྐུ་བཞི་པོ་དེ་དག་གི་མཛད་པ་ནི་གང་ལགས། སྐུ་ནི་གང་ལགས། དགོངས་པ་ནི་གང་ལགས། གཞི་ནི་གང་ལགས། ཞེས་༼༧༥༽མཛད་པ་ལ་སོགས་པ་བཞི་པོ་གཅིག་དང་ཐ་དད་གང་དུ་གྱུར་པ་དྲིས་པའོ། །ལན་སྨྲས་པ། ལང་ཀའི་བདག་པོ། གོང་གི་སྐུ་བཞི་པོ་དེ་དག་གི་འགྲོ་བའི་དོན་མཛད་པའི་བྱ་བ་ནི། སྐུ་བཞི་རྒྱ་མ་ཆད་པར་སངས་རྒྱས་ཀུན་གྱི་སྐུ་གསུང་ཐུགས་ཀྱི་མཛད་པ་སྟེ། སྤྲུལ་པའི་སྐུས་རྒྱུན་གྱི་དོན་མཛད་པའི་བྱ་བ་ཡང་སྐུ་བཞི་ཀའི་མཛད་པའི་ཕྱིར་མཛད་པའི་ངོས་ནས་སྤྲུལ་པ་གཅིག་ཏུ་མ་ངེས་པར་ཅིར་ཡང་སྣང་བའོ། །དེ་བཞིན་དུ་ལོངས་སྤྱོད་རྫོགས་པའི་སྐུ་མཚན་དཔེ་དོད་པས་སྐུས་ཏིང་ངེ་འཛིན་ལ་བཞུགས་པས་བདེ་བ་ཆེན་པོ་མ་བརྗོད་པར་འཁོར་གྱིས་གོ་བར་ཆོས་སྟོན་པ་ནི་རྒྱལ་བ་རྫོགས་པའི་སངས་རྒྱས་ཀུན་གྱི་སྐུ་ཡི་ངོ་བོ་ཉིད་དེར་སྣང་བ་སྟེ་ཡོངས་སུ་སྨིན་པ་ལོངས་སྤྱོད་རྫོགས་སྐུ་ཞེས་བྱ་བའོ། །དགོངས་པ་གཉིས་སུ་མེད་པའི་ངང་ལས་མི་གཡོ་བའི་ཆོས་ཀྱི་སྐུ་ནི་རྒྱལ་བ་རྫོགས་པའི་སངས་རྒྱས་ཀུན་གྱི་ཐུགས་སྐྱེ་མེད་དོན་གྱི་ངོ་བོ་བག་ཆགས་ཀྱི་རྡུལ་དང་བྲལ་བའི་དགོངས་པ་སྟེ། རང་བཞིན་རྣམ་པར་དག་པ་ཆོས་ཀྱི་སྐུ་དེར་བྱུང་བའོ། །དངོས་གཞི་མེད་པ་ལ་གོང་གི་སྐུ་གསུམ་ཀུན་ཏུ་སྣང་བའི་གཞི་ངོ་བོ་ཉིད་ཀྱི་སྐུ་ནི་རྫོགས་པའི་སངས་རྒྱས་མ་ལུས་པ་ཀུན་གྱི་འབྱུང་གནས་ཆོས་ཀྱི་དབྱིངས་ཀྱི་རང་བཞིན་སྐུ་ཐམས་ཅད་ངོ་བོ་གཅིག་པས་གཞིའི་གནས་ལུགས་ཏེ་ཇི་བཞིན་པ་དེ་ཁོ་ན་ཉིད་ཡིན་པས་གཅིག་དང་དུ་མ་ལས་གྲོལ་བ་ཉིད་དོ།།

བཞི་པ་གཅིག་དང་དུ་མའི་སྒོ་ནས་དབྱེ་བ་ནི།

ལང་ཀའི། ཞེས་ པ་ནས། མེད་པའི་ཕྱིར་དེ་དག་ལས་འདས་པ་ཞེས་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ། དེ་དག་ལ་ནི་མང་པོ་དང་། གཅིག་དང་། གཅིག་མང་པོ་དང་། དེ་དག་ལས་འདས་པ་ཞེས་ཀྱང་བྱའོ། །དེ་ཅིའི་ཕྱིར་ཞེ་ན། རྒྱུན་ནི་སྣ་ཚོགས་དཔག་གིས་མི་ལང་བའི་ཕྱིར་མང་པོ་ཞེས་བྱའོ། །སྨིན་པ་ནི་གང་ཐམས་ཅད་གཅིག་པའི་ཕྱིར་གཅིག་ཅེས་བྱའོ། །རྣམ་པར་དག་པ་ནི་རྒྱུན་དང་སྨིན་པའི་གཞིར་གྱུར་པའི་ཕྱིར་གཅིག་མང་པོ་ཞེས་བྱའོ། །དེ་ཉིད་ནི་དེ་དག་གི་འབྱུང་འཇུག་གིས་ཟད་འཕེལ་ མེད་པའི་ཕྱིར། དེ་དག་ལས་འདས་པ་ཞེས་བྱའོ།།

ལང་ཀའི་བདག ་པོ། དེ་དག་ལ་ནི་སྤྲུལ་སྐུ་མང་པོ་དང༌། ལོངས་སྐུ་གཅིག་དང༌། ཆོས་སྐུ་གཅིག་མང་པོ་དང༌། ངོ་བོ་ཉིད་ཀྱི་སྐུ་དེ་དག་ལས་འདས་པ་ཞེས་ཀྱང་བྱའོ། །དེའི་གཏན་ཚིགས། དེ་ཅིའི་ཕྱིར་ཞེ་ན། རྒྱུན་སྤྲུལ་པ་ནི་གདུལ་བྱའི་ཡུལ་སྣ་ཚོགས་པའི་དབང་གིས་སྤྲུལ་པའི་སྐུ་ཡང་ཇི་སྙེད་རྡུལ་གྲངས་ཙམ་དུ་དཔག་གིས་མི་ལང་བར་སྣང་བའི་ཕྱིར་མང་པོ་ཞེས་བྱའོ། །སྨིན་པ་ལོངས་སྤྱོད་རྫོགས་པ་ནི་སྟོན་འཁོར་ཐམས་ཅད་ཆ་ལུགས་མཐུན་ཞིང་སྟོན་པའི་དགོངས་པའི་མཚན་ཉིད་དང་འཁོར་གྱི་བསམ་པའི་མཚན་ཉིད་གཅིག་པའི་ཕྱིར་གཅིག་ཅེས་བྱའོ། །རྣམ་པར་དག་པ་ཆོས་སྐུ་ནི། ངོ་བོ་གཉིས་སུ་མེད་པ་ལས་རྒྱུན་དང་སྨིན་པའི་གཟུགས་སྐུ་རྣམ་གཉིས་ཇི་སྙེད་པར་འཆར་བའི་གཞིར་གྱུར་པའི་ཕྱིར་གཅིག་མང་པོ་ཞེས་བྱའོ། །དེ་ཉིད་ངོ་བོ་ཉིད་ཀྱི་སྐུ་ནི། གདུལ་བྱའི་སྣང་བའི་སྐུ་དེ་དག་གིས་འབྱུང་བ་དང་འཇུག་པའི་འགྲོ་འོང་གིས་འཕེལ་འགྲིབ་དུ་སྣང་མི་སྣང་ལས་ཡེ་གྲོལ་བའི་ཕྱིར་ཏེ། གདུལ་བྱ་༼༧༦༽འདུལ་བྱེད་ཉིད་ཀྱང་མ་དམིགས་པར་ཟད་འཕེལ་མེད་པའི་ཕྱིར་དེ་དག་ལས་འདས་པ་ཞེས་བྱའོ།། དེ་ལྟར་མིང་དུ་གདགས་པའི་རྣམ་གྲངས་བཞིའོ།།

གསུམ་པ་སྐུའི་མཚན་ཉིད་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

ཡང་ལང་ཀའི། ཞེས་པ་ནས། ཅེས་དྲིས་པ་ལས། ཞེས་པའི་བར་གྱིས་བསྟན་ཏེ།

ཡང་ལངྐའི་བདག་པོས་དྲིས་པ། གསང་བ་པའི་བདག་པོ་དེ་དག་རྟག་པ་ཞིག་གམ། འོན་ཏེ་མི་རྟག་པ་ཞིག

ཡོད་པ་ཞིག་གམ། གལ་ཏེ་ མེད་པ་ཞིག གཅིག་པ་ཞིག་གམ། ཐ་དད་པ་ཞིག་ཅེས་དྲིས་པ་ལས།

ཡང་ལང་ཀའི་བདག ་པོས་དྲིས་པ། གསང་བ་པའི་བདག་པོ་སྐུ་བཞི་པོ་དེ་དག་རྟག་པ་ཞིག་གམ། འོན་ཏེ་མི་རྟག་པ་ཞིག ཡོད་པ་ཞིག་གམ། གལ་ཏེ་མེད་པ་ཞིག གཅིག་པ་ཞིག་གམ། ཐ་དད་པ་ཞིག ཅེས་སྐུ་བཞིའི་མཚན་ཉིད་དྲི་བ་དྲུག་དྲིས་པ་ལས།

གཉིས་པ་ལན་ལ་གསུམ་སྟེ། དམ་བཅའ། གཏན་ཚིགས། གྲུབ་མཐའོ། །དང་པོ་ནི།

གསང་བ་པའི། ཞེས་པ་ནས། ཐ་དད་པའི་ངོ་བོ་ལས་གྲོལ་བ་ཡང་ཡིན་ནོ། །ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་སྨྲས་པ། ལངྐའི་བདག་པོ་ཇི་སྐད་དུ་དྲི་བ་དྲུག་ནི། འདི་ལྟ་སྟེ།

དེ་དག་ནི་རྟག་པ་ཡང་ཡིན་ནོ། །མི་རྟག་པ་ཡང་ཡིན་ནོ། །རྟག་ཀྱང་རྟག་ལ་མི་རྟག་ཀྱང་མི་རྟག་པ་ཡང་ཡིན་ནོ།།

རྟག་པ་ཡང་མ་ཡིན། མི་རྟག་པ་ཡང་མ་ཡིན་པ་ཡང་ཡིན་ནོ། །དེ་དག་ནི་ཡོད་པ་ཡང་ཡིན་ནོ། །མེད་པ་ཡང་ཡིན་ནོ།།

ཡོད་ཀྱང་ཡོད་ལ་མེད་ཀྱང་མེད་པ་ཡང་ཡིན་ནོ། །ཡོད་པ་ཡང་མ་ཡིན། མེད་པ་ཡང་མ་ཡིན་པ་ཡང་ཡིན་ནོ།།

གཅིག་པ་ཡང་ཡིན་ནོ། །ཐ་དད་པ་ཡང་ཡིན་ནོ། །གཅིག་པ་མ་ཡིན་ཐ་དད་པ་མ་ཡིན་པ་ཡང་ཡིན་ནོ།།

གཅིག་དང་ཐ་དད་པའི་ངོ་བོ་ལས་གྲོལ་བ་ཡང་ཡིན་ནོ།།

གསང་བ་པའི་བདག་པོས་སྨྲས་པ། ལང་ཀའི་བདག་པོ། ཇི་སྐད་དུ་དྲི་བ་དྲུག་གི་ལན་སྔ་ཕྱི་བཅོ་བརྒྱད་དུ་བསྟན་པ་ནི་འདི་ལྟ་སྟེ། སྐུ་བཞི་པོ་དེ་དག་ནི་རྟག་པ་ཡང་ཡིན་ནོ། །མི་རྟག་པ་ཡང་ཡིན་ནོ། །རྟག་ཀྱང་རྟག་ལ་མི་རྟག་ཀྱང་མི་རྟག་པ་ཡང་ཡིན་ནོ། །རྟག་པ་ཡང་མ་ཡིན། མི་རྟག་པ་ཡང་མ་ཡིན་པ་ཡང་ཡིན་ནོ། །སྐུ་དེ་དག་ནི་ཡོད་པ་ཡང་ཡིན་ནོ། །མེད་པ་ཡང་ཡིན་ནོ། །ཡོད་ཀྱང་ཡོད་ལ་མེད་ཀྱང་མེད་པ་ཡང་ཡིན་ནོ། །ཡོད་པ་ཡང་མ་ཡིན། མེད་པ་ཡང་མ་ཡིན་པ་ཡང་ཡིན་ནོ། །སྐུ་དེ་རྣམས་གཅིག་པ་ཡང་ཡིན་ནོ། །ཐ་དད་པ་ཡང་ཡིན་ནོ། །གཅིག་པ་ཡང་མ་ཡིན། ཐ་དད་པ་ཡང་མ་ཡིན་པ་ཡང་ཡིན་ནོ། །གཅིག་དང་ཐ་དད་པའི་ངོ་བོ་ལས་གྲོལ་བ་ཡང་ཡིན་ནོ།།

གཉིས་པ་གཏན་ཚིགས་ནི།

ལང་ཀའི་བདག་པོ། ཞེས་པ་ནས། ཁྱད་པར་ཅིར་ཡང་མཚུངས་པའི་ཕྱིར། ཞེས་པའི་བར་གྱིས་བསྟན་ཏེ།

ལངྐའི་ བདག་པོ་དེ་ཅིའི་ཕྱིར་ཞེ་ན། འདི་ལྟ་སྟེ། མི་འགྱུར་ཞིང་གཉེན་པོ་མེད་པ ་དང་། གང་འབྱུང་བ་མི་དམིགས་པ་དང་། ཀུན་གྱི་གཞིར་གྱུར་པ་དང་། མཐའ་ཡོངས་སུ་མི་དམིགས་པ་དང་། ཐེར་ཟུག་མ་ཡིན་པ་དང་། རྒྱུན་དུ་འབྱུང་བ་དང་། དགོངས་པ་དམ་པ་དང་། དངོས་པོ་མེད་པ་དང་། རྒྱུད་དག་པའི་ཡུལ་དུ་གྱུར་པ་དང་། མཐའ་དང་དབུས་ལས་འདས་པ་དང་། ཐ་སྙད་ལས་འདས་པ་དང་། ཡེ་ཇི་བཞིན་པ་དང་། བསམ་དུ་མེད་པ་དང་། བསམ་གྱིས་མི་ཁྱབ་པ་དང་། སོ་སོའི་སྤྱོད་ཡུལ་དང་། ཁྱད་པར་ཅིར་ཡང་མཚུངས་པའི་ཕྱིར།

ལང་ཀའི་བདག་པོ། དེ་ཅིའི་ཕྱིར་ཞེ་ན། འདི་ལྟ་སྟེ། ཞེས་དྲི་བ་དང་པོ་གཉིས་ལ་ལན་དྲུག་ནི་ཕྱོགས་ཕྱི་མས་གཏན་ཚིགས་འདི་དང་སྦྱར་ནས་གསལ་བར་འགྲེལ་ཏེ། མི་འགྱུར་ཞིང་གཉེན་པོ་མེད་པའི་ཕྱིར་རྟག་པ་ཡང་ཡིན་པ་དང༌། གང་བྱུང་བ་མི་དམིགས་པའི་ཕྱིར་མི་རྟག་པ་ཡང་ཡིན་པ་དང༌། ཀུན་གྱི་གཞིར་གྱུར་པའི་ཕྱིར་རྟག་ཀྱང་རྟག་པ་ཡང་ཡིན་པ་དང༌། མཐའ་ཡོངས་སུ་མི་དམིགས་པའི་ཕྱིར་མི་རྟག་ཀྱང་མི་རྟག་པའང་ཡིན་པ་དང༌། ཐེར་ཟུག་མ་ཡིན་པའི་ཕྱིར་རྟག་པའང་མ་ཡིན་པ་དང༌། རྒྱུན་དུ་འབྱུང་བའི་ཕྱིར་མི་རྟག་པའང་མ་ཡིན་པ་དང་དྲུག་གོ །དྲི་བ་བར་མའི་ལན་དྲུག་ཀྱང་དེ་བཞིན་དུ་འགྲེལ་ཏེ། དགོངས་པ་དམ་པའི་ཕྱིར་ཡོད་པའང་ཡིན་པ་དང༌། དངོས་པོ་མེད་པའི་ཕྱིར་མེད་༼༧༧༽པའང་ཡིན་པ་དང༌། རྒྱུད་དག་པའི་ཡུལ་དུ་གྱུར་པའི་ཕྱིར་ཞེས་པ་དང༌། མཐའ་དབུས་ལས་འདས་པའི་ཕྱིར་ཞེས་པའི་གཏན་ཚིགས་གཉིས་ཀྱིས་ཡོད་ཀྱང་ཡོད་ལ་མེད་ཀྱང་མེད་པའང་ཡིན་ནོ། །ཞེས་པ་དང༌། ཐ་སྙད་ལས་འདས་པའི་ཕྱིར་ཞེས་པ་དང༌། ཡེ་ཇི་བཞིན་པའི་ཕྱིར་ཞེས་གཏན་ཚིགས་ཟུང་གིས། ཡོད་པའང་མ་ཡིན། མེད་པའང་མ་ཡིན་པ་ཡང་ཡིན་པ་དང་དྲུག་གོ །དྲི་བ་ཐ་མ་བཞིའི་ལན་བཞི་ནི་རྗེས་སུ་མཐུན་པར་འགྲེལ་ཏེ། བསམ་དུ་མེད་པའི་ཕྱིར་གཅིག་པའང་ཡིན་པ་དང༌། བསམ་གྱིས་མི་ཁྱབ་པའི་ཕྱིར་ཐ་དད་པའང་ཡིན་པ་དང༌། སོ་སོའི་སྤྱོད་ཡུལ་ཐ་དད་པར་སྣང་བའི་ཕྱིར་དང༌། ཁྱད་པར་ཅིར་ཡང་མཚུངས་པའི་ཕྱིར། ཞེས་པའི་གཏན་ཚིགས་གཉིས་ཀྱིས། གཅིག་པའང་མ་ཡིན། ཐ་དད་པའང་མ་ཡིན་པའང་ཡིན་ནོ། །དེ་དག་རྣམ་གྲངས་སོ་སོར་མ་འདྲེས་ཀྱང་ངོ་བོ་ངང་གི་ཐིག་ལེ་གཅིག་ལ་ཡོངས་སུ་རྫོགས་པའི་ཕྱིར་གཅིག་དང་ཐ་དད་པའི་ངོ་བོ་ལས་གྲོལ་བ་ཡང་ཡིན་ནོ། །དེས་ན་དོན་གྱི་ལན་དྲུག་ཏུ་འགྱུར་རོ། །དེའང་ཐ་མ་གཉིས་སུ་དབྱེ་བ་ན། རྒྱལ་བ་སྐུ་བཞི་པོ་ནི་རྣམ་གྲངས་མ་ངེས་པའི་ཇི་བཞིན་པར་གནས་པའི་དོན་དུ་གསལ་ལོ།།

གསུམ་པ་གྲུབ་མཐའ་ནི།

རྟག་པར་ཡང་ཟུང་ཞིག ཅེས་པ་ནས། ངོ་བོ་ལས་གྲོལ་བར་ཡང་ཟུང་ཞིག ཅེས་པའི་བར་གྱིས་བསྟན་ཏེ།

རྟག་པར་ཡང་ཟུང་ཞིག མི་རྟག་པར་ཡང་ཟུང་ཞིག ཡོད་པར་ཡང་ཟུང་ཞིག མེད་པར་ཡང་ཟུང་ཞིག གཅིག་པར་ཡང་ཟུང་ཞིག ཐ་དད་པར་ཡང་ཟུང་ཞིག གཅིག་དང་ཐ་དད་པའི་ངོ་བོ་ལས་གྲོལ་བར་ཟུང་ཞིག

དེ་ལྟར་རྒྱལ་བ་སྐུ་བཞིའི་མཚན་ཉིད་ངེས་པར་ཤེས་ནས་རྟག་པར་ཡང་ཟུང་ཞིག མི་རྟག་པར་ཡང་ཟུང་ཞིག ཡོད་པར་ཡང་ཟུང་ཞིག མེད་པར་ཡང་ཟུང་ཞིག གཅིག་པར་ཡང་ཟུང་ཞིག ཐ་དད་པར་ཡང་ཟུང་ཞིག གཅིག་དང་ཐ་དད་པའི་ངོ་བོ་ལས་གྲོལ་བར་ཡང་ཟུང་ཞིག ཅེས་གཏན་ཚིགས་སྔོན་དུ་སོང་བས་ལན་ངེས་པ་སྟེ་བཤད་ཟིན་པ་ལྟར་ཤེས་པར་བྱའོ། །དེ་ལ་དྲི་བ་དྲུག་པ་ལན་སྔ་ཕྱི་བཅོ་བརྒྱད་དུ་སྦྱར་བ་ནི། ཕྱོགས་འཛིན་སྦྱངས་པ་དང༌། གང་གིས་ཕྱོགས་ལའང་མ་ཞེན་མོད་ཀྱང་ཕྱོགས་ཀུན་གྱི་དངོས་གཞིར་ཤར་བ་ནི་ཀུན་གྱི་གནས་ལུགས་ཏེ། དེ་ལ་ནི་ཐུན་མོང་མ་ཡིན་པའི་ལྷུན་གྲུབ་ཆེན་པོ་ཞེས་བྱའོ། །དེའང་མཐའ་གཉིས་ལ་ཞེན་པའི་བློ་ཆུང་བས་མི་རྟོགས་ཤིང་ཡུལ་མ་ཡིན་པའོ། །དོན་དེ་ཉིད་རྩད་བཅད་པའི་དུས་ནི་བཞི་སྟེ། གཞིའི་གནས་སྐབས་མ་བཅོས་པའི་དུས་སུ་དེ་ཁོ་ན་ལྟར་ཡིན་པ་ཉི་མ་དང་འོད་ཟེར་ལྟར་གནས་པ་དང༌། གཏན་ལ་ཕེབས་པའི་དུས་སུ། དོན་གསལ་བར་བྱེད་པའི་གདམས་ངག་འབོག་པ་སྒྲོན་མ་ལྟར་གནས་པ་དང༌། རྣམ་པར་རྩོད་པའི་དུས་སུ་བློ་མི་འཇུག་པར་ཁས་གང་དུའང་ལེན་པ་ནམ་མཁའི་དབྱིངས་ལྟར་༼༧༨༽གནས་པ་དང༌། ངེས་པའི་དོན་ལ་གནས་པའི་དུས་སུ་ངོས་འཛིན་དང་སྐྱེ་བ་མེད་པའི་ངང་ལས་མ་ཡེངས་པ་འབབ་ཆུ་ལྟར་གནས་པའོ། །འདི་དག་སྤྱིར་འགྲོ་བའི་ཚུལ་རྒྱས་པ་ནི། བཀའ་རྫོགས་པ་ཆེན་པོ་ཐུན་མོང་མ་ཡིན་པའི་ངེས་གསང་དང་སྦྱར་ཏེ་ལེགས་པར་ཤེས་པར་བྱའོ།།

བཞི་པ་རྣམ་གྲངས་མ་ངེས་པ་ནི།

ལང་ཀའི། ཞེས་པ་ནས། གཅིག་ཏུ་ཡང་ཟུང་ཞིག ཅེས་པའི་བར་གྱིས་བསྟན་ཏེ།

ལངྐའི་ བདག་པོ་དེ་ལྟར་ན་འདུལ་བའི་དབང་གི་ཕྱིར། སྐུ་ལ་ནི་ངེས་པ་མེད ་དེ། བསམ་གྱིས་མི་ཁྱབ་པར་ཡང་ཟུང་ཞིག ལྔར་ཡང་ཟུང་ཞིག བཞིར་ཡར་ཟུང་ཞིག གསུམ་དུ་ཡང་ཟུང་ཞིག གཉིས་སུ་ཡང་ཟུང་ཞིག

གཅིག་ཏུ་ཡང་ཟུང་ཞིག

ལང་ཀའི་བདག་པོ་དེ་ལྟར་ན། གདུལ་བྱ་བསམ་པ་ཐ་དད་པའི་ངོ་ལ་དེ་ལྟར་འདུལ་བའི་དབང་གི་དགོས་ཆེད་ཀྱི་ཕྱིར་སྐུ་ཡི་མཚན་ཉིད་མ་ངེས་པའི་རྗེས་སུ་རྣམ་གྲངས་ལའང་ངེས་པ་མེད་པར་སྟོན་ཏེ། གདུལ་བྱ་རྡུལ་ཕྲན་སྙེད་ལ་སྐུ་རྡུལ་ཕྲན་སྙེད་སྣང་བའི་ཕྱིར། བསམ་གྱིས་མི་ཁྱབ་པར་མང་པོར་ཡང་ཤེས་པར་གྱིས་ལ་ཟུང་ཞིག ཨ་ནུ་ཡོ་ག་པ་ལྟར། ངོ་བོ་ཉིད་སྐུ། ཆོས་སྐུ། ལོངས་སྐུ། སྤྲུལ་སྐུ། གསང་བའི་སྐུའམ་མ་ཧཱ་ལྟར་སྐུ་གསུམ་དང༌། མི་འགྱུར་རྡོ་རྗེའི་སྐུ། མངོན་པར་བྱང་ཆུབ་པའི་སྐུ་དང་ལྔར་ཡང་ཟུང་ཞིག མ་ཧཱ་ཡོ་ག་ལྟར། ཆོས་སྐུ། ལོངས་སྐུ། སྤྲུལ་སྐུ། གསང་བའི་སྐུ་དང་བཞིར་ཡང་ཟུང་ཞིག ཡང་ན་ཐེག་པ་ཆེན་པོ་ཁ་ཅིག་ལྟར་ངོ་བོ་ཉིད་སྐུ་ལ་སོགས་པ་བཞིའོ། །བྱ་སྤྱོད་དང་མཐུན་པར། རྡོ་རྗེ་སེམས་དཔའ་ཆོས་སྐུ། རྡོ་རྗེ་འཛིན་པ་ལོངས་སྐུ། ཤཱཀྱ་ཐུབ་པ་སྤྲུལ་སྐུའམ། ཡོ་ག་ལྟར་ཕྱོགས་མེད་རྣམ་སྣང་ཆེན་པོ་ཆོས་སྐུ། རིགས་ལྔ་ལོངས་སྐུ། ཐུབ་དབང་སྤྲུལ་པའི་སྐུའམ། གསང་ཆེན་ནང་པ་ལྟར། ཀུན་བཟང་ཆོས་སྐུ། རིགས་ལྔ་ལོངས་སྐུ། ཐུབ་དྲུག་སྤྲུལ་པའི་སྐུ་དང་གསུམ་དུ་ཡང་ཟུང་ཞིག ཐེག་པ་ཀུན་ལ་གྲགས་པ་ལྟར། ཆོས་ཀྱི་སྐུ་མཐའ་ལས་འདས་པའམ་ཡེ་ཤེས་དམ་པ་གཅིག་པུ་དང་གཟུགས་སྐུ་སྟེ་གཉིས་སུ་ཡང་ཟུང་ཞིག ཀུན་བྱེད་རྒྱལ་པོ་ལས། སྐུ་གཅིག་ཀུན་ཏུ་ཁྱབ་པས་བསྣན་པའི་ཆོས་མེད་དེ། །མཐའ་ལ་ཐུག་པ་མེད་པས་དབྱིངས་ལ་བྲི་བ་མེད། །ཆོས་ཀྱི་རོལ་པ་ཉམ་བག་ལྷག་པའི་གནས་མེད་དེ། །རང་བྱུང་ཆེ་བའི་ཡུལ་ལ་ཀུན་ཏུ་ཇི་བཞིན་གནས། །ཞེས་ཨ་ཏི་ཡོ་ག་ལྟར། བདེ་བ་ཆེན་པོ་ལྷག་པའི་ཆོས་སྐུ་དམ་པ་ངོ་བོ་ཉིད་གཅིག་ཏུ་ཡང་ཟུང་ཞིག

ལྔ་པ་མཐུན་པའི་དཔེ་ནི།

ངེས་པར་སྐུ་དང༌། ཞེས་པ་ནས། སྣང་བ་ནི་ཅུང་ཟད་ཀྱང་མེད་དོ། །ཞེས་པའི་བར་གྱིས་བསྟན་ཏེ།

ངེས་པར་སྐུ་དང་། གསུང་དང་། ཐུགས་དང་། ཡོན་ཏན་དང་། འཕྲིན་ལས་ཞེས་ཐ་དད་དུ་བཏགས་པར་ཟད་ཀྱི། སྐུ་ནི་ནམ་མཁའ་འོ། །གསུང་ནི་སྒྲ་བརྙན་ནོ། །ཐུགས་ནི་ཆོས་ཉིད་དོ། །ཡོན་ཏན་ནི་སྒྱུ་མའོ། །འཕྲིན་ལས་ནི་སྤྲུལ་པ་སྟེ། དེ་དག་ནི་གང་ལ་འདུལ་བའི་དབང་དུ་བྱིན་གྱིས་བརླབས་ལས་སྣང་བར་ཟད་ཀྱི།

ཡང་དག་པར་ན་སྣང་བ་ནི་ཅུང་ཟད་ཀྱང་མེད་དོ།།

དེ་ལྟར་ངེས་པར་རྒྱལ་བའི་སྐུ་དང༌། གསུང་དང༌། ཐུགས་དང༌། ཡོན་ཏན་དང༌། ཕྲིན་ལས་ཞེས་ལྔ་པོ་འདིར་ཡང་མིང་སོ་སོར་ཐ་སྙད་དུ་བཏགས་པར་ཟད་ཀྱི་ངོ་བོཐ་དད་པ་ནི་མ་ཡིན་ཏེ། དེའང་སྐུ་ཡི་དཔེ་ནི་ནམ་མཁའ་ལྟར་ཐམས་ཅད་དུ་གསལ་བར་སྣང་ལ་མ་དམིགས་པའོ། །གསུང་༼༧༩༽ནི་སྒྲ་བརྙན་ལྟར་གྲགས་པ་སྟོང་པ་ཡིན་ནོ། །ཐུགས་ནི་གཡོ་བ་མེད་པ་མ་བཅོས་པའི་ཆོས་ཉིད་དོ། །ཡོན་ཏན་ནི་མེད་བཞིན་ཅིར་ཡང་སྣང་ལ་སྣང་བཞིན་དངོས་པོར་མ་གྲུབ་པས་སྒྱུ་མ་ལྟ་བུའོ། །ཕྲིན་ལས་ནི་ཅིར་ཡང་སྣང་ཞིང་མཛད་ལ་གནས་པ་མེད་པའི་ཕྱིར་སྤྲུལ་པ་ལྟ་བུ་སྟེ། དེ་དག་ནི་གང་ལ་གང་གིས་འདུལ་བའི་དབང་དུ་མཐའ་ལས་གྲོལ་བའི་ལྷུན་གྲུབ་ཉིད་ཡིད་བཞིན་གྱི་ནོར་བུ་ལྟ་བུའི་བྱིན་གྱིས་བརླབ་ལས་གདུལ་བྱ་ལ་ལྔར་སྣང་བར་ཟད་ཀྱི། ཡང་དག་པར་ན་དེ་བཞིན་གཤེགས་པ་ཉིད་ཀྱི་སྣང་བ་ལ་ནི་ཆེད་དུ་སྣང་བར་བྱས་པའི་ཕྱོགས་ཆ་ཅུང་ཟད་ཙམ་ཡང་མེད་དོ།།

དྲུག་པ་རྟོགས་མ་རྟོགས་ཀྱི་སྣང་ཚུལ་ནི།

ལང་ཀའི། ཞེས་པ་ནས། གསང་སྔགས་སུ་ངོས་ཟིན་པ་ཡིན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་དག་གི་ངོ་བོ་ནི་རྣམ་པར་ཤེས་པའོ། །ངོས་ཟིན་པ་ནི་ཡེ་ཤེས་སོ། །མངོན་སུམ་པ་ནི་སངས་རྒྱས་སོ། །ལངྐའི་བདག་པོ་དེ་ལྟར་ན། གསང་སྔགས་ཀྱི་ངོ་བོ་དེ་ནི་ཡོངས་སུ་དཔག་པར་དཀའ་བའི་ཕྱིར། གང་མུན་པའི་ཁམས་པས་ནི་རྣམ་པར་ཤེས་པ་ཞེས་བཏགས་སོ། །སྣང་བའི་ཁམས་པ་དག་གིས་ནི་ཡེ་ཤེས་ཞེས་བཏགས་སོ།།

མིག་དངས་པ་རྣམས་ཀྱིས་ནི་སངས་རྒྱས་ཞེས་སུ་བཏགས་སོ། །དམ་པའི་མིག་ཅན་རྣམས་ཀྱིས་ནི་

གསང་སྔགས་སུ་ངོས་ཟིན་པ་ཡིན་ནོ།།

ལང་ཀའི་བདག་པོ། དེ་དག་གི་སྐབས་ཀྱི་ངོ་བོ་བསྟན་པ་ནི། ཐེག་པ་སྤྱི་དང་མཐུན་པར་རང་གི་རྣམ་པར་ཤེས་པ་སེམས་ཉིད་དེ་གཞིའི་རྣལ་འབྱོར་དང་པོ འོ། །གང་གིས་ངོས་ཟིན་ཏེ་རྟོགས་པ་ནི་ཡེ་ཤེས་ཏེ་ལམ་གྱི་རྣལ་འབྱོར་བར་མའི་སྐབས་སོ། །མངོན་སུམ་དུ་གྱུར་པ་ནི་རྒྱལ་བ་རྫོགས་པའི་སངས་རྒྱས་ཏེ་རྣལ་འབྱོར་ཐ་མ་འབྲས་བུའི་སྐབས་སོ། །ལང་ཀའི་བདག་པོ། དེ་ལྟར་ན་གསང་སྔགས་ཀྱི་ངོ་བོ་དེ་ནི་ཡོངས་སུ་དཔག་པར་དཀའ་བའི་ཕྱིར། གང་སེམས་ཅན་རྣམས་སམ་རྒྱུའི་ཐེག་པ་མུན་པའི་ཁམས་པ་དག་གིས་ནི་རྣམ་པར་ཤེས་པ་ཞེས་བཏགས་སོ། །གང་གསང་སྔགས་པའམ་སློབ་པའི་གང་ཟག་ཆོས་ཀྱི་མིག་ཅན་སྣང་བའི་ཁམས་པ་དག་གིས་ནི། ཡེ་ཤེས་ཞེས་བྱ་བར་བཏགས་སོ། །རྒྱལ་བ་རྫོགས་པའི་སངས་རྒྱས་ཡེ་ཤེས་ཀྱི་མིག་དྭང་བ་རྣམས་ཀྱིས་ནི་སངས་རྒྱས་སུ་བཏགས་སོ། །དེ་ལྟ་བས་ན་སྐབས་ཀྱིས་ས་གསུམ་ལ་མིང་གི་རྣམ་གྲངས་སོ་སོར་གྲགས་ཀྱང་ངོ་བོ་གཅིག་པའོ། །གསང་ཆེན་ལུང་གི་ཐེག་པ་འདིའི་ཁྱད་པར་ལ་ཞུགས་པའི་དམ་པའི་མིག་ཅན་ལམ་དམ་པ་ལ་གནས་པའི་ཤེས་རབ་ཀྱི་སྤྱན་ཆེན་པོ་མངའ་བ་རྣམས་ཀྱིས་ནི་གནས་ལུགས་ཇི་བཞིན་པའི་གསང་སྔགས་སུ་ངོས་ཟིན་ཞིང་གཟིགས་པ་ཡིན་ནོ།།

བདུན་པ་ཕུན་སུམ་ཚོགས་པ་ལ་གསུམ་སྟེ། དྲིས་པ་དང་། ལན་དང༌། ཞབས་སོ། །དང་པོ་ནི།

དེ་ནས་ཡང༌། ཞེས་པ་ནས། མཛད་པ་ནི་གང༌། ཞེས་དྲིས་སོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོས་དྲིས་པ། གསང་བ་པའི་བདག་པོ། དེ་དག་གི་ཞིང་ཁམས་ནི་གང་། འཁོར་ནི་གང་། བསྟན་པ་ནི་ཅི་ཞིག་སྒྲོགས། དུས་ནི་གང་། མཛད་པ་ནི་གང་ཞེས་དྲིས་སོ།།

དེ་ནས་ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ། སྐུ་ལྔ་པོ་དེ་དག་གི་ཞིང་ཁམས་ནི་གང་ལགས། འཁོར་ནི་གང༌། བསྟན་པ་ནི་ཅི་ཞིག་སྒྲོགས། དུས་ནི་གང༌། མཛད་པ་ནི་གང་ལགས། ཞེས་དྲི་བ་ལྔ་དྲིས་སོ།།

གཉིས་༼༨༠༽ལན་་ལ་ལྔ་སྟེ། ངོ་བོ་ཉིད་ཀྱི་སྐུའི་ཕུན་སུམ་ཚོགས་པ། ཆོས་སྐུའི་ཕུན་སུམ་ཚོགས་པ། ལོངས་སྐུའི་ཕུན་སུམ་ཚོགས་པ། གསང་བའི་སྐུའི་ཕུན་སུམ་ཚོགས་པ། སྤྲུལ་སྐུའི་ཕུན་སུམ་ཚོགས་པའོ། །དང་པོ་ནི།

གསང་བ་པའི། ཞེས་པ་ནས། མཛད་པ་ནི་ཅིར་ཡང་མཛད་པའོ། །ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་སྨྲས་པ། ལངྐའི་ བདག་པོ་ཇི་སྐད་དུ་དྲི་བ་ལྔ་པ་ནི་འདི་ལྟ་སྟེ།

གང་ངོ་བོ་ཉིད་མེད་པ ་དེའི་ཞིང་ཁམས་ནི་བསྐྱེད་དུ་མེད་པའོ། །འཁོར་ནི་སངས་རྒྱས་པ་མེད་པའོ།།

བསྟན་པ་ལ་ནི་བསམ་དུ་མེད་པའོ། །དུས་ནི་ཚད་ལས་འདས་པའོ། །མཛད་པ་ནི་ཅིར་ཡང་མཛད་པའོ།།

གསང་བ་པའི་བདག་པོས་སྨྲས་པ། ལང་ཀའི་བདག་པོ་ཇི་སྐད་དུ་དྲི་བ་ལྔ་ནི་འདི་ལྟ་སྟེ། ཞེས་ལན་བཏབ་པ་སོ་སོར་བསྟན་པའི་ཐོག་མ་གང་ངོ་བོ་ཉིད་སྐུ་དབྱིངས་རང་བཞིན་རྣམ་དག་རྒྱ་ཆད་ཕྱོགས་ལྷུང་མེད་པ་སྲིད་ཞི་ཀུན་ཁྱབ་དེའི་ཕུན་སུམ་ཚོགས་པ་ལྔའི་ཞིང་ཁམས་ནི་ཚད་ལས་འདས་ཏེ་སྐུ་གཞན་གང་གིས་ཀྱང་ཚད་གཟུང་ཞིང་བསྐྲུན་དུ་མི་ནུས་པ་དང་མི་དབོགས་པས་བསྐྱེད་དུ་མེད་པ་བརྗོད་པའི་ཐ་སྙད་ཀུན་དང་བྲལ་བའོ། །འཁོར་ནི་ཡེ་ནས་སངས་རྒྱས་ཟིན་པ་ལ་དེ་ཉིད་ཀྱི་བླ་དྭགས་དང་ཡང་བྲལ་བས་སངས་རྒྱས་དང་སེམས་ཅན་གང་གི་ཡང་ཐ་སྙད་ལས་འདས་པའི་རང་སྣང་ཕྱོགས་མེད་མཉམ་པ་ཆེན་པོ འོ། །བསྟན་པ་ནི་ཡེ་ནས་བསམ་དཔྱོད་ཐམས་ཅད་གྲོལ་བས་ཡུལ་དང་ཡུལ་ཅན་མེད་པའི་ངོ་བོ་ཉིད་བློ་ཡིས་བསམ་དུ་མེད་པའོ། །དུས་ནི་དུས་གསུམ་དུ་བཟུང་བ་ཉིད་ཀྱི་ཐ་སྙད་ལས་གྲོལ་བས་དུས་བཞི་ཐམས་ཅད་དུ་མཉམ་པ་ཉིད་དུ་གྱུར་ཏེ་ཚད་ལས་འདས་པའོ། །མཛད་པ་ནི་རིལ་རྒྱལ་བའི་མཛད་སྤྱོད་དུ་གྱུར་པས་མི་མཛད་པ་མེད་དེ་སྐུ་སོ་སོའི་མཛད་པ་ཡང་འདི་ཉིད་ལས་འཆར་བས་ཅིར་ཡང་མཛད་པའོ།།

གཉིས་པ་ཆོས་སྐུའི་ཕུན་སུམ་ཚོགས་པ་ནི།

གང་རྣམ་པར་དག་པ། ཞེས་པ་ནས། ཐམས་ཅད་སྣང་བར་མཛད་པའོ། །ཞེས་པའི་བར་གྱིས་བསྟན་ཏེ།

གང་རྣམ་པར་དག་པ་དེའི་ཞིང་ཁམས་ནི་བདལ་ཁྱབ་ཆེན་པོའོ། །འཁོར་ནི་ཡེ་ཤེས་རྒྱ་མཚོའི་ཚོགས་སོ།།

བསྟན་པ་ནི་བྱ་བ་མེད་པའི་ཆོས་སོ། །དུས་ནི་ཐམས་ཅད་ནས་ཐམས་ཅད་དུའོ།།

མཛད་པ་ནི་ཆོས་ཐམས་ཅད་སྣང་བར་མཛད་པའོ།།

གང་རྣམ་པར་དག་པ་ཆོས་སྐུ་དེའི་ཞིང་ཁམས་ནི་ཆོས་ཉིད་རིལ་ལ་སྣུམ་པས་གདལ་ཁྱབ་ཆེན་པོ་ཀུན་ནས་རྣམ་པར་དག་པའོ། །འཁོར་ནི་དུས་གསུམ་གྱི་སངས་རྒྱས་རིགས་ལྔ་ལ་སོགས་པ་ཡེ་ཤེས་རྒྱ་མཚོའི་ཚོགས་ཆེན་པོ་མངོན་དུ་བྱས་པ་ཇི་སྙེད་པ་རྣམས་སོ། །བསྟན་པ་ནི་བྱ་བ་དང་རྩོལ་བ་བྲལ་བས་ཆོས་ཨ་ཏིའི་དགོངས་པ་སྟོན་པས་བྱས་ཟིན་ཏེ་སླར་བྱེད་པ་མི་དམིགས་པར་གཉིས་སྣང་མེད་པའི་ཆོས་སོ། །དུས་ནི་དུས་གསུམ་ཐམས་ཅད་ནས་ཐམས་ཅད་དུ་མཁྱེན་པའི་ཡེ་ཤེས་རྒྱུན་མ་ཆད་པའོ། །དུས་གསུམ་སྨོས་པས་དུས་ཀྱིས་བསྐལ་ཞེ་ན། ཆོས་སྐུ་དུས་ཐམས་ཅད་པ་34ཡིན་པས་མ་བསྐལ་ལོ། །མཛད་པ་ཕྲིན་ལས་ནི་སྐུ་དང་ཏིང་ངེ་འཛིན་བསྟན་པ་ལ་སོགས་པ་ཆོས་ཇི་སྙེད་པ་ཐམས་ཅད་མི་འགོག་པར་གདུལ་བྱའི་ཡུལ་ལ་སྣང་བར་མཛད་པའོ།།

གསུམ་པ་ལོངས་སྐུའི་ཕུན་སུམ་ཚོགས་པ་ནི།

གང་སྨིན་པ་དེའི་༼༨༡༽ཞེས་པ་ནས། རྣལ་འབྱོར་དམ་པ་ཉིད་དོ། །ཞེས་པའི་བར་གྱིས་བསྟན་ཏེ།

གང་སྨིན་པ་དེའི་ཞིང་ཁམས་ནི་བདེ་བ་ཅན་ནོ། །འཁོར་ནི་ཡོངས་སུ་སྨིན་པ་རྒྱ་མཚོའི་ཚོགས་སོ། །བསྟན་པ་ནི་བརྗོད་དུ་མེད་པའོ། །དུས་ནི་གང་ནམ་གཙང་མ་ནའོ། མཛད་པ་ནི་རྣལ་འབྱོར་དམ་པ་ཉིད་དོ།།

གང་སྨིན་པ་ལོངས་སྤྱོད་རྫོགས་སྐུ་དེའི་ཞིང་ཁམས་ནི་འོག་མིན་ཆེན་པོ་བདེ་བ་ཅན་ནོ། །འཁོར་ནི་ཡོངས་སུ་སྨིན་པ་ས་བཅུ་པའམ་མཐར་ལམ་པ་འབྲས་བུའི་བྱང་ཆུབ་སེམས་དཔའ་རྒྱ་མཚོའི་རྡུལ་སྙེད་ཀྱི་ཚོགས་རྣམས་སོ། །ས་དང་པོ་ཡན་ཆད་ཀྱང་མི་འདོད་པ་ནི་མ་ཡིན་ནོ། །བསྟན་པ་ནི། བརྗོད་པས་མི་འདུལ་བ་དང་དེ་བཞིན་ཉིད་ལ་བརྗོད་དུ་མེད་པས་སྐུ་དང་ཏིང་ངེ་འཛིན་གྱི་དགོངས་པས་དོན་འཇལ་བར་བསྟན་པས་ཚིག་དང་བྲལ་བའོ། །དེ་བཞིན་ཉན་པའང་ཏིང་ངེ་འཛིན་གྱིས་སོ། །དུས་ནི་གང་གནས་གཙང་མ་ཆེན་པོའི་འོག་མིན་དུ་སེམས་དཔའ་རྣམས་ལ་སྟོན་པའི་སྐུར་སྣང་བའི་དུས་ཉིད་ནའོ། །མཛད་པ་ནི་གདུལ་བྱའི་དབང་གི་དུས་ཕྱད་པར་དགོངས་པ་རྣལ་འབྱོར་དམ་པ་མཉམ་པའི་ངང་ལས་མི་གཡོ་བ་ཉིད་དོ།།

བཞི་པ་གསང་བའི་སྐུའི་ཕུན་སུམ་ཚོགས་པ་ནི།

གང་གསང་བ་དེའི། ཞེས་པ་ནས། ཐེ་ཚོམ་གཅོད་པར་མཛད་པའོ། །ཞེས་པའི་བར་གྱིས་བསྟན་ཏེ།

གང་གསང་བ་དེའི་ཞིང་ཁམས་ནི་པདྨ་ཅན་ནོ། །འཁོར་ནི་རྒྱལ་བ་རྒྱ་མཚོའི་ཚོགས་སོ། །བསྟན་པ་ནི་གསང་སྔགས་རྒྱ་མཚོ་ཉིད་དོ། །དུས་ནི་གཙུག་ཏོར་འཁོར་ལོས་སྒྱུར་བ་འདོད་པ་ན་རྒྱལ་བ་ཀུན་གྱི་སྐུ་བསྐྲུན་པར་འབྱོར་བའི་དུས་ཉིད་ནའོ། །མཛད་པ་ནི་སྐྱེས་བུ་དམ་པ་རྣམས་ཀྱི་དགོངས་པ་དམ་པའི་ཐེ་ཚོམ་གཅོད་པར་མཛད་པའོ།།

གང་གསང་བ་མཆོག་གི་སྐུ་དེའི་ཞིང་ཁམས་ནི། པདྨོ་འདབ་མ་བརྒྱད་དང་ལྡན་པས་ཁ་ཁ་མུ་ཁ་བདེ་བ་ཆེན་པོའི་ཕོ་བྲང་སྙིང་པོ་ཟ་མ་ཏོག་ཅན་གྱི་གཞལ་ཡས་ཁང་ཡིན་ནོ། །འཁོར་ནི་སེམས་དང་སེམས་བྱུང་གི་བདུད་ཀྱི་དཔུང་བཅོམ་པའི་ཡེ་ཤེས་ཆེན་པོ་རྩ་གནས་ཀྱི་ཐིག་ལེར་རང་བཞིན་ལྷུན་གྱིས་གྲུབ་པའི་རྒྱལ་བ་རྒྱ་མཚོའི་ཚོགས་ཇི་སྙེད་པ་རྣམས་སོ། །བསྟན་པ་ནི། རང་བཞིན་ལྷན་ཅིག་སྐྱེས་པའི་བདེ་བ་གསང་བ་སྔགས་ཀྱི་རྒྱུད་དོན་རྒྱ་མཚོའི་ཚོགས་ཀྱི་གསང་བཅུད་རྟོགས་པར་དཀའ་བ་ཉིད་གསལ་ཞིང་སྟོན་པར་མཛད་པས་སོ། །དུས་ནི་ཐུན་མོང་གི་བུདྡྷའམ་གཙུག་ཏོར་འཁོར་ལོས་བསྒྱུར་བ་འདོད་པས་གསང་བ་རྡོ་རྗེའི་དབུས་ནས་ཐིག་ལེ་གྱེན་དུ་བསྐྱིལ་བ་ན་ཕུང་ཁམས་རང་བཞིན་གྱིས་ཕྱག་རྒྱར་ལྡང་ནས་རྒྱལ་བ་ཀུན་གྱི་སྐུ་བསྐྲུན་པར་འབྱོར་བའི་དུས་གདམས་པ་ཐོབ་པ་དང་རླུང་གནས་སུ་ཟིན་ཅིང་ལྡོག་པའི་དུས་དང་རང་བཞིན་རྒྱལ་བའི་སྐུ་གསུང་ཐུགས་བསྐྱེད་ཅིང་འབྱུང་བ་ཉིད་ནའོ། །མཛད་པ་ནི་ཐེག་པ་འོག་མ་ལ་གནས་ཀྱང་སྐྱེས་བུ་དམ་པ་གསང་བའི་སྐལ་བ་ཅན་རྣམས་ཀྱི་དགོངས་པ་དམ་པའི་ཐེ་ཚོམ་དབང་གི་སྒོ་ནས་བྱིན་རླབས་ཀྱི་ཤུགས་ཀྱིས་གཅོད་པར་མཛད་ཅིང་གསང་སྔགས་ཀྱི་གདེངས་རྙེད་པར་བྱེད་པའོ།།

ལྔ་པ་སྤྲུལ་སྐུའི་ཕུན་སུམ་ཚོགས་པ་ནི།

གང་རྒྱུན་གྱི། ཞེས་པ་ནས། མུན་པ་སེལ་བར་མཛད་པའོ། །ཞེས་པའི་བར་གྱིས་བསྟན་ཏེ།

གང་རྒྱུན་གྱི་ཞིང་ཁམས་ནི་མོས་པ་ཅན་ནོ། །འཁོར་ནི་མོས་པ་ཐ་དད་པའི་ཚོགས་སོ། །བསྟན་པ་ནི་བསམ་གྱིས་མི་ཁྱབ་པའོ། །དུས་ནི་སྒྲོན་མ་ཡོངས་སུ་བཀོད་པ་ནའོ། །མཛད་པ་ནི་གང་གི་མུན་པ་སེལ་བར་མཛད་པའོ།།

གང་རྒྱུན་གྱི་འདྲེན་པ་སྤྲུལ་པ་སྐུའི་ཞིང་ཁམས་ནི་མི་མཇེད་ཀྱི་འཇིག་རྟེན་ཐ་དད་པར་མོས་པ་༼༨༢༽ཅན་ཏེ་ཆ་གཅིག་གི་དབང་དུ་ཡིན་ནོ། །འཁོར་ནི་མོས་པ་ཐ་དད་པའི་ཚོགས་ཇི་སྙེད་པ་དང་ལྡན་པའི་བྱང་ཆུབ་སེམས་དཔའ་ལ་སོགས་པ་རྣམས་སོ། །བསྟན་པ་ནི། ཚིག་གི་གསུང་མོས་པ་ཐ་དད་ལ་སྣང་བས་བསམ་གྱིས་མི་ཁྱབ་པ་ཇི་སྙེད་པའོ། །དུས་ནི་འཇིག་རྟེན་དུ་སྟོན་པ་སྤྲུལ་པའི་སྐུའི་སྒྲོན་མ་ཡོངས་སུ་བཀོད་པའི་ཞིང་ཁམས་འབྱུང་བ་ཉིད་ནའོ། །མཛད་པ་ནི་འགྲོ་བ་རིགས་དྲུག་པོ་གང་གི་དོན་ལ་མདོངས་པའི་མ་རིག་པའི་མུན་པ་སེལ་བར་མཛད་པའོ།།

གསུམ་པ་ཞབས་ནི།

ལང་ཀའི། ཞེས་པ་ནས། འབའ་ཞིག་སྣང་བའོ། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ་དེ་དག་ཀྱང་སོ་སོར་བལྟ་བར་མི་བྱའོ། །དེ་ཅིའི་ཕྱིར་ཞེ་ན། གང་ངོ་བོ་ཉིད་མེད་པ ་ལས་དེ་ལྟར་སྣང་བར་ཟད་དེ། དེ་ནི་དེ་ཁོ་ན་ཉིད་གསང་བ་དམ་པའི་བྱིན་གྱིས་རླབས་འབའ་ཞིག་སྣང་བའོ།།

ལང་ཀའི་བདག་པོ། དེ་ལྟར་སྐུ་ལྔའི་ཆ་རྐྱེན་ཉི་ཤུ་རྩ་ལྔར་བཤད་ལ་དེ་དག་ཀྱང་གདུལ་བྱའི་བསམ་པས་ཕྱེ་བ་ལས་ངོ་བོ་སོ་སོར་གྱུར་པས་ཐ་དད་དུ་བལྟ་བར་མི་བྱའོ། །ཞེས་གདམས་པར་མཛད་དོ། །དེ་ཉིད་གཏན་ཚིགས་ཅིའི་ཕྱིར་མངོན་ཞེ་ན། གང་ངོ་བོ་ཉིད་ཀྱི་སྐུ་ལྔའི་ངོ་བོ་གང་དུའང་མི་ཟིན་པའི་དབྱིངས་རང་བཞིན་མེད་པའི་སྐུ་དམ་པ་ལས། གདུལ་བྱ་ལ་བྱིན་རླབས་ཀྱི་རྣམ་རོལ་དེ་ལྟར་སྣང་བར་ཟད་དེ། དེ་ཁོ་ན་ཉིད་གསང་སྔགས་གསང་བ་དམ་པའི་ངོ་བོ་ཇི་བཞིན་པའི་བྱིན་གྱིས་བརླབས་ཀྱི་ཡོན་ཏན་འབའ་ཞིག་སྣང་བ་ལ་སེལ་མེད་པའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། ཆད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ་དེ་བས་ན་གསང་བ་དམ་པ་ངོ་བོ་ཉིད་མེད་པ ་དེ་ནི་ཉི་མའི་སྙིང་པོ་ལྟ་བུའོ། །བྱིན་གྱི་རླབས་ལས་སྣང་བ་ནི་ཟེར་དང་འོད་ལྟ་བུར་རིག་པར་བྱའོ་ཞེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་སྐུ་ཡོངས་སུ་རྟོག་པའི་ཐེ་ཚོམ་ཆད་པར་གྱུར་ཏོ།།

ལང་ཀའི་བདག་པོ། དེ་བས་ན་ཚུལ་དེ་ཉིད་དཔེ་ཡིས་གསལ་བར་བསྟན་ན། ཇི་སྐད་དུ། བྱང་ཆུབ་ཀྱི་སེམས་ཉི་མའི་སྙིང་པོ་ལས། ངང་ལ་ཐ་དད་མི་གནས་པས། །སྙིང་པོ་འོད་དང་ཟེར་ཉིད་མཐུན། །ཞེས་པ་ལྟར། གསང་བ་དམ་པ་ངོ་བོ་ཉིད་མེད་པ་དབྱིངས་རང་བཞིན་རྣམ་དག་དེ་ནི། དཔེར་ན་ཉི་མའི་སྙིང་པོ་ལྟ་བུའོ། །དེའི་བྱིན་གྱིས་བརླབ་ལས་སྐུ་བཞིར་སྣང་བ་ནི་དཔེར་ན། ཟེར་དང་འོད་ལྟ་བུར་རིག་པར་བྱའོ། །ཞེས་སྨྲས་པས། ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་ཆེན་པོ་རྣམས་སྐུ་ལ་ཡོངས་སུ་རྟོག་པའི་ཐེ་ཚོམ་ཆད་དེ་དགོངས་པ་གཅིག་དང་དུ་མ་ལས་གྲོལ་བར་གྱུར་ཏོ། །དེའང་ཁམས་གསུམ་གྱི་རྣམ་ཤེས་ལས་ཡེ་ཤེས་ལྔར་སྣང༌། དེའི་དབྱིངས་དང་དབྱིབས་ལས་སྐུ་བཞིར་སྣང༌། དེའི་སྤྲུལ་པའི་བྱིན་རླབས་ལས་ཡི་གེའི་ཚོགས་སུ་སྣང༌། ཡི་གེའི་འཕྲོ་འདུའི་བྱིན་རླབས་ལས་ཚིག་ཚོགས་སུ་སྣང༌། དེ་ལས་བསྟན་པ་རྒྱ་མཚོར་སྣང༌། དེ་བས་ན་གསང་སྔགས་ཀྱི་དོན་མཐོང་བའི་བྱིན་རླབས་ལས་སྣང་ཞེས་བྱའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

སྐུ་ཡོངས་སུ་སྣང་བ་དམ་པ་རྒྱན་བཀོད་པའི་ལེའུ་སྟེ་སུམ་ཅུ་གསུམ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་༼༨༣༽ལས། སྐུ་ལྔའི་རྣམ་པ་ཐ་དད་དུ་ཡོངས་སུ་སྣང་བ་རྨད་དུ་བྱུང་བའི་ཕུན་ཚོགས་དམ་པ་ཡོན་ཏན་གྱི་རྒྱན་བཀོད་པ་རྣམས་གསང་བའི་ངོ་བོ་ཉིད་ལ་དབྱེར་མེད་དུ་ལྡན་པའི་དོན་བསྟན་པའི་ལེའུ་སྟེ་སུམ་ཅུ་རྩ་གསུམ་པ་གསལ་བར་བཀྲོལ་བའོ།། །།

ལེའུ་སོ་བཞི་པ་གསུང་མི་ཟད་པ་རྒྱན་གྱི་འཁོར་ལོ་བཀོད་པ།

༈ གསུམ་པ་གསུང་གི་བྱིན་རླབས་བཤད་པ་ལ་གསུམ་སྟེ། དྲིས་པ་དང༌། དེའི་ལན་བསྟན་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། དེ་སྐད་ཅེས་དྲིས་པ་ལས། ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། དེ་བཞིན་གཤེགས་པའི་གསུང་གི་བྱིན་གྱིས་བརླབས་ལས། ཇི་ལྟར་སྣང་བ་དཔག་པར་བྱ་བའི་ཕྱིར་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་གང་གི་ཐུགས་དང་སྐུའི་བྱིན་རླབས་ལས། སྣང་བ་ཡོངས་སུ་བཀོད་པ་དེ་དག་གི་གསུང་གི་བྱིན་རླབས་ལས་སྣང་བ་ཇི་ལྟར་དཔག་པར་བགྱི། དེ་སྐད་ཅེས་དྲིས་པ་ལས།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། དེ་བཞིན་གཤེགས་པའི་གསུང་གི་བྱིན་གྱི་རླབས་ལས་དགོངས་པའི་དོན་ཇི་ལྟར་སྣང་བ་ཡང་དག་པར་དཔག་པར་བྱ་བའི་ཕྱིར། དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། རྒྱལ་བ་གང་གི་ཐུགས་དང་སྐུའི་བྱིན་རླབས་ལས་སྣང་བ་ཡོངས་སུ་བཀོད་པ་དེ་དག་གི་གསུང་གི་བྱིན་རླབས་ལས་སྣང་བ་ཇི་ལྟར་དཔག་པར་བགྱི། དེ་སྐད་ཅེས་གསུང་རྟོགས་པར་བྱ་བའི་ཐབས་དྲིས་པ་ལས། ཞེས་པའོ།།

གཉིས་པ་དེའི་ལན་བསྟན་པ་ལ་གཉིས་ཏེ། རང་བཞིན་ལ་གསུང་དུ་མེད་པ། གདུལ་བྱ་ལ་གསུང་དུ་མ་འགག་པའོ། །དང་པོ་ནི།

གསང་བ་པའི། ཞེས་པ་ནས། དཔག་པར་རབ་ཏུ་དཀའོ། །ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་སྨྲས་པ། ལངྐའི་ བདག་པོ་ཇི་སྐད་དུ་དྲི་བ་དེ་ནི་འདི་ལྟ་སྟེ། ངོ་བོ་ཉིད་མེད་པ ་གསང་བ་དམ་པ་གསང་བ་དེ་ལ་ནི། ཚིག་དང་སྒྲའི་ཐ་སྙད་མེད་དེ། ཐམས་ཅད་ནས་ཐམས་ཅད་དུ་གསུང་སྐྱེ་བ་མེད་པ་ཁོ་ནའོ། །གལ་ཏེ་གསུང་དེ་དག་དཔག་པར་ནི། གང་ཡོངས་སུ་དག་པའི་སྐྱེས་བུ་དམ་པས་ཀྱང་མི་དཔོགས་ཏེ། གང་གི་ཕྱིར་དེ་དཔོག་པ་ཉིད་ན། ངོ་བོ་ཉིད་ མེད་པ་གསང་བ་དམ་པ་ཉིད་དུ་ངེས་པའི་ཕྱིར། དཔག་པར་རབ་ཏུ་དཀའ་འོ།།

གསང་བ་པའི་བདག ་པོས་ལན་སྨྲས་པ། ལང་ཀའི་ བདག་པོ། ཇི་སྐད་དུ་དྲི་བ་དེ་ནི། འདི་ལྟ་སྟེ། གང་ངོ་བོ་ཉིད་མེད་པ ་གསང་བའི་ཡང་གསང་བ་དམ་པ་ཡང་གསང་མཆོག་ཏུ་གྱུར་པ་དེ་ལ་ནི་བརྗོད་བྱ་རྗོད་བྱེད་དབྱེར་མེད་པ་ཉིད་དུའང་ངོ་བོ་བསྟན་ཞིང་བརྗོད་པ་ལས་འདས་པའི་ཕྱིར་ཚིག་དང་སྒྲའི་ཐ་སྙད་མེད་དེ། སྔར་གྱི་དུས་ཐམས་ཅད་ནས་ཕྱིས་ཀྱི་དུས་ཐམས་ཅད་དུ་གསུངས་པ་དང་བསྟན་དུ་མེད་པ་ངོ་བོ་ཉིད་ཀྱི་གསུང་དམ་པ་ཁོ་ནའོ། །གལ་ཏེ་གསང་བ་དམ་པ་དེ་དག་དཔག་པར་བྱ་བ་ནི། བརྗོད་དུ་ཡོད་ཅིང་རྟོགས་པར་བྱར་ཡོད་པ་མིན་པའི་ཕྱིར། གང་རྒྱུད་ཡོངས་སུ་དག་པའི་རྒྱལ་བར་གྱུར་པའི་སྐྱེས་བུ་དམ་པས་ཀྱང་ངོ་བོ་མི་ཟིན་པ་ལ་དཔག་པར་བྱས་ཀྱང་ཇི་ལྟ་བ་བཞིན་དུ་མི་དཔོགས་ཏེ། གང་གི་ཕྱིར་དེ་དཔོགས་པ་ཉིད་ན་ངོ་བོ་ཉིད་ མེད་པ་གསང་བ་དམ་པ་ཉིད་དུ་ངེས་པའི་ཕྱིར། ཞེས་བསྟན་དཀའ་བའི་གཏན་ཚིགས་དེས་ན། གསང་བདག ་ཆེན་པོ་ངས་ཀྱང་དཔག་པས་རིག་པར་དཀའ་ཞིང་བསྟན་པར་རབ་ཏུ་དཀའོ། །ཞེས་བཀའ་སྩལ་བ་ནི། གསང་བ་ཇི་བཞིན་པའི་དབང་དུའོ།།

གཉིས་པ་གདུལ་བྱ་གསུང་དུ་མ་འགག་པ་ལ་༼༨༤༽གཉིས་ཏེ། གསུང་ལྔ་སྤྱིར་བསྟན་པ། བྱེ་བྲག་ཏུ་སྤྲུལ་པའི་གསུང་རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། བསམ་གྱིས་མི་ཁྱབ་པ་ཞེས་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། འོན་ཀྱང་འདི་ལྟར་རིག་པར་བྱ་སྟེ། གང་ངོ་བོ་ཉིད་མེད་པའི་གསུང་ནི་ནམ་མཁའ་ལྟ་བུའོ། །རྣམ་པར་དག་པའི་གསུང་ནི་ཉི་མའི་སྙིང་པོ་ལྟ་བུའོ། །ཡོངས་སུ་སྨིན་པའི་གསུང་ནི་མེ་ལོང་ལྟ་བུའོ། །གསང་བ་དམ་པའི་གསུང་ནི་སེང་གེ་ལྟ་བུའོ། །རྒྱུན་དུ་འབྱུང་བའི་གསུང་ནི་གསུང་གཅིག་ཡན་ལག་བསམ་གྱིས་མི་ཁྱབ་པར་འབྱུང་བའི་ཕྱིར། བསམ་གྱིས་མི་ཁྱབ་པ་ཞེས་བྱའོ།།

འོ་ན་གཏན་ནས་བསྟན་དུ་མི་བཏུབ་པས་ཐབས་དང་འབྲེལ་བ་ མེད་དོ་བར་དོགས་པ་ལ། ལང་ཀའི་བདག ་པོ། གཞི་དེ་ལྟར་དུ་ངེས་མོད་འོན་ཀྱང་བརྒྱུད་ནས་རྟོགས་པར་བྱ་བའི་ཐབས་མེད་པ་མ་ཡིན་པའི་ཕྱིར་ཚུལ་འདི་ལྟར་སོ་སོར་རིག་པར་བྱ་སྟེ། གང་ཞེ་ན། ངོ་བོ་ཉིད་མེད་པའི་གསུང་ནི་ཐམས་ཅད་དུ་རང་སྣང་བ་ནམ་མཁའ་ལྟ་བུ་བརྗོད་མེད་བརྗོད་པ་ཀུན་འབྱུང་གི་གོ་སྐབས་ཅན་དུ་གྱུར་པའོ། །རྣམ་པར་དག་པའི་ཆོས་སྐུའི་གསུང་ནི། སྒྲིབ་པའི་དྲི་མ་མེད་པར་ཐམས་ཅད་དུ་མ་འགགས་པར་ཁྱབ་ཅིང་གདལ་བའི་ཡེ་ཤེས་རིག་པའི་གསུང་དཔེར་ན་ཉི་མའི་སྙིང་པོ་ལས་འོད་ཟེར་འབྱུང་བ་ལྟ་བུའོ། །ཡོངས་སུ་སྨིན་པ་ལོངས་སྤྱོད་རྫོགས་པའི་གསུང་ནི་ཚིག་ཏུ་མ་བརྗོད་ཀྱང་དགོངས་པའམ་བརྡའི་སྐུས་དབང་བསྐུར་བའི་བྱིན་རླབས་འཁོར་ལ་སྣང་བ་བརྗོད་པ་དང་འདྲ་བའི་ཕྱིར་མེ་ལོང་ལྟ་བུའོ། །དེ་ལྟར་ཡང༌། དཔལ་གསང་བའི་སྙིང་པོ་ལས། དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །མེ་ལོང་བཞིན་དུ་སྐུ་ལ་སྣང༌། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །དངོས་ཀྱི་མདོག་ངན་ཐམས་ཅད་སེལ། །དེ་ནས་ས་བཅུ་རིམ་གྱིས་འབྱུང༌། །ཞེས་པའི་དོན་ཏོ། །གསང་བ་དམ་པའི་གསུང་ནི་བདེ་བ་ཆེན་པོའི་རོས་གང་བས་གསང་སྔགས་རྒྱ་མཚོའི་ཚོགས་ཀྱི་ལྷན་ཅིག་སྐྱེས་པའི་ཡེ་ཤེས་སྐད་ཅིག་ལ་བརྗོད་པ་དང་འདྲ་བར་ཤར་བས་སྒྲིབ་པའི་ཕུང་པོ་རྟོག་ཚོགས་ཇི་སྙེད་པ་ཐམས་ཅད་སྐད་ཅིག་ལ་ཟིལ་གྱིས་གནོན་པ་སེང་གེ་ལྟ་བུའོ། །དེའང་སེང་གེ་ནམ་མཁའི་ངང་ན་རྩལ་སྦྱོངས་ཚེ་གཟུགས་མི་སྣང་ཡང་དྲི་དང་སྒྲས་གླང་པོ་ཆེ་ལ་སོགས་པ་ཀུན་སྐྲག་ཅིང་ཟིལ་གྱིས་གནོན་པ་ལྟར་གསང་བའི་སྐུ་ལྷུམས་ན་བཞུགས་པ་སྐུ་མི་སྣང་ཡང་སྒྲ་སྒྲོགས་ཏེ་མཚོན་པས་ཐེག་པ་འོག་མ་རིལ་བརྒྱལ་བར་འགྱུར་རོ། །རྒྱུན་དུ་འབྱུང་བ་སྤྲུལ་པའི་གསུང་ནི། ཚིག་ཇི་སྙེད་དུ་དངོས་སུ་བཀའ་སྩལ་པའི་གསུང་ཚངས་དབྱངས་ལྟ་བུ་གཅིག་ལའང་ཡན་ལག་བསམ་གྱིས་མི་ཁྱབ་པ་སུམ་བརྒྱ་དང་དྲུག་ཅུ་ལ་སོགས་པར་འབྱུང་བའི་ཕྱིར་བསམ་གྱིས་མི་ཁྱབ་པ་ཞེས་བྱའོ།།

གཉིས་པ་བྱེ་བྲག་ཏུ་སྤྲུལ་པའི་གསུང་རྒྱས་པར་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། གཟུགས་བརྙན་རྣམས་སུ་ཤེས་པར་༼༨༥༽བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་བསམ་གྱིས་མི་ཁྱབ་པ་དེ་དག་ཀྱང་བཞིར་འབྱུང་ཞིང་། བཞིར་སྣང་བ། བཞི་ལས་རྒྱས་པ་ཤེས་པར་བྱའོ། །བཞི་གང་ཞེ་ན། འདི་ལྟ་སྟེ། གསུང་གི་རང་བཞིན་དང་། རྣམ་གྲངས་དང་།

ཡན་ལག་དང་། གཟུགས་བརྙན་རྣམས་སུ་ཤེས་པར་བྱའོ།།

སྤྲུལ་པའི་གསུང་ནི་རྒྱས་པར་བསྟན་པའི་ཕྱིར། ལང་ཀའི་བདག་པོ། གང་སྤྲུལ་པའི་གསུང་བསམ་གྱིས་མི་ཁྱབ་པ་དེ་དག་ཀྱང་དོན་བསྡུ་ན་གསུང་གི་རྣམ་པ་བཞིར་འབྱུང་ཞིང་གདུལ་བྱ་ལའང་བཞིར་སྣང་བ་ཡི་རྩ་བ་བཞི་ལས་སྒྲ་དབྱངས་སྣ་ཚོགས་སུ་སྤྲོས་པའི་ཡན་ལག་རྒྱས་པར་དབྱེ་སྟེ་ཤེས་པར་བྱའོ། །བཞི་གང་ཞེ་ན། འདི་ལྟ་སྟེ། གསུང་གི་རང་བཞིན་བཅུ་དང༌། རྣམ་གྲངས་དྲུག་དང༌། ཡན་ལག་བཅུ་དང༌། གཟུགས་བརྙན་ཡི་གེ་རྣམས་སུ་ཤེས་པར་བྱའོ།།

གཉིས་པ་རྒྱས་པར་བཤད་པ་ལ་བཞི་སྟེ། གསུང་གི་རང་བཞིན། གསུང་གི་རྣམ་གྲངས། གསུང་གི་ཡན་ལག གསུང་གི་གཟུགས་བརྙན་ནོ། །དང་པོ་ནི།

ལང་ཀའི། ཞེས་པ་ནས། ཐམས་ཅད་འདུལ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ལ་རང་བཞིན་གང་ཞེ་ན། འདི་ལྟ་སྟེ། གདངས་སུ་ཆེ་བ་དང་། ཡོངས་སུ་ཁྱབ་པ་དང་། གོ་བར་མྱུར་བ་དང་། ཐེ་ཚོམ་གཅོད་པ་དང་། གཅིག་ལ་གཟིགས་སྙམ་པ་དང་། ཉི་ཚེར་སྟོན་པ་དང་། ཀུན་ནས་འཇུག་པ་དང་། འདུན་པ་སྐྱེད་པ་དང་། ཁྱད་དུ་ཞུགས་པ་དང་། ཐམས་ཅད་འདུལ་བའོ།།

ལང་ཀའི་བདག་པོ། དེ་ལ་རང་བཞིན་གང་ཞེ་ན། རང་བཞིན་བཅུ་དང་ལྡན་པ་འདི་ལྟ་སྟེ། ཆོས་ཀྱི་སྐུས་ཁྱབ་པའི་སྒོ་ནས་ཕྲ་བ་མ་ཡིན་ཏེ་ཐག་རིང་ཡང་འགྲམ་ན་གནས་པ་ལྟ་བུའི་བྱིན་དང་ལྡན་པས་གདངས་སུ་ཆེ་བ་དང༌། སྒྲ་ཇི་སྙེད་པར་ཐ་དད་དུ་སྣང་བའི་སྒོ་ནས་ཡོངས་སུ་ཁྱབ་པ་དང༌། དོན་ཟབ་མོ་སྐད་ཅིག་ལ་གདུལ་བྱའི་རིགས་ལ་སྣང་བར་བྱེད་ཅིང་ཁོང་དུ་ཆུད་པར་སླ་བའི་སྐད་ཀྱི་དབྱངས་དང་ལྡན་པའི་སྒོ་ནས་གོ་བར་མྱུར་བ་དང༌། ཉེ་བར་སྒྲུབས་པའི་སྒོ་ནས་ངེས་པ་རྙེད་པས་འཁོར་གྱི་ཐེ་ཚོམ་གཅོད་པ་དང༌། བྱམས་པའི་སྒོ་ནས་གདུལ་བྱ་གཅིག་གི་བསམ་པ་ལ་ཡང་བདག་ཉིད་གཅིག་པུ་ལ་གཟིགས་སོ་སྙམ་པ་དང༌། ཐུགས་རྗེ་ཆེན་པོའི་སྒོ་ནས་གདུལ་བྱ་རང་རང་ལ་ཕན་པའི་དོན་འབའ་ཞིག་ཉི་ཚེར་སྟོན་པ་དང༌། དེ་ལ་མོས་ཤིང་དགའ་བ་སྐྱེད་པའི་སྒོ་ནས་སྒོ་ཀུན་ནས་འཇུག་པ་དང༌། ཡིད་དུ་འོང་ཞིང་སྙན་པའི་སྒོ་ནས་མོས་པ་སྐྱེད་པའི་ཕྱིར་འདུན་པ་བསྐྱེད་པ་དང༌། ཤེས་པའི་བྱེ་བྲག་མཁྱེན་པའི་སྒོ་ནས་མ་འདྲེས་པར་སྟོན་པས་ལྷ་ཀླུ་སོགས་ཕལ་པ་གཞན་ལས་གསུང་ཁྱད་པར་དུ་གྱུར་པའི་ཚིག་གི་ཡོན་ཏན་ཞུགས་པ་དང༌། ཀུན་གྱི་སྐད་དང་མཐུན་པའི་སྒོ་ནས་ཚིག་གི་ཡོན་ཏན་གྱིས་དོན་རིག་པས་ཐམས་ཅད་འདུལ་བའོ།།

གཉིས་པ་གསུང་གི་རྣམ་གྲངས་ནི།

ལང་ཀའི། ཞེས་པ་ནས། སྒྲ་བརྙན་ལྟ་བུའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། རྣམ་གྲངས་གང་ཞེ་ན། འདི་ལྟ་སྟེ། ཚངས་པ་ལྟ་བུ་དང་། སིལ་སྙན་ལྟ་བུ་དང་། གླུ་གར་ལྟ་བུ་དང་། ཀ་ལ་པིངྐ་ལྟ་བུ་དང་། འབྲུག་དབྱངས་ལྟ་བུ་དང་། སྒྲ་བརྙན་ལྟ་བུའོ།།

ལང་ཀའི་བདག་པོ། རྣམ་གྲངས་དྲུག་བསྟན་པ་གང་ཞེ་ན། གདུལ་བྱའི་དབང་གི་འདི་ལྟ་སྟེ། སྒྲ་རིང་ཐུང་དང་ཕྲ་སྦོམ་དང་གཉིས་ཀའི་ཆ་ལས་སྣང་བའི་ངོ་བོ་དུང་ངེ་བའི་གསུང་ནི། ཚངས་པ་ཆེན་པོའི་དབྱངས་ལྟ་བུ་སྟེ་ལྷ་རྣམས་ཀྱི་ཡིད་འདྲེན་ཞིང་མོས་པར་བྱས་པས་འདུལ་བ་དང༌། ཡང་ན་ལྷའི་རྔ་༼༨༦༽སྒྲར་ཡང་གསུངས། བྲང་ངེ་བ་ནི་རོལ་མོ་སིལ་སྙན་ལྟ་བུ་དང་འདྲ་བར་ལྷ་མ་ཡིན་རྣམས་མོས་ཤིང་འདུལ་བ་དང༌། ཡང་ན་ཐག་བཟང་རིས་ཀྱི་གསེར་གྱི་རྔ་བོ་ཆེའི་སྒྲར་ཡང་གསུངས་སོ། །པང་ཀ་དེའུའི་དབྱངས་ནི། རོལ་མོ་པའི་གླུ་གར་སྙན་པ་ལྟ་བུ་དང་འདྲ་སྟེ། མི་རྣམས་ཀྱི་ཡིད་འཕྲོག་པས་མོས་ཤིང་འདུལ་བ་དང༌། ཅང་ཀ་དེའུ་ཀ་ལ་པིང་ཀའི་སྙན་པའི་སྒྲ་དབྱངས་ལྟ་བུ་དང་འདྲ་བར་བྱོལ་སོང་རྣམས་འདུ་ཤེས་སྐྱེད་དེ་མོས་ཤིང་འདུལ་བ་དང༌། གར་ད་པ་ནི་འབྲུག་གི་སྒྲ་དབྱངས་ལྟ་བུ་དང་མཚུངས་ཏེ་ཡི་དྭགས་རྣམས་ཟས་འབྱུང་བར་ཐོས་པས་མོས་ཤིང་འདུལ་བ་དང༌། མཁའ་ལ་རྒྱུ་བའི་ཡི་དྭགས་ཡིད་ཚིམ་པར་ཡང་གསུངས། ཤ་ཏ་པ་ནི་སྒྲ་བརྙན་ལྟ་བུ་སྟེ། བྱམས་པའི་ཚིག་དང་རྣམ་སྨིན་གྱི་འབོད་གྲོགས་ཀྱིས་དམྱལ་བ་རྣམས་མོས་ཤིང་འདུལ་བའོ།།

གསུམ་པ་གསུང་གི་ཡན་ལག་ནི།

ལང་ཀའི། ཞེས་པ་ནས། ཡན་ལག་ཀུན་རྫོགས་པར་འབྱུང་ངོ་། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། ཡན་ལག་ནི་འདི་ལྟ་སྟེ། འདུ་ཤེས་སྐྱེད་པ་དང་། རྣམ་པར་རིག་པ་དང་། མཉན་པར་འོངས་པ་དང་། མི་མཐུན་པ་མེད་པ་དང་། ཤིན་ཏུ་ཟབ་པ་དང་། རྗེས་སུ་འབྱུང་བ་དང་། གང་གིས་མི་ཚུགས་པ་དང་། རྣ་བར་སྙན་པ་དང་། རྣམ་པར་མ་འཁྲུགས་པ་དང་། ཤིན་ཏུ་གསལ་བ་སྟེ། རྣམ་གྲངས་ཀྱི་སྒོ་རེ་རེ་གང་འབྱུང་བ་དེ་དང་དེར། ཡན་ལག་ཀུན་རྫོགས་པར་འབྱུང་ངོ་།།

ལང་ཀའི་བདག་པོ། བཤད་པའི་རྩ་བ་གཅིག་ལའང་འདི་རྣམས་འཕྲོ་བའི་ཕྱིར་ཡན་ལག་བསྟན་པ་ནི་འདི་ལྟ་སྟེ། བདེ་བ་དང་སྤྲོ་བ་དང་མོས་པ་དང་དགའ་བས་གདུལ་བྱའི་སེམས་འཇུག་པས་འདུ་ཤེས་སྐྱེད་པར་བྱེད་པ་དང༌། དེ་བཞིན་གཤེགས་པ་སྦྲིད་སངས་པ་ལྟ་བུར་རང་རང་གི་དོན་གྱི་རྣམ་པ་སོ་སོར་མ་འདྲེས་པར་རིག་པར་བྱེད་པ་དང༌། གདུལ་བྱས་རང་གིས་འདོད་པའི་དོན་གྲུབ་པར་བྱེད་ཅིང་དགའ་བ་སྐྱེད་པས་མཉན་པར་འོས་པ་དང༌། སྨོན་ལམ་དང་ཐུགས་རྗེའི་སྒོ་ནས་གདུལ་བྱ་སོ་སོའི་བསམ་བློ་དང་མི་མཐུན་པ་མེད་པར་ཉི་ཚེ་བ་ལྟར་སྟོན་པ་དང༌། ཆོས་དབྱིངས་ཐུགས་སུ་ཆུད་པས་གསུང་གི་དོན་ཤིན་ཏུ་དཔག་པར་དཀའ་བས་ཟབ་པ་དང༌། གང་འདོད་པ་སྐོང་བའི་སྒོ་ནས་དེའི་བསམ་པའི་དོན་དང་མི་འགལ་བར་རྗེས་སུ་འབྱུང་བ་དང༌། ཐུན་མོང་གི་དགྲའི་གཉེན་པོ་དང་ཕྱིར་རྒོལ་བའི་མུ་སྟེགས་དང་བདུད་ལ་སོགས་པ་བར་ཆོད་གང་གིས་ཀྱང་མི་ཚུགས་པར་གྱུར་པ་དང༌། གདུལ་བྱའི་ཡིད་དང་འཐད་པར་སྟོན་པས་རྣར་ཞེས་རྣ་བའི་དབང་པོར་སྙན་པ་དང༌། གདུལ་བྱ་ཞེ་སྡང་ཅན་ལ་འདོད་ཆགས་ཀྱི་གཏམ་མ་ཡིན་པ་སོགས་གསུང་གི་དོན་མ་འདྲེས་པར་བྱེ་བྲག་ཕྱེད་དེ་སྟོན་པས་རྣམ་པར་མ་འཁྲུགས་པ་དང༌། དབྱིངས་སུ་གཅིག་པས་མ་སྒྲིབ་པར་ལྡབ་ལྡིབ་ལ་སོགས་པ་སྤངས་པས་ཤིན་ཏུ་གསལ་བ་སྟེ། གོང་གི་རྣམ་གྲངས་ཀྱི་སྒོ་དྲུག་པོ་རེ་རེར་གང་འབྱུང་བ་དེ་དང་དེར་ཡན་ལག་བཅུ་པོ་ཀུན་རྫོགས་པར་འབྱུང་བའི་ཕྱིར་གསུང་ཚངས་པའི་དབྱངས་ཡན་ལག་དྲུག་ཅུར་༼༨༧༽འགྱུར་བར་སྣང་ངོ་།།

བཞི་པ་གསུང་གི་གཟུགས་བརྙན་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་ཡི་གེ་བཤད་པའོ། །དང་པོ་ནི།

ལང་ཀའི། ཞེས་པ་ནས། དེ་ནི་རྐྱེན་ཇི་བཞིན་པའི་ཕྱིར་རོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ལ་གཟུགས་བརྙན་གང་ཞེ་ན། གཟུགས་བརྙན་ནི་ཡི་གེའི་ཚོགས་སུ་སྣང་ལ། ཡི་གེ་ནི་གསང་བ་དམ་པའི་བྱིན་གྱིས་རླབས་ལས་འབྱུང་བར་རིག་པར་བྱའོ། །ལངྐའི་བདག་པོ་གསང་བ་དམ་པའི་བྱིན་གྱིས་རླབས་ནི། ཡི་གེར་མ་ཟད་དེ། ཡི་གེ་ལ་སོགས་པའི་ཆོས་ཐམས་ཅད་མེད་པ་ལས་བྱུང་ཞིང་། བཏགས་པ་ལྟར་ཆགས། གང་ལྟར་བསྒྲུབས་པ་ལྟར་འགྲུབ། གང་དུ་མཐོང་བ་དེ་ལྟར་བལྟས་པ་ལྟར་སྣང་བའི་ཕྱིར། ཡི་གེ་ཡང་མི་དམིགས་པའི་དབྱིངས་ཀྱི་བྱིན་རླབས་ལས། གསུང་གི་གཟུགས་བརྙན་དུ་བྱུང་བར་ཟད་དོ། །ལངྐའི་བདག་པོ་འོན་ཏང་ན། ཆོས་ཐམས་ཅད་རང་བཞིན་གྱིས་སྟོང་སྟེ། ངང་གིས་མ་བཅོས་ཡོངས་ཀྱིས་འོད་གསལ་བས། བཙལ་དུ་མེད་ཅིང་ཡེ་ནས་བྱང་ཆུབ་པ་ལས། གང་བྱང་ཆུབ་དོན་དུ་གཉེར་ཞིང་འབད་པ་ནི་དཀའ་བ་བྱེད་པའོ། །སྨྲས་པ། གསང་བ་པའི་བདག་པོ། འོ་ན་སེམས་ཅན་དང་། སངས་རྒྱས་གཉིས་ཅིའི་ཕྱིར་ཐ་དད། སྨྲས་པ། ལངྐའི་བདག་པོ། དེ་ནི་རྐྱེན་ཇི་བཞིན་པའི་ཕྱིར་རོ།།

ལང་ཀའི་བདག་པོ། དེ་ལ་གསུང་གི་གཟུགས་བརྙན་གང་ཞེ་ན། གཟུགས་བརྙན་ཞེས་པ་ནི་ཡི་གེའི་ཚོགས་སུ་ཤར་བར་སྣང་བ་སྟེ་མཚན་ཉིད་སྒྲ་སྤྱིའི་རྣམ་པ་ལྟ་བུ་ཡིན་ལ། ཡི་གེ་དེ་ཉིད་ནི་གསང་སྔགས་གསང་བ་དམ་པ་ཇི་བཞིན་པའི་བྱིན་གྱིས་བརླབ་ལས་འབྱུང་བར་རིག་ཅིང་ཤེས་པར་བྱའོ། །ཞེས་གདམས་སོ། །འོ་ན་ཇི་ག་དེ་ལྟར་བཤད་པའི་སྤྲུལ་པའི་སྐུའི་གསུང་དུ་བསྟན་ནས། འདིར་གསང་བའི་བྱིན་རླབས་ཡིན་ན་སྤྲུལ་པའི་གསུང་དུ་མི་འགྱུར་བས་སྟོན་པ་ཉིད་ཀྱི་གསུང་གིས་བསལ་བའི་འགལ་བ་ལྟ་བུར་འགྱུར་རོ། །དེ་མིན་པར་ཚིག་འདི་དག་སྤྲུལ་པའི་གསུང་ཡིན་ན་ནི། གསང་སྔགས་ཀྱི་རྒྱུད་སྤྲུལ་པས་གསུངས་པས་མྱ་ངན་འདའ་ཀར་ལུང་བསྟན་པ་སྐད་དུ་གསུངས་པ་དང་། འདིར་གསང་བའི་བྱིན་རླབས་སུ་བསྟན་པའང་འགལ་ལོ་ཞེ་ན། དེ་དག་གི་དོན་ནི་ཐེ་ཚོམ་དུ་གྱུར་པ་མེད་དེ། སྐུ་བཞི་ལས་ཡི་གེ་སྤྲུལ་པའི་གསུང་ཡིན་དུ་ཟིན་ཀྱང༌། སྤྱིར་འདྲ་བ་ཐུན་མོང་གི་དབང་ཙམ་དང༌། སྤྲུལ་པ་ཉིད་ཀྱང་གསང་བ་དམ་པའི་བྱིན་རླབས་ཡིན་པས་གཞིའི་ངོ་བོ་ཉིད་ལ་དགོངས་པའི་ཕྱིར་རང་གི་ཚིག་སྐྱོན་མེད་དོ། །དེ་ལྟའི་ཡི་གེ་སྤྲུལ་པའི་གསུང་དུ་སྨོས་པས་གསང་སྔགས་ཀྱི་ཚུལ་གཞན་མ་ཟད་འདིའི་རྩ་རྒྱུད་མྱ་ངན་ལས་འདའ་ཁར་ལུང་བསྟན་པ་སྐད་དུ་གསུངས་ཀྱང༌། དོན་གྱི་དབང་དུ་འདི་ཉིད་གསང་སྔགས་ནང་གི་རྒྱུད་སྡེ་ཡིན་པས་གསང་བའི་བྱིན་རླབས་དང་ངོ་བོ་གཅིག་པར་འབྲེལ་བས་ཤིན་ཏུ་ངེས་ལ། བཤད་པའི་རྒྱུད་ནི་སྤྲུལ་པས་བཤད་པར་ཡང་མ་བསྟན་པས་གསང་བ་འདིའི་བྱིན་རླབས་དེ་སྐད་ཅིག་ཏུ་གྲགས་པའི་ཕྱིར་སྐྱོན་གཉིས་པའང་མེད་དོ། །ལང་ཀའི་བདག་པོ། གསང་བ་དམ་པའི་བྱིན་རླབས་ནི། ཡི་གེ་འབའ་ཞིག་གམ་ཞེ་ན། དེ་ནི་ཡི་གེར་ཡང་མ་ཟད་དེ། ཡི་གེ་ལ་སོགས་པའི་ཆོས་ཐམས་ཅད་ཀྱི་དངོས་གཞིར་གྱུར་པས་རང་བཞིན་མེད་པ་ལས་ཅིར་ཡང་བྱུང་ཞིང་སྣང་ལ། ཇི་ལྟར་བཏགས་པ་ལྟར་ཆགས། གང་ལྟར་བསྒྲུབ་པ་ལྟར་འགྲུབ། གང་དུ་མཐོང་བ་དེ་ལྟར་བརྟགས་ཤིང་བལྟས་པར་སྣང་བཏུབ་པའི་ཕྱིར། ཅིའང་མ་ཡིན་པ་བརྗོད་མེད་འཛིན་བྲལ་ནི་རྒྱལ་བའི་གསུང་ཆེན་པོ་སྟེ། དེ་ཉིད་ལ་བཤད་པ་ལྟར་ཡི་གེ་ལ་སོགས་པ་ཡང་མི་དམིགས་པའི་དབྱིངས་ཀྱི་བྱིན་གྱིས་བརླབས་དང་གཅིག་དང་དུ་མ་བྲལ་བའི་༼༨༨༽ཚུལ་གྱིས་རྫོགས་པ་ལས་སྣང་བའི་ཕྱིར་ཡི་གེ་ཡང་གསུང་གི་གཟུགས་བརྙན་དུ་འབྱུང་བར་ཟད་དོ། །ཞེས་བསྙད་ལ། ལང་ཀའི་བདག་པོ། འོན་ཏང་ན། སྣང་བ་འབའ་ཞིག་ལ་འཆེལ་བར་མི་འགྱུར་རམ་ཞེ་ན། ཆོས་རྣམས་ཀྱི་ཆོས་ཉིད་ངོ་བོ་ཉིད་མེད་པས་འཁོར་འདས་ཀྱི་ཆོས་ཐམས་ཅད་ཀྱང་རང་བཞིན་གྱི་གཏན་ཚིགས་ཀྱིས་ཡེ་སྟོང་གཞི་མེད་རྩ་བྲལ་དུ་མངོན་པར་གྲུབ་སྟེ། དེ་བས་ན་བྱེད་པ་པོས་མ་བྱས་པས་ངང་གིས་མ་བཅོས་མཐས་མ་སྒྲིབ་པར་ཡོང་གིས་འོད་གསལ་བས་གཞན་ནས་བཙལ་དུ་མེད་ཅིང་ཡེ་ནས་སྙིང་པོ་བྱང་ཆུབ་ཏུ་ལྷུན་གྱིས་གྲུབ་པར་གནས་པ་ལས་འཕྲལ་དུ་ལམ་གྱིས་བཅོས་པ་མ་ཡིན་པས་ན། གདུལ་བྱ་གང་དེ་ལྟ་བུའི་བྱང་ཆུབ་ཆེན་པོ་དོན་དུ་གཉེར་ཞིང་འབད་རྩོལ་གྱིས་སྒྲུབས་པ་ནི་དཀའ་བ་བྱེད་པ་ཚི་ཆད་པའི་ནད་དུ་གྱུར་པའོ། །ཐམས་ཅད་གཅིག་ན་ཐ་དད་པར་སྣང་བ་འགལ་བར་བསྟན་པའི་ཕྱིར། ཡང་ལང་ཀས་སྨྲས་པ། གསང་བ་པའི་བདག་པོ། ཞེས་བོས་ནས། ལན་གཞན་ལ་བརྟེན་པའི་མ་རངས་པ་སེལ་བའི་དོགས་པ་ཆེད་དུ་དྲིས་པ་སྟེ། འོ་ན་དེ་ལྟར་རིལ་གཉིས་མེད་ཡིན་དུ་ཟིན་ན། འགྲོ་བ་སེམས་ཅན་དང་རྒྱལ་བ་སངས་རྒྱས་གཉིས་ཅིའི་ཕྱིར་ཐ་དད་དེ་བདེ་སྡུག་སོ་སོར་འབྱུང་བ་ལགས། ལན་སྨྲས་པ། ལང་ཀའི་ བདག་པོ། དེ་ནི་ངོ་བོ་དབྱེར་མེད་ཡིན་ན་ཡང༌། ལོག་པ ་དང་ཡང་དག་པའི་རྐྱེན་ཇི་བཞིན་པས་བསྒྱུར་བའི་ཕྱིར་རོ། །ཞེས་ལན་བཏབ་པའོ། །འོན་ཀྱང་དེ་གཉིས་ལྡོག་པ་ཐ་དད་ཡོད་དུ་ཟད་ཀྱི་ངོ་བོ་བཀོལ་བ་མེད་དོ།།

གཉིས་པ་བྱེ་བྲག་ཏུ་ཡི་གེ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། གཟུགས་བརྙན་གྱི་སྤྲུལ་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་བས་ན། འདི་ལྟ་སྟེ། གཟུགས་བརྙན་གྱི་རྒྱུ་དང་། གཟུགས་བརྙན་འབྱུང་བའི་སྒོ་དང་། གཟུགས་བརྙན་གྱི་གཟུངས་དང་། གཟུགས་བརྙན་གྱི་དམ་ཚིག་དང་། གཟུགས་བརྙན་གྱི་སྤྲུལ་པའོ།།

ལང་ཀའི་བདག་པོ། ཞེས་བོས་ནས། དེ་བས་ན་འདི་ལྟ་སྟེ། ཞེས་གོང་མའི་ཚུལ་ལ་སྙེགས་པ་ནི། རྐྱེན་ཇི་བཞིན་གྱིས་བསླད་པའི་ཕྱིར་འགྲོ་བ་རྣམས་ལ་གཟུགས་བརྙན་གྱིས་དོན་བྱ་དགོས་པའི་དབྱེ་བ་བརྗོད་པས་དགོས་ཆེད་དུ་འགྱུར་བ་དང༌། གཞི་གཅིག་ལས་རྐྱེན་གྱིས་གཉིས་སུ་སྣང་དུ་བཏུབ་པའི་ཕྱིར་མི་དམིགས་པ་ལས་གཟུགས་བརྙན་སྣང་དུ་བཏུབ་པའི་དོན་དཔེར་སྦྱར་བ་གཉིས་ཐུན་མོང་དུ་འགྱུར་རོ། །དེའང་གཟུགས་བརྙན་གྱི་གྲངས་ལྔས་ཉེ་སྟོན་ཏེ། གཟུགས་བརྙན་གྱི་ཡི་གེའི་རྒྱུ་དང༌། གཟུགས་བརྙན་འབྱུང་བའི་སྒོ་དབུགས་དང་ཁ་ལྕེ་སོགས་དང༌། གཟུགས་བརྙན་གྱི་གཟུངས་ཡི་གེ་དང་དོན་དབྱེར་མེད་དང༌། མ་སྐྱེས་པའི་གཟུགས་བརྙན་གྱི་ཡི་གེ་ཨར་བྱུང་ཨ་ཡང་དེ་༼༨༩༽ལས་མི་འདའ་བའི་དམ་ཚིག་དང༌། གཟུགས་བརྙན་གྱི་སྤྲུལ་པ་ཨ་དང་ཀ་ལ་སོགས་པ་རྣམས་བསྟན་པའོ།།

གཉིས་པ་རྒྱས་པར་བཤད་པ་ལ་ལྔ་སྟེ། གཟུགས་བརྙན་གྱི་རྒྱུ། གཟུགས་བརྙན་འབྱུང་བའི་སྒོ། གཟུགས་བརྙན་གྱི་གཟུངས། གཟུགས་བརྙན་གྱི་དམ་ཚིག གཟུགས་བརྙན་གྱི་སྤྲུལ་པའོ། །དང་པོ་ནི།

ལང་ཀའི། ཞེས་པ་ན། ཅི་ཡང་ མེད་པ་ལས་ཅི་ཡང་འབྱུང་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ་དེ་ལ་གཟུགས་བརྙན་གྱི་རྒྱུ་ནི་དང་བ་དང་མི་དམིགས་པ་སྟེ།

ཅི་ཡང་ མེད་པ་ལས་ཅི་ཡང་འབྱུང་བའོ།།

ལང་ཀའི་བདག ་པོ། དེ་ལ་གཟུགས་བརྙན་གྱི་རྒྱུ་བསྟན་པ་ནི་གང་ཞེ་ན། ཇི་བཞིན་པ་གསང་བ་དམ་པའི་ངང་ལ་རིལ་མ་འདྲེས་པར་གསལ་བས་ཡེ་ཤེས་དྭངས་པ་དང་མཐའ་ཐམས་ཅད་དང་བྲལ་བས་ངོ་བོ་མེད་པའི་དབྱིངས་མི་དམིགས་པ་སྟེ། ཅིའི་ཕྱིར་ཞེ་ན། རང་གི་ངོ་བོ་འདི་འདྲར་མི་དམིགས་པས་ཅི་ཡང་མེད་པ་ལས་ཡི་གེ་སྣ་ཚོགས་ཅིར་ཡང་འབྱུང་ཞིང་འཆར་བའོ།།

གཉིས་པ་གཟུགས་བརྙན་འབྱུང་བའི་སྒོ་ལ་གཉིས་ཏེ། འབྱུང་བའི་སྒོ་དངོས་བསྟན་པ། དེས་ཇི་ལྟར་མཚོན་པའི་ཚུལ་བཤད་པའོ། །དང་པོ་ནི།

ལང་ཀའི་ཞེས་པ་ནས། ཅིར་ཡང་རིག་པར་བྱེད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཟུགས་བརྙན་འབྱུང་བའི་སྒོ་ནི། གང་དུ་གཉིས་འདུས་པ་སྟེ།

ཅི་ཡང་ མེད་པ་ལས་ཅི་ཡང་རིག་པར་བྱེད་པའོ།།

ལང་ཀའི་བདག ་པོ། གཟུགས་བརྙན་འབྱུང་ཞིང་ཡི་གེ་འཆར་བའི་སྒོ་ནི། གང་དུ་རྒྱུ་རྐྱེན་གཉིས་འདུས་པ་སྟེ། དཔེར་ན་བཞིན་དང་མེ་ལོང་ལ་གཟུགས་བརྙན་སྣང་བ་ལྟར་དབུགས་དང་ཁ་ལྕེ་ལས་ཡི་གེ་འབྱུང་བས་ན། ངོ་བོ་ཅི་ཡང་མེད་པ་ལས་ཡི་གེར་ཤར་བས་བྱེད་ལས་ཀྱིས་ཤེས་བྱ་ཅིར་ཡང་རིག་ཅིང་ཤེས་པར་བྱེད་པའོ། །དེའང་འོག་ཏུ་བྱུང་ཚུལ་དང་ལས་སྟོན་པ་སོགས་ལས་འཆད་པར་འགྱུར་རོ།།

གཉིས་པ་དེས་ཇི་ལྟར་མཚོན་པའི་ཚུལ་བཤད་པ་ནི།

ལང་ཀའི། ཞེས་པ་ནས། དེ་ལས་བྱུང་བས་དེ་ཉིད་དེ་ནི་འདི་ཁོ་ནའོ་ཞེས་བསྟན་པར་མི་ནུས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཟུགས་བརྙན་གྱིས་གང་མཚོན་པར་བྱེད་མོད་ཀྱི། གཟུགས་བརྙན་ལས་དངོས་གཞི་འབྱུང་བ་ཡང་མ་ཡིན། མི་འབྱུང་བ་ཡང་མ་ཡིན། སྣང་བ་ཡང་མ་ཡིན། མི་སྣང་བ་ཡང་མ་ཡིན། ཁྱབ་པ་ཡང་མ་ཡིན། མ་ཁྱབ་པ་ཡང་མ་ཡིན། དཔེར་ན་ནམ་མཁའི་སྒྲ་བསྒྲགས་པར་ནི་ཀུན་གྱིས་ནུས་མོད་ཀྱིས། ནམ་མཁའ་གང་ཞེ་ན། འདི་ཁོ་ནའོ་ཞེས་ནི་གང་གིས་ཀྱང་བསྟན་པར་མི་ནུས་སོ། །ལངྐའི་བདག་པོ་དེ་བཞིན་དུ་གཟུགས་བརྙན་གྱིས་ཀྱང་དངོས་གཞི་མཚོན་པར་ནུས་ཀྱི། འདི་ཁོ་ནའོ་ཞེས་བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། གཟུགས་བརྙན་ནི་དངོས་གཞི་ལས་བྱུང་བས་མཚོན་པར་ཡང་ནུས་ལ། གཟུགས་བརྙན་ཡིན་པའི་ཕྱིར། གང་གི་སྤྱོད་ཡུལ་དུ་ཡང་འགྱུར་བ་ཡིན་ལ་དངོས་གཞི་ནི་གང་གིས་ཀྱང་སྤྱོད་ཡུལ་དུ་མ་གྱུར་པས། འདིའོ་ཞེས་བསྟན་པར་མི་ནུས་སོ། །དེ་བས་ན་སངས་རྒྱས་ཀུན་གྱི་དགོངས་པ་གསང་བ་དེ་ནི། སངས་རྒྱས་འཇིག་རྟེན་དུ་བྱུང་ཡང་རུང་མ་བྱུང་ཡང་རུང་། སེམས་ཅན་རྣམས་སངས་རྒྱས་ཀྱང་རུང་མ་རྒྱས་ཀྱང་རུང་། ཐམས་ཅད་ཀྱི་རང་བཞིན་དུ་ཡེ་ནས་གནས་ཤིང་ཐམས་ཅད་ལ་ཁྱབ་ཀྱང་ཐམས་ཅད་ཀྱིས་མཐོང་བ་ནི་མ་ཡིན་ནོ། །དེ་ལས་བྱུང་བ་ཐམས་ཅད་ནི་ཤེས་པར་ཡང་རུང་ལ། དེས་དེ་ཉིད་མཚོན་པར་ཡང་རུང་ན། དེ་ལས་བྱུང་བས་དེ་ཉིད་

དེ་ནི་འདི་ཁོ་ནའོ། །ཞེས་བསྟན་པར་ནི་མི་ནུས་སོ།།

ལང་ཀའི་བདག་པོ། ཡི་གེ་དོན་གྱི་ངོ་བོ་མ་ཡིན་ཀྱང་དོན་མཚོན་ནུས་པ་དང་གཅིག་ཐ་དད་ལས་གྲོལ་བའི་ཚུལ་བསྟན་ཏེ། ཡི་གེའི་གཟུགས་བརྙན་གྱིས་གང་དོན་གྱི་དངོས་གཞི་མཚོན་པར་བྱེད་མོད་ཀྱི། གཟུགས་བརྙན་དེ་ཉིད་ལས་དོན་གྱི་དངོས་གཞི་འབྱུང་བ་ཡང་མ་ཡིན་ཏེ། སྒྲ་རང་ཐད་དེ་ཉིད་ཡེ་ནས་དོན་མ་ཡིན་པའི་ཕྱིར་དང༌། མི་འབྱུང་བ་ཡང་མ་ཡིན་ཏེ། ལོགས་ན་མེད་པར་མཚོན་ནུས་པའི་ཕྱིར་དང༌། དེ་བཞིན་དུ་ཡི་གེ་ལས་དོན་སྣང་བ་ཡང་མ་ཡིན་ཏེ་ཚིག་གིས་མི་ཕེབས་པའི་ཕྱིར་དང༌། མི་སྣང་བ་ཡང་མ་ཡིན་ཏེ། ལུང་ཚད་མར་ངེས་པས་བརྒྱུད་ནས་འཇལ་བར་བྱེད་པའི་ཕྱིར་དང༌། དེ་བཞིན་དུ་དོན་གྱི་ངོ་བོ་ཉིད་ལ་ཡི་གེས་ཁྱབ་པ་ཡང་མ་ཡིན་ཏེ། ཡི་གེའི་སྒྲ་ཙམ་གྱི་ཐོག་ཏུ་ཕེབས་༼༩༠༽པ་མེད་པའི་ཕྱིར་དང༌། ཡི་གེ་ལས་དོན་གྱིས་མ་ཁྱབ་པའམ་མ་བསྣུམས་པ་ཡང་མ་ཡིན་ཏེ། དོན་ལས་ཡི་གེ་གཞན་དུ་མ་ཡིན་པའི་ཕྱིར་རོ། །དཔེར་ན་ནམ་མཁའི་ཁམས་ལས་སྒྲ་བསྒྲགས་པར་ཀུན་གྱིས་ནུས་མོད་ཀྱི། ནམ་མཁའ་གང་ཞེ་ན། འདི་ཁོ་ནའོ་ཞེས་ནི་གང་གིས་ཀྱང་བསྟན་པར་མི་ནུས་སོ། །ལང་ཀའི་བདག་པོ། དེ་བཞིན་དུ་ཡི་གེའི་གཟུགས་བརྙན་གྱིས་ཀྱང་དེ་དང་འབྲེལ་བའི་ཕྱིར་དངོས་གཞི་ཕྱོགས་ཙམ་མཚོན་པར་ནུས་མོད་ཀྱི། ངོ་བོ་འདི་ཁོ་ནའོ་ཞེས་ངེས་པར་གཟུང་སྟེ་བསྟན་པར་མི་ནུས་སོ། །དེ་གཏན་ཚིགས་ཅིའི་ཕྱིར་བརྗོད་པར་མཛད་ཅེ་ན། གཟུགས་བརྙན་ཡི་གེའི་སྒྲ་ནི་དངོས་གཞི་ལས་འབྲེལ་བར་བྱུང་བས་ཕྱོགས་ཙམ་མཚོན་པར་ཡང་ནུས་པའི་གཏན་ཚིགས་གྲུབ་ལ། དེས་ན་གཟུགས་བརྙན་ཡིན་པའི་ཕྱིར་གང་དངོས་གཞི་གཞལ་བ་དག་གི་སྤྱོད་ཡུལ་དུ་ཡང་དངོས་སུ་གྱུར་པ་ལྟར་ཡོད་པ་ཡིན་པས་དོན་མཚོན་ཞིང་བསྟན་དུ་བཏུབ་པར་ཡང་ངེས་ལ། འོན་ཀྱང་དངོས་གཞི་དོན་རང་གི་ངོ་བོ་ནི་གང་གིས་ཀྱང་སྤྱོད་ཡུལ་དུ་མ་གྱུར་པས་བརྟགས་པར་རབ་ཏུ་དཀའ་བའི་ཕྱིར་འདི་ཁོ་ནའོ་ཞེས་བརྗོད་དུ་མི་བཏུབ་སྟེ་ཐ་མ་བསྟན་པར་མི་ནུས་པའི་གཏན་ཚིགས་སོ། །དེ་བས་ན་སངས་རྒྱས་ཀུན་གྱི་དགོངས་པ་གསང་བ་དམ་པ་དེ་ནི་མངོན་པར་མཚོན་ཏུ་མི་བཏུབ་པའི་ཚུལ་གྱིས། སངས་རྒྱས་རྣམས་འཇིག་རྟེན་དུ་བྱུང་ཡང་རུང་མ་བྱུང་ཡང་རུང༌། སེམས་ཅན་རྣམས་སངས་རྒྱས་ཀྱང་རུང་མ་རྒྱས་ཀྱང་རུང་སྟེ་ཆོས་ཐམས་ཅད་ཀྱི་རང་བཞིན་དུ་ཡེ་ནས་གནས་ཤིང་ཐམས་ཅད་ལ་རང་ཁྱབ་ཏུ་ཡོད་ཀྱང༌། མཚོན་རྣོན་པོ་རང་གིས་རང་མི་ཆོད་པ་ལྟར། ཐམས་ཅད་ཀྱིས་རང་གིས་རང་ངོ་མཐོང་ཞིང་རྟོགས་པ་ནི་མ་ཡིན་ནོ། །དེ་ལས་བྱུང་བ་ཡི་གེ་ཐམས་ཅད་ནི་རྟོགས་ཤིང་ཤེས་པར་ཡང་རུང་ལ། ཡི་གེ་དེས་དོན་དེ་ཉིད་མཚོན་པར་ཡང་རུང་ཞིང་ནུས་ན་ཡང༌། དེ་ལས་བྱུང་བ་ཡི་གེའི་ཚོགས་ཀྱི་རྣམ་གྲངས་བརྗོད་པས་དེ་ཁོ་ན་ཉིད་དངོས་གཞི་གསང་བ་དམ་པའི་ཆོས་ཉིད་དེ་ནི་ངོ་བོ་ངེས་པར་འདི་ཁོ་ནའོ་ཞེས་ཐོག་ཏུ་བབ་སྟེ་བསྟན་པར་མི་ནུས་ཏེ། ངོ་བོ་བརྗོད་པར་དང་བྲལ་ལ་བརྗོད་པ་ཐམས་ཅད་མཐའ་ཡིན་པའི་ཕྱིར། གཏན་ཚིགས་ཀྱིས་གྲུབ་པར་ངེས་སོ།།

གསུམ་པ་གཟུགས་བརྙན་གྱི་གཟུངས༌ལ་བཞི་སྟེ། ངོ་བོ་བཤད་པ། རྣམ་གྲངས་བསྟན་པ། གཟུགས་བརྙན་དང་དངོས་གཉིས་ཀའི་གཟུངས་བཤད་པ། ངེས་ཚིག་བསྟན་པའོ། །དང་པོ་ལ་གཉིས་ཏེ། དོན་བསྟན་པ། མཚོན་དཔེ་བཤད་པའོ། །དང་པོ་ནི།

ལང་ཀའི། ཞེས་པ་ནས་༼༩༡༽དངོས་གཞི་དང་གཟུགས་བརྙན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། གཟུགས་བརྙན་གྱི་གཟུངས་ནི། ཅི་ཡང་མེད་ཅིང་མ་མཐོང་བ་དེ་ཉིད་ཅི་ཡང་འབྱུང་ཞིང་། ཅི་གང་དང་ཡང་མ་བྲལ་བ་སྟེ། འདི་ལྟ་སྟེ། གཟུགས་བརྙན་གང་ཡིན་པ་དེ་ནི་དངོས་གཞིའོ། །དངོས་གཞི་གང་ཡིན་པ་དེ་ནི་གཟུགས་བརྙན་ནོ། །དངོས་གཞི་དང་གཟུགས་བརྙན་གང་ཡིན་པ་དེ་ནི་གསང་བ་དམ་པའི་དབྱིངས་སོ། །གསང་བ་དམ་པ་གང་ཡིན་པ་དེ་ནི། དངོས་གཞི་དང་གཟུགས་བརྙན་ནོ།།

ལང་ཀའི་བདག་པོ། གཟུགས་བརྙན་གྱི་ཡི་གེའི་གཟུངས་ནི། དངོས་པོ་རང་རྒྱུད་པར་མ་གྲུབ་པས་ཅི་ཡང་མེད་ཅིང་བརྟགས་སུ་མེད་པས་མ་མཐོང་བ་དེ་ཉིད་ཁོ་ན་ལས། ཡི་གེའི་སྒྲ་ཚིག་སྣ་ཚོགས་ཅི་ཡང་མི་འགོག་པར་འབྱུང་ཞིང་སྣང་ལ་གང་ཡང་མ་བཀོལ་བས་ཀུན་དང་ཡང་མ་བྲལ་བའི་གཉིས་སུ་མེད་པ་སྟེ་ཀུན་བྲལ་ཅི་མ་སྤངས་པའི་དངོས་དོན་དེ་ཉིད་དོ། །དེ་ཉེ་བར་བསྟན་པ་ནི་འདི་ལྟ་སྟེ། གཟུགས་བརྙན་གྱི་ཡི་གེ་གང་ཡིན་པ་དེ་ནི་ཡི་གེ་དང་དོན་དབྱེར་མེད་པས་དངོས་གཞིའོ། །ཆོས་ཉིད་དབྱེར་མེད་ཀྱི་ཇི་བཞིན་པ་གསང་བའི་དངོས་གཞི་གང་ཡིན་པ་དེ་ནི་ཡི་གེའི་གཟུགས་བརྙན་ནོ། །དེ་ལྟར་དངོས་གཞི་གསང་སྔགས་ཀྱི་དོན་དང་གཟུགས་བརྙན་གྱི་ཡི་གེ་དབྱེར་མེད་པ་གང་ཡིན་པ་དེ་ཉིད་ནི་རང་རིག་པ་བྱང་ཆུབ་ཀྱི་སྙིང་པོ་གསང་བ་དམ་པའི་དབྱིངས་སོ། །གསང་སྔགས་གསང་བ་དམ་པ་སྙིང་པོ་བྱང་ཆུབ་དོན་དང་ཡི་གེ་སོ་སོར་མེད་ཅིང་མི་འབྲལ་བའི་གཟུངས་གང་ཡིན་པ་དེ་ནི་དངོས་གཞི་དང་གཟུགས་བརྙན་གཉིས་ཀ་ཡིན་ནོ།།

གཉིས་པ་མཚོན་དཔེ་བཤད་པ་ནི།

འོན་ཏང་གསང་བ། ཞེས་པ་ནས། དེ་ཁོ་ན་ཉིད་དེ་ནི་གཟུངས་སོ། །ཞེས་པའི་བར་གྱིས་བསྟན་ཏེ།

འོན་ཏང་ན་གསང་བ་དམ་པ་ནི་རྒྱ་མཚོ་དང་འདྲ་ལ། བྱིན་གྱིས་རླབས་ལས་བྱུང་བ་ཐམས་ཅད་ནི་རླབས་དང་འདྲ་སྟེ། འདི་གཉིས་ལ་གཉིས་སུ་མེད་པ། གཉིས་ཀྱི་མཐའ་ལས་གྲོལ་བ། དབུ་མར་ཡང་མི་དམིགས་པ། ཡོངས་སུ་མི་འགྱུར་བར་གཟིགས་པ་སྟེ། དེ་ཁོ་ཉིད་དེ་ནི་གཟུངས་སོ།།

འོན་ཏང་དཔེར་མཚོན་ན། རྒྱ་མཚོ་ཆུ་ཡི་རི་མོ་ལྟར། །སྣ་ཚོགས་སྣང་ཡང་གཞན་འབྱུང་མིན། །ཞེས་པ་ལྟར་གསང་བ་དམ་པ་ནི་དཔེ་རྒྱ་མཚོ་དང་འདྲ་ལ། བྱིན་གྱིས་བརླབས་ལས་བྱུང་བ་ཡི་གེ་ལ་སོགས་པ་ཐམས་ཅད་ནི་རྦ་རླབས་དང་འདྲ་སྟེ། དོན་དང་གཟུགས་བརྙན་འདི་གཉིས་ལ་གདོད་ནས་སོ་སོ་བ་མ་གྲུབ་པས་གཉིས་སུ་དབྱེ་བ་མེད་པ། སོ་སོར་བགྲངས་པའི་གཉིས་ཀྱི་མཐའ་ལས་གྲོལ་བ། དབུ་མ་ཞེས་སུ་འཇོག་པའི་དབུས་ཀྱི་ཐ་སྙད་ཙམ་ཡང་མི་དམིགས་ཤིང་གཟུང་དུ་མེད་པ། གཉེན་པོས་ཡོངས་སུ་མི་ཤིགས་པས་མི་འགྱུར་བར་གནས་པའི་ངོ་བོ་དམ་པར་རྒྱལ་བ་རྣམས་ཀྱིས་གཟིགས་པ་སྟེ། དོན་མ་ནོར་བར་ངེས་པར་གཟུང་བ་དེའི་ཕྱིར་དེ་ཁོན་ཉིད་དེ་ནི་གཟུངས་ཀྱི་ངོ་བོ་དང་དེའི་གཏན་ཚིགས་སོ། །དེ་ནི་གཟུངས་དང་པོའོ།།

གཉིས་པ་རྣམ་གྲངས་བསྟན་པ་ནི།

དེ་བཞིན་དུ། ཅིས་ཀྱང༌། ཞེས་པ་ནས། གསང་སྔགས་ཀྱི་གཟུངས་སོ། །ཞེས་པའི་བར་གྱིས་བསྟན་ཏེ།

དེ་བཞིན་དུ་ཅིས་ཀྱང་མི་ཕྱེད་མི་ཤིགས་པ་དང་། གང་དུ་ཡང་མི་དམིགས་པ། མཉམ་པ་ཉིད་དང་། མི་འགྱུར་བ་ཉིད་དང་། ནམ་མཁའི་རང་བཞིན་དང་། མིང་དང། ཚིག་དང་། དོན་དང་། གསང་སྔགས་ཀྱི་གཟུངས་སོ།།

གཟུངས་ཀྱི་ངོ་བོ་དེ་བཞིན་དུ། ཡི་གེ་དང་དོན་གསང་བ་དམ་པ་ཉིད་ཡེ་ནས་མ་བཅོས་པའི་ཆོས་ཉིད་དུ་གཅིག་པས་ཅིས་ཀྱང་མི་ཕྱེད་ཅིང་འཕོ་འགྱུར་མེད་པས་གཉེན་པོས་མི་ཤིགས་པ་དང༌། མཐའ་གང་དུའང་མི་ཟིན་པས་མི་དམིགས་པ་དང༌། བཟང་ངན་གཉིས་སུ་མེད་པས་མཉམ་པ་༼༩༢༽ཉིད་དང༌། ངོ་བོ་མི་རླག་པས་མི་འགྱུར་བ་ཉིད་དང༌། སྟོང་ལ་མཐའ་མེད་ཅིང་གསལ་བས་ནམ་མཁའི་རང་བཞིན་དང༌། བཏགས་པ་མིང་དང༌། སྒྲ་ཡི་ཚིག་དང༌། དེའི་གཞི་ཡི་གེ་དང༌། མཚོན་བྱ་དོན་དང༌། སྤྱོད་ཡུལ་མ་ཡིན་པས་གསང་སྔགས་གསང་བ་དམ་པར་གྱུར་པ་ཉིད་ཀྱི་ཕྱིར་གཉིས་པ་གཟུངས་ཀྱི་རྣམ་གྲངས་སོ།།

གསུམ་པ་གཟུགས་བརྙན་དང་དངོས་གཉིས་ཀའི་གཟུངས་བཤད་པ་ནི།

འོན་ཏང་ན། ཞེས་པ་ནས། དེ་ནི་དེ་གཉིས་ཀྱི་གཟུངས་སོ། །ཞེས་པའི་བར་གྱིས་བསྟན་ཏེ།

འོན་ཏང་ན་གཟུགས་བརྙན་གྱི་རང་བཞིན་ཡང་མི་དམིགས་པའི་དབྱིངས་ལ། དངོས་གཞིའི་རང་བཞིན་ཡང་མི་དམིགས་པའི་དབྱིངས་ཁོ་ན་བས། དེ་ནི་དེ་གཉིས་ཀྱི་གཟུངས་སོ།།

འོན་ཏང་ན། གཟུགས་བརྙན་གྱི་རང་བཞིན་ཡང་མི་དམིགས་པའི་དབྱིངས་ཡིན་ལ། དངོས་གཞིའི་དོན་གྱི་རང་བཞིན་ཡང་མི་དམིགས་པའི་དབྱིངས་ཁོ་ན་བས། ཡི་གེ་དང་དོན་གྱི་མཚན་ཉིད་གཉིས་ཀ་མི་དམིགས་པའི་ཆོས་ཉིད་དུ་གཅིག་པ་དེ་ནི་དངོས་གཞི་དང་གཟུགས་བརྙན་དེ་གཉིས་ཀྱི་གཟུངས་ཏེ་གཉིས་སུ་མེད་ཅིང་མི་འབྲལ་བས་སོ། །དེ་ཉིད་གསུམ་པའོ།།

བཞི་པ་ངེས་ཚིག་བསྟན་པ་ནི།

མི་དམིགས་པའི་དབྱིངས། ཞེས་པ་ནས། སོ་སོ་མ་ཡིན་པའི་ཕྱིར་གཟུངས་སོ། །ཞེས་པའི་བར་གྱིས་བསྟན་ཏེ།

མི་དམིགས་པའི་དབྱིངས་དེ་ནི། ཐམས་ཅད་དུ་སེམས་ཅན་དང་སངས་རྒྱས་ལ་སོགས་པ་ཐམས་ཅད་བསྐྱེད་ཅིང་། དེའི་རང་བཞིན་དེ་ཡིན་པའི་ཕྱིར་གཅིག་པས་ན་སོ་སོ་མ་ཡིན་པའི་གཟུངས་སོ།།

དོན་དང་ཡི་གེར་ཡོད་པ་མ་ཡིན་པས་མི་དམིགས་པའི་དབྱིངས་ཀྱི་ངོ་བོ་དེ་ཉིད་ལས་ནི་དུས་དང་གནས་སྐབས་ཐམས་ཅད་དུ་འཁོར་བ་སེམས་ཅན་དང་མྱ་ངན་ལས་འདས་པ་སངས་རྒྱས་ལ་སོགས་པ་ཐམས་ཅད་བསྐྱེད་ཅིང་འབྱུང་བའི་གནས་ཡིན་ལ། དེའི་རང་བཞིན་ཆོས་ཉིད་དེ་ནི་དངོས་གཞི་ཐམས་ཅད་པའང་ཡིན་པའི་ཕྱིར་མི་ཕྱེད་པར་ངོ་བོ་གཅིག་པས་ན། སོ་སོ་མ་ཡིན་པའི་ཕྱིར་མི་འབྲལ་བས་གཟུངས་སོ། །དེ་ཉིད་ནི་གཟུངས་བཞི་པའོ། །མདོར་ན་གཏན་ཚིགས་བཞིའི་རིམ་པས་མིང་ངེས་པར་གྲུབ་པའོ།།

བཞི་པ་གཟུགས་བརྙན་གྱི་དམ་ཚིག་ལ་གསུམ་སྟེ། དངོས་བཤད་པ། བརྩད་པའི་སྐྱོན་སྤངས་པ། ཞབས་བསྡུ་བའོ། །དང་པོ་ལ་གཉིས་ཏེ། དོན་བཤད་པ། དེའི་དཔེ་བསྟན་པའོ། །དང་པོ་ནི།

ལང་ཀའི། ཞེས་པ་ནས། མི་འདའ་བའི་ཕྱིར་དམ་ཚིག་ཅེས་བྱའོ། །ཞེས་པའི་བར་གྱིས་བསྟན་ཏེ།

ལངྐའིབདག་པོ་གཟུགས་བརྙན་གྱི་དམ་ཚིག་ནི། གང་གི་གཟུགས་བརྙན་གང་དེ་ལས་མི་འདའ་བ་སྟེ། ཇི་ལྟར་སྣང་ཡང་དངོས་གཞི་དེ་ལས་འགྱུར་མི་འདའ་བ་སྟེ། དེ་ལྟར་འབྱུང་འཇུག་མེད་པ། ཕྱི་ནང་མེད་པ། སྒོ་ཕུགས་མེད་པ། འདུ་འབྲལ་མེད་པས་ན་དམ་ཚིག་གོ །ཐམས་ཅད་ཀྱང་དེའི་ངང་ལས་མི་འདའ་བའི་ཕྱིར་དམ་ཚིག་ཅེས་བྱའོ།།

ལང་ཀའི་བདག་པོ། ཡི་གེའི་གཟུགས་བརྙན་གྱི་དམ་ཚིག་ནི། དོན་མ་སྐྱེས་པ་གང་གི་གཟུགས་བསྙན་གང་ཡི་གེ་ཨར་བྱུང་ན་ཡང་དོན་མ་སྐྱེས་པ་དེ་ལས་མི་འདའ་བས་གཞན་དུ་མི་འགྱུར་བ་སྟེ། དེ་བཞིན་དུ་ཡི་གེ་གཞན་ལའང་རྗེས་སུ་མཐུན་ནོ། །དེས་ན་ཡི་གེ་ཇི་སྙེད་དུ་བྱུང་ནས་ཇི་ལྟར་སྣང་ཡང་རང་རང་གི་དོན་གྱི་དངོས་གཞི་དེ་ལས་གཞན་དུ་མི་འགྱུར་ཞིང་མི་འདའ་བ་ནི་ཡི་གེའི་དམ་ཚིག་གི་ངེས་པའོ། །དེ་ལྟར་ཡི་གེ་དེ་དག་རང་རང་གི་དོན་ལས་གཞན་དུ་འགྲོ་འོང་མེད་པའི་ཕྱིར་འབྱུང་འཇུག་མེད་པ་དང༌། ཡི་གེ་རྣམས་ལའང་ཕྱི་ནང་གི་རིས་མེད་པ་དང༌། ༼༩༣༽ཡི་གེ་ཉིད་སྒོ་དང་ཕུགས་ཀྱི་ཕྱོགས་མེད་པ་དང༌། དོན་ཆོས་ཉིད་དང་འདུ་འབྲལ་མེད་པས་ན་ཡི་གེ་ཀུན་གྱི་དམ་ཚིག་གོ །དེ་བས་གཏན་ཚིགས་བཞིས་ཡི་གེ་ཀུན་མཚུངས་པས་མིང་ཡང་ངེས་པར་གྲུབ་པའོ། །ཡང་ཡི་གེ་དང་སེམས་ཅན་སངས་རྒྱས་ཐམས་ཅད་ཀྱང་གཞི་མཉམ་པ་ཆེན་པོ་དེའི་ངང་ལས་མ་བཀོལ་ཏེ་རྒྱས་བཏབ་ནས་མི་འདའ་བའི་ཕྱིར་ཡང་དམ་ཚིག་ཅེས་བྱ་བའི་མཚན་ངེས་པར་གྲུབ་པའོ།།

གཉིས་པ་དེའི་དཔེ་བསྟན་པ་ནི།

ལང་ཀའི། ཞེས་པ་ནས། འབྲས་སུ་སྐྱེ་བར་མི་རིགས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དཔེར་ན་རྡོ་རྗེ་སེམས་དཔའ་ནི། གང་སངས་རྒྱས་རྣམས་ཀྱི་སྤྱོད་ཡུལ་དགོངས་པ་དམ་པ་ཡིན་ན། དེའི་གཟུགས་བརྙན་ཞིག་བླུན་པོ་གང་གི་མདུན་དུ་བཞག་ན། བླུན་པོ་དེ་ཇི་སྙམ་དུ་སེམས། སྨྲས་པ། གསང་བ་པའི་བདག་པོ་དེ་ནི་འདི་ལྟར་འདི་ནི་རྡོ་རྗེ་སེམས་དཔའ་ཉིད་མ་ཡིན་ཏེ། དེ་འདི་འདྲ་བ་འབའ་ཞིག་གོ་སྙམ་དུ་རྟོག་པའོ། །སྨྲས་པ། ལངྐའི་བདག་པོ་དེ་བས་ན་གང་དམ་པ་དག་གིས་ལྟས་ན། མི་དམིགས་པའི་དབྱིངས་ན་རྡོ་རྗེ་སེམས་དཔའ་དང་། དེའི་གཟུགས་བརྙན་གཉིས་གཞན་དང་གཞན་ན། སོ་སོ་ན་གནས་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་གཉིས་ཀྱི་རང་བཞིན་དེ་ཁོ་ན་ཉིད་དེ། དེ་བཞིན་ཉིད་ཡིན་པའི་ཕྱིར་རོ། །དེ་སོ་སོ་བ་ཞིག་ཡིན་ན་ནི། དམིགས་པས་འབྲས་བུ་སྐྱེ་བར་མི་རིགས་སོ།།

ལང་ཀའི་བདག་པོ། དཔེར་ན་རྡོ་རྗེ་སེམས་དཔའ་ནི་གང་སངས་རྒྱས་རྣམས་ཀྱི་སྤྱོད་ཡུལ་དུ་གྱུར་པའི་མཐར་ཐུག་གི་དགོངས་པ་དམ་པ་དངོས་ཡིན་ན། ཡི་གེ་དང་དོན་གཉིས་ཀྱི་དཔེར་བསྟན་ཏེ། རྡོ་རྗེ་སེམས་དཔའ་དེ་ཡི་སྐུའི་གཟུགས་བརྙན་ཞིག་བླུན་པོ་གང་ཞིག་གི་མདུན་དུ་བཞག་ན། བླུན་པོ་དེ་ཇི་སྙམ་དུ་སེམས། ལང་ཀས་སྨྲས་པ། གསང་བ་པའི་བདག་པོ། དེ་ནི་འདི་ལྟར་འདི་ནི་རྡོ་རྗེ་སེམས་དཔའ་ཉིད་ནི་མ་ཡིན་ཏེ། འོན་ཀྱང་དེ་ནི་འདི་དང་འདྲ་བ་འབའ་ཞིག་གོ་སྙམ་དུ་རྟོག་པའོ། །གསང་བ་པའི་བདག་པོས་སྨྲས་པ། ལང་ཀའི་བདག་པོ། དེ་བས་ན་གང་རྣམ་འདྲེན་དམ་པ་དག་གིས་བལྟས་ན། མི་དམིགས་པའི་དབྱིངས་ན་རྡོ་རྗེ་སེམས་དཔའ་དང༌། དེའི་གཟུགས་བརྙན་གཉིས་གཞན་དང་གཞན་ན་སོ་སོ་ནས་གནས་པ་མ་ཡིན་ནོ། །དེའི་རྒྱུ་མཚན་དེ་ཅིའི་ཕྱིར་ཞེ་ན། དེ་གཉིས་ཀྱི་རང་བཞིན་དེ་ཁོ་ན་ཉིད་དེ་དེ་བཞིན་ཉིད་ཡིན་པའི་ཕྱིར་རོ། །དེ་གཉིས་སོ་སོ་བ་ཞིག་ཡིན་ན་ནི། གཟུགས་བརྙན་ལ་དམིགས་པས་འབྲས་བུ་སྐྱེ་བར་མི་རིགས་པར་འགྱུར་བས་སོ།།

གཉིས་པ་བརྩད་པའི་སྐྱོན་སྤངས་པ་ནི།

ལང་ཀའི། ཞེས་པ་ནས། ཉམས་མ་རྙེད་པའི་ཕྱིར་རོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོས་སྨྲས་པ། གསང་བ་པའི་བདག་པོ་དེ་དག་ལ་ཁྱད་པར་མ་མཆིས་སམ། ལངྐའི་བདག་པོ་མི་ཤེས་པའི་དབང་དུ་གཟུགས་བརྙན་དང་། དེས་མཚོན་པའི་དོན་ཞེས་བརྗོད་ཅིང་སྣང་བར་ཟད་ཀྱི། དམ་པ་རྣམས་ཀྱི་དེ་ཁོ་ན་ཉིད་བཙན་པར་བྱ་ན། དེ་ལ་ཁྱད་པར་ཅུང་ཟད་ཀྱང་མེད་དོ། །སྨྲས་པ། གསང་བ་པའི་བདག་པོ་འོ་ན་ཆོས་རྣམས་ཀྱི་བརྗོོད་པ་དང་། མཚོན་པ་དང་། ཐ་སྙད་ཀྱིས་ཅི་ཞིག་བགྱི། སྨྲས་པ། ལངྐའི་བདག་པོ། དེ་ནི་ཁོ་བོས་གང་གི་དོགས་པ་བསལ་ཟིན་ཏོ། སྨྲས་པ། གསང་བ་པའི་བདག་པོ། འོ་ན་གང་བློ་ཆེན་པོ་དག་བྱ་དཀའ་བ་ཆེན་པོས་འབད་ཅིང་ལེགས་པར་བསྐྲུན་ཏེ་ཅི་ཞིག་བྱ། སྨྲས་པ། ལངྐའི་བདག་པོ་དེ་དེ་ལྟར་ཡིན་མོད་ཀྱི། གང་མཚན་མ་ལ་ཞེན་པ་དག་ཁྲིད་པའི་ཕྱིར་དང་། གང་བློ་ཆེ་ཡང་ད་དུང་ཚེགས་ཆུང་ངུའི་ཐབས་རླབས་པོ་ཆེས་དོན་ཆེན་པོར་རེད་ཟིན་པའི་ཉམས་མ་རྙེད་པའི་ཕྱིར་རོ།།

ཡང་ལང་ཀའི་བདག་པོས་སྨྲས་པ། གསང་བ་པའི་བདག་པོ། དངོས་གཞི་དང་གཟུགས་བརྙན་དེ་དག་ལ་ཁྱད་པར་མ་མཆིས་སམ། སྨྲས་པ། ལང་ཀའི་བདག་པོ། མི་ཤེས་པའི་དབང་དུ་གཟུགས་བརྙན་དང་དེས་མཚོན་པའི་དོན་ཞེས་བརྗོད་ཅིང་སྣང་བར་ཟད་ཀྱི། དམ་པ་རྣམས་ཀྱི་དེ་ཁོ་ན་ཉིད་དབང་བཙན་པར་བྱས་ན། དེ་གཉིས་ལ་ཁྱད་པར་ཅུང་ཟད་ཀྱང་མེད་དོ། །སྨྲས་པ། གསང་བ་པའི་བདག་པོ། འོ་ན་གཟུགས་བརྙན་དང་རྡོ་རྗེ་སེམས་དཔའ་ལ་དབྱེ་བ་མེད་པས་ཆོས་རྣམས་ཀྱི་དབྱེ་བ་ཚིག་དང་ཡི་གེས་བརྗོད་པ་དང༌། གཟུགས་བརྙན་གྱིས་དོན་མཚོན་པར་བྱེད་པ་དང༌། མཚོན་བྱ་སྟོན་པའི་ཐ་སྙད་ཀྱིས་ཅི་ཞིག་བགྱི། ཞེས་མ་རུངས་བ་རྒོལ་བའི་༼༩༤༽ཚུལ་གྱིས་དྲིས་པ་ལ། ལན་སྨྲས་པ། ལང་ཀའི་བདག་པོ། དེ་ནི་ཁོ་བོས་གོང་གི་མི་ཤེས་པའི་དབང་དུ་གཟུགས་བརྙན་དང་དེས་མཚོན་པའི་དོན་ཞེས་བརྗོད་ཅིང་སྣང་བར་ཟད་ཀྱི་དམ་པ་རྣམས་ཀྱི་དེ་ཁོ་ན་ཉིད་བཙན་པར་བྱས་ན་ཞེས་པའི་སྒྲས་དོགས་པ་བསལ་ཟིན་ཏེ། དམན་པ་ལ་ཡི་གེའི་གཟུགས་བརྙན་གྱིས་དོན་མཚོན་ པ་ལ་འགལ་བ་མེད་དེ་དགོས་ཆེད་ཡོད་པར་བསྟན་ཏོ། །སྨྲས་པ། གསང་བ་པའི་བདག ་པོ། བློ་ཆུང་བའི་དབང་དུ་བརྗོད་པ་དང་མཚན་མ་བསྟན་པ་ཡིན་ན། འོ་ན་གང་བློ་ཆེན་པོ་དག་ཀྱང་བྱང་ཆུབ་ཀྱི་སྤྱོད་པ་བྱ་དཀའ་བ་ཆེན་པོས་འབད་ཅིང་རྩོལ་བས་ལེགས་པར་བསྐྲུན་ཏེ་མཚོན་བྱ་མཚོན་བྱེད་དུ་བསྟན་པས་ཅི་ཞིག་བྱ། ཞེས་བློ་ཆུང་ངུ་ལ་རྩོལ་བས་མཚོན་པར་བསྟན་པས་བློ་ཆེན་པོའང་རྩོལ་བ་ལ་མ་རངས་ནས་དྲིས་པའོ། །སྨྲས་པ། ལང་ཀའི་བདག་པོ། །དེ་དེ་ལྟ་ཡིན་མོད་ཀྱི། གང་མཚན་མ་ལ་ཞེན་པ་དག་ཁྲིད་པར་བྱ་བའི་ཕྱིར་བློ་མཆོག་དེ་དག་རྩོལ་བ་འདྲ་ཡང་བདག་ཉིད་གཅིག་པུའི་ཕྱིར་མ་ཡིན་ཏེ། རྟོག་པ་དང་མ་བྲལ་བ་རྣམས་སྤྱོད་པས་དྲང་བའི་ཆེད་དང༌། གང་བློ་ཆེ་ཡང་ད་དུང་ཚེགས་ཆུང་ངུས་ཐབས་རླབས་པོ་ཆེས་ཁྱད་པར་སྒྲུབ་པའི་མན་ངག་ཟབ་མོ་མ་ཐོབ་པས་ལྟ་སྒོམ་སྤྱོད་པའི་དོན་ཆེན་པོར་རེད་ཟིན་པའི་ཉམས་མ་རྙེད་པའི་ཕྱིར་གོམས་པར་བྱ་བའང་ཡོད་པས་བདག་གཞན་གཉིས་ཀའི་ཆེད་དང་ལྡན་པའི་ཕྱིར་དགོས་པ་ཡོད་པར་འགྱུར་རོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། ཆོས་ཉིད་དུ་རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའ་བདག་པོ་དེ་ཁོ་ན་ཉིད་ལས་ནི། རྒྱུན་དུ་ཆོ་འཕྲུལ་རྣམས་སྣང་བ་ཡིན་ཏེ། རིན་པོ་ཆེའམ་སྤྲིན་ལྟ་བུར་ཅི་ཡང་མེད་པ་ལས། ཅིར་ཡང་སྣང་ཞིང་གང་ཆུང་ངུ་ལས་མང་པོ་མཆེད་པའི་ཕྱིར། སྲིད་པ་དང་མྱ་ངན་ལས་འདས་པའི་ཆོས་ཐམས་ཅད་སྣང་བ་འདི་ཅི་ཡང་མེད་པ་ལས་སྣང་ངོ་། །དེ་བས་ན་གསུང་གི་གཟུགས་བརྙན་

འདི་དག་ཀྱང་ཅི་ཡང་ མེད་པ་ཁོ་ན་ལས་སྣང་བའི་ཆོས་ཉིད་དུ་རིག་པར་བྱའོ།།

ལང་ཀའི་བདག ་པོ། དེ་ཁོ་ན་ཉིད་ཇི་བཞིན་པའི་ངང་ལས་ནི། དུས་གསུམ་རྒྱུན་མི་ཆད་པ་ཉིད་དུ་ཡི་གེ་ལ་སོགས་པ་ཆོ་འཕྲུལ་རྣམས་སྣང་བ་ཡིན་ཏེ། དེ་དག་འབྱུང་བའི་མཐུན་དཔེ་ནི་གཉིས་ཏེ་ནོར་བུ་རིན་པོ་ཆེ་ལས་དགོས་འདོད་འབྱུང་བའམ་ནམ་མཁའ་ལ་སྤྲིན་ཚོགས་བཀོད་པ་ལྟ་བུར་ཅི་ཡང་མེད་པ་ལས་ཅིར་ཡང་སྣང་ཞིང་འབྱུང་བ་ནི་བསམ་པ་ཐ་དད་ཀྱི་ངོར་དཔེ་གཉིས་ལྟར་གང་རྩོལ་བ་ཆུང་ངུ་ལས་འབྲས་བུ་མང་པོར་མཆེད་པའི་ཕྱིར་སྲིད་པ་དང་མྱ་ངན་ལས་འདས་པའི་ཆོས་ཐམས་ཅད་སྣང་བ་འདི་ཉིད་ཅི་ཡང་མེད་པ་ལས་རྩལ་གྱི་ཆོ་འཕྲུལ་དུ་སྣང་ངོ༌། །དེ་བས་ན་གསུང་གི་གཟུགས་བརྙན་འདི་དག་ཀྱང་གཞི་ཅི་ཡང་མེད་པ་ཁོ་ན་ལས་སྣང་བའི་ཆོས་ཉིད་མ་འདྲེས་ཡོངས་སུ་རྫོགས་པའི་དངོས་པོའི་གནས་ལུགས་ཉིད་དུ་རིག་པར་བྱའོ།།

ལྔ་པ་གཟུགས་བརྙན་གྱི་སྤྲུལ་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། མཁས་ཤིང་གྲོལ་བར་འགྱུར་༼༩༥༽རོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཟུགས་བརྙན་གྱི་སྤྲུལ་པ་ནི་ཐ་དད་དེ། གསུང་གི་གཟུགས་བརྙན་ནི་ཡི་གེར་སྣང་བ་ཡིན་ལ། ཡི་གེའི་སྤྲུལ་པ་ནི་འདི་ལྟ་སྟེ། མིང་དང་། བྱུང་ཚུལ་དང་། གཟུགས་དང་། རང་བཞིན་དང་། སྒྲ་དང་། ལས་དང་། སྒོ་དང་། རྣམ་གྲངས་དང་། ཡི་གེའི་གཞི་རྣམས་ཀྱིས་དེ་ཁོ་ན་ཉིད་གསང་བ་དམ་པ་དེ་མཐོང་ཞིང་ཤེས་པར་འགྱུར་རོ། །དེས་ཆོས་ཐམས་ཅད་ལ་མཁས་ཤིང་གྲོལ་བར་འགྱུར་རོ།།

ལང་ཀའི་བདག་པོ། གཟུགས་བརྙན་སྤྲུལ་པ་ནི་ཐ་དད་དེ། གསུང་གི་གཟུགས་བརྙན་ནི་ཡི་གེར་སྣང་བ་ཡིན་ལ། ཡི་གེའི་སྤྲུལ་པ་ནི་འདི་ལྟ་སྟེ། ཡི་གེ་སོ་སོའི་མིང་དང༌། བྱུང་ཚུལ་དང༌། གཟུགས་དང༌། རང་བཞིན་དང༌། སྒྲ་དང༌། ལས་དང༌། སྒོ་དང༌། རྣམ་གྲངས་དང༌། ཡི་གེའི་གཞི་རྣམས་ཀྱིས་ཆོས་ཉིད་ཇི་བཞིན་པའི་དེ་ཁོ་ན་ཉིད་གསང་བ་དམ་པ་དེ་ཉིད་ཡང་དག་པར་མཐོང་ཞིང་ཤེས་པར་འགྱུར་རོ། །དེས་ནི་ཆོས་ཐམས་ཅད་ལ་མཁས་ཤིང་རྣམ་པར་གྲོལ་བར་འགྱུར་རོ། །ཞེས་ཡི་གེའི་སྤྲུལ་པའི་གྲངས་དང་ཡོན་ཏན་བསྟན་པའོ།།

གཉིས་པ་རྒྱས་པར་བཤད་པ་ལ་དགུ་སྟེ། སོ་སོའི་མིང༌། གང་ལས་བྱུང་ཚུལ། རྣམ་འགྱུར་གྱི་གཟུགས། རང་བཞིན་ཡིན་ཚུལ། ཡི་གེའི་སྒྲ། བྱེད་པའི་ལས། འབྱུང་བའི་སྒོ། བཀོད་པའི་རྣམ་གྲངས། ཡི་གེའི་གཞི་རྣམས་རྒྱས་པར་བཤད་པའོ། །དང་པོ་ནི།

དེ་ལ་ལང་ཀའི་བདག་པོ། ཡི་གེ་དེའི་མིང༌། ཞེས་པ་ནས། དེ་དག་ནི་ཡི་གེའི་མིང་དུ་རིག་པར་བྱའོ། །ཞེས་པའི་བར་གྱིས་བསྟན་ཏེ།

དེ་ལ་ལངྐའི་བདག་པོ་ཡི་གེ་དེའི་མིང་ནི་འདི་ལྟ་སྟེ། གང་ན་ཡང་མེད་ལ། གང་མཚོན་པའི་བླ་དྭགས་ཏེ། གང་སྐྱེ་བ་མེད་པ་མཚོན་པར་བྱེད་པའི་ཡི་གེ་ལ་ནི། མིང་ཨ་ཞེས་བླ་དྭགས་སུ་བཏགས་སོ། །བྱ་བ་མཚོན་པར་བྱེད་པའི་ཡི་གེ་ལ་ནི། མིང་ཀ་ཞེས་ཚིག་བླ་དྭགས་སུ་བཏགས་སོ། །ཁྱབ་པ་མཚོན་པར་བྱེད་པའི་ཡི་གེ་ལ་ནི། མིང་ཁ་ཞེས་བླ་དྭགས་སུ་བཏགས་སོ། །སྐྱེ་བ་མཚོན་པར་བྱེད་པའི་ཡི་གེ་ལ་ནི། མིང་ག་ཞེས་ཚིག་བླ་དྭགས་སུ་བཏགས་སོ། །གྲོལ་བ་མཚོན་པར་བྱེད་པའི་ཡི་གེ་ལ་ནི། མིང་གྷ་ཞེས་ཚིག་བླ་དྭགས་སུ་བཏགས་སོ། །འཛིན་པ་མཚོན་པར་བྱེད་པའི་ཡི་གེ་ལ་ནི། མིང་ང་ཞེས་ཚིག་བླ་དྭགས་སུ་བཏགས་སོ། །སྤྱོད་པ་མཚོན་པར་བྱེད་པའི་ཡི་གེ་ལ་ནི། །མིང་ཙ་ཞེས་ཚིག་བླ་དྭགས་སུ་བཏགས་སོ། །འདུ་འབྲལ་མཚོན་པར་བྱེད་པའི་ཡི་གི་ལ་ནི། མིང་ཚ་ཞེས་ཚིག་བླ་དྭགས་སུ་བཏགས་སོ། །མི་གནས་པ་མཚོན་པར་བྱེད་པའི་ཡི་གེ་ལ་ནི། མིང་ཛ་ཞེས་ཚིག་བླ་དྭགས་སུ་བཏགས་སོ། །དྲི་མ་མཚོན་པར་བྱེད་པའི་ཡི་གེ་ལ་ནི། མིང་ཛྷ་ཞེས་ཚིག་བླ་དྭགས་སུ་བཏགས་སོ། །ཤེས་པ་མཚོན་པར་བྱེད་པའི་ཡི་གེ་ལ་ནི། མིང་ཉ་ཞེས་ཚིག་བླ་དྭགས་སུ་བཏགས་སོ། །དེ་ཉིད་མཚོན་པར་བྱེད་པའི་ཡི་གེ་ལ་ནི། མིང་ཊ་ཞེས་ཚིག་བླ་དྭགས་སུ་བཏགས་སོ། །བྱེད་པ་མཚོན་པར་བྱེད་པའི་ཡི་གེ་ལ་ནི། མིང་ཋ་ཞེས་ཚིག་བླ་དྭགས་སུ་བཏགས་སོ། །ཉེར་ཞི་མཚོན་པར་བྱེད་པའི་ཡི་གེ་ལ་ནི། མིང་ཌ་ཞེས་ཚིག་བླ་དྭགས་སུ་བཏགས་སོ། །ཆོས་མཚོན་པར་བྱེད་པའི་ཡི་གེ་ལ་ནི། མིང་ཌྷ་ཞེས་བླ་དྭགས་སུ་བཏགས་སོ། །མིང་མཚོན་པར་བྱེད་པའི་ཡི་གེ་ལ་ནི། མིང་ཎ་ཞེས་བླ་དྭགས་སུ་བཏགས་སོ། །ལམ་མཚོན་པར་བྱེད་པའི་ཡི་གེ་ལ་ནི། མིང་ཏ་ཞེས་བླ་དྭགས་སུ་བཏགས་སོ། །གནས་མཚོན་པར་བྱེད་པའི་ཡི་གེ་ལ་ནི། མིང་ཐ་ཞེས་བླ་དྭགས་སུ་བཏགས་སོ། །ཀུན་ནས་འཁྲུལ་པ་མཚོན་པར་བྱེད་པའི་ཡི་གེ་ལ་ནི། མིང་ད་ཞེས་བླ་དྭགས་སུ་བཏགས་སོ། །རང་བཞིན་མཚོན་པར་བྱེད་པའི་ཡི་གེ་ལ་ནི། མིང་དྷ་ཞེས་བླ་དྭགས་སུ་བཏགས་སོ། །ཡུལ་མཚོན་པར་བྱེད་པའི་ཡི་གེ་ལ་ནི། མིང་ན་ཞེས་བླ་དྭགས་སུ་བཏགས་སོ། །དོན་དམ་པར་མཚོན་པར་བྱེད་པའི་ཡི་གེ་ལ་ནི། མིང་པ་ཞེས་བླ་དྭགས་སུ་བཏགས་སོ། །འབྲས་བུ་མཚོན་པར་བྱེད་པའི་ཡི་གེ་ལ་ནི། མིང་ཕ་ཞེས་བླ་དྭགས་སུ་བཏགས་སོ། །འཆིང་གྲོལ་མཚོན་པར་བྱེད་པའི་ཡི་གེ་ལ་ནི། །མིང་བ་ཞེས་བླ་དྭགས་སུ་བཏགས་སོ། །སྲིད་པ་མཚོན་པར་བྱེད་པའི་ཡི་གེ་ལ་ནི། མིང་བྷ་ཞེས་བླ་དྭགས་སུ་བཏགས་སོ། །དྲན་པ་མཚོན་པར་བྱེད་པའི་ཡི་གེ་ལ་ནི། མིང་མ་ཞེས་བླ་དྭགས་སུ་བཏགས་སོ། །མི་འགྱུར་བ་མཚོན་པར་བྱེད་པའི་ཡི་གེ་ལ་ནི། །མིང་ཡ་ཞེས་བླ་དྭགས་སུ་བཏགས་སོ། །རྒྱུ་རྐྱེན་མཚོན་པར་བྱེད་པའི་ཡི་གེ་ལ་ནི། མིང་ཝ་ཞེས་བླ་དྭགས་སུ་བཏགས་སོ། །རྡུལ་མཚོན་པར་བྱེད་པའི་ཡི་གེ་ལ་ནི། མིང་ར་ཞེས་བླ་དྭགས་སུ་བཏགས་སོ། །བཅོམ་པ་མཚོན་པར་བྱེད་པའི་ཡི་གེ་ལ་ནི། མིང་ལ་ཞེས་བླ་དྭགས་སུ་བཏགས་སོ། །ཞི་བ་མཚོན་པར་བྱེད་པའི་ཡི་གེ་ལ་ནི། མིང་ཤ་ཞེས་བླ་དྭགས་སུ་བཏགས་སོ། །ཤེས་པ་སྐྱེ་བ་མཚོན་པར་བྱེད་པའི་ཡི་གེ་ལ་ནི། མིང་ཥ་ཞེས་བླ་དྭགས་སུ་བཏགས་སོ། །རྣམ་པ་ཐམས་ཅད་ཤེས་པ་མཚོན་པར་བྱེད་པའི་ཡི་གེ་ལ་ནི། མིང་ས་ཞེས་བླ་དྭགས་སུ་བཏགས་སོ། །རྒྱུ་མཚོན་པར་བྱེད་པའི་ཡི་གེ་ལ་ནི། མིང་ཧ་ཞེས་བླ་དྭགས་སུ་བཏགས་སོ། །མཐར་ཟད་པ་མཚོན་པར་བྱེད་པའི་ཡི་གེ་ལ་ནི། མིང་ཀྵ་ཞེས་བླ་དྭགས་སུ་བཏགས་སོ། །བདག་མཚོན་པར་བྱེད་པའི་ཡི་གེ་ལ་ནི། མིང་ཨ་ཞེས་བླ་དྭགས་སུ་བཏགས་སོ། །གཡེང་བ་མཚོན་པར་བྱེད་པའི་ཡི་གེ་ལ་ནི། མིང་ཨི་ཞེས་བླ་དྭགས་སུ་བཏགས་སོ། །རི་མཚོན་པར་བྱེད་པའི་ཡི་གེ་ལ་ནི། མིང་ཨཱི་ཞེས་བླ་དྭགས་སུ་བཏགས་སོ། །ཞེན་པ་མཚོན་པར་བྱེད་པའི་ཡི་གེ་ལ་ནི། མིང་ཨུ་ཞེས་བླ་དྭགས་སུ་བཏགས་སོ། །མུན་པ་མཚོན་པར་བྱེད་པའི་ཡི་གེ་ལ་ནི། མིང་ཨཱུ་ཞེས་བླ་དྭགས་སུ་བཏགས་སོ། །གདུང་བ་མཚོན་པར་བྱེད་པའི་ཡི་གེ་ལ་ནི། མིང་ཨེ་ཞེས་བླ་དྭགས་སུ་བཏགས་སོ། །མནར་སེམས་མཚོན་པར་བྱེད་པའི་ཡི་གེ་ལ་ནི། མིང་ཨཻ་ཞེས་བླ་དྭགས་སུ་བཏགས་སོ། །འཇིགས་པ་མཚོན་པར་བྱེད་པའི་ཡི་གེ་ལ་ནི། མིང་ཨོ་ཞེས་བླ་དྭགས་སུ་བཏགས་སོ། །སྟོང་པ་མཚོན་པར་བྱེད་པའི་ཡི་གེ་ལ་ནི། མིང་ཨཽ་ཞེས་བླ་དྭགས་སུ་བཏགས་སོ། །ནུབ་པ་མཚོན་པར་བྱེད་པའི་ཡི་གེ་ལ་ནི། མིང་ཨ་ཞེས་བླ་དྭགས་སུ་བཏགས་སོ། །སྐུ་མཚོན་པར་བྱེད་པའི་ཡི་གེ་ལ་ནི། མིང་ཨ་ཞེས་བླ་དྭགས་སུ་བཏགས་སོ། །ངག་མཚོན་པར་བྱེད་པའི་ཡི་གེ་ལ་ནི། མིང་ཨཾ་ཞེས་བླ་དྭགས་སུ་བཏགས་སོ། །ཐུགས་མཚོན་པར་བྱེད་པའི་ཡི་གེ་ལ་ནི། མིང་ཧཱུཾ་ཞེས་བླ་དྭགས་སུ་བཏགས་སོ། །ཡོན་ཏན་མཚོན་པར་བྱེད་པའི་ཡི་གེ་ལ་ནི། མིང་སྭཾ་ཞེས་བླ་དྭགས་སུ་བཏགས་སོ། །འཕྲིན་ལས་མཚོན་པར་བྱེད་པའི་ཡི་གེ་ལ་ནི། མིང་ཧཱཾ་ཞེས་བླ་དྭགས་སུ་བཏགས་སོ། །དགུག་པ་མཚོན་པར་བྱེད་པའི་ཡི་གེ་ལ་ནི། མིང་ལྕགས་ཀྱུ་ཞེས་བླ་དྭགས་སུ་བཏགས་སོ། །སྡུད་པ་མཚོན་པར་བྱེད་པའི་ཡི་གེ་ལ་ནི། མིང་འོད་དཔག་ཞེས་བླ་དྭགས་སུ་བཏགས་སོ། །འདྲེན་པ་མཚོན་པར་བྱེད་པའི་ཡི་གེ་ལ་ནི། མིང་རེ་བ་ཞེས་བླ་དྭགས་སུ་བཏགས་སོ། །སྦྱོར་བ་མཚོན་པར་བྱེད་པའི་ཡི་གེ་ལ་ནི། མིང་ཟླ་ཚེས་ཞེས་བླ་དྭགས་སུ་བཏགས་སོ། །མིང་མཚོན་པར་བྱེད་པའི་ཡི་གེ་ལ་ནི། མིང་ཐིག་ཅེས་བླ་དྭགས་སུ་བཏགས་སོ། །གཅོད་པ་མཚོན་པར་བྱེད་པའི་ཡི་གེ་ལ་ནི། མིང་དབྱུག་པ་ཞེས་བླ་དྭགས་སུ་བཏགས་སོ། །ལངྐའི་བདག་པོ་དེ་དག་ནི་ཡི་གེའི་མིང་དུ་རིག་པར་བྱའོ།།

དེ་ལ་ལང་ཀའི་བདག་པོ། །ཡི་གེ་དེའི་མིང་ནི་འདི་ལྟ་སྟེ། ཞེས་རྣམ་གྲངས་ལ་སྙེགས་པས་བཀར་བ་ནི་མིང་འཆད་པ་སྟེ་ཡི་གེ་དང༌དོན་གྱི་དངོས་པོ་ཕྱི་ནང་གང་ན་ཡང་མེད་ལ་གང་རང་རང་གི་མཚོན་པའང་མི་འགྱུར་བའི་བླ་དྭགས་སུ་སོ་སོའི་མིང་དུ་བསྙད་པར་བྱས་ཏེ། སྤྱིར་རྩ་རྒྱུད་ཀུན་འདུས་རིག་པ་ལས། ཡིག་འབྲུ་ཡན་ལག་མང་པོ་རྣམས། །རང་བཞིན་ཨ་ཡི་ངང་དུ་འདུས། །ཞེས་གསུངས་པས་སོ་སོའི་སྒྲ་ཇི་ལྟ་བར་གྲགས་པ་ལས་མི་འགྱུར་ཡང་ཨ་ཡི་ངང་ལས་གཞན་དུ་མེད་པས་བསྒྱུར་བ་དང༌། སྦྱར་བ་དང༌། དྲངས་པའི་སྒྲ་གསུམ་ལས་འདིར་དྲངས་པའི་སྒྲར་གྱུར་ཏེ་མཚོན་པ་ཡིན་ནོ། །འདི་ལའང༌། གཞི་དང་གསལ་བྱེད་ཀྱི་ཡི་གེ་བཤད་པ། དབྱངས་དང་བྱིན་རླབས་ཀྱི་ཡི་གེ་བཤད་པ། ཀུན་ཁྱབ་ཡན་ལག་གི་ཡི་གེ་བཤད་པ་གསུམ་ལས། དང་པོ་ལའང་སུམ་ཅུ་སོ་དྲུག་ཡོད་པ་ལས་དང་པོ་ནི། དེའང་ཇི་སྐད་དུ། ཨ་ནི་ཨ་ནུ་སརྦ་དང༌། །སརྦ་དྷརྨ་མ་སྐྱེས་འགྱུར། ཞེས་འབྱུང་བས། གང་དོན་སྐྱེ་བ་མེད་པ་མཚོན་པར་བྱེད་པའི་ཡི་གེ་ལ་ནི་མིང་ཨ་ཞེས་བླ་དྭགས་སུ་བཏགས་ཏེ་ཨ་ནུ་སརྦ་དྷརྨའི་སྒྲ་ལས་དྲངས་པས་ཆོས་ཐམས་ཅད་མ་བྱུང་མ་སྐྱེས་སྐྱེ་བ་མེད་པ་ལས་མི་འགྱུར་བར་མཚོན་པས་སོ། །དེ་སྐད་དུའང༌། གསང་སྙིང་ལས། ཨ་ནི་སྐྱེ་མེད་དེ་བཞིན་ཉིད། །ཅེས་དང༌། ཀུན་འདུས་ལས། ཨ་ནི་མ་སྐྱེས་ཡེ་ཤེས་ཡིན། །རང་བཞིན་༼༩༦༽ཐམས་ཅད་སྟོང་པར་སྟོན། །ཞེས་སོ། །གཉིས་པ་ནི། དེ་བཞིན་དུ། ཀ་ནི་ཀརྨ་ཕྲིན་ལས་ཏེ། །ཞེས་པས། བྱ་བ་མཚོན་པར་བྱེད་པའི་ཡི་གེ་ལ་ནི་མིང་ཀ་ཞེས་ཀརྨའི་སྒྲ་ལས་དྲངས་པའི་ཚིག་བླ་དྭགས་སུ་བཏགས་ཏེ། ཀུན་འདུས་ལས། ཀ་ནི་བྱ་བའི་ཡེ་ཤེས་ཏེ། །ལས་ཀྱིས་ཐམས་ཅད་གྲོལ་བར་སྟོན། །ཞེས་སོ། །གསུམ་པ་ནི། ཁ་ས་མེ་ན་ཁྱབ་པའོ། །ཞེས་པས། ཁྱབ་པ་མཚོན་པར་བྱེད་པའི་ཡི་གེ་ལ་ནི་མིང་ཁ་ཞེས་ཁ་ས་མེ་ནའི་སྒྲས་བླ་དྭགས་སུ་བཏགས་ཏེ། སྔ་མ་ལས། ཁ་ནི་ཁྱབ་པར་བྱེད་པའི་སྒོ །མི་དམིགས་ཐམས་ཅད་གྲོལ་བར་སྟོན། །ཞེས་སོ། །བཞི་པ་ནི། ག་ག་ཏི་ནི་སྐྱེ་བ་མཚོན། །ཞེས་པས། སྐྱེ་བ་མཚོན་པར་བྱེད་པའི་ཡི་གེ་ལ་ནི་མིང་ག་ཞེས་ག་ཏི་ནའི་སྒྲ་ཡིས་བླ་དྭགས་སུ་བཏགས་ཏེ། ག་ནི་དོན་དུ་འགྱུར་བའི་སྒོ །ཡུལ་མེད་ཐམས་ཅད་གྲོལ་བར་སྟོན། །ཞེས་སོ། །ལྔ་པ་ནི། གྷ་ག་ན་ནི་གྲོལ་བར་འགྱུར༌། །ཞེས་པས། གྲོལ་བ་མཚོན་པར་བྱེད་པའི་ཡི་གེ་ལ་ནི་མིང་གྷ་ཞེས་གྷ་ག་ན་ཡི་སྒྲས་བླ་དྭགས་སུ་བཏགས་ཏེ། གྷ་ནི་གནས་པའི་སྒོ་ཡིན་ཏེ། །གཅིག་ཏུ་མ་ངེས་གྲོལ་བར་སྟོན། །ཞེས་སོ། །དྲུག་པ་ནི། ང་ཧ་ར་སྒྲ་འཛིན་པ་སྟེ། ཞེས་པས། འཛིན་པ་མཚོན་པར་བྱེད་པའི་ཡི་གེ་ལ་ནི་མིང་ང་ཞེས་ང་ཧ་རའི་སྒྲ་ཡིས་བླ་དྭགས་སུ་བཏགས་ཏེ། ང་ནི་འཛིན་པ་མེད་པའི་སྒོ །འཛིན་བྲལ་ཐམས་ཅད་གྲོལ་བར་སྟོན། །ཞེས་སོ། །བདུན་པ་ནི། ཙརྱ་སྤྱོད་པའི་སྒྲ་ཡིན་ནོ། །ཞེས་པས། སྤྱོད་པ་མཚོན་པར་བྱེད་པའི་ཡི་གེ་ལ་ནི་མིང་ཙ་ཞེ་ཙརྱའི་སྒྲས་བླ་དྭགས་སུ་བཏགས་ཏེ། ཙ་ནི་འགག་པ་མེད་པའི་སྒོ །ཅིར་ཡང་སྣང་བས་ཐམས་ཅད་གྲོལ། །ཞེས་སོ། །བརྒྱད་པ་ནི། ཚ་བི་ཤ་ནི་འདུ་འབྲལ་མཚོན། །ཞེས་པས། འདུ་འབྲལ་མཚོན་པར་བྱེད་པའི་ཡི་གེ་ལ་ནི་མིང་ཚ་ཞེས་ཚ་བི་ཤ་ཡིས་སྒྲས་བླ་དྭགས་སུ་བཏགས་ཏེ། ཚ་ནི་འདུ་བ་མེད་པའི་སྒོ །འབྲལ་བ་མེད་པས་ཐམས་ཅད་གྲོལ། །ཞེས་སོ། །དགུ་པ་ནི། ཛ་ཧི་ན་ནི་མ་གནས་པ། །ཞེས་པས། མི་གནས་པ་མཚོན་པར་བྱེད་པའི་ཡི་གེ་ལ་ནི་མིང་ཛ་ཞེས་ཛ་ཧི་ནའི་སྒྲ་ཡིས་བླ་དྭགས་སུ་བཏགས་ཏེ། ཛ་ནི་མ་བྱུང་བ་ཡི་སྒོ །མི་གནས་པས་ན་ཐམས་ཅད་གྲོལ། །ཞེས་སོ། །བཅུ་པ་ནི། ཛྷ་ས་ཏ་ར་དྲི་མའོ། །ཞེས་པས། དྲི་མ་མཚོན་པར་བྱེད་པའི་ཡི་གེ་ལ་ནི་མིང་ཛྷ་ཞེས་ཛྷ་ས་ཏ་རའི་སྒྲས་བླ་དྭགས་སུ་བཏགས་ཏེ། ཛྷ་ནི་རྙོག་མ་བྲལ་བའི་སྒོ། །དྲི་མ་དག་པས་ཐམས་ཅད་གྲོལ། །ཞེས་སོ། །བཅུ་གཅིག་པ་ནི། ཉ་ནི་ཤེས་པའི་སྒྲ་རུ་འགྱུར། །ཞེས་༼༩༧༽པས། ཤེས་པ་མཚོན་པར་བྱེད་པའི་ཡི་གེ་ལ་ནི་མིང་ཉ་ཞེས་ཉ་ནའི་སྒྲས་བླ་དྭགས་བཏགས་སུ་ཏེ། ཉ་ནི་སྤྱོད་དང་བྲལ་བའི་སྒོ །བྱ་བ་མེད་པས་ཐམས་ཅད་གྲོལ། །ཞེས་སོ། །བཅུ་གཉིས་པ་ནི། ཊ་ཏ་ཀ་ར་དེ་ཉིད་དེ།ཞེས་པས། དེ་ཉིད་མཚོན་པར་བྱེད་པའི་ཡི་གེ་ལ་ནི་མིང་ཊ་ཞེས་ཊ་ཏ་ཀ་རའི་སྒྲས་བླ་དྭགས་སུ་བཏགས་ཏེ། ཊ་ནི་ང་རྒྱལ་མེད་པའི་སྒོ །རི་བོ་མེད་པས་ཐམས་ཅད་གྲོལ། །ཞེས་སོ། །བཅུ་གསུམ་པ་ནི། ཋ་ཏ་ན་ནི་བྱེད་པའོ། །ཞེས་པས། བྱེད་པ་མཚོན་པར་བྱེད་པའི་ཡི་གེ་ལ་ནི་མིང་ཋ་ཞེས་ཋ་ཏ་ནའི་སྒྲ་ཡིས་བླ་དྭགས་སུ་བཏགས་ཏེ། ཋ་ནིསྒྱུ་རྩལ་མེད་པའི་སྒོ། །བྱེད་པ་མེད་པས་ཐམས་ཅད་གྲོལ། །ཞེས་སོ། །བཅུ་བཞི་པ་ནི། ཌ་དར་མ་ན་ཉེར་ཞིའོ། །ཞེས་པས། ཉེར་ཞི་མཚོན་པར་བྱེད་པའི་ཡི་གེ་ལ་ནི་མིང་ཌ་ཞེས་ཌ་དར་མ་ནའི་སྒྲས་བླ་དྭགས་སུ་བཏགས་ཏེ། ཌ་ནི་འདྲེས་པ་མེད་པའི་སྒོ །རྩོད་པ་མེད་པས་ཐམས་ཅད་གྲོལ། །ཞེས་སོ། །བཅོ་ལྔ་པ་ནི། ཌྷ་བ་ར་ནི་ཆོས་ཡིན་ཏེ། །ཞེས་པས། ཆོས་མཚོན་པར་བྱེད་པའི་ཡི་གེ་ལ་ནི་མིང་ཌྷ་ཞེས་ཌྷ་བ་ར་ནའི་སྒྲས་བླ་དྭགས་སུ་བཏགས་ཏེ། ཌྷ་ནི་སླུ་བ་མེད་པའི་སྒོ །སྒྱུ་མ་ཐམས་ཅད་གྲོལ་བར་བྱེད། །ཞེས་སོ། །བཅུ་དྲུག་པ་ནི། ཎ་ར་མིང་གི་མཚོན་བྱེད་པའོ། །ཞེས་པས། མིང་མཚོན་པར་བྱེད་པའི་ཡི་གེ་ལ་ནི་མིང་ཎ་ཞེས་ཎ་རའི་སྒྲ་ཡིས་བླ་དྭགས་སུ་བཏགས་ཏེ། ཎ་ནི་ཀུན་ཏུ་འགྱུར་བའི་སྒོ །གཡོ་བ་མེད་པར་ཐམས་ཅད་གྲོལ། །ཞེས་སོ། །འདི་རྣམས་རྩ་བ་ཀུན་ན། ཏ་ཐ་ད་དྷ་ན། ཞེས་པའི་འབྲུ་རུ་འདུག་གོ །བཅུ་བདུན་པ་ནི། ཏ་ཐ་བ་ནས་ལམ་དུ་འགྱུར། །ཞེས་པས། ལམ་མཚོན་པར་བྱེད་པའི་ཡི་གེ་ལ་ནི་མིང་ཏ་ཞེས་ཏ་ཐ་བ་ནས་གྲས་བླ་དྭགས་སུ་བཏགས་ཏེ། ཏ་ནི་ཐ་སྙད་མེད་པའི་སྒོ །བརྗོད་པ་མེད་པས་ཐམས་ཅད་གྲོལ། །ཞེས་སོ། །བཅོ་བརྒྱད་པ་ནི། ཐ་ཏ་ན་ནིས་གནས་ཞེས་བྱ། །ཞེས་པས། གནས་མཚོན་པར་བྱེད་པའི་ཡི་གེ་ལ་ནི་མིང་ཐ་ཞེས་ཐ་ཏ་ན་ནིས་སྒྲས་བླ་དྭགས་སུ་བཏགས་ཏེ། ཐ་ནི་རྟེན་དང་བྲལ་བའི་སྒོ །གནས་པ་མེད་པས་ཐམས་ཅད་གྲོལ། །ཞེས་སོ། །བཅུ་དགུ་པ་ནི། ད་དེ་མ་ན་ཀུན་ནས་འཁྲུལ། །ཞེས་པས། ཀུན་ནས་འཁྲུལ་པ་མཚོན་པར་བྱེད་པའི་ཡི་གེ་ལ་ནི་མིང་ད་ཞེས་ད་དེ་མ་ནའི་སྒྲས་བླ་དྭགས་སུ་བཏགས་ཏེ། ད་ནི་གཏོང་དང་བྲལ་བའི་སྒོ །ལེན་པ་མེད་པས་ཐམས་ཅད་གྲོལ། །ཞེས་སོ། །ཉི་ཤུ་པ་ནི། དྷ་ཧེ་ཏུ་ན་པ་ནི་སྒྲ། །རང་བཞིན་ཇི་ལྟ་ཉིད་མཚོན་པའོ། །༼༩༨༽ཞེས་པས། རང་བཞིན་མཚོན་པར་བྱེད་པའི་ཡི་གེ་ལ་ནི་མིང་དྷ་ཞེས་དྷ་ཧེ་ཏུ་ན་པ་ནིའི་སྒྲས་བླ་དྭགས་སུ་བཏགས་ཏེ། དྷ་ནི་རང་བཞིན་མེད་པའི་སྒོ །མཚན་ཉིད་མེད་པས་ཐམས་ཅད་གྲོལ། །ཞེས་སོ། །ཉེར་གཅིག་པ་ནི། ན་ནི་ན་མ་ན་ཡུལ་ཏེ། །ཞེས་པས། ཡུལ་མཚོན་པར་བྱེད་པའི་ཡི་གེ་ལ་ནི་མིང་ན་ཞེས་ན་མ་ནའི་སྒྲ་ཡིས་བླ་དྭགས་སུ་བཏགས་ཏེ། ན་ནི་ཡུལ་དང་བྲལ་བའི་སྒོ །འཛིན་པ་མེད་པས་ཐམས་ཅད་གྲོལ། །ཞེས་སོ། །འདི་དག་རྩ་བ་རྣམས་ན། ཊ་ཋ་ཌ་ཌྷ་ཎ། །ཞེས་པའི་ཡི་གེར་འདུག་ཀྱང་ཀུན་འདུས་ཀྱི་ཕྱག་དཔེ་ལའང་འདི་དང་མཐུན་པ་ཡོད་པར་བཤད་པས་དོན་ལ་ཁྱད་མེད་པར་མངོན་ནོ། །ཉེར་གཉིས་པ་ནི། པ་ར་མཱརྠ་དོན་དམ་མོ། །ཞེས་པས། དོན་དམ་པ་མཚོན་པར་བྱེད་པའི་ཡི་གེ་ལ་ནི་མིང་པ་ཞེས་པར་མཱརྠའི་སྒྲ་ལས་དྲངས་ཏེ་བླ་དྭགས་སུ་བཏགས་ཏེ། པ་ནི་ངེས་པར་འབྱུང་བའི་སྒོ །འགག་པ་མེད་པས་ཐམས་ཅད་གྲོལ། ཞེས་སོ། །ཉེར་གསུམ་པ་ནི། ཕ་ནི་ཕ་ལ་འབྲས་བུ་ཉིད། །ཅེས་པས། འབྲས་བུ་མཚོན་པར་བྱེད་པའི་ཡི་གེ་ལ་ནི་མིང་ཕ་ཞེས་ཕ་ལའི་སྒྲ་ཡིས་བླ་དྭགས་སུ་བཏགས་ཏེ། ཕ་ནི་དངོས་པོ་མེད་པའི་སྒོ །ཅི་ཡང་མེད་པས་ཐམས་ཅད་གྲོལ། །ཞེས་སོ། །ཉེར་བཞི་པ་ནི། བ་ས་རྟ་ན་འཆིང་གྲོལ་མཚོན། །ཞེས་པས། འཆིང་གྲོལ་མཚོན་པར་བྱེད་པའི་ཡི་གེ་ལ་ནི་མིང་བ་ཞེས་བ་ས་རྟ་ནའི་སྒྲས་བླ་དྭགས་སུ་བཏགས་ཏེ། བ་ནི་བརྗོད་པ་མེད་པའི་སྒོ །བརྗོད་པ་མེད་པས་ཐམས་ཅད་གྲོལ། །ཞེས་སོ། །ཉེར་ལྔ་པ་ནི། བྷ་བ་ག་ཏ་སྲིད་པའོ། །ཞེས་པས། སྲིད་པ་མཚོན་པར་བྱེད་པའི་ཡི་གེ་ལ་ནི་མིང་བྷ་ཞེས་བྷ་བ་ག་ཏའི་སྒྲས་བླ་དྭགས་སུ་བཏགས་ཏེ། བྷ་ནི་རྡུལ་དང་བྲལ་བའི་སྒོ །རྟོག་པ་མེད་པས་ཐམས་ཅད་གྲོལ། ཞེས་སོ། །ཉེར་དྲུག་པ་ནི། མ་མ་ར་ན་དྲན་པར་འགྱུར། །ཞེས་པས། དྲན་པ་མཚོན་པར་བྱེད་པའི་ཡི་གེ་ལ་ནི་མིང་མ་ཞེས་མ་མ་ར་ནིའི་སྒྲ་ཡིས་བླ་དྭགས་སུ་བཏགས་ཏེ། མ་ནི་ཆགས་པ་མེད་པའི་སྒོ །རྟག་པ་མེད་པས་ཐམས་ཅད་གྲོལ། །ཞེས་སོ། །ཉེར་བདུན་པ་ནི། ཡ་ཡ་ན་ནི་མི་འགྱུར་བའོ། །ཞེས་པས། མི་འགྱུར་བ་མཚོན་པར་བྱེད་པའི་ཡི་གེ་ལ་ནི་མིང་ཡ་ཞེས་ཡ་ཡ་ནའི་སྒྲས་བླ་དྭགས་སུ་བཏགས་ཏེ། ཡ་ནི་ཆགས་པ་མེད་པའི་སྒོ །གོས་པ་མེད་པས་ཐམས་ཅད་གྲོལ། །ཞེས་སོ། །ཉེར་བརྒྱད་པ་ནི། ཝ་ཧེ་ཏུ་ན་རྒྱུ་རྐྱེན་ཏེ། །ཞེས་པས། རྒྱུ་རྐྱེན་མཚོན་པར་བྱེད་པའི་ཡི་གེ་ལ་ནི་མིང་ཝ་ཞེས་ཝ་ཧེ་ཏུ་༼༩༩༽ནའི་སྒྲ་ལས་དྲངས་པའི་བླ་དྭགས་སུ་བཏགས་ཏེ། ཝ་ནི་རྒྱུ་རྐྱེན་མེད་པའི་སྒོ །འབྲས་བུ་མེད་པས་ཐམས་ཅད་གྲོལ། །ཞེས་སོ། །ཉེར་དགུ་པ་ནི། ར་ར་ག་ན་ཆགས་པའི་རྡུལ། །ཞེས་པས། རྡུལ་མཚོན་པར་བྱེད་པའི་ཡི་གེ་ལ་ནི་མིང་ར་ཞེས་ར་ག་ནའི་སྒྲ་ཡིས་བླ་དྭགས་སུ་བཏགས་ཏེ། ར་ནི་རྐྱེན་དང་བྲལ་བའི་སྒོ །དོར་བ་མེད་པས་ཐམས་ཅད་གྲོལ། །ཞེས་སོ། །སུམ་ཅུ་པ་ནི། ལ་ལ་ག་ཤ་ན་བཅོམ་པའོ། །ཞེས་པས། བཅོམ་པ་མཚོན་པར་བྱེད་པའི་ཡི་གེ་ལ་ནི་མིང་ལ་ཞེས་ལ་ག་ཤ་ནའི་སྒྲས་བླ་དྭགས་སུ་བཏགས་ཏེ། ལ་ནི་བླང་དོར་མེད་པའི་སྒོ །ཡོན་ཏན་མེད་པས་ཐམས་ཅད་གྲོལ། །ཞེས་སོ། །སོ་གཅིག་པ་ནི། ཤ་ནི་པ་ཀ་ཏི་ཞི་བ། །ཞེས་པས། ཞི་བ་མཚོན་པར་བྱེད་པའི་ཡི་གེ་ལ་ནི་མིང་ཤ་ཞེས་ཤ་ནི་པ་ཀ་ཏིའི་སྒྲས་བླ་དྭགས་སུ་བཏགས་ཏེ། ཤ་ནི་སྤྲོས་པ་མེད་པའི་སྒོ །ཞི་བས་ཐམས་ཅད་གྲོལ་བར་བྱེད། །ཞེས་སོ། །སོ་གཉིས་པ་ནི། ཥ་དྷ་ཧྤ་ས་མ་ན་ཤེས་པ་སྐྱེད། །ཞེས་པས། ཤེས་པ་སྐྱེ་བ་མཚོན་པར་བྱེད་པའི་ཡི་གེ་ལ་ནི་མིང་ཥ་ཞེས་ཥ་དྷ་ཧ་ས་མ་ནའི་སྒྲས་བླ་དྭགས་སུ་བཏགས་ཏེ། ཥ་ནི་ཁུར་དང་བྲལ་བའི་སྒོ །ལྕི་བ་མེད་པས་ཐམས་ཅད་གྲོལ། །ཞེས་སོ། །སོ་གསུམ་པ་ནི། ས་ཧ་ར་ཎའི་སྒྲས་མཚོན་པ། །རྣམ་པ་ཐམས་ཅད་ཞེས་བྱར་འགྱུར། །ཞེས་པས། རྣམ་པ་ཐམས་ཅད་ཤེས་པ་མཚོན་པར་བྱེད་པའི་ཡི་གེ་ལ་ནི་མིང་ཞེས་ས་ཧ་ར་ཎའི་སྒྲས་བླ་དྭགས་སུ་བཏགས་ཏེ། ས་ནི་ཡང་དག་གསང་བའི་སྒོ །ངེས་པས་ཐམས་ཅད་གྲོལ་བར་བྱེད། །ཞེས་སོ། །སོ་བཞི་པ་ནི། ཧ་ཧེ་ཏུ་རྒྱུ་ཞེས་བྱ་ཡིན། །ཞེས་པས། རྒྱུ་མཚོན་པར་བྱེད་པའི་ཡི་གེ་ལ་ནི་མིང་ཧ་ཞེས་ཧ་ཧེ་ཏུའི་སྒྲ་ཡིས་བླ་དྭགས་སུ་བཏགས་ཏེ། ཧ་ནི་རྒྱུ་དང་བྲལ་བའི་སྒོ །རྐྱེན་དང་བྲལ་བས་གྲོལ་བར་བྱེད། །ཞེས་སོ། །སོ་ལྔ་པ་ནི། ཀྵ་ན་པ་ཏ་སརྦའི་སྒྲ། །མཐར་ཟད་པ་ཞེས་བྱ་བར་འགྱུར། །ཞེས་པས། མཐར་ཟད་པ་ཞེས་མཐའ་གང་ལའང་མི་གནས་པས་ཡེ་ནས་ཟད་པ་རང་བྱུང་གི་ཡེ་ཤེས་ཀུན་ཏུ་བཟང་པོ་མཚོན་པར་བྱེད་པའི་ཡི་གེ་ལ་ནི་མིང་ཀྵ་ཞེས་ཀྵ་ནུ་པ་ཏ་སརྦའི་སྒྲ་ལས་དྲངས་པའི་ཚིག་བླ་དྭགས་སུ་བཏགས་ཏེ། ཀྵ་ནི་ཁམས་དང་བྲལ་བའི་སྒོ །མཚན་ཉིད་མེད་པས་གྲོལ་བར་བྱེད། །ཅེས་སོ། །སོ་དྲུག་པ་ནི། ཨ་ཨེ་ཤྭ་ན་བདག་ཡིན་ཏེ། །དེ་ལྟར་གྲགས་པས་དོན་མཐོང་འགྱུར། །ཞེས་པས། གནས་ལུགས་དོན་གྱི་ཀུན་གཞི་དབྱིངས་ཆེན་ཀུན་ཏུ་བཟང་མོ་དམ་པའི་བདག་གམ་བདག་ཉིད་ཆེན་པོ་ཐོག་མཐའ་དང་བྲལ་བ་མཚོན་པར་བྱེད་པའི་ཡི་གེ་༼༡༠༠༽ལ་ནི་མིང་ཨ་ཞེས་ཨ་ཨེ་ཤྭ་ནའི་སྒྲ་ལས་དྲངས་པའི་ཚིག་བླ་དྭགས་སུ་བཏགས་ཏེ། ཨ་ནི་རང་བཞིན་ཡི་གེ་སྟེ། །རྟེན་དང་བྲལ་བས་རྒྱུ་རྐྱེན་མེད། །ཀུན་ལ་ཁྱབ་པས་ནམ་མཁའ་འདྲ། །ཨ་ནི་ཆོས་ཉིད་ཆོ་འཕྲུལ་ཏེ། །ཆོས་ཉིད་ཟབ་མོའི་ངང་ལས་ནི། །ཆོ་འཕྲུལ་ཡི་གེ་ཨ་བྱུང་བས། ཨས་ནི་ཆོས་ཉིད་མཚོན་པར་བྱེད། །ཞེས་པ་རྣམས་ཀུན་འདུས་རིག་པ་ལས་གསུངས་སོ།།

གཉིས་པ་དབྱངས་དང་བྱིན་རླབས་ཀྱི་ཡི་གེ་བཤད་པ་ལའང་བཅུ་བཞི་ལས། དང་པོ་ནི། ལྷ་རྣམས་འདུ་བྱེད་ཀྱི་གཡེང་བ་མཚོན་པར་བྱེད་པའི་ཡི་གེ་ལ་ནི་མིང་ཨི་ཞེས་བླ་དྭགས་སུ་བཏགས་ཏེ། ཀུན་འདུས་ལས། ཨི་ནི་མཐོང་བ་མེད་པའི་སྒོ །གཟུངས་དང་བྲལ་བས་ཐམས་ཅད་གྲོལ། །ཞེས་སོ། །གཉིས་པ་ནི། ལྷ་མ་ཡིན་གྱི་ང་རྒྱལ་གྱི་རི་བོ་མཚོན་པར་བྱེད་པའི་ཡི་གེ་ལ་ནི་མིང་ཨཱི་ཞེས་བླ་དྭགས་སུ་བཏགས་སོ། །གསུམ་པ་ནི། མི་རྣམས་དོད་པས་ཞེན་པ་ལ་ཆོག་ཤེས་མེད་པ་མཚོན་པར་བྱེད་པའི་ཡི་གེ་ལ་ནི་མིང་ཨུ་ཞེས་བླ་དྭགས་སུ་བཏགས་ཏེ། ཀུན་འདུས་ལས། ཨུ་ནི་ཐོས་པ་མེད་པའི་སྒོ །སྒྲ་དང་བྲལ་བས་ཐམས་ཅད་གྲོལ། །ཞེས་སོ། །བཞི་པ་ནི། བྱོལ་སོང་རྣམས་ཀྱི་གཏི་མུག་གི་མུན་པ་མཚོན་པར་བྱེད་པའི་ཡི་གེ་ལ་ནི་མིང་ཨཱུ་ཞེས་བླ་དྭགས་སུ་བཏགས་སོ། །ལྔ་པ་ནི། ཡི་དྭགས་ཀྱི་འདོད་ཆགས་མཆོག་ཏུ་ཆེ་ཞིང་གདུང་བ་མཚོན་པར་བྱེད་པའི་ཡི་གེ་ལ་ནི་མིང་ཨེ་ཞེས་བླ་དྭགས་སུ་བཏགས་ཏེ། ཀུན་འདུས་ལས། ཨེ་ནི་ཚོར་བ་མེད་པའི་སྒོ །དྲི་དང་བྲལ་བས་ཐམས་ཅད་གྲོལ། །ཞེས་སོ། །དྲུག་པ་ནི། དམྱལ་བ་རྣམས་ཀྱི་ཞེ་སྡང་གི་མནར་སེམས་པ་མཚོན་པར་བྱེད་པའི་ཡི་གེ་ལ་ནི་མིང་ཨི་ཞེས་བླ་དྭགས་སུ་བཏགས་སོ། །དེ་དག་ནི་འགྲོ་བ་དྲུག་གི་ས་བོན་མཚོན་པ་སྟེ་ཐུང་ངུ་གསུམ་གྱི་གྲོལ་བའི་སྒོ་མཚོན་པ་ལས་གཞན་རྣམས་ཀུན་འདུས་ལས་མ་གསུངས་ཀྱང་མཚོན་བྱ་རྒྱུན་ཆོས་དང་སྦྱར་ཏེ་འགྲེལ་ཆེན་ལས་ཟུང་དུ་བསྟན་པས་ཕྱོགས་མཐུན་དུ་དགོངས་པར་མངོན་ལ། ཡེ་ཤེས་གསང་བ་ལས། གདུལ་བྱ་འགྲོ་དྲུག་ཡོད་པས་ན། །ཡེ་ཤེས་རྣམ་པ་དྲུག་ཏུ་ཤར། །གང་ཟག་བློ་ལ་འཚམས་ཕྱོགས་སུ། །གང་དང་མཐུན་པའི་སྒོ་ནས་སྟོན། །ཞེས་གསུངས་པ་ལྟར། སོ་སོའི་ཐུབ་པའི་སྙིང་པོ་དང་མཐུན་པར་བཟུང་ན་གསང་སྙིང་ལྟར་ཤེས་པར་བྱའོ། །བདུན་པ་ནི། འཇིག་པ་མཚོན་པར་བྱེད་པའི་ཡི་གེ་ལ་ནི་མིང་ཨོ་ཞེས་ཨོ་ཏ་ནའི་སྒྲ་ཡིས་བླ་དྭགས་སུ་བཏགས་ཏེ། གསང་སྙིང་ལས། ཨོ་ནི་ཐམས་ཅད་འཇིག་པར་བྱེད། །ཞེས་དང༌། ཀུན་འདུས་ལས། ༼༡༠༡༽ཨོ་ནི་མྱོང་བ་མེད་པའི་སྒོ །རེག་དང་བྲལ་བས་ཐམས་ཅད་གྲོལ། །ཞེས་སོ། །བརྒྱད་པ་ནི། དེ་བས་ན་སྟོང་པ་མཚོན་པར་བྱེད་པའི་ཡེ་གེ་ལ་ནི་མིང་ཨཽ་ཞེས་ཨཽ་ཏ་ནའི་སྒྲ་ལས་དྲངས་པའི་ཚིག་བླ་དྭགས་སུ་བཏགས་ཏེ། གསང་སྙིང་ལས། ཨཽ་ནི་ཐམས་ཅད་ཞིག་པ་ཡིན། །ཞེས་སོ། །དགུ་པ་ནི། ཐ་སྙད་ཐམས་ཅད་མཁའ་དབྱིངས་སུ་ནུབ་པའམ་མི་དམིགས་པར་གཅིག་པའི་དོན་མཚོན་པར་བྱེད་པའི་ཡི་གེ་ལ་ནི་མིང་ཨ་ཞེས་བླ་དྭགས་སུ་བཏགས་ཏེ། ཀུན་འདུས་ལ། ཨ་ནི་ཡིག་འབྲུ་ཀུན་གྱི་གཏེར། །ཨ་ཉིད་ཆོས་ཀྱི་དབྱིངས་སུ་ཐིམ། །ཞེས་སོ། །བཅུ་པ་ནི། སྒྲ་མཚོན་པར་བྱེད་པའི་ཡི་གེ་ལ་ནི་མིང་ཨོ་ཞེས་བླ་དྭགས་སུ་བཏགས་ཏེ། ཀུན་འདུས་ལས། ཨ་ནི་ཆོ་འཕྲུལ་འབྱུང་བའི་སྒོ། །ཅིར་ཡང་སྣང་བས་ཐམས་ཅད་གྲོལ། །ཞེས་སོ། །འདི་ལ་ཀུན་འདུས་ཀྱི་མཆན་རྙིང་ལས། རིགས་བཞིའི་རང་བཞིན་ཡིན་པས་ལོགས་སུ་མ་གསུངས་ཀྱང༌། ཉི་མ་འབར་བའི་འཁོར་ལོ་ལས། ཆོ་འཕྲུལ་ཡི་གེ་ཨཱ་དུ་འབར། །སྣང་བ་སྐུ་ཡི་ས་བོན་ཞེས། །དེ་བཞིན་རིགས་ཀྱི་ཞིང་དུ་གྲུགས། །ཞེས་ཤུགས་ལ་འོང་ངོ་གསུངས། བཅུ་གཅིག་པ་ནི། ངག་གམ་གསུང་མཚོན་པར་བྱེད་པའི་ཡི་གེ་ལ་ནི་མིང་ཨྃ་ཞེས་བླ་དྭགས་སུ་བཏགས་ཏེ། །སྔ་མ་ལས། ཉི་མ་པདྨོ་འབར་འཕྲོས་པས། །ཆོ་འཕྲུལ་ཡི་གེ་ཨྃ་དུ་འབར། །པདྨོའི་སྙིང་པོའི་ས་བོན་ཞེས། །པདྨ་རིགས་ཀྱི་ཞིང་དུ་གྲགས། །ཞེས་སོ། །བཅུ་གཉིས་པ་ནི། ཐུགས་མཚོན་པར་བྱེད་པའི་ཡི་གེ་ལ་ནི་མིང་ཧཱུྃ་ཞེས་བླ་དྭགས་སུ་བཏགས་ཏེ། །དེ་ཉིད་ལས། ཉི་མ་འབར་བའི་འོད་ཟེར་ལས། །འབར་བའི་འོད་ཀྱི་རྡོ་རྗེ་འབར། །ཡི་གེ་ཧཱུྃ་དུ་སྤྲོས་པ་ལས། །རྡོ་རྗེ་སྙིང་པོའི་ས་བོན་ཞེས། །རྡོ་རྗེ་རིགས་ཀྱི་ཞིང་དུ་གྲགས། །ཞེས་སོ། །བཅུ་གསུམ་པ་ནི། ཡོན་ཏན་མཚོན་པར་བྱེད་པའི་ཡི་གེ་ལ་ནི་མིང་སྭཱ་ཞེས་བླ་དྭགས་སུ་བཏགས་ཏེ། སྔ་མ་ལས། ཉི་མའི་འོད་ཟེར་རིན་ཆེན་ལས། །ཡིག་འབྲུ་འོད་ཀྱི་སྭཱ་འཕྲོས་པས། །རིན་ཆེན་སྙིང་པོའི་ས་བོན་ཞེས། །རིན་ཆེན་རིགས་ཀྱི་ཞིང་དུ་གྲགས། །ཞེས་སོ། །བཅུ་བཞི་པ་ནི། ཕྲིན་ལས་མཚོན་པར་བྱེད་པའི་ཡི་གེ་ལ་ནི་མིང་ཧཱ་ཞེས་བླ་དྭགས་སུ་བཏགས་ཏེ། དེ་ཉིད་ལས། སྣ་ཚོགས་ཉི་མའི་འོད་འཕྲོས་པས། །ཆོ་འཕྲུལ་ཡི་གེ་ཧཱར་གསལ་བ། །སྣ་ཚོགས་སྙིང་པོའི་ས་བོན་ཏེ། །ལས་ཀྱི་རིགས་ཀྱི་ཞིང་དུ་གྲགས། །ཞེས་སོ། །དེ་དག་ནི་ཨ་ཨཱཿཧཱུྃ་སྭཱ་ཧཱ་ལྔས་འབྲས་བུ་ལྔ་མཚོན་པ་སྟེ་ཡོན་ཏན་དེ་ཉིད་གསུང་གིས་འདུལ་བ་ལ་དེར་སྣང་བའོ།།

གསུམ་པ་ཀུན་ཁྱབ་ཡན་ལག་གི་ཡི་གེ་བཤད་པ་༼༡༠༢༽ལའང་དྲུག་ལས། དང་པོ་ནི། འདི་དག་དབྱིབས་ཀྱི་དོན་ལ་མཚོན་པ་སྟེ། དེ་བཞིན་གཤེགས་པ་སྤྱན་དྲངས་ཤིང་དངོས་གྲུབ་བསྡུ་བ་ལ་སོགས་པ་དགུག་པ་མཚོན་པར་བྱེད་པའི་ཡི་གེ་ལ་ནི་མིང་བརྡའི་སྒོ་ནས་ལྕགས་ཀྱུ་དང་འདྲ་བའི་གི་གུ་ཞེས་པའི་ཚིག་བླ་དྭགས་སུ་བཏགས་སོ། །གཉིས་པ་ནི། དབང་དུ་སྡུད་པ་མཚོན་པར་བྱེད་པའི་ཡི་གེ་ལ་ནི་མིང་འོད་དཔག་གམ་ཞབས་ཀྱུད་ཞེས་པའི་ཚིག་བླ་དྭགས་སུ་བཏགས་སོ། །གསུམ་པ་ནི། འཁོར་བ་འདྲེན་པའི་ལས་ཀྱི་བྱེད་པ་མཚོན་པར་བྱེད་པའི་ཡི་གེ་ལ་ནི་མིང་རེ་བ་སྟེ་འགྲེང་བུ་ཞེས་པའི་ཚིག་བླ་དྭགས་སུ་བཏགས་སོ། །བཞི་པ་ནི། ལས་ཀྱིས་སྦྱོར་བ་མཚོན་པར་བྱེད་པའི་ཡི་གེ་ལ་ནི་མིང་ཟླ་ཚེས་ཏེ་ན་རོ་ཞེས་པའི་ཚིག་བླ་དྭགས་སུ་བཏགས་སོ། །ལྔ་པ་ནི། ཡི་གེ་བསྡུས་ནས་མིང་དུ་ལངས་པ་མཚོན་པར་བྱེད་པའི་ཡི་གེ་ལ་ནི་མིང་ཐིག་དངོས་སམ་ཚེག་ཞེས་ལས་ཀྱིས་བཞག་པའི་ཚིག་བླ་དྭགས་སུ་བཏགས་སོ། །དྲུག་པ་ནི། ཚིག་ཤད་དུ་གཅོད་པ་མཚོན་པར་བྱེད་པའི་ཡི་གེ་ལ་ནི་མིང་དབྱུག་པ་ཞེས་ཤད་ཀྱི་ཚིག་བླ་དྭགས་སུ་བཏགས་སོ། །ལང་ཀའི་བདག་པོ། ཞེས་བསྡུད་པ་པོ་ལ་བོས་ནས། དེ་དག་ནི་ཡི་གེའི་མིང་དུ་རིག་པར་བྱའོ། །ཞེས་གདམས་པའོ།།

གཉིས་པ་གང་ལས་བྱུང་ཚུལ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། དག་ལ་བོས་ཏེ་གསུངས། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལ་ཡི་གེའི་བྱུང་ཚུལ་གང་ཞེ་ན། འདི་ལྟ་སྟེ། སྟོན་པ་གསང་བ་མཆོག་ཉིད་ཀྱིས།།

འདུས་པ་དག་ལ་བོས་ཏེ་གསུངས།།

ལང་ཀའི་བདག་པོ། དེ་ལ་ཡི་གེའི་བྱུང་ཚུལ་གང་ཞེ་ན། འདི་ལྟ་སྟེ། སྟོན་པ་གསང་བ་མཆོག་གི་བདག་པོ་ཉིད་ཀྱིས། འཁོར་འདུས་པ་དག་ལ་བོས་ཏེ་གསུངས་པ་དང་མཐུན་པར་ཕྱག་ན་རྡོ་རྗེ་འཆད་པའི་སྐྱེས་བུ་ཉིད་ཀྱིས་འཁོར་ལ་བཀའ་སྩལ་པ།

གཉིས་པ་རྒྱས་པར་བཤད་པ་ནི།

གཞན་ཡང་འདུས་པའི། ཞེས་པ་ནས། སྤྲུལ་པ་དེ་ཉིད་ཡིན། །ཞེས་པའི་བར་གྱིས་བསྟན་ཏེ།

གཞན་ཡང་འདུས་པའི་རྣལ་འབྱོར་རྣམས། །ཡི་གེའི་རྗེས་སུ་དོན་དཔགས་ན། །ཡི་གེས་དོན་ནི་གསལ་བར་སྟོན། །ཅི་ཕྱིར་དོན་ཉིད་ཡི་གེར་སྣང་། །དབྱིངས་ལས་ཨ་བྱུང་ཨ་ལས་ནི། །ཡི་གེ་ཡིད་བཞིན་སྤྲིན་ཚོགས་འཕྲོ། །ཨ་ནི་རང་བཞིན་ཡི་གེ་སྟེ། །རྟེན་དང་བྲལ་བས་རྒྱུ་རྐྱེན་མེད། །ཁོང་ནས་ཀུན་ཁྱབ་ནམ་མཁའ་འདྲ། །ཆོས་ཉིད་སྐྱེ་མེད་ཟབ་མོ་ཡིས། །ཆོས་ཀུན་ཁྱབ་གནས་ཟིན་པ་ལྟར། །ཁྱབ་གནས་ཨ་ཡི་རང་བཞིན་གྱིས། །ཡི་གེ་ཀུན་ཁྱབ་ཀུན་ཟིན་ཏེ། །མིང་དང་ཚིག་ཚོགས་སྣ་ཚོགས་བསྒྱུར། །སྐྱེས་བུ་ཐུགས་ཀྱི་དཔལ་བེའུ་ནས། །ཐམས་ཅད་འབྱུང་བ་ཀུན་གྱི་གཞི། །མགུར་གྱི་གསང་བའི་དབྱིངས་སུ་ཤར། །ཆོ་འཕྲུལ་ཡི་གེ་ལྔར་སྣང་བ། །མགུར་གྱི་སྒྲ་ཕྱུང་མགུར་ལས་གྲགས། ཨ། ཀ་ཁ་གྷ་ང་། ཨ་ལས་ཡིག་འབྲུའི་ཟེར་འཕྲོས་པས། །ལྗགས་ཀྱི་དབང་པོ་ཟླ་གམ་འཕྲོས། །ཆོ་འཕྲུལ་ཡི་གེ་ལྔར་སྣང་བ། །ལྗགས་ཀྱི་སྒྲ་བྱུང་ལྗགས་ལས་གྲགས། །ཙ་ཚ་ཛ་ཛྷ་ཉ། ཨ་ཡི་འོད་ཟེར་རྩེ་མོ་ལ། །ལྗགས་ཀྱི་ཟླ་གམ་རྩེ་མོར་འཕྲོས། །ཆོ་འཕྲུལ་ལྔ་གཉིས་ཡི་གེར་སྣང། །རྩེ་མོ་སྒྲ་བྱུང་ཐོར་ཏོར་གྲགས། །ཊ་ཋ་ཌ་ཌྷ་ཎ། ཏ་ཐ་ད་དྷ་ན། དེ་བཞིན་དེ་ལས་དེ་བྱུང་བ། །ཞལ་གྱི་སྒྲོས་ལས་འཁྱིལ་འབར་བས། །དེ་བཞིན་འོད་འཕྲོ་ལྔར་སྣང་བ། །ཞལ་གྱི་སྒྲ་ཕྱུང་ཞལ་ལས་གྲགས། །པ་ཕ་བ་བྷ་མ། ཡིག་འབྲུ་ཀུན་གྱི་མཆོག་དེ་ཉིད། །གསུང་གི་རྒྱུན་ལམ་བདེར་འབྱུང་བ། །ཡུལ་ལ་རིག་པའི་འབྲུ་ཤར་བ། །ཆོ་འཕྲུལ་ཡི་གེ་སྣ་ཚོགས་སྣང་། །ཡ་ཝ་ར་ལ། ཤ་ཥ་ས་ཧ་ཀྵ། ཨ་ཨཱ། ཨ་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨཾ་ཨཿ། ར་ལ་ཨ་ཧོ། རང་བྱུང་གནས་ཁྱབ་དབྱིངས་ལས་ནི། །སྨྲ་བའི་འཕྲེང་བ་འོད་ཟེར་ཤར། །སྨྲ་བའི་ཡེ་ཤེས་ལས་བསྐྲུན་ན། །འདྲེན་པ་སྤྲུལ་པའི་ས་བོན་འབྱུང་། །དཔག་མེད་རྒྱལ་བའི་སྐུ་གསུང་ཐུགས།།

ཡི་གེ་སྤྲུལ་པ་དེ་ཉིད་ཡིན།།

གཞན་ཡང་འདུས་པའི་ཚོགས་ཀྱི་རྣལ་འབྱོར་པ་རྣམས། ཡི་གེའི་ཡོན་ཏན་ལ་བརྟེན་ནས་ལམ་གྱི་འཇུག་པ་གསུམ་ལས་ཡི་གེའི་རྗེས་སུ་འཇུག་པ་རྣམས་ཀྱིས་སོ་སོར་རྟོག་པའི་ཤེས་རབ་ཀྱིས་ལམ་ཚོལ་བས་ན། ཡི་གེའི་རྗེས་སུ་དོན་ལྐོག་ཏུ་གྱུར་པ་ལ་ཡང་དག་པར་དཔགས་ན། ཡི་གེས་བརྒྱུད་ནས་ཆོས་ཉིད་ཇི་བཞིན་པའི་དོན་ནི་གསལ་བར་སྟོན་ཅིང་མཐོང་བར་བྱེད་དེ། ཅི་ཡི་ཕྱིར་ན་དོན་གྱི་བྱིན་རླབས་ཉིད་ཡི་གེར་སྣང་བར་གྱུར་པའི་ཕྱིར་ངེས་པར་མཚོན་ནོ། །དེའི་ཚུལ་ནི་ལུས་ཁོང་སྟོང་ཁྱབ་པར་གསལ་བའི་ཆོས་མ་སྐྱེས་པ་ཉིད་ཀྱི་དབྱིངས་ལས་ཡི་གེ་ཨ་འབྱུང་ཞིང་སྣང་ལ་༼༡༠༣༽ཨ་དེ་ལས་ནི་ཡི་གེ་ཡིད་བཞིན་རིན་ཆེན་གྱི་སྤྲིན་ཚོགས་རིལ་སྤྲོ་ཞིང་བསྡུ་བར་བྱེད་དོ། །དེའང་མ་སྐྱེས་པའི་ཡི་གེ་ཨ་དེ་ནི་རང་བཞིན་ཆོས་ཉིད་ཀྱི་ཡི་གེ་ཡིན་ཏེ། གནས་པའི་རྟེན་དང་རྟེན་ཅན་གྱི་གཞི་དང་བྲལ་བས་རྒྱུ་རྐྱེན་གྱི་གྲོགས་མེད་པར་རང་བཞིན་མ་སྐྱེས་པའི་ཚུལ་གྱིས་ཡི་གེ་གང་གི་ཡང་ཁོང་ནས་འབྱུང་བས་ཐམས་ཅད་ཀུན་ལ་ཁྱབ་པ་ནམ་མཁའ་དང་འདྲ་བའི་ཕྱིར་ཡི་གེ་ཀུན་གྱི་གཞིའོ། །དེ་བས་དཔེར་བྱས་ན་དོན་ཆོས་ཉིད་སྐྱེ་བ་མེད་པའི་གནས་ལུགས་གཞི་དབྱིངས་ཟབ་མོ་ཡིས་ཕྱི་ནང་གི་ཆོས་ཀུན་ལ་ཁྱབ་པར་གནས་ཤིང་སྐྱེ་མེད་དེས་ཟིན་པ་ལྟར། ཡི་གེ་ཀུན་ལ་ཁྱབ་གདལ་དུ་གནས་པའི་སྐྱེ་མེད་ཨ་ཡི་རང་བཞིན་གྱིས་ཀྱང་ཡི་གེ་ཀུན་གྱི་སྒྲ་ལ་ཁྱབ་ཅིང་ཀ་ལ་སོགས་པ་ཀུན་ཀྱང་ཟིན་པ་ཡིན་ཏེ། དེས་མ་བསྡུས་པ་མེད་པས་མིང་དང་ཚིག་ཚོགས་སྣ་ཚོགས་ཇི་ལྟར་ཡང་འབྱུང་དུ་བཏུབ་ཅིང་བསྒྱུར་དུ་རུང་བའོ། །དེ་ཡང་གནས་སོ་སོ་ནས་འབྱུང་བའི་ཚུལ་ཇི་ལྟ་བུ་ཞེ་ན། སྐྱེས་བུ་ཆེན་པོའི་ཐུགས་ཀྱི་དཔལ་བེའུ་མ་སྐྱེས་པའི་ངང་ནས་ཡི་གེ་ཐམས་ཅད་འབྱུང་ཞིང་སྤྲོ་བ་ཀུན་གྱི་གཞི་མ་ཨ་ཉིད་རྐྱེན་གྱི་གནས་མགུར་གྱི་གྲེ་བའི་གཏིང་གི་གསང་བའི་དབྱིངས་སུ་ཤར་ཞིང༌། དེ་ལས་ཆོ་འཕྲུལ་གྱི་རོལ་པར་ཀ་ལ་སོགས་པ་ཡི་གེ་ལྔར་གྲེ་བ་ལས་བྱུང་ཞིང་སྣང་བ་ནི་མགུར་གྱི་སྒྲ་ལས་བྱུང་སྟེ་མགུར་ལ་གསུང་གི་སྒྲར་གྲགས་པ་སྟེ། ཨ་ནི་གཞི་མ་ཡིན་ལ། དེའི་ཆོ་འཕྲུལ། ཀ་ཁ་ག་གྷ་ང་ལྔའོ། །འདི་ལྔ་ནི་འབྱུང་བ་ནམ་མཁའ་དང་སྦྱར་ལ་བཀླག་པར་བྱ་སྟེ། ནམ་མཁའ་ལ་ཐོགས་པར་བྱེད་པའི་རེག་བྱ་དང་བྲལ་བ་ལྟར་ལྕེ་གང་ལའང་མ་རེག་པར་བཀླག་གོ །ཧ་དང་ཨ་དང་ཨཱ་ཡང་དེ་དང་འདྲའོ། །དེ་ནས་ལྗགས་ལས་བྱུང་བ། ཨ་ཡིག་གཞི་ལས་ཡིག་འབྲུའི་འོད་ཟེར་འཕྲོས་པས། གནས་ལྗགས་ཀྱི་དབང་པོ་ཟླ་གམ་དུ་འཕྲོས་ནས་མཐིལ་དུ་འཁྱིལ་བ་ལས། ཆོ་འཕྲུལ་གྱི་ཡེ་གེ་ལྔར་སྣང་བ་ནི། ལྗགས་ཀྱི་སྒྲར་བྱུང་ཞིང་ལྗགས་ལས་གསུང་དུ་གྲགས་པ་སྟེ། ཙ་ཚ་ཛ་ཛྷ་ཉ། ལྔའོ། །འདི་ལྔ་ནི་འབྱུང་བ་ཆུ་དང་སྦྱར་ལ་བཀླག་སྟེ་ཆུ་ཐུར་དུ་བྲུབ་པ་ལྟར་ལྕེ་ཐུར་དུ་བཞག་སྟེ་གྱེན་ལ་མི་ཟློག་པར་ཀློག་གོ །ཤ་ཡང་འདྲའོ། །དེ་ནས་ལྗགས་ཀྱི་རྩེ་མོ་ལས་བྱུང་བ། གཞིའི་ཡི་གེ་ཨ་ཡི་འོད་ཟེར་ཉི་རྩེད་མོ་ལས་ཕྱུང་སྟེ་རྐྱེན་གྱི་གནས་ལྗགས་ཀྱི་དབང་པོ་ཟླ་གམ་གྱི་རྩེ་མོར་འཕྲོས་པ་ལས། ཆོ་འཕྲུལ་ལྔ་གཉིས་བཅུའི་ཡི་གེར་སྣང་བ་ནི་ལྗགས་ཀྱི་རྩེ་མོར་སྒྲར་བྱུང་ནས་རྩེ་ཡི་ཐོར་ཏོར་གསུང་དུ་གྲགས་པ་སྟེ། ཏ་ཐ་ད་དྷ་ན། ལྔ་དང༌། ཊ་ཋ་ཌ་ཌྷ་ཎ། ལྔའོ། །འདི་ཡི་རྣལ་མ་ལྔ། ༼༡༠༤༽ནི་འབྱུང་བ་ས་དང་སྦྱར་ལ་བཀླག་སྟེ། ས་འཐས་པ་ལྟར་ལྕེ་འཐས་པའི་ཚུལ་གྱིས་ཀློག་གོ །ལོག་པ་ལྔ་ནི། འབྱུང་བ་མེ་དང་སྦྱར་ཏེ་མེ་གྱེན་ལ་འབར་བ་ལྟར་ལྕེ་གྱེན་དུ་ཟློག་ལ་རྐན་དང་སྦྱར་ནས་ཀློག་གོ །དེ་ནས་ཞལ་གྱི་སྒྲོས་ལས་བྱུང་བ། དེ་བཞིན་དུ་གཞིའི་ཡི་གེ་ཨ་དེ་ལས་འོད་ཟེར་དེ་ལྟར་བྱུང་བ། གནས་ཞལ་གྱི་སྒྲོས་ལས་འཁྱིལ་ཞིང་འབར་བས། སྔ་མ་དེ་བཞིན་དུ་འོད་ཟེར་གྱི་འབྲས་བུ་ཡིག་འབྲུ་ལྔར་སྣང་བ་ནི། ཞལ་གྱི་སྒོའི་སྒྲར་བྱུང་ནས་ཞལ་ལས་གསུང་དུ་གྲགས་པ་སྟེ། པ་ཕ་བ་བྷ་མ་ལྔའོ། །འདི་ལྔ་ནི་འབྱུང་བ་རླུང་དང་སྦྱར་ལ་བཀླག་སྟེ། རླུང་མྱུར་བར་རྒྱུ་ཞིང་གཡོ་བ་ལྟར། མཆུ་མྱུར་བ་རྒྱུ་ཞིང་གཡོ་བའི་ཚུལ་དུ་ཀློག་གོ །དེ་ནས་སྐུའི་ཕྱི་རོལ་ལས་ཇི་ལྟར་བྱུང་བ། ཡིག་འབྲུ་ཀུན་གྱི་མཆོག་ཏུ་གྱུར་བ་གཞིའི་ཨ་དེ་ཉིད་ལས་འོད་ཟེར་གསུང་གི་རྒྱུན་ལམ་དེར་བྱུང་བ་རྣམས་སྐུ་སྤྱི་ལ་ཁྱབ་པ་ལས་ཕྱི་རོལ་གྱི་ཡུལ་ལ་རིག་པའི་ངོ་བོར་ཡིག་འབྲུར་ཤར་བ་ནི། སྐྱེ་བ་མེད་པ་ལས་སྐྱེ་བའི་ཆོ་འཕྲུལ་གྱི་ཚུལ་དུ་ཡི་གེ་སྣ་ཚོགས་སུ་སྣང་བ་སྟེ། སྟོན་པ་ཀུན་ཏུ་བཟང་པོའི་སྐུའི་བྱིན་པ་ལས་ཡ་བྱུང༌། དེ་བཞིན་དུ་དགུ་སྐབས་ལས་ལྦ། སྟ་ཟུར་ལས་ར། དཔུང་པ་ལས་ལ། ཐུགས་ཀ་ལས་ཤ ཕྱག་ལས་ཥ། ལྟེ་བ་ལས་ས། ཞབས་ཀྱི་འཁོར་ལོ་ལས་ཧ། གསང་བའི་འོད་ཟེར་ལས་ཀྵ་བྱུང་ཞིང༌། སྨིན་མ་གཉིས་ལས་ཨ་ཨཱ་རིང་ཐུང་གཉིས། སྤྱན་གཉིས་ལས་ཨི་ཨཱི་རིང་ཐུང་གཉིས། སྙན་གཉིས་ལས་ཨུ་ཨཱུ་གཉིས། ཚེམས་གཉིས་ལས་ཨེ་ཨཻ་གཉིས། ཤངས་གཉིས་ལས་ཨོ་ཨཽ་གཉིས། སྤྱི་བོ་ལས་ཨ། སྐུའི་ཁོང་ཐུགས་ཀྱི་དབྱིང་ལས་ཨཿབྱུང་ངོ་། །གསུང་གི་རྒྱུད་ལས། ར་རཱ། ལ་ལཱ་བཞི་བྱུང༌། ཨ་ཧོ་ནི་དེ་ལས་བྱུང་ཞིང་མཉེས་པར་གྱུར་བའོ། །དེའང་སྡེ་ཚན་ལྔ་ལ་སྡེ་ལྔ་ཞེས་བྱ་ཞིང༌། ཡ་ཝ་ར་ལ་བཞི་ནི་སྡེ་ལྔའི་མཐའ་ན་གནས་པས་མཐར་གནས་དང༌། ཤ་ཥ་ས་ཧ་བཞི་ནི་དབུགས་ལ་བརྟེན་པས་དྲོ་བའི་ཡི་གེ་ཞེས་དང༌། ཀྵ་ལ་མཐར་ཟད་ཀྱི་ཡི་གེ་ཞེས་བྱའོ། །ལྷག་མ་རྣམ་ནི་དབྱངས་ཀྱི་ཡི་གེའོ། །དེ་ལྟར་རྒྱུ་རྐྱེན་དང་བྲལ་བར་རང་བྱུང་བའི་ངོ་བོ་ཉིད་དུ་གནས་ཤིང་ཁྱབ་གདལཆེན་པོའི་དབྱིངས་ཀྱི་རང་བཞིན་མ་སྐྱེས་པའི་ཡི་གེ་ཨའི་ངང་ལས་ནི་ཚིག་སྣ་ཚོགས་དང་ཆོས་ཀྱི་བརྗོད་པ་སྟོན་པའི་ཡི་གེ་དག་འབྱུང་ཞིང་སྨྲ་བའི་ཕྲེང་བའི་འོད་ཟེར་ཀུན་ཏུ་ཤར་བ་ཡིན་ལ། དེ་བས་གསུང་སྨྲ་བའི་ཡེ་ཤེས་ཡི་གེ་དེ་དག་ལས་བརྟགས་ཤིང་བསྒྲུབས་ནས་བསྐྲུན་༼༡༠༥༽པར་མཛད་དེ་བསྐྱེད་པར་བྱས་ན། རྒྱལ་བ་སྐུ་གསུམ་གྱིས་འགྲོ་དོན་མཛད་པའི་འདྲེན་པ་སྤྲུལ་པའི་སྐུའི་ས་བོན་ཡང་ཡི་གེ་ལས་འབྱུང་བས་བཀོད་པའི་སྒྱུ་འཕྲུལ་ཚད་མེད་པར་སྟོན་ལ། དེར་ཡང་མ་ཟད་དཔག་ཏུ་མེད་པའི་རྒྱལ་བ་ཇི་སྙེད་པའི་འདྲེན་པ་རྣམས་ཀྱི་སྐུ་གསུང་ཐུགས་ཀྱང་ཡི་གེའི་སྤྲུལ་པ་དེ་ཉིད་ཡིན་པས་ཆེ་བའི་ཁྱད་པར་གྱི་ཆོས་སུ་ཡང་འགྱུར་ཏེ། ཀུན་འདུས་ལས། དེས་ན་ཡིག་འབྲུའི་ཡན་ལག་ཀུན། །རྒྱལ་བ་རྒྱ་མཚོའི་སྐུ་གསུང་ཐུགས། །ཨ་ནི་སྐུའི་རང་བཞིན་ཏེ། །ཨ་ནི་ཐུགས་ཀྱི་མཚན་ཉིད་དོ། །ཡི་གེའི་ཕྲེང་བ་མང་པོ་ཀུན། །གསུང་བརྗོད་གསུང་གི་རང་བཞིན་ནོ། །ཨ་ནི་ཆོས་སྐུའི་རང་བཞིན་ཏེ། །ཨ་ནི་ལོངས་སྤྱོད་རྫོགས་པའི་སྐུ། །ཡིག་འབྲུ་འབར་བའི་ཕྲེང་བ་རྣམས། །སྤྲུལ་པ་འདྲེན་པའི་སྐུ་ཞེས་བཤད། །ཅེས་སོ།།

གསུམ་པ་ཞབས་བསྡུ་བ་ལ་གཉིས་ཏེ། ཡི་གེ་ལྔ་བཅུའི་བསྡུ་བ། ཡི་གེ་ཐམས་ཅད་ཀྱི་བསྡུ་བའོ། །དང་པོ་ནི།

མ་སྐྱེས་པ་ཡི། ཞེས་པ་ནས། བརྗོད་པ་ཀུན་གྱི་ཡི་གེ་ཨཱ། །ཞེས་པའི་བར་གྱིས་བསྟན་ཏེ།

མ་སྐྱེས་པ་ནི་ཐུགས་ཉིད་དེ། །དང་པོ་མགུར་གྱི་གཟུགས་བརྙན་ཏེ། །གཉིས་པ་ལྗགས་ཀྱི་གཟུགས་བརྙན་ཡིན། །གསུམ་པ་རྩེ་མོ་ལས་བྱུང་བ། །བཞི་པ་འབྱུང་བའི་སྒྲོས་ལས་ཤར། །ལྔ་པ་གསུང་གི་རྒྱུ་ལམ་ཡིན། །ཐམས་ཅད་སྡུད་པའི་ཡི་གེ་ཡ། །སྲེག་པ་འབྱུང་བའི་ཡི་གེ་ར། །འཇོམས་པ་ཆེན་པོའི་ཡི་གེ་ལ། །མུན་པ་སེལ་བའི་ཡི་གེ་འ། མཚན་མ་དག་པའི་ཡི་གེ་ཤ །སྟོང་པ་ཆེན་པོའི་ཡི་གེ་ཥ། །ཆོ་འཕྲུལ་འབྱུང་བའི་ཡི་གེ་ཀྵ།།

རྣམ་པ་ཀུན་གྱི་ཡི་གེ་ས། །འཁོར་བ་གནོན་པའི་ཡི་གེ་ཧ། །འབྱུང་བ་ཀུན་གྱི་ཡི་གེ་ཨ། །བརྗོད་པ་ཀུན་གྱི་ཡི་གེ་ཨཱ།

མ་སྐྱེས་པ་ཡི་རང་བཞིན་ཨ་ནི་ཐུགས་ལས་བྱུང་བ་ཉིད་དེ། དང་པོ་ཀ་སྡེ་ནི་མགུར་གྱི་གཟུགས་བརྙན་ཡིན་ཏེ། དེ་བཞིན་དུ་གཉིས་པ་ཙ་སྡེ་ནི་ལྗགས་ཀྱི་གཟུགས་བརྙན་ཡིན་ལ། གསུམ་པ་ཏ་སྡེ་དང་ཊ་ཚོ་ནི་ལྗགས་ཀྱི་རྩེ་མོ་ལས་བྱུང་བ་དང༌། བཞི་པ་པ་སྡེ་ནི་འབྱུང་བའི་སྒྲོས་ལས་ཤར་བ་སྟེ། ཀུན་འདུས་ལས། ཨ་ནི་ཐུགས་ཀྱི་ས་བོན་ཏེ། །ཀ་ལ་སོགས་པ་དང་པོ་ལྔ། །མགུར་གྱི་གསང་བའི་རང་བཞིན་ཡིན། །གཉིས་པ་ཙ་ལ་སོགས་པ་ལྔ། །ཟླ་གམ་ལྗགས་ཀྱི་རང་བཞིན་ཡིན། །གསུམ་པ་ཊ་ལ་སོགས་པ་བཅུ། །ལྗགས་ཀྱི་རྩེ་མོའི་རང་བཞིན་ཡིན། །བཞི་པ་པ་ལ་སོགས་པ་ལྔ། །ཞལ་གྱི་སྒྲོས་ལས་བྱུང་བར་བཤད། །ཅེས་སོ། །ལྔ་པ་ཡ་ཝ་ལ་སོགས་པ་ནི་གསུང་གི་རྒྱུན་ལམ་སྐུའི་གནས་རྣམས་ལས་བྱུང་བ་ཡིན་ཏེ། དེ་ཉིད་ལས། ལྔ་པ་ཡ་ལ་སོགས་པ་ཡི། །བཅུ་ཚན་གཉིས་ཀྱི་ཡི་གེ་དག །སྐུ་ལས་འཕྲོ་པར་རབ་ཏུ་བཤད། །སྐྱེས་བུ་ཆེན་པོའི་བྱིན་པ་ལས། །འཁོར་བར་གནས་པའི་ཡི་གེ་ཡྃ། །ཞབས་ཀྱི་འཁོར་ལོའི་འོད་ཟེར་ལས། །སྒྲིབ་པ་སྲེག་པའི་ཡིག་འབྲུ་ཧ། །གསང་བའི་མཁའ་ཡི་འོད་ཟེར་ལས། །ཆོ་འཕྲུལ་འབྱུང་བའི་ཡིག་འབྲུ་ཀྵ། །སྐུ་ཡི་ཁྲུ་ཚད་ལྟེ་བ་ལས། །འདོད་པ་འབྱུང་བའི་ཡིག་འབྲུ་ས། །ཐུགས་ཀར་འཁྱིལ་བའི་དཔལ་བེའུ་ལས། །མཚན་མ་དག་བའི་ཡིག་འབྲུ་ཤ །ཕྱག་གི་འཁོར་ལོའི་འོད་ཟེར་ལས། །ཆོ་འཕྲུལ་སྟོན་པའི་ཡིག་འབྲུ་ཥྷ། །སྐྱེས་བུ་ཆེན་པོའི་དཔུང་པ་ལས། །རྟོག་པ་༼༡༠༦༽འཇོམས་པའི་ཡིག་འབྲུ་ལ། །སྐྱེས་བུ་ཆེན་པོའི་སྟ་ཟུར་ལས། །འདོད་ཆགས་སྲེག་པའི་ཡི་གེ་ར། །སྐྱེས་བུ་ཆེན་པོའི་དཀུ་སྐབས་ལས། །གཏི་མུག་འཇོམས་པའི་ཡི་གེ་ཝ། །སྐྱེས་བུ་ཆེན་པོའི་སྨིན་མ་ལས། །འཁོར་བ་གནོན་པའི་ཡིག་འབྲུ་ཨ། །སྐྱེས་བུ་ཆེན་པོའི་སྤྱན་གཉིས་ལས། །རང་བཞིན་ཡི་གེ་ཨི་གཉིས་ཤར། །སྐྱེས་བུ་ཆེན་པོའི་སྙན་གཉིས་ལས། །རང་བཞིན་ཡི་གེ་ཨུ་གཉིས་ཤར། །སྐྱེས་བུ་ཆེན་པོའི་ཤངས་གཉིས་ལས། །རང་བཞིན་ཡི་གེ་ཨོ་གཉིས་ཤར། །སྐྱེས་བུ་ཆེན་པོའི་ཚེམས་གཉིས་ལས། །རང་བཞིན་ཡི་གེ་ཨེ་གཉིས་ཤར། །སྐྱེས་བུ་ཆེན་པོའི་སྤྱི་གཙུག་ནས། །རྒྱལ་བའི་ས་བོན་ཨ་དུ་ཤར། །ཞེས་པའི་དོན་གྱིས་འགྲེལ་ཏོ། །འོན་ཀྱང་མདོ་རང་གཞུང་དུ་བཤད་པ་འདིར་ནི་གནས་ལྕེ་མཆུ་རྐན་གྲེ་བ་དང་བཞི་པོ་ཀུན་ལས་ཤར་བས་གསུང་གི་རྒྱུན་གྱི་ལམ་སྟེ་རྒྱལ་བ་ཡེ་ཤེས་ཀྱི་སྐུ་ཅན་ཡིན་པས་དོན་དུ་ཁྱད་པར་མེད་དོ། །དེ་ལྟར་ལྔ་བཅུ་པོའི་བྱུང་ཚུལ་ཀུན་འདུས་ལྟར་སྐབས་དོན་དུ་ངེས་ནས། ཚིག་གི་དོན་དངོས། འཁོར་བའི་དངོས་པོ་ཐམས་ཅད་སེམས་ཉིད་དུ་སྡུད་པ་མཚོན་པའི་ཕྱིར་ཡི་གེ་ཡ་བྱུང་ལ། འདོད་ཆགས་ཉིད་ཆགས་པ་ཉིད་ཀྱིས་སྦྱོང་ཞིང་སྲེག་སྟེ་དག་པར་འབྱུང་བའི་མཚོན་བྱེད་ཡི་གེ་ར་ཡིན་ལ། རྣམ་པར་རྟོག་པའི་དཔུང་འཇོམས་པ་ཆེན་པོའི་མཚོན་བྱེད་ཡི་གེ་ལ་དང༌། གཏི་མུག་གི་མུན་པ་སེལ་བར་བྱེད་པའི་ཡི་གེ་ཝ་བྱུང་ལ། མཚན་མ་ཀ་ནས་དག་པར་མཚོན་པའི་ཡི་གེ་ཤ་ཡིན་ལ། མཐའ་གཉིས་མ་གྲུབ་པས་སྟོང་པ་ཆེན་པོའི་མཚོན་བྱེད་ཡི་གེ་ཥ་དང༌། སྐུ་དང་ཡེ་ཤེས་ཀྱི་མཛད་པའི་ཆོ་འཕྲུལ་ཅིར་ཡང་སྣང་བ་འབྱུང་བར་མཚོན་པའི་ཡི་གེ་ཀྵ་ཡིན་ལ། འདོད་པའི་རྣམ་པ་ཀུན་གྱི་འབྱུང་གཞི་མཚོན་པ་ཡི་གེ་ས་བྱུང་ལ། འཁོར་བ་འཁྲུལ་པའི་དཔུང་གནོན་པ་མཚོན་པའི་ཡི་གེ་ཧ་ཡིན་ཞིང༌། ཡོན་ཏན་དང་ཡི་གེ་འབྱུང་བ་ཀུན་གྱི་གཞིར་གྱུར་པ་ཡི་གེ་ཨ་དང༌། ཚིག་དང་བརྗོད་པ་ཀུན་གྱི་རྩ་བར་གྱུར་པ་ཡི་གེ་ཨཱ་ཡིན་པས་དེ་ལྟར་ལེགས་པར་བསྡུ་ཤེས་པར་བྱའོ།།

གཉིས་པ་ཡི་གེ་ཐམས་ཅད་ཀྱི་བསྡུ་བ་ནི།

ཚན་མེད་པ་དང༌། ཞེས་པ་ནས། བྱུང་ཚུལ་དུ་རིག་པར་བྱའོ། །ཞེས་པའི་བར་གྱིས་བསྟན་ཏེ།

ཚད་མེད་པ་དང་ལས་རྣམས་ཀྱི། །ཡི་གེ་བཅུ་དྲུག་རྫོགས་པ་ཉིད། །སྐུ་དང་གསུང་ཐུགས་ཡོན་ཏན་གྱི།།

ཚིག་འབྱུང་སྨྲ་བའི་ཡི་གེ་བཞི། །བདུན་དང་བཅུ་གཉིས་གསུང་གི་རྒྱུན། །འབྱུང་བ་ཉིད་དུ་མགོན་པོས་བཤད།།

ལངྐའི་ བདག་པོ་དེ་དག་ནི། ཡི་གེའི་བྱུང་ཚུལ་དུ་རིག་པར་བྱའོ།།

དབྱིངས་ཚད་མེད་པ ་མཚོན་པའི་རང་བཞིན་གྱི་ཡི་གེ་ཨཱ་ལི་དང་ལས་སྣ་ཚོགས་པ་མཚོན་པའི་ཆོ་འཕྲུལ་རྣམས་ཀྱི་ཡི་གེ་ཀཱ་ལི་སྟེ། སོ་ཡེ་ཤེས་དབང་ཕྱུག་གིས་ཀཱ་ལི་སུམ་ཅུ་རྩ་བཞིར་འདོད་དོ། །དབྱངས་དང་ཆོ་འཕྲུལ་གྱི་ཡི་གེ་རྣམ་པར་ཕྱེ་བ་ལས། ཡི་གེ་བཅུ་དྲུག་རྫོགས་པ་ཉིད་དེ། འདིར་ཚིགས་བཅད་ཁ་མ་ལོངས་ཀྱང་བཅུ་༼༡༠༧༽ཕྲག་གཉིས་དང་དྲུང་སྟེ་ཨ་ཀ་ནས་མའི་བར་ཡུལ་ལ་མ་འཕྲོས་པའི་བརྗོད་པ་ཞེས་གཞན་རྣམས་ཀྱི་རྩ་བ་ལྟ་བུ་རྩ་དྲུག་གོ །ཡང་ན་དབྱངས་ཡིག་བཅུ་དྲུག་གོ །སྐུ་དང་གསུང་ཐུགས་དང་ཡོན་ཏན་ཕྲིན་ལས་ཀྱི་ས་བོན་མཚོན་པ། ཨ་ལ་སོགས་པ་ལྔའོ། །ཚིག་འབྱུང་ཞིང་སྨྲ་བའི་གཞིའི་ཡི་གེ་ནི། གི་གུ་ན་རོ་འགྲེང་བུ་ཞབས་ཀྱུ་བཞི་སྟེ། ཤད་དང་ཐིག་ཀྱང་རྫོགས་ཏེ། ཚིག་དང་སྨྲ་བརྗོད་ལ་ཡིག་གཟུགས་ལྟར་མེད་ཀྱང་བྱེད་པ་ཡོད་པས་སོ། །འགྲེལ་པ་ལུང་བསྟན་མ་ལས་ན་རོ་མ་བསྒྲང་བར་ཟླ་ཚེས་དང་བཞིར་གསུངས་པས་དོན་དུ་གཅིག་གོ །གཞི་ཡི་དོན་དུ་བྱས་ན་ཡི་གེའི་གཞི་མ་ཨཱཿཨ་ཧཱུྃ་མཱུཾ་མོ། བདུན་ནི་སྡེ་བདུན་ལས་འཇིག་རྟེན་ལས་འདས་པའི་ཡི་གེ་ཨཱ་ཧཱུྃ་མཱུྃ་སྭཱ་ཨྃ་ཧྃ་ཨཱ་རྣམས་དང༌། བཅུ་གཉིས་ནི་ཡ་ནས་ཨ་གྱི་བར་ཉི་ཤུ་སྟེ། རྩ་བའི་རྒྱུད་ལས། ལྔ་པ་ཡ་ལ་སོགས་པ་ཡི། །བཅུ་ཚན་གཉིས་ཀྱི་ཡི་གེ་རྣམས། །ཞེས་པས་མངོན་ཏེ། འདིར་ནི། སྔར་ལྟར་ལ་ཝ་ནས་ཨྃ་ངམ་ཨ་གྱི་བར་ཏེ་དཔེ་ལ་ལར་ཨ་དུ་སྣང་ལ། ལ་ལར་ཨྃ་དུ་གསུངས་ཀྱང་སྤྱི་བོ་ནས་བྱུང་བར་བཤད་པས་དོན་འདྲ་བར་གསལ་ལ། ཀུན་འདུས་ན། ཨ་ཨཱ་གཉིས་མི་བཞུགས་པས། ཡ་ཝ་ཞེས་པ་ནས། ཨོ་ཨཽ། ཨ་ཨ་ཞེས་དཔེ་ལ་ལར་སྣང་ལ། དེ་ལྟར་ན་ཥྷ་ཞེས་པ་གཉིས་སུ་བསྒྲང་བར་བཞེད་ཅིང༌། དཔེ་ལ་ལ་ཨྃ་ཨ་ཞེས་བཞུགས་པ་ལྟར་ནའང་སྔ་མ་ལྟར་ལ་ཨ་ཡི་བར་རོ། །དེས་ན་ཡིད་ཆེས་པར་འགྱུར་རོ། །གསུང་གི་རྒྱུན་ཞེས་པ། ར་རཱ་ཨ་ཧོ། ལ་སོགས་པའི་ཡི་གེ་ལྷག་མ་རྣམས་སོ། །འདིའི་ཨ་ཐ་མ་ནི་སྤྱིར་འགྱུར་རོ། །དེ་ལྟར་གསུང་གྱི་རྒྱུན་བར་མི་ཆད་པར་འབྱུང་བ་ཉིད་དུ་སྟོན་པ་འགྲོ་བའི་མགོན་པོས་བཤད་ཅིང་བཀའ་སྩལ་ཏོ། །ཞེས་སྡུད་པ་པོ་ལང་ཀའི་བདག་པོ་ལ་བོས་ནས་དེ་དག་ནི་ཡི་གེའི་བྱུང་ཚུལ་དུ་རིག་པར་བྱའོ། །ཞེས་གདམས་པའོ།།

གསུམ་པ་རྣམ་འགྱུར་གྱི་གཟུགས་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། དབྱིབས་འབའ་ཞིག་གོ །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལ་ཡི་གེའི་གཟུགས་གང་ཞེ་ན། འདི་ལྟ་སྟེ། གང་ཁ་དོག་དང་དབྱིབས་ནི་འབའ་ཞིག་གོ།

ལང་ཀའི་བདག་པོ། འདི་ལ་ཡི་གེའི་གཟུགས་གང་ཞེ་ན། འདི་ལྟ་སྟེ། གང་ཁ་དོག་དང་དབྱིབས་འབའ་ཞིག་གོ །ཞེས་ངོ་བོ་སྟོན་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། ཁ་དོག་བཤད་པ། དབྱིབས་བཤད་པའོ། །དང་པོ་ནི།

ལང་ཀའི། ཞེས་པ་ནས། མ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཁ་དོག་གང་ཞེ་ན། རང་བཞིན་དང་། རིགས་དང་། སྣ་ཚོགས་དང་། མ་ངེས་པའོ།།

ལང་ཀའི་བདག་པོ། ཁ་དོག་གང་ཞེ་ན། དེ་ཉིད་ཉེ་བར་བསྟན་པ་ནི་བཞི་སྟེ། ༼༡༠༨༽ཕུང་པོ་དང་ཁམས་ལ་རང་བཞིན་བཅུད་ཀྱི་ཡི་གེ་གནས་པ་དུང་དང་ཀུ་མུད་ཏ་ལྟར་དཀར་བ་དང༌། དྭངས་གསལ་གཟི་མདངས་ལྡན་པ། ཤེལ་དང་ཉི་ཟླ་ལྟ་བུ་རང་བཞིན་གྱི་ཁ་དོག་དང༌། རྡོ་རྗེའི་རིགས་སྔོན་པོ་ལ་སོགས་པ་རིགས་ཀྱི་ལྷའི་སྐུ་མདོག་ཇི་འདྲ་བ་རིགས་ཀྱི་ཁ་དོག་དང༌། སྣ་ཚོགས་པའི་ཁ་དོག་མང་པོ་བཀྲམ་པ་ལྟ་བུ་སྣ་ཚོགས་པ་དང༌། རྨ་བྱའི་རྐེ་ལྟ་བུར་ཅིར་ཡང་སྣང་བས་གཞི་གཅིག་ཏུ་མི་ཟིན་པ་ཁ་དོག་མ་ངེས་པའོ།།

གཉིས་པ་དབྱིབས་བཤད་པ་ནི།

ལང་ཀའི། ཞེས་པ་ནས། ཡི་གེའི་གཟུགས་སུ་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དབྱིབས་ནི་ཐ་དད་པ་སྟེ། འདི་ལྟར་ཨ་འབའ་ཞིག་ལ་ཡང་། ཨ་སེང་གེ་གླལ་བ་ལྟ་བུ་དང་། ཨ་སེང་གེ་བསྒྱིངས་པ་ལྟ་བུ་དང་། ཨ་སེང་གེ་སྒྲ་འབྱིན་པ་ལྟ་བུ་དང་། ཨ་བིན་དུ་ཕུན་སུམ་ཚོགས་པ་ལྟ་བུ་དང་། ཨ་ཨ་མོའི་ཁ་འདྲ་བ་དང་། ཨ་འོད་དཔག་ཐིག་ལྟ་བུ་ལ་སོགས་པ་ཐ་དད་དོ། །དེ་བཞིན་དུ་ཀ་ལ་ཡང་། ཀ་པི་ཝཾ་ལྟ་བུ་དང་། ཀ་ཏྲི་ཤུ་ལ་ལྟ་བུ་དང་། ཀ་སྤྱང་ཀི་ལྟ་བུ་དང་། ཀ་རུ་སྦལ་ལྟ་བུ་དང་། ཀ་བ་དན་རྩེ་གསུམ་པ་ལྟ་བུ་ལ་སོགས་པ་ཐ་དད་དོ། །གཞན་ཡང་ཁ་ནི་རི་བོང་ལྟ་བུའོ། །ག་ནི་བསེ་ལྟ་བུའོ། །གྷ་ནི་བུམ་པ་ལྟ་བུའོ། །ང་ནི་ཀང་ཀ་ལྟ་བུའོ། །ཙ་ནི་ཙ་ཤའི་ཁ་ལྟ་བུའོ། །ཚ་ནི་གདུགས་ལྟ་བུའོ། །ཛ་ནི་དྲ་བ་ལྟ་བུའོ། །ཛྷ་ནི་དྲ་བ་ཆེན་པོ་ལྟ་བུའོ། །ཉ་ནི་བ་དན་ཁའི་ཁ་ལྟ་བུའོ། །ཏ་ནི་འཛམ་བུ་ཏི་པ་ལྟ་བུའོ། །ཐ་ནི་ཐག་ཀུ་རའི་ཁ་ལྟ་བུའོ། ད་ནི་ནམ་མཁའ་འགྲོའི་ཁ་ལྟ་བུའོ། ངྷ་ནི་དད་པའི་ཁ་ལྟ་བུའོ། །ན་ནི་ཏྭོ་ལའི་ཁ་ལྟ་བུའོ། །ཊ་ནི་དང་བ་བཟའ་ལྟ་བུའོ། །ཋ་ནི་ཕ་ཝང་ལྟ་བུའོ། །ཌ་ནི་མཆེ་བ་ལྟ་བུའོ། །ཌྷ་ནི་གཞུ་ལྟ་བུའོ། །ཎ་ནི་མ་ཧེའི་ཁ་ལྟ་བུའོ། །པ་ནི་རི་རབ་ལྟ་བུའོ། །ཕ་ནི་ཁྲུང་བྱ་ལྟ་བུའོ། །བ་ནི་འདམ་བྱ་ལྟ་བུའོ། །བྷ་ནི་ཁ་ལག་ཚེ་ལྟ་བུའོ། །མ་ནི་སྤྲེའུ་སློང་བ་ལྟ་བུའོ། །ཡ་ནི་ཟླ་བ་ཚེས་པ་ལྟ་བུའོ། །ཝ་ནི་རྒ་ཏིང་ཀའི་ཁ་ལྟ་བུའོ། །ར་ནི་ཀུན་ཙི་ཏའི་ཁ་ལྟ་བུའོ། །ལ་ནི་བྱ་རོག་ཤ་འཐེན་ལྟ་བུའོ། །ཤ་ནི་རི་བོང་ལྟ་བུའོ། །ཥ་ནི་ཤན་ཏ་ཀ་ལྟ་བུའོ། །ས་ནི་བྲམ་ཟེ་སློང་བ་ལྟ་བུའོ། །ཧ་ནི་ཧ་ར་ཀ་ལྟ་བུའོ། །ཀྵ་ནི་སྲིན་པོའི་ཁ་ལྟ་བུའོ། །ཨི་ནི་ལྕགས་ཀྱུ་བསྣོལ་བས་རེ་བ་རྟེན་པ་ལྟ་བུའོ། །ཨུ་ནི་འོད་དཔག་བརྩེགས་པ་རེ་བས་དྲངས་པ་ལྟ་བུའོ། །ཨེ་ནི་རེ་བ་བརྩེགས་པ་འོད་དཔག་གིས་དྲངས་པ་ལྟ་བུའོ། །ཨོ་ནི་གཞུ་བརྡུངས་པ་ལྟ་བུའོ། །ཨ་ནི་གདུགས་ཕུབ་པ་ལྟ་བུའོ། །ཨཾ་ནི་དྲང་སྲོང་ཚུལ་བརྟན་ལྟ་བུའོ། །ར໏་ནི་ལྕགས་སྒྲོག་ཀྱོགས་དྲངས་པ་ལྟ་བུའོ། །ལ໏་ནི་བྱ་གག་ཀྱོགས་དྲངས་པ་ལྟ་བུ་ལ་སོགས་པ་སྟེ། ཡི་གེ་རེ་རེ་ལ་ཡང་དབྱིབས་ཐ་དད་པ་ཡོད་དེ། དེ་ལྟར་འདྲེན་པ་ནི་གུ་གུ་ལྕགས་ཀྱུ་ལྟ་བུའོ། །འོད་དཔག་ནི་ཞབས་ཀྱུད་དཀྲིས་པ་ལྟ་བུའོ། །རེ་བ་ནི་བསེའི་ར་བསྒྲེང་བ་ལྟ་བུའོ། །ཟླ་ཚེས་ནི་ན་རོའི་རྭ་ལྟ་བུའོ། །ཐིག་ལེ་ནི་ཚག་ཚོག་གི་དམིག་ལྟ་བུའོ། །དབྱུག་པ་ནི་འཕང་མདུང་ལྟ་བུའོ། །སོ་སོའི་དབྱིབས་ཐ་དད་པ་དེ་ལྟ་བུ་ཡོད་དོ། །ལངྐའི་བདག་པོ་དེ་དག་ནི་ཡི་གེའི་དབྱིབས་ཏེ། ཡི་གེའི་གཟུགས་སུ་ཤེས་པར་བྱའོ།།

ལང་ཀའི་བདག་པོ། ཡི་གེའི་དབྱིབས་ནི་ཨའི་དབྱིབས་དྲུག་ལ་སོགས་པ་ཐ་དད་པ་རྣམས་གཟུང་སྟེ། འདི་ལྟར་ཨ་འབའ་ཞིག་ལ་ཡང༌། ན་ག་རའི་ཨ་སེང་གེ་ཀླལ་བ་ལྟ་བུ་དང༌། ཤར་ཕྱོགས་ཟ་ཧོར་གྱི་ཨ་སེང་གེ་འགྱིངས་པ་ལྟ་བུ་དང༌། ལྷོ་ཕྱོགས་བེ་ཏའི་ཨ་སེང་གེ་སྒྲ་འབྱིན་པ་ལྟ་བུ་དང༌། ནུབ་ཕྱོགས་ཨུ་རྒྱན་གྱི་ཨ་པདྨའི་བིན་དུ་ཕུན་སུམ་ཚོགས་ཤིང་འདུས་པ་ལྟ་བུ་དང༌། བྱང་ཕྱོགས་ལ་ཤའི་ཨ་ཡི་དབྱིབས་ཆུ་སྲིན་ཨ་མོའི་ཁ་ལྟ་བུ་དང༌། རྒྱ་ནག་པོའི་ཨ་ནི་འོད་དཔག་དང་ཐིག་སྦྲེལ་བ་ལྟ་བུ་ལ་སོགས་པ་ཐ་དད་དོ། །མཆན་གྱི་ཟུར་གཅིག་ལ། དང་པོ་སེང་གེས་ཐམས་ཅད་ཟ་བ་དང་སྐྲག་པ་དང་ཟིལ་གྱིས་གནོན་པར་སྦྱར་ལ། གཉིས་པ་ཀ་ཚན་རྣམས་དང༌། གསུམ་པ་ཨཱ་ལི་རྣམས་དང༌། བཞི་པ་ཤད་དང༌། ལྔ་པ་ཐིག་དང་ན་རོ་དང༌། དྲུག་པ་གི་གུ་དང་ཞབས་ཀྱུ་རྣམས་སུའང་གསུངས་སོ། །དེ་བཞིན་དུ་ཀ་ལ་ཡང་ན་ག་རའི་ཀ་པི་ཝྃ་ལྟ་བུ་དང༌། ཟ་ཧོར་གྱི་ཀ་ཏྲི་ཤུ་ལ་ལྟ་བུ་དང༌། བེ་ཏར་གྱི་ཀ་སྤྱང་ཀི་ལྟ་བུ་དང༌། ཨོ་རྒྱན་གྱི་ཀ་རུས་སྦལ་ལྟ་བུ་དང༌། ལ་ཤའི་ཀ་བ་དན་རྩེ་གསུམ་པ་ལྟ་བུ་ལ་སོགས་པ་ཐ་དད་དོ། །དེ་ལྟར་སྐབས་ཀྱི་དང་པོའི་ཁུངས་གཙོར་བྱས་པས་སྒོ་ནས། རྒྱ་གར་གྱི་ཡི་གེ་རྣམས་ཀྱི་ངེས་པར་གཟུང་བ་སྟེ། ཨའི་དབྱིབས་དྲུག་ལ་སོགས་པ་རྒྱ་གར་ནའང་རྒྱལ་ཁམས་སྡེ་མི་མཐུན་པའི་ཡི་གེ་ཡོད་པའི་ཕྱིར། གཅིག་པའང་ཐ་དད་དུ་བསྟན་པའོ། །ལ་ལ་འགྲོ་བ་དྲུག་གི་ཡིག་དབྱིབས་ཡིན་གསུངས་ཀྱང༌། ཨ་མ་གཏོགས་གཞན་ལ་དྲུག་ཏུ་མེད་པས་ངེས་པ་མེད་སྙམ་མོ་གསུང༌། གཞན་ཡང་ཁ་ནི་བོང་བུ་ལྟ་བུའོ། །ག་ནི་བསྭེ་ལྟ་བུའོ། །གྷ་ནི་བུམ་པ་ལྟ་བུའོ། །ང་ནི་ཀང་ཀའི་མཆུ་ལྟ་བུའོ། །དཔེ་ལ་ལར་ཀངྐ་ལྟ་བུ་ཞེས་བཞུགས། ཙ་ནི་ཙ་ཤའི་ཁ་ལྟ་བུའོ། །ཚ་ནི་གདུགས་ལྟ་བུའོ། །ཛ་ནི་དྲྭ་བ་ལྟ་བུའོ། །ཛྷ་ནི་དྲྭ་བ་ཆེན་པོ་ལྟ་༼༡༠༩༽བུའོ། །ཉ་ནི་བ་དན་གྱི་ཁ་ལྟ་བུའོ། །ཏ་ནི་འཛམ་བུ་ཏི་པ་ལྟ་བུའོ། །ཐ་ནི་ཐ་གུ་རའི་ཁ་ལྟ་བུའོ། །ད་ནི་མཁའ་འགྲོའི་ཁ་ལྟ་བུའོ། །དྷ་ནི་ངང་པའི་ཁ་ལྟ་བུའོ། །ན་ནི་ཏོ་ལེའི་ཁ་ལྟ་བུའོ། །ཊ་ནི་ངང་པ་ཟ་བ་ལྟ་བུའོ། །ཋ་ནི་ཕ་བང་ལྟ་བུའོ། །ཌ་ནི་མཆེ་བ་ལྟ་བུའོ། ཌྷ་ནི་གཞུ་ལྟ་བུའོ། །ཎ་ནི་མ་ཧེའི་ཁ་ལྟ་བུའོ། །པ་ནི་རི་རབ་ལྟ་བུའོ། ཕ་ནི་ཁྲུང་བྱ་ལྟ་བུའོ། །བ་ནི་འདམ་བྱ་ལྟ་བུའོ། །བྷ་ནི་ཁ་ལག་ཚེ་ལྟ་བུའོ། །མ་ནི་སྤྲེའུ་སློང་བ་ལྟ་བུའོ། །ལ་ནི་ཟླ་བ་ཚེས་པ་ལྟ་བུའོ། །ཝ་ནི་རྐ་ཏིང་ཀའི་ཁ་ལྟ་བུའོ། །ར་ནི་ཀུན་ཙི་ཏའི་ཁ་ལྟ་བུའོ། །ལ་ནི་བྱ་རོག་ཤ་འཐེན་ལྟ་བུའོ། །ཤ་ནི་རི་བོང་ལྟ་བུའོ། །ཥ་ནི་ཀན་ཏ་ཀ་ལྟ་བུའོ། །ས་ནི་བྲམ་ཟེ་སློང་བ་ལྟ་བུའོ། །ཧ་ནི་ཧ་ར་ཀ་ལྟ་བུའོ། །ཀྵ་ནི་སྲིན་པོའི་ཁ་ལྟ་བུའོ། །ཨི་ནི་ལྕགས་ཀྱུ་བསྣོལ་བ་རེ་བས་བརྟེན་པ་ལྟ་བུའོ། །ཨུ་ནི་འོད་དཔག་བརྩེགས་པ་རེ་བས་དྲངས་པ་ལྟ་བུའོ། །ཨེ་ནི་རེ་བ་བརྩེགས་པ་འོད་དཔག་གིས་དྲངས་པ་ལྟ་བུའོ། །ཨོ་ནི་གཞུ་བརྡུངས་པ་ལྟ་བུའོ། །ཨ་ནི་གདུགས་ཕུབ་པ་ལྟ་བུའོ། །ཨྃ་ནི་དྲང་སྲོང་ཚུལ་བརྟེན་ལྟ་བུའོ། །རི་ནི་ལྕགས་སྒྲོག་ཀྱོ་ཀས་དྲངས་པ་ལྟ་བུའོ། ལི་ནི་བྱ་གག་ཀྱོ་ཀས་དྲངས་པ་ལྟ་བུ་ལ་སོགས་ཏེ་ཡི་གེ་རེ་རེ་ལ་ཡང་དབྱིབས་ཐ་དད་པ་སྣ་ཚོགས་སུ་དབྱེ་བའང་ཡོད་དེ། དེ་ལྟར་འདྲན་པ་ནི་གི་གུ་ལྕགས་ཀྱུ་ལྟ་བུའོ། །འོད་དཔག་ནི་ཞབས་ཀྱུད་དཀྲིས་པ་ལྟ་བུའོ། །རེ་བ་ནི་བསེའི་རྭ་འགྲེང་བ་ལྟ་བུའོ། ཟླ་ཚེས་ནི་ན་རོའི་རྭ་ལྟ་བུའོ། །ཐིག་ལེ་ནི་ཚག་ཚག་གི་མིག་ལྟ་བུའོ། །དབྱུག་པ་ནི་འཕང་མདུང་ལྟ་བུ་སྟེ་སོ་སོའི་དབྱིབས་ཐ་དད་པ་ལྟ་བུ་ཡོད་དོ། །ལང་ཀའི་བདག་པོ་དེ་དག་ནི་ཡི་གེའི་དབྱིབས་ཏེ་ཡི་གེའི་གཟུགས་སུ་ཤེས་པར་བྱའོ།།

བཞི་པ་རང་བཞིན་ཡིན་ཚུལ་ནི།

ལང་ཀའི། ཞེས་པ་ནས། མི་འགྱུར་བ་ཁོ་ནར་ཤེར་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ལ་ཡི་གེའི་རང་བཞིན་གང་ཞེ་ན། འདི་ལྟ་སྟེ། ཡི་གེའི་རང་བཞིན་གང་ཡིན་པ་དེ། ཡི་གེ་གཞན་གྱི་རང་བཞིན་དུ་མི་འགྱུར་ལ། ཡི་གེ་གང་གིས་ཡི་གེ་གང་དག་གི་རང་བཞིན་རྣམ་གྲངས་སུ་མཚོན་པར་མི་ནུས་སོ། །ལངྐའི་བདག་པོ་དེ་ལ་གང་གི་རང་བཞིན་གང་དུ་མི་འགྱུར་བ་ནི། འདི་ལྟ་སྟེ། ཨའི་རང་བཞིན་ནི་སྐྱེ་བ་མེད་པ་ཡིན་ལ། དེ་ནི་ཨ་འབའ་ཞིག་ལས་མ་གཏོགས་པ། ཡི་གེ་གཞན་གང་གིས་ཀྱང་སྐྱེ་བ་མེད་པའི་རང་བཞིན་ཤེས་པར་འགྱུར་བ་མ་ཡིན་ནོ། །དེ་བཞིན་དུ་ཀའི་རང་བཞིན་བྱེད་པ་ཡིན་ལ། བྱེད་པ་ནི་ཀ་འབའ་ཞིག་ལས་མ་གཏོགས་པ། ཡི་གེ་གཞན་གང་གིས་ཀྱང་བྱེད་པ་ཤེས་པར་འགྱུར་བ་མ་ཡིན་ནོ། །ལངྐའི་བདག་པོ་དེ་ལྟར་ན། མིང་དུ་བཏགས་པ་གང་ཞིག་ལ། དངོས་གཞི་གང་ཡིན་པ་དེ་མིང་གི་རྣམ་གྲངས་གཞན་བརྗོད་པས་ཀྱང་ཤེས་པར་རུང་བ་ནི་ཡོད་མོད་ཀྱི། ཡི་གེ་ནི་ཤེས་པར་མི་རུང་བའི་ཕྱིར། ཡི་གེའི་རང་བཞིན་ནི་མི་འགྱུར་བ་ཁོ་ནར་ཤེས་པར་བྱའོ།།

ལང་ཀའི་བདག་པོ། དེ་ལ་ཡི་གེའི་རང་བཞིན་གང་ཞེ་ན། འདི་ལྟ་སྟེ། ཨ་ལྟ་བུའི་ཡི་གེའི་རང་བཞིན་གང་ཡིན་པ་དེ་ཉིད་ཀ་ལ་སོགས་པ་ཡི་གེ་གཞན་གྱི་རང་བཞིན་དུ་མི་འགྱུར་ལ། དེས་ན་ཨ་ལྟ་བུའི་ཡི་གེ་གང་གིས་ཀ་ལ་སོགས་པ་ལྟ་བུ་ཡི་གེ་གང་དག་གི་རང་བཞིན་ཐ་སྙད་ཀྱི་རྣམ་གྲངས་སུ་མཚོན་པར་མི་ནུས་སོ། །ལང་ཀའི་བདག་པོ། དེ་ལ་ཡི་གེ་གང་གི་རང་བཞིན་གཞན་གང་དུ་ཡང་མི་འགྱུར་བར་མཚོན་པ་ནི་འདི་ལྟ་སྟེ། ཡི་གེ་ཨའི་རང་བཞིན་ནི་སྐྱེ་བ་མེད་པ་ཡིན་ལ། དེ་ནི་ཨ་འབའ་ཞིག་ལས་མ་གཏོགས་པ། ཡི་གེ་གཞན་ཀ་ཁ་ལ་སོགས་པ་༼༡༡༠༽གང་གིས་ཀྱང་སྐྱེ་བ་མེད་པའི་རང་བཞིན་ཤེས་པར་འགྱུར་བ་མ་ཡིན་ནོ། །དེ་བཞིན་དུ་ཀ་ཡི་རང་བཞིན་བྱེད་པ་ཡིན་ལ་བྱེད་པ་དེ་ནི་ཀ་འབའ་ཞིག་ལས་མཚོན་པ་མ་གཏོགས་པ། ཨ་ལ་སོགས་པ་ཡི་གེ་གཞན་གང་གིས་ཀྱང་བྱེད་པ་ཤེས་པར་འགྱུར་བ་མ་ཡིན་ནོ།།

ལང་ཀའི་བདག་པོ། དེ་ལྟར་ན་མིང་དུ་བཏགས་པ་ཡི་གེ་གང་ཡང་རུང་བ་ཞིག་ལ། དངོས་གཞི་གང་ཡིན་པ་དེ་ཉིད་ཀྱི་དོན་དུ་བཏགས་པའི་མིང་གི་རྣམ་གྲངས་གཞན་དག་གིས་མཚོན་ཏེ་བརྗོད་པས་ཀྱང་ཤིང་གི་ཤ་བ་མཚོན་པ་དང༌། ཤ་བས་ཤིང་མཚོན་པ་ལྟ་བུར་དངོས་པོ་གཅིག་ལ་མིང་ཐ་དད་དུ་གྲགས་པས་ཤེས་པར་རུང་བ་ནི་ཡོད་མོད་ཀྱི་ཡི་གེ་ནི་གཅིག་གི་སྒྲ་ཡིས་གཞན་དག་མཚོན་པར་མི་ནུས་ཤིང་ཤེས་པར་མི་རུང་བའི་ཕྱིར་གྱི་གཏན་ཚིགས་དེས་ན་ཡི་གེའི་རང་བཞིན་ནི་མི་འགྱུར་བ་ཁོ་ནར་ངེས་པར་གཟུང་སྟེ་ཤེས་པར་བྱའོ།།

ལྔ་པ་ཡི་གེའི་སྒྲ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། དྲངས་བའི་སྒྲའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ཡི་གེའི་སྒྲ་གང་ཞེ་ན། འདི་ལྟ་སྟེ། རང་བཞིན་གྱི་སྒྲ་དང་། བསྒྱུར་བའི་སྒྲ་དང་། སྦྱར་བའི་སྒྲ་དང་། དྲངས་པའི་སྒྲའོ།།

ལང་ཀའི་བདག་པོ། དེ་ལ་ཡི་གེའི་སྒྲ་གང་ཞེ་ན། འདི་ལྟ་སྟེ། རང་བཞིན་གྱི་སྒྲ་དང༌། བསྒྱུར་བའི་སྒྲ་དང༌། སྦྱར་བའི་སྒྲ་དང༌། དྲངས་པའི་སྒྲ་སྟེ་རྣམ་གྲངས་བཞིའོ།།

གཉིས་པ་རྒྱས་པར་བཤད་པ་ལ་བཞི་སྟེ། རང་བཞིན་གྱི་སྒྲ་བཤད་པ། བསྒྱུར་བའི་སྒྲ་བསྟན་པ། སྦྱར་བའི་སྒྲ་བཤད་པ། དྲངས་པའི་སྒྲ་བསྟན་པའོ། །དང་པོ་ནི།

དེ་ལ་རང་བཞིན་གྱི། ཞེས་པ་ནས། དེ་ཁོ་ན་ཉིད་ལྟར་གྲགས་པའོ། །ཞེས་པའི་བར་གྱིས་བསྟན་ཏེ།

དེ་ལ་རང་བཞིན་གྱི་སྒྲ་གང་ཞེ་ན། འདི་ལྟ་སྟེ། ཡི་གེ་གང་ལ་དབྱིབས་དང་། ཁ་དོག་དང་། སྐད་དང་། བརྡ་ཐ་དད་ཀྱང་། ཨ་དང་ཀ་ལ་སོགས་པའི་མིིང་དུ་བཏགས་པའི་སྒྲ་ཇི་ལྟ་བ་དེ་ཁོ་ན་ཉིད་ལྟར་གྲགས་པའོ།།

དེ་ལ་རང་བཞིན་གྱི་སྒྲ་གང་ཞེ་ན། འདི་ལྟ་སྟེ། བཤད་པའི་ཡི་གེ་གང་ལ་ཡང་སོ་སོའི་གཟུགས་ཀྱི་ཆོས་དབྱིབས་དང་ཁ་དོག་གཉིས་ཐ་དད་པ་དང༌། བསྒྱུར་བའི་སྒྲ་སྐད་ཐ་དད་པ་དང༌། བརྡ་ཡི་ཐ་སྙད་ཐ་དད་པ་ལས་ཀྱི་སྒོ་ནས་མ་སྐྱེས་པ་མཚོན་པའི་ཨ་དང༌། བྱེད་པ་ལས་ཀྱི་ཡི་གེ་ཀ་ཞེས་པ་ལྟ་བུ་ལ་སོགས་པ་ཐ་སྙད་སྣ་ཚོགས་པ་ཡོད་པར་སྣང་མོད་ཀྱང༌། ཨ་དང་ཀ་ལ་སོགས་པའི་མིང་དུ་ཐོག་མར་ཇི་ལྟར་བཏགས་པའི་སྒྲ་ཇི་ལྟ་བ་དེ་ཁོ་ན་ལྟར་མ་བསླད་པར་གདུལ་བྱ་ལ་སྣང་ཞིང་འཇལ་བར་ངེས་པའི་སྒྲར་གྲགས་པའོ།།

གཉིས་པ་བསྒྱུར་བའི་སྒྲ་བསྟན་པ་ནི།

བསྒྱུར་བའི་སྒྲ། ཞེས་པ་ནས། ཚིག་ཐ་དད་པར་འགྱུར་བའོ། །ཞེས་པའི་བར་གྱིས་བསྟན་ཏེ།

བསྒྱུར་བའི་སྒྲ་གང་ཞེ་ན། འདི་ལྟ་སྟེ། ཡི་གེ་གང་དང་གང་བསྒྱུར་བའི་སྒྲ་དེས།

དོན་དང་ཚིག་ཐ་དད་པར་གྱུར་པའོ།།

བསྒྱུར་བའི་སྒྲ་གང་ཞེ་ན། འདི་ལྟ་སྟེ། ཡི་གེ་ཨ་ལྟ་བུ་དངོས་པོ་གང་ཞིག་ལ་ཡན་ལག་གང་དང་གང་དུ་བསྒྱུར་ནས་ཨཱ་ལ་སོགས་པའི་སྒྲ་ཡི་ཁྱད་པར་ངེས་དོན་གྱི་དབང་དུ་ཐུགས་དང་གསུང་ཆོས་ཀྱི་འབྱུང་གནས་དང༌། དྲག་པོ་དང་སྐུ་ཞེས་བཞི་པོ་ཐ་དད་པར་བྱུང་བ་ལྟ་བུར་༼༡༡༡༽མཚོན་པའི་ཁྱད་པར་ཨཱ་དང་ཨཱྃ་དང་ཨེ་དང་ཨཱོ་ཞེས་པའི་ཚིག་གི་རྣམ་གྲངས་ཐ་དད་པར་འགྱུར་བ་ལྟ་བུ་སྟེ་གཞན་ཡང་རྗེས་སུ་མཐུན་པའོ།།

གསུམ་པ་སྦྱར་བའི་སྒྲ་བཤད་པ་ནི།

སྦྱར་བའི་སྒྲ། ཞེས་པ་ནས། དེ་དང་དེའི་དོན་འབྱུང་བ་གང་ཡིན་པའོ། །ཞེས་པའི་བར་གྱིས་བསྟན་ཏེ།

སྦྱར་བའི་སྒྲ་གང་ཞེ་ན། འདི་ལྟ་སྟེ། དབྱིབས་གང་དང་གང་ལ་ཡི་གེ་གང་དང་གང་གི་གཟུགས་སུ་སྦྱར་བས།

དེ་དང་དེའི་དོན་འབྱུང་བ་གང་ཡིན་པའོ།།

སྦྱར་བའི་སྒྲ་གང་ཞེ་ན། འདི་ལྟ་སྟེ། ལས་བཞིའི་དཀྱིལ་འཁོར་གྱི་དབྱིབས་ལྟ་བུ་ལ། ལས་བཞི་པོ་གང་དག་གང་མཚོན་པ་ལ་ཡི་གེ་ཨེ་ཝཾ་མ་ཡ་ཞེས་གང་དང་གང་གི་གཟུགས་ཀྱི་དབྱིབས་སུ་སྦྱར་བས་ལས་བཞི་པོ་དྲག་པོ་དང་དབང་དང་རྒྱས་པ་དང་ཞི་བའི་ཕྲིན་ལས་རྣམ་བཞི་དེ་དང་དེའི་དོན་འབྱུང་བ་གང་ཡིན་པ་དེ་ལྟ་བུ་ལ་སོགས་པའོ།།

བཞི་པ་དྲངས་པའི་སྒྲ་བསྟན་པ་ནི།

དྲངས་པའི་སྒྲ། ཞེས་པ་ནས། དེ་ལས་དོན་འབྱུང་བ་གང་ཡིན་པའོ། །ཞེས་པའི་བར་གྱིས་བསྟན་ཏེ།

དྲངས་པའི་སྒྲ་གང་ཞེ་ན། འདི་ལྟ་སྟེ། ཡི་གེ་གང་དང་གང་ལས་ཚིག་གང་ལྟར་དྲངས་པའི་སྒྲ་དེ་དང་དེ་ལས། དོན་གང་འབྱུང་བ་གང་ཡིན་པའོ།།

དྲངས་པའི་སྒྲ་གང་ཞེ་ན། འདི་ལྟ་སྟེ། ཡི་གེ་ཀ་ལྟ་བུའི་དངོས་པོ་གང་དང་གང་ཞིག་ལས་ཚིག་གང་ལྟར་ཡང་དྲངས་པའི་སྒྲ་ཀརྨ་ཞེས་པ་དང༌། ཀཱ་ཡ་ཞེས་པ་དང༌། ཀཱ་རུ་ཎི་ཞེས་པ་དང༌། ཀཱ་ལཾ་ཞེས་པ་ལྟ་བུ་དེ་དང་དེ་ལས་དོན་ཕྲིན་ལས་དང་སྐུ་དང་ཐུགས་རྗེ་དང་ནག་པོ་ཞེས་པ་ལྟ་བུ་གང་ཐ་དད་པར་འབྱུང་ཞིང་འགྱུར་བ་ལྟ་བུ་གང་ཡིན་པའོ། །ཡི་གེ་གཞན་དག་ཀྱང་རྗེས་སུ་མཐུན་པའི་ཕྱིར་སྒྲ་བརྩེགས་མར་བྱུང་བ་སྟེ་བཤད་པ་དག་ཀྱང་ཤེས་པར་བྱའོ།།

དྲུག་པ་བྱེད་པའི་ལས་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། གང་ཤེས་པར་བྱེད་པ་ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལ་ཡི་གེའི་ལས་གང་ཞེ་ན། འདི་ལྟ་སྟེ། གང་དུ་སྤེལ་བ་དང་། གང་ཤེས་པར་བྱེད་པ་ཉིད་དོ།།

ལང་ཀའི་བདག་པོ། འདི་ལ་ཡི་གེའི་བྱེད་པའི་ལས་གང་ཞེ་ན། འདི་ལྟ་སྟེ། གང་དུ་སྒྲ་དང་ཚིག་མང་པོ་སྤེལ་བའམ་འཕེལ་བར་བྱེད་པ་དང༌། གང་ཤེས་བྱ་ཁོང་དུ་ཆུད་ཅིང་ཤེས་པར་བྱེད་པ་ཉིད་དོ།།

གཉིས་པ་རྒྱས་པར་བཤད་པ་ལ་གཉིས་ཏེ། སྤེལ་བར་བྱེད་པ། ཤེས་པར་བྱེད་པའོ། །དང་པོ་ནི།

གང་དུ་སྤེལ་བ། ཞེས་པ་ནས། ཐམས་ཅད་ཤེས་པར་བྱེད་པའོ། །ཞེས་པའི་བར་གྱིས་བསྟན་ཏེ།

གང་དུ་སྤེལ་བ་ནི། འདི་ལྟ་སྟེ། གང་མེད་པ་ལས་གཅིག་ཏུ་འབྱུང་བ་དང་། གཅིག་དང་། གསུམ་དང་། ལྔ་དང་། བཞི་བཅུ་དང་། འབུམ་སྡེ་དང་། བྱེ་བ་དང་། ས་ཡར་འཕེལ་བས་ཐམས་ཅད་ཤེས་པར་བྱེད་པའོ།།

དེ་ལའང་གང་དུ་སྤེལ་བ་ནི་འདི་ལྟ་སྟེ། གང་ངོ་བོ་གཟུང་དུ་མེད་པ་ཆོས་ཉིད་མ་སྐྱེས་པའི་ངང་ལས་ཡི་གེ་ཨ་ལྟ་བུ་གཅིག་ཏུ་འབྱུང་བ་དང༌། ཨ་གཅིག་པུ་དེ་ལས་སྐུ་གསུང་ཐུགས་ཀྱི་སྙིང་པོ་གསུམ་འབྱུང་བ་དང༌། དེ་བཞིན་དུ་རིགས་ལྔ་ཡི་སྙིང་པོ་དང༌། ཡི་གེ་བཞི་བཅུ་རྩ་གཉིས་དང༌། དེ་དག་ལས་མིང་དང་ཚིག་གི་ཐ་སྙད་དམ་ཚིག་དང་བམ་པོ་ཇི་སྙེད་པར་འབྱུང་བའང་བཅུ་དང་སུམ་བརྒྱ་ལ་སོགས་པ་ནས་འབུམ་སྡེ་གཅིག་དང༌། དེ་བས་བཅུ་འགྱུར་གྱིས་མང་བ་བྱེ་བ་དང༌། ༼༡༡༢༽དེ་བས་ཀྱང་བཅུ་འགྱུར་གྱིས་མང་བ་ས་ཡར་འཕེལ་བའི་ཚིག་གི་ཐ་སྙད་ལ་སོགས་པས་དོན་ཐམས་ཅད་རྟོགས་ཤིང་ཤེས་པར་བྱེད་པའོ།།

གཉིས་པ་ཤེས་པར་བྱེད་པ་ནི།

གང་ཤེས་པར་བྱེད་པ། ཞེས་པ་ནས། མང་པོ་ཐ་དད་པར་བཀླག་པའོ། །ཞེས་པའི་བར་གྱིས་བསྟན་ཏེ།

གང་ཤེས་པར་བྱེད་པ་ནི། འདི་ལྟ་སྟེ། མིང་བཀླག་པ་དང་། ཚིག་བཀླག་པ་དང་། གཟུགས་བཀླག་པ་དང་། དོན་བཀླག་པ་དང་། སྒྲ་བཀླག་པ་དང་། གཅིག་བཀླག་པ་དང་། མང་པོ་བཀླག་པ་དང་། གཅིག་མང་པོར་བཀླག་པ་དང་། མང་པོ་གཅིག་ཏུ་བཀླག་པ་དང་། གཅིག་དང་མང་པོ་ཐ་དད་པར་བཀླག་པའོ།།

གང་ཡི་གེའི་ལས་ཤེས་བྱ་ཤེས་པར་བྱེད་པ་བསྟན་པ་ནི་འདི་ལྟ་སྟེ། ཤ་བའི་མིང་བཀླག་པའི་ཡི་གེ་ཤ་དང་བ་ཡིས་འབྱིན་པར་བྱེད་པ་ལྟ་བུ། དོན་གྱི་ངོ་བོ་མཚོན་པས་མིང་བཀླག་པ་དང༌། ཚིག་གི་དངོས་པོ་གང་ཞིག་ཡི་གེ་ནུབ་པའི་བརྗོད་པས་སྟོན་པ་ནི་ཡི་གེ་འདུས་པས་མཚོན་པ་སྟེ་དོན་གྱི་ཁྱད་པར་སྟོན་པས་ཚིག་བཀླག་པ་དང༌། གཟུགས་བཤད་པ་བཞིན་མི་སྣང་བ་ནི་ཡི་གེ་དབྱིབས་དང་ཁ་དོག་འདི་ལྟ་བུར་ཡོད་དོ་ཞེས་སྟོན་པ་གཟུགས་བཀླག་པ་དང༌། ཡང་ན་ནོག་དང་ལྐོག་ཤལ་ཞེས་པ་ལྟ་བུ་ཡོད་དོ། །ཤེས་བྱ་མཉམ་པ་ཉིད་ཀྱི་དོན་གྱི་རྣམ་གྲངས་དག་ཡི་གེ་ལ་བརྟེན་ནས་ངོ་བོ་དང་མཚན་ཉིད་འདི་འདྲ་ཞེས་མཚོན་པ་དོན་བཀླག་པ་དང༌། བྱཱ་ཀ་ར་ཎ་དང་སཾ་སྐྲ་ཏ་ལ་སོགས་པའི་སྒྲ་ནུབ་པ་དག་ཡི་གེ་དེས་མཚོན་པས་ཤེས་པར་བྱེད་པ་སྒྲ་བཀླག་པ་དང༌། དངོས་པོ་གང་ཡང་རུང་བ་ཞིག་གི་རྣམ་པ་བཀླག་པ་ལ་གཟུགས་ཀྱི་ཕུང་པོ་བཅོ་ལྔ་ལ་གཟུགས་ཀྱི་ཕུང་པོ་དེ་ནི་གཟུགས་སུ་རུང་བ་འདིའོ། །ཞེས་སྟོན་པ་ལྟ་བུ་གཅིག་བཀླག་པ་དང༌། རྣམ་གྲངས་ཡིད་མལ་མན་ཆད་ཀྱི་གྲངས་ཕྲག་གཅིག་ཏུ་ནུབ་ན། དེ་ནི་འདི་ནས་བརྩིས་པའི་འདི་སྙེད་དོ་ཞེས་སྟོན་པ་ལྟ་བུ་མང་པོ་བཀླག་པ་དང༌། དཔེར་ན་འབྲས་ཁལ་སྟོང་དང་ཕུང་པོ་ལྔ་ཞེས་པ་ལྟ་བུ་གཅིག་མང་པོར་ནུབ་པ་མཚོན་པ་གཅིག་མང་པོར་བཀླག་པ་དང༌། གཟུགས་ཀྱི་ཕུང་པོ་བཅོ་ལྔ་ལྟ་བུ་རྣམ་གྲངས་མང་པོ་གཅིག་ཏུ་ནུབ་པ་ནི་ནེ་ཙོ་ཁྱུ་ཞེས་པ་ལྟ་བུ་དངོས་པོ་མང་པོ་གཅིག་ཏུ་ནུབ་པ་མང་པོ་གཅིག་ཏུ་བཀླག་པ་དང༌། དེ་ལྟར་གྲངས་དང་ངོ་བོའི་གཅིག་དང་དུ་མའང་ཆོས་ཅན་རང་གི་ངོ་བོ་ཐ་དད་དུ་ཕྱེ་བས་རྒྱ་ཆད་པར་གྱུར་པ་ལ་གཅིག་དང་དུ་མའི་སྒྲ་མེད་པ། གཟུགས་དང་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའོ། །ཞེས་པའམ། ས་དང་ཆུ་དང་མེ་དང་རླུང་ཞེས་པ་ལྟ་བུ་གཅིག་དང་མང་པོ་ཐ་དད་པར་བཀླག་པའོ།།

བདུན་པ་འབྱུང་བའི་སྒོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ཡང་ལང་ཀའི། ཞེས་པ་ནས། རྣམས་སུ་རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལ་ཡི་གེའི་སྒོ་གང་ཞེ་ན། འདི་ལྟ་སྟེ། ཡི་གེའི་སྒོ་དང་། ཚིག་གི་སྒོ་གང་དང་། དོན་གྱི་སྒོ་དང་། དབྱངས་ཀྱི་སྒོ་དང་། གཟུངས་ཀྱི་སྒོ་རྣམས་སུ་རིག་པར་བྱའོ།།

ཡང་ལང་ཀའི་བདག་པོ། འདི་ལ་ཡི་གེའི་འབྱུང་བའི་སྒོ་གང་ཞེ་ན། འདི་ལྟ་སྟེ། ༼༡༡༣༽ཡི་གེའི་སྒོ་དང༌། ཚིག་གི་སྒོ་དང༌། དོན་གྱི་སྒོ་དང༌། དབྱངས་ཀྱི་སྒོ་དང༌། གཟུངས་ཀྱི་སྒོ་རྣམས་སུ་རིག་པར་བྱ་སྟེ་རྣམ་གྲངས་ལྔའོ།།

གཉིས་པ་རྒྱས་པར་བཤད་པ་ལ་ལྔ་སྟེ། ཡི་གེའི་སྒོ་བཤད་པ། ཚིག་གི་སྒོ་བཤད་པ། དོན་གྱི་སྒོ་བསྟན་པ། དབྱངས་ཀྱི་སྒོ་བསྟན་པ། གཟུངས་ཀྱི་སྒོ་བཤད་པའོ། །དང་པོ་ནི།

ལང་ཀའི། ཞེས་པ་ནས། གང་ལ་བྲིས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ཡི་གེའི་སྒོ་གང་ཞེ་ན། གང་གིས་གང་ལ་བྲིས་པའོ།།

ལང་ཀའི་བདག་པོ། དེ་ལ་ཡི་གེའི་སྒོ་ཉེ་བར་བསྟན་པ་གང་ཞེ་ན། སྡུད་པ་པོ་གང་གིས་གཞི་གང་ལ་ཡི་གེར་བཀོད་པ་ལྟ་བུ་སྟེ། གང་གིས་བྲིས་པ་ལས་སྣང་བའོ།།

གཉིས་པ་ཚིག་གི་སྒོ་བཤད་པ་ནི།

ཚིག་གི་སྒོ། ཞེས་པ་ནས། ཡི་གེའོ། །ཞེས་པའི་བར་གྱིས་བསྟན་ཏེ།

ཚིག་གི་སྒོ་གང་ཞེ་ན། གང་ཡི་གེའོ།།

ཚིག་གི་སྒོ་གང་ཞེ་ན། གང་རྡུལ་ཕྲན་འདུས་པ་ལས་གོང་བུ་འབྱུང་བ་བཞིན་དུ་ཡི་གེ་འདུས་པ་ལས་ཚིག་འབྱུང་བའོ།།

གསུམ་པ་དོན་གྱི་སྒོ་བསྟན་པ་ནི།

དོན་གྱི་སྒོ། ཞེས་པ་ནས། ཚིག་གི་ཚོགས་སོ། །ཞེས་པའི་བར་གྱིས་བསྟན་ཏེ།

དོན་གྱི་སྒོ་གང་ཞེ་ན། གང་ཚིག་གི་ཚོགས་སོ།།

དོན་གྱི་སྒོ་གང་ཞེ་ན། གང་ཚིག་གི༌ཚོགས་ཀྱིས་དོན་མཚོན་པ་རྣམས་སོ།།

བཞི་པ་དབྱངས་ཀྱི་སྒོ་བསྟན་པ་ནི།

དབྱངས་ཀྱི་སྒོ། ཞེས་པ་ནས། སུམ་བརྒྱ་དྲུག་ཅུ་འབྱུང་བར་རིག་པར་བྱའོ། །ཞེས་པའི་བར་གྱིས་བསྟན་ཏེ།

དབྱངས་ཀྱི་སྒོ་གང་ཞེ་ན། གང་ཡི་གེ་བཅུ་དྲུག་གོ །ལངྐའི་བདག་པོ་གང་ཡི་གེ་བཅུ་དྲུག་ཀྱང་གང་ཞེ་ན། འགྲར་དང་ཅྭང་འབའ་ཞིག་ཏུ་ཤེས་པར་བྱའོ། །དེ་ནི་རིང་པོ་དང་ཐུང་ངུ་ཉིད་དུ་རིག་པར་བྱའོ། །གང་ཐུང་ངུ་དང་རིང་པོ་དེ་གཉིས་ལས། དབྱངས་ཀྱི་ཡན་ལག་དྲུག་བྱུང་བར་རིག་པར་བྱ་སྟེ། ཐུང་ངུ་ལས་གཉིས་དང་། གང་རིང་པོ་ལས་གཉིས་དང་། གང་དེ་གཉིས་ལས་གཉིས་འབྱུང་བར་རིག་པར་བྱའོ། །ཐུང་ངུ་ལས་ཡན་ལག་གཉིས་འབྱུང་བ་ནི་འདི་ལྟ་སྟེ། ཤ་ངྷ་བ་དང་། གར་ངྷ་བ་གཉིས་སོ། །རིང་པོ་ལས་ཡན་ལག་གཉིས་འབྱུང་བ་ནི། འདི་ལྟ་སྟེ། བྲེང་ངེ་བ་དང་། དུང་ངེ་བ་གཉིས་སོ། །གང་དེ་གཉིས་ལས་ཡན་ལག་གཉིས་འབྱུང་བ་ནི། འདི་ལྟ་སྟེ། ཅྭང་ཀ་དེའུ་དང་། པང་ཀ་དེའུ་གཉིས་སོ། །ལངྐའི་བདག་པོ་ཡན་ལག་འདི་དྲུག་ཀྱང་། གང་འགྲོ་བ་དྲུག་གི་ཁམས་སུ་གསུང་བའི་སྒོ་དྲུག་ལས། དྲུག་དྲུག་ཏུ་བསྒྱུར་བ་བྱས་པ་ལས། དྲུག་དང་བཅུ་གསུམ་དུ་འབྱུང་བར་རིག་པར་བྱའོ། །དྲུག་ཅུར་བསྒྱུར་བས་དབྱངས་ཀྱི་ཡན་ལག་དྲུག་ཅུར་འབྱུང་བར་རིག་པར་བྱའོ། །དྲུག་དྲུག་ཅུར་བསྒྱུར་བ་བྱས་པས།

ཡན་ལག་སུམ་བརྒྱ་དྲུག་ཅུར་འབྱུང་བར་རིག་པར་བྱའོ།།

དེ་ལ་དབྱངས་ཀྱི་སྒོ་གང་ཞེ་ན། གང་དབྱངས་ཀྱི་ཡེ་གེ་ཨ་ཨཱ་ཨི་ཨཱི་ལ་སོགས་པ་བཅུ་དྲུག་གོ །ལང་ཀའི་བདག་པོ་ཡི་གེ་བཅུ་དྲུག་ཀྱང་གང་ཞེ་ན། རིང་པོ་རྣམས་འགྭར་དང༌། ཐུང་ངུ་རྣམས་ཅྭང་འབའ་ཞིག་ཏུ་ཤེས་པར་བྱའོ། །དེ་ནི་རིང་པོ་དང་ཐུང་ངུ་ཉིད་དུ་ངེས་པས་སྒྲ་རིང་ཐུང་གཉིས་ལ་བརྒྱད་བརྒྱད་དུ་རིག་པར་བྱའོ། །གང་ཐུང་ངུ་དང་རིང་པོ་དེ་གཉིས་ཀྱི་གཞི་ལས། དབྱངས་ཀྱི་ཡན་ལག་དྲུག་འབྱུང་བར་རིག་པར་བྱ་སྟེ། གང་ཐུང་ངུ་ལས་གཉིས་དང༌། གང་རིང་པོ་ལས་གཉིས་དང༌། གང་དེ་གཉིས་ཀྱི་ཆ་མཉམ་པ་ལས་གཉིས་འབྱུང་བར་རིག་ཅིང་ཤེས་པར་བྱའོ། །གང་ཐུང་ངུ་ཅྭང་ལས་ཡན་ལག་གཉིས་འབྱུང་བ་ནི་འདི་ལྟ་སྟེ། སྒྲ་སྙན་ལྟ་བུ་ཤ་ཏ་པ་དང༌། འབྲུག་དབྱངས་ལྟ་བུ་གར་དྷ་བ་གཉིས་སོ། །དེའང་སྔ་མ་རྟོལ་བུ་མ་སྟོར་བ་ལྟར་རྡོ་རྗེ་སྲིན་པོའི་ངུར་སྒྲ་དང་བཅས་པ་དང༌། ཕྱི་མ་ནི་མཛོ་མོ་བུ་སྟོར་བ་ལྟར་འཁུན་ཞིང་གདུང་བའི་བའི་ངུད་སྒྲ་ལྕེ་རྩེ་ཡ་རྐན་ལ་གཏད་དེ་བླང་བའོ། །དེ་གཉིས་ཀྱི་ཡོན་ཏན་ཡང༌། རྩ་བའི་རྒྱུད་ལས། ཤ་ཏ་པ་ཡི་གླུ་བླངས་པས། །གདུག་བྱེད་ཐམས་ཅད་སྤ་ཡང་བཀོང༌། །གར་དྷ་པ་ཡི་གླུ་བླངས་པས། །གནོད་བྱེད་ཐམས་ཅད་རྡུལ་དུ་རློག །ཅེས་པས་དྲག་ལ་ཐུང་བའོ། །གང་རིང་པོ་འགྭར་ལས་ཡན་ལག་གཉིས་འབྱུང་བ་ནི་འདི་ལྟ་སྟེ། སིལ་སྙན་ལྟ་བུ་༼༡༡༤༽བྲེང་ངེ་བ་དང༌། ཚངས་དབྱངས་ལྟ་བུ་དུང་ངེ་བ་གཉིས་སོ། །དང་པོ་ནི་བུང་བ་རྫ་མར་བཅུག་པ་ལྟར་རྒྱུན་མ་ཆད་པ་སྟེ་འཁུར་བའི་དབུགས་ལས་བྱུང་བ་དང༌། གཉིས་པ་ནི། ཚངས་པའི་དབྱངས་ལྟར་ཕྲ་ལ་འཁྱུག་པའོ། །ཡོན་ཏན་ཡང་དེ་ཉིད་ལས། བྲེང་ངེ་བ་ཡི་གླུ་བླངས་པས། སྤྲུལ་པའི་ཆོ་འཕྲུལ་ཐམས་ཅད་འགྱེད། །དུང་ངེ་བ་ཡི་གླུ་བླངས་པས། །སྲིད་པའི་བུ་མོ་དབང་དུ་སྡུད། །ཅེས་པའི་དོན་ཏོ། །གང་དེ་གཉིས་མཉམ་པ་ལས་ཡན་ལག་གཉིས་འབྱུང་བ་ནི་འདི་ལྟ་སྟེ། ཀ་ལ་པིང་ཀ་ལྟ་བུ་ཅྭང་ཀ་དེའུ་དང༌། གླུ་གར་ལྟ་བུ་པྭང་ཀ་དེའུ་གཉིས་སོ། །སྔ་མ་ནི། ཧཱུྃ་ཧ་ཧེ་ཕཊ་རུ་ལུ་རུ་ལུ་ལ་སོགས་པ་སྔགས་ཀྱི་ཡི་གེའི་སྒྲ་སྒྲོག་པ་དང༌། ཕྱི་མ་ནི་འབྲུག་གི་སྒྲ་ལྟ་བུར་ཟབ་ཅིང་ཆེ་ལ་དྲག་པའོ། །དེ་ཡང་སྔ་མ་ལས། ཅྭང་ཀ་དེའུའི་གླུ་བླངས་པས། །འབར་བའི་དཀྱིལ་འཁོར་མེ་ལྟར་མཆེད། །པང་ཀ་དེའུའི་གླུ་བླངས་པས། །དྲག་པོ་གཏུམ་པོའང་ལྷན་ནེར་འགྱུར། །ཞེས་པའི་དོན་ཏོ། །དེ་ལྟར་སོ་སོའི་ཡོན་ཏན་ལས་དཔག་ནའང་སྒྲ་རིང་ཐུང་འཇལ་བར་འགྱུར་རོ། །ལང་ཀའི་བདག་པོ། །ཡན་ལག་འདི་དྲུག་ཀྱང་གསུང་རྩ་བ་དྲུག་ཏུ་ངེས་པའི་དགོངས་པ་དང༌། གང་གསུང་གི་ཡན་ལག་གི་ལས་ཀྱིས་འགྲོ་བ་དྲུག་གི་ཁམས་སུ་ཚངས་པ་ལྟ་བུ་ལ་སོགས་པ་གསུང་གི་རྣམ་གྲངས་དག་གིས་སྲིད་པ་ལས་སྒྲོལ་བར་མཛད་པའི་སྒོ་དྲུག་ལས། འགྲོ་དྲུག་རེ་རེ་ལའང་ཉོན་མོངས་པ་ཤས་ཆེ་ཆུང་གི་ནང་རིས་ཀྱི་འདུལ་བའི་དབང་གིས་དབྱངས་ཀྱི་ཡན་ལག་དྲུག་དྲུག་ཏུ་བསྒྱུར་བར་བྱས་པ་ལས་དྲུག་དང་བཅུ་ཚན་གསུམ་སྟེ་དྲུག་དྲུག་སུམ་ཅུ་རྩ་དྲུག་ཏུ་འགྱུར་བར་རིག་པར་བྱའོ། །དེ་ཡང་རྩ་བ་དྲུག་གི་རེ་རེ་ལའང་གོང་དུ་བཤད་པའི་འདུ་ཤེས་སྐྱེད་པ། རྣམ་པར་རིག་པ། མཉན་པར་འོས་པ། མི་མཐུན་པ་མེད་པ། ཤིན་ཏུ་ཟབ་པ། རྗེས་སུ་འབྱུང་བ། གང་གིས་ཀྱང་མི་ཚུགས་པ། རྣ་བར་སྙན་པ། རྣམ་པར་མ་འཁྲུགས་པ། ཤིན་ཏུ་གསལ་བ་སྟེ་ཡན་ལག་བཅུ་བཅུ་དང་ལྡན་པར་དྲུག་ཅུར་བསྒྱུར་བར་བྱས་པས་གསུང་ཚངས་པའི་དབྱངས་ཀྱི་ཡན་ལག་དྲུག་ཅུར་འབྱུང་བར་རིག་པར་བྱའོ། །གསུང་རྩ་བ་དྲུག་དྲུག་ལ་ཡན་ལག་བཅུ་བཅུར་བསྒྱུར་བར་བྱས་ཏེ་སྦྱར་བས་བྱེ་བྲག་རེ་རེ་ཞིག་ཡང་དྲུག་དྲུག་དང་ལྡན་པས་དྲུག་ཅུ་ཕྲག་དྲུག་ཏུ་འགྱུར་ཏེ་དབྱངས་ཀྱི་ཡན་ལག་སུམ་བརྒྱ་དང་དྲུག་ཅུར་འབྱུང་བར་ཡང་དག་པར་རིག་ཅིང་ཤེས་པར་བྱའོ། །མདོར་ན་གསུང་གི་ཡུལ་འགྲོ་བ་རིགས་དྲུག་གི་རེ་རེ་ལའང་གསུང་སྒོ་དྲུག་ཏུ་༼༡༡༥༽གསུངས་པས་དྲུག་དྲུག་སུམ་ཅུ་རྩ་དྲུག་དང༌། སྤྱིར་འགྲོ་བ་དྲུག་ཆར་དུ་བསྡམ་པས་ཕྱོགས་བཅུ་རེ་རེ་ནའང་འགྲོ་བ་དྲུག་དྲུག་གནས་པ་ལ་གསུང་གི་སྒོ་དྲུག་དྲུག་གསུངས་པས་གསུང་སྒོ་དྲུག་ཅུ། གསུང་གི་སྒོའི་རྩ་བ་རེ་རེ་ལའང་དབྱངས་ཀྱི་ཡན་ལག་བཅུ་བཅུ་སྟེ་དྲུག་ཅུ་དང་འགྲོ་བ་དྲུག་རེ་རེ་ལའང་གསུང་སྒོ་དྲུག་ཅུ་དྲུག་ཅུ་གསུངས་པས་སུམ་བརྒྱ་དྲུག་ཅུར་འགྱུར་བ་ཡིན་ནོ།།

ལྔ་པ་གཟུངས་ཀྱི་སྒོ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། སྔགས་ཀྱི་གཟུངས་སུ་རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཟུངས་ཀྱི་སྒོ་གང་ཞེ་ན། འདི་ལྟ་སྟེ། དོན་གྱི་གཟུངས་དང་། ཚིག་གི་གཟུངས་དང་། ཆོས་ཀྱི་གཟུངས་དང་། སྔགས་ཀྱི་གཟུངས་སུ་རིག་པར་བྱའོ།།

ལང་ཀའི་བདག་པོ་དེ་ལ་གཟུངས་ཀྱི་སྒོ་གང་ཞེ་ན། འདི་ལྟ་སྟེ། དོན་གྱི་གཟུངས་དང༌། ཚིག་གི་གཟུངས་དང༌། ཆོས་ཀྱི་གཟུངས་དང་། སྔགས་ཀྱི་གཟུངས་རྣམས་སུ་རིག་པར་བྱའོ།།

གཉིས་པ་རྒྱས་པར་བཤད་པ་ལ་བཞི་སྟེ། དོན་གྱི་གཟུངས། ཚིག་གི་གཟུངས། ཆོས་ཀྱི་གཟུངས། སྔགས་ཀྱི་གཟུངས་སོ། །དང་པོ་ནི།

ལང་ཀའི། ཞེས་པ་ནས། དེ་ཉིད་དེ་དང་མ་བྲལ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དོན་གྱི་གཟུངས་གང་ཞེ་ན། ཡི་གེ་གང་སྣང་བའི་དོན་དེ་ཉིད་དེ་དང་མ་བྲལ་བའོ།།

ལང་ཀའི་བདག་པོ། དོན་གྱི་གཟུངས་དེ་ཉིད་བསྟན་པ་གང་ཞེ་ན། ཡི་གེ་ཨ་ལྟ་བུ་གང་བྱུང་ཞིང་སྣང་བའི་དོན་གྱི་གཟུངས་ནི་མ་སྐྱེས་པ་དེ་ཉིད་ཡིན་ལ་དེ་ཡང་ཨ་ཉིད་དང་མ་བྲལ་བ་སྟེ་གཞན་ཡང་རྗེས་སུ་མཐུན་པའོ།།

གཉིས་པ་ཚིག་གི་གཟུངས་ནི།

ཚིག་གི་གཟུངས། ཞེས་པ་ནས། ཚིག་གང་བྱུང་བའོ། །ཞེས་པའི་བར་གྱིས་བསྟན་ཏེ།

ཚིག་གི་གཟུངས་གང་ཞེ་ན། ཡི་གེ་གང་ལས་ཚིག་གང་འབྱུང་བའོ།།

ཚིག་གི་གཟུངས་གང་ཞེ་ན། ཡི་གེ་གང་ལས་ཚིག་གང་བྱུང་ཞིང་སྣང་བ་ནའང་ཚིག་དང་ཡི་གེ་མི་འབྲལ་བ་ཀ་དང་བ་ལས་ཀ་བ་ཞེས་འབྱུང་བ་ལ་སོགས་པ་ལྟ་བུའོ།།

གསུམ་པ་ཆོས་ཀྱི་གཟུངས་ནི།

ཆོས་ཀྱི་གཟུངས། ཞེས་པ་ནས། མི་དམིགས་པའི་སྒོར་རིག་པར་བྱའོ། །ཞེས་པའི་བར་གྱིས་བསྟན་ཏེ།

ཆོས་ཀྱི་གཟུངས་གང་ཞེ་ན། གང་ཡི་གེ་ནི་ཆོས་ཐམས་ཅད་འབྲེལ་ཅིང་།

ཆོས་ཐམས་ཅད་མི་དམིགས་པའི་སྒོར་རིག་པར་བྱའོ།།

ཆོས་ཀྱི་གཟུངས་གང་ཞེ་ན། གང་ཡི་གེ་ནི་ཆོས་ཐམས་ཅད་དང་འབྲེལ་བར་གྱུར་ཅིང་ཐམས་ཅད་ཟིན་པ་ཡིན་ལ། དེས་ན་གང་ཡི་གེ་ལས་ཆོས་ཐམས་ཅད་མི་དམིགས་པར་འབྱུང་བའི་སྒོར་གྱུར་པ་སྟེ། གང་མི་དམིགས་པ་ནི་ཆོས་རྣམས་མ་ཡིན་པ་གཞན་ཞིག་ལས་མི་འབྱུང་བའི་ཕྱིར་ཆོས་ཀྱི་གཟུངས་སུ་རིག་པར་བྱའོ།།

བཞི་པ་སྔགས་ཀྱི་གཟུངས་ནི།

སྔགས་ཀྱི་གཟུངས། ཞེས་པ་ནས། བཙན་པར་རེད་པ་གང་ཡིན་པའོ། །ཞེས་པའི་བར་གྱིས་བསྟན་ཏེ།

སྔགས་ཀྱི་གཟུངས་གང་ཞེ་ན། ཡི་གེའི་སྒོ་ནས་ཚིག་བཙན་པར་རེག་པ་གང་ཡིན་པའོ།།

སྔགས་ཀྱི་གཟུངས་གང་ཞེ་ན། ཡི་གེའི་སྒོ་ནས་གསང་སྔགས་ཀྱི་ཚིག་བཙན་པར་རེད་དེ་ངོ་བོ་དང་ནུས་མཐུ་མི་འགྱུར་བའི་སྟོབས་ཅན་དུ་གྱུར་པ་གང་ཡིན་པའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། རིག་པར་བྱའོ། །༼༡༡༦༽ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་ཡི་གེའི་སྒོར་རིག་པར་བྱའོ།།

ལང་ཀའི་བདག་པོ་དེ་དག་ནི་ཡི་གེའི་སྒོར་རིག་པར་བྱའོ།།

བརྒྱད་པ་བཀོད་པའི་རྣམ་གྲངས་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཆོ་འཕྲུལ་གྱི་ཡི་གེའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལ་ཡི་གེའི་རྣམ་གྲངས་གང་ཞེ་ན། རང་བཞིན་གྱི་ཡི་གེ་དང་། ཆོ་འཕྲུལ་གྱི་ཡི་གེའོ།།

ལང་ཀའི་བདག་པོ་འདི་ལ་ཡི་གེའི་རྣམ་གྲངས་གང་ཞེ་ན། རང་བཞིན་གྱི་ཡི་གེ་དང༌། ཆོ་འཕྲུལ་གྱི་ཡི་གེའོ།།

གཉིས་པ་རྒྱས་པར་བཤད་པ་ལ་གཉིས་ཏེ། རང་བཞིན་གྱི་ཡི་གེ་བཤད་པ། ཆོ་འཕྲུལ་གྱི་ཡི་གེ་བསྟན་པའོ། །དང་པོ་ནི།

དེ་ལ་རང་བཞིན་གྱི། ཞེས་པ་ནས། ཡི་གེ་འབའ་ཞིག་པའོ། །ཞེས་པའི་བར་གྱིས་བསྟན་ཏེ།

དེ་ལ་རང་བཞིན་གྱི་ཡི་གེ་གང་ཞེ་ན། གང་ཐམས་ཅད་ཀྱང་ཡི་གེ་འབའ་ཞིག་པའོ།།

དེ་ལ་རང་བཞིན་གྱི་ཡི་གེ་གང་ཞེ་ན། གང་ཆོས་ཐམས་ཅད་ཀྱང་ཡི་གེ་འབའ་ཞིག་ཏུ་གནས་པའོ།།

གཉིས་པ་ཆོ་འཕྲུལ་གྱི་ཡི་གེ་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཆོ་འཕྲུལ་གྱི་ཡི་གེ ཞེས་པ་ནས། ཐུན་མོང་བའོ། །ཞེས་པའི་བར་གྱིས་བསྟན་ཏེ།

ཆོ་འཕྲུལ་གྱི་ཡི་གེ་གང་ཞེ་ན། འཇིག་རྟེན་དང་། འཇིག་རྟེན་ལས་འདས་པ་དང་ཐུན་མོང་བའོ།།

དེ་ལ་ཆོ་འཕྲུལ་གྱི་ཡི་གེ་གང་ཞེ་ན། གང་འཇིག་རྟེན་པའི་ཡི་གེ་དང་འཇིག་རྟེན་ལས་འདས་པ་དང་དེ་གཉིས་ཐུན་མོང་ཏུ་གྱུར་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། འཇིག་རྟེན་ལས་འདས་པའི་ཡི་གེ འཇིག་རྟེན་པའི་ཡི་གེ ཐུན་མོང་གི་ཡི་གེ་བཤད་པའོ། །དང་པོ་ནི།

འཇིག་རྟེན་ལས་འདས་པའི། ཞེས་པ་ནས། ཨཱ་རྣམས་སོ། །ཞེས་པའི་བར་གྱིས་བསྟན་ཏེ།

འཇིག་རྟེན་ལས་འདས་པའི་ཡི་གེ་གང་ཞེ་ན། ཨ་དང་། ཧཱུཾ་དང་། མུཾ་དང་། སྭཾ་དང་། ཨཾ་དང་། ཧཾ་དང་། ཨ་རྣམས་སོ།།

དེ་ལ་འཇིག་རྟེན་ལས་འདས་པའི་ཡི་གེ་གང་ཞེ་ན། དོན་དམ་དཀོར་བདུན་མཚོན་པའི་ཡི་གེ་སྟེ། སྐུའི་སྙིང་པོ་ཨཱ་དང༌། ཐུགས་ཀྱི་སྙིང་པོ་ཧཱུྃ་དང༌། དབྱིངས་ཀྱི་དོན་མཚོན་མཱུྃ་དང༌། ཡོན་ཏན་གྱི་སྙིང་པོ་སྭཱ་དང༌། གསུང་གི་སྙིང་པོ་ཨྃ་དང༌། ཕྲིན་ལས་ཀྱི་སྙིང་པོ་ཧྃ་དང་ཡེ་ཤེས་སྐྱེ་བ་མེད་པ་མཚོན་པས་ཨཱ་དང་བདུན་པོ་རྣམས་སོ།།

གཉིས་པ་འཇིག་རྟེན་པའི་ཡི་གེ་ནི།

ལང་ཀའི། ཞེས་པ་ནས། འཇིག་རྟེན་ཐ་དད་ཀྱི་ཡི་གེར་གྲགས་པ་གང་ཡིན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལ་འཇིག་རྟེན་པའི་ཡི་གེ་གང་ཞེ་ན། འདི་ལྟ་སྟེ། རྩ་བ་དང་། ཟིན་པ་དང་། གྲགས་པའོ། །རྩ་བ་གང་ཞེ་ན། ས་བོན་དྲུག་གང་ཡིན་པའོ། །ཟིན་པ་གང་ཞེ་ན། གང་འགྲོ་བ་རྣམས་ཀྱི་སྒྲ་སྐད་ཀུན་ཡི་གེས་ཟིན་པ་ཁོ་ནའོ། །གྲགས་པ་གང་ཞེ་ན། ལྷའི་ཡི་གེ་དང་། ཀླུའི་ཡི་གེ་དང་། ལྷ་མ་ཡིན་གྱི་ཡི་གེ་དང་། མིའི་ཡི་གེ་དང་། གནོད་སྦྱིན་གྱི་ཡི་གེ་ལ་སོགས་པ་འཇིག་རྟེན་ཐ་དད་ཀྱི་ཡི་གེར་གྲགས་པ་གང་ཡིན་པའོ།།

ལང་ཀའི་བདག་པོ་དེ་ལ་འཇིག་རྟེན་པའི་ཡི་གེ་གང་ཞེ་ན། འདི་ལྟ་ཏེ། རྩ་བ་དང༌། ཟིན་པ་དང༌། གྲགས་པའོ། །དེ་ཡང་རྩ་བ་གང་ཞེ་ན། ཨཿ ནྲིཿ སུཿ ཏྲིཿ པྲེཿ དུཿ སྟེ་ས་བོན་དྲུག་གི་ཡི་གེ་གང་ཡིན་པའོ། །ཟིན་པ་གང་ཞེ་ན། གང་འགྲོ་བ་རྣམས་ཀྱི་སྒྲ་སྐད་ཀུན་ཀྱང་སོ་སོར་སྣང་བའི་ཐ་དད་པའི་ཡི་གེས་ཟིན་པ་ཁོ་ནའོ། །གྲགས་པ་གང་ཞེ་ན། ལྷའི་ཡི་གེ་དང༌། ཀླུའི་ཡི་གེ་དང༌། ལྷ་མ་ཡིན་གྱི་ཡི་གེ་དང༌། མིའི་ཡི་གེ་དང༌། གནོད་སྦྱིན་གྱི་ཡི་གེ་དང༌། འགྲོ་ལྡིང་གི་ཡི་གེ་ལ་སོགས་པ་འཇིག་རྟེན་ཐ་དད་ཀྱི་ཡི་གེར་གྲགས་པ་གང་ཡིན་པའོ།།

གསུམ་༼༡༡༧༽པ་ཐུན་མོང་གི་ཡེ་གེ་ནི།

ཐུན་མོང་གི ཞེས་པ་ནས། ཀ་ལ་སོགས་པའོ། །ཞེས་པའི་བར་གྱིས་བསྟན་ཏེ།

ཐུན་མོང་གི་ཡི་གེ་གང་ཞེ་ན། ཨ་དང་ཀ་ལ་སོགས་པའོ།།

དེ་གཉིས་ཐུན་མོང་གི་ཡི་གེ་གང་ཞེ་ན། ཨ་ལི་དང་ཀ་ལི་ལ་སོགས་པ་གང་ཡི་གེར་སྣང་བ་རང་རང་གི་རིས་ཐམས་ཅད་དུ་གྱུར་པའོ།།

དགུ་པ་ཡི་གེའི་གཞི་རྣམས་རྒྱས་པར་བཤད་པ་ནི།

ལང་ཀའི། ཞེས་པ་ནས། གཞིར་གྱུར་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལ་ཡི་གེའི་གཞི་གང་ཞེ་ན། ཨཱ་དང་། ཨ་དང་། ཧཱུཾ་དང་། མཱུཾ་ཞེས་ཐམས་ཅད་

འབྱུང་བའི་གཞིར་གྱུར་པའོ།།

ལང་ཀའི་ བདག་པོ་འདི་ལ་ཡི་གེའི་གཞི་གང་ཞེ་ན། སྐྱེ་བ་མེད་པ ་ཀུན་གྱི་གཞི་མཚོན་པས་ཡི་གེ་ཨ་དང་རང་བཞིན་ལྷུན་གྲུབ་ཀྱི་དཀྱིལ་འཁོར་མཚོན་པ་ཨཱ་དང་རྩ་བ་བྱང་ཆུབ་སེམས་ཀྱི་དཀྱིལ་འཁོར་མཚོན་པ་ཧཱུྃ་དང་ཡེ་ཇི་བཞིན་པའི་དཀྱིལ་འཁོར་མཚོན་པ་མཱུྃ་སྟེ་ཡི་གེ་བཞིས་ཐམས་ཅད་འབྱུང་བའི་གཞིར་གྱུར་པའོ།།

གསུམ་པ་ཞབས་བསྡུ་བ་ནི།

གསང་བ་པའི། ཞེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཐམས་ཅད་གསུང་མི་ཟད་རྒྱན་གྱི་འཁོར་ལོར་རིག་པར་གྱུར་ཏོ།།

གསང་བ་པའི་བདག་པོས་དེ་སྐད་ཅེས་སྨྲས་ཏེ་བཀའ་སྩལ་པས། ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་བྱང་ཆུབ་སེམས་དཔའ་ཆེན་པོ་རྣམས་ཀྱིས། ཇི་ལྟར་བསྟན་པའི་ཆོས་ཐམས་ཅད་གསུང་མི་ཟད་པ་རྒྱན་གྱི་འཁོར་ལོར་ཤར་ཏེ་མུ་མཐའ་འཕེལ་འགྲིབ་མེད་པའི་ཡོན་ཏན་མངོན་པར་སྣང་སྟེ་གསལ་བར་རིག་པར་གྱུར་ཏོ། །འདི་དག་ནི་རྣལ་འབྱོར་ཐ་མའི་དོན་ཏེ་འཆད་པའང་སྦྱར་རོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

གསུང་མི་ཟད་པ་རྒྱན་གྱི་འཁོར་ལོ་བཀོད་པའི་ལེའུ་སྟེ་སུམ་ཅུ་བཞི་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གསུང་མི་ཟད་པ་རྒྱན་གྱི་འཁོར་ལོར་བཀོད་དེ་མུ་མཐའི་འཕེལ་འགྲིབ་མེད་པའི་ཡོན་ཏན་རྫོགས་པར་བསྟན་པའི་ལེའུ་སྟེ་སུམ་ཅུ་རྩ་བཞི་པ་ལེགས་པར་བཀྲོལ་ཏེ་རྣམ་པར་བཤད་པའོ།། །།

ལེའུ་སོ་ལྔ་པ་སྤྱོད་པ་མི་ཟད་པ་རྒྱན་གྱི་འཁོར་ལོ་བཀོད་པ།

༈ བཞི་པ་ཡོན་ཏན་དང་ཕྲིན་ལས་ཀྱི་བྱིན་རླབས་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་འདི་སྐད་ཅེས་སྨྲས་ཏེ་དྲིས་པ། གསང་བ་པའི་བདག་པོ། གསང་སྔགས་ཀྱི་བྱིན་གྱིས་བརླབས་ལས་སྣང་བའི་སངས་རྒྱས་རྣམས་ཀྱི་ཡོན་ཏན་དང་འཕྲིན་ལས་ཇི་ལྟར་སྣང་བ་ལགས། གསང་བ་པའི་བདག་པོས་སྨྲས་པ། ལངྐའི་བདག་པོ་གསང་སྔགས་ཀྱི་བྱིན་གྱིས་རླབས་ལས་སྣང་བའི་སངས་རྒྱས་རྣམས་ཀྱི་ཡོན་ཏན་དང་འཕྲིན་ལས་ནི་འདི་ལྟར་སྣང་བར་རིག་པར་བྱའོ། །གང་ཞེ་ན། འདི་ལྟ་སྟེ།

ལེའུ་འདིས་ངེས་དོན་སྟོན་ནོ། །དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་ཡོན་ཏན་དང་ཕྲིན་ལས་ཀྱི་བྱིན་རླབས་བསྟན་པ་དྲི་བའི་ཕྱིར་འདི་སྐད་ཅེས་སྨྲས་ཏེ་དྲིས་པ། གསང་བ་པའི་བདག་པོ། གསང་སྔགས་ཀྱི་དོན་རྟོགས་པའི་བྱིན་གྱིས་བརླབས་ལས་སྣང་བའི་སངས་རྒྱས་རྣམས་ཀྱི་ཡོན་ཏན་དང་ཕྲིན་ལས་ཀྱི་གསང་བ་ཟབ་མོ་ཇི་ལྟར་སྣང་བ་ལགས། ཞེས་དྲི་བ་གཉིས་དྲིས་པ་ན། གསང་བ་པའི་བདག་པོས་ལན་སྨྲས་པ། ལང་ཀའི་བདག་པོ་གསང་སྔགས་ཀྱི་བྱིན་གྱིས་བརླབས་༼༡༡༨༽ལས་སྣང་བའི་སངས་རྒྱས་ཀྱི་ཡོན་ཏན་དང་ཕྲིན་ལས་ནི་འོག་ནས་འབྱུང་བ་འདི་ལྟར་སྣང་བར་རིག་པར་བྱའོ། །གང་ཞེ་ན། འདི་ལྟ་སྟེ། ཞེས་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། ཡོན་ཏན་གྱི་སྣང་བ་བཤད་པ། ཕྲིན་ལས་ཀྱི་སྣང་བ་བསྟན་པའོ། །དང་པོ་ལ་ལྔ་སྟེ། ཚོགས་ལམ་གྱི་ཡོན་ཏན་བཤད་པ། སྦྱོར་ལམ་གྱི་ཡོན་ཏན་བསྟན་པ། མཐོང་ལམ་གྱི་ཡོན་ཏན་བཤད་པ། བསྒོམ་ལམ་གྱི་ཡོན་ཏན་བསྟན་པ། མཐར་ལམ་གྱི་ཡོན་ཏན་བཤད་པའོ། །དང་པོ་ལ་གཉིས་ཏེ། རྒྱུ་སེམས་བསྐྱེད་པའི་ཡོན་ཏན། ཚོགས་གསོག་པ་དངོས་ཀྱི་ཡོན་ཏན་ནོ། །དང་པོ་ནི།

འོག་ནས། སེང་གེའི་ཕྲུག་གུའི། ཞེས་པ་ནས། ཟུག་རྔུས་གཟིར་བར་འགྱུར། །ཞེས་པའི་བར་གྱིས་བསྟན་ཏེ།

སེང་གེ་ཕྲུག་གུའི་དྲིས་ནི་གར་ཁྱབ་པར། །གང་དག་མི་བཟོད་ཐམས་ཅད་འབྲོས་པར་འགྱུར། །སྙིང་པོའི་དོན་ལ་རིག་པའི་མཐུ་མེད་ཀྱང་། །སེམས་བསྐྱེད་ཙམ་གྱིས་དབུ་མ་ཟིལ་གྱིས་གནོན། །ལོག་པའི་དགྲ་རྣམས་

ཟིལ་གནོན་སྐྲག་འགྱུར་ཞིང་། །རང་རང་གནས་ནས་ཟུག་རྔུས་གཟིར་བར་འགྱུར།།

ཡོན་ཏན་གྱི་དོན་བརྗོད་པ་གང་ཞེ་ན། སྔགས་པས་སེམས་བསྐྱེད་པའི་ཡོན་ཏན་རྒྱུའི་ཐེག་པ་དང་ཁྱད་པར་ཆེ་བའི་དཔེ་དོན་བསྟན་ཏེ། དཔེར་ན་སེང་གེའི་ཕྲུག་གུའི་དྲིས་ནི་གར་ཁྱབ་པར་གྱུར་ཀྱང་གང་དག་དེ་མི་བཟོད་པའི་གཅན་གཟན་ལ་སོགས་པ་ཐམས་ཅད་འབྲོས་པར་འགྱུར་བ་ལྟར་དུ། གསང་སྔགས་ཀྱི་སྙིང་པོའི་དོན་ལ་རྟོགས་ཤིང་རིག་པའི་མཐུ་དང་སྟོབས་ཀྱི་རྩལ་མེད་པར་གྱུར་ཀྱང༌། ཐེག་པའི་མཆོག་ལ་མོས་པ་སྐྱེས་ཏེ་སེམས་བསྐྱེད་པ་ཙམ་གྱི་ཡོན་ཏན་གྱིས་ཀྱང་བྱང་ཆུབ་སེམས་དཔའི་སྤྱོད་པ་ལ་ཡུན་དུ་གནས་པའི་དབུ་མ་པ་ཡང་ཟིལ་གྱིས་གནོན་ཅིང་ལྷག་པའི་སྟོབས་དང་ལྡན་པའོ། །འོ་ན་དབུ་མ་པའི་བྱང་ཆུབ་སེམས་དཔའ་ལ་ནི། ས་ནོན་པ་ཡང་མང་ན། འདིར་ཡང་ལས་དང་པོ་པས་དང་པོ་ནས་ཟིལ་གྱིས་མནན་པར་བཏུབ་བམ་ཞེ་ན། དེ་ནི་དཔེར་ན་དམངས་ཀྱི་བུ་ལུས་སྐྱེས་རྩལ་རྫོགས་ཀྱང་རྒྱལ་པོ་ཆེན་པོར་བྱ་བ་ལ་བསོད་ནམས་བསག་ཅིང་སྐྱེ་བ་བརྒྱུད་དགོས་ལ། རྒྱལ་པོའི་ཕྲུག་གུ་ལ་རྒྱལ་ཐབས་ཀྱི་སྟོབས་ད་དུང་མེད་དེ་ལས་བྱིས་པར་སྤྱོད་ཀྱང་རྒྱལ་པོ་ཉིད་དུ་འབྱུང་བ་ལ་སྐྱེ་བ་བརྒྱུད་མི་དགོས་ཀྱི་དེ་ཉིད་ཀྱིས་རྒྱལ་ས་ནོན་པ་ལྟར་མདོ་སྡེ་པས་ས་ཐོབ་ཏུ་ཟིན་ཀྱང་གསང་དོན་མཐོང་བ་ལ་བསྐལ་པར་སྦྱོང་དགོས་པ་དང༌། འདིར་མོས་པའི་ས་བོན་ཡོད་པས་མྱུར་བར་ཐེག་པ་ཆེན་པོར་ངེས་པར་འབྱུང་བས་གཉིས་སུ་མེད་པའི་དོན་མངོན་དུ་འགྱུར་བའི་ཕྱིར་རོ། །དེ་བས་ན་སེམས་བསྐྱེད་པ་ཙམ་གྱིས་ལོག་པར་ལྟ་བའི་ཆ་འཛིན་པ་བདུད་དང་མུ་སྟེགས་ལ་སོགས་པའི་དགྲ་རྣམས་ཐམས་ཅད་ཟིལ་གྱིས་གནོན་ལ་སྐྲག་ཅིང་སྔངས་ཏེ་སྤ་བཀོང་བར་འགྱུར་ཞིང་རང་རང་གི་གནས་ནས་ཡིད་ཟུག་རྔུས་རབ་ཏུ་གཟིར་བར་འགྱུར་རོ།།

གཉིས་པ་ཚོགས་གསོག་པ་དངོས་ཀྱི་ཡོན་ཏན་ལ་༼༡༡༩༽གཉིས་ཏེ། ཚོགས་གསོག་པའི་ཐབས་ཀྱི་ཁྱད་པར། བསགས་པའི་འབྲས་བུའི་ཁྱད་པར་བསྟན་པའོ། །དང་པོ་ནི།

འོག་ནས། དཀར་པོའི་མཐར་ཐུག ཅེས་པ་ནས། དཀྱིལ་འཁོར་ཆེན་པོ་ཙམ། །ཞེས་པའི་བར་གྱིས་བསྟན་ཏེ།

དཀར་པོ་མཐར་ཐུག་བསོད་ནམས་ཀུན། །སེན་མོ་ཐོག་གི་ས་རྡུལ་འདྲ། །རྡོ་རྗེ་སྙིང་པོར་གཅིག་བསྐྱེད་པ།།

ས་ཡི་དཀྱིལ་འཁོར་ཆེན་པོ་ཙམ།།

ཆོས་སྤྱོད་བཅུ་དང་བསྡུ་བ་བཞི་ལ་སོགས་པ་ཐེག་པ་ཐུན་མོང་གི་དཀར་པོའི་སྤྱོད་པ་མཐར་ཐུག་པའི་བསོད་ནམས་ཀུན་ཀྱང་དཔེར་ན་སེན་མོའི་ཐོག་གི་གཞི་ལ་ས་རྡུལ་ཆགས་པའི་གྲངས་དང་འདྲ་ལ། ཐེག་པའི་རྒྱལ་པོ་འདིའི་སྒོར་ཞུགས་ཏེ་རྡོ་རྗེ་སྙིང་པོར་སེམས་སྐད་ཅིག་གཅིག་ཙམ་དུ་བསྐྱེད་པ་ཡི་བསོད་ནམས་ཡང་དཔེར་ན་ས་ཡི་གཞིའི་དཀྱིལ་འཁོར་ཆེན་པོ་ལ་ཡོད་པའི་རྡུལ་སྙེད་ཙམ་དུ་འབྱུང་བས་མདོ་སྔགས་ཀྱི་དགེ་བའི་རྩ་བ་བསྐྲུན་དུ་མི་བཏུབ་སྟེ་གསང་བའི་བྱིན་རླབས་ལས་ཕ་རོལ་ཏུ་ཕྱིན་པ་དང་ཞིང་དང་ཐབས་དང་འབྲས་བུས་ཁྱད་པར་དུ་འཕགས་པའོ།།

གཉིས་པ་བསགས་པའི་འབྲས་བུའི་ཁྱད་པར་བསྟན་པ་ནི།

གོང་ནས། ཉི་ཟླ་འོད་འབར། ཞེས་པ་ནས། སྐད་ཅིག་འབུམ་ཆར་མིན། །ཞེས་པའི་བར་གྱིས་བསྟན་ཏེ།

ཉི་ཟླའི་འོད་འབར་རིན་ཆེན་གྱིས། །རིན་ཆེན་རིན་ཏང་འབུམ་ཆར་མིན།།

དཀར་པོ་མཐར་ཐུག་བསོད་ནམས་ཀྱི། །གསང་ཉིད་སྐད་ཅིག་འབུམ་ཆར་མིན།།

དཔེར་ན་ཉི་མ་དང་ཟླ་བའི་འོད་ལྟར་འབར་བའི་ནོར་བུ་རིན་ཆེན་མེ་ཤེལ་དང་ཆུ་ཤེལ་གྱིས་ཀྱང་ནོར་བུ་རིན་ཆེན་དབང་གི་རྒྱལ་པོའི་རིན་ཐང་ལ་འབུམ་དུ་བགོས་པའི་ཆར་ཡང་ཉེ་བ་མིན་པ་ལྟར་དུ། རྒྱུའི་ཐེག་པའི་སྦྱིན་ཚུལ་ལ་སོགས་པ་དཀར་པོ་རྣམ་པར་སྤྱད་པའི་དགེ་བ་མཐར་ཐུག་པའི་བསོད་ནམས་ཀྱི་ཕུང་པོ་ཇི་སྙེད་པ་རྣམས་ཀྱིས་གསང་སྔགས་ཟབ་མོའི་དོན་ཉིད་སྐད་ཅིག་ཙམ་དུ་ལེགས་པར་གོ་བའི་ཡོན་ཏན་ལ་ཁྲི་ཕྲག་བཅུ་སྟེ་འབུམ་དུ་བགོས་པའི་ཆར་གྱིས་ཆ་གཅིག་ཏུའང་ཉེ་བ་མིན་ནོ། །དེས་ན་གསང་སྔགས་ཀྱི་དོན་གོ་བ་དེ་ནི་དཀར་པོ་རིལ་གྱིའང་བཅུད་དུ་གྱུར་པ་ཡིན་ཏེ། དེ་ཁོ་ན་ཉིད་དུ་ངེས་པས་དགེ་བ་མ་བྱས་པས་ཟད་པ་དང་བྱས་པས་འཕེལ་བ་དང་བྲལ་བའི་ཕྱིར་ཏེ། མན་ངག་ལས། ཁམས་གསུམ་གནས་པའི་སྲོག་བཏོན་ཀྱང༌། །གདེང་ཆེན་གོ་བའི་ཆར་མི་ཕོད། །གང་གཱའི་བྱེ་སྙེད་སེམས་ཅན་རྣམས། །སངས་རྒྱས་ས་ལ་བཀོད་པས་ཀྱང༌། །དེ་ཡི་རྡུལ་ཆར་མི་ཉེ་སྟེ། །དེ་དག་རྩ་བའང་དེ་ཉིད་དོ། །ཞེས་པའི་དོན་ཏོ། །དེ་ལྟ་བུའི་ཡོན་ཏན་ཚད་མེད་པའི་ཕྱིར་རིག་པས་འཇལ་བ་ཁོ་ནར་བྱའོ།།

གཉིས་པ་སྦྱོར་ལམ་གྱི་ཡོན་ཏན་བསྟན་པ་ལ་གཉིས་ཏེ། ལྟ་བ་ལོག་པའི་དགྲས་མི་འཇིགས་པ། སྦྱོར་ལམ་གྱི་ཁྱད་པར་བསྟན་པའོ། །དང་པོ་ནི།

ཚིགས་བཅད་གཅིག་གི་འོག་ནས། འཁོར་ལོས་བསྒྱུར་རྒྱལ། ཞེས་པ་ནས། ལོག་པའི་དགྲས་མི་འཇིགས། །ཞེས་པའི་བར་གྱིས་བསྟན་ཏེ།

འཁོར་ལོས་བསྒྱུར་རྒྱལ་གང་རྟེན་འཇིགས་མེད་ལྟར། །གསང་ཉིད་ངེས་པས་ལོག་པའི་དགྲས་མི་འཇིགས།།

སྔགས་༼༡༢༠༽ཀྱི་དོན་མཐོང་བ་ལ་བརྟེན་ནས་འཁོར་བའི་འཇིགས་པ་དང་བྲལ་བར་འགྱུར་ཏེ། དཔེར་ན་འཁོར་ལོས་སྒྱུར་བའི་རྒྱལ་པོ་ལ་མི་གང་བརྟེན་པ་དེ་དག་དཔུང་བཞིའི་འཇིགས་པ་དང་བྲལ་ཏེ་བག་ཚ་བ་མེད་པ་ལྟར་དུ་ཐེག་པ་ཆེན་པོར་སེམས་སྐྱེས་པས་གསང་བ་ཟབ་མོའི་དོན་ཉིད་དུ་རིགས་ངེས་ཏེ་མ་འགྱུར་བ་ལ་གནས་པས་དཔེ་ཡི་ཡེ་ཤེས་ཀྱི་ལྟ་བ་དང་ལྡན་པ་དེ་ལ་ལོག་པར་རྟོག་པའི་སྡུག་བསྔལ་གྱི་དགྲས་མི་འཇིགས་ཤིང་ཉམ་ང་བ་མེད་པའོ།།

གཉིས་པ་སྦྱོར་ལམ་གྱི་ཁྱད་པར་བསྟན་པ་ལ་གཉིས་ཏེ། གཞུང་ཉམས་ན་འགྲུབ་མི་འགྲུབ་ཀྱི་ཁྱད་པར། རྒྱལ་བས་དགོངས་མི་དགོངས་ཀྱི་ཁྱར་པར་རོ། །དང་པོ་ལ་གཉིས་ཏེ། འོག་མའི་གཞུང་ཉམས་ཀྱང་འགྲུབ་ལ་འདི་ཉམས་ན་མི་འགྲུབ་པ། འདིའི་གཞུང་ཉམས་ཀྱང་འོག་མའི་བླར་གྱུར་པའོ། །དང་པོནི།

འོག་ནས། སྐྱེས་བུ་རྐང་ལག ཅེས་པ་ནས། གསང་ཉིད་མེད་ན་བརླག །ཅེས་པའི་བར་གྱིས་བསྟན་ཏེ།

སྐྱེས་བུ་རྐང་ལག་བཅད་དེ་ཉམས་ཀྱང་འཚོ། །ཇི་ལྟར་སྙིང་ཕྱུང་འཚོ་བའི་ཀླགས་མེད་ལྟར།།

ཡན་ལག་ལྟ་བུའི་དབུ་མ་ཉམས་ཀྱང་འཚོ། །སྙིང་དང་འདྲ་བའི་གསང་ཉིད་མེད་ན་བརླག།

དཔེར་ན་སྐྱེས་བུ་གང་ཞིག་རྐང་པ་དང་ལག་པ་བཅད་དེ་ཉམས་ཀྱང་འཚོ་ལ་ཇི་ལྟར་སྙིང་ཕྱུང་པར་གྱུར་ན་དེ་ལ་ནམ་ཡང་འཚོ་བའི་གླགས་མེད་པ་ལྟར་དུ་ཡན་ལག་ལྟ་བུའི་དབུ་མ་ལ་སོགས་པའི་ལྟ་བ་ཉམས་ཤིང་ཚུལ་ཁྲིམས་རལ་པར་གྱུར་ཀྱང་ཉེན་ཆུང་བས་འཚོ་བར་འགྱུར་ཏེ་ཐེག་པ་ཆེན་པོ་གསང་སྔགས་ཀྱི་ཐབས་ཀྱིས་མི་ལྟུང་བར་ས་ལ་སྦྱོར་རོ། །སྙིང་དང་འདྲ་བའི་ཐབས་ཀྱི་ཐེག་པའི་གཞུང་ཉམས་ཏེ་གསང་བ་ཉིད་ཀྱི་དམ་ཚིག་མེད་ན་བརླག་པར་འགྱུར་བས་རྒྱུའི་ཐེག་པས་སློང་བར་མི་ནུས་ཏེ། དཔེར་ན་རྒོད་མ་ཤི་བའི་རྟེའུ་རློན་ར་ཡར་གྱི་འོ་མས་མི་འཚོ་བ་བཞིན་ནོ། །འོན་ཀྱང་ཐེག་པ་ཆེན་པོ་ཉིད་ལ་ཐབས་མེད་པ་ནི་མ་ཡིན་ནོ།།

གཉིས་པ་འདིའི་གཞུང་ཉམས་ཀྱང་འོག་མའི་བླར་གྱུར་པ་ནི།

གོང་ནས། རྡོ་རྗེ་ཉམས་ཀྱང༌། ཞེས་པ་ནས། ངེས་སྣང་ཆོས་ཀྱི་དབུལ་བ་སེལ། །ཞེས་པའི་བར་གྱིས་བསྟན་ཏེ།

རྡོ་རྗེ་ཉམས་ཀྱང་རིན་ཆེན་ཟིལ་གནོན་ཅིང་། །རིན་ཆེན་མི་བརླག་དབུལ་བའི་སྡུག་བསྔལ་སེལ།།

གསང་ཉིད་རྡོ་རྗེ་སྙིང་པོ་ཉམས་འགྱུར་ཡང་། །ཉན་ཐོས་ལ་སོགས་དབུ་མ་ཟིལ་གནོན་ཅིང་།།

གསང་ཉིད་ངེས་སྣང་ཆོས་ཀྱི་དབུལ་བ་སེལ།།

དཔེར་ན་རྡོ་རྗེ་རིན་པོ་ཆེ་ནི་ཆག་སྟེ་ཉམས་པར་གྱུར་ཀྱང་འཆིང་བུ་སོགས་རིན་ཆེན་ཕལ་པ་རྣམས་ཟིལ་གྱིས་གནོན་ཅིང༌། རྡོ་རྗེ་རིན་ཆེན་ཆག་པའི་ཡོན་ཏན་མི་བརླག་པར་སྤྱོད་པར་དབང་བ་རྣམས་ཀྱིས་འདོད་པ་ལྟར་འབྱུང་བས་དབུལ་ཞིང་ལྟོགས་པའི་སྡུག་བསྔལ་སེལ་ཏེ་འཇོགས་པ་བཞིན་དུ་ཐེག་པ་ཆེན་པོ་གསང་ཆེན་ཉིད་ཀྱི་དོན་དང་ལྡན་པའི་རྣལ་འབྱོར་པས་རྡོ་རྗེ་སྙིང་པོ་བླ་ན་མེད་པའི་ལྟ་བ་དང་ལྡན་ན་གཞུང་ཀུན་ནས་མ་སྲོངས་པར་ཡན་ལག་གི་དམ་ཚིག་ཆ་ཤས་ཉམས་པར་གྱུར་ན་ཡང༌། བསམ་པ་དོན་དང་མ་བྲལ་བས་ཉན་ཐོས་ལ་སོགས་པ་ནས་དབུ་མ་པའི་བར་གྱི་རྒྱུའི་ཐེག་པ་ཆེ་ཆུང་གཉིས་ཀ་ཟིལ་གྱིས་གནོན་ཅིང་ཁྱད་པར་འཕགས་ཏེ། ཅིའི་༼༡༢༡༽ཕྱིར་ན་རྒྱུའི་ཐེག་པ་ཆུང་ངུ་བ་ལྟ་སྨོས་ཀྱང་མེད་ན། ཐེག་པ་ཆེན་པོའང་བདེན་པ་རེས་འཇོག་གི་སེམས་ལ་གནས་པས་གཉིས་མེད་ཀྱི་མཐའ་ཡང་མི་མཐོང་སྟེ། དཔེར་ཁབ་མིག་འཛུད་པས་ནམ་མཁའ་མི་མཐོང་བ་བཞིན་ནོ། །དེ་བས་ན་བདེན་པ་གཉིས་རིས་མེད་པ་ཡེ་ཤེས་ཀྱི་སྟོབས་སོ། །དེས་ན་གསང་བའི་དོན་ཉིད་ངེས་པའི་དེ་མ་ཐག་ཏུ་དོན་ཟབ་མོ་རིག་པ་ལ་ཤར་ཞིང་སྣང་ནས་འབྲས་བུས་ཆོས་ཀྱི་དབུ་ལ་བ་སེལ་ཏེ་རྒྱུ་ནི་འབྲས་བུས་དབུ་ལ་བ་ཁོ་ནའོ།།

གཉིས་པ་རྒྱལ་བས་དགོངས་མི་དགོངས་ཀྱི་ཁྱད་པར་ནི།

འོག་ནས། གང་ཞིག་རྡོ་རྗེ། ཞེས་པ་ནས། མི་དགོངས་བཀུར་མི་མཛད། །ཅེས་པའི་བར་གྱིས་བསྟན་ཏེ།

གང་ཞིག་རྡོ་རྗེ་སྙིང་པོ་གསང་འཛིན་པ། །ཤིང་རྟ་ལ་སོགས་རྟ་ལ་འདུག་སྤྱོད་པ། །དེ་ཡི་བྱ་བ་བྱེད་པ་གཞན་མེད་ཀྱང་། །དེ་ཡི་རྟ་སྟེགས་རྒྱལ་བའི་དབུ་བཀུར་མཛད། །དབུ་མ་རྣམ་ཐར་གསུམ་སྒོར་བསྐལ་སྤྱད་ཀྱང་།།

དེ་ལ་རྒྱལ་བ་མི་དགོངས་བཀུར་མི་མཛད།།

རྣལ་འབྱོར་པ་གང་ཞིག་རྡོ་རྗེ་སྙིང་པོ་རྨད་དུ་བྱུང་བའི་ཐེག་པ་མཆོག་གི་གསང་དོན་འཛིན་པ་དེ་ནི། དཔེར་ན་ཤིང་རྟ་དང་གླང་པོ་ཆེ་ལ་སོགས་པའི་བཞོན་པ་རྣམས་ཞོན་པའི་དུས་ན། བཞོན་པ་དེ་དག་ལ་གང་ཞོན་པ་དེ་ཉིད་འདེགས་པ་དང་གནས་སུ་བསྐྱལ་བ་ལས་བྱ་བའི་ལས་གཞན་མེད་པ་ལྟར། ཐེག་པ་ཆེན་པོའི་རྣལ་འབྱོར་པའང་མཐར་ཕྱིན་པའི་ཕྲིན་ལས་མངའ་བའོ། །དེ་བས་ན་ཐེག་པ་ཆེན་པོའི་བཞོན་པ་ལ་གནས་པའི་རྣལ་འབྱོར་པ་ནི་ཤིང་རྟ་དང་གླང་པོ་སོགས་ལ་འདུག་པར་སྤྱོད་དེ་གནས་ཤིང་ཞོན་པ་དེ་ཡི་བསྙེན་བཀུར་གྱི་ལས་ཀྱི་བྱ་བ་བྱེད་པ་གཞན་མེད་པར་གྱུར་ཀྱང༌། དེ་ཡི་རྟ་སྟེགས་རྒྱལ་བ་རྣམ་འདྲེན་དམ་པས་ཀྱང་དབུར་ཞེས་དབུ་ཡི་ཐོག་ཏུ་བཀུར་བར་མཛད་དོ། །མདོ་སྡེ་ལས་དབུ་མ་ལ་གནས་པའི་རྣལ་འབྱོར་པས་སྟོང་པ་དང་མཚན་མ་མེད་པ་དང་སྨོན་པ་མེད་པའི་རྣམ་ཐར་གསུམ་གྱི་སྒོར་བསྐལ་པ་གྲངས་མེད་པ་གསུམ་གྱི་ཡུན་དུ་སྤྱད་དེ་བརྩལ་ཀྱང་དེ་ལ་རྒྱལ་བ་ཉིད་ཀྱིས་ཐུགས་ཀྱིས་མི་དགོངས་ཤིང་དུས་རིང་པོར་འབྲས་བུ་མི་ཐོབ་པས་གསང་བའི་རྣལ་འབྱོར་པ་ལྟར་སྐུ་ཡིས་བཀུར་བར་མི་མཛད་དོ། །དེ་དག་གིས་དགོངས་པ་དམ་པ་ལ་ཞུགས་མ་ཞུགས་ཀྱི་བྱེ་བྲག་གིས་འབྲས་བུའི་སར་ངེས་པར་འབྱུང་བ་ལ་མྱུར་བུལ་ཡོད་པའི་ཕྱིར་རོ། །དེ་བས་ན་ཐེག་པ་ཆེན་པོ་གསང་བ་མཆོག་གི་སྙིང་པོ་ནི་རྒྱལ་བ་ཉིད་ཀྱིའང་ཡབ་ཡུམ་དག་སྟོན་པ་མཆོད་གནས་དམ་པ་ཡིན་པས་དེ་ལ་གནས་པའང་རྗེས་སུ་མཚུངས་པ་ཉིད་དོ།།

གསུམ་པ་མཐོང་ལམ་གྱི་ཡོན་ཏན་བཤད་པ་ལ་ལྔ་སྟེ། ཡོན་ཏན་ཚད་མེད་པ། རྟོག་པ་ཆོས་ཉིད་དུ་གསལ་བ། སྒྲིབ་པ་སེལ་བར་བྱེད་པ། འཁོར་བའི་འཇིགས་པ་མེད་པ། བག་ཆགས་ངན་པ་སེལ་བའོ། །དང་པོ་ནི།

སྙིང་པོའི་དོན་རིག ཅེས་པ་ནས། རྒྱལ་བས་བཤད་མི་རྫོགས། །ཞེས་པའི་བར་གྱིས་བསྟན་ཏེ།

སྙིང་པོ་དོན་རིག་སྐད་ཅིག་ཙམ་གྱིས་ཀྱང་། །བྱིན་རླབས་ཡོན་ཏན་རྒྱལ་བས་བཤད་མི་རྫོགས།།

དེ་ལྟ་བའི་ཕྱིར་གསང་ཆེན་སྙིང་པོའི་དོན་ཟབ་༼༡༢༢༽མོ་མངོན་སུམ་དུ་རིག་ཅིང་མཐོང་ན་འབྲས་བུ་གཞན་ནས་བཙལ་མི་དགོས་པར་དུས་སྐད་ཅིག་ཙམ་གྱིས་ཀྱང་རྟོགས་པའི་བྱིན་རླབས་སེམས་སྐྱེས་པའི་ཡོན་ཏན་རྒྱལ་བ་རྣམ་འདྲེན་དམ་པས་བཤད་ཀྱང་མི་རྫོགས་པ་འབྱུང་བས་སྟོང་གསུམ་གྱི་འགྲོ་བའི་ཁ་ལྕེས་སོ་སོར་བརྗོད་ཀྱང་མི་ཟིན་པའི་ཡོན་ཏན་དང་ལྡན་པ་ཉིད་དོ།།

གཉིས་པ་རྟོག་པ་ཆོས་ཉིད་དུ་གསལ་བ་ནི།

གོང་ནས། ཀུ་བ་གཅིག་གི ཞེས་པ་ནས། གསང་བའི་སྙིང་པོར་འགྱུར། །ཞེས་པའི་བར་གྱིས་བསྟན་ཏེ།

ཀུ་བ་གཅིག་གི་བྱིན་རླབས་ཀྱི། །ལྗགས་ནི་སྟོང་རྙེེད་བསྒྱུར་བ་བཞིན།།

གསང་བའི་དོན་མཐོང་སྐད་ཅིག་གིས། །ཐམས་ཅད་སྣང་བའི་སྙིང་པོར་འགྱུར།།

བྲུ་ཤའི་སྐད་དུ་ཀུ་བ་ཞེས་མཐུན་པའི་དཔེས་ཡོན་ཏན་གྱི་གཞི་གྲུབ་པའི་ཚུལ་ལ་བཤད་ལུགས་གཉིས་ཏེ། དཔེར་ན་ནང་གི་བསམ་པ་གཅིག་གི་འདུ་བྱེད་མང་པོས་བྱིན་རླབས་ཀྱིས་ལྗགས་སྨྲ་བྱེད་ཀྱི་སྒྲ་ནི་སྟོང་སྙེད་མང་པོར་བསྒྱུར་བ་ལྟར་སྣང་བ་བཞིན་དུ་ཞེས་པའམ། ཡང་ན། དཔེར་ན་གསེར་འགྱུར་རྩི་སྲང་གཅིག་གི་བྱིན་རླབས་ཀྱིས་ལྕགས་ཀྱི་སྲང་ནི་མང་པོ་སྟོང་སྙེད་ཀྱང་གསེར་དུ་བསྒྱུར་བར་བྱེད་པ་བཞིན་དུ། གནས་ལུགས་ཇི་བཞིན་པ་གསང་བའི་དོན་ཟབ་མོ་ཡང་དག་པར་མཐོང་བ་ན་ཤིན་ཏུ་ཕྲ་བའི་སེ་གོལ་གྱི་ཡུན་ལ་ཡིད་ཆེས་པར་གོ་བར་མཛད་པས་རྟོགས་པའི་རིག་པ་སྐད་ཅིག་གཅིག་གིས་ཁམས་གསུམ་གྱི་ཆོས་སྣང་ངོ་ཅོག་ཐམས་ཅད་གསང་བའི་སྙིང་པོར་གྲོལ་ཏེ་སྐུ་དང་ཡེ་ཤེས་སུ་གསལ་བར་གྱུར་ཏོ། །འོན་ཀྱང་མིན་པ་ཞིག་རྟོགས་པས་ཡིན་པར་བྱས་པ་མིན་ཏེ། ཡེ་ནས་ཡིན་པའི་དོན་གྱི་གནས་ལུགས་ཇི་ལྟ་བ་བཞིན་འཇལ་བར་གྱུར་པའོ།།

གསུམ་པ་སྒྲིབ་པ་སེལ་བར་བྱེད་པ་ནི།

མར་མེ་གཅིག་གི ཞེས་པ་ནས། གནས་པའི་སྒྲིབ་པ་སེལ། །ཞེས་པའི་བར་གྱིས་བསྟན་ཏེ།

མར་མེ་གཅིག་གི་བྱིན་རླབས་ཀྱིས། །བསྐལ་པའི་མུན་ནག་སེལ་བ་བཞིན།།

སྙིང་པོ་དོན་རིག་སྐད་ཅིག་མས། །བསྐལ་པར་གནས་པའི་སྒྲིབ་པ་སེལ།།

རྐང་པ་དང་པོ་གཉིས་མཐུན་པའི་དཔེ་སྟེ་མར་མེ་གཅིག་གི་བྱིན་རླབས་ཀྱིས་བསྐལ་པའི་ཡུན་དུ་བསགས་པའི་མུན་ནག་ཀྱང་སེལ་བར་བྱེད་པ་བཞིན་དུ། ད་ལྟར་རང་བྱུང་སྙིང་པོ་དོན་གྱི་ངོ་བོ་རིག་པ་རང་ལས་ཤར་བ་མེད་པར་རང་གསལ་དུ་ཤར་ན་ཡུན་སྐད་ཅིག་ལས་ཀྱང༌། འཁོར་བཐོག་མཐའ་མེད་པའི་བསྐལ་པར་མི་འབྲལ་བར་གནས་པའི་སྒྲིབ་པའི་ཕུར་པོ་ཇི་སྙེད་པ་ཡང་རྣམ་པར་སེལ་ཞིང་ཡེ་ཤེས་ཀྱི་ཀློང་དུ་འགྱུར་ཏེ། སྒྲིབ་པ་འདག་པའི་ཚུལ་དེ་ལ་ཆེད་དུ་བསལ་བ་མེད་པར་གསང་སྔགས་ཀྱི་དོན་དང་མ་བྲལ་བའི་ཡོན་ཏན་ཞེས་བྱའོ།།

བཞི་པ་འཁོར་བའི་འཇིགས་པ་མེད་པ་ནི།

ནོར་བུ་རིན་ཆེན། ཞེས་པ་ནས། འཁོར་བའི་འཇིགས་པ་མེད། །ཅེས་པའི་བར་གྱིས་བསྟན་ཏེ།

ནོར་བུ་རིན་ཆེན་གང་བསྲེལ་བ། །དབུལ་བའི་འཇིགས་པ་མེད་པ་ལྟར།།

སྙིང་པོ་དོན་གསང་གང་བསྲེལ་བ། །ལྷུངས་ནས་འཁོར་བའི་འཇིགས་པ་མེད།།

རྐང་པ་དང་པོ་གཉིས་སྙིང་པོ་རྟོགས་པས་འཁོར་བའི་སྡུག་བསྔལ་ལ་བག་ཚ་བ་མེད་པའི་དཔེ་སྟེ། ནོར་བུ་རིན་ཆེན་དབང་གི་རྒྱལ་པོ་༼༡༢༣༽གང་གིས་བསྲེལ་བ་ལ་དབུལ་བའི་འཇིགས་པ་མེད་པ་ལྟར་དུ། གསང་བ་མཆོག་གི་བཅུད་ཀྱི་སྙིང་པོ་དོན་གྱི་གསང་ཆེན་གང་སུའི་རིག་པ་ལ་ཡོད་ཅིང་མཐོང་ནས་བསྲེལ་བ་ནི་སྡུག་བསྔལ་དུ་ལྟུང་ནས་འཁོར་བའི་གནས་ཉིད་སངས་རྒྱས་ཀྱི་ཞིང་དུ་གསལ་ཏེ་མ་དམིགས་པས་འཇིགས་པ་མེད་དེ་བག་ཚ་བ་དང་ཉམ་ང་བ་མེད་པའི་ཡོན་ཏན་ཐོབ་སྟེ་མཐོང་ལམ་ལས་སླར་ལྡོག་པ་མེད་པའོ།།

ལྔ་པ་བག་ཆགས་ངན་པ་སེལ་བ་ནི།

ཚིགས་བཅད་གཅིག་གི་འོག་ནས། འགྲོ་གང་འོ་མའི། ཞེས་པ་ནས། སྣང་བས་ཐམས་ཅད་མེད། །ཅེས་པའི་བར་གྱིས་བསྟན་ཏེ།

འགྲོ་གང་འོ་མའི་རྒྱ་མཚོ་ཇི་སྙེད་དུ། །སེང་གེའི་འོ་མ་གཅིག་བླུག་བརླག་པ་ལྟར།།

ལས་དང་ཉོན་མོངས་སྡུག་བསྔལ་རྒྱ་མཚོར་ནི། །གསང་ཉིད་སྐད་ཅིག་སྣང་བས་ཐམས་ཅད་མེད།།

དཔེར་ན་འགྲོ་བ་གང་སེམས་ཅན་ཕལ་པའི་འོ་མའི་རྒྱ་མཚོ་ཇི་སྙེད་ཀྱི་ནང་དུ་སེང་གེའི་འོ་མ་ཐིགས་པ་གཅིག་བླུགས་པས་འོ་མ་གཞན་ཀུན་བརླག་ཅིང་འཐོར་བར་བྱེད་པ་ལྟར་དུ་འགྲོ་བའི་རྒྱུད་ལ་ལས་གསུམ་དང་ཉོན་མོངས་པ་གཉིས་དང་སྡུག་བསྔལ་བཅུ་གཅིག་ལ་སོགས་པ་འཁོར་བའི་རྒྱ་མཚོར་སྣང་བ་ནི་ཇི་སྙེད་ཡོད་ཀྱང་གསང་སྔགས་དོན་གྱི་བདེན་པ་ཉིད་མཐོང་བ་མེད་པའི་ཚུལ་དུ་མཐོང་སྟེ་སྐད་ཅིག་ཙམ་དུ་སྣང་བས་འཁྲུལ་པས་བརྟགས་པ་མངོན་གྱུར་པ་ཐམས་ཅད་མེད་དེ་སྤྱོད་ཡུལ་ཡོངས་སུ་དག་པའི་ཡོན་ཏན་དང་ལྡན་པར་འགྱུར་རོ།།

བཞི་པ་བསྒོམ་ལམ་གྱི་ཡོན་ཏན་བསྟན་པ་ནི།

གོང་ནས། མི་རྟོག་གང་ལ། ཞེས་པ་ནས། བྱེད་པ་ཅི་ཡང་མེད། །ཅེས་པའི་བར་གྱིས་བསྟན་ཏེ།

མི་རྟོག་གང་ལ་རྟག་ཉིད་དུ། །བརྟགས་པས་རྟོག་པའི་བྱིན་རླབས་འབྱུང་། །མི་ཟད་རིན་ཆེན་ནམ་མཁའ་མཛོད། །བྱིན་རླབས་ཆེན་པོ་རྒྱུན་མི་འཆད། །གསང་ཉིད་སྙིང་པོའི་བྱིན་རླབས་ནི། །གང་དུ་རྣམ་པར་མི་རྟོག་བཞིན། །འདོད་འབྱུང་བྱ་བ་ཐམས་ཅད་བྱེད། །དེ་ལ་བྱེད་པ་ཅི་ཡང་མེད།།

གང་དུའང་འཛིན་པ་དང་བྲལ་བའི་རྣམ་པར་མི་རྟོག་པའི་ཡེ་ཤེས་ཆེན་པོའི་དངོས་གཞི་གང་ལ་དུས་ཕྱད་པར་རྟག་པ་ཉིད་དུ་ལམ་པའི་བློས་བརྟགས་པ་ལྟར་གནས་པ་ལས་ཇི་ལྟར་རྟོགས་ཤིང་བསམ་པ་བཞིན་དུ་སྐུ་དང་མཛད་པའི་བྱིན་རླབས་རང་འཆར་ཞིང་འབྱུང་ཡང་ཡོན་ཏན་འཕེལ་འགྲིབ་མེད་པར་མི་ཟད་རིན་ཆེན་མཆོག་གི་གཏེར་ཏེ་དངོས་པོ་མེད་པས་ནམ་མཁའི་མཛོད་ལྟར་བརྟགས་ན་མེད་ལ་བཞག་ན་སྣང་བས་བྱིན་རླབས་ཆེན་པོ་དུས་ཕྱད་པར་འབྱུང་བས་རྒྱུན་མི་འཆད་པར་སྣང་ངོ༌། །དེ་ཡིས་དོན་བྱེད་པའི་ཚུལ་ཇི་ལྟ་བུ་ཞེ་ན། གསང་བ་ཟབ་མོའི་དོན་ཉིད་རྟོགས་ཏེ་གོམས་པས་བྱང་ཆུབ་སྙིང་པོའི་བྱིན་རླབས་ཀྱི་ཡོན་ཏན་སྣང་བའི་ཚུལ་ནི། བྱང་ཆུབ་སྙིང་པོ་དེ་ཉིད་དངོས་པོ་གང་དུ་ཅིར་ཡང་རྣམ་པར་མི་རྟོག་སྟེ་འཛིན་པ་ཐམས་ཅད་དང་བྲལ་བཞིན་དུ་རང་སྣང་བས་གདུལ་བྱའི་འདོད་པ་ཀུན་འབྱུང་ཞིང་རེ་བ་ལྟར་འཆར་བས་མཛད་པ་དོན་གྱི་བྱ་བ་ཐམས་ཅད་བྱེད་ཅིང་སྐལ་བ་དང་འཚམས་པར་མཛད་པ་ཅིར་ཡང་སྟོན་པ་དེ་ལ་རྩོལ་བ་དང་རྟོག་པ་མི་མངའ་བས་བྱེད་པ་ཅི་ཡང་མེད་དེ་སྒོམ་པའི་ལམ་གྱི་ཡོན་ཏན་རྟོག་པ་མེད་པར་རང་སྣང་བར་ཟད་དོ།།

ལྔ་པ་མཐར་ལམ་གྱི་ཡོན་ཏན་བཤད་པ་ནི།

འོག་ནས་༼༡༢༤༽དཀར་པོ་ཕྱོགས་ཀྱི། ཞེས་པ་ནས། གཏོས་ཀྱི་ནམ་མཁའ་འདྲ། །ཞེས་པའི་བར་གྱིས་བསྟན་ཏེ།

དཀར་པོ་ཕྱོགས་ཀྱི་མཐའ་ཐུག་པ། །དེ་ནི་མུན་ཁང་སྒྲོན་མེ་ཙམ། །རྡོ་རྗེ་སྙིང་པོར་གཅིག་རིག་པ།།

དུས་མཐའི་བསྐལ་པའི་མེ་ཆེན་འདྲ། །དབུ་མར་སྣང་བའི་ནམ་ཀ་ནི། །གང་གི་བསེ་ཁུང་ནམ་ཀའོ།།

རྡོ་རྗེ་གསང་བའི་ནམ་ཀ་ནི། །འབྱུང་ཆེན་གཏོས་ཀྱི་ནམ་ཀ་འདྲ།།

རྟོགས་པའི་ཡེ་ཤེས་ཀྱི་ཁྱད་པར། མདོ་སྡེ་ལས་དཀར་པོ་ཕྱོགས་ཀྱི་མཐར་ཐུག་ཏུ་གྲགས་པ་བསོད་ནམས་དང་ཡེ་ཤེས་ཀྱི་ཚོགས་རྣམ་གཉིས་བསགས་ཏེ་རྫོགས་པའི་ཡེ་ཤེས་དེ་ནི་དཔེར་ན་མུན་ཁང་གི་སྒྲོན་མེ་དང་འདྲ་སྟེ་ཡེ་ཤེས་ཆེན་པོ་མུ་མཐའ་མེད་པ་མ་མཐོང་བས་སྒྲིབ་པ་སྲབ་པ་ཙམ་ཡིན་ནོ། །ཐེག་པ་ཆེན་པོ་རབ་ཏུ་གསང་བ་འདིར་ཚོགས་མ་བསགས་པར་རྫོགས་ཏེ། རིལ་རྡོ་རྗེ་སྙིང་པོར་དབྱིངས་གཅིག་པ་ཉིད་དུ་རིག་ཅིང་རྟོགས་པའི་ཡེ་ཤེས་ཤར་བ་ནི། དཔེར་ན་དུས་ཀྱི་མཐའི་འཇིག་རྟེན་འཇིག་པའི་བསྐལ་པའི་མེ་ཆེན་པོ་དང་འདྲ་སྟེ། གང་སྦྱང་བྱ་རིལ་མ་བསལ་བར་ཀ་ནས་དག་པའི་ཡེ་ཤེས་སུ་གསལ་བའི་ཕྱིར་རོ། །ཆོས་ཀྱི་དབྱིངས་མཐོང་བའི་ལྟ་བའི་ཁྱད་པར་གྲུབ་མཐའ་དབུ་མར་གནས་པའི་མདོ་སྡེ་པས་དངོས་པོ་ཐམས་ཅད་རྟེན་འབྲེལ་ལ་སོགས་པ་གཞལ་བའི་མཐར་དོན་དམ་པ་མ་སྐྱེས་པའི་དོན་སྣང་བའི་ཆོས་ཉིད་ནམ་མཁའ་ལྟར་གསལ་ལ་མི་གཡོ་བར་འདོད་པ་ནི། ཁང་ཁྱིམ་གྱི་གནས་གང་གི་གསེང་སྐར་གྱི་ཁོང་གི་ནམ་མཁའ་དང་འདྲ་སྟེ། ཆོས་དང་གང་ཟག་བརྟགས་ན་མ་གྲུབ་པ་ཙམ་གྱིས་ཕྱེ་བའོ། །ཐེག་པ་ཆེན་པོ་རིལ་གཉིས་སུ་མེད་པ་ལས་གཞལ་བྱ་འཇལ་བྱེད་དུའང་མེད་པར་སྟོན་པའི་ཆོས་ཉིད་རྡོ་རྗེ་གསང་བའི་ནམ་མཁའ་བདེན་པ་གཉིས་ལས་གྲོལ་བའི་དོན་གྱི་གནས་ལུགས་མ་བསྒྲིབས་མི་འགོག་པར་མ་ཕྱིན་ཀུན་ལ་ཁྱབ་པའི་དོན་རྟོགས་པ་ནི་རིལ་རྫོགས་པར་གསལ་བས་འབྱུང་ཆེན་གཏོས་ཀྱི་ནམ་མཁའ་དང་འདྲ་བར་གསང་བ་ཇི་བཞིན་པའི་ངོ་བོར་སོན་པའོ། །དེས་ན་རྒྱུ་འབྲས་ཀྱི་ཐེག་པ་ནི་ཇི་ས་ནས་བསྐྲུན་དུ་མེད་དེ་འཆད་པར་ཡང་འགྱུར་རོ། །དེ་ལྟ་བུའི་གདེངས་ནི་མ་རྙེད་དེ་གསང་སྔགས་ལ་རྟོགས་པ་གནད་དུ་མ་ཆུད་པ་དུས་དེང་སང་གི་གང་ཟག་མདོ་སྡེ་ལ་ལྕེ་སྦྱངས་ནས་ཐེག་པ་ཆེན་པོར་ཞུགས་པ་དང༌། གསང་སྔགས་ལ་ལྡོངས་པ་ཁ་ཅིག །རྒྱུ་འབྲས་ཀྱི་ཐེག་པ་ནི་དོན་དམ་པའི་ལྟ་བ་ལ་ཡང་ཁྱད་པར་མེད་ལ། གྲུབ་ཐག་ཉེ་རིང་གི་ཐབས་ཙམ་ལས་འབྲས་བུ་ལ་ཡང་ཁྱད་པར་མེད་དོ་ཞེས་སྨྲ་བ་ནི་ནོང་བུས་བློན་གྲལ་མི་ཟིན་པ་དང་འདྲ་སྟེ། རྨོངས་པ་དེས་ཐེག་པ་ཆེན་པོའི་ས་མི་ནོན་ཏེ། སླར་རང་གི་རྒྱུད་འཆལ་ཏོ། །འོན་ཀྱང་ཐེག་པ་ཆེན་པོ་ནི་ཡོན་ཏན་གྱི་ཁྱད་པར་དེ་ལྟ་བུ་དང་ལྡན་པས་མོས་པ་ཙམ་ཡང་མི་གཏོང་བར་རིགས་སོ། །འོ་ན་དེ་བཞིན་གཤེགས་པའི་འབྲས་བུའི་ཡོན་ཏན་གྱི་བྱིན་རླབས་ལམ་ལྔར་འབྱུང་བ་༼༡༢༥༽འདི་ཉིད་མི་འཐད་དོ་ཞེ་ན། དེ་ནི་འགལ་བ་མེད་དེ། དེ་བཞིན་གཤེགས་པའི་ཡོན་ཏན་ཀྱང་བྱང་ཆུབ་སེམས་ཀྱི་ཡོན་ཏན་ཡིན་ལ། ལམ་ལྔའི་ཡོན་ཏན་ཀྱང་བྱང་ཆུབ་སེམས་རྟོགས་གོམས་ཀྱི་ཡོན་ཏན་ཡིན་པས་འགལ་བ་མེད་དོ། །དེ་བས་ན། ཅིའི་ཕྱིར་རྡོ་རྗེ་གསང་སྔགས་ནི། །དེ་བཞིན་གཤེགས་པ་ཉིད་དུ་གསལ། །ཞེས་སྟོན་པ་དང་བསྟན་པ་དོན་ལ་གཉིས་མེད་ཡིན་པས་སོ།།

གཉིས་པ་ཕྲིན་ལས་ཀྱི་སྣང་བ་བསྟན་པ་ནི།

མཛད་པའི་རླབས་ཀྱི། ཞེས་པ་ནས། བསྐལ་པ་ལྟ་བུའོ། །ཞེས་པའི་བར་གྱིས་བསྟན་ཏེ།

མཛད་པ་རླབས་ཀྱི་ཞི་བ་ནི། །སྟོངས་པའི་བསྐལ་པ་ལྟ་བུར་སྣང་། །ཐམས་ཅད་རྒྱས་པར་མཛད་པ་ཡང་། །གནས་པོའི་བསྐལ་པ་ལྟར་བུར་སྣང་། །ཐུགས་རྗེའི་དབང་དུ་མཛད་པ་ཡང་། །ཆགས་པའི་བསྐལ་པ་ལྟ་བུར་སྣང་།།

མངོན་པར་སྤྱོད་པ་མཛད་པ་ནི། །འཇིག་པའི་བསྐལ་པ་ལྟ་བུའོ།།

ཕྲིན་ལས་ཀྱི་དོན་ཇི་ལྟ་བུ་སྙམ་པ་ལ། ཐབས་ཆེན་པོའི་མཛད་པའི་བྱིན་རླབས་ཀྱིས་མཉམ་པ་ཆེན་པོའི་གནད་ཆུད་པས་རྟོག་མཚན་གྱི་ཟུག་རྔུ་ཞི་ཞིང་བྲལ་བ་ལ་ནི་མཐའ་གང་ཡང་མ་དམིགས་པས་དཔེར་ན་འཇིག་རྟེན་གྱི་སྲིད་པ་སྟོངས་པའི་བསྐལ་པ་ལྟ་བུར་སྣང་ངོ༌། །དེ་ལྟ་བུའི་སྤྱོད་ཡུལ་དུ་ཐམས་ཅད་འབྲས་བུའི་ངོ་བོས་གང་བར་སྣང་ཞིང་ཡེ་ཤེས་རྒྱས་པར་མཛད་པ་ཡང་ཀུན་ལ་ཕན་འདོགས་ཤིང་ཡིད་ཚིམ་པར་བྱེད་པས་དཔེར་ན་འཇིག་རྟེན་ཆགས་ནས་གནས་པའི་བསྐལ་པ་ལྟ་བུར་སྣང་བའོ། །ཆོས་ཐམས་ཅད་གཉིས་སུ་མེད་པའི་རང་བཞིན་ཡིན་པས་མ་འགགས་པའི་ཐུགས་རྗེའི་སྒོ་ནས་འཁོར་བ་དབང་དུ་མཛད་དེ་སྙིང་རྗེ་ཆེན་པོས་ཟིན་པའི་དོན་འཇལ་བ་ནི་གཅིག་ཏུ་བསྡུས་པའི་ཕྱིར་འཇིག་རྟེན་ཆགས་པའི་བསྐལ་པ་ལྟ་བུར་སྣང་བའོ། །སྟོང་པས་དངོས་པོ་འཇིག་པ་དང༌། ཐབས་ཀྱིས་འགྲོ་བ་འཇིག་པ་དང༌། མི་རྟོག་པས་རྟོག་པ་འཇིག་པས་ན་རྟོགས་པའི་ཐབས་ཀྱི་ཐུགས་རྗེ་ཆེན་པོས་དངོས་པོར་གྱུར་བའི་ཡུལ་ཐམས་ཅད་སྐྱེ་མེད་ཀྱི་ངང་དུ་བསྒྲལ་བས་མངོན་པར་སྤྱོད་པའི་མཛད་པ་ནི། འཇིག་རྟེན་གྱི་ཁམས་འཇིག་པའི་བསྐལ་པ་ལྟ་བུའོ། །ཡང་ན་ཚིག་གོང་མ་བཞི་ཕྲིན་ལས་ཀྱི་མིང་དུ་སྦྱར་ཏེ། འོག་མ་ཀུན་དཔེ་མ་ཡིན་པར་དོན་དངོས་སུ་སྦྱར་ཀྱང་མི་འགལ་ཏེ། ཆོ་འཕྲུལ་མངོན་ཕྱུང་དང་འདྲའོ་སྙམ་མོ་ཞེས་ཀྱང་གསུངས་སོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་ཡོན་ཏན་མི་ཟད་མཛོད་ཀྱི་བཀོད་པ་དང་།།

འཕྲིན་ལས་བརླབས་ཀྱིས་མཛད་པའི་བྱིན་རླབས་ལས་སྣང་བར་རིག་པར་བྱའོ།།

ལང་ཀའི་བདག་པོ་དེ་དག་ནི་ཡོན་ཏན་མི་ཟད་པ་མཛོད་ཀྱི་བཀོད་པ་དང༌། ཕྲིན་ལས་རླབས་ཀྱིས་མཛད་པའི་ཕྱིར་བྱིན་གྱིས་བརླབས་ལས་སྣང་བར་རིག་པར་བྱའོ།།

གསུམ་པ་མཇུག་བསྡུ་བ་ནི།

དེ་སྐད་ཅེས། ཞེས་པ་ནས། རིག་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་སྐད་ཅེས་སྨྲས་པ་དང་། དམན་པའི་ལུས་ཀྱི་སེམས་དཔའ་རྣམས། གསང་བ་དམ་པ་དེ་ཁོ་ན་ཉིད་དེ་བྱིན་གྱིས་བརླབས་ལས་སྣང་བར་རིག་པར་གྱུར་ཏོ།།

སྟོན་པ་གསང་བའི་བདག་པོས་དེ་སྐད་ཅེས་སྨྲས་པས། དམན་པའི་ལུས་ཀྱི་སེམས་དཔའ་ཆེན་པོ་རྣམས་གསང་བ་དམ་པ་དེ་ཁོན་ཉིད་དེ་ཉིད་བྱིན་༼༡༢༦༽གྱིས་བརླབས་ལས་སྣང་བར་ཡང་དག་པར་རིག་ཅིང་རྟོགས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྤྱོད་པ་མི་ཟད་པ་རྒྱན་གྱི་འཁོར་ལོ་བཀོད་པའི་ལེའུ་སྟེ་སུམ་ཅུ་ལྔ་པའོ། །ཐེག་པ་ཆེན་པོ་ངེས་པར་འབྱུང་བའི་ཚུལ་ལས། བྱིན་གྱིས་བརླབས་ཀྱི་སྣང་ན་ཡང་འབྱུང་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱ་ཡེ་ཤེས་རྣམ་པར་བགྲོས་པའི་གཏམ་རྒྱུད་ཆེན་པོ་བསྟན་པ་བདུན་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཡོན་ཏན་དང་ཕྲིན་ལས་ཐུན་མོང་གི་སྤྱོད་པ་མི་ཟད་པ་རྒྱན་གྱི་འཁོར་ལོར་བཀོད་པར་བསྟན་པའི་ལེའུ་སྟེ་སུམ་ཅུ་སོ་ལྔ་པ་རྣམ་པར་བཤད་པའོ། །དེ་དག་གི་སྒོ་ནས་ཐེག་པ་ཆེན་པོ་ངེས་པར་འབྱུང་བའི་ཚུལ་གསང་བ་དམ་པ་ལས་སྔོན་བྱུང་སྐྱེས་བུས་ས་ནོན་པའི་འབྲས་བུ་ལྔའི་བྱིན་གྱིས་བརླབས་ཀྱིས་སྣང་བ་རིལ་དུ་ཤར་བ་ན་ཡང་འབྱུང་ཞེས་པའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ། བྱུང་ཚུལ་བསྟན་པ་བདུན་པ་ཉིད་རྒྱས་པར་བཀྲོལ་ཏེ་ལེགས་པར་བཤད་པའོ།། །།

ལེའུ་སོ་དྲུག་པ་རྨོངས་པ་སེལ་བའི་སྤྱོད་མཐུན་བགྲོས་པ།

༈ བརྒྱད་པ་བརྒྱུད་པ་ཐབས་ཀྱི་གྲགས་པའི་བྱུང་ཚུལ་ལ་གསུམ་སྟེ། བྱུང་ཚུལ་གྱི་དྲིས་ལན་སྤྱིར་བསྟན་པ། བྱེ་བྲག་ཏུ་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང་ལང་ཀའི། ཞེས་པ་ནས། ཡང་དག་གསང་བའི་དོན་འདི་གསུངས། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་མངའ་བདག་བྱང་ཆུབ་སེམས་དཔའ་᫥ᨓ᪱᫥་᩶᪍འ་ཆེན་པོ་དེས། གསང་བ་པའི་བདག་པོ་དེ་ལ་སྔོན་དུ་བྱུང་བའི་ཚིག་བཅུ་གཉིས་པའི་བརྒྱད་པ། བརྒྱུད་པའི་ཐབས་ཀྱིས་གྲགས་པ་ན་ཡང་བྱུང་ཞེས་འབྱུང་བ་ལ། འདི་སྐད་ཅེས་དྲི་བ་ཡོངས་སུ་དྲིས་སོ། །ཀྱེ་གསང་བ་པའི་བདག་པོ་ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་རྒྱུད་དུ་བརྗོད་པའི་སྐབས་སུ། བརྒྱུད་པ་ཐབས་ཀྱིས་གྲགས་པ་ན་ཡང་བྱུང་ཞེས་བཀོད་པ་དེ་ཇི་ལྟར་བརྒྱུད་ཅིང་གང་དུ་གྲགས་པ་ལགས། སྨྲས་པ། ལངྐའི་བདག་པོ་དགོངས་པས་བརྒྱུད་དེ་ཚིག་ཏུ་གྲགས་པས། ལྷ་དང་མིའི་འཇིག་རྟེན་དུ་སྣང་བར་གྱུར་པ་ཡིན་ནོ། །ལངྐའི་བདག་པོ་དེ་གང་ཞེ་ན། འདི་ལྟ་སྟེ། གང་གིས་གང་ལ་གང་བརྒྱུད་པ། །དེ་བཞིན་ཉིད་དེ་དེའོ་ཞེས། །ཆོས་ཀྱི་རྒྱལ་པོ་རྒྱལ་ཚབ་ལ། །དགོངས་པ་གསང་བ་ངེས་པར་བརྒྱུད། །ལྷ་གནས་མི་ཡི་འཇིག་རྟེན་དུ། །གསང་བའི་བདག་པོས་གང་བགྲོས་པ། །སྔོན་དུ་གནང་བྱུང་སྐྱེས་བུ་དག །དམན་པའི་ལུས་འཛིན་སེམས་དཔར་གྲགས། །གྲགས་པ་དེ་ཡང་ཇི་ག་གང་། །འདས་པའི་དུས་ན་སྔོན་བྱུང་བ། །འགྲོ་མགོན་རྡོ་རྗོའི་སྙིང་པོ་ཡིས། །ནག་པོ་རང་ཐག་འཁོར་བ་ཅན། །གདུལ་བྱའི་ཞིང་དུ་སྨིན་མཛད་ཚེ། །སྨིན་དང་མ་སྨིན་འདུས་པའི་འཁོར། །ཀུན་ནས་འདུས་པར་གྱུར་པ་ལ། །ཡང་དག་གསང་བའི་དོན་འདི་གསུངས།།

སྤྱིར་བྱུང་ཚུལ་འདི་འང་དམ་པའི་གསང་ལུང་ཇི་ལྟར་བྱུང་གི་ལན་ཏེ། ཁྱད་པར་རྩལ་འཕངས་ལས་འབྲས་བུ་གཞན་དོན་ཐབས་ལ་མཁས་པའི་མཛད་པ། རྒྱུད་གནས་ལུགས་ལས་རྒྱུད་པ་ཐབས་ཀྱི་གྲགས་པའི་བྱུང་ཚུལ། མི་མཐུན་སྐྱོན་སེལ་གྱི་ལྟ་བ། སྟག་མོ་ཚང་སེལ་བའམ། ལྡུམ་རའི་དུག་སེལ་བ་ལྟ་བུ་ཉིད་རྒྱས་པར་སྟོན་ནོ། །དེ་ནས་ཡང་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་དེ་ལ་སྔོན་དུ་བྱུང་བའི་ཚིག་བཅུ་གཉིས་པའི་བརྒྱད་པ། བརྒྱུད་པ་ཐབས་ཀྱི་གྲགས་པ་ན་ཡང་འབྱུང་ཞེས་བྱུང་བ་ལ། འདི་སྐད་ཅེས་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ཐེག་པ་ཆེན་པོ་གསང་བ་དམ་པ་འབྱུང་བའི་ཚུལ། སྟོན་མཆོག་ཐུབ་པས་ལུང་བསྟན་པ་གཏམ་དུ་བརྗོད་པའི་སྐབས་སུ། བརྒྱུད་པ་ཐབས་ཀྱི་གྲགས་པ་ན་ཡང་འབྱུང་ཞེས་བཀོད་པ་དེ་ཉིད། ཇི་ལྟར་བརྒྱུད་ཅིང་གང་དུ་གྲགས་པ་ལགས། ཞེས་དྲིས་པ་ལས། གསང་བ་པས་ལན་སྨྲས་ཏེ་བཀའ་སྩལ་པ། ལང་ཀའི་བདག་པོ། རྒྱལ་བ་རྣམས་ལ་དགོངས་པས་བརྒྱུད་དེ་གང་ཟག་ཆོས་ཀྱི་མིག་ཅན་ལ༌ཚིག་ཏུ་གྲགས་པའི་སྒོ་ནས་བརྒྱུད་པས་ཞིང་ཁམས་ལྷ་དང་མིའི་འཇིག་རྟེན་དུ་སྣང་བར་གྱུར་པ་ཡིན་ནོ། །ལང་ཀའི་བདག་པོ། དེ་ལྟར་བྱུང་ཚུལ་གྱིས་དོན་ཉེ་བར་བསྟན་པ་གང་ཞེ་ན། འདི་ལྟ་སྟེ། སྟོན་པ་ཡང་དག་པར་རྫོགས་པའི་སངས་རྒྱས་གང་གིས་༼༡༢༧༽ཉིད་ཀྱི་དགོངས་པའི་དོན་ཆོས་ཀྱི་རྒྱལ་ཚབ་རྒྱུད་དག་པ་གང་ལ་བསྟན་པ་རིན་པོ་ཆེ་གང་ཞིག་ཆུ་དང་ཟླ་བ་ལྟར་བརྒྱུད་པ་ཡིན་ཏེ། དེའང་ཆོས་གསང་བ་ཇི་བཞིན་པའི་དེ་བཞིན་ཉིད་དེ་ཡི་ངོ་བོ་ནི་དེ་ཁོ་ནའོ་ཞེས་སྟོན་པ་ཆོས་ཀྱི་རྒྱལ་པོ་ཀུན་ཏུ་བཟང་པོས་འཁོར་རྒྱལ་ཚབ་སྐྱེས་བུ་རིགས་ལྔ་ལ་དགོངས་པ་གསང་ཆེན་དམ་པ་ལྟར་ངེས་པར་བརྒྱུད་དེ། ལྷ་གནས་གསུམ་དང༌། ལུང་བསྟན་གྱི་གནས་མི་ཡི་འཇིག་རྟེན་མ་ལ་ཡ་ཉིད་དུ་སྟོན་པ་གསང་བའི་བདག་པོ་ཆེན་པོས་བཀོད་པ་སྣ་ཚོགས་ཀྱིས་གསང་བ་མཆོག་གི་དོན་དེ་ཉིད་ཚིག་ཏུ་བཀའ་སྩལ་ནས་གང་བགྲོས་པ་ནི། འཁོར་གང་ལ་ན་སྔོན་སྟོན་པ་འཇིག་རྟེན་དུ་བཞུགས་ཚེ་དངོས་སུ་ལུང་བསྟན་པ་གནང་ཞིང་ཐོབ་པའི་དམ་པའི་རིགས་ཅན་ལྔར་བྱུང་བའི་སྐྱེས་བུ་དག་ནི་འགྲོ་བ་དམན་པའི་ལུས་འཛིན་པ་ཅན་གྱི་བྱང་ཆུབ་སེམས་དཔར་གྱུར་བ་སོ་སོ་ལ་སྣང་ནས་ད་ལྟར་ཡང་གྲགས་པའོ། །དེ་ལྟར་སྔ་བར་གྲགས་པའི་ལོ་རྒྱུས་ཀྱིས་ཡིད་ཆེས་པར་བྱ་བའི་ཕྱིར་གྲགས་པ་དེ་ཡང་ཇི་ག་ལྟ་བུ་ལ་བརྟེན་ནས་འཇིག་རྟེན་དུ་སྣང་བ་ཚུལ་གང་ལྟར་བྱུང་བ་ཡིན་ཞེ་ན། སྔོན་བསྐལ་པ་གྲངས་མེད་པ་ལས་ཀྱང་གྲངས་མེད་པ་འདས་པའི་དུས་ན་སྔོན་རོལ་གྱི་བསྐལ་པ་ཀུན་དགའ་ལ་བྱུང་བའི་སྟོན་པ་འགྲོ་བ་རྣམས་ཀྱི་མགོན་སྐྱབས་དམ་པ་ཐུབ་དཀའ་གཞོན་ནུ་རྡོ་རྗེ་སྙིང་པོའམ་རྡོ་རྗེ་སེམས་དཔའ་ཞེས་སུ་གནས་གྱུར་པ་ཡིས་དུས་དེར་བྱུང་བའི་ཐར་པ་ནག་པོ་ཞེས་བྱ་བ་རང་ཐག་ལྟར་ཟློས་བུར་བརྒྱུད་པའི་འཁོར་བ་སྡུག་བསྔལ་ཅན་གྱི་ངན་སོང་ལས་ཐར་ནས་རུ་ཏྲར་གྱུར་བ་བཏུལ་ཏེ། གདུལ་བྱའི་ཞིང་དུ་སྨིན་པར་མཛད་དེ་བྱང་ཆུབ་ཀྱི་གནས་ལ་དགོད་པའི་དུས་སུ་ཡོངས་སུ་སྨིན་པ་ས་ནོན་པའི་འཁོར་དང་མ་སྨིན་པ་ས་མ་ནོན་པར་གྱུར་པའི་འདུས་པའི་འཁོར་ཚོགས་མང་པོ་ཀུན་ནས་ཀུན་དུ་འདུས་པར་གྱུར་པ་ལ། བསྟན་པ་ཡང་དག་གསང་བའི་དོན་གྱི་ཐེག་པ་ཆེན་པོ་འདི་ཉིད་དུས་དེར་ཡང་རྒྱལ་ཚབ་སྐྱེས་བུས་གསུངས་པ་ལྟར་ད་ལྟའང་འཆད་པ་སྟེ། དེ་བས་ན་བྱུང་ཚུལ་ནི་སྐབས་གཅིག་གི་དབང་དུ་དུས་གཅིག་པར་འདུས་ཀྱང་སོམ་ཉི་མེད་དོ།།

གཉིས་པ་བྱེ་བྲག་ཏུ་བཤད་པ་ལ་གསུམ་སྟེ། གདུལ་བྱ་སྨིན་པར་བྱ་བའི་ཕྱིར་མ་བཅོས་པའི་དམ་ཚིག་བསྟན་པ། དམ་ཚིག་གི་ཁེ་ཉེན་དང་དྲིས་ལན་བཤད་པ། སྤྱད་ལེགས་ཉེས་ཀྱི་སྐྱོན་ཡོན་ལོ་རྒྱུས་ཀྱིས་བསྟན་པའོ། །དང་པོ་ལ་དྲུག་སྟེ། མ་བཅོས་པའི་དམ་ཚིག་དངོས་བསྟན་པ། དེ་ལ་མ་རངས་པ་རྣམས་རང་གི་དམ་ཚིག་ཕུལ་ཞིག་པར་གསུངས་པ། དམ་ཚིག་ཕུལ་བའི་༼༡༢༨༽རིམ་པ་བསྟན་པ། དོན་གཞན་ལ་དགོངས་ཏེ་སྲུང་བའི་ཡོན་ཏན་གསུངས་པ། སྒྲ་ཇི་བཞིན་པར་སྤྱད་པའི་སྐྱོན་བཤད་པ། མཐུན་འཇུག་གི་སྒྲས་ལོག་པའི་དམ་ཚིག་མ་བཅོས་པའི་དམ་ཚིག་ཏུ་བསྟན་པའོ། །དང་པོ་ལ་གསུམ་སྟེ། གདམས་པ། ཞུས་པ། ལན་བཤད་པའོ། །དང་པོ་ནི།

ལང་ཀའི། ཞེས་པ་ནས། ཉེ་བར་ལོངས་ཤིག ཅེས་བཀའ་སྩལ་པ་དང༌། ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེའི་ཚེ་དེའི་དུས་ན། ཡོངས་སུ་རྫོགས་པར་ངོས་མི་ཟིན་པའི་སྲས་དེ་དག་ཡོངས་སུ་རྫོགས་པར་ངོས་བཟུང་བའི་སླད་དུ་གསུངས་པ་རྣམ་པར་བསྐུལ་བ། འདུས་པ་ཆེན་པོའི་ཚོགས། ཁྱེད་ཡོངས་སུ་རྫོགས་པར་ངོས་མ་ཟིན་ན། ཡེ་ནས་རྫོགས་པར་བཟུང་བའི་ཕྱིར། མ་བཅོས་པའི་དམ་ཚིག་ཉེ་བར་ལོང་ཞིག

ཅེས་བཀའ་སྩལ་པ་དང་།

ལེའུ་འདིས་དྲང་དོན་སྟོན་ནོ། །ལང་ཀའི་བདག་པོ་དྲེགས་པ་བཏུལ་བ་དེའི་ཚེ་ཁྱད་པར་གྱི་དུས་གསང་སྔགས་འབྱུང་བ་དེའི་དུས་ན། སྟོན་པ་གསང་བའི་བདག་པོས་དུས་འདིར་ལོ་རྒྱུས་སུ་བསྙད་པ་ནི། གདུལ་བྱའི་བྱ་བ་ཡོངས་སུ་མ་རྫོགས་པར་བྱང་ཆུབ་སྙིང་པོའི་ཆོས་ཉིད་ཡོངས་སུ་རྫོགས་པར་ངོས་མ་ཟིན་པའི་སྲས་མིའི་ཐོད་པ་ཅན་ལ་སོགས་པ་ལོག་སྲེད་ཅན་གྱི་འཁོར་དེ་དག་ཡང་དག་པའི་ལམ་ལ་དགོད་པའི་དགོས་ཆེད་དང་ལྡན་པས་ཡོངས་སུ་རྫོགས་པར་ངོས་གཟུང་སྟེ་དོན་རྟོགས་པར་བྱ་བའི་སླད་དུ་སྟོན་པས་གསང་བ་ཟབ་མོ་ལ་འཇུག་པའི་ཕྱིར་འཁོར་དེ་དག་ལ་རྣམ་པར་བསྐུལ་ཏེ་དམ་ཚིག་ལོངས་ཤིག་པར་གདམས་པ། ཇི་སྐད་བསྐུལ་ན་འདུས་པ་ཆེན་པོའི་ཚོགས་ཁྱེད་རྣམས་ཡོངས་སུ་རྫོགས་པར་མ་རྟོགས་ཏེ་ངོས་མ་ཟིན་པ་ཡི་དེ་ཁོ་ན་ཉིད་དེ་ཡེ་ནས་རང་ལ་རྫོགས་པར་ངོས་བཟུང་སྟེ་བྱང་ཆུབ་ཐོབ་པར་བྱ་བའི་ཕྱིར་མ་བཅོས་པའི་དམ་ཚིག་ཉེ་བར་ལོང་ཞིག ཅེས་བཀའ་སྩལ་པ་དང༌།

གཉིས་པ་ཞུས་པ་ནི།

འདུས་པའི་ཚོགས། ཞེས་པ་ནས། དེ་སྐད་ཅེས་གསོལ་པ་ལས། ཞེས་པའི་བར་གྱིས་བསྟན་ཏེ།

འདུས་པའི་ཚོགས་རྣམས་ཀྱིས་གསོལ་པ། བཅོམ་ལྡན་འདས་དེ་ཉིད་ཉེ་བར་བཟུང་བའི་སླད་དུ། མ་བཅོས་པའི་དམ་ཚིག་ཅེས་བགྱི་བ་དེ་ཇི་ལྟ་བུ་ལགས། ཇི་ལྟར་ཉེ་བར་བཟུང་བར་བགྱི། དེ་སྐད་ཅེས་གསོལ་པ་ལས།

དེ་ནས་འཁོར་གྱིས་དེ་ཉིད་ཤེས་པར་བྱ་བའི་ཕྱིར་འདུས་པའི་ཚོགས་རྣམས་ཀྱིས་གསོལ་པ། བཅོམ་ལྡན་འདས་དེ་ཉིད་ཉེ་བར་བཟུང་བའི་སླད་དུ་མ་བཅོས་པའི་དམ་ཚིག་ཅེས་བགྱི་བ་དེ་ཉིད་ཇི་ལྟ་བུ་ལགས། དེ་ཇི་ལྟར་ཉེ་བར་གཟུང་བར་བགྱི། དེ་སྐད་ཅེས་དྲི་བ་གཉིས་གསོལ་པ་ལས།།

གསུམ་པ་ལན་བཤད་པ་ནི།

བཅོམ་ལྡན་འདས། ཞེས་པ་ནས། ཞེས་བཀའ་སྩལ་པ་ལས། ཞེས་པའི་བར་གྱིས་བསྟན་ཏེ།

བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་གང་མ་བཅོས་པའི་དམ་ཚིག་ནི། འདི་ལྟ་སྟེ། མ་ནོར་མ་བཅོས་དམ་ཚིག་ནི། །དེ་བཞིན་ཉིད་ཀྱི་ཆོས་ཉིད་ལ། །བློ་བཞག་དེ་ལས་མི་འདའ་བ། །རྒྱལ་བ་རྣམས་ཀྱི་དམ་ཚིག་གོ །ཞེས་བཀའ་སྩལ་པ་ལས།།

དེ་ནས་སྟོན་པ་བཅོམ་ལྡན་འདས་ཀྱིས་ལན་ཉེ་བར་བཀའ་སྩལ་པ། འདུས་པ་ཆེན་པོའི་ཚོགས་རྣམས། གང་མ་བཅོས་པའི་དམ་ཚིག་ནི་འདི་ལྟ་སྟེ། ངོ་བོ་མ་འཁྲུལ་པས་མ་ནོར་ཞིང་བཅོས་བསླད་མེད་པས་མ་བཅོས་པའི་དམ་ཚིག་གི་བསྲུང་བྱིན་གང་ཞེ་ན། ཆོས་རྣམས་ཀྱི་དེ་བཞིན་ཉིད་དེ་ཁོ་ན་རང་རིག་གི་སེམས་ཀྱི་ཆོས་ཉིད་ཡིན་ལ། དེ་ཉིད་དུའང་འཛིན་པའི་འདུ་ཤེས་མ་ཞུགས་པ་ནི་༼༡༢༩༽གང་དུའང་མ་གཡོས་པའི་ཕྱིར་ན་དེའི་མིང་དུ་བློ་བཞག་པ་ཞེས་བྱ་བའང་ཡིན་ཏེ་དེ་ལས་གང་དུའང་འགྱུར་བ་མེད་པས་མི་འདའ་བ་ནི་རྒྱལ་བ་བདེ་བར་གཤེགས་པ་རྣམས་ཀྱི་ཐུགས་དམ་ཡིན་པས་དམ་ཚིག་གི་མཆོག་གོ །ཅེས་དམ་ཚིག་ལ་དགོད་པའི་ཕྱིར་ངེས་པ་དོན་གྱི་ལྟ་བའི་དམ་ཚིག་བཀའ་སྩལ་བ་ལས།།

གཉིས་པ་དེ་ལ་མ་རངས་པ་རྣམས་རང་གི་དམ་ཚིག་ཕུལ་ཞིག་པར་གསུངས་པ་ནི།

འདུས་པའི་ཚོགས་རྣམས། ཞེས་པ་ནས། དེ་སྐད་ཅེས་བཀའ་སྩལ་བ་ལས། ཞེས་པའི་བར་གྱིས་བསྟན་ཏེ།

འདུས་པའི་ཚོགས་རྣམས་ཤིན་ཏུ་སྐྲག་ཅིང་དངངས་ནས། ཡོངས་སུ་མ་རངས་ཏེ། ཨེ་མའོ་སྒྱུ་མའི་བདག་པོ་ཞིག་གིས་བདག་ཅག་བསླུས་སོ། །བདག་ཅག་སོ་སོའི་མོས་པ་སྣ་ཚོགས་པ་རྣམས་བཀག་ནས། སྟོང་པ་ཆེན་པོ་ལ་གཏད་པ་འདི་ནི། བདག་ཅག་སོ་སོ་རང་གི་དམ་ཚིག་དང་བྲལ་ལོ་ཞེས་ངུས་པ་ལས། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཀྱེ་མིའི་ཐོད་པ་ཅན་ལ་སོགས་པའི་ཚོགས། རང་རང་ཇི་ལྟར་དགའ་བའི་དམ་ཚིག་རྣམས། སྤོབས་པ་སྐྱེད་ལ་ཀུན་གྱིས་ཕུལ་ཅིག གང་མ་བཅོས་པའི་དམ་ཚིག་དེ་ལ་ནི། གང་ཡང་འགག་པ་མེད་པས་ཡོངས་སུ་མི་འགོག་པར་སྣང་ངོ་། །དེ་སྐད་ཅེས་བཀའ་སྩལ་པ་ལས།

དེ་ལ་འདུས་པའི་ཚོགས་རྣམས་བཤད་པ་ལྟར་ངོས་མ་ཟིན་ཏེ་ཆོས་ལ་བཟོད་པ་མ་ཐོབ་པས་ཤིན་ཏུ་སྐྲག་ཅིང་སྔངས་ནས་ཡིད་ཡོངས་སུ་མ་རངས་པའམ་མ་མགུ་སྟེ། ངག་ཏུ་ཡང་སྟོང་པ་ཆེན་པོའི་དོན་མ་མཐོང་བས་འདི་སྐད་དུ་བརྗོད་དེ། ཨེ་མའོ་སྒྱུ་མའི་བདག་པོ་ཞིག་གིས་བདག་ཅག་བསླུས་སོ། །བདག་ཅག་སོ་སོའི་མོས་པ་སྣ་ཚོགས་པ་རྣམས་བཀག་ནས་སྟོང་པ་ཆེན་པོ་ལ་གཏད་པ་འདི་ནི། བདག་ཅག་སོ་སོ་རང་རང་གི་དམ་ཚིག་དང་བྲལ་ལོ། །ཞེས་ཟེར་ཏེ་ངུས་པ་ལས། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཀྱེ་མིའི་ཐོད་པ་ཅན་ལ་སོགས་པའི་འདུས་པའི་ཚོགས་རྣམས། རང་རང་ཇི་ལྟར་དཀའ་བའི་དམ་ཚིག་རྣམས། སྤོབས་པ་སྐྱེད་ལ་ཀུན་གྱིས་ཕུལ་ཞིག གང་མ་བཅོས་པའི་དམ་ཚིག་མཆོག་ཏུ་གྱུར་པ་དེ་ལ་ནི་སོ་སོའི་སྤྱོད་པ་གང་ཡང་འགག་པ་མེད་པས་མི་སྤོང་སྟེ། རང་རང་གིས་དམ་ཚིག་དང་སྤྱོད་པ་ཅི་དགར་སྤྱོད་པར་ཡོངས་སུ་མི་འགོག་པར་རྗེས་སུ་གནང་ངོ༌། །དེ་བས་ན་སོ་སོའི་དམ་ཚིག་ཕུལ་ཅིག་པར་བསྐུལ་ཏེ། དེ་སྐད་ཅེས་བཀའ་སྩལ་པ་ལས།།

གསུམ་པ་དམ་ཚིག་ཕུལ་བའི་༼༡༢༨༽རིམ་པ་བསྟན་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ཡོངས་སུ་གཟུང་བའི། ཞེས་པ་ནས། དམ་ཚིག་ཕུལ་བ། ཞེས་པའི་བར་གྱིས་བསྟན་ཏེ།

ཡོངས་སུ་བཟུང་བའི་སྲས་རྣམས་མགུ་ཞིང་རངས་པར་གྱུར་ཏེ། མདངས་ཕྱུང་ནས་ཀུན་གྱིས་རྣམ་པར་འདུན་ཏེ། སོ་སོ་དགའ་བའི་དམ་ཚིག་ཕུལ་བ།

སྔར་ངོས་མ་ཟིན་པས་ཡོངས་སུ་གཟུང་བའི་སྲས་ལོག་རྟོག་ཅན་དེ་རྣམས་མངོན་སྤྱོད་མ་འགག་པ་ལ་ཡིད་མགུ་ཞིང་རངས་པར་གྱུར་ཏེ། མདངས་ཕྱུངས་ནས་ཀུན་གྱིས་རྣམ་པར་འདུན་ཏེ། སོ་སོ་རང་རང་ནས་དགའ་བའི་དམ་ཚིག་ཕུལ་བ།

གཉིས་པ་རྒྱས་པར་བཤད་པ་ལ་བཅུ་གསུམ་སྟེ། ནག་པོ་དེད་དཔོན་འཁོར་བཅས་ཀྱིས་གཞན་འཇོམས་པའི་དམ་ཚིག་ཕུལ་བ། གུ་ལང་ལ་སོགས་པས་ཆགས་པ་སྤྱོད་པའི་དམ་ཚིག་ཕུལ་བ། བྱིཥྞུ་ལ་སོགས་པས་སྲོག་གཅོད་པའི་དམ་ཚིག་ཕུལ་བ། གནོད་སྦྱིན་རྣམས་ཀྱིས་མ་བྱིན་པར་ལེན་པའི་དམ་ཚིག་ཕུལ་བ། མུ་སྟེགས་ཀྱིས་དགེ་མཚན་འཆང་བའི་དམ་ཚིག་ཕུལ་བ། རིགས་ངན་སྨེ་ཤ་ཅན་གྱིས་ཤ་ལྔ་ཟ་བའི་དམ་ཚིག་ཕུལ་བ། སྲིན་མོས་ཁྲག་འཐུང་བའི་དམ་ཚིག་༼༡༣༠༽ཕུལ་བ། ཕྲ་མེན་མས་ལོག་པའི་ཡོ་བྱད་ལྔ་སྤྱོད་པའི་དམ་ཚིག་ཕུལ་བ། རིགས་ངན་ངན་སྐྱུག་ཅན་གྱིས་དམ་རྫས་ལྔ་སྤྱོད་པའི་དམ་ཚིག་ཕུལ་བ། བུད་མེད་ཀྱིས་འཁྲིག་པའི་ཆགས་པ་སྤྱོད་པའི་དམ་ཚིག་ཕུལ་བ། ཤྭ་བ་ར་པས་རྫུན་གྱི་དམ་ཚིག་ཕུལ་བ། ལོག་སྲེད་ཅན་གྱིས་དགེ་སྡིག་འཆོལ་བར་སྤྱོད་པའི་དམ་ཚིག་ཕུལ་བ། གསང་ཚིག་བསྟེན་པས་མཐུ་བྱེད་པའི་དམ་ཚིག་ཕུལ་བའོ། །དང་པོ་ནི།

ནག་པོ་དེད་དཔོན། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

ནག་པོའི་དེད་དཔོན་འཁོར་དང་བཅས་པ་རྣམས་ཀྱིས་གསོལ་པ། དཔའ་བོ་ཆེན་པོ་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། རང་གི་དཀའ་ཐུབ་ཆེན་པོ་ཡིས། །རང་གི་རྒྱལ་སྲིད་ལ་གནས་ཏེ།།

གཞན་གྱི་སྡེ་པ་འཇོམས་པ་ནི། །བདག་ཅག་རྣམས་ཀྱི་དམ་ཚིག་གོ །ཞེས་གསོལ་ཏོ།།

འདི་རྣམས་སྔོན་བྱུང་དུ་རུ་ཏྲ་འཁོར་དང་བཅས་པ་ལ་སོགས་པས་སྒྲ་ཇི་བཞིན་དུ་སྨྲས་པ་ཡིན་ཀྱང༌། རྗེས་འཇུག་ཏུ་གང་ཟག་ལམ་པ་རྣམས་ཀྱི་བསམ་པ་དང་མཐུན་པར་སྦྱར་ཏེ་ཤེས་པར་བྱ་སྟེ། དེའང་ནག་པོ་དེད་དཔོན་གྱི་གཙོ་བོ་རུ་ཏྲ་འཁོར་དང་བཅས་པ་རྣམས་ཀྱིས་དམ་ཚིག་ཕུལ་བའི་ཚིག་གསོལ་པ། དཔའ་བོ་ཆེན་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། དྲེགས་པ་རང་རང་དག་གི་དཀའ་ཐུབ་ཀྱི་དམ་ཚིག་ཆེན་པོ་ཡིས། རང་གི་ཆོས་ལུགས་ཀྱི་རྒྱལ་སྲིད་ལ་གནས་ཏེ། ཞེ་སྡང་གིས་ཕ་རོལ་གཞན་གྱི་སྡེ་དང་དཔུང་འཛིན་པ་རྣམས་འཇོམས་པར་བྱེད་པ་ནི་བདག་ཅག་རྣམས་ཀྱི་དམ་ཚིག་གོ །ཞེས་གསོལ་ནས་དམ་ཚིག་ཕུལ་ཏོ།

གཉིས་པ་གུ་ལང་ལ་སོགས་པས་ཆགས་པ་སྤྱོད་པའི་དམ་ཚིག་ཕུལ་བ་ནི།

དེ་ནས་འདོད་ཆགས། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་འདོད་ཆགས་ཀྱི་བདག་པོ་རྣམས་ཀྱིས་འདི་སྐད་ཅེས་གསོལ་ཏོ། །དབང་ཕྱུག་ཆེན་པོ་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། མ་དང་བུ་མོ་སྲིང་མོ་དང་། །རྒྱུ་དང་མི་རྒྱུའི་བུད་མེད་ལ། །འདོད་པ་བས་ནིཆགས་སྤྱོད་པ། །བདག་ཅག་རྣམས་ཀྱི་དམ་ཆིག་དེ་ལགས་སོ། །ཞེས་གསོལ་ཏོ།།

དེ་ནས་གུ་ལང་ལ་སོགས་པ་འདོད་ཆགས་ཀྱི་བདག་པོ་རྣམས་ཀྱི་གཙོ་བོས་འདི་སྐད་ཅེས་གསོལ་ཏོ། །དབང་ཕྱུག་ཆེན་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། རང་གི་མ་དང་བུ་མོ་དང་སྲིང་མོ་རྣམས་དང༌། གཞན་ཡང་སྲིད་པར་རྒྱུ་བ་དང་སྲིད་པའི་ས་བོན་བཅོས་ནས་མི་རྒྱུ་བའི་བུད་ མེད་ཀུན་ལ་འདོད་པ་དང་བཅས་པས་ནི་ཆགས་པ་གང་སྤྱོད་པ་བདག ་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

གསུམ་པ་བྱིཥྞུ་ལ་སོགས་པས་སྲོག་གཅོད་པའི་དམ་ཚིག་ཕུལ་བ་ནི།

དེ་ནས་ཞེ་སྡང༌། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཞེ་སྡང་ཅན་གྱི་བདག་པོ་རྣམས་ཀྱིས་འདི་སྐད་ཅེས་གསོལ་ཏོ། །འཇིགས་བྱེད་ཆེན་པོ་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། སེམས་ཅན་སེམས་ཅན་ཐམས་ཅད་ཀྱི། །སྲོག་ནི་ཤིན་ཏུ་ཕྲོགས་ནས་ཀྱང་། །ཤ་དང་ཁྲག་ལ་ལོངས་སྤྱོད་པ། །བདག་ཅག་རྣམས་ཀྱིས་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་ཞེ་སྡང་ཅན་གྱི་བདག་པོ་བྱིཥྣུ་ལ་སོགས་པ་རྣམས་ཀྱིས་འདི་སྐད་ཅེས་གསོལ་ཏོ། །འཇིགས་བྱེད་ཆེན་པོ། བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། སེམས་ཅན་ཆེ་བ་དང་སེམས་ཅན་ཆུང་བ་ཐམས་ཅད་ཀྱི་སྲོག་ནི་ཤིན་ཏུ་ཕྲོགས་ནས་ཀྱང་ཤ་དང་ཁྲག་ལ་ལོངས་སྤྱོད་བྱེད་པ་གང་ཡིན་པ་བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏེ་ཕུལ་ཏོ།།

བཞི་པ་གནོད་སྦྱིན་རྣམས་ཀྱིས་མ་བྱིན་པར་ལེན་པའི་དམ་ཚིག་ཕུལ་བ་ནི།

དེ་ནས་གནོད་སྦྱིན། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་གནོད་སྦྱིན་ཆེན་པོ་རྣམས་ཀྱིས་འདི་སྐད་ཅེས་གསོལ་ཏོ། །འཇིགས་བྱེད་ཆེན་པོ་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། ནོར་གྱི་བདག་པོ་ཐམས་ཅད་ལ། །གསེར་ལ་སོགས་པ་བླངས་ནས་ནི། །རང་གི་འདོད་པར་ལོངས་སྤྱོད་པ། །བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་གནོད་སྦྱིན་ཆེན་པོ་རྣམས་ཀྱིས་འདི་སྐད་ཅེས་གསོལ་ཏོ། །༼༡༣༡༽འཇིགས་བྱེད་ཆེན་པོ། བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། ནོར་གྱི་བདག་པོ་ཐམས་ཅད་ལ་གསེར་ལ་སོགས་པ་མ་བྱིན་པར་བླངས་ནས་ནི་རང་གི་ཅི་ལྟར་འདོད་པར་ལོངས་སྤྱོད་པར་བྱེད་པ་གང་བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

ལྔ་པ་མུ་སྟེགས་ཀྱིས་དགེ་མཚན་འཆང་བའི་དམ་ཚིག་ཕུལ་བ་ནི།

དེ་ནས་རྟོག་པ་ཅན། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་རྟོགས་པ་པོ་རྣམས་ཀྱིས་འདི་སྐད་ཅེས་གསོལ་ཏོ། །ཡིད་བཞིན་རྟོག་པའི་རྒྱལ་པོ་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། གང་གིས་མགོ་ཐོད་བཅད་ནས་ནི། །དགེ་མཚན་རྟགས་དེ་སུ་འཆང་བ། །ཡིད་བཞིན་ནོར་བུ་ལྟ་བུར་འགྱུར། །བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་རྟོག་པ་ཅན་མུ་སྟེགས་རྣམས་ཀྱིས་འདི་སྐད་ཅེས་གསོལ་ཏོ། །ཡིད་བཞིན་རྟོག་པའི་རྒྱལ་པོ། བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། རོ་གང་གི་མགོ་ཡི་ཐོད་པ་བཅད་ནས་ནི་དགེ་མཚན་གྱི་རྟགས་སུ་དེ་ཉིད་སུ་ཡིས་འཆང་བ་ན། བདག་ཅག་མུ་སྟེགས་པ་ལྟར་ཡོན་ཏན་ཡིད་བཞིན་ནོར་བུ་ལྟ་བུར་འགྱུར་བར་འདོད་པ་བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དྲུག་པ་རིགས་ངན་སྨེ་ཤ་ཅན་གྱིས་ཤ་ལྔ་ཟ་བའི་དམ་ཚིག་ཕུལ་བ་ནི།

དེ་ནས་རིགས་ངན། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་རིགས་ངན་སྨེ་ཤ་ཅན་རྣམས་ཀྱིས་འདི་སྐད་ཅེས་གསོལ་ཏོ། །མངའ་ཐང་རྫོགས་པའི་རྒྱལ་པོ་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། བ་གླང་རྟ་ཤ་ཁྱི་ཤ་དང་། །མི་ཤ་གླང་ཆེན་ཤ་ལ་སོགས། །ཟོས་ན་ཡོན་ཏན་ཐམས་ཅད་འགྲུབ། །བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་རིགས་ངན་སྨེ་ཤ་ཅན་རྣམས་ཀྱི་ཚོགས་ཀྱིས་འདི་སྐད་ཅེས་གསོལ་ཏོ། །མངའ་ཐང་རྫོགས་པའི་རྒྱལ་པོ། བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། བ་ལང་དང་ཁྱིའུ་ཤ་དང་རྟ་ཤ་དང་མི་ཡི་ཤ་དང་གླང་ཆེན་གྱི་ཤ་ལ་སོགས་པ་ཟོས་ན་ཡོན་ཏན་ཐམས་ཅད་འགྲུབ་པར་འདོད་པ་བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

བདུན་པ་སྲིན་མོས་ཁྲག་འཐུང་བའི་དམ་ཚིག་ཕུལ་བ་ནི།

དེ་ནས་སྲིན་མོ། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་སྲིན་མོ་ཁྲག་འཕྲོག་མ་རྣམས་ཀྱིས་འདི་སྐད་ཅེས་གསོལ་ཏོ། །ཁྲག་འཐུང་རྒྱལ་པོ་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། སྲོག་ཆགས་དག་ནི་ཐམས་ཅད་ཀུན། །བསད་པའི་ཁྲག་ནི་དྲོན་མོ་དག །འཐུངས་ན་གཟི་བྱིན་འབར་བར་འགྱུར། །བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་སྲིན་མོ་ཁྲག་འཕྲོག་མ་རྣམས་ཀྱིས་འདི་སྐད་ཅེས་གསོལ་ཏོ། །ཁྲག་འཐུང་རྒྱལ་པོ། བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། སྲོག་ཆགས་དག་ནི་ཐམས་ཅད་ཀུན་བསད་པའི་ཁྲག་ནི་དྲོན་མོ་དག་འཐུང་བར་བྱས་ན་ལུས་གཟི་བྱིན་འབར་བར་འགྱུར་བ་བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

བརྒྱད་པ་ཕྲ་མེན་མས་ལོག་པའི་ཡོ་བྱད་ལྔ་སྤྱོད་པའི་དམ་ཚིག་ཕུལ་བ་ནི།

དེ་ནས་ཕྲ་མེན། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཕྲ་མེན་མ་རྣམས་ཀྱིས་འདི་སྐད་ཅེས་གསོལ་ཏོ། །ཆོ་འཕྲུལ་ཆེན་པོའི་མངའ་བདག བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། ཐོད་རུས་རྐང་དང་འབྲུ་མར་ཁྲག །ཆང་དང་ཨ་མྲ་ཏར་སྦྱར་བ། །རྫུ་འཕྲུལ་གྲུབ་པའི་དམ་རྫས་ཏེ། །བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་ཕྲ་མེན་མ་རྣམས་ཀྱིས་འདི་སྐད་ཅེས་གསོལ་ཏོ། །ཆོ་འཕྲུལ་ཆེན་པོའི་མངའ་བདག བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། ཐོད་རུས་ཀླད་པ་རྐང་དང་འབྲུ་མར་ཁྲག་བཅས་ཆང་དང་ཨ་མྲ་ཏར་སྦྱར་བ་ཟོས་ན་རྫུ་འཕྲུལ་འགྲུབ་པའི་དམ་རྫས་ཏེ་བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དགུ་པ་རིགས་ངན་ངན་སྐྱུག་ཅན་གྱིས་དམ་རྫས་ལྔ་སྤྱོད་པའི་དམ་ཚིག་ཕུལ་བ་ནི།

དེ་ནས་རིགས་ངན། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་རིགས་ངན་ངན་སྐྱུགས་ཅན་རྣམས་ཀྱིས་འདི་སྐད་ཅེས་གསོལ་ཏོ། །གཏུམ་རྔམ་ཆེན་པོ་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། ཤ་ཆེན་བཤང་གཅི་ཁུ་བ་ཁྲག །བདུད་རྩི་འཁྱིལ་བ་དམ་རྫས་ཏེ། །ནད་རྣམས་མ་ལུས་འཇོམས་པར་བྱེད། །བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་རིགས་ངན་ངན་སྐྱུགས་ཅན་རྣམས་ཀྱིས་འདི་སྐད་ཅེས་གསོལ་ཏོ། །གཏུམ་རྔམ་ཆེན་པོ་བདག་ཅག་རྣམས་ཀྱི་དམ་ཚིག་༼༡༣༢༽ནི་འདི་ལྟ་སྟེ། ཤ་ཆེན་དང་གཤང་གཅི་ཁུ་བ་དང་ཁྲག་རྣམས་བསྟེན་པ་བདུད་རྩི་འཁྱིལ་བའི་དམ་རྫས་ཡིན་ཏེ། ནད་རྣམས་མ་ལུས་འཇོམས་པར་བྱེད་དེ་ བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

བཅུ་པ་བུད་མེད ་ཀྱིས་འཁྲིག་པའི་ཆགས་པ་སྤྱོད་པའི་དམ་ཚིག་ཕུལ་བ་ནི།

དེ་ནས་བུད་མེད། ཅེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་བུད་མེད་རྣམས་ཀྱི་ཚོགས་ཀྱིས་འདི་སྐད་ཅེས་གསོལ་ཏོ། །སྒེག་པོ་བདག་ཅག་རྣམས་ཀྱི་དམ་ཚིག་ནི། །འདི་ལྟ་སྟེ། བྲོ་གར་གླུ་ཚིག་སྙན་དངགས་དང་། །འཇོ་ཚུལ་སྟབས་ཀྱིས་ཡིད་ཕྲོགས་ཏེ། །བསྙེན་པའི་ཚུལ་གྱིས་འཁྲིག་སྤྱོད་པ། །འདི་དག་དགའ་བའི་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་བུད་མེད་རྣམས་ཀྱི་ཚོགས་ཀྱིས་འདི་སྐད་ཅེས་གསོལ་ཏོ། །སྒེག་པོ་ཆེན་པོ། བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། ལུས་ཀྱིས་བྲོ་གར་དང་ངག་གི་གླུ་ཚིག་སྙན་དངགས་དང་བཅས་ཏེ་འཇོ་ཚུལ་གྱི་སྟབས་སྣ་ཚོགས་ཀྱིས་སྐྱེས་པ་རྣམས་ཀྱི་ཡིད་འཕྲོག་པར་བྱས་ཏེ། བསྟེན་པའི་ཐབས་ཀྱིས་འཁྲིག་པ་ལ་སྤྱོད་པ་འདི་དག་དགའ་བའི་དམ་ཚིག་སྟེ། བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

བཅུ་གཅིག་པ་ཤྭ་བ་ར་པས་རྫུན་གྱི་དམ་ཚིག་ཕུལ་བ་ནི།

དེ་ནས་ཤྭ་བ་ར། ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཤྭ་བ་ར་བའི་ཚོགས་ཀྱིས་འདི་སྐད་ཅེས་གསོལ་ཏོ། །ངག་གི་དབང་ཕྱུག་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། གཞན་གྱིས་དཔག་པར་དཀའ་བའི་ཕྱིར། །ངག་གི་སྤྲུལ་པ་མཚམས་སྨྲ་བ། །བསླུ་བ་ཆེན་པོའི་མཆོག་ཡིན་ཏེ། །བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་རྫུན་དུ་སྨྲ་བའི་ཤྭ་བ་ར་་པའི་ཚོགས་རྣམས་ཀྱིས་འདི་སྐད་ཅེས་གསོལ་ཏོ། །ངག་གི་དབང་ཕྱུག་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། གཞན་གྱིས་དཔགས་པར་དཀའ་བའི་ཕྱིར། ངག་གི་རྫུན་གྱི་ཚིག་གི་སྤྲུལ་ པ་ཡུལ་ཡོད་མེད་དང་འཚམས་པར་སྨྲ་བ་གང་དེ་བསླུ་བ་ཆེན་པོའི་མཆོག་ཡིན་ཏེ། བདག ་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

བཅུ་གཉིས་པ་ལོག་སྲེད་ཅན་གྱིས་དགེ་སྡིག་འཆོལ་བར་སྤྱོད་པའི་དམ་ཚིག་ཕུལ་བ་ནི།

དེ་ནས་ལོག་སྲེད། ཅེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་ལོག་སྲེད་ཅན་རྣམས་ཀྱི་ཚོགས་ཀྱིས་འདི་སྐད་ཅེས་གསོལ་ཏོ། །སྐྱེས་བུ་ཡང་དག་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། ཡང་དག་ངང་དུ་ཀུན་རིག་ན། །ཆེ་ཆུང་ལས་གཉིས་གང་བྱས་ཀྱང་། །གཉིས་ཀྱི་དབང་དུ་མི་འགྱུར་ན། །བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

དེ་ནས་ཡང་མུ་སྟེགས་ལོག་སྲེད་ཅན་རྣམས་ཀྱི་ཚོགས་ཀྱིས་འདི་སྐད་ཅེས་གསོལ་ཏོ། །སྐྱེས་བུ་ཡང་དག་ཆེན་པོ། བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། བདག་འཛིན་གྱི་སེམས་ཡང་དག་པའི་ངང་དུ་ཀུན་རིག་ན། དགེ་སྡིག་གམ་དཀར་ནག་ཆེ་ཆུང་གི་ལས་གཉིས་གང་བྱས་ཀྱང༌། དེ་གཉིས་ཀྱི་དབང་ཏུ་མི་འགྱུར་ན་གཉིས་དང་བྲལ་བར་སྨྲ་བས་བདག་ཅག་རྣམས་ཀྱི་དམ་ཚིག་དེ་ལགས་སོ། །ཞེས་གསོལ་ཏོ།།

བཅུ་གསུམ་པ་གསང་ཚིག་བསྟེན་པས་མཐུ་བྱེད་པའི་དམ་ཚིག་ཕུལ་བ་ནི།

དེ་ནས་གསང་ཚིག ཞེས་པ་ནས། ཞེས་གསོལ་ཏོ། །ཞེས་པའི་བར་གྱིས་བསྟན་ཏེ།

དེ་ནས་གསང་ཚིག་གི་བརྟེན་པའི་ཚོགས་རྣམས་ཀྱིས་གསོལ་པ། གསང་བའི་རྣལ་འབྱོར་བདག་ཅག་རྣམས་ཀྱི་དམ་ཚིག་ནི། འདི་ལྟ་སྟེ། བཤང་གཅི་ཁྲག་དང་སོལ་ཁུའི་གོས། །བརྒྱ་འམ་སྟོང་དུ་གྱོན་ནས་ནི། །ལིངྒ་བཅད་ནས་སངས་རྒྱས་འཇིག །གསང་སྔགས་གསང་བའི་དམ་ཚིག་གོ །ཞེས་གསོལ་ཏོ།།

དེ་ནས་འཇིག་རྟེན་གྱི་གསང་ཚིག་གི་སྔགས་བསྟེན་པའི་རྒྱང་འཕེན་པའི་ཚོགས་རྣམས་ཀྱིས་གསོལ་བ། གསང་བའི་རྣལ་འབྱོར་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། གཤང་གཅི་དང་ཁྲག་དག་སོལ་ཁུའི་གོས་ཞེས་དེ་དག་གིས་བསྐུས་པ་གོན་ནས་ལུས་ལའང་བྱུག་སྟེ་སྔགས་ཀྱི་གྲངས་བཅུ་ཕྲག་བཅུ་བརྒྱ་འམ་བརྒྱ་ཕྲག་བཅུ་སྟོང་དུ་བཟླས་ཏེ་ལུས་ལ་༼༡༣༣༽རྟགས་སམ་ཐིག་ལེ་གྲངས་དེ་ལྟར་བཀོད་ནས་ནི་ལས་བྱས་ཏེ་ལིང་ག་བཅད་དེ་གཏུབས་ན་སངས་རྒྱས་ཀྱང་འཇིག་པར་འདོད་པ་ནི་གསང་སྔགས་གསང་བའི་དམ་ཚིག་མཆོག་གོ །ཅེས་གསོལ་ནས་རང་རང་གི་དམ་ཚིག་ཕུལ་བར་གྱུར་ཏོ།།

བཞི་པ་དོན་གཞན་ལ་དགོངས་ཏེ་སྲུང་བའི་ཡོན་ཏན་གསུངས་པ་ལ་གསུམ་སྟེ། དེ་ལྟར་ལོངས་ཤིག་པར་གདམས་པ། ཡོན་ཏན་དངོས་བསྟན་པ། དེ་ལ་དད་པའི་འཁོར་རིགས་ངེས་པར་གཟུང་བའོ། །དང་པོ་ནི།

དེ་ནས་བཅོམ་ལྡན་འདས། ཞེས་པ་ནས། རྫོགས་པར་བླང་བར་བྱོས། །ཞེས་པའི་བར་གྱིས་བསྟན་ཏེ།

དེ་ནས་བཅོམ་ལྡན་འདས་ཀྱིས་གང་མ་འདྲེས་ཡོངས་སུ་མི་འགོག་པའི་དམ་ཚིག་བཀའ་སྩལ་པ། གང་འདིར་འདུས་པའི་སྐལ་ལྡན་ཀུན། །སོ་སོའི་མོས་པ་ཐ་དད་པའི། །ཡིད་བཞིན་ནོར་བུའི་དམ་ཚིག་ནི།།

ཡོངས་སུ་རྫོགས་པ་བླང་བར་བྱོས།།

དེ་ནས་ལྡེམ་དགོངས་སུ་མཐུན་པས་དྲང་ཕྱིར་རིགས་རྒྱུད་ཅན་ལ་གསུངས་པ་དང༌། ཞེན་ཆགས་ཅན་དང༌། ལོག་སྲེད་ཅན་གྱི་ཆེད་དུ་བཅོམ་ལྡན་འདས་ཀྱིས་དོན་གཞན་ལ་དགོངས་ཏེ་གང་མ་རུངས་པ་དག་གིས་དམ་ཚིག་ཕུལ་བ་རྣམས་དོན་ཀུན་སུན་བཏོན་པས་མ་འདྲེས་ལ་མིང་རྣམས་སུན་མ་བཏོན་པས་ཡོངས་སུ་མི་འགོག་པའི་དམ་ཚིག་སོ་སོར་བརྩལ་ལ་སྤྱོད་དུ་གནང་བར་མཐུན་འཇུག་སྤྱོད་པའི་གསུང་དུ་བཀའ་སྩལ་པ། གང་འདིར་འདུས་པའི་སྐལ་ལྡན་ཀུན་ཞེས་སོ་སོ་ལ་བོས་ན། ཁྱེད་ཅག་རྣམས་ཀྱིས་རང་རང་སོ་སོའི་མོས་པ་ཐ་དད་པའི་དོན་དང་མཐུན་པའི་ཡིད་བཞིན་ནོར་བུ་ལྟ་བུའི་དམ་ཚིག་རྣམས་ནི་ཡོངས་སུ་རྫོགས་པར་བླང་བར་བྱོས་ཤིག་ཅེས་གདམས་པའོ།།

གཉིས་པ་ཡོན་ཏན་དངོས་བསྟན་པ་ལ་བཅུ་གཉིས་ཏེ། ནག་པོ་དེད་དཔོན་གྱི་དམ་ཚིག་སངས་རྒྱས་འགྲུབ་པའི་སྣོད་དུ་གསུངས་པ། གུ་ལང་གི་དམ་ཚིག་ཐེག་ཆེན་སྒྲུབ་པའི་སྣོད་དུ་གསུངས་པ། བྱིཥྣུའི་ཡང་དག་གི་དམ་ཚིག་ཏུ་བསྟན་པ། གནོད་སྦྱིན་གྱིའང་ཡང་དག་པའི་དམ་ཚིག་ཏུ་བསྟན་པ། མུ་སྟེགས་ཀྱི་འདོད་པའི་དམ་ཚིག་ཏུ་བསྟན་པ། སྨེ་ཤ་ཅན་གྱི་རྣལ་འབྱོོར་གྱི་ཟས་སུ་བསྟན་པ། སྲིན་མོའི་དམ་ཚིག་ཁྲག་འཐུང་མའི་དམ་ཚིག་ཏུ་གསུངས་པ། བུད་མེད་ཀྱིས་ཕུལ་བ་ཆོས་ཀྱི་དམ་ཚིག་ཏུ་གསུངས་པ། ཤྭ་བ་ར་་པའི་སངས་རྒྱས་ཀྱི་བཀའི་དམ་ཚིག་ཏུ་བསྟན་པ། ལོག་སྲེད་ཅན་གྱི་ཡོན་ཏན་ལྔ་དང་ལྡན་པར་བསྟན་པ། གསང་ཚིག་སྟེན་པའི་དམ་ཚིག་སྔགས་ཀྱི་དམ་ཚིག་ཏུ་བསྟན་པ། ཕྲ་མེན་མ་དང་ངན་སྐྱུག་ཅན་གྱི་དམ་ཚིག་ཆོས་ཉིད་རྒྱན་གྱི་དམ་ཚིག་ཏུ་བསྟན་པའོ། །དང་པོ་ནི།

གཞན་གྱི་སྡེ་པ། ཞེས་པ་ནས། འགྲུབ་པའི་སྣོད་དུ་གསུངས། །ཞེས་པའི་བར་གྱིས་བསྟན་ཏེ།

གཞན་གྱི་སྡེ་ པ་འཇོམས་བྱེད་ཅིང་། །མཚམས་མེད་ལྔ་པོ་སྤྱོད་བཞིན་དུ།།

བདག ་ཉིད་ཆེན་པོར་དམིགས་པ་དེ། །སངས་རྒྱས་འགྲུབ་པའི་སྣོད་དུ་གསུངས།།

དྲེགས་པ་འཁོར་བཅས་ལ་བཀའ་སྩལ་པ། ཡང་དག་པའི་མཚམས་མེད་ལྔ་ལ་དགོངས་ཏེ། གཞན་གྱི་སྡེ་པ་རྣམས་འཇོམས་པར་བྱེད་ཅིང་མཚམས་མེད་ལྔ་པོ་སྤྱོད་བཞིན་དུ་རང་གི་སྤྱོད་པ་དེ་དག་མ་སྤངས་པར་ཇི་བཞིན་པའི་ངང་དུ་༼༡༣༤༽རྟོགས་པ་ནི་བདག་ཉིད་ཆེན་པོར་དམིགས་པ་སྟེ། ཀུན་བྱེད་རྒྱལ་པོ་ལས། ང་ནི་མ་ནོར་བ་ཡི་བྱང་ཆུབ་སེམས། །དེ་བཞིན་ཉིད་དུ་ཡེ་ནས་རྒྱལ་བར་བྱེད། །ཅེས་པ་ལྟ་བུར་རྟོགས་པའི་དམ་ཚིག་ལ་གནས་པས་འབྲས་བུ་སངས་རྒྱས་འགྲུབ་པའི་ཐེག་པ་མཆོག་གི་སྣོད་ཉིད་དུ་གསུངས་པ་ཡིན་ནོ།།

གཉིས་པ་གུ་ལང་གི་དམ་ཚིག་ཐེག་ཆེན་སྒྲུབ་པའི་སྣོད་དུ་གསུངས་པ་ནི།

མ་དང་བུ། ཞེས་པ་ནས། སྣོད་དུ་གསུངས། །ཞེས་པའི་བར་གྱིས་བསྟན་ཏེ།

མ་དང་བུ་མོ་སྲིང་མོ་དང་། །རྒྱུ་བའི་བུད་མེད་ཐམས་ཅད་ལ།།

འདོད་པ་བས་ནི་ཆགས་སྤྱད་ན། །དེ་དག་བསྒྲུབ་པའི་སྣོད་དུ་གསུངས།།

གུ་ལང་འཁོར་བཅས་ལ་བཀའ་སྩལ་པ། ཆོས་ཉིད་རྟོགས་པའི་ཤེས་རབ་ཡེ་ཤེས་དང་མི་འབྲལ་བ་ལ་དགོངས་ཏེ། མ་དང་བུ་མོ་སྲིན་མོ་དང་སྲིད་པར་རྒྱུ་བའི་བུད་མེད་ཐམས་ཅད་ལ། ཐབས་དང་ལྡན་པས་འདོད་པ་བས་ནི་ཆགས་པ་ལ་སྤྱད་ཀྱང་མ་ཟིན་ན་དེ་དག་ཐེག་པ་ཆེན་པོ་སྒྲུབ་པའི་སྣོད་དུ་གསུངས་པའོ།།

གསུམ་པ་བྱིཥྣུའི་ཡང་དག་གི་དམ་ཚིག་ཏུ་བསྟན་པ་ནི།

གསོད་ལ། ཞེས་པ་ནས། ཆེན་པོ་ཡིན། །ཞེས་པའི་བར་གྱིས་བསྟན་ཏེ།

གསོད་ལ་དགའ་བ་གང་དག་གི །སྲོག་གི་དབང་པོ་རྒྱུན་བཅད་ནས།།

ཤ་རུས་ཟ་ཞིང་ཁྲག་འཐུང་བ། །ཡང་དག་དམ་ཚིག་ཆེན་པོ་ཡིན།།

བྱིཥྣུ་འཁོར་བཅས་ལ་བཀའ་སྩལ་པ། སྐྱེ་མེད་རྟོགས་ན་སྐྱེ་བ་རྒྱུན་ཆད་པ་ལ་དགོངས་ཏེ། གསོད་པ་ལ་དགའ་བ་གང་ཞིག་གིས་ཤེས་རབ་དང་ཏིང་ངེ་འཛིན་གྱིས་སྲིད་པ་སྲོག་གི་དབང་པོ་དངོས་སུ་བསྒྲལ་ཞིང་ལམ་ལྔ་དང་འགྲོ་བ་དྲུག་གི་རྒྱུན་དང་སྒོ་བཀག་ཅིང་བཅད་ནས་ནི་ཤ་རུས་ཟ་ཞིང་ཁྲག་འཐུང་བ། གང་གིས་དུག་གསུམ་རྣམ་པར་དག་པས་ན་ཡང་དག་དམ་ཚིག་ཆེན་པོ་ཡིན་ནོ་ཞེས་གསུངས་པའོ།།

བཞི་པ་གནོད་སྦྱིན་གྱིའང་ཡང་དག་པའི་དམ་ཚིག་ཏུ་བསྟན་པ་ནི།

ནོར་གྱི། ཞེས་པ་ནས། དམ་ཚིག་ཡིན། །ཞེས་པའི་བར་གྱིས་བསྟན་ཏེ།

ནོར་གྱི་བདག་པོའི་གཏེར་ཁུང་ནས། །གསེར་ལ་སོགས་པ་མ་བྱིན་པར།།

བསླངས་ན་འདོད་པའི་ལོངས་སྤྱད་པ། །འདི་ནི་ཡང་དག་དམ་ཚིག་ཡིན།།

གནོད་སྦྱིན་འཁོར་བཅས་ལ་བཀའ་སྩལ་པ། གདམས་ངག་བླངས་ནས་ངེས་པར་35འཇོག་པ་ལ་དགོངས་ཏེ། ནོར་གྱི་བདག་པོའི་གཏེར་ཁུངས་ནས་གསེར་ལ་སོགས་པ་མ་བྱིན་པར་འཕྲུལ་དགའི་ཚུལ་གྱི་ཏིང་ངེ་འཛིན་གྱིས་བླངས་ནས་འདོད་པའི་ལོངས་སྤྱོད་བྱེད་པ་འདི་ནི་དམ་པ་མ་ནོར་བ་ཡང་དག་པའི་དམ་ཚིག་ཡིན་ནོ།།

ལྔ་པ་མུ་སྟེགས་ཀྱི་འདོད་པའི་དམ་ཚིག་ཏུ་བསྟན་པ་ནི།

རྣལ་འབྱོར། ཞེས་པ་ནས། དམ་པའོ། །ཞེས་པའི་བར་གྱིས་བསྟན་ཏེ།

རྣལ་འབྱོར་རིག་པའི་བློ་ཅན་གྱིས། །གང་གི་མགོ་ཐོད་གཅད་ནས་ནི། །དུར་ཁྲོད་སྣོད་ལས་ཆེས་ཤེས་པ།།

ཡང་དག་ལྟ་བའི་དམ་ཚིག་སྟེ། །འདོད་པའི་དམ་ཚིག་དམ་པའོ།།

མུ་སྟེགས་རྟོག་པ་ཅན་འཁོར་བཅས་ལ་བཀའ་སྩལ་པ། ཕྱིན་ཅི་ལོག་གི་ལས་རྣམས་རྟོགས་ན་རྣལ་མ་ཡིན་པ་ལ་དགོངས་ཏེ། རྣལ་འབྱོར་རིག་པའི་བློ་ཅན་གྱིས་མ་རིག་པ་ཀ་ནས་དག་པར་རྟོགས་པས་གང་གི་མགོ་ཐོད་བཅད་ནས་ནི་རྩ་བའི་རྒྱུད་ལས་གསུངས་པ་ལྟར་ཐོད་པ་བརྟགས་ཏེ་བཟང་ཞིང་ཤིས་པ་དུར་ཁྲོད་ཀྱི་སྣོད་ལ་འཆང་བ་ནི་གསང་བའི་ཆོས་ཀྱི་བརྡ་དོན་ཤེས་པས་ཡང་དག་ལྟ་བའི་དམ་ཚིག་སྟེ་མ་ནོར་བར་འདོད་པའི་དམ་ཚིག་དམ་པའོ་ཞེས་གསུངས་སོ།།

དྲུག་པ་སྨེ་ཤ་ཅན་གྱི་རྣལ་འབྱོོར་གྱི་ཟས་སུ་བསྟན་པ་ནི།

བ་ལང༌། ཞེས་པ་ནས། མི་བྱའོ། །ཞེས་པའི་བར་གྱིས་བསྟན་ཏེ།

བ་གླང་ཁྱི་ཤ་རྟ་ཤ་དང་། །ཤ་ཆེན་གླང་པོའི་མཆོག་ཡིན་ཏེ།།

རྣལ་འབྱོར་ཆེན་པོའི་ཟས་ཡིན་པས། །གཞན་ནི་བཟའ་བར་མི་བྱའོ།།

རིགས་༼༡༣༥༽ངན་སྨེ་ཤ་ཅན་རྣམས་ལ་བཀའ་སྩལ་པ། རིགས་ངན་གྱི་ཕྱིན་ཅི་ལོག་གི་ལྟ་བ་ཡང་རྣལ་མར་རྟོགས་ན་གལ་མེད་པ་ལ་དགོངས་ཏེ། བ་ལང་དང་ཁྱི་ཡི་ཤ་དང་རྟ་ཤ་དང་ཤ་ཆེན་དང་གླང་པོ་ཆེའི་ཤ་རྣམས་ནི་མཆོག་ཡིན་ཏེ་དེ་དག་དངོས་སུ་སྤྱོད་ལ་མི་ཆགས་པར་སྤང་ལེན་དང་བྲལ་བར་ལྟ་བས་ཟིན་ནས་མ་སྤངས་པར་སྤྱོད་པ་ནི་རྣལ་འབྱོར་ཆེན་པོའི་ཟས་ཡིན་པས་གཞན་ནི་བཟའ་བར་མི་བྱའོ་ཞེས་གསུངས་སོ།།

བདུན་པ་སྲིན་མོའི་དམ་ཚིག་ཁྲག་འཐུང་མའི་དམ་ཚིག་ཏུ་གསུངས་པ་ནི།

དམར་ཆེན། ཞེས་པ་ནས། གཟི་བྱིན་ཆེ། །ཞེས་པའི་བར་གྱིས་བསྟན་ཏེ།

དམར་ཆེན་ཁྲག་གི་རྒྱ་མཚོ་ལ། །གང་ཞིག་འཐུང་བར་བྱེད་པ་དེ།།

ཁྲག་འཐུང་ཀུན་གྱི་དམ་ཚིག་སྟེ། །ཟད་པར་འཐུངས་ན་གཟི་བྱིན་སྐྱེ།།

སྲིན་མོ་ཁྲག་འཕྲོགས་མའི་ཚོགས་ལ་བཀའ་སྩལ་པ། ཁུ་ཁྲག་ལ་སོགས་པ་ཆོས་ཉིད་དུ་རྟོགས་ན་ཡོ་བྱད་ཡིན་པ་ལ་དགོངས་ཏེ། དམར་ཆེན་ཁྲག་གི་རྒྱ་མཚོ་ལ་གང་ཞིག་ཡང་དག་པའི་ལྟ་བས་ཟིན་ཏེ་མ་སྤངས་པར་སྤྱོད་ཅིང་འཐུང་བར་བྱེད་པ་དེ་ནི་དཔལ་ཆེན་ཁྲག་འཐུང་ཀུན་གྱི་དམ་ཚིག་སྟེ་འདོད་ཆགས་ཟད་པར་འཐུངས་ན་གཟི་བྱིན་ལྷག་པར་ཆེ་ཞིང་ཐེག་པ་ཆེན་པོའི་སྣོད་ཡིན་ནོ་ཞེས་གསུངས་སོ། །བཤད་པའི་གྲལ་དང་བསྟུན་ན་འོག་གི་ཕྲ་མེན་མ་དང་ངན་སྐྱུག་ཅན་གྱི་དམ་ཚིག་པར་འདིར་ལེན་ནོ།།

བརྒྱད་པ་བུད་མེད་ཀྱིས་ཕུལ་བ་ཆོས་ཀྱི་དམ་ཚིག་ཏུ་གསུངས་པ་ནི།

བྲོ་གར། ཞེས་པ་ནས། ཆེན་པོ་ཡིན། །ཞེས་པའི་བར་གྱིས་བསྟན་ཏེ།

བྲོ་གར་གླུ་ཚིག་ལ་སོགས་པས། །བུད་མེད་ཐམས་ཅད་བརྟེན་ནས་ནི།།

འདོད་པས་ལོག་པར་སྤྱོད་འགྱུར་བ། །ཆོས་ཉིད་དམ་ཚིག་ཆེན་པོ་ཡིན།།

བུད་མེད་རྣམས་ལ་བཀའ་སྩལ་པ། ཤེས་རབ་དང་སྙིང་རྗེས་ཆོས་ཉིད་དང་འཁོར་བ་མི་གཏོང་བ་ལ་དགོངས་ཏེ། བྲོ་གར་དང་གླུ་ཚིག་ལ་སོགས་པས་བུད་མེད་ཐམས་ཅད་ཐབས་དང་ལྡན་པར་བསྟེན་ནས་ནི་འདོད་པས་ལོག་པར་སྤྱོད་པའི་སྒྱུ་འཕྲུལ་ཡང་གསང་སྤྱོད་ཐབས་ཀྱི་བརྟུལ་ཞུགས་སུ་འགྱུར་བ་ནི་ཆོས་ཉིད་དབྱིངས་དང་སྦྱོར་བས་དམ་ཚིག་ཆེན་པོ་ཡིན་ནོ་ཞེས་གསུངས་སོ།།

དགུ་པ་ཤྭ་བ་ར་་པའི་སངས་རྒྱས་ཀྱི་བཀའི་དམ་ཚིག་ཏུ་བསྟན་པ་ནི།

གང་ཉིད། ཅེས་པ་ནས། གསུང་གི་དམ་ཚིག་ཡིན། །ཞེས་པའི་བར་གྱིས་བསྟན་ཏེ།

གང་ཉིད་གཏིང་དཔག་དཀའ་བའི་ཕྱིར། །མེད་ལས་ཡོད་སྨྲ་ཡོད་ལས་མེད། །ཡུལ་དང་མཐུན་འཇུག་སྨྲ་བ་ནི། །སངས་རྒྱས་བཀའ་ཡི་དམ་ཚིག་ཡིན། །གང་དག་ཐོག་མ་མེད་པ་ནས། །གང་འཁྱམས་རང་གིས་ཉེས་པའོ་ཞེས། །སྤྱོ་བརྒྱད་ངག་གི་རྩུབ་སྨྲ་བ། །སངས་རྒྱས་གསུང་གི་དམ་ཚིག་ཡིན།།

ཤྭ་བ་ར་་པའི་ཚོགས་ལ་བཀའ་སྩལ་པ། དོན་དུ་འགྱུར་ན་ཡོད་པ་ལས་མེད་པར་སྨྲ་ཞིང་མེད་པ་ལས་ཡོད་པར་སྨྲ་བ་ལ་དགོངས་ཏེ། དོན་མཐའ་དང་བྲལ་བ་གང་ཉིད་གཏིང་དཔག་པར་དཀའ་བའི་ཕྱིར་མེད་པ་ལས་ཡོད་པར་སྨྲ་ཞིང་ཡོད་པ་ལས་མེད་པར་ཡུལ་དང་མཐུན་འཇུག་གི་རྫུན་དུ་སྨྲ་བ་ནི། སངས་རྒྱས་རྣམས་ཀྱི་བཀའ་ཡི་དམ་ཚིག་ཡིན་ལ། གང་དག་ཐོག་མ་མེད་པ་ནས་འཁོར་བ་གང་དུ་འཁྱམས་པ་ནི་རང་གི་ཉེས་པ་ཁོ་ནའོ་ཞེས་དྲེགས་པ་བཏུལ་བར་བཤད་ཟིན་པ་ལྟར་སྤྱོ་བ་བརྒྱད་དམ་མ་རིག་པ་དང་བདག་འཛིན་དང་འཁྲུལ་པའི་ཀུན་བརྟགས་དང་ཉོན་མོངས་ལྔ་སྟེ་བརྒྱད་ལ་སྤྱོ་བས་ཚིག་རྩུབ་ངག་གི་རྫུན་དུ་སྨྲ་བ་ནི། སངས་རྒྱས་རྣམས་ཀྱིས་གདུལ་བྱ་སྒྲོལ་བའི་གསུང་གི་དམ་ཚིག་༼༡༣༦༽དམ་པ་ཡིན་ནོ། །ཞེས་གསུངས་སོ།།

བཅུ་པ་ལོག་སྲེད་ཅན་གྱི་ཡོན་ཏན་ལྔ་དང་ལྡན་པར་བསྟན་པ་ནི།

བྱེ་བྲག་ཐམས་ཅད། ཅེས་པ་ནས། རང་བཞིན་ཆེན་པོའི་དམ་ཚིག་ཡིན། །ཞེས་པའི་བར་གྱིས་བསྟན་ཏེ།

བྱེ་བྲག་ཐམས་ཅད་གཅིག་པས་ན། །ལས་ཀྱི་དབང་དུ་མི་འགྱུར་བ། །མ་ནོར་མ་བཅོས་དམ་ཚིག་སྟེ། །རྣམ་སྨིན་མེད་པའི་དམ་ཚིག་ཡིན། །མི་གཡོ་མི་འགྱུར་མི་སྐྱོད་པ། །དམིགས་པ་ཡོད་མེད་མི་དམིགས་ཀྱང་། །སྟོར་བྲལ་མེད་པ་གང་ཡིན་པ། །མི་གཡོའི་དམ་ཚིག་ཆེན་པོའོ། །དེ་ཉིད་ཆེན་པོར་ཀུན་གཅིག་པས། །བླང་དང་དོར་བ་ཡོད་མེད་པ། །གཉིས་སུ་སྣང་བའི་ཆོས་རྣམས་ཀུན། །དེ་ཉིད་ཆེན་པོར་ཡོངས་ཀྱིས་གཅིག །དཀར་པོ་ནག་པོ་གང་འདི་ལ། །རྒྱུ་དང་འབྲས་བུ་སོ་སོ་ཡང་། །ནམ་མཁའ་བཞིན་ཏེ་མེད་པས་ན། །མཉམ་པའི་དམ་ཚིག་ཆེན་པོ་ཡིན། །མཉམ་ཉིད་རིག་པའི་རྒྱལ་པོ་ལས། །བྱེ་བྲག་རྣམ་པ་ཡོངས་ཀྱིས་མེད།།

རང་གིས་རྙེད་ལས་གཞན་གྱིས་མིན། །འདི་ནི་རང་བྱུང་དམ་ཚིག་ཡིན།།

ལོག་སྲེད་ཅན་རྣམས་ལ་བཀའ་སྩལ་པ། ཐམས་ཅད་ཆོས་ཉིད་དུ་རྟོགས་ན་རང་བཞིན་མཉམ་པས་གལ་མེད་པ་ལ་དགོངས་ཏེ། ལོག་སྲེད་ཅན་དག་གིས་དམ་ཚིག་གི་བྱེ་བྲག་སོ་སོར་མ་འདྲེས་པ་དེ་དག་ཐམས་ཅད་སེམས་ཀྱི་ཆོས་ཉིད་དུ་དབྱེར་མེད་པར་གཅིག་པས་ན་བྱས་ལ་མི་གསོག་པའི་ཐབས་ལ་མཁས་པས་རྣམ་སྨིན་སྐྱེད་པའི་དཀར་ནག་གི་ལས་ཀྱི་དབང་དུ་མི་འགྱུར་བར་དོན་གྱི་ཐོག་ཏུ་ཕེབས་པས་མ་ནོར་ཞིང་འཁྲུལ་པས་མ་བསླད་པས་མ་བཅོས་པའི་དམ་ཚིག་ཡིན་ཏེ་དེ་ལ་ནི་ལས་ཀྱི་རྣམ་པར་སྨིན་པའི་འབྲས་བུ་མེད་པའི་དམ་ཚིག་མཆོག་ཡིན་ནོ། །ཡང་དག་པའི་དམ་ཚིག་ཉིད་རྗེས་སུ་བསྟན་པའི་ཕྱིར། ཡང་དག་རྟོགས་པའི་གདེངས་དང་ལྡན་པའི་རིག་པ་ནི་འདུ་ཤེས་ཀྱིས་གང་དུའང་མི་གཡོ་ལ་འཇིག་པ་མེད་པས་མི་འགྱུར་ཞིང་ཀུན་ནས་མི་བསྒུལ་བས་མཐའ་ཡིས་མི་བསྐྱོད་པ་ཆེན་པོ་ལ་བློས་ཅིར་ཡང་མི་བསམ་པ་ཉིད་ཀྱིས་སྤྲོས་པ་དང་མཚན་མར་དམིགས་པས་ཡོད་མེད་ཀྱི་ཕྱོགས་རིས་མ་དམིགས་པའི་རྣལ་འབྱོར་དམ་པ་ལ་མཐའི་སྒྲིབ་པ་མེད་ཀྱང་ཡོན་ཏན་ཆེན་པོའི་བཅུད་བརླག་པ་དང་བྲལ་བའི་སྒོ་ནས་སྟོར་བ་མེད་པ་གང་ཡིན་པ། འབྱུང་འཇུག་གི་བྱ་བ་དང་བྲལ་བ་ནི་མི་གཡོ་བའི་དམ་ཚིག་ཆེན་པོ འོ། །དངོས་པོ་རྣམས་ཀྱི་དེ་ཁོ་ན་ཉིད་ཆེན་པོར་ཀུན་གྱི་ངང་གཅིག་ཏུ་གདལ་བས་ཕྱོགས་རིས་མེད་པ་ལ་བླང་དང་དོར་བ་ཡོང་ཡེ་མེད་པས་སྤོང་ལེན་དང་བྲལ་བ་ཉིད་དེ་དེ་ལྟ་བུའི་ངང་གི་ཐིག་ལེ་ཆེན་པོ་ལ་གཉིས་སུ་སྣང་བའི་ཆོས་རྣམས་ཀུན་ཀྱང་སོ་སོར་མ་དམིགས་པས་དེ་ཁོ་ན་ཉིད་ཆེན་པོར་ཡོངས་ཀྱིས་གཅིག་པའི་དོན་གྱི་བླ་དྭགས་ནི་གྲངས་ཀྱི་གཞིར་བརྗོད་དེ་རྣམ་པ་བགྲང་དུ་མེད་དོ། །ལས་དཀར་པོ་དགེ་བ་དང་ནག་པོ་སྡིག་པ་གང་བྱས་པ་འདི་ལ་རྒྱུ་ལས་དང་འབྲས་བུ་རྣམ་སྨིན་གྱི་ཆ་སོ་སོ་ནས་མ་འདྲེས་པར་འཁྲུལ་པ་ལ་སྣང་ཡང་མཉམ་པའི་ངང་ལ་ལས་སུ་འདུ་ཤེས་པ་མེད་པས་རྣམ་སྨིན་མེད་པ་ནི་སྤྱོད་ལམ་ཆགས་པས་དཔེ་འདུས་མ་བྱས་ནམ་མཁའ་བཞིན་ཏེ་ངང་ལ་ཕྱོགས་རིས་མེད་པས་ན་མཉམ་པའི་དམ་ཚིག་ཆེན་པོ་ཡིན་ནོ་ཞེས་བསྙད་དེ། ཇི་ལྟ་བའི་དོན་རྟོགས་པའི་ཡེ་ཤེས་མཉམ་ཉིད་རིག་པའི་རྒྱལ་པོ་ནི་རིལ་གྱི་བདག་པོར་གྱུར་པས་ལས་སོ་སོར་དབྱེ་བའི་བྱེ་བྲག་གི་རྣམ་པ་ཐ་དད་པ་ཡོངས་ཀྱིས་མེད་ཅིང་ངོ་བོས་མ་གྲུབ་སྟེ། ཅིའི་ཕྱིར་ཞེ་ན། ཆོས་ཐམས་ཅད་ལ་རིག་པས་རྒྱས་བཏབ་པས་རང་གིས་རང་བཞིན༼༡༣༧༽རྙེད་པ་ཉིད་ལས་དེ་ཁོ་ན་ཉིད་དུ་གསལ་བ་ཡིན་གྱི་གཞན་སྤྱད་བྱ་སྤྱོད་བྱེད་ཐ་དད་ཀྱིས་རྙེད་པ་མིན་པར་རང་བཞིན་ཡེ་ཤེས་ཆེན་པོའི་དམ་ཚིག་ཡིན་པས་ཡང་དག་པའི་ཐུགས་དམ་ཆེན་པོ་ལྔའི་དོན་ནོ།།

བཅུ་གཅིག་པ་གསང་ཚིག་སྟེན་པའི་དམ་ཚིག་སྔགས་ཀྱི་དམ་ཚིག་ཏུ་བསྟན་པ་ནི།

གཤང་གཅི། ཞེས་པ་ནས། དམ་ཚིག་ཡིན། །ཞེས་པའི་བར་གྱིས་བསྟན་ཏེ།

བཤང་གཅི་ཟག་པའི་གོས་གྱོན་ཏེ། །ལིངྒ་སྐྱེ་བའི་རྒྱུན་བཅད་ནས། །སྐྱེ་བ་རྣམས་གྲངས་བརྒྱ་སྙེད་དུ།།

བཟླས་ནས་དེ་ཉིད་འདིར་སྦྱར་ན། །སངས་རྒྱས་གཟུགས་སྐུ་ཇི་སྙེད་པ།།

ཆོས་སྐུ་ཉིད་དུ་འཇིག་འགྱུར་ན། །རྡོ་རྗེ་སྔགས་ཀྱི་དམ་ཚིག་ཡིན།།

གསང་ཚིག་སྟེན་པ་རྣམས་ལ་བཀའ་སྩལ་པ། ལྟ་བ་རྟོགས་ན་ཐམས་ཅད་འཇིག་པ་ལ་དགོངས་ཏེ། གཤང་གཅི་ཟག་པའི་གོས་གྱོན་ཏེ་ཞེས་གོས་ཀྱི་བརྡ་ཡི་དོན་ནི་འགྲོ་བའི་ལུས་ཏེ་ལིང་ག་ལ་དམིགས་ནས་དགྲའི་སྐྱེ་རྒྱུན་བཅད་པའམ་དེར་ལིང་ག་ལྟར་སྐྱེ་བའི་ས་བོན་གྱི་རྒྱུན་མི་དམིགས་པར་རྟོགས་པས་བཅད་པར་མཛད་པ་ན་སྐྱེ་བ་རྣམ་གྲངས་བརྒྱ་སྟེ་བཅུ་ཕྲག་བཅུ་སྙེད་དུ་བསྐྱར་ཞིང་མི་བཏང་བར་སྔགས་བཟླས་པར་བྱས་ན་དེའི་ནུས་པ་དེ་ཉིད་ཏིང་ངེ་འཛིན་དེར་སྦྱར་ནས་བྱང་ཆུབ་ཀྱི་ཞིང་ལ་བཀོད་ན། དེ་ལྟ་བུས་ཡང་དག་པ་ཆེད་དུ་བྱས་པའི་རྒྱལ་བ་སངས་རྒྱས་གཟུགས་སྐུ་ཇི་སྙེད་པ་ཉིད་དུ་ཞེན་པའང་ཆོས་ཀྱི་སྐུ་སྟོང་པ་ཉིད་དུ་འཇིག་ཅིང་བྲལ་བར་འགྱུར་བས་ན་དེ་ལ་རྡོ་རྗེ་སྔགས་ཀྱི་དམ་ཚིག་མཆོག་དམ་པ་ཡིན་ནོ་ཞེས་བྱའོ།།

བཅུ་གཉིས་པ་ཕྲ་མེན་མ་དང་ངན་སྐྱུག་ཅན་གྱི་དམ་ཚིག་ཆོས་ཉིད་རྒྱན་གྱི་དམ་ཚིག་ཏུ་བསྟན་པ་ནི།

འདོད་པས། ཞེས་པ་ནས། བཀའ་སྩལ་པས། །ཞེས་པའི་བར་གྱིས་བསྟན་ཏེ།

འདོད་པས་སྤྱོད་པའི་ལོངས་སྤྱོད་ལྔ། །འདོད་པ་བས་ནི་ཆགས་སྤྱོད་ན།།

ཆོས་ཉིད་རྒྱན་གྱི་དམ་ཚིག་སྟེ། །བདེ་བ་ཆེན་པོ་ཉིད་ཀྱི་དམ། །ཞེས་བཀའ་སྩལ་པས།

ཕྲ་མེན་མ་དང་རིགས་ངན་ངན་སྐྱུགས་ཅན་རྣམས་ལ་བཀའ་སྩལ་པ། ཆོས་ཉིད་དུ་རྟོགས་ན་གལ་མེད་པའམ་དམ་པའི་ཡོ་བྱད་ལྔ་ལ་དགོངས་ཏེ། གཟུགས་དང་སྒྲ་ལ་སོགས་པ་འདོད་པས་སྤྱོད་པའི་ལོངས་སྤྱོད་ལྔ་ནི་ཆོས་ཉིད་ཀྱི་ངང་ལ་མི་ལྡན་མ་བྲལ་བར་བཞག་སྟེ་འདོད་པ་བས་ནི་ཆགས་པའི་ཚུལ་དུ་སྤྱོད་ན་ཆོས་ཉིད་རྒྱན་གྱི་དམ་ཚིག་སྟེ། རིལ་ལ་ཞེན་པ་དང་རྩོལ་བ་མེད་པ་བདེ་བ་ཆེན་པོ་ཉིད་ཀྱི་དམ་ཚིག་མཆོག་དམ་པ་ཡིན་ནོ། །ཞེས་བཀའ་སྩལ་པས།།

གསུམ་པ་དེ་ལ་དད་པའི་འཁོར་རིགས་ངེས་པར་གཟུང་བ་ནི།

འདུས་པ་ཆེན་པོ འི། ཞེས་པ་ནས། དེ་ཉིད་ལས་མི་འདའ་བར་གཟུང་ངོ༌། །ཞེས་པའི་བར་གྱིས་བསྟན་ཏེ།

འདུས་པ་ཆེན་པོའི་ཚོགས་རྣམས་རབ་ཏུ་མགུ་ཞིང་རངས་ནས། ཀུན་གྱིས་མགྲིན་གཅིག་ཏུ་གསོལ་པ། ཨེ་མའོ་ཡིད་བཞིན་མཛད་པའི་རྒྱལ་པོ། བདག་ཅག་རྣམས་ཀྱི་བསམ་པ་རངས་སོ། །བདག་ཅག་རྣམས་ཀྱི་གཙོ་བོ་ལགས་སོ། །བདག་ཅག་རྣམས་ཀྱི་རྒྱལ་པོ་ལགས་སོ། །བདག་ཅག་མ་བཅོས་པའི་དམ་ཚིག་ཏུ་གཟུང་དུ་གསོལ། ཞེས་གསོལ་པ་ལས། ལངྐའི་བདག་པོ་བཅོམ་ལྡན་འདས་དེས་བཀའ་སྩལ་པ། ཨ་ཧོ་ཡིན་ནོ། །ལེགས་སོ། །བསྟོད་དོ། །དམ་ཚིག་དམ་པ་དེ་ཉེ་བར་ཟུང་ཞིག ཏིཥྚ་བཛྲ་ས་མ་ཡ་སྟྭཾ། ཞེས་གང་དེ་ཉིད་ལས་མི་འདའ་བར་བཟུང་ངོ་།།

དེ་ལྟར་ཡོན་ཏན་བསྟན་པ་ལ་འཁོར་འདུས་པ་ཆེན་པོའི་ཚོགས་རྣམས་རབ་ཏུ་མགུ་ཞིང་ཡིད་རངས་ནས་ཀུན་གྱིས་མགྲིན་གཅིག་ཏུ་གསོལ་པ། ཨེ་མའོ་ཡིད་བཞིན་མཛད་པའི་རྒྱལ་པོ། བདག་ཅག་རྣམས་ཀྱི་བསམ་པ་རངས་སོ། །བདག་ཅག་རྣམས་ཀྱི་གཙོ་བོ་ལགས་སོ། །བདག་ཅག་རྣམས་ཀྱི་རྒྱལ་པོ་ལགས་སོ། །བདག་ཅག་མ་བཅོས་པའི་དམ་ཚིག་ཏུ་གཟུང་དུ་གསོལ། ཞེས་ཡིད་རངས་པས་གསོལ་ཏེ་བསྟོད་པ་ལས། ལང་ཀའི་བདག་པོ། བཅོམ་ལྡན་འདས་དེས་དོན་རིག་ནས་དེ་ལས་བཟློག་པའི་ཕྱིར་བཀའ་སྩལ་པ། ༼༡༣༨༽རང་རང་གི་དམ་ཚིག་གི་དོན་ལ་མ་ནོར་བའི་དམ་པར་གསོལ་བ་བཏབ་པ་ལ་དགྱེས་ནས་ཨ་ཧོཿ ཞེས་སྩལ་ཏེ། དེ་ནས་ཚིག་གཅིག་གིས་དམ་ཚིག་དང་སྤྱོད་པ་ལ་བསམ་པ་རངས་པ་མ་ནོར་བ་ཡིན་ནོ། །དེ་ནས་གཉིས་ཀྱིས་སྟོན་པ་ལ་བསྟོད་ནས་དེ་ལྟར་མི་འདོར་བ་ལེགས་སོ། །དེ་ནས་གཅིག་གིས་དེ་ཉིད་དམ་པར་གསོལ་བ་ལ་གནང་བ་བྱིན་ཏེ་གཏད་དོ། །དེས་ན་དམ་ཚིག་དམ་པ་དེ་ཉེ་བར་ཟུངས་ཤིག ཏིཥྛ་བཛྲ་ས་མ་ཡ་སྟྭཾ། ཞེས་དམ་ཚིག་བརྟན་པར་རྡོ་རྗེར་བྱ་བའི་དུས་ལ་བབ། ཅེས་པའི་དོན་ཏེ་གང་དེ་ཉིད་ལས་མི་འདའ་བར་རིགས་ངེས་པར་གཟུང་ངོ༌།།

ལྔ་པ་སྒྲ་ཇི་བཞིན་པར་སྤྱད་པའི་སྐྱོན་བཤད་པ་ལ་གཉིས་ཏེ། འཁོར་གྱིས་དམ་ཚིག་བསྲུང་བའི་འབྲས་བུ་དྲིས་པ། ལན་སྒྲ་ཇི་བཞིན་པར་བསྟན་པའོ། །དང་པོ་ནི།

ལང་ཀའི། ཞེས་པ་ནས། ཞེས་གསོལ་པ་ལས། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ནས་འདུས་པའི་ཚོགས་ཀྱིས། ཡང་བཅོམ་ལྡན་འདས་དེ་ལ་གསོལ་པ། བཅོམ་ལྡན་འདས། བཅོམ་ལྡན་འདས་ནི་བདག་ཅག་གི་སྒྲོན་མ་ལགས་ན། བདག་ཅག་རྣམས་རང་རང་གི་དམ་ཚིག་འདི་ལ་གནས་ན། རིགས་ནི་གང་འཛིན་པར་འགྱུར། གོ་འཕང་ནི་གང་དུ་ཐོབ་པར་འགྱུར་བ་ལགས།

བདག་ཅག་རྣམས་ལ་བསྟན་དུ་ཞེས་གསོལ་པ་ལས།

ལང་ཀའི་བདག་པོ། དེ་ནས་འདུས་པའི་ཚོགས་རྣམས་ཀྱིས། གང་བཅོམ་ལྡན་འདས་དེ་ལ་གསོལ་པ། སྟོན་པ་བཅོམ་ལྡན་འདས། བཅོམ་ལྡན་འདས་ནི་བདག་ཅག་རྣམས་ཀྱི་སྒྲོན་མ་ལགས་ན། བདག་ཅག་རྣམས་རང་རང་གི་དམ་ཚིག་འདི་ལ་གནས་ན། རིགས་ནི་གང་འཛིན་པར་འགྱུར། གོ་འཕང་ནི་གང་དུ་ཐོབ་པར་འགྱུར་བ་ལགས། བདག་ཅག་རྣམས་ལ་བསྟན་དུ་གསོལ། ཞེས་གསོལ་ཏེ་རིགས་དང་འབྲས་བུ་གཉིས་དྲིས་པ་ལས།

གཉིས་པ་ལན་སྒྲ་ཇི་བཞིན་པར་བསྟན་པ་ལ་གཉིས་ཏེ། ཉོན་ཅིག་པར་གདམས་པ། ལན་དངོས་བསྟན་པའོ། །དང་པོ་ནི།

ལང་ཀའི། ཞེས་པ་ནས། ཉོན་ཅིག ཅེས་པའི་བར་གྱིས་བསྟན་ཏེ།

ལངྐའི་བདག་པོ་བཅོམ་ལྡན་འདས་དེས་བཀའ་སྩལ་པ། འདུས་པའི་ཚོགས་རང་རང་གི་

དམ་ཚིག་ལ་གནས་ན། ཇི་ལྟར་འགྱུར་བ་བཤད་ཀྱི་ཉོན་ཅིག

ལང་ཀའི་བདག་པོ། བཅོམ་ལྡན་འདས་དེས་བཀའ་སྩལ་པ། འདུས་པའི་ཚོགས་རྣམས་རང་རང་གི་དམ་ཚིག་ལ་གནས་ན་རྣམ་སྨིན་གྱི་འབྲས་བུ་ཇི་ལྟར་འགྱུར་བ་དག་བཤད་ཀྱིས་ལེགས་པར་ཉོན་ཅིག་ཅེས་གདམས་པའོ།།

གཉིས་པ་ལན་དངོས་བསྟན་པ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ཨེ་མའོ། ཞེས་པ་ནས། ཕྱེད་པར་མི་འགྱུར་རོ། །ཞེས་པའི་བར་གྱིས་བསྟན་ཏེ།

ཨེ་མའོ་ཐོད་པ་ཅན་གྱི་ཚོགས། །ཁྱེད་ཀྱིས་སྨྲས་པའི་ཚིག་འདི་རྣམས། །མདུད་པས་བཅིངས་པའི་

ཚིག་ཡིན་ཏེ། །ནམ་ཡང་གྲོལ་བར་མི་འགྱུར་རོ། །ཡང་དག་ཡང་དག་ཅེས་སྨྲ་བ། །ཡང་དག་

ཉིད་ཀྱང་མདུད་པ་སྟེ། །མདུད་པ་དགྲོལ་བར་མ་བྱས་ན། །ཐ་རམས་ཕྱེད་པར་མི་འགྱུར་རོ།།

ལོག་པའི་སྤྱོད་པ་དང་དམ་ཚིག་གིས་ཐར་དུ་རེ་བ་ལ་ངམ་པ་དང་ངོ་མཚར་བའི་ཚིག་ཨེ་མའོ་ཞེས་པས་དྲངས་ཏེ་མི་མ་ཡིན་པ་ལ་མིའི་མགོ་དང་ཐོད་པ་ཅན་གྱི་འཁོར་དུ་སྣང་བའི་ཚོགས་ཀུན་ ཞེས་བོས་ནས། སྤྱིར་རང་རང་གི་དམ་ཚིག་ལ་ཞེན་པ་ནི་ནོར་བ་ཡིན་པས་ལྟུང་བའི་སྒོར་འགྱུར་བར་གསུངས་པས། ཁྱེད་རྣམས་ཀྱིས་རང་རང་གི་དམ་པ་སྨྲས་པའི་ཚིག་འདི་རྣམས་ནི་སོ་སོར་འཛིན་ཞེན་གྱི་རྟོག་པ་དགྲོལ་བར་དཀའ་བའི་༼༡༣༩༽མདུད་པས་བཅིངས་ནས་མི་ཐར་བའི་ཚིག་ཡིན་ཏེ། དེ་ལྟར་བཅིངས་པས་དུས་ནམ་ཡང་ཀུན་ནས་ཐར་ཞིང་ཡོངས་སུ་གྲོལ་བར་མི་འགྱུར་རོ། །དེ་ཅིའི་ཕྱིར་ཞེ་ན། ཡང་དག་པའི་ཞེན་པ་ལའང་མི་གནས་པར་བྱ་བའི་ཕྱིར། ཡང་དག་པ་ཉིད་དུའང་བརྗོད་དུ་མེད་པ་ལ་ཡང་དག་པ་ཉིད་དོ་ཞེས་གང་སྨྲ་བ་དེ་ཡང་ཡང་དག་པ་ཉིད་དུའང་བརྗོད་ཅིང་བསམ་དུ་མེད་པ་ལ་དེ་ལྟར་བརྗོད་བསམ་བྱེད་པ་ཉིད་ཀྱང་འཆིང་བས་མདུད་པ་དམ་པོ་སྟེ་མདུད་པ་དེ་ལས་ཐར་ནས་དགྲོལ་བར་མ་བྱས་ན། ཆོས་ཀྱི་སྒོ་ལྕགས་ཤེས་རབ་ཀྱི་ཐ་རམས་ཕྱེད་པར་མི་འགྱུར་རོ་ཞེས་འཛིན་པའི་མདུད་པ་དགྲོལ་དགོས་པར་བཀའ་སྩལ་པའོ།།

གཉིས་པ་རྒྱས་པར་བཤད་པ་ལ་བཅུ་སྟེ། ནག་པོ་དེ་དད་དཔོན་གྱི་དམ་ཚིག་གིས་བདུད་ཀྱི་ལས་སུ་འགྲོ་བ། གུ་ལང་བུད་མེད་ཀྱི་དམ་ཚིག་གིས་མངལ་གྱི་སྲིན་བུར་སྐྱེ་བ། བྱིཥྣུའི་དམ་ཚིག་གིས་ཤན་པར་སྐྱེ་བ། མུ་སྟེགས་ཀྱི་དམ་ཚིག་གིས་འདམ་དུ་འགྲོ་བ། སྨེ་ཤ་ཅན་གྱིས་དམ་ཚིག་གིས་མདངས་བཅུད་འཕྲོག་པ། གནོད་སྦྱིན་གྱི་དམ་ཚིག་གིས་ལོག་འཚོར་འགྲོ་བ། ལོག་སྲེད་ཅན་གྱི་དམ་ཚིག་གིས་རིགས་ཆད་པར་འགྲོ་བ། ཤྭ་བར་པའི་དམ་ཚིག་གི་དྲན་པ་ཉམས་པར་འགྱུར་བ། གསང་ཚིག་སྟེན་པའི་དམ་ཚིག་གིས་སྐྱོན་དུ་འགྱུར་བ། སྲིན་མོ་དང་ཕྲ་མེན་མ་དང་ངན་སྐྱུགས་ཅན་གྱི་དམ་ཚིག་གིས་འབྱུང་པོ་ཁྲག་གི་དྲི་སྣོམ་པའི་ལུས་ལེན་པར་བསྟན་པའོ། །དང་པོ་ནི།

མཚམས་མེད། ཅེས་པ་ནས། ལས་ཞེས་བཤད། །ཅེས་པའི་བར་གྱིས་བསྟན་ཏེ།

མཚམས་མེད་ལ་སོགས་བྱེད་པ་དང་། །གཞན་གྱི་སྡེ་པ་འཇོམས་པ་ཡིས།།

རྣམ་པར་དགྲོལ་བར་མི་འགྱུར་ཏེ། །དེ་ནི་བདུད་ཀྱི་ལས་ཞེས་བཤད།།

དེ་ལྟར་མི་གྲོལ་བ་སོ་སོའི་དམ་ཚིག་ཕུལ་བ་དང་སྦྱར་ནས་བསྟན་པ་ནི། རྩ་བའི་རྒྱུད་ལས་ལྟུང་བའི་སྒོ་དགུ་ལ་འདི་ཉིད་དུ་བཅུ་དྲུག་ཏུ་བསྟན་པ་དེ་འདིར་གང་སྙམ་པ་ལ། དང་པོ་དང་སྡེབ་ནས། མཚམས་མེད་ལྔ་ལ་སོགས་པ་བྱེད་པ་དང༌། གཞན་གྱི་སྡེ་པ་འཇོམས་པ་ཡིས་ནི་རྣམ་པར་གྲོལ་བར་མི་འགྱུར་ཏེ། རྒྱུ་འདི་ནི་རྣམ་སྨིན་དམྱལ་བ་དང་རྒྱུ་མཐུན་བདུད་ཀྱི་གནས་དང་སྲིན་པོར་ལྟུང་བའི་ལས་ཀྱི་སྒོ་ཞེས་སུ་བཤད་དོ།།

གཉིས་པ་གུ་ལང་བུད་མེད་ཀྱི་དམ་ཚིག་གིས་མངལ་གྱི་སྲིན་བུར་སྐྱེ་བ་ནི།

ཆགས་པའི། ཞེས་པ་ནས། སེམས་ཅན་ཡིན། །ཞེས་པའི་བར་གྱིས་བསྟན་ཏེ།

ཆགས་པའི་ལས་སམ་སྦྱོར་བ་དག །ཆགས་པའི་དབང་གིས་དེ་རྨོངས་ཏེ། །དེ་དག་དེ་ཡི་གྲོང་ཁྱེར་དུ།།

གནས་འགྱུར་དེ་ཡི་སེམས་ཅན་ཡིན།།

གཉིས་པ་དང་བཅུ་པར་སྡེབས་ཏེ། ཆགས་པའི་ལས་སམ་སྦྱོར་བ་དག་ལ་དམ་པར་བྱེད་པ་ནི། ཆགས་པའི་དབང་གིས་ལོག་སྤྱོད་དེར་རྨོངས་ཏེ་ཞེན་པ་དེ་དག་མངལ་གནས་དེ་ཡི་གྲོང་ཁྱེར་དུ་གནས་པར་འགྱུར་ཞིང་དེ་ཡི་གནས་ཀྱི་སེམས་ཅན་ཡིན་པས་མངལ་གྱི་སྲིན་བུར་ལྟུང་བའོ།།

གསུམ་པ་བྱིཥྣུའི་དམ་ཚིག་གིས་ཤན་པར་སྐྱེ་བ་ནི།

གང་དུ། ཞེས་པ་ནས། རྩ་བ་ཡིན། །ཞེས་པའི་༼༡༤༠༽བར་གྱིས་བསྟན་ཏེ།

གང་དུ་སྡང་བས་གསོད་པའི་ལས། །གང་གི་ལུས་དང་སྲོག་ཕྲལ་ནས།།

ཤན་པ་གསོད་པའི་རིགས་དག་ཏུ། །ལྷུང་འགྱུར་སྡུག་བསྔལ་རྩ་བ་ཡིན།།

གང་དུ་ཞེ་སྡང་གི་བསམ་པས་གཞན་གསོད་པའི་ལས་ཀྱིས་འགྲོ་བ་གང་གི་ལུས་དང་སྲོག་ཕྲལ་ནས་གསོད་ན་རྒྱུ་མཐུན་གྱི་འབྲས་བུ་ཤན་པ་སོགས་སྲོག་ཆགས་གསོད་པའི་རིགས་དག་ཏུ་ལྟུང་བར་འགྱུར་བས་རྣམ་སྨིན་དམྱལ་བའི་སྡུག་བསྔལ་གྱི་རྩ་བ་ཆེན་པོ་ཡིན་ནོ།།

བཞི་པ་མུ་སྟེགས་ཀྱི་དམ་ཚིག་གིས་འདམ་དུ་འགྲོ་བ་ནི།

རྒྱལ་བ། ཞེས་པ་ནས། བྱིང་བར་འགྱུར། །ཞེས་པའི་བར་གྱིས་བསྟན་ཏེ།

རྒྱལ་བ་རྣམས་ནི་རྣམ་དག་པས། །གང་ཚེ་བདེ་གཤེགས་རྒྱལ་བའི་ཞལ། །སྨད་པའི་རྫས་ནི་སྣ་ཚོགས་ཀྱིས།།

ཡོངས་སུ་སྟབས་པ་གང་བྱས་པ། །དེ་ཚེ་ལས་ཀྱི་རྣམ་སྨིན་གྱིས། །ཐར་མེད་ནད་ཀྱིས་བཟུང་ནས་ནི།།

ངན་སྐྱུགས་འདམ་དུ་བྱིང་བར་འགྱུར།།

ལྔ་པ་དང་སྡེབས་ནས། རྒྱལ་བ་རྣམས་ཀྱི་དགོངས་པ་ནི་མཚན་མ་རྣམ་པར་དག་པ་ཡིན་པས། གང་གི་ཚད་བདེ་གཤེགས་རྒྱལ་བའི་ཞལ་དུ་ཐོད་པ་ལ་སོགས་པ་སྨད་པའི་རྫས་ནི་སྣ་ཚོགས་ཀྱིས་ཤ་ཁྲག་དང་བདུད་རྩི་སོགས་ཡོངས་སུ་བསྟབས་པ་གང་བྱས་པ་དེ་ཡི་ཚེ་ན་ནག་པོའི་ལས་ཀྱི་རྣམ་སྨིན་གྱིས་ཐར་པ་མེད་པའི་ནད་ཀྱིས་བཟུང་ནས་ནི་ཡི་དྭགས་སུ་ལྷུང་ཞིང་ངན་སྐྱུགས་ཀྱི་འདམ་དུ་བྱིང་བར་གྱུར་ཏེ་དེའི་སྐྱེ་བོར་སྐྱེ་བར་འགྱུར་རོ།།

ལྔ་པ་སྨེ་ཤ་ཅན་གྱིས་དམ་ཚིག་གིས་མདངས་བཅུད་འཕྲོག་པ་ནི།

ཤ་དང༌། ཞེས་པ་ནས། ཡལ་བར་འགྱུར། །ཞེས་པའི་བར་གྱིས་བསྟན་ཏེ།

ཤ་དང་ཁྲག་ལ་སོགས་པའི་ཟས། །རྐུ་བའི་རྔམ་ཟས་ཆེན་པོ་སྟེ། །གང་གིས་ཟོས་པའི་ལུས་རྣམས་ལ། །དྲི་ཡིས་འཚོ་བ་ཀུན་འདུས་ནས། མདངས་དང་བཅུད་རྣམས་ཕྲོག་པར་བྱེད། །དེས་ནི་གཟི་མདངས་ཡལ་བྱེད་འགྱུར།།

དྲུག་པ་དང་སྡེབས་ནས། ཤ་དང་ཁྲག་ལ་སོགས་པའི་ཁ་ཟས་དེ་དག་སྤྱོད་པ་ནིརྐུ་བའི་རྔམ་ཟས་ཆེན་པོ་ཡིན་ཏེ་དེ་ལྟར་གང་གིས་ཟོས་པའི་ལུས་རྣམས་ལ་དྲི་ཡིས་འཚོ་བར་བྱེད་པ་དྲི་ཟ་དང་སྲིན་བུ་མང་པོ་ཀུན་འདུས་ནས་མདངས་དང་བཅུད་རྣམས་འཕྲོགས་པར་བྱེད་ཅིང་སྲོག་གཅོད་པ་དང༌། ལས་དེས་རྣམ་པར་སྨིན་པ་ནི་གཟི་མདངས་ཡལ་བ་ཡི་དྭགས་སུ་སྐྱེ་བར་འགྱུར་རོ། །ཕྱག་དཔེ་གཅིག་ན་འདིར། ཅིའི་ཕྱིར་ཇི་སྟེ་དེ་རྣམས་བཟའ། །ཞེས་པའི་རྐང་པ་གཅིག་བཞུགས་སོ།།

དྲུག་པ་གནོད་སྦྱིན་གྱི་དམ་ཚིག་གིས་ལོག་འཚོར་འགྲོ་བ་ནི།

དེ་ཉིད། ཅེས་པ་ནས། དམ་པོ་ཡིན། །ཞེས་པའི་བར་གྱིས་བསྟན་ཏེ།

དེ་ཉིད་རིན་ཆེན་ཡོད་བཞིན་དུ། །གཞན་གྱི་རིན་ཆེན་སྤྱོད་ལེན་པ།།

ལོག་པས་ལོག་པར་འཚོ་བའི་ཆོས། །འདི་དག་མདུད་པ་དམ་པོ་ཡིན།།

བཞི་པ་དང་སྡེབས་ཏེ། རང་གི་སེམས་ཀྱི་དེ་ཉིད་རིན་ཆེན་ལྟ་བུ་ཡོད་བཞིན་དུ། གཞན་གྱི་རིན་ཆེན་སོགས་མ་བྱིན་པར་སྤྱོད་ཅིང་རྐུ་བས་ལེན་པ་བྱ་བ་ལོག་པས་ལོག་པར་འཚོ་བའི་ཆོས་ཡིན་པས་ལས་འདི་དག་ཀྱང་མདུད་པ་དམ་པོ་ཡིན་པས་རྣམ་སྨིན་ཡི་དྭགས་སུ་ལྟུང་བར་འགྱུར་བའོ།།

བདུན་པ་ལོག་སྲེད་ཅན་གྱི་དམ་ཚིག་གིས་རིགས་ཆད་པར་འགྲོ་བ་ནི།

དཀར་ནག ཅེས་པ་ནས། ཁམས་སུ་འགྱུར། །ཞེས་པའི་བར་གྱིས་བསྟན་ཏེ།

དཀར་ནག་ལས་ལ་ཁྱད་མེད་ཅེས། །ཐམས་ཅད་ཁྲ་བོ᫙་སྤྱོད་པ་ནི།།

རིགས་མེད་རིགས་ཆད་ལོག་པའི་རིགས། །འབྲས་བུ་ལོག་པའི་ཁམས་སུ་འགྱུར།།

བཅུ་གཉིས་པ་དང་སྡེབས་ཏེ། དཀར་ནག་གི་ལས་ལ་ཁྱད་པར་མེད་དོ་ཞེས་ཟེར་ནས་དགེ་སྡིག་ཐམས་ཅད་ཁྲ་བོར་འདྲེན་མར་སྤྱོད་པ་ནི་ཡང་དག་པའི་རིགས་མེད་པར་རིགས་ཆད་ལོག་པའི་རིགས་སུ་ལྟུང་བས་འབྲས་བུ་ལོག་པར་ལྟ་བའི་ཁམས་སུ་འགྱུར་ཏེ་མུ་སྟེགས་སུ་ལྟུང་བའི་སྒོ འོ།།

བརྒྱད་པ་ཤྭ་བར་པའི་དམ་ཚིག་གི་དྲན་པ་ཉམས་པར་འགྱུར་བ་ནི།

བདེར་གཤེགས། ཞེས་པ་ནས། ཉམས་པར་འགྱུར། །ཞེས་པའི་བར་༼༡༤༡༽གྱིས་བསྟན་ཏེ།

བདེ་གཤེགས་མཉེས་བྱའི་ལས་རྣམས་ལ། །ཡན་ལག་ཚིག་ཏུ་མ་དག་ན། །ཉེས་བྱས་ལས་ཀྱི་རྒྱུ་དེ་ནི། །གང་གི་དུས་རྣམས་ཐམས་ཅད་དུ། །དབང་པོ་ཡན་ལག་མ་ཚང་ཞིང་། །དྲན་པའི་སྙིང་པོ་ཉམས་པར་འགྱུར།།

བཅུ་གཅིག་པ་དང་སྡེབས་ནས། བདེར་གཤེགས་མཉེས་བྱའི་ཆོ་ག་དང་སྔགས་ཀྱི་ལས་རྣམས་ལ་མཚོན་པའི་ཡན་ལག་ཚིག་ཏུ་མ་དག་པར་རྫུན་བྱས་ན་ཉེས་པར་བྱས་པའི་ལས་ཀྱི་རྒྱུ་དེས་ནི། གང་གི་དུས་རྣམས་ཐམས་ཅད་དུ་དབང་པོ་དང་ཡན་ལག་མ་ཚང་ཞིང་དྲན་པའི་སྙིང་པོ་ཉམས་པ་དག་ཏུ་སྐྱེ་བར་འགྱུར་རོ།།

དགུ་པ་གསང་ཚིག་སྟེན་པའི་དམ་ཚིག་གིས་སྐྱོན་དུ་འགྱུར་བ་ལ་བདུན་ཏེ། ཁྲོ་བོ་རང་རྒྱུད་པར་བསྒོམ་པས་ལས་ཀྱི་སྲིན་པོར་སྐྱེ་བ། ཁྲོ་མོར་རང་རྒྱུད་པར་བསྒོམ་པས་སྲིན་མོར་སྐྱེ་བ། ཕྲ་མེན་མ་རང་རྒྱུད་དུ་བསྒོམ་པས་ཤོ་གམ་གྱི་གཅན་ཆེན་དུ་སྐྱེ་བ། དབང་ཕྱུག་མ་རང་རྒྱུད་པར་བསྒོམ་པས་གནོད་སྦྱིན་ནག་མོའི་ལུས་སུ་སྐྱེ་བ། རྒྱན་ཆས་རང་རྒྱུད་པར་བསྒོམ་པས་བྲམ་ཟེ་མི་སྡུག་པའི་ལུས་སུ་སྐྱེ་བ། བསྒོམ་བྱ་ཐམས་ཅད་རང་རྒྱུད་པར་བསྒོམ་པས་འཛིན་པའི་ཕུར་པར་འགྱུར་བ། རྒྱུའི་ཡི་གེ་རང་རྒྱུད་པར་བསྒོམ་པས་ཙན་དན་གྱི་སྦྲུལ་གདུག་པ་ལ་སོགས་སུ་སྐྱེ་བའོ། །དང་པོ་ནི།

བདེར་གཤེགས། ཞེས་པ་ནས། རིག་འཛིན་ཡིན། །ཞེས་པའི་བར་གྱིས་བསྟན་ཏེ།

བདེ་གཤེགས་རྒྱལ་བ་སྒོམ་ཟློས་པ། །ཆ་མཐུན་བཅོས་པའི་ཆོ་འཕྲུལ་ལྟར།།

གང་གིས་དེ་དག་དེར་རེད་ན། །ལས་ཀྱི་སྲིན་པོའི་རིགས་འཛིན་ཡིན།།

འདི་དག་བཅུ་གསུམ་པ་དང་སྡེབས་ནས། བདེར་གཤེགས་རྒྱལ་བ་ཁྲོ་བོའི་སྐུ་ལ་སོགས་པ་སྒོམ་ཞིང་སྔགས་ཟློས་པར་བྱེད་པ་ན། ཁྲོ་བོ་ཆེན་པོའི་ཚུལ་གྱི་ཆ་མཐུན་དུ་བཅོས་ཏེ་བསྒོམ་པའི་རྫུ་འཕྲུལ་གྱི་ཆོ་འཕྲུལ་སོག་ཁྲོ་ཚུལ་ལྟར། གང་དག་གིས་རང་རྒྱུད་པར་བཟུང་ནས་དེར་བརྟགས་ཏེ་ཡུན་དུ་གོམས་པས་དེར་ཡང་ཆ་མཐུན་དུ་རེད་ན་ལས་ཀྱི་སྲིན་པོའི་རིགས་འཛིན་པ་ཡིན་པས་སྲིན་པོར་ལྟུང་བའི་སྒོ འོ།།

གཉིས་པ་ཁྲོ་མོར་རང་རྒྱུད་པར་བསྒོམ་པས་སྲིན་མོར་སྐྱེ་བ་ནི།

འོག་ནས། མ་མོ་རྔམ་པའི། ཞེས་པ་ནས། དེ་དག་འཁོར། །ཞེས་པའི་བར་གྱིས་བསྟན་ཏེ།

མ་མོ་རྔམ་པའི་ཆ་ལུགས་སུ། །གང་གིས་རྟོག་པ་དེར་བཟུང་ན།།

སྲིན་མོ་མི་སྡུག་ཤ་ཟ་མོར། །ལངྐའི་ཡུལ་དུ་དེ་དག་འཁོར།།

མ་མོ་ཀོ་རི་བརྒྱད་རྣམས་རྔམ་པའི་ཆ་ལུགས་སུ་གང་གི་རྟོག་པ་རང་རྒྱུད་པར་དེར་གཟུང་ནས་བསྒོམ་ན་སྲིན་མོ་མི་སྡུག་པ་དང་ཤ་ཟ་མོར་སྐྱེས་ཏེ་ལང་ཀའི་ཡུལ་དུ་དེ་དག་འཁོར་བར་འགྱུར་བས་སྲིན་མོ་བརྒྱད་དུ་སྐྱེ་བའོ།།

གསུམ་པ་ཕྲ་མེན་མ་རང་རྒྱུད་དུ་བསྒོམ་པས་ཤོ་གམ་གྱི་གཅན་ཆེན་དུ་སྐྱེ་བ་ནི།

མཚན་མའི། ཞེས་པ་ནས། རྟག་པར་འགྱུར། །ཞེས་པའི་བར་གྱིས་བསྟན་ཏེ།

མཚན་མའི་མགོ་བརྙན་བླ་ཐབས་ཅན། །དེ་འདྲ་གང་གིས་ངེས་བརྟགས་ན།།

ཤོ་གམ་གནས་ཀྱི་གཅན་ཆེན་རིགས། །འཛིན་ཅིང་གནས་དེར་རྟག་པར་འགྱུར།།

སིངྷ་ལ་སོགས་པ་མཚན་མའི་མགོ་བརྙན་གྱི་བླ་དྭགས་ཅན་ལྟར་དེ་འདྲར་གང་གིས་ངེས་པར་བརྟགས་ནས་རང་རྒྱུད་པར་སྒོམ་ན་ཕུང་པོ་ཟིལ་གྱིས་མི་ནོན་པར་ཤོ་གམ་གནས་ཀྱི་སེང་སྟག་ལ་སོགས་པ་གཅན་གཟན་ཆེན་པོའི་རིགས་སུ་སྐྱེ་བ་འཛིན་ཅིང་གནས་དར་རྟག་ཏུ་འཁོར་བར་འགྱུར་བས་ཤོ་གམ་གཅན་ཆེན་དུ་ལྟུང་བའི་སྒོ འོ།།

བཞི་པ་དབང་ཕྱུག་མ་རང་རྒྱུད་པར་བསྒོམ་པས་གནོད་སྦྱིན་ནག་མོའི་ལུས་སུ་སྐྱེ་བ་ནི།

ལས་ཀྱི། ཞེས་ནས། འཚེ་བ་ཡིན། །ཞེས་པའི་བར་གྱིས་བསྟན་ཏེ།

ལས་ཀྱི་དབང་བཙན་བྲན་མོའི་ཚོགས། །དེ་འདྲ་ཉིད་དུ་དེར་བརྟགས་ན།།

གནོད་སྦྱིན་ནག་མོའི་ཚོགས་སུ་འགྱུར། །གཞན་གྱི་ཚེ་ལ་འཚེ་བ་ཡིན།།

༼༡༤༢༽ལས་ཀྱི་དབང་བཙན་པའི་བྲན་མོའི་ཚོགས་ཀྱི་དབང་ཕྱུག་མ་ཉེར་བརྒྱད་ལྟ་བུ་དེ་འདྲ་ཉིད་དུ་རང་རྒྱུད་པ་དེར་རྣམ་པར་བརྟགས་ནས་སྒོམ་ན་གནོད་སྦྱིན་ནག་མོའི་ཚོགས་སུ་འགྱུར་ཞིང་གཞན་གྱི་ཚེ་སྲོག་ལ་འཚེ་བར་བྱེད་པ་ཡིན་པས་གནོད་སྦྱིན་མོ་ཉི་ཤུ་རྩ་བརྒྱད་དུ་ལྟུང་བའི་སྒོ འོ།།

ལྔ་པ་རྒྱན་ཆས་རང་རྒྱུད་པར་བསྒོམ་པར་བྲམ་ཟེ་མི་སྡུག་པའི་ལུས་སུ་སྐྱེ་བ་ནི།

གོང་ནས། རྒྱན་དང་ཆ་ལུགས། ཞེས་པ་ནས། ཡན་ལག་འབྱུང༌། །ཞེས་པའི་བར་གྱིས་བསྟན་ཏེ།

རྒྱན་དང་ཆ་ལུགས་ཐམས་ཅད་ཀུན། །གང་གིས་དེ་དང་དེར་བརྟགས་ན།།

བྲམ་ཟེ་མི་སྡུག་ལུས་རིགས་འཛིན། །ཆུ་སྲིན་ཉ་སོགས་ཡན་ལག་འབྱུང་།།

དུར་ཁྲོད་ཀྱི་ཆས་ལ་སོགས་པ་རྒྱན་དང་གར་དགུ་སོགས་ཁྲོ་བོའི་ཆ་ལུགས་ཐམས་ཅད་ཀུན་ཀྱང་གང་གིས་དེ་དང་དེར་རང་རྒྱུད་པར་བརྟགས་ཏེ་བསྒོམ་ན། གླང་ཆེན་ཀོ་རློན་གྱིས་གཏི་མུག་གི་ཞིང་སྤུངས། ཞིང་གི་གཡང་གཞིས་དུར་ཁྲོད་ཀྱི་བདག་པོར་སྐྱེ། སྟག་གི་ཤམ་ཐབསཀྱིས་ཕྲག་དོག་གི་རླུང་འཚུབ། སྦྲུལ་གྱི་ཆུན་པོས་ཞེ་སྡང་གི་མེ་འབར་བ་སོགས་སུ་འགྱུར་བས་དོན་གྱིས་ལྷ་ཆེན་པོར་ལྟུང་བའི་སྒོ་སྟེ་རྒྱུ་མཐུན་གྱི་དབང་ངོ༌། །དབུ་གསུམ་ཕྱག་དྲུག་སོགས་རང་རྒྱུད་པར་གོམས་པས་བྱོལ་སོང་མགོ་གསུམ་པ་དང་བྲམ་ཟེ་མི་སྡུག་པའི་ལུས་དང་རིགས་སོགས་འཛིན་པ་རྣམས་སུ་སྐྱེ་ཞིང༌། ཀླུ་འབྲུག་ལག་མང་དང་ཆུ་སྲིན་དང་ཉ་ལ་སོགས་ཡན་ལག་ཅན་དུ་འབྱུང་བ་རྣམ་པར་སྨིན་པའོ།།

དྲུག་པ་བསྒོམ་བྱ་ཐམས་ཅད་རང་རྒྱུད་པར་བསྒོམ་པས་འཛིན་པའི་ཕུར་པར་འགྱུར་བ་ནི།

ཏིང་འཛིན། ཞེས་པ་ནས། ཆེན་པོར་འགྱུར། །ཞེས་པའི་བར་གྱིས་བསྟན་ཏེ།

ཏིང་འཛིན་རྟོག་པ་ཐམས་ཅད་ཀུན། །གང་གིས་དེ་དང་དེར་བརྟགས་ན།།

ཅི་ལའᩏ་རྟོག་ཅིང་ཆགས་པ་ཡི། །འཛིན་པའི་ཕུར་པ་ཆེན་པོར་འགྱུར།།

ལྷ་དང་གཞལ་ཡས་ཁང་ལ་སོགས་པ་སྒོམ་པའི་ཏིང་ངེ་འཛིན་དང་རྟོག་པ་ཐམས་ཅད་ཀུན་ཀྱང་མི་དམིགས་པས་མ་ཟིན་པར་གང་གིས་དེ་དང་དེར་རྣམ་པར་བརྟགས་ཏེ་རང་རྒྱུད་པར་སྒོམ་ན་གང་ཅི་ལ་ཡང་རྣམ་པར་རྟོག་ཅིང་ཆགས་པ་ཡི་འཛིན་པའི་ཕུར་པ་ཆེན་པོར་འགྱུར་བས་རུ་ཏྲར་ལྟུང་བའི་སྒོ འོ།།

བདུན་པ་རྒྱུའི་ཡི་གེ་རང་རྒྱུད་པར་བསྒོམ་པས་ཙན་དན་གྱི་སྦྲུལ་གདུག་པ་ལ་སོགས་སུ་སྐྱེ་བ་ནི།

ཨ་དང་ཞེས་པ་ནས། གེགས་ཆེན་ཡིན། །ཞེས་པའི་བར་གྱིས་བསྟན་ཏེ།

ཨ་དང་ཧཱུྃ་ལ་སོགས་པ་ཡི། །རྒྱུ་ཡི་ཡི་གེ་ཐམས་ཅད་ལ། །དེ་དག་སོ་སོར་དེར་བརྟགས་ན།།

ཙན་དན་སྦྲུལ་གདུག་ལ་སོགས་པ། །ལྷུང་འགྱུར་རྟོག་པའི་གནས་ཆེན་ཡིན།།

མ་སྐྱེ་པའི་ཡི་གེ་ཨ་དང་ཐུགས་ཀྱི་ཡི་གེ་ཧཱུྃ་ལ་སོགས་པ་ཡི་རྒྱུ་ཡི་གེ་ཐམས་ཅད་ཀུན་ཀྱང་དེ་དག་སོ་སོར་མཚན་མ་རང་རྒྱུད་པ་དེར་བརྟགས་ནས་སྒོམ་ན་མཆོད་རྟེན་ཧྲུལ་པོའི་སེམས་ཅན་དང་ཙན་དན་གྱི་སྦྲུལ་གདུག་པ་ལ་སོགས་པར་ལྟུང་བར་འགྱུར་བས་གཟུགས་ཕུང་གི་རྟོག་པ་མི་ཤིགས་པའི་གེགས་ཆེན་པོ་ཡིན་པར་རྗེས་སུ་འཇུག་པའི་རྣལ་འབྱོར་གྱི་གཞུང༌། ཏིང་ངེ་འཛིན་མཆོག་གི་རྒྱུད་ལས་ཀྱང་རྒྱས་པར་འབྱུང་ངོ༌།།

བཅུ་པ་སྲིན་མོ་དང་ཕྲ་མེན་མ་དང་ངན་སྐྱུགས་ཅན་གྱི་དམ་ཚིག་གིས་འབྱུང་པོ་ཁྲག་གི་དྲི་སྣོམ་པའི་ལུས་ལེན་པར་བསྟན་པ་ནི།

ཁྲག་ལ་སོགས་པའི། ཞེས་པ་ནས། འཛིན་པ་ཡིན། །ཞེས་པའི་བར་གྱིས་བསྟན་ཏེ།

ཁྲག་ལ་སོགས་པའི་རྫས་ཆེན་ལྔ། །དངོས་པོ་ཁོ་ནར་དེར་བརྟགས་ན།།

འབྱུང་པོ་ཁྲག་གི་དྲི་སྣོམ་པའི། །ལུས་ལེན་རིགས་ནི་འཛིན་པ་ཡིན།།

འདི་ནི་བདུན་པ་དང་བརྒྱད་པ་དང་དགུ་པ་རྣམས་དང་སྡེབས་ནས། ཁྲག་དང་ཤ་ཆེན་ལ་སོགས་པའི་རྫས་ཆེན་པོ་ལྔ་ཡང་དངོས་པོ་ཁོ་ནར་དེར་༼༡༤༣༽བརྟགས་ཏེ་རང་རྒྱུད་པར་ཞེན་པས་ཆགས་པར་བསྟེན་ནས་འབྱུང་པོ་ཁྲག་གི་དྲི་ལ་སྣོམ་པའི་ལུས་ལེན་ཅིང་དེའི་རིགས་ནི་འཛིན་པ་ཡིན་པས་བགེགས་ཆེན་པོར་ལྟུང་བའི་སྒོ འོ།།

གསུམ་པ་ᫍ᪠᫥་᪠᫥ྡུ་བ་ནི།

འོག་ནས། དེས་ན་མདུད་པ། ཞེས་པ་ནས། བཀའ་སྩལ་པ་ལས། ཞེས་པའི་བར་གྱིས་བསྟན་ཏེ།

དེས་ན་མདུད་པ་དམ་པོ་འདི། །བཀུར་དུ་ལྕི་བའི་གདོས་ཡིན་ཏེ། །ལོག་པར་ལྟ་བའི་མིག་ལོང་ནས།།

སེམས་ཀྱི་ནོར་བུ་རིན་ཆེན་དེ། །རྟག་ཆད་ཁམས་སུ་གཏོར་བར་འགྱུར། །ཞེས་བཀའ་སྩལ་པ་ལས།

སྐྱོན་དེ་ལྟར་ཆེ་བ་དེས་ན་རང་རང་གི་དམ་ཚིག་ལ་འཛིན་པ་དགྲོལ་དཀའ་བས་མདུད་པ་དམ་པོ་འདི་ནི་སྡུག་བསྔལ་གྱི་ཁུར་དུ་ལྕི་ཞིང་ཁམས་གསུམ་ལས་མི་ཐར་པའི་གདོས་དང་འདྲ་བ་ཡིན་ཏེ། དེ་ལྟ་བུའི་ཕྱིན་ཅི་ལོག་ཏུ་འཆལ་བར་འགྱུར་བའི་ལྟ་བ་ངན་པའི་ལིང་ཏོག་གིས་ཤེས་རབ་ཀྱི་མིག་ལོང་ནས་རང་གི་རིག་པ་སེམས་ཀྱི་ཆོས་ཉིད་ཡིད་བཞིན་ནོར་བུ་ལྟ་བུའི་རིན་ཆེན་དེ་ཉིད་རྟག་པ་དང་ཆད་པ་གཉིས་ཀྱི་ལྟ་བ་ངན་པའི་ཁམས་སུ་སྟོར་ནས་བརླག་པར་འགྱུར་བའོ། །དེ་སྐད་ཅེས་བཀའ་སྩལ་པ་ལས།

དྲུག་པ་མཐུན་འཇུག་གི་སྒྲས་ལོག་པའི་དམ་ཚིག་མ་བཅོས་པའི་དམ་ཚིག་ཏུ་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འདུས་པའི་ཚོགས། ཞེས་པ་ནས། ཆད་པར་དུས་སོ། །ཞེས་པའི་བར་གྱིས་བསྟན་ཏེ།

འདུས་པའི་ཚོགས་དེ་དག་རྟོག་པའི་ནད་ཀྱིས་ཟིན་ཅིང་རང་རང་གི་དམ་ཚིག་ལས་ལོག་པར་རིགས་ནས།

ཨེ་མའོ་སྒྱུ་མའི་བདག་པོས་ནི་བདག་ཅག་བསླུས་སོ་ཞེས་རྨ་ག་ཆད་པར་དུས་སོ།།

དེ་ནས་འདུས་པའི་ཚོགས་དེ་དག་རང་རང་གི་ལྟ་སྤྱོད་དང་དམ་ཚིག་ལ་ཞེན་པས་རྟོག་པའི་ནད་ཀྱིས་ཟིན་ཅིང༌། དོན་དེ་ཐོས་པས་རང་རང་གི་དམ་ཚིག་རྣམས་སྔོན་ལ་མ་ནོར་བར་གསུངས་ཀྱང་གཞུག་ཏུ་བོར་བས་ལས་ལོག་པར་རིག་ནས། ཨེ་མའོ་ཞེས་ངམ་སྟེ་སྒྱུ་མའི་བདག་པོས་ནི་སྔར་མཐུན་འཇུག་ཏུ་བསྟན་པ་དེས་བདག་ཅག་བསླུས་སོ། །ཞེས་བརྗོད་ནས་ནོར་བ་སྤྱད་པ་ལ་འགྱོད་དེ་རྨ་ག་ཆད་པར་ངུས་སོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཞེན་པ་སྒྲོལ་བའི་ཕྱིར་ངེས་མེད་དུ་བསྟན་པ། དྲིས་ལན་རྒྱས་པར་བཤད་པ། དེ་ལྟར་བསྟན་པའི་ཡོན་ཏན་ནོ། །དང་པོ་ནི།

དེའི་ཚེ་དེའི་དུས་ན། ཞེས་པ་ནས། དེའི་ཕྱིར་ཆོས་ཐམས་ཅད་ངེས་པ་མེད་པར་ང་སྨྲའོ། །ཞེས་པའི་བར་གྱིས་བསྟན་ཏེ།

དེའི་ཚེ་དེའི་དུས་ན་བཅོམ་ལྡན་འདས་ཀྱིས་བཀའ་སྩལ་པ། ཀྱེ་རིགས་ཀྱི་བུ་དག་རང་རང་གི་རྒྱུད་ལ་རྣམ་པར་ལྟོས་ཤིག་ཅེས་བཀའ་སྩལ་པ་ལས། འདུས་པ་དེ་དག་གིས་ལས་ཀྱི་རྒྱུད་བྱ་བ་ཇི་ལྟ་བུ་ཡིན་པ་བལྟས་ན། ཐམས་ཅད་མེ་ལོང་གི་ནང་གི་གཟུགས་བརྙན་བཞིན་སྣང་བར་གྱུར་ཏེ། ལངྐའི་བདག་པོ་དེ་དག་གིས། བཅོམ་ལྡན་འདས་དེ་ལ་གསོལ་པ། ཨེ་མའོ་བཅོམ་ལྡན་འདས་བདག་ཅག་རྣམས་ཀྱི་དམ་ཚིག་ནི་ལོག་པའི་དཀའ་ཐུབ་ཏུ་གྱུར་པར་ངེས་ན། འདི་དག་ཉིད་ཡང་དག་པའི་དཀའ་ཐུབ་ཏུ་མཛད་དུ་གསོལ། ཇི་ལྟར་རང་རང་གི་དམ་ཚིག་རྣམས་མ་བཀག་པར་སྤྱོད་བཞིན་དུ་ཆོས་ཉིད་ཀྱི་དཀའ་ཐུབ་ཏུ་མཛད་དུ་གསོལ། དེ་ཅིའི་སླད་དུ་ཞེ་ན། བདག་ཅག་ནི་རང་རང་གི་དཀའ་ཐུབ་ལ་ཆགས་ཤིང་ཞེན་པ་ལགས་སོ། །ཆོས་ཐམས་ཅད་ནི་སྒྱུ་མ་ལྟ་བུ་སྟེ། ཅིར་ཡང་འགྱུར་བ་ལགས་སོ། །ཐེག་པ་ཆེན་པོའི་སྒོ་ནི་བསྐལ་པའི་མེ་དཔུང་ལྟ་བུ་ལགས་སོ། །དེ་བཞིན་དུ་ནམ་མཁའ་ལྟ་བུ་དང་། ས་ཆེན་པོ་ལྟ་བུ་དང་། རླུང་ཆེན་པོ་ལྟ་བུ་ལགས་སོ། །སངས་རྒྱས་བཅོམ་ལྡན་འདས་ནི། ཐབས་རྒྱ་མཚོའི་མངའ་བདག་ལགས་པས། སོ་སོའི་མོས་པ་ཇི་ལྟ་བ་བཞིན་དུ་བཤད་དུ་གསོལ་ཞེས་ཞུས་པ་ལས། ལངྐའི་བདག་པོ་བཅོམ་ལྡན་འདས་དེས་དགྱེས་པ་ཆེན་པོའི་བཞད་པ་མཛད་ནས། ཀྱེ་རིགས་ཀྱི་བུ་དག་ཐེག་པ་ཆེན་པོའི་དོན་དེ་ལྟར་ཞུ་བ་ནི་ལེགས་ན། འདི་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་ཐེ་ཚོམ་སྐྱེ་བ་ཡིན་ན། ཁྱེད་རྣམས་ལྟ་ཅི་སྨོས། དེ་སྐད་ཅེས་བཀའ་སྩལ་པ་ལས། འདུས་པའི་ཚོགས་ཀྱིས་གསོལ་པ། བཅོམ་ལྡན་འདས་ཐེ་ཚོམ་སྐྱེ་བར་བགྱིད་པ་ནི་ངེས་པ་མ་མཆིས་པ་ལགས་ན། སངས་རྒྱས་བཅོམ་ལྡན་འདས་རྣམས་ནི་ངེས་པ་ཅན་ལགས་ན། ངེས་པ་མ་མཆིས་པའི་ཆོས་འཁོར་གྱི་ནང་འདིར་གསུང་ངམ་ཞེས་གསོལ་པ་ལས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་འདུས་པའི་ཚོགས་ཆོས་ཐམས་ཅད་ནི་ངེས་པ་མེད་པར་ང་སྨྲའོ། །དེ་ཅིའི་ཕྱིར་ཞེ་ན། ཐེར་ཟུག་ཏུ་རེད་པའི་ཆོས་ནི་གང་ཡང་མེད་པའི་ཕྱིར་རོ། །དེ་བས་ན་ཁྱེད་རྣམས་ཀྱི་རང་རང་གི་དམ་ཚིག་ལ་ཡང་ངེས་པ་མེད་དེ། སྐྱེ་བ་འདི་ལས་གཞན་པ་དཔག་ཏུ་མེད་པ་བླངས་པ་དང་། ལེན་པའི་སྐབས་སུ་སོ་སོའི་སྐྱེ་བ་ཐ་དད་པ་དེ་བཞིན་དུ་མོས་པ་དང་། ལས་དང་། སྐལ་བ་དང་། གནས་དང་། སྡེ་དང་། ཤ་ཚུགས་དང་། རིགས་དང་། ཁ་དོག་དང་། འཚོ་བ་དང་། ལྟ་བ་དང་། སྤྱོད་པ་ཐ་དད་ན། ད་ཁྱེད་ཀྱི་ངེས་པ་ག་ལ་བཟུང་།

དེའི་ཕྱིར་ན་ཆོས་ཐམས་ཅད་ནི་ངེས་པ་མེད་པར་ང་སྨྲའོ།།

སྟོན་པ་དཔལ་གྱིས་བཀའ་སྩལ་པ་དེའི་ཚེ་ལས་རྒྱུད་ལོག་པས་གདུང་ནས་ངུས་པ་དེའི་དུས་གཉིས་གཅིག་པར་གྱུར་པའི་སྐབས་ན། བཅོམ་ལྡན་འདས་ཀྱི་བཀའ་བསྩལ་པ་ནི། ཀྱེ་རིགས་ཀྱི་བུ་དག་རང་རང་གི་སེམས་ཀྱིས་སྔར་བྱས་པའི་ལས་ཀྱི་རྒྱུད་ལ་རྣམ་པར་ལྟོས་ཤིག་ཅེས་གདམས་ནས་བཀའ་སྩལ་པ་ལས། འདུས་པའི་ཚོགས་དེ་དག་གིས། རང་རང་གི་ལས་ཀྱི་རྒྱུད་བྱ་བ་ཇི་ལྟ་བུ་ཡིན་པར་རང་རང་གིས་བརྟགས་ཏེ་བལྟས་པ་ན། ལས་ཀྱི་རྒྱུད་ཐམས་ཅད་དཔེར་ན་མེ་ལོང་ནང་གི་གཟུགས་བརྙན་བཞིན་དུ་རིག་པ་ལ་སྣང་བའི་གློ་བུར་གྱི་དྲི་མ་ལྟ་བུའི་སྒྲིབ་པ་ཡིན་པར་ཡང༌༼༡༤༤༽དག་པར་ཤེས་པར་གྱུར་ཏེ། ལང་ཀའི་བདག་པོ། དེ་དག་གིས་དོན་མ་ནོར་བ་རྟོགས་པར་འདོད་ནས་བཅོམ་ལྡན་འདས་དེ་ལ་གསོལ་པ། ཨེ་མའོ་བཅོམ་ལྡན་འདས་བདག་ཅག་རྣམས་ཀྱི་དམ་ཚིག་ནི་ལོག་པའི་དཀའ་ཐུབ་ཏུ་གྱུར་པར་ངེས་པ་རྙེད་ན། དེའི་རྒྱུས་མ་ནོར་བའི་དོན་ལ་འདོད་པ་སྐྱེས་པས། འདི་དག་ཉིད་ཡང་དག་པའི་བཀའ་ཐུབ་ཏུ་མཛད་དུ་གསོལ་ཞེས་ཡང་དག་པའི་དོན་རྙེད་པར་འདོད་པའི་སྒོ་ནས་ཐར་པའི་ཐབས་ཞུས་པ་དང༌། ཇི་ལྟར་རང་རང་གི་དམ་ཚིག་རྣམས་མ་བཀག་པར་སྤྱོད་བཞིན་དུ་ཞེས་ཞེན་བའི་སྒོ་ནས་རང་རང་གི་དམ་ཚིག་ལ་གནས་པར་ཞུས་ཤིང༌། ཆོས་ཉིད་ཀྱི་དཀའ་ཐུབ་ཏུ་མཛད་དུ་གསོལ། ཞེས་ནོར་བར་རིག་ཀྱང་ཞེན་པ་དག་མ་བྲལ་བས་རྟོགས་པའི་སྒོ་ནས་དམ་ཚིག་དམ་པར་མཛོད་ཅིག་པར་ཞུས་པའོ། །དེ་ཉིད་དགོས་ཆེད་ཅིའི་སླད་དུ་ཞེ་ན། བདག་ཅག་རྣམས་ནི་རང་རང་གི་ནོར་བའི་དཀའ་ཐུབ་ཀྱི་དམ་ཚིག་ལ་ཆགས་ཤིང་ཞེན་པ་ལགས་པས་དགྲོལ་བར་མཛད་པར་གསོལ་བ་འདེབས་སོ། །དེ་ཡང་ཆོས་ཐམས་ཅད་ནི་སྒྱུ་མ་ལྟ་བུ་སྟེ་མཚན་ཉིད་མ་ངེས་པས་ཅིར་ཡང་འགྱུར་བ་ལགས་པས་དགྲོལ་དུ་བཏུབ་པས་སོ། །གསང་སྔགས་ཐེག་པ་ཆེན་པོའི་སྒོ་འདི་ནི། ལོག་པའི་སྒྲིབ་པ་ཀུན་སྲེག་པས་བསྐལ་པའི་མེ་དཔུང་ལྟ་བུ་ལགས་སོ། །དེ་བཞིན་དུ་གོ་སྐབས་ཡངས་པས་ནམ་མཁའ་ལྟ་བུ་དང༌། སྤང་ལེན་མེད་པར་ཀུན་ཐེག་པས་ས་ཆེན་པོ་ལྟ་བུ་དང༌། འཐོར་སྟོབས་ཆེ་ཞིང་ངོས་བཟུང་མེད་པར་ཅིར་ཡང་སྣང་བའི་ཐབས་མཆོག་དང་ལྡན་པས་རླུང་ཆེན་པོ་ལྟ་བུ་ལགས་སོ། །དེས་ན་རྣམ་རྟོག་ལོག་པའི་ཚོགས་དེ་དག་སྦྱོང་ཞིང་ཤོང་ལ་ཡང་དག་པར་སྐྱེ་བ་དང་གཡེང་བ་ཡང་ཡིན་པས་དཔེ་བཞིའི་སྒོ་ནས་སྣང་ལ་མ་ངེས་པའི་ཆོས་གང་ཡང་མི་སྤོང་བར་རྟོགས་པའི་སྒོ་ཞུས་པ་དང༌། དེར་མ་ཟད་དེ་སྟོན་པ་སངས་རྒྱས་བཅོམ་ལྡན་འདས་རྣམས་ནི། ཐབས་ཀྱི་ཕུང་པོ་མང་པོ་རྒྱ་མཚོ་ལྟ་བུའི་མངའ་བདག་ཏུ་གྱུར་པ་ལགས་པས། བདག་ཅག་སོ་སོའི་མོས་པའི་བསམ་པ་ཐ་དད་པ་ཇི་ལྟ་བ་བཞིན་དུ་དེ་དང་མཐུན་པར་གྲོལ་བའི་ཐབས་ཀྱི་སྒོ་ཟབ་མོ་བཤད་དུ་གསོལ་ཞེས་གསོལ་བ་བཏབ་ཅིང་ཞུས་པ་ལས། ལང་ཀའི་བདག་པོ་ཞེས་བོས་པ་ནི་ལོ་རྒྱུས་གསུངས་པའི་ཕྱིར་ཏེ། བཅོམ་ལྡན་འདས་དེས་ལན་དུ། འཁོར་རྣམས་མ་ནོར་བའི་དོན་ལ་མོས་པ་ལ་དགྱེས་པ་ཆེན་པོའི་ཞལ་བཞད་པ་མཛད་ནས་གནང་སྟེ་ཀྱེ་རིགས་ཀྱི་བུ་དག་ཞེས་བོས་ནས་ཐེག་པ་༼༡༤༥༽ཆེན་པོའི་དོན་འདི་ཉིད་དེ་ལྟར་ཞུ་བ་ནི་ལེགས་ན། འོན་ཀྱང་གསང་བའི་རང་བཞིན་འདི་ནི་རྟོགས་པར་དཀའ་བས་བཅུ་གཅིག་ཀུན་ཏུ་འོད་ལ་བཞུགས་པའི་སངས་རྒྱས་དང་ས་བཅུའི་བྱང་ཆུབ་སེམས་དཔའ་ཐམས་ཅད་ཀྱང་ཐེ་ཚོམ་སྐྱེ་བ་ཡིན་ན། ཁྱེད་རྣམས་ཡིད་ཆེས་པར་དཀའ་བ་ལྟ་ཅི་སྨོས། དེ་སྐད་ཅེས་བཀའ་སྩལ་པ་ལས། འདུས་པའི་ཚོགས་ཀྱིས་གསོལ་པ། བཅོམ་ལྡན་འདས་ཐེ་ཚོམ་སྐྱེ་བར་བགྱིད་པ་ནི་ངེས་པ་མ་མཆིས་པ་ལགས་ན། གང་སངས་རྒྱས་བཅོམ་ལྡན་འདས་རྣམས་ནི་ངེས་པའི་དོན་སྟོན་པ་ཅན་དུ་གྱུར་པས་དེ་ལ་བདག་ཅག་ཀྱང་ངེས་པར་འཛིན་ལགས་ན། ངེས་པ་མ་མཆིས་པའི་ཆོས་འཁོར་གྱི་ནང་འདིར་གསུང་ངམ་ཅི། ཞེས་གསོལ་བ་ལས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་འདུས་པའི་ཚོགས་རྣམས། ཆོས་ཐམས་ཅད་ངེས་པ་མེད་པར་ང་སྨྲའོ། །དེ་ཅིའི་ཕྱིར་ཞེ་ན། རྟག་པ་ཐེར་ཟུག་ཏུ་རེད་པའི་ཆོས་ནི་གང་ཡང་མེད་པའི་ཕྱིར་རོ། །དེ་བས་ན་ཁྱེད་རྣམས་ཀྱིས་རང་རང་གི་དམ་ཚིག་ལ་ཡང་ངེས་པ་མེད་དེ། ད་ལྟའི་སྐྱེ་བ་འདི་དང་འདི་ལས་གཞན་པའི་སྐྱེ་བ་དཔག་ཏུ་མེད་པ་སྔ་ཕྱིར་བླངས་པ་དང་ལེན་པའི་སྐབས་སུ་སོ་སོའི་སྐྱེ་བ་ཇི་སྙེད་པ་ཐམས་ཅད་ཐ་དད་ཡིན་པ་དེ་བཞིན་དུ་མོས་པ་ཐ་དད་དང༌། ལས་ཐ་དད་དང༌། སྐལ་པ་ཐ་དད་དང༌། གནས་མཐོ་དམན་ཐ་དད་དང༌། སྡེ་སོ་སོ་དང༌། ཤ་ཚུགས་མི་འདྲ་བ་དང༌། རིགས་སོ་སོ་དང༌། ཁ་དོག་ཐ་དད་དང༌། འཚོ་བ་ཐ་དད་དང༌། ལྟ་བ་ཐ་དད་དང༌། སྤྱོད་པ་ཐ་དད་པ་སྟེ་དངོས་པོ་བཅུ་གཅིག་ཏུ་སྨོས་པའང་རེ་རེ་ནས་ཐ་དད་པ་ཡིན་ན་གཅིག་ཏུ་བཟུང་དུ་མི་བཏུབ་པ་ནི་གཏན་ཚིགས་ཏེ། དེ་ལྟར་ཐ་དད་པ་བཅུ་གཉིས་ཀྱི་ཕྱིར་དམ་ཚིག་ཀྱང་མ་ངེས་ན། ད་ཁྱེད་ཀྱིས་ངེས་པར་གང་ལ་གཟུང༌། དེའི་ཕྱིར་ཆོས་ཐམས་ཅད་ཀྱི་དོན་ཡང་ངེས་པ་མེད་པར་སྟོན་པ་ང་ཡིས་སྨྲའོ། །ཞེས་གསུངས་སོ།།

གཉིས་པ་དྲིས་ལན་རྒྱས་པར་བཤད་པ་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

དེ་ནས། ཞེས་པ་ནས། ཞེས་གསོལ་པས། ཞེས་པའི་བར་གྱིས་བསྟན་ཏེ།

དེ་ནས་འདུས་པའི་ཚོགས་ཀྱིས་གསོལ་བ། འོ་ན་བཅོམ་ལྡན་འདས་བདག་ཅག་གི་དམ་ཆིག་རྣམས་ངེས་པར་བཟུང་ན་དེ་ཇི་ལྟ་བུ་ལགས།

དེ་ནས་འདུས་པའི་ཚོགས་རྣམས་ཀྱིས་གསོལ་བ་བཏབ་པ། འོ་ན་བཅོམ་ལྡན་འདས་བདག་ཅག་གི་དམ་ཚིག་རྣམས་ངེས་པར་གཟུང་ན་ཅི་ལྟ་བུ་ལགས། ཞེས་གསོལ་པས།།

གཉིས་པ་ལན་ལ་བཅུ་སྟེ། ནག་པོ་དེད་དཔོན་ལ་མ་བཅོས་པའི་མཚམས་མེད་ལྔའི་དམ་ཚིག་བསྟན་པ། བུད་མེད་རྣམས་ལ་མ་བཅོས་པའི་ཆགས་པའི་དམ་ཚིག་བསྟན་པ། གུ་ལང་ལ་མ་བཅོས་པའི་མ་སྲིང་བུ་མོ་ལ་སྤྱོད་༼༡༤༦༽པའི་དམ་ཚིག་བསྟན་པ། བྱིཥྣུ་དང་གསང་ཚིག་རྟེན་པ་ལ་མ་བཅོས་པའི་སྲོག་གཅོད་པའི་དམ་ཚིག་བསྟན་པ། ཤྭ་བར་པ་ལ་མ་བཅོས་པའི་རྫུན་གྱི་དམ་ཚིག་བསྟན་པ། གནོད་སྦྱིན་ལ་མ་བཅོས་པའི་མ་བྱིན་པར་ལེན་པའི་དམ་ཚིག་བསྟན་པ། མུ་སྟེགས་པ་དང་ལོག་སྲེད་ཅན་ལ་མ་བཅོས་པའི་ལོག་སྤྱོད་ཀྱི་དམ་ཚིག་བསྟན་པ། སྲིན་མོ་དང་ངན་སྐྱུགས་ཅན་ལ་མ་བཅོས་པའི་དམ་རྫས་སྤྱོད་པའི་དམ་ཚིག་བསྟན་པ། ཕྲ་མེན་མ་ལ་མ་བཅོས་པའི་ལོག་འཚོའི་ཡོ་བྱད་སྤྱོད་པའི་དམ་ཚིག་བསྟན་པ། སྨེ་ཤ་ཅན་ལ་མ་བཅོས་པའི་ཤ་ལྔ་ཟ་བའི་དམ་ཚིག་བསྟན་པའོ། །དང་པོ་ནི།

བཅོམ་ལྡན་འདས། ཞེས་པ་ནས། མཚམས་མེད་དམ་ཚིག་ཡིན། །ཞེས་པའི་བར་གྱིས་བསྟན་ཏེ།

བཅོམ་ལྡན་འདས་ཀྱིས་བཀའ་སྩལ་པ། འདུས་པའི་ཚོགས་འདི་ལྟ་སྟེ། མཚམས་མེད་ལྔ་ཡི་དམ་ཚིག་ནི།།

དམ་ཚིག་ཏིང་འཛིན་ཤེས་རབ་དང་། །བྱང་ཆུབ་སེམས་དང་སྙིང་རྗེ་ལྔ།།

བར་མཚམས་མེད་པར་རྒྱུན་མི་འཆད། །འདི་ནི་མཚམས་མེད་དམ་ཚིག་ཡིན།།

དེ་ནས་བཅོམ་ལྡན་འདས་ཀྱིས་ལན་བཀའ་སྩལ་པ། འདུས་པའི་ཚོགས་རྣམས་ཞེས་བོས་ནས་ལེགས་པར་ཉོན་ཅིག་དང་ཡང་དག་པའི་དམ་ཚིག་ཉེ་བར་བསྟན་པ་ནི་འདི་ལྟ་སྟེ། ཞེས་གསུངས་སྟེ། རུ་ཏྲའི་དམ་ཚིག་ལས་ཟློག་ནས་ངེས་པ་ལྔར་སྡེབས་ནས། གང་མཚམས་མེད་པ་ལྔ་ཡི་དམ་ཚིག་ཡང་དག་པར་བསྒྱུར་བ་ནི་ལྡེམ་དགོངས་ཀྱི་ཚུལ་ཏེ། རྩ་བ་དང་ཡན་ལག་གི་དམ་ཚིག་མ་ཉམས་པར་སྲུངས་པ་དང་རྣལ་འབྱོར་འདི་ལ་གནས་པའི་ཏིང་ངེ་འཛིན་དང༌། དོན་ཇི་ལྟ་བར་རྟོགས་པའི་ཤེས་རབ་དང༌། དོན་དམ་དང་ཀུན་རྫོབ་གཉིས་སུ་མེད་པའི་བྱང་ཆུབ་ཀྱི་སེམས་དང་སྙིང་རྗེ་ཆེན་པོ་དང་ལྔ་པོ་དུས་གསུམ་དུ་བར་མཚམས་མེད་པར་རྒྱུན་མི་གཅད་པ་འདི་ནི་ཡང་དག་པའི་མཚམས་མེད་ལྔ་ཡི་དམ་ཚིག་ཡིན་ནོ།།

གཉིས་པ་བུད་མེད་རྣམས་ལ་མ་བཅོས་པའི་ཆགས་པའི་དམ་ཚིག་བསྟན་པ་ནི།

ཆགས་པ། ཞེས་པ་ནས། དམ་ཚིག་ཡིན། །ཞེས་པའི་བར་གྱིས་བསྟན་ཏེ།

ཆགས་པ་ཆེན་པོའི་དམ་ཚིག་ནི། །འཁོར་བ་དང་ནི་ཆོས་ཉིད་ལ།།

ཤེས་རབ་སྙིང་རྗེས་མི་གཏོང་བ། །འདི་ནི་ཆགས་པའི་དམ་ཚིག་ཡིན།།

བཅུ་པ་དང་སྡེབས་ཏེ། ཡང་དག་པའི་ཆགས་པ་ཆེན་པོའི་དམ་ཚིག་ནི། འཁོར་བ་དང་ནི་ཆོས་ཉིད་གཉིས་ལས། ཕྱི་མ་ནི་ཤེས་རབ་གྱིས་ལྟ་བས་མི་གཏོང་བ་དང༌། སྔ་མ་ནི་དམིགས་མེད་ཀྱི་སྙིང་རྗེས་མི་གཏོང་བས་མི་བྱེད་པ་འདི་ནི་ཡང་དག་པར་ཆགས་པའི་དམ་ཚིག་ཆེན་པོ་ཡིན་ནོ།།

གསུམ་པ་གུ་ལང་ལ་མ་བཅོས་པའི་མ་སྲིང་བུ་མོ་ལ་སྤྱོད་༼༡༤༦༽པའི་དམ་ཚིག་བསྟན་པ་ནི།

མ་དང༌། ཞེས་པ་ནས། གཟུངས་སུ་བཤད། །ཅེས་པའི་བར་གྱིས་བསྟན་ཏེ།

མ་དང་བུ་མོ་སྲིང་མོ་ནི། །ཆོས་ཉིད་དང་ནི་ཡེ་ཤེས་ལྔ་།།

རང་ལས་བྱུང་བའི་ཤེས་རབ་ནི། །དེ་བཞིན་ཉིད་ཀྱི་གཟུངས་སུ་བཤད།།

གཉིས་པ་དང་སྡེབས་ནས། མ་དང་སྲིང་མོ་དང་བུ་མོ་རྣམས་ནི་གཞི་དང༌། ལྷན་ཅིག་སྐྱེས་པ་དང་རང་ལས་བྱུང་བའི་ཕྱིར་ཆོས་ཉིད་དང་ནི་ཡེ་ཤེས་ལྔ་དང་མཉམ་པའི་རང་རིག་པ་ལས་རང་བྱུང་དུ་ཤར་བའི་ཤེས་རབ་དང་གསུམ་སྟེ། དེ་རྣམས་དང་དུས་གསུམ་དུ་ཞེན་པ་མི་འབྲལ་བ་ནི་དེ་བཞིན་ཉིད་ཀྱི་གཟུངས་སུ་བཤད་པའོ།།

བཞི་པ་བྱིཥྣུ་དང་གསང་ཚིག་རྟེན་པ་ལ་མ་བཅོས་པའི་སྲོག་གཅོད་པའི་དམ་ཚིག་བསྟན་པ་ནི།

༼༡༤༧༽གང་ལ། ཞེས་པ་ནས། དེ་ལ་བྱ། །ཞེས་པའི་བར་གྱིས་བསྟན་ཏེ།

གང་᫗ᩏ་སྐྱེ་བ་མེད་བསྟན་ན། །སྲོག་གི་དབང་པོ་མི་ལེན་པའི། །སྐྱེ་བའི་རྒྱུན་ནི་

ཆད་པ་དང་། །ཐམས་ཅད་སྟོང་པར་བཅོམ་ནས་ནི། །སྲོག་བཅད་པ་ཞེས་དེ་ལ་བྱ།།

གསུམ་པ་དང༌། བཅུ་གསུམ་པར་སྡེབས་ཏེ། ཞེ་སྡང་ཅན་དང་གསང་ཚིག་རྟེན་པ་ལ་སྲོག་གཅོད་པར་གསུངས་པ་གང་ལ་དགོངས་ན་རྣལ་འབྱོར་པ་སུ་གང་ཞིག་ལ་ཆོས་ཉིད་སྐྱེ་བ་མེད་པ་ཇི་བཞིན་པའི་དོན་བསྟན་པར་གྱུར་ན་ཡང་དག་པར་གོ་ཞིང་དོན་མཇལ་བས་སྲིད་པའི་ས་བོན་ཐམས་ཅད་ཟད་པར་བྱས་ཏེ་གཞི་རྩ་བཏོན་པའི་ཕྱིར་དུས་ཕྱི་མར་སྲོག་གི་དབང་པོ་མི་ལེན་ཞིང་འཁོར་བར་སྐྱེ་བའི་རྒྱུན་ནི་ཆད་དེ་བྲལ་བ་དང༌། ཆོས་ཐམས་ཅད་སྟོང་པར་བཅོམ་སྟེ་རིལ་མ་དམིགས་པར་གཤེགས་པ་ནི། སྲོག་བཅད་པ་ཞེས་སུ་དེ་ཉིད་ལ་བྱའོ།།

ལྔ་པ་ཤྭ་བར་པ་ལ་མ་བཅོས་པའི་རྫུན་གྱི་དམ་ཚིག་བསྟན་པ་ནི།

དངོས་པོ། ཞེས་པ་ནས། ཆེན་པོ་ཡིན། །ཞེས་པའི་བར་གྱིས་བསྟན་ཏེ།

དངོས་པོ་མེད་ལས་དངོས་པོར་སྟོན། །དངོས་པོར་སྣང་བ་མེད་སྨྲ་བ།།

རྒྱལ་བ་ཀུན་གྱི་བཀའ་ཡིན་ཏེ། །བསླུ་བའི་དམ་ཚིག་ཆེན་པོ་ཡིན།།

བཅུ་གཅིག་པ་དང་སྡེབས་ནས། ཡང་དག་པའི་རྫུན་ནི་ཆོས་རྣམས་ཐམས་ཅད་ཡེ་ངོ་བོ་བྲལ་བས་དངོས་པོ་མེད་པ་ལས་རང་བཞིན་མ་འགག་པར་འཆར་བས་ཞེན་པའི་ངོ་ལ་སྣ་ཚོགས་པའི་དངོས་པོར་སྟོན་པས་ན། དེ་ལྟར་ཆོས་སོ་ཅོག་གི་དངོས་པོར་སྣང་བ་ལ་རང་བཞིན་མེད་པར་སྨྲ་བ་སྣང་ལ་མ་གྲུབ་པའི་དོན་དུ་སྟོན་པའི་མཚོན་བྱེད་ནི། རྒྱལ་བ་ཀུན་གྱི་བཀའ་ལུང་དམ་པ་ཡིན་ཏེ། ཡང་དག་པའི་རྫུན་གྱི་བསླུ་བའི་དམ་ཚིག་ཆེན་པོ་ཡིན་ནོ།།

དྲུག་པ་གནོད་སྦྱིན་ལ་མ་བཅོས་པའི་མ་བྱིན་པར་ལེན་པའི་དམ་ཚིག་བསྟན་པ་ནི།

གཞན་གྱི། ཞེས་པ་ནས། དམ་ཚིག་ཡིན། །ཞེས་པའི་བར་གྱིས་བསྟན་ཏེ།

གཞན་གྱི་ཡིད་བཞིན་ནོར་བུ་ལ། །རྗེས་སུ་མོས་པའི་འོད་ཟེར་གྱིས། །བླངས་ནས་བྱང་ཆུབ་འཇོག་པ་དང་།།

དེ་ཉིད་ལྕགས་ཀྱུས་ལེན་པ་ནི། །མ་བྱིན་ལེན་པའི་དམ་ཚིག་ཡིན།།

བཞི་པ་དང་སྡེབས་ནས། དམ་པ་གཞན་གྱི་ལོངས་སྤྱོད་རུའི་གདམས་ངག་ཡིད་བཞིན་ནོར་བུ་ལྟ་བུ་ལ་རྒྱལ་བའི་དགོངས་པའི་རྗེས་སུ་དད་བརྩོན་ཤེས་རབ་དང་ལྡན་པར་མོས་ཏེ་སྒོམ་པའི་ཏིང་ངེ་འཛིན་གྱི་འོད་ཟེར་གྱིས་ཡང་དག་པར་བླངས་ནས་རང་གཞན་གཉིས་ཀ་བྱང་ཆུབ་ཆེན་པོའི་དོན་དུ་དགོད་པའི་ཕྱིར་དམ་པའི་གདམས་ངག་རྟོགས་པའི་ངང་ལ་འཇོག་པ་དང་རིག་པའི་དེ་ཉིད་མངོན་དུ་བྱེད་པའི་ཐབས་དྲན་པའི་ལྕགས་ཀྱུས་འགུགས་ཤིང་ཤེས་རབ་གྱི་རྩལ་གྱིས་ལེན་པ་ནི་སྦྱིན་བྱ་དང་སྦྱིན་བྱེད་མེད་པས་མ་བྱིན་པར་ལེན་པའི་དམ་ཚིག་ཆེན་པོ་ཡིན་ནོ།།

བདུན་པ་མུ་སྟེགས་དང་ལོག་སྲེད་ཅན་ལ་མ་བཅོས་པའི་ལོག་སྤྱོད་ཀྱི་དམ་ཚིག་བསྟན་པ་ནི།

དེ་ཉིད། ཅེས་པ་ནས། ཆེན་པོ་ཡིན། །ཞེས་པའི་བར་གྱིས་བསྟན་ཏེ།

དེ་ཉིད་ཆེན་པོར་དེ་འདོད་པས། །མཚན་མར་ཞེན་ལས་ལོག་སྤྱོད་པ།།

འདོད་པས་ལོག་པར་སྤྱོད་པ་སྟེ། །སྦྱོར་བའི་དམ་ཚིག་ཆེན་པོ་ཡིན།།

ལྔ་པ་དང་བཅུ་གཉིས་པར་སྡེབས་ཏེ། ལྷུན་གྱིས་གྲུབ་པའི་དེ་བཞིན་ཉིད་ཆེན་པོ་དེ་ཉིད་མ་བཅོས་པར་རྟོགས་པར་འདོད་པས། རྟོག་འཛིན་གྱིས་མཚན་མར་ཞེན་པ་ལས་སླར་ལོག་སྟེ་ཡང་དག་པ་གཉིས་མེད་དུ་སྤྱོད་པའི་དོན་རྟོགས་པར་འདོད་པས་རིལ་ཆོས་ཉིད་དུ་བྱ་བ་དེ་ཉིད་མཚན་མ་ལས་ལོག་ཀྱང་དགག་༼༡༤༨༽སྒྲུབ་ཅན་དུ་ལྟོས་པའི་ཕྱིར་ཡང་དག་པར་མི་འགྲུབ་པས་རང་བཞིན་མ་བཅོས་པའི་རྣལ་མའི་དོན་ལ་སྤྱོད་པ་སྟེ་ཡུལ་ཆོས་ཉིད་ལ་རྟོགས་པའི་ཡེ་ཤེས་སྦྱོར་བའི་དམ་ཚིག་ཆེན་པོ་ཡིན་ནོ།།

བརྒྱད་པ་སྲིན་མོ་དང་ངན་སྐྱུགས་ཅན་ལ་མ་བཅོས་པའི་དམ་རྫས་སྤྱོད་པའི་དམ་ཚིག་བསྟན་པ་ནི།

དམ་ཚིག ཅེས་པ་ནས། མི་འགྱུར་རོ། །ཞེས་པའི་བར་གྱིས་བསྟན་ཏེ།

དམ་ཚིག་ཏིང་འཛིན་ཤེས་རབ་དང་། །སེམས་ཉིད་སྙིང་རྗེ་ཆེན་པོ་ལྔ། །ཤ་ཆེན་བཤང་གཅི་ཁུ་བ་ཁྲག །རྣམ་པ་ལྔ་པོ་སྦྱར་བ་འདི། །ཆོས་རྣམས་ཀུན་གྱི་ཡོ་བྱད་ཡིན། །ཡོ་བྱད་འདི་དང་མ་ལྡན་ན། །དོན་རྣམས་གྲུབ་པར་མི་འགྱུར་རོ།།

བདུན་པ་དང་དགུ་པར་སྡེབས་ནས། དམ་ཚིག་དང་ཏིང་ངེ་འཛིན་དང་ཤེས་རབ་དང༌། བྱང་ཆུབ་ཀྱི་སེམས་ཉིད་དང་སྙིང་རྗེ་ཆེན་པོ་ལྔ་ཡི་ངོ་བོ་ནི་བཤད་ཟིན་ཏེ། ཤ་ཆེན་དང་གཤང་གཅི་དང་ཁུ་བ་དང་ཁྲག་རྣམ་པ་ལྔ་པོ་དང་སྦྱོར་བ་འདི་ནི། ཇི་སྐད་དུ། དམ་ཚིག་ཤ་དང་ཏིང་འཛིན་གཤང༌། །ཤེས་རབ་གཅི་བ་སེམས་ཁུ་སྟེ། །སྙིང་རྗེ་ཁྲག་རྣམས་དོན་གཞི་དང༌། །རྟོག་སྦྱོང་ལོག་དང་དོན་བཅུ་དང༌། །འགྲོ་ལ་ཆགས་ཕྱིར་དམ་པའི་མཆོག །འབྲས་བུའི་དོན་ཕྱིར་རྒྱུ་ཡི་ཕུལ། །ཞེས་པའི་དོན་ཏེ། འདི་ཉིད་ཆོས་རྣམས་ཀུན་གྱི་ཡང་དག་པའི་ཡོ་བྱད་ཡིན་པས་ཡོ་བྱད་འདི་དང་མ་ལྡན་ན། རང་དང་གཞན་དང་ཆོས་ཀྱི་དོན་རྣམས་ཕུན་སུམ་ཚོགས་པར་གྲུབ་པར་མི་འགྱུར་རོ།།

དགུ་པ་ཕྲ་མེན་མ་ལ་མ་བཅོས་པའི་ལོག་འཚོའི་ཡོ་བྱད་སྤྱོད་པའི་དམ་ཚིག་བསྟན་པ་ནི།

ལོག་པར། ཞེས་པ་ནས། འགྱུར་བ་ཡིན། །ཞེས་པའི་བར་གྱིས་བསྟན་ཏེ།

ལོག་པར་འཚོ་བའི་ཡོ་བྱད་ཀྱང་། །ལྟ་དང་ཉོན་མོངས་ལས་ཉོན་མོངས། །འདོད་པ་བདུན་ལྔ་ཉིད་སྦྱར་ཏེ།།

དེ་ལའང་དེ་སྐད་གྲགས་པ་སྟེ། །འཁོར་བ་ཉིད་དུ་འགྱུར་བ་ཡིན།།

བརྒྱད་པ་དང་སྡེབས་ནས། འཁོར་བའི་འབྲས་བུ་འབྱིན་པའི་རྒྱུ་རུ་གྱུར་བས་ལོག་པར་འཚོ་བའི་ཡོ་བྱད་རྣམས་ཀྱང༌། འཇིག་ལྟ་དང༌། མཐར་ལྟ་དང་། ལོག་ལྟ་དང༌། ལྟ་བ་མཆོག་འཛིན་དང༌། ཚུལ་ཁྲིམས་བརྟུལ་ཞུགས་མཆོག་འཛིན་ཏེ་ལྟ་བ་ལྔ་དང༌། འདོད་ཆགས་ལ་སོགས་པ་ཉོན་མོངས་པ་ལྔ་དང༌། རྣམ་པར་དཀར་ནག་དང་མི་གཡོ་བའི་ལས་གསུམ་དང༌། ཉེ་བའི་ཉོན་མོངས་པ་ཉི་ཤུ་རྣམས་དང༌། གཟུགས་སྒྲ་ལ་སོགས་པ་འདོད་ཡོན་ལྔ་ལ་སྤྱོད་ཅིང་འདུན་ལ། ཕོ་མོ་གཉིས་ལ་ཆགས་པ་དང་བདུན་ཏེ། ཚན་པ་ལྔ་པོ་ཉིད་སྦྱར་ཏེ་འདྲེས་མར་སྤྱོད་པ་དེ་ལའང་ལོག་པའི་འཚོ་བ་ཞེས་དེ་སྐད་དུ་གྲགས་པ་ཉིད་དེ། འཁོར་བ་བསྐྱེད་པའི་རྒྱུ་ཆེན་པོ་ཉིད་དུ་གནས་པའི་ཕྱིར་ཕྱིན་ཅི་ལོག་གི་ཡོ་བྱད་དུ་འགྱུར་བ་ཡིན་ནོ།།

བཅུ་པ་སྨེ་ཤ་ཅན་ལ་མ་བཅོས་པའི་ཤ་ལྔ་ཟ་བའི་དམ་ཚིག་བསྟན་པ་ནི།

ལོག་པར། ཞེས་པ་ནས། ལྟོས་ན་སྨེ། །ཞེས་པའི་བར་གྱིས་བསྟན་ཏེ།

ལོག་པར་སྤྱོད་པའི་ལྟ་བ་ལྔ་ །སྨེ་ཤ་ལྔ་ཞེས་གྲགས་པ་སྟེ།།

དེས་ན་ལྟ་བ་མི་གཙང་བས། །ཡང་དག་ལྟ་ལ་ལྟོས་ན་སྨེ།།

དྲུག་པ་དང་སྡེབས་ནས། ཕྱིན་ཅི་ལོག་པར་སྤྱོད་པའི་ལྟ་བ་ལྔ་སྟེ། འཇིག་ཚོགས་ལ་ལྟ་བ། མཐར་འཛིན་པ་ལ་ལྟ་བ། ལོག་པར་ལྟ་བ། ལྟ་བ་མཆོག་ཏུ་འཛིན་པ། ཚུལ་ཁྲིམས་དང་བརྟུལ་ཞུགས་མཆོག་འཛིན་ཏེ། ལྔ་པོ་དེ་ལ་མཐའ་ཡི་སྐྱོན་ཡོད་པ་ཅན་ནི་སྨེ་ཤ་ལྔ་ཞེས་གྲགས་པ་སྟེ་བཤད་པའི་ལྟ་བ་ལྔ་དང་འདིར་སྡེ་ལྔར་ཕྱེ་ནས་བསྟན་ཏེ་ཁྱད་པར་དང་སྤྱིའི་༼༡༤༩༽དབང་ངོ༌། །དེས་ན་སྡེ་ལྔ་ནི་ལྟ་བ་མི་གཙང་བ་ཡིན་པས་གསང་ཆེན་དོན་གྱི་སྙིང་པོ་རྟོགས་པས་ཡང་དག་པའི་ལྟ་བ་མཐའ་ཐམས་ཅད་ལས་གྲོལ་བ་ལ་ལྟོས་ན་སྨེ་ཟས་ཅན་གྱི་ལྟ་བ་ཞེས་བྱའོ།།

གསུམ་པ་དེ་ལྟར་བསྟན་པའི་ཡོན་ཏན་ལ་གཉིས་ཏེ། ལོག་པ་མ་བཀག་པའི་དྲིས་ལན། སྔར་གནང་མ་གནང་གི་དྲིས་ལན་ནོ། །དང་པོ་ནི།

བཅོམ་ལྡན་འདས། ཞེས་པ་ནས། ངོ་མཚར་དུ་གྱུར་ཏེ་ངུས་སོ། །ཞེས་པའི་བར་གྱིས་བསྟན་ཏེ།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པས། འདུས་པའི་ཚོགས་དེ་དག་གིས་སྐྱེ་བ་མེད་པའི་དོན་མཐོང་ནས། ཤིན་ཏུ་ཡང་ངོ་མཚར་བར་གྱུར་ནས་གསོལ་པ། བཅོམ་ལྡན་འདས་འོ་ན་བདག་ཅག་གི་དམ་ཚིག་འདི་རྣམས་ཐེག་པ་ཆེན་པོར་མ་སྩོལ་ཏམ། བཀའ་སྩལ་པ། འདུས་པའི་ཆོགས་སོ་སོའི་དམ་ཚིག་རྣམས་ཐེག་པ་ཆེན་པོ་ཡོངས་སུ་རྫོགས་པར་ནི་མ་བཀག་གོ །གསོལ་པ། བཅོམ་ལྡན་འདས་ཅིའི་སླད་དུ་མ་བཀག་པ་བཤད་དུ་གསོལ། བཅོམ་ལྡན་འདས་དེས་བཀའ་སྕལ་བ། ཇི་ལྟར་ནམ་མཁའི་རང་བཞིན་དུ། །སྣང་སྲིད་མ་བཀག་སྣང་བ་བཞིན། །ཐེག་པ་ཆེན་པོའི་ནམ་མཁའ་འདིར། །ལྟ་སྤྱོད་ཐམས་ཅད་མ་བཀག་སྟེ། །དེ་ཕྱིར་ཐམས་ཅད་ནམ་མཁར་སྣང་། །ཞེས་གསུངས་པས། འདུས་པའི་ཚོགས་ཐམས་ཅད་ངམ་ཞིང་ངོ་མཚར་དུ་གྱུར་ཏེ་ངུས་སོ།།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པས། འདུས་པའི་ཚོགས་དེ་དག་གིས་དབུགས་ཆེན་འབྱིན་པའི་ས་ཐོབ་ནས་ཆོས་ཉིད་སྐྱེ་བ་མེད་པའི་དོན་མཐོང་བས། ཤིན་ཏུ་ཡང་ངོ་མཚར་དུ་གྱུར་ཏེ། མ་བཀག་པར་སྤྱད་ཀྱང་སྐྱོན་གྱིས་མ་གོས་པ་ལ་དོགས་པ་གཅོད་པའི་ཕྱིར་གསོལ་པ། སྟོན་པ་བཅོམ་ལྡན་འདས་འོ་ན་བདག་ཅག་གི་དམ་ཚིག་འདི་རྣམས་གསང་སྔགས་ཐེག་པ་ཆེན་པོར་ཇི་ལྟ་བར་མ་སྩལ་ཏམ། ཞེས་ཞུས་པ་དང༌། ལན་དུ་ཇི་བཞིན་དུ་རྟོགས་སམ་མཐོང་ན་དགག་མི་དགོས་པར་བཀའ་སྩལ་པ། འཁོར་འདུས་པའི་ཚོགས་སོ་སོའི་དམ་ཚིག་རྣམས་གསང་མཆོག་ཐེག་པ་ཆེན་པོ་ལ་ནི་གང་ཡང་དོག་པ་མེད་པར་ཤོང་བས་སོ་སོར་མ་འདྲེས་པར་ཆོས་ཉིད་དུ་ཡོངས་སུ་རྫོགས་པར་གནས་པའི་ཡིན་ཚུལ་གྱི་དོན་ལ་ནི་ཅི་ཡང་མ་བཀག་གོ །དེའི་གཏན་ཚིགས་ཞུ་བའི་ཕྱིར་གསོལ་པ། བཅོམ་ལྡན་འདས་འོ་ན་ཅིའི་སླད་དུ་མ་བཀག་པར་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དཔེ་ཇི་ལྟར་ན་ནམ་མཁའི་རང་བཞིན་མི་སྒྲིབ་པ་ཉིད་དུ། སྣང་སྲིད་ཐམས་ཅད་མ་བཀག་པར་སྣང་བ་བཞིན་དུ་གསང་སྔགས་ཐེག་པ་ཆེན་པོའི་དགོངས་དོན་རྒྱ་མཚོ་དྭངས་པ་ལ་ནམ་མཁའ་ཤར་བ་ལྟ་བུའི་སྒོ་འདིར་ནི་ལྟ་བ་རིལ་དང་སྤྱོད་པ་ཐམས་ཅད་ཤོང་བས་ན་ཡང་དག་པར་རྟོགས་ན་གང་ཡང་མ་བཀག་སྟེ། སྤང་བྱ་མེད་པའི་གཏན་ཚིགས་དེ་ཡི་ཕྱིར་ཐམས་ཅད་རྣམ་པར་དག་པའི་ནམ་མཁའི་སྣང་བས་གསང་སྔགས་མ་ཡིན་པར་གཞན་དུ་སྣང་བ་གང་ཅི་ཡང་མེད་དོ། །ཞེས་ལན་གསུངས་པས། འདུས་པའི་ཚོགས་ཐམས་ཅད་མ་བཀག་ལ་མ་ཞེན་པར་རྟོགས་པས་ངམ་ཞིང་དགའ་བས་ངོ་མཚར་དུ་གྱུར་ཏེ་དོན་རང་ལ་ཡོད་པ་སྔར་མ་ཤེས་པ་ལ་མཆི་མ་བླགས་ནས་ངུས་སོ།།

གཉིས་པ་སྔར་གནང་མ་གནང་གི་དྲིས་ལན་ནི།

དེ་ནས་ཞེས་པ་ནས། ཡོངས་སུ་རྫོགས་པར་བྱེད་དོ། །ཞེས་པའི་བར་གྱིས་བསྟན་ཏེ།

དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་བཀའ་སྕལ་བ། འདུས་པའི་ཚོགས་ཁྱེད་རྣམས་ཀྱིས་ཅི་ཞིག་ཐོས་ནས་ངུ་། གསོལ་པ། བཅོམ་ལྡན་འདས་ཀྱིས། ཡུན་གྱི་དོན་སྲིད་ཆེན་པོ་འདི་ལྟ་བུ་བདག་ཅག་ལ་སྔར་མ་བསྟན་པ། ཐུགས་རྗེ་རེ་ཆུང་ཞེས་གསོལ་བ་ལས། བཅོམ་ལྡན་འདས་ཀྱིས་བཀའ་སྕལ་པ། འདུས་པའི་ཚོགས་རང་རང་གི་ནམ་མཁའ་སྟེ། རང་རང་གི་མུན་པ་གློ་བུར་བས་སྒྲིབས་པར་ཟད་ཀྱི། རང་རང་གི་ནམ་མཁའ་ཉིད་དུ་སྣང་བ་ལ། གང་གིས་གང་ལ་བསྟན་ཅི་དགོས་ཞེས་བཀའ་སྕལ་པས། གང་གིས་མི་རིག་པ་གང་ཡིན་པ་དེ་ཉིད་རིག་པར་གྱུར་ཏེ། བག་བཞི་བསྐུམས་ཡན་ལག་ས་ལ་བརྡབས་ནས་ལུས་གདན་ཁྲིར་ཕུལ་ཏེ། ཉོན་མོངས་པའི་སྒྲིབ་པ་སྦྱོང་ཞིང་། རྣ་བས་ཆོས་ཉན་པས་ཤེས་བྱའི་སྒྲིབ་པ་སྦྱོང་སྟེ། རིགས་འཛིན་ལུས་སེང་གེ་དང་།།

རྟ་དང་། གླང་པོ་ཆེ་ལ་སོགས་པས་ཞབས་ཀྱི་གདན་ཁྲི་བྱ་བ་ཡོངས་སུ་རྫོགས་པར་བྱེད་དོ།།

དེ་ནས་བཅོམ་ལྡན་འདས་ཀྱིས་དོན་རྟོགས་མ་རྟོགས་མཁྱེན་བཞིན་དུ་བཀའ་སྩལ་པ། འཁོར་༼༡༥༠༽འདུས་པའི་ཚོགས་ཁྱེད་རྣམས་ཀྱིས་ཅི་ཞིག་ཐོས་ནས་ངུ་བ་ཡིན་ཞེས་གསུངས་པས། སླར་གསོལ་པ། བཅོམ་ལྡན་འདས་ཡུན་གྱི་དོན་སྲིད་ཆེན་པོ་འདི་ལྟ་བུ་བདག་ཅག་རྣམས་ལ་སྔར་མ་བསྟན་པ་ཐུགས་རྗེ་རེ་ཆུང་ཞེས་གསོལ་ཏེ་སྟོན་པ་ལ་འཁངས་པ་ལས། བཅོམ་ལྡན་འདས་ཀྱིས་བཀའ་སྩལ་པ། འདུས་པའི་ཚོགས་རྣམས་སྒྲིབ་པ་མེད་པར་རང་རང་གི་ནམ་མཁའ་སེམས་ཉིད་ཡེ་སངས་རྒྱས་པ་དེ་ཉིད་རང་རང་གི་མ་རིག་པའི་མུན་པ་གློ་བུར་བས་བསྒྲིབས་ནས་མ་མཐོང་བར་ཟད་ཀྱི། ཆོས་ཐམས་ཅད་ཀྱི་ངོ་བོ་ཉིད་རང་རང་གི་ནམ་མཁའ་དེ་ཉིད་ཀྱི་ངང་དུ་སྣང་བ་ལ་བཤད་ཉན་གང་ཡང་མེད་པར་ཐམས་ཅད་བདག་ཉིད་ཆེན་པོ་ཡིན་པའི་ཕྱིར་གང་གིས་གང་ལ་བསྟན་ཅིང་བཤད་ཅི་དགོས་ཏེ་མི་དགོས་སོ། །ཞེས་སྨྲས་ཏེ་བཀའ་སྩལ་པས། འཁོར་གང་གིས་རིག་པ་ལ་དོན་དེ་ཉིད་སྣང་བས་མ་རིག་པ་གང་ཡིན་པ་དེ་ཉིད་རིག་པར་གྱུར་ཏེ། དབྱེར་མེད་ཆེན་པོའི་ཡེ་ཤེས་སུ་གསལ་བ་ན། སྟོན་པ་ལ་དྲིན་ལན་དུ་གཏང་རག་ཕུལ་བ་དང༌། བླ་མ་ལ་ཕྱོགས་པར་བསྟན་པའི་ཕྱིར་བག་བཞི་བསྐུམས་ཤིང་ཡན་ལག་ས་ལ་བརྡབས་ནས་ལུས་གདན་ཁྲིར་ཕུལ་ཏེ་ཉོན་མོངས་པའི་སྒྲིབ་པ་སྦྱོང་ཞིང་རྣ་བས་ཆོས་ཉན་པས་ཤེས་བྱའི་སྒྲིབ་པ་སྦྱོང་སྟེ། རིགས་འཛིན་གྱི་ལུས་ཀྱི་མི་འཇིགས་པ་སེང་གེ་དང༌། རྫུ་འཕྲུལ་རྟ་དང་སྟོབས་གླང་པོ་ཆེ་དང་དབང་རྨ་བྱ་ལ་སོགས་པའི་ཚུལ་དུ་བསྟན་པས་ཞབས་ཀྱི་གདན་ཁྲིའི་བྱ་བ་ཡོངས་སུ་རྫོགས་པར་བྱེད་དོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྨོངས་པ་སེལ་བའི་སྤྱོད་མཐུན་འགྲོས་པའི་ལེའུ་སྟེ་སུམ་ཅུ་དྲུག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། འཁོར་དོན་ལ་རྨོངས་པ་རྣམས་ཀྱི་དོན་མ་མཐོང་བའི་སྒྲིབ་པ་སེལ་བ་དང༌། དུག་གིས་དུག་གསོ་བ་ལྟར་དུ་ཁོང་དག་རང་རང་གི་བསམ་པ་དང་སྤྱོད་པ་ཀུན་དང་མཚུངས་པར་མཐུན་འཇུག་སྦྱོང་བའི་ལུང་དུ་བཀའ་སྩལ་པ་ཉིད་ལོ་རྒྱུས་སུ་བརྗོད་པས་གསང་བ་པའི་འཁོར་འདུས་པ་དེ་དག་གི་རྒྱུད་བཀྲོལ་བར་མཛད་པའི་ལེའུ་སྟེ་སུམ་ཅུ་རྩ་དྲུག་པ་རྣམ་པར་བཤད་པའོ།། །།

ལེའུ་སོ་བདུན་པ་གང་དྲི་བའི་ཐེ་ཙོམ་བཅད་པ།

༈ བམ་པོ་དྲུག་པར་ཟུག་པ། གཉིས་པ་དམ་ཚིག་གི་ཁེ་ཉེན་དང་དྲིས་ལན་བསྟན་པ་ལ་གཉིས་ཏེ། སྤྱོད་དཀའ་བའི་ཕྱིར་ན་ཁེ་ཉེན་བསྟན་པ། གཏན་ལ་དབབ་ཕྱིར་ན་དྲིས་ལན་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས། ཞེས་པ་ནས། གྲགས་པ་ནི་འདི་ལྟ་སྟེ། ཞེས་པའི་བར་གྱིས་བསྟན་ཏེ།

དེ་ནས་ལངྐའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ། གང་གིས་གང་ལ་རྒྱུད་དེ་གྲགས་པའི་གསང་བ་དམ་པ་དེ། སྔོན་དུ་བྱུང་བའི་སྤྱད་པ་སྤྱོད་པར་གྲགས་པའི་གཏམ་རྒྱུད་ཇི་སྐད་བརྗོད་པ་རྣམ་པར་བརྗོད་པ་ལགས་ཞེས་སྨྲས་པ་ལས། གསང་བ་པའི་བདག་པོས་སྨྲས་པ། ལངྐའི་བདག་པོ་སྔོན་བྱུང་བའི་གཏམ་རྒྱུད་གསང་བ་

དམ་པ་སྤྱད་པ་སྤྱོད་པར་གྲགས་པ་ནི། འདི་ལྟ་སྟེ།

ལེའུ་འདིས་དྲང་དོན་སྟོན་ནོ། །དེ་ནས་ལང་ཀའི་མངའ་བདག་བྱང་ཆུབ་སེམས་དཔའ་དེས། ༼༡༥༡༽གསང་བ་པའི་བདག་པོ་ལ་གསང་སྔགས་སྤྱད་ལེགས་ཉེས་ཀྱི་ཁྱད་པར་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ། སྟོན་པ་གང་གིས་འཁོར་གང་ལ་བརྒྱུད་དེ་གྲགས་པའི་གསང་བ་དམ་པ་དེ་ཉིད། སྔོན་དུ་བྱུང་བ་སྔར་སྤྱད་པ་དག་གིས་ཇི་ལྟར་སྤྱོད་པར་གྲགས་པའི་གཏམ་རྒྱུད་ཇི་སྐད་བརྗོད་པ་རྣམ་པར་བརྗོད་པ་ལགས། ཅེས་སྨྲས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ། སྔོན་དུ་བྱུང་བའི་གཏམ་རྒྱུད་གསང་བ་དམ་པ་སྤྱད་པ་སྤྱོད་པར་གྲགས་པ་ནི། འདི་ལྟ་སྟེ།

གཉིས་པ་རྒྱས་པར་བཤད་པ་ལ་གཉིས་ཏེ། ཁེ་ཉེན་སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

གང་དུ་འདུས་པའི་ཚོགས་ཀྱིས། ཞེས་པ་ནས། ཤེས་པར་གྱིས་ཤིག ཅེས་པའི་བར་གྱིས་བསྟན་ཏེ།

གང་དུ་འདུས་པའི་ཚོགས་ཀྱིས། བཅོམ་ལྡན་འདས་གསང་བ་མཆོག་གི་བདག་པོ་དེ་ལ་གསོལ་པ། བཅོམ་ལྡན་འདས་གསང་བ་དམ་པ་གང་གིས་སྤྱད་པ་ལེགས་པ་དང་། ཉེས་པར་སྤྱོད་པ་ཇི་ལྟ་བུར་འཚལ་བར་བགྱི། དེ་སྐད་ཅེས་གསོལ་པ་དང་། ལངྐའི་བདག་པོ་བཅོམ་ལྡན་འདས་དེས་བཀའ་སྩལ་པ། འདུས་པ་ཆེན་པོའི་ཚོགས། གསང་སྔགས་དམ་པ་གང་གིས་སྤྱད་པ་སྤྱོད་པ་ནི། རབ་ཏུ་དཀའ་བར་ཤེས་པར་གྱིས་ཤིག

གང་དེ་ཉིད་དུ་འདུས་པའི་ཚོགས་རྣམས་ཀྱིས། བཅོམ་ལྡན་འདས་གསང་བ་མཆོག་གི་བདག་པོ་དེ་ལ་གསོལ་པ། སྟོན་པ་བཅོམ་ལྡན་འདས། གསང་ཆེན་གསང་བ་དམ་པ་གང་གིས་ཡང་དག་པར་སྤྱད་པས་ལེགས་པར་གྱུར་པ་དང༌། གང་གིས་ལོག་པར་ཞུགས་ཏེ་ཉེས་པར་སྤྱོད་པ་བྱུང་བའི་ཚུལ་ཇི་ལྟ་བུར་འཚལ་བར་བགྱི། དེ་སྐད་ཅེས་གསོལ་པ་དང༌། ལང་ཀའི་བདག་པོ། བཅོམ་ལྡན་འདས་དེས་བཀའ་སྩལ་པ། འདུས་པ་ཆེན་པོའི་ཚོགས་རྣམས། གསང་སྔགས་དམ་པ་གང་དག་གིས་ལེགས་པར་སྤྱད་པ་དང་ཉེས་པར་སྤྱོད་པ་ནི། རབ་ཏུ་དབྱེ་དཀའ་བར་ངེས་པས་བྱེ་བྲག་ཕྱེད་པར་ཤེས་པར་གྱིས་ཤིག

གཉིས་པ་རྒྱས་པར་བཤད་པ་ནི།

དེ་ཅིའི་ཕྱིར་ཞེ་ན། ཞེས་པ་ནས། ཐམས་ཅད་དེ་ཁོ་ན་ཉིད་དུ་འགྱུར་རོ། །ཞེས་པའི་བར་གྱིས་བསྟན་ཏེ།

དེ་ཅིའི་ཕྱིར་ཞེ་ན། གསང་བ་དམ་པ་ནི་ཤིན་ཏུ་མེ་དང་འདྲ་སྟེ། ཇི་ལྟར་མེ་ནི་རྒྱུན་དུ་བཅངས་ཤིང་སྤྱད་ལེགས་ན། ཇི་ལྟ་བ་བཞིན་དུ་རྒྱུན་དུ་སྤྱད་པའི་འདོད་པ་འབྱུང་ངོ་། །མེ་ཉིད་ཇི་ལྟ་བ་བཞིན་དུ་སྤྱད་ཉེས་ན། མེའི་ཕུང་པོ་ཆེན་པོར་འགྱུར་ཏེ། གང་སྤྱོད་པར་བྱེད་པ་དེ་ཡང་བསྲེགས། ཁྱིམ་ནས་ཁྱིམ་ཡང་བསྲེགས། རྫས་ཀྱི་དངོས་པོ་ཐམས་ཅད་ཀྱང་ཚིག་པར་འགྱུར་རོ། །དེ་བཞིན་དུ་གསང་སྔགས་འདི་ནི་ཆུ་དང་འདྲ་སྟེ། ཆུ་གང་གི་ཐབས་ཀྱིས་ཟིན་ན། ཇི་ལྟར་འདོད་པ་བཞིན་དུ་འགྱུར་རོ། །གང་ཆུ་རང་བཞིན་དང་ཐབས་ལ་མི་མཁས་པས་ནི། གང་སྤྱོད་པར་བྱེད་པ་དེ་ཉིད་གཡེང་བར་འགྱུར་རོ། །གཞན་ཡང་གསང་བ་དམ་པ་འདི་ནི་གདུག་པའི་གཅན་གཟན་དང་འདྲ་སྟེ། གང་གདུག་པའི་གཅན་གཟན་ནི། གཞན་གྱི་སྲོག་གཅོད་པར་བྱེད་ཅིང་། གཞན་དག་འཇོམས་པར་བྱེད་ན་ཡང་། གང་ཐབས་ལ་མཁས་པ་དེས་ཇི་ལྟ་བ་བཞིན་དུ་དབང་དུ་འགྱུར་རོ། །གང་ཐབས་ཀྱིས་མ་ཟིན་ན་ནི། རང་སྲོག་ལ་འབབ་པར་བྱེད་དོ། །གཞན་ཡང་གསང་སྔགས་འདི་ནི་སྦྲུལ་གྱི་མགོ་ལ་འདུག་པའི་ནོར་བུ་རིན་པོ་ཆེ་དང་འདྲ་སྟེ། གང་ཇི་ལྟར་ཐབས་ཀྱིས་ཟིན་ན། རིན་པོ་ཆེ་ལ་དགའ་བདེར་སྤྱད་དུ་ཡོད་ལ། གང་གི་ཐབས་ཀྱིས་མ་ཟིན་ན་ནི་འཚོ་བ་དང་འབྲལ་བར་བྱེད་དོ། །གཞན་ཡང་ལྡུམ་བུ་ལང་ཐང་ཚེ་དང་འདྲ་སྟེ། གང་ཐབས་ཀྱིས་ཟིན་ན་ཚད་ནད་དྲག་པོ་ཡང་གཅོད་པར་བྱེད་ལ། གང་ཐབས་ཀྱིས་མ་ཟིན་ན་ནི་སྲོག་དང་ཡང་བྲལ་བར་བྱེད་དོ། །དེ་ལྟར་ན་གང་ཐབས་ཀྱིས་ཟིན་པ་ནི། དུག་འགྱུར་རྩི་དང་། གསེར་འགྱུར་རྩི་དང་། མུན་འགྱུར་གྱི་སྒྲོན་མ་བཞིན་དུ་ཆུང་ངུས་ཆེན་པོ་འཇོམས་པར་ནུས་ཏེ། གང་ཕྱིན་ཅི་མ་ལོག་པར་ངེས་པ་ཉིད་ཀྱིས་ཐམས་ཅད་དེ་ཁོ་ན་ཉིད་དུ་འགྱུར་རོ།།

གང་གསང་བ་སྤྱད་ལེགས་ཉེས་ཀྱི་དཔེར་བསྟན་པ་སྟེ་རྩ་བའི་རྒྱུད་ལས་ཀྱང་འདས་པ་སྔོན་བྱུང་གི་ལེའུ་ལས་དཔེ་དང་པོ་བཞི་དང་གསང་སྔགས་སྤྱད་ལེགས་ཉེས་ཀྱི་དཔེ་རྣམས་སྟོན་ཏེ། དེ་དག་གིས་འདིར་འགྲེལ་ཏོ། །འོ་ན་རྩ་བས་བཤད་རྒྱུད་འགྲེལ་ན་དེ་ཉིད་མི་ངེས་པར་འགྱུར་རོ་བར་དོགས་པ་ལ། དེ་ནི་སྐབས་སུ་སྒོ་གསལ་བ་དང་རྒྱས་པའང་ཡོད་ཀྱི། སྤྱིར་རྩ་བ་ལས་ཡན་ལག་རྒྱས་པར་ཕྱེ་བའི་གྲངས་ཤིན་ཏུ་རྒྱས་པར་བཤད་རྒྱུད་ལས་སྟོན་པའི་ཕྱིར་ན། ཐེ་ཚོམ་གྱི་དོགས་པ་སེལ་བར་འགྱུར་རོ། །དེ་ལྟར་ངེས་པར་བྱས་ནས། སྤྱད་ལེགས་ཉེས་འབྱུང་བ་དེ་ཉིད་རྒྱུ་མཚན་ཅིའི་ཕྱིར་ཞེ་ན། དཔེ་ལ་བརྟེན་ནས་སྟོན་ཏེ། དཔེ་འདི་ཚོ་གསང་སྔགས་སྤྱིའི་དཔེ་རུ་འཐད་པས་དང་པོ་དམ་ཚིག་གི་༼༡༥༢༽དཔེ་ནི། གསང་བ་དམ་པ་འདི་ནི་ཤིན་ཏུ་མེ་དང་འདྲ་སྟེ། ཇི་ལྟར་མེ་ནི་རྒྱུན་དུ་བཅངས་ཤིང་སྤྱད་པ་ལེགས་ན། ཇི་ལྟ་བ་བཞིན་དུ་རྒྱུན་དུ་སྤྱད་པའི་འདོད་པ་ལྟར་འབྱུང་ངོ༌།།

མེ་དེ་ཉིད་ཐབས་མེད་པར་ཇི་ལྟ་བ་བཞིན་དུ་མ་སྤྱད་པར་ཉེས་ན། མེ་ཡི་ཕུང་པོ་ཆེན་པོར་གྱུར་ཏེ། གང་སྤྱོད་པར་བྱེད་པ་དེ་ཡང་བསྲེག ཁྱིམ་ནས་ཁྱིམ་ཡང་བསྲེག རྫས་ཀྱི་དངོས་པོ་ཐམས་ཅད་ཀྱང་ཚིག་པར་འགྱུར་རོ། །དེ་བཞིན་དུ་དབང་གི་དཔེ་བསྟན་ཏེ། གང་གསང་སྔགས་འདི་ནི་ཆུ་དང་འདྲ་སྟེ། ཆུ་གང་གིས་ཐབས་ཀྱིས་ཟིན་ཅིང་སྤྱད་ལེགས་ན། ཇི་ལྟར་འདོད་པ་བཞིན་དུ་དགའ་བ་དང་བདེ་བར་འབྱུང་ངོ༌། །གང་ཆུའི་རང་བཞིན་དང་ཐབས་ལ་མི་མཁས་པས་ནི། གང་སྤྱོད་པར་བྱེད་པ་དེ་ཉིད་གཡེང་ཞིང་འཆི་བར་ཡང་འགྱུར་རོ། །གཞན་ཡང་སྤྱོད་པའི་དཔེ་སྟོན་ཏེ། གསང་བ་དམ་པ་འདི་ནི་གདུག་པའི་གཅན་གཟན་ཁྲོ་བོ་དང་འདྲ་སྟེ། གང་གདུག་པའི་གཅན་གཟན་གྱིས་ནི། གཞན་གྱི་སྲོག་གཅོད་པར་བྱེད་ཅིང༌། གཞན་དག་འཇོམས་པར་བྱེད་ན་ཡང༌། གང་ཐབས་ལ་མཁས་པ་དེས་ཇི་ལྟ་བ་བཞིན་དུ་དབང་དུ་འདུའོ། །ཐབས་ཀྱིས་མ་ཟིན་ན་ནི་རང་གི་སྲོག་ལ་འབབ་པར་བྱེད་དོ། །གཞན་ཡང་ལྟ་བའི་དཔེ་སྟོན་ཏེ། གསང་སྔགས་འདི་ནི་སྦྲུལ་གྱི་མགོ་ལ་འདུག་པའི་ནོར་བུ་རིན་པོ་ཆེ་དང་འདྲ་སྟེ། གང་ཇི་ལྟར་ཐབས་ཀྱིས་ཡོངས་སུ་ཟིན་ན། རིན་པོ་ཆེ་དེ་ལ་དགའ་བ་དེར་སྤྱད་དུ་ཡོད་ལ་གང་གིས་ཐབས་ཀྱིས་མ་ཟིན་ན་ནི་འཚོ་བའི་ཚེའམ་སྲོག་དང་ཡང་བྲལ་བར་བྱེད་དོ། །གཞན་ཡང་ཐབས་ལམ་གྱི་དཔེ་སྟོན་ཏེ། སྤྱིར་པད་པ་ཏ་བྱ་བ་ཡང་ཡོད་ཀྱང་འདིར་ལྡུམ་བུ་ལང་ཏང་ཙེ་དང་འདྲ་སྟེ། གང་གི་ཐབས་ཀྱིས་ཟིན་ན། ཚད་ནད་དྲག་པོ་ཡང་གཅོད་པར་བྱེད་ལ། གང་ཐབས་ཀྱིས་མ་ཟིན་ན་སྲོག་གི་དབང་པོ་དང་ཡང་བྲལ་བར་བྱེད་དོ། །དེ་ལྟར་ན་སྙིང་རྗེ་ཆེན་པོ་དང་གྲོལ་ལམ་གྱི་དཔེ་ཡང་སྟོན་ཏེ། གང་ཐབས་ཀྱིས་ཟིན་པ་ནི། དུག་འགྱུར་གྱི་རྩི་དང༌། གསེར་འགྱུར་གྱི་རྩི་དང༌། མུན་འགྱུར་གྱི་སྒྲོན་མ་བཞིན་དུ་ཆུང་ངུས་ཆེན་པོ་ཡང་འཇོམས་པར་འགྱུར་ཏེ། གང་གསང་དོན་ཕྱིན་ཅི་མ་ལོག་པར་ངེས་པ་ཉིད་ཀྱིས། ཐམས་ཅད་དེ་ཁོ་ན་ཉིད་དུ་གསལ་བར་འགྱུར་རོ།།

གསུམ་པ་ཞབས་བསྡུ་བ་ནི།

འདུས་པ་ཆེན་པོའི་ཚོགས་དེ་བས། ཞེས་པ་ནས། བཀའ་སྩལ་པ་དང༌། ཞེས་པའི་བར་གྱིས་བསྟན་ཏེ།

འདུས་པ་ཆེན་པོའི་ཚོགས། དེ་བས་ན་གསང་བ་དམ་པ་འདི་ནི་སྤྱད་པར་རབ་ཏུ་དཀའ་བས། སྔོན་དུ་བྱུང་བ་སྤྱད་པ་སྤྱོད་པ་དག གསང་བ་དམ་པ་ངོས་མ་ཟིན་པ་ལོག་པའི་ལམ་དུ་བྱུང་བ་ཡང་ཡོད་དོ། །གང་ཐབས་ལ་མཁས་པ་ངོས་ཟིན་པ་མ་ནོར་བའི་ལམ་དུ་འབྱུང་བ་ཡང་ཡོད་པས། འདུས་པ་ཆེན་པོའི་ཚོགས། གང་གསང་བ་དམ་པ་ངོས་ཟིན་པའི་ཐབས་ཀྱི་སྤྲིན་ཆེན་པོས་སྤྱད་པ་སྤྱོད་པ་ལས་མཁས་པར་གྱིས་ཤིག དེ་སྐད་ཅེས་བཀའ་སྩལ་པ་དང་།

འདུས་པ་ཆེན་པོའི་ཚོགས་རྣམས་སྐྱོན་ཡོན་ཡོད་པ་དེ་བས་ན། གསང་བ་དམ་པ་འདི་ནི་སྤྱད་པར་དཀའ་བས། སྔོན་དུ་བྱུང་བའི་སྤྱོད་པ་གསང་བ་ཉེས་པར་སྤྱད་པ་དག་གསང་བ་༼༡༥༣༽དམ་པ་ངོས་མ་ཟིན་པས། ལོག་པའི་ལམ་དུ་སྔར་བྱུང་བ་ཡང་ཡོད་དོ། །གང་ཐབས་ལ་མཁས་པས་རྟོགས་ཏེ་ངོས་ཟིན་པ་མ་ནོར་བའི་ལམ་དུ་བྱུང་བ་ཡང་ཡོད་པས། འོག་གི་མགོ་འདྲེན་ལྟ་བུར། འདུས་པ་ཆེན་པོའི་ཚོགས་གང་གསང་བ་དམ་པ་ངོས་ཟིན་པའི་ཐབས་ཀྱི་སྤྲིན་ཆེན་པོས་ལེགས་པར་སྤྱད་པ་དང་སྤྱོད་པ་ལ་ཡོངས་སུ་མཁས་པར་གྱིས་ཤིག དེ་སྐད་ཅེས་བཀའ་སྩལ་པ་དང༌།

གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

འདུས་པའི་ཚོགས། ཞེས་པ་ནས། གསོལ་པ་དང༌། ཞེས་པའི་བར་གྱིས་བསྟན་ཏེ།

འདུས་པའི་ཚོགས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དུ་གསང་སྔགས་ལོག་པའི་ལམ་པ་ནི་གང་ལགས། གང་མ་ནོར་བའི་ལམ་པ་ནི་གང་ལགས། བདག་ཅག་རྣམས་ལ་རྒྱ་ཆེར་བཤད་དུ་གསོལ།

དེ་སྐད་ཅེས་གསོལ་པ་དང་།

དེ་ནས་ཡང་འདུས་པའི་ཚོགས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་དུ་གསང་སྔགས་ལོག་པའི་ལམ་པ་ནི་གང་ལགས། གང་མ་ནོར་བའི་ལམ་པ་ནི་གང་ལགས། བདག་ཅག་རྣམས་ལ་རྒྱ་ཆེར་བཤད་དུ་གསོལ། དེ་སྐད་ཅེས་གསོལ་པ་དང༌།

གཉིས་པ་ལན་ལ་གཉིས་ཏེ། མ་ནོར་བའི་ལམ་བཤད་པ། ལོག་པའི་ལམ་བསྟན་པའོ། །དང་པོ་ལ་གཉིས་ཏེ། མ་ནོར་བའི་ལམ་དངོས་བཤད་པ། ཐུན་མོང་གི་ཚད་མས་མ་རྟོགས་པར་གདམས་པའོ། །དང་པོ་ནི།

ལང་ཀའི། ཞེས་པ་ནས། ཡང་དག་གསང་བའི་ལམ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་བཅོམ་ལྡན་འདས་དེས། འདུས་པ་ཆེན་པོའི་ཚོགས་རྣམས་ལ་བཀའ་སྩལ་པ། འདུས་པ་ཆེན་པོའི་ཚོགས་འདི་ལྟ་སྟེ། རྒྱུད་དེ་གྲགས་པས་གང་སྤྱོད་པ། །གསང་སྔགས་གསང་བའི་ངོ་བོ་འདི།།

ཇི་ལྟར་དེ་ལྟར་གཏན་ལ་དབབ། །འདི་ནི་ཡང་དག་གསང་བའི་ལམ།།

ལང་ཀའི་བདག་པོ། ཞེས་གསང་བ་པས་སྡུད་པ་པོ་ལ་བོས་ནས། ལོ་རྒྱུས་སུ་བརྗོད་པའི་སྒོ་ནས། བཅོམ་ལྡན་འདས་གསང་བ་མཆོག་གི་བདག་པོ་དེས། འདུས་པ་ཆེན་པོའི་ཚོགས་ལ་བཀའ་སྩལ་པ། འཁོར་འདུས་པ་ཆེན་པོའི་ཚོགས་རྣམ་འདི་ལྟ་སྟེ། བཤད་པ་ལྟར་རྒྱལ་བ་རྣམས་ལ་དགོངས་པས་བརྒྱུད་དེ་ཆོས་ཀྱི་རྒྱལ་པོས་རྒྱལ་ཚབ་ལ་བསྟན་པ་ལས་རིམ་པར་ལྷ་མི་སྐལ་པ་ལྡན་པ་རྣམས་ལ་གྲགས་པར་གྱུར་པས་ཐེག་མཆོག་གསང་ཆེན་དམ་པ་གང་ལ་གཞུང་དུ་བྱེད་པའི་རྣལ་འབྱོར་པས་ལེགས་པར་སྤྱོད་པ་གསང་སྔགས་གསང་བའི་སྙིང་པོ་འདི་ཡི་དགོངས་དོན་རང་ལ་གནས་པ་ཇི་ལྟ་བ་བཞིན་དུ་སྔར་སྤྱད་པ་བྱུང་བ་དེ་ལྟར་ད་ལྟ་དེང་གི་དུས་འདིར་ཡང་ལུང་རིགས་མན་ངག་གསུམ་གྱིས་རང་གནས་ཀྱི་ཆོས་ཉིད་ལེགས་པར་གཏན་ལ་དབབ་པར་བྱ་སྟེ། དེ་ལྟ་བུར་སྔར་གསུངས་པ་ལྟར་དོན་ངེས་ནས་སྤྱོད་པ་འདི་ནི་ཡང་དག་གསང་བའི་ལམ་དམ་པ་མ་ནོར་བར་ལེགས་པར་སྤྱད་པ་ཡིན་ནོ།།

གཉིས་པ་ཐུན་མོང་གི་ཚད་མས་མ་རྟོགས་པར་གདམས་པ་ནི།

གང་དུ་ལོག་པའི། ཞེས་པ་ནས། ནུས་པ་མ་ཡིན་ནོ། །ཞེས་པའི་བར་གྱིས་བསྟན་ཏེ།

གང་དུ་ལོག་པའི་ཆོས་རྣམས་དང་། །གསང་སྔགས་གསང་བའི་སྙིང་པོ་གཉིས། །བཏགས་པའི་མིང་གི་སྒྲར་གཅིག་ཕྱིར། །ངེས་པར་བཏགས་ཏེ་ཟིན་པར་བྱ། །ཐེག་པ་ཆེན་པོའི་གསང་སྔགས་འདི། །འཐུན་མཇུག་ཐབས་ཀྱི་སྒྲར་བསྟན་པས། །ཕྱི་རོལ་གཞན་དུ་འགྱུར་སྲིད་ཕྱིར། །ཚིག་དང་སྒྲ་ལ་དོན་མི་གཞག །དམ་པ་རྣམས་ཀྱི་དགོངས་པ་འདི།།

དཔེ་འམ་ཚད་མའམ་གཏན་ཚིགས་སམ། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ནོ།།

གང་དུ་གསང་བ་ཟབ་མོའི་དོན་ལས་གོལ་ཏེ་ལོག་པར་སྤྱོད་པའི་ཆོས་རྣམས་དང་གསང་སྔགས་གསང་བའི་སྙིང་པོ་མ་ནོར་བར་སྤྱོད་པ་༼༡༥༤༽གཉིས་མི་སྤོང་བར་སྤྱོད་པ་ཙམ་དུ་བཏགས་པ་མིང་གི་སྒྲར་བརྗོད་གཅིག་པའི་ཕྱིར་ཤན་འབྱེད་པར་དཀའ་བས་ན་བློས་ལེགས་པར་དཔྱད་ཅིང་ངེས་པར་བརྟགས་ཏེ་དོན་ཁྱད་པར་ཅན་ཉིད་མ་ནོར་བར་མཐོང་ནས་ངོས་ཟིན་པར་བྱའོ། །དེས་ན་ཐེག་པ་ཆེན་པོའི་གསང་སྔགས་འདི་ཡི་ཐབས་ཀྱི་སྤྱོད་པ་ལ་གང་ཡང་མི་སྤོང་བའི་ཚུལ་གྱིས་གདུལ་བྱ་ཇི་ལྟར་དགའ་བ་ལྟར་དུ་མཐུན་འཇུག་གི་ཐབས་ཀྱི་སྒྲར་མོས་པའི་ཕྱོགས་དང་མཐུན་པར་བསྟན་པས། དོན་མ་རྙེད་པར་སྒྲ་བཞིན་དུ་གོ་ན་ཐར་པ་ནག་པོ་ལྟ་བུར་འབྱུང་ཞིང་ཕྱི་རོལ་མུ་སྟེགས་པ་གཞན་དང་ཆ་མཐུན་དུ་གོལ་བར་འགྱུར་སྲིད་པའི་ཕྱིར་གྱིས་གཏན་ཚིགས་དེས་ན། ཚིག་དང་སྒྲ་ནི་དོན་མཚོན་བྱེད་ཡིན་ཀྱང་སྒྲ་ཇི་བཞིན་པ་མིན་པས་དེ་ཙམ་ལ་དོན་གྱི་ངོ་བོ་མི་བཞག་སྟེ། ངེས་པར་གདེང་དུ་མི་བྱའོ། །དེ་ཉིད་གཏན་ཚིགས་ཅིའི་ཕྱིར་ཞེ་ན། རྒྱལ་བ་དམ་པ་རྣམས་ཀྱི་དགོངས་པའི་ཞེ་ཕུགས་གསང་སྔགས་ཇི་བཞིན་པ་འདི་ནི། ངེས་པའི་ལུང་དང་མན་ངག་ལས་ཉམས་ན། བརྗོད་པས་ཐོག་ཏུ་མི་ཕེབས་པས་ཐུན་མོང་དུ་མ་གྱུར་པའི་ཕྱིར་ན། ཐེག་པ་ཐུན་མོང་བ་དག་གིས་མཐུན་པ་དང་མི་མཐུན་པའི་དཔེའམ། དོན་དཔེར་སྦྱོར་བ་དང༌། གཏན་ལ་དབབ་པའི་གཞི་ཡང་མངོན་ལྐོག་གཉིས་སུ་འདུས་པ་ལས་མངོན་སུམ་ཚད་མ་ལ་ཡང་དབང་པོ་དང༌། ཡིད་དང༌། རང་རིག་པ་དང༌། རྣལ་འབྱོར་མངོན་སུམ་དང༌། དེའང་མངོན་སུམ་ཡིན་ལ་རིགས་པ་མ་ཡིན་པ་དང༌། རིགས་པ་ཡིན་ལ་མངོན་སུམ་མ་ཡིན་པ་དང༌། གཉིས་ཀ་ཡིན་པ་དང༌། གཉིས་ཀ་མ་ཡིན་པའམ། རྗེས་སུ་དཔག་པ་ལའང་རྗེས་དཔག་ཡིན་ལ་རིགས་པ་མ་ཡིན་པ་ལ་སོགས་པ་བཤད་པ་དག་གིས་ལྐོག་ཏུ་གྱུར་པ་དང༌། ཤིན་ཏུ་ལྐོག་ཏུ་གྱུར་པ་གཉིས་ལ་དམིགས་པ་དག་དང༌། སྦྱོར་བ་ཚང་བ་དང༌། གཏན་ཚིགས་འབའ་ཞིག་གིས་སྦྱོར་བ་དང༌། མཐུན་པའི་ཕྱོགས་ཉིད་ཅན་གྱིས་སྦྱོར་བ་དང༌། མི་མཐུན་པའི་ཕྱོགས་ཉིད་ཅན་གྱིས་སྦྱོར་བ་དག་གིས་སམ་རྟགས་ཀྱི་སྒོ་ནས་གཏན་ལ་འབེབས་པ་དང༌། རིགས་པ་བཞི་དང་བཅས་པར་ཚུལ་གསུམ་གྱི་རྟགས་ལས་རྗེས་སུ་དཔོག་པའི་སོ་སོར་རྟོག་པའི་ཤེས་རབ་རྣམས་ཀྱིས་ཡུལ་དུ་གཞལ་བས་གསང་སྔགས་ཇི་བཞིན་པའི་ངོ་བོ་རང་གསལ་ཕྱོགས་མེད་ཆེན་པོ་མ་བཅོས་པའི་ཆོས་ཉིད་ཟབ་མོའི་གནས་ལུགས་ཉིད་གོ་ཞིང་རྟོགས་པར་ནུས་པ་མ་ཡིན་ནོ། །འོན་ཀྱང་གཞུང་འདི་ཉིད་ཀྱི་དཔེ་དང་ཚད་མ་ལ་སོགས་པ་མི་འདོད་པ་ནི་མ་ཡིན་ཏེ་སྐབས་ཀྱི་དོན་ལ་མཁས་༼༡༥༥༽ན་མཚོན་བྱེད་ཐབས་ཀྱི་སྒྲོན་མར་འགྱུར་བས་སོ།།

གཉིས་པ་ལོག་པའི་ལམ་བསྟན་པ་ལ་གསུམ་སྟེ། སྤྱིར་མ་རྟོགས་པར་སྤྱོད་ཅིང་བཤད་པའི་སྐྱོན་བསྟན་པ། དེའི་རྣམ་གྲངས་བྱེ་བྲག་ཏུ་ཕྱེ་བ། ཞབས་བསྡུ་བའོ། །དང་པོ་ནི།

དགོངས་དོན་གསང་བའི། ཞེས་པ་ནས། སྡིག་དེ་དེ་བས་ལྕི། །ཞེས་པའི་བར་གྱིས་བསྟན་ཏེ།

དགོངས་དོན་གསང་བའི་སྙིང་པོ་འདི། །གང་གི་བློ་ནི་མ་འབྱོར་བར། །སུ་ཞིག་སྨྲ་བར་བརྩོན་པ་དེ། །མ་སྨྲས་ན་ནི་མི་འཚོའམ་ཅི། །དེ་བཞིན་སྤྱོད་དང་ལྟ་བ་དང་། །བསྒྲུབ་དང་རྟོག་དཔྱོད་བྱེད་པ་རྣམས། །དོན་ལ་ངེས་བློ་མ་རྙེད་པར། །མ་སྤྱད་ན་ནི་ཅི་ཞིག་ཉེས། །ཅི་ཕྱིར་གསང་སྔགས་རྒྱ་མཚོ་འདི། །དཔེར་ན་གང་གིས་སྦྲིད་སངས་བཞིན། །དམ་པའི་བཀའ་ཚིག་དེ་ལའང་། །དོན་ནི་ཐ་དད་དུ་མར་བྱུང་། །དེས་ན་གསང་བ་དམ་པའི་དོན། །མ་རྟོགས་བཞིན་དུ་གང་སྨྲ་བ། །གང་གིས་མཚམས་མེད་ལྔ་བྱས་པས། །ལོག་སྨྲའི་སྡིག་དེ་དེ་བས་ལྕི།།

རྒྱལ་བའི་དགོངས་དོན་མཐར་ཐུག་པ་གསང་ཆེན་གསང་བའི་སྙིང་པོ་འདི་ལ་གང་ཟག་གང་གི་བློ་ནི་མ་འབྱོར་ཏེ་ཡང་དག་པར་མ་རྟོགས་བཞིན་དུ་སུ་ཞིག་གསང་དོན་ཟབ་མོ་འཆད་ཅིང་སྨྲ་བར་བརྩོན་པ་དེ་ནི་ལོང་བས་ལོང་བ་ཁྲིད་པ་ལྟ་བུར་འགྱུར་བས་འདི་ལྟར་མ་སྨྲས་ན་ནི་ཁྱོད་ཉིད་མི་འཚོ་བར་ངེས་པར་འཆིའམ་ཅི་ཞེས་དོན་གྱིས་གདམས་པ་བསྟན་པར་བྱའོ། །དེ་བཞིན་དུ་གསང་སྔགས་ཀྱི་སྤྱོད་པ་བྱེད་པ་དང༌། དོན་ལ་དམིགས་པས་ལྟ་བ་དང༌། ཆེད་དུ་གཉེར་ཞིང་བསྒྲུབ་པ་དང་མི་རྟོག་པའི་ཐབས་ལ་རྟོག་དཔྱོད་བྱེད་པ་རྣམས་ལ་ཡང་གང་ཟག་ཁྱོད་ཀྱིས་དོན་ལ་ངེས་པའི་བློ་གྲོས་མ་རྙེད་པར་ཤེད་མ་བྱེ་བཞིན་དུ་གསང་བ་གོལ་བར་མ་སྤྱད་ན་ནི་ཁྱོད་ལ་ཅི་ཞིག་ཉེས་པར་འགྱུར་ཏེ་གདོད་ནས་མ་ཐོས་ན་ཤིན་ཏུ་དགེ་བ་ཡིན་པས་ལོག་པར་མ་སྤྱོད་ཅིག་པར་གདམས་པའོ། །རྒྱུ་མཚན་ཅི་ཡི་ཕྱིར་ན་གསང་སྔགས་ཟབ་མོའི་དགོངས་དོན་རྒྱ་མཚོ་ལྟ་བུར་གཏིང་དཔག་དཀའ་བ་འདི་ཉིད། དཔེར་ན་སྟོན་པ་བཅོམ་ལྡན་འདས་ཤཱཀྱ་ཐུབ་པ་གང་གིས་སྦྲིད་པ་བསངས་པ་ལས། ནད་པ་དང་སྨན་པ་དང་ཁྱོ་མོ་གསུམ་གྱི་རྣ་བར། རིན་ཆེན་སྲོག་དང་མ་བྲལ་ན། །སྒྱུ་མའི་ནོར་ནི་བཙལ་གྱིས་རྙེད། །ནོར་གྱི་མཆོག་ནི་སྙིང་རྗེ་ཡིན། །ནད་པ་སོས་པས་ཀུན་ཏུ་བྲིན། །ཕྱི་མ་ཅི་འགྱུར་ཆ་མེད་ཀྱིས། །སྔ་མ་དེ་ལ་ནན་ཏན་སྐྱེད། །ཅེས་སོ་སོར་ཐོས་པ་བཞིན་དུ། དམ་པའི་བཀའ་ལུང་ཟབ་མོའི་ཚིག་གཅིག་རེ་རེ་ལའང་བརྡ་དང་དགོངས་པའི་སྐབས་ཀྱིས་དོན་ནི་ཐ་དད་དུ་མར་འབྱུང་ཞིང་སྣ་ཚོགས་སུ་འགྱུར་བས་ཤིན་ཏུ་བརྡ་འཇལ་བར་དཀའོ། །དེས་ན་གསང་སྔགས་གསང་བ་དམ་པའི་དོན་ཉིད་མ་རྟོགས་བཞིན་དུ་གང་བཤད་ཅིང་སྨྲ་བ་དེ་ནི། གང་གིས་མཚམས་མེད་པ་ལྔ་བྱས་པ་བས་ཀྱང་ལོག་སྨྲའི་སྡིག་པའི་ཚད་དེ་དེ་བས་ཀྱང་ལྕི་བ་ཡིན་ཏེ་ལམ་ལོག་པར་བཀོད་པའི་ཕྱིར་རོ།།

གཉིས་པ་དེའི་རྣམ་གྲངས་བྱེ་བྲག་ཏུ་ཕྱེ་བ་ལ་བཅུ་སྟེ། སྲོག་གཅོད་པའི་ཉེས་པ་བསྟན་པ། མ་གོ་བར་བཤད་པའི་ཉེས་པ་བསྟན་པ། སྒྲ་ཇི་བཞིན་པར་སྤྱད་པའི་ཉེས་པ་བཤད་པ། གཞུང་བསླད་པའི་ཉེས་པ་བཤད་པ། སྤྱོད་པ་ལོག་པའི་ཉེས་པ་བཤད་པ། ༼༡༥༦༽ལྟ་བ་ལོག་པའི་ཉེས་པ་བསྟན་པ། དོན་མེད་པར་རང་གི་ལྟ་བ་ལ་མཆོག་ཏུ་འཛིན་པའི་ཉེས་པ་བསྟན་པ། ཚོད་དཔགས་ཙམ་དུ་སྤྱོད་པའི་ཉེས་པ་བཤད་པ། ལུང་མེད་པར་སྤྱོད་པའི་ཉེས་པ་བསྟན་པ། དོན་མ་གོ་བར་བསྒོམ་པའི་ཉེས་པ་བཤད་པའོ། །དང་པོ་ནི།

གསང་བ་ཉིད་ལས། ཞེས་པ་ནས། སྒྱུ་སྤྱོད་དབང་བསྒྱུར་བའོ། །ཞེས་པའི་བར་གྱིས་བསྟན་ཏེ།

གསང་བ་ཉིད་ལས་གོལ་བ་ཡི། །གསང་བར་སྨྲ་བའི་ལོག་སྲེད་ཅན། །གསང་སྔགས་ཆོ་གས་ཟིན་གྱུར་ན། །གང་གིས་འཚོ་བའི་སྲོག་བཅད་ཀྱང་། །དེ་ནི་ཉེས་པར་མི་འགྱུར་ཞེས། །ལོག་པར་ཁ་ལོ་སྒྱུར་བ་འབྱུང་། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །བྲམ་ཟེ་འཚེ་བའི་ལོག་སྲེད་ཅན། །ལོག་སྨྲ་སྒྱུ་སྤྱོད་དབང་སྒྱུར་བའོ།།

གསང་བ་ཕྱོགས་མེད་ཆེན་པོ་གཉིས་ཆོས་དང་ངོས་བཟུང་མེད་པ་ཉིད་ལས་ཕྱོགས་དང་ཟླ་དང་རང་རྒྱུད་དུ་གོལ་བ་ཡི་གང་ཟག་ཤེད་མ་བྱེ་བར་གཞན་ལ་གསང་བར་སྨྲ་བའི་ལོག་པ་ལ་ཞེན་ཆགས་དང་སྲེད་པ་ཅན་དག་གིས། ཚིག་ཏུའང་འདི་སྐད་དུ། གསང་སྔགས་ཀྱི་ཐབས་ཀྱི་ཆོ་གས་བྱ་བས་ཟིན་པར་གྱུར་ན་འགྲོ་བ་གང་གི་འཚོ་བ་སྲོག་གི་དབང་པོའི་རྒྱུན་བཅད་དེ་བསད་ཀྱང་དེ་ནི་སྡིག་པའི་ཉེས་པར་མི་འགྱུར་བས་གསོད་པར་གྱིས་ཤིག་ཅེས་ལམ་ལོག་པར་ཁ་ལོ་སྒྱུར་བ་དེ་འདྲ་དུས་ཕྱིས་ཀྱང་འབྱུང་ངོ༌། །དེ་དག་ཀྱང་སྔར་ཡང་འབྱུང་བའི་ཚུལ་ཇི་ལྟ་བུ་ཞེ་ན། སྔ་བར་འདས་པའི་བསྐལ་པ་བགྲང་ཡས་པ་སྟོན་པ་ཉིད་ཀྱིས་ཀྱང་དྲན་པ་ཐོག་མའི་དུས་ན་སྔོན་བྱུང་བ། སངས་རྒྱས་མངོན་བྱུང་རྒྱལ་པོ་མྱ་ངན་ལས་འདས་པའི་འོག་ཏུ། བྲམ་ཟེའི་རིགས་ཀྱི་ཚུལ་འཆོས་ཀྱི་སྤྱོད་པས་འཚོ་བར་བྱེད་པའི་ལོག་པར་ལྟ་བའི་སྲད་པ་ཅན་རྣལ་འབྱོར་བཟང་རྒྱན་བྱ་བ་དེ་ཡིས་གཞན་ལ་ལོག་པའི་ཆོས་སྨྲ་ཞིང་རང་ཡང་གཡོ་དང་སྒྱུ་ཡིས་སྤྱོད་པས་འཁོར་མང་པོ་ལོག་པའི་ལམ་དུ་དབང་བསྒྱུར་བར་བྱུང་བ་ལྟ་བུར་མ་སྤྱོད་ཅིག་པའོ། །འདི་དག་རྩ་བའི་རྒྱུད་ལས་ཀྱང་གསལ་པོར་འབྱུང་བའི་རྗེས་སུ་བསྙད་པར་བྱའོ།།

གཉིས་པ་མ་གོ་བར་བཤད་པའི་ཉེས་པ་བསྟན་པ་ནི།

གང་འདིར་ལོག་པར། ཞེས་པ་ནས། དེ་མིན་འདྲ་གཞན་སྤྱོད་པའོ། །ཞེས་པའི་བར་གྱིས་བསྟན་ཏེ།

གང་འདིར་ལོག་པར་སྤྱོད་རྒྱས་པས། །ཀུན་ཀྱང་ལོག་པ་ཉིད་ལ་འཇུག །དེ་ལ་གསང་བར་སྒྲ་མཚོན་ན།།

གསང་སྔགས་དེ་ལ་མངོན་སྤྱོད་འབྱུང་། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ།།

གང་དུ་གཞན་འབྱུང་ལོག་སྲེད་ཅན། །དེ་མིན་འདྲ་གཞན་སྤྱོད་པའོ།།

དེ་ཡང་བཤད་པ་ལྟར་གང་འདིར་ལོག་པའི་ལམ་ལ་ཕྱིན་ཅི་ལོག་པར་སྤྱོད་པའང་འཕེལ་ཏེ་རྒྱས་པར་གྱུར་པས། དེ་དང་མཐུན་པའི་རིགས་ཅན་ཀུན་ཀྱང་ཕྱིན་ཅི་ལོག་པ་དེ་ཉིད་ལ་འཇུག་སྟེ། དེ་ལ་མིང་དུ་གསང་བ་དམ་པར་སྤྱོད་པའི་མིང་གི་སྒྲ་ཡིས་མཚོན་ནས་གསང་སྔགས་དེ་ལ་བརྟེན་ནས་མངོན་སྤྱོད་བྱེད་ཅིང་བསྙོན་ཐབས་བླུན་པའི་སྡིག་པ་ཅན་དག་ཀྱང་འབྱུང་ངོ༌། །དེ་ཡང་ཇི་ལྟ་བུ་ཞེ་ན། འདས་པར་གྱུར་པའི་དྲན་པ་ཐོག་མའི་དུས་དེ་ཉིད་ན། བསྐལ་པ་ཀུན་བཀོད་ལ་སངས་རྒྱས་སྔོན་བྱུང་རྒྱལ་པོ་འདས་པའི་ཚེ་སྔོན་བྱུང་བ། བྲམ་ཟེ་དེ་ཉིད་མ་ཡིན་པ་དགེ་སློང་དྲི་མེད་སྤྱོད་པ་ལྟ་བུ་དུས་ཀྱི་དངོས་པོ་༼༡༥༧༽གང་དུ་འགྲོ་བ་གཞན་ཡང་འབྱུང་ནས་ལོག་པར་ལྟ་བའི་སྲེད་པ་ཅན་དུ་གྱུར་ཏེ། གསང་བ་དམ་པ་དེ་ཉིད་དངོས་ཀྱི་སྤྱོད་པ་མིན་པར་ཚུལ་མཚུངས་པར་སྤྱད་པའི་འདྲ་བ་གཞན་འབྱུང་གི་སྤྱོད་ཚུལ་མུ་སྟེགས་པ་དང་ཆ་འདྲ་བ་ལྟ་བུར་ཡང་དག་པ་ལས་ནོར་བར་སྤྱོད་པ་འབྱུང་བའོ།།

གསུམ་པ་སྒྲ་ཇི་བཞིན་པར་སྤྱད་པའི་ཉེས་པ་བཤད་པ་ནི།

གང་དུ་འདི་ལྟར། ཞེས་པ་ནས། སྡུག་བསྔལ་སྤྱི་ཚུགས་པའོ། །ཞེས་པའི་བར་གྱིས་བསྟན་ཏེ།

གང་དུ་འདི་ལྟ་ལོག་པའི་ཆོས། །གསང་སྔགས་དམ་པའི་ཚིག་དང་སྒྲ། །གཅིག་ལ་མི་གཅིག་སོ་སོ་ལ། །རྨོངས་པའི་མུན་པར་གང་སྤྱོད་པ། །སྔགས་པས་བདུད་ཀྱི་ལས་བྱེད་དེ། །ཤི་ནས་དམྱལ་བ་ཆེན་པོར་འགྲོ། །ཅི་ཕྱིར་ལྟ་བས་མི་ཟིན་ཕྱིར། །བདུད་དང་སྲིན་པོའི་སྤྱོད་པ་ལ། །དགའ་མགུར་སྤྱོད་ཅིང་འདོད་དགུར་འཇོལ། །དེ་ལ་བག་ཆགས་ཞེན་པའི་མཐུས། །དམྱལ་ཆེན་འབར་བ་བརྒྱད་ཀྱི་ཡང་། །རྡོ་རྗེ་དམྱལ་བ་ཆེན་པོ་ལྟུང་། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །ལོག་པའི་སྟོབས་ལྡན་ཡ་མཚན་ཅན། །ལོག་ཞེན་སྡུག་བསྔལ་སྤྱི་ཚུགས་པའོ།།

དུས་གང་ཡང་རུང་བ་དག་ཏུ་འདི་ལྟར་ལོག་པར་སྤྱོད་པའི་ཆོས་དང༌། ཐེག་པ་ཆེན་པོ་གསང་སྔགས་དམ་པའི་བཀའ་ལུང་གི་ཚིག་དང་སྒྲ་གཉིས་མིང་དུ་བརྗོད་ཚུལ་གཅིག་ལ་མཚོན་བྱ་དོན་གྱི་རང་བཞིན་མི་གཅིག་པར་སོ་སོར་དུ་མ་འབྱུང་བའི་གཞི་ཡིན་པ་ལ། གཞི་དོན་ལ་རྨོངས་པའི་མུན་པས་སྒྲིབ་ནས་ཡང་དག་པར་མ་རིག་པར་གང་སྒྲ་བཞིན་སྤྱོད་པ་པོ་ནི་སྔགས་ཀྱི་རྣལ་འབྱོར་པ་བདུད་ཀྱི་ལས་ཀྱི་སྤྱོད་པ་བྱེད་པ་ཉིད་དེ། དེ་ཉིད་ཤི་ནས་རྣམ་པར་སྨིན་པ་ནི། དམྱལ་བ་ཆེན་པོ་བརྒྱད་ཀྱི་སྡུག་བསྔལ་མྱོང་བར་སྐྱེ་ཞིང་འགྲོའོ། །གཏན་ཚིགས་ཅིའི་ཕྱིར་ན་རྟོགས་པ་ལྟ་བས་མ་ཟིན་པ་ཁོ་ནའི་ཕྱིར་ཏེ། བདུད་དང་སྲིན་པོའི་སྤྱོད་པ་ལ་རང་དགས་དགའ་མགུར་སྤྱོད་ཅིང་འདོད་རྒུར་འཇོལ་ཉོག་ཏུ་བྱས་ནས་དེ་ལ་བག་ཆགས་ཀྱི་ཞེན་པ་བརྟས་པའི་མཐུས། དམྱལ་ཆེན་འབར་བ་ཚ་གྲང་བརྒྱད་ཀྱི་ཡང་འོག་ཏུ། ཚེ་ཚད་ལས་འདས་པས་སྡུག་བསྔལ་མཆོག་ཏུ་ཆེ་བ་རྡོ་རྗེའི་གཏན་གཏུན་གྱི་སྦྱོར་བས་འཁུན་པར་ཡང་མི་ནུས་པའི་དམྱལ་བ་ཆེན་པོར་ལྟུང་ནས་ཉམ་ཐག་གོ །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ། གསང་སྔགས་ཟབ་མོ་ལས་གོལ་ནས་ལོག་པའི་སྤྱོད་པ་སྟོབས་དང་ལྡན་པ་ལ་གནས་པས་ཡ་མཚན་ཅན་གྱི་གང་ཟག་ལམ་ལོག་པ་ལ་ཞེན་པའི་བག་ཆགས་དྲག་པོས་རྣམ་སྨིན་སྡུག་བསྔལ་ཅན་དུ་སྤྱི་ཚུགས་སུ་ལྷུང་བ་ཐར་པ་ནག་པོ་ཉིད་ལྟ་བུའོ།།

བཞི་པ་གཞུང་བསླད་པའི་ཉེས་པ་བཤད་པ་ནི།

ཨེ་མའོ་འགྲོ་བ། ཞེས་པ་ནས། ངན་པས་དེ་ཉིད་བསླད། །ཅེས་པའི་བར་གྱིས་བསྟན་ཏེ།

ཨེ་མའོ་འགྲོ་བ་རྣམས་མི་གྲོལ། །ཅི་ཕྱིར་འོང་བའི་དུས་རྣམས་སུ། །གཡོན་ཅན་བཅོས་མའི་གསང་ཚིག་གིས། །དྲི་མེད་གསང་བའི་བསྟན་པ་རྣམས། །དཀྲུགས་འགྱུར་བཀའ་བསླད་གཞུང་བོར་ནས། །དོན་མེད་ལོག་ཆོས་རྒྱས་པར་འགྱུར། །གཞན་ནས་བྱུང་བ་མ་ཡིན་ཏེ། །རྩ་བ་ཉིད་ལས་གྱུར་པར་ཟད། །དེ་ཡང་ཇི་ལྟ་བུ་ཞེ་ན།།

འདས་པའི་དུས་ན་སྔོན་བྱུང་བ། །འདི་བར་མ་གྱུར་བསླད་པ་ཅན། །དེ་རྒྱུད་ངན་པས་དེ་ཉིད་སླད།།

ལོག་པས་ལོག་པར་བསྒྱུར་བས་ལྟུང་བ་ལ་ངོ་མཚར་བས་དམ་སྟེ། ཨེམའོ་ཞེས་པས་དྲངས་ནས། ཕྱིན་ཅི་ལོག་ཏུ་འཛིན་པས་བཅིངས་པའི་འགྲོ་བ་སེམས་ཅན་འཇིག་རྟེན་དུ་འབྱུང་བ་རྣམས་ནི་ནམ་ཡང་མི་གྲོལ་ཏེ། གཏན་ཚིགས་ཅི་ཡི་ཕྱིར་ཞེ་ན། དེ་ལྟ་བུ་མ་འོངས་པ་ན་འབྱུང་བར་འགྱུར་བའི་དུས་རྣམས་སུ། གང་ཟག་གཡོན་ཅན་ལོག་པའི་བློ་དང་ལྡན་པ་དག་གིས་དོན་མ་ནོར་བར་བསྒྱུར་ནས་ཚུལ་འཆོས་དང་བཅོས་མའི་གསང་ཚིག་གིས་སྒྲ་༼༡༥༨༽བཞིན་དུ་བཤད་པ་འདིའང་སྒྲོ་སྐུར་མེད་པའི་དྲི་མེད་གསང་བའི་བསྟན་པ་ཡང་དག་པ་ཡིན་ནོ་ཞེས་རང་གིས་འཛིན་ཞིང་གཞན་ལ་སྟོན་པ་རྣམས་ནི། གསང་བ་ཟབ་མོའི་ཆོས་རྣམས་དཀྲུག་པར་འགྱུར་ཞིང་བཀའ་ལ་ལོག་པར་བསླད་པས་སེལ་ཞུགས་ཏེ་མ་ནོར་བའི་གཞུང་བོར་ནས་ཡང་དག་པའི་དོན་མེད་པའི་ལོག་པའི་ལམ་དུ་འཕྱན་པའི་ནོར་བའི་ཆོས་མང་པོ་འཕེལ་ཞིང་རྒྱས་པར་འགྱུར་ལ། དེའི་རྒྱུ་ཡང་གཞན་ནས་འབྱུང་བ་མ་ཡིན་ཏེ། གསང་སྔགས་མཆོག་གི་གནད་ཟབ་མོ་ཁོང་དུ་མ་ཆུད་པའི་རྩ་བ་ཉིད་ལས་གྱུར་པར་ཟད་དོ། །དེ་ཡང་ཇི་ལྟ་བུ་ཞེ་ན། བསྐལ་པ་གྲངས་མེད་པ་འདས་པའི་དུས་ན་སྔོན་དུ་བྱུང་བ་ཡི་རྣལ་འབྱོར་དཔའ་སྦྱིན་པ་ལྟ་བུ། གསང་སྔགས་མ་ནོར་བའི་ཕྱོགས་འདི་པར་མ་གྱུར་པར་ལོག་པས་བསླད་པ་ཅན་གྱི་སེལ་དང་ལྡན་པ་དེ་ཡིས་རང་གི་ཤེས་རྒྱུད་ངན་པར་ཞུགས་ཏེ་སྨད་པར་བྱས་པས་རང་སེམས་དེ་ཉིད་བསླད་དེ་ལྟ་སྤྱོད་ལོག་པའི་སྐྱོན་ཅན་དུ་སོང་བའོ།།

ལྔ་པ་སྤྱོད་པ་ལོག་པའི་ཉེས་པ་བཤད་པ་ནི།

ང་ཡི་ཡིད་བཞིན། ཞེས་པ་ནས། ལོག་སྡེ་དྲུག་བརྒྱུད་པའོ། །ཞེས་པའི་བར་གྱིས་བསྟན་ཏེ།

ང་ཡི་ཡིད་བཞིན་ནོར་བུ་འདི། །ཅིར་ཡང་བསྟན་པ་དཔག་དཀའི་ཕྱིར། །མ་འོངས་དུས་ཀྱི་ལོག་སྤྱོད་ཀྱིས།།

ལོག་བརྟགས་ལོག་སྡེ་མང་པོ་བྱུང་། དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ།།

ལམ་ལོག་ལམ་སྟོར་ལམ་ཉེས་པ། །ལོག་ཞེན་ལོག་སྡེ་དྲུག་བརྒྱུད་པའོ།།

སྟོན་པ་ང་ཡི་བཀའ་དྲི་མ་མེད་པ་ཡིད་བཞིན་ནོར་བུ་ལྟ་བུའི་གསང་སྔགས་ཟབ་མོ་འདི་ཉིད་སྤྱོད་པ་ཐབས་ཀྱི་འཇུག་སྒོ་ཅིར་ཡང་སྟོན་ལ་ལྟ་བ་ཟབ་མོའི་གནས་ལུགས་བློས་རྟོགས་ཤིང་དཔག་པར་དཀའ་བའི་ཕྱིར་ཀྱི་གཏན་ཚིགས་དེས་ན། ཕྱིས་མ་འོངས་པའི་དུས་ཀྱི་ཚེ་ན་ཡང་ལོག་པར་སྤྱོད་པ་སྣ་ཚོགས་ཀྱིས་གནས་ཤིང་དོན་ངེས་པར་མ་མཐོང་བས་ལོག་པར་བརྟགས་པའི་སྒོ་ནས་ནོར་བ་ལ་ཞེན་པས་དེའི་གཞུང་འཛིན་པའི་ལོག་པར་གོལ་བའི་སྡེར་ལོངས་པ་མང་པོ་འབྱུང་སྟེ་དུས་དེ་ཙམ་གྱི་ཕྱི་དུས་ཡིན་ནོ། །དེ་ཁོ་ན་ཡང་སོ་སོའི་སྡེ་མ་འདྲེས་པར་བསྟན་པ་གང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་དེར་གསང་བ་དམ་པའི་ལམ་བརླག་ནས་ལོག་པར་གྱུར་པ་ཡང་དག་པའི་ལམ་སྟོར་བས་གོལ་སར་ལྟུང་ཞིང་ལམ་ཤིན་ཏུ་ལོག་པར་འཕྱན་པའི་ཉེས་པ་ལ་ཞུགས་པ་མུ་སྟེགས་ཀྱི་རིགས་ཅན་ཕྱིན་ཅི་ལོག་ལ་ཆགས་ཤིང་ཞེན་པའམ། ལོག་པའི་སྡེ་པ་དེ་དང་ཕྱོགས་མཐུན་པའི་ཚན་པ་གཅིག་ལའང་དྲུག་སྟེ། གསང་བ་ཟབ་མོའི་དོན་མ་མཐོང་བས་ཚུལ་དེ་ལྟར་བརྒྱུད་ཅིང་ལོག་པར་ཞེན་པ། རྒྱལ་བྱེད་ཚལ་གནས་ཀྱི་སྡེ་དང༌། འཇིགས་བྱེད་རིགས་གནས་ཀྱི་སྡེ་དང༌། གཙུག་ལག་ཁང་ཆེན་གྱི་སྡེ་དང༌། མཐར་སྒྲོགས་རིག་བྱེད་ཀྱི་སྡེ་དང༌། ས་སྲུང་པ་བའི་སྡེ་དང༌། གནས་མ་བུའི་སྡེ་དང་དྲུག་གོ །ཕྱོགས་ལོག་པར་གྱུར་པ་ལའང་དྲུག་སྟེ། སོ་སོ་ཐ་དད་རྒྱུར་ལྟ་ལ་ཁྲུས་དང་གཙང་སྦྲ་སྤྱད་པས་དག་པར་ལྟ་བ་༼༡༥༩༽དང༌། འཚོ་བ་བཅོས་པས་དག་པར་ལྟ་བ་དང༌། རྒྱུན་དུ་ལྷམ་དང་གོས་བཅོས་པས་དག་པར་ལྟ་བ་དང༌། སྐྲ་སྤུ་བཅོས་པ་དག་པར་ལྟ་བ་དང༌། རུས་པའི་རྒྱན་ཅན་སོགས་ཀྱིས་དག་པར་ལྟ་བ་དང༌། དཀའ་ཐུབ་རྟེན་པ་དྲག་པོས་དག་པར་ལྟ་བའི་ལོག་སྡེ་ཕྲག་གཅིག་སྟེ། ལེའུ་རེ་བརྒྱད་པ་ལས། རྒྱུར་ལྟ་སྤྱད་པས་དག་པར་ལྟ། །འཚོ་བ་བཅོས་པས་དག་ལྟ་དང༌། །རྒྱུན་ལས་ལྷམ་དང་གོས་བཅོས་པ། །སྐྲ་སྤུ་བཅོས་དང་རྒྱན་ཅན་དང༌། །དཀའ་ཐུབ་རྟེན་པ་36དྲུག་པོའོ། །ཞེས་སོ།།

དྲུག་པ་ལྟ་བ་ལོག་པའི་ཉེས་པ་བསྟན་པ་ནི།

གང་ལ་ལོག་ཞེན། ཞེས་པ་ནས། ནག་པོ་ཀུན་རྨོངས་པའོ། །ཞེས་པའི་བར་གྱིས་བསྟན་ཏེ།

གང་ལ་ལོག་ཞེན་ལོག་དབང་གིས། །ལོག་བློས་ལོག་མཐོང་གཙོར་བཟུང་ནས། །ལྟ་སྒོ་ཀུན་ཏུ་མི་འཇུག་ཅིང་། རྨོངས་པའི་ལྟ་བ་བརྟན་པར་གནས། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ།།

ལོག་ལྟ་གཅིག་ཏུ་ཞེན་སེམས་པ། །ཆར་ཀ་ནག་པོ་ཀུན་རྨོངས་པའོ།།

ཤེས་བྱ་གང་ཡང་རུང་བ་དག་གི་བྱེ་བྲག་ལ་ཕྱིན་ཅི་ལོག་ཏུ་ཞེན་ཏེ་མངོན་པར་ཆགས་པས་རྒྱུད་ལོག་པར་འཕྱན་པའི་དབང་གི་ལོག་པར་གྱུར་པའི་བློས་ལོག་པར་མཐོང་བ་དེ་ཉིད་ལྟ་བའི་གཙོ་བོར་བཟུང་ནས་ཡང་དག་པའི་ཤེས་རབ་ཀྱིས་མ་ནོར་བའི་ལྟ་བུ་སྒོ་རྣམས་ཀུན་ལ་མི་འཇུག་ཅིང་ངེས་པའི་སེམས་དང་བྲལ་ཏེ་མ་རིག་རྨོངས་པའི་ལྟ་བ་ལ་བརྟན་པར་གནས་ཏེ་མི་འགྱུར་བའོ། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་དེའི་ཚུལ་འཛིན་པའི་དུས་དེར་ལོག་པར་ལྟ་བ་གཅིག་ཏུ་མངོན་པར་ཞེན་ནས་ཕྱིན་ཅི་ལོག་ལ་འཆལ་བར་སྤྱོད་པའི་སེམས་དཔའ་བ་ཆར་ཀ་ཐར་པ་ནག་པོ་ཀུན་ནས་རྨོངས་པར་གྱུར་པའོ། །དེས་ན་བཤད་པའི་དུས་དང་འཆད་པ་རྣམས་བསྐལ་པ་ཀུན་དགའ་ལྟ་བུར་བྱུང་བའང་རིགས་སོ།།

བདུན་པ་དོན་མེད་པར་རང་གི་ལྟ་བ་ལ་མཆོག་ཏུ་འཛིན་པའི་ཉེས་པ་བསྟན་པ་ནི།

གང་འདིར་བཅིངས་པ། ཞེས་པ་ནས། གཅིག་པུར་སྤྱོད་པའོ། །ཞེས་པའི་བར་གྱིས་བསྟན་ཏེ།

གང་འདིར་བཅིངས་པ་ལྔས་བཅིངས་ནས། །རང་གི་ཆེ་བའི་ཐབས་བཟུང་སྟེ། །རྟོག་དཔྱོད་ཙམ་ཡང་མི་འཇུག་པ། །གླང་ཆེན་མྱོས་པ་རྨོངས་འདྲ་འབྱུང་། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ།།

བདག་ཉིད་གཅིག་བུར་ཆོས་སྨྲ་བ། །ལོག་ཕྱོགས་གཅིག་པུར་སྤྱོད་པའོ།།

གང་གི་དུས་འདིར་ཡང་ཐར་པ་ནག་པོ་དེ་ཉིད་ཉོན་མོངས་པའི་ཞགས་པས་བཅིང་པ་ལྔས་བཅིངས་ཤིང་བསྡམས་ནས། རང་གི་ཆེ་བའི་ང་རྒྱལ་གྱི་ས་ལ་གནས་པའི་ཐབས་བཟུང་སྟེ། བསམ་པའི་ཤེས་རབ་ཀྱི་རྟོག་དཔྱོད་ཙམ་ཡང་བརྟེན་ཏེ་མི་འཇུག་པར་མ་རིག་པས་ནོན་པ་ནི། གླང་ཆེན་ཆང་གིས་མྱོས་པ་ཀུན་ནས་རྨོངས་པ་དང་འདྲ་བར་བྱུང་བའོ། །སྤྱིར་ལོག་པར་སྤྱོད་པ་ལ། ཡེ་ནས་ལོག་པར་སྤྱོད་པ་དང༌། ཤེས་བཞིན་ལོག་པར་སྤྱོད་པ་གཉིས་ལས། སྔ་མ་དམུས་ལོང་དང་འདྲ་ཞིང༌། ཕྱི་མ་རྐྱེན་གྱིས་ལོང་བ་དང་འདྲ་བ་ལས། འདི་ནི་དང་པོ་ཡིན་ནོ། །དེ་ཡང་དེའི་ཚུལ་ནི་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་ཡི་བསྐལ་པ་དེ་ལ། བདག་ཉིད་གཅིག་པུར་ཆོས་སྨྲ་བ་ཉིད་དུ་བཟུང་ནས། ང་ལས་བཙན་པ་དང་ཆེ་བ་མེད་པར་ང་རྒྱལ་བས་གཞན་ལ་ལོག་པའི་ཆོས་༼༡༦༠༽བསྟན་པས་ལོག་པར་ཕྱོགས་པའི་སྡེ་པ་མང་པོས་ནག་པོ་གཅིག་པུར་སྤྱོད་པའོ།།

བརྒྱད་པ་ཚོད་དཔགས་ཙམ་དུ་སྤྱོད་པའི་ཉེས་པ་བཤད་པ་ནི།

གང་དུ་དམུས་ལོང༌། ཞེས་པ་ནས། མཆོག་འཛིན་ལྔ་སྡེ་པའོ། །ཞེས་པའི་བར་གྱིས་བསྟན་ཏེ།

གང་དུ་དམུས་ལོང་ལམ་ཞུགས་པ། །ཡིད་ཀྱིས་གོམས་པའི་ཚད་དཔག་ནས། །ཉམ་ངའི་ལམ་དུ་རྒྱུག་པ་ལྟར།།

ཚོད་དཔགས་ཙམ་ལ་གཙོར་འཛིན་བྱུང་། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ།།

གང་དུ་མུན་པས་ཟིན་པ་ཡི། །བརྟུལ་ཞུགས་མཆོག་འཛིན་ལྔ་སྡེ་པའོ།།

དུས་དང་གནས་གང་དུ་དཔེར་ན་མ་ལྟོ་ནས་ལོང་བས་དམུས་ལོང་ཞིག་ལམ་ཞུགས་ཏེ་སོང་བ་ན། དཔྱོད་པའི་ཡིད་ཀྱིས་གོམས་པའི་ཚད་ལ་དཔག་ནས་འདོར་བར་བྱས་ན་ཡང་ཉམ་ངའི་ལམ་དུ་རྒྱུག་ཅིང་གཡང་སར་ལྷུང་བ་ལས་མེད་པ་ལྟར་དུ། གསང་སྔགས་གསང་བའི་དོན་མ་རྟོགས༌པར་ངན་དཔྱོད་ཀྱིས་ཚོད་དཔག་ཙམ་ལ་གཙོ་ཆེར་འཛིན་ཅིང་སྤྱོད་པ་མཆོག་ཏུ་བྱེད་པ་འབྱུང་བས་གོལ་སར་འཕྱན་པའོ། །དེ་ཡང་ཚུལ་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་དེ་ཉིད་དུ་གང་དུ་མ་རིག་པའི་མུན་པས་ཟིན་ཅིང་བསྡམ་པ་ཡིས་ལྟ་བ་ལ་གནས་པ་བརྟུལ་ཞུགས་མཆོག་འཛིན་ལྔ་སྡེ་པ་ཡང་བྱུང་སྟེ་རྒྱལ་པོ་པྲ་མ་ན་ལྟ་བུ་ཡང་གཟུང་བར་བྱའོ། །དེའང་དགེ་འདུན་ཕལ་ཆེན་པའི་སྡེ་པ་ལས་ལྔར་གྱེས་ཏེ། ནུབ་ཀྱི་རི་བོའི་སྡེ་དང་ཤར་གྱི་རི་བོའི་སྡེ་དང༌། གངས་རིར་གནས་པའི་སྡེ་དང༌། རྟག་པར་སྨྲ་བའི་སྡེ་དང༌། འཇིག་རྟེན་འདས་པའི་སྡེ་དང་ལྔའོ། །ཕྱོགས་ལྟོས་དཔྱོད་པ་གསང་བ་ཆེན་པོའི་ཞར་ལས་བྱུང་བ་བརླང་པོའི་བརྟུལ་ཞུགས་སྤྱོད་པ་སྟེ། གཞི་ཚུལ་ཁྲིམས་དག་བརྟུལ་ཞུགས་མཆོག་ཏུ་འཛིན་པ་ལས་གྱེས་པ་འཇིག་ཚོགས་ལ་ལྟ་བ། མཐར་འཛིན་པ། ལོག་པར་འཛིན་པ། ལྟ་བ་ཁྱད་པར་ཅན། རང་གི་བརྟུལ་ཞུགས་མཆོག་ཏུ་འཛིན་པ་སྡེ་ལྔ་སྟེ། འཇིག་པའི་ཚོགས་དང་མཐར་འཛིན་དང༌། །ལོག་པར་འཛིན་དང་ལྟ་ཁྱད་ཅན། །རང་གིས་བརྟུལ་ཞུགས་མཆོག་འཛིན་ཏེ། །རིས་ནི་མཐུན་པས་སྡེ་ལྔར་གྲགས། །ཞེས་སོ།།

དགུ་པ་ལུང་མེད་པར་སྤྱོད་པའི་ཉེས་པ་བསྟན་པ་ནི།

ལུང་མེད་རྣལ་འབྱོར། ཞེས་པ་ནས། སྨྲ་བ་བཞི་སྡེ་པའོ། །ཞེས་པའི་བར་གྱིས་བསྟན་ཏེ།

ལུང་མེད་རྣལ་འབྱོར་བསྒོམ་པ་དང་། །ཆོས་མེད་ཆོས་སུ་སྨྲ་བ་དང་། །སྡིག་ཅན་སྨོན་པའི་བརྟུལ་ཞུགས་ལ།།

དཔའ་བརྟུལ་སྤྱོད་པ་ཆེར་སྤྱོད་བྱུང་། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ།།

གང་གི་ཚད་མས་མ་གཞལ་བའི། །མུ་ཆོར་སྨྲ་བ་བཞི་སྡེ་པའོ།།

ཡང་དག་ངེས་པའི་ལུང་མེད་པར་ཏིང་ངེ་འཛིན་གྱི་རྣལ་འབྱོར་སྒོམ་པར་བྱེད་པ་དང༌། རང་ལམ་ཡང་དག་པའི་ཆོས་མེད་པས་ཤེད་མ་བྱེ་བར་གཞན་ལ་ཆོས་སུ་སྨྲ་ཞིང་སྒྲོགས་པར་བྱེད་པ་དང་ལོག་པར་སྤྱོད་པའི་རྩབ་ཧྲལ་གྱི་སྡིག་པ་ཅན་སྨྱོན་པའི་བརྟུལ་ཞུགས་ལ་གནས་པ་དཔའ་བརྟུལ་གྱི་སྤྱོད་པ་ལ་གཙོ་ཆེར་སྤྱོད་པ་དུ་མ་ཡང་འབྱུང་སྟེ། དེ་ཡང་ཚུལ་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་ཡི་དུས་དེར་ཡང་གང་གིས་ལུང་དང་རིགས་པ་ཚད་མས་མ་གཞལ་ཏེ་ལེགས་པར་མ་བརྟགས་པའི་བྱུང་རྒྱལ་མུ་ཅོར་དུ་སྨྲ་བའི་ནང་རིས་བཞི་སྡེ་བྱུང་བ་སྟེ་དགེ་སློང་སྡེ་བྱིན་ལྟ་བུ་ཡང་གཟུང་བར་བྱའོ། །དེ་ཡང༌༼༡༦༡༽ཐམས་ཅད་ཡོད་པར་སྨྲ་བའི་སྡེ་དང༌། དགེ་འདུན་ཕལ་ཆེ་བའི་སྡེ་དང༌། གནས་བརྟན་པའི་སྡེ་དང༌། ལེགས་དཔོགས་པའི་སྡེ་དག་གོ །ལོག་ཕྱོགས་པའང༌། གང་དུ་ཤེས་པ་ཡོད་སྨྲ་ལྟ། །དེ་བཞིན་མེད་པར་ལྟ་བ་དང༌། །འདི་གང་འདི་ལས་གྱུར་ལྟ་བ། །གང་དུ་ཡོད་མིན་མེད་མིན་ལྟ། །བདག་ཤི་ཚེ་འདི་མྱ་ངན་འདས། །ཞེས་ཏེ། གསུམ་པ་དང་ལྔ་པ་གཅིག་ཏུ་བརྩིའོ།།

བཅུ་པ་དོན་མ་གོ་བར་བསྒོམ་པའི་ཉེས་པ་བཤད་པ་ནི།

དོན་མེད་འདུག་ལ། ཞེས་པ་ནས། འཇུག་པ་བདུན་སྡེ་པའོ། །ཞེས་པའི་བར་གྱིས་བསྟན་ཏེ།

དོན་མེད་འདུག་ལ་བརྩོན་པ་དང་། །ལུགས་མ་ལ་སོགས་གཟུགས་བརྙན་དག།

དམིགས་པའི་མཚན་མར་འཛིན་པ་ཡི། །གང་དུ་རགས་པའི་རི་བོ་བྱུང་།།

དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ།།

གང་དུ་རྒྱུ་བ་ཀུན་བཀག་པ། །མཉམ་པར་འཇུག་པ་བདུན་སྡེ་པའོ།།

དུས་རྟག་ཏུ་དགོན་པའི་གནས་སུ་དོན་རྟོགས་པའི་གདེངས་མེད་པར་ཡལ་བར་འདུག་པ་ལ་བརྩོན་ཞིང་གྲིམས་པ་དང༌། གསེར་དངུལ་གྱི་ལུགས་མ་དང་འཇིམ་པ་ལ་སོགས་པའི་གཟུགས་བརྙན་དག་ལ་དེ་ཉིད་དུ་ཞེན་ནས་ཡང་དག་པའི་ཐབས་ཀྱིས་མ་ཟིན་པར་དམིགས་པའི་མཚན་མར་འཛིན་པ་ཡི་བློ་གང་དུ་ཀུན་རྟོག་རགས་པའི་རི་བོ་ལྟར་དུ་བསྒྱུར་དཀའ་བ་དག་ཀྱང་འབྱུང་བར་འགྱུར་རོ། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་དེ་ཉིད་དུ་ཡང༌། གང་དུ་རྣམ་པར་ཤེས་པ་ཚོགས་ལྔའི་སྒོ་ཡི་རྒྱུ་བ་ཀུན་བཀག་པའི་སྒོ་ནས་ནང་དུ་བསྡུས་ཏེ་མཉམ་པར་འཇོག་ཅིང་ལོག་པའི་ཏིང་ངེ་འཛིན་ལ་འཇུག་པར་བྱེད་པ་རིས་བདུན་གྱི་སྡེ་པར་གྱུར་པ་བྱུང་བའོ། །དེའང་ཐམས་ཅད་ཡོད་པར་སྨྲ་བ་ལས་བདུན་དུ་གྱེས་ཏེ། གཞི་ཐམས་ཅད་ཡོད་པར་སྨྲ་བའི་སྡེ་དང༌། འོད་སྲུངས་པའི་སྡེ་དང༌། མང་སྟོན་པའི་སྡེ་དང༌། ཆོས་སྲུང་པའི་སྡེ་དང༌། མང་དུ་ཐོས་པའི་སྡེ་དང༌། གོས་དམར་བའི་སྡེ་དང༌། རྣམ་པར་ཕྱེ་སྟེ་སྨྲ་བའི་སྡེ་རྣམས་བྱུང་བའོ། །ཡང་ན་བདག་གིར་ལྟ་བ་གཞན་ལས་གྱུར་པ་སྡེ་ལྔ་དང་བདག་ཏུ་ལྟ་བ་འདི་ལས་གྱུར་པ་སྡེ་གཉིས་དང་བདུན་ཏེ། བཅོས་མ་གཞན་ལས་གྱུར་པ་དང༌། །འདི་ལས་གྱུར་པ་གཉིས་ཁོ་ན། །ཞེས་སོ། །དེའང་སྔ་མ་ནི། གནས་ལ་བདག་གིར་འཛིན་པ། འཁོར་ལ་བདག་གིར་འཛིན་པ། ཡོ་བྱད་ལ་བདག་གིར་འཛིན་པ། ནོར་ལ་བདག་གིར་འཛིན་པ། ལོངས་སྤྱོད་ལ་བདག་གིར་འཛིན་པ་ལྔ་སྟེ། གནས་དང་འཁོར་དང་ཡོ་བྱད་ནོར། །ལོངས་སྤྱོད་ལྔ་ལྡན་གཞན་ལས་གྱུར། །ཞེས་སོ། །ཕྱི་མ་ནི་རྟག་ཆད་གཉིས་ཏེ། དེའང་དྲན་པ་རྟག་པར་ལྟ་བ༌། ལྟོས་འཛིན་རྡུལ་མུན་སྙིང་སྟོབས་ཀྱི་འགྱུར་བ་རང་བཞིན་གྱི་རྒྱུར་རྟག་པར་ལྟ་བ། རྒྱུ་འབྲས་མེད་པའི་མཐར་ལྟ་བ། དེ་རང་ཡང་མཐའ་མེད་པར་ཤེས་ཏེ་སྟོང་པ་ཁོ་ནར་ལྟ་བ། ཀུན་ནས་མི་གཡེང་བར་མི་རྟོག་པ་བསྒོམ་པ་བསམ་གཏན་རྟག་པར་ལྟ་བ་སྟེ། དྲན་པ་རྟག་ལྟ་༼༡༦༢༽ལྟོས་འཛིན་རྒྱུ། །མེད་པའི་མཐའ་དང་མཐའ་མེད་ཤེས། །ཀུན་ནས་རྣམ་པར་མི་གཡེང་ལྟ། །ཞེས་པ་རྣམས་ལེའུ་རེ་བརྒྱད་པའི་ཞར་བྱུང་ལས་གསལ་བར་སྟོན་ནོ།།

གསུམ་པ་ཞབས་བསྡུ་བ་ནི།

སྦས་པའི་དོན་རྣམས། ཞེས་པ་ནས། གསང་བ་མཆོག་དེས་བཤད། །ཅེས་པའི་བར་གྱིས་བསྟན་ཏེ།

སྦས་པའི་དོན་རྣམས་སྒྲར་བསྒྱུར་ནས། །སྤྱོད་ཁོངས་ཙམ་དུ་བྱེད་པ་རྣམས། །སྟེང་དུ་མི་འབབ་གོལ་སར་འགྲོ།།

སྐུ་གསུང་ཐུགས་ཀྱི་སླུ་བྱེད་ཡིན། །ལངྐའི་བདག་པོ་དེ་ལྟར་ན། །དེ་སྐད་གསང་བ་མཆོག་དེས་བཤད།།

ཐུན་མོང་མིན་པའི་སྤྱོད་པ་གསང་བར་བྱས་པ་གང་ཞིག་སྒྲ་ཇི་བཞིན་མ་ཡིན་པར་སྦས་ཏེ་བརྡ་དང་ཟུར་གྱིས་སྟོན་པར་མཛད་པའི་དོན་གྱི་གསང་བ་རྟོགས་དཀའ་བ་རྣམས་རག་ཐད་ཀྱི་སྒྲར་བསྒྱུར་ནས་རྟོག་ཅིང་དཔྱོད་པའི་བློ་ཡིས་ཚོད་ཡོད་དུ་གཞལ་བའི་ཁོངས་ཙམ་དུ་བྱེད་ཅིང་སྨྲ་བ་རྣམས་ཀྱིས་ཇི་བཞིན་པའི་སྟེང་དུ་མི་འབབ་པས་ཡང་དག་པར་གཏན་ལ་མི་ཕེབས་ཏེ་ལོག་པའི་གོལ་སར་འགྲོ་བར་འགྱུར་བས་ན། རྒྱལ་བ་རྫོགས་པའི་སངས་རྒྱས་ཀྱི་སྐུ་གསུང་ཐུགས་ཀྱི་རྡོ་རྗེ་གསུམ་མི་ཐོབ་པར་འཁྲུལ་པར་འཕྱན་པའི་བསླུ་བྱེད་ཆེན་པོ་ཡིན་ནོ། །ལང་ཀའི་བདག་པོ་ཞེས་སྡུད་པ་པོ་ལ་བོས་ན་བསྟན་པ་དེ་ལྟར་ན་སྔོན་ཡང་དེ་སྐད་དུ་སྟོན་པ་གསང་བ་མཆོག་དེས་བཤད་ཅིང་བཀའ་སྩལ་ཏོ། །ཞེས་གསང་བ་ལས་བསྙད་པར་མཛད་དོ།།

གཉིས་པ་གཏན་ལ་དབབ་ཕྱིར་ན་དྲི་ལན་བཤད་པ་ལ་གཉིས་ཏེ། དྲིས་པ་དང༌། ལན་བཤད་པའོ། །དང་པོ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

གཞན་ཡང་ཐབས་ལྡན། ཞེས་པ་ནས། གལ་དུ་དྲི་བ་དྲིས། །ཞེས་པའི་བར་གྱིས་བསྟན་ཏེ།

གཞན་ཡང་ཐབས་ལྡན་འདི་ལྟ་སྟེ། །དེ་ནས་འཁོར་དེར་འདུས་གྱུར་པའི། །རྣལ་འབྱོར་ཐེག་པ་

མཆོག་སྤྱོད་པ། །ཚངས་པའི་འོད་ཅེས་བྱ་བ་ལ། །གང་དེར་མོས་པ་ཆུང་སྤྱོད་པའི།།

རྣལ་འབྱོར་གྲགས་ལྡན་ཞེས་བྱ་བས། །འདི་སྐད་གལ་དུ་དྲི་བ་དྲིས།།

གཞན་ཡང་གོལ་བ་མི་མཐུན་པའི་གེགས་སེལ་བཤད་པ་ནི། བློ་གྲོས་ཐབས་ལྡན་ལང་ཀ་ལ་གསང་བདག་གིས་བོས་ནས་འདི་ལྟ་སྟེ་ཞེས་ཉེ་བར་བསྟན་པ་ནི། སྐབས་ཀྱི་ཚིག་གི་འབྲེལ་བའང་དུས་དེར་སྟོན་པས་གསུངས་མ་ཐག་པར་འཁོར་གྱིས་རྣལ་འབྱོར་གཉིས་ཀྱིས་རྩོད་པ་སྟོན་པའི་ཕྱིར་གོང་དུ་སྙེགས་པ་དང་འོག་མའི་འདྲེན་པའོ། །དེ་ནས་སྟོན་པ་རྡོ་རྗེ་སྲིན་པོ་དེ་ཉིད་ཀྱི་འཁོར་དེར་གཏོགས་ཤིང་འདུས་པར་གྱུར་པའི་རྣལ་འབྱོར་པ་གསང་སྔགས་ཐེག་པ་མཆོག་ལ་ཡང་དག་པར་ཞུགས་ཏེ་ཚུལ་བཞིན་དུ་སྤྱོད་པ་ཚངས་པའི་འོད་ཅེས་བྱ་བ་ལ་གང་དེར་མོས་པ་ཆུང་ངུ་ལ་གནས་ཏེ་མཚན་ཉིད་ཐེག་པ་ལ་སྤྱོད་པའི་རྣལ་འབྱོར་པ་གྲགས་ལྡན་ཞེས་བྱ་བས་འདི་སྐད་ཅེས་ཐེ་ཚོམ་གྱི་གནས་རྣམས་གལ་པོ་གཏར་ཀ་གེགས་སེལ་གྱི་ཚུལ་དུ་དྲི་བ་བཅུ་གཅིག་འོག་ནས་འབྱུང་བ་འདི་ལྟར་དྲིས་པའོ།།

གཉིས་པ་རྒྱས་པར་བཤད་པ་ལ་ལྔ་སྟེ། དམན་པའི་སྤྱོད་པ་དམ་པར་མི་འགྲོ་བར་དྲིས་པ། དོན་དམ་པར་མཉམ་ཡང་ཀུན་རྫོབ་ཏུ་བླང་དོར་བྱ་དགོས་པར་དྲིས་པ། དྲང་དོན་ལ་ངེས་དོན་དུ་གཟུང་དུ་མི་༼༡༦༣༽རུང་བར་དྲིས་པ། ཚད་ལས་འདས་པའི་སྤྱོད་པ་བྱ་བར་མི་རིགས་པར་དྲིས་པ། སྒྲོལ་བའི་སྤྱོད་པ་བྱ་བར་མི་རིགས་པར་དྲིས་པའོ། །དང་པོ་ནི།

དམ་པར་སྤྱོད་པ། ཞེས་པ་ནས། དམ་པར་འགྱུར་མི་སྲིད། །ཅེས་པའི་བར་གྱིས་བསྟན་ཏེ།

དམ་པར་སྤྱོད་པ་ཚངས་པའི་འོད། །གང་འདིར་དམ་པ་སྤྱོད་དོ་ཞེས། །ཤིན་ཏུ་དམན་པའི་ལས་སྤྱོད་པ། །དེ་ཡི་སྨིན་པ་ཐ་དད་ཕྱིར། །མུན་པ་སྣང་བར་མི་འགྱུར་བཞིན། །དམན་པ་དམ་པར་ག་ལ་འགྱུར། །དཔེར་ན་མཐོན་སར་འགྲོ་འདོད་པ། །གཞོལ་ཕྱོགས་ལམ་དུ་འབབ་པ་བཞིན། །གོ་འཕང་ཆེན་པོ་མཐོང་འདོད་པ། །ངན་འགྲོ་ཡ་ངའི་རྒྱུད་དུ་ཞུགས། །གང་འདིར་བཏུང་བའི་ཆུ་འདོད་པའི། །སྨིག་རྒྱུ་སྙེགས་པས་ཚིམ་མེད་ལྟར། །དམན་པ་དམ་པར་སྨིན་འདོད་པ། །མཉམ་ལ་དམན་སྤྱོད་འགྱུར་བ་ཡི། །སྦྲུལ་འབྲས་ཁྱུང་གིས་བརྣོངས་འགྱུར་ཡང་། །ཕྱིན་ཅི་ལོག་འགྱུར་མི་སྲིད་པས། །དེ་ཉིད་ཁོར་ནར་སྣང་བ་བཞིན། །དམན་པ་དམ་པར་འགྱུར་མི་སྲིད།།

འདི་ཉིད་དྲི་བ་གཉིས་ཀྱི་སྒོ་ནས་སྟོན་པ་ལས་དྲི་བ་དང་པོ་དམན་སྤྱོད་དམ་པར་མི་འགྱུར་བ་ལའང་གསུམ་གྱི་ཐོག་མ་ནི་གསང་སྔགས་དམ་པར་སྤྱོད་པ་ཚངས་པའི་འོད་ཅེས་བོས་ནས་འདི་ལྟར་འབྲས་བུ་ཐ་དད་པས་དམན་སྤྱོད་དམ་པར་མི་འགྱུར་བས་ན། ཁྱེད་གསང་སྔགས་པ་རྣམས་ཀྱིས་ཐབས་ལ་གནས་པ་གང་གི་དུས་འདིར་ཐེག་པ་ཆེན་པོ་གསང་བ་དམ་པར་སྤྱོད་དོ་ཞེས་ཟེར་ནས། ཤིན་ཏུ་དམན་པ་འཁོར་བའི་སྤྱོད་པ་སྨད་པར་གྱུར་པའི་ལས་ལམ་དག་ལ་སྤྱོད་པ་ནི། ལས་དེ་ཡི་འབྲས་བུ་རྣམ་པར་སྨིན་པ་ཐ་དད་དུ་སྣང་སྟེ་ཡིད་དུ་མི་འོང་བ་རྣམ་པ་མང་པོ་ཡོད་པའི་ཕྱིར་གྱི་གཏན་ཚིགས་དེས་ན་དེ་ཉིད་ཡང་དག་པའི་སྤྱོད་པར་མི་འགྱུར་ཏེ། དཔེར་ན་མུན་པ་སྣང་བར་མི་འགྱུར་བ་དང་འདྲ་ཞིང༌། དེ་བས་ན་དམན་པའི་སྤྱོད་པ་ངན་པ་དེ་ཉིད་ཡང་དག་པའི་སྤྱོད་པ་དམ་པར་ག་ལ་འགྱུར་ཏེ་མི་འགྱུར་རོ་ཞེས་གསང་བའི་ཐབས་ཀྱིས་སྤྱོད་པ་གང་ཡང་མི་སྤོང་བ་ལ་དྲིས་པའོ། །གཉིས་པ་ལམ་ཐ་དད་པས་དམན་པ་དམ་པར་མི་འགྱུར་བས་ན། དཔེར་ན་མཐོ་སར་འགྲོ་བར་འདོད་པ་གང་དེ་གཞོལ་ཕྱོགས་ཀྱི་ལམ་དུ་ཐུར་ལ་འབབ་པ་བཞིན་དུ། འབྲས་བུའི་གོ་འཕང་ཆེན་པོ་བྱང་ཆུབ་མཆོག་ཉིད་མཐོང་ཞིང་ཐོབ་པར་འདོད་པ་ན། དེའི་རྒྱུར་ནག་པོའི་སྤྱོད་པ་དེ་དག་སྤྱད་ན་མི་ཁོམས་པ་བརྒྱད་དུ་སྐྱེ་ཞིང་ངན་འགྲོ་ཡ་ང་བའི་སྡུག་བསྔལ་གྱི་རྒྱུད་དུ་ཞུགས་པ་དེས་ན་དེར་མི་ལྟུང་བའི་ཐབས་ཅི་ཡོད་ཅེས་དྲིས་པ་དང༌། གསུམ་པ་འཁྲུལ་མ་འཁྲུལ་ཐ་དད་པས་དམན་པ་དམ་པར་མི་འགྱུར་བས་ན། དཔེར་ན་གང་ཞིག་བཏུང་བར་བྱ་བའི་ཆུ་ལེན་པར་འདོད་པ་ཡིས་སྨིག་རྒྱུ་ལ་ཆར་འཁྲུལ་ཏེ་བསྙགས་པས་ངོམས་ཤིང་ཚིམ་པ་མེད་པ་ལྟར་དུ་དམན་པ་དམ་པར་སྨིན་པར་འདོད་པའི་ས་པ་དག་སངས་རྒྱས་ཉིད་དུ་འགྲུབ་པར་བསམ་པ་ཞིག་ཡོད་ན་མཉམ་པ་ཉིད་སྤྱོད་པ་ལ་དམན་པའི་སྤྱོད་པ་རྣམས་བྱས་པས་ཐོབ་པར་འགྱུར་བ་རིགས་པ་མ་ཡིན་ན། ཇི་ལྟར་ཐོབ་པར་འགྱུར་ཞེས་སྔགས་ནས་བཤད་པའི་སྤྱོད་པ་ལ་དྲིས་པའི་བྱེ་བྲག་གིས་དྲི་བ་གསུམ་གྱི་ཐ་མའོ། །དྲི་བ་གཉིས་པ་རྒྱུ་ཐ་དད་པས་དམན་པ་དམ་པར་མི་འགྱུར་ན་དེས་ཇི་ལྟར་ཐོབ་པའི་ཚུལ་ལ་རྩོད་པའི་སྒོ་ནས་དྲིས་པ་སྟེ། དཔེར་ན་སྦྲུལ་གྱིས་འབྲས་བུའམ་སྒོ་ང་དེ་ཉིད་ཁྱུང་གིས་བརྣོངས་ཏེ་༼༡༦༤༽བསྐྱངས་པར་གྱུར་ན་ཡང་ཕྱིན་ཅི་ལོག་པར་འགྱུར་ཞིང་ཁྱུང་དུ་སྣང་བ་མི་སྲིད་པས་རང་རིས་དེ་ཉིད་ཁོ་ནར་སྣང་བ་བཞིན་དུ་འགྲོ་བའི་སྤྱོད་པ་དམན་པ་སྨད་པའི་གནས་རྣམས་བྱས་པས་རྒྱལ་བའི་སྤྱོད་པ་དམ་པར་འགྱུར་བ་མི་སྲིད་པས་ཡང་དག་པའི་དོན་གྱི་སྤྱོད་པ་གྲུབ་པར་བཏུབ་བམ་ཞེས་དྲིས་པའོ།།

གཉིས་པ་དོན་དམ་པར་མཉམ་ཡང་ཀུན་རྫོབ་ཏུ་བླང་དོར་བྱ་དགོས་པར་དྲིས་པ་ནི།

གང་གིས་གསང་བ། ཞེས་པ་ནས། བྱ་ཕྱིར་འཁྲུ་འདོད་འདྲའོ། །ཞེས་པའི་བར་གྱིས་བསྟན་ཏེ།

གང་གིས་གསང་བའི་ལས་ལོག་པས། །གང་འདིར་ལོག་སྤྱོད་དམན་པ་དག །ཐམས་ཅད་རང་བཞིན་མེད་སྟོངས་པས། །ཉོན་མོངས་བྱང་ཆུབ་སྟོང་མཉམ་ཟེར། །འཚོ་བའི་སྨན་དང་འཆི་བའི་དུག །འབྱུང་བས་བསྐྱེད་པར་རྒྱུ་གཅིག་ཀྱང་། །འཚོ་དང་འཆི་བར་བྱེད་པའི་བཐུ། །དེ་ཉིད་མི་མཐུན་སོ་སོར་སྣང་། །དེས་ན་གང་འདིར་ལ་ལ་ཞིག །འབྱུང་བས་བསྐྱེད་པར་གཅིག་མཉམ་ཞེས། །དུག་ཀྱང་བཟའ་ཞིང་བཏུང་ངམ་ཅི། །དེ་བཞིན་དམ་པ་དམན་པའི་རིགས། །རང་བཞིན་མེད་པར་དོན་གཅིག་ཀྱང་། །མཉམ་ཞེས་དམ་པ་ཉིད་བཞག་ཅིང་། །དམན་པ་ཚད་དུ་དཔྱད་དམ་ཅི། །དེས་ན་དམ་པ་དམན་པ་དང་། །གཙང་དང་མི་གཙང་ཆེ་ཆུང་གཉིས། །བཟང་ངན་བདེ་སྡུག་ལ་སོགས་དང་། །བསྟི་གནས་དཔྱད་སྦྱར་སྙོམ་བྱེད་པ། །མཉམ་སྦྱར་བརྟགས་སྤྱོད་ཡིན་ཞེ་ན། །དུག་དང་ཁ་ཟས་བདེ་སྡུག་རྣམས། །མི་མཉམ་མཉམ་པར་ག་ལ་སྙོམས། །མ་བཅོས་མཉམ་པའི་ཆོས་ཉིད་ལ། །བློ་བུར་ལས་ཀྱིས་མི་མཉམ་སྟེ། །ནམ་མཁའ་དྲི་མེད་དབྱེ་གསལ་ལ། །དག་པར་བྱ་ཕྱིེར་འཁྲུ་འདོད་འདྲའོ།།

དྲི་བ་གསུམ་པ་གསང་སྔགས་ཀྱིས་ཉོན་མོངས་དང་བྱང་ཆུབ་མཉམ་པར་བསྟན་པ་ལ་བརྒལ་བ་རྣལ་འབྱོར་པ་གང་ཞིག་གིས་ཐེག་ཆེན་གསང་བ་དམ་པ་ལས་ལོག་པར་འཁྲུལ་ཏེ་གོལ་བའི་དབང་གིས་གང་འདིར་ཕྱིན་ཅི་ལོག་པའི་སྤྱོད་པ་དངོས་པོ་བཞི་ལ་སོགས་པ་དམན་པ་དག་སྤྱད་ཀྱང་དངོས་པོ་ཐམས་ཅད་དོན་དམ་པར་མ་གྲུབ་པས་རང་བཞིན་མེད་པར་སྟོང་པ་ཉིད་དུ་མཉམ་པ་ཡིན་པས་དོན་མ་རིག་པའི་ལོག་པར་འཛིན་པའི་ཉོན་མོངས་པ་རྣམས་དང་ཆོས་ཀྱི་སྐུ་བྱང་ཆུབ་ཆེན་པོ་ཡང་གསང་སྔགས་ཀྱི་ལུགས་ལ་ཀུན་རྫོབ་ཏུའང་ངོ་བོས་མ་གྲུབ་པར་སྟོང་པར་མཉམ་མོ་ཞེས་ཟེར་ཞིང་ཚིག་ཏུ་སྨྲ་སྟེ་ཚུལ་དེས་དོན་གྱི་ཐོག་ཏུ་བབ་ཅིང་རྟོགས་པར་ནུས་སམ་ཞེས་དྲི་བ་གསུམ་པའོ། །དྲི་བ་བཞི་པ་མཉམ་པར་འདོད་པ་ལ་དཔེའི་སྐྱོན་བཀལ་བ། དཔེར་ན་འཚོ་བར་བྱེད་པའི་སྨན་དང་འཆི་བར་འགྱུར་བའི་དུག་གཉིས་འབྱུང་བས་བསྐྱེད་པར་རྒྱུ་གཅིག་པ་ཡིན་ཀྱང་འཚོ་བ་དང་འཆི་བར་བྱེད་པའི་ནུས་པའི་མཐུ་དེ་གཉིས་ཉིད་ལ་སྐྱོན་དང་ཡོན་ཏན་མི་མཐུན་པར་སོ་སོར་སྣང་བ་དེས་ན་སྐབས་གང་འདིར་གང་ཟག་ལ་ལ་ཞིག་གིས་འདི་གཉིས་འབྱུང་བས་བསྐྱེད་པར་རྒྱུ་གཅིག་པའི་ཕྱིར་ན་མཉམ་པ་ཡིན་ནོ་ཞེས་ཟེར་ཞིང་སྨན་བོར་ནས་དུག་ཀྱང་བཟའ་ཞིང་བཏུང་དུ་རུང་ངམ་ཅི་ཞིག་ཡིན་ཏེ་དེ་ལྟར་མ་མཐོང་ངོ༌། །དཔེ་དེ་བཞིན་དུ་ཐེག་པ་ཆེན་པོ་གསང་བ་དམ་པ་ལ་སྤྱད་པ་དག་གིས་སྨན་དང་འདྲ་བ་ཡང་དག་པའི་སྤྱོད་པ་བླང་བྱར་བསྟན་པ་རྣམས་དང་དུག་དང་འདྲ་བའི་སྤྱད་པར་བྱ་བ་བཞི་ལ་སོགས་པ་ཀུན་གྱིས་སྤང་བྱར་བཞག་པ་དམན་པའི་ལས་དག་ཀྱང་གནས་ལུགས་ཇི་བཞིན་པའི་ངོ་བོར་རང་བཞིན་མེད་པར་མཉམ་པས་ཆོས་ཉིད་མ་བཅོས་པའི་དོན་དུ་དབྱེེར་མེད་པར་དབྱིངས་གཅིག་ཏུ་གནས་ཀྱང་། མཉམ་པར་འདྲ་བ་གང་ལ་དེ་གཉིས་མཉམ་པར་གནས་ཞེས་བརྗོད་དེ་དམ་པའི་སྤྱོད་པ་རྣམ་པར་དཀར་བ་ཉིད་བཞག་ཅིང་བོར་ནས་སྦྱོར་སྒྲོལ་ལ་སོགས་པ་དམན་པའི་སྤྱོད་པ་རྣམས་ཆེད་དུ་བླངས་ཏེ་སྤྱད་པར་བྱེད་དམ་༼༡༦༥༽འདིའི་དོན་ཅི་ལྟ་བུ་ཞིག་ཡིན། ཚུལ་དེས་ན་སྤྱོད་པ་དམ་པ་དང་དམན་པ་དཀར་ནག་གི་ལས་ལམ་དང༌། དག་ཅིང་གཙང་བ་དང་སྨེ་ཞིང་མི་གཙང་བ་དང་ཆེ་ཆུང་གཉིས་དང་བཟང་ངན་དང་བདེ་སྡུག་ལ་སོགས་པ་དང་མདོར་ན་གཉིས་ཆོས་སུ་སྣང་ངོ་ཅོག་མཉམ་པ་ཡིན་ནོ་ཞེས་སྨྲ་བ་ནི་དོན་དམ་དུ་མཉམ་ཡང་ཀུན་རྫོབ་ཏུ་མི་མཉམ་པས་ཤིན་ཏུ་ནོར་བ་ཡིན་ཏེ་དཔེར་ན་མཆོད་པའི་བསྟི་གནས་དམ་པ་སྤྲུལ་པའི་སྐུ་མཆོག་ལྟ་བུ་ཞིག་དང༌། འཇིག་རྟེན་གྱི་སྤྱད་བྱར་མཁས་པ་འཚོ་བའི་ལས་བྱེད་པ་སྨན་པ་ལྟ་བུ་གཉིས་སྙོམས་པར་བྱེད་པ་དང་འདྲའོ། །སྤྱོད་པ་ཅི་ཡང་མི་འགོག་པ་དེ་ཉིད་མཉམ་པ་ཉིད་ལ་སྦྱོར་བའི་དོན་གྱི་རྟགས་སམ་མཚོན་པའི་ཐབས་སུ་སྤྱོད་པ་ཡིན་ནོ་ཞེ་ན། དེ་ནི་སྨན་དུག་དང་ཁ་ཟས་བདེ་སྡུག་ཅན་རྣམས་ཀུན་རྫོབ་ཏུ་མི་མཉམ་པས་བཟང་ངན་མཉམ་པར་ག་ལ་སྙོམས་ཏེ་སྙོམས་པར་མི་འགྱུར་བ་ལྟར་རོ། །མི་མཉམ་པའི་གཏན་ཚིགས་སམ་དཔེ་དོན་ཇི་ལྟར་ཡིན་ན་ཡེ་ནས་མ་བཅོས་པར་མཉམ་པར་གནས་པའི་ཆོས་ཉིད་ཀྱི་ངང་ལ་ཆེ་ཆུང་དང་བཟང་ངན་བྲལ་བའི་དོན་ལས་མ་འདས་པར་མཉམ་ཡང་རང་རང་གི་བློ་བུར་གྱི་ལས་དང་རྣམ་རྟོག་སྣ་ཚོགས་ཀྱིས་བརྟགས་པས་བཟང་ངན་དང་ཆེ་ཆུང་ལ་སོགས་པར་སྣང་བ་ཡིན་པས་ནམ་ཡང་མི་མཉམ་སྟེ། ཁྱོད་སྤྱོད་པ་མཉམ་པ་ཉིད་དུ་འདོད་པ་ནི་མི་མཐུན་པའི་དཔེ་ནམ་མཁའ་དྲི་མ་མེད་པར་ཡེ་ནས་གསལ་བ་ལ་སྒྲིབ་པ་དག་པར་བྱ་བའི་ཕྱིར་ཆུ་ཡིས་འཁྲུ་བར་འདོད་ཀྱང་བཀྲུར་མི་བཏུབ་པ་དང་འདྲ་བས་མཉམ་པར་མི་འགྱུར་རོ་ཞེས་སྨྲས་ཏེ་ཐག་བཅད་པའོ།།

གསུམ་པ་དྲང་དོན་ལ་ངེས་དོན་དུ་གཟུང་དུ་མི་རུང་བར་དྲིས་པ་ནི།

གང་དུ་ནད་རྣམས། ཞེས་པ་ནས། གཞན་བརླག་དམན་པར་ངེས། །ཞེས་པའི་བར་གྱིས་བསྟན་ཏེ།

གང་དུ་ནད་རྣམས་འཇོམས་པའི་སྨན། །ནད་མེད་རྣམས་ཀྱི་དུག་ཏུ་འགྱུར། །ལྟ་ལོག་འཇིག་རྟེན་དྲང་བའི་ཐབས། །རྣལ་མ་སྤྱད་ན་ཉེས་པར་ངེས། །འཐུན་འཇུག་སྤྱོད་པས་དྲང་བའི་ཐབས། །གང་གི་དབང་དུ་སྤྱོད་བྱེད་པ། །གང་སྟོབས་རིགས་དང་ལྡན་པ་ཡིས། །མི་མཐུན་བཅོམ་ནས་འཐུན་འགྱུར་བཞིན། །ཚིག་འཐུན་དོན་ལྡན་དམ་པ་ཡིས། །ཇི་ལྟར་རིག་པ་དེ་ལྟར་ངེས། །ཇི་ལྟར་ཞུམ་པ་ཁེ་བསྐམ་གྱི། །གྲགས་པ་འདོད་ཕྱིར་གདེང་མེད་པར། །གཡུལ་ཞུགས་སྟོབས་རིག་འགྲན་ཟླས་ན། །གཞན་དབང་དེ་ཉིད་བརླག་པར་འགྱུར། །དེ་བཞིན་དམ་པར་བཅོས་པ་ཡིས། །ཁེ་དང་གྲགས་པ་རློམ་སེམས་ཕྱིར། །ལོག་སྲེད་དྲང་བའི་འཐུན་སྤྱོད་ལ། །ཡང་དག་དམ་པར་ངེས་བཟུང་ནས། །ཚིག་གི་ལམ་ཉིད་སྒྲར་སྤྱད་ན། །བདག་ཕུང་གཞན་བརླག་དམན་པར་ངེས།།

གང་དུ་ནད་རྣམས་འཇོམས་པར་བྱེད་པའི་སྨན་དག་ཀྱང་ནད་མེད་པ་རྣམས་ཀྱིས་མི་མཐུན་པར་བརྟེན་ན་དུག་ཏུ་འགྱུར་བ་ལྟར་དུ་རྟག་ཆད་དུ་ལྟ་བ་ལྟ་བུ་ལྟ་བ་ལོག་པའི་འཇིག་རྟེན་པ་རྣམས་དྲང་བའི་ཐབས་སུ་བསྟན་པའི་སྤྱོད་པ་རྣམས་ཀྱང་ངེས་པའི་དོན་དུ་རློམ་ནས་རྣལ་མར་བཟུང་སྟེ་སྤྱོད་ན་ཉེས་པའི་གཡང་སར་འཕྱན་པར་ངེས་པས་གསང་སྔགས་པ་འཇིག་རྟེན་རྣམས་དྲང་བའི་ཐབས་སུ་ངན་པར་སྤྱོད་དོ་ཞེ་ནའང༌། ཁྱེད་འགྲོ་དོན་དུ་གསང་སྔགས་ཀྱི་སྤྱོད་པ་རྣམ་པར་དཀར་བ་རྣམས་སྤྱད་ན་ཉེས་པ་ཞིག་འབྱུང་ངམ། དེ་ལྟར་ན་རང་དོན་དུ་ཡང་མི་སྤྱོད་པ་དེས་གཞན་གྱི་དོན་ཡང་མི་བྱེད་པ་འདི་ཚུལ་ཇི་ལྟ་བུ་ཡིན་ཞེས་དཔེ་སྣ་ཚོགས་ལ་བརྟེན་ཏེ་དོན་དང་འགལ་བར་དྲིས་པ་སྟེ་དྲི་བ་བཞི་༼༡༦༦༽པའོ། །དྲི་བ་ལྔ་པ་དྲང་དོན་མཐུན་འཇུག་གི་སྤྱོད་པ་ཡང་རིགས་པའི་སྟོབས་དང་ལྡན་ན་ཡང་དག་པའི་ལམ་ལ་དྲང་བར་ནུས་ཀྱི་དེ་ལྟར་མིན་ན་མི་རུང་བའི་ཚུལ་གྱིས་དྲི་བ་སྟེ། འགྲོ་བ་གང་དང་བསྟུན་ཏེ་མཐུན་འཇུག་གི་སྤྱོད་པ་ལ་གནས་ནས་དྲང་བའི་ཐབས་ཀྱིས་ཡང་དག་པར་འདྲེན་པའོ། །གདུལ་བྱ་གང་གི་བསམ་པ་དང་མཐུན་པར་དབང་ཕྱུག་ཉིད་དུ་འགོད་པའི་དོན་སྤྱོད་པར་བྱེད་པ་སྟེ། དཔེར་ན་མི་དཔའ་བོ་གང་ཞིག་སྟོབས་ཆེ་ཞིང་མཛངས་པ་ཤེས་རིག་དང་ལྡན་པ་དེ་ཡིས་རང་དང་ཕ་རོལ་མི་མཐུན་པ་བཅོས་ནས་ཐབས་ཀྱིས་འོག་ཏུ་བཅུག་པས་དགའ་བར་བྱེད་ཅིང་མཐུན་པར་འགྱུར་བ་བཞིན་དུ། གདུལ་བྱ་དང་མཚུངས་པའི་ངག་གི་ཚིག་མཐུན་པར་སྨྲ་ཞིང་མོས་པར་བྱེད་པའི་དོན་དང་ལྡན་པའི་ཐབས་དམ་པ་ཡིས་སྒོ་ནས་ཇི་ལྟར་བདེན་ཞིང་ཚད་མར་རིགས་པ་དེ་ལྟར་དོན་བྱས་ན་ཡང་དག་པའི་ཐབས་སུ་ངེས་པར་འགྱུར་གྱི། རང་དབང་མེད་པའི་སྒྲོལ་བ་ལ་སོགས་པའི་བྱ་བ་ནི་ནམ་ཡང་མི་རིགས་སོ་ཞེས་དྲི་བ་ལྔ་པའོ། །དྲི་བ་དྲུག་པ་རིགས་སྟོབས་དང་མི་ལྡན་ན་རང་གཞན་གང་གི་དོན་དུ་ཡང་སྤྱོད་པར་མི་རིགས་པའི་དཔེ་དོན་སྟོན་ཏེ། དཔེ་ཇི་ལྟར་ན་སྡར་མར་གྱུར་པ་སེམས་ཀྱི་དཔའ་ཞུམ་ནས་ལུས་ཀྱི་སྟོབས་ཆུང་བས་བླུན་པོ་ཞིག་གིས་ཁོ་ལ་བརྐམ་ཆགས་ཀྱིས་གྲགས་པ་འདོད་པའི་ཕྱིར་རྩལ་དང་སྟོབས་ཀྱི་ཉམ་བག་གི་གདེངས་མེད་པར་གཡུལ་དུ་ཞུགས་ཏེ་ཕ་རོལ་དང་སྟོབས་རིག་འགྲན་པར་བཟླས་ནས་དཔུང་དང་སྟོབས་བཀྱེ་ནས་རྩོད་པར་བྱེད་ན་རང་ཉིད་གཞན་གྱི་དཔུང་གི་དབང་དུ་བྱས་ཏེ་དེ་ཉིད་དུ་ངེས་པར་བརླག་ནས་ཁོ་ཡིས་བཀོལ་བར་འགྱུར་བ་དེ་བཞིན་དུ་ཡང་དག་པའི་རྟོགས་པ་མེད་པར་གསང་སྔགས་དམ་པར་བཅོས་པ་ཡིས། རང་ལ་ཁེ་དང་གྲགས་པ་འདོད་པའི་རློམ་སེམས་ཀྱི་ཕྱིར་དུ་གདུལ་བྱ་ལོག་སྲེད་ཅན་རྣམས་ཡང་དག་པར་འདྲེན་ཞིང་དྲང་བའི་ཆ་མཐུན་གྱི་སྤྱོད་པ་ལ་མཐུན་འཇུག་ཏུ་ལེགས་པར་སྤྱོད་པའི་གདེངས་མེད་པར་རང་གི་གསང་སྔགས་ཀྱི་ཚིག་ཙམ་ལ་ཡང་དག་པའི་སྤྱོད་པ་དམ་པར་ངེས་པར་བཟུང་ནས་དེ་ཉིད་ཁོ་ན་གཙོ་བོར་བྱས་ཏེ་ཚིག་གི་ལམ་ཉིད་སྒྲར་སྤྱད་དེ་སྒྲ་ཇི་བཞིན་པར་བཟུང་ན་དོན་མ་རྟོགས་ཞིན་དུ་ཚུལ་བཅོས་པས་བདག་ཕུང་ཞིང་ལོག་པར་ཁྲིད་པས་གཞན་བརླག་སྟེ་གཉིས་ཀ་དམན་པར་ལྟུང་ཞིང་ལོག་པར་ངེས་པའོ།།

བཞི་པ་ཚད་ལས་འདས་པའི་སྤྱོད་པ་བྱ་བར་མི་རིགས་པར་དྲིས་པ་ནི།

ཐམས་ཅད་གང་གི ཞེས་པ་ནས། ཀྱང་ནི་མི་རིགས་སོ། །ཞེས་པའི་བར་གྱིས་བསྟན་ཏེ།

ཐམས་ཅད་གང་གི་ཐེག་ཚད་དང་། །གོ་དང་རྟོགས་དང་ནུས་ཚད་དང་། །གང་དུ་འདུ་ཚད་མ་གཏོགས་པ།།

ཚད་ལས་འདས་ན་ཡུལ་མིན་དེ། །འདས་ན་འདས་པ་ཉིད་དུ་འགྱུར། །གང་ཡང་ཚད་ལས་འདས་པ་ནི།།

ཟས་ཀྱང་དུག་ཏུ་འགྱུར་བཞིན་དུ། །དུག་ཆེན་ཟ་བའི་ཉོད་པ་དེ། །དམ་པས་ཀྱང་ནི་མི་རིགས་སོ།།

དྲི་བ་༼༡༦༧༽བདུན་པ་ལས་དང་པོ་པས་སྤྱོད་པ་རང་དང་འཚམས་ཚད་དུ་སྤྱད་པ་ལས་བརླང་སྤྱོད་བྱས་ན་ངེས་པར་ལྟུང་བས་མ་སྤྱད་ན་དམ་ཚིག་ཉམས་པ་འདི་ཇི་ལྟར་ཡིན་ཞེས་དྲིས་པ་སྟེ། གང་ཟག་ཐམས་ཅད་ཀྱང་གང་ལ་སློབ་པ་ན་རང་རང་གི་བློ་ཡིས་ཐེག་ཚད་དང་ཇི་ལྟར་གོ་བ་དང་རྟོགས་པའི་ཚད་དང་བློ་རྩལ་གྱི་ནུས་པའི་ཚད་དང་བསྟུན་ཏེ་གང་དུ་ཉམས་འོག་ཏུ་འདུ་བའམ་ཆུད་པའི་ཚད་ལ་སློབ་པ་མ་གཏོགས་པ་ཀུན་བཟློག་སྟེ་ཚད་ལས་འདས་པར་མི་འཚམས་པ་ལ་སོགས་པ་ཀུན་སྤྱོད་དེ་འཆོལ་བར་གྱུར་ན་དོན་དང་མཐུན་པའི་ཡུལ་མེད་པར་ཚད་ལས་བརྒལ་ཏེ་འདས་པར་གྱུར་པས་ན་དོན་ལས་འདས་པ་ཉིད་དུ་འགྱུར་ཞིང་རྟེན་དང་བྲལ་ནས་རང་དང་གདུལ་བྱ་རྣམས་ཡང་དག་པའི་ཐབས་དང་མ་འཕྲད་པར་ལོག་ལམ་དུ་སོང་ན་ཤིན་ཏུའང་སྡུག་བསྔལ་གྱི་རྒྱུའམ་ཞེས་དྲི་བ་བདུན་པའི་དོན་ཏོ། །དྲི་བ་བརྒྱད་པ་ལྟ་བ་རྟོགས་པའི་བློ་དང་འཚམས་པ་ལས་གཞན་དུ་སྤྱོད་པ་བརླང་པོ་མི་རུང་བའི་ཚུལ་གྱིས་དྲི་བ་སྔ་མའི་མཐུན་དཔེ་བསྟན་པ་སྟེ། མདོར་ན་གང་དང་གང་ཡང་ཚད་ལས་འདས་པར་གྱུར་པ་ནི་འཚོ་བའི་ཁ་ཟས་ཀྱང་ཚད་ལས་འདས་ན་དུག་ཏུ་འགྱུར་བ་བཞིན་དུ་ལྟ་བའི་ཚིག་གི་ཁྱད་ཁམས་ལ་བརྟེན་ནས་བློ་ཆུང་རྣམས་ལ་ཟབ་དོན་སྒྲ་ཇི་བཞིན་པ་མིན་པ་ཡང་ཚིག་ལམ་དུ་བརྗོད་ནས་ཕྱིན་ཅི་ལོག་པའི་ཉོན་མོངས་པ་ལྔའི་དུག་ཆེན་པོ་ཟ་ཞིང་ཁོང་དུ་ཆུད་པར་བྱེད་པའི་ཚུལ་གྱིས་ཚད་ལས་འདས་པར་ཉོད་པ་དེ་ནི་གང་ཟག་སུ་ཡིས་སྤྱོད་ཀྱང་དོན་དུ་མི་འགྱུར་བས་སྤྱོད་པ་དེ་དག་ནི་རྣལ་འབྱོར་མཆོག་ལྡན་དམ་པས་ཀྱང་ནི་ནམ་ཡང་སྤྱད་པར་མི་རིགས་ཏེ། རྒྱལ་པོ་ལ་གདོལ་པའི་སྤྱོད་པའི་གཉེར་མེད་པ་དང་འདྲ་བས་སོ། །ཞེས་དྲི་བ་བརྒྱད་པའི་ཚིག་གོ།

ལྔ་པ་སྒྲོལ་བའི་སྤྱོད་པ་བྱ་བར་མི་རིགས་པར་དྲིས་པ་ནི།

གང་དག་གང་གིས། ཞེས་པ་ནས། གལ་དུ་དྲིས་པ་ལས། །ཞེས་པའི་བར་གྱིས་བསྟན་ཏེ།

གང་དག་གང་གིས་བཅིངས་པ་ལས། །དེ་ཉིད་མ་གྲོལ་མ་ཐར་བར། །ཐམས་ཅད་ཐམས་ཅད་བསྒྲལ་པ་ཡི། །བསླུ་བ་ཆེན་པོ་དེ་ཅི་ཞིག །དེ་ཉིད་མ་རིག་མ་གྲོལ་ཞིང་། །དེ་ཡི་སེམས་དག་མ་བྱུང་ན། །སངས་རྒྱས་ས་ལ་ངེས་བཞག་ཀྱང་། །དེ་ཉིད་མཐོང་བ་དམྱལ་བའི་གནས། །དེ་རིག་དེ་ཡི་དོན་ལྡན་ན། །དམྱལ་ཆེན་དེ་དག་ཞིང་ཁམས་དག །གསང་བའི་སྙིང་པོས་ཀུན་ཁྱབ་ཀྱང་། །དེ་རིག་དེ་དང་མ་ལྡན་ན། །ལོང་བའི་མདུན་དུ་གཟུགས་བསྟན་ལྟར། །གཏི་མུག་འཁོར་བའི་མུན་པ་ཡིན། །དེ་སྐད་གལ་དུ་དྲིས་པ་ལས།།

དྲི་བ་དགུ་པ་རིགས་པ་དང་མི་ལྡན་པར་བསྒྲལ་བར་བྱས་ཀྱང་གྲོལ་བ་མ་ཡིན་ན་སྒྲོལ་བའི་ལས་བྱེད་པ་ཇི་ལྟར་ཡིན་ཞེས་དྲིས་པ་སྟེ། གང་དག་རྣལ་འབྱོར་པ་སུ་ཡང་རུང་བ་གཟུང་འཛིན་ལས་མ་གྲོལ་བ་གང་ཞིག་གིས་རང་ཉིད་མི་ཤེས་པའི་དྲྭ་བའི་རྒྱར་ཆུད་དེ་བཅིངས་པར་གྱུར་པ་ལས། དེ་ཉིད་རྟོགས་པས་རྒྱུད་མ་གྲོལ་ཞིང་འཆིང་བ་ལས་མ་ཐར་བར་ཀུན་ཏུ་རྟོག་པས་རྨོངས་བཞིན་དུ་ཕ་རོལ་གྱི་འགྲོ་བ་ཆེ་ཆུང་ཐམས་ཅད་ཐམས་ཅད་བསྒྲལ་བ་ཡི་སྤྱོད་པ་རྩོམ་པ་ནི་རང་རྐྱལ་མ་སྦྱངས་པར་གཞན་ཆུ་བོ་ལས་སྒྲོལ་བ་དང་འདྲ་སྟེ། རང་གཞན་གཉིས་ཀ་བརླག་པའི་ཕྱིར་བསླུ་བའི་སྤྱོད་༼༡༦༨༽པ་ཆེན་པོ་སྟེ་དེ་ལྟ་བུའི་གསང་སྔགས་ཀྱི་སྤྱོད་པས་ཅི་ཞིག་བྱ་སྟེ་སྤྱོད་པ་བསླབ་པ་དངོས་ཇི་ལྟ་བུ་ཡིན་ཞེས་དྲི་བ་དགུ་པའི་ཚིག་གོ །དྲི་བ་བཅུ་པ་བསྒྲལ་བྱའི་རྒྱུད་མ་དག་ན་བསྒྲལ་ཡང་མི་གྲོལ་ལ་རྒྱུད་དག་ན་བསྒྲལ་ཡང་མི་དགོས་པས་འདིའི་དོན་ཇི་ལྟར་ཡིན་ཞེས་དྲིས་པ་སྟེ། བསྒྲལ་བྱ་ཐེག་པ་ཆེན་པོར་ཁས་འཆེ་བའི་གང་ཟག་དེ་ཉིད་ཀྱིས་རང་གི་གནས་ལུགས་ཆོས་ཉིད་དངོས་ཀྱི་དོན་མ་རིག་པའམ་མ་མཐོང་ལ་རྒྱུད་མ་སྦྱངས་པས་མ་གྲོལ་ཞིང་དེ་ཡི་སེམས་རྣམ་པར་དག་སྟེ་ཐེག་པ་ཆེན་པོའི་དོན་རིག་ཅིང་རྟོགས་པའི་བློ་མཆོག་ཡེ་ཤེས་ཀྱི་སྣང་བ་གསལ་ཁྱབ་ཏུ་མ་བྱུང་ན་སྒྲོལ་མཁན་གྱིས་རྒྱལ་བའི་ཞིང་དུ་བཀོད་དེ་སངས་རྒྱས་ཀྱི་ས་ལ་ངེས་པར་བཞག་ཀྱང་ས་དེ་ཉིད་རང་གི་ཞེ་སྡང་གིས་ཡུལ་དུ་མཐོང་བས་དམྱལ་བའི་གནས་ལས་མི་འདའ་ལ། གནས་ལུགས་གཤིས་ཀྱི་ཆོས་ཉིད་དེ་ཡང་དག་པར་རིག་ཅིང་རྟོགས་པ་དེ་ཡི་དོན་དང་ལྡན་ན་མ་བསྒྲལ་ཡང་དམྱལ་བ་ཆེན་པོའི་གནས་དེ་དག་རྒྱལ་བའི་ཞིང་ཁམས་རྣམ་པར་དག་པར་མཐོང་བས་སྔགས་ཀྱིས་སྒྲོལ་བའི་ཁ་ན་ཡོད་དམ་ཞེས་དྲི་བ་བཅུ་པའི་ཚིག་གོ །དྲི་བ་བཅུ་གཅིག་པ། གསང་བའི་ཆོས་ཉིད་ཆོས་ཀུན་གྱི་གནས་ལུགས་གདལ་ཁྱབ་ཆེན་པོ་ཡིན་ཀྱང་ཤེས་རབ་དང་བྲལ་ན་བསྟན་ཀྱང་མི་རྟོགས་པས་སྒྲོལ་བའི་སྤྱོད་པ་འདིའི་དོན་ཇི་ལྟར་ཡིན་ཞེས་དྲིས་པ་སྟེ། ཆོས་ཉིད་ཇི་བཞིན་པ་གསང་བའི་སྙིང་པོ་ཕྲ་ཞིང་ཟབ་པའི་མཆོག་དེས་ཀུན་ལ་ཁྱབ་ཅིང་གདལ་བ་ལ་ཚབས་ཆེ་ཆུང་མེད་ཀྱང༌། དེ་ཉིད་ཇི་ལྟ་བ་བཞིན་དུ་རིག་ཅིང་རྟོགས་པའི་བློ་གྲོས་དེ་དང་མ་ལྡན་ན་སྤྱོད་པ་སྤྱད་ཀྱང་མི་གྲོལ་བས་གནས་ལུགས་ཀྱི་དོན་མི་མཐོང་བ་ནི་དཔེར་ན་ལོང་བའི་མདུན་དུ་གཟུགས་བསྟན་ཀྱང་མི་མཐོང་བ་ལྟར་ཞེ་སྡང་ཅན་ལ་སྒྲོལ་བའི་ལས་བྱེད་པ་ནི་གཏི་མུག་འཁོར་བའི་མུན་པ་ལ་འཕྱན་པ་ཡིན་ན་དེས་ཇི་ལྟར་གྲོལ་བ་ཡིན་ཞེས་དྲི་བ་བཅུ་གཅིག་པའི་དོན་ཏེ། དེ་སྐད་ཅེས་གལ་པོའི་ཚུལ་དུ་དྲིས་པ་ལས།

གཉིས་པ་ལན་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ཚངས་པའི་འོད་ཅེས། ཞེས་པ་ནས། ངེས་པའི་ཚིག་སྨྲས་པ། །ཞེས་པའི་བར་གྱིས་བསྟན་ཏེ།

ཚངས་པའི་འོད་ཅེས་བྱ་བ་ཡི། །རྣལ་འབྱོར་དམ་པས་ཐེག་ཆེན་པོས། །རྣལ་འབྱོར་མོས་པ་ཆུང་སྤྱོད་པ།།

གྲགས་པའི་ཚུལ་ལྡན་བྱ་བ་ལ། །དམ་པར་ངེས་པའི་ཚིག་སྨྲས་པ།།

དེ་དག་གི་ལན་ངེས་པར་བསྟན་པ་གང་སྙམ་པ་ལ། དགེ་སློང་རྣལ་འབྱོར་གྱི་དབང་ཕྱུག་ཚངས་པའི་འོད་ཅེས་བྱ་བ་ཡི་གསང་བའི་རྣལ་འབྱོར་དམ་པ་ཐེག་ཆེན་ཚུལ་བཞིན་དུ་སྟོན་པ་པོས། རྣལ་འབྱོར་མོས་པ་ཆུང་ངུ་ལ་སྤྱོད་པ་གྲགས་པའི་ཚུལ་ལྡན་ཞེས་བྱ་བ་ལ། ཐབས་ཀྱི་མཐར་ཐུག་༼༡༦༩༽གསང་ཆེན་དམ་པར་ངེས་པའི་ཚིག་གཏར་ག་གེགས་སེལ་གྱི་ལན་དུ་ཡང་དག་པར་སྨྲས་པ་ནི།

གཉིས་པ་རྒྱས་པར་བཤད་པ་ལ་ལྔ་སྟེ། དམན་པའི་སྤྱོད་པ་རྟོགས་ན་དམ་པར་འགྲོ་བ། དེ་བཞིན་ཉིད་ལ་བླང་དོར་མི་དགོས་པ། དྲང་དོན་ལ་ངེས་དོན་དུ་མི་འཛིན་པ། ཚད་ལས་འདས་པའི་སྤྱོད་པ་མི་སྤྱོད་པ། རྟོགས་པས་བསྒྲལ་ཞིང་མ་རྟོགས་པས་མི་སྒྲོལ་བར་བསྟན་པའོ། །དང་པོ་ནི།

འོག་ནས། འཇིག་རྟེན་ཀུན་གྱི་དམན་པ་རྣམས། །ཞེས་པ་ནས། ཤེས་ན་དམ་པར་འགྱུར། །ཞེས་པའི་བར་གྱིས་བསྟན་ཏེ།

འཇིག་རྟེན་ཀུན་གྱི་དམན་པ་རྣམས། །སྣ་ཚོགས་དམ་པར་དྲང་བའི་ཕྱིར། །དམན་པའི་ལྟ་སྤྱོད་མཐའ་ཡས་པ། །ཡོངས་སུ་རྗོགས་པར་བྱེད་པར་ཟད། །སྦྲུལ་སྒོང་ཁྱུད་དུ་མི་འགྱུར་ཡང་། །བསྒྱུར་བས་གསེར་འགྱུར་སྨན་བཞིན་དུ། །དམན་པ་ཀུན་གྱི་དེ་བཞིན་ཉིད། །མ་བཅོས་ཤེས་ན་དམ་པར་འགྱུར།།

འདིར་རས་ཆོད་ཅན་གྱི་ཆེད་དུ་རྒྱུད་དཀྲུག་པ་ཉིད་ཅུང་ཟད་ལེགས་པར་བསྡེབ་སྟེ་འཆད་པ་ལ། ལན་དང་པོ་གཉིས་གང་སྙམ་པ་ལ། དྲི་བ་དང་པོའི་ཉིང་ལག་གི་དྲི་བ་གསུམ་ཡང་ལན་གཅིག་གིས་ཆོད་པར་བྱ་བའི་ཕྱིར། གང་འཇིག་རྟེན་པའི་འགྲོ་བ་ཀུན་གྱི་དམན་པའི་སྤྱོད་པ་སྨད་པར་བྱ་བ་འཁོར་བའི་དངོས་པོ་བཞི་ལ་སོགས་པ་རྣམས་སྤྱོད་པ་ཡང་གདུལ་བྱ་ཐ་དད་པ་རྣམས་ཐེག་པ་ཆེན་པོའི་ཐབས་སྣ་ཚོགས་ཀྱིས་ཡང་དག་གསང་བའི་རྟོགས་པ་དམ་པར་དྲང་ཞིང་བཀྲི་བའི་དགོས་ཆེད་ཀྱི་ཕྱིར་དམན་པའི་ལྟ་སྤྱོད་མཐའ་ཡས་ཇི་སྙེད་པ་ཀུན་ཀྱང་མི་འགོག་པར་མཐུན་པར་སྤྱོད་པའི་ཚུལ་གྱིས་དོན་ཆོས་ཉིད་དུ་ཡོངས་སུ་རྫོགས་པར་རྟོགས་པས་ཟིན་ཆགས་མེད་པར་རྒྱུད་གྲོལ་བར་བྱེད་པར་ཟད་པས་རྣམ་སྨིན་མྱོང་བར་མི་འགྱུར་བར་ངན་འགྲོའི་ས་བོན་ལས་གྲོལ་ཏེ་ཐབས་ཆེན་པོའི་མཛད་པ་ལ་དམན་པའི་ལས་སུ་དོར་བ་མེད་པར་ལན་བཏབ་པའོ།།

དྲི་བ་གཉིས་པའི་ལན་ཅི་ཞེ་ན། དཔེར་ན་སྦྲུལ་སྒོང་བརྣོངས་པ་ཁྱུང་དུ་མི་འགྱུར་བ་ཁྱོད་ལྟར་ཡིན་ཡང༌། འདིར་འགྱུར་བས་མཐུན་དཔེ་གསེར་འགྱུར་དང་དུག་འགྱུར་གྱི་རྩི་ཡི་ལས་ཀྱི་ནུས་པས་ལྕགས་དང་དུག་ཀྱང་གསེར་དང་སྨན་དུ་འགྱུར་བ་བཞིན་དུ། དམན་པ་སེམས་ཅན་ནམ་སྤྱོད་ངན་ཀུན་གྱི་དེ་ཁོ་ན་ཉིད་དམ་དེ་བཞིན་ཉིད་མ་ནོར་མ་བཅོས་མ་བསླད་པར་ཤེས་ཤིང་མཐོང་ན། དེ་སྤྱད་པ་ཉིད་ཀྱིས་ཚོགས་གཉིས་དམ་པར་འགྱུར་བས་ཡང་དག་པའི་དངོས་པོ་དང་སྤྱོད་པ་ཡིན་པར་ལན་བཏབ་པའོ།།

གཉིས་པ་དེ་བཞིན་ཉིད་ལ་བླང་དོར་མི་དགོས་པ་ནི།

དེ་བཞིན་ཉིད་ཀྱི། ཞེས་པ་ནས། རང་བཞིན་ཡོངས་སུ་རྫོགས། །ཞེས་པའི་བར་གྱིས་བསྟན་ཏེ།

དེ་བཞིན་ཉིད་ཀྱི་དབྱིངས་ཉིད་ལ། །ངན་འགྲོ་གོ་འཕང་མཐོ་དམན་མེད། །སྨྱོན་རྨོངས་བྱང་ཆུབ་ཐ་དད་ཀྱང་།།

སྟོང་པ་ཉིད་ལ་དེ་གཉིས་མེད། །དུག་དང་སྨན་གཉིས་སོ་སོ་ཡང་། །འབྱུང་བ་དག་ལ་དེ་གཉིས་མེད།།

མ་འདྲེས་སྣ་ཚོགས་ཐ་དད་ཀྱང་། །ཀུན་གྱི་རང་བཞིན་ཡོངས་སུ་རྫོགས།།

ལན་གསུམ་པ་གང་ཞེ་ན། ཆོས་ཉིད་དེ་བཞིན་ཉིད་ཀྱི་གནས་ལུགས་མུ་མཐའ་མེད་པའི་དབྱིངས་ཀྱི་ངང་ཉིད་ལ་མཐོ་རིས་དང་ངན་འགྲོ་སངས་རྒྱས་དང་སེམས་ཅན་༼༡༧༠༽ཞེས་པའི་གོ་འཕང་མཐོ་དམན་གྱི་བྱེ་བྲག་མེད་པའི་ཕྱིར། ཞེན་བློ་ཅན་དག་ལ་ཉོན་མོངས་དང་བྱང་ཆུབ་མི་མཉམ་པར་བཟང་ངན་ཐ་དད་དུ་སྣང་ཀྱང་སྣང་ཚུལ་དང་སྤྱོད་པ་བཟང་ངན་ཐམས་ཅད་ཕྱོགས་མེད་སྟོང་པ་ཉིད་དུ་རྟོགས་པ་ལ་དེ་གཉིས་མེད་པས་གང་ཡང་མ་བཀག་ལ་མི་དམིགས་པར་མཐོང་བའི་བློ་དང་ལྡན་པ་ལ། དེ་སྐད་བསྟན་པ་ཡང་ཉེས་པ་མེད་པ་ཉིད་དུ་ལན་བཏབ་པོ། ལན་བཞི་པ་གང་ཞེ་ན། དཔེར་ན་དུག་དང་སྨན་གཉིས་བྱེད་ལས་སོ་སོ་ཐ་དད་དུ་སྣང་ཡང༌། འབྱུང་བ་དག་ལ་དེ་གཉིས་ཐ་དད་མེད་པ་ལྟར། སྣང་ཚུལ་ལ་འཁོར་འདས་དང་སྤྱོད་པ་ལོག་མ་ལོག་ལ་སོགས་པ་བསམ་ཡས་པ་རྣམས་མ་འདྲེས་པའི་ངོས་ནས་སྣ་ཚོགས་ཐ་དད་དུ་སྣང་ཀྱང༌། དེ་དག་ཀུན་གྱི་རང་བཞིན་ལ་དེ་ཁོ་ན་ཉིད་ཀྱི་རྒྱས་ཐེབས་པས་ཡོངས་སུ་རྫོགས་པའི་ངོས་ནས་ཆོས་ཉིད་མཉམ་པ་ཉིད་དུ་གྲོལ་བས་དེ་ལྟར་རྟོགས་པའི་གདེངས་ཆུད་དེ་རིགས་ངེས་པར་གྱུར་ཕྱིན་ཆད་གཞན་དོན་གྱི་ཆེད་དུ་སྤྱོད་པ་དམན་པ་དག སྤྱོད་ཀྱང་ཡང་དག་པའི་སྤྱོད་པ་མ་ནོར་བ་ཡིན་པར་ལན་བཏབ་པའོ།།

གསུམ་པ་དྲང་དོན་ལ་ངེས་དོན་དུ་མི་འཛིན་པ་ནི།

གོང་གི གང་འདིར་ཐེག་པ་མང་བཤད་པ། །ཞེས་པ་ནས། ཐབས་སུ་སྦྱར་བར་ཟད། །ཅེས་པའི་བར་གྱིས་བསྟན་ཏེ།

གང་འདིེར་ཐེག་པ་མང་བཤད་པ། །ཐ་དད་ཡོད་པ་མ་ཡིན་ཏེ། །མོས་པ་ཐ་དད་དྲང་བའི་ཕྱིར། །ཐབས་ཀྱི་སྒོ་ནི་མང་པོར་བཤད། །དེ་ཀུན་མོས་པ་མ་བཀག་པའི། །དྲང་བའི་ཐབས་སུ་སྦྱར་བས་ན། །ཀུན་ལ་ངེས་པའི་བློ་མི་བཞག །གང་དུ་ངེས་པ་གཅིག་ཉིད་ལའོ། །ཀུན་ཤོང་ཀུན་འཇུག་འདིར་བདེ་བས། །ཐེག་པ་ཆེན་པོར་བརྗོད་པ་ཡིན། །ཐེག་པ་ཆེ་དང་ཐབས་མངའ་བས། །ཐམས་ཅད་གང་ཡང་འགོག་པ་མེད། །གང་མི་འགོག་པ་འཇུག་ལམ་བདེ། །བདེ་བ་ཉིད་ན་སྤྱད་པར་སླ། །ཐབས་དང་ཐེག་པའི་བྱེ་བྲག་རྣམས། །སོ་སོ་མི་མཐུན་ཐ་དད་ཀྱང། ཐབས་ཀྱི་ངེས་པར་སྤྱོད་པས་ན། །ངེས་པ་ཉིད་ན་ཁྱད་པར་མེད། །དམ་ཚིག་བསྒྲུབ་པ་སྤྱོད་པ་དང་། །ལྟ་བ་སྣ་ཚོགས་ཐ་དད་ཀུན། །དུད་འགྲོ་ཡི་དྭགས་མི་མ་ཡིན། །ངན་སྐྱུགས་ཆེད་དུ་བྱེད་ལ་སོགས། །ཕྱིན་ཅི་ལོག་ཏུ་བལྟས་པ་རྣམས། །དམ་པའི་དོན་ལ་གཟུད་པའི་ཕྱིར། །རྣམ་པ་སྣ་ཚོགས་ཐ་དད་ཀྱང་། །ཡེ་ཉིད་རྡོ་རྗེ་གཅིག་དགོངས་ནས། །སྣ་ཚོགས་ཀུན་དང་འཐུན་འཇུག་ཕྱིར། །སྦྱར་ནས་རྟེན་བྲིད་དྲང་བ་དང་། །ཁྲིད་པའི་ཐབས་སུ་སྦྱར་བར་ཟད།།

ལན་ལྔ་པ་གང་ཞེ་ན། སྟོན་པ་གང་ཞིག་གིས་འདིར་ཡང་གསང་སྔགས་ཐེག་པ་ཆེན་པོའི་སྒོར་ཐབས་ཀྱི་བྱེ་བྲག་མང་དུ་བཤད་པ་ཀུན་ཀྱང་ངོ་བོ་ཐ་དད་རི་ཆད་དུ་ཡོད་པ་མ་ཡིན་ཏེ། འོན་ཀྱང་གང་ཟག་མོས་པ་ཐ་དད་པ་རྣམས་དྲང་བའི་དགོས་ཆེད་ཀྱི་ཕྱིར་ཐབས་ཀྱི་སྤྱོད་པའི་སྒོ་ནི་མང་པོར་བཤད་དེ་བཀའ་སྩལ་པས། དེ་དག་ཀུན་ཀྱང་གདུལ་བྱ་རང་རང་གི་མོས་པ་དང་མཐུན་པའི་སྒོ་ནས་ཐེག་པ་མཆོག་གི་དོན་ལ་དྲང་བའི་ཐབས་སུ་བསྟན་པས་ན། རྣལ་འབྱོར་དམ་པའི་སྤྱོད་པ་ཁོ་ན་ཡིན་པར་མ་ངེས་པས། ཐབས་ཀྱི་སྤྱོད་པའི་རྣམ་གྲངས་ཀུན་ལ་འདི་ཁོ་ནའོ་ཞེས་ངེས་པར་གཟུང་དུ་མེད་མོད་དོན་ལ་ཇི་ལྟར་སྤྱད་ཀྱང་འཆིང་བའི་དུག་ཏུ་མི་འགྱུར་བར་གང་དུ་བདེན་པ་དམ་པ་དེ་ཁོ་ན་ཉིད་དུ་ངེས་པའི་ཐེག་པ་གཅིག་པུ་མ་ནོར་བ་ཉིད་ལ་འབབ་ཞིང་གཞོལ་བ་ཁོ་ནའོ་ཞེས་ལན་བཏབ་པའོ། །ལན་དགུ་པ་ཇི་ལྟ་བུ་ཞེ་ན། དེ་ལ་སོགས་པ་སྤྱོད་པའི་ཐབས་ཀྱི་སྒོ་ཇི་སྙེད་པ་དེ་དག་ཀུན་ཀྱང་གདུལ་བྱ་རང་རང་གི་མོས་པའི་བསམ་པ་དེ་ཉིད་མ་བཀག་པར་ད་དུང་ཐེག་པ་ཆེན་པོར་མ་འདུས་པ་དག་གདོན་ཅིང་དྲང་བའི་ཐབས་སུ་དགོས་ཆེད་དང་ལྡན་པས་ཡང་དག་པའི་དོན་ལ་སྦྱར་ཏེ་བསྟན་པར་མཛད་པས་ན། གདུལ་བྱའི་བློ་ངོར་ཁྲིད་ཐབས་སུ་མོས་པ་དང་མཐུན་པར་བསྟན་པ་ཀུན་ལ་འདི་༼༡༧༡༽ཁོ་ནའོ་ཞེས་ཕྱོགས་གཅིག་ཏུ་ངེས་པའི་བློ་མི་བཞག་སྟེ། མ་ངེས་པ་ཡིན་ཀྱང་སྤྱོད་པའི་རྣམ་གྲངས་བཟང་ངན་གང་ལྟར་སྤྱད་ཀྱང་གང་དུ་དེ་ཁོ་ན་ཉིད་ཇི་བཞིན་པའི་ངང་ལས་མི་འགྱུར་བའི་དོན་དུ་ངེས་པར་འབབ་པ་དེ་ལ་བློ་གྲོས་དམ་པར་བཞག་པར་བྱ་སྟེ་སྤྱོད་པ་རིལ་ནོར་དུ་བྱེད་པའི་བསླབ་པ་ཆེན་པོ་གཅིག་པུ་ཉིད་ལ་མ་འདྲེས་ཡོངས་རྫོགས་སུ་མཉམ་པར་ཤེས་པར་བྱའོ། །ལན་བཅུ་གཅིག་པ་གང་ཞེ་ན། གོང་དུ་བཤད་པ་དེ་བས་ན་ཐབས་ཆེན་པོ་དེ་ཁོ་ན་ཉིད་ཇི་བཞིན་པར་ངེས་པའི་སྒོ་འདིར་ཐབས་ཀུན་ཤོང་ལ་ཀུན་ལའང་འཇུག་པས་འདིར་ནི་གང་ཡང་མ་བཀོལ་བར་འདུས་ཏེ་ཡང་དག་པའི་ལམ་འདིས་བདེ་བ་ཆེན་པོ་ཐོབ་པར་བྱེད་པས་ཐེག་པ་ཆེན་པོར་བརྗོད་པའི་མིང་ཡང་ངེས་པར་གྲུབ་པ་ཡིན་ནོ། །འོན་ཀྱང་ཐེག་པ་མཆོག་ཏུ་ཆེ་བའི་ཚིག་གི་བརྗོད་པས་དོན་ལྟར་ཐབས་ཀྱི་སྒོ་ཡང་ཁྱད་པར་འཕགས་པ་དང༌། ཐབས་ཀྱི་བྱེ་བྲག་གྲངས་ལས་འདས་པ་ཀུན་རྫོགས་ཏེ་ཤིན་ཏུ་མང་པོར་གྱུར་པས་ཐམས་ཅད་གང་ཡང་འགོག་པ་མེད་པར་ཡང་དག་པའི་ཐབས་སུ་ངེས་ཏེ་གང་གི་སྤྱོད་པ་ཡང་མི་འགོག་པས་འདོར་བར་བྱ་བ་ཡང་མེད་ལ། སྤྱོད་པ་ཉིད་ཀྱི་སྦྱོར་བས་གདུང་བ་དང་བྲལ་བས་ཀུན་ཀྱང་འཇུག་པའི་ལམ་དུ་བདེ་བར་འཆར་རོ། །དེ་ལྟ་བུའི་བདེ་བ་ཉིད་ལ་འཛིན་པ་མེད་ཅིང་མ་ཆགས་པས་སྤྱད་པར་སླ་སྟེ་བྱ་བར་དཀའ་བ་ཡང་མེད་དོ། །ལན་བཅུ་པ་གང་སྙམ་པ་ལ། དེ་བས་ཐབས་དང་ཐེག་པའི་བྱེ་བྲག་ཇི་སྙེད་པ་རྣམས་གང་ཡང་ཐེག་པ་སོ་སོ་ལ་གྲགས་པ་ལྟར་མི་མཐུན་པར་ཐ་དད་དུ་བསྟན་པ་ཀུན་ཀྱང་སྒོ་འདི་དང་ལྡན་ན་མ་ནོར་བར་སྤྱོད་ལ་མི་འཆིང་བ་ཉི་ཤར་བས་ཡང་དག་པའི་ཐབས་ཆེན་པོ་ཉིད་ཀྱིས་བདག་དང་གཞན་གྱི་དོན་མཐར་ཕྱིན་པར་ངེས་པར་སྦྱོར་བར་བྱེད་པས་ན། དོན་དེ་ལ་ངེས་པའི་གདེང་རྙེད་པ་ཉིད་ན་གནས་མཐོ་དམན་དང་བཟང་ངན་གྱི་ཁྱད་པར་མེད་དེ་འཁོར་བ་ཉིད་བདེ་བ་ཆེན་པོའི་གནས་སུ་ངེས་པར་ལན་བཏབ་པའོ། །བརྒྱད་པའི་ལན་ཇི་ལྟ་བུ་ཞེ་ན། དམ་ཚིག་དང་སྒྲུབ་པ་དང་སྤྱོད་པ་དང་ལྟ་བ་སྣ་ཚོགས་པ་རྣམ་གྲངས་ཐ་དད་དུ་བསྟན་ཏེ་དམན་པའི་སྤྱོད་པ་ལའང་སློབ་པར་གསུངས་པ་ཐམས་ཅད་ཀུན་ཀྱང་གདུལ་བྱ་ཀླུ་ལ་སོགས་པ་དུད་འགྲོ་དང་ཡི་དྭགས་དང་མི་མ་ཡིན་རྣམས་ཀྱིས་ངན་སྐྱུགས་ཆེད་དུ་བྱེད་པ་ལ་སོགས་པ་ཕྱིན་ཅི་ལོག་ཏུ་གྱུར་པའང་ཡང་དག་པར་བལྟས་ཏེ་ཞེན་པ་ཅན་རྣམས་དམ་པའི་དོན་ལ་ངེས་པར་གཟུད་པའི་ཕྱིར་བསྟན་པའི་རྣམ་པ་ཇི་སྙེད་པའི་ཐབས་དང་དམ་ཚིག་༼༡༧༢༽ལ་སོགས་རྣམ་གྲངས་སྣ་ཚོགས་ཐ་དད་དུ་སྣང་བ་སོ་སོ་ཡང་ངོ་བོ་ཡེ་གདོད་མ་ཉིད་ནས་གཉིས་སུ་མེད་པར་རང་རིག་པ་རྒྱུ་རྐྱེན་དང་བྲལ་བས་འགྱུར་མེད་རྡོ་རྗེར་སྐྱེ་འཇིག་མེད་པར་དབྱེར་མེད་པའི་ངང་དུ་དོན་ལ་གཅིག་ཏུ་གནས་པར་དགོངས་ནས་གདུལ་བྱ་བསམ་པ་ཐ་དད་སྣ་ཚོགས་པ་ཀུན་དང་མཐུན་འཇུག་གི་ཐབས་ཀྱི་སྒོ་ནས་དྲང་བའི་ཕྱིར། དེ་དག་གི་ངོ་བོ་དོན་ལ་སྦྱར་ནས་རྣམ་པ་རང་རང་གི་བསམ་སྤྱོད་དང་མཐུན་པར་སྟེན་དུ་འཇུག་པའི་ཐབས་ཀྱིས་བྲིད་ནས་ཡང་དག་པར་དྲང་ཞིག་བཏོན་ཏེ་འགོད་པ་དང་གནས་ཆེན་པོར་ཁྲིད་ཅིང་བསྐྱང་བའི་ཐབས་སུ་སྦྱར་བའི་ཆེད་དུ་གསུངས་པར་ཟད་དེ་ངོ་བོ་ཉིད་ལ་བསྟན་དུ་མེད་ཀྱང་ཐབས་ཆེན་པོས་ལྡོངས་པ་རྣམས་འདྲེན་པའི་སྤྱོད་པ་ལ་ལོང་བ་ལྟར་མ་རིག་པས་ནོན་པས་སྤྱད་པར་མི་རིགས་པར་ལན་བཏབ་པའོ།།

བཞི་པ་ཚད་ལས་འདས་པའི་སྤྱོད་པ་མི་སྤྱོད་པ་ནི།

གོང་ནས། གང་འདིར་མོས་པ་ཆུད་འཛིན་གྱི། །ཞེས་པ་ནས། ཙམ་ནི་ཐེག་ཚད་ཡིན། །ཞེས་པའི་བར་གྱིས་བསྟན་ཏེ།

གང་འདིར་མོས་པ་ཚུལ་འཛིན་གྱི། །གྲགས་པའི་ཚུལ་འཛིན་བྱ་བ་ཁྱོད། །སངས་རྒྱས་གསང་བའི་སྙིང་པོ་འདི།། སངས་རྒྱས་ཉིད་འདི་མ་གཏོགས་པ། །གང་གི་སྤྱོད་ཡུལ་མ་ཡིན་པས། །ཚུལ་འདྲ་ཙམ་གྱིས་མི་འགྲུབ་བོ། །གང་འདིར་དད་མོས་ནུས་པ་ན། །དེ་ཉིད་དེ་ལ་དེར་ལྟས་ན། །དེ་ལ་དེ་སྦྱོར་དེ་ཉིད་དེ། །དེ་དག་ཙམ་ནི་ཐེག་ཚད་ཡིན།།

དྲི་བ་དྲུག་པའི་ལན་གང་ཞེ་ན། གང་གི་དུས་འདིར་མོས་པ་ཆུང་ངུའི་གྲུབ་མཐའ་འཛིན་པ་ཅན་གྱི་རྒོལ་བ་པོ་གྲགས་པའི་ཚུལ་འཛིན་བྱ་བ་ཁྱོད་ཉོན་དང་ཞེས་བོས་ནས། ཐེག་པ་ཆེན་པོ་གསང་སྔགས་ཀྱི་དོན་སངས་རྒྱས་ཀྱི་དགོངས་པ་དམ་པ་གསང་བའི་སྙིང་པོ་འདི་ནི་སྤྱོད་ཡུལ་བཞི་ལས་རྒྱལ་བ་རྫོགས་པའི་སངས་རྒྱས་ཉིད་ཀྱིས་རང་རིག་པའི་མངོན་སུམ་གྱི་ཡུལ་དུ་འདི་ཉིད་ཇི་བཞིན་པར་གཟིགས་པ་མ་གཏོགས་པ། བློ་ཆུང་བ་གང་གིའང་སྤྱོད་ཡུལ་མ་ཡིན་པས་མངོན་སུམ་དུ་མཐོང་བ་མེད་པའི་ཕྱིར་སྒྲ་ཇི་བཞིན་པར་སྤྱད་ན་བརླག་པར་བྱེད་པས་གསང་སྔགས་ཀྱི་ཚུལ་དང་འདྲ་བར་བཅོས་པ་ཙམ་གྱིས་ནམ་ཡང་མི་འགྲུབ་པའོ་ཞེས་ལན་བཏབ་སྟེ། འོན་ཀྱང་མོས་པ་དང་སློབ་པ་དང་བརྒྱུད་པའི་སྤྱོད་ཡུལ་ནི་འདིར་བསལ་བ་མེད་དོ། །ལན་བདུན་པ་གང་སྙམ་པ་ལ། རྣལ་འབྱོར་པ་གང་སུ་ཞིག་གིས་གསང་སྔགས་ཐེག་པ་ཆེན་པོའི་སྒོ་འདིར་ཤིན་ཏུ་དད་པ་དང་མོས་པ་དང་རྟོགས་པར་འདོད་པས་བསམ་དཔྱོད་ནུས་ན། རྣལ་འབྱོར་བློ་མཆོག་ལྡན་པ་དེ་ཉིད་གསང་སྔགས་ཐེག་པ་ཆེན་པོ་དེ་ལ་ལྟ་བའི་མིག་གིས་ཡང་དག་པའི་དོན་དེར་བལྟས་ཏེ་རྩེ་གཅིག་ཏུ་དམིགས་པར་བྱས་ན། ཇི་ལྟར་གོམས་པའི་རིམ་པ་བཞིན་ཡང་དག་པ་ཇི་བཞིན་པའི་དོན་དེ་ལ་གང་ཟག་དམ་པ་དེས་རྟོགས་པའི་བློ་གྲོས་དེ་ཉིད་སྦྱོར་ནས་རང་གྲོལ་དུ་འགྲོ་བས་དེ་ཁོ་ན་ཉིད་ཀྱི་ཆོས་ཉིད་དེ་བཞིན་ཉིད་དུ་རིགས་ངེས་པར་འགྱུར་༼༡༧༣༽བས་ན་རིམ་པ་དེ་དག་གི་དོན་ལ་དེ་བཞིན་དུ་འབད་པ་ཙམ་ནི་རང་རང་གི་སྐབས་ཀྱི་བློས་ཐེག་ཚད་ཡིན་པས་ཤིན་ཏུ་འཚམས་པ་སྟེ་ལྟུང་བ་མེད་པར་ལན་བཏབ་པའོ།།

ལྔ་པ་རྟོགས་པས་བསྒྲལ་ཞིང་མ་རྟོགས་པས་མི་སྒྲོལ་བར་བསྟན་པ་ནི།

འོག་ནས། གང་འདིར་དམ་པར་གྱུར་ངེས་ན། ཞེས་པ་ནས། ལམ་པ་ཤ་སྟག་འབྱུང༌། །ཞེས་པའི་བར་གྱིས་བསྟན་ཏེ།

གང་འདི་དམ་པར་འགྱུར་ངེས་ན། །དམན་པའི་ལས་རྣམས་ཆེད་དུ་སྤྱད། །དེ་ཉིད་མ་མཐོང་གང་དག་གིས།།

ཚིག་བརྡ་ལམ་གྱི་རྗེས་འབྲེངས་པས། །ཡང་དག་ལམ་ལས་གོལ་བ་ཡི། །ལོག་པའི་ལམ་པ་ཤེ་དག་འབྱུང་།།

འདི་ནི་ལྔ་པ་དང་དྲུག་པའི་ཡང་ལན་དང༌། དགུ་པ་ལ་སོགས་པ་ཐུན་མོང་དུ་སྒྲ་ཇི་བཞིན་དུ་སྤྱད་ན་ལྟུང་བར་བསྟན་པ་སྟེ། གང་འདིར་སེམས་སྐྱེ་མེད་དུ་རྟོགས་པའི་ལྟ་བ་དང་ལྡན་ཞིང་དེ་ཉིད་ལ་གོམས་པ་བརྟན་ཏེ་དམ་པར་གྱུར་ནས་རིགས་ངེས་པར་གྱུར་ན། སྦྱོར་སྒྲོལ་ལ་སོགས་པ་དམན་པའི་ལས་རྣམས་གདུལ་བྱ་སྐལ་བ་དང་ལྡན་པ་དག་དྲང་བའི་ཆེད་དུ་སྤྱད་ཀྱང་ཡང་དག་པའི་སྤྱོད་པ་མ་ནོར་བ་ཡིན་པས་དམ་པས་མཐུན་འཇུག་གི་སྤྱོད་པ་ཡིན་ཡང༌། བདེན་པའི་དོན་དེ་ཁོ་ན་ཉིད་མ་མཐོང་ཞིང་ཟབ་མོའི་གནད་ཁོང་དུ་མ་ཆུད་པའི་རྣལ་འབྱོར་པ་གང་དག་གིས། ཚིག་བརྡ་བརྗོད་པའི་ལམ་ཙམ་གྱི་རྗེས་སུ་བློ་འབྲེངས་པས་སྒྲ་རང་ཐད་དུ་བཟུང་ནས་ཡང་དག་པའི་ལམ་མ་ནོར་བ་ལས་གོལ་ཏེ་འཁྲུལ་པར་འཕྱན་པ་ཡི་ཐེག་ཆེན་གསང་བའི་ལམ་མཆོག་ལ་རྒྱབ་ཀྱིས་ཕྱོགས་པ་ལོག་པའི་ལམ་ལ་ཞུགས་པའི་གང་ཟག་རྨོངས་པ་ཤ་སྟག་ཀྱང་མང་དུ་འབྱུང་སྟེ་གསང་སྔགས་ལོག་པར་སྤྱོད་པའི་སྐབས་རྣམས་ལས་བསྟན་པ་ལྟ་བུའོ། །དེ་བས་ན་ཐབས་ཆུང་ངུའི་ཚིག་དང་མཐུན་པར་དོན་སྤྱོད་པ་ཉིད་ཀྱིས་གསང་ཆེན་ངེས་པའི་སྙིང་པོའི་དོན་ཡང་དག་པ་རིག་པ་དང་ངེས་པ་མ་ཡིན་པར་ལན་བཏབ་པའོ།།

གསུམ་པ་ཞབས་བསྡུ་བ་ནི།

ལང་ཀའི་བདག་པོ། ཞེས་པ་ནས། གྲོལ་བར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་སྐད་དུ། །ཚངས་པའི་འོད་ཅེས་བྱ་བ་དེས། །གྲགས་པའི་ཚུལ་དང་ལྡན་པ་ཡི།།

དྲི་བ་ཆུང་ངུའི་ཐེ་ཙོམ་བཅད། །ཅེས་གསང་བའི་བདག་པོ་དེས། ལངྐའི་མངའ་བདག་ལ་སྨྲས་པས།

གང་ལ་མོས་པ་ཆུང་ངུའི་སེམས་ཅན་རྣམས་ཐེག་པ་ཆེན་པོ་ཉིད་དུ་ངེས་པར་གྲོལ་བར་གྱུར་ཏོ།།

ལང་ཀའི་བདག་པོ་ཞེས་བོས་ནས། དེ་སྐད་དུ་ཐེག་པ་ཆེན་པོའི་རྣལ་འབྱོར་པ་ཚངས་པའི་འོད་ཅེས་བྱ་བ་དེས། རྒྱུའི་ཐེག་པའི་རྣལ་འབྱོར་པ་གྲགས་པའི་ཚུལ་དང་ལྡན་པ་ཡི་སྔགས་ལ་ངེས་པ་མ་རྙེད་པའི་དྲི་བ་ཆུང་ངུའི་ཐེ་ཚོམ་གྱི་དོགས་པ་བཅད་དེ་ལེགས་པར་བསལ་བར་གྱུར་ཏོ། །ཞེས་སྟོན་པ་གསང་བ་པའི་བདག་པོ་དེས། སྡུད་པ་པོ་ལང་ཀའི་མངའ་བདག་ལ་དེ་སྐད་ཅེས་བཀའ་སྩལ་ཏེ་སྨྲས་པས། གང་དུ་མོས་པ་ཆུང་ངུའི་སེམས་ཅན་སྐལ་བ་དམན་པ་དག་ཐེག་པ་ཆེན་པོ་གསང་བ་དམ་པ་ཉིད་དུ་ངེས་པ་ཡང་དག་པར་རྙེད་དེ་རྣམ་པར་གྲོལ་བར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།།

གང་དྲི་བའི་ཐེ་ཙོམ་བཅད་པའི་ལེའུ་སྟེ་སུམ་ཅུ་བདུན་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གྲགས་ལྡན་གང་གི་དྲི་བའི་ཐེ་ཚོམ་༼༡༧༤༽རྣམས་ཚངས་པའི་འོད་ཀྱིས་ཇི་ལྟར་བཅད་པའི་ཚུལ་བསྟན་པའི་ལེའུ་སྟེ་སུམ་ཅུ་རྩ་བདུན་པ་ལེགས་པར་བཤད་པའོ།། །།

ལེའུ་སོ་བརྒྱད་པ་སྔོན་བྱུང་བའི་གཏམ་རྒྱུད་ཡོངས་སུ་བརྗོད་པ།

༈ གསུམ་པ་སྤྱད་ལེགས་ཉེས་ཀྱི་སྐྱོན་ཡོན་ལོ་རྒྱུས་ཀྱི་སྒོ་ནས་བསྟན་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས། ཞེས་པ་ནས། གསང་བའི་བདག་པོ་འདི་ལྟ་སྟེ། ཞེས་པའི་བར་གྱིས་བསྟན་ཏེ།

དེ་ནས་གསང་བའི་བདག་པོ་དེས། ལངྐའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་འདི་སྐད་ཅེས་བཀའ་སྩལ་པ། ཀྱེ་ལངྐའི་བདག་པོ་ཁོ་བོའི་དྲིན་པ་ཐོག་མའི་ཚེ། ཁོ་བོའི་སྟོན་པ་གསང་བ་མཆོག་

གི་བདག་པོ་དེས། འཁོར་དམ་པ་དེའི་ནང་དུ་གསང་བ་བརྒྱུད་པ་གྲགས་པའི་གཏམ་བརྗོད་པ་ནི།

གསང་བ་པའི་བདག་པོ་འདི་ལྟ་སྟེ།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དེ་ནས་དུས་དེར་སྔ་མའི་རྗེས་སུའང་སྟོན་པ་གསང་བ་པའི་བདག་པོ་དེས། སྡུད་པ་པོ་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་འདི་སྐད་ཅེས་བཀའ་སྩལ་ཏོ། །ཀྱེ་ལང་ཀའི་བདག་པོ། ཁོ་བོའི་དྲན་པ་ཐོག་མའི་ཚེ་ན་གནས་འོག་མིན་ཆེན་པོར་ཁོ་བོའི་སྟོན་པ་དཔལ་གསང་བ་མཆོག་གི་བདག་པོ་དེས། འཁོར་དམ་པ་དེའི་ནང་དུ་དུས་དེ་ཉིད་ཀྱི་ཡང་སྔ་མར་གསང་བ་ཆེན་པོ་ཇི་ལྟར་བརྒྱུད་པའི་ཚུལ་གྱི་གྲགས་པའི་གཏམ་རྒྱུད་བརྗོད་པ་ནི། གསང་བའི་བདག་པོ་འདི་ལྟ་སྟེ། ཞེས་འོག་ནས་འབྱུང་བ་བཞིན་བཀའ་སྩལ་པར་མཛད་དེ་འདིར་ནི་ལོ་རྒྱུས་བརྗོད་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། ལོག་པར་སྤྱོད་པའི་སྐྱོན་ལོ་རྒྱུས་ཀྱི་སྒོ་ནས་བསྟན་པ། ལེགས་པར་སྤྱོད་པའི་ཡོན་ཏན་ལོ་རྒྱུས་ཀྱི་སྒོ་ནས་བསྟན་པའོ། །དང་པོ་ལ་གཉིས་ཏེ། རྒྱས་པར་བཤད་པ། མཇུག་བསྡུ་བའོ། །དང་པོ་ལ་བཅུ་གཅིག་སྟེ། ཚུལ་བཅོས་པའི་སྐྱོན། བདག་བསྟོད་གཞན་ལ་སྨོད་པའི་སྐྱོན། མི་ཤེས་པར་སློབ་དཔོན་བྱས་པའི་སྐྱོན། འདུལ་ཞིང་སོ་སོར་བཅད་པའི་སྐྱོན། ཚོགས་ཀྱི་ཡོ་བྱད་ལ་གསོག་འཇོག་བྱས་པའི་སྐྱོན། བཀའ་བརྐུས་ཤིང་བསླུས་པའི་སྐྱོན། ཉམས་པའི་ཚུལ་བཅོས་པའི་སྐྱོན། ཚིག་གི་མཉམ་པ་ལ་བརྟེན་ནས་ཆགས་སྡང་བསྐྱེད་པའི་སྐྱོན། གསང་དོན་གླེང་བ་ལ་ཕྲག་དོག་བྱས་པའི་སྐྱོན། ཚིག་གི་དུག་མདའ་གཏོང་བའི་སྐྱོན། ལྟ་བ་མེད་པར་སྤྱི་ཡུད་ཙམ་ལ་ལྟོས་པའི་སྐྱོན་ནོ། །དང་པོ་ནི།

ང་ཡི་དགོངས་པ། ཞེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

ང་ཡི་དགོངས་པ་སྐབས་ཅིག་ན། །གསང་བ་སྙིང་པོའི་དོན་འདི་དག །མ་ནོར་ཉིད་དུ་ནུབ་པར་འགྱུར། །ཚུལ་ལམ་བཅོས་པ་ཙམ་དག་ལ། །ཕལ་ཆེར་དོན་དུ་སྤྱོད་མོད་ཀྱི། །དོན་དུ་ངེས་པར་ངས་མ་མཐོང་། །ཀུན་ཀྱང་ལོག་པའི་ལམ་ལ་སྤྱོད། །གང་དུ་ལོག་པ་ཇི་ག་ན། །འདི་ལ་མི་གནས་འདི་ཉམས་དང་། །འདི་ལས་ལོག་དང་ལོག་ཚུལ་སྤྱོད། །འདི་ཚུལ་མ་ཡིན་འདིར་མ་ངེས། །གཡོ་སྒྱུས་བདེན་འདྲར་བཅོས་ལོག་གམ། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །བསྐལ་པ་ཀུན་བཀོད་བྱ་བ་ལ། །སངས་རྒྱས་སྔོན་བྱུང་རྒྱལ་པོ་དེ། །མྱ་ངན་འདས་པར་གྱུར་འོག་ཏུ། །བྱུང་བའི་རྣལ་འབྱོར་བཟང་ལྡན་དེ། །མི་ཤེས་བྱིས་པའི་འཁོར་རྣམས་ལ། །ཚུལ་བཅོས་ལོག་པའི་སྔགས་བསྟན་པས། །ལྔ་བརྒྱའི་འཁོར་དང་བཅས་པ་དེ། །དོན་ལས་གོལ་ཅིང་འཁོར་བར་ལོག །དེ་འདྲའི་ཚུལ་བྱུང་དེར་མ་སྤྱོད།།

སྟོན་པ་ང་ཡི་དགོངས་པ་དམ་པ་གསང་ཆེན་ལུང་གི་བསྟན་པ་རིན་པོ་ཆེ་ལ་སྐབས་གཅིག་ཏུ་ལེགས་པར་སྤྱོད་ན་ཡང༌། གསང་བའི་མངའ་བདག་ཆེན་པོ་དེའི་རྗེས་སུ་གསང་བ་ཟབ་མོའི་དོན་འདི་དག་མ་ནོར་སྤྱོད་པ་ཉིད་ནི་ནུབ་པར་འགྱུར་ཞིང་དེའི་བསྟན་པ་གཟུགས་བརྙན་གྱི་ཚུལ་ལམ་བཅོས་མ་ཙམ་དག་ལ་ཕལ་ཆེར་གྱིས་དོན་དུ་བཟུང་ནས་སྤྱོད་མོད་༼༡༧༥༽ཀྱི་སྤྱོད་པ་དེ་དག་རྣལ་འབྱོར་མཆོག་གི་གསང་དོན་དུ་ངེས་པར་སྟོན་པ་ངས་ཡང་དག་པར་མ་མཐོང་སྟེ། རྣལ་འབྱོར་དུ་ཁས་འཆེ་བ་ཀུན་ཀྱང་ལོག་པའི་ལམ་ལ་སྤྱོད་པ་ཁོ་ནའོ། །དེ་ཡང་ལམ་གང་དུ་ལོག་པ་ཁོ་ན་ལ་སྤྱོད་པ་ཇི་ག་ལྟར་ཡིན་ཞེ་ན། གསང་བའི་དོན་ཟབ་མོ་འདི་ཉིད་ཡང་དག་པར་རྟོགས་པ་ལ་མི་གནས་པར་འདི་ཡི་དམ་ཚིག་ཉམས་པ་དང་སྤྱོད་པ་འདི་ལས་ལོག་པར་ཞུགས་པ་དང་ལོག་པའི་བརྟུལ་ཞུགས་ཀྱི་ཚུལ་ལ་སྤྱོད་པ་འབྱུང་བས། དེ་ནི་གསང་སྔགས་འདི་ཡི་ལམ་ཡང་དག་པའི་ཚུལ་ལ་སློབ་པ་མ་ཡིན་པས་འབྲས་བུའི་སྒོ་འདིར་འཇུག་པར་མ་ངེས་ཏེ་གཡོ་དང་སྒྱུས་བདེན་པ་དང་འདྲར་ཞེས་འདྲ་བར་བཅོས་ནས། ལོག་པར་སྤྱོད་པ་དག་གམ་འཁྲུལ་བར་འཕྱན་པའོ། །དེ་ཡང་གང་ཟག་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ། བསྐལ་པ་ཀུན་བཀོད་ཞེས་བྱ་བ་ལ་འཇིག་རྟེན་དུ་བྱོན་པའི་སངས་རྒྱས་མངོན་བྱུང་རྒྱལ་པོ་དེ་ཉིད་མྱ་ངན་ལས་འདས་པར་གྱུར་པའི་འོག་དུ་བྱུང་བའི་རྣལ་འབྱོར་བཟང་ལྡན་བྱ་བ་དེ་ཡིས། རང་གིས་གསང་དོན་ཟབ་མོ་མི་ཤེས་པར་བྱིས་པའི་འཁོར་ཚོགས་རྣམས་ལ། ཚུལ་འདྲ་བར་བཅོས་ཏེ་ལམ་ལོག་པའི་རྒྱུར་འགྱུར་བའི་སྔགས་ཀྱི་ཀུན་སྤྱོད་བསྟན་པས་ལྔ་བརྒྱའི་འཁོར་དང་བཅས་པ་དེ་དག་གསང་བ་མཆོག་གི་དོན་ལས་གོལ་ཞིང་སླར་ཡང་འཁོར་བར་འཆིང་ཞིང་ལོག་པའི་གནས་སུ་འཁྱམས་པ་དེ་འདྲའི་ཚུལ་སྔོན་ཡང་བྱུང་བས་མ་འོངས་པ་རྣམས་ཚུལ་དེར་ཞེས་དེ་ལྟ་བུར་མ་སྤྱོད་ཅིག་ཅེས་གདམས་པའོ།།

གཉིས་པ་བདག་བསྟོད་གཞན་ལ་སྨོད་པའི་སྐྱོན་ནི།

གཞན་ཡང་གསང་བའི། ཞེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གསང་བའི་བདག་པོ་ཉོན། །རྨད་བྱུང་གསང་བའི་སྙིང་པོ་འདི། །རྣལ་འབྱོར་དབང་ཕྱུག་ཚད་མ་རྣམས། །ཕལ་ཆེར་མི་གནས་སྐབས་དག་ཏུ། །མི་ཤེས་ངན་རྟོགས་ཅན་རྣམས་ཀྱིས། །ལོག་བརྟགས་དོན་སླད་གཞུང་བོར་ཏེ། །ནོར་བས་བདག་ཉིད་སུན་འབྱིན་ཅིང་། །འདི་ཡི་གཞན་རྟོགས་མ་ཡིན་ཞེས། །བདག་བསྟོད་གཞན་ལ་སྨོད་པ་ལོག །དེ་ཡང་ཇི་ལྟ་བུ་ཞེ་ན། བསྐལ་པ་དེ་ཡི་དུས་ཉིད་ལ། །རྣལ་འབྱོར་དཔའ་བྱིན་བྱ་བ་ཞིག །དོན་ལ་བློ་ཤེས་མ་བྱེ་ཞིང་། །གྲོས་ཀྱི་ཐབས་ལ་མི་མཁས་པས། །བློ་གྲོས་ངེས་པའི་གཞུང་བོར་ནས། །ཆོས་མ་ཡིན་པའི་ཆོས་སྤྱོད་ཅིང་། །ངེས་པའི་གྲོས་ལྡན་གཞན་དག་ལ། །དེ་ལྟར་མ་ངེས་བློ་གྲོས་ནི། །བདག་གི་བློ་གྲོས་འདི་ཡིན་ཞེས། །མངོན་པའི་ང་རྒྱལ་ཆེར་སྤྱོད་པ། །འདི་ནི་སྲིད་པ་ལོག་པའི་ལམ། །དེ་འདྲའི་ཚུལ་བྱུང་དེར་མ་སྤྱོད།།

གཞན་ཡང་གསང་བའི་བདག་པོ་ཉོན་ཅིག ཐབས་རྨད་དུ་བྱུང་བའི་གསང་བའི་སྙིང་པོ་འདི་ཡི་དོན་ལ་རྣལ་དུ་འབྱོར་ནས་སེམས་ལ་དབང་བསྒྱུར་བས་སྤྱོད་ཡུལ་རང་སྣང་གི་དོན་དུ་རྟོགས་པའི་རིག་པ་ཚད་མ་སྐྱེས་པ་རྣམས་ཕལ་ཆེར་མི་བཞུགས་པའི་གནས་སྐབས་དག་ཏུ་ཡང་གསང་བའི་བསྟན་པ་འདི་ཉིད་ནོར་བར་སྤྱོད་དེ། གསང་དོན་ཚུལ་བཞིན་དུ་མི་ཤེས་ཤིང་ངན་པའི་སྤྱོད་ཡུལ་ལ་རྟོག་འཛིན་ཅན་རྣམས་ཀྱིས། ལམ་ལོག་པར་བརྟགས་ནས་ཡང་དག་པའི་དོན་བསླད་ཅིང་བཀའ་ཡི་གཞུང་བོར་ཏེ་ནོར་བར་ཞུགས་པས་བདག་ཉིད་སུན་འབྱིན་ཞིང་འདི་ཉིད་ཁོ་ན་ཡིན་གྱི་གཞན་གྱིས་དོན་ཇི་བཞིན་པར་རྟོགས་པ་མ་ཡིན་ཞེས་ཟེར་ཞིང་བདག་ལ་བསྟོད་ཅིང་གཞན་ལ་སྨོད་པ་ནི་ལོག་པར་ལྟུང་བའོ། །དེ་ཡང་ཇི་ལྟ་བུ་ཞེ་ན། ༼༡༧༦༽བསྐལ་པ་ཀུན་བཀོད་ཞེས་བྱ་བ་དེ་ཡི་དུས་ཉིད་ལ། རྣལ་འབྱོར་དཔལ་བྱིན་བྱ་བ་ཞིག་གིས་གསང་སྔགས་ཀྱི་དོན་ལ་བློ་ཤེད་མ་བྱེ་ཞིང༌། ལྷག་མཐོང་གིས་ས་གཅོད་པའི་གྲོས་ཀྱི་ཐབས་ལ་མི་མཁས་པས་གསང་དོན་ལ་བློ་གྲོས་ངེས་པའི་བཀའི་གཞུང་བོར་ནས་ཡང་དག་པའི་ཆོས་མ་ཡིན་པའི་ལོག་པའི་ཆོས་ལ་སྤྱོད་ཅིང༌། གསང་དོན་ཇི་བཞིན་དུ་ངེས་པའི་བློ་གྲོས་དང་ལྡན་པ་གཞན་དག་ལ་ཁྱོད་ཀྱིས་དེ་ལྟར་མ་ངེས་ཏེ་ཡང་དག་པའི་བློ་གྲོས་ནི་བདག་གི་བློ་གྲོས་འདི་ཉིད་ཁོ་ན་ཡིན་ནོ་ཞེས་མངོན་པའི་ང་རྒྱལ་ཆེར་སྤྱོད་པ་འདི་ནི་རང་གིས་མི་ཤེས་པར་གཞན་ལ་སྨྲ་ཚབས་ཆེ་བས་སྲིད་པ་ལོག་པའི་ལམ་གྱི་འབྲས་བུར་སྨིན་པ་སྟེ། སྔོན་ཡང་དེ་འདྲའི་ཚུལ་བྱུང་བས་མ་འོངས་པ་རྣམས་དེར་མ་སྤྱོད་ཅིག་པའོ།།

གསུམ་པ་མི་ཤེས་པར་སློབ་དཔོན་བྱས་པའི་སྐྱོན་ནི།

གཞན་ཡང་གནོད་འདུལ། ཞེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གནོད་འདུལ་འདི་ལྟ་སྟེ། །སྔར་བྱུང་རྒྱུད་ཀྱི་རྗེས་གནས་པས། །གདེང་མེད་བཞིན་དུ་དཔོན་བཏགས་ནས། །ཚིག་གཉེར་གྲགས་པའི་དབང་དེས་ནི། །མི་ཤེས་བཞིན་དུ་རས་གཅོད་པ། །ཚུལ་འཆོས་སེམས་ཀྱི་གྱ་གྱུར་ཅན། །སྨྱོན་ཐབས་བླུན་པའི་སྡིག་ཅན་ཡིན། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །ཀུན་བཀོད་གྲགས་པ་དེ་ཉིད་ལ། །ཚུལ་རྟགས་འཛིན་པའི་རྣལ་འབྱོར་པ། །དྲི་མེད་སྤྱོད་ཅེས་བྱ་བ་ཞིག །སྔར་བྱུང་མཁས་པའི་རྗེས་སུ་སྣང་། །ཁྲི་ཕྲག་བཅུ་ཡི་འཁོར་རྣམས་ཀྱིས། །རྒྱུད་ཀྱི་རྗེས་སུ་བྱུང་བ་ཡི། །དོན་མེད་རྣལ་འབྱོར་དེ་ཉིདལ། །ཚིག་གི་ཁུར་ཆེན་རྗིད་ཕབ་ནས། །རིགས་བརྒྱུད་འཛིན་པར་དཔོན་སྟབས་ཏེ། །ཆེ་བས་ཆེ་བའི་གྲགས་པ་སྐྱེས། །མི་ཤེས་བཞིན་དུ་ཚུལ་བཅོས་ཏེ། །འདྲ་ཚུལ་ལོག་པའི་ཆོས་སྤྱད་པས། །འཁོར་བཅས་དྲེགས་པའི་རུ་དྲར་ལྷུངས། །དེ་འདྲའི་ཚུལ་བྱུང་དེར་མ་སྤྱོད།།

གཞན་ཡང་གནོད་སྦྱིན་འདུལ་བའི་དབང་པོ་འདི་ལྟ་སྟེ། བརྒྱུད་པ་ཚད་ལྡན་སྔར་བྱུང་བའི་རྒྱུད་ཀྱི་རྗེས་སུ་གནས་པས། རིགས་བཟང་ཡང་རང་ལ་སྔགས་ཀྱི་ལྟ་དགོངས་རྟོགས་པའི་གདེངས་མེད་བཞིན་དུ་འཁོར་རྣམས་ཀྱིས་སློབ་དཔོན་གྱི་གོ་སར་བསྟབས་ནས། ཚིག་འབའ་ཞིག་དོན་དུ་གཉེར་ཞིང་རྒྱུད་དྲེགས་པར་གྱུར་པའི་དབང་ངེས་ན་རང་གིས་མི་ཤེས་བཞིན་དུ་གཞན་ལ་ཆེ་ངག་གིས་རས་སུ་གཅོད་པ། དོན་གྱི་གདེངས་མེད་པར་ཡིད་གཉིས་དང་ཐེ་ཚོམ་ཟ་བས་ཚུལ་ཙམ་འཆོས་པའི་སེམས་ཀྱི་གྱ་གྱུ་ཅན་སྤྱོད་པ་སྨྱོན་ཐབས་སུ་སྤྱོད་ཅིང་སེམས་ཀུན་ཏུ་བླུན་པའི་སྡིག་པ་ཅན་ཡིན་ནོ། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་བསྐལ་པ་ཀུན་བཀོད་དུ་གྲགས་པ་དེ་ཉིད་ལ། སྔགས་ཀྱི་ཚུལ་རྟགས་ཙམ་འཛིན་པའི་རྣལ་འབྱོར་པ་དྲི་མེད་སྤྱོད་པ་ཞེས་བྱ་བ་ཞིག་གིས། སྔར་བྱུང་བའི་མཁས་པའི་རྒྱུད་ཀྱི་རྗེས་སུ་སྣང་བ་རྒྱུ་མཚན་དུ་བྱས་ཏེ། ཁྲི་ཕྲག་བཅུ་ཡི་འཁོར་རྣམས་ཀྱིས། རིགས་རྒྱུད་བཟང་པོ་རྣམས་ཀྱི་རྗེས་སུ་བྱུང་བ་ཡི་དབང་ལས། གསང་དོན་རྟོགས་པའི་གདེངས་མེད་པའི་རྣལ་འབྱོར་དེ་ཉིད་ལ་ཁྱོད་ཀྱིས་སློབ་དཔོན་བྱས་ཏེ་ཆོས་བཤད་དགོས་སོ་ཞེས་ཚིག་གི་ཁུར་ཆེན་ལྗིད་དུ་ཕབ་ནས་དོན་ལྡན་མཁས་པའི་རིགས་རྒྱུད་འཛིན་པར་བྱེད་པའི་དཔོན་དུ་བསྟབས་ཏེ་བཀུར་བས། ཚུལ་རྟགས་ཙམ་གྱི་ཆེ་བས་རང་ལ་ཆེ་བའི་དྲེགས་པ་སྐྱེས་ནས་ཡང་དག་པའི་ལམ་མི་ཤེས་བཞིན་དུ་ཚུལ་འཆོས་པར་བྱས་ཏེ་འདྲ་ཚུལ་ལོག་པའི་ཆོས་ལ་སྤྱད་པས། འཁོར་དང་བཅས་པ་དྲེགས་པའི་༼༡༧༧༽རུ་ཏྲར་ལྟུང་སྟེ། སྔར་ཡང་དེ་འདྲའི་ཚུལ་བྱུང་བས་དེར་མ་སྤྱོད་ཅིག་ཅེས་པའོ།།

བཞི་པ་འདུལ་ཞིང་སོ་སོར་བཅད་པའི་སྐྱོན་ནི།

གཞན་ཡང་གནོད་འདུལ། ཞེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གནོད་འདུལ་གསང་བའི་བདག །མཛའ་འདྲིན་སླངས་ཏེ་ཞིང་རྣམས་དང་། །རྙེད་དང་བཀུར་སྟིས་འཚོ་བའི་འཁོར། །གཞན་དབང་ཉིད་དུ་འགྱུར་དོགས་ནས། །རིས་དང་ཚོམ་སྡེ་སོ་སོར་སྤྱོད། །འདི་དག་བདག་གི་གདུལ་བྱ་ཡི། །འབྱོར་པས་འཚོ་བའི་ཞིང་ཡིན་གྱིས། །གང་དག་གང་འདིར་མ་འདུ་ཞེས། །སྨྱོན་རྨོངས་ཚིག་གི་སྒོ་ཕྱེད་ནོར། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །གང་དུ་གྲགས་པ་དེ་ཉིད་ལ། །ན་ཞི་ན་ཞེས་བྱ་བ་ཞིག །རྣལ་འབྱོར་ལྔ་བརྒྱའི་འཁོར་དང་བཅས། །ཤིན་ཏུ་གསང་སྔགས་ཆེར་སྤྱོད་ཅེས། །དགོན་པའི་རྒྱུད་དུ་དབེན་གནས་ཏེ། །གང་གི་ལྗོངས་ཆེན་དེ་དག་ན། །གནས་པས་གནས་པ་དེ་དག་ཀུན། །ཁ་གསགས་ཐབས་སྒྱུས་ཞིང་དུ་སྤྱོད། །གཞན་གྱི་སྡེ་པར་གྱུར་པ་ཡི། །རྣལ་འབྱོར་མིག་ལྡན་དོན་མཐོང་ཞིག །གང་དེར་ཆེད་དུ་གཉེར་འོངས་ནས། །དོན་དམ་ངེས་ལམ་དེ་ཁོ་ན། །རྒྱས་པར་བསྟན་དུ་བརྩམས་པ་ལ། །དགོན་པའི་རྒྱུད་དུ་དབེན་འཛིན་པས། །སྨྱོན་རྨོངས་ལོག་པའི་བསྒོ་བ་བྱས། །འདི་ཁམས་བདག་གི་ཞིང་ཡིན་གྱི། །ཁོ་ན་ངོ་བོ་ཉིད་དེངས་ཤིག །ཚད་དང་གཞན་གྱི་རིས་བཅད་པས། །ཉོན་མོངས་འཁོར་བའི་ལམ་དུ་ལྷུངས། །དེ་འདྲའི་ཚུལ་བྱུང་དེར་མ་སྤྱོད།།

གཞན་ཡང་གནོད་འདུལ་གསང་བའི་བདག་པོ། མཛའ་བ་དང་སྨོས་འདྲིན་དུ་ཡོད་པས་བསླད་ན་སྟེར་བའི་གདུལ་ཞིང་རྣམས་དང༌། རྙེད་པ་དང་བཀུར་སྟིས་འཚོ་བའི་འཁོར་རྣམས་གཞན་གྱི་དབང་ཉིད་དུ་འགྱུར་བར་དོགས་ནས། རང་གཞན་གྱི་རིགས་དང་ཚོམ་རྣམས་སྡེ་ཚན་སོ་སོར་གཅོད་པར་བྱེད་དེ། འདི་དག་བདག་གིས་འདུལ་བར་བྱ་བའི། ལོངས་སྤྱོད་དང་འབྱོར་པས་འཚོ་བའི་ཞིང་ཡིན་གྱིས། གཞན་གང་དག་གསང་སྔགས་ཀྱི་གདུལ་ཞིང་གང་འདིར་མ་འདུ་ཞིག་ཅེས་ཉོན་མོངས་པའི་ཚིག་གིས་རིགས་སྡེ་སོ་སོར་ཕྱེས་ནས་རིས་སུ་བཅད་དེ་བསྒོ་བར་བྱེད་པ་ནི་ལམ་ནོར་བ་ལ་ལྟུང་བ་སྟེ། དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་གང་བསྐལ་པ་ཀུན་བཀོད་དུ་གྲགས་པ་དེ་ཉིད་ལ། རྣལ་འབྱོར་པ་ན་ཞི་ན་ཞེས་བྱ་བ་ཞིག རྣལ་འབྱོར་ལྔ་བརྒྱའི་འཁོར་དང་བཅས་ཏེ། ཤིན་ཏུ་མྱུར་བའི་གསང་སྔགས་ཀྱི་ལམ་ལ་ཆེར་སྤྱོད་དོ་ཞེས་ཟེར་ནས། དགོན་པའི་རྒྱུད་དུ་དབེན་པ་ལ་གནས་ཏེ་འདུག་ནས་གང་གི་ཡུལ་ཁམས་ཀྱི་ལྗོངས་ཆེན་པོ་དེ་དག་ན་གནས་ཤིང་བརྟེན་པས་མི་ཡི་གང་ཟག་ཇི་སྙེད་ཅིག་གནས་པ་དེ་དག་ཀུན་ཀྱང་ཁ་གསག་དང་ཐབས་ཀྱི་སྒྱུས་རང་གི་གདུལ་ཞིང་དུ་སྤྱོད་པར་བྱེད་དོ། །དེ་ལས་གཞན་གྱི་སྡེ་པར་གྱུར་པ་ཡི། རྣལ་འབྱོར་པ་བློ་གྲོས་ཀྱི་མིག་དང་ལྡན་པས་གསང་བ་མཆོག་གི་དོན་ཡང་དག་པར་མཐོང་བ་ཞིག གདུལ་བྱ་གང་དེ་དག་གི་དོན་ཆེད་དུ་གཉེར་ཏེ་དེར་འོངས་ནས། གསང་ཆེན་དོན་དམ་པའི་བདེན་པ་ཡང་དག་པར་ངེས་པའི་ལམ་དེ་ཁོ་ན་རྒྱས་པར་སྟོན་པའི་ཆེད་དུ་ཆོས་བཤད་པར་བརྩམས་པ་ལས་དགོན་པའི་རྒྱུད་དུ་དབེན་པར་འཛིན་པ་ན་ཞི་ན་ཞེས་བྱ་བས། ཉོན་མོངས་པའི་དབང་གི་ལོག་པའི་སེམས་ཀྱིས་བསྒོ་བ་བྱས་ཏེ། འདི་ཡི་ཡུལ་ཁམས་གང་དེ་བདག་གི་གདུལ་བའི་ཞིང་ཡིན་གྱིས། ཁྱོད་ནི་འདི་ལ་མི་གཏོགས་པས་དགེ་སློང་རྣལ་འབྱོར་ཁོ་ན་ངོ་བོ་ཉིད་ཁྱོད་རང་གནས་གཞན་དུ་དེངས་ཤིག ཅེས་རང་གི་སྡེ་ཚན་དང་གཞན་གྱི་ཕྱོགས་རྣམས་རིས་སུ་བཅད་པས་ཀུན་ནས་ཉོན་མོངས་པ་འཁོར་བའི་ལམ་གྱི་འདམ་རྫབ་ཏུ་ལྷུང་བར་གྱུར་ཏེ། སྔོན་ཡང་དེ་འདྲའི་ཚུལ་བྱུང་བས་དེར་ཞེས་དེ་འདྲའི་ཚུལ་དུ་མ་སྤྱོད་ཅིག་ཅེས་པའོ།།

ལྔ་པ་ཚོགས་ཀྱི་ཡོ་བྱད་ལ་གསོག་འཇོག་བྱས་པའི་སྐྱོན་ནི།

གཞན་ཡང་གདུལ་དཀའ། ཞེས་པ་ནས། ༼༡༧༨༽ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གདུལ་དཀའ་འདུལ་བའོ། །རྣལ་འབྱོར་དམ་པའི་དངོས་རྒྱུ་ལ། །བདག་གིར་འདོད་སྤྱོད་གསོག་འཇོག་བྱེད། །གཅིག་ཡིད་གཅིག་གིས་འབྱིན་བྱེད་པ། །ནམ་ཞར་ལོངས་སྤྱོད་ཐོབ་པ་མིན། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །གྲགས་པ་ཀུན་བཀོད་དེ་ཉིད་ལ། །བདེར་ཤིས་ཞེས་ནི་བྱ་བ་ཡི། །རྣལ་འབྱོར་ཞེན་ཆགས་འཁོར་དང་བཅས། །སྔགས་ཚིག་སྒྲ་ཡི་རྗེས་གཅོད་པས། །དེ་ཡི་འཁོར་དེར་འདུས་གྱུར་པའི། །བུད་མེད་བཟང་རྒྱན་བྱ་བ་ཞིག །འཚོ་བ་འཛིན་པར་སྦྱར་བ་ལས། །སེར་སྣས་གསོག་འཇོག་བྱ་བ་ཡི། །ཡི་དྭགས་ཁྱི་ཡི་ལུས་བླངས་ཏེ། །དམན་པའི་ལུས་སུ་གཏན་དུ་འཁྱམས། །དེ་འདྲའི་ཚུལ་བྱུང་དེར་མ་སྤྱོད།།

གཞན་ཡང་གདུལ་དཀའ་འདུལ་བ་གསང་བདག་ཆེན་པོ། རྣལ་འབྱོར་དམ་པས་ཚོགས་ཀྱི་ཡོ་བྱད་དུ་བསྔོས་པར་གྱུར་པའི་རྒྱུ་ཡི་དངོས་པོ་ལ། བདག་གིར་བྱས་ནས་འདོད་པའི་ལོངས་སྤྱོད་ཀྱི་ཆེད་དུ་གསོག་འཇོག་བྱེད་དེ་གཅིག་གི་ཡིད་ལ་གཅིག་གིས་མཐུན་པ་སྟེར་ཏེ་སུན་འབྱིན་པར་བྱེད་པ་རྣམས་ནི་ནམ་ཞར་ཡང་ལོངས་སྤྱོད་ཐོབ་པ་མིན་ནོ། །དེ་ཡང་ཇི་ལྟ་བུ་ཞེ་ན་འདས་པའི་དུས་ན་སྔོན་བྱུང་བ་བསྐལ་པར་གྲགས་པ་ཀུན་བཀོད་ཞེས་བྱ་བ་དེ་ཉིད་ལ། རྣལ་འབྱོར་བདེར་ལྡན་ཤིས་པ་ཞེས་ནི་བྱ་བ་ཡི་རྣལ་འབྱོར་ཞེན་ཆགས་ཅན་ཚོམ་བུའི་འཁོར་དང་བཅས་པ་ཞིག་གསང་སྔགས་ཀྱི་ཚིག་སྒྲ་ཡི་རྗེས་སུ་རྒྱ་ཆེར་སྤྱོད་པ་ལས། དེ་ཡི་འཁོར་དུ་འདུས་པར་གྱུར་པའི་བུད་མེད་བཟང་རྒྱན་ཞེས་བྱ་བ་ཞིག་འཚོ་བ་ཚོགས་ཀྱི་ཡོ་བྱད་རྣམས་འཛིན་པར་སྦྱར་ནས་གིང་དུ་བསྐོས་པ་ལས། འབྱོར་པའི་དངོས་པོ་དག་ལ་སེར་སྣས་གསོག་འཇོག་བྱས་པ་ཡིས་ལས་ཀྱི་རྣམ་པར་སྨིན་པས་ཡི་དྭགས་ཁྱི་ཡི་ལུས་སུ་སྐྱེ་བ་བླངས་ཏེ་དམན་པའི་ལུས་སུ་གཏན་དུ་འཁྱམས་པར་གྱུར་ཏེ། སྔོན་ཡང་དེ་འདྲའི་ཚུལ་བྱུང་བས་ཚུལ་དེར་མཐུན་པར་མ་སྤྱོད་ཅིག་ཅེས་པའོ།།

དྲུག་པ་བཀའ་བརྐུས་ཤིང་བསླུས་པའི་སྐྱོན་ནི།

གཞན་ཡང་གསང་བདག ཅེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གསང་བདག་གནོད་འདུལ་བ། །ལོག་པར་སྤྱོད་པའི་རྣལ་འབྱོར་ནི། །ལོག་ལྟ་གཏུམ་ཁྲོ་སྤྱི་བརྟོལ་ཆེ། །སྡིག་དཔྱོད་དོན་དང་མི་ལྡན་ཡང་། །བདག་འདི་ངེས་པ་ཁོ་ནའོ་ཞེས། །བབ་ཆོལ་བཀའ་རྐུན་སླུ་བྱེད་བསླད། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །ཆོས་སྐྱོང་བ་ཡི་རྣལ་འབྱོར་པ། །པྲ་མ་ཏ་ཞེས་བྱ་བ་ཞིག །དོན་དང་ལམ་ལ་མ་མཐོང་བར། །བདག་ནི་ལམ་མཁན་ཁོ་ནའོ་ཞེས། །ཀུན་ལ་རྒྱ་ཆེར་གྲགས་པ་ལས། །རྒྱལ་བའི་བཀའ་རྐུས་འགྲོ་གང་རྣམས། །བསླུས་པར་གྱུར་པའི་སྨིན་པ་ཡིས། །ངན་འགྲོར་བྱིང་འགྱུར་གནས་དེ་ནས། །ཐར་ནས་ལོག་པའི་འཇིག་རྟེན་པ། །བདག་འཛིན་སྤྱོད་པའི་ཁམས་སུ་ལྷུངས། །དེ་འདྲའི་བྱུང་ཚུལ་དེར་མ་སྤྱོད།།

གཞན་ཡང་གསང་བདག་གནོད་སྦྱིན་འདུལ་བ། གསང་བའི་བཀའ་ལ་ལོག་པར་སྤྱོད་པའི་རྣལ་འབྱོར་ནི། ལོག་ལྟའི་སྤྱི་བརྟོལ་དང་གཏུམ་ཁྲོ་ཆེ་ཞིང་སྡིག་སྤྱོད་ལ་གནས་པས་ཡང་དག་པའི་དོན་དང་མི་ལྡན་ཡང་བདག་གིས་བསྟན་པ་འདི་ནི་ངེས་པ་ཟབ་མོ་ཁོ་ནའོ་ཞེས་ཟེར་ཞིང་བབ་ཅོལ་དུ་སྟོན་པ་དང་བླ་མའི་བཀའ་ཡི་རྐུན་བུ་རང་གཞན་བསླུ་བར་བྱེད་པའི་གསང་བའི་གཞུང་ལ་བསླང་པར་བྱེད་པ་དག་བྱུང་ངོ༌། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་ཆོས་སྐྱོང་བ་ཡི་རྒྱལ་པོའི་རིགས་ཀྱི་རྣལ་འབྱོར་པ་པྲ་མ་ཏ་ཞེས་བྱ་བ་ཞིག་གིས། གསང་དོན་རྟོགས་པ་དང་བྲལ་ཞིང་ཐབས་ཀྱི་ལམ་ལ་འཇུག་པའི་སྒོ་ཡང་དག་པར་མ་མཐོང་བར་བདག་ནི་གསང་བའི་ལམ་མཁན་ཁོ་ནའོ་ཞེས་ཀུན་ལ་རྒྱ་ཆེར་བསྒྲགས་པས་དེ་ལྟར་གྲགས་པར་གྱུར་པ་ལས། རྒྱལ་བའི་བཀའ་ལུང་བརྐུས་ཏེ་འགྲོ་བ་གང་རྣམས་བསླུས་པར་གྱུར་པའི་ལས་ཀྱི་རྣམ་པར་སྨིན་པ་ཡིས་སྡུག་བསྔལ་གྱིས་གདུང་བ་ངན་འགྲོར་བྱིང་བར་འགྱུར་ཞིང་གནས་རིས་དེ་ནས་ཐར་ནས་ཀྱང་ལྟ་བ་ལོག་པའི་འཇིག་རྟེན་པ་བདག་ཏུ་འཛིན་པ་ལ་སྤྱོད་པའི་མུ་སྟེགས་པའི་ཁམས་ཀྱི་གནས་སུ་ལྟུང་༼༡༧༩༽བར་གྱུར་ཏེ། དེ་འདྲའི་ཚུལ་སྔར་ཡང་བྱུང་བས་དེར་མ་སྤྱོད་ཅིག་ཅེས་པའོ།།

བདུན་པ་ཉམས་པའི་ཚུལ་བཅོས་པའི་སྐྱོན་ནི།

གཞན་ཡང་གསང་བདག ཅེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གསང་བདག་འདུལ་བའོ། །ཐ་ཚིག་ཉམས་ཤིང་དོན་ལ་རྨུགས། །གྲགས་པ་དེ་ལ་ཁས་འཆེས་ཕྱིེར། །རྒྱལ་པོའི་རྒྱལ་ས་ཐོབ་འདོད་པ། །ཁྲེལ་མེད་སྤྱི་བརྟོལ་མུན་སྤྲུལ་འཆལ། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །གང་དུ་གྲགས་པ་དེ་ཉིད་ལ། རྣལ་འབྱོར་སྔགས་ཀྱི་ཚུལ་སྤྱོད་པ། །པེ་ན་པ་ཡང་བྱ་བ་ཞིག །བརྒྱ་ཡི་སྡེ་དང་བཅས་པ་བྱུང་། །རྩ་བ་ཉམས་ཤིང་དོན་ལ་རྨུགས། །དྲེགས་པ་ཆེན་པོའི་ང་རྒྱལ་གྱིས། །དོན་དང་ལྡན་པ་ཚུལ་བཅོས་ཕྱིར། །རྒྱལ་པོའི་རྒྱལ་ཐབས་ཆེ་བླངས་པས། །རི་བོས་སྲོག་ཆགས་མནན་པ་བཞིན། །ང་རྒྱལ་དྲེགས་པའི་རི་བོ་ཡིས། །འཁོར་བའི་ལས་སྤྱོད་ལས་ངན་པ། །གཏི་མུག་ཕག་གི་རིགས་སུ་ལྷུངས། །དེ་འདྲའི་ཚུལ་བྱུང་དེར་མ་སྤྱོད།།

གཞན་ཡང་གསང་བདག་ཆེན་པོ་གདུལ་དཀའ་འདུལ་བ་པོ། སྔགས་ཀྱི་ཐ་ཚིག་ཉམས་ཤིང་རྟོགས་པའི་དོན་ལ་རྨུགས་ཏེ་རྨོངས་བཞིན་དུ་ང་རྒྱལ་གྱི་དྲེགས་པས་ཁེངས་ཏེ་གསང་བའི་དོན་དེ་ལ་མཁས་པར་ཁས་འཆེས་པའི་ཕྱིར་རྡོ་རྗེ་རྒྱལ་པོའི་དབང་ཐོབ་ནས་ཐབས་ཀྱི་རྒྱལ་ས་ཐོབ་པར་འདོད་པ་ཡི་གང་ཟག་ཁྲེལ་མེད་སྤྱི་བརྟོལ་ཅན་བདུད་སྡེར་གཏོགས་པའི་མུན་སྤྲུལ་གསང་སྔགས་ཚུལ་འཆོས་སུ་སྤྱོད་པའི་འཆལ་པ་དག་ཀྱང་བྱུང་ངོ༌། །དེ་ཡང་ཇི་ལྟ་བུ་ཞེ་ན། འདས་པའི་དུས་ཀྱི་ཚེ་ན་སྔོན་བྱུང་བ། གང་བསྐལ་པ་ཀུན་བཀོད་དུ་གྲགས་པ་དེ་ཉིད་ལ། རྣལ་འབྱོར་པ་སྔགས་ཀྱི་ཚུལ་ཙམ་ལ་སྤྱོད་པ་པེ་ན་པ་ཡ་ཞེས་བྱ་བ་ཞིག་འཁོར་བརྒྱ་ཡི་སྡེ་དང་བཅས་པ་བྱུང་ནས། རྩ་བ་ཉམས་ཤིང་དོན་ལ་རྨུགས་བཞིན་དྲེགས་པ་ཆེན་པོའི་ང་རྒྱལ་གྱིས་མི་མཁས་བཞིན་དུ་དོན་ལ་མཁས་པ་དང་ལྡན་པར་ཚུལ་བཅོས་པའི་ཕྱིར་རྡོ་རྗེ་རྒྱལ་པོའི་རྒྱལ་ཐབས་ཆེས་ཆེ་བ་བླངས་པས་དཔེར་ན་རི་བོ་ཆེན་པོས་སྲོག་ཆགས་མནན་པ་བཞིན་དུ་ང་རྒྱལ་དྲེགས་པའི་རི་བོ་ཡིས་ནོན་ཏེ་འཁོར་བའི་ལས་ལམ་ལ་སྤྱད་པས་ལས་ངན་པ་དེའི་མཐུས་གཏི་མུག་ཕག་གི་རིགས་ཀྱི་ལུས་སུ་ལྟུང་ནས་ཉམ་ཐག་པ་དེ་འདྲའི་ཚུལ་སྔར་ཡང་དེ་ལྟར་བྱུང་བས་ཚུལ་དེར་མ་སྤྱོད་ཅིག་ཅེས་པའོ།།

བརྒྱད་པ་ཚིག་གི་མཉམ་པ་ལ་བརྟེན་ནས་ཆགས་སྡང་བསྐྱེད་པའི་སྐྱོན་ནི།

གཞན་ཡང་གསང་བའི། ཞེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གསང་བའི་བདག་པོ་ཉོན། །མཉམ་པའི་དོན་ཉིད་མ་ཆུད་པར། །མཉམ་ཞེས་ཚིག་གི་ལམ་འབྱིན་ཅིང་། །ཆགས་སྡང་གཉིས་ལ་མངོན་འཆེལ་བ། །རྣལ་འབྱོར་ལས་ཀྱི་འཁོར་བའི་ལམ། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །གྲགས་འབྱུང་བསྐལ་པ་དེ་ཉིད་ལ། །བདེ་སྦྱིན་ཞེས་ནི་བྱ་བ་ཞིག །རྣལ་འབྱོར་སྟོང་གི་འཁོར་དང་བཅས། །གསང་བ་དམ་པར་ངེས་སོ་ཞེས། །བརྟེན་ཁྲིད་ཆགས་སྡང་གཉིས་ལ་འཆེལ། །དེ་ཉིད་ཡོངས་སུ་སྨིན་པ་ཡི། །རཀྵ་སྲིན་པོའི་ཁམས་སུ་ལྷུངས། །དེ་འདྲའི་ཚུལ་བྱུང་དེར་མ་སྤྱོད།།

གཞན་ཡང་གསང་བའི་ བདག་པོ་ཉོན་དང༌། མཉམ་པའི་དོན་ཉིད་ཁོང་དུ་མ་ཆུད་དེ་རྟོགས་པ་མེད ་པར་མཉམ་པ་ཉིད་ཡིན་ནོ་ཞེས་ཚིག་གི་ལམ་ཙམ་ངག་ཏུ་འབྱིན་ཅིང་ཆགས་སྡང་གཉིས་ཀྱིས་སྦྱོར་སྒྲོལ་ལ་མངོན་པར་འཆེལ་བ་ནི། རྣལ་འབྱོར་བརླང་པོར་སྤྱོད་པའི་ལས་ཀྱིས་འཁོར་བའི་ལམ་གྱི་རྒྱུད་དུ་ལྟུང་ངོ༌། །དེ་ཡང་དཔེ་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་ཀུན་བཀོད་ཞེས་བྱ་བར་གྲགས་པ་འབྱུང་བའི་བསྐལ་པ་དེ་ཉིད་ལ། རྣལ་འབྱོར་པ་བདེ་སྦྱིན་ཞེས་ནི་བྱ་བ་ཞིག་རྣལ་འབྱོར་པ་སྟོང་གི་འཁོར་དང་བཅས་ཏེ་གསང་ཆེན་གསང་བ་དམ་པར་ངེས་སོ་ཞེས་ཁས་འཆེ་ཞིང་གསང་བའི་ལས་ལ་སྤྱོད་ཅིང་སྟོན་པའི་ཚུལ་འཆོས་ཀྱི་ཁྲིད་ནས་ཆགས་སྡང་གི་བརླང་སྤྱོད་གཉིས་ལ་འཆེལ་བས། ལས་དེ་ཉིད་ཡོངས་སུ་སྨིན་པ་ཡིས་རཀྴ་སྲིན་པོའི་ཁམས་སུ་༼༡༨༠༽ལྟུང་སྟེ་སྔོན་ཡང་དེ་འདྲའི་ཚུལ་བྱུང་བས་དེར་མ་སྤྱོད་ཅིག་པའོ།།

དགུ་པ་གསང་དོན་གླེང་བ་ལ་ཕྲག་དོག་བྱས་པའི་སྐྱོན་ནི།

གཞན་ཡང་གསང་བདག ཅེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གསང་བདག་འདི་ལྟ་སྟེ། །རྣལ་འབྱོར་གང་དག་བློ་ཆུང་རྣམས། །རྣལ་འབྱོར་གང་དག་དོན་གླེང་ན། །དེ་ལ་འཇིགས་ཤིང་སྐྲག་འགྱུར་ཏེ། །སྤ་ཞུམ་མི་དགའ་འབྱོལ་བྱེད་བླུན། །དེ་ཡང་ཇི་ལྟ་བུ་ཞེ་ན། །ལྷ་སྦྱིན་བདེ་ཞེས་བྱ་བ་ཞིག །རྣལ་འབྱོར་ལས་ཀྱི་དང་པོའི་ཚེ། །རྣལ་འབྱོར་ངེས་དོན་མང་པོ་གཞན། །ངེས་དོན་གསང་བའི་དོན་གླེང་ན། །ལྷ་སྦྱིན་འཁོར་བཅས་དེ་ལ་བྱོལ། །ནོར་པའི་སེམས་ཀྱིས་ཕྲག་དོག་སྐྱེས། །རང་གི་གནས་དོན་ངན་དུ་བརྗོད། །དེ་ཡིས་བསྐལ་པ་དཔག་ཏུ་མེད། །ཡང་དག་དོན་གོལ་ལོག་པར་འཁྱམས། །དེ་འདྲའི་ཚུལ་བྱུང་དེར་མ་སྤྱོད།།

གཞན་ཡང་གསང་བདག་ཆེན་པོ་འདི་ལྟ་སྟེ། རྣལ་འབྱོར་གང་དག་བློ་ཆུང་བ་རྣམས་དང་རྡོ་རྗེའི་གྲལ་དུ་འདུས་ཏེ་རྣལ་འབྱོར་མཁས་པ་གང་དག་གིས་གསང་སྔགས་ཀྱི་དོན་གླེང་ན། དེ་ལ་འཇིགས་ཤིང་སྐྲག་པར་འགྱུར་ཏེ། སེམས་དཔའ་ཞུམ་ཞིང་ཡིད་མི་དགའ་བས་གཞན་དུ་འབྱོལ་བར་བྱེད་པ་ནི་བློ་གྲོས་བླུན་པ་ཡིན་ནོ། །དེ་ཡང་ཇི་ལྟ་བུ་ཞེ་ན། དགེ་སློང་ལྷ་སྦྱིན་དེ་ཞེས་བྱ་བ་ཞིག་རྣལ་འབྱོར་ལས་ཀྱི་དང་པོའི་སར་སློབ་པའི་ཚེ། རྣལ་འབྱོར་དོན་དང་ལྡན་པ་མང་པོ་གཞན་འདུས་ནས་ངེས་དོན་གསང་བའི་དོན་ཟབ་མོ་གླེང་བར་བྱེད་པ་ན། ལྷ་སྦྱིན་འཁོར་བཅས་དེ་ལས་གཞན་དུ་བྱོལ་ནས། ངེས་དོན་གླེང་བ་ལ་མི་དགའ་ཞིང་ནོར་བའི་སེམས་ཀྱིས་མཁས་པ་དེ་དག་ལ་ཕྲག་དོག་སྐྱེས་ཏེ་རང་གི་གནས་སུ་དོང་ནས་ངན་པའི་ཚིག་ཏུ་བརྗོད་དོ། །ལས་དེ་ཡིས་མཐུ་ལས་བསྐལ་པ་དཔག་ཏུ་མེད་པ་ཉིད་དུ་ཡང་དག་པའི་དོན་ལས་གོལ་ནས་ལོག་པའི་སྡེ་ཡི་རིགས་འཛིན་པར་འཁྱམས་ཏེ་དེ་འདྲའི་ཚུལ་སྔར་ཡང་བྱུང་བས་ཚུལ་དེར་མ་སྤྱོད་ཅིག་ཅེས་པའོ།།

བཅུ་པ་ཚིག་གི་དུག་མདའ་གཏོང་བའི་སྐྱོན་ནི།

གཞན་ཡང་གསང་བའི། ཞེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གསང་བའི་བདག་པོ་ཉོན། །རྣལ་འབྱོར་ཉིད་ཀྱིས་རྣལ་འབྱོར་ལ། །རྣོན་པོ་གདུག་པའི་དུམ་མདའ་སྟོང་། །ཐ་ཚིག་བཙན་པོ་རྫོང་ལྟ་བུ། །འཇོམས་བྱེད་རྣལ་འབྱོར་རང་འགེགས་ཡིན། །དེ་ཡང་ཇི་ལྟ་བུ་ཞེ་ན།།

རྣལ་འབྱོར་བློ་གྲོས་བྱ་བ་ཞིག །མི་འཇིགས་ཞེས་བྱའི་རྣལ་འབྱོར་པ། །དོན་མེད་བཅོས་མར་སྤྱོད་པ་དེ།།

བློ་གྲོས་དམ་པ་འདུས་པར་འགྱུར། །བཟོད་ལྡན་དེ་ལ་ངན་སེམས་ཀྱིས། །སྐུར་བཏབ་ཁ་ན་མ་ཐོ་བརྗོད།།

དེས་ནི་མི་འཇིགས་མནར་མེད་ལྷུངས། །དེ་འདྲའི་ཚུལ་བྱུང་དེར་མ་སྤྱོད།།

གཞན་ཡང་གསང་བའི་བདག་པོ་ཉོན་དང༌། མདོ་སྡེ་དཀོན་མཆོག་བརྩེགས་པ་ལས། བྱིས་པ་ཁྲོས་ན་ཚིག་རྩུབ་སྨྲ། །ཞེས་པ་ལྟར། རྣལ་འབྱོར་པ་ཉིད་ཀྱིས་རྣལ་འབྱོར་པ་གཞན་ལ་ངན་ཚིག་རྣོན་པོ་ཤིན་ཏུ་གདུག་པའི་དུག་མདའ་གཏོང་ཞིང་བརྗོད་པ་སྔགས་ཀྱི་ཐ་ཚིག་བཙན་པོ་རྡོ་རྗེའི་རྫོང་མཁར་ལྟ་བུ་འཇོམས་པར་བྱེད་པའི་རྣལ་འབྱོར་རང་གི་གེགས་ཆེན་པོ་ཡིན་ནོ། །དེ་ཡང་དཔེ་ཇི་ལྟ་བུ་ཞེ་ན། རྣལ་འབྱོར་པ་རྣམ་དག་བློ་གྲོས་བྱ་བ་ཞིག མི་འཇིགས་ཞེས་བྱའི་རྣལ་འབྱོར་པ་དོན་མེད་ཅིང་ཚུལ་བཅོས་པར་སྤྱོད་པ་དེ་ཡིས་སྡེ་པ་མང་པོ་སྐྱོང་བའི་སར་བློ་གྲོས་དམ་པ་དེ་ཡང་འདུས་པར་གྱུར་པ་ལས། བཟོད་པ་ཐོབ་པའི་མཁས་པ་ཡོན་ཏན་ལྡན་པ་དེ་ལ་མི་འཇིགས་ཞེས་བྱ་བས་ངན་སེམས་ཀྱིས་སྒྲོ་སྐུར་མང་པོ་བཏབ་ནས་ཁ་ན་མ་ཐོ་བ་བརྗོད་དོ། །ལས་དེས་རྣམ་པར་སྨིན་པས་ནི་མི་འཇིགས་མནར་མེད་པར་ལྟུང་ནས་ཉམ་ཐག་པར་གྱུར་ཏེ་སྔོན་ཡང་དེ་འདྲའི་ཚུལ་བྱུང་བས་དེར་མ་སྤྱོད་ཅིག་ཅེས་གདམས་པར་མཛད་དོ།།

བཅུ་གཅིག་ པ་ལྟ་བ་མེད་པར་སྤྱི་ཡུད་ཙམ་ལ་ལྟོས་པའི་སྐྱོན་ནི།

གཞན་ཡང་གསང་བདག  ཅེས་པ་ནས། ཚུལ་བྱུང་དེར་མ་སྤྱོད། །ཅེས་པའི་བར་གྱིས་༼༡༨༡༽བསྟན་ཏེ།

གཞན་ཡང་གསང་བདག་འཛིན་པ་ཉོན། །ལྟ་བའི་དམིགས་བུ་དང་བྲལ་ནས། །ཡང་དག་དབུ་མའི་ལམ་

མི་གསལ། །སྤྱི་ཡུད་ཙམ་ལ་ལྟོས་སྤྱོད་པ། །དེར་ནི་རྣལ་འབྱོར་ལོང་བའི་ཚོགས། །དེ་ཡང་ཇི་ལྟ་བུ་ཞེ་ན།།

རྒྱལ་པོ་རབ་ཏུ་གསལ་འཛིན་པ། །རྣལ་འབྱོར་གསང་བའི་རྗེས་ཞུགས་ཏེ། །ཤེས་རབ་ལྟ་བའི་མིག་མེད་པར།།

རྣལ་འབྱོར་མིང་ཙམ་ཚུལ་བཟུང་ནས། །སྒྲ་ཐོས་རྗེས་སུ་ཚུལ་སྤྱད་པས། །གཏི་མུག་མུན་པའི་གླིང་དུ་ལྷུངས།།

དེ་འདྲའི་ཚུལ་བྱུང་དེར་མ་སྤྱོད།།

གཞན་ཡང་གསང་བདག་རྡོ་རྗེ་འཛིན་པ་ཉོནཅིག གསང་དོན་ཇི་བཞིན་དུ་མཐོང་བས་ལྟ་བའི་མིག་མེད་ཀྱང་ཐབས་ཇི་ལྟ་བར་ངེས་པའི་དམིགས་བུ་དང་བྲལ་ནས་རྨོངས་ཤིང་འཐིབས་པ་དག ཡང་དག་པའི་ཆོས་ཉིད་མཐའ་བྲལ་དབུ་མའི་ལམ་གྱི་དེ་ཁོ་ན་ཉིད་ཀྱི་རྟོགས་པ་མི་གསལ་བར། ཡིད་ཀྱིས་དམིགས་ཏེ་སྤྱི་ཡུད་ཙམ་ལ་ལྟོས་ནས་སྒྲ་བཞིན་དུ་སྤྱོད་པ་དེ་ནི་རྣལ་འབྱོར་ལོང་བའི་ཚོགས་ཡིན་པས་ཡང་དག་པའི་ལམ་མི་མཐོང་ངོ༌།།

དེ་ལྟར་སྤྱོད་པའི་དཔེ་ཡང་ཇི་ལྟ་བུ་ཞེ་ན། རྒྱལ་པོ་རབ་ཏུ་གསལ་བར་འཛིན་པ་ཞེས་བྱ་བའི་རྣལ་འབྱོར་པ་ཞིག་བྱུང་ནས། གསང་བའི་ལུང་གི་རྗེས་སུ་ཞུགས་ཏེ་ཚུལ་ཙམ་དུ་སྤྱོད་ཀྱང༌། གནས་ལུགས་རྟོགས་པའི་ཤེས་རབ་ཀྱི་ལྟ་བའི་མིག་མེད་པར་སྔགས་ཀྱི་རྣལ་འབྱོར་པའི་མིང་ཙམ་གྱི་ཚུལ་བཟུང་ནས་སྒྲ་ཐོས་པ་ཙམ་ཀྱི་ཚུལ་དུ་གཞུང་གི་རྗེས་སུ་སྤྱོད་པ་བྱས་པས། གཏི་མུག་མུན་པའི་ཁམས་ཀྱི་འགྲོ་བའི་གནས་སུ་ལྷུང་བར་གྱུར་པ་དེ་འདྲའི་ཚུལ་གྱིས་ལོག་པར་སྤྱོད་པ་སྔར་ཡང་བྱུང་བས་མ་འོངས་པའི་རྗེས་འཇུག་རྣམས་ཀྱང་གསང་སྔགས་ལུང་ཆེན་དམ་པ་འདི་ཉིད་ཚུལ་དེར་གོལ་བའི་ལམ་དུ་མ་སྤྱོད་པར་དོན་ལ་མཁས་པར་གྱིས་ཤིག་ཅེས་གདམས་པར་མཛད་དོ།།

གཉིས་པ་མཇུག་བསྡུ་བ་ནི།

དེ་ལ་སོགས་ཏེ། ཞེས་པ་ནས། ལྡན་པ་ཤིན་ཏུ་གཅེས། །ཞེས་པའི་བར་གྱིས་བསྟན་ཏེ།

དེ་ལ་སོགས་ཏེ་མཐའ་ཡས་མཆོག །ཐམས་ཅད་འཁོར་བའི་ལམ་དུ་ལྷུང་། །དེས་ན་གསང་བའི་སྙིང་པོ་འདི།།

གོལ་ས་ཆེ་བར་རྒྱལ་བས་བཤད། །དེས་ན་ཐབས་ལ་མཁས་པ་དང་། །བློ་གྲོས་ལྡན་པ་ཤིན་ཏུ་གཅེས།།

དེ་ལྟར་བཤད་པ་ལ་སོགས་ཏེ་ལོག་པར་སྤྱོད་པའི་གང་ཟག་མཐའ་ཡས་པ་མང་པོ་དག་གསང་བ་མཆོག་གི་ལམ་ལས་ཉམས་ཏེ་ཐམས་ཅད་སྲིད་པ་འཁོར་བའི་ལམ་པར་ལྟུང་ངོ༌། །སྐྱོན་གྱི་ཚུལ་དེས་ན་གསང་ཆེན་གསང་བའི་སྙིང་པོ་འདི་ནི། བློ་གྲོས་མི་གསལ་ཞིང་ཐབས་མི་མཁས་པ་རྣམས་ལ་ལོག་པར་འཕྱན་པའི་གོལ་ས་ཡང་ཤིན་ཏུ་ཆེ་བར་སྟོན་མཆོག་རྒྱལ་བ་དམ་པས་བཤད་དོ།།

དེས་ན་གསང་སྔགས་སྤྱད་པའི་ཐབས་མཆོག་ལ་མཁས་པ་དང༌། མི་དམིགས་པའི་ཤེས་རབ་ཟབ་མོའི་བློ་གྲོས་ལྡན་པ་ནི་ཆེས་ཤིན་ཏུ་གཅེས་པ་ཡིན་པས་མེད་དུ་མི་རུང་བར་ནོར་དུ་འཛིན་པར་བྱེད་དགོས་སོ།།

གཉིས་པ་ལེགས་པར་སྤྱོད་པའི་ཡོན་ཏན་ལོ་རྒྱུས་ཀྱི་སྒོ་ནས་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཐབས་མཁས་བློ་གྲོས། ཞེས་པ་ནས། དམ་པའི་སྤྱོད་ཡུལ་ཏེ། །ཞེས་པའི་བར་གྱིས་བསྟན་ཏེ།

ཐབས་མཁས་བློ་གྲོས་ལྡན་པ་ཡི། །ངེས་པར་ལེགས་པའི་རྣལ་འབྱོར་པ། །སྔོན་འདས་དུས་ན་བྱུང་བ་ཡི།།

རྩལ་ཆེན་རྣམས་ཀྱི་བཅད་རྒྱུད་ནི། །སྐྱེས་བུ་དམ་པའི་སྤྱོད་ཡུལ་ཏེ།།

དེ་ལ་གསང་སྔགས་སྤྱད་ལེགས་པའི་ཡོན་ཏན་གང་ཞེ་ན། མཆོག་ཏུ་ཐབས་ལ་མཁས་ཤིང་བློ་གྲོས་ཟབ་མོ་དང་ལྡན་པ་ཡི་སྒོ་ནས་གསང་བའི་ཆོས་ཉིད་ཇི་བཞིན་པའི་དཀྱིལ་འཁོར་ངེས་པར་མཐོང་ནས་ཐབས་ལ་ལེགས་པར་སྤྱོད་པའི་རྣལ་འབྱོར་པ་དམ་པ་སྔོན་ཚེ་འདས་པའི་དུས་༼༡༨༢༽ན་བྱུང་བ་ཡི་བློ་མཆོག་རྩལ་ཆེན་ལྡན་པ་རྣམས་ཀྱི་བཅད་པར་བྱ་བའི་རྒྱུད་ལུང་མན་ངག་ཀུན་གྱི་སྙིང་པོ་ཡང་གསང་དམ་པ་འདི་ནི་དབང་པོ་ཡང་རབ་ཏུ་གྱུར་པའི་སྐྱེས་བུ་དམ་པའི་སྤྱོད་ཡུལ་ཁོ་ན་ཡིན་ཏེ། སྐལ་པ་མཆོག་དང་ལྡན་ཞིང་བློ་གྲོས་རབ་ཏུ་གྱུར་བ་དག་གིས་ཇི་བཞིན་དུ་རྟོགས་པར་ནུས་པའི་ངེས་པ་དོན་གྱི་ཆོས་ཟབ་མོ་ཡིན་ནོ།།

གཉིས་པ་རྒྱས་པར་བཤད་པ་ལ་བཅུ་སྟེ། མཚན་ཐོས་པའི་ཡོན་ཏན་བསྟན་པ། ཐོས་ནས་ཡི་དམ་དུ་བྱས་པའི་ཡོན་ཏན་བསྟན་པ། སྔགས་ལ་37ཐོས་པ་བྱས་པའི་ཡོན་ཏན་བསྟན་པ། གསང་སྔགས་ལ་ཞུགས་པའི་ཡོན་ཏན་བསྟན་པ། སྔགས་ཐོས་ནས་ཚུལ་བཞིན་དུ་སྤྱོད་པའི་ཡོན་ཏན་བཤད་པ། སྔགས་ལ་ཡི་རངས་པའི་ཡོན་ཏན་བསྟན་པ། སྔགས་ལ་ངེས་པར་ཤེས་པའི་ཡོན་ཏན་བཤད་པ། སྔགས་ཀྱི་ཚིག་བཞི་པ་གཅིག་ཁོང་དུ་ཆུད་ན་འོག་མའི་མཆོད་སྦྱིན་ལས་འཕགས་པའི་ཡོན་ཏན་བཤད་པ། སྔགས་ཚུལ་བཞིན་དུ་བཅངས་པའི་ཡོན་ཏན་བཤད་པ། སྔགས་མ་ནོར་བར་བསྟན་པའི་ཡོན་ཏན་བཤད་པའོ། །དང་པོ་ནི།

ཡོན་ཏན་སྒྲ་བསྒྲགས། ཞེས་པ་ནས། ཚུལ་བྱུང་དེ་བཞིན་སྤྱོད། །ཅེས་པའི་བར་གྱིས་བསྟན་ཏེ།

ཡོན་ཏན་སྒྲ་གྲགས་སུས་ཐོས་པ། །མིང་ཙམ་གྱིས་ཀྱང་དེ་ཐོབ་ཅིང་། །དྲན་པས་ངན་འགྲོ་རྒྱལ་སྐྱོབ་ཡིན། །དེ་ཡང་ཇི་ལྟ་བུ་ཞེ་ན། །ཤིན་ཏུ་གསང་བའི་སྙིང་པོ་འདི། །མ་བྱུང་བ་ཡི་སྔོན་དུས་ན། །ལྷ་རྣམས་གསུམ་དུ་གྲགས་པ་ལས། །ལྷ་ཡི་བུ་ནི་འོད་ལྡན་དེ། །མི་རྟག་འཆི་བའི་དུས་བབས་ནས། །སྔོན་བྱུང་སྔ་ལྟས་བྱུང་བ་ན། །མི་བདེ་བར་ནི་འདུ་ཤེས་འགྱུར། །མ་འོངས་འདུ་ཤེས་བཞག་པ་ལས། །མི་གཙང་ཟས་ཀྱིས་འཚོ་བ་ཡི། །སྲོག་ཆགས་བླུན་པའི་ལུས་ལེན་པར། །རང་གི་མངོན་པར་ཤེས་པས་མཐོང་། །ཤིན་ཏུ་སྐྲག་པའི་འདུ་ཤེས་ཀྱིས། །སྐྱབས་ཀྱི་ཡུལ་ནི་ཡིད་ལ་བྱས། །གང་དེར་གང་དྲན་མ་བྱུང་བར། །ཐེག་ཆེན་གསང་བའི་སྙིང་པོའི་མཚན། །ཚིག་གི་ལམ་དུ་གྲགས་པ་བཞིན། །ཐོས་པ་ཡིད་ལ་བྱས་པ་ཡིས། །ངན་འགྲོར་འགྲོ་ལས་སླར་ལོག་སྟེ། །བདེ་བ་ཆེན་པོའི་གནས་སུ་འགོད།།

དེ་འདྲའི་ཚུལ་བྱུང་དེ་བཞིན་མཛོད།།

གསང་ཆེན་ནང་གི་རྒྱུད་སྡེ་དེ་ཉིད་ངེས་པ་ཡང་དག་པའི་མདོ་ལུང་ཆེན་པོ་འདི་ཡི་ཡོན་ཏན་སྒྲ་རུ་བསྒྲགས་པའི་མཚན་ཙམ་ཞིག་གང་ཟག་སུས་ཐོས་པ་དེ་ཡི་མིང་ཉིད་ལེགས་པར་འཛིན་པ་ཙམ་གྱིས་ཀྱང་མཆོག་གི་བདེ་བ་ཐོབ་ཅིང༌། མོས་པ་དང་དད་པར་གྱུར་ཏེ་དྲན་པས་ཡིད་ལ་བྱས་པས་ཀྱང་ངན་འགྲོ་ལས་སྐྱོབ་སྟེ་བདེ་བ་ལ་སྦྱོར་བ་ཡིན་ནོ། །དེ་ཡང་ཚུལ་དེ་ལྟར་སྔོན་བྱུང་བའི་དཔེ་ཇི་ལྟ་བུ་ཞེ་ན། ཤིན་ཏུ་འཕྲད་པར་དཀའ་བའི་གསང་ཆེན་ངེས་པའི་སྙིང་པོ་འདི་ཉིད་ཁྱབ་གདལ་དུ་གྲགས་ཏེ་ཐུན་མོང་གི་སྤྱོད་ཡུལ་དུ་མ་བྱུང་བ་ཡི་སྔོན་གྱི་དུས་ན། དབང་བསྒྱུར་གྱི་ཁང་བཟང་དང༌། དགའ་ལྡན་ཆོས་བཟང་དང༌། སུམ་ཅུ་རྩ་གསུམ་སྟེ་ལྷ་གནས་གསུམ་དུ་གྲགས་པར་གྱུར་པ་དེའི་མཚན་གྱི་ངེས་གསང་དེ་ཉིད་རྣ་བའི་དབང་པོས་ཐོས་པ་ལས། ལྷ་ཡི་བུ་ནི་འོད་ལྡན་ཞེས་བྱ་བ་དེ་མི་རྟག་འཆི་བའི་དུས་ལ་བབ་ནས། ནམ་མཁའ་ལ་སྒྲ་འབྱུང་བ། མེ་ཏོག་རྙིང་པ། ལུས་དྲི་མི་ཞིམ་པ། ལྷ་མོ་རྣམས་གམ་དུ་མི་སྡོད་པ། སྟན་ལ་སྡོད་མི་ཟུག་པ་སྟེ་འཆི་བའི་སྔོན་དུ་བྱུང་བའི་སྔ་ལྟས་ལྔ་ཉིད་བྱུང་བ་ན། ཡིད་མི་བདེ་བར་གདུང་ནས་ནི་དགའ་བའི་འདུ་ཤེས་འགྱུར་ཏེ་མི་དགའ་བའི་བློས། ཕྱི་མ་མ་འོངས་པའི་སྐྱེ་བ་ལ་འདུ་ཤེས་བཞག་སྟེ་བལྟས་པ་ལས་མི་གཙང་བའི་ཟས་ཀྱིས་འཚོ་བ་ཡི་སྲོག་ཆགས་བླུན་༼༡༨༣༽པའི་ལུས་ལེན་པར་རང་གི་མངོན་པར་ཤེས་པས་མཐོང་བས་ན། ཤིན་ཏུ་འཇིགས་ཤིང་སྐྲག་པའི་འདུ་ཤེས་ཀྱིས་དམིགས་ཏེ་སྐྱབས་ཡུལ་རྣམས་ནི་ཡིད་ལ་བྱས་ཤིང་འདུན་པ་སྐྱེད་པ་ལས། གང་དེར་ཡང་གང་གཞན་གྱི་དྲན་པ་གསལ་བར་མ་བྱུང་བར་གྱུར་ནས། ཐེག་ཆེན་གསང་བའི་སྙིང་པོའི་མཚན་ཐུན་མོང་མིན་པ་ཉིད་ཚིག་གི་ལམ་དུ་གྲགས་པ་བཞིན་ཡང་དག་པར་ཐོས་པ་དེ་ཉིད་ཡིད་ལ་བྱས་པ་ཡིས་ངན་འགྲོར་འགྲོ་བ་ལས་སླར་ལོག་སྟེ་གསང་བ་འཛིན་པའི་གནས་སུ་སྐྱེས་ཏེ་རྡོ་རྗེ་ཅན་གྱི་འཁོར་དུ་གྱུར་ནས་བདེ་བ་ཆེན་པོའི་གནས་སུ་འཁོད་དེ་སྔོན་ཡང་ལེགས་པར་སྤྱོད་པ་དེ་འདྲའི་ཚུལ་བྱུང་བས་མ་འོངས་པ་རྣམས་ཀྱང་ཚུལ་དེ་བཞིན་སྤྱོད་པར་གྱིས་ཤིག

གཉིས་པ་ཐོས་ནས་ཡི་དམ་དུ་བྱས་པའི་ཡོན་ཏན་བསྟན་པ་ནི།

གཞན་ཡང་གསང་བའི། ཞེས་པ་ནས། ཚུལ་དུ་དག་པར་གྱིས། །ཞེས་པའི་བར་གྱིས་བསྟན་ཏེ།

གཞན་ཡང་གསང་བའི་བདག་པོ་ཉོན། །ཐེག་ཆེན་གསང་བར་རབ་ངེས་པ། །རྣམ་སྨིན་དྲག་པོས་གང་འཕངས་པ། །ཇི་ལྟར་འཕོ་ལོང་གདབ་པ་བཞིན། །འཕེན་འགྲོ་དོན་གྱིས་དེར་མི་གནས། །ཅི་ཕྱིར་ཐམས་ཅད་སྟོང་ཉིད་པས། །སྡུག་བསྔལ་གནས་སུ་བཅས་ཏེ་ཡང་། །སེམས་ཅན་བཅས་ཏེ་སྟོང་པའི་ཕྱིར། །རེག་གྱུར་མྱོང་མ་གྱུར་པ་ཡིན། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །དམིགས་པ་ཅན་གྱི་རྣལ་འབྱོར་པ། །ཐེག་ཆེན་ཟབ་མོའི་ཚིག་ཐོས་པས། །ཤིན་ཏུ་སྐྲག་ཅིང་དངངས་གྱུར་ཏེ། །སྐུར་བཏབ་རྒྱབ་ཕྱོགས་སྙིང་རལ་ནས།།

ངུ་འབོད་གནས་ལྷུང་མ་མྱོང་བར། །བདེ་འགྲོ་ཐར་པའི་གནས་སུ་ཐོན། །དེ་འདྲའི་ཚུལ་དུ་དག་པར་གྱིས།།

གཞན་ཡང་གསང་བའི་བདག་པོ་ཉོན་ཅིག ཐེག་ཆེན་གསང་བར་བསྟན་པའི་ལྟ་བ་ལ་རབ་ཏུ་ངེས་པ་རྙེད་པར་གྱུར་ན། སྔོན་ལས་ཀྱི་རྣམ་སྨིན་དྲག་པོས་གང་དམྱལ་བ་ངུ་འབོད་དུ་འཕངས་ཀྱང་དཔེ་ཇི་ལྟར་ན་དར་གྱི་ཕོ་ལོང་ས་ལ་བརྡབས་པ་བཞིན་དུ་སྐོར་གཅིག་འཕེན་པའི་ལས་ཀྱི་མཐུས་དེར་འགྲོ་ཡང་རིགས་ངེས་པ་དང༌། ལྡན་པའི་དོན་གྱིས་དེར་མི་གནས་ཏེ། ཅི་ཡི་ཕྱིར་ན་ཆོས་ཐམས་ཅད་སྟོང་པ་ཉིད་ལས་མ་འདས་པས་སྡུག་བསྔལ་གྱི་གནས་སུ་སྣང་བའི་ཡུལ་དང་བཅས་ཏེ་མི་དམིགས་ལ་ཡུལ་དེ་ཡང་མཚན་མར་འཛིན་པའི་སེམས་ཅན་དང་བཅས་ཏེ་སྟོང་པ་ཉིད་དུ་ངེས་པའི་ཕྱིར། ཡིད་དུ་མི་འོང་བའི་རེག་བྱར་གྱུར་ཏེ་སྡུག་བསྔལ་མྱོང་བར་འགྱུར་བ་མ་ཡིན་ནོ། །ཚུལ་དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་ཡང་དག་པར་དམིགས་པ་ཅན་གྱི་རྣལ་འབྱོར་པ་བྲམ་ཟེ་བྱམས་ལྡན་ཞེས་བྱ་བས་ཐེག་ཆེན་གསང་བ་ཟབ་མོའི་ཚིག་ཐོས་པས་དེ་ལ་ངེས་པ་རྙེད་ནས། སྔར་གྱི་ལས་ལ་ཤིན་ཏུ་སྐྲག་ཅིང་དངངས་པར་གྱུར་ཏེ་མཚན་མ་ལ་སྐུར་པ་བཏབ་ཅིང་ཐབས་ལ་རྒྱབ་ཀྱིས་ཕྱོགས་པའི་དངོས་འཛིན་ལ་སྙིང་རལ་བའི་ཚུལ་གྱི་ཞེན་པ་ལོག་ནས་གསང་བ་མཆོག་གི་རིགས་སུ་ངེས་པས་ཕོགས་ཅིག་ངུ་འབོད་གྱི་གནས་སུ་ལྟུང་ཡང་སྡུག་བསྔལ་མ་མྱོང་བར། བདེ་འགྲོ་ཐར་པའི་གནས་སུ་འཁོད་དེ་ཡང་དག་པར་ཐོན་པ་སྔོན་ཡང་དེ་འདྲའི་ཚུལ་བྱུང་བ་བཞིན་དུ་རྗེས་འཇུག་དག་ཀྱང་རྒྱུད་དག་པ་ལ་སློབ་པར་གྱིས་ཤིག་གང་ཟག་འདི་ནི་ཕྱི་མ་དང་གཅིག་པས་རྩ་བའི་རྒྱུད་ལས་ཀྱང་མི་འབྱུང་ངོ༌།།

གསུམ་པ་སྔགས་ལ་ཐོས་པ་བྱས་པའི་ཡོན་ཏན་བསྟན་པ་ནི།

རྒྱལ་༼༡༨༤༽བ་རྣམས་ཀྱི། ཞེས་པ་ནས། ཚུལ་བྱུང་མོས་པར་སྤྱོད། །ཅེས་པའི་བར་གྱིས་བསྟན་ཏེ།

རྒྱལ་བ་རྣམས་ཀྱི་གསང་འདི་ལ། །གང་དག་གང་དུ་འདུན་སྐྱེད་པ། །གཞན་གྱི་བར་ཆད་མི་འབྱུང་བར། །ཇི་ལྟར་མོས་པ་དེ་མྱུར་ཐོབ། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །བྲམ་ཟེ་བྱམས་ལྡན་ཞེས་བྱ་བས། །གསང་ཆེན་གསང་བའི་སྙིང་པོ་འདི། །མཐོང་བ་མོས་ཏེ་ཀུན་ལ་བལྟས། །གར་ཡང་རྙེད་པར་མ་གྱུར་ཏེ། །གང་གི་ཕྱོགས་སུ་གནས་ནས་ནི། །ཤིན་ཏུ་ངུས་ནས་གདུང་སྔགས་སྨྲེས། །ཨེ་མའོ་བདག་ནི་ལས་རེ་འཕམ། །སྐྱེས་ནས་རྒས་པར་གྱུར་བར་དུ། །ཡང་དག་གསང་བའི་དོན་བཙལ་ན། །གང་འདི་མ་མཐོང་ལས་རེ་ངན། །ད་ཡོང་ཇི་ལྟར་མཐོང་བར་འགྱུར། །བཙལ་བས་རྙེད་ཕྲད་ཡོང་མིན་ཏེ། །བདག་ལ་སྟོན་པ་གང་སུ་ཞིག །སྒྲ་ཆེར་ངུས་ཏེ་སྨྲས་པ་ལས། །ནམ་མཁའི་ཁམས་ནས་སྒྲ་བྱུང་སྟེ། །སྐལ་དང་ལྡན་པའི་རིགས་ཅན་ཁྱོད། །འདི་ལྟར་ངེས་པའི་བློ་བརྟན་པ། །ཁྱོད་ནི་དོན་གྱི་བགོ་སྐལ་བ། །དུས་གསུམ་རྒྱལ་བ་ཐམས་ཅད་ཀྱིས། །ཁྱེད་ལ་བྱིན་གྱིས་རླབས་པ་མཛད། །དེ་བས་མོས་པ་མ་གཡེལ་བར། །དོན་དང་འཕྲད་པའི་ཐབས་དག་ལ། །མཁས་ཤིང་བརྩོན་པ་བྱ་དགོས་ཏེ། །གདོས་པའི་ལུས་ནི་གདོད་བོར་ནས། །སྙིང་པོའི་དོན་ལ་ངེས་བསྟས་ན། །དེ་མ་ཐག་ཏུ་མཐོང་བར་འགྱུར། །དེ་སྐད་ལུང་བསྟན་ཐོས་ནས་ནི། །དགའ་བས་མོས་པ་ཆེར་གཡོས་ཏེ། །ཇི་ལྟར་བསྟན་པ་དེར་བལྟས་པས།།

རིགས་ཆེན་འཛིན་པའི་སྲས་སུ་གྱུར། །དེ་འདྲའི་ཚུལ་བྱུང་མོས་པར་སྤྱོད།།

རྒྱལ་བ་རྣམས་ཀྱི་དགོངས་པ་དམ་པ་གསང་བ་ཆེན་པོ་འདི་ལ་སྐྱེས་བུ་གང་དག་དགའ་ཞིང་གང་ཞིག་འདུན་པ་ཡང་དག་པར་སྐྱེད་པ་དེ་དག་ལ་གཞན་གྱི་བར་ཆད་མི་འབྱུང་བར་ཇི་ལྟར་མོས་པ་དེ་ལྟར་མྱུར་དུ་ཐོབ་པར་འགྱུར་ཏེ་དོན་མཆོག་གི་སྐལ་བ་དང་ལྡན་པར་འགྱུར་རོ། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་བྲམ་ཟེ་བྱམས་ལྡན་ཞེས་བྱ་བ་དེ་ཡིས་གསང་ཆེན་གསང་བའི་སྙིང་པོ་འདི་ཡི་དོན་མཐོང་བར་མོས་ཏེ་ཡུལ་ཀུན་ལ་བལྟས་ཏེ་བཙལ་ཡང་ཕྱོགས་གར་ཡང་རྙེད་པར་མ་གྱུར་ཏེ། གསང་དོན་གང་གི་ཕྱོགས་སུ་མོས་འདུན་ཤུགས་དྲག་པོ་སྐྱེད་དེ་གནས་ནས་ནི། ཤིན་ཏུ་ངུས་ནས་གདུང་བའི་སྨྲེ་སྔགས་བཏོན་ཏེ་སྨྲེངས་བར་བྱེད་དེ། ཨེ་མའོ་བདག་ནི་ལས་ངན་ཞིང་ཡིད་རེ་འཕམ་སྟེ། འདི་ལྟར་སྐྱེས་ནས་རྒས་པར་གྱུར་པའི་བར་དུ་ཡང་དག་གསང་བའི་དོན་བཙལ་བ་ལ་འབད་ན་ཡང༌། གང་གསང་བ་ཟབ་མོའི་དོན་འདི་ཉིད་མ་མཐོང་ཞིང་རྙེད་པ་མེད་པ་འདི་ལས་རེ་ངན་པས་ད་ཡང་ཇི་ལྟར་མཐོང་བར་འགྱུར་སྙམ་སྟེ་བཙལ་བས་རྙེད་ཅིང་ཕྲད་པ་ཡོང་ཡེ་ཡོད་པ་མིན་པ་ལྟར་གྱུར་པར་ངེས་ཏེ། བདག་ལ་གསང་བའི་དོན་འདི་ཕྱིན་ཅི་མ་ལོག་པར་སྟོན་པ་ཐུགས་རྗེ་ཅན་གང་སུ་ཞིག་བཞུགས་པ་དེ་ལ་སྐྱབས་སུ་མཆིའོ་ཞེས་སྒྲ་ཆེར་བརྗོད་དེ་རབ་ཏུ་ངུས་ཏེ་སྨྲེངས་ཤིང་སྨྲེ་སྔགས་བཏོན་པ་ལས། ནམ་མཁའི་ཁམས་ནས་སྒྲ་དངོས་སུ་བྱུང་སྟེ། སྐལ་པ་དང་ལྡན་པའི་བྲམ་ཟེ་རིགས་ངེས་པ་ཅན་ཁྱོད་ནི། འདི་ལྟར་ངེས་པའི་དོན་ལ་བློ་གྲོས་བརྟན་པ་དང་ལྡན་པས་སྐྱེས་བུ་ཁྱོད་ནི་ངེས་དོན་ཟབ་མོའི་བསྒོ་སྐལ་ལ་དབང་བར་གྱུར་པ་དུས་གསུམ་གྱི་རྒྱལ་བ་ཐམས་ཅད་ཀྱིས་ཁྱོད་ཉིད་ལ་བྱིན་གྱིས་བརླབ་པར་མཛད་པ་ནི་ངེས་པ་ཡིན་པ་དེ་བས་ན་འདི་ལྟ་བུའི་མོས་པ་འདི་ཉིད་མ་གཡེལ་བར་གསང་བའི་དོན་དང་ཕྲད་པར་བྱ་བའི་ཐབས་དག་ལ་མཁས་ཤིང་བསྒྲིན་པས་བརྩོན་པར་བྱ་དགོས་ཏེ། དེས་ན་གཅེས་པར་བཟུང་བའི་གདོས་པ་དང་བཅས་པའི་ལུས་འདི་ལ་ནི་ཆགས་ཤིང་ཞེན་པ་ད་གདོད་བོར་ནས་རྩ་ལས་ཁྲག་ཆེན་བཏོན་པ་ཙན་དན་གྱི་ཆུར་དམིགས་ཏེ་རྒྱལ་བ་ཀུན་ལ་མཆོད་ནས་སྙིང་པོ་གསང་བའི་དོན་ལ་ངེས་པར་བལྟས་ན་དེ་མ་ཐག་ཏུ་དོན་མ་ནོར་བར་མཐོང་བར་འགྱུར་རོ། །དེ་སྐད་ཅེས་ལུང་བསྟན་པའི་སྒྲ་ཐོས་པར་གྱུར་ནས་ནི། ཡིད་དགའ་ཞིང་སྤྲོ་བས་མོས་པ་ཆེས་ཆེར་གཡོས་ཏེ། ཇི་ལྟར་ལུང་བསྟན་པ་དེར་ཡང་དག་པར་བལྟས་༼༡༨༥༽ནས་ངེས་པར་སྤྱད་པས། གསང་བ་དམ་པའི་རིགས་ཆེན་འཛིན་པའི་རྒྱལ་བའི་ཐུགས་སྲས་སུ་གྱུར་ཏེ་ཕྱིར་མི་ལྡོག་པ་ཐོབ་པ་དེ་འདྲའི་ཚུལ་བྱུང་བ་བཞིན་དུ་སྐལ་ལྡན་དག་གིས་མོས་པར་སྤྱོད་ཅིག

བཞི་པ་གསང་སྔགས་ལ་ཞུགས་པའི་ཡོན་ཏན་བསྟན་པ་ནི།

གསང་བའི་བདག་པོ། ཞེས་པ་ནས། ཚུལ་བྱུང་འཇུག་པར་གྱིས། །ཞེས་པའི་བར་གྱིས་བསྟན་ཏེ།

གསང་བའི་བདག་པོ་འདི་ལྟ་སྟེ། །མཐོང་ལ་སྐལ་ལྡན་འདིར་ཞུགས་ཏེ། །ཐམས་ཅད་དུ་ཡང་དེ་བཞིན་ཏེ། །ཏོག་གི་རྩེ་མོར་གྱུར་པ་བཞིན། །ཡོངས་ཀྱིས་ནུབ་པ་མ་ཡིན་ནོ། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །དགེ་བའི་རྒྱལ་པོ་ཞེས་བྱ་བ། །ལྷ་བུ་ཁྲི་ཚོ་བཅུ་དང་བཅས། །སྙིང་པོ་གསང་བར་རྣལ་འབྱོར་ལ། །རིན་ཆེན་འོད་ལྡན་གཙུག་འཛིན་དུ། །ཤིན་ཏུ་དང་བས་དགེར་གཡོས་ཏེ། །ལྷ་རྫས་ཡོ་བྱད་མང་པོ་དང་། །བཅས་ནས་དམ་པའི་དྲུང་དུ་དོང་། །དགའ་བས་འདུན་པའི་ཚུལ་བཟུང་ནས། །སྙིང་པོ་གསང་བའི་དོན་ལ་ཞུགས། །ཆོ་འཕྲུལ་ཆེན་པོ་བཞི་ཐོབ་སྟེ། །ལྷ་གནས་ཀུན་ཏུ་བགྲོད་པ་དང་། །འབྱུང་ཆེན་ལུས་ལས་སྤྲུལ་པ་དང་། རི་བོ་འདེགས་དང་འཕང་པ་དང་། །ཡུན་གྱི་ཚེ་ལ་གནས་པ་ཐོབ། །རྒྱལ་མཚན་རྩེ་མོའི་ཏོག་བཞིན་དུ། །མཐོང་བ་དག་པའི་ཆོས་ཉིད་དེ། །བསྐལ་པར་ནུབ་པར་མ་གྱུར་ཏོ། །དེ་འདྲའི་ཚུལ་བྱུང་འཇུག་པར་གྱིས།།

གཞན་ཡང་གསང་བའི་བདག་པོ་འདི་ལྟ་སྟེ། གསང་དོན་ཡང་དག་པར་མཐོང་བའི་རྗེས་ལ་སྐལ་ལྡན་གྱི་སྐྱེས་བུ་འདིར་ཞུགས་པ་དག་གིས་དྭངས་པར་བྱས་ཏེ་ཀུན་ཏུ་མཆོད་ན་ཡུལ་གྱི་ཡོན་ཏན་ཐམས་ཅད་མཉམ་པ་ཉིད་དུ་ཐོབ་པ་ཡང་དེ་ཇི་ལྟ་བ་བཞིན་དུ་ངེས་ཏེ་དཔེར་ན་ཏོག་གི་རྩེ་མོར་གྱུར་པ་བཞིན་དུ་དགོངས་དོན་སྙིང་པོའི་མཐར་ཐུག་ཇི་བཞིན་པ་ཉིད་དུ་སོན་པ་ཡིན་པས་དུས་ནམ་ཡང་ཡོངས་ཀྱིས་འོད་གསལ་བའི་ཆོས་ཉིད་འདུས་མ་བྱས་པ་ལ་ནུབ་ཅིང་འཇིག་པ་ཡོད་པ་མ་ཡིན་ནོ། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་ལྷ་ཡི་བུ་དག་པའི་རྒྱལ་པོ་ཞེས་བྱ་བ་ལྷ་ཡི་བུ་ཁྲི་ཚོ་བཅུ་དང་བཅས་པ་ཉིད་སྙིང་པོ་གསང་བའི་དོན་ལ་ཡང་དག་པར་རྣལ་དུ་འབྱོར་པ་ལ། འགྲེལ་ཆེན་གྱིས་རིན་ཆེན་འོད་ལྡན་འདི་བླ་མར་བྱས་ཀྱང༌། ཆོས་རྗེ་དམ་པ་རིན་པོ་ཆེའི་ཕྱག་མཆན་ལྟར་སློབ་མར་བྱས་ན་ཀུན་འདུས་རིག་པ་དང་ཡང་མཐུན་པས། དེ་ལྟར་ན། ལྷ་ཡི་བུ་རིན་ཆེན་འོད་ལྡན་གྱིས་དགེ་བའི་རྒྱལ་པོ་དེ་ཉིད་སྤྱི་བོའི་གཙུག་གི་རིགས་ཀྱི་བདག་པོར་འཛིན་ཅིང་གུས་པའི་ཞིང་དུ་བརྟེན་ཏེ་ཤིན་ཏུ་དྭངས་པའི་དད་པས་ཡིད་དགེར་ཞེས་དགེ་བར་གཡོས་ཏེ་ལྷ་རྫས་ཀྱི་ཡོ་བྱད་མང་པོ་དང་བཅས་ནས་ལྷ་བུ་དམ་པའི་དྲུང་དུ་དོང་སྟེ། རབ་ཏུ་དགའ་བས་འདུན་ཞིང་གུས་པའི་ཚུལ་བཟུང་ནས་སྙིང་པོ་གསང་བའི་དོན་ལ་ཡང་དག་པར་ཞུགས་ཏེ་གནས་པས་ཆོ་འཕྲུལ་ཆེན་པོ་བཞི་ཐོབ་པར་གྱུར་ཏེ། གང་ཞེ་ན། ལྷ་གནས་ཀུན་ཏུ་བགྲོད་ནུས་པ་དང༌། འབྱུང་བ་ཆེན་པོ་དག་ཀྱང་ལུས་ལས་སྤྲུལ་པ་དང༌། རི་བོ་རྣམས་འདེགས་པ་དང་འཕང་བར་བྱེད་པ་དང༌། ཡུན་གྱི་ཚེ་ལ་རང་དབང་དུ་གནས་པ་འཐོབ་ནས་དཔེར་ན་རྒྱལ་མཚན་གྱི་རྩེ་མོའི་ཏོག་བཞིན་དུ་མཐོང་བ་རྣམ་པར་དག་པའི་ཆོས་ཉིད་དེ་ཡིས་མཐོང་བར་གྱུར་ཏེ་བསྐལ་པ་ཡོངས་སུ་ཞིག་པར་གྱུར་ཀྱང་ཀུན་ཏུ་ནུབ་པར་མ་གྱུར་རོ། །སྔོན་ཡང་དེ་འདྲའི་ཚུལ་ཡང་དག་པར་བྱུང་བས་ཕྱིས་ཀྱི་རྣལ་འབྱོར་དག་ཀྱང་དེ་བཞིན་དུ་ངེས་པར་འཇུག་པར་གྱིས་ཤིག

ལྔ་པ་སྔགས་ཐོས་ནས་ཚུལ་བཞིན་དུ་སྤྱོད་པའི་ཡོན་ཏན་བཤད་པ་ནི།

གཞན་ཡང་གསང་བདག ཅེས་པ་ནས། ཚུལ་བྱུང་མཐོང་བར་གྱིས། །ཞེས་པའི་བར་གྱིས་བསྟན་ཏེ།

གཞན་ཡང་གསང་བདག་འདི་ལྟ་སྟེ། །མཐོང་བས་ཆོས་འདི་ཡོངས་དག་ལ། །ཡེ་ཤེས་སྒྲོན་མའི་མིག་རྙེད་པས། །བླ་མེད་སྙིང་པོ་ཅན་གྱི་རྣམས། །ལམ་རྙེད་ལམ་དུ་ཞུགས་པ་ཡིན། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །བྲམ་ཟེ་པ་པ་ཡ་ཏིའི་བུ། །ཐེག་ཆེན་དམིགས་ལྡན་དོན་མཐོང་བས། །དེ་ཉིད་སྙིང་པོར་སྤྱོད་པ་ལ།།

བྲམ་ཟེ་བུ་ནི་ཀེ་རན་ཏ། །དད་པས་དེ་ཡི་རྗེས་སུ་འབྲངས། །གསང་བ་འདུས་པའི་མིག་ལྡན་པས།།

དོན་གྱི་སྙིང་པོ་མཐོང་བར་གྱུར། །ཐེག་ཆེན་གསང་བར་རབ་ངེས་པ། །ལྷུན་གྲུབ་རྩལ་ཆེན་རྫོགས་པ་ཡི།།

རིགས་ཆེན་འཛིན་པའི་ས་ཉིད་ཐོབ། །དེ་འདྲའི་ཚུལ་བྱུང་མཐོང་བར་གྱིས།།

གཞན་ཡང་གསང་བདག་༼༡༨༦༽ཆེན་པོ་འདི་ལྟ་སྟེ། ཇི་ལྟར་སྣང་བའི་དངོས་པོ་དག་གི་རང་བཞིན་མཐོང་བས་ཆོས་ཉིད་ཇི་བཞིན་པ་འདི་ཉིད་ཡོངས་སུ་དག་པར་རྟོགས་པ་ན་ཡེ་ཤེས་གསལ་བའི་སྒྲོན་མའི་མིག་དམ་པ་རྙེད་ནས། བླ་ན་མེད་པའི་སྙིང་པོ་ཅན་རྣམས་ཀྱི་ཇི་ལྟར་བགྲོད་པའི་ལམ་རྙེད་ནས་ཡང་དག་པའི་ལམ་དུ་ཞུགས་པ་ཡིན་ནོ།།

དེ་ཡང་ཚུལ་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་བྲམ་ཟེ་བ་ཡ་བ་ཏིའི་བུ་དེ་ཉིད་ཐེག་པ་ཆེན་པོའི་མིག་དང་ལྡན་པས་མ་བཅོས་གསང་བའི་དོན་མཐོང་ནས་དེ་ཉིད་སྙིང་པོར་སྤྱོད་དེ་གནས་པ་ལ། བྲམ་ཟེའི་བུ་ནི་ཀེ་རན་ཏ་ཞེས་བྱ་བ་ཤིན་ཏུ་དད་པས་དེ་ཡི་རྗེས་སུ་འབྲེངས་པར་གྱུར་པ་ན། གསང་བ་འདུས་པའི་བློ་མིག་དང་ལྡན་པས་དོན་གྱི་སྙིང་པོ་མ་ནོར་བར་མཐོང་བར་གྱུར་ཏེ་ཐེག་ཆེན་གསང་བ་དམ་པར་རབ་ཏུ་ངེས་པ་ཡི་ལྷུན་གྲུབ་རྩལ་ཆེན་རྫོགས་པ་ཡི་རིགས་ཆེན་འཛིན་པའི་ས་ཉིད་འཐོབ་པ་ཡིན་པས་དེ་འདྲའི་ཚུལ་རྨད་དུ་བྱུང་བའི་རྗེས་སུ་ཞུགས་ཏེ་སྙིང་པོའི་དོན་ཇི་བཞིན་དུ་མཐོང་བར་གྱིས་ཤིག

དྲུག་པ་སྔགས་ལ་ཡི་རངས་པའི་ཡོན་ཏན་བསྟན་པ་ནི།

གཞན་ཡང་གསང་ཆེན། ཞེས་པ་ནས། ཚུལ་བྱུང་མཁས་པར་གྱིས། །ཞེས་པའི་བར་གྱིས་བསྟན་ཏེ།

གཞན་ཡང་གསང་ཆེན་འཛིན་པ་ཉོན། །གང་དག་ཐེག་ཆེན་མངོན་སྤྱོད་ལ། །དགའ་བར་རྗེས་སུ་ཡི་རང་བ། །དེ་ནི་དེ་དང་འདྲ་བ་སྟེ། །འབྲས་བུ་དག་ལ་མཐོན་དམན་མེད། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །རྒྱལ་པོ་དབང་ཕྱུག་འོད་ལྡན་པ། །རྣལ་འབྱོར་ཅན་གྱི་འཁོར་དང་བཅས། །ཐེག་ཆེན་ཟབ་མོའི་དོན་དང་ཞུགས། །གསང་སྔགས་གསང་བའི་བྱིན་རླབས་དག །ངོ་མཚར་ཆོ་འཕྲུལ་མང་པོ་རྣམས། །ཐོག་མ་ཀུན་ཏུ་གྲགས་པར་གྱུར། །དེ་ལས་གཞན་པའི་རྣལ་འབྱོར་པ། །བྲམ་ཟེ་དགེ་སློང་བྱ་བ་ཞིག །ཤིན་ཏུ་དགའ་བའི་སེམས་བསྐྱེད་ནས། །དམ་པར་ངེས་པའི་བསླབ་པ་ཞུས། །བྱིས་པའི་སྤྱོད་ཡུལ་མ་ཡིན་ཕྱིར། །གསང་ཆེན་གསང་བ་རབ་ཏུ་གསང་། །བྲམ་ཟེ་མ་ལོག་ཡོ་བྱད་དག །དེ་ལ་དེ་བསྔོས་དག་པར་སྦྱར། །སྐྱེས་བུ་དམ་པ་དེ་ཡུལ་དུ།།

ཡིད་ཀྱི་ཕྱོགས་དེར་སྨོན་པ་བརྗོད། །འདི་ལ་མོས་པའི་ངེས་པ་ཡིས། །སྙིང་པོར་ངེས་པའི་དམ་པ་དང་།།

རྗེས་སུ་ཡི་རང་དམ་པ་གཉིས། །ཐོབ་པ་མཉམ་པ་ཉིད་དུ་གྱུར། །འདི་ལྟར་ཚེགས་མེད་དོན་པོ་ཆེ།།

ཐབས་ལ་མཁས་པའི་རིགས་ཆེན་འཛིན། །དེ་འདྲའི་ཚུལ་བྱུང་མཁས་པར་གྱིས།།

གཞན་ཡང་གསང་ཆེན་འཛིན་པ་ཉིད་ཉོན་དང༌། དམ་པ་གང་དག་ཐེག་པ་ཆེན་པོ་ལ་མངོན་པར་སྤྱོད་པ་དེ་ལ་དགའ་བས་རྗེས་སུ་ཡི་རང་བར་བྱས་པས། བསོད་ནམས་དེ་ནི་སྔ་མ་དངོས་སུ་སྤྱོད་པ་དེ་དང་འདྲ་བ་སྟེ་འབྲས་བུ་དག་ལ་ཡང་མཐོ་དམན་མེད་དོ། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་རྒྱལ་པོ་དབང་ཕྱུག་འོད་ལྡན་ཞེས་བྱ་བ། རྣལ་འབྱོར་ཅན་གྱི་འཁོར་ཚོམ་བུ་བཅུ་དང་བཅས་པ་ཐེག་ཆེན་ཟབ་མོའི་དོན་ལ་ངེས་པར་ཞུགས་པས་གསང་སྔགས་གསང་བའི་བྱིན་རླབས་དག་ལས། ངོ་མཚར་བའི་ཆོ་འཕྲུལ་རྣམ་པ་མང་པོ་རྣམས་ཐོབ་པར་གྱུར་པ་ཕྱོགས་ཀུན་ཏུ་ཡོངས་སུ་གྲགས་པར་གྱུར་ཏོ། །དེ་ལས་གཞན་པའི་རྣལ་འབྱོར་པ་བྲམ་ཟེ་དགེ་སློང་བྱ་བ་ཞིག་གིས། ཤིན་ཏུ་དགའ་བའི་སེམས་བསྐྱེད་ནས་གསང་བ་དམ་པར་ངེས་པའི་བསླབ་པ་རྣམས་ཞུས་པ་ལ་རྒྱལ་པོ་དབང་ཕྱུག་འོད་ལྡན་གྱི་ཞལ་ནས་གསང་སྔགས་ཐེག་པའི་མཐར་ཐུག་འདི་ཉིད་བྱིས་པའི་སྤྱོད་ཡུལ་མ་ཡིན་པའི་ཕྱིར་གསང་ཆེན་གསང་བ་དམ་པ་ནི་རབ་ཏུ་གསང་བར་གསུངས་སོ་ཞེས་བརྗོད་དེ་གསང་སྒོ་བསྡམས་ནས་མ་གནང་ངོ༌། །བྲམ་ཟེ་དེ་ཉིད་དད་པ་མ་ལོག་པར་འབྱོར་པའི་ཡོ་བྱད་ཅི་ཡོད་པ་དག་དམ་པའི་རྒྱལ་པོ་དེ་ལ་ཕུལ་ཏེ་གསང་ཆེན་དེ་ཡི་ཡོ་བྱད་དུ་བསྔོས་ནས་ཡང་༼༡༨༧༽དག་པར་སྦྱར་ཞིང༌། སྐྱེས་བུ་དམ་པ་དེ་ཉིད་བཞུགས་པའི་ཡུལ་དུ་ཡིད་ཀྱིས་མངོན་པར་ཕྱོགས་ནས་དེར་དམིགས་ཏེ་རྩེ་གཅིག་པའི་སེམས་ཀྱིས་སྨོན་ལམ་མཆོག་དམ་པ་མང་པོ་བརྗོད་དོ། །དེ་ལྟར་གསང་བ་དམ་པ་འདི་ལ་མོས་པའི་བྱིན་རླབས་ཀྱིས། སྙིང་པོར་ངེས་པའི་རྒྱལ་པོ་དམ་པ་དང༌། རྗེས་སུ་ཡི་རང་བྱེད་པའི་བྲམ་ཟེ་དམ་པ་གཉིས། འབྲས་བུ་ཐོབ་པ་ལ་མཐོ་དམན་མེད་པར་མཉམ་པ་ཉིད་དུ་གྱུར་ཏོ། །དེས་ན་འདི་ལྟར་རྗེས་སུ་ཡི་རང་ཉིད་ནི་ཚེགས་མེད་པར་དོན་རིན་པོ་ཆེ་ལེན་པའི་ཐབས་ལ་མཁས་པའི་རིགས་ཆེན་འཛིན་པ་ཡིན་ཏེ་དེ་འདྲའི་ཚུལ་བཟང་པོ་སྔར་བྱུང་བ་ལྟར་ཐབས་ཀྱི་རྣམ་གྲངས་ཀུན་ལ་མཁས་པར་གྱིས་ཤིག

བདུན་པ་སྔགས་ལ་ངེས་པར་ཤེས་པའི་ཡོན་ཏན་བཤད་པ་ནི།

གཞན་ཡང་གསང་འཛིན། ཞེས་པ་ནས། ཚུལ་བྱུང་བསླབ་པར་གྱིས། །ཞེས་པའི་བར་གྱིས་བསྟན་ཏེ།

གཞན་ཡང་གསང་འཛིན་འདི་ལྟ་སྟེ། །བསམ་ཡས་བསམ་གྱིས་མི་ཁྱབ་པའི། །རྒྱལ་བས་འདི་གཟིགས་འདི་མཁྱེན་པས། །སྲིད་གསུམ་འགྲོ་བའི་བཤེས་གཉེན་དུ། །དམ་པ་གསང་བའི་བདག་པོར་གྱུར། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །གསལ་བྱིན་བྱ་བའི་ཁྱིམ་བདག་ཞིག །ཐེག་ཆེན་གསང་བ་འདིར་གནས་པས། །རང་གི་གསང་བ་ཉིད་མཐོང་བས། །གསང་ཆེན་གསང་བའི་ངེས་རྙེད་དེ། །ཀུན་གྱི་གསང་བ་ངེས་པར་མཐོང་། །ཆོས་རྣམས་ཀུན་གྱི་གསང་བ་སྟེ། །དེ་ལས་དེ་བྱུང་འབུམ་ཕྲག་ཡས། །ཆོས་ཀྱི་རྒྱལ་པོར་གྱུར་ནས་ནི།།

སྨྲ་བ་ཀུན་གྱི་སེང་གེ་ཞེས། །ཞིང་ཁམས་ཀུན་ཏུ་གྲགས་པར་གྱུར། །དེ་འདྲའི་ཚུལ་བྱུང་བསླབ་པར་གྱིས།།

གཞན་ཡང་གསང་སྔགས་འཛིན་པའི་བདག་པོ་འདི་ལྟ་སྟེ། བསམ་ཡས་བསམ་གྱིས་མི་ཁྱབ་པའི་རྒྱལ་བ་རྣམ་འདྲེན་དམ་པས་ཐབས་འདི་ལ་བསླབ་ཅིང་ཡང་དག་པར་གཟིགས་ཏེ་འདི་ཡི་དོན་མཁྱེན་པས་སྲིད་གསུམ་འགྲོ་བའི་བཤེས་གཉེན་དུ་གྱུར་ཏེ་སྟོན་པ་དམ་པ་གསང་བ་འཛིན་པའི་བདག་པོར་གྱུར་ཏོ། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་གསལ་བྱིན་ཞེས་བྱ་བའི་ཁྱིམ་བདག་ཞིག་གིས་ཐེག་ཆེན་གསང་བ་འདི་ཡི་དོན་ལ་བསླབ་ནས་དོན་འདིར་གནས་ཤིང་གོམས་པར་བྱས་པས་རང་གི་སེམས་ཀྱི་ཆོས་ཉིད་གསང་བ་ཟབ་མོ་དེ་ཉིད་ཡང་དག་པར་མཐོང་ནས་གསང་ཆེན་གསང་བའི་གནས་ལུགས་ལ་ངེས་པ་རྙེད་དེ་ཆོས་རྣམས་ཀུན་གྱི་གསང་བ་ངེས་པར་མཐོང་ངོ༌། །དེ་ཡང་ཆོས་རྣམས་ཀུན་གྱི་རྩ་བ་ནི་སེམས་ཀྱི་གསང་བ་དེ་ཁོ་ན་ཉིད་ཡིན་ཏེ། རྩ་བ་དེ་ལས་དེ་ཐམས་ཅད་བྱུང་བས་ཆོས་སྒོ་འབུམ་ཕྲག་མཐའ་ཡས་པ་ཀུན་ལ་དབང་བསྒྱུར་བས་ཆོས་ཀྱི་རྒྱལ་པོར་གྱུར་ནས་ནི་སྟོན་པ་སངས་རྒྱས་སྨྲ་བ་ཀུན་གྱི་སེང་གེ་ཞེས་ཞིང་ཁམས་རབ་འབྱམས་ཀུན་ཏུ་གྲགས་པར་གྱུར་ཏེ་དེ་འདྲའི་ཚུལ་བྱུང་ཟིན་པའི་རྗེས་སུ་ཡང་དག་པར་བསླབ་པར་གྱིས་ཤིག

བརྒྱད་པ་སྔགས་ཀྱི་ཚིག་བཞི་པ་གཅིག་ཁོང་དུ་ཆུད་ན་འོག་མའི་མཆོད་སྦྱིན་ལས་འཕགས་པའི་ཡོན་ཏན་བཤད་པ་ནི།

གཞན་ཡང་གསང་འཛིན། ཞེས་པ་ནས། ཚུལ་བྱུང་དེ་བཞིན་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གསང་འཛིན་གནོད་འདུལ་ཉོན། །ཐེག་ཆེན་གསང་བའི་ཚིག་ལམ་གཅིག །གང་དུ་ཆུད་པར་གྱུར་པ་ནི། །སྐྱེ་ལ་ཉན་ཐོས་བསམ་ཡས་དང་། །རྒྱལ་བ་མཐའ་ཡས་སྲས་བཅས་ལ། །མཆོད་ཡོན་ཚོགས་ཆེན་སྤེལ་བས་ནི། །འབུམ་གྱི་ཆར་ཡང་མི་ཕོད་དོ། །ཅི་ཕྱིར་ཐེག་ཆེན་འདི་ཤེས་པས། །རྒྱལ་བ་མཉེས་པའི་མཆོག་འདི་ཡིན། །ནམ་མཁའ་ཀུན་ཁྱབ་རྒྱལ་བ་དང་། །ཐེག་ཆེན་གསང་བའི་སྙིང་པོ་གཉིས། །སོ་སོ་མ་ཡིན་ཐ་མི་དད། །དེས་ན་རྒྱལ་བ་གཅིག་མཉེས་པས། །རྒྱལ་བ་ཐམས་ཅད་མཉེས་པ་ཡིན། །སྐུ་དང་གསུང་ཐུགས་གཅིག་ལས་མེད། །འདུལ་བའི་དབང་གི་ཁྱད་པར་ལས། །བསམ་གྱིས་མི་ཁྱབ་བསྟན་པར་ཟད། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །སྐལ་ལྡན་ཡོངས་སུ་དག་པའི་རིགས། །དགེ་ལྡན་གསལ་ལྡན་བྱ་བ་གཉིས། །གང་དུ་མོས་པ་སོ་སོར་སྐྱེས། །གཅིག་ལ་གཅིག་འདིར་ཐ་ཚིགས་བཅས། །གཅིག་གིས་དམན་པའི་ཐེག་པ་ལ།།

སྤྱད་ནས་བྱ་བའི་ལས་ཆེན་བྱས། །གཅིག་ནི་ཐེག་ཆེན་གསང་བའི་དོན། །རྒྱ་ཆེར་ངེས་པར་ཆུབ་པ་ལས།།

ཐེག་ཆེན་གཞོན་པའི་གསལ་ལྡན་ནི། །རིགས་ཆེན་གཅིག་གིས་མངོན་པར་ཆུབ། །བྱ་བ་བྱེད་པའི་དགེ་ལྡན་ནི།།

གྲངས་མེད་བསྐལ་པ་གསུམ་གྱིས་ཆུབ། །དེས་ན་ཐེག་ཆེན་གསང་བ་ལ། །དེ་འདྲའི་ཚུལ་བྱུང་ཚུལ་བཞིན་སྤྱོད།།

གཞན་ཡང་གསང་འཛིན་གནོད་སྦྱིན་འདུལ་བ་ཉོན་དང༌། ཐེག་ཆེན་གསང་བའི་ཚིག་གི་ལམ་འདིའི་ཚིགས་བཅད་གཅིག་ཙམ་གང་གིས་ལེགས་པར་ཁོང་དུ་ཆུད་པར་གྱུར་པ་ནི། སྐྱེ་བོ་མང་པོ་ལ་སྦྱིན་པ་བྱས་པ་དང༌། ཉན་ཐོས་བསམ་ཡས་པ་དང༌། རྒྱལ་བ་མཐའ་ཡས་སྲས་དང་བཅས་པ་ལ་མཆོད་ཡོན་ཚོགས་ཆེན་སྤེལ་བས་༼༡༨༨༽ནི་འབུམ་གྱི་ཆར་ཡང་མི་ཕོད་དེ་གསང་སྔགས་ཀྱི་ཚིག་གཅིག་ཁོང་དུ་ཆུད་པ་བསོད་ནམས་ཆེ་བ་ཉིད་དོ། །དེ་ཅི་ཡི་ཕྱིར་ཞེ་ན་ཐེག་ཆེན་གསང་བ་འདི་ཡི་དོན་ཤེས་པས་རྒྱལ་བ་མཉེས་པའི་མཆོག་ཏུ་འདི་ཉིད་འགྱུར་བ་ཡིན་ཏེ། ནམ་མཁའ་ཀུན་ལ་ཁྱབ་པའི་འགྲོ་བའི་འདྲེན་པར་ཤར་བའི་རྒྱལ་བ་རྣམས་དང༌། ཐེག་ཆེན་གསང་བའི་སྙིང་པོ་ཉག་གཅིག་དོན་གྱི་རྒྱལ་བ་གཉིས་དོན་ལ་སོ་སོ་མ་ཡིན་ཞིང་ངོ་བོ་ཐ་མི་དད་པ་དེས་ན་རྒྱལ་བ་གཅིག་མཉེས་པས་རྒྱལ་བ་ཐམས་ཅད་མཉེས་པ་ཡིན་པར་འཐད་པའི་ཕྱིར་ཏེ། སྐུ་དང་གསུང་དང་ཐུགས་ཀྱི་དབྱིངས་གཅིག་ལས་མེད་པ་ལ་གདུལ་བྱའི་བསམ་པ་སྣ་ཚོགས་པ་གང་དང་གང་གིས་འདུལ་བའི་དབང་གི་ཁྱད་པར་མི་འདྲ་བ་ལས་བཀོད་པ་བསམ་གྱིས་མི་ཁྱབ་པར་བསྟན་ནས་དོན་མཛད་པར་ཟད་དོ། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་སྐལ་པ་མཆོག་དང་ལྡན་པ་དང་ལས་རྒྱུད་ཡོངས་སུ་དག་པའི་རིགས་ཅན་བྲམ་ཟེ་དགེ་ལྡན་བྱ་བ་དང་དགེ་སློང་གསལ་ལྡན་བྱ་བ་གཉིས་གང་དུ་མོས་པ་སོ་སོར་སྐྱེས་ནས་གཅིག་ལ་གཅིག་གིས་མོས་དོན་འདིར་བསླབ་པས་འབྲས་བུ་གང་གིས་ཐོབ་པར་འགྲན་པའི་ཐ་ཚིག་བཅས་པ་ལས་གཅིག་དགེ་ལྡན་གང་གིས་དམན་པའི་ཐེག་པ་རྒྱུའི་ལམ་ལ་སྤྱད་ནས་མཆོད་སྦྱིན་གྱི་བྱ་བའི་ལས་ཆེན་པོར་བྱས་སོ། །གཅིག་གསལ་ལྡན་གྱིས་ནི་ཐེག་ཆེན་གསང་བའི་དོན་རྒྱ་ཆེར་ངེས་པར་ཁོང་དུ་ཆུབ་ནས་ཚོགས་ཀྱི་མཆོད་པར་བརྩོན་པ་ལས། གསང་སྔགས་ཐེག་ཆེན་ཞོན་པའི་གསལ་ལྡན་ནི་རིགས་ཆེན་ངེས་ནས་ཚེ་གཅིག་གིས་འབྲས་བུ་མངོན་པར་བྱང་ཆུབ་པར་གྱུར་ལ། མཚན་ཉིད་ཀྱི་ཐེག་པ་ལ་བྱ་བ་བྱེད་པའི་དགེ་ལྡན་ནི་གྲངས་མེད་ཀྱི་བསྐལ་པ་གསུམ་གྱིས་འབྲས་བུ་བྱང་ཆུབ་ཐོབ་བོ། །ཁྱད་པར་དེ་ལྟར་ཆེ་བ་དེས་ན་ཐེག་ཆེན་གསང་བ་དམ་པ་ལ་སྤྱད་དེ་ཚེ་འདི་ཉིད་ལ་འབྲས་བུ་ཐོབ་པ་སྐྱེས་མཆོག་གསལ་ལྡན་དེ་འདྲའི་སྤྱོད་ཚུལ་གྱི་འབྲས་བུར་མྱུར་དུ་སྦྱོར་བའི་བྱུང་བ་དང་མཐུན་པར་གསང་ཆེན་སྙིང་པོའི་དོན་ལ་ལེགས་པར་བསླབ་སྟེ་དེ་བཞིན་དུ་སྤྱོད་པར་གྱིས་ཤིག

དགུ་པ་སྔགས་ཚུལ་བཞིན་དུ་བཅངས་པའི་ཡོན་ཏན་བཤད་པ་ནི།

གཞན་ཡང་གསང་འཛིན། ཞེས་པ་ནས། ཚུལ་བྱུང་དག་པར་སྤྱོད། །ཅེས་པའི་བར་གྱིས་བསྟན་ཏེ།

གཞན་ཡང་གསང་འཛིན་བདག་པོ་ཉོན། །གསང་འདི་རྟག་ཏུ་གང་འཆང་བ། །མི་བསྐྱོད་རྒྱལ་པོ་ལ་སོགས་པའི།། ཆེ་ཡོན་བརྟག་པའང་ཅི་འདྲ་བ། །དོན་གྱི་གཟུངས་དང་བཅས་པར་འཐོབ། །དེ་ཡང་ཇི་ལྟ་བུ་ཞེ་ན།།

ཁྱིམ་བདག་མེས་སྦྱིན་བྱ་བ་དེ། །བརྒྱ་ཡི་འཁོར་དང་བཅས་པ་ཞིག །རྟག་པར་ཐེག་ཆེན་འདིར་གནས་པས།། སངས་རྒྱས་མི་འཁྲུགས་རྒྱལ་པོ་ཡི། །འཁོར་དང་བཅས་པ་ཅི་འདྲ་བར། །རིགས་ཆེན་འཛིན་པ་གཅིག་གིས་ཐོབ།།

དེ་འདྲའི་ཚུལ་བྱུང་དག་པར་སྤྱོད།།

གཞན་ཡང་གསང་སྔགས་འཛིན་པའི་བདག་པོ་ཉོན་ཅིག གསང་སྔགས་ཀྱི་ཆོས་འདི་དག་རྟག་ཏུ་གང་གིས་འཆང་བ་དེ་ནི་མི་བསྐྱོད་རྒྱལ་པོ་ལ་སོགས་པའི་ཆེ་བའི་ཡོན་ཏན་ཚད་ལས་འདས་པ་རྟག་ཏུ་རྫོགས་ཤིང་མངའ་བ་རྣམས་ཅི་འདྲ་བ་དེ་ལྟར་དོན་གྱི་གཟུངས་དང་བཅས་པར་༼༡༨༩༽ཐོབ་པར་འགྱུར་རོ། །དེ་ཡང་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་ཁྱིམ་བདག་མེས་སྦྱིན་བྱ་བ་དེ་ཉིད་ཚོམ་བུ་བརྒྱ་ཡི་འཁོར་དང་བཅས་པ་ཞིག རྟག་པར་རྒྱུན་དུ་ཐེག་ཆེན་གསང་བ་འདི་ཉིད་བཅངས་ཤིང་དོན་འདིར་གནས་པས། སངས་རྒྱས་མི་འཁྲུགས་པའི་རྒྱལ་པོ་དེ་ཉིད་འཁོར་དང་བཅས་པ་ཅི་འདྲ་བར། རྩལ་སྟོབས་རྫོགས་པའི་རིགས་ཆེན་འཛིན་པ་གཅིག་གིས་འབྲས་བུ་དམ་པ་ཉིད་འཐོབ་པར་གྱུར་པ་དེ་འདྲའི་ཚུལ་བྱུང་བའི་རྗེས་སུ་ཡང་དག་པར་སྤྱོད་ཅིག

བཅུ་པ་སྔགས་མ་ནོར་བར་བསྟན་པའི་ཡོན་ཏན་བཤད་པ་ནི།

གཞན་ཡང་གསང་བདག ཅེས་པ་ནས། གསང་བར་ངེས་པའོ། །ཞེས་པའི་བར་གྱིས་བསྟན་ཏེ།

གཞན་ཡང་གསང་བདག་འདི་ལྟ་སྟེ། །སྐུ་དང་གསུང་ཐུགས་རྡོ་རྗེ་ཡི། །དོན་དུ་ངེས་པར་བསྒྲུབ་པ་རྣམས། །རྟོགས་ནས་སྨྲ་བར་གང་བྱེད་པ། །གོམས་པར་བརྗོད་དང་སྨོས་པ་ཡིས། །ཆོས་ཀྱི་རྒྱལ་པོར་དེ་འགྱུར་ཞིང་། །ཡོན་ཏན་སྤྱི་གཙུག་ཉིད་དུ་འགྱུར། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །དྲང་སྲོང་རྣལ་འབྱོར་ཀལ་ཡ་ནས།། དྲང་སྲོང་རྣམ་པ་མང་སྡེ་ལ། །ཐེག་ཆེན་གསང་བའི་བསྔགས་པ་བརྗོད། །དོན་རྣམས་ལེགས་པར་བཀོད་པ་ལས།། མང་པོས་རིགས་ཆེན་འཛིན་པ་ཐོབ། །གང་དེར་བསྔགས་པ་རྗོད་བྱེད་པ། །གསང་བདག་ཆོས་ཀྱི་རྒྱལ་པོར་གྱུར།། དེས་ན་ཐེག་ཆེན་གསང་བ་འདི། །ཀུན་ལ་བསྔགས་པ་བརྗོད་པར་གྱིས། །དེས་ནི་ང་ཡི་དགོངས་པ་འཐོབ། །རྒྱལ་བ་ཀུན་གྱི་ཐུགས་དམ་ཡང་། །ཐེག་ཆེན་གསང་བའི་སྙིང་པོ་ཡིན། །རྣལ་འབྱོར་གང་ཞིག་བློ་ལྡན་པས། །སྐད་ཅིག་ཐང་ཅིག་ཡུད་ཙམ་ལ། །གསང་ཆེན་གསང་བར་ངེས་བཞག་ན། །རྒྱལ་བ་ཀུན་དང་རིགས་འཛིན་གྱི།།

གསང་ཆེན་གསང་བར་རབ་ངེས་པའོ།།

གཞན་ཡང་གསང་བདག་ཆེན་པོ་འདི་ལྟ་སྟེ། གསང་བ་མཆོག་གི་སྐུ་དང་གསུང་དང་ཐུགས་རྡོ་རྗེ་ཡི་བདག་ཉིད་མི་ཕྱེད་པའི་དོན་དུ་ངེས་པར་བསྒྲུབ་པ་རྣམས་ཀྱིས་རང་གིས་ཡང་དག་པར་རྟོགས་ནས་གཞན་ལ་ཚུལ་བཞིན་དུ་སྨྲ་བར་གང་བྱེད་པ་དེ་ནི། དོན་དེ་ལ་གོམས་པས་ཇི་ལྟར་བརྗོད་པའི་ཚིག་དང་སྨོན་ལམ་བཏབ་པ་དང་མཐུན་པ་ཡིས་འབྲས་བུ་གསང་ཆེན་འཛིན་པའི་ཆོས་ཀྱི་རྒྱལ་པོ་དེ་ཉིད་དུ་འགྱུར་ཞིང་མཐར་ཕྱིན་པའི་ཡོན་ཏན་གྱི་སྤྱི་གཙུག་མངོན་པར་མཐོ་བ་ཉིད་དུ་འགྱུར་རོ། །དེ་ཡང་དཔེ་ཇི་ལྟ་བུ་ཞེ་ན། འདས་པའི་དུས་ན་སྔོན་བྱུང་བ་དྲང་སྲོང་གི་རྣལ་འབྱོར་ཆེན་པོ་ཀལ་ཡ་ནས། དྲང་སྲོང་རྣམ་པ་མང་པོའི་སྡེ་ལ་ཐེག་ཆེན་གསང་བའི་ཡོན་ཏན་གྱི་བསྔགས་པ་རྒྱ་ཆེར་བརྗོད་ཅིང་བསྒྲགས་ནས་དོན་གྱི་གནས་རྣམས་ལ་ངེས་པར་བཀོད་པ་ལས།

དྲང་སྲོང་མང་པོས་རིགས་ཆེན་འཛིན་པའི་ས་དམ་པ་ཐོབ་པར་གྱུར་ལ། གང་དེར་བསྔགས་པ་བརྗོད་པར་བྱེད་པ་དྲང་སྲོང་ཀལ་ཡ་ན་ནི་གསང་བའི་མངའ་བདག་ཆོས་ཀྱི་རྒྱལ་པོར་གྱུར་པ་དེས་ན་ཐེག་ཆེན་གསང་བ་འདི་ཡི་དོན་དང་མཐུན་པར་སྣོད་ལྡན་ཀུན་ལ་བསྔགས་པ་བརྗོད་པར་གྱིས་དང༌། ཐབས་དེས་ནི་སྟོན་པ་ང་ཡི་དགོངས་པ་དང་སྤོབས་པ་ཕུན་སུམ་ཚོགས་པ་འདི་ཉིད་ཐོབ་པར་འགྱུར་རོ། །དེ་ཡི་ཕྱིར་རྒྱལ་བ་ཀུན་གྱི་སྙིང་པོའི་ཐུགས་དམ་ཡང་ཐེག་ཆེན་གསང་བའི་སྙིང་པོ་འདི་ཉིད་ཁོ་ན་ཡིན་ནོ། །ཞེས་བཤད་པའི་ཡོན་ཏན་དང་དེའི་གཏན་ཚིགས་བསྟན་པའོ། །དེས་ན་རྣལ་འབྱོར་པ་གང་ཞིག་བློ་གྲོས་དང་ལྡན་པས། དུས་སྐད་ཅིག་ཐང་ཅིག་ཡུད་ཙམ་ལ་ཡང་གསང་ཆེན་གསང་བ་འདིའི་དོན་ལ་ཡང་དག་པར་ངེས་པར་བཞག་ན། རྒྱལ་བ་རྫོགས་པའི་སངས་རྒྱས་ཀུན་དང་རིགས་འཛིན་རྣམས་ཀྱི་དགོངས་པ་ལྟར་གསང་ཆེན་གསང་བ་དམ་པར་ངེས་པའོ། །ཞེས་པ་ནི་སྒོམ་པའི་ཡོན་༼༡༩༠༽ཏན་ནོ།།

གསུམ་པ་ཞབས་བསྡུ་བ་ནི།

གསང་བའི་བདག་པོ། ཞེས་པ་ནས། གསང་བ་མཆོག་ཉིད་གསུང༌། །ཞེས་པའི་བར་གྱིས་བསྟན་ཏེ།

གསང་བའི་བདག་པོ་དེ་ལྟར་ན། །གསང་ཆེན་གསང་བའི་སྙིང་པོ་གང་། །ངེས་པར་ལེགས་པའི་བཅད་རྒྱུད་དང་།། ལོག་པར་ངེས་པའི་བཅད་རྒྱུད་རྣམས། །སྔོན་བྱུང་བརྒྱུད་པའི་གྲགས་པ་ཡིན། །དེ་སྐད་གསང་བ་མཆོག་ཉིད་གསུང་།།

གསང་བའི་མངའ་བདག་ཆེན་པོ་དེ་ལྟར་ན་གསང་ཆེན་གསང་བའི་སྙིང་པོ་འདིའི་དོན་གང༌། མ་ནོར་བར་ཉམས་སུ་བླངས་ཏེ་ངེས་པར་ལེགས་པའི་བཅད་རྒྱུད་དང༌། ཕྱིན་ཅི་ལོག་ཏུ་ཉམས་སུ་བླངས་ཏེ་ལོག་པར་ངེས་པའི་བཅད་རྒྱུད་རྣམས་སྔོན་དུ་བྱུང་བའི་བརྒྱུད་པ་རིན་པོ་ཆེ་འདི་ཡི་གླེང་གཞི་ལ་གྲགས་པ་ཡིན་པས་ན་ཚུལ་དེ་སྐད་དུ་སྟོན་པ་གསང་བ་མཆོག་གི་བདག་པོ་ཉིད་ཀྱིས་གསུངས་ཤིང་བཀའ་སྩལ་པར་མཛད་པས་སྐྱོན་དང་ཡོན་ཏན་གྱི་ཚུལ་ལ་མཁས་པར་བྱའོ།།

གསུམ་པ་བྱུང་ཚུལ་གྱི་ཞབས་བསྡུ་བ་ནི།

ཞེས་གསང་བ་པའི། ཞེས་པ་ནས། ཆད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ཞེས་གསང་བ་པའི་བདག་པོས་སྔོན་བྱུང་བའི་གཏམ་རྒྱུད་ཇི་ལྟར་བརྒྱུད་ཅིང་གྲགས་པ་བརྗོད་པའི་བྱ་བ་བྱས་པས། ལངྐའི་བདག་པོ་ལ་སོགས་པ་སྔོན་དུ་གནང་བའི་སེམས་དཔའ་དམན་པའི་ལུས་ཅན་རྣམས།

གང་དུ་མ་ངེས་པའི་སོམ་ཉི་ཡོངས་སུ་ཆད་པར་གྱུར་ཏོ།།

ཞེས་གསང་བ་པའི་བདག་པོས་སྔོན་དུ་བྱུང་བའི་གཏམ་རྒྱུད། ཇི་ལྟར་བརྒྱུད་ཅིང་གྲགས་པ་བརྗོད་པའི་བྱ་བ་བྱས་པས། ལང་ཀའི་བདག་པོ་ལ་སོགས་པ་སྔོན་དུ་གནས་པའི་སེམས་དཔའ་ཆེན་པོ་དམན་པའི་ལུས་ཅན་རྣམས། གསང་མཆོག་ཐེག་པ་ཆེན་པོ་འདི་ཉིད་ཐོག་མ་མེད་པའི་དུས་ནས་བགྲོས་སམ་མ་བགྲོས་སྙམ་དུ་གང་དུ་གྲགས་པ་དང་བརྒྱུད་པའི་ཚུལ་རྣམས་ཇི་བཞིན་དུ་མ་ངེས་པའི་སོམ་ཉི་ཡོངས་སུ་ཆད་དེ་ཡང་དག་པར་ངེས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།།

སྔོན་བྱུང་བའི་གཏམ་རྒྱུད་ཡོངས་སུ་བརྗོད་པའི་ལེའུ་སྟེ་སུམ་ཅུ་བརྒྱད་པའོ།།

ཐེག་པ་ཆེན་པོ་ངེས་པར་འབྱུང་བའི་ཚུལ་ལས། བརྒྱུད་པ་ཐབས་ཀྱིས་གྲགས་པ་ན་ཡང་བྱུང་ཞེས་བྱ་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱ་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་བརྒྱད་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྔོན་འོག་མིན་དུ་སྔར་གྱི་བྱུང་ཚུལ་བཀའ་སྩལ་པའི་གཏམ་རྒྱུད་ཡོངས་སུ་བརྗོད་པའི་ལེའུ་སྟེ་སུམ་ཅུ་རྩ་བརྒྱད་པ་རྣམ་པར་བཤད་དེ་འགྲེལ་པའོ། །འགྲེལ་པ་ལུང་བསྟན་མ་ལས་ནི། ལེའུ་སྔ་མས་དེ་ལྟར་སྤྱད་ལེགས་ཉེས་ཀྱི་ཁྱད་པར་བསྟན་ནས། ལེའུ་འདིས་དེ་དག་གི་ལེགས་ཉེས་ཀྱི་འབྲས་བུ་ལོ་རྒྱུས་ཀྱི་སྒོ་ནས་གདམས་པར་བསྟན་ཏོ། །དེ་དག་གི་སྒོ་ནས། ཐེག་པ་ཆེན་པོ་ངེས་པར་འབྱུང་བའི་ཚུལ་ལས། བརྒྱད་པ་ཐབས་ཀྱི་གྲགས་པ་ན་ཡང་འབྱུང༌། ཞེས་བྱ་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ། བྱུང་ཚུལ་བསྟན་པ་བརྒྱད་པའི་དོན་རྫོགས་པའོ།། །།

ལེའུ་སོ་དགུ་པ་ཐུགས་ཀྱི་མཛད་པ་ཡོངས་སུ་རྫོགས་པ།

༈ དགུ་པ་གང་གི་ཆེད་དུ་མཛད་པའི་བྱུང་ཚུལ་ལ་གསུམ་སྟེ། སྤྱིར་བསྟན་པ། བྱེ་བྲག་ཏུ་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། དེ་ཁོ་ན་ཉིད་ལ་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྔོན་དུ་བྱུང་བའི་ཚིག་བཅུ་གཉིས་པའི་དགུ་པ། གང་གི་ཆེད་དུ་མཛད་པ་ན་ཡང་འབྱུང་ཞེས་བྱུང་བའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། གང་གི་ཆེད་དུ་མཛད་པ་ན་ཡང་བྱུང་ཞེས་བཀོད་པ་དེ་ཇི་ལྟ་ཇི་ལྟར་མཛད་དེ་གྲགས་པ་ལགས། སྨྲས་པ། ལངྐའི་བདག་པོ་གང་མ་བཅོས་པ་དེ་ཁོ་ན་བཞིན་མཛད་པ་ལ་བྱའོ།།

སྤྱིར་བྱུང་ཚུལ་འདི་ཉིད་དགོངས་པ་ཚིག་གསུམ་བགྲོ་བར་མཛད་ཀྱི་ལན་ཏེ། ཁྱད་པར་༼༡༩༡༽རྩལ་འཕངས་ལས་འབྲས་བུ་ཡུལ་དང་མཐུན་པའི་མཛད་པ་ཡིན་ལ། རྒྱུད་གནས་ལུགས་ལས་གང་གི་ཆེད་དུ་མཛད་པའི་བྱུང་ཚུལ། གྲོལ་བ་དོན་མཐུན་གྱི་ལྟ་བ་སྨན་པ་མཁས་པ་ལྟ་བུ་ཉིད་རྒྱས་པར་སྟོན་ནོ། །དེ་ནས་ཡང་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྔོན་དུ་བྱུང་བའི་ཚིག་བཅུ་གཉིས་པའི་དགུ་པ། གང་གི་ཆེད་དུ་མཛད་པ་ན་ཡང་འབྱུང་ཞེས་སྟོན་པས་ལུང་བསྟན་པའི་བྱུང་བའི་ཚུལ་གྱི་དོན་གྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། གང་གི་ཆེད་དུ་མཛད་པ་ན་ཡང་འབྱུང་ཞེས་བཀོད་པ་དེ་ཉིད་ཇི་ལྟ་ཇི་ལྟར་ཡུལ་དང་མཐུན་པར་མཛད་དེ་ཡོངས་སུ་གྲགས་པ་ལགས་ཞེས་ཞུས་པས། ལན་སྨྲས་པ། ལང་ཀའི་བདག་པོ་གང་ཡེ་ཇི་བཞིན་པའི་ཆོས་ཉིད་འཕྲལ་དུ་མ་བཅོས་པ་དེ་ཁོ་ན་ཉིད་ཇི་ལྟ་བ་བཞིན་དུ་མཛད་པའང་དེ་དང་མཐུན་པ་ལ་བྱའོ། །ཡང་དེ་ཉིད་དྲི་བའི་ཕྱིར་སྨྲས་པ། གསང་བ་པའི་བདག་པོ། གང་མ་བཅོས་པ་དེ་ཁོ་ན་བཞིན་དུ་མཛད་པ་དེ་གང་ལགས། ལན་སྨྲས་པ། ལང་ཀའི་བདག་པོ། གང་གྲོང་ཁྱེར་གསུམ་ལ་སོགས་པ་འཁོར་འདས་ཀྱི་ཆོས་ཇི་སྙེད་པ་རྣམས་ཀྱི་རང་བཞིན་གྱི་ཆོས་ཉིད་མ་བཅོས་པ་དེ་ཁོ་ན་ཉིད་མ་འདྲེས་ཡོངས་རྫོགས་ཀྱི་ངོ་བོ་དེ་ཉིད་ལ་བྱའོ། །འདིར་གང་གི་ཆེད་དུ་མཛད་ན་ཁམས་གསུམ་གྱི་སེམས་ཅན། གང་གིས་མཛད་ན་སངས་རྒྱས་ཀྱིས། གང་མཛད་ན་ལེའུ་བཞིའི་དོན་ལྟར། ཇི་ལྟར་མཛད་ན་ཅི་ཡང་མིན་པ་ལས་ཅིར་ཡང་འཆར་བའི་ཚུལ་གྱིས་སོ།།

གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། དྲིས་པའི་སྒོ་ནས་མདོར་བསྟན་པ། ལན་གྱི་སྒོ་ནས་རྒྱས་པར་བཤད་པའོ། །དང་པོ་ནི།

སྨྲས་པ། ཞེས་པ་ནས། ཞེས་ཡོངས་སུ་དྲིས་པ་ལས། ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ་གང་མ་བཅོས་པ་དེ་ཁོ་ན་བཞིན་དུ་མཛད་པ་དེ་གང་ལགས། སྨྲས་པ། ལངྐའི་བདག་པོ་ཆོས་རྣམས་ཀྱི་ཆོས་ཉིད་དེ་ཁོ་ན་ལ་བྱའོ། །སྨྲས་པ། གསང་བ་པའི་བདག་པོ་ཆོས་རྣམས་ཀྱི་ཆོས་ཉིད་དེ་ཁོ་ན་ལ་ནི། སངས་རྒྱས་ཀྱང་མེད། སེམས་ཅན་ཡང་མེད། ཕོ་མོ་ཡང་མེད། རིགས་བརྒྱུད་ཀྱང་མེད། གཟུགས་མེད། བསྟན་དུ་མེད། མཚོན་དུ་མེད། དཔེ་ཡང་མེད། མཛད་པ་ཡང་མེད་དེ། དཔག་པར་རབ་ཏུ་དཀའ་ལ། གང་གིས་རྟོགས་པར་ནུས་པ་མ་ཡིན་ན། གསང་བ་པའི་ བདག་པོ་གང་ཅི་ཡང་མེད་པ ་ལས། སངས་རྒྱས་དང་། སེམས་ཅན་དང་། ཕོ་མོ་དང་། རིགས་བརྒྱུད་དང་། གཟུགས་སྣ་ཚོགས་དང་། བསྟན་པ་སྣ་ཚོགས་དང་། མཚོན་པ་དང་། དཔེ་ཐ་དད་པ་དང་། མཛད་པ་སྣ་ཚོགས་དང་། རྗེས་སུ་དཔག་པ་ལ་སོགས་པ་ཇི་སྙེད་པ་མང་པོ་འདི་དག་གང་གི་ཆེད་དུ་མཛད་པ་སྣང་བ་ལགས་ཞེས་ཡོངས་སུ་དྲིས་པ་ལས།།

ཡང་སྡུད་པ་པོས་སྨྲས་པ། སྟོན་པ་གསང་བ་པའི་བདག་པོ། ཆོས་རྣམས་ཀྱི་ཆོས་ཉིད་དེ་ཁོ་ན་ཉིད་ཀྱིས་གདུལ་བྱའི་ཆེད་དུ་མཛད་པའི་དོན་བྱར་ཡོད་མེད་དྲིས་པའི་དོན་ནི། ཡེ་ཇི་བཞིན་པའི་ངང་ལ་ལྟོས་པའི་ཐ་སྙད་ཐམས་ཅད་གོལ་བའི་ཕྱིར་ཕྱོགས་རིས་མེད་པ་ལ་ནི་ཡེ་ནས་སངས་རྒྱས་ཟིན་པ་ལ་འཕྲལ་དུ་བརྟགས་པའི་ཐ་སྙད་ཀྱི་སངས་རྒྱས་ཀྱང་མེད་ལ། ཁམས་གསུམ་སངས་རྒྱས་ཀྱིས་ཡིན་པ་ལ་འགྲོ་བ་སེམས་ཅན་གྱི་མིང་ཡང་མེད་པ་དང༌། ཇི་བཞིན་པ་ནི་རྣམ་པ་ཐམས་ཅད་པའི་ཕྱིར་མཚན་གྱི་བྱེ་བྲག་གིས་ཕྱེ་བའི་ཕོ་མོ་ཡང་མེད་ཅིང༌། རིགས་རྒྱུད་ཐ་དད་ཀྱང་མེད་པ་དང༌། དབྱིབས་དང་༼༡༩༢༽ཁ་དོག་གི་རྣམ་པ་དང་བྲལ་བས་གཟུགས་ཀྱང་མེད་ལ། དེས་ན་གཞན་ལ་ངོ་བོ་བསྟན་དུ་མེད་ཅིང༌། དཔེ་དང་ཚིག་གིས་མཚོན་དུ་མེད་ལ། རིལ་དེ་ཉིད་ཡིན་པས་མཚོན་བྱེད་ཀྱི་དཔེ་ཡང་མེད་དོ། །དེ་ལྟ་བུའི་ཆོས་ཉིད་ལ་དོན་གྱི་བྱ་བ་དང་བྲལ་བས་མཛད་པ་ཡང་མེད་དེ། ཕོ་མོ་ལ་སོགས་པ་གསུམ་དུ་བློས་མི་འཁྱུད་པས་དཔག་པར་རབ་ཏུ་དཀའ་ལ། བསྟན་དུ་མེད་པ་སོགས་བཞི་ཡི་དོན་ལྟར་སུས་ཀྱང་གོ་བར་བྱར་མེད་ཅིང་གང་གིས་ཀྱང་མཐོང་བ་དང་རྟོགས་པར་ནུས་པ་མ་ཡིན་ན་ཇི་ལྟར་སྣང་བར་འགྱུར་ཏེ་སྣང་བ་མེད་པའི་དེ་ཁོ་ན་ཉིད་དུ་གནས་པ་ལགས་ན། གསང་བ་པའི་ བདག་པོ། གང་གནས་ལུགས་མཐའ་བཅུ་པོ་ཅི་ཡང་མེད་པ ་ལས། ཅིར་ཡང་མཛད་པ་ནི། སྐུ་གསུང་ཐུགས་དང་ཐབས་ཀྱི་མཛད་པ་བཞིར་འཕྲུལ་པ་སྟེ། དེ་ཁོ་ན་ཉིད་ངོ་བོ་མེད་པ་ལས། ལན་གྱི་ཚུལ་ནས་དྲི་བའི་རྣམ་གྲངས་སུ་འགྱུར་ཏེ། དེ་ལྟ་བུའི་ངང་ལས་ཆོ་འཕྲུལ་དུ། སངས་རྒྱས་སུ་སྣང་བ་ནི་དྲི་བ་དང་པོ་དང༌། དེ་བཞིན་དུ་སེམས་ཅན་དང༌། ཕོ་མོ་དང༌། རིགས་རྒྱུད་དང༌། གཟུགས་སྣ་ཚོགས་དང༌། བསྟན་པ་སྣ་ཚོགས་དང༌། མཚོན་པ་སྟེ་བདུན་དང༌། དཔེ་ཐ་དད་པ་སྐུ་ཡི་མཛད་པ་དང༌། སྔ་མ་བདུན་གྱི་སྟེང་དུ་མཛད་པ་སྣ་ཚོགས་བསྣན་པས་ཐུགས་ཀྱི་མཛད་པ་བརྒྱད་དང༌། འདིའི་མཛད་པ་སྣ་ཚོགས་པའི་ཟུར་གྱིས་ཐབས་ཀྱི་མཛད་པའི་དྲི་བའང་བསྟན་ལ། རྗེས་སུ་དཔག་པ་གསུང་གི་མཛད་པ་དང་གྲངས་བཅུ་ནི་དྲི་བ་བཅུ་སྟེ། དེ་དག་ལ་སོགས་པ་མ་འགགས་པའི་ཆོས་ཇི་སྙེད་པ་མང་པོ་འདི་ཉིད། མེད་པ་ལས་ཡོད་པར་སྣང་བ་ནི་གང་གི་ཆེད་དུ་མཛད་པར་སྣང་སྟེ་དགོས་པ་ཅིའི་ཕྱིར་བཀོད་པ་ལགས། ཞེས་ཡོངས་སུ་དྲི་བ་བཅུར་དྲིས་པ་ལས།

གཉིས་པ་ལན་གྱི་སྒོ་ནས་རྒྱས་པར་བཤད་པ་ལ་བཞི་སྟེ། མཛད་པ་ཐ་དད་ལ་སོགས་པ་བརྒྱད་ཀྱི་ལན་ཐུགས་ཀྱི་མཛད་པ། རྗེས་དཔག་གི་ལན་གསུང་གི་མཛད་པ། མཛད་པ་ཐ་དད་ཀྱི་ལན་ཟུར་གཉིས་པ་ཐབས་ཀྱི་མཛད་པ། དཔེ་ཐ་དད་ཀྱི་ལན་སྐུའི་མཛད་པའོ། །དང་པོ་ལ་གཉིས་ཏེ། རྒྱས་པར་བཤད་པ། ཞབས་བསྡུ་བའོ། །དང་པོ་ལ་བརྒྱད་དེ། མཛད་པ་ཐ་དད་དུ་མཛད་པ། སངས་རྒྱས་སུ་མཛད་པ། སེམས་ཅན་དུ་མཛད་པ། ཕོ་མོར་མཛད་པ། རིགས་རྒྱུད་དུ་མཛད་པ། གཟུགས་སྣ་ཚོགས་སུ་མཛད་པ། བསྟན་པ་སྣ་ཚོགས་སུ་མཛད་པ། མཚོན་པ་སྣ་ཚོགས་སུ་མཛད་པའོ། །དང་པོ་ལ་གཉིས་ཏེ། ལེགས་པ་བྱིན་ཏེ་མདོར་བསྟན་པ། དེའི་དོན་རྒྱས་པར་བཤད་པའོ། །དང་པོ་ནི།

གསང་བ་པའི། ཞེས་པ་ནས། དེ་ཡིན་༼༡༩༣༽པའི་ཕྱིར་ཏེ། ཞེས་པའི་བར་གྱིས་བསྟན་ཏེ།

གསང་བ་པའི་བདག་པོས་སྨྲས་པ། ཀྱེ་ལངྐའི་ བདག་པོ་ཡོངས་སུ་དྲི་བ་ཆེན་པོ་འདི་ནི་ལེགས་སོ། །རབ་ཏུ་ལེགས་སོ། །གང་ཅི་ཡང་མེད་པ ་ལས་ཅི་ཡང་སྣང་བ་འདི་ནི། དེའི་རང་བཞིན་དེ་ཡིན་པའི་ཕྱིར་ཏེ།

ལེའུ་འདིས་དྲང་དོན་སྟོན་ནོ། །གསང་བ་པའི་བདག་པོས་ལན་སྨྲས་པ། ཀྱེ་ལང་ཀའི་བདག་པོ། ཡོངས་སུ་དྲི་བ་ཆེན་པོ་འདི་ནི་རང་དོན་དུ་ལེགས་སོ། །གཞན་དོན་དུ་རབ་ཏུ་ལེགས་སོ། །ཞེས་ལེགས་པར་གནང་སྟེ་དོན་བཀའ་སྩལ་པ། འདི་ནི་དྲི་བ་དགུ་པའི་ལན་ཏེ། ཆོས་ཉིད་དེ་ཁོ་ན་ཉིད་གང་མཚོན་པ་བཅུ་པོ་ཅི་ཡང་མེད་པ་ལས། མཛད་པ་ཐམས་ཅད་ལྷུན་གྱིས་གྲུབ་པའི་དེ་ཁོ་ན་ཉིད་མཚོན་པ་བཅུ་པོ་ཅིར་ཡང་སྣང་བ་འདི་ནི། འཆད་པར་འགྱུར་བའི་ཆོས་ཇི་སྙེད་པ་མི་འགོག་པར་སྣང་བ་དེའི་རང་བཞིན་རྣམ་པའི་མཚན་ཉིད་གང་དུའང་མ་གྲུབ་པའི་ཆོས་ཉིད་དེ་ཁོ་ན་ཉིད་དེ་ཉིད་ཡིན་པའི་ཕྱིར་ཏེ་དེས་ན་རང་བཞིན་གྱི་གཏན་ཚིགས་ཀྱིས་གྲུབ་པའོ།།

གཉིས་པ་དེའི་དོན་རྒྱས་པར་བཤད་པ་ལ་གསུམ་སྟེ། གདུལ་བྱ་བཤད་པ། མཛད་པའི་གཞི་བསྟན་པ། མཛད་པ་དངོས་བཤད་པའོ། །དང་པོ་ནི།

གྲོང་ཁྱེར་ཆེན་པོ། ཞེས་པ་ནས། མི་སྣང་བའི་གྲོང་ཁྱེར་རོ། །ཞེས་པའི་བར་གྱིས་བསྟན་ཏེ།

གྲོང་ཁྱེར་ཆེན་པོ་གསུམ་གྱི་ཆེད་དུ་མཛད་པ་ཐ་དད་པར་སྣང་བ་འབའ་ཞིག་གོ །གྲོང་ཁྱེར་གསུམ་གང་ཞེ་ན། འདི་ལྟ་སྟེ། ཕྱེད་སྣང་གི་གྲོང་ཁྱེར་དང་། ཀུན་སྣང་གི་གྲོང་ཁྱེར་དང་། མི་སྣང་བའི་གྲོང་ཁྱེར་རོ།།

གང་གྲོང་ཁྱེར་གསུམ་གྱི་དེ་ཁོ་ན་ཉིད་མཐའ་བཅུ་ཀུན་ལས་འདས་པ་ལས། མཚོན་པ་བཅུ་ཅིར་ཡང་འཆར་བ་འདི་གདུལ་བར་བྱ་བ་གྲོང་ཁྱེར་ཆེན་པོ་གསུམ་གྱི་ཆེད་དུ་གྲོལ་བར་བྱེད་པའི་ཕྲིན་ལས་ཀྱི་མཛད་པ་མི་འདྲ་བ་ཐ་དད་པར་རང་སྣང་བའི་མཛད་སྤྱོད་སེལ་མེད་པ་འབའ་ཞིག་གོ །དེ་ལ་གྲོང་ཁྱེར་གསུམ་གང་ཞེ་ན་འདི་ལྟ་སྟེ། ཞེས་གདུལ་བྱ་ལ་ཉེ་བར་བསྟན་པ་ནི་རྒྱུད་གཅིག་པ་དང་ཐ་དད་པ་གཉིས་ཀར་སྦྱར་ཏེ། དང་པོ་ལྟར་ན། ཉོན་མོངས་པའི་ཡིད་ཀྱིས་ཕྱི་ནང་གཉིས་ལས་ནང་དུ་འཛིན་པའི་ཕྱིར་ཕྱེད་སྣང་གི་གྲོང་ཁྱེར་དང༌། ཚོགས་དྲུག་ཕྱི་ནང་གཉིས་ཀར་གསལ་བའི་ཕྱིར་ཀུན་སྣང་གི་གྲོང་ཁྱེར་དང༌། ཀུན་གཞི་ཤིན་ཏུ་ཆ་ཕྲ་བར་རྒྱུ་བའི་ཕྱིར་མི་སྣང་བའི་གྲོང་ཁྱེར་རམ། ཡང་ན་ངག་དང་ལུས་དང་ཡིད་དེ་སྒོ་གསུམ་མོ། །དེ་བས་ན་ཁམས་གསུམ་གྱི་ས་བོན་རྒྱུད་ལ་ཡོད་པའང་མི་འདོད་པ་མ་ཡིན་ནོ། །གཉིས་པ་ལྟར་ན། འདོད་ཁམས། གཟུགས་ཁམས། གཟུགས་མེད་ཀྱི་ཁམས་གསུམ་སྟེ། ངོ་བོ་ནི་ཞེན་པའི་བརྟགས་པ་སྣང་བ་ཡིན་ལ། དེའང་འདོད་ཁམས་ནི་ཉིན་མཚན་ཆ་གཉིས་སུ་སྣང་བའི་ཕྱིར་ཕྱེད་སྣང་གི་གྲོང་ཁྱེར་དང༌། གཟུགས་ཁམས་ནི། ལུས་དང་གནས་ཀྱི་འོད་ཀྱིས་ཉིན་མཚན་མེད་པར་གསལ་བའི་ཕྱིར་ཀུན་སྣང་གི་གྲོང་ཁྱེར་དང༌། གཟུགས་མེད་ཁམས་ནི། གནས་ལུས་གཞན་གྱིས་མངོན་པར་མི་མཐོང་བའི་ཕྱིར་ཤིན་ཏུ་གྲངས་ལས་འདས་པས་མི་སྣང་བའི་གྲོང་ཁྱེར་རོ། །ངེས་ཚིག་ནི། ཐམས་ཅད་ཚོགས་ཤིང་མཆེད་པས་༼༡༩༤༽ན་གྲོང་ཁྱེར་ཞེས་བྱའོ། །དེའང་ཁམས་གསུམ་ནི་ཕྱིའི་གྲོང་ཁྱེར་དང༌། ལུས་ངག་ཡིད་གསུམ་ནི་ནང་གི་གྲོང་ཁྱེར་དང༌། ཉོན་ཡིད་ཚོགས་དྲུག་ཀུན་གཞི་གསུམ་ནི་གསང་བའི་གྲོང་ཁྱེར་རོ།།

གཉིས་པ་མཛད་པའི་གཞི་བསྟན་པ་ནི།

ལང་ཀའི། ཞེས་པ་ནས། གནས་སུ་གྱུར་པ་ཁོ་ནའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་ཉིད་ཆོས་ཉིད་ཡིན་པས་ན། དེ་ལ་ནི་ཆོས་ཀྱི་དབྱིངས་ཞེས་བྱའོ།།

དེ་ཅིའི་ཕྱིར་ཞེ་ན། ཆོས་ཀྱི་དབྱིངས་གང་ཡིན་པ་དང་། གྲོང་ཁྱེར་གསུམ་གྱི་རང་བཞིན་གང་ཡིན་པ་འདིར་གཅིག་པའི་ཕྱིར་ཏེ། ཐམས་ཅད་འབྱུང་བའི་སྒོ་དང་། གནས་སུ་གྱུར་པ་ཁོ་ནའོ།།

དེའང་གདུལ་བྱ་དང་བྱིན་རླབས་ཀྱི་མཛད་པ་གཉིས་ངོ་བོས་ཐ་དད་པར་འཛིན་པའི་དོགས་པ་བསལ་བའི་ཕྱིར་དུ་མཛད་པའི་གཞི་བསྟན་ཏེ། ལང་ཀའི་བདག་པོ། ཁམས་ཀྱི་གྲོང་ཁྱེར་གསུམ་ཉིད་ངོ་བོས་ཆོས་ཉིད་དེ་ཁོ་ན་ཉིད་ཡིན་པས་ན་དངོས་གཞི་མེད་པར་ཀུན་ལ་གདལ་བའི་ཕྱིར་དེ་ལ་ནི་ཆོས་ཀྱི་དབྱིངས་ཞེས་བརྗོད་པར་བྱའོ། །དེ་གཏན་ཚིགས་ཅིའི་ཕྱིར་ཞེ་ན། ཆོས་ཀྱི་དབྱིངས་གང་ཡིན་པ་དང༌། གྲོང་ཁྱེར་གསུམ་གྱི་རང་བཞིན་གང་ཡིན་པ་འདི་ངོ་བོ་གཅིག་པར་མཚུངས་པའི་ཕྱིར་ཏེ། ཁམས་གསུམ་ལས་གཞན་པའི་ཆོས་ཉིད་མ་དམིགས་པས་སོ། །དེ་བས་ན་གཉིས་སུ་མེད་པའི་དོན་ཉིད་ནི་དངོས་པོ་གཉིས་པ་རིལ་དང་ལམ་དང་འབྲས་བུའི་ཆོས་ཐམས་ཅད་འཆར་ཞིང་འབྱུང་བའི་སྒོ་དང༌། གསང་སྔགས་ངོ་བོ་ཉིད་ཀྱི་མཛད་པ་ཀུན་གྱི་གནས་སུ་གྱུར་པ་ཁོ་ན་སྟེ། ཇི་སྙེད་པའི་ཆོས་ཐམས་ཅད་ཀྱི་གཞིའམ་རྒྱུར་གྱུར་པའི་ཆོས་ཀྱི་དབྱིངས་ཁམས་གསུམ་གྱི་དེ་ཁོ་ན་ཉིད་གང་ཡིན་པའོ།།

གསུམ་པ་མཛད་པ་དངོས་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། གསང་བའི་སྒོ འོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་གྱི་ཆེད་དུ་སྒོ་གསུམ་དུ་སྣང་བ་ནི། འདི་ལྟ་སྟེ།

གཟུངས་ཀྱི་སྒོ་དང་། རིག་པའི་སྒོ་དང་། གསང་བའི་སྒོའོ།།

ལང་ཀའི་བདག་པོ། གྲོང་ཁྱེར་གསུམ་གྱི་ཆེད་དུ་སྒོ་གསུམ་སྣང་བ་ནི། འདི་ལྟ་སྟེ། འདོད་ཁམས་ལ་མ་ཧཱ་ཡོ་ག་ཡེ་ནས་གཉིས་སུ་མེད་པའི་ངང་ལས་མི་འབྲལ་བས་གཟུངས་ཀྱི་སྒོ་སྣང་བ་དང༌། གཟུགས་ཁམས་ལ་ཨ་ནུ་ཡོ་ག་དེའི་དོན་ཇི་ལྟར་གནས་པ་མཐོང་བས་རིག་པའི་སྒོ་དང༌། གཟུགས་མེད་ལ་ཨ་ཏི་ཡོ་ག་དེ་ཉིད་མངོན་དུ་བྱས་པའི་དོན་སྨྲར་མེད་པའི་ཕྱིར་གསང་བའི་སྒོ་སྟེ། རྣལ་འབྱོར་གསུམ་གི་དོན་དུའང་འགྱུར་བས། ཁམས་གསུམ་ལ་སྣང་བ་ནི་རིམ་པ་ཇི་བཞིན་དུའང་སྦྱར་བར་བྱའོ།།

གཉིས་པ་རྒྱས་པར་བཤད་པ་ལ་གསུམ་སྟེ། གཟུངས་ཀྱི་སྒོ་བཤད་པ། རིག་པའི་སྒོ་བསྟན་པ། གསང་བའི་སྒོ་བཤད་པའོ། །དང་པོ་ནི།

ལང་ཀའི། ཞེས་པ་ནས། རྐྱེན་གྱིས་ལས་མཐའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཟུངས་ཀྱི་སྒོ་ཡང་། གྲོང་ཁྱེར་གསུམ་གྱི་ཆེད་དུ་གསུམ་སྣང་བར་མཛད་པ་ནི། འདི་ལྟ་སྟེ།

དེ་ཉིད་རྐྱེན་གྱིས་ཞི་གནས་དང་། དེ་འཛིན་རྐྱེན་གྱིས་ལྷག་མཐོང་དང་། དེ་འཇུག་རྐྱེན་གྱིས་ལས་མཐའ་འོ།།

ལང་ཀའི་བདག་པོ། གཟུངས་ཀྱི་སྒོ་ཡང༌། གྲོང་ཁྱེར་གསུམ་གྱི་ཆེད་དུ་གསུམ་དུ་སྣང་བར་མཛད་པ་ནི་འདི་ལྟ་༼༡༩༥༽སྟེ། རྒྱུད་གཅིག་གི་དབང་དུ། ཀུན་གཞིའི་རྐྱེན་གྱིས་ཤེས་པ་གསུམ་ཐ་དད་པར་མི་སྣང་བ་དང༌། ཉོན་ཡིད་ཀྱི་རྐྱེན་གྱིས་བསམ་གཏན་ལ་སོགས་པ་ལ་འཛིན་པའི་འདུ་ཤེས་འབྱུང་བ་དང༌། ཚོགས་དྲུག་གི་རྐྱེན་གྱིས་འདོད་ཡོན་ལྔའི་ཡུལ་ལ་སྤྱོད་པར་བྱེད་པའོ། །དེ་དག་གྲོལ་བར་བྱ་བའི་དགོས་པ་ནི། དང་པོ་དེ་ཉིད་ཀྱི་རྐྱེན་དུ་ཆོས་ཇི་བཞིན་པ་ཡེ་ནས་མི་གཡོ་བ་ཉིད་ཀྱིས་ཞི་གནས་ཀྱི་དོན་དང༌། བར་མ་དེ་འཛིན་གྱི་རྐྱེན་དུ། ཆོས་ཉིད་ཅིས་ཀྱང་མ་བསྒྲིབས་པར་རང་གསལ་བའི་ཡེ་ཤེས་ཉིད་ཀྱིས་ལྷག་པར་མཐོང་བའི་དོན་དང༌། ཐ་མ་དེ་འཇུག་གི་རྐྱེན་དུ་དེ་གཉིས་ཡེ་ནས་གཉིས་སུ་མེད་པའི་འབྲས་བུ་ཉིད་ཀྱིས་ལས་ཀྱི་མཐའ་འོ། །དེ་དག་ཤེས་བྱ་དམ་པར་གྱུར་པས་ན་ཤེས་པའི་མཚན་ཉིད་དུའང་འགྱུར་ཏེ་དེ་ཁོ་ན་ཉིད་ཡིན་པས་སོ། །རྒྱུད་ཐ་དད་པའི་དབང་དུ་ཆ་མཐུན་གྱི་ཚུལ་ནས་ནི། གཟུགས་མེད་པ་ལ་ཆོས་ཉིད་རང་ཆས་སུ་ཡོད་པས་དེ་ཉིད་ཀྱི་རྐྱེན་གྱིས་ཞི་གནས་དང༌། གཟུགས་ལ་ཡེ་ཤེས་རང་ཆས་སུ་ཡོད་པས་དེ་འཛིན་གྱི་རྐྱེན་གྱིས་ལྷག་མཐོང་དང༌། འདོད་པ་ལ་འབྲས་བུ་རང་ཆས་སུ་ཡོད་པའི་ཕྱིར་དེ་འཇུག་གི་རྐྱེན་གྱིས་ལས་མཐའ་སྟེ་འོན་ཀྱང་གཏན་ནས་རིས་སུ་ཆད་པ་ནི་མ་ཡིན་ནོ།།

གཉིས་པ་རིག་པའི་སྒོ་བསྟན་པ་ནི།

ལང་ཀའི། ཞེས་པ་ནས། ཞེན་པའི་ཆེད་དུ་ལས་མཐའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་རིག་པའི་སྒོ་ལ་ཡང་གྲོང་ཁྱེར་གསུམ་གྱི་ཆེད་དུ་གསུམ་སྣང་བར་མཛད་པ་ནི། འདི་ལྟ་སྟེ།

མི་སྣང་བའི་ཆེད་དུ་ཞི་གནས་དང་། སྣང་བའི་ཆེད་དུ་ལྷག་མཐོང་དང་། ཞེན་པའི་ཆེད་དུ་ལས་མཐའ་འོ།།

ལང་ཀའི་བདག་པོ། རིག་པའི་སྒོ་ལ་ཡང་གྲོང་ཁྱེར་གསུམ་གྱི་ཆེད་དུ་རྣམ་པ་གསུམ་སྣང་བར་མཛད་པ་ནི། འདི་ལྟ་སྟེ། མི་སྣང་བ་གཟུགས་མེད་པའི་ཁམས་ཀྱི་ཆེད་དུ་ཇི་ལྟ་བར་རྟོགས་ནས་བློ་བྱིང་རྒོད་དང་བྲལ་བར་བསྒོམ་པའི་ཞི་གནས་བསྟན་པ་དང༌། སྣང་བ་གཟུགས་ཁམས་པའི་ཆེད་དུ་དེ་ཁོ་ན་ཉིད་ཇི་ལྟ་བའི་བདེན་པ་མཐོང་བའི་ལྟ་བ་ལྷག་མཐོང་གི་དོན་བསྟན་པ་དང༌། ཞེན་པ་འདོད་ཁམས་པའི་ཆེད་དུ་ཕུང་པོ་དང་ཁམས་ལ་སོགས་པ་རིལ་འབྲས་བུ་སྐུ་དང་ཡེ་ཤེས་ཀྱི་ངོ་བོར་གཉིས་སུ་མེད་པར་བྱེད་པའི་ལས་ཀྱི་མཐའ་བསྟན་པའོ།།

གསུམ་པ་གསང་བའི་སྒོ་བཤད་པ་ནི།

ལང་ཀའི་བདག་པོ་གསང་བའི། ཞེས་པ་ནས། ཆེད་དུ་ལས་མཐའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གསང་བའི་སྒོ་ལ་ཡང་གྲོང་ཁྱེར་གསུམ་གྱི་ཆེད་དུ་གསུམ་སྣང་བར་མཛད་པ་ནི། འདི་ལྟ་སྟེ།

མི་སྣང་བའི་ཆེད་དུ་ཞི་གནས་དང་། སྣང་བའི་ཆེད་དུ་ལྷག་མཐོང་དང་། ཞེན་པའི་ཆེད་དུ་ལས་མཐའ་འོ།།

ལང་ཀའི་བདག་པོ། གསང་བའི་སྒོ་ལ་ཡང༌། གྲོང་ཁྱེར་ཆེན་པོ་གསུམ་གྱི་ཆེད་དུ་གསུམ་གྱི་མཛད་པར་སྣང་བ་ནི་འདི་ལྟ་སྟེ། མི་སྣང་བ་གཟུགས་མེད་པའི་ཆེད་དུ་དེ་བཞིན་ཉིད་མངོན་དུ་གྱུར་པས་འབྱུང་འཇུག་མེད་པའི་ཞི་གནས་བརྟན་པ་དང༌། སྣང་བ་གཟུགས་ཁམས་པའི་ཆེད་དུ་ཡེ་ཤེས་ཆེན་པོ་མངོན་དུ་བྱས་པས་རིག་པ་མ་འགག་པའི་ལྷག་མཐོང་གསལ་བ་དང༌། ཞེན་པ་༼༡༩༦༽འདོད་ཁམས་པའི་ཆེད་དུ་དེ་གཉིས་གཉིས་སུ་མེད་པས་རྟོག་ཚོགས་འབྲས་བུར་ཤར་བའི་ལས་ཀྱི་མཐའ་རྣམ་པར་དག་པ་སྟེ་རྒྱུད་ཀྱི་དབང་དུ་འགྲེལ་པའོ། །ཐེག་པའི་དབང་དུ་འགྲེལ་པ་ནི། ཉན་རང་དང་ཐེག་པ་ཆེན་པོ་རྒྱུ་འབྲས་སུ་འབྲེལ་བས་གཟུངས་ཀྱི་སྒོ་ཕྱེད་སྣང་རྒྱུའི་ཐེག་པ་མདོ་སྡེ་དང༌། ཡོན་ཏན་དང་བྱིན་རླབས་ལྷར་སྣང་བར་འདོད་པས་རིག་པའི་སྒོ། ཀུན་སྣང་བ་སྔགས་ཕྱི་པ་དང༌། དེ་དྲུག་གིས་རྟོགས་པར་མི་ནུས་པས་གསང་བའི་སྒོ་མི་སྣང་བ་གསང་སྔགས་ནང་པའོ། །དེའང་རིམ་པ་བཞིན་ཀུན་འབྱུང་འདྲེན་པས་རྒྱུ་འབྲས་འབྲེལ་ཏེ་མི་འཆོར་བའི་ཕྱིར་དང༌། དཀའ་ཐུབ་རིག་བྱེད་ཀྱིས་དོན་ལ་འདེགས་པའི་ཕྱིར་དང༌། དབང་བསྒྱུར་བའི་ཐབས་ཀྱིས་དཔག་པར་དཀའ་བའི་ཕྱིར་སྒོ་གསུམ་གྱི་མིང་ཡང་ངེས་པར་གྲུབ་བོ། །དེ་བས་ན་ཞི་གནས་ལྷག་མཐོང་ལས་མཐའ་གསུམ་ཡང་ཐེག་པ་རང་རང་གི་གཞུང་སོ་སོ་ལ་གྲགས་པ་ལྟར་བསྙད་པར་བྱའོ།།

གཉིས་པ་སངས་རྒྱས་སུ་མཛད་པ་ནི།

ལང་ཀའི། ཞེས་པ་ནས། གཟུགས་ཀྱི་སངས་རྒྱས་དང་གསུམ་མོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་གྱི་ཆེད་དུ། སངས་རྒྱས་གསུམ་སྣང་བར་མཛད་པ་ནི། འདི་ལྟ་སྟེ། མི་སྣང་བའི་ཆེད་དུ་འདུས་མ་བྱས་ཀྱི་སངས་རྒྱས་དང་། སྣང་བའི་ཆེད་དུ་འདུས་བྱས་ཀྱི་སངས་རྒྱས་དང་།

ཞེན་པའི་ཆེད་དུ་གཟུགས་ཀྱི་སངས་རྒྱས་དང་གསུམ་མོ།།

ལན་དང་པོས་དྲི་བ་དང་པོའི་དོགས་པ་བཅད་པ་ནི། གང་ཞེ་ན། ལང་ཀའི་བདག་པོ། གྲོང་ཁྱེར་གསུམ་གྱི་ཆེད་དུ་སངས་རྒྱས་གསུམ་ཉེ་བར་སྣང་བར་མཛད་པ་ནི་འདི་ལྟ་སྟེ། རྒྱུད་གཅིག་པའམ་ཐ་དད་པ་གཉིས་ཀར་སྦྱར་ཏེ། མི་སྣང་བའི་ཆེད་དུ་ངོ་བོ་ཉིད་ཀྱི་སྐུ་རྒྱུ་རྐྱེན་དང་བྲལ་བས་འདུས་མ་བྱས་ཀྱི་སངས་རྒྱས་སུ་བསྟན་པ་དང༌། སྣང་བའི་ཆེད་དུ་ཆོས་ཀྱི་སྐུ་ཚོགས་ལས་གྲུབ་པས་འདུས་བྱས་ཀྱི་སངས་རྒྱས་སུ་བསྟན་པ་དང༌། ཞེན་པའི་ཆེད་དུ་ལོངས་སྤྱོད་རྫོགས་པ་དང་སྤྲུལ་པ་དང་གསང་བའི་སྐུ་གདུལ་བྱ་ལ་སྣང་བས་ཁམས་གསུམ་འདུལ་བ་གཟུགས་ཀྱི་སངས་རྒྱས་སུ་བསྟན་པ་དང་གསུམ་མོ།།

གསུམ་པ་སེམས་ཅན་དུ་མཛད་པ་ནི།

ལང་ཀའི། ཞེས་པ་ནས། འདོད་པའི་སེམས་ཅན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་གྱི་རྐྱེན་གྱིས་སེམས་ཅན་གསུམ་སྟེ། དེ་ཉིད་གོལ་བའི་རྐྱེན་གྱིས་གཟུགས་མེད་པའི་སེམས་ཅན་དང་། དེ་འཛིན་གོལ་བའི་རྐྱེན་གྱིས་གཟུགས་ཀྱི་སེམས་ཅན་དང་།

དེ་འཇུག་ཞེན་པའི་རྐྱེན་གྱིས་འདོད་པའི་སེམས་ཅན་ནོ།།

ལན་གཉིས་པས་དྲི་བ་གཉིས་པ་ངེས་པར་མཛད་པ་ནི་གང་ཞེ་ན། ལང་ཀའི་བདག་པོ། གྲོང་ཁྱེར་གསུམ་གྱི་རྐྱེན་གྱིས། སེམས་ཅན་གསུམ་དུ་སྣང་བ་སྟེ། དེ་ཉིད་ཀུན་གཞི་ཤས་ཆེ་བ་ལྟ་བ་ཇི་བཞིན་པ་གོལ་བའི་རྐྱེན་གྱིས་ཤེས་པ་གསུམ་དང་ལྡན་པའི་འགྲོ་བ་གཟུགས་མེད་པའི་སེམས་ཅན་དང༌། དེ་འཛིན་ཉོན་ཡིད་ཤས་ཆེ་བ་ཡེ་ཤེས་ཀྱི་དོན་ལས་གོལ་བའི་རྐྱེན་གྱིས་ཤེས་པ་དྲུག་དང་ལྡན་པའི་འགྲོ་བ་གཟུགས་ཀྱི་སེམས་ཅན་དང༌། དེ་འཇུག་ཞེན་པའི་ཚོགས་༼༡༩༧༽དྲུག་ཤས་ཆེ་བ་སྤྱོད་པ་གོལ་བའི་རྐྱེན་གྱིས་ཤེས་པ་ཚོགས་བརྒྱད་ཆར་དང་ལྡན་པའི་འགྲོ་བ་འདོད་པའི་སེམས་ཅན་ཏེ་གསུམ་དུ་སྣང་བ་ཡིན་ནོ།།

བཞི་པ་ཕོ་མོར་མཛད་པ་ནི།

ལང་ཀའི། ཞེས་པ་ནས། མ་ནིང་ངོ༌། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ་གྲོང་ཁྱེར་གསུམ་གྱི་རྐྱེན་གྱིས་མེད་པ ་དང་། རགས་པ་དང་། ཕོ་མོ་དང་། མ་ནིང་ངོ་།།

ལན་གསུམ་པ་ནི། ལང་ཀའི་བདག་པོ། གྲོང་ཁྱེར་གསུམ་གྱི་རྐྱེན་གྱིས་ལུས་གསུམ་དུ་བསྟན་པ་ནི། གང་ཞེ་ན། ཏིང་ངེ་འཛིན་གྱི་ལུས་ལ་གནས་པས་སྣང་བའི་དངོས་པོ་དང་བྲལ་བ་གཟུགས་མེད་པ་ཡི་ལུས་དང༌། ཤིན་ཏུ་གཟུགས་བྱད་དང་ལྡན་པས་ལུས་རགས་པར་སྣང་བ་གཟུགས་ཁམས་ཀྱི་ལུས་དང༌། དེ་གཉིས་ནི་བརྫུས་ནས་སྐྱེ་བའི་ཆའོ། །ཕོ་དང་མོ་ཡི་མཚན་དང་ལྡན་པ་དང༌། མ་ནིང་ཞེས་བྱ་བ་འགྱུར་བག་ཅན་དང༌། མཚན་པོ་ཆེ་དང༌། རླུགས་པ་དག་ཏུ་སྣང་བ་ནི་འདོད་ཁམས་ཀྱི་ལུས་ཏེ་གསུམ་དུ་སྣང་ངོ༌།།

ལྔ་པ་རིགས་རྒྱུད་དུ་མཛད་པ་ནི།

ལང་ཀའི། ཞེས་པ་ནས། སྤྱོད་པ་ལྟར་སྣང་ངོ༌། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདོད་པའི་རྐྱེན་གྱིས་གང་གི་ཡབ་ཡུམ་དང་། སྲས་རྒྱུད་དང་།

འདོད་པ་ལྔ་ལ་ལོངས་སྤྱོད་པ་ལྟར་སྣང་ངོ་།།

ལན་བཞི་པ་ནི། ལང་ཀའི་བདག་པོ། གང་འདོད་པ་ལ་ཆགས་པའི་ཁམས་དེའི་རྐྱེན་གྱིས་རྒྱལ་བ་མན་ཆད་ལའང་གང་གི་རྣམ་པ་ཡབ་ཡུམ་དུ་བཞུགས་པ་དང༌། སྲས་རྒྱུད་དུ་བཀོད་པ་དང༌། འདོད་པ་ལྔ་ལ་ལོངས་སྤྱོད་པ་ལྟར་སྣང་ངོ༌།།

དྲུག་པ་གཟུགས་སྣ་ཚོགས་སུ་མཛད་པ་ནི།

དེ་ཡང་དེ་བཞིན། ཞེས་པ་ནས། སྙེད་དུ་འཇུག་པར་མཛད་དོ། །ཞེས་པའི་བར་གྱིས་བསྟན་ཏེ།

དེ་ཡང་དེ་བཞིན་གཤེགས་པའི་ཡུམ་དུ་དེ་བཞིན་གཤེགས་པ་ཉིད་མཛད་པ་དང་། དེ་བཞིན་གཤེགས་པའི་སྲས་སུ་དེ་བཞིན་གཤེགས་པའི་མཛད་པ་དང་། ལྷུམས་སུ་ཞུགས་པ་དང་། དེ་ན་ཡང་དེ་ཁོ་ན་ཉིད་གསང་བ་དམ་པ་ཐེ་ཚོམ་གཅོད་པ་དང་། སླར་ལོག་པ་དང་། ཞུ་བ་དང་། ཞུ་བར་ལྡོག་པ་དང་། གནང་བ་དང་། བྱེད་པ་དང་། བྱ་བ་སྙེད་དུ་འཇུག་པར་མཛད་དོ།།

ལན་ལྔ་པ་ནི་འདི་ལྟ་སྟེ། དེ་ཡང་རིགས་ཀྱི་བདག་པོ་ཧེ་རུ་ཀའི་ཐུགས་ཀ་ནས་ཀྲོ་དྷཱི་ཤྭ་རི་བཏོན་ནས་ཧི་ཧི་ཞེས་ཡུམ་དུ་མཛད་པ་ལྟ་བུ་དང༌། རིགས་བཞི་ལས་སྣང་བའི་ཡུམ་བཞིར་སྤྲུལ་པ་ལྟ་བུར་དེ་བཞིན་གཤེགས་པའི་ཡུམ་དུ་དེ་བཞིན་གཤེགས་པ་ཉིད་མཛད་པ་དང༌། བཤད་པའི་ཁྲོ་བོ་སྨེ་བརྩེགས་ལྟ་བུ་དེ་བཞིན་གཤེགས་པའི་སྲས་སུ་དེ་བཞིན་གཤེགས་པ་མཛད་པ་དང༌། གསང་བའི་སྐུ་བྷ་གའི་ལྷུམས་སུ་བཞུགས་པ་དང༌། དེ་ཉིད་ན་གསང་བའི་སྐུའི་མཛད་པ་ཡང༌། ཐབས་ཤེས་རོལ་པའི་བྱིན་རླབས་ལས། གསང་སྔགས་དེ་ཁོ་ན་ཉིད་གསང་བ་དམ་པའི་ངེས་པ་རྙེད་དེ་ཐེ་ཚོམ་གཅོད་པ་དང༌། ཐེ་ཚོམ་ཆོད་ནས་དེ་ལ་རྟེན་པ་མེད་དེ་སླར་ལོག་པ་དང༌། གསང་བའི་སྐུའི་ཐེ་ཚོམ་ཞུ་བ་ནི་ཐབས་ལ་གནས་པ་དངོས་དང༌། དེ་དག་ཏུ་རྩོལ་བ་ལ་ཞུགས་པ་ཞུ་བར་བསྡོག་པ་དང༌། དེས་གསང་སྔགས་ཀྱི་རིགས་ངེས་ཏེ་དོན་སྣང་བར་བྱིན་གྱིས་རློབས་པའི་གནང་བ་སྦྱིན་པ་ལ་གནས་པ་དང༌། གསང་བའི་སྒོའི་རྩའི་ཁ་བྱེ་བ་དང༌། བྷ་གའི་གནས་བྱེ་བ་སྙེད་དུ་འཇུག་པར་མཛད་པ་ཉིད་༼༡༩༨༽དོ། །འདི་དངོས་སུ་གསང་བའི་སྐུའི་མཛད་པ་ཡིན་ཀྱང་སྤྲུལ་པ་དང་ལོངས་སྤྱོད་ཀྱི་མཛད་པར་ཡང་མི་འདོད་པ་མ་ཡིན་ནོ།།

བདུན་པ་བསྟན་པ་སྣ་ཚོགས་སུ་མཛད་པ་ནི།

ལང་ཀའི། ཞེས་པ་ནས། ཆུང་ངུར་སྣང་བར་མཛད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་གྱི་ཆེད་དུ་བསྟན་པ་གསུམ་སྟེ། དེ་ཉིད་ཀྱི་རྐྱེན་གྱིས་ཐེག་པ་ཆེན་པོ་དང་། དེ་འཛིན་གྱི་རྐྱེན་གྱིས་ཐེག་པ་སྣ་ཚོགས་དང་། དེ་འཇུག་གི་རྐྱེན་གྱིས་ཐེག་པ་ཆུང་ངུར་སྣང་བར་མཛད་དོ།།

ལན་དྲུག་པ་གང་ཞེ་ན། ལང་ཀའི་བདག་པོ། གྲོང་ཁྱེར་གསུམ་གྱི་ཆེད་དུ་བསྟན་པ་གསུམ་སྣང་བ་སྟེ། དེ་ཉིད་ཀྱིས་རྐྱེན་གྱིས་ཐེག་པ་ཆེན་པོ་གསང་སྔགས་དང༌། དེ་འཛིན་གྱི་རྐྱེན་གྱིས་སྐལ་བ་མ་ངེས་པས་ཐེག་པའི་སྒོ་ཐ་དད་པ་སྣ་ཚོགས་དང༌། དེ་འཇུག་གི་རྐྱེན་གྱིས་རྒྱུ་མཚན་ཉིད་ཀྱི་ཐེག་པ་ཆུང་ངུར་སྣང་བར་མཛད་དོ། །དེ་དག་ནི་རིམ་པ་བཞིན་དུ་དེ་ཁོ་ན་ཉིད་མི་གཡོ་བར་རྟོགས་པས་ཆོག་པའི་ཕྱིར་དང༌།  བདག་མེད་རྟོགས་པའི་ཡེ་ཤེས་ཀྱི་ཐབས་དང་སྒོ་མང་པོར་ཤར་བའི་ཕྱིར་དང༌། སྤྱོད་པ ་ལ་བསྟེན་ནས་འདྲེན་པའི་ཕྱིར་ཏེ་ཆ་མཐུན་གྱི་ཚུལ་ལོ།།

རྒྱུད་གཅིག་པའི་དབང་དུ་གོང་དུ་བཤད་པའི་གྲོལ་བའི་རྐྱེན་གསུམ་གྱི་དོན་དུ་ངེས་པས་ཐེ་ཚོམ་མི་ཟ་ནའང༌། རྒྱུད་ཐ་དད་པའི་དབང་དུ་ན་གཟུགས་མེད་པ་རང་གི་ཏིང་ངེ་འཛིན་གྱི་ལུས་ལ་རྟེན་པ་ལ་གསང་སྔགས་ཀྱི་སྐལ་པ་མེད་པ་དང༌། འདོད་ཁམས་ཞེན་ཆགས་ཅན་ལ་གསང་སྔགས་ཐབས་ཀྱི་སྒོ་གསུངས་ན། འདིར་ཐེག་པ་ཆུང་ངུར་བསྟན་པ་ལ་འགལ་བ་དུ་མ་འདུའོ་ཞེ་ན། སྔོན་དུ་དོགས་པ་བསལ་ཟིན་ཏེ་རིས་སུ་ཆད་པའི་བསྟན་པ་མ་ཡིན་ནོ།།

བརྒྱད་པ་མཚོན་པ་སྣ་ཚོགས་སུ་མཛད་པ་ལ་ལྔ་སྟེ། ཏིང་ངེ་འཛིན་གསུམ་དུ་མཚོན་པ། མཆོད་རྟེན་གསུམ་དུ་མཚོན་པ། དཀྱིལ་འཁོར་གསུམ་དུ་མཚོན་པ། སྔགས་གསུམ་དུ་མཚོན་པ། མཚན་ཉིད་གསུམ་དུ་མཚོན་པའོ། །དང་པོ་ནི།

ལང་ཀའི། ཞེས་པ་ནས། རྒྱུའི་ཏིང་ངེ་འཛིན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་གྱི་ཆེད་དུ་ཏིང་ངེ་འཛིན་གསུམ་སྣང་བ་ནི། འདི་ལྟ་སྟེ། དེ་ཉིད་ཀྱི་ཆེད་དུ་དེ་བཞིན་ཉིད་ཀྱི་ཏིང་ངེ་འཛིན་དང་། དེ་འཛིན་གྱི་ཆེད་དུ་ཀུན་ཏུ་སྣང་གི་ཏིང་ངེ་འཛིན་དང་།

དེ་འཇུག་གི་ཆེད་དུ་རྒྱུའི་ཏིང་ངེ་འཛིན་ནོ།།

འདི་དག་ནི་བདུན་པའི་ལན་ཏེ། ལང་ཀའི་བདག་པོ། གྲོང་ཁྱེར་གསུམ་གྱི་ཆེད་དུ་ཏིང་ངེ་འཛིན་གསུམ་དུ་སྣང་བ་ནི་འདི་ལྟ་སྟེ། དེ་ཉིད་རྩ་བའི་རྣམ་ཤེས་ཀྱི་ཆེད་དུ་དེ་བཞིན་ཉིད་ཀྱི་ཏིང་ངེ་འཛིན་བསྟན་ཏེ་གཙོ་བོ་གཟུགས་མེད་འདུལ་བ་དང༌། དེ་འཛིན་ཉོན་མོངས་པའི་ཡིད་ཀྱི་ཆེད་དུ་ཀུན་ཏུ་སྣང་གི་ཏིང་ངེ་འཛིན་བསྟན་ཏེ་གཙོ་བོ་གཟུགས་ཁམས་འདུལ་བ་དང༌། དེ་འཇུག་ཚོགས་དྲུག་གི་ཆེད་དུ་ས་བོན་ཨ་ཨཱཿཧཱུྃ་སོགས་རྒྱུའི་ཏིང་ངེ་འཛིན་བསྟན་ཏེ་གཙོ་བོར་འདོད་ཁམས་འདུལ་བ་ཡིན་ནོ། །དེའང་ཤེས་པ་གསུམ་ཏིང་ངེ་འཛིན་གསུམ་ཡིན་པའི་དོན་ནི་འཆད་པར་འགྱུར་ལ། ཐ་དད་པའི་དོན་དུ་ཆ་མཐུན་དུ་བསྟན་པ་སྟེ། དེ་དག་གི་དོན་ནི་བརྡ་འཇལ་བར་སླའོ།།

གཉིས་པ་༼༡༩༩༽པ་མཆོད་རྟེན་གསུམ་དུ་མཚོན་པ་ནི།

ལང་ཀའི། ཞེས་པ་ནས། མཆོད་རྟེན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་གྱི་ཆེད་དུ་མཆོད་རྟེན་གསུམ་སྣང་བ་ནི། འདི་ལྟ་སྟེ།

ཐུགས་ཀྱི་མཆོད་རྟེན་དང་། སྐུའི་མཆོད་རྟེན་དང་། གསུང་གི་མཆོད་རྟེན་ནོ།།

ལང་ཀའི་བདག་པོ། གྲོང་ཁྱེར་གསུམ་གྱི་ཆེད་དུ་མཆོད་རྟེན་གསུམ་སྣང་བ་ནི། འདི་ལྟ་སྟེ་ཞེས་ཉེ་བར་བསྟན་པ་ནི། ཐུགས་ཀྱི་ཡེ་ཤེས་སྣང་བ་དང་བྲལ་བའི་རྟགས་རྡོ་རྗེ་དང་འཁོར་ལོ་ལ་སོགས་པའི་མཚན་མ་ཐུགས་ཀྱི་མཆོད་རྟེན་དང༌། སྐུ་ཕྱག་རྒྱར་སྣང་བས། རྣམ་པའི་གཟུགས་བརྙན་སྐུའི་མཆོད་རྟེན་དང༌། གསུང་བསྟན་པར་སྣང་བས། གཙུག་ལག་གི་གླེགས་བམ་གསུང་གི་མཆོད་རྟེན་དང་གསུམ་ཡིན་ནོ། །དེའང་རྒྱུད་གཅིག་གི་སྣང་ཚུལ་ཀུན་གཞི་སྣང་བ་དང་བྲལ་བ། ཡིད་ཕྱག་རྒྱར་སྣང་བ། སྒོ་ལྔའི་སྤྱོད་ཡུལ་དུ་ཤར་བ་སྟེ་གོ་སླ་ལ། ཁམས་གསུམ་ལ་མཐུན་ཕྱོགས་སུ་སྣང་བའོ།།

གསུམ་པ་དཀྱིལ་འཁོར་གསུམ་དུ་མཚོན་པ་ནི།

ལང་ཀའི། ཞེས་པ་ནས། དཀྱིལ་འཁོར་རོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་གྱི་ཆེད་དུ་དཀྱིལ་འཁོར་གསུམ་སྣང་བ་ནི། འདི་ལྟ་སྟེ། རང་བཞིན་གྱི་དཀྱིལ་འཁོར་དང་། ཏིང་ངེ་འཛིན་གྱི་དཀྱིལ་འཁོར་དང་། གཟུགས་བརྙན་གྱི་དཀྱིལ་འཁོར་རོ།།

ལང་ཀའི་བདག་པོ། གྲོང་ཁྱེར་གསུམ་གྱི་ཆེད་དུ་དཀྱིལ་འཁོར་གསུམ་སྣང་བ་ནི་འདི་ལྟ་སྟེ། ཡེ་ནས་ལྷུན་གྱིས་གྲུབ་པ་རང་བཞིན་གྱི་དཀྱིལ་འཁོར་དང༌། རང་རིག་དེ་ཁོ་ན་ཉིད་དུ་གསལ་བ་ཏིང་ངེ་འཛིན་གྱི་དཀྱིལ་འཁོར་དང༌། དངོས་སུ་འདྲ་བར་བྱས་ཏེ་བྲི་བར་བྱེད་པ་གཟུགས་བརྙན་གྱི་དཀྱིལ་འཁོར་དུ་ཤར་རོ། །རྒྱུད་གཅིག་ལ་གནས་པ་སྒོམ་པ་མཚོན་པའམ། མཐུན་ཕྱོགས་ཀྱི་ཚུལ་ཏེ་གོ་སླའོ།།

བཞི་པ་སྔགས་གསུམ་དུ་མཚོན་པ་ནི།

ལང་ཀའི། ཞེས་པ་ནས། གཟུངས་སྔགས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་གྱི་ཆེད་དུ་སྔགས་གསུམ་སྣང་བ་ནི། འདི་ལྟ་སྟེ།

གསང་སྔགས་དང་། རིག་སྔགས་དང་། གཟུངས་སྔགས་སོ།།

ལང་ཀའི་བདག་པོ། གྲོང་ཁྱེར་གསུམ་གྱི་ཆེད་དུ་སྔགས་གསུམ་སྣང་བ་ནི། འདི་ལྟ་སྟེ། ལྷ་མོ་རྣམས་ནི་ཤེས་རབ་ཀྱི་རང་བཞིན་ཟབ་ཅིང་རྟོགས་པར་དཀའ་བས་གསང་སྔགས་དང༌། ལྷ་ཕོ་རྣམས་ནི་ཐབས་ཀྱི་རང་བཞིན་རིག་པའི་རྒྱལ་པོར་གྱུར་པས་རིག་སྔགས་དང༌། ཐབས་ཤེས་གཉིས་སུ་མེད་པར་ཁ་སྦྱོར་གྱི་ཚུལ་བཟུང་བའི་ཕྱིར་གཟུངས་སྔགས་སོ། །ཡང་ན་ཡི་གེ་གསུམ་གྱི་དོན་ཏེ། གཉིས་པ་དང་གསུམ་པ་དང༌། དང་པོའམ། གཉིས་པ་དང༌། དང་པོ་དང༌། གསུམ་པ་སྟེ། རང་བཞིན་ལྷུན་གྱིས་གྲུབ་པ་བདེ་བར་གཤེགས་པའི་སྙིང་པོ་ཨཱ་དང༌། ཡེ་ཇི་བཞིན་པ་རིལ་དང་མི་ཕྱེད་པའི་ངོ་བོ་མཱུྃ་དང༌། རྩ་བ་བྱང་ཆུབ་ཀྱི་སེམས་སྤྱོད་ཡུལ་དང་བྲལ་བ་བློས་རེག་དཀའ་བ་ཉིད་ཧཱུྃ་ངོ༌། །གྲགས་པའི་དབང་དུ་ན་སྤྱི་གཞུང་ལྟར་རོ།།

ལྔ་པ་མཚན་ཉིད་གསུམ་དུ་མཚོན་པ་ནི།

ལང་ཀའི། ཞེས་པ་ནས། རྒྱུའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོང་ཁྱེར་གསུམ་གྱི་ཆེད་དུ་མཚན་ཉིད་གསུམ་དུ་སྣང་བ་ནི།

འདི་ལྟ་སྟེ། འབྲས་བུ་དང་། རྐྱེན་དང་། རྒྱུའོ།།

ལང་ཀའི་བདག་པོ། གྲོང་ཁྱེར་༼༢༠༠༽གསུམ་གྱི་ཆེད་དུ་མཚན་ཉིད་གསུམ་གྱིས་མཚོན་པ་བསྟན་པ་ནི། རྒྱུད་གཅིག་པའི་དབང་དུ། སྒོ་ལྔ་འབྲས་བུ་དང༌། ཡིད་གཉིས་རྐྱེན་དང༌། ཀུན་གཞི་རྒྱུ་ཡི་རྣམ་པའོ། །འོན་ཀྱང་གྲངས་མཐུན་པའི་སྒོ་ནས་མཚོན་པ་སྟེ། གཅིག་ལའང་གསུམ་ཀ་ཐུན་མོང་དུ་འགྱུར་བས་ཀུན་ལ་སྦྱར་བར་བྱའོ།།

གཉིས་པ་ཞབས་བསྡུ་བ་ནི།

ལང་ཀའི། ཞེས་པ་ནས། ཡོངས་སུ་སྣང་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ལ་སོགས་པ། གྲོང་ཁྱེར་གསུམ་གྱི་ཆེད་དུ་མཛད་པ་ཡོངས་སུ་སྣང་བར་མཛད་དེ།

དེ་དག་ནི་མཐར་ཐུག་གི་མཛད་པ་ཡོངས་སུ་སྣང་བའོ།།

ལང་ཀའི་བདག་པོ། དེ་དག་ལ་སོགས་པ་གྲོང་ཁྱེར་ཆེན་པོ་གསུམ་གྱི་ཆེད་དུ་མཛད་པ་ཡོངས་སུ་སྣང་བར་མཛད་དེ། དེ་དག་ནི་ཐུགས་ཀྱི་མཛད་པ་ཡོངས་སུ་སྣང་བའོ། །འདི་དག་གི་དོན་ཇི་ལྟ་བ་བཞིན་རྟོགས་པར་གྱུར་ན། ཕྲིན་ལས་ཐམས་ཅད་ཀྱི་རྒྱལ་པོ་སྐབས་སྦྱོར་བདུན་པའི་རྒྱུད་ལས། རང་རིག་ཡེ་ཤེས་བདེ་གཤེགས་རྣམས་ཀྱི་ཐུགས། །མི་བརྗེད་མ་ཡེངས་དོན་གྱི་སྙིང་པོར་རྟོགས། །རང་རིག་སྤྲོས་བྲལ་འཛིན་མེད་ཡེ་ཤེས་ལ། །ཐབས་མཁས་བདེ་ཆེན་བྱང་ཆུབ་སེམས་རྣམས་འབྱུང༌། །ཐུགས་རྗེ་ཆེན་པོས་ཡོངས་ལ་ཁྱབ་པར་མཛད། །འགྲོ་བའི་དོན་རྫོགས་ཐུགས་ཀྱི་ཕྲིན་ལས་ནི། །མུན་པའི་སྒོ་ཕྱེ་ཁ་ལོ་གྱེན་དུ་བསྒྱུར། །ཡེ་ཤེས་ཐུགས་ཀྱི་ཡོན་ཏན་བརྗོད་མི་ལངས། །ཇི་ལྟར་དགོངས་པ་ཡེ་ཤེས་རྒྱ་མཚོ་སྟེ། །དགོངས་པའི་མན་ངག་ཡིད་ལ་སྣང་བར་འགྱུར། །ངེས་པའི་དོན་འདི་གང་ཞིག་རྟོགས་པ་དང༌། །དོན་ལ་གོམས་པའི་སྐྱེས་བུ་ཆེན་པོ་དེས། །ཇི་ལྟར་བསམ་ཀྱང་དགོངས་པའི་ཀློང་དུ་འགྱུར། །སེམས་ཅན་གཞན་གྱི་དོན་ཀྱང་བྱེད་པར་ནུས། །ཡང་དག་དོན་དང་ལྡན་པར་རྒྱལ་བས་གསུངས། །ཞེས་གསུངས་པ་ལ་སོགས་པ་ལྟར་ཐུགས་ཀྱི་མཛད་པའི་ཡོན་ཏན་ཕུན་སུམ་ཚོགས་པ་ལ་དབང་བར་འགྱུར་བས། རྒྱས་པར་རྫོགས་པ་ཆེན་པོ་སེམས་ཕྱོགས་རྒྱ་མཚོའི་དགོངས་པ་ཟབ་མོར་ལ་བཟླ་བར་བྱའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཐུགས་ཀྱི་མཛད་པ་ཡོངས་སུ་རྫོགས་པའི་ལེའུ་སྟེ་སུམ་ཅུ་དགུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གསང་ཆེན་ལུང་གི་སྦས་བཤད་ཐུགས་ཀྱི་མཛད་པ་ཡོངས་སུ་རྫོགས་པར་བསྟན་པའི་ལེའུ་སྟེ་སུམ་ཅུ་རྩ་དགུ་པ་ཉིད་གསལ་བར་བཤད་པའོ།། །།

ལེའུ་བཞི་བཅུ་པ་གསུང་གི་མཛད་པ་ཡོངས་སུ་རྫོགས་པ།

༈ གཉིས་པ་རྗེས་དཔག་གི་ལན་གསུང་གི་མཛད་པ་བཤད་པ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། སྨྲས་པ། ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས། ལངྐའི་བདག་པོ་ལ་སྨྲས་པ།

ལེའུ་འདིས་དྲང་དོན་སྟོན་ནོ། །དེ་༼༢༠༡༽ནས་ཡང་སྟོན་པ་གསང་བ་པའི་བདག་པོས། སྡུད་པ་པོ་ལང་ཀའི་བདག་པོ་ལ་བོས་ནས། དྲི་བ་ཐ་མ་རྗེས་སུ་དཔག་པའི་དོན་བསྟན་པའི་ཕྱིར་སྨྲས་པ་ནི་བཀའ་སྩལ་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། འཇིག་རྟེན་ལས་འདས་པའི་ཐེག་པ་ལ་གནས་པ་རྣམས་གསང་ཆེན་འདིར་གཞུག་པ། འཇིག་རྟེན་པ་གཞན་རྣམས་གསང་མཆོག་ཐེག་པ་ཆེན་པོའི་སྒོ་འདིར་གཞུག་པའོ། །དང་པོ་ལ་ལྔ་སྟེ། གསང་སྔགས་པ་དེ་ཁོ་ན་ཉིད་ལ་གཞུག་པ། རང་རྒྱལ་བ་སྣང་བའི་སྒོ་འདིར་གཞུག་པ། ཉན་ཐོས་པ་བསླབ་པའི་སྒོ་འདིར་གཞུག་པ། སེམས་ཙམ་པ་རྣམས་ལྟ་བའི་སྒོ་འདིར་གཞུག་པ། དབུ་མ་པ་རྣམས་ནམ་མཁའ་རྡོ་རྗེར་གཞུག་པའོ། །དང་པོ་ནི།

ལང་ཀའི་བདག་པོ། ཞེས་པ་ནས། ནམ་མཁར་གདོན་མི་ཟ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་སངས་རྒྱས་ཀྱི་ཆེད་དུ་ཡང་དག་པའི་གསང་བ་འདི་ཡོངས་སུ་གསུང་བར་མཛད་དོ། །སངས་རྒྱས་རྣམས་ཀྱི་མཛད་པ་ནི། །ཐམས་ཅད་ཉིད་ལས་མི་གཞན་ཕྱིར།།

ཅི་ཡང་བླང་དོར་མེད་པས་ན། །རྡོ་རྗེ་ནམ་མཁར་གདོན་མི་ཟའོ།།

ལང་ཀའི་བདག་པོ། གཞན་ཡང་གཞན་དོན་གྱི་སྤྱོད་པ་ཁྱད་པར་ཅན་གྱི་མཛད་པས་ཐབས་སྔ་མ་གསང་སྔགས་ཕྱི་མ་དང་མ་ཧཱ་ཡོ་ག་ལ་གནས་པའི་སངས་རྒྱས་ཀྱི་ཆེད་དུ་མི་མཐུན་པ་འདོགས་སུ་གནང་བའི་སྒོ་ནས་ཡང་དག་པའི་གསང་བ་ཆེན་པོའི་སྔགས་ཀྱི་སྤྱོད་པ་རྣལ་འབྱོར་དམ་པ་རྣམས་ཀྱི་དགོངས་པ་འདི་ཡོངས་སུ་གསུང་བར་མཛད་དོ། །རྒྱལ་བ་རྫོགས་པའི་སངས་རྒྱས་རྣམས་ཀྱི་དགོངས་པའི་ཞེ་ཕུགས་དམ་པ་གསང་སྔགས་ཐེག་པ་ཆེན་པོ་ཉིད་ནི། དངོས་པོ་ཐམས་ཅད་ཀུན་ཀྱང་བྱང་ཆུབ་ཀྱི་སེམས་སྐྱེ་བ་མེད་པ་དེ་ཉིད་དུ་བྱུང་ཐེབས་པ་ལས་མི་གཞན་པའི་ཕྱིར་གྱིས་གཏན་ཚིགས་དེས་ན་ལྟ་བས་དེ་ལྟར་རྟོགས་པ་ལ། སྤྱོད་པས་ཆོས་གང་ཅི་ལ་ཡང་སྤང་ལེན་གྱི་བླང་དོར་བྱར་མེད་པར་མཉམ་པ་ཉིད་དུ་ཞུགས་ཏེ་འཕོ་འགྱུར་མེད་པར་གནས་པས་ན་རྡོ་རྗེ་ནམ་མཁར་མཉམ་པའི་ལྷག་པའི་ཆོས་སྐུ་ཆེན་པོ་ཐོབ་པར་གདོན་མི་ཟ་བས་ཐེ་ཚོམ་མེད་པར་ལྟ་སྤྱོད་དེ་བཞིན་དུ་གྱིས་ཤིག་པའོ།།

གཉིས་པ་རང་རྒྱལ་བ་སྣང་བའི་སྒོ་འདིར་གཞུག་པ་ནི།

ལང་ཀའི། ཞེས་པ་ནས། ཉིད་དུ་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་རང་སངས་རྒྱས་ཀྱི་ཆེད་དུ་སྣང་བ་རྡོ་རྗེ་བསྟན་པ་འདི་མཛད་དོ། །ངག་གི་རྡོ་རྗེ་ཡི་གེ་མེད། །ལུས་ཀྱི་རྡོ་རྗེ་སྣང་སྟོན་པ། །གང་གི་ཡིད་ནི་འདིར་བཅུག་སྟེ། །གསང་བ་ཉིད་དུ་རབ་ངེས་པའོ།།

ལང་ཀའི་བདག་པོ། གཞན་ཡང་གོང་དང་མཐུན་པར་རང་རྒྱལ་རྣམས་གསང་སྔགས་ལ་གཞུག་པའི་དོན་ཏེ། རྒྱུན་དུ་ཞུགས་པའམ་རང་སངས་རྒྱས་ཀྱི་རིགས་ངེས་པར་ཕྱེད་ནས་འདོད་ཁམས་སུ་སྐྱེས་པས་རྟོག་དཔྱོད་དང་ལྡན་པར་བླ་མ་ལ་མ་བརྟེན་པར་བྱང་ཆུབ་ཐོབ་པར་འགྱུར་བ་རང་སངས་རྒྱས་རྣམས་གསང་ཆེན་སྔགས་ཀྱི་ཐེག་པ་ཆེན་པོར་དྲང་བའི་ཆེད་དུ་ལུས་ཀྱི་རྫུ་འཕྲུལ་གྱི་སྣང་བ་མ་འགགས་པར་མངོན་དུ་གསལ་ཞིང༌། དགོངས་པ་རྡོ་རྗེ་ལྟར་མི་འཇིག་པའི་དོན་དུ་ཆ་མཐུན་པར་འཛིན་པས་༼༢༠༢༽ཐེག་པ་ཆེན་པོའི་གསང་ལུང་འདི་ཉིད་བཀའ་སྩལ་ཏེ་གསུང་བར་མཛད་དོ། །དེ་ཡང་ངག་གི་ངོ་བོ་རང་རིག་པའི་རྡོ་རྗེ་འདུས་མ་བྱས་པ་ཉིད་ལ་བརྗོད་པ་དང་བྲལ་བས་ཡི་གེ་མེད་པས་ཆོས་མི་གསུང་ལ། ལུས་ཀྱི་ངོ་བོ་རང་རིག་པའི་རྡོ་རྗེ་རང་བྱུང་གི་ཡེ་ཤེས་རང་སྣང་བའི་རོལ་པ་ཞི་བ་དང་ཁྲོ་བོའི་སྐུ་ལ་སོགས་ཅིར་ཡང་འཆར་བའི་རྫུ་འཕྲུལ་གྱིས་གཞན་དོན་བྱེད་ཅིང་མཛད་པ་སྟོན་པ་ཡི་སྒོ་ནས་རང་རྒྱལ་བའི་གང་ཟག་གང་གི་ཡིད་ནི་དེ་ལྟར་རང་རྒྱལ་ལ་རང་རྒྱལ་དུ་སྟོན་པའི་ཐབས་ཀྱིས་དྲང་ནས་གསང་སྔགས་ལུང་གི་སྒོ་འདིར་བཅུག་སྟེ། སྙིང་པོ་གསང་བ་ཉིད་དུ་རིགས་རབ་ཏུ་ངེས་ཏེ་ཇི་བཞིན་དུ་རྟོགས་པར་མཛད་པའོ།།

གསུམ་པ་ཉན་ཐོས་པ་བསླབ་པའི་སྒོ་འདིར་གཞུག་པ་ནི།

ལང་ཀའི། ཞེས་པ་ནས། དམ་པ་ཉིད་དུ་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་གསང་བ་མཆོག་གི་བདག་པོ་དེས། ཉན་ཐོས་ཀྱི་ཆེད་དུ་བརླབ་པ་རྡོ་རྗེ་མཛད་པ་

འདི་གསུང་བ་མཛད་དོ། །སྒོ་གསུམ་རྡོ་རྗེ་བྱ་བ་བཅུ། །བསྲུང་བ་ཡོངས་སུ་དག་པའི་མཐའ།།

ཞི་བའི་ཕྱོགས་ཡིད་འདིར་བཅུག་སྟེ། །དམ་པ་ཉིད་དུ་རབ་ངེས་པའོ།།

ལང་ཀའི་བདག་པོ། གཞན་ཡང་གསང་བ་མཆོག་གི་བདག་པོ་དེས། ཉན་ཐོས་ཀྱི་ལྟ་སྒོམ་དང་བསྟུན་ཏེ་གསང་སྔགས་སུ་དྲང་བའི་ཆེད་དུ་སྒོ་གསུམ་གྱི་བསླབ་པ་རྡོ་རྗེ་གསུམ་གྱི་ངོ་བོར་མི་འགག་པར་མཛད་དེ་བསྲུང་བྱ་ཐེག་པ་ཆེན་པོར་ངེས་པའི་ཐབས་འདི་བཀའ་སྩལ་ཞིང་གསུང་བར་མཛད་དོ། །ལུས་ངག་ཡིད་ཀྱི་བསྲུང་བྱ་གསུམ་བཞི་གསུམ་སྟེ་དགེ་བ་བཅུ་བོ་ཉིད་ནི་གསང་སྔགས་ཀྱི་སྐབས་སུ་སྒོ་གསུམ་ཡེ་ཤེས་རྡོ་རྗེ་ཡིན་པས་དེའི་ལས་སུ་བྱ་བ་དགེ་བ་བཅུ་ཡང་རྡོ་རྗེ་ལྟ་བུར་ངེས་ཏེ་ཆེད་དུ་བསྲུང་བ་མེད་པར་འདུལ་ཁྲིམས་ཡོངས་སུ་དག་པ་ཡིན་པའི་ཕྱིར། ཁོ་ཉིད་ཀྱི་སྤྱོད་པ་མ་དོར་བར་གསང་སྔགས་སུ་མཛད་པས་ཉན་ཐོས་མྱ་ངན་ལས་འདས་པའི་མཐའ་ཞི་བ་ཕྱོགས་གཅིག་ལ་གནས་པའི་ཡིད་ཀྱང་ཐེག་ཆེན་གསང་བའི་རྒྱལ་པོ་འདིར་བཅུག་སྟེ། གསང་བ་དམ་པ་ཉིད་དུ་རིགས་རབ་ཏུ་ངེས་པར་མཛད་པའོ།།

བཞི་པ་སེམས་ཙམ་པ་རྣམས་ལྟ་བའི་སྒོ་འདིར་གཞུག་པ་ནི།

ལང་ཀའི། ཞེས་པ་ནས། དམ་པར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། རྣལ་འབྱོར་སེམས་དཔའི་ཆེད་དུ་ལྟ་བ་རྡོ་རྗེ་འདི་གསང་བ་གསུང་བ་མཛད་དོ། །ཐམས་ཅད་རྣམ་རིག་འཁྲུལ་སྣང་བ། །གཞན་མེད་དེ་ཉིད་དམ་པར་ཡོད།།

རྣམ་ཤེས་གང་ཡིན་འདིར་བཅུག་སྟེ། །གསང་བ་དམ་པར་རབ་ངེས་པའོ།།

ལང་ཀའི་བདག་པོ། དེ་ནས་ཡང་སྐྱེས་བུ་དམ་པ་དེས། རྣལ་འབྱོར་སེམས་དཔའི་གྲུབ་མཐའ་ལ་གནས་པ་རྣམ་རིག་པ་དང་རྣལ་འབྱོར་སྤྱོད་པའི་དབུ་མ་པ་རྣམས་གསང་བ་ཆེན་པོར་དྲང་བའི་ཆེད་དུ་ཁོའི་ལྟ་བ་ཉིད་རྡོ་རྗེ་ཐེག་པར་གསུང་པར་མཛད་པ་འདི་ཉིད་བཀའ་སྩལ་ཏེ་གསུང་བར་མཛད་དོ། །དངོས་པོའི་ཆོས་ཐམས་ཅད་སེམས་ཀྱི་རྣམ་པ་རང་རིག་པ་ཉིད་དུ་ངེས་པ་ལ་དཔེར་མིག་རྫི་འཁོར་ལངས་པས་སྐྲའི་འཁོར་ལོ་མཐོང་བ་ལྟར་དངོས་ཡུལ་ཐ་དད་པར་མཐོང་བ་ནི་སེམས་འཁྲུལ་པའི་སྣང་བ་ཀུན་རྫོབ་ཡིན་ལ། དེ་ལྟ་༼༢༠༣༽བས་ན་ཡུལ་གྱི་རྣམ་པ་གཞན་རང་རྒྱུད་དུ་གྲུབ་པ་མེད་དེ། ཡེ་ཤེས་སྐད་ཅིག་མ་རྒྱུན་གྱི་རྟག་པ་དོན་དམ་པར་ཡང་ཡོད་པར་འདོད་པ་ཉིད་དང་མཐུན་པར། འདིར་ཡང་ཆོས་ཐམས་ཅད་རང་རིག་པའི་དེ་ཁོ་ན་ཉིད་ཡེ་ཤེས་གསང་བ་དམ་པའི་ངོ་བོར་རང་བཞིན་གྱི་སྣང་བར་ཡོད་པའི་ཆ་མཐུན་གྱི་སྒོ་ནས། རྣམ་རིག་པར་སྤྱོད་པ་དེ་དག་གི་ཡིད་ཀྱི་རྣམ་པར་ཤེས་པ་གང་ཡིན་པ་ཐེག་ཆེན་གསང་བ་ཟབ་མོའི་སྒོ་འདིར་བཅུག་སྟེ། གསང་བ་དམ་པར་རིགས་རབ་ཏུ་ངེས་པར་མཛད་པའོ།།

ལྔ་པ་དབུ་མ་པ་རྣམས་ནམ་མཁའ་རྡོ་རྗེར་གཞུག་པ་ནི།

ལང་ཀའི། ཞེས་པ་ནས། མི་དམིགས་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། གང་གི་མཐའ་ཡོངས་སུ་སེལ་བ་དག་གི་ཆེད་དུ་ནམ་མཁའ་རྡོ་རྗེ་མཛད་པ་འདི་གསུང་བ་མཛད་དོ། །གང་འདིར་ཡོད་དང་མེད་པ་ཡི། །མཐའ་གཉིས་ངེས་པར་རབ་གསལ་ཏེ། །སེམས་ཉིད་གང་ཡིན་འདིར་བཅུག་སྟེ། །དབུ་མར་མི་དམིགས་རབ་ངེས་པའོ།།

ལང་ཀའི་བདག་པོ། དེ་ནས་ཡང་སྐྱེས་བུ་ཆེན་པོ་དེས། གང་ཆོས་ཇི་སྙེད་པ་དེ་དག་གི་མཐའ་ཡི་སྤྲོས་པ་ཡོངས་སུ་སེལ་བ་དབུ་མ་པ་དག་གི་འདོད་པ་དང་མཐུན་པར་སྔགས་སུ་དྲང་བའི་ཆེད་དུ། དབུ་མ་པས་དོན་དམ་པར་མ་སྐྱེས་པ་ནམ་མཁའ་ལྟ་བུར་གསལ་བའི་ལྟ་བ་དེ་ཉིད་གཉིས་མེད་མཐའ་བྲལ་གྱི་ངོ་བོ་རྡོ་རྗེ་ཐེག་པར་མཛད་པ་འདི་ཡི་དོན་བཀའ་སྩལ་ཏེ་གསུང་པར་མཛད་དོ།།

དེ་ཡང་གང་སུ་ཞིག་གིས་དབུ་མའི་སྐབས་འདིར་རྟེན་འབྲེལ་ཆེན་པོའི་གཏན་ཚིགས་ལ་སོགས་པ་ལ་བརྟེན་ནས་རྟེན་འབྲེལ་འདུས་བདོ་བ་ཙམ་ན་དེ་ཉིད་ལ་རྣམ་པའི་ངོ་བོར་མ་གྲུབ་པས་ཡོད་པའི་མཐའ་སེལ་བ་དང་སྒྱུ་མ་ཙམ་དུ་སྣང་བས་མེད་པ་ཡི་མཐའ་ཡང་གྲོལ་བས། དེ་ལྟར་མཐའ་གཉིས་ངེས་པར་རབ་ཏུ་བསལ་ཏེ་ངོ་བོ་འདི་འདྲར་ངོས་བཟུང་མེད་པའི་སྟོང་པ་ཉིད་ཀྱི་བླ་དྭགས་སུ་དབུ་མ་ཞེས་སུ་བཞེད་པ་དེ་ཉིད་འདིར་གཉིས་མེད་མཐའ་གྲོལ་ཆེན་པོ་རང་བཞིན་མཉམ་པ་ཉིད་ལ་འགོད་པར་མཛད་དེ། དབུ་མ་པས་སེམས་ཉིད་གང་ཡིན་པ་དེ་ཡང་སྒོ་འདིར་བཅུག་སྟེ། གནས་ལུགས་མཐའ་བྲལ་ཆེན་པོ་དབུ་མར་ཡང་མི་དམིགས་པའི་གསང་ཆེན་གསང་བ་དམ་པར་རིགས་རབ་ཏུ་ངེས་ཏེ་ཐེག་ཆེན་མཆོག་ལ་གནས་པར་མཛད་པའོ།།

གཉིས་པ་འཇིག་རྟེན་པ་གཞན་རྣམས་གསང་མཆོག་ཐེག་པ་ཆེན་པོའི་སྒོ་འདིར་གཞུག་པ་ལ་དགུ་སྟེ། གཏི་མུག་ཅན་རྣམས་གཞུག་པ། འདོད་ཆགས་ཅན་རྣམས་གཞུག་པ། ཞེ་སྡང་ཅན་རྣམས་གཞུག་པ། ཕྲག་དོག་ཅན་རྣམས་གཞུག་པ། ཕྲ་མ་ཅན་རྣམས་གཞུག་པ། ང་རྒྱལ་ཅན་རྣམས་གཞུག་པ། ཤ་ཟའི་རིགས་ཅན་གཞུག་པ། མཁའ་འགྲོའི་རིགས་ཅན་གཞུག་པ། འཇིག་རྟེན་པ་ཐམས་ཅད་གཞུག་པའོ། །དང་པོ་ནི།

ལང་ཀའི། ཞེས་པ་ནས། ཐེག་པར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། ཚངས་པ་ལ་སོགས་པ་གང་གཏི་མུག་ཅན་གྱི་ཆེད་དུ་གཏི་མུག་རྡོ་རྗེ་མཛད་པ་འདི་གསུང་བ་མཛད་དོ། །འཇིག་རྟེན་ཀུན་གྱི་གཏི་མུག་ལས། །བྱང་ཆུབ་སེམས་ནི་རྡོ་རྗེ་འབྱུང་།།

གཏི་མུག་རྡོ་རྗེ་ཡིད་བཅུག་ནས། །གསང་ཆེན་ཐེག་པར་རབ་ངེས་པའོ།།

གོང་མ་འཇིག་༼༢༠༤༽རྟེན་ལས་འདས་པ་རྣམས་ནི་ལྟ་བ་ལ་ཞུགས་པ་ལྡེམ་པོར་དགོངས་པ་ཡིན་ཀྱང་འཇིག་རྟེན་པ་རྣམས་ལ་ལྟ་བ་མི་གསུངས་པས་སྤྱོད་པ་ལ་ཞུགས་པ་ལྡེམ་དགོངས་ཡིན་ཏེ། གཏི་མུག་ཅན་ལ་ཚུལ་དེ་དང་མཐུན་པས་འདུལ་བ་ལྟ་བུ་ཐབས་རྨད་དུ་བྱུང་བ་ཡིན་ལ། འོ་ན་འཁོར་བའི་ལམ་པ་དག་ཀྱང་ཡང་དག་པའི་ལམ་དུ་མཛད་པ་གང་སྙམ་པ་ལ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས་ལོ་རྒྱུས་སུ་བཀའ་སྩལ་པ་ནི། དེ་ནས་ཡང་སྟོན་པ་སྐྱེས་བུ་དམ་པ་དེས། འཇིག་རྟེན་པ་རྣམས་སོ་སོའི་ལྟ་སྤྱོད་དང་མཐུན་པར་བསྟན་ནས་གསང་སྔགས་སུ་དྲང་བ་ལ། ཚངས་པ་ལ་སོགས་པ་གང་གདུལ་བྱ་གཏི་མུག་ཅན་གྱི་ཆེད་དུ་དེ་ཉིད་ཀྱིས་གྲོལ་བར་བྱ་བའི་ཕྱིར་མ་རིག་རྨོངས་པའི་གཏི་མུག་ཉིད་མ་སྤངས་པར་རྡོ་རྗེ་ཐེག་པའི་དོན་དུ་ངེས་པར་མཛད་པའི་ཐབས་དམ་པ་འདི་གསུང་སྟེ་བཀའ་སྩལ་བར་མཛད་དོ། །ཕྱི་ནང་ན་གནས་པའི་འཇིག་རྟེན་གྱི་འགྲོ་བ་ཀུན་གྱི་རྒྱུད་ལ་ཡོད་པའི་གཏི་མུག་གི་ངོ་བོ་དེ་ཉིད་ལས་ནོར་བ་ཙམ་ཡང་བསལ་དུ་མེད་པར་ཡེ་ནས་རང་རིག་པ་ཡེ་ཤེས་ཆེན་པོའི་ཀློང་དུ་གསལ་བའི་ཕྱིར་བྱང་ཆུབ་སེམས་ཀྱི་རྡོ་རྗེ་དང་ངོ་བོ་ཐ་མི་དད་པར་འབྱུང་ལ། དེ་ལྟར་རྟོགས་པས་གཏི་མུག་ཉིད་གཉིས་སུ་མེད་པའི་རྡོ་རྗེ་བྱང་ཆུབ་ཆེན་པོ་ཉིད་དུ་རང་ཤར་ཏེ་འབྱེད་པ་མེད་པའི་དོན་གཞན་ནས་བཙལ་བས་འབྱུང་བ་མ་ཡིན་པས་སྤང་དུ་མེད་པར་བཀའ་སྩལ་པས། གཏི་མུག་ཅན་དག་གི་ཡིད་ཀྱང་གཉིས་མེད་ཀྱི་དོན་འདིར་བཅུག་ནས། གསང་ཆེན་རྡོ་རྗེའི་ཐེག་པར་རིགས་རབ་ཏུ་ངེས་པར་མཛད་པའོ།།

གཉིས་པ་འདོད་ཆགས་ཅན་རྣམས་གཞུག་པ་ནི།

ལང་ཀའི། ཞེས་པ་ནས། ཐེག་པར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། གུ་ལང་ལ་སོགས་པ་གང་འདོད་ཆགས་ཅན་གྱི་ཆེད་དུ། ཆགས་པ་རྡོ་རྗེ་མཛད་པ་འདི་གསུང་བ་མཛད་དོ། །འཇིག་རྟེན་གཡོ་འགུལ་ཕོ་མོ་དང་། །ཇི་སྙེད་གུ་ལང་དབུ་མ་ཉིད།།

ཆགས་པ་རྡོ་རྗེ་ཡིད་བཅུག་ནས། །གསང་ཆེན་ཐེག་པར་རབ་ངེས་པའོ།།

ལང་ཀའི་བདག་པོ། གཞན་ཡང་སྐྱེས་བུ་དམ་པ་དེས། གུ་ལང་མ་ཧཱ་དེ་བ་ལ་སོགས་པ་གང་འདོད་ཆགས་ཅན་རྣམས་ཀྱི་ཆེད་དུ་དེ་ཉིད་ཀྱིས་གྲོལ་བར་བྱ་བའི་ཕྱིར། འདོད་ཅིང་ཆགས་པ་ཉིད་མ་སྤངས་པར་ཡེ་ཤེས་རྡོ་རྗེར་མཛད་པའི་ཐབས་དམ་པ་འདི་ཉིད་གསུང་སྟེ་བཀའ་སྩལ་པར་མཛད་དོ། །འཇིག་རྟེན་གྱི་འགྲོ་བ་ནང་བཅུད་གཡོ་བའི་སེམས་ཅན་རྡུལ་གཟུགས་ཀྱི་རྐྱེན་ལས་ཕོ་མོ་མང་པོ་གང་ཡང་རུང་བ་ཆགས་ཤིང་ཞེན་པ་དང་ལྡན་པ་ཇི་སྙེད་ཡོད་པ་རྣམས་དང༌། ཁྱད་པར་དུ་འདོད་པའི་འཇིག་རྟེན་གྱི་གཙོ་བོ་གུ་ལང་དང་ཨུ་མ་དེ་བ་ཉིད་འཁྲིག་པ་ལ་ཆགས་ཤིང་ཞེན་པ་ཡང་མཐུན་པས་འདུལ་བ་གཡེམ་ལ་གཡེམ་པས་འདུལ་བ་དང༌། མི་མཐུན་པས་འདུལ་བ་གཡེམ་པ་གཉེན་པོས་འདུལ་བའི་ཐབས་ཁྱད་པར་ཅན་གྱིས་ཆགས་པ་ཉིད་ཆགས་༼༢༠༥༽མེད་ཡེ་ཤེས་ཀྱི་རྡོ་རྗེ་ཉིད་དུ་རང་ཤར་བས་མི་འགོག་ལ་ཐོགས་པ་མེད་པར་བཀའ་སྩལ་ཏེ་ཆགས་ཞེན་ཅན་རྣམས་ཀྱི་ཡིད་གསང་ཆེན་གཉིས་མེད་ཀྱི་དོན་འདིར་བཅུག་ནས། གསང་བ་ཆེན་པོའི་ཐེག་པ་དམ་པར་རིགས་རབ་ཏུ་ངེས་པར་མཛད་པའོ།།

གསུམ་པ་ཞེ་སྡང་ཅན་རྣམས་གཞུག་པ་ནི།

ལང་ཀའི། ཞེས་པ་ནས། ཐེག་པར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། བིཥྞུ་ལ་སོགས་པ་གང་ཞེ་སྡང་ཅན་གྱི་ཆེད་དུ། གསོད་པ་རྡོ་རྗེ་མཛད་པ་འདི་གསུང་བ་མཛད་དོ། །ཇི་སྙེད་གཡོ་རྡུལ་སེམས་ཅན་རྣམས། །རྡོ་རྗེ་མཚོན་ཆེན་གཅིག་གིས་བསད།།

ཞེ་སྡང་རྡོ་རྗེ་ཡིད་བཅུག་ནས། །རྡོ་རྗེ་ཐེག་པར་རབ་ངེས་པའོ།།

ལང་ཀའི་བདག་པོ། དེ་ནས་ཡང་སྟོན་པ་སྐྱེས་བུ་དམ་པ་དེས། བྱིས་ནུ་ཁྱབ་འཇུག་ལ་སོགས་པ་གང་གདུལ་བར་བྱ་བ་ཞེ་སྡང་ཅན་གྱི་ཆེད་དུ་སྤྱོད་པ་དེ་ཉིད་ཀྱིས་གྲོལ་བར་བྱ་བའི་ཕྱིར། གཉིས་སུ་མེད་པའི་མཚོན་གྱིས་བསད་པ་ལ་དགོངས་ཏེ། གསོད་གཅོད་བྱེད་པ་ཡང་དག་ཆེན་རྡོ་རྗེ་ཐེག་པའི་མཛད་པར་བསྟན་པའི་ཐབས་ཀྱི་གསང་བ་འདི་བཀའ་སྩལ་ཏེ་གསུང་བར་མཛད་དོ། །སྙིང་རྗེའི་ཞིང་ཇི་སྙེད་པའི་འགྲོ་བ་གཡོ་བ་བཅུད་ཀྱིས་བསྡུས་པའི་རྡུལ་སྙེད་ཀྱི་སེམས་ཅན་རྣམས་གཉིས་མེད་དུ་རྟོགས་པའི་ཤེས་རབ་ནི་ལས་ཀྱི་རྡོ་རྗེའི་མཚོན་ཆ་ཆེན་པོ་སྟེ་དེ་གཅིག་གིས་ཐམས་ཅད་རིལ་མ་སྐྱེས་པའི་ངང་དུ་བསད་ཅིང་སྲོག་བཅད་པས་ཞེ་སྡང་གི་སྤྱོད་པ་ཉིད་ཀྱང་མ་བཀག་པར་བྱས་པ་མེད་པར་ཡང་དག་པའི་རྡོ་རྗེ་ཁྲོ་བོའི་མཛད་པར་གསུངས་པས་དེ་དག་གི་ཡིད་མོས་པར་དྲང་སྟེ་ཐབས་ཀྱི་སྒོ་འདིར་བཅུག་ནས་གསང་བ་མཆོག་གི་ལམ་དུ་བཅུག་ནས། རྡོ་རྗེ་ཐེག་པར་རིགས་རབ་ཏུ་ངེས་པར་མཛད་ནས་གྲོལ་བར་བྱས་པའོ།།

བཞི་པ་ཕྲག་དོག་ཅན་རྣམས་གཞུག་པ་ནི།

ལང་ཀའི། ཞེས་པ་ནས། སྙིང་པོར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། གནོད་སྦྱིན་ལ་སོགས་པ་གང་ཕྲག་དོག་ཅན་གྱི་ཆེད་དུ། འཁྲུག་པ་རྡོ་རྗེ་མཛད་པ་འདི་གསུང་བ་མཛད་དོ། །ཤ་ཟ་རྟག་ཏུ་གཞན་དོན་སྤྱོད། །ཀུན་སྡོམ་རྡོ་རྗེ་གོ་ཆ་བགོས།།

ཀུན་འཁྲུགས་རྡོ་རྗེ་ཡིད་བཅུག་ནས། །གསང་ཆེན་སྙིང་པོར་རབ་ངེས་པའོ།།

ལང་ཀའི་བདག་པོ། དེ་ནས་ཡང་སྟོན་པ་སྐྱེས་བུ་དམ་པ་དེས། གནོད་སྦྱིན་ལ་སོགས་པ་གང་ཕྲག་དོག་ཅན་གྱི་འགྲོ་བ་རྣམས་གྲོལ་བའི་ཆེད་དུ། འཁྲུག་པ་སེམས་ཀྱི་ཁོང་ཁྲོ་ཉིད་གཉིས་མེད་ཡེ་ཤེས་ཀྱི་རྡོ་རྗེར་མཛད་པའི་ཐབས་དམ་པ་འདི་བཀའ་སྩལ་ཏེ་གསུང་བར་མཛད་དོ། །གཞན་གྱི་ཉིད་ཤས་འཚོ་བས་ཤ་ཟ་བ་དང༌། རྟག་ཏུ་གཞན་ལ་འདོད་པའི་ལོངས་སྤྱོད་ཡོད་ན་མི་དགའ་བས་དུས་ཀུན་ཏུ་སྡོམ་པ་ན་ཕྲག་དོག་སྐྱེས་ནས་གནོད་སྦྱོར་རྩོམ་པའི་མི་མ་ཡིན་རྣམས་ཀྱིས་དེ་ལྟར་འདོད་ཅིང་དོག་པ་ཉིད་རྡོ་རྗེའི་ཡེ་ཤེས་ཆེན་པོའི་ངང་ལ་མཚན་རྟོག་མི་ཆུང་བའི་དོན་དུ་རྟོགས་པའི་ཤེས་རབ་ཀྱིས། བདུད་དཔུང་གིས་མི་བརྫི་པའི་གོ་ཞུབ་དང་མཚོན་ཆ་བགོས་པ་དང་ལྡན་པ་དེ་ཡིན་པར་མཐོང་བས་ཀུན་ནས་འཁྲུག་པ་ཉིད་སྤང་དུ་མེད་པར་མི་ཕྱེད་པའི་རྡོ་རྗེ་ཡིན་པར་བཀའ་སྩལ་ཏེ་ཡིད་དྲང་ཞིང་སྒོ་འདིར་བཅུག༼༢༠༦༽ནས་དོན་ལ་སྦྱར་བས་ཕྲག་དོག་ཅན་རྣམས་ཀྱིས་དོན་དེ་ཉིད་རྟོགས་ནས་གསང་ཆེན་སྙིང་པོར་རིགས་རབ་ཏུ་ངེས་པར་གྱུར་པའོ།།

ལྔ་པ་ཕྲ་མ་ཅན་རྣམས་གཞུག་པ་ནི།

ལང་ཀའི། ཞེས་པ་ནས། གསང་བར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། ཀླུ་ལ་སོགས་པ་གང་ཕྲ་མ་ཅན་གྱི་ཆེད་དུ། ཕྲ་མ་རྡོ་རྗེ་མཛད་པ་འདི་གསུང་བ་མཛད་དོ། །རྡོ་རྗེ་དམ་པ་དབྱེ་བའི་མཆོག །ལོག་ལྟ་ཡང་དག་ལྟ་དབྱེ་བྱས། །ཕྲ་མ་རྡོ་རྗེ་ཡིད་བཅུག་ནས། །རྡོ་རྗེ་གསང་བར་རབ་ངེས་པའོ།།

ལང་ཀའི་བདག་པོ། དེ་ནས་ཡང་སྟོན་པ་སྐྱེས་བུ་དམ་པ་དེས། ཀླུ་ལ་སོགས་པ་གང་གདུལ་བྱ་ཕྲ་མ་ཅན་རྣམས་ཀྱི་ཆེད་དུ། དེ་ཉིད་མ་སྤངས་པར་གྲོལ་བར་བྱ་བའི་ཕྱིར་ཕྲ་མ་ཉིད་ཡེ་ཤེས་རྡོ་རྗེར་མཛད་པའི་ཐབས་ཀྱིས་གསང་བ་ཆེན་པོ་འདི་ཉིད་གསུང་བར་མཛད་དོ། །གཉིས་སུ་མེད་པའི་ཡེ་ཤེས་རྡོ་རྗེ་དམ་པ་འཛིན་པ་ནི་ཐེག་པ་གཞན་དང་མ་འདྲེས་པར་དབྱེ་ཞིང་འབྱེད་པའི་ཕྲ་མ་མཆོག་གི་ངོ་བོ་ཉིད་ཡིན་པར་རྟོགས་པས་ཕྱིན་ཅི་ལོག་གི་ལྟ་བ་དང་ཡང་དག་པའི་ལྟ་བ་ཤན་མ་འདྲེས་པར་དབྱེ་བར་བྱས་ཏེ། ལོག་པར་མི་གནས་པའི་ཕྲ་མ་ཆེན་པོ་གཉིས་མེད་དོན་གྱི་རྡོ་རྗེ་ལ་དེ་དག་གི་ཡིད་བཅུག་སྟེ་རྟོགས་པར་བཀོད་ནས་རྡོ་རྗེ་གསང་བ་དམ་པར་རིགས་རབ་ཏུ་ངེས་པར་མཛད་པའོ།།

དྲུག་པ་ང་རྒྱལ་ཅན་རྣམས་གཞུག་པ་ནི།

ལང་ཀའི། ཞེས་པ་ནས། ཐེག་པར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། ལྷ་མ་ཡིན་ལ་སོགས་པ་གང་ང་རྒྱལ་ཅན་གྱི་ཆེད་དུ། གདུལ་དཀའ་རྡོ་རྗེ་མཛད་པ་འདི་གསུང་བ་མཛད་དོ། །རྡོ་རྗེ་གདུལ་དཀའ་མ་ལུས་པ། །གནོན་པ་བརྩེགས་པའི་རི་བོ་ཆེ།།

ང་རྒྱལ་རྡོ་རྗེ་ཡིད་བཅུག་ནས། །རྡོ་རྗེ་ཐེག་པར་རབ་ངེས་པའོ།།

ལང་ཀའི་བདག་པོ། དེ་ནས་ཡང་སྟོན་པ་སྐྱེས་བུ་དམ་པ་དེས། ལྷ་མ་ཡིན་ལ་སོགས་པ་གང་ང་རྒྱལ་ཅན་གྱི་གང་ཟག་རྣམས་དགྲོལ་བའི་ཆེད་དུ། གང་ལོག་སྡེ༌ཟིལ་གྱིས་གནོན་པ་ལ་དགོངས་ནས་གདུལ་དཀའ་དྲེགས་པས་ཁེངས་པའི་ངོ་བོ་ཉིད་རྡོ་རྗེ་ཡེ་ཤེས་ཆེན་པོ་ཡོན་ཏན་རྫོགས་པའི་ཆེ་བཙན་དུ་མཛད་པ་འདི་ཉིད་ཡང་དག་པར་གསུང་བར་མཛད་དོ། །ང་རྒྱལ་མ་ནོར་བ་ནི་རྡོ་རྗེ་གསུམ་གྱི་སྐུ་མཆོག་ཁྲོ་བོ་ཆེན་པོར་བྱུང་བས་གདུལ་དཀའ་ལོག་པའི་དྲེགས་པ་ཅན་མ་ལུས་པ་རིལ་བཏུལ་ཞིང་ཚར་བཅད་དེ་ངོ་མཐོན་དུ་སྟོབས་ཀྱིས་གནོན་པ་དང་གདན་དུ་བརྩེགས་པའི་ང་རྒྱལ་གྱི་རི་བོ་མཆོག་ཏུ་ཆེ་བ་ལ་སྤྱོད་ཀྱང་བྱས་འཛིན་མེད་པས་རྣམ་སྨིན་མེད་པར་བཀའ་སྩལ་པས་ང་རྒྱལ་རྡོ་རྗེ་ཡང་དག་པར་རྟོགས་པ་ལ་དེ་དག་གི་ཡིད་ངེས་པར་བཅུག་ནས། ཐབས་དེས་རྡོ་རྗེ་གསང་བའི་ཐེག་པ་ལ་རིགས་རབ་ཏུ་ངེས་ཏེ་གྲོལ་བར་མཛད་པའོ།།

བདུན་པ་ཤ་ཟའི་རིགས་ཅན་གཞུག་པ་ནི།

ལང་ཀའི། ཞེས་པ་ནས། ཆེན་པོར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། སྲིན་པོ་ལ་སོགས་པ་གང་ཤ་ཟ་བ་རྣམས་ཀྱི་ཆེད་དུ། རྔམ་པ་རྡོ་རྗེ་མཛད་པ་འདི་གསུང་བ་མཛད་དོ། །རྡོ་རྗེ་ཟ་བ་མ་ལུས་པ། །ཐམས་ཅད་ཟད་པར་བྱེད་པ་ཉིད།།

རྔམ་པའི་རྡོ་རྗེ་ཡིད་བཅུག་ནས། །ཐེག་པ་ཆེན་པོར་རབ་ངེས་པའོ།།

ལང་ཀའི་བདག་པོ། དེ་ནས་ཡང་སྟོན་པ་སྐྱེས་བུ་དམ་པ་དེས། སྲིན་པོ་ལ་སོགས་པ་ཤ་ཟ་རྣམས་ཀྱི་རྒྱུད་དགྲོལ་བའི་ཆེད་དུ། རྔམ་ཆགས་ཀྱིས་འཚོ་བ་ཉིད་འདིར་རྡོ་རྗེ་ཡེ་ཤེས་ཆེན་པོས་ཕྱིན་ཅི་ལོག་འཇོམས་པ་ལ་རྔམ་པར་༼༢༠༧༽མཛད་པའི་ཐབས་དམ་པ་འདི་ཉིད་ཡང་དག་པར་གསུང་བར་མཛད་དོ། །གཉིས་མེད་ཀྱི་ལྟ་བས་ཟིན་པ་ལ་དགོངས་ནས། ལས་དང་ཉོན་མོངས་པའི་ཤ་རྣམས་རྡོ་རྗེ་ཡེ་ཤེས་ཆེན་པོས་དོན་མི་བྱེད་པར་ཟ་བ་གང་ཉིད་མི་འཇིགས་ཤིང་བརྩལ་བ་མེད་པར་རྟོགས་པས་ཆོས་ཅན་མ་ལུས་པ་ཐམས་ཅད་ཀྱི་ངོ་བོ་ཡེ་ཤེས་ཆེན་པོའི་ཀློང་དུ་ཟད་དེ་རང་གསལ་དུ་གྲོལ་བར་བྱེད་པ་ཉིད་ལ་ཤ་ཟ་བའང་མི་འགོག་པར་རྣམ་པའི་ཟ་བ་ཆེན་པོ་གཉིས་མེད་ཀྱི་རྡོ་རྗེ་གསང་བར་གདུལ་བྱ་དེ་དག་གི་ཡིད་བཅུག་ནས་དོན་དེ་མཐོང་བར་མཛད་པས། གསང་བའི་ཐེག་པ་ཆེན་པོར་རིགས་རབ་ཏུ་ངེས་པར་མཛད་པའོ།།

བརྒྱད་པ་མཁའ་འགྲོའི་རིགས་ཅན་གཞུག་པ་ནི།

ལང་ཀའི། ཞེས་པ་ནས། གསང་བར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པར་དེས། མཁའ་འགྲོ་ལ་སོགས་པ་གང་ཕྲ་མེན་མ་དག་གི་ཆེད་དུ། རྡོ་རྗེ་ཨམྲ་ཏ་མཛད་པ་འདི་གསུང་བ་མཛད་དོ། །རྡོ་རྗེ་བཤང་གཅི་ཨ་མྲ་ཏ། །བཏུང་བ་མ་ངེས་པ་ཡི་ཐབས།།

ཕྲ་མེན་རྡོ་རྗེ་ཡིད་བཅུག་ནས། །རྡོ་རྗེ་གསང་བར་རབ་ངེས་པའོ།།

ལང་ཀའི་བདག་པོ། དེ་ནས་ཡང་སྟོན་པ་སྐྱེས་བུ་དམ་པ་དེས། མཁའ་འགྲོ་ལ་སོགས་པ་གང་ཕྲ་མེན་མ་དེ་དག་གི་རྒྱུད་དགྲོལ་བར་མཛད་པའི་ཆེད་དུ། སྨད་པ་ལྔའམ་མི་གཙང་བ་རྣམས་ཡང་དག་པའི་དོན་གྱི་བདུད་རྩི་དམ་པ་རྡོ་རྗེ་ཨ་མྲ་ཏ་ཉིད་དུ་བསྒྱུར་ཏེ་ཀུན་གྱིས་སྤྱོད་པར་མཛད་པ་འདི་ཉིད་བཀའ་སྩལ་ཏེ་གསུང་བར་མཛད་དོ། །གཉིས་མེད་དོན་གྱི་རྡོ་རྗེ་མི་ཕྱེད་པའི་ཆོས་ཉིད་རྟོགས་ན་གཤང་གཅི་ལ་སོགས་པ་སྨད་པའི་རྫས་ཉིད་ཀྱང་རང་རིག་པའི་ཡེ་ཤེས་རང་སྣང་བའི་བདུད་རྩི་ཨ་མྲ་ཏ་ཡིན་པས། རྒྱལ་བ་མན་ཆད་ཀུན་གྱིས་བཟང་ཞིང་བཏུང་བའི་སྤྱོད་པ་དམ་པར་ངེས་པ་ལ། དངོས་གཞི་ཕྱོགས་གཅིག་གི་སྤྱོད་པར་མ་ངེས་ཏེ། ཆོས་ཉིད་ལ་གཙང་སྨེ་མེད་པ་དང༌། ཉོན་མོངས་པའི་དུག་བདུད་རྩིར་བསྒྱུར་བ་དང༌། འཁོར་བ་ཟད་པར་བྱེད་པ་ཡི་ཐབས་སུ་རང་སྣང་བ་ཉིད་ཀྱི་ཕྱིར། དེ་ལྟར་རྟོགས་པ་ན་རིལ་མཉམ་པའི་ངང་དུ་འཐུང་བས་ཕྲ་མེན་རྡོ་རྗེ་ཡིན་པ་ལ་གང་ཡང་སྤྱད་བཀག་མེད་པར་སྤྱད་དུ་རུང་བར་བཀའ་སྩལ་ཏེ། དེ་དག་གི་ཡིད་མཐུན་པས་དྲང་སྟེ་ཐབས་ཀྱི་སྒོ་གསང་བ་ཆེན་པོ་འདིར་བཅུག་ནས་དོན་རྟོགས་པ་ལ་བཀོད་པས་སྙིང་པོ་རྡོ་རྗེ་གསང་བར་རིགས་རབ་ཏུ་ངེས་ཏེ་ཡང་དག་པའི་སྲས་དམ་པར་མཛད་པའོ།།

དགུ་པ་འཇིག་རྟེན་པ་ཐམས་ཅད་གཞུག་པ་ནི།

ལང་ཀའི། ཞེས་པ་ནས། ཐེག་པར་རབ་ངེས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡང་སྐྱེས་བུ་དམ་པ་དེས། མཐའ་ཡས་རྡོ་རྗེ་མཛད་པ་འདི་གསུང་བ་མཛད་དོ། །མཐའ་ཡས་འཇིག་རྟེན་རྡུལ་སྙེད་ན། །ལོག་རྟོག་མི་མཐུན་རྡུལ་ཕྲན་སྙེད། །གཉེན་པོ་རྟོག་འདུལ་དེ་སྙེད་ཀྱིས།།

རྡོ་རྗེ་ཐེག་ཆེན་དབྱིངས་སུ་སྦྱོར། །མཐའ་ཡས་གཡོ་རྡུལ་སྣ་ཚོགས་པ། །གང་ལ་མོས་པ་དེ་གསུངས་པས།།

སེམས་ཅན་རྡོ་རྗེ་ཡིད་བཅུག་ནས། །སེམས་ཉིད་ཐེག་ཆེན་རབ་ངེས་པའོ།།

ལང་ཀའིབདག་པོ། དེ་ནས་ཡང་སྟོན་པ་སྐྱེས་བུ་དམ་པ་དེས། འགྲོ་བ་མཐའ་ཡས་མ་ལུས་ཐམས་ཅད་སྒྲོལ་བར་བྱ་བའི་ཕྱིར། སོ་སོའི་སྤྱོད་པ་གང་ཇི་སྙེད་པ་ཡང་ངོ་བོ་ཡང་དག་པའི་རྡོ་རྗེ་དམ་པ་ཡིན་པར་སྐལ་བ་དང་ལྡན་པ་༼༢༠༨༽ཀུན་གྱིས་རྟོགས་པར་མཛད་པའི་ཐབས་ཕུལ་དུ་བྱུང་བ་འདི་ཉིད་ཡང་དག་པར་བཀའ་སྩལ་ཏེ་གསང་བར་མཛད་དོ། །གནས་མཐའ་ཡས་པར་གྱུར་པའི་འཇིག་རྟེན་གྱི་ཁམས་རྡུལ་སྙེད་རྣམས་ན་སེམས་ཅན་ཇི་སྙེད་ཅིག་མཆིས་པ་ཐམས་ཅད་ཕྱིན་ཅི་ལོག་གི་རྟོག་པ་ནང་རིས་མི་མཐུན་པར་སྣང་བ་རྡུལ་ཕྲན་སྙེད་ཀུན་ལ་གཉེན་པོ་རྟོག་པ་འདུལ་བའི་སྒོ་དེ་སྙེད་ཀྱིས་སྤོང་བར་མཛད་པ་དང༌། ཟིལ་གྱིས་གནོན་པ་དང༌། ཐག་བསྲིང་བ་ལ་སོགས་པ་རྡུལ་སྙེད་ཀྱི་ཐབས་རྣམས་ཀྱིས་ཆ་མཐུན་དུ་འདུལ་བར་མཛད་པ་གང་དེ་དག་ཀུན་ཀྱང་མཐར་རྡོ་རྗེ་ཐེག་པ་གསང་བ་ཆེན་པོའི་དབྱིངས་སུ་སྦྱོར་ཏེ་སྒོ་འདིར་ཡང་དག་པར་འགོད་དོ། །དེས་ན་འགྲོ་བའི་སྤྱོད་པ་མཐའ་ཡས་པ་གཡོ་རྡུལ་ཀྱི་གྲངས་སྙེད་སྣ་ཚོགས་པ་ཀུན་ཀྱང་རང་རིག་པའི་ཡེ་ཤེས་རྒྱུ་རྐྱེན་དང་བྲལ་བ་ཉིད་ཡིན་པས། དོན་དེ་ཡང་དག་པར་རྟོགས་ན་རང་རང་སྤྱོད་པ་གང་ལ་དགའ་ཞིང་མོས་པ་དེ་ཉིད་སྤྱོད་དུ་རུང་བར་གནང་ཞིང་མ་ནོར་བ་ཡིན་པར་གསུངས་ཏེ་བཀའ་སྩལ་པར་མཛད་པས་ཆ་མཐུན་དུ་བསྟན་པའི་ཐབས་ཀྱིས་ཚུལ་དེས་འགྲོ་བ་སེམས་ཅན་ཇི་སྙེད་པ་ཀུན་ཀྱང་གང་ལ་མོས་པ་དེ་ཉིད་ལ་གནས་ཏེ་ཆོས་ཉིད་དེ་ཁོ་ན་ཉིད་ལྟར་རྡོ་རྗེ་ལྟར་མི་ཕྱེད་པས་གཉུག་མའི་ཡིད་ཀྱི་དོན་ལ་གོམས་པར་བྱེད་པས་གསང་བ་མཆོག་གི་སྒོ་འདིར་བཅུག་ནས་ཡང་དག་པར་རྟོགས་པར་མཛད་དེ་སེམས་ཉིད་བླ་ན་མེད་པའི་ཐེག་པ་དམ་པར་རབ་ཏུ་ངེས་པས་ཐུགས་ཀྱི་སྲས་སུ་མི་འགྱུར་བར་མཛད་པའོ། །དེ་དག་གི་དོན་ཡང་ཆོས་ཐམས་ཅད་གསང་སྔགས་མཚོན་པའི་སྒོར་མ་གྱུར་པ་མེད་པ་དང༌། དེ་ཉིད་ཀྱིས་རྒྱས་བཏབ་པའི་ཕྱིར་སྤྱོད་པ་དོར་བར་བྱ་བས་དམིགས་པ་དང༌། དོན་གཞན་ནས་མི་འབྱུང་བ་དང༌། རིག་ཅིང་རྟོགས་ན་རང་ལས་འཆར་བའི་ཕྱིར་རྟོགས་པ་དང༌། མོས་པ་དང༌། ཞུགས་པ་དང༌། སྲས་དམ་པར་གྱུར་པ་ལ་ཐེ་ཚོམ་མེད་དོ། །ཚིག་དེ་ལས་རྗེས་སུ་དཔག་སྟེ་དཔྱད་ཅིང་བརྟགས་ན་ཡང་དག་པར་གོ་བས་འདི་དག་ནི་ལན་ཐ་མར་ཡང་ངེས་སོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། ཆེད་དུ་མཛད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་གསུང་གི་མཛད་པ་གང་གི་ཆེད་དུ་མཛད་པའོ།།

ལང་ཀའི་བདག་པོ། དེ་དག་ནི་གསུང་གི་མཛད་པ་ཐུན་མོང་མ་ཡིན་པས་གཞན་དོན་སྤྱོད་པའི་ཚུལ་ཟབ་མོ་གདུལ་བྱ་གང་དག་གི་རྒྱུད་གྲོལ་བར་བྱ་བའི་ཆེད་དུ་ལྡེམ་པོར་གསུངས་པའི་ཐབས་ཀྱིས་སྙིང་པོ་དེ་ཁོ་ན་ཉིད་ཇི་བཞིན་པ་ཉིད་ལ་འགོད་པར་མཛད་པའི་ཕྲིན་ལས་གསང་བ་དམ་༼༢༠༩༽པའོ། །དེའང་ལྟ་བ་ལ་ལྡེམ་པོར་གསུངས་པའི་ཐབས་ཀྱིས། ལྟ་བའི་རྒྱལ་པོ་གང་ལ་གཞུག་པ་ཡང༌། བརྩོན་པ་དོན་ལྡན་གྱི་རྒྱུད་ལས། བརྩལ་བ་མེད་པའི་སེམས་ཉིད་ནི། །ཆོས་ཀྱི་སྐུ་ཡི་གདེངས་ཆེན་ཏེ། །མ་གཡོས་པ་ཡི་དབྱིངས་ཉིད་ལ། །མ་བཅོས་པ་ཡི་ཆོས་ཉིད་གསལ། །མ་བརྩལ་བ་ཡི་ཡེ་ཤེས་ཤར། །ཤར་བས་སངས་རྒྱས་ཐམས་ཅད་ཐོབ། །སངས་རྒྱས་ཐོབ་པས་སེམས་ཅན་ཟད། །ཉི་མ་ཤར་བས་མུན་པ་ནུབ། །རིག་པ་གསལ་བས་འཁྲུལ་པ་སྟོངས། །ཡེ་ཤེས་གསལ་བས་འཁོར་བ་དྭངས། །དེ་ལ་སུས་ཀྱང་བརྩལ་བ་མེད། །བརྩལ་མེད་སྙིང་པོར་ཤར་བ་ལས། །རྒྱུ་འབྲས་ཅན་དུ་དེ་མ་བསྟན། །བཅོས་པ་མེད་པར་ཤེས་པ་ལས། །གཉེན་པོ་ཅན་དུ་དེ་མ་བསྟན། །འགྱུར་བ་མེད་པའི་ཤེས་པ་ལས། །འཆི་འཕོ་ཅན་དུ་དེ་མ་བསྟན། །མ་གཡོས་པ་ཡི་ཤེས་པ་ལས། །འཛིན་རྟོག་ཅན་དུ་དེ་མ་བསྟན། །མཉམ་པ་ཉིད་ཀྱི་ཤེས་པ་ལས། །ཆེ་ཆུང་ཅན་དུ་དེ་མ་བསྟན། །ཀུན་ཏུ་བཟང་བའི་ཤེས་པ་ལ། །གཙང་སྨེ་ཅན་དུ་དེ་མ་བསྟན། །མཐའ་དབུས་མེད་པའི་ཤེས་པ་ལ། །ཕྱོགས་རིས་ཅན་དུ་དེ་མ་བསྟན། །དེ་ལྟར་ཤེས་པས་སེམས་ཤེས་ལ། །སེམས་ཤེས་པས་ནི་མ་བརྩལ་བ། །མ་བརྩལ་བས་ནི་ཡེ་ཤེས་ཆེ། །ཡེ་ཤེས་དེ་ཞེས་སྤྱོད་པ་ཡིན། །ཐིག་ལེ་ཆེན་པོ་བརྩལ་བ་མེད། །སྟོང་པ་ཆེན་པོ་བཙལ་བ་མེད། །སྐྱེ་འགག་མེད་པས་བཙལ་བ་མེད། །མ་གཡོས་ཆོས་ཉིད་བཙལ་བ་མེད། །དེ་ལྟར་ཤེས་པས་སེམས་ཅན་ནི། །དེ་ནི་སྤྱོད་པ་དོན་དང་ལྡན། །ཞེས་པ་ལ་སོགས་པ་ལུང་དང་མན་ངག་རྣམས་ལས་འབྱུང་བ་ལྟར་ཤེས་པར་བྱ་ཞིང༌། སྤྱོད་པ་ལ་ལྡེམ་པོར་དགོངས་པའི་ཐབས་ཀྱིས་དོན་ལ་སྦྱོར་བ་ཡང༌། དེ་ཉིད་ལས། སྣང་སྲིད་མཚན་མའི་རྫས་རྣམས་ཀུན། །མ་རིག་རྨོངས་པའི་བློ་རྣམས་ཀྱིས། །ཡོད་པ་ཉིད་དུ་སྣང་བ་སྟེ། །ཐབས་ལ་མཁས་པའི་རྣལ་འབྱོར་པས། །རང་བཞིན་མེད་པར་འདྲིས་པར་སྤྱོད། །རྒྱུ་འབྲས་མཚན་མའི་ཆགས་སེམས་ལ། །གང་ཟག་འཁྲུལ་པས་རྟོག་པ་ཆགས། །མཁས་པས་ཡེ་ནས་དངོས་མེད་རྟོགས། །འབྱུང་བ་མ་སྐྱེས་ཡུམ་གྱི་ཀློང༌། །འགྱུར་མེད་སྙིང་པོ་ཡིན་པར་སྟོན། །སྤྱོད་པའི་རྒྱལ་པོ་འདི་ལས་བྱུང༌། །ལུས་ཀྱི་སྤྱོད་པས་ཐམས་ཅད་བསྒྲལ། །སེམས་ཅན་ཐམས་ཅད་བསྒྲལ་བ་ནི། །རྒྱལ་བ་མཉེས་ཏེ་སྲས་སུ་བྱ། །ཞེས་སོགས་དང༌། ཐབས་ཀྱི་སྤྱོད་པས་མ་སྤྱད་ན། །སྤང་བ་ཉིད་ཀྱང་འཁོར་༼༢༡༠༽བའི་རྒྱུ། །ཐབས་ཀྱི་སྤྱོད་པས་སྤྱད་པ་ནི། །བདག་པོ་ཞིང་ལ་ལོངས་སྤྱོད་འདྲ། །ཞེས་དང༌། དོན་དམ་ཉིད་དུ་མ་སྐྱེས་པས། །ཐབས་ཀྱིས་སྤྱད་ཀྱང་གོལ་ས་མེད། །མ་ཆགས་རྟོག་པ་མེད་པར་སྤྱོད། །དོན་དང་མཐུན་ཞིང་འགལ་མེད་པའོ། །ཞེས་པ་ལ་སོགས་པ་ཚད་མའི་ལུང་ལ་བརྟེན་ནས་མཐར་ཐུག་གསང་བ་ཆེན་པོའི་དབྱིངས་ལ་སྦྱོར་བའི་ཚུལ་ལ་ཡང་དག་པའི་བློ་གྲོས་སྒྲུབས་ཏེ་ལུང་ཆེན་ཐེག་པའི་རྒྱལ་པོའི་ཐབས་རྨད་དུ་བྱུང་བའི་ཟབ་ཁྱད་ལ་ངེས་པ་རྙེད་པར་བྱའོ། །དེ་ལྟར་གསུང་གི་གསང་བ་འདིའི་ངོ་བོ་ནི། སྐབས་སྦྱོར་བདུན་པ་ལས། རང་བཞིན་སྤྲོས་བྲལ་བདེ་གཤེགས་རྣམས་ཀྱི་གསུང༌། །བརྗོད་མེད་མ་སྐྱེས་ཡེ་ནས་སྟོང་པའི་གཞི། །ཚིག་དང་ཡི་གེར་མ་བརྟགས་མཚན་མ་མེད། །དངོས་མེད་མ་སྐྱེས་ཆོས་རྣམས་འབྱུང་བའི་མཛོད། །ཐབས་ལ་མཁས་པས་ཡོངས་ལ་ཁྱབ་པར་སྒྲོགས། །འགྲོ་བའི་དོན་མཛད་གསུང་རབ་བདུད་རྩིའི་བཅུད། །མ་རིག་ལོག་རྟོག་ཁ་ལོ་གྱེན་ལ་བསྒྱུར། །དམ་པ་ཆོས་ཀྱི་ཡོན་ཏན་བརྗོད་མི་ལངས། །ཇི་སྙེད་བརྗོད་པས་གསུང་རབ་རྒྱ་མཚོ་སྟེ། །ཐེག་པའི་བྱེ་བྲག་བློ་ལ་སྣང་བར་འགྱུར། །དོན་འདི་གང་ཞིག་བློ་ལ་འཆང་བ་དང༌། །ངེས་པར་སེམས་ལ་གསལ་བའི་རྣལ་འབྱོར་དེས། །ཇི་སྙེད་བརྗོད་པ་ཆོས་ཀྱི་སྒོ་མོ་ལ། །ཕ་རོལ་གཞན་གྱི་ཤེས་པས་གྲོལ་བ་ཡིས། །གསུང་རབ་དོན་དང་ལྡན་པར་རྒྱལ་བས་གསུངས། ཞེས་གསུངས་པ་ལྟར་ངེས་པས། དོན་འདི་ལ་མཁས་པར་གྱུར་ན། གསང་ཆེན་ལུང་གི་ཆོས་མཛོད་ལ་དབང་ནས། མན་ངག་བདུད་རྩིའི་སྤྲིན་ཆར་ལ་སྤྱོད་པའི་སྨྲ་བའི་སེང་གེར་འགྱུར་བས་ཡང་དག་པར་རྗེས་སུ་དཔག་པར་བྱའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

གསུང་གི་མཛད་པ་ཡོངས་སུ་རྫོགས་པའི་ལེའུ་སྟེ་བཞི་བཅུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྒྱལ་བའི་གསུང་གི་མཛད་པ་ཆོས་ཉིད་ལ་ཡོངས་སུ་རྫོགས་པར་བསྟན་པའི་ལེའུ་སྟེ་བཞི་བཅུ་པ་ལེགས་པར་བཤད་པའོ།། །།

ལེའུ་ཞེ་གཅིག་པ་ཐབས་ཀྱི་མཛད་པ་ཡོངས་སུ་རྫོགས་པ།

༈ གསུམ་པ་མཛད་པ་ཐ་དད་ཀྱི་ལན་ཟུར་གཉིས་པ་ཐབས་ཀྱི་མཛད་པ་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས། ཞེས་པ་ནས། མཐའ་ཡས་པར་སྣང་སྟེ། ཞེས་པའི་བར་དང༌།

དེ་ནས་ཡང་གསང་བ་པའི་བདག་པོ་དེས། ལངྐའི་བདག་པོ་ལ་སྨྲས་པ། ལངྐའི་བདག་པོ་གཞན་ཡང་གང་གི་དོན་དུ་ཐབས་ཇི་ལྟར་ཡང་མཛད་པ་ནི་འདི་ལྟ་སྟེ། གང་གི་ཡུལ་ཐ་དད་མཐའ་ཡས་པའི་ཕྱིར། མཛད་པ་ཡང་ཐ་དད་མཐའ་ཡས་པར་སྣང་བ་སྟེ།

འགྲེལ་ཆེན་ལས། བསམ་པ་ཐ་དད་པའི་ཕྱིར་དངོས་པོ་བདུན་པོ་ཐ་དད་པར་སྟོན་པའང་སྔ་མའི་ལུས་མདོར་བསྟན་པ་སྟེ། ཡར་བཀབ་ལ་བཤད་༼༢༡༡༽དགོས་པའི་ཕྱིར། ཞེས་གསུངས་པ་དང༌། མདོའི་ཀ་བ་ཡང་ཁྱེད་བླ་མས་ཀྱང་མདོར་བསྟན་དུ་བཞེད་པས།

འོག་ནས། གང་དེ་ལྟར་མོས་པ་ཐ་དད་ལ། ཞེས་པ་ནས། ཡོངས་སུ་སྨིན་པར་མཛད་དོ། །ཞེས་པའི་བར་གྱིས་བསྟན་ཏེ།

གང་དེ་ལྟར་མོས་པ་ཐ་དད་ལ་སྤྱོད་པ་དང་། གཟུགས་དང་། སྒྲ་དང་། ལྟ་བ་དང་། ཐབས་དང་། འདོད་པ་དང་།

དོན་ཐ་དད་པར་བསྟན་པས་ཡོངས་སུ་སྨིན་པར་མཛད་དོ།།

ལེའུ་འདིས་དྲང་དོན་སྟོན་ནོ། །དེ་ནས་ཡང་སྟོན་པ་གསང་བ་པའི་བདག་པོ་དེས། སྡུད་པ་པོ་ལང་ཀའི་བདག་པོ་ལ་སྨྲས་པ། ལང་ཀའི་བདག་པོ། གཞན་ཡང་གདུལ་བྱ་གང་དག་གི་དོན་དུ་ཐབས་སྣ་ཚོགས་པ་ཇི་ལྟར་ཡང་སྣང་བས་དོན་མཛད་པ་ནི། འདི་ལྟ་སྟེ། ཞེས་ཉེ་བར་བསྟན་པ་ནི། གང་གདུལ་བར་བྱ་བ་སེམས་ཅན་དག་གི་རིགས་དང་སྤྱོད་ཡུལ་ཐ་དད་པ་རྣམས་ནི་བསམ་པ་མི་མཐུན་པ་མཐའ་ཡས་པར་སྣང་བའི་ཕྱིར། དེ་དག་འདུལ་བའི་དགོས་ཆེད་དུ་མཛད་པ་ཐབས་ཀྱི་སྒོ་ཡང་ཐ་དད་པ་མང་པོ་མཐའ་ཡས་པ་དེ་སྙེད་ཀྱིས་དོན་དང་མཐུན་པར་སྣང་བའི་ཐབས་ཀྱིས་མཐར་ཕྱིན་པར་མཛད་པ་སྟེ། དེ་ཅིའི་ཕྱིར་ཞེ་ན། གང་དེ་ལྟར་མོས་པ་ཐ་དད་ལ། སྤྱོད་པ་ཐ་དད་དང༌། གཟུགས་ཐ་དད་དང༌། སྒྲ་ཐ་དད་དང༌། ལྟ་བ་ཐ་དད་དང༌། ཐབས་ཐ་དད་དང༌། འདོད་པ་ཐ་དད་དང༌། དོན་ཐ་དད་པར་བསྟན་པས་རང་རང་གི་སྐལ་བ་དང་འཚམས་པར་ཡོངས་སུ་སྨིན་པར་མཛད་དེ་མཐར་སྒོ་འདི་ཉིད་ལ་འགོད་དོ།།

གཉིས་པ་རྒྱས་པར་བཤད་པ་ལ་བདུན་ཏེ། སྤྱོད་པ་ཐ་དད་པའི་ཐབས་ཀྱི་མཛད་པ། གཟུགས་ཐ་དད་པའི་ཐབས་ཀྱི་མཛད་པ། སྒྲ་ཐ་དད་པའི་ཐབས་ཀྱི་མཛད་པ། ལྟ་བ་ཐ་དད་པའི་ཐབས་ཀྱི་མཛད་པ། ཐབས་ཐ་དད་པའི་ཐབས་ཀྱི་མཛད་པ། དོན་ཐ་དད་པའི་ཐབས་ཀྱི་མཛད་པ། འདོད་པ་ཐ་དད་པའི་ཐབས་ཀྱི་མཛད་པས་འདུལ་བའོ། །དང་པོ་ནི།

ཡུལ་ལ་ལ་ནི། ཞེས་པ་ནས། ལ་ལ་ནི་སྤྱོད་པས་སོ། །ཞེས་པའི་བར་གྱིས་བསྟན་ཏེ།

ཡུལ་ལ་ལ་ནི་དག་པས་སྨིན་པར་མཛད་དོ། །ལ་ལ་ནི་མ་དག་པས་སྨིན་པར་མཛད་དོ། །ལ་ལ་ནི་དག་པ་སྤངས་པས་སོ། །ལ་ལ་ནི་གདམས་ངག་གིས་སོ། །ལ་ལ་ནི་གླ་འཁྱལ་གྱིས་སོ། །ལ་ལ་ནི་འཇམ་པས་སོ། །ལ་ལ་ནི་རྩུབ་པས་སོ། །ལ་ལ་ནི་གཉིས་ཀས་སོ། །ལ་ལ་ནི་འཇིགས་པས་སོ། །ལ་ལ་ནི་ཐར་པས་སོ། །ལ་ལ་ནི་འདམ་གྱིས་སོ། །ལ་ལ་ནི་འཁྲུགས་པས་སོ། །ལ་ལ་ནི་འཐིབས་པས་སོ། །ལ་ལ་ནི་འཐབས་པས་སོ། །ལ་ལ་ནི་ནོན་པས་སོ། །ལ་ལ་ནི་བསྲེག་པས་སོ། །ལ་ལ་ནི་བསླངས་པས་སོ། །ལ་ལ་ནི་མ་བསླངས་པས་སོ། །ལ་ལ་ནི་གནོད་པས་སོ། །ལ་ལ་ནི་གནོད་པ་མེད་པས་སོ། །ལ་ལ་ནི་འཚེ་བས་སོ། །ལ་ལ་ནི་མི་འཚེ་བས་སོ། །ལ་ལ་ནི་སྨད་པས་སོ། །ལ་ལ་ནི་བསྟོད་པས་སོ། །ལ་ལ་ནི་འགྱོད་པས་སོ། །ལ་ལ་ནི་མ་འགྱོད་པས་སོ། །ལ་ལ་ནི་མཐིང་སླད་ཀྱིས་སོ། །ལ་ལ་ནི་ཁ་གསགས་ཀྱིས་སོ། །ལ་ལ་ནི་ནན་ཏུར་གྱིས་སོ། །ལ་ལ་ནི་བཞབས་པས་སོ། །ལ་ལ་ནི་བྱིན་པས་སོ། །ལ་ལ་ནི་བླངས་པས་སོ། །ལ་ལ་ནི་ཅི་ཡང་ཆོག་ཤེས་པས་སོ། །ལ་ལ་ནི་མིང་སྨོས་པས་སོ། །ལ་ལ་ནི་གཟུགས་སྨོས་པས་སོ། །ལ་ལ་ནི་གཟུགས་བསྟན་པས་སོ།།

ལ་ལ་ནི་སྨྲ་བས་སོ། །ལ་ལ་ནི་སྤྱོད་པས་སོ། །

དོན་བྱ་བའི་ཡུལ་གདུལ་བྱ་ལ་ལ་ཞེས་བསམ་པ་མི་མཐུན་པས་དགར་བ་ནི་མོས་པ་དང་མཐུན་པའི་བསམ་སྤྱོད་ཀྱིས་འདུལ་བས་རྣམ་པར་དག་པ་ཐར་པའི་སྤྱོད་པས་སྨིན་པར་མཛད་དོ། །དེ་བཞིན་དུ། ལ་ལ་ནི་བསམ་སྤྱོད་མ་དག་པ་འཇིག་རྟེན་པའི་སྤྱོད་པས་སྨིན་པར་མཛད་དོ། །ལ་ལ་སྲིན་པོ་ལྟ་བུ་ལ་ནི་རྣམ་པར་དག་པ་དགེ་བ་དང་དཀར་བའི་ལས་སྤངས་པས་ཐབས་ཀྱིས་སོ། །ལ་ལ་ནི་སྤྱོད་ལམ་དང་དོན་མཐུན་པའི་གདམས་ངག་ཟབ་མོའི་ལུང་གིས་སོ། །ལ་ལ་ནི་བླ་འཁྱལ་ལམ་འཆལ་བའི་སྤྱོད་པའི་ཐབས་ཀྱིས་སོ། །ལ་ལ་ནི་སྒོ་༼༢༡༢༽གསུམ་འཇམ་པོའི་སྤྱོད་པས་སོ། །ལྷ་དང་ལྷ་མ་ཡིན་ལྟ་བུ་ལ་ལ་ནི་ཤིན་ཏུ་རྩུབ་བའི་སྤྱོད་པས་སོ། །ལ་ལ་ནི་འཇམ་རྩུབ་གཉིས་ཀས་སོ། །ལ་ལ་ནི་ལས་རྒྱུ་འབྲས་ལྟ་བུ་འཇིགས་ཤིང་བསྡིགས་པར་བསྟན་པས་སོ། །ལ་ལ་ནི་རྒྱལ་བའི་ཆ་ལུགས་ལྟ་བུ་ཐར་པ་དང་མཐུན་པས་སོ། །ལ་ལ་ནི་རང་གི་ཉེས་གཞན་ལ་སྐུད་པའི་འདམ་རྫབ་ལྟ་བུ་ཉིད་ཀྱིས་སོ། །ལ་ལ་ནི་འཁོན་སེམས་ལྟ་བུ་ཉོན་མོངས་པས་འཁྲུག་པས་སོ། །ལ་ལ་ནི་སེམས་བྱིང་རྨུགས་པ་སྟེ་གཏི་མུག་འཐིབས་པའི་སྤྱོད་པས་སོ། །ལ་ལ་ནི་ཞེ་སྡང་གིས་འཐབས་ཤིང་རྩོད་པས་སོ། །ལ་ལ་ནི་ང་རྒྱལ་གྱི་རི་བོས་གནོན་པས་སོ། །ལ་ལ་ནི་འདོད་ཆགས་ཀྱི་མེས་སྲེད་པའམ་སྲེག་པས་སོ། །ལ་ལ་ནི་བསོད་སྙོམས་བསླངས་པས་སོ། །ཡང་ན་ཁེ་གྲགས་ཅན་ལ་བསླངས་པས་འདུལ་བའོ། །ལ་ལ་ནི་དེ་མ་ཡིན་པ་མ་བསླངས་པས་སོ། །ཡང་ན་སེར་སྣ་ཅན་ལ་ཡོན་མ་བསླངས་པས་འདུལ་བའོ། །ལ་ལ་གདོན་བགེགས་ལྟ་བུ་ནི་གནོད་པའི་སྤྱོད་པས་འདུལ་བས་སོ། །ལྷ་ལྟ་བུ་ལ་ལ་ནི་ཕན་པར་བྱེད་པ་ལ་མོས་ཏེ་གནོད་པ་མེད་པས་སོ། །ལ་ལ་ནི་ལུས་དང་ལོངས་སྤྱོད་ལ་འཚེ་བས་སོ། །ལ་ལ་ནི་མི་འཚེ་བར་མ་གཙེས་པར་བཞག་པས་སོ། །ལ་ལ་ནི་སྒོ༌གསུམ་ལ་ངག་གིས་སྨད་པར་བྱས་པས་སོ། །ལ་ལ་ནི་བསྟོད་པར་བྱས་པས་སོ། །ལ་ལ་ནི་སྔར་ལས་ངན་བྱས་པ་ལ་འགྱོད་པས་སོ། །ལ་ལ་ནི་སྔར་གྱི་བྱ་བ་ལ་མི་འགྱོད་པས་སོ། །ལ་ལ་ནི་ཀུ་རེ་དང་འཐིང་སླད་ཀྱིས་སོ། །ལ་ལ་ནི་ཁ་གསག་གི་ངག་གིས་སོ། །ལ་ལ་ནི་ནན་ཏུར་གྱི་ལས་ཀྱིས་སོ། །ལ་ལ་ནི་བྲིད་དེ་བཞབས་པས་སོ། །ལ་ལ་ནི་ནོར་རྫས་བྱིན་པས་སོ། །ལ་ལ་ནི་ཚུར་ལ་བླངས་པས་སོ། །ལ་ལ་ནི་དངོས་པོ་གང་ཅི་ལ་ཡང་ཆོག་ཤེས་པས་སོ། །ལ་ལ་ནི་སངས་རྒྱས་དང་བསོད་ནམས་ཅན་གྱི་མཚན་ནམ་མིང་སྨོས་པས་སོ། །ལ་ལ་ནི་གཟུགས་འདི་འདྲ་བ་ཡོད་ཅེས་བཀོད་པ་སྣ་ཚོགས་པ་སྨོས་པས་སོ། །ལ་ལ་ནི་ཞི་ཁྲོ་ལ་སོགས་པའི་གཟུགས་བསྟན་པས་སོ། །ལ་ལ་ནི་གཏམ་བདེན་པར་སྨྲ་བས་སོ། །ལ་ལ་ནི་སྤྱོད་པ་ཐ་དད་པ་དང་བསྟུན་པས་སོ།།

གཉིས་པ་གཟུགས་ཐ་དད་པའི་ཐབས་ཀྱི་མཛད་པ་ནི།

ལ་ལ་ནི་རྒྱན་གྱིས་སོ། །ཞེས་པ་ནས། གང་ལ་ལ་ནི་ཐུབ་པས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་རྒྱན་གྱིས་སོ། །ལ་ལ་ནི་སྒྲས་སོ། །ལ་ལ་ནི་དྲིས་སོ། །ལ་ལ་ནི་རོས་སོ། །ལ་ལ་ནི་རེག་གིས་སོ། །ལ་ལ་ནི་ཆོས་ཀྱིས་ཡོངས་སུ་སྨིན་པར་མཛད་དོ། །ལ་ལ་ནི་གཟུགས་ཡིད་དུ་མི་འོང་བས་སོ། །དེ་བཞིན་དུ་ལ་ལ་ནི་སྒྲ་དང་། དྲི་དང་། རོ་དང་། རེག་ཡིད་དུ་མི་འོང་བས་ཡོངས་སུ་སྨིན་པར་མཛད་དོ། །གང་ལ་ལ་ནི་ཐུབ་པས་སོ།།

གདུལ་བྱ་ལ་ལ་ནི་ཡིད་དུ་འོང་བའི་རྒྱན་གྱིས་སོ། །ལ་ལ་ནི་ཐ་མལ་པ་དང་ཡང་དག་པའི་སྒྲས་སོ། །ལ་ལ་ནི་དྲིས་སོ། །ལ་ལ་ནི་རོས་སོ། །ལ་ལ་ནི་རེག་གིས་སོ། །དེ་དག་༼༢༡༣༽ནི་འདོད་པའི་ཡོན་ཏན་ལྔ་ཡིད་དུ་འོང་བས་འདུལ་བའོ། །ལ་ལ་ནི་འདུས་བྱས་དང་འདུས་མ་བྱས་ཀྱི་ཆོས་ཀྱིས་ཡོངས་སུ་སྨིན་པར་མཛད་དོ། །ལ་ལ་ནི་གཟུགས་ཡིད་དུ་མི་འོང་བས་གྲོལ་བས་སོ། །དེ་བཞིན་དུ། ལ་ལ་ནི་སྒྲ་དང༌། དྲི་དང༌། རོ་དང༌། རེག་ཡིད་དུ་མི་འོང་བས་ཡོངས་སུ་སྨིན་པར་མཛད་དོ། །གང་ལ་ལ་དག་ནི་སྤྲུལ་པའི་སྐུ་ཐུབ་པ་དྲུག་གིས་མཛད་པས་གདུལ་བར་ངེས་སོ། །འོ་ན་དེ་རྣམས་གཟུགས་ཁོ་ནར་ངེས་སམ་ཞེ་ན། དེ་རྣམས་ཀྱི་རྟེན་གཟུགས་ཟིན་པས་གཟུགས་ཐ་དད་པའི་ཐབས་སུ་བསྟན་པར་མཛད་དེ། དེ་བས་ན་བྱང་ཆུབ་ཀྱི་སེམས་སྐྱེ་བའི་རྐྱེན་མ་ངེས་པས་གསང་སྔགས་ཀྱི་མཛད་པ་ལའང་རིས་མེད་པར་སྤྱོད་པའོ། །སེམས་སྐྱེ་བའི་ཚུལ་ནི་རང་རང་གི་དོན་རིག་པས་སྐབས་སུ་སྦྱར་རོ།།

གསུམ་པ་སྒྲ་ཐ་དད་པའི་ཐབས་ཀྱི་མཛད་པ་ནི།

ལ་ལ་ནི་རྒྱུན་མི་ཆད་པར། ཞེས་པ་ནས། བཤེས་གཉེན་དམ་པས་སྒྲས་སོ། །ཞེས་པ་དང༌།

ལ་ལ་ནི་རྒྱུན་མི་འཆད་པར་སྨྲ་བས་སོ། །ལ་ལ་ནི་སྐད་ཅིག་སྨྲ་བས་སོ། །ལ་ལ་དག་ནི་ཅི་ཡང་མི་བརྗོད་པས་སོ། །ལ་ལ་དག་ནི་དམ་པ་མཐོང་བས་སོ། །ལ་ལ་ནི་དམ་པའི་སྒྲས་སོ། །ལ་ལ་ནི་བཤེས་གཉེན་དམ་པའི་སྒྲས་སོ།།

འོག་ནས། ལ་ལ་ནི་དུག་གསུམ་གྱི་སྡུག་བསྔལ། ཞེས་པ་ནས། མི་མྱོང་བར་གྱུར་བའི་སྒྲས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་དུག་གསུམ་སྡུག་བསྔལ་མྱོང་བར་འགྱུར་བའི་སྒྲས་སྨིན་པར་མཛད་དོ། །ལ་ལ་ནི་བདེ་བ

མྱོང་བར་འགྱུར་བའི་སྒྲས་སོ། །ལ་ལ་ནི་བདེ་བ་མི་མྱོང་བར་འགྱུར་བའི་སྒྲས་སོ།།

ལ་ལ་ནི་དུས་གསུམ་དུ་ཆོས་ཀྱི་འཁོར་ལོ་བསྐོར་ཏེ་རྒྱུན་མི་འཆད་པར་སྨྲ་བས་སོ། །ལ་ལ་ནི་སེ་གོལ་གྱི་ཡུན་ནམ་སྐད་ཅིག་གིས་སྨྲ་བས་སོ། །ལ་ལ་ནི་ལོངས་སྐུ་དང་རང་རྒྱལ་ལྟ་བུ་ཅི་ཡང་མི་བརྗོད་པས་འདུལ་བས་སོ། །ལ་ལ་ནི་དམ་པ་དག་གི་སྐུ་མཐོང་བས་སོ། །ལ་ལ་ནི་བུདྡྷ་དང་ཐེག་པ་ཆེན་པོའི་ཆོས་ཀྱི་གསུངས་དབྱངས་དམ་པ་ཐོས་པའི་སྒྲས་སོ། །གང་དག་ལ་ལ་ནི་རྡོ་རྗེ་སེམས་དཔའ་སངས་རྒྱས་ཀུན་གྱི་དགེ་བའི་བཤེས་གཉེན་དམ་པའི་གསུང་གི་སྒྲས་འདུལ་བས་སོ། །ལ་ལ་ནི་དུག་གསུམ་གྱིས་བསླངས་པའི་ལས་ཀྱིས་ངན་སོང་གི་སྡུག་བསྔལ་སྤྱོད་པར་འགྱུར་བར་ལུང་བསྟན་པའི་སྒྲས་སྨིན་པར་མཛད་དོ། །ལ་ལ་ནི་མཐོ་རིས་སམ་སངས་རྒྱས་ཀྱི་གོ་འཕང་གི་བདེ་བ་མྱོང་བར་གྱུར་པའི་སྒྲས་སོ། །ལ་ལ་ནི་སྡིག་པའི་ལས་ཀྱིས་བདེ་བ་མི་མྱོང་བར་གྱུར་བའི་སྒྲས་སོ།།

བཞི་པ་ལྟ་བ་ཐ་དད་པའི་ཐབས་མཛད་པ་ནི།

ལ་ལ་ནི་མི་རྟོག་པས། ཞེས་པ་ནས། མཐར་ཕྱིན་པས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་མི་རྟོག་པས་སོ། །ལ་ལ་ནི་རྟོག་པས་སོ། །ལ་ལ་ནི་སྡུག་བསྔལ་བས་སོ། །ལ་ལ་ནི་བདེ་བས་སོ། །ལ་ལ་ནི་བདག་མེད་པས་སོ། །ལ་ལ་ནི་བདག་ཡོད་པས་སོ། །ལ་ལ་ནི་ཞི་བས་སོ། །ལ་ལ་ནི་མངོན་སྤྱོད་ཀྱིས་སོ། །ལ་ལ་ནི་རྒྱས་པས་སོ། །ལ་ལ་ནི་དབང་གིས་སོ། །ལ་ལ་ནི་མཐར་ཕྱིན་པས་སོ།།

ལ་ལ་ནི་རྣམ་པར་མི་རྟོག་པ་བསྟན་པས་སོ། །ལ་ལ་ནི་རྟོག་པ་ཤ་སྟག་ཏུ་བསྟན་པས་སོ། །ལ་ལ་ནི་སྡུག་བསྔལ་དུ་བཅུག་པའི་ཐབས་ཀྱིས་སོ། །ལ་ལ་ནི་བདེ་བ་ལ་བཀོད་པར་བྱས་པས་སོ། །ལ་ལ་ནི་ཉན་ཐོས་སམ་བྱང་ཆུབ་སེམས་དཔའ་ལྟ་བུ་གང་ཟག་གི་བདག་གམ། བདག་གཉིས་ཀ་མེད་པར་བསྟན་པས་སོ། །ལ་ལ་ནི་མུ་སྟེགས་༼༢༡༤༽པའམ་ཉན་ཐོས་ལྟ་བུ་གང་ཟག་གི་བདག་གམ་ཆོས་ཀྱི་བདག་ཡོད་པར་བསྟན་པས་སོ། །ལ་ལ་ནི་ཞི་བའི་ཕྲིན་ལས་ཀྱི་ལྟ་བ་དང་སྤྱོད་པའི་ཐབས་ཀྱི་རྣམ་པས་སྨིན་པས་སོ། །ལ་ལ་ནི་མངོན་སྤྱོད་ཀྱི་ཐབས་ཀྱིས་སོ། །ལ་ལ་ནི་ཡེ་ཤེས་ལ་སོགས་རྒྱས་པས་སོ། །ལ་ལ་ནི་ཡོངས་སུ་སྡུད་པ་དབང་གིས་སོ། །ལ་ལ་ནི་ལྷུན་གྱིས་གྲུབ་པའི་ཕྲིན་ལས་མཐར་ཕྱིན་པས་སོ།།

ལྔ་པ་ཐབས་ཐ་དད་ཀྱི་མཛད་པ་ནི༌།

ལ་ལ་ནི་སྲིད་པའི། ཞེས་པ་ནས། བྱ་བ་རྫོགས་པའི་ཐབས་ཀྱིས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་སྲིད་པའི་ལོངས་སྤྱོད་སྤངས་ཏེ་དཀའ་ཐུབ་དྲག་པོས་སོ། །ལ་ལ་ནི་སྲིད་པའི་ལོངས་སྤྱོད་བླངས་ཏེ་འཇོལ་ཉོག་ཏུ་སྤྱད་པས་སོ། །ལ་ལ་ནི་བཀག་པའི་ཐབས་ཀྱིས་སོ། །ལ་ལ་ནི་གང་ལ་མ་རེག་པའི་ཐབས་ཀྱིས་སོ།།

ལ་ལ་ནི་བྱ་བ་རྫོགས་པའི་ཐབས་ཀྱིས་སོ།།

ལ་ལ་ནི་ཉན་ཐོས་ལྟ་བུ་སྲིད་པའི་ལོངས་སྤྱོད་སྤངས་ཏེ་དཀའ་ཐུབ་དྲག་པོས་འདུལ་བས་སོ། །ལ་ལ་ནི་གསང་སྔགས་ནང་པའི་ཐབས་ཀྱི་སྤྱོད་པ་ལྟ་བུ་སྲིད་པའི་ལོངས་སྤྱོད་བླངས་ཏེ་འཇོལ་ཉོག་ཏུ་སྤྱོད་པས་སོ། །ལ་ལ་ནི་རིག་སྔགས་ཀྲི་ཡའི་སྤྱོད་པ་ལྟ་བུར་འདོད་ཡོན་ལྔ་མ་དག་པ་བཀག་པའི་ཐབས་ཀྱིས་སོ། །ལ་ལ་ནི་བདག་ཉིད་ལ་ལོངས་སྤྱོད་ཐམས་ཅད་ཚང་བས་འཁོར་ལོས་སྒྱུར་བའི་རྒྱལ་པོ་ལྟ་བུར་གང་ལ་ཡང་རག་མ་ལས་པའི་ཐབས་ཀྱིས་སོ། །ལ་ལ་ནི་ཨ་ཏི་ཡོ་ག་ལྟ་བུ་བྱ་བ་ཐམས་ཅད་དུས་གཅིག་ཏུ་རྫོགས་པའི་ཐབས་ཀྱིས་འདུལ་བས་སོ།།

དྲུག་པ་དོན་ཐ་དད་པའི་ཐབས་ཀྱི་མཛད་པ་ནི།

ལ་ལ་ནི་སྦྱིན་པས། ཞེས་པ་ནས། ཡང་དག་འཇོག་གིས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་སྦྱིན་པས་སོ། །ལ་ལ་ནི་སྙན་པས་སོ། །ལ་ལ་ནི་མཐུན་པས་སོ། །ལ་ལ་ནི་སྤྱོད་པས་སོ། །ལ་ལ་ནི་ནང་ཡོངས་སུ་གཏོང་བས་སོ། །ལ་ལ་ནི་ཕྱི་ཡོངས་སུ་གཏོང་བས་སོ། །ལ་ལ་ནི་ཐམས་ཅད་བཏང་བས་སོ། །ལ་ལ་ནི་ཐམས་ཅད་ཆགས་པས་ཡོངས་སུ་སྨིན་པར་མཛད་པས་སོ། །ལ་ལ་ནི་རྣམ་པར་གཡེངས་པས་སོ།།

ལ་ལ་ནི་ནང་དུ་ཡང་དག་པར་འཇོག་གིས་སོ།།

ལ་ལ་ནི་གང་ལ་མོས་པ་ལྟར་སྦྱིན་པས་སོ། །ལ་ལ་ནི་སྙན་པར་སྨྲ་བས་སོ། །ལ་ལ་ནི་དོན་མཐུན་པས་སོ། །ལ་ལ་ནི་དོན་སྤྱོད་པས་སོ། །ཞེས་བསྡུ་བའི་དངོས་པོ་བཞིས་འདུལ་བའོ། །ལ་ལ་ནི་ནང་རང་གི་ལུས་ཡོངས་སུ་གཏོང་བས་སོ། །ལ་ལ་ནི་ལོངས་སྤྱོད་ཡོངས་སུ་གཏོང་བས་སོ། །ལ་ལ་ནི་ཕྱི་ནང་ཐམས་ཅད་བཏང་བས་སོ། །ལ་ལ་ནི་ལུས་དང་ལོངས་སྤྱོད་ཐམས་ཅད་ལ་ཆགས་ཤིང་ཞེན་པས་ཡོངས་སུ་སྨིན་པར་མཛད་དོ། །ལ་ལ་ནི་འདུ་བྱེད་ཆེན་པོས་བྱ་བ་མང་པོ་ལ་རྣམ་པར་གཡེང་པས་སོ། །ལ་ལ་ནི་བསམ་གཏན་སྒོམ་ནས་ནང་དུ་ཡང་དག་འཇོག་གིས་སོ།།

བདུན་པ་འདོད་པ་ཐ་དད་པའི་ཐབས་ཀྱི་མཛད་པས་འདུལ་བ་ནི།

ལ་ལ་ནི་འདོད་པ། ཞེས་པ་ནས། སྤྱོད་པས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདོད་པ་བཀག་པས་སོ། །ལ་ལ་ནི་འདོད་པ་སྤྱོད་པས་སོ།།

ལ་ལ་ཆགས་པ་མེད་པ་ནི་འཁྲིག་པའི་འདོད་པ་བཀག་སྟེ་སྤངས་པའི་ཐབས་ཀྱིས་འདུལ་བས་སོ། །ལ་ལ་ཆགས་པ་ཅན་ནི་འདོད་པ་ལ་ལོངས་སྤྱོད་པས་འདུལ་བས་སོ། །དེ་ལྟར་ཐབས་ཀྱི་སྒོ་བརྒྱད་ཅུ་རྩ་བདུན་སྨོས་པ་ལ་སོགས་པ་ཐབས་སྣ་ཚོགས་ཀྱི་མཛད་པས་འདུལ་བར་བྱེད་པའོ། །འདི་དག་ཐམས་ཅད་དུ་རང་ཐད་མ་ཡིན་པར་གང་ལའང་འཆད་པར་འགྱུར་བའི་ལྡེམ་དགོངས་བརྒྱད་ཀྱི་ཆ་དང་༼༢༡༥༽ལྡན་པ་ཡིན་པར་ཡང་དག་པར་ཤེས་པར་བྱའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། རིག་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་ཐབས་ཀྱི་མཛད་པར་རིག་པར་བྱའོ།།

ལང་ཀའི་བདག་པོ། དེ་ལྟར་བསམ་པ་ཐ་དད་ཀྱི་ཕྱིར། གདུལ་ཐབས་ཀྱི་སྒོ་སྣ་ཚོགས་ཇི་སྙེད་པར་བསྟན་པ་དེ་དག་ནི་རྒྱལ་བའི་ཐབས་ལ་མཁས་པར་གཞན་དོན་གྱི་མཛད་པ་ཕུན་སུམ་ཚོགས་པ་ཡིན་པར་རིག་པར་བྱའོ། །ཞེས་གསུངས་སོ། །དེས་ན་ཐེག་པའི་རྒྱལ་པོ་འདི་ལས་ཐབས་ཀྱི་སྒོ་ཐམས་ཅད་མ་འདྲེས་པར་སྟོན་པའང་ཐབས་ཀྱི་རྗེ་བཙུན་ཀུན་གྲོལ་བྱང་ཆུབ་ཀྱི་སེམས་ལ་མངའ་དབང་བསྒྱུར་བས་ཡིན་ཏེ། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། ཀུན་རྫོབ་དངོས་པོར་སྣང་བ་ཡི། །སྣོད་བཅུད་རྫས་སུ་སྣང་བ་ཀུན། །ཆོས་ཉིད་མ་སྐྱེས་རང་བཞིན་ལ། །མིང་དང་ཚིག་ཏུ་བཏགས་པས་འགལ། །ཅིར་སྣང་ཀུན་ཏུ་བཟང་པོ་ལ། །དེ་ཉིད་སེམས་ཀྱི་རོལ་པ་ཡིན། །ཅི་ལྟར་མཛད་པ་འགལ་བ་མེད། །ཕྲིན་ལས་བྱ་བཙལ་མེད་པའོ། །དགེ་བ་དང་ནི་སྡིག་པའི་ལས། །ཐར་པའི་བྱེ་བྲག་ཐམས་ཅད་ཀུན། །སེམས་ཉིད་གཉིས་མེད་ལྷུན་གྲུབ་ལ། །བྱང་ཆུབ་སེམས་ཀྱི་ཕྲིན་ལས་ཏེ། །རྟོག་དང་མི་རྟོག་ལས་འདས་པ། །སངས་རྒྱས་མཛད་པ་ཁྱད་པར་ཆེ། །ཅིར་ཡང་མེད་པས་ཅིར་སྤྱོད་པ། །བདེ་བ་ཆེན་པོའི་མཛད་སྤྱོད་ཡིན། །ཀུན་གཞི་མ་བྱུང་མ་སྐྱེས་པ། །སྒྲོལ་སྦྱོར་ལ་སོགས་ཇི་སྤྱོད་པ། །གང་ལ་ཡོད་མིན་མེད་པ་ནི། །བླང་དོར་མེད་པས་ཕྲིན་ལས་བཟང༌། །ཞེས་གསུངས་པ་ལྟར་ལེགས་པར་ཤེས་ན་དཀྱིལ་འཁོར་གསུམ་གྱི་གནས་ལུགས་མཉམ་ཉིད་ཀུན་ཏུ་བཟང་པོ་ཉིད་མ་འདྲེས་ཡོངས་རྫོགས་སུ་སྟོན་ཅིང་ཐབས་ཀྱི་གསང་བ་ཀུན་ལ་དབང་བསྒྱུར་བའི་ལུང་གི་ཆ་བ་རྨད་དུ་བྱུང་བ་དང་ལྡན་པའི་ཚུལ་ལ་ངེས་པ་རྙེད་དེ་ཆེད་དུ་མཛད་པའི་ཁྱད་པར་ལ་མཁས་པར་འགྱུར་ཏེ། སྐབས་སྦྱོར་བདུན་པ་ལས། སྤྱོད་པའི་རྒྱལ་པོ་བདེ་གཤེགས་རྣམས་ཀྱི་ལས། །རྣལ་འབྱོར་ཐུགས་ཀྱི་སྒྲོམ་བུ་དམ་པ་ལས། །ངེས་པར་གསལ་བའི་ལྡེ་མིག་སྒོ་ཕྱེ་ནས། །རྒྱལ་བའི་བཀའ་ལས་ཕྱུངས་ཏེ་བཤད་པར་བྱ། །ཞེས་པ་ལ་སོགས་པ་ཚད་མེད་དོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཐབས་ཀྱི་མཛད་པ་ཡོངས་སུ་རྫོགས་པའི་ལེའུ་སྟེ་བཞི་བཅུ་རྩ་གཅིག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྒྱལ་བའི་ཐབས་མཁས་ཀྱི་མཛད་པ་ཀུན་ཆོས་ཉིད་ལ་ཡོངས་སུ་རྫོགས་པར་བསྟན་པའི་ལེའུ་སྟེ་བཞི་བཅུ་ཞེ་གཅིག་པ་ཉིད་གསལ་བར་བཤད་དེ་བཀྲོལ་བའོ།། །།༼༢༡༦༽

ལེའུ་ཞེ་གཉིས་པ་སྐུའི་མཛད་པ་ཡོངས་སུ་རྫོགས་པར་མཛད་པ།

༈ བཞི་པ་དཔེ་ཐ་དད་ཀྱི་ལན་སྐུའི་མཛད་པ་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོ་དེས། ལངྐའི་བདག་པོ་ལ་སྨྲས་པ། ལངྐའི་བདག་པོ་

གཞན་ཡང་གང་གི་ཆེད་དུ། སྐུའི་མཛད་པ་ནི་འདི་ལྟ་སྟེ།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དཔེ་དང་སྐུའི་མཛད་པ་གཉིས་བསྟན་པའི་ཕྱིར། དེ་ནས་ཡང་གསང་བ་པའི་བདག་པོ་དེས། ལང་ཀའི་བདག་པོ་ལ་སྨྲས་པ། འོ་ན་ལེའུ་འདི་ལ་མཚོན་པ་དཔེའི་ཚིག་མེད་པས་དཔེའི་ལན་དུ་ཇི་ལྟར་འགྱུར་ཞེ་ན། འདྲ་བ་དང་མི་འདྲ་བ་དང་ཕྱོགས་ཙམ་མཐུན་པའི་དཔེ་བཅད་ནས་དོན་གྱི་བཀོད་པ་ཐ་དད་པ་དཔེར་བླངས་པ་ཡིན་པས། ལན་བརྒྱད་པ་དཔེའི་ཐེ་ཚོམ་གཅོད་པའི་ཕྱིར། ལང་ཀའི་བདག་པོ་ཞེས་སྡུད་པ་པོ་ལ་བོས་ནས་གཞན་ཡང་གདུལ་བྱ་གྲོང་ཁྱེར་གསུམ་གང་གི་ཆེད་དུ་དཔེ་སྒྲོན་མ་དང་འདྲ་བའི་ཚུལ་ནས་སྐུའི་མཛད་པ་ཉེ་བར་བསྟན་པ་ནི་འདི་ལྟ་སྟེ། ཞེས་པའོ།།

གཉིས་པ་རྒྱས་པར་བཤད་པ་ནི།

ཇི་ལྟར་རྡོ་རྗེ་སེམས་དཔའི། ཞེས་པ་ནས། དེ་ཁོ་ནའོ། །ཞེས་པའི་བར་གྱིས་བསྟན་ཏེ།

ཇི་ལྟར་རྡོ་རྗེ་སེམས་དཔའི་སྤྲུལ་པ་འཇིག་རྟེན་དུ་བཀོད་པས། ཐམས་ཅད་ཀྱི་གཟུགས་སུ་སྣང་བ་དེས།

ཐམས་ཅད་སྨིན་པར་མཛད་པ་དེ་ཁོ་ནའོ།།

ཇི་ལྟ་ཇི་ལྟར་ལེའུ་བདུན་པ་ལས་བཤད་པ་ལྟར་རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པ་འཇིག་རྟེན་གྱི་ཁམས་ཀུན་ཏུ་བཀོད་ནས་སྔོན་མའི་ཞིང་ཁམས་སུ་སྣང་བར་མཛད་པས། གདུལ་བྱ་ཐམས་ཅད་ཀྱི་རང་རང་གི་མོས་པ་ལྟར་གཟུགས་སྐུའི་སྒྱུ་འཕྲུལ་སྣ་ཚོགས་སུ་སྣང་བ་དེས། ཐམས་ཅད་ཀྱི་རྒྱུད་སྐལ་བ་དང་འཚམས་པར་སྨིན་པར་མཛད་པ་དེ་ཁོ་ན་གང་ཡིན་པ་ནི་སྐུའི་གསང་བ་བསམ་གྱིས་མི་ཁྱབ་པ་འདིའི་ངོ་བོ འོ།།

གསུམ་པ་ཞབས་བསྡུ་བ་ནི།

འོག་ནས། ལང་ཀའི་བདག་པོ་དེ་དག་ནི། ཞེས་པ་ནས། ཆེད་དུ་མཛད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་གང་གི་ཆེད་དུ། དེ་བཞིན་གཤེགས་པ་སྐུའི་མཛད་པ་ཆེད་དུ་མཛད་པའོ།།

ལང་ཀའི་བདག་པོ། དེ་དག་ནི་གདུལ་བྱ་གང་དག་གི་ཆེད་དུ། དེ་བཞིན་གཤེགས་པའི་སྐུའི་ཕྲིན་ལས་ཀྱི་མཛད་པ་ཆེད་དུ་བཀོད་དེ་དོན་མཛད་པའོ། །དེ་ལྟར་དཔལ་རྡོ་རྗེ་སེམས་དཔའི་སྒྲོན་མའི་ཞིང་གི་སྤྲུལ་པའི་བཀོད་པ་དོན་གྱི་དཔེར་བླངས་པའི་སྐུའི་ཕྲིན་ལས་ཆེད་དུ་མཛད་པ་འདིའི་གསང་བ་དམ་པ་ནི། སྐབས་སྦྱོར་བདུན་པ་ལས། གདོད་ནས་མ་སྐྱེས་རྣམ་དག་དབྱིངས་ཀྱི་སྐུ། །ཡོངས་ལ་ཁྱབ་པས་ཐུགས་རྗེ་སྤྲུལ་པའི་སྐུ། །ཐབས་མཁས་རོལ་པས་ལོངས་སྤྱོད་རྫོགས་པའི་སྐུ། །སྐྱེ་ཤི་མེད་པས་རྡོ་རྗེ་སེམས་ཀྱི་སྐུ། །དོན་དམ་རྟོགས་པས་མངོན་པར་བྱང་ཆུབ་སྐུ། །གཉིས་མེད་གཡུང་དྲུང་བདེ་ཆེན་ཆོས་ཀྱི་སྐུ། །སྐུ་ལྔ་དབྱེར་མེད་རོལ་པའི་ཕྲིན་ལས་ཀྱིས། །དོན་དམ་ཕྲིན་ལས་ཡེངས་པ་མེད་པར་མཛད། །ཅེས་༼༢༡༧༽གསུངས་པ་ལ་སོགས་པ་ལྟར་ངེས་ཤིང༌། ཆོས་དབྱིངས་བྱང་ཆུབ་སེམས་ཀྱི་བཀོད་པ་རང་སྣང་ངང་གི་ཐིག་ལེའི་དཀྱིལ་འཁོར་དུ་མངའ་དབང་བསྒྱུར་བའི་མཛད་པ་ཕུན་སུམ་ཚོགས་པ་སྟེ། དེ་བཞིན་གཤེགས་པ་ཐམས་ཅད་ཀྱིས་སྤྱི་དབང་བསྐུར་བ་དབང་བསྐུར་རྒྱལ་པོའི་རྒྱུད་ལས། སངས་རྒྱས་སྤྲུལ་པ་བསམ་ཡས་པ། །བྱང་ཆུབ་སེམས་ཀྱི་ཆོ་འཕྲུལ་ཏེ། །སངས་རྒྱས་བྱང་ཆུབ་བླ་ན་མེད། །ཐམས་ཅད་སངས་རྒྱས་ང་ཡིས་བྱས། །ཞེས་པ་ལ་སོགས་པ་ཤིན་ཏུ་མང་ངོ༌།།

གསུམ་པ་བྱུང་ཚུལ་གྱི་མཇུག་བསྡུ་བ་ལ་གཉིས་ཏེ། མཛད་པ་གདུལ་བྱ་དང་མཐུན་པར་བསྟན་པ། དེའི་གཏན་ཚིགས་མ་འདྲེས་ཡོངས་རྫོགས་ཀྱིས་ངེས་པར་མཛད་པའོ། །དང་པོ་ནི།

གོང་ནས། དེ་ལྟར་ན་གང་གི་ཆེད་དུ། ཞེས་པ་ནས། མོས་པ་མཐའ་ཡས་གསུང༌། །ཞེས་པའི་བར་གྱིས་བསྟན་ཏེ།

དེ་ལྟར་ན་གང་གི་ཆེད་དུ་མཛད་པའི་དེ་བཞིན་གཤེགས་པའི་དགོངས་པའི་སྒོ་དང་། དེ་བཞིན་གཤེགས་པའི་གསུང་གི་སྒོ་དང་། དེ་བཞིན་གཤེགས་པའི་མཛད་སྤྱོད་ཀྱི་སྒོ་དང་། དེ་བཞིན་གཤེགས་པའི་སྤྲུལ་པའི་མཐའ་དང་། དེ་བཞིན་གཤེགས་པའི་ཐབས་རྒྱ་མཚོ་དང་འདྲ་བའི་སྤྲིན་ཕུང་ལ་ནི། འདི་ལས་གཅིག་ཅེས་གང་ལའང་གཟུང་དུ་མེད་དོ། །དེ་ཅིའི་ཕྱིར་ཞེ་ན། ལངྐའི་བདག་པོ་འདི་ལྟ་སྟེ། སེམས་ཅན་མོས་པ་ཐ་དད་པས། །མཐའ་ཡས་སྐྱེ་བོ་མགུ་དཀའ་བ། །རྒྱལ་བས་ཀྱང་ནི་མི་མགུ་བས། །གང་ལའང་མོས་པ་མཐའ་ཡས་གསུངས།།

དེ་ལྟར་ན་གདུལ་བྱ་གང་གི་ཆེད་དུ་བཀོད་པར་མཛད་པའི་དེ་བཞིན་གཤེགས་པའི་ཐུགས་ཀྱི་དགོངས་པའི་སྒོ་ཞེས་པས་ལེའུ་སོ་དགུ་པ་སྡུད་པ་དང༌། དེ་བཞིན་གཤེགས་པའི་གསུང་གི་སྒོ་ཞེས་པས་ལེའུ་བཞི་བཅུ་པ་སྡུད་པ་དང༌། དེ་བཞིན་གཤེགས་པའི་མཛད་སྤྱོད་ཀྱི་སྒོ་ཞེས་པས་ལེའུ་ཞེ་གཅིག་པ་སྡུད་པ་དང༌། ཡང་ན་འདི་དང་ཐབས་རྒྱ་མཚོ་དྲྭ་བའི་སྤྲིན་དཔུང་གཉིས་ཀྱིས་ལེའུ་འདི་ཉིད་སྡུད་ལ། དེ་བཞིན་གཤེགས་པའི་སྐུའི་སྤྲུལ་པའི་ཕྲིན་ལས་ཀྱི་མཐའ་དང་ཞེས་པས་ལེའུ་འདིའི་སྟོད་བསྡུ་སྟེ། དེ་ལྟར་དེ་བཞིན་གཤེགས་པའི་སྐུ་གསུང་ཐུགས་དང་ཐབས་ཀྱི་མཛད་པ་རྒྱ་མཚོ་ཆེན་པོའི་དབྱིངས་ལྟར་ཟབ་ཅིང་རྒྱ་ཆེ་ལ་གཉིས་སུ་མེད་པའི་བཀོད་པ་དྲྭ་བའི་སྤྲིན་དཔུང་བསམ་གྱིས་མི་ཁྱབ་པར་ཤིན་ཏུ་མང་ལ་འབྲེལ་བ་ནི། འདིའམ་གཅིག་ཅེས་གང་ལའང་ཚད་གཟུང་དུ་མེད་དེ། གཅིག་དང་དུ་མ་ལས་གྲོལ་པའི་ཕྱིར་ངོ་བོ་མ་ངེས་པ་ཉིད་དོ། །དེ་ཅིའི་ཕྱིར་ཞེ་ན། དེའི་གཏན་ཚིགས་ནི། ལང་ཀའི་བདག་པོ། འདི་ལྟ་སྟེ། འགྲོ་བ་སེམས་ཅན་ཐམས་ཅད་བསམ་པ་དང་མོས་པ་ཐ་དད་པ་སྣ་ཚོགས་སུ་གྱུར་པས་རང་རང་གི་བློ་དང་མོས་པ་དང་མཐུན་པར་མ་མཛད་ན་མཐའ་ཡས་པའི་སྐྱེ་བོ་རྣམས་ནི་མགུ་བར་དཀའ་བ་ཡིན་པས་སྐྱོན་ཟད་ཡོན་ཏན་ཀུན་རྫོགས་ཀྱི་རྒྱལ་བ་རྣམ་འདྲེན་དམ་པས་ཀྱང་མཐུན་འཇུག་གི་ཐབས་ཀྱིས་མ་དགོངས་ན་ནི་ནམ་ཡང་མི་མགུ་བས་དྲང་བར་མི་ནུས་པའི་ཕྱིར་ན་རང་རང་གང་ལ་མོས་པ་ལྟར་ཐབས་ཀྱི་སྒོ་མཐའ་ཡས་པར་གསུངས་པ་ཡིན་ཏེ། སྐུའི་བཀོད་པ་ལ་སོགས་པ་ཀུན་ཀྱང་དེ་ལྟར་མཛད་པའི་ཕྱིར་རོ།།

གཉིས་པ་དེའི་གཏན་ཚིགས་མ་འདྲེས་ཡོངས་རྫོགས་ཀྱིས་ངེས་པར་མཛད་པ་ནི།

ལང་ཀའི་༼༢༡༨༽ཞེས་ པ་ནས། གཉིས་སུ་མེད་པར་གནས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ་གང་དམ་པ་རྣམས་དེ་ཁོ་ན་ཉིད་ལས་མ་གཡོས་པར། སེམས་ཅན་གྱི་ཁམས་འདུ་ཤེས་མཐའ་ཐུག་མེད་པ་དང་། སྒྲ་དང་། གཟུགས་དང་། སྤྱོད་པ་མཐའ་ཐུག་པ་མེད་པའི་རྣམས་མི་མཁྱེན་པ་དང་། མ་གསན་པ་དང་། མ་གཟིགས་པ་དང་། མི་འགྲེལ་པ་ནི་གང་ཡང་མེད་དོ། །དེ་ཅིའི་ཕྱིར་ཞེ་ན། ཐམས་ཅད་ནས་ཐམས་ཅད་དུ་སྙིང་པོ་བྱང་ཆུབ་ཉིད་དུ་མ་འདྲེས་པར་ཡོངས་སུ་རྫོགས་པའི་ཕྱིར། གང་གི་སྙིང་པོ་བྱང་ཆུབ་ན་མི་གཡོ་བ་ནི་མི་རྟོག་པ་ཉིད་དང་། སེམས་ཅན་གང་ཏིལ་འབྲུ་ན་གནས་པ་དེ་ལ། རིང་བ་དང་། ཉེ་བ་དང་། གཅིག་པ་དང་། སོ་སོ་མ་ཡིན་པ་སྟེ། དེ་ཁོ་ན་ཉིད་གཅིག་པའི་ཕྱིར་དབྱིངས་གཅིག་ཏུ་གཉིས་སུ་ མེད་པར་གནས་སོ།།

ལང་ཀའི་བདག་པོ། གང་རྒྱལ་བ་རྣམ་འདྲེན་དམ་པ ་རྣམས་ཀྱིས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་དཔེར་ན་མཚོ་དྭངས་པ་ལ་གཟའ་སྐར་ཤར་བ་ལྟར་དེ་ཁོ་ན་ཉིད་ལས་མ་གཡོས་པར་སེམས་ཅན་གྱི་ཁམས་ཀྱི་འདུ་ཤེས་མཐའ་ཐུག་པ་མེད་པ་དང༌། དེ་བཞིན་དུ་སྒྲ་དང༌། གཟུགས་དང༌། སྤྱོད་པ་མཐའ་ལ་ཐུག་པ་མེད་པ་རྣམ་གྲངས་ཇི་སྙེད་ཡོད་པ་རྣམས་སྤྱོད་ཡུལ་དང་བྲལ་ཏེ་རྣམ་པར་མི་རྟོག་བཞིན་དུ་གོ་རིམ་ལྟར་མི་མཁྱེན་པ་དང༌། མ་གསན་པ་དང༌། མི་གཟིགས་པ་དང༌། མི་འགྲེལ་བ་ནི་གང་ཡང་མེད་དོ། །དེ་ཉིད་གཏན་ཚིགས་ཅིའི་ཕྱིར་ཞེ་ན། དུས་ཐམས་ཅད་ནས་གནས་སྐབས་ཐམས་ཅད་དུ་རྒྱལ་བའི་ཐུགས་ཇི་བཞིན་པའི་ཆོས་ཉིད་མངོན་དུ་གྱུར་པའི་སྙིང་པོ་བྱང་ཆུབ་ཆེན་པོའི་ངང་ཉིད་དུ་མཚན་ཉིད་མ་འདྲེས་ལ་ངོ་བོ་གཉིས་སུ་མེད་པར་བྱུང་ཐེབས་པས་ཡོངས་སུ་རྫོགས་ཏེ་གཅིག་དང་ཐ་དད་ལས་འདས་པའི་གཏན་ཚིགས་དེའི་ཕྱིར་ན། རྒྱལ་བ་གང་ཞིག་གི་དགོངས་པ་ཡེ་ནས་གནས་པའི་ཆོས་ཉིད་ཇི་བཞིན་པ་སྙིང་པོ་བྱང་ཆུབ་ཉིད་ཀྱི་ངང་ན་དུས་རྟག་ཏུ་འབྱུང་འཇུག་གི་ཡུལ་མེད་པར་རང་གསལ་ཏེ་མི་གཡོ་བ་ལ། འདུ་ཤེས་ཐམས་ཅད་དང་བྲལ་བས་སྒྲིབ་པ་མེད་པར་རྣམ་པར་མི་རྟོག་སྟེ་གདལ་ཁྱབ་ཆེན་པོའི་ཡེ་ཤེས་ཉིད་དང༌། ཁམས་གསུམ་གྱི་འགྲོ་བ་སེམས་ཅན་གང་ཏིལ་འབྲུ་ཡན་ཆད་ཀྱི་ནང་ན་གནས་ཤིང་འདུག་པ་དེ་དག་ལ། ལམ་པ་ལ་ལྡོག་པས་བྱས་པའི་དབྱེ་བ་ཐ་དད་དུ་ཡོད་ཀྱང༌། ངོ་བོ་དབྱེར་མེད་དུ་མཉམ་པས་རིང་བ་མ་ཡིན་པ་དང༌། ཉེ་བ་མ་ཡིན་པས་ཉེ་རིང་དང་བྲལ་ཏེ་གཉིས་སུ་མེད་པ་དང༌། འཁྲུལ་པ་ལ་སོ་སོར་སྣང་ཡང་དོན་ལ་རང་སྣང་ཉིད་དུ་གཅིག་པ་ཡིན་པས། དངོས་པོ་གཅིག་པ་དང༌། སོ་སོ་ཐ་དད་པ་ཡང་མ་ཡིན་ཏེ་གཅིག་དང་ཐ་དད་ལས་གྲོལ་བའི་ངོ་བོ་དེ་ཁོ་ན་ཉིད་ཀྱི་ངང་དུ་དབྱེར་མེད་ཅིང་སྣུམ་ཚབ་ཆེ་ཆུང་མེད་པར་རང་གསལ་བའི་ཡེ་ཤེས་ཆེན་པོར་གཅིག་པའི་ཕྱིར་གྱི་གཏན་ཚིགས་དེས་ན་དབྱིངས་རང་བཞིན་རྣམ་དག་མཉམ་པ་ཉིད་གཅིག་དང་ཡེ་ནས་གཉིས་སུ་མེད་པར་གནས་པས་ཡུལ་ཐ་དད་ཀྱི་མཐའ་དང་བྲལ་བའི་ཕྱིར་མཁྱེན་ཏུ་བཏུབ་སྟེ་མ་འདྲེས་ཡོངས་རྫོགས་སུ་གསལ་བའི་བླ་དྭགས་མཁྱེན་པ་ཉིད་དུ་མཐར་ཐུག་དཔྱོད་པའི་རིགས་པ་དངོས་པོ་སྟོབས་ཞུགས་ཀྱི་ཚད་མས་ཤིན་ཏུ་ངེས་ཤིང་ཡང་དག་པར་གྲུབ་པས་སོ།།༼༢༡༩༽

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

སྐུའི་མཛད་པ་ཡོངས་སུ་རྫོགས་པར་མཛད་པའི་ལེའུ་སྟེ་བཞི་བཅུ་རྩ་གཉིས་པའོ།།

ཐེག་པ་ཆེན་པོ་ངེས་པར་འབྱུང་བའི་ཚུལ་ལས། གང་གི་ཆེད་དུ་མཛད་པ་ན་ཡང་བྱུང་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱ་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་དགུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྒྱལ་བའི་སྐུའི་མཛད་པ་ཆོས་ཉིད་ལ་ཡོངས་སུ་རྫོགས་པར་བསྟན་པའི་ལེའུ་སྟེ་བཞི་བཅུ་ཞེ་གཉིས་པ་ཉིད་རྣམ་པར་བཤད་དེ་འགྲེལ་པའོ། །དེ་དག་གི་སྒོ་ནས། ཐེག་པ་ཆེན་པོ་གསང་བ་དམ་པ་ངེས་པར་འབྱུང་བའི་ཚུལ་ལས་གྲོང་ཁྱེར་གསུམ་གང་གི་ཆེད་དུ་མཛད་པ་ཆེན་པོ་བཞི་བཀོད་པའི་དུས་ན་ཡང་འབྱུང༌། ཞེས་བྱ་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པའི་དོན་བཤད་པ་སྟེ་བྱུང་ཚུལ་བསྟན་པ་དགུ་པ་ཉིད་ཡང་དག་པར་བཀྲོལ་བའོ།། །།

ལེའུ་ཞེ་གསུམ་པ་རྗེས་སུ་འབྱུང་བར་ལུང་བསྟན་པ།

༈ བཅུ་པ་ལུང་ཆེན་ངེས་པར་བསྟན་པའི་བྱུང་ཚུལ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། བདག་པོས་སྨྲས་པ། ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྔོན་དུ་བྱུང་བའི་ཚིག་བཅུ་གཉིས་པའི་བཅུ་པ། ལུང་ཆེན་ངེས་པར་བསྟན་པ་ན་ཡང་འབྱུང་ཞེས་བྱུང་བའི་དྲི་བ་ཡོངས་སུ་དྲིས་པ། ཀྱེ་གསང་བའི་བདག་པོ་ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་རྒྱུད་དུ་བརྗོད་པའི་སྐབས་སུ། ལུང་ཆེན་ངེས་པར་བསྟན་པ་ན་ཡང་བྱུང་ཞེས་བཀོད་པ་དེ་ཇི་ལྟ་བ་ཞིག་ཏུ་ལུང་བསྟན་ཏེ་གྲགས་པ་ལགས། གསང་བའི་བདག་པོས་སྨྲས་པ།

ལེའུ་འདིས་ངེས་དོན་སྟོན་ལ། དམ་པའི་གསང་ལུང་ཇི་ལྟར་བྱུང་གི་ལན་ཏེ། ཁྱད་པར་རྩལ་འཕངས་ལས་འབྲས་སུ་རྨད་བྱུང་ཆེ་བའི་མཛད་པ། རྒྱུད་གནས་ལུགས་ལས་ལུང་ཆེན་ངེས་པར་བསྟན་པའི་བྱུང་ཚུལ་ངེས་པར་ཕྱིས་འབྱུང་གི་ལྟ་བ་བློན་པོ་རིགས་པ་ཅན་གྱི་ཞལ་ཆེམས་ལྟ་བུ་ཉིད་རྒྱས་པར་སྟོན་ནོ། །དི་ནས་ཡང་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྔོན་དུ་བྱུང་བའི་ཚིག་བཅུ་གཉིས་པའི་བཅུ་པ། ཐུབ་པས་གསང་སྔགས་ཕྱིས་འབྱུང་བར་ལུང་ཆེན་ངེས་པར་བསྟན་པ་ན་ཡང་འབྱུང་ཞེས་བྱུང་བའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ཐེག་པ་ཆེན་པོ་གསང་བ་དམ་པ་འབྱུང་བའི་ཚུལ་སྟོན་པས་གོང་དུ་ལུང་བསྟན་པ་དེ་དེང་འདིར་གཏམ་དུ་མརྗོད་པའི་སྐབས་སུ། ལུང་ཆེན་ངེས་པར་བསྟན་པ་ན་ཡང་འབྱུང་ཞེས་བཀོད་པར་མཛད་པ་དེ་ཉིད་ཇི་ལྟ་བ་ཞིག་ཏུ་ལུང་བསྟན་ཏེ་གདུལ་བྱ་ལ་གྲགསཔར་གྱུར་པ་ལགས། ཞེས་དྲིས་པས། སྟོན་པ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ།།

གཉིས་པ་རྒྱས་པར་བཤད་པ་ལ་གཉིས་ཏེ། ངེས་པར་བཤད་ཀྱིས་ཉོན་ཅིག་པར་གདམས་པ། ཇི་ལྟར་ལུང་བསྟན་ཚུལ་བཤད་པ་དངོས་སོ། །དང་པོ་ནི།

ལང་ཀའི། ཞེས་པ་ནས། ཇི་ལྟ་ཇི་ལྟར་འདི་ལྟ་སྟེ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་དྲི་བ་དེ་ནི་ལེགས་སོ། །ཤིན་ཏུ་ལེགས་སོ། །རབ་ཏུ་ལེགས་སོ། །དེ་ནི་འདི་ལྟར་འཁོར་བ་ཐོག་མ་དང་ཐ་མ་མེད་པའི་དུས་སུ། བསྐལ་པ་ཐོག་མ་དང་ཐ་མ་མེད་པའི་བསྐལ་པ་ལ། སངས་རྒྱས་ཐོག་མ་དང་ཐ་མ་མེད་པར། གང་གིས་སྒྲོན་མར་སྣང་བ་དག་གིས་ཐབས་གཅིག་གི་བྱ་བས། གང་ཕྱོགས་གཅིག་ཏུ་ཕན་པ་ཉིད་དུ་བྱ་བ་ཡོངས་སུ་སྨིན་པར་བྱས་ཏེ། ཐབས་དམ་པས་གང་ཕྱོགས་མེད་པར་ཕན་པ་ཉིད་དུ་ཡོངས་སུ་སྨིན་པར་བྱ་བ་དག གང་གི་རྗེས་སུ་གང་འགྲོ་བར་དམ་བཅས་པ་ཉིད་དེས་འབྱུང་ཞིང་སྣང་བར་ལུང་བསྟན་པ་དེ་ཡོངས་སུ་གྲགས་པར་གྱུར་གྱི། སྒྲོན་མ་གང་གིས་ཉིད་ཀྱི་ཡུལ་སྣང་བ་ལས་མ་གཏོགས་པ། ཐམས་ཅད་སྣང་བ་ནི་མ་ཡིན་པའི་ཕྱིར་རོ། །ལངྐའི་བདག་པོ་ལུང་བསྟན་པ་དེ་ཡང་། ཇི་ལྟ་ཇི་ལྟར་འདི་ལྟ་སྟེ།

གསང་བ་མཆོག་གི་སྡུད་པ་པོ་ལང་ཀའི་བདག་པོ། ཞེས་བོས་ནས་དྲིས་པ་ལ་ལེགས་པར་གནང་བ་སྟེ། དེའང་གང་དྲི་བ་ཉིད་དེ་ནི་སྤྱིར་རང་དོན་དུའང་ལེགས་སོ། །ཁྱད་པར་དུའང་སྔོན་གྱི་རྒྱལ་བས་ལུང་བསྟན་པ་ཡོད་པས་གཞན་དོན་དུའང་ཤིན་ཏུ་ལེགས་༼༢༢༠༽སོ། །ད་ལྟ་ཐུབ་པའི་དབང་པོས་ལུང་བསྟན་པ་ཡོད་པས་གཉིས་ཀའི་དོན་དུའང་རབ་ཏུ་ལེགས་སོ། །ཞེས་གྲངས་སྨོས་པ་སྟེ། སྤྱིར་ཐོག་མ་དང་མཐའ་མ་མེད་པར་འབྱུང་བ་དང༌། སྔོན་དང་ད་ལྟར་ཡང་དངོས་སུ་ལུང་བསྟན་ཚུལ་ཡོད་པས་དུས་གསུམ་གྱི་དབང་དུའང་འགྱུར་རོ། །དེའི་དོན་གྱི་མཚན་ཉིད་ཉེ་བར་བསྟན་པ་ནི་སྤྱིར་འདི་ལྟར་འཁོར་བ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་ཞིང་ཁམས་རྣམས་སུ། དུས་བསྐལ་པ་ཐོག་མ་དང་མཐའ་མ་མེད་པའི་གནས་སྐབས་རྣམས་ལ། སྟོན་པ་སྤྲུལ་པའི་སངས་རྒྱས་ཐོག་མ་དང་ཐ་མ་མེད་པར་བྱོན་ཏེ། གདུལ་བྱ་མོས་པ་སྤྱོད་པའི་ས་པ་གང་དག་གི་སྒྲོན་མར་སྣང་བའི་སྒོ་ནས་རྒྱུའི་ཐེག་པས་དོན་མཛད་པ་དག་གིས་དངོས་སུ་བཞུགས་པའི་ཚེ། མཚན་ཉིད་ཀྱི་ཐེག་པ་འབའ་ཞིག་གིས་དྲངས་ཏེ་ཐབས་ཀྱི་སྒོ་གཉེན་པོ་ཕྱོགས་གཅིག་ཏུ་ངེས་པར་བྱ་བའི་ཆོས་ཀྱི་འཁོར་ལོ་རིམ་པར་བསྐོར་བའི་མཛད་པས། གདུལ་བྱ་གང་ལ་ཡང་སོ་སོའི་ཉོན་མོངས་པའི་སྤྱོད་པ་རྣམས་སྤོང་འགེག་སྦྱོང་བའི་ཐབས་གསུམ་གྱི་སྒོ་ནས་གཉེན་པོ་ཕྱོགས་གཅིག་ཏུ་བསྟན་པས་ཕན་གདགས་པ་ཉིད་དུ་མཛད་དེ་དོན་བྱ་བ་གང་གིས་གདུལ་བྱའི་རྒྱུད་རྣམ་པར་དག་ཅིང་ཡོངས་སུ་སྨིན་པར་བྱས་ཏེ་སའི་རིམ་པ་བསྐྲུན་ཞིང་ནོན་པར་བྱས་ཀྱང༌། ཐབས་དམ་པ་གང་གསང་སྔགས་སྙིང་པོའི་ཐེག་པ་ཕྱོགས་རིས་མེད་པར་ཕན་གདགས་པ་ཅིག་ཆར་དུ་ཡང་དག་པར་རྫོགས་པ་ཉིད་དུ་འཚང་རྒྱ་བའི་ཐབས་མཆོག་དྲྭ་བ་སྤྲིན་དཔུང་ལྟ་བུ་དག་གིས་བཤད་པ་ལྟར་སོ་སོ་ཇི་ལྟར་མོས་པ་ལྟར་འདུལ་བས་ཉོན་མོངས་སྤྱོད་ཅིང་སྤོང་བ་གང་ལ་དགའ་བ་ལྟར་འབྱུང་བའི་ཐབས་ཆེན་པོ་ཕྱོགས་རིས་དང་བྲལ་བས་ཡང་དག་པར་རྫོགས་པའི་ས་ཉིད་དུ་ཡོངས་སུ་སྨིན་པར་བྱ་བའི་གདུལ་བྱ་ཤིན་ཏུ་སྐལ་བ་དང་ལྡན་པ་དག་དགོད་པར་མཛད་པ་དེ་ཉིད་ནི། གདུལ་བྱའི་ཁམས་དབང་བསམ་པ་གང་གི་རྗེས་སུ་གདུལ་ཐབས་གང་ཞིག་འགྲོ་བ་དེས་གདུལ་བར་དམ་བཅས་པ་དེ་ཉིད་ཀྱི་དབང་དེས། ཐབས་མཆོག་སྔགས་ཀྱི་ཐེག་པས་གདུལ་བ་ཐུགས་དམ་དུ་བཅས་པ་ནི་ཕྱིས་འབྱུང་ཞིང་སྣང་བར་འགྱུར་བར་ལུང་བསྟན་པ་དེ་ལྟར་ཐུན་མོང་གི་སྤྱོད་ཡུལ་དུ་ཡོངས་སུ་གྲགས་པར་འགྱུར་གྱི། སྤྲུལ་པའི་སྒྲོན་མ་གང་གིས་ཀྱང་དངོས་སུ་ཁྱབ་གདལ་དུ་མ་གསུངས་ཤིང་ཐབས་ཀྱི་སྒྱུ་འཕྲུལ་མ་མཛད་པས་ཟག་བྲལ་གྱི་སྐུ་དེ་ཉིད་ཀྱིས་མཚན་ཉིད་རྒྱུའི་ཐེག་པའི་ཆོས་འཁོར་བསྐོར་ནས་བསྟན་པ་དེ་ཉིད་ཐུན་མོང་གི་སྤྱོད་ཡུལ་དུ་སྣང་བས་དོན་མཛད་པ་༼༢༢༡༽ལས། དེ་ལ་མ་གཏོགས་པ་གསང་སྔགས་ཐབས་ཀྱི་སྒོ་ཇི་སྙེད་པ་ཐམས་ཅད་སྣང་བ་ནི་མ་ཡིན་པའི་གཏན་ཚིགས་དེའི་ཕྱིར་ན་གསང་བ་ཡོངས་སུ་རྫོགས་པ་རྒྱལ་བ་སྐུ་ལྔའི་བཀའ་དྲི་མ་མེད་པ་ཉིད་སྤྲུལ་པའི་སྐུ་ཁོ་ནས་གསུངས་པར་སྨྲ་བ་ནི་ལོང་བ་ལམ་དུ་ཞུགས་པ་དང་འདྲའོ། །དེ་ཅིའི་ཕྱིར་ཞེ་ན། སྤྲུལ་པ་ནི་བཀའ་དུ་མ་ལས་ཀྱང་འདོད་ཆགས་སྤང་བའི་ཆ་ལུགས་སུ་བཞུགས་པར་གསུངས་པའི་ཕྱིར་སྐུ་དང་བསྟན་པ་མཐུན་པས་གདུལ་བྱའི་དོན་བྱ་བའི་ཕྱིར་དང༌། རིལ་གྱིས་ལུང་བསྟན་པར་གསུངས་པ་ལྟར་ད་ལྟ་ཡང་སྔོན་དུ་རྒྱས་པར་བཀའ་སྩལ་ན་ཕྱིས་ལུང་བསྟན་བརྒྱུད་པའི་བསྟན་པ་གང་དེ་འབྱུང་བར་ཡང་མི་རིགས་པ་ལ་སོགས་པ་སྐྱོན་དུ་མར་འགྱུར་བས། གསང་སྔགས་ནི་ཕྱིས་སྐུ་མྱ་ངན་ལས་འདས་ནས་འཇིག་རྟེན་དུ་འབྱུང་ཞིང་མཛད་པ་ཐ་དད་སྣང་པར་ལུང་བསྟན་པ་དེ་ཉིད་དེ་ཇི་ལྟ་བ་བཞིན་དུ་ཞིང་ཁམས་ཀུན་ཏུ་ཡོངས་སུ་གྲགས་པའང་འཐད་པ་ཁོ་ན་ཡིན་པས་དེ་ལྟར་ཤེས་ན་གཞུང་དང་ཤིན་ཏུ་མཐུན་པར་འགྱུར་རོ། །སྤྱིར་སངས་རྒྱས་ཀྱི་བསྟན་པ་ལ་གསང་སྔགས་ནང་པ་ནི་འབྱུང་བའང་ཡོད་ལ་མི་འབྱུང་བའང་ཡོད་མོད་ཀྲི་ཡ་ནི་ཀུན་ཏུ་འབྱུང་ངོ༌། །ཞེས་ཆོས་རྗེའི་ཕྱག་མཆན་ལས་གསུངས། ལང་ཀའི་བདག་པོ་སྔ་མ་དག་དང་ད་ལྟར་ལུང་བསྟན་པ་དེ་ཡང་ཇི་ལྟ་ཇི་ལྟར་ཉེ་བར་བསྟན་པ་ནི་འདི་ལྟ་སྟེ།

གཉིས་པ་ཇི་ལྟར་ལུང་བསྟན་ཚུལ་བཤད་པ་དངོས་ལ་དྲུག་སྟེ། བདེ་གཤེགས་སྔོན་བྱུང་རྒྱལ་པོས་ལུང་བསྟན་པ། སངས་རྒྱས་འོད་མཐའ་ཡས་ཀྱིས་ལུང་བསྟན་པ། སངས་རྒྱས་ཀུན་གྱི་དགེ་བའི་བཤེས་གཉེན་གྱིས་ལུང་བསྟན་པ། རྒྱལ་བ་བཟང་རྒྱན་དཔལ་གྱིས་ལུང་བསྟན་པ། རྣམ་འདྲེན་དཀོན་མཆོག་དཔལ་གྱིས་ལུང་བསྟན་པ། སྟོན་མཆོག་ཤཱཀྱ་ཐུབ་པས་ལུང་བསྟན་པའོ། །དང་པོ་ནི།

བསྐལ་པ་ཐོག་མ། ཞེས་པ་ནས། དམ་པ་དེས་ལུང་བསྟན། ཞེས་པའི་བར་གྱིས་བསྟན་ཏེ།

བསྐལ་པ་ཐོག་མ་མེད་པ་ལ། །ཇི་སྙེད་གང་བྱུང་བརྗོད་མི་ལང་། །སྐབས་ལས་གཅིག་བཟུང་འདིར་བརྗོད་ཀྱི། །དམ་བཅས་གོ་ཆ་བགོས་ཁྱོད་ཉོན། །བསྐལ་པ་ཀུན་བཀོད་བྱ་བ་ལ། །སངས་རྒྱས་བྱེ་བ་ཕྲག་བརྒྱ་འབྱུང་། །ཀུན་གྱི་ཐ་མར་བྱུང་བ་ཡི། །བདེ་གཤེགས་སྔོན་བྱུང་རྒྱལ་པོ་དེས། །འཁོར་གྱི་ནང་དུ་ལུང་བསྟན་པ། །འཇིག་རྟེན་གཅིག་གམ་གླིང་གཅིག་ཏུ། །བསྐལ་པ་གཅིག་གི་གནས་སྐབས་ལ། །ཡུལ་གཅིག་རྡོ་རྗེ་གདན་གཅིག་ཏུ། །མཛད་པ་མཐར་ཕྱིན་སངས་རྒྱས་གཉིས། །འབྱུང་བར་ཡང་དག་ངས་མ་མཐོང་། །བྱུང་ན་མི་སྲིད་ཆོས་དང་འགལ། །སངས་རྒྱས་མྱ་ངན་འདས་འོག་ཏུ། །རྨད་བྱུང་གསང་བའི་སྙིང་པོ་ཉིད། །རྒྱ་ཆེར་གྲགས་པར་འགྱུར་རོ་ཞེས། །སངས་རྒྱས་ཀུན་གྱི་ལུང་ཆེན་སྟོན། །ཇི་ལྟར་འདིར་ཡང་དེ་བཞིན་ཏེ། །ང་ནི་མི་བཞུགས་འདས་འོག་ཏུ།།

ཀུན་གྱི་དགོངས་པ་འདུས་པ་ཉིད། །བརྒྱ་མཐར་འདུལ་བ་སྣང་བར་འགྱུར། །དེ་སྐད་དམ་པ་དེས་ལུང་བསྟན།།

འཁོར་བ་དང་བསྐལ་པ་ཐོག་མ་དང་ཐ་མ་མེད་པ་རྣམས་ལས་སྤྲུལ་པའི་སྒྲོན་མ་ཇི་སྙེད་པ་རྣམས་ཀྱིས་གང་གསང་སྔགས་ཕྱིས་འབྱུང་བར་ལུང་བར་བསྟན་པ་མཐའ་དག་ནི་བརྗོད་ཀྱིས་མི་ལང་བས་སྐབས་ཀྱིས་ཕྱོགས་ལས་ཆ་གཅིག་བཟུང་ནས་སྟོན་པའི་སྐུ་དང་མཛད་པ་མཐུན་པར་འབྱུང་བ་ཁ་ཅིག་གིས་ལུང་བསྟན་ཚུལ་འདིར་ངེས་པར་བརྗོད་དེ་བསྟན་གྱིས། དམ་བཅས་ཀྱི་གོ་ཆ་ཆེན་པོ་བགོས་པ་ཁྱོད་ཉོན་ཅིག་ཅེས་གདམས་པར་མཛད་དོ། །དེའང་བསྐལ་པ་ཚད་མེད་དཔག་ཏུ་མེད་པའི་སྔོན་རོལ་གྱི་ཆ་གཅིག་གཟུང་བ་ནི། བསྐལ་པ་ཆེན་པོ་ཀུན་བཀོད་ཞེས་བྱ་བ་ལ། །སངས་རྒྱས་བྱེ་བ་ཕྲག་བརྒྱ་བྱུང་བ་ལས། དེ་དག་ཀུན་གྱི་ཐ་མར་བྱུང་བ་ཡི་བདེ་བར་གཤེགས་པ་མངོན་འབྱུང་རྒྱལ་པོ་ཞེས་བྱ་བ་དེས་འཁོར་རྣམས་ཀྱི་ནང་དུ་གསང་སྔགས་ཕྱིས་འབྱུང་བར་ལུང་བསྟན་པར་མཛད་པ། འཇིག་རྟེན་གྱི་གནས་གཅིག་གམ་ཡུལ་གླིང་གཅིག་ཏུ་བསྐལ་པ་གཅིག་གི་གནས་སྐབས་ཉིད་ལ་ཡུལ་གཅིག་གླིང་དབུས་རྡོ་རྗེ་གདན་གྱི་གནས་གཅིག་ཏུ་མཛད་པ་མཐར་ཕྱིན་པའི་སངས་རྒྱས་རྣམ་པ་གཉིས་དུས་གཅིག་ཏུ་འབྱུང་བར་ཡང་དག་ཉིད་དུ་རྒྱལ་བ་ངས་ཀྱང་མ་མཐོང་སྟེ། ཇི་སྐད་དུ། བསྟན་པ་གཅིག་ལ་སྟོན་པ་གཉིས་མི་འབྱུང༌། །ཞིང་ཁམས་གཅིག་ལ་རྒྱལ་པོ་གཉིས་མི་འཚོགས། །ཁྲུ་གང་སྟན་ལ་མི་གཉིས་འདུག་པ་མིན། །རིན་ཆེན་མགོན་པོ་ཉི་མ་ཡོད་བཞིན་དུ། །མཻ་ཏྲི་མགོན་པོ་ཟླ་བས་ཅི་ཞིག་བྱ། །ཞེས་པ་ལྟར་བྱུང་ན་ཡང་ཀུན་ཏུ་མི་སྲིད་པ་ཡིན་པས་ཡང་དག་པའི་ཆོས་དང་འགལ་བར་འགྱུར་རོ། །དེས་ན་སྤྲུལ་པའི་སྒྲོན་མར་གྱུར་པའི་སངས་རྒྱས་གང་དེ་མྱ་ངན་ལས་འདས་པའི་འོག་ཏུ། རྨད་དུ་བྱུང་བའི་ཐེག་པ་གསང་བའི་སྙིང་པོ་འདི་ཉིད་རྒྱ་ཆེར་རབ་ཏུ་གྲགས་པར་འགྱུར་རོ་ཞེས་རྣམ་འདྲེན་སངས་རྒྱས་ཀུན་གྱིས་ལུང་ཆེན་པོ་སྟོན་པ་ཇི་ལྟར་མཛད་པ་དེ་ལྟར་འདིར་ཡང་དེ་བཞིན་དུ་ངེས་ཏེ། སྟོན་པ་མངོན་འབྱུང་རྒྱལ་པོ་ང་ནི་མི་བཞུགས་པར་མྱ་ངན་ལས་འདས་པའི་འོག་ཏུ། སངས་རྒྱས་ཀུན་གྱི་དགོངས་པ་འདུས་པའི་བཀའ་དམ་པ་ཉིད་ལོ་བརྒྱ་འདས་པའི་མཐར་གསང་སྔགས་མཆོག་གིས་འདུལ་བའི་དུས་ལ་བབ་པ་ཡིན་པས་མི་ཡུལ་དུ་སྣང་བར་འགྱུར་ཏེ་ཡོངས་སུ་གྲགས་པར་འབྱུང་ངོ༌། །ཞེས་དེ་སྐད་དམ་པ་དེས་ལུང་བསྟན་པར་མཛད་དོ།།

གཉིས་པ་སངས་རྒྱས་འོད་མཐའ་ཡས་ཀྱིས་ལུང་བསྟན་པ་ནི།

གཞན་ཡང་བསྐུལ་བ། ཞེས་པ་ནས། ཅན་གྱིས་འབྱིན་ལུང་བསྟན། །ཞེས་པའི་བར་གྱིས་བསྟན་ཏེ།

གཞན་ཡང་བསྐལ་པ་ཆེན་པོ་ཉོན། །བསྐལ་པ་མཐའ་ཡས་བྱ་བ་ལ། །སངས་རྒྱས་སུམ་ཁྲི་ལྔ་སྟོང་བྱུང་། །ཀུན་གྱི་མ་ཐར་བྱུང་བ་ཡིས། །སངས་རྒྱས་འོད་མཐའ་ཡས་པ་དེས། །འཁོར་གྱི་ནང་དུ་ལུང་བསྟན་པ། །ཁྲི་ཕྲག་ཕྱེད་དང་བཞི་བྱུང་བའི། །སངས་རྒྱས་སྔ་མ་འདས་རྣམས་ཀྱིས། །སྨིན་བྱས་མ་སྨིན་གང་ཆེད་དུ། །དམ་པ་འབྱུང་བར་ལུང་བསྟན་བཞིན། །འདིར་ཡང་ཡོངས་སུ་བཟུང་བར་གྱིས། །ང་འདས་ནས་ནི་མི་སྣང་ན།།

བརྒྱ་ཕྲག་གཅིག་ན་དོན་སྣང་འགྱུར། །དྲག་ཤུལ་ནན་གྱིས་འབྱིན་ལུང་བསྟན།།

གཞན་ཡང་བསྐུལ་བ་ཆེན་པོ་བློ་གྲོས་ཐབས་ལྡན་ཁྱོད་ཉོན་དང༌། བསྐལ་པ་ཆེན་པོ་མཐའ་ཡས་ཞེས་བྱ་བ་ལ། སྒྲོན་མའི་སངས་རྒྱས་སུམ་ཁྲི་ལྔ་སྟོང་སྟེ་ཁྲི་ཕྲག་ཕྱེད་དང་བཞི་འབྱུང་བ་ལས། དེ་དག་ཀུན་གྱི་ཐ་མར་བྱུང་བ་ཡི། ཞིང་ཁམས་བདེ་བ་ཅན་ཞེས་བྱ་བ་ཡི་སངས་རྒྱས་འོད་མཐའ་ཡས་པ་ཞེས་བྱ་བ་དེས། འཁོར་གྱི་ནང་དུ་ལུང་བསྟན་པ། ཁྲི་ཕྲག་ཕྱེད་དང་བཞི་འབྱུང་བའི། སངས་རྒྱས་སྔ་མ་བྱོན་ཟིན་ཏེ་འདས་པ་རྣམས་ཀྱིས་ཐུན་མོང་གི་གདུལ་བྱ་རྣམས་རྒྱུའི་ཐེག་པའི་སྒོ་ནས་སྨིན་པར་བྱས་པ་ལས། བློ་རབ་ཐེག་པ་ཆུང་ངུ་ལ་མི་མོས་པས་དེ་ཡིས་མ་སྨིན་པའི་གདུལ་བྱ་སྐལ་ལྡན་གང་དག་གི་ཆེད་དུ། གསང་ཆེན་གསང་བ་དམ་པ་འབྱུང་བར་སྔར་གྱི་རྒྱལ་བས་སྤྱིར་ཡང་༼༢༢༣༽ལུང་བསྟན་པ་བཞིན་དུ་བྱེ་བྲག་འོད་མཐའ་ཡས་པ་བདག་གི་བསྟན་པའི་སྐབས་འདིར་ཡང་ཡོངས་སུ་བཟུང་བར་གྱིས་ཤིག དེ་ཡང་སྟོན་པ་ང་ནི་མྱ་ངན་ལས་འདས་ནས་མི་སྣང་བ་ན་ལོ་བརྒྱ་ཕྲག་གཅིག་སོང་བ་ན་གསང་བ་མཆོག་གི་དོན་ཟབ་མོ་འཇིག་རྟེན་དུ་ཡོངས་སུ་སྣང་བར་འགྱུར་ཏེ། དུས་དེར་ཡང་གསང་བའི་བདག་པོ་ཕྱག་ན་རྡོ་རྗེ་དྲག་ཤུལ་ཅན་གྱིས་གསལ་བར་འབྱིན་ཅིང་སྟོན་པར་བྱེད་དོ་ཞེས་ལུང་བསྟན་པར་མཛད་དོ།།

གསུམ་པ་སངས་རྒྱས་ཀུན་གྱི་དགེ་བའི་བཤེས་གཉེན་གྱིས་ལུང་བསྟན་པ་ནི།

བསྐུལ་བ་ཆེན་པོ། ཞེས་པ་ནས། ཉིད་ཀྱིས་གྲགས་པར་འགྱུར། །ཞེས་པའི་བར་གྱིས་བསྟན་ཏེ།

བསྐལ་པ་ཆེན་པོ་གཞན་ཡང་ཉོན། །བསྐལ་པ་གྲགས་ལྡན་བྱ་བ་ལ། །སངས་རྒྱས་བཞི་ཁྲི་དྲུག་སྟོང་བྱུང་། །ཀུན་གྱི་ཐ་མར་བྱུང་བ་ཡི། །སངས་རྒྱས་ཀུན་གྱི་བཤེས་གཉེན་དེས། །འཁོར་གྱི་ནང་དུ་ལུང་བསྟན་པ། །སྟོང་ཕྲག་བཞི་བཅུ་དྲུག་བྱུང་བའི། །དམ་པ་དེ་བཞིན་གཤེགས་རྣམས་ཀྱིས། །གང་གི་ཆེད་དུ་ལུང་བསྟན་བཞིན། །ང་ནི་བདེ་བར་གཤེགས་ཕྱི་ན། །བརྒྱ་ཕྲག་བཅོ་ལྔར་གྱུར་པ་ན། །འབྲས་བུ་ཆུང་བར་སྣང་བ་ཡི། །རྡུལ་བྲལ་དྲི་མེད་དམ་པ་ཉིད། །མཆོག་གི་ཞིང་ཁམས་དམ་པ་འདིར། །སྣང་བ་ཐོབ་པའི་སྐལ་ལྡན་ཅན། །བྲམ་ཟེ་ཤེས་པ་མོ་ཞིག་ལ།།

གནོད་འདུལ་ཉིད་ཀྱིས་གྲགས་པར་འགྱུར།།

བསྐུལ་བ་ཆེན་པོ་ལང་ཀའི་མངའ་བདག་དམ་པ་གཞན་ཡང་ཉོན་དང༌། བསྐལ་པ་ཆེན་པོ་གྲགས་ལྡན་ཞེས་བྱ་བ་ལ། སངས་རྒྱས་བཞི་ཁྲི་དང་དྲུག་སྟོང་འབྱུང་བ་ལས། དེ་དག་ཀུན་གྱི་ཐ་མར་བྱུང་བ་ཡི། མང་པོ་འདུལ་བའི་ཞིང་ཁམས་ཀྱི་སངས་རྒྱས་ཀུན་གྱི་བཤེས་གཉེན་ཞེས་བྱ་བ་དེས་འཁོར་རྣམས་ཀྱི་ནང་དུ་ལུང་བསྟན་པར་མཛད་པ། རྒྱལ་བ་སྟོང་ཕྲག་བཞི་བཅུ་རྩ་དྲུག་འབྱུང་བའི་རྒྱལ་བ་དམ་པ་དེ་བཞིན་གཤེགས་པ་རྣམས་ཀྱིས་གསང་བའི་གདུལ་བྱ་གང་གི་ཆེད་དུ་འབྱུང་འགྱུར་དུ་ལུང་བསྟན་པ་བཞིན། སྟོན་པ་ང་ནི་བདེ་བར་གཤེགས་ཏེ་མྱ་ངན་ལས་འདས་པའི་ཕྱི་ན་ལོ་ནི་བརྒྱ་ཕྲག་བཅོ་ལྔར་གྱུར་ཏེ་སྟོང་དང་ལྔ་བརྒྱ་སོང་ནས་སྐྱེ་རྒུའི་ཚེ་ལོ་ཡང་དེ་སྙེད་ཐུབ་པ་ན། ཚེ་གཅིག་གིས་འབྲས་བུ་བྱང་ཆུབ་ཆེན་པོ་མངོན་པར་སྣང་བ་ཡི་རྡུལ་བྲལ་དྲི་མ་མེད་པའི་གསང་བ་དམ་པ་དེ་ཉིད་མཆོག་གི་ཞིང་ཁམས་དམ་པ་འདིར་ཡང༌། དག་པའི་སྣང་བ་ལ་དབང་ཐོབ་པའི་སྐལ་བ་དང་ལྡན་པ་ཅན་བྲམ་ཟེ་རིགས་ཀྱི་དབྱིངས་སྣང་ཤེས་རབ་རྒྱས་པའི་དམ་པ་ངང་ཚུལ་བཟང་མོ་ཞིག་ལ་དུས་དེར་ཡང་གནོད་འདུལ་ཕྱག་ན་རྡོ་རྗེ་ཉིད་ཀྱིས་བསྟན་ཏེ་ཡོངས་སུ་གྲགས་པར་འགྱུར་རོ། །དེ་ལྟ་བས་ན་ཐོག་མ་དང་ཐ་མ་མེད་པར་ཕྱག་ན་རྡོ་རྗེ་དང་ལང་ཀ་ཁོ་ནས་བཀའ་སྩལ་ཞིང་གསང་སྔགས་བསྡུས་པ་ལ་ཐེ་ཚོམ་མེད་དོ།།

བཞི་པ་རྒྱལ་བ་བཟང་རྒྱན་དཔལ་གྱིས་ལུང་བསྟན་པ་ནི།

གཞན་ཡང་བསྐུལ་བ། ཞེས་པ་ནས། མཐུན་པར་གྲགས་པར་འགྱུར། །ཞེས་པའི་བར་གྱིས་བསྟན་ཏེ།

གཞན་ཡང་བསྐལ་པ་ཆེན་པོ་ཉོན། །བསྐལ་པ་བཟང་རྒྱན་བྱ་བ་ལ། །སངས་རྒྱས་བྱེ་བ་བརྒྱད་ཅུ་འབྱུང་། །དེ་དག་མཐར་ཟད་བྱུང་བ་ཡི། །སངས་རྒྱས་བཟང་རྒྱན་དཔལ་གྱིས་ཀྱང་། །འཁོར་གྱི་ནང་དུ་ལུང་བསྟན་པ། །བྱེ་བ་བརྒྱད་ཅུ་བྱུང་བ་ཡི། །དེ་བཞིན་གཤེགས་པ་སྔ་མ་ཡིས། །ཐེག་པ་འབྱུང་བར་ལུང་བསྟན་བཞིན། །ང་ཡི་སྣང་བ་འདི་ནུབ་ནས། །བརྒྱ་ཕྲག་ཕྱེད་ཀྱི་དུས་དག་ན། །འདི་ཚེ་གཅིག་ལ་གྲུབ་པ་ཡི། །ཆོས་ཀྱི་མེ་ལོང་དམ་པ་ཞིག །ང་འདས་གླིང་གི་འཇིག་རྟེན་འདིར། །འབྱུང་བའི་དགེ་སློང་སྐལ་ལྡན་ཅན། །ཉི་མའི་སྙིང་པོ་བྱ་བ་ལ།།

བསྟན་པའི་ཆར་ཆེན་ཕབ་ནས་ནི། །ཀུན་ཏུ་འཐུན་པར་གྲགས་པར་འགྱུར།།

གཞན་ཡང་བསྐུལ་བ་ཆེན་པོ་ཁྱོད་ཉོན་ཅིག བསྐལ་པ་ཆེན་པོ་བཟང་རྒྱན་ཞེས་བྱ་བ་ལ་སངས་རྒྱས་བྱེ་བ་ཕྲག་བརྒྱད་ཅུ་འབྱུང་བ་ལས་དེ་དག་གི་མཐའ་ཟད་པའམ་ཐ་མར་བྱུང་བ་ཡི་སངས་རྒྱས་བཟང་རྒྱན་དཔལ་ཉིད་ཀྱིས་ཀྱང་འཁོར་གྱི་ནང་དུ་ལུང་བསྟན་པར་མཛད་པ། དེ་ལྟར་རྒྱལ་བ་བྱེ་བ་ཕྲག་བརྒྱད་ཅུར་བྱུང་བ་ཡི་དེ་བཞིན་གཤེགས་པ་སྔ་མ་ཡིས་གསང་བའི་༼༢༢༤༽ཐེག་པ་ཕྱིས་འབྱུང་བར་ལུང་བསྟན་པ་བཞིན་དུ་སྟོན་པ་ང་ཡི་སྐུའི་སྣང་བ་འདི་ཉིད་ནུབ་ནས་ལོ་བརྒྱ་ཕྲག་ཕྱེད་དེ་ལྔ་བཅུ་སོང་བའི་སྐབས་ཀྱི་དུས་དག་ལ་འདི་ལྟར་ཚེ་གཅིག་ལ་འབྲས་བུ་གྲུབ་པ་ཡི། ཆོས་ཀྱི་མེ་ལོང་དམ་པ་བླ་ན་མེད་པ་ཞིག ང་ཉིད་འདས་པའི་རྗེས་ཀྱི་གླིང་གི་འཇིག་རྟེན་འདིར་འབྱུང་བའི་དགེ་སློང་སྐལ་པ་མཆོག་དང་ལྡན་པ་ཅན་ཉི་མའི་སྙིང་པོ་ཞེས་བྱ་བ་ལ། གསང་ཆེན་ལུང་གི་བསྟན་པའི་ཆར་པ་ཆེན་པོ་ཕབ་པར་མཛད་ནས་ནི། ཐུན་མོང་ཀུན་ཏུ་རིགས་དང་མཐུན་པར་ཡོངས་སུ་གྲགས་པར་འགྱུར་རོ།།

ལྔ་པ་རྣམ་འདྲེན་དཀོན་མཆོག་དཔལ་གྱིས་ལུང་བསྟན་པ་ནི།

གཞན་ཡང་བསྐུལ་བ། ཞེས་པ་ནས། ཀུན་གྱིས་ཐོབ་པར་འགྱུར། །ཞེས་པའི་བར་གྱིས་བསྟན་ཏེ།

གཞན་ཡང་བསྐལ་པ་ཆེན་པོ་ཉོན། །བསྐལ་པ་རྫོགས་ལྡན་བྱ་བ་ལ། །སངས་རྒྱས་བྱེ་བ་ཕྲག་བརྒྱ་བྱུང་། །དེ་ཀུན་མཐར་ཟད་བྱུང་བ་ཡི། །སངས་རྒྱས་དཀོན་མཆོག་དཔལ་གྱིས་ཀྱང་། །འཁོར་གྱི་ནང་དུ་ལུང་བསྟན་པ། །བྱེ་བ་ཕྲག་བརྒྱ་བྱུང་བ་ཡི། །དེ་བཞིན་གཤེགས་པ་དེ་རྣམས་ཀྱིས། །ངེས་པ་དམ་པར་ལུང་བསྟན་བཞིན། །ང་སྣང་མི་གནས་དེ་རྗེས་ལ། །ལོ་ནི་བརྒྱད་ཅུ་རྩ་གཉིས་ལ། །གསང་འདུས་ཐེག་ཆེན་སྙིང་པོ་འདི། །བྱང་ཆུབ་སྙིང་པོ་ཅན་ཞེས་པའི། །ས་ལེ་གསེར་གླིང་བྱ་བ་དེར། །རྒྱལ་པོ་བད་སྐྱོབ་སྐལ་ཡོད་ལ། །ལས་དང་ཐུགས་རྗེ་མཐུན་པ་ཡི། །ཆོས་ཀྱི་མིག་གཅིག་འབྱེད་འགྱུར་ཏེ། །རིགས་ལྡན་ཀུན་གྱིས་ཐོབ་པར་འགྱུར།།

གཞན་ཡང་བསྐུལ་བ་ཆེན་པོ་ཉོན་དང༌། བསྐལ་པ་ཆེན་པོ་རྫོགས་ལྡན་ཞེས་བྱ་བ་ལས་སངས་རྒྱས་བྱེ་བ་ཕྲག་བརྒྱ་འབྱུང་བ་ལས་དེ་དག་ཀུན་གྱི་མཐར་ཟད་དམ་ཐ་མར་བྱུང་བ་ཡི་སྒྲོན་མའི་སངས་རྒྱས་དཀོན་མཆོག་དཔལ་གྱིས་ཀྱང་འཁོར་རྣམས་ཀྱི་ནང་དུ་ལུང་བསྟན་པར་མཛད་པ། འདྲེན་པ་བྱེ་བ་ཕྲག་བརྒྱ་ཕྲག་བརྒྱ་བྱུང་བ་ཡི་དེ་བཞིན་གཤེགས་པ་དེ་རྣམས་ཀྱིས་གསང་ཆེན་ངེས་པ་དམ་པ་ཉིད་འབྱུང་བར་ལུང་བསྟན་པ་བཞིན་དུ་སྟོན་པ་ང་ཡི་སྣང་བ་འཇིག་རྟེན་འདི་ན་མི་གནས་པ་དེ་ཡི་རྗེས་ལ་ལོ་ནི་བརྒྱད་ཅུ་རྩ་གཉིས་ན། གསང་བ་ཀུན་འདུས་པའི་ཐེག་ཆེན་གྱི་སྙིང་པོ་དམ་པ་འདི། བྱང་ཆུབ་སྙིང་པོ་ཅན་ཞེས་པའི་གནས་ས་ལེ་གསེར་གླིང་བྱ་བ་དེར་བྱུང་བའི་རྒྱལ་པོ་བདེ་སྐྱོབ་ཞེས་བྱ་བ་གསང་སྔགས་མཆོག་གི་སྐལ་པ་ཡོད་པ་དེ་ལ་གདུལ་བྱའི་དཀར་པོ་དགེ་བའི་ལས་དང་རྒྱལ་བའི་ཐུགས་རྗེ་མཐུན་པ་ཡི་སྒོ་ནས། གསང་ཆེན་ཆོས་ཀྱི་མིག་གཅིག་དྲི་མ་མེད་པ་ཉིད་རྣམ་པར་འབྱེད་ཅིང་སྣང་བར་འགྱུར་ཏེ། གསང་སྔགས་ཀྱི་རིགས་དང་ལྡན་པ་ཀུན་གྱིས་སྤྱོད་ཡུལ་དུ་ཡང་དག་པར་ཐོབ་པར་འགྱུར་རོ།།

དྲུག་པ་སྟོན་མཆོག་ཤཱཀྱ་ཐུབ་པས་ལུང་བསྟན་པ་ནི།

བསྐུལ་བ་ཆེན་པོ། ཞེས་པ་ནས། དེ་སྐད་ལུང་བསྟན་སྣང༌། །ཞེས་པའི་བར་གྱིས་བསྟན་ཏེ།

བསྐལ་པ་ཆེན་པོ་གཞན་ཡང་ཉོན། །བསྐལ་པ་བཟང་པོ་འདི་ཉིད་ལ། །སངས་རྒྱས་བརྒྱ་ཕྲག་བཅུ་བྱུང་བའི། །བཞི་པར་བྱུང་བའི་སྒྲོན་མ་ཉིད། །ཐུབ་པའི་དབང་པོ་ཉིད་ཀྱིས་ནི། །འཁོར་གྱི་ནང་དུ་ལུང་བསྟན་པ། །བྱེ་ཕྲག་བརྒྱད་ཅུ་རྩ་བཞི་ཡི། །མངོན་རྫོགས་རྒྱལ་པོ་དེ་རྣམས་ཀྱིས། །གང་གི་ཕྱོགས་དག་སྨིན་བྱས་ནས། །ཐེག་ཆེན་རྡོ་རྗེ་སྙིང་པོ་འདི། །རྒྱ་ཆེར་གྲགས་པར་འགྱུར་རོ་ཞེས། །ཀུན་གྱི་ལུང་ཆེན་བསྟན་པ་བཞིན། །ང་ནི་འདི་ན་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དག་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་ཏེ། །རྒྱལ་པོ་ཛ་ཞེས་བྱ་བ་ལ། །སྔོན་དུ་ལྟས་སྣང་སྣང་འགྱུར་བ། །དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་དཔའ་དམན་པའི་ལུས། །ལངྐའི་བདག་པོ་ལ་སོགས་ལ། །ལག་ན་རྡོ་རྗེ་སྣང་བར་འགྱུར། །དམ་པས་དེ་སྐད་ལུང་བསྟན་སྣང་།།

བསྐུལ་བ་ཆེན་པོ་བློ་གྲོས་ཐབས་ལྡན་ཁྱོད་ཀྱིས་གཞན་ཡང་ཉོན་དང༌། ད་ལྟ་བསྐལ་པ་བཟང་པོ་འདི་ཉིད་ལ། སངས་རྒྱས་བརྒྱ་ཕྲག་བཅུ་སྟེ་སྟོང་ཕྲག་གཅིག་བྱུང་བའི་འོད་སྲུང་གསེར་ཐུབ་འཁོར་བ་འཇིག་གསུམ་སྔར་འདས་ནས་རྣམ་འདྲེན་བཞི་པར་བྱུང་བའི་སྒྲོན་མ་དམ་པ་ཉིད་དུ་སྣང་བ་ཐུབ་པའི་དབང་པོ་ཤཱཀྱ་སེང་གེ་དེ་ཉིད་ཀྱིས་འཁོར་རྣམས་ཀྱི་ནང་དུ་ལུང་བསྟན་པར་མཛད་པ། འགྲེལ་པ་ལུང་བསྟན་མ་ལས་བསྐལ་པ་རྫོགས་ལྡན་གྱི་གྲངས་བྱེ་བ་ཕྲག་བརྒྱད་ཅུ་རྩ་བཞི་ཡི་སྒྲོན་མའི་བསྐལ་བ་དམ་པ་ལ་བྱོན་པའི་སྟོན་པ་མངོན་རྫོགས་རྒྱལ་པོ་དེ་རྣམས་༼༢༢༥༽ཀྱིས། ཞེས་པར་འགྲེལ་པ་ལྟར་རམ། ཡང་ན་དཔེ་ལ་ལར་བྱེ་བྲག་བརྒྱ་བཅུ་རྩ་བཞི་ཞེས་ཡོད་པས། བྱེ་བྲག་ཏུ་བྱ་ན་སྤྲུལ་བའི་རྣམ་འདྲེན་བརྒྱ་ཚན་བཅུ་པ་སྟོང་ཡོད་པའི་གྲངས་ཀྱི་རྩ་བ་བཞི་ཡི་སྟོན་པ་ཤཱཀྱའི་རྒྱལ་པོ་ང་ཡི་བསྟན་པ་འདིར་ཡང་སྔ་ཕྱིའི་མངོན་རྫོགས་རྒྱལ་པོ་རྒྱལ་བ་འདྲེན་པ་དམ་པ་དེ་རྣམས་ཀྱིས་གདུལ་བྱ་གང་གི་སྐལ་བ་ལྟར་མཚན་ཉིད་ཀྱི་ཐེག་པའི་ཕྱོགས་ལ་མོས་པ་དག་སྨིན་པར་བྱས་ནས། ཐེག་ཆེན་རྡོ་རྗེ་སྙིང་པོ་ཉིད་ནི་མ་འོངས་པའི་དུས་འདི་རུ་རྒྱ་ཆེར་གྲགས་པར་འགྱུར་རོ་ཞེས་ཀུན་གྱིས་ལུང་ཆེན་པོ་བསྟན་པ་བཞིན་དུ་སྟོན་པ་ཐུབ་པའི་དབང་པོ་ང་ནི་འཇིག་རྟེན་འདི་ན་མི་སྣང་བར་མྱ་ངན་ལས་འདས་ནས་ལོ་ནི་བརྒྱད་དང་བཅུ་ཚན་གཉིས་ཏེ་ཉི་ཤུ་རྩ་བརྒྱད་ན་དབང་བསྒྱུར་གྱི་ཁང་བཟང་དང༌། དགའ་ལྡན་དང༌། སུམ་ཅུ་རྩ་གསུམ་སྟེ་ལྷ་གནས་གསུམ་དུ་གྲགས་པ་ཡི། བསྟན་པའི་སྙིང་པོ་དམ་པ་ཞིག །འཛམ་བུའི་གླིང་གི་ཡུལ་དབུས་རྡོ་རྗེ་གདན་འདིའི་ཤར་གྱི་ཕྱོགས་མཚམས་ཀྱི་གནས་ཟ་ཧོར་གྱི་རྒྱལ་ཁམས་སུ། མི་ཡི་རྒྱལ་པོ་ལས་གསང་སྔགས་མཆོག་གི་སྐལ་བ་དང་ལྡན་པའི་རིགས་ཅན་དུ་གྱུར་ཏེ་ཆོས་ཀྱི་རྒྱལ་པོ་དམ་པ་ཛཿཞེས་བྱ་བར་གྲགས་པ་ལ་སྔོན་དུ་རྨི་ལམ་གྱི་ལྟས་བདུན་སྣང་ནས་ད་ལྟ་ལུང་བསྟན་པའི་ཚིག་གིས་གནང་སྟེ་བཀའ་སྩལ་པ་འདི་ཉིད་གསལ་བར་གྲགས་པར་འགྱུར་བ་ནི། རི་བོ་མ་ལ་ཡ་དྲག་ཤུལ་ཅན་སྲིན་པོ་ཞེས་བྱ་བའི་རྩེར་རིགས་མཐུན་པའི་གྲོགས་སྐལ་ལྡན་གྱི་བྱང་ཆུབ་སེམས་དཔའ་ཆེན་པོ་ལ་སོགས་པ་དམན་པའི་ལུས་ཅན་ལང་ཀའི་བདག་པོ་བློ་གྲོས་ཐབས་ལྡན་ལ་སོགས་པ་དམ་པའི་རིགས་ཅན་རྣམས་ལ་སྟོན་པ་གསང་བའི་བདག་པོ་ལག་ན་རྡོ་རྗེས་གསལ་བར་བསྟན་ཏེ་འཇིག་རྟེན་འདིར་སྣང་བར་འགྱུར་རོ། །ཞེས་སྟོན་མཆོག་ཐུབ་དབང་དམ་པས་དེ་སྐད་དུ་ལུང་བསྟན་པར་སྣང་བ་ལྟར་ད་ལྟ་ཡང་ཡོངས་སུ་གྲགས་ཏེ་རྒྱས་པར་གྱུར་པ་ཡིན་ནོ། །དེས་ན་རིག་པ་ཁྱད་པར་ཅན་གྱི་འཁོར་ལ་སྟོན་པ་སྐུ་ལྔའི་བཀོད་པའང་རང་བཞིན་དབྱེར་མེད་ཀྱི་ངོ་བོར་སྣང་བས་ཆོས་སྐུའི་བསྟན་པ་ཡང་གསུངས་པར་བཞེད་ཀྱིས། གདུལ་བྱ་ཐུན་མོང་དུ་གྲགས་པའི་ངོར་སྤྲུལ་སྐུ་ཕྱོགས་གཅིག་ཏུ་སྣང་བ་ཉིད་ནི་སྟོན་པ་མ་ཡིན་ཏེ། ཆོས་སྐུའི་བསྟན་པ་བྱིན་གྱིས་བརླབས་ཀྱིས་སྟོན་པར་མཛད་པའི་ཐུན་མོང་མིན་པའི་སྟོན་པ་ནི་གསང་བའི་བདག་པོ་ཕྱག་ན་རྡོ་རྗེ་ཡིན་པའི་ཕྱིར་རྒྱལ་བ་སྐུ་ལྔའི་བསྟན་པའི་སྙིང་པོ་གང་དེ་ཉིད་འཆད་པར་མཛད་པའོ། །འོ་ན་རྩ་བའི་རྒྱུད་ཀྱི་སྟོན་པ་སྤྲུལ་སྐུ་ཉིད་༼༢༢༦༽དུ་བཞེད་པའང་མི་འཐད་པར་འགྱུར་རོ་ཞེ་ན། འགལ་བ་མེད་དེ། རྩ་བའི་རྒྱུད་དུ་འཇོག་པ་ནི། སྤྲུལ་པའི་སྐུས་བཀའ་སྩལ་བར་མཛད་པའི་བྱུང་ཚུལ་བཅུ་གཉིས་ཀྱིས་བསྟན་པའི་ངོ་བོ་རྒྱལ་བའི་དགོངས་པ་ཚིག་གསུམ་པོ་དེ་ཉིད་རྒྱལ་བ་སྐུ་བཞིའི་བསྟན་པ་ཀུན་དང་དབྱེར་མེད་པའི་གསང་ཆེན་ཐེག་པའི་ཡང་བཅུད་དུ་ངེས་ཏེ་སྔར་སྟོན་པས་བཀའ་སྩལ་བའི་བྱུང་ཚུལ་བཅུ་གཉིས་ཀྱི་དོན་རྩ་བར་བྱས་ནས་རྒྱལ་བ་སྐུ་བཞིའི་དགོངས་པ་བྱིན་རླབས་དང་ངོ་བོ་དང་ཚིག་སྡེབ་ཀྱིས་བཤད་པ་ལྟར་བཤད་པའི་རྒྱུད་ཀྱིས་ཕྱིན་ཅི་མ་ལོག་པར་སྟོན་ནུས་པའམ་དེ་ལྟར་རྟོགས་པ་ལ་བཞག་པ་ཡིན་གྱི། ཐུན་མོང་གི་ངོར་བྱུང་ཚུལ་བཅུ་གཉིས་ཀྱི་ཚེ་ན་གསང་སྔགས་འབྱུང་བར་ལུང་བསྟན་པ་ཙམ་དུ་ཟད་པའི་ཕྱིར་རོ། །དེ་ལྟར་མ་ཡིན་ན་སྔ་ཕྱིར་གླེང་གཞིའི་སྐབས་སུ་སྤྲུལ་སྐུ་ལས་ཐོས་པར་བཤད་པ་རྣམས་ཀྱང་མི་འཐད་པར་འགྱུར་རོ།།

གསུམ་པ་མཇུག་བསྡུ་བ་ནི།

དེ་ལ་སོགས་པ། ཞེས་པ་ནས། ཡིད་རངས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ལ་སོགས་པ་མཐའ་ཡས་པས། །ཐོག་མ་ཐ་མ་ མེད་པ་རུ། །དེ་ལྟ་དེ་ལྟར་གྲགས་པ་ཡིན། །གསང་བའི་བདག ་པོས་དེ་སྐད་གསུངས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་

ངེས་པར་ཡི་རངས་པར་གྱུར་ཏོ།།

དེ་ལ་སོགས་པ་བསྐལ་པ་མཐའ་ཡས་པར་གྱུར་པ་རྣམས་སུ་དུས་ཐོག་མ་དང་ཐ་མ་མེད་པའི་བར་དུ་ད་ལྟའི་ཞིང་ཁམས་ཀྱི་གནས་འདིར་བྱུང་བའི་སྒྲོན་མའི་བསྐལ་པ་སྔ་ཕྱི་ཀུན་ལ་དེ་ལྟ་དེ་ལྟར་གྲགས་པར་གྱུར་པ་ཡིན་ནོ། །ཞེས་སྟོན་པ་གསང་བ་པའི་བདག་པོས་དེ་སྐད་ཅེས་གསུངས་པས་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་ཆེན་པོ་རྣམས་ངེས་པར་ཡིད་རངས་ཏེ་བློ་གྲོས་ཀྱི་སྣང་བ་རྒྱས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པའི་འདུས་པའི་མདོ་ཆེན་པོ་ལས།

རྗེས་སུ་འབྱུང་བར་ལུང་བསྟན་པའི་ལེའུ་སྟེ་བཞི་བཅུ་རྩ་གསུམ་པའོ།།

ཐེག་པ་ཆེན་པོ་ངེས་པར་འབྱུང་བའི་ཚུལ་ལས། ལུང་ཆེན་ངེས་པར་བསྟན་པ་ན་ཡང་བྱུང་ཞེས་བྱ་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱ་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་བཅུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གསང་སྔགས་ཀྱི་གདུལ་བྱ་ལ་གདུལ་ཐབས་རྗེས་སུ་འབྱུང་བར་ལུང་བསྟན་ཚུལ་བཤད་པའི་ལེའུ་སྟེ་བཞི་བཅུ་རྩ་གསུམ་པ་ཉིད་གསལ་བར་བཤད་དེ་རྣམ་པར་བཀྲོལ་བའོ། །ཚུལ་དེ་ཡི་སྒོ་ནས་ཐེག་པ་ཆེན་པོ་ངེས་པར་འབྱུང་བའི་ཚུལ་ལས། ལུང་ཆེན་ངེས་པར་བསྟན་པ་ན་ཡང་འབྱུང་ཞེས་བྱ་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ། བྱུང་ཚུལ་བསྟན་པ་བཅུ་པ་ཉིད་ལེགས་པར་འགྲེལ་ཏེ་རྣམ་པར་བཤད་པའོ། །དེ་ལྟར་རྒྱལ་བ་རེ་རེས་ལུང་བསྟན་པའི་དུས་དེར་བྱུང་བས། འདིར་ཡང་ཐུབ་པའི་དབང་པོས་ལུང་བསྟན་པའི་ཚེ་བྱུང་བའོ། །འོ་ན་འདི་ལྟར་བཤད་པའི་རྩ་བའི་རྒྱུད་ནི། ཐུབ་པ་ཤཱཀྱའི་རྒྱལ་པོས་བཀའ་སྩལ་པའི་བྱུང་ཚུལ་བཅུ་གཉིས་ཁོ་ནར་ངེས་སམ་སྙམ་ན། མ་ངེས་ཏེ། ལུང་བསྟན་བརྒྱུད་པའི་བསྟན་པ་རིན་པོ་ཆེའི་༼༢༢༧༽སྐབས་ཀྱི་དོན་ལ་རྩ་བཤད་དེ་ལྟར་ངེས་པར་བསྟན་གྱིས། གཞན་བྱིན་རླབས་འབྱུང་བའི་བསྟན་པའི་རང་སྐབས་དང་བསྟུན་ན། ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །ཅེས་ལུང་བསྟན་པ་ལ་སོགས་པའི་ཕྱིར་ན། ཀུན་འདུས་རྩ་རྒྱུད་དུ་བཞག་སྟེ། དེའི་དགོངས་དོན་གྱི་སྙིང་པོ་དམ་པ་ཉིད་རྒྱལ་བ་ཀུན་གྱི་ཇི་ལྟར་བསྟན་པ་བཞིན་ད་ལྟའི་དུས་འདིར་ཡང་རྒྱས་པར་བགྲོས་ཏེ་གསལ་བར་གསུངས་པའི་ཕྱིར་དགོངས་པ་འདུས་པ་འདི་ཉིད་བཤད་རྒྱུད་དུ་བཞག་པའང་གཞུང་གི་དགོངས་པ་ཉིད་དུ་ངེས་པར་གྲུབ་པ་ཡིན་ནོ། །དེ་བས་ན་བྱུང་ཚུལ་ནི་འདིར་སྨོས་པ་ཁོ་ནས་ཀྱང་མི་ཆོག་པ་མེད་པ་ལྟ་བུ་ཡིན་ནའང་བཤད་པ་བཞིན་དུ་དགོས་པའི་དབང་གིས་བཅུ་གཉིས་སུ་སྨོས་ཏེ་བསྐལ་པ་ཐོག་མ་དང་ཐ་མ་མེད་པའི་སྐབས་རེ་རེར་གསང་སྔགས་སྙིང་པོའི་བསྟན་པ་བྱུང་ངོ་ཅོག་ལ་བྱུང་ཚུལ་གྱི་དགོས་པ་ཡང་ཚང་བར་བྱུང་བ་དང་མཐར་ཐུག་ཏུ་དེ་ཀུན་ཀྱང་རྒྱལ་བའི་དགོངས་པ་ཚིག་གསུམ་དུ་མ་འདྲེས་ཡོངས་རྫོགས་སུ་འདུས་པར་ཤེས་པར་བྱའོ།། །།

ལེའུ་ཞེ་བཞི་པ་ཆོ་འཕྲུལ་མངོན་བྱུང་བ།

༈ བཅུ་གཅིག་པ་ལས་རྒྱུད་ཡོངས་སུ་གཅོད་པའི་བྱུང་ཚུལ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས། ཞེས་པ་ནས། ལས་རྒྱུད་གཅོད་པ་འབའ་ཞིག་གོ །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྔོན་དུ་བྱུང་བའི་ཚུལ་བཅུ་གཉིས་པའི་བཅུ་གཅིག་པའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཉིད་ཀྱི་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་རྒྱུད་དུ་བརྗོད་པའི་སྐབས་སུ། ལས་རྒྱུད་ཡོངས་སུ་གཅོད་པ་ན་ཡང་བྱུང་ཞེས་བཀོད་པ་དེ་ཇི་ལྟ་བུ་ཞིག་ཏུ་གྲགས་ཤིང་བྱུང་བ་ལགས། གསང་བ་པའི་བདག་པོས་སྨྲས་པ། ལངྐའི་བདག་པོ་གང་གི་དྲི་བ་དེ་ནི་འདི་ལྟ་སྟེ། གང་ཞིག་འདེགས་པའི་ཡུལ་རྣམས་ལ། །གསུམ་དུ་ངེས་པར་སྣང་བ་ནི། །འདོད་ལ་ཞེན་དང་ངེས་པར་འབྱུང་། །གདུལ་དཀའ་དྲག་པོས་གདུལ་བྱ་གསུམ། །གང་གིས་འདེགས་པའི་རྩལ་གསུམ་ནི། །འཁོར་ལོ་རྒྱུན་དང་དོན་དམ་ངེས། །ཆོ་འཕྲུལ་མངོན་པར་འབྱུང་བ་གསུམ། །རང་བཞིན་ཡེ་ནས་སྣང་བ་ཡིན། །ཇི་ལྟར་འདེགས་པའི་ཐབས་རྣམས་ནི། །བསམ་གྱིས་མི་ཁྱབ་གསུམ་ཉིད་དུ། །སྣང་བ་དེ་ཉིད་གང་ཡིན་པ། །རང་བཞིན་ཤུགས་དང་གཉན་པོའི་ཐབས། །ལས་རྒྱུད་གཅོད་པ་འབའ་ཞིག་གོ།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ལ། དགོངས་པ་ཚིག་གསུམ་བགྲོ་བར་མཛོད་ཀྱི་ལན་ཏེ། ཁྱད་པར་རྩལ་འཕངས་ལས་འབྲས་བུ་ལས་རྒྱུད་གཅོད་པའི་མཛད་པ། རྒྱུད་གནས་ལུགས་ལས་ལས་རྒྱུད་ཡོངས་སུ་གཅོད་པའི་བྱུང་ཚུལ་བག་ཆགས་རང་དག་གི་ལྟ་བ་ཁྲུས་མཁན་མཁས་པས་ཁྲུས་བྱས་པ་ལྟ་བུ་ཉིད་རྒྱས་པར་སྟོན་ནོ། །དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྔོན་དུ་བྱུང་བའི་ཚིག་བཅུ་གཉིས་པའི་བཅུ་གཅིག་པ་གང་ཡིན་པ་དེ་ཉིད་ཀྱི་དོན་དུ་དྲི་བ་ཡོངས་སུ་དྲིས་པ།

ཀྱེ་གསང་བའི་བདག་པོ། ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། ལས་རྒྱུད་ཡོངས་སུ་གཅོད་པ་ན་ཡང་འབྱུང་ཞེས་བཀོད་པ་དེ་ཉིད་ཚུལ་ཇི་ལྟ་བ་ཞིག་ཏུ་རྣམ་པར་གྲགས་ཤིང་བྱུང་བ་ལགས། ཞེས་དྲིས་པ་ལས། སྟོན་པ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ལང་ཀའི་བདག་པོ་གང་དྲི་བ་དེ་ནི་འདི་ལྟ་སྟེ། ༼༢༢༨༽གང་ཞིག་ཐབས་དམ་པས་འདེགས་པར་བྱ་བའི་ཡུལ་ལས་རྒྱུད་གཅོད་པའི་གདུལ་བྱ་རྣམས་ལའང་རྣམ་པ་གསུམ་དུ་ངེས་པར་སྣང་བ་ནི་འདི་ལྟར། འདོད་པ་ལྔ་ལ་ཞེན་པས་གདུང་ཞིང་འཇོལ་ཉོགས་སུ་སྤྱོད་པས། འཚོ་བའི་ཟས། རྟེན་པའི་གནས། མཐུན་པའི་གྲོགས་ཁོ་ན་འདོད་པའི་གདུལ་བྱ་དང་དབང་པོ་རབ་འབྲིང་ཐ་མའི་བྱེ་བྲག་གིས་བྱང་ཆུབ་འདོད་ཅིང་འཁོར་བ་ལས་ངེས་པར་འབྱུང་བའི་གདུལ་བྱ་དང༌། ཞེ་སྡང་མེ་ལྟར་འབར་ཞིང༌། གཏི་མུག་མུན་ལྟར་འཐིབས་ལ་འདོད་ཆགས་ཚ་ལ་དང་གར་སྦྱིན་ལྟར་དམ་པས་གོང་མ་གཉིས་ཀྱིས་གདུལ་དཀའ་བས་རྣམ་སྨིན་དྲག་པོའི་ཐབས་ཀྱིས་གདུལ་བར་བྱ་བ་དང་གསུམ་ཡིན་ལ། རྒྱལ་བའི་མཛད་པས་ལས་རྒྱུད་གཅོད་པར་བྱེད་ཅིང་འགྲོ་བ་དེ་དག་ཐབས་གང་གིས་འདྲེན་ཞིང་འདེགས་པར་བྱེད་པའི་ཐེག་པ་མཆོག་གི་གདུལ་བའི་ཐབས་ཀྱི་རྩལ་ཆེན་གསུམ་ནི། འབྱུང་བ་ལྔ་འཁོར་ལོ་ལྟར་བསྐལ་པ་རེའི་བར་དུ་རྒྱུན་མི་ཆད་པར་འབྱུང་བས་འཁོར་ལོ་རྒྱུན་གྱི་ཐེག་པ་དང༌། ཐེག་པ་དགུའི་རིམ་པས་རང་རང་གི་འདོད་པའི་འབྲས་བུ་དམ་པ་མི་བསླུ་བར་ཐོབ་ངེས་པས་དོན་དམ་ངེས་པའི་ཐེག་པ་དང༌། བསྐལ་པ་འཇིག་པའི་དུས་སུ་སྐྱེ་བ་མེད་པའི་ངང་ལས་འབྱུང་བ་ཁྲོས་པའི་ཐུགས་རྗེའི་ཆོ་འཕྲུལ་དྲག་ཤུལ་དུ་འགྱེད་པས་ཆོ་འཕྲུལ་མངོན་པར་འབྱུང་བའི་ཐེག་པ་དང་གསུམ་སྟེ། རང་བཞིན་ཡེ་ནས་རྒྱལ་བའི་ཐུགས་གསང་བ་སྔགས་ཀྱི་ཆོས་ཉིད་དམ་པར་རང་སྣང་བའི་ཕྱིར་ན་ཐེག་པ་གསུམ་ཡང་བྱིན་གྱིས་བརླབས་ཀྱིས་རྒྱལ་བའི་མཛད་པ་ཉིད་ཤར་བ་ཡིན་ནོ།།

ཇི་ལྟར་དོན་བྱེད་ཚུལ་འདྲེན་ཞིང་འདེགས་པའི་ཐབས་ཇི་སྙེད་པ་རྣམས་ཀུན་ནས་བསྡུ་བའི་ཆིངས་ཆེན་པོ་ནི། བསམ་གྱིས་མི་ཁྱབ་པ་རྣམ་པ་གསུམ་ཉིད་དུ་སྣང་བ་དེ་ཉིད་གང་ཡིན་པ་སྟེ། ཐེག་པ་དང་པོས་སྐྱེ་བའི་རྒྱུ་འཚོ་བའི་ཟས། རྟེན་པའི་གནས་བྱེད་དེ་རང་བཞིན་ཤུགས་ཀྱིས་འདུལ་བ་དང༌། བར་པས་ཉོན་མོངས་པ་བཅོད་པའི་གཉེན་པོ་ཐབས་ཀྱིས་འདུལ་བ་དང༌། ཐ་མས་ཕྱི་ནང་གི་བསྐལ་པ་ཟུང་གསུམ་གྱིས་ལོག་ཞེན་སྒྲོལ་བས་ལས་རྒྱུད་གཅོད་པས་གདུལ་བར་མཛད་པ་འབའ་ཞིག་གོ།

གཉིས་པ་རྒྱས་པར་བཤད་པ་ལ་གསུམ་སྟེ། འདོད་པ་ལ་ཞེན་པའི་གདུལ་བྱ་འཁོར་ལོ་རྒྱུན་གྱིས་ཐེག་པས་འདུལ་བ། ངེས་པར་འབྱུང་བའི་གདུལ་བྱ་དོན་དམ་ངེས་པའི་ཐེག་པས་འདུལ་བ། གདུལ་དཀའ་དྲག་པོའི་གདུལ་བྱ་ཆོ་འཕྲུལ་མངོན་འབྱུང་གི་ཐེག་པས་གདུལ་བའོ། །དང་པོ་ལ་གསུམ་སྟེ། སྤྱིར་བསྟན་པ། བྱེ་བྲག་ཏུ་བཤད་པ། ཞབས་བསྡུ་བའོ། །དང་༼༢༢༩༽པོ་ནི།

འཁོར་ལོ་རྒྱུན་དུ། ཞེས་པ་ནས། མི་ཟད་རྣམ་པ་གསུམ། །ཞེས་པའི་བར་གྱིས་བསྟན་ཏེ།

འཁོར་ལོ་རྒྱུན་དུ་སྣང་བ་ཡང་། །ཡེ་ནས་སངས་རྒྱས་གྲགས་པ་ལྔ། །གདུལ་བྱ་གདུལ་བྱེད་ཐམས་ཅད་ཀུན།།

ལྔར་འབྱུང་ལྔར་སྣང་ལྔར་འདུལ་སྒྲོལ། །བསྐྱེད་དང་འཚོ་དང་རྟེན་པ་ཡི། །རྒྱུ་དང་རྐྱེན་དང་གནས་པ་ནི།།

མི་རྟོག་ངང་གིས་ཀུན་འབྱུང་བ། །མེད་ལ་མི་ཟད་རྣམ་པ་གསུམ།།

དེ་ལ་དེ་དག་སོ་སོ་ནས་བསྟན་པའི་ཕྱིར་དང་པོ་གང་སྙམ་པ་ལ། འདི་ལྟར་བསྐལ་པའི་འཁོར་ལོ་བར་མི་ཆད་པར་རྒྱུན་དུ་སྣང་བ་དེ་ཡང༌། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། འབྱུང་བ་མེད་པའི་སྔོན་རོལ་ན། །སངས་རྒྱས་སེམས་ཅན་མིང་ཡང་མེད། །འབྱུང་བ་ལྔ་ཡི་སངས་རྒྱས་ནི། །སངས་རྒྱས་ཀུན་གྱི་རྗེ་བཙན་ཡིན། །ཞེས་གསུངས་པ་ལྟར། ཡེ་གདོད་མ་ནས་རྒྱལ་བ་དམ་པ་ཆོས་ཉིད་དབྱིངས་ཀྱི་སངས་རྒྱས་སུ་གྲགས་པའི་འབྱུང་བ་ཆེན་པོ་ཆེ་བ་ལྔ་དང་ལྡན་པ་དེས་ནི་གདུལ་བར་བྱ་བ་མ་ལུས་པ་ཀུན་གདུལ་བར་བྱེད་པའི་ཐབས་ཀྱིས་ཐམས་ཅད་ཀུན་ནས་དགྲོལ་བ་ཡིན་པས་གདུལ་བྱ་ཡང་འབྱུང་ཆེན་ལྔ་ཡི་བདག་ཉིད་འགྲོ་བ་ལྔར་བྱུང་ནས་འདུལ་བྱེད་ཀྱང་ཆེ་བ་ལྔ་ཡི་སངས་རྒྱས་འབྱུང་བ་ལྔར་སྣང་སྟེ་གདུལ་ཐབས་ཀྱང་འབྱུང་ཆེན་ལྔའི་བཀོད་པ་འདོད་པའི་ཡོན་ཏན་གྱི་སྒྱུ་འཕྲུལ་རྣམ་པ་ལྔས་ངེས་པར་འདུལ་ཞིང་ཡོངས་སུ་སྒྲོལ་བར་བྱེད་དེ། སྔ་མ་ལས། འབྱུང་བ་ལྔ་པོ་མ་ཡི་དབྱིངས། །མ་ལས་སྐྱེས་པས་སངས་རྒྱས་སྲས། །ཞེས་དང༌། འབྱུང་བ་ཤེས་རབ་ཕ་རོལ་ཕྱིན། །འབྱུང་བ་ལྔ་ཡི་འཕྲོ་འདུ་ཡིས། །ཆོས་ཀྱི་དབྱིངས་ཀྱི་ཆོ་རོལ་བསྟན། །སྟོང་པའི་དོན་རྟོགས་འབྱུང་བ་ལ། །ངེས་པའི་རིག་པས་གསལ་བཏབ་ནས། །ཐབས་དང་ལྡན་པའི་བྱིན་རླབས་ཀྱིས། །འདི་དག་འབྱུང་བ་སྟོན་པར་ཟད། །དོན་ལ་དེ་ལྟར་བསྟན་པ་མེད། །ཅེས་སོ། །དེའང་ཚུལ་ཇི་ལྟ་བུ་ཞེ་ན། འགྲོ་བ་ཐམས་ཅད་སྐྱེ་བར་བྱེད་པའི་རྒྱུ་དང༌། འཚོ་བའི་ལོངས་སྤྱོད་ཀྱི་རྐྱེན་དང༌། རྟེན་པར་བྱེད་པའི་གནས་སུ་གྱུར་པ་ཡི་སྒོ་ནས་རྒྱུ་དང་རྐྱེན་དང་གནས་པ་གསུམ་གྱིས་འདུལ་བ་ནི་ཡེ་ཤེས་ཆེན་པོ་ལ་དོན་བྱ་བའི་རྟོག་འཛིན་མི་མངའ་བས་རྣམ་པར་མི་རྟོག་བཞིན་དུ་ཡེ་ནས་ངང་གིས་ལྷུན་གྱིས་གྲུབ་པའི་ཤུགས་ལས་འདོད་ཡོན་ཀུན་དང་འབྱུང་བ་ལྔ་ཉིད་སྣ་ཚོགས་སུ་སྣང་ནས་ཐབས་གསུམ་གྱིས་དོན་བྱེད་པའང༌། དེ་དག་གི་རྒྱུའི་རང་བཞིན་ཐེར་ཟུག་པའི་ངོ་བོ་མེད་པར་དབྱིངས་ཀྱི་ངང་ལ་ཅིར་ཡང་མ་གྲུབ་བཞིན་དུ་དུས་གསུམ་ཀུན་ཏུ་མི་ཟད་པར་རྒྱུ་རྐྱེན་རྟེན་གནས་རྣམ་པ་གསུམ་དུ་འཕེལ་འགྲིབ་མེད་པར་འབྱུང་ཞིང་དོན་མཛད་པ་ཉིད་དོ། །དེར་མ་ཟད་སྤྱི་གཅོད་ལས། ཚིམ་བྱེད་བདེ་བས་དོན་བྱེད་པ་དང༌། སྣང་བྱེད་སྟོན་པས་དོན་བྱེད་པ་དང༌། གོ་བྱེད་བརྡ་ཡིས་དོན་བྱེད་པ་དང་གསུམ་གྱིས་རང་བཞིན་༼༢༣༠༽ཤུགས་ཀྱིས་འདུལ་ལོ། །ཞེས་གསུངས་པ་སོགས་བཀོད་པ་ཚད་མེད་པས་དོན་མཛད་པར་གསལ་ཏེ། ཀུན་ཏུ་བཟང་པོ་ཆེ་བ་རང་ལ་གནས་པ་ལས། འབྱུང་བ་ཡེ་ནས་དག་པ་སྟེ། །འབྱུང་བའི་གནས་ནི་ནམ་མཁའ་ལ། །འབྱུང་བའི་རྒྱུ་ནི་ས་གཞིའོ། །འབྱུང་བའི་ལོངས་སྤྱོད་མེ་ཆུ་སྟེ། །འབྱུང་བའི་སྤྲུལ་པ་རླུང་ཡིན་ནོ། །འབྱུང་བའི་མཚན་ཉིད་རྟོག་པ་མེད། །འབྱུང་བའི་རང་བཞིན་འདུས་མ་བྱས། །འབྱུང་བའི་འབྲས་བུ་དམིགས་པ་མེད། །འབྱུང་བའི་ཡོན་ཏན་གོ་ཞིང་རྟོགས། །འབྱུང་བའི་དོན་ལ་འགྱུར་བ་མེད། །ཆོས་ཉིད་ངང་ལས་ཀུན་འབྱུང་བས། །ཐམས་ཅད་འབྱུང་བས་འབྱུང་བ་ཆེ། །འབྱུང་བའི་རང་བཞིན་དངོས་མེད་པས། །དེས་ན་འབྱུང་བ་སྟོན་པའོ། །ཞེས་དང༌། ཐམས་ཅད་འབྱུང་བ་ལྔ་ཡིས་སྐྱེད། །འབྱུང་བ་ཆེན་པོའི་དོན་རྟོགས་ན། །ཐམས་ཅད་ཆེ་བའི་རྒྱལ་པོར་འགྲུབ། །ཆེ་བའི་རྫུ་འཕྲུལ་ཅིར་ཡང་སྟོན། །བདག་ཉིད་ཐབས་ཀྱི་བྱིན་རླབས་ལས། །འཕྲུལ་པ་ལྔ་ཡི་ཆོ་འཕྲུལ་གྱིས། །མ་རིག་རྟོག་པའི་ལིང་ཏོག་བསལ། །ང་དང་བདག་ཏུ་བྱེད་པ་བཅོམ། །ཕྱོགས་དང་རིས་སུ་ལྟ་བ་བསལ། །མཚན་མའི་འཛིན་རྟོག་གནས་པ་བཀྲོལ། །ཡང་གསང་ངེས་པའི་ལམ་དུ་བཞག །ཐར་པའི་ལམ་ཞེས་དེ་ལ་གསུངས། །ཞེས་པ་ལ་སོགས་པ་ཤིན་ཏུ་མང་ངོ༌།།

གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གང་གི་དབྱིངས་དང༌། ཞེས་པ་ནས། དུ་ཡང་སངས་རྒྱས་མེད། །ཅེས་པའི་བར་གྱིས་བསྟན་ཏེ།

གང་གི་དབྱིངས་དང་མངོན་སུམ་པ། །བདག་ཉིད་ཆེན་པོ་དེ་ཉིད་ནི།།

ཐམས་ཅད་དུ་ཡང་སངས་རྒྱས་མེད།།

དེ་ལྟར་མཛད་པ་གསུམ་གྱིས་དོན་མཛད་པའི་ངོ་བོ་ཕུན་སུམ་ཚོགས་པའི་ཆེ་བ་གང་དང་ལྡན་ཞེ་ན། འབྱུང་ཆེན་དབྱིངས་ཀྱི་རང་བཞིན་ཡེ་ནས་དག་པའི་ཆོས་ཉིད་གང་གི་ཆེ་བ་ནི་རྣམ་པ་ལྔ་དང་ལྡན་པ་སྟེ། ཆོས་ཀྱི་དབྱིངས་སུ་སངས་རྒྱས་པའི་ཆེ་བ་དང༌། མངོན་སུམ་དུ་སངས་རྒྱས་པའི་ཆེ་བ་དང༌། བདག་ཉིད་ཆེན་པོར་སངས་རྒྱས་པའི་ཆེ་བ། དེ་ཉིད་ཡིན་པར་སངས་རྒྱས་པའི་ཆེ་བ་དང་ནི། ཐམས་ཅད་ནས་ཐམས་ཅད་དུ་ཡང་སངས་རྒྱས་པ་མེད་པའི་ཆེ་བའོ།།

གཉིས་པ་རྒྱས་པར་བཤད་པ་ལ་ལྔ་སྟེ། ཆོས་ཀྱི་དབྱིངས་སུ་སངས་རྒྱས་པའི་ཆེ་བ། མངོན་སུམ་པར་སངས་རྒྱས་པའི་ཆེ་བ། བདག་ཉིད་ཆེན་པོར་སངས་རྒྱས་པའི་ཆེ་བ། དེཉིད་ཡིན་པར་སངས་རྒྱས་པའི་ཆེ་བ། ཐམས་ཅད་ནས་སངས་རྒྱས་མེད་པའི་ཆེ་བའོ། །དང་པོ་ནི།

ལང་ཀའི། ཞེས་པ་ནས། སྟོན་པས་མཛད་པར་སྟོན། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། །གང་དག་དབྱིངས་སུ་སངས་རྒྱས་པ། །ཆེན་པོ་ལྔར་སྣང་གང་འདི་དག།

འབྱུང་བ་རྒྱུན་གྱི་བཅོམ་ལྡན་འདས། །ཐུགས་རྗེ་བརྟག་པའི་སངས་རྒྱས་ཏེ། །རང་བཞིན་ཀུན་ལ་ཁྱབ་པར་གནས།།

ཇི་ལྟར་འདོད་དང་འདོད་པར་སྣང་། །སྣང་སྲིད་སྟོན་པའི་སྒྲོན་མར་གྲགས། །འབྱུང་བ་རྒྱུན་གྱི་རྟག་པ་སྟེ།།

རང་བཞིན་སྟོང་པར་མཛད་པ་སྟོན།།

དེ་དག་ཀྱང་རེ་རེ་ནས་འཆད་པའི་ཕྱིར། ལང་༼༢༣༡༽ཀིའི་བདག་པོ་ཞེས་སྡུད་པ་པོ་ལ་བོས་ནས་སངས་རྒྱས་དང་པོ་ཉེ་བར་བསྟན་པ་ནི་འདི་ལྟ་སྟེ། གང་ཆོས་ཐམས་ཅད་ཀྱི་ཆོས་ཉིད་རང་བཞིན་རྣམ་དག་ཆོས་ཀྱི་དབྱིངས་སུ་གནས་ཅི་ལའང་མི་གནས་པར་ངང་གིས་སངས་རྒྱས་པ་ཉིད་དེ། གནས་པ་ཐ་གྲུ་ཆེ་བར་གྱུར་པས་ས་ཆུ་མེ་རླུང་ནམ་མཁའ་ཞེས་འབྱུང་བ་ཆེན་པོ་ལྔར་སྣང་བའི་ཆོས་ཀྱི་མཚན་ཉིད་ཅན་གང་ཡིན་པ་དངོས་པོ་དང་དངོས་པོ་མེད་པའི་ཐ་སྙད་ཀྱི་འབྱུང་གཞིར་གྱུར་པ་འདི་དགའ་འགྲོ་བ་དང་རྩི་འཁྲུངས་ལ་སོགས་པ་རིལ་གྱི་རྒྱུར་གྱུར་བས་འབྱུང་བ་ཆེན་པོ་ཞེས་སུ་གྲགས་ཀྱང་ཡེ་ཕྱི་མོ་ནས་ངོ་བོ་མི་དམིགས་པར་ཆོས་ཉིད་ཀྱིི་དབྱིངས་སུ་གདལ་བ་ལ་སྣང་བ་བར་མཚམས་ མེད་པར་རྒྱུན་མི་ཆད་པའི་བདག་ཉིད་ཀྱི་མཛད་པ ་སྟོན་པས་སྤྲོས་པ་ཡེ་ནས་བཅོམ་ཞིང་རིལ་རྫོགས་པར་འདུས་ཤིང་ལྡན་ཀྱང་གཉིས་མེད་ཀྱི་ངོ་བོ་མཐའ་ཐམས་ཅད་ལས་འདས་ཤིང་ཡོངས་སུ་གྲོལ་བས་བཅོམ་ལྡན་འདས་ཞེས་པའི་མཚན་ཡང་ངེས་པར་འགྲུབ་ལ། དེ་ལྟར་ཆོས་ཀྱི་དབྱིངས་མི་གཡོ་བའི་ངང་ལས་ཐུགས་རྗེ་ཆེན་པོའི་མཛད་པ་གསུམ་སྣང་སྟེ་རྒྱུན་མི་འཆད་པར་ངོ་བོ་ཉིད་ཀྱི་འདུས་མ་བྱས་པར་གྱུར་པས་འཕོ་མེད་རྟག་པའི་སངས་རྒྱས་ཉིད་ཡིན་ཏེ། མེད་པ་ལས་རྒྱུན་དུ་འབྱུང་ཞིང་བྱུང་ཙམ་ན་སྟོན་པ་ཉིད་དུ་སངས་ཏེ་ཕྱོགས་མེད་ཀྱི་ངང་དུ་རང་གསལ་བར་རྒྱས་པའི་ཕྱིར་ཏེ། དེ་ཉིད་ངོ་བོའི་བདག་ཉིད་ལས་མི་གཞན་པར་སྣོད་བཅུད་ཀྱི་རང་བཞིན་ཀུན་ལ་གཉིས་སུ་མེད་པར་མཉམ་ཉིད་གདལ་ཁྱབ་ཆེན་པོར་ཡང་དག་པར་གནས་པ་ལས། སེམས་ཅན་རྣམས་ཀྱིས་ཇི་ལྟར་འདོད་པ་དང་མཐུན་པར་བཟང་ངན་གང་ལ་མོས་པ་ལྟར་འབྱུང་བའི་ཆོས་ཉིད་མི་གཡོ་བའི་ངང་ལས་མཛད་པའི་ངོ་བོ་གསུམ་ཉིད་འདོད་པ་བཞིན་དུ་རྣམ་པར་སྣང་བར་བྱེད་དོ། །དེས་ན་སྣང་སྲིད་སྣོད་བཅུད་གཉིས་ཀ་བསྐྱེད་ཅིང་སྟོན་པའི་ཕྱིར་དང༌། ཐམས་ཅད་དུ་གསལ་བར་གོ་འབྱེད་པས་སྒྲོན་མར་གྱུར་པའི་ཕྱིར་དང༌། ཕྱོགས་མེད་པར་ཀུན་ཏུ་གྲགས་ཏེ་དོན་བྱེད་པའི་ཕྱིར་འབྱུང་བ་ཞེས་པའི་མིང་ཡང་ངེས་པར་གྲུབ་ལ། དེ་ལྟར་སྣང་ལ་རྒྱུན་མི་ཆད་པ་ཉིད་ཀྱི་མཛད་པ་གསུམ་ལ་སོགས་པ་རྟག་ཏུ་སྟོན་པ་སྟེ། དེ་ཉིད་ཀྱི་རང་བཞིན་ཡེ་ནས་སེམས་ཀྱི་དཀྱིལ་འཁོར་འོད་གསལ་བའི་ངོ་བོ་ཡིན་པས་སྣང་ལ་མ་གྲུབ་པས་སྟོང་པ་ཉིད་ནི་ཆོས་ཀྱི་དབྱིངས་ཏེ། དེ་བས་ན་མཛད་པ་གང་ཡང་མི་འགོག་པར་ཀུན་ཏུ་སྟོན་པར་བྱེད་དོ།།

གཉིས་པ་མངོན་སུམ་པར་སངས་རྒྱས་པའི་ཆེ་བ་ནི།

ལང་ཀའི། ཞེས་པ་ནས། ཀུན་གྱི་རྟེན། བསྐལ་པའི་༼༢༣༢༽འཁོར་ལོ་གཅིག་ཏུ་གནས། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་གང་། །མངོན་སུམ་པ་ཡི་སངས་རྒྱས་ནི། །མཁའ་དབྱིངས་ཀུན་ཏུ་མུ་མེད་དབྱིངས། །ཁམས་གསུམ་དངོས་དང་དངོས་མེད་ཀུན། །ཕྱོགས་མཚམས་ཀུན་གྱི་ལུས་དང་གནས། །ཀུན་གྱི་གོ་སྐབས་སྟོང་ཡོད་གནས། །འགྲོ་དང་མི་འགྲོ་རྟེན་པ་ནི། །དངོས་པོ་ཐམས་ཅད་སྐྱེ་འབྱུང་གནས། །ཀུན་ལ་དགའ་བར་སྦྱོར་བ་ནི། །བསྐལ་པའི་འཁོར་ལོ་གཅིག་ཏུ་གནས། །གཉེན་སྡུད་གཞན་སྐྱེད་རང་བཞིན་གསལ། །གྱེས་འཛིན་མི་ལྡོག་རྒྱུན་མི་འཆད། །དགོན་གདུང་ཀུན་བརླན་རྣམ་པར་གཡོ། །བསྐལ་པའི་འཁོར་ལོ་གཅིག་ཏུ་གནས། །ཀུན་སྨིན་མུན་སེལ་ཀུན་སྟོན་སྙོམས། །བསྲེགས་བསྙེན་ཁ་དོག་གསལ་འབྱུང་བ། །བཅུད་འཛིན་ཡོངས་སུ་ལྟས་སྣང་བ། །བསྐལ་པ་གཅིག་གི་འཁོར་ལོ་གནས། །མི་གནས་ཐོགས་མེད་ཤུགས་ཀྱིས་འབྱུང་། །གཟུགས་མེད་གཟུགས་ཀྱི་མཐུ་བས་དྲག །ཡང་གཡོ་ཁྱབ་འཇུག་ཀུན་གྱི་རྟེན། །བསྐལ་པའི་འཁོར་ལོ་གཅིག་ཏུ་གནས།།

ལང་ཀའི་བདག་པོ་ཞེས་སྡུད་པ་པོ་ལ་དེ་ལས་གཞན་ཡང་གང་སངས་རྒྱས་གཉིས་པ་བསྟན་པ་ནི། ཐམས་ཅད་ཀྱི་འདོད་པ་སྐོང་བའི་བྱ་བ་བྱེད་པའི་ཕྱིར་འབྱུང་བ་ལྔ་དབང་པོའི་མངོན་སུམ་དུ་གནས་པ་ཉིད་ཡེ་ནས་མཉམ་པ་ཡི་ངང་དུ་དྲི་མ་མེད་པར་ཁྱབ་པས་སངས་རྒྱས་ཀྱི་ངོ་བོར་གྱུར་པ་ནི། འབྱུང་བ་ནམ་མཁའ་རྣམ་པར་དག་པའི་དབྱིངས་ཀྱི་མཚན་ཉིད་ནི་ཀུན་ཏུ་མུ་མཐའ་ཐུག་པ་མེད་པའི་དབྱིངས་ཆེན་པོ་ཁྱབ་ཅིང་གདལ་བའི་ངང་དུ་ཁམས་གསུམ་གྱི་འདོད་པ་དང་གཟུགས་ཁམས་དངོས་པོ་དང་དངོས་པོ་མེད་པ་གཟུགས་མེད་ཀྱི་ཁམས་ཀུན་གྱི་འགྲོ་བ་ཕྱོགས་མཚམས་སྟེང་འོག་བཅུ་ན་ཡོད་པ་ཇི་སྙེད་ཀུན་གྱི་ལུས་དང་གནས་ལ་སོགས་པ་ཐམས་ཅད་ཀུན་གྱི་གོ་སྐབས་ནམ་མཁའ་སྟོང་པས་འབྱེད་ཅིང་ཀུན་གསལ་བར་བྱེད་ལ་ཤོང་ཞིང་ཡངས་པས་རང་བཞིན་ཀྱིས་ངང་དེར་འདུས་པ་ཇི་སྙེད་ཡོད་པ་ཀུན་བདེ་བ་དང་ལྡན་པར་གནས་པའི་དོན་མངོན་སུམ་དུ་མཛད་དོ། །འགྲོ་བ་ལྔ་དང་མི་འགྲོ་བ་རྩི་ཤིང་ལ་སོགས་པ་ཀུན་གྱི་རྟེན་གཞི་སྲ་བ་ས་ཡི་ངོ་བོ་ནི། ཕྱི་དང་ནང་གི་དངོས་པོ་ལུས་དང་ནགས་ཚལ་དང་རྩི་ཐོག་ལ་སོགས་པ་ཐམས་ཅད་སྐྱེ་བ་དང་འབྱུང་བ་དང་རྟེན་དུ་གནས་པའི་སྒོ་ནས་འགྲོ་བ་ཀུན་ལ་རང་རང་གི་བསམ་པ་གང་ལ་དགའ་ཞིང་ངེས་པར་འདོད་པ་བཞིན་དུ་ཡང་དག་པར་སྦྱོར་ཏེ་ཚིམ་པར་བྱེད་པའི་ཐབས་ཀྱིས་འདུལ་བ་ནི། བསྐལ་ཕྲན་བརྒྱད་ཅུའི་ཡུན་གྱི་འདོགས་གཞིར་གྱུར་པའི་བསྐལ་པའི་འཁོར་ལོ་ཆེན་པོ་གཅིག་གི་བར་དུ་རང་ཆར་གནས་པས་མིང་ཡང་འགྲུབ་བོ། །འོ་ན་ནམ་མཁའ་ལ་ནི་འཇིག་ཆགས་མེད་པས་ངེས་པར་ཐེག་པ་དེ་ཉིད་མ་ཡིན་ནོ་ཞེ་ན། བཞི་ལ་འཇིག་ཆགས་སྟོང་གནས་ཡོད་པས་ཕལ་ཆེ་བའི་དབང་དང༌། གཞི་ལ་བཞིར་འབྱུང་བའི་ཡང་གཞིར་གྱུར་ཏེ། ནམ་མཁའ་མེད་ན་སྣང་བར་མི་འགྱུར་བའི་ཕྱིར་དང༌། ཐེག་པ་དེ་དག་ཏུ་གྱུར་པ་ཡང་ནམ་མཁའི་མཛད་སྤྱོད་ཀྱིས་གོ་འབྱེད་པའི་དབང་གིས་ཡིན་པའི་ཕྱིར་ངེས་པར་ཐེག་པ་ཡིན་ནོ། །འབྱུང་བ་ཆུ་ཁམས་ཀྱི་བྱེད་ལས་དང་མཚན་ཉིད་གང་གཤེར་བས་ཡུལ་མཉེན་ཞིང་གང་དུའང་དྲང་དུ་བཏུབ་པས་ལྕུག་ལ་ཀུན་སྡུད་པ་དང་ཕྱི་ནང་གི་དངོས་པོ་གཞན་ཀུན་སྐྱེད་པའི་ལས་བྱེད་ཅིང་མདངས་ལ་སོགས་པ་རང་བཞིན་གྱིས་གསལ་བར་བྱེད་པ་དང་གྱེས་པ་འཛིན་པའི་ལས་ཀྱིས་ཡོངས་སུ་སྡུད་པ་དང༌། གྱེན་དུ་མི་ལྡོག་པར་རྒྱུན་མི་འཆད་པར་འབབ་ཅིང་འགྲོ་བ་དང༌། དགོན་པའི་ས་གཞི་སྐམ་པོ་དང་སྐོམ་པས་གདུང་བ་ཀུན་རླན་ཞིང་ཚིམ་པར་བྱེད་པ་དང༌། དུས་གསུམ་དུ་རྣམ་༼༢༣༣༽པར་གཡོ་ཞིང་རླབས་འབྱུང་བའི་སྒོ་ནས་སྐྱེ་འཚོ་རྟེན་པའི་ལས་གསུམ་བྱེད་པའང་སྤྱིར་བསྐལ་པའི་འཁོར་ལོ་ཆེན་པོ་གཅིག་གི་ཡུན་དུ་ཐ་སྙད་བཞིའི་གཞིར་གྱུར་ཞིང་བྱེ་བྲག་བསྐལ་ཕྲན་ཉི་ཤུའི་བར་དུ་གནས་པའོ། །དེ་བཞིན་དུ་འབྱུང་བ་མེ་ཁམས་ཀྱི་ལས་དང་མཚན་ཉིད་ཀྱང་དྲོད་སྙོམས་པར་བྱས་ནས་ཕྱི་ནང་ཀུན་སྨིན་པར་བྱེད་པ་དང་འོད་ཀྱིས་མུན་པ་སེལ་བ་དང༌། མཐོང་བྱའི་རྫས་ཀུན་གསལ་བར་སྟོན་པ་དང་ཕྱི་ནང་གི་དངོས་པོ་ཐམས་ཅད་ལ་སྙོམས་པར་ཁྱབ་པ་དང་དངོས་པོ་སྲེག་སྟེ་ཚིག་པར་བྱེད་པ་དང༌། རང་བཞིན་མཉེན་ལ་གྱེན་དུ་འབར་བ་དང༌། རང་གི་ཁ་དོག་ཤིན་ཏུ་གསལ་བར་འབྱུང་བ་དང༌། ཕྱི་ནང་གི་བཅུད་འཛིན་ཏེ་མི་གཏོང་བ་དང་དེ་དག་ཡོངས་སུ་བརྟས་པར་བྱེད་པའི་ལས་སུ་སྣང་བ་དང་བྱེད་པའི་ལས་དགུ་དང་ལྡན་པའི་མཚན་ཉིད་ཅན་གྱིས་རྩ་བ་གསུམ་གྱིས་དོན་མཛད་པ་ཡང་བསྐལ་པ་ཆེན་པོ་གཅིག་གི་འཁོར་ལོར་རང་ཆར་གྱུར་ཏེ་སྤྱིར་གནས་སོ། །རླུང་གི་ཁམས་ཀྱི་མཚན་ཉིད་དང་བྱེད་པ་ཡང་གཡོ་བར་གྱུར་ཏེ་མི་གནས་པས་གཅིག་ཏུ་མི་ཟིན་པ་དང་གང་དུའང་ཐོགས་པ་མེད་པར་ཤུགས་ཀྱིས་འབྱུང་བ་དང༌། རླུང་ཉིད་ལ་དབྱིབས་དང་ཁ་དོག་གི་གཟུགས་མེད་པར་གཟུགས་ཀྱི་རྣམ་པའི་མཐུ་བས་ཀྱང་སྟོབས་དྲག་པར་འབྱུང་བ་དང༌། ལྗིད་མེད་པས་ཡང་ལ་ཀུན་ཏུ་གཡོ་ཞིང་འབྱུང་བ་དང༌། ཕྱི་ནང་ཐམས་ཅད་དུ་ཁྱབ་པར་འཇུག་པ་དང༌། སྣོད་བཅུད་ཀུན་གྱི་གཞི་རྟེན་དུ་གྱུར་པའི་བྱེད་པ་དང་ལྔ་ཡིས་རྒྱུ་རྐྱེན་གནས་གསུམ་དུ་དོན་སྤྱོད་ལ་བསྐལ་པའི་འཁོར་ལོ་ཆེན་པོ་གཅིག་ཏུ་གནས་པའང་ཆ་གཅིག་བཟུང་བ་སྟེ་སྤྱིར་འཁོར་མོར་འབྱུང་བ་ཀུན་ལ་འདྲའོ། །དེ་དག་གིས་མངོན་སུམ་དུ་དོན་རྫོགས་པར་མཛད་ལ་ཡང་དག་པར་རྟོགས་ན་དབྱིངས་ཇི་བཞིན་པའི་ངོ་བོར་མངོན་སུམ་དུ་སངས་རྒྱས་པའི་ཆེ་བར་ཡང་སྣང་བའི་ཕྱིར་རོ། །དེས་ན་སྤངས་གར་ཡང་མ་སྤངས་པར་མངོན་པར་སངས་རྒྱས་པར་གྲུབ་བོ།།

གསུམ་པ་བདག་ཉིད་ཆེན་པོར་སངས་རྒྱས་པའི་ཆེ་བ་ནི།

ལང་ཀའི། ཞེས་པ་ནས། མ་རྨོངས་ཤེས་བྱ་རྫོགས། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། །བདག་ཉིད་ཆེན་པོའི་སངས་རྒྱས་ནི། །ཀུན་ཤོང་ཡེ་འཚོ་ཀུན་ཏུ་བཟང་།།

ཀུན་ཐེག་ལྷུན་སྡུག་ཡེ་ཤེས་གཟུགས། །ཀུན་སྡུད་མཉམ་སྦྱོར་ཏིང་ངེ་འཛིན།།

སྒྲིབ་སེལ་ལྷག་མཐོང་ཤེས་རབ་འབར། །ཐོགས་མེད་མ་རྨོངས་ཤེས་བྱ་རྫོགས།།

ལང་ཀའི་བདག་པོ་གཞན་ཡང་འདི་ལྟ་སྟེ། དངོས་པོ་བརྟན་གཡོ་ཐམས་ཅད་འབྱུང་བའི་བདག་ཉིད་ལས་གཞན་མེད་པའི་ཕྱིར་དང་དེ་ཉིད་ཀྱང་ཆོས་ཉིད་དབྱིངས་ཀྱི་ངོ་བོར་རག་གར་ཡང་མ་ལུས་པར་བདག་ཉིད་ཆེན་པོའི་ངང་དུ་ཡེ་ནས་སངས་རྒྱས་པའི་རང་བཞིན་བསྟན་ པ་ནི། འབྱུང་བ་ལྔ་ཉིད་རིལ་གྱི་བདག་ཉིད་དུ་རྡུལ་མེད ་པར་སངས་ལ་རང་གསལ་བར་རྒྱས་ཏེ་བརྡལ་བ་ཆེན་པོར་མཉམ་༼༢༣༤༽པ་ནི་གོང་ན་མེད་པའི་མཆོག་དམ་པ་སྟེ། ཡེ་ཤེས་ཆེན་པོའི་ཀློང་ཉིད་ནམ་མཁར་གསལ་བ་ནི་དབྱིངས་ཀྱི་ནམ་མཁའ་རྟོགས་པའི་འབྲས་བུར་ཤར་བ་སྟེ། དངོས་པོ་ཕྱི་ནང་ཀུན་ཡེ་ཤེས་ཆེན་པོའི་དབྱིངས་སུ་འདུས་ཤིང་ཤོང་བས་ཐམས་ཅད་ཡེ་ཤེས་ནམ་མཁའི་ངོ་བོར་ཡེལ་འཕྱོ་བའམ་ཡངས་པར་གདལ་བ་ནི་དྭངས་སྙིགས་སྤྱད་པའི་མཚན་ཉིད་མེད་པར་ཀུན་ཏུ་བཟང་པོའི་ཀློང་དམ་པ་སྟེ། ལེའུ་ཐ་མ་ལས། སྣང་སྟོང་གོ་འབྱེད་ཀུན་ཁྱབ་མཁའ། །ཞེས་སོ། །ས་ཉིད་ཆོས་ཀྱི་དབྱིངས་ལས་རང་རིག་པར་རང་སྣང་བ་ནི། ཆོས་ཐམས་ཅད་གང་ཡང་ཀུན་ནས་འདེགས་ཤིང་ཐེག་པས་དབྱིངས་རང་བཞིན་དག་པ་ཉིད་བརྗིད་ཆེ་བས་ལྷུན་སྡུག་སྟེ་ཡེ་ཤེས་ཀྱི་སྤྱི་གཟུགས་སམ་ཐུགས་རྗེ་མཆོག་གི་སྐུ་ཞེས་བྱ་སྟེ། ཐེག་ཆེན་དབྱིངས་ལ་ཀུན་གནས་ས། །ཞེས་སོ། །ཆུའི་བྱེད་པས་ཀུན་སྡུད་པ་ནི་གསང་སྔགས་ཇི་བཞིན་པའི་ངོ་བོར་མཉམ་པར་སྦྱོར་བས་བློ་ལས་འདས་པའི་ཏིང་ངེ་འཛིན་གྱི་དགོངས་པ་དུས་གསུམ་དུ་འབྱུང་འཇུག་དང་བྲལ་བའི་འབྲས་བུ་མཆོག་གི་རང་ཉིད་དེ། ཞི་གནས་རྣམ་དག་ཆུ་ཆེན་པོ། །ཞེས་སོ། །དབྱིངས་ཇི་བཞིན་པ་གསལ་བར་རྟོགས་པའི་རང་བྱུང་རིག་པའི་མེས་སྒྲིབ་པའི་མུན་པ་སེལ་བ་ཉིད་ནི། ཡེ་ཤེས་ལྷག་མཐོང་ཆེན་པོར་རང་བཞིན་ཇི་ལྟར་བར་མངོན་དུ་བྱས་པའི་ཤེས་རབ་མཆོག་ཉིད་རབ་ཏུ་འབར་ཏེ་འོད་གསལ་དག་པའི་རང་སྣང་རང་རིག་པའི་མངོན་སུམ་དུ་རང་ཤར་བས་ཟག་མེད་ཡུལ་ལས་འདས་པའི་ངོ་བོ་སྟེ། ལྷག་མཐོང་ཡེ་ཤེས་འོད་འབར་མེ། །ཞེས་སོ། །ཡེ་ཤེས་ཀྱི་རླུང་གི་བྱེད་ལས་གང་ལའང་ཐོགས་པ་མེད་པ་ཉིད་ཀྱིས་མངོན་པར་རྫོགས་པར་བྱང་ཆུབ་པའི་ཡེ་ཤེས་ཆེན་པོ་རྣམ་པ་ཐམས་ཅད་ཀུན་ལ་མ་རྨོངས་པའི་གཟིགས་པ་རྣམ་པར་དག་པས་ཤེས་བྱ་ཇི་ལྟ་བ་དང་ཇི་སྙེད་པས་བསྡུས་པ་མཐའ་དག་མ་འདྲེས་ཡོངས་སུ་རྫོགས་པར་གསལ་བའི་ བདག་ཉིད་ཆེན་པོ་སྟེ། གང་ལའང་ཐོགས་པ་དང་ཉམ་ང་བ་མེད ་པས་གདོད་མའི་ཡེ་ཤེས་དམ་པ་ཡིན་པས་འཕྲལ་དུ་བྱས་པ་ལྟ་བུ་མ་ཡིན་ནོ། །དེས་ན་ལེའུ་ཐ་མ་ལས། ཤེས་བྱ་ཐོགས་མེད་འཐོར་བའི་རླུང༌། །ཞེས་འབྱུང་ངོ་། །དེ་ལྟར་ཐམས་ཅད་འབྱུང་བའི་བདག་ཉིད་ལས་བྱུང་བའི་ཡེ་ཤེས་ཆེན་པོར་ངེས་ཤིང་དེ་ཉིད་རང་གི་སེམས་ཀྱི་ཆོས་ཉིད་དུ་ཡང་དག་པར་གནས་པའོ།།

བཞི་པ་དེ་ཉིད་ཡིན་པར་སངས་རྒྱས་པའི་ཆེ་བ་ནི།

ལང་ཀའི། ཞེས་པ་ནས། ཀུན་བྱེད་གདོན་མི་ཟ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་ནི། །དེ་ཉིད་ཡིན་པའི་སངས་རྒྱས་ནི། །ནམ་མཁའ་རྣམ་པར་སྣང་བར་མཛད།།

ས་ནི་མི་གཡོ་རྡོ་རྗེ་འཛིན། །མེ་ནི་རིན་ཆེན་འབྱུང་བར་ལྡན། །ཆུ་ནི་གཉེན་གསལ་སྣང་མཐའ་ཡས།།

རླུང་ནི་ཀུན་བྱེད་གདོན་མི་ཟ།།

ལང་ཀའི་བདག་པོ་ཞེས་བོས་ནས་གཞན་ཡང་ཉེ་བར་བསྟན་པ་ནི་འབྱུང་བ་ལྔ་༼༢༣༥༽རིགས་ལྔ་ཡེ་ཤེས་ལྔའི་རང་བཞིན་ཡིན་པའི་ཕྱིར་ལྟོས་ཅི་ལ་ཡང་མི་ལྟོས་པར་དེ་ཉིད་ཡིན་པའི་ངོ་བོར་སངས་རྒྱས་པའི་ཆེ་བ་དམ་པ་ནི། ནམ་མཁའ་ནི་ཐམས་ཅད་དུ་ཁྱབ་ཅིང་གོ་འབྱེད་པའི་ཕྱིར་རྣམ་པར་སྣང་བར་མཛད་པའི་སངས་རྒྱས་ཡིན་ལ། ས་ནི་སྲ་ཞིང་མི་གཡོ་ལ་འགྱུར་བ་མེད་པའི་ཕྱིར་རྡོ་རྗེ་འཛིན་པ་ཉིད་དུ་སངས་རྒྱས་པ་ཡིན་ཞིང༌། མེ་ཉིད་ནི་གསལ་ཞིང་གཉེན་པའི་ཕྱིར་ཡོན་ཏན་རིན་ཆེན་འབྱུང་བར་ལྡན་པའི་རྒྱལ་བར་གནས་ལ། ཆུ་ནི་ཐམས་ཅད་ལ་ཁྱབ་ཅིང་དྲང་དུ་རུང་བར་གཉེན་ལ་གསལ་བར་ཤར་བའི་ཕྱིར་སྣང་བ་མཐའ་ཡས་ཀྱི་སངས་རྒྱས་ཡིན་ཞིང༌། རླུང་ནི་གང་དུའང་ཐོགས་པ་མེད་པར་ཀུན་འབྱེད་ཅིང་འཕྲུལ་པར་བྱེད་པའི་ཕྱིར་གདོན་མི་ཟ་བའམ་དོན་ཡོད་གྲུབ་པ་ཉིད་དུ་སངས་རྒྱས་པ་ཡིན་པས་རིགས་ཀྱི་སངས་རྒྱས་ལྔར་སྦྱར་ཏེ་བསྟན་ཀྱང་ངོ་བོ་གཏན་ནས་ཐ་དད་པ་ནི་མ་ཡིན་ཏེ། འབྱུང་བ་ལྔ་རྒྱལ་བ་རིགས་ལྔའི་ངོ་བོ་ཡིན་པའི་ཕྱིར་ཆོས་ཉིད་དུ་ཆུབ་པ་ན་ཡེ་ཤེས་ལྔ་ཡང་ཡིན་པས་སོ། །དེས་ན་དབྱིངས་ཇི་བཞིན་པའི་ཆོས་ཉིད་དང་དེ་ལས་ཤར་བའི་སངས་རྒྱས་དང་སེམས་ཅན་ཀུན་ཀྱང་འབྱུང་བ་དེ་ཉིད་དུ་སངས་རྒྱས་པ་ཁོ་ན་ཡིན་པར་ངེས་པར་བྱའོ།།

ལྔ་པ་ཐམས་ཅད་ནས་སངས་རྒྱས་མེད་པའི་ཆེ་བ་ནི།

ལང་ཀའི། ཞེས་པ་ནས། ཆེན་པོ་མཅོམ་ལྡན་འདས། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ་འདི་ལྟ་སྟེ། །གང་འདིར་སངས་རྒྱས་མེད་པ ་ནི། །ཐམས་ཅད་སྟོང་པར་ཡེ་སངས་ཏེ།།

དེས་ཁྱབ་མ་འདྲེས་རྒྱས་པ་ཉིད། །མ་བཅོས་ཡེ་ནས་སངས་རྒྱས་པ། །འབྱུང་བ་ཆེན་པོ་བཅོམ་ལྡན་འདས།།

ལང་ཀའི་བདག་པོ་གཞན་ཡང་འདི་ལྟ་སྟེ། ཐམས་ཅད་ནས་ཐམས་ཅད་དུ་གཞི་ལམ་འབྲས་བུའི་ཐ་སྙད་ལས་འདས་ཏེ་དོན་གོང་མ་དག་གི་ངོ་བོ་ལ་བརྗོད་པའི་ཡུལ་དང་བྲལ་ཏེ་གཞན་དུ་སངས་རྒྱས་བ་མེད་པ་དང་དེ་ཉིད་ཙམ་དུའང་མཚོན་པའི་ཐ་སྙད་གང་ཡིན་པ་ཐམས་ཅད་འདིར་དབྱིངས་རང་བཞིན་རྣམ་དག་གི་ངོ་བོར་ཡེ་ནས་གྲོལ་བས་སངས་རྒྱས་མེད་པའི་ཆེ་བ་དེ་ཉིད་ཉེ་བར་བསྟན་པ་ནི། འབྱུང་བ་ལྔའི་རང་བཞིན་སྣོད་བཅུད་ཀྱི་དངོས་པོ་ཇི་སྙེད་པ་ཐམས་ཅད་སྐབས་འདིར་དམིགས་མེད་སྟོང་པ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་གཉིས་སུ་མེད་པའི་ངང་དུ་གཅིག་དང་ཐ་དད་ལས་འདས་པར་ཡེ་ནས་སངས་ཏེ་ངང་ཆེན་པོ་དེས་ཐམས་ཅད་ལ་ཁྱབ་སྟེ་མ་འདྲེས་པར་སངས་རྒྱས་པ་ཉིད་ལ་དེ་ཉིད་ཀྱི་བླ་དྭགས་དང་བྲལ་བ་ནི་དཀྱིལ་འཁོར་རྣམ་གསུམ་དབྱེར་མེད་པའི་ཆོས་ཉིད་མ་བཅོས་པའི་ངོ་བོར་ཡེ་ནས་སྤྱོད་ཡུལ་དང་བྲལ་ཏེ་སངས་རྒྱས་པ་ཉིད་དུ་ངེས་པས་འབྱུང་བ་ཆེན་པོ་ལྔ་ཡི་དངོས་པོར་སྣང་བ་ཡང་དེས་བསྡུས་པ་རྣམས་ཡེ་ནས་སྣང་མ་མྱོང་བ་ལ་མཐའི་དྲི་མ་མཐའ་དག་དང་བྲལ་བས་བཅོམ་པ་དང༌། ཐམས་ཅད་ལ་རང་གསལ་དུ་བརྡལ་བས་ལྡན་པ་ཉིད་དེ། དེ་ཉིད་༼༢༣༦༽ཀྱི་ཐ་སྙད་དང་ཡང་བྲལ་བ་ནི་རྣམ་གྲངས་གཅིག་ཏུ་ན་ནན་གྱིས་བཅོམ་པ་མ་ཡིན་པར་རང་བཞིན་དུ་གསལ་བར་རྒྱས་ཤིང་ལྷུན་རྫོགས་ཀྱི་ཡོན་ཏན་དང་ངང་གིས་ལྡན་ཏེ་དམིགས་པའི་སྤྱོད་ཡུལ་ལས་འདས་པས་བཅོམ་ལྡན་འདས་ཞེས་པའི་ངེས་ཚིག་ཏུའང་ཡང་དག་པར་འགྱུར་ཏེ། རྡོ་རྗེ་སེམས་དཔའ་ནམ་མཁའ་ཆེ་ལས། འབྱུང་བ་ཆེན་པོ་བཅོམ་ལྡན་འདས། །འགྲོ་བ་ཀུན་ལ་རང་བཞིན་གནས། །ཕྱིན་ཅི་ལོག་ཏུ་རྣམ་བརྟགས་ཀྱང༌། །གྲོལ་བ་རང་བྱུང་གཞན་ལས་མིན། །ཞེས་སོ། །དེ་དག་ཀྱང་མིན་པ་ལས་ཡིན་པར་མ་བསྒྱུར་ཏེ། གདོད་ནས་དེ་ལྟ་བུ་ལྔར་སྣང་བ་ཉིད་སུས་ཀྱང་མ་བྱས་པར་རྒྱལ་བའི་ངོ་བོར་ཤར་བས་ད་འཕྲལ་དུ་གདགས་པ་དང་བྲལ་བའོ། །དེ་དག་ནི་རང་བཞིན་གྱི་སྣང་བ་འབའ་ཞིག་གི་ངོ་བོར་འགྱུར་རོ། །དེའང་ཆེ་བ་དང་པོས་སྐྱེ་བོ་དང་མུ་སྟེགས་ལས་འཕགས་ལ། གཉིས་པས་ཉན་རང་ལས་འཕགས་ཤིང༌། གསུམ་པས་ཀྲི་ཡོག་ལས་འཕགས་ལ། བཞི་པས་དབུ་སེམས་ལས་འཕགས་ཏེ། ཐ་མས་རྒྱུད་ལུང་ཀུན་ལས་འཕགས་པའི་ཁྱད་པར་གྱི་ཆེ་བར་འགྱུར་བས་ཨ་ནུའི་ཨ་ཏི་ཡན་ཆད་ལས་དེ་མན་ཆད་ལ་འདི་དག་སྦྱོར་དུ་མེད་དོ། །དེས་ན་འདིར་ནི་ཨ་ནུའི་ཨ་ཏིའི་རང་ལུགས་ཐུན་མོང་མིན་པ་ལྟར་གཞུང་གི་དགོངས་པ་དང་མཐུན་པར་འགྲེལ་པ་དང་ཕྱག་མཆན་རྣམས་ཀྱིས་ཇི་ལྟར་བཀྲལ་བ་བཞིན་དུ་ཚད་མའི་ལམ་གྱིས་གསལ་བར་བཤད་པ་ཡིན་ལ། སྔར་ནི་ཅུང་ཟད་རྫོགས་པ་ཆེན་པོའི་དགོངས་པར་ལ་བཟླ་བའི་ཚུལ་གྱིས་བཤད་པ་ཡིན་པས་རྒྱས་པར་ཀུན་བྱེད་རྒྱལ་པོའི་བཤད་རྒྱུད་ངེས་དོན་མདོ་བཅུ་དང༌། བང་མཛོད་འཕྲུལ་གྱི་ལྡེ་མིག་དང༌། ཀློང་རབ་འབྱམས་རྒྱལ་པོའི་རྒྱུད་ལ་སོགས་པ་སེམས་ཀློང་རང་གཞུང་ལྟར་ཤེས་པར་བྱ་ཞིང༌། དེ་དག་གི་ཟབ་གནད་བསྡུས་ཏེ་དགོངས་པ་མཐུན་པར་བསྟན་པ་ནི་གསང་བདག་ཆེན་པོ་དགའ་རབ་དཔའ་བོས་འབྲས་བུའི་ཀློང་བྱང་ཆུབ་ཀྱི་སྙིང་པོ་བསྟན་པ་ལས་གསུངས་པ་ཉིད་ཡིན་པས་ཅུང་གསལ་གནད་དུ་དྲིལ་བ་ཞིག་ནི་བདག་གིས་རྡོ་རྗེ་སེམས་དཔའ་ནམ་མཁའ་ཆེའི་འགྲེལ་བཤད་དུའང་བཀོད་དོ། །མན་ངག་གི་སྡེ་ནི་ལམ་དྲང་ཐད་དུ་བཤད་པའི་ཁྱད་ཆོས་ཀྱི་སྟེང་ནས་སེམས་ཀློང་ལས་ཀྱང་འཕགས་པའི་ཆེ་བ་རྣམས་གཙོ་བོར་སྟོན་པས་འདི་དག་ཆེར་མི་འབྱུང་ངོ༌།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། ཀུན་ལ་རང་བཞིན་གནས། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི། །འཁོར་ལོ་རྒྱུན་གྱི་ཐེག་པ་སྟེ།།

ངང་གིས་རྒྱུན་གྱི་འཁོར་ལོ་འབྱུང་། །བརྟན་གཡོ་ཀུན་ལ་རང་བཞིན་གནས།།

ལང་ཀའི་མངའ་བདག་ཆེན་པོ་དེ་དག་ནི། འཁོར་ལོ་རྒྱུན་གྱི་ཐེག་པའི་ངོ་བོ་བསྟན་པ་སྟེ། ཇི་སྐད་དུ། སྐོར་དང་གཅོད་དང་རྒྱུན་མི་འཆད། །འཁོར་ལོ་ཞེས་ནི་བརྗོད་པ་ཡིན། །ཞེས་པ་ལྟར་སུས་ཀྱང་མ་བྱས་པར་རང་གི་ངང་གིས་རྒྱུན་གྱི་དུས་སུ་བར་མི་ཆད་པར་ལས་རྒྱུད་གཅོད་པའི་འཁོར་ལོར་འབྱུང་བ་སྟེ། བརྟན་གཡོ་སྣོད་བཅུད་ཐམས་ཅད་ཀུན་ལ་ཁྱབ་པར་རང་བཞིན་གྱི་སྣང་བར་ཆེ་བ་ལྔ་དང་ལྡན་པར་ཡང་དག་པར་གནས་ཏེ་ཕན་པ་འབའ་ཞིག་གིས་དོན་མཛད་པའོ། །འདི་དག་ནི་རྒྱལ་བ་རྡོ་རྗེ་སེམས་དཔའ་ཇི་བཞིན་པ་གསང་བ་དམ་པའི་བྱིན་རླབས་དང་མཛད་པ་ཡིན་པ་ལ། རྨོངས་པ་དག་སེམས་ཅན་གྱི་ལས་སུ་སྨྲ་བ་ལ་བསྔགས་པ་ནི། སྔགས་ཀྱི་དོན་ཟབ་མོ་མ་མཐོང་བ་སྟེ་དཔེར་ན་ཁྲེའུར་ཡིག་འབྲུ་ཐུ་བའམ། བྱེའུ་འབུ་ཐུ་བ་ཡིས་ས་གཞི་ཆེན་པོ་མ་མཐོང་བ་དང་འདྲ་སྟེ་གསང་སྔགས་ཐེག་པ་ཆེན་པོའི་ལུང་གི་དེ་ཁོ་ན་ཉིད་ལ་མདོངས་པའོ། །དེ་བས་ན་ལས་རྒྱུད་གཅོད་པ་ལའང་ཡང་དག་པར་རྗེས་སུ་སྦྱར་ཏེ་དོན་གནད་ལ་མཁས་པར་བྱའོ།།

གཉིས་པ་ངེས་པར་འབྱུང་བའི་གདུལ་བྱ་དོན་དམ་ངེས་པའི་ཐེག་པས་འདུལ་བ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཐབས་ཀྱི་ཐེག་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་གང་། །དོན་དམ་ངེས་པའི་ཐེག་པ་ནི། །གསུམ་དུ་ངེས་པར་སྣང་བ་སྟེ།།

ཀུན་འབྱུང་འདྲེན་དང་དཀའ་ཐུབ་རིག །དབང་སྒྱུར་ཐབས་ཀྱི་ཐེག་པའོ།།

ལག་ཀའི་བདག་པོ་གཞན་ཡང་གང་གདུལ་ཐབས་དང་པོ་དང་མི་མཐུན་པར་ངེས་པའི་འབྱུང་བའི་གདུལ་བྱའི་ཆེད་དུ་དོན་དམ་ངེས་པའི་ཐེག་པ་བསྟན་པ་ལ་ནི་ལས་དང་སྐལ་པའི་དབང་གིས་རྣམ་པ་གསུམ་དུ་ངེས་པར་སྣང་བ་སྟེ། འཇིག་རྟེན་གྱི་ཞིང་ཁམས་ཀུན་ཏུ་སྤྲུལ་པའི་སྐུར་འབྱུང་ཞིང་སྣང་བས་དྲང་དོན་དུ་གསུངས་པའི་ཐབས་ཀྱིས་འདུལ་བ་དང་འདྲེན་པར་བྱེད་པ་མཚན་ཉིད་རྒྱུའི་ཐེག་པ་དང༌། དམ་ཚིག་དང་དཀའ་ཐུབ་གཙོ་བོར་བྱེད་པའི་སྒོ་ནས་དོན་རིག་པར་བྱེད་པ་སྔགས་ཕྱི་རྒྱུད་གསུམ་དང་རིག་པ་རང་དབང་དུ་བསྒྱུར་བའི་ཐབས་ཀྱི་སྒོ་ནས་གང་ཡང་སྤང་ལེན་མེད་པར་དུག་འགྱུར་གྱི་རྩི་ལྟར་ཉོན་མོངས་པ་སྤྱད་ཀྱང་མི་གོས་པར་སྟོན་པའི་ཐེག་པས་འདུལ་བ་གསང་སྔགས་ནང་གི་རྒྱུད་སྡེའོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཀུན་འབྱུང་འདྲེན་པའི་ཐེག་པ་བཤད་པ། དཀའ་ཐུབ་རིག་བྱིད་ཀྱི་ཐེག་པ་བསྟན་པ། དབང་བསྒྱུར་ཐབས་ཀྱི་ཐེག་པ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། དང་པོ་ནི།

གང་འདིར་འདྲེན་པ། ཞེས་པ་ནས། འབྲིང་དང་རབ་ཏུ་སྣང༌། །ཞེས་པའི་བར་གྱིས་བསྟན་ཏེ།

གང་འདིར་འདྲེན་པ་འདི་ལྟ་སྟེ། །ཡུལ་གསུམ་ངེས་པར་སྣང་བ་ནི། །ཐ་མ་འབྲིང་དང་རབ་ཏུ་སྣང་།།

གང་འདིར་ཐེག་པ་དང་པོ་ཀུན་འབྱུང་འདྲེན་པ་ལ་ཡང་བྱེ་བྲག་གི་རྣམ་གྲངས་ཡོད་པ་འདི་ལྟ་སྟེ། ཡུལ་གྱི་ཤེས་རབ་ཐ་མ་དང་འབྲིང་དང་རབ་༼༢༣༨༽གསུམ་གྱི་དབང་ལས་ཐེག་པའང་ཐ་མ་འབྲིང་དང་རབ་གསུམ་དུ་ངེས་པར་སྣང་བ་ནི། ཐ་མ་ཉན་ཐོས་དང་འབྲིང་རང་རྒྱལ་དང་རབ་ལ་བྱང་ཆུབ་སེམས་དཔའི་ཐེག་པ་དང་གསུམ་དུ་སྣང་བའོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཉན་ཐོས་ཀྱི་ཐེག་པ། རང་རྒྱལ་གྱི་ཐེག་པ། བྱུང༌ཆུབ་སེམས་དཔའི་ཐེག་པ་བཤད་པའོ། །དང་པོ་ནི།

ཐ་མའི་ཡུལ་དུ། ཞེས་པ་ནས། ཐར་པའི་ལམ་དུ་སྣང༌། །ཞེས་པའི་བར་གྱིས་བསྟན་ཏེ།

ཐ་མའི་ཡུལ་དུ་གྱུར་པ་ནི། །ཤིན་ཏུ་ཡ་ངའི་ལས་སྤངས་ཏེ། །ཡིད་འོང་དུལ་བའི་ཚུལ་བཟུང་ནས།།

རང་གི་རྩ་བ་དེར་བསྐྲུན་པ། །སོ་སོར་ཐར་པའི་ལམ་དུ་སྣང་།།

དང་པོ་ཉན་ཐོས་བསྟན་པའི་ཕྱིར་ཐ་མ་ལ་གསུམ་གྱི་ཐ་མའི་ཡང་ཐ་མ་འཕགས་པ་ཉན་ཐོས་ཀྱི་སྤྱོད་ཡུལ་དུ་གྱུར་པ་ནི། ཤིན་ཏུ་ཡ་ངའི་ལས་སུ་གྱུར་བ་མཚམས་མེད་པ་ལྔ་ལ་སོགས་པ་མི་དགེ་བའི་ལས་སོ་ཅོག་བཀག་ཅིང་སྤངས་ཏེ་གཞན་གྱི་བསམ་པ་དང་མཐུན་ཞིང་མོས་པ་ཡིད་དུ་འོང་བའི་ཆ་ལུགས་འདུལ་བའི་སྡེ་སྣོད་ལས་འབྱུང་བ་ལྟར་སྒོ་གསུམ་ཉིས་བརྒྱ་དང་ལྔ་བཅུ་རྩ་གསུམ་བསྡོམས་ཏེ་དགེ་སློང་གི་ཚུལ་ཁྲིམས་ཀྱི་བསླབ་པའི་གནས་རྣམས་བཟུང་ནས། ཀུན་ཉོན་རྒྱུ་འབྲས་དང་རྣམ་བྱང་རྒྱུ་འབྲས་ཀྱིས་བསྡུས་པ་བདེན་པ་བཞིའི་ཆོས་ཉིད་རྟོགས་ཤིང་གོམས་པས་རང་གི་ཐོབ་བྱའི་སྙིང་པོའམ་རྩ་བ་དགྲ་བཅོམ་པའི་གོ་འཕང་གི་འབྲས་བུ་དེར་བསྐྲུན་ཞིང་ཐོབ་པ་ཉིད་དོན་དུ་གཉེར་བའི་ལྟ་སྤྱོད་གཞུང་བསྲངས་ནས་གོམས་སྤྱོད་ལ་གནས་པས་གང་ཟག་རང་རང་སོ་སོར་འཁོར་བའི་སྡུག་བསྔལ་ལས་ཐར་པའི་ལམ་ཟུང་བཞི་ཡ་བརྒྱད་ཉིད་དུ་སྣང་བའོ། །དེས་ནི་རྒྱལ་ཆེན་དང་འདྲ་སྟེ་རང་དོན་འབའ་ཞིག་དོན་དུ་གཉེར་ནས་སྒྲུབས་པའོ།།

གཉིས་པ་རང་རྒྱལ་གྱི་ཐེག་པ་ནི།

འབྲིང་གི་ཡུལ་དུ། ཞེས་པ་ནས། རང་གི་རྩལ་གྱིས་བདེར་གནས་པའོ། །ཞེས་པའི་བར་གྱིས་བསྟན་ཏེ།

འབྲིང་གི་ཡུལ་དུ་གྱུར་པ་ནི། །འདི་ཀུན་རྟེན་ཅིང་འབྲེལ་འབྱུང་ལ། །བདག་མེད་ཆོས་ཅིག་མེད་མཐོང་བས།།

བརྗོད་མེད་སྤྲུལ་པའི་ཆོས་རྣམས་སྟོན། །རང་གི་རྩལ་གྱིས་བདེར་གནས་པའོ།།

དབང་པོ་ཐ་མའི་འབྲིང་དུ་གྱུར་པ་རང་རྒྱལ་བ་དག་གི་སྤྱོད་ཡུལ་དུ་གྱུར་པ་ནི། དངོས་པོ་ཕྱི་ནང་གི་ཆོས་འདི་ཀུན་རྟེན་ཅིང་འབྲེལ་བར་འབྱུང་བ་བཅུ་གཉིས་ལས་སྣང་བས་ལུགས་ནས་འབྱུང་བར་ངོས་ཟིན་ལ། དེ་དག་དགག་ཏུ་རུང་བ་དང་མི་རུང་བ་རྩད་བཅད་པས་ལུགས་ལས་བཟློག་པར་བཀག་སྟེ་བདེན་དོན་སྟོང་ པ་བཅུ་གཉིས་ཀྱི་ཆོས་ཉིད་མཐོང་སྟེ། གང་ཟག་ལ་བདག་མེད ་པའི་སྟེང་དུ་གཟུགས་ཀྱི་ཕུང་པོའི་ཆོས་རིལ་ལ་ བདག་མེད་པར་རྟོགས་པ ་ཡིན་ཏེ། སྒྱུ་འཕྲུལ་ཆེན་པོའི་རྒྱུད་ལས། དངོས་པོ་གཟུགས་ལ་ཐོགས་མེད་རབ་ཏུ་འཇུག །ཅེས་འབྱུང་བ་དང༌། ཡོ་ག་ཙརྱ་ལས། གཟུགས་ཀྱི་ཕུང་པོ་ཆོས་ཀྱི་ཕྱོགས་གཅིག་ཁམས་གཅིག་བདག་མེད་པར་རྟོགས་སོ། །ཞེས་སོ། །དེས་ན་གང་ཟག་གི་ བདག་མེད་རྫོགས་ཤིང་ཆོས་ཀྱི་ཕྱོགས་གཅིག་གཟུང་བ་རང་༼༢༣༩༽བཞིན་མེད་པར་མཐོང་ནས་འགོག་པ ་དང༌། མི་ལྕོགས་པ་མེད་པ་ལ་སོགས་པའི་ཏིང་ངེ་འཛིན་བཅུ་གཅིག་རིམ་པར་བསྒོམ་པས་ལམ་བཞི་སྟན་ཐོག་གཅིག་གིས་བགྲོད་དེ་ཡིད་བཞིན་བདེ་བ་མཆོག་གི་ས་རང་རྒྱལ་དགྲ་བཅོམ་གྱི་འབྲས་བུ་ཐོབ་པར་གྱུར་ནས། ངག་གིས་བརྗོད་པའི་ཆོས་སྟོན་པ་མེད་པར་རྒྱལ་བ་སྔ་མའི་བསྟན་པ་ནུབ་པ་དང༌། ཕྱི་མ་མ་བྱུང་བའི་སྐབས་སུ་གདུལ་ཞིང་རྣམས་ལ་ལུས་ཀྱི་རྫུ་འཕྲུལ་གྱིས་རྣམ་པར་སྤྲུལ་ཏེ་རྒྱུད་དགྲོལ་བའི་ཆོས་རྣམས་སྟོན་ཏེ་དོན་མཛད་ལ། དེ་ཡང་རང་རྒྱལ་བར་གྱུར་ཙམ་ན། སྔོན་བསྐལ་པ་བརྒྱ་ཡི་བར་དུ་ཚོགས་བསགས་པའི་རྒྱུས་སློབ་དཔོན་ལ་མ་བརྟེན་པར་དུར་ཁྲོད་ཀྱི་རུས་པ་ལ་བརྟགས་པའི་རྐྱེན་ལས་རང་གི་ཤེས་རབ་ཀྱི་རྩལ་གྱིས་ས་མཆོག་དེར་བདེར་ཞེས་བདེ་བར་གནས་ཏེ་འགྲོ་དོན་ཡང་གྲུ་རྫིང་དང་འདྲ་བར་ཉུང་ངུ་ཙམ་གྱི་དོན་བྱེད་པའོ།།

གསུམ་པ་བྱང་ཆུབ་སེམས་དཔའི་ཐེག་པ་ནི།

རབ་ཀྱི་ཡུལ་དུ། ཞེས་པ་ནས། ངོ་བོ་ཉིད་སྐུ་འཐོབ། །ཅེས་པའི་བར་གྱིས་བསྟན་ཏེ།

རབ་ཀྱི་ཡུལ་དུ་གྱུར་པ་ནི། །བདག་མེད་བྱམས་སྙོམས་རྟོག་ལས་འདས། །ཡུལ་མེད་མ་སྐྱེས་ཕྱོགས་དང་བྲལ།།

ས་དང་རྣམ་ཐར་བདེར་བསྐྲུན་པ། །དངོས་མེད་ངོ་བོ་ཉིད་སྐུ་ཐོབ།།

ཐ་མའི་རབ་ཏུ་གྱུར་ཏེ་མདོ་སྡེའི་གྲུབ་མཐའ་འཛིན་པ་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་དུ་གྱུར་པ་ནི། ཆོས་དང་གང་ཟག་གི་དངོས་པོ་གཉིས་མ་དམིགས་པར་ བདག་མེད་གཉིས་ཀ་རྟོགས་པའི་ལྟ་བ་དང་ལྡན་པས་སྤྱོད་པ ་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཚད་མེད་པ་བཞིས་ཀུན་ལ་མཉམ་པར་དོན་མཛད་ཅིང༌། ཏིང་ངེ་འཛིན་རྣམ་པར་མི་རྟོག་པ་ཉིད་བསྒོམ་པས་རྟོག་པ་ལས་འདས་ཏེ་འཛིན་ པ་མེད་ལ། ཆོས་ལ་བདག ་མེད་པར་རྟོགས་པས་དོན་དམ་པར་ཕྱི་རོལ་གྱི་ཡུལ་མེད་ཅིང་ནང་གང་ཟག་མེད་པས་འཛིན་པ་དང་ཡང་བྲལ་ཏེ། མ་སྐྱེས་པའི་ཆོས་ཉིད་བཤད་པའི་རྟེན་འབྲེལ་གྱི་གཏན་ཚིགས་སོགས་ཀྱིས་མཐོང་བས་ཕྱི་ནང་གཉིས་ཀར་མ་ཟིན་ཏེ་དོན་དམ་པའི་བདེན་པ་ཡུལ་སེམས་ཀྱི་ཕྱོགས་རིས་དང་བྲལ་བའི་ངོ་བོ་ས་དང་པོར་མངོན་སུམ་དུ་མཐོང་ལ། དེ་ནས་ས་གཉིས་པ་ནས་ཡར་བསྒོམ་ལམ་རྣམས་དང་།

དེ་ཡང་རྣམ་པར་ཐར་པའི་སྒོ་གསུམ་ལ་རིམ་པར་བརྟེན་ནས་བསྒྲུབས་པས་ས་བཅུ་པ་ཐོབ་པའི་ཚེ་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་དགེ་བ་ཟག་བཅས་དང་ལམ་དང་ཆོས་ཉིད་ལ་འཁོར་གསུམ་དུ་རྟོག་པའི་གནས་ངན་ལེན་གྱི་བག་ཆགས་དང་བཅས་པ་ཆ་ཕྲ་བའང་དག་པར་བྱས་ཏེ། གནས་དོན་ལུས་སུ་སྣང་བ་གནས་འགྱུར་བའི་ཚུལ་གྱིས་འབྲས་བུའི་གོ་འཕང་གི་ངོ་བོ་ཐོབ་བྱ་དམ་པ་དོན་གཉིས་ལྷུན་གྱིས་གྲུབ་པའི་བདེར་ཞེས་བདེ་བ་མཆོག་ཉིད་བསྐྲུན་པར་བྱས་པས་༼༢༤༠༽ཀུན་ཏུ་འོད་ཀྱི་ས་ལ་མཐའ་གཉིས་དང་བྲལ་བས་དངོས་མེད་སྐུ་གསུམ་གྱི་རང་བཞིན་ངོ་བོ་ཉིད་སྐུའམ་ཆོས་སྐུ་མཐར་ཐུག་ཉིད་ཀྱི་འཐོབ་པར་འདོད་དོ། །འོན་ཀྱང་གསང་སྔགས་ཀྱི་ངོ་བོ་ཉིད་སྐུ་ལ་ནི་མ་རེག་གོ།

གཉིས་པ་དཀའ་ཐུབ་རིག་བྱེད་ཀྱི་ཐེག་པ་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཡུལ་གྱིས་གསུམ་ཉིད་དེ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་གང་། །དཀའ་ཐུབ་རིག་བྱེད་ཐེག་པ་ནི། །འདི་ཡི་ཡུལ་ནི་གསུམ་ཉིད་དེ།།

ལང་ཀའི་བདག་པོ་ཞེས་བོས་ནས་གཞན་ཡང་གང་ཐེག་པ་བར་མ་དཀའ་ཐུབ་རིག་བྱེད་ཀྱི་ཐེག་པ་སྔགས་ཕྱི་པ་བསྟན་པ་ནི། དབང་པོ་འབྲིང་གི་ཡུལ་འདི་ལ་ཡང་ཡུལ་གྱིས་དབང་ལས་ནང་གསེས་བློ་རབ་འབྲིང་ཐ་མ་གསུམ་གྱི་དབྱེ་བ་ཡོད་པ་ཉིད་དེ། ཞེས་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཀྲི་ཡ་ཏནྟྲ། ཨུ་པ་ཡ་ཏནྟྲ། ཡོ་ག་ཏནྟྲ་བཤད་པའོ། །དང་པོ་ནི།

ཐ་མ་དག་ལ། ཞེས་པ་ནས། རྡོ་རྗེ་འཛིན་གནས་པའོ། །ཞེས་པའི་བར་གྱིས་བསྟན་ཏེ།

ཐ་མ་དག་ལ་སྣང་བ་ནི། །དཀའ་ཐུབ་སྡོམ་དང་བརྟུལ་ཞུགས་དག །མཉམ་ཉིད་མི་གཡོ་སྐྱེ་མེད་ལ།།

བཀུར་འོས་འདུན་པའི་ཚུལ་བཟུང་ནས། །རིགས་ཀྱི་རྡོ་རྗེ་འཛིན་གནས་པའོ།།

དེ་ཡང་འབྲིང་གི་ཐ་མ་དག་པ་སྤྱོད་པའི་ཡུལ་དུ་སྣང་བ་ཀྲི་ཡའི་གཞུང་ནི། སྒོ་གསུམ་སྨྱུང་བར་གནས་པའི་དཀའ་ཐུབ་དང༌། རྩ་བ་ལྔ་དང༌། ཡན་ལག་ཉི་ཤུ་ལ་སོགས་པའི་སྡོམ་པ་དང༌། ཁྲུས་དང་གཙང་སྦྲའི་སྤྱོད་པ་ལ་གནས་པའི་བརྟུལ་ཞུགས་དག་གཙོ་བོར་བྱས་ཏེ་དོན་དམ་པར་ཆོས་ཐམས་ཅད་མཉམ་པ་ཉིད་དུ་རྟོགས་ནས་དེ་ལས་མི་གཡོ་བར་སྐྱེ་བ་མེད་པའི་ངང་ལ་བརྟན་པར་གནས་ཏེ། ཀུན་རྫོབ་ཏུ་དམ་ཚིག་སེམས་དཔའ་ཆོ་ག་ཡན་ལག་བཅུ་གཅིག་གིས་བསྐྱེད་ནས་ལྷ་ཡེ་ཤེས་སེམས་དཔའ་སྤྱན་དྲངས་པ་ཉིད་བཀུར་བར་འོས་པ་རྗེ་བོའི་ཚུལ་དུ་བལྟས་ཏེ་སྤྱི་བོར་རྡུལ་གསུམ་གྱིས་མཆོད་པ་ཙམ་མམ་མདུན་དུ་དཀྱིལ་འཁོར་གྱི་དབུས་སུ་བཞུགས་པ་ལ། བདག་དམ་ཚིག་སེམས་དཔའ་དེ་ལ་འདུན་པའི་བྲན་གྱི་ཚུལ་བཟུང་བར་བྱས་ནས། ལྷ་དྲུག་དང་ལྡན་པས་བསྒོམ་ཞིང་བཟླས་པ་དང་མཆོད་པ་དང་བཤགས་པ་དང་གསོལ་བ་གདབ་པ་ལ་སོགས་པ་ཀུན་བྱས་ཏེ། དེ་ལྟར་བསྒྲུབ་པས་གནས་སྐབས་རིག་འཛིན་གསུམ་གྱི་ས་ནོན་ནས་མཐར་ཐུག་རིགས་གསུམ་གྱི་རྡོ་རྗེ་འཛིན་པའི་འབྲས་བུ་དམ་པ་ཐོབ་སྟེ་མཆོག་གི་གོ་འཕང་ལ་གནས་པའོ།།

གཉིས་པ་ཨུ་པ་ཡ་ཏནྟྲ་ནི།

འབྲིང་ལ་རྣམ་པར། ཞེས་པ་ནས། རྡོ་རྗེ་འཆང་གནས་པའོ། །ཞེས་པའི་བར་གྱིས་བསྟན་ཏེ།

འབྲིང་ལ་རྣམ་པར་སྣང་བ་ནི། །བྱ་བ་དག་གི་ལས་སྤྱད་དེ། །རྣལ་འབྱོར་ཏིེང་འཛིན་ངར་ལྡན་ན།།

མི་གཡོའི་སེམས་དཔས་མངོན་སུམ་དུ། །རིགས་བཞི་རྡོ་རྗེ་འཆང་གནས་པའོ།།

འབྲིང་གི་འབྲིང་དུ་གྱུར་པ་ཨུ་པ་ཡའི་སྤྱོད་ཡུལ་ལ་རྣམ་པར་སྣང་བ་ནི། སྤྱོད་པ་ཀྲི་ཡ་ལྟར་ཁྲུས་དང་གཙང་སྦྲ་ལ་སོགས་པ་བྱ་བ་དག་པའི་ལས་རྣམས་སྤྱད་དེ་ལྟ་བ་གོང་མ་དང་མཐུན་པའི་དབང་གིས་ཁྱད་པར་དུ་རིགས་བཞིའི་ལྷ་བསྒོམ་པའང་དེ་ཁོ་ན་ཉིད་བཞི་དང་ལྡན་༼༢༤༡༽ཏེ་རྣལ་འབྱོར་ཡོ་གའི་ཏིང་ངེ་འཛིན་ལྟར་ལས་འཛུམ་པའི་ཞལ་གྱིས་དམ་ཚིག་སེམས་མར་བསྒོམ་པ་དང་ལྡན་པས་ཡུམ་དང་བཅས་པར་བསྐྱེད་དེ་མཆོད་བཟླས་དང་གསོལ་བ་ལ་སོགས་པ་བྱས་ནས་བསྒྲུབ་ན། གནས་སྐབས་རྡོ་རྗེ་མི་བསྐྱོད་པའི་རིག་འཛིན་མི་གཡོ་བའི་སེམས་དཔས་ཞེས་སེམས་དཔའ་གྲུབ་ནས། མཐར་ཐུག་དེ་ཉིད་ཀྱིས་མངོན་སུམ་དུ་རིགས་བཞི་རྡོ་རྗེ་འཆང་གི་གོ་འཕང་ལ་གནས་པའི་འབྲས་བུ་དམ་པ་ཐོབ་པའོ།།

གསུམ་པ་ཡོ་ག་ཏནྟྲ་བཤད་པ་ནི།

རབ་ལ་ངེས་པར། ཞེས་པ་ནས། རིགས་འཆང་གནས་པའོ། །ཞེས་པའི་བར་གྱིས་བསྟན་ཏེ།

རབ་ལ་ངེས་པར་སྣང་བ་ནི། །སེམས་ཉིད་ཡུལ་ལ་རྩལ་རྫོགས་ཏེ། །ཡུལ་ཉིད་རིག་པས་མངོན་མཐོང་ན།།

དེ་ཉིད་དེར་ནི་མངོན་བྱང་ནས། །རྡོ་རྗེ་རིགས་འཆང་གནས་པའོ།།

འབྲིང་གི་རབ་ཏུ་གྱུར་པ་ཡོ་ག་བ་རྣམས་ཀྱི་ངོ་ལ་ངེས་པར་སྣང་བ་ནི། དོན་དམ་མཚན་མ་མེད་པའི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་སྣང་བར་ལྟ་བས་མངོན་པར་བྱང་ཆུབ་པ་ལྔ་སྒོམས་ཏེ། དང་པོ་གཞི་རང་རིག་མཚན་མེད་སྟོང་པ། དེ་ནས་གདན་ཟླ་བ། དེ་ནས་གསུང་ཡིག་འབྲུ། དེ་ནས་ཐུགས་ཕྱག་མཚན། དེ་ནས་སྐུ་ཕྱག་རྒྱ་ཡོངས་སུ་རྫོགས་པའི་བར་ལ་སྦྱངས་ཏེ་མཇུག་ལས་སུ་རུང་བ་དང་སེམས་མཚན་མ་མེད་པའི་བྱིན་རླབས་ཉིད་བསྒོམ་བྱའི་ཡུལ་ལ་རྩལ་རྫོགས་ཏེ་བསྒོམ་བྱ་ཡུལ་ཉིད་རང་རིག་པས་རྣལ་འབྱོར་གྱི་མངོན་སུམ་དུ་གསལ་ཏེ་མཚན་མེད་དུ་མཐོང་ན། བསྒོམ་བྱའི་ཡུལ་གྱི་མཚན་མ་དང་སོ་སོའི་སྐྱེ་བོའི་ཡུལ་དེ་ཉིད་རྡོ་རྗེ་དབྱིངས་ཀྱི་དཀྱིལ་འཁོར་མཚན་མ་མེད་པ་དེར་ནི་མངོན་པར་བྱང་ཆུབ་པར་གསལ་ཏེ་ཡོངས་སུ་རྫོགས་པས་དོན་དང་གཉིས་སུ་མེད་པར་ཆུད་ན་གནས་སྐབས་རིག་འཛིན་གྱི་གོ་འཕང་བརྒྱུད་ནས་མཐར་ཐུག་རྡོ་རྗེ་དབྱིངས་ཀྱི་དཀྱིལ་འཁོར་རིགས་ལྔའི་རྡོ་རྗེ་གསུམ་དང་ཐ་མི་དད་པར་འཆང་བའི་འབྲས་བུའི་གོ་འཕང་ལ་གནས་པའོ། །འདི་དག་གི་རང་འབྲས་མངོན་དུ་བྱས་པ་ན་མདོའི་རང་ལུགས་ལྟར་གྱིས་དམིགས་པས་འབྲས་བུ་སྐྱེ་བའི་ས་ལ་མངོན་པར་བྱང་ཆུབ་པ་ཡང་ཡིན་ནོ།།

གསུམ་པ་དབང་བསྒྱུར་ཐབས་ཀྱི་ཐེག་པ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཡོངས་སུ་རྫོགས། །ཅེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་གང་། །དབང་སྒྱུར་ཐབས་ཀྱི་ཐེག་པ་ཡང་།།

ཡུལ་གྱི་རྣམ་པ་གསུམ་སྣང་བ། །བསྐྱེད་དང་རྫོགས་དང་ཡོངས་སུ་རྫོགས།།

ལང་ཀའི་མངའ་བདག་ཆེན་པོ། གཞན་ཡང་གང་ཕྱི་པ་ལས་ཁྱད་པར་དུ་གྱུར་པས་དབང་བསྒྱུར་ཐབས་ཀྱི་ཐེག་པ་ལ་ཡང་གདུལ་བྱ་རབ་ཀྱི་རབ་འབྲིང་ཐ་མ་གསུམ་གྱི་ཡུལ་གྱིས་དབང་ལས་རྣམ་གྲངས་རྣམ་པ་གསུམ་དུ་སྣང་བ་ནི། ལྷ་ཡི་དཀྱིལ་འཁོར་རིམ་པར་བསྐྱེད་ཅིང་སྒོམས་པས་རྣལ་འབྱོར་རྩལ་ཆེན་༼༢༤༢༽རྫོགས་པ་དང་ལྡན་པ་གནས་པ་མི་འགྱུར་བའི་ས་པ་དང༌། ལྷ་སྐད་ཅིག་གིས་རྫོགས་ཚུལ་དུ་སྒོམས་པ་གདལ་བ་ཆོས་ཉིད་ཀྱི་ས་པ་དང༌། བསྐྱེད་རྫོགས་ཀྱི་བྱ་བ་དང་བྲལ་བས་མ་བརྩལ་བར་ཡོངས་སུ་གྲོལ་བ་རྫོགས་པ་སྤྱིར་ཆིབས་ཀྱི་ས་ལ་གནས་པ་དང་གསུམ་མོ།།

གཉིས་པ་རྒྱས་པར་བཤད་པ་ལ་གསུམ་སྟེ། བསྐྱེད་པ་མ་ཧཱ་ཡོ་ག རྫོགས་པ་ཨ་ནུ་ཡོ་ག རྫོགས་ཆེན་ཨ་ཏི་ཡོ་ག་བཤད་པའོ། །དང་པོ་ནི།

ཐ་མ་བསྐྱེད་པ། ཞེས་པ་ནས། རྩལ་ཆེན་རྫོགས་པའི་ས། །ཞེས་པའི་བར་གྱིས་བསྟན་ཏེ།

ཐ་མ་བསྐྱེད་པ་གང་སྣང་བ། །ཐབས་དང་ཤེས་རབ་རྣམ་དག་ལས། །རྟེན་པ་ལྔ་ལ་སོགས་པའི་ཆོས།།

རྒྱལ་བ་ལྔ་ལས་རྫོགས་སངས་རྒྱས། །རྣལ་འབྱོར་རྩལ་ཆེན་རྫོགས་པའི་ས།།

རབ་ཀྱི་ཐ་མ་ལ་བསྐྱེད་པ་མ་ཧཱ་ཡོ་ག་སྟེ་དེ་ལ་གང་སྣང་བའི་ཚུལ་གྱི་ལུགས་བཤད་པ་ནི། ལྟ་བ་ཐབས་མ་འགགས་པའི་ལྷའི་ཚོགས་དང་ཤེས་རབ་རང་བཞིན་མེད་པའི་མཉམ་ཉིད་ཆེན་པོ་གཉིས་ཡེ་ནས་གཉིས་སུ་མེད་པར་རྣམ་པར་དག་པའི་ངོ་བོ་ལ་སྣང་སྟོང་དང་བྲལ་བར་རྟོགས་པའི་ལྷན་ཅིག་སྐྱེས་པའི་ཡེ་ཤེས་ཀྱི་ཉམས་རྙེད་ནས་ཐབས་ཀྱི་རྣམ་པར་གྲོལ་བ་དང༌། ཤེས་རབ་ཀྱི་རྣམ་པར་ངེས་པའི་ལམ་གཉིས་གོམས་པ་དང༌། བསྟེན་པའི་དམ་རྫས་དྲི་ཆེན་དྲི་ཆུང་རཀྟ་ཟིལ་པ་ལྷག་པའི་བྱང་ཆུབ་སེམས་ཅན་དང་མཱཾ་ས་རྣམ་པ་ལྔ་དང༌། ལ་སོགས་པ་ཞེས་དངོས་པོ་གཞན་བསྡུ་བ་ནི། འདོད་པ་ལྔ་དང༌། སྤྱད་པར་བྱ་བ་ལྔ་དང༌། ཤ་ལྔ་སྟེ་སྤྱོད་པར་བྱ་བའི་ཆོས་ཉི་ཤུ་པོ་དེ་དག་གི་རང་བཞིན་ཡེ་ཕྱི་མོ་ནས་དེ་བཞིན་ཉིད་མཐའ་ལས་གྲོལ་བའི་ངོ་བོས་རིགས་ཀྱི་རྒྱལ་བ་ལྔ་ལ་སོགས་པར་སྦྱངས་སྒྱུར་ལས་འདས་ཏེ་མངོན་པར་རྫོགས་པར་སངས་རྒྱས་པར་ཤེས་པས་བླང་དོར་མེད་པ་སྤྱོད་པ་དེ་དག་ཆེད་དུ་བྱས་ཏེ་སྤྱོད་ཅིང༌། དེ་བཞིན་ཉིད་ཀྱི་ངང་ལས་ལྷའི་དཀྱིལ་འཁོར་རིམ་པར་བསྐྱེད་དེ་བསྒོམ་པས་དངོས་པོ་རྟོག་ཚོགས་དང་བཅས་པ་ཉིད་རྣམ་གྲོལ་འབྲས་བུའི་དཀྱིལ་འཁོར་དུ་སངས་རྒྱས་པར་གྱུར་པ་ནི་རྣལ་འབྱོར་ཆེན་པོ་རྩལ་ཆེན་རྫོགས་པའི་ཏིང་ངེ་འཛིན་དང་ལྡན་ཏེ་གནས་པ་མི་འགྱུར་བའི་ས་མཆོག་མངོན་དུ་བྱས་པའོ།།

གཉིས་པ་རྫོགས་པ་ཨ་ནུ་ཡོ་ག་ནི།

འབྲིང་ལ་རྫོགས་པར། ཞེས་པ་ནས། མི་འགྱུར་གདལ་བའི་ས། །ཞེས་པའི་བར་གྱིས་བསྟན་ཏེ།

འབྲིང་ལ་རྫོགས་པར་གང་སྣང་བ། །མཉམ་པས་མཉམ་པའི་དོན་མཐོང་ན། །མཉམ་རྫོགས་ཡུལ་ཤེས་དབྱིངས་ཡེ་ཤེས། །ཀུན་རིག་ཀུན་རྫོགས་ཀུན་ཏུ་སྣང་། །ཆོས་ཉིད་མི་འགྱུར་གདལ་བའི་ས།།

རབ་ཀྱི་འབྲིང་དུ་གྱུར་པ་ལ་ཨ་ནུ་ཡོ་ག་རྫོགས་པའི་ཚུལ་དུ་སྤྱོད་པར་གང་སྣང་བའི་ལུགས་བཤད་པ་ནི། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཡེ་ནས་རང་རིག་པ་དབྱིངས་དང་ཡེ་ཤེས་གཉིས་སུ་མེད་པའི་ངང་དུ་མཉམ་པར་ངེས་པས་སྲས་བྱང་ཆུབ་ཀྱི་སེམས་བདེ་བ་ཆེན་པོར་ཆེ་ཆུང་མེད་པར་ཀུན་ཏུ་རང་གསལ་བར་མཉམ་པའི་དོན་གྱི་ངོ་བོ་བླ་མས་ཇི་ལྟར་བསྟན་པ་ལྟར་རང་གིས་ཇི་ལྟ་བ་བཞིན་དུ་མཐོང་ཞིང་༼༢༤༣༽རྟོགས་པའི་དུས་ན། ཆོས་ཀྱི་དབྱིངས་བྱ་བ་ཙམ་ལའང་དམིགས་པའི་རྟེན་མི་འཆའ་སྟེ། རྒྱུ་འབྲས་ཐམས་ཅད་མཉམ་རྫོགས་ཆེན་པོར་དབྱེར་མེད་པར་གདལ་ཏེ་རིག་པ་ཉིད་ངོ་བོ་མ་གྲུབ་བཞིན་དུ་ཡུལ་དང་ཤེས་པར་མ་འདྲེས་པར་གསལ་ཡང་རང་བཞིན་སྐྱེ་བ་མེད་པའི་དབྱིངས་ཀྱི་རྒྱུ་ལས་རང་རིག་པའི་ཡེ་ཤེས་གཉིས་མེད་ཡེ་མཉམ་ཆེན་པོ་འབྲས་བུའི་ངོ་བོར་རྟོགས་པ་ཉིད་གསལ་བར་གོམས་པས། ཆོས་སོ་ཅོག་ཐམས་ཅད་ཀུན་དེ་ཁོ་ན་ཉིད་དུ་མ་འདྲེས་པར་རིག་ཅིང་དེ་ཀུན་གདོད་མ་ནས་ཡོངས་སུ་རྫོགས་ཏེ་དཀྱིལ་འཁོར་གསུམ་དབྱེར་མེད་པར་མཐའ་དབུས་ལས་འདས་པར་མཁྱེན་པ་ལ། རྒྱུ་འབྲས་ཀྱི་ཆོས་ཐམས་ཅད་དང༌། ལྷ་དང་གཞལ་ཡས་ཁང་ལ་སོགས་པ་ཐམས་ཅད་དུས་གསུམ་ཀུན་ཏུ་རང་སྣང་དུ་ཤར་ཏེ། བདག་ཉིད་ཆེན་པོའི་ངང་དུ་ལྷུན་གྱིས་གྲུབ་པར་གསལ་ལོ། །དེ་ལྟ་བུ་ལ་དཀྱིལ་འཁོར་རིམ་པར་བསྐྱེད་པ་དང༌། སྤྱོད་པ་ཆེད་དུ་བསྟེན་པའང་མེད་དེ་རིལ་འབྲས་བུའི་ཆོས་ཉིད་གཉིས་མེད་ལས་མི་འགྱུར་བར་ཕྱོགས་རིས་མེད་པར་ཀུན༌ལ་གདལ་བའི་ས་མཆོག་རྨད་དུ་བྱུང་བ་ཉིད་དུ་ཡང་དག་པར་བྱང་ཆུབ་པར་གྱུར་པའོ།།

གསུམ་པ་རྫོགས་ཆེན་ཨ་ཏི་ཡོ་ག་བཤད་པ་ནི།

རབ་ལ་ཡོངས་སུ། ཞེས་པ་ནས། རྫོགས་པ་སྤྱིར་ཆིབས་ས། །ཞེས་པའི་བར་གྱིས་བསྟན་ཏེ།

རབ་ལ་ཡོངས་སུ་རྫོགས་པ་ནི། །ཡེ་ཤེས་དབྱིངས་ཤེས་བྱ་བའི་དོན། །ཐ་སྙད་ཙམ་དུ་རྟོགས་ཆུད་ནས།།

རྩལ་མེད་རྫོགས་བྲལ་བསམ་ཡུལ་འདས། །ཐམས་ཅད་རྫོགས་པའི་སྤྱིར་ཆིབས་པ།།

དབང་པོ་རབ་ཀྱི་རབ་ཏུ་གྱུར་པ་ལ་ཤིན་ཏུ་རྣལ་འབྱོར་ཨ་ཏི་ཡོ་གའི་ལུགས་ཀྱིས་གང་སྣང་བ་ཐམས་ཅད་བདག་ཉིད་ཆེན་པོར་ཡོངས་སུ་རྫོགས་པའི་ཚུལ་བསྟན་པ་ནི། ཀུན་ནས་ཉོན་མོངས་པ་དང་རྣམ་པར་བྱང་བ་ཞེས་བྱ་བ་ལ་སོགས་པ་གཉིས་ཀྱི་ཆོས་རྣམས་གདོད་ནས་མ་བསལ་མ་བཀོད་པར་རང་བཞིན་ལྷུན་གྱིས་གྲུབ་པའི་ངང་དུ་གསལ་བ་ལ། ལྟ་བས་རང་བྱུང་གི་ཡེ་ཤེས་དང་ཆོས་ཀྱི་དབྱིངས་ཞེས་བྱ་བར་ཨ་ནུས་མཐར་ཐུག་ཏུ་བཏགས་པའི་དོན་དེ་ཡང་ཐིག་ལེ་བྱང་ཆུབ་ཀྱི་སེམས་ཡིན་པས་དེ་ལ་དབྱིངས་དང་ཡེ་ཤེས་སུ་གདགས་པ་དང་བྲལ་ཏེ་དབྱིངས་དང་ཡེ་ཤེས་རང་ཡང་ཐ་སྙད་ཚིག་གིས་བཏགས་པ་ཙམ་དུ་ཡང་དག་པར་རྟོགས་ཤིང་ཁོང་དུ་ཆུད་པར་གྱུར་ནས། ཆོས་ཐམས་ཅད་ཐིག་ལེ་ཉག་གཅིག་ལས་མ་འདས་པས་དེ་ལས་གཞན་དུ་འབྲས་བུའི་རེ་རྩོལ་དང་ཞེ་འདོད་མེད་པས་དངོས་པོར་གཞལ་བའི་གྲུབ་མཐའ་གང་ཡང་ཁོང་དུ་ཆུད་པར་བྱར་མེད་དེ། འདུ་ཤེས་གང་དུའང་མ་ཞུགས་ཏེ་བློས་མ་བསམས་ཤིང་མ་དཔྱད་པ་ཉིད་ཀྱིས་ཆོས་ཉིད་ཇི་བཞིན་པའི་དོན་མཐོང་བ་མེད་པར་ཡང་༼༢༤༤༽དག་པར་མཐོང་བར་འགྱུར་ཏེ།

རྡོ་རྗེ་སེམས་དཔའ་ནམ་མཁའ་ཆེ་ལས། ཆེ་བས་ཆེ་བ་ཟབ་མོ་ཡི། །ཡོན་ཏན་ཅིར་ཡང་བསྔགས་པ་མེད། །དོན་རྣམས་ཇི་བཞིན་མི་བསྐྱོད་དེ། །བྱ་བ་མེད་པས་གྲོལ་བའང་གྲོལ། །རང་བྱུང་ཡེ་ཤེས་བརྩལ་མེད་པས། །གྲོལ་ནས་གྲོལ་བའི་ལམ་ཡང་སྟོན། །ཞེས་གསུངས་པས། དངོས་པོ་གཞལ་ཞིང་དོན་ཚོལ་བའི་བྱ་བྱེད་མེད་པ་ཉིད་ཀྱིས་ཐ་སྙད་ཙམ་དུ་གྲོལ་ཞེས་ཀྱང་བྱ་སྟེ། དེ་ལ་བཅིངས་པའི་ཆོས་མ་དམིགས་པའི་ཕྱིར་རོ། །དེ་བས་ན་ཡེ་ནས་ངོ་བོས་ཡུལ་དང་བྲལ་བ་ལ་དབྱིངས་དང་ཡེ་ཤེས་གཉིས་སུ་མེད་པ་ལའང་ཡིད་མི་བརྟེན་པས་སེམས་ཐག་པ་ནས་གུད་ནས་གོ་བར་བྱར་མེད་དོ། །འོ་ན་གཏན་ནས་གོ་བར་བྱར་མེད་ན་ཆོས་ཇི་བཞིན་པ་ཉིད་དུའང་ཇི་ལྟར་འགྱུར་ཞེ་ན། ཅིའང་རིག་པར་བྱར་མེད་པར་ཡང་དག་པར་རིག་པ་ན་མཁའ་ཁྱབ་བྱང་ཆུབ་སེམས་ཀྱི་ལྟ་བ་མ་རྟོགས་པར་རྟོགས་ཏེ་མ་མཐོང་བར་མཐོང་བ་ཡིན་པས་བླ་དྭགས་ཚིག་གི་ཐ་སྙད་དུ་ཆོས་ཉིད་ཇི་བཞིན་པ་ཉིད་དུ་རྟོགས་ཞེས་བྱ་སྟེ་བསླབ་པ་མེད་པའི་བསླབ་པ་ཆེན་པོ འོ། །དེ་ལྟ་བུའི་གདེངས་ཆུད་པ་ལ་འཆད་པར་འགྱུར་བའི་ཟིན་པའི་དོན་དང་ཡང་དག་པར་ལྡན་པས་སྒོ་གསུམ་ཤ་ཐང་བར་བྱས་ཏེ་སྤྱོད་པས་བརྩལ་བ་དང་བསྒྲུབ་ཏུ་མེད་པར་དོན་ཀུན་གྲུབ་པས་བྱར་མེད་ལྷུན་གྲུབ་ཀྱི་སྤྱོད་པ་ཞེས་བྱའོ། །དེས་ན་དུས་གསུམ་གྱི་རྒྱལ་བ་རིལ་གྱི་སྤྱི་མེས་འབྲས་བུའི་སྡོང་པོ་ནི། རང་གི་སེམས་ཉིད་ཇི་བཞིན་པ་ཉིད་དུ་ཡེ་ནས་རྫོགས་པས་མཉམ་ཉིད་རྫོགས་པ་ཆེན་པོ འོ་ཞེས་པའི་བློ་ཡི་འཇུག་པ་དང་ཡང་བྲལ་ཏེ་ཕྱོགས་མེད་བདེ་བ་ཆེན་པོའི་ངང་དུ་ཡེ་གསལ་དུ་རྫོགས་པ་ཉིད་པས་དེ་ལྟ་བུའི་ཟབ་མོའི་དོན་མཆོག་དེ་ཉིད་སྒོམ་པའི་དུས་ནའང་རིག་པ་ཇི་བཞིན་པའི་རྗེས་སུ་འབྲང་བ་མེད། འཛིན་པ་ཡང་མེད། བསམ་པ་དང་དཔྱོད་པ་མེད། དམིགས་པ་ཡང་མེད་དེེ། མངོན་དུ་མི་བྱེད། ཆེད་དུ་མི་གཉེར། བློས་ཕེབས་པར་མི་འདོད་པས་བསྒོམ་པའི་ཡུལ་ལས་འདས་པའོ། །དེ་ལྟར་ཅིར་ཡང་བསམ་དུ་མེད་པ་ཉིད་ཀྱིས་ཕྱི་མོའི་ཆོས་ཉིད་ཀྱི་ཐོག་ཏུ་བབ་པས། དེ་དག་ཉིད་དུ་འདོད་པའང་མེད་པའི་བླ་དྭགས་སུ་རྣམ་པར་མི་རྟོག་པའི་སྒོམ་པ་ཞེས་ཀྱང་བྱ་སྟེ་ཡེངས་པའང་མེད་ལ་བསྒོམ་རྒྱུ་ཡང་མེད་དེ། སྔ་མ་ལས། ཡོན་ཏན་ཆེན་པོའི་བསམ་གཏན་ནི། །བསམ་གཏན་ཉིད་པས་བསམ་དུ་མེད། །མ་བསམ་མ་སྦྱངས་ཆོས་བཞིན་དུ། །རྣམ་རྟོག་ཉིད་ལས་ཡེ་ཤེས་སྐྱེ། །ཞེས་སོ།།

དེ་ལྟར་རྟོགས་ན་བསྒོམ་པ་མི་འགོག་༼༢༤༥༽ལ་སྒོམ་ཏུའང་མེད་དེ། ཐུན་མཚམས་མེད་པའི་བསྒོམ་པ་ཆེན་པོ འོ། །དེ་ལྟར་རྟོགས་པའི་དུས་དེང་སང་གི་གང་ཟག་རབ་གཅིག་དེ་ནི་ཆོས་ཀྱི་གཞི་ཡིན་ནོ། །དོན་དེ་མ་ངེས་པར་གང་ཟག་གི་བསམ་པས་ཨ་ཏི་ཡོ་ག་ལ་དམིགས་དགོས་པས་ཐབས་དམིགས་པ་ཅན་གྱི་མན་ངག་གིས་འགྲོལ་དགོས་ཞེས་སྨྲ་བ་ནི། དེ་ཉིད་ཀྱི་དོན་གྱི་གདེངས་མ་རྙེད་པར་གསལ་ཏེ། མདོངས་པ་དེ་ནི་དཔེར་ན་དང་རུའི་ལྡེའུ་མིག་གིས་རྒྱལ་པོའི་བང་མཛོད་ཀྱི་ཐ་རམ་འབྱེད་པར་འདོད་པ་དང་འདྲའོ། །དེ་ལྟ་བུའི་དོན་ཆེན་པོ་རྟོགས་ཤིང་མངོན་དུ་གྱུར་པ་ནི། ཡེ་ཤེས་གསང་བ་ལས། དེས་ན་ས་རྣམས་ཐམས་ཅད་ཀུན། །རང་བྱུང་ལྷུན་རྫོགས་ཁྱད་པར་སྣང༌། །ས་ཡི་ཁྱད་པར་ཅི་བསྟན་ཀྱང༌། །མ་བཅོས་རྫོགས་པའི་ས་ལ་འདུས། །ཞེས་གསུངས་པ་ལྟར་འབྲས་བུའི་ས་ཐམས་ཅད་མ་བཙལ་ལྷུན་གྱིས་རྫོགས་པས་རྫོགས་པ་སྤྱིར་ཆིབས་ཀྱི་ས་ཞེས་བྱ་སྟེ། དེའི་གོང་ན་གཞན་མེད་པས་སོ།།

གསུམ་པ་གདུལ་དཀའ་དྲག་པོའི་གདུལ་བྱ་ཆོ་འཕྲུལ་མངོན་འབྱུང་གི་ཐེག་པས་གདུལ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

ལང་ཀའི། ཞེས་པ་ནས། འཁོར་ལོས་གཅོད་པས་འགྱུར། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་གང་། །ཆོ་འཕྲུལ་མངོན་ཕྱུང་ཐེག་པ་ཡང་། །ཡུལ་གྱི་རྣམ་པ་གསུམ་སྣང་བ།།

ཞེན་དང་རྨོངས་དང་འཁྲུག་པ་ཡི། །ལས་ངན་འདུ་ཤེས་ངན་པ་རྣམས། །རྒྱུན་བཅད་བསྒྱུར་བའི་ཕྲིན་ལས་ནི།།

སྲིད་གསུམ་དྲ་བའི་འཁོར་ལོ་དག །ལས་ཀྱི་འཁོར་ལོ་རྒྱུད་བཅད་ཕྱིར། །དམ་པའི་འཁོར་ལོ་བསྐོར་བྱས་ནས།།

བསྐལ་པའི་འཁོར་ལོས་གཅོད་པར་འགྱུར།།

ལང་ཀའི་བདག་པོོ། ཞེས་སྡུད་པ་པོ་ལ་བོས་ནས། གཞན་ཡང་གང་ཐུགས་རྗེའི་ཆོ་འཕྲུལ་མངོན་སུམ་དུ་བྱུང་བའི་ཐེག་པས་འདུལ་བ་ངོ་བོ་ཉིད་སྐུའི་མཛད་པ་ཡང་ཡུལ་གྱི་དབང་ལས་རྣམ་པ་གསུམ་དུ་སྣང་བ་ནི། གདུལ་བྱ་སེམས་ཅན་ཁ་ཅིག འདོད་པ་ལ་ཞེན་ཅིང་ཆགས་པ་ཅན་དང༌། ཁ་ཅིག་ནི་རྨོངས་ཤིང་གཏི་མུག་ཅན་དང༌། ལ་ལ་ནི་ཞེ་སྡང་མཆོག་ཏུ་ཆེ་བས་རྒྱུད་འཁྲུག་པ་ཡི་འགྲོ་བ་གང་ཞིག་སྨད་པའི་ལས་ངན་ཤ་སྟག་སྤྱོད་ཅིང་བསམ་པའི་འདུ་ཤེས་ཤིན་ཏུ་ངན་པ་ཅན་རྣམས་ལ། ཆད་པའི་ལས་ཀྱི་ཚུལ་དུ་ལས་ངན་རྒྱུན་དུ་གསོགས་པའི་འཕྲོ་བཅད་ཅིང་འདུ་ཤེས་སྔ་མ་ལས་གཞན་དུ་བསྒྱུར་བའི་ཕྲིན་ལས་ཀྱི་མཛད་པ་བསྟན་པ་ནི། སྤྱིར་སྲིད་པའི་གནས་ཀྱི་འོབས་སུ་ལྷུང་ཞིང་ཁྱད་པར་དུ་ཉེ་བའི་སྲིད་པ་འདི་དང་ཕྱི་མ་བར་དོ་གསུམ་གྱི་ལས་ངན་གྱི་དྲྭ་བར་འཕྱན་པའི་དབང་གིས་རྒྱུན་དུ་ཐར་བར་དཀའ་ཞིང་གནས་ངན་གཅིག་ཏུའང་ཡང་ནས་ཡང་དུ་འཁོར་ལོ་ལྟར་སྐྱོར་བུར་འབྱུང་བ་དག་གི་འདོད་ཆགས་དང་གཏི་མུག་དང་ཞེ་སྡང་ལ་སོགས་པས་ཀུན་ནས་བསླང་པའི་ལས་ངན་གྱི་འཁོར་ལོ་རྒྱུན་བཅད་པའི་དགོས་ཆེད་ཀྱི་ཕྱིར་དུ། རྒྱལ་བ༼༢༤༦༽ ཐུགས་རྗེའི་མངའ་བདག་དམ་པ་ཉིད་ཀྱིས་དོན་གྱི་མཛད་པ་སྟོན་པའི་ཐུགས་རྗེ་ཆེན་པོའི་ཕྲིན་ལས་ཀྱི་འཁོར་ལོ་བསྐོར་བར་བྱས་ནས། ལས་ངན་ཚར་བཅད་པ་ནི། དངོས་སུ་ན་ཐེག་པ་སྔ་མ་གཉིས་ཀྱིས་གདུལ་བར་དཀའ་བ་རྣམས་བསྐལ་པའི་ཆོ་འཕྲུལ་གྱི་འཁོར་ལོས་ལས་རྒྱུད་གཅོད་པར་འགྱུར་བའི་མཛད་པ་བསྟན་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། མཛད་པ་དེ་ལྟར་བསྟན་པའི་དགོས་ཆེད། དེ་ཡིས་དོན་ཇི་ལྟར་བྱེད་ཚུལ། ཐབས་ཀྱི་ཡོན་ཏན་དང་གྲལ་གྱི་ཐ་མར་བཤད་པའོ། །དང་པོ་ནི།

ཅི་ཕྱིར་སེམས་ཅན། ཞེས་པ་ནས། ལས་རྒྱུན་གཅད་པའི་ཕྱིར། །ཞེས་པའི་བར་གྱིས་བསྟན་ཏེ།

ཅི་ཕྱིར་སེམས་ཅན་ཁ་ཅིག་ནི། །ཆགས་པས་ཞེན་ཅིང་གདུང་བར་འགྱུར། །གང་ཚེ་སེམས་ཅན་ཁ་ཅིག་ནི།།

ཤིན་ཏུ་རྨོངས་ཤིང་འཐིབས་པར་འགྱུར། །གང་ཚེ་སེམས་ཅན་ཁ་ཅིག་ནི། །ཤིན་ཏུ་ཁྲོ་གཏུམ་གདུག་པར་འགྱུར།།

འདིལྟར་དུག་གསུམ་སྨིན་པ་ལ། །གང་གིས་ཕན་པར་མི་འགྱུར་ཏེ། །མི་རྟག་མཚན་ཉིད་བསྟན་པས་ཀྱང་།།

ལས་ངན་ལས་རྒྱུན་བཅད་པའི་ཕྱིར།།

འོ་ན་ཕྱི་ནང་གི་བསྐལ་པ་ཟུང་གསུམ་ཁོ་ནས་ཚར་བཅད་དེ་འདུལ་བ་དགོས་ཆེད་ཅི་ཡི་ཕྱིར་ཞེ་ན། འགྲོ་བ་ཇི་སྙེད་པ་རྣམས་ལས་དུས་ཀྱི་ཐ་མ་ཚེ་ལོ་སུམ་ཅུ་པར་གྱུར་པ་ན་སེམས་ཅན་ཁ་ཅིག་ནི། ཤིན་ཏུ་ཆགས་པ་ཆེ་བས་ཞེན་ཅིང་གདུང་བར་འགྱུར་བ་དང༌། ཚེ་ལོ་ཉི་ཤུ་པ་གང་གི་ཚེ་ན་སེམས་ཅན་ཁ་ཅིག་ནི་མ་རིག་པས་ནོན་ཏེ་ཤིན་ཏུ་རྨོངས་ཤིང་འཐིབས་པར་འགྱུར་བ་དང༌། ཚེ་ལོ་བཅུ་པ་གང་གི་ཚེ་ན་སེམས་ཅན་ཁ་ཅིག་ནི། ཤིན་ཏུ་ཞེ་སྡང་བདོ་བས་ཁྲོ་གཏུམ་ཆེ་ཞིང་གདུག་པ་དང་རྩུབ་པར་འགྱུར་བ་སྟེ། དུས་ནི་འཆད་དེ་སྒྲོན་མའི་བྱ་བ་རྣམས་རྫོགས་ནས་ནུབ་པའི་དུས་ཏེ། འདི་ལྟར་དུག་གསུམ་ཤིན་ཏུ་སྨིན་ཞིང་བདོ་བ་དེ་ལྟ་བུ་ལ་ལས་ཐབས་གཞན་གང་གིས་ཀྱང་འདུལ་བར་མི་ནུས་པས་གོང་གི་གདུལ་ཐབས་གཉིས་ཀྱིས་ཡང་ཕན་ཞིང་སྐྱོབ་པར་མི་འགྱུར་ཏེ། ཤིན་ཏུ་དངོས་པོར་ཞེན་པ་ལ། སྣོད་བཅུད་མི་རྟག་པའི་མཚན་ཉིད་དངོས་སུ་སྣང་བས་འཚོ་བའི་སྲོག་དང་བྲལ་ཏེ་འཆི་བའི་སྡུག་བསྔལ་བསྟན་ནས་ཀྱང་ལས་ངན་གཅོད་པར་མཛད་པ་དང༌། སྡུག་བསྔལ་ཉིད་ཀྱིས་སེམས་སྐྱོ་བའི་རྒྱུར་གྱུར་པས་ཀྱང་དེ་ལྟར་བསྟན་ནས་ལས་རྒྱུན་ཡོངས་སུ་གཅད་པའི་ཕྱིར་གདུལ་བྱེད་ཀྱི་མཛད་པ་དེ་དག་བཀོད་པ་ཉིད་དོ།།

གཉིས་པ་དེ་ཡིས་དོན་ཇི་ལྟར་བྱེད་ཚུལ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

རང་བཞིན་ཆོ་འཕྲུལ། ཞེས་པ་ནས། ཉིད་དུ་བསྒྲལ་བའི་མཆོག །ཅེས་པའི་བར་གྱིས་བསྟན་ཏེ།

རང་བཞིན་ཆོ་འཕྲུལ་མངོན་བྱུང་བ། །ཁྲོས་ན་ཟ་བྱེད་ལྔ་ཡིས་འཇིག །ཆོ་འཕྲུལ་ཟ་བྱེད་ལྔ་ཁྲོས་པས། །མ་ལུས་བསྒྲལ་ནས་སྟོངས་མཛད་ཕྱིར། །ནམ་མཁའི་ཁྲོ་བོ་ཟ་བྱེད་ཆེ། །ཐམས་ཅད་ཐིམ་པས་སྟོངས་པར་མཛད།།

དེ་བཞིན་ཉིད་དུ་བསྒྲལ་བའི་མཆོག།

ཐེག་པ་འོག་མ་གཞན་ལ་མ་གྲགས་པའི་མཛད་པ་འདིའི་ངོ་བོ་རང་བཞིན་ལྷུན་གྱིས་གྲུབ་པ་སེམས་ཀྱི་དཀྱིལ་འཁོར་འོད་གསལ་བའི་ཡེ་ཤེས་ཀྱི་ཆོ་འཕྲུལ་དབང་པོའི་མངོན་སུམ་དུ་ཕྱུང་སྟེ་དངོས་སུ་སྣང་བར་བྱུང་བའི་མཛད་པ་ནི་གང་ཞེ་ན། རང་བཞིན་གྱི་ཁྲོ་བོ་འགྲོ་བ་དུག་གསུམ་སྨིན་པ་རྣམས་ཞལ་དུ་༼༢༤༧༽གསོལ་བར་མཛད་པའི་དངོས་པོ་འབྱུང་བ་ཆེན་པོ་ལྔ་ཁྲོས་ནས་འཆད་འགྱུར་ལྟར་འབྲས་བུའི་ཁྲོ་བོ་དཔལ་ཆེན་པོའི་རོལ་པའི་བཀོད་པ་དུག་ལྔའི་ཚུལ་གྱིས་དུག་ལྔ་ཟ་བར་བྱེད་པ་ཧེ་རུ་ཀ་ལྔ་ཡི་ངོ་བོས་མཛད་པ་རང་བཞིན་དུ་བཀོད་པའི་བསྐལ་པ་ལྔ་པོ་དེ་ཡིས་ཆོ་འཕྲུལ་བསྟན་ནས་འཇིག་ཅིང་འཇོམས་པར་བྱེད་པ་སྟེ། ཁྲོ་བོ་ལྷ་རྒྱུད་ཆེན་པོ་ལས། གཏི་མུག་ཚུལ་གྱིས་གཏི་མུག་འཇོམས་མཛད་པའི། །གཏི་མུག་རྡོ་རྗེ་བུདྡྷ་ཧེ་རུ་ཀ །ཡེ་ཤེས་རྡོ་རྗེས་ཉོན་མོངས་འཁོར་བ་འཇོམས། །ཐབས་འཛིན་མཚོན་ཆའི་བསྐལ་པས་དངོས་པོ་འཇིག །ཞེ་སྡང་ཚུལ་གྱིས་ཞེ་སྡང་འཇོམས་མཛད་པ། །ཞེ་སྡང་རྡོ་རྗེ་བཛྲ་ཧེ་རུ་ཀ །རིན་ཆེན་དབྱིག་ལྟར་རེ་བ་ཀུན་སྐོང་ཞིང༌། །བདག་མེད་ཞི་གནས་ཆུ་ཡི་བསྐལ་པས་འཁྲུ། །ང་རྒྱལ་ཚུལ་གྱིས་ང་རྒྱལ་འཇོམས་མཛད་པ། །ང་རྒྱལ་རྡོ་རྗེ་རཏྣ་ཧེ་རུ་ཀ །འཁོར་བའི་འདམ་དུ་པད་ལྟར་སྐུ་འཁྲུངས་ཀྱང༌། །ལྷག་མཐོང་མེ་ཆེན་བསྐལ་པས་ཐམས་ཅད་སྲེག །འདོད་ཆགས་ཚུལ་གྱིས་འདོད་ཆགས་འཇོམས་མཛད་པ། །འདོད་ཆགས་རྡོ་རྗེ་པདྨ་ཧེ་རུ་ཀ །ཕྲིན་ལས་རྒྱ་མཚོས་འགྲོ་བའི་དོན་མཛད་ཅིང༌། །ཤེས་རབ་ཐོགས་མེད་བསྐལ་པའི་རླུང་གིས་བསྐྱོད། །ཕྲག་དོག་ཚུལ་གྱིས་ཕྲག་དོག་འཇོམས་མཛད་པ། །ཕྲག་དོག་རྡོ་རྗེ་ཀརྨ་ཧེ་རུ་ཀ །སྐུ་ཡི་ལོངས་སྤྱོད་སྣ་ཚོགས་མི་དམིགས་ཤིང༌། །ཤེས་རབ་མཐར་ཕྱིན་གཏི་མུག་རྣམ་པར་དག །ཅེས་སོ། །དེའང་ཅི་ཡང་མ་ཡིན་པའི་ངང་ལས་ཅིར་ཡང་སྣང་བས་མཛད་པ་མ་ངེས་པ་ནི་ཆོ་འཕྲུལ་གྱི་དོན་ཏེ། བཀོད་པ་དེ་ལྟར་སྟོན་པའི་ཟ་བྱེད་ཀྱི་བསྐལ་པ་ལྔ་ནི་རང་བཞིན་གྱི་ཁྲོ་བོ་ཡིན་པས་གདུལ་བྱེད་རྔམ་པའི་རྒྱལ་པོ་དེ་ལྔ་ཁྲོས་པས་གདུལ་བྱ་ཕྱི་ནང་གི་དངོས་པོ་མ་ལུས་པ་རིལ་བསྒྲལ་ནས་མ་གྲུབ་པར་བྱས་ཏེ། སྲིད་པ་སྟོངས་པར་མཛད་པའི་གཏན་ཚིགས་ཀྱི་ཕྱིར་ཁྲོ་བོར་མིང་ཡང་གྲུབ་བོ། །དེ་དག་ཀྱང་ལས་ཀྱི་དབང་གིས་རང་ཐད་དུ་སྣང་བ་ཙམ་མ་ཡིན་པར། རིལ་ཡེ་ཤེས་ཆེན་པོ་རང་སྣང་བའི་ཕྱིར་སྟོང་པ་ཆེན་པོའི་ནམ་མཁའ་ནི་ཡེ་ཤེས་རྔམ་པའི་ཁྲོ་བོ་སྟེ་ཟ་བྱེད་ཆེ་བའི་རྒྱལ་པོ་དེས་དངོས་པོ་ཐམས་ཅད་དེ་ཁོ་ན་ཉིད་དུ་ཐིམ་པར་གྱུར་པས་སྟོང་པའི་དབྱིངས་སུ་རྔུབ་པར་མཛད་དེ་མཐའ་ལ་མི་གནས་པར་བྱས་སོ། །དེ་ལྟ་བས་ན་ཕྱི་ནང་གི་དངོས་སྣང་ཐམས་ཅད་ཆོས་ཉིད་དེ་བཞིན་ཉིད་དུ་ཡང་དག་པར་བསྒྲལ་ཏེ་སྐྱས་ཐེབས་པའི་ཕྱིར་ཐུགས་རྗེ་༼༢༤༨༽མཆོག་གི་ཆོ་འཕྲུལ་གྱི་མཛད་པ་ཕུལ་དུ་བྱུང་བའོ།།

གཉིས་པ་རྒྱས་པར་བཤད་པ་ནི།

སྲེད་ཞི་འཚོ་བྲལ། ཞེས་པ་ནས། རྒས་རྒུད་ཐམས་ཅད་སྟོངས། །ཞེས་པའི་བར་གྱིས་བསྟན་ཏེ།

སྲིད་ཞི་མཚོ་བྲལ་བསྐམ་པ་ཡིས། །ཞེན་པས་ཆགས་པའི་རྒྱུད་གཅོད་པ། །བཟོད་ལྡན་རྨོངས་པའི་བསྐལ་པ་ཡིས། །སེམས་པའི་ཡིད་ཀྱིས་ལས་རྒྱུད་གཅོད། །ཐབས་འཛིན་མཚོན་ཆའི་བསྐལ་པ་ཡིས། །དངོས་པོ་དངོས་པོ་ཐམས་ཅད་གཅོད། །ལྷག་མཐོང་མེ་ཡི་བསྐལ་པ་ཡིས། །ཉོན་མོངས་དངོས་པོ་ཐམས་ཅད་བསྲེག །ཞི་གནས་ཆུ་ཡི་བསྐལ་པ་ཡིས། །ཉོན་མོངས་དྲི་མ་ཐམས་ཅད་འཁྲུ། །ཐོགས་མེད་རླུང་གི་བསྐལ་པ་ཡིས། །ཤེས་བྱ་ཐམས་ཅད་ཀུན་ཏུ་བསྐྱོད། །ཤེས་རབ་ནམ་མཁའི་བསྐལ་པ་ཡིས། །མཚན་མའི་རྒས་རྒུད་ཐམས་ཅད་སྟོངས།།

ཡིད་དུ་འཐད་པའི་བཟའ་བཏུང་དང་བྲལ་བས་ཟས་སྐོམ་ལ་སྲེད་པ་ཞི་ཞིང་འཚོ་བའི་སྲོག་དང་བྲལ་བར་བྱེད་པ་མུ་གེའི་བསྐལ་པ་ལོ་གསུམ་མམ་བདུན་དུ་འབྱུང་བ་ཡིས་ཟས་སྐོམ་ལ་སོགས་པ་འདོད་པ་ལ་ཞེན་པས་ལྷག་པར་ཆགས་པའི་ཡུལ་གྱི་འདོད་པའི་ཡོན་ཏན་ཡིད་དུ་འོང་བ་དང་བྲལ་བར་བྱས་ཏེ་ལས་ངན་གྱི་རྒྱུན་གཅོད་དོ། །མི་བཟོད་པའི་ཟུག་རྔུ་དང་ལྡན་པའི་སྡུག་བསྔལ་གྱིས་རྨོངས་ནས་དྲན་པ་ཉམས་པར་བྱེད་པའི་ནད་ཀྱི་བསྐལ་པ་སྤྲིན་དམར་མཆེད་པ་འདྲ་བ་ཟླ་བ་གསུམ་མམ་བདུན་དུ་འབྱུང་བ་ཡིས་སེམས་པ་དང་ཡིད་ཀྱི་ལས་ཀྱི་འདུ་བྱེད་མང་པོ་དང་ཁྱད་པར་དུ་གཏི་མུག་གི་ལས་དང་ལམ་གྱི་རྒྱུད་རྣམས་འཇོམས་ཤིང་གཅོད་པར་བྱེད་དོ། །ཞེ་སྡང་ཅན་རྣམས་འཇོམས་པའི་ཐབས་འཛིན་པ་ཅན་གྱི་མཚོན་ཆའི་བསྐལ་པ་ཞག་གསུམ་དུ་འབྱུང་བ་ཡིས། གཞན་གྱི་དངོས་པོ་དང་བདག་གི་དངོས་པོ་ཐམས་ཅད་འཇོམས་ཤིང་གཅོད་པར་བྱེད་དོ། །ངོ་བོ་གཞིའི་ངོས་ནས་ཀྱང་རང་བཞིན་གྱི་ལྷག་མཐོང་དུ་གྱུར་པ་བྱེད་པའི་ལས་ཀྱིས་དངོས་པོ་ཀུན་ཡོངས་སུ་སྲེག་པ་འབར་བ་མེ་ཡི་བསྐལ་པ་ཡིས་ཉོན་མོངས་པ་དུག་གསུམ་ལ་སོགས་པའི་ངོ་བོ་དང་བསམ་གཏན་དང་པོ་མན་ཆད་ཀྱི་དངོས་པོ་ཐམས་ཅད་སྲེག་པར་བྱེད་དོ། །རང་བཞིན་གྱི་ཞི་གནས་སྡུད་བྱེད་ཆུ་ཡི་བསྐལ་པ་ཡིས། ཉོན་མོངས་པ་དང་ལས་ལམ་གྱི་དྲི་མ་རྒྱུན་དག་པར་བྱེད་ཅིང་བསམ་གཏན་གཉིས་པ་མན་ཆད་ཀྱི་དངོས་པོ་ཐམས་ཅད་འཁྲུ་ཞིང་འཇིག་པར་བྱེད་དོ། །མཚན་ཉིད་གང་དུའང་མི་ཟིན་པར་སྐད་ཅིག་ལའང་བྱ་བ་བྱེད་པས་ཐོགས་པ་མེད་པ་རླུང་གི་བསྐལ་པ་ཡིས། ཤེས་བྱ་ཡུལ་གྱི་དངོས་པོ་ཐམས་ཅད་ཕྱོགས་དང་བྲལ་བར་ཀུན་ཏུ་བསྐྱོད་ཅིང་གཏོར་ཏེ་བསམ་གཏན་གསུམ་པ་མན་ཆད་མེད་པར་བྱས་ཏེ་མཐའ་བྲལ་མི་གནས་པའི་ཀློང་དུ་གདལ་བར་བྱས་སོ། །མི་དམིགས་པའི་ངོ་བོ་རང་བཞིན་གྱི་ཤེས་རབ་སྟོང་པ་ཆེན་པོ་ནམ་མཁའི་བསྐལ་པ་ཡིས་དེ་ལྟར་བཤིག་པའི་རྗེས་ལ་སྟོངས་པར་གནས་ཏེ་དངོས་པོ་དང་སྐྱེ་འགྲོར་སྣང་བའི་མཚན་མའི་རྒས་རྒུད་ཐམས་ཅད་སྟོངས་ཤིང་མེད་པར་མཛད་པས་འདི་ཉིད་ཁྲོ་བོ་ལྔ་ཡིས་མཛད་༼༢༤༩༽པའི་གྲུབ་མཐའ་ལྟ་བུར་གྱུར་པས་ན་སྤྱིར་སྦྱར་བར་བྱ་སྟེ། སྔ་མ་ལས། འགྲོ་རྣམས་ཇི་ལྟར་འདུལ་ཞིང་གཤེགས་མཛད་པ། །ཤེས་རབ་ནམ་མཁའི་བསྐལ་པས་རྒས་རྒུད་སྟོངས། །ཞེས་སོ།།

གསུམ་པ་ཐབས་ཀྱི་ཡོན་ཏན་དང་གྲལ་གྱི་ཐ་མར་བཤད་པ་ནི།

ལས་ངན་མྱུར་དུ། ཞེས་པ་ནས། ཐ་མ་ཡིན་པར་བཤད། །ཅེས་པའི་བར་གྱིས་བསྟན་ཏེ།

ལས་ངན་མྱུར་དུ་རྒྱུན་ཆད་ན། །གནས་ངན་དག་ལས་མྱུར་དུ་གྲོལ།།

ཐབས་དང་ཐེག་པ་གང་དག་ལས། །ཐ་མའི་ཐ་མ་ཡིན་པར་བཤད།།

དེ་ལྟར་མཛད་པ་ལ་དགོས་པ་ཅི་ཡོད་ཅེ་ན། བཤད་པ་ལྟར་ཐབས་ལ་བརྟེན་ནས་ལས་ལམ་ལ་འགྱོད་པ་སོགས་ཀྱིས་ལས་ངན་མྱུར་དུ་རྒྱུན་བཅད་པར་བྱས་ནས། འདོད་ཁམས་ནས་བསམ་གཏན་གསུམ་པའི་བར་གྱི་གནས་ངན་དག་ལས་མྱུར་དུ་སྒྲོལ་ནས་རིམ་གྱིས་གྲོལ་བར་མཛད་པའི་འདུལ་བྱེད་བཀོད་པ་འདི་ནི་ཐབས་གསུམ་གྱིས་གདུལ་བའི་དུས་དང་ཐེག་པ་གསུམ་གྱི་གདུལ་ཐབས་གང་དག་བསྟན་པ་གཉིས་ཀ་ལས་གྲལ་གྱི་ཐ་མའི་ཐ་མ་ཡིན་པར་ངེས་པར་བསྟན་ནས་བཤད་པ་ཉིད་དོ།།

གསུམ་པ་མཇུག་བསྡུ་བ་ནི།

སྙིགས་མར་གྱུར་པའི། ཞེས་པ་ནས། ཤུགས་ཀྱིས་འདུལ་བ་ཡིན། །ཞེས་པའི་བར་གྱིས་བསྟན་ཏེ།

སྙིགས་མར་གྱུར་པའི་སྐབས་རྣམས་སུ། །འདུལ་བ་རྣམ་གཉིས་ནུབ་པས་ན། །ཉོན་མོངས་རྣམས་ནི་དངོས་པོར་སྣང་། །འདས་ནས་ནུབ་བོ་ཞེས་པ་ལ། །མ་འདས་མ་ནུབ་དེ་ཉིད་ནི། །དུས་དེར་ཤུགས་ཀྱིས་འདུལ་བ་ཡིན།།

དེ་ཡང་ཟས་དང༌། དུས་དང༌། ཚེ་དང༌། འགྲོ་བ་དང༌། ལས་ཀྱི་སྙིགས་མར་གྱུར་པ་ལྔ་ལ་བབ་པའི་སྐབས་རྣམས་སུ་མདོ་སྔགས་ཀྱི་བསྟན་པ་རིན་པོ་ཆེས་འདུལ་བ་རྣམ་པ་གཉིས་པོོ་ནུབ་ནས་དུང་ཕྱིས་པ་ལྟར་མི་སྣང་བར་གྱུར་པའི་དུས་ན། ཆགས་སྡང་ལ་སོགས་པ་ཉོན་མོངས་པ་རྣམས་ནི་དངོས་སུ་རགས་ཏེ་ཆེན་པོར་སྣང་བ་འབྱུང་བའི་ཚེ། ཐེག་པ་ཆུང་ངུ་བ་རང་བཞིན་གྱི་སྣང་བ་ཐམས་ཅད་རྒྱལ་བའི་མཛད་པར་མ་ཤེས་པས་ཕྱོགས་གཅིག་པའི་མཛད་པ་ལ་ཞེན་པ་དག་ན་རེ། དོན་དམ་ངེས་པའི་ཐེག་པའི་དབང་དུ། སྟོན་པ་འདས་ནས་བསྟན་པ་ཡང་ནུབ་བོ། །དེས་ནས་འགྲོ་བ་རྣམས་འདུལ་བའི་ཐབས་ཅི་ཡང་མེད་དོ། །ཞེས་སྨྲ་བར་བྱེད་པ་དེ་དག་ལ། དུས་དེ་རྣམས་ཀུན་ཏུ་གསང་སྔགས་ཀྱི་ཐུགས་རྗེ་འཆར་ནུབ་མེད་པས་མཛད་པ་ནུབ་པར་མི་འགྱུར་བ་ཁོ་ནས་སྟོན་པ་མ་འདས་ལ་བསྟན་པ་མ་ནུབ་པར་དེ་ཁོ་ན་ཉིད་དེ་དག་ཡིན་པའི་ཕྱིར། ལེའུ་ཐ་མ་ལས། འཁོར་བ་ཇི་སྲིད་ཡོད་བར་དུ། །བསྟན་པའི་སྙིང་པོ་ཉི་མར་ཤར། །རང་བཞིན་ཆོས་ཉིད་འཁོར་ལོ་འདི། །མི་ནུབ་རྒྱུན་མི་འཆད་པར་བསྐོར། །ཞེས་གསུངས་པ་ལྟར་ངེས་པས་སྙིགས་མའི་དུས་དེར་ཡང་ཐུགས་རྗེ་ཆེན་པོའི་བྱིན་རླབས་ཀྱི་ཤུགས་ཀྱིས་འདུལ་ཞིང་སྒྲོལ་བར་མཛད་པའི་བཀོད་པ་སྟོན་པ་ཡིན་ཏེ། སངས་རྒྱས་མྱ་ངན་ཡོངས་མི་འདའ། ༼༢༥༠༽།ཆོས་ཀྱང་ནུབ་པར་མི་འགྱུར་ཏེ། །མ་རིག་སྨིན་མཛད་འདུལ་བའི་ཕྱིར། །བྱུང་ནས་མྱ་ངན་འདའ་བར་སྟོན། །ཞེས་གསུངས་པའི་དོན་ཁོ་ནའོ། །ཚུལ་འདི་དག་གི་གནད་དོན་ལ་ལེགས་པར་དཔྱད་ན་ལུང་ཆེན་པོ་འདིའི་ལུགས་ལ། གཞི་ལའང་ཁྲོ་བོ་མངོན་པར་འབྱུང་བའི་དཀྱིལ་འཁོར་བཞེད་པར་གསལ་ཏེ། འོན་ཀྱང་དབྱིངས་རང་བཞིན་ལྷུན་གྲུབ་ཀྱི་ངང་ལས་བཀོད་པའི་རང་རྩལ་དུ་ཤེས་པར་བྱ་བ་ནི་གནད་ཀྱི་དོན་ཏེ། མཐར་ཐུག་རྫོགས་པ་ཆེན་པོའི་དགོངས་པར་ལ་བཟླ་བའི་ཚུལ་ལའང་མཁས་པར་བྱའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་ པ་ནས། སོམ་ཉི་མེད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ་དེ་ལྟར་ན། །འདི་ཀུན་གསང་བ་དམ་པ་ཡི། །དབྱིངས་ལས་གར་ཡང་མ་གཡོས་ཤིང་། །སྟོང་པ་ཁོ་ནའི་དབྱིངས་ཉིད་ལས། །སྟོང་པའི་ཆོས་རྣམས་འབྱུང་བར་ཟད། །སྟོང་ཉིད་གསང་བ་དེ་ཁོ་ན། །ཐེག་ཆེན་གསང་བ་དེ་ཉིད་དོ། །གསང་བ་པའི་བདག་པོས་དེ་སྐད་ཅེས་བརྗོད་པས། །ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཐམས་ཅད་གསང་བ་དམ་ པ་ཉིད་དུ་ངེས་པར་སོམ་ཉི་མེད་པར་གྱུར་ཏོ།།

ལང་ཀའི་བདག ་པོ་དེ་ལྟར་བཤད་པའི་ཚུལ་དེས་ན། གདུལ་ཐབས་ཀྱི་བཀོད་པ་ཇི་སྙེད་དུ་བསྟན་པ་འདི་དག་ཀུན་ཀྱང་ཆོས་ཉིད་གསང་བ་དམ་པ་ཡི་དབྱིངས་ལས་གར་ཡང་མ་གཡོས་ཏེ། བསྐལ་པའི་འཁོར་ལོ་དང་བསྟན་པའི་མཛད་པ་ཇི་ལྟར་བྱུང་ཡང་དེ་ཁོ་ན་ཉིད་བརྟགས་དཀའ་བའི་ངང་ལས་འགྱུར་བ་མེད་དེ། དེ་ཉིད་གསང་སྔགས་ཀྱི་དཀྱིལ་འཁོར་ཡིན་པའི་ཕྱིར་རོ། །དེ་བས་ན་སྣང་ཚུལ་ཇི་ལྟར་ཤར་ཡང་མཉམ་པ་ཉིད་རྣམ་པའི་མཆོག་ཀུན་དང་ལྡན་པའི་སྟོང་པ་ཁོ་ནའི་དབྱིངས་མཐའ་གང་ཡང་མ་བཀོལ་བའི་ངོ་བོ་དེ་ཉིད་ལས་མི་གཞན་པར་སྟོང་པའི་ཆོས་བསྐལ་པ་ལ་སོགས་པའི་སྒྱུ་འཕྲུལ་རྣམས་རང་སྣང་ཞིང་འབྱུང་བར་ཟད་དེ། དེ་དག་གི་ངོ་བོ་སྟོང་པ་ཉིད་ཀྱི་གནས་ལུགས་གསང་བ་དམ་པ་དེ་ཁོ་ན་ཉིད་ཆེན་པོར་མ་འདྲེས་ཡོངས་རྫོགས་སུ་བསྟན་པ་ནི། རྒྱུད་ལུང་མན་ངག་ཀུན་གྱི་སྤྱིར་འགྲེལ་ཆོས་ཐམས་ཅད་ཀྱི་མེ་ལོང་ཐེག་ཆེན་གསང་བ་དམ་པ་རང་སྣང་དེ་བཞིན་ཉིད་ཀྱི་ངོ་བོ་སེམས་ཉིད་འོད་གསལ་བའི་དཀྱིལ་འཁོར་དུ་སྟོན་པ་མདོ་ཆེན་པོ་དགོངས་པ་འདུས་པ་འདི་ཉིད་ཁོ་ན་ཡིན་ཏེ་གཉིས་པ་ མེད་པ་ཉིད་དོ། །ཅེས་སྟོན་པ་གསང་བ་པའི་བདག ་པོས་དེ་སྐད་ཅེས་བརྗོད་པས། ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་ཆེན་པོ་རྣམས། ཆོས་ཐམས་ཅད་གསང་བ་དམ་པ་དེ་ཁོ་ན་ཉིད་དུ་ངེས་པར་མཐོང་ནས་རྟོགས་པའི་གདེངས་རྙེད་དེ་སོམ་ཉི་མེད་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཆོ་འཕྲུལ་མངོན་བྱུང་གི་ལེའུ་སྟེ་བཞི་བཅུ་བཞི་པའོ།།

ཐེག་པ་ཆེན་པོ་ངེས་པར་འབྱུང་བའི་ཚུལ་ལས། ལས་རྒྱུད་ཡོངས་སུ་གཅོད་པ་ན་ཡང་འབྱུང་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་འགྲོས་པ་སྟེ་བྱུང་ཚུལ་བསྟན་པ་བཅུ་གཅིག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ངོ་བོ་ཉིད་ཀྱི་སྐུའི་ཆོ་འཕྲུལ་གྱི་མཛད་པ་ཇི་ལྟར་བཀོད་དེ་མངོན་པར་འབྱུང་༼༢༥༡༽བའི་ཐབས་ཆེན་མཆོག་གི་ཚུལ་བསྟན་པའི་ལེའུ་སྟེ་བཞི་བཅུ་རྩ་བཞི་པ་ཉིད་རྣམ་པར་བཀྲོལ་ཏེ་བཤད་པའོ།། །།

ཚུལ་དེ་ཡི་སྒོ་ནས་ཐེག་པ་ཆེན་པོ་ངེས་པར་འབྱུང་བའི་ཚུལ་ལས། གཉེན་པོའི་ཐབས་ཀྱིས་ལས་རྒྱུད་ཡོངས་སུ་གཅོད་པ་ན་ཡང་འབྱུང་བའི་ངེས་ཚིག་དང་ཡི་གེར་སྣང་བའི་དབང་དུ་བསྟན་ཏེ། དོན་དུ་གསུམ་ཀ་ཐ་དད་པར་གྱུར་པ་མེད་དོ། །ཞེས་བྱ་བའི་ངེས་དོན་སྙིང་པོའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་བཅུ་གཅིག་པ་ཉིད་གསལ་བར་བཤད་དེ་ཡང་དག་པར་བསྟན་པའོ།།

ལེའུ་ཞེ་ལྔ་པ་བཀོད་པ་རྣམ་པར་འགྲེལ་པ།

༈ བམ་པོ་བདུན་པར་ཟུག་པ། བཅུ་གཉིས་པ་དགོངས་པ་རྣམ་པར་བགྲོ་བའི་ཚུལ་བྱུང་ཚུལ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ལ་གཉིས་ཏེ། དྲིས་པ་དང༌། ལན་དུ་བགྲོ་བར་དཀའ་བར་གསུངས་པའོ། །དང་པོ་ནི།

དེ་ནས། ཞེས་པ་ནས། བགྲོས་ཏེ་གྲགས་པ་ལགས། ཅེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྔོན་དུ་བྱུང་བའི་ཚིག་བཅུ་གཉིས་པའི་ཐ་མ་དགོངས་པ་རྣམ་པར་འགྲོས་པ་ན་ཡང་འབྱུང་ཞེས་སྣང་བ་དེ་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཉིད་ཀྱིས། ཐེག་པ་ཆེན་པོ་གསང་བ་དམ་པ་འབྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། དགོངས་པ་རྣམ་པར་བགྲོ་བ་ན་ཡང་འབྱུང་བ་ཞེས་བཀོད་པ་དེ།

ཇི་ལྟ་ཞིག་ཏུ་བགྲོས་ཏེ་གྲགས་པ་ལགས།

སྤྱིར་བྱུང་ཚུལ་འདི་ཡང་གསང་བ་རྒྱུད་ཀྱི་བགྲོ་བ་མཛོད་ཀྱི་ལན་ཏེ། ཁྱད་པར་རྩལ་འཕངས་ལས་འབྲས་བུ་བསྟན་པ་འཆད་པའི་མཛད་པ། རྒྱུད་གནས་ལུགས་ལས་དགོངས་པ་རྣམ་པར་བགྲོ་བའི་བྱུང་ཚུལ། དོན་གཏན་ལ་འབེབས་པའི་ལྟ་བ། བླ་བློན་ཚོགས་ནས་རྒྱལ་པོའི་ཆབ་སྲིད་འཚོ་བ་ལྟ་བུ་ཉིད་རྒྱས་པར་སྟོན་ནོ། །དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྔོན་དུ་བྱུང་བའི་ཚིག་བཅུ་གཉིས་པའི་ཐ་མ་སྒོ་གསུམ་གྱི་ངོས་ནས་དགོངས་པ་རྣམ་པར་བགྲོ་བ་ན་ཡང་འབྱུང༌། ཞེས་སྣང་བའི་དྲི་བ་ཡོངས་སུ་དྲིས་པ། ཀྱེ་སྟོན་པ་གསང་བ་པའི་བདག་པོ། ཉིད་ཀྱི་ཐེག་པ་ཆེན་པོ་གསང་བ་དམ་པ་འབྱུང་བའི་ཚུལ། སྟོན་པ་ཤཱཀྱ་ཐུབ་པས་ལུང་བསྟན་པ་གཏམ་རྒྱུད་དུ་བརྗོད་པའི་སྐབས་སུ། དགོངས་པ་རྣམ་པར་བགྲོ་བ་ན་ཡང་འབྱུང༌། ཞེས་བཀོད་པ་དེ་ཉིད་ཇི་ལྟ་བ་ཞིག་ཏུ་བགྲོས་ཏེ་གྲགས་པ་ལགས།

གཉིས་པ་ལན་དུ་བགྲོ་བར་དཀའ་བར་གསུངས་པ་ནི།

སྨྲས་པ། ཞེས་པ་ནས། དེ་སྐད་ཅེས་སྨྲས་པས། ཅེས་པའི་བར་གྱིས་བསྟན་ཏེ།

སྨྲས་པ། ལངྐའི་བདག་པོ། གང་ཡོངས་སུ་དྲི་བ་དེ་ནི། འདི་ལྟར་ཟབ་པ། ཆེས་ཟབ་པ། འདི་ལྟར་དཀའ་བ། ཆེས་དཀའ་བ། རྟོག་གེའི་སྤྱོད་ཡུལ་མ་ཡིན་པ། བརྟག་པར་རབ་ཏུ་དཀའ་བ། དཔག་པ་ལས་འདས་པ་སྟེ། གང་རྒྱུད་ཡོངས་སུ་དག་པའི་སངས་རྒྱས་དང་། གང་ས་ལ་གནས་པ་རྣམས་ཀྱིས་ཀྱང་། རབ་ཏུ་བགྲོ་བར་མི་ནུས་པ་ཡིན་ན། བདག་གིས་ཡོངས་སུ་བགྲོ་བ་ལྟ་ཅི་སྨོས་ཏེ། གང་གི་སྤྱོད་ཡུལ་ཡང་མ་ཡིན་ནོ། །དེ་སྐད་ཅེས་སྨྲས་པས།

གསང་བའི་མངའ་བདག་ཆེན་པོས་གསང་སྔགས་ཀྱི་ཆེ་བ་དབྱུང་བ་དང༌། བསྐལ་པའི་ས་ལ་གཞེས་པའི་ཕྱིར་སླར་ཡང་སྨྲས་ཏེ་བཀའ་སྩལ་པ། སྡུད་པ་པོ་ལང་ཀའི་བདག་པོ། གང་ཡོངས་སུ་དྲི་བ་དེ་ནི་སྐྱེ་བོ་དང་མུ་སྟེགས་ལ་སོགས་པས་མི་རྟོགས་པས་འདི་ལྟར་ཟབ་པ། འདས་པའི་ལམ་ལ་གནས་པས་ཀྱང་སྤྱོད་ཡུལ་མིན་པས། ༼༢༥༢༽ཆེས་ཟབ་པ། རྒྱུ་ཡི་ཐེག་པས་གཏན་ལ་དབབ་པར་མི་ནུས་པས་འདི་ལྟར་དཀའ་བ། སྔགས་ཕྱི་པ་དང་རྒྱུད་ལུང་གིས་སྒོམ་ཡུལ་ལས་འདས་པས་ཆེས་དཀའ་བ། ཚུ་རོལ་མཐོང་བའི་བློས་གཞལ་བར་མི་ནུས་པས་རྟོག་གེའི་སྤྱོད་ཡུལ་མ་ཡིན་པ། ཡུལ་དང་དངོས་པོར་མི་གནས་པས་བརྟགས་པར་རབ་ཏུ་དཀའ་བ། རང་རྒྱུད་པ་དང་ལམ་པ་རྣམས་ཀྱིས་བློ་ཡིས་དཔག་པ་ལས་འདས་པ་སྟེ། གང་ཀུན་ཏུ་འོད་ལ་བཞུགས་པའི་རྒྱུད་ཡོངས་སུ་དག་པའི་སངས་རྒྱས་དང༌། གང་རྒྱུའི་ས་བཅུ་པ་ལ་གནས་པ་རྣམས་ཀྱིས་ཀྱང༌། རབ་ཏུ་བགྲོ་བར་མི་ནུས་པ་ཡིན་ན། བདག་གིས་ཡོངས་སུ་བགྲོ་བར་མི་ནུས་པ་ལྟ་ཅི་སྨོས་ཏེ། རྒྱུད་དག་པའི་སངས་རྒྱས་དང་བྱང་ཆུབ་སེམས་དཔའ་ཆེན་པོ་གང་གི་སྤྱོད་ཡུལ་ཡང་མ་ཡིན་ནོ། །དེ་སྐད་ཅེས་སྨྲས་ཏེ་བཀའ་སྩལ་པས།

གཉིས་པ་རྒྱས་པར་བཤད་པ་ལ་གཉིས་ཏེ། གནད་ནས་ཕབས་ཏེ་ཞུས་པ། དེ་ལ་ལན་གནང་བའོ། །དང་པོ་ནི།

ལང་ཀའི། ཞེས་པ་ནས། ཞེས་བསྐུལ་བ་ལས། ཞེས་པའི་བར་གྱིས་བསྟན་ཏེ།

ལངྐའི་བདག་པོས་འདི་སྐད་ཅེས་སྨྲས་སོ། །ཀྱེ་སྐྱེས་བུ་ཆེན་པོ་གསང་བ་པའི་བདག་པོ། ཉོན་མོངས་པར་སྣང་བའི་འགྲོ་བ་རྣམས་ལ་ཕན་པ་དང་སྙིང་བརྩེ་བ་ཉིད་དུ་བགྱི་བའི་སླད་དུ། མི་ཆེན་པོ་རྣམས་ཀྱི་སྤྱོད་ཡུལ། ཆོས་ཐམས་ཅད་མངོན་པར་རྫོགས་པར་སངས་རྒྱས་པ། གང་དུ་མ་བཀག་པའི་ཆོས་ཉིད་དུ་ལོངས་སྤྱོད་པ། ཐབས་ཀྱི་ཐེག་པ་ཆེན་པོ་དགོངས་པ་དམ་པ་དེ་ཁོ་ན་ཉིད་དེ། རྣམ་པར་བགྲོ་ཞིང་སྨྲ་བའི་སེང་གེ་ཁྱོད་ཀྱིས། ཕྱིན་ཅི་མ་ལོག་པར་བགྲོ་བའི་དུས་ལ་བབ་བོ། །སྐྱེས་བུ་ཆེན་པོ་ཤིན་ཏུ་རབ་ཏུ་དུས་ལ་བབ་བོ། །ངེས་པའི་དམ་པར་བགྲོ་བའི་དུས་ལ་བབ་བོ། །དེ་ཅིའི་སླད་དུ་ཞེ་ན། སྐྱེས་བུ་ཆེན་པོ་ཁྱོད་ནི། དེ་བཞིན་གཤེགས་པ་ཐམས་ཅད་ཀྱི་བཀའ་གསང་བ་ཆེན་པོའི་བདག་པོར་དབང་གིས་དབང་བསྐུར་བ་ལགས། གང་རྨོངས་པ་རྣམས་ཀྱིས་གོ་འབྱེད་པ་དང་། གང་འཐོམས་པ་དྲང་བའི་ཐབས་སྤྲིན་ཕུང་གི་དྲང་བས། ཐམས་ཅད་བདེ་ལག་ཏུ་དྲང་བའི་ཐབས་སུ་དགོངས་པ་དམ་པའི་ལུང་དགྲོལ་དུ་གསོལ་ཞེས་བསྐུལ་བ་ལས།

དེ་ནས་སྡུད་པ་པོ་ལང་ཀའི་བདག་པོ་དེས། ངེས་པར་བསྐུལ་བ་གནད་ལ་ཕབས་ནས་བགྲོ་བར་མཛད་པ་ཆེད་དུ་ཞུ་བའི་ཕྱིར་འདི་སྐད་ཅེས་སྨྲས་སོ། །ཀྱེ་སྟོན་པ་སྐྱེས་བུ་ཆེན་པོ་གསང་བ་པའི་བདག་པོ། ཞེས་བོས་ནས། གདུལ་བྱ་མངོན་པར་མཐོ་བ་ལ་གནས་པའི་ལྷ་མི་ལ་སོགས་པ་ཉོན་མོངས་པར་སྣང་བའི་འགྲོ་བ་རྣམས་ལ་ཕན་པར་བྱ་བ་དང་རྒྱུ་དང་སྔགས་ཀྱི་ནང་གི་ངེས་པར་ལེགས་པའི་བྱང་ཆུབ་ལ་གནས་པ་རྣམས་ལའང་ཐུགས་རྗེ་ཆེན་པོས་སྙིང་བརྩེ་བ་ཉིད་དུ་བགྱི་བའི་སླད་ཀྱི་དགོས་ཆེད་དུ། མི་ཆེན་པོ་ཐེག་ཆེན་གསང་མཆོག་རྒྱལ་པོའི་རྣལ་འབྱོར་དྲྭ་བར་གྱུར་པར་དག་དང༌། སངས་རྒྱས་རྣམས་ཀྱི་སྤྱོད་ཡུལ། ཆོས་ཐམས་ཅད་རིལ་གྱི་ངོ་བོ་ཉིད་སྣང་བའི་མངོན་སུམ་དུ་ཡང་དག་པར་རྫོགས་པར་སངས་རྒྱས་ཀྱི་ས་མཆོག་ཏུ་སྟོན་པ་དེའི་ཕྱིར་སྤྱོད་པ་ལ་ཡང་རིས་མེད་དེ། གང་དུ་ཡང་མ་བཀག་པའི་ཆོས་ཉིད་དུ་ལོངས་སྤྱོད་པ། མཉམ་པ་ཉིད་ཀྱི་མཛད་པ་འཆིང་བའི་ལས་ཉིད་ཀྱིས་ཐར་བར་བྱེད་དེ་སྤངས་པ་མེད་པར་འབྲས་བུར་གསལ་བས་ཐབས་ཀྱི་ཐེག་པ་ཆེན་པོ། གང་གི་དོན་ནི་རྒྱལ་བ་ཀུན་གྱི་དགོངས་པའི་ཞེ་ཕུགས་མཐར་ཐུག་པ་དམ་པ་བརྣག་པར་བྱ་བ་དེ་ཁོ་ན་ཉིད་དེ། དེ་ལྟ་བུའི་གསང་ཆེན་སྔགས་ཀྱི་ཐེག་པ་འདི་ཉིད། རྣམ་པར་བགྲོ་ཞིང་གསང་བའི་ཆོས་སྟོན་པའི་སྨྲ་༼༢༥༣༽བའི་སེང་གེ་འགྱིང་བག་ཏུ་བཞུགས་པའི་སྟོན་མཆོག་དམ་པ་ཁྱོད་ཀྱིས། རང་དོན་དུའང་གསང་བ་ཟབ་མོའི་དོན་ཇི་ལྟ་བ་ཉིད་ཁོ་ན་ལྟར་ཕྱིན་ཅི་མ་ལོག་པར་བགྲོ་བའི་དུས་ལ་བབ་བོ། །འཆད་པའི་སྐྱེས་བུ་ཆེན་པོ་གཞན་དོན་དུའང་ཤིན་ཏུ་རབ་ཏུ་འདིས་འདུལ་བའི་སྐབས་ཀྱི་ལུང་བསྟན་པ་དང་བསྐུལ་བར་གྱུར་པའི་དུས་ལ་བབ་བོ། །གཉིས་ཀའི་དོན་དུའང་ངེས་པ་དོན་གྱི་གསང་བ་དམ་པ་བགྲོ་ཞིང་བཀའ་སྩལ་པའི་དུས་ལ་ཡང་དག་པར་བབ་བོ། །ཞེས་བརྣག་ཅིང་ཞུས་ནས། གནད་ལ་དབབ་པར་ཞུ་བའི་ཕྱིར། དེ་ཅིའི་སླད་དུ་ཞེ་ན། ཁྱེད་ཀྱིས་བསྟན་པར་དཀའ་བར་གསུངས་ཀྱང༌། སྟོན་པ་དམ་པ་ཁྱེད་ཀྱིས་སྟོན་སྤྱོད་པའི་གཏན་ཚིགས་དང་དགོས་པ་ནི། སྐྱེས་བུ་ཆེན་པོ་སྟོན་པའི་ཐུགས་ལས་སྐྱེས་པ་ཁྱོད་ལ་ནི། རྒྱལ་བ་ཐམས་ཅད་ཀྱི་རིགས་ཀྱི་བདག་པོ་ཉིད་ཀྱིས་འཆད་པ་ལྟར། དེ་བཞིན་གཤེགས་པ་ཐམས་ཅད་ཀྱི་བཀའ་གསང་བ་ཆེན་པོའི་དམ་པའི་མཛོད་གསུམ་གྱི་བདག་པོར་རྡོ་རྗེ་རྒྱ་གྲམ་གྱི་འཁོར་ལོ་ལག་ཏུ་གཏད་དེ། རྣམ་པར་བླ་བཀྱལ་གྱི་སྤོབས་པ་ཅན་དུ་བྱིན་གྱིས་བརླབས་པར་མཛད་ནས་གསང་སྔགས་འཆད་པའི་སྐྱེས་བུར་དབང་གིས་དབང་བསྐུར་ནས། དམན་པ་གསང་དོན་ལ་མདོངས་པའི་ཡེ་ཤེས་གྲོལ་བར་བྱ་བ་དང༌། ཤེས་རབ་ཀྱི་སྤྱན་མདོངས་པ་དག་གི་ལིང་ཏོག་བསལ་ཏེ། ཐབས་མང་པོ་ཟད་པ་མེད་པས་གདུལ་བྱ་རྣམས་གདུང་བ་མེད་པར་ཐར་པ་མཆོག་གི་གོ་འཕང་ཐོབ་པར་བྱ་བའི་ཕྱིར་དབང་བསྐུར་བ་ལགས་པས་འདིར་ཡང་དགོས་པ་དེ་ཉིད་ཀྱི་ཕྱིར་ཏེ། གང་གསང་དོན་ལ་རྨོངས་པ་རྣམས་ཀྱི་ཤེས་པ་དགྲོལ་བར་མཛད་དེ་གོ་འབྱེད་པ་དང༌། གང་མ་རིག་པས་ཤེས་རབ་ཀྱི་སྤྱན་འཐོམས་ཏེ་ལྡོངས་པ་དག་གི་ལིང་ཏོག་བསལ་ཏེ་ཡང་དག་པར་དྲང་བའི་ཐབས་རྒྱ་མཚོའི་སྤྲིན་དཔུང་གི་དྲྭ་བ་ཁྱོད་ལ་མངའ་བས། བློ་གྲོས་ཅན་གྱི་གདུལ་བྱ་ཐམས་ཅད་བདེ་བླག་ཉིད་དུ་གསང་བ་མཆོག་གི་རྒྱལ་ས་ལ་དྲང་བའི་སླད་དུ། གསང་སྔགས་ཐེག་པ་ཆེན་པོ་རྒྱལ་བ་ཀུན་གྱི་དགོངས་པ་དམ་པའི་ལུང་ཆེན་པོ་འདི་ཉིད་ཡང་དག་པར་དགྲོལ་ཏེ་གསལ་བར་བཤད་དུ་གསོལ། ཞེས་གསོལ་བ་བཏབ་ཅིང་གཞན་བསྐུལ་མཛད་པ་ལས།

གཉིས་པ་དེ་ལ་ལན་གནང་བ་ལ་གཉིས་ཏེ། དེ་ལྟར་བསྐུལ་བ་ལ་ལེགས་པ་བྱིན་པ། ལུང་དམ་པ་རྒྱས་པར་བཤད་པའོ། །དང་པོ་ནི།

གསང་བ་པའི། ཞེས་པ་ནས། ༼༢༥༤༽གླེང་བསླང་ལེགས་སོ་ལེགས། །ཞེས་པའི་བར་གྱིས་བསྟན་ཏེ།

གསང་བ་པའི་བདག་པོ་དེས་འདི་སྐད་ཅེས་སྨྲས་སོ། །བསྐུལ་བའི་གོ་ཆ་ཆེན་པོ་ཁྱོད། །ཀུན་ལ་རབ་ཏུ་བརྩེ་བའི་ཕྱིར། །གང་ལ་བསྐུལ་བ་ཁྱོད་བརྩོན་ན། བགྲོ་བ་གླེང་བསླང་ལེགས་སོ་ལེགས།།

དེ་ནས་སྟོན་པ་གསང་བ་པའི་བདག་པོ་དེས། སྡུད་པ་པོ་ལ་འདི་སྐད་ཅེས་བཀའ་སྩལ་ཏེ་སྨྲས་སོ། །གསང་སྔགས་ཞུ་བར་དམ་བཅས་ཏེ་བསྐུལ་བར་མཛད་པའི་གོ་ཆ་ཆེན་པོ་དང་ལྡན་པ་ལང་ཀའི་མངའ་བདག་ཁྱོད་ཀྱིས་གདུལ་བྱ་སེམས་ཅན་ཀུན་ལ་ཐུགས་རབ་ཏུ་བརྩེ་བའི་ཕྱིར་གསང་དོན་ཟབ་མོའི་དངོས་གཞི་གང་སྟོན་པ་ང་ལ་ཞུ་ཞིང་འཆད་པར་བསྐུལ་བར་དམ་པ་ཁྱོད་ཉིད་བརྩོན་འགྲུས་བརྟན་པས་ན། རྒྱལ་བ་ཀུན་གྱི་དགོངས་པ་བགྲོ་ཞིང་གསང་ཆེན་ཆོས་ཀྱི་མེ་ལོང་དམ་པ་བཤད་དུ་གསོལ་ཞེས་སྐབས་ལས་གླེང་དུ་བསླང་བ་ནི། རང་གི་དོན་དུའང་ལེགས་སོ། །གཞན་གྱི་དོན་དུའང་ཤིན་ཏུ་ལེགས་པས་ཕྱིན་ཅི་མ་ལོག་པར་བསྟན་པར་བྱའོ།།

གཉིས་པ་ལུང་དམ་པ་རྒྱས་པར་བཤད་པ་ལ་གསུམ་སྟེ། སྐུ་བཞི་ལས་ཐོས་པའི་སྒོ་ནས་བཤད་པར་དམ་བཅའ་བ། ཐོས་པས་མཐོང་བར་འགྱུར་བས་ཉོན་ཅིག་པར་གདམས་པ། བགྲོ་བ་དངོས་ཀྱི་དོན་ནོ། །དང་པོ་ནི།

འདི་ལྟར་འདི་སྐད། ཅེས་པ་ནས། ཙམ་དུ་བགྲོ་བར་བྱ། །ཞེས་པའི་བར་གྱིས་བསྟན་ཏེ།

འདི་ལྟར་འདི་སྐད་བདག་ཉིད་ཀྱིས། །ངེས་པའི་དོན་དེ་ཁོ་ན་ཉིད། །ཐོས་པར་སྣང་བའི་དུས་གཅིག་ན། །ཐམས་ཅད་ནམ་མཁའ་ལྟ་བུ་ལས། །རང་བྱུང་རང་སྣང་ཉིད་དུ་ཐོས། །གསང་བའི་ཚིག་ནི་འདི་སྐད་དུ། །ཐོས་པར་གྱུར་པའི་དུས་གཅིག་ན། །འཐུན་འཇུག་ཐབས་ཀྱི་ཆ་འཐུན་དུ། །བསྟན་ནས་དྲང་བའི་ཐབས་སུ་ཐོས། །ལུང་གི་གཏན་ཚིགས་འདི་སྐད་དུ། །བདག་གིས་ཐོས་པའི་དུས་གཅིག་ན། །ལྡེམས་དགོངས་སྦྱོར་བའི་ཚུལ་ཉིད་ཀྱིས། །བསྟན་ནས་དཀྲི་བའི་ཐབས་སུ་ཐོས། །འདོད་རྐྱེན་ཚིག་ནི་འདི་སྐད་དུ། །རྟོགས་པར་གྱུར་པའི་དུས་གཅིག་ན། །འདོད་ཆེན་པ་ལ་འདོད་པ་ཡིས། །ཐབས་ཀྱིས་དྲང་བ་ཉིད་དུ་ཐོས། །གསང་སྔགས་རྡོ་རྗེ་ནམ་མཁའ་ཆེ། །ཚིག་གི་སྤྱོད་ཡུལ་མ་ཡིན་པས། །བརྗོད་པས་རྟོགས་པར་མི་ནུས་ཏེ། །བདག་གིས་བགྲོ་བར་རབ་ཏུ་དཀའ། །དཔེ་འམ་ཚད་མའམ་གཏན་ཚིགས་སམ། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ཏེ། །དམུས་ལོང་མཁའ་ལ་མཐོས་འཇལ་འདྲ། །འོན་ཀྱང་བཀའ་ཡི་གཉེར་གཏད་ཅིང་། །ལོག་ཞེན་ཐབས་ཀྱིས་དྲང་བ་དང་། །བསྐུལ་བ་ཁྱོད་ཀྱི་དམ་ཚིག་ཀྱང་། །སྔོན་གྱི་གོ་ཆ་གོན་པའི་མཐུས། །མ་རྟོགས་པ་རྣམས་ཚིག་ཙམ་གྱིས། །མཚོན་ནས་རྣམ་གྲོལ་ས་དག་ལ། །རྒྱུད་དེ་དྲང་བའི་ཐབས་ཉིད་དུ། །ཅི་རིགས་ཙམ་དུ་བགྲོ་བར་བྱ།།

སྐུ་བཞི་ལས་ཐོས་པའི་དགོངས་པ་མངའ་བས་བགྲོ་བ་པོ་ཡིན་པར་ཞལ་གྱིས་བཞེས་ཏེ་ཐོས་པའི་ལོ་རྒྱུས་བཀའ་སྩལ་པ། འདི་ལྟར་སྟོན་པ་བཞིས་འཁོར་བཞི་ལ་བསྟན་པ་བཞི་གསུངས་པ་བདག་གིས་མ་བརྒྱུད་པར་མངོན་སུམ་དུ་ཐོས་ཤིང་དོན་འདི་སྐད་སྟོན་པ་བདག་ཉིད་ཀྱིས་གསང་སྔགས་ཇི་བཞིན་པའི་ངོ་བོ་མ་ནོར་བར་ངེས་པའི་ཆོས་ཉིད་བྱང་ཆུབ་སེམས་ཀྱི་དོན་དེ་ཁོ་ན་ཉིད་བློ་གྲོས་ཅན་གྱིས་ཉི་མའི་སྙིང་པོ་ལྟར་དོན་དམ་ངེས་པའི་ཚིག་ཏུ་ཐོས་པ་དང་མཐུན་པར་ཡང་དག་པར་ཐོས་པས་དོན་གྱི་ངོ་བོ་རིག་པ་ལ་ཤར་ཞིང་སྣང་བའི་དུས་གཅིག་གི་ཚེ་ན། དེ་ལས་འཕྲུལ་པའི་ཇི་སྙེད་པའི་ཆོས་ཐམས་ཅད་མཉམ་པ་ཉིད་ཀྱི་ངང་དུ་གསལ་བས་དཔེ་ནམ་མཁའ་ལྟ་བུ་ཆོས་ཀྱི་སྐུ་ལས་ནི་ཚིག་ཏུ་མ་བརྗོད་པར་ངའི་ཤེས་རབ་དྭངས་པ་ལ་སྟོད་པའི་བྱིན་རླབས་རང་བྱུང་ཉིད་དུ་ཁོང་ནས་ཤར་ཏེ་བསྟན་པ་ཡང་རིལ་ཆོས་ཉིད་ཇི་བཞིན་པར་བློ་ལ་རང་སྣང་སྟེ་གསལ་བར་སྒྲིབ་མེད་ཉིད་དུ་ཤར་བ་ནི་ཐོས་པའོ། །གསང་བའི་མངའ་བདག་ལོངས་སྤྱོད་རྫོགས་པའི་སྐུ་ལས་སྐུའི་བསྟན་པ་མེ་ལོང་ལྟ་བུའི་གསུང་དགོངས་པ་བརྡའི་ཚིག་ནི་འདི་སྐད་དུ་ཐོས་པར་གྱུར་པའི་དུས་གཅིག་གི་སྐབས་ན། གདུལ་བྱ་རྣམས་དང་ལྟ་སྤྱོད་མཐུན་པར་འཇུག་པའི་ཐབས་ཀྱིས་ཆ་མཐུན་སྦྱོར་༼༢༥༥༽བའི་ལུང་དུ་དགོངས་པས་བརྒྱུད་དེ་གཉིས་མེད་མཆོག་གི་ཡེ་ཤེས་བསྟན་ནས་རིགས་རྒྱུད་ཅན་གྱིས་ལྡེམ་དགོངས་མན་ངག་གི་ཚིག་དུ་ཐོས་པ་ལྟར་ངེས་པར་མཚོན་ནས་དྲང་བའི་ཐབས་སུ་ཡང་དག་པར་ཐོས་པའོ།།

གསང་སྔགས་ཀྱི་ལུང་གི་གསང་བ་ཟབ་མོ་དོན་གཅུས་པའི་གཏན་ཚིགས་ཀྱི་སྒོ་ནས་ཚིག་གི་བརྗོད་པ་འདི་སྐད་དུ། རྡོ་རྗེ་འཛིན་པ་བདག་གིས་སྟོན་པ་སྤྲུལ་པའི་སྐུ་ལས་ཡང་དག་པར་ཐོས་པའི་དུས་གཅིག་གི་ཚེ་ན། འཆད་པར་འགྱུར་བའི་ལྡེམ་པོ་བཞི་དང་དགོངས་པ་བཞིས་གཞན་ལ་དགོངས་ནས་ཚིག་ཏུ་སྨྲས་པས་དོན་ལ་སྦྱོར་བའི་ཚུལ་ཉིད་ཀྱིས། ཚངས་པ་དབྱངས་ཀྱི་གསུང་གིས་གཞན་གྱི་ཚིག་ཏུ་སྨྲ་བ་ལ་སོགས་པའི་ཚུལ་དུ་བསྟན་ནས་དོན་ལ་དྲང་བའི་འཇུག་སྒོ་ཉིད་དུ་ལོག་སྲེད་ཅན་གྱིས་བཀྲི་དྲང་བརྒྱུད་པའི་ཚིག་ཏུ་ཐོས་པ་ལྟར་ཡང་དག་པར་འཁྲིད་པའི་ཐབས་སུ་ཕྱིན་ཅི་མ་ལོག་པར་ཐོས་པའོ། །གདུལ་བྱའི་འདོད་ཆགས་ལ་སོགས་པ་ཉོན་མོངས་པ་རེ་རེའི་ཆ་རྐྱེན་དུ་དེ་དང་འཚམས་པར་དེ་ཉིད་དུ་སྤྱོད་པའི་ཐབས་ཆེན་པོའི་ཚིག་ནི་ཉེ་བར་བསྟན་པ་འདི་སྐད་དུ། སྟོན་པ་གསང་བའི་སྐུའི་གསུང་སེང་གེ་ལྟ་བུའི་བྱིན་རླབས་ཀྱིས་དེ་ཁོ་ན་ཉིད་ཀྱི་རྟོགས་པ་མ་འདྲེས་པར་གསལ་བ་ཁོ་ནར་གྱུར་ཏེ་གསང་བའི་དགོངས་པ་དམ་པ་ཐོས་ཏེ་ངེེས་པའི་དུས་གཅིག་གི་ཚེ་ན། ཤིན་ཏུ་འདོད་ཆགས་ཆེན་པོར་གྱུར་པའི་ལས་རྣམས་སྤངས་པས་མི་སྤོངས་ཏེ། དཔེར་མེས་ཚིག་པ་ལ་སླར་ཡང་མེས་གདུང་ན་ཕན་པ་བཞིན་འདོད་པ་སྤྱོད་ཀྱང་དེ་ཡིས་མི་ལྷུང་བར་གྲོལ་བར་འགྱུར་བའི་ཐབས་ཀྱིས་ཡང་དག་པར་འདྲེན་པའི་ཕྱིར། ཞེན་ཆགས་ཅན་གྱིས་འདོད་པ་རང་རྐྱེན་གྱི་ཚིག་ཏུ་ཐོས་པ་ལྟར་གསང་བ་ངེས་པའི་དབྱིངས་སུ་རྣམ་པར་དྲང་བའི་ཐབས་ཀྱི་རྒྱལ་པོའི་སྒོ་དམ་པ་ཉིད་དུ་གསལ་བར་ཐོས་ཏེ་བརྗོད་པ་དང་འདྲ་བའི་ཕྱིར་རོ། །སྐབས་འདིར་ཕྱག་མཆན་ན། ཡིད་འབྱུང་ནས་སླར་བརྟགས་པས་སྟོང་པ་ཉིད་དུ་སྦྱོར་བའོ། །ཞེས་ཀྱང་འབྱུང་ལ། འདི་ཇི་ལྟར་འདོད་པ་ལྟར་རང་སྒེར་སྤྱོད་དུ་བཅུག་ནས་ཕྱིས་སུ་རྟོགས་པ་བྱུང་བས་ལྷག་པའི་སེམས་སྐྱེ་བ་ལ་བྱའོ། །ཞེས་གསུངས། དེ་ལྟར་སྐུ་བཞི་ལས་ཐོས་པར་བསྟན་པ་ནི་ཡིད་ཆེས་པར་འགྱུར་བའི་དགོས་ཆེད་དུ་ཡིན་ནོ། །འོན་ཀྱང་བརྗོད་པའི་ཡུལ་ལས་འདས་པས་བརྗོད་དཀའ་བར་བསྟན་ཏེ། ལྷག་པའི་རྣལ་འབྱོར་ཆེན་པོའི་དོན་ཤིན་ཏུ་ཟབ་པས་བློ་ཡི་ཡུལ་༼༢༥༦༽ལས་འདས་ཏེ་རྟོགས་དཀའ་བས་གསང་སྔགས་ངོ་བོ་དབྱེར་མེད་པས་རྡོ་རྗེ་ལྟར་མི་ཕྱེད་པ་རྩོལ་བ་དང་བྲལ་བར་ཀུན་ལ་གདལ་བས་ནམ་མཁའ་དྭངས་པའི་ཀློང་བཞིན་དུ་རང་རིག་མཆོག་ཏུ་ཆེ་བའི་རྒྱལ་པོ་ངོ་བོ་མ་ངེས་པའི་གསང་བ་དམ་པའི་དོན་ནི་གཞན་དུ་བསྟན་པའི་ཡུལ་མེད་དེ་ཚིག་གི་སྤྱོད་ཡུལ་མ་ཡིན་པས་ན། བརྗོད་པས་རྟོགས་པར་མི་ནུས་ཏེ་བསམ་གྱིས་མི་ཁྱབ་པའི་ཆོས་ཉིད་བློ་འདས་བརྗོད་བྲལ་ཆེན་པོ་ཡིན་པའི་ཕྱིར། མཚན་ཉིད་དེ་ལྟ་བུ་ལ་གསང་བའི་མཛོད་འཛིན་བདག་གིས་ཀྱང་ཁྱོད་ལ་བགྲོ་བར་རབ་ཏུ་དཀའ་སྟེ་བསྟན་དུ་མི་བཏུབ་པར་བཀའ་སྩལ་པའོ། །དེའི་གཏན་ཚིགས་ཀྱང༌། ཡེ་ཤེས་རྫོགས་པ་ལས། གཉིས་སུ་མེད་པའི་རང་བཞིན་པས། །ཆོས་ཅན་ཆོས་ཉིད་གང་ཡང་མིན། །འདོད་པའི་བློ་ཡིས་གང་སྦྱོར་བ། །དམན་པའི་སེམས་ལ་བསྟན་པར་ཟད། །ཅེས་གསུངས་པ་ལྟར། འོག་མ་མཐའ་ཚོལ་གྱི་ཤེས་པ་ལ་སྣང་བའི། དཔེའམ་ཚད་མའམ་གཏན་ཚིགས་སམ་རྗེས་སུ་དཔག་པའི་ཤེས་རབ་རྣམས་ཀྱིས་རྟོགས་པར་ནུས་པ་མ་ཡིན་ཏེ། ཐུན་མོང་གི་གཏན་ཚིགས་ཀྱིས་མི་ཕེབས་པར་བཤད་ཟིན་པས་དེ་ནི་དཔེར་ན་དམུས་ལོང་གིས་ནམ་མཁའ་ལ་མཐོས་འཇལ་བ་དང་འདྲའོ།།

འོན་ཀྱང་གསང་བའི་བདག་པོས་ཐུགས་རྗེས་དགོངས་ནས་འཆད་པར་བསྟན་ཏེ། དེ་ལྟར་འཆད་པར་དཀའ་ན་ཡང༌། རྒྱལ་བ་ཐམས་ཅད་ཀྱིས་གསང་བ་འཛིན་པའི་བདག་པོར་བཀའ་ཡི་གཉེར་གཏད་ཅིང་དབང་བསྐུར་བར་མཛད་པའི་ཕྱིར་དང༌། མུ་སྟེགས་པ་དང་ཐེག་པ་འོག་མ་ལ་སོགས་པ་ལོག་སྲེད་ཅན་དང་མཚན་མར་ཞེན་པ་གཞན་རྣམས་གསང་བའི་ཐབས་ཀྱིས་དོན་ལ་དྲག་ཞིང་རྟོགས་པ་ལ་དགོད་པའི་ཕྱིར་དང༌། ལང་ཀའི་མངའ་བདག་བསྐུལ་བ་པོ་ཁྱོད་ཀྱིས་དམ་ཚིག་ཀྱང་གསང་སྔགས་འཆད་པར་བསྐུལ་བའི་སྔོན་གྱི་བརྩོན་འགྲུས་ཀྱི་གོ་ཆ་གྱོན་པ་དང་ལྡན་པས་བསྐུལ་བའི་ཕྱིར་གསུམ་མམ། ཡང་ན་བསྐུལ་བ་པོ་ཁྱོད་ཀྱི་སྔོན་ཚེ་གསང་སྔགས་འཆད་པར་བསྐུལ་བའི་དམ་ཚིག་ཀྱང་བརྟན་པས་ད་ལྟ་ནན་གྱིས་བསྐུལ་བའི་ཕྱིར་དང༌། སྟོན་པ་བདག་གིས་ཀྱང་བསྐུལ་བ་པོ་གང་དུ་སྣང་བར་ཆོ་འཕྲུལ་གྱི་བཀོད་པས་སྣང་བར་མཛད་དེ་གསང་སྔགས་སྟོན་པར་ཞལ་གྱིས་བཞེས་ཏེ། སྔོན་གྱི་གོ་ཆ་ཆེན་པོ་གྱོོན་པའི་མཐུས་ད་ལྟ་ཡང་༼༢༥༧༽འཆད་པའི་དུས་ལ་བབ་པ་རྣམས་ཀྱི་ཕྱིར་ཏེ། རྒྱུ་མཚན་བཞི་ཡི་སྒོ་ནས། ཚིག་གི་བརྗོད་པས་དོན་ཇི་ལྟ་བ་ཉིད་དུ་ཕེབས་པར་དཀའ་ཡང་གདུལ་བྱ་ས་བཅུ་པ་མན་ཆད་ཀྱི་རབ་འབྲིང་ཐ་མའི་བློ་ཅན་གསང་སྔགས་མཆོག་གི་དོན་མ་རྟོགས་པར་མུན་པའི་སྤྱོད་ཡུལ་ལ་གནས་པ་རྣམས་ཐུན་མོང་མ་ཡིན་པའི་ཚིག་གི་བརྗོད་པ་ཙམ་གྱིས་ཐ་སྙད་ལའང་བརྟེན་ཏེ། གསང་བའི་དོན་གྱི་གནས་ལུགས་ངེས་པར་ཡང་དག་པར་མཚོན་ནས་ཟབ་དོན་གསལ་བར་བསྟན་པས་རྒྱུད་རྣམ་པར་གྲོལ་ནས་ཡང་དག་རྒྱལ་བའི་གོ་འཕང་རང་བྱུང་ལྷུན་རྫོགས་ཀྱི་ས་མཆོག་དག་པ་གཉིས་དང་ལྡན་པ་ལ་དགོད་པའི་ཆེད་དུ་བརྒྱུད་དེ་དྲང་བར་མཛད་པའི་ཐབས་ཀྱི་ཁྱད་པར་གསང་བ་དམ་པ་ཉིད་དུ་འགྱུར་བའི་ཕྱིར་དཔེར་ན་ཁྱེའུས་ཁྱེའུ་འབྱིན་པའི་ཚུལ་དུ་རྟོགས་ནས་ས་མཆོག་ནོན་པའི་ཐབས་སུ་གདུལ་བྱའི་དོན་དང་ཡེ་ནས་ཇི་ལྟར་ཡིན་པ་བཞིན་དུ་ཅི་རིགས་ཙམ་དུ་ཇི་ལྟར་འཚམས་པར་ཡང་དག་པར་བགྲོ་བར་བྱའོ། །ཞེས་གསང་མཛོད་ལུང་གི་གཏེར་སྒོ་ཕྱེས་ཏེ་བཤད་པར་ཞལ་གྱིས་བཞེས་པའོ།།

གཉིས་པ་ཐོས་པས་མཐོང་བར་འགྱུར་བས་ཉོན་ཅིག་པར་གདམས་པ་ནི།

རང་བཞིན་ཡེ་ནས། ཞེས་པ་ནས། རྣམ་པར་བགྲོས་པ་ཉོན། །ཞེས་པའི་བར་གྱིས་བསྟན་ཏེ།

རང་བཞིན་ཡེ་ནས་སངས་རྒྱས་པ། །མཐོང་དང་མི་མཐོང་རྣམ་གཉིས་ལ། །དམན་པའི་སྐབས་ན་དེ་མཐོང་མིན།།

མཐོང་བ་དམ་པའི་སྐབས་ནའོ། །མཐོང་བ་མངོན་ཐོས་རྣམ་གཉིས་ལ། །མཐར་ཕྱིན་དམ་པ་མངོན་སུམ་མ།།

བློ་གྲོས་རྣལ་འབྱོར་སྤྱོད་ཡོན་ཅན། །ཐོས་པས་མཐོང་བར་འགྱུར་ཕྱིར་རོ། །སྟུག་པོ་བཀོད་པའི་རྒྱལ་བ་ཡང་།།

ཆོས་སྐུ་སྙིང་པོར་གྱུར་པས་ན། །དེ་ཡིས་འགྲོ་བ་མི་སྨིན་ཕྱིར། །གཟུགས་སྐུ་བསྟན་ནས་ཚིག་ལམ་བརྗོད།།

འདས་དང་མ་འོངས་ད་ལྟར་གྱི། །དཔག་ཏུ་མེད་པའི་དུས་རྣམས་སུ། །རྒྱལ་བ་རྣམས་ཀྱི་དགོངས་པ་གང་།།

ཇི་ལྟར་རྣམ་པར་བགྲོས་པ་ཉོན།།

ཆོས་ཐམས་ཅད་ཀྱི་རང་བཞིན་གསང་སྔགས་ཇི་བཞིན་པའི་དོན་གྱི་ངོ་བོ་སེམས་ཉིད་ཡེ་ནས་སངས་རྒྱས་པ་ཡི་གནས་ལུགས་ཉིད། སྤྱིར་ན་ཡང་དག་པར་རྟོགས་ཏེ་མཐོང་བ་དང་དེ་ལྟར་མ་རྟོགས་པས་མི་མཐོང་བ་རྣམ་པ་གཉིས་སུ་ཡོད་པ་ལས། དམན་པ་འགྲོ་བ་རྣམས་དང་རྒྱུའི་ཐེག་པའི་སྐབས་ན་ཡེ་ནས་སངས་རྒྱས་པ་དེ་ཉིད་ཇི་བཞིན་དུ་མཐོང་བ་ཡིན་ལ། རྫོགས་པའི་སངས་རྒྱས་རྣམས་དང་རིག་པ་འཛིན་པ་ཆེན་པོ་དག་གིས་ཡང་དག་པར་མཐོང་བ་ནི་གསང་ཆེན་འབྲས་བུའི་ཐེག་པ་དམ་པའི་སྐབས་ལ་བརྟེན་པ་ཁོ་ན་ཡིན་པའི་ཕྱིར་ཡང་བསྟན་དགོས་པའོ། །སྤྱིར་མཐོང་བ་ལའང་གཉིས་ཏེ། གསང་སྔགས་ཇི་བཞིན་པའི་དོན་མངོན་དུ་གྱུར་ཏེ་རང་རིག་པས་མངོན་སུམ་དུ་མཐོང་བ་དག་ཆོས་ཉིད་ཡེ་སངས་རྒྱས་པའི་དོན་དེ་ཉིད་རྣ་བའི་དབང་པོའི་མངོན་སུམ་དུ་མ་ནོར་བ་ཐོས་ཏེ་གསང་བའི་ལུང་དོན་འཛིན་པ་རྣམ་པ་གཉིས་ལས། སྔ་མ་ནི་རྣམ་འདྲེན་སྐུ་ལྔའི་རྒྱལ་བ་འབྲས་བུའི་གོ་འཕང་ལ་བཞུགས་པ་རྣམས་ཡིན་ཀྱང༌། འདིར་ཐོས་པས་མཐོང་བ་ཉིད་ཡང་དག་པར་གོམས་པས་མཐར་ཕྱིན་ཏེ་སྐྱེད་དུ་བྱ་བ་མེད་པར་གྱུར་པ་རྒྱལ་བ་དམ་པའི་༼༢༥༨༽དགོངས་པ་མངོན་སུམ་པ་ཉིད་དུ་འགྱུར་བ་ཡིན་པས། དེ་ནི་ཤེས་རབ་མཆོག་གི་བློ་གྲོས་དང་ཏིང་ངེ་འཛིན་དམ་པའི་རྣལ་འབྱོར་ལ་གནས་པ་སྤྱོད་པ་ཕུལ་དུ་བྱུང་བ་དང་ལྡན་པ་གང་གིས་གསང་བ་མཆོག་གི་ཆེ་བའི་ཡོན་ཏན་ཁྱད་པར་ཅན་རྣམས་སྟོན་པའི་མདོ་བཞི་དང་དགོངས་པ་ཚིག་གསུམ་གྱི་དོན་ལྟ་བུ་བརྗོད་བྱར་བྱས་པའི་གཞུང་ཡང་དག་པར་ཐོས་པས་མཚོན་ནས་དོན་རྟོགས་ཤིང་མཐོང་བར་འགྱུར་བ་ཁོ་ན་ཡིན་པའི་ཕྱིར་རོ། །དེས་ན་དགོས་ཆེད་རྨད་དུ་བྱུང་བ་ལ་བརྟེན་ནས་རྒྱལ་བ་ཀུན་གྱི་དགོངས་པ་གསང་བ་འདི་ཉིད་བགྲོ་ཞིང་ཚིག་ཏུ་བསྟན་པ་ཡིན་ནོ། །དེ་ཡི་ཚུལ་ཇི་ལྟར་ཡིན་པའང༌། འབྲས་བུའི་ས་མཆོག་སྟུག་པོ་བཀོད་པ་ལ་གནས་པའི་རྒྱལ་བ་རྫོགས་པའི་སངས་རྒྱས་ཇི་སྙེད་བཞུགས་པ་དག་གི་ཡང་རྣམ་གྲོལ་ཆོས་ཀྱི་སྐུ་མཆོག་བརྙེས་ཏེ་བྱང་ཆུབ་སྙིང་པོར་ལྷུན་གྱིས་གྲུབ་པར་གྱུར་པའི་ཚེ་ཕྱོགས་ཆའི་སྣང་བ་ཀུན་ལས་འདས་པས་ན། གཟུགས་སྐུའི་བཀོད་པ་མི་སྣང་བར་བྱང་ཆུབ་ཆེན་པོའི་ངང་དེ་ལ་བཞུགས་པ་ཡིས་གདུལ་བྱའི་འགྲོ་བ་ཐམས་ཅད་ཡོངས་སུ་མི་སྨིན་པའི་ཕྱིར། རྒྱལ་བ་དེ་དག་གིས་ཀྱང་མཛད་པ་བསྟན་ཏེ་གདུལ་བྱ་བསྐྱང་བའི་ཆེད་དུ་སྤྲུལ་པ་དང་ལོངས་སྤྱོད་རྫོགས་པའི་གཟུགས་སྐུ་གཉིས་ཀྱི་སྣང་བར་བསྟན་ནས་རིམ་དང་ཅིག་ཆར་དུ་ཐེག་པ་ཆེན་པོའི་ཆོས་ཀྱི་འཁོར་ལོ་ཚིག་ལམ་དུ་བརྗོད་དེ་དངོས་སུ་སྟོན་པ་དང་ལུང་བསྟན་པར་མཛད་དོ། །དེས་ན། ཀུན་འདུས་རིག་པ་ལས། བདེ་གཤེགས་རྒྱལ་བ་ཀུན་གྱི་ཐུགས། །གསང་བ་དེ་ཉིད་སྙིང་པོའི་དོན། །མཉམ་ཉིད་བྱང་ཆུབ་ཐེག་ཆེན་པོ། །གསལ་བར་བཀོད་དེ་ངས་བརྗོད་ཀྱིས། །རྒྱ་ཆེན་འདུས་པའི་ཚོགས་རྣམས་ཉོན། །ཞེས་གསུངས་པ་ལྟར་འདས་པ་དང་མ་འོངས་པ་དང་ད་ལྟར་གྱི་ཞིང་ཀུན་ཏུ་བྱོན་པའི་རྣམ་འདྲེན་རྫོགས་པའི་སངས་རྒྱས་ཐམས་ཅད་ཀྱིས་ཀྱང་དཔག་ཏུ་མེད་པའི་དུས་རྣམས་སུ། ཐོག་མ་མེད་པའི་རྒྱལ་བ་སྐུ་ལྔ་རྣམས་ཀྱི་ཡང་དག་པའི་དགོངས་པ་ཟབ་མོའི་དོན་ཉིད་ཀྱི་ཐུགས་ཀྱི་གསང་མཛོད་གང་ཡིན་པ་ཐེག་པ་ཆེན་པོ་བླ་ན་ མེད་པ་ཉིད་འཁོར་རྣམས་ལ་ཇི་ལྟར་བཀའ་སྩལ་ཏེ་རྣམ་པར་བགྲོས་པ་རྣམས་སྟོན་པ་གསང་བའི་བདག ་པོ་ང་ཡིས་འདུས་པའི་འཁོར་དམ་པ་ཁྱེད་རྣམས་ལ་ཡོངས་སུ་རྫོགས་པར་བརྗོད་དེ་གསལ་བར་བཤད་ཀྱིས་གུས་པ་ཆེན་པོས་ཉོན་ལ་ཡིད་ལ་ལེགས་པར་ཟུང་ཞིག་ཅེས་གདམས་པར་མཛད་དོ།།

གསུམ་པ་བགྲོ་བ་དངོས་ཀྱི་དོན་ལ་གཉིས་ཏེ། ཆོས་ཀྱི་རྣམ་གྲངས་བཅུར་༼༢༥༩༽བགྲོ་བ། མཚན་དང་མདོ་གང་དུ་འདུས་པ་བགྲོ་བའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། དང་པོ་ནི།

ལང་ཀའི། ཞེས་པ་ནས། ནད་གསོ་བར་བྱའོ། ཞེས་པའི་བར་གྱིས་བསྟན་ཏེེ།

ལངྐའི་བདག་པོ་འདི་ལྟ་སྟེ། །དམ་པ་རྣམས་ཀྱི་དགོངས་པ་ལ་འཇུག་པར་འདོད་ན་མཛོད་དུ་འཇུག་པར་བྱའོ། །རང་བཞིན་མ་བཅོས་པར་བྱའོ། །ལྗོན་ཤིང་བསྐྱེད་པར་བྱའོ། །དམ་པར་འཇུག་པར་བྱའོ། །སྒྲོན་མ་བསེལ་བར་བའོ། །ཁྱད་པར་དུ་བགྲོ་བར་བྱའོ། །ཡུལ་ལ་འཇུག་པར་བྱའོ། །མེ་ལོང་བརྟག་པར་བྱའོ། །འཐུན་པར་འཇུག་པར་བྱའོ། །ནད་པ་གསོ་བར་བྱའོ།།

འོ་ན་བསྟན་པ་དངོས་ཇི་ལྟ་བུ་ཞིག་སྙམ་པ་ལ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས་བགྲོས་པའི་དོན་ཉེ་བར་བསྟན་པ་ནི་འདི་ལྟ་སྟེ། རྒྱལ་བ་རྣམ་འདྲེན་དམ་པ་རྣམས་ཀྱི་ཐུགས་ཀྱི་དགོངས་པ་མཐར་ཐུག་ཏུ་བརྣག་པར་བྱ་བའི་གསང་སྔགས་ཐེག་པ་ཆེན་པོ་ལ་ཁྱེད་རྣམས་འཇུག་པར་འདོད་ཅིང་སློབ་པར་མོས་པ་ཞིག་ན། དེའི་ཐབས་ལ་ཆོས་ཀྱི་རྣམ་གྲངས་ཆེན་པོ་བཅུ་ཡོད་དེ། རྣམ་གྲངས་དང་པོ་ནི་མེད་ལ་མི་ཟད་པའི་མཛོད་དུ་འཇུག་པར་བྱ་བའོ། །དེ་ཉིད་ལེའུ་ཞེ་ལྔ་པ་ནས་ང་དྲུག་པའི་བར་བཅུ་གཉིས་ཀྱིས་འགྲེལ་ཏོ། །གཉིས་པ་ནི། གསང་བ་མཆོག་གི་རང་བཞིན་མ་བཅོས་པར་བྱ་བའོ། །དེ་ནི་ལེའུ་ང་བདུན་པས་འགྲེལ་ཏོ། །གསུམ་པ་ནི། བྱང་ཆུབ་སེམས་ཀྱི་ལྗོན་ཤིང་བསྐྱེད་པར་བྱ་བའོ། །དེ་ནི་ང་བརྒྱད་པས་འགྲེལ་ཏོ། །བཞི་པ་ནི། ལམ་དམ་པར་འཇུག་པར་བྱ་བའོ། །དེ་ནི་ང་དགུ་པས་འགྲེལ་ཏོ། །ལྔ་པ་ནི། ཤེས་རབ་ཀྱི་སྒྲོན་མ་བསེལ་བར་བྱ་བའོ། །དེ་ཉིད་དྲུག་ཅུ་པས་འགྲེལ་ཏོ། །དྲུག་པ་ནི། སའི་ཁྱད་པར་དུ་འགྲོ་བར་བྱ་བའོ། །དེ་ནི་རེ་གཅིག་པས་འགྲེལ་ཏོ། །བདུན་པ་ནི། དགོངས་པ་སྙིང་པོའི་ཡུལ་ལ་འཇུག་པར་བྱ་བའོ། །དེ་ནི་རེ་གཉིས་པས་འགྲེལ་ཏོ། །བརྒྱད་པ་ནི། མཐུན་པའི་དཔེ་མེ་ལོང་བརྟག་པར་བྱ་བའོ། །དེ་ཉིད་རེ་གསུམ་པས་འགྲེལ་ཏོ། །དགུ་པ་ནི། གདུལ་བྱ་དང་མཐུན་པར་འཇུག་པར་བྱ་བའོ། །དེ་ནི་རེ་བཞི་པས་འགྲེལ་ཏོ། །བཅུ་པ་ནི། རྟོག་པའི་ནད་གསོ་བར་བྱ་བའོ། །དེ་ཉིད་ནི་ལེའུ་རེ་ལྔ་པ་ནས་ཐ་མའི་བར་གྱིས་འགྲེལ་ཏོ།།

གཉིས་པ་རྒྱས་པར་བཤད་པ་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

སྨྲས་པ། ཞེས་པ་ནས། ཡོངས་སུ་ཤེས་པར་བྱ། ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ། ཆོས་ཀྱི་རྣམ་གྲངས་བཅུ་པོ་དེ་དག་ཇི་ལྟར་ཡོངས་སུ་ཤེས་པར་བགྱི།

ལང་ཀའི་བདག་པོས་སྨྲས་པ། གསང་བ་པའི་བདག་པོ། ཆོས་ཀྱི་རྣམ་གྲངས་བཅུ་པོ་དེ་དག་ཇི་ལྟར་ཡོངས་སུ་ཤེས་པར་བྱ་ཞེས་དེ་དག་ཉིད་རྟོགས་པའི་ཐབས་དྲིས་པའོ།།

གཉིས་པ་ལན་ལ་བཅུ་སྟེ། མཛོད་དུ་འཇུག་པར་བྱ་བ། རང་བཞིན་མ་བཅོས་པར་བྱ་བ། ལྗོན་ཤིང་བསྐྱེད་པར་བྱ་བ། དམ་པར་འཇུག་པར་བྱ་བ། ༼༢༦༠༽སྒྲོན་མ་བསྲེལ་བར་བྱ་བ། ཁྱད་པར་དུ་འགྲོ་བར་བྱ་བ། ཡུལ་ལ་འཇུག་པར་བྱ་བ། མེ་ལོང་བརྟག་པར་བྱ་བ། མཐུན་པར་འཇུག་པར་བྱ་བ། ནད་གསོ་བར་བྱ་བའོ། །དང་པོ་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། མདོར་བསྟན་པ། སྒོ་གསུམ་ལྡེ་མིག་དང་བཅས་པ་རྒྱས་པར་བཤད་པ། ལྡེ་མིག་གིས་སྒོ་འབྱེད་ཚུལ་གྱིས་མཇུག་བསྡུ་བའོ། །དང་པོ་ནི།

སྨྲས་པ་ལང་ཀའི། ཞེས་པ་ནས། འཇུག་པ་ཉིད་དོ། །ཞེས་པའི་བར་གྱིས་བསྟན་ཏེ།

སྨྲས་པ། ལངྐའི་བདག་པོ། ཆོས་ཀྱི་རྣམ་གྲངས་བཅུ་པོ་འདི་དག་ལས། དང་པོ་དམ་པ་རྣམས་ཀྱི་མཛོད་དུ་གཞུག་པར་བྱ་ན། སྒོ་གསུམ་ནས་ཞུགས་ནས། གང་མེད་ལ་མི་ཟད་པའི་མཛོད་དུ་འཇུག་པ་ཉིད་དོ།།

སྟོན་པས་ལན་བཀའ་སྩལ་ཏེ་སྨྲས་པ། ལང་ཀའི་བདག་པོ། དེ་ལྟར་ཆོས་ཀྱི་རྣམ་གྲངས་བཅུ་པོ་དེ་དག་ལས་རྣམ་གྲངས་དང་པོ་སྟོན་མཆོག་རྒྱལ་བ་དམ་པ་རྣམས་ཀྱི་དགོངས་པ་གསང་བའི་མཛོད་དུ་འཇུག་པར་བྱ་བ་ན་འཇུག་སྒོ་གསུམ་ནས་བརྒྱུད་པས་ཞུགས་ནས་ཡེ་ནས་རང་ལ་ལྷུན་གྱིས་གྲུབ་པའི་གསང་སྔགས་དམ་པ། ཡོན་ཏན་ཀུན་གྱི་འབྱུང་གནས་གང་ཡིན་པ་རང་རིག་མེད་ལ་མི་ཟད་པའི་གསང་མཛོད་སྙིང་པོ་བྱང་ཆུབ་ཀྱི་གོ་འཕང་མཆོག་ཏུ་མངོན་སུམ་གྱིས་འཇུག་ཅིང་ཐོབ་པར་བྱ་བ་ཉིད་དོ།།

གཉིས་པ་སྒོ་གསུམ་ལྡེ་མིག་དང་བཅས་པ་རྒྱས་པར་བཤད་པ་ནི།

སྨྲས་པ། གསང་བ། ཞེས་པ་ནས། འབྱིན་པའོ། །ཞེས་པའི་བར་གྱིས་བསྟན་ཏེ།

སྨྲས་པ། གསང་བ་པའི་བདག་པོ། སྒོ་གསུམ་གང་ལགས། སྨྲས་པ། ལངྐའི་བདག་པོ། སྒོ་གསུམ་ནི་འདི་ལྟ་སྟེ། སྤྱོད་པའི་འདྲེན་སྒོ་དང་། ཐབས་ཀྱི་སྦྱོར་སྒོ་དང་། ངེས་པའི་གསང་སྒོ་དང་གསུམ་མོ། །སྨྲས་པ། གསང་བ་པའི་བདག་པོ། སྒོ་དེ་དག་གང་གིས་འབྱེད་པ་ལགས། སྨྲས་པ། ལངྐའི་བདག་པོ། སྒོ་དེ་དག་ནི་ལྡེ་མིག་གསུམ་གྱིས་འབྱེད་པར་རིག་པར་བྱ་སྟེ། གསུམ་གང་ཞེ་ན། འདི་ལྟ་སྟེ། འབྱེད་པ་དང་། གྲོལ་བ་དང། འབྱིན་པའོ།།

ལང་ཀའི་བདག་པོས་སྨྲས་པ། གསང་བ་པའི་བདག་པོ། འཇུག་སྒོ་གསུམ་ཉིད་གང་ལགས། ཞེས་དྲིས་པ་ན། ལན་དུ་སྨྲས་པ། ལང་ཀའི་བདག་པོ། སྒོ་གསུམ་ནི་འདི་ལྟ་སྟེ། རྣམ་པར་དཀར་བའི་སྤྱོད་པའི་སྒོ་ནས་བདག་གཞན་འདྲེན་ཞིང་དོན་མཐར་ཕྱིན་པར་བྱེད་པའི་སྒོ་མཚན་ཉིད་རྒྱུའི་ཐེག་པ་དང༌། ཐབས་ཀྱི་སྒོ་མང་པོས་དོན་ལ་སྦྱོར་བའི་སྒོ་སྔགས་ཕྱི་པ་དང༌། ཇི་ལྟ་བའི་དོན་མ་བསླད་པར་བསྟན་པས་དོན་ལ་སྦྱོར་བ་ངེས་པའི་གསང་སྒོ་ནང་པའི་ཐེག་པ་དང་གསུམ་མོ། །དེ་གསུམ་གྱིས་མཚོན་བྱ་དོན་གྱི་གནས་ལུགས་དངོས་དང་བརྒྱུད་དེ་མཚོན་པར་བྱེད་པའོ། །ཡང་ལང་ཀས་སྨྲས་པ། གསང་བ་པའི་བདག་པོ། སྒོ་དེེ་དག་གང་གིས་འབྱེད་པ་ལགས། ཞེས་རྟོགས་པའི་ཐབས་དྲིས་པ་ན། ལན་སྨྲས་པ། ལང་ཀའི་བདག་པོ། སྒོ་དེ་དག་ནི་ལྡེ་མིག་གསུམ་གྱིས་ཡང་དག་པར་འབྱེད་པར་རིག་པར་བྱ་སྟེ། གསུམ་གང་ཞེ་ན། འདི་ལྟ་སྟེ། སྒོ་རེ་རེ་ལའང༌། འབྱེད་པར་བྱེད་པ་ཡན་ལག་གི་ལྡེ་མིག་དང༌། འགྲོལ་བར་བྱེད་པ་མདོའི་ལྡེ་མིག་དང༌། འབྱིན་པར་བྱེད་པ་རྩ་༼༢༦༡༽བའི་ལྡེ་མིག་སྟེ་རྣམ་པ་དེ་གསུམ་གྱིས་ཕྱེད་དེ་རྟོགས་པར་འགྱུར་བའོ།།

གསུམ་པ་ལྡེ་མིག་གིས་སྒོ་འབྱེད་ཚུལ་གྱིས་མཇུག་བསྡུ་བ་ནི།

ལང་ཀའི། ཞེས་པ་ནས། ཕྱེད་ཅེས་དམ་པས་བཤད། །ཅེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ཡང་འདི་ལྟ་སྟེ། ཡན་ལག་དྲུག་དང་མདོ་བཞི་དང་། །རྩ་བ་གསུམ་གྱི་ལྡེ་མིག་གིས།།

རྒྱལ་བ་ཀུན་གྱི་དགོངས་པའི་མཛོད། །ངེས་པར་ཕྱེ་ཞེས་དམ་པས་བཤད།།

ལང་ཀའི་བདག་པོ། སྒོ་འབྱེད་ཚུལ་དེ་ཡང་འདི་ལྟ་སྟེ། འབྱེད་པའི་ཐབས་མཆོག་ཡན་ལག་དྲུག་དང་འགྲོལ་ཐབས་མདོ་བཞི་དང༌། འབྱིན་པའི་ཐབས་རྩ་བ་གསུམ་གྱི་ལྡེ་མིག་དག་གིས་རྒྱལ་བ་ཀུན་གྱི་དགོངས་པའི་གསང་མཛོད་དམ་པ་ཉིད་ངེས་པར་ཕྱེད་པ་ཡིན་ནོ་ཞེས་སྟོན་པ་རིགས་ཀྱི་ཁྱབ་བདག་དམ་པས་བཤད་པར་མཛད་དོ།།

གཉིས་པ་བྱེ་བྲག་ཏུ་བཤད་པ་ལ་གསུམ་སྟེ། སྤྱོད་པའི་འདྲེན་སྒོར་འཇུག་པ། ཐབས་ཀྱི་སྦྱོར་སྒོ་དང་ངེས་པའི་གསང་སྒོ་ཐུན་མོང་དུ་འཇུག་པ། ཁྱད་པར་དུ་ངེས་པའི་གསང་སྒོར་འཇུག་པ་རྒྱས་པར་དབྱེ་བའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། རྩ་བ་གསུམ་མོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ལ་སྤྱོད་པའི་འདྲེན་སྒོ་ལྡེ་མིག་གསུམ་གྱིས་འབྱེད་པ་ནི་འདི་ལྟ་སྟེ། ཡན་ལག་དྲུག་དང་། མདོ་བཞི་དང་། རྩ་བ་གསུམ་མོ།།

ལེའུ་འདིས་དྲང་དོན་སྟོན་ནོ། །དེ་དག་སོ་སོ་ནས་རྟོགས་པར་བྱ་བའི་ཕྱིར། ལང་ཀའི་བདག་པོ་ཞེས་བོས་ནས། དེ་ལ་དང་པོ་སྤྱོད་པས་འདྲེན་སྒོ་ལྡེ་མིག་གསུམ་གྱིས་འབྱེད་པ་ནི། འདི་ལྟ་སྟེ། བྱ་བ་བྱེད་པའི་རྣམ་འབྱོར་སྟོན་པའི་ཡན་ལག་དྲུག་དང༌། མདོ་བཞི་དང༌། རྩ་བ་གསུམ་མོ། །ཞེས་རྣམ་གྲངས་མདོར་བསྟན་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། འབྱེད་པའི་ལྡེ་མིག་ཡན་ལག་དྲུག དགྲོལ་བའི་ལྡེ་མིག་མདོ་བཞི། འབྱིན་པའི་ལྡེ་མིག་རྩ་བ་གསུམ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ལ་ཡན་ལག ཅེས་པ་ནས། མཚན་ཉིད་ཀྱི་ཡན་ལག་གོ །ཞེས་པའི་བར་གྱིས་བསྟན་ཏེ།

དེ་ལ་ཡན་ལག་དྲུག་གང་ཞེ་ན། རྒྱུའི་ཡན་ལག་དང་། སྦྱོར་བའི་ཡན་ལག་དང་། འབྲས་བུའི་ཡན་ལག་དང་། དངོས་གཞིིའི་ཡན་ལག་དང་། བཟུང་བའི་ཡན་ལག་དང་། མཚན་ཉིད་ཀྱི་ཡན་ལག་གོ།

དེ་ཡང་གྲངས་ལ་སྙེགས་པས་ཡན་ལག་དྲུག་བཀར་ཏེ་བསྟན་པ་གང་ཞེ་ན། བསྟན་པ་དང་འབྲས་བུའི་གཞིརགྱུར་པའི་ཕྱིར་རྒྱུའི་ཡན་ལག་དང༌། ལྟ་སྤྱོད་ཀྱིས་ཡུལ་ལ་སྦྱོར་བའི་ཕྱིར་སྦྱོར་བའི་ཡན་ལག་དང༌། ལམ་མཐར་ཕྱིན་པས་ཐོབ་པ་དམ་པའི་དོན་བསྟན་པའི་ཕྱིར་འབྲས་བུའི་ཡན་ལག་དང༌། ཆོས་རྣམས་ཀྱི་དེ་ཁོ་ན་ཉིད་དམ་རང་གི་ངོ་བོ་བསྟན་པའི་ཕྱིར་དངོས་གཞིའི་ཡན་ལག་དང༌། སྡོམ་པའམ་ཚུལ་ཁྲིམས་བཟུང་བར་བྱ་བའི་ཚུལ་བསྟན་པའི་ཕྱིར་གཟུང་བའི་ཡན་ལག་དང༌། ཆོས་རྣམས་ཀྱི་མཚན་ཉིད་ཐ་དད་སྣ་ཚོགས་པ་ཅི་འདྲ་བར་བསྟན་པའི་ཕྱིར་མཚན་ཉིད་ཀྱི་ཡན་ལག་སྟེ་དྲུག་གོ།

གཉིས་པ་རྒྱས་པར་བཤད་པ་ལ་དྲུག་སྟེ། རྒྱུའི་ཡན་ལག སྦྱོར་བའི་ཡན་ལག འབྲས་བུའི་ཡན་ལག དངོས་༼༢༦༢༽གཞིའི་ཡན་ལག གཟུང་བའི་ཡན་ལག མཚན་ཉིད་ཀྱི་ཡན་ལག་བཤད་པའོ། དང་པོ་ནི།

དེ་ལ་རྒྱུའི་ཡན་ལག ཅེས་པ་ནས། ལམ་གྱི་ཡན་ལག་གོ །ཞེས་པའི་བར་གྱིས་བསྟན་ཏེ།

དེ་ལ་རྒྱུའི་ཡན་ལག་གང་ཞེ་ན། འདི་ལྟ་སྟེ། འབྱུང་བའི་ཡན་ལག་དང་། སྨིན་པའི་ཡན་ལག་གོ །ལངྐའི་བདག་པོ། དེ་ལ་འབྱུང་བའི་ཡན་ལག་གང་ཞེ་ན། གང་ཡོངས་སུ་འཚོགས་ན། བརྗོད་པ་འབྱུང་བ་ཉིད་ལ་བྱ་སྟེ། ཚད་མ་དང་། བློ་གྲོས་དང་། འཛིན་པ་དང་། མཆོད་རྟེན་དང་། འདུས་པ་དང་། ངེས་པའོ། །སྨིན་པའི་ཡན་ལག་ནི། གང་དམ་པར་སྨིན་པའི་རྒྱུ་སྟེ། གང་ཞེ་ན། འདི་ལྟ་སྟེ། བྱང་ཆུབ་ཀྱི་ཡན་ལག་དང་། ལམ་གྱི་ཡན་ལག་གོ།

དེ་ལ་རྒྱུའི་ཡན་ལག་གང་ཞེ་ན། འདི་ལྟ་སྟེ། བསྟན་པ་འབྱུང་བའི་རྒྱུར་གྱུར་པའི་ཡན་ལག་དང་། མཐར་ཐུག་གི་འབྲས་བུ་སྨིན་པར་བྱེད་པའི་རྒྱུའི་ཡན་ལག་གོ །ལང་ཀའི་བདག་པོ། དེ་ལ་འབྱུང་བའི་ཡན་ལག་གང་ཞེ་ན། གང་རྒྱུ་ཕུན་སུམ་ཚོགས་པའི་གླེང་གཞི་ཡོངས་སུ་འཚོགས་ན། བསྟན་པ་རིན་པོ་ཆེ་འདི་ཉིད་དངོས་པོར་གྲུབ་པར་བྱེད་པའི་གཏན་ཚིགས་ཀྱིས་གསུང་རབ་རྣམས་ཀྱི་བརྗོད་པ་འབྱུང་བ་ཉིད་ལ་བྱ་སྟེ། ཕུན་སུམ་ཚོགས་པ་དྲུག་ཚང་ན་བསྟན་པའི་སྒྲ་འབྱུང་བའི་ཕྱིར་རྒྱུར་ངེས་སོ། །དེའི་རྣམ་གྲངས་སམ་ངོ་བོ་ནི། སྟོན་པ་ཕུན་སུམ་ཚོགས་པ་སྒྲོ་སྐུར་དང་རྫུན་སྤངས་པའི་ཕྱིར་སྐྱེས་བུ་ཚད་མ་དམ་པ་དང༌། བསྟན་པ་ཕུན་སུམ་ཚོགས་པ་གདུལ་བྱའི་རྒྱུད་གྲོལ་བར་བྱེད་པའི་ཕྱིར་ཞི་ལྷག་གི་བློ་གྲོས་ཀྱི་དོན་དང་ཐབས་སྟོན་པ་དང༌། སྡུད་པ་པོ་ཕུན་སུམ་ཚོགས་པ་ཐོས་པའི་དོན་མི་གཏོང་བའི་ཕྱིར་ལྷག་ཆད་མེད་པར་ཤེས་རབ་ཀྱི་རྒྱུད་ལ་འཛིན་ཞིང་ཡི་གེར་ཡང་འགོད་པ་དང༌། གནས་ཕུན་སུམ་ཚོགས་པ་མཆོད་གནས་དམ་པ་དག་གི་གཞི་རྟེན་དུ་གྱུར་པའི་ཕྱིར་མཆོད་གནས་སྟོན་འཁོར་དམ་པ་རྣམས་ཀྱི་བཞུགས་གནས་ཀྱི་རྟེན་དུ་གྱུར་པ་དང༌། འཁོར་ཕུན་སུམ་ཚོགས་པ་དཀར་པོའི་ཕྱོགས་སྡུད་པ་མང་པོ་ཚོགས་པའི་ཕྱིར་འདུས་པ་ཕལ་མོ་ཆེ་དང་ལྷན་ཅིག་ཏུ་གྱུར་པ་དང༌། དུས་ཕུན་སུམ་ཚོགས་པ་དེ་ཉིད་ལས་གཞན་དུ་མ་ཡིན་པའི་ཕྱིར་དུས་གཅིག་དེར་ངེས་པར་གྱུར་པའོ། །དེ་ལ་སྨིན་པའི་ཡན་ལག་འདི་ཉིད་ནི་བསྟན་པའི་དངོས་པོ་གང་ཞིག་འབྲས་བུ་ཆོས་ཀྱི་སྐུ་དམ་པ་ཉིད་དུ་ཡང་དག་པར་སྨིན་ཅིང་འགྲུབ་པར་བྱེད་པའི་རྒྱུ་ལ་བྱ་སྟེ་ངོ་བོ་དང་ངེས་ཚིག་ཀྱང་འགྲུབ་པར་འགྱུར་ལ། དེ་ཉིད་ཉེ་བར་བསྟན་པ་གང་ཞེ་ན། འདི་ལྟ་སྟེ། མདོར་བསྡུ་ན། མཐོང་ལམ་དུ་བྱང་ཆུབ་ཀྱི་ཡན་ལག་བདུན་དང༌། སྒོམ་ལམ་དུ་འཕགས་པའི་ལམ་གྱི་ཡན་ལག་བརྒྱད་པོ་དག་གོ །དང་པོ་བདུན་གང་ཞེ་ན། ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང༌། དྲན་པ་ཡང་དག་བྱང་ཆུབ་ཀྱི་ཡན་ལག་དང༌། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང༌། དགའ་བ་ཡང་དག་བྱང་ཆུབ་ཀྱི་ཡན་ལག་དང༌། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང༌། ཏིང་ངེ་འཛིན་༼༢༦༣༽ཡང་དག་བྱང་ཆུབ་ཀྱི་ཡན་ལག་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་རྣམས་སོ། །གཉིས་པ་བརྒྱད་ནི། ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་ཏིང་ངེ་འཛིན་དང༌། ཡང་དག་པའི་དྲན་པའོ།།

གཉིས་པ་སྦྱོར་བའི་ཡན་ལག་ནི།

ལང་ཀའི་བདག་པོ། སྦྱོར་བའི། ཞེས་པ་ནས། རང་བཞིན་ལ་སྦྱོར་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་སྦྱོར་བའི་ཡན་ལག་ནི། ཡུལ་ལ་སྦྱོར་བ་སྟེ། གང་བློའི་ཡུལ་ལ་སྦྱོར་བ་དང་། སྙིང་རྗེའི་ཡུལ་ལ་སྦྱོར་བའོ། །ལངྐའི་བདག་པོ། དེ་ལ་བློའི་ཡུལ་ལ་སྦྱོར་བ་ནི་འདི་ལྟ་སྟེ། གང་བློ་གྲོས་འབྱུང་བའི་རྩ་བ་གླེང་སློང་བ་ལ་སྦྱོར་བ་དང་། བློ་གྲོས་རྙེད་པའི་རྩ་བ་སའི་ཁྱད་པར་ལ་སྦྱོར་བ་དང་། བློ་གྲོས་ངེས་པའི་རྩ་བ་རྣམ་པར་ཐར་པ་ལ་སྦྱོར་བ་དང་། བློ་གྲོས་གཞག་པའི་རྩ་བ་དེ་ཁོ་ན་ཉིད་ལ་སྦྱོར་བའོ། །ལངྐའི་བདག་པོ་སྙིང་རྗེའི་ཡུལ་ལ་སྦྱོར་བ་ཡང་འདི་ལྟ་སྟེ། གང་གི་རྒྱུ་ལ་སྦྱོར་བ་དང་། འབྲས་བུ་ལ་སྦྱོར་བ་དང་། དེ་དག་གི་རང་བཞིན་ལ་སྦྱོར་བའོ།།

ལང་ཀའི་བདག་པོ་དེ་ལ་སྦྱོར་བའི་ཡན་ལག་གི་ངེས་ཚིག་ནི་ཡུལ་ལ་སྦྱོར་བས་ན་སྦྱོར་བ་རྣམ་པ་གཉིས་ཏེ། གང་བློའི་ཤེས་རབ་ཀྱིས་ཤེས་བྱའི་ཡུལ་ལ་སྦྱོར་བ་དང༌། གང་སྙིང་རྗེའམ་ཐུགས་རྗེའི་སྤྱོད་པས་གདུལ་བྱའི་ཡུལ་གྱི་འགྲོ་དོན་ལ་སྦྱོར་བའོ། །ལང་ཀའི་བདག་པོ། དེ་ཉིད་རྒྱས་པར་བཤད་ན། དེ་ལ་བློའི་ཡུལ་ལ་སྦྱོར་བ་ནི་རྣམ་པ་བཞི་སྟེ། མོས་པ་སྤྱོད་པའི་ས་ལ། གང་དོན་གྱི་རྟོགས་པ་སྐྱེད་པའི་བློ་གྲོས་འབྱུང་བའི་རྩ་བར་གྱུར་པ་རྒྱུ་ཡི་ཡན་ལག་སྟོན་པས་གནང་བ་དང་འཁོར་གྱིས་གུས་པས་ཞུ་བ་གཉིས་ཀྱིས་གླེང་སློང་བ་ལ་བརྟེན་ནས་བསྟན་པ་རིན་པོ་ཆེ་འཇིག་རྟེན་དུ་འབྱུང་བའི་རྗོད་བྱེད་གསུང་རབ་ཀྱི་སྡེ་ཡན་ལག་བཅུ་གཉིས་ལ་སོགས་པ་ལ་ཐོས་བསམ་བྱེད་ཅིང་ཚོགས་སྦྱོར་གྱི་ལམ་ལ་བསླབ་པས་དོན་ཇི་ལྟ་བར་མཐོང་བས་ས་དང་པོ་ལ་སྦྱོར་བ་དང༌། མཐོང་ལམ་ལ་ཆོས་ཉིད་ཀྱི་མཚན་ཉིད་མངོན་སུམ་དུ་མཐོང་བས་བློ་གྲོས་ཡང་དག་པར་རྙེད་པའི་རྩ་བར་གྱུར་པ་རྒྱུ་ཡི་ཡན་ལག་ས་དང་པོ་རབ་ཏུ་དགའ་བ་ལ་གནས་པས་ཟག་པ་མེད་པའི་སའི་ཁྱད་པར་གོང་མ་རྣམས་ལ་དངོས་སུ་སྦྱོར་བ་དང༌། མཐར་ལམ་ལ་དེའི་དོན་ལ་གོམས་པ་མཐར་ཕྱིན་ནས་བློ་གྲོས་ཇི་བཞིན་དུ་ངེས་པའི་རྩ་བར་གྱུར་པ་རྒྱུ་ཡི་ཡན་ལག་རྣམ་པར་ཐར་པའི་སྒོ་གསུམ་ལ་མཐོང་བ་ཡོངས་སུ་རྫོགས་པའི་ལྟ་བས་མི་འགྱུར་བ་ཆོས་ཀྱི་སྐུ་ལ་དངོས་སུ་སྦྱོར་བ་དང༌། སྒོམ་ལམ་དུ་བདེན་པ་མཐོང་ནས་ཡང་ཡང་གོམས་པར་བྱེད་པས་ཞི་གནས་དང་ལྷག་མཐོང་གི་བློ་གྲོས་ཡང་དག་པའི་དོན་ལ་བཞག་པའི་རྩ་བར་གྱུར་པ་རྒྱུ་ཡི་ཡན་ལག་ཆོས་ཉིད་མ་སྐྱེས་པ་སྒོམ་པར་བྱེད་པས་མཐར་ལམ་གྱི་དེ་ཁོ་ན་ཉིད་ལ་སྦྱོར་བ་སྟེ་ས་བཅུ་པའི་ཁྱད་པར་གྱི་ལམ་ལ་གནས་པར་ངེས་པའོ། །འདི་རྣམས་ཀྱིས་ཚོགས་སྦྱོར་དུ་ཐོས་བསམ་གྱི་ཤེས་རབ་ལ་བསླབ་པས་ཤེས་རབ་གསུམ་གྱི་དོན་རྙེད་༼༢༦༤༽ནས་ཕར་ཕྱིན་བཅུས་ས་བཅུ་མཐར་ཕྱིན་ཏེ་ཁྱད་པར་གྱི་ལམ་ནས་སངས་རྒྱས་ཀྱི་ས་ལ་སྦྱོར་བའི་ཕྱིར་བློ་ཤེས་རབ་ཀྱིས་ཡུལ་ཆོས་ཀྱི་དབྱིངས་ལ་སྦྱོར་བའི་ཁྱད་པར་རྣམས་བསྟན་པའོ། །ལང་ཀའི་བདག་པོ། སྙིང་རྗེའི་སྒོམ་སྤྱོད་ཀྱིས་ཡུལ་གྱི་དོན་བྱེད་པ་ལ་སྦྱོར་བ་ཡང་འདི་ལྟ་སྟེ། གང་འགྲོ་བ་རིགས་དྲུག་གི་སེམས་ཅན་རྣམས་རྒྱུ་ཀུན་འབྱུང་གི་བདེན་པ་ལས་དང་ཉོན་མོངས་པས་ཁམས་གསུམ་དུ་སྨིན་པར་བྱེད་པ་ལ་དགོངས་ཏེ་སྙིང་རྗེས་དོན་སྤྱོད་པ་ལ་སྦྱོར་བ་དང༌། རྒྱུ་དེས་སྒྲུབས་པའི་འབྲས་བུ་སྡུག་བསྔལ་གྱི་བདེན་པ་སྤྱི་དང་ཁྱད་པར་དུ་གསུམ་དང་བརྒྱད་ལ་སོགས་པས་གདུང་ཞིང་ཉམ་ཐག་པ་ལ་རྗེས་སུ་དགོངས་ཏེ་སྙིང་རྗེས་དོན་སྤྱོད་པ་ལ་སྦྱོར་བ་དང༌། འགྲོ་བ་རྣམས་ཀྱིས་འཁོར་བ་རྒྱུ་འབྲས་དེ་དག་གི་རང་བཞིན་མི་རྟག་སྡུག་བསྔལ་སྟོང་ བདག་མེད་བཞིའམ་མ་སྐྱེས་པའི་དོན་མ་མཐོང་བས་ཀུན་ནས་འཁྲུལ་པར་འཕྱན་པ ་ལ་དགོངས་ཏེ་སྙིང་རྗེ་འབྱུང་བས་དོན་སྤྱོད་པ་ལ་སྦྱོར་བའོ། །དེའང་སྔ་མ་གཉིས་སེམས་ཅན་ལ་དམིགས་པ་དང༌། གསུམ་པས་ཆོས་ལ་དམིགས་པའམ། དམིགས་མེད་ཀྱི་སྙིང་རྗེའི་ཡུལ་ལ་སྦྱོར་བར་བསྟན་པའོ།།

གསུམ་པ་འབྲས་བུའི་ཡན་ལག་ནི།

ལང་ཀའི། ཞེས་པ་ནས། དམ་པ་དེ་ཁོ་ན་ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་འབྲས་བུའི་ཡན་ལག་ནི། གང་འབྲེལ་བའི་དགོས་ཆེད་དམ་པར་འབྱུང་བ་སྟེ།

ཐོབ་པ་དམ་པ་དེ་ཁོ་ན་ཉིད་དོ།།

ལང་ཀའི་བདག་པོ། དེ་ལ་ངེས་པར་གཏན་ལ་ཕེབས་པས་འབྲས་བུའི་ཡན་ལག་ནི། གང་ཡང་དག་པར་གྲུབ་པའི་མཐའ་རྒྱུ་རྐྱེན་དང་རིམ་པར་འབྲེལ་བས་ཐོས་བསམ་བསྒོམ་གསུམ་དང་ཚོགས་གཉིས་རྫོགས་པར་བསླབ་པས་ས་བཅུ་མཐར་ཕྱིན་པར་བགྲོད་དེ་རྡོ་རྗེ་ལྟ་བུའི་ཏིང་ངེ་འཛིན་གྱིས་བདུད་བཏུལ་ནས་མཐར་འབྲས་ལ་སྦྱོར་བའི་དགོས་ཆེད་དམ་པར་འབྱུང་བས། བྱ་བ་ཡོངས་སུ་རྫོགས་པ་སྟེ། ཐོབ་པ་དམ་པ་ཆོས་ཀྱི་སྐུའི་དེ་ཁོ་ན་ཉིད་མངོན་དུ་བྱས་ཏེ་ཀུན་ཏུ་འོད་ཀྱི་ས་ལ་བྱང་ཆུབ་ནས་འབྲས་བུའི་གོ་འཕང་དམ་པ་བརྙེས་པ་ཉིད་དོ།།

བཞི་པ་དངོས་༼༢༦༢༽གཞིའི་ཡན་ལག་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཐམས་ཅད་ཀྱི་དངོས་གཞིའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་དངོས་གཞིའི་ཡན་ལག་ནི། གང་གི་དགོངས་པ་ངེས་པར་འགྲེལ་བ་སྟེ། གང་ཞེ་ན་འདི་ལྟ་སྟེ། གང་ལ་ཆོས་རྣམས་ཀྱི་དངོས་གཞི་གསུམ་དུ་བསྡུ་བ་སྟེ། གསུམ་གང་ཞེ་ན། རང་བཞིན་གྱི་དངོས་གཞི་དང་། རྩ་བའི་དངོས་གཞི་དང་། ཐམས་ཅད་ཀྱི་དངོས་གཞིའོ།།

ལང་ཀའི་བདག་པོ། དེ་ལ་དངོས་གཞིའི་ཡན་ལག་ནི། བདེ་བར་གཤེགས་པ་གང་གི་དགོངས་པ་ཆོས་ཉིད་མ་སྐྱེས་པ་ཉིད་ཡེ་ཤེས་ཀྱིས་ངེས་པར་འགྲེལ་ཞིང་གཏན་ལ་འབེབས་པར་བྱེད་པ་སྟེ། ངོ་བོ་ནི་ཡན་ལག་གི་དངོས་ཆོས་འབྱུང་བའི་གཞི་ཡིན་པས་ངེས་ཚིག་ཀྱང་འགྲུབ་ལ། དེ་ཉིད་བསྟན་པ་གང་ཞེ་ན། ༼༢༦༥༽འདི་ལྟ་སྟེ། ཤེས་བྱ་གང་ལ་བྱེད་པ་པོ་མེད་ལ་རང་གི་མཚན་ཉིད་འཛིན་པའི་ཆོས་རྣམས་ཀྱི་དངོས་གཞི་གསུམ་དུ་བསྡུ་བ་སྟེ་གསུམ་གང་ཞེ་ན། འགྲེལ་ཆེན་ལྟར་ན་དོན་ཉིད་ལམ་གྱི་ཆོས་དང་བསྒྲུབ་པའི་ཆོས་ཀྱི་རང་བཞིན་ནམ། གདམས་ངག་ལྟར་ན་མྱ་ངན་ལས་འདས་པའི་ལམ་དང་འབྲས་བུ་གཉིས་ཀའི་རང་བཞིན་གྱི་དངོས་གཞི་དང༌། གཞལ་བྱའི་རྩ་བ་འཁོར་བ་དང་མྱ་ངན་ལས་འདས་པའི་ཆོས་ཀྱི་མཚན་ཉིད་འཛིན་པ་རྩ་བའི་དངོས་གཞི་དང༌། འཁོར་བ་དང་ལམ་པ་དང་འབྲས་བུ་ཐམས་ཅད་ཀྱི་དངོས་གཞི་བདེན་པ་གཉིས་སུ་བསྟན་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། རང་བཞིན་གྱི་དངོས་གཞི། རྩ་བའི་དངོས་གཞི། ཐམས་ཅད་ཀྱི་དངོས་གཞི་བཤད་པའོ། །དང་པོ་ནི།

ལང་ཀའི། ཞེས་པ་ནས། ཆུབ་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་རང་བཞིན་གྱི་དངོས་གཞི་གང་ཞེ་ན། འདི་ལྟ་སྟེ། ཐོས་པ་དང་། དོང་བ་དང་།

བཟུང་བ་དང་། ཆུབ་པའོ།།

ལང་ཀའི་བདག་པོ། དེ་ལ་རང་བཞིན་གྱི་དངོས་གཞི་གང་ཞེ་ན། རྣམ་གྲངས་བཞི་ཉིད་འདི་ལྟ་སྟེ། འགྲེལ་ཆེན་ལྟར་ན་རང་བཞིན་མ་སྐྱེས་པའི་དོན་སྟོན་པའི་གཞུང་ཟབ་མོ་ལམ་པས་མ་ནོར་བར་ཐོས་ཏེ་རང་བཞིན་མེད་པར་ངེས་པ་དང༌། དེའི་དོན་ལ་རྗེས་སུ་ཡི་རངས་ནས་བསམ་དཔྱོད་ཀྱིས་ཉམས་སུ་བླངས་པས་དོད་པ་དང༌། དེ་ཉིད་ཀྱི་དོན་རྙེད་དེ་མ་མཐོང་གི་བར་དུ་མི་གཏོང་བར་དྲན་པས་གཟུང་བ་དང༌། དེ་ལ་བློ་གྲོས་ཡོངས་སུ་ཆུབ་ནས་དོན་གྲུབ་པའོ། །ཞེས་དང༌། འགྲེལ་པ་ལུང་བསྟན་མ་ལས། ཐེག་པ་ཐུན་མོང་གི་གཞུང་ཐོས་པ་དང༌། ཆོས་དང་བླ་མ་ལ་སྐྱབས་སུ་དོང་བ་དང༌། སྡོམ་པ་དང་བསླབ་པ་གཟུང་བ་དང༌། བསླབ་པ་མཐར་ཕྱིན་ཏེ་ཡོངས་སུ་ཆུབ་པ་བཞིར་གསུངས་པ་ལྟ་བུར་ཕྱག་མཆན་ཁ་ཅིག་ལས་འབྱུང་ངོ༌། །གདམས་ངག་ལྟར་ན། ཚོགས་སྦྱོར་གཉིས་ནི་ཐོས་པས་ཚིག་འཛིན་པ་ལ་གཙོ་བོར་བྱེད་པ་དང༌། དེའི་རྗེས་སུ་དོང་ནས་བསམ་དཔྱོད་བྱེད་པ་དང༌། མཐོང་སྒོམ་གཉིས་ནི་ཆོས་ཉིད་རང་གི་མཚན་ཉིད་ལ་མི་གཏོང་བར་གནས་པས་གཟུང་བ་དང༌། ཁྱད་པར་གྱི་ལམ་ནི་བློ་གྲོས་ཡོངས་སུ་ཆུབ་པའོ། །ཞེས་སོ།།

གཉིས་པ་རྩ་བའི་དངོས་གཞི་ནི།

ལང་ཀའི། ཞེས་པ་ནས། རྒྱན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་རྩ་བའི་དངོས་གཞི་གང་ཞེ་ན། འདི་ལྟ་སྟེ། །གདགས་པ་དང་། སྤྱོད་པ་དང་། སྐྱེ་བ་དང་། གནས་པ་དང་། བདེ་བ་དང་། ཉོན་མོངས་པ་དང་། ཡོངས་སུ་བྱང་བ་དང་། སྣ་ཚོགས་དང་། བྱེད་པ་དང་། བྱ་བ་དང་། རྒྱན་ནོ།།

ལང་ཀའི་བདག་པོ། རྩ་བའི་དངོས་གཞི་གང་ཞེ་ན། རྣམ་གྲངས་བཅུ་གཅིག་འདི་ལྟ་སྟེ། སེམས་དང་ཡུལ་སྣང་གི་ཆོས་ལ་ཡོད་མེད་ཀྱི་དངོས་པོ་གཉིས་ཀྱིས་མིང་དང་ཐ་སྙད་ཀྱི་གདགས་པ་དང༌། གཉིས་ཀའི་ཆ་ལས་བཏགས་༼༢༦༦༽པའི་སྒོ་གསུམ་གྱི་སྤྱོད་པ་བཟང་ངན་གྱི་མིང་གི་ཐ་སྙད་ཇི་སྙེད་པ་དང༌། སེམས་ཀྱི་ལས་བཟང་ངན་ཐ་དད་པ་ལྟར་སྐྱེ་བའི་དངོས་པོར་སྣང་བ་རྒྱུ་རྐྱེན་གྱི་ཁྱད་པར་ལས་བྱུང་བ་དང༌། དེ་དག་སྐྱེས་ནས་ཐེར་ཟུག་པ་མེད་པར་ལུས་སེམས་སྐད་ཅིག་མའི་རྒྱུན་དུ་གནས་པ་དང༌། བདེ་བར་གནས་པའི་མཚན་ཉིད་ལ་རང་དང་སྦྱིན་བདག་གིས་འཚོ་བའི་ལོངས་སྤྱོད་ཀྱིས་ཚིམས་པའི་བདེ་བ་སོགས་དང་ལྡན་པ་དང༌། ལུས་དང་དེ་ལ་བརྟེན་ནས་བརྟགས་པའི་ཆོས་རྣམས་ཀྱིས་གདུང་སྟེ་རྩ་བ་དང་ཉེ་བའི་ཉོན་མོངས་པར་བྱས་པ་འཁོར་བའི་རྟེན་དུ་གྱུར་པ་དང༌། ཐོག་མེད་ནས་བསགས་པ་དང་འདི་ལ་བསགས་པའི་བག་ཆགས་ཀྱི་དྲི་མ་བརྟགས་པའི་ཞེན་པ་ཡོངས་སུ་བྱང་ནས་ཆགས་པ་དང་བྲལ་བའམ་དཀར་པོའི་བག་ཆགས་ངོ་བོ་ཉིད་ཀྱི་དགེ་བ་བཅུ་གཅིག་ཏུ་སྣང་བ་རྣམ་པར་དག་པ་དང༌། རྒྱུ་རྐྱེན་གྱི་རྣམ་པ་ཐམས་ཅད་དུ་སེམས་ཉིད་སྣ་ཚོགས་སུ་སྣང་བ་ལ་བརྡ་དང་ཐ་སྙད་ཀྱིས་དངོས་པོ་ཐ་དད་པར་བཏགས་པ་ཇི་སྙེད་བཤད་པ་རྣམས་དང༌། ལུས་ལ་རྟེན་དུ་བཅས་པའི་སྒོ་ནས་བདག་པོའི་རྐྱེན་བྱེད་པ་དབང་པོ་རྣམས་སམ་རྣམ་བྱང་ལ་དབང་བྱེད་པས་དད་པ་ལ་སོགས་པ་དག་དང༌། རྣམ་ཤེས་ཀྱིས་དམིགས་པར་གྱུར་པའི་སྒོ་ནས་ཤེས་པར་བྱ་བའམ་བསྟན་པར་བྱ་བའི་ཡུལ་དུ་སྣང་བ་རྣམས་དང༌། དེ་དག་གི་འདུ་འཕྲོད་ཀྱི་སྒོ་ནས་རྟེན་འབྲེལ་གྱི་རྣམ་པ་གསལ་ཞིང་མཛེས་པའི་རྒྱན་དང་ལྡན་པའི་ཕྱིར་འབྲས་བུ་བཟང་ངན་དུ་སྣང་བས་རྣམ་པར་ཤེས་པའི་དེ་མ་ཐག་རྐྱེན་དུ་གནས་པ་ཡུལ་དང་དབང་པོ་གཉིས་ལ་བརྟེན་པ་རྣམས་ཡིན་ནོ།།

གསུམ་པ་ཐམས་ཅད་ཀྱི་དངོས་གཞི་ནི།

ལང་ཀའི། ཞེས་པ་ནས། དངོས་གཞིའི་ཡན་ལག་ཅེས་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། །ཐམས་ཅད་ཀྱི་དངོས་གཞི་གང་ཞེ་ན། ཀུན་ནས་ཉོན་མོངས་པ་ལས་སྣང་བ་འདི་ལྟ་སྟེ། བསྡུ་བ་དང་། འཇུག་པ་དང། གང་ཟག་དང་། ཆོས་སོ། །ཡོངས་སུ་དག་པ་ལས་སྣང་བ་ནི་འདི་ལྟར་ལྡོག་པ་དང་། རྩོལ་བ་དང་། གནས་དང་། བདེ་བ་དང་། ཐབས་དང་། ཤེས་པ་དང་། ཤེས་པའི་གནས་དང་། ནན་ཏན་དང་། ང་རྒྱལ་མེད་པ་དང་། བག་ཆགས་དང་། མངོན་དུ་བྱ་བ་དང་། བསྒོམ་པ་དང་། སྙིང་པོ་དང་། རྣམ་པ་དང་། དམིགས་པ་དང་། དཔྱོད་པ་དང་། གཡེང་བ་དང་། མི་གཡེང་བ་དང་། བཙལ་བ་དང་། ཡོན་ཏན་དང་། བརྟན་པ་དང་། ཤེས་པའི་གནས་དང་། བསྡུ་བ་དང་། ཕྱོགས་བསྡུ་བ་དང་། རྟོགས་པ་དང་། ཐོབ་པར་བྱ་བ་དང་། སྤྱིར་ཕྱིན་པ་དང་། ཡོངས་སུ་བྲི་བའོ། །ལངྐའི་བདག་པོ་དེ་དག་ནི་དངོས་གཞིའི་ཡན་ལག་ཅེས་བྱའོ།།

ལང་ཀའི་བདག་པོ། ཐམས་ཅད་ཀྱི་དངོས་གཞི་གང་ཞེ་ན། གཉིས་ཏེ། ཇི་ཙམ་དུ་སྲིད་པའི་ས་བོན་མ་ཟད་ཀྱི་བར་དུ་གནས་པའི་ངོ་བོ་ཀུན་ནས་ཉོན་མོངས་པ་ལ་སྣང་བ་ཀུན་རྫོབ་ཀྱི་བདེན་པ་དང༌། རྣམ་པར་དག་པའི་རྒྱུ་འདི་དང༌། དེའི་འབྲས་བུ་ཡོངས་སུ་དག་པ་ལ་སྣང་བ་དོན་དམ་པའི་བདེན་པའོ། །དང་པོ་འཁོར་བའི་དངོས་གཞི་ཀུན་ནས་ཉོན་མོངས་པ་ལ་སྣང་བ་ནི་རྣམ་གྲངས་བཞི་ཡོད་པ་ཉིད་འདི་ལྟ་སྟེ། དབང་དུ་བྱ་བའི་ཕྱིར་ཡུལ་དང་གནས་དང་ལས་དང་སྐྱེ་བ་ལ་སོགས་པ་རྒྱུ་རྐྱེན་གྱི་འབྲེལ་བ་དུ་མ་འདུས་པ་ལས་སྣང་བས་ཀུན་ཏུ་བསྡུ་བ་དང༌། རྒྱུ་རྐྱེན་འཚོགས་ནས་གང་བྱ་བ་རྩོམ་པ་ལ་འཇུག་པའི་ཤེས་པ་༼༢༦༧༽དང༌། རྒྱུན་ལ་ཀུན་ཏུ་བརྟགས་པས་གང་ཟག་གི་བདག་དང་སྲོག་དང་ཤེད་ཅན་དང་ཤེད་བདག་ལ་སོགས་པ་བྱེད་པའི་སྐྱེས་བུ་བཅུ་གཉིས་སུ་སྣང་བ་དང༌། གཟུང་འཛིན་གྱི་རྣམ་པར་སྣང་བ་ཕུང་ཁམས་སྐྱེ་མཆེད་ཀྱིས་བསྡུས་པའི་ཡུལ་དང་སྣོད་དང་དངོས་པོ་སྣ་ཚོགས་ཀྱི་མཚན་ཉིད་འཛིན་པས་ཆོས་ཀྱི་བདག་ཏུ་གཟུང་ཞིང་གདགས་པ་རྣམས་སོ། །རྣམ་པར་བྱང་བའི་ཆོས་ཡོངས་སུ་དག་པ་ལ་སྣང་བ་ནི། རྣམ་གྲངས་ཉི་ཤུ་རྩ་བདུན་དུ་གནས་པ་འདི་ལྟར་ཏེ། འགྲེལ་པ་ལུང་བསྟན་མ་ལས། ཀུན་རྫོབ་ཙམ་དུ་ཆོས་ཀྱི་འཁོར་ལོ་དང་སྒོ་མོ་དང་ཚིག་དང་ཡི་གེར་འདོགས་པ་ཞེས་འབྱུང་བས་དང་པོ་ཡང་དག་པའི་དམིགས་པ་ལ་ཉེ་བར་འདོགས་པ་དྲན་པ་ཉེ་བར་བཞག་པ་བཞི་སྟེ། ཇི་སྐད་དུ། ལུས་ཚོར་སེམས་དང་ཆོས་རྣམས་ལ། །དྲན་པ་ཉེ་བར་བཞག་པ་བཞི། །འདི་བཞི་ངོ་བོ་ཤེས་རབ་སྟེ། །ཡང་དག་དོན་ནི་མཐོང་བྱེད་པའོ། །ཞེས་གསུངས་པ་ལྟར་དང༌། གཉིས་པ་དེ་ལ་ཐོས་བསམ་གྱི་སྒོ་ནས་རྩོལ་བའི་ལས་ཀྱིས་སྐྱོན་གྱི་བྱ་བ་འདོར་བར་བྱེད་པ་ཡང་དག་པའི་སྤོང་བ་བཞི་སྟེ། དགེ་བ་སྐྱེད་དང་སྤེལ་བ་དང༌། །མི་དགེ་ཞི་དང་མི་སྐྱེ་ཕྱིར། །ཡང་དག་སྤོང་བ་བཞི་ཡི་ནི། །བརྩོན་འགྲུས་རབ་ཏུ་འབྱུང་བར་འགྱུར། །ཞེས་པ་ལྟར་དང༌། གསུམ་པ་བདེན་པ་གཉིས་ཡིད་ལ་བྱེད་པའི་ལྟ་བ་ལ་བརྟེན་ནས་ཏིང་ངེ་འཛིན་གྱིས་སེམས་མི་གཡོ་བར་གནས་ཏེ་སྡུག་བསྔལ་དང་བྲལ་བར་བྱེད་པ་མཐར་གྱིས་གནས་པའི་སྙོམས་པར་འཇུག་པ་དགུ་སྟེ། བསམ་གཏན་བཞི་དང་གཟུགས་མེད་བཞི། །འགོག་སྙོམས་དང་བཅས་སྙོམས་འཇུག་དགུ །ཞེས་དང༌། བཞི་པ་རྟོགས་ཤིང་གོམས་པས་མཐར་ཐུག་གི་འབྲས་བུ་ཐོབ་སྟེ་ བདག་གཞན་སྡུག་བསྔལ་དང་བྲལ་བར་བྱེད་པས་བདེ་བ་དམ་པ་ཚད་མེད་པ ་བཞི་སྟེ། བྱམས་དང་སྙིང་རྗེ་དགའ་བ་དང༌། །བཏང་སྙོམས་དག་ནི་ཚད་མེད་བཞི། །ཞེས་དང༌། ལྔ་པ་སྙིང་རྗེས་ཕན་འདོགས་པའི་སྒོ་ནས་མི་དམིགས་པས་ཟིན་པས་བདག་གཞན་གྱི་དོན་སྤྱོད་ལ་མ་ཆགས་པའི་ཐབས་ཀྱི་སྤྱོད་པ་ཕ་རོལ་ཏུ་ཕྱིན་པ་བཅུ་སྟེ། སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཕར་ཕྱིན་དྲུག །ཐབས་སྟོབས་སྨོན་ལམ་ཡེ་ཤེས་བཞི། །བསྣན་པས་ཕ་རོལ་ཕྱིན་བཅུར་བཞེད། །ཅེས་པ་ལྟར་དང༌། དྲུག་པ་དངོས་པོ་རྣམས་ཀྱི་དེ་ཁོ་ན་ཉིད་རང་བཞིན་མེད་པར་རྟོགས་ཏེ་ཤེས་བྱ་སོ་སོར་མ་འདྲེས་པར་རིག་པས་ཤེས་པ་སོ་སོ་ཡང་དག་པའི་༼༢༦༨༽རིག་པ་བཞི་སྟེ། དོན་ཆོས་ངེས་པའི་ཚིག་སྤོབས་པ། །སོ་སོ་ཡང་དག་རིག་པ་བཞི། །ཞེས་པ་དང༌། བདུན་པ་བཤད་པའི་ཐབས་ཤེས་དང་བདེན་པ་གཉིས་ཀྱི་དོན་རྟོགས་པའི་གཞིར་གྱུར་པའི་ཤེས་པའི་གནས་དབང་པོ་ལྔ་སྟེ། དད་པ་བརྩོན་འགྲུས་དྲན་པ་དང༌། །ཏིང་འཛིན་ཤེས་རབ་དབང་སྟོབས་ལྔ༌། །ཞེས་པ་ལྟར་དང༌། བརྒྱད་པ་ཤེས་ནས་ཡལ་བར་མི་འཇོག་པར་བདག་གཞན་གྱི་དོན་ཆུད་མི་གསོན་པས་ནན་ཏན་དམ་པ་བསྡུ་བའི་དངོས་པོ་བཞི་སྟེ། སྦྱིན་དང་སྙན་པར་སྨྲ་བ་དང༌། །དོན་སྤྱོད་དོན་མཐུན་བསྡུ་དངོས་བཞི། །ཞེས་དང༌། དགུ་པ་རློམ་སེམས་མེད་པར་ཡུལ་སེམས་དུ་འཛིན་པ་དང་བྲལ་བས་ངར་འཛིན་པའམ་ང་རྒྱལ་མེད་པ་ བདག་མེད་རྣམ་པ ་གཉིས་ཏེ། ཆོས་དང་གང་ཟག་ བདག་མེད་གཉིས། །ཞེས་དང༌། བཅུ་པ ་དོན་ལ་འདྲིས་ཤིང་གོམས་པས་ཡང་དག་པའི་དོན་མཐུ་ཅན་དུ་བྱེད་པའི་ཕྱིར་མི་དགེ་བའི་བག་ཆགས་མེད་པ་སྟོབས་ལྔ་སྟེ་གོང་དུ་དྲངས་པ་ལྟར་དང༌། བཅུ་གཅིག་པ། རྟོགས་པའི་ལྟ་བས་དག་པ་འཇིག་རྟེན་པའི་ཡེ་ཤེས་དང༌། མི་རྟོག་པའི་ལྷག་མཐོང་གི་ཡེ་ཤེས་གཉིས་མངོན་དུ་བྱ་ཞིང་མཐོང་བར་བྱེད་པ་བདེན་པ་གཉིས་ཏེ། ཀུན་རྫོབ་དང་ནི་དོན་དམ་པ། །འདི་ནི་བདེན་པ་གཉིས་སུ་འདོད། །ཅེས་པ་དང༌། བཅུ་གཉིས་པ། ལྟ་བའི་ངང་ལ་ཞི་ལྷག་གིས་མི་གཡོ་བར་གནས་ཏེ་ཟབ་ཅིང་རྒྱ་ཆེ་བའི་རྣམ་འཕྲུལ་མངོན་དུ་བྱེད་པའི་སྒོ་ལ་སྙོམས་པར་འཇུག་པའི་བསྒོམ་པ་ཏིང་ངེ་འཛིན་གྱི་སྒོ་འབུམ་ཕྲག་སྟེ། དཀོན་མཆོག་བརྩེགས་པ་བྱམས་པའི་སྨོན་ལམ་ལས། སྒྱུ་མ་ལྟ་བུའི་ཏིང་འཛིན་དང༌། །དཔའ་བར་འགྲོ་བའི་ཏིང་འཛིན་དང༌། །རྡོ་རྗེ་ལྟ་བུའི་ཏིང་འཛིན་གྱིས། །བསམ་གཏན་ཕ་རོལ་ཕྱིན་རྫོགས་ཤོག །ཅེས་པ་ལ་སོགས་པ་མདོ་ལས་འབྱུང་བ་ལྟར་དང༌། བཅུ་གསུམ་པ། གོམས་པ་གདེངས་སུ་གྱུར་པས་འབྲས་བུའི་མཆོག་ཏུ་གྱུར་ཏེ་མི་འགྱུར་ཞིང་ཐོགས་པ་མེད་པར་མཁྱེན་པའི་སྙིང་པོ་སྟོབས་བཅུ་སྟེ། གནས་དང་གནས་མིན་རྣམ་སྨིན་ཁམས། །མོས་དང་དབང་པོ་བསམ་གཏན་དང༌། །ལམ་དང་སྔོན་གནས་འཆི་འཕོ་དང༌། །ཟག་པ་ཟད་མཁྱེན་སྟོབས་བཅུའོ། །ཞེས་དང༌། བཅུ་བཞི་པ། མཉམ་པ་ཉིད་ཀྱི་དབྱིངས་ལས་གཡོ་བ་མི་མངའ་བར་ཤེས་བྱ་སོ་སོའི་རྣམ་པའི་ཆ་རྣམས་མ་འདྲེས་པར་མཁྱེན་པ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དེ། འཁྲུལ་དང་ཅ་ཅོ་དྲན་པ་ཉམས། །མཉམ་བཞག་མིན་དང་འདུ་༼༢༦༩༽ཤེས་ཚོགས། །མ་བརྟགས་བཏང་སྙོམས་མི་མངའ་བ། །སྤྱོད་པས་བསྡུས་པ་དྲུག་ཡིན་ནོ། །འདུན་བརྩོན་དྲན་དང་ཤེས་རབ་དང༌། །རྣམ་པར་གྲོལ་དང་རྣམ་གྲོལ་གྱི། །ཡེ་ཤེས་གཟིགས་པ་ཉམས་པ་དག །མི་མངའ་རྟོགས་པས་བསྡུས་པ་དྲུག །སྐུ་གསུང་ཐུགས་ཀྱི་ལས་གསུམ་པོ། །ཡེ་ཤེས་རྗེས་འབྲང་སྤྱོད་པ་གསུམ། །འདས་དང་ད་ལྟ་མ་འོངས་པར། །ཡེ་ཤེས་གཟིགས་འཇུག་དུས་བསྡུས་གསུམ། །དེ་ལྟར་དྲུག་ཚན་གསུམ་པོ་ནི། །མ་འདྲེས་པ་ནི་བཅོ་བརྒྱད་དོ། །ཞེས་པ་ལྟར་དང༌། བཅོ་ལྔ་པ། སྙིང་རྗེ་དང་ཤེས་རབ་ཀྱིས་འགྲོ་བ་དང་ཆོས་ཉིད་ཀྱི་ཡུལ་རྣམས་སྒྲིབ་མེད་དུ་གསལ་བར་དམིགས་པ་མངོན་པར་ཤེས་པ་དྲུག་སྟེ། ལྷ་ཡི་མིག་དང་རྣ་བ་དང༌། །གཞན་སེམས་ཤེས་དང་སྔོན་གནས་ཤེས། །རྫུ་འཕྲུལ་གྱི་ནི་མངོན་ཤེས་ལྔ༌། །ཟག་ཟད་མངོན་ཤེས་བསྣན་དྲུག་གོ །ཞེས་དང༌། བཅུ་དྲུག་པ། ཕྱི་ནང་གི་ཆོས་ལ་རིགས་པ་དང་གཏན་ཚིགས་ཀྱིས་གཞིག་ཅིང་བྱང་ཆུབ་ཀྱི་དོན་དུ་འགྱུར་བའི་སྤྱོད་པ་ལ་སློབ་པ་ཆོས་སྤྱོད་བཅུ་སྟེ། དབུས་མཐའ་རྣམ་འབྱེད་ལས། ཡི་གེ་འབྲི་མཆོད་སྦྱིན་པ་དང༌། །ཉན་དང་ཀློག་དང་ལེན་པ་དང༌། །འཆད་དང་ཁ་ཏོན་བྱེད་པ་དང༌། །དོན་སེམས་པ་དང་སྒོམ་པའོ། །སྤྱོད་པ་དེ་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་པ་ལྟར་དང༌། བཅུ་བདུན་པ། སྔ་མ་ལས། ལེ་ལོ་དང་ནི་གདམས་ངག་རྣམས། །བརྗེད་དང་བྱིང་དང་རྒོད་པ་དང༌། །འདུ་མི་བྱེད་དང་འདུ་བྱེད་དེ། །འདི་དག་ཉེས་པ་ལྔར་འདོད་དོ། །ཞེས་གསུངས་པ་ལྟར་ལྔའི་སྟེང་དུ། བློས་མ་ཟིན་ན་རྟོག་པ་རང་ག་ཨ་འཐས་སུ་གྱུར་ན་བོགས་སྐྱེད་མི་ཐོན་པའི་སྐྱོན་བདུན་པོ་ཏིང་ངེ་འཛིན་ལ་མཉམ་པར་འཇོག་པའི་ཚེ་ན་འབྱུང་བས་རྣམ་པར་གཡེང་བ་དེ་རྣམས་འགེགས་པའི་ལས་བྱེད་པ་སྤོང་བའི་འདུ་བྱེད་བརྒྱད་དེ། དད་འདུན་རྩོལ་བ་ཤིན་སྦྱང་དང༌། །དྲན་པ་ཤེས་བཞིན་སེམས་པ་དང༌། །གཏང་སྙོམས་འདུ་བྱེད་བརྒྱད་ཡིན་ནོ། །ཞེས་དང༌། བཅོ་བརྒྱད་པ། ཡང་དག་པའི་ཐབས་དང་གཉེན་པོར་རྩེ་གཅིག་ཏུ་བསྡུས་ཏེ་བསམ་པ་དོན་ལས་མི་གཡེང་བ་རྣམ་པར་ཐར་པའི་སྒོ་གསུམ་སྟེ། སྟོང་ཉིད་མཚན་མེད་སྨོན་མེད་གསུམ། །ཞེས་པ་དང༌། བཅུ་དགུ་པ། ལམ་གོང་ནས་གོང་དུ་བགྲོད་པའི་ཐབས་དོན་དུ་གཉེར་ནས་ས་ལ་བསྐྱོད་པར་བྱེད་པས་བརྩལ་བ་ནི། རྫུ་འཕྲུལ་གྱི་༼༢༧༠༽རྐང་པ་བཞི་སྟེ། འདུན་བརྩོན་སེམས་པ་དཔྱོད་པ་ནི། །རྫུ་འཕྲུལ་རྐང་པ་བཞི་ཡིན་ནོ། །འདི་བཞི་ངོ་བོ་ཏིང་འཛིན་ཏེ། །གུས་འབད་སེམས་གནས་དཔྱོད་ཤེས་སོ། །ཞེས་དང༌། ཉི་ཤུ་པ། གོམས་པ་མཐར་ཕྱིན་པའི་དྲོད་རྟགས་ལ་སོགས་པ་ནམ་ཡང་བརྗེད་ངས་སུ་ལྷུང་བ་མེད་པའི་ཡོན་ཏན་གྱི་གཞི་ནི་གཟུངས་ཀྱི་སྒོ་ལྔ་བརྒྱ་སྟེ། མི་བརྗེད་པ་ཡི་གཟུངས་ལ་ནི། །བཟོད་ཐོབ་སྒོ་དང་ཚིག་དང་དོན། །སྔགས་ཀྱི་གཟུངས་ཞེས་རྣམ་བཞིར་བརྗོད། །ཡང་ནི་གཟུངས་ཀྱི་རྣམ་གྲངས་ལ། །རྣམ་སྨིན་ཐོས་དང་ཏིང་འཛིན་སྐྱེས། །སོ་སྐྱེས་ས་བདུན་དག་ས་པའི། །གཟུངས་ལ་ཆུང་འབྲིང་ཆེན་པོར་བཤད། །ཅེས་པ་རྣམས་དང༌། ཡང་ནི་གཟུངས་ཀྱི་རྣམ་གྲངས་ལ། །སྒྲ་དབྱངས་རྣམ་པར་དག་པའི་གཟུངས། །མི་ཟད་ཟ་མ་ཏོག་གི་གཟུངས། །དེ་བཞིན་འཁྱིལ་བ་མཐའ་ཡས་དང༌། །རྒྱ་མཚོའི་ཕྱག་རྒྱ་པདྨ་བཀོད། །ཆགས་མེད་སྙོམས་འཇུག་གདོན་མི་ཟ། །སངས་རྒྱས་བྱིན་རླབས་གཟུངས་བརྒྱད་གསུངས། །ཞེས་གཟུངས་དབང་གིས་ཞུས་པ་ལས་བརྒྱད་གསུངས་པ་སོགས་མདོ་ལས་འབྱུང་བ་ལྟར་དང༌། ཉེར་གཅིག་པ། འདི་དག་ལ་རྐྱེན་གྱིས་མི་བརྫི་བས་བདུད་དང་མུ་སྟེགས་ལ་སོགས་པས་མི་ཚུགས་ཤིང་མི་ཤིགས་པས་བརྟན་པ་ནི་མི་འཇིགས་པ་བཞི་སྟེ། རྟོགས་དང་སྤངས་པ་ལམ་དང་གེགས། །སྟོན་ལ་མི་འཇིགས་རྣམ་པ་བཞི། །ཞེས་པ་དང༌། ཉེར་གཉིས་པ། གཞན་ལ་ཕན་གདགས་པའི་ཕྱིར་བསྡུ་བའི་དངོས་པོ་བཞིས་ལེགས་པར་བསྡུས་ནས་ལམ་གྱིས་དོན་ཁོང་དུ་ཆུད་དེ་གཉེར་བས་འབྲས་བུ་ཆུབ་ཅིང་བསྡུ་བར་བྱེད་པ་འཕགས་པ་དང་བྱང་ཆུབ་ཀྱི་ལམ་བཅོ་ལྔ་སྟེ། དྲན་དང་ཆོས་རབ་རྣམ་འབྱེད་དང༌། །བརྩོན་བགྲུས་དགའ་དང་ཤིན་ཏུ་སྦྱང༌། །ཏིང་ངེ་འཛིན་དང་བཏང་སྙོམས་ནི། །བྱང་ཆུབ་ཡན་ལག་བདུན་ཡིན་ནོ། །ཡང་དག་ལྟ་དང་རྟོག་པ་དང༌། །ངག་དང་ལས་མཐའ་འཚོ་བ་དང༌། །རྩོལ་བ་དྲན་པ་ཏིང་ངེ་འཛིན། །འཕགས་ལམ་ཡན་ལག་བརྒྱད་དུ་བརྗོད། །ཅེས་པ་དང༌། ཉེར་གསུམ་པ། བྱང་ཆུབ་ཀྱི་ཕྱོགས་སུ་བཀོད་པས་གཞན་དང་མ་འདྲེས་པའི་ཆོས་དག་ཁོང་དུ་ཆུད་པར་བྱེད་པ་ཡིན་པས་བྱང་ཆུབ་ཀྱི་ཕྱོགས་ཀུན་བསྡུ་བ་སུམ་ཅུ་རྩ་བདུན་ཏེ། དྲན་པ་ཉེར་བཞག་བཞི། ཡང་དག་པའི་སྤོང་བ་བཞི། རྫུ་འཕྲུལ་གྱི་རྐང་པ་བཞི། དབང་པོ་ལྔ། སྟོབས་ལྔ། བྱང་ཆུབ་ཀྱི་ཡན་ལག་བདུན། འཕགས་པའི་ལམ་ཡན་བརྒྱད་རྣམས་དྲངས་ཟིན་པ་ལྟར་དང༌། ཉེར་བཞི་པ། དེ་དག་གི་དེ་ཁོ་ན་༼༢༧༡༽ཉིད་དོན་དམ་པའི་མཚན་ཉིད་ཇི་ལྟ་བའི་གནས་ལུགས་རྟོགས་པས་ཐེག་པ་ཆེན་པོའི་ལྟ་བ་དང༌། ཉེར་ལྔ་པ། མཐར་ཐུག་གི་འབྲས་བུ་དམ་པ་ཡང་དག་པར་བསྒྲུབ་བྱར་གྱུར་པས་ཀུན་ནས་ཐོབ་པར་བྱ་བ་སྐུ་གསུམ་མམ་བཞི་ལ་སོགས་པའི་གོ་འཕང་བླ་ན་མེད་པ་སྟེ། འབྲས་བུ་སངས་རྒྱས་ས་དེ་ནི། །སྐུ་བཞི་ཡེ་ཤེས་ལྔ་ཡིས་བསྡུས། །ཞེས་པ་ལྟར་དང༌། ཉེར་དྲུག་པ། ལྟ་བ་དང་ཏིང་ངེ་འཛིན་ལ་གོམས་པ་ཡོངས་སུ་རྫོགས་པས་རང་ལམ་གྱི་སའི་རྩེ་མོརགྱུར་ཏེ་སྤྱིར་ཕྱིན་པ་བཅུ་གཅིག་ཀུན་ཏུ་འོད་ཀྱི་ས་སྟེ། ཆོས་ཀུན་སྣང་བ་མཉམ་པ་ཡི། །རྡོ་རྗེ་ལྟ་བུའི་ཏིང་འཛིན་ལས། །མི་སློབ་ལམ་གྱུར་ས་བཅུ་གཅིག །ཀུན་ཏུ་འོད་ནི་རབ་ཐོབ་སྟེ། །དེ་བཞིན་ཉིད་དུ་ཆོས་ཐམས་ཅད། །གནས་གྱུར་ཡོན་ཏན་མཐར་ཐུག་ཐོབ། །ཅེས་དང༌། ཉེར་བདུན་པ། ཏིང་ངེ་འཛིན་གོམས་པའི་སྟོབས་ཀྱིས་མི་མཐུན་པ་ཞི་ནས་སྒྲིབ་པ་ཁད་ཀྱིས་བསྲབས་ཏེ་ཡོངས་སུ་བྲི་བས་ས་གོང་མ་དང་ཀུན་ཏུ་འོད་ཐོབ་ལ་མ་རག་པ་ནི་འཕགས་པའི་ས་བཅུ་སྟེ། མཐོང་ལམ་རབ་དགའི་ས་ཐོབ་ནས། །འཇིགས་པ་ལྔ་བྲལ་ཡོན་ཏན་ནི། །བརྒྱ་ཕྲག་བཅུ་གཉིས་དག་ཀྱང་ཐོབ། །སྒོམ་ལམ་ས་དགུར་རིམ་པ་བཞིན། །དྲི་མེད་འོད་བྱེད་འོད་འཕྲོ་དང༌། །སྦྱང་དཀའ་མངོན་གྱུར་རིང་དུ་སོང༌། །མི་གཡོ་ལེགས་བློ་ཆོས་ཀྱི་སྤྲིན། །སློབ་པའི་ས་ནི་བཅུ་པོ་ལ། །སྒྲིབ་པ་གཉིས་པོ་རིམ་སྤོངས་ནས། །ས་རྣམས་ཡོངས་སུ་སྦྱོང་བར་བརྩོན། །ཞེས་གསུངས་པ་ལྟར་ཤེས་པར་བྱའོ། །དེ་ལྟར་དྲངས་པ་རྣམས་ཀུན་མཁྱེན་མི་ཕམ་ཆོས་རྗེས་མཁས་འཇུག་སྡོམ་བྱང་ལས་སོ། །དེ་རྣམས་ཀྱི་ངོ་བོ་བསྟན་པ་ནི་ངོ་ཤེས་པར་བྱ་བའི་ཕྱིར་ཏེ། ལང་ཀའི་བདག་པོ། དེ་དག་ནི་དངོས་གཞིའི་ཡན་ལག་ཅེས་བྱའོ།།

ལྔ་པ་གཟུང་བའི་ཡན་ལག་ནི།

ལང་ཀའི། ཞེས་པ་ནས། གཟུང་བའི་ཡན་ལག་ཅེས་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་བཟུང་བའི་ཡན་ལག་གང་ཞེ་ན། འདི་ལྟ་སྟེ། བླང་བ་དང་། འཕམ་པ་དང་། ལྟུང་བ་དང་། རང་བཞིན་དང་། མེད་པའི་རང་བཞིན་དང་། འབྱུང་བ་དང་། ཡོངས་སུ་བཏང་བ་ཁོ་ནར་ཤེས་པར་བྱ་སྟེ།

ལངྐའི་བདག་པོ་དེ་དག་ནི་བཟུང་བའི་ཡན་ལག་ཅེས་བྱའོ།།

ལང་ཀའི་བདག་པོ། དེ་ལ་སྒོ་གསུམ་གྱི་སྡོམ་པ་གཟུང་བའི་ཡན་ལག་གང་ཞེ་ན། འདི་ལྟ་སྟེ། གང་དང་པོ་མཁན་པོ་དང༌། སློབ་དཔོན་ལ་སོགས་པ་དད་པའི་དགེ་འདུན་གྲངས་ཚང་བ་ལས། སློབ་དཔོན་ནས། དགེ་བསྙེན་དང༌། བར་སློབ་དང༌། དགེ་ཚུལ་དང༌། དགེ་འདུན་ལས་དགེ་སློང་གི་ཚུལ་ཁྲིམས་རྣམས་ལེགས་པར་ནོད་དེ། སྡོམ་པའམ་ཚུལ་ཁྲིམས་བླང་བ་དང༌། སོ་སོར་ཐར་པ་རྩ་བའི་མདོ་ལས། མི་ཚངས་སྤྱོད་དང་རྐུ་བ་དང༌། །མི་ལ་གསད་པར་མི་བྱ་བ། །རྫུན་དུ་སྨྲ་དང་བཅས་པ་ཡི། །ཆོས་བཞི་འདིར་ནི་གསུངས་པ་༼༢༧༢༽ཡིན། །ཞེས་པ་ལ་སོགས་པ་ལྟར། རྩ་བ་ཕས་ཕམ་པའི་ཆོས་རྣམ་པ་བཞི་དང༌། ལྟུང་བར་གྱུར་པ་ལྷག་མ་བཅུ་གསུམ་དང༌། སྤང་བའི་ལྟུང་བྱེད་སུམ་ཅུ་དང༌། ལྟུང་བྱེད་འབའ་ཞིག་པ་དགུ་བཅུ་ཐམ་པ་དང༌། སོ་སོར་བཤགས་པར་བྱ་བ་བཞི་དང༌། བསླབ་པར་བྱ་བའི་ཆོས་མང་པོ་རྣམས་དང༌། རྩོད་པ་ཉེ་བར་ཞི་བའི་ཆོས་བདུན་ལ་སོགས་པ་ཐེག་པ་ཆེ་ཆུང་གི་གནང་བཀག་གི་ཆོས་བསྲུང་བ་དང༌། དེས་ན་སྒོ་གསུམ་སྡོམ་པའི་རང་བཞིན་ཅན་གྱི་ཚུལ་ཁྲིམས་དང་ལྡན་པར་བྱ་བ་དང༌། ལྟུང་བ་དང་ཉེས་བྱས་ཀྱིས་རྩ་བ་དང་ཡན་ལག་གི་འཆལ་བའི་དྲི་མ་མེད་པའི་རང་བཞིན་ཡོངས་སུ་དག་པར་སྒྲུབ་པ་དང༌། ཉེས་པའི་རྣམ་གྲངས་རྟོགས་ནས། ཐར་པའི་གྲོང་ཁྱེར་དུ་འཇུག་པའི་ཕྱིར་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་འཁོར་བ་ལས་ངེས་པར་འབྱུང་བ་དང༌། རྒྱལ་སྲིད་དང་བུ་དང་བུ་མོ་དང༌། ཁྱོ་མོ་དང་། ཁྱིམ་དང་ལོངས་སྤྱོད་ལ་སོགས་པ་ལ་ཡོངས་སུ་མ་ཆགས་པར་ཀུན་ནས་བཏང་བར་བྱེད་པ་ཁོ་ནར་ངེས་པའམ། ཡང་ན། བསླབ་པ་ཕུལ་དང་འཆི་འཕོ་དང༌། །ཞེས་པ་ལ་སོགས་པ་ལྟར་སྡོམ་པ་ཡོངས་སུ་གཏོང་བར་ཡང་ཤེས་པར་བྱ་སྟེ། ལང་ཀའི་བདག་པོ། རྣམ་གྲངས་བདུན་པོ་དེ་དག་ནི་སྡོམ་པ་གཟུང་བའི་ཡན་ལག་ཅེས་བྱའོ།།

དྲུག་པ་མཚན་ཉིད་ཀྱི་ཡན་ལག་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། ཡོན་ཏན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་མཚན་ཉིད་ཀྱི་ཡན་ལག་གང་ཞེ་ན། འདི་ལྟ་སྟེ། ཀུན་རྫོབ་དང་། དམ་པ་དང་། དམིགས་པ་དང་། རྣམ་པ་དང་། རང་བཞིན་དང་། འབྲས་བུ་དང། བསྙད་པ་དང་། བར་དུ་གཅོད་པ་དང་། འཐུན་པ་དང།

ཉེས་དམིགས་དང་། ཡོན་ཏན་ནོ།།

ལང་ཀའི་བདག་པོ། དེ་ལ་མཚན་ཉིད་ཀྱི་ཡན་ལག་ནང་རིས་ཐ་དད་སྣ་ཚོགས་སུ་བསྟན་པ་ཉིད་གང་ཞེ་ན། རྣམ་གྲངས་བཅུ་གཅིག་ཏུ་གནས་པ་འདི་ལྟ་སྟེ། ཀུན་རྫོབ་ཀྱི་བདེན་པ་དང༌། དོན་དམ་པའི་བདེན་པ་དང༌། ཐམས་ཅད་དུ་བསྟན་པའི་དམིགས་པ་དང༌། ཆོས་རྣམས་ཀྱི་བྱེ་བྲག་རྣམ་པ་དང༌། ཆོས་ཐམས་ཅད་ཀྱི་རང་བཞིན་དང༌། ཐོབ་པར་བྱ་བ་འབྲས་བུ་དང༌། གང་བྱང་ཆུབ་ཅིང་དོན་དེ་གཞན་ལ་བརྗོད་པས་བསྙད་པ་དང༌། ཡང་དག་པའི་དོན་མཐོང་དུ་མི་སྟེར་བ་བར་དུ་གཅོད་པ་དང༌། བདེན་པ་དང་གཏན་ཚིགས་དེམས་སུ་བྱས་པས་མཐུན་པ་དང༌། དོན་དང་མི་མཐུན་པ་ཉེས་དམིགས་དང༌། དོན་དང་མཐུན་པར་གྱུར་པའི་ཡོན་ཏན་རྣམས་ཡིན་ནོ།།

གཉིས་པ་རྒྱས་པར་བཤད་པ་ལ་གཉིས་ཏེ། ཐུན་མོང་དུ་སྤྱིར་བསྟན་པ། དམིགས་པ་དང་རྣམ་པ་བྱེ་བྲག་ཏུ་བཤད་པའོ། །དང་པོ་ནི།

༼༢༧༣༽ལང་ཀའི། ཞེས་པ་ནས། རྫོགས་པའོ། །ཞེས་པའི་བར་དང༌།

ལངྐའི་བདག་པོ་དེ་ལ་ཀུན་རྫོབ་གང་ཞེན། འདི་ལྟ་སྟེ། གང་ཟག་དང་། བརྟགས་པ་དང་། ལས་སུ་བསྟན་པའོ། །ལངྐའི་བདག་པོ་དེ་ལ་དམ་པ་གང་ཞེ་ན། འདི་ལྟ་སྟེ། དེ་བཞིན་རྣམ་པ་བདུན་དུ་བསྟན་པར་བལྟའོ།།

འོག་ནས། ལང་ཀའི་བདག་པོ། དམིགས་པ་ནི་འཛིན་པའོ། །ཞེས་པ་ནས། མཐུན་པར་ཇེན་པ་ནི་ཡོན་ཏན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དམིགས་པ་ནི་འཛིན་པའོ། །རྣམ་པ་ནི་དབྱེ་བའོ། །བྱང་ཆུབ་ནི་རང་བཞིན་ནོ། །གང་སྤངས་པས་གང་ཐོབ་པ་ནི་འབྲས་བུའོ། །གང་ཆུབ་ཅིང་གང་ལ་བརྗོད་པ་ནི་བསྙད་པའོ། །གང་གི་ཕྱོགས་དང་མི་མཐུན་པ་ནི་རབ་ཏུ་གཅོད་པའོ། །གང་གི་ཕྱོགས་ལ་ནན་ཏན་བྱེད་པ་ནི་འཐུན་པའོ། །གང་དང་མི་མཐུན་པའི་དབང་དུ་ཞེན་པ་ནི་ཉེས་དམིགས་སོ། །གང་དང་འཐུན་པར་ཇེན་པ་ནི་ཡོན་ཏན་ནོ།།

ལང་ཀའི་བདག་པོ། དེ་ལ་ཀུན་རྫོབ་གང་ཞེ་ན། འདི་ལྟ་སྟེ། ཞེས་བཅུ་གཅིག་ལ་སྙེགས་པས་དང་པོ་ཀུན་རྫོབ་བཀར་ནས་བསྟན་པ་ནི་མཚན་ཉིད་གསུམ་སྟེ། ལུང་བསྟན་ལས། ཕུང་པོ་ལྔ་ཡི་རྒྱུན་ལ་བདག་ཏུ་རྟོག་པ་དང་བཅས་པས་འཁྲུལ་པའམ། འགྲེལ་ཆེན་ལས། ཀུན་གཞི་ཤེས་པ་སྐད་ཅིག་མ་ལས་དང་ཉོན་མོངས་པས་རྒྱས་པར་ལྟུང་བའི་ས་བོན་དང་བཅས་པས་བག་ཆགས་གང་ཟག་དང༌། ངོ་བོ་མེད་པ་ལ་ཡོད་པར་གཟུང་བའི་ཡུལ་ཐམས་ཅད་དུ་དངོས་པོར་བརྟགས་པའི་འཁྲུལ་པ་སྒྲ་དོན་སྤྱི་ལ་ནན་གྱིས་ཞེན་པ་དང༌། རྟོག་མེད་འཁྲུལ་པ་ཟླ་བ་གཅིག་ལ་གཉིས་སུ་བཟུང་བ་དང༌། རྟོག་བཅས་འཁྲུལ་པ་ཐག་པ་ལ་སྦྲུལ་འཛིན་ལྟ་བུ་དང༌། ངོ་བོ་སྒྱུ་མ་ཙམ་དུ་དགེ་བ་དང་མི་དགེ་བ་དང་ལུང་མ་བསྟན་གསུམ་གྱི་ལས་སུ་བསྟན་པ་འདུ་བྱེད་ལྔ་བཅུ་རྩ་གཅིག་ལ་སོགས་པ་རྣམས་ཏེ་དག་པ་དང་མ་དག་པའི་དབྱེ་བས་གཉིས་སུ་ཕྱེ་ཞིང༌། སྔ་མ་གཉིས་ལོག་པའི་ཀུན་རྫོབ་དང༌། ཕྱི་མ་ཡང་དག་པའི་ཀུན་རྫོབ་ཏུ་ཤེས་པར་བྱའོ།།

ལང་ཀའི་བདག་པོ། དེ་ལ་གཉིས་པ་དོན་དམ་པ་གང་ཞེ་ན་ཡང་མཚན་ཉིད་རྣམ་གསུམ་འདི་ལྟ་སྟེ། རྒྱུ་རྐྱེན་ལས་འདས་ཤིང་བློའི་ཡུལ་ལམ་སྒྲ་ཡིས་བརྗོད་པའི་སྤྲོས་པ་ཐམས་ཅད་དང་བྲལ་བས་མཐའ་རིལ་གྱིས་མ་བསྒོས་པ་དང་། རྒྱུ་རྐྱེན་ལས་མ་བྱས་པར་ཕྱིན་ཅི་མ་ལོག་པའི་ཆོས་ཉིད་ཡོངས་སུ་གྲུབ་པས་མི་འཇིག་པར་བསྟན་པ་འདུས་མ་བྱས་པའི་ངོ་བོ་འཕོ་འགྱུར་མེད་པ་དང༌། ཐམས་ཅད་ཀྱང་སྐྱེ་བ་མེད་པ་དེའི་ངང་དུ་འདུས་པས་ཐོབ་བྱའི་འབྲས་བུ་ཡོངས་སུ་རྫོགས་པ་སྟེ། དེ་ལ་སྤྲོས་པ་ཕྱོགས་གཅིག་དང་བྲལ་བ་རྣམ་གྲངས་པའི་དོན་དམ་དང༌། སྤྲོས་པ་ཐམས་ཅད་དང་བྲལ་བ་རྣམ་གྲངས་མ་ཡིན་པའི་དོན་དམ་གཉིས་ཏེ་ངེས་ཚིག་དང་བཅས་པར་འཇལ་བར་བྱའོ། །མཚན་ཉིད་ཀྱི་ཡན་ལག་ལ་བཅུ་གཅིག་གི་གསུམ་པ་མན་ཆད་ཀྱི་དོན་བརྗོད་པའི་ཕྱིར། ལང་ཀའི་བདག་པོ། གསུམ་པ་དམིགས་པ་ནི། ཤེས་པ་ཡུལ་ལ་གཏོད་དེ་རྒྱུ་འབྲས་ཀྱི་ཆོས་ལ་སྒྲོ་འདོགས་གཅོད་པའི་གཞིར་འཛིན་པའོ། །བཞི་པ་རྣམ་པ་ནི་དེ་ཉིད་ཀྱི་ཆོས་ལ་སོ་སོར་བརྟགས་པའི་བྱེ་བྲག་གི་མཚན་ཉིད་མ་འདྲེས་པར་དབྱེ་བའོ། །༼༢༧༤༽འོ་ན་ཐུན་མོང་དུ་བསྟན་པ་འདི་དང་བྱེ་བྲག་ཏུ་བཤད་པ་གཉིས་བལྡབས་པར་གྱུར་པ་ཅི་དགོས་སྙམ་པ་ལ། དེ་ནི་མདོ་རྒྱས་དང་ངོ་བོ་གསལ་བར་བརྗོད་པ་དང་འདིར་ངེས་ཚིག་ལྟ་བུའི་ཕྱིར་རོ། །ལྔ་པ་བྱང་ཆུབ་ཀྱི་ངོ་བོ་ཉིད་ནི་རྒྱུ་འབྲས་སམ་འཁོར་འདས་ཀྱི་ཆོས་དེ་རྣམས་ཀྱི་རང་བཞིན་ཆོས་ཉིད་དེ་བཞིན་ཉིད་ཡིན་ནོ། །དྲུག་པ་གང་སྒྲིབ་པ་གཉིས་ཕྲ་རགས་རྣམས་གཉེན་པོས་སྤངས་པས་གང་སྐུ་གསུམ་དང་ཡེ་ཤེས་བཞིའི་དོན་མངོན་དུ་སྣང་སྟེ་ཡང་དག་པར་ཐོབ་པ་ནི་འབྲས་བུའོ། །བདུན་པ་གང་བདག་དོན་དུ་ཤེས་བྱའི་དོན་ལ་བློ་གྲོས་ཡོངས་སུ་ཆུབ་ཅིང་ཁོང་དུ་ལེགས་པར་ཆུད་ནས་གང་གཞན་ལ་ཆོས་ཀྱི་འཁོར་ལོར་བསྐོར་ཏེ་བཤད་ཅིང་བརྗོད་པ་ནི་ཡང་དག་པར་བསྙད་པའོ། །བརྒྱད་པ་གང་ཡང་དག་པའི་ཚད་མ་མྱ་ངན་ལས་འདས་པའི་ཆོས་ཀྱི་རྣམ་གྲངས་དག་གི་ཕྱོགས་དང་མི་མཐུན་པ་ལྟ་བ་ངན་པ་དང༌། བདག་ཏུ་འཛིན་པ་དང༌། ལེ་ལོ་ལ་སོགས་པ་རྣམས་ནི་བར་དུ་གཅོད་པའོ། །དགུ་པ་ཆོས་དང་མཐུན་པས་རྣམ་པར་གྲོལ་བའི་དེ་ཁོ་ན་ཉིད་མཐོང་བ་གང་གི་ཕྱོགས་སུ་གནས་པས་བདེན་པའི་གཏན་ཚིགས་ལ་ཡང་ཡང་དེམས་སུ་བྱེད་ཅིང་བརྩོན་འགྲུས་ཀྱི་ནན་ཏན་དུ་བྱེད་དེ་ཆུད་མི་གསོན་པ་ནི་དོན་དང་མཐུན་པའོ། །བཅུ་པ་གང་ཡང་དག་པའི་ལྟ་སྒོམ་སྤྱོད་པའི་ཆོས་དང་མི་མཐུན་པ་འཁོར་བའི་ཆོས་ལྟ་བུའམ་ཕྱིར་རྒོལ་བ་མུ་སྟེགས་པ་ལྟ་བུ་མ་དག་པའི་རིགས་པ་ཅན་གྱི་དབང་དུ་ཇེན་པའམ་སོང་ནས་ལོག་པའི་ཕྱོགས་སུ་སོན་པ་ནི་ཉེས་པའོ། །བཅུ་གཅིག་པ་གང་ནང་པ་སངས་རྒྱས་པ་ལྟ་བུ་ལམ་ལ་ཞུགས་ཏེ་འབྲས་བུ་མཐར་ཕྱིན་པར་བྱེད་པ་དངོས་པོ་སྟོབས་ཞུགས་ཀྱི་རིགས་པ་རྣམ་པར་དག་པ་དང་མཐུན་པར། ཐེ་ཚོམ་དང༌། མ་ངེས་པ་དང་བྲལ་ཏེ་འགལ་བ་མེད་པར་གྱུར་ནས་རྣལ་མའི་ཕྱོགས་སུ་ཇེན་ཞེས་པ་བྲུ་ཤའི་སྐད་དེ་བོད་སྐད་དུ་སོང་བ་ནི་ཡང་དག་པའི་ཡོན་ཏན་ཡིན་ནོ།།

གཉིས་པ་དམིགས་པ་དང་རྣམ་པ་བྱེ་བྲག་ཏུ་བཤད་པ་ལ་གཉིས་ཏེ། དམིགས་པ་བཤད་པ། རྣམ་པ་གཏན་ལ་དབབ་པའོ། དང་པོ་ནི།

གོང་ནས་སྔར་གྱི་འཕྲོར། དམིགས་པ་ནི་ཐམས་ཅད་དུ་བསྟན་པའོ། །ཞེས་པས་བསྟན་ཏེ།

དམིགས་པ་ནི་ཐམས་ཅད་དུ་བསྟན་པའོ།།

དེ་ཡང་དམིགས་པ་ཞེས་བྱ་བ་ནི་ཡུལ་དུ་སྣང་བའི་ཆོས་ཤེས་བྱར་གྱུར་པ་ཐམས་ཅད་ཡིན་ལ་དམིགས་པར་བྱེད་པ་ནི་དུས་ཀུན་ཏུ་ཤེས་པ་ཁོ་ན་ཡིན་པར་ངེས་པར་བསྙད་དེ་ཡུལ་དང་ཡུལ་ཅན་དུ་ཡང་དག་པར་བསྟན་པར་བྱ་བའོ། །དེས་ན་འདིའི་མཚན་ཉིད་ངེས་ན་འཁྲུལ་སྣང་གི་སྒྲོ་འདོགས་༼༢༧༥༽ཆོད་ཅིང་ཡེ་ཤེས་ཀྱི་སྣང་བ་ལ་ཡིད་ཆེས་པར་འགྱུར་བས་བློ་གྲོས་དང་ལྡན་པས་ཞིབ་ཏུ་རྟོགས་པར་བྱའོ།།

གཉིས་པ་རྣམ་པ་གཏན་ལ་དབབ་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

རྣམ་པ་ནི། ཞེས་པས་ནས། རྣམ་པར་སྤྲོས་པའོ། །ཞེས་པའི་བར་གྱིས་བསྟན་ཏེ།

རྣམ་པ་ནི་ཐམས་ཅད་དུ་བརྟག་པ་སྟེ། བདེན་པ་དང་། གཞག་པ་དང་། ཉེས་པ་དང་། ཡོན་ཏན་དང་། ཚུལ་དང་། འཇུག་པ་དང་། རིག་པ་དང་། བསྡུས་པ་དང་། རྣམ་པར་སྤྲོས་པའོ།།

དེ་ཡང་དམིགས་པ་ནི་དམིགས་པར་བྱ་བའམ་འཛིན་པར་བྱ་བའི་སྒོ་ནས་བསྟན་ལ། རྣམ་པ་འདི་ནི་དམིགས་པ་དང་འཛིན་པར་བྱེད་པའི་བསམ་པའི་སྒྲོ་ཡི་སྤྱི་དང་བྱེ་བྲག་གི་རང་རྣམ་ལ་འཇོག་པ་ཡིན་པས། རྣམ་པ་ཞེས་བྱ་བའི་ངོ་བོ་ཉིད་ནི་དུས་ཐམས་ཅད་དུ་ཡང་རང་གི་བློས་བརྟགས་ཏེ་བཟུང་བས་མ་འདྲེས་པར་སྣང་བ་སྟེ། དེ་ལའང་རྣམ་པ་དགུ་སྟེ། སོ་སོའི་རྣམ་གྲངས་བསྟན་པ་ནི། མི་འགྱུར་བར་ཡོངས་སུ་གྲུབ་པས་བདེན་པ་དང༌། བརྗོད་མི་རྗོད་ཀྱི་རྣམ་པར་བཞག་པ་དང༌། སྡུག་བསྔལ་མྱོང་བའི་རྒྱུའི་ཕྱིར་ཉེས་པ་དང༌། འབད་པས་བདེ་བ་ཐོབ་པའི་ཕྱིར་ཡོན་ཏན་དང༌། འབྲས་བུ་ལ་སྦྱོར་བར་བྱེད་པའི་ལུགས་ཀྱི་ཚུལ་དང༌། ཤེས་པ་ཡུལ་ལ་ཇི་ལྟར་འཇུག་པ་དང༌། དོན་དང་ཐ་སྙད་གཏན་ལ་འབེབས་པས་རིགས་པ་དང༌། ཤེས་པ་རིགས་བསྡུས་པ་དང༌། དུ་མར་རྣམ་པར་སྤྲོས་ཏེ་བསྟན་པས་མཐར་ཕྱིན་པའོ།།

གཉིས་པ་རྒྱས་པར་བཤད་པ་ལ་བརྒྱད་དེ། བདེན་པ་བཤད་པ། གཞག་པ་བསྟན་པ། ཉེས་པ་བཤད་པ། ཡོན་ཏན་བསྟན་པ། ཚུལ་བཤད་པ། འཇུག་པ་བཤད་པ། རིགས་པ་བསྟན་པ། བསྡུས་པ་དང་རྣམ་པར་སྤྲོས་པ་བཤད་པའོ། །དང་པོ་ནི།

ལང་ཀའི། ཞེས་པ་ནས། གང་ཡིན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་བདེན་པ་ནི་གང་ཞེ་ན། དེ་ཁོ་ན་ཉིད་གང་ཡིན་པའོ།།

ལང་ཀའི་བདག་པོ། དེ་ལ་བདེན་པ་ནི་གང་ཞེ་ན། ཆོས་རྣམས་ཀྱི་གནས་ལུགས་ཆོས་ཉིད་དེ་ཁོ་ན་ཉིད་མ་ནོར་མི་འགྱུར་བའི་ངོ་བོ་ལ་འགྱུར་བ་མེད་པར་ཡོངས་སུ་གྲུབ་པའམ། རྣམ་གྲངས་མ་ཡིན་པའི་དོན་དམ་པ་ཡིན་ནོ་བར་མངོན་པར་ཞེན་པ་གང་ཡིན་པའོ།།

གཉིས་པ་གཞག་པ་བསྟན་པ་ནི།

གཞག་པ་ནི། ཞེས་པ་ནས། ལུང་བསྟན་པ་གཞག་པའོ། །ཞེས་པའི་བར་གྱིས་བསྟན་ཏེ།

གཞག་པ་ནི་གང་ཟག་དང་། བརྟགས་པ་དང་། གཅིག་པ་དང་། དབྱེ་བ་དང་། དྲི་བ་དང་། གཞག་པ་དང་། རྣམ་པར་གཞག་པ་དང་། གསང་བ་དང་། བསྙད་པ་དང་། ལུང་བསྟན་པར་གཞག་པའོ།།

བརྗོད་མི་རྗོད་ངེས་པར་གཞག་པ་ཡང་ནི་ཤུགས་ཀྱིས་རྣམ་གྲངས་བཅུར་འགྱུར་བ་གང་ཞེ་ན། འགྲེལ་པ་ལུང་བསྟན་མར་ཕུང་པོ་ལྔའི་རྒྱུན་བློས་མ་ཕྱེ་བའི་གང་ཟག་གམ། འགྲེལ་ཆེན་ལས། ཐོག་མ་མེད་པ་ནས་ལས་ཀྱི་བག་ཆགས་ཀྱི་དབང་དུ་གྱུར་པ་ཅན་དུ་མཐོང་བ་ལྟ་བུ་གང་ཟག་གི་བདག་ཏུ་༼༢༧༦༽ལུང་བསྟན་པར་རིགས་ཀྱང༌། རྟག་པའི་གང་ཟག་དང་སེམས་ཅན་གཅིག་གམ་ཟེར་ན། རྟག་བདག་གཞི་མ་གྲུབ་པས་ལུང་མི་བསྟན་པ་དང༌། འཁྲུལ་པའི་ཆོས་རྣམས་བརྟགས་ཞེན་གྱི་དབང་གིས་བསམ་པ་ལྟར་ཐ་དད་དུ་སྣང་བ་ཡིན་ན་ཡང༌། རྡུལ་དང་སེམས་ཅན་གཅིག་གམ་ཐ་དད་ཟེར་ན་ཐེག་པ་ཆེན་པོའི་ལུང་གིས་ཕྱི་རོལ་དུ་ལུང་མི་བསྟན་པ་དང༌། ཆོས་ཐམས་ཅད་རང་བཞིན་མེད་པར་ཕྱོགས་གཅིག་ཏུ་བསྟན་པའམ། སྐྱེས་པ་ཐམས་ཅད་འཆིའམ་མི་འཆི་ཞེས་ཟེར་ན་འཆི་བ་དང༌། འདུས་བྱས་ཐམས་ཅད་རྟག་གམ་མི་རྟག་ཞེས་བརྗོད་ན་མི་རྟག་པའོ། །ཞེས་ཕྱོགས་གཅིག་ཏུ་ལུང་བསྟན་པར་ངེས་ཀྱང༌། བདག་ཆེན་པོ་གཅིག་པུ་ཡིན་ནམ་ཞེས་ཟེར་ན་གཅིག་ཏུ་གདགས་པའི་གཞི་མ་གྲུབ་པས་ལུང་མི་བསྟན་པ་དང༌། བདེན་པ་གཉིས་སོ་སོར་དབྱེ་སྟེ་བསྟན་པ་དང༌། གང་ཟག་གི་བསམ་པ་དང་ཀུན་རྫོབ་ཀྱིརྣམ་དབྱེ་ཇི་ལྟར་མོས་པ་ལྟར་ཕྱེ་ལ་བརྗོད་པའམ། སེམས་ཅན་རྣམས་སྐྱེའམ་མི་སྐྱེ་ཞེས་བརྗོད་ན་ཉོན་མོངས་དང་བཅས་པ་སྐྱེ་ལ་ཉོན་མོངས་མེད་ན་རྟེན་མེད་པས་མི་སྐྱེའོ་ཞེས་རྣམ་པར་དབྱེ་ནས་ལུང་སྟོན་པར་རིགས་ཀྱང༌། བདག་གི་ངོ་བོ་ཤེས་རིག་གམ་བེམས་པོ་གང་ཡིན་སོགས་ཟེར་ན། དབྱེ་གཞི་མ་གྲུབ་པ་ལ་དབྱེ་ངོ་ལུང་མི་བསྟན་པ་དང༌། ཕྱིར་རྒོལ་བ་པ་ལ་རྣམ་གཞག་བདེ་བར་གཏན་ལ་ཕབ་ཀྱང་ལོག་པའི་གལ་ཏུ་སྨྲ་བ་ལ་བདག་གིས་མ་ངེས་ན་ཁྱོད་ཀྱིས་ཇི་ལྟར་རྟོགས་ཅེས་དྲི་བར་བྱས་ཏེ་ལན་བརྗོད་པའམ། མི་འདི་འགྲོ་བ་བཟང་ངམ་ངན་ཟེར་ན་གང་དང་བསྒྲུན་དྲིས་ནས་ལྷ་དང་བསྒྲུན་ན་ངན་ལ་ངན་འགྲོ་དང་བསྒྲུན་ན་བཟང་ངོ་ཞེེས་བརྗོད་པར་རིགས་ལ།  བདག་ཡོད་དམ་མེད་ཅེས་དྲི་ན་ཁྱོད་ཀྱིས་གང་ལ་བསམ་སྟེ་དྲི་ཞེས་སྨྲས་ནས་བརྟེན་ནས་བཏགས་པ ་ཙམ་དུ་ཡོད་ཀྱང་རྟག་གཅིག་རང་དབང་གི་རྫས་སུ་གཏན་ མེད་པས་དོན་ལ་བདེན་པ་གཉིས་ཆར་ཡོད་པར་ལུང་མི་བསྟན་པ་དང༌། བདག ་དང་ཕུང་པོ་གཅིག་གམ་ཐ་དད་ཟེར་ན། བདག་གཞི་མ་གྲུབ་པས་ལན་ཅི་ཡང་མི་བརྗོད་པར་གཞག་པ་སོགས་སམ། འཇིག་རྟེན་འདི་དང་རི་དང་ཆུ་ལ་སོགས་པ་མཐའ་གཅིག་ཏུ་གཞན་ན་ཡོད་དམ་མེད་ཟེར་ནའང་མ་ངེས་པས་ལུང་མི་བསྟན་པ་དང༌། གྲུབ་མཐའ་དྲི་བ་ལ་རང་ལུགས་གཞག་པ་ལྟ་བུ་ལུང་བསྟན་པ་དང༌། སྔར་གྲུབ་ཟིན་པ་ལ་རྗེས་མི་གཅོད་པར་རྣམ་པར་གཞག་པ་དང༌། དེས་ཀྱང་མ་འདུལ་ན་དེ་ཉིད་དེར་བཞག་༼༢༧༧༽ལ་བདག་ཉིད་ལངས་ཏེ་འགྲོ་ཞིང་དེར་ཡང་འོང་ནས་དྲི་ན་མི་སྨྲ་བའམ། འཇིག་རྟེན་འདི་དང་རི་དང་ཆུ་ལ་སོགས་པ་གྲངས་ངེས་སུ་བརྗོད་པའི་ལན་རྣམ་པར་གཞག་སྟེ་ལུང་མི་བསྟན་པ་དང༌། འཇིག་རྟེན་གྱི་ཐ་སྙད་ཁམས་ཀྱི་གནས་གསུམ་པ་ལྟ་བུར་རྣམ་པར་གཞག་པ་དང༌། བསྟན་པའི་དབྱེ་བ་རྣམ་པར་བཞག་པ་ལྟ་བུ་ལུང་བསྟན་པ་དང༌། སྟོང་པ་ཉིད་ལྟ་བུ་སྣང་མིན་ལ་བསྟན་པར་བྱ་བ་མ་ཡིན་པས་གསང་བར་བརྗོད་པའམ། ཉོན་མོངས་པ་ཅན་ལ་ཀུན་གཞིའམ་ལེན་པའི་རྣམ་ཤེས་མི་བརྗོད་པའམ། གཞན་སྣོད་དང་ལྡན་ཞིང་དམ་པའི་བློ་ཅན་ལ་ལུང་བསྟན་ཏེ་བརྗོད་པ་དང༌། ཇི་སྐད་བཤད་པའི་དོན་རྣམས་འཁོར་ལ་ཞིབ་ཏུ་བརྗོད་དེ་རྣམ་པར་བསྙད་པའམ། གཞན་དོན་དུ་བརྗོད་བྱ་མཐའ་དག་མིང་དུ་གདགས་ཏེ་ལུང་བསྟན་པ་དང༌། དོན་དམ་མཐར་ཐུག་གི་ངོ་བོ་དྲིས་པ་ལ། ཤེས་བརྗོད་འཇུག་གསུམ་ལས་འདས་པས་ཅི་ཡང་མི་གསུངས་པར་བཞུགས་པ་ལྟ་བུ་ལུང་དུ་མ་བསྟན་ཀྱང་རྒྱ་ཆེར་བཤད་པར་གྱུར་པ་དང༌། གལ་ཏེ་རང་གིས་མ་འདུལ་ན་ཡུལ་ཁམས་གཞན་གྱི་བླ་མ་དང་སངས་རྒྱས་ལ་དྲིས་ཤིག་ཅེས་གཞན་དག་ཏུ་ལུང་བསྟན་ཏེ་བརྗོད་པ་ཀུན་ཏུ་བཞག་པའོ། །ཚིག་ཐ་མ་འདི་ཉིད་སྔ་མ་ཀུན་ལ་སྦྱར་ཏེ་ལུང་བསྟན་པ་དང་གཞག་པ་གཉིས་སུ་འཆད་པའི་དོན་དུའང་གསུངས་སོ།།

གསུམ་པ་ཉེས་པ་བཤད་པ་ནི།

ལང་ཀའི། ཞེས་པ་ནས། མོངས་པའི་རྣམ་གྲངས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཉེས་པ་གང་ཞེ་ན། ཀུན་ནས་ཉོན་མོངས་པའི་རྣམ་གྲངས་སོ།།

ལང་ཀའི་བདག་པོ། ཉེས་པ་གང་ཞེ་ན། འཁོར་བར་ལྟུང་ནས་སྡུག་བསྔལ་མྱོང་བའི་རྒྱུར་གྱུར་པའི་ཕྱིར་ཏེ། སྒོ་གསུམ་ཀུན་ནས་གདུང་ཞིང་ཐོག་མ་མེད་པ་ནས་རྨོངས་པ་མ་རིག་པའི་ལས་རྣམས་སུ་བརྟགས་པ་ཀུན་ནས་ཉོན་མོངས་པའི་རྣམ་གྲངས་རྣམས་སོ།།

བཞི་པ་ཡོན་ཏན་བསྟན་པ་ནི།

ཡོན་ཏན། ཞེས་པ་ནས། བྱང་བའི་རྣམ་གྲངས་སོ། །ཞེས་པའི་བར་གྱིས་བསྟན་ཏེ།

ཡོན་ཏན་གང་ཞེ་ན། ཡོངས་སུ་བྱང་བའི་རྣམ་གྲངས་སོ།།

ཡོན་ཏན་གང་ཞེ་ན། འབད་ཅིང་བརྩོན་པས་བདེ་བ་ཐོབ་པའི་ཕྱིར་ཏེ། སྒྲིབ་པ་ཡོངས་སུ་དག་སྟེ་རྣམ་པར་སྦྱང་བ་མྱ་ངན་ལས་འདས་པའི་ཆོས་རྣམས་ཀྱི་ཡོན་ཏན་བརྗོད་པ་ཇི་སྙེད་དུ་ངེས་པར་བརྟགས་པའི་རྣམ་གྲངས་རྣམས་སོ།།

ལྔ་པ་ཚུལ་བཤད་པ་ནི།

ལང་ཀའི། ཞེས་པ་ནས། དགོངས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཚུལ་གང་ཞེ་ན། དོན་དང་། ཐོབ་པ་དང་། བཤད་པ་དང་། མཐའ་སྤོང་བ་དང་།

བསམ་གྱིས་མི་ཁྱབ་པ་དང་། དགོངས་པའོ།།

ལང་ཀའི་བདག་པོ། ཚུལ་རྣམ་པ་དྲུག་གང་ཞེ་ན། འབྲས་བུ་ལ་སྦྱོར་བའི་ལུགས་བརྗོད་པ་སྟེ། ཤེས་པར་བྱ་ཞིང་བསྒྲུབ་པར་བྱ་བའི་རང་བཞིན་དོན་དམ་པ་ཇི་ལྟ་བ་ལ་འཇུག་པའི་ཚུལ་དང༌། ཀུན་༼༢༧༨༽མཁྱེན་གྱི་གོ་འཕང་ཐོབ་སྟེ་འབྲས་བུ་དམ་པ་མངོན་དུ་བྱེད་པའི་ཚུལ་དང༌། གསུང་རབ་བསྟན་པའི་ཚིག་གིས་མཚོན་ནས་དོན་གྱི་ངོ་བོ་རང་གིས་རྟོགས་པ་ལྟར་གཞན་ལ་བཤད་པ་ཡོངས་སུ་བརྗོད་པའི་ཚུལ་དང༌། ཚུལ་དེས་མཐའ་ཡི་ལྟ་བ་མཐའ་དག་སྤོང་སྟེ་སེལ་བར་བྱེད་པས་གང་ལ་ལྟོས་པ་ཐམས་ཅད་མཐའ་སྟེ་དེ་ལ་མི་གནས་པར་སྟོན་པའི་ཚུལ་དང༌། ཇི་སྙེད་པའི་ཆོས་ཀྱི་དོན་དེ་བཞིན་ཉིད་བསམ་གྱིས་མི་ཁྱབ་པ་ཡང་དག་པར་ཤེས་ནས་ངང་ལས་མི་འདའ་བར་ལྷག་མཐོང་གི་ཚུལ་དང༌། ཏིང་ངེ་འཛིན་གྱི་སྟོབས་ཀྱིས་དགོངས་པ་རྩེ་གཅིག་ལས་མི་གཡོ་བར་བརྟན་པ་ཐོབ་པ་ཞི་གནས་ཀྱི་ཚུལ་ཏེ། དེ་དག་ནི་ཡང་དག་པ་ཆེད་དུ་བྱས་པའི་བརྟགས་པའོ།།

དྲུག་པ་འཇུག་པ་བཤད་པ་ནི།

ལང་ཀའི། ཞེས་པ་ནས། རྐྱེན་རྣམས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འཇུག་པ་གང་ཞེ་ན། དུས་དང་། འདུས་པ་དང་། རྐྱེན་རྣམས་སོ།།

ལང་ཀའི་ བདག་པོ། ཤེས་པ་ཡུལ་ལ་འཇུག་པ་ནི་གང་ཞེ་ན་དོན་གསུམ་གྱིས་བསྟན་ཏེ། རྩོམ་པ་མེད ་པའམ་ཡོད་ཀྱང་རུང་སྟེ་ལེགས་ཉེས་བར་མ་གང་ལའང་ཤེས་པ་འཇུག་པའི་དུས་སྐབས་ཀྱི་ཚེ་དང༌། ཡུལ་དང་དབང་པོ་རྣམ་ཤེས་གསུམ་འདུས་ཤིང་ཚོགས་ནས་ཡུལ་ཡོངས་སུ་གཅོད་པའི་རེག་པར་ཤར་བ་དང༌། ཇི་སྐད་དུ། རྒྱུ་དང་དམིགས་པ་དེ་མ་ཐག །བདག་པོ་ཡང་ནི་དེ་བཞིན་ཏེ། །ཞེས་པ་ལྟར་རྐྱེན་བཞི་པོ་རྣམས་འཛོམ་པ་ལས་རང་ཡུལ་ཇི་ལྟ་བར་ངེས་པར་བྱེད་དེ་འཁོར་བར་འཇུག་པས་སོ། །དེ་ལྟ་བུས་ཡུལ་ཤེས་པར་བརྟགས་པའོ།།

བདུན་པ་རིགས་པ་བསྟན་པ་གཉིས་ཏེ། མདོར་བསྟན་པ། རྒྱས་པར་བཤད་པའོ། དང་པོ་ནི།

ལང་ཀའི། ཞེས་པ་ནས། ཆོས་ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་རིག་པ་གང་ཞེ་ན། འདི་ལྟ་སྟེ། ལྟོས་པ་དང་། བྱ་བ་བྱེད་པ་དང་། བསྒྲུབ་པ་དང་། ཆོས་ཉིད་དོ།།

ལང་ཀའི་བདག་པོ། བདེན་པ་དང་བཅས་པ་བློ་ལ་གྲུབ་པར་བྱེད་པས་ཐེ་ཚོམ་ཆད་ནས་ཡང་དག་པའི་ངེས་ཤེས་སྐྱེད་པའི་རིགས་པ་གང་ཞེ་ན། རྣམ་གྲངས་བཞི་ཉིད་འདི་ལྟ་སྟེ། འབྲས་བུས་བསྡུས་པའི་ཆོས་ཐམས་ཅད་རྒྱུ་ལ་ལྟོས་ནས་གྲུབ་པའི་ཕྱིར་འབྲས་བུ་ལྟོས་པའི་རིགས་པ་དང༌། རྒྱུས་བསྡུས་པའི་ཆོས་ཐམས་ཅད་ཀྱིས་འབྲས་བུ་སྐྱེད་པའི་བྱ་བ་བྱེད་པའི་ཕྱིར་རྒྱུ་བྱ་བ་བྱེད་པའི་རིགས་པ་དང༌། ཚད་མའི་རྟགས་ལ་བརྟེན་ནས་འཐད་པ་སྒྲུབ་པར་བྱེད་པས་འཐད་པ་སྒྲུབ་པའི་རིགས་པ་དང༌། ཆོས་རྣམས་ཀྱི་ཆོས་ཉིད་རང་བཞིན་མ་བཅོས་པར་གཞན་ལ་ལྟོས་མེད་དུ་གྲུབ་པ་ངོ་བོ་ཆོས་ཉིད་ཀྱི་རིགས་པ་དང་རྣམ་པ་བཞི་ཉིད་དོ།།

གཉིས་པ་རྒྱས་པར་བཤད་པ་ལ་བཞི་སྟེ། འབྲས་བུ་ལྟོས་པའི་རིགས་པ། རྒྱུ་བྱ་བ་བྱེད་པའི་རིགས་པ། འཐད་པ་༼༢༧༩༽སྒྲུབ་པའི་རིགས་པ། ངོ་བོ་ཆོས་ཉིད་ཀྱི་རིགས་པ་བཤད་པའོ། །དང་པོ་ནི།

ལང་ཀའི། ཞེས་པ་ནས། ཐ་སྙད་ཀྱི་ཕྱིར་རྒྱུ་དང་རྐྱེན་དུ་གྱུར་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ལྟོས་པ་གང་ཞེ་ན། གང་འདུས་པ་དག་སྐྱེ་བ་དང་། ཐ་སྙད་ཀྱི་ཕྱིར་རྒྱུ་དང་རྐྱེན་དུ་གྱུར་པའོ།།

ལང་ཀའི་བདག་པོ། དེ་ལ་འབྲས་བུའི་ངོས་ནས་མཚོན་པ་ལྟོས་པའི་རིགས་པ་གང་ཞེ་ན། རྣམ་གྲངས་གཉིས་ཏེ། གང་རང་རང་གི་རྒྱུ་རྐྱེན་གྱི་ཆོས་དུ་མ་འདུས་ཤིང་ཚོགས་པ་ལས་འབྲས་བུ་དེ་དག་སྐྱེ་བའམ་འབྱུང་བར་རྣམ་པར་བཞག་པ་དཔེར་ན་མིག་གི་རྣམ་ཤེས་དེ་ཉིད་རང་རྒྱུ་ཡུལ་དབང་ཤེས་གསུམ་ཚོགས་ནས་གྲངས་ཚང་བ་ལ་ལྟོས་ནས་སྐྱེ་བ་ལྟ་བུ་དང༌། བརྗོད་པ་དང་དངོས་པོ་གང་གྲགས་པའི་སྟོབས་ཀྱིས་དེ་དང་དེའི་ཐ་སྙད་ཀྱི་རྣམ་པར་བཞག་པའི་ཕྱིར། ཡོད་པའི་ཐ་སྙད་ལ་ལྟོས་ནས་མེད་པའི་ཐ་སྙད་གྲུབ་པ་ལྟ་བུ་དང༌། དེ་བཞིན། རིང་ཐུང༌། བཟང་ངན། ཆེ་ཆུང༌། མཐོ་དམན། དག་མ་དག་གི་ཐ་སྙད་དྲུག་ལ་སོགས་པ་འགྲུབ་པའི་རྒྱུ་དང་རྐྱེན་དུ་གྱུར་པའོ། །དེའང་སྐྱེད་བྱེད་ཀྱི་རྒྱུ་རྐྱེན་ལ་ལྟོས་པ་ས་བོན་དང་ཆུ་ལུད་སོགས་རྒྱུ་ཚོགས་གྲངས་ཚང་ལས་རང་འབྲས་དངོས་སུ་སྐྱེ་བའི་མྱུ་གུ་ལྟ་བུ་སྟེ། གོང་བུ་འདི་ཆོས་ཅན། རང་རྒྱུ་སྔོན་སོང་ལ་ལྟོས་པ་ཅན་ཡིན་ཏེ། མྱུ་གུ་ཡིན་པའི་ཕྱིར། ཞེས་འགོད་པ་ལྟ་བུའོ། །དེས་ན་རྒྱུའི་སྐབས་ནའང་རྒྱུ་རྐྱེན་ཚོགས་པ་ལས་འབྲས་བུ་སྐྱེ་རུང་དུ་དཔོག་པ་རང་བཞིན་གྱི་གཏན་ཚིགས་སུ་འགྱུར་རོ། །དོན་གྲུབ་ནས་ཐ་སྙད་མ་གྲུབ་པ་ལ་སྒྲུབ་ན། གོང་བུ་འདི་ཆོས་ཅན། བ་ལང་ཡིན་ཏེ་ནོག་དང་ལྐོག་ཤལ་དང་ལྡན་པའི་ཕྱིར། ཞེས་འཇོག་བྱེད་ཀྱི་རྒྱུ་ལ་ལྟོས་པས་ན་བ་ལང་གི་ཐ་སྙད་དེ་ཉིད་ནོག་དང་ལྐོག་ཤལ་གྱི་རྟགས་ལ་ལྟོས་པ་ལྟ་བུ་འཇིག་རྟེན་གྱི་ཐ་སྙད་ཐམས་ཅད་ལྟོས་ནས་གདགས་པ་ཁོ་ནའོ། །དེས་ན་སྐྱེ་བ་གྲུབ་པ་དང་ཐ་སྙད་གདགས་པའི་གྲུབ་པའི་བྱེ་བྲག་གིས་གཉིས་ཏེ། གོང་མ་དོན་གྱི་རྒྱུ་རྐྱེན་དུ་གྱུར་པའི་འབྲས་བུ་དང༌། འོག་མ་ཐ་སྙད་དུ་གྱུར་པའི་རྒྱུ་རྐྱེན་གྱི་འབྲས་བུ་ཡིན་ནོ།།

གཉིས་པ་རྒྱུ་བྱ་བ་བྱེད་པའི་རིགས་པ་ནི།

བྱ་བ་བྱེད་པ། ཞེས་པ་ནས། ལས་སུ་བྱ་བའི་ཕྱིར་རྒྱུ་དང་རྐྱེན་དུ་གྱུར་པའོ། །ཞེས་པའི་བར་གྱིས་བསྟན་ཏེ།

བྱ་བ་བྱེད་པ་གང་ཞེ་ན། དེ་ལ་ཆོས་གང་ཡང་ཐོབ་པའི་ཕྱིར་རམ། གྲགས་པའམ། སྐྱེས་ནས་ལས་སུ་བྱ་བའི་ཕྱིར་རྒྱུ་དང་རྐྱེན་དུ་གྱུར་པའི་ཕྱིར་རོ།།

དེ་ལ་རྒྱུའི་ངོས་ནས་མཚོན་པ་བྱ་བ་བྱེད་པའི་རིགས་པ་གང་ཞེ་ན། དེ་ལ་ཡང་རྣམ་གྲངས་གསུམ་དུ་གནས་ཏེ། དངོས་པོའི་ཆོས་གང་ཞིག་འབྲས་བུར་གྱུར་པའི་བྱ་བ་ནི་རང་རྒྱུར་ངེས་པའི་རྒྱུ་རྐྱེན་དེས་སྐྱེད་པའམ་ཐོབ་པར་བྱེད་པའི་ཕྱིར་རམ། གང་རྣམ་རྟོག་མཐུན་སྣང་གི་དབང་གིས་ཡུལ་གང་ལ་གྲགས་༼༢༨༠༽པའི་བྱ་བ་བྱེད་པ་སྟེ། དཔེར་ན་རི་བོང་ཅན་ལ་ཉི་མའི་ཟླ་བོར་བྱུང་བས་ཟླ་བའི་སྒྲས་བརྗོད་པའི་བྱ་བ་བྱེད་པ་དང༌། ནོག་དང་ལྐོག་ཤལ་གྱིས་བ་ལང་དུ་གྲགས་པ་ལྟ་བུའམ། སྐྱེད་བྱེད་ཀྱི་རྒྱུ་འདི་ལ་རྟེན་ནས་རང་འབྲས་སྐྱེ་བའི་དངོས་པོ་སོ་སོར་སྐྱེས་ནས་རང་རང་གི་རིགས་ཀྱི་ལས་སུ་གྱུར་པའི་བྱ་བ་བྱེད་པའི་ཕྱིར་རྒྱུ་ལ་ཡོད་པའི་རྒྱུ་དང་རྐྱེན་དུ་གྱུར་པ་དང་འབྲས་བུ་དེ་དག་གིས་ཀྱང་གཞན་གྱི་རྒྱུ་བྱེད་པའོ།།

དེའང་རྒྱུ་རྐྱེན་གྱི་ཚོགས་པ་ཚང་བས་འབྲས་བུ་སྐྱེད་པའི་བྱ་བ་བྱེད་པ་དང༌། ཐ་སྙད་དུ་དོན་དང་མཐུན་པར་གྲགས་པ་རྣམས་ནི་ཡང་དག་པའི་རིགས་པ་ཡིན་ནོ། །འོ་ན་འཇིག་རྟེན་ན་གང་ཟག་ཕལ་པ་ལའང་གྲགས་པ་འདི་རྣམས་ཚད་མ་ཡིན་ནམ་མ་ཡིན་ཞེ་ན། དངོས་པོ་སྟོབས་ཞུགས་ཀྱི་ཚད་མ་ཡིན་པར་མ་ངེས་ཀྱང༌། རྒོལ་ཕྱི་རྒོལ་རྩོད་པའི་དུས་སུ་གྲགས་པ་དང་འགལ་ན་སྨྲ་བ་པོའི་སྐྱོན་དུ་ཆེ་བས་ན། དམ་བཅའ་བའི་གེགས་བྱེད་པ་སྲིད་པ་ཡིན་ནོ། །སྐྱེས་ནས་ལས་སུ་བྱ་བ་འདི་ཉིད། ཀུན་གཞི་ལས་མིག་གི་རྣམ་ཤེས་ལྟ་བུར་སྐྱེས་ནས་དེའི་ལས་སུ་བྱ་བ་ཀུན་གཞི་ལ་གཟུགས་ཀྱི་བག་ཆགས་གསོགས་པའི་བྱ་བ་བྱེད་པ་ལ་སོགས་པ་ཀུན་ལ་སྦྱོར་ཤེས་པར་བྱའོ།།

གསུམ་པ་འཐད་པ་༼༢༧༩༽སྒྲུབ་པའི་རིགས་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

སྒྲུབ་པ་གང་ཞེ་ན། ཞེས་པ་ནས། མ་དག་པའོ། །ཞེས་པའི་བར་གྱིས་བསྟན་ཏེ།

བསྒྲུབ་པ་གང་ཞེ་ན། དེ་ལ་གང་གོ་ཆ་བགོས་པ་སྟེ། གང་སྨྲ་བ་དང་། གང་ངེས་པར་ཤེས་པར་བྱ་བའི་ཕྱིར་རྒྱུ་དང་རྐྱེན་དུ་གྱུར་པའོ། །ལངྐའི་བདག་པོ་དེ་ཡང་འདི་ལྟར་དག་པ་དང་མ་དག་པའོ།།

འཐད་པ་སྒྲུབ་པའི་རིགས་པ་གང་ཞེ་ན། དེ་ལ་རྒོལ་བ་གང་གིས་རང་གི་གྲུབ་མཐའ་སྒྲུབ་པར་དམ་བཅས་པ་ལ་ཕྱི་རྒོལ་གྱིས་མི་ཚུགས་པའི་གོ་ཆ་བགོས་ནས་མི་འགྱུར་བ་སྟེ། དེ་ཉིད་སྒྲུབ་བྱེད་ཀྱི་རིགས་པ། གང་རང་གི་དོན་དུ་བསྒྲུབ་པར་བྱ་བ་ཡོངས་སུ་དག་པའི་མཚན་ཉིད་ལྔའི་སྒོ་ནས་སྨྲ་བའམ། གཞན་དོན་རྗེས་དཔག་ཏུ་མཐུན་པ་དང་མི་མཐུན་པ་རྩོད་པའི་ཚེ་བདེན་པ་དང་རྫུན་པ་བརྗོད་དེ་བདེན་པའི་དོན་རྟགས་ཡང་དག་གིས་སྒྲུབ་པ་དང༌། རྫུན་པ་ཉིད་རྟགས་ཡང་དག་གིས་སུན་དབྱུང་ཚུལ་སྨྲ་བ་དང༌། གང་རང་དོན་རྗེས་དཔག་ཏུ་བདག་གིས་བསྒྲུབ་བྱ་ཡང་དག་པར་ངེས་པ་ཉིད་སྐྱོན་དང་བྲལ་བར་ཤེས་པར་བྱ་བའམ། གཞན་དོན་རྗེས་དཔག་ཏུ་བདག་གིས་ངེས་པར་དམ་བཅས་པ་ཕྱིར་རྒོལ་གྱིས་ཤེས་པར་བྱ་བའི་ཕྱིར། ལུང་ཚད་མ་སྒྲུབ་བྱེད་ཀྱི་རྒྱུ་དང་རིགས་པ་ཚད་མ་རྟོགས་པར་བྱེད་པའི་རྐྱེན་དུ་རྒྱུར་པ་རྣམས་སོ། །ལང་ཀའི་བདག་པོ། ཞེས་སྡུད་པ་པོ་ལ་བོས་ནས། རྗེས་སུ་དཔག་པ་དེ་ཡང་དབྱེ་ན་སྐབས་ཀྱིས་གཉིས་སུ་གནས་པ་འདི་ལྟ་སྟེ། གཏན་༼༢༨༡༽ཚིགས་དང་དཔེ་ལ་སོགས་པ་སྐྱོན་མེད་པ་ཡང་དག་པའི་ཚད་མ་རང་གི་སྡེ་པའི་ཤེས་པ་དང༌། གཏན་ཚིགས་ལ་སོགས་པ་སྐྱོན་ཅན་ལྟར་སྣང་སྟེ་མ་དག་པས་ཚད་མ་མིན་པ་གཞན་གྱི་སྡེ་པའི་ཤེས་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། དག་པ་བཤད་པ། མ་དག་པ་བཤད་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

གང་དག་པ། ཞེས་པ་ནས། ངེས་པའོ། །ཞེས་པའི་བར་གྱིས་བསྟན་ཏེ།

གང་དག་པ་ནི་དམིགས་པ་དང་། གནས་པ་དང་། དཔེ་དང་། གྲགས་པ་དང་། ངེས་པའོ།།

དེ་ལ་གང་ཡང་དག་པའི་ཤེས་པ་ནི་ཡོངས་སུ་དག་པ་ལྔ་ཡིས་མཐར་ཕྱིན་པར་འགྱུར་ཏེ། དམ་བཅས་ཏེ་བསྒྲུབ་པར་བྱ་བའི་དམིགས་པ་དང༌། བསྒྲུབ་བྱ་རྩོད་གཞིའི་ཆོས་ཅན་ལ་གནས་པར་ངེས་པ་ཡང་དག་པར་སྒྲུབ་པའི་གཏན་ཚིགས་དང༌། བསྒྲུབ་བྱའི་ཆོས་དང་ལྡན་པས་ཁྱབ་པ་གྲུབ་པའི་ཚད་མས་འཇུག་ཡུལ་གྱི་མཐུན་དཔེ་ལ་བརྟེན་ནས་གྲགས་པ་མཚོན་པར་བྱེད་པ་དང༌། རང་དང་ཕ་རོལ་ལ་ཐུན་མོང་དུ་གྲགས་ཏེ་དཔག་གཞིར་བཟུང་བའི་ཆོས་ཅན་མཐུན་སྣང་དུ་གྲུབ་པ་དང༌། ཤིན་ཏུ་ལྐོག་གྱུར་གཏན་ལ་འབེབས་པའི་ལུང་ཡང་དག་ལ་བརྟེན་པའི་གཏན་ཚིགས་ལ་སོགས་པ་ཀུན་གྱི་སྟོབས་ལས་བྱུང་བའི་ཚད་མའི་སྒོ་ནས་རང་གི་གྲུབ་མཐའ་ངེས་པར་རྟོགས་ཏེ། གཞན་གྱིས་གནོད་པ་མེད་པའོ། །དེ་ལ་དང་པོ་བསྒྲུབ་བྱའི་མཚན་ཉིད་ནི། རང་གི་ཞེ་བས་འདོད་པ་སྟེ། རྣམ་ངེས་ལས། འདོད་པ་ཕྱོགས་ཀྱི་མཚན་ཉིད་དོ། །ཞེས་སོ། །དམ་བཅའ་བ་ལ་དབྱེ་ན་གཉིས་ཏེ། རང་རྒྱུད་ཀྱི་དམ་བཅའ་དང༌། ཐལ་འགྱུར་གྱི་དམ་བཅའོ། །དང་པོ་ནི། སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར། དཔེར་ན་བུམ་པ་བཞིན༌། ཞེས་པ་དང༌།  བདག་དང་གཞན་སྨྲས་ཀྱི་དངོས་པོ་རྣམས་ཆོས་ཅན། ཡང་དག་པར་རང་བཞིན་གྱིས་གྲུབ་པ་མེད ་དེ། བདེན་པའི་གཅིག་དང་དུ་མ་བྲལ་བའི་ཕྱིར། དཔེར་ན་གཟུགས་བརྙན་བཞིན། ཞེས་པ་ལྟ་བུའོ།།

གཉིས་པ་ལ་གཉིས་ཏེ། རང་རྒྱུད་སྟོན་པར་བྱེད་པའི་ཐལ་འགྱུར་དང༌། སུན་འབྱིན་བརྗོད་པའི་ཐལ་འགྱུར་རོ། །དང་པོ་ནི། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར། ཞེས་དང༌། དངོས་པོ་རྣམས་ཆོས་ཅན། རང་བཞིན་གྱིས་གྲུབ་པ་མེད་པར་ཐལ། གཅིག་དང་དུ་མ་བྲལ་བའི་ཕྱིར། ཞེས་པ་ལྟ་བུ་དང༌། གཉིས་པ་ནི། གཙོ་བོ་ཆོས་ཅན། དུས་ཡིན་པར་ཐལ། གསལ་བ་དུ་མ་དང་རང་བཞིན་གཅིག་པའི་ཕྱིར། ཞེས་དང༌། ཐ་སྙད་བདེན་པ་ཆོས་ཅན། རིགས་༼༢༨༢༽པས་དཔྱད་བཟོད་ཡིན་པར་ཐལ། རང་གི་མཚན་ཉིད་རྟེན་པའི་ཕྱིར། ཞེས་པ་ལྟ་བུ་སྟེ། ཚད་མ་ཀུན་བཏུས་ལས། ཐལ་འགྱུར་ཕྱོགས་ཆོས་ཅན་མིན་ཕྱིར། །ཁས་བླངས་སྔོན་དུ་སོང་བ་ལས། །དེ་བཞིན་རྟགས་དང་དམ་བཅའ་ཡི། །སྐྱོན་བརྗོད་སུན་འབྱིན་དུ་ཤེས་བྱ། །ཞེས་སོ།།

གཉིས་པ་གཏན་ཚིགས་ཀྱི་མཚན་ཉིད་ནི། ཚུལ་གསུམ་དང་ལྡན་པའོ། །དེའང་ཚུལ་དང་པོ་རྗེས་སུ་དཔག་པར་བྱ་བ་ལ་ཡོད་པ་ཉིད་དུ་ངེས་པ་དང༌། ཚུལ་བར་པ་མཐུན་པའི་ཕྱོགས་ཁོ་ན་ལ་ཡོད་པ་ཉིད་དུ་ངེས་པ་དང༌། ཚུལ་ཐ་མ་མི་མཐུན་པའི་ཕྱོགས་ལ་མེད་པ་ཉིད་དུ་ངེས་པ་སྟེ། རྣམ་འགྲེལ་ལས། ཕྱོགས་ཆོས་དེ་ཆས་ཁྱབ་པ་ཡི། །གཏན་ཚིགས་དེ་ནི་རྣམ་གསུམ་ཉིད། །མེད་ན་མི་འབྱུང་ངེས་ཕྱིར་རོ། །ཞེས་སོ། །དེ་ལ་དབྱེ་ན། རང་བཞིན་གྱི་གཏན་ཚིགས་དང༌། མི་དམིགས་པའི་གཏན་ཚིགས་དང༌། འབྲས་བུའི་གཏན་ཚིགས་དང་གསུམ་ལས། དང་པོ་ནི། བདག་གཅིག་འབྲེལ་ལ་བརྟེན་ནས་རང་ལས་ཐ་མི་དད་ཀྱི་དོན་ཡོད་པས་ཡིན་པར་སྒྲུབ་པ་ལ་ཚུལ་གསུམ་ཚང་བའོ། །དེའང་སྒྲ་ཆོས་ཅན། མི་རྟག་སྟེ། བྱས་པའི་ཕྱིར་རམ་སྐྱེས་པའི་ཕྱིར་ལྟ་བུ། ཁྱད་པར་ལྟོས་པ་བ་དང༌། སྒྲ་ཆོས་ཅན། མི་རྟག་སྟེ། དངོས་པོར་ཡོད་པ་ཡིན་པའི་ཕྱིར་ལྟ་བུ། ཁྱད་པར་དག་པ་བའི་རང་བཞིན་གྱི་རྟགས་སྦྱོར་ཏེ་གཉིས་སོ།།

གཉིས་པ་ནི། རང་ལས་ཐ་མི་དད་ཀྱི་དོན་མེད་པའི་ཐ་སྙད་སྒྲུབ་པ་ལ་ཚུལ་གསུམ་ཚང་བའོ། །དེའང་མི་སྣང་བ་མ་དམིགས་པ་དང༌། སྣང་རུང་མ་དམིགས་པ་གཉིས་ལས། དང་པོ། མདུན་གྱི་གཞི་འདིར་ཆོས་ཅན། ཤ་ཟ་བསྐལ་དོན་དུ་སོང་བའི་གང་ཟག་གིས་ཤ་ཟ་ཡོད་མེད་གང་རུང་དུ་མི་ངེས་ཏེ། དེ་ལ་དེ་མི་སྣང་བས་མ་དམིགས་པ་ཡིན་པའི་ཕྱིར། ཞེས་པ་ལྟ་བུའོ། །དོན་དུ་ཤ་ཟ་དང་བར་སྲིད་ལྟ་བུ་ཕྱོགས་འདིར་ཡོད་ཀྱང་བསྐལ་དོན་དུ་སོང་བ་དེའི་ངོར་མི་སྣང་བ་ཉིད་ཀྱི་མ་དམིགས་པ་ཡིན་པའི་ཕྱིར། རྟགས་དེས་ཡོད་མེད་ངེས་པའི་དཔྱད་ཤེས་དོན་མཐུན་དུ་འཇུག་པ་ཉིད་མེད་པའི་ཐ་སྙད་སྒྲུབ་པ་ཙམ་ཡིན་པས་ཡུལ་དུས་ངོ་བོས་བསྐལ་པའི་དངོས་པོ་གང་ལའང་མཚུངས་སོ།།

གཉིས་པ་ལ། དམིགས་རུང་མ་དམིགས་པ་དང༌། འགལ་ཟླ་དམིགས་པ་གཉིས་ལས། དང་པོ་ནི། ཁྱིམ་འདི་ན་ཆོས་ཅན། བུམ་པ་མེད་དེ་སྣང་རུང་ཚད་མས་མ་དམིགས་པའི་ཕྱིར། ཞེས་པ་ལྟ་བུ་རང་བཞིན་མ་དམིགས་པ། མཚན་མོའི་རྒྱ་མཚོར་ཆོས་ཅན། དུ་བ་མེད་དེ། མེ་མེད་པའི་ཕྱིར་ལྟ་བུ་རྒྱུ་མ་དམིགས་པ། བྲག་རྫོང་༼༢༨༣༽ཕ་ཀིར་ཆོས་ཅན། ཤ་བ་མེད་དེ། ཤིང་མེད་པའི་ཕྱིར། ལྟ་བུ་ཁྱབ་བྱེད་མ་དམིགས་པ། དུ་བས་དབེན་པའི་རྩིག་སྐོར་དུ་ཆོས་ཅན། དུ་བའི་དངོས་འབྲས་མེད་དེ། དུ་བ་མེད་པའི་ཕྱིར། ཞེས་པ་ལྟ་བུ་དངོས་འབྲས་མ་དམིགས་པ་སྟེ་བཞིར་དབྱེ་བ་ཡོད་དོ།།

གཉིས་པ་སྣང་རུང་གི་འགལ་ཟླ་དམིགས་པ་ལ། ལྷན་ཅིག་མི་གནས་འགལ་ལ་བརྟེན་པ་དང༌། ཕན་ཚུན་སྤང་འགལ་ལ་བརྟེན་པའི་འགལ་དམིགས་ཀྱི་རྟགས་སྦྱོར་གཉིས་ལས། དང་པོ་ལ་བཅུ་གཉིས་ཏེ། ཕྱོགས་ཕ་ཀིར་ཆོས་ཅན། གྲང་རེག་མེད་དེ། མེས་ཁྱབ་པའི་ཕྱིར། ཞེས་པ་ལྟ་བུ་རང་བཞིན་དང་འགལ་བའི་རང་བཞིན་དམིགས་པའི་དགག་རྟགས། ཕྱོགས་ཕ་ཀིར་ཆོས་ཅན། གྲང་རེག་གི་དངོས་རྒྱུ་ནུས་པ་ཐོགས་མེད་མེད་དེ། མེས་ཁྱབ་པའི་ཕྱིར། ཞེས་པ་ལྟ་བུ་རྒྱུ་དང་འགལ་བའི་རང་བཞིན་དམིགས་པ། ཕྱོགས་ཕ་ཀིར་ཆོས་ཅན། གྲང་འབྲས་སྤུ་ལོང་བྱེད་མེད་དེ། མེས་ཁྱབ་པའི་ཕྱིར། ཞེས་པ་ལྟ་བུ་འབྲས་བུ་དང་འགལ་བའི་རང་བཞིན་དམིགས་པ། ཕྱོགས་ཕ་ཀིར་ཆོས་ཅན། ཁ་བའི་རེག་པ་མེད་དེ། མེས་ཁྱབ་པའི་ཕྱིར། ཞེས་པ་ལྟ་བུ་ཁྱབ་བྱ་དང་འགལ་བའི་རང་བཞིན་དམིགས་པ་བཞི་དང་ཡང་། ཕྱོགས་ཕ་ཀིར་ཆོས་ཅན། གྲང་རེག་མེད་དེ། དུ་བ་དྲག་ཏུ་ཕྱུར་བས་ཁྱབ་པར་ནོན་པ་ཡིན་པའི་ཕྱིར། ཞེས་པ་ལྟ་བུ་རང་བཞིན་དང་འགལ་བའི་འབྲས་བུ་དམིགས་པ། ཕྱོགས་ཕ་ཀིར་ཆོས་ཅན། གྲང་རེག་གི་དངོས་རྒྱུ་ནུས་པ་ཐོགས་མེད་མེད་དེ། དུ་བ་དྲག་ཏུ་ཕྱུར་བས་ཁྱབ་པར་ནོན་པའི་ཕྱིར། ལྟ་བུ་རྒྱུ་དང་འགལ་བའི་འབྲས་བུ་དམིགས་པ། ཕྱོགས་ཕ་ཀིར་ཆོས་ཅན། གྲང་འབྲས་སྤུ་ལོང་བྱེད་མེད་དེ། དུ་བ་དྲག་ཏུ་ཕྱུར་བས་ཁྱབ་པར་ནོན་པའི་ཕྱིར། ལྟ་བུ་འབྲས་བུ་དང་འགལ་བའི་འབྲས་བུ་དམིགས་པ། ཕྱོགས་ཕ་ཀིར་ཆོས་ཅན། ཁ་བའི་རེག་པ་མེད་དེ། དུ་བ་དྲག་ཏུ་ཕྱུར་བས་ཁྱབ་པར་ནོན་པ་ཡིན་པའི་ཕྱིར། ཞེས་པ་ལྟ་བུ་ཁྱབ་བྱ་དང་འགལ་བའི་འབྲས་བུ་དམིགས་པ་བཞི་དང༌། ཡང་ཕྱོགས་ཕ་ཀིར་ཆོས་ཅན། གྲང་རེག་མེད་དེ། ཙན་དན་གྱི་མེས་ཁྱབ་པར་ནོན་པ་ཡིན་པའི་ཕྱིར། ཞེས་པ་རང་བཞིན་དང་འགལ་བའི་ཁྱབ་བྱ་དམིགས་པ། ཕྱོགས་ཕ་ཀིར་ཆོས་ཅན། གྲང་རེག་གི་དངོས་རྒྱུ་ནུས་པ་ཐོགས་མེད་མེད་དེ། ཙན་དན་གྱི་མེས་ཁྱབ་པར་ནོན་པའི་ཕྱིར། ཞེས་པ་རྒྱུ་དང་འགལ་བའི་ཁྱབ་བྱ་དམིགས་པ། ཕྱོགས་ཕ་ཀིར་ཆོས་ཅན། གྲང་འབྲས་སྤུ་ལོང་བྱེད་མེད་དེ། ༼༢༨༤༽ཙན་དན་གྱི་མེས་ཁྱབ་པར་ནོན་པའི་ཕྱིར། ཞེས་པ་འབྲས་བུ་དང་འགལ་བའི་ཁྱབ་བྱ་དམིགས་པ། ཕྱོགས་ཕ་ཀིར་ཆོས་ཅན། ཁ་བའི་རེག་པ་མེད་དེ། ཙན་དན་གྱི་མེས་ཁྱབ་པར་ནོན་པ་ཡིན་པའི་ཕྱིར། ཞེས་པ་ལྟ་བུ་ཁྱབ་བྱ་དང་འགལ་བའི་ཁྱབ་བྱ་དམིགས་པ་བཞི་སྟེ་དེ་ལྟར་བཅུ་གཉིས་སོ།།

གཉིས་པ་ཕན་ཚུན་སྤང་འགལ་དངོས་ལ་རྟགས་དང་བསྒྲུབ་བྱར་སྦྱར་བ་མེད་ཀྱང་བརྒྱུད་འགལ་གྱི་ཁྱབ་བྱ་བཀོད་པ་ལས། ཁྱབ་བྱེད་ཀྱི་འགལ་ཟླ་འགོག་པ། སྒྲ་ཆོས་ཅན། རྟག་པ་མིན་ཏེ། བྱས་པའི་ཕྱིར་རམ་རྩོལ་བྱུང་གི་ཕྱིར། ཞེས་པ་ལྟ་བུ་ལ་ཚད་མས་གནོད་འགལ་ཞེས་ཀྱང་ཟེར་ཏེ་རང་བཞིན་གྱི་རྟགས་སྦྱོར་དུ་འདུའོ། །དེ་བཞིན་དུ་དོན་དམ་དཔྱོད་པའི་རྟགས་སུ་གྱུར་པའི་རིགས་ཅན་གྱི་སྦྱོར་བ་སོགས་གཏན་ཚིགས་གཞན་དག་ཀྱང་འདི་གསུམ་གྱི་ཁོངས་སུ་འདུ་སྟེ། གཅིག་དུ་བྲལ་གྱི་གཏན་ཚིགས་བདེན་པའི་ཁྱབ་བྱེད་མ་དམིགས་པ་ཡིན་ཞིང༌། རྡོ་རྗེ་གཟེགས་མ་རྒྱུ་མ་དམིགས་པ་དང༌། ཡོད་མེད་སྐྱེ་འགོག་འབྲས་བུ་མ་དམིགས་པ་དང༌། རྟེན་འབྲེལ་ཆེན་མོའི་གཏན་ཚིགས་བདེན་པའི་འགལ་ཟླ་དམིགས་པ་ཡིན་པ་སོགས་ཡང་དག་པར་ཤེས་པར་བྱའོ། །གསུམ་པ་ནི། དེ་བྱུང་གི་འབྲེལ་བ་ལ་བརྟེན་ནས་རང་ལས་ཐ་དད་ཀྱི་དོན་ཡོད་པར་སྒྲུབ་པ་ལ་ཚུལ་གསུམ་ཚང་བའོ། །དེས་ན་འབྲས་བུའི་རྟགས་ཀྱིས་རྒྱུ་རྗེས་སུ་དཔོག་པ་ཡིན་ལ། དེ་ལ་དབྱེ་ན། སྦྱོར་བ་འགོད་ཚུལ་གྱིས་ལྔ་ཡོད་དེ། དུ་ལྡན་གྱི་ལ་ལ་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར། ཞེས་པ་ལྟ་བུ་རྒྱུ་དངོས་སུ་སྒྲུབ་པའི་འབྲས་རྟགས། བར་སྣང་གི་དུ་བ་སྔོ་ལོང་པོ་ཆོས་ཅན། རང་རྒྱུ་མེ་སྔོན་སོང་ཡིན་ཏེ། དུ་བ་ཡིན་པའི་ཕྱིར་ལྟ་བུ་རྒྱུ་སྔོན་སོང་སྒྲུབ་པའི་འབྲས་རྟགས། ཉེར་ལེན་གྱི་ཕུང་པོ་ཆོས་ཅན། རང་རྒྱུ་དང་བཅས་པ་ཡིན་ཏེ། རེ་འགའ་བའི་དངོས་པོ་ཡིན་པའི་ཕྱིར། ཞེས་པ་ལྟ་བུ་རྒྱུ་སྤྱིར་སྒྲུབ་པ། སྔོར་སྣང་དབང་ཤེས་ཆོས་ཅན། རང་གི་དམིགས་རྐྱེན་དང་བཅས་པ་ཡིན་ཏེ། དབང་ཤེས་ཡིན་པའི་ཕྱིར། ཞེས་པ་ལྟ་བུ་རྒྱུ་ཁྱད་པར་བ་སྒྲུབ་པ། ཁ་ནང་གི་བུར་གོང་ཆོས་ཅན། གཟུགས་ཡོད་དེ། རོ་ཡོད་པའི་ཕྱིར། ཞེས་པ་ལྟ་བུ་རྒྱུ་ཆོས་རྗེས་དཔག་གི་འབྲས་རྟགས་ཡིན་ཏེ། དོན་དུ་བུར་རོ་ད་ལྟ་བ་ལས་སྔ་མ་དང་ད་ལྟའི་རོ་གཟུགས་གཉིས་ཚོགས་པ་གཅིག་པར་རྒྱུ་སྔ་མས་བསྐྱེད་པ་དཔོག་པ་ཡིན་པའི་ཕྱིར་རོ།།

གསུམ་པ་དཔེའི་མཚན་ཉིད་ནི། རྗེས་སུ་འགྲོ་ལྡོག་གི་དོན་ལ་ངེས་པར་གནས་པའོ། །དབྱེ་ན་གཉིས་ཏེ། མཐུན་པའི་དཔེ་དང༌། མི་མཐུན་པའི་དཔེའོ། །༼༢༨༥༽བཞི་པ་ཆོས་ཅན་གྱི་མཚན་ཉིད་ནི། སྤྱིར་ཆོས་ཀྱི་རྟེན་དུ་གྱུར་པའོ། །རྩོད་གཞི་ཆོས་ཅན་གྱི་མཚན་ཉིད་ནི། ཤེས་པར་འདོད་པའི་བྱེ་བྲག་དང་ལྡན་པའོ། །དབྱེ་ན་བཞི་སྟེ། མཐུན་དཔེའི་ཆོས་ཅན་དང༌། མི་མཐུན་པའི་དཔེའི་ཆོས་ཅན་དང༌། སྐབས་སུ་བབ་པའི་ཆོས་ཅན་དང༌། རྩོད་གཞིའི་ཆོས་ཅན་ནོ། །ལྔ་པ་ནི་གཞུང་དུ་གསལ་ལོ།།

གཉིས་པ་རྒྱས་པར་བཤད་པ་ལ་ལྔ་སྟེ། བསྒྲུབ་བྱ་བཤད་པ། གཏན་ཚིགས་བཤད་པ། དཔེ་བཤད་པ། ཆོས་ཅན་བསྟན་པ། ལུང་ཚད་མར་ངེས་པ་བསྟན་པའོ། །དང་པོ་ནི།

ལང་ཀའི། ་ཞེས་པ་ནས། དམིགས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ཐམས་ཅད་མི་རྟག་པ་དང་། སྡུག་བསྔལ་བ་དང་། སྟོང་པ་དང་།  བདག་མེད་པ ་ནི་དམིགས་པའོ།།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། དེ་ལ་རྗེས་སུ་དཔག་པར་བྱ་བ་བསྟན་པ་ནི། ཚད་མ་མདོ་ལས། དེ་ལ་དཔག་བྱ་བསྟན་པ་ནི། །རྟགས་ཀྱི་དོན་གྱི་ཡུལ་དུ་འདོད། །རང་གི་ངོ་བོ་ཉིད་དང་ལྡན། །རང་དང་འདོད་འགྱུར་མ་བསལ་བ། །ཞེས་དང༌། རྣམ་ངེས་ལས། ངོ་བོ་ཁོ་ནར་བསྟན་བྱ་བ། །རང་ཉིད་འདོན་དང་མ་བསལ་བའོ། །ཞེས་པ་ལྟར་རྣམ་བཅད་ལ་ལྟོས་ནས་མཚན་ཉིད་ལྔ་ལྡན་ཡིན་ལ། ཡོངས་གཅོད་ལ་ལྟོས་ན་རིགས་པའི་སྒོ་ལས། བསྒྲུབ་བྱར་འདོད་པ་ཕྱོགས་ཡིན་ནོ་ཞེས་གཅིག་ཏུ་གསུངས་པ་ལྟར་ཡིན་ཏེ། འདིར་བྱེ་བྲག་ཏུ་བསྒྲུབ་བྱ་དམིགས་ཀྱིས་གཟུང་ན་ནང་པ་སངས་རྒྱས་པ་ཀུན་གྱི་སྤྱིའི་གཞི་ཡིན་པ་དང༌། ཀུན་ལ་ཡོངས་སུ་གྲགས་པས་ན་གཞན་ཡང་མཚོན་པར་བྱེད་པ་སྟེ། དེ་ལ་འདུས་བྱས་ཐམས་ཅད་མི་རྟག་པ་ཡིན་པ་དང༌། ཟག་པ་དང་བཅས་པ་ཐམས་ཅད་སྡུག་བསྔལ་བ་ཡིན་པ་དང༌། ཆོས་ཐམས་ཅད་སྟོང་པ་ཡིན་པ་དང༌། གནས་ལུགས་ཀྱི་ངོ་བོ་ བདག་མེད་པའི་ཞི་བ་ཡིན་པ ་ནི་བསྒྲུབ་པར་བྱ་བའི་དམིགས་པའོ། །དེས་ན་འཁྲུལ་སྣང་སྤྱིའི་མཚན་ཉིད་བཞི་དང༌། བདེན་པ་བཞི་ལྟ་བོུ། །དེའང་རང་དོན་ཁོ་ནར་མ་ཟད་ཕྱི་རོལ་མུ་སྟེགས་པ་དང་རྩོད་པ་བྱེད་པའི་ཚེ་ནའང་ནང་པ་སངས་རྒྱས་པ་ཙམ་གྱིས་ཆོས་རྟགས་ཀྱི་དམ་བཅའ་བཞི་པོ་འདི་ཁས་ལེན་དགོས་པས་སོ།།

གཉིས་པ་གཏན་ཚིགས་བཤད་པ་ནི།

ཐམས་ཅད་སྐད་ཅིག ཅེས་པ་ནས། གནས་པའོ། །ཞེས་པའི་བར་གྱིས་བསྟན་ཏེ།

ཐམས་ཅད་སྐད་ཅིག་མ་དང་། གཞན་ཡོད་པ་དང་། ལས་རྣམས་མི་རྟག་པ་དང་། ལས་ལ་གནས་པ་དང་།

དེའི་འབྲས་བུ་ལ་གནས་པ་ནི་གནས་པའོ།།

དེ་རྣམས་སྒྲུབ་པར་བྱེད་པའི་གཏན་ཚིགས་ཀྱང༌། རྒྱུ་རྐྱེན་གྱིས་སྣང་བའི་འདུས་བྱས་ཐམས་ཅད་རང་སྐྱེས་ནས་སྐད་ཅིག་གཉིས་པར་མི་སྡོད་པར་འཇིག་ངེས་པས་སྐད་ཅིག་མ་ཡིན་པའི་ཕྱིར་བྱས་པ་ཡང་ཡིན་པ་དང༌། ཐམས་ཅད་བརྟགས་པ་ལས་སྣང་བས་ན་འཁྲུལ་པ་ཙམ་གྱི་ངོ་ལ་རྐྱེན་༼༢༨༦༽གཞན་གྱི་དབང་གིས་དོན་བྱེད་ནུས་པར་ཡོད་པ་དང་གཉིས་ཀྱི་ཕྱིར་མི་རྟག་པར་གྲུབ་ལ། སྒོ་གསུམ་གྱི་བྱ་བ་ལ་ཡོད་པའི་བྱེད་པ་ཟག་པ་དང་བཅས་པའི་ལས་རྣམས་ཀྱིས་རང་རང་གི་འབྲས་བུ་འབྱིན་ནས་ཟད་པར་འགྱུར་བས་གཅིག་ཏུ་མ་ངེས་པར་འགྱུར་ཞིང་ལྟུང་བའི་མི་རྟག་པ་ཡིན་པའི་ཕྱིར་སྡུག་བསྔལ་བར་གྲུབ་པ་དང༌། ལས་རྣམས་ཀྱི་བྱ་བ་ཡང་སྔར་གྱི་ལས་ལ་ལྟོས་པ་སྟེ་རྒྱུ་ལ་གནས་པ་ཡིན་པས་ལས་དེ་ལས་བྱུང་ཞིང་དེ་ལ་སྤྱོད་པའི་ཕྱིར་ བདག་གི་བའི་ཆོས་སམ་རང་བཞིན་མེད་པར་གྲུབ་པ ་དང༌། ལས་དེ་དང་དེའི་འབྲས་བུ་ལས་ལ་ཡོད་པའི་བདེ་སྡུག་གི་རྣམ་པར་སྨིན་པ་ལ་གནས་པ་ནི་རྒྱུའི་དབང་ལས་བྱུང་བས་འབྲས་བུས་གཞིའི་ལས་ཀྱི་རྒྱུ་ཡི་མདུན་བསུ་བར་བྱེད་པའི་ཕྱིར་ བདག་རྟག་པ་མེད ་པའམ་སྤྲོས་པ་ཞི་བར་གྲུབ་པ་སྟེ།

དེ་ནི་འདུས་བྱས་ཀྱི་གནས་སྐབས་ལས་འབྲས་བུར་བརྩིས་པ་སྟེ། དེ་དག་བསྒྲུབ་བྱ་བཞི་པོ་བསྒྲུབ་པར་བྱེད་པའི་གཏན་ཚིགས་སུ་གནས་པའོ། །དེས་ན་གནས་སྐབས་ཀྱི་སྟོབས་ཀྱིས་ཡང་དག་པའི་ཆོས་སུ་གྲགས་པས་བསྒྲུབ་བྱ་རང་བཞིན་དུ་བསྒྲུབ་པར་བྱེད་པའོ།།

གསུམ་པ་དཔེ་བཤད་པ་ནི།

ཐམས་ཅད་ལ་གྲགས་པ། ཞེས་པ་ནས། དཔེའོ། །ཞེས་པའི་བར་གྱིས་བསྟན་ཏེ།

ཐམས་ཅད་ལ་གྲགས་པ་ཉེ་ནི་གྲགས་པ་ཉེ་བར་སྦྱོར་བའི་དཔེའོ།།

རྒོལ་ཕྱི་རྒོལ་ཐམས་ཅད་ཀྱི་བློ་ལ་གྲགས་ཤིང་གྲུབ་པ་གཏན་ཚིགས་ཀྱི་ཁྱབ་བྱར་དཔེའི་ཆོས་ཅན་གྱི་སྟེང་དུ་ཉེ་བར་སྦྱར་བ་དང༌། དམིགས་པ་བསྒྲུབ་པར་བྱ་བའི་ཆོས་ཁྱབ་བྱེད་དུ་དངོས་དང་ཤུགས་ཀྱི་སྒོ་ནས་མཐུན་དཔེ་དང་མི་མཐུན་པའི་དཔེའི་སྟེང་དུ་ཉེ་བར་སྦྱོར་ཏེ་བཀོད་པ་ནི་དཔེའོ། །དེའང་བསྒྲུབ་བྱའི་ཆོས་དང་ལྡན་པར་མཚུངས་པ་དཔེས་བསྟན་པའི་སྐབས་སུ་མཐུན་ཕྱོགས་མཐའ་དག་ལ་ཡོད་པ་དང༌། མི་མཐུན་ཕྱོགས་མཐའ་དག་ལས་ལྡོག་པ་ཞེས་བཤད་དེ། རྒོལ་བ་དང་ཕྱིར་རྒོལ་བ་ལ་གྲགས་པའི་དབང་གིས་དཔེར་གྲུབ་པའོ།།

བཞི་པ་ཆོས་ཅན་བསྟན་པ་ནི།

དེ་དག་ལ་གྲགས། ཞེས་པ་ནས། གྲགས་པའོ། །ཞེས་པའི་བར་གྱིས་བསྟན་ཏེ།

དེ་དག་ལ་གྲགས་པ་ནི་གྲགས་པའོ།།

གྲུབ་མཐའ་ལ་གྲགས་པའི་བྱེ་བྲག་ཏུ་མ་བྱས་པའི་ཆོས་ཅན་དེ་དག་རྒོལ་ཕྱི་རྒོལ་གཉིས་ཀ་ལ་གྲགས་པས་བུམ་པ་ལྟ་བུ་འཇིག་རྟེན་ན་སྐྱེ་བ་དང་འཇིག་པར་ཆད་ཅིང་གྲགས་པ་ལྟ་བུ་དང༌། དེས་གཏན་ཚིགས་མཐུན་སྣང་དུ་གྲགས་ཤིང་གྲུབ་པ་ནི་བསྒྲུབ་བྱ་ཡང་དག་པར་བསྒྲུབ་པའི་རྩོད་གཞི་ཆོས་ཅན་དུ་གྲགས་པའོ། །དེས་ན་རྩོད་པའི་གཞི་ཕྱོགས་ནི། ཚད་མས་གྲུབ་བསལ་མེད་ལ་དཔག་གཞིར་བཟུང་བ་སྟེ། མེ་ཚ་བ་ཡིན་པ་ལྟ་བུ་རྒོལ་བ་གཉིས་ཀའི་ངོར་ཚད་༼༢༨༧༽མས་གྲུབ་ཟིན་པ་དང༌། མེ་གྲང་བ་ཡིན་པ་ལྟ་བུ་ཚད་མས་བསལ་ཟིན་པ་ལ་སྒྲུབ་བྱེད་མི་འཇུག་གི་སྒྲ་ལྟ་བུ་ཐུན་མོང་དུ་གྲགས་ཀྱང་དེ་ལ་རྟག་པ་དང་མི་རྟག་པར་འཛིན་པ་ཐ་དད་པའི་དབང་གིས་དཔག་གཞིར་བཟུང་བ་ལྟ་བུ་ལ་སྒྲུབ་བྱེད་ཀྱི་གཏན་ཚིགས་འགོད་པ་ཡིན་ནོ།།

ལྔ་པ་ལུང་ཚད་མར་ངེས་པ་བསྟན་པ་ནི།

གང་གིས་ཚད་མ། ཞེས་པ་ནས། ངེས་པའོ། །ཞེས་པའི་བར་གྱིས་བསྟན་ཏེ།

གང་གིས་ཚད་མ་ཉིད་དུ་སྣང་བ་ནི་ངེས་པའོ།།

ལུང་ཡང་དག་ལ་བརྟེན་པའི་གཏན་ཚིགས་ལ་སོགས་པའི་སྒྲུབ་བྱེད་གང་གིས་བསླུ་བ་མེད་པར་བདེན་པའི་མཚན་ཉིད་དང་ལྡན་པའི་བསྒྲུབ་བྱ་ཚད་མ་ཉིད་དུ་གནས་པ་ཕྱིར་རྒོལ་གྱིས་ཀྱང་མཐོང་ནས་ཚད་མ་གཞན་གྱིས་གནོད་པ་མེད་པར་དོན་དང་མཐུན་པར་སྣང་བ་ནི་རྗེས་སུ་དཔག་པའི་འབྲས་བུ་གཏན་ལ་དབབ་བྱ་ཡང་དག་པར་ངེས་ནས་གྲུབ་མཐའ་སྙོགས་པའོ། །འདི་དང་རྗེས་དཔག་གཙོ་ཆེ་བ་ཡིན་ཀྱང་མངོན་སུམ་ཡང་ཤུགས་ལ་སྟོན་པ་ཡིན་ནོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། ཚད་མས་དག་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ཡང་འདི་ལྟར་བྱུང་བ་དང་། བརྟགས་པ་དང་། གཅོད་པ་དང་། བྲལ་བ་དང་། སྣང་བས་ན་ཚད་མར་ངེས་པའོ། །དེ་ནི་མངོན་སུམ་དང་དཔག་པ་དང་། ཚད་མས་དག་པའོ།།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། གཏན་ཚིགས་དེ་ཡང་འདི་ལྟར་མངོན་སུམ་བཞིར་བྱུང་བ་དང་མཐུན་པར་རྩོད་པ་དང་བྲལ་བ་དང༌། རང་བཞིན་དང༌། འབྲས་བུ་དང༌། མ་དམིགས་པའི་རྟགས་གསུམ་ལ་མཚན་ཉིད་ཚུལ་གསུམ་ངེས་པར་ཚང་བའི་གཏན་ཚིགས་དང༌། དེ་རྣམས་དང་དཔེ་ལ་བརྟེན་ནས་ཡང་དག་པའི་ཤེས་པས་མི་མཐུན་པའི་ཕྱོགས་མ་རྟོགས་ལོག་རྟོག་ཐེ་ཚོམ་གསུམ་གཅོད་པས་ཡོངས་སུ་དག་པ་དང༌། དམ་བཅའ་ལ་རྩོད་པ་ཉེ་བར་འཇུག་པའི་རྐྱེན་མ་གྲུབ་མ་ངེས་འགལ་བ་རྣམས་མེད་པས་བསལ་བའི་སྐྱོན་དང་བྲལ་བ་དང༌། གྲུབ་མཐའི་དོན་གོ་ནས་བདེན་པའི་ཕྱོགས་དང་མཐུན་པར་བློ་ལ་སྣང་བས་ན་དོན་གཏན་ལ་ཕེབས་ཏེ་ཚད་མར་ངེས་པའོ། །དེའང་གཏན་ཚིགས་ཀྱིས་བསྒྱུར་བའི་ཕྱིར་གྱི་དོན་ཏེ། སྤྱིར་གྱི་གནས་ལས་གཏན་ཚིགས་ཀྱི་བཞི་པར་བསྒྱུར་བ་སྟེ་ཆོས་ལྔ་དང་ལྡན་པའི་གཏན་ཚིགས་ཀྱི་སྟོབས་ཀྱིས་དོན་ངེས་ན་འཁྲུལ་པ་མི་འབྱུང་བར་ཡང་དག་པའི་ཚད་མ་ལེགས་པར་གྲུབ་པའོ། །ངེས་བྱེད་དེ་ཡང་བསྡུ་ན་ནི་ཚད་མ་གཉིས་སུ་འདུས་ཏེ། མངོན་སུམ་གྱིས་གྲུབ་པ་དང༌། རྗེས་དཔག་གིས་གྲུབ་པ་དང་གཉིས་ཀྱིས་སྐྱོན་རྣམས་སེལ་བས་བྲལ་སྣང་ནི། དངོས་པོ་སྟོབས་ཞུགས་སམ། ཤིན་ཏུ་ལྐོག་གྱུར་ལུང་ཚད་མས་ངེས་ཏེ་རྣམ་པར་དག་ཅིང་སྐྱོན་མེད་པར་གྲུབ་པའོ། །དེའང་མངོན་སུམ་དང་རྗེས་དཔག་གཉིས་ཀྱིས་༼༢༨༨༽འཐད་པ་སྒྲུབ་པ་དེ་ཚུལ་ཇི་ལྟ་བུའི་སྒོ་ནས་སྒྲུབ་པར་བྱེད་ཅེ་ན། ཇི་ལྟར་སྣང་བ་ཐ་སྙད་ཀྱི་དོན་དང༌། ཇི་ལྟར་གནས་པ་དོན་དམ་གྱི་དོན་གཉིས་པོ་དེ་མངོན་དུ་གྱུར་པ་ལ་མངོན་སུམ་ཚད་མ་དང༌། ལྐོག་ཏུ་གྱུར་པ་ལ་དེ་དཔོག་ནུས་ཀྱི་རྟགས་མངོན་པར་སྣང་བ་ལས་མི་བསླུ་བ་གཞན་རྗེས་སུ་དཔག་པའི་ཚད་མ་གོང་དུ་བསྟན་པ་ལྟ་བུ་གཉིས་ཀྱི་སྒོ་ནས་སོ། །དེ་ཡང་ཀུན་རྫོབ་པའི་ངོ་བོ་མངོན་སུམ་དུ་གྱུར་པ་ནི་མིག་ཤེས་མ་འཁྲུལ་པས་ཨུཏྤལ་སྔོན་པོ་མངོན་སུམ་དུ་མཐོང་བ་ལྟ་བུའོ། །དོན་དམ་པའི་ངོ་བོ་མངོན་སུམ་དུ་དམིགས་པ་ནི་འཕགས་པ་རྣམས་ཀྱི་མཉམ་བཞག་གི་ཡེ་ཤེས་ལྟ་བུའོ། །ཐ་སྙད་པའི་དོན་རྗེས་སུ་དཔག་པ་ནི། གོང་དུ་བསྟན་པ་ལྟར་དུ་བ་ལས་མེ་དང་བྱས་པ་ལས་མི་རྟག་པར་དཔོག་པ་ལྟ་བ་དང༌། དོན་དམ་པ་རྗེས་སུ་དཔག་པ་ནི། གཅིག་དུ་བྲལ་ལ་སོགས་པའི་གཏན་ཚིགས་ཀྱིས་སྟོང་པ་ཉིད་རྗེས་སུ་དཔག་པ་ལྟ་བུའོ། །འོ་ན་མངོན་སུམ་ཚད་མ་དེ་ལ་དུ་ཡོད་ཅེ་ན། བཞི་སྟེ། བདག་རྐྱེན་དབང་པོ་གཟུགས་ཅན་པ་ལ་བརྟེན་ནས་སྐྱེས་པའི་རྟོག་བྲལ་མ་འཁྲུལ་པའི་ཤེས་པ་ནི་དབང་པོའི་མངོན་སུམ་སྟེ། མ་འཁྲུལ་པའི་མིག་ཤེས་ལ་སོགས་པ་ཚད་མ་ལྔའོ། །དབང་པོ་འཁྲུལ་རྒྱུས་བསླད་པའི་ཟླ་གཅིག་ཟླ་གཉིས་སུ་སྣང་བ་སོགས་ནི་མངོན་སུམ་ལྟར་སྣང་བ་སྟེ་ཚད་མ་མིན་ནོ། །བདག་རྐྱེན་ཡིད་དབང་ལ་བརྟེེན་ནས་སྐྱེས་པའི་རྟོག་བྲལ་མ་འཁྲུལ་པའི་ཤེས་པ་ནི་ཡིད་ཀྱི་མངོན་སུམ་ཚད་མ་ཉིད་དོ། །དབང་པོ་འཁྲུལ་པའི་རྗེས་སུ་ཕྱོགས་པའི་ཡིད་རྟོག་མེད་དང་རྨི་ལམ་གྱི་སྣང་བ་ལྟ་བུ་ནི་ཚད་མ་མིན་ནོ། །བདག་རྐྱེན་ཞི་ལྷག་གི་རྣལ་འབྱོར་ལ་བརྟེན་ནས་སྐྱེས་པའི་རྟོག་བྲལ་མ་འཁྲུལ་པའིཤེས་པ་ནི་རྣལ་འབྱོར་མངོན་སུམ་ཚད་མའོ། །མི་སྡུག་པ་གོམས་པའི་ཀེང་རུས་ཀྱི་གསལ་སྣང་ལྟ་བུ་ནི་འཁྲུལ་པ་ཡིན་པས་ཚད་མར་མི་བཞེད་དོ། །རྣལ་འབྱོར་མངོན་སུམ་དེས་ཀུན་རྫོབ་ཀྱི་དངོས་པོ་བསྒྲིབ་པ་དང་ཆོད་པ་སོགས་ཀྱི་དོན་ཤེས་ པ་ལྟ་བུ་སྣང་བཅས་དང༌། བདག་མེད ་མཐོང་བ་ལྟ་བུ་སྣང་མེད་ཀྱི་རྣལ་འབྱོར་མངོན་སུམ་དུ་བཞེད་དོ། །སེམས་སེམས་བྱུང་ཐམས་ཅད་རང་ཉིད་གསལ་བའི་ངོ་བོས་རྟོག་བྲལ་མ་འཁྲུལ་པར་རང་རིག་པ་ནི་རང་རིག་མངོན་སུམ་སྟེ། འཁྲུལ་པའམ་མ་འཁྲུལ་པའི་ཤེས་པ་གང་སྐྱེས་ཀྱང་དེས་རང་ཉིད་རང་གསལ་དུ་མྱོང་བ་ཙམ་ལ་མ་འཁྲུལ་ཞིང་རྟོག་པ་དང་བྲལ་བའང་ཡིན་ནོ། །མངོན་སུམ་བཞི་པོ་འདི་དག་གི་ཡུལ་ནི་ཡུལ་དུས་རྣམ་པ་མ་འདྲེས་པར་རང་མཚན་ཉིད་སྣང་༼༢༨༩༽བའི་ཕྱིར་སྒྲ་དོན་འདྲེས་འཛིན་གྱི་རྟོག་པ་མེད་པ་ཡིན་ནོ། །སྤྱིར་འཇིག་རྟེན་པའི་མངོན་སུམ་འདི་དག་མེད་ན། རྟགས་རྣམས་ཀྱང་ཤེས་པ་མ་འཁྲུལ་པས་དམིགས་པའི་རྩ་བ་ཅན་ཡིན་པས་དེ་རྣམས་ཀྱང་མེད་པར་འགྱུར་ལ། རྒྱུ་ལས་སྐྱེ་བ་དང་དེ་འགགས་པ་སོགས་སྣང་ཚོད་ཀྱི་རྣམ་བཞག་འདི་རྣམས་མེད་པར་འགྱུར་བའི་ཕྱིར། སྣང་བ་དེ་རྣམས་ཀྱི་རང་བཞིན་སྟོང་པ་ཉིད་ཀྱང་རྟོགས་ཏེ་རྣམ་པར་གྲོལ་བར་མི་འགྱུར་བས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །དམ་པའི་དོན་ནི་མ་རྟོགས་ན། །མྱ་ངན་འདས་པ་ཐོབ་མི་འགྱུར། །ཞེས་གསུངས་པ་བཞིན་ནོ།།

བྱེ་བྲག་ཏུ་ཡང་དབང་པོའི་མངོན་སུམ་མེད་ན་གཟུགས་སོགས་ཀྱི་དོན་མི་མཐོང་ཞིང༌། ཡིད་མངོན་མེད་ན་ཕྱི་ནང་གི་ཡུལ་ཐམས་ཅད་ཐུན་མོང་དུ་ཤེས་པའི་རྣམ་རིག་མེད་པར་འགྱུར་བ་དང༌། རྣལ་འབྱོར་མངོན་སུམ་མེད་ན་ཕལ་པའི་ཡུལ་ལས་འདས་པའི་དོན་རྟོགས་པའི་ཤེས་པ་མི་སྲིད་པས་དེ་གསུམ་དུ་རྣམ་བཞག་མཛད་ལ། དེ་ཐམས་ཅད་ཤེས་པས་རང་རང་གི་ཡུལ་མངོན་སུམ་དུ་མྱོང་བ་ཡིན་ཞིང༌། མྱོང་བ་ཐམས་ཅད་ཀྱི་མཐའ་རང་རིག་པ་ལ་ཐུག་པ་སྟེ། མངོན་སུམ་མྱོང་བའི་དོན་ལ་སྒྲུབ་བྱེད་གཞན་མི་དགོས་པ་ནི། རང་བློ་མ་འཁྲུལ་པ་ཉིད་རང་གསལ་དུ་ཉམས་སུ་མྱོང་བ་ལས་ཐེ་ཚོམ་ཆོད་པ་ཡིན་པས་རང་རིག་འདི་ནི་ཚད་མ་ཐམས་ཅད་ཀྱི་མཐའ་གཏུགས་ས་ཡིན་ནོ། །དེ་ཡང་རྗེས་སུ་དཔག་པ་ནི་མཐར་མངོན་སུམ་པའི་རྩ་བ་ཅན་ཡིན་ལ། མངོན་སུམ་གྱི་མཐའ་རང་རིག་གིས་ངེས་ཏེ་མ་འཁྲུལ་པའི་བློ་ཡི་ཉམས་མྱོང་ལ་ཐུག་ནས་སྒྲུབ་བྱེད་གཞན་བཙལ་མི་དགོས་པ་བདེ་སོགས་ཉམས་སུ་མྱོང་བ་བཞིན་ནོ། །གཉིས་པ་རྗེས་དཔག་ལའང་བློ་གང་གིས་རྗེས་སུ་དཔོགས་པར་བྱེད་པ་ནི་རྟོག་པ་དང་བཅས་པའི་ཡིད་ཡིན་གྱི་གཞན་མ་ཡིན་ནོ། །རྟོག་པ་ཞེས་པ་ཇི་ལྟ་བུ་ཞེ་ན། ཡུལ་གང་དང་གང་ཡིན་པའི་དོན་དེའི་རྣམ་པ་སྤྱི་ཙམ་ཡིད་བློར་སྣང་བ་ལ་དེ་དང་དེའི་མིང་དང་བསྲེས་ཏེ་འཛིན་པ་དཔེར་ན་ཀ་བ་དང་བུམ་པ་ཞེས་སུ་རྣམ་པར་རྟོག་པའམ་ཡིད་ཀྱིས་བརྗོད་པ་ནི་ཡིད་རྟོག་བཅས་ཞེས་བྱའོ། །བརྡ་བྱེད་མི་ཤེས་པའི་སྐྱེ་བོ་བྱིས་པ་ཆུང་ངུ་རྣམས་དང་རྟ་སོགས་དུད་འགྲོ་རྣམས་ཀྱིས་ཀྱང་བློ་ལ་ཟས་སྐོམ་སོགས་ཀྱི་དོན་སྤྱི་ཙམ་སྣང་བ་དེ་ཉིད་མིང་དང་འདྲེས་པ་མེད་ཀྱང༌། འདྲེས་སུ་རུང་བའི་དོན་སྤྱིའི་རྟོག་པ་དེའི་སྒོ་ནས་དོན་ལ་འཇུག་ལྡོག་བྱེད་པ་ཡིན་ཏེ། དཔེར་ན་ཆུ་དངོས་སུ་མ་མཐོང་ཡང༌། ཆུ་ཤག་ཤག་འབབ་པའི་སྒྲ་ཐོས་པ་ན། སྐོམ་པས་གདུང་བའི་དུད་འགྲོ་རྣམས་ཀྱིས་ཀྱང་ཆུའི་༼༢༩༠༽རྣམ་པ་བློ་ལ་ཤར་ནས་དེ་འདོད་པའི་རྣམ་འགྱུར་གྱི་སྒྲ་སྒྲོགས་པ་དང༌། རྒྱང་རིང་པོའི་ཆུའི་རྗེས་སུ་སྙོགས་ཤེས་པ་ལྟ་བུའི་དེའི་ཚུལ་ཤེས་པར་བྱེད་དོ། །དེས་ན་ཡིད་རྟོག་བཅས་འདིས་ཡུལ་དུས་རྣམ་པ་འདྲེས་པའི་ཚུལ་གྱིས་དོན་རྣམས་ཀྱི་སྤྱི་ཙམ་བཟུང་ཞིང༌། དེ་ཉིད་ལ་དགག་སྒྲུབ་ཀྱི་ཐ་སྙད་སྣ་ཚོགས་བྱེད་པའི་སྒོ་ནས་ཐ་སྙད་ཐམས་ཅད་འགྲུབ་པ་ཡིན་གྱི། གཞན་དུ་ན་རྗེས་སུ་དཔག་པ་དང་བསླབ་པའི་གནས་གང་ཡང་བསྟན་པར་མི་ནུས་ཏེ། མངོན་སུམ་ལ་ནི་རང་དུས་ཀྱི་རང་ཡུལ་དེའི་ཆ་ཤས་རྣམས་དང་སྐད་ཅིག་མའི་རང་མཚན་སིལ་བུ་ཕན་ཚུན་མ་འདྲེས་པར་གནས་པ་ཙམ་སྣང་བ་དེ་ནི་མིང་དང་འདྲེས་སུ་མི་རུང་བས་དེ་ཁོ་ན་ལ་ཐ་སྙད་ཀྱི་དོན་སྦྱར་བ་མེད་དོ། །རྟོག་པ་འདིས་ནི་ད་ལྟ་མཐོང་བའི་ཡུལ་ལ་མིང་དང་རིགས་སོགས་སྦྱར་ནས་འཛིན་པ་ཀུན་རྫོབ་ཀྱི་རྟོག་པའམ་བརྡ་རྟེན་ཅན་གྱི་རྟོག་པ་ཞེས་བརྗོད་པ་དེ་ཙམ་ཁོ་ན་བྱེད་པར་མ་ཟད་ཀྱི། འདས་པ་ལ་དྲན་པའི་ཚུལ་གྱིས་རྟོག་པ་དང༌། མ་འོངས་པ་ལ་མངོན་པར་འདོད་པའི་ཚུལ་གྱིས་རྟོག་པ་དང༌། རྗེས་སུ་དཔོགས་པའི་རྟེན་རྟགས་འཛིན་གྱི་རྟོག་པ་དང༌། རྟགས་དེ་ལས་རྟགས་ཅན་རྗེས་སུ་དཔག་བྱ་ལ་རྟོག་པ་རྣམས་ཀྱི་སྒོ་ནས་མངོན་དུ་མ་གྱུར་པ་ལྐོག་གྱུར་གྱི་དོན་རྣམས་ཀྱང་གཞལ་བར་བྱེད་པ་ཡིན་པས། རྟོག་པ་དང་བཅས་པའི་རྗེས་སུ་དཔག་པ་མེད་ན། བཙས་མ་ཐག་པའི་བུ་ཆུང་མེ་སོགས་ལ་འཇིགས་མི་ཤེས་པ་ལྟར། བླང་དོར་འཇུག་ལྡོག་གང་ཡང་མི་བྱེད་པར་འགྱུར་རོ། །རྟོག་བཅས་ཀྱི་ཡིད་འདི་ལ་ཡང་ཐག་པ་ལ་ཐག་པར་རྟོག་པ་དང༌། སྨིག་རྒྱུ་ལ་སྨིག་རྒྱུར་རྟོག་པ་ལྟར་མ་འཁྲུལ་པ་ཞིག་དང༌། ཐག་པ་ལ་སྦྲུལ་དང་སྨིག་རྒྱུ་ལ་ཆུར་རྟོག་པ་ལྟར་འཁྲུལ་པ་ཞིག་དང་གཉིས་སུ་ཡོད་པ་ལས། མ་འཁྲུལ་པའི་རྟོག་པ་ལ་བརྟེན་ནས་དུས་གསུམ་ཤེས་བྱའི་ཐ་སྙད་ཐམས་ཅད་མ་ནོར་བར་འབྱེད་པ་ཡིན་ནོ། །དེའི་ཕྱིར་དངོས་པོ་སྟོབས་ཞུགས་ཀྱི་རིགས་པ་བཞི་དང་གོང་དུ་རྟགས་ཡང་དག་གི་མཚན་གཞིའི་དབྱེ་བ་གསུམ་དུ་བསྟན་པ་ལྟར་རིགས་པའི་གཏན་ཚིགས་ལ་མཁས་པ་དག་གིས། ཤིན་ཏུ་ལྐོག་གྱུར་གྱི་དོན་ཟབ་མོ་གཞལ་བྱར་བསྟན་པའི་ལུང་ཚད་མ་དཔྱད་པ་གསུམ་གྱི་དག་པ་ལ་བརྟེན་ནས་བདེན་པ་གཉིས་ཀྱི་གནས་ཚུལ་ལ་ཚད་མ་གཉིས་ཀྱིས་ཚུལ་བཞིན་དུ་དཔྱད་པར་བྱས་པས་ཡིད་ཆེས་ཀྱི་ངེས་པ་གཞན་དྲིང་མི་འཇོག་པ་ལེགས་པར་རྙེད་དེ། ཟབ་རྒྱས་ཀྱི་ཆོས་ཚུལ་རྟོགས་པར་དཀའ་བའི་གནས་རྣམས་ལ་བློ་གྲོས་ཀྱི་སྣང་༼༢༩༡༽བ་འཕེལ་ནས་མི་འཇིགས་པའི་སྤོབས་པ་དང་ལྡན་པས་སྤྱོད་པས་འདྲེན་སྒོའི་གྲུབ་པའི་མཐའི་འཐད་པ་སྒྲུབ་པའི་རིགས་པ་མཐར་ཕྱིན་ཏེ། གཞན་ལའང་འབེལ་བའི་གཏམ་རྣམ་པར་སྤྲོ་བ་ལ་སྨྲ་བའི་རྒྱན་དང་ལྡན་པར་གྱུར་ནས་དོན་གཉིས་ཕུན་སུམ་ཚོགས་པར་འགྱུར་བའོ།།

གཉིས་པ་མ་དག་པ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། མ་ངེས་པ་དག་གོ །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མ་དག་པ་ནི་འདི་ལྟར་གཞན་དང་འཐུན་པ་དང་། མི་མཐུན་པ་དང་། ཐམས་ཅད་དང་འཐུན་པ་དང་། མི་མཐུན་པ་དང་། གཞན་གྱི་དཔེ་ཉེ་བར་སྦྱར་བ་དང་། མ་གྲགས་པ་དང་། མ་ངེས་པ་དག་གོ།

ལང་ཀའི་བདག་པོ། ཞེས་བོས་ནས། མ་དག་པ་གཏན་ཚིགས་ལྟར་སྣང་བ་བསྟན་པ་ནི། འདི་ལྟར་ཏེ། བསྒྲུབ་བྱ་འདུས་བྱས་ཀྱི་མཚན་ཉིད་ལས་གཞན་དུ་གྱུར་པ་འདུས་མ་བྱས་ཀྱི་མཚན་ཉིད་དང་མཐུན་པ་འགལ་བ་དང༌། མཐུན་ཕྱོགས་དང་མི་མཐུན་ཕྱོགས་གཉིས་དང་མི་མཐུན་པས་ཕྱོགས་གཉིས་ཀར་མེད་པ་ཐུན་མོང་མ་ཡིན་པའི་མ་ངེས་པ་དང༌། འདི་གཉིས་བསྒྲུབ་བྱ་ལྟར་སྣང་གི་མདོར་བསྟན་ནོ། །མཐུན་ཕྱོགས་དང་མི་མཐུན་ཕྱོགས་ཐམས་ཅད་དང་མཐུན་པར་ཡོད་པས་ཕྱོགས་གཉིས་ཀར་ཞུགས་པ་དངོས་ཀྱི་མ་ངེས་པ་དང༌། མཐུན་ཕྱོགས་ལ་མེད་ཅིང་མི་མཐུན་པའི་ཕྱོགས་ཁོ་ན་ལ་ཞུགས་པ་འགལ་བ་དང༌། འདི་གཉིས་གཏན་ཚིགས་ལྟར་སྣང་གི་མདོར་བསྟན་ནོ། །རྩོད་གཞི་ཆོས་ཅན་ལས་བཞན་གྱི་རང་བཞིན་དང་མཐུན་པའི་དཔེར་སོང་བས་ལྟར་སྣང་གི་དཔེ་ཉེ་བར་སྦྱར་བ་དཔེ་མ་དག་པའི་མདོར་བསྟན་དང༌། རྩོད་གཞི་ཆོས་ཅན་ཐུན་མོང་དུ་མ་གྲགས་པར་རྟག་པའམ་མི་རྟག་པའི་སྒྲ་ལྟ་བུ་མཐུན་སྣང་དུ་མ་གྲུབ་པ་ནི་ཆོས་ཅན་མ་དག་པའི་མདོར་བསྟན་དང༌། ལུང་དུ་གྲགས་ཀྱང་ཡང་དག་པར་མ་ངེས་པས་ཚད་མས་གནོད་པ་ཅན་གྱི་ལྟར་སྣང་བ་དག་གོ །ཞེས་འབྲས་བུ་མ་དག་པའི་མདོར་བསྟན་ཏེ། གོང་གི་ལྔ་ལས་རིམ་པ་བཞིན་ལོག་པའོ། །དེ་ལ་སྤྱིར་རྟགས་སུ་བཀོད་པ་རྟགས་ཀྱི་མཚན་ཉིད་ཡིན་པས། གཞི་གྲུབ་ན་རྟགས་སུ་རུང་བས་ཁྱབ་བོ། །བྱེ་བྲག་ལ་ཤེས་ནས་སྤང་བར་བྱ་བ་རྟགས་ལྟར་སྣང༌དང་། ཤེས་ནས་བླང་བར་བྱ་བ་རྟགས་ཡང་དག་ཡིན་པས་ཕྱི་མ་ལུང་ཡང་དག་ལ་བརྟེན་པར་བཤད་ཟིན་པས། འདིར་དང་པོ་བཤད་པ་ལ། རྟགས་སུ་བཀོད་པ་གང་ཞིག་ཚུལ་གསུམ་མ་ཚང་བ་རྟགས་ལྟར་སྣང་གི་མཚན་ཉིད་ཡིན་ལ། དབྱེ་ན་མ་གྲུབ་པ། མ་ངེས། འགལ་བ་གསུམ་ལས། དང་པོའི་མཚན་ཉིད་ནི། རྟགས་གང་ཞིག་ཤེས་འདོད་ལ་འགོད་བྱ་ལྟར་མ་གྲུབ་པ་ཡིན་ལ། དབྱེ་ན། དོན་དུ་མ་༼༢༩༢༽གྲུབ་པ་དང༌། གྲུབ་ཀྱང་བློ་ངོར་ལྟོས་ནས་མ་གྲུབ་པ་གཉིས། དང་པོ་ལ། ཆོས་ཅན་མེད་པ། རྟགས་མེད་པ། གཉིས་ཀ་མེད་པ། ཡོད་ཀྱང་འབྲེལ་བ་ མེད་པ་བཞི་ལས། དང་པོ། ཐམས་ཅད་ལ་ཁྱབ་པའི་བདག ་ཆོས་ཅན། ཞེའམ། དོན་དམ་པའི་སྒྲ་ཆོས་ཅན། ཞེས་པ་ལྟ་བུ། དེ་ལ་རྟགས་གང་བཀོད་ཀྱང་ཕྱོགས་མེད་པས་ཕྱོགས་ཆོས་མི་འགྲུབ། གཉིས་པ། བདག་གི་ཡོན་ཏན་དམིགས་པའི་ཕྱིར། ཞེའམ། རི་བོང་གི་རྭ་ཡིན་པའི་ཕྱིར་ལྟ་བུ། དེ་གང་ལ་བཀོད་ཀྱང་ཆོས་ཀྱི་ཆོས་མིན་པས་ཕྱོགས་ཆོས་མི་གྲུབ། གསུམ་པ། དོན་དམ་པའི་སྒྲ་ཆོས་ཅན། རྟག་སྟེ། རི་བོང་གི་རྭ་ཡིན་པའི་ཕྱིར་ལྟ་བུ་ཕྱོགས་དང་ཆོས་གཉིས་ཀ་མ་གྲུབ་པའོ། །བཞི་པ་ལ་རྟགས་ཤེས་འདོད་ལ། མི་སྲིད་པ་དང༌། མ་ཁྱབ་པ་དང༌། ཁྱབ་མ་ཁྱབ་གཉིས་ཀའི་ཆ་ཡོད་པ་དང་གསུམ། དང་པོ་སྒྲ་ཆོས་ཅན། མི་རྟག་སྟེ། མཉན་བྱ་མ་ཡིན་པའི་ཕྱིར་ལྟ་བུའམ། མིག་གིས་གཟུང་བྱ་ཡིན་པའི་ཕྱིར་ལྟ་བུ། གཉིས་པ། སྒྲ་ཆོས་ཅན། བློ་སྔོན་དུ་སོང་བས་ཁྱབ་སྟེ། སྐྱེས་བུའི་རྩོལ་བ་ལས་བྱུང་བའི་ཕྱིར་ལྟ་བུ། གསུམ་པ། ཟླ་བ་གཉིས་སྣང་གི་དབང་ཤེས་ཆོས་ཅན། མངོན་སུམ་ཚད་མ་ཡིན་ཏེ། རྟོག་བྲལ་མ་འཁྲུལ་པ་ཡིན་པའི་ཕྱིར་ལྟ་བུ། རྟོག་བྲལ་གྲུབ་ཀྱང་མ་འཁྲུལ་པ་མ་གྲུབ་པས། འདིར་རྟགས་མ་གྲུབ་ཀྱི་ལན་ཐེབས། ཁྱབ་ཆེས་པ་ནི། མ་ངེས་པ་ཡིན་གྱིས་རྟགས་མ་གྲུབ་ཀྱི་ལན་མི་ཐེབས་པས་མེད་དོ། །དེ་ལྟར་ན་དྲུག་གོ །གཉིས་པ་བློ་ལ་ལྟོས་ན། ཆོས་ཅན་མ་གྲུབ་པ། རྟགས་མ་གྲུབ་པ། དེ་གཉིས་ཀ་མ་གྲུབ་པ། དེ་གཉིས་ཀྱི་འབྲེལ་བ་མ་གྲུབ་པ་དང་བཞི་ལས། དང་པོ། ཤ་ཟའི་བུམ་པའམ། ནོར་བུའམ། སྒྲོན་མར་མ་ངེས་པ་ན། ནོར་བུ་ཆོས་ཅན་དུ་བཞག་པ་ལྟ་བུ། གཉིས་པ། འདོད་ཆགས་དང་བྲལ་བས་བྱས་པའི་ཕྱིར་ལྟ་བུའམ། དུ་རླངས་གང་རུང་དུ་ཐེ་ཚོམ་ཟ་བ་ན། དུ་བ་རྟགས་སུ་བཀོད་པ་ལྟ་བུ། གསུམ་པ། ཤ་ཟའི་བུམ་པ་ཆོས་ཅན། འདིར་ཡོད་དེ། ཤ་ཟ་ཡོད་པའི་ཕྱིར་ལྟ་བུ། བཞི་པ་ལ། མི་སྲིད་པར་དོགས་པ། མ་ཁྱབ་པར་དོགས་པ། གཉིས་ཀའི་ཆ་ཅན་དུ་དོགས་པ་གསུམ། དང་པོ། སྒྲ་མ་བྱས་པར་སེམས་པ་ལ། སྒྲ་ཆོས་ཅན། མི་རྟག་སྟེ། བྱས་པའི་ཕྱིར་ལྟ་བུ། གཉིས་པ། ཚིག་ལ་སྐྱེས་བུས་བྱས་མ་བྱས་གཉིས་ཡོད་པར་འདོད་པ་ལ། ཚིག་རྣམས་ཆོས་ཅན། རང་བྱུང་མིན་ཏེ། སྐྱེས་བུས་བྱས་པའི་ཕྱིར། ལྟ་བུ། གསུམ་པ། དངོས་པོ་ཕལ་ཆེར་མི་རྟག་པར་འདོད་ཀྱང༌། ༼༢༩༣༽དབང་ཕྱུག་སོགས་རྟག་དངོས་སྲིད་པར་འདོད་པའི་ངོར། དབང་ཕྱུག་ཆོས་ཅན། རྣམ་པར་འགྱུར་བ་ཅན་ཡིན་ཏེ། མི་རྟག་པ་དང་དངོས་པོའི་གཞི་མཐུན་ཡིན་པའི་ཕྱིར། ལྟ་བུའོ། །ད་ལྟའི་དགེ་བས་སྔ་མའི་དགེ་བ་དང༌། རྨ་བྱའི་སྒྲ་གྲགས་པས་རི་སུལ་དབུས་མར་རྨ་བྱ་བསྒྲུབ་པ་ནི་མ་ངེས་པ་ཡིན་གྱི། རྟགས་མ་གྲུབ་པ་མིན་ནོ། །རྨ་བྱའི་སྒྲ་གྲགས་པའི་ཕྱིར་རི་སུལ་འདི་ན་རྨ་བྱ་ཡོད་དོ། །ཞེས་པ་ལྟ་བུ་དང༌། རྒོལ་བ་ལ་ལྟོས་པ་སོགས་གཞན་ནི་འདིར་འདུ་ལ། རྩོལ་བྱུང་གི་སྒྲ་མི་རྟག་པར་སྒྲུབ་ན། སྒྲའི་ཕྱོགས་གཅིག་ཆུ་སྒྲ་ལ་མེད་པས་ཆོས་ཅན་གྱི་ཕྱོགས་གཅིག་ལ་མ་གྲུབ་པ་ལྟ་བུ་རྩོད་པའི་སྐབས་ན་ཕྱེ་དགོས་ཀྱང་སྤྱིར་རྟགས་སྐྱོན་མེད་ཡིན་ནོ། །དེ་ལྟར་ན་དྲུག་སྟེ་བཅུ་གཉིས་ཡིན་ལ། ཆོས་དང་ཆོས་ཅན་གྱི་ཕྱོགས་རེ་ལ་མ་གྲུབ་པ་ལས་ཕྱེ་བའི་སྐྱོན་དུ་འགྲོ་བའི་ཆ་རྣམས་ནི་རྟགས་ཀྱི་ངོ་བོ་མ་གྲུབ་པར་འདུ་ཞིང༌། གཞན་ནི་ཕྱོགས་ཆོས་སྐྱོན་མེད་ཡིན་ཡང༌། གྲུབ་མཐའ་ལ་ལྟོས་པའི་སྐྱོན་ནི་གྲུབ་མཐའི་ཁས་བླངས་ལ་དགོངས་ཀྱི། ཡང་དག་པར་ན། ཆོས་ཅན་ནམ། རྟགས་ཀྱི་ངོ་བོ་མ་གྲུབ་པར་འདུ་བ་ཡིན་ནོ། །སྤྱིར་དངོས་པོ་ལ་གྲུབ་ན་རྒོལ་བ་གཉིས་ཀ་ལ་སྒྲ་མ་གྲུབ་ཀྱང་རྟགས་སུ་འགྲོ་ལ་དངོས་པོ་ལ་མ་གྲུབ་ན་རྒོལ་བ་གཉིས་ཀའི་ངོར་སྒྲ་ཙམ་གྲུབ་ཀྱང་རྟགས་མ་ཡིན་ནོ། །ཕྱི་མ་གཉིས་ནི་གཞུང་ལྟར་རོ། །དེས་ན་ལུང་ལྟར་སྣང་ནི་གཞི་ནས་སྐྱོན་ཅན་མ་དག་པ་ཡིན་པས་དེ་ལ་བརྟེན་ནས་གང་ཞིག་སྒྲུབ་ཀྱང་ལྟར་སྣང་གསུམ་ལས་མི་འདའ་འོ། །དེའི་ཕྱིར་ན་དག་མ་དག་གི་རྣམ་དབྱེ་ལ་མཁས་པ་ནི་ཤིན་ཏུ་གཅེས་སོ།།

གཉིས་པ་རྒྱས་པར་བཤད་པ་ལ་ལྔ་སྟེ། བསྒྲུབ་བྱ་ལྟར་སྣང་བ། གཏན་ཚིགས་ལྟར་སྣང་བ། དཔེ་ལྟར་སྣང་བ། ཆོས་ཅན་ལྟར་སྣང་བ། ལུང་ལྟར་སྣང་བ་བཤད་པའོ། །དང་པོ་ནི།

ལང་ཀའི། ཞེས་པ་ནས། གཞན་དང་མི་མཐུན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ཡོངས་སུ་དག་པའི་མཚན་ཉིད་ལྔ་མ་ཡིན་པའི་ཚད་མ་གཞན་དང་འཐུན་པར་དམིགས་པ་དང་། འདུས་བྱས་ཀྱི་མཚན་ཉིད་མི་རྟག་པ་ལ་སོགས་པ་ཇི་ལྟ་བ་ལས་བརྟག་པ་དང་། བདག་ལ་སོགས་པ་གཞན་དུ་དམིགས་ཏེ། ཕྱིན་ཅི་ལོག་བཞིར་ལྟ་བས་འདུས་མ་བྱས་ཀྱི་མཚན་ཉིད་དང་མཐུན་པར་དམིགས་པ་འདི་ནི་མཐུན་པའོ། །ཚད་མ་གཞན་དང་མི་མཐུན་པ་དང་། ཡུལ་གྱི་མཚན་ཉིད་གཞན་དང་མི་མཐུན་པ་འདི་ནི་གཞན་དང་མི་མཐུན་པའོ།།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། དེ་ལ་བསྒྲུབ་བྱ་ལྟར་སྣང་གི་མཚན་ཉིད་བསྟན་པ་ནི། གོང་གི་ཡོངས་སུ་དག་པའི་མཚན་ཉིད་ལྔ་དང་ལྡན་པ་མ་ཡིན་པའི་ཕྱིར་ཚད་མ་ཡང་དག་དང་མི་མཐུན་པར་གཞན་མུ་སྟེགས་བྱེད་ལ་སོགས་པ་རྣམས་ཀྱི་འདོད་པ་ལྟ་བུ་དམ་བཅའ་ལ་སོགས་པ་སྐྱོན་ཅན་དུ་གྱུར་ཏེ་ཚད་མ་མ་ཡིན་པ་ལ་ཚད་མར་བཟུང་བ་དང་མཐུན་པར་དམིགས་པ་དང༌། བྱེ་བྲག་གི་དམིགས་བཟུང་ན་འདུས་བྱས་ཀྱི་མཚན་ཉིད་མི་རྟག་པ་ལ་སོགས་པ་ཞེས་༼༢༩༤༽པའི་ཁོངས་སུ་ལས་ལ་གནས་པས་འགྱུར་ཞིང་ལྟུང་བའི་ཕྱིར་སྡུག་བསྔལ་བ་དང༌། རྒྱུ་ལས་ལ་གནས་པའི་ཕྱིར་དངོས་པོར་གྲུབ་པས་སྟོང་པ་དང༌། ལས་དེའི་འབྲས་བུ་རྣམ་སྨིན་ལ་གནས་པའི་ཕྱིར་གང་ཟག་གི་ བདག་མེད་པ ་དང་བཞི་པོ་དེའི་དོན་ཇི་ལྟ་བ་ལས་བསྒྲུབ་བྱ་བཟློག་སྟེ། རྟག་པ་དང་བདག་དང་ལ་སོགས་པའི་ཁོངས་སུ་སྡུག་བསྔལ་མ་ཡིན་པ་དང༌། སྟོང་པ་མ་ཡིན་པ་བསྡུ་སྟེ་དེ་ལྟར་གཞན་ཕྱིན་ཅི་ལོག་ཏུ་དམིགས་ཏེ། ཕྱིན་ཅི་ལོག་གི་མཚན་ཉིད་བཞིར་ལྟ་བར་བྱེད་པས་ནམ་མཁའ་ལ་སོགས་འདུས་མ་བྱས་ཀྱི་མཚན་ཉིད་དང་མཐུན་པར་དམིགས་པ་འདི་ནི་མི་མཐུན་པའི་ཕྱོགས་གཞན་དང་མཐུན་པ་ཡིན་པས་འགལ་བ་སྟེ། དཔེར་ན། སྒྲ་ཆོས་ཅན། རྟག་པ་ཡིན་ཏེ། བྱས་པའི་ཕྱིར། ལྟ་བུ་མི་མཐུན་ཕྱོགས་ཐམས་ཅད་ལ་ཁྱབ་པར་ཡོད་པའི་འགལ་བ་དང༌། རྩོལ་བ་ལས་བྱུང་བའི་ཕྱིར་ལྟ་བུ་མཐུན་ཕྱོགས་ལ་གཏན་མེད་ལ། མི་མཐུན་ཕྱོགས་ཀྱི་ཕྱོགས་གཅིག་ལ་ཡོད་པའི་འགལ་བའོ།།

དེས་ན་རྟགས་གྲུབ་ཀྱང་བསྒྲུབ་བྱ་དེ་ལས་བཟློག་པས་ཁྱབ་ན་འགལ་བ་ཞེས་བྱའོ། །དོན་དུ། འདུས་བྱས་ཀྱི་མཚན་ཉིད་མི་རྟག་པ་དང༌། སྡུག་བསྔལ་བ་དང༌། སྟོང་ པ་དང༌། བདག་མེད ་པར་དམ་བཅའ་བ་ལས། དེ་ལས་ལོག་སྟེ། རྟག་པ་དང༌། བདེ་བ་དང༌། བདག་གི་བར་སྣང་བའམ། རང་བཞིན་གྱིས་གྲུབ་པའི་སྣང་བ་དང༌། བདག་ཏུ་དམ་བཅས་ན་དེ་མ་དག་པ་དང་མཐུན་པས་གཞན་དང་མཐུན། ཅེས་པའོ། །ཁྱབ་པ་འཛིན་པའི་ཚད་མ་བཀོད་པ་དེ་གཞན་མཐུན་ཕྱོགས་དང་མི་མཐུན་ཕྱོགས་གཉིས་ཀ་དང་མི་མཐུན་པ་དང༌། དམ་བཅའ་བའི་ཡུལ་གྱི་མཚན་ཉིད་གཏན་ཚིགས་ཀྱིས་གཏན་ལ་དབབ་བྱ་དེ་ཉིད་གཞན་མཐུན་པའི་དཔེ་དང་མི་མཐུན་པའི་དཔེ་སོགས་གཉིས་ཀ་དང་མ་མཐུན་པས་ཕྱོགས་གཉིས་ཀར་མེད་པ་འདི་ནི། རྩོད་གཞི་ལས་གཞན་པའི་དཔེ་དོན་གྱི་ཆོས་ཅན་གང་དང་ཡང་མི་མཐུན་པ་ཡིན་པས་ཐུན་མོང་མ་ཡིན་པའི་མ་ངེས་པ་སྟེ།

དཔེར་ན། སྒྲ་ཆོས་ཅན། མི་རྟག་པ་ཡིན་ཏེ། མཉན་བྱ་ཡིན་པའི་ཕྱིར། ཞེས་པའི་སྦྱོར་བ་འདིའི་རྟགས་མཐུན་ཕྱོགས་དང་མི་མཐུན་པའི་ཕྱོགས་གཉིས་ཀ་ལ་མེད་ནས་མ་མཐོང་བ་ཡིན་པས་ཐུན་མིན་གྱི་མ་ངེས་པའོ། །དེས་ན་ཆོས་ཅན་ལས་གཞན་མཐུན་མི་མཐུན་གྱི་ཕྱོགས་གང་ལའང་མི་འཇུག་པ་ནི་ཐུན་མོང་མིན་པའི་མ་ངེས་པ་ཞེས་བྱའོ། །དོན་དུ་རྟག་དངོས་ལ་སོགས་པ་མ་དག་པ་ལས་གཞན་པ་དག་པའི་ཕྱོགས་གང་དང་ཡང་མི་མཐུན་པའོ།།

གཉིས་པ་གཏན་ཚིགས་ལྟར་སྣང་བ་ནི།

ཐམས་ཅད་༼༢༩༥༽ ཡིད་ཀྱི། ཞེས་པ་ནས། འདི་ནི་མི་མཐུན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ཐམས་ཅད་ཀྱི་བྱ་བ་དག་གོ་ཞེས་བྱ་བ་ནི། ཐམས་ཅད་དང་མཐུན་པའོ། །མི་མཐུན་པ་ནི་གང་གཅིག་གིས་མི་མཐུན་པས། ཕན་ཚུན་མི་མཐུན་པ་ཞེས་བྱ་བའི་འདིའི་མིང་མཐུན་པའོ།།

རྟགས་མ་ངེས་པ་བཀོད་པས་བསྒྲུབ་བྱ་ལོག་པ་ནི། ཐམས་ཅད་དུ་ཡིད་ཀྱི་ཡུལ་དུ་བྱ་བ་དག་གོ །ཞེས་བྱ་བ་བཀོད་པ་ནི། ཡིད་ཀྱི་ཡུལ་ནི་ཕྱོགས་ཐམས་ཅད་དང་མཐུན་པ་གཉིས་ཀྱིས། རྟགས་དེ་བསྒྲུབ་བྱ་ཡང་དག་གི་ཕྱོགས་གང་ལའང་གཅིག་ཏུ་མ་གྲུབ་པས་དངོས་པོ་རིལ་གྱི་མཐུན་པ་དང་མི་མཐུན་པའི་ཕྱོགས་ཀུན་ལ་ཞུགས་པའི་སྟོབས་ཀྱིས་བསྒྲུབ་བྱ་ངེས་པར་མི་འགྲུབ་པས་ཐུན་མོང་གི་མ་ངེས་པ་ཡིན་ཏེ། དཔེར་ན། སྒྲ་ཆོས་ཅན། མི་རྟག་པ་ཡིན་ཏེ། ཡིད་ཀྱིས་ཤེས་པར་བྱ་བ་ཡིན་པའི་ཕྱིར། བུམ་པ་བཞིན། ཞེས་པ་དང༌། སྒྲ་ཆོས་ཅན། རྟག་པ་ཡིན་ཏེ། ཤེས་བྱ་ཡིན་པའི་ཕྱིར། ནམ་མཁའ་བཞིན། ཞེས་གང་བཀོད་ཀྱང༌། རྟགས་དེ་ཉིད་མཐུན་ཕྱོགས་ཐམས་ཅད་ལའང་ཡོད། མི་མཐུན་པའི་ཕྱོགས་ཐམས་ཅད་ལའང་ཡོད་པས། བསྒྲུབ་བྱ་མི་རྟག་པ་ཡང་མི་འགྲུབ། དེ་ལས་བཟློག་པས་རྟག་པ་ཡང་མི་འགྲུབ་པས་ཐུན་མོང་གི་མ་ངེས་པའོ། །དེས་ན་ཆོས་ཅན་ལས་གཞན་མཐུན་ཕྱོགས་དང་མི་མཐུན་ཕྱོགས་གཉིས་ཀ་ལ་འཇུག་པ་ཐུན་མོང་བའི་མ་ངེས་པ་ཞེས་བྱའོ། །དོན་དུ་ཡིད་ཀྱི་ཡུལ་རྟག་པ་དང་མི་རྟག་པ་ཐམས་ཅད་ལ་ཞུགས་པས་ཐུན་མོང་གི་མ་ངེས་པའོ། །དེའི་མཚན་ཉིད་ནི་རྩོད་གཞི་ཆོས་ཅན་གང་ལ་བཀོད་ནས་བསྒྲུབ་བྱ་གང་སྒྲུབ་ཀྱང་ཡང་དག་པར་གྲུབ་པར་མ་ངེས་པའོ། །གང་བསྒྲུབ་བྱ་ཉིད་དུ་དམིགས་ཏེ་དམ་བཅས་པ་དང་ཕྱོགས་ཐམས་ཅད་ཀྱིས་མི་མཐུན་པ་ཡི་གཏན་ཚིགས་སུ་བཀོད་པ་གང་གཅིག་གི་སྟོབས་ཀྱིས་དམ་བཅའ་དང་གཏན་ཚིགས་མི་མཐུན་པར་ངེས་པས་ཕྱིན་ཅི་ལོག་གི་རང་བཞིན་དང་མཐུན་པར་སྣང་ནས་ཕན་ཚུན་མི་མཐུན་པའི་གྱུར་པ་ཞེས་བྱ་བ་འདི་ནི། མཚན་ཉིད་མི་མཐུན་པ་གཅིག་ལ་མཚན་ཉིད་མི་མཐུན་པ་གཅིག་སྣང་བའི་དབང་གིས་འགལ་བའི་གཏན་ཚིགས་སུ་འགྱུར་བ་ཡིན་ཏེ། དཔེར་ན། སྒྲ་ཆོས་ཅན། རྟག་པ་ཡིན་ཏེ། བྱས་པ་ཡིན་པའི་ཕྱིར། ཞེས་པའི་རྟགས་བཀོད་ན། གཏན་ཚིགས་དེ་ཉིད་བསྒྲུབ་བྱའི་མི་མཐུན་ཕྱོགས་ཁོ་ནར་གནས་པས་འགལ་བ་ཞེས་བྱའོ། །དེས་ན་རྟགས་དེས་བསྒྲུབ་བྱ་ཕྱིན་ཅི་ལོག་ཏུ་སྒྲུབ་པར་ངེས་པ་ཡིན་ནོ།།

དེ་ལ་དབྱེ་ན། དོན་ལ་ལྟོས་པ་དང༌། བློ་ངོར་ལྟོས་པ་གཉིས། དང་པོ་ལ། དགག་པ་ཕྱིན་ཅི་ལོག་དང༌། སྒྲུབ་པ་ཕྱིན་ཅི་ལོག་གཉིས་ལས། དང་པོ་ནི། ཁྱིམ་འདི་ན་ཆོས་ཅན། བུམ་པ་མེད་དེ། སྣང་རུང་ཚད་མས་དམིགས་པའི་ཕྱིར། ༼༢༩༦༽ཞེས་པ་ལྟ་བུ། མི་དམིགས་པའི་རྟགས་བཟློག་པ་ཐམས་ཅད་ཡིན་ལ། གཉིས་པ་ནི། ལ་ལ་ཆོས་ཅན། མེ་ཡོད་དེ། དུ་བ་མེད་པའི་ཕྱིར། ཞེས་དང༌། སྒྲ་ཆོས་ཅན། རྟག་སྟེ། བྱས་པའི་ཕྱིར་ལྟ་བུ། འབྲས་རང་གི་རྟགས་དང་བསྒྲུབ་བྱ་ལོག་པ་ཐམས་ཅད་ཡིན་ནོ།།

གཉིས་པ་ནི། སྒྲ་རྟག་པར་ཁས་ལེན་པའི་ངོར། དུང་སྒྲ་ཆོས་ཅན། མི་རྟག་པ་ཡིན་ཏེ། སྒྲ་ཡིན་པའི་ཕྱིར་ལྟ་བུ། སྒྲུབ་པ་འགལ་བ་དང༌། ཡོད་པ་གསར་དུ་མི་སྐྱེ་བར་ཁས་ལེན་པའི་ངོར། བུམ་པ་ཆོས་ཅན། གསར་དུ་མི་སྐྱེ་བ་མིན་ཏེ། ཡོད་པའི་ཕྱིར་ལྟ་བུ། དགག་པ་འགལ་བ་གཉིས་ཏེ་དེ་ལྟར་བཞིའོ། །དོན་དུ། རྟགས་བྱས་པ་དང༌། བསྒྲུབ་བྱ་རྟག་པ་གཉིས་འགལ་བས་མི་མཐུན་པར་ངེས་པ་ལྟ་བུའོ། །དེའི་མཚན་ཉིད་ནི། རྩོད་གཞི་ཆོས་ཅན་ལ་བསྒྲུབ་བྱ་ཕྱིན་ཅི་ལོག་ཏུ་སྒྲུབ་པར་ངེས་པའོ། །ཡང་ན། སྒྲ་ཆོས་ཅན། རྩོལ་བ་ལས་བྱུང་བ་མ་ཡིན་ཏེ། མི་རྟག་པ་ཡིན་པའི་ཕྱིར། མཐུན་དཔེ་གློག་དང༌། ནགས་ཀྱི་མེ་ཏོག་དང༌། ནམ་མཁའ་བཞིན། མི་མཐུན་པའི་དཔེ་བུམ་སོགས་བཞིན། ཞེས་བྱ་བའི་སྦྱོར་བ་དེ་ཉིད་ཆོས་ཅན་སྒྲ་ཡི་བསྒྲུབ་བྱ་དང་མི་མཐུན་པ་གང་བུམ་པ་ལྟ་བུ་གཅིག་གི་ངོ་བོ་རྩོལ་བྱུང་མ་ཡིན་པ་དང་མི་མཐུན་པ་ཡིན་པ་ལ་མི་རྟག་པའི་གཏན་ཚིགས་དེ་ཞུགས་པས། མི་མཐུན་པའི་ཕྱོགས་མཐའ་དག་ལ་ཡོད་ལ། མཐུན་པའི་ཕྱོགས་གློག་ལ་ཡོད་ཀྱང༌། ནམ་མཁའ་ལ་མེད་པས། མཐུན་ཕྱོགས་ནང་ཕན་ཚུན་མི་མཐུན་པ་ཞེས་བྱ་བ་འདི་ནི་བསྒྲུབ་བྱ་ཡང་དག་སྒྲུབ་པ་དང་མི་མཐུན་པས་དངོས་ཀྱི་མ་ངེས་པའི་རྣམ་གྲངས་སུ་འགྱུར་བའོ།།

དེ་ལའང་དབྱེ་ན། དོན་ལ་ལྟོས་པའི་ཐུན་མོང་གི་མ་ངེས་པ་དང༌། བློ་ལ་ལྟོས་པའི་ལྷག་ལྡན་གཉིས། དང་པོ་ལའང༌། ཕྱོགས་གཉིས་ཀར་ཁྱབ་པར་ཞུགས་པ། སྒྲ་མི་རྟག་སྟེ། གཞལ་བྱ་ཡིན་པའི་ཕྱིར་ལྟ་བུ། མཐུན་ཕྱོགས་ལ་ཁྱབ་པར་མཐོང་ལ་མི་མཐུན་ཕྱོགས་ལ་ཆ་གཉིས་སུ་འཇུག་པ། སྒྲ་ཆོས་ཅན། རྩོལ་བ་ལས་བྱུང་བ་ཐལ། མི་རྟག་པའི་ཕྱིར་ལྟ་བུ། མི་མཐུན་ཕྱོགས་ལ་ཁྱབ། མཐུན་ཕྱོགས་ལ་ཆ་གཉིས་སུ་འཇུག་པ། སྒྲ་ཆོས་ཅན། རྩོལ་བྱུང་མིན་པར་ཐལ། མི་རྟག་པའི་ཕྱིར་ལྟ་བུ། ཕྱོགས་གཉིས་ཀར་ཆ་གཉིས་སུ་འཇུག་པ། དུང་སྒྲ་ཆོས་ཅན། མཉན་བྱ་ཡིན་ཏེ། རྩོལ་བྱུང་ཡིན་པའི་ཕྱིར་ལྟ་བུ་སྟེ་བཞིའོ། །འདིར་དང་པོ་དང་གསུམ་པ་བསྟན་པས་མཚོན་ནས་གཞན་རྣམས་ལའང་༼༢༩༧༽འཕྲུལ་ཤེས་པར་བྱའོ། །གཉིས་པ་ལ། ཡང་དག་ལྷག་ལྡན་དང༌། འགལ་བའི་ལྷག་ལྡན་གཉིས། དང་པོ། སྒྲ་མི་རྟག་སྟེ། བྱས་པའི་ཕྱིར་ལྟ་བུ། བྱས་པ་དང་རྟག་པ་འགལ་བར་མི་ཤེས་པ་ལ་བཀོད་ན་མཐུན་ཕྱོགས་ལ་མཐོང༌། མི་མཐུན་ཕྱོགས་ལ་མ་མཐོང་ཡང༌། མི་མཐུན་ཕྱོགས་ལ་མེད་པར་མ་ངེས་ནས་ཐེ་ཚོམ་སྐྱེད་པའོ།།

གཉིས་པ་ནི། སྒྲ་ཆོས་ཅན། རྟག་སྟེ། བྱས་པའི་ཕྱིར་ལྟ་བུ། རྟག་པ་དང་བྱས་པ་འགལ་བར་མི་ཤེས་པ་ལ་བཀོད་ན། མི་མཐུན་ཕྱོགས་ལ་མཐོང༌། མཐུན་ཕྱོགས་ལ་མ་མཐོང་ཡང་མཐུན་ཕྱོགས་ལ་ཡོད་སྲིད་སྙམ་ནས་ཐེ་ཚོམ་གྱི་ལྷག་མ་ལྡན་པའོ། །ཡང་ན། རྟགས་ཆོས་ཅན་ལས་གཞན་པའི་ཕྱོགས་གཉིས་ཀར་མི་མཐུན་པ་གང་ཡིན་པ་གཅིག་གི་ཕྱོགས་སུ་བཟུང་ནས་མཐུན་པར་སྦྱར་བ་ལ་མ་གྲགས་པའི་སྟོབས་ཀྱིས་མི་མཐུན་པ་སྣང་ནས་ཡང་དག་པར་མ་མཐོང་བས། ཕན་ཚུན་མི་མཐུན་པ་ཞེས་བྱ་བ་འདི་ནི་བསྒྲུབ་བྱ་ཡང་དག་པར་མི་འགྲུབ་པས་མི་མཐུན་པའམ་མ་དག་པ་ཡིན་པས་ཐུན་མོང་མིན་པའི་མ་ངེས་པའོ།།

དེ་ལའང་དབྱེ་ན། དོན་ལ་ལྟོས་པ་དང༌། བློ་ངོར་ལྟོས་པ་གཉིས། དང་པོ། ཕྱོགས་གཉིས་ཀར་མེད་ནས་མ་མཐོང་བ། སྒྲ་ཆོས་ཅན། མི་རྟག་སྟེ། མཉན་བྱ་ཡིན་པའི་ཕྱིར། ཞེས་པ་ལྟ་བུ། གཉིས་པ་ལ། ཕྱོགས་གཉིས་ཀར་ཡོད་ཀྱང་མ་མཐོང་བ། སྐྱེས་བུ་འདི་ཆོས་ཅན། ལྷ་ལས་ཚེ་འཕོས་པ་ཡིན་ཏེ། མིག་དང་ལྡན་པའི་ཕྱིར། ཞེས་པ་ལྟ་བུ། ལྷ་ལས་འཕོས་མ་འཕོས་གཉིས་ཀ་སུ་ཡིན་དམིགས་མ་ནུས་པས་གཉིས་ཀར་མ་མཐོང་ནས་ཐེ་ཚོམ་པའོ། །མཐུན་ཕྱོགས་ལ་ཡོད་ཀྱང་མ་མཐོང་ལ། མི་མཐུན་ཕྱོགས་ལ་མེད་ནས་མ་མཐོང་བའི་བློ་ངོར་ཐུན་མིན་དུ་གྱུར་པ། རིག་བྱེད་ཀྱི་སྒྲ་རྟག་པར་འདོད་པ་ལ། སྒྲ་ཆོས་ཅན། མི་རྟག་སྟེ། བྱས་པའི་ཕྱིར། རིག་བྱེད་ཀྱི་སྒྲ་བཞིན། ཞེས་པ་ལྟ་བུ། མི་མཐུན་པའི་ཕྱོགས་ལ་ཡོད་ཀྱང་མ་མཐོང་བ། རིག་བྱེད་པའི་ངོར། གང་མ་བྱས་ན། རྟག་པས་ཁྱབ་སྟེ། དཔེར་ན་རིག་བྱེད་བཞིན། ནམ་མཁའ་ཡང་མ་བྱས་སོ། །ཞེས་འགོད་པ་ལྟ་བུའོ།།

གསུམ་པ་དཔེ་ལྟར་སྣང་བ་ནི།

ལང་ཀའི། ཞེས་པ་ནས། དེ་ཡང་མ་གྲགས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། གཞན་དང་འཐུན་པའི་དཔེ་དང་སྦྱར་བ་ལ་མི་མཐུན་པ་ཡོད་པས་དེ་ནི་མ་ངེས་སོ་ཞེས་བྱ་བ་ནི་མ་གྲགས་པའོ། །མི་མཐུན་པ་དཔེ་དང་སྦྱར་བ་ལ་མཐུན་པ་ཡོད་པས་དེ་མ་ངེས་སོ་ཞེས་བྱ་བ་ནི། དེ་ཡང་མ་གྲགས་པའོ། །གང་མ་གྲགས་པས། གང་གིས་བརྟག་པ་མ་དག་པའོ།།

ལང་ཀའི་བདག་པོ། གཞན་ཡང་དཔེ་ལྟར་སྣང་དུ་གྱུར་པ། རྟགས་དེ་ཉིད་རྩོད་གཞིའི་ཆོས་ཅན་ལ་བཀོད་དེ། མཐུན་པ་དཔེ་ཡི་ཆོས་ཅན་དང་སྦྱར་བ་ལ། དེ་ཉིད་མཐུན་ཕྱོགས་ཁོ་ན་དང་མི་མཐུན་པར་སྣང་བ་ཡོད་པས་དེ་ནི། ༼༢༩༨༽ཐུན་མོང་མ་ཡིན་པའི་འགལ་བར་འགྱུར་བས་ཡང་དག་པའི་མཐུན་དཔེར་མ་ངེས་སོ། །ཞེས་བྱ་བ་ནི་བསྒྲུབ་བྱའི་ཆོས་ལྡན་མ་གྲུབ་པས་འཇིག་རྟེན་ན་མཐུན་པའི་དཔེར་མ་གྲགས་པའོ། །དེ་ཡང་དཔེར་ན། སྒྲ་ཆོས་ཅན། རྟག་པ་ཡིན་ཏེ། ལུས་ཅན་མིན་པའི་ཕྱིར། དཔེར་ན་ནམ་མཁའ་བཞིན། ཞེས་བཀོད་ན་མ་དག་སྟེ། སྒྲ་ཆོས་ཅན། མི་རྟག་པ་ཡིན་ཏེ། ལུས་ཅན་མིན་པའི་ཕྱིར། དཔེར་ན། སེམས་དང་སེམས་ལས་བྱུང་བ་བཞིན། ཞེས་བརྗོད་ན། ཕྱོགས་གང་གིའང་མཐུན་ཆ་ཡོད་པས་ཡང་དག་ཁོ་ན་དང་མཐུན་པ་མ་ཡིན་པ་དང༌། ཆོས་ཉིད་ཆོས་ཅན། མ་སྐྱེས་པ་ཡིན་ཏེ། ཡང་དག་གི་གཅིག་དང་དུ་མ་བྲལ་བའི་ཕྱིར། དཔེར་ན་ནམ་མཁའི་མེ་ཏོག་བཞིན། ཞེས་བཀོད་ན་ཡང་དཔེ་ལྟར་སྣང་བ་ཡིན་ཏེ། ནམ་མཁའི་མེ་ཏོག་གི་མཚན་ཉིད་ཡོངས་སུ་ཆད་པའི་ཀུན་བརྟགས་ཡིན་པས་མཐུན་དཔེར་མ་ངེས་པའོ། །དེ་བཞིན་དུ་མི་མཐུན་པའི་དཔེ་དང་སྦྱར་བ་ལ་ཡང་མཐུན་པའི་དཔེ་ཡི་ཆར་སྣང་བ་ཡོད་པས་མི་མཐུན་པ་ཁོ་ནར་མ་གྲུབ་པ་དེ་ནི་ཐུན་མོང་མ་ཡིན་པས་འགལ་བ་ཡིན་པས་མི་མཐུན་པའི་དཔེ་ཉིད་དུ་མ་ངེས་པའོ། །ཞེས་བྱ་བ་ལྟ་བུ་དེ་ཡང་འཇིག་རྟེན་ན་མི་མཐུན་པའི་དཔེའི་ཆོས་ཅན་དུ་མ་གྲགས་པའོ། །དཔེར་ན། སྔ་མ་བཟློག་པའམ། ནམ་མཁའ་ཆོས་ཅན། རྟག་པ་ཡིན་ཏེ། ལུས་ཅན་མིན་པའི་ཕྱིར། དཔེར་ན་བུམ་པ་བཞིན། ཞེས་མི་མཐུན་པའི་དཔེར་བཀོད་ན་ལྟར་སྣང་ཡིན་ཏེ། འགོག་པ་ཆོས་ཅན། འདུས་བྱས་མ་ཡིན་ཏེ། ལུས་ཅན་མིན་པའི་ཕྱིར། དཔེར་ན་ནམ་མཁའ་བཞིན། ཞེས་བརྗོད་ན། རྟགས་དེའི་མཐུན་པའི་དཔེར་ཡང་འགྱུར་ལ། ཡང་ཆོས་ཉིད་ཆོས་ཅན། འདུས་མ་བྱས་པ་ཡིན་ཏེ། རྒྱུ་རྐྱེན་གྱིས་མ་བསྐྱེད་པའི་ཕྱིར། དཔེར་ན་བུམ་པ་བཞིན། ཞེས་བྱས་ན། ཆོས་ཉིད་ཀྱང་རྟག་པ་ཐེར་ཟུག་མ་ཡིན་ལ། བུམ་པ་ཡང་རྟག་པ་ཐེར་ཟུག་མ་ཡིན་པར་མཐུན་ཆ་ཡོད་པས་དེ་ནི་མི་མཐུན་པའི་དཔེར་མ་ངེས་པའོ།།

བཞི་པ་ཆོས་ཅན་ལྟར་སྣང་བ་ནི།

གང་མ་གྲགས་པས། ཞེས་པ་ནས། མ་དག་པའོ། །ཞེས་པའི་བར་གྱིས་བསྟན་ཏེ།

གང་མ་གྲགས་པས། གང་གིས་བརྟག་པ་མ་དག་པའོ།།

གང་མཐུན་སྣང་དུ་མ་གྲགས་པས་རྒོལ་ཕྱིར་རྒོལ་གང་གིས་རང་རང་ག་ིབརྟགས་པ་ཉིད་ཆོས་ཅན་དུ་བཟུང་ན་མ་དག་པའི་ལྟར་སྣང་དུ་འགྱུར་པའོ། དཔེར་ན། བུམ་པ་རྟག་པ་འདི་ལ་ཆོས་ཅན་བྱས་ན་སངས་རྒྱས་པ་ལ་མ་གྲུབ། མི་རྟག་པ་འདི་ཞེས་ཆོས་ཅན་དུ་བྱས་ན་མུ་སྟེགས་པ་ལ་མ་གྲུབ་པ་ལྟ་བུའོ།།

ལྔ་པ་ལུང་ལྟར་སྣང་བ་བཤད་པ་ནི།

གང་རང་བཞིན། ༼༢༩༩༽ཞེས་པ་ནས། མ་ངེས་པའོ། །ཞེས་པའི་བར་གྱིས་བསྟན་ཏེ།

གང་རང་བཞིན་གྱིས་མ་དག་པ་ནི་མ་ངེས་པའོ།།

གང་ཚད་མས་གཏན་ལ་དབབ་པའི་འབྲས་བུ་ཡང་དག་པའི་གནས་ལུགས་སུ་རང་བཞིན་གྱིས་མ་གྲུབ་ཅིང༌། དེ་ལྟར་རྟོགས་ཏེ་ངེས་པ་ལའང་མ་གྲགས་པར་ཚད་མ་གཞན་གྱིས་གནོད་པ་ཡོད་པས་མ་དག་པའི་རྣམ་པར་སྣང་བ་ནི། དེའི་བྱ་བ་ངང་གིས་མ་དག་པ་དང༌། བྱེད་པའི་ཤེས་པ་རིགས་པས་མ་དག་པར་སྣང་བས་ན་ཡང་དག་པར་ངེས་པ་ལས་ལོག་སྟེ་མ་ངེས་པར་གྱུར་བའི་ལུང་ནི་ལྟར་སྣང་དུ་གྱུར་པ་ཡེ་ནས་སྐྱོན་ཅན་ཁོ་ནའོ། །དེ་ཡང་སངས་རྒྱས་ཀྱི་ལུང་དུ་དྲངས་པ་ལ་མུ་སྟེགས་པའི་ལུང་དུ་བྱུང་ན་མ་དག་ལ། མུ་སྟེགས་པའི་ལུང་དུ་དྲངས་པ་ལ་སངས་རྒྱས་པའི་ལུང་དུ་སོང་ན་མ་དག་པའོ། །ཞེས་སྔགས་དང་མཚན་ཉིད་ལ་སོགས་པ་ཡང་འགྲེའོ། །དེ་ལ་ཚད་མ་འདི་ཚོ་མཐུན་ཕྱོགས་ལ་ཡང་གཞན་ཟེར། མི་མཐུན་པའི་ཕྱོགས་ལ་ཡང་གཞན་ཟེར་བས་འགྱུར་ངན་ནོ། །བྱས་པ་ལ། མདོ་སྡེ་བཀའ་ཡང་དག་པའི་ཚད་མ་ལ་དགོངས་པ་ངེས་པར་འགྲེལ་བའི་མདོ་ལས་ཁུངས་དྲངས་པ་ན་ཡང༌། འགྱུར་འདི་ཁོ་ན་ལྟར་བཞུགས་སོ། །དེས་ན་སྐ་ཅོག་གི་འགྱུར་དང་མཐུན་པ་ཡིན་པར་ཡིད་ཆེས་པར་བྱའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། སྒྲུབ་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་བསྒྲུབ་པའོ།།

ལང་ཀའི་བདག་པོ། བཤད་མ་ཐག་པ་དེ་དག་ནི་འཐད་པ་སྒྲུབ་པའི་རིགས་པ་ཡིན་པར་ཤེས་པར་བྱའོ།།

བཞི་པ་ངོ་བོ་ཆོས་ཉིད་ཀྱི་རིགས་པ་ནི།

ལང་ཀའི། ཞེས་པ་ནས། མ་བཅོས་པ་ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཆོས་གང་ཞེ་ན། གང་དུ་ཡང་མ་བཅོས་པ་ཉིད་དོ།།

ལང་ཀའི་བདག་པོ། དེ་ལ་ཆོས་ཉིད་ཀྱི་རིགས་པ་གང་ཞེ་ན། གང་ཐ་སྙད་ཀྱི་དབང་དུ། མེའི་ཆོས་ཉིད་རང་བཞིན་གྱིས་ཚ་བ་དང༌། ཆུའི་ཆོས་ཉིད་རང་བཞིན་གྱིས་གཤེར་བ་ལྟ་བུ་ལ་སོགས་པ་མ་བཅོས་པ་དང༌། དོན་དམ་གྱི་དབང་དུ་བསམ་གྱིས་མི་ཁྱབ་པའི་ཆོས་ཉིད་རང་བཞིན་ཡེ་ནས་མ་བཅོས་པར་གནས་པ་ཉིད་དོ། །དེ་སྐད་དུའང༌། ཤིང་རྟ་ཆེན་པོ་ཀླུ་སྒྲུབ་ཀྱིས། མེ་ཡི་རང་བཞིན་ཚ་བ་དང༌། །བུ་རམ་རང་བཞིན་མངར་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་བརྗོད། །ཞེས་དང༌། རང་བཞིན་གཞན་དུ་འགྱུར་བ་ནི། །ནམ་ཡང་འཐད་པ་མ་ཡིན་ཏེ། །རང་བཞིན་དག་ནི་བཅོས་མིན་དང༌། །གཞན་ལ་ལྟོས་པ་མེད་པའོ། །ཞེས་སོ།།

བརྒྱད་པ་བསྡུས་པ་དང་རྣམ་པར་སྤྲོས་པ་བཤད་པ་ནི།

ལང་ཀའི། ཞེས་པ་༼༣༠༠༽ནས། མཐར་ཕྱིན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་བསྡུས་པ་དང་། རྣམ་པར་སྤྲོས་པས་ནི་ཐམས་ཅད་ཀྱང་བསྡུས་ཏེ།

གཅིག་ལ་ཁྱད་པར་གྱིས་ཕྱེ་སྟེ་མཐར་ཕྱིན་པའོ།།

ལང་ཀའི་བདག་པོ། གང་ཚད་མ་ཐམས་ཅད་མངོན་སུམ་དང་རྗེས་དཔག་ཉིད་དུ་བསྡུས་པ་དང༌། དེ་ལས་མངོན་སུམ་བཞི་དང༌། རྗེས་དཔག་གསུམ་ལ་སོགས་པར་རྣམ་པར་སྤྲོས་པ་ཉིད་ཀྱིས་རྣམ་དབྱེ་བསྟན་པས་ནི། ཤེས་བྱའམ་གཞལ་བྱའི་ཆོས་ཐམས་ཅད་ཀྱང་མངོན་སུམ་དང་ལྐོག་གྱུར་གཉིས་སུ་བསྡུས་ཏེ། གཞལ་བྱ་གཅིག་ལའང་སྤྲོས་པའི་ཁྱད་པར་གྱིས་ཕྱེ་སྟེ་ཚད་མ་གཉིས་ཀྱིས་མཇལ་བའི་དོན་མཐར་ཕྱིན་ཏེ་གྲུབ་མཐའ་ཡང་དག་པར་ངེས་པའོ།།

ཡང་ན་འགྲེལ་ཆེན་ལྟར། གང་ཤེས་པའི་རིགས་གཅིག་ཉིད་དུ་བསྡུས་པ་དང༌། དུ་མར་རྣམ་པར་སྤྲོས་པ་ཡི་ཚུལ་གཉིས་ཀྱིས་ནི། ཕྱི་རོལ་གྱི་ཡུལ་ཐམས་ཅད་ཀྱང་དེ་བཞིན་དུ་བསྡུས་པར་འགྱུར་ཏེ། འདིར་ཤེས་པའི་རིགས་སུ་གཅིག་པ་ལ་ལས་ཀྱི་ཁྱད་པར་གྱིས་བརྒྱད་དུ་ཕྱེ་བ་ལྟ་བུ་སྟེ། མདོར་ན་གཅིག་ལ་དུ་མའི་ཁྱད་པར་སྤྲོས་པ་དང༌། དུ་མ་ལས་གཅིག་ཏུ་བསྡུ་ཞིང་དེ་ལྟར་ཕྱེ་བས་དོན་གྱི་རྟོགས་པ་མཐར་ཕྱིན་ཏེ་དངོས་པོ་རྣམས་གཅིག་དང་དུ་མ་དང་བྲལ་བར་གྱུར་པའོ།།

གསུམ་པ་ཞབས་བསྡུ་བ་ནི།

འོག་ནས། ལང་ཀའི། ཞེས་པ་ནས། ངེས་པར་འགྲེལ་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་མཚན་ཉིད་ཀྱི་ཡན་ལག་སྟེ། ཡན་ལག་དྲུག་པོ་དེ་དག་ནི་འབྱེད་པའི་ལྡེ་མིག་སྟེ། གང་སྤྱོད་པ་འདྲེན་པའི་སྒོ་གང་ཡིན་པ་དེ་ནི་དཔེ་འབྱེད་ཅིང་།

གང་དེ་ཉིད་དུ་དགོངས་པ་ངེས་པར་འབྲེལ་ཏོ།།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། ཇི་སྐད་བཤད་པ་དེ་དག་ནི། ཆོས་རྣམས་ཀྱི་མཚན་ཉིད་བསྟན་པའི་ཕྱིར་ངོ་བོ་བསྟན་པའི་རྣམ་གྲངས་ཀྱི་ཡང་ཡན་ལག་ཏུ་གྱུར་པ་སྟེ། དེས་ན་ཡན་ལག་དྲུག་པོ་དེ་དག་ནི་རྒྱུའི་ཐེག་པ་ཐ་རམ་དང་འདྲ་བ་རྣམས་འབྱེད་པར་བྱེད་པའི་ལྡེ་མིག་སྟེ། གང་རྣམ་པར་དགར་ཏེ་བསྟན་པའི་དག་ཅིང་དཀར་བའི་སྤྱོད་པས་གདུལ་བྱ་འདྲེན་པའི་སྒོ་གང་ཡིན་པའི་ཐེག་པ་དེ་ནི།

ལྡེའུ་མིག་དེས་ངེས་པར་འབྱེད་ཅིང་གང་དེ་ཉིད་དུ་དགོངས་པ་གསལ་བར་འཆད་དེ་དྲང་དོན་གྱི་འཇུག་རིམ་ལ་གནས་ཀྱང་ངོ་བོ་ངེས་དོན་དམ་པར་འགྲེལ་ནས་ཡང་དག་པར་སྟོན་ཏོ།།

གཉིས་པ་དགྲོལ་བའི་ལྡེ་མིག་མདོ་བཞི་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། ངེས་པའི་མདོའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་མདོ་བཞི་གང་ཞེ་ན། འདི་ལྟ་སྟེ། དགོངས་པ་གཞན་པའི་མདོ་དང་། ལྡེམ་པོ་ངག་གི་མདོ་དང་། འཐུན་འཇུག་སྦྱོར་བའི་མདོ་དང་། དོན་དམ་ངེས་པའི་མདོའོ།།

ལང་ཀའི་བདག་པོ། ཞེས་བོས་ནས། དེ་ལ་དགྲོལ་བའི་ལྡེའུ་མིག་མདོ་བཞི་གང་ཞེ་ན། འདི་ལྟ་སྟེ། དགོངས་པ་གཞན་པའི་མདོ་དང༌། ལྡེམ་པོ་ངག་གི་མདོ་དང༌། མཐུན་འཇུག་སྦྱོར་བའི་མདོ་དང༌། དོན་དམ་ངེས་པའི་༼༣༠༡༽མདོའོ་ཞེས་བཞིའི་གྲངས་བརྗོད་པའོ།།

གཉིས་པ་རྒྱས་པར་བཤད་པ་ལ་བཞི་སྟེ། དགོངས་པ་གཞན་པའི་མདོ་བཤད་པ། ལྡེམ་པོ་ངག་གི་མདོ་བཤད་པ། མཐུན་འཇུག་སྦྱོར་བའི་མདོ་བཤད་པ། དོན་དམ་ངེས་པའི་མདོ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཡུལ་ལ་དགོངས་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ལ་དགོངས་པ་གཞན་པའི་མདོ་ནི། འདི་ལྟ་སྟེ། རང་བཞིན་དང་། དུས་དང་།

དོན་དང་། ཡུལ་ལ་དགོངས་པའོ།།

ལང་ཀའི་བདག་པོ། དེ་ལ་དགོངས་པ་གཞན་པའི་མདོ་ནི། འདི་ལྟ་སྟེ། མཉམ་པ་ཉིད་ཀྱི་རང་བཞིན་ལ་དགོངས་པ་དང༌། དུས་གཞན་ལ་དགོངས་པ་དང༌། དོན་གཞན་ལ་དགོངས་པ་དང༌། གང་ཟག་གི་བསམ་པའི་ཡུལ་གཞན་ལ་དགོངས་པ་དང་བཞིའོ།།

གཉིས་པ་རྒྱས་པར་བཤད་པ་ལ་བཞི་སྟེ། མཉམ་པ་ཉིད་ལ་དགོངས་པ་བསྟན་པ། དུས་གཞན་ལ་དགོངས་པ་བསྟན་པ། དོན་གཞན་ལ་དགོངས་པ་བཤད་པ། གང་ཟག་གི་བསམ་པ་ལ་དགོངས་པ་བཤད་པའོ། །དང་པོ་ནི།

ལང་ཀའི། ཞེས་པ་ནས། ཞལ་གྱིས་སྩལ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། རང་བཞིན་ནི་འདི་ལྟར། ཇི་ག་ཁྱད་པར་སྣང་བ་ལ། གང་དེ་ལྟར་རྟོག་པ་ཞེན་པ་དག་གསལ་བའི་ཕྱིར་རང་བཞིན་ལ་དགོངས་ཏེ། དེ་གང་ཡིན་པ་ནི་འདི་ཉིད་དོ་ཞེས་གཅིག་ཏུ་ཞལ་གྱིས་སྩལ་བའོ།།

ལང་ཀའི་བདག་པོ། ཞེས་བོས་ནས། དེ་ལ་རང་བཞིན་མཉམ་པ་ཉིད་ལ་དགོངས་པ་ནི། འདི་ལྟར་ཏེ། གདུལ་བྱའི་གང་ཟག་ཁ་ཅིག་གིས། གང་ཇི་ག་ཞིག་དུས་གསུམ་གྱི་རྒྱལ་བ་སོ་སོའི་ཁྱད་པར་མི་མཚུངས་པ་དང༌། སངས་རྒྱས་མར་མེ་མཛད་དང་རྣམ་པར་གཟིགས་པས་ཤཱཀྱ་ཐུབ་པ་གདུལ་ཞིང་ཆུང་བས་ངན་ནམ་སྙམ་དུ་སངས་རྒྱས་བཟང་ངན་ཅན་དུ་སྣང་བ་ལ། གང་དགོས་ཆེད་དེ་ལྟར་སངས་རྒྱས་བཟང་ངན་དང་གཉིས་སུ་རྟོག་པ་ཡི་ཞེན་པ་དེ་དག་བསལ་བར་བྱ་བའི་ཕྱིར། དགོངས་གཞི་རྒྱལ་བ་གཉིས་པོ་ཡང་རང་བཞིན་ཆོས་སྐུར་མཉམ་པ་ལ་དགོངས་ཏེ། ཆོས་སྟོན་ཚུལ། རྣམ་འདྲེན་ཤཱཀྱ་ཐུབ་པས། དེ་ལ་རྣམ་པར་གཟིགས་ཞེས་བྱ་བ་གང་ཡིན་པ་ནི། འདི་ལྟར་ཤཱཀྱ་ཐུབ་པ་ང་ཉིད་དོ། །ཞེས་གཅིག་པ་ཉིད་དུ་ཞལ་གྱིས་བཞེས་ཏེ་བཀའ་སྩལ་པ་ལྟ་བུའོ།།

གཉིས་པ་དུས་གཞན་ལ་དགོངས་པ་བསྟན་པ་ནི།

ལང་ཀའི། ཞེས་པ་ནས། འགྱུར་རོ་ཞེས་སྟོན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དུས་ནི་འདི་ལྟར་སྒྱིད་ལུག་པ་གང་དག་མངོན་པར་སྤྲོ་བ་བསྐྱེད་པའི་ཕྱིར།

གང་གི་རྒྱུ་འབྲས་མི་བསླུ་བ་དགོངས་ཏེ་གྱིན་འདའ་ཙམ་འདིས་མྱུར་དུ་འགྱུར་རོ་ཞེས་སྟོན་པའོ།།

ལང་ཀའི་བདག་པོ། དུས་གཞན་ལ་དགོངས་པ་ནི། འདི་ལྟར་ཏེ། གདུལ་བྱ་ཁ་ཅིག་རྩོལ་བ་དང་མོས་པ་དང་ཤེས་རབ་ཆུང་བས། རྒྱ་ཆེན་པོའི་བྱ་བ་ལ་སེམས་ཞུམ་ནས་སྒྱིད་ལུག་པ་ཡི་ལེ་ལོ་ཅན་གང༌། སངས་རྒྱས་ཀྱི་ཆོས་ཐབས་དང་བརྩོན་པ་ཆེན་པོས་སྒྲུབ་དགོས་ཟེར་བ་དེ་ཙམ་མི་འགྲུབ་ལ་མི་ལྕོགས་པས་འབྲས་བུ་ཐོབ་པར་མི་ནུས་༼༣༠༢༽ཞེས་སྨྲ་བ་དག་ལ། དགོས་ཆེད་སེམས་དྭངས་ཤིང་མངོན་པར་སྤྲོ་བ་སྐྱེད་པའི་ཕྱིར་དུ། དགོངས་གཞི་གང་རྒྱུ་ཆུང་ངུས་ཀྱང་བརྒྱུད་ནས་ཐོབ་པས། དེ་དག་གི་རྒྱུ་འབྲས་མི་བསླུ་བས་དོན་དེ་ཉིད་དུས་ནམ་ཞིག་འགྲུབ་པ་ལ་དགོངས་ཏེ། ཆོས་སྟོན་ཚུལ། ཨཱརྱ་པ་ལོ། ཞེས་བརྗོད་པ་དང༌། ལྷ་ཕྱག་གཅིག་འཚལ་བ་དང༌། ཡིད་ཀྱིས་སྐད་ཅིག་ཙམ་མོས་པའི་སྒོ་གསུམ་གྱི་བྱ་བས་ཀྱང་འཕགས་པ་དེ་ཉིད་ཀྱི་ཞལ་མཐོང་ངོ༌། །ཞེས་དང༌།

སྣང་བ་མཐའ་ཡས་ཀྱི་མཚན་ཐོས་པ་ཙམ་གྱིས་ཞིང་དེར་སྐྱེ་བ་དང༌། ཤཱཀྱ་ཐུབ་པའི་མཚན་ཐོས་པས་ཕྱིར་མི་ལྡོག་པ་འཐོབ་བོ། །ཞེས་པ་ལྟ་བུ། གྱིན་འདའ་ཙམ་འདིས་མྱུར་བ་ཉིད་དུ་འགྲུབ་པར་འགྱུར་རོ་ཞེས་བཀའ་སྩལ་ཏེ་ཆོས་སྟོན་པར་མཛད་པའོ།།

གསུམ་པ་དོན་གཞན་ལ་དགོངས་པ་བཤད་པ་ནི།

ལང་ཀའི། ཞེས་པ་ནས། ཞེས་བསྒོའོ། །ཞེེས་པའི་བར་གྱིས་བསྟན་ཏེ།

ལངྐའི་བདག་པོ་དོན་ནི་འདི་ལྟར། གང་གིས་གང་ལ་རློམ་སེམས་པ་དག དེའི་མུན་པ་བསལ་བའི་ཕྱིར།

གང་གིས་མཐོང་ལམ་མ་ཐོབ་པར་དེ་ཉིད་མི་མཐོང་བ་ལ་དགོངས་ཏེ། འདི་དག་ནི་དཔག་ཏུ་མེད་པའི་

དམ་པས་མ་བསྙད་པར་ཤེས་པར་མི་ནུས་སོ་ཞེས་བསྒོའོ།།

ལང་ཀའི་བདག་པོ། དོན་གཞན་ལ་དགོངས་པ་ནི། འདི་ལྟར་ཏེ། གདུལ་བྱ་གང་དག་གིས་ཤེས་བྱའི་གནས་ལུགས་ཟབ་མོའི་དོན་མ་མཐོང་བར་ཚིག་ཐོས་པ་ཙམ་གང་ལ་ངས་ཇི་བཞིན་པར་རྟོགས་སོ། །ཞེས་ཡོན་ཏན་ཆུང་ངུ་ཙམ་གྱིས་ང་རྒྱལ་ནས་རློམ་སེམས་པ་དག་ལ། དགོས་ཆེད་དེའི་རྒྱུད་ཀྱི་མ་རིག་པའི་མུན་པ་བསལ་ཏེ་དོན་རྣལ་མ་ལ་གཞུག་པའི་ཕྱིར་དུ། དགོངས་གཞི་གང་ཞིག་གིས་ས་དང་པོ་མཐོང་ལམ་མ་ཐོབ་ཀྱི་བར་དུ་དེ་བཞིན་ཉིད་རང་གི་མཚན་ཉིད་མི་མཐོང་བ་ལ་དགོངས་ཏེ། ཆོས་སྟོན་ཚུལ། འདི་ལྟར་ཆོས་ཉིད་རྣམ་པར་དག་པའི་དོན་མཐོང་བར་བྱ་བ་ནི། དཔག་ཏུ་མེད་པའི་རྒྱལ་བ་རྣམ་འདྲེན་དམ་པ་མང་པོ་ལ་བསྙེན་བཀུར་བྱས་ཏེ། དེ་དག་གིས་ཆོས་བསྟན་པས་ཐེ་ཚོམ་བཅད་དེ་དོན་ཟབ་མོ་ཡང་དག་པར་མ་བསྙད་པའམ་མ་སྩལ་བར་ཤེས་ཤིང་རྟོགས་པར་མི་ནུས་སོ། །ཞེས་བསྒོ་བར་མཛད་པ་ལྟ་བུའོ།།

བཞི་པ་གང་ཟག་གི་བསམ་པ་ལ་དགོངས་བཤད་པ་ནི།

ལང་ཀའི། ཞེས་པ་ནས། ཕྱོགས་ལ་སྨོད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡུལ་ལ་དགོངས་པ་ནི་འདི་ལྟར། གང་ཕྱོགས་གཅིག་ཙམ་གྱིས་ཆོག་པར་འཛིན་པ་དག་བློ་བསྐྱེད་པའི་ཕྱིར། གང་གི་ཕྱོགས་ཀུན་བཀོད་དེ་ཡོངས་སུ་བསྔགས་པ་བརྗོད་ཅིང་།

གང་ཕྱོགས་གཅིག་གིས་མི་ཆོག་པ་ལ་དགོངས་ཏེ། སྔོན་དུ་གོམས་པའི་ཕྱོགས་ལ་སྨོད་པའོ།།

ལང་ཀའི་བདག་པོ། གདུལ་ཡུལ་གང་ཟག་གི་བསམ་པ་ལ་དགོངས་པ་ནི། འདི་ལྟར་ཏེ། གདུལ་བྱ་གང་སུ་ཞིག་སྦྱིན་པའམ་ཉེའུ་འདོན་ནམ་ཚུལ་ཁྲིམས་ལྟ་བུ་དགེ་བ་ཕྱོགས་གཅིག་གི་ཆ་ཙམ་གྱིས་འབྲས་བུ་ཐོབ་པར་བཟུང་ནས། གཞན་མི་བྱེད་པར་དེ་ཙམ་གྱིས་ཆོག་པར་འཛིན་པ་དག་ལ། དགོས་ཆེད། དེ་དག་གི་བློ་གྲོས་རྒྱ་བསྐྱེད་དེ། དགེ་རྩ་ཤིན་ཏུ་རྒྱ་ཆེན་པོ་ལ་གཟུད་པའི་ཕྱིར། གང་ཕ་རོལ་ཏུ་ཕྱིན་༼༣༠༣༽པ་བཅུ་ལ་སོགས་པ་གོང་མ་དག་གི་ཕྱོགས་ལ་བློ་སྟོབས་ཆེན་པོ་ཀུན་བཀོད་དེ། དེ་རྣམས་ཀྱི་དགེ་བ་ཇི་སྙེད་པའི་ཡོན་ཏན་ལ་ཡོངས་སུ་བསྔགས་པ་བརྗོད་ཅིང༌། དགོངས་གཞི་གང་ཕྱོགས་ཆ་གཅིག་གིས་འབྲས་བུ་ལ་སྦྱོར་མི་ནུས་པས་དེ་ཙམ་གྱིས་མི་ཆོག་པ་ལ་དགོངས་ཏེ། ཆོས་སྟོན་ཚུལ། སྦྱིན་པ་ལ་དགའ་བ་ཞིག་ན་སྦྱིན་པ་བས་ཀྱང༌ཚུལ་ཁྲིམས་ལ་སོགས་པ་དགེ་བ་གཞན་སྟོང་འགྱུར་གྱིས་ཆེ་བར་བརྗོད་པ་ལྟ་བུ། མདོར་ན་ཁ་ཅིག་གིས་དགེ་བ་གང་སྤྱོད་པ་དེ་ལས་གཞན་དགེ་རྩ་ཆེ་བར་བརྗོད་དེ་སྔོན་དུ་གོམས་ཤིང་ཞེན་པའི་ཕྱོགས་དེ་དག་ལ་བདུད་ཀྱི་ལས་སུ་བསྟན་པ་སོགས་ཀྱིས་སྨོད་པར་མཛད་པའོ།།

གཉིས་པ་ལྡེམ་པོ་ངག་གི་མདོ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། བསླུ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་ལྡེམ་པོ་ངག་གི་མདོ་ནི། འདི་ལྟ་སྟེ། སྦྱོར་བ་དང་། དབྱེ་བ་དང་།

ཟིལ་གྱིས་གནོན་པ་དང་། བསླུ་བའོ།།

ལང་ཀའི་བདག་པོ། ཞེས་བོས་ནས། དེ་ལ་དོན་གཞན་དུ་ལྡེམ་པས་གདུལ་བྱ་གཞུག་པའི་ཐབས་དམ་པ་ལྡེམ་པོ་ངག་གི་མདོ་ནི། འདི་ལྟ་སྟེ། སྦྱོར་བ་གཞུག་པ་ལ་ལྡེམ་པོར་དགོངས་པ་དང༌། དབྱེ་བ་མཚན་ཉིད་ལ་ལྡེམ་པོར་དགོངས་པ་དང༌། ཟིལ་གྱིས་གནོན་པ་གཉེན་པོ་ལ་ལྡེམ་པོར་དགོངས་པ་དང༌། བསླུ་བའི་རྣམ་ཅན་བསྒྱུར་བ་ལ་ལྡེམ་པོར་དགོངས་པ་སྟེ་བཞིའོ།།

གཉིས་པ་རྒྱས་པར་བཤད་པ་ལ་བཞི་སྟེ། གཞུག་པ་ལ་ལྡེམ་པ་བཤད་པ། མཚན་ཉིད་ལ་ལྡེམ་པ་བསྟན་པ། གཉེན་པོ་ལ་ལྡེམ་པ་བཤད་པ། བསྒྱུར་བ་ལ་ལྡེམ་པ་བསྟན་པའོ། །དང་པོ་ནི།

ལང་ཀའི། ཞེས་པ་ནས། གཞུག་པའི་ཕྱིར་རོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་སྦྱོར་བ་ནི། གང་འདི་ལྟར་གང་སྐྲག་ཅིང་དངངས་པ་དག ཚི་ཆད་པར་རྩོལ་བ་དང་།

གང་མངོན་པར་ཞེན་པ་དག ཅི་ལ་ཡང་མི་འཇུག་པ་དེ་དག་གང་གི་དོན་ལ་ངེས་པར་གཞུག་པའི་ཕྱིར།

གང་དང་གང་གི་འབྲས་བུ་ཡོད་པ་དང་། ཀུན་ཀྱང་རང་བཞིན་མེད་ལ་དགོངས་ཏེ།

ཐམས་ཅད་ཡོད་དོ་ཞེས་བྱ་བ་དང་། སྟོང་པ་ཉིད་དོ་ཞེས་གང་གི་འདུ་ཤེས་གཞུག་པའི་ཕྱིར་རོ།།

ལང་ཀའི་བདག་པོ། དེ་ལ་ཡང་དག་པའི་དོན་ལ་སྦྱོར་བའི་ཕྱིར། གཞུག་པ་ལ་ལྡེམ་པོར་དགོངས་པ་ནི། གང་འདི་ལྟར་ཏེ། གང་གདུལ་བྱ་ཐེག་པ་ཆུང་ངུའི་རིགས་ཅན་སུ་ཞིག་དོན་ཟབ་མོ་སྟོང་པ་ཉིད་ལ་སྐྲག་ཅིང་སྔངས་པ་དག རྒྱུ་འབྲས་ལ་མངོན་པར་ཞེན་ནས་བྱ་བ་སྣ་ཚོགས་ལ་འབད་པ་ཆེན་པོས་ཚི་ཆད་པའམ་ཤ་ཐང་བར་རྩོལ་སྒྲུབ་བྱེད་པ་དང༌། གང་ཐེག་པ་ཆེན་པོ་ལ་ཞུགས་ཀྱང་སུ་ཞིག་དངོས་པོར་ལྟ་བ་ལ་མངོན་པར་ཞེན་པ་དག ཁ་ལྟ་ལ་གནས་ཏེ་དཀར་སྤྱོད་ཀྱི་དགེ་བ་ཅི་ལ་ཡང་མི་འཇུག་པ་དེ་དག དགོས་ཆེད་རྣམ་བྱང་གི་བྱ་བ་དང༌། སྟོང་པ་ཉིད་གང་གི་དོན་ལ་ངེས་པར་གཞུག་པའི་ཕྱིར་དུ། དགོངས་གཞི། ཐ་སྙད་དུ་རྒྱུ་གང་དང་གང་གི་དགེ་༼༣༠༤༽བ་ལ་སྤྱད་ན་བརྒྱུད་པའི་འབྲས་བུ་ཡོད་པར་མི་བསླུ་བ་དང༌། ཆོས་སོ་ཅོག་ཀུན་ཀྱང་དོན་དམ་པར་རང་བཞིན་མེད་ཅིང་མ་སྐྱེས་པ་ལ་དགོངས་ཏེ། ཆོས་སྟོན་ཚུལ། སྔངས་པས་རྩོལ་བ་ལ་རྒྱུ་འབྲས་ཀྱི་ཆོས་ཐམས་ཅད་ལ་ངོ་བོ་ཡོད་དོ་ཞེས་བྱ་བ་མཐུན་པར་དགོངས་ཏེ་གསུངས་པ་དང༌། དངོས་པོ་ལ་མངོན་པར་ཞེན་པ་བཟློག་པའི་ཕྱིར། ཆོས་ཐམས་ཅད་སྟོང་པ་ཉིད་དོ། །ཞེས་བརྗོད་དེ་གདུལ་བྱ་གང་དག་གི་འདུ་ཤེས་ཡང་དག་པའི་དོན་ལ་གཞུག་པའི་ཕྱིར་རོ།།

གཉིས་པ་མཚན་ཉིད་ལ་ལྡེམ་པ་བསྟན་པ་ནི།

ལང་ཀའི། ཞེས་པ་ནས། གསུམ་བསྟན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དབྱེ་བ་ནི་འདི་ལྟར། གང་དང་གང་ལ་མོས་པ་དེ་ལྟར། ཀུན་བརྟགས་པ་དངོས་པོ་མེད་པར་བཤད་པ་དང་། གཞན་གྱི་དབང་རྟེན་ཅིང་འབྲེལ་བར་འབྱུང་བ་བཤད་པ་དང་། ཡོངས་སུ་གྲུབ་པར་མི་འགྱུར་བ་ཕྱིན་ཅི་མ་ལོག་པར་བཤད་པ་དགོངས་ཏེ་གསུམ་བསྟན་པའོ།།

ལང་ཀའི་བདག་པོ། འཕགས་པ་ལང་ཀར་གཤེགས་པའི་མདོ་ལས། བརྟགས་པ་ཤིན་ཏུ་མ་གྲུབ་སྟེ། །གཞན་ལས་བྱུང་བ་མ་ཡིན་ནོ། །དེ་ཚེ་དོན་དམ་རང་བཞིན་ནི། །ཤིན་ཏུ་དག་པ་ཤེས་པར་འགྱུར། །ཞེས་གསུངས་པ་ལྟར། དབྱེ་གཞིའི་དོན་མཐོང་བའི་ཕྱིར་མཚན་ཉིད་ལ་ལྡེམ་པོར་དགོངས་པ་ནི། འདི་ལྟར་ཏེ། གདུལ་བྱ་རྟག་པ་དང་ཆད་པ་གང་དང་གང་ལ་མོས་པ་དེ་ལ་དེ་དང་མཐུན་པ་ལྟར། དགོས་ཆེད་རྟག་པར་ལྟ་བ་བཟློག་པའི་ཕྱིར། དགོངས་གཞི་ཀུན་བརྟགས་ལ་རང་གི་མཚན་ཉིད་ཀྱི་ངོ་བོ་ཉིད་མེད་པ་ལ་དགོངས་ཏེ། ཆོས་སྟོན་ཚུལ། དངོས་པོ་ཐམས་ཅད་རང་བཞིན་མེད་པར་བཤད་པ་དང༌། དགོས་ཆེད་ཆད་པར་ལྟ་བ་བཟློག་པའི་ཕྱིར། དགོངས་གཞི་གཞན་གྱི་དབང་ལ་རང་ལས་སྐྱེ་བའི་ངོ་བོ་ཉིད་མེད་པ་ལ་དགོངས་ཏེ། ཆོས་སྟོན་ཚུལ། རྒྱུ་རྐྱེན་ལས་བྱུང་བའི་ཆོས་ཐམས་ཅད་རྟེན་ཅིང་འབྲེལ་བར་འབྱུང་བར་བཤད་པ་དང༌། རྟག་པར་ཞེན་པ་དག་གདུལ་བའི་དགོས་ཆེད་ཀྱི་ཕྱིར། དགོངས་གཞི་ཡོངས་སུ་གྲུབ་པ་ལ་དོན་དམ་པར་ངོ་བོ་ཉིད་མེད་པ་ལ་དགོངས་ཏེ། སྟོན་ཚུལ། ཆོས་ཐམས་ཅད་ཀྱི་ཆོས་ཉིད་མི་འགྱུར་བ་དང་ཕྱིན་ཅི་མ་ལོག་པ་ཡི་རང་བཞིན་ཡིན་པར་བཤད་པའི་སྒོ་ནས་མཚན་ཉིད་རྣམ་པ་གསུམ་ལ་དགོངས་ཏེ་རྟག་མཐའ་གཉིས་དང་ཆད་པའི་མཐའ་གཅིག་སྟེ་མཐའ་གསུམ་བསལ་བའི་ཆེད་དུ་སྟོན་ཚུལ་གསུམ་དུ་བསྟན་པའོ།།

གསུམ་པ་གཉེན་པོ་ལ་ལྡེམ་པ་བཤད་པ་ནི།

ལང་ཀའི། ཞེས་པ་ནས། རྒྱ་ཆེན་པོ་དག་སྟོན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཟིལ་གྱིས་གནོན་པ་ནི་འདི་ལྟ་སྟེ། གང་ཕུན་སུམ་ཚོགས་པའི་གྲགས་པ་དང་། རྫོགས་ལོངས་སྤྱོད་པ་དག་བསྟན་པས་ཟིལ་གྱིས་མནན་པའི་ཕྱིར། གཉེན་པོ་གྱུར་པས་འདུལ་

བར་དགོངས་ཏེ་རྒྱ་ཆེན་པོ་དག་སྟོན་པའོ།།

ལང་ཀའི་བདག་པོ། མི་མཐུན་པའི་ཕྱོགས་ཟིལ་གྱིས་གནོན་པའི་ཕྱིར་གཉེན་པོ་ལ་ལྡེམ་པོར་དགོངས་པ་ནི། འདི་ལྟར་ཏེ། གདུལ་བྱ་གང་ཞིག་འཇིག་རྟེན་ན་རིགས་དང་ལོངས་སྤྱོད་དང་གཟུགས་བྱད་སོགས་ཕུན་སུམ་ཚོགས་པའི་ཁྱད་པར་དང་༼༣༠༥༽ལྡན་པར་གྲགས་པ་ལ། དེ་ཡིས་ཆེ་བར་རློམ་ནས་ང་རྒྱལ་གྱིས་ཁེངས་ཤིང་དྲེགས་པ་དག དགོས་ཆེད་དེ་བས་ཀྱང་འཕགས་པའི་རྒྱལ་བ་རྫོགས་ལོངས་སྤྱོད་པ་ལྟ་བུ་དམ་པ་དག་གི་ཡོན་ཏན་བསྟན་ནས་ཟིལ་གྱིས་གནོན་པའི་ཕྱིར། དགོངས་གཞི། ཁོའི་ཆེ་བའི་ང་རྒྱལ་གྱི་གཉེན་པོར་གྱུར་པས་འདུལ་བར་དགོངས་ཏེ། ཆོས་སྟོན་ཚུལ། རྒྱལ་བའི་སྐུའི་མཚན་དཔེ་དང་ཞིང་ཁམས་དང་ལོངས་སྤྱོད་དང་འཁོར་ལ་སོགས་པ་ཡོན་ཏན་གྱི་བཀོད་པ་རྒྱ་ཆེན་པོ་དག་སྟོན་ཅིང་བཤད་པས་རིམ་པར་དྲང་ནས་མཐར་ཐུག་དེ་ཉིད་ཐོབ་པ་ལ་འཇུག་པར་བྱེད་པ་ལྟ་བུའོ།།

བཞི་པ་བསྒྱུར་བ་ལ་ལྡེམ་པ་བསྟན་པ་ནི།

ལང་ཀའི། ཞེས་པ་ནས། རྒྱུ་གཞན་དུ་སྟོན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་བསླུ་བ་ནི་འདི་ལྟར། གང་འདུ་ཤེས་ལོག་པ་དག སྦས་པའི་ཐབས་ཀྱིས་ངེས་པར་བསྒྱུར་བའི་ཕྱིར། དོན་མི་གྱུར་བ་ལ་དགོངས་ཏེ་རྒྱུ་གཞན་སྟོན་པའོ།།

ལང་ཀའི་བདག་པོ། བསླུ་བའི་རྣམ་པ་ཅན་གྱིས་དོན་ལ་སྦྱོར་བ་བསྒྱུར་བ་ལ་ལྡེམ་པོར་དགོངས་པ་ནི། འདི་ལྟར་ཏེ། གདུལ་བྱ་གང་མཚམས་མེད་པ་ལྔ་དང་མི་དགེ་བ་བཅུ་སོགས་ལོག་སྲེད་ཅན་གྱི་སྤྱོད་པ་ལ་དགའ་ནས་འདུ་ཤེས་ཕྱིན་ཅི་ལོག་ཏུ་གྱུར་པ་དག དགོས་ཆེད། དེ་ཁོ་ན་ཉིད་དང་དང་མཐུན་པར་སྤྱད་པས་གྲོལ་བ་ལྟ་བུ། ངེས་པའི་དོན་ཟབ་མོ་གསང་བའམ་སྦས་པའི་ཐབས་ཀྱིིས་འདུ་ཤེས་ཀྱི་བློ་ངན་པ་དེ་ངེས་པར་བསྒྱུར་པ་ལ་གཞུག་པའི་ཕྱིར་དུ། དགོངས་གཞི། དོན་ཆོས་ཉིད་ཀྱི་ངང་ལ་དགེ་སྡིག་མ་གྲུབ་པས་རིལ་མ་སྐྱེས་པའི་དབྱིངས་ལས་མི་འགྱུར་བ་ལ་དགོངས་ཏེ། ཆོས་སྟོན་ཚུལ། བྱང་ཆུབ་སྒྲུབ་པའི་རྒྱུ་མཚམས་མེད་ལྔ་ལ་སོགས་པ་ཡང་ཡིན་པ་ལྟ་བུར་རྣམ་པ་གཞན་དུ་སྟོན་པ་སྟེ། ཇི་སྐད་དུ།

ཕ་དང་མ་ནི་བསད་བྱ་ཞིང༌། །བྲམ་ཟེ་གཙང་སྦྲ་ཅན་གཉིས་དང༌། །རྒྱལ་པོ་ཡུལ་འཁོར་བཅས་བཅོམ་ན། །མི་དེ་ཡོངས་སུ་དག་པར་འགྱུར། །ཞེས་གསུངས་པ་ལྟ་བུ་ཐབས་དེས་དྲང་ནས་རིམ་པར་དགོངས་གཞི་ལ་བཀོད་དེ་བྱང་ཆུབ་འགྲུབ་པར་བྱེད་པ་ལྟ་བུའོ། །འོ་ན་ལྡེམ་པོ་དང་དགོངས་པ་གཉིས་ཆར་ལ་དགོངས་གཞི་རེ། གདུལ་བྱ་རེ། དགོས་ཆེད་རེ། ཆོས་སྟོན་ཚུལ་རེ་བྱུང་བས་མཚོན་ཚུལ་འདྲེས་ཏེ། དགོངས་ལྡེམ་དགོངས་གཉིས་ལ་ཁྱད་པར་མེད་དོ་སྙམ་པ་ལ། ལྷ་རྗེ་ཡང་ཁྱེད་བླ་མའི་ཞལ་ནས། ལྡེམ་པོ་ནི་རྫུན་ཆ་ཡིན་ལ། དགོངས་པ་ནི་བདེན་ཆ་ནས་བཞག་གསུང་ངོ༌། །ཇོ་བོ་ལྷ་རྗེ་ནི། ཆོས་བཞི་བཞི་ཡོད་ཀྱང༌། དགོངས་གཞི་ལ་སོགས་པ་མཚོན་ཚུལ་མ་འདྲེས་གསུང་ངོ༌། །ཀུན་མཁྱེན་དམ་པ་རིན་པོ་ཆེས། ཁོ་བོ་ནི། ལྡེམ་པོ་ནི་གདུལ་བྱའི་༼༣༠༦༽བསམ་པ་དང་མཐུན་པར་ཆོས་སྟོན་ལ། དགོངས་པ་ནི་གདུལ་བྱའི་བསམ་པ་དང་མི་མཐུན་པར་གཉེན་པོའི་སྒོ་ནས་ཆོས་སྟོན་པའོ། །དེས་ན་མ་འདྲེས་སོ། །ཞེས་གསུངས་ཏེ། གཞུང་དང་མཐུན་པར་དཀའ་གནད་གསལ་བར་བྱེད་པའོ།།

གསུམ་པ་མཐུན་འཇུག་སྦྱོར་བའི་མདོ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ནན་ཏན་གྱི་ལུང་ངོ༌། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་འཐུན་འཇུག་སྦྱོར་བའི་ལུང་ནི་འདི་ལྟ་སྟེ། རང་རྐྱེན་གཉེར་གྱི་ལུང་དང་། ཐབས་འཛུད་བསྲེ་བའི་ལུང་དང་། ཆ་འཐུན་སྦྱོར་བའི་ལུང་དང་། གདམས་ངག་ནན་ཏན་གྱི་ལུང་ངོ་།།

ལང་ཀའི་བདག་པོ། དེ་ལ་གདུལ་བྱ་དང་མཐུན་པར་འཇུག་པའི་ཐབས་ཀྱིས་ཡང་དག་པའི་དོན་ལ་སྦྱོར་བའམ་དགོད་པའི་ལུང་བཀའ་སྒྲོ་སྐུར་དང་བྲལ་བ་ནི་འདི་ལྟ་སྟེ། རང་གང་ལ་མོས་པ་དེའི་ཆ་རྐྱེན་ཆེད་གཉེར་གྱི་སྟོན་པའི་ལུང་དང༌། དེ་ཉིད་ཐབས་ལ་འཛུད་ཕྱིར་བདག་དང་སྤྱོད་པ་བསྲེ་བའི་ལུང་དང༌། ཕ་རོལ་དང་ཆ་མཐུན་པར་སྤྱད་དེ་དོན་ལ་སྦྱོར་བའི་ལུང་དང༌། འཁོར་ལ་གདམས་ངག་བྱིན་པ་ཉིད་ནན་ཏན་གྱི་གནས་སུ་སྟོན་པའི་ལུང་ངོ༌།།

གཉིས་པ་རྒྱས་པར་བཤད་པ་ལ་བཞི་སྟེ། རང་རྐྱེན་གཉེར་གྱི་ལུང་བཤད་པ། ཐབས་འཛུད་བསྲེ་བའི་ལུང་བསྟན་པ། ཆ་མཐུན་སྦྱོར་བའི་ལུང་བཤད་པ། གདམས་ངག་ནན་ཏན་གྱི་ལུང་བསྟན་པའོ། །དང་པོ་ནི།

ལང་ཀའི། ཞེས་པ་ནས། དེ་ལྟར་ཉིད་སྟོན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་རང་རྐྱེན་གཉེར་གྱི་ལུང་ནི་འདི་ལྟར། གང་ལ་གང་ལྟར་རྐྱེན་དུ་འཚམས་པ་

དེ་ལ་དེ་ལྟར་ཉིད་སྟོན་པའོ།།

ལང་ཀའི་བདག་པོ། ཞེས་བོས་ནས། དེ་ལ་རང་རྐྱེན་གཉེར་གྱི་ལུང་ནི་འདི་ལྟར་ཏེ། གདུལ་བྱ་གང་སུ་ཞིག་ཇི་ལྟ་བུའི་ཆོས་ཀྱི་སྣོད་དུ་གནས་པ་ལ་དེ་ཉིད་གང་ལ་མོས་པ་ལྟར་འདུལ་བར་བྱེད་པའི་རྐྱེན་དུ་འཚམས་པ་དེ་ལ། དེ་ལྟར་དེའི་ཆ་རྐྱེན་དུ་ངེས་པའི་ཐེག་པ་ཉིད་སྟོན་པར་བྱེད་པའི་བཀའ་དམ་པའོ།།

གཉིས་པ་ཐབས་འཛུད་བསྲེ་བའི་ལུང་བསྟན་པ་ནི།

ཐབས་འཛུད། ཅེས་པ་ནས། དེ་དག་བསྒྱུར་པའོ། །ཞེས་པའི་བར་གྱིས་བསྟན་ཏེ།

ཐབས་འཛུད་བསྲེ་བའི་ལུང་ནི་འདི་ལྟར། གང་བསྡུ་བའི་ཐབས་ཀྱིས་གང་

གི་ཆ་དང་འདྲེན་མར་དེ་དག་བསྒྱུར་བའོ།།

དེ་བཞིན་དུ་ཐབས་འཛུད་བསྲེ་བའི་ལུང་ནི། འདི་ལྟར་ཏེ། གདུལ་བྱ་ཕ་རོལ་གྱི་དངོས་པོ་གང་དག་དབང་དུ་བསྡུ་བའི་ཐབས་ཀྱིས་ཡང་དག་པའི་དོན་ལ་འཛུད་པའི་ཕྱིར། གདུལ་བྱ་གང་གི་སྤྱོད་པའི་ཆ་དང་རང་གི་སྤྱོད་པ་འདྲེན་མས་ཞེས་འདྲེས་མར་སྤྱོད་པའི་སྒོ་ནས་གཅིག་ཏུ་མཐུན་པ་ན་ལས་ཀྱི་སྐྱོན་བགྲངས་པ་ལ་སོགས་ཀྱིས་དེ་དག་གི་སེམས་བསྒྱུར་ཏེ་ཡང་དག་པའི་འདུ་ཤེས་ལ་འགོད་པའོ།།

གསུམ་པ་ཆ་མཐུན་སྦྱོར་བའི་ལུང་བསྟན་པ་ནི།

ཆ་མཐུན། ཞེས་པ་ནས། འདི་ལྟར་སྦྱོར་བའོ། །ཞེས་པའི་བར་གྱིས་བསྟན་ཏེ།

ཆ་འཐུན་སྦྱོར་བ་ནི་འདི་ལྟར། གང་གི་ཆ་བཞིན་སྤྱོད་པས་འདི་ལྟར་སྦྱོར་བའོ།།

དེ་ལ་ཆ་མཐུན་སྦྱོར་བའི་༼༣༠༧༽ལུང་བསྟན་པ་ནི། འདི་ལྟར་ཏེ། གང་ཕ་རོལ་པོ་དག་གི་སྲོག་གཅོད་སྤོང་བ་ལ་སོགས་པའི་ཆ་ཁོ་ན་བཞིན་དུ་དེ་དང་མཐུན་པར་རང་ཡང་སྤྱད་པས་མཐར་ཐེག་པ་ཆེན་པོ་འདི་ཉིད་ནས་གསུངས་པ་ལྟར་དོན་གྱི་རང་བཞིན་རྟོགས་པ་ལ་སྦྱོར་བར་བྱས་ཏེ་ཡང་དག་པར་འདྲེན་པའོ།།

བཞི་པ་གདམས་ངག་ནན་ཏན་གྱི་ལུང་བསྟན་པ་ནི།

གདམས་ངག ཅེས་པ་ནས། བྱས་ཏེ་འཇོག་པའོ། །ཞེས་པའི་བར་གྱིས་བསྟན་ཏེ།

གདམས་ངག་ནན་ཏན་གྱི་ལུང་ནི་འདི་ལྟར་གང་གཅེས་སྤྲས་བྱས་ཏེ་འཇོག་པའོ།།

དེ་ལ་གདམས་ངག་ནན་ཏན་གྱི་ལུང་ནི། འདི་ལྟར་ཏེ། གདུལ་བྱ་གང་ཞིག་ལ། ཐེག་པ་སྤྱིའི་ལུགས་ཀྱི་གདམས་ངག་གང་བསྟན་པ་དེ་ཉིད་ཤིན་ཏུ་ཟབ་ལ་ཕངས་པའི་བརྣག་པར་བྱ་བ་ཡིན་པས་གཅེས་སྤྲས་སུ་བྱས་ཏེ་ནན་ཏན་གྱིས་ཤིག་ཅེས་སྙིང་པོའི་གདམས་པ་འཇོག་པའོ། །འདི་དང་སྔ་མ་གཉིས་ལུང་བསྟན་མ་ལས་སྔགས་ལ་སྦྱོར་བའི་བཤད་ཀྱང་སྤྱོད་པས་འདྲེན་སྒོ་འགྲོལ་བའི་ལྡེ་མིག་ཐེག་པ་སྤྱིའི་ལུགས་ཡིན་པས་སྐབས་འཆོལ་བར་འགྱུར་རོ།།

སྙམ་མོ་ཞེས་ཕྱག་མཆན་གཅིག་ན་གསུངས་ཀྱང་མཐར་སྔགས་ལ་སྦྱོར་པའི་ཆ་རྐྱེན་ཡིན་པས་ནན་ཏན་གྱི་ལུང་དུ་བསྟན་ན་གཞུང་གི་དགོངས་པ་ཡིན་མོད། སྔགས་སྤྱོད་དང་དངོས་སུ་སྦྱར་ན་སྐབས་འཆོལ་བར་གསལ་ལོ། །འོ་ན་རྒྱུའི་ཐེག་པས་ཀྱང་དེ་ལྟར་དོན་སྤྱོད་པས་གསང་སྔགས་ཀྱི་ཐབས་དང་ཁྱད་པར་མེད་དོ་བར་དོགས་པ་ལ། དེ་དག་ནི་ལུས་ངག་གིས་ཆེད་དུ་སྤྱོད་པ་ཡིན་ལ། གསང་སྔགས་དམ་པ་ནི་ཐབས་སུ་མ་གྱུར་པ་མེད་པས་རིལ་མཛད་སྤྱོད་དུ་གྱུར་པ་ལ་ཆེད་དུ་ཆ་རེ་ནས་སྤྱོད་པའི་བྱ་བ་དང་བྲལ་བའི་ཕྱིར་བསྐྲུན་དུ་མེད་པར་བྱའོ།།

བཞི་པ་དོན་དམ་ངེས་པའི་མདོ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། གལ་པོའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་དོན་དམ་ངེས་པའི་ལུང་ནི་འདི་ལྟ་སྟེ། དགོངས་པ་དང་། ངེས་པ་དང་། ངོ་བོ་དང་། གལ་པའོ།།

ལང་ཀའི་ བདག་པོ། དེ་ལ་ཆོས་ཉིད་ཇི་བཞིན་དུ་སྟོན་པས་དོན་དམ་ངེས་པའི་ལུང་སྒྲོ་སྐུར་མེད་པ ་ནི། འདི་ལྟ་སྟེ། དགོས་ཆེད་བསྟན་པ་དང༌། ངེས་པ་རྙེད་པ་དང༌། དོན་རང་གི་ངོ་བོ་དང༌། དེ་ལ་རྩོད་པའི་གེགས་སེལ་བས་གལ་པོའོ། །དེ་བཞི་ནི་ཆོས་ཐམས་ཅད་གང་ཇི་ལྟར་དུ་གཏན་ལ་དབབ་ཀྱང་སྦྱར་དུ་བཏུབ་པའོ།།

གཉིས་པ་རྒྱས་པར་བཤད་པ་ལ་བཞི་སྟེ། དགོས་པ་བཤད་པ། ངེས་པ་བསྟན་པ། ངོ་བོ་བཤད་པ། གལ་པོ་བསྟན་པའོ། །དང་པོ་ནི།

ལང་ཀའི། ཞེས་པ་ནས། ངོས་ཟིན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་དགོངས་པ་གང་ཞེ་ན། འདི་ལྟ་སྟེ། གང་བྱུང་བ་དག་གང་གི་ཕྱིར་བརྟགས་ཏེ།

དེ་ལྟར་དེའི་ཕྱིར་ངོས་ཟིན་པའོ།།

ལང་ཀའི་བདག་པོ། དེ་ལ་དགོས་ཆེད་བསྟན་པ་གང་ཞེ་ན། འདི་ལྟ་སྟེ། གང་དངོས་པོར་༼༣༠༨༽འབྱུང་ཞིང་སྣ་ཚོགས་སུ་སྣང་བའི་ཆོས་ཇི་སྙེད་པ་འདི་དག་གི་མཚན་ཉིད་ཇི་ལྟ་བ་བཞིན་དུ་རྟོགས་ཤིང་རིགས་པར་བྱ་བ་གང་གི་ཕྱིར་དུ། སོ་སོར་རྟོག་པའི་ཤེས་རབ་ཀྱིས་གཞལ་ཞིང་བརྟགས་ཏེ་དཔྱད་ཅིང་བསམ་པས་དོན་རྙེད་པ་ཇི་ལྟ་བ་དེ་བཞིན་དུ། འདིར་ཡང་དེ་ལྟར་གཏན་ཚིགས་ཀྱིས་གཞལ་བར་བྱས་པས་དོན་གོ་བར་འགྱུར་བ་དེའི་ཕྱིར་རིགས་པ་ལ་བརྟེན་ནས་དགོས་ཆེད་ཀྱི་དོན་ཇི་ལྟར་ཡིན་པ་ངོས་ཟིན་ཏེ་ཡང་དག་པར་མཐོང་བའོ།།

གཉིས་པ་ངེས་པ་བསྟན་པ་ནི།

ངེས་པ། ཞེས་པ་ནས། རྙེད་པའོ། །ཞེས་པའི་བར་གྱིས་བསྟན་ཏེ།

ངེས་པ་ནི་འདི་ལྟར། གང་ལ་གཏན་ལ་ཕབ་པ་དེའི་ངེས་པ་རྙེད་པའོ།།

དེ་ལ་ངེས་པའི་ཡིད་ཆེས་རྙེད་པ་ནི། འདི་ལྟར་ཏེ། འདོད་རྒྱལ་བའི་སྒྲ་ཚིག་ལྟ་བུ་མ་ཡིན་པར་དོན་དང་ལྡན་པའི་སྒྲ་ལ་བརྟེན་ནས་ངེས་ཚིག་ཡང་དག་པར་སྦྱར་བ་ན་གང་དོན་མ་ནོར་བའི་དེ་ཉིད་ཤེས་བྱའི་དངོས་གཞིར་བཤད་པ་ལྟར་བརྟགས་ཏེ་གཏན་ལ་ཕབ་པར་བྱས་པ་གང་གི་ཚེ་འབེབས་མཁན་དེའི་བློ་ཆེ་ཆུང་གི་བསམ་པ་དང་མཐུན་པར་ཡིད་ཆེས་ཀྱི་ངེས་པ་རྙེད་དེ་གྲུབ་མཐའ་གཞན་གྱི་སྐྱོན་གྱིས་མི་འཕྲོགས་པར་དོན་གདེང་དུ་ཆུད་དེ་འགྱུར་བ་མེད་པར་རྟོགས་པའོ།།

གསུམ་པ་ངོ་བོ་བཤད་པ་ནི།

ངོ་བོ། ཞེས་པ་ནས། དངོས་གཞིའོ། །ཞེས་པའི་བར་གྱིས་བསྟན་ཏེ།

ངོ་བོ་ནི་འདི་ལྟར་གང་བཏགས་པས་བརྗོད་པའི་དངོས་གཞིའོ།།

དེ་ལ་ཆོས་གང་ཞིག་གཏན་ལ་དབབ་བྱ་རང་གི་ངོ་བོ་ནི། གང་ཞེ་ན། འདི་ལྟར་ཏེ། གང་མཚོན་པའི་མིང་དུ་བརྟགས་པ་དང་ཟབ་མོའི་གདམས་ངག་གིས་བསྟན་པའང་མཚུངས་ཏེ་ཚིག་གི་ཐ་སྙད་ཇི་སྙེད་པས་བརྗོད་པར་བྱ་བའི་དངོས་གཞི་དངོས་པོ་སོ་སོའི་དོན་གྱི་ངོ་བོ་ཉིད་ལྟ་བུ་ཐ་སྙད་དོན་མཐུན་ཐམས་ཅད་ཀྱིས་གཞལ་བར་བྱ་བའི་གཞིར་གྱུར་པའོ།།

བཞི་པ་གལ་པོ་བསྟན་པ་ནི།

གལ་པོ། ཞེས་པ་ནས། གཏོད་པ་ཉིད་དོ། །ཞེས་པའི་བར་གྱིས་བསྟན་ཏེ།

གལ་པོ་ནི་འདི་ལྟར་གང་ལ་གང་གང་གིས་གལ་དུ་གཏོད་པ་ཉིད་དོ།།

དེ་ལ་གཏན་ཚིགས་ཀྱི་གལ་པོ་ཞེས་བྱ་བ་ནི་གང་ཞེ་ན་འདི་ལྟར་ཏེ། རྒོལ་བ་གང་སུ་ཞིག་ལ་དྲི་བའི་དོན་གྱི་དངོས་པོ་ཞིག་ཕྱི་རྒོལ་གྱི་གང་ཟག་གང་གིས་རྒོལ་བྱེད་ཀྱི་ཐབས་ཏེ་གང་དང་གང་དུ་འགལ་བའི་ཚིག་བློ་ལ་བླངས་ནས་བརྟགས་པའི་ཕྱིར་བརྗོད་དེ་དོན་དང་འགལ་བ་དེ་ཉིད་གལ་དུ་གཏོད་ནས་དྲི་བ་ནི་གལ་པོ་འཛུགས་པ་ཡིན་པས། དེ་ལ་གཏར་ཀ་གེགས་སེལ་གྱི་ལན་གྱིས་མི་འགལ་བའི་གནད་རྣམས་གཏན་ཚིགས་ཀྱིས་མཚོན་ནས་དོན་དང་མཐུན་པར་སྐྱོན་གྱི་ཆ་གང་ཡང་མི་འཇུག་པར་གྲུབ་མཐའ་ཟིན་པ་ནི་གལ་པོ་ལ་མཁས་པ་ཉིད་དོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། གསལ་བར་བྱེད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་ངེས་པ་དམ་པའི་ལུང་སྟེ། མདོ་བཞི་པོ་དེ་དག་ནི་དགྲོལ་བའི་ལྡེ་མིག་སྟེ།

གང་སྤྱོད་པས་འདྲེན་པའི་སྒོ་གང་ཡིན་པ་དེ་ནི། དེས་དགྲོལ་ཞིང་གང་དེ་ཉིད་དུ་གསལ་བར་བྱེད་པའོ།།

ལང་ཀའི་བདག་པོ། ཇི་ལྟར་བསྟན་༼༣༠༩༽པ་དེ་དག་ནི་ངེས་པ་དམ་པའི་ལུང་སྟེ། མདོ་བཞི་པོ་དེ་དག་ནི་དགྲོལ་བར་བྱེད་པའི་ལྡེ་མིག་ཏུ་གྱུར་པ་སྟེ། གང་སྤྱོད་པས་འདྲེན་པའི་སྒོའི་ཐེག་པ་གང་ཡིན་པ་དེ་ནི། བཞི་པོ་དེས་ངེས་པར་དགྲོལ་ཞིང་དོན་གང་དེ་ཉིད་དུ་གསལ་བར་བྱེད་པ་ཁོ་ནའོ།།

གསུམ་པ་འབྱིན་པའི་ལྡེ་མིག་རྩ་བ་གསུམ་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། རྩ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་རྩ་བ་གསུམ་གང་ཞེ་ན། འདི་ལྟ་སྟེ། བློའི་རྩ་བ་དང་། གྲོས་ཀྱི་རྩ་བ་དང་། ཐབས་ཀྱི་རྩ་བའོ།།

ལང་ཀའི་བདག་པོ། དེ་ལ་འབྱིན་པར་བྱེད་པའི་ཕྱིར་ཤེས་བྱ་དེ་ཉིད་ཀྱི་རྩ་བར་གྱུར་པ་རྣམ་གྲངས་གསུམ་ནི་གང་ཞེ་ན། འདི་ལྟ་སྟེ། ཞི་བར་གནས་པ་བློའི་རྩ་བ་དང༌། ལྷག་གེར་མཐོང་བ་གྲོས་ཀྱི་རྩ་བ་དང༌། ཟུང་དུ་འབྲེལ་བ་ཐབས་ཀྱི་རྩ་བའོ།།

གཉིས་པ་རྒྱས་པར་བཤད་པ་ལ་གསུམ་སྟེ། བློའི་རྩ་བ་བཤད་པ། གྲོས་ཀྱི་རྩ་བ་བསྟན་པ། ཐབས་ཀྱི་རྩ་བ་བཤད་པའོ། །དང་པོ་ནི།

ལང་ཀའི། ཞེས་པ་ནས། ལྷན་ནེ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་བློའི་རྩ་བ་ནི་འདི་ལྟར། ཇི་བཞིན་པའི་དེ་བཞིན་ཉིད་དུ་མི་རྟོག་རྣམ་པར་མི་རྟོག་ལྷན་ནེ་བའོ།།

ལང་ཀའི་བདག་པོ། དེ་ལ་བློའི་རྩ་བ་ནི། འདི་ལྟར་ཏེ། ཡེ་ནས་ཇི་བཞིན་པ་ཉིད་དུ་གནས་པ་ནི་མ་སྐྱེས་པའི་ཆོས་ཀྱི་དབྱིངས་ཏེ། དེ་ཉིད་ཡང་དག་པར་བསྒོམ་པའི་ངང་ལ། བློ་བྱིང་རྒོད་ལ་སོགས་པའི་དབང་དུ་མི་འགྱུར་བར་དེ་བཞིན་ཉིད་དུ་གྱུར་པ་ནི་དེ་ལ་བློ་གནས་པའི་ཚུལ་ཏེ། དེ་ལྟར་ཡུལ་ལ་སྤྱིར་མི་རྟོག་ཅིང་བློ་ཡི་གཡོ་བས་བྱེ་བྲག་ཏུ་རྣམ་པར་མི་རྟོག་པར་བརྟན་པར་གྱུར་ནས་རྟོགས་པའི་ངང་ལ་ལྷན་ནེ་བར་གནས་པ་ཉིད་ཞི་གནས་ཀྱི་མཆོག་ཏུ་གྱུར་པའོ།།

གཉིས་པ་གྲོས་ཀྱི་རྩ་བ་བཤད་པ་ནི།

ལང་ཀའི། ཞེས་པ་ནས། ས་ལེ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གྲོས་ཀྱི་རྩ་བ་ནི་འདི་ལྟར། གང་ཐམས་ཅད་ནས་ཐམས་ཅད་དུ་མ་འདྲེས་པ་

ལ་མ་རྨོངས་པ་དེ་ཉིད་ས་ལེ་བའོ།།

ལང་ཀའི་བདག་པོ། དེ་ལ་གྲོས་ཀྱི་རྩ་བ་ནི། འདི་ལྟར་ཏེ། གང་ཤེས་བྱ་མཆོག་གི་དངོས་གཞི་རྟོགས་ནས་དུས་ཐམས་ཅད་ནས་གནས་སྐབས་ཐམས་ཅད་དུ་མ་འདྲེས་པར་གསལ་བས་བྱེད་ལས་དང་མཚན་ཉིད་རྫོགས་པ་ལ་སྒྲིབ་པ་བསལ་བའི་དབང་གིས་མ་རྨོངས་པ་ཉིད་དུ་ས་ལེ་བར་མཁྱེན་པ་ཉིད་ལྷག་མཐོང་གི་ངོ་བོ་ཉིད་དམ་པའོ།།

གསུམ་པ་ཐབས་ཀྱི་རྩ་བ་བཤད་པ་ནི།

ལང་ཀའི། ཞེས་པ་ནས། དག་པ་ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཐབས་ཀྱི་རྩ་བ་ནི་འདི་ལྟར། གང་ཡོངས་སུ་རྫོགས་པ་ལ་རྣམ་པར་དག་པ་ཉིད་དོ།།

ལང་ཀའི་བདག་པོ། དེ་ལ་ཐབས་ཀྱི་རྩ་བ་ནི། འདི་ལྟར་ཏེ། གང་བྱང་ཆུབ་ཀྱི་སྤྱོད་པ་རྒྱ་མཚོ་ལྟ་བུ་རྣམས་བདག་གཞན་གྱི་དོན་དུ་ཡོངས་སུ་རྫོགས་པར་སྤྱོད་པ་ལ་མི་དམིགས་པར་རྟོགས་པས་འཆིང་བ་རྣམ་པར་དག་པ་གང་ཡིན་པ་ཉིད་ཀྱིས་ཞི་གནས་དང་ལྷག་མཐོང་ཟུང་དུ་འབྲེལ་བའི་ཐབས་རྨད་དུ་བྱུང་བ་དེ་ཉིད་དོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། བྱེད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་རྩ་བ་སྟེ། རྩ་བ་གསུམ་པོ་འདི་དག་ནི་འབྱེད་པའི་ལྡེ་མིག་ཅེས་བྱ་བ་སྟེ།

གང་སྤྱོད་པས་འདྲེན་པའི་སྒོ་གང་ཡིན་པ་དེ་ནི་དེས་འབྱིན་ཅིང་དེ་ཉིད་དུ་གསལ་བར་བྱེད་པའོ།།

ལང་ཀའི་བདག་པོ། ཇི་སྐད་བཤད་པ་དེ་དག་ནི་རྩ་བར་གྱུར་པ་སྟེ། རྩ་བ་གསུམ་པོ་དེ་དག་ནི། འབྲས་བུ་ངེས་པར་འབྱིན་པའི་ལྡེ་མིག་ཅེས་བྱ་སྟེ། གང་སྤྱོད་པས་འདྲེན་པའི་སྒོ་ཡི་ཐེག་པ་གང་ཡིན་པ་དེ་ནི། རྩ་བ་གསུམ་པོ་དེས་འབྱིན་ཅིང་དེ་ཉིད་དུ་ཡང་དག་པར་གསལ་བར་བྱེད་པའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

བཀོད་པ་རྣམ་པར་འགྲེལ་པའི་ལེའུ་སྟེ་བཞི་བཅུ་རྩ་ལྔ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཐེག་པའི་རྣམ་གྲངས་རྣམ་པར་བཀོད་པ་ལས་རྒྱུའི་ཐེག་པ་ལྡེ་མིག་གསུམ་གྱིས་རྣམ་པར་འགྲེལ་པའི་དོན་གསལ་བར་བསྟན་པའི་ལེའུ་སྟེ་བཞི་བཅུ་རྩ་ལྔ་པ་ཉིད་རྒྱས་པར་འགྲེལ་ཏེ་ཚད་མའི་ལམ་གྱིས་ཡང་དག་པར་བཤད་པའོ།། །།

ལེའུ་ཞེ་དྲུག་པ་བསྡུ་བ་རྣམ་པར་འགྲེལ་པ།

༈ གཉིས་པ་ཐབས་ཀྱི་སྦྱོར་སྒོ་དང་ངེས་པའི་གསང་སྒོ་ཐུན་མོང་དུ་འཇུག་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས་ཡང༌། ཞེས་པ་ནས། རྩ་བའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་སྒོ་གཉིས་ཀྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་གང་སྒོ་གཉིས་འབྱེད་ཅིང་རྣམ་པར་འགྲེལ་བ་ཇི་ལྟར་འབྱིན་པ་ལགས། སྨྲས་པ། ལངྐའི་བདག་པོ་སྒོ་གཉིས་ནི་འདི་ལྟར་འདི་ཡང་ལྡེ་མིག་གསུམ་གྱིས་རྣམ་པར་འབྱེད་ཅིང་གསལ་བར་བྱེད་པ་སྟེ། ཐུན་མོང་གི་ཡན་ལག་དང་། མདོ་དང་། རྩ་བའོ།།

གསང་སྔགས་ཀྱི་ལྡེའུ་མིག་བཤད་པའི་ཕྱིར། དེ་ནས་ཡང༌། ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྟོན་པ་གསང་བ་པའི་བདག་པོ་ལ། ཐུབ་པ་རིགས་ཀྱི་འཇུག་སྒོ་དང༌། གྲུབ་པ་ལ་ལུང་གི་གསང་སྒོ་སྔགས་ཕྱི་པ་དང་ནང་པ་གཉིས་ཀྱི་ལྡེ་མིག་ཆ་མཐུན་པའི་དོན་དུ་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། གང་ཐབས་ཀྱི་སྦྱོར་སྒོ་དང༌། ངེས་པའི་གསང་སྒོ་གཉིས་ཡན་ལག་དྲུག་གིས་འབྱེད་ཅིང་མདོ་བཞིས་རྣམ་པར་འགྲེལ་ཏེ་རྩ་བ་གསུམ་གྱིས་ཇི་ལྟར་འབྱིན་པ་ལགས། སྟོན་པས་ལན་སྨྲས་ཏེ་བཀའ་སྩལ་པ། ལང་ཀའི་བདག་པོ། ཐབས་ཀྱི་སྦྱོར་སྒོ་དང༌། ངེས་པའི་གསང་སྒོ་གཉིས་ནི། འདི་ལྟར་འདི་ཡང་ལྡེའུ་མིག་གསུམ་གྱིས་རྣམ་པར་འབྱེད་ཅིང་གསལ་བར་བྱེད་པ་སྟེ། གང་གསང་སྔགས་ཕྱི་ནང་ཐུན་མོང་གི་ཡན་ལག་དྲུག་དང༌། མདོ་བཞི་དང༌། རྩ་བ་གསུམ་པོ་དག་གིའོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཡན་ལག་བཤད་པ། མདོ་བསྟན་པ། རྩ་བ་བཤད་པའོ། །དང་པོ་ལ་གཉིས་ཏེ། སྒོ་དྲུག་དངོས་བཤད་པ། དེའི་ཡན་ལག་བསྟན་པའོ། །དང་པོ་ནི།

གང་འདི་ལྟར། ཞེས་པ་ནས། རྫོགས་པའི་ཡན་ལག་གོ །ཞེས་པའི་བར་གྱིས་བསྟན་ཏེ།

གང་འདི་ལྟར་ཡན་ལག་དྲུག་ནི་འདི་ལྟ་སྟེ། བྱ་བའི་ཡན་ལག་དང་། ཐབས་ཀྱི་ཡན་ལག་དང་། སྦྱོར་བའི་ཡན་ལག་དང་། སྤྱོད་པའི་ཡན་ལག་དང་། རིག་པའི་ཡན་ལག་དང་། རྫོགས་པའི་ཡན་ལག་གོ།

གང་འདི་ལྟར་གསང་སྔགས་སྤྱིའི་ཡན་ལག་དྲུག་ནི། འདི་ལྟ་སྟེ། ཀྲི་༼༣༡༡༽ཡ་དང༌། ཨུ་པ་ཡ་དང་། ཡོ་ག་དང༌། མ་ཧཱ་ཡོ་ག་དང༌། ཨ་ནུ་ཡོ་ག་དང༌། ཨ་ཏི་ཡོ་ག་དང་དྲུག་སྟེ། ཁྲུས་དང་གཙང་སྦྲ་ལ་སོགས་པ་སྤྱོད་པ་གཙོ་བོར་གྱུར་པས་བྱ་བའི་ལས་ཀྱི་ཡན་ལག་ཏུ་གྱུར་པའི་རྒྱུད་ཡིན་པའི་ཕྱིར་དང༌། གོང་འོག་གཉིས་ཀའི་ཐབས་ལ་བརྟེན་ནས་གྲུབ་པ་མཐར་ཕྱིན་ཐབས་ཀྱི་ཡན་ལག་ཏུ་གྱུར་པའི་རྒྱུད་ཡིན་པའི་ཕྱིར་དང༌། ཏིང་ངེ་འཛིན་གཙོ་བོར་སྤྱོད་པས་ཞི་གནས་སྦྱོར་བའི་ཡན་ལག་ཏུ་གྱུར་པའི་རྒྱུད་ཡིན་པའི་ཕྱིར་དང༌། བླང་དོར་མེད་པའི་སྤྱོད་པས་ཇི་ལྟར་འདུལ་བར་མཛད་པས་མཐུན་འཇུག་སྤྱད་པའི་ཡན་ལག་ཏུ་གྱུར་པའི་རྒྱུད་ཡིན་པའི་ཕྱིར་དང༌། མཉམ་པའི་དོན་ཇི་ལྟ་བ་ཉིད་ལ་འཆིང་བ་བྲལ་བས་སྤྱོད་པ་ཆེད་དུ་བྱར་མེད་པར་རྣམ་གྲོལ་རིག་པའི་ཐབས་ཀྱི་ཡན་ལག་ཏུ་གྱུར་པའི་རྒྱུད་ཡིན་པའི་ཕྱིར་དང༌། རིལ་འབྲས་བུའི་ངོ་བོ་ལ་འཕྲལ་དུ་བརྩལ་བ་མེད་པར་ལྷུན་གྱིས་གྲུབ་པས་བྱ་བྲལ་རྫོགས་པའི་དོན་གྱི་ཡན་ལག་ཏུ་གྱུར་པའི་རྒྱུད་ཡིན་པའི་ཕྱིར་ཏེ། དེ་ལྟར་ཕྱི་ནང་གཉིས་ཀ་གཅིག་ཏུ་བརྩིས་པས་དྲུག་ཏུ་ལངས་པས་ན་ཡན་ལག་དྲུག་ཏུ་གྱུར་པ་དག་གོ།

གཉིས་པ་དེའི་ཡན་ལག་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། འགྲེལ་པ་སྟེ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཡན་ལག་དྲུག་པོ་འདི་དག་ཀྱང་གཅིག་ཏུ་ཡན་ལག་བཅུ་གཉིས་ཀྱིས་ཡོངས་སུ་རྫོགས་ཤིང་། ཡན་ལག་དྲུག་གིས་གསལ་བར་འགྲེལ་ཏེ།

ལང་ཀའི་བདག་པོ། ཞེས་བོས་ནས། གསང་སྔགས་རྡོ་རྗེ་ཐེག་པའི་གནས་ཀྱི་ཡན་ལག་དྲུག་པོ་འདི་དག་ཀྱང་ཕྱི་ནང་གཉིས་ལ་མདོ་གཅིག་ཏུ་བརྩིས་པས་ཡན་ལག་གི་དབྱེ་བ་རྒྱུད་རེ་ལ་ཡང་གསང་བའི་སྐོལ་མདོ་བཅུ་གཉིས་ཀྱིས་ཡོངས་སུ་རྫོགས་པར་ཤེས་ཤིང་དོན་ཀུན་མཐར་ཕྱིན་པར་བྱེད་ལ། འཆད་པའི་ཐབས་ཀྱིས་ཡན་ལག་དྲུག་གིས་གསལ་བར་འགྲེལ་ཞིང་སྟོན་པར་བྱེད་པ་སྟེ། ཞེས་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། ཐབས་ཀྱི་ལམ་འགྲུབ་བྱེད་ཀྱི་ཡན་ལག་བསྟན་པ། གསང་དོན་ཤེས་པར་བྱེད་པའི་ཡན་ལག་བཤད་པའོ། །དང་པོ་ནི།

བཅུ་གཉིས་གང༌། ཞེས་པ་ནས། ལྟ་བའི་ཡན་ལག་གོ །ཞེས་པའི་བར་གྱིས་བསྟན་ཏེ།

བཅུ་གཉིས་གང་ཞེ་ན། འདི་ལྟ་སྟེ། སྒོའི་ཡན་ལག་དང་། དམ་པའི་ཡན་ལག་དང་། ངེས་པའི་ཡན་ལག་དང་། བསམ་པའི་ཡན་ལག་དང་། དམིགས་པའི་ཡན་ལག་དང་། བཟླས་པའི་ཡན་ལག་དང་། སྦྱོར་བའི་ཡན་ལག་དང་། དཔྱོད་པའི་ཡན་ལག་དང་། ཐོབ་པའི་ཡན་ལག་དང་། གནས་པའི་ཡན་ལག་དང་།

སའི་ཡན་ལག་དང་། ལྟ་བའི་ཡན་ལག་གོ།

དེ་ལ་བཅུ་གཉིས་ཀྱི་གྲངས་ཉེ་བར་བསྟན་པ་གང་ཞེ་ན། འདི་ལྟ་སྟེ། ཐོག་མར་རང་རང་གི་ལམ་གྱི་འཇུག་པའི་སྒོའི་ཡན་ལག་གང་ཡིན་པ་དང༌། བསྲུང་བ་དམ་ཚིག་བསྟན་པའི་ཡན་ལག་དང༌། ངེས་པ་རྙེད་པའི་ཐབས་ཐོས་པའི་ཡན་ལག་དང༌། བསམ་པའི་ཤེས་རབ་ཀྱིས་མཚན་མེད་ཀྱི་དོན་ལ་དཔྱོད་ཅིང་ཏིང་ངེ་འཛིན་སྒོམ་པའི་ཡན་ལག་དང༌། སྒོམ་པའི་ཤེས་རབ་ཀྱིས་མཚན་༼༣༡༢༽མའི་ཏིང་ངེ་འཛིན་ལྷ་སོགས་ལ་དམིགས་པའི་ཡན་ལག་དང༌། སྙིང་པོའི་སྔགས་བཟླས་བརྗོད་བྱེད་པའི་ཡན་ལག་དང༌། ཕྲིན་ལས་ཀྱིས་བདག་གཞན་དོན་ལ་སྦྱོར་བའི་ཡན་ལག་དང༌། མི་འཆིང་བར་སྤྱོད་པའི་བྱ་བ་ཁྱད་འཕགས་ཐབས་ཀྱི་ཡན་ལག་དང༌། བསྒྲུབ་བྱའི་འབྲས་བུ་ཐོབ་པའི་དབང་གི་ཡན་ལག་དང༌། རིག་འཛིན་གྱི་ས་ལ་གནས་བརྟེན་པའི་གཞིའི་ཡན་ལག་དང༌། ཡང་དག་པར་རྫོགས་པའི་སངས་རྒྱས་ཀྱིས་སའི་ཡན་ལག་དང༌། དོན་རྟོགས་པ་ལྟ་བའི་ཡན་ལག་དང་བཅུ་གཉིས་པོ་དག་གོ །འོ་ན་རྫོགས་པའི་ཡན་ལག་སྐོལ་མདོ་བཅུ་གཉིས་ཀྱིས་འགྲེལ་པར་མི་རིགས་པས་འགལ་ལོ་ཞེ་ན། བྱ་བ་དང་བྲལ་བའི་སྐོལ་མདོ་ནི། འཇུག་ཏུ་མེད་པའི་སྒོ་དང༌། བསྲུང་མཚམས་དང་བྲལ་བའི་དམ་ཚིག་ལ་སོགས་པ་ཚང་བས་གང་ཡང་སྤང་བྱ་མིན་པའི་ཕྱིར་མི་འགལ་ཏེ། འོན་ཀྱང་སྒྲ་མཐུན་པ་ལས་དོན་ངེས་པར་འཕགས་པའི་སྐོལ་མདོ་བཅུ་གཉིས་ཀྱི་གྲངས་དྲུག་ཕྲག་གཉིས་སུ་འགྱུར་བས་ཁྱད་པར་ཅན་དུ་འགྲེལ་ཏོ། །དེ་ལ་སྐོལ་མདོ་བཅུ་གཉིས་ནི། སྤྱིར་ཐེག་པའི་རིམ་པ་དགུ་ཀ་ལ་སྦྱར་དུ་བཏུབ་ཅིང༌། ཁྱད་པར་དུ་གསང་བའི་སྒོ་དྲུག་ལ་སྦྱར་ཏེ་གཞུང་དུ་བསྟན་པ་ཡིན་ཀྱང༌། སྐབས་འདིར་ཨ་ནུ་ཡོ་ག་ལ་སྦྱོར་ཏེ། སློབ་དཔོན་ཆེན་པོ་དྷརྨ་བོདྷིས་མཛད་པའི་མདོའི་དོན་བསྡུས་ལས། མདོ་ནི་བཅུ་གཉིས་འཇུག་སྒོ་དང༌། །ཞེས་པས། འཇུག་པའི་སྒོ་དབྱིངས་དང་ཡེ་ཤེས་ཀྱི་སྒོ་ནས་འཇུག་ལ། དམ་ཚིག་ལྟ་བ་ཏིང་འཛིན་དང༌། །ཞེས་པས། དམ་ཚིག་ནི། སྙིང་རྗེའི་དམ་ཚིག་དང་ཆོས་ཉིད་ཀྱི་དམ་ཚིག་སྲུང་ངོ༌། །ལྟ་བ་ནི་དབྱིངས་དང་ཡེ་ཤེས་གཉིས་སུ་མེད་པར་ལྟའོ། །ཏིང་ངེ་འཛིན་ནི་དོན་དང་ཡི་གེའི་རྗེས་སུ་ཞུགས་ནས་མཚན་བཅས་དང་མཚན་མེད་སྒོམ་མོ། །དམིགས་པ་བཟླས་པ་ཕྲིན་ལས་དང༌། ཞེས་པས། དམིགས་པ་ནི། ཆོས་ཐམས་ཅད་རང་གི་སེམས་ཀྱི་བདག་ཉིད་ཆེན་པོར་དམིགས་པའོ། །བཟླས་པ་ནི། བྲག་ཆ་ལྟར་གྲགས་སྟོང་དབྱེར་མེད་དུ་ཟློས་པའོ། །ཕྲིན་ལས་ནི། ཞི་རྒྱས་དབང་དྲག་བཞི་ཡིས་དོན་མཛད་པའོ། །སྤྱོད་པ་དང་ནི་ཐོབ་བྱེད་དབང༌། །ཞེས་པས། སྤྱོད་པ་ནི། ཐབས་ཀྱི་སྤྱོད་པ་དང་དབང་བསྒྱུར་གྱི་སྤྱོད་པ་ལ་སློབ་བོ། །དབང་ནི། ཞི་བ་དང་ཁྲོ་བོའི་དབང་མཆོག་སུམ་ཅུ་རྩ་དྲུག་བསྐུར་རོ། །རིགས་འཛིན་ས་དང་སངས་རྒྱས་ས། །ཞེས་པས། རིག་འཛིན་གྱི་ས་ནི། སྒྲ་ལ་གནས་པའི་རིགས་འཛིན། ལམ་ལ་གནས་པའི་༼༢༡༣༽རིགས་འཛིན། ཚེ་ལ་དབང་བའི་རིགས་འཛིན། ཕྱག་རྒྱ་ཆེན་པོའི་རིགས་འཛིན། ལྷུན་གྱིས་གྲུབ་པའི་རིགས་འཛིན་རྣམས་སོ། །སངས་རྒྱས་ཀྱི་ས་ནི་བརྡལ་བ་ཆོས་ཉིད་དང༌། ཡི་གེ་འཁོར་ལོ་ཚོགས་ཆེན་ཉིད་ཐོབ་པའོ། །ངེས་བྱེད་ཡན་ལག་དག་ཏུ་བཤད། །ཅེས་པས། ལྟ་བ་ངེས་པར་བྱེད་པའི་ཡན་ལག་ཆོས་རྟགས་ཀྱི་ཕྱག་རྒྱ་ལ་བརྟེན་ནས་དོན་ཐུན་མོང་མིན་པར་ཐོས་པས་ཇི་བཞིན་དུ་ངེས་པར་བྱེད་པ་ཡིན་ནོ། །ཞེས་རོགས་བརྩོན་འགྲུས་སེང་གེས་འདུས་པ་མདོའི་ཁོག་དོན་རིན་པོ་ཆེའི་སྒྲོན་མ་ལས་འབྱུང་བ་ལྟར་རོ།།

གཉིས་པ་གསང་དོན་ཤེས་པར་བྱེད་པའི་ཡན་ལག་བཤད་པ་ལ་གཉིས་ཏེ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། ཐུན་མོང་དུ་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དྲུག་གང་ཞེ་ན། འདི་ལྟ་སྟེ། རྒྱུའི་ཡན་ལག་དང་། རྩ་བའི་ཡན་ལག་དང་། འབྲེལ་བའི་ཡན་ལག་དང་། འདྲེན་པའི་ཡན་ལག་དང་། ངེས་པའི་ཡན་ལག་དང་། སྦྱོར་བའི་ཡན་ལག་གོ །ལངྐའི་བདག་པོ། འདི་དག་ནི་གང་ཐམས་ཅད་ནས་ཐམས་ཅད་དུ་ཐུན་མོང་དུ་ཤེས་པར་བྱའོ།།

ཡང་བཤད་ལུགས་ཀྱི་ཡན་ལག་སྟོན་པའི་ཕྱིར། ལང་ཀའི་བདག་པོ། སྔགས་ཕྱི་ནང་གི་རྒྱུད་ལ་ཐུན་མོང་དུ་སྦྱོར་བའི་འཆད་ཐབས་དྲུག་གང་ཞེ་ན། འདི་ལྟ་སྟེ། རྒྱུའི་ཡན་ལག་གླེང་གཞི་གཉིས་དང༌། རྩ་བའི་ཡན་ལག་གླེང་བསླང་གཉིས་དང༌། འབྲེལ་བའི་ཡན་ལག་དགོས་འབྲེལ་བཞི་དང༌། འདྲེན་པའི་ཡན་ལག་བཤད་ཐབས་བཅུ་དང༌། ངེས་པའི་ཡན་ལག་ཐབས་སྒོ་བཅུ་གཉིས་དང༌། སྦྱོར་བའི་ཡན་ལག་རྟོགས་འཇུག་དྲུག་ཅུ་རྩ་གཅིག་གོ །ལང་ཀའི་བདག་པོ། དྲུག་པོ་འདི་དག་ནི། གང་ཕྱི་ནང་གི་རྒྱུད་དྲུག་རེ་རེ་ལ་ཡང་ཡན་ལག་འདི་དྲུག་དང་ལྡན་པས་ཕྱི་པ་དང་ནང་པ་ཐམས་ཅད་ནས་ཐམས་ཅད་དུ་སྒྲ་མཐུན་པར་ཐུན་མོང་དུ་འཇལ་བའི་ཚུལ་གྱིས་ཡང་དག་པར་སྦྱོར་ཤེས་པར་བྱའོ།།

གཉིས་པ་ཞབས་བསྡུ་བ་ནི།

ལང་ཀའི། ཞེས་པ་ནས། འགྲེལ་པར་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་ཡན་ལག་སྟེ། གང་སྒོ་དེ་དག དེ་དག་གིས་འབྱེད་ཅིང་གསལ་

བར་བྱེད་པའི་འགྲེལ་པར་ཤེས་པར་བྱའོ།།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། བཤད་པ་དེ་དག་ནི་རྟོགས་པར་བྱེད་པའི་ཐབས་ཀྱི་ཡན་ལག་སྟེ། གང་སྒོ་གཉིས་པོ་དེ་དག་ཡན་ལག་དེ་དག་གིས་ངེས་པར་འབྱེད་ཅིང་གསལ་བར་འགྲེལ་པར་ཤེས་པར་བྱའོ། །དེ་དག་རྒྱས་པར་ངེས་པའི་གསང་སྒོ་དང་སྦྱར་ཏེ་ལེའུ་རེ་རེས་འཆད་པར་འགྱུར་རོ།།

གཉིས་པ་མདོར་བསྟན་པ་ནི།

ལང་ཀའི། ཞེས་པ་ནས། གང་ཡིན་པ་དེ་ཁོ་ན་ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ་དེ་ལ་མདོ་གང་ཞེ་ན། འདི་ལྟ་སྟེ། སྐྱེ་བ་མེད་པ ་དང་། མཉམ་པ་ཉིད་དང་། ཇི་བཞིན་པ་དང་། རྩ་བ་མེད་པར་ལུང་སྟོན་པའོ། །ལངྐའི་ བདག་པོ་དེ་དག་ནི་གཞན་གྱི་སྐྱེ་བ་མེད་པ ་དང་། མཉམ་པ་ཉིད་དང་།

ཇི་བཞིན་པ་དང་། བརྩལ་བ་ མེད་པ་དང་། མ་འདྲེས་པ་གང་ཡིན་པ་དེ་ཁོ་ན་ཉིད་དོ།།

ལང་ཀའི་བདག ་པོ། དེ་ལ་གསང་བའི་དོན་གྱི་མདོ་བཞི་བསྟན་པ་གང་ཞེ་ན། འདི་ལྟ་སྟེ། ཡོ་ག་ཕྱི་ནང་གི་རང་གཞུང་དངོས་པོ་རྣམས་མཚན་མ་གཉིས་མེད་པར་ཆོས་ཉིད་རྒྱུ་རྐྱེན་དང་བྲལ་བའི་རང་རིག་སྐྱེ་བ་མེད་པས་རྒྱས་ཐེབས་པས་བདེན་གཉིས་དབྱེར་མེད་ཀྱི་དངོས་གཞིར་སྟོན་པ་དང༌། དེ་༼༣༡༤༽ལ་བཟང་ངན་བླང་དོར་དང་བྲལ་བས་མཉམ་པ་ཉིད་དུ་སྟོན་པ་དང༌། ཆོས་ཇི་སྙེད་པ་རྣམས་ཀྱི་རང་བཞིན་ཡེ་ནས་མ་བཅོས་མ་བསླད་པར་ཇི་བཞིན་པ་ཉིད་དུ་གནས་པ་དང༌། དེ་ལྟ་བུ་ལ་འབྲས་བུའི་ངོ་བོ་རྒྱུ་ཡིས་བྱས་པ་མིན་པས་འཕྲལ་དུ་བྱ་བས་བརྩལ་བ་མེད་པར་ཆོས་ཐམས་ཅད་དེ་ལྟར་ཡིན་པར་ལུང་སྟོན་ཞིང་འཆད་པར་བྱེད་པའོ། །ལང་ཀའི་བདག་པོ་ཡོ་ག་ཕྱི་ནང་གི་མདོ་བཞི་པོ་དེ་དག་ནི་གཞན་རྒྱུའི་ཐེག་པ་རྣམས་ཀྱི་དབུ་མ་པ་ཡང་དོན་དམ་པ་འབའ་ཞིག་ལ་མཐའ་དང་བྲལ་བས་རང་བཞིན་སྐྱེ་བ་མེད་པར་འདོད་པ་དང༌། དེའི་ངང་ལ་བཟང་ངན་དང་བླང་དོར་བྲལ་བས་མཉམ་པ་ཉིད་དང༌། སྟོང་པ་ཆེན་པོའི་ངོ་བོ་ཡེ་ནས་མ་བཅོས་མ་བསླད་པས་ཇི་བཞིན་པ་ཉིད་དང༌། དེ་ལྟར་དོན་དམ་པར་སྒྲུབ་ཅིང་བརྩལ་བ་མེད་པར་སྨྲ་ཡང༌། ཀུན་རྗོབ་ཀྱི་དབང་དུ་སྐྱེ་བ་ཡོད་པ་དང༌། མི་མཉམ་པ་དང༌། བཅོས་མར་སྣང་བ་དང༌། རྩོལ་སྒྲུབ་དང་བཅས་པར་སྨྲ་བ་དང༌། ཆེ་བའི་ཁྱད་པར་མ་འདྲེས་པར་འཕགས་པའི་ཤན་འབྱེད་དང་བཅས་པས་མདོ་བཞིས་དོན་འགྲོལ་བ་གང་ཡིན་པ་གསང་སྔགས་ཐེག་པ་ཆེན་པོའི་དེ་ཁོ་ན་ཉིད་བསྟན་པ་སྟེ། གཞི་བདེན་པ་ཕྱོགས་གཅིག་པ་དང་དབྱེར་མེད་དུ་རྟོགས་པའི་ཁྱད་པར་གྱི་དབྱེ་བ་ཅན་དུ་ངེས་པའི་ཕྱིར། ཞེས་མདོ་ལས་སྔགས་ཀྱི་ཁྱད་འདོན་མཛད་པ་ཉིད་དོ། །དེ་བས་ན་དོན་གྱི་གཞི་ནས་ཀྱང་ཁྱད་པར་ཆེ་བ་སྟེ། དབུ་མའི་སློབ་དཔོན་ཨཱརྱ་དེ་བ་ཉིད་ཀྱི་མན་ངག་ལས། གཅིག་དང་དུ་མ་རྟེན་འབྲེལ་གྱིས། །བྲལ་བའི་མ་སྐྱེས་སྟོང་ལྟ་བ། །བེམས་པོའི་ནང་ན་དེ་ལ་ངས། །བེམས་པོའི་མཆོག་ཏུ་སྨྲ་བ་མིན། །རྒྱུ་ཡིས་བགྲོད་པའི་ཀུན་ཏུ་འོད། །ཐབས་ཆེན་ལམ་གྱི་ཆོས་སྐུ་སྟེ། །ཡང་དག་རྫོགས་པའི་སངས་རྒྱས་ལ། །རྒྱ་མཚོའི་རླབས་བཞིན་ཤུགས་ཀྱིས་འཆར། །ཆུ་ཟླ་གཟུགས་བརྙན་འགྲོ་འོང་མེད། །སྨོན་ལམ་སྟོབས་ལ་རག་མ་ལས། །ཞེས་གསུངས་པས། ཆེ་བའི་ཁྱད་པར་གསལ་བར་ཡིད་ཆེས་སོ།།

གསུམ་པ་རྩ་བ་བཤད་པ་ནི།

ལང་ཀའི། ཞེས་པ་ནས། འབྱིན་པར་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་རྩ་བ་གང་ཞེ་ན། འདི་ལྟ་སྟེ། དེ་ཁོ་ན་ཉིད་གང་ཡིན་པ་དང་། དམ་པར་ངེས་པ་དང་། ཡོངས་སུ་ཟིན་པའོ། །ལངྐའི་བདག་པོ་དེ་དག་ནི་རྩ་བ་སྟེ། དེས་སྒོ་དེ་དག་གི་ཇི་ལྟ་བ་ངེས་པར་འབྱིན་པར་ཤེས་པར་བྱའོ།།

ལང་ཀའི་བདག་པོ། དེ་ལ་རྩ་བ་གསུམ་གང་ཞེ་ན། འདི་ལྟ་སྟེ། ཞེས་ཉེ་བར་བསྟན་པ་ནི་རང་བཞིན་དང་ལམ་དང་གྲུབ་པའི་སྒོ་ནས་གཞིར་གྱུར་པའི་གྲངས་ཏེ། གཞི་དངོས་པོའི་གནས་ལུགས་སངས་རྒྱས་དང་སེམས་ཅན་གྱི་རྟོགས་རུང་མ་རྟོགས་རུང་གསང་སྔགས་ཇི་བཞིན་པའི་ཆོས་ཉིད་བདེན་༼༣༡༥༽གཉིས་དབྱེར་མེད་ཀྱི་དེ་ཁོ་ན་ཉིད་གང་ཡིན་པ་དང༌། དེའི་དོན་ཇི་ལྟ་བར་ཐག་ཆོད་པའི་མཚོན་ཐབས་ཀྱིས་གདེངས་མི་འགྱུར་བར་ངེས་ཏེ་ཡང་དག་པར་རྟོགས་པ་ལམ་དམ་པར་ངེས་པ་དང༌། དེ་ཉིད་མངོན་དུ་གྱུར་པས་བྱ་བ་མཐར་ཕྱིན་ཏེ་བདག་གཞན་གྱི་དོན་ཡོངས་སུ་རྫོགས་པར་ཟིན་པ་འབྲས་བུ་ལྷུན་གྱིས་གྲུབ་པའོ། །ལང་ཀའི་བདག་པོ། ཞེས་བོས་ནས། གསུམ་པོ་དེ་དག་ནི་ཆོས་ཐམས་ཅད་ཀྱི་རྩ་བ་སྟེ། གསུམ་པོ་དེས་ཐབས་ཀྱི་སྦྱོར་སྒོ་དང་ངེས་པའི་གསང་སྒོ་གཉིས་ཀྱི་དོན་དེ་དག་ཇི་ལྟ་བ་བཞིན་དུ་རྟོགས་པར་བྱེད་ཅིང་ངེས་པར་འབྱིན་པར་ཤེས་པར་བྱའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

བསྡུ་བ་རྣམ་པར་འགྲེལ་པའི་ལེའུ་སྟེ་བཞི་བཅུ་དྲུག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གསང་སྔགས་ཕྱི་ནང་གི་བསྟན་པ་ཐམས་ཅད་ཀྱི་དོན་སྙིང་པོའི་ཡང་བཅུད་དུ་བསྡུ་བ་ཉིད་ལྡེའུ་མིག་གསུམ་གྱིས་རྣམ་པར་འགྲེལ་བའི་ཚུལ་བསྟན་པའི་ལེའུ་སྟེ་བཞི་བཅུ་རྩ་དྲུག་པ་ཉིད་ལེགས་པར་བཤད་པའོ།། །།

ལེའུ་ཞེ་བདུན་པ་གླེང་གཞི་ཕུན་སུམ་ཚོགས་པ་བསྟན་པ།

༈ གསུམ་པ་ཁྱད་པར་དུ་ངེས་པའི་གསང་སྒོར་འཇུག་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། ངེས་པར་མཐོང་བའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས། ལངྐའི་བདག་པོ་ལ་བོས་ཏེ་སྨྲས་པ། ལངྐའི་བདག་པོ་དེ་དག་ལས་ཁྱད་པར་དུ་ངེས་པའི་གསང་སྒོ ལྡེ་མིག་གསུམ་གྱིས་འབྱེད་པ་ཡང་འདི་ལྟ་སྟེ། དམ་པ་རྣམས་ཀྱི་གསང་བའི་སྒོ།

ཡན་ལག་མདོ་དང་རྩ་བ་ཡི། །འབྱེད་འགྲོལ་ངེས་པར་འབྱིན་པ་ཡིས། །དེ་ཉིད་ངེས་པར་མཐོང་བའོ།།

དེ་ནས་ཡང་སྟོན་པ་གསང་བའི་བདག་པོ་དེས། སྡུད་པ་པོ་ལང་ཀའི་བདག་པོ་ལ་བོས་ཏེ་སྨྲས་པ། ལང་ཀའི་མངའ་བདག་ཆེན་པོ། བཤད་པ་དེ་དག་རྣམས་ལས་ཐབས་ཀྱི་སྦྱོར་སྒོ་ལས་ཀྱང་ཁྱད་པར་དུ་གྱུར་པ་ངེས་པའི་གསང་སྒོ་གསང་སྔགས་ནང་པའི་བང་མཛོད་ལྡེའུ་མིག་རྣམ་པ་གསུམ་གྱིས་འབྱེད་ཚུལ་བསྟན་པ་ཡང༌། འདི་ལྟ་སྟེ། རྒྱལ་བ་རྫོགས་པའི་སངས་རྒྱས་རྣམ་འདྲེན་དམ་པ་རྣམས་ཀྱི་ཐུགས་ལ་བརྣག་པས་གསང་བའི་དོན་ཟབ་མོ་འབྱུང་བའི་སྒོ་དམ་པ་གསང་ཆེན་ལུང་གི་གསང་བ་ཡང༌། རྒྱུད་ཀྱི་ཡན་ལག་དྲུག་དང༌། མདོ་བཞི་དང༌། རྩ་བ་གསུམ་གྱི་ལྡེ་མིག་དམ་པ་ཡི། ལྡེ་མིག་ལྟ་བུར་འབྱེད་པ་དང༌། སྒོ་བྱེ་བ་ལྟ་བུར་འགྲོལ་བ་དང༌། མཛོད་འབྱིན་པ་ལྟ་བུར་ངེས་པར་འབྱིན་པ་ཡིས་སྒོ་ནས་རྟོགས་པའི་ཐབས་གསུམ་གྱིས། གསང་བ་མཆོག་གི་དེ་ཁོ་ན་ཉིད་ངེས་པར་མཐོང་བར་བྱེད་པའོ།།

གཉིས་པ་ལ་རྒྱས་པར་བཤད་པ་གསུམ་སྟེ། འབྱེད་པར་བྱེད་པའི་ལྡེ་མིག འགྲོལ་བར་བྱེད་པའི་ལྡེ་མིག འབྱིན་པར་བྱེད་པའི་ལྡེ་མིག་བཤད་པའོ། །དང་པོ་ལ་གསུམ་སྟེ། སྤྱིར་བསྟན་པ། བྱེ་བྲག་ཏུ་བཤད་པ། ཞབས་བསྡུ་བའོ། །དང་པོ་ལ་གཉིས་༼༣༡༦༽ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འབྱེད་པ་རྒྱུ་དང༌། ཞེས་པ་ནས། ཀུན་ལ་ངེས་པར་འགྲོ། །ཞེས་པའི་བར་གྱིས་བསྟན་ཏེ།

འབྱེད་པ་རྒྱུ་དང་རྩ་བ་དང་། །འགྲེལ་བའི་ཚིག་དང་ངེས་པ་དང་།།

སྦྱོར་བས་ཡན་ལག་རྫོགས་པ་ཡིན། །བརྗོད་འབྱུང་ཀུན་ལ་ངེས་པར་འགྲོ།།

དེ་ཡང་འབྱེད་པའི་ལྡེ་མིག་བསྟན་པ་ལ་ཡང༌། རྒྱུད་འབྱུང་བའི་རྒྱུ་གླེང་གཞི་དང༌། རྐྱེན་བརྗོད་པའི་གཞི་རྟེན་རྩ་བ་གླེང་བསླང་བ་དང༌། རྩོད་པ་བཟློག་པ་དགོས་འབྲེལ་བཞི་པའི་དོན་དང་དོན་བྱེད་པ་འདྲེན་པའི་ཚིག་བཅུ་དང༌། ཡན་ལག་ངེས་པ་བཅུ་གཉིས་དང༌། སྦྱོར་བ་དྲུག་ཅུ་རྩ་གཅིག་གིས་ཡང་དག་གི་ས་ལ་སྦྱོར་བས་ཡན་ལག་དྲུག་གི་དོན་རྫོགས་པར་ཚང་བ་ཡིན་ཏེ། དེ་ནི་འདི་ཉིད་གཅིག་པུར་མ་ཟད་གསང་སྔགས་ཀྱི་རྒྱུད་བརྗོད་འབྱུང་ཇི་སྙེད་པའི་བསྟན་པ་ཀུན་ལ་ངེས་པར་འགྲོ་ཞིང་ཐུན་མོང་དུ་འཇུག་གོ།

གཉིས་པ་རྒྱས་པར་བཤད་པ་ནི།

རྒྱུ་གཞི་གང་འབྱུང༌། ཞེས་པ་ནས། དྲུག་ཏུ་རྫོགས་པའོ། །ཞེས་པའི་བར་གྱིས་བསྟན་ཏེ།

རྒྱུ་གཞི་གང་བྱུང་ཆད་ཕྱིར་ནི། །རྒྱུ་ཡི་ངོ་བོ་བྱིན་གྱིས་བརླབ། །ལུང་བསྟན་ཉིད་དུ་ངེས་པར་སྣང་། །རྩ་བའི་ཡན་ལག་གང་དག་གིས། །མདུན་བསུ་གུས་དང་དྲི་བ་དྲིས། །སྐབས་ལ་གླེང་དུ་བླང་བའོ། །འབྲེལ་བའི་ཡན་ལག་རྣམ་པ་བཞི། །བརྗོད་དང་བརྗོད་བྱ་འགྲེལ་དགོས་ལས། །ཐ་མ་གཉིས་བཞིར་འདྲེན་པའོ། །འདྲེན་པ་གང་འདིར་རྣམ་པ་བཅུ། །ལྟ་ཉིད་དེ་བཞིན་སྒོ་འབྱེད་དང་། །སྤྱིར་སྡུད་པ་དང་འབྱོར་པར་འདྲེན། །རང་རྐྱེན་ལྡེམ་དགོངས་གལ་པོ་ཉིད། །མ་བཅོས་དེ་ཉིད་མཚོན་པའི་དཔེ། །ཆོ་རོལ་སྣྲེལ་བཞི་རྣམ་པ་བཅུ། །མེ་ལོང་བཅུ་དང་རྣམ་སྦྱར་བས། །སྒྲོན་མས་མུན་པའི་རྫས་ཚོལ་སྦྱར། །ངེས་པ་བཞི་བཞི་བཞིར་སྦྱར་བས། །བཅུ་གཉིས་ཡན་ལག་བཞིར་ཀུན་སྣང་། །སྦྱོར་བ་བཞི་པ་ལྔ་གཉིས་བཞི། །ཡན་ལག་ལྔར་སྣང་དེར་སྦྱར་ལྔ། །རྟོག་འཇུག་དྲུག་ཅུ་གཅིག་ཐབས་ནས།།

ཡན་ལག་དྲུག་ཏུ་རྫོགས་པའོ།།

དེ་ལ་རྒྱུ་གླེང་གཞི་ཕུན་སུམ་ཚོགས་པ་ལ་ཡང་དབྱེ་བ་གསུམ་སྟེ། རུ་ཏྲའི་དངོས་པོ་འཇིག་རྟེན་དུ་བྱུང་བ་འདུལ་བའི་ཕྱིར་གདུལ་བྱ་སྔོན་གྱི་གླེང་གཞི་དང༌། གང་ལྷན་ཅིག་པ་དང་གོ་ཕྱེ་བའི་འཁོར་གྱི་དོན་དུ་བསྟན་པ་དམ་པ་གསང་སྔགས་ཀྱི་དངོས་པོ་འབྱུང་བའི་དགོས་ཆེད་ཀྱི་ཕྱིར་ནི། རྒྱུ་ཡི་ངོ་བོ་སྐུ་བཞིས་གསང་བདག་ལ་བརྒྱུད་པས་སྔོན་བྱུང་བྱིན་གྱིས་བརླབས་ཀྱི་འབྱུང་བའི་གླེང་གཞི་གང་ཡིན་པ་གཏན་ཚིགས་བྱུང་ཁུང་གི་གླེང་གཞི་དང༌། གསང་བདག་གིས་དམ་པའི་རིགས་ཅན་ལྔ་ལ་བརྒྱུད་པས་རྗེས་འཇུག་ལུང་བསྟན་བརྒྱུད་པའི་གླེང་གཞི་ཉིད་དུ་ངེས་པར་སྣང་བ་དེ་རྣམས་སོ། །བསྟན་པ་རིན་པོ་ཆེའི་བརྗོད་པ་འབྱུང་བའི་རྩ་བ། གླེང་བསླང་བའི་ཡན་ལག་ལའང་དབྱེ་བ་གསུམ་སྟེ། སྟོན་པ་དང་འཁོར་དང་སྡུད་པ་པོ་དང་བཅས་པ་གང་དག་གིས། སྟོན་པས་འཁོར་རྣམས་དོན་ལ་སྤྲོ་བ་སྐྱེད་པའི་ཕྱིར་མདུན་བསུ་བའི་སྒོ་ནས་གླེང་བསླང་བ་དང༌། འཁོར་གྱིས་སྟོན་པས་གསུངས་པའི་དོན་མ་རིག་པས་ཐེ་ཚོམ་སྐྱེས་ནས་གུས་པ་དང་བཅས་ཏེ་དྲི་བ་དྲིས་ནས་གླེང་བ་སླང་བ་དང༌། དེ་ནས་སྐབས་སུ་དྲིས་ལན་བྱུང་ངོ་ཅོག་ལས་གློ་གློར་གླེང་དུ་ལངས་པས་རྒྱུད་དོན་རྫོགས་པར་འབྱུང་བའོ། །འབྲེལ་བའི་ཡན་ལག་དགོས་འབྲེལ་རྣམ་པ་བཞི་སྟེ། ཚིག་དང་ཡི་གེར་བསྟན་པ་རྗོད་བྱེད་དང་རྒྱུད་དོན་གྱི་ངོ་བོ་བརྗོད་བྱ་དང༌། འབྲེལ་བ་དང་དགོས་པ་རྣམས་ལས་ཐ་མ་ལ་དགོས་པ་དང་ཉིང་དགོས་གཉིས་སུ་ཕྱེ་བས་བརྗོད་བྱ་དང༌། འབྲེལ་བ་དང་དགོས་པ་དང་ཉིང་དགོས་ཀྱི་གྲངས་བཞིར་འདྲེན་པའོ། །དེ་ལ་བརྗོད་བྱ་ནི་རྒྱུད་ཀྱི་དོན་ཏེ་༼༣༡༧༽སྦས་པའི་དོན་མཚོན་འབྱུང་བའི་རིགས། མ་མཐོང་རྣམས་ལ་བསྟན་པར་བཤད། །ཅེས་པས་མངོན་ནོ། །རྗོད་བྱེད་ནི་ཕྱག་ན་རྡོ་རྗེ་འཆད་པའི་སྐྱེས་བུས་བསྟན་པའི་ལུང་གི་ཚིག་རྒྱུད་དོ། །འབྲེལ་བ་ནི། རྒྱུ་དང་འབྲས་བུ་དང་ཐབས་དང་ཐབས་ལས་བྱུང་བར་འབྲེལ་བའི་ཚུལ་ཏེ། སྟོན་པ་ཀུན་ཏུ་བཟང་པོས་གསང་བ་པ་ལ་དབང་བསྐུར་ནས། ཕྱག་ན་རྡོ་རྗེའི་ལག་ཏུ་རྒྱ་གྲམ་བབས་པས་འཁོར་ལོ་བསྐོར་ཏེ་འདུས་པ་ཕལ་མོ་ཆེ་ལ་བཤད་པ་དང༌། གསང་བའི་བདག་པོ་ནི་རྡོ་རྗེ་སེམས་དཔའི་ཐུགས་དེ་བཞིན་ཉིད་ལས་སྐྱེས་པས་བཅོམ་ལྡན་འདས་ཀྱི་ཐུགས་དང་འབྲེལ་བའོ། །དགོས་པ་ནི་ལམ་རྣམས་དང་དེའི་ཆ་རྐྱེན་རྣམས་ཏེ་དང་དུ་བླང་བའི་ཕྱིར་རོ། །དགོས་པའི་ཡང་དགོས་པ་ནི་གསང་སྔགས་ཇི་བཞིན་པ་སེམས་ཀྱི་དཀྱིལ་འཁོར་འོད་གསལ་བ་ཉིད་མངོན་དུ་གྱུར་པ་སྟེ། དགོས་པས་དོན་དུ་གཉེར་བའི་དོན་སྒོ་ཡིན་པའི་ཕྱིར་རོ། །སྨྲ་བརྗོད་ཚིག་གི་ཡན་ལག་གིས་དོན་ལ་ངེས་པར་འདྲེན་པ་ལའང་སྤྱིར་བརྗོད་བྱ་མཚོན་པའི་ཐབས་མང་ཡང་གང་ལུང་ཆེན་གསང་བ་ཟབ་མོའི་འབྲུ་གཉེར་གྱི་དོན་བཤད་པའི་སྐབས་འདིར་ནི་མཚོན་པའི་དཔེ་དང་སྦྱར་ཏེ་གསལ་བར་བྱེད་པའི་ཡན་ལག་གི་ཚིག་རྣམ་པ་བཅུ་སྟེ། རང་བཞིན་ལྟ་བའི་ཚིག་གིས་རྟོགས་པའི་ནམ་འཕང་གཅད་པ་ཁྱུང་ནམ་མཁའ་ལ་ལྡིང་བ་ལྟ་བུ་ཉིད་དང༌། དེ་བཞིན་དུ་སྒོ་རྣམ་པར་འབྱེད་པའི་ཚིག་གིས་དོན་གྱི་ཚོམས་ས་གཅོད་ཀྱི་དབྱེ་བ་སྟག་གི་མཆོངས་པ་ལྟ་བུ་དང༌། སྤྱིར་སྤྱི་དོན་སྡུད་པའི་ཚིག་གིས་ཁོག་དབུབ་པ་སེང་གེའི་མཆོངས་པ་ལྟ་བུ་དང༌། འབྲེལ་བར་སྦྱོར་བའི་ཚིག་གིས་གོང་འོག་གི་ལེའུ་མཚམས་འབྱོར་བར་བྱས་ཏེ་འདྲེན་པ་ངང་མོའི་འགྲོས་ལྟ་བུ་དང༌། རང་རྐྱེན་གཉེར་གྱི་ཚིག་གིས་གཞུང་གི་འབྲུ་གཞོམ་པ། རུ་སྦལ་གྱི་འགྲོས་ལྟ་བུ་དང༌། ལྡེམ་དགོངས་མན་ངག་གི་ཚིག་གིས་མི་འཚམས་པ་འཚམས་པར་བཤད་པ་རྣ་ཕྲུག་བྲག་ལ་འཛེགས་པ་ལྟ་བུ་དང༌། གལ་པོ་ཞེས་གཏར་ཀ་གེགས་སེལ་གྱི་ཚིག་གིས་ཐེ་ཚོམ་གཅོད་པ་ཉིད་གླག་གཟན་ལ་འཇུམས་པ་ལྟ་བུ་དང༌། ཚད་མ་བཀའ་གཞུང་གི་ཚིག་གིས་མ་བཅོས་མ་བསླད་པས་དེ་ཁོ་ན་ཉིད་ལ་ཡིད་ཆེས་ཤིང་གདེངས་རྙེད་པར་བྱ་བ་དུས་ཀྱི་འབྲུག་ཆར་ལྟ་བུ་དང༌། མཚོན་པའི་དཔེ་ཡི་ཚིག་གིས་མཐའ་མཐུན་པ་དང་མི་མཐུན་པ་ཉེ་བར་སྦྱར་བས་ཡིད་ཆེས་ཤིང་གོ་སླ་བར་བྱ་བ་མེ་ལོང་ལྟ་བུ་དང༌། ཆོ་རོལ་སྣྲེལ་གཞིར་གྱུར་པ་བསྣོལ་༼༣༡༨༽མཚམས་འཕེན་སྡུད་ཀྱི་ཚིག་གིས་གོང་འོག་གི་འབྲེལ་བརྩི་ཞིང་འཁྲུགས་པ་སྡེབ་པ་ཐགས་དང་སེང་ཕྲུག་རྩལ་སྦྱོང་བ་ལྟ་བུ་དང་རྣམ་པ་བཅུ་པོ་ཉིད་མཚོན་བྱེད་ཀྱི་དཔེ་མེ་ལོང་བཅུ་དང་མཚོན་བྱ་དོན་གྱི་གནས་བཅུ་རྣམ་པར་སྦྱར་བས་གནས་ལུགས་རྟོགས་པར་བྱ་བ་ནི་སྒྲོན་མས་མུན་པའི་རྫས་ཚོལ་བ་དང་འདྲ་བར་སྦྱར་བར་བྱ་སྟེ། སྒྲོན་མ་ནི་འདྲེན་པའི་ཚིག་མུན་པ་ནི་དོན་མི་མཐོང་བ། རྫས་ཚོལ་བ་ནི་གསེར་དང་འདྲ་བའི་བརྗོད་བྱ། སྦྱར་བ་ནི་དོན་ངེས་པར་མཐོང་བའོ། །དེས་ན་བཤད་པ་དང་འཆད་པའི་འགྲེལ་ལུགས་རྣམས་ཀྱང་འདི་དག་གིས་ཁོང་ནས་ངེས་པར་འཇལ་བར་བྱའོ། །ངེས་དོན་རྙེད་པའི་བྱེ་བྲག་གི་ཡན་ལག་ངེས་པ་ནི་སྣོད་རྣམ་པ་བཞི་ལ་བསྟན་པ་བཞི་ཡི་ཚིག་དང་དོན་གྱི་ཆོས་རྣམས་ཆོས་རྟགས་ཀྱི་ཕྱག་རྒྱ་གསང་བའི་སྤྱི་ཐེམས་ཆེན་པོ་བཞིར་སྦྱར་ཏེ་གཏན་ལ་དབབ་ནས་དམིགས་བཟུང་བས་ངེས་པའི་ངོ་བོ་བཞི་གསུམ་བཅུ་གཉིས་སུ་དབྱེ་སྟེ་ཡན་ལག་བཞི་བཞིར་འཆད་པ་ཀུན་སྣང་བའོ། །ཡང་ན་སྣོད་བཞི་ལ་ཆོས་རྟགས་བཞི་དང༌། དེའི་དོན་བཞི་སྟེ་ཡན་ལག་བཞི་ཚོམ་འདྲེས་པར་ཆ་རེར་འཆད་པའང་སྣང་ངོ་། །བདག་གི་དོན་དུ་སྦྱོར་བ་བཞི་པ་ཞེས་བཞི་ཚོ་བརྒྱད་དེ་སུམ་ཅུ་སོ་གཉིས་ལ། ཀུན་མཁྱེན་དམ་པ་རིན་པོ་ཆེའི་གསུང་སྒྲོས་ལྟར་ན། སྦྱོར་བའམ་རྟོགས་པ་བཞི། ཤེས་པ་བཞི། དགོས་པ་བཞི། ལམ་བཞི། དབང་བཞི། གོམས་པ་བཞི། བསྙེན་བསྒྲུབ་བཞི། མཚན་ཉིད་དང་སྦྱར་བ་བཞིའམ། ཡང་ན་རིགས་འཛིན་བཞིའོ། །གཞན་དོན་དུ་སྦྱོར་བ་ལྔ་ཚན་གཉིས་དང་བཞི་ཚན་གཉིས་དང་ཡན་ལག་ལྔར་སྣང་བ་དང་དེ་དང་སྦྱར་བ་ལྔ་སྟེ་ཉེར་བརྒྱད་དུ་གསུངས་པ། མངོན་ཤེས་ལྔ། སྒྲུབ་པའི་ཡོ་བྱད་ལྔ། ཆོ་འཕྲུལ་བཞི། ཕྲིན་ལས་བཞི། ཐབས་ལྔ། ཐབས་དང་སྦྱར་བ་ལྔའོ།།

འགྲེལ་ཆེན་ལྟར་ན། ངེས་པའི་ཐབས་ཆེན་པོས་ལམ་དམ་པ་ལ་ངེས་པར་སྦྱོར་བའི་ཡན་ལག་ནི། རྟོགས་པ་རྣམ་པ་བཞི། མཚན་ཉིད་ཀྱི་ཡན་ལག་བཞི། དགོས་འབྲེལ་བཞི། ཐོས་ཆུང་གོམས་དང་སོགས་དཀྱིལ་འཁོར་དུ་འཇུག་པའི་ཡན་ལག་བཞི། ཚོ་གཉིས། སེམས་འཇུག་པའི་རིམ་པ་བཞི། བསྙེན་བསྒྲུབ་བཞི། དེའི་དོན་ཤེས་པར་བྱ་བ། དེ་བཞིན་མཉམ་གྱུར་སོགས་བཞི་ནི་བདག་དོན་ཏེ། གྲངས་ནི་བཞི་ཚོ་བརྒྱད་དོ། །གཞན་དོན་མཛད་པ། ཆོ་འཕྲུལ་བཞི་དང༌། ཐབས་སྦྱར་༼༣༡༩༽ལྔ་དང༌། སྔགས་ཀྱི་རང་བཞིན་ལྔ་སྟེ་ཕྲག་གཉིས་དང༌། ཕྲིན་ལས་བཞི་དང༌། ཐབས་ཀྱི་ཡན་ལག་ལྔ་དང༌། དེས་དོན་ལ་སྦྱོར་ཐབས་ལྔའོ། །གྲངས་ནི། ལྔ་ཕྲག་བཞི་དང༌། བཞི་ཕྲག་གཉིས་སོ། །དེ་གཉིས་ཀའང་དོན་ལ་ཁྱད་པར་མེད་དོ། །དེ་ལྟར་སྤྱིར་བསྡོམས་པས་ངེས་པར་དོན་གཉིས་ལ་འཇུག་པས་སྦྱོར་བའི་རྟོགས་འཇུག་དྲུག་ཅུ་རྩ་གཅིག་གི་ཐབས་བསྟན་ནས། གླེང་གཞི་མན་ཆད་ཀྱིས་འཆད་པའི་ཡན་ལག་དྲུག་པོ་རྣམས་འདིར་འདུས་ཤིང་ཚང་བ་ཉིད་དུ་ངེས་པར་རྫོགས་པའོ། །དེ་ལྟར་དྲུག་ལ་སྤྱིར་དགུ་བཅུ་རྩ་གཅིག་ཏུ་འགྱུར་ཏེ། གླེང་གཞི་གཉིས། གླེང་བསླང་བ་གཉིས། དགོས་འབྲེལ་བཞི། འདྲེན་པ་བཅུ། ངེས་པ་བཅུ་གཉིས། སྦྱོར་བའི་རེ་གཅིག་གོ།

གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། སྦྱོར་བའི་ཡན་ལག་གོ །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་འདིར་ཡན་ལག་དྲུག་ནི་འདི་ལྟ་སྟེ། རྒྱུའི་ཡན་ལག་དང་། རྩ་བའི་ཡན་ལག་དང་། འབྲེལ་བའི་ཡན་ལག་དང་། འདྲེན་པའི་ཡན་ལག་དང་། ངེས་པའི་ཡན་ལག་དང་། སྦྱོར་བའི་ཡན་ལག་གོ།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། དེ་ལ་གང་འདིར་ཡན་ལག་དྲུག་བསྣན་ནས་སྟོན་པ་ནི། རེ་རེ་ནས་རྒྱས་པར་བསྟན་པའི་ཕྱིར་འདི་ལྟ་སྟེ།

རྒྱུའི་ཡན་ལག་གླེང་གཞི་དང༌། རྩ་བའི་ཡན་ལག་གླེང་བསླང་བ་དང༌། འབྲེལ་བའི་ཡན་ལག་དགོས་འབྲེལ་དང༌། འདྲེན་པའི་ཡན་ལག་ཚིག་བཅུ་དང༌། ངེས་པའི་ཡན་ལག་བཅུ་གཉིས་དང༌། སྦྱོར་བའི་ཡན་ལག་དྲུག་ཅུ་རྩ་གཅིག་དག་གོ།

གཉིས་པ་རྒྱས་པར་བཤད་པ་ལ་དྲུག་སྟེ། རྒྱུའི་ཡན་ལག རྩ་བའི་ཡན་ལག འབྲེལ་བའི་ཡན་ལག འདྲེན་པའི་ཡན་ལག ངེས་པའི་ཡན་ལག སྦྱོར་བའི་ཡན་ལག་བཤད་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། རྫོགས་པ་དྲུག་གོ །ཞེས་པའི་བར་གྱིས་བསྟན་ཏེ།

དེ་ལ་ལངྐའི་བདག་པོ་རྒྱུའི་ཡན་ལག་ནི། གང་འབྱུང་བའི་རྒྱུར་གྱུར་པ་སྟེ། འདི་ལྟར་ཡོངས་སུ་ཚོགས་པ་དྲུག་གོ།

ལེའུ་འདིས་ངེས་དོན་དང་དྲང་དོན་གཉིས་ཀ་སྟོན་ནོ། །ལང་ཀའི་བདག་པོ། དེ་ལ་རྒྱུའི་ཡན་ལག་གླེང་གཞི་བསྟན་པ་ནི། གང་བསྟན་པའི་དངོས་པོ་འབྱུང་ཞིང་སྣང་བའི་རྒྱུར་གྱུར་པ་སྟེ་མིང་ཡང་ངེས་པར་འགྲུབ་པ་ལ། དེའི་ངོ་བོ་བསྟན་པ་ནི་འདི་ལྟར་ཏེ། སྟོན་པ་དང༌། གནས་དང༌། འཁོར་དང༌། སྡུད་པ་དང༌། དུས་དང༌། བསྟན་པ་སྟེ་ཡོངས་སུ་རྫོགས་པའི་ཕུན་སུམ་ཚོགས་པ་དྲུག་གོ།

གཉིས་པ་རྒྱས་པར་བཤད་པ་ལ་གཉིས་ཏེ། སྐུ་བཞིའི་གླེང་གཞི་ལོ་རྒྱུས་སུ་བརྗོད་པ། དེ་དག་མ་འདྲེས་ཡོངས་རྫོགས་སུ་བཞུགས་པས་ཞུ་བ་བསྒུགས་པའོ། །དང་པོ་ལ་བཞི་སྟེ། ཆོས་སྐུའི་གླེང་གཞི། ༼༣༢༠༽ལོངས་སྐུའི་གླེང་གཞི། སྤྲུལ་སྐུའི་གླེང་གཞི། གསང་བའི་སྐུའི་གླེང་གཞི་བཤད་པའོ། །དང་པོ་ལ་བཞི་སྟེ། དུས་དང་སྡུད་པ་པོ་ཐུན་མོང་དུ་བསྟན་པ། སྟོན་པ་བཤད་པ། གནས་བསྟན་པ། འཁོར་བཤད་པའོ། །དང་པོ་ནི།

ལང་ཀའི། ཞེས་པ་ནས། དུས་གཅིག་ན། ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ཡང་འདི་ལྟར་འདི་སྐད་བདག་གིས་ཐོས་པ།

དེ་ཁོ་ན་ཉིད་ངེས་པར་སྣང་བའི་དུས་གཅིག་ན།

འདི་ནི་གླེང་གཞི་གསུམ་དུ་ཕྱེ་བ་ལས། གཏན་ཚིགས་འབྱུང་ཁུངས་རྒྱུའི་གླེང་གཞིར་གྱུར་པའི་ཕྱིར། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། དེ་ཡང་འདི་ལྟར། བློ་གྲོས་ཅན་ལ་ངེས་པར་སྣང་བའི་བསྟན་པ་རིན་པོ་ཆེ་འདི་སྐད་དུ་ཉེ་བར་བསྟན་པའི་དོན་སྟོན་པ་ཆོས་ཀྱི་སྐུ་ལ་གསང་བའི་བདག་པོ་འཆད་པའི་སྐྱེས་བུ་ཉིད་འདིར་སྐབས་ཀྱི་སྡུད་པ་པོར་གྱུར་པ་བདག་གིས་ཐོས་པའི་ཚེ་ཐོས་ལུགས་ཆོས་ཉིད་ཇི་བཞིན་པ་དེ་ཁོ་ན་ཉིད་དུ་རིག་པའི་གསུང་གིས་རིག་པ་ལ་ངེས་པར་མི་འགྱུར་བར་རང་སྣང་ཞིང་ཤར་བའི་དུས་གཅིག་གི་ཚེ་ན། ཞེས་རྒྱུའི་སྡུད་པ་དང་དུས་ཕུན་སུམ་ཚོགས་པའོ།།

གཉིས་པ་སྟོན་པ་བཤད་པ་ལ་གཉིས་ཏེ། སྟོན་པའི་ངོ་བོ་བསྟན་པ། །མཚན་ཉིད་བཤད་པའོ། །དང་པོ་ནི།

བཅོམ་ལྡན་འདས། ཞེས་པ་ནས། ཡོངས་སུ་རྫོགས་པའི་རྒྱལ་པོ་དེ། ཞེས་པའི་བར་གྱིས་བསྟན་ཏེ།

བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཐུགས། དགྲ་བཅོམ་པ་ཡང་དག་པར་རྫོགས་པར་རྫོགས་པའི་སངས་རྒྱས་ཞེས་བྱའི་ཐ་སྙད་དང་བྲལ་བ། བླ་དྭགས་ཐམས་ཅད་ལས་འདས་པ། ནམ་མཁའ་ཆེན་པོ་ཀུན་ལ་ཁྱབ་པའི་ བདག་ཉིད། མངོན་སུམ་མི་གནས་མཚོན་དུ་མེད་པ ་ཡོངས་སུ་རྫོགས་པའི་རྒྱལ་པོ་དེ།

སྟོན་པ་གང་ཞེ་ན། ཐེག་མཆོག་རྫོགས་པ་ཆེན་པོ་དང་སྦྱར་ཏེ། མཐར་ཐུག་པའི་ཡེ་ཤེས་ཆེན་པོ་གཉིས་སུ་མེད་པར་བྱ་བ་ཐམས་ཅད་མཛད་པས་མཐའ་ཀུན་བཅོམ་ཞིང་རང་བཞིན་གྱིས་སྣང་བའི་ཡེ་ཤེས་དང་ཡོན་ཏན་ཐམས་ཅད་ལྡན་པར་བཞུགས་ཀྱང་ངོ་བོ་ཡོངས་སུ་མི་ཟིན་པས་དམིགས་བསམ་ལས་འདས་པ། །གཞི་དབྱིངས་དེ་བཞིན་ཉིད་ཡེ་ཇི་བཞིན་པའི་ངང་ཉིད་དུ་ཕྱིན་པ་མེད་པར་སོན་ཞིང་གཤེགས་པའི་རྒྱལ་བ་ཐམས་ཅད་ཀྱི་ཐུགས་ཀྱི་ངོ་བོ་དབྱིངས་དང་ཡེ་ཤེས་གཉིས་སུ་མེད་པའི་ལྷུན་ལ་མི་གཡོ་བ་ཆེན་པོར་བཞུགས་པ། བདེ་བ་འཇོམས་པས་དགྲ་ཡིས་འཚེ་བ་སྤང་བྱའི་སྣང་བ་ཐམས་ཅད་མ་སྤངས་བྲལ་བར་བཅོམ་པས་དགྲ་བཅོམ་ཆེན་པོ། ཡོན་ཏན་ཇི་སྙེད་པ་ཐམས་ཅད་བརྩལ་བ་མེད་པར་ཡང་དག་པར་མངོན་དུ་བྱས་པས་གང་ལའང་རག་མ་ལས་པར་ཡོངས་སུ་རྫོགས་པའི་མངའ་བདག་སའི་ཞེན་མཐའ་རིལ་སངས་པའི་ཡེ་ཤེས་ཀུན་ཏུ་གདལ་ཞིང་སྒྲིབ་མེད་གསལ་བར་རྒྱས་པ། དེ་ལྟ་བུའི་ངོ་བོར་བཞུགས་པ་ལའང་ཕྱོགས་རིས་བྲལ་བས། ཚིག་གིས་འདི་ཞེས་བྱ་བར་བརྗོད་ཅིང་གདགས་པའི་ཐ་སྙད་ལ་ལྟོས་༼༣༢༡༽པའི་ཟླ་དང་བྲལ་བ། ངོ་བོ་བསྟན་དུ་མེད་པས་གློ་བུར་གྱི་མིང་རྣམས་མ་སྤངས་བྲལ་ཏེ་བླ་དྭགས་ཐམས་ཅད་ལས་འདས་པ། ཕྱིན་པ་མེད་པར་ཀུན་ཏུ་གདལ་བས་ཡེ་ཤེས་ཀྱི་ནམ་མཁའ་ཆེན་པོ་འཁོར་འདས་ཀྱི་དངོས་གཞི་ཀུན་ལ་རྫོགས་པར་ཁྱབ་པའི་བདག་ཉིད་ཆེན་པོ། དབྱིངས་དང་ཁ་དོག་གི་སྐུ་རྣམས་མ་བཀོལ་ལ་མི་ལྡན་པར་མངོན་སུམ་གྱི་ཡུལ་དུ་མི་གནས་པས་དཔེས་མཚོན་ཞིང་བསྐྲུན་དུ་ མེད་པ། དངོས་པོ་གཉིས་པ་རིལ་ཡོངས་སུ་རྫོགས་པའི་རྒྱལ་པོ་ཀུན་གྱི་བདག ་ཉིད་དུ་བཞུགས་པའི་ཆོས་བཅུ་དང་ལྡན་པ་དེ་ནི་སྟོན་པ་ཕུན་སུམ་ཚོགས་པ་ཆོས་ཀྱི་སྐུའི་ངོ་བོའོ།།

གཉིས་པ་མཚན་ཉིད་བཤད་པ་ནི།

འོག་ནས། གང་དུའང་མི་གནས། ཞེས་པ་ནས། མི་ནུབ་པའི་ཏོག་ཆེན་པོར། ཞེས་པའི་བར་གྱིས་བསྟན་ཏེ།

གང་དུ་ཡང་མི་གནས་པ་ཆེན་པོ། གང་ལ་ཡང་མ་ཆགས་ཆགས་པའི་བདག་ཉིད། ཅི་ཡང་མི་མཛད་མཛད་པ་ཐམས་ཅད་ལྷུན་གྲུབ། མི་སྐྱེ་མི་འགག་རྣམ་གྲོལ་རྣམ་དག དངོས་པོར་མ་ཡིན་ནམ་མཁའི་རང་བཞིན། མ་བཅོས་མ་བྱས་ཡེ་ནས་ཇི་བཞིན། འཁོར་བ་མི་སྤོང་ཡེ་བརྡལ་ཁྱབ་པ། དུག་གསུམ་མི་སྤོང་སྨད་པ་ཆེན་པོ། ཅིར་ཡང་མི་དམིགས་དམིགས་པ་ཀུན་འབྱུང་། ཚིག་གི་ལམ་ཆད་བརྗོད་པ་ཀུན་འབྱུང་། གང་དང་མ་འདྲེས་གཅིག་ཏུ་ཡོངས་སུ་རྫོགས་པ། ཀུན་ནས་ཀུན་ཏུ་དང་བཟང་པོ། མི་ནུབ་པའི་ཏོག་ཆེན་པོར།

སྟོན་པའི་མཚན་ཉིད་དང་ཡོན་ཏན་ཇི་ལྟ་བུ་ཞེ་ན། མཐའ་གང་གིས་ཀྱང་མ་རེག་པས་གང་དུའང་མི་གནས་ལ། འདི་འདྲར་མེད་ཅིང་ཐམས་ཅད་ཀྱི་དངོས་པོར་ཡང་ཤར་བས་གང་ཡང་མ་སྤངས་པའི་གནས་པ་ཆེན་པོ། ཡུལ་གྱི་མཚན་ཉིད་གང་དང་ཡང་ལྷན་ཅིག་ པ་མེད་པས་གང་ལའང་མ་ཆགས་ལ། རིལ་དང་མི་ཕྱེད་པ་ཆེན་པོར་ཤར་བས་ཆགས་པའི་བདག ་ཉིད། ཆེད་དུ་བྱ་བ་ཅི་ཡང་མི་མཛད་པར་ཕྲིན་ལས་ཐམས་ཅད་པར་བཞུགས་པས་མཛད་པ་ཐམས་ཅད་ལྷུན་གྱིས་གྲུབ་སྟེ་འགྲོ་དོན་རྒྱུན་ཆད་མེད་པར་མཛད་པ། རྒྱུ་རྐྱེན་དང་བྲལ་བས་མི་སྐྱེ་ལ་ཡེ་ཤེས་མི་འགག་པས་འཕོ་འགྱུར་མེད་པ། ཕྱིན་ཅི་ལོག་དང་ཡང་དག་པའི་འཆིང་བ་ཐམས་ཅད་བཅད་པས་རྣམ་པར་གྲོལ་ཏེ། མཐའི་སྤྲོས་པའི་དྲི་མ་དང་བྲལ་བས་རྣམ་པར་དག་པ། ཐེར་ཟུག་མེད་པར་ཅིར་ཡང་འབྱུང་བས་དངོས་པོ་མ་ཡིན་ཞིང་ནམ་མཁའི་རང་བཞིན་ངང་གིས་གསལ་བ། ཀུན་ནས་ལེགས་པ་ཆེན་པོ་བྱེད་པ་པོས་མ་བཅོས་རྒྱུ་རྐྱེན་གྱིས་མ་བྱས་པར་བརྩལ་བ་མེད་པར་ཡེ་ནས་ཇི་བཞིན་པར་གནས་པས་རྣལ་མར་གྱུར་པ། སྨད་བྱ་འཁོར་བ་སྐྱོན་དུ་མི་འདོར་བས་མི་སྤོང་ལ་དེ་ཉིད་ཆོས་ཀྱི་སྐུ་ཉིད་དུ་གསལ་བར་གྱུར་པས་ཡེ་གདལ་ཁྱབ་པ། ཆགས་སྡང་མ་རིག་པའི་དུག་གསུམ་གྱི་ནད་རྣམས་མི་སྤོང་བར་སྐུ་གསུམ་གྱི་བདུད་རྩིར་མཛད་པས་འཚོ་མཛད་སྨན་པ་ཆེན་པོ། སྤྱོད་ཡུལ་ཀ་ནས་དག་པས་ཅིར་ཡང་མི་དམིགས་ལ་རྣམ་པའི་འཛིན་པ་ཡེ་ནས་འབྲལ་བཞིན་དམིགས་པ་དེ་དག་ཏུ་སྣང་བས་ཀུན་གྱི་འབྱུང་གནས་སུ་གྱུར་པ། ངོ་བོ་བརྗོད་དུ་མེད་པས་ཚིག་གི་ལམ་༼༣༢༢༽ཆད་ཀྱང་ངང་ལས་ལྷུན་གྱིས་གྲུབ་པར་འཆར་བས་སྨྲ་བརྗོད་ཀྱི་རྣམ་པར་རང་བཞིན་ཀུན་ཏུ་འབྱུང་བ། མཐའ་གང་གིས་ཀྱང་མ་བསྒོས་པས་གང་དང་མ་འདྲེས་ལ་ཐ་སྙད་ཀྱི་དངོས་གཞི་རིལ་འདུས་པས་གཅིག་ཏུ་ཡོངས་སུ་རྫོགས་པ། དུས་ཀུན་ནས་སྐབས་ཀྱི་སྔ་ཕྱི་ཀུན་ཏུ་དགག་སྒྲུབ་མེད་པར་མཐའི་དྲི་མའི་རྡུལ་དང་བྲལ་བས་ངང་བཟང་པོ་མཆོག་ཏུ་གྱུར་པ། ཀུན་གྱི་བླར་གྱུར་པས་དུས་གསུམ་དུ་མི་ནུབ་ཅིང་མི་རླག་པའི་ཏོག་ཆེན་པོར་རྒྱལ་མཚན་གྱི་རྩེ་མོར་བཞུགས་པ་སྟེ། འདིར་མཚན་ཉིད་ལྔ་ཕྲག་གཉིས་དང་གསུམ་དུ་ལྡན་པར་བཞུགས་སོ། །

གསུམ་པ་གནས་བསྟན་པ་ནི།

གོང་ནས། ས་ཡོངས་སུ་ཁྱབ། ཅེས་པ་ནས། ཞེས་བྱ་བའི་ཞིང་ཁམས་ན། ཞེས་པའི་བར་གྱིས་བསྟན་ཏེ།

ས་ཡོངས་སུ་ཁྱབ་པའི་གནས་རྫོགས་པ་སྤྱིར་ཆིབ་ཅེས་བྱ་བ། ནམ་མཁའི་དབྱིངས་བདེ་བ་ཆེན་པོའི་ངང་། ཐམས་ཅད་ལས་སངས་རྒྱས་པས་མཁྱེན་པར་བཀོད་པ། ཀུན་གཞི་ཆོས་ཀྱི་ཕོ་བྲང་། ཡེ་འབྱམས་རྨད་དུ་གྲགས་པ། རྒྱ་ཕྱོགས་སུ་ཡོངས་སུ་མ་ཆད་པ། ཆོས་ཉིད་ཀྱི་ནམ་མཁའ་བརྗོད་དུ་མེད་པ་ལ་ཡེ་ཤེས་ཀྱི་ཉི་མ་དཔག་ཏུ་མེད་པ་ཤར་བ། མཐའ་དང་དབུས་མེད་ཅིང་ཀུན་ཏུ་རྒྱ་མཉམ་པ། བདལ་ཁྱབ་ཆེན་པོ་ཞེས་བྱ་བའི་ཞིང་ཁམས་ན།

སྟོན་པ་ཆོས་སྐུའི་གནས་ཕུན་སུམ་ཚོགས་པ་ནི། ཆོས་ཉིད་ཀྱིས་ཐམས་ཅད་ཀྱང་མ་བཀོལ་བར་གདལ་བའི་གཞིར་གྱུར་པས་འབྲས་བུའི་ས་མཆོག་ཡོངས་སུ་ཁྱབ་པའི་གནས་རྒྱུ་འབྲས་ཀུན་ལྷུན་གྱིས་རྫོགས་པའི་སའི་རིམ་པའི་ཏོག་ཆེན་པོར་གྱུར་ཏེ་འདིའི་གོང་ན་གཞན་མེད་པས་རྫོགས་པ་སྤྱིར་ཆིབས་ཀྱི་ས་ཞེས་བྱ་བ། བྱང་ཆུབ་སེམས་དཔའ་ས་བཅུ་པ་ལ་གནས་པས་ཀྱང་ཡུལ་མིན་པར་མཉམ་ཉིད་ཆེན་པོ་མུ་མཐའ་མེད་པས་ནམ་མཁའི་དབྱིངས་གདུང་བ་ཐམས་ཅད་ངང་གིས་བྲལ་བའི་ཀློང་དམ་པ་བདེ་བ་ཆེན་པོའི་ངང༌། དངོས་པོ་གཉིས་པ་རིལ་ཡང་དག་པར་རྫོགས་པའི་ཡེ་ཤེས་ཀྱི་སར་རང་གསལ་བར་ཆུབ་པས་ཐམས་ཅད་སངས་རྒྱས་པར་མཁྱེན་པར་བཀོད་པ། ཐམས་ཅད་ཀྱི་འབྱུང་གནས་ཆོས་ཉིད་ཀྱི་ངང་རྒྱལ་བ་རིལ་གྱི་བཞུགས་གནས་ཆེན་པོ་ཀུན་གཞི་ཆོས་ཀྱི་ཕོ་བྲང་ཡངས་པ། ཡེ་ནས་མཐའ་དང་བྲལ་བར་ཐམས་ཅད་ལ་ཁྱབ་ཅིང་ཡོན་ཏན་ཀུན་གྱི་བདག་ཉིད་ཡེ་འབྱམས་རྨད་དུ་གྲགས་པ། རྒྱ་ཁྱོན་ཚད་མེད་པས་ཕྱོགས་བཅུར་དབྱེ་བས་ཕྱོགས་དང་རིས་སུ་ཡོངས་སུ་མ་ཆད་པར་མཉམ་པ་ཉིད་དུ་རང་གསལ་བ། དབྱིངས་ཀྱི་ཆ་ཆོས་ཉིད་ཀྱི་ནམ་མཁའ་ཚིག་གིས་བརྗོད་དུ་མེད་པས་རང་བཞིན་བསྟན་པར་དཀའ་བ་ལ། རྒྱན་རང་བྱུང་རིག་པའི་ཡེ་ཤེས་ཀྱི་ཉི་མ་འཆར་ནུབ་མེད་པར་གསལ་ཏེ་ཚད་དཔག་ཏུ་མེད་པར་རང་ཤར་བ། འདི་ཉིད་རྒྱུར་ཡང་གསུངས་པ་ཡོད། ཡོད་མེད་དང་རྟག་ཆད་ལ་སོགས་པ་ཀུན་ལས་འདས་པས་མི་བདེན་པས་མཐའ་དང་བདེན་པའི་དབུས་མེད་ཅིང་དབུ་མ་དང་གཉིས་མེད་ཀྱི་ཐ་སྙད་ལས་ཀྱང་གྲོལ་བས་ཀུན་ཏུ་རྒྱ་མཉམ་པ། ཆོས་ཉིད་བསྒོམ་༼༣༢༣༽པ་མེད་པར་ཀུན་ལ་ཁྱབ་པས་སྲོག་ཆགས་ལྡེམ་བུ་ཡན་ཆོད་དུ་སྣུམས་ཚབས་ཆེ་ཆུང་མེད་པར་གྱུར་པའི་མཚན་ནི། གདལ་ཁྱབ་ཆེན་པོ་ཞེས་བྱ་བའི་ཞིང་ཁམས་སུ་གྲགས་པ་ཕྱི་ནང་མེད་པར་ཆོས་ཀྱི་དབྱིངས་སུ་འབྱམས་ཀླས་པའི་གནས་དམ་པ་ན་བཞུགས་སོ།།

བཞི་པ་འཁོར་བཤད་པ་ནི།

འོག་ནས། ཡེ་ཤེས་བརྗོད་ཀྱིས། ཞེས་པ་ནས། ངོ་བོ་ཉིད་དུ་བཞུགས་སོ། །ཞེས་པའི་བར་གྱིས་བསྟན་ཏེ།

ཡེ་ཤེས་བརྗོད་ཀྱིས་མི་ལང་བའི་ཡང་མི་ལང་བ་དང་འདུ་འབྲལ་མེད་པ་ཀུན་ཏུ་འུབ་ཆུབ་སྟེ།

དངོས་པོ་མེད་པའི་ངོ་བོ་ཉིད་དུ་བཞུགས་སོ།།

འཁོར་ཕུན་སུམ་ཚོགས་པ་ནི། རྫོགས་པ་སྤྱིར་ཆིབས་ཀྱི་ས་ཐོབ་སྟེ་ལྷུན་གྱིས་གྲུབ་པའི་རྣལ་འབྱོར་པ་རེ་རེ་ལའང་ཡེ་ཤེས་ལྔ་དང་ལྡན་ཞིང་ཡེ་ཤེས་རེ་རེ་ལའང་ལྔ་ལྔར་དབྱེ་བ་ལ་སོགས་པ་གྲངས་མེད་པའམ། རང་བྱུང་གི་ཡེ་ཤེས་ཆེན་པོ་མངོན་དུ་བྱས་པ་ཉིད་ཀྱང་ཡེ་ཤེས་རང་སྣང་བའི་ངོ་བོ་རྣམ་པར་དག་པའི་བྱེ་བྲག་གྲངས་ལས་འདས་ཏེ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བ་ཚད་མེད་བརྗོད་དུ་མེད་པ་དང༌། ཐོག་མར་འདུ་ཞིང་ཐ་མ་འབྲལ་བ་མེད་པར་ལྷུན་གྱིས་རྫོགས་ལ་མ་འདྲེས་པས་ཀུན་ཏུ་འུབ་ཆུབ་སྟེ། ཕྱག་དཔེ་གཅིག་ན་བར་འདིར་རང་རིག་པའི་རྒྱལ་པོ། ཞེས་བཞུགས། གཅིག་དང་དུ་མ་ལས་གྲོལ་བས་དངོས་པོ་མེད་པའི་ངོ་བོ་ཉིད་དུ་ཐབས་གཅིག་ཏུ་བཞུགས་སོ། །དེ་བས་ན་གནས་ཀྱི་དོན་གྱིས་ས་བཅུ་པ་རྫོགས་པ་སྤྱིར་ཆིབས་ཐོབ་པས་ཆོས་སྐུ་ལས་ཉན་པའི་འཁོར་དུ་གྱུར་པར་ཤིན་ཏུ་རིགས་སོ།།

གཉིས་པ་ལོངས་སྐུའི་གླེང་གཞི་ལ་བཞི་སྟེ། དུས་དང་སྡུད་པ་ཐུན་མོང་དུ་བསྟན་པ། སྟོན་པ་བཤད་པ། གནས་བསྟན་པ། འཁོར་བཤད་པའོ། །དང་པོ་ནི།

གསང་བའི་སྙིང་པོ། ཞེས་པ་ནས། དུས་གཅིག་ན། ཞེས་པའི་བར་གྱིས་བསྟན་ཏེ།

གསང་བའི་སྙིང་པོ་དེ་ཁོ་ན་ཉིད་ཀྱི་ཚིག་འདི་སྐད་དུ། འཐུན་འཇུག་ཐབས་སུ་ཐོས་པའི་དུས་གཅིག་ན།

ལོངས་སྤྱོད་རྫོགས་པའི་སྐུའི་གླེང་གཞི་བསྟན་པ་ནི། ཇི་སྐད་བསྟན་པའི་གསང་སྔགས་ཀྱི་ཐེག་པ་དབྱིངས་དང་ཡེ་ཤེས་སམ་རྒྱུ་འབྲས་དབྱེར་མེད་གསང་བའི་སྙིང་པོ་དེ་ཁོ་ན་ཉིད་ཀྱི་དོན་ཟབ་མོ་བརྗོད་པ་དང་འདྲ་བའི་ཕྱིར་སྒྲའི་ཚིག་འདི་སྐད་དུ་ཐབས་ཀྱི་སྒོ་མང་པོས་ཇི་ལྟར་གདུལ་བྱ་ས་ལ་གནས་པའམ། རིག་འཛིན་རྣམས་ཀྱི་བློ་དང་མཐུན་པར་འཇུག་པའི་ཐབས་སུ་སྟོན་པ་གསང་བས་ལོངས་སྤྱོད་རྫོགས་པའམ་ལོངས་སྤྱོད་རྫོགས་སྐུའི་བསྟན་པར་སྡུད་པ་པོ་བདག་གིས་ཐོས་པར་གྱུར་པའི་དུས་གཅིག་གི་ཚེ་ན།

གཉིས་པ་སྟོན་པ་བཤད་པ་ལ་གཉིས་ཏེ། སྟོན་པའི་ངོ་བོ་བཤད་པ། མཚན་ཉིད་བསྟན་པའོ། །དང་པོ་ནི།

དེ་བཞིན་གཤེགས་པ། ཞེས་པ་ནས། བསྐྱོད་པ་དེ། ཞེས་པའི་བར་གྱིས་བསྟན་ཏེ།

དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས། གསང་བ་མཆོག་གི་བདག་པོ་དེ། བླང་དོར་མི་མངའ་བྱིན་གྱིས་བརླབས་ཀྱི་དབང་ཕྱུག འདོད་པ་ཀུན་འབྱུང་མི་ཟད་མཛོད་ཀྱི་བཀོད་པ། ཆེ་བ་ཀུན་བཅོམ་དམ་པར་རོལ་པའི་གཟི་བརྗིད། རླབས་སུ་སྤྱོད་པའི་སྤྱོད་པ་ཆེན་པོས་བསྐྱེད་པ་དེ།

སྟོན་པ་ཉིད་ནི་གང་ཞེ་ན། གནས་༼༣༢༤༽ཚུལ་ཇི་ལྟར་ཡིན་པ་དེ་ཁོ་ན་བཞིན་དུ་ཡང་དག་པར་གཤེགས་ཏེ་ཉིད་ལས་སྐུ་གསུང་ཐུགས་ཀྱི་མཛད་པ་སྣ་ཚོགས་སུ་བཀོད་ནས་གཞན་དོན་དུ་གཤེགས་པའི་གཟུགས་སྐུའི་རྒྱལ་བ་གདུལ་བྱ་ལ་སྣང་བ་མ་ལུས་པ་ཐམས་ཅད་ཀྱི་གཙོ་མཆོག་སྟོན་པ་རིགས་དྲུག་པ། གཟུང་འཛིན་མི་མངའ་བར་ཟག་མེད་ཀྱི་ཆོས་ཀུན་ལ་དབང་བསྒྱུར་ཞིང་ངོ་བོ་གང་དུའང་མི་གནས་པས་བཅོམ་ལྡན་འདས་ལོངས་སྤྱོད་ཆེན་པོ་རྒྱལ་བ་ཀུན་ཏུ་ཞལ་གསང་སྔགས་ཐེག་པ་མཆོག་གི་མངའ་བདག་ཆེན་པོ་ལོངས་སྤྱོད་རྫོགས་སྐུ་དེ་ལ། མྱ་ངན་ལས་འདས་པ་བླང་བ་དང་འཁོར་བ་དོར་བའི་སྤོང་ལེན་མི་མངའ་བར་ཉིད་ཀྱི་ཐུགས་རང་སྣང་བའི་ཡེ་ཤེས་སུ་མ་འདྲེས་ལ་ཡོངས་སུ་རྫོགས་པར་བྱིན་གྱིས་བརླབས་ཀྱི་དབང་ཕྱུག་ཆེན་པོ། ལོངས་སྤྱོད་རྫོགས་པའི་བསྟན་པ་དང་དངོས་གྲུབ་ཀྱི་འདོད་པ་ཀུན་གྱི་འབྱུང་གནས་སུ་གྱུར་ཀྱང་འཕེལ་འགྲིབ་མི་མངའ་བར་མི་ཟད་མཛོད་ཀྱི་བཀོད་པར་དང་ལྡན་པ། མཚན་དང་དཔེ་བྱད་རྫོགས་པའི་སྐུ་མཆོག་སྐུ་གསུང་ཐུགས་ཀྱི་ཆེ་བ་ཀུན་གྱིས་སྤྱོམ་པའི་མངའ་བདག་དམ་པ་འཁོར་ཐམས་ཅད་ཀྱང་ངོ་མཚར་སྐྱེས་ཏེ་ངམ་པར་འགྱུར་བས་ལོངས་སྤྱོད་ལ་རོལ་པའི་སྐུའི་གཟི་བརྗིད་མཚུངས་པ་མེད་པ། ཕྲིན་ལས་ཀྱི་མཛད་ཐབས་མཐའ་ཡས་པས་རླབས་སུ་གཅོད་པའི་སྒོ་ནས་བྱ་བ་མེད་པར་དོན་སྤྱོད་པ་ཆེན་པོས་འགྲོ་བ་མེད་པར་གདུལ་བྱའི་དོན་ལ་ཐུགས་རྗེའི་དབང་གིས་བསྐྱོད་པར་མཛད་པ་དེ་ལྟ་བུ་ནི་སྟོན་པ་མཆོག་གི་ངོ་བོའོ།།

གཉིས་པ་མཚན་ཉིད་བསྟན་པ་ནི།

འོག་ནས། གར་ཡང་མ་འགགས་སྣང་བ་ཆེན་པོ། ཞེས་པ་ནས། ཡོངས་སུ་རྫོགས་པའི་རྒྱལ་པོ་དེ། ཞེས་པའི་བར་གྱིས་བསྟན་ཏེ།

གར་ཡང་མ་འགགས་ཀུན་སྣང་ཆེན་པོ། ཅི་ཡང་མ་གསུངས་རྒྱ་ཆེར་བཤད་པ། གང་ལའང་མི་

དགོངས་ཏིང་འཛིན་ཆེན་པོ། མངའ་ཏང་ཡོངས་སུ་རྫོགས་པའི་རྒྱལ་པོ་དེ།

སྟོན་པའི་མཚན་ཉིད་ནི། གོང་གི ཆེ་བ་ཀུན་སྤྱོམ། མན་ཆད་ཀྱིས་ཀྱང་མཚན་ཉིད་ཡང་སྟོན་ལ། སྟོན་པའི་ངོ་བོ་ཀུན་ཏུ་ཞལ་དུ་བཞུགས་པས་མཚན་ཉིད་ཀྱང་ཆོས་ཐམས་ཅད་གར་ཡང་མ་འགགས་པར་ཀུན་ཏུ་གསལ་ཡང་སྣང་བྱ་སྣང་བྱེད་མེད་པས་སྣང་བ་ཆེན་པོ། བརྗོད་པ་ཅིར་ཡང་མ་གསུངས་པར་སྐུ་དང་དགོངས་པའི་བྱིན་རླབས་ཀྱིས་གདུལ་བྱའི་རིག་པ་ལ་གསང་སྔགས་དམ་པ་རྫོགས་པར་རྒྱ་ཆེར་བཤད་དེ་དོན་འཇལ་བར་མཛད་པ། དགོངས་པ་བསམ་དཔྱོད་དང་བྲལ་བས་ཡུལ་གང་ལ་ཡང་མི་དགོངས་པར་གནས་བྱ་གནས་བྱེད་མེད་པར་མི་གཡོ་བར་གསལ་བས་ཏིང་ངེ་འཛིན་ཆེན་པོ་མཆོག་ཏུ་འཕགས་པ། བསོད་ནམས་དང་ཡེ་ཤེས་ཀྱི་ལོངས་སྤྱོད་གཉིས་ལ་མངའ་ཐང་ཡོངས་སུ་རྫོགས་པར་ལྷུན་གྱིས་གྲུབ་པའི་བདག་ཉིད་དུ་བཞུགས་པའི་༼༣༢༥༽ཆོས་ཀྱི་རྒྱལ་པོ་ཆེན་པོར་གྱུར་པ་དེ་ལྟ་བུའི་མཚན་ཉིད་བླ་ན་མེད་པར་དང་ལྡན་པའོ།།

གསུམ་པ་གནས་བསྟན་པ་ནི།

གོང་གི རྨད་དུ་བྱུང་བའི་དོན་འདི་ཉིད། ཅེས་པ་ནས། ཀུན་ཏུ་ཡང་ནང་དུ་གྱུར་པ་ན། ཞེས་པའི་བར་གྱིས་བསྟན་ཏེ།

རྨད་དུ་བྱུང་བའི་དོན་འདི་ཉིད་གླེང་བའི་གནས། ཚོགས་ཆེན་རྫོགས་པའི་གཞི། རྩལ་ཆེན་རྫོགས་པའི་ས། བདེ་བ་ཅན་ཞེས་བྱ་བའི་ཞིང་ཁམས་ན། འོག་མིན་ཆོས་ཀྱི་ཕོ་བྲང་རིན་པོ་ཆེ་སྣ་ཚོགས་ཀྱི་གཞལ་ཡས། མཐའ་དང་དབུས་མེད་ཅིང་རྩེ་མོ་ཀུན་ཏུ་རྒྱ་མཉམ་པ། རིན་པོ་ཆེའི་རྒྱལ་པོས་རྣམ་པར་བརྒྱན་པ། མུ་ཏིག་གི་ལྕང་ལོ་དང་། ཆུན་འཕྱང་དང་། ལྡ་ལྡིས་མཛེས་པ། རྩིབས་ཀུན་ཏུ་ཉི་མ་དང་ཟླ་བ་རངས་པ་དང་། མ་རངས་པ་འཕྱོ་བས་གསལ་བཏབ་ཅིང་འཕྲ་བཀོད་པ། སྐར་མ་དང་ཤིན་ཏུ་སྐར་མ་དག་གིས་གཟེར་སྤྲས་པ། རིན་པོ་ཆེའི་ཀ་བ་བརྒྱད་ཟུག་པ། ཉི་མ་དང་ཟླ་བས་བརྒྱན་པ། རིན་པོ་ཆེའི་ཀ་བརྒྱན་ལས། རིན་པོ་ཆེའི་གཙར་དང་། འོད་ཟེར་ཀུན་འཕྲོ་བ། གདུང་ཆེན་པོ་བརྒྱད་རེའུ་རེར་བྲེས་པ། ཆོས་ཉིད་ཀྱི་བླ་བྲེ་ལ། རྡོ་རྗེའི་ཤར་བུ་བྱུང་བ། རྫུ་འཕྲུལ་གྱི་སྤྲིན་དཔུང་འཐིབས་པ། བྱང་ཆུབ་ཀྱི་ཆར་མངོན་པར་འབབ་པ། ཉོན་མོངས་པའི་གདུང་བ་སངས་པར་གྱུར་པ། ཡེ་ཤེས་ཀྱི་མྱུ་གུ་མངོན་པར་བསྐྱེད་པ་ཆོས་ཉིད་ཀྱི་སྒྲ་མངོན་པར་སྒྲོག་པ་ལས། ཀུན་གཞི་ཡེ་འབྱམས་རྨད་དུ་གྲགས་པའི་གླེང་སློང་བ་ཚིག་གི་བརྗོད་པ་དང་བྲལ་ཞིང་། བཞིན་དང་མེ་ལོང་གི་ཚུལ་ལྟར་སྣང་བ། གཞལ་ཡས་ཁང་རྡོ་རྗེས་མངོན་པར་དགའ་བ། རྡོ་རྗེས་རྣམ་པར་བརྒྱན་པ། རིན་པོ་ཆེ་སྣ་ཚོགས་ལས་གྲུབ་པ། གསེར་གྱི་ས་གཞི་བདལ་བ། མེ་ལོང་ངམ། ཆུ་ཤེལ་ལམ། ཆུ་དང་བའམ། གསེར་ཤིན་ཏུ་སྦྱངས་པ་ལྟར་མཉམ་ཞིང་སྙོམས་ལ། གསལ་ཞིང་འཚེར་བ་ལས་གཟུགས་བརྙན་འབྱུང་བ། ནེམ་པ། འཕར་བ། འཇམ་པ། དག་པ། དང་བ། ལྡེམ་པ། མཉེན་པ། འབར་བ། འཕྲོ་བ། རྟོག་པ་མེད་པ། རིན་པོ་ཆེ་སྣ་ཚོགས་ཀྱི་འོད་རང་བཞིན་གྱིས་བྱུང་ཞིང་། ཟེར་ཀུན་ཏུ་འཕྲོ་བས་ཕྱི་ནང་གི་མུན་པ་ཡོངས་སུ་སེལ་བ། བུ་རྩེ་འཁོར་ལོ་རྩིབས་བཞིར་འབར་བ། རྡོ་རྗེས་ཀུན་ཏུ་སྤྲས་པ། སྒོ་གསུམ་ཀུན་ཏུ་གསལ་བ་ལ། བ་ཏིའི་འོད་གྱི་མུ་ཁྱུད་ཡོངས་སུ་མ་ཆད་པ། ཉི་ཟླའི་གའུ་གསུམ་རྒྱུད་ཟུང་སྒྲིལ་དུ་འབར་བ། ཐེམ་སྐས་དང་། རྟ་བབས་ཀྱིས་བརྒྱན་པ། གྲུ་ཆད་བཞིས་བརྒྱན་པ། བར་ཁྱམས་ཀྱིས་མཛེས་པ། ཧར་དང་། ཧར་ཆེན་པོས་བརྒྱན་པ། ཏྭ་ར་ཎ་ཡིས་བཟུང་བ། འཕྲེང་བས་མཛེས་པ། དྲ་བ་དང་དྲ་བ་ཕྱེད་མས་བརྒྱན་པ། ཟར་ཚགས་ཀྱི་ཀླུབས་པ། རྡོ་རྗེ་རིན་པོ་ཆེ་འབར་བས་ཀུན་ཏུ་མདངས་ཕྱུང་བ། དྲིལ་བུ་གཡེར་ཀ་ལས་ཐེག་པ་ཆེན་པོའི་ཆོས་ཀྱི་སྒྲ་སྒྲོག་པ། ཆོས་ཀྱི་སྐུའི་གཟུགས་བརྙན་བྱུང་བ། གཞི་ཡོངས་སུ་མཛེས་པའི་རྒྱན། རྡོ་རྗེ་མུ་ཁྱུད་མ་ཆད་པས། རྡོ་རྗེ་འགྲེང་བུ་དང་དྲ་བས་བརྒྱན་པ། ཏ་ལའི་ཤིང་ལྗོན་པ་སྐྱེས་པ་ལ་གསེར་གྱི་ཙོང་ཙོང་བྲེས་པ། རིན་པོ་ཆེའི་ཕྲ་མིག་གིས་སྤྲས་པ། བདུད་རྩིའི་ཆུ་རྒྱུན་འབབ་པ། ཕྱི་དང་ནང་མེད་ཅིང་ཀུན་ཏུ་ཡང་ནང་དུ་གྱུར་པ་ན།

དེའི་བཞུགས་གནས་ཀྱི་རང་བཞིན་ནི། བགྲོ་བ་མེད་པར་གདུལ་བྱ་མཆོག་ལ་རྨད་དུ་བྱུང་བའི་གསང་སྔགས་ཀྱི་ཐེག་པ་ཁྱད་པར་ཅན་གྱི་དོན་ཟབ་མོ་འདི་ཉིད་དབྱིངས་ཀྱི་སྐུ་དང་དགོངས་པས་གླེང་བའི་སྟོན་པའི་བཞུགས་གནས་ཕུན་སུམ་ཚོགས་པ་གང་ཞེ་ན། མ་འགགས་པ་དང་མ་དམིགས་པས་བསོད་ནམས་དང་ཡེ་ཤེས་ཀྱི་ཚོགས་ཆེན་རྣམ་གཉིས་ཡོངས་སུ་རྫོགས་པའི་གཞི་ཡི་ཕྱིར་དང༌། མཐར་ལམ་པ་བསྒྲུབ་བྱའི་རྩལ་ཆེན་རྫོགས་པའི་ས་མཆོག་ནོན་ཏེ་ཡེ་ཤེས་དང་ཡོན་ཏན་བསམ་གྱིས་མི་ཁྱབ་པ་དང་ལྡན་པའི་འཁོར་དང་སྟོན་པ་ཉིད་ལ་རང་སྣང་ཞིང༌། འཁོར་འདས་ཀྱི་བདེ་བ་རྣམ་གཉིས་ལ་མངའ་མཛད་པའི་ཕྱིར། ཟུག་རྔུ་མེད་པས་བདེ་བ་ཅན་ཞེས་བྱ་བའི་ཞིང་ཁམས་ན། གནས་གཞི་ནི་གདུལ་བྱའི་ངོ་ལ་ཞིང་ཁམས་དེ་ན་གཞལ་ཡས་ཁང་ཡོད་པར་སྣང་བའོ། །དེའང་རང་བཞིན་དང༌། རིག་པ་དང༌། གནས་ཀྱི་འོག་མིན་ནི་ཆོས་ཉིད་དང༌། གཟུང་འཛིན་བྲལ་བའི་ཡེ་ཤེས་དང༌། གཙང་རིགས་ལྷ་ལྔའི་བླར་གྱུར་པས་དབང་ཕྱུག་ཆེན་པོའི་གནས་རྣམས་ཏེ། འདིར་གདུལ་བྱའི་ངོ་ལ་སྣང་བས་གནས་ཀྱི་འོག་མིན་ལ་དོན་རང་བཞིན་དང་རིག་པའི་གནས་ཀྱང་མཉམ་པ་ཉིད་དུ་རྫོགས་པས་ཆོས་ཀྱི་དབྱིངས་ཀྱི་ཕོ་བྲང༌། རྒྱུ་ཡེ་ཤེས་ཀྱི་རིན་པོ་ཆེ་སྣ་ཚོགས་ལས་བྱས་ཤིང་གྲུབ་པ་རྒྱ་དང་ཡན་མན་གྱི་ཚད་ལས་འདས་པའི་གཞལ་ཡས་ཁང༌། རིལ་ནང་ཉིད་དུ་གྱུར་པ་ལ་མཐའ་དང་དབུས་མེད་ཅིང་རྒྱ་ཁྱོན་གྱི་ཚད་གཟུང་དང་བྲལ་བའི་ངོ་བོ། གཞལ་ཡས་ཁང་གི་རྩེ་མོ་སྤྲོས་པ་མེད་པའི་རང་རྟགས་གྲྭ་ཟུར་མེད་པར་ཀུན་ཏུ་རྒྱ་མཉམ་པས་ཟླུམ་པོར་ཐམས་ཅད་དུ་ཁྱབ་ཅིང་འཁྱིལ་བའོ། །འོ་ན་སྒོ་དང་དབྱིབས་སྣང་བ་ལ་ངེས་པར་གཟུང་བ་མེད་དོ་ཞེ་ན། དེ་དག་གི་དོན་སྨོས་པ་སྟེ་གདུལ་བྱའི་ངོ་ལ་དབྱིབས་དང་སྒོ་སྣང་ཞིང་ཚད་མེད་པ་སྟེ། དཔེར་ན་མི་རྣམས་རང་རང་གི་གནས་ན་འདུག་པས་ལུང་པའི་དབྱིབས་དང་ཕུ་མདའ་དང་ལམ་སྒོ་ཤེས་ཀྱང༌། ལུང་པ་རིལ་གྱིས་རྒྱ་དང་དཔང་ཚད་འདི་ཙམ་ཞེས་མ་དམིགས་པ་ལྟར་འཁོར་གྱི་བྱང་ཆུབ་སེམས་དཔའ་རྣམས་ཀྱིས་གཞལ་ཡས་ཁང་མཐོང་ནས་དེ་ན་བདག་ཅག་ཆོས་སྟོན་༼༣༢༦༽ཅིང་ཉན་ནས་འདུག་ཀྱང༌། རྒྱ་དང་དཔང་དམིགས་པར་མི་ནུས་ཏེ། གལ་ཏེ་དམིགས་ན་ཚད་མི་རྙེད་པ་ནི་བྱང་ཆུབ་སེམས་དཔའ་དཔལ་སྟོབས་ཀྱིས་བཅོམ་ལྡན་འདས་ཀྱི་དབུའི་གཙུག་ཏོར་བལྟས་པས་མ་མཐོང་བ་བཞིན་ནོ། །རྒྱན་གྱི་མཚན་ཉིད་ཇི་ལྟ་བུ་སྙམ་པ་ལ། རང་བྱུང་གི་ཡེ་ཤེས་རིན་པོ་ཆེའི་རྒྱལ་པོས་འོད་རབ་ཏུ་འབར་བས་ཀུན་ནས་རྣམ་པར་བརྒྱན་པ། ཐག་པ་དང་འདྲ་བའི་ཡེ་ཤེས་ལས་ཕྲེང་བ་སྣ་ཚོགས་དང་འདྲ་བར་ཐབས་མང་པོ་རྫོགས་པས་ཇི་སྙེད་པས་ཡོན་ཏན་གྱི་བདག་ཉིད་དང༌། བསམ་གྱིས་མི་ཁྱབ་པའི་ཡེ་ཤེས་མངའ་བའི་ཕྱིར་མུ་ཏིག་གི་ཕྲེང་བ་མང་པོར་འཁྲིགས་པས་ལྕང་ལོ་ཅན་སྣ་ཚོགས་ཀྱིས་ཕྱི་ནང་ནས་བརྒྱན་པ་དང༌། གཞན་ཡང་ཐབས་དང་ཤེས་རབ་འབྲེལ་བའམ་བདེན་པ་གཉིས་སུ་མེད་པའི་ཕྱིར། རིན་པོ་ཆེའི་ཆུན་འཕྱང་པཉྩ་རེ་ཁེའི་གཟར་མང་པོ་ཕྱི་ནང་ནས་བརྒྱན་པ་དང༌། ཐབས་སྣ་ཚོགས་ཀྱིས་ཀུན་ནས་མཉེན་པས། དར་འཕན་དང་བ་དན་དང་བླ་བྲེ་ལ་སོགས་པ་དར་སྣ་ཚོགས་ཀྱི་ལྡ་ལྡིས་ཕྱོགས་དང་མཚམས་དང་སྟེང་ནས་མཛེས་པར་བརྒྱན་པ། རྩིབས་ལོགས་ཀུན་ཏུ་རང་བཞིན་གྱིས་འོད་གསལ་བའི་རྟགས་སུ་ཉི་མ་འོད་ཟེར་རྒྱས་པ་དང༌། ཟླ་བ་རངས་པར་རྫོགས་པ་ཚེས་བཅུ་དྲུག་པ་ལྟ་བུ་དང༌། མ་རངས་པར་ཕྱེད་པ་ཚེས་བརྒྱད་པ་ལྟ་བུར་འཕྱོ་བས་འོད་ཀྱིས་གསལ་བཏབ་ཅིང་38འཕྲ་སྤེལ་མར་བཀོད་དེ་གཅིག་མདངས་གཅིག་གིས་ཕྱུང་ནས་ཀུན་ཏུ་གསལ་ཡང་བདེན་པ་མ་མཐོང་བས་མི་རྟོགས་པ། ཡང་ན་རྩེ་མོ་བུམ་པ་ལྟར་ཟླུམ་པའི་ནང་གི་ཕྱོགས་ཀྱི་གཞལ་ཡས་ཁང་གི་སྟེང་འཁོར་ལོའི་རྩིབས་ཀུན་ཏུ་ཉི་མ་དང་ཟླ་བ་རངས་པ་དང་མ་རངས་འཕྱོ་བས་ཐམས་ཅད་གསལ་བར་བྱེད་ཅིང་ཉི་ཟླ་སྤེལ་མའི་ཕྲ་བཀོད་པ། སྐར་མ་ཆུང་ངུ་དང་ཤིན་ཏུ་སྐར་མ་ཆེན་པོ་དག་གིས་རིན་པོ་ཆེའི་རྩིག་པའི་གཟེར་འགོ་རྣམས་སྤྲས་པས་བརྒྱན་པ། དབུས་ཀྱི་ཕྱོགས་མཚམས་ན་རྣམ་ཐར་བརྒྱད་ཀྱི་རྟགས་སུ་འོག་རྡོ་རྗེའི་གདུང་ནས་རིན་པོ་ཆེའི་ཀ་བ་མཆོག་བརྒྱད་ཟུག་པས་སྟེང་གི་རྡོ་རྗེའི་གདུང་མགོ་བཏེགས་པ། ཀ་ལོའི་ཀ་རྒྱན་ཉི་མ་དང་ཟླ་བས་བྱས་ཏེ་ཡོངས་སུ་བརྒྱན་པ། འདིར་ཀུན་མཁྱེན་དམ་པ་རིན་པོ་ཆེའི་གསུང་སྒྲོས་ལ། ཀ་བའི་ཞབས་སུ་པདྨ་དང་འཁོར་ལོ་དང་ཟླ་བ། སྟེང་དུ་འཁོར་ལོ་དང་པདྨ་དང་ཉི་མ་བཀོད་པས་བརྒྱན་པ། ཞེས་གསུངས། ༼༣༢༧༽ཡེ་ཤེས་ཀྱི་བྱེ་བྲག་སྣ་ཚོགས་རྫོགས་པའི་རྟགས་སུ། ཀ་བ་ལ་རིན་པོ་ཆེའི་རིགས་སྣ་ཚོགས་ཀྱི་ཀ་རྒྱན་བྱས་པ་ལས་ཀྱང་རིན་པོ་ཆེའི་གཙར་སྣ་ཚོགས་བརྒྱུས་པས་མཛེས་པ་དང༌། འོད་ཟེར་སྣ་ཚོགས་ཕྱོགས་ཀུན་ཏུ་འཕྲོ་བ། རིན་པོ་ཆེའི་གདུང་ཆེན་པོ་བརྒྱད་གཉིས་བསྣོལ་མར་བྱུང་བས་བར་ཐམས་ཅད་རེའུ་མིག་གི་རེས་སུ་བྲེས་པ། ཆོས་ཉིད་མ་སྐྱེས་པས་ཀུན་ཏུ་ཁྱབ་པའི་རྟགས་སུ་དར་གྱི་བླ་རེ་དང༌། ཐམས་ཅད་གཉིས་སུ་མེད་པར་རང་སྣང་བས་དེ་ལ་རྡོ་རྗེའི་ཤར་བུ་འབྱུང་བས་རྒྱན་དང་ལྡན་པ། ཡང་ན་ཐབས་མ་འདྲེས་པར་བྱུང་བས། མདའ་ཡབ་ཀྱི་འོག་ཏུ་རྡོ་རྗེའི་ཤར་བུ་བུམ་པའི་དབྱིབས་སུ་སོ་སོར་འབྱུང་བ་ཡེ་ཤེས་ཆེན་པོ་ཅིར་ཡང་སྣང་ལ་མ་ངེས་པས་ཆོ་འཕྲུལ་གྱི་བཀོད་པ་ལས་སྤྲུལ་པའི་སྐུའི་འཕྲོ་འདུ་ལ་སོགས་པ་རྫུ་འཕྲུལ་གྱི་སྤྲིན་ཕུང་སྣ་ཚོགས་ཕྱོགས་ཇི་སྙེད་ཀུན་ནས་གཏིབས་པ། བྱང་ཆུབ་ཆེན་པོའི་གནས་ཀྱི་བྱིན་གྱིས་བརླབས་ལས་གདུལ་བྱའི་སེམས་བསྐྱེད་པའི་ཆོས་དང་སྤྲུལ་པའི་ཆར་མངོན་པར་འབབ་པ་དང༌། གདུལ་བྱ་བྱང་སེམས་དང་འགྲོ་དྲུག་གཉིས་ཀྱི་ཉོན་མོངས་པའི་དགོན་དོང་གི་གདུང་བ་བརླན་ཞིང་བསངས་ནས་མེད་ལ་དག་པར་གྱུར་པ། དེ་དག་གི་རྒྱུད་པ་ཡེ་ཤེས་ཇི་སྙེད་པའི་སྒོ་སྔར་མ་སྐྱེས་པ་སྐྱེད་པར་བྱེད་པས་ཡེ་ཤེས་ཀྱི་མྱུ་གུ་མངོན་པར་བསྐྱེད་པ་དང༌། ཐེག་པ་ཆེན་པོ་གསང་བ་མཆོག་གི་ཆོས་ཉིད་ཀྱི་རང་སྒྲ་ཕྱོགས་ཀུན་ཏུ་མངོན་པར་སྒྲོགས་པ་ལས། གསང་ཆེན་དོན་གྱི་ངོ་བོ་ཆོས་ཉིད་ཇི་བཞིན་པ་ཀུན་གཞི་ཡེ་འབྱམས་རྨད་དུ་གྲགས་པའི་རང་བྱུང་ཟླ་མེད་པ་འདིའི་དོན་གླེང་སློང་ཞིང་གསལ་བར་སྟོན་པ། དེ་ཡང་ཚིག་གི་བརྗོད་པ་དང་བྲལ་ཞིང་དཔེ་བཞིན་དང་མེ་ལོང་གི་ཚུལ་ལྟར་གཞལ་ཡས་ཁང་གི་དབྱིབས་དང་ཁ་དོག་མཐོང་བས་དོན་སྣང་བར་འགྱུར་བ། གཞལ་ཡས་ཁང་མི་ཕྱེད་པས་རྡོ་རྗེ་མི་འགྱུར་བའི་ངོ་བོར་མ་སྐྱེས་པར་རང་སྣང་བས་གདུལ་བྱ་རྣམས་མངོན་པར་ཉམས་དགའ་བ། རིན་པོ་ཆེ་ལས་བྱས་པའི་རྡོ་རྗེས་ཕྱོགས་བཞི་ནས་རྣམ་པར་བརྒྱན་པ། རང་བྱུང་གི་ཡེ་ཤེས་རྟོག་པ་མེད་བཞིན་ཅིར་ཡང་སྣང་བའི་རྟགས། གཞལ་ཡས་ཁང་གི་མཚན་ཉིད་ཀྱང༌། རྒྱུ་རིན་པོ་ཆེ་སྣ་ཚོགས་ཀྱི་རིགས་མང་པོ་ལས་མངོན་པར་གྲུབ་པ། འོག་གསེར་གྱི་ས་གཞི་གདལ་བ། རྩིག་པ་དང་རྒྱན་དང་འོག་དང་ངོས་ཀུན་ཀྱང་མེ་ལོང་ངམ། ཆུ་ཤེལ་ལམ། ཆུ་དྭང་བའམ། གསེར་ཤིན་ཏུ་སྦྱངས་པ་ལྟར་རིམ་པ་བཞིན་མཉམ་ཞིང་སྙོམས་ལ། ཁ་དོག་གསལ་ཞིང་འོད་༼༣༢༨༽འཚེར་བ་ལས་གཞན་གྱི་གཟུགས་བརྙན་ནང་དུ་འབྱུང་ཞིང་མ་འདྲེས་པར་སྣང་བ། མནན་ན་ནེམས་པ། བཏེགས་ན་འཕར་བ། རེག་ན་འཇམ་པ། བལྟས་ན་དྲི་མ་མེད་པས་རང་བཞིན་དག་པ། མཚན་ཉིད་རྡུལ་མེད་པར་དྭང་བ། གཞལ་ཡས་ཁང་གི་རྩེ་མོ་ལྡེམ་པ། ཡང་ན་དངོས་པོ་མེད་པས་ལྡེམ་པ། གདོས་པ་མེད་པར་མཉེན་པ། འོད་གསལ་བར་འབར་བ། ཟེར་སྣ་ཚོགས་འཕྲོ་བ། འདི་འདྲའི་རྣམ་པར་རྟོག་པ་མེད་པས་བྱེད་པ་མེད་པར་རང་སྣང་བ། རིན་པོ་ཆེ་སྣ་ཚོགས་ཇི་སྙེད་པ་དེ་སྙེད་ཀྱི་འོད་རང་བཞིན་གྱིས་མ་འདྲེས་པར་འབྱུང་ཞིང་ཕྱོགས་ཀུན་ཏུ་ཁྱབ་པ། གཞལ་ཡས་ཁང་ལས་འོད་ཟེར་ཀུན་ཏུ་འཕྲོ་བས་ཕྱི་དང་ནང་གི་མུན་པ་ཡོངས་སུ་སེལ་བའི་ལས་བྱེད་པ། ནང་གི་འོག་གཞི་དང༌། སྟེང་བུམ་པའི་དབུ་རྩེའི་ནང་ཀུན་དབྱིབས་འཁོར་ལོ་རྩིབས་བཞིར་འོད་གསལ་བར་འབར་བ། དེ་ལ་མུ་ཁྱུད་ཀྱི་ཕྲེང་བ་རིམ་པ་གཉིས་སུ་རྡོ་རྗེ་ཉལ་བ་དང༌། འགྲེང་བའི་རྡོ་རྗེས་ར་བ་གཉིས་ཀྱིས་ཀུན་ཏུ་སྤྲས་ཏེ་འཁོར་བར་བརྒྱན་པ། ཕྱོགས་གཅིག་ནའང་སྒོ་གསུམ་བརྩེགས་པའམ་རིམ་པ་གསུམ་ལ། ནང་མ་བཞི་ནི་འབྲས་བུའི་ངོ་བོ་རྣམ་ཐར་བཞི་སྟེ། རྣམ་ཐར་གསུམ་ནི་ས་བཅུ་ལ་རྫོགས་པའོ། །བར་པ་རྒྱུའི་ཐེག་པ་ཚད་མེད་བཞི། ཕྱི་མ་བསྡུ་བ་བཞི་སྟེ་གདུལ་བྱ་འཇུག་སླ་བའོ། །སྒོ་དེ་དག་ལས་ཀྱང་ཐུགས་རྗེ་ཀུན་ཏུ་གསལ་བར་འཆར་བ། གདུལ་བྱ་ཡང་བཞི་ཚན་དེ་དག་གི་སྒོ་ནས་འཇུག་པའི་ཕྱིར་སྒོའོ། །རང་བྱུང་ཡེ་ཤེས་ཀྱི་ཐམས་ཅད་དབང་དུ་མཛད་པའི་རྟགས་སུ། རིན་པོ་ཆེའི་པ་ཏི་འོད་དམར་སྨུག་ཅན་གྱིས་གཞལ་ཡས་ཀྱི་རྒྱབ་གཡོགས་ཏེ་མུ་ཁྱུད་ཡོངས་སུ་བར་མ་ཆད་པར་བསྐོར་བ། ཉི་ཟླའི་གའུ་ཁ་སྦྱར་གསུམ་རྒྱུད་བྱས་པ་ཟུང་སྒྲིལ་དུ་གཤིབས་ནས་འོད་འབར་བ་དང་ལྡན་པ། གཞལ་ཡས་ཀྱི་རྨང་ནས་སྒོའི་ཕྱི་ནང་དུ་ཐེམ་སྐས་ཀྱི་རིམ་པ་བརྒྱད་དང༌། ཡ་ཕུབ་ཀྱི་སྟེང་ན་ཡང༌། རྟ་རྐང་དང༌། ཆུ་སྐྱེས་སམ་པདྨ། སྒྲོམ་དང༌། ཟར་ཚགས་དང༌། སྣ་འཕྱོངས་དང༌། ཆུན་འཕྱངས་དང༌། ཤར་བུ་དང༌། ཕ་གུའི་སྟེང་ཁྱུང་མགོ་དང་འབྲས་བུའི་རྟ་བབ་བརྒྱད་ཀྱིས་བརྒྱན་པ་དང་ལྡན་ཏེ། ཐེག་པ་བརྒྱད་ཀྱི་རྒྱུ་འབྲས་ཀྱི་ཕྱིར་རོ། །ཡང་ན་རྒྱུའི་རྟ་བབ། དྲན་པ་ཉེར་བཞག་བཞི་ནས་ཡང་དག་སྤོང་བཞིར་བརྒྱུད་པས་རྫུ་འཕྲུལ་གྱི་རྐང་པ་བཞིའི་སྒོ་ནས་འཇུག་པའི་རྟགས་དང༌། འབྲས་བུའི་རྟ་བབ་ཐེག་པ་བརྒྱད་བགྲོད་ནས་༼༣༢༩༽རྫོགས་པ་ཆེན་པོར་འཇུག་པའི་རྟགས་སུའང་གསུངས་སོ། །བདེན་པ་བཞིའི་ཕྱིར་གྲུ་ཆད་བཞིས་བརྒྱན་པ། བདེན་པ་གཉིས་དང་དབྱེར་མེད་པ་གསུམ་གྱི་ཕྱིར། སྒོ་གསུམ་ཡོད་པས་བར་ཁྱམས་གསུམ་གྱིས་མཛེས་པ། ཡེ་ཤེས་ཀྱི་རྩིག་པའི་སྟེང་ནས་མུ་ཏིག་གི་ཧ་ར་ཕྱེད་པ་དང༌། རངས་པར་འཁོར་བའི་ཧ་ར་ཆེན་པོས་བརྒྱན་པ། དེ་ལ་ཡང་ཆུ་སྲིན་ཏྭ་ར་ན་ཡིས་བཟུང་བ་སྟེ་ཡ་ཕུབས་སུ་ཡང་རིགས་སོ། །དེ་དག་དང་རྟ་བབ་རྣམས་སུ་རིན་པོ་ཆེའི་ཕྲེང་བས་མཛེས་པར་བརྒྱན་པ། རྩིག་པ་དང་བྱ་འདབ་གཉིས་ཀྱི་བར་དུ་མགུལ་འཁོར་བར། དྲྭ་བ་བསྐྱིལ་བ་དང༌། དྲྭ་བ་ཕྱེད་པར་བརྐྱངས་པས་ཀུན་ཏུ་བརྒྱན་པ། ཡེ་ཤེས་བསམ་གྱིས་མི་ཁྱབ་པར་ཤར་བའི་རྟགས་སུ། ལོགས་ངོས་རྣམས་ལ་རིན་པོ་ཆེའི་ཟ་ར་ཚགས་ཀྱིས་ཡོངས་སུ་ཀླུབས་པ། སྒོའི་རྩེ་མོའི་གཡས་གཡོན་ན། རྡོ་རྗེ་རིན་པོ་ཆེ་འོད་འབར་བས་ཀུན་ཏུ་མདངས་ཕྱུང་སྟེ་ཤིན་ཏུ་གསལ་བར་བྱས་པ། དྲིལ་བུ་དང་གཡེར་ཁ་འཕྱང་བ་ལས་ཐེག་པ་ཆེན་པོའི་དོན་མཚོན་པ་འབྱུང་བའི་ཆོས་ཀྱི་སྒྲ་སྒྲོགས་པ། བཤད་པ་དེ་དག་ཀུན་ཀྱང་ཆོས་ཀྱི་སྐུའི་གཟུགས་བརྙན་ཡིན་ལ། དེ་དག་གིས་ཀྱང་གཉིས་སུ་མེད་པའི་ཆོས་སྐུ་ཆེན་པོའི་དོན་སྣང་ཞིང་འབྱུང་བའི་མཚོན་བྱེད་དུ་གྱུར་པ་ཡིན་པས་གཞི་ཁྱད་པར་དུ་ལེགས་པར་ཡོངས་སུ་མཛེས་པའི་རྒྱན་དང་ལྡན་པ། ཡང་ན་ནང་གཞལ་ཡས་ཁང་ལ་ཕྱི་མཆོད་རྟེན་གྱི་རྣམ་པར་ཤར་བས་ཆོས་ཀྱི་སྐུ་མཚོན་པའི་གཟུགས་བརྙན་དུ་འབྱུང་བ། ཞེས་ཀྱང་གསུངས། བཤད་པ་བཞིན་ལྟེ་བ་ལ་རྡོ་རྗེ་མུ་ཁྱུད་བར་མ་ཆད་པས་ཀུན་ཏུ་བསྐོར་བ། རྡོ་རྗེའི་འགྲེང་བུ་ནི་ལྟེ་བའི་རྡོ་རྗེའི་ཚུལ་དང༌། སྒོའི་གོང་གི་ཐོག་ཐུན་མོང་དང༌། མི་མཐུན་པ་ཚར་བཅད་པའི་རྟགས་སུ། ཕྱི་རོལ་དུ་ཡང་རྡོ་རྗེའི་དྲྭ་བས་བརྒྱན་པ། སྒོའི་གཡས་གཡོན་ནས་དགོས་འདོད་སྐོང་བའི་རྟགས་ཡེ་ཤེས་ཀྱི་ཏཱ་ལའི་ཤིང་ལྗོན་པ་སྐྱེས་པ་ལ། གསེར་གྱི་ཙོང་ཙོང་གིས་བྲེས་ཏེ་སྦྲེལ་བ་ལ་ཡང་རིན་པོ་ཆེའི་རིགས་སྣ་ཚོགས་ཀྱི་ཕྲ་མིག་གིས་སྤྲས་ཤིང་བརྒྱན་པ་ལས་གཡེར་ཁ་འཕྱང་བའོ། །གཡས་གཡོན་ནས་ཡེ་ཤེས་ཀྱི་བདུད་རྩིའི་ཆུ་རྒྱུན་ཡིད་དུ་འོང་བ་དལ་བར་འབབ་པ། རིལ་གཟུང་འཛིན་དང་བྲལ་བས་ཕྱི་དང་ནང་མེད་པར་ཡེ་ཤེས་ཁོ་ན་བས་ཀུན་ཏུ་ཡང་ནང་དུ་གྱུར་པ་སྟེ། གསང་བ་སྙིང་པོའི་འགྲེལ་ཆུང་ལས། གནས་མཆོག་མཚན་༼༣༣༠༽ཉིད་བརྗོད་པ་ནི། །ཕྱི་དང་ནང་ཀུན་ཆོས་ཀྱི་དབྱིངས། །བྷ་ག་ཉིད་དུ་འདུས་པས་ན། །ཀུན་ཏུ་ནང་ཞེས་བརྗོད་པ་ཡིན། །ཞེས་གསུངས་པ་ལྟར་ཏེ། རྒྱལ་བའི་ཡེ་ཤེས་ཀྱི་བཀོད་པ་རང་སྣང་བའི་ཞིང་ན་བཞུགས་པའོ།།

བཞི་པ་འཁོར་བཤད་པ་ནི།

རྫོགས་ལོངས་སྤྱོད་པའི་འཁོར། ཞེས་པ་ནས། སྤྱོད་པར་བཞུགས་སོ། །ཞེས་པའི་བར་གྱིས་བསྟན་ཏེ།

རྫོགས་ལོངས་སྤྱོད་པའི་འཁོར་བརྗོད་ཀྱིས་མི་ལང་བའི་ཡང་མི་ལང་བ་ལ། འདི་ལྟ་སྟེ། དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་མི་བསྐྱོད་པ་ལ་སོགས་པ། རྡོ་རྗེའི་གདུང་དང་། སྡེའི་སངས་རྒྱས་ཐམས་ཅད་དང་། དེ་བཞིན་གཤེགས་པ་ཚོར་བའི་རྒྱལ་པོ་བཏང་སྙོམས་ཆེན་པོ་ལ་སོགས་པ། ནོར་བུའི་གདུང་དང་། སྡེའི་སངས་རྒྱས་ཐམས་ཅད་དང་། དེ་བཞིན་གཤེགས་པ་འདུ་ཤེས་ཀྱི་རྒྱལ་པོ་མཚན་མ་མེད་པ་ལ་སོགས་པ། པདྨའི་གདུང་དང་། སྡེའི་སངས་རྒྱས་ཐམས་ཅད་དང་། དེ་བཞིན་གཤེགས་པ་འདུ་བྱེད་ཀྱི་རྒྱལ་པོ་སེམས་དཔའ་ཆེན་པོ་ལ་སོགས་པ། གཞོན་ནུའི་གདུང་དང་། སྡེའི་སངས་རྒྱས་ཐམས་ཅད་དང་། དེ་བཞིན་གཤེགས་པ་གཟུགས་ཀྱི་རྒྱལ་པོ་རྣམ་པར་མི་ཤིགས་པ་ལ་སོགས་པ། གླང་པོའི་གདུང་་དང་། སྡེའི་སངས་རྒྱས་ཐམས་ཅད་ཀུན་ཀྱང་ཐབས་སྤྲིན་ཕུང་ལྟ་བུ་དང་། ཤེས་རབ་ནམ་མཁའ་ལྟ་བུར་འབྲེལ་བ་ཤ་སྟག་དང་། གཙོ་བོ་དང་འཁོར་གྱི་ཚུལ་དུ་རྫོགས་ལོངས་སྤྱོད་པར་བཞུགས་སོ།།

འཁོར་ཇི་ལྟ་བུ་དང་ལྡན་ཞེ་ན། ཉིད་ལས་མི་གཞན་པའི་འཁོར་ཕྱོགས་བཅུའི་སངས་རྒྱས་དང་རིག་པ་ཁྱད་པར་ཅན་གྱི་འཁོར་མཐར་ལམ་པ་སྟེ། འཁོར་གྲངས་ལས་འདས་པ་ཉེ་བར་བསྟན་པ་ནི། རྫོགས་ལོངས་སྤྱོད་པའི་འཁོར་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བ་ལ། འདི་ལྟ་སྟེ། སྙིང་པོའི་གླེང་གཞི་དང་ཡང་ཚུལ་མཐུན་པར། རྣམ་པར་ཤེས་པའི་ཕུང་པོ་ཉིད་རང་རིག་པ་གཅིག་དང་དུ་མའི་མཐའ་ལས་གྲོལ་བའི་དེ་བཞིན་ཉིད་དུ་རྟོགས་པས་དེ་ཁོ་ན་ཉིད་དུ་ནར་སོན་པར་གཤེགས་པས་རྟོག་པ་དེ་ཉིད་མ་སྤངས་དག་པའི་ཚུལ་ནས་རྣམ་པར་ཤེས་པའི་རྒྱལ་པོ་ཞེས་པའི་མཚན་ངེས་པར་འགྲུབ་ལ། དེ་ཡང་རྣམ་པར་ཤེས་པའི་ཕུང་པོ་མེ་ལོང་ལྟ་བུའི་ཡེ་ཤེས་ཆེན་པོར་འབྱུང་འཇུག་མེད་པར་རང་གསལ་བ་དེའི་ཚེ་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོའི་ བདག་ཉིད་ཟག་པ་མེད ་པའི་སྐུར་སྣང་བའི་རྡོ་རྗེ་མི་བསྐྱོད་པ་ལ་སོགས་པ་གཙོ་བོ་རྡོ་རྗེའི་གདུང་དང༌། རྒྱུད་འཛིན་པ་དང༌། གདུང་འཚོབ་པ་གཉིས་ཀྱི་སྒོ་ནས་ཐུགས་ཀྱི་རིགས་དེའི་སྡེའི་སངས་རྒྱས་སུ་གྱུར་པ། རྡོ་རྗེ་སེམས་དཔའ། རྡོ་རྗེ་རྒྱལ་པོ། རྡོ་རྗེ་འདོད་པ། རྡོ་རྗེ་ལེགས་པ་ལ་སོགས་པ་འཁོར་དུ་སྣང་བའི་རྩལ་ཆེན་རྫོགས་པའི་རྣལ་འབྱོར་ལ་བཞུགས་པ་ཐམས་ཅད་དང༌། ཚོར་བའི་ཕུང་པོ་ཉིད་རང་རིག་པ་གཅིག་དང་དུ་མའི་མཐའ་ལས་གྲོལ་བའི་དེ་བཞིན་ཉིད་དུ་རྟོགས་པས་དེ་ཁོ་ན་ཉིད་དུ་ནར་སོན་པར་གཤེགས་པས་རྟོག་པ་དེ་ཉིད་མ་སྤངས་དག་པའི་ཚུལ་ནས་ཚོར་བའི་རྒྱལ་པོ་ཞེས་པའི་མཚན་ཡང་འགྲུབ་ལ། དེ་ཡང་ཚོར་བའི་ཕུང་པོ་ཉིད་མཉམ་པ་ཉིད་ཀྱི་ཡེ་ཤེས་སུ་ཤར་བའི་བཏང་སྙོམས་ཆེན་པོ་ཏིང་ངེ་འཛིན་གྱི་ཕུང་པོ་འབུམ་ཕྲག་ལ་མངའ་བརྙེས་པའི་ བདག་ཉིད་ཟག་པ་མེད ་པའི་སྐུར་སྣང་བའི་རིན་ཆེན་འབྱུང་ལྡན་ལ་སོགས་པ་གཙོ་བོ་ནོར་བུའི་གདུང་དང༌། རྒྱུད་འཛིན་པ་དང༌། གདུང་འཚོབ་པ་གཉིས་ཀྱི་སྒོ་ནས་ཡོན་ཏན་གྱི་རིགས་དེའི་སྡེའི་སངས་རྒྱས་སུ་གྱུར་པ། རྡོ་རྗེ་རིན་ཆེན། རྡོ་རྗེ་གཟི་བརྗིད། རྡོ་རྗེ་རྒྱལ་མཚན། རྡོ་རྗེ་བཞད་པ་ལ་སོགས་པ་འཁོར་དུ་སྣང་བའི་རྩལ་ཆེན་པ་ཐམས་ཅད་དང༌། དེ་བཞིན་༼༣༣༡༽དུ་འདུ་ཤེས་ཀྱི་ཕུང་པོ་ཉིད་རང་རིག་པ་གཅིག་དང་དུ་མའི་མཐའ་ལས་གྲོལ་བའི་དེ་བཞིན་ཉིད་དུ་རྟོགས་པས་དེ་ཁོ་ན་ཉིད་དུ་ནར་སོན་པར་གཤེགས་པས་རྟོག་པ་དེ་ཉིད་མ་སྤངས་དག་པའི་ཚུལ་ནས་འདུ་ཤེས་ཀྱི་རྒྱལ་པོ་ཞེས་པའི་མཚན་ཡང་འགྲུབ་ལ། དེའང་འདུ་ཤེས་ཀྱི་ཕུང་པོ་སོ་སོར་རྟོག་པའི་ཡེ་ཤེས་སུ་ཤར་ཏེ་གསལ་ལ་མི་འཛིན་པ་ལ་འདུ་ཤེས་གསུམ་གྱི་མཚན་མ་མེད་པར་ཤེས་རབ་ཀྱི་ཕུང་པོའི་ བདག་ཉིད་ཟག་པ་མེད ་པའི་སྐུར་སྣང་བའི་འོད་སྣང་མཐའ་ཡས་ལ་སོགས་པ་གཙོ་བོ་པདྨོའི་གདུང་དང༌། རྒྱུད་འཛིན་པ་དང༌། གདུང་འཚོབ་པ་གཉིས་ཀྱི་སྒོ་ནས་པདྨོའི་རིགས་དེའི་སྡེའི་སངས་རྒྱས་སུ་གྱུར་པ། རྡོ་རྗེ་ཆོས། རྡོ་རྗེ་རྣོན་པོ། རྡོ་རྗེ་འཁོར་ལོ། རྡོ་རྗེ་སྨྲ་བ་ལ་སོགས་པ་འཁོར་དུ་སྣང་བའི་རྩལ་ཆེན་པ་ཐམས་ཅད་དང༌། འདུ་བྱེད་ཀྱི་ཕུང་པོ་ཉིད་རང་རིག་པ་གཅིག་དང་དུ་མའི་མཐའ་ལས་གྲོལ་བའི་དེ་བཞིན་ཉིད་དུ་རྟོགས་ཏེ་དེ་ཁོ་ན་ཉིད་དུ་ནར་སོན་པར་གཤེགས་པས་རྟོག་པ་དེ་ཉིད་མ་སྤངས་དག་པའི་ཚུལ་ནས་འདུ་བྱེད་ཀྱི་རྒྱལ་པོ་ཞེས་པའི་མཚན་ཡང་འགྲུབ་ལ། དེ་ཡང་འདུ་བྱེད་ཀྱི་ཕུང་པོ་དེ་ཉིད་བྱ་བ་གྲུབ་པའི་ཡེ་ཤེས་སུ་ཤར་བའི་བདག་གཞན་གྱི་དགོས་པ་ལས་མི་གཡོ་བས་སེམས་དཔའ་ཆེན་པོ་རྣམ་པར་གྲོལ་བའི་ཕུང་པོའི་ བདག་ཉིད་ཟག་པ་མེད ་པའི་སྐུར་སྣང་བའི་དོན་ཡོད་གྲུབ་པ་ལ་སོགས་པ་གཙོ་བོ་གཞོན་ནུའི་གདུང་དང༌། རྒྱུད་འཛིན་པ་དང༌། གདུང་འཚོབ་པ་གཉིས་ཀྱི་སྒོ་ནས་ལས་ཀྱི་རིགས་དེའི་སྡེའི་སངས་རྒྱས་སུ་གྱུར་པ། རྡོ་རྗེ་ལས། རྡོ་རྗེ་མཆེ་བ། རྡོ་རྗེ་ཁུ་ཚུར། རྡོ་རྗེ་གནོད་སྦྱིན་ལ་སོགས་པ་འཁོར་དུ་སྣང་བའི་རྩལ་ཆེན་པ་ཐམས་ཅད་དང༌། གཟུགས་ཀྱི་ཕུང་པོ་ཉིད་རང་རིག་པ་གཅིག་དང་དུ་མའི་མཐའ་ལས་གྲོལ་བའི་དེ་བཞིན་ཉིད་དུ་མ་འདྲེས་ཡོངས་སུ་རྫོགས་པར་རྟོགས་ཏེ་དེ་ཁོ་ན་ཉིད་དུ་ནར་སོན་པར་གཤེགས་པས་རྟོག་པ་དེ་ཉིད་མ་སྤངས་དག་པའི་ཚུལ་ནས་གཟུགས་ཀྱི་རྒྱལ་པོ་ཞེས་པའི་མཚན་ཡང་འགྲུབ་ལ། དེའང་གཟུགས་ཀྱི་ཕུང་པོ་ཉིད་སྟོང་པ་ཉིད་ཀྱི་ཡེ་ཤེས་སུ་རང་སྣང་ཞིང་འབྱེད་པ་མེད་པར་ཤར་བ་ལས་ཁྱད་པར་དུ་ཡང་རྣམ་པར་རིག་བྱེད་མ་ཡིན་པའི་གཟུགས་དག་པ་ལས་བཏགས་པའི་རྣམ་པར་མི་རིག་པ་ཚུལ་ཁྲིམས་ཀྱི་ཕུང་པོའི་ བདག་ཉིད་ཟག་པ་མེད ་པའི་སྐུར་གསལ་བར་སྣང་བའི་རྣམ་པར་སྣང་མཛད་ལ་སོགས་པ་གཙོ་བོ་གླང་པོའི་གདུང་དང༌། རིགས་འཛིན་པ་དང༌། གདུང་འཚོབ་པ་གཉིས་ཀྱི་སྒོ་ནས་དེ་བཞིན་གཤེགས་༼༣༣༢༽པའི་རིགས་དེའི་སྡེའི་སངས་རྒྱས་སུ་གྱུར་པ། སེམས་དཔའ་རྡོ་རྗེ། རིན་ཆེན་རྡོ་རྗེ། ཆོས་ཀྱི་རྡོ་རྗེ། ལས་ཀྱི་རྡོ་རྗེ་ལ་སོགས་པ་འཁོར་དུ་སྣང་ཡང་ཉིད་ལས་མི་གཞན་པའི་རྒྱལ་བ་རྫོགས་པའི་སངས་རྒྱས་ཐམས་ཅད་དེ། དེ་ལྟར་རིགས་ལྔ་པོ་ཀུན་ཀྱང་ཐབས་ཡབ་ཏུ་སྣང་བ་ཡོན་ཏན་ཅིར་ཡང་འཆར་བས་སྤྲིན་ཕུང་ལྟ་བུ་དང༌། ཤེས་རབ་ཡུམ་དུ་སྣང་བ་སྤྲོས་པ་དང་བྲལ་བས་ནམ་མཁའ་ལྟ་བུ་ཡེ་ཤེས་དང་དབྱིངས་གཉིས་སུ་མེད་པར་ཟུང་དུ་འབྲེལ་བ་ཤ་སྟག་ཏུ་བཞུགས་པ་དང༌། བཞུགས་ཚུལ་ཡང༌། གཙོ་བོ་རིགས་ཀྱི་རྒྱལ་བ་ལྔ་དང༌། རང་རང་གི་འཁོར་གྱི་སེམས་དཔའ་ཇི་སྙེད་པའི་ཚུལ་དུ་ལོངས་སྤྱོད་ཆེན་པོའི་སྟོན་པ་གསང་བ་མཆོག་གི་བདག་པོ་དང༌། རིགས་ལྔ་ཁོ་ན་ལྟར་རྫོགས་ལོངས་སྤྱོད་པའི་གཙོ་བོ་དང༌། གནས་ཀྱི་དགོངས་པས་རྩལ་ཆེན་རྫོགས་པའི་རྣལ་འབྱོར་གྱིས་རྫོགས་སྐུ་ལ་ཉན་པའི་འཁོར་དུ་བཀོད་པའི་རང་ལ་ཐབས་གཅིག་པར་བཞུགས་བྱ་བཞུགས་བྱེད་མེད་པའི་ཚུལ་གྱིས་བཞུགས་སོ།།

གསུམ་པ་སྤྲུལ་སྐུའི་གླེང་གཞི་ལ་བཞི་སྟེ། དུས་དང་སྡུད་པ་ཐུན་མོང་དུ་བསྟན་པ། སྟོན་པ་བཤད་པ། གནས་བསྟན་པ། འཁོར་བཤད་པའོ། །དང་པོ་ནི།

རྒྱ་ཆེར་བརྗོད་པ། ཞེས་པ་ནས། དུས་གཅིག་ན། ཞེས་པའི་བར་གྱིས་བསྟན་ཏེ།

རྒྱ་ཆེར་བརྗོད་པ་ལྡེམ་དགོངས་སྦྱོར་བའི་ཚིག་འདི་སྐད།

དཀྲི་བའི་ཐབས་སུ་ཐོས་པའི་དུས་གཅིག་ན།

དེ་ཡང་སྤྲུལ་པའི་སྐུའི་བསྟན་པ་རྒྱ་ཆེར་བརྗོད་པ་ལྡེམ་པོ་དང་དགོངས་པ་བརྒྱད་ཀྱིས་དོན་ལ་སྦྱོར་བའི་ཚངས་པ་དབྱངས་ཀྱི་ཚིག་ཏུ་བགྲོ་བ་འདི་སྐད་དུ། ལོག་སྲེད་ཅན་ལ་བཀྲི་དྲང་བརྒྱུད་པའི་ཐབས་སུ་བསྟན་པ་ཇི་སྙེད་པ་ཐམས་ཅད་སྡུད་པ་པོ་ཕྱག་ན་རྡོ་རྗེ་བདག་ཉིད་ཀྱིས་དངོས་སུ་ཚིག་ཏུ་ཐོས་པའི་དུས་གཅིག་ཏུ་གྱུར་པ་དེའི་ཚེ་ན།

གཉིས་པ་སྟོན་པ་བཤད་པ་ལ་གཉིས་ཏེ། སྟོན་པའི་ངོ་བོ་བསྟན་པ། མཚན་ཉིད་བཤད་པའོ། །དང་པོ་ནི།

བཅོམ་ལྡན་འདས། ཞེས་པ་ནས། རྒྱལ་པོ་རྣམས་ནི། ཞེས་པའི་བར་གྱིས་བསྟན་ཏེ།

བཅོམ་ལྡན་འདས་ཆོ་འཕྲུལ་ཆེན་པོ། ཅིར་ཡང་སྣང་བའི་རྒྱལ་པོ་རྣམས་ནི།

སྟོན་པའི་ངོ་བོ་ནི། མཚན་ཉིད་ཐེག་པ་ལྟར་བདུད་བཞི་བཅོམ་ཞིང་ལེགས་པའི་ཡོན་ཏན་དྲུག་དང་ལྡན་ཏེ། འཁོར་བ་དང་མྱ་ངན་ལས་འདས་པའི་མཐའ་ལས་འདས་པའི་རྣམ་འདྲེན་དམ་པ་ཐུབ་པའི་དབང་པོ་ལ་སོགས་པ་ཆོས་ཀྱི་སྐུ་ལས་མ་གཡོས་པར་ཐུགས་རྗེས་སྤྲུལ་པའི་ཆོ་འཕྲུལ་ཆེན་པོ་མཛད་པ་བཅུ་གཉིས་ལ་སོགས་པ་ཕྲིན་ལས་ཀྱི་བཀོད་པ་སྣ་ཚོགས་པ་གདུལ་བྱ་འདུལ་བའི་དབང་གིས་ངེས་ པ་མེད་པར་ཅིར་ཡང་སྣང་བའི་ཐབས་ལ་མཁས་པའི་མངའ་བདག ་འདྲེན་མཆོག་ཆོས་ཀྱི་རྒྱལ་པོ་སྤྲུལ་པའི་༼༣༣༣༽སྒྲོན་མར་བཀོད་པའི་སྟོན་པ་ཇི་སྙེད་པའི་སྐུ་ཡི་སྒྱུ་འཕྲུལ་བསྟན་པ་རྣམས་ནི།

གཉིས་པ་མཚན་ཉིད་བཤད་པ་ནི།

འོག་ནས། འཁོར་བ་འདྲེན་པའི། ཞེས་པ་ནས། ཆེན་པོར་སྤྲུལ་པ་སྟེ། ཞེས་པའི་བར་གྱིས་བསྟན་ཏེ།

འཁོར་བ་འདྲེན་པའི་སངས་རྒྱས་སྣང་སྲིད་སྟོན་པའི་སྒྲོན་མ། གདུང་བ་སེལ་བའི་སེམས་དཔའ། འགྲོ་དོན་མཛད་པའི་འཕགས་པ། ཐབས་མཁས་ཐུགས་རྗེའི་སྤྲུལ་པ། འབྱུང་བ་དོན་གྱི་བཅོམ་ལྡན་འདས།

ཐུགས་རྗེ་བརྟག་པའི་བདག་ཉིད་ཆེན་པོར་སྤྲུལ་པ་སྟེ།

སྟོན་པའི་མཚན་ཉིད་ནི། གནས་གཅིག་ནས་གཅིག་ཏུ་འཁོར་བའི་འགྲོ་བ་རིགས་དྲུག་གི་སེམས་ཅན་རྣམས་ཁམས་གསུམ་ལས་འདོན་ཞིང་ཟག་མེད་ལ་བཀོད་ནས་ཐར་པར་འདྲེན་པའི་སངས་རྒྱས། མ་རིག་པའི་ལིང་ཏོག་བསལ་ནས་སྣང་སྲིད་ལ་བདེན་པ་གཉིས་དང་ལས་རྒྱུ་འབྲས་གསལ་བར་སྟོན་པའི་སྒྲོན་མ། ཉོན་མོངས་པ་དང་སྡུག་བསྔལ་གྱི་གདུང་བ་སེལ་ཞིང་ཕན་བདེར་སྦྱོར་བའི་སེམས་དཔའ། འགྲོ་དྲུག་ཇི་ལྟར་འདུལ་བ་བཞིན་དོན་མཛད་པའི་འཕགས་པའི་གཙོ་མཆོག་དམ་པ། ཤིན་ཏུ་བསྒྱུར་བར་དཀའ་བའང་ལྡེམ་དགོངས་བརྒྱད་དང་ལུང་བཞི་ལ་སོགས་པས་སྒྲོལ་བའི་ཐབས་ལ་མཁས་པས་ཐུགས་རྗེའི་སྤྲུལ་པ་ཆེན་པོ། སྔ་ཕྱིར་འབྱུང་བ་རྒྱུན་མི་ཆད་པར་གདུལ་བྱ་ཀུན་གྱི་སྒྲོན་མར་སྣང་བའི་ཐུབ་ པ་བཅོམ་ལྡན་འདས། ཐུགས་རྗེ་ཆེན་པོ་མི་སྐྱེ་བའི་དུས་མེད་པས་རྒྱུན་གྱི་རྟག་པའི་བདག ་ཉིད་ཆེན་པོར་སྤྲུལ་པའི་སྐུར་བྱུང་བ་སྟེ།

གསུམ་པ་གནས་བསྟན་པ་ནི།

གོང་ནས། བྱ་བ་རྫོགས་པའི་གནས། ཞེས་པ་ནས། ཞིང་ཁམས་ན། ཞེས་པའི་བར་གྱིས་བསྟན་ཏེ།

བྱ་བ་རྫོགས་པའི་གནས་བསོད་ནམས་གཏེར་ཞེས་བྱ་བ། འཇིག་རྟེན་གྱི་ཁམས་དཔག་ཏུ་མེད་པ།

གནས་ཇི་བཞིན་པ། མོས་པ་ཅན་ཞེས་བྱ་བའི་ཞིང་ཁམས་ན།

གནས་ཕུན་སུམ་ཚོགས་པ་ནི། ཕྲིན་ལས་ཀྱི་བྱ་བ་རོལ་པའི་བཀོད་པ་ཉི་ཤུ་དང༌། མཛད་པ་བཅུ་གཉིས་རྫོགས་པར་མཛད་པའི་གནས། ལྔ་པ་བསོད་ནམས་གཏེར་གྱིས་ཞེས་བྱ་བ་ལ་གནས་པ་མན་ཆད་ཀྱིས་བསོད་ནམས་གསོགས་པའི་ཞིང༌། གདུལ་བྱ་སེམས་ངེས་པར་སྐྱེས་ནས་ཚོགས་སྦྱོར་བ་དག་གི་སྤྱོད་ཡུལ། འཇིག་རྟེན་གྱི་ཁམས་བཤད་པ་ལྟར་དཔག་ཏུ་མེད་ཅིང་བསམ་ལས་འདས་པར་གྱུར་པ། འགྲོ་དྲུག་སོ་སོའི་གནས་འཇིག་རྟེན་འདི་ཁོ་ན་ཇི་བཞིན་པ་ལས་མ་བཅོས་པ། ཡང་ན་སྤྲུལ་པའི་སྒྲོན་མའི་གནས་བཤད་པའི་བཀོད་པ་ཇི་བཞིན་པ། གདུལ་བྱ་མོས་པས་སྤྱོད་པ་ཤས་ཆེ་བས་མོས་པ་ཅན་ཞེས་བྱ་བའི་ཞིང་ཁམས་ན་བཞུགས་པའོ།།

བཞི་པ་འཁོར་བཤད་པ་ནི།

འོག་ནས། འཁོར་བརྗོད་ཀྱིས་མི་ལང༌། ཞེས་པ་ནས། སྣང་བར་སྟོན་ཏོ། །ཞེས་པའི་བར་གྱིས་བསྟན་ཏེ།

འཁོར་བརྗོད་ཀྱིས་མི་ལང་བའི་ཡང་མི་ལང་བ་དག་དང་། སྟོན་པ་དང་ཉན་པའི་ཚུལ་དུ་རྣམ་པར་བཤད་པ་ཆེན་པོར་བཞུགས་ཏེ། ཐམས་ཅད་བདེན་པ་གཉིས་ཀྱི་ཚུལ་དུ་སྣང་བར་སྟོན་ཏོ།།

འཁོར་སྤྱི་ནི་རིགས་དྲུག་གི་གདུལ་བྱ་ཀུན་དང༌། ཁྱད་པར་དུ་ཡང་ལྷ་མི་སྐལ་པ་ཅན་གྲངས་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བ་ཚད་གཟུང་ལས་འདས་པ་དག་དང་ལྷན་ཅིག་ཏུ། དངོས་སུ་ཚིག་ཏུ་༼༣༣༤༽སྟོན་པ་དང༌། རྣ་བས་ཉན་པའི་ཚུལ་དུ་བརྗོད་ཅིང་གྲགས་པ་ནི་གདུལ་བྱའི་སྣང་བ་སྟེ། སྟོན་པས་གསུང་དབྱངས་ཡན་ལག་སུམ་བརྒྱ་དྲུག་ཅུ་སོགས་བསམ་གྱིས་མི་ཁྱབ་པའི་སྒོ་ནས། རྩ་བ་སྡེ་སྣོད་གསུམ་ལ་ཡན་ལག་བཅུ་གཉིས་སྒོ་མོ་བརྒྱད་ཁྲི་བཞི་སྟོང་དུ་སྤྲོས་ཏེ་རྣམ་པར་བཤད་པ་ཆེན་པོར་བཀའ་སྩལ་ཞིང་བཞུགས་ཏེ། ཆོས་སྟོན་ཚུལ་ནི། ཐམས་ཅད་ཀྱང་ཀུན་རྫོབ་དང་དོན་དམ་པའི་བདེན་པ་གཉིས་ཀྱི་ཚུལ་འབའ་ཞིག་ཏུ་སྣང་བར་ཡོངས་སུ་སྟོན་ཏོ། །གནས་ཀྱི་དགོས་པས་བསོད་ནམས་གཏེར་གྱི་ས་པ་ནི་འཁོར་དུ་ངེས་པའོ།།

བཞི་པ་གསང་བའི་སྐུའི་གླེང་གཞི་བཤད་པ་ལ་བཞི་སྟེ། དུས་དང་སྡུད་པ་ཐུན་མོང་དུ་བསྟན་པ། སྟོན་པ་བཤད་པ། གནས་བསྟན་པ། འཁོར་བཤད་པའོ། །དང་པོ་ནི།

འདོད་པ་རང་རྐྱེན། ཞེས་པ་ནས། དུས་གཅིག་ན། ཞེས་པའི་བར་གྱིས་བསྟན་ཏེ།

འདོད་པ་རང་རྐྱེན་གྱི་ཚིག་འདི་སྐད། མ་བཀག་ཆོས་ཉིད་དུ་དགོངས་པ་རང་སྣང་བར་ཐོས་པའི་དུས་གཅིག་ན།

སྟོན་པ་གསང་བའི་སྐུའི་བསྟན་པ། འདོད་པ་རང་གིས་ཆོས་ཉིད་རྟོགས་པའི་རྐྱེན་གྱི་ཚིག་དང༌། འདོད་ཆགས་ཅན་གྱིས་རང་སྤྱོད་ཀྱིས་གྲོལ་བའི་རྐྱེན་དུ་འདོད་པ་སྤྱོད་པའི་ཐབས་ཀྱི་ཚིག་འདི་སྐད་དུ། དེ་ཡང་འདོད་པ་སྤང་དུ་མེད་དེ་མ་བཀག་པར་དེ་ཉིད་དོན་གྱི་ཆོས་ཉིད་དུ་གནས་པ་ཡིན་པ་དང༌། ཡིན་དོན་གྱི་རང་བཞིན་དེ་ཉིད་མངོན་དུ་འབྱིན་པར་བྱེད་པ་ལ་དགོངས་ཏེ་བསྟན་པ་ཉིད། སྡུད་པ་པོ་གསང་བདག་ཆེན་པོས།

སེང་གེ་ལྟ་བུའི་གསུང་ཐབས་ཀྱི་སྒོ་ནས་བརྗོད་པ་དང་འདྲ་བར་རང་སྣང་གི་དགོངས་པ་ལ་ཤར་ཏེ་ཐོས་པར་གྱུར་པའི་དུས་དེའི་སྐབས་གཅིག་ན། ཞེས་ཟླ་སྤངས་པ་ནི་ཐམས་ཅད་ནས་ཐམས་ཅད་དུ་མ་ཡིན་པ་སྟེ་བཤད་པ་རྣམས་ལའང་སྦྱར་རོ།།

གཉིས་པ་སྟོན་པ་བཤད་པ་ལ་གཉིས་ཏེ། སྟོན་པའི་ངོ་བོ་བཤད་པ། མཚན་ཉིད་བསྟན་པའོ། །དང་པོ་ནི།

བཅོམ་ལྡན་འདས། ཞེས་པ་ནས། བདེ་བ་ཆེན་པོ་དེ། ཞེས་པའི་བར་གྱིས་བསྟན་ཏེ།

བཅོམ་ལྡན་འདས་གསང་བའི་སྐུ་བདེ་བ་ཆེན་པོ་དེ།

སྟོན་པའི་ངོ་བོ་ནི། ཉོན་མོངས་པ་དང༌། འདུས་བྱས་དང༌། སྐད་ཅིག་གིས་འགྱུར་བ་དང༌། སྤང་གཉེན་གྱི་རྟོག་པ་རྣམས་རང་གིས་མེད་ཅིང་ཡེ་ཤེས་རང་གསལ་གྱི་རེག་པར་ཡོན་ཏན་ལྷུན་གྲུབ་ཏུ་འཆར་བས་མཐའ་གཉིས་མ་སྤངས་པར་བྲལ་བས་བཅོམ་ལྡན་འདས། ལྟ་བས་གསང་བ་དང༌། སྤྱོད་པས་གསང་བའི་རང་བྱུང་དོན་གྱི་སྐུ་རྟེན་ཐིག་ལེ་འདུས་པའི་ཡེ་ཤེས་བདེ་བ་ཆེན་པོ་མི་འགྱུར་བའི་རོ་དང་ལྡན་པར་བཞུགས་པ་དེ་ཉིད་དོ།།

གཉིས་པ་མཚན་ཉིད་བསྟན་པ་ནི།

འོག་ནས། ཐུན་མོང་མ༼༣༣༥༽གྱུར་གསང་བའི་སྐུ་སྟེ། ཞེས་པས་བསྟན་ཏེ།

ཐུན་མོང་དུ་མ་གྱུར་པའི་གསང་བའི་སྐུ་སྟེ།

སྟོན་པའི་མཚན་ཉིད་ནི། ཡོ་ག་ཕྱིར་མན་ཆད་ཀྱི་ཡུལ་མ་ཡིན་པས་ཐུན་མོང་དུ་མ་གྱུར་ཏེ་རྟོགས་པར་དཀའ་བས་གསང་བའི་སྐུ་སྟེ། མཐའི་ཟུག་རྔུ་མ་སྤང་བྲལ་ཞིང་ལོངས་སྤྱོད་གཉིས་བདེ་སྟོང་དབྱེར་མེད་དུ་བཞུགས་པ་དེ་ཉིད་དོ།།

གསུམ་པ་གནས་བསྟན་པ་ནི།

གོང་གི །ཆོ་འཕྲུལ་ཡོངས་སུ། ཞེས་པ་ནས། ཞིང་ཁམས་ན། ཞེས་པའི་བར་གྱིས་བསྟན་ཏེ།

ཆོ་འཕྲུལ་ཡོངས་སུ་རྫོགས་པའི་གནས། གཙུག་ཏོར་འཁོར་ལོས་སྒྱུར་བའི་ཁྱད་པར། ཟབ་མོ་གསང་བ་མཆོག་གི་དགྱེས་པ། ཡུམ་གྱི་ལྷུམས་པདྨའི་སྙིང་པོ། རྒྱལ་བ་ཀུན་གྱིས་བསྐྲུན་པའི་ཕོ་བྲང་། གང་གི་དོན་དུ་གཤེགས་པའི་ཤུལ། སྲིད་པ་གསུམ་གྱི་སེམས་ཅན་སྐྱེད་པར་བྱེད་པའི་གཞི། ཆགས་པའི་རྟེན། འབྱུང་བའི་གནས། འགྲོ་བའི་ལམ་དུ་གྱུར་པ། དེ་དང་ཆ་མཐུན་དུ་བསྟན་པ། པདྨོ་ཅན་ཞེས་བྱ་བར་གྲགས་པའི་ཞིང་ཁམས་ན།

གནས་ཕུན་སུམ་ཚོགས་པ་ནི། རྟོགས་པ་དང་མ་རྟོགས་པ་ལས་འཁོར་འདས་ཀྱི་ཆོ་འཕྲུལ་ཡོངས་སུ་རྫོགས་པར་སྟོན་ལ་ཁྱད་པར་དུ་ཇི་སྙེད་པའི་སྤྲུལ་པ་འབྱུང་བའི་གནས། རྡོ་རྗེའི་རྩེ་མོ་དང་གསང་བའི་སྣ་རྩེ་ཕྲད་པས་རྟེན་གྱི་ངོ་བོ་དབུ་ནས་སླར་བཟློག་པའི་གཙུག་ཏོར་འཁོར་ལོས་བསྒྱུར་བའི་ཐབས་མཆོག་གང་གིས་འོག་མ་ལས་ཁྱད་པར་དུ་གྱུར་པའི་གསང་བ་ཟབ་མོ་དཔག་པར་དཀའ་བ་ཉམས་སུ་མྱོང་ནས་གཉིས་མེད་ཀྱི་ཡེ་ཤེས་གསང་བ་མཆོག་གི་རོ་དང་ལྡན་པས་དགའ་བ་ཆེན་པོའི་བྱེ་བྲག་བརྒྱད་གཉིས་ཀྱི་རོལ་པར་ཤར་ཏེ་ཀུན་ནས་དགྱེས་པར་བྱེད་པ། འཁོར་འདས་སྐྱེད་པའི་གནས་དོན་དང་མཐུན་པའི་བྷ་ག་ཡུམ་གྱི་ལྷུམས་སུ་ཉེས་པས་མི་གོས་པར་འདབ་མ་བརྒྱད་ལྡན་གྱི་པདྨའི་སྙིང་པོ་རྩ་བའི་རྩེ་མོའི་ཟེའུ་འབྲུ། རྒྱལ་བ་བཞི་བཅུ་རྩ་གཉིས་ལ་སོགས་པ་ཀུན་གྱི་སྐུ་བསྐྲུན་ཞིང་འབྱུང་བའི་ཕོ་བྲང༌། གནས་ཀྱི་ཡོན་ཏན་གདུལ་བྱ་ཤིན་ཏུ་ཆགས་པ་ཅན་གང་ཐབས་ཀྱི་མཆོག་གི་གདུལ་ཞིང་དོན་མཛད་པ་ལ་གཤེགས་པའི་ཤུལ་ལམ་དམ་པ། སྐྱོན་གྱི་དབང་དུ་ཐབས་དང་བྲལ་ནས་བླ་མན་ཆད་སྲིད་པ་ཁམས་གསུམ་གྱི་སེམས་ཅན་ལས་ཀྱིས་སྐྱེད་ཅིང་སྨིན་པར་བྱེད་པའི་གཞི། འགྲོ་བ་རྣམས་ཤིན་ཏུ་ཆགས་ཤིང་ཞེན་པའི་རྟེན་དུ་གྱུར་པ། སེམས་ཅན་མང་པོ་འབྱུང་བའི་གནས། རྣལ་འབྱོར་པ་དང་འགྲོ་བ་རྣམས་ཐབས་ཀྱིས་ཟིན་མ་ཟིན་གྱིས་འཁོར་འདས་སུ་འགྲོ་བར་བྱེད་པའི་ལམ་དུ་གྱུར་པ། གདུལ་བྱ་གང་དག་གདུལ་བའི་ཕྱིར་སྤྱོད་པ་དེ་དང་ཆ་མཐུན་དུ་བསྟན་ཏེ། ཆགས་པ་མེད་པར་བྱེད་པས་གསང་བའི་གནས་པདྨོ་འདབ་མ་བརྒྱད་དང་ལྡན་པ་ཅན་ཞེས་བྱ་བར་མཚན་ངེས་པར་གྲགས་པའི་ཞིང་ཁམས་རྟོགས་ན་ཡོན་ཏན་ཀུན་འབྱུང་བའི་གཞི་རྟེན་བཀོད་པ་སྣ་ཚོགས་ཐ་དད་དུ་སྣང་བ་དེ་ན་བཞུགས་སོ།།

བཞི་པ་འཁོར་བཤད་པ་ནི།

འོག་ནས། གསང་བའི་འཁོར། ཞེས་པ་ནས། ཚུལ་དུ་བཞུགས་སོ། །ཞེས་པའི་བར་གྱིས་བསྟན་ཏེ།

གསང་བའི་འཁོར་བརྗོད་ཀྱིས་མི་ལང་བའི་ཡང་མི་ལང་བ་ལ། འདི་ལྟ་སྟེ། གསང་བའི་སེམས་དཔའ་ཆེན་པོ་རྡོ་རྗེ་མྱུར་བ་དང་། རྡོ་རྗེ་ཆེན་པོ་མགྱོགས་པ་དང་། རྡོ་རྗེ་ཆེན་པོ་རྣོ་བ་དང་། རྡོ་རྗེ་ཆེན་པོ་འབྱུང་བ་དང་། རྡོ་རྗེ་ཆེན་པོ་འབྱེད་པ་དང་། རྡོ་རྗེ་ཆེན་པོ་ཆེ་བ་དང་། རྡོ་རྗེ་ཆེན་པོ་ཡངས་པ་དང་། རྡོ་རྗེ་ཆེན་པོ་ཟབ་པ་དང་། རྡོ་རྗེ་ཆེན་པོ་བརྟན་པ་དང་། རྡོ་རྗེ་ཆེན་པོ་སྣ་ཚོགས་ལ་སོགས་པ། ཤིན་ཏུ་གསང་བའི་འཁོར་འབྱུང་འཇུག་དང་བཅས་ཏེ། གང་ཐེ་ཚོམ་གཅོད་པ་དང་། ཆོད་པ་དང་། ཞུ་བར་ལྡོག་པའི་ཚུལ་དུ་བཞུགས་སོ།།

འཁོར་བསྟན་པ་ནི། ༼༣༣༦༽གསང་བའི་སྐུའི་འཁོར་རྩ་དང་བཅུད་དུ་འཛོམ་པ་ལ་ཡེ་ཤེས་ཀྱིས་བསྐུལ་བས་རྣམ་པར་འཕྲུལ་པ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བ་གྲངས་ལས་འདས་པ་ཉིད་ཉེ་བར་བསྟན་པ་འདི་ལྟ་སྟེ། འཁོར་དེ་དག་ཀྱང་ཕྱི་པ་མན་ཆད་ཀྱི་ཡུལ་མ་ཡིན་པས་གསང་བ་དམ་པ་གཉིས་སུ་མེད་པའི་ཡེ་ཤེས་ཤར་བས། རྩོལ་བའི་ཐབས་ཀྱི་ཆ་རེས་ཉོན་མོངས་པ་དང་སྒྲིབ་པའི་ཕུང་པོ་ཀུན་ནས་བསལ་ཞིང་གསང་སྔགས་ཀྱི་དོན་ལ་མི་གཡོ་བར་སེམས་པས་དམིགས་ཤིང་མཐའ་ཀུན་འཇོམས་པར་བྱེད་པས་དཔའ་བོར་གྱུར་པའི་ཕྱིར། ཀུན་ཀྱང་གསང་བའི་སེམས་དཔའ་ཐབས་ཀྱི་རྡོ་རྗེ་ཡིན་པར་ངེས་པ་ནི་སྤྱིའི་མཚན་ནོ།།

སྒོས་མཚན་ནི། རྡོ་རྗེ་ལྟ་བུའི་ཐབས་ཀྱི་ཁྱད་པར་གྱིས་ཟིན་པའི་འཁོར་འདི་དག་རྒྱུད་སོ་སོ་བ་མ་ཡིན་པའི་ཕྱིར། ཐབས་ཁྱད་པར་ཅན་གྱིས་ཟིན་པའི་རྡོ་རྗེའི་ཡེ་ཤེས་ཆེན་པོ་གསང་སྔགས་ཀྱི་དོན་དེ་མ་ཐག་པར་འབྱུང་བས་རྡོ་རྗེ་མྱུར་བ་དང༌། ཡང་དག་པའི་ས་ལ་སྐད་ཅིག་གིས་ཕྱིན་པར་བྱེད་པས་རྡོ་རྗེ་ཆེན་པོ་མགྱོགས་པ་དང༌། བདེ་ལ་མི་རྟོག་པས་ལོག་པའི་དྲྭ་བ་གཅོད་པས་རྡོ་རྗེ་ཆེན་པོ་རྣོན་པོ་དང༌། དེ་ལས་ཡོན་ཏན་གྱི་བྱེ་བྲག་རང་འཆར་བས་རྡོ་རྗེ་ཆེན་པོ་འབྱུང་བ་དང༌། རིག་པའི་སྒོ་གསལ་བར་བྱེད་པས་རྡོ་རྗེ་ཆེན་པོ་འགྱེད་པ་དང༌། ཐབས་གོང་ན་མེད་པ་དང་ལྡན་པས་རྡོ་རྗེ་ཆེན་པོ་ཆེ་བ་དང༌། དམན་པ་མ་སྤངས་བཀོལ་བ་མེད་པར་རྣམ་པར་དག་པས་རྡོ་རྗེ་ཆེན་པོ་ཡངས་པ་དང༌། ཐབས་ཀྱི་དོན་དཔག་པར་དཀའ་བས་རྡོ་རྗེ་ཆེན་པོ་ཟབ་པ་དང་། མི་འགྱུར་བའི་ཡེ་ཤེས་ཆེན་པོ་ནུབ་པ་མེད་པར་ཤར་བས་རྡོ་རྗེ་ཆེན་པོ་བརྟན་པ་དང༌། ཡེ་ཤེས་ཆེན་པོ་ཇི་སྙེད་པའི་བྱེ་བྲག་ཀུན་འདུས་པས་རྡོ་རྗེ་ཆེན་པོ་སྣ་ཚོགས་དང༌། ལ་སོགས་པ་ཞེས་པས་དངོས་པོ་གཞན་བསྡུ་བ་ནི་བརྗོད་ཀྱིས་མི་ལང་བ་རྣམས་ཏེ། དེ་ལྟ་བུའི་ཤིན་ཏུ་གསང་བའི་འཁོར་མང་པོ་པདྨའི་སྙིང་པོའི་གནས་སུ་རང་རང་གི་གནས་ནས་འབྱུང་སྟེ་འོང་བ་དང༌། གཞལ་ཡས་སུ་འཇུག་པ་དང༌། རང་གནས་སུ་འགྲོ་བ་དང་བཅས་ཏེ། འཁོར་གྱི་དངོས་པོ་ཇི་སྙེད་པ་དག་གང་རྟེན་དང་འཕྲད་བདོ་བ་ལས་ཐེ་ཚོམ་གཅོད་བཞིན་པ་དང༌། སླར་བཟློག་ནས་རང་རང་གི་གནས་སུ་ཕྱིན་པས་ཐེ་ཚོམ་ཆོད་ནས་གསང་བ་དམ་པའི་གདིངས་རྙེད་ཟིན་པ་དང༌། ཡང་རང་རང་གི་གནས་ནས་ཆ་ཡིས་བསྐྱོད་དེ་གསང་བའི་དོན་རྩེ་མོའི་གནས་སུ་ཞུ་བར་རྩོམ་ནས་ཉེ་བར་བསྡོགས་པའི་ཚུལ་དུ་བཞུགས་ཏེ། གནས་གསུམ་ན་༼༣༣༧༽རྒྱུད་ཐ་དད་པའི་དབང་དུ་ཡང་འགྱུར་བར་རིགས་སོ། །དེའང་རྩ་གནས་བྱེ་མ་བྱེས་ཀྱི་ཡེ་ཤེས་སུ་སྐྱེ་བ་དང༌། སྐྱེས་པ་དང༌། ལྡོག་པའི་རིམ་པ་ཁོ་ནའོ། །འདི་དག་རིལ་ཡང་གསང་བ་ཆེན་པོའི་སྐུའི་ཡན་ལག་གི་བྱེ་བྲག་ཏུ་འདུས་པའི་ཕྱིར་འཁོར་ཕུན་སུམ་ཚོགས་པར་ངེས་པའོ།།

གཉིས་པ་དེ་དག་མ་འདྲེས་ཡོངས་རྫོགས་སུ་བཞུགས་པས་ཞུ་བ་བསྒུགས་པ་ལ་གཉིས་ཏེ། གཅིག་དང་དུ་བྲལ་དུ་བཞུགས་པ་དང༌། དགོངས་པ་ཉམས་པ་ལ་བཞུགས་ཏེ་ཞུ་བ་བསྒུགས་པའོ། །དང་པོ་ནི།

དེ་ལྟར་ན། ཞེས་པ་ནས། ཀུན་ཏུ་སྣང་ངོ་། །ཞེས་པའི་བར་གྱིས་བསྟན་ཏེ།

དེ་ལྟར་ན་དེ་བཞིན་གཤེགས་པ་ཐམས་ཅད་རེ་རེ་ལ་ཡང་སྐུའི་བྱེ་བྲག་འདི་ལྟར་སྣང་ཞིང་། ཐ་དད་དུ་སྣང་བ་ཡང་མེད་དེ། གཅིག་དང་ཐ་དད་པའི་ངོ་བོ་ལས་ཀྱང་གྲོལ་ལ། ལྷན་ནེ། ལྷང་ངེ་།

ལྷམ་མེ། ལྷག་གེར་ཀུན་ནས་ཀུན་ཏུ་སྣང་ངོ་།།

དེ་བས་ན། སྟོན་པ་སྐུ་བཞིའི་གླེང་གཞིའི་ངོ་བོ་ཕུན་སུམ་ཚོགས་པ་དྲུག་དྲུག་ཏུ་བསྟན་པའི་ཚུལ་དེ་ལྟར་ན། ཕྱོགས་བཅུའི་དེ་བཞིན་གཤེགས་པ་ཇི་སྙེད་པ་ཐམས་ཅད་ལས་ཐོས་པའི་ཚུལ་ཡང༌། གདུལ་བྱའི་དབང་གི་ཕྱིར་རྒྱལ་བ་རེ་རེ་ལ་ཡང་སྐུའི་བྱེ་བྲག་རྣམ་པ་བཞི་བཞི་འདི་ལྟར་སྣང་ཞིང་ཕུན་སུམ་ཚོགས་པ་དྲུག་ལྡན་དུ་ཤར་བས་ཕྱོགས་ཀུན་ལྷུན་གྱིས་གྲུབ་པའི་གླེང་གཞི་ཞེས་ཀྱང་བྱ་ལ། ཐམས་ཅད་ཀྱི་ངོ་བོ་རིས་སུ་ཆད་ཅིང་ཐ་དད་དུ་སྣང་བ་ལྟར་སོ་སོར་འབྱུང་བའི་རྒྱུ་ཡང་མེད་དེ། ལྷུན་རྫོགས་ངང་གི་ཐིག་ལེ་གཅིག་གི་དབྱིངས་སུ་མཉམ་པའི་ཕྱིར། ཕྱོགས་མེད་གདལ་ཁྱབ་མཉམ་པ་ཆེན་པོའི་གླེང་གཞི་ཞེས་ཀྱང་བྱ་སྟེ། མཐའ་ལ་ཞེན་པ་ཡོངས་སུ་བསལ་བའི་ཕྱིར་རྒྱལ་བ་ཐམས་ཅད་གཅིག་དང་ཐ་དད་པའི་ངོ་བོ་ལས་ཀྱང་གྲོལ་ལ། རང་སྣང་རིས་མེད་ཀྱི་བཀོད་པ་སྟོན་པའི་ཕྱིར། སྟོན་པ་མི་གཡོ་བར་ལྷན་ནེ། གནས་མི་སྒྲིབ་པར་ལྷང་ངེ་། འཁོར་རྟོགས་པའི་ངང་ལ་ལྷམ་མེ། བསྟན་པ་ཀུན་དོན་གསལ་བར་ལྷག་གེར་སྣང་བའམ། ཡང་ན། ཆོས་སྐུ་མ་གཡོས་པར་ལྷན་ནེ། ལོངས་སྐུ་རང་གསལ་དུ་ལྷང་ངེ། གསང་བའི་སྐུ་བདེ་བ་ཆེན་པོར་ལྷམ་མེ། སྤྲུལ་པའི་སྐུ་མངོན་པར་ལྷག་གེར་ཕྱོགས་ཀུན་ནས་དུས་ཀུན་ཏུ་གནས་ཐམས་ཅད་པར་སྔ་མ་དང་ཕྱི་མ་མེད་པར་མ་འདྲེས་ཡོངས་རྫོགས་སུ་སྣང་ངོ་། །དེ་ལྟར་གླེང་གཞི་འདིའི་དོན་རྒྱས་པ་ནི་ཀུན་མཁྱེན་དམ་པ་རིན་པོ་ཆེས་སྐུ་བཞིའི་གླེང་འགྲེལ་ལས་ཤེས་པར་བྱ་སྟེ། འདིར་བར་སྐབས་སུ་འབྲུ་གནོན་ལ་མཁོ་བ་ཅུང་ཟད་ལས་ཐམས་ཅད་སྦྱར་ན་མང་བར་འགྱུར་བས་ཡི་གེས་འཇིགས་སོ།།

གཉིས་པ་དགོངས་པ་ཉམས་པ་ལ་བཞུགས་ཏེ་ཞུ་བ་བསྒུགས་པ་ནི།

དེའི་ཚེ། ཞེས་པ་ནས། མི་དམིགས་སོ། །ཞེས་པའི་བར་གྱིས་བསྟན་ཏེ།

དེའི་ཚེ་དེའི་དུས་ན་མི་ཆེད་པའི་སྤྱོད་ཡུལ། ཐབས་ཀྱི་ཐེག་པ་ཆེན་པོ་གསང་བའི་སྙིང་པོ་འདི། སྐུ་གཞིར་རྣམ་པར་སྣང་བ་ལ་སོགས་པ་ཐོས་པ། ཕྱིན་ཅི་མ་ལོག་པའི་དོན་རྒྱལ་བའི་སྲས་དག་ལ་དེ་ཁོ་ན་ལྟར་བགྲོ་བ་ནི། འདི་ལྟ་སྟེ། དེ་བཞིན་གཤེགས་པ་ཐམས་ཅད་ཆོས་ཐམས་ཅད་དགོངས་པ་མཉམ་པ་ཉིད་ལ་ཤར་བར་མཁྱེན་ནས། སྐུ་མཉམ་པ་ཉིད་མི་དམིགས་པ་ཞེས་བྱ་བའི་ངང་ལ་རྣམ་པར་བཞུགས་སོ། །གསུང་མཉམ་པ་ཉིད་མི་དམིགས་པ་ཞེས་བྱ་བའི་ངང་ལ་རྣམ་པར་བཞུགས་སོ། །ཐུགས་མཉམ་པར་ཉིད་མི་དམིགས་པ་ཞེས་བྱ་བའི་ངང་ལ་རྣམ་པར་བཞུགས་ཏེ། འཇུག་པ་འམ། ལྡོག་པ་འམ། རྣམ་པར་ལྡོག་པ་མི་དམིགས་སོ།།

དེ་ལྟར་སྐུ་བཞིས་བཀའ་སྩལ་པ་དེའི་ཚེ། གསང་བ་པ་བདག་གིས་ཐོས་པ་དེའི་དུས་ན། ལམ་གྱི་༼༣༣༨༽གསུམ་པ་དང་སའི་དྲུག་པ་ཡན་ཆད་ཀྱི་རྣལ་འབྱོར་མཆོག་དང་སངས་རྒྱས་རྣམས་ཀྱི་བར་ལྷ་དང་མི་ཆེན་པོའི་སྤྱོད་ཡུལ། གསང་སྔགས་དམ་པའི་རྒྱུད། ཐབས་ཀྱི་ཐེག་པ་ཆེན་པོ་ཐུན་མོང་མིན་པས་གསང་བའི་སྙིང་པོ་འདི་ཉིད་སྡུད་པ་པོ་གསང་བའི་མངའ་བདག་ཆེན་པོ་ངས། བཤད་པ་བཞིན་དུ་སྟོན་པ་སྐུ་བཞི་རྣམ་པར་སྣང་བ་ལས་ཡང་དག་པར་ཐོས་པ། ནོར་བ་མེད་པར་ཕྱིན་ཅི་མ་ལོག་པའི་གསང་དོན་ཟབ་ཅིང་རྒྱ་ཆེ་བ་མ་འདྲེས་ཡོངས་རྫོགས་ཀྱི་དགོངས་པ་དམ་པ་ཉིད། རིག་པ་འཛིན་པ་རྒྱལ་བའི་སྲས་གདུང་རྒྱུད་དུ་བྱུང་བའི་འདུས་པ་ཕལ་མོ་ཆེའི་འཁོར་དག་ལ། སྟོན་པ་སྐུ་བཞིས་གསུངས་པ་དེ་ཁོ་ན་ཇི་ལྟ་བར་བགྲོ་ཞིང་བཤད་པ་ཉེ་བར་བསྟན་པ་ནི། འདི་ལྟ་སྟེ། རྫོགས་པའི་སངས་རྒྱས་དེ་བཞིན་གཤེགས་པ་ཐམས་ཅད་དང་ཆོས་སོ་ཅོག་ཐམས་ཅད་དུ་སྣང་བའི་རྒྱུ་རྒྱལ་བའི་དགོངས་པ་སྤོང་ལེན་ངང་གིས་བྲལ་བའི་གསང་སྔགས་ཇི་བཞིན་པའི་མཉམ་པ་ཉིད་ལ་གཅིག་དང་དུ་མ་མེད་པར་རང་ཤར་བར་མཁྱེན་ནས་ཐུགས་སུ་ཆུད་པས། སྐུ་མཉམ་པ་ཉིད་སྣང་བའི་ཐ་སྙད་མི་དམིགས་པ་ཞེས་བྱ་བའི་ངང་ལ་རྣམ་པར་བཞུགས་སོ། །གསུང་མཉམ་པ་ཉིད་བརྗོད་པའི་ཐ་སྙད་མི་དམིགས་པ་ཞེས་བྱ་བའི་ངང་ལ་རྣམ་པར་བཞུགས་སོ། །ཐུགས་མཉམ་པ་ཉིད་རྟོག་པའི་ཐ་སྙད་མི་དམིགས་པ་ཞེས་བྱ་བའི་ངང་ལ་དེ་ཁོ་ན་ཉིད་ཀྱི་ངོ་བོར་རྣམ་པར་བཞུགས་ཏེ། རྟེན་དང་རྟེན་ཅན་ནི་འདོད་པ་མ་ཡིན་ནོ། །འོན་ཏང་སྐུ་གསུང་ཐུགས་ཀྱི་ངང་དེ་ལའང་ཇི་བཞིན་པའི་ངང་ལས་ བདག་ཉིད་འཕྲལ་དུ་འཇུག་པའམ། གཞན་མེད་པས་དེ་ལས་ལྡོག་པའམ། རབ་ཏུ་ཡང་བྱེ་བྲག་ཏུ་རྣམ་པར་ལྡོག་པ ་ཞེས་བྱ་བའི་འཕོ་འགྱུར་དུ་སྣང་བ་ནི་གང་ཡང་མེད་ཅིང་མི་དམིགས་སོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། ཡན་ལག་ཅེས་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཉིས་ནི་གང་འབྱུང་བ་བརྗོད་པ་གཉིས་ཉིད་དོ། །ལངྐའི་བདག་པོ།

དེ་དག་ནི་རྒྱུའི་ཡན་ལག་ཅེས་བྱའོ།།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། འདིའི་གླེང་གཞི་གཏན་ཚིགས་བྱུངཁུངས་དང་ལུང་བསྟན་བརྒྱུད་པའི་གནས་དང་སྟོན་པ་གཉིས་ནི་ལོ་རྒྱུས་སུ་བརྗོད་པས་གང་བསྟན་པ་ཟབ་མོའི་དངོས་པོར་སྣང་བ་སྔོན་དང་ད་ལྟར་འབྱུང་བ་ཚིག་ཏུ་བརྗོད་པ་གཉིས་ཀྱི་སྒོ་ནས་བསྟན་པ་དམ་པའང་གཉིས་སུ་སྣང་བར་མཛད་པ་ཉིད་དོ། །འདིའི་དོན་ལ་ཇོ་བོ་ལྷ་རྗེ་ནི། བྱིན་རླབས་འབྱུང་བའི་གླེང་གཞི་དང༌། ལུང་བསྟན་བརྒྱུད་པའི་གླེང་གཞི་གཉིས་རྗེས་འཇུག་ཏུ་རི་མ་ལ་ཡར་འབྱུང་བའི་ཆ་ནས་ལུང་བསྟན་༼༣༣༩༽བརྒྱུད་པའི་གླེང་གཞིར་འགྲོ་ལ། དེ་ལོ་རྒྱུས་བརྗོད་པའི་ཆ་ནས་བྱིན་རླབས་འབྱུང་བའི་གླེང་གཞིར་འགྲོའོ། །འདིའི་གནད་ཀས། དོན་བསྡུས་ཀྱི་ལུང་བསྟན་བརྒྱུད་པའི་སྐབས་ན། གླེང་བསླང་ལ་སོགས་དྲུག་རྣམས་དང༌། མདོ་བཞི་རྩ་བ་གསུམ་ལ་སོགས། ཚུལ་བཞིན་རྗེས་སུ་སྦྱར་བར་བྱ། །ཞེས་པའང་འབྱུང་བའི་ཆ་ནས་ལུང་བསྟན་བརྒྱུད་པའི་ལྡེ་མིག་ཏུ་འགྲོ་ལ། ལོ་རྒྱུས་བརྗོད་པའི་ཆ་ནས་བྱིན་རླབས་འབྱུང་བའི་ལྡེ་མིག་ཏུ་འགྲོའོ། །ཞེས་གསུང་ངོ༌།།

དེ་ལ་ཀུན་མཁྱེན་ཤེས་རབ་སེང་གེས། དོན་བསྡུས་ཀྱི་ལྡེ་མིག་དེ་ལ་འདི་ལྟར་ཡང་གོ་སྟེ། སྤྱིར་འབྱེད་པར་བྱེད་པའི་ལྡེའུ་མིག་ལ་ཡན་ལག་དྲུག་ལས། བྱིན་རླབས་འབྱུང་བ་དང༌། ལུང་བསྟན་བརྒྱུད་པ་གཉིས་ཀྱི། རྒྱུའི་ཡན་ལག་དང་རྩ་བའི་ཡན་ལག་གཉིས་མ་འདྲེས་པར་བྱུང་བས། འབྲེལ་བའི་ཡན་ལག་མན་ཆད་ལ། རང་བཞིན་དགོངས་འདུས་གཏན་ལ་འབེབས་པའི་དུས་ན་བྱིན་རླབས་འབྱུང་བའི་རྒྱུད་ཀྱི་ལྡེ་མིག་ཏུ་འགྲོ་ལ། མཚོན་པར་བྱེད་པ་ཡི་གེའི་རྒྱུད་གཏན་ལ་འབེབས་པའི་ངོས་ནས་ལུང་བསྟན་བརྒྱུད་པའི་རྒྱུད་ཀྱི་ལྡེ་མིག་ཏུ་འགྲོའོ། །གསུངས་པ་ཉིད། བསྟན་པ་གཉིས་ཀྱི་དོན་རྣམས་མ་འདྲེས་ཡོངས་རྫོགས་སུ་གསལ་བར་མཐོང་བའི་དཀའ་བའི་གནད་སྣང་བར་བྱེད་པ་སྟེ། བློ་ལྡན་རྣམས་ཀྱིས་ཞིབ་ཏུ་བསམ་པར་འོས་སོ། །འོན་ཀྱང་ལེའུ་དང་པོར་ཡང་སྐུ་བཞི་ལ་གསང་བདག་གིས་ཐོས་པ་གཅིག་བྱུང༌། ལེའུ་ཞེ་བདུན་པ་འདིར་ཡང་སྐུ་བཞི་ལ་གསང་བདག་གིས་ཐོས་ནས་འདུག་པས་བྱིན་རླབས་འབྱུང་བ་རང་ལ་གླེང་གཞི་གཉིས་བྱུང་བས་བལྡབས་པར་འགྲོ་སྙམ་པ་ལ། ཆོས་རྗེ་ཀཿཐོག་པས་ལེའུ་དང་པོར་གླེང་གཞི་གཅིག་བྱུང་བ་ནི་སྔོན་བྱུང་དུ་འབྱུང་བ་ཡིན་ལ། ཞེ་བདུན་པའི་གླེང་གཞི་ནི་རྗེས་འཇུག་ལ་ལོ་རྒྱུས་སུ་བརྗོད་པར་འཐད་དམ་སྙམ་མོ། །ཞེས་གསུངས་ཏེ། གནད་ཟབ་མོ་སྟོན་པའི་འཆད་ཚུལ་འདིས་གོང་གི་རྩ་ཚིག་གི་དོན་འགྲོལ་བའི་གསལ་བྱེད་དུའང་ཤུགས་ཀྱིས་འགྲོའོ། །ལང་ཀའི་བདག་པོ། དེ་དག་ནི་རྒྱུད་འབྱུང་བའི་རྒྱུའི་ཡན་ལག་གླེང་གཞི་ཞེས་བྱའོ།།

ཞེས་རྒྱུད་འདི་འབྱུང་བའི་རྒྱུའི་ངོ་བོ་ཚོགས་པའི་ཕྱིར་གཏན་ཚིགས་བྱུང་ཁུངས་ཀྱི་གླེང་གཞི་སྟེ། གསང་སྔགས་དམ་པའི་ཡན་ལག་གཅིག་གོ །གླེང་གཞི་འདིར་སྨོས་པ་ནི་བསྟན་པར་འགྱུར་གྱི་རྒྱུད་འབྱུང་བར་མི་རིགས་པས་དགོས་ པ་མེད་དོ་བར་དོགས་པ་ལ། འབྱུང་ཁུངས་ཀྱི་གླེང་གཞི་འདི་དག་མི་སྣང་ན་ནི་གསང་བའི་བདག ་པོ་ཉིད་ཀྱང་གསང་བདག་ཏུ་མི་འགྱུར་བས་འདིར་༼༣༤༠༽སྨོས་པས་འཁོར་རྣམས་དང་པོ་གསང་བདག་ཉིད་ཀྱིས་སུ་ལ་ཐོས་པའི་ལོ་རྒྱུས་ཀྱིས་ཡིད་ཆེས་པར་འགྱུར་བ་དང༌། འདིར་མི་ཡུལ་དུ་སྣང་བ་གཙོར་བྱས་པ་དང༌། རྒྱུད་དཀྲུགས་པའི་དབང་གིས་གྲལ་ལ་ཐེ་ཚོམ་མེད་དོ། །གྲལ་ནི་གླེང་བསླང་བ་དང་ཡང་རྗེས་སུ་མཐུན་ནོ། །འོན་ཀྱང་རྒྱུད་འདི་ལ་གླེང་གཞི་ཚན་པ་དྲུག་བྱུང་བས་བལྡབས་སམ་སྙམ་པ་ལ། ལྔ་ནི་བྱིན་རླབས་འབྱུང་བའི་གླེང་གཞི་ཡིན་པས། ལེའུ་དང་པོ་སྐུ་གསུམ་གྱིའོ། །སོ་གསུམ་པའི་དེ་སྐུ་ལྔའི་གླེང་གཞིའོ། །ཞེ་བདུན་པའི་འདིར་སྐུ་བཞིའོ། །ང་ལྔ་པའི་ནི་གསང་བའི་སྐུའི་གླེང་གཞིའོ། །ང་དྲུག་པའི་ནི་ངོ་བོ་ཉིད་སྐུའི་གླེང་གཞིའོ། །ཞེས་གསུངས་ཏེ། ལུང་བསྟན་བརྒྱུད་པའི་བསྟན་པའི་ཡང་གཏན་ཚིགས་བྱུང་ཁུངས་ཀྱི་གླེང་གཞིར་འགྱུར་རོ། །ལྔ་པའི་སྟོད་ནི་ལུང་བསྟན་བརྒྱུད་པའི་གླེང་གཞིའོ། །ཞེས་གསུངས་སོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

གླེང་གཞི་ཕུན་སུམ་ཚོགས་པ་བསྟན་པའི་ལེའུ་སྟེ་བཞི་བཅུ་བདུན་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གླེང་གཞི་ཕུན་སུམ་ཚོགས་པ་བྱུང་བའི་ཚུལ་བསྟན་པའི་ལེའུ་སྟེ། བཞི་བཅུ་ཞེ་བདུན་པ་ཉིད་གསལ་བར་བཀྲོལ་བའོ།། །།

ལེའུ་ཞེ་བརྒྱད་པ་རྩ་བ་སྦྱོར་བའི་ཡན་ལག་བསྟན་པ།

༈ གཉིས་པ་རྩ་བའི་ཡན་ལག་གླེང་བསླང་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། གང་ཡིན་པ་ལ་བྱ་སྟེ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་རྩ་བའི་ཡན་ལག་གང་ཞེ་ན། འདི་ལྟ་སྟེ། བརྗོད་པ་འབྱུང་བའི་རྩ་བ་གང་

གིས་གང་ལ་གླེང་བསླང་བ་གང་ཡིན་པ་ལ་བྱ་སྟེ།

ལེའུ་འདིས་ངེས་དོན་དང་དྲང་དོན་གཉིས་ཀ་སྟོན་ནོ། །ཐུན་མོང་མ་ཡིན་པ་ངོ་བོའི་འབྱུང་ཁུངས་ཀྱི་གླེང་བསླང་བ་རྗེས་སུ་བསྟན་པའི་ཕྱིར། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། ཡན་ལག་གཉིས་པ་བསྟན་པ་འབྱུང་བའི་རྩ་བར་གྱུར་པའི་ཡན་ལག་གླེང་བསླང་བ་གང་ཞེ་ན། དེ་ཉིད་ཉེ་བར་བསྟན་པ་འདི་ལྟ་སྟེ། བསྟན་པ་གང་ལས་རྒྱུད་ཀྱི་ཚིག་དང་ཡི་གེར་སྣང་ནས་བརྗོད་པ་འབྱུང་བའི་རྩ་བ་ཡིན་པས་མིང་ཡང་འགྲུབ་ལ། དེའི་ངོ་བོ་ནི། སྟོན་པའི་དངོས་པོ་གང་གི་འཁོར་གྱི་དངོས་པོ་གང་ལ་མདུན་བསུ་བ་དང༌། དེ་ནས་འཁོར་གྱིས་གུས་པས་དྲི་བའི་ཚུལ་དུ་གླེང་བསླང་བ་གང་ཡིན་པའི་དོན་གྱི་དངོས་པོ་ངེས་པར་བཞག་པ་དེ་ཉིད་ལ་བྱ་སྟེ།

གཉིས་པ་རྒྱས་པར་བཤད་པ་ལ་གཉིས་ཏེ། སྟོན་པ་ཡབ་ཡུམ་གྱིས་མདུན་བསུས་ཏེ་གླེང་བསླང་བ། འཁོར་གྱིས་གུས་པས་དྲིས་ཏེ་གླེང་བསླང་བའོ། །དང་པོ་ལ་གསུམ་སྟེ། ཆོས་སྐུ་ལས་གཟུགས་སྐུར་བཞེངས་ཏེ་རོལ་པ་མཛད་པ། རོལ་པ་ལས་བཞེངས་ཏེ་དབང་༼༣༤༡༽བསྐུར་བ། དབང་གི་མཛད་པ་ལས་བཞེངས་ཏེ་རྒྱུད་བཤད་པར་དགོངས་པའོ། །དང་པོ་གསུམ་སྟེ། ཡུམ་གྱིས་བསྐུལ་བ། ཡབ་བཞེངས་པ། རོལ་པ་མཛད་པའོ། །དང་པོ་ནི།

འདི་ལྟར་དེ་ནས། ཞེས་པ་ནས། ཞེས་སྒྲ་བྱུང་བ་ལས། ཞེས་པའི་བར་གྱིས་བསྟན་ཏེ།

འདི་ལྟ་སྟེ། དེ་ནས་དེ་བཞིན་གཤེགས་པ་དེ་དག་དབྱིངས་ཀྱི་ངང་ལ་མི་གཡོ་བར་མནལ་བཞིན་དུ། སངས་རྒྱས་ཀུན་གྱི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་སྟོང་པ་ཉིད་ཀྱི་ངང་ལས་བསྐུལ་བ་ཆེན་པོའི་སྒྲ་འདི་བྱུང་ངོ་། །ཡོད་མེད་སྟོང་པ་ཤིན་ཏུ་རྣལ་འབྱོར་མཐུས། །ནམ་མཁའ་བཞིན་ལས་དམ་ཚིག་ཉེ་བར་གཤེགས། །ཡེ་ཤེས་རྒྱ་མཚོ་རྣམ་པར་གྲོལ་བའི་ཀློང་། །མི་གནས་མི་དམིགས་ནམ་མཁའི་དབྱིངས་ནས་བཞེངས། །ཞེས་སྒྲ་བྱུང་བ་ལས།

ཐུན་མོང་མ་ཡིན་པའི་དབང་དུ་ཡབ་ཡུམ་གྱིས་གླེང་བསླང་བའི་ངོ་བོ་ཉིད་དེ། དེ་ཡང་འདི་ལྟར་མདུན་བསུ་བ་ལྟ་བུར། ཡུམ་གྱིས་གླེང་བསླང་བ་བསྟན་པའི་ཕྱིར། དེ་ནས་དེ་བཞིན་གཤེགས་པ་སྐུ་བཞི་པོ་དེ་དག་སྐུ་གསུང་ཐུགས་མི་དམིགས་པའི་མཉམ་པ་ཉིད་ཆོས་ཀྱི་དབྱིངས་སྐྱེ་མེད་ཀྱི་ངང་ལས་དགོངས་པ་མི་གཡོ་བར་མ་བཅོས་རྣལ་མར་མནལ་ཏེ་བཞུགས་བཞིན་དུ། ཡུམ་ཀུན་ཏུ་བཟང་མོ་རྒྱལ་བ་སྐུ་བཞི་པོ་ཐམས་ཅད་སྐྱེད་པར་མཛད་པས་སངས་རྒྱས་ཀུན་གྱི་ཡུམ། དབྱིངས་རང་བཞིན་གྱིས་རྣམ་པར་དག་པའི་ཤེས་རབ་ཀྱི་ཕ་རོལ་ཏུ་ཕྱིན་མ་མ་སྐྱེས་པའི་ཆོས་ཉིད་སྟོང་པ་ཉིད་ཀྱི་ངང་ལས་སྐུར་རང་སྣང་བས་ཡབ་དབྱིངས་ནས་བཞེངས་པའི་ཕྱིར་བསྐུལ་བ་ཆེན་པོའི་གླུའི་ཚིག་དོན་ཆེ་བ་གསང་སྔགས་ཐབས་ཆེ་བ་སྟོང་པ་ཉིད་ཀྱི་རང་སྒྲ་འདི་ཉིད་བྱུང་ངོ་། །ཆོས་ཉིད་ཇི་བཞིན་པ་ཉིད་ནི་ཅིའང་མེད་པར་ཅིར་ཡང་སྣང་བའི་ཕྱིར། ཡོད་པ་དང༌། མེད་པ་དང༌། དབྱེར་མེད་ཀྱི་མཐའ་གསུམ་ལས་གྲོལ་ཏེ། ཟབ་མོ་སྟོང་པ་ཉིད་ཀྱི་ངང་ཤིན་ཏུ་རྣལ་འབྱོར་རྫོགས་པ་ཆེན་པོའི་དོན་ལས་མ་གཡོས་པ་ནི་རང་རིག་རྟོགས་པའི་རྒྱལ་པོ་སྟེ་དེ་ཉིད་ཐམས་ཅད་དུ་མི་འགག་པར་འཆར་བའི་བྱིན་རླབས་ཀྱི་མཐུས། དཔེ་ནམ་མཁའ་བཞིན་དུ་དམིགས་པ་རྣམ་པར་དག་པའི་ཆོས་ཀྱི་དབྱིངས་ཀྱི་ངང་ལས་སྔོན་གྱི་ཐུགས་དམ་ལས་མི་འདའ་བར་དམ་ཚིག་ཆེན་པོའི་དབང་གིས་འགྲོ་བའི་དོན་ལ་ཉེ་བར་གཤེགས་ཏེ། དགོངས་པ་དུས་གཅིག་ལ་གསལ་བས་ཡང་དག་པའི་ཡེ་ཤེས་ཆེན་པོ་འཕེལ་འགྲིབ་མེད་པ་དང་རོ་གཅིག་པས་རྒྱ་མཚོ་ལྟ་བུར་ཤིན་ཏུ་ཟབ་ཅིང་རྒྱ་ཆེ་བ་དེས་འཁོར་འདས་ཐམས་ཅད་གསལ་ལ་མི་དམིགས་པར་གཟིགས་ཏེ་རང་བྱུང་ཡེ་ཤེས་སུ་རྣམ་པར་གྲོལ་བའི་ཀློང་དམ་པ་ལོག་པའི་སེལ་དང་བྲལ་བ་དེ་ལའང་མི་གནས་པར་མཚན་ཉིད་གཅིག་ཏུ་མི་ཟིན་པས་ངོ་བོ་མ་ངེས་པ་ལ་སྤྱོད་ཡུལ་མེད་ཅིང་མི་དམིགས་པའི་ནམ་མཁའི་དཀྱིལ་ལྟ་བུའི་སྐྱེ་བ་མེད་པའི་དབྱིངས་ཀྱི་ངང་ནས་སྐྱེ་བའི་ཆོ་འཕྲུལ་གྱིས་འགྲོ་བའི་དོན་ལ་མངོན་པར་བཞེངས་ནས་སྐུའི་བཀོད་པ་གསལ་བར་སྟོན་ཅིག ཅེས་བསྐུལ་བའི་སྒྲ་དེ་སྐད་དུ་བྱུང་བ་ལས།

གཉིས་པ་ཡབ་བཞེངས་པ་ནི།

༼༣༤༢༽བཅོམ་ལྡན་འདས། ཞེས་པ་ནས། བཀྱེ་བ་ལྟ་བུའོ། །ཞེས་པའི་བར་གྱིས་བསྟན་ཏེ། བཅོམ་ལྡན་འདས་དེ་དག་གིས་ཆོས་ཐམས་ཅད་བྱང་ཆུབ་ཀྱི་སྙིང་པོ་ལ་ཤར་བར་མཁྱེན་ནས། སྟོང་པ་ཉིད་ཀྱི་ངང་ལས་ཉི་མ་རྡོ་རྗེ་བྱུང་སྟེ། དཔེར་ན་ནམ་མཁའ་བའི་དྭངས་པ་ལས་ཉི་མའི་སྙིང་པོ་ཤར་བ་ལྟ་བུའོ། །དེ་ནས་ཉི་མའི་སྙིང་པོ་དེ་ལས་འོད་ཟེར་བྱེ་བ་མང་པོ་བཀྱེ་བས། དཔེར་ན་ཉི་མ་སྟོང་ལས་འོད་ཟེར་བྱེ་བ་བཀྱེ་བ་ལྟ་བུའོ།།

དེ་ནས་ཡབ་ཀྱིས་གནང་བར་མཛད་དེ་སྐུར་བཞེངས་ནས་བཅོམ་ལྡན་འདས་དེ་དག་གིས་ཞེས་སྙེགས་པ་དང་སྡུད་པའི་སྒྲ་ནི། སྐུ་བཞིའི་ཁྱད་པར་དུ་སྣང་བའི་སྟོན་པ་རྣམས་ཏེ། དེ་རིལ་གྱིས་ཆོས་ཐམས་ཅད་གསང་སྔགས་ཇི་བཞིན་པ་བྱང་ཆུབ་ཀྱི་སྙིང་པོ་ལ་རང་སྣང་དུ་ཤར་བར་བསྐུལ་བའི་སྒོ་ནས་ཐུགས་སུ་ཆུད་ཅིང་མཁྱེན་ནས། སྙིང་པོ་བྱང་ཆུབ་མཐའ་དབུས་མེད་པའི་སྟོང་པ་ཉིད་ཀྱི་ངང་མུན་པ་སེལ་བས་རང་བྱུང་ཡེ་ཤེས་ཀྱི་སྐུ་སྐྱེ་འཇིག་དང་བྲལ་བས་ཉི་མ་རྡོ་རྗེ་བྱུང་སྟེ་སྣང་བར་མཛད་དེ། དཔེར་ན་དབྱིངས་ནམ་མཁའ་དང་བ་ལས་ཡེ་ཤེས་ཉི་མའི་སྙིང་པོ་ཤར་བ་ལྟ་བུ་སོ་སོར་མི་ཕྱེད་ཅིང་རང་གསལ་བའོ། །བཞེངས་མ་ཐག་པ་དེ་ནས་སྐུ་ཤིན་ཏུ་གསལ་བ་ཉི་མའི་སྙིང་པོ་ལྟ་བུ་དེ་ལས་གདུལ་བྱའི་ངོ་ལ་སྐུའི་འོད་ཟེར་བྱེ་བ་ཕྲག་མང་པོའམ། རིག་པའི་བྱེ་བྲག་མང་པོ་བཀྱེ་བས། དཔེར་ན་ཉི་མ་གསལ་བའི་སྙིང་པོ་སྟོང་ལས་འོད་ཟེར་བྱེ་བ་ཕྲག་མང་བཀྱེ་ནས་མུན་པ་གཞི་བྲལ་གྱི་གཟི་བརྗིད་ཅན་དུ་སྒྲིབ་པ་མེད་པར་སྣང་བ་ལྟ་བུའོ། །འདིར་ཆོས་སྐུ་སྟོང་པ་ལས་ལོངས་སྐུ་ཉི་མ་ལྟ་བུར་སྐུར་སྣང་བར་བཞེད་པའང་མཆིས་སྐད་ཅེས་ཆོས་རྗེའི་ཕྱག་མཆན་ལས་བྱུང་བ་ནི། རྩ་རྒྱུད་ལྟར་འཆད་པ་ཁོ་ན་ལ་གསུངས་པའོ།།

གསུམ་པ་རོལ་པ་མཛད་པ་ནི།

འོད་ཟེར་དེ་དག ཅེས་པ་ནས། རྣམ་པར་འཇུག་པར་མཛད་དོ། །ཞེས་པའི་བར་གྱིས་བསྟན་ཏེ།

འོད་ཟེར་དེ་དག་ལས་ཐུགས་རྗེ་བྱང་ཆུབ་སེམས་ཀྱི་སྤྲིན་མངོན་པར་འཁྲིགས་ཏེ། རོལ་པའི་ཆར་མངོན་པར་ཕབ་པས། རོལ་པ་སྣ་ཚོགས་ཀྱི་འབྲུག་དང་། རོལ་པ་སྣ་ཚོགས་ཀྱི་གློག་དང་། རོལ་པ་སྣ་ཚོགས་ཀྱི་མཆོད་པ་དང་། རོལ་པ་སྣ་ཚོགས་ཀྱི་གླུ་དང་། རོལ་པ་སྣ་ཚོགས་ཀྱི་གར་དང་། རོལ་པ་སྣ་ཚོགས་ཀྱི་རྔ་དང་། རོལ་པ་སྣ་ཚོགས་ཀྱི་དུང་དང་། ཀེར་ཀོ་དང་། གླིང་བུ་དང་། རོལ་པ་སྣ་ཚོགས་ཀྱི་རྒྱན་དང་། རོལ་པ་སྣ་ཚོགས་ཀྱི་མཉེས་པ་དང་། རོལ་པ་སྣ་ཚོགས་ཀྱི་ཤེས་རབ་དང་། རོལ་པ་སྣ་ཚོགས་ཀྱི་ཡེ་ཤེས་དང་། རོལ་པ་སྣ་ཚོགས་ཀྱི་ཏིང་ངེ་འཛིན་དང་། རོལ་པ་སྣ་ཚོགས་ཀྱི་བདེ་བ་དང་། རོལ་པ་སྣ་ཚོགས་ཀྱི་ཚོར་བ་དང་། རོལ་པ་སྣ་ཚོགས་ཀྱི་དགའ་བ་ཆེན་པོ་དང་། རོལ་པ་སྣ་ཚོགས་ཀྱི་བཙུན་མོ་སྟོང་པ་ཆེན་པོ་དེ་བཞིན་ཉིད་ལ་རྣམ་པར་འཇུག་པར་མཛད་དོ།།

དེ་ཡང་རོལ་པ་ཉེར་གསུམ་དང་མཛད་པ་ཉེར་གསུམ་སྦྱར་ཏེ། བཤད་པའི་འོད་ཟེར་དེ་དག་ལས། ཀུན་འདུས་རིག་པར། ཉོན་ཅིག་འདུས་པ་ཆེན་པོའི་ཚོགས། །བརྡ་ཞེས་བྱ་བ་སྦས་པའི་ཚིག །སྦས་ཏེ་གསང་བའི་ཆོས་རྣམས་ནི། །རྣལ་འབྱོར་ཆེན་པོའི་སྤྱོད་པ་ཡིན། །ཞེས་གསུངས་པ་ལྟར་བརྡའི་དོན་ཏེ། ཐུགས་རྗེ་བྱང་ཆུབ་ཀྱི་སེམས་རྣམ་པ་གཉིས་ཀྱི་སྤྲིན་མངོན་པར་འཁྲིགས་ཏེ་སྒྱུ་འཕྲུལ་གྱི་བཀོད་པ་བསྟན་ནས། དེའི་རྐྱེན་རོལ་ཐབས་རྣམས་ནི། ཐབས་དང་ཤེས་རབ་དགྱེས་པར་རོལ་ཏེ་ལོངས་སྤྱོད་པའི་ཆར་མངོན་པར་ཕབ་པས་རོལ་ཐབས་ནི་བསྟན་པ་དང་སྤྲུལ་པར་བཀོད་པའི་དོན་དང༌། འདོད་པའི་བསྟན་བཅོས་ཀྱི་ཆ་ལྟར། རོལ་པ་སྣ་ཚོགས་ཀྱི་འབྲུག་ཐལ་མོའི་སྒྲ་ནི། གསུང་གི་ཐེག་པ་ཆེན་པོ་དང༌། རོལ་པ་སྣ་ཚོགས་ཀྱི་གློག་ཁུ་བ་འཕོ་བ་འབྱུང་བ་ནི། སྤྲུལ་པ་འཕྲོ་བ་དང༌། རོལ་པ་སྣ་ཚོགས་ཀྱི་མཆོད་པ༼༣༤༣༽ཕྱིའི་འདོད་ཡོན་ལྔས་བདེ་བ་སྐྱེད་པ་ནི། ཡུལ་ལྔའི་ལྷ་མོ་དང༌། རོལ་པ་སྣ་ཚོགས་ཀྱི་གླུ་ཧ་དང་སི་སོགས་སྙན་པའི་སྒྲས་བདེ་བ་སྐྱེད་པ་ནི། ལྷ་མོ་དབྱངས་མ་དང༌། རོལ་པ་སྣ་ཚོགས་ཀྱི་གར་ལག་གིས་བསྐྱོད་པ་ནི། ལྷ་མོ་གར་མ་དང༌། རོལ་པ་སྣ་ཚོགས་ཀྱི་རྔ་རྡེབ་པ་རྣམས་ནི་ཆོས་ཀྱི་རྔ་དང༌། རོལ་པ་ཆེན་པོའི་དུང་དབུགས་འབུད་པ་ནི། ཆོས་ཀྱི་དུང་དང༌། རོལ་པ་ཆེན་པོའི་ཀེར་ཀོ་རྩེ་བའི་གནས་སུ་སེན་མོས་འཚེ་བ་ནི། སྒྲའི་བྱེ་བྲག་དང༌། རོལ་པ་ཆེན་པོའི་གླིང་བུ་ཙུམྤ་ནི་བྱེད་པ་ནི། ན་དའི་དབྱངས་དང༌། རོལ་པ་སྣ་ཚོགས་ཀྱི་རྒྱན་ཡབ་ཡུམ་གྱི་རྒྱན་རྣམས་ནི། ཕྱི་དང་ནང་གི་ལོངས་སྤྱོད་ཀྱི་ཐབས་ལ་རོལ་བའི་ཆ་དང༌། རོལ་པ་སྣ་ཚོགས་ཀྱི་མཉེས་པ་ལུས་ཀྱི་མདངས་འབྱིན་ཅིང་དགའ་བ་ནི། དབང་པོ་དང་ཡུལ་གྱི་བདེ་བའི་ཆ་དང༌། རོལ་པ་སྣ་ཚོགས་ཀྱི་ཤེས་རབ། དགྱེས་པའི་སྤྱོད་པ་སྐྱོད་ཐབས་མང་པོས་ཐབས་ཀྱི་དོན་ཇི་ལྟ་བར་ཤེས་པར་བྱེད་པ་ནི། ཐེག་པ་གོང་འོག་གི་དོན་ཀུན་ཆུབ་པའི་ཆ་དང༌། རོལ་པ་སྣ་ཚོགས་ཀྱི་ཡེ་ཤེས་དེ་དག་གི་ཐབས་ཤེས་པར་བྱས་པས་རིག་པ་གསལ་བ་ནི། གོང་དུ་བོགས་སྐྱེ་བ་དང༌། རོལ་པ་སྣ་ཚོགས་ཀྱི་ཏིང་ངེ་འཛིན་སྐབས་སུ་སྦྱོར་བའི་ཉམས་བརྟག་པའི་ཏིང་འཛིན་ནི་ལམ་པའི་བསམ་གཏན་དང༌། རོལ་པ་སྣ་ཚོགས་ཀྱི་བདེ་བ་དགྱེས་པས་དགའ་བ་མྱོང་བ་ནི་བདེ་བ་ཆེན་པོའི་དོན་རྙེད་པས་ཡེ་ཤེས་གསལ་བ་དང༌། རོལ་པ་སྣ་ཚོགས་ཀྱི་ཚོར་བ། ལྷན་ཅིག་སྐྱེས་པའི་ཡེ་ཤེས་ཆེན་པོའི་རོ་ཚོར་བ་ནི་ཏིང་ངེ་འཛིན་གྱི་རོ་དང་ལྡན་པ་དང༌། རོལ་པ་སྣ་ཚོགས་ཀྱི་དགའ་བ་ཆེན་པོ། ཡུམ་མཚན་རྣམས་དང་ལྡན་པས་བདེ་བ་སྐྱེས་པ་ནི་ཆོས་ཀྱི་དོན་རྙེད་པའི་ཡེ་ཤེས་ཤར་བ་དང༌། རོལ་པ་སྣ་ཚོགས་ཀྱི་བཙུན་མོའི་བྷ་ག་དེ་དག་གིས་ཡུམ་གྱི་མཁའ་ལ་འཇུག་པ་ནི་སྟོང་པ་ཉིད་རྟོགས་པ་སྟེ། དོན་དུ་དབྱིངས་མ་སྐྱེས་པའི་ཆོས་ཉིད་ཀྱི་ངོ་བོ་སྟོང་པ་ཆེན་པོའི་དེ་བཞིན་ཉིད་ལ་རང་བྱུང་རིག་པའི་ཡེ་ཤེས་རྣམ་པར་འཇུག་པར་མཛད་པ་ཉིད་དོ།།

གཉིས་པ་རོལ་པ་ལས་བཞེངས་ཏེ་དབང་བསྐུར་བ་ལ་གཉིས་ཏེ། ཡུམ་གྱིས་བསྐུལ་བར་མཛད་པ། ཡབ་ཀྱིས་དབང་བསྐུར་བའོ། །དང་པོ་ནི།

དེ་ནས་དེ་བཞིན། ཞེས་པ་ནས། སྒྲ་དེས་བསྐུལ་བས། ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ཐམས་ཅད་ཀྱི་ཡུམ་སྟོང་པ་ཉིད་ཀྱི་ངང་དེ་ལས། ཆོས་ཉིད་དེ་བཞིན་ཉིད་ཀྱི་སྒྲ་འདི་བྱུང་ངོ་། །ཚོགས་ཆེན་ཉིད་རྫོགས་ཐུགས་དམ་དབྱིངས་ཀྱི་ལྷ། །ལོངས་སྤྱོད་རྫོགས་མཛད་རོལ་པ་ཆེན་པོའི་སྐུ། །རྡོ་རྗེ་སེམས་དཔའ་བསྐལ་བཟང་དཔལ་ཁྱོད་བདག །ཐབས་ཀྱི་རོལ་པས་

བདེ་ཆེན་དབྱིངས་ནས་བཞེངས། །ཞེས་སྒྲ་དེས་བསྐུལ་བས།

ཡབ་ཀྱིས་རོལ་པའི་ཆར་ཕབ་མ་ཐག་པ་དེ་ནས་དེ་བཞིན་གཤེགས་པ་ཐམས་ཅད་ཀྱི་ཡུམ་ཐམས་ཅད་དང་ཤེས་རབ་ཀྱི་སྤྱོད་པའི་དབྱིངས་ཀྱི་རང་བཞིན་སྟོང་པ་ཉིད་ཀྱི་ངང་དེ་༼༣༤༤༽ལས། སྐུ་ཅིར་ཡང་བསྟན་པར་བསྐུལ་བའི་ཆོས་ཉིད་དེ་བཞིན་ཉིད་ཀྱི་སྒྲ་འདི་རང་སྣང་དུ་བྱུང་ངོ༌། །སྐུ་གསུམ་ལྷུན་གྱིས་གྲུབ་པའི་མངའ་བདག་བསོད་ནམས་དང་ཡེ་ཤེས་ཀྱི་ཚོགས་ཆེན་རྣམ་གཉིས་རྫོགས་པས་མི་གནས་པའི་ཡེ་ཤེས་མཆོག་གི་ཐུགས་དམ་ལས་མི་གཡོ་བའི་མཉམ་ཉིད་དབྱིངས་ཀྱི་བདག་ཉིད་ཆོས་སྐུ་དོན་གྱི་ལྷ་མཆོག་མཉམ་པའི་དབྱིངས་དང་ཡེ་ཤེས་དབྱེར་མེད་པར་ཞུགས་ཀྱི་རྒྱུད་ཡོངས་སུ་དག་སྟེ་རང་དོན་མཐར་ཕྱིན་ནས་དགྱེས་པའི་ལོངས་སྤྱོད་མཆོག་གི་མངའ་ཐང་ལྷུན་གྱིས་གྲུབ་ཅིང་རྫོགས་པར་མཛད་པས་ཐབས་མཆོག་རོལ་པ་ཆེན་པོའི་སྐུ་ཞེས་བྱ་བ། གང་ལ་གང་གིས་འདུལ་པའི་སྤྲུལ་པའི་སྒྱུ་འཕྲུལ་སྣ་ཚོགས་སུ་སྟོན་ཀྱང༌། སྐྱེ་འཇིག་མི་མངའ་བ་རྡོ་རྗེ་ལྟ་བུའི་ངང་ལས་མ་གཡོས་པར་ལོག་ཕུང་འཇོམས་པས་སེམས་དཔའ་ཆེན་པོ་སྟོན་པ་ཡོན་ཏན་ཚད་ལས་འདས་པའི་མངའ་དབང་བརྙེས་པས་གཞན་དོན་རྫོགས་པས་རང་བྱུང་ལྷུན་གྲུབ་མཆོག་གི་བདག་ཉིད་ཐབས་ཤེས་དགྱེས་པར་རོལ་པའི་སྐལ་པ་བཟང་པོ་དཔལ་གསུམ་ཡོངས་སུ་རྫོགས་པ་ཁྱོད་ཡུམ་བདག་ལ་འདོད་ཆགས་ཐབས་ཀྱི་སྤྱོད་པའི་རོལ་པར་མཛད་པས་འཁོར་སྣོད་དུ་རུང་བ་རྣམས་ལ་དབང་བསྐུར་བའི་ཕྱིར་བདེ་བ་ཆེན་པོ་དགྱེས་པའི་དབྱིངས་ནས་ཅིར་ཡང་སྣང་བའི་སྐུར་བཞེངས་ཤིག །ཅེས་གླུ་དབྱངས་ཀྱི་སྒྲ་དེས་བསྐུལ་བར་མཛད་པས།

གཉིས་པ་ཡབ་ཀྱིས་དབང་བསྐུར་བ་ནི།

བདེ་བ་ཆེན་པོའི། ཞེས་པ་ནས། གསང་བ་ཉིད་དོ། །ཞེས་པའི་བར་གྱིས་བསྟན་ཏེ།

བདེ་བ་ཆེན་པོའི་ངང་དེ་ལས་ཆོ་འཕྲུལ་ཆེན་པོ་རྣམ་པར་བཞེངས་ཏེ། རྣམ་པར་འཕྲུལ་བ་དང་། རྣམ་པར་འཁྱིལ་བ་དང་། རྣམ་པར་འགྱིང་བ་དང་། རྣམ་པར་བརྗིད་པ་དང་། གར་གྱི་ཕྱག་རྒྱ་ཆེན་པོ་དང་། རྣམ་པར་བཞད་པ་སྣ་ཚོགས་དང་། ཐུགས་རྗེའི་འཕྲོ་འདུ་དང་། ཡོན་ཏན་གྱི་ཁྱད་པར་དང་། འོད་ཟེར་གྱི་འབར་འཕྲོ་ལ་སོགས་པ། སྤྲུལ་པ་གློག་གི་འཕྲེང་བས་ནམ་མཁའ་ཐམས་ཅད་ཀུན་ཏུ་ཁྱབ་པར་མཛད་དེ། ཐམས་ཅད་ནས་ཐམས་ཅད་དུ། མཚན་མ་དང་། རྣམ་པ་དང་། ཡོད་པ་དང་། མེད་པ་ལ་གསང་སྔགས་ཀྱི་ངོ་བོ་དེ་ཁོ་ན་ཉིད་ཀྱི་ངང་གིས་ཡོངས་སུ་ཁྱབ་སྟེ་རང་བཞིན་གསང་བ་ཉིད་དོ།

རོལ་ཐབས་དང་པོ་གཉིས་དང་ལྷག་མ་བཅོ་བརྒྱད་དེ་རོལ་པ་ཉི་ཤུས་སྐུ་གསུམ་ལྷུན་གྲུབ་བདེ་བ་ཆེན་པོའི་ངང་དུ་བཞུགས་པ་ལ་བསྐུལ་བས་དགྱེས་པའི་རོ་མཆོག་བདར་བའི་ངོ་བོ་དེ་ལས་སྐུའི་ཆོ་འཕྲུལ་ཆེན་པོར་རྣམ་པར་བཞེངས་ཏེ་ཅིར་ཡང་སྣང་བར་མཛད་པ་ནི་རྣམ་གྲངས་བཅུ་སྟེ། སྐུ་ལས་སྤྲུལ་པའི་རྣམ་པར་འཕྲུལ་པ་ཅིར་ཡང་མ་འདྲེས་པར་སྣང་བ་དང༌། སྐུ་མཆོག་ཡོངས་སུ་རྫོགས་པ་རྣམ་པར་འཁྱིལ་བ་ཉིད་སྣང་བ་དང༌། སྐུ་རྣམ་པར་འགྱིང་བ་སེང་གེའི་ཚུལ་དང༌། རྣམ་པར་བརྗིད་པ་གླང་པོའི་ཚུལ་དང༌། ཕྱག་གི་གར་ཐབས་གར་གྱི་ཕྱག་རྒྱ་ཆེན་པོའི་ཚུལ་དང༌། ཞལ་བཞད་པ་རྣམ་པར་བཞད་པ་སྣ་ཚོགས་ཀྱི་ཚུལ་དང༌། སྤྲུལ་པའི་འབྱུང་འཇུག་སྣང་བ་ཐུགས་རྗེའི་འཕྲོ་འདུ་ཡི་ཚུལ་དང༌། འབྲས་བུའི་ཡོན་ཏན་གྱི་བྱེ་བྲག་ཡོན་ཏན་གྱི་ཁྱད་པར་གྱི་ཚུལ་དང༌། འོད་༼༣༤༥༽ཟེར་གྱི་སྣང་བ་ལས་འོད་ཕུང་འབར་བ་དང་ཟེར་དུ་འཕྲོ་བའི་ཚུལ་རྣམས་སོ། །བརྡའི་དབང་དུ་ན། འཁོར་ལ་དབང་བསྐུར་བའི་ཕྱིར། རོལ་པའི་བྱང་ཆུབ་སེམས་པས་བྱིན་རླབས་ཅིར་ཡང་རྣམ་པར་འཕྲུལ་པ་དང༌། བྱང་སེམས་སླར་རྣམ་པར་འཁྱིལ་བ་དང༌། རྡོ་རྗེའི་གནས་རྣམས་གང་བས་རྣམ་པར་འགྱིང་བ་དང༌། བདེ་བའི་རོ་མི་འགྱུར་བས་རྣམ་པར་བརྗིད་པ་དང༌། འཁོར་ལ་དབང་བསྐུར་བའི་ཕྱག་གི་བརྡ་ཅིར་ཡང་སྣང་བས་གར་གྱི་ཕྱག་རྒྱ་ཆེན་པོ་དང༌། དབང་བསྐུར་བར་དགྱེས་པས་རྣམ་པར་བཞད་པ་སྣ་ཚོགས་དང༌། དབང་གིས་དོན་མཛད་པའི་སྦྱོར་བ་ཐུགས་རྗེའི་འཕྲོ་འདུ་དང༌། དབང་གི་བྱིན་རླབས་མ་འདྲེས་པས་ཡོན་ཏན་གྱི་ཁྱད་པར་དང༌། འཁོར་གྱི་རིག་པ་ལ་བྱིན་རླབས་སྣང་ཞིང་གསལ་བར་བྱས་པ་འོད་ཟེར་གྱི་འབར་འཕྲོ་རྣམས་དང༌། ལ་སོགས་པ་ཞེས་གཞན་བསྡུ་བ་ནི། བྱིན་རླབས་ཇི་སྙེད་པ་ཐམས་ཅད་དེ། བྱང་ཆུབ་སེམས་ཀྱི་བྱིན་རླབས་ཅིར་ཡང་སྣང་བའི་སྤྲུལ་པ་གློག་གི་ཕྲེང་བ་གསལ་ཞིང་རྒྱུན་མ་ཆད་པས་ནམ་མཁའ་རྣམ་པར་གང་བའི་འཁོར་ཇི་སྙེད་པ་ཐམས་ཅད་ཀུན་ཏུ་ཡོངས་སུ་ཁྱབ་ཅིང་སྣུམས་པར་མཛད་དེ། སྔར་གྱི་དུས་ཐམས་ཅད་ནས་ཕྱིས་ཀྱི་དུས་ཐམས་ཅད་དུ་འཁོར་གྱི་རིག་པ་ལ་རོལ་པ་སོགས་ལ་མཚན་མ་དང་དངོས་པོར་འཛིན་པ་དང༌། སྟོང་པ་སོགས་ལ་རྣམ་པར་རྟོག་པ་དང༌། ཡོད་པ་དང་མེད་པའི་མཐའ་གཉིས་སུ་ལྟ་བ་ཡོད་པ་རྣམས་ལ་གསང་བའི་དབང་གི་བྱིན་རླབས་གསང་སྔགས་ཀྱི་ངོ་བོ་དེ་ཁོ་ན་ཉིད་ཀྱི་ངང་གིས་ཡོངས་སུ་ཁྱབ་སྟེ། དེ་ཉིད་ཆེད་དུ་མ་བསལ་བར་ཇི་བཞིན་པའི་རང་བཞིན་དུ་ཤེས་ཏེ་རྣམ་པར་མི་རྟོག་པ་སྐྱེས་པའི་འཁོར་སྐལ་བ་ཅན་དག་ལ་གསང་བའི་དབང་བསྐུར་བ་ཉིད་དོ།།

གསུམ་པ་དབང་གི་མཛད་པ་ལས་བཞེངས་ཏེ་རྒྱུད་བཤད་པར་དགོངས་པ་ལ་གཉིས་ཏེ། ཡུམ་གྱིས་བསྐུལ་བར་མཛད་པ། ཡབ་ཀྱིས་བཤད་པར་དགོངས་ཏེ་ཞུ་བ་བསྒུགས་པའོ། །དང་པོ་ནི།

དེ་ནས་ཡང༌། ཞེས་པ་ནས། ཞེས་བསྐུལ་བས། ཞེས་པའི་བར་གྱིས་བསྟན་ཏེ།

དེ་ནས་ཡང་དེ་བཞིན་གཤེགས་པ་ཐམས་ཅད་ཀྱི་ཡུམ། སྟོང་པ་ཆེན་པོ་དེ་ཁོ་ཉིད་ལས་བསྐུལ་བ་ཐ་མའི་སྒྲ་འདི་བྱུང་ངོ་། །ཡེ་ཤེས་སྒྱུ་མས་རྣམ་པར་རོལ་པའི་སྐུ། །ཐབས་དང་ཤེས་རབ་ཆེ་ལ་མངའ་བརྙེས་པས། །འཕགས་རྗེ་སྤྲུལ་པ་མང་པོ་འབྱུང་བའི་གནས། །བདེ་གཤེགས་བདེ་བར་གཤེགས་པ་བཞེངས་སུ་གསོལ། །ཞེས་བསྐུལ་བས།

འཁོར་ལ་གསང་དབང་གི་བྱིན་རླབས་ཀྱིས་ཁྱབ་པར་མཛད་མ་ཐག་པ་དེ་ནས་ཡང་དེ་བཞིན་གཤེགས་པ་ཐམས་ཅད་ཀྱི་ཡུམ། སྟོང་པ་ཆེན་པོའི་དེ་ཁོ་ན་ཉིད་ཀྱི་ངང་དེ་ཉིད་ལས། བསྐུལ་བ་ཐ་མའི་སྒྲ་རྒྱུད་བཤད་པ་དང་སྤྲུལ་པའི་མཛད་པ་སྣང་བར་བྱ་དགོས་པར་ཡོངས་སུ་ཞུ་བ་འདི་ཉིད་བྱུང་ངོ་།། ༼༣༤༦༽

དེ་ཡང་སྤྲུལ་པའི་སྐུར་བཞེངས་པའི་ཕྱིར་བསྐུལ་བའི་ཚིག་བརྗོད་དེ། ཡེ་ཤེས་ཆེན་པོ་རང་སྣང་བའི་སྒྱུ་མས་རྣམ་འཕྲུལ་སྣ་ཚོགས་པར་རོལ་པའི་སྐུ་མཆོག་འགྲོ་དོན་མཛད་པའི་སྟོན་པ་དམ་པ་ཐབས་དང་ཤེས་རབ་གཉིས་མེད་དུ་རོལ་པའི་གསང་སྔགས་མཆོག་ཏུ་ཆེ་བའི་ལོངསསྤྱོད་ལ་མངའ་དབང་བརྙེས་པའི་རྒྱལ་བ་འཕགས་ཚོགས་ཡོངས་ཀྱི་རྗེ་བོ་གདུལ་བྱའི་དོན་དུ་སྤྲུལ་པ་མང་པོ་ཀུན་འབྱུང་བའི་གནས་ཀྱི་གཞི་ཉིད་རང་དོན་དུ་བདེར་གཤེགས་འབྲས་བུའི་གོ་འཕང་གི་བདེ་བ་ཆེན་པོ་བརྙེས་ནས། གཞན་དོན་དུ་གདུལ་བྱ་རྣམས་བདེ་བར་གཤེགས་པའི་རྒྱལ་ཐབས་ལ་དགོད་པར་མཛད་པ་ཁྱོད་ཉིད། འགྲོ་བའི་དོན་དུ་སྤྲུལ་པའི་བཀོད་པ་སྣ་ཚོགས་དང་རྒྱུད་འཆད་པའི་སྟོན་པར་ཡང་དག་པར་བཞེངས་སུ་གསོལ། ཞེས་ཆོ་འཕྲུལ་མཛད་པར་བསྐུལ་བས།

གཉིས་པ་ཡབ་ཀྱིས་བཤད་པར་དགོངས་ཏེ་ཞུ་བ་བསྒུགས་པ་ནི།

བཅོན་ལྡན་འདས། ཞེས་པ་ནས། མི་གསུང་བར་བཞུགས་སོ། །ཞེས་པའི་བར་གྱིས་བསྟན་ཏེ།

བཅོམ་ལྡན་འདས་གསང་བ་མཆོག་གི་བདག་པོ་དེས། རྡོ་རྗེ་རོལ་པ་དེ་ཁོ་ན་ཉིད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཅང་མི་གསུང་བར་བཞུགས་སོ།།

དེ་ནས་སྟོན་པ་བཅོམ་ལྡན་འདས་གསང་སྔགས་གསང་བ་མཆོག་གི་བདག་པོ་རིགས་ཐམས་ཅད་ཀྱི་ཁྱབ་བདག་དེ་ཉིད། རྡོ་རྗེ་གསུམ་ཐབས་དང་ཤེས་རབ་གཉིས་སུ་མེད་པར་རོལ་པའི་སྤྱོད་པས་དེ་ཁོ་ན་ཉིད་མ་ནོར་བའི་དགོངས་པ་མཉམ་པ་ཉིད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་མི་གཡོ་བར་ཞུ་བ་བསྒུགས་པའི་ཆེད་དུ་ཅི་ཡང་མི་གསུང་བར་བཞུགས་སོ། །དེ་དག་ནི་འཁོར་གྱིས་ཅི་ཡང་མ་ཞུས་པར་སྟོན་པ་ཡབ་ཡུམ་གྱིས་གླེང་ནས་དབང་བསྐུར་བའི་ཕྱིར་མདུན་བསུ་བའི་དོན་དུ་སྦྱར་རོ།།

གཉིས་པ་འཁོར་གྱིས་གུས་པས་དྲིས་ཏེ་གླེང་བསླང་བ་ལ་གཉིས་ཏེ། འཁོར་གྱིས་ཞུས་པ། སྟོན་པས་གནང་བ་བྱིན་པའོ། །དང་པོ་ལ་གཉིས་ཏེ། ཞུ་བའི་སྦྱོར་བ་བསྟན་པ། ཞུ་བ་དངོས་བཤད་པའོ། །དང་པོ་ལ་གཉིས་ཏེ། ཉེ་བར་བསྟན་པ། གུས་པས་བསྟོད་པའོ། །དང་པོ་ནི།

དེ་ནས་དེ་བཞིན། ཞེས་པ་ནས། གསོལ་བ་བཏབ་བོ། །ཞེས་པའི་བར་གྱིས་བསྟན་ཏེ།

དེ་ནས་དེ་བཞིན་གཤེགས་པ་ཀུན་གྱི་ཡུམ། ཤེས་རབ་ཀྱི་ཕ་རོལ་ཏུ་ཕྱིན་པའི་ངང་ལས་རྣམ་པར་བསྐུལ་བ་ཆེན་པོའི་སྒྲ་བྱུང་བ་དེ་དག་ལ། འཁོར་ཤིན་ཏུ་མང་པོ་རྣམས་ངོ་མཚར་དུ་གྱུར་རྨད་དུ་གྱུར་ཏེ། དེ་དག་ཐམས་ཅད་མགྲིན་གཅིག་ཏུ་རྡོ་རྗེ་རོལ་པ་དེ་ཁོ་ན་ཉིད་ཀྱི་གླུ་འདིས་གསོལ་བ་བཏབ་བོ།།

གུས་པས་དྲི་བ་གླེང་བ་ལྟ་བུ་གང་སྙམ་པ་ལ། རྩ་བའི་རྒྱུད་ལས་ནི་རིགས་ཀྱི་བདག་པོ་ཀུན་ཏུ་བཟང་པོའི་ཡུམ་ཀུན་ཏུ་བཟང་མོར་གསལ་བར་བྱུང་བ་དེ་དང༌། དམ་ཚིག་ཆེན་པོ་རྡོ་རྗེ་སེམས་དཔའ་ལ་སོགས་པ་འཁོར་ཤིན་ཏུ་མང་པོ་རྣམས་ཞེས་པའམ། འདིར་ནི་དེ་ནས་དེ་བཞིན་གཤེགས་པ་ཀུན་གྱི་ཡུམ་ཤེས་རབ་གྱི་ཕ་རོལ་ཏུ་ཕྱིན་མའི་ངང་དེ་ལས་ཡབ་ལ་རྣམ་པར་བསྐུལ་བ་ཆེན་པོའི་སྒྲ་བྱུང་བ་དེ་དག་ལ། འདུས་པ་ཕལ་མོ་ཆེའི་འཁོར་ཤིན་ཏུ་མང་པོ་རྣམས་སྒྲའི་ཚིག་གམ་རང་དོན་དུ་ཤིན་ཏུ་ཡ་མཚན་ཆེ་ཞིང་ངོ་མཚར་དུ་གྱུར་ལ། སྒྲའི་དོན་ནམ་གཞན་དོན་དུ། རྨད་དུ་བྱུང་བའི་གནས་ལ་ངམ་པ་ཆེན་པོར་གྱུར་ཏེ། འཁོར་དེ་དག་ཐམས་ཅད་དག་མཚུངས་པར་མགྲིན་གཅིག་ཏུ། གཙོ་མཆོག་སྟོན་པ་རྡོ་རྗེ་རོལ་པ་དེ་ཁོ་ན་ཉིད་ཀྱི་ངང་དུ་བཞུགས་པ་ལ། གླུ་ཡིེས་དགྱེས་པ་བསྐྱེད་པས་གནང་པའི་རྒྱུར་གྱུར་པའི་སྒོ་ནས་གུས་པར་དྲི་བའི་ཚིག་འདིས་རྣམ་པར་བསྐུལ་ཞིང་གསོལ་བ་བཏབ་བོ།།

གཉིས་པ་གུས་པས་བསྟོད་པ་ལ་གསུམ་སྟེ། སྐུ་ལ་བསྟོད་པ། གསུང་ལ་བསྟོད་པ། ཐུགས་ལ་བསྟོད་པའོ། །དང་པོ་ནི།

ཨེ་མའོ། །ཡིད་བཞིན་སྐུ་མཆོག ཅེས་པ་ནས། རོལ་པའི་ཆོ་འཕྲུལ་སྟོན། །ཞེས་པའི་བར་གྱིས་བསྟན་ཏེ།

ཨེ་མའོ། ཡིད་བཞིན་སྐུ་མདོག་ནམ་མཁའ་ལྟ་བུ་ལས། །ཁྱབ་པའི་བྱིན་རླབས་རྡོ་རྗེ་གར་མཛད་ཅིང་།།

གཟི་བརྗིད་སྤྲིན་དཔུང་རོལ་པས་བསྒྱིངས་པའི་སྐུ། །ཐོགས་མེད་རྡོ་རྗེ་རོལ་པའི་ཆོ་འཕྲུལ་སྟོན།།

ཨེ་མའོ། །ཞེས་སྟོན་པའི་ངོ་བོ་སྐུ་ལྔའི་ཡོན་ཏན་གྱི་མཛད་པ་ལ་ངམ་ཞིང་ངོ་མཚར་བའི་ཚིག་གིས་དྲངས་ཏེ་སྨྲས་ པ་ནི། ཡོན་ཏན་ཐམས་ཅད་འབད་སྩོལ་མེད་པར་ཡིད་བཞིན་ནོར་བུ་ལྟར་ལྷུན་གྱིས་གྲུབ་པའི་བདག ་ཉིད་དམིགས་པ་དང་བྲལ་བའི་སྐུ་མཆོག་ཅིར་ཡང་སྣང་བ་དཔེ་ནམ་མཁའ་ལྟ་བུ་གཞིའི་དོན་ངོ་བོ་ཉིད་སྐུའི་ངང་དུ་བཞུགས་པ་ལས། ཐམས་ཅད་དུ་གདལ་ཞིང་ཁྱབ་པའི་ཆོས་སྐུའི་ཡོན་ཏན་མ་གྲུབ་ལ་སྣང་བའི་བྱིན་རླབས་ཀྱི་ངོ་བོ་རྡོ་རྗེ་གསུམ་གྱི་གར་ཐབས་ཀྱི་མཛད་པ་སྣ་ཚོགས་གང་དུའང་མ་ངེས་པར་ཅིར་ཡང་སྟོན་ཅིང་འཕྲོ་བས་སྤྲུལ་པར་ཡང་འགྲོ་བར་གསུངས་ལ། ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་ལ་སོགས་གཟི་བརྗིད་ཕུན་སུམ་ཚོགས་པའི་སྒྱུ་འཕྲུལ་སྤྲིན་ཕུང་ལྟ་བུར་མངའ་མཛད་ཅིང་ཐབས་དང་ཤེས་རབ་ཀྱི་རོལ་པས་བདེ་སྟོང་མཆོག་གི་ཡེ་ཤེས་ཀྱིས་བསྒྱིངས་པའི་དབང་ཕྱུག་ཆེན་པོ་གསང་བའི་སྐུ་ཡི་རྣམ་པར་ཡང་ཀུན་ཏུ་འཕྲུལ་ཏེ་ཅིར་ཡང་འཆར་བས་འགྲོ་བའི་དོན་ལ་སྐད་ཅིག་ཀྱང་ཐོགས་པ་མེད་པར་སྐུ་གསུང་ཐུགས་རྡོ་རྗེ་མི་ཕྱེད་པའི་རང་བཞིན་དུ་དབྱེར་མེད་པར་རོལ་པའི་ངང་ལས་གདུལ་བྱའི་སྐལ་པ་དང་མཚམས་པར་དོན་མཛད་པས་ཆོ་འཕྲུལ་སྣ་ཚོགས་ཀྱི་སྤྲུལ་པའི་སྐུར་སྟོན་ཏེ་མཉེས་པ་ཆེན་པོའི་སྐུའི་རྣམ་པས་དོན་མཛད་པ་མཆོག་ལ་གུས་པས་འདུད་དོ། །ཞེས་སྐུ་གསུམ་མམ་ལྔའི་སྒོ་ནས་གསོལ་ཏོ།།

གཉིས་པ་གསུང་ལ་བསྟོད་པ་ནི།

ཨེ་མའོ། ཡིད་བཞིན་གསུང་མཆོག ཅེས་པ་ནས་རྒྱ་མཚོ་སྟོན། ཞེས་པའི་བར་གྱིས་བསྟན་ཏེ།

ཨེ་མའོ། ཡིད་བཞིན་གསུང་མཆོག་སྒྲ་བརྙན་ལྟ་བུ་ལས། །སྙན་པའི་བྱིན་རླབས་རྡོ་རྗེ་བརྗོད་མཛད་ཅིང་། །ཡན་ལག་རྒྱ་མཚོ་མི་ཟད་བཀོད་པའི་གསུང་། །སེང་གེའི་སྒྲ་ཡིས་གསང་སྔགས་རྒྱ་མཚོ་སྟོན།།

སྟོན་པའི་གསུང་གི་ཡོན་ཏན་ལ་ངོ་མཚར་སྐྱེས་ནས། ཨེ་མའོ། ཞེས་དམ་པའི་ཚིག་གིས་དབུ་དྲངས་ནས་གསོལ་བ། གསུང་ལྔ་ལྷུན་གྱིས་གྲུབ་པའི་ངོ་བོ་ཉིད་ལས་གདུལ་བྱའི་ཡིད་ལ་ཇི་ལྟར་འདོད་པ་༼༣༤༨༽བཞིན་འབྱུང་བའི་གསུང་མཆོག་མ་འགག་པར་ཤར་ཡང་དངོས་གཞི་བྲལ་བས་སྒྲ་བརྙན་ལྟ་བུ་ལས། ཞེས་སྤྲུལ་སྐུའི་གསུང་ཡང་མཚོན་པར་གསུངས་ལ། གདུལ་བྱའི་རྣ་བར་དགའ་བ་བསྐྱེད་པའི་གསུང་ལྔར་སྙན་པའི་བྱིན་རླབས་སམ། ལོངས་སྐུས་དགོངས་པའི་གསུང་ཚིག་ཏུ་བརྗོད་པ་དང་འདྲ་བར་རིག་པའི་ངོ་ལ་གསལ་བར་ཤར་ཏེ་དོན་མཚོན་བྱེད་དུ་སྙན་པའི་བྱིན་རླབས་ཀྱི་ངོ་བོ་དབྱིངས་དང་ཡེ་ཤེས་གཉིས་སུ་མེད་པའི་རྡོ་རྗེ་ལྟ་བུར་མི་ཕྱེད་པའི་ཆོས་སྐུའི་གསུང་ཉིད་བརྗོད་པ་དང་མཚུངས་པར་ཉི་མ་ལྟར་གསལ་བ་ལས་རྡོ་རྗེ་ཐེག་པའི་ཆོས་སྟོན་པར་མཛད་ཅིང༌། བཤད་པ་ལྟར་གསུང་གཅིག་ལའང་ཡན་ལག་བཅུ་བཅུར་འགྱུར་བས། གདུལ་བྱའི་ཡིད་ལ་མོས་པ་བཞིན་གསུང་དབྱངས་སུམ་བརྒྱ་དྲུག་ཅུ་ལྟ་བུ་རྒྱ་མཚོ་ཆེན་པོ་ལྟར་མུ་མཐའ་མེད་པར་རྫོགས་པས་ཐེག་པའི་རིམ་པ་སྣ་ཚོགས་མི་ཟད་པར་བཀོད་པའི་སྤྲུལ་སྐུའི་གསུང་དང༌། དཔེ་སེང་གེའི་སྒྲ་ལྟར་སྟོན་པ་གསང་བའི་སྐུའི་གསུང་གིས་རྟོག་ཚོགས་ཟིལ་གྱིས་གནོན་པ་ཡིས་གསང་སྔགས་ཐེག་པ་ཆེན་པོ་རྒྱ་མཚོ་ལྟར་ཟབ་པའི་སྒྲ་ཡིས་ལྟ་བ་དམན་པ་འཇོམས་པར་བྱེད་པའི་གསུང་གི་བཀོད་པ་སྟོན་པ་ཁྱོད་ལ་འདུད་དོ་ཞེས་གསུང་ལྔའི་སྒོ་ནས་གསོལ་བ་བཏབ་བོ།།

གསུམ་པ་ཐུགས་ལ་བསྟོད་པ་ནི།

ཨེ་མའོ། །ཡེ་ཤེས། ཞེས་པ་ནས། ཆོ་འཕྲུལ་སྟོན། །ཞེས་པའི་བར་གྱིས་བསྟན་ཏེ།

ཨེ་མའོ། ཡེ་ཤེས་སྙིང་པོ་ཉི་མ་ལྟ་བུ་ལས། །འབར་བའི་བྱིན་རླབས་རྡོ་རྗེ་བདེ་མཛད་ཅིང་།།

ཐིག་ལེ་སྤྲོས་བྲལ་རྣམ་པར་མི་རྟོག་མཐུས། །རྣམ་གྲོལ་དེ་ཉིད་ངེས་པའི་ཆོ་འཕྲུལ་སྟོན།།

སྟོན་པའི་ཐུགས་ཀྱི་ཡོན་ཏན་རྒྱ་མཚོ་ལྟ་བུ་ལ་ངོ་མཚར་སྐྱེས་ནས། ཨེ་མའོ། །ཞེས་དམ་པའི་ཚིག་གིས་དབུ་དྲངས་ནས། ཐུགས་ལྔའི་ངོ་བོ་མི་གནས་པའི་ཡེ་ཤེས་ཆེན་པོ་ནི་ཡེ་ཤེས་རིལ་གྱི་རྩ་བ་སྟེ། དེ་ཉིད་ཀྱི་སྙིང་པོའམ་རང་བཞིན་སྟོང་པ་ཉིད་ཀྱི་ཡེ་ཤེས་ཉི་མ་དྭངས་པའི་དཀྱིལ་འཁོར་ལྟ་བུ་ལས། ཐམས་ཅད་དུ་རང་གསལ་ཞིང་ཅིར་ཡང་མི་རྟོག་པར་ཡེ་ཤེས་ཀྱི་འོད་ཇི་སྙེད་དུ་གསལ་བར་འབར་བའི་བྱིན་རླབས་མེ་ལོང་ལྟ་བུའི་ཡེ་ཤེས་སྐྱེ་འཇིག་མེད་པས་རྡོ་རྗེ་མཆོག་གིས་འཁོར་འདས་རང་རིག་ཏུ་གདལ་ཏེ་གདུལ་བྱ་ཀུན་བདེ་བ་ལ་འགོད་པར་མཛད་ཅིང༌། དེ་ཉིད་ལའང་འགྲོ་འོང་གི་འཕྲོ་བ་མེད་པས་ཐིག་ལེ་ཆེན་པོ་གཟུང་འཛིན་གྱི་སྤྲོས་པ་དང་བྲལ་བའི་མཉམ་ཉིད་ཡེ་ཤེས་རྣམ་པར་མི་རྟོག་པའི་ཐུགས་ཀྱི་ངང་ལས། མི་ཤེས་པའི་མདུད་པ་ངང་གིས་བྲལ་བས་རྣམ་གྲོལ་རིག་པའི་དེ་ཉིད་སོ་སོར་རྟོག་པའི་ཡེ་ཤེས་ཤེས་བྱ་ཇི་སྙེད་པ་ཐམས་ཅད་མ་འདྲེས་པར་གསལ་ཞིང་མཉམ་པར་ངེས་པའི༼༣༤༩༽ཐུགས་ཀྱི་ཆོ་འཕྲུལ་བྱ་བ་གྲུབ་པའི་ཡེ་ཤེས་ཀྱིས་བདག་གཞན་གྱི་དོན་ཀུན་རྫོགས་པར་མཛད་པའི་ཡེ་ཤེས་ཐུགས་ཀྱི་མཛད་པ་སྟོན་པ་ཁྱོད་ལ་འདུད་དོ། །ཞེས་ཐུགས་ལྔའི་སྒོ་ནས་གསོལ་བ་བཏབ་པའོ། །འདིར་ཐུགས་ལྔ་དང་ཡེ་ཤེས་ལྔ་སྦྱར་ཚུལ་ལ། ཕྱག་མཆན་ཁ་ཅིག་ཏུ། ངོ་བོ་ཉིད་སྐུའི་ཐུགས་སྟོང་ཉིད། ལོངས་སྐུའི་ཐུགས་མེ་ལོང༌། ཆོས་སྐུའི་ཐུགས་མཉམ་ཉིད། གསང་བའི་སྐུའི་ཐུགས་སོར་རྟོག་སྤྲུལ་སྐུའི་ཐུགས་བྱ་གྲུབ་ཡེ་ཤེས་སུ་བཞེད་ཅིང༌། ཡང་གཞན་འདྲ་བ་ལས། ཆོས་སྐུའི་ཐུགས་སྟོང་ཉིད། ངོ་བོ་ཉིད་སྐུའི་ཐུགས་མཉམ་ཉིད་དུ་ཡང་གསུང་ངོ༌། །འོན་ཀྱང༌། ངོ་བོ་ཉིད་སྐུའི་ཐུགས་སྟོང་ཉིད་ཡེ་ཤེས། ཆོས་སྐུའི་ཐུགས་མེ་ལོང་ལྟ་བུ། ལོངས་སྐུའི་ཐུགས་མཉམ་ཉིད་དང་སོར་རྟོག་སྤྲུལ་སྐུ་དང་གསང་བའི་ཐུགས་བྱ་གྲུབ་ཡེ་ཤེས་སུ་བྱས་ན་གསང་བདག་དགའ་རབ་དཔའ་བོའི་དགོངས་པར་འགྱུར་རོ།།

གཉིས་པ་ཞུ་བ་དངོས་བཤད་པ་ནི།

མི་ཤེས་བླུན་རྨོངས། ཞེས་པ་ནས། གསོལ་བ་བཏབ་བོ། །ཞེས་པའི་བར་གྱིས་བསྟན་ཏེ།

མི་ཤེས་བླུན་རྨོངས་འདམ་བྱིང་འགྲོ་བ་རྣམས། །སྡུག་བསྔལ་དྲ་བས་བཅིངས་པ་ཐབས་ཀྱིས་ཁྲོལ། །མ་རིག་མུན་པས་ལྡོངས་པ་དོན་གྱིས་ཕྱེ། །འཁོར་བའི་རྒྱ་མཚོ་རོལ་པའི་གྲུ་ཡིས་སྒྲོལ། །དེ་བཞིན་གཤེགས་པ་ཀུན་གྱི་ཐུགས་ཆེན་པོ། །ཡེ་ཤེས་དོན་གྱི་སྙིང་པོ་མཆོག་དང་ལྡན། །རྣལ་འབྱོར་ཐེག་ཆེན་རྡོ་རྗེ་ཀུན་འདུས་ལུང་།།

འདུས་པའི་ཚོགས་ལ་རྒྱ་ཆེར་བཤད་དུ་གསོལ། །ཨ་ཧོ་ཞེས་ངེས་པར་བཏུད་དེ་གསོལ་བ་བཏབ་བོ།།

ཚིགས་བཅད་འདི་ལ་སྐྱེ་བོ་ཉན་རང་བོ་དྷི་རྣམས་སྦྱར་བར་བྱ་སྟེ། གང་ཆོས་ཉིད་ཀྱི་དོན་མི་ཤེས་པར་མ་རིག་པས་བླུན་ཞིང་རྨོངས་པས་འཁོར་བའི་རྒྱ་མཚོའི་འདམ་དུ་བྱིང་ཞིང་ནུབ་ནས་ཐར་བར་དཀའ་བའི་འགྲོ་བ་རྣམས། འཁོར་བའི་སྡུག་བསྔལ་གྱིས་ཉམ་ཐག་ཅིང་ཐར་པ་ཐོབ་པའི་ཐབས་དང་བྲལ་བའི་མདུད་པ་དམ་པོས་དྲྭ་བས་བཅིངས་པ་ཐུགས་རྗེའི་ཐབས་ཀྱིས་ཁྲོལ་ལ་བཤིགས་པར་མཛོད་ཅིག དེ་བཞིན་དུ་འགྲོ་བ་གང་མ་རིག་པའི་ལིང་ཏོག་གི་མུན་པས་ཤེས་རབ་ཀྱི་སྤྱན་ལྡོངས་ཤིང་འཐིབས་པ་རྣམས་གསུང་གི་མཛད་པ་ཐེག་པའི་ཐབས་ཀྱིས་བསལ་ཏེ་ཤེས་རབ་སྣང་བའི་སྒོ་ཕྱེ་བར་མཛད་དུ་གསོལ། ཞེས་པ་དང༌། འཁོར་བའི་རྒྱ་མཚོ་ཆེན་པོའི་ཆུ་བོའི་འཇིང་ལས་ཕྲིན་ལས་ཀྱི་རོལ་པ་ཐབས་ཀྱི་མཛད་པའི་གྲུ་ཡིས་སྒྲོལ་བར་མཛོད་ཅིག ཅེས་གསོལ་ནས། རྒྱུད་ཀྱི་མཚན། རྒྱལ་བ་རྫོགས་པའི་སངས་རྒྱས་དེ་བཞིན་གཤེགས་པ་ཀུན་གྱི་ཐུགས་ལྷུན་གྱིས་གྲུབ་པའི་ཡེ་ཤེས་ཆེན་པོ་དགོངས་པའི་ཞེ་ཕུགས་དམ་པ་ཇི་ལྟར་མངའ་བ་བཞིན། གསང་བའི་ཡེ་ཤེས་དོན་གྱི་སྙིང་པོ་མཆོག་དང་ལྡན་པས་རྣལ་འབྱོར་གསུམ་གྱི་དོན་མཐར་ཕྱིན་པར་གྲུབ་པའི་ལུང་ཐེག་པ་ཆེན་པོའི་མངོན་པར་རྟོགས་པ་རྡོ་རྗེ་བཀོད་པའི་རྒྱུད་ཀུན་འདུས་རིག་པའི་མདོ་བསྟན་པ་ཐམས་ཅད་ཀྱི་གཞི་རྩར་གྱུར་པས་ལུང་དམ་པ་སྒྲོ་སྐུར་དང་བྲལ་བའི་༼༣༥༠༽ཆོས་ཀྱི་རྣམ་གྲངས་རྣམ་པར་བཀོད་པ་འདི་ཉིད་བདག་ཅག་མང་པོ་འདུས་པའི་འཁོར་གྱི་ཚོགས་རྣམས་ལ་རྒྱ་ཆེར་བཤད་དེ་ལྷག་མ་མེད་པར་བཀའ་སྩལ་དུ་གསོལ། ཞེས། དཔེ་ལ་ལར། ཨ་ལ་ལ་ཧོ། ཞེས་སྐུ་གསུང་ཐུགས་དགྱེས་པ་སྐྱེད་པའི་སྒྲའམ། ལ་ལར་ཨ་ཧོ༔ ཞེས་མ་སྐྱེས་པ་ལ་དགྱེས་པའི་སྒྲ་ཡང་གསུངས་ཏེ། དེ་ལྟར་དགྱེས་པ་སྐྱེད་པའི་སྒྲ་བརྗོད་དེ། སྒོ་གསུམ་ངེས་པར་བཏུད་པར་བྱས་ཏེ། གུས་པ་ཆེན་པོས་གསོལ་བ་བཏབ་བོ།།

གཉིས་པ་སྟོན་པས་གནང་བ་བྱིན་པ་ལ་ལྔ་སྟེ། འོད་དང་སྤྲུལ་པ་བཀྱེ་བ། བྱིན་རླབས་འཁོར་ལ་སྣང་བ། སྣོད་དང་མི་ལྡན་པ་བསྐྲད་པ། སྣོད་ལྡན་བྱིན་གྱིས་རློབས་པ། རྒྱུད་བཤད་པའི་ཚུལ་ལོ། དང་པོ་ནི།

དེ་ནས། ཞེས་པ་ནས། ཁྱབ་ཅིང་སྣང་བར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེ། རྡོ་རྗེ་རོལ་པ་དེ་ཁོ་ན་ཉིད་ཀྱི་གླུ་དེས་གསོལ་བ་བཏབ་པས། འཁོར་ཐམས་ཅད་ལ་གཟིགས་ཏེ་འཛུམ་པ་མཛད་པས། ཐུགས་རྣམ་པར་དག་པའི་ཀློང་ནས། རིག་པའི་ཉི་མ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་འོད་ཟེར་འབྱམས་ཀླས་པ། ཀུན་ནས་ཀུན་ཏུ་ཁྱབ་པར་ཤར་རོ། །འོད་ཟེར་དེ་དག་རེ་རེ་ལས་རྡོ་རྗེ་གནོད་སྦྱིན་དང་། རྡོ་རྗེ་སྲིན་པོ་ལྟ་བུའི་གཟུགས་སྣ་ཚོགས་བྱུང་ངོ་། །དེ་དག་རེ་རེ་ལས་ཀྱང་སངས་རྒྱས་འབུམ་ཕྲག་དཔག་ཏུ་མེད་པ་འཁོར་སོ་སོའི་ཞམ་འབྲིང་

དང་བཅས་ཏེ། ཞིང་ཁམས་མཐའ་ཡས་པར་ཁྱབ་ཅིང་སྣང་བར་གྱུར་ཏོ།།

གསོལ་བ་བཏབ་མ་ཐག་པ་དེ་ནས་རིགས་ཀྱི་བདག་པོ་བཅོམ་ལྡན་འདས་གསང་བ་མཆོག་གི་མངའ་བདག་སྔགས་ཀྱི་སྟོན་པ་ཆེན་པོ་དེས། རྡོ་རྗེ་རོལ་པ་དེ་ཁོ་ན་ཉིད་ཀྱི་གླུ་དེས་གསོལ་བ་བཏབ་པས་རྐྱེན་གྱིས་སྐབས་ལས་གླེང་དུ་བསླངས་པས་གནང་བ་བྱིན་ཏེ་འཁོར་ཐམས་ཅད་ལ་གཟིགས་ཏེ་ཞལ་འཛུམ་པ་མཛད་པས་བྱིན་རླབས་བཀྱེ་བ་ནི་འཁོར་གྱི་སྣང་བ་སྟེ། བརྡའི་སྒོ་ནས་ཞལ་གྱིས་བཞེས་ཏེ་ཤུགས་ལ་གླེང་བསླང་བའང་ཡིན་ལ། དེ་ནས་ཡབ་ཡུམ་ཉིད་ཀྱི་ཐུགས་མཐའ་དང་བྲལ་བས་རྣམ་པར་དག་པའི་དབྱིངས་ཀྱི་ཀློང་ནས་རང་བྱུང་རིག་པའི་ཡེ་ཤེས་ཀྱི་རོལ་པ་ཐིག་ལེ་གཟི་མདངས་ཀྱི་ངོ་བོ་ཟླ་བ་ཉི་མ་དཀར་དམར་བྱང་སེམས་རྣམ་གཉིས་བརྗོད་ཀྱིས་མི་ལང་བའི་ཡང་བརྗོད་ཀྱི་མི་ལང་བ་གྲངས་ལས་འདས་པའི་འོད་ཟེར་འབྱམས་ཀླས་པ་དང་ལྡན་པའི་ཡེ་ཤེས་ཆེན་པོ་ལ་ཡེ་ཤེས་ཐམས་ཅད་འདུས་པའི་འོད་མུ་མཐའ་མེད་པས་འཁོར་འདས་ཀྱི་གནས་སམ་དུས་ཀུན་ནས་གནས་སྐབས་ཀུན་ཏུ་ཁྱབ་པར་མཛད་དོ། །ཡེ་ཤེས་ཆེན་པོའི་འོད་ཟེར་དེ་དག་རེ་རེ་ལས་ཀྱང་ཁྲོ་བོ་རྡོ་རྗེ་གནོད་སྦྱིན་ལྗང་སྔོན་གཡས་རྒྱ་གྲམ་གཡོན་པ་སྡིགས་མཛུབ་མཛད་པ་དང༌། ཁྲོ་མཆོག་རྡོ་རྗེ་སྲིན་པོ་མཐིང་ནག་གཡས་རལ་གྲི་གཡོན་ཁྲོ་བའི་དལ་འགྱེད་པ་ལྟ་བུའི་གཟུགས་མང་པོ་འཁོར་གྱི་སྒྲིབ་པ་གཞོམ་པའི་ཕྱིར་ཐ་དད་པར་སྣང་བར་མཛད་དེ་སྣ་ཚོགས་སུ་བྱུང་ངོ༌། །དེ་ལྟར་ཁྲོ་བོ་དེ་དག་རེ་རེ་ལས་ཀྱང་སྤྲུལ་པའི་སངས་རྒྱས་འབུམ་ཕྲག་༼༣༥༡༽དཔག་ཏུ་མེད་པ་མང་པོ་རང་རང་གི་འཁོར་རྣམས་དང་སོ་སོའི་ཞབས་འབྲིང་དང་བཅས་ཏེ་སྒྲོན་མ་བཀོད་པ་ལྟར་ཞིང་ཁམས་ཐ་དད་མཐའ་ཡས་པར་ཁྱབ་ཅིང་གསང་སྔགས་ཀྱི་བྱིན་རླབས་ལས་ཆོས་ཀྱི་སྒོ་ཚད་མེད་པ་སྟོན་པར་ཀུན་ཏུ་སྣང་བར་གྱུར་ཏོ། །དེ་ནི་ཐེག་པ་གཞན་གྱི་གླེང་གཞི་འདིའི་བྱིན་རླབས་ལས་སྣང་བའོ།།

གཉིས་པ་བྱིན་རླབས་འཁོར་ལ་སྣང་བ་ནི།

དེ་དག་ལས་རིག་པའི། ཞེས་པ་ནས། ལྡན་པར་གནས་སོ། །ཞེས་པའི་བར་གྱིས་བསྟན་ཏེ།

དེ་དག་ལས་རིག་པའི་ཉི་མའི་འོད་ནམ་མཁའི་ཁམས་ཁྱབ་པར་བྱུང་བས། མུན་པ་མུན་ནག་སྨག་ཏུ་གྱུར་པ་ཐམས་ཅད་ཡང་དག་པར་གསལ་ཏོ། །རིག་པའི་ཆོས་ཀྱི་འབྲུག་སྒྲ་དང་། ཆོས་ཀྱི་ཆར་དང་། ཆོས་ཀྱི་གླུ་སྣ་ཚོགས་དང་། ཆོས་ཀྱི་གར་སྣ་ཚོགས་དང་། ཆོས་ཀྱི་མཆོད་པ་སྣ་ཚོགས་བྱུང་སྟེ། འབྱམས་ཀླས་པའི་ནམ་མཁའ་ལ། ཕན་ཚུན་དང་། ཡན་མན་དང་། སྣྲེལ་གཞི་ལ་སོགས་པ་ཐམས་ཅད་དུ་ཁྱབ་པར་ལིང་ལོངས་ཕྱད་པར་བྱུང་ངོ་། །རྨད་དུ་བྱུང་བའི་སྐུ་བསམ་གྱིས་མི་ཁྱབ་པའི་འོད་ཟེར་འབར་འཕྲོ་འཁྲུག་ཅིང་ལིང་ལོང་ཕྱད་དོ། །རྨད་དུ་བྱུང་བའི་ཐུགས་ཀྱང་ལྷང་ངེའོ། །རྨད་དུ་བྱུང་བའི་གསུང་བསམ་གྱིས་མི་ཁྱབ་པར་ཡང་ཨ་ཧོ་ཞེས་སྒྲོགས། སངས་རྒྱས་དཔག་ཏུ་མེད་པ་ཡང་གསུང་བསམ་གྱིས་མི་ཁྱབ་པའི་སྒྲ་གཅིག་ཏུ། ཨེ་མའོ་རྨད་བྱུང་རོལ་པའི་ཆོས་ཀྱི་དོན་བྱུང་ངོ་ཞེས་སྒྲོགས། འཁོར་འབུམ་ཕྲག་དང་གདུལ་བྱ་སྣ་ཚོགས་སྤྲོ་བའི་ངོ་མཚར་བསྐྱེད། རིག་པའི་རྩལ་སྦྱངས། དོན་གྱི་ཆེ་བ་བྱུང་། ངམ་ཞིང་ངོ་མཚར་བར་གྱུར་ཏེ། ཐམས་ཅད་ཉེ་བར་གནས་སོ། །ཞི་བར་གནས་སོ།།

དགའ་བ་དང་ལྡན་པར་གནས་སོ།།

དེ་ལྟར་ཐེག་པ་སོ་སོའི་གླེང་གཞིའི་བཀོད་པ་དེ་དག་ལས་ཀྱང་ཡོན་ཏན་གྱི་རྩལ་དགོངས་པ་རིག་པའི་དོན་སྟོན་པའི་ཉི་མའི་འོད་ཟེར་བསམ་གྱིས་མི་ཁྱབ་པའི་སྒོ གདུལ་བྱའི་གནས་ཀྱི་ནམ་མཁའི་ཁམས་མཐའ་ལ་ཐུག་པ་མེད་པར་ཁྱབ་པར་བྱུང་བས་གདུལ་བྱ་མ་རིག་པས་རྒྱུད་ནོན་པའི་ཉན་རང་གི་མུན་པ། མུ་སྟེགས་བྱེད་ཀྱི་མུན་ནག་སོ་སོའི་སྐྱེ་བོའི་སྨག་རུམ་དུ་ཆུད་པར་གྱུར་པ་ཐམས་ཅད་ཀྱི་སྒྲིབ་པ་ཐམས་ཅད་ཡང་དག་པར་བསལ་ཏེ་གསང་སྔགས་ཀྱི་སྣོད་དུ་བྱས་པར་གྱུར་ཏོ། །དེ་ལྟར་གང་གིས་བསལ་བར་མཛད་ཅེ་ན། དོན་ཇི་ལྟ་བ་བཞིན་དུ་རིག་ཅིང་མཐོང་བར་བྱེད་པའི་གསུང་ཆོས་ཀྱི་འབྲུག་སྒྲ་ཆེན་པོ་དང༌། གདུལ་བྱའི་རྒྱུད་བརླན་པའི་ཆོས་ཀྱི་ཆར་མང་པོ་ཕབ་པ་དང༌། གདུལ་བྱའི་བློ་རིམ་འདྲེན་པའི་ཆོས་ཀྱི་གླུ་དབྱངས་སུམ་བརྒྱ་དྲུག་ཅུ་ལ་སོགས་པ་སྣ་ཚོགས་དང༌། གདུལ་བྱའི་བློ་དང་མཐུན་པར་ཅིར་ཡང་འཆར་བས་ཆོས་ཀྱི་གར་ཐབས་སྣ་ཚོགས་ཀྱི་མཛད་པ་དང༌། ཕྱི་ནང་གི་ཆོས་ཀྱི་མཆོད་པ་སྣ་ཚོགས་མང་པོ་བྱུང་སྟེ། རྒྱ་ཁྱོན་ཚད་མེད་པར་འབྱམས་ཀླས་པའི་ནམ་མཁའ་ཕྱི་ནང་གསང་གསུམ་དུ་བཤད་པ་ཀུན་ཏུ་ཁྱབ་པའི་འཇིག་རྟེན་ལ་ཆོས་ཀྱི་སྒྲ་ཐ་དད་པ་ཕྱོགས་མཚམས་བརྒྱད་ཕན་ཚུན་དང༌། སྟེང་འོག་ཡན་མན་དང༌། ཐད་ཀའི་ཕྱོགས་མཚམས་སྣྲེལ་ཞི་ལ་སོགས་པ་གདུལ་བྱའི་གནས་ཐམས་ཅད་དུ་ཐ་དད་པར་མ་ཁྱབ་པ་མེད་པར་གསང་སྔགས་ཇི་ལྟ་བར་སྣང་བ་མ་ངེས་པས་ལིང་ལོང་དུ་དུས་ཕྱད་པའམ་རྟག་པར་དོན་མཛད་པ་བྱུང་ངོ༌། །འགྲོ་བའི་ཆེད་དུ་རྨད་དུ་བྱུང་བའི་སྐུ་མཆོག་གི་སྤྲུལ་པ་བསམ་གྱིས་མི་ཁྱབ་པ་ཇི་ལྟར་ཡང་སྣང་བའི་སྐུ་རེ་རེ་ལ་ཡང་འོད་ཟེར་འབུམ་ཕྲག་གསལ་ཞིང་འབར་བ་དང༌། ཀུན་ཏུ་འཕྲོ་བ་དང༌། བསྣོལ་མར་འཁྲུག་ཅིང་ཕྱོགས་རྣམས་སུ་ངེས་པ་མེད་པར་ལིང་ལོང་དུ་ཕྱད་དེ་རྟག་ཏུ་དོན་མཛད་དོ། །བར༼༣༥༢༽འདིར་ཆོས་རྗེས་ཕྱག་མཆན་བཞུགས་པའི་དཔེ་ལ། ཡེ་ཤེས་རྨད་དུ་བྱུང་བའི་སྐུ་ཡང་ལྷུན་ཆགས་པས་ལྷན་ནེའོ། །ཞེས་བཞུགས་ཀྱང་དཔེ་གཞན་དང་འགྲེལ་ཆེན་དུ་མི་བཞུགས། རྨད་དུ་བྱུང་བའི་ཐུགས་མཆོག་རྣམ་པར་མི་རྟོག་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་ཤིན་ཏུ་གསལ་བར་ལྷང་ངེ་ཉིད་དུ་བཞུགས་པའོ། །རྨད་དུ་བྱུང་བའི་གསུང་ཐེག་པ་ཆེན་པོ་བྱིན་རླབས་ཀྱི་བསྟན་པ་མང་པོ་བསམ་གྱིས་མི་ཁྱབ་པ་ཡང་དགྱེས་པའི་ཨ་ཧོ་ཞེས་སྒྲོགས་ཤིང་ཆོས་སྟོན་ཏོ། །དེའང་སྐྱེ་འགག་མེད་པའི་དོན་ལ་དགྱེས་པའམ། གདུལ་བྱ་འདུལ་བའི་ཐབས་སྣ་ཚོགས་ལ་དགྱེས་པའོ། །རྒྱལ་བ་རྫོགས་པའི་སངས་རྒྱས་དཔག་ཏུ་ མེད་པ་ཇི་སྙེད་པ་ཡང་གསུང་བསམ་གྱིས་མི་ཁྱབ་པའི་སྒྲ་གཅིག་ཏུ་མཚུངས་པར་གསང་བའི་བདག ་པོའི་སྐུ་གསུང་ཐུགས་ལ་དམ་པས་ཨེ་མའོ། །ཞེས་པས་དྲངས་ནས། གསང་བའི་མངའ་བདག་དམ་པས་རྨད་དུ་བྱུང་བའི་ཐེག་པ་ཆེན་པོའི་རོལ་པའི་མཛད་པ་སྣང་བས་ཆོས་ཀྱི་སྒོ་ཐེག་པ་མཐའ་དག་གིས་འགྲོ་བའི་དོན་གྱི་སྣང་བ་ཡང་དག་པར་བྱུང་ངོ༌། །ཞེས་སྒྲོགས་སོ། །རིགས་ཀྱི་བདག་པོ་ཉིད་ཀྱི་ཉེ་བའི་འཁོར་འབུམ་ཕྲག་བཅུ་དང༌། རིང་བའི་འཁོར་གདུལ་བྱ་བསམ་པ་སྣ་ཚོགས་ཐ་དད་པ་དག་ཀྱང་གསང་བའི་བྱིན་རླབས་ཀྱིས་རིམ་དང་ཅིག་ཅར་དུ་དོན་ལ་སྤྲོ་ཞིང་མངོན་པར་དགའ་བའི་ཡ་མཚན་སྣ་ཚོགས་ཀྱིས་ངོ་མཚར་མཆོག་ཏུ་སྐྱེད། ཤེས་རབ་གོང་ནས་གོང་དུ་འཕགས་པས་རིག་པའི་རྩལ་སྦྱངས། རྟོགས་པས་དོན་གྱི་ཆེ་བ་མངོན་དུ་ཕྱུང་སྟེ། སྟོན་པའི་བྱིན་རླབས་ལ་ཤིན་ཏུ་ངམ་ནས། ཨེ་མའོ། །ཞེས་སྒྲོགས་ཤིང་དོན་ལ་ངོ་མཚར་བར་གྱུར་ཏེ། གདུལ་བྱ་ཐམས་ཅད་སྟོན་པ་ལ་འདུན་པས་གསང་བའི་དོན་ལ་ཉེ་བར་གནས་སོ། །རྒྱུད་ཀྱི་རྟོག་པ་ཞི་བར་གནས་སོ། །ཆོས་ཀྱི་དོན་མཐོང་ནས་གཞན་གྱི་དོན་སྤྱོད་པ་ལ་དགའ་བ་དང་ལྡན་པར་གནས་སོ། །དེ་དག་སྐུ་གསུང་ཐུགས་ཀྱི་སྒོ་ནས་གསོལ་བ་བཏབ་པའི་ལན་དུ་ཅི་རིགས་པར་སྦྱར་རོ།།

གསུམ་པ་སྣོད་དང་མི་ལྡན་པ་བསྐྲད་པ་ནི།

དེ་ནས་གསང་བ། ཞེས་པ་ནས། ཆོས་ཉིད་དུ་ཞི་བར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ནས་གསང་བ་མཆོག་གི་བདག་པོ་དེས། འཁོར་རྣམ་པར་སྦྱོང་བ་རྡོ་རྗེ་རྒྱན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཤངས་ཀྱི་ཧཱུྃ་རིངས་ལས་རྡོ་རྗེ་མངོན་པའི་མཐུ་ཆེན་འདི་དག་མངོན་པར་ཕྱུང་ངོ་། །ཧཱུྃ་ཧཱུྃ་ཧཱུྃ། རྡོ་རྗེ་འདུ་བ་འདུས་པ་ཡི། །ཐེག་ཆེན་དམ་པའི་རིགས་ཅན་རྣམས། །བླ་འོག་རིམ་པ་ཇི་བཞིན་དུ། །རྡོ་རྗེ་གསང་བའི་གྲལ་བཀོད་དེ། །རིགས་མ་ཡིན་པར་རིགས་མིན་འགྱུར། །རིགས་ཅན་རྣམས་ཀྱི་དམ་ཚིག་འདི། །རིགས་མིན་རྣམས་ལ་འབབ་མི་འགྱུར། །དེ་ལས་འདས་ན་དེ་རླག་བྱེད། །ཧཱུྃ་ཀྲོ་དྷ་ཛྭ་ལ་ས་མ་ཡཱ། རཀྴ་ཛྭ་ལ་ས་མ་ཡཱ། ཡཀྴ་ཛྭ་ལ་ས་མ་ཡཱ། ཅིཏྟ་ཛྭ་ལ་ས་མ་ཡཱ། ཞེས་སྒྲ་བྱུང་བས། ཞལ་ལྗགས་ཀྱི་དབང་པོའི་འོད་དཔུང་ལས་ཁྲོ་བོ་འོད་ཀྱི་འཕྲེང་བ་འབར་བ་དང་། སྲིན་པོ་འོད་ཀྱི་འཕྲེང་བ་འཕྲོ་བ་དང་། གནོད་སྦྱིན་འོད་ཀྱི་འཕྲེང་བ་འཁྲུག་པ་དང་། ཟ་བྱེད་འོད་ཀྱི་འཕྲེང་བ་ཚུབ་མ་རྒྱུན་མར་བྱུང་བས། རུ་དྲ་ཅན་དང་། བདུད་དང་། སྲིན་པོ་དང་། གནོད་སྦྱིན་དང་། མཇུག་སྲེད་དང་། སྲེད་མེད་དང་། དབང་ཕྱུག་དང་། སྟོབས་ལྡན་དང་། སྤྲེའུ་དང་། ར་དང་། ལུ་འདེ་དང་། སྦྲང་མ་དང་། བྱ་རོག་དང་། མེ་ཁྱེར་དང་། འཁོར་བ་དང་། ཆུ་དང་། ས་དང་། ནམ་མཁའ་དང་། མེ་དང་། སྒྲ་དང་། རྟོགས་དཔྱོད་ལ་སོགས་པ། མཚན་མར་མི་གནས་ཆོས་ཉིད་དུ་ཞི་བར་གྱུར་ཏོ།།

འཁོར་རྣམས་སྣོད་དུ་རུང་བར་བྱིན་གྱིས་བརླབས་པའི་ཕྱིར། དེ་ནས་སྟོན་པ་གསང་བ་མཆོག་གི་བདག་པོ་དེས། ཉིད་ཀྱི་འཁོར་རྣམས་ཀྱི་སྒྲིབ་པ་རྣམ་པར་སྦྱང་ཤིང་དག་པར་མཛད་པའི་༼༣༥༣༽ཕྱིར་དང༌། སྐལ་བ་མེད་པ་རྣམས་མི་གནས་པར་བྱེད་ཅིང༌། སྐལ་བ་ཅན་རྣམས་སྤྱན་སྔར་འདུ་བར་བྱེད་པ་ཉིད་ཀྱིས་དགོངས་པའི་མཚན་ངེས་པ་རྡོ་རྗེ་རྒྱན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཤངས་ཀྱི་དབུགས་ཀྱི་ཧཱུྃ་རིངས་ལས་ལྟ་ངན་དང་སྒྲིབ་པ་འཇོམས་པའི་ནུས་པ་དང་ལྡན་པས་རྡོ་རྗེ་མངོན་པའི་མཐུ་ཅན་གྱི་སྔགས་ཚིག་འདི་དག་གི་སྒྲ་བཏོན་ཏེ་མངོན་པར་ཕྱུང་ངོ་། །ཧཱུྃ་ཧཱུྃ་ཧཱུྃ་ཞེས་རྡོ་རྗེ་གསུམ་གྱི་ཕྱིར་གྲངས་ངེས་ལ། རྡོ་རྗེ་གསང་བའི་གྲལ་འདིར་འདུ་བར་དབང་བས་འདུས་པ་ཡི་འཁོར་གསང་མཆོག་ཐེག་པ་ཆེན་པོ་རྟོགས་པར་འདོད་པས་སྤྱན་སྔར་འཚོགས་པ་དམ་ཚིག་ཆེན་པོ་སེམས་དཔའ་རྡོ་རྗེ་ལ་སོགས་པའི་གསང་སྔགས་ཀྱི་རིགས་ཅན་རྣམས་ནི་རྟོགས་པ་གོང་འོག་ལྟར་གྲལ་བླ་འོག་གི་རིམ་པ་ཇི་ལྟ་བ་བཞིན་དུ་རྡོ་རྗེ་གསང་བའི་གྲལ་འདིར་འཁོད་དེ་འདུག་ལ། ཐེག་ཆེན་གསང་སྔགས་ཀྱི་རིགས་མ་ཡིན་པ་རུ་ཏྲ་ཅན་ལ་སོགས་པ་གསང་བའི་རིགས་མེད་པའམ་མིན་པ་རྣམས་ནི་རྒྱུད་འཛིན་པར་མི་འགྱུར་བས་གཞན་དུ་སོང་ཞིག་པའོ། །དེ་ཅིའི་ཕྱིར་ཞེ་ན། ལས་དང་སྐལ་བ་མཆོག་གི་སྤྱོད་ཡུལ་རིགས་ཅན་རྣམས་ཀྱི་དམ་ཚིག་དམ་པ་གསང་སྔགས་ཟབ་མོ་འདི་ནི། རིགས་དང་སྐལ་བ་མེད་པ་རྣམས་ལ་འབབ་སྟེ་རྟོགས་པར་མི་འགྱུར་བས་དམ་ཚིག་གི་དོན་དེ་ལས་འདས་ཤིང་ཉམས་ན་དེ་དག་ངན་སོང་དུ་རྒྱུད་བརླག་པར་བྱེད་པས་བསྐྲད་པའོ། །འོག་གི་འོད་ཀྱི་ཕྲེང་བ་བཞི་འདོན་པའི་སྔགས། ཧཱུྃ་ཀྲོ་ཏ་ཛྭ་ལ་ས་མ་ཡ། རཀྴ་ཛྭ་ལ་ས་མ་ཡ། ཡཀྴ་ཛྭ་ལ་ས་མ་ཡ། ཙི་ཏ་ཛྭ་ལ་ས་མ་ཡ། ཞེས་སྒྲ་བྱུང་བས། སྟོན་པའི་ཞལ་ལྗགས་ཀྱི་དབང་པོའི་འོད་ཀྱི་མེ་དཔུང་ཆེན་པོ་ལས། འོད་བཞི་བྱུང་བ་ནི་ཕྱི་ནང་གཉིས་སུ་འགྱུར་ཏེ། ཕྱི་ལྟར་ན། རིམ་པ་བཞིན། རིགས་ཀྱི་ཧེ་རུ་ཀ་ཕྲ་མེན་དང་བཅས་པའི་ཁྲོ་བོ་འོད་ཀྱི་ཕྲེང་བ་འབར་བ་བར་མ་ཆད་པར་བྱུང་བ་དང༌། རྡོ་རྗེ་སྲིན་པོ་ཁྲོ་བོ་བཅུ་ལ་སོགས་པ་འོད་ཀྱི་ཕྲེང་བ་དང་བཅས་པར་འཕྲོ་བ་དང༌། རྡོ་རྗེ་གནོད་སྦྱིན་འོད་ཀྱི་ཕྲེང་བ་དང་བཅས་པ་བསྣོལ་མར་འཁྲུག་པ་དང༌། ཟ་བྱེད་ཆེན་པོ་རུ་ཏི་ཏེ་རུ་ཀ་ལ་སོགས་པ་འོད་ཀྱི་ཕུང་པོའི་ཚུབ་མ་རྒྱུད་མར་བར་མ་ཆད་པ་རྣམས་བྱུང་བས་སྐལ་མེད་རྣམས་བསྐྲད་པའོ། །དེའང་དང་པོ་སྐུ་མདོག་ནག་པོ་གཡས་རྡོ་རྗེ། གཉིས་པ་སྐུ་མདོག་མཐིང་ནག་རལ་གྲི། གསུམ་པ་སྐུ་མདོག་ལྗང་ཀུ་རྡོ་རྗེ་རྒྱ་གྲམ། བཞི་པ་སྐུ་མདོག་དམར་ནག་གཡས་མི་སྙིང་༼༣༥༤༽གཡོན་སྡིགས་མཛུབ་མཛད་པའོ། །ནང་ལྟར་ན། ཀུན་གཞི། ཉོན་ཡིད། ཡིད་ཤེས། སྒོ་ལྔ་བཞི་པོ་རིགས་སྐྱེས་པས་གྲོལ་བའོ། །སྐལ་མེད་དངོས་གང་སྙམ་པ་ལ། རྒྱུད་གཅིག་པ་དང་ཐ་དད་པ་གཉིས་ཀ་སྦྱར་ཏེ། རྒྱུད་ཐ་དད་ཀྱི་དབང་དུ་རུ་ཏྲ་ཅན་དང༌། རྒྱུད་གཅིག་པའི་དབང་དུ་ང་རྒྱལ་གྱིས་དྲེགས་པའོ། །དེ་བཞིན་དུ། བདུད་དང་གནོད་སེམས། སྲིན་པོ་དང་ཞེ་སྡང༌། གནོད་སྦྱིན་དང་ཕྲག་དོག་འཇུག་སྲེད་དང་འདོད་ཆགས། སྲེད་མེད་དང་བདེ་བ་སྤོང་བ། དབང་ཕྱུག་དང་བདག་ལྟ། སྟོབས་ལྡན་དང་ལས་ཀྱི་བག་ཆགས་བརྟས་པ། སྤྲེའུ་དང་རྣམ་ཤེས་སམ་བྲག་ལ་གནས་པའི་ཐེའུ་རང་དང་ཡང་མཐུན་གསུང༌། ར་དང་འདུ་ཤེས་དམྱལ་བའི་ཁྱི་ལུ་འདེ་དང་གཟུང་འཛིན། སྦྲང་མ་དང་འདུ་བྱེད་དམ་གཅིག་ཏུ་འདུ་ཞིང་གདུག་པ་ཆེ་བས་བགེགས་དང་ཡང་མཐུན་གསུང༌། བྱ་རོག་དང་ཚོར་བའམ་ཤ་ཚོར་བས་གཤིན་རྗེ་དང་ཡང་འདྲ་གསུང༌། སྲིན་བུ་མེ་ཁྱེར་དང་དབང་པོ། འཁོར་བའི་སེམས་ཅན་ལས་ངན་ཕལ་པ་དང་ཡུལ། ཀུན་འདུས་ཀྱི་མཆན་རྙིང་ལས་འཁོར་འདི་ཉིད་གཟའ་དང་རྒྱུ་སྐར་དུའང་གསུང༌། ཆུ་ལ་གནས་པའི་འགྲོ་བ་དང་ཆུའི་རྟོག་པ། ས་ལ་གནས་པའི་འགྲོ་བ་དང་སའི་རྟོག་པ། ནམ་མཁའ་ལ་གནས་པའི་འགྲོ་བ་དང་ནམ་མཁའི་རྟོག་པ། མེ་ལ་གནས་པའི་འགྲོ་དང་མེའི་རྟོག་པ། སྒྲ་དང་སྒྲའི་རྟོག་པའམ། ཀུན་འདུས་ཀྱི་མཆན་ལས་འབྲུག་གི་སྒྲར་ཡང་གསུང༌། བསམ་ངན་གྱི་ལོག་སྲེད་ཅན་དང༌། སེམས་ཀྱི་རྟོག་དཔྱོད་ལ་སོགས་པ་ཞེས་དངོས་པོ་གཞན་བསྡུ་བ་ནི་མུ་སྟེགས་བྱེད་ལ་སོགས་པ་ཐམས་ཅད་སྐལ་བ་མེད་པས་བསྐྲད་པའམ། མཚན་མར་འཛིན་པ་ཐ་དད་པ་མཐའ་དག་མི་གནས་པར་ངོ་བོ་དག་པས་ཆོས་ཉིད་མཉམ་པའི་ངང་དུ་ཟུག་རྔུ་དང་བྲལ་ཏེ་ཞི་བར་གྱུར་ཏོ།།

བཞི་པ་སྣོད་ལྡན་བྱིན་གྱིས་རླབས་པ་ནི།

དེ་ནས་འོད་ཟེར། ཞེས་པ་ནས། ཐིམ་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ནས་འོད་ཟེར་དེ་དག་མཁའ་ལ་འཁྱིལ་བ་དང་། འཁོར་མང་པོ་དག་ཤིན་ཏུ་སྐྲག་སྟེ་གསོལ་བ་བཏབ་པ། ཨེ་མ་ཨེ་མ་བདག་ཅག་བཅོམ་ལྡན་འདས་ཀྱི་སྣོད་དུ་རུང་བར་བྱིན་གྱིས་བརླབ་ཏུ་གསོལ། ཐེག་པ་ཆེན་པོའི་རིགས་སུ་གཟུང་དུ་གསོལ་ཞེས་གསོལ་བ་བཏབ་པ་ལས། བཅོམ་ལྡན་འདས་ཀྱི་ཞལ་གྱི་མདངས་ཕྱུང་ནས། འོད་ཟེར་དེ་དག་ཡེ་ཤེས་ཀྱི་འོད་ཞི་ཞིང་འཁྱིལ་བ་དང་། མཛེས་ཤིང་བདེ་བས་ཐམས་ཅད་རངས་པར་བྱས་ནས།

སྣོད་རྣམ་པར་སྦྱངས་ཏེ་འོད་ཀྱི་གནས་སུ་ཐིམ་པར་གྱུར་ཏོ།།

དེ་ནས་འོད་ཟེར་དེ་དག་སྣོད་ལྡན་བྱིན་གྱིས་རློབས་པའི་ཕྱིར་འོད་གཅིག་ཏུ་གྱུར་ནས་ནམ་མཁའ་ལ་འཁྱིལ་བ་དང༌། འཁོར་མང་པོ་དེ་དག་ཤིན་ཏུ་སྐྲག་ཅིང་སྔངས་ཏེ་དབང་དང་རྒྱུད་ཀྱི་སྣོད་དུ་རུང་བར་གསོལ་བ་བཏབ་པ། འོད་ཀྱིས་སྐལ་ངན་བསྐྲད་པ་ལ་ཨེ་མའོ། །ཞེས་ངམ་ཞིང༌། སྐལ་ལྡན་རྣམས་རྒྱུད་སྦྱངས་པ་ལ་ཨེ་མ་ཞེས་ངམ་སྟེ། འཁོར་བདག་ཅག་རྣམས་ལ་སྟོན་པ་བཅོམ་ལྡན་འདས་ཀྱིས་ཟབ་མོའི་༼༣༥༥༽དབང་བསྐུར་ཏེ་གསང་སྔགས་ཀྱི་སྣོད་དུ་རུང་བར་བྱིན་གྱིས་བརླབ་ཏུ་གསོལ། ཐེག་པ་ཆེན་པོའི་རིགས་སུ་ངེས་ཏེ་མི་འགྱུར་བར་གཟུང་བར་མཛད་དུ་གསོལ་ཞེས་གསོལ་བ་བཏབ་པ་ལས། འདི་ལ་དབང་བསྐུར་བ་དང་རྒྱུད་ཀྱི་འབྲུ་བཤད་པ་གཉིས་སུ་སྦྱར་ཏེ། ཕྱི་ལྟར་ན་སྟོན་པས་གནང་སྟེ་རྒྱུད་ཀྱི་སྣོད་དུ་རུང་བར་བྱིན་གྱིས་བརླབ་པ་ནི། བཅོམ་ལྡན་འདས་ཀྱིས་ཞལ་གྱི་མདངས་ལས་འོད་དངོས་སུ་ཕྱུང་བས། འོད་ཟེར་དེ་དག་ཡེ་ཤེས་ཀྱི་འོད་དུ་ཤར་ཏེ་ཉོན་མོངས་དང་མཚན་རྟོག་ཞི་ཞིང་ཆོས་ཉིད་ཀྱི་དབྱིངས་སུ་འཁྱིལ་བ་དང་དབྱིངས་དང་ཡེ་ཤེས་གཉིས་མེད་དུ་གྱུར་པས་མཛེས་ཤིང་ལེགས་པར་ཐབས་ཀྱི་མཆོག་གི་བདེ་བས་གསང་བའི་དོན་གྱི་ཉམས་རྙེད་པ་ལ་དགོད་པའི་ཡོན་ཏན་ཅན་དེས་འཁོར་ཐམས་ཅད་ཀྱི་རྒྱུད་དག་པར་མཛད་དེ་བསམ་པ་རངས་པར་བྱས་ནས། སྣོད་རྣམ་པར་སྦྱངས་ཤིང་རྒྱུད་ལ་ཡོད་པའི་རྟོག་པ་རྣམས་བསལ་ཏེ། སླར་འོད་ཀྱི་གནས་སྟོན་པའི་ལྗགས་སུ་ཐིམ་པར་གྱུར་ཏོ། །དབང་གི་དོན་དུ་ན། བཅོམ་ལྡན་འདས་ཡབ་ཡུམ་གྱིས་ཐབས་ཤེས་རབ་རོལ་པའི་ཐིག་ལེ་གཟི་མདངས་ཅན་བདེ་བའི་རོ་དང་མཚུངས་པར་ལྡན་པ་སྟོན་པའི་ངོ་བོ་དེ་རྡོ་རྗེའི་ཞལ་གྱི་མདངས་ལས་ཕྱུངས་པས། ཐིག་ལེའི་འོད་ཟེར་དེ་དག་རྡོ་རྗེའི་ཡེ་ཤེས་ཀྱི་ངང་དུ་འདུས་པའི་གཉིས་མེད་ཀྱི་འོད་མང་པོར་རྟོག་ཚོགས་ཀུན་ཞི་ཞིང་གཅིག་ཏུ་འདྲེས་ཏེ་འཁྱིལ་བ་དང༌། རྣམ་པར་མི་རྟོག་པའི་ཡེ་ཤེས་འོད་གསལ་བས་མཛེས་ཤིང་བདེ་བ་ཆེན་པོའི་རོས་གང་བས་འཁོར་ཐམས་ཅད་རང་རང་སོ་སོའི་རིག་པ་དགའ་བདེའི་རོ་ཅན་དུ་གྱུར་པས་རངས་པར་བྱས་ནས། བདེ་བའི་ཉམས་རྙེད་དེ་དགྱེས་པའི་རོས་ཚིམ་ནས་སྣོད་ཀྱི་རྒྱུད་ལ་ཡོད་པའི་རྟོག་པ་རྣམས་རྣམ་པར་སྦྱངས་ཏེ། ཐིག་ལེ་དྲངས་ནས་སླར་འོད་ཀྱི་གནས་སུ་བཟློག་པས་རང་རང་གི་གནས་ཐ་དད་པར་ཐིམ་སྟེ། བུམ་པ་ཆུས་གང་བ་ལྟར་བདེ་བའི་རོ་དང་བཅས་པས་ལུས་གང་བར་གྱུར་ཏོ། །དེ་ལྟར་ཡེ་ཤེས་རང་གནས་བདེན་པའི་ཚིག་གིས་དབང་བསྐུར་ཏེ་ཟབ་མོའི་སྣོད་དུ་གྱུར་ཏོ།།

ལྔ་པ་རྒྱུད་བཤད་པའི་ཚུལ་ནི།

ལང་ཀའི། ཞེས་པ་ནས། ངོ་བོར་བཞུགས་སོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེ། མི་གནས་པའི་ཡེ་ཤེས་ཆེན་པོའི་ཀློང་ནས་ངེས་པར་བཞེངས་ནས། སེང་གེ་རྣམ་པར་རྒྱལ་བའི་སྒྲ་ལྟ་བུས་དོན་གྱི་བཀོད་པ། བརྟགས་ཀྱི་རོལ་པ། གསང་བའི་ངེས་པ། བཀའི་འགྲེལ་པ། ཆོས་ཀྱི་མེ་ལོང་། གཏན་ཚིགས་ཀྱི་འབྱུང་གནས། དགོངས་པ་ཀུན་འདུས་རྡོ་རྗེ་རྣམ་པར་བསྒྱིངས་པའི་གཞུང་ཆེན་པོའི་སྒྲ་འདི་ཕྱུང་ངོ་། །ཨ་ཧཱུཾ་མཱུཾ་ཞེས་གསུངས་ནས། ཅང་མི་གསུང་། རབ་ཏུ་མི་གསུང་། གསུངས་པ་མི་འགོག འགོག་པ་མ་ཡིན། མ་གསུངས་པ་ཉིད་ན་རྒྱ་ཆེར་བཤད་པའི་ངོ་བོར་བཞུགས་སོ།།

དེ་ནས་རིགས་ཀྱི་བདག་པོ་ཕྱག་ན་རྡོ་རྗེ་ལ་སོགས་པའི་འཁོར་དབང་ཐོབ་པ་ལ་རྒྱུད་བཤད་པ་ཉིད། གསང་བ་པས་ལᩏ་ཀའི་བདག་པོ་ཞེས་སྡུད་པ་པོ་ལ་བོས་ནས་ལོ་རྒྱུས་སུ་བརྗོད་པ་ནི། དེ་ནས་སྟོན་པ་ཆེན་པོ་༼༣༥༦༽བཅོམ་ལྡན་འདས་གསང་བ་མཆོག་གི་བདག་པོ་དེ་ཡི་ཐུགས་མཚན་ཉིད་ཐམས་ཅད་དང་བྲལ་བའི་མི་གནས་པའི་ཡེ་ཤེས་ཆེན་པོའི་དབྱིངས་ཀྱི་ཀློང་ནས། སྐུ་མངོན་དུ་སྣང་བར་ངེས་པར་བཞེངས་པར་མཛད་ནས་ཐམས་ཅད་ཟིལ་གྱིས་གནོན་པས་སེང་གེ་རྣམ་པར་རྒྱལ་བའི་སྒྲ་ལྟ་བུས་གསུང་གིས་བཀའ་སྩལ་པའི་དོན་གང་ཞེ་ན། རྒྱུད་ཀྱི་མཚན། སེམས་ཀྱི་དཀྱིལ་འཁོར་འོད་གསལ་བ་ཇི་བཞིན་པའི་ཡེ་ཤེས་ཆེན་པོ་ལ་བསྒྲུབ་བྱ་དང་ཤེས་བྱའི་དོན་གྱི་སྙིང་པོ་ཇི་སྙེད་པ་མ་བཙལ་ལྷུན་གྱིས་གྲུབ་པར་རྫོགས་པས་བཀོད་པ་ཕུན་སུམ་ཚོགས་པ་དེ་ཉིད་མ་སྦས་མ་གབ་པར་འདོགས་སུ་གནང་བའི་སྒོ་ནས་ཚིག་དང་ཡི་གེར་བསྟན་པའི་གཟུགས་བརྙན་འདི་ཡང་དེ་བཞིན་ནོ། །མཛད་པ་རིལ་ལྷུན་གྱིས་གྲུབ་པའི་བྱང་ཆུབ་ཀྱི་སེམས་དེ་ཉིད་གདུལ་བྱ་ལ་རྟགས་ཀྱི་རོལ་པར་རང་སྣང་བའི་ཞི་བའི་དཀྱིལ་འཁོར་དང༌། ཁྲོ་བོའི་དཀྱིལ་འཁོར་དུ་སྣང་ནས་ཇི་ལྟར་འདུལ་བའི་དོན་མཛད་པ་དང༌། དམ་པ་རྣམས་ཀྱི་གསང་བའི་མཛོད་གསུམ་གྱི་ནང་ནས་ཡང་ངེས་དོན་དམ་པ་ཡིན་པའི་ཕྱིར་དང༌། རྒྱུད་ལུང་མན་ངག་གི་བཀའ་ཡི་གནས་ཀུན་གཏན་ལ་འབེབས་པའི་འགྲེལ་པ་ཡིན་པའི་ཕྱིར་དང༌། ཆོས་རྣམས་ཀྱི་ཇི་ལྟ་བ་ཉིད་གསལ་བར་སྟོན་པའི་དོན་དུ་མེ་ལོང་གི་གཟུགས་བརྙན་ལྟར་ཇི་བཞིན་དུ་མ་འདྲེས་ལ་ཡོངས་སུ་རྫོགས་པའི་ཕྱིར་དང༌། ཆོས་རྟགས་ཀྱི་གཏན་ཚིགས་བཞི་དང་སྒོ་གསུམ་གྱི་ལྡེའུ་མིག་གསུམ་པོ་ཐམས་ཅད་གསལ་བར་འབྱུང་བའི་གནས་སུ་གྱུར་པའི་ཕྱིར་དང༌། རྒྱལ་བ་རིལ་གྱི་དགོངས་པ་ཐམས་ཅད་ཀྱི་དོན་གྱི་མདོ་ཀུན་འདུས་པའི་ཕྱིར་དང༌། ཇི་བཞིན་པའི་གསང་བ་ཉིད་མི་ཕྱེད་པས་རྡོ་རྗེ་རང་བྱུང་འདུས་མ་བྱས་པ་ལ་ཡོན་ཏན་དང་འབྲས་བུ་ཐམས་ཅད་མ་བརྩལ་བར་རྫོགས་པས་རྣམ་པར་བསྒྱིངས་ཏེ་བརྗིད་པའི་རྒྱུད་དང༌། ཐེག་པའི་ལུགས་ཀྱི་གཞུང་དམ་པ་རྣམས་མ་འཁྱར་བའི་དོན་ཆེན་པོ་ཐེག་པའི་རྒྱལ་པོའི་རྩ་བ་ཉིད་བཤད་པའི་སྒྲ་ཡི་གསང་བ་འདི་བྱུང་ངོ༌།།

ༀ་ཧཱུྃ་མཱུྃ་ཞེས་གསུངས་པ། བཤད་པའི་མཚན་དང་ཆེ་བ་ཇི་ལྟར་བསྟན་ཀྱང་ཡི་གེ་གསུམ་བཤད་པ་གཞན་དཀྱིལ་འཁོར་རྣམ་གསུམ་གྱི་དོན་གྱི་ངོ་བོ་བརྡས་བསྟན་པ་དེར་འདུས་པས་ཡི་གེའི་དོན་གསུམ་གྱི་མཚན་བརྒྱད་དུ་ཡོན་ཏན་གྱི་ཁྱད་པར་གྱིས་བསྒྲངས་པའོ། །འོན་ཀྱང་མདོ་དེ་དག་ཙམ་བརྗོད་པས་གསང་བདག་ལ་སོགས་པའི་སྒྲིབ་པ་མཐའ་སྤངས་ཀྱི་འཁོར་རྩལ་ཆེན་པ་རྣམས་ཀྱིས་རྒྱས་པར་གོ་བར་འགྱུར་རོ།།

གཞན་དུ་༼༣༥༧༽ན། ཨ་ཡབ་མཱུྃ་ཡུམ་ཧཱུྃ་གཉིས་སུ་མེད་པའི་སྒོ་ནས་ཡེ་ཤེས་ཆེན་པོ་གསང་བ་མཆོག་གི་རྒྱུད་ཀྱི་དོན་འབྱུང་བའི་བརྡ་སྟེ། དངོས་སུ་བརྗོད་པ་ནི་མ་ཡིན་ནོ། །དེ་ཡང་སྟོན་པས་ངོ་བོ་ཉིད་ཀྱི་ངང་ལས་ཚིག་ཅང་མི་གསུང་ཞིང༌། ཆོས་སྐུའི་ཀློང་ནས་རབ་ཏུ་མི་གསུང་སྟེ། གསུང་བའི་རྩོལ་རྟོག་མི་མངའ་བའི་ཕྱིར་རོ། །ལོངས་སྐུའི་དགོངས་པ་བདེན་པ་རེས་མོས་བྲལ་བས་མི་གཡོ་བ་ཆེན་པོ་ལ་གདུལ་བྱའི་ངོར་བསྟན་པའི་དོན་བཀའ་སྩལ་བའི་གསུང་པ་མི་འགོག་ལ། སྤྲུལ་སྐུའི་བརྗོད་པ་ཚིག་གི་གསུང་འགོག་པ་མ་ཡིན་ཏེ་ཇི་ལྟར་འདུལ་བ་བཞིན་དུ་བཀའ་སྩལ་བར་སྣང་ངོ༌། །དེ་ལྟར་ཆེད་དུ་མ་གསུངས་ཏེ་གསུངས་པ་མི་མངའ་བ་ཉིད་ནའང་བསམ་གྱིས་མི་ཁྱབ་པར་རྒྱ་ཆེར་བཤད་པའི་ངོ་བོར་གང་ལའང་མི་གནས་པར་བཞུགས་སོ།།

གསུམ་པ་ཞབས་བསྡུ་བ་ནི།

ལག་ཀའི། ཞེས་པ་ནས། ཞེས་བྱའོ། །ཞེས་པའི་བར་གྱིས་བསྟན་ཏེ།

ལངྐའིབདག་པོ་དེ་དག་ནི་རྩ་བ་སྦྱོར་བའི་ཡན་ལག་ཅེས་བྱའོ།།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། བཤད་པ་དེ་དག་ནི་རྩ་བ་གླེང་སློང་བའི་སྦྱོར་བ་བསྟན་པ་འབྱུང་བའི་ཡན་ལག་ཅེས་བྱའོ། །ཞེས་གླེང་བསླང་བའི་ངོ་བོ་བསྟན་པའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྩ་བ་སྦྱོར་བའི་ཡན་ལག་བསྟན་པའི་ལེའུ་སྟེ་བཞི་བཅུ་བརྒྱད་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྩ་བ་སྦྱོར་བའི་ཡན་ལག་གླེང་བསླང་པའི་ཚུལ་བསྟན་པའི་ལེའུ་སྟེ། བཞི་བཅུ་རྩ་བརྒྱད་པ་ཉིད་རྣམ་པར་བཤད་པའོ།། །།

ལེའུ་ཞེ་དགུ་པ་འབྲེལ་བ་དགོས་ཆེད་ཀྱི་ཡན་ལག་བསྟན་པ།

༈ གསུམ་པ་འབྲེལ་བའི་ཡན་ལག་བཤད་པ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། ཆེད་དུ་བརྗོད་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་འབྲེལ་བའི་ཡན་ལག་གང་ཞེ་ན། གང་དང་གང་དག་རྟག་ཏུ་འབྲེལ་བ་སྟེ། དེ་ནི་འདི་ལྟར་ཆེད་དུ་བགྲོ་བ་ཆེད་དུ་བརྗོད་པར་བྱའོ།།

ལེའུ་འདིས་ངེས་དོན་དང་དྲང་དོན་གཉིས་ཀ་སྟོན་ནོ། །དེ་ནས་སྟོན་པ་གསང་བདག་ཆེན་པོས། ཡན་ལག་གསུམ་པ་རྒྱས་པར་བསྟན་པའི་ཕྱིར། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། དེ་ལ་བསྟན་པ་འབྱུང་བའི་དགོས་པ་དང་འབྲེལ་བའི་ཡན་ལག་གང་ཞེ་ན། གང་རྒྱུ་དང་ཐབས་ཀྱི་དངོས་གཞི་དང༌། གང་འབྲས་བུ་དང་ཐབས་ལས་བྱུང་བའི་དངོས་པོ་རྣམས་མེད་ན་མི་འབྱུང་བར་ངེས་ཏེ་འབྲེལ་ཞིང་རྗོད་བྱེད་དང་བརྗོད་བྱ་ཡང་དེ་ལྟར་རྟག་ཏུ་འབྲེལ་བ་ནི་ངོ་བོ་སྟེ། དེ་ཡི་དོན་ནི་འདི་ལྟར་ཉེ་བར་བྱུང་བ་གང་ཡིན་པ་སྡུད་པ་པོ་ཁྱོད་ཀྱིས་གོ་བར་བྱ་བའི་དགོས་ཆེད་ཀྱི་དོན་དུ་སྟོན་པ་ངས་རྒྱས་པར་བགྲོ་བ་ཆེད་དུ་བརྗོད་དེ་བསྟན་པར་བྱའོ། །ཞེས་ཞལ་གྱིས་བཞེས་པའོ།།༼༣༥༨༽

གཉིས་པ་རྒྱས་པར་བཤད་པ་ལ་བཞི་སྟེ། འབྲེལ་བ་བཤད་པ། དགོས་པ་བསྟན་པ། རྗོད་བྱེད་བཤད་པ། བརྗོད་བྱ་བསྟན་པའོ། །དང་པོ་ལ་གཉིས་ཏེ། ཐབས་དང་ཐབས་བྱུང་གི་འབྲེལ་བ་བཤད་པ། རྒྱུ་དང་འབྲས་བུར་འབྲེལ་བ་བསྟན་པའོ། །དང་པོ་ལ་བཞི་སྟེ། སྟོན་པས་རྡོ་རྗེ་སེམས་དཔའ་ལ་ཤོད་ཅིག་པར་བསྐུལ་བ། སེམས་དཔའ་རྡོ་རྗེས་འཆད་པའི་དབང་ཞུས་པ། སྟོན་པས་འཆད་པའི་བཀའ་སྡོད་སྐྱེས་བུར་དབང་བསྐུར་བ། ཐབས་ལས་བྱུང་བ་དབང་གི་ཡོན་ཏན་ནོ། །དང་པོ་ནི།

ལང་ཀའི། ཞེས་པ་ནས། བསྐུལ་བ་རྣམ་པར་མཛད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ནས་བདག་དེའི་ཚེ་དེའི་དུས་ན་དམ་ཚིག་ཆེན་པོ་རྡོ་རྗེ་སེམས་དཔར་གྱུར་པ་ལ། བཅོམ་ལྡན་འདས་གསང་བ་མཆོག་གི་བདག་པོ་དེས། ཐེག་པ་ཆེན་པོ་གསང་བའི་དོན་བདག་ཉིད་ཀྱིས་རྒྱ་ཆེར་ཆེད་དུ་བརྗོད་པ་ཆེད་དུ་བརྗོད་གཅིག་པར་དགོངས་པའི་ཕྱིར། བདག་ལ་ཉི་ཚེར་ཞལ་འདུད་པར་གཟིགས་ཏེ། འཛུམ་པས་བསྐུལ་བ་རྣམ་པར་མཛད་དོ།།

དགོས་འབྲེལ་བཞི་ལས་རྗོད་བྱེད་འཆད་པའི་སྐྱེས་བུ་ཉིད་ཀྱི་དོན་བསྟན་པའི་ཕྱིར། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། གླེང་བསླང་བ་དེ་ནས་མདུན་བསུ་བ་ལྟ་བུར། གསང་བའི་མཛོད་འཛིན་ཕྱག་ན་རྡོ་རྗེ་བདག་ཉིད་ལ་སྟོན་པས་དབང་བསྐུར་ནས་རྒྱུད་བཤད་པའི་དུས་གཉིས་འཛོམ་པ་དེའི་ཚེ་དེའི་དུས་ན། བདག་གི་མཚན་དམ་ཚིག་ཆེན་པོ་རྡོ་རྗེ་སེམས་དཔའ་ཞེས་བྱ་བར་གྱུར་པ་ལ། སྟོན་པ་བཅོམ་ལྡན་འདས་རིགས་བདག་ཀུན་ཏུ་བཟང་པོ་གསང་བ་མཆོག་གི་བདག་པོ་དེས། དགོས་པ་གང་གི་ཕྱིར་ན། གདུལ་བྱ་རྣམས་འབྲས་བུའི་གོ་འཕང་མཆོག་ལ་སྐྱོལ་བས་ཐེག་པ་ཆེན་པོ་དངོས་པོའི་གནས་ལུགས་ཇི་བཞིན་པར་སྟོན་པས་གསང་བའི་དོན་བླ་ན་ མེད་པ་ཉིད་འཁོར་གཞན་ལ་ཕྱག་ན་རྡོ་རྗེ་བདག ་ཉིད་ཀྱིས་རིག་པ་ཁྱད་པར་ཅན་ལ་དགོངས་པ་བརྡའི་སྒོ་ནས་རྒྱ་ཆེར་ཆེད་དུ་བརྗོད་པ་དང་གོ་ཕྱེ་བའི་འཁོར་ལ་གསུང་དུ་བསྒྲགས་ནས་འཆད་ཅིང་ཆེད་དུ་བརྗོད་ཅིག་པར་མངའ་གསོལ་ནས་སྟོན་དུ་གཞུག་པར་དགོངས་པའི་ཕྱིར། ཚུལ་ཇི་ལྟར་ན། གཞན་རྣམ་པར་བཅད་དེ་སྟོན་པས་སེམས་དཔའ་རྡོ་རྗེ་བདག་ཉིད་ཁོ་ན་ལ་ཉི་ཚེར་ཞལ་འདུད་པར་སྤྱན་གྱིས་གཟིགས་ཏེ་འཛུམ་པ་མཛད་པས་གསང་བ་མཆོག་གི་ལུང་ཆེན་བཤད་པའི་བསྐུལ་བ་རྣམ་པར་མཛད་དོ། །འདི་ཉིད་ཤུགས་ལ་སྟོན་པས་གླེང་བསླང་བར་ཡང་འགྲོའོ།།

གཉིས་པ་སེམས་དཔའ་རྡོ་རྗེས་འཆད་པའི་དབང་ཞུས་པ་ནི།

དེ་ནས་བདག ཅེས་པ་ནས། གསོལ་བ་བཏབ་པ་ལས། ཞེས་པའི་བར་གྱིས་བསྟན་ཏེ།

དེ་ནས་བདག་དམ་ཚིག་ཆེན་པོ་རྡོ་རྗེ་སེམས་དཔའ་ཞེས་བྱ་བར་སྣང་བ་དེས་ཡང་དག་པར་བསྐུལ་བར་རྣམ་པར་རིག་ནས་རང་གི་སྟན་ལས་ལངས་ཏེ། རང་གི་མཚན་མ་གནས་ལྔར་རེག་པར་བྱས་ནས། ཐེག་པ་ཆེན་པོ་དེ་ཁོ་ན་ཉིད་རྒྱ་ཆེར་བརྗོད་པར་བྱ་བའི་ཆེད་དུ། ལྕེ་པདྨའི་སྟེང་དུ་བཞག་སྟེ། ཤིན་ཏུ་གུས་པས་ལུས་ཀྱི་བག་བཞི་ས་ལ་ཕབ་པའི་ཕྱག་རྣལ་འབྱོར་ལུགས་སུ་བྱས་ནས། སེང་གེའི་ལྟ་སྟངས་ཀྱིས་སྟོན་པའི་ཞལ་ལ་བལྟས་ཏེ་འདི་སྐད་དུ་གསོལ་ཏོ། །རྡོ་རྗེ་རྒྱལ་པོ་ཚོགས་བདག་དགོངས་སུ་གསོལ། །ཆོས་ཀྱི་རྒྱལ་པོ་མི་གཡོ་རྒྱལ་ཚུལ་མཛད། །རྒྱལ་མཆོག་བདེ་ཆེན་ས་ལ་རབ་བཞུགས་ཏེ། །སྨྲ་བའི་ལས་མཆོག་རྡོ་རྗེ་ལྕེ་འབར་བར། །སྒྲ་དབྱངས་རྒྱལ་པོ་རྣམས་ཀྱིས་བདག་བྱིན་རླབས། །གསང་སྔགས་རྒྱལ་པོ་ཆོས་ཀྱི་མེ་ལོང་འདི། །རྒྱལ་མཆོག་ཆོས་ཀྱི་རྒྱལ་པོ་ཉིད་ཀྱི་མཐུས། །འདུས་པའི་ཚོགས་ལ་རྒྱ་ཆེར་བརྗོད་པར་འོས། །ཨ་ཧོ་ཞེས་གསོལ་བ་བཏབ་པས།

དེ་ནས་དུས་དེར་བདག་གི་མཚན་དམ་ཚིག་ཆེན་པོ་རྡོ་རྗེ་སེམས་དཔའ་ཞེས་བྱ་བར་གྲགས་ཤིང་སྡུད་པ་པོར་སྣང་བ་དེས། སྟོན་པས་བརྡའི་སྒོ་ནས་རྒྱུད་འཆད་པར་ཡང་༼༣༥༩༽དག་པར་བསྐུལ་བར་རྣམ་པར་རིག་ཅིང་ཤེས་ནས། སྟོན་པ་ལ་འཆད་པའི་དབང་ནོད་པའི་ཕྱིར། བདག་སེམས་དཔའ་རྡོ་རྗེ་རང་གི་སྟན་ལས་ལངས་ཏེ། རང་གི་ཐུགས་མཚོན་པའི་རྟགས་ཀྱི་མཚན་མ་རྡོ་རྗེ་རྒྱ་གྲམ་དེ་ཡིས་བདག་ཉིད་ཀྱི་སྤྱི་བོ་ལ་སོགས་པ་གནས་ལྔར་རིག་པར་བྱས་ནས། གསང་སྔགས་ཐེག་པ་ཆེན་པོའི་དོན་གྱི་དེ་ཁོ་ན་ཉིད་མ་ནོར་བར་རྒྱ་ཆེར་བརྗོད་པར་བྱ་བའི་ཆེད་དུ། ངག་རྡོ་རྗེར་བྱིན་གྱིས་བརླབ་ཅིང་ཁྱད་པར་དུ་ཡང་བདག་གི་ལྕེ་ཉེས་པའི་སྐྱོན་གྱིས་མ་གོས་པར་འཆད་པའི་རྟགས་ཆུ་སྐྱེས་པདྨའི་དཀྱིལ་འཁོར་དུ་གསལ་བའི་སྟེང་དུ་རྡོ་རྗེ་རྒྱ་གྲམ་བཞག་སྟེ། སྒོ་གསུམ་ཤིན་ཏུ་གུས་པའི་ཚུལ་གྱིས་ལུས་ཀྱི་བག་བཞི་དང་ལྟོ་བ་ས་ལ་ཕབ་པའི་བརྐྱང་ཕྱག་རྣལ་འབྱོར་གྱི་ཐེག་པ་གསང་ཆེན་ནང་པའི་ལུགས་སུ་བྱས་ནས། བག་ཚ་བ་དང་འཇིགས་པ་མེད་པས་སེང་གེའི་ལྟ་སྟངས་ཀྱིས་སྟོན་པའི་ཞལ་དུ་བལྟས་ཏེ་འདི་སྐད་ཅེས་གསོལ་ཏོ།།

རྡོ་རྗེ་གསུམ་མི་ཕྱེད་པའི་མངའ་བདག་མཐའ་ཀུན་ལས་རྒྱལ་བའི་མ་འདྲེས་ཡོངས་རྫོགས་ཀྱི་ངོ་བོ་འཁོར་འདུས་པའི་ཚོགས་ཀྱི་གཙོ་བདག་ཆེན་པོ་ཉིད་བདག་ལ་ཐུགས་བརྩེ་བས་དགོངས་སུ་གསོལ། སྟོན་པ་ཆོས་ཀྱི་རྒྱལ་པོ་དགོངས་པ་མི་གཡོ་ཞིང་བསྐྱོད་པ་མེད་པས་བརྗིད་པ་ཆེད་དུ་བསྒྲུབ་པ་མེད་པར་རྗེ་རྒྱལ་མཆོག་གི་ཚུལ་ལུགས་སུ་མཛད་པ་ཁྱོད་ཉིད། རྒྱལ་མཆོག་ཀུན་ཏུ་བཟང་པོ་བདེ་བ་ཆེན་པོའི་ལོངས་སྤྱོད་ལ་རོལ་པའི་ས་མཆོག་ཁྱབ་གདལ་ལྷུན་རྫོགས་ལ་རབ་ཏུ་བཞུགས་ཏེ་ཅི་ཡང་མི་གསུང་ལ། འོན་ཀྱང་སེམས་དཔའ་རྡོ་རྗེ་བདག་ནི་ཆོས་སྨྲ་བའི་ལས་ཆེན་གསང་སྔགས་སྟོན་པ་མཆོག་ཏུ་རྣམ་པར་བསྐུལ་བས། རྡོ་རྗེ་ལྟ་བུའི་ལྕེ་འོད་དུ་འབར་བས་ཅིར་ཡང་སྒྲོགས་ཏེ་དོན་མཚོན་པ་འདི་ཉིད། གསུང་ཆོས་ཀྱི་སྒྲ་དབྱངས་ཀྱི་མངའ་བདག་ཕྱོགས་བཅུ་དུས་བཞིའི་རྒྱལ་བ་རིགས་ཀྱི་བདག་པོ་རྣམས་ཀྱིས་བྱིན་གྱིས་བརླབ་སྟེ་བདག་འཆད་པའི་མཐུ་དང་ལྡན་པར་བྱིན་གྱིས་རློབས་པར་གྱིས་ཤིག་ཅེས་གསོལ་བ་བཏབ་པ་དང༌། གསང་སྔགས་ཐམས་ཅད་ཀྱིའང་རྒྱལ་པོ་རྒྱུད་མཆོག་ཐུན་མོང་མ་ཡིན་པ་མདོ་ཆེན་པོ་ཆོས་ཀྱི་མེ་ལོང་འདི་ཉིད། རྒྱལ་བ་སངས་རྒྱས་ཐམས་ཅད་ཀྱི་ཡང་རབ་མཆོག་དབང་ཕྱུག་ཆེན་པོ་ཆོས་ཀྱི་རྒྱལ་པོ་ཉིད་ཀྱི་སྐུ་གསུང་ཐུགས་ཀྱི་བྱིན་རླབས་ཀྱི་མཐུས། བདག་གིས་འདུས་པའི་འཁོར་ཚོགས་རྣམས་ལ་རྒྱ་ཆེར་བརྗོད་པར་འོས་པས་བཤད་པར་རིགས་སོ། །ཞེས་གསོལ་ཏེ། ཨ་ཧོཿཞེས་དགྱེས་༼༣༦༠༽པ་སྐྱེད་པའི་སྒྲ་དང་བཅས་པར་ཞུས་པས་གསོལ་བ་བཏབ་པ་ལས།

གསུམ་པ་སྟོན་པས་འཆད་པའི་བཀའ་སྡོད་སྐྱེས་བུར་དབང་བསྐུར་བ་ནི།

གསང་བ་མཆོག་གི ཞེས་པ་ནས། ལག་ཏུ་བབས་པར་གྱུར་ནས། ཞེས་པའི་བར་གྱིས་བསྟན་ཏེ།

གསང་བ་མཆོག་གི་བདག་པོ་དེས། བདག་རྡོ་རྗེ་ལས་ཀྱི་བཀའ་བར་བསྒོ་བ་དེ། རྡོ་རྗེ་བརྗོད་པ་ཆེན་པོར་བྱིན་གྱིས་བརླབས་པའི་ཕྱིར། རྡོ་རྗེ་རྣམ་པར་འཕྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ལྗགས་ཀྱི་འོད་ཟེར་ལས། བཛྲ་ཀརྨ་སཏྭ་ཙཀྲ་ཧ་ཧ་ཧཾ། ཞེས་རྡོ་རྗེ་རྒྱ་གྲམ་གྱིས་འཁོར་ལོ་འབར་བ། སེམས་དཔའ་རྡོ་རྗེ་ཁོ་ན་བདག་དེའི་ལག་ཏུ་འབབ་པར་གྱུར་ནས།

དེ་ནས་སྟོན་པ་ཀུན་ཏུ་བཟང་པོ་གསང་བ་མཆོག་གི་མངའ་བདག་ཆེན་པོ་དེས། བདག་གསང་བ་འཛིན་པ་ཉིད་གསང་ཆེན་རྡོ་རྗེ་ཐེག་པ་ཡང་དག་པར་འཆད་པའི་ལས་བྱེད་ཀྱི་སྐྱེས་བུར་ལས་གཉེར་གཏད་དེ་བཀའ་སྡོད་དམ་པར་བསྒོ་བ་དེ། གསང་སྔགས་རྡོ་རྗེ་རྒྱལ་པོའི་ཐེག་པ་རྒྱ་ཆེར་སྨྲ་ཞིང་བརྗོད་པ་ཆེན་པོར་བྱིན་གྱིས་བརླབ་ནས་སྟོབས་དང་ལྡན་པར་བྱ་བའི་ཕྱིར། སྟོན་པ་ཉིད་རྡོ་རྗེ་གསུམ་དབྱེར་མེད་པའི་ངང་ལས་གསང་སྔགས་ཀྱི་བསྟན་པ་ཟབ་མོ་རྣམ་པར་འཕྲོ་ཞིང་འབྱུང་བ་ཞེས་བྱ་བའི་ཏིང་ངེ་འཛིན་གྱི་དགོངས་པ་ལ་སྙོམས་པར་ཞུགས་ནས་ལྗགས་ཀྱི་འོད་ཟེར་ལས། བཛྲ་ཀརྨ་ས་ཏྭ་ཙཀྲ་ཧ་ཧ་ཧྃ། ཞེས་གསུངས་ཏེ། སྔགས་ཀྱི་དོན་ཀྱང༌། རྡོ་རྗེ་རྒྱ་གྲམ་གྱི་འཁོར་ལོ་འོད་འབར་བ་ཞིག་བྱུང༌། ཞེས་པ་སྟེ། དེའང་ས་ཏྭའི་སྒྲ་ལས་སེམས་དཔའ་འམ་བརྟན་པ་སྟེ། རྡོ་རྗེ་གསུམ་མི་ཕྱེད་པར་བརྟན་པས་ཕྲིན་ལས་ཀྱི་སེམས་དཔའ་ཆེན་པོར་བྱིན་གྱིས་རློབས་པས་དབང་གི་རྫས་རྡོ་རྗེ་རྒྱ་གྲམ་གྱི་འཁོར་ལོ་འོད་འབར་བ་ཞིག་དབྱུང་ནས། སེམས་དཔའ་རྡོ་རྗེ་ཁོ་ན་བདག་ཉིད་དུ་གྱུར་བ་དེའི་ལག་ཏུ་ངེས་པར་བབས་པར་གྱུར་ནས་འཆད་པའི་དབང་ཐོབ་པས་སྟོན་པ་དང་སྐྱེས་བུ་ཐབས་དང་ཐབས་བྱུང་གི་ཚུལ་དུ་འབྲེལ་བའོ། །འདི་ལ་ཀུན་ཏུ་འདུས་ཀྱི་འཆད་ཚུལ་གཅིག་ལ། སྔ་ནས་ཕྱག་མཚན་དུ་རྡོ་རྗེ་རྩེ་ལྔ་པ་གཅིག་བསྣམས་པ་ལ། ཕྱིས་རྡོ་རྗེས་དབང་བསྐུར་བ་གཉིས་ལྟེ་བ་བསྣོལ་བས་རྡོ་རྗེ་རྒྱ་གྲམ་དུ་གྱུར་པར་འཆད་པ་ཞིག་ཀྱང་བྱུང་ངོ༌།།

བཞི་པ་ཐབས་ལས་བྱུང་བ་དབང་གི་ཡོན་ཏན་ལ་གཉིས་ཏེ། ཆོས་འཆད་པའི་ནུས་པ་དང་ལྡན་པར་གྱུར་པ། འཆད་པའི་སྐྱེས་བུའི་དོན་བྱེད་ཚུལ་ལོ། །དང་པོ་ནི།

ལས་ཀྱི་རྡོ་རྗེའི། ཞེས་པ་ནས། ལྡན་པ་ཆེན་པོར་གྱུར་ཏོ། །ཞེས་པའི་བར་གྱིས་བསྟན་ཏེ།

ལས་ཀྱི་རྡོ་རྗེའི་དབང་ཐོབ་སྟེ། རྣམ་པར་སྨྲ་བ་ཆེན་པོ་ཤིན་ཏུ་སླ་བཀྱལ་པའི་སྤོབས་པ་ཅན་དུ་བྱིན་གྱིས་བརླབས་ནས། ཀུན་ཏུ་མི་བཟོབ་བག་དང་ལྡན་པ་ཆེན་པོར་གྱུར་ཏོ།།

དེ་ལྟར་ཐབས་ལས་བྱུང་བ་འཆད་པའི་ལས་བྱེད་པ་ཉིད་ཀྱི་རྡོ་རྗེའི་དབང་བསྐུར་བ་ཐོབ་སྟེ། བདག་གིས་ཀྱང་དབང་ཐོབ་པའི་རྟགས་དང་ཡོན་ཏན། རྒྱ་ཆེ་བ་གསང་སྔགས་ཀྱི་ཆོས་ཀྱི་རྣམ་གྲངས་སྣ་ཚོགས་པ་སོ་སོའི་བྱེ་བྲག་མ་འདྲེས་པར་སྟོན་པའི་རྣམ་པར་སྨྲ་བ་ཆེན་པོར་གྱུར་ནས། ལུང་ཆེན་གསང་བའི་རྒྱུད་འདིའི་དོན་ཐོགས་པ་མེད་པར་འཆད་པའི་ཤིན་ཏུ་བླ་བཀྱལ་བའི་སྤོབས་པ་ཅན་དུ་བྱིན་གྱིས་བརླབས་པར་༼༣༦༡༽མཛད་པས་གསང་སྔགས་ཀྱི་བདག་པོར་གྱུར་ནས། དུས་ཐམས་ཅད་ནས་ཐམས་ཅད་ཀུན་ཏུ་ བདག་གི་སྒོ་གསུམ་གྱི་སྤྱོད་པ་ཆེད་དུ་བསྡམས་པ་མེད ་པར་མི་གཟོབ་པ་འདྲ་བར་སྣང་ཡང༌། ངོ་བོ་ལོག་པར་གྱུར་ཏེ་འཁྲུལ་བ་མི་འབྱུང་བར་རབ་ཏུ་བག་དང་ལྡན་པ་ཆེན་པོར་གྱུར་ཏོ། །དེ་ལྟར་དབང་ཐོབ་པ་ནི་དགོས་འབྲེལ་བཞི་ལས་ཐབས་དང་ཐབས་བྱུང་གི་འབྲེལ་བའི་ཚུལ་ལོ།།

གཉིས་པ་འཆད་པའི་སྐྱེས་བུའི་དོན་བྱེད་ཚུལ་ནི།

དེ་ནས་བདག ཅེས་པ་ནས། རྣམ་པར་གནས་སོ། །ཞེས་པའི་བར་གྱིས་བསྟན་ཏེ།

དེ་ནས་བདག་རྡོ་རྗེ་སེམས་དཔའ་དེས། ལས་ཀྱི་མཚན་མ་དེ་ལག་ཏུ་བླངས་ནས། རྡོ་རྗེའི་ཚིག་སྣ་ཚོགས་ཀྱིས་ལན་ལྔ་སྟེ། རྣམ་པ་བཅུ་གཉིས་སུ་བསྐོར་ནས། གྲངས་གཉིས་དང་ལྔར་བསྒྱུར་ནས། ཞིང་ཁམས་མཐའ་དག་རྣམ་པར་གཡོས་ཏེ། གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། ལྡེག རབ་ཏུ་ལྡེག ཀུན་ཏུ་རབ་ཏུ་ལྡེག འཁྲུགས། རབ་ཏུ་འཁྲུགས། ཀུན་ཏུ་རབ་འཁྲུགས། འུར། རབ་ཏུ་འུར། ཀུན་ཏུ་རབ་ཏུ་འུར། ཆེམ། རབ་ཏུ་ཆེམ། ཀུན་ཏུ་རབ་ཏུ་ཆེམ། མཐའ་མཐོ་ན་ནི་དཔུང་དམའ། དཔུང་མཐོ་ན་ནི་མཐའ་དམའ། ཤར་མཐོ་ན་ནི་ནུབ་དམའ། ནུབ་མཐོ་ན་ནི་ཤར་དམའ། ལྷོ་མཐོ་ན་ནི་བྱང་དམའ། བྱང་མཐོ་ན་ནི་ལྷོ་དམའ་བར་གྱུར་ཏེ། ཞིང་ཁམས་ཐམས་ཅད་བདག་རྡོ་རྗེ་སེམས་དཔའ་ཤ་སྟག་ལྟ་བུར་གྱུར་ནས། གསང་སྔགས་ཀྱི་ངོ་བོ་ཉིད་ཕྱིན་ཅི་མ་ལོག་པའི་ཚུལ་གྱིས་རྒྱ་ཆེར་བརྗོད་པའི་སྒྲ་རྣམ་པར་བརྗོད་དོ། །བདག་སེམས་དཔའ་རྡོ་རྗེ་ཉིད་རྣམ་པར་རྔོམ་པའི་ཚུལ་གྱིས་སྟོན་པའི་མདུན་ལོགས་སུ་སེང་གེའི་རྡོ་རྗེས་མཚན་པའི་ཁྲི་ལ་འགྱིང་

བག་གི་ཚུལ་གྱིས་རྣམ་པར་གནས་སོ།།

དེ་ནས་འཆད་པའི་ནུས་པ་དང་ལྡན་པར་གྱུར་པའི་བདག་རྡོ་རྗེ་སེམས་དཔའ་དེས། དབང་ཐོབ་པའི་རྫུ་འཕྲུལ་གྱི་ཆོ་འཕྲུལ་གྱིས་འཁོར་རྣམས་སྤྲོ་བ་བསྐྱེད་དེ་ཞིང་ཁམས་དག་པ་ཆེན་པོར་བྱིན་གྱིས་རློབས་པའི་ཕྱིར། འཆད་པའི་ཕྲིན་ལས་ཀྱི་མཚན་མ་རྡོ་རྗེ་རྒྱ་གྲམ་དེ་ཉིད་ལག་ཏུ་བླངས་ནས། ཆོས་བཤད་པའི་ཕྱིར། རྡོ་རྗེ་ཐེག་པའི་དམ་᪍འི་ཆོས་བརྡ་ཚིག་སྣ་ཚོགས་དང་བཤད་ཐབས་མང་པོ་ཉིད་ཀྱིས་སྐུ་གསུང་ཐུགས་ཡོན་ཏན་ཕྲིན་ལས་ལྔའི་མཛད་པའི་ཕྱིར། ཆོས་ཀྱི་འཁོར་ལོ་ལན་གྲངས་ལྔ་ལྔར་བསྐྱར་ཞིང་བསྐོར་རོ། །རྣམ་པ་བཅུ་གཉིས་ནི་ཉི་ཤུ་སྟེ། དེ་ལྟར་ཉི་ཤུ་རྩ་ལྔར་བསྐོར་བ་ནི་ལན་གྲངས་ཏེ། དོན་གྱི་གཞི་སྐུ་གསུང་ཐུགས་ཡོན་ཏན་ཕྲིན་ལས་ཉི་ཤུ་རྩ་ལྔའི་ཕྱིར་གྲངས་ཐུན་མོང་དུ་བསྟན་ཏེ་སྤྱི་དབང་ངོ༌། ཡང་ན་ལྔ་པ་ལྔ་ལས། དང་པོ་ཆོས་ཐམས་ཅད་ཡེ་ནས་སངས་རྒྱས་པའི་གཏན་ཚིགས་ལྔ། གཉིས་པ་སྐུ་གསུང་ཐུགས་ཡོན་ཏན་ཕྲིན་ལས་ལྔ། གསུམ་པ་ཡེ་ཤེས་ལྔ། བཞི་པ་རིགས་ལྔ། ལྔ་པ་ཆེ་བ་ལྔའོ། །ཞེས་ཀྱང་འབྱུང་ལ། ཆོས་རྗེ་དམ་པ་རིན་པོ་ཆེའི་ཕྱག་མཆན་ལས། སྐུ་རྒྱུད་སངས་རྒྱས་མཉམ་སྦྱོར་ལ་སོགས་པ་ལྔ། དེ་ལས་འཕྲོས་པ་རྣམས་ཀྱང་གསུང༌། ཞེས་འབྱུང༌། རྒྱུད་གཞུང་འདི་ཉིད་ཀྱི་དབང་དུ་ན། ལན་ལྔ་ནི། རྣལ་འབྱོར་རྣམ་པ་ལྔའི་ཆོས་བསྟན་པ་སྟེ། དེ་ཉིད་ཡན་ལག་ས་བཅུ་དང་རྣལ་འབྱོར་བཅུ་སྟེ་རྣམ་པ་བཅུ་ཕྲག་གཉིས་སུ་ཆོས་ཀྱི་འཁོར་ལོ་བསྐོར་ནས་བསྟན་ཏེ། བསྡོམས་པས་ཉི་ཤུ་རྩ་ལྔར་གྱུར་པ་ལ། རེ་རེ་ལའང་བྱེ་བྲག་གི་དབྱེ་བས་གྲངས་བཅུ་ཕྲག་གཉིས་དང་ལྔར་བསྒྱུར་ཏེ་རྨད་དུ་བྱུང་བའི་ཆོས་བསྟན་པས་ཞིང་ཐམས་ཅད་ཀྱི་གཞི་ལྔ་ལས་སྣང་བའི་འཁོར་མང་པོ་རྣམས་ལ་རང་རང་གི་ཐབས་དང་འཚམས་པའི་ཆོས་སུ་སྣང་ཞིང༌། ཀུན་འདུས་ཀྱི་མཆན་ལས། རྡོ་རྗེ་རྒྱ་གྲམ་གྱི་འཁོར་ལོ་བསྐོར་བས་རྩེ་མོ་ཉི་ཤུ་ལས་འོད་ཟེར་གྱི་དྲྭ་བ་ཉི་ཤུས་འགྲོ་བ་ལྔའི་དོན་བྱས་པ་༼༣༦༢༽ལའང་གསུངས་སོ།།

དེ་ལྟར་ཐུན་མོང་མ་ཡིན་པའི་ཆོས་ཀྱི་འཁོར་ལོ་བསྐོར་བས། ཕྱི་ནང་གཉིས་ཀྱི་ཚུལ་དུ་ཞིང་ཁམས་མཐའ་དག་ཐམས་ཅད་རྣམ་པར་གཡོས་ཏེ། ཕྱི་ལྟར་ན། གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་ཏེ་གཡོ་བ་ཚབས་ཆེ་ཆུང་གསུམ་དུ་གྱུར་པ་དང༌། ནང་ལྟར་ན། རིག་པ་ལ་གསང་སྔགས་ཀྱི་རྣལ་འབྱོར་གཡོས་ཏེ་རྩ་བ་ལྔའི་དོན་ལྡང་བ་དང་གཡོ་ཚབས་ཆེ་ཆུང་དུ་གྱུར་པའམ། འདུན་པ་སེམས་པའི་རྣལ་འབྱོར་ལ་གཉིས་ལས་དང་པོའི་སེམས་གོང་དུ་གཡོ་བའམ། དང་པོ་འགྱུར་དབང་མ་ངེས་པའི་ས་ཐོབ་པར་ཡང་གསུངས་ལ། དེ་བཞིན་དུ་སྦྱར་ཏེ། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏེ་འགུལ་ཚབས་ཆེ་ཆུང་གསུམ་དུ་གྱུར་པ་དང༌། རིག་པ་དོན་གྱི་ཕྱོགས་སུ་བསྐྱོད་པའམ། གཉིས་པའི་དུས་ཀྱི་སེམས་གོང་དུ་བསྐྱོད་པའམ། གཉིས་པ་རྟེན་པ་གཞི་ཡི་ས་ཐོབ་པ་དང༌། ལྡེག རབ་ཏུ་ལྡེག ཀུན་ཏུ་རབ་ཏུ་ལྡེག་སྟེ། ལྡེག་ཚབས་ཆེ་ཆུང་གསུམ་དུ་གྱུར་པ་དང༌། ལོགས་སུ་གྱུར་པས་རང་གི་ས་ལ་མི་རྟེན་པས་ས་གོང་མར་འགྲོ་བའམ། རིགས་ཆེན་འབྱེད་པའི་རྣལ་འབྱོར་སྦྱོར་བའི་དུས་ཀྱི་སེམས་གོང་མར་འགྲོ་བའམ། གསུམ་པ་གལ་ཆེན་སྦྱོང་བའི་ས་ཐོབ་པ་དང༌། འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་ཏེ། འཁྲུགས་ཚབས་ཆེ་ཆུང་གསུམ་དུ་གྱུར་པ་དང༌། ས་གོང་མའི་ཡང་གོང་མའི་དོན་རིག་པ་དང་མི་ཕྱེད་པར་གྱུར་བའམ། དབུགས་ཆེན་འབྱིན་པའི་དུས་སུ་གཟུང་འཛིན་གྱི་སྣང་བ་མི་གནས་པའམ། བཞི་པ་བསླབ་པ་རྒྱུན་གྱི་ས་ཐོབ་པ་དང༌། འུར། རབ་ཏུ་འུར། ཀུན་ཏུ་རབ་ཏུ་འུར་ཏེ། འུར་ཚབས་ཆེ་ཆུང་གསུམ་དུ་གྱུར་པ་དང༌། རྣམ་པར་རྟོག་པ་སྐབས་ཀྱི་སྒྲིབ་པ་རྣམས་འཕྱག་པ་དང༌། ལུང་ཆེན་ཐོབ་པའི་དུས། ལུང་བསྟན་གྱི་སྒྲ་སྙན་པའམ། ལྔ་པ་བསོད་ནམས་གཏེར་གྱི་ས་ཐོབ་པ་དང༌། ཆེམ། རབ་ཏུ་ཆེམ། ཀུན་ཏུ་རབ་ཏུ་ཆེམ་སྟེ། ཆེམ་ཚབས་ཆེ་ཆུང་གསུམ་དུ་གྱུར་པ་དང༌། རྣམ་པར་རྟོག་པའི་བག་ཆགས་ཀྱི་སྒྲིབ་པ་ཐམས་ཅད་འཇོམས་པའམ། རྣལ་འབྱོར་ལྔ་མཐར་ཕྱིན་ཏེ་རྩལ་ཆེན་རྫོགས་པར་གྱུར་པའམ། དྲུག་པ་རྟེན་པས་ཁྱད་པར་དུ་འགྲོ་བའི་ས་ཐོབ་པ་དང༌། ཕྱི་ལྟར་ན། མཐའ་མཐོ་ན་དབུས་དམའ། དབུས་མཐོ་ན་མཐའ་དམའ་བ་ནི། ནང་ལྟར་ན་རྟོགས་པ་ཤར་བའི་ལྟས་ཏེ། ལྷུན་གྱིས་གྲུབ་པའི་ཕྲིན་ལས་རྫོགས་པའམ། བདུན་པ་དམིགས་པས་འབྲས་༼༣༦༣༽བུ་སྐྱེ་བའི་ས་ཐོབ་པ་དང༌། ཕྱི་ལྟར་ན། ཤར་མཐོ་ན་ནུབ་དམའ། ནུབ་མཐོ་ན་ནི་ཤར་དམའ་བ་ནི། ནང་དུ། ཞི་བ་དང་དབང་གི་ཕྲིན་ལས་གྲུབ་པའམ། བརྒྱད་པ་གནས་པ་མི་འགྱུར་བའི་ས་ཐོབ་པ་དང་། དེ་བཞིན་དུ། ལྷོ་མཐོ་ན་བྱང་དམའ། བྱང་མཐོ་ན་ལྷོ་དམའ་བར་གྱུར་པ་ནི། རྒྱས་པ་དང་དྲག་པོའི་ཕྲིན་ལས་གྲུབ་པའམ། དགུ་པ་གདལ་བ་ཆོས་ཉིད་ཀྱི་ས་མཆོག་ཐོབ་ནས་སའི་རིམ་པ་མཐར་ཕྱིན་ཏེ། བཅུ་པ་རྫོགས་པ་སྤྱི་ཆིབས་ཀྱི་ས་དམ་པ་མངོན་དུ་བྱས་པས། ཞིང་ཁམས་ཐམས་ཅད་ཀྱི་གདུལ་ཞིང་གི་འཁོར་རྣམས་གསང་སྔགས་ཐོས་ཤིང་གསང་དོན་རྟོགས་པས་བདག་གསང་བའི་བདག་པོ་རྡོ་རྗེ་སེམས་དཔའ་དང་འདྲ་བ་ཤ་སྟག་ལྟ་བུར་གྱུར་ནས། དེ་དག་ཀུན་ཀྱང་གསང་སྔགས་ཀྱི་ཐེག་པའི་དོན་གྱི་སྙིང་པོའི་ངོ་བོ་ཉིད་ནོར་བ་མེད་པར་ཕྱིན་ཅི་མ་ལོག་པའི་ཚུལ་གྱིས་རྒྱ་ཆེར་བརྗོད་ཅིང་སྟོན་པའི་སྒྲ་རྣམ་པར་བརྗོད་དེ་སྨྲ་བར་གྱུར་བ་ཉིད་དོ།།

བདག་འཆད་པའི་སྐྱེས་བུ་སེམས་དཔའ་རྡོ་རྗེ་ཉིད་ཀྱང་རྒྱལ་ཚབ་ཏུ་གནང་བ་ཐོབ་ནས་རྣམ་པར་བརྗིད་ཅིང་ཤིན་ཏུ་རྔོམ་པའི་རྣམ་རོལ་དུ་བཀོད་དེ་བསྟན་པ་མཆོག་གི་ཆོས་འཆད་པར་འཁོར་རྣམས་ལ་སྣང་བའི་ཚུལ་གྱིས། རིགས་ཀྱི་བདག་པོ་སྟོན་པའི་མདུན་ལོགས་སུ་སེང་གེའི་ཁྲི་རྡོ་རྗེས་མཚན་པས་བརྒྱན་པའི་ཆོས་འཆད་པའི་ཁྲི་ལ། ལུས་འགྱིང་བག་གི་ཚུལ་གྱིས་འཇུག་ཅིང་རྣམ་པར་གནས་སོ།།

གོང་གི་ཕྱིའི་ལྟས་རྣམས་ཀྱང་གདུལ་བྱའི་ངོ་ལ་ཕྱི་རོལ་གྱི་ཆོ་འཕྲུལ་སྣ་ཚོགས་སུ་སྣང་བར་ཤེས་པར་བྱའོ། །འོ་ན་ལེའུ་བཅུ་བདུན་པའི་སྟོད་དང༌། སོ་གཅིག་པའི་སྨད་དང༌། འདི་གསུམ་བལྡབས་སོ་ཞེས་བརྒལ་ན། དང་པོ་ནི་ཆོས་སྣང་བའི་ཆོ་འཕྲུལ་དང་ཡིག་འབྲུ་རྣམས་ཀྱི་བྱིན་རླབས་ཀྱིས་ཡིན་ལ། གཉིས་པ་ནི་རུ་ཏྲས་འབྲས་བུ་ཐོབ་པའི་ཚེ་དེའི་མཐུས་ཡིན་ཅིང༌། འདིར་ནི་སྡུད་པ་པོ་ལ་དབང་བསྐུར་བས་འཆད་པའི་སྐྱེས་བུར་གྱུར་པའི་བྱིན་རླབས་ཀྱིས་ཡིན་པས་མི་འགལ་ལོ། །གསུང༌། དེ་བས་ན་ཕྱག་ན་རྡོ་རྗེས་རིགས་ཀྱི་བདག་པོ་གཅིག་ལའང་ཐོས་ལ། འདིར་འཆད་པ་པོ་ཡིན་པའང་ལོ་རྒྱུས་འདིས་ཐེ་ཚོམ་མེད་པར་གསལ་ལོ།།

གཉིས་པ་རྒྱུ་དང་འབྲས་བུར་འབྲེལ་བ་བསྟན་པ་ལ་གཉིས་ཏེ། འབྲེལ་བ་དང་ལྡན་པར་བསྟོད་པ། དེའི་ཡོན་ཏན་བསྟན་པའོ། །དང་པོ་ལ་གཉིས་ཏེ། དེ་ལས་བྱུང་བའི་ཡོན་ཏན་དང་ལྡན་པར་འཁོར་གྱིས་བསྟོད་པ། སྟོན་པ་མཆོག་གིས་བསྟོད་པའོ། །དང་པོ་ནི།

དེ་ནས་འདུས་པའི། ཞེས་པ་ནས། ཁོ་བོ་ལ་བསྟོད་པ་དང༌། ༼༣༦༤༽ཞེས་པའི་བར་གྱིས་བསྟན་ཏེ།

དེ་ནས་འདུས་པའི་ཚོགས་འཁོར་ཕལ་མོ་ཆེ་རྣམས་ཀྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མའོ་བཅོམ་ལྡན་འདས་སེམས་དཔའ་རྡོ་རྗེ་འདི་ནི། འདི་ལྟར་མཐུ་ཆེ་བ། འདི་ལྟར་བྱིན་རླབས་ཆེ་བ། འདི་ལྟར་རྒྱ་ཆེ་བ། འདི་ལྟར་མཁས་པ། འདི་ལྟར་གསལ་ཞིང་ཟབ་པ་ན། བཅོམ་ལྡན་འདས་ཀྱི་ཐུགས་དང་འབྲེལ་ཅིང་། ཐུགས་ལས་སྐྱེས་པ་དེ་ཁོ་ན་ཉིད་དང་འབྲེལ་ཅིང་། དེ་ཁོ་ན་ཉིད་ལས་སྐྱེས་པ་ལགས་སོ།།

ཞེས་གསོལ་པས་ཁོ་བོ་ལ་བསྟོད་པ་དང་།

རྒྱུ་དང་འབྲས་བུའི་ཚུལ་དུ་འབྲེལ་བ་གང་སྙམ་པ་ལ། འཆད་པའི་སྐྱེས་བུས་ཆོས་ཀྱི་འཁོར་ལོ་བསྐོར་མ་ཐག་པ་དེ་ནས། ལང་ཀ་ལ་སོགས་པ་འདུས་པའི་ཚོགས་ཀྱི་འཁོར་ཡོངས་སུ་རྫོགས་པ་ཕལ་མོ་ཆེ་རྣམས་ཀྱིས། སེམས་དཔའ་རྡོ་རྗེ་ལ་ངོ་མཚར་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འཆད་པའི་སྐྱེས་བུ་ལ་ངམ་ནས། ཨེ་མའོ། །ཞེས་བརྗོད་དེ། སྟོན་པ་བཅོམ་ལྡན་འདས་ལ་བོས་ནས། འཆད་པའི་སྐྱེས་བུ་སེམས་དཔའ་རྡོ་རྗེ་ཞེས་བྱ་བ་འདི་ནི་རྒྱུད་ཀྱི་དོན་གཏིང་ཕྱིན་པར་རྟོགས་པ་དང༌། འགྲོ་དོན་མཛད་པའི་ཐབས་ཁྱད་པར་ཅན་མངའ་བས། ཐབས་དང་ཤེས་རབ་ཀྱིས་གདུལ་དཀའ་དྲག་པོ་ཀུན་བཏུལ་བས་འདི་ལྟར་མཐུ་ཆེ་བ། ཞིང་ཁམས་ཐམས་ཅད་ཀྱི་ས་གཡོས་པ་སོགས་སུ་གྱུར་པས་འདི་ལྟར་བྱིན་རླབས་ཆེ་བ། མ་འདྲེས་པའི་ཆོས་ཀུན་མཁྱེན་པས་ཡེ་ཤེས་ཐམས་ཅད་ཀྱི་འབྱུང་གནས་སུ་གྱུར་ཏེ་ཐབས་ཀྱི་གསང་མཛོད་མངའ་བས་འདི་ལྟར་རྒྱ་ཆེ་བ། དགོངས་དོན་ཐམས་ཅད་ཀྱི་མཛོད་དུ་གྱུར་ཏེ་ཆོས་ཉིད་ཡོངས་སུ་རྫོགས་པར་མཁྱེན་པས་འདི་ལྟར་འཆད་པ་ལ་མཁས་པ། དགོངས་པའི་ལྟ་བ་དང་ཏིང་ངེ་འཛིན་མ་འདྲེས་ཡོངས་རྫོགས་སུ་ཤར་བས་འདི་ལྟར་གསལ་ཞིང་ཟབ་པ་ཡི་ཡོན་ཏན་དང་ལྡན་པའི་འཆད་པའི་སྐྱེས་བུར་གྱུར་པ་ནི། བཅོམ་ལྡན་འདས་ཁྱོད་ཀྱི་ཐུགས་དང་རྒྱུ་འབྲས་སུ་འབྲེལ་ཞིང་ཐུགས་ཀྱི་བྱིན་རླབས་ལས་སྐྱེས་ཏེ་སྣང་བ། གསང་སྔགས་ཇི་བཞིན་པ་སྟོན་པའི་རང་བཞིན་དེ་ཁོ་ན་ཉིད་དང་ངོ་བོ་བདག་ཉིད་གཅིག་པར་འབྲེལ་ཞིང༌། དེ་ཁོ་ན་ཉིད་དེའི་བྱིན་རླབས་ལས་སྐྱེས་ཏེ་སྣང་བ་ལགས་སོ། །ཞེས་གསོལ་པས། སྟོན་པའི་སྤྱན་སྔར་ཁོ་བོ་གསང་བདག་ཉིད་ལ་བསྟོད་པ་དང༌།

གཉིས་པ་སྟོན་པ་མཆོག་གིས་བསྟོད་པ་ནི།

ལང་ཀའི། ཞེས་པ་ནས། བརྗོད་པ་བཀའ་སྩལ་པ་ལས། ཞེས་པའི་བར་གྱིས་བསྟན་ཏེ།

ལངྐའི་བདག་པོ་བཅོམ་ལྡན་འདས་དེས། དེ་དག་ལ་བཀའ་སྩལ་པ། འདུས་པ་ཆེན་པོའི་ཚོགས། སེམས་དཔའ་རྡོ་རྗེ་འདི་ནི་བྱང་ཆུབ་ཀྱི་སེམས་ཀྱི་ངོ་བོ། སྙིང་རྗེ་ཐམས་ཅད་ཀྱི་བདག་པོ། ཐབས་ཐམས་ཅད་ཀྱི་མཆོག སངས་རྒྱས་ཐམས་ཅད་ཀྱི་རྗེ་བཙན། བྱང་ཆུབ་སེམས་དཔའ་ཐམས་ཅད་ཀྱི་ཡབ། རྣལ་འབྱོར་ཀུན་གྱི་རྣལ་འབྱོར། མྱ་ངན་ལས་འདས་པ་ཀུན་གྱི་དེད་དཔོན། བདུད་ཐམས་ཅད་ཀྱི་ཡང་བདུད་ཆེན་པོ། སངས་རྒྱས་ཐམས་ཅད་ཀྱི་ཡང་གདུལ་དཀའ་གདུལ་བ། ཆོས་ཐམས་ཅད་ཀྱི་མཛོད། གསང་བ་ཐམས་ཅད་ཀྱི་བདག་པོ། ཡེ་ཤེས་ཐམས་ཅད་ཀྱི་འབྱུང་གནས་ཆེན་པོར་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། ཐོག་མ་དང་ཐ་མ་མེད་པར་མཉམ་པའི་དུས། ཕ་མཐའ་ལས་ཀྱང་ཕ་མཐའ། དཔག་ཏུ་མེད་ཅིང་བསམ་དུ་མེད་པ། འབྱམས་ཀླས་པའི་དུས་ན། བྱ་བ་བྱས་ཤིང་བྱེད་པ་བྱས་པ། མངོན་པར་རྫོགས་པར་སངས་རྒྱས་པ་ཡིན་ཏེ། འདི་ནི་ཆོས་ཐམས་ཅད་ཀྱི་རང་བཞིན་དུ་སྦྱོར་ཞིང་། ཆོས་ཐམས་ཅད་ཀྱི་རང་བཞིན་དུ་འབྲེལ་བས་རྒྱལ་བ་ཐམས་ཅད་ཀྱི་ཐུགས་ལས་སྐྱེས་ཤིང་། ཐུགས་དང་འབྲེལ་བ། ཐམས་ཅད་ཀྱི་ཡབ་ཏུ་གྱུར་པ་ཡིན་ཏེ། དེ་འདྲའོ་ཞེས་ཁོ་བོ་ལ་བསྔགས་པ་བརྗོད་པ་བཀའ་སྩལ་པ་ལས།

ལང་ཀའི་བདག་པོ། དེའི་དུས་སུ། སྟོན་པ་ཆེན་པོ་བཅོམ་ལྡན་འདས་དེས། འཁོར་དེ་དག་ལ་དྭང་བ་སྐྱེད་པའི་ཕྱིར་འཆད་པའི་སྐྱེས་བུའི་ཡོན་ཏན་བཀའ་སྩལ་ཏེ་བཤད་པ་ནི། འདུས་པ་ཆེན་པོའི་ཚོགས། ཞེས་བོས་ནས། ཡོན་ཏན་གྱི་རྣམ་གྲངས་བཅུ་གཉིས་པོ་འདི་དག་ཆོས་ཅན་དང༌། དམ་བཅའ་དང༌། གཏན་ཚིགས་ཀྱི་ཚུལ་གྱིས་སྟོན་ཏེ། རྒྱལ་ཚབ་འཆད་པའི་སྐྱེས་བུ་སེམས་དཔའ་རྡོ་རྗེ་འདི་ནི། ཞེས་པ་ཆོས་ཅན་དུ་བྱས་ནས། བྱང་ཆུབ་སེམས་ཀྱི་ངོ་བོ་ཡིན་ཏེ་ཞེས་དམ་བཅའ་བ་དང༌། ༼༣༦༥༽དེ་བཞིན་དུ། སྙིང་རྗེ་ཐམས་ཅད་ཀྱི་བདག་པོ། ཐབས་ཐམས་ཅད་ཀྱི་མཆོག་སངས་རྒྱས་ཐམས་ཅད་ཀྱི་རྗེ་བཙུན། བྱང་ཆུབ་སེམས་དཔའ་ཐམས་ཅད་ཀྱི་ཡབ། རྣལ་འབྱོར་ཀུན་གྱི་རྣལ་འབྱོར། མྱ་ངན་ལས་འདས་པ་ཀུན་གྱི་དེད་དཔོན། བདུད་ཐམས་ཅད་ཀྱི་ཡང་བདུད་ཆེན་པོ། སངས་རྒྱས་ཐམས་ཅད་ཀྱི་ཡང་གདུལ་དཀའ་འདུལ་བ། ཆོས་ཐམས་ཅད་ཀྱི་མཛོད། གསང་བ་ཐམས་ཅད་ཀྱི་བདག་པོ། ཡེ་ཤེས་ཐམས་ཅད་ཀྱི་འབྱུང་གནས་ཆེན་པོར་གྱུར་པ་ཡིན་ནོ། །ཞེས་དམ་བཅའ་བཅུ་གཉིས་སོ། །དེ་དག་གི་གཏན་ཚིགས་ཕྱོགས་ཕྱི་མས་བྱས་ནས་ངེས་པར་འགྲེལ་ཏེ། དེ་ཅིའི་ཕྱིར་ཞེ་ན། ཞེས་དེ་དག་གཏན་ཚིགས་གང་གིས་མངོན་ན་འདི་ལྟ་སྟེ། ཐོག་མ་དང་ཐ་མ་མེད་པར་མཉམ་པའི་དུས་ཀྱི་ངོ་བོར་གནས་པའི་ཕྱིར། ཞེས་པ་སྟེ། འཁོར་བ་ཐོག་མ་དང་ཐ་མ་མེད་པའི་དུས་ཉིད་ནས་རང་རིག་པ་བྱང་ཆུབ་ཀྱི་སེམས་རྩོལ་མཐས་མ་བསྒོས་ཤིང་རིལ་གྱི་དངོས་གཞི་གཡོ་བ་དང་བྲལ་བ་ལ་གཉིས་པའི་ཆོས་ཐམས་ཅད་མ་དམིགས་པར་ཆོས་ཉིད་མཉམ་པའི་ངོ་བོ། དུས་གསུམ་མ་འགགས་ལ་བྲལ་བས་མཚན་ཉིད་ཐམས་ཅད་པའི་ཕྱིར་ཞེས་དང་པོའི་གཏན་ཚིགས་དང༌། ཕ་མཐའ་ལས་ཀྱང་ཕ་མཐའ་ཡས་པའི་སྙིང་རྗེའི་ཕྱིར། ཞེས་པ། དུས་ཐོག་མའི་ཕ་མཐའ་ལས་ཀྱང་ཐོག་མའི་ཕ་མཐའ་ཚད་མེད་པ་ནས་ཐུགས་རྗེ་ཆེན་པོ་རིལ་འབྱུང་བའི་དབང་ཕྱུག་ཆེན་པོ་ཡིན་པའི་ཕྱིར། ཞེས་གཉིས་པའི་གཏན་ཚིགས་དང༌། དཔག་ཏུ་མེད་ཅིང་བསམ་དུ་མེད་པ་མངའ་བའི་ཕྱིར། ཞེས་པ། ཐབས་ཀྱི་བྱེ་བྲག་མང་པོ་དཔག་ཏུ་མེད་ཅིང་ངོ་བོ་བསམ་དུ་མེད་པས་ཟབ་པ་སྣ་ཚོགས་ཆེ་བ་དང་ཡངས་པ་མངའ་བས་གོང་ན་མེད་པའི་ཕྱིར། ཞེས་གསུམ་པའི་གཏན་ཚིགས་དང༌། འབྱམས་ཀླས་པའི་དུས་ནས་ལྷུན་གྱིས་རྫོགས་པའི་ཕྱིར། ཞེས་པ། མུ་མཐའ་མེད་ཅིང་འབྱམས་ཀླས་པའི་དུས་ནས་མཉམ་པ་ཆེན་པོར་ལྷུན་གྱིས་གྲུབ་པའི་བདག་ཉིད་དམ་པར་བཞུགས་པའི་ཕྱིར། ཞེས་བཞི་པའི་གཏན་ཚིགས་དང༌། བྱ་བ་བྱས་ཤིང་བྱེད་པ་བྱས་པ་ཡིན་པའི་ཕྱིར། ཞེས་པ། བདག་གི་དོན་གྱི་བྱ་བ་ལྷུན་གྱིས་རྫོགས་པར་བྱས་ཤིང༌། གཞན་ས་ལ་གནས་པའི་སེམས་དཔའ་ཆེན་པོ་རྣམས་ཀྱི་དོན་བྱེད་པ་ཡང་ཇི་ལྟར་འདུལ་བ་བཞིན་དུ་མཛད་ཅིང་བྱས་ཏེ་འབྲས་བུའི་ས་ལ་འདོན་པའི་ཕྱིར། ཞེས་ལྔ་པའི་གཏན་ཚིགས་དང༌། མངོན་པར་རྫོགས་པར་སངས་རྒྱས་པ་ཡིན་པའི་ཕྱིར་ཏེ། ཞེས་པ། ༼༣༦༦༽གསང་སྔགས་སྙིང་པོའི་དེ་བཞིན་ཉིད་ཆེན་པོའི་རིག་པ་མངོན་དུ་བྱས་པས་སྐྱེད་དུ་བྱ་བ་མེད་པར་རྫོགས་པར་སངས་རྒྱས་པ་དེ་ལ། མཐའ་དང་ཞེན་མཐའ་མེད་པར་རྣལ་མའི་དོན་ལ་འབྱོར་པས་མི་གཡོ་གདལ་བ་ཆེན་པོའི་དགོངས་པར་བཞུགས་པའི་ཕྱིར། ཞེས་དྲུག་པའི་གཏན་ཚིགས་དང༌། དེ་ནི་ཆོས་ཐམས་ཅད་ཀྱི་རང་བཞིན་དུ་སྦྱོར་ཞིང་གོ་འཕང་མཆོག་ལ་འགོད་པའི་ཕྱིར། ཞེས་པ། སེམས་དཔའ་རྡོ་རྗེ་དེ་ནི་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱི་རང་བཞིན་ཇི་བཞིན་པའི་ཆོས་ཉིད་ཀྱི་ངང་དུ་ཆོས་ཀུན་ཡོངས་རྫོགས་སུ་སྦྱོར་ཞིང་གདུལ་བྱ་རྣམས་ཀྱང་གོ་འཕང་དེ་ལ་འགོད་པའི་ཕྱིར། ཞེས། བདུན་པའི་གཏན་ཚིགས་དང༌། ཆོས་ཐམས་ཅད་ཀྱི་རང་བཞིན་དུ་འབྲེལ་བས་མི་མཐུན་ཕྱོགས་ཀུན་འཇོམས་པའི་ཕྱིར། ཞེས་པ། དངོས་པོའི་ཆོས་ཐམས་ཅད་ཀྱི་རང་བཞིན་གཞི་ཇི་བཞིན་པའི་དེ་ཁོ་ན་ཉིད་དུ་སོན་ཏེ་བདག་ཉིད་ཆེན་པོར་འབྲེལ་བས་ཡེ་ཤེས་ཆེན་པོས་བདུད་བཞིའི་དཔུང་ཐམས་ཅད་བཅོམ་པའི་ཕྱིར། ཞེས་བརྒྱད་པའི་གཏན་ཚིགས་དང༌། རྒྱལ་བ་ཐམས་ཅད་ཀྱི་ཐུགས་ལས་སྐྱེས་ཤིང་སྟོབས་རྫོགས་པའི་ཕྱིར། ཞེས་པ། རྒྱལ་བ་རྫོགས་པའི་སངས་རྒྱས་ཀུན་གྱི་ཐུགས་ཡེ་ཤེས་ཆེན་པོའི་བྱིན་རླབས་ལས་སྐྱེས་ཤིང་བྱིན་རླབས་ཀུན་གྱི་བདག་ཉིད་དུ་སྣང་བས། མཐུ་ཐམས་ཅད་ཀྱི་ཡང་བདག་པོར་གྱུར་ཏེ། གནོད་སྦྱིན་ལ་སོགས་པ་ཤིན་ཏུ་ཉོན་མོངས་ཆེ་ཞིང་ཁ་ལོ་བསྒྱུར་བར་དཀའ་བ་དག་གི་གཉེན་པོར་གྱུར་པའི་ཕྱིར། ཞེས་དགུ་པའི་གཏན་ཚིགས་དང༌། རྒྱལ་བ་ཀུན་གྱི་ཐུགས་དང་འབྲེལ་བ་ཡིན་པའི་ཕྱིར། ཞེས་པ། སངས་རྒྱས་རྣམས་ཀྱི་ཡེ་ཤེས་ཀྱི་ཐུགས་དང་རྒྱུ་དང་འབྲས་བུར་འབྲེལ་བས་དགོངས་པའི་གསང་དོན་ཐམས་ཅད་བདག་གི་ཐོབ་པས་བསྟན་པ་རིལ་དང་གསང་སྔགས་འབྱུང་བའི་མཛོད་ཀྱི་གནས་ཆེན་པོར་གྱུར་བའི་ཕྱིར་ཞེས་བཅུ་གཅིག་པ་དང་བཅུ་པའི་གཏན་ཚིགས་ཏེ་གཉིས་སུ་འགྲེལ་ཏོ། །ཐམས་ཅད་ཀྱི་ཡབ་ཏུ་གྱུར་པ་ཡིན་པའི་ཕྱིར་ཏེ། ཞེས་པ། རང་བྱུང་གི་ཡེ་ཤེས་ནི་གསང་བ་དམ་པ་ཐམས་ཅད་ཀྱི་ངོ་བོ་ཉིད་པས། ཡེ་ཤེས་ཇི་སྙེད་པ་ཐམས་ཅད་འཆར་ཞིང་སྣང་བའི་གཞིར་གྱུར་པའི་ཕྱིར་ཏེ། ཡོན་ཏན་གྱི་ཁྱད་པར་ཕུན་སུམ་ཚོགས་པ་དེ་ནི། དེ་འདྲ་བ་ལྟ་བུའོ། ཞེས་ཁོ་བོ་ལ་བསྔགས་པ་བརྗོད་དེ་ཡོན་ཏན་ཅི་ཡོད་པ་ཐམས་ཅད་མཆོག་ཏུ་བཀའ་སྩལ་པ་ལས་ནི། འཁོར་རྣམས་གསང་བདག་ལ་གསང་དོན་ཞུ་བ་ལ་གཟུད་པའི་ཆེད་དོ།།

གཉིས་པ་དེའི་ཡོན་ཏན་བསྟན་པ་ལ་༼༣༦༧༽གསུམ་སྟེ། འཁོར་གྱིས་ཞུས་པ། སྐྱེས་བུས་གསུངས་པ། བཤད་དུ་མེད་པའི་ཁུངས་བསྟན་པའོ། །དང་པོ་ནི།

འདུས་པའི་ཚོགས། ཞེས་པ་ནས། གསོལ་བ་བཏབ་བོ། །ཞེས་པའི་བར་གྱིས་བསྟན་ཏེ།

འདུས་པའི་འཁོར་ཐམས་ཅད་ངོ་མཚར་དུ་གྱུར་ཏེ་གསོལ་པ། བཅོམ་ལྡན་འདས་དེ་ནི་འདི་ལྟར་ངོ་མཚར་ལགས་སོ། །བདེ་བར་གཤེགས་པ་དེ་ནི་འདི་ལྟར་ངོ་མཚར་ལགས་སོ། །ཞེས་གསོལ་ཏེ། སེམས་དཔའ་རྡོ་རྗེ་དམ་པ་དེ་ལ་དེ་ལོགས་སུ་བཏུད་ནས། ལུས་ཀྱི་བག་བཞི་ས་ལ་ཕབ་པའི་ཕྱག་རྣལ་འབྱོར་གྱི་ལུགས་སུ་བྱས་ནས། རྨད་དུ་བྱུང་བའི་མེ་ཏོག་དང་། ཏིང་ངེ་འཛིན་གྱི་མཆོད་པ་སྣ་ཚོགས་བྱས་ཏེ། འདི་ལྟར་རྨད་བྱུང་ངོ་མཚར་ཁྱོད། །སངས་རྒྱས་ཐུགས་ལས་རྒྱལ་སྐྱེས་པ། །ཇི་ལྟར་ཞིང་འདིར་སྣ་ཞིག་གུ །རྣལ་འབྱོར་ཡབ་གྱུར་རྒྱལ་བའི་སྲས། །རང་བཞིན་ཀུན་དང་གཅིག་འབྲེལ་བའི། །བཀའ་ཡི་འཁོར་ལོ་རབ་བསྐོར་བས། །རྣམ་དག་ལམ་མཆོག་དག་པ་དག།

ཚིག་གིས་མཚོན་ཏེ་གསལ་བར་མཛོད། །ཨ་ཧོ་ཞེས་གསོལ་བ་བཏབ་བོ།།

སྟོན་པས་ཕྱག་ན་རྡོ་རྗེ་ལ་བསྔགས་པའི་ཡོན་ཏན་བརྗོད་པ་ལ། འདུས་པའི་ཚོགས་ཀྱི་འཁོར་ཐམས་ཅད་ངམ་ཞིང་ངོ་མཚར་དུ་གྱུར་ཏེ། ངོ་མཚར་བའི་ངོ་བོའི་ཚིག་བསྣན་ནས་སྨྲས་ཏེ་གསོལ་པ། བཅོམ་ལྡན་འདས། དེ་ལྟར་ཐབས་དང་ཐབས་ལས་བྱུང་བའི་འབྲེལ་བ་འདི་ནི་རང་དོན་གྱི་འབྲས་བུ་མཐར་ཕྱིན་པས་འདི་ལྟར་ངོ་མཚར་ལགས་སོ། །བདེ་བར་གཤེགས་པ་དེ་ཉིད་དེ་ལས་བྱུང་བར་འབྲེལ་བ་འདི་ནི་གཞན་དོན་གྱི་ཕྲིན་ལས་མཐར་ཕྱིན་པས་འདི་ལྟར་ངོ་མཚར་ལགས་སོ། །ཞེས་གསོལ་ཏེ། རྒྱུད་ཀྱི་དོན་ཞུ་བའི་ཕྱིར། འཁོར་རྣམས་ཀྱིས་སེམས་དཔའ་རྡོ་རྗེ་དམ་པ་གསང་བདག་ཕྱག་ན་རྡོ་རྗེ་དེ་ལ་སྟོན་པ་ཆེན་པོའི་སྤྱན་སྔར་མ་ཡིན་པར་གུད་དམ་ལོགས་སུ་སྒོ་གསུམ་བཏུད་པར་བྱས་ནས། ལུས་ཀྱི་བག་བཞི་དང་ལྟོ་བ་ས་ལ་ཕབ་པའི་བརྐྱང་ཕྱག་ནང་གི་རྣལ་འབྱོར་གྱི་ལུགས་སུ་བྱས་ནས། མཉེས་པས་གནང་བའི་རྒྱུར་གྱུར་པའི་ཕྱིར། ཡེ་ཤེས་ཆེན་པོ་རང་སྣང་བའི་རྨད་དུ་བྱུང་བའི་མེ་ཏོག་ཁྱད་པར་ཅན་དང༌། ཕྱི་ནང་གསང་བའི་ཏིང་ངེ་འཛིན་གྱི་མཆོད་པ་མང་པོ་སྣ་ཚོགས་པ་བསམ་པས་སྤྲུལ་ཞིང་མཆོད་པར་བྱས་ཏེ་ཞུས་པ། སྟོན་པས་དབང་བསྐུར་ཞིང་ཇི་ལྟར་གསུངས་པ་འདི་ལྟར་ཡོན་ཏན་རྨད་དུ་བྱུང་བ་མངའ་བའི་ངོ་མཚར་ཆེན་པོའི་སྐྱེས་བུ་སེམས་དཔའ་རྡོ་རྗེ་ཁྱོད། རྒྱལ་བ་རྫོགས་པའི་སངས་རྒྱས་ཀུན་ཏུ་བཟང་པོ་རྡོ་རྗེ་འཛིན་པ་ཆེན་པོའི་ཐུགས་ལས་རྒྱལ་ཚབ་འཆད་པའི་སྐྱེས་བུར་འཁྲུངས་ཤིང་སྐྱེས་པ་ཚུལ་ཇི་ལྟར་ཡང་ད་ལྟར་གྱི་ཞིང་ཁམས་དམ་པ་འདིར་སྐུར་སྣང་ནས་སྟོན་པར་གྱུར་ཞིག་གུ་སྟེ་སྣང་བ་ངོ་མཚར་བླ་ན་མེད་པ་ཁྱོད་ཉིད། མ་འོངས་པའི་རྣལ་འབྱོར་པ་རྣམས་བསྐྱེད་པའི་ཡབ་ཏུ་གྱུར་ཅིང་སྟོན་པ་ཀུན་ཏུ་བཟང་པོའི་ཐུགས་ལས་སྐྱེས་པས་རྒྱལ་བའི་སྲས། ཆོས་ཐམས་ཅད་ཀྱི་རང་བཞིན་དེ་ཁོ་ན་ཉིད་དང་གཉིས་སུ་མེད་པར་སངས་རྒྱས་ཀུན་གྱི་ཐུགས་དང་གཅིག་ཏུ་འབྲེལ་བའི་འཆད་པ་པོ་ལགས་པས། ཁྱོད་ཀྱིས་གསང་སྔགས་གསང་བ་མཆོག་གི་བཀའ་ཡི་ལུང་ཆེན་རྒྱུད་སྡེ་ཟབ་མོའི་ཆོས་ཀྱི་འཁོར་ལོ་རབ་ཏུ་བསྐོར་བར་མཛད་པས། ལོག་པའི་ལམ་དང་བྲལ་བས་རྣམ་པར་དག་ཅིང་ཐབས་ཀྱི་ཉེ་ལམ་མཆོག་ཏུ་གྱུར་པ་གསང་སྔགས་གསང་ཆེན་དམ་པའི་དོན་མཆོག་བླ་ན་མེད་༼༣༦༨༽པ་དག་ཐུན་མོང་མ་ཡིན་པའི་ཚིག་གིས་གསལ་བར་མཚོན་ཏེ་རྒྱུད་རྒྱལ་རྒྱུད་ཀྱིསྙིང་པོ་ཉིད་རྣམ་པར་བཤད་དེ་གསང་དོན་མ་འདྲེས་ཡོངས་རྫོགས་སུ་གསལ་བར་མཛོད་ཅིག ཅེས་ཞུས་ཏེ། ཨ་ཧོ༔ཞེས་དགྱེས་སྒྲ་དང་བཅས་པས་གསོལ་བ་བཏབ་བོ།།

གཉིས་པ་སྐྱེས་བུས་གསུངས་པ་ནི།

ལང་ཀའི། ཞེས་པ་ནས། ཨ་ཧོཿ ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ནས་དམ་པ་རྡོ་རྗེ་བདག་གིས་རྡོ་རྗེ་བསྐོར་ཏེ་བསྒྱུར་ནས། བརྗིད་བག་ཏུ་རྡོ་རྗེའི་

ཚིག་ཏུ་སྨྲས་པ། ཨ་ཧཱུཾ་མཱཾ། ཨ་ཧོ།

གནང་ནས་བཤད་པ་ལྟར་ཆོས་བཤད་པར་བསྟན་པའི་ཕྱིར། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། གསོལ་བ་བཏབ་མ་ཐག་པ་དེ་ནས་སྐྱེས་བུ་དམ་པ་སེམས་དཔའ་རྡོ་རྗེ་ཉིད་དུ་གྱུར་པ་བདག་གིས། སྟོན་པས་དབང་རྟགས་སུ་ལག་ཏུ་རྡོ་རྗེ་རྒྱ་གྲམ་བཞག་པ་དེ་ཉིད་བསྐོར་ཏེ་བསྒྱུར་ནས། བླ་བཀྱལ་བའི་སྤོབས་པ་ཡོད་པས་བརྗིད་བག་ཏུ་གྱུར་པ་དང་ལྡན་པས། རྡོ་རྗེ་ཐེག་པ་བླ་ན་མེད་པའི་དོན་ཕུལ་དུ་བྱུང་བ་མཚོན་པའི་སྒྲ་ཚིག་ཏུ་སྟོན་པས་ཁོ་བོ་ལ་ཇི་སྐད་བསྟན་པ་ལྟར་སྨྲས་ཏེ་བཤད་པར་མཛད་པའོ། །དེ་ཉིད་གང་ཞེ་ན། ༀ་ཧཱུྃ་མཱུྃ། ཨ་ཧོཿ ཞེས་པ་ཡི་གེ་གསུམ་ནི་བཤད་ཟིན་ཏེ་རྒྱུད་དོན་ཇི་ལྟ་བ་བཞིན་བཤད་པའོ། །དེ་དག་ཀྱང་འདུས་པའི་འཁོར་ལ་རྒྱས་པར་བཤད་དེ་དགྱེས་པའི་ཡི་གེ་ཨ་ཧོ་གཉིས་བརྗོད་པས་སྐྱེ་མེད་ལ་མཉེས་པར་མཚོན་པའོ།།

གསུམ་པ་བཤད་དུ་མེད་པའི་ཁུངས་བསྟན་པ་ནི།

རྒྱལ་བའི་སྲས་པོ། ཞེས་པ་ནས། སྩལ་བར་དགོངས་པའོ། །ཞེས་པའི་བར་གྱིས་བསྟན་ཏེ།

རྒྱལ་བའི་སྲས་པོ་ཅང་མི་གསུང་། །མི་གསུང་བས་ནི་རྒྱ་ཆེར་བཤད། །བཤད་དུ་མེད་པའི་ཆོས་ཉིད་འདི། །རྒྱལ་བ་རྣམས་ཀྱིས་མ་བཤད་དེ། །དེ་ལྟར་སྟོན་པ་རྒྱལ་མཆོག་ཀྱང་། །རྣམ་པར་བཤད་པར་མི་བཞེད་དེ། །རྒྱལ་ཆེར་བཤད་པར་དགོངས་པའོ། །སྐྱེ་བ་མེད་པའི་ཆོས་ཉིད་ནི། །མ་སྐྱེས་པས་ན་སྙིང་པོར་བཤད། །སྙིང་པོའི་དོན་དེ་གང་ཡིན་པ། །ཚིག་ཏུ་སྨྲ་བར་འདོད་མ་ཡིན། །སྤྲོས་པ་ཉིད་ན་གོལ་བ་ཞེས། །རྒྱལ་བ་རྣམས་ཀྱིས་ཡང་དག་དཔྱད། །དེ་བས་རྡོ་རྗེ་རྒྱལ་པོ་ཉིད། །བཀའ་མ་སྩལ་བར་དགོངས་པའོ།།

དེ་ལ་རྡོ་རྗེ་འཛིན་པ་གསང་བའི་མངའ་བདག་རྒྱལ་བ་ཐམས་ཅད་ཀྱི་གདུང་རྒྱུད་དུ་བྱུང་བའི་སྲས་མཆོག་ཆེན་པོ་དེ་ནི་ཚིག་ཏུ་བརྗོད་དེ་ཅང་མི་གསུང་བ་ཉིད་དེ། དོན་གྱི་ངོ་བོ་བརྗོད་དུ་མེད་པས་སོ། །དེ་ལྟར་མ་གསུང་པ་ཉིད་ནི་བརྗོད་པ་ཐམས་ཅད་པའི་ཕྱིར་གསུང་ངོ་བར་མི་རྟོག་པར་བསྟན་པ་ཐམས་ཅད་དུ་གསལ་བས་ཟབ་ཅིང་རྒྱ་ཆེར་བརྗོད་ཅིང་བཤད་དེ་བཀའ་སྩལ་བ་ཉིད་དོ།།

དེའི་ཚུལ་ནི། གསང་སྔགས་ཐེག་པ་ཆེན་པོའི་ངོ་བོ་ཚིག་ཏུ་བཤད་དུ་མེད་པའི་ཆོས་ཉིད་བརྗོད་པ་དང་བྲལ་བའི་དོན་གྱི་རྒྱུད་འདི་ཉེ་བར་བཟུང་བ་ནི་འདས་པའི་དུས་ཀྱི་རྒྱལ་བ་རྫོགས་པའི་སངས་རྒྱས་རྣམས་ཀྱིས་ཀྱང་ཚིག་ཏུ་གསུངས་ནས་མ་བཤད་དེ། གསུང་ཞིང་བརྗོད་དུ་ མེད་པའོ། །ཚུལ་དེ་བཞིན་དུ། ད་ལྟར་སྟོན་པ་རིགས་ཀྱི་བདག ་པོ་དང༌། རྒྱལ་མཆོག་རྡོ་རྗེ་འཛིན་པ་ཉིད་ཀྱང༌། ཚིག་ཏུ་བརྗོད་དེ་རྣམ་པར་བཤད་པར་མི་བཞེད་པས་སྤྲུལ་པའི་སྐུ་ལྟར་བརྗོད་པ་ཚིག་གི་གསུང་གིས་བཀའ་སྩལ་པར་མི་མཛད་དེ། རང་གསལ་རིག་པའི་གསུང་མངའ་བས་བྱིན་གྱིས་བརླབ་ཀྱི་༼༣༦༩༽ཚུལ་དུ་གདུལ་བྱའི་འཁོར་གྱི་རིག་པ་ལ་དོན་རྒྱ་ཆེར་བཤད་པ་དང་འདྲ་བར་འཇལ་བར་བྱེད་པས་དགོངས་པས་བརྒྱུད་པའམ། དགོངས་པ་བརྡའི་སྒོ་ནས་ཆོས་སྟོན་པའོ། །དེ་ཡན་ཆད་ནི་ཆོས་སྐུ་དང་ལོངས་སྐུའི་བསྟན་པ་ཡང་ཡིན་ནོ།།

དེ་ཅིའི་ཕྱིར་ཞེ་ན། གང་རྒྱུ་རྐྱེན་དང་བྲལ་བས་དངོས་གཞི་སྐྱེ་བ་མེད་པའི་ཆོས་ཉིད་ཀྱི་དོན་ཡང་དག་པར་ངེས་པ་ནི། ངོ་བོ་མཐའ་གང་དུའང་བྱུང་མ་མྱོང་བར་མ་སྐྱེས་པས་ན་རྒྱུ་འབྲས་ཡོངས་ཀྱི་རྩ་བ་དང་བཅུད་ཀྱི་སྙིང་པོར་བཤད་པར་གསལ་ཏེ། དེས་ན་སྙིང་པོའི་དོན་གྱི་ངོ་བོ་མ་ནོར་བའི་གསང་རྒྱུད་དེ་ཁོ་ན་ཉིད་གང་ཡིན་པ་འདི་ནི་བརྗོད་དུ་མེད་པ་ཉིད་ལ་བརྗོད་པས་ཐོག་ཏུ་མི་ཕེབས་པས་ཚིག་ཏུ་སྨྲ་བར་བྱས་ཏེ་བཤད་ཅིང་བརྗོད་དུ་ཡོད་པར་རིགས་ཤིང་འཐད་པ་མ་ཡིན་ནོ། །དེའི་ཕྱིར་ཚིག་རྒྱས་པར་སྤྲོས་ཏེ་བཤད་པ་ཉིད་ན་དོན་ཇི་བཞིན་པའི་ཐོག་ཏུ་མི་ཕེབས་པས་འཁྲུལ་པར་གོལ་བ་ཡིན་ནོ་ཞེས་རྒྱལ་བ་རྫོགས་པའི་སངས་རྒྱས་རྣམས་ཀྱིས་ཀྱང་ངེས་པ་དོན་གྱི་མདོ་རྒྱུད་མན་ངག་ཀུན་ལས་ཡང་དག་པར་བཤད་དོ། །གཏན་ཚིགས་དེ་བས་ན་སྟོན་པ་རིགས་ཀྱི་བདག་པོ་རྡོ་རྗེ་རྒྱལ་པོ་ཉིད་ཀྱང་ཚིག་ཏུ་ཕྱུང་སྟེ་བཀའ་མ་སྩལ་བར། ཁོ་བོ་ལ་སོགས་པ་ལ་དགོངས་པ་ཏིང་ངེ་འཛིན་གྱིས་བཤད་དེ། མཉམ་པ་ཉིད་གསང་སྔགས་དོན་གྱི་རྒྱ་མཚོ་ལས་མི་གཡོ་བར་བཞུགས་པའོ།།

གཉིས་པ་དགོས་པ་བསྟན་པ་ལ་གཉིས་ཏེ། དགོས་པ་བཤད་པ། དགོས་པའི་ཡང་དགོས་པ་བཤད་པའོ། །དང་པོ་ནི།

དགོངས་པའི་དོན་རྣམས། ཞེས་པ་ནས། ཚིག་གིས་དེ་མཚོན་དགོས། །ཞེས་པའི་བར་ཀྱིས་བསྟན་ཏེ།

དགོངས་པའི་དོན་རྣམས་གང་འབྱིན་པ། །ཇི་ལྟར་མེ་ལོང་གཟུགས་བརྙན་ལྟར། །དགོངས་དོན་རིག་ལ་སྣང་གྱུར་པ། །མ་སྐྱེས་སྙིང་པོ་དོན་གྱིས་ན། །ཚིག་ཏུ་སྤྲོ་བ་མ་ཡིན་ནའང་། །མཚན་མ་ཚིག་གི་རྣལ་འབྱོར་པ། །ཚིག་ལ་ཞིབ་ལ་དོན་ལ་རྩིང་། །ཚིག་ཕྱིར་བློ་འབྲང་རྩལ་ཞན་རྣམས། །དཀྲི་བའི་བསམ་པ་རངས་བྱའི་ཕྱིར།།

མི་དམིགས་པ་ལ་དམིགས་པ་ཡི། །ཆོ་འཕྲུལ་ཚིག་གིས་དེ་མཚོན་དགོས།།

འོ་ན་དགོངས་པ་ཇི་ལྟར་བརྒྱུད་ཅེ་ན། གསང་སྔགས་ཐེག་པ་ཆེན་པོའི་རྒྱུད་མཆོག་རྒྱལ་བའི་དགོངས་པ་མཐར་ཐུག་ཏུ་ངེས་པའི་དོན་རྣམས་གང་དགོངས་པས་གསལ་བར་འབྱིན་ཅིང་སྟོན་པའི་ཚུལ་བསྟན་པ་ཡང༌། ཚིག་གིས་བརྗོད་པས་མ་ཡིན་པར། དཔེ་ཇི་ལྟར་ན་མེ་ལོང་གཡའ་དྭངས་པ་ལ་གཟུགས་བརྙན་རང་དབང་མེད་པར་འབྱུང་བ་ལྟར། རྒྱལ་བའི་དགོངས་པ་སྙིང་པོ་གསང་བའི་དོན་མཆོག་དམ་པ་ཉིད་སྡུད་པ་པོ་དང་འཁོར་གྱི་རིག་པ་དྭངས་པ་ལ་བྱིན་གྱིས་བརླབས་ཀྱིས་རང་སྣང་དུ་ཤར་བར་གྱུར་པའོ། །འོ་ན་དེ་ཡང་ཚིག་གིས་མཚོན་དུ་མེད་དམ་ཞེ་ན། །སྒྲ་ཚིག་གིས་མི་མཚོན་པར་དགོངས་པའི་དོན་གྱིས་མཚོན་པའི་ཕྱིར། །རྒྱུད་ཀྱི་ངོ་བོ་མ་སྐྱེས་པའི་ཆོས་ཉིད་བརྗོད་པ་དང་བྲལ་བས་དངོས་གཞི་སྙིང་པོའི་རྩ་བར་གྱུར་པ་ཉིད་དོན་གྱིས་རང་གསལ་དུ་མཚོན་པས་ན་ཚིག་ཏུ་བརྗོད་དེ་སྤྲོ་བ་མ་ཡིན་པས་བཤད་པས་མཚོན་པར་མི་༼༣༧༠༽ནུས་སོ། །ངོ་བོ་དེ་ལྟར་ཡིན་ནའང༌། མི་མཐུན་པ་སྟོན་པ་ནི་དཀྲི་བའི་ཕྱིར་ཚིག་གིས་སྟོན་ཅིང་མཚོན་པའོ། །དེ་ལ་གདུལ་བྱ་གང་དག་དཀྲི་བར་བྱ་ཞེ་ན། །ཞེན་རྟོག་གི་མཚན་མ་དང་མ་བྲལ་བས་སྒྲ་བརྗོད་ཡིད་ལ་བྱེད་པའི་ཚིག་གི་རྣལ་འབྱོར་པ་རྣམས། ཚིག་ལ་བརྟེན་ནས་སྔ་མའི་རྗེས་སུ་ཕྱི་མ་ལོང་བཏགས་ནས་མཐར་ཆགས་སུ་བརྗོད་དེ་ཞིབ་པ་སྐད་དུ་ཟེར་ཡང་དེ་ཁོ་ན་ལ་འཆེལ་བས་དོན་གྱི་ངོ་བོའི་མཐའ་ཡང་མ་མཐོང་བས་དོན་རྟོགས་པ་ལ་རྩིང་སྟེ། དོན་མཆོག་ཡལ་བར་གྱུར་པས་ན། སྒྲའི་ཚིག་གི་ཕྱིར་རམ་རྗེས་སུ་དེ་ལ་རྟོག་པའི་བློ་ཡི་ཤེས་པ་འབྲངས་པས་གསང་སྔགས་ཀྱི་གཏིང་མཐོང་བའི་བློ་གྲོས་ཀྱི་རྩལ་ནན་ཅིང་ནུས་པ་ཆུང་བ་རྣམས། གསང་སྔགས་ལ་ལྡེམ་དགོངས་ཀྱིས་བཀྲི་ཞིང་དྲང་བའི་ཐབས་ཀྱིས་ཚིག་ཏུ་བསྟན་པས་གསང་དོན་གྱིས་ཡིད་ཚིམ་ནས་བསམ་པ་རངས་ཏེ་ངོ་བོའི་མཐའ་མཐོང་བས་དོན་རྟོགས་པར་བྱའི་ཞེས་བྱའི་ཕྱིར་དུ། དོན་མཚོན་དུ་མེད་ཅིང་མི་དམིགས་པ་ལ། འགྲོ་བའི་དོན་དུ་དེ་ཉིད་མཚོན་ཞིང་དམིགས་པ་ཡི་བྱིན་རླབས་ཀྱི་རྗོད་བྱེད་ཚིག་དང་སྒྲ་རྒྱུད་འདི་ལྟ་བུ་ཆོ་འཕྲུལ་ཆེན་པོས་ཚིག་གིས་བསྟན་ནས། གསང་བའི་དོན་གྱི་དེ་ཁོ་ན་ཉིད་དེ་མཚོན་པར་བྱས་པས་ཚུལ་བཞིན་དུ་རྟོགས་ཤིང་གོམས་པར་བྱ་བ་ནི་དགོས་ཆེད་དོ།།

གཉིས་པ་དགོས་པའི་ཡང་དགོས་པ་བཤད་པ་ནི།

བདེ་གཤེགས་རྒྱལ་བ། ཞེས་པ་ནས། དེ་ཉིད་མཐོང་བྱ་དགོས། །ཞེས་པའི་བར་གྱིས་བསྟན་ཏེ།

བདེར་གཤེགས་རྒྱལ་བ་ཀུན་གྱི་ཐུགས། །གསང་བ་དེ་ཉིད་སྙིང་པོའི་དོན། །མཉམ་ཉིད་བྱང་ཆུབ་ཐེག་ཆེན་པོ། །གསལ་བར་ཀུན་ལ་ཁྱབ་སྣང་བ། །ཀུན་གྱི་དེ་ཉིད་མཐོང་བྱ་དགོས།།

དགོས་པའི་ཡང་དགོས་པ་གང་སྙམ་པ་ལ་འགྱུར་མེད་བདེ་བ་ཆེན་པོའི་ངང་དུ་སོན་པས་བདེ་བར་གཤེགས་པ་རྟོགས་པ་མངོན་གྱུར་གྱི་རྒྱལ་བ་རྫོགས་པའི་སངས་རྒྱས་གདུལ་བྱ་འདུལ་བའི་དབང་གིས་མཚན་ཐ་དད་དུ་གྲགས་པ་ཀུན་གྱི་ཐུགས་གསང་བའི་ཡེ་ཤེས་བརྟག་པར་དཀའ་བ་དེ་ཉིེད་ལ་འབྲས་བུ་ལྷུན་གྱིས་གྲུབ་པས་སྙིང་པོའི་དོན་གྱི་ངོ་བོ་བསྒྲུབ་པར་བྱ་བའི་དོན་མཆོག་བླང་དོར་དང་བྲལ་བས་སྐྱེ་མེད་མཉམ་པ་ཉིད་ནི། ཆོས་སྐུ་བྱང་ཆུབ་ཆེན་པོ་ཞེས་བྱ་ལ། རིལ་གོ་འཕང་དེ་ལ་འགོད་པས་ཐེག་པ་ཆེན་པོ་ཞེས་ཀྱང་བྱ་སྟེ། དེ་ལྟ་བུའི་མཚན་ཉིད་ཅན་གྱིས་མ་བསྒྲིབས་གསལ་བར་ཀུན་ལ་ཁྱབ་ཅིང་བསྣུམས་པའི་ཆོས་ཉིད་རང་བཞིན་གྱི་སྣང་བ་དེའི་དོན་ཉིད་ལམ་པ་གནས་པ་ཀུན་གྱིས་རང་རིག་པའི་མངོན་སུམ་གྱི་དེ་ཁོ་ན་ཉིད་དུ་མཐོང་བར་བྱ་བ་དང༌། བསྒྲུབ་པར་བྱ་བ་དང༌། ཐོབ་པར་བྱ་བའི་ངོ་བོ་ཡིན་པའི་ཕྱིར། དེ་ཉིད་མངོན་དུ་གྱུར་པ་ནི་དགོས་པོའི་ཡང་དགོས་པ་མཐར་ཐུག་པའོ།།

གསུམ་པ་བརྗོད་བྱེད་བཤད་པ་ནི།

ང་ནི་དུས་གསུམ། ཞེས་པ་ནས། སྒོ་དབྱེ་འོས། །ཞེས་པའི་བར་གྱིས་བསྟན་ཏེ།

ང་ནི་དུས་གསུམ་བཞུགས་པ་ཡི། །རྒྱལ་བ་ཀུན་གྱི་སྙིང་པོ་སྟེ། །སྟོང་པར་གནས་པའི་དོན་འདི་ལ།།

བརྡ་དང་དཔེས་མཚོན་ལྡེ་མིག་གིས། །མཉམ་ཉིད་རིག་པའི་སྒོ་དབྱེ་འོ།།

ཁོ་བོ་གསང་བའི་བདག་པོ་སྟོན་པ་དམ་པ་ང་ཉིད་ནི། འདས་པ་དང་ད་ལྟར་དང་མ་འོངས་པའི་དུས་གསུམ་ཀུན་ན་བཞུགས་པ་ཡི་བདེ་བར་གཤེགས་པའི་རྒྱལ་བ་ཀུན་གྱི་ཐུགས་གསང་བའི་ཡེ་༼༣༧༢༽ཤེས་ཀྱི་སྙིང་པོ་རང་བཞིན་འོད་གསལ་བ་ཉིད་ཡིན་ཏེ། དེས་ན་སྟོན་པ་བདག་གིས་དེ་ལྟ་བུའི་མཐའ་གང་དུའང་རྣམ་པ་ཅན་དུ་སྣང་མ་མྱོང་བས་སྟོང་པ་ཆེན་པོ་མཐའ་བྲལ་ངོ་བོ་གསལ་ཁྱབ་ཀྱི་དབྱིངས་རང་བཞིན་དག་པར་སྦས་པའི་ཆོས་ཉིད་དཀྱིལ་འཁོར་རྣམ་གསུམ་དབྱེར་མེད་པའི་གནས་ལུགས་དོན་གྱི་ངོ་བོ་ཉིད། སུས་ཀྱང་མཐོང་བར་དཀའ་བའི་རྒྱུད་ཀྱི་རྒྱལ་པོ་འདི་ཡི་དོན་མ་བཅོས་པའི་རང་བཞིན་དུ་གནས་པ་ལ་མཚོན་བྱེད་མི་འདྲ་བའི་ཐབས་ཀྱིས་དོན་ལ་སྦྱོར་བའི་བརྡ་དང༌། མཐུན་པ་དང་མི་མཐུན་པའི་རྣམ་པས་དོན་ལ་སྦྱོར་བ་དཔེས་མཚོན་ཚུལ་དང། ལྡེའུ་མིག་རྣམ་པ་གསུམ་ལ་སོགས་པའི་རྗོད་བྱེད་དག་གིས་མཚོན་ནས། སྐྱེ་མེད་མཉམ་པའི་ཆོས་ཉིད་གསང་སྔགས་ཇི་བཞིན་པའི་དོན་རྣལ་མ་ཉིད་རང་གསལ་རིག་པ་ལ་སྣང་བར་བྱས་ནས་སྒྲིབ་མེད་དུ་ཤར་བའི་སྒོ་དབྱེ་བར་འོས་པས་དེ་ལྟར་སྟོན་པ་པོ་ལ་འཆད་པའི་སྐྱེས་བུ་ཞེས་བྱའོ།།

བཞི་པ་བརྗོད་བྱ་བསྟན་པ་ནི།

སྦས་པའི་དོན་མཚོན། ཞེས་པ་ནས། དེ་བཞིན་ཉིད་དུ་འཐད། །ཅེས་པའི་བར་གྱིས་བསྟན་ཏེ།

སྦས་པའི་དོན་མཚོན་དབྱུང་བའི་རིགས། །མ་མཐོང་རྣམས་ལ་བསྟན་པར་དཀའ།།

དེ་མཐོང་དེ་བཞིན་ཉིད་དུས་འཐད།།

བརྗོད་བྱ་གང་ཞེ་ན། རྒྱལ་བ་ཀུན་གྱི་ཐུགས་ལ་གབ་ཅིང་སྦས་ཏེ་མངོན་དུ་མ་ཕྱུང་བ་གང་མཐར་འཛིན་ཅན་ལ་རང་གསང་ཐབས་ཀྱིས་ཆོད་པའི་ཆོས་ཉིད་རྒྱུད་མཆོག་འདི་ཡིས་མཚོན་བྱ་དོན་གྱི་ངོ་བོ་དེ་ཉིད་དེ། དེ་ལྟར་བརྗོད་བྱར་གྱུར་པ་གང་དེ་ཚིག་གི་ཆོ་འཕྲུལ་གྱིས་མཚོན་ནས་དོན་གྱི་ངོ་བོ་ཉིད་ངེས་པར་དབྱུང་ཞིང་གསལ་བར་བྱ་བར་ཤིན་ཏུ་རིགས་པས་ན། ཇི་བཞིན་པར་མཚོན་པའི་ཚིག་སྡེབས་ལེགས་པས་གནས་ལུགས་མ་མཐོང་བ་རྣམས་ལ་བསྟན་པར་གཤའ་བའམ། སྡེ་སྤར་ལྟར་ན་བརྗོད་དེ་བཤད་པས། མཚོན་བྱའི་དོན་དེ་ཉིད་མཐོང་ཞིང་རྟོགས་པ་ན། ངོ་བོ་ཡེ་ནས་མ་བཅོས་པའི་དེ་བཞིན་ཉིད་དུ་དངོས་པོ་སྟོབས་ཞུགས་ཀྱི་རིགས་པ་མཐར་ཐུག་པའི་ལམ་ནས་འཐད་པར་གྲུབ་པ་ཡིན་པས། དེ་ལྟར་རིགས་པས་མཇལ་ཏེ་འདོད་པའི་དོན་རྟོགས་པའོ། །འོ་ན་སྟོན་པའི་དགོས་འབྲེལ་ལས་བསྟན་པའི་དགོས་འབྲེལ་མེད་དོ་ཞེ་ན་སྔར། གསང་སྔགས་རྡོ་རྗེའི་ཐེག་པ་འདི། །དེ་བཞིན་གཤེགས་པ་ཉིད་དུ་གསལ། །ཞེས་པས་ཤིན་ཏུའང་ཡོད་དེ་རྫོགས་པར་གསལ་ངེས་སོ། །དེས་ན་མ་འདྲེས་ཡོངས་རྫོགས་ཀྱི་བསྟན་མཆོག་གསང་བ་དམ་པའི་རང་གི་མཚན་ཉིད་ལྟར་བཤད་ན་ཡང༌། དུར་ཁྲོད་ཁུ་བྱུག་རོལ་པའི་མདོ་ལས།

ཁམས་གསུམ་གནས་པའི་སེམས་ཅན་ལ། །མདོ་དོན་འདི་ལྟར་གཅེས་པས་ན། །

དགོས་པ་ཞེས་སུ་བཤད་པ་ཡིན། །འདི་དོན་རྟོགས་པས་རྣལ་འབྱོར་པས། །གཞན་དག་བདེ་བླག་རྟོགས་འགྱུར་བས། །མདོ་གཞན་དག་དང་འབྲེལ་བར་བཤད། །མདོ་འདི་དག་ལ་བརྟེན་ནས་སུ། །དངོས་གྲུབ་ཁྱད་པར་ཅན་ཡང་ཐོབ། །དེས་ན་དགོས་པ་དག་དང་འབྲེལ། །ཏིང་ངེ་འཛིན་དང་བྱང་ཆུབ་སེམས། །གཟུགས་བརྙན་ཏིང་འཛིན་དཀྱིལ་འཁོར་དང༌། །སྔགས་དང་ཕྱག་རྒྱ་ཐུགས་རྗེས་འདུལ། །ལས་དང་དམ་ཚིག་མདོ་ཡི་དོན། །རྣམ་བཤད་བརྗོད་པ་ཞེས་༼༣༧༢༽སུ་བཤད། །དངོས་གྲུབ་འབྲས་བུ་ཁྱད་པར་ཅན། །གདོན་མི་ཟ་བར་ངེས་འགྲུབ་པ། །ཡང་དགོས་ཡིན་པར་རྒྱལ་བས་གསུང༌། །དེ་བས་རྣམ་པ་བཞི་པོ་ཡིས། །བདེ་བླག་དག་ཏུ་རྟོགས་འགྱུར་ཕྱིར། །རྣམ་བཞི་ཁོང་དུ་ཆུད་པ་གཅེས། །ཞེས་གསུངས་པ་ལྟར། གསང་བའི་རང་གནད་ལ་བརྟེན་ནས་ཆོས་ཉིད་ཡོངས་སུ་རྫོགས་པའི་དོན་གྱི་གསང་བ་མ་ནོར་བར་རྙེད་ནས་མཚན་ཉིད་རྟོགས་པ་ལ་འཇུག་པར་བྱའོ། །དགོས་འབྲེལ་ཁྱད་པར་ཅན་དང་ལྡན་པ་དེ་བས་ན་སྟོན་པ་གསང་བདག་ཆེན་པོ་ངས་བཤད་དོ་ཞེས་ཞལ་གྱིས་བཞེས་པའི་དོན་ཏོ།།

གསུམ་པ་ཞབས་བསྡུ་བ་ནི།

ཞེས་གསང་བ་པའི། ཞེས་པ་ནས། ཆུབ་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ཅེས་གསང་བའི་བདག་པོ་དེས། ཆོས་ཐམས་ཅད་དགོངས་འབྲེལ་ཡན་ལག་བཞིར་འདུས་པར་གོ་ཆ་བགོས་སོ། །དེ་ནས་ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས་ཀྱང་།

དགོས་འབྲེལ། ཡན་ལག་བཞིའི་སྒོ་ནས། ཆོས་ཐམས་ཅད་ཡོངས་སུ་ཆུབ་པར་གྱུར་ཏོ།།

དེ་སྐད་ཅེས་གསང་བ་སྔགས་ཀྱི་ཐེག་པའི་བདག་པོ་སེམས་དཔའ་རྡོ་རྗེ་དེས། ཆོས་ཐམས་ཅད་འདིར་དགོས་འབྲེལ་ཡན་ལག་བཞིར་འདུས་པར་གོ་ཆ་བགོས་ཏེ་རྒོལ་བ་པོས་མི་ཚུགས་པར་མཛད་དེ། གསང་ཆེན་ལུང་གི་བསྟན་པ་གསལ་བར་བྱས་སོ། །དེ་ནས་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས་ཀྱང་དགོས་འབྲེལ་ཡན་ལག་བཞིའི་སྒོ་ནས་ཆོས་ཐམས་ཅད་བློ་ལ་ཡོངས་སུ་ཆུབ་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

འབྲེལ་བ་དགོས་ཆེད་ཀྱི་ཡན་ལག་བསྟན་པའི་ལེའུ་སྟེ་བཞི་བཅུ་དགུ་པའོ།། །།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། འབྲེལ་བ་དགོས་ཆེད་ཀྱི་ཡན་ལག་རྣམ་པ་བཞིར་ཕྱེ་ནས་བསྟན་པའི་ལེའུ་སྟེ། བཞི་བཅུ་རྩ་དགུ་པ་ཉིད་གསལ་བར་རྣམ་པར་བཤད་པའོ།། །།

ལེའུ་ལྔ་བཅུ་པ་ཡོངས་སུ་འདྲེན་པའི་ཡན་ལག་རྣམ་པར་བགྲོས་པ།

༈ བཞི་པ་འདྲེན་པའི་ཡན་ལག་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས། ཞེས་པ་ནས། རྣམ་པར་སྦྱར་བ་ཡིན། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས། ལངྐའི་བདག་པོ་ལ་བོས་ཏེ་སྨྲས་པ། ལངྐའི་བདག་པོ་དེ་ལ་འདྲེན་པའི་ཡན་ལག་གང་ཞེ་ན། གང་ལས་གང་དུ་ཡོངས་སུ་འདྲེན་པ་སྟེ། དེ་ཡང་འདི་ལྟར་ཡོངས་སུ་བགྲོ་བ་རྣམ་པར་བགྲོ་བར་བྱའོ། །ལངྐའི་བདག་པོ་འདི་ལྟ་སྟེ། ཡོངས་སུ་འདྲེན་པའི་ཡན་ལག་ནི། །བཅུ་ཕྲག་གཅིག་གིས་འདྲེན་པས་ནི། །སྨྲ་བརྗོད་ཚིག་གི་ཡན་ལག་རྫོགས། །གང་ལ་ལྟ་དང་སྒོ་འབྱེད་དང་། །སྡུད་དང་སྦྱོར་བར་འདྲེན་པ་དང་། །རྐྱེན་དང་གཞན་དམིགས་འཛིན་པའི་ཚིག །མ་བཅོས་མེ་ལོང་སྣྲེལ་ཞི་རྣམས། །མེ་ལོང་བཅུ་དང་མཐུན་སྦྱར་བས། །ཚིག་དོན་རྣམ་པར་སྦྱར་བ་ཡིན།།

ལེའུ་འདིས་དྲང་དོན་སྟོན་ནོ། །དགོས་འབྲེལ་བསྟན་མ་ཐག་པ་དེ་ནས་ཡན་ལག་བཞི་པ་བསྟན་པའི་ཕྱིར། སྟོན་པ་གསང་བ་པའི་བདག་པོ་དེས། ལང་ཀའི་བདག་པོ་ལ་བོས་ནས་བཀའ་སྩལ་ཏེ་སྨྲས་པ་ནི། སྡུད་པ་པོ་ལང་ཀའི་བདག་པོ། དེ་ལ་རྒྱུད་ཀྱི་འདྲེན་པའི་ཡན་ལག་གང་ཞེ་ན། དེ་ཉིད་ཉེ་བར་བསྟན་པ་དངོས་ནི། རྒྱུད་ཀྱི་ཚིག་གི་དངོས་པོ་གང་ལས་༼༢༽བཤད་པའི་ཐབས་ཀྱི་ཡན་ལག་གང་ཡིན་པ་ནང་རིས་མི་མཐུན་པར་སོ་སོ་ཉིད་དུ་ཡོངས་སུ་འདྲེན་པ་སྟེ། དེ་ཡང་འདི་ལྟར། རྒྱུད་དོན་འདྲེན་པའི་ཚིག་བཅུར་ཡོངས་སུ་འགྲོ་བ་གང་ཅི་ལྟར་ཡིན་པ་དེ་ལྟར་ཁྱེད་ལ་བཤད་དེ་རྣམ་པ་བགྲོ་བར་བྱའོ། །ཞེས་གནང་བའོ། །དེ་ཡང་ལང་ཀའི་བདག་པོ་འདི་ལྟ་སྟེ། ཞེས་རྒྱས་པར་བཤད་དེ་ཡོངས་སུ་འདྲེན་པའི་ཡན་ལག་ནི། རྣམ་གྲངས་བཅུ་ཕྲག་གཅིག་གིས་དོན་ལ་འདྲེན་པས་བཤད་ཐབས་སུ་རྣམ་པར་ཕྱེ་ནས་བསྟན་ན་ནི། ཇི་སྐད་བཤད་པའི་39སྨྲ་བརྗོད་ཚིག་གི་ཡན་ལག་མཐར་ཕྱིན་པར་འགྱུར་ཏེ་ཡོངས་སུ་རྫོགས་པའོ། །རྣམ་གྲངས་བཅུ་པོ་གང་ཞེ་ན། གང་རང་བཞིན་ལ་ལྟ་བ་དང༌། སྒོ་རྣམ་པར་འབྱེད་པ་དང༌། སྤྱི་དོན་སྡུད་པ་དང༌། འབྲེལ་བ་སྦྱོར་བར་འདྲེན་པ་དང༌། རང་རྐྱེན་གཉེར་བ་དང༌། གཞན་ལ་མི་མཚམས་པར་མཚམས་པ་ལྡེམ་དགོངས་དང༌། དོན་གྱི་དམིགས་འཛིན་པའི་ཚིག་གཏར་ཀ་གེགས་སེལ་དང༌། ཚད་མའི་བཀའ་མ་བཅོས་པ་དང༌། མཚོན་པ་དཔེའི་མེ་ལོང་དང༌། སྣོལ་མཚམས་སྣྲེལ་ཞི་གང་ཡིན་པའི་བཤད་ཐབས་བཅུ་པོ་རྣམས། འཆད་པའི་དཔེ་མེ་ལོང་བཅུ་ཡི་བྱེད་ལས་ཀྱིས་བརྟགས་པ་དང་མཐུན་པར་སྦྱར་བས། བཤད་ཐབས་ཀྱི་ཚིག་འདིས་རྒྱུད་ཀྱི་དོན་ལ་བཀབ་སྟེ་འདྲེན་པའི་ཚིག་དང་། དེས་དོན་མཚོན་ཚུལ་རྣམ་པར་སྦྱར་ཏེ་མ་འདྲེས་ཡོངས་རྫོགས་སུ་བཤད་པར་བྱ་བ་ཡིན་ནོ།།

གཉིས་པ་རྒྱས་པར་བཤད་པ་ལ་བཅུ་སྟེ། རང་བཞིན་ལྟ་བའི་ཚིག་ཁྱུང་ནམ་མཁའ་ལ་ལྡིང་བ་ལྟར་བཤད་པ། རྣམ་པར་དབྱེ་བའི་ཚིག་སྟག་གི་མཆོང་སྟབས་ལྟར་བཤད་པ། སྤྱི་དོན་སྡུད་པའི་ཚིག་སེང་གེའི་མཆོང་རྩལ་ལྟར་བཤད་པ། འབྲེལ་བར་སྦྱོར་བའི་ཚིག་ངང་མོའི་འགྲོས་ལྟར་བཤད་པ། རང་རྐྱེན་གཉེར་གྱི་ཚིག་རུས་སྦལ་གྱི་ནུར་འགྲོས་ལྟར་བཤད་པ། ལྡེམ་དགོངས་མན་ངག་གི་ཚིག་རྣ་ཕྲུག་བྲག་ལ་འཛེགས་པ་༼༣༽ལྟར་བཤད་པ། གཏར་ཀ་གེགས་སེལ་གྱི་ཚིག་གླ་ཁྲ་མོ་གཟན་ལ་འཇུམས་པ་ལྟར་བཤད་པ། ཚད་མ་བཀའ་གཞུང་གི་ཚིག་དུས་ཀྱི་འབྲུག་ཆར་ལྟར་བཤད་པ། མཚོན་པ་དཔེའི་ཚིག་མེ་ལོང་དྭངས་པའི་ངོས་ལྟར་བཤད་པ། བསྣོལ་མཚམས་འཕེན་སྡུད་ཀྱི་ཚིག་ཐགས་དང་སེང་ཕྲུག་རྩལ་སྦྱོང་བ་ལྟར་བཤད་པའོ།།

དང་པོ་རང་བཞིན་ལྟ་བའི་ཚིག་ཁྱུང་ནམ་མཁའ་ལ་ལྡིང་བ་ལྟར་བཤད་པནི།

ལང་ཀའི། ཞེས་པ་ནས། ལྟ་འཕང་རླབས་སུ་གཅོད། །ཅེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། །གང་ལ་བལྟ་དང་ལྟ་བ་ནི། །གང་འདིར་མཁའ་ལ་འགྲོ་བ་ནི། །རྩལ་གྱིས་ནམ་འཕང་རླབས་སུ་གཅོད། །དེ་བཞིན་འདི་ཉིད་འདིར་བགྲོ་བ། །མ་འདྲེས་ལྟ་འཕང་རླབས་སུ་གཅོད།།

དེ་དག་རེ་རེ་ནས་བསྟན་པའི་ཕྱིར། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། གྲངས་བསྟན་པ་དེ་ཡང་འདི་ལྟ་སྟེ། ཐོག་མར་ལྟ་བ་ཉེ་བར་བསྟན་པ་ནི། རྒྱུད་ཀྱི་དངོས་པོར་གང་ལ་རང་བཞིིན་གྱི་ལྟ་བར་བྱ་བའི་ཡུལ་དང་ལྟ་བར་བྱེད་པའི་ཤེས་པ་གཉིས་མེད་པར་ངང་གིས་གསལ་བའི་ལྟ་བ་མཆོག་གི་དོན་ནི། གང་གསང་བ་ཟབ་མོའི་ལྟ་བ་དེ་ཁོ་ན་ཉིད་ཀྱི་ཁྱུང་དབྱིངས་ཀྱི་ནམ་མཁའ་ལ་ལྡིང་བས་གཉིས་མེད་དུ་ངེས་པར་སྣང་བའི་སྐབས་འདིར། དཔེར་ན་བྱ་ཁྱུང་གི་ནམ་མཁའ་ལ་འཕུར་ཏེ་འགྲོ་བ་ནི། གཤོག་པའི་རྩལ་གྱིས་ནུས་པས་རི་བྲག་དང་གྱེན་ཐུར་ཐམས་ཅད་ཁོབ་འོག་ཏུ་ཆུད་པས་ནམ་འཕང་རླབས་སུ་གཅོད་དེ་ལྡིང་བ་ཡང་འཕང་མཐོ་ལ་ཉམ་ང་བ་དང་རྗེས་མེད་པ་ལྟར། དེ་བཞིན་དུ། རྣལ་འབྱོར་པ་ལམ་ཆེན་པོར་ངེས་པས། རྒྱུད་དོན་ཟབ་མོའི་ཆོས་ཉིད་དེ་བཞིན་ཉིད་ལྟ་བའི་དེ་ཁོ་ན་ཉིད་འདིར་བློ་ཤེས་རབ་ཀྱིས་རྟོགས་ནས་གཉིས་མེད་དུ་འགྲོ་བར་བྱེད་པ་ཉིད་ནི། འོག་མ་དང་མ་འདྲེས་པར་ལུང་དང་མན་ངག་གི་ཐབས་དང་ལྡན་པའི། ལྟ་བས་ཆོས་སོ་ཅོག་མ་འདྲེས་ཡོངས་རྫོགས་སུ་རྟོགས་ཏེ་སྤྱོད་ཡུལ་མེད་པར་ཡེ་ཤེས་ཆེན་པོར་རང་གསལ་བ་ལས། མུན་པ་དང༌། ལོག་སྤྱོད་དང་བྱིས་པ་དང་ཕྱོགས་སུ་རིག་པ་དང་མཐའ་དབུས་འབྱེད་པ་དང༌། དམ་པ་ཆེན་པོའི་ཤེས་པ་དྲུག་གི་འཕང་བཅད་ནས་དོགས་ཐོགས་དང༌། བླང་དོར་མེད་པར་སྤྱི་རྒྱ་རླབས་རྩལ་གྱིས་ཡོངས་སུ་གཅོད་པར་འགྱུར་རོ། །དེ་བས་ན་སྒྱུ་འཕྲུལ་ཐུགས་ཐིག་ལས་ཀྱང༌། ག་རུ་ཊ་ཡི་ཆོས་བཞི་པོས། །རྣལ་འབྱོར་ཅན་གྱིས་ལྟ་འཕང་བཅད། །ཅེས་འབྱུང་བས། ཆོས་བཞི་སྟེ། ཇི་ལྟར་ཁྱུང་ནམ་མཁའ་ལ་ལྡིང་བའི་ཚེ། མིག་གྱེན་དུ་ལྟ་བ་དང༌། གཤོག་པ་གཡོབ་པའི་རྩོལ་བ་མེད་པ་དང༌། ངམ་གྲོག་དང་གཡང་སར་ཉམ་མི་ང་བ་དང༌། བྱ་ལམ་ལ་རྗེས་མེད་པ་བཞིན་དུ། འདིའི་གོང་ན་རྟོགས་བྱ་༼༤༽གཞན་མེད་པས་རང་བཞིན་ལྟ་བའི་ཚིག་གིས་ཐེག་པ་ཐམས་ཅད་ཁོབ་འོག་ཏུ་འཇུག་པ་དང༌། ལམ་བགྲོད་པའི་རྩོལ་བ་དང་བྲལ་བ་དང༌། ལྟུང་གནས་སྲིད་པ་དང་ཞི་བའི་མཐའ་ལ་ཉམ་མི་ང་བ་དང༌། བལྟ་བྱ་ལྟ་བྱེད་བློ་ཡུལ་དུ་བྱེད་པའི་རྟོག་པ་མེད་པའོ།།

གཉིས་པ་རྣམ་པར་དབྱེ་བའི་ཚིག་སྟག་གི་མཆོང་སྟབས་ལྟར་བཤད་པ་ནི།

བགྲོད་པར་བྱ་བའི། ཞེས་པ་ནས། ཚོམས་སུ་བཅོད། །ཅེས་པའི་བར་གྱིས་བསྟན་ཏེ།

བགྲོད་པར་བྱ་བའི་ས་ཚིག་དག །རྩལ་ཚད་དག་གི་རྩལ་དུ་གཅོད།།

དེ་བཞིན་དོན་དང་ཚིག་མཚམས་དག །དོན་གྱི་ཚིག་དང་ཚོམས་སུ་གཅོད།།

དཔེར་ན་ས་བཅད་པར་བྱ་བའི་ཕྱིར་ལམ་གྱི་རྒྱུད་ཀྱི་བགྲོད་པར་བྱ་བའི་ས་ཚིགས་40དག སྟག་གིས་མཆོང་རྩལ་གྱི་ཚད་དག་གིས་སའི་ཚད་ཀྱང་ཚོམ་ཉིད་དུ་གཅོད་པ་ལྟར་དཔེ་དེ་བཞིན་དུ་འདིར་ཡང་དོན་གྱི་ཚོམས་གང་སྟོན་པ་དང༌། དེའི་ཚིག་གི་དཀྱུས་ཀྱི་བར་མཚམས་དག་ས་གཅོད་ཀྱི་ལྡེའུ་མིག་གི་དབྱེ་བས་དོན་གྱི་ཚོམས་ཀྱི་དཀྱུས་ཚིགས་དང་དེའི་ཚིག་གི་མཚམས་ཀྱི་ཚོམས་སུ་གཞན་དང་མ་འདྲེས་པར་གཅོད་པར་བྱ་བའོ། །དེ་བས་ན་སྔ་མ་ལས་ཀྱང༌། བྱ་གྷྲ་མཆོང་བ་དེ་བཞིན་པས། །ཏནྟྲའི་ཚིག་དོན་དུམ་བུར་གཅོད། །ཅེས་པ་སྟེ། ཇི་ལྟར་སྟག་མཆོངས་པའི་ཚེ། བགྲོད་བྱའི་ས་ཚིགས་དུམ་བུར་དུམ་བུར་བཅད་ནས་མཆོངས་པ་བཞིན་དུ་རྣམ་པར་དབྱེ་བའི་ཚིག་གིས་ཚིག་དོན་གྱི་དམིགས་སོ་སོར་ཕྱེ་ནས་མིང་འདོགས་གསལ་བར་སྟོན་པའོ།།

གསུམ་པ་སྤྱི་དོན་སྡུད་པའི་ཚིག་སེང་གེའི་མཆོང་རྩལ་ལྟར་བཤད་པ་ནི།

ཇི་ལྟར་གང་གི ཞེས་པ་ནས། གཅིག་ཏུ་སྡུད། །ཅེས་པའི་བར་གྱིས་བསྟན་ཏེ།

ཇི་ལྟར་གང་གིས་ཁོབས་འོག་ཏུ། །ས་ཁམས་མང་པོ་ཆུད་པ་ལྟར།།

བརྗོད་པའི་རྣམ་གྲངས་མང་པོ་ཀུན། །གང་གི་ངོ་བོ་གཅིག་ཏུ་སྡུད།།

དཔེ་ཇི་ལྟར་ན་སེང་གེའི་རྩལ་གྱིས་མཆོངས་པ་གང་གི་41ཁོབས་འོག་ཏུ། ས་ཚིགས་རི་བྲག་ཡུལ་ཁམས་མང་པོ་འདུས་ཤིང་ཆུད་པ་ལྟར་དུ། རྐྱེན་ཡི་གེའི་རྒྱུད་ཀྱི་ཚིག་གི་ཁྱད་པར་གྱིས་དོན་ཇི་བཞིན་དུ་བརྗོད་པའི་བྱ་བ་བྱེད་པའི་རྒྱུད་དབུ་ཞབས་ཀྱི་རྣམ་གྲངས་མང་པོ་ཀུན་ཀྱང་དོན་གྱི་ཁོག་དབུབ་སྟེ་བརྗོད་བྱའི་ངོ་བོ་མ་ནོར་བར་དཀྱིལ་འཁོར་གསུམ་མམ་གཞི་ལམ་འབྲས་བུ་ལྟ་བུ་གང་གི་དོན་གྱི་ངོ་བོ་གཅིག་ཉིད་དུ་ཡོངས་སུ་སྡུད་དེ། དེ་ལས་སོ་སོའི་ཡན་ལག་རྣམས་འབྱུང་བར་ཤེས་པར་བྱ་བའོ། །དེ་བས་ན་དོན་ལྷུན་གྱིས་གྲུབ་པ་གཅིག་ལས་རྣལ་འབྱོར་གསུམ་དུ་ཕྱེ་ནས་འགྲེལ་པའང་ངོ་བོ་ཉིད་གཅིག་ཏུ་དབྱེར་མེད་པར་སྟོན་པའོ། །དེ་ལྟ་བས་ན་སྔ་མ་ལས། སེང་གེ་མཆོངས་པའི་ཆོས་གཅིག་ལྟར། །རྣམ་གྲངས་ཚིག་ལམ་དོན་གཅིག་སྡུད། །ཅེས་པ་སྟེ། ཇི་ལྟར་སེང་གེ་མཆོངས་པའི་ཚེ། ས་ཚིགས་དུ་མ་ཁོག་འོག་ཏུ་ཆུད་པ་བཞིན་དུ། ཚིག་དོན་གྱི་རྣམ་གྲངས་དུ་མ་རྣམས་སྤྱི་དོན་བསྡུ་བའི་ཚིག་གིས་དོན་གྱི་ངོ་བོ་གཅིག་ཏུ་སྡུད་པའོ།།

བཞི་པ་འབྲེལ་བར་སྦྱོར་བའི་ཚིག་ངང་མོའི་འགྲོས་ལྟར་བཤད་པ་ནི།

གང་དག་གང་ལྟར། ཞེས་པ་ནས། འབྲེལ་བར་སྦྱོར། །ཞེས་པའི་བར་གྱིས་༼༥༽བསྟན་ཏེ།

གང་དང་གང་ལྟར་འགྲོ་བ་དག །དྲང་པོར་འབྲེལ་རྗེས་ནོན་པར་སྣང་།།

བརྗོད་དང་བརྗོད་པའི་ཚིག་མཚམས་དག །གང་འདིར་མི་འཁྲུགས་འབྲེལ་བར་སྦྱོར།།

ཚིག་གི་མཚམས་སྦྲེལ་བ་ནི། དཔེར་ན་འདབ་ཆགས་ངང་པ་གང་དག་ཕྱོགས་གང་དང་གང་དུ་ཇི་ལྟར་འགྲོ་བ་ན་ཡང་དེ་དག་གི་གོམ་འགྲོས་དྲང་པོར་འབྲེལ་ཏེ་མི་འཁྱོག་པར་སྔ་རྗེས་ཉིད་ཕྱི་རྗེས་ཀྱིས་ནོན་པར་སྣང་བ་ལྟ་བུར་འབྲེལ་ཏེ་མཐར་ཆགས་སུ་གྱུར་པ་ལྟར། སྔར་བརྗོད་པའི་ཚིག་དང་ཕྱིས་བརྗོད་པའི་ཚིག་གི་གོང་འོག་གི་མཚམས་དག་འབྲེལ་བར་བྱས་ཏེ། གང་བརྗོད་བྱ་རྒྱུད་ཀྱི་དོན་འདིར་ཡང་ངོ་བོ་མ་ནོར་བར་ས་གཅོད་པའི་ཚུལ་གྱིས་ཚིག་དོན་སྔ་ཕྱི་མི་འཁྲུགས་པར་གོང་འོག་གི་ཚིག་དོན་འབྲེལ་བ་དང་བཅས་ཏེ་ཞིབ་ཏུ་ངེས་པར་སྦྱོར་ནས་འདབ་འབྱོར་དུ་འཆད་པའོ། །དེ་བས་ན་སྔ་མ་ཉིད་ལས། ངང་མོའི་འགྲོས་ཆོས་རྣམ་གཉིས་ལྟར། །གཞུང་དོན་དབུ་ཞབས་ལེ་མཚམས་སྦྱོར། །ཞེས་པ་སྟེ། ཇི་ལྟར་ངང་མོ་འགྲོ་བའི་ཚེ། སྔ་ཕྱི་དྲང་པོར་འགྲོ་ཞིང༌། སྔ་རྗེས་ཕྱི་རྗེས་ཀྱིས་ནོན་པར་འགྲོ་བ་བཞིན་དུ། འབྲེལ་མཚམས་སྦྱོར་བའི་ཚིག་གིས་ཚིག་འབྲེལ་དང་དོན་འབྲེལ་མ་ཆད་པར་སྦྱོར་བའོ།།

ལྔ་པ་རང་རྐྱེན་གཉེར་གྱི་ཚིག་རུས་སྦལ་གྱི་ནུར་འགྲོས་ལྟར་བཤད་པ་ནི།

གང་འགྲོ་གནས་སུ། ཞེས་པ་ནས། དེ་བཞིན་སྦྱོར། །ཞེས་པའི་བར་གྱིས་བསྟན་ཏེ།

གང་འགྲོ་གནས་སུ་བགྲོད་པ་ནི། །གཡོ་འགུལ་མི་མངོན་ཤུགས་ཀྱིས་འགྲོ།།

ཡི་གེ་བརྗོད་དང་རང་གཉེར་གྱི། །གང་གི་ངོ་བོ་དེ་བཞིན་སྦྱོར།།

རང་རྐྱེན་གཉེར་གྱི་ཚིག་ནི། དཔེར་ན་རུས་སྦལ་གྱིས་དངོས་པོ་རྣམས་གང་དུ་འགྲོ་བར་འདོད་པའི་གནས་སུ་ནུར་འགྲོས་ཀྱིས་བགྲོད་པ་ནི། གཞན་གྱིས་གཡོ་འགུལ་དུ་འགྲོ་བར་མི་མཐོང་བས་ཆེར་མི་མངོན་ཀྱང་རང་གི་ནུར་བའི་ཤུགས་ཀྱིས་འགྲོ་བས་གནས་དེར་ཕྱིན་པ་ལྟར། དཀྱུས་ཀྱི་ཡི་གེ་དབུ་ཞབས་རྫོགས་པའི་ཚིག་ཏུ་བཤད་དེ་མཐར་ཆགས་སུ་བརྗོད་པ་དང་མཐུན་པར་གནས་སྐབས་དོན་གྱི་གཏན་ཚིགས་ལུང་དང་མན་ངག་གི་གསང་བ་ཟབ་མོ་རྣམས་རང་རྐྱེན་གཉེར་གྱིས་ཚིག་གིས་གཞུང་གི་འབྲུ་གནོན་ལ་བརྟེན་ནས་དོན་གང་གི་དངོས་གཞིའི་ངོ་བོ་ཇི་ལྟར་ཡིན་པ་དེ་ཉིད། ཤུགས་ཀྱིས་གསལ་བར་བྱས་ནས་དེ་ཁོ་ན་བཞིན་དུ་སེལ་མེད་པར་ཞིབ་ཏུ་སྦྱོར་ཏེ་སྤྱིར་བཤད་ཚུལ་བཅུ་དང་གཞི་ལམ་འབྲས་བུ་གསུམ་སྦྱར་ཞིང་རྒྱུད་དྲུག་གམ་ཁྱད་པར་དུ་ཡང་ངེས་པའི་གསང་སྒོའི་རྒྱུད་གསུམ་པོ་རང་རང་གི་དཀྱུས་དོན་བརྡའ་འཕྲོད་ངེས་སུ་བཤད་དེ་བརྗོད་བྱའི་ཐོག་ཏུ་འབེབས་པར་བྱེད་པའོ། །དེ་བས་ན། སྔ་མ་ལས། རུས་སྦལ་འགྲོས་ཀྱི་ཆོས་གཉིས་པོས། །འབྲུ་སྟོང་མི་བཞག་གཟེར་བུ་གདབ། །ཅེས་པ་སྟེ། ཇི་ལྟར་རུས་སྦལ་འགྲོ་བ་ལ་ཆོས་གཉིས་ཏེ། གཡོ་འགུལ་མི་མངོན་པར་ཤུགས་ཀྱིས་འགྲོ་བ་དང༌། ས་སྟོང་མི་ལུས་པར་རྗེས་ཀྱིས་ཁྱབ་པ་བཞིན་དུ། རང་རྐྱེན་གཉེར་གྱི་ཚིག་གིས་འབྲུ་སྟོང་མི་བཞག་པར་ཚིག་དོན་བརྡ་འཕྲོད་པར་བྱེད་པའོ།།

དྲུག་པ་ལྡེམ་དགོངས་མན་ངག་གི་ཚིག་རྣ་ཕྲུག་བྲག་ལ་འཛེགས་པ་ལྟར་བཤད་པ་ནི།

གང་ཞིག་གང་ལྟར། ཞེས་༼༦༽པ་ནས། དེར་མཚམས་སྦྱོར། །ཞེས་པའི་བར་གྱིས་བསྟན་ཏེ།

གང་ཞིག་གང་ལྟར་གང་འགྲོ་བ། །མི་འཚམ་པ་ལ་དེར་འཚམ་སྣང་།།

བརླང་པོ་ཞེར་འདེབས་སྐྱོན་ཚིག་རྣམས། །གང་མི་འཚམས་པར་དེར་མཚམས་སྦྱོར།།

ལྡེམ་དགོངས་མན་ངག་གི་ཚིག་གང་ཞེ་ན། དཔེར་ན་རྣ་ཕྲུག་ཆུང་ངུ་གང་ཞིག་གང་བྲག་གི་གཡང་སར་ཡང་བདེ་བླག་ལྟར་འཛེགས་ཏེ་གང་གི་ངོས་ལ་འགྲོ་བ་དེ་ནི། ཆུང་བས་རི་དྭགས་གཞན་པ་ལ་མི་འཚམས་ཤིང་མི་རིགས་པ་ཡིན་ན་ཡང་རྣ་ཕྲུག་ཁོ་ན་ཉིད་ལ་བདེར་ཞེས་བདེ་བླག་ཏུ་འཚམས་པ་ལྟར་སྣང་བ་བཞིན་དུ། རི་དྭགས་གཞན་ལྟ་བུའི་སྔགས་ཕྱི་པ་གང་ལ་མི་འཚམས་པ། ལྔ་ཚོ་བཞི་སྤྱད་པ་ལྟ་བུ་སྤྱོད་པ་བརླང་པོ་དང་ཕ་རོལ་ལ་ཞེར་འདེབས་སུ་སྣང་བའི་སྒྲ་བརྗོད་འདོད་ཡོན་ལྔ་དང་མཚམས་མེད་ལྔ་སོགས་སྤྱོད་པར་གསུངས་པ་ལྟ་བུའི་སྐྱོན་ཚིག་བསྟན་པ་རྣམས་ཀྱང༌། འདིར་བཤད་པ་ལྟར་དོན་གཞན་དུ་ལྡེམ་པོ་ལ་དགོངས་ནས་གསུངས་པས། དེ་ཡིས་དོན་འགྲུབ་པར་ཐེག་འོག་པ་གང་གི་རང་ཐད་དུ་མི་འཚམས་པ་ལྟར་སྣང་ཡང༌། གསང་མཆོག་འདིར་ནི་ཐབས་དེ་ཉིད་ཀྱིས་འདུ་ཤེས་བསྒྱུར་ནས་འདུལ་བར་བྱེད་པས་གསང་ཆེན་ཐབས་ཀྱིས་ཟིན་པ་དེར་ཤིན་ཏུ་འཚམས་པར་ངེས་པས་ན་དེ་ལྟར་སྟོན་ཏེ་དོན་ལ་སྦྱོར་བའོ། །དེ་བས་ན་སྔ་མ་ལས། གནའ་ཕྲུག་འཛེགས་པའི་ཆོས་གཉིས་ལྟར། །ལྡེམ་དགོངས་གསང་བ་བརྒྱད་ཀྱིས་སྦྱར། །ཞེས་པ་སྟེ། ཇི་ལྟར་གནའ་ཕྲུག་བྲག་ལ་འཛེགས་པ་ལ་ཆོས་གཉིས་ཏེ། སྐྱེས་མ་ཐག་ཏུ་བྲག་མེ་ལོང་གི་ངོས་ལྟ་བུ་ལ་རྩེད་མོ་རྩེ་ཞིང་འགྲོ་བ་དང༌། དེ་རི་དྭགས་གཞན་ལ་མི་འཚམས་ཀྱང་ཁོ་རང་ལ་འཚམས་པ་བཞིན་དུ། ལྡེམ་དགོངས་མན་ངག་གི་ཚིག་གིས་ཟབ་ལམ་སྦས་ཚུལ་དུ་བསྟན་པ་རྣམས་ཐབས་ཀྱིས་འབྱིན་པ་དང༌། དེ་ཐེག་པ་འོག་མ་རྣམས་ལ་མི་འཚམས་ཀྱང་འདིར་འཚམས་པའོ།།

བདུན་པ་གཏར་ཀ་གེགས་སེལ་གྱི་ཚིག་གླག་ཁྲ་མོ་གཟན་ལ་འཇུམས་པ་ལྟར་བཤད་པ་ནི།

གང་དག་ཡིད་ལ། ཞེས་པ་ནས། མངོན་པར་སྟོན། །ཞེས་པའི་བར་གྱིེས་བསྟན་ཏེ།

གང་དག་ཡིད་ལ་བཏགས་པའི་ཟས། །ཁོང་ནས་འདོད་པའི་བཅུད་འབྱིན་བྱེད།།

གང་དུ་དམིགས་སུ་འཛིན་པ་ཡིས། །གང་མི་གསལ་བ་མངོན་པར་སྟོན།།

གཏར་ཀ་གེགས་སེལ་གྱི་ཚིག་ཇི་ལྟ་བུ་སྙམ་པ་ལ། དཔེར་ན་གླག་ཁྲ་མོ་གང་དག་གིས་རང་གི་བསམ་པས་ཡིད་ལ་བཏགས་པའི་འདོད་པ་ལྟར་ཁ་ཟས་ཀྱི་གཟན་ལ་འཇུམས་པའི་ཚེ། ཤ་གཡག་ལ་སོགས་པ་གང་གི་ཡང་ཐ་མལ་གྱི་ཤ་བོར་ཏེ་ཁོང་ནས་འདོད་པའི་སྙིང་ཕྱུང་སྟེ་བཅུད་འབྱིན་པར་བྱེད་པ་ལྟར་དུ། ཤེས་བྱའི་དངོས་པོ་གང་དང་གང་སྟོན་པའི་སྐབས་ཉིད་དུ་ཡང་གཏར་ཀ་དང་ཐེ་ཚོམ་གྱི་མདུད་པ་དེ་ཉིད་དམིགས་སུ་འཛིན་པ་ཡི་སྒོ་ནས་གང་མི་གསལ་ཞིང་མཐོང་དཀའ་བ་དེ་ཉིད་ལུང་དང་མན་ངག་གིས་༼༧༽བརྡ་འཇལ་བར་མངོན་དུ་བྱས་ཏེ་གསལ་བར་སྟོན་པས་ཐེ་ཚོམ་མེད་པར་བྱེད་པ་སྟེ། དེས་ན་རྒོལ་ཕྱི་རྒོལ་གང་གི་སྐབས་སུ་ཡང་ལན་ཐོགས་པ་མེད་པར་ཐེབས་ཏེ། དཀའ་བའི་གནད་ལ་མཁས་པར་འགྱུར་བའོ། །དེ་བས་ན། དེ་ཉིད་ལས། གླག་གི་གཟན་གྱི་ཆོས་གཉིས་ལྟར། །དོན་གྱི་དམིགས་བཟུང་གེགས་བསལ་ལོ། །ཞེས་པ་སྟེ། ཇི་ལྟར་གླག་ཁྲ་མོ་གཟན་ལ་བཅུམ་པའི་ཚེ། ཆོས་གཉིས་ཏེ། གང་ཡིད་ལ་བཏགས་པའི་ཟས་དང༌། དེའི་ཁོང་གི་བཅུད་འབྱིན་པ་ལྟར། གཏར་ཀ་གེགས་སེལ་གྱི་ཚིག་གི་གཏན་ཚིགས་ཀྱིས་གཏན་ལ་ཕབ་ནས་གྲུབ་མཐའི་དོན་ལོངས་པར་བྱེད་པའོ།།

བརྒྱད་པ་ཚད་མ་བཀའ་གཞུང་གི་ཚིག་དུས་ཀྱི་འབྲུག་ཆར་ལྟར་བཤད་པ་ནི།

ཇི་ལྟར་སྒྲ་བརླན། ཞེས་པ་ནས། ཡིན་པར་ངེས། །ཞེས་པའི་བར་གྱིས་བསྟན་ཏེ།

ཇི་ལྟར་སྒྲ་བརྙན་རྒྱུན་བྱུང་ན། །གང་སྐྱེའི་དུས་སུ་ཡིད་ཆེས་འགྱུར།།

དེ་བཞིན་ཚད་མའི་ཡུལ་བྱུང་ན། །མ་བཅོས་དེ་ཉིད་ཡིན་པར་ངེས།།

ཚད་མ་བཀའ་གཞུང་གི་ཚིག་ཇི་ལྟ་བུ་སྙམ་པ་ལ། དཔེ་ཇི་ལྟར་ན། དཔྱིད་དུས་སུ་འབྲུག་གི་སྒྲ་གྲགས་ཏེ་བརླན་པའི་ཆར་གྱི་རྒྱུན་བབ་ཅིང་དུས་ཀྱི་འབྲུག་ཆར་བྱུང་བ་ན། མི་རྣམས་ཀྱིས། གང་རྩི་ཐོག་དང་ལོ་འབྲས་ལ་སོགས་པ་སྐྱེའི་ཞེས་སྐྱེ་བར་འབྱུང་བའི་དབྱར་གྱི་དུས་སུ་སླེབ་ངེས་པར་ཡིད་ཆེས་སྐྱེས་ཏེ་ཐེ་ཚོམ་མེད་པར་འགྱུར་བ་ལྟར། དཔེ་དེ་བཞིན་དུ། སྒྲོ་སྐུར་དང་བྲལ་བས་རྫུན་ནོར་སྤངས་པའི་ལུང་ཟབ་མོ་ཚད་མའི་ཡུལ་དུ་ངེས་པའི་བཀའ་ལུང་གི་གསང་བ་དམ་པའི་གཞུང་གསུངས་ཏེ་བསྟན་པ་རིན་པོ་ཆེ་བྱུང་ན། ལུང་རིགས་མན་ངག་གསུམ་དང༌། ཆོས་རྟགས་བཞི་དང༌། ཐུན་མོང་མིན་པའི་ལུང་དང་མན་ངག་གིས་ལམ་པ་བློ་དང་ལྡན་པ་དག དོན་མ་ནོར་བའི་ངོ་བོ་མ་བཅོས་པའི་ཆོས་ཉིད་ཇི་བཞིན་པ་དཀྱིལ་འཁོར་གསུམ་དབྱེར་མེད་པའི་དེ་ཁོ་ན་ཉིད་དེ་ཡིན་པར་བཀའི་གཏན་ཚིགས་ཀྱི་ཚད་མས་ངེས་ཏེ་ཕྱིར་མི་ལྡོག་པ་སྐྱེད་པར་བྱེད་པའོ། །དེ་བས་ན་སྔ་མ་ལས། དུས་ཀྱི་འབྲུག་ལྟར་ཆོས་གསུམ་པོས། །བཀའ་ཡི་ཚད་གསུམ་སྐབས་སྦྱར་ནས། །ཞེས་པ་སྟེ། ཇི་ལྟར་འབྲུག་གི་སྒྲ་ལའང་ཆོས་གསུམ་སྟེ། དུས་མིན་དུ་མི་འབྱུང་བ་དང༌། དུས་སུ་འབྱུང་བ་དང༌། དེས་དབྱར་དགུན་ལ་སོགས་པའི་དུས་ཀྱི་སྤྲོས་པ་ཆོད་པས་ཡིད་ཆེས་པ་བཞིན་དུ། བཀའ་ལུང་ཚད་མ་ཉིད་དྲང་ཡུལ་མ་ཡིན་པར་མི་དྲང་ཞིང་། སྐབས་དང་མཐུན་པར་དྲངས་པས་དོན་གྱི་སྒྲོ་འདོགས་ཆོད་པ་སྟེ། ཇི་སྐད་དུ། ལུང་ནི་ཡིད་ཆེས་ཚིག་ཡིན་ཏེ། །ཉེས་པ་ཟད་པས་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་༼༨༽ཟད་ལུང་དུ་ཤེས་པར་བྱ། །ཞེས་སོགས་པའི་ཕྱིར་རོ།།

དགུ་པ་མཚོན་པ་དཔེའི་ཚིག་མེ་ལོང་དྭངས་པའི་ངོས་ལྟར་བཤད་པ་ནི།

གང་འདིར་དག་པའི། ཞེས་པ་ནས། གསལ་བར་བྱེད། །ཅེས་པའི་བར་གྱིས་བསྟན་ཏེ།

གང་འདིར་དག་པའི་མེ་ལོང་གིས། །བཞིན་དང་གཟུགས་བརྙན་སྟོན་པ་ལྟར།།

ཉེ་བར་མཚོན་པའི་མེ་ལོང་གིས། །གང་མི་མཐོང་བ་གསལ་བར་བྱེད།།

མཚོན་པ་དཔེའི་ཚིག་གང་ཞེ་ན། དཔེས་དོན་མཚོན་པ་གང་གི་དུས་འདིར་དཔེར་ན་གཡའ་དག་པའི་མེ་ལོང་གིས། བྱད་བཞིན་དང་ལྐོག་ཏུ་གྱུར་པའི་དངོས་པོ་དེ་དག་གཟུགས་བརྙན་དུ་སྣང་ནས་གསལ་བར་སྟོན་པ་ལྟར། དོན་གྱི་སྐབས་གང་རུང་དུའང་དོན་དེ་ཉིད་ཉེ་བར་མཚོན་ནས་རྟོགས་པར་བྱེད་པའི་དཔེ་ཡི་མེ་ལོང་ཕ་རོལ་ལའང་གྲགས་པའི་ཆོས་དག་གིས། དོན་གྱི་ངོ་བོ་གང་ཞིག་བརྟག་པར་དཀའ་ཞིང་ཕལ་པས་མི་མཐོང་བ་ཡང་དག་ངེས་པའི་དགོངས་པ་དེ་ཉིད་གསལ་བར་བྱེད་པ་ནི། དོན་དཔེར་སྦྱོར་བ་དང༌། ཐ་སྙད་མཐུན་མི་མཐུན་དཔེས་སྦྱོར་བ་སྟེ། ཆོས་ཉིད་མ་སྐྱེས་པ་འདུས་མ་བྱས་པ་ཡིན་ཏེ། ལོག་རྟོག་ལྟ་བུའོ། །ཞེས་པ་དང༌། དེ་ལྟར་ཡིན་ཏེ། ནམ་མཁའ་ལྟ་བུའོ། །ཞེས་པ་ལ་སོགས་པའོ། །དེ་བས་ན་སྔ་མ་ལས། མེ་ལོང་ཆོས་ལྟར་མཚོན་པའི་དཔེ། །ཀུན་ལ་དཔེས་མཚོན་ཐོག་ཏུ་དབབ། །ཅེས་པ་སྟེ། ཇི་ལྟར་རང་གི་བཞིན་རས་ལྐོག་ཏུ་གྱུར་པ་མེ་ལོང་གིས་གསལ་བ་བཞིན་དུ། ཤིན་ཏུ་ལྐོག་གྱུར་གྱི་གཞུང་དོན་རྣམས་ཀྱང་དཔེས་མཚོན་ནས་ངེས་པར་བྱེད་པའོ།།

བཅུ་པ་བསྣོལ་མཚམས་འཕེན་སྡུད་ཀྱི་ཚིག་ཐགས་དང་སེང་ཕྲུག་རྩལ་སྦྱོང་བ་ལྟར་བཤད་པ་ནི།

ཇི་ལྟར་སྣྲེལ་ཞི། ཞེས་པ་ནས། ཉིད་དུ་སྦྱོར། །ཞེས་པའི་བར་གྱིས་བསྟན་ཏེ།

ཇི་ལྟར་སྣྲེལ་བཞི་འཆོལ་འཁྲུགས་པ། །བསྣོལ་མཚམས་འཕེན་སྡུད་འཆོལ་མཚམས་སྦྱོར།།

རྩལ་ཆེན་རོལ་པའི་སྟབས་ཆེན་ལྟར། །དེ་ཉིད་རིག་པ་ཉིད་དུ་སྦྱོར།།

བསྣོལ་མཚམས་འཕེན་སྡུད་ཀྱི་ཚིག་གིས་གོང་འོག་གི་འཁྲུགས་པ་བསྡེབས་པ་གང་ཞེ་ན། དཔེ་ཇི་ལྟར་ན་ཐགས་ཀྱི་བཀད་གོང་འོག་ཏུ་དགོས་པ་འོག་དང་སྟེང་ནས་འཆོལ་བར་ལེན་པ་ལྟར། རྒྱུད་ཀྱི་ཚིག་ཚོམས་སྣྲེལ་ཞིར་གྱུར་ཏེ་གོང་འོག་གི་ཚིག་དོན་གྱི་རིམ་པ་འཆོལ་ཞིང་འཁྲུགས་པ་ཡི་བར་རྣམས་བསྣོལ་མཚམས་འཕེན་སྡུད་ཀྱི་ཚིག་གིས་གོ་རིམ་འཆོལ་ཞིང་འཁྲུགས་པ་རྣམས་མཚམས་སྦྱོར་ཏེ། འབྲུའི་འདུག་ས་བསྒྱུར། ཚིག་གི་གོང་འོག་བརྗེ། དོན་གྱི་འཁྲུགས་པ་བསྡེབས་ནས་ཉམས་སུ་བླང་ཞིང་གོ་བདེ་བར་བྱེད་པ་དང༌། ཡང་སེང་གེའི་ཕྲུག་གུས་མཆོངས་པ་སློབ་ནས་རྩལ་སྦྱོང་བའི་ཚེ། བསྣོལ་མར་མཆོངས་ཤིང་དྲང་པོར་འགྲོ་བ་ལ་སྦྱང་བས་རྩལ་ཆེན་པོར་རྫོགས་ཏེ། འབྱོངས་པ་ན་རོལ་པའི་སྟབས་ཆེན་གཅིག་ཏུ་འགྱུར་བ་ལྟར་རྒྱུད་ཀྱི་ཚིག་ཚོམས་དང་དོན་འཁྲུགས་མ་ལ་བར་དག་བཞག་ཅིང་དེ་༼༩༽ཉིད་ཀྱི་ངོ་བོ་གོ་རིམས་དང་འདུག་ས་བསྒྱུར་ཏེ་གོང་འོག་མཐུན་པར་ཤེས་པས་བརྗོད་བྱ་དོན་གྱི་རིག་པ་གང་ཡིན་པ་ཉིད་དུ་སྦྱོར་ཏེ་ཚིག་དོན་གཅིག་ཏུ་བསྡེབས་ནས་གནད་ལོངས་པར་བྱེད་པའོ། །དེ་བས་ན། ཐུགས་ཐིག་ཉིད་ལས། མིང་འཇིགས་ཕྲུག་གུ་རྩལ་སྦྱོང་ལྟར། །འབྲུ་ཚིག་དོན་གྱི་གོ་རིམས་སྡེབས། །ཞེས་པ་སྟེ། ཇི་ལྟར་སེང་གེའི་ཕྲུག་གུ་རྩལ་སྦྱོང་བའི་ཚེ་ན། བསྣོལ་མར་མཆོངས་ནས་དྲང་པོར་འགྲོ་བ་བཞིན་དུ་བསྣོལ་མཚམས་འཕེན་སྡུད་ཀྱི་ཚིག་གིས། དོན་གྱི་འཁྲུགས་སྡེབས། དཀྱུས་ཀྱི་གོ་རིམ་བརྗེ། འབྲུའི་འདུག་ས་བསྒྱུར་ནས་སྒྲ་ཇི་བཞིན་པ་མ་ཡིན། དོན་ཐུན་མོང་བ་མ་ཡིན་པའི་རྒྱུད་དོན་ཕྱིན་ཅི་མ་ལོག་པར་སྟོན་པའོ། །དེ་ལྟར་བཤད་ཐབས་འདྲེན་པའི་ཚིག་བཅུ་འདི་ཉིད་རྒྱུད་གཞུང་སྤྱིའི་ཚིག་དོན་གྱི་འཆད་ཐབས་ཡིན་པས་ཐུགས་ཐིག་ལས་གསུངས་པ་འདི་ཡང་ལུང་གི་འཆད་ཐབས་ཀྱི་མ་ཧཱའི་རྒྱུད་བཤད་པ་ལྟར་ཤེས་དགོས་ལ། དེ་ལྟར་བྱས་ནས་དེ་དག་ཀྱང་རིགས་བསྡུས་ན། རྗེ་སྒྲོ་ཕུག་པའི་ཁོག་དབུབ་ལས། དེ་ལ་རྣམ་པར་དབྱེ་བ། འབྲེལ་སྦྱོར་བ། རང་རྐྱེན་གཉེར་གསུམ་དཀྱུས་སུ་སྦྱར། གཞན་ལེའུ་གང་བཤད་ཀྱི་དཀྱུས་ཀྱི་ཐད་ཀར་ངོ་སྤྲད་དོ། །ཞེས་གསུངས་པ་ལྟར། སྤྱི་འགྲོ་རྣམ་པ་གསུམ་མ་གཏོགས་གསང་སྙིང་གི་ལེའུ་སོ་སོ་དང་སྦྱར་ཚུལ་རགས་ཙམ་རྗེ་སྒྲོལ་གཡུང་གཉིས་ཀྱི་ཁོག་དབུབ་ཏུའང་འབྱུང་ངོ༌། །ཉང་ཊཱིཀ་པ་ནི། གསུམ་དུ་འདུས་པར་བཞེད་དེ། དཀྱུས་དབུ་ཞབས་ཐམས་ཅད་དུ་ཁྱབ་བྱེད་དུ་འཇུག་པ་གསུམ་ཁྱད་པར་དུ་འཇུག་པ་གསུམ། འཇུག་ཏུ་རུང་བཞིའོ། །དང་པོ་ནི། རྣམ་དབྱེ། འབྲེལ་སྦྱོར། རང་རྐྱེན་ནོ། །གཉིས་པ་ནི། རང་བཞིན། ལྡེམ་དགོངས། སྤྱི་དོན་གསུམ་མོ། །གསུམ་པ་ནི། གཏར་ཀ ཚད་མ་བཀའ་གཞུང༌། མཚོན་དཔེ། བསྣོལ་མཚམས་འཕེན་སྡུད་དང་བཞིའོ། །ཞེས་གསུངས། འོན་ཀྱང་འདུས་མདོའི་རང་གཞུང་དང་སྦྱར་ན་ལུང་གི་འཆད་ཐབས་ཀྱིས་ལུང་གི་རྒྱུད་བཤད་པ་ལྟར་ཤེས་དགོས་པས་སྤྱིར་ཐུན་མོང་དུ་འགྲོ་བ་རྣམས་སྔ་མ་ལྟར་ལས། ཐུན་མོང་མིན་པའི་ཚིག་དོན་ནི། གོང་དུ་རྩ་བའི་འབྲུ་གནོན་དུ་བྱུང་བ་ལྟར་མདོ་ཆེན་པོའི་གཞུང་དང་སྦྱར་ནས་བཤད་པ་སྟེ། རྒྱས་པར་རང་སྐབས་ཀུན་དང་སྦྱར་ཏེ་འཆད་དགོས་ཀྱང༌། སྤྱིར་འགྲོ་བའི་གནད་འགག་བསྡུ་ཚུལ་ཙམ་ནི། ལ་ཤན་ལྟ་བའི་མེ་ལོང་གི་འགྲེལ་༼༡༠༽པ་འཇམ་དཔལ་བཤེས་གཉེན་ཕྱི་མས་མཛད་པ་ལས། སྤྱི་དོན་སྡུད་པའི་ཚིག་སེང་ཆེན་གྱིས་མཆོང་སྟབས་ལྟ་བུས་ཁོག་དོན་རྣལ་འབྱོར་གསུམ་དང་སྣང་བ་སྦྱར་ཏེ་བསྟན་པར་བསྡུ་བ་ནི། རང་བཞིན་གྱི་རྣལ་འབྱོར་རམ་སྣང་བ་སྟེ་འཁྲུལ་སྣང་ཞོར་དུ་བསྟན་པ་དང༌། ཉམས་སུ་ལེན་པའི་རྣལ་འབྱོར་གདུལ་བྱའི་སྣང་བ་དང༌། འབྲས་བུའི་རྣལ་འབྱོར་དེ་བཞིན་གཤེགས་པའི་སྣང་བར་བསྟན་པའོ། །རང་བཞིན་ལྟ་བའི་ཚིག་ཁྱུང་ལྡིང་བ་ལྟར་ཆོས་ཇི་བཞིན་པར་བསྟན་པ་དང༌། རྣམ་པར་འབྱེད་པའི་ཚིག་སྟག་གི་མཆོངས་པ་ལྟར་ཚིག་དོན་བསྡུས་པས་ས་བཅད་པ་དང༌། རང་རྐྱེན་གཉེར་གྱི་ཚིག་རུས་སྦལ་གྱི་ནུར་འགྲོས་ལྟ་བུས་འབྲུ་གཞོམ་པ་དང༌། འབྲེལ་བར་སྦྱོར་བའི་ཚིག་བྱ་ངང་མོའི་འགྲོས་ལྟ་བུས་གོང་འོག་འབྲེལ་བར་བཤད་པ་དང༌། ཚད་མ་བཀའ་གཞུང་གི་ཚིག་དུས་ཀྱི་འབྲུག་ཆར་ལྟ་བུས་སྐད་གཞན་གྱིས་སེལ་མ་ཞུགས་པར་བཤད་པ་དང༌། ལྡེམ་དགོངས་མན་ངག་གི་ཚིག་རྣ་ཕྲུག་བྲག་ལ་འཛེགས་པ་ལྟ་བུས་གསང་བའི་ལྡེམ་དགོངས་བརྒྱད་ཀྱིས་མི་འཚམས་པར་བཤད་པ་དང༌། གཏར་ཀ་གེགས་སེལ་གྱི་ཚིག་གླག་ཁྲ་མོ་གཟན་ལ་འཇུམས་པ་ལྟ་བུས་གནད་དུ་གལ་བཙུག་ལ་བཅུད་ཕྱིན་པར་བཤད་པ་དང༌། མཚོན་པ་དཔེའི་ཚིག་མེ་ལོང་ལྟ་བུས་དཔེས་མཚོན་ཏེ་བཤད་པ་དང༌། བསྣོལ་མཚམས་འཕེན་སྡུད་ཀྱི་ཚིག་སེང་ཕྲུག་རྩལ་སྦྱོང་བ་ལྟ་བུས་ཚིག་དང་འབྲུའི་གོ་རིམས་བསྡེབས་ཏེ་བཤད་པའོ། །ཞེས་གསུངས་པས། རྒྱུད་ལས་འཕགས་པའི་ལུང་ཆེན་པོའི་ཁྱད་པར་གྱི་ཆོས་རྣམས་ཀྱང་ངེས་པར་འགྱུར་རོ། །དེ་བཞིན་དུ། རིན་པོ་ཆེའི་རྒྱན་ལས། ལུང་གིས་མན་ངག་རྒྱུད་བཤད་པ། །འདྲེན་པའི་ཚིག་བཅུས་དྲངས་ཏེ་དགྲོལ། །དཀྱུས་ཚིག་དགྲོལ་བར་འཐད་པ་ཡིན། །ཞེས་གསུངས་པ་ལྟར་ལུང་གི་འཆད་ཐབས་ཀྱིས་མན་ངག་གི་རྒྱུད་བཤད་པ་ལའང་སྦྱར་བར་བྱ་སྟེ། ཅི་རིགས་པ་ནི་གཞུང་འདི་ལས་ཀྱང་སྟོན་མོད་དེ། རྒྱས་པར་ཡོངས་སུ་རྫོགས་པ་ནི་རྫོགས་པ་ཆེན་པོའི་རྒྱུད་དངོས་དང་སྦྱར་ཏེ་འདྲ་མཐུན་ཁྱད་འཕགས་ཀྱི་ཚུལ་དང་ལྡན་པས་ཚིག་དོན་བཤད་པ་ལ་མཁས་པར་བྱའོ། །དེར་མ་ཟད་ལེའུ་ཞེ་དྲུག་པ་ལས་གསུངས་པ་ལྟར་གསང་སྔགས་ཕྱི་པ་དང་ཡང་ཐུན་མོང་ཡིན་པས་སོ་སོའི་རྒྱུད་ཀྱི་རང་སྐབས་དང་སྦྱར་ནས་ཡོ་ག་འབྲོག་འཆོལ་བའི་སྐྱོན་དུ་མ་སོང་བར་འདྲེན་པའི་ཚིག་དོན་ལ་མཁས་པའི་བློ་གྲོས་དང་ལྡན་ན་གསང་དོན་མཐའ་དག་ལ་མཁྱེན་༼༡༡༽རབ་ཐོགས་མེད་དུ་རྒྱས་ཏེ་རལ་གྲི་ནམ་མཁའ་ལ་བསྐོར་བ་ལྟར་འགྱུར་རོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། འབྱེད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི། །གང་སྨྲ་བརྗོད་དུ་འདྲེན་པ་ཡི། །ཡན་ལག་ཁོ་ནར་ཤེས་པར་གྱིས། །ཞེས་གསང་བ་པའི་བདག་པོས་དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས། ཆོས་ཐམས་ཅད་ལ་གང་དུ་སྨྲ་བའི་སྒོ་ཡོངས་སུ་བྱེ་བར་གྱུར་ཏོ།།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། བཤད་པ་རྣམ་པ་བཅུ་པོ་དེ་དག་ནི། གང་སྨྲ་བ་དང་བརྗོད་པའི་ཚིག་གིས་དོན་གང་དུ་འདྲེན་པ་ཡི་འཆད་ཐབས་ཀྱི་ཡན་ལག་དབུ་ཞབས་སུ་སྦྱར་བར་བྱ་བ་ཁོ་ནར་ཡང་དག་པར་ཤེས་པར་གྱིས་ཤིག ཅེས་གསང་བ་པའི་བདག་པོ་ཆེན་པོས་དེ་སྐད་ཅེས་སྨྲས་ཏེ་བཀའ་སྩལ་པས། ལང་ཀའི་བདག་པོ་ལ་སོགས་པ། དམན་པའི་ལུས་ཀྱི་སེམས་དཔའ་ཆེན་པོ་རྣམས། ཆོས་ཐམས་ཅད་ལ་གང་འདྲེན་པའི་ཚིག་གིས་ཇི་ལྟར་དུ་སྨྲ་བའི་སྒོ་ཡོངས་སུ་འབྱེད་དེ་མཁས་པར་གྱུར་ཏོ། །ཚུལ་དེ་ནི་བསྟན་པའི་ཡོན་ཏན་གྱིས་འཁོར་རྣམས་ཀྱིས་ངེས་པར་གོ་བའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཡོངས་སུ་འདྲེན་པའི་ཡན་ལག་རྣམ་པར་བགྲོས་པའི་ལེའུ་སྟེ་ལྔ་བཅུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཡོངས་སུ་འདྲེན་པའི་ཡན་ལག་རྣམ་པར་བགྲོས་ཏེ་བསྟན་པའི་ལེའུ་སྟེ། ལྔ་བཅུ་པ་གསལ་བར་བཤད་པའོ།། །།

ལེའུ་ང་གཅིག་པ་ངེས་པ་དམ་པའི་ཡན་ལག་བགྲོས་པ།

༈ ལྔ་པ་ངེས་པའི་ཡན་ལག་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། དག་པ་ལྷ་ངེ་བའི། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོ་དེས། སེམས་དཔའ་ཆེན་པོ་ལངྐའི་བདག་པོ་དེ་ལ་ངེས་པར་བོས་ཏེ་རྣམ་པར་སྨྲས་པ། ལངྐའི་བདག་པོ་འདི་ལྟ་སྟེ། །གང་དུ་ངེས་པའི་ཡན་ལག་ནི། །གང་ལ་གང་གིས་གང་བརྗོད་པ།།

འབྲེལ་བཞི་བཤད་སྦྱོར་བརྗོད་པའི་སྒོ། །ཡོངས་སུ་དག་པའི་ལྷང་ངེ་བའི།།

ལེའུ་འདིས་ངེས་དོན་དང་དྲང་དོན་གཉིས་ཀ་སྟོན་ནོ། །རྗེས་སུ་མཐུན་པར་བཤད་པའི་ཡན་ལག་ལྔ་པ་ངེས་དོན་བྱེ་བྲག་གི་གཏན་ཚིགས་གང་སྙམ་པ་ལ། འདྲེན་པ་ཚིག་གི་ཡན་ལག་བཤད་མ་ཐག་པ་དེ་ནས་ཡང་ངེས་པའི་ཡན་ལག་བཅུ་གཉིས་སྟོན་པའི་ཕྱིར། སྟོན་པ་གསང་བ་པའི་བདག་པོ་དེས། བསྡུས་པའི་དོན་གལ་ཆེ་བའི་ངོས་ནས། བྱང་ཆུབ་སེམས་དཔའ་ཆེན་པོ་ལང་ཀའི་བདག་པོ་དེ་ལ་ངེས་པར་བོས་ཏེ། གཏན་ཚིགས་མ་འདྲེས་པར་བྱ་བའི་ཕྱིར་རྣམ་པར་སྨྲས་ཏེ་བཤད་པར་མཛད་པ། སྡུད་པ་པོ་ལང་ཀའི་བདག་པོ་འདི་ལྟ་སྟེ། ཞེས་སྐབས་ཐམས་ཅད་དུ་ངེས་དོན་མ་འདྲེས་པར་ཉེ་བར་བསྟན་པ་ལ། རྒྱུད་དོན་གཏན་ལ་འབེབས་པའི་སྐབས་གང་དུ་རང་རང་དང་མཐུན་པར་དོན་ངེས་པར་བྱེད་པའི་ཡན་ལག་ཡང་དག་པར་ཤེས་པའི་མཚན་ཉིད་གང་ཡིན་པ་དེ་ནི། ཕྱག་མཆན་ཞིག་ན། ངོ་བོ་གང་ལ་དགོས་ཆེད་གང་གི་དབང་གིས་ངེས་པའི་ཚིག་དང་དོན་གྱི་དམིགས་བཟུང་ནས་གང་བརྗོད་དེ་བསྟན་པ་ཉིད། ༼༡༢༽ཞེས་པར་འབྲེལ་ཚུལ་ཞིག་ཀྱང་བཞུགས་མོད། དེའི་འགྲེལ་ཚུལ་གཅིག་དང་འགྲེལ་མཆན་གཞན་ཀུན་མཚུངས་པར། སྡུད་པ་པོ་དང་འཁོར་གྱི་དངོས་པོའི་སྣོད་གང་ལ། སྟོན་པ་སྐུ་བཞིའི་ངོ་བོ་གང་གིས་བསྟན་པ་བཞིའི་དོན་གྱི་རྒྱུད་མཆོག་གང་འདི་བརྗོད་ཅིང་བཤད་པ་ལ། རྒྱུ་གླེང་གཞི་དང་རྩ་བ་གླེང་བསླང་བ་ནི་རྒྱུད་ཀྱི་རྒྱུ་རྐྱེན་དང༌། དགོས་འབྲེལ་བཞི་སྤྱིའི་དོན་དང༌། འདྲེན་པའི་ཡན་ལག་རྒྱུད་ཀྱི་བཤད་ཐབས་བཅུ་དང་ངེས་པར་སྦྱོར་བའི་ཡན་ལག་འཆད་པར་འགྱུར་བ་སྟེ། གླེང་གཞི་འཚོགས་ནས་གླེང་བསླང་བ་བརྗོད་པ་འབྱུང་བའི་རྩ་བ་དང༌། དགོས་འབྲེལ་ཕུན་སུམ་ཚོགས་པ་དང་འཆད་ཐབས་ཀྱིས་འདྲེན་པའི་ཚུལ་དང་བདག་གཞན་དོན་ལ་སྦྱོར་བའི་ཐབས་ཆེན་གྱི་ཡན་ལག་ལྔས་སྣོད་བཞི་ལ་བསྟན་པ་བཞི་རུ་བརྗོད་པར་བྱ་བའི་ངེས་པའི་གསང་སྒོ་བླ་ན་མེད་པའི་རྒྱུད་ཀྱི་དོན་དྲི་མ་མེད་པར་ཡོངས་སུ་དག་པ་ཉིད་ལྷ་ངེ་བར་མ་འདྲེས་ཡོངས་རྫོགས་སུ་སྣང་ཞིང་གསལ་བར་བྱེད་པའི་ཕྱིར་འདི་ཉིད་ཀྱང་ཡན་ལག་སྟེ་དེ་ལྟར་དྲུག་གིས་འབྱེད་པའི་དོན་རྫོགས་པར་འགྱུར་རོ། །ཡང་ན། སྣོད་བཞི་ལ་སྟོན་པ་བཞིས་བསྟན་པ་བཞི་གསུངས་པ་དེ་ཡང་ལས་དང་ཐུགས་རྗེར་འབྲེལ་བ་དང༌། སྣོད་དང་བཅུད་དུ་འབྲེལ་བ་དང༌། ཤེས་བྱ་དང་ཤེས་བྱེད་དུ་འབྲེལ་བ་དང༌། ཐབས་དང་ཐབས་ལས་བྱུང་བའི་ཚུལ་དུ་འབྲེལ་བ་དང་བཞི་ཚང་བ་དེ་ཡང༌། ངོ་བོ་ལ་སོགས་པ་གསང་སྔགས་ཀྱི་སྤྱི་ཐེམས་ཆེན་པོ་བཞིས་བཤད་པ་དང་སྦྱོར་ཏེ། དེ་ཡང་ཆོས་རྟགས་ཀྱི་ཕྱག་རྒྱ་བཞིར་ངེས་པའི་གཏན་ཚིགས་ཀྱིས་བརྗོད་ནས་རྒྱུད་ཀྱི་གསང་བའི་སྒོ་ཡོངས་སུ་དག་པ་ལྷ་ངེ་བར་གཏན་ལ་འབེབས་པའི་ཐབས་ཀྱི་ཡན་ལག་ཏུ། འདར་ཇོ་བཙུན་སོགས་ཀྱིས་བཞེད་པར་གསུངས་ཏེ་ཆོས་རྗེ་དམ་པ་རིན་པོ་ཆེའི་ཕྱག་མཆན་དུའང་ཟུར་ཙམ་འབྱུང་ངོ་། །དེས་ན་ངེས་དོན་གཏན་ཚིགས་ཀྱི་ཡན་ལག་འདི་ཉིད་གཏན་ཚིགས་བཞིས་ལེའུ་རྫོགས་པར་སྟོན་ཏེ། ཡོངས་སུ་འགྲེལ་པའི་གཏན་ཚིགས་བཤད་མ་ཐག་པ་རྣམས་དང༌། དེ་ནས་སྣོད་བཞི་ལ་བསྟན་པ་བཞིར་བྱུང་བའི་གཏན་ཚིགས་དང༌། དེ་ནས་གསང་སྔགས་ཀྱི་སྤྱི་ཐེམས་བཞིར་ངེས་པའི་གཏན་ཚིགས་དང༌། དེ་ནས་ཆོས་རྟགས་ཀྱི་ཕྱག་རྒྱ་བཞིར་ངེས་པའི་གཏན་ཚིགས་རྣམས་སོ། །དེའང་དཔེས་མཚོན་ན། འདུལ་བྱེད་སྐུ་བཞི་སྨན་པ་ལྟ་བུ། གདུལ་བྱ་བཞི་ནད་པ་ལྟ་བུ། ཐེག་པ་བཞི་སྨན་ལྟ་བུ། ངོ་བོ་ངེས་ཚིག་སོགས་བཞི་སྨན་གྱི་དམིགས་བཟུང་བ་ལྟ་བུ་བཀའ་དོན་གཏན་༼༡༣༽ཚིགས་བཞི་སྨན་ལ་གཟུ་ལུམ་སྤང་བ་ལྟ་བུའོ།།

གཉིས་པ་རྒྱས་པར་བཤད་པ་ལ་གསུམ་སྟེ། སྣོད་བཞི་ལ་བསྟན་པ་བཞིར་བཤད་པ། གཏན་ཚིགས་ཀྱི་ཡག་ལག་བཞིར་ངེས་པ། བཀའ་རྟགས་ཀྱི་ཕྱག་རྒྱ་བཞི་བཤད་པའོ། །དང་པོ་ནི།

གང་ལ་སྤྱན་རས། ཞེས་པ་ནས། ངེས་པར་སྣང༌། །ཞེས་པའི་བར་གྱིས་བསྟན་ཏེ།

གང་ལ་སྤྱན་རས་གཟིགས་དབང་གིས། །མཐའ་ཐུག་མེད་པའི་འགྲོ་གང་དག །འདི་ན་སྣོད་བཞིར་ཁོ་ནར་གཟིགས། །ཞེན་ཆགས་ཅན་དང་ལོག་སྲེད་ཅན། །རིགས་རྒྱུད་ཅན་དང་བློ་གྲོས་ཅན། །ཐམས་ཅད་ཆ་བཞིར་སྣང་བ་སྟེ། །འདོད་ཁྲིད་སྦྱོར་དང་ངེས་པར་སྣང་།།

དེ་ཉིད་འབྱུང་བའི་རྒྱུ་ནི་གདུལ་བྱའི་དངོས་པོ་གང་ལ་གདུལ་བྱེད་ཐུགས་རྗེའི་མངའ་བདག་རྣམས་ཀྱིས་བྱ་ར་མཛད་དེ་མི་གཟིགས་པའི་དུས་མེད་པར་སྤྱན་རས་ཀྱིས་གཟིགས་ཏེ་མི་གཏོང་བར་རྟག་ཏུ་གསལ་བའི་དབང་གིས། འདིར་ཡང་གདུལ་བྱ་མང་པོ་མཐའ་ལ་ཐུག་པ་མེད་པའི་འགྲོ་བ་གང་དག་ཇི་སྙེད་པ་ཡང༌། ཇི་ལྟར་གཟིགས་ན་ངེས་པའི་ཡན་ལག་འདི་ཉིད་ཀྱིས་ན་བསྟན་པའི་དོན་གྱི་སྣོད་རིགས་བཞི་ཁོ་ནར་ཡང་དག་པར་གཟིགས་ཤིང་མཁྱེན་ཏེ། བཞི་པོ་གང་ཞེ་ན། འདོད་པ་ལ་ཞེན་ཅིང་ཆགས་པའི་རིགས་ཅན་གྱི་སྣོད་ཀྱི་གདུལ་བྱ་དང༌། ལོག་པའི་ལྟ་སྤྱོད་ལ་དགའ་ཞིང་སྲེད་པའི་སྣོད་མུ་སྟེགས་ཀྱི་རིགས་ཅན་ལྟ་བུ་བྱིས་པའི་གདུལ་བྱ་དང༌། བྱང་ཆུབ་ཀྱི་སེམས་ངེས་པར་སྐྱེས་ཏེ་སྤྱོད་པ་བརྟུལ་ཕོད་པས་ཐེག་པ་ཆེན་པོ་གསང་སྔགས་ཀྱི་རིགས་རྒྱུད་ཅན་གྱི་སྣོད་དུ་ངེས་པའི་གདུལ་བྱ་དང༌། གསང་སྔགས་ལ་ཅིག་ཆར་དུ་འཇུག་པའི་ཤེས་རབ་དང་ཏིང་ངེ་འཛིན་གྱི་བློ་གྲོས་ཅན་གྱི་སྣོད་མཆོག་དང་ལྡན་པའི་གདུལ་བྱ་དང༌། གདུལ་བྱ་ཐམས་ཅད་དེ་ལྟར་སྣོད་ཀྱི་བྱེ་བྲག་གི་ཆ་བཞིར་ཡོངས་སུ་སྣང་ཞིང་གསལ་བ་སྟེ། བཞི་ཚོ་ཐོག་མའོ། །དེ་དག་ལ་ཐེག་པའང་རྣམ་གྲངས་བཞིར་བསྟན་ཏེ། ཆེད་དུ་སྔགས་ཀྱི་གདུལ་ཐབས་ནི། འདོད་པ་ཅན་ལ་གསང་བའི་སྐུའི་བསྟན་པ་ལྟར་འདོད་པ་རང་རྐྱེན་གྱི་ཚིག་གིས་ཇི་ལྟར་འདུལ་བ་བཞིན་དུ་སྟོན་པ་དང༌། ལོག་སྲེད་ཅན་ལ་སྤྲུལ་སྐུའི་བསྟན་པ་ལྟར་ལྡེམ་དགོངས་སམ་བཀྲི་དྲང་བརྒྱུད་པའི་ཚིག་གིས་ཁྲིད་ཅིང་དྲང་བའི་ཐབས་སུ་ཇི་ལྟར་འདུལ་བ་བཞིན་སྟོན་པ་དང༌། སེམས་སྐྱེས་པའི་རིགས་རྒྱུད་ཅན་ལ་ལོངས་སྐུའི་བསྟན་པ་ལྟར་ལྡེམ་དགོངས་སྦྱོར་བའི་ཚིག་གིས་གསང་བའི་དོན་ལ་ཇི་ལྟར་འདུལ་བ་བཞིན་གཞུགས་པ་དང༌། བློ་གྲོས་ཅན་ལ་ཆོས་སྐུའི་བསྟན་པ་ལྟར་དོན་དམ་ངེས་པར་སྣང་བའི་ཚིག་གིས་གསང་བ་ཟབ་མོའི་དོན་ལ་དུས་གཅིག་ཏུ་དགོད་པའོ། །དེ་དག་བཞི་ཕྲག་གཉིས་པའོ།།

གཉིས་པ་གཏན་ཚིགས་ཀྱི་ཡག་ལག་བཞིར་ངེས་པ་ནི།

དེ་དག་རེས་འགའ། ཞེས་པ་ནས། བཅས་པ་ལས། །ཞེས་པའི་བར་གྱིས་བསྟན་ཏེ།

དེ་དག་རེས་འགའ་ཆ་བཞི་སྟེ། །གང་དུ་དགོས་པ་གང་ངེས་པ། །ངོ་བོ་དམིགས་དང་བཅས་པ་ལས།།

འོ་ན་རྒྱུད་དབུ་ཞབས་སུ་བསྟན་པ་བཞིར་འགྲོའམ་ཞེ་ན། ༼༡༤༽གདུལ་ཐབས་ཀྱི་བསྟན་པ་བཞི་པོ་དེ་དག་ཀྱང༌། དུས་སྐབས་ཀྱི་ལན་གྲངས་རེས་འགའ་འདུལ་བའི་ཆོས་ཀྱི་ཆ་ཡིས་དབྱེ་བས་རེ་རེ་ལའང་བཞི་ཕྲག་ཏུ་རྣམ་གྲངས་མཐུན་ལ་དོན་གྱི་ངོ་བོ་མི་མཐུན་པ་བཞི་ཞེས་སྟོན་པར་འགྱུར་ཏེ། གདུལ་བྱ་འདུལ་བའི་སྐབས་ལ་བབ་པ་གང་གི་དུས་ཉིད་དུ། འདོད་པའི་ཆོས་ལྟ་བུ་གཅིག་ལའང་དེའི་དོན་གྱི་ཉིང་དགོས་མཐར་ཕྱིན་པར་ངེས་པའི་དགོས་ཆེད་ཡོད་པ་དང༌། དེ་ལ་དེ་སྐད་ཅེས་ཅིའི་ཕྱིར་བྱ་བའི་གང་རུང་གི་ངེས་པའི་ཚིག་དང་ལྡན་པ་དང༌། བསྟན་པའི་དོན་རང་གི་ངོ་བོ་ཅི་ཞིག་ཡིན་པ་དང༌། དོན་དེ་ལ་གལ་པོའི་དམིགས་བཙལ་ཏེ་འཐད་པ་བཟུང་ནས་བརྒལ་བརྟག་གིས་མཐར་དབྱུང་ཚུལ་དང་བཅས་པའི་རྣམ་གྲངས་ཕྱེ་བ་ལས། བཅས་ཞེས་སྦྲགས་མའི་སྒྲས་འདུལ་ཐབས་གཅིག་ལའང་བཞི་བཞི་ལྡན་པར་སྟོན་པའོ། །དེའང་འདོད་པ་རང་རྐྱེན་གྱི་ཐེག་པའི་དགོས་ཆེད་ནི། གང་ཟག་ཆགས་ཅན་གྱི་དོན་དུའོ། །ངེས་ཚིག་ནི་འདོད་པ་མ་བཀག་པར་རང་སོར་བཞག་པ་ཉིད་ཀྱིས་འབྲས་བུ་ཐོབ་པའོ། །ངོ་བོ་ནི་འདོད་ཆགས་ལ་བརྟེན་ཏེ་བདེ་སྟོང་གི་དོན་ཉམས་སུ་མྱོང་བའོ། །དོན་གྱི་དམིགས་བཟུང་བ་ནི། ཐབས་ལམ་གྱི་ཆ་རྐྱེན་རྣམས་འཚོགས་པ་དང༌། དེས་ཉམས་སུ་ལོངས་པ་དང༌། མི་མཐུན་པའི་ཕྱོགས་སུ་མི་འཆོར་བ་དང༌། རྟོགས་པའི་དོན་རྙེད་པའོ། །གཞན་གསུམ་པོའང་དེས་འགྲེའོ། །ཆོས་རྟགས་བཞི་ཡང་བསྟན་པ་བཞི་སོ་སོ་དང་མཐུན་པའོ། །དེ་དག་བཞི་ཕྲག་གསུམ་པའོ།།

གསུམ་པ་བཀའ་རྟགས་ཀྱི་ཕྱག་རྒྱ་བཞི་བཤད་པ་ནི།

བཀའ་དོན་གཏན་ཚིགས། ཞེས་པ་ནས། རྒྱས་འཐད་སྦྱར། །ཞེས་པའི་བར་གྱིས་བསྟན་ཏེ།

བཀའ་དོན་གཏན་ཚིགས་རིག་པ་བཞི། །སྣང་དང་མི་འགལ་རྒྱས་འཐད་སྦྱར།།

དེ་ལྟར་གཏན་ཚིགས་གང་གིས་ཡིད་ཆེས་པར་བྱེད་ཅེ་ན། རྒྱལ་བ་རྫོགས་པའི་སངས་རྒྱས་ཀྱི་ངེས་པ་དོན་གྱི་བཀའ་ལུང་ལས་སྣང་བར་ངེས་པ་དང༌། ཤེས་བྱ་དང་རྟོགས་པར་བྱ་བའི་དོན་གྱི་ངོ་བོ་ཡིན་པ་དང༌། རང་རང་ལ་བདེན་པར་གྲུབ་པའི་གཏན་ཚིགས་ཀྱིས་ཚད་མར་གྲུབ་པ་དང༌། མངོན་སུམ་དང་འཐད་པ་སོགས་ཀྱི་རིགས་པ་ཡང་དག་པས་ཡིད་ཆེས་པར་བྱེད་པ་སྟེ། རྣམ་པ་བཞིས་ནོར་འཁྲུལ་དང་བྲལ་བར་ལུང་ཆེན་པོའི་གསང་དོན་དུ་ངེས་པའི་གདེངས་རྙེད་པའོ། །དེ་དག་ནི་བཞི་ཕྲག་བཞིའོ། །དེའང་གཏན་ཚིགས་ཀྱི་ཆོས་རྟགས་བཞིའི་སྒོ་ནས་ཚུལ་ཇི་ལྟར་སྦྱོར་བ་ནི། བཤད་པའི་བསྟན་པ་བཞིའི་༼༡༥༽ཆོས་གང་དང་གང་སྟོན་ན་ཡང༌། རྒྱལ་བའི་བཀའ་ལུང་ལས་གསལ་བར་འབྱུང་ཞིང་ངེས་པར་སྣང་བ་ཞིག་དགོས་ཏེ། བཀའ་ལས་མི་སྣང་ན་ཡིད་ཆེས་མི་སྐྱེ་ཞིང་རྒྱབ་རྟེན་མེད་པར་འགྱུར་བ་དང༌། དོན་གྱི་ངོ་བོ་ཆོས་ཉིད་དང་མི་འགལ་བ་ཞིག་དགོས་ཏེ། དོན་དང་འགལ་ན་སྙིང་པོ་མེད་པར་ཡ་ཆ་བར་འགྱུར་བ་དང༌། ཚད་མའི་གཏན་ཚིགས་ཀྱིས་རྒྱས་པར་བསྟན་པ་ཞིག་དགོས་ཏེ། མ་རྒྱས་ན་ཇི་བཞིན་དུ་གཏན་ལ་མི་ཕེབས་པས་ཤེས་བྱའི་ལྷག་མ་ལུས་པར་འགྱུར་བ་དང༌། དངོས་པོ་སྟོབས་ཞུགས་ཀྱི་རིགས་པ་མཆོག་གིས་འཐད་པར་གྲུབ་པ་ཞིག་དགོས་ཏེ། མ་འཐད་ན་ཡང་དག་པའི་དོན་དུ་མི་འོས་པས་རྟོགས་ཀྱང་འབྲས་བུ་ཐོབ་པར་མི་གཤའ་བས་ན། དེ་བཞི་དང་སྦྱར་ནས་ཡིད་ཆེས་པའི་གནས་སུ་གྱུར་ན་ནམ་ཡང་བསླུ་བ་མེད་པར་སྙིང་ནོར་དུ་རུང་བར་ངེས་པའོ། །དེ་དག་ནི་བཞི་ཕྲག་ལྔ་པ་སྟེ་ཁས་བླང་བའི་རྣམ་གྲངས་ཉི་ཤུའོ།།

གསུམ་པ་ཞབས་བསྡུ་བ་ནི།

ཐམས་ཅད་མེད་རྒྱུ། ཞེས་པ་ནས། རྙེད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ཐམས་ཅད་མེད་རྒྱུ་བཏགས་ཆགས་པ། །བསྒྲུབ་འགྲུབ་ཇི་ལྟར་བལྟས་པར་སྣང་། །གང་དག་གང་ལ་བརྡ་ཕྲད་པས། །གང་གིས་དོན་ལེན་ཉིད་དུ་ངེས། །ཞེས་ངེས་པ་དམ་པ་ཉིད་དུ་བགྲོས་པས། དམན་པའི་ལུས་ཀྱི་སེམས་དཔའ་རྣམས། ཆོས་ཐམས་ཅད་བརྡ་ཙམ་གྱིས་གང་གིས་ངེས་པ་རྙེད་པར་གྱུར་ཏོ།།

དེ་ལྟར་གཏན་ཚིགས་ཀྱིས་ངེས་པའི་དོན་གྱི་ཡིན་ལུགས་གང་སྙམ་པ་ལ། དངོས་པོར་སྣང་བའི་ཆོས་ཐམས་ཅད་རྐྱེན་ལས་བྱུང་བས་ཐེར་ཟུག་པ་མེད་པར་དེ་ཁོ་ན་ཉིད་མཐའི་དྲི་མ་རིལ་ཀ་ནས་དག་པ་ཉིད་ཐམས་ཅད་དུ་མ་བཀོལ་བར་སྣང་བ་ཡང་གཞི་རང་བཞིན་མེད་པ་ཇི་བཞིན་པའི་ངོ་བོ་ཉིད་དུ་རྒྱུ་ལྟར་གྱུར་པ་ཡིན་པས། དེ་ལ་རང་གི་བློས་མིང་གི་བླ་དྭགས་ཇི་ལྟར་བཏགས་པ་ལྟར་སྣང་ཞིང་ཆགས་པ་ཡིན་ལ། འབྲས་བུའི་དངོས་གཞིར་གྱུར་པའང༌། ལམ་པས་ཇི་ལྟར་དོན་དུ་གཉེར་ནས་བསྒྲུབས་པ་ལྟར་འབྲས་བུ་ཐ་དད་དུ་འགྲུབ་ཅིང༌། ལྟ་བས་ཇི་ལྟར་བལྟས་པའི་དོན་ཐ་དད་པར་ཡང་རང་བཞིན་གཅིག་ཏུ་མ་ངེས་པར་ཐེག་པ་སོ་སོའི་ངོ་བཞིན་དུ་ཡང་སྣང་ངོ༌། །དེས་ན་གཏན་ཚིགས་ཀྱི་སྒོ་ནས་དོན་གྱི་ངོ་བོ་གང་དག་སྣོད་དུ་གྱུར་པའི་རྣལ་འབྱོར་པ་གང་སུ་ཞིག་གི་བློ་ལ་དོན་ཇི་ལྟ་བ་བཞིན་དུ་བརྡ་ལེགས་པར་སྤྲད་དེ་འཇལ་ངེས་སུ་བྱས་པས་དེ་ལྟར་གོ་བར་འགྱུར་བའི་ཕྱིར། ཤེས་བྱ་ཟབ་མོ་གང་གི་ངོ་བོ་མཐར་ཐུག་པའི་གསང་བ་ཉིད་དང་འཕྲད་ནས་དོན་དེ་བཞིན་དུ་ཉམས་སུ་ལེན་པ་ཉིད་དུ་ངེས་པ་ལ་བསླུ་ཞིང་རྫུན་པ་ནམ་ཡང་མེད་དོ། །དེ་བས་ན་བསྟན་པ་བཞིའི་དོན་མ་ནོར་བར་གོང་གི་བཞི་ཚོ་ཕྱི་མ་གཉིས་ཀྱིས་གཏན་ལ་འབེབས་པའི་ཕྱིར་གཏན་ཚིགས་བཀའ་དོན་ལ་སོགས་བཞི་༼༡༦༽སྨོས་ཏེ་ཡང་དག་པ་ཤེས་པར་བྱེད་པའི་མཚན་ཉིད་དོ། །ཞེས་བཤད་པ་བཞིན་ངེས་པ་དོན་གྱི་བྱེ་བྲག་གི་མཆོག་དམ་པ་ཉིད་མ་ནོར་བར་བགྲོས་ཏེ་བཤད་པས། འཁོར་དམན་པའི་ལུས་ཀྱི་སེམས་དཔའ་རྣམས་ཀྱིས་ཀྱང་གཏན་ཚིག་རྒྱས་པར་ཁོང་དུ་ཆུད་པའི་རྒྱུས། ཆོས་ཐམས་ཅད་ཀྱི་དོན་ཡང་དག་པར་མཚོན་པའི་ཚིག་གི་བརྡ་སྨོས་པ་ཙམ་གྱིས་གང་གསང་སྔགས་ལུང་གི་དོན་ལ་ཚད་མས་ངེས་པ་རྙེད་ཅིང་རྟོགས་པའི་ཉམས་དང་ལྡན་པར་གྱུར་ཏོ། །འོ་ན་འདིར་བཤད་པའི་སྣོད་བཞི་དང༌། ལེའུ་ཞེ་བཞི་པར་བཤད་པའི་གདུལ་བྱ་གསུམ་པོ་དེ་གཉིས་རྒྱ་གང་གི་ཆེ་ཞེ་ན། གདུལ་བྱ་གསུམ་གྱི་ཁོངས་སུ་སྣོད་བཞི་འདུས་ལ། སྣོད་བཞིའི་ཁོངས་སུ་གདུལ་བྱ་གསུམ་མ་འདུས་པས་གདུལ་བྱ་གསུམ་རྒྱ་ཆེ་སྟེ། སྣོད་བཞི་པོ་ངེས་པར་འབྱུང་བའི་གདུལ་བྱའི་བྱེ་བྲག་ཡིན་པས། འདོད་ལ་ཞེན་པ་དང་གདུལ་དཀའ་དྲག་པོ་གཉིས་མ་འདུས་པས་སོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ངེས་པ་དམ་པའི་ཡན་ལག་བགྲོས་པའི་ལེའུ་སྟེ་ལྔ་བཅུ་གཅིག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ངེས་པ་དམ་པའི་ཡན་ལག་བགྲོས་ཏེ་ཚད་མའི་གཏན་ཚིགས་བསྟན་པའི་ལེའུ་སྟེ། ལྔ་བཅུ་རྩ་གཅིག་པ་ཉིད་རྣམ་པར་འགྲེལ་པའོ།། །།

ལེའུ་ང་གཉིས་པ་འཇུག་པ་ཐབས་ཀྱི་ཡན་ལག་བགྲོས་པ།

༈ དྲུག་པ་སྦྱོར་བའི་ཡན་ལག་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། རྟོགས་འཇུག་ཐབས་ཉིད་ནི། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོ་དེས། དམན་པའི་ལུས་ཀྱི་སེམས་དཔའ་ཆེན་པོ་ལངྐའི་བདག་པོ་ལ།

ཡིད་ཡོངས་སུ་འཇུག་པའི་ཐབས་ཀྱིས་བོས་ཏེ་སྨྲས་པ། ལངྐའི་བདག་པོ་ཡན་ལག་གི

མཐའ་ཟད་རྟོག་འཇུག་ཐབས་ཉིད་ནི།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །ཡན་ལག་ལྔ་པ་བཤད་མ་ཐག་པ་དེ་ནས་ཡང་དྲུག་པ་རྗེས་མཐུན་དུ་བསྟན་པའི་ཕྱིར་སྟོན་པ་གསང་བ་པའི་བདག་པོ་དེས། དམན་པའི་ལུས་ཀྱི་སེམས་དཔའ་ཆེན་པོ་ལང་ཀའི་བདག་པོ་ལ། རྟོགས་པ་ལྟ་བ་དང་ཉམས་སུ་བླང་བ་ཏིང་ངེ་འཛིན་གྱི་ཡིད་ངེས་པར་ཡོངས་སུ་འཇུག་པའི་ཐབས་ཀྱིས་བོས་ཏེ། ལུང་ཆེན་པོའི་སྦྱོར་བའི་ཡན་ལག་སྨྲས་ཏེ་བཀའ་སྩལ་པ། སྡུད་པ་པོ་ལང་ཀའི་བདག་པོ། ཡན་ལག་དྲུག་གི་ཐ་མ་འདིས་རྫོགས་པས་མཐར་ཟད་ཀྱི་རྗེས་མ་བསྟན་པ་ཡང༌། རང་གི་དོན་དུ་དེ་ཁོ་ན་རྟོགས་ཤིང་དོན་ལ་འཇུག་པ་དང་གཞན་གྱི་དོན་དུ་ཐུགས་རྗེས་ཐབས་ལ་མཁས་པའི་ཡན་ལག་ཉིད་ནི། གནས་སྐབས་ཀྱི་དོན་དང་མཐར་ཐུག་གི་འབྲས་བུ་ལ་ངེས་པར་སྦྱོར་བས་མིང་ཡང་འགྲུབ་ལ། དབྱེ་བས་དྲུག་ཅུ་རྩ་གཅིག་ཏུ་བཤད་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། བདག་དོན་དུ་སྦྱོར་བ་༼༡༧༽སུམ་ཅུ་རྩ་གཉིས་བཤད་པ། གཞན་དོན་དུ་སྦྱོར་བ་ཉི་ཤུ་རྩ་བརྒྱད་བཤད་པའོ། །དང་པོ་ལ། བཞི་ཚོ་བརྒྱད་དེ། རྟོགས་པ་བཞི། མཚན་ཉིད་བཞི། དགོས་འབྲེལ་བཞི། དཀྱིལ་འཁོར་དུ་འཇུག་པའི་ཡན་ལག་བཞི། དལ་དུ་འཇུག་པའི་དཔེ་བཞི། ལམ་དུ་འཇུག་པའི་དཔེ་བཞི། བསྙེན་བསྒྲུབ་ཀྱི་ཡན་ལག་བཞི། མཚན་ཉིད་དང་སྦྱར་བ་བཞི་བཤད་པའོ། །དང་པོ་ནི

རང་བཞིན་འབྱུང་སྒོ། ཞེས་པ་ནས། ངེས་གཞག་བྱ། །ཞེས་པའི་བར་གྱིས་བསྟན་ཏེ།

རང་བཞིན་འབྱུང་སྒོ་དབང་སྦྱོར་དང་། །ངེས་པར་ཁོང་དུ་ཆུད་པ་ཡིས། །ཡང་དག་དོན་ལ་ངེས་གཞག་བྱ།།

རྒྱུ་གཅིག་པ་ནི། ཆོས་ཐམས་ཅད་ཀྱི་རང་བཞིན་བརྟགས་ན་ངོ་བོ་མ་སྐྱེས་པ་ཞིག་པས་དམིགས་སུ་མེད་ལ་བསམ་ན་ཐམས་ཅད་དུ་མ་འགགས་པ་ཞིག་པས་ཅིར་ཡང་སྣང་བ་ཉིད་དོན་ལ་བདེན་པ་དབྱེར་མེད་པར་གཅིག་པའི་ངོ་བོ་དེ་ཁོ་ན་ཉིད་བཤད་པ་ལྟར་མེད་རྒྱུ་བཏགས་ཆགས་བསྒྲུབ་འགྲུབ་ཏུ་སྣང་བའི་གཞིར་གྱུར་པས་རྟོགས་བྱའམ་བསྒྲུབ་བྱའི་རང་བཞིན་རྒྱུ་གཅིག་པར་རྟོགས་པའོ།།

ཡིག་འབྲུའི་ཚུལ་ནི། ཆོས་ཐམས་ཅད་སྐུ་གསུང་ཐུགས་ཀྱི་འབྲས་བུ་མཐར་ཐུག་པར་ངེས་པའི་རྟོགས་པ་འབྱུང་བའི་སྒོ་སྟེ། གསུང་སྐུ་ཐུགས་གསུམ། ཨ་ཨོ་ཨ໋་གསུམ་གྱིས་མཚོན་པའི་ཚུལ་གྱིས་ཨས་མཚོན་པའི་རང་བཞིན་ཆོས་སོ་ཅོག་རང་གི་སེམས་རྒྱུ་རྐྱེན་དང་བྲལ་བས་མཚན་ཉིད་གང་དུའང་མ་སྐྱེས་པར་གསལ་བའི་གསུང་དང༌། དེ་ཉིད་ཉི་ཚེ་བའི་སྟོང་པ་མ་ཡིན་ཏེ་ཡེ་ཤེས་སུ་གསལ་བས་དབྱིངས་དང་ཡེ་ཤེས་གཉིས་སུ་མེད་པའི་ཆོས་ཀྱི་སྐུ་ཡི་གེ་ཆ་གཉིས་པ་ཨོ་ཡིས་མཚོན་པའི་ཚུལ་དང༌། དེ་དག་ཀྱང་རང་བྱུང་གི་ཡེ་ཤེས་ཆེན་པོ་ཡེ་ཤེས་ལྔ་མ་བཙལ་བར་རྫོགས་པའི་ཐུགས་ཀྱི་ངོ་བོ་ཨ໋ཱ་གྱི་ཡི་གེས་རྫོགས་ཚུལ་དུ་མཚོན་ཏེ་སངས་རྒྱས་པར་རིག་པ་ལ་གསལ་བའོ།།

བྱིན་གྱི་རླབས་ཀྱིས་རྟོགས་པ་ནི། རྟོགས་པའི་མཐུས་རང་དབང་མེད་པར་དོན་ལ་སྦྱོར་བ་སྟེ། དཔེར་ན་རྒྱུ་རས་སྣམ་དཀར་པོ་ལས་ཁ་དོག་དམར་པོར་སྒྱུར་པའི་མཐུ་བཙོད་ལ་ཡོད་པ་དང༌། སྔོན་པར་བསྒྱུར་ན་རམས་ལ་ཡོད་བྱ་བ་ལྟར་ཁམས་གསུམ་རང་རིག་པ་རྣམ་པར་དག་པའི་སྣམ་བུ་ཡེ་ནས་ཡིན་པ་ཉིད། བཤད་པའི་རྟོགས་པ་གཉིས་ཀྱི་ཚོན་གྱིས་རང་རིག་པ་ལ་སྐུ་དང་ཡེ་ཤེས་འབྲས་བུའི་ཁ་དོག་ཏུ་སྣང་བར་བྱེད་པའི་སྣུམས་པ་ནི་རློབ་པ་དང༌། དེ་ལྟར་རིག་པར་རང་ལ་ཤར་བ་ནི་བརླབས་པའོ། །འོན་ཀྱང་མིན་པ་ལས་ཡིན་པར་བསྒྱུར་བ་ནི་མེད་དོ།།

མངོན་སུམ་པར་རྟོགས་པ་ནི། དེ་༼༡༨༽ལྟར་གསུམ་གྱི་ཡང་འབྲས་བུ་སྟེ། ཆོས་རྣམས་གསང་སྔགས་དེ་ཁོ་ན་ཉིད་དུ་ལྷུན་གྱིས་གྲུབ་པའི་དོན་རང་གི་རིག་པའི་མངོན་སུམ་དུ་རྟོགས་པ་ཡང་ཚིག་སྒྲ་ལ་རྟེན་པ་དང་དོན་ཞེ་ལ་འཛིན་པ་ཙམ་མ་ཡིན་པར་ཆོས་ཉིད་ཇི་བཞིན་པའི་དོན་ངེས་པར་ཁོང་དུ་ཆུད་དེ་རྟོགས་པའི་གདེངས་ཆེན་པོ་རྙེད་པའོ། །དེ་ལྟར་རྟོགས་པ་བཞི་ཡིས་དེ་ཁོ་ན་ཉིད་ཡང་དག་པའི་དོན་ལ་བློ་འཇུག་རིམ་ལྟར་ངེས་པར་གཞག་སྟེ་གོམས་པར་བྱའོ། །འདི་དག་ལྟ་བ་ཁོ་ན་སྟེ་བཞི་ཕྲག་དང་པོའོ།།

གཉིས་པ་མཚན་ཉིད་བཞི་ནི།

ཤེས་དང་འཇུག་དང༌། ཞེས་པ་ནས། མཚན་ཉིད་ཡིན། །ཞེས་པའི་བར་གྱིས་བསྟན་ཏེ།

ཤེས་དང་འཇུག་དང་འབྲས་བུ་དང་། །ལྷུན་གྱིས་གྲུབ་པའི་མཚན་ཉིད་ཡིན།།

མཚན་ཉིད་རྣམ་པ་བཞི་སྤྱི་དང་བྱེ་བྲག་ཏུ་བསྟན་པའི་ཕྱིར། དེ་ལྟར་མངོན་སུམ་པར་རྟོགས་པའི་ངོ་བོ་རང་གསལ་ཤེས་པའི་མཚན་ཉིད་ལྟ་བའི་དོན་ཡང་དག་པར་མཐོང་བ་དང༌། དེ་ལྟར་མཐོང་བའི་དོན་ལ་གོམས་པར་གནས་པའི་ཏིང་ངེ་འཛིན་གྱིས་འཇུག་པ་དང༌། དེ་ཉིད་རྐྱེན་དང་བསྲེས་ཏེ་རྗེས་མཐུན་དུ་སྤྱོད་པས་བོགས་འདོན་ལ་བརྟེན་ནས། དེ་ལྟར་འབད་པས་དྲོད་རྟགས་དང་ལྡན་པར་ཟུང་དུ་འབྲེལ་བའི་འབྲས་བུ་མཐར་ལམ་མན་ཆད་ཀྱི་རིག་འཛིན་དུ་གྱུར་པ་དང༌། མཇུག་མ་བཙལ་པར་ལྷུན་གྱིས་གྲུབ་པས་རྒྱལ་བའི་གོ་འཕང་སྐྱེད་དུ་བྱ་བ་མེད་པའི་འབྲས་བུ་ཆེན་པོ་དང་བཞི་ནི་མཚན་ཉིད་བཞི་ཡིན་ནོ། །དེས་ན་རྣལ་འབྱོར་ལྔའམ་བཅུའི་རྒྱུ་ལས་མཐོང་ལམ་ཐོབ་ནས་རྐྱེན་བསྒོམ་སྤྱོད་གཉིས་ལ་རྗེས་སུ་ཞུགས་པས་ལམ་གྱི་རིག་འཛིན་དང་མཐར་འབྲས་མངོན་དུ་བྱས་པའམ། དེ་དག་ནི་རྣལ་འབྱོར་གསུམ་སྟེ། ཤེས་པ་གཞི། འཇུག་པ་དང་གནས་སྐབས་ཀྱི་འབྲས་བུ་ལམ། སངས་རྒྱས་ཉིད་འབྲས་བུའི་རྣལ་འབྱོར་གྱི་དོན་དུའང་འགྱུར་རོ།།

གསུམ་པ་དགོས་འབྲེལ་བཞི་ནི།

དེ་འབྲེལ་དེ་དགོས། ཞེས་པ་ནས། བྱེད་དགོས་ཡིན། །ཞེས་པའི་བར་གྱིས་བསྟན་ཏེ།

དེ་འབྲེལ་དེ་དགོས་དེ་མཚོན་དགོས། །དེ་ཡི་རྗེས་སུ་བྱེད་དགོས་ཡིན།།

དགོས་འབྲེལ་གང་ཞེ་ན། བསྙེགས་པའི་དོན་གྱིས་འདིར་རྣལ་འབྱོར་གསུམ་དང་ལམ་གྱི་དགོས་འབྲེལ་དུ་འགྱུར་ཏེ། སྟོན་པས་གསང་བ་ཟབ་མོའི་རྒྱུད་བཀའ་སྩལ་པས། དེའི་ཚིག་དོན་ངེས་པ་གང་གི་ཚེ་ན། རྒྱུ་ཤེས་པ་དང༌། རྐྱེན་འཇུག་པ་དང༌། ལམ་གྱུར་གྱི་གྲུབ་པ་དང༌། མཐར་ཕྱིན་པའི་འབྲས་བུའི་མཚན་ཉིད་བཞི་ཡང༌། དེ་དག་ངེས་པའི་འཇུག་རིམ་ལྟར་སྔ་མ་ནི་རྒྱུ་ལ་ཕྱི་མ་ནི་འབྲས་བུའི་ཚུལ་དུའང་འབྲེལ་ཏེ། སྔ་མ་ནི་ཐབས་སུ་གྱུར་ལ། ཕྱི་མ་ནི་ཐབས་༼༡༩༽ལས་བྱུང་བར་ཡང་འབྲེལ་བར་འགྱུར་རོ། །དེ་བས་ན་རྣལ་འབྱོར་ལྔ་དང་བཅུ་ཡང་རྗེས་སུ་མཐུན་པར་འགྱུར་རོ། །དེ་དག་གི་དགོས་པ་ནི་ལམ་སོ་སོའི་ཆ་རྐྱེན་ལྟར་ཡན་ལག་གིས་དང་དུ་བླང་དགོས་པའོ། །དེ་ལ་མཚོན་པ་ནི་བརྗོད་པ་སྟེ་དེ་ལ་བརྗོད་བྱ་རྗོད་བྱེད་དོ། །བརྗོད་བྱ་ནི་རྒྱུད་ཀྱི་དོན་ལམ་རིམ་དང་རྣལ་འབྱོར་གསུམ་གྱི་སྐབས་སྐབས་ཀྱིས་ཤེས་པར་བྱའོ། །རྗོད་བྱེད་ནི། རྐྱེན་ཚིག་དང་ཡི་གེ་རྣམས་ཀྱིས་མཚོན་ཞིང་ཐོབ་པར་བྱེད་པའོ། །འདིར་དགོས་པ་བརྗོད་པ་ནི་ཁྱད་པར་གྱི་དགོས་པ་སྟེ་བརྗོད་བྱ་མཚོན་དགོས་པས་སོ། །དེ་དག་ཀྱང་དོན་གྱི་ལམ་སྔ་མ་དེ་ཡི་རྗེས་སུ་བསྒྲུབ་པས་གོམས་པ་སྟོབས་སུ་གྱུར་ཏེ་ལས་སུ་རུང་ནས་མཐར་ཕྱིན་པ་ནི་འབྲས་བུ་མངོན་དུ་བྱེད་པ་ཡིན་པས་དགོས་པའི་ཡང་དགོས་པ་སྟེ་དེ་ཉིད་བསྒྲུབ་པར་བྱ་བ་ཡིན་ནོ། །དེ་ལྟར་བཞི་ཕྲག་གསུམ་པའོ།།

བཞི་པ་དཀྱིལ་འཁོར་དུ་འཇུག་པའི་ཡན་ལག་བཞི་ནི།

ཐོས་ཆུང་གོམས་དང་ངེས་པར་གྱུར། །ཞེས་པས་བསྟན་ཏེ།

ཐོས་ཆུང་གོམས་དང་ངེས་པར་འགྱུར།།

འཇུག་པའི་ཡན་ལག་བཞི་ནི། སྤྱིར་བསླབ་པའི་མཐའ་བཅུ་ཡང༌། རིམ་པ་བསྡུས་ན་ཐབས་ཀྱི་ཐེག་པའི་གཞུང་མ་ནོར་བར་ཐོས་པས་ཤེས་པ་ཡིན་པས་མཐའ་བཅུ་ཡང་དག་པར་ཤེས་པ་ཐོས་པ་ལ་རག་ལས་པས་ན་ཐོག་མར་ཐོས་པ་གཅེས་པ་དང༌། དེ་ནས་ཐོས་པའི་སྒོ་ནས་དོན་གྱི་གདེངས་ཆུད་དེ་རྟོགས་པ་དང༌། དེ་ལྟར་རྟོགས་པ་ལ་རྣལ་འབྱོར་དུ་བྱས་ཏེ་གོམས་པ་དང༌། དེ་ལྟར་གོམས་པར་བྱས་པས་ལས་སུ་རུང་ནས་ངེས་པར་འབྲས་བུ་མཐར་ཕྱིན་ཏེ་མི་འགྱུར་བར་གྱུར་པའོ། །བཞི་ཕྲག་བཞི་པའོ།།

ལྔ་པ་དལ་དུ་འཇུག་པའི་དཔེ་བཞི་ནི།

ཕྱེ་མཐོང་ཞུགས་དང་ཐོབ་པ་ཡིན། །ཞེས་པས་བསྟན་ཏེ།

ཕྱེད་མཐོང་ཞུགས་དང་ཐོབ་པ་ཡིན།།

དེའི་དཔེ་དཀྱིལ་འཁོར་དུ་འཇུག་པའི་ཡན་ལག་བཞི་ནི། ཐོས་པའི་ཤེས་རབ་ཀྱི་མིག་ཤིན་ཏུ་དྭངས་པ་ཕྱེ་ནས་རང་བཞིན་ཕྱིན་ཅི་མ་ལོག་པར་ངེས་པ་ནི་དཔེར་ན་མིག་བྱེ་བ་ལྟ་བུའོ། །ཐོས་བསམ་གྱིས་དོན་གྱི་གདེངས་རྙེད་དེ་གསང་སྔགས་ཀྱི་དཀྱིལ་འཁོར་རྣམ་གསུམ་མཐོང་བ་ནི། དཔེར་ན་ཕྱིའི་ཡུལ་ལམ་དཀྱིལ་འཁོར་མཐོང་བ་དང་འདྲའོ། །རྟོགས་པའི་དོན་ལ་རྣལ་འབྱོར་དུ་བྱེད་པ་ནི་དཀྱིལ་འཁོར་གསུམ་དུ་ཞུགས་པ་སྟེ། དཔེར་ན་དཀྱིལ་འཁོར་དུ་བཅུག་པ་དང་འདྲའོ། །དེ་ལྟར་ཞུགས་ཏེ་འབད་པས་ས་འོག་མ་ནོན་ཏེ་གོང་མ་ཐོབ་ནས་འབྲས་བུ་ལྷུན་གྱིས་གྲུབ་པ་ནི། དཔེར་ན་དཀྱིལ་འཁོར་དུ་དབང་ཐོབ་པ་དང་འདྲ་བ་ཡིན་ཏེ། དེ་༼༢༠༽ལྟར་བཞི་ཕྲག་ལྔ་པའོ། །དེ་དག་ནི་ལམ་ཟག་པ་ལྔ་དང་པོ་དང༌། དེ་ནས་མཐོང་བསྒོམ་དང་མཐར་ལམ་དུ་སྦྱར་རོ། །འཆད་པའང་རྗེས་སུ་མཐུན་ནོ།།

དྲུག་པ་ལམ་དུ་འཇུག་པའི་དཔེ་བཞི་ནི།

དེ་ཚོལ་དེ་རྙེད་འཇུག་མངོན་གྱུར། །ཞེས་པས་བསྟན་ཏེ།

དེ་ཚོལ་དེ་རྙེད་འཇུག་མངོན་གྱུར།།

སེམས་འཇུག་ཅིང་སྐྱེ་བའི་ཡན་ལག་བཞི་གང་ཞེ་ན། དང་པོ་ཁོ་ནར་དེ་ཞེས་སྙེགས་པའི་སྒྲས། གསང་སྔགས་ལ་མིག་ཕྱེ་བའི་ཐབས་ཀྱིས་དོན་ཚོལ་བ་དང༌། དེ་ལྟར་བཙལ་བས་གསང་སྔགས་ཀྱི་གདེང་རྙེད་དེ་བདེན་པ་མཐོང་བ་དང༌། དེ་ཡི་དོན་ལ་འདྲིས་པར་བྱ་བའི་ཕྱིར་འཇུག་པ་དང༌། གོམས་པར་བྱས་པས་དོན་མངོན་དུ་གྱུར་བའོ། །དེ་ལྟར་བཞི་ཕྲག་དྲུག་པའོ།།

བདུན་པ་བསྙེན་བསྒྲུབ་ཀྱི་ཡན་ལག་བཞི་ནི།

བསྙེན་པ་ཉེ་བསྙེན་བསྒྲུབ་དང་འགྲུབ། །ཅེས་པས་བསྟན་ཏེ།

བསྙེན་པ་ཉེ་བསྙེན་བསྒྲུབ་དང་འགྲུབ།།

བསྙེན་བསྒྲུབ་རྣམ་བཞི་ནི། དང་པོར་ལམ་ཚོལ་བ་བསྙེན་པའོ། །རྟོགས་པ་ནི་ཉེ་བའི་བསྙེན་པའོ། །བསྒོམ་པ་ནི་བསྒྲུབ་པ་དང༌། མཐར་ཕྱིན་ཏེ་འགྲུབ་པ་ནི། བསྒྲུབ་པ་ཆེན་པོའོ། །ཡང་ན་སེམས་ཉིད་དུ་ཤེས་པ་ནི་བསྙེན་པ་དང༌། ལྷར་ཤེས་པ་ནི་ཉེ་བསྙེན་དང༌། ཆོས་ཉིད་དུ་ཤེས་པ་ནི་བསྒྲུབ་པ་དང༌། བུདྡྷ་ཐོབ་པ་ནི་འགྲུབ་པའོ། །ཞེས་དང༌། ཡང་ན་ཆོས་ཉིད་ཀྱི་དོན་ཤེས་པས་བསྙེན་པ། དེའི་དོན་ལ་གནས་པས་ཉེ་བསྙེན། དོན་ལ་ཆེད་དུ་གནས་པས་ན་བསྒྲུབ་པ་དང༌། མཐར་ཕྱིན་ཅིང་ཉམ་ང་དང་བྲལ་བས་འགྲུབ་པའོ། །ཞེས་དང༌། འོག་གི་བཞི་ཚོའི་དབང་དུ་ནི། མཉམ་པའི་དོན་ཤེས་པ་ནི་བསྙེན་པའོ། །བསྒོམ་པ་ནི་ཉེ་བསྙེན་ནོ། །ལྟ་སྒོམ་གཉིས་སུ་མེད་པར་གྲུབ་པ་བསྒྲུབ་པའོ། །དེ་དག་ལས་སུ་རུང་ནས་མངོན་དུ་གྱུར་བ་བསྒྲུབ་པ་ཆེན་པོ་སྟེ་བཞི་ཕྲག་བདུན་པའོ། །འདི་ལ་མཧཱ་ཡོ་ག་དང་ཚུལ་མཐུན་པར་ཡང་འཆད་དུ་ཡོད་པར་མངོན་ནོ།།

བརྒྱད་པ་མཚན་ཉིད་དང་སྦྱར་བ་བཞི་བཤད་པ་ནི།

དེ་བཞིན་མཉམ་འགྱུར། ཞེས་པ་ནས། འཇུག་རིམས་ཡིན། །ཞེས་པའི་བར་གྱིས་བསྟན་ཏེ།

དེ་བཞིན་མཉམ་འགྱུར་རྣལ་འབྱོར་པ། །ལྷུན་གྲུབ་ལས་སུ་རུང་བའོ། །དེ་ནི་ངེས་པར་འཇུག་རིམས་ཡིན།།

ལྟ་བ་མཚན་ཉིད་དང་སྦྱར་བའི་ཡང་གྲུབ་པ་བཞི་ནི། བཤད་པ་དེ་བཞིན་དུ་རིམ་པ་ལྟར་འཇུག་པའང་ཐོས་བསམ་གྱིས་མཉམ་པ་ཉིད་རྟོགས་པར་འགྱུར་བ་དང༌། རྟོགས་ཏེ་རྣལ་འབྱོར་དུ་འདྲིས་གོམས་བྱེད་པས་འགྲུབ་པ་དང༌། བསྒོམས་པས་ལྟ་བ་དང་ཏིང་ངེ་འཛིན་ཟུང་དུ་ལྷུན་གྱིས་གྲུབ་པ་དང༌། དེ་ལྟར་གྱུར་པས་མཐར་ཕྱིན་ཏེ་འབྲས་བུར་གྲུབ་པས་ལས་སུ་རུང་བའོ། །དེ་ལྟར་༼༢༡༽བཞི་ཚོ་བརྒྱད་ནི་ངེས་པར་ལམ་དུ་འཇུག་པའི་རིམས་པ་ཡིན་ཏེ་བདག་གི་དོན་ཏོ།།

སྤྱིར་གསང་སྔགས་འབྱུང་འཇུག་གི་ཡན་ལག་ནི། ལམ་ལ་རིམ་པར་ཞུགས་ནས་གོང་དུ་རིམ་པར་སྐྱེད་དུ་འབྱུང་བའོ། །ཡང༌། གསང་སྔགས་ཀྱི་དོན་གྱི་འབྱུང་འཇུག་གི་རིམས་པ་གཉིས་ལས། འཇུག་རིམ་ནི། འཁོར་བ་དང་མྱ་ངན་ལས་འདས་པའི་དོན་ལ་འཇུག་པ་སྟེ། དོན་གྱི་ངོ་བོ་ཚོལ་བ། དོན་གྱི་ངེས་པ་རྙེད་པ། དོན་གྱི་རྗེས་སུ་འཇུག་པ། དོན་མངོན་དུ་གྱུར་པ་ལྟ་བུར་སྦྱར་རོ། །འབྱུང་རིམས་ནི། འཕགས་པའི་ས་ལས་འཁོར་བའི་ཁམས་ལ་ཐུགས་རྗེ་འབྱུང་བ་སྟེ། ཐུགས་རྗེ་ཆེན་པོ་གཡོ་བ། ཐུགས་རྗེ་ཆེན་པོ་འབྱུང་བ། གཟུགས་སྐུར་སྣང་བ། འགྲོ་དོན་མཛད་པའོ། །ཞེས་ཕྱག་མཆན་ལས་འབྱུང་ངོ༌། །འདི་དག་ལས་དོན་གྱི་རྣལ་འབྱོར་ལྔ་དང་བཅུར་གྱེས་པའང་ཡིན་ལ་རྣལ་འབྱོར་གྱི་ཆ་རྐྱེན་སོ་སོའི་ཡན་ལག་ཏུའང་འགྱུར་རོ།།

གཉིས་པ་གཞན་དོན་དུ་སྦྱོར་བ་ཉི་ཤུ་རྩ་བརྒྱད་བཤད་པ་ལ་ལྔ་སྟེ། ཆོ་འཕྲུལ་བཞི། མངོན་ཤེས་ལྔ། རང་བཞིན་ལྔ། ཐབས་དང་ཐབས་སྦྱར་ལྔ་ལྔ། ཕྲིན་ལས་བཞི་བཤད་པའོ། །དང་པོ་ནི།

གཞན་གྱི་དོན་དུ། ཞེས་པ་ནས། སྦྱར་བ་ཡིན། །ཞེས་པའི་བར་གྱིས་བསྟན་ཏེ།

གཞན་གྱི་དོན་དུ་འབྱུང་རིམས་བཞི། །གཡོ་དང་ཆོ་འཕྲུལ་སྣང་མཛད་པའོ། །ཇི་ལྟར་རིམས་བཞིན་སྦྱར་བ་ཡིན།།

གཞན་དོན་དུ་འབྱུང་འཇུག་གི་ཡན་ལག་ངེས་པར་གཟུང་བ་ནི། བདག་དོན་གྱི་འཇུག་པ་མཐར་ཕྱིན་ནས། གཞན་གྱི་དོན་དུ་ཐུགས་རྗེ་འབྱུང་བས་གཞན་ངེས་པར་དོན་ལ་སྦྱོར་བ་ཁོ་ན་ཉིད་དོ། །དེ་ལའང་རིམས་པ་བཞི་སྟེ། ཐུགས་རྗེ་ཆེན་པོ་ཀུན་ཏུ་གཡོ་ནས་ལྡང་ཞིང་སྐྱེ་བ་དང༌། མཚན་ཉིད་མ་ངེས་པར་སྤྲུལ་པ་སྣ་ཚོགས་ཀྱི་ཆོ་འཕྲུལ་འབྱུང་བ་དང༌། སྐུ་གསུང་ཐུགས་ཀྱི་མཛད་པའི་དངོས་པོ་གདུལ་བྱ་ལ་སྣང་བ་དང་དེས་ཇི་ལྟར་འཚམས་པར་དོན་མཛད་པ་དང་མཛད་སྤྱོད་བཞིའོ། །ཡང་ན། སྐུ་རྫུ་འཕྲུལ་གྱི་ཆོ་འཕྲུལ་གྱིས་སྣོད་བཅུད་ཀུན་བྱིན་རླབས་ཀྱིས་གཡོ་བར་མཛད་པ་དང༌། ཐུགས་ཀུན་ཏུ་བརྗོད་པའི་ཆོ་འཕྲུལ་གྱིས་ཐུགས་རྗེ་རྒྱུན་དུ་འབྱུང་བ་དང༌། ཕྲིན་ལས་ཆོས་སྣང་བའི་ཆོ་འཕྲུལ་གྱིས་མཛད་པ་གདུལ་བྱ་ལ་སྣང་བ་དང༌། གསུང་རྗེས་སུ་བསྟན་པའི་ཆོ་འཕྲུལ་གྱིས་ཇི་ལྟར་འཚམས་པར་དོན་མཛད་པའོ། །དེ་དག་ནི་ཇི་ལྟར་བདག་དོན་གྱི་ཚུལ་དང་མཐུན་པར་གདུལ་བྱའི་བློའི་རིམས་པ་བཞིན་དུ་འགྲོ་བ་རྣམས་དོན་ལ་སྦྱོར་བའི་མཛད་པ་འབྱུང་འཇུག་གི་ཡན་ལག་ཡིན་ནོ།།

གཉིས་པ་མངོན་ཤེས་ལྔ༌ནི།

དེ་ཤེས་དེ་མ་སྐྱེས། ཞེས་པ་ནས། རིམས་བཞིན་ནོ། །ཞེས་པའི་བར་གྱིས་བསྟན་ཏེ།

དེ་ཤེས་དེ་མ་སྐྱེས་པར་ཤེས། །དེ་འདུས་དངོས་མེད་ཤེས་པ་དང་། །ཡེ་ནས་ཤེས་པ་རིམས་བཞིན་ནོ།།

ཤེས་པ་ལྔ་གང་སྙམ་པ་ལ། དོན་བྱ་བའི་གདུལ་བྱའི་མཚན་ཉིད་ཇི་ལྟ་བ་དེ་བཞིན་དུ་མ་འདྲེས་པར་མཁྱེན་པའི་ཤེས་པ་དང༌། ཡང་ན་ལྷའི་མིག་དང་རྣ་བའི་མངོན་ཤེས་༼༢༢༽དང༌། དེ་ལྟ་བུའི་གདུལ་བྱའི་སེམས་ཀྱི་རང་བཞིན་མ་སྐྱེས་པར་སྟོང་ བདག་མེད་དུ་ཡང་ཤེས་ནས་གདུལ་བའི་ཐབས་སྟོན་པའམ། ཡང་ན་ཟག་པ ་ཟད་པའི་མངོན་ཤེས་དང༌། དེ་ལྟར་མཁྱེན་ཅིང་དོན་བྱེད་པའི་དུས་ཤེས་པའམ། ཡང་ན་སྔོན་གནས་མཁྱེན་པའི་མངོན་ཤེས་དང༌། བདག་གཞན་དང་ཐབས་ཀུན་སྣང་སྟོང་གི་དངོས་པོ་གཉིས་ཀའང་མེད་པར་མཁྱེན་པའི་ཤེས་པའམ། འཆི་འཕོ་དང་སྐྱེ་བ་མཁྱེན་པའི་མངོན་ཤེས་དང༌། དེ་ཡང་འཕྲལ་དུ་བཙལ་བ་ལས་བྱུང་བ་མ་ཡིན་ཏེ། ཡེ་ཕྱི་མོ་ཉིད་ནས་མ་བཅོས་མ་བསླད་པར་ཐམས་ཅད་དུ་རང་གསལ་བར་མཁྱེན་པའི་ཤེས་པ་ཉིད་དེ། དེ་ལྟར་མཁྱེན་ནས་འགྲོ་དོན་སྐལ་པའི་རིམས་པ་བཞིན་མཛད་པའམ། ཡང་ན་ཕ་རོལ་གྱི་སེམས་ཤེས་པའི་མངོན་ཤེས་ཡིན་ནོ། །སྐབས་ཁ་ཅིག་ཏུ་གྲངས་ཀྱི་སྤྱི་དབང་གིས་ཐམས་ཅད་འདུས་པ་ཤེས་པ་ཞེས་བྱ་བའི་གྲངས་ལྔ་ཚོགས་སུ་སྦྱར་བར་ཡང་འགྱུར་ཏེ་ཤེས་པ་ལྔ་ཡང་བཞིར་བསྡུའོ།།

གསུམ་པ་རང་བཞིན་ལྔ༌ནི།

ཐམས་ཅད་མཉམ་ཉིད། ཅེས་པ་ནས། ལྔར་སྣང་བའོ། །ཞེས་པའི་བར་གྱིས་བསྟན་ཏེ།

ཐམས་ཅད་མཉམ་ཉིད་དེ་ཉིད་དང་། །བསྒྲུབ་དང་མི་འདའ་སྤྱོད་མཐུན་རྫས། །རང་བཞིན་རྣམ་པ་ལྔར་སྣང་བའོ།།

སྔགས་ཀྱི་སྤྱོད་པའི་རང་བཞིན་ལྔ་ཇི་ལྟ་བུ་ཞེ་ན། འཁོར་བའི་དངོས་པོ་བཞི་ལ་སོགས་པ་ཐམས་ཅད་བཟང་ངན་སྤོང་ལེན་མེད་པར་མཉམ་པ་ཉིད་དུ་གནས་པའི་གཞི་དང༌། ཡེ་ནས་མ་བཅོས་པར་དེ་བཞིན་ཉིད་ཡིན་པའི་ལྟ་བའི་དོན་བརྗོད་པའི་ཕྱིར་དང༌། ཡང་ན། མཚན་བཅས་དང་མཚན་མ་མེད་པའི་དེ་བཞིན་ཉིད་ལ་གནས་པའི་ཏིང་ངེ་འཛིན་དང༌། ཞེས་ཀྱང་གསུང་ལ། གོང་གི་ཐབས་དེ་དག་གི་སྒོ་ནས་བདག་གཞན་གྱི་དོན་དུ་གཉེར་བའི་མཆོག་དང་ཐུན་མོང་གི་བསྒྲུབ་པའི་བྱེ་བྲག་རྣམས་དང༌། སྤྱད་བྱ་དེ་དག་འགྲོ་དོན་དུ་སྤྱད་པར་བྱ་བ་ལས་མི་འདའ་བའི་དམ་ཚིག་མི་འགྱུར་བར་བྱིན་གྱིས་རློབས་པ་དང༌། དབང་བསྒྱུར་བ་དང་ཐབས་ཀྱི་སྤྱོད་པ་ལ་སོགས་པའི་སྤྱོད་པ་རྣམས་དང༌། ལོག་སྲེད་ཅན་ལ་སོགས་པ་དང་ཐེག་པ་རྣམས་ཀྱི་སྤྱོད་པ་ཡོད་དོ་ཅོག་དང་མཐུན་པས་དོན་བྱ་བ་དམ་རྫས་ལྔ་ལ་སོགས་པའི་ཡོ་བྱད་དང༌། གསང་སྔགས་ཀྱི་སྤྱོད་པའི་རང་བཞིན་རྣམ་པ་ལྔར་སྣང་བ་ཉིད་ནི་སྤྱིར་གསང་བ་ནང་པ། ཁྱད་པར་དུ་ཡང་རྒྱུད་འདི་ལས་བཤད་པའོ།།

བཞི་པ་ཐབས་དང་ཐབས་སྦྱར་ལྔ་ལྔ༌ནི།

གང་མཁས་ཆེ་དང༌། ཞེས་པ་ནས། བདེར་འཇུག་པའོ། །ཞེས་པའི་བར་གྱིས་བསྟན་ཏེ།

ཐབས་མཁས་ཆེ་དང་མང་དང་ཡངས། །བསྒྱུར་དང་རླབས་ཆེན་ཅིར་སྟོན་དང་།།

ཀུན་ཤོང་ཀུན་འཇུག་བདེར་འཇུག་པའོ།།

ཐབས་རྣམ་པ་ལྔ་བསྟན་པའི་ཕྱིར། ཐབས་ཀྱི་དངོས་པོ་རྣམས་ལ་གང་ཕྱིན་ཅི་ལོག་གི་སྤྱོད་པས་ཀྱང་གདུལ་བྱ་ཆུད་མི་ཟ་བར་དོན་ལ་གཞུག་པས་ཐབས་མཁས་པ་དང༌། ཉོན་མོངས་པ་ལྔ་དང་འདོད་ཡོན་ལྔ་དང་མཚམས་མེད་པ་ལྔ་ཡང་བྱང་ཆུབ་ཀྱི་ལམ་དུ་སློང་བས་ཐབས་ཤིན་ཏུ་ཆེ་བ་དང༌། ༼༢༣༽གདུལ་བྱའི་གྲངས་དང་མཐུན་པར་གདུལ་ཐབས་ཀྱི་སྒོ་བསམ་གྱིས་མི་ཁྱབ་པས་ཐབས་མང་བ་དང༌། མཐས་གཏུག་པའི་ཆོས་ཐམས་ཅད་ཐབས་སུ་མ་གྱུར་བ་མེད་པས་གང་ཡང་མི་སྤང་བར་མཐའ་ལ་ཐུག་པ་མེད་པས་ཐབས་ཡས་པ་དང༌། གསང་སྔགས་ཀྱི་སྒོར་མ་ཤོང་བ་དང་མི་སྤྱད་པ་མེད་པར་ཐབས་སུ་གྱུར་པས་ཐབས་ཡངས་པ་དང་ལྔའོ།།

ཐབས་ཀྱི་བཤད་སྦྱར་ལྔ་ནི། གང་དུག་སྨན་དུ་བསྒྱུར་བ་ལྟར་འཁོར་བ་ཆོས་ཉིད་དང་ཉོན་མོངས་པ་ཉིད་ཡེ་ཤེས་སུ་བསྒྱུར་ནས་གྲོལ་བར་བྱེད་པས་ཐབས་ལ་མཁས་པར་ངེས་པ་དང༌། གང་ལོག་སྲེད་ཅན་རྣམས་ཀྱང་ཡང་དག་པ་ལ་བཙུད་དེ་གདུལ་བྱའི་བློ་གང་ཡང་ཐུགས་རྗེས་མ་ཟིན་པ་མེད་པས་ཐབས་རླབས་ཆེན་པོ་ཡིན་པར་ངེས་པ་དང་། གདུལ་བྱའི་གྲངས་ལྟར་ཐབས་ཀྱི་སྒོ་བསམ་གྱིས་མི་ཁྱབ་པ་མང་པོ་ཅིར་ཡང་སྟོན་ཏེ་འདུལ་བར་བྱེད་པས་ཐབས་མང་བར་ངེས་པ་དང༌། ཐབས་མཐའ་མེད་པ་ཀུན་ཤོང་བས་ནམ་མཁའི་མཐས་གཏུག་པའི་ཐབས་གང་ཡང་མ་འདུས་པ་མེད་པས་ཐབས་ཡས་པར་ངེས་པ་དང༌། འཇིག་རྟེན་པ་དང་ལོག་སྲེད་ཅན་དང་ཐེག་པ་ཀུན་གྱི་སྤྱོང་པ་གང་ཡང་མི་སྤོང་བར་ཀུན་དང་མཐུན་པར་དོན་སྤྱོད་དེ་ཡང་དག་པའི་ལམ་ལ་བདེར་ཞེས་བདེ་བར་འཇུག་པས་ན་ཐབས་ཡངས་པར་ངེས་པའོ། །དེ་ལྟར་ཐབས་དེ་དག་གིས་གཞན་དོན་ལ་བདེ་བླག་ཏུ་འཇུག་པར་བྱེད་པས་གདུལ་བྱ་སྣོད་དུ་གྱུར་པ་ལ་ཐབས་ཆེན་མཆོག་གི་ཐེག་པར་ཡང་ཤིན་ཏུ་ངེས་པར་འགྱུར་རོ།།

ལྔ་པ་ཕྲིན་ལས་བཞི་བཤད་པ་ནི།

བཅོམ་དང་ཞི་དང༌། ཞེས་པ་ནས། ལས་བཞིའོ། །ཞེས་པའི་བར་གྱིེས་བསྟན་ཏེ།

བཅོམ་དང་ཞི་དང་མཐའ་རྒྱས་དང་། །ཆུབ་པར་འདུས་པ་ལས་བཞིའོ།།

ཕྲིན་ལས་རྣམ་བཞི་བསྟན་པ་ནི། དྲག་པོའི་ཕྲིན་ལས་ཀྱིས་གདུལ་དཀའ་གཞོམ་ཞིང་མཚན་མའི་རྟོག་པ་བཅོམ་པ་དང༌། ཞི་བའི་ཕྲིན་ལས་ཀྱིས་གདུག་པ་ཅན་ལྷན་ནེར་འགྱུར་ཞིང་སྤྲོས་པའི་མཚན་མ་ཞི་བ་དང༌། རྒྱས་པའི་ཕྲིན་ལས་ཀྱིས་ཚེ་དང་བསོད་ནམས་དཔལ་དང་གཟི་བརྗིད་མཐའ་ཡས་པར་འཕེལ་ཞིང༌། ཤེས་བྱ་ལ་ཡེ་ཤེས་རྒྱས་པར་འགྱུར་བ་དང་། དབང་གི་ཕྲིན་ལས་ཀྱིས་རིལ་བདག་གི་བར་འགྱུར་ཞིང་དེ་ཁོ་ན་ཉིད་ཀྱི་ངང་དུ་འཁོར་འདས་ཐམས་ཅད་ཆུབ་པར་འདུས་པ་སྟེ། དེ་དག་ནི་ཐབས་དང་དོན་གྱི་ལས་རྣམ་པ་བཞིའོ། །དེ་ཡང་སྦྱིན་སྲེག་དང་རོ་སྲེག་ལྟ་བུར་ཡང་སྦྱར་བར་བྱའོ། །དེ་ལའང་ཆགས་གནས་འཇིག་སྟོངས་ལྟ་བུ་རང་བཞིན་གྱི་ལས་བཞི་དང༌། སྤྱོད་པ་རྣལ་འབྱོར་པས་གང་དགོས་ཀྱི་ལས་བཞི་ལྟ་བུ་དང༌། རང་སྣང་གི་མཛད་པ་འབྲས་བུའི་ལས་བཞི་རྣམས་ལས་འདིར་འབྲས་བུ་ཐུགས་རྗེའི་ལས་བཞིའོ།།

གསུམ་པ་མཇུག་བསྡུ་བ་ནི།

གང་དུ་སྦྱོར་བའི། ཞེས་པ་ནས། རྫོགས་པ་ཡིན། །ཞེས་པའི་བར་༼༢༤༽གྱིས་བསྟན་ཏེ།

གང་དུ་སྦྱོར་བའི་ཡན་ལག་འདིས། །ཡན་ལག་ཐམས་ཅད་རྫོགས་པ་ཡིན།།

སྐབས་གང་ཞིག་ཏུ་བདག་དང་གཞན་གྱི་དོན་ལ་སྦྱོར་བའི་ཡན་ལག་དྲུག་ཅུ་རྩ་གཅིག་འདིས། དོན་དང་འབྲས་བུ་ལ་སྦྱོར་བའི་ལམ་གྱི་ཡན་ལག་ཐམས་ཅད་ངེས་པར་ཚང་ཞིང་རྫོགས་ནས་ཡང་དག་པར་འདུས་པ་ཡིན་ཏེ། དེ་ལ་གཞན་དོན་དུ་བཞི་ཚོ་གསུམ་དང༌། ལྔ་ཚོ་གསུམ་གྱི་དབང་དུ་ནི་བདག་དོན་དང་བསྡོམས་པས་ལྔ་བཅུ་རྩ་དགུ། བདག་གཞན་གྱི་དོན་གཉིས་དང་དྲུག་ཅུ་རྩ་གཅིག་གོ །རིམས་སུ་འཇུག་པ་དང༌། རྒྱུད་མཧཱ་ཡོ་གའི་རྐྱེན་བཤད་པ་སྟེ། སྔར་བཤད་པའི་རྗེས་བསྙགས་ན་ཤེས་པའང་ལྔར་འགྱུར་ཏེ། བཞི་ཕྲག་བཅུ་དང་། ལྔ་ཕྲག་བཞི་དང་དྲུག་ཅུ། རྩ་བ་ངེས་པར་སྦྱོར་བ་ཉིད་དང་དྲུག་ཅུ་རྩ་གཅིག་གོ །འདི་ནི་གཞུང་གི་དེ་ལྟར་སྣང་ངོ་།།

གསུམ་པ་འབྱེད་པའི་ལྡེའུ་མིག་གིས་ཞབས་བསྡུ་བ་ནི།

ལང་ཀའི། ཞེས་པ་ནས་ཆུད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི། །ཡན་ལག་ཡིན་ཏེ་ཡན་ལག་དེས། །གང་ལྟར་བརྗོད་པ་ཐམས་ཅད་ནི།།

རྣམ་པར་འབྱེད་པར་ཤེས་པར་བྱའོ། །དེ་སྐད་ཅེས་གསང་བ་པའི་བདག་པོས་སྨྲས་པས།

དམན་པའི་ལུས་ཀྱི་སེམས་དཔའ་རྣམས་ཆོས་ཐམས་ཅད་ཁོང་དུ་ཡོངས་སུ་ཆུད་པར་གྱུར་ཏོ།།

ལང་ཀའི་བདག་པོ། ཞེས་བོས་ནས། དེ་དག་ནི་ཡན་ལག་ཡིན་ཏེ། ཡན་ལག་དྲུག་པོ་དེས་ངེས་པའི་གསང་སྒོའི་གང་ལྟར་བརྗོད་པ་ཐམས་ཅད་ལེགས་པར་ཁྲོལ་ནས་རྣམ་པར་དབྱེ་ཞིང་གསལ་བར་འབྱེད་པར་ཤེས་པར་བྱའོ། །དེ་སྐད་ཅེས་སྟོན་པ་གསང་བ་པའི་བདག་པོས་སྨྲས་པས། དམན་པའི་ལུས་ཀྱི་སེམས་དཔའ་རྣམས་ཀྱིས་ཆོས་ཐམས་ཅད། ཁོང་དུ་ཡོངས་སུ་ཆུད་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

འཇུག་པ་ཐབས་ཀྱི་ཡན་ལག་བགྲོས་པའི་ལེའུ་སྟེ་ལྔ་བཅུ་གཉིས་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། བདག་དོན་དུ་འཇུག་པ་དང་གཞན་དོན་བྱེད་པའི་ཐབས་ཀྱི་ཡན་ལག་གི་སྦྱོར་བ་ལས། ཐབས་ཐམས་ཅད་འབྲེལ་བ་གཉིས་ཀྱིས་འབྲེལ་བར་བསྟན་ཏེ་རྣམ་པར་འགྲེལ་བའི་དོན་གྱི་ཚོམས་བསྟན་པའི་ལེའུ་སྟེ་ལྔ་བཅུ་རྩ་གཉིས་པ་ཉིད་གསལ་བར་བཀྲོལ་ཏེ་བཤད་པའོ།། །།

ལེའུ་ང་གསུམ་པ་མདོ་རྒྱ་ཆེར་འགྲེལ་པ།

༈ གཉིས་པ་དགྲོལ་བའི་ལྡེའུ་མིག་མདོ་བཞི་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

དེ་ནས་ཡང༌། ཞེས་ པ་ནས། འབྱུང་བ་མེད་པའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག ་པོས། གསང་བ་པའི་བདག་པོ་ལ་དྲིས་པ། ཀྱེ་གསང་བ་པའི་བདག་པོ་མདོ་ཡོངས་སུ་དགྲོལ་བ་ཞེས་བགྱི་བ་ཇི་ལྟར་ལགས། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ལངྐའི་བདག་པོ་མདོ་ནི་འདི་ལྟར། གང་དུ་གང་ལྟར་བརྗོད་པ་ཐམས་ཅད་མདོ་བཞི་པོ་འདི་དག་ཁོ་ནར་ཟད་དོ། །ལངྐའི་བདག་པོ་བཞི་གང་ཞེ་ན། འདི་ལྟ་སྟེ། གང་ཐོས་པས་ངེས་པར་འབྱུང་བ་དང་། གང་གིས་མཐོང་བས་ངེས་པར་འབྱུང་བ་དང་། གང་གིས་མངོན་སུམ་མར་ངེས་པར་འབྱུང་བ་དང་། གང་ནས་གང་དུ་ངེས་པར་འབྱུང་བ་མེད་པའོ།།

ལེའུ་འདིས་ངེས་དོན་སྟོན་ནོ། །ལྡེའུ་མིག་དང་པོའི་དོན་རྣལ་འབྱོར་ཐ་མའི་རྐྱེན་རྫོགས་པ་སྟེ་འཆད་པའི་ལྡེའུ་མིག་གཉིས་ཡན་ལག་དང་བཅས་པའང་རྣལ་འབྱོར་དབུ་མའམ་ལམ་གྱི་རྣལ་འབྱོར་རོ། །ལྡེའུ་མིག་གཉིས་པ་གཅིག་ཆར་བའི་ཡུལ་རང་བཞིན་ལྟ་བའི་ཚིག་བཤད་པ་ལ་འཇུག་པའི་ཕྱིར། དང་པོ་རྫོགས་པ་དེ་ནས་ཡང་ལྡེའུ་མིག་བར་པ་ཞུ་བའི་ཕྱིར་སྡུད་པ་པོ་ལང་ཀའི་བདག་པོ་དེས། སྟོན་པ་གསང་བ་པའི་བདག་པོ་ལ་ཞུ་བ་མི་མཐུན་པ་༼༢༥༽ལེའུ་བཞི་བཅུ་བདུན་པ་ལས་གསུངས་པའི་ལྡེའུ་མིག་གི་དོན་ལ་དྲི་བ་དྲིས་པ། ཀྱེ་གསང་བ་པའི་བདག་པོ། གང་ལེའུ་དེ་ཉིད་ལས་གང་གི་ཡན་ལག་དྲུག་གི་ཡང་རྩ་བ་གསང་སྔགས་ཐུན་མོང་མ་ཡིན་པའི་མདོ་བཞི་ཡིས་ཡོངས་སུ་དགྲོལ་བ་ཞེས་བགྱི་བར་བཀའ་སྩལ་པ་དེ་ཉིད་ཇི་ལྟར་ཤེས་པར་བྱ་བ་ལགས། ཞེས་དེ་སྐད་ཅེས་དགྲོལ་ཐབས་དྲིས་པ་ལས། སྟོན་པ་གསང་བ་པའི་བདག་པོས་ལན་དུ་བཀའ་སྩལ་ཏེ་སྨྲས་པ། ལང་ཀའི་བདག་པོ། ཞེས་བོས་ནས་ལེའུ་ཞེ་དྲུག་པ་དང་ཞེ་བདུན་པའི་སྐབས་སུ་ནི་ཚིག་ཐམས་ཅད་ཀྱི་དོན་མདོ་བཞིར་བསྡུས་པ་དེ་ཉིད་དགྲོལ་བའི་ཐབས་ནི་འདི་ལྟར། གནས་གང་དུ་བརྒྱུད་ཚུལ་གང་ལྟར་བརྗོད་པ་དང་བཀའ་སྩལ་པའི་གཏན་ཚིགས་དང་ཐབས་ཐམས་ཅད་མདོ་བཞི་པོ་འདི་དག་ཁོ་ནར་ཟད་ཅིང་འདུས་པས་དེ་ལས་གཞན་ མེད་པ་ཉིད་དོ། །ལང་ཀའི་བདག ་པོ། བཞི་གང་ཞེ་ན། གྲངས་ཉེ་བར་བསྟན་པ་འདི་ལྟ་སྟེ། ཟག་བཅས་ཀྱི་སྐབས་སུ་ཆོས་ཀྱི་དངོས་པོ་ཇི་ལྟ་བུ་གང་ཐོས་པར་གྱུར་པས་འཚངས་རྒྱ་ཞིང་ངེས་པར་འབྱུང་བ་ཡི་མདོ་དང༌། ཟག་མེད་མཐོང་ལམ་ཡན་ཆད་ལམ་པ་གང་ཞིག་གིས་དོན་ཇི་ལྟ་བར་མཐོང་བའམ་རྟོགས་པས་འཚངས་རྒྱ་ཞིང་ངེས་པར་འབྱུང་བ་ཡི་མདོ་དང༌། རྣལ་འབྱོར་གྱི་དབང་ཕྱུག་གམ་རྫོགས་པའི་སངས་རྒྱས་གང་སུ་ཞིག་གིས་དེ་དོན་མངོན་སུམ་དུ་གྱུར་ཏེ་ཡོངས་སུ་ཆུབ་པར་ངེས་པར་འབྱུང་བ་ཡི་མདོ་དང༌། གཞི་དངོས་པོའི་གནས་ལུགས་ལ་གང་དུས་ཀྱི་དངོས་པོ་ཐམས་ཅད་ནས་གང་ཐམས་ཅད་དུ་ངེས་པར་འབྱུང་ཞིང་འབྲས་བུ་དམ་པ་ཐོབ་པར་བྱར་ཡང་མེད་པ་ཡི་མདོ འོ།།

གཉིས་པ་རྒྱས་པར་བཤད་པ་ལ་བཞི་སྟེ། ཐོས་པས་ངེས་པར་འབྱུང་བའི་མདོ་བཤད་པ། མཐོང་བས་ངེས་པར་འབྱུང་བའི་མདོ་བསྟན་པ། མངོན་སུམ་པར་ངེས་པར་འབྱུང་བའི་མདོ་བཤད་པ། ངེས་པར་འབྱུང་བ་མེད་པའི་མདོ་བཤད་པའོ། །དང་པོ་ནི།

ལང་ཀའི། ཞེས་པ་ནས། དེ་བཞིན་ཉིད་དུ་ཆུབ། །ཅེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་གང་ཐོས་པས་ངེས་པར་འབྱུང་བ་ནི། ཀུན་གྱི་རང་བཞིན་དེ་བཞིན་ཉིད།།

གང་གིས་ཐོས་པ་དེ་ཉིད་དུ། །དངོས་པོ་མེད་སངས་ཀུན་ཁྱབ་རྒྱས། །དེ་ཤེས་དེ་བཞིན་ཉིད་དུ་ཆུབ།།

དང་པོ་ཐོས་པའི་མདོ་བསྟན་པའི་ཕྱིར། ལང་ཀའི་བདག་པོ་ཞེས་བོས་ནས། དེ་ཡང་བཞི་ལ་སྙེགས་ཏེ་གང་ཐོས་པས་ངེས་པར་འབྱུང་བའི་མདོ་བཀར་ནས་སྟོན་པ་ནི། འཁོར་འདས་ཀྱི་ཆོས་སམ་དངོས་པོ་གཉིས་པ་ཀུན་གྱི་རང་བཞིན་ཡེ་ནས་མ་བཅོས་པར་ལྷུན་གྱིས་གྲུབ་པའི་དེ་བཞིན་ཉིད་བྱང་ཆུབ་ཀྱི་༼༢༦༽སྙིང་པོ་ཉིད་ལས་ཡོན་ཏན་གྱི་ཁྱད་པར་ཤེས་བྱའི་མདོ་བཞིར་བསྟན་པའི་དོན་གྱི་ངོ་བོ་གང་ཡིན་པ་དེ་ཉིད། རྣལ་འབྱོར་པ་གང་སུ་ཞིག་གིས་མ་ནོར་བར་ཐོས་ཏེ་བརྡ་འཇལ་བ་གང་གི་དུས་དེ་ཁོ་ནའི་སྐད་ཅིག་གི་ཚེ་ཉིད་དུ། ཆོས་སོ་ཅོག་ཐམས་ཅད་མ་སྤངས་བྲལ་ཏེ་སྐྱེ་བ་མེད་པར་རྟོགས་པས་དངོས་པོ་མེད་པར་སངས་ཤིང་ཡེ་ཤེས་ཆེན་པོ་ཀུན་ལ་སྣུམས་པས་ཁྱབ་གདལ་དུ་རྒྱས་པའི་དོན་དེ་ཤེས་ནས་དེ་བཞིན་ཉིད་ཁོང་དུ་ཆུབ་པས་འཁོར་བ་མ་སྤངས་པར་ངེས་པར་འབྱུང་བའི་ཕྱིར། གཅིག་ཤེས་ན་ཆོས་ཐམས་ཅད་སྐྱེ་བ་མེད་པར་ཤེས་པའམ་ཐོས་པ་ཞེས་བྱའོ། །དེ་ཡང་ཅིག་ཆར་དང་རིམས་གྱིས་པའི་དབང་གིས། སྐད་ཅིག་གམ། ཚེ་གཅིག་དང༌། དེར་མ་ཟད། གྲངས་མེད་དམ། གསུམ་མམ་སོ་གསུམ་ལྟ་བུ་ཡང་ཡིན་ནོ། །དེ་ཉིད་ཆོས་ཀྱི་དབྱིངས་སུ་སངས་རྒྱས་པའི་ཆེ་བའང་ཡིན་ནོ།།

གཉིས་པ་མཐོང་བས་ངེས་པར་འབྱུང་བའི་མདོ་བསྟན་པ་ནི།

ལང་ཀའི། ཞེས་པ་ནས། ཉིད་དེར་ཀུན་སངས་རྒྱས། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་གིས་མཐོང་བས་ངེས་པར་འབྱུང་བ་ནི་འདི་ལྟ་སྟེ། གང་གིས་དེ་བཞིན་དེ་མཐོང་ན།།

མཐོང་བས་སྣང་སྲིད་ཡོངས་སུ་དག །གང་ལའང་ཉམ་ང་ཡོད་མ་ཡིན། །དེ་བཞིན་ཉིད་དེར་ཀུན་སངས་རྒྱས།།

རྟོགས་པ་སྒོམ་པའི་མདོ་བསྟན་པའི་ཕྱིར། ལང་ཀའི་ བདག་པོ། ཞེས་བོས་ནས། མཐོང་ལམ་ཡན་ཆད་ཟག་མེད་ཀྱི་ལམ་པ ་གང་གིས་སྐྱེ་བ་མེད་པའི་དོན་མཐོང་ཞིང་རྟོགས་པས་ངེས་པར་འབྱུང་བ་ཡང་དག་པར་འགྲུབ་པའི་མདོ་ཉེ་བར་བསྟན་པ་ནི་འདི་ལྟ་སྟེ། རྣལ་འབྱོར་པ་གང་གིས་གསང་བའི་གཞུང་ལ་བརྟེན་ནས་སྐྱེ་བ་མེད་པའི་ཆོས་ཉིད་དེ་བཞིན་ཉིད་ཀྱི་དོན་དེ་ཉིད་ལྷག་པའི་ཤེས་རབ་གྱིས་མཐོང་བ་མེད་པར་རྟོགས་ནས། ཅིར་ཡང་མ་མཐོང་བར་མཐོང་བས་སྣང་སྲིད་སྣོད་བཅུད་དུ་ཞེན་ཅིང་སྣང་བའི་མཐར་འཛིན་ཐམས་ཅད་མ་བཀོལ་བར་དེ་བཞིན་ཉིད་དུ་ཡོངས་སུ་དག་སྟེ་དྲི་མ་མེད་པར་གསལ་བ་ལ། ལས་དང་སྤྱོད་པ་དང་མཚན་མ་གང་ལའང་འཇིགས་ཤིང་ཉམ་ང་བ་ཡོད་པ་མ་ཡིན་ཏེ། ཇི་ལྟར་སྤྱད་ཀྱང་འཛིན་པ་དང་བྲལ་བས་འཁོར་བར་ལྟུང་བའི་དོགས་པ་མེད་པ་ཉིད་དེ། དེ་ཅིའི་ཕྱིར་ཞེ་ན། ཡེ་ཤེས་དེ་བཞིན་ཉིད་དེར་འཁོར་བའི་དངོས་པོ་ཀུན་བདེ་ལྡན་གྱི་ཞིང་དུ་སངས་རྒྱས་པའི་ཕྱིར་རོ། །དེ་ནི་དེ་ཉིད་ཡིན་པ་དང་བདག་ཉིད་ཆེན་པོར་སངས་རྒྱས་པའི་ཆེ་བའང་ཡིན་ནོ།།

གསུམ་པ་མངོན་སུམ་པར་ངེས་པར་འབྱུང་བའི་མདོ་བཤད་པ་ནི།

ལང་ཀའི། ཞེས་པ་ནས། མངོན་སུམ་སངས་རྒྱས་ཡིན། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་གིས་མངོན་སུམ་པར་ངེས་པར་འབྱུང་བ་ནི་འདི་ལྟ་སྟེ། གང་གིས་སྟོང་ཉིད་དེ་ཤེས་པ། །དེས་ནི་ཐམས་ཅད་མངོན་སུམ་དུ། །སྟོང་པ་ཉིད་དུ་ངེས་པར་ཟད། །དེ་ཉིད་མངོན་སུམ་སངས་རྒྱས་ཡིན།།

བསྒོམས་པས་མངོན་དུ་གྱུར་པའི་མདོ་བསྟན་པ་ནི། ལང་ཀའི་བདག་པོ། དེ་བཞིན་གཤེགས་པ་གང་གིས་མངོན་སུམ་པར་སངས་རྒྱས་༼༢༧༽ཀྱི་སར་ངེས་པར་འབྱུང་བ་ཉིད་བཤད་པའི་རྗེས་སུ་བསྙད་པ་ནི་འདི་ལྟ་སྟེ། གང་སུ་ཞིག་གིས་མཐའ་གཉིས་དམིགས་སུ་མེད་པས་སྟོང་པ་ཉིད་ཆེན་པོའི་དོན་དེ་གོ་ཞིང་རང་རིག་བདེ་བ་ཆེན་པོར་གསལ་བར་ཤེས་པ་གང་གི་དུས་དེར་ནི་ཆོས་ཐམས་ཅད་ཀུན་དབང་པོའི་མངོན་སུམ་མམ་རང་རིག་པའི་མངོན་སུམ་དུ། ཇི་ལྟ་བ་དེ་ཁོ་ན་ཉིད་ཀྱི་སྟོང་པ་ཉིད་དུ་རང་ཤར་བར་ངེས་ཏེ་རང་གི་མཚན་ཉིད་རིག་པར་གསལ་བ་ལ་དམིགས་པའི་ཡུལ་དུ་བྱེད་པའི་ཕྲ་བའི་རྟོག་པའང་ཟད་ན་རགས་པ་དང་བྲལ་བ་ལྟ་ཅི་སྨོས་ཏེ། དེ་ལྟ་བུའི་སྐྱེས་ཆེན་ལ་རེ་དོགས་ཐམས་ཅད་དང་བྲལ་བའི་ཕྱིར་བག་ཚ་བ་གང་ཡང་མེད་དོ། །དེ་ལྟར་གསལ་བས་ཅིར་འགྱུར་ན། བདག་དང་ཆོས་ཐམས་ཅད་སྐྱེ་བ་མེད་པའི་རང་བཞིན་རྣམ་པའི་མཆོག་ཀུན་ལྡན་པའི་དེ་ཁོ་ན་ཉིད་ཀྱི་ངོ་བོར་མ་འདྲེས་ཡོངས་རྫོགས་སུ་མངོན་སུམ་པར་སངས་རྒྱས་པ་ཡིན་པས་རང་གསལ་ཉི་མའི་སྙིང་པོ་བཞིན་དུ་རྟོག་སྒྲིབ་བཙལ་གྱིས་མི་རྙེད་པ་ཉིད་དོ། །དེ་ཉིད་ཁོ་ན་མངོན་པར་རྫོགས་པར་སངས་རྒྱས་པ་ཉིད་དེ། ཨ་ནུའི་རང་ལུགས་སུ་རང་རིག་པའི་མངོན་སུམ་དུ་བཞེད་ཀྱང༌། རྫོགས་པ་ཆེན་པོ་ལྟར་ན་དབང་པོའི་མངོན་སུམ་དུ་ཡང་ངེས་པར་བཞེད་དོ། །དེས་ན་བསམ་གཏན་མིག་སྒྲོན་ལས། རྣམ་གཅིག་ཏུ་དོན་གྱི་ངོ་བོ་ལ་ཡང་ཁྱད་པར་ཡོད་དེ། སྔགས་ཀྱི་དེ་བཞིན་ཉིད་ནི་རང་རིག་གཉིས་མེད་ཀུན་ཏུ་འོད་གསལ་བ་ཡིན་ལ། རྫོགས་ཆེན་ནི་ལྷུན་རྫོགས་དེ་བཞིན་ཉིད་མཐར་ཐུག་ཉིད་པས། གཉིས་མེད་ཆེན་པོ་དབྱེ་བ་མེད་པས་ཡེ་ཤེས་བླ་མའི་ས་ཡིན་པས་ཁྱད་པར་ཤིན་ཏུ་ཆེའོ། །ཞེེས་གསུངས་པས་ཀྱང་གནད་གསལ་བར་ངེས་སོ། །དེ་ཉིད་མངོན་སུམ་པར་སངས་རྒྱས་པའི་ཆེ་བའང་ཡིན་ནོ། །དེ་ལྟར་མདོ་གསུམ་ནི་རང་རང་གི་སྐབས་ན་ཡེ་མཉམ་པའི་དོན་ཡོད་ཀྱང་རིམ་པས་མཐར་ཕྱིན་པའོ།།

བཞི་པ་ངེས་པར་འབྱུང་བ་མེད་པའི་མདོ་བཤད་པ་ནི།

ལང་ཀའི། ཞེས་པ་ནས། དེ་ཉིད་ཁོ་ནའོ། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ། གང་ནས་གང་དུ་ངེས་པར་བྱུང་བ་མེད་པ ་ནི་འདི་ལྟ་སྟེ། ཐམས་ཅད་དེ་བཞིན་ཉིད་དབྱིངས་སུ། །ཡེ་ནས་རྣམ་རྟོག་མེད་སངས་རྒྱས། །གདོད་སངས་རྒྱས་སུ་ག་ལ་ཡོད། །དེ་བཞིན་དེ་ཉིད་ཁོ་ནའོ།།

མདོ་ཐ་མ་གང་ཞེ་ན། ལང་ཀའི་བདག་པོ། ཞེས་བོས་ནས། གཞིའི་གནས་ལུགས་དེ་ཉིད་ཡེ་སངས་རྒྱས་པའི་ཡེ་ཤེས་སུ་བསྟན་པས་དུས་གང་ནས་སྐབས་གང་དུའང་ངེས་པར་འབྱུང་བ་སངས་རྒྱས་པ་མེད་པར་མ་ཧཱ་ཡོ་ག་ཉིད་ལ་བཟླ་བ་ནི་འདི་ལྟ་སྟེ། དངོས་པོ་དང་སྟོང་པ་ཉིད་ཀྱི་ཆོས་ཐམས་ཅད། མཉམ་པ་ཆེན་པོ་མུ་མཐའ་མེད་པར་རིལ་གྱིས་འབྱུང་གནས་སུ་གྱུར་པས་དེ་བཞིན་ཉིད་ཀྱི་དབྱིངས་༼༢༨༽སུ། ལམ་པས་བརྟགས་དཔྱད་ལས་བྱུང་བ་མ་ཡིན་པར་ཡེ་ཐོག་མ་མེད་པ་ནས་དེ་ཉིད་དུ་42བྱུང་ཐེབས་ཏེ་རྣམ་རྟོག་གི་སེལ་མེད་པར་འབྲས་བུར་རང་གསལ་བའི་སངས་རྒྱས་འབའ་ཞིག་ལ་ད་གདོད་འཕྲལ་ལམ་གློ་བུར་དུ་རིག་པས་མངོན་སུམ་དུ་བཤད་པ་ལྟར་སངས་རྒྱས་སུ་གྱུར་ཏེ་ཞེན་མཐའ་དང་འབྲལ་དུ་ག་ལ་ཡོད་དེ་མེད་དོ། །དེ་བས་ན་གྲོང་ཁྱེར་གསུམ་ནི་ཡེ་ནས་བྱ་བཙལ་མེད་པར་མ་བཅོས་མ་བསླད་པའི་དེ་བཞིན་ཉིད་དེ་ཆོས་ཉིད་མ་ནོར་བའི་དེ་ཁོ་ན་ཉིད་དུ་ངེས་པ་ལས་སངས་རྒྱས་ཀྱི་བླ་དྭགས་ཉིད་དང་ཡེ་བྲལ་བའོ། །དེ་དག་ནི་འཚངས་རྒྱ་བར་འདོད་པའི་ཞེ་འདོད་དགག་པ་དང༌། ངོ་བོ་དེ་ཁོ་ན་ཉིད་དགོངས་ཤིང་ལ་བཟླ་བའི་དགོས་པས་བསྟན་པ་སྟེ། ཀློང་རབ་འབྱམས་རྒྱལ་པོའི་རྒྱུད་ལས། དངོས་མེད་དེ་བཞིན་ཉིད་འདི་ལས། །ཆོས་རྣམས་མ་ལུས་འབྱུང་བའི་ཕྱིར། །འཁོར་འདས་གཉིས་ཀའི་གཞི་ཡིན་ཏེ། །དེ་ཡང་དབྱིངས་ཀྱི་རང་བཞིན་ཡིན། །རང་བཞིན་དེ་ལྟར་ཤེས་པས་ན། །ནམ་མཁའ་འོད་དུ་འབར་བ་བཞིན། །གཞི་ཤར་རང་གྲོལ་དོན་གྱི་གཏེར། །རང་བཞིན་གནས་པ་དགོངས་པའི་ཀློང༌། །ཞེས་པ་ལ་སོགས་པ་ལྟར་ཤེས་པར་བྱའོ། །དེ་ཉིད་སངས་རྒྱས་མེད་པའི་ཆེ་བའང་ཡིན་ནོ། །དེ་དག་གིས་ནི་མདོ་བཞི་མངོན་དུ་བྱེད་པས་དགྲོལ་བར་འགྱུར་བའི་དོན་བསྟན་ཏོ།།

གསུམ་པ་མཇུག་བསྡུ་བ་ནི།

ལང་ཀའི། ཞེས་པ་ནས། ཆུབ་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་མདོ་སྟེ། གང་གིས་གང་ལ་གང་ལྟར་བརྗོད་པ་མཐའ་ཡས་པ། མདོ་བཞི་པོ་དེ་དག་འབའ་ཞིག་ཁོ་ནར་ཟད་དོ། །དེ་དག་ནི་གང་གི་མདུད་པ་རྣམ་པར་འགྲོལ་བ་སྟེ། ཆོས་ཐམས་ཅད་རྣམ་པར་གྲོལ་ཅིང་། རྒྱ་ཆེར་འགྲེལ་པ་ཉིད་དུ་ཤེས་པར་བྱའོ། །གསང་བ་པའི་བདག་པོས་དེ་སྐད་ཅེས་སྨྲས་པས། དམན་པའི་ལུས་ཀྱི་སེམས་དཔའ་རྣམས་ཕྱོགས་ཐམས་ཅད་གསལ་བར་ཡོངས་སུ་ཆུབ་པར་གྱུར་ཏོ།།

ལང་ཀའི་བདག་པོ། ཞེས་བོས་ནས། བཤད་པ་དེ་དག་ནི་མདོ་སྟེ། སྟོན་པ་གང་གིས་འཁོར་གང་ལ་བརྒྱུད་ཚུལ་གང་ལྟར་བརྗོད་པའི་གཏན་ཚིགས་དང་ཐབས་བསྟན་པ་མཐའ་ཡས་པ་ཐམས་ཅད་མདོ་བཞི་པོ་དེ་དག་འབའ་ཞིག་ཁོ་ནར་ཟད་དེ། དེ་ལས་མེད་པས་ན་ཐམས་ཅད་འདུས་པས་མདོ་ཞེས་བརྗོད་པ་ཉིད་དོ། །དེ་དག་ནི་གདུལ་བྱ་གང་གི་ཞེན་འཛིན་གྱི་རྟོག་པས་མདུད་པ་རྣམ་པར་དགྲོལ་བ་སྟེ། ཆོས་ཐམས་ཅད་ཆོས་ཉིད་དུ་རྣམ་པར་འགྲོལ་ཞིང་དོན་ཟབ་པ་དང་རྒྱ་ཆེར་འགྲེལ་ཏེ་བསྟན་པ་ཉིད་དུ་ཤེས་པར་བྱའོ། །སྟོན་པ་གསང་བ་པའི་བདག་པོས་དེ་སྐད་ཅེས་སྨྲས་ཏེ་བཀའ་སྩལ་པས། དམན་པའི་ལུས་ཀྱི་སེམས་དཔའ་དམ་པའི་རིགས་ཅན་རྣམས། ཕྱོགས་ཐམས་ཅད་གསལ་བར་ཡོངས་སུ་ཆུབ་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

མདོ་རྒྱ་ཆེར་འགྲེལ་བའི་ལེའུ་སྟེ་ལྔ་བཅུ་གསུམ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། མདོ་བཞིའི་༼༢༩༽དོན་རྒྱ་ཆར་འགྲེལ་ཏེ་བསྟན་པའི་ལེའུ་སྟེ། ལྔ་བཅུ་རྩ་གསུམ་པ་ཉིད་རྣམ་པར་བཤད་པའོ།། །།

ལེའུ་ང་བཞི་པ་ཆོས་ཐམས་ཅད་ཀྱི་མེ་ལོང་བསྟན་པ།

༈ གསུམ་པ་འབྱིན་པའི་ལྡེའུ་མིག་རྩ་བ་གསུམ་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས་ཡང༌། ཞེས་པ་ནས། ངེས་པའོ། །ཞེས་པའི་བར་གྱིས་བསྟན་ཏེ།

དེ་ནས་ལངྐའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་དེ་ལ་རྩལ་བའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། གང་གི་རྩ་བ་ནི་གང་། ངེས་པར་འབྱིན་པ་ནི་གང་། གསང་བ་པའི་བདག་པོ་གོ་དབྱེ་བར་གསོལ། སྨྲ་བའི་སེང་གེ་ཤིན་ཏུ་གོ་དབྱེ་བར་གསོལ། དེ་སྐད་ཅེས་སྨྲས་པ་ལས། གསང་བ་པའི་བདག་པོས་སྨྲས་པ། ལངྐའི་བདག་པོ་གང་གི་རྩ་བ་དྲི་བ་དེ་ནི་ལེགས་སོ། །ཤིན་ཏུ་རབ་ཏུ་ལེགས་སོ། །འདི་ལྟ་སྟེ། རྩ་བ་ནི་མེ་ལོང་དང་། མི་མཐུན་པ་དང་། ངེས་པའོ།།

ལེའུ་ཞེ་བདུན་པའི་ལྡེའུ་མིག་གསུམ་པ་བཤད་དེ་རྗེས་སུ་འགྲེལ་བའི་ཕྱིར། མདོ་བཞི་བསྟན་མ་ཐག་པ་དེ་ནས་ཡང་གཅིག་ཆར་བའི་ཡུལ་ཆེན་པོ་རྩ་བ་གསུམ་དྲི་བ་མི་མཐུན་པ་དེ་ཉིད། སྡུད་པ་པོ་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྟོན་པ་གསང་བ་པའི་བདག་པོ་དེ་ལ། ཞུས་ཏེ་རྩ་བའི་དྲི་བ་ཉིད་གཞན་དོན་དུ་ཡོངས་སུ་དྲིས་པ། ཀྱེ་སྟོན་པ་གསང་བ་པའི་བདག་པོ། ཞེས་བོས་ནས། ཆོས་ཐམས་ཅད་ཀྱི་སྙིང་པོ་གསང་སྔགས་ནང་པ་གང་གི་རྩ་བ་ནི་གང༌། དེ་ཉིད་མཐར་ངེས་པར་ཕྱིན་པར་བྱེད་པའི་ངོ་བོ་མ་ནོར་བར་གསལ་བར་མངོན་དུ་འབྱིན་པ་ནི་གང་ཇི་ལྟ་བུ་ཞིག་ཡིན་པར། གསང་བ་པའི་བདག་པོ་རང་གི་དོན་དུ་བཤད་པའི་གོ་དབྱེ་བར་གསོལ། སྨྲ་བའི་སེང་གེ་གཞན་དོན་དུ་ཤིན་ཏུ་གོ་དབྱེ་བར་གསོལ། དེ་སྐད་ཅེས་སྨྲས་ཏེ་གསོལ་བ་བཏབ་པ་ལས། སྟོན་པ་གསང་བ་པའི་མངའ་བདག་ཆེན་པོས་ལན་སྨྲས་པ། ལང་ཀའི་བདག་པོ། ཞེས་བོས་ནས། གང་གི་རྩ་བ་དྲིས་པ་ལ་ལེགས་པར་གནང་བ་གཉིས་ཏེ། དྲི་བ་ཡང་གཉིས་ཀྱི་ཕྱིར། དེ་ལྟར་རྩ་བ་དྲི་བ་དེ་ནི་རང་དོན་དུའང་ལེགས་སོ། །ངེས་པར་འབྱིན་པ་དྲི་བ་དེ་ནི་གཞན་དོན་དུའང་ཤིན་ཏུ་རབ་ཏུ་ལེགས་སོ། །དེས་ན་དེ་ཉིད་ཉེ་བར་བསྟན་པ་འདི་ལྟ་སྟེ། རྩ་བ་ནི། མེ་ལོང་མཚོན་དཔེའི་རྩ་བ་དང༌། མི་མཐུན་པ་སྐྱོན་གྱི་རྩ་བ་དང༌། ངེས་པ་སེམས་ཉིད་དོན་གྱི་རྩ་བའོ། །ཞེས་ལེའུ་ཞེ་བདུན་པའི་རྩ་བ་གསུམ་གཏན་ལ་འབེབས་ཤིང་ཉམས་སུ་ལེན་པའི་རྩ་བ་གསུམ་གྱི་གྲངས་ཏེ། ང་བཞི་པ་དང༌། ང་ལྔ་པ་དང༌། ང་དྲུག་པའི་ལུས་བསྟན་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། མཚོན་པ་དཔེའི་རྩ་བ་བཤད་པ། མི་མཐུན་པ་སྐྱོན་གྱི་རྩ་བ་བསྟན་པ། དོན་ངེས་པའི་རྩ་བ་བཤད་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། དེ་ལྟར་བལྟའོ། །ཞེས་པའི་བར་གིས་བསྟན་ཏེ།

ལངྐའི་བདག་པོ་མེ་ལོང་ནི་འདི་ལྟར། ནམ་མཁའི་ཆོས་འཐུན་པའི་དཔེ་ཉེ་བར་བཟུང་བ་སྟེ།

ནམ་མཁའ་ཇི་ལྟ་བ་དེ་ལྟར། གང་གི་ངེས་པ་ཡང་དེ་ལྟར་བལྟའོ།།

ལེའུ་འདིས་དྲང་དོན་དང་ངེས་དོན་༼༣༠༽གཉིས་ཀ་སྟོན་ནོ། །ལང་ཀའི་བདག་པོ། ཞེས་བོས་ནས། ལེའུ་འདིས་དཔེའི་རྩ་བ་ལ་བརྟེན་པའི་སྒོ་ནས་དོན་གསལ་བར་བྱེད་པའང༌། མེ་ལོང་ནི་དཔེ་སྟེ། འདི་ལྟ་ནམ་མཁའི་ངོ་བོ་ཆོས་དུ་དང་ལྡན་པ་ལྟར་དེ་ཁོ་ན་ཉིད་དང་ཡང་མཐུན་པའི་དཔེ་ཉེ་བར་བཟུང་ནས་བསྟན་པ་སྟེ། ནམ་མཁའ་ལ་ཆོས་ཇི་ལྟ་བར་ཡོད་པ་དེ་ལྟར། དམ་པ་གང་གིས་གསང་བའི་དབྱིངས་དེ་ཁོ་ན་ཉིད་ངེས་པ་ལའང་དེ་ལྟར་ཡོད་པར་སྦྱར་ཏེ་བལྟ་ཞིང་རྟོགས་པར་བྱ་བའོ།།

གཉིས་པ་རྒྱས་པར་བཤད་པ་ལ་བཞི་སྟེ། ནམ་མཁའ་མཐའ་དང་བྲལ་བ་བཞིན་ཆོས་ཉིད་བསྟན་པ། ནམ་མཁའ་མི་འགྱུར་ཞིང་མ་བཅོས་པ་བཞིན་ཆོས་ཉིད་བསྟན་པ། ནམ་མཁའ་མ་བྱས་ལ་གཉེན་པོ་མེད་པ་བཞིན་ཆོས་ཉིད་བསྟན་པ། དཔེའི་སྒོ་ནས་དོན་མཐོང་ཚུལ་བཤད་པའོ། །དང་པོ་ནི།

ལང་ཀའི། ཞེས་པ་ནས། མངོན་པར་འདུ་བྱེད་པ་ མེད་པ་ཡིན་ནོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ་དེ་ལ་ནམ་མཁའ་གང་ཞེ་ན། འདི་ལྟ་སྟེ། རང་བཞིན་གཅིག་པ་དང་། མི་གོས་པ་དང་། གོ་འབྱེད་པ་དང་། སྐྱེ་བ་མེད་པ་དང་། འཇིག་པ་མེད་པ་དང་། དབྱིབས་མེད་པ་དང་། ཁ་དོག་མེད་པ་དང་། འདུས་མ་བྱས་པ་དང་། གཟུང་བ་མེད་པ་དང་། འཛིན་པ་མེད་པ་དང་། མཐའ་མེད་པ་དང་། དབུས་མེད་པ་དང་། འཕེལ་བ་མེད་པ་དང་། འགྲིབ་པ་མེད་པ་དང་། འགྲོ་བ་མེད་པ་དང་། འོང་བ་མེད་པ་དང་། གཡོ་བ་མེད་པ་དང་། འགུལ་བ་མེད་པ་དང་། ཆགས་པ་མེད་པ་དང་། གནས་པ་མེད་པ་དང་། འཇིག་པ་མེད་པ་དང་། སྟོངས་པ་མེད་པ་དང་། འགྱུར་བ་མེད་པ་དང་། མ་ཁྱབ་པ་མེད་པ་དང་། མི་འབྱུང་བ་མེད་པ་དང་། མ་ཆུབ་པ་མེད་པ་དང་། སྐྱེ་བ་མེད་པ་དང་། ནུབ་པ་མེད་པ་དང་། མཚན་ཉིད་མེད་པ་དང་། རྒྱུ་མེད་པ་དང་། རྐྱེན་མེད་པ་དང་།

འབྲས་བུ་མེད་པ་དང་། རྩོལ་བ་མེད་པ་དང་། མངོན་པར་འདུ་བྱེད་པ་ མེད་པ་ཡིན་ནོ།།

དཔེའི་ཆོས་བསྟན་པའི་ཕྱིར། ལང་ཀའི་བདག ་པོ། ཞེས་བོས་ནས། དེ་ལ་དཔེའི་མེ་ལོང་ནམ་མཁའ་གང་ཞེ་ན། དེ་ཉིད་ཉེ་བར་བསྟན་པ་འདི་ལྟ་སྟེ། ཞེས་མཚོན་དཔེའི་རྣམ་གྲངས་སུམ་ཅུ་སོ་བཞི་བཤད་པ་འདི་རྣམས་དང་མཚོན་བྱའི་དོན་སྦྱར་ནས་ཤེས་པར་བྱ་སྟེ། ནམ་མཁའ་ཞེས་བརྗོད་པ་ཐམས་ཅད་རང་བཞིན་སྟོང་པར་གཅིག་པ་ལྟར་གསང་བའི་དབྱིངས་དེ་ཁོ་ན་ཉིད་ཇི་བཞིན་པ་དེ་ཡང་རྣམ་གྲངས་ཇི་སྙེད་དུ་བརྗོད་ཀྱང༌། རང་བཞིན་མཐའ་ཐམས་ཅད་ལས་གྲོལ་བར་གཅིག་པ་དང༌། ཆར་རྡུལ་ལ་སོགས་པས་མི་གོས་པ་ལྟར། ལས་ཀྱི་བག་ཆགས་དང་དངོས་མཐའ་རིལ་གྱིས་མ་རིག་པས་མི་གོས་པ་དང༌། ཆོས་ཅན་སྣ་ཚོགས་སྣང་བའི་གོ་འབྱེད་པ་ལྟར་འཁོར་བ་དང་མྱ་ངན་ལས་འདས་པའི་ཆོས་ཇི་སྙེད་པའི་གསལ་བྱེད་ཀྱི་རྒྱུ་ཡིན་པས་གོ་འབྱེད་པ་དང༌། རྒྱུ་རྐྱེན་འདུས་པ་ལས་བྱུང་བ་མེད་པས་སྐྱེ་བ་མེད་པ་ལྟར། རང་གི་ངོ་བོ་གང་དུའང་སྣང་བ་མེད་པས་སྐྱེ་མེད་ཡིན་པ་དང༌། གཉེན་པོས་འཇིག་པ་མེད་པ་ལྟར། སྲིད་གསུམ་ཆུ་ལྟར་འཁྲུག་སྟེ་འཁྲུལ་ཡང་བརླགས་པ་མེད་པ་དང༌། གཟུགས་མེད་པས་དབྱིབས་འདི་འདྲར་བསྟན་དུ་མེད་པ་དང༌། ཁ་དོག་མ་ངེས་པས་གཟུང་དུ་མེད་པ་ལྟར། བསམ་གྱིས་མི་ཁྱབ་པའི་དབྱིབས་དང་ཁ་དོག་ཅན་པས་རྣམ་པའི་དབྱིབས་ཁ་དོག་དང་བྲལ་བ་དང༌། རྒྱུ་རྐྱེན་ལས་བྱས་པ་མ་ཡིན་པས་འདུས་མ་བྱས་པ་ལྟར། འཕྲལ་དུ་རྒྱུ་རྐྱེན་ལས་བྱས་པ་མ་ཡིན་པ་དང༌། ནམ་མཁའ་ལ་ཡུལ་༼༣༡༽རང་གི་ངོ་བོ་གཟུང་བ་མེད་པ་དང༌། དེ་ལྟར་འཛིན་པ་པོ་མེད་པ་ལྟར་དེ་ཁོ་ན་ཉིད་ཀྱང་རིལ་གཉིས་སུ་མེད་པའི་བྱང་ཆུབ་ཀྱི་སེམས་སྤྱོད་ཡུལ་དང་བྲལ་ཏེ་ཐ་སྙད་ལས་འདས་པ་ལ། གཟུང་འཛིན་གྱི་མཐའ་མེད་པ་དང༌། དེ་བཞིན་དུ་མཐའ་ལ་ཐུག་པ་མེད་པ་དང༌། དབུས་སུ་གཟུང་བ་མེད་པར་ལྟར། ཐམས་ཅད་དུ་མཉམ་ཞིང་གདལ་བར་གསལ་བ་དབུས་མཐའི་ཚད་བྲལ་བ་དང༌། སྔ་མ་ལས་རྒྱ་ཁྱོན་དང་གྲངས་ཀྱི་འཕེལ་བ་མེད་པ་དང་ཕྱིས་དེ་ལས་ཆུང་ངུར་འགྲིབ་པ་ མེད་པ་ལྟར། ཡེ་ནས་རྒྱུ་འབྲས་ལྷུན་གྱིས་གྲུབ་པའི་བདག ་ཉིད་ལ་དབྲི་བསྣན་མེད་པའི་ཕྱིར་དང༌། གནས་གཞན་ནས་གཞན་ཞིག་ཏུ་འགྲོ་བ་མེད་པ་དང༌། སླར་འདིར་འོང་བ་མེད་པ་ལྟར། ཐམས་ཅད་རང་བྱུང་ཆེན་པོའི་ངོ་བོ་ལ་རྟེན་དང་བརྟེན་ཅན་གྱི་གནས་དང་ཕྱོགས་བྲལ་བའི་ཕྱིར་དང༌། དཔེ་ནམ་མཁའ་ལ་ཕན་ཚུན་དུ་འབྱུང་བ་མེད་པས་གཡོ་བ་མེད་པ་ལྟར། དེ་བཞིན་ཉིད་ཀྱང་དངོས་པོ་གཉིས་པ་ཅིར་ཡང་སྣང་ཡང་དེ་ཉིད་ལས་མ་འདས་པའི་ཕྱིར་དང༌། གཞན་དུ་བསྐྱོད་པས་འགུལ་བ་མེད་པ་ལྟར། ཐམས་ཅད་ལ་སོན་ཟིན་པའི་ཕྱིར་དང༌། གང་ལའང་མ་ཞེན་པས་ཆགས་པ་མེད་པ་ལྟར། ཡུལ་ཇི་སྙེད་པའང་སེམས་ཀྱི་དེ་ཉིད་དུ་རང་གསལ་བ་ལ་ཞེན་པ་མེད་པ་དང༌། རྟེན་དང་བྲལ་བས་གནས་པ་མེད་པ་ལྟར། མཚན་ཉིད་གང་དུའང་མི་ཟིན་པས་རྟེན་གནས་བྲལ་བ་དང༌། རྐྱེན་གྱི་དངོས་པོས་འཇིག་པ་མེད་པ་ལྟར། མི་འགྱུར་བའི་ངོ་བོ་རྟག་པ་ཆེན་པོར་བཞུགས་པ་དང༌། ཡང་ན། རྐྱེན་གྱིས་ནམ་མཁའི་དངོས་པོ་འཇིག་པ་མེད་པ། ཞེས་སྦྱར། ཞིག་ནས་ནམ་མཁའ་སྟོངས་པ་མེད་པ་ལྟར། ཅིར་ཡང་སྣང་བ་མི་འགོག་པ་དང༌། སྔ་ཕྱི་མི་འདྲ་བར་འགྱུར་བ་མེད་པ་ལྟར། མཉམ་པ་ཆེན་པོ་སྐྱེ་འཇིག་དང་བྲལ་བས་མི་འདྲ་བ་ལས་མི་འདྲ་བར་སོང་བ་མེད་པ་དང༌། འབྱུང་བ་གང་ལའང་ནམ་མཁས་མ་ཁྱབ་པ་མེད་པ་ལྟར། ཐ་སྙད་ཀྱི་ཆོས་སྣང་ཞིང་གྲགས་སོ་ཅོག་དེ་ཉིད་ཡིན་པས་ཀུན་ལ་གདལ་བ་དང༌། ནམ་མཁའི་ངང་ལས་མི་སྣང་བ་མེད་པར་ཆོ་འཕྲུལ་ཅིར་ཡང་སྣང་བས་མི་འབྱུང་བ་མེད་པ་ལྟར། གསང་སྔགས་ཇི་བཞིན་པ་དེ་ཡང་བསམ་གྱིས་མི་ཁྱབ་པའི་ཆོས་ཐམས་ཅད་དུ་ཤར་བའི་ཕྱིར་དང༌། ནམ་མཁའི་ངང་དུ་མ་འདུས་པ་མེད་པས་མ་ཆུབ་པ་མེད་པ་ལྟར། དངོས་པོ་གཉིས་པ་རིལ་དེར་བྱུང་ཐེབས་པའི་ཕྱིར་དང༌། དུས་མཐར་གནས་ཀྱང་སྐྱོ་བ་མེད་པ་ལྟར། དུས་གསུམ་དུ་ཟླ་མེད་པར་བཞུགས་ཀྱང་དུབ་པ་མེད་པའི་ཕྱིར་དང༌། ངོ་བོ་ཕྱིས་མི་སྣང་བར་འགྱུར་བ་མེད་པས་ནུས་པ་མེད་པ་ལྟར། དབྱིངས་གཏིང་༼༣༢༽མཐའ་བྲལ་བ་ལ་འཕོ་འགྱུར་མེད་པའི་ཕྱིར་དང༌། རང་གི་མཚན་ཉིད་ངེས་པར་གཟུང་དུ་མེད་པ་ལྟར་མཚན་ཉིད་ཐམས་ཅད་པ་ལ་རྣམ་པའི་མཚན་ཉིད་ཀུན་དང་བྲལ་བའི་ཕྱིར་དང༌། སྐྱེད་བྱེད་མེད་པས་རྒྱུ་མེད་པ་དང༌། སྨིན་པར་བྱེད་པའི་གྲོགས་མེད་པས་རྐྱེན་མེད་པ་ལྟར། གདོད་གྲུབ་ཟིན་པ་ལ་སྐྱེད་སྨིན་བྱེད་པ་མེད་པ་དང༌། དེ་གཉིས་འཛོམ་ནས་བསྐྱེད་པས་ནམ་མཁར་གྲུབ་པའི་འབྲས་བུ་མེད་པ་ལྟར། རྒྱུ་རྐྱེན་ཡེ་ནས་བྲལ་བ་ལ་འཕྲལ་དུ་ངོ་བོ་བསྒྲུབ་པ་མེད་པ་དང༌། ལས་ཀྱིས་ཚི་ཆད་པའི་རྩོལ་བ་མེད་པ་ལྟར། ཅི་སྣང་ཅི་བྱུང་ཡང་འཕྲལ་དུ་ལས་བརྩམས་ནས་ཆེད་དུ་བྱ་བ་མེད་པ་དང༌། འཕྲལ་དུ་ལས་མངོན་པར་རྩོལ་བའི་འདུ་བྱེད་པ་མེད་པ་ལྟར། མཛད་པ་ཇི་སྙེད་པས་འགྲོ་དོན་རྒྱུན་མི་འཆད་ཀྱང་འཕྲལ་དུ་རྩོལ་བ་མེད་པ་ཡིན་ནོ། །དེ་ལྟར་ཆོས་སུམ་ཅུ་རྩ་བཞི་དང་ལྡན་པས་ཀྱང་དཔེ་དོན་ཉེ་བར་སྦྱར་བར་བྱའོ།།

གཉིས་པ་ནམ་མཁའ་མི་འགྱུར་ཞིང་མ་བཅོས་པ་བཞིན་ཆོས་ཉིད་བསྟན་པ་ནི།

ལང་ཀའི། ཞེས་པ་ནས། དེའི་ཕྱིར་མ་བཅོས་པའོ། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ་ནམ་མཁའ་ནི་ཡོད་པ་ལས་མེད་པར་གྱུར་པ ་མ་ཡིན། མེད་པ་ལས་ཡོད་གྱུར་པ་མ་ཡིན། དེ་བཞིན་དུ་གསལ་བ་ལས་མི་གསལ་བར་གྱུར་པ་དང་། མི་གསལ་བ་ལས་གསལ་བར་གྱུར་པ་དང་། ཐ་དད་པ་ལས་གཅིག་ཏུ་གྱུར་པ་དང་། གཅིག་པ་ལས་ཐ་དད་པར་གྱུར་པ་དང་། ཡིན་པ་ལས་མིན་པར་གྱུར་པ་དང་། མིན་པ་ལས་ཡིན་པར་གྱུར་པ་དང་། ཉེ་བ་ལས་རིང་བར་གྱུར་པར་དང་། རིང་བ་ལས་ཉེ་བར་གྱུར་པ་དང་། དེ་བཞིན་དུ་ཆེ་བ་དང་ཆུང་བར་གྱུར་པ་དང་། བཟང་བ་དང་ངན་པར་གྱུར་པ་དང་། བདེ་བ་དང་སྡུག་བསྔལ་བར་གྱུར་པ་དང་། ཁྱབ་པ་དང་མ་ཁྱབ་པར་གྱུར་པ་དང་། འབྱུང་བ་དང་མི་འབྱུང་བར་གྱུར་པ་དང་། དག་པ་དང་མ་དག་པར་གྱུར་པ་དང་། གྲུབ་པ་དང་མ་གྲུབ་པར་གྱུར་པ་དང་། མཐོ་བ་དང་དམའ་བར་གྱུར་པ་དང་། ཡངས་པ་དང་དོག་པར་གྱུར་པ་དང་། དབྱིབས་དང་དབྱིབས་མེད་པར་གྱུར་པ་དང་། ཁ་དོག་དང་ཁ་དོག་མེད་པར་གྱུར་པ་དང་། ཕྱི་དང་ནང་དུ་གྱུར་པ་དང་། སྐྱེ་བ་དང་འགག་པར་གྱུར་པ་དང་། འཕོ་བ་དང་མི་འཕོ་བར་གྱུར་པ་དང་། འགྱུར་བ་དང་མི་འགྱུར་བར་གྱུར་པ་དང་། མུན་པ་དང་སྣང་བར་གྱུར་པ་དང་། སྔོན་དང་ཕྱི་མར་གྱུར་པ་དང་། མཐའ་དང་དབུས་སུ་གྱུར་པ་དང་། བདག་དང་གཞན་དུ་གྱུར་པ་དང་། དེ་བཞིན་དུ་བླངས་ནས་དོར་བར་གྱུར་པ་དང་། དོར་བ་ལས་བླངས་པར་གྱུར་པ་མེད་པའི་ཕྱིར། ནམ་མཁའ་ནི་ཐམས་ཅད་ནས་ཐམས་ཅད་དུ་མ་བཅོས་པའོ། །དེ་བཞིན་དུ་དེ་བཞིན་ཉིད་ཀྱང་སྦྱར་ཏེ། དེའི་ཕྱིར་མ་བཅོས་པའོ།།

དེ་ཡང་ནམ་མཁའ་ལ་འཕོ་འགྱུར་དང་མཚན་མ་བྲལ་བས་ངོ་བོ་མ་བཅོས་པར་ངེས་པའི་དཔེ་དང་མཐུན་པར་དོན་བསྟན་ཏེ་མཐའ་གཉིས་པ་རིལ་བྲལ་བར་སྒྲུབ་པའི་ཕྱིར། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། དཔེར་ན་ནམ་མཁའ་ནི་རྣམ་གྲངས་ཀྱི་ཆོས་ལྔ་བཅུ་དང་ལྡན་ཏེ། ཇི་ལྟར་ན། ནམ་མཁའི་ངོ་བོ་སྔར་ཡོད་པ་ལས་ཕྱིས་མེད་པར་གྱུར་པ་མ་ཡིན། སྔར་མེད་པ་ལས་ཕྱིས་ཡོད་པར་གྱུར་པ་ཡང་མ་ཡིན་ཏེ། དུས་སྔ་ཕྱིའི་ཆོས་འཆད་པ་ཀུན་རྗེས་སུ་མཐུན་པར་བསྙད་དོ། །དེ་དང་འདྲ་བར་ལྷུན་གྱིས་གྲུབ་པའི་དེ་བཞིན་ཉིད་ནི། དུས་གསུམ་དུ་མཉམ་པ་ཆེན་པོ་སྐད་ཅིག་མའི་རྒྱུན་ཡོད་མེད་ལས་ཀྱང་གྲོལ་བ་ལ། སྔར་ངོ་བོ་གྲུབ་པ་ཞིག་ཕྱིས་རླག་པ་དང༌། སྔར་མ་གྲུབ་པ་ཞིག་ཕྱིས་ལམ་པའི་བློས་བྱས་ནས་ཡོད་པར་གྱུར་པ་མེད་དོ། །དེ་ལྟར་ན་དུས་གསུམ་ཉིད་མཉམ་པ་ཆེན་པོ་སྔ་ཕྱིའི་རྒྱུད་གྲོལ་བ་ལ་དུས་ཐོག་མཐའ་མེད་པར་རིལ་རྗེས་སུ་མཐུན་ཏེ་ཟུང་སྦྱར་བས་གཏན་ཚིགས་ཉེར་ལྔ་ཡིན་ནོ། །དེ་བས་ན་སྔ་མ་དེ་བཞིན་དུ། ནམ་མཁའ་ནི་སྔར་གསལ་བ་ལས་ཕྱིས་མི་གསལ་བར་གྱུར་པ་མེད་པ་དང༌། སྔར་མི་གསལ་བ་ལས་ཕྱིས་གསལ་བར་གྱུར་པ་མེད་པ་ལྟར། གསང་བའི་དབྱིངས་ཀྱང་དེ་བཞིན་དུ་སྦྱར་ཏེ། བྱང་ཆུབ་ཀྱེ་སེམས་ཡེ་ཤེས་ཆེན་པོའི་ཉི་མ་འཆར་ནུབ་དང་བྲལ་བའི་ཕྱིར་དང༌། སྔར་ཐ་དད་པ་ལས་ཕྱིས་གཅིག་ཏུ་གྱུར་༼༣༣༽པ་དང༌། སྔར་གཅིག་པ་ལས་ཕྱིས་ཐ་དད་པར་གྱུར་པ་ཡང་མེད་པ་ལྟར། དོན་ཆོས་ཉིད་ཀྱང་ཡིན་ཏེ། བྱང་ཆུབ་ཀྱི་སེམས་དེ་ཁོ་ན་ཉིད་བསམ་གྱིས་མི་ཁྱབ་པར་སྣང་ལ་གནས་པ་མེད་པའི་ཕྱིར་དང༌། སྔར་ཡིན་པ་ལས་ཕྱིས་མིན་པར་གྱུར་བ་དང༌། སྔར་མིན་པ་ལས་ཕྱིས་ཡིན་པར་གྱུར་པ་ཡང་མེད་པ་ལྟར། གསང་སྔགས་ཇི་བཞིན་པའང་མཚུངས་ཏེ། དེ་བཞིན་ཉིད་ནི་དུས་གསུམ་དུ་མ་ནོར་ངེས་པར་སྒྲོ་སྐུར་དང་བྲལ་བ་ཆེན་པོར་བྱུང་བའི་ཕྱིར་དང༌། སྔར་ཉེ་བ་ལས་ཕྱིས་རིང་བར་གྱུར་པ་དང༌། སྔར་རིང་བ་ལས་ཕྱིས་ཉེ་བར་གྱུར་པ་མེད་པ་ལྟར། བྱང་ཆུབ་ཀྱི་སེམས་ཀྱང་ཡིན་ཏེ། ཆོས་སོ་ཅོག་ཉིད་དུས་གསུམ་དུ་དེ་བཞིན་ཉིད་ཀྱི་ངང་དུ་རང་ཤར་བ་ལས་བསྒྲུབ་ཏུ་མེད་པའི་ཕྱིར་དང༌། དེ་བཞིན་དུ། ཆེ་བ་ཆུང་བར་གྱུར་པ་དང༌། ཆུང་བ་ཆེ་བར་གྱུར་པ་མེད་པ་ལྟར། རང་རིག་པའང་ཡིན་ཏེ། དེ་བཞིན་ཉིད་ལ་རང་བཞིན་གྱིས་ཆེ་ཆུང་གཉིས་མེད་པར་མཆོག་དང་མཐའ་བྲལ་བའི་ཕྱིར་དང༌། དེ་ལྟར་སྦྱར་ཏེ། ནམ་མཁའ་ལ་བཟང་བ་དང་ངན་པར་གྱུར་པ་མེད་པ་ལྟར། དེ་ཁོ་ན་ཉིད་ཀྱང་ཡིན་ཏེ། གསང་བ་ཇི་བཞིན་པའི་དབྱིངས་དུས་གསུམ་དུ་ཟླ་དང་གཉེན་པོ་བྲལ་བ་ལས་བཟང་ངན་མ་དམིགས་པའི་ཕྱིར་དང༌། བདེ་བ་དང་སྡུག་བསྔལ་བར་གྱུར་པ་མེད་པ་ལྟར། མཉམ་པ་ཉིད་ཀྱང་ཡིན་ཏེ། ཡེ་ནས་སྡུག་བསྔལ་ཆོས་ཉིད་ཀྱི་ལོངས་སྤྱོད་དུ་ཤར་བའི་ཕྱིར་དང༌། ཁྱབ་པ་དང་མ་ཁྱབ་པར་གྱུར་པ་མེད་པ་ལྟར། ངེས་པའི་གསང་བའང་མཚུངས་ཏེ། ཆོས་ཐམས་ཅད་བྱང་ཆུབ་ཀྱི་སེམས་མ་ཡིན་པ་མེད་པའི་ཕྱིར་དང༌། འབྱུང་བ་དང་མི་འབྱུང་བར་གྱུར་བ་མེད་པ་ལྟར། དོན་གྱི་ངོ་བོའང་ཡིན་ཏེ། སྤྲུལ་པ་དང་དངོས་གྲུབ་བརྩལ་བ་མེད་པར་རང་འཆར་བ་ལ་རྒྱུན་མེད་པའི་ཕྱིར་དང༌། དག་པ་དང་མ་དག་པར་གྱུར་པ་མེད་པ་ལྟར། དབྱིངས་མཐའ་དང་བྲལ་བའང་མཚུངས་ཏེ། མཐའི་དྲི་མ་རིལ་ཡེ་ནས་མ་སྤངས་བྲལ་བ་ཆེན་པོར་བཞུགས་པའི་ཕྱིར་དང༌། གྲུབ་པ་དང་མ་གྲུབ་པར་གྱུར་པ་མེད་པ་ལྟར། གནས་ལུགས་ཀྱང་ཡིན་ཏེ། ཁམས་གསུམ་སངས་རྒྱས་ཀྱི་སར་ཡེ་གསལ་བ་ལ་བླ་དྭགས་གཉིས་མེད་པའི་ཕྱིར་དང༌། མཐོ་བ་དང་དམའ་བར་གྱུར་པ་མེད་པ་ལྟར། དོན་གྱི་སྙིང་པོའང་ཡིན་ཏེ། ཡེ་མཉམ་པ་ལ་ཆེ་ཆུང་ངང་གིས་མ་དམིགས་པས་རིམ་པ་བྲལ་བའི་ཕྱིར་དང༌། ༼༣༤༽ཡངས་པ་དང་དོག་པར་གྱུར་པ་མེད་པ་ལྟར། ཐིག་ལེ་ཆེན་པོའང་ཡིན་ཏེ། ཕྱིན་ཅི་ལོག་གི་ཆོས་སོ་ཅོག་ཀྱང་མ་བཀོལ་བར་ཆོས་ཉིད་དུ་འདུས་པ་ཆེན་པོ་ལ་ཚུད་པ་དང་མི་ཚུད་པ་གཉིས་མེད་པའི་ཕྱིར་དང༌། དབྱིབས་དང་དབྱིབས་མེད་པར་གྱུར་པ་མེད་པ་ལྟར། བསམ་གྱིས་མི་ཁྱབ་པའི་དབྱིངས་ཀྱང་ཡིན་ཏེ། རིང་ཐུང་ལ་སོགས་པའི་དབྱིབས་ཐམས་ཅད་མ་སྤངས་པའི་ངང་ལས་རྣམ་པའི་དབྱིབས་ངེས་པར་གཟུང་བ་དང་བྲལ་བའི་ཕྱིར་དང༌། ཁ་དོག་དང་ཁ་དོག་མེད་པར་གྱུར་པ་གཉིས་མེད་པ་ལྟར། རང་བཞིན་ཡང་ཡིན་ཏེ། ཁ་དོག་རྩ་ལྔ་ལ་སོགས་པ་རིལ་མ་བཀོལ་བ་ལ་ཕྱོགས་ཆའི་ཁ་དོག་ཡེ་བྲལ་བའི་ཕྱིར་དང༌། ཕྱི་དང་ནང་དུ་གྱུར་པ་མེད་པ་ལྟར། ཆོས་ཀྱི་དབྱིངས་ཀྱང་ཡིན་ཏེ། སྣོད་བཅུད་དང་ཡུལ་སེམས་ཕྱི་ནང་ཐམས་ཅད་ཡེ་ཤེས་ཆེན་པོའི་ཀློང་དུ་ནུབ་པའི་ཕྱིར་དང་། སྐྱེ་བ་དང་འགག་པར་གྱུར་པ་མེད་པ་ལྟར། གཉུག་མའི་ངོ་བོའང་ཡིན་ཏེ། དེ་ཁོ་ན་ཉིད་ལ་སྐྱེ་ཤིའི་ཆོས་མ་སྤངས་བྲལ་བས་ངོ་བོ་གཟུང་ནུབ་ཡེ་མེད་པའི་ཕྱིར་དང༌། འཕོ་བ་དང་མི་འཕོ་བར་གྱུར་པ་མེད་པ་ལྟར། རང་བྱུང་རིག་པའང་མཚུངས་ཏེ། གནས་རིས་ཐམས་ཅད་དེ་བཞིན་ཉིད་དུ་རང་གསལ་བ་ལ་འགྲོ་འོང་དུས་གསུམ་དུ་བྲལ་བའི་ཕྱིར་དང༌། འགྱུར་བ་དང་མི་འགྱུར་བར་གྱུར་པ་མེད་པ་ལྟར། སྙིང་པོ་བྱང་ཆུབ་ཀྱང་ཡིན་ཏེ། བྱང་ཆུབ་ཀྱི་སེམས་མཚན་ཉིད་གང་དུའང་མ་ཟིན་པས་ཅིར་སྣང་དེ་ཉིད་ཡིན་པའི་ངོ་བོ་ལ་མི་འདྲ་བས་ཀྱང་མི་འདྲ་བར་གྱུར་པ་མེད་པའི་ཕྱིར་དང༌། མུན་པ་དང་སྣང་བར་གྱུར་པ་མེད་པ་ལྟར། འོད་གསལ་བའི་ཡེ་ཤེས་ཀྱང་ཡིན་ཏེ། མཉམ་པ་ཆེན་པོ་ཡེ་ནས་མཐའི་སྒྲིབ་པ་མ་བསལ་བྲལ་བའི་ཕྱིར་དང༌། སྔོན་དང་ཕྱི་མར་གྱུར་པ་མེད་པ་ལྟར། ངང་གི་ཐིག་ལེ་ཡང་ཡིན་ཏེ། དུས་གསུམ་མ་འགགས་པའི་སེམས་ཉིད་མ་བཅོས་པའི་ངང་ལ་སྐད་ཅིག་མའི་རྒྱུན་མེད་པའི་ཕྱིར་དང༌། མཐའ་དང་དབུས་སུ་གྱུར་བ་མེད་པ་ལྟར། རང་སྣང་རིས་མེད་ཀྱང་ཡིན་ཏེ། དེ་བཞིན་ཉིད་ནི་སྣང་བཞིན་མ་གྲུབ་ལ་མ་གྲུབ་བཞིན་མི་འགོག་པ་ལ་བར་གྱི་ཐ་སྙད་ཙམ་ཡང་མེད་པའི་ཕྱིར་དང༌།  བདག་དང་གཞན་དུ་གྱུར་པ་མེད་པ ་ལྟར། སེམས་ཉིད་རང་གསལ་བའང་ཡིན་ཏེ། ཆོས་ཉིད་གསང་བའི་དབྱིངས་ལ་ཕྱོགས་རིས་དང་བྲལ་བའི་ཕྱིར་དང༌། དེ་བཞིན་དུ་ནམ་མཁའ་ལ་བླངས་ནས་དོར་བར་གྱུར་པ་དང༌། ༼༣༥༽དོར་བ་ལས་བླངས་པར་གྱུར་པ་མེད་པ་ལྟར། གཤིས་ཀྱི་གནས་ལུགས་ཀྱང་ཡིན་ཏེ། ཐམས་ཅད་ཀྱང་དེ་ཉིད་དུ་རང་སྣང་བ་ལ་བཟང་ངན་བྲལ་བའི་ཕྱིར་ཏེ། དེས་ན་ནམ་མཁའ་རང་གི་ངོ་བོ་ནི་ཐམས་ཅད་ནས་ཐམས་ཅད་དུ་མ་བཅོས་པའོ། །དཔེ་དེ་བཞིན་དུ་དབྱིངས་རང་བཞིན་རྣམ་དག་དཀྱིལ་འཁོར་གསུམ་དབྱེར་མེད་པའི་ཆོས་ཉིད་རང་རིག་དོན་གྱི་ངོ་བོ་འདི་ཉིད་ཀྱང་སྦྱར་བར་བྱ་སྟེ། ཆོས་དབྱིངས་མཚོན་པའི་དཔེའི་རྣམ་གྲངས་དང་མཐུན་པར་ཐུན་མོང་མིན་པའི་གཏན་ཚིགས་དེ་དག་གིས་སྒྲུབ་པའི་དོན་གྱི་བླ་དྭགས་སུ་མ་བཅོས་པ་ཞེས་བསྙད་པས་ན། དེའི་ཕྱིར་གསང་བའི་དབྱིངས་ནི་རང་བཞིན་མ་བཅོས་པའོ། །ཞེས་གསུངས་ཏེ་བཀའ་སྩལ་བར་མཛད་དོ།།

གསུམ་པ་ནམ་མཁའ་མ་བྱས་ལ་གཉེན་པོ་མེད་པ་བཞིན་ཆོས་ཉིད་བསྟན་པ་ནི།

ལང་ཀའི། ཞེས་ པ་ནས། མ་བྱས་པས་གཉེན་པོ་མེད་དོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ་འདི་ལྟ་སྟེ། དཔེར་ན་ནམ་མཁའ་ནི་སུས་ཀྱང་མ་བྱས། བྱེད་པ་པོ་མེད། རྒྱུ་ལས་མ་བྱུང་། རྐྱེན་ལས་མ་སྐྱེད། དང་པོར་མ་སྐྱེས། ཐ་མར་མི་འཇིག ཐོག་མ་དང་ཐ་མར་མི་དམིགས། ཐོབ་པ་དང་མ་ཐོབ་པ་མེད། རེ་བ་དང་བཙལ་བ་མེད་དོ། །དེའི་ཕྱིར་ནམ་མཁའ་ནི་སུས་ཀྱང་བྱས་པ་མེད་པས་གཉེན་པོ་མེད་དོ།།

དེ་བཞིན་དུ་དེ་ཉིད་ཀྱང་བྱེད་པ་མེད་པའི་ཕྱིར། མ་བྱས་པས་གཉེན་པོ་ མེད་དོ།།

དོན་མ་བཅོས་པ་དེ་ཉིད་མི་འཇིག་པར་མཚོན་པའི་ཕྱིར། ལང་ཀའི་བདག ་པོ། ཞེས་བོས་ནས། དཔེའི་ཆོས་རྣམ་གྲངས་བཅུ་གཉིས་ཉེ་བར་བསྟན་པ་འདི་ལྟ་སྟེ། དཔེར་ན་ནམ་མཁའ་དེ་ནི་བྱེད་པ་པོ་སུས་ཀྱང་མ་བྱས། བྱེད་པ་པོ་དེ་ཉིད་ཀྱང་ཡེ་མེད། རྒྱུ་དྲུག་ལས་མ་བྱུང༌། རྐྱེན་བཞི་ལས་མ་བསྐྱེད། དུས་ཐོག་མར་དང་པོ་མ་སྐྱེས། ཐ་མར་མི་འཇིག ཐོག་མ་དང་ཐ་མར་ཡང་མི་དམིགས། དེ་བཞིན་དུ། ཐོབ་པ་དང་མ་ཐོབ་པ་ཡང་མེད་ལ། རེ་བ་དང་བརྩལ་བ་ཡང་མེད་དོ། །དེ་ལྟར་ཆོས་བཅུ་གཉིས་གཏན་ཚིགས་སུ་གྱུར་པ་དེའི་ཕྱིར་དཔེ་ནམ་མཁའ་ནི་སུས་ཀྱང་མ་བྱས་ལ་བྱས་པ་མེད་པས་གཉེན་པོ་མེད་པའི་དོན་གྱི་ངོ་བོར་གྲུབ་པ་ཉིད་དོ།།

དཔེ་ཇི་ལྟ་བ་དེ་བཞིན་དུ་སེམས་ཀྱི་ཆོས་ཉིད་དེ་ཁོ་ན་ཉིད་གསང་བའི་དབྱིངས་དེ་བཞིན་ཉིད་ཀྱི་ངོ་བོ་འདི་ཉིད་ཀྱང༌། མཁན་པོས་མ་བསྒྲུབས་པས་སུས་ཀྱང་མ་བྱས། ཡེ་གྲུབ་ཟིན་པ་ལ་མཁན་པོ་ཉིད་ཀྱང་མ་དམིགས་པས་བྱེད་པ་པོ་ཡང་མེད། ཡེ་ནས་རྒྱུ་རྐྱེན་ཉིད་འབྲས་བུར་རྫོགས་ཏེ་གཉིས་མེད་ཆེན་པོར་གྲུབ་ཟིན་པས། རྒྱུ་ལས་མ་བྱུང་རྐྱེན་གྱིས་མ་བསྐྱེད་དེ་དེ་དག་གིས་འཕྲལ་དུ་མ་བསྒྲུབ། དེ་ལྟར་རྒྱུ་རྐྱེན་མེད་པར་དུས་གསུམ་གྱི་རྒྱུན་མ་འགགས་བྲལ་བའི་ངོ་བོ་ཉིད་རྒྱུ་རྐྱེན་དང་མི་མཐུན་པའི་ཕྱིར་དང་པོར་མ་སྐྱེས་ཤིང༌། གཉེན་པོ་མེད་པས་ཐ་མར་མི་འཇིག དུས་གསུམ་མཉམ་པ་ཉིད་ལ་ཡུལ་དང་བྲལ་ཞིང་ངོ་བོ་ལྷན་ཅིག་ པ་མེད་པའི་ཕྱིར་ཐོག་མ་དང་ཐ་མར་མི་དམིགས། བདག ་ཉིད་༼༣༦༽ཆེན་པོར་རྫོགས་པ་ལ་རེ་དོགས་དག་བྲལ་བའི་ཕྱིར་ཐོབ་པ་དང་མ་ཐོབ་ པ་ཡང་མེད། དེ་བཞིན་ཉིད་བདག་ཉིད་ལས་གཞན་ནས་གཉེར་དུ་མེད ་པས་བསྒྲུབ་ཏུ་མེད་པའི་ཕྱིར་རེ་བ་དང་བརྩལ་བ་མེད་དེ། དེ་ལྟར་གཏན་ཚིགས་བཅུ་གཉིས་ཀྱིས་གྲུབ་པས་ཆོས་ཉིད་འདུས་མ་བྱས་ནི་མ་བྱས་མ་བཏགས་ཏེ། དེ་ལ་འཇིག་པ་དང་བྲལ་བས་ཟིལ་གྱིས་གནོན་པའི་གཉེན་པོ་མེད་པའི་ཕྱིར། དེ་ཁོ་ན་ཉིད་རྩ་བ་ཆེན་པོ་གསང་བ་ཇི་བཞིན་པའི་དོན་མདོ་བཞིར་གྲགས་པའི་དབྱིངས་དམ་པ་ཉིད་དོ། །དེ་ལྟར་བྱེད་པ་པོ་དང༌། འཇིག་པའི་གཉེན་པོ་བྲལ་ནས་དོན་ལ་སྦྱོར་བར་བྱའོ།།

བཞི་པ་དཔེའི་སྒོ་ནས་དོན་མཐོང་ཚུལ་བཤད་པ་ལ་གཉིས་ཏེ། ལྟ་བ་བསྟན་པ། ཏིང་ངེ་འཛིན་བཤད་པའོ། །དང་པོ་ལ་གསུམ་སྟེ། དཔེས་དོན་མཐོང་ཚུལ། དོན་གྱི་རྣམ་གྲངས་ཆེ་བ་དང་བཅས་པ། དེའི་གོལ་སྒྲིབ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། སེམས་ཉིད་རྙེད་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། གང་ཞིག་ནམ་མཁའི་མཐའ་ཚོལ་བ། །ཚོལ་བས་རྙེད་པར་མི་འགྱུར་ཏེ།།

གོ་སྐབས་ཡོད་པར་གང་ཤེས་པ། །དེ་ནི་ནམ་མཁའ་རྙེད་པའོ། །སེམས་ཀྱིས་སེམས་ཉིད་རྩད་གཅོད་པ།།

རྩ་བ་མེད་པས་རྙེད་མ་ཡིན། །གཞི་རྩ་མེད་འབྱུང་གང་ཤེས་པ། །དེ་ནི་སེམས་ཉིད་རྙེད་པའོ།།

རྩ་བའི་དཔེས་དབུ་མའི་དོན་བཙལ་ཐབས་མི་མཐུན་པ་བསྟན་པའི་ཕྱིར། ལང་ཀའི་བདག་པོ། ཞེས་བོས་ནས། མི་མཐུན་པའི་དཔེ་དོན་ཉེ་བར་བསྟན་པ་འདི་ལྟ་སྟེ། དཔེར་ན་མུ་སྟེགས་པའམ་ཐེག་འོག་པ་ལྟ་བུ། མི་གང་ཞིག་གིས་ནམ་མཁའི་མཐའ་ཚོལ་བར་རྩོམ་ནས་བཙལ་བ་ལ་ཞུགས་པ་ན། དེའི་མཐའ་བཙལ་དུ་མེད་པའི་ཕྱིར། ཚོལ་བར་བྱས་པས་མཐའ་ནམ་ཡང་རྙེད་པར་མི་འགྱུར་ཏེ་མཐའ་དང་བྲལ་བ་ཡིན་པ་ལྟར། དེ་བས་ན་གང་སུ་ཞིག་གིས་ནམ་མཁའི་དོན་ནི་གོ་སྐབས་འབྱེད་པ་ཙམ་དུ་ཡོད་པ་ཡིན་པར་གང་ཤེས་པ་དེ་ནི་ནམ་མཁའ་རང་གི་མཚན་ཉིད་ཤེས་ཤིང་མཐའ་ཡང་རྙེད་པ་ཁོ་ནའོ། །དཔེ་དེ་བཞིན་དུ། འདིར་ཡང་དཔྱད་པས་བཙལ་ཡང་དོན་མི་མཐོང་བའི་ཕྱིར། རང་གི་སེམས་མཉམ་པའི་དོན་ཉིད་ཀྱིས་དོན་གྱི་ངོ་བོ་སེམས་ཀྱི་ཆོས་ཉིད་གང་དེ་ཇི་ལྟ་བུ་ཡིན་པར་རྩད་གཅོད་དེ་ཡོད་མེད་རྟག་ཆད་སོགས་སུ་དཔྱོད་ཅིང་ཚོལ་བ་ལ་འབད་པས་ནི། དོན་ཆེན་པོ་ནམ་ཡང་མི་མཐོང་སྟེ།

དེ་ཅིའི་ཕྱིར་ཞེ་ན། རང་རིག་པ་ནི་ཡེ་ནས་གཞི་དང་རྩ་བ་བྲལ་ཏེ་སྤྱོད་ཡུལ་དུ་བྱར་མེད་ཅིང་བསམ་དཔྱོད་ལས་འདས་པ་ལ་བསམ་དཔྱོད་བྱས་པས་རྙེད་པ་མ་ཡིན་པར་སླར་འཁྲུལ་པ་ཡིན་པའི་ཕྱིར་རོ། །འོ་ན་ཐབས་གང་གིས་ཤེས་པར་འགྱུར་ཞེ་ན། རང་རིག་པ་བྱང་ཆུབ་ཀྱི་སེམས་བདེ་བ་ཆེན་པོ་རྟེན་པའི་གཞི་དང་༼༣༧༽སྐྱེད་པའི་རྩ་བ་མེད་པའི་ངོ་བོ་ཉིད་ལས་གང་ཅིར་ཡང་མ་ངེས་པ་མེད་པར་འགག་པ་མེད་པར་ཀུན་འབྱུང་བའི་རང་བྱུང་གི་རིག་པ་མ་བསམ་མ་དཔྱད་པར་ཇི་བཞིན་པའི་ཆོས་ཉིད་དུ་དམ་པ་གང་གིས་ཤེས་པ་དེ་ནི། བྱ་བཙལ་གྱིས་བསླབ་པ་མེད་པའི་བསླབ་པ་ཆེན་པོ་ཉིད་པས་དོན་ཇི་བཞིན་པར་མ་བསམ་པས་ཕེབས་པ་དེ་ནི་སེམས་ཉིད་ཀྱི་དོན་རྙེད་པ་མེད་པའི་རྙེད་པ་ཡང་དག་པའོ། །དེ་བས་ན་ཅིར་ཡང་བསམ་དུ་མེད་ལ་མ་བསམ་པ་ཉིད་འཆིང་བ་མ་དམིགས་པར་གྲོལ་བ་ཡིན་པའི་ཕྱིར། ནམ་མཁའ་ཆེ་ལས། ཆེ་བ་ཆེ་བ་ཟབ་མོ་ཡི། །ཡོན་ཏན་ཅིར་ཡང་བསྔགས་པ་མེད། །དོན་རྣམས་ཇི་བཞིན་མི་བསྐྱོད་དེ། །བྱ་བ་མེད་པས་གྲོལ་བའང་གྲོལ། །ཞེས་དང༌། ཡེ་ཤེས་རྫོགས་པ་ལས། བསམ་མེད་རང་བཞག་ས་ལེ་བ། །ཅི་ཡང་མ་ཡིན་གྱི་ན་བ། །རང་གསལ་ཡེ་ཤེས་ཉི་མའི་འོད། །ཀུན་བཟང་རྒྱལ་བའི་ཐུགས་དམ་མོ། །ཞེས་གསུངས་པའི་དོན་ནོ།།

གཉིས་པ་རྒྱས་པར་བཤད་པ་ལ་གསུམ་སྟེ། སེམས་ཕྱོགས་བྲལ་དུ་རྟོགས་པ་ཉིད་རྙེད་པར་བསྟན་པ། རྙེད་པས་ཐམས་ཅད་གཉིས་སུ་མེད་པར་གསལ་བར་བསྟན་པ། རྙེད་པའི་ཡོན་ཏན་སྡུག་བསྔལ་མ་སྤང་བྲལ་བར་བསྟན་པའོ། །དང་པོ་ནི།

སེམས་ཀྱིས་སེམས་བཙལ། ཞེས་པ་ནས། རྟོགས་ན་དེ་ཁོ་ན། །ཞེས་པའི་བར་གྱིས་བསྟན་ཏེ།

སེམས་ཀྱིས་སེམས་བཙལ་སེམས་མི་རྙེད། །སུ་ཞིག་སེམས་ཀྱི་གཏིང་རྩ་ཚོལ། །གང་ཞིག་སེམས་ཀྱི་དབུས་མཐའ་འབྱེད། །བཙལ་བས་རྙེད་པ་ག་ལ་ཡིན། །སེམས་ཀྱི་སེམས་ལ་ཇི་ལྟར་མཚོན། །སེམས་ལ་དངོས་པོ་ཡོད་ཅེ་འམ། །སེམས་ཀྱི་དངོས་པོ་གང་གིས་བྱས། །དངོས་མེད་དངོས་སྤྲུལ་བྱང་ཆུབ་སེམས། །ཕྱོགས་བྲལ་ཆེན་པོ་གང་སུ་ཞིག །ཕྱོགས་གཅིག་བྲལ་བས་ཕྱོགས་ཀུན་བྲལ། །བརྟག་པའི་སྤྱོད་ཡུལ་ལས་འདས་པ།།

དེ་ཉིད་རྟོགས་ན་དེ་ཁོ་ན།།

དེ་བས་ན་རྩོལ་བས་བཙལ་བ་འཁྲུལ་པར་བསྟན་པའི་ཕྱིར། རང་གི་སེམས་ཉིད་མ་བཅོས་པ་ནི་དོན་གྱི་མཆོག་ཡིན་བཞིན་དུ་དེ་ཉིད་མི་ཤེས་པར་བློ་དམན་དག་སེམས་ཀྱི་རྟོག་དཔྱོད་དག་གཏན་ཚིགས་ཀྱིས་དངོས་པོར་དཔྱད་ནས་སེམས་ཀྱི་ངོ་བོའི་གྲུབ་པའི་མཐའ་ཉིད་གཞན་དུ་བཙལ་བས་ནི་གཉུག་མའི་སེམས་ནམ་ཡང་མི་རྙེད་པས་སེམས་ཀྱི་ངོ་བོ་དང་འཕྲད་པར་མི་འགྱུར་ཏེ་སླར་འཁྲུལ་བར་འཕྱན་པའོ། །དེས་ན་གང་ཟག་གང་སུ་ཞིག་གིས་རང་གི་སེམས་ཀྱི་མུ་དང་གཏིང་དང་གཞི་དང་རྩ་བ་ཚོལ་བའི་ཕྱིར་དཔྱོད་པ་སེམས་ཙམ་པ་ལྟ་བུ་དང༌། བློ་ཆུང་གང་ཞིག་སེམས་ཀྱི་དབུས་དང་མཐའ་འབྱེད་ནས་མཐའ་སྤོང་བ་དབུ་མ་པ་ལྟ་བུ་དེ་དག་གིས་དོན་ཕྱོགས་མེད་ཀྱི་ངོ་བོ་ཉིད་རྩོལ་བས་བཙལ་བས་རྙེད་པ་ག་ལ་ཡིན་ཏེ་མ་ཡིན་པས་ན་ནམ་ཡང་རྙེད་པར་མི་འགྱུར་ཏེ། ཚོལ་བ་མེད་པ་ཉིད་བཙལ་བ་ཆེན་པོ་ཡིན་པ་ལས་གོལ་བའི་ཕྱིར་ཏེ། དཔྱད་པས་རྟོག་མཐའ་སྐྱེས་ཏེ་སྔ་མ་ལ་ཕྱི་མས་ལོངས་བཏགས་ནས་རྩོལ་སྒྲུབ་ཀྱིས་ཁ་འཁོར་བར་འགྱུར་རོ། །༼༣༨༽དེ་བས་ན་མན་ངག་ལས། མཚོན་ཅིང་རྟོགས་པར་བྱ་བ་དེ་ཉིད་ནི། །སྟོན་པའི་ལུང་བཞིན་ཚིག་གི་མཐའ་དཔྱོད་པ། །ཚད་མར་བཟུང་ཕྱིར་འཛིན་པ་དེ་སྐྱེས་ཏེ། །དེ་བས་མཚོན་བྱེད་སེམས་ཀྱི་རྒྱུད་ཁ་འཁོར། །ཞེས་དང༌། གསང་བདག་དགའ་རབ་དཔའ་བོས་མཛད་པའི་ཐིག་ལེ་བཞི་པའི་བསམ་གཏན་ལས། དེ་དོན་རང་ལ་འཆར་བ་ལ། །རིང་ནས་འགྲུབ་ཏུ་རེ་བ་ནི། །ནམ་མཁའ་དག་ལ་མཐའ་ཚོལ་བཞིན། །གྲུབ་ཏུ་རེ་སྟེ་མི་འགྲུབ་པོ། །འཇུག་སྒོ་བཀག་པ་མ་ཡིན་ཏེ། །རང་བྱུང་ཡེ་ཤེས་འགྲུབ་མི་འགྱུར། །ཕྱི་ལམ་བཅད་པ་མ་ཡིན་ཏེ། །འཁྲུལ་པའི་ལོངས་བཏགགས་འཆད་མི་འགྱུར། །ཞེས་གསུངས་པའི་དོན་ཏོ། །འོ་ན་ཐབས་མ་ནོར་བ་གང་ཡིན་ཞེ་ན། དཔེར་མཚོན་རྣོན་པོ་དང་འདྲ་སྟེ། རང་གི་སེམས་ཀྱིས་རང་སེམས་ཉིད་ལ་ཇི་ལྟར་མཚོན་ཏེ། མཐའ་གང་དུའང་མཚོན་དུ་མེད་དོ། །དེ་ཅིའི་ཕྱིར་ན། སེམས་ལ་བཙལ་བའི་དོན་གྱི་དངོས་པོ་ཞིག་ཡོད་དོ་ཅེའམ་དངོས་མེད་ཞིག་ཡིན་ནོ་ཞེས་སྨྲ་ན། །ཡོད་ན་སེམས་ཀྱི་དངོས་པོ་གང་གིས་བྱ་ལ། མེད་ན་སེམས་ཀྱི་ཐ་སྙད་ཇི་ལྟར་གདགས་ཏེ། དེས་ན་འདི་འདྲར་བསྟན་དུ་མེད་དོ། །འོ་ན་དེའི་ངོ་བོ་ཇི་ལྟ་བུ་ཞིག་ཡིན་ཞེ་ན། དེ་ཉིད་ངོ་བོ་ཉིད་ཀྱིས་དངོས་པོ་དང་དངོས་མེད་གང་དུའང་མ་གྲུབ་པར་ཇི་སྙེད་པའི་ཆོས་སྣ་ཚོགས་ཀྱི་དངོས་པོ་ལྟར་སྤྲུལ་ཏེ་ཅིར་ཡང་འཆར་ཞིང་རང་སྣང་ལ་གཉིས་ལས་གྲོལ་བའི་ངོ་བོ་ཆོས་ཉིད་བྱང་ཆུབ་ཀྱི་སེམས་ཡིན་ལ། དེས་ན་བྱང་ཆུབ་ཀྱི་སེམས་ཕྱོགས་ཐམས་ཅད་མ་སྤངས་བྲལ་བའི་དོན་ཆེན་པོ་ཉིད་ཅིར་ཡང་མ་བསམས་མ་དམིགས་པ་ཉིད་ཀྱིས་རྟོགས་པའི་རྣལ་འབྱོར་པ་གང་སུ་ཞིག་གི་རིག་པ་ལ་བདག་ཏུ་འཛིན་པའི་ཕྱོགས་གཅིག་ཉིད་མ་སྤངས་པར་བྲལ་བས་མཐའི་ཕྱོགས་ཇི་སྙེད་དུ་འཛིན་པ་ཀུན་ཀྱང་དེ་ལྟར་མ་སྤངས་བྲལ་ཏེ་ངང་གི་དག་པས་ན། ཡང་དག་པའི་དོན་ཉིད་ནི་ཡེ་ཉིད་ནས་ བདག་ཉིད་ཡིན་པ་དང༌། ཡུལ་དུ་མེད་པ ་དང༌། མཚན་ཉིད་གང་དུའང་མ་གཡོས་པར་བརྟགས་པའི་སྤྱོད་ཡུལ་ཐམས་ཅད་ལས་འདས་པ་ཡིན་པས། དེ་ལ་ཇི་ཙམ་དུ་དཔྱད་ན་རྟོག་པ་སྐྱེ། བསམ་ན་དམིགས་པ་འབྱུང༌། དམིགས་ན་འཛིན་པ་སྐྱེ་བས་ཡང་དག་པར་མི་མཐོང་བའི་ཕྱིར་དེ་དག་དང་བྲལ་བའོ། །དེས་ན་དེ་ལྟ་བུའི་དོན་དེ་ཉིད་ཇི་བཞིན་དུ་རང་རིག་པར་རྟོགས་ན་མ་བཅོས་པའི་ཆོས་ཉིད་སྐྱེ་བ་མེད་པ་ཡིན་པས། བློ་ཡིས་མ་བརྟགས་མ་བསམས་མ་དམིགས་ན། ༼༣༩༽ཕྱི་མོའི་དོན་རྣལ་དུ་ཕེབས་པའང་དེ་ཁོ་ན་ཉིད་དེ་གཞན་དུ་བཙལ་བ་མེད་དོ། །དེ་ལྟར་ཡང་སྐུ་གསུམ་བཀོད་པའི་བསམ་གཏན་ལས། བརྗོད་མེད་ཕྱོགས་བྲལ་ནམ་མཁའི་ཀློང༌། །ནམ་མཁའི་ཀློང་ལ་སྐྱེ་ཤི་མེད། །སྐྱེ་ཤི་མེད་པ་བྱང་ཆུབ་སེམས། །འདུ་འབྲལ་མེད་པར་རང་ལ་གནས། །ཡེ་ནས་གནས་པས་སྒྲུབ་ཏུ་མེད། །མ་བསྒྲུབ་ལྷུན་གྲུབ་སྐུ་གསུམ་ཀློང༌། །རང་ཤར་རང་གྲོལ་འགྱུར་མེད་སྲོག །ཟབ་ཅིང་བརྟག་དཀའ་ཕྲ་བའི་ལམ། །གཞན་གྱིས་རྟོགས་དཀའ་ཆེ་བའི་ཡུལ། །ཟབ་མོ་གཡང་ཆེན་རྣལ་འབྱོར་དོན། །ཕྲ་རགས་མེད་པར་གནས་མོད་ཀྱང༌། །གཞན་དུ་ལྟ་བ་གོལ་བའི་ས། །ཞེས་སོ།།

གཉིས་པ་རྙེད་པས་ཐམས་ཅད་གཉིས་སུ་མེད་པར་གསལ་བར་བསྟན་པ་ནི།

སེམས་ཀྱིས་སེམས་བཙལ། ཞེས་པ་ནས། མ་རིག་གཉིས་སུ་སྣང༌། །ཞེས་པའི་བར་གྱིས་བསྟན་ཏེ།

སེམས་ཀྱིས་སེམས་བཙལ་དྲོད་ཅིག་རྙེད། །དྲོད་དེ་རྙེད་ན་བྱང་ཆུབ་སེམས། །ཅི་ཡང་ཡིན་ནོ་གང་ཡང་རུང་། །དེ་ཉིད་ཆོས་ཀྱི་དོན་པོ་མཆོག །དེས་ན་འཁོར་བ་ཆོས་ཉིད་འདི། །གཉིས་སུ་ཡོད་པ་མ་ཡིན་ཏེ། །འཁོར་བའི་དེ་བཞིན་དེ་ཉིད་ནི། །ཆོས་ཉིད་ཡིན་པར་ལུང་དུ་བསྟན། །འཁོར་བར་འཁྲུལ་པའི་སྒྱུ་མ་དང་། །རྣམ་དག་རྣམ་སྦྱང་སྒྱུ་མ་གཉིས། །སེམས་ཅན་སངས་རྒྱས་ཐ་དད་ཀྱང་། །དེ་བཞིན་ཉིད་ལ་ཡོང་ཡེ་མེད། །དཔེར་ན་རས་སྣམ་རྒྱུ་ཅིག་ལས། །ཚོན་གྱི་རྐྱེན་གྱིས་བསྒྱུར་བྱས་ན། །ཁ་དོག་སྣ་ཚོགས་ཐ་དད་ཀྱང། །རས་སྣམ་ཉིད་ལས་ག་ལ་ཡོད། །ལོག་རྟོག་ཡང་དག་རྟོག་སྨིན་པ། །སེམས་ཅན་ཡེ་ཤེས་ཅན་འདི་དག །རྒྱུ་གཅིག་རྐྱེན་གྱིས་བསྒྱུར་བ་ལས། །རིག་དང་མ་རིག་གཉིས་སུ་སྣང་།།

དེ་ཡང་འདིར་འདུ་ཤེས་གང་དུའང་མ་ཞུགས་པའི་སེམས་ཀྱིས་ཅི་ཡང་ཚོལ་བ་མེད་པ་ཉིད་ཀྱིས་སེམས་ཉིད་ཀྱི་ངོ་བོ་བཙལ་བ་ནི་ཡང་དག་པའིི་ཚོལ་བ་ཡིན་པས། དེ་ལྟར་བཙལ་བ་ན་གང་དུའང་མ་གཡོས་པའི་དོན་ཉིད་གར་ཡང་མ་གྲུབ་པའི་རིག་པ་མེད་པ་ཉིད་དུ་རང་རིག་པར་གྱུར་ནས་འཁོར་བ་ཆོས་ཉིད་དུ་སྣང་བའི་ལྟ་བས་དྲོད་མཆོག་ཅིག་རྙེད་ན་ཐ་སྙད་དུ་སེམས་ཀྱི་ཆོས་ཉིད་རྙེད་པ་སྟེ། དེ་ལྟར་ལྟ་བས་དྲོད་དམ་པ་དེ་རྙེད་ན་ངོ་བོ་ངེས་ པ་མེད་པས་རང་བྱུང་གི་ཡེ་ཤེས་སྙིང་པོ་བྱང་ཆུབ་ཀྱི་སེམས་ཅིའང་མ་ཡིན་པར་བདག ་ཉིད་ཆེན་པོ་ཡིན་པར་ཡང་དག་པར་རིག་པ་དེ་ཁོ་ན་དོན་ཡང་དག་པ་ཡིན་ནོ། །དེས་ན་ཕྱོགས་མེད་རང་གསལ་གྱི་ཀློང་ཆེན་པོ་དེ་ལ་ནི་ཡིན་མིན་དང་ཡོད་མེད་ཀྱི་རིས་དང་བྲལ་བས་རང་སྣང་གི་ཆོས་ཉིད་ཅི་ཡང་ཡིན་ནོ་གང་ཡང་རུང་བ་སྟེ་མཐའ་ཀུན་མ་སྤངས་ཡེ་ནས་བྲལ་བ་དེ་ཉིད་ནི་དངོས་པོའི་ཆོས་རྣམས་ཀྱི་རང་བཞིན་དེ་ཁོ་ན་ཉིད་ཆོས་ཐམས་ཅད་ཀྱི་དོན་གྱི་སྙིང་པོ་བྱང་ཆུབ་མཆོག་གི་གནས་ལུགས་སམ་གཙོ་བོ་དམ་པ་ཡིན་ནོ། །དེས་ན་དོན་གྱི་ངོ་བོ་མ་ནོར་བར་བསྟན་པའི་ཚུལ་གྱིས་འཁོར་བའི་སྣང་བ་དང་ངོ་བོའི་ཆོས་ཉིད་འདི་གཉིས་གཞི་དེ་བཞིན་ཉིད་ལ་གཉིས་སུ་ཡོད་པ་མ་ཡིན་ཏེ། ཐ་དད་མེད་པས་དུང་དང་དཀར་བ་བཞིན་ནོ། །འོ་ན་གཉིས་སུ་སྣང་བ་ཇི་ལྟར་ཡིན་ཞེ་ན། མ་རྟོགས་པ་རྣམས་ལ་འཁོར་བར་སྣང་བའི་དངོས་པོ་རྣམས་ཀྱི་རང་བཞིན་མ་བཅོས་པའི་དེ་བཞིན་ཉིད་གཉིས་སུ་མེད་པའི་དེ་ཁོ་ན་ཉིད་དེ་ནི། ཆོས་ཉིད་ཡིན་པར་རྣམ་འདྲེན་རྒྱལ་བ་རྣམས་ཀྱིས་ལུང་དུ་༼༤༠༽བསྟན་ཏེ་བཀའ་སྩལ་བར་མཛད་དོ། །དེ་ལྟ་བུའི་དོན་ནི་མ་མཐོང་བའི་དུས་དེང་སང་གི་སྔགས་པ་བློ་ཕད་ཧྲུལ་དུ་སྙུང་བླུགས་པ་ལྟར་དམིགས་པ་ལ་དགའ་བ་དག དོན་ཆེན་པོ་མ་མཐོང་བའི་རང་ཉམས་ཀྱིས་བྱ་བ་མེད་པ་ནི་ཆོས་ཀྱི་གཞི་དང་ལས་སུ་རུང་བའི་སྤྱོད་ཡུལ་ཡིན་ནོ། །ཞེས་སྨྲ་ཞིང༌། ལས་དང་པོ་པས་བསམ་དཔྱོད་དགོས་སོ་ཞེས་ཟེར་བ་ནི། ཐབས་ཆེན་པོ་དང་བྲལ་བས་ཅིག་ཆར་འཇུག་པའི་སྐལ་བ་མེད་པ་ཡིན་ཏེ། ཀྱེ་མ་ཐུགས་རྗེའི་གནས་སུ་གྱུར་པའོ། །དེས་ན་པཎ་ཆེན་འཇམ་དཔལ་བཤེས་གཉེན་གྱིས། སྐྱེ་བོ་སྐྱེ་བ་སྣ་ཚོགས་དག་ལས་སྐྱེས་ཤིང་སྐྱེ་དང་སྐྱེ་འགྱུར་སྐྱེ་བའི་རྒྱུན་གྱིས་དབང་སོང་བས། །རྟོག་མཐའ་མི་ཤེས་རྟོག་པས་བསླུས་ཤིང་རྟོག་པའི་རྒྱུན་འབྲངས་འཁྲུལ་རྟོག་ལས་ཕྱིར་ལྡོག་པ་མེད་གྱུར་པ། །སྒྱུ་མའི་སྒྱུ་ཤེས་དག་གིས་སྒྱུ་མའི་རྟ་གླང་འདྲ་བར་སྒྱུ་མར་རྨོངས་པའི་སྒྱུ་མ་རྣམས། །རྨི་ལམ་གྱིས་བསླད་བཞིན་དུ་རྨི་ཡིས་བདེན་པ་ཉམས་ཤིང་རྨི་ལམ་དབང་དུ་སོང་བའི་རྨི་ལམ་པ། །ལམ་འདི་སྤོང་ཞིང་མཐའ་དང་ལམ་གཞན་ལམ་དུ་བལྟས་ནས་མ་ནོར་ལམ་ཞེས་སྟོན་བྱེད་པ། །དེ་དག་རྡོ་ལ་གསེར་བཞིན་ཐུགས་རྗེར་རུང་ཞིང་ཐུགས་རྗེ་ཆེན་པོས་ཀྱེ་མའོ་ཕྲོགས་པ་ཡིན། །ཞེས་གསུངས་སོ། །དེའི་ཕྱིར་འཁོར་བར་སྣང་ལ་ངོས་བཟུང་མེད་པ་ལོག་རྟོག་འཁྲུལ་པའི་སྒྱུ་མ་དང༌། འཁྲུལ་པ་རྣམ་པར་དག་པའི་སྐུ་དང་ཡེ་ཤེས་སྒྲིབ་པ་རྣམ་པར་བྱང་བའི་སྒྱུ་མ་གཉིས་རྐྱེན་གྱི་དབང་གིས་སེམས་ཅན་དང་སངས་རྒྱས་ཞེས་བརྟགས་པ་དང་ལྡོག་པའི་ཐ་དད་ཡོད་ཀྱང༌། མི་མཐུན་པ་སྟོན་པས་ངོ་བོ་དེ་བཞིན་ཉིད་ལ་ནི་གཅིག་ཁོ་ན་ལས་ཐ་དད་པའི་རང་བཞིན་ཡོང་ཡེ་མེད་དོ། །དེ་བས་ན་གློ་བུར་གྱི་རྟོག་པའི་རྒྱུ་རྐྱེན་43འཛོམ་པའི་སྣང་བ་ལས་མིང་བཏགས་པ་སོ་སོ་བ་ཙམ་ཡང་ངོ་བོ་ལ་གཉིས་པ་གཞི་ནས་མེད་པའི་ཕྱིར། འཁྲུལ་པའི་ངོ་ལ་གཉིས་སུ་སྣང་དུ་བཏུབ་པ་ཡང༌། དཔེར་ན་རས་དང་སྣམ་བུའི་རྒྱུ་གཅིག་ལས་ཚོན་སྣ་ཚོགས་ཀྱི་རྐྱེན་གྱིས་མདོག་བསྒྱུར་བར་བྱས་ན། དམར་སེར་ལ་སོགས་པའི་ཁ་དོག་སྣ་ཚོགས་པ་ཐ་དད་དུ་སྣང་ཀྱང༌། རས་བལ་ཉིད་ལས་གུད་དུ་སོང་བ་ག་ལ་ཡོད་དེ་མེད་དོ། །དེ་བཞིན་དུ་ལོག་རྟོག་ཉིད་སྨིན་པ་དང་ཡང་དག་པའི་རྟོག་པ་སྨིན་པ་ལས། འགྲོ་བ་སེམས་ཅན་ཞེས་བྱ་བ་དང༌། སངས་རྒྱས་ཡེ་ཤེས་ཅན་ཞེས་བྱ་བར་དབྱེ་བ་འདི་དག རྒྱུ་བྱང་ཆུབ་ཀྱི་སེམས་སུ་གཅིག་པ་༼༤༡༽ལས་རྟོགས་མ་རྟོགས་ཀྱི་རྐྱེན་གྱིས་བསྒྱུར་བ་ལས། སངས་རྒྱས་རིག་པ་ཅན་དང་སེམས་ཅན་མ་རིག་པ་ཅན་གཉིས་སུ་སྣང་གིས་དོན་ལ་དབྱེར་མེད་ཡིན་ནོ།།

གསུམ་པ་རྙེད་པའི་ཡོན་ཏན་སྡུག་བསྔལ་མ་སྤང་བྲལ་བར་བསྟན་པ་ནི།

འཁོར་བའི་སྡུག་བསྔལ། ཞེས་པ་ནས། ཡེ་ཤེས་རང་བྱུང་ཆེ། །ཞེས་པའི་བར་གྱིས་བསྟན་ཏེ།

འཁོར་བའི་སྡུག་བསྔལ་མི་འདྲ་བ། །དབུགས་ཆེན་ཕྱིན་ནས་རྨི་སངས་ལྟར། །ཐམས་ཅད་བདེ་ཆེན་བྱང་ཆུབ་སེམས། །མཁའ་ལྟར་ཁྱབ་བརྡལ་ཉིད་དུ་སྣང་། །བློ་བུར་ལས་ཞེས་བཏགས་པ་ཀུན། །འདུས་བྱས་ཡིན་ཏེ་མ་སྐྱེས་པས། །དེ་བཞིན་ཉིད་དེ་ཁྱབ་བརྡལ་ཆུབ། །བཙལ་མེད་ཡེ་ཤེས་རང་བྱུང་ཆེ།།

འོ་ན་གཏན་འབྲས་བུ་ཐོབ་ཏུའང་མེད་དམ་ཞེ་ན། འཁོར་བའི་འགྲོ་བ་གྲོང་ཁྱེར་གསུམ་གྱི་བདེ་བ་དང་སྡུག་བསྔལ་མྱོང་བ་ནི་མེད་བཞིན་དུ་སྣང་བ་རྨི་ལམ་དང་འདྲ་བ་ཡིན་ན། འཁོར་བ་ལས་དབུགས་ཆེན་པོ་ཕྱིན་ནས་གཉིད་སད་ཅིང་རྨི་ལམ་སངས་ན་སྡུག་བསྔལ་གྱི་སྤྱོད་ཡུལ་བྲལ་ཏེ་སད་པའི་བདེ་བ་ཉིད་དུ་སྣང་བ་ལྟར། དངོས་པོ་ཐམས་ཅད་ཡེ་ནས་ཆོས་ཉིད་བདེ་བ་ཆེན་པོ་བྱང་ཆུབ་ཀྱི་སེམས་ཇི་བཞིན་པའི་རང་བཞིན་དཔེར་ན་ནམ་མཁའ་ཀུན་ལ་ཁྱབ་པ་ལྟར་ཆོས་རིལ་ལ་བསྣུམས་ཚབས་ཆེ་ཆུང་མེད་པར་ལྷག་པའི་ཆོས་སྐུ་ཆེན་པོ་ཁྱབ་གདལ་ཉིད་དུ་སྣང་བའོ། །དེས་ན་རྨི་ལམ་ལྟ་བུར་གློ་བུར་རམ་འཕྲལ་དུ་རྟོག་པས་ནན་དུ་བརྟགས་པས་འདུ་བྱེད་ཀྱི་ལས་སུ་གྱུར་པའི་ཐ་སྙད་ཀྱི་སྒྲིབ་པ་ཞེས་སུ་བཏགས་པའི་འཁྲུལ་པའི་སྣང་བ་ཡོད་དོ་ཅོག་ཀུན་རང་གི་རྟོག་པའི་རྒྱུ་རྐྱེན་འཛོམ་པ་ལས་སྣང་བས་འདུས་བྱས་ཁོ་ན་ཡིན་ཏེ། འདིར་ལས་ཉོན་དེ་གཉིས་ཀྱི་རང་བཞིན་ཡེ་ནས་མ་སྐྱེས་པའི་ཆོས་ཉིད་ལས་བཀོལ་བ་མེད་པར་ངོ་བོ་དེ་བཞིན་ཉིད་དེ་ཁྱབ་གདལ་ཆེན་པོའི་དབྱིངས་སུ་ཆུབ་པས་བཙལ་དུ་མེད་པར་སྒྲིབ་པ་ཉིད་ཡེ་ཤེས་ཕྱིན་ཅི་ལོག་ཉིད་བྱང་ཆུབ། ཉོན་མོངས་ཉིད་བདེ་བ་ཆེན་པོར་ཡེ་གྲོལ་བ་ཡིན་པས་མ་བསལ་དག་པ་ལ་དེའི་ཐ་སྙད་མེད་པའོ། །འོན་ཀྱང་སྒྲིབ་པ་ལ་སྦྱང་རྩོལ་མ་བྱས་པར་རང་བཞིན་གཉིས་མེད་དུ་ངེས་ནས་བཤད་པ་ལྟར་ཡེ་ཤེས་རང་བྱུང་ཆེན་པོ་རྟོགས་པས་སྤང་དུ་མེད་པར་ལྷུན་གྱིས་གྲུབ་པའི་ཁྱད་པར་གྱི་ཆེ་བ་དང་ལྡན་པ་ལ་འབྲས་བུ་རྒྱུ་རྐྱེན་ལ་རག་མ་ལས་པར་རང་གྲོལ་ཉིད་དུ་ཐོབ་པའི་སྒྲའོ། །དེ་དག་ནི་དོན་ནོར་མ་ནོར་ཤེས་པར་བྱ་བའི་ཕྱིར་བཀོད་པ་སྟེ་ལྟ་བའི་མི་མཐུན་པའོ། །དེ་ཡན་ཆད་ཀྱི་བམ་པོ་བདུན་པ་སོང་ནས། བམ་པོ་བརྒྱད་པར་དབུ་ཟུག་པའོ།།

གཉིས་པ་དོན་གྱི་རྣམ་གྲངས་ཆེ་བ་དང་བཅས་པ་ལ་བདུན་ཏེ། ཡིན་པའི་ཆེ་བ་བདུན་དཔེས་བསྟན་པ། ངེས་པ་དྲུག་བཤད་པ། ཟིན་པ་དྲུག་བསྟན་པ། གཏན་ཚིགས་གསུམ་བཤད་པ། དྲོད་རྟགས་དྲུག་བཤད་པ། ཡིད་ཆེས་བཅུ་གཉིས་བཤད་པ། དེ་དག་གི་དོན་རང་༼༤༢༽ལས་འབྱུང་བར་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

བམ་པོ་བརྒྱད་པར་ཟུག་པའོ།།

ལང་ཀའི། ཞེས་པ་ནས། རྣམ་པར་ངེས་པ་ཡིན། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ཉིད་ནི། །ཡིན་པར་ངེས་པའི་རྩ་བ་བདུན།།

དེ་བརྟགས་དེ་ཉིད་དེ་རྟོགས་ན། །དེ་ཉིད་རྣམ་པར་ངེས་པ་ཡིན།།

རྩ་བའི་ཐ་མ་དཔེས་ཆེ་བའི་དོན་ངེས་པས་མན་ངག་ཡིན་པ་དང་རྒྱུད་ཀྱི་ཆེ་བ་ཐུན་མོང་དུ་བསྟན་པ་གང་སྙམ་པ་ལ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས་རྩ་བའི་དཔེ་གསུམ་གྱིས་མཚོན་ནས་ཐ་མ་དོན་མཐོང་བའི་ཚུལ་གྱིས་ངོ་བོ་ངེས་པར་བསྟན་པ་འདི་ཉིད་ནི་འདིར་ལྟར། རྒྱུད་ཀྱི་རྒྱལ་པོ་འདིའི་དོན་ཕུན་སུམ་ཚོགས་པ་ཉིད་ཡིན་པར་ངེས་པའི་རྩ་བ་བདུན་གྱི་ངོ་བོ་ཡིན་པས་ཁྱད་པར་དུ་འཕགས་པ་དང༌། དེས་ན་མན་ངག་ཨ་ཏི་ཡོ་གའི་ཐེག་པ་ཡང་ཡིན་པར་མངོན་པས་ངེས་པའི་གཏན་ཚིགས་ཀྱི་རྩ་བ་བསྡུས་པ་འདི་དག་གིས་རྒྱུད་ཀྱི་དོན་མ་ནོར་བ་དེ་ལ་བརྟགས་ཤིང་དཔྱད་པས་དོན་དེ་ཉིད་ཇི་ལྟ་བ་དེ་བཞིན་དུ་མཐོང་ནས་ཡང་དག་པར་རྟོགས་པ་ན། མཐོང་བ་པོ་ཡི་སྐྱེས་བུ་དེ་ཉིད་དེ་ལྟ་བུའི་གསང་དོན་ཟབ་མོ་རྣམ་པར་ངེས་ཏེ་མི་འགྱུར་བར་གདེང་དུ་ཆུད་པ་ཡིན་པས་མིང་ཡང་འགྲུབ་བོ།།

གཉིས་པ་རྒྱས་པར་བཤད་པ་ལ་བདུན་ཏེ། ཐེག་པའི་ཡང་རྩེ་ཡིན་པར་ངེས་པའི་ཆེ་བ། རྒྱུད་ཀྱི་རྒྱལ་པོ་ཡིན་པར་ངེས་པའི་ཆེ་བ། ལུང་གི་སྤྱི་འགྲེལ་ཡིན་པར་ངེས་པའི་ཆེ་བ། མན་ངག་གི་རྩ་བ་ཡིན་པར་ངེས་པའི་ཆེ་བ། བསྟན་པའི་འབྱུང་གནས་ཡིན་པར་ངེས་པའི་ཆེ་བ། དོན་གྱི་མཇུག་སྡུད་ཡིན་པར་ངེས་པའི་ཆེ་བ། ཆོས་ཐམས་ཅད་ཀྱི་མེ་ལོང་ཡིན་པས་ངེས་པའི་ཆེ་བ་བཤད་པའོ། །དང་པོ་ནི།

གླིང་དང་རི་བོ། ཞེས་པ་ནས། ཆེན་པོ་ཉིད་མཐོང་གསལ། །ཞེས་པའི་བར་གྱིས་བསྟན་ཏེ།

གླིང་དང་རི་བོ་མུ་ཁྱུད་བཅས། །ལྷུན་པོའི་རྩེ་མོ་ཡིད་ནས་གསལ།།

ཇི་སྙེད་ཐེག་པའི་རྣམ་གྲངས་ཀུན། །དེ་ཉིད་ཆེན་པོ་ཉིད་མཐོང་གསལ།།

དཔེར་ན་ཡུལ་གླིང་དང་ས་ཁམས་རི་བོ་དང་མཐའི་མུ་ཁྱུད་དང་བཅས་པ་ཐམས་ཅད། རི་རབ་ལྷུན་པོའི་རྩེ་མོ་ཉིད་ནས་བལྟས་ན། ཐམས་ཅད་ཀུན་གསལ་བ་དང༌། ཁོབས་འོག་ཏུ་ཆུད་པ་དང༌། མར་ལྟ་བའི་ཡུལ་ཁོ་ནར་མཐོང་བ་ལྟར། གྲངས་ཀྱི་བཀོད་པ་ཇི་སྙེད་དུ་སྣང་བའི་ས་དང༌། ཐེག་པ་རྣམ་གྲངས་དེ་སྙེད་ཐམས་ཅད་ཀུན་ཀྱང༌། གསང་སྔགས་ཀྱི་གནས་ལུགས་དེ་ཁོ་ན་ཉིད་ཐེག་པ་ཆེན་པོ་ཇི་བཞིན་པ་རང་བྱུང་ལྷུན་གྱིས་གྲུབ་པའི་དོན་འདི་ཉིད་ཡང་དག་པར་མཐོང་ཞིང་རྟོགས་ན། དེ་དག་ཐམས་ཅད་མ་འདྲེས་ལ་ཡོངས་སུ་རྫོགས་པར་གསལ་བ་དང༌། དམའ་བས་ཁོབས་འོག་ཏུ་ཆུད་པ་དང༌། མར་ལ་ལྟ་བ་ཁོ་ནར་སྣང་ལ། དེ་ལྟར་ངེས་པར་འདོགས་པའི་སྒོ་ནས་ཡི་གེ་༼༤༣༽འདི་ཡང་ཐེག་པ་ཐམས་ཅད་ཀྱི་ཡང་རྩེ་ཡིན་པར་ངེས་པའོ།།

གཉིས་པ་རྒྱུད་ཀྱི་རྒྱལ་པོ་ཡིན་པར་ངེས་པའི་ཆེ་བ་ནི།

འཇིག་རྟེན་འོད་ཀྱི། ཞེས་པ་ནས། ཆེན་པོ་དེ་ཉིད་དོ། །ཞེས་པའི་བར་གྱིས་བསྟན་ཏེ།

འཇིག་རྟེན་འོད་ཀྱི་རྒྱལ་པོ་ནི། །གཟི་ལྡན་གསལ་བའི་ཉི་མ་ཡིན།།

ཆོས་ཀུན་ཡོངས་སུ་རྫོགས་གསལ་བ། །ཀུན་སྣང་ཆེན་པོ་དེ་ཉིད་དོ།།

དཔེར་ན་འཇིག་རྟེན་ན་འོད་ཐམས་ཅད་ཀྱི་རྒྱལ་པོ་ནི། གཟི་ལྡན་གསལ་བའི་ཉི་མ་ཡིན་པ་ལྟར། ལམ་དང་འབྲས་བུའི་ཆོས་རྣམས་ཀུན་སྒྲོ་སྐུར་མེད་པར་བྱང་ཆུབ་ཀྱི་སེམས་ལ་བྱེ་བྲག་མ་འདྲེས་པར་ངོ་བོ་ཡོངས་སུ་རྫོགས་པར་འདུས་ཤིང་གསལ་ལ་འོག་མ་རྣམས་ཟིལ་གྱིས་གནོན་པ་ཉིད་པས། བསྟན་པ་ཀུན་སྣང་ཞིང་རིལ་གྱིས་བདག་ཉིད་ཆེན་པོ་དེ་ཉིད་ཡིན་པའི་ཕྱིར། དེ་ལྟར་འདོགས་པའི་ཡི་གེ་འདི་ཡང༌། རྒྱུད་དམ་ལུང་ཐམས་ཅད་ཀྱི་རྒྱལ་པོ་ཞེས་བྱ་བ་ཉིད་དོ།།

གསུམ་པ་ལུང་གི་སྤྱི་འགྲེལ་ཡིན་པར་ངེས་པའི་ཆེ་བ་ནི།

གོ་སྐབས་ཆེན་པོ། ཞེས་པ་ནས། བརྗོད་ཀུན་གསལ་བར་འགྲེལ། །ཞེས་པའི་བར་གྱིས་བསྟན་ཏེ།

གོ་སྐབས་ཆེན་པོ་ནམ་མཁའ་ནི། །ཆེན་པོ་བཞི་ཡི་གོ་འབྱེད་ལྟར།།

གསང་ཉིད་འདུས་པ་དེ་ཉིད་ཀྱིས། །བརྗོད་པའི་བརྗོད་ཀུན་གསལ་བར་འགྲེལ།།

དཔེར་ན་གོ་སྐབས་ཆེན་པོ་འབྱེད་པའི་ནམ་མཁའ་ནི། ཕྱོགས་ལྷུང་བྲལ་བ་དང༌། རང་བཞིན་སྟོང་པ་དང༌། སྒོ་མི་འགག་པ་ཉིད་པས་འབྱུང་བ་ཆེན་པོ་བཞི་ཡི་དངོས་པོ་སོགས་ཀུན་གྱི་གོ་འབྱེད་ནས་ཐམས་ཅད་མ་སྒྲིབ་པར་སྣང་བ་ལྟར། བྱང་ཆུབ་ཀྱི་སེམས་བསྟན་ཅིང་བརྟགས་པར་དཀའ་བས་རང་བཞིན་གསང་བ་དེ་ཉིད་རིལ་གྱི་བཅུད་ཆེན་པོ་རྫོགས་ཤིང་དགོངས་པ་ཀུན་འདུས་པའི་དོན་དུ་གྱུར་བས་རང་རིག་པ་དེ་ཉིད་ཀྱང་ཕྱོགས་ལྷུང་དང་བྲལ་ཞིང་ངོ་བོ་རིས་སུ་མི་ཟིན་པར་བརྗོད་བྱ་དང་རྗོད་བྱེད་ཐམས་ཅད་ཀྱི་སྒོ་མི་འགག་པ་ཉིད་ཀྱིས་ཐེག་པ་སོ་སོས་བརྗོད་པའི་བསྟན་པ་ཐམས་ཅད་ཀྱི་བཀའ་ཡི་བརྗོད་པ་ཀུན་གྱི་དོན་ལྡེའུ་མིག་གསུམ་གྱིས་འབྱེད་ཅིང་གསལ་བར་འགྲེལ་བས་ན་ལུང་ཐམས་ཅད་ཀྱི་སྤྱི་འགྲེལ་ཡིན་ནོ།།

བཞི་པ་མན་ངག་གི་རྩ་བ་ཡིན་པར་ངེས་པའི་ཆེ་བ་ནི།

གང་གིས་བཀའ་ཡི། ཞེས་པ་ནས། གང་ལའང་བརྩལ་མི་དགོས། །ཞེས་པའི་བར་གྱིས་བསྟན་ཏེ།

གང་གིས་བཀའ་ཡི་གསང་ཐོབ་ན། །མི་གང་གཞན་ལ་རག་མ་ལུས།།

གསང་བའི་སྙིང་པོ་ཀུན་ཆུབ་ན། །སྨྲ་བརྗོད་གང་ལའང་བཙལ་མི་དགོས།།

དཔེར་ན་བློན་པོ་ལྟ་བུ་མི་གང་སུ་ཞིག་གིས་རྒྱལ་པོ་ཆེན་པོའི་བཀའ་ཡི་གསང་ལུང་ཚད་མ་དང་རྒྱ་རྟགས་ངེས་པར་ཐོབ་ན། མི་གང་གཞན་དམན་པ་སུ་ལ་ཡང་རག་མ་ལས་པར་རྒྱལ་པོའི་གྲོས་ལ་དབང་བསྒྱུར་བ་ལྟར་དུ། བསྟན་པའི་རྩ་བ་འདིའི་དོན་གསང་བའི་སྙིང་པོ་དབྱིངས་ལྷུན་གྲུབ་ཆེན་པོ་རྒྱལ་བའི་དགོངས་མཛོད་ཀུན་འདུས་པའི་ངོ་བོ་མ་ནོར་བར་ཁོང་དུ་ཆུབ་ན། གཞན་རྒྱུ་འབྲས་ཀྱི་ཐེག་པའི་ཚིག་གི་ཚོགས་ཇི་སྙེད་ཀྱི་སྨྲ་བ་དང་བརྗོད་པའི་ཐ་སྙད་གང་ཅི་ལའང་རྟེན་བཅའ་ཞིང་བྱ་བ་དང་འབད་པས་བརྩལ་མི་དགོས་པར་འདི་ཉིད་ཁོ་ནས་མཐར་ཐུག་༼༤༤༽གི་དོན་ལ་སྦྱོར་བས་མན་ངག་ཐམས་ཅད་ཀྱི་རྩ་བའང་ཡིན་ནོ།།

ལྔ་པ་བསྟན་པའི་འབྱུང་གནས་ཡིན་པར་ངེས་པའི་ཆེ་བ་ནི།

རྒྱུན་དང་བཅས་པའི། ཞེས་པ་ནས། ཟབ་མོའི་དབྱིངས་ནས་འབྱུང༌། །ཞེས་པའི་བར་གྱིས་བསྟན་ཏེ།

རྒྱུན་དང་བཅས་པའི་འབྱུང་བ་རྣམས། །ནམ་མཁའི་ངང་ལས་བྱུང་ཞིང་སྣང་།།

དེ་བཞིན་སྨྲ་བརྗོད་འབྱུང་བ་རྣམས། །དེ་ཉིད་ཟབ་མོའི་དབྱིངས་ནས་བྱུང་།།

དཔེར་ན་རྒྱུན་དང་བཅས་པའི་འབྱུང་བ་ཆེན་པོ་བཞི་རྩི་ཤིང་དང་བཅས་པ་རྣམས་དུས་ཐམས་ཅད་དུ་བར་མ་ཆད་པར་རྒྱུའི་ངོས་ནས་འབྱུང་བ་ནམ་མཁས་གོ་ཕྱེ་ཞིང་ནམ་མཁའི་ངང་ལས་འབྱུང་ཞིང་སྣང་བ་ཡིན་ལ། དེ་བཞིན་དུ་རྒྱུ་དང་འབྲས་བུའི་བསྟན་པ་ཇི་སྙེད་པ་གདུལ་བྱ་ལ་སྨྲ་བརྗོད་འབྱུང་བའི་ཐེག་པར་སྣང་བ་མ་ལུས་པ་རྣམས་ཀྱང་དེ་ཉིད་ཇི་བཞིན་པར་ངེས་པའི་ལུང་ཟབ་མོའི་བཀའ་གསང་གཏིང་དཔག་དཀའ་བ་འདིའི་དབྱིངས་ལས་བྱིན་རླབས་ཀྱིས་ཤར་ནས་ཁྱབ་གདལ་དུ་འབྱུང་བས་ན་བསྟན་པ་ཐམས་ཅད་ཀྱི་འབྱུང་གནས་ཀྱང་ཡིན་ནོ།།

དྲུག་པ་དོན་གྱི་མཇུག་སྡུད་ཡིན་པར་ངེས་པའི་ཆེ་བ་ནི།

དོན་དུ་བྱ་བའི། ཞེས་པ་ནས། དེ་བཞིན་ཉིད་དུ་འདུས། །ཞེས་པའི་བར་གྱིས་བསྟན་ཏེ།

དོན་དུ་བྱ་བའི་རྣམ་གྲངས་ཀུན། །མཐར་གྱིས་འབྲས་བུ་གྲུབ་པར་སྡུད།།

གྲངས་མང་རྒྱ་ཆེར་བརྗོད་མོད་ཀྱང་། །དེ་ཀུན་དེ་བཞིན་ཉིད་དུ་འདུས།།

དཔེར་ན། འཇིག་རྟེན་གྱི་བསྒྲུབ་བྱ་ཁེ་སྤོགས་ལ་སོགས་པ་དོན་དུ་བྱ་བའི་རྣམ་གྲངས་མང་པོ་ཇི་སྙེད་ཀུན་བྱེད་པ་ཡང༌། མཐར་གྱིས་འབྲས་བུ་གང་གྲུབ་པར་གྱུར་པ་ཐམས་ཅད་རང་ཁྱིམ་དུ་སྡུད་པས་ཐ་མ་དེར་འདུས་པ་ལྟར། རྒྱལ་བའི་བཀའ་ཡི་ཚིག་གི་རྣམ་གྲངས་མང་པོ་ཐེག་པ་དགུ་ལ་སོགས་པ་གདུལ་བྱའི་བློ་རིམ་ཇི་ལྟ་བར་རྒྱ་ཆེར་སྤྲོས་ཏེ་རྒྱས་པར་བརྗོད་ཅིང་བཤད་པར་མཛད་མོད་ཀྱང༌། དེ་རྣམས་ཐམས་ཅད་ཀུན་དོན་གྱི་ངོ་བོ་གསང་སྔགས་ཇི་བཞིན་པ་དེ་བཞིན་ཉིད་ཀྱི་ངང་དུ་ཇི་ལྟ་བ་བཞིན་རྟོགས་པ་ན། ཀུན་འདུས་ཤིང་རྫོགས་པས་དེར་མ་འདུས་པ་མེད་པས་ན། རྒྱུད་འདི་ཉིད་དོན་ཐམས་ཅད་ཀྱི་མཇུག་སྡུད་ཀྱང་ཡིན་ནོ།།

བདུན་པ་ཆོས་ཐམས་ཅད་ཀྱི་མེ་ལོང་ཡིན་པས་ངེས་པའི་ཆེ་བ་བཤད་པ་ནི།

མེ་ལོང་གསལ་བའི། ཞེས་པ་ནས། རང་བཞིན་གསལ་བར་བྱེད། །ཅེས་པའི་བར་གྱིས་བསྟན་ཏེ།

མེ་ལོང་གསལ་བའི་སྙིང་པོས་ནི། །བཞིན་གྱི་གཟུགས་བརྙན་སྟོན་པ་ལྟར།།

དེ་ཉིད་ཆོས་ཀྱི་མེ་ལོང་གིས། །ཀུན་གྱི་རང་བཞིན་གསལ་བར་བྱེད།།

དཔེར་ན་མེ་ལོང་གསལ་བའི་སྙིང་པོས་ནི། བྱད་བཞིན་གྱི་གཟུགས་བརྙན་གསལ་བར་སྟོན་པ་ལྟར། དེ་ཁོ་ན་ཉིད་གསང་བའི་སྙིང་པོ་འདིའི་དོན་ཡེ་གསལ་ཆེན་པོའི་ངང་དུ་གདལ་བའི་ཆོས་ཀྱི་མེ་ལོང་གིས། དངོས་པོ་དང་དངོས་པོ་མེད་པའམ་འཁོར་འདས་ལམ་གསུམ་གྱི་ཆོས་ཐམས་ཅད་ཀུན་གྱི་རང་བཞིན་མ་ནོར་བ་ཉིད་ཇི་ལྟ་བ་བཞིན་དུ་གསལ་བར་བྱེད་པས་ན། ཆོས་ཐམས་ཅད་ཀྱི་མེ་ལོང་ཡང་ཡིན་ནོ།།

གཉིས་པ་ངེས་པ་དྲུག་བཤད་པ་ནི།

ཀུན་གྱི་རྩ་བ། ཞེས་པ་ནས། བྱ་བ་ག་ལ་ཡོད། །ཅེས་པའི་བར་གྱིས་བསྟན་ཏེ།

ཀུན་གྱི་རྩ་བར་རང་བྱུང་བས། །རང་བཞིན་ཅིས་ཀྱང་མ་བཅོས་པའོ། །ཀུན་ཤེས་རིག་པ་མི་ནུབ་པས།།

འོད་གསལ་སྣང་བས་ཕྱོགས་ཀུན་མཐོང་། །ཐམས་ཅད་དེ་ཉིད་དེར་འདུས་པས། །དངོས་མེད་ངོ་བོ་ཉིད་དུ་ཟད།།

དེ་བཞིན་ཉིད་དུ་ཀུན་གཅིག་པས། །གཉིས་སུ་བྱ་བའི་ཐ་སྙད་མེད། །རྒྱུ་ཉིད་འབྲས་བུར་ཡེ་རྫོགས་པས།།

རེ་དོགས་གཉིས་བྲལ་དེ་ཁོ་ནའོ། །དོར་བར་བྱ་བའི་དངོས་མེད་པས། །བླང་བར་བྱ་བ་ག་ལ་ཡོད།།

མན་ངག་ཡིན་པའི་རྗེས་སུ་ངེས་པའི་དོན་དྲུག་༼༤༥༽གིས་དེ་ཉིད་གསལ་བར་བསྟན་པའི་ཕྱིར། ཆོས་སོ་ཅོག་ཀུན་གྱི་གཞི་དང་རྩ་བ་སེམས་ཀྱི་ཆོས་ཉིད་འོད་གསལ་བ་ཉིད་རང་བྱུང་དུ་ཤར་བས་ན། ཐམས་ཅད་ཀྱི་ངོ་བོ་ལ་རང་བཞིན་གྱི་གཏན་ཚིགས་དང་ཆོས་ཉིད་ཀྱི་རིགས་པའི་དོན་གྱིས་བྱ་བ་ཐམས་ཅད་དང་བྲལ་བས། རང་བཞིན་ཅིས་ཀྱང་མ་བཅོས་པར་ངེས་ཏེ། མདོར་ན་ཆོས་ཐམས་ཅད་ཀྱི་རང་བཞིན་མ་བཅོས་པར་ངེས་པ་སྟེ། ངེས་པ་དང་པོ འོ། །སྤྱོད་ཡུལ་ཀུན་མ་འདྲེས་ཡོངས་རྫོགས་སུ་ཤེས་པའི་རིག་པ་ཕྱོགས་ལྷུང་མེད་པ་ཉིད་གཉིས་མེད་ཡེ་ཤེས་ཆེན་པོའི་ཀློང་དུ་མི་འགག་པར་གསལ་བའི་ཉི་མ་འཆར་ནུབ་མེད་པར་གདལ་བས་ཆོས་སོ་ཅོག་ཀུན་རང་འོད་གསལ་བར་སྣང་བས་ཕྱོགས་ཀུན་ཡོང་གི་འོད་གསལ་བར་མཐོང་བས་ན་ཡོང་གིས་འོད་གསལ་བར་ངེས་པ་སྟེ། གཉིས་པའོ། །དངོས་པོ་གཉིས་པའི་ཆོས་ཐམས་ཅད་ཀྱི་རང་བཞིན་ལྷུན་གྱིས་གྲུབ་པའི་དེ་བཞིན་ཉིད་དེར་འདུས་པས་ལྷག་མ་མེད་པར་སངས་རྒྱས་པ་ལ། མཐའ་གང་གིས་ཀྱང་མ་བསྒོས་ཏེ། དངོས་པོ་མེད་པའི་དེ་ཉིད་ཆེན་པོ་འབའ་ཞིག་ངོ་བོ་ཉིད་དུ་གསལ་བར་ཟད་པས། ཆོས་ཐམས་ཅད་ལྷུན་གྱིས་གྲུབ་པའི་ངང་དུ་ངེས་ཏེ། བདག་ཉིད་ཆེན་པོ་གཅིག་ཏུ་ལྷུན་གྱིས་གྲུབ་པར་ངེས་པ་སྟེ་གསུམ་པའོ། །ཆོས་ཉིད་མ་བཅོས་མ་བསླད་པའི་ངོ་བོ་དེ་བཞིན་ཉིད་དུ་ནི་ཡུལ་སེམས་སྣང་ཞེན་ཀུན་གྱི་རང་བཞིན་མཉམ་པར་གཅིག་པས། ལོག་ཞེན་ལ་གཉིས་སུ་སྣང་ཞིང་ཡུལ་དུ་བྱ་བའི་ཆོས་སོ་ཅོག་ཀུན། མ་སྤངས་པར་ཆོས་ཉིད་དུ་ནུབ་པ་ལ་ཐ་སྙད་ཅི་ཡང་མེད་པར་སྤྲོས་པ་ཀུན་དང་བྲལ་བའི་ཕྱིར་འཁོར་བ་ཆོས་ཉིད་དུ་ངེས་པ་སྟེ་བཞི་པའོ། །རྒྱུ་སེམས་ཅན་གྱི་སྒོ་གསུམ་ཉིད་སྣང་ལ་ངོ་བོ་མེད་པས་ཆོས་སྐུ་ཆེན་པོའི་འབྲས་བུར་ཡེ་རྫོགས་སུ་གསལ་བས། ཐོབ་ལྟུང་ལ་རེ་དོགས་གཉིས་དང་བྲལ་ཏེ། རྒྱུ་འབྲས་གཉིས་སུ་མེད་པའི་དེ་ཁོ་ན་ཉིད་དུ་ངེས་ཏེ་རྒྱུ་ཉིད་འབྲས་བུར་རྫོགས་པར་ངེས་པ་སྟེ་ལྔ་པའོ། །བཟང་ངན་དང་སྐྱོན་ཡོན་སྣང་གྲགས་ཀྱི་ཆོས་ཐམས་ཅད་དོར་བར་བྱ་བའི་དངོས་པོ་མེད་པར་གསང་བ་ཆེན་པོ་སེམས་ཀྱི་དཀྱིལ་འཁོར་འོད་གསལ་བ། དཀྱིལ་འཁོར་རྣམ་གསུམ་གྱི་ངོ་བོ་ཉིད་པས་གཞན་ནས་བླང་བར་བྱ་བ་ག་ལ་ཡོད་དེ་སྤང་བླང་གི་ཐ་སྙད་མ་སྤངས་ཡེ་ནས་བྲལ་བས་ན། སྐྱོན་དང་ཡོན་ཏན་བླང་དོར་མེད་པར་ངེས་པ་སྟེ་དྲུག་པའོ།།

གསུམ་པ་ཟིན་པ་དྲུག་བསྟན་པ་ནི།

མཐོང་ཟིན་སྦྱངས་ཟིན། ཞེས་པ་ནས། རྙེད་པ་ཉིད་ལས་བྱུང༌། །ཞེས་པའི་བར་གྱིས་བསྟན་༼༤༦༽ཏེ།

མཐོང་ཟིན་སྦྱངས་ཟིན་བྱས་པ་ཟིན། །འདོད་པ་གྲུབ་ཟིན་སྤྱོམ་པ་ཟིན།།

དེ་བཞིན་དངོས་པོར་གྲུབ་ཟིན་པས། །དེ་ཉིད་རྙེད་པ་ཉིད་ལས་བྱུང་།།

ཁས་བླངས་པའི་ཟིན་པ་དྲུག་གི་དོན་རྗེས་སུ་བསྟན་པ་གང་ཞེ་ན། ཡེ་ཤེས་ཆེན་པོ་རྒྱུན་ཆད་མེད་པར་རང་གསལ་བས་ཆོས་ཉིད་ཀྱི་ནམ་མཁའ་མཐོང་ཟིན། ཐུགས་རྗེ་ཆེན་པོ་རྒྱུན་དུ་འཆར་ཏེ། རྡོ་རྗེ་མཚོན་གྱིས་སྒྲིབ་པ་ཐམས་ཅད་ཡེ་ནས་བསྒྲལ་བས་འཁོར་བའི་སྡུག་བསྔལ་སྦྱངས་ཟིན། ཕྲིན་ལས་ལྷུན་གྱིས་གྲུབ་པས་སེམས་ཅན་རིལ་སངས་རྒྱས་ཀྱི་ས་ལ་མ་བཀོད་པར་རྫོགས་པའི་ཕྱིར་འགྲོ་བའི་དོན་བྱས་པ་ཟིན། སྐུ་དང་ཡེ་ཤེས་ཀྱི་འབྲས་བུ་རང་རིག་པ་ལ་ལྷུན་གྱིས་རྫོགས་ཏེ་དངོས་པོ་ཐམས་ཅད་ཆོས་ཉིད་དུ་ཤར་ནས་སྨོན་ལམ་རྒྱུན་དུ་གྲུབ་པས་འདོད་པ་གྲུབ་ཟིན། ཡེ་ཤེས་ཆེན་པོ་ལ་ཡོན་ཏན་ཐམས་ཅད་ལྷུན་གྱིས་གྲུབ་སྟེ་ བདག་ཉིད་ཆེན་པོ་ཟླ་མེད་པར་བྱུང་བས་ཡོན་ཏན་གྱི་ཆེ་བ་སྤྱོམ་པ ་ཟིན། དེ་བཞིན་དུ་ཁམས་གསུམ་སངས་རྒྱས་ཀྱི་ས་རུ་གྲོལ་ཏེ་ཆོས་ཅན་ཆོས་ཉིད་དང༌། སེམས་ཅན་མྱང་འདས་སུ་ཤར་བ་ལ་འབྲས་བུ་གཞན་དུ་རག་མ་ལས་པས་དངོས་གྲུབ་ཆེན་པོ་གྲུབ་ཟིན་པས་དོན་བླ་ན་མེད་པ་ཡང༌། ཡེ་ནས་དེ་ལྟ་བུའི་ངོ་བོ་ཉིད་དུ་གནས་པ་ཇི་ལྟ་བར་རྟོགས་ཏེ་གསང་བ་མཆོག་གི་དེ་ཁོ་ན་ཉིད་ཀྱི་ཉམས་རྙེད་ནས་གདེང་དུ་ཆུད་པ་ཉིད་ལས་སྐྱེས་ཆེན་དམ་པ་ལ་དེ་ལྟར་འབྲས་བུའི་དོན་རྣམས་རང་བྱུང་རང་ཤར་དུ་འཆར་བའོ། །དེ་ཉིད་ཅུང་ཟད་རྒྱས་པར་བཤད་ན། ཁྱུང་ཆེན་ལས། ཟིན་པས་ཆགས་དང་བྲལ་ཡང་ཞི། །དངོས་པོ་མེད་དང་རྣམ་པར་སྤངས། །བདུད་རྩི་ཆེན་པོའི་རང་བཞིན་ལ། །གཟའ་བའི་ཐབས་ལ་རག་པ་མེད། །ཅེས་དང༌། རིན་པོ་ཆེ་ཀུན་འདུས་ལས། དེ་བཞིན་ཡེ་ནས་བདུད་རྩིས་ཟིན་པ་ལ། །བྱས་པས་ཟིན་པར་ཡོང་མི་འགྱུར། །མ་ལུས་ཟིན་པར་གྱུར་ཏེ་དབྱིངས་རྟོགས་ན། །རྣམ་པར་ཀུན་བྱས་བྱང་ཆུབ་མཆོག་གི་ངང༌། །ཞེས་གསུངས་པ་ལྟར། རང་རིག་པ་ལྷུན་གྱིས་རྫོགས་པའི་དེ་བཞིན་ཉིད་མ་ནོར་བར་རྟོགས་ན། སེམས་ཅན་སངས་རྒྱས་སུ་བཀོད་པས་འགྲོ་དོན་ཡེ་ནས་བྱས་ཟིན། རང་བྱུང་དེ་བཞིན་ཉིད་ལ་རྒྱལ་བ་རིལ་མ་འདྲེས་ལ་ཡོངས་སུ་རྫོགས་པས་དཀྱིལ་འཁོར་ཡེ་ནས་བཀོད་ཟིན། སྟོང་གསུམ་ཡོངས་གྲོལ་གྱི་རང་བཞིན་པས། མཆོད་པ་ཡེ་ནས་ཕུལ་ཟིན། ཅི་བྱས་སངས་རྒྱས་ཀྱི་མཛད་པ་སྟེ་ཀུན་ཏུ་བཟང་པོའི་མཛད་པར་མ་གྱུར་པ་མེད་པས་སྤྱོད་པ་ཡེ་ནས་སྤྱད་ཟིན། ཐམས་ཅད་ཡེ་ཤེས་ཆེན་པོར་འཛིན་རྟོག་མེད་པར་རང་གསལ་བ་ལྟ་བས་རྟོགས་ཟིན། བདེ་བ་ཆེན་པོའི་ངང་ལ་དུས་གསུམ་དུ་འབྱུང་འཇུག་བྲལ་བས་༼༤༧༽བསྒོམ་པ་བྱས་ཟིན། ཇི་ལྟར་བྱས་ཀྱང་44ཐིག་ལེ་ཆེན་པོ་ལས་འདའ་བ་མེད་པས་དམ་ཚིག་བསྲུངས་ཟིན། ལྷུན་གྱིས་རྫོགས་ཏེ་དོན་གཞན་དུ་མ་ལུས་པས་བསྒྲུབ་པ་བྱས་ཟིན། སྣང་སྲིད་སྐུ་དང་ཡེ་ཤེས་སུ་རང་ཤར་བས་དངོས་གྲུབ་ཐོབ་ཟིན། སྐུ་གསུམ་བྱང་ཆུབ་ཀྱི་སེམས་ཉིད་པས་ཚོགས་རྫོགས་ཟིན། དུས་གསུམ་མཉམ་པ་ཉིད་ཀྱི་ཀློང་ལས་མ་ཉམས་པས་དངོས་གྲུབ་བརྩམས་ཟིན། ཡེ་ཤེས་རང་བྱུང་རྒྱལ་པོ་བགྲོད་དུ་མེད་པས་ས་ནོན་ཟིན། ཐམས་ཅད་བདག་ཉིད་ཆེན་པོར་སྣུམས་པས་དབང་རྫོགས་ཟིན། དེ་ལྟར་མཐའ་མ་སྤངས་པའི་ཡེ་ཤེས་གང་དང་ཡང་ལྷན་མི་གཅིག་པས། སྒྲིབ་པ་སྦྱངས་ཟིན། ཅིར་སྣང་ཕྱག་རྒྱའི་ངོ་བོ་བས། ཕྱག་རྒྱ་བཅིངས་བསྒོམས་བྱས་ཟིན། སྒྲར་སྣང་བ་རྒྱལ་བའི་གསུང་ཡིན་པས་བཟླས་བརྗོད་བྱས་ཟིན། ཡེ་གཉིས་སུ་མེད་པའི་གཟུངས་ཀྱི་རྒྱལ་མོ་དང་འདུ་འབྲལ་མེད་པས་སྦྱོར་བ་བྱས་ཟིན། བྱུང་ཚོར་རྟོག་པ་ཡེ་ཤེས་སུ་གསལ་བ་ལ་རྣམ་རྟོག་མིང་མེད་པས་བསམ་སྐྱོན་བཅོས་ཟིན། རང་བྱུང་ཆེན་པོ་ཅིར་ཡང་མ་འགགས་པར་ཤར་བས་རྟགས་ཐོན་ཟིན། རང་རིག་མཉམ་པའི་ཀླུང་དུ་གཉིས་མེད་པས་དྲོད་རྙེད་ཟིན། དེ་ལྟར་ཟིན་པའི་དོན་ཉི་ཤུས་གཏན་ལ་ཕེབས་ཟིན་པ་ལ། སུ་ཞིག་གིས་གང་ཞིག་ལ་བརྩལ་ཏེ། རྩོལ་བ་པོ་དང་བརྩལ་བ་ཀ་ནས་དག་གོ །ཞེས་བསམ་གཏན་མིག་གི་སྒྲོན་མ་ལས་གསུངས་པ་སོགས་རྫོགས་པ་ཆེན་པོའི་གཞུང་ལས་ཤེས་པར་བྱ་སྟེ། བདེ་འབྱམས་ལས་ཀྱང༌། བྱ་བ་མེད་པས་ཐིག་ལེ་བདེ། །དུས་གསུམ་མེད་པས་ཐིག་ལེ་བདེ། །བརྩལ་དུ་མེད་པས་ཐིག་ལེ་བདེ། །བརྩོལ་བར་འདོད་པས་དབྱིངས་མི་བསྐྱོད། །ཅེས་སོགས་ཚད་མེད་དོ།།

བཞི་པ་གཏན་ཚིགས་གསུམ་བཤད་པ་ནི།

ཀུན་བརྟགས་ཀུན་ཉིད། ཅེས་པ་ནས། གཅིག་ལས་མེད་པ་ཡིན། །ཞེས་པའི་བར་གྱིས་བསྟན་ཏེ།

ཀུན་བརྟགས་ཀུན་ཉིད་དབེན་ན་སྣང་། །ཀུན་ལ་སྦྱར་བས་དོན་བྱེད་ནུས། །ཐེ་ཚོམ་ཆད་པས་འཐུན་པར་སྣང་།།

མདོར་ན་གསུམ་ཉིད་ཁོ་ན་ལ། །ལར་ན་གཉིས་ཉིད་ཁོ་ནར་ཟད། །ངེས་པར་གཅིག་ལས་མེད་པ་ཡིན།།

མན་ངག་གཏན་ལ་དབབ་པའི་གཏན་ཚིགས་ཀྱི་དོན་བསྟན་པའི་ཕྱིར། ཚིགས་བཅད་གཅིག་དང་རྐང་པ་གཉིས་འདི་གསུངས་ཏེ། འདི་དག་སྤྱིར་ཐུན་མོང་གི་ཀུན་རྫོབ་ཀྱི་བདེན་པ་བརྟགས་པས་དབེན། མཐུན་པར་སྣང༌། དོན་བྱེད་ནུས་ཞེས་པ་གསུམ་དང༌། ཡང་དག་ལོག་པའི་ཀུན་རྫོབ་གཉིས་དང༌། མདོར་ཀུན་རྫོབ་སྒྱུ་མ་གཅིག་ལྟ་བུར་སྣང་ན་ཡང༌། འདིར་མན་ངག་ཟབ་མོའི་དོན་གྱིས་ངང་རང་བཞིན་བདག་ཉིད་ཆེན་པོ་གསུམ་དུ་འགྱུར་ཏེ། དངོས་པོ་གཉིས་པ་རིལ་ལྷག་པའི་རྣལ་འབྱོར་གྱི་ལུགས་ཀྱིས། ཀུན་༼༤༨༽ཏུ་བརྟགས་ཏེ་ཡུལ་དུ་ཞེན་པའི་ཆོས་སྣ་ཚོགས་སུ་སྣང་བ་བཟང་ངན་གཉིས་ཀའི་ངོ་བོ་ཀུན་བརྡ་ཡིས་ཕྱི་རོལ་དུ་འཛིན་ཞིང་ཞེན་པ་རིལ་དང་བཅས་པ་ཉིད་སྣང་རྟོག་བདོ་ཙམ་ན་མཉམ་པ་ཆེན་པོ་བྱང་ཆུབ་ཀྱི་སེམས་ལྷུན་གྱིས་གྲུབ་པའི་ངང་དུ་མཐའ་གང་གིས་ཀྱང་མ་རེག་པར་གསལ་བ་ནི་དབེན་པ་ཆེན་པོ་ཡིན་པས་ན་རང་བཞིན་ལྷུན་གྱིས་གྲུབ་པའི་སྣང་བའོ། །དེས་ན་ཀུན་ཏུ་བརྟགས་པའི་ཆོས་ཀུན་མི་རྟོག་པར་གསལ་བས་དབེན་ལ་དེས་ཀུན་ལ་ཁྱབ་པས་སྣང་བ་སྟེ། མ་གཡོས་པར་མཚོན་པས་ངང་གི་གཏན་ཚིགས་དང༌། དེ་ལྟ་བུའི་ངང་ཆེན་པོ་དེ་ནི་ངོ་བོ་ཐམས་ཅད་པའི་ཕྱིར་གང་དང་ཡང་མི་ཕྱེད་པས་ཀུན་ལ་སྦྱོར་ཞིང་ཀུན་ཏུ་སྣང་བ། དེ་ཉིད་རང་བཞིན་སྣ་ཚོགས་སུ་ཤར་བས་ཆོས་བཟང་བ་དང་ངན་པ་འཁོར་བ་དང་མྱ་ངན་ལས་འདས་པ་ཇི་སྙེད་དུ་སྣང་ལ་མ་འགག་པར་ཤར་ཡང༌། ངང་གི་དོན་གྱིས་རང་རང་གི་བྱས་པ་སྣ་ཚོགས་པས་འགྲོ་བའི་དོན་གྱི་བྱ་བ་བྱེད་ནུས་པ་རྣམས་ནི་རང་བཞིན་གྱི་ཆོས་སུ་གནས་པས་ཅིར་ཡང་སྣང་བར་མཚོན་པ་རང་བཞིན་གྱི་གཏན་ཚིགས་དང༌། དེ་ལྟ་བུའི་ངང་དང་རང་བཞིན་གཉིས་སུ་མེད་པའི་དོན་འདིར་ཐེ་ཚོམ་ཆད་ནས་ཐབས་ཁྱད་པར་ཅན་གྱིས་རྟོགས་པའི་གདེངས་རྙེད་དེ་རང་བཞིན་ངང་དུ་ཕེབས་པས། དངོས་པོ་ཐ་དད་པ་ཐམས་ཅད་རང་བྱུང་ཡེ་ཤེས་བདག་ཉིད་ཆེན་པོའི་ངོ་བོར་གཅིག་ཏུ་མཐུན་པར་རང་སྣང་ཞིང་ལྷག་པའི་ཆོས་སྐུ་ཆེན་པོར་གསལ་བ་ལ་དབྱེར་ མེད་མཚོན་པ་བདག ་ཉིད་ཆེན་པོའི་གཏན་ཚིགས་ཞེས་བྱ་སྟེ། ཕྱོགས་ཐ་དད་པའི་ཡུལ་དུས་ཀྱི་སྣང་བའི་རིས་དང་བྲལ་བའོ། དེ་ལྟར་ཡང༌། ཡེ་ཤེས་གསང་བ་ལས། བྱང་ཆུབ་སེམས་ཀྱི་ངོ་བོ་ནི། །དམན་པའི་སེམས་ཀྱིས་མི་རྟོགས་ཏེ། །གཏན་ཚིགས་གསུམ་གྱིས་ཤེས་པར་བྱ། །ངང་ནི་རིག་པ་གསལ་བ་སྟེ། །རང་བཞིན་རིག་པ་ཅིར་ཡང་སྣང༌། །བདག་ཉིད་སྣང་སྟོང་ཐ་དད་མེད། །བསྒྲུབ་བྱ་དག་གི་རང་བཞིན་ནི། །འཁྲུལ་པ་བྱང་ཆུབ་སེམས་སུ་ཤེས། །ཞེས་སོ། །མདོར་ན་ཨ་ཏི་ཡོ་གའི་ཆོས་རྣམ་གྲངས་ཇི་སྙེད་དུ་བཤད་པ་ཀུན་གྱི་མདོ་དེ་གསུམ་ཉིད་ཁོ་ན་ལ་འདུས་ཤིང༌། ཡང་ན་དཔེ་དོན་རྟགས་གསུམ་གྱིས་མཚོན་པར་ཡང་རུང་ལ། ལར་ནི་རང་བཞིན་ངང་དུ་ཕེབས་པས་མ་དམིགས་པའི་ཕྱིར། ངང་དང་བདག་ཉིད་ཆེན་པོ་གཉིས་ཉིད་ཁོ་ནར་ཟད་པའམ། ཀུན་ཏུ་བཟང་པོ་དང་བཟང་མོའམ། དབྱིངས་དང་ཡེ་ཤེས་གཉིས་སུ་༼༤༩༽འདུས་པར་ཡང་རུང་ངོ༌། །ངེས་པར་རང་བྱུང་གི་ཡེ་ཤེས་ བདག་ཉིད་ཆེན་པོ་གཅིག་ལས་མེད་པ ་ཡིན་པས་ཆོས་རྣམས་ཀྱི་དེ་ཁོ་ན་ཉིད་དེར་ལྷུན་གྱིས་རྫོགས་ པ་ལས་གཞན་རྡུལ་ཙམ་གྱིས་ཐ་སྙད་གདགས་པར་བྱར་ཡང་མེད་དེ། སྔ་མ་ལས། བདག ་ཉིད་ཆེན་པོའི་གཏན་ཚིགས་ཀྱིས། །ཐམས་ཅད་བྱང་ཆུབ་སེམས་སུ་ཤེས། །གང་ལྟར་གནས་ཀྱང་ཆོས་ཉིད་དོ། །ཞེས་སོ། །ཡང་ན་གཏན་ཚིགས་དྲུག་སྟེ། ངང་གིས་དབེན་པའི། དོན་བྱེད་ནུས་པའི། མཐུན་པར་སྣང་བའི། ངང་རང་བཞིན་བདག་ཉིད་ཆེན་པོ་གསུམ་དུ་འདུས་པའི། དབྱིངས་དང་ཡེ་ཤེས་གཉིས་སུ་འདུས་པའི།  བདག་ཆེན་པོ་གཅིག་ལས་མེད་པའི་གཏན་ཚིགས་རྣམས་སོ།།

ལྔ་པ ་དྲོད་རྟགས་དྲུག་བཤད་པ་ནི།

ཐམས་ཅད་འདིར་འདུས། ཞེས་པ་ནས། ཉིད་དེ་ཀུན་གྱི་མདོ། །ཞེས་པའི་བར་གྱིས་བསྟན་ཏེ།

ཐམས་ཅད་འདིར་འདུས་འདི་ལས་བྱུང་། །ཀུན་གྱི་རྩ་བ་འདི་ཤེས་ན།།

ཀུན་ཀྱང་མ་བཅོས་ཇི་བཞིན་པ། །དེ་བཞིན་ཉིད་དེ་ཀུན་གྱི་མདོ།།

དེ་ཅིའི་ཕྱིར་ཞེ་ན། དོན་གྱིས་གང་ཡང་མ་བཀོལ་བ་ཆེན་པོ་ནི་ཐམས་ཅད་ཀྱི་གཞིར་གྱུར་པས་སེམས་ཉིད་གསང་བའི་སྙིང་པོ་འདིར་ཆོས་ཀུན་འདུས་པའི་བདག་ཉིད་ཆེན་པོའི་ངོ་བོ་སྟེ། དེ་བས་ན་ཆོས་ཐམས་ཅད་ཀྱང་འདི་ལས་བྱུང་བས་ཀུན་གྱི་འབྱུང་གནས་སུ་གྱུར་པའི་མ་ནོར་ངེས་པའི་རྩ་བ་འདི་ཡི་དོན་ཇི་བཞིན་དུ་ཤེས་ཤིང་རྟོགས་ནས་གོམས་པར་བྱས་ན། དབུགས་དལ་བ་ལྟ་བུ་སྦྱོར་བ་ནང་གི་དྲོད་དང༌། ལུང་སྟོན་པ་ལྟ་བུ་མཚན་མ་ཕྱིའི་དྲོད་དང༌། ལྟ་བ་རྟོགས་པ་ལྟ་བུ་རིག་པ་རང་བཞིན་དྲོད་དང༌། ལམ་གོང་འོག་ཀུན་རིག་པ་ལྟ་བུ་རང་བཞིན་ལུང་གི་དྲོད་དང༌། རྟོགས་པའི་ངང་ལས་མི་འགྱུར་བར་གནས་པ་ལྟ་བུ་གནས་འགྱུར་ཆོས་ཉིད་ཀྱི་དྲོད་དང༌། བདུད་ཀྱི་སྤྱོད་ཡུལ་བཅོ་བརྒྱད་ལྟ་བུ་མངོན་སུམ་མཚན་མའི་དྲོད་ཀུན་ཀྱང་འབྱུང་ལ། ཇི་ལྟར་བྱུང་ཡང་མངོན་ཞེན་མེད་པར་དངོས་སྣང་རིལ་ཡང་འཕྲལ་དུ་བློས་མ་བྱས་པར་ཆོས་ཉིད་མ་བཅོས་པའི་ངོ་བོ་ཇི་བཞིན་པ་དེ་བཞིན་ཉིད་དུ་རང་གསལ་བ་ནི། རིལ་གྱི་བདག་ཉིད་ཆེན་པོ་ཡིན་པས་དེ་ཐམས་ཅད་ཀུན་གྱི་མདོ་ཆེན་པོ་ཤིན་ཏུ་རྣལ་འབྱོར་འདི་ཉིད་ཡིན་པ་བདུན་གྱིས་ཉམས་སུ་མྱོང་ན་དྲོད་རྟགས་དང་རྟོགས་པ་ཡོངས་ཀྱི་རྩ་བ་རྒྱལ་བའི་དགོངས་པ་ཀུན་འདུས་པའི་དོན་བླ་ན་མེད་པར་བསྟན་པ་ཡིན་ནོ།།

དྲུག་པ་ཡིད་ཆེས་བཅུ་གཉིས་བཤད་པ་ནི།

སྒྱུ་མར་ཀུན་སྣང༌། ཞེས་པ་ནས། ཡུལ་ན་བགྲོད་པ་མེད། །ཅེས་པའི་བར་གྱིས་བསྟན་ཏེ།

སྒྱུ་མར་ཀུན་སྣང་དངོས་གཞི་མེད། །ཆགས་པ་མེད་པས་ཡིད་མི་འཁྲུགས། །ནམ་མཁའི་ངང་ལ་རང་བཞིན་མེད། །རྟག་ཏུ་མེད་པས་དངོས་དང་བྲལ། །སྙིང་པོ་ཉིད་ལས་གཞན་པ་མེད། །སྣ་ཚོགས་དག་གི་རྒྱུན་དུ་འཆར། །སྒྲོན་མར་སྣང་བས་མུན་པ་སེལ། །ཡིད་བཞིན་ནོར་བུ་ཉིད་ལས་བྱུང་། །སྐྱེ་འགག་མེད་པས་འཇིགས་དང་བྲལ། །ཅིར་ཡང་མ་ངེས་ཉམ་མི་ང་། །ཆུབ་ན་བྱ་བཙལ་ཀུན་དང་བྲལ། །གོ་བའི་ཡུལ་ན་བགྲོད་པ་མེད།།

དེའི་དོན་ལ་ཡིད་ཆེས་པ་དག་རྣམ་གྲངས་བཅུ་གཉིས་ཀྱིས་༼༥༠༽གསལ་བར་བསྟན་པའི་ཕྱིར། ཚུལ་ཇི་ལྟ་བར་མཐོང་བ་དང་རྟོགས་པའི་རྟགས་ནི། བློ་དང་ལྡན་པས་ཆོས་ཐམས་ཅད་སྒྱུ་མ་ལྟ་བུར་རྟོགས་པ་ན། ཡོན་ཏན་ཀྱང་སྒྱུ་མར་དུས་ཀུན་ཏུ་སྣང་བས་སྐྱོན་ལ་དངོས་གཞི་མེད་པར་ཡིད་ཆེས། བྱམས་པ་ལ་ཆགས་པ་མེད་པས་སྡང་བ་ལ་ཡིད་མི་འཁྲུག་པར་ཡིད་ཆེས། སྣང་སྲིད་ཆོས་ཉིད་ཀྱི་ནམ་མཁའི་ངང་ལ་རོ་གཅིག་ཏུ་གནས་པར་རྟོགས་པས་དངོས་པོ་ལ་རང་བཞིན་མེད་པར་ཡིད་ཆེས། རིག་པ་སྣང་བའི་སྤྱོད་ཡུལ་དང་བྲལ་ཏེ་མཚན་མར་བརྟག་ཏུ་མེད་པ་ཉིད་པས་ཡུལ་སེམས་ཀྱི་དངོས་པོ་དང་བྲལ་བར་ཡིད་ཆེས་པའམ། ཕུང་པོ་ལ་བརྟག་ཏུ་མེད་པས་ཀུན་གཞི་ལ་དངོས་པོ་མེད་པར་ཡིད་ཆེས། འབྲས་བུའི་རྩ་བར་ཆོས་ཉིད་ཀྱི་སྙིང་པོ་ཀུན་གཞིར་གྱུར་པས། སེམས་ཉིད་ལས་སངས་རྒྱས་གཞན་པ་ལོགས་ན་མེད་པར་ཡེ་སངས་རྒྱས་པར་ཡིད་ཆེས། དྲན་རིག་སྣ་ཚོགས་སུ་རྒྱུ་བ་ཡེ་ཤེས་ཇི་སྙེད་པར་ལྷུན་གྱིས་གྲུབ་སྟེ་དུས་གསུམ་དུ་གསལ་བ་དག་གིས། ཐུགས་རྗེ་རྒྱུན་དུ་འཆར་བར་ཡིད་ཆེས། ཡེ་ཤེས་གསལ་བའི་སྒྲོན་མར་ཡིད་ཀྱི་མེ་ལོང་ཉིད་རང་སྣང་བས་མ་རིག་པའི་མུན་པ་མིང་མེད་དུ་སེལ་བར་ཡིད་ཆེས། ཡོན་ཏན་གྱི་འབྱུང་གནས་ཡིད་བཞིན་ནོར་བུ་ལྟ་བུར་ཀུན་གཞི་ཉིད་གྱུར་པས། དངོས་གྲུབ་རང་གི་རྩལ་ཉིད་ལས་བྱུང་བར་ཡིད་ཆེས། སེམས་ཉིད་ལ་སྐྱེ་འགག་གི་འཕོ་འགྱུར་མེད་པས་སྐྱེ་ཤི་ལ་འཇིགས་པ་དང་བྲལ་བར་ཡིད་ཆེས། ངོ་བོ་ཅིར་ཡང་མ་ངེས་པར་རྟོགས་ནས་གནས་ལ་ངེས་པ་མེད་པས་འཕོ་འགྱུར་ལ་ཉམ་མི་ང་བར་ཡིད་ཆེས། མ་རྟོགས་པ་རྟོགས་པར་བྱར་མེད་པར་ཡེ་སངས་རྒྱས་པའི་དོན་དུ་ཆུབ་པས་ན་ཤེས་པ་བྱ་བརྩལ་ཀུན་དང་བྲལ་ཏེ་རྩོལ་སྒྲུབ་བྱ་མི་དགོས་པར་ཡིད་ཆེས། དོན་ངེས་ནས་གོ་བའི་ཡུལ་རྟོགས་ན་ཁམས་གསུམ་སངས་རྒྱས་ཀྱི་ཞིང་ཡིན་པས། སའི་རིམ་པ་ལ་བསྒྲོད་པ་མེད་པར་ཡིད་ཆེས་པ་རྣམས་ཀྱི་དོན་ཏོ།།

བདུན་པ་དེ་དག་གི་དོན་རང་ལས་བྱུང་བར་བསྟན་པ་ནི།

དེ་ཉིད་ཆེན་པོའི་ཚིག ཅེས་པ་ནས། དོན་ཉིད་ཉིད་ལས་བྱུང༌། །ཞེས་པའི་བར་གྱིས་བསྟན་ཏེ།

དེ་ཉིད་ཆེན་པོའི་ཚིག་རེ་རེར། །རྒྱལ་བ་ཀུན་གྱི་དགོངས་པའི་རྒྱུད།།

གཞན་དུ་རྩ་བ་གསུམ་བཅད་ཀྱང་། །གསང་བའི་དོན་ཉིད་ཉིད་ལས་བྱུང་།།

དེ་ལྟ་བུའི་མན་ངག་རིན་པོ་ཆེ་ཇི་ལྟར་སྣང་ནས་བརྒྱུད་ཚུལ་ནི། དེ་ཁོ་ན་ཉིད་ཀྱི་དོན་ཆེན་པོའི་ཡང་ཆེན་པོ་ཁྱད་པར་ཅན་གྱི་གསང་བ་ཟབ་མོ་འདིའི་ཚིག་རེ་རེར་ཡང༌། རྒྱལ་བ་ཀུན་གྱི་དགོངས་པ་ལ་བརྒྱུད་དེ་དེ་ཁོ་ན་ཉིད་བྱིན་རླབས་ཀྱིས་རང་སྣང་བ་བཞིན་དང་མེ་ལོང་ལྟ་བུའོ། །རིག་འཛིན་རྣམས་ལ་༼༥༡༽རིག་པས་བརྒྱུད་པའང་ཚུལ་དེ་ཉིད་དེ་རང་གི་ངོ་བོ་རང་སྣང་བའོ། །དེ་དག་ནི་དོན་གཅིག་ལ་མཚོན་པའི་མིང་ཡང་གཅིག་གིས་ཕྱིར་ཚིག་རེ་རེར་བརྒྱུད་ཅེས་བསྙད་དེ་ཚིག་རྒྱས་པར་བསྙད་པ་མེད་དོ།།

གང་ཟག་ལ་རྣ་བས་བརྒྱུད་པ་ནི། མན་ངག་གི་ཚིག་མ་ནོར་བ་དམ་པའི་མཛོད་གསུམ་དུ་བརྒྱུད་དེ་སྙན་ཁུངས་བརྒྱུད་པའི་མན་ངག་གོ །དེ་ལྟ་བས་ན་སེམས་ཉིད་ལས་གཞན་དུ་བཙལ་ཏེ་ཐེག་པ་གཞན་གྱི་སྒོ་ནས་བློ་དང་གྲོས་དང་ཐབས་ཀྱི་རྩ་བ་གསུམ་གྱིས་རྩད་བཅད་པར་བྱས་ཀྱང་མི་རྙེད་དོ། །དེའི་ཕྱིར་མན་ངག་སྙན་ཁུངས་སུ་བརྒྱུད་པའི་གསང་བའི་དོན་ནི་གསང་སྔགས་ཀྱི་ཐེག་པ་འདི་ཉིད་ཁོ་ན་ལས་བྱུང་སྟེ། དེ་ཡང་མདོར་རང་རིག་པ་ཉིད་ལས་བྱུང་བའོ། །འདི་དག་ནི་རྫོགས་པ་ཆེན་པོའི་སྐབས་སུ་ཡང་མན་ངག་གི་སྙིང་པོ་དམ་པ་ཡིན་ཏེ། ལ་ཤན་ལྟ་བའི་སྒྲོན་མ་ལས། རྒྱས་པར་མདོ་བཞི་མེ་ལོང་དང༌། །ངེས་བདུན་ངེས་ཟིན་གཏན་ཚིགས་དྲུག །ཚུལ་གྱིས་ངེས་པ་བཅུ་གཉིས་སོགས། །གཞུང་འདིར་ཚད་མས་བལྟ་བར་བྱ། །ཞེས་གསུངས་སོ།།

གསུམ་པ་དེའི་གོལ་སྒྲིབ་བཤད་པ་ལ་དྲུག་སྟེ། གོལ་སྒྲིབ་ཀྱི་ངོ་བོ་བཤད་པ། གོལ་སྒྲིབ་ཀྱི་རྒྱུ་བཤད་པ། རྟོགས་པ་མེད་པར་གླེགས་བམ་བཅངས་ཀྱང་གོལ་བར་བསྟན་པ། གོལ་བ་ཉིད་ལ་བཟླ་བའི་ཐབས་བཤད་པ། རྟོགས་པས་ཇི་ལྟར་སྤྱད་ཀྱང་མི་འཆིང་ཞིང་གྲོལ་བར་བསྟན་པ། གོལ་སྒྲིབ་སྤོང་བ་བྱ་བ་བྱེད་པའི་རྣལ་འབྱོར་དུ་གོལ་བར་བསྟན་པའོ། །དང་པོ་ནི།

གང་ཞིག་གཞན་དུ། ཞེས་པ་ནས། རྟོག་པ་དེ་ཉིད་བགེགས། །ཞེས་པའི་བར་གྱིས་བསྟན་ཏེ།

གང་ཞིག་གཞན་དུ་གང་ཚོལ་བ། །དེ་ནི་གོལ་བའི་ལམ་དུ་ཞུགས། །རྣམ་རྟོག་མུན་པའི་སྒྲིབ་པས་བསྒྲིབས།།

གང་མ་རིག་པ་དེ་སྒྲིབ་ཡིན། །རྣམ་པར་རྟོག་པ་དེ་ཉིད་བགེགས།།

རྩ་བ་བར་མའི་དོན་གྱིས་རྗེས་སུ་གོལ་སྒྲིབ་བསྟན་པ་ནི། རྣལ་འབྱོར་པ་ཐ་ཤལ་གང་སུ་ཞིག་གིས་སེམས་ཉིད་རང་རིག་པ་ལས་གཞན་དུ་བསྙེགས་ཏེ་ལམ་དང་འབྲས་བུའི་དོན་ཟབ་མོ་གང་ཚོལ་བ་དེ་ཉིད་ནི། བདག་ཉིད་ཆེན་པོ་ལས་འཁྲུལ་པས་ཡུལ་འཛིན་གྱི་རྟོག་པར་གོལ་ནས་ནོར་བའི་ལམ་དུ་ཆུད་དེ་ལོག་པར་ཞུགས་པ་ཡིན་ནོ། །དེ་ཅི་སྟེ་ཞེ་ན། ཡུལ་གཞན་དུ་རྣམ་པར་རྟོག་པ་ནི་དོན་མཐོང་དུ་མི་སྟེར་བའི་མུན་པའི་སྒྲིབ་པར་གྱུར་པས་དེས་རྒྱུད་ནོན་ནས་རང་རིག་པའི་ཆོས་ཉིད་བསྒྲིབས་ཏེ་མ་མཐོང་བ་ནི་སྒྲིབ་པའི་ངོ་བོ འོ། །དེས་ན་དོན་ལ་བསྒྲིབས་བྱ་སྒྲིབ་བྱེད་མེད་ཀྱང༌། གང་ཆོས་ཉིད་རང་གསལ་དུ་མ་རིག་པར་ཡུལ་དུ་བྱེད་པ་དེ་ཉིད་ལྟ་བའི་སྒྲིབ་པ་ཡིན་ནོ། །དེ་བས་ན། ཆོས་ཉིད་མཚན་མར་བརྟག་ཏུ་མེད་པ་༼༥༢༽ལ་མཚན་མར་བརྟག་པའམ་དམིགས་པའི་ཡུལ་དུ་མེད་པ་ལ་ཡུལ་དུ་བྱེད་པའི་རྣམ་པར་རྟོག་པ་དེ་ཉིེད་ལ་མིང་དུ་ཡང་ཡང་དག་པའི་བར་ཆད་བྱེད་པས་བགེགས་ཞེས་བྱ་བ་ཡིན་པས་གོལ་སྒྲིབ་ཏུ་འཕྱན་པ་ཉིད་དེ། ངེས་དོན་མདོ་བཅུ་ལས། སྤྲོས་པ་མེད་པའི་དོན་ཤོར་བས། །མཚན་མ་དག་གི་ལམ་ལ་བགྲོད། །སྒྲོ་སྐུར་བྲལ་བའི་ཆོས་ཉིད་ལ། །ཚིག་དང་ཡི་གེར་བརྗོད་པས་གོལ། །བརྗོད་ཡོད་རྟོག་པ་སྒྲིབ་པ་ཡིན། །ཞེས་སོ།།

གཉིས་པ་གོལ་སྒྲིབ་ཀྱི་རྒྱུ་བཤད་པ་ནི།

བགེགས་ནི་དེ་ཉིད། ཅེས་པ་ནས། སྐྱོན་དང་གོལ་སྒྲིབ་ཡིན། །ཞེས་པའི་བར་གྱིས་བསྟན་ཏེ།

བགེགས་ནི་དེ་ཉིད་དེ་ལས་བྱུང་། །གང་ལ་རྣམ་རྟོག་མ་བྱུང་ན། །བདུད་ཅེས་བྱ་བ་ག་ལ་ཡོད།།

བདུད་ནི་གང་ལས་བྱུང་ཞེ་ན། །རྟག་ཏུ་འགྲུས་ལས་བྱུང་བ་ཡིན། །འགྲུས་མེད་ཉིད་ལས་བདུད་མི་འབྱུང་།།

ཅི་ཕྱིར་མི་འགྲུས་དེ་ཉིད་བདུད། །དེ་བཞིན་སྐྱོན་དང་གོལ་སྒྲིབ་ནི། །ཡོན་ཏན་ཉམས་དང་མཐོང་ལས་བྱུང་།།

གལ་ཏེ་ཡོན་ཏན་ཉམས་མཐོང་ན། །སྐྱོན་དང་གོལ་སྒྲིབ་ག་ལ་ ཡོད། །དེ་ཉིད་སྐྱོན་དང་གོལ་སྒྲིབ་ཡིན།།

དེ་ལ་གོལ་སྒྲིབ་ཀྱི་བགེགས་དེའི་རྒྱུ་ནི་དེ་ཁོ་ན་ཉིད་བརྟག་ཏུ་མེད་པ་ལ་རྣམ་པར་རྟོག་ཅིང་དོན་ཆེད་དུ་གཉེར་བ་ཉིད་ཡིན་པས་འཁྲུལ་རྟོག་དེ་ལས་བྱུང་བའོ། །དེས་ན་སྐྱེས་མཆོག་གང་སུ་ཞིག་ལ། བདག་ཉིད་མཉམ་པའི་དོན་ཉིད་ཡེ་ནས་ཡིན་པར་རྟོགས་ཏེ་དེ་ཉིད་དུའང་འཛིན་པ་མ་སྐྱེས་པར་རྣམ་པར་རྟོག་པ་གང་ཡང་མ་བྱུང་ན། གཉིས་སུ་རྟོག་པའི་བདུད་ཅེས་བྱ་བ་ག་ལ་ཡོད་དེ་མིང་ཡང་མེད་དོ། །དེའི་ཕྱིར་བདུད་ནི་གང་ལས་བྱུང་བ་ཡིན་ཞེ་ན། རྒྱུ་ཉེ་བར་བསྟན་པ་ནི། ཆོས་ཉིད་བཙལ་བའི་རྒྱུ་དང་བྲལ་བས་བསམ་དཔྱད་མེད་པར་རང་གསལ་བ་ལ། དེ་ལྟར་མ་ཤེས་པར་ཡང་དག་པའི་དོན་གཅིག་བཟུང་ནས་དེ་ལ་མངོན་དུ་འདྲིས་པར་རྩོལ་ཞིང་རྟག་ཏུ་བརྩོན་འགྲུས་བྱེད་པ་ལས་བྱུང་བ་ཡིན་ཏེ། དེ་ལ་བདག་ཉིད་ཆེན་པོར་མ་ཤེས་པའི་ཕྱིར་རོ། །དེས་ན་ཆོས་ཉིད་ བདག་ཉིད་ཆེན་པོར་ཤེས་ནས་དེ་ཉིད་དུའང་འདུ་ཤེས་མ་ཞུགས་པས་དངོས་སུ་རྩོལ་བསྒྲུབ་ཀྱིས་བརྩོན་འགྲུས་མེད་པ ་ཉིད་ལས་བདུད་གཞན་གང་ཡང་མི་འབྱུང་སྟེ་གཉིས་འཛིན་མེད་པའི་ཕྱིར་རོ། །འོ་ན་ཡལ་བ་ཁོ་ནར་འདུག་གོ་ཞེ་ན། དེ་ཡང་རིགས་པ་མ་ཡིན་ཏེ། ཅི་ཡི་ཕྱིར་ན། མི་བསྒོམ་པའམ་བསྒོམ་པ་ཡལ་བར་འདུག་པའང་མེད་པའི་དོན་མ་མཐོང་བར་བརྩོན་པའི་ཐབས་ཀྱིས་མི་འགྲུས་པར་སྙོམས་ལས་ཀྱི་ལེ་ལོ་བྱེད་པ་དེ་ཉིད་ནི་དོན་མི་མཐོང་བའི་གཏན་ཚིགས་ཀྱིས་བདུད་ཅེས་བྱ་བར་བསྙད་དེ་ཡལ་བར་མི་འདུག་གོ །འོ་ན་བསྒྲིམ་མོ་ཞེ་ན། ཇི་ལྟར་བཤད་པ་དེ་བཞིན་དུ་སྐྱོན་དང་གོལ་སྒྲིབ་དག་ནི་ཆོས་ཉིད་ལ་བཟང་ངན་གྱི་ཐ་སྙད་ཡེ་གྲོལ་བའི་ཕྱིར་དེ་ཉིད་དུ་བརྗོད་བསམ་བྱར་ཡང་མེད་པ་ལ་མཚན་མ་དང་བྲལ་བའི་ཆོས་ཉིད་མཉམ་པ་ཆེན་པོ་ཞེས་བྱ་བ་ཞིག་ཡོན་ཏན་དུ་༼༥༣༽བཟུང་བས་མཉམ་པ་ཉིད་ཡུལ་དུ་མཐོང་ནས་དང་དུ་ལེན་པ་ལས་བྱུང་བ་ཡིན་ནོ། །འོ་ན་ཐབས་མ་ནོར་བའི་དོན་གྱི་ངོ་བོ་ཉིད་གང་ཞེ་ན། གལ་ཏེ་སྐྱེས་བུ་དམ་པ་སུ་ཞིག་གིས་ལྟ་ངན་དེ་ལས་རྒྱལ་ནས། ཆོས་ཉིད་དོན་གྱི་གནས་ལུགས་དཀྱིལ་འཁོར་གསུམ་དབྱེར་མེད་ཀྱི་ངོ་བོར་ཡོན་ཏན་ལྷུན་གྱིས་གྲུབ་པར་རྫོགས་པ་དེ་ཉིད་ལ་ཡང་དེར་དམིགས་པའི་ཐ་སྙད་དང་ཡང་བྲལ་བར་གྱུར་ཏེ་མཉམ་ཉིད་ཆེན་པོ་ཡུལ་དུ་མཐོང་བ་མེད་པས་ན་དེ་ཉིད་དུ་ལྟ་ཞིང་སེམས་རྗེས་སུ་འབྲང་བའང་མེད་པར་མངོན་དུ་མི་བྱེད་དེ། འདུ་ཤེས་གང་དུའང་མ་ཞུགས་ཏེ་ཅིར་ཡང་མ་གཡོས་པའི་རྟོགས་པ་མཐའ་དབུས་དང་བྲལ་བའི་དགོངས་ཉམས་ཤར་སྲིད་པ་ལ་ནི། འཁྲུལ་བགེགས་ཀྱི་སྐྱོན་དང་གོལ་སྒྲིབ་ག་ལ་ཡོད་དེ། གཉིས་ལྟ་གཏན་ནས་དག་པའི་ཕྱིར། བཙལ་ཡང་མི་རྙེད་དོ། །དེ་བས་ན་ཆོས་ཟབ་མོ་ལ་སྤྱོད་པའི་སྐལ་ལྡན་དག་ནི་ཅི་ལའང་འཛིན་པ་མེད་དེ། དེ་ཉིད་ཆེད་དུ་བྱ་བ་དང་ཡང་བྲལ་བ་ཁོ་ནའོ། །དེའི་ཕྱིར་བྱ་བས་མ་བསླབ་པ་མེད་པ་དེ་ཉིད་ལ་ཆེད་དུ་བྱེད་ནའང༌། རྩོལ་སྒྲུབ་ཀྱིས་ནོར་བས་སྐྱོན་དང་དོན་མི་མཐོང་བས་གོལ་སྒྲིབ་ཀྱི་བགེགས་ཆེན་པོ་ཡིན་ཏེ། གཉིས་སུ་འབྱེད་པའི་ཕྱིར། ངེས་དོན་མདོ་བཅུ་ལས། དེས་ན་སྒྲོ་སྐུར་གོལ་སྒྲིབ་འདི། །ཡོད་རྟོག་གང་ཟག་བློ་ལ་སྣང༌། །རྟོག་འདས་ཏིང་འཛིན་བསམ་བྲལ་ལ། །གོལ་སྒྲིབ་ཡོད་པར་ངས་མ་གསུངས། །ཞེས་དང༌། རང་གི་རང་བཞིན་མ་ཤེས་ན། །སྒྲིབ་པ་སྒྲིབ་པ་ཞེས་སུ་བཤད། །རང་གི་རང་བཞིན་མ་ཤེས་ནས། །འོག་མ་འོག་མ་ཡིན་སྨྲ་བ། །གོལ་ས་གོལ་ས་ཞེས་སུ་བཤད། །ཞེས་སོ། །དེ་བས་ན་ཅིར་ཡང་བསམ་ཞིང་དཔྱད་ཚོལ་མེད་པར་ཕྱི་མོའི་ཆོས་ཉིད་དུ་བློ་མ་ཕབ་པར་ཕེབས་ཟིན་ནས་ཀློང་ནས་གསལ་བར་འདུག་གོ།

གསུམ་པ་རྟོགས་པ་མེད་པར་གླེགས་བམ་བཅངས་ཀྱང་གོལ་བར་བསྟན་པ་ནི།

གང་ཉིད་མངོན་དུ། ཞེས་པ་ནས། ཐབས་མེད་གནས་ངན་འཁྱམས། །ཞེས་པའི་བར་གྱིས་བསྟན་ཏེ།

གང་ཉིད་མངོན་དུ་མ་གྱུར་ན། །གསང་བའི་དོན་འབྱུང་གང་བསྲེལ་ཡང་།།

ནད་པ་སྨད་བསྲེལ་ཐབས་མེད་བཞིན། །ངེས་པའི་ཐབས་མེད་གནས་ངན་འཁྱམས།།

དེ་བས་ན་རྟོགས་པས་ཐག་ཆོད་པ་གཅེས་ཏེ། ཇི་ལྟར་ཞེ་ན། གང་ཟག་གང་གིས་ཆོས་ཉིད་ཇི་བཞིན་པའི་ངོ་བོ་རང་རིག་པའི་མངོན་སུམ་དུ་མ་གྱུར་ཏེ་རྟོགས་པས་ཐག་མ་ཆོད་ན། གསང་བའི་དོན་རང་བྱུང་གི་ཡེ་ཤེས་མཚོན་པའི་ཟབ་མོའི་ལུང་གི་པོ་ཏི་དང་གླེགས་བམ་གང་ཇི་སྙེད་པ་འཆང་ཞིང་བསྲེལ་ན་ཡང་ཕན་པ་མེད་དེ། དཔེར་ན་ནད་པ་ཞིག་གིས་སྨན་མང་པོ་སྲེལ་ནས་ཡོད་ཀྱང་རང་གིས་ནད་ལ་བཏང་བའི་ཐབས་མི་ཤེས་ན་ནད་༼༥༤༽ཀྱིས་འཆི་བ་ལས་མེད་པ་བཞིན་དུ། ཚིག་ཙམ་ལ་བརྟེན་ཡང་དོན་ངེས་པར་རྟོགས་ནས་བྱང་ཆུབ་སྒྲུབ་པའི་གདམས་ངག་གི་ཐབས་མེད་ན་འཁོར་བའི་གནས་ངན་དུ་ལྟུང་ནས་འཁྱམས་པར་འགྱུར་བ་ལས་གྲོལ་བར་མི་ངེས་སོ། །དེ་ཡང་དོན་ཟབ་མོ་ལ་བསྐུལ་བའི་ཕྱིར་གསུངས་ཏེ་བཅངས་པའི་བསོད་ནམས་འགོག་པ་ནི་མ་ཡིན་ནོ།།

བཞི་པ་གོལ་བ་ཉིད་ལ་བཟླ་བའི་ཐབས་བཤད་པ་ནི།

ཡུལ་དང་མཚན་མ། ཞེས་པ་ནས། མུན་ཁུང་ཇི་བཞིན་ནོ། །ཞེས་པའི་བར་གྱིས་བསྟན་ཏེ།

ཡུལ་དང་མཚན་མ་དངོས་པོ་དང་། །དྲན་རྟོག་མཐོང་ཐོས་ཇི་སྙེད་ཀུན། །ཡིད་ལ་ཇི་ལྟར་འགྱུས་པ་བཞིན།།

དེ་ཉིད་སྐད་ཅིག་དེ་ལྟར་སྣང་། །རྟག་ཏུ་མི་གནས་སྐད་ཅིག་མ། །མི་ནུབ་མ་ཆགས་བདེ་ཆེན་སེམས།།

སེམས་ཀྱི་དབྱིངས་ལས་མ་གཏོགས་པ། །གཞན་ཞེས་གང་ཡང་མེད་པས་ན། །གོལ་སྒྲིབ་བྱ་བ་ག་ལ་ཡོད།།

སུ་ཞིག་གོལ་སྒྲིབ་དོན་དུ་གཉེར། །གང་གིས་གོལ་སྒྲིབ་ཇི་ལྟར་སྙེད། །གོལ་སྒྲིབ་ཉིད་ཀྱང་དེ་ཉིད་དབྱིངས།།

བཙལ་བས་དེ་ཡང་དེ་ལ་ཐུག །གཞན་དུ་བཙལ་ཞིང་དེ་ལས་བྱུང་། །བལྟས་པས་མཐོང་བ་རྟོགས་པ་མེད།།

འཇའ་སྣང་མུན་ཁུང་ཇི་བཞིན་ནོ།།

མཐོང་ཐོས་ལ་སོགས་པའི་གཟུགས་སྒྲ་སོགས་ཇི་སྙེད་པའི་ཡུལ་རྣམས་དང༌། ཡོད་སྟོང་སོགས་མཚན་མ་དང༌། སྣང་བརྟགས་ཀྱི་དངོས་པོ་དང༌། ཡིད་དང་མཚུངས་པའི་དྲན་རྟོག་དང་མིག་གི་རྣམ་ཤེས་དང་རྣ་བའི་རྣམ་ཤེས་ཀྱིས་མཐོང་ཐོས་ལ་སོགས་པའི་རྟོག་ཚོགས་ཇི་སྙེད་པ་ཀུན་ཡིད་ཀྱི་རྣམ་ཤེས་ལས་དྲན་པ་དང་མཚུངས་པར་ལྡན་པའི་རྟོག་པ་ཉིད་ཇི་ལྟར་འགྱུས་པ་བཞིན་དུ་སེམས་ཀྱི་ཀུན་རྟོག་དེ་ཉིད་སྐད་ཅིག་མའི་ངོ་བོར་ཤེས་པ་ཉིད་དེ་ལྟར་སྣང་བའི་ཕྱིར་རྟག་པ་མེད་པར་ཡུན་དུ་མི་གནས་བཞིན་སྐད་ཅིག་མ་ཉིད་རྒྱུན་རིང་བར་ཡིད་མྱུར་བའི་རྣམ་པར་མི་རྟག་པར་སྣང་བ་ཅན་ནོ། །དེའི་རང་བཞིན་ཇི་ལྟ་བུ་ཞེ་ན། འཁྲུལ་པའི་དུས་སུ་སྐད་ཅིག་མའི་རྒྱུན་དེ་ཉིད་ཀྱི་དོན་རྟོགས་ན་ངོ་བོ་བྱང་ཆུབ་ཀྱི་སེམས་སྤྱོད་ཡུལ་ཀར་དག་པས་རྒྱུད་དུ་སྐྱེ་བ་མེད་པའི་ཕྱིར་མི་ནུབ་པ་དང༌། དུས་གསུམ་དུ་རྟག་པ་ཆེན་པོ་ཟིན་ཆགས་མེད་པས་མ་ཆགས་པ་ལ། ཉོན་མོངས་པ་ཉིད་བདེ་བ་ཆེན་པོ་སེམས་ཉིད་མཉམ་པའི་ཀློང་དུ་གསལ་བ་ལ་གཡོ་ཞིང་མཐའ་ལ་ཐུག་པ་མེད་པའི་འཇིང་ཆེན་པོ་སེམས་ཀྱི་ཆོས་ཉིད་རང་གི་དབྱིངས་ལས་མ་གཏོགས་པ། དེར་མ་འདུས་པའི་ཆོས་གཞན་ནོར་འཁྲུལ་ཞེས་བྱ་བ་གང་ཡང་མེད་དེ་བཙལ་ཡང་མི་རྙེད་པས་ན། གོལ་སྒྲིབ་ཞེས་བྱ་བ་ག་ལ་ཡོད་དེ་ཀ་ནས་མ་གྲུབ་པས་དཔེར་ན་གསེར་ས་ལེ་སྦྲམ་བཞིན་ནོ།།

དེ་བས་ན་དེ་ལྟ་བུའི་ངང་རྙེད་པའི་རྣལ་འབྱོར་པ་གང་སུ་ཞིག་གིས་གོལ་ས་དང་སྒྲིབ་པ་དོན་དུ་གཉེར་ཏེ་ཆེད་དུ་བཙལ་ཡང་ཚོལ་བ་པོ་གང་གིས་གོལ་སྒྲིབ་ཇི་ལྟར་རྙེད་དེ་མི་རྙེད་པས་གཉེན་པོས་བཅོས་ཤིང་དགག་ཏུའང་མེད་དོ། །ཅི་སྟེ་ཞེ་ན། གོལ་སྒྲིབ་ལས་བཀོལ་བའི་ཆོས་ཉིད་མེད་དེ། གོལ་སྒྲིབ་དེའི་རང་བཞིན་ཉིད་ཀྱང་དེ་ཁོ་ན་ཉིད་ཀྱི་དབྱིངས་ཡིན་ལ། དེ་ལྟར་གོལ་སྒྲིབ་རྩད་བཅད་དེ་བཙལ་བས་དེ་རང་ཡང་ཡེ་ཤེས་མཉམ་པའི་ངང་དེ་ལ་ཐུག་པས། གཞན་དུ་༼༥༥༽བཙལ་ཞིང་ལོགས་སུ་བཟུང་ཡང་གོལ་སྒྲིབ་ཉིད་སེམས་ཀྱི་ཀློང་དེ་ཉིད་ལས་ཤར་ནས་བྱུང་བ་ཡིན་པས། གོལ་སྒྲིབ་ཡུལ་དུ་སྣང་བ་ཉིད་ལ་རང་བཞིན་བརྟགས་ཤིང་བལྟས་པས་དེའི་དོན་གྱི་ངོ་བོ་མཐོང་བ་དང་རྟོགས་པའི་ལྟ་བས་མ་ཟིན་ཏེ་མཐའ་ལས་གྲོལ་བ་ཉིད་ལ་རང་བཞིན་བསྟན་དུ་མེད་པ་ནི། དཔེར་ན་ནམ་མཁའི་འཇའ་ཚོན་སྣང་བ་ལ་ངོ་བོ་མི་རྙེད་པ་དང་ཁང་སྟོང་གི་མུན་ཁུང་ལ་སྒྲོན་མེ་བཏེགས་ཏེ་བཙལ་ཡང་རྫས་མེད་པ་ཇི་ལྟ་བ་བཞིན་ནོ།།

ལྔ་པ་རྟོགས་པས་ཇི་ལྟར་སྤྱད་ཀྱང་མི་འཆིང་ཞིང་གྲོལ་བར་བསྟན་པ་ནི།

དེ་ཉིད་མཐོང་བའི། ཞེས་པ་ནས། དེར་སྦྱངས་ལམ་གནས་མཆོག །ཅེས་པའི་བར་གྱིས་བསྟན་ཏེ།

དེ་ཉིད་མཐོང་བའི་ཁྱད་པར་ལས། །སྤྱོད་ལམ་དངོས་གཞི་གང་སྤྱད་གང་།།

བཅིངས་པར་མི་འགྱུར་གྲོལ་འགྱུར་ཐབས། །ཐམས་ཅད་དེར་སྦྱངས་ལམ་གནས་མཆོག།

དེ་ལྟར་ཆོས་ཉིད་མཉམ་པའི་དབྱིངས་དེ་ཉིད་ཇི་ལྟ་བར་མཐོང་ནས་ངང་ལ་གནས་པའི་ཁྱད་པར་གྱི་ཆོས་དང་ལྡན་པས་རིལ་མཉམ་པའི་ཀློང་ལས་གཡང་ས་མེད་པར་ཐག་ཆོད་པའི་རྣལ་འབྱོར་ཆེན་པོས། སྒོ་གསུམ་གྱི་སྤྱོད་ལམ་འཁོར་བའི་དངོས་གཞི་སྤྱད་པར་བྱ་བ་ལྔ། མི་སྤང་བ་ལྔ། དང་དུ་བླང་བ་ལྔ། འདོད་ཡོན་ལྔའམ། ཡང་ན་འགྲོ་ཉལ་འདུག་འཆག་སོགས་གང་ལྟར་སྤྱད་ཀྱང་ཟིན་ཆགས་མེད་པས་འཆིང་བར་མི་འགྱུར་ཞིང་བག་ཆགས་ཀྱིས་གོས་པ་མེད་པར་གྲོལ་བར་འགྱུར་བ་ནི། སྤྱོད་ལ་མི་འཆིང་པའི་ཐབས་ཆེན་པོ་རྨད་དུ་བྱུང་བའོ། །དེ་ལྟར་ཆོས་ཐམས་ཅད་ཀྱི་ངོ་བོ་རིལ་ཆོས་ཉིད་དེར་སྦྱངས་ཏེ་ཀུན་ཏུ་བཟང་མོའི་སྤྱོད་པས་ཡོངས་སུ་དག་པ་ནི་ལམ་ལ་གནས་པ་རྣམས་ཀྱི་རྣལ་འབྱོར་མཆོག་གི་སྤྱོད་པ་སྟེ། རྣལ་འབྱོར་གྱི་ཡང་ཐོག་གསུམ་ལ་གནས་པའོ།།

དྲུག་པ་གོལ་སྒྲིབ་སྤོང་བ་བྱ་བ་བྱེད་པའི་རྣལ་འབྱོར་དུ་གོལ་བར་བསྟན་པ་ནི།

གང་ཉིད་དོན་གྱིས། ཞེས་པ་ནས། རྟོག་པ་ཡོངས་མ་ཆོམས། །ཞེས་པའི་བར་གྱིས་བསྟན་ཏེ།

གང་ཉིད་དོན་གྱི་རྗེ་ཚོལ་ཞིང་། །གོལ་སྒྲིབ་ཡོངས་སུ་གཅོད་འདོད་པའི། །མཐའ་སེལ་རྣལ་འབྱོར་སེམས་དཔའ་ལ། །གང་ལ་ཞེན་པའི་ཕྱོགས་བཟུང་སྟེ། །དབུས་མཐར་ལྟ་བ་དེ་བཟུང་བས། །ཆོག་པའི་ངེས་བློ་བརྟན་པ་ཅན། །དེ་ཀུན་རྣལ་འབྱོར་ཡིན་མོད་ཀྱི། །ཡང་དག་དོན་ལ་རྣལ་མི་འབྱོར། །སྤྱོད་ལམ་རྣལ་དུ་འབྱོར་མོད་ཀྱི། །ཡང་དག་དོན་དུ་ཡོང་མ་འབྱོར། །ཕྱོགས་སུ་ལྟ་བ་ཞེན་མོད་ཀྱི། །དམ་པའི་དོན་དུ་ཡོང་མ་ཞེན། །བློ་བུར་ལས་རོ་ཚོར་མོད་ཀྱི། །ཆོས་ཉིད་ཀྱི་ནི་རོ་མ་ཚོར། །བདག་མེད་ཕྱོགས་བྲལ་ཟེར་མོད་ཀྱི། །ཕྱོགས་སུ་ལྟ་དང་ཡོངས་མ་བྲལ། །བརྟུལ་ཞུགས་རྟོགས་པ་ཆོམ་མོད་ཀྱི། །གཟུང་འཛིན་རྟོག་པ་ཡོངས་མ་ཆོམས།།

རྨད་དུ་བྱུང་བའི་དོན་མ་མཐོང་བའི་སྤྱོད་ཡུལ་བསྟན་པའི་ཕྱིར། དེ་ལྟ་བུའི་གནས་མ་ཆུད་པའི་ལམ་པ་གང་སུ་ཉིད་དོན་གྱི་ངོ་བོ་ཡུལ་དུ་བྱས་ནས་དེ་ལྟར་མཚོན་པའི་ཚིག་གི་རྗེས་སུ་དཔྱོད་པས་དོན་ཚོལ་ཞིང་གྲུབ་མཐའ་རྟོག་པས་གོལ་སྒྲིབ་སེལ་ཞིང་ཡོངས་སུ་གཅོད་པར་འདོད་པའི་རང་རང་གི་གྲུབ་མཐའ་འཛིན་པ་དག གཅིག་དུ་བྲལ་ལ་སོགས་པའི་གཏན་ཚིགས་ཀྱིས་ཡོད་མེད་རྟག་ཆད་འགྲོ་འོང་གཅིག་དུ་མ་ལ་སོགས་པ་མཐའ་ཀུན་སེལ་བའམ་བསལ་ཞིང་སྤོང་ནས་དེ་དག་དང་བྲལ་བ་ལ་བློ་གནས་པར་བྱེད་པ་དབུ་མ་པ་དང༌། ལྷན་ཅིག་དམིགས་ངེས་ལ་སོགས་པའི་གཏན་ཚིགས་ཀྱིས་ཆོས་ཀུན་སེམས་སུ་སྒྲུབས་ནས་གཟུང་འཛིན་གྱིས་སྟོང་པའི་རང་རིག་པའི་དོན་ལ་གནས་པར་འདོད་པ་རྣལ་འབྱོར་༼༥༦༽སྤྱོད་པའི་སེམས་དཔའ་སེམས་ཙམ་པ་ལ་སོགས་པ་རྣམས་ནི། རང་རང་གི་བསམ་པས་གཟུང་བའི་ལྟ་བ་གང་ལ་མོས་པ་ལྟར་སྣང་བ་དང་སྟོང་པ་དང་སྣང་སྟོང་གཉིས་དང་གཉིས་སུ་མེད་པ་ལྟ་བུ་གང་རུང་རེ་ལ་ཞེན་པའི་ཕྱོགས་བཟུང་སྟེ། དབུས་མཐར་ཕྱེ་ནས་མཐའ་དང་བྲལ་བའམ་མཐའ་དབུས་དང་བྲལ་བར་རྟོགས་པས་ལྟ་བ་ལ་དམིགས་ཏེ་དོན་དེ་མི་གཏོང་བར་བཟུང་བས་ཐབས་དེ་ཉིད་ཀྱིས་ཆོག་པར་བྱས་པའི་ཕྱོགས་གཅིག་གི་ལམ་ལ་ངེས་པའི་བློ་གྲོས་བརྟན་པ་ཅན་ཤིན་ཏུ་ལྷན་ཅིག་པའི་དོན་ལའང་ཀླན་དཀའ་བ་དང་ལྡན་པའི་ཨ་ནུ་ཡོ་ག་མན་ཆད་ཀྱང་རྫོགས་པ་ཆེན་པོ་ལ་ལྟོས་ན་ད་དུང་ངེས་པ་མ་རྙེད་པའི་ཕྱིར། རྒྱུའི་མི་རྟོག་པ་ལ་རྗེས་སུ་འཇུག་པའི་རྣལ་འབྱོར་དེ་ཀུན། རང་རང་གི་ལྟ་བའི་དོན་ལ་འདྲིས་པས་བསྒོམ་པའི་བྱ་བ་བྱེད་པའི་རྣལ་འབྱོར་ཡིན་མོད་ཀྱི་ཡང་གསང་སྔགས་ཆེན་པོ་ཇི་བཞིན་པ་བྱ་བསམ་མེད་པའི་ཀློང་དུ་མ་ཕེབས་པས་ཡང་དག་མཆོག་གི་དོན་ལ་རྣལ་དུ་མི་འབྱོར་ཏེ་ད་དུང་ཆེད་དུ་འདྲིས་གོམས་ཀྱི་ཡུལ་ཅན་ནོ། །དེ་བཞིན་དུ་རང་རང་གི་ཆོས་སྤྱོད་ཀྱི་སྤྱོད་ལམ་བཞིར་ཏིང་ངེ་འཛིན་དྲན་པ་ལ་བཏགས་ནས་རྣལ་དུ་འབྱོར་བས་བརྟན་པར་མངོན་དུ་བྱེད་མོད་ཀྱི། ཡེ་སྤྱོད་ཆེན་པོ་ཐུན་མཚམས་མ་སྤངས་བྲལ་བས་ཡེངས་སྒོམ་གཉིས་ཀའི་ཐ་སྙད་དང་བྲལ་བ་ཡང་དག་པའི་དོན་བླ་ན་མེད་པ་ཉིད་དུ་བློ་ངེས་པར་ཡོངས་སུ་མ་འབྱོར་ཏེ། མངོན་དུ་འདོད་པའི་འཇིག་རྟེན་གྱི་ནད་དང་མ་བྲལ་ལོ། །རང་རང་གི་བདེན་པ་གཉིས་ཕྱེ་ནས་དོན་དམ་པ་ཞིག་ཡུལ་དུ་བྱས་པའམ། རང་གཞུང་ལ་གྲགས་པའི་བདེན་གཉིས་ཀྱི་ལྟ་བའམ་གཉིས་མེད་ལ་སོགས་པ་ཕྱོགས་སུ་ལྟ་བ་དེ་ཉིད་ལ་བློ་གསལ་བར་འདོད་དེ་ཞེན་པས་མི་འབྲལ་བར་བརྟན་པ་ཐོབ་མོད་ཀྱི། གསང་སྔགས་མཆོག་གི་ལྟ་བ་མེད་པའི་ལྟ་བ་མཉམ་པ་ཆེན་པོ་དམ་པའི་དོན་དུ་ཡོངས་སུ་མ་ཞེན་པས་ཡང་དག་པར་མི་མཐོང་ངོ༌། །འཕྲལ་སྣང་གློ་བུར་དུ་སྤྱད་པའི་དགེ་བའི་ལས་རྣམས་དང༌། ཏིང་ངེ་འཛིན་ལ་ཆེད་དུ་བརྩལ་བའི་རོ་མྱང་ཞིང་ཚོར་མོད་ཀྱི། གསང་སྔགས་བླ་ན་མེད་པའི་ཆོས་ཉིད་མཉམ་པ་ཆེན་པོའི་དོན་གྱི་ངོ་བོ་ནི་ཉམས་དང་ཏིང་ངེ་འཛིན་གྱི་རོ་མྱོང་ཚོར་དང་བྲལ་བ་ཡིན་པས་དེ་ལྟར་ངེས་པའི་དོན་ཆེན་པོའི་རོ་མཆོག་ཉིད་མ་ཚོར་བས་མཐར་ཐུག་གི་བདེན་པ་མ་མཐོང་ངོ༌། །སོ་སོར་རྟོག་པའི་ཤེས་རབ་ཀྱིས་རྩད་བཅད་དེ་༼༥༧༽གྲུབ་མཐའ་རྙེད་པས། ཚིག་ཏུ་བདག་མེད་གཉིས་རྟོགས་ཀྱི་ལྟ་བ་ཕྱོགས་རིས་སུ་སྣང་བ་ཐམས་ཅད་དང་བྲལ་བ་ཉིད་དོ། །ཞེས་སྨྲ་ཞིང་ཟེར་མོད་ཀྱི། མདོ་སྡེ་བདེན་པ་རེ་འཇོག་དང༌། ས་བཅུའམ་གསང་སྔགས་ཨ་ནུ་མན་ཆད་གཉིས་མེད་ལ་ད་དུང་སེམས་དམིགས་པ་དང་མ་བྲལ་བ་ཉིད་ལྟོས་པའི་ཕྱོགས་ལྟ་ཉིད་པས་ཆོས་ཉིད་ཀྱི་ཕྱོགས་སུ་ལྟ་བ་དང་ཡོངས་སུ་མ་བྲལ་བའོ། །ཁྱད་པར་དུ་ཡང་ས་བརྒྱད་པའི་སེམས་དཔའ་དང༌། མ་ཧཱ་ཡོ་ག་ལ་སོགས་པ། གནས་འགྱུར་ཐོབ་པའམ། ཐབས་ཀྱི་བརྟུལ་ཞུགས་དང་ལྡན་པས་གཙང་སྨེ་དང་བཟང་ངན་དུ་འཛིན་པའི་རྟོག་པ་ཆོམས་ནས་མི་གནས་མོད་ཀྱི། ཆོས་ཉིད་ཡུལ་དུ་བྱེད་དེ་ཆེད་དུ་བྱས་པའི་གཟུང་འཛིན་གྱི་རྟོག་པ་ཡོངས་སུ་མ་ཆོམས་པས། ཞེན་པ་ལ་བལྟས་པའི་གཟུང་འཛིན་ལ་གནས་ཏེ། ཀུན་འདུས་ལས། བྱང་ཆུབ་དེ་ཡང་མི་དམིགས་ཏེ། །མི་གནས་ཞེས་ནི་གང་བརྗོད་ཀྱང༌། །གནས་དང་དམིགས་པའི་དོན་འཛིན་པ། །གཟུང་འཛིན་ཞེས་ནི་དེ་ལ་བྱ། །ཞེས་སོ། །དེ་བས་ན་ཐེག་པ་ཀུན་ལ་མཁས་པར་བྱས་ཏེ། གསང་བ་ཟབ་མོའི་དགོངས་པའི་མཐིལ་ལོན་པ་ནི་ཤིན་ཏུ་གཅེས་ཏེ། དེ་ཉིད་ལས། གཞན་ཡང་འདུས་པའི་རྣལ་འབྱོར་རྣམས། །དོན་གྱིས་རྗེས་ནི་ཚོལ་འདོད་ན། །ཚིག་འགའ་ཐོས་པ་ཙམ་གྱིས་ནི། །ཆོག་པའི་འདུ་ཤེས་མ་སྐྱེད་ཅིག །ཅེས་གདམས་པར་མཛད་དོ།།

གཉིས་པ་ཏིང་ངེ་འཛིན་བཤད་པ་ལ་གཉིས་ཏེ། རིམ་གྱིས་པའི་ཏིང་ངེ་འཛིན་བསྟན་པ། གཅིག་ཆར་བའི་ཏིང་ངེ་འཛིན་བཤད་པའོ། །དང་པོ་ལ་ལྔ་སྟེ། བློ་བཞག་ཐབས་བསྟན་པ། སྐྱོན་ངོས་གཟུང་བ། དེའི་བཅོས་ཐབས་བཤད་པ། ཏིང་ངེ་འཛིན་གྱི་ངོ་བོ་བསྟན་པ། དེ་ལྟར་གོམས་པའི་དྲོད་རྟགས་བཤད་པའོ། །དང་པོ་ནི།

དབུས་མཐར་རྟོག་པའི། ཞེས་པ་ནས། ལོངས་སྤྱོད་རྫོགས་བདག་པོ། །ཞེས་པའི་བར་གྱིས་བསྟན་ཏེ།

དབུས་མཐར་རྟོགས་པའི་རྣལ་འབྱོར་པ། །བརྗོད་པའི་ཚིག་ལམ་སྒྲོན་མ་ཡིས། །ཡང་དག་དབུ་མའི་གསེར་ཚོལ་བ། །45འདོད་སྤྲེའུ་འདི་གཟུང་བྱས་ནས། །རྐུན་པོའི་བྱི་ལ་གདགས་པར་བྱ། །བསེར་ཁུང་སྐར་ཁུང་ཀུན་བཀག་སྟེ། །རེའུ་ཆ་འཕང་འཕུང་བཤིག་ནས་ནི། །རྒྱལ་པོའི་དཀོར་མཛོད་ཁ་ཕྱེ་ནས།།

དེ་དག་ལོངས་སྤྱོད་རྗོགས་པའི་བདག།

རྒྱུའི་ཐེག་པའི་དམིགས་པའི་བསྒོམ་ལུགས་ལ་བརྟེན་ནས་གསང་སྔགས་རིམ་འཇུག་གི་ཚུལ་གྱིས་མཐར་དོན་གྱི་ངོ་བོ་ལ་སྦྱོར་བའི་བཞག་ཐབས་བསྟན་པའི་ཕྱིར། དོན་གཞན་ལ་དགོངས་པ་དང་བརྡ་ཡི་སྒོ་ནས་འཆད་དེ། དེ་ལྟར་དབུས་མཐར་འབྱེད་པ་ལ་རྟོག་ཅིང་དོན་གྱི་རྗེས་སུ་བློ་འབྲངས་ཏེ་རྩོལ་བར་བྱེད་པའི་རྣལ་འབྱོར་པ་དག་གིས། ཐོས་བསམ་གྱི་ཤེས་རབ་ཀྱི་སྒོ་ནས་རྒྱུད་དོན་བརྗོད་པའི་ཚིག་གི་ལམ་གྱི་སྒྲོན་མ་ལྟ་བུ་༼༥༨༽ལ་བརྟེན་པ་ཡིས་ཡང་དག་དབུ་མའི་དོན་མཆོག་གསང་བའི་དབྱིངས་ཀྱི་ངོ་བོ་གསེར་ས་ལེ་སྦྲམ་དང་འདྲ་བ་ཉིད་ཚོལ་བ་ན། ལྟ་བས་ཇི་བཞིན་དུ་རྙེད་པའི་དོན་ལ། བསྒོམ་པའི་གོམས་པར་བྱས་ནས་འབྲས་བུའི་གསེར་སྦྱང་བཙོ་མ་མངོན་པར་བྱེད་འདོད་པ་རྣམས་ཀྱིས། ཀུན་ཏུ་འཇུག་པའི་ཡིད་ཤེས་གཏོགས་འདོད་སྤྲེལ་དང་འདྲ་བ་འདི་ཉིད་དྲན་རིག་དང་དམིགས་པའི་ཀ་བ་ལ་བཏགས་ཏེ་བཟུང་བར་བྱས་ནས་བསྒོམ་སྟེ། དེའང་སྤྲེའུ་ལ་ཆོས་གསུམ་སྟེ། ཀུན་ལ་འཇུག་པ་དང༌། གཅོལ་ཆུང་བ་དང༌། སྤྲེའུ་གཅིག་གིས་སྐར་ཁུང་ཀུན་ཁྱེད་པ་ལྟར། ཡིད་ལའང་ཆོས་གསུམ་སྟེ། ཡུལ་ཀུན་ལ་འཇུག་པ་དང༌། རིགས་པའི་དོན་ལ་གཏད་དུ་མི་འཇུག་པར་དོན་མ་ཡིན་པ་ལ་གཏད་པ་དང༌། ཡིད་གཅིག་གིས་སྒོ་ལྔ་ཀུན་ཁྱེད་པའོ། །དེ་བཞིན་དུ་ཉོན་མོངས་པ་ཅན་གྱི་ཡིད་རྐུན་མོ་བྱི་ལ་དང་འདྲ་བ་འདི་ཉིད་སྔ་མ་ལྟར་རྟོག་པའི་རྒྱུ་འགྲུལ་བཟུང་སྟེ།  བདག་མེད་དོན་གྱི་ངོ་བོ་རང་རིག་པའི་ཕུར་པ ་ལ་གདགས་པར་བྱས་ཏེ་དོན་མཐོང་བར་བྱ་སྟེ། དཔེར་ན་བྱི་ལ་ལའང་ཆོས་གསུམ་སྟེ། སྦར་མོ་བསྒུམ་ནས་སུས་མི་ཚོར་བར་བྱེད་པ་དང༌། མི་འགུལ་བར་བསྐུམ་ནས་སྡོད་པ་དང༌། དོན་དུས་ལ་བབ་ནས་འཛིན་པ་ལྟར། ཉོན་ཡིད་ལའང་ཆོས་གསུམ་སྟེ། བག་ལ་ཉལ་བར་གནས་པ་དང༌། དུས་ལ་མ་བབ་བར་དུ་མི་འཛིན་པ་དང༌། འཛིན་ནས་མི་གཏོང་བའོ། །དེ་ལྟར་སྒོ་ལྔ་ཕྱི་ནང་གསལ་བར་བྱེད་པས་གསེང་ཁུང་སྐར་ཁུང་ལྟ་བུ་ཀུན་ཚོགས་ལྔའི་རྣམ་ཤེས་སུ་ཤར་ཏེ་སྒོ་རྣམས་ནས་ཅུང་ཟད་ཀྱང་ཡུལ་ལ་འཕྲོར་མི་གཞུག་པར་བཀག་སྟེ་ངང་ལ་གནས་པ་དང་། ཕུང་ཁམས་སྐྱེ་མཆེད་སོ་སོའི་བག་ཆགས་རེའུ་ཆ་ཕང་ཕུང་ལྟ་བུ་ཀུན་གཟུང་འཛིན་གྱི་རྟོག་པའི་ཕུང་པོ་མི་དམིགས་པར་བདག་འཛིན་མེད་པའི་ངང་དུ་བཀོལ་ཏེ་བཤིག་ནས་ནི། ཀུན་གཞི་སེམས་ཀྱི་ཆོས་ཉིད་བྱང་ཆུབ་ཀྱི་སེམས་རྟོགས་ནས་འདོད་རྒུ་མི་ཟད་པར་འབྱུང་བས་རྒྱལ་པོའི་དཀོར་མཛོད་ལྟ་བུ་ཁ་ཕྱེ་ནས་གནས་ལུགས་མཉམ་པ་ཆེན་པོ་ཡོན་ཏན་ལྷུན་གྱིས་གྲུབ་པའི་ཆོས་ཉིད་གསལ་བར་བྱེད་ན། སོ་སོའི་གཞུང་དུ་བསྒོམ་པའི་རྣལ་འབྱོར་དེ་དག་གི་འབྲས་བུ་དཀྱིལ་འཁོར་གསུམ་དབྱེར་མེད་ཀྱི་དོན་ལ་མ་བཅོས་ངང་གིས་གདལ་བས་ཡང་དག་པར་ལོངས་སྤྱོད་ཀུན་རྫོགས་པའི་བདག་ཉིད་ཆེན་པོ་སངས་རྒྱས་ཀྱི་གོ་འཕང་དམ་པ་༼༥༩༽ཉིད་མངོན་དུ་གྱུར་པ་ཡིན་ནོ། །དེའང་དང་པོ་དང་གསུམ་པ་ཞི་གནས་ཀྱི་རྣལ་འབྱོར་དང༌། གཉིས་པ་དང་བཞི་པ་ལྷག་མཐོང་གི་རྣལ་འབྱོར་ཡིན་པར་ཀུན་གཟིགས་རོང་ཟོམ་པཎྜི་ཏས་གསུངས་སོ། །དེ་སྐད་དུ། རྩ་བའི་རྒྱུད་ལས་ཀྱང༌། ཐོས་པ་ཚིག་གི་སྒྲོན་མ་ཡིས། །ཡང་དག་དོན་གྱི་གསེར་བཙལ་ན། །གཏོགས་འདོད་སྤྲེའུ་འདི་བཟུང་ནས་ཀྱང༌། །རྐུན་མོ་བྱི་ལ་བཏགས་བྱས་ཏེ། །གསེར་ཁུང་སྐར་ཁུང་ཀུན་བཀག་ཅིང༌། །ཁང་སྟོང་ཕང་ཕུང་བཤིག་ནས་ནི། །རྒྱལ་པོའི་དཀོར་མཛོད་ཁ་ཕྱེ་ནས། །དེ་དག་རྟག་ཏུ་སངས་རྒྱས་ཡིན། །ཞེས་སོ།།

གཉིས་པ་སྐྱོན་ངོས་གཟུང་བ་ལ་གཉིས་ཏེ། ངོ་བོ་བཤད་པ། ཉེས་དམིགས་བསྟན་པའོ། །དང་པོ་ལ་གསུམ་སྟེ། རྟོག་པའི་སྐྱོན་བསྟན་པ། གཡེང་བའི་སྐྱོན་བཤད་པ། སྒྲིབ་པའི་སྐྱོན་བསྟན་པའོ། །དང་པོ་ནི།

ཡང་དག་དབུ་མའི། ཞེས་པ་ནས། གཏམས་དང་བན་བུན་གཉིས། །ཞེས་པའི་བར་གྱིས་བསྟན་ཏེ།

ཡང་དག་དབུ་མའི་ལམ་ཚོལ་བ། །རྟོག་པའི་སྐྱོན་ལྔ་སྤང་བར་བྱ། །རྟོགས་པ་རགས་པའི་རི་བོ་དང་། །མཚན་མ་རྒྱུ་བའི་ཚོར་བ་དང་། །བྱུང་ཚོར་འབྱུང་བ་རྣམ་པ་ལྔ། །དེ་ཡང་འདི་ལྟར་རྟོག་པར་བྱེད། །རྟོགས་པ་ལ་ཡང་གཉིས་ཡོད་དེ། །རགས་པ་དང་ནི་ཕྲ་བའོ། །དེ་བཞིན་མཚན་མ་ཆེ་ཆུང་གཉིས། །རྒྱུ་བ་རིང་པོ་ཐུང་ངུ་གཉིས། །ཚོར་བ་གསལ་བ་མི་གསལ་བ། །བྱུང་ཚོར་མྱུར་བ་བུལ་བའོ། །འདི་ནི་དོན་ལ་སྒྲིབ་པ་ཡི། །རྟོག་པ་ཆེན་པོའི་གེགས་ཆེན་ཡིན། །ཅི་ཕྱིར་དབུང་ཉིད་མི་མཐོང་ཕྱིར། །མུན་པ་དང་ནི་འཁྲིག་པ་དང་། །ཀུན་ཏུ་གཏིབས་དང་སྤྲིན་ཕུང་དང་། །བན་བུན་ལྟ་བུར་འཐིབས་པ་ཡི། །དཔུང་ཉིད་མི་གསལ་མཐོང་མི་འགྱུར། །འདི་ཡང་རྣམ་པ་གཉིས་གཉིས་ཏེ། །མུན་པ་ནག་པོ་ཆེན་པོ་དང་། །ཀུན་ནས་འཐིབས་པ་ལྟ་བུ་སྟེ། །ཡོངས་སུ་འཁྲིག་དང་བསྒྲིབ་པ་དང་། །འཐིབས་པ་ཆེན་པོ་ཆུང་ངུ་གཉིས། །སྤྲིན་ཆེན་འཐིབས་དང་འལ་འོལ་དང་།།

ན་བུན་གཏམས་དང་བན་བུན་གྱིས།།

དེའི་དུས་སུ་སྒོམ་སྐྱོན་དངོས་ལས་སེམས་བཅོས་པའི་ཐབས་ནི། ཡང་དག་དབུ་མའི་ལམ་གྱིས་དོན་ཚོལ་བ་རྣམས་ཀྱིས་ཆོས་ཉིད་མཉམ་པའི་ངང་ལ་འདྲིས་པར་བྱེད་པའི་ཚེ། རྣམ་པར་རྟོག་པའི་སྐྱོན་འདི་ལྔ་སྤང་བར་བྱ་སྟེ། རྣམ་པའི་སྒོ་ནས་བཞག་པའི་རྟོག་པ་རགས་པའི་རི་བོ་དང༌། འཛིན་པས་ཕྱེ་བའི་མཚན་མ་དང༌། རྒྱུན་གྱིས་བཞག་པའི་རྒྱུ་བ་དང༌། ཉམས་མྱོང་གི་བཞག་པའི་ཚོར་བ་དང༌། སེམས་ཀྱི་བྱུང་ཚོར་འབྱུང་འཇུག་གིས་ཕྱེ་བ་དང་རྣམ་པ་ལྔ་ཡིན་ནོ། །དེ་ཡང་འདི་ལྟར་གཉིས་གཉིས་སུ་རྟོག་པར་བྱེད་དེ། རྣམ་པས་ཕྱེ་བའི་རྟོག་པ་གཞིག་དཀའ་བ་ལ་ཡང་གཉིས་ཡོད་དེ། རགས་པ་དང་ནི་ཕྲ་བའོ། །དེ་བཞིན་དུ་འཛིན་པས་ཕྱེ་བས་མཚན་མ་ལ་ཡང་འདུ་ཤེས་ཀྱི་དབང་གིས་ཆེ་བ་དང་ཆུང་བ་གཉིས་དང༌། དྲན་འཛིན་གྱི་ཡུན་གྱིས་ཕྱེ་བའི་རྒྱུ་བ་ལ་ཡང་རྒྱུན་རིང་པོ་དང་ཐུང་ངུ་གཉིས་དང༌། ལུས་ཀྱི་མྱོང་བས་ཕྱེ་བའི་ཚོར་བ་ལའང་གསལ་བ་དང་མི་གསལ་བ་གཉིས་དང༌། སེམས་ཀྱི་འབྱུང་འཇུག་གིས་ཕྱེ་བའི་བྱུང་ཚོར་ལའང་མྱུར་བ་དང་བུལ་བ་གཉིས་ཏེ་བཅུའོ། །འདི་དག་ནི་ཆོས་ཉིད་ཡང་དག་པའི་དོན་ལ་སྒྲིབ་སྟེ་མཐོང་དུ་མི་སྟེར་བ་ཡི་རྣམ་པར་རྟོག་པ་ཆེན་པོའི་བདུད་བགེགས་རྟོགས་པའི་གེགས་ཆེན་པོ་ཡིན་ནོ། །དེ་ཡང་དཔེ་ཡིས་གསལ་བར་བསྟན་པའི་ཕྱིར། དེ་ཁོ་ན་ཉིད་མཐོང་དུ་མི་སྟེར་བ་གཏན་ཚིགས་ཅིའི་ཕྱིར་ཞེ་ན། ཆོས་ཉིད་དོན་གྱི་༼༦༠༽ངོ་བོའི་དབུས་ཉིད་མི་མཐོང་བར་བྱེད་པའི་ཕྱིར་ཏེ། རྟོག་པའི་དཔེ་མུན་པ་ལྟ་བུ་དང་ནི་མཚན་མའི་དཔེ་དཔྱིད་ཀྱི་དུས་རླུང་དམར་འཁྲིགས་པ་ལྟ་བུ་དང༌། རྒྱུ་བའི་དཔེ་ཆར་སྤྲིན་ཀུན་ཏུ་འཐིབས་པ་ལྟ་བུ་དང༌། ཚོར་བའི་དཔེ་སྤྲིན་ཕུང་འཁྱིལ་བ་ལྟ་བུ་དང༌། བྱུང་ཚོར་གྱི་དཔེ་ན་བུན་དཀྲིགས་པ་ལྟ་བུས་སྒྲིབ་པ་ཡིས་ཆོས་ཉིད་དོན་གྱི་དབུས་ཉིད་མི་གསལ་བར་སྒྲིབ་པའི་སྐྱོན་གྱིས་ཡང་དག་པར་མཐོང་བར་མི་འགྱུར་བའི་ཚུལ་དེ་བས་ན་སྒྲིབ་པར་བྱེད་པའོ། །འདི་ལྔ་ལ་ཡང་རྣམ་པ་གཉིས་གཉིས་ཏེ། དོན་གྱི་ཤུགས་ཀྱིས་དཔེ་དང་གྲངས་རྗེས་སུ་མཐུན་པར་འགྱུར་བས། རྟོག་པ་མཚོན་པའི་མུན་པའི་རིགས་ལའང༌། རྟོག་པ་ཕྲ་བ་དང་མཚུངས་པའི་མུན་པ་དང༌། རགས་པ་དང་འདྲ་བའི་མུན་ནག་ཆེན་པོ་ལྟ་བུ་གཉིས་དང༌། མཚན་མ་མཚོན་པས་འཁྲིགས་པ་ལའང༌། མཚན་མ་ཆེན་པོ་དང་མཚུངས་པར་དཔྱིད་ཀྱི་དུས་སུ་ཤིན་ཏུ་རླུང་ཆེན་ཀུན་ཏུ་ལྡང་ནས་འཐིབས་པ་ལྟ་བུ་དང༌། ཆུང་ངུ་དང་འདྲ་བར་རླུང་ཡོངས་སུ་འཁྲིགས་པ་དང་མཐུན་པར་བསྒྲིབས་པ་དང༌། རྒྱུ་བ་མཚོན་པས་ཆར་སྤྲིན་ལའང༌། རྒྱུ་བ་རིང་པོ་དང་མཚུངས་པར་ཆར་སྤྲིན་དྲག་པོ་ཤིན་ཏུ་འཐིབས་པས་སྒྲིབ་པ་ཆེན་པོ་དང༌། ཐུང་ངུ་དང་འདྲ་བར་ཆར་སྤྲིན་ཆུང་ངུ་འཐིབས་པ་ལྟ་བུ་གཉིས་དང༌། ཚོར་བ་མཚོན་པས་སྤྲིན་ལའང༌། ཚོར་བ་གསལ་བ་དང་མཚུངས་པར་ཆར་ཆད་དེ་སྤྲིན་གྱི་ཕུང་པོ་ཆེན་པོ་འཐིབས་པ་དང༌། མི་གསལ་བ་དང་འདྲ་བར་འལ་འོལ་དུ་འཁྱིལ་བ་ལྟ་བུ་གཉིས་དང༌། བྱུང་ཚོར་མཚོན་པས་ན་བུན་ལའང༌། བྱུང་ཚོར་མྱུར་བ་དང་མཚུངས་པར་སྤྲིན་སངས་ཏེ་ན་བུན་གྱིས་ཀུན་ཏུ་གཏམས་པ་དང༌། བུལ་བ་དང་འདྲ་བར་ན་བུན་བན་བུན་ཙམ་གྱིས་སྒྲིབ་པ་ལྟ་བུ་གཉིས་ཏེ། དེ་ལྟར་སྒྲིབ་ཚབས་ཆེ་ཆུང་གིས་རྣམ་པར་བཞག་པའོ། །ཕྱག་དཔེ་ལ་ལར། བན་བུན་གྱིས། ཞེས་བཞུགས།

གཉིས་པ་གཡེང་བའི་སྐྱོན་བཤད་པ་ནི།

ཚིགས་བཅད་གཅིག་གི་འོག་ནས། སྒྲིབ་པར་གྱུར་པའི། ཞེས་པ་ནས། རབ་ཏུ་གསལ་བར་འདོད། །ཅེས་པའི་བར་གྱིས་བསྟན་ཏེ།

བསྒྲིབ་པར་གྱུར་པའི་མུན་ནག་ནི། །མཚན་མའི་གཡེང་བ་དྲུག་ཏུ་གནང་།།

རང་བཞིན་ཕྱི་ནང་མཚན་མ་དང་། །ཡིད་ལ་བྱེད་དང་གནས་ངན་ལེན། །འདི་དག་རབ་ཏུ་གསལ་བར་འདོད།།

དོན་མཐོང་དུ་མི་སྟེར་བའི་སྒྲིབ་པར་གྱུར་པའི་མུན་ནག་ལྟ་བུའི་གཡེང་བ་དྲུག་ནི། ཕྱི་ནང་གི་མཚན་མའི་ཡུལ་ལ་གཡེང་བ་རྣམ་པ་དྲུག་ཏུ་སྣང་བ་རྣམས་ཏེ། སྒོ་ལྔ་ལ་མཉམ་བཞག་གཏན་མེད་པས་སམ། ཆེད་བྱས་མེད་པར་ཡིད་ཕྱི་རོལ་རྗེས་སུ་འཕྲོ་བ་རང་བཞིན་གྱི་གཡེང་བ་དང༌། ཡིད་ཀྱི་རྣམ་ཤེས་འདོད་ཡོན་གྱི་ལོངས་སྤྱོད་ལ་འཕྲོ་ཞིང་ཡུལ་༼༦༡༽གྱི་རོ་མྱོང་བ་ཕྱི་ཡི་གཡེང་བ་དང༌། བྱིང་རྒོད་དུ་གྱུར་པའམ་ཏིང་ངེ་འཛིན་གྱི་རོ་ལ་ཆགས་པ་ནང་གི་གཡེང་བ་དང༌། གྲགས་པ་འདོད་པའི་ཕྱིར་དགེ་སྦྱོར་བྱེད་པ་དང་དམིགས་རྩོལ་གྱི་སྐབས་ལེན་པར་བྱེད་པ་མཚན་མ་ཉིད་ཀྱི་གཡེང་བ་དང༌། དེ་ཁོ་ན་ཉིད་ལ་འདུ་ཤེས་ཀྱིས་གཟུང་བའམ། ཐེག་པ་གོང་མའི་དོན་བསྒོམ་པའི་ཚེ། འོག་མའི་དོན་ཡིད་ལ་བྱེད་པ་དང༌། ཏིང་ངེ་འཛིན་སྔ་མ་བཏང་ནས་ཕྱི་མ་ཡིད་ལ་བྱེད་པ་རྣམས་ཡིད་ལ་བྱེད་པའི་གཡེང་བ་དང༌། ང་དང་བདག་འཛིན་མ་བྲལ་བར་བདག་ཏུ་བཟུང་ནས་ངའོ་སྙམ་པ་ལ་བརྟེན་ཏེ་དགེ་བ་ལ་འཇུག་པ་ཡང་གནས་ངན་ལེན་གྱི་གཡེང་བ་སྟེ། འདི་དག་ཀྱང་ཅི་ཡང་ཡིད་ལ་མི་བྱེད་པའི་ཐབས་ཀྱིས་སྤོང་ཞིང་རབ་ཏུ་བསལ་ནས་རྟོགས་པའི་ཡེ་ཤེས་གསལ་བར་འདོད་དོ།།

གསུམ་པ་སྒྲིབ་པའི་སྐྱོན་བསྟན་པ་ནི།

གང་དུ་དབུ་མ། ཞེས་པ་ནས། སེམས་དཔའི་རྣལ་འབྱོར་འདོད། །ཅེས་པའི་བར་གྱིས་བསྟན་ཏེ།

གང་དུ་དབུ་མ་ཉིད་ལྟ་ཚེ། །དབུ་མའི་ལམ་ལ་སྒྲིབ་པའི་སྐྱོན། །རྣམ་པ་ལྔ་བྱུང་གང་སྒྲིབ་པ།།

བྱུང་ཚོར་བྱིང་རྨུགས་འཛིན་ཆགས་དང་། །ཐེར་ཟུག་ཕྱལ་བའི་དབང་གིས་ན།།

གཡེངས་དང་འཐིབས་དང་འགོག་པ་དང་། །རྟོགས་དང་མེད་པ་ཁོ་ན་ཡིན།།

འདི་དག་དབུ་མའི་སྐྱོན་ཡིན་ཞེས།།དབུ་མར་སེམས་དཔའི་རྣལ་འབྱོར་འདོད།།

སྐབས་གང་ཞིག་ཏུ་དབུ་མ་ཉིད་ཀྱི་དོན་ལ་ལྟ་ཞིང་ཆོས་ཉིད་བསྒོམ་པའི་ཚེ་ན། དབུ་མའི་ལམ་ལ་བར་དུ་གཅོད་ཅིང་སྒྲིབ་པའི་སྐྱོན་གྱི་རྣམ་གྲངས་རྣམ་པ་ལྔ་བྱུང་ནས་དོན་གྱི་ངོ་བོ་གང་ཉིད་སྒྲིབ་པར་བྱེད་པ་ནི། ཡིད་ཀྱི་རྣམ་པའི་བྱུང་ཚོར་དང༌། བྱིང་རྨུགས་སུ་གྱུར་པ་དང༌། འཛིན་ཆགས་ཀྱི་ཞེན་པ་དང༌། ཐེར་ཟུག་ཏུ་འཐས་པ་དང༌། ངེས་པ་མེད་པར་ཕྱལ་བར་གྱུར་པའི་སྐྱོན་དང་ལྔའི་དབང་གིས་ན། བྱུང་ཚོར་གྱི་དབང་གིས་གཡེང་བར་འགྱུར་བ་མར་མེ་རླུང་གིས་བསྐྱོད་པ་ལྟ་བུ་དང༌། བྱིང་རྨུགས་ཀྱི་དབང་གིས་འཐིབས་པར་འགྱུར་བ་འབེན་འཐིབས་པའི་མདའ་ལྟ་བུ་དང༌། འཛིན་ཆགས་ཀྱི་དབང་གིས་འགོག་པ་ཁྱིམ་བདག་འཇུར་བུ་ཅན་ཞིག་མར་འདོད་ནས་བ་ཉོས་པས་ཞོ་ལ་ཆགས་པ་ལྟ་བུ་དང༌། ཐེར་ཟུག་གི་དབང་གིས་ཀུན་ཏུ་རྟོག་པར་འགྱུར་བ་སྐྱེས་སུ་བྱ་རོག་གི་ཁུ་འཕྲིག་ཅན་ལྟ་བུ་དང༌། ཕྱལ་བའི་དབང་གིས་དོན་མཐོང་བ་མེད་པ་ཁོ་ནར་གྱུར་པ་ཤེས་རྒྱ་ཆུང་བས་འཁོར་བར་ཆུད་པ་བྱ་མུན་ལ་ཐུག་པ་ལྟ་བུ་རྣམས་ཡིན་ནོ། །འདི་དག་དབུ་མའི་དོན་རྟོགས་པའི་ལྟ་བ་དང་བསམ་གཏན་གྱི་སྐྱོན་ཡིན་ནོ་ཞེས་དབུ་མར་གནས་ཏེ་དོན་བསྒོམ་པའི་བྱང་ཆུབ་སེམས་དཔའི་རྣལ་འབྱོར་པ་དག་འདོད་དོ། །གསང་སྔགས་ཀྱང་མི་འདོད་པ་ནི་མ་ཡིན་ཏེ། རྫོགས་ཆེན་ལྟར་ནའང་རིམ་གྱིས་པའི་སྐབས་ཡིན་པས་སོ།།

གཉིས་པ་ཉེས་དམིགས་བསྟན་པ་ནི།

གོང་གི གནས་ངན་གསུམ་དང༌། ཞེས་པ་ནས། རང་རྒྱལ་སེམས་དཔར་ལྟུང༌། །ཞེས་པའི་བར་གྱིས་༼༦༢༽བསྟན་ཏེ།

གནས་ངན་གསུམ་དང་ཕྱེད་སྣང་གནས། །འདོད་པ་བཞི་ཡི་བདེ་གནས་དང་།།

བསམ་གཏན་གནས་དང་རྒྱུན་བཞིའི་གནས། །ཉན་ཐོས་རང་རྒྱལ་སེམས་དཔར་ལྷུང་།།

སྐྱོན་དེ་དག་གིས་གང་དང་གང་དུ་གོལ་བར་འགྱུར་ཞེ་ན། དེ་དག་གི་ཉེས་དམིགས་བསྟན་པ་ནི། རྟོག་པ་ཆེ་ཕྲས་ངན་སོང་གི་གནས་ངན་གསུམ་དུ་ལྟུང་བ་དང༌། མཚན་མ་ཆེ་ཆུང་གིས་ཉིན་མཚན་ཕྱེད་དུ་སྣང་བ་མིའི་གནས་སུ་ལྟུང་བ་དང༌། རྒྱུ་བ་དང༌། ཚོར་བ་དང༌། བྱུང་ཚོར་དང༌། སེམས་ཀྱི་ཆོས་དང་བཞིས། འདོད་པའི་ལྷའི་རིགས་རྒྱལ་ཆེན་རིས་བཞི། སུམ་ཅུ་རྩ་གསུམ། འཐབ་བྲལ། དགའ་ལྡན་བཞིའམ། ས་ལ་བརྟེན་པ་གཉིས་ནས་མཁའ་ལ་བརྟེན་པ། མཚེ་མ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་དང་བཞི་ཡི་བདེ་གནས་སུ་ལྟུང་ངོ༌། །ཡང་ན། རྒྱུ་བས་རྒྱལ་ཆེན་དང་སུམ་ཅུ། ཚོར་བས་འཐབ་བྲལ། བྱུང་ཚོར་གྱིས་དགའ་ལྡན་དུ་ལྟུང་བ་དང་བཞིར་ཡང་གསུང༌། གཞན་སེམས་ཡོད་མེད་ཀྱིས་མུ་སྟེགས་སུ་ལྟུང་བ་དང༌། བྱིངས་རྨུགས་ཀྱིས་གཟུགས་ཁམས་བསམ་གཏན་བཞིའི་གནས་སུ་ལྟུང་བ་དང༌། བྱུང་ཚོར་ལ་རྟེན་པའི་འདུ་ཤེས་ཀྱི་རྗེས་སུ་འབྲངས་པའི་རྒྱུན་གྱི་བྱེ་བྲག་ལས་གཟུགས་མེད་སྐྱེ་མཆེད་མུ་བཞིའི་གནས་སུ་ལྟུང་བ་ཡིན་ཞིང༌། བདེན་བཞིའི་བླང་དོར་ལ་གནས་ཏེ་འཛིན་ཆ་དང་མ་བྲལ་ན་བདེན་པའི་དོན་མཐོང་བར་དཀའ་བས་ཉན་ཐོས་འགོག་པར་ལྟུང་བ་དང༌། རྟེན་འབྲེལ་བཀག་པ་ལས་འབྲས་བུ་ཚོལ་བ་ལྟ་བུ་ཕྱལ་བར་གྱུར་ཏེ་ཞི་བ་ཕྱོགས་གཅིག་ལ་ལྟ་བས་རང་རྒྱལ་དུ་ལྟུང་བ་དང༌། སྟོང་པ་ཉིད་ཡང་དག་པར་མ་མཐོང་སྟེ། བློ་ཐེར་ཟུག་ཏུ་འཐས་ནས། ཤེས་པ་འཁྲུལ་པར་སྣང་བ་ཙམ་དུ་ལྟ་བས་ན་རྣམ་རིག་གི་སེམས་དཔར་ལྟུང་བར་འགྱུར་བ་ཡིན་ནོ།།

གསུམ་པ་དེའི་བཅོས་ཐབས་བཤད་པ་ལ་གཉིས་ཏེ། རྟོག་པའི་སྐྱོན་བཅོས་ཐབས་བསྟན་པ། སྒྲིབ་པའི་སྐྱོན་བཅོས་ཐབས་བཤད་པའོ། །དང་པོ་ནི།

འོག་ནས། དབུ་མར་ངེས་པའི་ཞེས་པ་ནས། ཅན་དུ་ལྟུང་མི་འགྱུར། །ཞེས་པའི་བར་གྱིས་བསྟན་ཏེ།

དབུ་མ་ངེས་པའི་ལམ་ཚོལ་བ། །དགོན་པའི་རྒྱུད་དུ་དབེན་བཟུངས་ཏེ། །ཚད་མ་གཉིས་ཀྱིས་གཞལ་བའི་བློ། །རྣམ་པར་རྟོག་པའི་རྗེས་གཅོད་པ། །ཡོད་མེད་སྔོན་རྟོགས་གང་ལས་བྱུང་། །བརྟགས་པས་རྟོགས་པ་རྟས་ལས་བྱུང་། །རྟོགས་པ་སྒྱུ་མར་རབ་ཤེས་ན། །རྟོག་པའི་རི་བོ་ཞི་བར་འགྱུར། །དེ་ནི་གནས་ངན་གསུམ་དུ་མིན། །རྟོག་པ་གང་ལས་བྱུང་ཞེ་ན། །མཚན་མ་ཉིད་ལས་བྱུང་བ་ཡིན། །མཚན་མ་སྒྱུ་མར་རབ་ཤེས་ན། །མཚན་མའི་ཆོས་རྣམས་ཞི་བར་འགྱུར། །དེས་ནི་འདོད་ཁམས་ཐ་མར་མིན། །མཚན་མ་དེའང་ཇི་ལྟར་ན། །དེའང་འབྱུང་བ་དག་ལས་འབྱུང་། །དྲན་པ་སྐྱོན་དང་བཞིར་ཤེས་ན། །སྒྱུ་མའི་སྐྱོན་རྣམས་སེལ་བར་བྱེད། །འདོད་ཁམས་གཉིས་པར་དེ་དག་ཡིན། །རྒྱུ་བ་དེ་ཡང་གང་དེ་བཞིན། །དེ་ཡང་འདི་ལྟར་འབྱུང་བ་ཡིན། །དེ་ཉིད་དེ་ལྟར་ཤེས་གྱུར་ན། །སྐྱོན་གྱིས་ཚོར་བ་སེལ་བར་བྱེད། །འདོད་ཁམས་གསུམ་པར་དེ་ཡོང་མིན། །དེ་ཉིད་དེ་ལྟར་དེ་རྩད་ན། །གང་དེ་ཕྱི་ནང་ཉིད་ཁོ་ན། །དེ་ཉིད་སྐྱོན་དུ་རབ་ཤེས་ན། །འགག་དང་སྐྱེ་བ་ག་ལ་ཡོད། །དེ་ནི་འདོད་ཁམས་བཞི་པར་མིན། །དེ་ཡང་གང་ལས་སྐྱེ་མཆེད་ན། །སེམས་ཀྱི་ཆོས་ལས་གྱུར་པ་སྟེ། །སེམས་ཉིད་སྒྱུ་མར་རབ་ཤེས་ན། །སེམས་ཀྱི་ཆོས་རྣམས་ཞི་བར་འགྱུར། །ཕུང་པོ་གཟུགས་བརྙན་འདྲ་བ་ལ། །སེམས་ནི་སྨིག་རྒྱུ་ལྟ་བུར་འདོད། །ཡོད་མེད་གཉིས་ཀྱི་མཐའ་ལས་གྲོལ། །དེ་ཤེས་འདོད་ཁམས་ལྔ་པར་མིན། །སེམས་ཉིད་ཡོད་པའི་དངོས་པོ་འམ། །མེད་ཅེས་བྱ་བ་མི་ལྟ་བས། །ཡ་མཚན་ཅན་དུ་ལྟུང་མི་འགྱུར།།

དེ་དག་བསལ་བའི་ཐབས་གང་སྙམ་པ་ལ། རབ་ཏུ་འབྱེད་པ་མངོན་དུ་བྱེད་པས་བཅོས་ཐབས་བསྟན་ཏེ། སྐྱེས་བུ་གང་སུ་ཞིག་གིས་རྣམ་པར་མི་རྟོག་པའི་ཡེ་ཤེས་གསང་བའི་དབུ་མར་ངེས་པའི་ལམ་གྱི་དོན་གཉེར་ནས་ཡང་དག་པར་ཚོལ་བར་ཞུགས་ཏེ་ཕྱི་ནང་གི་དགོན་པ་འདུ་འཛི་དང་བྱ་བྱེད་གཉིས་དང་བྲལ་བའི་གནས་ཀྱི་རྒྱུད་དུ་རང་ཉིད་གཅིག་པུར་དབེན་པར་བཟུང་སྟེ་མངོན་སུམ་དང་རྗེས་དཔག་གམ་ལུང་དང་རིགས་པའི་ཚད་མ་གཉིས་ཀྱིས་ཐུན་མོང་༼༦༣༽དང་ཐུན་མོང་མ་ཡིན་པར་གཞལ་ཏེ་ངེས་པའི་གདེང་ཡོད་པའི་ཤེས་རབ་གྱི་བློས་སྒོམ་སྐྱོན་དུ་གྱུར་པའི་རྣམ་པར་རྟོག་པའི་ཡིད་ལ་བྱེད་པ་དག་རྗེས་གཅོད་པའམ་རྩད་གཅད་པར་བྱས་ཏེ་བརྟགས་པ་ན། ཆོས་རྣམས་ལ་ཡོད་པ་དང་མེད་པ་དང་སྔོན་གྱི་རྟོག་པ་དང་ཕྱིས་ཀྱི་རྟོག་པ་ལ་སོགས་པ་རྣམ་པར་རྟོག་པ་རྣམས་གང་ལས་བྱུང་བའི་རྒྱུ་རྩད་བཅད་ན། ངོ་བོ་མ་གྲུབ་པར་ནན་གྱིས་བརྟགས་པས་སྐད་ཅིག་སྔ་མའི་རྟོག་པ་ཉིད་མཐུ་བརྟས་པ་ལས་བྱུང་བར་ཤེས་པའི་ཚེ་བཅོས་པའི་ཐབས་ཀྱང་དེ་ལྟ་བུར་རྒྱུ་འཁྲུལ་རྟོག་པ་བརྟན་པའི་རྟོག་པ་ཉིད་སྣང་ལ་རང་བཞིན་མ་གྲུབ་པར་བདེན་མེད་སྒྱུ་མར་རབ་ཏུ་ཤེས་པར་གྱུར་ན། རྟོག་པའི་རི་བོ་ཕྲ་རགས་དག་རབ་ཏུ་ཞི་ནས་ཡོངས་སུ་དག་པར་འགྱུར་རོ། །དེ་ལྟར་ཞི་བ་དེས་ནི་འབྲས་བུ་ངན་འགྲོའི་གནས་ངན་གསུམ་དུ་ནམ་ཡང་ལྟུང་བ་མིན་ནོ། །དེ་བཞིན་དུ་མཚན་མ་བཅོས་པའི་ཐབས་ཀྱང༌། རྟོག་པ་བརྟས་པའང་རྒྱུ་གང་ལས་བྱུང་བ་ཡིན་ཞེ་ན། དེ་ཡང་ལུང་དང་མན་ངག་ལ་བརྟེན་ནས་ངེས་པར་བརྟགས་ཤིང་དཔྱད་པས། ཡུལ་ལ་མཚན་མར་འཛིན་པའམ་ཆོས་ཉིད་ལ་བཟུང་བ་ཉིད་ལས་བྱུང་བ་ཡིན་པར་ཤེས་པས། ཡུལ་དུ་ཞེན་པའི་མཚན་མ་ཡང་བཤད་པ་ལྟར་སྣང་ལ་རང་བཞིན་མེད་པའི་སྒྱུ་མར་རབ་ཏུ་ཤེས་པ་ན་མཚན་མའི་ཆོས་རྣམས་མི་ལྡང་བར་རྣམ་པར་ཞི་བར་འགྱུར་ལ། དེས་ནི་འདོད་པའི་ཁམས་ཀྱི་མཐོ་རིས་ཀྱི་གནས་ཐ་མ་མིའི་འགྲོ་བར་ལྟུང་བ་མིན་ནོ། །མཚན་མ་དེ་ཡང་རྒྱུ་ཇི་ལྟར་ཡིན་དཔྱད་ན། དེ་ཡང་དྲན་པ་རྒྱུ་བ་ནི་གཏིང་ཐོག་དུ་བྱུང་བས་འབྱུང་བ་ཞེས་བྱ་བས་ན་འབྱུང་བ་དག་ལས་བྱུང་བར་ཤེས་ཏེ་དྲན་པའི་ཤེས་པ་ཕྱི་ནང་དུ་རྒྱུ་བ་ན་སྐྱོན་དང༌། དེ་ལྟར་དྲན་པའི་རྒྱུ་བ་རིང་ཐུང་རྣམས་སྣང་ལ་རང་བཞིན་མེད་པར་སྒྱུ་མ་ལྟ་བུར་རབ་ཏུ་ཞིར་ཞེས་ཞི་བར་ཤེས་ན། ཐབས་དེས་རྒྱུ་བའི་སྐྱོན་ཀུན་སེལ་ཞིང་ཆད་པར་བྱེད་པས། འདོད་ཁམས་ལྷའི་གནས་རྒྱལ་ཆེན་རིགས་བཞི་དང་སུམ་ཅུ་རྩ་གསུམ་གཉིས་ལོངས་སྤྱོད་མཚུངས་པས་གཅིག་པར་བརྩིས་ཏེ་རྟོགས་པ་དེ་དང་ལྡན་པ་དག་ཞེས་པའམ་གནས་རིས་ཏེ་དག་ཏུ་ལྟུང་བ་མིན་ནོ།།

གོང་མ་ལྟར་རྒྱུ་བ་དེ་ཡང་གང་ལས་བྱུང་ཞེ་ན། དེ་ལྟར་རྩད་བཅད་པས་སྔ་མ་དེ་བཞིན་དུ་དེ་ཡང་དེ་ལྟར་བདེ་སྡུག་མྱོང་བའི་ཚོར་བ་ལས་བྱུང་བ་ཡིན་པར་ཤེས་ཏེ། ཚོར་བ་དེ་ཉིད་སྔ་མ་དེ་ལྟར་སྣང་ལ་མེད་པ་སྒྱུ་མར་ལྟ་བུར་ཤེས་༼༦༤༽པར་གྱུར་ན། སྐྱོན་གྱི་ཚོར་བ་སེལ་བར་བྱེད་དེ་མི་འབྱུང་བས། འདོད་ཁམས་ཀྱི་ལྷ་གནས་གསུམ་པར་འཐབ་བྲལ་དེ་རུ་ཡོང་ཡེ་ལྟུང་བ་མིན་ནོ། །ཚོར་བ་དེ་ཉིད་ཀྱང་དེ་ལྟར་གང་ལས་བྱུང་བ་དེ་ཉིད་རྩད་བཅད་ནས་བརྟགས་པ་ན། གང་དེ་ཡང་བྱུང་ཚོར་ཕྱི་ནང་ཉིད་དུ་འབྱུང་འཇུག་བྱེད་པའི་རྒྱུ་ཁོ་ན་ལས་བྱུང་བར་ཤེས་ཏེ་བྱུང་ཚོར་ངོས་ཟིན་ནས། བྱུང་ཚོར་དེ་ཉིད་སྐྱོན་དུ་གྱུར་པའང་སྒྱུ་མ་ལྟ་བུར་རང་བྱུང་རང་ཞིར་རབ་ཏུ་ཤེས་པས་ན་དགག་པ་དང་སྐྱེ་བའམ་ལྡང་བ་ཡང་ག་ལ་ཡོད་དེ་མེད་པས་ན་དེ་ནི་འདོད་ཁམས་བཞི་པ་དགའ་བ་དང་ལྡན་པར་ལྟུང་བ་མིན་ནོ། །བྱུང་ཚོར་དེ་ཡང་གང་ལས་སྐྱེ་ཞིང་མཆེད་ན། དེའི་རྒྱུ་སེམས་ཀྱི་ཆོས་ཤེས་རིག་གིས་འཛིན་པ་ལས་བྱུང་བར་གྱུར་པ་སྟེ། དེ་བས་ན་སེམས་ཉིད་ཀྱང་སྣང་སྟོང་གི་མཐའ་དང་བྲལ་བར་སྒྱུ་མ་ལྟ་བུར་རབ་ཏུ་ཤེས་ཤིང་རྟོགས་ན། སེམས་ཀྱི་ཆོས་སུ་གྱུར་པའི་དྲན་རྟོག་གིས་འཛིན་པ་རྣམས་མི་ལྡང་བར་ཞི་བར་འགྱུར་རོ། །དེ་ལྟར་རྟོགས་ན་ལུས་སུ་སྣང་བའི་གཟུགས་ཀྱི་ཕུང་པོ་ནི་སྣང་ལ་རང་བཞིན་མ་གྲུབ་པས་གཟུགས་བརྙན་དང་འདྲ་བ་ལ། སེམས་དང་སེམས་བྱུང་ནི་སྐད་ཅིག་མའི་རྒྱུན་དུ་བྲང་བྲེང་སྣང་ཡང་དངོས་པོ་མེད་པ་སྨིག་རྒྱུ་ལྟ་བུར་འདོད་པ་ཉིད་དེ་ཡོད་པ་དང་མེད་པ་གཉིས་ཀྱི་མཐའ་ལས་མ་སྤངས་པར་གྲོལ་བའི་ངོ་བོར་གསལ་བས་ན་དེ་ལྟར་ཤེས་ཤིང་རྟོགས་པ་དེས། འཕྲུལ་དགའ་དང་གཞན་འཕྲུལ་དབང་བྱེད་གཉིས་ལོངས་སྤྱོད་འཕྲུལ་ཚུལ་སྤྱིར་མཚུངས་པས་གཅིག་ཏུ་བརྩིས་ཏེ། འདོད་ཁམས་ཀྱི་ལྷ་གནས་ལྔ་པར་ལྟུང་བ་མིན་ནོ། །དེ་དག་ནི་འབྲས་བུ་ནས་དཔྱད་པས་རྒྱུ་ངོས་ཟིན་ནས་དེ་ཉིད་ཀྱང་དགག་པ་མེད་པར་ཤེས་པས་མི་ལྡང་བར་གྲོལ་བ་ནི། ཉོན་མོངས་པ་རབ་ཏུ་འབྱེད་དེ་དོན་མངོན་དུ་བྱེད་པས་སྤོང་བའོ། །གཞན་གཉེན་པོས་སྤངས་པ་དང༌། རབ་ཏུ་འབྱེད་པ་མེད་པར་མངོན་དུ་མི་བྱེད་པས་སྤོངས་པ་ནི་སྔ་མ་བློ་ཆུང་བ་དང༌། ཕྱི་མ་གཅིག་ཆར་འཇུག་པའི་ཐབས་སོ། །གཞན་ཡང་སེམས་ཉིད་སྣང་སྟོང་གི་མཐའ་ལས་གྲོལ་བར་རྟོགས་པས་རྟག་པ་ བདག་དང་བདག་གིར་ཡོད་པའི་དངོས་པོའམ་ཆད་པ་སྔ་ཕྱི་རྒྱུ་འབྲས་མེད ་ཅེས་བྱ་བར་མི་ལྟ་བར་མཐའ་ལ་མི་འཛིན་པས། འདིར་རྟག་ཆད་དུ་ལྟ་བ་སྤྱི་ལ་བསྟིང་བའི་ཚིག་གིས་ཡ་མཚན་ཅན་༼༦༥༽མུ་སྟེགས་བྱེད་དུ་ལྟུང་བར་མི་འགྱུར་རོ།།

གཉིས་པ་སྒྲིབ་པའི་སྐྱོན་བཅོས་ཐབས་བཤད་པ་ནི།

བྱིང་རྨུགས་ཅན་དུ། ཞེས་པ་ནས། རིམ་པའང་སྦྱོར་མ་ཡིན། །ཞེས་པའི་བར་གྱིས་བསྟན་ཏེ།

བྱིང་རྨུགས་ཅན་དུ་མ་གྱུར་པས། །བསམ་གཏན་སྐྱོན་དུ་དེ་མི་འགྱུར། །འདུ་ཤེས་རྗེས་སུ་མ་འབྲངས་པས།།

སེམས་ཅན་གནས་སུ་དེ་ཡོད་མིན། །ཀུན་འབྱུང་ཀུན་བཞི་ཉིད་མཐོང་བས། །ཞི་བའི་གནས་སུའང་ཡོང་མ་ཡིན།།

ཞི་བས་ཞི་བར་མི་ལྟ་བས། །རང་རྒྱལ་གནས་སུའང་ག་ལ་ཡིན། །རྣམ་རིག་ཙམ་དུའང་མ་ཡིན་པས།།

སེམས་དཔའ་དེར་ཡང་དེ་མ་ཡིན། །སྟོང་ཉིད་མཉམ་པའི་དབུ་མ་ལ། །སོ་སོ་ཐ་དད་དབྱེར་མེད་པས།།

ས་ཡི་རིམ་པའང་སྦྱོང་མ་ཡིན།།

བྱིང་རྨུགས་ཀྱིས་འཐིབས་པ་ཅན་དུ་མ་གྱུར་ཏེ་རང་རིག་པ་ཡེ་ཤེས་སུ་གསལ་བས། འདུ་ཤེས་མེད་པ་དང་བསམ་གཏན་བཞིའི་སྐྱོན་དུ་དེ་ཉིད་ལྟུང་བར་མི་འགྱུར་རོ། །སེམས་ཅིར་ཡང་མི་རྟོག་པ་ཉིད་འདུ་ཤེས་ཀྱི་རྗེས་སུ་མ་འབྲངས་པས་ཐ་མལ་གྱི་འདུ་ཤེས་དང་སྐྱེ་མཆེད་མུ་བཞིའི་འདུ་ཤེས་སུ་མི་གོལ་བས་སེམས་ཅན་ཕལ་པ་དང་གཟུགས་མེད་རྒྱུན་བཞིའི་གནས་སུ་དེ་ཉིད་ལྟུང་བ་ཡོང་ཡེ་མིན་ནོ། །དེ་གཉིས་ཀྱི་སྔ་མ་ནི་བྱིངས་རྨུགས་ཀྱིས་འཐིབས་པ་བཅོས་ཐབས་དང༌། ཕྱི་མ་ནི་ལུས་མེད་སེམས་ཀྱི་གཡོ་བ་བཅོས་པའི་ཐབས་སོ། །ཆོས་ཐམས་ཅད་པའི་རྩ་བ་ཀུན་འབྱུང་ཀུན་གཞི་ཉིད་རྟོགས་ཏེ་ཆོས་ཉིད་ཀྱི་བདེན་པ་མཐོང་བས། ཞི་བ་ཕྱོགས་གཅིག་པའི་མྱང་འདས་ཉན་ཐོས་འགོག་པའི་གནས་སུ་ཡོང་ཡེ་ལྟུང་བ་མ་ཡིན་ནོ། །འཁོར་བ་དང་མྱ་ངན་ལས་འདས་པའི་མཐའ་གཉིས་མེད་པར་རྟོགས་པ་ལ། རྟེན་འབྲེལ་ལུགས་འབྱུང་དུ་འཛིན་པ་ཞི་བས་འཁོར་བའི་སྐྱོན་ཆེད་དུ་ཞི་བར་མི་ལྟ་བས། རང་རྒྱལ་གྱི་གནས་སུའང་ག་ལ་ཡིན་ཏེ་མི་ལྟུང་ངོ༌།།

དེ་གཉིས་ཀྱི་སྔ་མ་ནི། འཛིན་ཆགས་ཀྱི་དབང་གིས་འགོག་པ་བཅོས་ཐབས་དང༌། ཕྱི་མ་ནི་ཕྱལ་བས་མེད་པ་བཅོས་པའི་ཐབས་སོ། །རིལ་སེམས་ཀྱི་ཆོས་ཉིད་དུ་ཤེས་པ་ལ། ཉམས་མྱོང་གིས་འཐས་ཏེ་སེམས་སྣང་བའི་རྣམ་རིག་ཙམ་དུའང་མི་ལྟ་ཞིང་འཛིན་པ་མིན་པས་ན་སེམས་དཔའ་སེམས་ཙམ་པ་དེ་ལ་ཡང་སྐབས་དེར་གོལ་བ་མ་ཡིན་ནོ། །དེ་ཉིད་ཐེར་ཟུག་དབང་གིས་རྟོག་པ་བཅོས་ཐབས་སོ། །སྟོང་ཉིད་མཉམ་པའི་ངོ་བོ་མཐའ་གཉིས་བྲལ་བའི་དབུ་མ་ཆེན་པོའི་དོན་ལ་མཐའ་དབུས་འབྱེད་ཅིང་གོང་འོག་དང་མཉམ་རྗེས་སོ་སོར་ཐ་དད་ཀྱི་རིས་དང་བྲལ་ཏེ་བདེན་གཉིས་དབྱེར་མེད་མཉམ་པ་ཆེན་པོ་ཉིད་པས། དང་པོ་ནས་བཅུ་པའི་བར་གྱི་ས་ཡི་རིམ་པའང་སྦྱོང་སྟེ་ཀུན་ཏུ་འོད་ལ་བགྲོད་དུ་ཡོད་པ་མ་ཡིན་ནོ། །རྒྱུ་མཚན་འདིས་ན་ཚུལ་འདི་ཡང་སྔགས་ཀྱི་རྩོལ་བའི་རྣལ་འབྱོར་རིམ་གྱིས་འཇུག་པ་ལའང་སྦྱར་བར་གསལ་ལོ།།

བཞི་པ་ཏིང་ངེ་འཛིན་གྱི་ངོ་བོ་བསྟན་པ་ནི།

ཕྱོགས་ལྟ་མཐའ་འདས། ཞེས་པ་ནས། རྒྱུན་དུ་དྲན་པར་བྱ། །ཞེས་པའི་བར་གྱིས་བསྟན་ཏེ།

ཕྱོགས་ལྟ་མཐའ་འདས་དབུ་མ་ཉིད། །རང་བཞིན་མེད་པ་དེ་ཉིད་ལ།།

སེམས་ཉིད་ཀྱི་ནི་སྐད་ཅིག་མས། །མི་གཡོ་རྒྱུན་དུ་དྲན་པར་བྱ།།

བདེན་གཉིས་ཕྱོགས་རིས་སུ་ལྟ་བའི་མཐའ་ཐམས་༼༦༦༽ཅད་ལས་འདས་པའི་དབུ་མ་ཆེན་པོ་གསང་བའི་ཆོས་ཉིད་རང་བཞིན་འདི་འདྲར་མེད་པས་སྟོང་པ་ཉིད་གང་དུའང་མི་ཟིན་པ་ཡི་དེ་ཁོ་ན་ཉིད་ཀྱི་དོན་ལ། རང་རིག་པའི་སེམས་ཉིད་གྱིན་འདའ་བས་བསྒོམ་པའང་ལུས་སེམས་ཁོང་ཀློད་བག་བདལ་ཏེ་ཡང་བགས་སུ་བཞག་ལ་ཆེད་དུ་གྲིམས་ཕྱུང་བ་མེད་པར་བཏང་སྙོམས་ཀྱི་སྐད་ཅིག་མས་མ་བྲལ་མ་ཤོར་ཙམ་དུ་བློ་མི་གཡོ་བར་དལ་བའི་ངང་ལ་ཅིར་ཡང་མི་བསམ་པར་རྒྱུན་དུ་དྲན་པར་བྱས་ཏེ་བཞག་པར་བྱ་སྟེ་དེ་ལ་ཡུན་ཇེ་རིང་དུ་འབད་དོ།།

ལྔ་པ་དེ་ལྟར་གོམས་པའི་དྲོད་རྟགས་བཤད་པ་ལ་གཉིས་ཏེ། སྤྱིར་བསྟན་པ། ཡེ་ཤེས་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ལྟར་དེ་ལ། ཞེས་པ་ནས། དང་ནི་ཡེ་ཤེས་འབྱུང༌། །ཞེས་པའི་བར་གྱིས་བསྟན་ཏེ།

དེ་ལྟར་དེ་ལ་མཉམ་བཞག་ན། །རྟགས་ཀྱི་ཚོར་བ་འདི་ལྟར་འབྱུང་།།

དྲོད་དང་རྟགས་དང་ཆོ་འཕྲུལ་དང་། །མངོན་ཤེས་དང་ནི་ཡེ་ཤེས་འབྱུང་།།

དེ་ལྟར་བསྒོམ་པའི་ངོ་བོ་བཤད་པའི་ཚུལ་དེ་ཁོ་ན་ལ་བློ་ཡུན་རིང་དུ་མཉམ་པར་བཞག་ནས་གོམས་པར་བྱས་ན། དོན་ལ་ཉེ་བའི་རྟགས་ཀྱི་ཚོར་བ་རྣམ་པ་ལྔ་ཉིད་འདི་ལྟར་འབྱུང་སྟེ། གང་ཞེ་ན། དྲོད་དང་རྟགས་དང་ཆོ་འཕྲུལ་དང་མངོན་ཤེས་དང་ནི་རྣམ་པ་ཐམས་ཅད་མཁྱེན་པའི་ཡེ་ཤེས་རྣམས་འབྱུང་ངོ༌།།

གཉིས་པ་རྒྱས་པར་བཤད་པ་ནི།

དྲོད་ནི་གཡོ་དང༌། ཞེས་པ་ནས། མཐོང་དང་ཐམས་ཅད་གསལ། །ཞེས་པའི་བར་གྱིས་བསྟན་ཏེ།

དྲོད་ནི་གཡོ་དང་ཐོབ་པ་དང་། །རྟགས་བྱུང་བ་དང་བསྟན་པ་དང་། །ཆོ་འཕྲུལ་བྱུང་དང་རྫོགས་པ་ཡི།།

གང་དུ་རིག་པ་ཐམས་ཅད་གསལ། །དེར་ནི་དོན་རྣམས་རྫོགས་པ་ཡིན། །དཔེར་ན་མུན་པ་སངས་པ་དང་།།

སྣང་བ་འབྱུང་དང་ནམ་མཁའ་དང་། །ཀུན་ཏུ་མཐོང་དང་ཐམས་ཅད་གསལ།།

དེ་ཡང་དྲོད་ལ་ནི་མགོ་གཡོ་བ་དང་ལེགས་པར་ཐོབ་པ་གཉིས་དང༌། དང་སྒྲའི་ཟུར་གྱིས་བརྟན་པ་དང་གསུམ་དུ་འགྱུར་ལ། རྟགས་ནི་མགོ་བྱུང་བ་དང་མི་འགྱུར་བར་བརྟན་པ་དང༌། དང་སྒྲའི་ཟུར་གྱིས་ཐོབ་པ་དང་གསུམ་དུ་འགྱུར་རོ། །ཆོ་འཕྲུལ་ནི་མགོ་འབྱུང་བ་དང་ཡོངས་སུ་རྫོགས་པར་ཐོབ་པ་དང་གཉིས་སོ། །དེ་ནས་མངོན་པར་ཤེས་པ་ཡུལ་དྲུག་པོ་གང་དུ་ཡང་རིག་པ་གསལ་ཏེ་སྔོན་གྱི་གནས་དང༌། ཕ་རོལ་གྱི་སེམས་དང༌། ལྐོག་གྱུར་གྱི་སྒྲ་ལ་སོགས་པ་ཀུན་གསལ་བར་མཐོང་སྟེ་ཡེ་ཤེས་ཆེན་པོ་ཉིད་ལ་ལྟོས་ནས་ཕྲ་བའོ། །དེ་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཇི་ལྟ་བ་དང་ཇི་སྙེད་པ་ཐམས་ཅད་གསལ་བར་མཁྱེན་ཏོ། །ལྔ་པོ་དེས་ནི་དྲོད་རྟགས་ཀྱི་དོན་རྣམས་ཡོངས་སུ་རྫོགས་ཏེ་བསྒྲུབ་བྱ་མཐར་ཕྱིན་པ་ཡིན་པས་སྐྱེད་དུ་བྱ་བ་མེད་པར་གྱུར་པའོ། །དེ་དག་འབྱུང་བའི་ཚུལ་ཇི་ལྟ་བུ་ཞེ་ན། དེ་ཡང་གཟུང་བ་ལ་རགས་པ་དང་ཕྲ་བ་དང་འཛིན་པ་ལ་རགས་པ་དང་ཕྲ་བ་དང་བག་ལ་ཉལ་བའི་རིམ་པས་དག་པའི་སྣང་བ་ནི། དཔེར་༼༦༧༽བྱ་ན་མུན་པ་སངས་ནས་གསལ་བ་ལྟ་བུ་དྲོད་དང༌། སྐྱ་རེངས་ཤར་ནས་སྣང་བ་བྱུང་བ་ལྟ་བུའི་རྟགས་དང༌། ནམ་མཁའ་ཤིན་ཏུ་དྭངས་པ་ལ་ཉི་མ་ཤར་བ་ལྟ་བུའི་ཆོ་འཕྲུལ་དང༌། ཡུལ་ཁམས་ཀུན་ཏུ་མཐོང་བ་ལྟ་བུའི་མངོན་ཤེས་དང༌། རྫས་རིལ་ལ་མ་ཁྱབ་ཅིང་མི་གསལ་བ་མེད་པར་ཐམས་ཅད་གསལ་བར་སྣང་བའི་ཉི་མ་ཤར་བ་ལྟ་བུའོ། །ཡང་ན། རྟོག་པ་གྲོལ་ཏེ་མུན་པ་སངས་པ་སྐྱ་རེངས་དང་པོ་ལྟ་བུ་དང༌། མཚན་མ་དང་བྲལ་བས་སྣང་བ་བྱུང་བ་སྐྱ་རེངས་ཐ་མ་ལྟ་བུ་དང༌། རྒྱུ་བ་སངས་པས་ནམ་མཁའ་གསལ་བ་ནམ་ལངས་པ་ལྟ་བུ་དང༌། ཚོར་བ་དག་པས་ཀུན་ཏུ་མཐོང་བ་ཉི་མ་མ་ཤར་གོང་ལྟ་བུ་དང་། བྱུང་ཚོར་ཞི་བས་ཐམས་ཅད་གསལ་བ་ཉི་མ་ཤར་བ་ལྟ་བུའོ། །ཞེས་འབྱུང་སྟེ་ལུགས་གཅིག་གོ།

གཉིས་པ་ཡེ་ཤེས་བྱེ་བྲག་ཏུ་བཤད་པ་ལ་གསུམ་སྟེ། ཡེ་ཤེས་ཤར་བའི་ཡོན་ཏན། ཤེས་རབ་མེད་པའི་སྐྱོན། མ་རྟོགས་པར་གཞན་ལ་བསྟན་པའི་སྐྱོན་བཤད་པའོ། །དང་པོ་ནི།

དེས་ན་དེ་ཡི། ཞེས་པ་ནས། ཡིན་པས་དེ་ལ་ལྟོས། །ཞེས་པའི་བར་གྱིས་བསྟན་ཏེ།

དེ་ནས་དེ་ཡི་ཁྱད་པར་གྱིས། །གང་དུ་ཆགས་པའི་མུན་བསལ་ཏེ། །ཇི་ལྟར་རླུང་གིས་སྤྲིན་ཆགས་ལྟར།།

སྐད་ཅིག་ཙམ་གྱི་རྣལ་འབྱོར་གྱིས། །མུན་པའི་ཁམས་ནི་ཆགས་པར་གྱུར། །ཇི་ལྟར་མར་མེས་མུན་བསལ་ན།།

དེ་ཉིད་སྣང་བར་གྱུར་པ་བཞིན། །སྐད་ཅིག་མ་ཡི་དེ་རིག་ན། །སྔོན་ནས་ཞེན་པའི་མུན་པ་སེལ།།

དེ་གང་རིག་པ་དེ་དག་ནི། །དེ་ཉིད་དེ་ཡི་སྒོ་ཕྱེ་ཞིང་། །དེ་བཞིན་མིག་དང་དེ་ལྡན་པས།།

མཐོང་ཐོས་ཚིག་ལམ་ལེའུ་བཞིར་སྡེབས། །ས་པ་ཡིན་པས་དེ་ལ་ལྟོས།།

དེ་ལྟར་དྲོད་རྟགས་བྱུང་ནས་ཡེ་ཤེས་ཤར་བས་སྒྲིབ་པ་འདག་པའི་ཚུལ་ནི། ཏིང་ངེ་འཛིན་ལ་བརྟན་པ་ཐོབ་པ་དེས་ན་ཡོན་ཏན་ལྔ་སྐྱེས་པ་དེ་ཡི་མཐུ་དང་རྩལ་གྱི་ཁྱད་པར་གྱིས། ཀུན་གཞིའི་ཁམས་གང་དུ་སེམས་ལ་ཡོད་པའི་མ་རིག་པའི་བག་ཆགས་དང༌། དེའི་དབང་གི་འཁྲུལ་བར་སྣང་བའི་མུན་པས་སྒྲིབ་པའི་ཚོགས་ཀྱི་དྲི་མ་མཐའ་དག་བསལ་བར་བྱས་ཏེ་དག་པར་བྱེད་པ་ནི། དཔེར་ཇི་ལྟར་ན། དྲག་པོའི་འཐོར་རླུང་གིས་སྤྲིན་ཕྱགས་པ་ལྟར་དུ་བྱ་བ་རྫོགས་པའི་སྐད་ཅིག་མ་ཙམ་གྱི་བར་དུ་ཡང་དག་པའི་དོན་ལ་རྣལ་དུ་འབྱོར་བའི་ཏིང་ངེ་འཛིན་གྱིས། སྒྲིབ་པར་གྱུར་པའི་མུན་པའི་ཁམས་དེ་དག་ཐམས་ཅད་རང་བཞིན་མེད་པའི་དབྱིངས་ཀྱི་ངང་དུ་ཕྱགས་ཏེ་དག་པར་འགྱུར་རོ། །དེས་ན་དོན་དུ་གཉེར་བའི་དགོས་པ་ཡང་དཔེ་ཇི་ལྟར་ན་མར་མེས་མུན་པ་བསལ་བར་བྱས་ན། མུན་པ་དེ་ཉིད་སྣང་བར་འགྱུར་བ་བཞིན་དུ། སེམས་སྐད་ཅིག་མ་ཡི་རང་བཞིན་དེ་ཉིད་ཡེ་ནས་ཆོས་ཉིད་ཡིན་པའི་དོན་དུ་རྟོགས་པའི་རིག་པ་ཡེ་ཤེས་གསལ་བར་གྱུར་པ་ན། སྔོན་ཐོག་མ་མེད་པ་ནས་ཀྱི་ལོག་པར་ཞེན་པ་དང༌། ལམ་ལ་བསླབ་ནས་ཡང་དག་པར་ཞེན་པའི་བག་ཆགས་ཀྱི་མུན་པའི་མཐར་སྣང་མ་ལུས་པ་ཀུན་སེལ་ཏེ་དག་པར་༼༦༨༽བྱེད་དོ། །དེ་སྐད་དུའང༌། ཀུན་འདུས་ལས།

དེ་ལྟར་སེམས་ཀྱིས་སེམས་མཐོང་ན། །ཡེ་ཤེས་ཀྱིས་ནི་ཆོས་ཉིད་མཐོང༌། །དུས་ཀུན་ཏུ་ནི་སྐྱེ་འགག་མེད། །སྔོན་མ་མཐོང་བའི་དོན་མཐོང་འགྱུར། །དེ་ཡང་དངོས་པོ་ཅང་མི་མཐོང༌། །ཐམས་ཅད་རང་བཞིན་མེད་པ་ཞིག །བློ་ལ་འགྱུས་པ་ཁོ་ནར་ཟད། །དེ་ལྟ་བུ་ཡི་དོན་མཐོང་ན། །མཚན་མར་མཐོང་བ་ཅི་ཡང་མེད། །སྒྱུ་མ་ཙམ་དུ་ཚུལ་ཤེས་ན། །ནམ་མཁར་མཉམ་པའི་དོན་སྣང་འགྱུར། །ཞེས་དང༌། དེ་ནས་དེ་མ་ཐག་ཏུ་ཡང༌། །ཡིད་ཀྱི་རྒྱུ་བ་རྒྱུན་ཆད་ནས། །སྔར་འཁྲུལ་མཚན་མའི་ཆོས་བྲལ་ཏེ། །དེས་ནི་བདེན་པ་མཐོང་བ་ཡིན། །ཞེས་སོ། །དེ་ཉིད་རྟོགས་པའི་རྟགས་ནི། དེ་ལྟ་བུའི་ཆོས་ཉིད་ཀྱི་དོན་གང་ཡིན་པ་དེ་ཉིད་ངེས་པར་རིག་ཅིང་རྟོགས་པའི་རྣལ་འབྱོར་པ་དེ་དག་ནི། དོན་དེ་ཁོ་ན་ཉིད་དེ་ཡི་སྒོ་རྟོགས་པའི་རིག་པ་དེ་ཡིས་ཕྱེ་ཞིང་དེ་བཞིན་ཉིད་མཐོང་བའི་ཤེས་རབ་ཀྱི་མིག་གམ་སྤྱན་དང་དམ་པ་དེ་ཉིད་ལྡན་པས། མཐོང་ཐོས་ཀྱི་ཆོས་ཇི་སྙེད་པ་ཐམས་ཅད་ཚིག་གི་ལམ་གྱི་ལེའུ་བཞིར་བསྡེབས་ནས་ཚིག་བཞི་པའི་ཚིགས་སུ་བཅད་པའི་སྒོ་ནས་ལྟ་སྒོམ་སྤྱོད་འབྲས་ཀུན་གྱི་གནད་དོན་གསལ་བར་བྱེད་པ་དང་སྦྱར་ཏེ་སྨྲ་ཞིང་སྟོན་པ་དང༌། གཏན་ཚིགས་ཟབ་མོ་རྣམས་ཀྱང་ཚིག་ལ་མ་བསླབས་པར་རིགས་པའི་རྩལ་གྱིས་འབྱིན་པར་ནུས་ཏེ། དེ་ལྟ་བུའི་རྟོགས་པ་དང་ལྡན་པ་དེ་ནི། ས་ལ་གནས་པའི་བྱང་ཆུབ་སེམས་དཔའ་ཆེན་པོའམ་རིག་པ་འཛིན་པའི་སྐྱེས་བུ་དམ་པ་ཡིན་པས་ན། དེ་ལྟར་དོན་ཆེན་པོ་དེ་ལ་ཡང་དག་པར་ལྟོས་ལ་རྟོགས་པར་གྱིས་ཤིག་པའོ།།

གཉིས་པ་ཤེས་རབ་མེད་པའི་སྐྱོན་ནི།

དེ་ཡི་མིག་དང༌། ཞེས་པ་ནས། ངེས་ཀྱི་དམིགས་མི་ཕྱེད། །ཅེས་པའི་བར་གྱིས་བསྟན་ཏེ།

དེ་ཡི་མིག་དང་མ་ལྡན་ན། །མུ་མཐའ་ཡས་པའི་ཚིག་རྣམས་ཀྱིས།།

དེ་ལ་ཐ་སྙད་ཅི་བརྗོད་ཀྱང་། །ངེས་མ་ངེས་ཀྱི་དམིགས་མ་ཕྱེད།།

དེ་ལྟར་དོན་མ་གོ་བའི་སྐྱོན་ནི། བཤད་མ་ཐག་པ་དེ་ལྟ་བུའི་ཆོས་ཉིད་རྟོགས་པའི་ཤེས་རབ་དེ་ཡི་སྤྱན་མིག་དང་མ་ལྡན་པར་རྟོགས་པའི་གདེང་དང་བྲལ་ན། དོན་གྱི་མཚོན་ཐབས་མུ་མཐའ་ཡས་པ་ཇི་སྙེད་པའི་ཚིག་གི་ལམ་གྱི་བརྗོད་པ་རྣམས་ཀྱིས། དོན་དེ་ལ་མཚོན་པའི་ཐ་སྙད་སྣ་ཚོགས་པ་ཇི་ལྟར་བརྗོད་དེ་བསྟན་ཀྱང༌། ཇི་བཞིན་དུ་ངེས་སམ་མ་ངེས་པའི་ཁྱད་པར་དབྱེ་ནས་ནོར་མ་ནོར་གྱི་དམིགས་གནད་མི་ཕྱེད་པས་ཡང་དག་པར་དཔོགས་པར་མི་ནུས་སོ།།

གསུམ་པ་མ་རྟོགས་པར་གཞན་ལ་བསྟན་པའི་སྐྱོན་བཤད་པ་ནི།

ཚིག་ཕྱིར་བློ་འབྲངས། ཞེས་པ་ནས། ཆོས་སྨྲ་དེ་བས་ལྕི། །ཞེས་པའི་བར་གྱིས་བསྟན་ཏེ།

ཚིག་ཕྱིར་བློ་འབྲང་དམུ་རྒོད་དག །བསླབས་པའི་ས་དང་ལམ་མ་ཡིན། །ཚིག་ལམ་འབུམ་ཕྲག་ཅི་བརྗོད་ཀྱང་།།

གཞན་ལ་སྨྲ་བར་བྱ་མ་ཡིན། །གལ་ཏེ་གང་ཞིག་གང་སྨྲ་བ། །ལོག་སྨྲ་རྡོ་རྗེ་བཀའ་རྐུན་པོ།།

ཐར་མེད་རྡོ་རྗེར་དེ་ལྟུང་འགྱུར། །དོན་རྒྱུ་ཚུལ་འཆོས་མཁན་དག་གིས། །ངེས་པའི་བློ་ཤེས་མ་བྱེ་བར།།

ཚིག་ལམ་ཡི་གེས་ཁྲིད་ནས་ནི། །གང་མ་ངེས་པར་ལམ་བརྗོད་ན།།

སྲོག་ཆགས་ཀུན་གྱི་སྲོག་ཕྲོགས་པས། །མ་ངེས་ཆོས་སྨྲ་དེ་བས་ལྕི།།

དེའི་ཕྱིར་དོན་མ་ངེས་པར་ཚིག་གམ་༼༦༩༽སྒྲའི་ཕྱིར་བློ་འབྲངས་པས་བློ་གྲོས་རྩིང་ཞིང་རྣམ་པར་གཡེང་བའི་དམུ་རྒོད་དག ངེས་པའི་དོན་ལ་གོམས་པར་བྱ་བའི་གསང་བ་མཆོག་གི་བསླབ་པའི་ས་དང་ལམ་གནས་པ་མ་ཡིན་ཏེ། ཚིག་ཙམ་ཤེས་ཀྱང་དོན་མ་ངེས་པས་སོ། །དེ་ལྟ་བུའི་གང་ཟག་དེས་གསང་དོན་མཚོན་པའི་ཚིག་གི་ལམ་གྱི་རྗོད་བྱེད་འབུམ་ཕྲག་ཏུ་གྱུར་པ་སྟོང་ཕྲག་བརྒྱ་ལྟ་བུ་ཇི་ལྟར་བརྗོད་ཀྱང༌། དེ་དག་གཞན་ལ་སྟོན་ཞིང་སྨྲ་བར་བྱ་བ་མ་ཡིན་པས་གསང་བར་བྱ་སྟེ་སྨྲ་བར་མ་བྱེད་ཅིག གལ་ཏེ་གང་ཟག་གང་ཞིག་རང་གིས་མ་རྟོགས་པར་གཞན་སྣོད་མ་ཡིན་པ་གང་ལ་གསང་དོན་སྨྲ་བ་དང་བཤད་པར་བྱེད་ན། ཆོས་མིན་ཆོས་སུ་སྨྲ་བས་ལོག་པར་སྨྲ་བ་རྡོ་རྗེ་གསང་བའི་ཐེག་པ་ཆེན་པོའི་བཀའ་རྐུན་བྱེད་པོ་དེ་ཉིད། ཐར་པའི་དུས་མེད་པར་རྡོ་རྗེ་དམྱལ་བའི་གནས་དེར་ལྟུང་ནས་སྡུག་བསྔལ་གྱིས་ཉམ་ཐག་པའི་ཉེས་པ་འབྱུང་ངོ༌། །ཡང་ན། དཔེ་ལ་ལར། རྡོ་རྗེ་དེ་ལྟུང་འགྱུར། །ཞེས་འབྱུང་བས། རྡོ་རྗེར་གྲགས་པའི་དམྱལ་བ་དེར་ལོག་སྨྲ་དེ་ཉིད་ལྟུང་བར་འགྱུར་རོ། །ཞེས་སྦྱར། དེ་ཅིའི་ཕྱིར་ཞེ་ན། གསང་སྔགས་ཐེག་པ་ཆེན་པོའི་དོན་ངེས་པར་མ་གོ་བར་དོར་རམ་གཡོ་སྒྱུ་དང་ཚུལ་འཆོས་མཁན་དག་གིས། དོན་ཇི་བཞིན་དུ་ངེས་པའི་བློ་ཤེད་མ་བྱེ་བར་ཁྱད་པར་མཚོན་པའི་ཚིག་ལམ་སྒྲ་ཕྱིར་འབྲངས་པའི་མིང་ཚིག་གཉིས་ཀྱི་རྟེན་ཡི་གེས་ཁྲིད་ནས་ནི། གང་དོན་མ་ངེས་ཏེ་མི་ཤེས་པར་ཐེ་ཚོམ་ཟ་བཞིན་དུ་གཞན་ལ་གསང་སྔགས་ཀྱི་ཚིག་ལམ་བརྗོད་དེ་བཤད་ན། ཁམས་གསུམ་གྱི་སེམས་ཅན་སྲོག་ཆགས་པ་ཀུན་གྱི་སྲོག་ཕྲོགས་ཏེ་བསད་པའི་སྡིག་པ་བས་ཀྱང༌། རང་གིས་མ་རྟོགས་ཏེ་ངེས་པ་མ་རྙེད་པར་གཞན་ལ་ཆོས་སྨྲ་བ་ནི་དེ་བས་ཀྱང་སྡིག་པ་ལྕི་བའི་ཕྱིར་ཏེ། དེས་ནི་ལོག་ལམ་དུ་བཙུད་པས་ བདག་གཞན་ལ་ཐར་པའི་སྐབས་མེད་པར་འཁོར་བའི་གཏིང་རྡོ་བྱས་པའི་ཕྱིར་རོ།།

གཉིས་པ ་ཅིག་ཆར་བའི་ཏིང་ངེ་འཛིན་བཤད་པ་ལ་ལྔ་སྟེ། བློ་བཞག་ཐབས་བསྟན་པ། ཏིང་ངེ་འཛིན་གྱི་ངོ་བོ་བསྟན་པ། དེའི་ཡོན་ཏན་བཤད་པ། གོལ་ས་ངོས་གཟུང་བ། ལ་བཟླ་བའི་ཐབས་བཤད་པའོ། །དང་པོ་ནི།

ཚིགས་བཅད་བདུན་གྱི་འོག་ན། བསམ་དུ་མེད་པའི་ཆོས་ཉིད། ཅེས་པ་ནས། དེ་བཞིན་ཉིད་ལས་མེད། །ཅེས་པའི་བར་གྱིས་བསྟན་ཏེ།

བསམ་དུ་མེད་པའི་ཆོས་ཉིད་ནི། །མི་བསམ་དེ་བཞིན་ཉིད་དུ་བཞག།

བསམ་གྱིས་མི་ཁྱབ་ཆོས་རྣམས་ཀུན། །བསམ་མེད་དེ་བཞིན་ཉིད་ལས་མེད།།

དེ་དག་གི་རྗེས་སུ་ཐེག་པ་ཆེན་པོ་གཅིག་ཆར་བའི་འཇུག་ཐབས་བསྟན་པའི་ཕྱིར། དེ་བས་ན་བློ་མཆོག་གཅིག་ཆར་བ་རྣམས་ཀྱིས་བློ་བཞག་ཐབས་ནི། གནས་ལུགས་རང་བཞིན་གྱི་སྣང་བ་བསམ་དུ་མེད་པའི་ཆོས་ཉིད་ཇི་བཞིན་པ་འདི་ནི། སེམས་༼༧༠༽ཀྱིས་གང་དུའང་བསམ་དཔྱད་མེད་པར་རིག་པའང་དེ་ཉིད་ཀྱི་ཕྱིར་རྟོག་པའི་བློས་ཅིར་ཡང་མི་བསམ་པ་ཁོ་ནར་ཆོས་ཉིད་མ་བཅོས་པའི་དེ་བཞིན་ཉིད་སྤྲོས་པ་དང་བྲལ་བའི་ངང་དུ་མ་གཡོས་པར་བཞག་ན་རྩོལ་བས་མ་བསླད་པའི་ཕྱིར་ཐབས་དམ་པ་ཉིད་དེ། ཀུན་འདུས་ལས། དེས་ན་ཏིང་འཛིན་ཁྱད་པར་འདི། །རྣལ་འབྱོར་ཅན་གྱིས་འདྲིས་པར་བསྒོམ། །ཐམས་ཅད་མི་རྟོག་སྐྱེ་མེད་ཅིང༌། །རྟོག་པའི་མཐའ་སྤངས་ནམ་མཁའི་དབྱིངས། །ཞེས་སོ། །དེ་ལྟར་བཞག་ན་ཡིད་ཀྱི་བྱ་བས་མི་འཁྱུད་པས་བསམ་གྱིས་མི་ཁྱབ་པའི་འཁོར་འདས་ཀྱི་ཆོས་རྣམས་ཇི་སྙེད་པ་ཀུན་གྱི་དོན་ཡང་བསམ་དུ་མེད་པའི་ཆོས་ཉིད་གཟའ་གཏད་དང་བྲལ་བའི་དེ་བཞིན་ཉིད་ཀྱི་ངང་དུ་འདུས་པས། དེ་ལས་གཞན་དུ་གྱུར་པའི་ཆོས་གང་ཡང་མེད་པས་དེ་ལྟར་གཡོ་བ་མེད་པར་མི་གནས་པའི་གནས་པ་ཆེན་པོ་ནི་རང་སྣང་ལྷུན་གྲུབ་ཀྱི་ངང་དུ་རིག་པ་རང་གསལ་དུ་གདལ་བ་ཁོ་ནའོ།།

གཉིས་པ་ཏིང་ངེ་འཛིན་གྱི་ངོ་བོ་བསྟན་པ་ནི།

གོང་ནས། མཐའ་དང་དབུས་བྲལ། ཞེས་པ་ནས། སྣང་བའི་ཐ་སྙད་བྲལ། །ཞེས་པའི་བར་གྱིས་བསྟན་ཏེ།

མཐའ་དང་དབུས་བྲལ་དེ་ཁོ་ན། །མི་གནས་མི་ལེན་མི་འབྱེད་ཅིང་།།

ཅི་ཡང་མ་ཡིན་མཐོང་ཐོས་མེད། །ཅི་ཡང་མི་བྱེད་བྱ་དང་བྲལ། །སྣང་མེད་སྣང་བའི་ཐ་སྙད་བྲལ།།

འོ་ན་ལྟ་བའི་དོན་མ་ནོར་བ་གསང་སྔགས་གཅིག་ཆར་བ་གང་ལྟར་འདོད་ཅེ་ན། མཐའ་དང་དབུས་ཀྱི་ཐ་སྙད་དང་ཡེ་ནས་བྲལ་བའི་གསང་བའི་ཆོས་ཉིད་དེ་ཁོ་ན་ཉིད་ཇི་བཞིན་པའི་དེ་བཞིན་ཉིད་ཇི་ལྟ་བར་ཁོང་དུ་ཆུད་ནས་ཐག་ཆོད་ན། བློ་ཅི་ལ་ཡང་རྟེན་བཅས་ཏེ། མི་གནས་པར་དབུ་མའམ་ཆོས་ཉིད་ཀྱང་དང་དུ་མི་ལེན་ལ། བཟང་ངན་ལ་སོགས་པའི་རིས་སུ་མི་འབྱེད་ཅིང༌། ངོ་བོའམ་མཚན་ཉིད་མེད་པའི་ཆོས་ཉིད་ཅི་ཡང་མ་ཡིན་པ་ལ་མཐོང་ཐོས་ལ་སོགས་པ་མ་འགགས་ལ་བྲལ་བས་མཚན་མའི་ཐ་སྙད་གང་ཡང་མེད་པར་དོན་གྱི་དངོས་པོ་གང་ཅི་ཡང་མངོན་དུ་མི་བྱེད་དེ། སེམས་མི་རྟོག་པ་ཉིད་ཆེད་དུ་བྱ་བའི་རྩོལ་བ་ཙམ་དང་ཡང་བྲལ་བ་ཉིད་དོ། །དེ་ལྟ་བུའི་དོན་ནི་མཐའ་གང་དུའང་འབྱུང་མ་མྱོང་བས་སྣང་བ་མེད་པའི་ཆོས་ཉིད་དབུས་སུ་སྣང་བའི་ཐ་སྙད་དང་ཡང་བྲལ་བས། མཐའ་མེད་དོ་ཞེས་པའི་བཏགས་པའང་མེད་པས་དམིགས་བསམ་བརྗོད་པ་ཀུན་ལས་འདས་པའི་རང་རིག་པའི་ངོ་བོ་རྗེན་པར་མཐོང་ནས་དགོངས་པ་མི་གཡོ་བར་གནས་པ་སྟེ། རྒྱུད་ཀྱི་རྒྱལ་པོ་སེམས་ལུང་ཆེན་པོའི་མདོ་ལས། ཆོས་ཉིད་མཚན་མ་མེད་པ་སྟེ། །ཆོས་ཉིད་དམིགས་པའི་ཡུལ་མེད་པས། །དབང་པོས་མཐོང་བར་བྱ་བ་མིན། །ཡུལ་མེད་ཁྱབ་པས་དེ་བཞིན་ཉིད། །ཅེས་དང༌། གླེང་བྲལ་འདི་ལ་གནས་པ་ཡིས། །རྣལ་འབྱོར་འདི་ནི་སྐལ་པ་བཟང༌། །ཆོས་ཉིད་གཏེར་༼༧༡༽ལྡན་ནམ་མཁའི་ཚུལ། །རྣལ་འབྱོར་ཆོས་ཉིད་ཡིན་པའི་ཕྱིར། །ཞེས་པ་ལ་སོགས་པ་ལྟར་རོ།།

གསུམ་པ་དེའི་ཡོན་ཏན་བཤད་པ་ལ་གཉིས་ཏེ། ལས་དང་དུས་ལ་རག་མ་ལས་པར་བསྟན་པ། ཡོན་ཏན་བཞི་དང་ལྡན་པར་བཤད་པའོ། །དང་པོ་ནི།

གོང་གི དེས་ན་མཐའ་དབུས། ཞེས་པ་ནས། སྙམ་པའི་ཁར་མ་ལུས། །ཞེས་པའི་བར་གྱིས་བསྟན་ཏེ།

དེས་ན་མཐའ་དབུས་མཉམ་ཉིད་ལ། །བཏུད་དེ་ཅིག་ཅར་གང་འཇུག་པ། །རྣལ་འབྱོར་གནས་ཡུན་རིང་ཐུང་དང་། །གང་འཕྲོ་ཡོད་དང་མེད་པ་དང་། །ནམ་ཞིག་མཉམ་པའི་ཁར་མ་ལུས།།

རིམ་གྱིས་པས་ཡུན་རིང་མོས་ཆོས་ལྔ་ཐོབ་པའི་ཚུལ་དེས་ན། མཐའ་དབུས་དང་བྲལ་བས་མཉམ་ཉིད་ཆེན་པོའི་དོན་ལ། རིམ་པ་མེད་པར་སྤྱི་བླུགས་སུ་བཏུད་དེ་གཅིག་ཆར་དུ་གང་འཇུག་པ་ཡི་རྣལ་འབྱོར་རབ་མཆོག་དེ་དག་གི་བཞག་ཐབས་ནི་བཤད་ཟིན་ཏེ་བསམ་དཔྱོད་དང་བྲལ་བའོ། །དེ་ལྟར་གསང་སྔགས་ཀྱི་དོན་གོ་ནས་བསྒོམ་པ་ནི། འབྲས་བུ་ཉིད་ལ་ཞུགས་པ་ཡིན་པས་བརྩོན་པ་ཆེན་བསྒོམ་གནས་ཡུན་རིང་ཐུང་ལ་རག་མ་ལས་པ་དང་དེ་བཞིན་དུ་ཡང་གང་ལས་འཕྲོ་ཡོད་པ་དང་མེད་པ་དང༌། དུས་ནམ་ཞིག་ན་འགྲུབ་པར་འགྱུར་སྙམ་པའི་ཁར་ཡང་རག་མ་ལུས་ཏེ་གོལ་སྒྲིབ་མེད་པའི་སྙིང་པོ་ལ་གནས་པས་ལས་འཕྲོ་ཆེ་ཆུང་དང་རེ་རྩོལ་ལ་ལྟོས་པ་མེད་དོ།།

གཉིས་པ་ཡོན་ཏན་བཞི་དང་ལྡན་པར་བཤད་པ་ནི།

དེ་ལ་དེ་བཞིན། ཞེས་པ་ནས། གནས་སུ་དེ་དག་མིན། །ཞེས་པའི་བར་གྱིས་བསྟན་ཏེ།

དེ་ལ་དེ་བཞག་དེར་བཞག་ན། །དེ་མ་ཐག་ཏུ་དེ་ཉིད་སྣང་། །དེ་ལས་དེ་བཞིན་མ་ཡོས་ན།།

གྲོང་ཁྱེར་སྣང་བར་མི་འགྲོ་ལྟར། །དེ་ལ་དེ་ལྟར་མ་ཆགས་ན། །སྣང་བ་མེད་པར་ག་ལ་འགྲོ།།

དེ་ཉིད་མངོན་དུ་གྱུར་པས་ན། །ཞི་བའི་གནས་སུ་དེ་དག་མིན།།

དེ་ཅིའི་ཕྱིར་ཞེ་ན། དེ་ཡང་ཆོས་ཉིད་ཇི་བཞིན་པའི་ངང་ལ་རིག་པ་དེ་ཡང་ཇི་བཞིན་པར་སྤྱི་བླུགས་སུ་མ་བཞག་པར་བཞག་པ་ལྟར་མཉམ་པ་ཉིད་ཀྱི་ངང་དེར་བཞག་ན། དུས་སྐད་ཅིག་ཙམ་ལས་མི་ཐོགས་པར་དེ་མ་ཐག་ཏུ་རང་བྱུང་གི་ཡེ་ཤེས་དེ་ཉིད་རང་ལ་སྣང་སྟེ། རང་རིག་པ་མཉམ་པའི་ཀློང་དུ་གསལ་བར་འགྱུར་ཏེ། དེ་ལྟ་བུ་ལ་རེ་དོགས་མེད་པའི་ཕྱིར་རོ། །དེ་བས་ན་འདིར་གསང་སྔགས་ཉིད་ཀྱི་རིམ་གྱིས་པའང༌། ཟབ་མོ་གཅིག་ཆར་བ་ལ་ལྟོས་པས་རིང་བ་ལྟ་བུར་སྣང་ཡང༌། རྒྱུ་འབྲས་གཉིས་མེད་ལ་སྦྱོར་བས་རག་ལུས་པར་མི་བྱེད་དོ། །གོལ་ས་རྣམས་ཀྱང་གཞིག་དཔྱད་མེད་པར་ཁེགས་ཏེ། གང་ཞེ་ན། གཅིག་ཆར་བས་མཉམ་པ་ཆེན་པོ་བྱང་ཆུབ་སེམས་ཀྱི་ཀློང་དེ་ལས་དོན་དེ་བཞིན་དུ་མ་གཡོས་ཏེ་འདུ་ཤེས་གང་དུའང་མ་ཞུགས་པས་ན་གཟུགས་ཁམས་ཀྱི་གྲོང་ཁྱེར་དུ་སྣང་བར་གོལ་བ་དེར་མི་འགྲོའོ། །ཆགས་ན་ལྷ་ལ་ཆགས་ཀྱང་འཆིང་བའི་རྒྱུ་དང༌། རྟོག་ན་དོན་དུ་རྟོག་ཀྱང་བདུད་ཡིན་པས། མཉམ་པ་ཆེན་པོའི་ཏིང་ངེ་འཛིན་གྱི་རོ་དེ་ལ་དེ་ལྟར་མ་ཆགས་པས་ན་གཟུགས་མེད་ཀྱི་ཁམས་སྣང་བ་མེད་པར་ག་ལ་འགྲོ་སྟེ་མི་འགྲོ་བས་གོལ་ས་༼༧༢༽མེད་དོ། །སེམས་ཀྱི་དེ་ཉིད་མངོན་དུ་གྱུར་ཏེ་མཉམ་པའི་ཡེ་ཤེས་རང་གསལ་བས་ན་ཉན་ཐོས་ཞི་བ་ཕྱོགས་གཅིག་པའི་གནས་སུ་དེ་དག་གོལ་བ་མིན་པས་འགོག་པར་ལྟུང་བའང་མེད་དོ།།

བཞི་པ་གོལ་ས་ངོས་གཟུང་བ་ལ་བདུན་ཏེ། ལྟ་བའི་གོལ་ས། ཐེག་པའི་གོལ་ས། དམ་ཚིག་གི་གོལ་ས། སའི་གོལ་ས། ཡེ་ཤེས་ཀྱི་གོལ་ས། བསྒོམ་པའི་གོལ་ས། སྤྱོད་པའི་གོལ་ས་བཤད་པའོ། །དང་པོ་ནི།

ཡོད་དང་མེད་པའི། ཞེས་པ་ནས། འགྱེད་པ་དེ་ཉིད་ནད། །ཅེས་པའི་བར་གྱིས་བསྟན་ཏེ།

ཡོད་དང་མེད་པའི་མཐའ་ཆོད་ན། །མཐའ་ལས་འདས་པའི་རྣལ་འབྱོར་ཉིད། །གང་འདིར་ངེས་པ་དམ་པའོ་ཞེས། །གང་དག་འདི་ལྟར་དམ་བཅས་པས། །གང་ལ་རེ་དོགས་མེད་པ་ཡི། །གོལ་སྒྲིབ་ཉིད་དུ་ངེས་པར་སྣང་། །ཅི་ཕྱིར་དབུས་མཐའ་མེད་པས་ན། །དབུས་ཡོད་མཐའ་ཡང་དེ་བཞིན་འབྱུང་།།

དབུས་མེད་མཐའ་ཡང་ངང་གིས་མེད། །དབུས་མཐའ་དབྱེ་བ་དེ་ཉིད་ན།།

ངེས་པར་བཟུང་བའི་སྐྱོན་གྱིས་དབུ་མར་གོལ་བའི་ཚུལ་འཆད་པ་ནི། སེམས་ཀྱི་ཆོས་ཉིད་ལ་ཡོད་པ་སྣང་བ་དང་མེད་པ་སྟོང་པའི་མཐའ་གཉིས་དང་བྲལ་བར་ཐག་ཆོད་དེ་ཆོས་ཐམས་ཅད་ཆོས་ཉིད་སྤྲོས་བྲལ་དུ་རྟོགས་ནས་ངང་ལས་མ་གཡོས་ན་མཐའ་ལས་འདས་པའི་རྣལ་འབྱོར་གྱི་དོན་ཟབ་མོ་མ་ནོར་བར་བསྒོམ་པ་ཉིད་དེ། སེམས་ལུང་ཆེན་པོའི་མདོ་ལས། ཆེ་བའི་ཡེ་ཤེས་རྙེད་དཀའ་བ། །ཟབ་ཅིང་ཕྲ་ལ་རྟོགས་པར་དཀའ། །ཆོས་ཉིད་མི་རྙེད་སྒྱུ་མར་བསྟན། །ཇི་ལྟར་སྒྱུ་མ་སྣང་གྱུར་ཡང༌། །དེ་ལ་དངོས་པོ་ག་ལ་ཡོད། །ཅེས་དང༌། བཙལ་དུ་མེད་པའི་ཆོས་ཉིད་ནི། །མ་བཙལ་བཞག་པས་བསྒོམ་པ་ཡིན། །ཆོས་ཉིད་ཇི་བཞིན་མཉམ་པའི་ཚུལ། །དམིགས་པ་མེད་པས་ཀུན་ཏུ་བཟང༌། །ཞེས་སོ། །དེས་ན་གསང་སྔགས་གཅིག་ཆར་བའི་ལྟ་བས་སྐབས་གང་འདིར། དོན་མ་ནོར་བའི་དངོས་པོ་ནི་འདི་ལྟར་ངེས་པ་དམ་པ་དེ་ཁོ་ན་འོ་ཞེས་ཞེ་བས་འདོད་དེ་ངེས་པར་གཟུང་བ་གང་དག་འདི་ལྟར་ངེས་སོ་ཞེས་དབུ་མ་པ་ལྟར་དམ་འཅའ་བ་ནི། གསང་བ་ཆེན་པོའི་ཏིང་ངེ་འཛིན་རང་གསལ་བ་གང་ལ་རྟགས་མཚན་དང་གོལ་བ་ལ་རེ་བ་དང་དོགས་པ་མེད་པ་ཡི་དོན་ལས་འཁྲུལ་པས་གོལ་སྒྲིབ་ཉིད་དུ་ངེས་པར་སྣང་སྟེ་དོན་མཐོང་དུ་མི་སྟེར་བ་ཁོ་ནའོ། །དེ་ལྟར་ཞེ་ལ་འཛིན་པ་ཉིད་སྐྱོན་ཡིན་པའི་གཏན་ཚིགས་ནི། ཅི་ཡི་ཕྱིར་མངོན་ན་དོན་ལ་དབུས་མཐའ་འབྱེད་ཅིང་མཐའ་བསལ་ཏེ་དབུས་སྒྲུབ་པས་ན། དབུ་མའི་ཆོས་ཉིད་དུ་ངེས་པའི་དབུས་ཡོད་ན་དེ་ལ་ལྟོས་པའི་མཐའ་ཡང་རང་བཞིན་གྱིས་འབྱུང་ལ། ཡེ་ཉིད་ནས་མཐའ་དང་བྲལ་བས་དབུས་མེད་པ་ལ་མཐའ་ཡི་སྣང་བ་ཡང་ངང་གིས་མེད་པས་མཐའ་དབུས་སུ་འཛིན་པའི་རྟོག་ཞེན་གྱིས་དོན་དང་མི་མཐུན་པའི་སེལ་བའི་འདུ་ཤེས་གང་ཡང་མི་གནས་པ་ལ། ཆོས་ཉིད་དོན་དུ་གཉེར་བའང་མེད་ན་མཐའ་ག་ལ་འབྱུང་སྟེ། རང་བཞིན་གྱི་གཏན་ཚིགས་ཀྱིས་གསལ་ལོ། །དེ་བས་ན་དབུས་༼༧༣༽མཐར་དབྱེ་བ་དེ་ཉིད་དེ་ལྟར་དོན་ལས་ཉམས་པའི་ཕྱིར་གསང་བ་ཆེན་པོའི་གནད་ཡིན་ནོ།།

གཉིས་པ་ཐེག་པའི་གོལ་ས་ནི།

འོག་ནས། ས་དང་རྣམ་ཐར། ཞེས་པ་ནས། ཆེན་པོར་གྱུར་པ་ཡིན། །ཞེས་པའི་བར་གྱིས་བསྟན་ཏེ།

ས་དང་རྣམ་ཐར་ལ་སོགས་པ། །ཆོས་སྐུ་བྱང་ཆུབ་དཀར་པོའི་ཕྱོགས།།

ཀུན་ཀྱང་བསམ་དུ་མེད་པ་ཡི། །གོལ་སྒྲིབ་ཆེན་པོར་གྱུར་པ་ཡིན།།

དེ་བས་ན་བསྒོམ་པ་གོལ་བའི་ཕྱིར་རྒྱུའི་སྤྱོད་པ་འདིར་འདུས་ཏེ། ཕ་རོལ་དུ་ཕྱིན་པའི་ས་ཡི་རིམ་པ་བཅུ་དང༌། རྣམ་པར་ཐར་པ་བརྒྱད་དང་གསུམ་ལ་སོགས་པ་ཞེས་བསྡུ་བའི་དོན་གྱིས་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལྟ་བུ་འབྲས་བུ་ཆོས་ཀྱི་སྐུ་ཡི་བྱང་ཆུབ་ཆེན་པོ་ཐོབ་པར་བྱེད་པའི་དཀར་པོའི་ཕྱོགས་སུ་བཞག་པའི་ལས་ཇི་སྙེད་པ་ཀུན་ཀྱང་ཡིད་ཀྱིས་བསམ་དུ་མེད་པ་ཡི་ཆོས་ཉིད་བྱ་རྩོལ་དང་བྲལ་བའི་དོན་གྱི་ངོ་བོ་མཐོང་དུ་མི་སྟེར་བའི་གོལ་སྒྲིབ་ཀྱི་གཡང་ས་དང་གེགས་ཆེན་པོར་གྱུར་པ་ཡིན་ནོ། །དེ་ཅི་སྟེ་ཞེ་ན། རིག་པ་ཅིར་ཡང་མ་བསམ་ན་མ་གཡོས་པ་ལ་བསམ་དཔྱད་བྱས་པས་རིག་པའི་རྒྱ་མཚོ་རྙོགས་ཏེ། རྟོག་དཔྱོད་ཀྱི་རྙོག་མ་མ་སངས་ན་མི་མཐོང་བའི་ཕྱིར་རོ།།

གསུམ་པ་དམ་ཚིག་གི་གོལ་ས་ནི།

འདའ་དཀའ་ཆེན་པོའི། ཞེས་པ་ནས། མེད་ལས་གང་འཛིན་གོལ། །ཞེས་པའི་བར་གྱིས་བསྟན་ཏེ།

འདའ་དཀའ་ཆེན་པོའི་དཀའ་ཐུབ་ནི། །མ་བཅོས་དེ་བཞིན་ཉིད་ཁོ་ན།།

དཔག་མེད་རྒྱལ་བས་འདའ་བར་དཀའ། །གང་བཟུང་མེད་པས་གང་འཛིན་གྲོལ།།

ཤིན་ཏུ་རྣལ་འབྱོར་གྱི་དམ་ཚིག་འདའ་དཀའ་ཆེན་པོའི་དཀའ་ཐུབ་དམ་པ་ནི། སེམས་ཀྱི་ཆོས་ཉིད་ཐིག་ལེ་ཆེན་པོ་ཡེ་ནས་མ་བཅོས་པའི་དེ་བཞིན་ཉིད་ཇི་བཞིན་པའི་དེ་ཁོ་ན་ཉིད་ཀྱི་ངང་དེ་ལ་འདའ་ཉམས་དང་བསྲུང་བ་མེད་པ་ཉིད་དེ། དཔག་ཏུ་མེད་པའི་རྒྱལ་བ་དམ་པ་འདྲེན་མཆོག་བདེ་བར་གཤེགས་པ་ཇི་སྙེད་པ་ཀུན་ཀྱང་དེ་ལས་འདའ་བར་དཀའ་བས་ཐུགས་དམ་ཆེན་པོ་དེའི་ངང་ལས་མི་འདའ་བར་བཞུགས་པ་ཁོ་ནའོ། །དེ་ལྟ་བུའི་ངང་ལ་བསྲུང་མཚམས་གང་ཡང་གཟུང་དུ་མེད་པ་ལ་རྣལ་འབྱོར་པ་གང་གིས་ཕྱོགས་རིས་སུ་ཕྱེ་ནས་སྡོམ་པ་གང་གི་བསྲུང་མཚམས་འཛིན་པ་ནི་ཆོས་ཉིད་ཀྱི་དམ་ཚིག་བསྲུང་དུ་མེད་པ་ལས་གོལ་བ་ཡིན་པས་དོན་ལས་འཁྲུལ་པའོ།།

བཞི་པ་སའི་གོལ་ས་ནི།

གདལ་ཁྱབ་ཆེན་པོའི། ཞེས་པ་ནས། ས་བཀོད་གང་བགྲོད་ནོར། །ཞེས་པའི་བར་གྱིས་བསྟན་ཏེ།

བདལ་ཁྱབ་ཆེན་པོའི་ས་འདི་ནི། །ཡེ་ནས་མ་བགྲོད་རང་བཞིན་བཀོད།།

ས་འདིར་མ་ཆུབ་གང་ཡང་མེད། །གང་འདིར་ས་བཀོད་གང་བགྲོད་གོལ།།

ཁམས་གསུམ་ཐམས་ཅད་གདལ་ཁྱབ་ཆེན་པོའི་ཆོས་ཀྱི་སྐུས་བསྣུམས་པའི་གཉིས་མེད་ཡེ་ཤེས་བླ་མའི་ས་མཆོག་འདི་ཉིད་ནི་ཡེ་ནས་རིམ་པས་མ་བགྲོད་པར་འགྲོ་བ་དྲུག་ཀུན་སངས་རྒྱས་ཀྱི་ས་ལ་རང་བཞིན་གྱིས་བཀོད་དེ་མ་བཅོས་རྫོགས་པའི་ས་ཆེན་པོ་ཉིད་ནོན་པས་སེམས་ཀྱི་ཆོས་ཉིད་ཀྱི་ཀློང་འདིར་མ་ཆུབ་པ་གང་ཡང་མེད་པས་སངས་རྒྱས་ཀྱི་ས་མ་ཡིན་པའི་ཆོས་གང་༼༧༤༽ཡང་མི་རྙེད་ལ། དེས་ན་ཀློང་ཆེན་པོ་གང་འདིར་སྟོང་གསུམ་ཐམས་ཅད་སངས་རྒྱས་ཀྱི་ས་ལ་མ་བཀོད་པར་ཡེ་ནོན་པ་ལགས་པས་གང་ས་བཅུའི་རིམ་པ་རྩོལ་བས་བགྲོད་པར་འདོད་པ་ནི་ཆེད་དུ་བྱས་པའི་གོལ་ས་སྟེ་ནོར་བའི་ལམ་ཡིན་ནོ།།

ལྔ་པ་ཡེ་ཤེས་ཀྱི་གོལ་ས་ནི།

དེ་ཉིད་དེ་རིག ཅེས་པ་ནས། དེ་ལས་ངེས་པར་གོལ། །ཞེས་པའི་བར་གྱིས་བསྟན་ཏེ།

དེ་ཉིད་དེར་རིག་ཡེ་བྱུང་ལ། །ཁྱད་པར་རིམ་པ་འབྱུང་འདོད་གང་།།

གང་འདི་རྨོངས་པ་ཁོ་ནའོ། །རང་བྱུང་དེ་ལས་ངེས་པར་གོལ།།

སེམས་ཀྱི་ཆོས་ཉིད་མཉམ་པ་ཆེན་པོ་དེ་བཞིན་ཉིད་དེ་ཉིད་རང་རིག་པ་དེ་ནི་རང་བྱུང་གི་ཡེ་ཤེས་འབྱུང་འཇུག་དང་བྲལ་བའི་ངོ་བོར་བགྲོད་དུ་མེད་པར་གདོད་ནས་གྲོལ་བ་ཡིན་པ་ལ། སུ་དག་ལམ་གྱི་ཡེ་ཤེས་བསྒོམ་ནས་རིག་པ་ལ་བོགས་དང་སྐྱེད་ཀྱི་ཁྱད་པར་རིམ་པར་སྐྱེས་ནས་མཐར་ཕྱིན་པའི་འབྲས་བུ་འབྱུང་བར་འདོད་པ་གང་དག་ནི། གཅིག་ཆར་བའི་དོན་ཆེན་པོ་གང་འདིར་རྨོངས་པས་གོལ་བ་ཁོ་ནའོ། །དེས་ན་སེམས་ཀྱི་ཆོས་ཉིད་རྒྱུ་རྐྱེན་མེད་པས་རང་བྱུང་གི་སྙིང་པོ་ཡེ་ནས་གནས་པའི་དོན་ཤེས་པའི་རང་རིག་པ་དེ་ལས་ངེས་པར་གོལ་བ་ལ་ཐེ་ཚོམ་ཡང་མེད་དོ།།

དྲུག་པ་བསྒོམ་པའི་གོལ་ས་ནི།

བསམ་ཡུལ་དམིགས་སུ། ཞེས་པ་ནས། སེམས་འཆོས་གོལ་སར་ཞུགས། །ཞེས་པའི་བར་གྱིས་བསྟན་ཏེ།

བསམ་ཡུལ་དམིགས་སུ་མེད་པ་ལ། །བཏང་སྙོམས་ཆེན་པོའི་རྣལ་འབྱོར་པ།།

ཇི་བཞིན་པ་ཉིད་ཡིད་བཞིན་དུ། །ལུས་དབེན་སེམས་འཆོས་གོལ་སར་ཞུགས།།

སྒོ་གསུམ་བཅོས་པའི་སྐྱོན་འཆད་པ་ནི། འདིར་ཡེ་ཤེས་ཆེན་པོ་བསྒོམ་བསམ་སྤྱོད་ཡུལ་དམིགས་སུ་མེད་པའི་རང་གསལ་རིག་པ་གཉིས་མེད་ཆེན་པོ་ལ་དུས་གསུམ་དུ་དམིགས་པའི་འདུ་ཤེས་མེད་པར་བཏང་སྙོམས་ཆེན་པོའི་རྣལ་འབྱོར་པ་ཉིད་ནི་གང་དུའང་མ་གཡོས་པས་མ་བཅོས་རྣལ་མ་ཇི་བཞིན་པ་ཉིད་དང་བྲལ་བ་མེད་པར་ཡེ་ནས་ཡིན་བཞིན་དུ། དེ་ཉིད་ཡང་དག་པར་མ་རྙེད་པས་རྒྱུ་བ་དང་མ་བྲལ་བར་ལུས་དགོན་པར་འདུག་ནས་དབེན་པར་བྱས་ཏེ་སེམས་ཀྱི་བྱུང་ཚོར་འཆོས་བགེགས་ཀྱི་རྟོག་དཔྱོད་འཛིན་པ་དག་ནི་ཆོས་ཉིད་དང་མཚན་མ་རིས་སུ་བྱེད་པ་དང་མ་བྲལ་བས་གོལ་སར་ཞུགས་ཏེ་ལམ་འོག་མར་ཆུད་པའོ།།

བདུན་པ་སྤྱོད་པའི་གོལ་ས་ནི།

ཀུན་གྲོལ་ཆེན་པོ། ཞེས་པ་ནས། ཆེན་པོ་ཉིད་ལས་གོལ། །ཞེས་པའི་བར་གྱིས་བསྟན་ཏེ།

ཀུན་གྲོལ་ཆེན་པོ་དེ་ཉིད་ལ། །བཅིངས་གྲོལ་མེད་པར་ངེས་བཞིན་དུ།།

གང་འདིར་དཀའ་ཐུབ་རྟོག་པས་བཅིངས། །རྣམ་གྲོལ་ཆེན་པོ་ཉིད་ལས་གོལ།།

ཆོས་ཀུན་སེམས་ཉིད་དུ་རང་གྲོལ་བས་གནས་ལུགས་ཆེན་པོ་དེ་ཉིད་ལ་ཡེ་ནས་བཅིངས་པ་མ་དམིགས་པས་མཐར་གྲོལ་བར་འདོད་པའི་འདུ་ཤེས་ཡང་མེད་པར་ལྷུན་མཉམ་རྫོགས་པའི་ངོ་བོར་ངེས་བཞིན་དུ། འོག་མ་པ་གང་འདིར་ལྡོང་པ་དག་དེ་ལྟར་བློར་མ་ཆུད་པས་རང་རང་གི་སྲུང་བར་བྱ་བ་རྩ་བ་དང་ཡན་ལག་གི་དཀའ་ཐུབ་ལ་རྟོག་པས་སྒོ་གསུམ་བཅིངས་ནས་བླང་དོར་བྱེད་པའི་ཀུན་སྤྱོད་ལ་གནས་པ་ནི། ཤིན་ཏུ་རྣམ་པར་གྲོལ་བའི་རྣལ་འབྱོར་ཆེན་པོ་༼༧༥༽ཉིད་ལས་གོལ་ཏེ་བཅིངས་གྲོལ་མེད་པའི་དོན་མ་མཐོང་བ་ཁོ་ནའོ།།

ལྔ་པ་ལ་བཟླ་བའི་ཐབས་བཤད་པ་ནི།

ཡེ་ནས་མ་བཅོས། ཞེས་པ་ནས། ཉིད་ཀྱང་དེ་ཁོ་ན། །ཞེས་པའི་བར་གྱིས་བསྟན་ཏེ།

ཡེ་ནས་མ་བཅོས་ཉིད་ཁོ་ནར། །གང་གནས་དེ་ཉིད་དེ་ཁོ་ན།།

དེ་ལ་གོལ་ས་ག་ལ་ཡོད། །གོལ་སྒྲིབ་ཉིད་ཀྱང་དེ་ཁོ་ན།།

ཡེ་གདོད་མ་ནས་མ་བཅོས་མ་བསླད་པའི་ཆོས་ཉིད་དེ་ཁོ་ནར་དབྱིངས་དང་རིག་པ་གཉིས་སུ་མེད་པར་གང་གནས་ཏེ་སྒྲིབ་མེད་མཁྱེན་པའི་ཡེ་ཤེས་དེ་ཉིད་རང་ཤར་བ་ལ་བསམ་པའི་འདུ་ཤེས་གང་ཡང་མེད་པར་དེ་ཁོ་ན་ཉིད་དུ་གསལ་བ་ལ། ཐམས་ཅད་ཆོས་ཉིད་དུ་གདལ་བས་ན། གསང་སྔགས་གསང་བའི་སྙིང་པོ་དེ་ལ་སྐྱོན་གྱི་གོལ་ས་ག་ལ་ཡོད་དེ། གོལ་སྒྲིབ་ཉིད་ཀྱང་དེ་ཁོ་ན་ཉིད་དེའི་ངོ་བོ་ཡིན་པར་རྟོགས་པས་སྐྱོན་ཡོན་ཏན་དུ་ཤར་ཏེ་ཐིག་ལེ་ཉག་གཅིག་གི་ཀློང་ལ་སེལ་མེད་པས་གོལ་སྒྲིབ་ཀྱི་མིང་ཡང་མེད་དེ། ཀུན་འདུས་ལས།

དེ་བས་འདུས་པ་ཆེན་པོའི་ཚོགས། །སེམས་ནི་ཡང་དག་ལམ་ཉིད་དེ། །མཁའ་ལ་བྱ་ལམ་རྗེས་མེད་བཞིན། །གོལ་མེད་ལམ་ཞེས་འདྲེན་པས་བཤད། །ཅེས་སོ།།

གསུམ་པ་ཞབས་བསྡུ་བ་ནི།

དེ་སྐད་ཅེས། ཞེས་པ་ནས། ཆད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་སྐད་ཅེས་བགྲོས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས།

གང་གིས་བཅིངས་པ་ལས་ཡོངས་སུ་གྲོལ་ཏེ། རེ་རྩོལ་གྱི་ཐེ་ཚོམ་ཆད་པར་གྱུར་ཏོ།།

དེ་སྐད་ཅེས་བགྲོས་ཏེ་བཀའ་སྩལ་པས། འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས། འཁྲུལ་པའི་རྟོག་པ་གང་དང་གང་གིས་བཅིངས་པ་རྣམས་ལས་ཡོངས་སུ་གྲོལ་ཏེ། འབྲས་བུ་གཞན་ལ་རེ་རྩོལ་གྱི་ཐེ་ཚོམ་ཆད་ནས་ངེས་པའི་གདེངས་རྙེད་པར་གྱུར་ཏོ། །དེ་ལྟ་བུའི་རྟོགས་པ་ནི་བཤད་པ་ལྟར་རྣལ་འབྱོར་དབུ་མའོ་དོན་ཏེ། དེ་ལ་རྣམ་གྲངས་བཅུ་ལས་ཡང་ཐོག་གི་ཡུལ་དུ་གྱུར་པའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཆོས་ཐམས་ཅད་ཀྱི་མེ་ལོང་བསྟན་པའི་ལེའུ་སྟེ་ལྔ་བཅུ་བཞི་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། དོན་གྱི་གཙོ་བོ་ལས་ཆོས་ཐམས་ཅད་ཀྱི་མེ་ལོང་ནམ་མཁའ་མཐའ་དང་བྲལ་བ་བཞིན་ཆོས་ཉིད་མཐའ་བྲལ་དུ་བསྟན་པའི་ལེའུ་སྟེ་ལྔ་བཅུ་རྩ་བཞི་པ་ཉིད་གསལ་བར་འགྲེལ་ཏེ་བསྟན་པའོ།། །།

ལེའུ་ང་ལྔ་པ་ཆོས་ཐམས་ཅད་ཀྱི་རྩ་བ་གང་མུན་པའི་སྤྱོད་ཡུལ་བསྟན་པ།

༈ གཉིས་པ་མི་མཐུན་པ་སྐྱོན་གྱི་རྩ་བ་བཤད་པ་ལ་བཞི་སྟེ། མདོར་བསྟན་པ། རྒྱས་པར་བཤད་པ། རྒྱུད་ལུང་མན་ངག་གི་དཔེས་མུན་པའི་ཐེ་ཚོམ་བསལ་བ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། མུན་སྣང་གཉིས་སུ་སྣང་བ་ཡིན་ཏེ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་གང་གི་རྩ་བ་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཆོས་ཐམས་ཅད་ཀྱི་རྩ་བ་ཞེས་བགྱི་བ་དེ་གང་ལགས། དེ་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ཀྱེ་ལངྐའི་བདག་པོ་གང་དྲི་བ་དམ་པ་འདི་ནི་ལེགས་སོ། །ཤིན་ཏུ་རབ་ཏུ་ལེགས་སོ། །གང་ཆོས་ཐམས་ཅད་ཀྱི་རྩ་བ་ཞེས་བགྱི་བ་དེ་ནི་རྩ་བ་བྱང་ཆུབ་སེམས་ལ་བྱའོ། །དེ་ནི་འདི་ལྟར་ཡོངས་སུ་ཤེས་པར་བྱ་སྟེ། སངས་རྒྱས་ཀུན་གྱི་ཐུགས་ཀྱི་ཆོས་ཉིད་དང་། སེམས་ཅན་ཀུན་གྱི་སེམས་ཀྱི་ཆོས་ཉིད་དུ་ཤེས་པར་བྱའོ།།

དེ་ནི་མུན་སྣང་གཉིས་སུ་སྣང་བ་ཡིན་ཏེ།

ལེའུ་འདིས་དྲང་དོན་འབའ་ཞིག་སྟོན་ནོ། །མཚོན་པ་དཔེའི་རྩ་བ་བསྟན་པ་དེ་ནས་ཡང་སྡུད་པ་པོ་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྟོན་པ་གསང་བ་པའི་བདག་པོ་ལ་ལྡེའུ་མིག་ཐ་མ་རྩ་བ་གསུམ་གྱི་༼༧༦༽དོན་ལས་བར་མ་ཆོས་ཐམས་ཅད་ཀྱི་མུན་པ་གང་གི་རྩ་བའི་རྣམ་གྲངས་ཆེན་པོའི་དོན་གྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཆོས་ཐམས་ཅད་ཀྱི་རྩ་བ་ཞེས་བགྱི་བ་དེ་ཡི་ངོ་བོ་གང་ལགས། དེ་ཉིད་ཐབས་གང་གིས་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་རྣམ་གྲངས་གཉིས་དྲིས་པ་ལས། སྟོན་པ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་ལང་ཀའི་བདག་པོ། ཞེས་བོས་ནས་དྲི་བ་གཉིས་དྲིས་པ་ལ་ལེགས་པ་གཉིས་གནང་སྟེ། གང་དུ་དྲི་བ་དམ་པ་འདི་ནི་རང་དོན་དུ་ཡང་ལེགས་སོ། །གཞན་དོན་དུའང་ཤིན་ཏུ་རབ་ཏུ་ལེགས་སོ། །གང་ཆོས་ཐམས་ཅད་ཀྱི་རྩ་བ་ཞེས་བགྱི་བ་དེ་ནི་རྟོགས་ན་འདས་པ་དང་མ་རྟོགས་ན་འཁོར་བ་འབྱུང་བའི་རྩ་བ་ཆོས་ཉིད་བྱང་ཆུབ་ཀྱི་སེམས་ལ་བྱའོ། །ཞེས་ངོ་བོ་བསྟན་པའོ།།

དེ་ཉིད་ཇི་ལྟར་ཤེས་པར་བྱ་བའི་ལན་བསྟན་ཏེ། བྱང་ཆུབ་ཀྱི་སེམས་དེ་ནི་འདི་ལྟར་ཉེ་བར་བསྟན་པའི་ཐབས་ཀྱི་སྒོ་ནས་ཡོངས་སུ་ཤེས་པར་བྱ་སྟེ། གང་སངས་རྒྱས་ཀུན་གྱི་ཐུགས་ཀྱི་ཆོས་ཉིད་དང༌། སེམས་ཅན་ཀུན་གྱི་སེམས་ཀྱི་ཆོས་ཉིད་གཉིས་ཐ་སྙད་སོ་སོར་དབྱེ་ཡང་ངོ་བོས་དབྱེར་མེད་པའི་སྤྲོས་པ་དང་བྲལ་བའི་རང་བཞིན་དེ་ཉིད་དུ་ཤེས་པར་བྱའོ། །ཆོས་ཉིད་དེ་ནི་རྟོགས་མ་རྟོགས་ཀྱི་རྩ་བས་མུན་པ་འཁོར་བའི་སེམས་ཅན་དང༌། སྣང་བ་མྱ་ངན་ལས་འདས་པའི་སངས་རྒྱས་གཉིས་སུ་སྣང་བ་ཡིན་ཏེ། ཚིག་ལྷག་མ་དང་བཅས་པ་ནི་དོན་དེ་ཉིད་རྒྱས་པར་སྟོན་པའི་ཁུངས་མཚོན་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། མུན་པའི་གཞི་ཆོས་ཐམས་ཅད་ཀྱི་རྩ་བའི་དྲིས་ལན་བསྟན་པ། མུན་པའི་ཁམས་ཀྱི་ངོ་བོའི་དྲིས་ལན་བསྟན་པའོ། །དང་པོ་ལ་གཉིས་ཏེ། དྲིས་པ་དང༌། ལན་བཤད་པའོ། །དང་པོ་ལ་གཉིས་ཏེ། སྟོན་པ་གསང་བའི་སྐུའི་ལོ་རྒྱུས་བཤད་པ། དྲིས་པ་དངོས་བསྟན་པའོ། །དང་པོ་ནི།

ལང་ཀའི། ཞེས་པ་ནས། ཐེ་ཚོམ་ཆད་ནས་སླར་དོང་བ་དང༌། ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ཡང་འདི་ལྟར་བཅོམ་ལྡན་འདས་གསང་བ་མཆོག་གི་བདགོ་པོ་དེ། གསང་བའི་གནས་པདྨོ་ཅན་ཞེས་བྱ་བ། གཙུག་ཏོར་འཁོར་ལོས་སྒྱུར་བའི་སྒྱུ་མའི་ལྷུམས་གསང་བ་མཆོག་གི་ཕོ་བྲང་ན། སྐད་ཅིག་བཞུགས་པ་དེའི་ཚེ་དེའི་དུས་ན། གང་སྐྱེས་བུ་དམ་པ་དཔག་ཏུ་མེད་པ་དག་དེ་ཁོ་ན་ཉིད། གསང་བ་དམ་པའི་ཐེ་ཚོམ་གཅོད་པ་དང་། ཡོངས་སུ་ཞུ་བ་དང་། ཞུ་བར་དོག་པ་དང་། ཐེ་ཚོམ་ཆད་ནས་སླར་དོང་བ་ན།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས། གནས་ལུགས་དེ་ཡང་གསང་བའི་སྐུ་ལས་ཐོས་པའི་ཚུལ་འདི་ལྟར་རྟེན་འཛོམ་པའི་རིག་པ་སྐད་ཅིག་གིས་རྟོགས་པ་གསང་བའི་སྐུའི་ལོ་རྒྱུས་ཉིད་སྟོན་ཏེ། ཚུལ་འདི་ཉིད་ཇི་ལྟར་སྣང་ལུགས་ནི། གསང་བ་རྨད་དུ་བྱུང་བའི་ཐབས་ཆེན་པོས་སྐད་ཅིག་གིས་རྟོག་པ་བག་ཆགས་དང་བཅས་པ་བཅོམ་ཞིང་ཡོན་ཏན་རྫོགས་པར་ལྡན་ཀྱང་མཐའ་ཀུན་ལས་འདས་པའི་སྟོན་པ་གསང་བའི་སྐུ་གསང་༼༧༧༽སྔགས་ཀྱི་རྒྱལ་པོ་ཐམས་ཅད་ལ་ཁྱབ་ཀྱང་རྟོགས་པར་དཀའ་བས་གསང་བ་མཆོག་གི་ བདག་པོ་འཁོར་འདས་དབྱེར་མེད་ཀྱི་ངོ་བོ་མཐའ་གང་ཡང་སྣང་བ་མེད་པ ་དེ་ཉིད། རྒྱུ་ཡི་ཐེག་པས་མི་རྟོགས་པས་གསང་བའི་གནས་ཉེས་པས་མི་གོས་པས་པདྨོ་ཅན་ཞེས་བྱ་བ་ཐབས་ཀྱི་མཆོག་གི་རྡོ་རྗེའི་གཙུག་ཏོར་གྱི་རྟོག་པ་གཅོད་པའི་འཁོར་ལོས་བདེ་སྟོང་ལ་དབང་བསྒྱུར་བའི་ཆོ་འཕྲུལ་གྱིས་སྤྲུལ་པ་ཐམས་ཅད་གནས་པའི་ལྷུམས་ཡུམ་གྱི་མཁའ་གསང་བ་མཆོག་གི་ཕོ་བྲང་ན། ཡུན་དུས་མཐའི་སྐད་ཅིག་ལ་བཞུགས་ཏེ་ཆོས་སྟོན་པ་དེའི་ཚེ་དེའི་དུས་ན། གང་དེ་ཉིད་ཀྱི་འཁོར་རང་བཞིན་གྱི་སྐྱེས་བུ་དམ་པ་རྡོ་རྗེ་མྱུར་བ་ལ་སོགས་པ་དཔག་ཏུ་མེད་པ་མང་པོ་དག རྡོ་རྗེའི་རྩེ་མོར་ལྷན་ཅིག་སྐྱེས་པའི་ངོ་བོ་དེ་ཁོ་ན་ཉིད་གསང་བ་དམ་པའི་དོན་ལ་སྔར་ངེས་པ་མ་རྙེད་པའི་ཐེ་ཚོམ་དག་དགའ་བ་བཞིའི་སྒོ་ནས་གཅོད་པ་དང༌། སྦྱོར་བའི་བསྟན་བཅོས་ལྟར་ད་ལྟ་རྡོ་རྗེའི་ལམ་ནས་ཡོངས་སུ་ཞུ་བ་དང༌། རྩ་གནས་རྣམས་ནས་གཡོ་ཞིང་ད་གདོད་ཞུ་བར་བསྡོག་པ་དང༌། ཡེ་ཤེས་སྐྱེས་པས་ཐེ་ཚོམ་ཆད་ནས་སླར་རྩ་གནས་སུ་དོང་བ་དང་ལྡན་ཏེ་ལོངས་སྤྱོད་རྫོགས་པ་ཆེན་པོའི་གསང་བའི་ཐབས་མཆོག་གི་ཕུན་སུམ་ཚོགས་པར་ངེས་པ་ན།

གཉིས་པ་དྲིས་པ་དངོས་བསྟན་པ་ནི།

གང་ཁོ་བོ་འཁོར་དེར། ཞེས་པ་ནས། ཞེས་ཞུས་པ་ལས། ཞེས་པའི་བར་གྱིས་བསྟན་ཏེ།

གང་ཁོ་བོ་དེར་འདུས་པར་གྱུར་པས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་བྱང་ཆུབ་ཀྱི་སྙིང་པོ་ཞེས་བགྱི་བ། ཆོས་ཐམས་ཅད་ཀྱི་རྩ་བ་དེ་མ་མཐོང་མ་དམིགས་ལགས་སོ། །ཡང་དག་པར་མ་རྙེད། ངེས་པར་མ་འཚལ་ལགས་སོ། །བསྙགས་པས་མ་སླེབས། བགྲོད་པས་མ་ཁྱབ་ལགས་ན། འདི་གང་ན་མཆིས། གང་དུ་བཙལ། གང་ཞིག་ལགས། གང་ལ་བགྱི། གང་དུ་གཏོར། བཅོམ་ལྡན་འདས་དུས་ཀྱི་སྐད་ཅིག་མ་འདི་ཉིད་དུ་བསྟན་དུ་གསོལ། བདེ་བར་གཤེགས་པ་འདི་བསྟན་དུ་གསོལ། ཞེས་ཞུས་པ་ལས།

གང་དེའི་ཚེ་སྡུད་པ་པོ་གསང་བའི་བདག་པོ་ཕྱག་ན་རྡོ་རྗེ་ཁོ་བོ་གསང་བའི་སྐུའི་འཁོར་དེར་འདུས་པར་གྱུར་པས། བཅོམ་ལྡན་འདས་གསང་བའི་སྐུ་དེ་ལ་འདི་སྐད་ཅེས་གསོལ་ཏོ། །ཞེས་ཞུ་བ་བརྗོད་པ་ནི། སྤྱིར་དྲི་བ་ལྔ་ལས་འདིར་དགོས་པ་གཞན་དོན་དུ་ཐེ་ཚོམ་དང་མི་ཤེས་པ་དྲིས་པའོ། །འོ་ན་སྐབས་འདིར་གསང་བའི་སྐུ་ཁོ་ན་ལ་དྲི་བ་འབྱུང་བ་ཅིའི་ཕྱིར་ཞེ་ན། ཐབས་དང་ལྡན་མི་ལྡན་གྱིས་འཁོར་འདས་གཉིས་ཀའི་རྩ་བར་གྱུར་པའི་ཕྱིར་རོ། །དེ་ཡང་བཅོམ་ལྡན་འདས། ཞེས་སྟོན་པ་ལ་བོས་ནས། འཁོར་བདག་ཅག་གིས། དོན་ཆེན་པོ་བྱང་ཆུབ་ཀྱི་སྙིང་པོ་ཞེས་བགྱི་བ་འཁོར་འདས་ཀྱི་ཆོས་ཐམས་ཅད་ཀྱི་རྩ་བར་གྱུར་པ་དེ་ཉིད། མ་རིག་པས་སྒྲིབ་པས་མ་རྟོགས་ཏེ་ངོ་བོ་མ་མཐོང༌། འདི་འདྲར་མ་དམིགས་ལགས་སོ། །ཡུལ་དུ་བྱེད་པས་ཡང་དག་པར་མ་རྙེད། ཐེ་ཚོམ་མེད་པར་ངེས་པར་མ་འཚལ་ལགས་སོ། །ཟབ་ཅིང་དཔག་པར་དཀའ་བས་བློ་ཡིས་བསྙགས་པས་མ་སླེབས། བགྲོད་ཀྱང་༼༧༨༽ཡངས་པས་མ་ཁྱབ་ལགས་ན། འདི་ཉིད་གནས་གང་ན་མཆིས། ས་གང་དུ་བཙལ། རིགས་གང་ཞིག་ལགས། ངོ་བོ་གང་ལ་བགྱི། ཁུངས་གང་དུ་སྟོར་ཞེས་པའི་དྲི་བ་བཅུ་གཅིག་དྲིས་པ་ནི། བཅོམ་ལྡན་འདས་ཐབས་ཀྱི་སྒོ་ནས་ཡེ་ཤེས་སྐྱེ་བའི་དུས་ཀྱི་སྐད་ཅིག་མ་འདི་ཉིད་དུ་བསྟན་དུ་གསོལ། དུས་དེ་ལ་ནན་ཏན་བརྣན་ནས་བདེ་བར་གཤེགས་པ་འདི་ཉིད་བསྟན་དུ་གསོལ། ཞེས་བདག་དང་གཞན་དོན་གཉིས་ཀྱི་ཕྱིར་ཡང་གསུངས་ཏེ། དེ་ལྟར་ཚིག་ཏུ་ཞུ་བ་དང༌། ཏིང་ངེ་འཛིན་གྱིས་ཞུ་བ་དང༌། བརྡ་ཡིས་ཞུ་བ་དང༌། ཐབས་ཀྱིས་ཞུ་བ་རྣམས་ལས་ཐ་མ་གཉིས་ཀྱིས་ཞུས་པ་ལས། ཞེས་སོ། །འོ་ན་འདི་རྒྱུ་མཚན་ཉིད་ཀྱང་ཡིན་པ་ལ་གསང་བའི་སྐུའི་གླེང་གཞིར་བྱུང་བ་འགལ་སྙམ་ན། སྤྱིར་ཐེག་པ་ཆེན་པོ་ཀུན་ལ་གྲགས་ཀྱང༌། འདིར་གསང་བའི་ལམ་དུ་ལྷན་ཅིག་སྐྱེས་པའི་ཡེ་ཤེས་སྐྱེས་ན་སངས་རྒྱ། ཐུན་མོང་འདོད་ཆགས་སུ་གོལ་ན་འཁོར་བ་སྣང་བའི་དོན་དཔེ་དེ་བཞིན་དུ་ཀུན་གཞི་ཉིད་ཀྱང་རྟོགས་ན་འཚང་རྒྱ་ལ་མ་རྟོགས་ན་འཁོར་བར་སྣང་བའི་ཕྱིར་ལུང་ཆེན་པོའི་ཐབས་ཆེན་གསང་བའི་སྒོ་དམ་པ་སྟེ་མ་ཧཱ་མན་ཆད་ཀུན་ལས་འཕགས་པར་ཡང་གསལ་ལོ།།

གཉིས་པ་ལན་བཤད་པ་ནི།

བཅོམ་ལྡན་འདས་དེས། ཞེས་པ་ནས། དེ་སྐད་ཅེས་བཀའ་སྩལ་པ་དང༌། ཞེས་པའི་བར་གྱིས་བསྟན་ཏེ།

བཅོམ་ལྡན་འདས་དེས་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་བྱང་ཆུབ་ཀྱི་སྙིང་པོ་ཞེས་བྱ་བ་ཆོས་ཐམས་ཅད་ཀྱི་རྩ་བ་དེ་ནི་བསྒྲིབས་པས་མ་མཐོང་། མེད་པས་མ་དམིགས། ཟབ་པས་མ་རྙེད། དཀའ་བས་མ་ཤེས། མྱུར་བས་མ་བསླེབས། ཡངས་པས་མ་ཁྱབ་པ་ཡིན་ཏེ། འདི་མུན་པའི་ཁམས་ན་ཡོད། གྲོང་ཁྱེར་གསུམ་དུ་བཙལ། འདི་ཡན་ལག་དང་། མདོ་དང་། རྩ་བ་ཡིན། ངོ་བོ་དེ་ཁོ་ན་ཉིད་ལ་བྱ། མུན་པའི་ཁམས་སུ་གཏོར། སེམས་དཔའ་ཆེན་པོ་དེ་ལྟ་བས་ན། མུན་པ་འདི་གསལ་བའི་ཕྱིར། འདིའི་རང་བཞིན་ལ་མཁས་པར་བྱའོ། །དེ་བཞིན་དུ་ངོ་བོ་དང་། མཚན་ཉིད་དང་། ཡན་ལག་དང་། ཇི་སྲིད་པའི་ཡུན་དང་། ལས་དང་། མུན་པའི་རྣམ་གྲངས་དང་། དཔེ་ལ་སོགས་པ་དང་། བསལ་བའི་ཐབས་རྣམས་ལ་མཁས་པར་བྱའོ། །འདི་ལ་ནན་ཏན་བྱའོ། །གང་མུན་པའི་ཁམས་པ་དག་ཆ་གཅིག་ཏུ་ཤེས་པར་བྱའོ། །དེ་སྐད་ཅེས་བཀའ་སྩལ་པ་དང་།

སྤྱིར་མུན་པའི་སྤྱོད་ཡུལ་འདི་ལ་ས་བཅད་ལུགས་གཉིས་ཏེ། ལྷ་རྗེ་ཡང་ཁྱེད་ཀྱི་ལུགས་སུ་ས་བཅད་ན། མདོ་རྒྱས་མཇུག་སྡུད་གསུམ་ལས། རྒྱས་པ་ལ་གཉིས་ཏེ་མུན་པའི་གླེང་གཞི་ཆོས་ཐམས་ཅད་ཀྱི་རྩ་བའི་དྲིས་ལན་དང༌། མུན་པའི་དྲིས་ལན་ནོ། །དང་པོ་ལ་གཉིས་ཏེ། དྲིས་པ་དང་ལན་ནོ། །དྲིས་པ་ནི།

ལང་ཀའི་བདག་པོ་དེ་ཡང་འདི་ལྟར་བཅོམ་ལྡན་འདས་གསང་བ་མཆོག་གི་བདག་པོ་དེ། ཞེས་པ་ནས། བདེ་བར་གཤེགས་པ་འདི་བསྟན་དུ་གསོལ། ཞེས་ཞུས་པ་ལས། ཞེས་སོ། །ལན་ལ་གཉིས་ཏེ། ལན་མདོར་བསྟན་པ་ནི། བཅོམ་ལྡན་འདས་དེས་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་བྱང་ཆུབ་ཀྱི་སྙིང་པོ། ཞེས་པ་ནས། གང་མུན་པའི་ཁམས་པ་དང་ཆ་གཅིག་ཏུ་ཤེས་པར་བྱའོ། །དེ་སྐད་ཅེས་བཀའ་སྩ་ལ་པ་དང༌། ཞེས་སོ། །ལན་རྒྱས་པ་ནི། འཁྲུག་སྡེབས་ཏེ། ཚན་གཉིས་ལྷག་ཙམ་གྱི་འོག་ན། བཅོམ་ལྡན་འདས་དེས་བཀའ་སྩལ་པ་སེམས་དཔའ་ཆེན་པོ་མུན་པ་དང་སྣང་བས་བསྡུས་པའི་ཆོས་ཐམས་ཅད་ཀྱི་རྩ་བ་ནི་གཞི་དང་རྩ་བ་༼༧༩༽མེད་པར་འདུས་པར་ཤེས་པར་བྱའོ། །ཞེས་པ་ནས། བླུན་པོའི་ཆེད་དུ་ཤེས་པར་གྱིས། ཞེས་པ་ཡན་ཆད་དོ།།

མུན་པའི་དྲིས་ལན་ལ། མདོ་དང་རྒྱས་པའོ། །མདོར་བསྟན་པ་ནི། འདི་ཡང་འདི་ལྟར་ཡོངས་སུ་སྣང༌། །ཡན་ལག་མདོ་དང་རྩ་བ་སྟེ། །འབྱེད་དང་འགྲེལ་དང་འབྱིན་པ་ཡིན། །ཞེས་པའོ། །རྒྱས་པ་ལ་གསུམ་སྟེ། མུན་པ་འབྱེད་པའི་ཡན་ལག་དྲུག་དང༌། འགྲེལ་པའི་མདོ་བཞི་དང༌། འབྱིན་པའི་རྩ་བ་གསུམ་མོ། །དེ་ལ་གཞིའི་མདོ་ཀུན་གཞི་ལ། དྲིས་པ་དང་ལན་དང་མཇུག་བསྡུ་བའོ། །དྲིས་པ་ནི་གོང་དུ་བཞག་པའི་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་མུན་པ་འདི་ཅི་ལས་བྱུང༌། ལ་སོགས་པ་དོན་བཅོ་ལྔ་དྲིས་པའོ། །ལན་ནི་འོག་ཏུ་འཁྲུགས་བྱས་ཏེ། ལང་ཀའི་བདག་པོ་ལ་དེ་ལ་གཞིའི་མདོ་ནི་འདི་ལྟ་སྟེ། ཞེས་པ་ནས་མར་ལན་འདེབས་སོ། །དེ་ལ་སྐྱོན་དུ་བྱ་བ་ཀུན་གཞི་ལ་དྲི་བའི་མཁན་པོ་ཡང་གསང་བདག་ཡིན་ལ། ལན་འདེབས་པ་ཡང་གསང་བདག་ཡིན་པས་མི་འཐད་དོ་ཅེ་ན། དེ་ནི་གསང་བདག་གིས་དྲིས་པ་ལས། སྔོན་བྱུང་དུ་སྟོན་པ་གསང་བ་མཆོག་གི་བདག་པོས་ལན་དོན་གྱིས་བཏབས་ཏེ། རྗེས་འཇུག་ཏུ་རི་མ་ལ་ཡར་གསང་བདག་གིས་དམ་པའི་རིགས་ཅན་ལ་གསུངས་པའོ། །སྟོན་པས་ལན་བཏབས་པ་ཅིས་མངོན་ཞེ་ན། དེ་སྐད་གསང་བ་མཆོག་དེས་བཤད། །ཅེས་པས་མངོན་ནོ། །ས་བཅད་ལུགས་གཅིག་ལ། སྟོད་ཀྱི་འཁྲུགས་མེད་པར་བྱས་ལ། མུན་པའི་གཞི་ཆོས་ཐམས་ཅད་ཀྱི་རྩ་བའི་དྲིས་ལན་ལ། དྲིས་པ་དང་ལན་ནོ། །མུན་པའི་དྲིས་ལན་ལ། དྲིས་པ་དང་ལན་ནོ། །དེའང་དྲི་བ་བཅོ་ལྔ་ལ་ལན་བཅུ་གཉིས་སུ་བསྡུས་ནས་འདེབས་ཏེ། རྩ་བ་གང༌། ཞེས་པ་དང༌། རྩ་བ་གང་དུ་འདུས། ཞེས་པ་ལ་ལན་གཅིག་ཏུ་འདེབས། ཡན་ལག་ཏུ། ཞེས་པ་དང༌། བྱེ་བྲག་ཏུ། ཞེས་པ་ལ་ལན་གཅིག་ཏུ་འདེབས། མུན་པ་ཞེས་ཅིའི་ཕྱིར་བགྱི། ཞེས་པ་དང༌། འདི་ཅིའི་ཕྱིར་འཐིབས། ཞེས་པ་ལ་ལན་གཅིག་ཏུ་འདེབས་སོ། །ཀུན་གཞིའི་མདོ་ལ། ཀུན་གཞིའི་མདོར་བསྟན། འོག་མ་ཀི་ནས། མུན་པའང་དེ་ཉིད་དེ་ལས་བྱུང༌། །མུན་པའི་རང་བཞིན་ངོ་བོ་དང༌། །མཚན་ཉིད་ཡན་ལག་རྩ་བ་དང༌། །གནས་དང་སྒྲིབ་པ་བྱེ་བྲག་ཆོས། །གང་དུ་གང་གིས་གང་ཕྱིར་གང༌། །དེ་དག་དེ་བས་དབྱེ་བར་བྱའོ། །ཞེས་པ་དེ་ཡར་བླང་ལ། མདོར་བསྟན་ནོ།།

རྒྱས་པ་ནི། ལང་ཀའི་བདག་པོ་དེ་ལ་༼༨༠༽གཞིའི་མདོ་ནི་འདི་ལྟ་སྟེ། གཞི་ནི་བྱིས་པ་འདི་ལྟར་འདོད། །ཅེས་པ་ནས་མར་བཅོ་ལྔས་སྟོན་ཏོ། །འོན་ཀྱང་འདིར་ནི་ཀུན་མཁྱེན་དམ་པ་རིན་པོ་ཆེས་མཛད་པའི་བསྡུས་དོན་ལྟར་ཏེ། སྟོན་པ་བཅོམ་ལྡན་འདས་གསང་བ་མཆོག་གི་བདག་པོ་དེས་འདི་སྐད་ཅེས་བཀའ་སྩལ་ཏོ། །ལན་དེའང༌། བྱིན་གྱིས་རླབས་ཀྱིས་ལན་སྩལ་པ་དང༌། དགོངས་པ་བརྡ་ཡིས་ལན་འདེབས་པ་དང༌། ཚིག་ཏུ་བརྗོད་པས་ལན་གདབ་པ་དང༌། ཐབས་དང་བརྡ་ཡིས་ལན་འདེབས་པ་ཐུན་མོང་བ་རྣམས་ལས། འདིར་དྲིས་ལན་གྱིས་ཐེ་ཚོམ་བཅད་པ་སྤྱིར་བསྟན་པ་ནི། བཤད་པ་དང་འཆད་པའི་དྲིས་ལན་ལའང་ཉེ་བར་སྦྱར་རོ། །དེ་བས་ན་འདིར་ཐ་མ་བཀའ་སྩལ་བར་མཛད་དེ། སེམས་དཔའ་ཆེན་པོ་ཞེས་བོས་ནས། ཆོས་ཉིད་བྱང་ཆུབ་ཀྱི་སྙིང་པོ་ཞེས་བྱ་བ་ཆོས་ཐམས་ཅད་ཀྱི་རྩ་བ་ཆེན་པོའི་དོན་བྱང་ཆུབ་ཀྱི་སེམས་ཐིག་ལེ་ཉག་གཅིག་དེ་ནི་འདི་ལྟར་དང་པོའི་ལན་རང་ངོ་མ་ཤེས་པའི་མ་རིག་པས་བསྒྲིབས་པས་མ་མཐོང་བ་ཡིན་ལ། དེ་ནས་རིམ་པ་བཞིན་སྦྱར་ཏེ། སྤྱོད་ཡུལ་དུ་བྱར་མེད་པས་མ་དམིགས་ཤིང༌། གཏིང་ཟབ་པས་ཡང་དག་པའི་དོན་མ་རྙེད་པ་དང༌། བློས་དཔག་པར་དཀར་བས་ངེས་པར་མ་ཤེས། བྱང་ཆུབ་ཀྱི་སྙིང་པོ་རང་གི་ངང་ནི་ཤིན་ཏུ་མྱུར་བས་རྩོལ་བགྲོད་ཀྱིས་མ་སླེབས་ལ་དོན་དེ་ཉིད་མུ་མཐའ་མེད་དེ་ཡངས་པས་བློས་མ་ཁྱབ་པ་ཡིན་ཏེ། དེས་ན་འདི་ཉིད་འཇིག་རྟེན་འཁོར་བ་མུན་པའི་ཁམས་ན་ཡོད་པ་ཡིན་པས། རྟོགས་པར་བྱེད་ནས་དོན་ཚོལ་ན་གྲོང་ཁྱེར་གསུམ་དུ་བཙལ་ལ། འདི་ཡི་རིགས་ཀྱི་རང་བཞིན་གང་ཞིག་ཡིན་ན་ཡན་ལག་དྲུག་དང༌། མདོ་བཞི་དང༌། རྩ་བ་གསུམ་ཉིད་ཡིན་པས། དེའི་ངོ་བོ་ཆོས་ཐམས་ཅད་ཀྱི་ཆོས་ཉིད་དེ་ཁོ་ན་ཉིད་ལ་བྱ་ཞིང༌། གར་སྟོར་ན་མ་རིག་བདག་ཏུ་རྟོག་པའི་མུན་པའི་ཁམས་སུ་སྟོར་བ་ཡིན་ནོ། །སེམས་དཔའ་ཆེན་པོ། ཞེས་བོས་ནས། གཏན་ཚིགས་དེ་ལྟ་བས་ན། ལན་གྱི་དོན་ཚུལ་གྱི་རྩ་བ་མ་རིག་པའི་མུན་པ་འདི་ཉིད་བསལ་བའི་ཕྱིར། འདིའི་རང་བཞིན་ལ་མཁས་པར་བྱ་ཞིང་མཚན་ཉིད་ཇི་ལྟ་བར་རྟོགས་པར་གྱིས་ཤིག་པར་གདམས་པའོ། །རྟོགས་པར་བྱ་བའི་ཐབས་བསྟན་པའི་ཆེད་དུ། དེ་བཞིན་དུ། ཀུན་གཞི། ཉོན་ཡིད། ཡིད་ཤེས། སྒོ་ལྔ་དང་ཤེས་པ་བཞི་པོ་རེ་རེ་ལའང་སྦྱར་ཏེ། མུན་པའི་ངོ་བོ་དང༌། དེའི་མཚན་ཉིད་དང༌། མུན་པའི་ཡན་ལག་དང༌། ཇི་སྲིད་དུ་གནས་པའི་ཡུན་དང༌། དེའི་བྱེད་ལས་དང༌། མུན་པའི་རྣམ་གྲངས་དང༌། མཚོན་བྱེད་ཀྱི་དཔེ་ལ་སོགས་པ་རྣམས་དང༌། ༼༨༡༽མུན་པ་འདི་ཉིད་བསལ་བའི་ཐབས་ལམ་གྱི་ཆོས་ཀྱི་མཚན་ཉིད་རིག་པ་རྣམས་ལ་ཡང་མཁས་པར་བྱའོ། །འདི་རྣམས་མ་ནོར་བར་ངེས་པ་ལ་ནན་ཏན་ཏུ་འབད་པར་བྱའོ། །དེའང་དོན་གཞན་དུ་ཚོལ་བའི་ཞེན་པ་དགག་པའི་ཕྱིར། གང་བློ་ཆུང་ངུའི་ཐེག་པ་འཛིན་པས་མུན་པའི་ཁམས་པ་དབུ་སེམས་དག་གིས་འདོད་པའི་མུན་པའི་ཁམས་དང་ཡང་བྱང་ཆུབ་སེམས་ཀྱི་ངོ་བོ་ནི་ཆ་གཅིག་ཏུ་བསྟུན་ཏེ་ཤེས་པར་བྱའོ། །ཞེས་ལྡོག་པའི་ཐ་དད་ཡོད་ཀྱང་ངོ་བོ་མུན་པའི་ཁམས་དང་བྱང་ཆུབ་སྙིང་པོ་དབྱེར་མེད་པའོ་ཞེས་གསུངས་ཏེ་དེ་སྐད་ཅེས་བཀའ་སྩལ་བར་མཛད་པ་དང༌།།

གཉིས་པ་མུན་པའི་ཁམས་ཀྱི་ངོ་བོའི་དྲིས་ལན་བསྟན་པ་ལ་གཉིས་ཏེ། དྲིས་པ་དང༌། ལན་བཤད་པའོ། །དང་པོ་ནི།

ཁོ་བོས་འདི་སྐད། ཅེས་པས་ནས། དེ་སྐད་ཅེས་གསོལ་བ་དང༌། ཞེས་པའི་བར་གྱིས་བསྟན་ཏེ།

ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་མུན་པ་འདི་ཅི་ལས་བྱུང་། མུན་པ་འདིའི་རང་བཞིན་ཅི། མུན་པ་འདིའི་ངོ་བོ་གང་། མུན་པ་འདིའི་མཚན་ཉིད་ཅི། མུན་པ་འདིའི་ཡན་ལག་དུ། མུན་པ་འདིའི་རྩ་བ་གང་། མུན་པ་འདི་ཇི་སྲིད་ཅིག་གནས། མུན་པ་འདི་ཅི་ལ་སྒྲིབ། མུན་པ་འདིའི་བྱེ་བྲག་དུ། མུན་པ་འདི་གང་དང་མཐུན། མུན་པ་འདི་གང་དུ་འཐིབས། མུན་པ་དེ་གང་གིས་སེལ། མུན་པ་ཞེས་ཅིའི་ཕྱིར་བགྱི། འདི་ཅིའི་ཕྱིར་འཐིབས། རྩ་བ་གང་དུ་འདུས། འདི་བཤད་དུ་གསོལ། བདེ་བར་གཤེགས་པ་འདི་བཤད་དུ་གསོལ།

དེ་སྐད་ཅེས་གསོལ་པ་དང་།

དེ་ཉིད་ཤེས་པར་བྱ་བའི་ཕྱིར་རྒྱས་པར་དྲིས་པ་ནི། གསང་བདག་ཆེན་པོ་ཕྱག་ན་རྡོ་རྗེ་ཁོ་བོས། སྟོན་པ་གསང་བའི་སྐུ་ལ་འདི་སྐད་ཅེས་གསོལ་ཏོ། །ཀྱེ་བཅོམ་ལྡན་འདས། དེ་ལྟ་བུའི་མུན་པ་འདི་ཉིད་རྒྱུ་ཅི་ལས་བྱུང་བ་ལགས། མུན་པ་འདིའི་རང་བཞིན་ཅི་ལྟ་བུ། མུན་པ་འདིའི་ངོ་བོ་གང་ཞིག་ཡིན། མུན་པ་འདིའི་མཚན་ཉིད་ཅི་ལྟ་བུ། མུན་པ་འདིའི་ཡན་ལག་གི་དབྱེ་བ་དུ། མུན་པ་འདིའི་རྩ་བ་གང་ཞིག་ཡིན། མུན་པ་འདིའི་ཇི་སྲིད་ཅིག་ཏུ་གནས། མུན་པ་འདིས་དོན་ཅི་ཞིག་ལ་སྒྲིབ། མུན་པ་འདིའི་བྱེ་བྲག་གི་རྣམ་གྲངས་དུ། མུན་པ་འདི་དཔེ་གང་དང་མཐུན། མུན་པ་འདི་གཞི་གང་དུ་འཐིབས། མུན་པ་འདི་ཐབས་གང་གིས་སེལ། མུན་པ་ཞེས་ངེས་ཚིག་ཅིའི་ཕྱིར་བགྱི། འདི་ཅིའི་ཕྱིར་འཐིབས་པ་ཡིན། འདི་ཉིད་རྩ་བ་གང་དུ་འདུས་ཞེས། དྲི་བ་བཅོ་ལྔ་པོ་འདི་ཉིད་དུས་ཀྱི་སྐད་ཅིག་འདི་རུ་ཡང་དག་པར་བཤད་དུ་གསོལ། སླར་ཡང་བརྣན་ཏེ། བདེ་བར་གཤེགས་པ་འདི་ཉིད་ངེས་པར་བཤད་དུ་གསོལ། དེ་སྐད་ཅེས་གསོལ་ཏེ་ཞུས་པ་དང༌། ཞེས་སོ། །དེའང་སྤྱི་དང་ཁྱད་པར་ལས། ཁྱད་པར་དུ་ཡང་མུན་པའི་ཡན་ལག་དྲུག་དང༌། མདོ་བཞི་དང༌། རྩ་བ་གསུམ་གྱི་ངོ་བོ་ལས། མདོ་བཞི་ཤེས་པ་རེ་རེ་ལ་ལྡན་པའི་བྱེ་བྲག་བཞིར་ཉུང་བསྡུས་ནས་དྲིས་པའོ། །དེའང་མུན་པ་ནི་མ་རིག་པ་དང་མཚུངས་པའི་ཤེས་པ་སྟེ། ཀུན་གཞི་ལ་འདི་དག་རྒྱས་པར་ལྡན་ཏེ་འཆད་པར་འགྱུར་རོ།།

གཉིས་པ་ལན་བཤད་པ་ལ་གཉིས་ཏེ། མུན་པ་སྤྱིའི་དྲིས་ལན། བྱེ་བྲག་གི་ལན་བསྟན་པའོ། །དང་པོ་ལ་བཅུ་གཅིག་སྟེ། རྩ་བ་གང་དང་གང་དུ་འདུས་ཀྱི་ལན་བྱང་ཆུབ་སེམས་སུ་འདུས་པར་བསྟན་པ། ཅིའི་ཕྱིར་འཐིབས་ཀྱི་ལན་རྟོགས་པར་དཀའ་བས་མཐར་ལམ་པས་ཀྱང་མ་༼༨༢༽མཐོང་བར་བསྟན་པ། རང་བཞིན་གྱི་ལན་དངོས་པོ་མེད་པས་མི་དམིགས་པར་བསྟན་པ། མཚན་ཉིད་ཀྱི་ལན་བཙལ་བས་མི་རྙེད་པས་ཆོས་ཀྱི་དབྱིངས་ལས་མ་གཡོས་པར་བསྟན་པ། ཅི་སྲིད་གནས་པ་དང་ཅི་ལ་སྒྲིབ་ཀྱི་ལན་བྱང་ཆུབ་ཀྱི་ཤིང་ལ་བསྟན་པ། མུན་པ་གང་དུ་འཐིབས་ཀྱི་ལན་རྟོགས་པར་དཀའ་བས་ཁམས་གསུམ་དུ་འཐིབས་པར་བསྟན་པ། ངོ་བོའི་ལན་ཤེས་པ་ཡུལ་ལ་འཇུག་ཅིང་ཆོས་ཉིད་མ་རིག་པར་བསྟན་པ། གང་དང་མཐུན་གྱི་ལན་མུན་ཁུང་དུ་གསེར་སྟོར་བ་ལྟར་བཤད་པ། མུན་པ་ཞེས་ཅིའི་ཕྱིར་བགྱི་བའི་ལན་རྟག་ཏུ་མུན་པའི་འདུ་ཤེས་སུ་འབྱུང་བས་ངེས་ཚིག་གྲུབ་པར་བསྟན་པ། ཅི་ལས་བྱུང་གི་ལན་རྒྱུའི་ཐེག་པ་བློ་ཆུང་བས་ཀུན་ཏུ་བརྟགས་པ་ལས་བྱུང་བར་བསྟན་པ། ཡན་ལག་དང་བྱེ་བྲག་གི་ལན་ཐུན་མོང་དུ་བསྟན་ཏེ་རྣམ་གྲངས་ངོས་བཟུང་བའོ། །དང་པོ་ནི།

བཅོམ་ལྡན་འདས་དེས། ཞེས་པ་ནས། འདི་དག་ཉིད་དུ་འདུས། །ཞེས་པའི་བར་གྱིས་བསྟན་ཏེ།

བཅོམ་ལྡན་འདས་དེས་བཀའ་སྩལ་པ། སེམས་དཔའ་ཆེན་པོ་མུན་པ་དང་སྣང་བས་བསྡུས་པའི་ཆོས་ཐམས་ཀྱི་རྩ་བ་ནི། གཞི་དང་རྩ་བ་མེད་པར་འདུས་པར་ཤེས་པར་བྱའོ། །དེ་ལྟར་སྟོན་པའི་མདོ་ནི་འདི་ལྟ་སྟེ། སངས་རྒྱས་བྱང་ཆུབ་འབྱུང་བ་ཡི། །སྐྱེ་ཤིང་སྙིང་པོ་དེ་ཉིད་དེ། །པདྨོ་ཁ་འབུས་སྙིང་པོ་ལྟར། །རྩ་བ་འཁོར་བའི་འདམ་ན་ཡོད། །རྩ་བ་ཐམས་ཅད་འབྱུང་བ་ཡི། །རྩ་བ་མེད་པའི་རྩ་བ་ནི། །ཆོས་རྣམས་ཀུན་གྱི་རྩ་བ་ཡིན།།

ཁམས་གསུམ་འདི་དག་ཉིད་དུ་འདུས།།

དྲི་བའི་ལན་སྤྱི་དང་ཁྱད་པར་ལས། སྤྱིའི་དབང་དུ་ལན་ཐ་མ་བསྟན་པའི་ཕྱིར་དང༌། ཆ་གཅིག་ཏུ་ཤེས་པར་བྱ་བའི་དོན་བསྟན་པའི་ཕྱིར། སྟོན་པ་བཅོམ་ལྡན་འདས་དེས་བཀའ་སྩལ་པ། བྱང་ཆུབ་སེམས་དཔའ་ཆེན་པོ། ཞེས་བོས་ནས། མ་རིག་པའི་མུན་པ་དང༌། ཡེ་ཤེས་ཀྱི་སྣང་བས་བསྡུས་པའི་ཆོས་ཐམས་ཅད་ཀྱི་རྩ་བ་གང་ཉིད་ནི། རང་གི་སེམས་ཀྱི་རང་བཞིན་རྟེན་པའི་གཞི་དང་སྐྱེད་པའི་རྩ་བ་མེད་པར་སྙིང་པོ་བྱང་ཆུབ་ཀྱི་སེམས་ཉིད་དུ་འདུས་པས་བྱང་ཆུབ་ཀྱི་སེམས་རྒྱུ་རྐྱེན་དང་བྲལ་བར་ངང་གཅིག་ཏུ་གྱུར་པར་ཤེས་པར་བྱའོ། །དེས་ན་མུན་པའི་རྩ་བ་མ་རིག་པའི་སེམས་ཀྱང་དེར་འདུས་སོ། །དྲུག་པའི་ལན་བསྟན་པའི་ཕྱིར། དེ་ལྟར་ངོ་བོ་གཉིས་མེད་ཆེན་པོ་ཉིད་མ་མཐོང་བའི་དོན་ཤེས་པར་བྱ་བའི་ཐབས་དམ་པ་མ་ནོར་བར་སྟོན་པའི་མདོ་ནི་འཆད་པའི་ཚུལ་ཉེ་བར་བསྟན་པ་འདི་ལྟ་སྟེ། ཡང་དག་པར་རྫོགས་པའི་སངས་རྒྱས་ཀྱི་བྱང་ཆུབ་ཆེན་པོ་ཆོས་ཀྱི་སྐུའི་ཡོན་ཏན་ཐམས་ཅད་འབྱུང་བ་ཡི་གཞི་དང་སྐྱེད་པར་བྱེད་ཅིང་རྩ་བའི་བཅུད་དུ་གྱུར་པའི་སེམས་ཀྱི་རང་བཞིན་བྱང་ཆུབ་ཀྱི་སྙིང་པོ་དེ་ཉིད་ནི། ཀུན་གཞི་མ་རིག་པ་དང་བཅས་པའི་ངོ་བོ་དེ་ཁོ་ན་ཉིད་ཡིན་པས། དཔེར་ན་མེ་ཏོག་པདྨོ་ཁ་འབུས་པའི་རྒྱུ་ཡི་རྩ་བའི་སྙིང་པོ་འདམ་ཟུག་ནས་ཡོད་པ་ལྟར། སྙིང་པོ་བྱང་ཆུབ་ཆེན་པོའི་རྩ་བ་ཡང་འཁོར་བའི་འདམ་ན་ཆོས་ཉིད་གཉིས་མེད་ཆེན་པོར་༼༨༣༽ཡོད་པ་ཁོ་ནའོ།།

དེས་ན་ཀུན་གཞི་འཁྲུལ་པ་ཡང་ལྷན་ཅིག་སྐྱེས་པ་དང་ཀུན་ཏུ་བརྟགས་པའི་མ་རིག་པ་གཉིས་ལས་བྱུང་བ་སྟེ། ངེས་དོན་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། དེ་ཡང་འདུས་པའི་སྙིང་པོ་ཉོན། །ལྷན་ཅིག་ཀུན་བརྟགས་གཉིས་འཛོམ་པས། །ཀུན་གཞིའི་རྣམ་པར་ཤེས་པ་ཡིན། །དེས་བསྐྱེད་ཚོགས་བརྒྱད་ཁ་ཚང་བས། །འཁོར་བར་འཁྱམས་ཞེས་དེ་ལ་བྱ། །ཞེས་སོ། །དེའི་ཕྱིར་ལོག་པ་དང་མ་རིག་པའི་ཡང་རྩ་བ་རྟོགས་མ་རྟོགས་ཀྱིས་འཁོར་འདས་ལམ་གསུམ་གྱི་ཆོས་ཐམས་ཅད་འབྱུང་བ་ཡི་དངོས་གཞིའི་རྩ་བ་ངོ་བོ་འདི་འདྲར་མེད་པའི་སེམས་ཉིད་སྙིང་པོའི་རྩ་བ་ནི། དངོས་པོ་གཉིས་པའི་ཆོས་རྣམས་ཀུན་གྱི་རྩ་བ་ཡིན་པས། ཁམས་གསུམ་དུ་སྣང་བའི་མུན་པའི་ཆོས་འདི་དག་ཀུན་གྱི་རྩ་བ་ཡང་རང་གི་རིག་པའི་སེམས་ཉིད་དུ་འདུས་པར་ཤེས་པར་བྱའོ།།

གཉིས་པ་ཅིའི་ཕྱིར་འཐིབས་ཀྱི་ལན་རྟོགས་པར་དཀའ་བས་མཐར་ལམ་པས་ཀྱང་མ་མཐོང་བར་བསྟན་པ་ནི།

ཆོས་འདི་ཟབ་སྟེ། ཞེས་པ་ནས། ཀྱང་ནི་མཐོང་མ་ཡིན། །ཞེས་པའི་བར་གྱིས་བསྟན་ཏེ།

ཆོས་འདི་ཟབ་སྟེ་མཐོང་བར་དཀའ། །རྟོགས་པར་ཡང་ནི་མི་ནུས་ཏེ།།

མཐར་ཕྱིན་ས་ལ་གནས་པ་ཡི། །སྐྱེས་བུས་ཀྱང་ནི་མཐོང་མ་ཡིན།།

འདི་ཡང༌། འགྲེལ་ཆེན་ལྟར་ན། གཉིས་པའི་ལན་བསྟན་པའི་ཕྱིར། རྐང་པ་སྔ་མ་གཉིས་དང༌། བརྒྱད་པ་དང་བཅུ་གཅིག་པའི་ལན་གང་ཞེ་ན། རྐང་པ་ཕྱི་མ་གཉིས་ཀྱིས་བསྟན་པར་བཞེད་ནས། དེ་དག་གི་གཏན་ཚིགས་ཚིགས་བཅད་འོག་མས་བསྟན་པར་མཛད་དོ། །དེ་ལྟར་ན། མུན་པའི་རང་བཞིན་དང༌། དོན་ཅི་ལ་སྒྲིབ་པ་དང༌། རྒྱུད་གང་དུ་འཐིབས་པར་བསྟན་པ་ཡིན་ཀྱང༌། བསྡུས་དོན་ལྟར་ན། བཅུ་བཞི་པའི་ལན་བསྟན་པའི་ཕྱིར། མུན་པའི་རང་བཞིན་རང་རིག་པ་བྱང་ཆུབ་སེམས་ཀྱི་ཆོས་ཉིད་འདི་ནི་དཔེར་ན་ནམ་མཁའི་གཏིང་མ་རྙེད་པ་བཞིན་དུ་ཤིན་ཏུ་ཟབ་སྟེ་དམིགས་པ་དང་བཅས་པའི་བློས་མཐོང་བར་དཀའ་ཞིང་གཏིང་དཔག་པར་མི་ནུས་པས་ངོ་བོ་ཇི་བཞིན་དུ་རྟོགས་པར་དཀའ་བའི་ཕྱིར་འདིའི་རང་བཞིན་ཡང་འདི་འདྲར་ཞེས་ནི་མཐོང་བར་མི་ནུས་ཏེ་ཡུལ་དང་དངོས་པོར་མ་གྲུབ་པས་སོ། །དེས་ན་སློབ་པའི་ས་ཡི་རིམ་པ་མཐར་ཕྱིན་ཏེ་ས་བཅུ་པ་ལ་གནས་པ་ཡི་བྱང་ཆུབ་སེམས་དཔའ་ཆེན་པོ་ཀུན་ཏུ་འོད་ལ་འཇུག་པ་ལའང་ཀུན་ནས་ཉོན་མོངས་པ་མེད་པའི་ལྷན་ཅིག་སྐྱེས་པའི་མ་རིག་པ་ཡོད་པས་ན། དེ་ལྟ་བུའི་སྐྱེས་བུས་ཀྱང་ནི་རྩ་བ་ཆེན་པོ་མཐོང་བ་མ་ཡིན་ཏེ། བག་ལ་ཉལ་བའི་མུན་པས་བསྒྲིབས་པའི་ཕྱིར་ཏེ། ཚུལ་དེའི་དབང་གིས་འཐིབས་པ་ཡིན་པས་ཀུན་ཏུ་འོད་དང་ས་བཅུ་མན་ཆད་ལ་སྒྲིབ་ཅིང་ས་ལ་གནས་༼༨༤༽པའི་སྐབས་སེམས་སྐྱེས་པ་ཡན་ཆད་དུ་རང་རང་ལ་སྒྲིབ་ཚབ་ཆེ་ཆུང་དང་ཕྲ་རགས་ཡོད་པའོ། །དེའི་ཕྱིར་སྒྲིབ་པས་མ་མཐོང་བར་ཡང་གསལ་ལོ།།

གསུམ་པ་རང་བཞིན་གྱི་ལན་དངོས་པོ་མེད་པས་མི་དམིགས་པར་བསྟན་པ་ནི།

མེད་པས་སྟོང་པའི། ཞེས་པ་ནས། མི་རྟོག་སྐྱེ་བ་མེད། །ཅེས་པའི་བར་གྱིས་བསྟན་ཏེ།

མེད་པས་སྟོང་པའི་ཆོས་ཉིད་འདི། །ཡོད་པས་དངོས་པོར་ཡོངས་མི་དམིགས།།

དམིགས་དང་མི་དམིགས་ཚིགས་ལམ་ཆད། །རྣམ་པར་མི་རྟོག་སྐྱེ་བ་མེད།།

གཉིས་པའི་ལན་བསྟན་ཏེ། དེ་ལྟར་རྟོགས་པར་དཀའ་བ་ཅིའི་ཕྱིར་ཞེ་ན། དོན་གྱི་ངོ་བོའི་རང་བཞིན་སྤྱོད་ཡུལ་དུ་མེད་པས་གནས་ལུགས་མཐའ་ཐམས་ཅད་ཀྱིས་སྟོང་པའི་ཆོས་ཉིད་འདི་ལ། བློས་དམིགས་པའི་ཡུལ་དང་ཡུལ་ཅན་གྱི་མཚན་ཉིད་གཞི་ནས་བྲལ་བས་ཡོད་པའི་དངོས་པོར་ཡོང་ཡེ་མི་དམིགས་པའི་གཉིས་མེད་ཆེན་པོ་ཉིད་དུ་ངེས་པ་ཡིན་པས། དེ་ལྟ་བུའི་ངང་ལ་ཡེ་ཤེས་ཆོས་ཀྱི་དབྱིངས་རྒྱུན་དུ་སྐྱེ་བའི་ཐ་སྙད་མེད་པར་མར་མེ་ལྟར་རང་གསལ་བ་ཉིད་ལ་དམིགས་པ་དང་མི་དམིགས་པའི་ཚིག་ལམ་ཆད་དེ་བརྗོད་གཞི་དང་བྲལ་བའི་ངོ་བོ་མཐའ་དང་དབུས་སམ་ཡོད་མེད་གཉིས་དང་གཉིས་མེད་ཙམ་དུའང་གཟུང་འཛིན་དུ་རྣམ་པར་མི་རྟོག་པས་རང་བྱུང་རིག་པའི་ཡེ་ཤེས་ཐ་སྙད་ཐམས་ཅད་བྲལ་བ་ཡིན་པའི་ཕྱིར། སྐྱེ་བ་མེད་པའི་ཆོས་ཉིད་ཟབ་མོ་བསམ་བརྗོད་ཀྱི་ཡུལ་ལས་འདས་པ་ཉིད་དུ་ངེས་པས་སའི་ཞེན་མཐས་མ་རྟོགས་པ་ཁོ་ནར་ཟད་དོ། །དེས་ནས་མེད་པས་མ་དམིགས་པར་ཡང་ངེས་སོ།།

བཞི་པ་མཚན་ཉིད་ཀྱི་ལན་བཙལ་བས་མི་རྙེད་པས་ཆོས་ཀྱི་དབྱིངས་ལས་མ་གཡོས་པར་བསྟན་པ་ནི།

གསལ་བས་དུས་མཐའ། ཞེས་པ་ནས། མ་ཕྱིན་ཕྱིན་པ་མེད། །ཅེས་པའི་བར་གྱིས་བསྟན་ཏེ།

གསལ་བ་དུས་མཐའ་མེད་པ་རུ། །མ་ལུས་ཁྱབ་པར་ཀུན་བཙལ་ཡང་། །འདི་ཞེས་བྱ་བའི་དངོས་པོ་ཞིག།

མི་རྙེད་རྙེད་པར་མི་འགྱུར་རོ། །མཁས་པས་དུས་མཐའ་མེད་པ་རུ། །ཤིན་ཏུ་སྒྲིམས་ཏེ་ཅིར་བརྟག་ཀྱང་།།

གང་འདིར་ཅི་ཡང་མཐོང་བ་མེད། །མགྱོགས་པས་དུས་མཐའ་མེད་པ་རུ། །ཉམ་ཐག་ཆད་པར་བརྒྱུགས་ཀྱང་ནི།།

ད་དུང་དེ་ཉིད་དབྱིངས་དེ་ལས། །གར་ཡང་མ་ཕྱིན་ཕྱིན་པ་མེད།།

འགྲེལ་ཆེན་ལས། འདི་ནས་བཟུང་འོག་གི་ཚིགས་བཅད་གཅིག་ཡན་ཆད། བདུན་པའི་ལན་བསྟན་པའི་ཕྱིར་གསུངས་པས། དེ་ལྟར་མཚན་ཉིད་འདི་ལྟར་ངེས་ཏེ་ཡུལ་དུ་བྱེད་པས་དུས་གསུམ་དུ་མ་རྙེད་པས་མུན་ཁམས་འཁོར་བ་ཇི་སྙེད་པའི་ཡུལ་དུ་གནས་ཀྱང་བྱང་ཆུབ་སྙིང་པོའི་ཤིང་བུ་མངོན་དུ་གྱུར་པ་ན་ལྡོག་པར་བསྟན་པ་ཡིན་ལ། བསྡུས་དོན་ལྟར་ན། བཞི་པའི་ལན་བསྟན་ཏེ། བྱང་ཆུབ་ཀྱི་སྙིང་པོ་ནི་ཡེ་ནས་ཡུལ་མེད་རང་གསལ་གྱི་ངོ་བོ་ཉིད་ཡིན་པས། དྲན་རིག་སྒྲིབ་བྱེད་དང་བྲལ་བའི་སྒོ་ནས་དུས་ཐོག་མ་དང་ཐ་མ་བྲལ་བའི་མཐའ་ཡི་ཚད་གཟུང་མེད་པ་རུ་གནས་ཁམས་གསུམ་མ་ལུས་པར་ཁྱབ་པར་ཀུན་ཏུ་བཙལ་བར་བྱས་ན་ཡང་། སེམས་ཀྱི་ངོ་བོ་མཚན་ཉིད་འདི་ལྟར་ངེས་པ་ཞིག་གོ་ཞེས་བྱ་བའི་དངོས་པོ་ངེས་གཟུང་ཅན་ཞིང་སྔར་གྱིས་སངས་རྒྱས་ཀུན་གྱིས་ཀྱང་མི་རྙེད་པའི་ངང་དེ་ལ་སེམས་ཅན་རྣམས་ཀྱིས་46ད་ཡོང་བཙལ་ཡང་ཕྱིས་༼༨༥༽སུ་རྙེད་པར་མི་འགྱུར་རོ། །དེ་བཞིན་དུ་རྒྱལ་བ་ལྟ་བུའི་མཁས་པའམ་སྒྲ་དང་ཚད་མ་ལ་མཁས་ཤིང་གོམས་པར་བྱས་པས་ཀྱང་དུས་ཐོག་མཐའ་མེད་པ་རུ་བློ་སོ་སོར་རྟོག་པའི་ཤེས་རབ་ཀྱིས་ཤིན་ཏུ་བསྒྲིམས་ཏེ་མཐའ་བགྲངས་ནས་ཅིར་ཞེས་ཅི་ལྟར་བརྟགས་ཤིང་དཔྱད་པར་བྱས་པས་ཀྱང༌། གང་སྙིང་པོ་བྱང་ཆུབ་ཀྱི་མཚན་ཉིད་འདིར་ངོ་བོ་ངེས་པ་ཅིར་ཡང་མཐོང་བ་མེད་དེ། སླར་ཡང་ཆེད་དུ་བྱས་པའི་སྒྲིབ་པར་འགྱུར་བས་སོ། །དེ་བས་ན་ཡུལ་དུ་བྱེད་པས་དུས་གསུམ་དུ་མི་རྙེད་པས་འཁོར་བ་ཇི་སྙེད་པའི་ཡུལ་དུ་རང་སྣང་དུ་གནས་པའོ། །ཚུལ་དེ་ལྟ་བས་ན། མཉམ་པ་ཆེན་པོ་མ་ཡིན་པ་མེད་པའི་ཕྱིར། དཔེ་ལྟ་བུར་མགྱོགས་པས་དུས་མཐའ་མེད་པ་རུ། ཉམ་ཐག་ཆད་པར་བརྒྱུགས་ཏེ་ཀུན་ཏུ་ཕྱིན་ཀྱང་ནི། ད་དུང་དེ་ཁོ་ན་ཉིད་ཆོས་ཀྱི་དབྱིངས་འདི་ཉིད་ལས་གཞན་གར་ཡང་མ་ཕྱིན་པས་ལོགས་སུ་གྱུར་པར་སྔར་ཡང་མ་སླེབས་པས་ན་ད་ཡང་ཕྱིན་པ་མེད་པར་གཞི་འདི་ཉིད་ཀྱི་ངང་ཁོ་ནའོ། །དེས་ནས་བགྲོད་དུ་མེད་པར་མུན་པའི་རང་བཞིན་དང་ཆ་གཅིག་ཏུ་གྱུར་པའོ། །དེ་དག་གི་ཕྱིར། ཟབ་པས་མ་རྙེད། དཀའ་བས་མ་ཤེས། མྱུར་བས་མ་སླེབ་པར་ངེས་པའང་ཡིན་ནོ།།

ལྔ་པ་ཅི་སྲིད་གནས་པ་དང་ཅི་ལ་སྒྲིབ་ཀྱི་ལན་བྱང་ཆུབ་ཀྱི་ཤིང་ལ་བསྟན་པ་ནི།

སྐྱེ་མེད་ཆོས་ཀྱི། ཞེས་པ་ནས། ཀུན་འབྱུང་བྱང་ཆུབ་ཤིང༌། །ཞེས་པའི་བར་གྱིས་བསྟན་ཏེ།

སྐྱེ་མེད་ཆོས་ཀྱི་སྡོང་པོ་ལ། །རྣམ་ཐར་བཞི་ཡི་ཡན་ལག་འགེལ།།

བྱང་ཆུབ་བླ་མེད་སྙིང་པོར་སྨིན། །དེ་ནི་ཀུན་འབྱུང་བྱང་ཆུབ་ཤིང་།།

བདུན་པ་དང་བརྒྱད་པ་གཉིས་ཀྱི་ལན་གང་ཞེ་ན། རྣལ་འབྱོར་གྱི་དབང་གིས་རྒྱུའི་ཐེག་པ་ལས་རྣམ་པར་ཐར་པ་གསུམ་དུ་བསྟན་ཀྱང༌། འདིར་ཐུན་མོང་མིན་པའི་གནས་ལུགས་དངོས་གཞི་དང་བྲལ་བས་སྐྱེ་བ་མེད་པའི་ཆོས་ཉིད་ཀྱི་སྡོང་པོ་ཀུན་གྱི་རྩ་བར་གྱུར་པས་དངོས་པོའི་དེ་ཁོ་ན་ཉིད་ལ། མ་རྟོགས་པའི་དུས་སུ་འཁོར་བའི་ཆོས་ཀྱི་ཡན་ལག་སྣ་ཚོགས་སུ་སྣང་ཡང༌། མཚན་ཉིད་རྟོགས་པས་ལམ་པའི་བློ་ལ་ལམ་གྱི་ཆོས་སུ་སྣང་བས་ན། རང་བཞིན་དང་མཐུན་པར་སྟོང་པ་ཉིད་དང༌། སྨོན་པ་མེད་པ། མཚན་མ་མེད་པ། རང་བཞིན་གྱིས་འོད་གསལ་བའི་མཚན་ཉིད་ཅན་གྱི་རྣམ་པར་ཐར་པའི་སྒོ་བཞི་ཡི་ཡེ་ཤེས་མ་འགགས་པར་སྣང་བས་ཡལ་ག་འགེལ་བའམ་ཡན་ལག་གེལ་པ་ནི་ཀུན་ནས་རྒྱས་པ་དང་ཕྱོགས་སུ་གྱེས་པར་བྱུང་བའོ། །དེ་ཉིད་ལམ་པས་དོན་དུ་གཉེར་ནས་འབད་པ་བྱས་པས་ལམ་གྱི་རྣམ་ཐར་བཞིས་འབྲས་བུའི་མཚན་ཉིད་བྱང་ཆུབ་བླ་ན་མེད་པའི་སྙིང་པོར་སྨིན་ཏེ་ཆོས་སྐུ་ཆེན་པོ་ཉིད་དུ་མཐར་ཕྱིན་པའོ། །ཆེ་བའི་ཡོན་ཏན་༼༨༦༽དེ་ལྟར་རྒྱས་པའི་སྙིང་པོའི་ལྗོན་པ་བཟང་པོ་དེ་ནི་ཡོན་ཏན་ཀུན་གྱི་འབྱུང་གནས་བྱང་ཆུབ་ཀྱི་ཤིང་བུ་དམ་པ་ཡིན་ནོ། །དེ་བས་ན་བྱང་ཆུབ་སྙིང་པོའི་ངོ་བོ་ལ་སྒྲིབ་ཅིང་དེ་ཉིད་མངོན་དུ་གྱུར་པ་ན་ལྡོག་གོ །ཚུལ་དེའི་ཕྱིར་ཡངས་པས་མ་ཁྱབ་པར་ཡང་གསལ་ལོ།།

དྲུག་པ་མུན་པ་གང་དུ་འཐིབས་ཀྱི་ལན་རྟོགས་པར་དཀའ་བས་ཁམས་གསུམ་དུ་འཐིབས་པར་བསྟན་པ་ནི།

འཇུག་པ་དོན་ལ། ཞེས་པ་ནས། ཆེད་ལས་བྱེད་ལས་གྱུར། །ཞེས་པའི་བར་གྱིས་བསྟན་ཏེ།

འཇུག་པ་དོན་ལ་འདོད་པའི་ཁམས། །མངོན་བྱེད་འཛིན་པ་གཟུགས་ཁམས་སོ།།

སྣང་མེད་མ་ཆད་གཟུགས་མེད་ཉིད། །གང་དེ་ཆེད་ལས་བྱེད་པར་འགྱུར།།

བསྡུས་དོན་ལྟར་ན་ཚིགས་བཅད་འདི་ཉིད་བཅུ་གཅིག་པའི་ལན་ཏེ། ཤེས་པ་ཚོགས་དྲུག་ཡུལ་དྲུག་ལ་འཇུག་པ་དང་བཅས་ཏེ་གཟུགས་སྒྲ་ལ་སོགས་པའི་ཡུལ་དོན་གྱི་དངོས་པོ་ལ་མ་རིག་པའི་དབང་གིས་ཞེན་ཅིང་ཆགས་པ་ནི་འདོད་པའི་ཁམས་ཀྱི་མ་རིག་པ་ཡིན་ལ། བསམ་གཏན་བཞིའི་ཏིང་ངེ་འཛིན་མངོན་དུ་བྱེད་ཅིང་དེ་ལ་ཉོན་ཡིད་ཀྱིས་བདག་ཏུ་འཛིན་པའི་འདུ་ཤེས་དང་མ་བྲལ་བ་ཉིད་གཟུགས་ཀྱི་ཁམས་ཀྱི་མ་རིག་པར་ངེས་སོ། །གཟུགས་མངོན་དུ་སྣང་བ་མེད་པར་ཀུན་གཞིའི་ངང་ལ་བསམ་པའི་འདུ་ཤེས་བཞི་རྒྱུན་མ་ཆད་པར་སྙོམས་འཇུག་བཞི་ལ་གནས་ཏེ་དམིགས་པ་དང་རྣམ་པར་གྱུ་བས་ཡང་དག་པའི་དོན་མ་རྙེད་པ་གཟུགས་མེད་པའི་ཁམས་ཀྱི་མ་རིག་པ་ཉིད་དེ་བྱེ་བྲག་གསུམ་གྱིས་ཆོས་ཉིད་རྟོགས་པར་དཀའ་བས་ན་ཁམས་གསུམ་དུ་འཐིབས་པ་ཡིན་ནོ། །དེས་ན་གང་ཤེས་པ་གསུམ་དུ་སྣང་བ་དེ་ཡི་རྒྱུ་ནི། ཇི་བཞིན་པ་མ་རིག་པ་ལས་རང་གི་ཡུལ་དང་ཏིང་ངེ་འཛིན་གྱི་དམིགས་པ་ལ་ཆེད་དུ་འཛིན་པའི་ལས་ཀྱི་བྱེད་པ་ལས་མ་རིག་པའི་རྒྱུན་གྱིས་ཁམས་གསུམ་དུ་སྣང་བར་གྱུར་པ་ཡིན་ནོ། །འགྲེལ་ཆེན་ལྟར་ན། རྐང་པ་སྔ་མ་གསུམ་དགུ་པའི་ལན་ཏེ། མ་རིག་པའི་བྱེ་བྲག་གིས་ཁམས་གསུམ་དུ་སྣང་བའོ། །དང་པོའི་ལན་བསྟན་པའི་ཕྱིར། རྐང་པ་བཞི་པ་གསུངས་ཏེ། མ་རིག་པའི་དབང་གིས་རང་ཡུལ་ཆེད་དུ་བྱེད་པ་ལས་གྲོང་ཁྱེར་གསུམ་དུ་བྱུང་བས་སོ། །ཚུལ་འདི་དག་ལ་བརྟེན་ནས་བཙལ་བའི་གནས་གྲོང་ཁྱེར་གསུམ་ཡིན་པར་ཤེས་པར་བྱའོ།།

བདུན་པ་ངོ་བོའི་ལན་ཤེས་པ་ཡུལ་ལ་འཇུག་ཅིང་ཆོས་ཉིད་མ་རིག་པར་བསྟན་པ་ནི།

ཡུལ་དུ་གང་གྱུར། ཞེས་པ་ནས། ཉིད་མེད་དེ་ཉིད་དོ། །ཞེས་པའི་བར་གྱིས་བསྟན་ཏེ།

ཡུལ་དུ་གང་འགྱུར་འཇུག་པ་ཉིད། །གང་ལ་འཇུག་པ་དེ་རྣམ་ཤེས། །དེ་ཡུལ་མུན་པའི་ཁམས་གྱུར་ཀྱང་།།

མུན་པའི་ཁམས་ན་དེ་ཉིད་སྣང་། །སྣང་དང་སྣང་བའི་འོད་འབྱུང་བ། །སྐྱེ་འབྱུང་རྩ་བའི་སྙིང་པོ་ཉིད།།

ཕྱོགས་རིས་ངེས་མི་རིག་པ་ཡི། །ངོ་བོ་ཉིད་མེད་དེ་ཉིད་དོ།།

གསུམ་པའི་ལན་ནི། དབང་པོའི་ཡུལ་དང་སེམས་ཀྱི་ཡུལ་ཏིང་ངེ་འཛིན་དུ་ཆགས་པས་ཁམས་གསུམ་གྱི་འགྲོ་བའི་ཡུལ་དུ་གང་གྱུར་པའི་དངོས་པོ་གང་ཡང་རུང་བ་ལ་ཤེས་པ་འཇུག་པ་ཉིད་ནི། ཡུལ་གང་ལ་འཇུག་ཀྱང་རུང་༼༨༧༽སྟེ་གཡོ་བ་དེ་ཉིད་ཁམས་གསུམ་གྱི་འཁྲུལ་པའི་རྣམ་པར་ཤེས་པ་དོན་ལ་མདོངས་པའི་ངོ་བོ་དེ་ཉིད་དོ། །དེས་ན་ཤེས་པས་ཟིན་པའི་ཡུལ་གང་དུ་སྣང་བར་གྱུར་པ་ན་ཡང་འགྲོ་བ་དེ་དག་གི་སྤྱོད་ཡུལ་དེ་ནི་མུན་པའི་ཁམས་སུ་གྱུར་པ་ཁོ་ན་ཡིན་ཀྱང༌། མི་མཐུན་པ་ནི། མུན་པའི་ཁམས་ཉིད་ན་རང་རིག་པ་བྱང་ཆུབ་ཀྱི་སྙིང་པོའི་ངོ་བོ་དེ་ཉིད་སྣང་ཞིང་གཉིས་སུ་མེད་པར་གསལ་བར་ཡོད་པས་ནང་ཤེས་པའི་རྒྱུན་གསལ་བ་དེ་ནི་སྣང་བའི་ཁམས་ཡང་ཡིན་ནོ། །དེས་ན་བྱང་ཆུབ་ཀྱི་སེམས་འདི་ནི་མུན་པའི་ཁམས་ན་ཡོད་དོ། །དེ་ཡང་སེམས་དང་སེམས་བྱུང་དུ་སྣང་བ་དང་སེམས་སྣང་བའི་འོད་དུ་བྱུང་བའི་དངོས་པོ་གཉིས་པ་ཇི་སྙེད་པ་དེ་དག་སྐྱེ་བ་བཞི་དང་འབྱུང་བ་ལྔ་ལ་སོགས་པར་སྣང་བའི་ཡང་གཞི་དང་རྟེན་དུ་གྱུར་པས་རྩ་བའི་སྙིང་པོ་རང་རིག་པ་ཅིར་ཡང་སྣང་བ་ཉིད་ཡིན་པས་ཁམས་གསུམ་གྱི་འགྲོ་བ་ཀུན་གྱིས་དེ་ཉིད་ལ་ཀུན་གཞིའི་ཁམས་ཀྱི་དངོས་པོའི་ཕྱོགས་ཀྱི་ཁྱད་པར་ཙམ་དུ་རིག་ཅིང་མཐོང་ཡང་ངེས་པའི་དོན་ཇི་བཞིན་དུ་མི་རིག་པ་ཡི་ངོ་བོ་ཉིད་མེད་པས་ཕྱོགས་རེས་སུ་གཟུང་དུ་མི་བཏུབ་པའི་ཤེས་པ་མ་རིག་པ་དང་མཚུངས་པའི་རང་རིག་པ་དེ་ཉིད་ཡིན་པས་དོན་ལ་མུན་སྣང་དབྱེར་མེད་ཀྱི་ཆོས་ཉིད་བསམ་བརྗོད་ལས་འདས་པ་ཉིད་དོ། །དེས་ན་ངོ་བོ་དེ་ཁོ་ན་ཉིད་ལ་བྱ་བར་ཡང་གསལ་ལོ།།

བརྒྱད་པ་གང་དང་མཐུན་གྱི་ལན་མུན་ཁུང་དུ་གསེར་སྟོར་བ་ལྟར་བཤད་པ་ནི།

མུན་ཁུང་གསེར་སྟོར། ཞེས་པ་ནས། སེམས་འདི་སྟོར་བར་གྱུར། །ཞེས་པའི་བར་གྱིས་བསྟན་ཏེ།

མུན་ཁུང་གསེར་གཏོར་ཇི་བཞིན་དུ། །འཁོར་བ་མུན་པ་མུན་ནག་ཏུ།།

རིན་ཆེན་གསེར་དང་འདྲ་བ་ཡི། །བྱང་ཆུབ་སེམས་འདི་གཏོར་བར་འགྱུར།།

བསྡུས་དོན་ལྟར་ན། ཚིགས་ཅད་འདི་ཉིད་བཅུ་པའི་ལན་ཏེ། དེ་ལྟར་ཤེས་པ་མ་རིག་པ་དང་མཚུངས་པར་ལྡན་པས་རང་གི་ཆོས་ཉིད་མི་མཐོང་བ་ནི། དཔེར་ན་མུན་ཁུང་དུ་གསེར་སྟོར་བ་ཇི་ལྟ་བ་བཞིན་དུ། འཁོར་བའི་གནས་མུན་པ་མུན་ནག་གི་སྨག་རུམ་དང་འདྲ་བ་ཉིད་དུ། རིན་ཆེན་གསེར༌དང་འདྲ་བ་ཡི་ཆོས་ཉིད་བྱང་ཆུབ་སེམས་ཀྱི་དོན་འདི་ཉིད་སྟོར་བར་གྱུར་ཏེ། མ་རིག་པས་དོན་མཐོང་དུ་མི་སྟེར་བའི་ཕྱིར་དཔེ་དོན་མཐུན་པར་ངེས་པའོ། །འགྲེལ་ཆེན་ལྟར་ན། རྐང་པ་དང་པོ་ནི། བཅུ་པའི་ལན་ཏེ། དཔེར་མུན་པར་གསེར་སྟོར་བ་དང་འདྲ་བའོ། །དེ་ནས་རྐང་པ་གསུམ་ལན་བཅུ་གསུམ་སྟེ། འཁོར་བའི་སྨག་རུམ་དུ་རིན་ཆེན་སེམས་ཉིད་ཀྱི་དོན་སྟོར་ཏེ། མ་རིག་པས་དོན་མཐོང་དུ་མི་སྟེར་བའི་ཕྱིར་མིན་པ་ཞེས་བགྱི་བའི་གཏན་ཚིགས་སོ། །དེས་ན་མུན་པའི་ཁམས་སུ་སྟོར་བའོ།།

དགུ་པ་མུན་པ་ཞེས་ཅིའི་ཕྱིར་བགྱི་བའི་ལན་རྟག་ཏུ་མུན་པའི་འདུ་ཤེས་སུ་འབྱུང་བས་ངེས་ཚིག་གྲུབ་པར་བསྟན་པ་ནི།

མུན་པའི་ཁམས་སུ། ཞེས་༼༨༨༽པ་ནས། འདུ་ཤེས་ཉིད་དུ་འབྱུང༌། །ཞེས་པའི་བར་གྱིས་བསྟན་ཏེ།

མུན་པའི་ཁམས་སུ་གྱུར་པ་དག །མུན་པའི་འདུ་ཤེས་ཉིད་དུ་འབྱུང་།།

བསྡུས་དོན་ལྟར་ན། བཅུ་གསུམ་པའི་ལན་ཏེ། མ་རིག་པ་གཉིས་ཀྱི་མུན་པའི་ཁམས་སུ་གྱུར་པའི་འགྲོ་བ་སེམས་ཅན་གྱི་གནས་སྐབས་དག་ཏུ། དཔེར་ན་མིག་གིས་མིག་མི་མཐོང་བ་ལྟར་སྤྱོད་ཡུལ་དང་བྲལ་བས་རང་གིས་རང་མ་མཐོང་སྟེ། ཤེས་པ་མ་རིག་པའི་རྒྱུད་དུ་གྱུར་པའི་ཕྱིར་མུན་པའི་འདུ་ཤེས་ཉིད་དུ་འབྱུང་བས་ན། སྔགས་ལ་ལྟོས་པའི་རྒྱུ་མཚན་ཉིད་ཀྱི་ཐེག་པའང་འདུ་ཤེས་དེ་དང་མ་བྲལ་བ་ཉིད་དེ། དེའི་ཕྱིར་མུན་པ་ཞེས་བགྱིའོ། །འགྲེལ་ཆེན་ལྟར་ན། ལན་བཅུ་བཞི་པ་སྟེ། མ་རིག་པ་ཤ་སྟག་ཏུ་གྱུར་པའི་འགྲོ་བ་རྣམས། མ་རིག་པ་གཉིས་ཀྱིས་ནོན་པ་ནི། དཔེར་མིག་གིས་མིག་མ་མཐོང་བ་ལྟར་ཡུལ་བྲལ་བས་རང་གིས་རང་མ་མཐོང་སྟེ། ཤེས་པ་མ་རིག་པ་རྒྱུད་དུ་གྱུར་པའི་ཕྱིར་མུན་པ་ཉིད་དུ་འཐིབས་པའོ།།

བཅུ་པ་ཅི་ལས་བྱུང་གི་ལན་རྒྱུའི་ཐེག་པ་བློ་ཆུང་བས་ཀུན་ཏུ་བརྟགས་པ་ལས་བྱུང་བར་བསྟན་པ་ནི།

མུན་པའི་ཁམས་པས། ཞེས་པ་ནས། ཆེད་དུ་ཤེས་པར་གྱིས། །ཞེས་པའི་བར་གྱིས་བསྟན་ཏེ།

མུན་པའི་ཁམས་པས་གང་ཤེས་པ། །ཕྲ་མོའི་ཤ་ཆས་ཙམ་ཡན་ཆད། །གང་འདི་བློ་ཆུང་བྱིས་པ་རྣམས།།

ཆེད་དུ་གླེང་གཞི་གང་བརྗོད་པ། །བློ་ལྡན་ཀུན་ལ་འདི་བརྗོད་ཀྱི། །བླུན་པོའི་ཆེད་དུ་ཤེས་པར་གྱིས།།

བསྡུས་དོན་ལྟར་ན། དང་པོའི་ལན་ཏེ། ཁམས་གསུམ་གྱི་འགྲོ་བའི་མུན་པའི་ཤེས་པ་མ་ཟད་གསང་སྔགས་བླ་ན་མེད་པ་ལ་ལྟོས་ནས་མུན་པའི་ཁམས་པས་གྲུབ་མཐའ་སྨྲ་བ་དག་གིས་གང་ལྟར་ཤེས་པ་རྟོག་པའི་མཚན་ཉིད་ཕྲ་མོའི་ཕྲ་མོ་ཆ་ཤས་ཙམ་གྱི་དངོས་པོ་ཡན་ཆད་ཐམས་ཅད་མུན་པ་ཡིན་པས་དེའི་དངོས་དོན་གང་འདིར་བློ་ཆུང་བྱིས་པ་རྒྱུའི་ཐེག་པ་ཆེན་པོ་རྣམས་ཀྱི་ཆེད་དུ་སྟོན་པ་རྫོགས་པའི་སངས་རྒྱས་ཀྱིས་གླེང་གཞི་གང་ཞིག་བརྗོད་པ་དེ་ཉིད། འདི་ན་དོན་དང་མཐུན་པར་གསལ་བའི་ཕྱིར་གསང་སྔགས་ཐེག་པ་ཆེན་པོའི་བློ་དང་ལྡན་པ་ཀུན་ལ་ཡང་འདི་ལྟར་བརྗོད་ཅིང་བཤད་ཀྱིས། སེམས་དཔའ་ཆེན་པོ་ཁྱོད་ཀྱིས་ཀྱང་གཞན་གྱི་དོན་ཕྱིར་བླུན་པོའི་རིགས་ཅན་དྲང་བའི་ཆེད་དུ་ཤེས་པར་བྱོས་ལ་རྟོགས་པར་གྱིས་ཤིག་ཅེས་གདམས་པར་མཛད་པའོ། །ཚུལ་འདི་ལྟར་ན་མུན་པ་གང་གིས་སེལ་གྱི་ལན་འདིར་དངོས་སུ་མ་ཟིན་ཀྱང་འོག་ནས་འབྱུང་ངོ༌།།

འགྲེལ་ཆེན་ལྟར་ན། ལན་བཞི་པ་ནི། མུན་པའི་ཁམས་པར་གྱུར་པས་གྲོང་ཁྱེར་གསུམ་གྱི་འགྲོ་བ་རྣམས་ཀྱིས། གང་ཡུལ་གྱི་བྱེ་བྲག་ཤེས་པར་བྱེད་པའི་ཤེས་པ་དངོས་པོ་ལ་རིག་ཅིང་རྟོག་པའི་ངོ་བོ་ནི་མུན་པའི་མཚན་ཉིད་དེ། དེ་དག་གི་མཚན་ཉིད་ཕྲ་མོའི་ཆ་ཤས་ཙམ་ཡན་ཆད་ཕྲ་རགས་ཐམས་ཅད་༼༨༩༽ཇི་ལྟར་བསལ་བ་བཅུ་གཉིས་པའི་ལན་གྱིས་གསལ་བར་སྟོན་ཏེ། གང་འདིར་རྒྱུའི་ཐེག་པ་ཆེན་པོ་བློ་ཆུང་ཞིང་དོན་གྱི་བརྡ་ཤེད་མ་བྱེ་བ་རྣམས་ཀྱི་ཆེད་དུ་སྟོན་པས་གླེང་གཞི་གང་བརྗོད་ཅིང་བཀའ་སྩལ་པ་དེ་ཉིད། འདིར་གསལ་བའི་ཕྱིར་ཐེག་པ་ཆེན་པོའི་བློ་དང་ལྡན་པའི་རྣལ་འབྱོར་ཀུན་ལ་ཡང་འདི་ལྟར་བརྗོད་དེ་བཤད་ཀྱི། ཁྱོད་ཀྱིས་ཀྱང་གཞན་བླུན་པོ་རྣམས་དྲང་བའི་ཆེད་དུ་ཤེས་པར་གྱིས་ཤིག་པར་གདམས་པའོ།།

བཅུ་གཅིག་པ་ཡན་ལག་དང་བྱེ་བྲག་གི་ལན་ཐུན་མོང་དུ་བསྟན་ཏེ་རྣམ་གྲངས་ངོས་བཟུང་བ་ནི།

འདི་ཡང་འདི་ལྟར། ཞེས་པ་ནས། འགྲོལ་དང་འབྱིན་པ་ཡིན། །ཞེས་པའི་བར་གྱིས་བསྟན་ཏེ།

འདི་ཡང་འདི་ལྟར་ཡོངས་སུ་སྣང་། །ཡན་ལག་མདོ་དང་རྩ་བ་དང་། །འབྱེད་དང་འགྲོལ་བ་འབྱིན་པ་ཡིན།།

བསྡུས་དོན་ལྟར་ན་ལྔ་པ་དང་དགུ་པའི་ལན་དང༌། འགྲེལ་ཆེན་ལས་ལྔ་པའི་ལན་དང་ཁྱད་པར་གྱིས་དེ་དག་གིས་ལན་གདབ་པ་ཐུན་མོང་དུ་བསྟན་པའི་ཕྱིར། མ་རིག་པའི་མུན་པ་མཚན་ཉིད་པས་མཐོང་བའི་དོན་འདི་ཡང་ཡན་ལག་འབྱེད་ན་འདི་ལྟར་ལྡེ་མིག་གསུམ་དུ་ཡོངས་སུ་སྣང་བ་ཉིད་དེ། ཡན་ལག་ཚོགས་དྲུག་དང་མདོ་ཤེས་པ་བཞི་དང་རྩ་བ་ལུས་ངག་ཡིད་གསུམ་སྟེ། ལྡེ་མིག་དང་པོས་འཁོར་བ་རྣམ་པར་འབྱེད་པ་དང༌། བར་མས་འགྲོལ་བ་དང༌། ཐ་མས་ངེས་པར་འབྱིན་པ་ཡིན་ཏེ། ཤུགས་ཀྱིས་བཅུ་གཉིས་པའི་ལན་དུའང་འགྱུར་རོ།།

དེས་ན་བཀའི་ལུང་གཅིག་ལ་ཞུས་ལན་ཕྲ་མེན་རྒྱས་ན་རྒྱུད་དུ་འགྲོ་བའི་དཔེ་ལྟར། རྣམ་པར་ཤེས་པའི་རྒྱུད་གཅིག་ལ་དབང་པོ་དྲུག་གི་རྐྱེན་གྱིས་རྣམ་པར་ཤེས་པ་ཚོགས་དྲུག་དང་དམིགས་པའི་རྣམ་ཤེས་དང་བདུན་རྩ་བའི་རྣམ་ཤེས་དང་བརྒྱད་དུ་བྱུང་ནས་སྒོ་གསུམ་དུ་རྒྱས་ཤིང་འཕེལ་ན་རྒྱུད་དུ་འགྲོ་བའོ།།

གཉིས་པ་བྱེ་བྲག་གི་ལན་བསྟན་པ་ལ་གསུམ་སྟེ། མུན་པའི་ཡན་ལག་དྲུག་བཤད་པ། མུན་མདོ་བཞི་བསྟན་པ། མུན་པའི་རྩ་བ་གསུམ་བཤད་པའོ། །དང་པོ་ནི།

ཡན་ལག་དྲུག་ཏུ། ཞེས་པ་ནས། གཅོད་པའི་ཡན་ལག་ཡིན། །ཞེས་པའི་བར་གྱིས་བསྟན་ཏེ།

ཡན་ལག་དྲུག་ཏུ་གང་གྲགས་པ། །མཐོང་ཐོས་ཚོར་མྱོང་རེག་ཤེས་དྲུག།

འབྱུང་འཇུག་གཅོད་པའི་ཡན་ལག་ཡིན།།

དེ་ལ་ཡན་ལག་དང་པོ་གང་ཞེ་ན། རྣམ་པར་ཤེས་པའི་རྒྱུད་གཅིག་ལ་དབང་པོ་དྲུག་གི་རྐྱེན་གྱིས་ཡན་ལག་དྲུག་ཏུ་གང་གྲགས་པ་ནི། མིག་གིས་མཐོང་བ་དང༌། རྣ་བས་ཐོས་པ་དང༌། སྣ་ཡིས་ཚོར་བ་དང༌། ལྕེ་ཡིས་མྱོང་བ་དང་། ལུས་ཀྱི་རེག་པ་དང༌། ཡིད་ཀྱི་ཀུན་ཤེས་པ་དང་རྣམ་པར་ཤེས་པའི་ཚོགས་དྲུག་སྟེ། དེ་ལའང་རྒྱུའི་ཡན་ལག་དྲུག་དང༌། དམིགས་པའི་ཡན་ལག་དྲུག་དང༌། གཅོད་པའི་ཡན་ལག་དྲུག་སྟེ། ཡུལ་ལ་ཕྱིར་འབྱུང་བ་ལྟ་བུ་དང་དངོས་སུ་ཡུལ་ལ་འཇུག་ཅིང་ཡུལ་གྱི་སྒྲོ་༼༩༠༽འདོགས་ཡོངས་སུ་གཅོད་པའི་ཡན་ལག་ཏུ་གྱུར་པ་རྣམས་ཡིན་ནོ། །དེ་དག་འདིར་མི་སྤྲོ་སྟེ། སྒོ་ལྔ་འཇུག་པའི་མདོ་དང་མཐུན། ཡིད་ཤེས་སྣང་བའི་མདོ་དང་མཐུན་པས་འཆད་པར་འགྱུར་རོ།།

གཉིས་པ་མུན་མདོ་བཞི་བསྟན་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། འཇུག་པ་ལུང་བཞི་བཤད། །ཅེས་པའི་བར་གྱིས་བསྟན་ཏེ།

ལངྐའི་བདག་པོ་མདོ་བཞི་ནི་གང་ཞེ་ན། འདི་ལྟ་སྟེ། གཞིའི་མདོ་དང་། དམིགས་པའི་མདོ་དང་།

སྣང་བའི་མདོ་དང་། འཇུག་པའི་མདོའོ། །དེ་ཡང་འདི་ལྟར། མདོ་བཞི་བཞི་དང་དམིགས་པ་དང་།།

སྣང་དང་འཇུག་པ་ལུང་བཞིན་བཤད།།

ལང་ཀའི་བདག་པོ་ཞེས་བོས་ནས། མདོ་བཞི་བསྟན་པ་ནི་གང་ཞེ་ན། ལུང་གི་མདོ་བཞི་ནི་རྣམ་ཤེས་བཞི་སྟེ། ཆོས་ཐམས་ཅད་ཀྱི་མདོ་རྣམ་ཤེས་སུ་འདུས་པའི་ཚུལ་འདི་ལྟ་སྟེ། བག་ཆགས་བསགས་པའི་གཞིའི་མདོ་ཀུན་གཞི་དང༌། དེ་ལ་བདག་ཏུ་ལྟ་བས་དམིགས་པའི་མདོ་ཉོན་ཡིད་དང༌། ཕྱི་ནང་ཀུན་སྣང་བའི་མདོ་ཡིད་ཀྱི་ཤེས་པ་དང༌། རང་ཡུལ་ཐུན་མིན་ལ་འཇུག་པའི་མདོ་སྒོ་ལྔའི་ཤེས་པའོ། །དེའང་འདི་ལྟར། མདོ་བཞི་པོ་གཞི་ཡི་མདོ་དང་དམིགས་པ་དང་སྣང་བ་དང་འཇུག་པ་ཡི་མདོ་བཞི་སྟོན་པ་མཆོག་གིས་དྲང་བའི་ལུང་བཞིན་དུ་གསལ་བར་བཤད་དེ་བཀའ་སྩལ་པའོ།།

གཉིས་པ་རྒྱས་པར་བཤད་པ་ལ་བཞི་སྟེ། གཞིའི་མདོ་ཀུན་གཞི་བཤད་པ། དམིགས་པའི་མདོ་ཉོན་མོངས་པ་ཅན་གྱི་ཡིད་བཤད་པ། སྣང་བའི་མདོ་ཡིད་ཀྱི་རྣམ་ཤེས་བཤད་པ། འཇུག་པའི་མདོ་སྒོ་ལྔའི་ཤེས་པ་བསྟན་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། བྱིས་པ་འདི་ལྟར་འདོད། །ཅེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ། གཞིའི་མདོ་ནི་འདི་ལྟ་སྟེ། གཞི་ནི་བྱིས་པ་འདི་ལྟར་འདོད།།

དེ་ལ་མུན་པའི་དྲིས་ལན་སོ་སོའི་བྱེ་བྲག་ཏུ་ཕྱེ་ནས་མདོ་དང་པོ་བསྟན་པའི་ཕྱིར། ལང་ཀའི་བདག་པོ། ཞེས་བོས་ནས། དེ་ལ་གཞིའི་མདོ་ཉེ་བར་སྟོན་པ་ནི་འདི་ལྟ་སྟེ། ཆ་ཕྲ་བའི་གཞི་དེ་ནི་མཚན་ཉིད་ཐེག་པ་དོན་ལ་ཤེད་མ་བྱེ་བའི་བྱིས་པ་རྣམ་རིག་པ་ལ་སོགས་པ་རྣམས་ཀུན་གཞིའི་རང་བཞིན་འདི་ལྟར་འདོད་དེ་དེ་ཉིད་འཐད་པར་སྒྲུབ་པར་བྱེད་དོ།།

གཉིས་པ་རྒྱས་པར་བཤད་པ་ལ་བཅུ་གཉིས་ཏེ། རང་བཞིན་དངོས་པོ་མེད་ཅིང་ཀུན་ལ་ཁྱབ་པས་མ་བཅོས་པར་བསྟན་པ། མཚན་ཉིད་ཤེས་ལ་མི་གསལ་བས་ཚོར་བ་བཏང་སྙོམས་དང་ལྡན་ཏེ་སྐད་ཅིག་མའི་རྒྱུན་དང་བཅས་པར་བསྟན་པ། ངོ་བོ་ཕྱོགས་གཅིག་ཏུ་རྒྱ་མ་ཆད་པས་བག་ཆགས་ཐམས་ཅད་ཀྱི་གཞིར་བསྟན་པ། ཡན་ལག་ཐུན་མོང་དང་ཁྱད་པར་གྱི་འཁོར་དང་ལྡན་པས་བག་ཆགས་ཀྱི་གོ་འབྱེད་པར་བསྟན་པ། ༼༩༡༽གནས་པའི་ཡུན་དང་ཅི་ལ་སྒྲིབ་ཀུན་ཐུན་མོང་དུ་བསྟན་པ། བྱེ་བྲག་འཁོར་འདས་གཉིས་ཀྱི་གཞི་རྟེན་དུ་གྱུར་པར་བསྟན་པ། རྩ་བ་གང་དང་གང་དུ་འདུས་པ་ཐུན་མོང་དུ་བསྟན་པ། མུན་པའི་རྒྱུ་ཅི་ལས་བྱུང་དང་ཀུན་གཞི་སྒྲུབ་བྱེད་ཀྱི་རིགས་པ་བཤད་པ། མུན་པའི་ཁམས་ཀྱི་ཀུན་གཞི་ཉིད་དཔེ་གང་དང་མཐུན་ཚུལ་བཤད་པ། མུན་པ་ཞེས་ཅིའི་ཕྱིར་བགྱི་བའི་ངེས་ཚིག་བཤད་པ། མུན་པ་ཉིད་ཅིའི་ཕྱིར་འཐིབས་པའི་རྒྱུ་མཚན་བཤད་པ། མུན་པ་གང་གིས་སེལ་བ་ཡེ་ཤེས་རང་སྣང་དུ་བསྟན་པའོ། །དང་པོ་ནི།

གཟུགས་མེད་མིང་ལ། ཞེས་པ་ནས། མེད་པར་འདུས་མ་བྱས། །ཞེས་པའི་བར་གྱིས་བསྟན་ཏེ།

གཟུགས་མེད་མིང་ལ་མངོན་ཞེན་པ། །མེད་པའི་ཁམས་ཉིད་དེ་ཁོ་ན། །ཤེས་པ་ཀུན་གྱི་ངོ་བོར་འབྱུང་།།

ཤེས་བྱ་ཉིད་དེ་ཡུལ་དུ་སྣང་། །ཐམས་ཅད་འབྱུང་བར་བྱེད་པའི་རྒྱུ། །ཡེ་ནས་ངང་གིས་མ་སྐྱེས་ལ།།

མ་བཅོས་ཡོང་གི་འོད་གསལ་བའོ། །རྒྱུ་རྐྱེན་མེད་པས་འདུས་མ་བྱས།།

སྤྱིར་ཀུན་གཞི་དང་མུན་པ་གཉིས་ངོ་བོ་བཅིག་ཡིན་ཀྱང༌། ཐམས་ཅད་ཀྱི་གཞིར་གྱུར་པས་ཀུན་གཞི་དང༌། དེ་མ་རྟོགས་པས་འཁོར་བར་སྣང་བས་མུན་པ་ཞེས་བསྟན་པ་ཡིན་ལ། དེ་བས་ན་གོང་གི་མུན་པའི་དྲིས་ལན་དང་ཀུན་གཞིའི་དྲིས་ལན་མཐུན་ནོ། །འོན་ཀྱང་གོང་གི་མུན་པ་གང་གི་ཆེད་དུ་ལན་མ་གསུངས་པ་རྣམས་འདིར་བསྟན་པར་མཛད་དོ། །དེ་ཡང་འཆད་པའི་དོན་གྱི་རྣམ་གྲངས་ཀྱིས་བཅུ་གསུམ་དུ་འགྱུར་བའི་ཕྱིར། ཁྱད་པར་དུ་མུན་པའི་རང་བཞིན་ཉིད་འཆད་དེ། དེ་ལ་སྦྱོར་བའི་ཀུན་གཞི་རང་བཞིན་ཆ་ཕྲ་བས་གཟུགས་ཀྱིཕུང་པོ་དངོས་སུ་སྣང་བ་མེད་པར་བརྟགས་པའི་མཚན་ཉིད་ཀྱི་མིང་བཞིའི་ཕུང་པོའི་མཚན་མའི་ཐ་སྙད་ཙམ་ལ་ཁ་བལྟས་ཏེ་མངོན་པར་ཞེན་ཅིང་རྟོག་པའི་ངོ་བོ་གསལ་བར་སྣང་བ་མེད་པ་དེ་ནི་གཟུགས་མེད་པའི་ཁམས་ལ་གནས་པ་ཉིད་ཡིན་པས་ཀུན་གཞི་དེ་ཡང་དེ་དང་ཆ་མཐུན་པ་ཁོ་ན་ཡིན་ཞིང༌། ཀུན་གཞི་དེའི་བྱེད་པའི་ལས་ཀྱི་ཁྱད་པར་གྱིས་རྣམ་པར་ཤེས་པ་ཚོགས་བརྒྱད་དང་དྲུག་དང་སེམས་བྱུང་དང་བཅས་པ་ཀུན་གྱི་རྒྱུའི་ངོ་བོར་སྣང་བས་ཐམས་ཅད་འབྱུང་བའི་གཞིར་གྱུར་ལ། དེ་བས་ན་ཀུན་གཞི་དེ་ཉིད་རྒྱུའི་ཐེག་པ་སེམས་ཙམ་དང་དབུ་མའི་གྲུབ་མཐའ་འཛིན་པ་ཕལ་ཆེ་བས་སྣང་སེམས་ཀུན་གྱི་གཞི་ཤེས་པར་བྱ་བའི་ཆོས་སུ་བཞེད་པ་ཉིད་དེ། དེས་ན་འདིར་ཡང་དོན་གྱི་ཤེས་བྱར་མི་བཞེད་ཀྱང༌། ཐ་སྙད་ཙམ་དུ། རྒྱན་སྟུག་པོ་བཀོད་པ་ལས། ཇི་ལྟར་ཁབ་ལེན་མཐོང་བ་དང༌། །ལྕགས་ནི་མྱུར་བར་ཀུན་ཏུ་འཁོར། །འོན་ཀྱང་དེ་ལ་སེམས་པ་མེད། །སེམས་ལྡན་བཞིན་དུའང་རབ་ཏུ་སྣང༌། །དེ་བཞིན་ཀུན་གཞི་རྣམ་ཤེས་ཀྱང་། སེམས་༼༩༢༽མེད་སེམས་ཅན་ཇི་བཞིན་དུ། །འགྲོ་དང་འོང་བར་གཡོ་བ་སྟེ། །ས་རྣམས་འབྲི་བར་རབ་ཏུ་བྱེད། །ཅེས་དང༌། འདི་ལྟར་སྣང་བ་གང་ཡང་རུང༌། །མཚན་མ་གཟུགས་སུ་སྣང་བ་རྣམས། །བག་ཆགས་ལོག་པའི་ཀུན་གཞི་སྟེ། །ས་རྣམས་ཀུན་ན་གཟུགས་ལྟར་གནས། །ཇི་ལྟར་འོ་མ་གྱུར་པ་དང༌། །ཡོན་ཏན་ཞོ་དང་དར་བར་སྣང༌། །དེ་བཞིན་ཀུན་གཞི་རྣམ་ཤེས་ཀྱང༌། །རྣམ་པར་གྱུར་ནས་གཟུགས་ལྟར་གནས། །ཞེས་དང༌། གཟུགས་ཀྱི་ཡོན་ཏན་ལྡན་པའི་གཟུགས། །ཀུན་གཞི་གཟུགས་ལྟར་གནས་པ་སྟེ། །བྱིས་པ་ཇི་ལྟར་བརྟགས་པ་བཞིན། །གཟུགས་ནི་གུད་ན་ཡོད་པ་མིན། །ཞེས་གསུངས་པ་ལྟར། བརྟགས་པའི་སེམས་ཅན་དུ་སྣང་ཞིང་མཚན་མའི་དོན་དུ་སྣང་བའི་གཞིར་གྱུར་པས་ཕྱི་རོལ་ཡུལ་སྣ་ཚོགས་པ་ཉིད་དུ་སྣང་བས་ན། དཔེར་ན་དགེ་སློང་མི་གཙང་བ་བསྒོམ་པས་སྤྱོད་ཡུལ་ཐམས་ཅད་རུས་པའི་ཕུང་པོར་སྣང་བ་ལྟ་བུར། ཡུལ་ཐམས་ཅད་ཀྱི་ཡང་རྩ་བ་ཀུན་གཞི་འཁྲུལ་པས་ཕྱི་རོལ་ཡུལ་གྱི་དངོས་པོ་སྣ་ཚོགས་སུ་སྣང་ཞིང་ས་བོན་ཐམས་ཅད་པ་ཡིན་པས་འཁོར་འདས་དང་དགེ་སྡིག་དང་ལམ་པའི་ལྟ་བ་ལ་སོགས་པ་ཀུན་ནས་ཉོན་མོངས་པའི་ཆོས་རྣམས་ཐམས་ཅད་འབྱུང་བར་བྱེད་པའི་རྒྱུ་དང་རྣམ་པར་བྱང་བའི་རྟེན་དུ་གྱུར་པ་ནི་སྦྱོར་བ་དོན་གྱི་ཀུན་གཞིའོ། །གཞི་དོན་གྱི་ཀུན་གཞིའི་རང་བཞིན་ནི། སྦྱོར་བ་དོན་གྱི་ཀུན་གཞི་རྐྱེན་བཞིས་འཁྲུལ་བདོ་ཙམ་ན། སྤྱིལ་པོའམ་ཁང་པ་ལྟ་བུར་རང་རེ་རྣམ་པར་གཙེས་པས་སྤྱི་འདུས་བདོ་བ་ཙམ་མེད་དེ། ཡེ་ཐོག་མ་ནས་རྣལ་མ་དོན་གྱི་ངོ་བོ་རང་བཞིན་ངང་གིས་མ་སྐྱེས་ལ་བྱེད་པ་པོས་མ་བཅོས་པར་ཐམས་ཅད་ལ་ཁྱབ་ཅིང་ངོས་བཟུང་དང་བྲལ་ཏེ་སྒྲིབ་བྱེད་མེད་པར་ཡོང་གིས་འོད་གསལ་བ་རྒྱུ་རྐྱེན་མེད་པར་རང་སྣང་ཡང་ངོ་བོ་འདུས་མ་བྱས་པ་ཆོས་ཉིད་སྐྱེ་བ་མེད་པའི་ངང་དེའོ། །དེའང་དྲི་བྲལ་གྱི་ཆོས་ཉིད་མིན་པར་དྲི་མ་དང་བཅས་པའི་གནས་ལུགས་ཡིན་པས། ཡང་འབྱེད་འཕྲུལ་གྱི་ལྡེ་མིག་ལས། ཀུན་གཞི་ཀུན་གཞི་ཞེས་བྱ་བ། །ཐམས་ཅད་ཀུན་གྱི་གཞིར་གྱུར་པས། དེ་ཕྱིར་ཀུན་གཞིའི་མིང་དུ་བཏགས། །དཔེར་ན་ས་ལ་རྙོག་མི་ཟེར། །དེ་བཞིན་ཆུ་ལ་རྙོག་མི་ཟེར། །ས་ཆུ་འདྲེས་ལ་རྙོག་མར་བཏགས། །དེ་བཞིན་སེམས་ཅན་ཐམས་ཅད་ལ། །ཆོས་སྐུས་ཁྱབ་པར་གནས་པ་ལ། །དེ་ལ་ཀུན་གཞི་མིང་མ་བཏགས། །༼༩༣༽རྣམ་རྟོག་མཚན་མར་གནས་པ་ལ། །དེ་ལ་ཀུན་གཞིར་མིང་མ་བཏགས། །ཆོས་སྐུ་ཆུ་དང་འདྲ་བ་ལ། །བག་ཆགས་ས་འདྲས་བསླད་པ་ལ། །ཀུན་གཞི་ཞེས་ནི་མིང་དུ་བཏགས། །ཞེས་གསུངས་པས་རང་བཞིན་གྱི་གསང་གནད་སྟོན་པའི་ངེས་ཚིག་འདི་ལ་བརྟེན་ནས་མཐར་ཐུག་གི་དོན་ལ་གསང་བ་སྙིང་ཏིག་གི་དགོངས་པ་ལྟར་ཀུན་མཁྱེན་ཆོས་ཀྱི་རྒྱལ་པོ་དང་དགོངས་པའི་བབ་སོ་གཅིག་ཏུ་ཤེས་པར་བྱའོ།།

གཉིས་པ་མཚན་ཉིད་ཤེས་ལ་མི་གསལ་བས་ཚོར་བ་བཏང་སྙོམས་དང་ལྡན་ཏེ་སྐད་ཅིག་མའི་རྒྱུན་དང་བཅས་པར་བསྟན་པ་ནི།

ཡོངས་སུ་མ་ཆད། ཅེས་པ་ན། སྐྱེ་འགག་བཅས་པའོ། །ཞེས་པའི་བར་གྱིས་བསྟན་ཏེ།

ཡོངས་སུ་མ་ཆད་ཡུལ་ཀུན་ལ། །ཤེས་ལ་མི་གསལ་ལྷན་ཅིག་བྱུང་། །ཁྱབ་འཇུག་བཏང་སྙོམས་དངོས་མེད་ཉིད།།

རྣམ་པར་མི་རྟོག་དཔྱོད་དང་བྲལ། །མི་རྟོག་དེ་ཡི་དེ་ཉིད་ལ། །སྐད་ཅིག་སྔ་ཕྱི་ཇི་སྙེད་པ།།

རྒྱུན་དང་བཅས་པའི་ཆུ་བོ་བཞིན། །རྒྱུ་འབྱུང་སྐྱེ་འགག་བཅས་པའོ།།

ཀུན་གཞིའི་དམིགས་པའི་ཡུལ་ཇི་ལྟ་བུ་སྙམ་པ་ལ། བག་ཆགས་ཀྱི་ཀུན་གཞི་ནི། མིག་གི་རྣམ་པར་ཤེས་པས་གཟུགས་ཁོ་ན་ལ་དམིགས་པའམ། རྣ་བའི་རྣམ་པར་ཤེས་པས་སྒྲ་ཁོ་ན་ལ་དམིགས་པ་ལྟ་བུ་མ་ཡིན་པར་དམིགས་པ་དང་རྣམ་པ་ཡོངས་སུ་མ་ཆད་པར་དོན་དང་སེམས་ཅན་དང་ཀུན་བརྟགས་པའི་བག་ཆགས་ཐོག་མ་ནས་བསགས་པའི་དབང་གིས་ས་གང་དུ་སྨིན་ཀྱང་དེའི་ཕྱི་སྣོད་དང་ནང་ཉེ་བར་ལེན་པའི་ཕུང་པོར་སྣང་བའི་ཡུལ་ཀུན་ལ་གཅོད་པ་ཡང༌། ཡུལ་གྱི་རྣམ་པ་ཇི་ལྟ་བར་ཤེས་པ་ལ་ཚོགས་དྲུག་གི་རྟོག་པ་རགས་པས་སྒྲིབ་པས་གསལ་བར་མི་མངོན་པར་མི་གསལ་བའི་ཚུལ་དུ་བཤད་པ་བཞིན་དུ་ཚོགས་དྲུག་ལྟར་ཡུལ་རིས་སུ་ཆད་པ་མ་ཡིན་པས་མ་སྒྲིབ་ལུང་མ་བསྟན་པའི་ངོ་བོས་ཡུལ་ལ་དམིགས་རྣམ་རྒྱུན་མ་ཆད་དེ་ལྔ་ཀུན་ཏུ་འགྲོ་བ་དང་བཅས་ཏེ་ཚོགས་དྲུག་སྐྱེ་བ་དང་ཡང་ལྷན་ཅིག་པར་འབྱུང་ངོ་། །ཆོས་ཐམས་ཅད་ལ་ཁྱབ་པར་འཇུག་ཅིང་ཡུལ་རིལ་ལ་གཅོད་པའང་སྒོ་ལྔ་ལྟར་རིས་མེད་པས་ཚོར་བ་བདེ་སྡུག་དང་མི་ལྡན་པར་བཏང་སྙོམས་ཀྱི་ཆོས་ཉིད་མ་ཆད་པ་དང་ལྡན་ཞིང༌། རང་གི་ངོ་བོ་རགས་པའི་དངོས་པོ་མེད་པར་ཀུན་གཞིར་གྱུར་པའི་ས་བོན་ཐམས་ཅད་པ་ཉིད་ཡིན་པས། ཡིད་ཀྱི་ཤེས་པ་ལ་སོགས་པ་ཚོགས་དྲུག་ལྟར་ཡུལ་ལ་གསལ་བའི་རྣམ་པར་མི་རྟོག་སྟེ། ཡུལ་ཅི་ལའང་འདི་དང་འདི་ཞེས་རགས་པའི་རྟོག་དཔྱོད་དང་བྲལ་བར་གནས་པའོ། །ཀུན་གཞིའི་མཚན་ཉིད་ཇི་ལྟ་བུ་ཞེ་ན། དེ་ལྟར་ཀུན་གཞི་ཅི་ལ་ཡང་མི་རྟོག་ཅིང་རིས་སུ་མ་དམིགས་པ་དེ་ཡི་ངང་དེ་ཉིད་ལ་ཤེས་པ་སྐད་ཅིག་མ་སྔ་ཕྱིར་རྒྱུ་བའི་གྲངས་མང་པོ་ཇི་སྙེད་པ་ཐམས་ཅད་བར་མ་ཆད་པར་རྒྱུན་དང་བཅས་པར་འབྱུང་བས་ན་དཔེར་ན་ཆུ་བོ་རྒྱུན་དུ་འབབ་པ་བཞིན་དུ། དེ་ཡང་༼༩༤༽སྐད་ཅིག་སྔ་མས་ཕྱི་མའི་རྒྱུ་བྱས་ནས་རྒྱུན་དུ་འབྱུང་ཞིང་ཕྱི་མ་སྐྱེ་ཙམ་ན་སྔ་མ་འགག་པ་དང་བཅས་ཏེ་སྤྱིའི་མཚན་ཉིད་སྐད་ཅིག་མའི་མི་རྟག་པ་དང་རྒྱུན་གྱི་རྟག་པའི་མཚན་ཉིད་དེ་དོན་གྱི་ངོ་བོ་གསང་བའི་དབྱིངས་ནི་མི་འགག་པར་གཟུགས་བརྙན་ལྟ་བུ་ལས་ངོ་བོའི་རྒྱུན་སྐད་ཅིག་མ་ལས་གྲོལ་བའོ།།

གསུམ་པ་ངོ་བོ་ཕྱོགས་གཅིག་ཏུ་རྒྱ་མ་ཆད་པས་བག་ཆགས་ཐམས་ཅད་ཀྱི་གཞིར་བསྟན་པ་ནི།

གཅིག་ཏུ་ཆད་པ། ཞེས་པ་ནས། ཐམས་ཅད་པ་ཉིད་དེ། །ཞེས་པའི་བར་གྱིས་བསྟན་ཏེ།

གཅིག་ཏུ་ཆད་པ་མེད་པ་ཡིན། །སོ་སོ་རིས་ལྟར་མི་སྣང་བ། །བྱེ་བྲག་རྣམ་པར་འབྱེད་པ་ནི།།

འདི་དང་འདི་ཞེས་ག་ལ་ཡོད། །ཐ་སྙད་གཉིས་ཀྱིས་བསྡུས་པའི་ཆོས། །ཐམས་ཅད་ཐམས་ཅད་པ་ཉིད་དེ།།

དེ་ལ་ཀུན་གཞིའི་དམིགས་པའི་ཡུལ་དེ་ཡང༌། གཏན་ལ་དབབ་པ་བསྡུ་བ་ལས། མདོར་བསྡུ་ན་ཀུན་གཞི་རྣམ་པར་ཤེས་པ་ནི་དམིགས་པ་རྣམ་པ་གཉིས་ཀྱིས་འཇུག་སྟེ། ནང་གི་ལེན་པ་རྣམ་པར་རིག་པ་དང༌། ཕྱི་རོལ་གྱི་སྣོད་རྣམ་པ་ཡོངས་སུ་མ་ཆད་པ་རྣམ་པར་རིག་པས་སོ། །དེ་ལ་ནང་གི་ལེན་པ་ནི་ཀུན་བརྟགས་པའི་ངོ་བོ་ཉིད་ལ་མངོན་པར་ཞེན་པའི་བག་ཆགས་དང་རྟེན་དང་དབང་པོའི་གཟུགས་སོ། །དེ་ཡང་གཟུགས་ཅན་གྱི་ཁམས་ནའོ། །གཟུགས་ཅན་མ་ཡིན་པ་ན་ནི་བག་ཆགས་ལེན་པ་ཁོ་ནར་ཟད་དོ། །དེ་ལ་ཕྱི་རོལ་གྱི་སྣོད་རྣམ་པ་ཡོངས་སུ་མ་བཅད་པ་རྣམ་པར་རིག་པ་ནི་ཀུན་གཞི་རྣམ་པར་ཤེས་པ་ནང་གི་ལེན་པའི་དམིགས་པ་གང་ཡིན་པ་དེ་ཉིད་ལ་བརྟེན་ནས། རྟག་ཏུ་རྒྱུན་མི་འཆད་པར་འཇིག་རྟེན་དང་སྣོད་ཀྱི་རྒྱུན་རྣམ་པར་རིག་པ་སྟེ། འདི་ལྟ་སྟེ། དཔེར་ན་མར་མེ་འབར་བ་ནི་སྙིང་པོ་དང་སྣུམ་གྱི་རྒྱུས་ནི་ནང་དུ་འཇུག་པར་འགྱུར་ལ། ཕྱི་རོལ་དུ་ནི་འོད་འབྱུང་བར་བྱེད་པ་བཞིན་དུ་ནང་གི་ལེན་པའི་དམིགས་པ་དང༌། ཕྱི་རོལ་གྱི་དམིགས་པ་འདི་ལ་ཡང་ཀུན་གཞི་རྣམ་པར་ཤེས་པའི་ཚུལ་དེ་དང་འདྲ་བར་བལྟ་བར་བྱའོ། །དམིགས་པ་དེ་ནི་འཇིག་རྟེན་གྱི་མཁས་པ་རྣམས་ཀྱིས་ཀྱང་ཡོངས་སུ་གཅད་པར་དཀའ་བའི་ཕྱིར་ཕྲ་བ་ཡིན་ནོ། །ཞེས་དང༌། རྒྱན་སྟུག་པོ་བཀོད་པ་ལས། ཀུན་གཞི་ཟབ་པ་ཉིད་དག་ཀྱང༌། །བློ་ཆུང་རྣམས་ཀྱིས་མ་རིག་པས། །སྒྱུ་མའི་རི་དྭགས་བཞིན་དུ་འཁོར། །རང་བཞིན་གཅིག་མིན་ཤེས་པར་དཀའ། །ཞེས་གསུངས་པ་ལྟར་ཀུན་གཞིའི་ཡུལ་མ་ཡིན་པ་མེད་པས། རང་གི་མཚན་ཉིད་ཕྱོགས་གཅིག་ཏུ་རྒྱ་ཡོངས་སུ་ཆད་པ་མེད་པ་ཡི་རྣམ་པར་ཤེས་པ་ཡིན་པས། དམིགས་རྣམ་སོ་སོ་ནས་གསལ་བའི་ཕྱོགས་རིས་ཅན་དུ་ཤར་བའི་ཚོགས་དྲུག་ལྟར་ཕྱོགས་གཅིག་པར་གྱུར་ཏེ་མི་སྣང་བ་ཉིད་དེ། དེས་ན་སུ་ཞིག་འདི་ནི་ཀུན་གཞིའི་ཡུལ་ལོ། །འདི་ནི་མ་ཡིན་ནོ། །ཞེས་ཀུན་གཞིའི་༼༩༥༽ཡུལ་ལ་བྱེ་བྲག་རྣམ་པར་འབྱེད་པ་ནི་འདི་དང་འདི་ཞེས་བློ་རྩིང་པོས་རྣམ་པར་དབྱེ་བ་ག་ལ་ཡོད་དེ་མེད་པས་ན་ཚོགས་དྲུག་དང་མི་མཚུངས་པའོ། །དེའི་ཕྱིར། དཔེར་ན་ཀུན་གཞི་རྒྱལ་པོ་ལྟ་བུ་དང༌། ཡིད་བློན་པོ་ལྟ་བུ་དང༌། སྒོ་ལྔ་དམངས་ལྟ་བུའོ། །དེ་ཅིའི་ཕྱིར་ཞེ་ན། ཡུལ་ཐམས་ཅད་ཀྱི་བདག་ཉིད་ཡིན་པས་ཕྱོགས་རིས་སུ་འཛིན་པ་དང་བྲལ་བས་འཁོར་བ་དང་མྱང་འདས་ཕྱི་སྣོད་དང་ནང་ཉེར་ལེན་གྱི་ཕུང་པོར་གྱུར་པའི་དགེ་སྡིག་དང་སྣོད་བཅུད་ཀྱི་དངོས་པོ་ཐ་སྙད་གཉིས་ཀྱིས་བསྡུས་པའི་ཆོས་ཇི་སྙེད་པར་གྲགས་པ་རིལ་ཡིན་པས། སྣོད་ཐམས་ཅད་དང་བཅུད་ཐམས་ཅད་པ་ཉིད་དེ་ཀུན་གྱི་བག་ཆགས་ཀྱི་གཞི་ཡིན་པའི་ཕྱིར་དམིགས་པ་རྒྱ་ཆེ་ཞིང་རྣམ་པ་མི་གསལ་བར་ངེས་པའོ།།

བཞི་པ་ཡན་ལག་ཐུན་མོང་དང་ཁྱད་པར་གྱི་འཁོར་དང་ལྡན་པས་བག་ཆགས་ཀྱི་གོ་འབྱེད་པར་བསྟན་པ་ནི།

ཀུན་འགྲོ་ཀུན་འཇུག ཅེས་པ་ནས། གསོག་དང་ལེན་པ་ཡིན། །ཞེས་པའི་བར་གྱིས་བསྟན་ཏེ།

ཀུན་འགྲོ་ཀུན་འཇུག་ཀུན་ལ་སྦྱོར། །དངོས་རིག་སྣ་ཚོགས་དབྱེར་མི་རིག །གཡོ་བ་ཉིད་དང་རྣམ་པར་བཀོད།།

ཡོངས་མྱོང་གཅོད་དང་དེ་འཛིན་བྱེད། །ལྔ་ལྡན་བདུན་དུ་ལྡན་པ་ལ། །དེ་ནི་ཀུན་ལ་སྙོམས་པ་ཡིན།།

གང་ཞེན་དེ་འཛིན་ཀུན་མི་གཏོང་། །གོ་སྐབས་ཡོད་པའི་ནམ་མཁའ་ལྟར།།

ཆོས་ཀུན་གནས་འབྱུང་གོ་ཡོད་པ། །སྐྱེད་སྨིན་སོག་དང་ལེན་པ་ཡིན།།

དེའང་འཆད་པའི་འཁོར་ཀུན་ཏུ་འགྲོ་བ་ལྔ་དང་ལྡན་ཏེ་རྣམ་པར་ཤེས་པའི་ཚོགས་བདུན་པོ་ཀུན་དང་འཇུག་པ་མཚུངས་པར་མཐོ་རིས་དང་ངན་སོང་གི་ཡུལ་ཀུན་ལ་སྦྱོར་བར་བྱེད་པས་ཡུལ་གྱི་དངོས་པོར་རིག་ནས་དམིགས་པ་མ་ཆད་པར་གཅོད་ཀྱང་ངོ་བོ་བླུན་པར་གྱུར་པས་འདི་ནི་འདིའོ་ཞེས་ཡུལ་ཐ་དད་པ་སྣ་ཚོགས་སུ་དབྱེར་ཞེས་དབྱེ་སྟེ་མི་རིག་པས་བྱེ་བྲག་སོ་སོར་གཅོད་པར་མི་ནུས་སོ། །འོ་ན་ཀུན་གཞི་ཉིད་འཁོར་དུ་དང་མཚུངས་པར་ལྡན་ཞེ་ན། ཐུན་མོང་གི་འཁོར་ནི་ལྔ་ཀུན་ཏུ་འགྲོ་བ་དང་ལྡན་ཏེ། སུམ་ཅུ་པ་ལས། དེ་ལ་ཀུན་གཞི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །དེ་ནི་ལེན་པ་དག་དང་གནས། །རྣམ་པར་རིག་པ་མི་རིག་པ། །རྟག་ཏུ་རེག་དང་ཡིད་བྱེད་དང༌། །ཚོར་དང་འདུ་ཤེས་སེམས་པར་ལྡན། །ཞེས་གསུངས་པ་ལྟར། སེམས་ཡུལ་ལ་གཡོ་ཞིང་བསྐྱོད་པར་བྱེད་པ་འདུ་བྱེད་སེམས་པ་ཉིད་དང༌། སེམས་ཡུལ་ལ་གཏོད་ཅིང་རྣམ་པར་བཀོད་པའམ་འགོད་པར་བྱེད་པ་ཡིད་ལ་བྱེད་པ་དང༌། ཡུལ་གྱི་དངོས་པོ་བཟང་ངན་གྱི་ཁྱད་པར་ཕན་པ་དང་གནོད་པ་དང་གཉིས་ཀ་ལས་ཟློག་པའི་མཚན་ཉིད་གང་ཡིན་པ་ཁོ་ན་ཡོངས་སུ་མྱོང་བར་བྱེད་པ་ཚོར་བ་དང་། གསུམ་འདུས་ནས་དམིགས་རྣམ་མ་ཆད་པར་ཡུལ་ཀུན་ཡོངས་སུ་གཅོད་པས་རེག་པ་དང་། ཡུལ་དེ་ཉིད་ལ་མཚན་མར་འཛིན་པར་བྱེད་པའི་འདུ་ཤེས་ཏེ། ལྔ་རྣམས་དང་མཚུངས་པར་ལྡན་ནོ། །དེས་ན་ལུང་ལས་ཀྱང་གསུམ་འདུས་པ་གང་ཡིན་པ་དེ་ནི་རེག་པའོ། །རེག་༼༩༦༽པ་དང་ལྷན་ཅིག་སྐྱེས་པ་ནི་ཚོར་བ་དང་སེམས་པ་དང་འདུ་ཤེས་ཡིན་པས་དབང་པོ་ཐ་མི་དད་པ་ཡིན་ལ། དེ་ལས་བྱུང་བ་ཡིན་ལ་བྱེད་པའང་ཉེ་བར་གནས་པར་འགྱུར་རོ། །ཞེས་གསུངས་པ་ཉིད་དོན་གསང་དུ་དྲངས་སོ། །དེ་བཞིན་དུ་ཁམས་གསུམ་གྱི་སེམས་ཡོད་དོ་ཅོག་དང་ལྷན་ཅིག་འབྱུང་ཞིང༌། རྣམ་ཤེས་བརྒྱད་ཆར་ལའང་རྫོགས་ཏེ་ལས་གསུམ་གྱི་སྐབས་སུ་འབྱུང་བའི་ཕྱིར། ཁྱད་པར་གྱི་འཁོར་ནི་ཀུན་གཞི་ཉིད་མ་ཡིན་པའི་སེམས་རྣམ་པར་ཤེས་པ་ཚོགས་བདུན་དང་ཡང་མེ་ལོང་དང་གཟུགས་བརྙན་ནམ་ཆུའི་རྒྱུན་དང་རྦ་རླབས་ལྟར་དུ་ལྡན་པ་ཉིད་ཡིན་ལ། དེ་ནི་འབྲས་བུའི་ཡན་ལག་ཀྱང་ཡིན་ནོ། །འོ་ན་ཚོར་བ་ལ་བདེ་སྡུག་བཏང་སྙོམས་གསུམ་ཡོད་པས་ཀུན་གཞི་གང་དང་མཚུངས་པར་ལྡན་ཞེ་ན། རྩ་བའི་རྣམ་ཤེས་དེ་ནི་ཡུལ་གྱི་ཆོས་ཀུན་ལ་བཏང་སྙོམས་དང་ལྡན་པ་ཡིན་པས། བདེ་བ་དང་སྡུག་བསྔལ་གཉིས་དང་མི་ལྡན་པར་ཚོར་བ་བཏང་སྙོམས་ཁོ་ན་དང་ལྡན་ཏེ། ཚུལ་དེས་ཀུན་འགྲོ་གཞན་ཀུན་ཡང་མཚོན་པར་ནུས་པས་ན། བསྡུ་བ་ལས། སེམས་ལས་བྱུང་བ་དེ་དག་ལས་ཀུན་གཞི་རྣམ་པར་ཤེས་པ་དང་མཚུངས་པར་ལྡན་པའི་ཚོར་བ་གང་ཡིན་པ་དེ་ནི་གཅིག་ཏུ་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་དང་ལུང་དུ་མ་བསྟན་པ་ཡིན་ནོ། །དེ་ཉིད་ཀྱིས་དེ་ལས་གཞན་པའི་སེམས་ལས་བྱུང་བའི་ཆོས་རྣམས་ཀྱང་རྣམ་པར་བཤད་པ་ཡིན་ནོ། །ཞེས་སོ། །དེ་བཞིན་དུ་བསྒོ་བྱེད་ཚོགས་བདུན་གྱིས་བཞག་པས་འདྲིས་པའི་ལས་ཀྱི་བག་ཆགས། སྐྱེ་འགག་ལྷན་ཅིག་འབྱུང་བའི་ཚུལ་གྱིས་དགེ་སྡིག་ལུང་མ་བསྟན་གང་ཡང་རུང་བ་ཞེན་པ་དེ་ཉིད་འཛིན་ཅིང་དུས་ཀུན་ཏུ་མི་གཏོང་བ་ཉིད་དེ། བག་ཆགས་ཀྱི་ཡུལ་གནས་བཟང་ངན་ལྟ་བུ་རིས་སུ་འབྱེད་ནས་མི་ཤེས་སོ།།

འོ་ན་ཀུན་གཞིའི་ཆོས་ནི་གང་ཞེ་ན། ཀུན་གཞི་ལས་བག་ཆགས་ཀྱིས་འབྲས་བུ་སྐྱེད་པ་ནི། དཔེར་ན་ཀུན་འབྱུང་ཞིང་གོ་སྐབས་འབྱེད་པར་ཡོད་པས་མི་སྒྲིབ་པར་སྣང་བའི་ནམ་མཁའ་ལྟར་དུ། ཀུན་གཞི་ལ་འཁོར་བ་དང་མྱ་ངན་ལས་འདས་པའི་ཆོས་ཀུན་གྱིས་གནས་པ་དང་འབྱུང་བའི་གོ་སྐབས་འབྱེད་པ་ཡོད་པ་ཉིད་པས་འཁོར་འདས་གཉིས་ཀ་འབྱུང་ཞིང་སྣང་བར་བྱེད་པའོ། །འོ་ན་ཀུན་གཞིའི་ལས་ཇི་ལྟ་བུ་ཞེ་ན། ལས་ཀྱི་བག་ཆགས་ཀྱིས་རྣམ་པར་ཤེས་པ་ཚོགས་བདུན་གྱི་བྱེ་བྲག་སྔར་མ་སྐྱེས་པ་སྐྱེད་པའི་རྒྱུའི་བྱ་བ་ཀུན་གཞི་བག་ཆགས་དང་བཅས་པས་མཚུངས་པར་བྱེད་པ་དང༌། ཀུན་ནས་ཉོན་མོངས་པ་དང་རྣམ་པར་བྱང་བའི་ཡང་གཞི་དང་རྟེན་གྱི་ཕྱིར་རྣམ་པར་སྨིན་པའི་བག་ཆགས་རྣམས་མཐུ་བརྟས་ཏེ་སྨིན་པར་ངེས་པའི་སྟོབས་ཅན་དུ་བྱེད་པ་དང་རྒྱུ་མཐུན་པ་དང་རྣམ་པར་སྨིན་པའི་བག་ཆགས་གསོག་པའི་ཉོན་མོངས་རྣམས་ཀྱི་སྣོད་ལྟ་བུར་གྱུར་པ་དང༌། སྐྱེ་བ་སྔ་ཕྱི་མཚམས་སྦྱོར་བར་བྱེད་པས་སྔར་མ་བླངས་པའི་ལུས་ལེན་པར་བྱེད་པ་ཡིན་པས་བྱེད་པའི་ལས་ནི་བཞི་བྱེད་པའོ།།

ལྔ་པ་གནས་པའི་ཡུན་དང་ཅི་ལ་སྒྲིབ་ཀུན་ཐུན་མོང་དུ་བསྟན་པ་ནི།

རྐྱེན་ནི་གཉིས་དང༌། ཞེས་པ་ནས། གང་ཕྲད་དེ་ཉིད་དུའོ། །ཞེས་པའི་བར་གྱིས་བསྟན་ཏེ།

རྐྱེན་ནི་གཉིས་དང་མི་ལྡན་ཏེ། །མ་ངེས་དེ་ཉིད་ཁོ་ན་ལ།།

ཐམས་ཅད་དུ་ནི་གནས་པ་ཡིན། །རྐྱེན་ནི་གང་ཕྲད་དེ་ཉིད་དུའོ།།

ཀུན་གཞི་ནི་ལུང་དུ་མ་བསྟན་པ་ཡིན་པས། དགེ་བ་དང་སྡིག་པའི་རྐྱེན་ནི་གཉིས་དང་མངོན་དུ་མི་ལྡན་ཏེ། གཏན་ཚིགས་ཅིའི་ཕྱིར་ན་མཐོ་རིས་དང་ངན་སོང་གཉིས་ཀར་འགྱུར་བས་རིགས་མ་ངེས་པ་དེ་ཉིད་འདི་ཁོ་ན་དང་ལྡན་ནོ་ཞེས་ཕྱོགས་གཅིག་པར་གཟུང་དུ་མེད་པའི་ཕྱིར། ཞེས་པའམ། ཡང་ན་དེ་མ་ཐག་པ་དང་དམིགས་པའི་རྐྱེན་ནི་གཉིས་དང་མི་ལྡན་ཏེ། དེ་མ་ཐག་རྐྱེན་མེད་དེ། དེ་ནི་རྣམ་པར་ཤེས་པ་གང་ཞིག་མངོན་དུ་གྱུར་ན་རྣམ་ཤེས་གཞན་སྐྱེ་བའི་གེགས་བྱེད་པ་ལ་འགགས་ན་སྐབས་འབྱེད་པས་སྐྱེ་བ་དང་མཐུན་པར་འགྱུར་བའི་ཕྱིར་བཞག་པའི་སྐད་ཅིག་སྔ་མ་ཡིན་ན། སྔ་མ་འགགས་པས་ཕྱི་མ་ལ་ཕན་འདོགས་ན། ཁྱིམ་བྱ་ཤི་བ་ཡང་སྐད་འདོན་པར་འགྱུར་བ་ལྟར་བཤད་པས་དོན་གསང་ལས་ཀུན་གཞིའི་རྣམ་ཤེས་མངོན་དུ་གྱུར་བཞིན་དུ་འཇུག་པའི་རྣམ་ཤེས་སྐྱེ་བ་ཡོད་པར་གསུངས་པ་དང༌། དམིགས་རྐྱེན་ཀྱང་མེད་དེ། སེམས་དང་སེམས་ལས་བྱུང་བ་ཐམས་ཅད་གང་ནས་འཆར་བའི་ཡུལ་ལོགས་སུ་མེད་པས་ན་མིག་ལ་སོགས་པའི་རྣམ་པར་ཤེས་པས་མངོན་སུམ་དུ་མི་དམིགས་པའི་ཕྱིར་རོ། །དེས་ན་དུས་དང་ཡུལ་རྒྱ་ཆད་ཅན་དུ་མ་ངེས་པར་ཀུན་གཞི་དེ་ཉིད་ལུང་མ་བསྟན་ཁོ་ན་ངེས་པ་ཡིན་ནོ། །ལམ་གྱི་དབང་དུ། དེ་མ་ཐག་པའི་རྐྱེན་རང་གི་ཤེས་རབ། དེའི་རྒྱུ་སྔ་མའི་བསགས་པ་དང་། དམིགས་པའི་རྐྱེན་གསང་བ་སྟོན་པའི་བླ་མ། དེའང་དབང་པོ་ཚང་བ་གཞན་ལ་ཕན་འདོགས་པའོ། །ཞེས་ཀྱང་གསུངས་པས་དེ་ལྟར་ཕྱོགས་གཅིག་གི་རྐྱེན་དུ་མ་ངེས་པའང་ཡིན་ནོ། །དེའི་ཕྱིར་ཆོས་མངོན་པའི་མདོ་ལས། ཆོས་ཀུན་ས་བོན་ཐམས་ཅད་༼༩༨༽པའི། །རྣམ་པར་ཤེས་པ་ཀུན་གཞི་སྟེ། །དེ་བས་ཀུན་གཞིའི་རྣམ་ཤེས་དེ། །དམ་པ་དག་ལ་ངས་བཤད་དོ། །ཞེས་གསུངས་པ་ལྟར། ས་བོན་དང་དུས་ཐམས་ཅད་པ་ཡིན་པས་རྡོ་རྗེ་ལྟ་བུའི་ཏིང་ངེ་འཛིན་མ་སྐྱེས་ཀྱི་བར་དུ་ནི་གནས་པ་ཡིན་པས་ཀུན་གཞིའི་ས་བོན་དེ་ཉིད་འཕྲལ་ལ་རྐྱེན་གྱིས་བསྒྱུར་ཏེ་ལས་དགེ་སྡིག་གི་རྐྱེན་ཉིད་གང་དང་ཕྲད་པ་དེ་ཉིད་ཀྱིས་བསྐུལ་བས་ས་བོན་བརྟས་པ་སད་པ་དེའི་དབང་དུ་འགྱུར་བས་བཟང་ངན་དུ་སྣང་བའི་གཞི་རྟེན་དུ་གནས་པའོ། །ཡང་ན་ལམ་གྱི་རྐྱེན་ཁྱད་པར་གང་དང་ཕྲད་པ་ལྟར་དེ་ཉིད་ཀྱི་རྟེན་དུའང་རུང་བའོ། །ས་བོན་གྱི་ཆ་དེ་ཉིད་ལྡོག་པའི་དུས་ནི་གཉིས་ཏེ་མཐོང་སྤང་གི་ས་བོན་གྱི་ཆ་ནི་མཐོང་ལམ་སྐྱེས་པ་ན་ལྡོག་ལ། སྒོམ་སྤང་གི་ས་བོན་གྱི་ཆ་ནི་སྒོམ་ལམ་སྐྱེས་པ་ན་ལྡོག་གོ །དེས་ན་ས་བོན་དང་རྣམ་སྨིན་ཐམས་ཅད་ལྡོག་པའི་དུས་ནི་རྡོ་རྗེ་ལྟ་བུའི་ཏིང་ངེ་འཛིན་ནམ་མཐར་ལམ་ཐ་མ་སྐྱེས་པ་ནའོ།།

དྲུག་པ་བྱེ་བྲག་འཁོར་འདས་གཉིས་ཀྱི་གཞི་རྟེན་དུ་གྱུར་པར་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཆོས་རྣམས་རྩ་བར། ཞེས་པ་ནས། ཤེས་པའི་ཁྱད་པར་སྣང༌། །ཞེས་པའི་བར་གྱིས་བསྟན་ཏེ།

ཆོས་རྣམས་རྩ་བར་གཅིག་པ་ལ། །དེ་རྒྱུན་དབང་གིས་རྣམ་པ་གཉིས།།

གཞི་དང་རྟེན་ཞེས་གྲགས་པ་ལ། །རྨོངས་དང་ཤེས་པའི་ཁྱད་པར་སྣང་།།

འོ་ན་དབྱེ་བ་དང་ཁྱད་པར་ཅི་ལྟ་བུ་ཞིག་ཅེ་ན། ཀུན་ནས་ཉོན་མོངས་པ་དང༌། རྣམ་པར་བྱང་བའི་ཆོས་རྣམས་ཀུན་གྱི་རྩ་བར་ཀུན་གཞི་གྱུར་པས་དབྱེར་མེད་པར་གཅིག་པ་ལ། ཀུན་གཞིའི་དེ་ཡི་རྒྱུན་རིག་པ་དང་མ་རིག་པའམ་རྟོགས་མ་རྟོགས་ཀྱི་དབང་གིས་སྐད་ཅིག་མའི་རྒྱུན་གྱིས་བཟང་ངན་གྱི་ཁྱད་པར་དབྱེ་བའི་གྲངས་རྣམ་པ་གཉིས་སུ་སྣང་བ་ཉིད་དེ། གང་ཞེ་ན། འཁོར་བའི་གཞི་དང་མྱང་འདས་ཀྱི་རྟེན་ཞེས་པའི་དབྱེ་བ་གཉིས་སུ་གྲགས་པ་ཡིན་ལ། དེའང་ཀུན་ནས་ཉོན་མོངས་པའི་གཞིར་གྱུར་པས་རྨོངས་པ་དང༌། རྣམ་པར་བྱང་བའི་རྟེན་དུ་གྱུར་པས་ཡེ་ཤེས་དང་ལྡན་པའི་ཁྱད་པར་དུ་སྣང་བའོ། །དེ་ལྟར་ཀུན་གཞིས་དངོས་པོ་གཉིས་ཀྱི་ས་བོན་གཟུང་ནས་བསྐྱེད་པས་ཚོགས་བདུན་ཉིད་ལས་ཀྱང་ཁྱད་པར་དུ་འཕགས་སོ། །དེར་མ་ཟད་ས་བོན་ཅན་གྱི་ཕྱིར་ཀུན་གཞི་ནི་རྒྱུ་དང༌། དེ་ལས་ལས་དང་མཐུན་པའི་འབྲས་བུའི་རྒྱུད་དུ་སྣང་བའི་ཕྱིར་རྒྱུ་འབྲས་ཀྱི་དབྱེ་བར་ཡང་འགྱུར་རོ།།

གཉིས་པ་རྒྱས་པར་བཤད་པ་ལ་གཉིས་ཏེ། འཁོར་བའི་གཞི་བཤད་པ། རྣམ་བྱང་གི་རྟེན་བསྟན་པའོ། །དང་པོ་ནི།

གཞི་ལ་ཀུན་འགྲོ། ཞེས་པ་ནས། བསྟི་གནས་མེད། །ཅེས་པའི་བར་གྱིས་བསྟན་ཏེ།

གཞི་ལ་ཀུན་འགྲོ་ཀུན་ལ་རྨོངས། །རྣམ་པར་ཞེན་པ་བསྟི་གནས་མེད།།

དེ་གཉིས་༼༩༩༽རེ་རེ་ནས་བསྟན་པའི་ཕྱིར། རྣམ་གྲངས་དང་པོ་ཀུན་ནས་ཉོན་མོངས་པའི་གཞི་རུ་གྱུར་པ་ལ་ནི། འགྲོ་བ་རིགས་དྲུག་གི་གནས་རིས་ཀུན་ཏུ་འགྲོ་ཞིང་སྐྱེ་བ་དང༌། ཤེས་བྱ་ཀུན་ལ་རྨོངས་པར་སྣང་བས། ཀུན་ནས་ཉོན་མོངས་པའི་བག་ཆགས་འཁོར་བའི་ཆོས་ལ་རྣམ་པར་ཞེན་པ་དང་མི་འབྲལ་བའི་དབང་གིས། ས་བོན་ངན་པས་ནོན་ཞིང་བསྒོས་ཏེ། རྣམ་པར་ཐར་པའི་ལམ་རྣམས་དང་བྲལ་བའི་ཕྱིར། རྣམ་པར་བྱང་བའི་རྟེན་ཙམ་ལས་མེད་པའམ་འཁོར་བ་ལས་དབུགས་ཕྱིན་ནས་བསྟི་གནས་སུ་སྣང་བ་མེད་དེ། དཔེར་ན་དུག་གི་བུམ་པ་ལ་མ་གི་ཏའི་ཐིགས་པ་རྟེན་བཅས་པ་ལྟ་བུའོ།།

གཉིས་པ་རྣམ་བྱང་གི་རྟེན་བསྟན་པ་ནི།

རྟེན་ནི་གཞི་སྦྱོར། ཞེས་པ་ནས། སྣང་བས་ལྔར་བཤད་དོ། །ཞེས་པའི་བར་གྱིས་བསྟན་ཏེ།

རྟེན་ནི་གཞི་སྦྱོར་སྣང་བ་དང་། །འགྱུར་མེད་རྣམ་དག་བཙལ་མེད་གནས། །དེ་དག་རེ་ཞིང་རྒྱུ་འབྲས་གཉིས།།

སྔ་མ་སྔ་མ་གང་དག་གང་། །ཕྱི་མ་ཕྱི་མ་སྨིན་པའི་རྒྱུ། །དེ་བཞིན་ཀུན་ཏུ་འཁོར་བར་འབྱུང་།།

རྟེན་ལྔ་དེ་རྒྱུན་དེ་དབང་གིས། །རྣལ་འབྱོར་ལྔར་སྣང་གཉེན་པོ་ལྔ། །སྨིན་པའི་དཔེ་ལྔ་སྦྱོར་དཔེ་བཞིན།།

སྐབས་ལྔ་ལམ་ལྔ་དེ་བཞིན་ས།།ལྔ་ལྔ་བསྟི་གནས་དུས་ལྔ་དང་། །གནས་ལྔ་མཐར་ཕྱིན་རྣམ་པ་ལྔ།།

འདིར་དབྱེ་བ་ལས་ལྔ་བཅུ་དྲུག །རྫོགས་པར་སྣང་བས་ལྔར་བཤད་དོ།།

འདི་དག་སྤྱིར་རྒྱུའི་ཐེག་པ་དང་རིམ་གྱིས་པ་ལའང་སྦྱར་ཏེ་གྲོང་ཁྱེར་གསུམ་གྱི་ལམ་ཞུགས་ལྟ་བུའོ། །ཕལ་ཆེར་གསང་སྔགས་ཀྱི་ལམ་ཡིན་པས་ཚེ་གཅིག་ལ་ལམ་ལྔ་རྫོགས་པ་དང་སྦྱར་རོ། །དེ་ཡང་རྣམ་པར་བྱང་བའི་རྟེན་དུ་གྱུར་པའི་ཚུལ་ནི། གཞི་ཉིད་རྒྱུའི་ཀུན་གཞི་འདུན་པའི་རྣལ་འབྱོར་པའི་དུས་དང༌། སྦྱོར་བ་འདུན་པའི་ཀུན་གཞི་རིགས་ཆེན་འབྱེད་པ་པ་དང༌། སྣང་བ་དོན་གྱི་ཀུན་གཞི་དབུགས་ཆེན་འབྱིན་པ་པ་དང༌། འགྱུར་མེད་རྣམ་པར་དག་པའི་ཀུན་གཞི་ལུང་ཆེན་ཐོབ་པ་པ་དང༌། བརྩལ་མེད་གནས་པའི་ཀུན་གཞི་རྩལ་ཆེན་རྫོགས་པ་པ་དང་ལྔ་སྟེ་ཐུན་མོང་དུ་ཚོགས་སྦྱོར་མཐོང་སྒོམ་ཁྱད་པར་རམ་མཐར་ལམ་དུ་གྱུར་པའོ། །དེ་ལྟར་ཀུན་གཞི་ལྔ་པོ་དེ་དག་རེ་རེ་ཞིང་ཡང་རྒྱུ་དང་འབྲས་བུ་གཉིས་སུ་ཡོད་པ་ནི། ཕལ་པའི་སེམས་བརྒྱད་སྐྱེས་ནས་འགྱུར་དབང་མ་ངེས་པ་ཡན་ཆད་ལམ་སྔ་མ་སྔ་མ་གང་དང་གང་ཡིན་པ་དག་ནི་རྒྱུན་ཡིན་ལ་ལམ་ཕྱི་མ་ཕྱི་མ་དག་ནི་སྨིན་པར་གྱུར་པའི་འབྲས་བུ་ཡིན་པས་དེ་ལྟར་རྒྱུ་འབྲས་ཀྱི་འབྲེལ་བ་ཡོད་པའི་རིམ་པ་ལྟར་བསྟན་པ་ཡིན་ནོ། །དེ་བཞིན་དུ་སྐབས་གང་ལའང་རྒྱུ་འབྲས་གཉིས་སུ་འབྲེལ་ཏེ་ཀུན་ཏུ་འཁོར་བར་འབྱུང་བ་ཡིན་ནོ། །དེ་བས་ན་རྩ་བའི་རྒྱུད་ལས་ཀྱང༌། ཆོས་རྣམས་ཀུན་གཞིར་གཅིག་པ་ལ། །ཀུན་གཞི་གནས་གྱུར་རྣམ་པ་ལྔས། །བྱེ་བྲག་ལམ་གྱི་ཆོས་སུ་སྣང༌། །གཞི་ཉིད་རྒྱུ་ཡི་ཀུན་གཞི་དང༌། །སྦྱོར་བའི་འདུན་པའི་ཀུན་གཞི་དང༌། །སྣང་བ་དོན་གྱི་ཀུན་གཞི་དང༌། །འགྱུར་བ་མེད་པའི་ཀུན་གཞི་དང༌། །བརྩལ་༼༡༠༠༽མེད་གནས་པའི་ཀུན་གཞི་ལྔ། །སྐབས་ལྔ་དག་ཏུ་གནས་གྱུར་པས། །ས་ཡི་ཁྱད་པར་བགྲོད་པ་ཡིན། །དེ་ཡང་གཉིས་ཀྱི་ཆོས་འདི་དག །ཀུན་ཀྱང་ཡོངས་ཀྱི་རྣལ་འབྱོར་དང༌། །འགྲོ་དོན་གསུམ་གྱིས་འགྲོ་བ་སྟེ། །དགེ་དོན་དང་ནི་སྒྲུབ་པ་པོ། །རིགས་འཛིན་ཞེས་ནི་རྫོགས་པ་ཡིན། །ཞེས་གསུངས་སོ། །དེ་ཡང་ས་བོན་རྒྱུའི་གཞི་རྟེན་ནི་རྐྱེན་གྱིས་བསྒྱུར་བ་ལས་ཀྱི་བག་ཆགས་དང༌། ཉོན་མོངས་མངོན་དུ་རྒྱུ་བའི་བག་ཆགས་དང༌། ལྟ་བར་ཆེད་དུ་འཛིན་པ་ཀུན་ཏུ་རྒྱུ་བའི་བག་ཆགས་དང༌། སྒོམ་པ་ཆེད་དུ་བྱེད་པ་ལྷན་ཅིག་སྐྱེས་པའི་བག་ཆགས་དང༌། ཀུན་གཞི་ཆ་ཕྲ་བའི་རང་ངོ་བག་ལ་ཉལ་བའི་བག་ཆགས་དང་ལྔ་ནི་རྟེན་དུ་གྱུར་པས་བག་ཆགས་དེ་དག་ཀུན་གཞི་ལ་གནས་པའང་རིམ་པ་བཞིན་ཏེ། དེ་ཡི་རྒྱུན་མ་ཆད་པའི་མཐུ་དང་སྟོབས་ཀྱི་དབང་གིས་ན། ཀུན་གཞི་འོག་ནས་གོང་དུ་གནས་གྱུར་པ་ལས་རྣལ་འབྱོར་ལྔར་སྣང་བ་ནི་བཤད་པའི་ལས་དང་པོ་པའམ་འདུན་པ་སེམས་པའི་རྣལ་འབྱོར་དང༌། སྤྱོད་པ་རྒྱུན་གྱིའམ་རིགས་ཆེན་འབྱེད་པའི་རྣལ་འབྱོར་དང༌། དབུགས་ཆེན་འབྱིན་པའི་རྣལ་འབྱོར་དང༌། ལུང་ཆེན་ཐོབ་པའི་རྣལ་འབྱོར་དང༌། རྩལ་ཆེན་རྫོགས་པའི་རྣལ་འབྱོར་དང་ལྔའོ།།

གཉེན་པོ་ལྔ་ནི་ཤེས་པ་ལྔ་སྟེ། གང་ཞེ་ན། རིམ་པ་བཞིན་བྱང་ཆུབ་འདོད་པ་ཤེས་པ་དང༌། ཆོས་ཀྱི་རྣམ་པར་ཤེས་པ་དང༌། ཐམས་ཅད་ཤེས་པ་དང༌། ཡོངས་སུ་ཤེས་པ་དང༌། ཤེས་པ་ཆེན་པོ འོ། །ལྔ་པོ་དེས་བག་ཆགས་ལྔ་འཇོམས་པ་དང་སྤོང་བ་གཉིས་ཀར་འགྱུར་རོ། །སར་སྨིན་པའི་དཔེ་ལྔ་ནི། ས་བོན་དང༌། མྱུ་གུ་དང༌། ལོ་འདབ་དང༌། མེ་ཏོག་དང༌། འབྲས་བུ་ལྟ་བུའོ། །ས་ལ་སྦྱོར་པའི་དཔེ་ཡང་སྔ་མ་དང་གྲངས་འདྲ་བར་ལྔ་སྟེ། རས་བལ་དང༌། སྣམ་བུ་དང༌། བཀྲུ་བཅག་དང༌། ཇེན་ཚུར་དང༌། ཚོས་ལྟ་བུ་སྟེ་དེ་བཅུའང་སྐབས་ལྔ་ལ་རིམ་པར་འབྱུང་བའི་ཕྱིར། སེམས་ཅན་ཀྱི་སྐབས་དང༌། འཕགས་པའི་སྐབས་དང༌། ས་ཐོབ་པའི་སྐབས་དང༌། རིག་འཛིན་བྱང་ཆུབ་ཐོབ་པའི་སྐབས་དང༌། འབྲས་བུ་ཐོབ་པའི་སྐབས་སོ།།

ལམ་ལྔ་ནི། ཚོགས་ལམ་དང༌། སྦྱོར་ལམ་དང༌། མཐོང་ལམ་དང༌། སྒོམ་ལམ་དང༌། མཐར་ཕྱིན་པའི་ལམ་མོ། །དེ་བཞིན་དུ་ས་ལྔ་སྟེ། འགྱུར་དབང་མ་ངེས་པའི་ས་དང༌། བསོད་ནམས་གཏེར་གྱིས་དང༌། རྟེན་པས་ཁྱད་པར་དུ་འགྲོ་བའི་ས་༼༡༠༡༽དང༌། དམིགས་པས་འབྲས་བུ་ཐོབ་པའི་ས་དང༌། གནས་པ་མི་འགྱུར་བའི་ས་དང་ལྔའོ། །དེ་ནས་ལམ་ལ་གནས་པ་དང་མཐུན་པའི་ས་ལྔ་སྟེ། མོས་པ་སྤྱོད་པའི་ས་དང༌། སེམས་དཔར་སྦྱོར་བའི་སའམ་གལ་ཆེན་སྤྱོད་པའི་ས་དང༌། མི་ལྡོག་གནས་པའི་ས་དང༌། དམིགས་པས་འབྲས་བུ་སྐྱེ་བའི་ས་དང༌། རྩལ་ཆེན་རྫོགས་པའི་སའོ། །འདི་དག་རིམ་པར་ངེས་པས་མཚོན་པར་ཟད་ཀྱིས། དོན་ལ་ཨ་ནུའི་ས་བཅུ་དང་སྦྱར་ཏེ། དང་པོ་ལྔ་འཇིག་རྟེན་པའི་ས་དང༌། ཕྱི་མ་ལྔ་འདས་པའི་སར་བྱས་ནས་ལྔ་ཕྲག་གཉིས་སུ་བགྲང་ཡང་ས་ལམ་རྫོགས་པ་ན་གནད་གཅིག་ཏུ་འབབ་པར་འགྱུར་ཞིང་རྒྱུ་འབྲས་ཀྱི་ངེས་པར་ཡང་འགྲིག་གོ །ས་འདི་རྣམས་ལའང་རྒྱུའི་ཐེག་པས་ཞི་ལྷག་ལ་སྤྱོད་ཀྱང༌། གསང་སྔགས་པས་སྣང་སྟོང་དབྱེར་མེད་དུ་གསལ་བར་བྱེད་དོ། །བསྟི་གནས་ལྔ་ནི། ལས་སྤྱོད་པའི་བསྟི་གནས། བསླབ་པ་སྤྱོད་པའི་བསྟི་གནས། མཚན་མའི་རྒྱུད་སྦྱོང་བའི་བསྟི་གནས། སྒྱུ་མ་སྦྱོང་བའི་བསྟི་གནས། ཡེ་ཤེས་རྩལ་གྱི་བསྟི་གནས་སོ།།

དུས་ངེས་པ་ལྔ་ནི། དྲན་པ་ཐོབ་པའི་དུས་དང༌། སྤྱོད་པ་ཐོབ་པའི་དུས་དང༌། རྟོགས་པ་ཐོབ་པའི་དུས་དང༌། གོམས་པ་ཐོབ་པའི་དུས་དང༌། ངེས་པ་ཐོབ་པའི་དུས་དང་ལྔའོ། །གནས་ལྔ་ནི། འདོད་པ་གྲུབ་པ་མཐར་ཕྱིན་པའི་གནས་དང༌། བཟོད་པ་གྲུབ་པ་འཕགས་པའི་གནས་དང༌། བདེན་པ་གྲུབ་པ་ཡང་དག་པའི་གནས་དང༌། ལས་སུ་རུང་བ་སྦྱོར་བའི་གནས་དང༌། ལྷུན་གྱིས་གྲུབ་པ་མཉམ་པའི་གནས་སོ། །མཐར་ཕྱིན་པ་རྣམ་པ་ལྔ་ཡང༌། སྔགས་ལ་ཞུགས་པའི་ལས་མཐར་ཕྱིན་པ་དང༌། བསླབ་པའི་སྦྱོར་བ་མཐར་ཕྱིན་པ་དང༌། བདེན་པ་མཐོང་བ་མཐར་ཕྱིན་པ་དང༌། ཏིང་ངེ་འཛིན་གོམས་པ་མཐར་ཕྱིན་པ་དང་། འབྲས་བུ་གྲུབ་པ་མཐར་ཕྱིན་པ་སྟེ། རྟེན་སྐབས་སུ་སྐྱེད་དུ་བྱ་བ་མེད་པའི་ཕྱིར་མིང་ངེས་པར་འགྲུབ་སྟེ་བཤད་པ་རྣམས་ལའང་སྦྱར་རོ། །དེ་ལྟར་རྟེན་གྱི་ཀུན་གཞིའི་སྐབས་འདིར་དབྱེ་བའི་གྲངས་ཀྱི་འཇུག་པ་བསྡུ་བ་ལས། རྣམ་གྲངས་ལྔ་དང་བཅུ་ཕྲག་དྲུག་ལ་ནི་དྲུག་ཅུ་རྩ་ལྔ་སྟེ། ལྔ་ཕྲག་བཅུ་གསུམ་གྱི་ས་ལམ་རྫོགས་ཏེ་ལྔ་ལྔས་མཐར་ཕྱིན་པར་སྣང་བས། རྩ་བ་ལྔར་བསྡུས་ནས་ལྔ་ལས་མ་གཡོས་པར་བཤད་དེ་རིམ་པར་སྦྱར་བ་ཉིད་དོ། །འདི་དག་ཀྱང་རྒྱུ་འབྲས་ཐུན་མོང་བའི་ལམ་དང༌། འབྲས་བུ་༼༡༠༢༽ཐུན་མོང་མ་ཡིན་པ་ཉིད་ཀྱི་ལམ་ལྔ་ཅི་རིགས་པར་སྦྱར་རོ། །བཤད་པའི་ཏིང་ངེ་འཛིན་ལྔ་དང༌། ལྟས་ལྔ་དང༌། དབང་ལྔ་དང༌། སེམས་ལྔ་དང༌། ལྔ་ཕྲག་སྤྱིར་བཅུ་བདུན་དུ་འགྱུར་ལ། དུ་མའི་གྲངས་སུ་འདྲེན་པ་དེས་ཐུན་མོང་མ་ཡིན་པའི་ལམ་ཡིན་པར་ཡང་གསལ་ལོ།།

བདུན་པ་རྩ་བ་གང་དང་གང་དུ་འདུས་པ་ཐུན་མོང་དུ་བསྟན་པ་ལ་གཉིས་ཏེ། སྤྱིར་བསྟན་པ། བྱེ་བྲག་མིང་གི་རྣམ་གྲངས་བཤད་པའོ། །དང་པོ་ནི།

ཆོས་རྣམས་ཀུན་གྱི། ཞེས་པ་ནས། མཐོང་ན་མྱ་ངན་འདས། །ཞེས་པའི་བར་གྱིས་བསྟན་ཏེ།

ཆོས་རྣམས་ཀུན་གྱི་གཞིར་གྱུར་པས། །ནོར་བའི་རྐྱེན་གྱིས་འཁོར་བར་སྣང་།།

རང་བཞིན་ཇི་ལྟར་ཡིན་པའི་དོན། །ངེས་པར་མཐོང་ན་མྱ་ངན་འདས།།

ཆོས་རྣམས་ཀུན་གྱི་གཞིར་གྱུར་ཏེ་དངོས་པོ་བཟང་ངན་གཉིས་ཀའི་རྩ་བ་ཀུན་གཞིར་གཅིག་པ་ཡིན་པས། མཚན་ཉིད་མ་རྟོགས་ཏེ་མ་རིག་པས་ནོན་ནས་ནོར་བའི་དབང་གིས་གཟུང་འཛིན་དུ་འཁྲུལ་པའི་རྐྱེན་གྱིས་འཁོར་བར་སྣང་བས་ཀུན་ནས་ཉོན་མོངས་པའི་གཞི་ཡིན་ལ། ཀུན་གཞིའི་རང་བཞིན་ཆོས་ཐམས་ཅད་ཀྱི་ཆོས་ཉིད་ཇི་ལྟར་ཡིན་པའི་དོན་གྱི་གནས་ལུགས་མ་ནོར་བར་རྟོགས་ཏེ་ངེས་པར་མཐོང་ན། སྐྱེ་རྒ་ན་འཆི་ལས་ཐར་པའི་འབྲས་བུ་མྱ་ངན་ལས་འདས་པ་ཐོབ་པའི་རྟེན་དུ་གྱུར་པའོ།།

གཉིས་པ་བྱེ་བྲག་མིང་གི་རྣམ་གྲངས་བཤད་པ་ལ་གཉིས་ཏེ། འཁོར་བར་གྲགས་པའི་མིང་གི་རྣམ་གྲངས། མྱ་ངན་ལས་འདས་པར་གྲགས་པའི་མིང་གི་རྣམ་གྲངས་སོ། །དང་པོ་ནི།

ཀུན་གྱི་གཞི་དང༌། ཞེས་པ་ནས། འབྱུང་གནས་རྒྱུ་ཞེས་གྲགས། །ཞེས་པའི་བར་གྱིས་བསྟན་ཏེ།

ཀུན་གྱི་གཞི་དང་གང་དེ་ཤེས། །ཆོས་ཀྱི་ཕུང་པོ་སྲིད་གསུམ་འབྱུང་།།

དེ་འབྱུང་རྩ་བ་སྣ་ཚོགས་ལེན། །དབྱིངས་དང་འབྱུང་གནས་རྒྱུ་ཞེས་གྲགས།།

ཐེག་པ་ཐུན་མོང་དང་ཐུན་མོང་མ་ཡིན་པའི་གཞུང་རྣམས་སུ་ཀུན་གཞི་ལ་མིང་གི་རྣམ་གྲངས་ཐ་དད་དུ་གྲགས་པ་ལའང་གཉིས་ལས། འཁོར་བར་གྲགས་པའི་མིང་གི་རྣམ་གྲངས་ཇི་ལྟ་བུ་སྙམ་པ་ལ། ཀུན་ནས་ཉོན་མོངས་པའི་བག་ཆགས་ཀྱི་ས་བོན་ཐམས་ཅད་གསོག་པའི་གཞི་ཡིན་པས་ཀུན་གྱི་གཞི་ཞེས་བྱ་བ་དང༌། ལུས་དང་གྲུབ་སྡེ་གཅིག་པས་ཡུལ་གྱི་དངོས་པོ་གང་དེ་ཤེས་ཤིང་ཀུན་ཤེས་པའི་སེམས་ཉེ་བར་འཇོག་པས་ཀུན་གཞིའི་རྣམ་པར་ཤེས་པ་ཞེས་ཀྱང་བྱ་སྟེ། འཕགས་པ་རིན་པོ་ཆེ་བཀོད་པའི་མདོ་ལས། དེ་ལྟར་དེ་ནི་ལུས་འདི་ལ་གྲུབ་པ་དང་བདེ་བ་གཅིག་པའི་ཕྱིར་འབྲེལ་བ་དང་རབ་ཏུ་འབྲེལ་བས་ཀུན་གཞི་རྣམ་པར་ཤེས་པ་ཞེས་ཀྱང་བྱའོ། །ཞེས་གསུངས། འཁོར་བ་མ་སྟོངས་བར་དུ་གནས་ཏེ་སྲིད་པའི་ཆོས་ཀྱི་སྣང་བ་སྟོན་པའི་གཞིར་གནས་པ་ལས་ཕུང་པོ་ཐ་དད་སྣ་ཚོགས་སུ་སྣང་བས་འཁོར་བ་ཇི་སྲིད་ཀྱི་ཕུང་པོའམ་ཆོས་ཀྱི་ཕུང་པོ་ཞེས་ཀྱང་བྱའོ། །རྟེན་འབྲེལ་བཅུ་གཉིས་ཀྱི་གཞིར་༼༡༠༣༽གྱུར་པས་སྲིད་གསུམ་འབྱུང་བའི་ཡན་ལག་ཞེས་ཀྱང་བྱའོ། །རྩ་བ་ལ་བརྟེན་པའི་ལྗོན་ཤིང་བཞིན་ཚོགས་བདུན་པོ་དེ་དག་ཀུན་འབྱུང་བའི་རྩ་བ་ཡིན་པས་རྩ་བའི་རྣམ་པར་ཤེས་པ་ཞེས་ཀྱང་བྱའོ། །འདོད་གཟུགས་གཉིས་སུ་མིང་གཟུགས་ཀྱི་ཕུང་པོ་དང་གཟུགས་མེད་དུ་མིང་བཞིའི་ཕུང་པོ་ལེན་ཏེ་ཁམས་གསུམ་ཀུན་ཏུ་སྐྱེ་བ་མང་པོ་སྣ་ཚོགས་ཀྱི་ལུས་ཐམས་ཅད་ལེན་པས་ལེན་པའི་རྣམ་པར་ཤེས་པ་ཞེས་ཀྱང་བྱ་སྟེ། སྔ་མ་ལས། བློ་གྲོས་ཡངས་པ་རྣམ་པར་ཤེས་པ་དེས་དེ་ལྟར་ལུས་འདི་ཉེ་བར་བཟུང་ཞིང་བླངས་པས་ན་ལེན་པའི་རྣམ་པར་ཤེས་པ་ཞེས་བྱའོ། །ཞེས་སོ། །མུ་མཐའ་མི་རྙེད་པར་ཀུན་འབྱུང་བས་ཐོག་མ་མེད་པའི་དབྱིངས་ཞེས་པའམ་ཀུན་གྱི་འབྱུང་བ་ཞེས་ཀྱང་བྱ་བ་དང་། དངོས་པོ་ཕྱི་ནང་དུ་སྣང་བ་ཀུན་འབྱུང་ཞིང་ཀུན་གྱི་རྟེན་པའི་གནས་ཡིན་པས་ཐམས་ཅད་ཀྱི་གནས་སམ་ས་བོན་ཐམས་ཅད་པ་ཞེས་ཀྱང་བྱ་སྟེ། རྒྱན་སྟུག་པོ་བཀོད་པ་ལས། སྔོན་མེད་བག་ཆགས་ལྡན་པས་ན། །ཀུན་གཞི་ས་བོན་ཐམས་ཅད་ཅན། །རྒྱ་མཚོའི་རྦ་རླབས་ཇི་བཞིན་དུ། །རླུང་གི་རྐྱེན་གྱིས་བསྐྱོད་པ་ལྟར། །གར་བྱེད་ཅིང་ནི་རབ་ཏུ་འབྱུང༌། །རྣམ་པར་རྒྱུན་ཀྱང་མི་འཆད་དོ། །ཞེས་སོ། །ཚོགས་བདུན་གྱི་ཡང་སྐྱེད་བྱེད་ཀྱི་རྒྱུ་ཡིན་པའམ། མཚན་ཉིད་གསུམ་གྱི་གཞིར་གྱུར་པས་ཆོས་ཀྱི་བག་ཆགས་ཀྱི་ས་བོན་སྣ་ཚོགས་ཀུན་བསགས་པའི་ཕྱིར་བཤད་པའི་ཀུན་གཞི་ལ་སེམས་ཞེས་དང་ཐམས་ཅད་བསྐྱེད་པའི་རྒྱུ་ཞེས་སུ་འཇིག་རྟེན་པ་ལ་རབ་ཏུ་གྲགས་སོ། །དེའང༌། དང་པོའི་ས་བོན་ཙམ་དང༌། གསུམ་པ་བཞི་པ་ལྔ་པ་རྣམས་ཐེག་པ་ཆུང་ངུ་ལ་གྲགས་པ་དང༌། དང་པོ་གསལ་བར་བསྟན་ཅིང་གཉིས་པ་དང་དྲུག་པ་མན་ཆད་ཐེག་པ་ཆེན་པོ་ལ་གྲགས་པའོ།།

གཉིས་པ་མྱ་ངན་ལས་འདས་པར་གྲགས་པའི་མིང་གི་རྣམ་གྲངས་ནི།

སྟོང་པ་ཉིད་དང༌། ཞེས་པ་ནས། ཡེ་ཤེས་ཡིན་ཞེས་གྲགས། །ཞེས་པའི་བར་གྱིས་བསྟན་ཏེ།

སྟོང་པ་ཉིད་དང་མཚན་ཉིད་མེད། །དེ་བཞིན་ཉིད་དེ་མ་ནོར་བ། །མ་བཅོས་གཞན་མ་ཡིན་པ་ཉིད། །ཏིང་འཛིན་རྟོགས་པ་སྟོང་ཉིད་གྲགས། །ལྷག་མཐོང་ཞི་གནས་རྣམ་པར་ཐར། །དབུ་མའི་མཐའ་བྲལ་བཟུང་བ་མེད། །འཛིན་མེད་ཆད་མེད་རྟག་པ་མེད། །སྐྱེ་མེད་འགག་མེད་རྟོག་ པ་མེད། །རྣམ་པར་རྟོག་མེད་མཚན་མ་མེད། །དེ་བཞིན་བདག ་མེད་གཞན་མེད་པ། །འགྲོ་བ་མེད་ཅིང་འོང་བ་མེད། དྲི་མེད་འདུ་བ་བྲལ་བ་མེད། །ཕུང་མེད་ཁམས་མེད་སྐྱེ་མཆེད་མེད། །ཡུལ་མེད་ལས་མེད་རྒྱུ་འབྲས་མེད། །མ་སྐྱེས་སྙིང་པོ་བྱང་ཆུབ་མེད།།

སངས་རྒྱས་ཆོས་དང་བྱང་ཆུབ་སེམས། །དེ་ནས་མི་སྐྱེ་མི་འགག་ལ། །དེ་ནི་ནམ་མཁའ་ལྟ་བུའོ།།

ཆོས་ཀྱི་དབྱིངས་ཉིད་ཆོས་ཀྱི་སྐུ། །མི་རྟོགས་ཡེ་ཤེས་ཡིན་ཞེས་གྲགས།།

རྣམ་པར་བྱང་བ་ལ་གྲགས་པའི་མཚན་གྱི་རང་བཞིན་གང་སྙམ་པ་ལ། ཀུན་གཞི་བྱང་ཆུབ་སེམས་ཀྱི་རང་བཞིན་མཐའ་གཉིས་སུ་མ་གྲུབ་པས་སྟོང་པ་ཉིད་ཅེས་བྱ་བ་དང༌། ངོ་བོ་ཕྱོགས་གཅིག་ཏུ་འདི་འདྲར་མི་ཟིན་པས་མཚན་ཉིད་མེད་པ་ཞེས་བྱ་བ་དང༌། བྱེད་པ་པོ་མེད་པས་མ་བཅོས་པའི་ངོ་བོ་དེ་བཞིན་ཉིད་ཅེས་བྱ་བ་དང༌། དེ་ཡང་དེ་བཞིན་གཤེགས་པའི་དགོངས་པ་ཉིད་ཡིན་པས་བདེན་པའི་དོན་མ་ནོར་བ་ཞེས་༼༡༠༤༽བྱ་བ་དང༌། ཡེ་ནས་གཉེན་པོས་མ་བསླད་པའི་དོན་ཡིན་པས་མ་བཅོས་པ་ཞེས་བྱ་བ་དང༌། དོན་ལོགས་ན་མེད་པའི་ཕྱིར་གཞན་མ་ཡིན་པ་དེ་བཞིན་ཉིད་ཅེས་བྱ་བ་དང༌། རང་བཞིན་གསལ་བ་མི་གཡོ་བས་ཏིང་ངེ་འཛིན་ཞེས་བྱ་བ་དང༌། རྟོག་པ་རགས་པའི་བྱེ་བྲག་མེད་པས་སྟོང་པ་ཉིད་ཅེས་བྱ་བར་གྲགས་པ་དང༌། ཡེ་ཉིད་ནས་ཀུན་གཞིའི་རང་བཞིན་མ་སྒྲིབ་པར་གསལ་བས་ལྷག་མཐོང་ཞེས་ཀྱང་བྱ་བ་དང་། སྤྲོས་པ་རྣམས་དང་བྲལ་བས་ཞི་གནས་ཞེས་བྱ་བ་དང་། ཡེ་ནས་གཟུང་འཛིན་དང་ལས་ཀྱིས་འཆིང་བ་མེད་པའི་ཕྱིར་རྣམ་པར་ཐར་པ་ཞེས་བྱ་བ་དང་། དེ་བཞིན་དུ་ཀུན་གཞིའི་རང་བཞིན་ལ་མི་གནས་པས་དབུ་མ་ཞེས་དང༌། མཐའ་དང་བྲལ་བ་ཞེས་བྱ་བ་དང༌། དངོས་པོར་གཟུང་བ་མེད་པ་ཞེས་ཀྱང་བྱའོ། །བདག་ཏུ་འཛིན་པ་མེད་པ་དང༌། མ་འགག་པས་ཆད་པ་མེད་པ་དང༌། མི་དམིགས་པས་རྟག་པ་མེད་པ་ཞེས་བྱ་བ་དང༌། རང་བཞིན་སྐྱེ་འགག་དང་བྲལ་བས་སྐྱེ་བ་མེད་པ་དང་འགག་པ་མེད་པ་ཞེས་དང༌། གཅིག་ཏུ་སྤྱིའི་རྟོག་པ་མེད་པ་དང་བྱེ་བྲག་གི་རྣམ་པར་རྟོག་པ་མེད་པ་དང༌། སྤྲོས་པའི་མཚན་མ་མེད་པ་དང་དེ་བཞིན་དུ་དོན་དམ་ལ་ བདག་མེད་ཅིང་གཞན་མེད་པ ་ཞེས་བྱ་བ་དང༌། ཆོས་ཀྱི་དབྱིངས་ལ་འགྲོ་བ་མེད་ཅིང་འོང་བ་མེད་པ་ཞེས་བྱ་བ་དང༌། ཆོས་ཉིད་ལ་དྲི་མ་མེད་ཅིང་འདུ་བ་དང་འབྲལ་བ་མེད་པ་ཞེས་བྱ་བ་དང༌། ཅིར་ཡང་མ་གྲུབ་པ་ལ་བྱེ་བྲག་ཏུ་ཕུང་པོ་མེད་ཅིང་ཁམས་མེད་ལ་སྐྱེ་མཆེད་མེད་པ་ཞེས་བྱ་བ་དང༌། ཡུལ་གུད་པ་མེད་པ་དང༌། ལས་བྱར་མེད་པ་དང༌། སྐྱེད་པའི་རྒྱུ་མེད་པ་དང་། སྨིན་པའི་འབྲས་བུ་མེད་པ་ཞེས་བྱ་བ་དང༌། ངོས་གཟུང་ལས་འདས་པས་མ་སྐྱེས་པའི་ངོ་བོ་སྙིང་པོ་བྱང་ཆུབ་པའང་དམིགས་སུ་མེད་པ་དང༌། བཅུ་ཕྲག་གསུམ་དང་བཞི་ལ་སོགས་པར་གྲགས་སོ། །ཀུན་གཞི་བྱང་ཆུབ་ཀྱི་སེམས་ནི་ཡེ་ནས་སངས་རྒྱས་ཆོས་དང་དགེ་འདུན་ཏེ་དོན་གྱི་དཀོན་མཆོག་གསུམ་དང་བྱང་ཆུབ་ཀྱི་སེམས་རྣམ་པ་གསུམ་དབྱེར་མེད་པའི་ངོ་བོར་གནས་པས་ཆོས་ཉིད་དེ་ནི་རྒྱུ་ལས་མི་སྐྱེ། རྐྱེན་གྱིས་མི་འགག་ལ། དེ་ལྟར་འདུས་མ་བྱས་པ་དེ་ནི་ངོ་བོ་ཡེ་མ་གྲུབ་པ་ལ་འཇིག་པ་མེད་པས་ནམ་མཁའ་ལྟ་བུ་དང་འདྲའོ། །འོན་ཀྱང་ཀུན་གཞི་དེ་ལྟ་བུའི་དོན་དམ་པ་མི་འགྱུར་བར་ཡོངས་སུ་གྲགས་པ་དེ་ནི། རྟེན་གྱི་ཚུལ་ནས་ཆོས་ཀྱི་དབྱིངས་ཉིད་ལ་ཆོས་ཀྱི་སྐུར་༼༡༠༥༽ཤེད་མ་བྱེ་བ་དག་འདོད་དོ། །དེ་ནི་རྣམ་པར་མི་རྟོག་པའི་ཡེ་ཤེས་ཀྱི་རང་བཞིན་ཡིན་པར་འདོད་པ་རྒྱུའི་ཐེག་པ་ཆེན་པོ་འཁོར་ལོ་ཐ་མའི་གཞུང་ལས་གྲགས་སོ།།

ཐེག་པ་ཆེན་པོ་གསང་སྔགས་བླ་ན་མེད་པ་ཉིད་ནི། ཀུན་གཞི་མུ་མཐའ་བྲལ་བའི་ཆོས་ཀྱི་དབྱིངས་ཉིད་ཆོས་ཀྱི་སྐུ་ཆེན་པོ་ཡེ་ནས་རྣམ་པར་མི་རྟོག་པའི་ཡེ་ཤེས་ཉིད་དུ་གསལ་བ་ཡིན་ནོ་ཞེས་བཞེད་པར་རིག་འཛིན་མཆོག་ལ་གྲགས་སོ། །དེ་ལྟར་ཀུན་གཞིའི་བྱེ་བྲག་མིང་གི་རྣམ་གྲངས་འདི་དག་ལྷ་རྗེ་བ་རྣམ་གཉིས་ཐེག་པ་ཆེ་ཆུང་གཉིས་ཀ་ལ་གྲགས་པར་གསུངས་ཀྱང༌། ཐེག་པ་ཆུང་ངུ་ལ་གྲགས་པ་རྣམས་ལ་རང་གི་སྒྲ་དང་རྣམ་གྲངས་ཀྱིས་ཅི་རིགས་སུ་བསྟན་པ་དག་གིས་ལམ་པོ་ཆེ་བཏོད་པ་ཙམ་ལས་ཀུན་གཞིའི་མཚན་ཉིད་དང་སྦྱར་ཏེ་བཀའ་སྩལ་པ་མེད་པས་འགྲེལ་ཆེན་ལས་ཐེག་ཆེན་ལ་གྲགས་པར་བཤད་དེ་འགྲེལ་ལུགས་འཐད་དོ། །ཞེས་ཀུན་མཁྱེན་དམ་པ་རིན་པོ་ཆེས་གསུངས་སོ། །དེས་ན་བཤད་པའི་གཞི་ནི་བྱིས་པ་འདི་ལྟར་འདོད། ཅེས་པ་དང༌། བློ་ལྡན་ཀུན་ལ་འདི་བརྗོད་ཀྱིས། །བླུན་པོའི་ཆེད་དུ་ཤེས་པར་གྱིས། །ཞེས་པའི་སྒྲས་འདི་དག་ཐེག་པ་དམན་པ་རྒྱུ་མཚན་ཉིད་ཀྱི་གཞུང་ཁོ་ནར་ངེས་པའོ། །སྐབས་སུ་རྣམ་པར་བྱང་བའི་རྟེན་བཤད་པའི་ལམ་རིམ་གྱིས་ངེས་པས་ཐེག་ཆེན་གསང་མཆོག་རྒྱལ་པོར་བཤད་དེ། ཐུན་མོང་དུ་བསྟན་ཏེ་མ་ངེས་པར་གྱུར་པས་གཉིས་ཀར་ཅི་རིགས་སུ་བཤད་པ་ཉིད་དོ། །དེ་ལྟར་གཞུང་གང་གི་རྟོགས་པ་མཐར་ཕྱིན་པ་ནི། ཀུན་གཞི་མེ་ལོང་ལྟ་བུའི་ཡེ་ཤེས་སུ་གནས་གྱུར་ཞེས་བྱ་སྟེ་གཏན་དུ་བར་གྱུར་པའོ།།

བརྒྱད་པ་མུན་པའི་རྒྱུ་ཅི་ལས་བྱུང་དང་ཀུན་གཞི་སྒྲུབ་བྱེད་ཀྱི་རིགས་པ་བཤད་པ་ལ་བཞི་སྟེ། མུན་པའི་རང་བཞིན་རྒྱུ་ལས་མ་བྱུང་རང་སྣང་དུ་བསྟན་པ། མུན་པའི་རྒྱུ་ཆེད་དུ་བྱས་པའི་ཀུན་བརྟགས་ལས་བྱུང་བར་བསྟན་པ། མུན་པ་ཇི་ལྟར་འགག་རིམ་བཞིན་ལམ་ལྔའི་སྐབས་ཀྱིས་ངེས་པར་འབྱུང་ཚུལ་བཤད་པ། བརྩད་པའི་དྲིས་ལན་གྱིས་མུན་པ་སྒྲུབ་བྱེད་ཀྱི་རིགས་པ་བསྟན་པའོ། །དང་པོ་ནི།

མ་བྱུང་ཡེ་ནས་རང་བཞིན་སྣང༌། །ཞེས་རྐང་པ་གཅིག་གིས་བསྟན་ཏེ།

མ་བྱུང་ཡེ་ནས་རང་བཞིན་སྣང༌།།

གཞི་ཇི་ལྟ་བའི་ངོ་བོ་ནི་མཐའ་གང་དུ་ཡང་མི་སྣང་བས་རྒྱུ་རྐྱེན་ལས་མ་བྱུང་བར་ཡེ་ཐོག་མ་མེད་པ་ནས་རང་བཞིན་གྱིས་འོད་གསལ་བའི་ཆོས་ཉིད་དབྱིངས་ཀྱི་གནས་ལུགས་རང་སྣང་བའི་གསང་བ་དམ་པ་སྟེ་དོན་གྱི་ཆོས་བཞིའི་བདག་ཉིད་ཆེན་པོ འོ།།

གཉིས་པ་མུན་པའི་རྒྱུ་ཆེད་དུ་བྱས་པའི་ཀུན་བརྟགས་ལས་བྱུང་བར་བསྟན་པ་ནི།

འོག་ནས། ༼༡༠༦༽མུན་པའང་དེ་ཉིད་དེ་ལས་བྱུང༌། །ཞེས་རྐང་པ་གཅིག་གིས་བསྟན་ཏེ།

མུན་པའང་དེ་ཉིད་དེ་ལས་བྱུང༌།།

དེའང་མུན་པ་ནི་མ་རིག་པ་དང་མཚུངས་པར་ལྡན་པའི་གཟུང་འཛིན་གྱི་ཀུན་རྟོག་ཡིན་པས་ཆེད་དུ་བརྟགས་པའང༌། དེ་ཉིད་དུ་ཟད་པ་དེས་ན་དེ་བྱང་ནས་འཚང་རྒྱ་བར་འདོད་པ་ནི་རྒྱུ་དེ་ལས་བྱུང་བའི་སྒྲིབ་པ་ཉིད་དེ་མུན་པའི་སྤྱོད་ཡུལ་ཁོ་ནའོ།།

གསུམ་པ་མུན་པ་ཇི་ལྟར་འགག་རིམ་བཞིན་ལམ་ལྔའི་སྐབས་ཀྱིས་ངེས་པར་འབྱུང་ཚུལ་བཤད་པ་ནི།

གོང་གི་སྔར་གྱི་འཕྲོར། ཇི་སྲིད་ལེན་པའི། ཞེས་པ་ནས། སྐབས་ལྔས་ངེས་པར་འབྱུང༌། །ཞེས་པའི་བར་གྱིས་བསྟན་ཏེ།

ཇི་སྲིད་ལེན་པའི་སྲིད་པ་དག །གང་སངས་གང་དག་འབྱུང་འགགས་པ།།

སྡུག་བསྔལ་དེ་རྒྱུན་ཟད་བསྲེགས་པས། །འགྱུར་བའི་སྐབས་ལྔས་ངེས་པར་འབྱུང་།།

དུས་འཁོར་བ་ཇི་སྲིད་དུ་ཐོག་མ་དང་ཐ་མ་མེད་པར་སྐྱེ་བ་ཐ་དད་པ་སྣ་ཚོགས་ཀྱི་ལུས་མ་བླངས་པ་ལེན་པར་བྱེད་ཅིང་བླངས་ནས་གནས་པར་བྱེད་པའི་ཀུན་གཞི་རྣམ་པར་ཤེས་པ་དེ་ལ་ཁམས་གསུམ་གྱིས་བག་ཆགས་ཀྱི་ས་བོན་ཡོད་པ་དེ་རྣམས་རྐྱེན་དང་ཕྲད་ན་ཡོངས་སུ་རྫོགས་པར་བྱེད་པའི་འབྲས་བུ་ནས་མིང་བཏགས་པས་སྲིད་པ་ཀུན་ནས་རྫོགས་པའི་བག་ཆགས་སྔ་མ་རྣམས་འཕེན་པའི་ཡན་ལག་གིས་འབྲས་བུ་མཐོ་དམན་དུ་སྨིན་པར་བྱེད་པས་ས་བོན་ངན་པ་དག་བག་ཆགས་ཀྱི་དངོས་པོར་གང་གནས་པ་རིམ་པར་སངས་ནས་བག་ཆགས་ཕྱི་མའི་དངོས་པོ་གང་ཡིན་པ་རྣམས་དག་པར་འབྱུང་བས་རྒྱུ་ལས་དང་ཉོན་མོངས་པ་འགགས་པའི་རིམས་པས་སྐད་ཅིག་མ་རྒྱུན་དུ་འབྱུང་བའི་བག་ཆགས་མཐུ་བརྟས་པས། རྒྱུད་གང་ལ་འབྲས་བུ་སྡུག་བསྔལ་གྱི་གདུང་བར་སྨིན་པར་བྱེད་པའི་བག་ཆགས་མང་པོ་དེ་དག་ཀུན་གཞི་སྐད་ཅིག་མའི་རྒྱུན་ལ་ཡོད་པ་རྣམས་གཉེན་པོ་ལམ་གྱི་ཡེ་ཤེས་ཀྱིས་གཏན་ནས་སྦྱངས་ཏེ་ཟད་པར་བསྲེགས་པས་ཀུན་གཞི་མེ་ལོང་ལྟ་བུའི་ཡེ་ཤེས་སུ་གྱུར་པ་ཡང༌། གནས་འགྱུར་བའི་དུས་གོང་དུ་བཤད་པ་ལྟར་ལམ་གྱི་རྣལ་འབྱོར་ལྔའི་རིམ་པ་ལྟར་སྐབས་ལྔས་བོགས་རེར་གྱུར་ཏེ་མཐར་ཕྱིན་ནས་ཀུན་ཉོན་ལས་ངེས་པར་འབྱུང་སྟེ། ཀུན་གཞི་གཏན་དུ་ལྡོག་པར་བྱེད་པའོ།།

བཞི་པ་བརྩད་པའི་དྲིས་ལན་གྱིས་མུན་པ་སྒྲུབ་བྱེད་ཀྱི་རིགས་པ་བསྟན་པ་ལ་གཉིས་ཏེ། ངོ་བོ་ལ་བརྩད་པའི་དྲིས་པ་དང༌། དེའི་ལན་བཤད་པའོ། །དང་པོ་ནི།

གཟུགས་མེད་མཐོང་མེད། ཅེས་པ་ནས། བྱ་བར་ག་ལ་རིགས། །ཞེས་པའི་བར་གྱིས་བསྟན་ཏེ།

གཟུགས་མེད་མཐོང་མེད་ཡོད་མ་ཡིན། །ཡོད་པས་མཐོང་བའི་ཡུལ་དུ་གྱུར།།

མཐོང་མེད་ཡུལ་དུ་མ་གྱུར་པས། །ཡོད་ཅེས་བྱ་བར་ག་ལ་རིགས།།

ཀུན་གཞི་ཡོད་པར་བསྒྲུབ་པའི་གཏན་ཚིགས་བསྟན་པ་ལ། ཀུན་གཞི་ལ་དབྱིབས་དང་ཁ་དོག་བྲལ་བས་གཟུགས་མེད་ལ། བརྟག་ཏུ་མི་བཏུབ་པས་སུས་ཀྱང་མཐོང་བ་མེད་པའི་ཕྱིར་ཡོད་པ་མ་ཡིན་ནོ་ཞེས་ཀྱང་བྱ་ལ། ཀུན་གཞི་ཡོད་པས་ན་སྣང་བའི་དངོས་ཡུལ་ཐ་དད་པ་༼༡༠༧༽དེ་དག་མཐོང་བའི་ཡུལ་དུ་གྱུར་པའི་ཕྱིར་ཡོད་པ་ཞེས་ཀྱང་བྱ་སྟེ། ངོ་བོ་ཡོད་མེད་ལས་གྲོལ་བའོ། །གལ་ཏེ་དེ་བས་ན་མཐོང་བ་མེད་ཅིང་མ་གྲུབ་པ་ཞིག་ཡུལ་དུ་མ་གྱུར་པ་ཉིད་ཀྱི་ཕྱིར། དེ་ལ་ཡོད་པ་ཞེས་བྱ་བར་གདགས་པར་ག་ལ་རིགས་ཏེ་རིགས་པ་མ་ཡིན་པས་ཀུན་གཞི་མེད་དོ་ཞེ་ན།

གཉིས་པ་དེའི་ལན་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

མུ་མཐའ་མེད་པར། ཞེས་པ་ནས། མེད་ན་ཀུན་དང་འགལ། །ཞེས་པའི་བར་གྱིས་བསྟན་ཏེ།

མུ་མཐའ་མེད་པར་འབྱུང་བའི་རྒྱུ། །དངོས་མེད་གཞི་རྟེན་ངོ་བོ་ཉིད།།

དེ་བས་ཐ་དད་སྣ་ཚོགས་འབྱུང་། །དབྱིངས་འདི་མེད་ན་ཀུན་དང་འགལ།།

དེ་ཡང་ལང་ཀར་གཤེགས་པ་རིན་པོ་ཆེའི་མདོ་ལས། དངོས་པོ་རྣམས་ནི་ཡོད་མ་ཡིན། །མེད་པའང་མ་ཡིན་ཤེས་པར་བྱ། །དེ་ནི་ཆོས་ཀྱི་ཆོས་ཉིད་དེ། །ཡོད་པར་གྱུར་ཕྱིར་མེད་པ་ཡོད། །མེད་པར་གྱུར་ཕྱིར་ཡོད་པ་ཡོད། །མེད་པར་ཡང་ནི་འཛིན་མི་བྱ། །ཡོད་པར་ཡང་ནི་མི་བརྟག་གོ །ཞེས་དང་། ཡོད་པ་མ་ཡིན་མེད་པའང་མིན། །དེ་བཞིན་ཡོད་མེད་གཉི་ག་མིན། །དེ་ལྟར་འཇིག་རྟེན་རབ་མཐོང་ན། །སེམས་གྱུར་བདག་མེད་པའང་འཐོབ། །སེམས་གྱུར་ བདག་མེད་པའང་འཐོབ། །ཅེས་གསུངས་པ ་ལྟར་མེད་པ་མ་ཡིན་པར་ངོ་བོ་ཡོད་མེད་ལས་གྲོལ་བའི་ཀུན་གཞི་ཡོད་པས་ཀུན་གྱི་རྒྱུ་བྱེད་པ་ཉིད་དོ། །དེ་ཡང་འདི་ལྟར་ཀུན་གཞི་ངོ་བོ་མུ་མཐའ་མེད་ཅིང་བློས་དཔག་ཏུ་མེད་པར་འཁོར་བ་དང་མྱ་ངན་ལས་འདས་པའི་དངོས་པོ་གཉིས་པའི་ཆོས་གཟུགས་ནས་རྣམ་པ་ཐམས་ཅད་མཁྱེན་པའི་བར་དུ་རིལ་སྐྱེད་ཅིང་འབྱུང་བའི་རྒྱུའམ་གཞིར་གྱུར་པ་ཡིན་པས་ཀུན་གཞི་ཞེས་བྱ་ལ། དེ་ཡང་ངོ་བོ་བཟང་ངན་ཐ་དད་དུ་གྱུར་པའི་དངོས་པོ་དང་གཟུང་འཛིན་དུ་སྣང་བའི་མཐར་གནས་པ་མེད་པར་རང་བཞིན་གཅིག་ཏུ་མཉམ་ན་ཡང་རྐྱེན་དང་འཕྲད་པས་འགྱུར་ཏེ། རྐྱེན་ངན་པ་དང་འཕྲད་པས་ཀུན་ནས་ཉོན་མོངས་པའི་གཞིར་འགྱུར་ལ། རྐྱེན་བཟང་པོ་དང་འཕྲད་པས་རྣམ་པར་བྱང་བའི་རྟེན་དུ་འགྱུར་པས་གཉིས་ཀའི་ངོ་བོ་ཉིད་དམ་རང་བཞིན་དུ་གནས་པའི་གཏན་ཚིགས་དེ་བས་ན། ཅིར་ཡང་སྣང་སྟེ། འཁོར་འདས་ཀྱི་དངོས་པོ་གཉིས་པ་བཟང་ངན་ཐ་དད་དང་དེ་རང་ལའང་མི་འདྲ་བའམ་མི་མཐུན་པ་མང་པོ་སྣ་ཚོགས་པར་སྣང་བའི་ཕྱིར་ཀུན་གཞི་ཡོད་པར་མངོན་ནོ། །དེས་ན་ཐམས་ཅད་ཀྱི་རྒྱུ་ཀུན་གཞི་བག་ཆགས་དང་བཅས་པའི་དབྱིངས་འདི་ཉིད་མེད་ན་འཆད་པ་ཀུན་ལས་འདས་ཏེ་འཁོར་བ་འབྱུང་ལྡོག་དང་རྣམ་བྱང་གི་འབྲས་བུ་གང་ཡང་མི་འབྱུང་བར་རྒྱུ་མ་ངེས་པའི་འགལ་བ་ཁོ་ནར་འགྱུར་རོ། །དེ་བས་༼༡༠༨༽ན་ལུང་ལས་ཀྱང༌། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ན་འགྲོ་ཀུན་དང༌། །མྱ་ངན་འདས་པ་ཐོབ་པར་འགྱུར། །ཞེས་དང༌། སྔ་མ་ལས། ཉེས་པ་ཀུན་ལས་རབ་གྲོལ་ཞིང༌། །ང་ཡི་ཚུལ་ནི་རབ་རྟོག་ན། །དེ་ནི་ཡང་དག་རྟོགས་པ་སྟེ། །འདྲེན་པ་ཆེ་ལ་དེ་མི་སྨོད། །ཅེས་གསུངས་པ་ཡིན་ནོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཀུན་གཞི་མེད་ན་འཁོར་བ་ལས་ལྡོག་ཏུ་མི་རུང་བའི་ཚུལ་བསྟན་པ། ཀུན་གཞི་མེད་ན་འཁོར་བར་འཇུག་ཏུ་མི་རུང་བའི་ཚུལ་བཤད་པ། ཀུན་གཞིའི་མཚན་ཉིད་ལ་བརྩད་པའི་སྐྱོན་སྤང་བའོ། །དང་པོ་ལ་གཉིས་ཏེ། གཟུང་འཛིན་གྱིས་འཆིང་བ་ལས་མི་གྲོལ་བའི་ཚུལ། རྣམ་བྱང་གི་ས་བོན་བསགས་པ་མེད་ཚུལ་བཤད་པའོ། །དང་པོ་ནི།

གལ་ཏེ་མེད་པ། ཞེས་པ་ནས། གྲོལ་འདོད་འགྲོལ་མ་ཡིན། །ཞེས་པའི་བར་གྱིས་བསྟན་ཏེ།

གལ་ཏེ་མེད་པ་གཅིག་ཡོད་ན། །འཛིན་པའི་ཕྱོགས་ཀྱང་དེ་ལྟ་བས། །ནམས་ཀྱང་གྲོལ་བར་མི་འགྱུར་ཏེ།།

འཆིང་བའི་མདུད་པ་དེ་ན་ཡོད། །གང་ཞིག་མུར་འཛིན་མཐར་ལྟ་བ། །དེས་ནི་མུ་མེད་དོན་མ་མཐོང་། །མུར་འཛིན་མཁའ་ལ་མཐོས་འཇལ་འདྲ། །མུ་མེད་ཉིད་ན་གྲོལ་བར་བཤད། །མུར་འཛིན་གྲོལ་འདོད་གྲོལ་མ་ཡིན།།

དེ་ལྟར་འགལ་བར་འགྱུར་བ་གཏན་ཚིགས་ཅིའི་ཕྱིར་ན། གལ་ཏེ་ཀུན་གཞི་མེད་ལ་གཟུང་བར་སྣང་བའི་ཡུལ་དུ་གྱུར་པ་གཅིག་ཡོད་དོ་ཞེ་ན། གཟུང་ཡུལ་དོན་ལ་ཡོད་པ་དེའི་ཕྱིར་ལུས་དང་གྲིབ་མ་ལྟར་ཤེས་པ་འཛིན་པའི་ཕྱོགས་ཀྱང་དེ་ལྟ་བར་ཡོད་པར་ངེས་པས་གཟུང་འཛིན་རང་རྒྱུད་པར་ཞེན་པ་དེ་བས་དུས་ནམས་ཀྱང་གྲོལ་བར་མི་འགྱུར་ཏེ། འཁྲུལ་རྟོག་རང་རྒྱུད་དུ་གྲུབ་པའི་གཟུང་འཛིན་གྱིས་འཆིང་བས་བསྡམ་ནས་སྲིད་པ་ལས་ནམ་ཡང་མི་ཐར་པའི་མདུད་དམ་པོར་གྱུར་པས་སྐྱོན་ཆེན་པོ་དེ་ན་ཡོད་དོ། །གལ་ཏེ་གཟུང་འཛིན་ཡོད་ཀྱང་གྲོལ་ལོ་ཞེ་ན། མུ་སྟེགས་པ་ལ་སོགས་པ་གང་སུ་ཞིག་གིས་ཀུན་གཞི་ལ་མུ་མཐའ་བཙལ་ཏེ། ཡུལ་ཤེས་སྐད་ཅིག་མ་ཙམ་དང་རྟག་པའམ་ཆད་པའི་མུར་འཛིན་ཞིང་གཟུང་འཛིན་གྱི་མཐར་ལྟ་ངན་པ་ལ་ཞེན་པ་དེས་ནི་ཀུན་གཞི་བྱང་ཆུབ་ཀྱི་སེམས་མུ་མཐའ་མེད་པའི་ཆོས་ཉིད་ཀྱི་དོན་ཡང་དག་པར་མ་མཐོང་བར་ངེས་ཏེ་རྟག་ཆད་དང་གཟུང་འཛིན་གྱི་མུར་ལྟ་ཞིང་བརྟགས་པའི་ཞེན་འཛིན་ལས་མ་གྲོལ་བའི་ཕྱིར་དཔེར་ན་ནམ་མཁའ་ལ་མཐོས་འཇལ་ཏེ་ཚད་བགྲངས་པ་དང་འདྲའོ། །དེས་ན་ཀུན་གཞི་མུ་མཐའ་མེད་པའི་ཆོས་ཉིད་མ་བཅོས་རང་སར་གྲོལ་བའི་མཐའ་བྲལ་གྱི་དོན་རྟོགས་ནས་མཐའ་མི་ཚོལ་བ་གང་ཞིག་ནི་མཐས་མ་བཅིངས་པས་ན་གྲོལ་བར་བཤད་པ་ཡིན་གྱི། དེ་ལས་བཟློག་སྟེ་རྟག་ཆད་གཟུང་འཛིན་གྱི་མུར་འཛིན་དང་བཅས་བཞིན་དུ་ཐར་པ་དང་གྲོལ་བར་༼༡༠༩༽འདོད་ཀྱང་ཆེད་དུ་བྱས་པས་ཞེན་མཐས་འཆིངས་པས་ནམ་ཡང་གྲོལ་བ་མ་ཡིན་ཏེ་འཁོར་བའི་མཐའ་ལ་གནས་པའོ། །དེའི་ཕྱིར་དགོངས་པ་ངེས་པར་འགྲེལ་པ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་ཞེས། །དེ་ནི་བྱིས་པ་རྣམས་ལ་ངས་མ་བསྟན། །ཞེས་གསུངས་སོ། །དེས་ན་ཀུན་གཞི་མེད་ན་གཟུང་འཛིན་ལས་མི་གྲོལ་བའི་སྐྱོན་དུ་འགྱུར་རོ།།

གཉིས་པ་རྣམ་བྱང་གི་ས་བོན་བསགས་པ་མེད་ཚུལ་བཤད་པ་ནི།

བྱེ་མ་བསྐྱེད་ཀྱང༌། ཞེས་པ་ནས། དེ་བཞིན་ཉིད་ཅེས་བསྔགས། །ཞེས་པའི་བར་གྱིས་བསྟན་ཏེ།

བྱེ་མ་སྐྱེད་ཀྱང་འབྲུར་མི་སྨིན། །ཤེལ་སྒོང་བསྒྱུར་ཀྱང་གཏིང་མི་འགྱུར། །འཆིང་བུ་བསྒྱུར་ཀྱང་རིན་ཆེན་མིན།།

ས་རྡོ་བསྲེས་ཀྱང་འདྲེར་མི་རུང་། །གློག་འགྱུས་གཞི་ལ་མུན་པ་མེད། །མཚལ་ཟིལ་གསེར་ཞུན་གཅིག་མི་སྲིད།།

སྐྱེས་བུ་ཉིད་ལ་མཆོང་མི་སྲིད། །ཆུ་བོ་སྔ་ཕྱི་རྒྱུན་མི་འཕྲད། །ཆོས་འཐུན་པ་ན་རིགས་མཐའ་ཡས།།

དེ་བས་དེ་བཞིན་ཉིད་ཅེས་བསྔགས།།

དེ་བཞིན་དུ་ཀུན་གཞིའི་རྣམ་པར་ཤེས་པ་མེད་ན་བག་ཆགས་སོགས་ཏུ་མི་བཏུབ་སྟེ། དོན་གསང་བ་བསྡུས་པ་ལས། བརྟན་ལུང་མ་བསྟན་བསྒོ་བྱ་དང༌། །བསྒོ་བར་བྱེད་དང་འབྲེལ་བ་དང༌། །སྒོ་བྱེད་དེ་ལས་གཞན་ན་མེད། །འདི་ནི་བག་ཆགས་མཚན་ཉིད་དོ། །ཞེས་པས། བག་ཆགས་གང་དེ་རྒྱུན་བརྟན་པ་ལ་བསྒོད། མི་བརྟན་པ་ལ་མི་བསྒོད། ལུང་དུ་མ་བསྟན་པ་ལ་བསྒོད། ལུང་དུ་བསྟན་པ་ལ་མི་བསྒོད། བསྒོ་བར་བྱ་བའི་འོས་ལ་བསྒོད། འོས་མ་ཡིན་པ་ལ་མི་བསྒོད། བསྒོ་བར་བྱེད་པ་དང་འབྲེལ་བ་ལ་བསྒོད། མ་འབྲེལ་བ་ལ་མི་བསྒོད། སྒོད་བྱེད་དེ་ལས་གཞན་དུ་མེད་ན་བསྒོ་ཡིས། གཞན་དུ་གྱུར་ན་མི་སྒོད་དོ། །དེ་བས་ན་འདིར་ཡང་ཀུན་གཞི་མ་མཐོང་ནས་མེད་པར་སྨྲ་ཞིང་ཐར་འདོད་དེ་འཁོར་བ་སྤོང་བ་དེ་དག་གིས། ཀུན་ནས་ཉོན་མོངས་པའི་ས་བོན་རྣམ་བྱང་ལ་གསོག་ཏུ་མི་བཏུབ་སྟེ། གཉེན་པོ་ཡིན་པའི་ཕྱིར་དང་རྣམ་བྱང་གི་ས་བོན་ཀུན་ནས་ཉོན་མོངས་པ་ལ་གསོག་ཏུ་མི་བཏུབ་སྟེ་མི་མཐུན་པའི་ཕྱོགས་ཡིན་པའི་ཕྱིར་རོ། །དེས་ན་ཀུན་གཞི་ལ་མ་བརྟེན་པར་དགེ་བའི་བག་ཆགས་བདག་ཅེས་བྱ་བརྟག་པ་དེ་ལ་བསྒོས་ནས་ཐར་བར་འདོད་ན་ནི་རྣམ་བྱང་གི་ས་བོན་གྱི་བག་ཆགས་མེད་པས་འཁོར་བ་ལྡོག་ཏུ་མི་རུང་སྟེ་དཔེར་ན་བྱེ་མ་ལ་ས་བོན་བྱས་ནས་འབྲས་བུ་བསྐྱེད་ཀྱང་དེའི་འབྲས་བུ་ནས་འབྲས་སོགས་ཀྱི་འབྲུར་མི་སྨིན་པ་དང་འདྲའོ།།

འོ་ན་འདུས་མ་བྱས་པ་ལ་བག་ཆགས་ཀྱི་ས་བོན་བསྒོའམ་ཞེ་ན། གཏན་མི་འགྱུར་ཞིང་རྣམ་པར་དག་པའི་ངོ་བོ་བརྟན་པ་ལ་བསྒོ་བྱའི་འོས་མ་ཡིན་པས་མི་རུང་ངོ་། །དེའི་ཕྱིར་ཀུན་གཞིའི་རང་བཞིན་ལ་མུ་མཐའ་མེད་པ་ཉིད་མཐར་བཟུང་ཡང་མ་རིག་པ་དང་མཚུངས་པའི་ཕྱིར་བག་ཆགས་ཀྱི་རྐྱེན་སྣང་༼༡༡༠༽སྣ་ཚོགས་སུ་སྣང་བ་ཙམ་ལས་དོན་གྱི་ངོ་བོ་ལ་མཐར་མི་འགྱུར་བ་ནི། དཔེར་ན་ཤེལ་སྒོང་རྐྱེན་གྱིས་བསྒྱུར་ཡང་གཏིང་ནས་མི་འགྱུར་བ་དང་འདྲའོ། །དེས་ན་རང་བཞིན་མ་ཡིན་པ་དེ་ལ་བརྟེན་ནས་ཐར་བར་མི་འགྱུར་བའང་དེ་བཞིན་དུ་ངེས་པས་ཀུན་གཞི་ཡོད་པར་མངོན་ནོ། །འོན་ཏེ་རྣམ་བྱང་གི་བག་ཆགས་ཉོན་མོངས་ཅན་གྱི་ཡིད་ལ་བསྒོའམ་ཞེ་ན། དྲི་མའི་ངོ་བོ་ཡིན་པས་བསྒོ་རུ་མི་བཏུབ་པ་དང༌། དེར་མ་ཟད་ཀུན་གཞི་མེད་ན་ཉོན་མོངས་པ་སྤངས་པའང་གང་ལ་གནས་ཏེ་སྤང་བར་བྱ་སྟེ། སྒོ་ལྔ་ལ་གནས་ཏེ་སྤོང་ན་ནི་མཐོང་སྒོམ་གྱི་ལམ་གྱི་དུས་སུ་འགགས་པས་མི་རུང་ཞིང༌། ཉོན་མོངས་པ་ཅན་གྱི་ཡིད་ལ་གནས་ཏེ་སྤོང་ངོ་ཞེ་ན། དྲི་མའི་ངོ་བོ་དེ་ཉིད་སྤང་བའི་གཞིར་མི་བཏུབ་པས་དཔེར་ན་འཆིང་བུ་བསྒྱུར་ཡང་དངོས་སུ་ནོར་བུ་རིན་ཆེན་དུ་འགྱུར་བ་མིན་པ་བཞིན་ནོ། །དེ་བཞིན་དུ་འཁོར་བ་ལུགས་སུ་འབྱུང་བ་ཡང་ཀུན་གཞི་མེད་ན་བག་ཆགས་ཀྱི་ས་བོན་གང་ལ་བསྒོ་སྟེ། སེམས་ལས་བྱུང་བའི་དགེ་བ་ལ་བསྒོ་ན་གླ་རྩི་དང་འདྲ་ལ། མི་དགེ་བ་ལ་བསྒོ་ན་སྒོག་སྐྱ་དང་འདྲ་ཞིང༌། ཡིད་ལ་བསྒོ་ན་གློག་དང་འདྲ་སྟེ་མྱུར་ལ་དྲག་གོ །འོ་ན་གཟུགས་ཀྱི་ཕུང་པོ་ལ་བསྒོ འོ་ཞེ་ན། འབྲེལ་བ་མེད་པས་བག་ཆགས་དག་འདྲེས་སུ་མི་བཏུབ་སྟེ། དཔེར་ན་ས་དང་རྡོ་བསྲེས་ཀྱང་འདྲེས་སུ་མི་རུང་བ་དང་འདྲའོ། །འོན་ཏེ་ཡིད་ཀྱི་རྣམ་པར་ཤེས་པ་ལ་བསྒོའམ་ཞེ་ན། གསལ་ལ་མི་བརྟན་པ་ཉིད་པས་མི་རུང་སྟེ། དཔེར་ན་གློག་འགྱུར་བའི་གཞི་ལ་མུན་པ་མེད་པ་དང་འདྲ་བས་བག་ཆགས་ཀྱི་གཞིར་མི་རུང་ལ། དེར་མ་ཟད་འཁོར་བ་ལུགས་ནས་བཟློག་པར་ཡང་མི་བཏུབ་སྟེ། མཐོང་སྒོམ་གྱི་ཉོན་མོངས་པ་སྤངས་པའམ། ཉོན་ཡིད་དང་སྒོ་ལྔ་ལ་གནས་ཏེ་སྤོང་དུ་ནི་གོང་དུ་བཤད་པ་དང་འདྲ་ལ། ཡིད་ལ་གནས་ཏེ་སྤོང་ན་ནི། ལམ་གྱི་དུས་ན་ཡིད་གཉེན་པོ་ལམ་གྱི་ཡེ་ཤེས་སུ་གྱུར་བས་གཉེན་པོ་ལ་ཉོན་མོངས་པ་གནས་སུ་མི་རུང་སྟེ་དཔེར་ན་སྟྭར་ཚན་ལ་རྩི་སྦུར་མི་གནས་པ་དང༌། གློག་ལ་མུན་པ་མེད་པ་དང་འདྲ་སྟེ། དེ་བས་ན་ཀུན་གཞི་ཡོད་དོ། །དེ་བཞིན་དུ་ཀུན་གཞི་མེད་ན། རྣམ་པར་བྱང་བ་ལ་འཇུག་པ་དང་འཁོར་བར་ལུགས་སུ་འབྱུང་བའི་བག་ཆགས་ཀྱང་མི་རུང་སྟེ། ཚོགས་དྲུག་གི་གཅིག་ལ་གཅིག་བསྒོའམ་ཞེ་ན། གནས་དང་དབང་པོ་དང་ཡུལ་ཐ་དད་པ་ལ་ཕན་ཚུན་སྤངས་ཏེ་གནས་པའི་འགལ་བ་ཡོད་པས་ཐ་དད་གསུམ་དང་འགལ་བའི་ཕྱིར་མི་བཏུབ་སྟེ། དཔེར་ན་མཚལ་བཞུ་བའི་ཟིལ་པ་དངུལ་ཆུ་དང་གསེར་ཞུན་མ་ཉིད་གཅིག་པ་མི་སྲིད་པ་དང་འདྲའོ།།

འོ་ན་ཚོགས་དྲུག་རང་རེའི་བག་ཆགས་རང་རེ་ལ་བསྒོ འོ་ཞེ་ན། མི་བརྟན་ལ་བསྒོ་གཞི་དང་འབྲེལ་༼༡༡༡༽བ་མེད་པར་བྱ་བྱེད་འགལ་བས་མི་བཏུབ་སྟེ། དཔེར་ན་སྐྱེས་བུ་ཇི་ལྟར་མཆོང་བ་ཆེ་ཡང་རང་གིས་རང་ཉིད་ལ་མཆོངས་པ་མི་སྲིད་པ་དང་འདྲའོ། །འོན་ཏེ་ཤེས་པ་སྔ་མས་ཕྱི་མ་ལ་བསྒོ་ཞིང་ཕྱི་མས་སྔ་མ་ལ་བསྒོའམ་ཞེ་ན། རྒྱུད་གཅིག་ལ་ལྷན་ཅིག་ཏུ་མི་གནས་པའི་འགལ་བ་ཡོད་པས་མི་བཏུབ་སྟེ། དཔེར་ན་ཆུ་བོ་སྔ་ཕྱི་གཉིས་རྒྱུན་མི་འཕྲད་པ་དང་འདྲའོ། །འོ་ན་ཤེས་པའི་རིགས་མཐུན་པ་ཙམ་གང་དང་གང་ལའང་བསྒོའམ་ཞེ་ན། བསྒོ་བྱའི་འོས་མ་ཡིན་པས་མི་བཏུབ་སྟེ། ཤེས་པའི་རིགས་མང་པོ་གཞན་དང་གཞན་ཐམས་ཅད་ཆོས་མཐུན་པ་ཡིན་པས་ན་རིགས་མཐའ་ཡས་པ་ཀུན་གྱིས་ཀུན་ལ་བསྒོ་བར་ཐལ་ཏེ་དགྲ་བཅོམ་པའི་ཤེས་པ་ལའང་ཀུན་ནས་ཉོན་མོངས་པའི་བག་ཆགས་བསྒོད་པ་སོགས་སུ་འགྱུར་རོ། །དེ་བས་ན་ཀུན་གཞི་ཡོད་དགོས་སོ། །དེ་ཡང་དོན་གསང་ལས། ཐ་དད་གསུམ་དང་འགལ་བའི་ཕྱིར། །དྲུག་པོ་དག་ནི་འབྲེལ་མེད་དེ། །སྐད་ཅིག་ལྷན་ཅིག་མེད་པའི་ཕྱིར། །རིགས་ལ་བྱ་ན་གཞན་དུ་ཐལ། །ཞེས་ཐེག་བསྡུས་སུ་གསུངས་པར་བཤད་པའི་ཡང་དོན་ཏོ།།

གཏན་ཚིགས་དེ་ལྟར་དུ་ངེས་པ་དེས་ན་འཁྲུལ་གྲོལ་གྱི་གཞིར་ཀུན་གཞིའི་དེ་བཞིན་ཉིད་ཡོད་པའི་གསང་དོན་ལ་བློ་གྲོས་གསལ་བ་དེ་ནི་དོན་ལ་མཁས་པ་ཉིད་ཅེས་བྱ་ཞིང་ཤིན་ཏུ་བསྔགས་པར་འོས་པ་སྟེ། རྩ་བའི་རྒྱུད་ལས། ཀུན་གཞི་ནམ་མཁའི་སྙིང་པོ་དེ། །ཉོན་མོངས་སྤྲིན་གྱིས་གཏིབས་སྦུངས་པ། །ཤེས་རབ་རླུང་གིས་མ་གཏོར་བར། །ག་ཞ་མཁན་གྱི་སྦྱོང་འདྲ་ཡིས། །སྒྲིབ་བསལ་ཆོས་ཉིད་གསལ་འདོད་པ། །ཇི་ལྟར་ཆུས་གཤེར་བྱིས་པ་དག །ཉི་མ་སྤྲིན་ལྡན་གྲིབ་མ་ཡིས། །ཤིན་ཏུ་སྒྲིབས་པར་གྱུར་པ་ན། །སྤྲིན་ཆེན་འདུས་པའི་ཕུང་པོ་ལ། །ཁ་ཡི་དབུགས་ཀྱིས་བུས་བྱས་ནས། །སྤྲིན་བསལ་ཉི་འོད་གསལ་འདོད་འདྲའོ། །དེ་ཕྱིར་རྣལ་འབྱོར་དབང་ཕྱུག་གིས། །སེམས་ཉིད་དོན་ལ་རྣམ་བརྟགས་ཏེ། །ཀུན་གཞི་རྩ་བར་ཤེས་པར་བྱ། །སེམས་ཉིད་དེ་ལ་ལྟས་གསལ་བ། །རྩ་བ་དང་ནི་གང་ལྡན་པ། །དུས་དག་ཚིགས་དང་ལོར་གྱུར་ཀྱང་། །ཡལ་ག་ལོ་འདབ་འབྲས་བུར་སྐྲུན། །རྩ་བའི་ས་བོན་མེད་མི་འགྱུར། །ཞེས་དང༌། ཀུན་གཞི་ཀུན་ཏུ་ནམ་མཁའ་ལ། །ཡིད་ནི་མཁའ་ལ་ཉི་ཤར་འདྲ། །རྣམ་ཤེས་ཉོན་མོངས་སྤྲིན་གྱིས་ཁེབས། །འདུ་བྱེད་རླུང་གིས་ཀུན་བསྐྱོད་དེ། །གསལ་དང་འབྱུང་འཇུག་སངས་དང་འགག །རྣམ་ཤེས་མཚན་མའི་རྟོག་པ་ཡིས། །ཀུན་གཞི་ནམ་༼༡༡༢༽མཁའ་མཐོང་མི་སྟེར། །ཀུན་གཞི་མཐོང་ཉིད་ཆོས་སྐུ་སྟེ། །འདི་དོན་ནམ་མཁའ་མ་བརྗེད་པ། །ཏིང་འཛིན་ཆེན་པོ་རྒྱུན་མི་འཆད། །གང་ཞིག་འདི་དོན་ཡིད་འཆང་བ། །གཟུགས་ཀྱི་དངོས་པོ་ཅིར་སྣང་ཡང༌། །སེམས་ནི་ཡེ་ནས་མྱ་ངན་འདས། །བདེ་ཆེན་སངས་རྒྱས་ཐམས་ཅད་ལ། །དགོངས་པ་འདི་ལས་ཡོང་མི་མངའ། །ཞེས་གསུངས་པ་དང༌། ལང་ཀར་གཤེགས་པ་ལས་ཀྱང༌། ཡིད་ཀྱི་ཤེས་ལས་བྱུང་བ་ཡི། །བག་ཆགས་དྲི་མ་བཞིན་དུ་ལྟོས། །སེམས་ནི་རས་ཡུག་དཀར་པོ་འདྲ། །བག་ཆགས་རྣམས་ཀྱིས་མི་མཛེས་སོ། །ཞེས་དང༌། དེ་བཞིན་གཤེགས་པའི་སྙིང་པོ་ནི། །རྣམ་ཤེས་བདུན་དང་ལྡན་པ་ཡང༌། །འཛིན་པ་གཉིས་ཀྱིས་རབ་འཇུག་སྟེ། །ཡོངས་སུ་ཤེས་པས་ལྡོག་པར་འགྱུར། །ཞེས་དང༌། རྙོག་པ་སྤངས་པའི་སེམས་ཉིད་ནི། །ཡིད་ཀྱི་རྣམ་ཤེས་བཟློག་པ་སྟེ། །ཆོས་རྣམས་ཐམས་ཅད་ཤེས་པའི་ཕྱིར། །སེམས་ནི་སངས་རྒྱས་ཞེས་ང་འཆད། །ཞེས་སོགས་ཚད་མེད་དོ།།

གཉིས་པ་ཀུན་གཞི་མེད་ན་འཁོར་བར་འཇུག་ཏུ་མི་རུང་བའི་ཚུལ་བཤད་པ་ལ་གསུམ་སྟེ། སེམས་ཅན་གྱི་ལུས་བླང་དུ་མི་རུང་བར་བསྟན་པ། སྙོམ་འཇུག་གཉིས་ལས་ལྡང་དུ་མི་རུང་བར་བསྟན་པ། ཤེས་པ་ཆད་ནས་ལྡང་དུ་མི་རུང་བར་བསྟན་པའོ། །དང་པོ་ནི།

དེ་ཉིད་མེད་ན། ཞེས་པ་ནས། ལེན་ཡོད་ག་ལ་སྲིད། །ཅེས་པའི་བར་གྱིས་བསྟན་ཏེ།

དེ་ཉིད་མེད་ན་ཐམས་ཅད་དུ། །གང་དེ་ལན་ཡོད་ག་ལ་སྲིད།།

དགོངས་པ་ངེས་པར་འགྲེལ་བའི་མདོ་ལས། བློ་གྲོས་ཡངས་པ་འགྲོ་བ་དྲུག་གི་འཁོར་བ་འདི་ན་སེམས་ཅན་གང་དང་གང་དག་སེམས་ཅན་གྱི་རིས་གང་དང་གང་དུ་ཡང་སྒོ་ང་ནས་སྐྱེ་བའི་སྐྱེ་གནས་སམ། ཡང་ན་མངལ་ནས་སྐྱེ་བའམ། ཡང་ན་དྲོད་གཤེར་ལས་སྐྱེ་བའམ། ཡང་ན་རྫུས་ཏེ་སྐྱེ་བའི་སྐྱེ་གནས་སུ་ལུས་མངོན་པར་འགྲུབ་ཅིང་འབྱུང་བར་འགྱུར་བ་དེར་དང་པོར་འདི་ལྟར་ལེན་པ་རྣམ་པ་གཉིས་པོ་རྟེན་དང་བཅས་པའི་དབང་པོ་གཟུགས་ཅན་ལེན་པ་དང༌། མཚན་མ་དང་མིང་དང་རྣམ་པར་རྟོག་པ་ལ་ཐ་སྙད་འདོགས་པའི་སྤྲོས་པའི་བག་ཆགས་ལེན་པ་ལ་རྟེན་ནས་ས་བོན་ཐམས་ཅད་པའི་སེམས་རྣམ་པར་སྨིན་ཅིང་འཇུག་ལ་རྒྱས་ཤིང་འཕེལ་བ་དང་ཡངས་པར་འགྱུར་རོ། །དེ་ལ་གཟུགས་ཅན་གྱི་ཁམས་ན་ནི་ལེན་པ་གཉི་ག་ཡོད་ལ། གཟུགས་ཅན་མ་ཡིན་པའི་ཁམས་ན་ནི་ལེན་པ་གཉིས་སུ་མེད་དོ། །ཞེས་གསུངས་པ་ལྟར་གལ་ཏེ་ཀུན་གཞི་དེ་ཉིད་མེད་ན་ལུས་ཀྱི་རྒྱུ་བག་ཆགས་གསོག་ས་མེད་པས་དུས་གསུམ་ཐམས་ཅད་དུ་འཁོར་བ་༼༡༡༣༽ལུགས་ནས་འབྱུང་སྟེ་སྐྱེ་བ་བཞི་པོའི་ལུས་གང་ཡིན་པ་དེ་ཉིད་མ་བླང་པ་ལེན་པ་དང་བླངས་པ་གནས་པར་བྱེད་པ་གང་ཡང་ཡོད་པར་མི་རུང་བས་འཁོར་བ་སྣང་བར་ག་ལ་སྲིད་དེ་སྣང་དུ་མི་བཏུབ་བོ། །གལ་ཏེ་སྲིད་ན་ལུས་ལེན་པ་དེ་ཉིད་རྒྱུ་དང་འབྲེལ་བ་ཞིག་གམ། རྒྱུ་མེད་པ་ཞིག་ཡིན། ཕྱི་མ་ལྟར་ན་རྟག་ཏུ་ཡོད་པའམ་མེད་པར་ཐལ་ལོ།།

དང་པོ་ལྟར་ན། རྒྱུ་རྟག་པ་ཞིག་གམ་མི་རྟག་པ་ཞིག་ཡིན། རྟག་ན་རིམས་དང་གཅིག་ཆར་གྱིས་དོན་བྱེད་པ་འགལ་ལོ། །མི་རྟག་པ་ཡིན་ན། གཟུགས་སམ་སེམས་གང་ཡིན། དང་པོ་ལྟར་ན། རྩོམ་གཞི་གཟུགས་རྡུལ་ཕྲ་རབ་ཡིན་དགོས་པས། དེ་ལ་ཕྱོགས་ཆ་བརྟགས་ན་མ་གྲུབ་པས་འདུས་ནས་རྩོམ་པར་མི་རུང་ངོ༌། །དེར་མ་ཟད་གཟུགས་མེད་དུ་མིང་བཞིའི་ཕུང་པོ་ལེན་པར་ཡང་འགལ་ལོ། །གཉིས་པ་ལྟར་ན་ཚོགས་བདུན་ནི་ས་བོན་ཐམས་ཅད་པ་མིན་པས་ལུས་ལེན་ཞིང་གནས་པའི་རྟེན་དུ་མི་རུང་ངོ༌། །དེའི་ཕྱིར་ཀུན་གཞི་ལས་འོས་མེད་པའོ། །དེ་ལྟར་ཀུན་གཞི་མེད་ན་འཁོར་བ་ལས་ལྡོག་ཏུ་མི་བཏུབ་པ་བཞིན་དུ་འཁོར་བར་འཇུག་པའང་མི་རུང་ངོ༌།།

གཉིས་པ་སྙོམ་འཇུག་གཉིས་ལས་ལྡང་དུ་མི་རུང་བར་བསྟན་པ་ནི།

དེ་ཉིད་མེད་ན། ཞེས་པ་ནས། ལྡང་སྟེ་གང་མི་འགྱུར། །ཞེས་པའི་བར་གྱིས་བསྟན་ཏེ།

དེ་ཉིད་མེད་ན་རྒྱུན་བཀག་ནས། །ཇི་སྲིད་ཅིག་ན་སླར་ལྡང་བ། །གང་ལས་བྱུང་སྟེ་གང་ལས་མིན།།

གང་མེད་དེ་ཉིད་གཉིས་མེད་ན། །གང་ལས་ལྡང་སྟེ་གང་མི་འགྱུར།།

དེ་བཞིན་དུ་གལ་ཏེ་ཀུན་གཞི་དེ་ཉིད་མེད་ན་ཉན་ཐོས་གང་གིས་ཚོགས་དྲུག་གི་རྒྱུ་བ་ཉོན་ཡིད་དང་བཅས་པ་རྒྱུན་བཀག་ནས་བསྒོམས་ཏེ་འགོག་པ་ལ་སྙོམས་པར་ཞུགས་པ་ལས། དུས་བྱམས་པའི་བསྟན་པ་ལྟ་བུ་ཇི་སྲིད་ཅིག་ན་གཎྜི་བརྡུང་བའི་སྒྲ་ལ་སོགས་པ་རྐྱེན་གྱིས་བསྐུལ་ཏེ་འགོག་པ་ལས་སླར་ལྡང་བ་དེ་ཡང་རྒྱུ་གང་ལས་བྱུང་སྟེ་ཀུན་གཞི་མ་ཡིན་པ་གཞན་གང་ལས་ཀྱང་བྱུང་བ་མིན་པས་ཀུན་གཞི་ཡོད་པར་མངོན་ནོ། །དེ་བཞིན་དུ་གང་བག་ཆགས་ཀྱི་རྟེན་ཀུན་གཞི་ཉིད་མེད་ན་དེ་ལ་རྟེན་མེད་པས་འདུ་ཤེས་མེད་པ་བ་དང་འདུ་ཤེས་མེད་པའི་སྙོམས་པར་འཇུག་པ་གཉིས་ཀྱིས་ཚོགས་དྲུག་འགག་ནས་མེད་པར་གྱུར་བ་ན། ཕྱིས་དེ་ལས་ལྡང་བའང་རྒྱུ་གང་ལས་ལྡང་སྟེ་ཀུན་གཞི་མ་ཡིན་པ་གང་ནས་ཀྱང་འབྱུང་བར་མི་འགྱུར་ཀུན་གཞི་ཡོད་པར་གསལ་ལོ།།

གསུམ་པ་ཤེས་པ་ཆད་ནས་ལྡང་དུ་མི་རུང་བར་བསྟན་པ་ནི།

དེ་བཞིན་གང་གིས། ཞེས་པ་ནས། དུག་སྨན་ཇི་བཞིན་ནོ། །ཞེས་པའི་བར་གྱིས་བསྟན་ཏེ།

དེ་བཞིན་གང་གིས་འགགས་འགྱུར་ན། །སྐད་ཅིག་ཇི་སྲིད་དེ་ནས་ལྡང་།།

དེས་ན་དེ་ཉིད་ཀུན་གྱི་གཞི། །ལུས་དང་དུག་སྨན་ཇི་བཞིན་ནོ།།

དེ་བས་ན་སྔ་མ་དེ་བཞིན་དུ་བརྒྱལ་འབོགས་སམ་གཉིད་ལ་སོགས་པ་རྐྱེན་གང་གིས་དབང་ལས་ཚོགས་དྲུག་མྱོས་ཏེ་འགགས་པར་འགྱུར་པ་ན་ཡུན་སྐད་ཅིག་གམ་ཇི་སྲིད་ཀྱི་རིང་ཐུང་གི་ཡུན་དེ་སྲིད་ལོན་ཏེ་དེ་ནས་སླར་ལྡང་བའང་ཀུན་གཞི་ཡོད་པས་ལྡང་བའོ། །དེ་ལྟར་གསུམ་གྱི་དུས་སུ་འགག་པ་ལྡང་བའི་གཏན་ཚིགས་དེས་ན་ཀུན་གཞི་དེ་ཉིད་ལུས་ལེན་པ་སོགས་འཁོར་བར་འཇུག་ལྡོག་གི་གཞི་ཡིན་པར་མ་ཟད་ཤེས་པ་ཉམས་པ་སླར་གསོ་བ་ལ་སོགས་པ་ཀུན་གྱི་གཞི་ཡང་ཡིན་ཏེ། དཔེར་ན་ལུས་ཀྱི་འབྱུང་ཁམས་དང་ལུས་དུག་གིས་མྱོས་པ་སྨན་གྱིས་གསོ་བ་ཇི་ལྟ་བ་བཞིན་ནོ། །དེ་ལྟར་གཏན་ཚིགས་ཀྱི་རྩ་བ་བཞིས་ཀུན་གཞི་ཡོད་པར་མངོན་ནོ།།

གསུམ་པ་ཀུན་གཞིའི་མཚན་ཉིད་ལ་བརྩད་པའི་སྐྱོན་སྤང་བ་ལ་གསུམ་སྟེ། གཅིག་དང་ཐ་དད་ལ་བརྩད་པའི་ལན་བསྟན་པ། བཙན་མི་བཙན་ལ་བརྩད་པའི་ལན་བསྟན་པ། ཀུན་གཞིའི་ཆོས་ཉིད་བསམ་གྱིས་མི་ཁྱབ་པར་བསྟན་ནས་མཚན་ཉིད་ངེས་པར་བྱ་བའོ། །དང་པོ་ནི།

འཇུག་པ་ལྔ་ནི། ཞེས་པ་ནས། འོ་མའི་ཆུ་བཞིན་ནོ། །ཞེས་པའི་བར་གྱིས་བསྟན་ཏེ།

འཇུག་པ་ལྔ་ནི་རྨི་ལམ་འདྲ། །དེ་ལྟར་ན་འདི་གཅིག་པ་འམ། །འོན་ཏེ་ཐ་དད་པ་ཞིག་ཡིན།།

གཅིག་དང་ཐ་དད་ངོ་བོ་ལས། །གྲོལ་ཏེ་དབྱིབས་སམ་ཁ་དོག་གམ། །རྙོག་ཆུ་འོ་མ་ཆུ་བཞིན་ནོ།།

འོ་ན་འཇུག་པ་སྒོ་ལྔའི་རྣམ་པར་ཤེས་པའི་ཚོགས་ལྔ་ནི་དངོས་པོ་མེད་པར་དཔེ་སྒྱུ་མ་ལྟ་བུའམ་རྨི་ལམ་དང་འདྲ་བར་མི་བརྟན་ལ་མི་རྟག་པས་བསླུ་བར་བྱེད་པ་ཡིན་ལ། ཀུན་གཞི་ནི་དེ་ལྟར་མིན་པར་བརྟན་པ་ལྟ་བུར་མི་བསླུ་བ་ཡིན་པའི་ཚུལ་དེ་ལྟར་ཡིན་ན་ཀུན་གཞི་དང་སྒོ་ལྔ་འདི་གཉིས་ངོ་བོ་གཅིག་པའམ་འོན་ཏེ་ཐ་དད་པ་ཞིག་ཡིན་ཞེས་ནས་རྩོད་པར་བྱེད་ན། ལན་ནི། གལ་ཏེ་ངོ་བོ་གཅིག་པར་འགྱུར་ཏེ། སྒོ་ལྔར་ངོ་བོ་གཅིག་ན་ནི། ཀུན་གཞི་ལ་མི་བརྟེན་པའི་ཕྱིར་སེམས་ཅན་གྱིས་འཇུག་གཞི་མཐོང་བས་གྲོལ་བར་ཐལ་བའི་སྐྱོན་དུ་འགྱུར་ལ། འོན་ཏེ་ཀུན་གཞིར་ངོ་བོ་གཅིག་ན་ནི་གཟུང་འཛིན་རགས་པའི་འཁྲུལ་སྣང་མ་ཤར་བས་འདོད་གཟུགས་ཀྱི་སེམས་ཅན་ལྟ་བུའི་ཉེར་སྤྱོད་ཅན་དུ་མི་རུང་བའི་སྐྱོན་དུ་ཐལ་བར་འགྱུར་རོ། །གལ་ཏེ་ཐ་དད་པར་གྱུར་ན་ཡང༌། ངོ་བོ་འབྲེལ་མེད་དུ་འགྱུར་བ་དང༌། ཀུན་གཞི་མཐོང་བས་བག་ཆགས་མི་འཇིལ་བ་ལ་སོགས་པའི་སྐྱོན་དུ་ཐལ་བར་འགྱུར་རོ། །དེས་ན་བསྒྲུབ་བྱའི་དོན་ནི། བྱེད་པའི་ལས་ཀྱིས་སོ་སོར་སྣང་ལ་ཤེས་པའི་རིགས་སུ་གཅིག་པ་ཡིན་པས་གཅིག་དང་ཐ་དད་ཀྱི་ངོ་བོ་ལས་གྲོལ་བ་ཡིན་ཏེ་དཔེར་ན་བག་ཆགས་སད་པའི་ཚེ། གཅིག་གྲུབ་ན་གཅིག་ཀྱང་འགྲུབ་པའམ། གཅིག་ཞིག་ན་གཅིག་ཀྱང་ཞིག་པར་འགྱུར་བ་དབྱིབས་སམ་ཁ་དོག་གམ། གཞི་དང་བཅས་པའི་དཔེ། བག་ཆགས་ངན་པར་༼༡༡༥༽སྣང་བ་རྙོག་མ་ཅན་གྱི་ཆུ་ལྟ་བུ་དང༌། བག་ཆགས་བཟང་པོར་སྣང་བ་འོ་མའི་ཆུའམ་འོ་གའི་ཆུ་དྭངས་པ་ཇི་ལྟ་བ་བཞིན་ནོ།།

གཉིས་པ་བཙན་མི་བཙན་ལ་བརྩད་པའི་ལན་བསྟན་པ་ནི།

དེ་ན་དེ་ཉིད། ཅེས་པ་ནས། འབྱུང་བ་ཇི་བཞིན་ནོ། །ཞེས་པའི་བར་གྱིས་བསྟན་ཏེ།

དེ་ན་དེ་ཉིད་དེ་བཙན་ནམ། །གལ་ཏེ་དེ་ཡི་གཞི་ཉིད་བཙན། །མི་གཡོ་མི་འགྱུར་གཡོ་དང་འགྱུར།།

མ་བྱུང་བ་དང་དེ་བཞིན་འབྱུང་། །ནམ་མཁའ་འབྱུང་བ་ཇི་བཞིན་ནོ།།

དེ་ལྟར་གཅིག་ཐ་དད་ལས་གྲོལ་བའི་ཚུལ་དེ་བཞིན་ཡིན་ནའམ་ཚུལ་དེས་ན་གཅིག་དུ་མ་ལས་གྲོལ་བ་དེ་ཉིད་ལ་སྒོ་ལྔ་ཡིད་ཤེས་དང་བཅས་པས་ཡུལ་བཅད་པའི་བག་ཆགས་ཀྱི་ངོ་བོ་ནུས་པ་དང་བཅས་པ་དེ་ཉིད་དབང་བཙན་ནམ། གལ་ཏེ་བག་ཆགས་ཚོགས་དྲུག་དང་བཅས་པ་དེ་ཡི་གཞི་ཡི་རང་བཞིན་ཀུན་གཞི་འདི་ཉིད་དབང་བཙན་པ་ཡིན་ཞེས་རྒོལ་བར་བྱེད་ན། ལན་དུ་ཀུན་གཞི་ཉིད་བཙན་པས་ཆོས་ཉིད་ཀྱི་རང་བཞིན་གང་དུའང་མི་གཡོ་ལ་མཚན་ཉིད་མཐའི་སྤྲོས་པ་ཅིར་ཡང་མི་འགྱུར་བས་དབང་བཙན་པར་གནས་ལ་སྒོ་ལྔ་ཡིད་དང་བཅས་པའི་བག་ཆགས་ཀྱི་སྣང་བ་རྣམས་ནི་ཀུན་ནས་གཡོ་བ་སྤྲོས་མཐའ་སྣ་ཚོགས་སུ་འགྱུར་བས་མི་བཙན་ལ་དེ་བཞིན་དུ་ཀུན་གཞིའི་ངོ་བོ་ནི་འཕྲལ་དུ་མ་བྱུང་བ་དང་ཚོགས་དྲུག་གི་བག་ཆགས་ནི་སྔ་མར་བཤད་པ་དེ་བཞིན་འཕྲལ་དུ་ཡུལ་ཐ་དད་ལས་འབྱུང་བ་ཡིན་པས། དཔེར་ན་ཀུན་གཞི་ནམ་མཁའ་ལྟ་བུ་དང༌། ཚོགས་དྲུག་གི་བག་ཆགས་དེའི་ངང་ལས་འབྱུང་བ་དང་འཇའ་རླན་སོགས་ཀྱི་ཆོ་འཕྲུལ་འཆར་བ་ཇི་ལྟ་བ་བཞིན་ནོ།།

གསུམ་པ་ཀུན་གཞིའི་ཆོས་ཉིད་བསམ་གྱིས་མི་ཁྱབ་པར་བསྟན་ནས་མཚན་ཉིད་ངེས་པར་བྱ་བ་ནི།

ཐོག་མ་ཐ་མ། ཞེས་པ་ནས། འབྱུང་རྒྱུ་དེ་ཉིད་དོ། །ཞེས་པའི་བར་གྱིས་བསྟན་ཏེ།

ཐོག་མ་ཐ་མ་དུས་མི་དམིགས། །མ་ནོར་མ་བཅོས་དེ་བཞིན་ཉིད། །རང་བཞིན་ཀུན་ཏུ་སྣང་བའི་དབྱིངས།།

མ་བྱུང་རང་བཞིན་ཡེ་ནས་གསལ། །གཞི་འམ་དེ་རྒྱུན་ཞེས་བྱ་བ། །ཤེས་རྒྱུན་ཐམས་ཅད་སྐྱེ་འབྱུང་བའི།།

རྩ་བ་མཐུ་ཆེན་གཞིར་གཞག་པ། །སྣ་ཚོགས་འབྱུང་རྒྱུན་དེ་ཉིད་དོ།།

དེ་བས་ན་རང་བཞིན་དོན་གྱི་ཀུན་གཞིའི་གནས་ལུགས་ནི། ཐོག་མ་དང་ཐ་མ་མེད་དེ་སྔ་ཕྱིའི་དུས་དང་བྲལ་བས་འབྱུང་བ་དང་སངས་པའི་ཁྱད་པར་མི་དམིགས་ཤིང་ཡེ་ཉིད་ནས་ཡང་དག་པར་གནས་པས་མ་ནོར་བའི་ངོ་བོ་རྒྱུ་རྐྱེན་གྱིས་བྱས་པ་མེད་པར་མ་བཅོས་པའི་ཆོས་ཉིད་མ་བསླད་པས་དེ་བཞིན་ཉིད་ཀྱི་རང་བཞིན་དུས་བཞི་ཀུན་ཏུ་མ་བསྒྲིབས་ཏེ་གསལ་བར་སྣང་བའི་དབྱིངས་མུ་མཐའ་མེད་པའི་གསང་བ་དམ་པ་ཡིན་ལ། དེའི་ངོ་བོ་ནི་མཐའ་གང་དུའང་མ་བྱུང་བས་ཕྱོགས་ཆའི་སྤྲོས་པ་གང་ཅིར་ཡང་མི་སྣང་སྟེ་ཡེ་ཤེས་ཆེན་པོའི་རང་བཞིན་དུ་ཡེ་གདོད་མ་ནས་རང་བྱུང་གི་རིགས་པར་འོད་གསལ་བའོ། །འོ་ན་འཁོར་བའི་ཆོས་ཇི་སྙེད་པར་སྣང་བ་འདི་ཉིད་ཅི་ཞིག་ཉེས་ཤེ་ན། རང་བཞིན་དེ་ལྟར་དུ་གནས་པ་ཡིན་ཀྱང་རང་ངོ་རང་གིས་མ་མཐོང་བའི་ཆ་ལས་སྦྱོར་བ་དོན་གྱི་༼༡༡༦༽ཀུན་གཞིའམ་འཁོར་བའི་རྒྱུའི་བག་ཆགས་དེ་ཉིད་སྐད་ཅིག་མའི་རྒྱུན་དུ་བྱུང་བས་ཀུན་གཞིའི་རྣམ་པར་ཤེས་པ་ཞེས་ཀྱང་བྱ་བ་ཡིན་ཏེ། ལང་ཀར་གཤེགས་པ་ལས། སེམས་ཀྱི་ཆོས་ཉིད་དག་པ་སྟེ། །སེམས་ནི་ནོར་ལས་བྱུང་བ་ཡིན། །ནོར་བ་གནས་ངན་ལེན་པ་སྟེ། །དེ་ཡི་ཕྱིར་ན་སེམས་མི་མཐོང༌། །ཞེས་དང༌། སེམས་སླུ་བ་ཡི་སྨིག་རྒྱུ་བ། །ཇི་ལྟར་དཔྱིད་ཀ་གཡོ་བ་ན། །རི་དྭགས་རྣམས་ནི་ཆུར་འཛིན་ཏེ། །དེ་ལ་དངོས་པོ་ཡོད་པ་མིན། །དེ་བཞིན་རྣམ་ཤེས་ས་བོན་ཡང༌། །ལྟ་བའི་ཡུལ་ལ་རབ་ཏུ་གཡོ། །བྱིས་པ་རྣམས་ནི་སྐྱེ་བར་འཛིན། །རབ་རིབ་ཅན་གྱིས་རབ་རིབ་བཞིན། །ཞེས་དང༌། ཇི་ལྟར་རྒྱ་མཚོའི་རླབས་རྣམས་ནི། །རླུང་གི་རྐྱེན་གྱིས་བྱུང་བ་དག །གར་བྱེད་རབ་ཏུ་འཇུག་པར་འགྱུར། །རྒྱུན་ཀྱང་ཆད་པར་མི་འགྱུར་རོ། །དེ་བཞིན་ཀུན་གཞི་ཆུ་བོ་ཡང༌། །རྟག་ཏུ་ཡུལ་གྱི་རྐྱེན་གྱིས་བྱུང༌། །རྣམ་ཤེས་རྦ་རླབས་སྣ་ཚོགས་ཀྱིས། །གར་བྱེད་རབ་ཏུ་འདུད་པར་འགྱུར། །ཞེས་གསུངས་པ་ལྟར་དེ་ནི་རྣམ་ཤེས་ཚོགས་བདུན་གྱིའང་སྐྱེད་བྱེད་ཡིན་པས་ཀུན་ནས་ཉོན་མོངས་པའི་ཤེས་རྒྱུན་ཐམས་ཅད་སྐྱེ་ཞིང་འཁོར་བའི་ཆོས་རྣམས་འབྱུང་བའི་རྩ་བ་བག་ཆགས་སྣ་ཚོགས་ཀྱི་ནུས་པའི་མཐུ་ཡི་སྟོབས་ཅན་དང་བཅས་པས་འཁོར་བའི་གཞི་རྩར་གྱུར་པ་དེ་ཉིད་གཞིར་བཞག་པ་ལས་དངོས་པོ་གཟུང་འཛིན་སྣ་ཚོགས་སུ་འབྱུང་ཞིང་སྣང་བའི་རྒྱུ་དེ་ཉིད་ལ་བག་ཆགས་ཀྱི་ཀུན་གཞི་ཞེས་བརྗོད་པ་ཡིན་ཏེ། སྔ་མ་ལས། ཇི་ལྟར་མེ་ལོང་གཟུགས་བརྙན་དང༌། །རབ་རིབ་ཅན་ལ་སྐྲ་འཛིངས་པ། །དེ་བཞིན་བག་ཆགས་ཀྱིས་གཡོགས་སེམས། །བྱིས་པ་རྣམས་ཀྱིས་མཐོང་བ་ཡིན། །ཞེས་པ་དང༌། ཀུན་གཞི་ལ་ནི་རྟེན་བཅས་ནས། །ཡིད་ཀྱང་ཤིན་ཏུ་འཇུག་པར་འགྱུར། །སེམས་དང་ཡིད་ལ་རྟེན་བཅས་ནས། །རྣམ་པར་ཤེས་པ་འཇུག་པར་འགྱུར། །ཞེས་དང༌། འཇིག་རྟེན་དག་ན་སེམས་སླུ་བ། །ཅུང་ཟད་ཙམ་ནི་གང་ཡོད་པ། །རང་བཞིན་གཉིས་དང་འབྲེལ་བ་སྟེ། །ཀུན་གཞི་རྣམ་པར་ཤེས་པས་སྤྲུལ། །ཞེས་སོགས་གསུངས་པ་ཉིད་དོ། །འོན་ཀྱང་དེ་ཙམ་ཉིད་ནའང་རང་བཞིན་གང་དུའང་འབྱུང་ཞིང་སྣང་བར་གནས་པ་ནི་ངོ་བོ་ལ་མེད་པ་ཁོ་ནའོ།།

དགུ་པ་མུན་པའི་ཁམས་ཀྱི་ཀུན་གཞི་ཉིད་དཔེ་གང་དང་མཐུན་ཚུལ་བཤད་པ་ལ་བཅུ་གཅིག་སྟེ། བག་ཆགས་གློ་བུར་དུ་ལྡང་བའི་དཔེ་བཤད་པ། ཀུན་གཞིའི་རང་༼༡༡༧༽བཞིན་བག་ཆགས་དང་བྲལ་བའི་དཔེ་བསྟན་པ། རྩ་བའི་རྣམ་ཤེས་ལས་ཡན་ལག་འབྱུང་བས་འཁོར་བར་སྣང་བའི་དཔེ་བཤད་པ། བག་ཆགས་རྐྱེན་གྱིས་སློང་བའི་དཔེ་བསྟན་པ། རྨོངས་པའི་དབང་གིས་རང་བཞིན་གྱིའང་ལྡང་བའི་དཔེ་བསྟན་པ། ཀུན་གཞིས་བག་ཆགས་འཛིན་པའི་དཔེ་བཤད་པ། མ་རིག་པའི་མཐུས་རང་བཞིན་ལ་བག་ཆགས་བསྒོ་བའི་དཔེ་བསྟན་པ། བག་ཆགས་བསྣོན་མར་གསོགས་པའི་དཔེ་བཤད་པ། བག་ཆགས་བརྣན་ཏེ་བརྟས་པའི་དཔེ་བསྟན་པ། སྒྲིབ་པ་དག་ཅིང་འབྱངས་པའི་དཔེ་བསྟན་པ། བག་ཆགས་སྨིན་པའི་དུས་དང་དེའི་དཔེ་བཤད་པའོ། །དང་པོ་ནི།

དྭངས་པའི་མཁའ་ལ། ཞེས་པ་ནས། སྤྲིན་ཕུང་འཐིབས་ཞེས་བྱ། །ཞེས་པའི་བར་གྱིས་བསྟན་ཏེ།

དང་བའི་མཁའ་ལ་རྒྱུ་བའི་སྤྲིན། །གསེར་གྱི་བླངས་ཙམ་བྱུང་ཚུལ་ཆད། །ཁུ་རླངས་སྤྲིན་དཔུང་འཐིབ་ཅེས་བྱ།།

ཀུན་གཞིའི་དཔེ་རྣམས་ཇི་ལྟ་བུ་སྙམ་པ་ལ། དཔེར་ན་ཤིན་ཏུ་དྭངས་པའི་ནམ་མཁའ་དག་པའི་རང་བཞིན་ལ་རྒྱུ་བའི་སྤྲིན་གྱི་རིགས་ལས་ཆེན་པོ་རྣམས་སྤྲིན་ཕུང་ཡིན་པ་ལྟ་ཅི་སྨོས་ཏེ་ཐ་ན་གསེར་གྱི་རླངས་པ་ཙམ་གྱི་སྤྲིན་ཆུང་ངུ་འབྱུང་བ་ཚུན་ཆད་ཀྱང་སྤྲིན་དུ་གཏོགས་པ་ཡིན་པས་ནམ་མཁའ་སྒྲིབ་པའི་ཁུག་རླངས་དང་སྤྲིན་ཕུང་འཐིབས་པ་ཞེས་བྱ་ཞིང་དེའི་རྒྱུ་ཡང་ནམ་མཁའ་ཡིན་པ་ལྟར་ཀུན་གཞི་ཉིད་ལ་བག་ཆགས་ཀྱིས་སྒྲིབ་པའང་བྱུང་ཚོར་ཤིན་ཏུ་ཕྲ་བའི་གཡོ་བ་ཚུན་ཆད་ཀྱང་བག་ཆགས་སུ་གཏོགས་པ་ཡིན་པས་བག་ཆགས་ཀྱི་སྒྲིབ་པ་ཞེས་བྱ་ཞིང་དེ་དག་གི་རྒྱུ་ཡང་ཀུན་གཞི་ཡིན་ནོ་བར་བསྟན་པའོ།།

གཉིས་པ་ཀུན་གཞིའི་རང་བཞིན་བག་ཆགས་དང་བྲལ་བའི་དཔེ་བསྟན་པ་ནི།

འབྱུང་བའི་སྐད་ཅིག ཅེས་པ་ནས། བྱེ་བྲག་དེ་ཙམ་མོ། །ཞེས་པའི་བར་གྱིས་བསྟན་ཏེ།

འབྱུང་བའི་སྐད་ཅིག་དེ་སྔོན་ཆད། །དང་བའི་མཁའ་ཉིད་སྣང་ཞེས་བྱ། །དེ་བཞིན་དེ་ཉིད་དེ་གཞིར་གཞག།

མཚུངས་པ་ཡིན་ཕྱིར་དེར་སྣང་སྟེ། །སོ་སོའི་བྱེ་བྲག་དེ་ཙམ་མོ།།

དཔེར་ན་དེ་ལྟར་ནམ་མཁའ་ལ་སྤྲིན་འབྱུང་བའི་སྐད་ཅིག་དེ་ཡི་སྔོན་ཕན་ཆད་སྤྲིན་ཕྲ་རགས་མ་བྱུང་བའི་དུས་སུ་ཤིན་ཏུ་དང་བའི་ནམ་མཁའ་ཉིད་སྣང་བ་ཡིན་ཀྱང་སྤྲིན་ཕུང་དེ་ཉིད་འབྱུང་བའི་སྐད་ཅིག་ཙམ་དུ་སྣང་བ་དེ་ཚུན་ཆད་ནས་ཡུན་ཐུང་ངུ་དང་རིང་པོར་བྱུང་བ་གཉིས་ཀ་དང་པོའི་ནམ་མཁའི་ཆོ་འཕྲུལ་སྣང་བ་ཞེས་བྱ་སྟེ། ནམ་མཁའ་མེད་པར་སྤྲིན་ཡོད་པར་མི་རུང་བས་ནམ་མཁའ་ཉིད་རྒྱུ་ཡིན་པ་དེ་བཞིན་དུ་ཀུན་གཞི་དེ་ཉིད་བག་ཆགས་དེ་དག་ཐམས་ཅད་ཀྱི་གཞིར་བཞག་པའང༌། ཀུན་གཞི་དང་བག་ཆགས་གཉིས་ལམ་པའི་གང་ཟག་གིས་ལམ་ལྔའི་ཡེ་ཤེས་རྒྱུད་ལ་སྐྱེས་ཏེ་བག་ཆགས་བསལ་བའི་རིམ་པ་བཞིན་ཆོས་ཉིད་༼༡༡༨༽གསང་བའི་ནམ་མཁའ་སྣང་ཞིང་མཐར་བག་ཆགས་དག་པའི་ཆོས་སྐུའི་སྣང་བ་ཡོད་པས་སྤྲིན་དང་བྲལ་བའི་ནམ་མཁའ་ཡོད་པ་ལྟར་ལྡོག་པ་ཐ་དད་ཀྱི་དབྱེ་བ་ཡོད་ཀྱང༌། ཀུན་ནས་ཉོན་མོངས་པའི་དུས་ན་སོ་སོར་མི་ཕྱེད་པས་ཀུན་གཞི་དང་བག་ཆགས་དུས་མཚུངས་ཤིང་གྲུབ་པ་དང་བདེ་བ་གཅིག་པར་གྱུར་པ་ཡིན་པའི་ཕྱིར་གྱི་གཏན་ཚིགས་དེས་ན་ཀུན་གཞི་དེ་ཉིད་བག་ཆགས་ཀྱི་ངོ་བོར་སྣང་བ་ཡིན་ཏེ་དེ་བས་ན་ཀུན་གཞི་དང་བག་ཆགས་ཀྱི་དབྱེ་བའི་ཆ་སོ་སོའི་བྱེ་བྲག་དེ་ཙམ་མོ། །ཞེས་རྣམ་དབྱེ་དེ་ལས་བཏགས་ཏེ་དོན་ལ་རྟེན་དང་བརྟེན་པའི་ཚུལ་ཡིན་པས་ཀུན་གཞི་མེད་པར་བག་ཆགས་ཡོད་པར་མི་རུང་བས་རྒྱུའི་དཔེ་དོན་ནམ་མཁའ་དང་ཀུན་གཞི་སྦྱར་ཏེ་གསལ་བར་བསྟན་པ་སྟེ། དོན་གྱི་ངོ་བོ་ནི་ནམ་མཁའི་རང་བཞིན་ལྟར་ཆོས་གང་ལའང་གནས་པ་མ་ཡིན་ནོ།།

གསུམ་པ་རྩ་བའི་རྣམ་ཤེས་ལས་ཡན་ལག་འབྱུང་བས་འཁོར་བར་སྣང་བའི་དཔེ་བཤད་པ་ནི།

དེ་ཉིད་དེ་ཡི། ཞེས་པ་ནས། དངངས་འཇིགས་དངོས་པོ་ཉིད། །ཅེས་པའི་བར་གྱིས་བསྟན་ཏེ།

དེ་ཉིད་དེ་ཡི་རྒྱུ་བ་ལས། །འཇུག་པའི་ཚོགས་རྣམས་རྩལ་དུ་སྣང་། །རྩ་བ་མཐུ་ཆེན་འཕེལ་འགྱུར་བས། །གང་དང་གང་དུ་གང་ཉོན་མོངས། །མཚན་མར་སྣང་འཛིན་གཡོ་འགུལ་བསྐྱོད། །རང་སྣང་གང་ལ་དེ་གསལ་རིག །གང་དུ་ལྟ་དང་གང་འཛིན་པའི། །དེ་རྒྱུན་དེ་ལས་དེར་འདི་འབྱུང་།།

གང་ཚོར་གང་ཤེས་གང་དེ་ཤེས། །སྐྲག་ཅིང་དངས་འཇིགས་དངོས་པོ་ཉིད།།

ཀུན་གཞི་ལས་འཁོར་བའི་ཚོགས་དྲུག་སྣང་བའི་ཚུལ་ནི། ཀུན་གཞི་དེ་ཉིད་བག་ཆགས་དང་བཅས་པ་དེ་ཡི་སྐད་ཅིག་མའི་རྒྱུན་གྱི་རྒྱུ་བ་ལས་འཇུག་པའི་རྣམ་པར་ཤེས་པ་ཚོགས་དྲུག་པོ་རྣམས་རྩལ་དུ་འབྱུང་སྟེ་རྒྱ་མཚོའི་རླབས་ལྟ་བུར་སྣང་བ་ཉིད་དེ། དགོངས་པ་ངེས་པར་འགྲེལ་པའི་མདོ་ལས། བློ་གྲོས་ཡངས་པ་ལེན་པའི་རྣམ་པར་ཤེས་པ་དེ་ལ་རྟེན་ཅིང་གནས་ནས་རྣམ་པར་ཤེས་པའི་ཚོགས་དྲུག་པོ་འདི་ལྟ་སྟེ། མིག་གི་རྣམ་པར་ཤེས་པ་དང༌། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པ་དག་འབྱུང་ངོ༌། །དེ་ལ་རྣམ་པར་ཤེས་པ་དང་བཅས་པའི་མིག་དང་གཟུགས་རྣམས་ལ་བརྟེན་ནས། མིག་གི་རྣམ་པར་ཤེས་པ་འབྱུང་སྟེ། མིག་གི་རྣམ་པར་ཤེས་པ་དེ་དང་ལྷན་ཅིག་རྗེས་སུ་འཇུག་པ། དུས་མཚུངས་པ། སྤྱོད་ཡུལ་མཚུངས་པ། རྣམ་པར་རྟོག་པའི་ཡིད་ཀྱི་རྣམ་པར་ཤེས་པ་ཡང་འབྱུང་ངོ༌། །ཞེས་སོགས་དང༌། ལང་ཀར་གཤེགས་པ་ལས།

ཀུན་གཞི་ལས་ནི་སེམས་ཀུན་ཀྱང༌། །རྦ་རླབས་བཞིན་དུ་འབྱུང་བར་འགྱུར། །ཐམས་ཅད་བག་ཆགས་རྒྱུ་ལས་བྱུང༌། །རྐྱེན་བཞིན་དུ་ནི་འབྱུང་བའོ། །ཞེས་བཀའ་སྩལ་པ་བཞིན་ཏེ། དེ་ཡང་དེ་ལྟར་ཚོགས་དྲུག་ཏུ་སྣང་བས་ཡུལ་བཅད་དེ་ཀུན་གཞི་ལ་བག་ཆགས་ཡིད་ཀྱིས་བསྒོས་པས། འཁོར་བའི་རྩ་བའམ་ས་བོན་རྒྱས་ཤིང་ནུས་པའི་མཐུ་ཆེན་པོར་འཕེལ་བའི་བག་ཆགས་༼༡༡༩༽སྟོབས་ཅན་དུ་གྱུར་པས་གནས་ཀྱི་དངོས་པོ་གང་དང་སྤྱོད་ཡུལ་གང་ཡིན་པ་དག་ཀྱང་བཟང་ངན་དང་མཐོ་དམན་དུ་སྨིན་ཅིང་གང་སྣང་དེར་འཛིན་ཞེན་དང་བཅས་ཏེ་ཉོན་མོངས་ཞིང་ཉམ་ཐག་པ་དང་དེ་ལས་ཡུལ་ཐ་དད་པའི་བདེ་སྡུག་གི་མཚན་མར་སྣང་བ་སྣ་ཚོགས་པ་དེ་དག་ཀུན་ལ་ཚོགས་དྲུག་གི་འཛིན་ཞེན་གྱི་དབང་གིས་ལས་མང་པོ་གསོགས་ཏེ་འདུ་བྱེད་ཀྱི་རླུང་གིས་གཡོ་འགུལ་དུ་བསྐྱོད་པས་འགྲོ་བ་རིགས་དྲུག་ཏུ་ཟོ་ཆུན་བརྒྱུད་པའི་ཆུ་རྒྱུན་ལྟར་ཕྱི་ནང་གི་རྟེན་ཅིང་འབྲེལ་བའི་ཡན་ལག་དང་མཐུན་པར་འཁོར་ཞིང་སྡུག་བསྔལ་བ་ཡིན་ཏེ། རིན་པོ་ཆེ་རྒྱན་ལས། ཡིན་པར་གནས་དང་མ་ཤེས་པ། །སྔ་ཕྱི་མི་གནས་ཐོག་མ་མེད། །ཚད་ལས་འདས་པས་ཐ་མའང་བྲལ། །རྒྱུན་དུ་མི་སྟོངས་འཁོར་ལོ་བསྐོར། །ཟོ་ཆུ་བརྒྱུད་པའི་འཁོར་ལོ་ལྟར། །ཕྱི་ནང་བཅུ་གཉིས་ཤུགས་ཀྱིས་བསྐྱར། །ཡོད་པ་མིན་ཀྱང་དོན་ལྟར་སྣང༌། །རྐྱེན་གྱིས་དཀྲུགས་པའི་དབང་པོ་བཞིན། །ཞེས་སོ། །དེས་ན་ཀུན་གཞི་རྒྱུའི་རྐྱེན་དུའང་འགྱུར་རོ། །དེའང་ཀུན༌གཞི་དང་བག་ཆགས་ལས་འབྲས་བུ་འཁྲུལ་པ་དངོས་ཡུལ་དུ་རང་སྣང་བ་གང་ཡིན་དེ་ལ་ཚོགས་དྲུག་གིས་བྱེ་བྲག་ཏུ་བཟུང་ཞིང་སྤྱོད་ཡུལ་དེ་ལྟར་ཤེས་ཤིང་གསལ་བར་རིག་པའི་སྒོ་ནས་སྒོ་ལྔས་ཡུལ་ལྔར་བཅད་ཅིང་ཡིད་ཐུན་མོང་གི་རྗེས་སུ་འབྲང་བ་དེའང་ཀུན་གཞིའི་བག་ཆགས་ཀྱི་རྒྱུད་གང་དུ་དམིགས་ཏེ་ཡུལ་དུས་དབྱེ་བ་མེད་པར་རྣམ་པར་སྨིན་པའི་ཆ་ལ་ཉོན་མོངས་པ་ཅན་གྱི་ཡིད་ཀྱིས་བདག་ཏུ་ལྟ་བ་དང་གང་དེ་ལ་བདག་གིར་ཡང་འཛིན་པས་བརྟགས་པའི་རྟོག་པ་སྐད་ཅིག་མ་དེ་ཡི་རྒྱུན་ལས་ཐམས་ཅད་ཟག་བཅས་སུ་སོང་བ་དེ་ལས་ཀུན་གཞི་བག་ཆགས་དང་བཅས་པའི་འབྲས་བུ་དེ་ཡང་འཁོར་བའི་གཟུགས་དང་ཆོས་སྣ་ཚོགས་སུ་རེད་ཅིང་སྣང་བ་འདིར་སྨིན་པར་འབྱུང་སྟེ་འཁྲུལ་འཁོར་ཅན་དུ་འཕྱན་པའོ། །དེ་ལྟ་བུའི་གཟུང་འཛིན་གྱི་འཁོར་བར་སྣང་བའི་ཆོས་དེ་དག་ལའང་གང་གཟུགས་ཀྱི་ཕུང་པོའི་ཆ་ལ་བརྟེན་ནས་བདེ་སྡུག་བཏང་སྙོམས་ཀྱི་ཚོར་བ་གང་གི་ཡུལ་ལ་འདུ་ཤེས་ཀྱིས་མཚན་མར་འཛིན་པའི་བྱེ་བྲག་ཏུ་ཤེས་པས་འདུ་བྱེད་ལངས་པ་གང་དེ་ཡིས་ལས་སྣ་ཚོགས་སྤྱད་པས་རྣམ་པར་ཤེས་པས་དེ་དང་མཐུན་པར་རིག་སྟེ་ཡུལ་གྱི་རྐྱེན་སྣང་སྡུག་བསྔལ་གསུམ་དང་བརྒྱད་ལ་སོགས་པས་སྐྲག་ཅིང་སྔངས་པ་དང་འཇིགས་པ་བརྒྱད་ལ་སོགས་༼༡༢༠༽པས་ཡ་ང་བའི་དངོས་པོ་ཅན་ཉིད་དུ་གྱུར་ཏེ་ཡུལ་རྐྱེན་ངན་པས་ཉམ་ཐག་ཅིང་ཐར་མེད་དུ་འཁྱམས་པ་ཡིན་ཏེ། སྔ་མ་ལས། མ་རིག་འདམ་གྱི་ཕུང་པོ་ལ། །ཉོན་མོངས་དུག་གི་གཞི་བཏབ་པས། །སྡུག་བསྔལ་སྣ་ཚོགས་ཉེས་པས་ཉེན། །ཐར་པ་བདེ་ཆེན་སྲོག་བྲལ་བའོ། །ཞེས་དང༌། རང་བྱུང་བདེ་བའི་འཁོར་ལོའི་རྒྱུད་ལས། དེ་ཡང་ཀུན་གཞི་ངར་འཛིན་དང༌། །བག་ཆགས་ཡོངས་སུ་མ་ཟད་པས། །ཆེ་བའི་ཡོན་ཏན་མི་རྫོགས་ཤིང༌། །འཁོར་བའི་གནས་ལས་དེ་མི་ཐར། །ཞེས་སོ།།

བཞི་པ་བག་ཆགས་རྐྱེན་གྱིས་སློང་བའི་དཔེ་བསྟན་པ་ནི།

མེ་ལོང་མེ་ཤེལ། ཞེས་པ་ནས། ཕྲད་ན་དེ་བཞིན་འབྱུང༌། །ཞེས་པའི་བར་གྱིས་བསྟན་ཏེ།

མེ་ལོང་མེ་ཤེལ་མེ་འབྱུང་གསུམ། །གང་དང་འཕྲད་ན་དེ་བཞིན་འབྱུང་།།

ཀུན་གཞི་ལ་བག་ཆགས་རྐྱེན་གྱིས་སློང་ངོ་ཞེས་པའི་ཚུལ་ཇི་ལྟ་བུ་ཞེ་ན། དཔེར་ན་མེ་ལོང་གཡའ་ཅན་དང༌། མེ་ཤེལ་དང༌། ཆུ་ཤེལ་ལམ་བཙའ་རྡོ་དང་གཙུབ་ཤིང་མེ་འབྱུང་བ་གསུམ་ལ། གཟུགས་བརྙན་དང་མེ་ཆུ་འབྱུང་རུང་རང་རྒྱུད་དུ་ཡོད་པ་དེ་ཉིད་རྐྱེན་དྲི་སྣུམས་ཀྱིས་ཕྱིས་ཏེ་དྭངས་པ་ན་གཟུགས་དང༌། ཉི་མའི་འོད་ཟེར་དང༌། ཟླ་བའི་འོད་ཟེར་རམ་སྐྱེས་བུའི་རྩོལ་བས་བརྡབས་པ་དང་བཙུབ་པ་ཡི་རྐྱེན་གང་དང་ཕྲད་ན་ཡང་གཟུགས་བརྙན་དང་མེ་དང་ཆུའམ་མེ་འབྱུང་བ་དེ་བཞིན་དུ་ཀུན་གཞི་ལ་བག་ཆགས་ཀྱི་ས་བོན་གང་འབྱུང་བའང་གློ་བུར་གྱི་ལས་ཀྱི་རྐྱེན་གང་གིས་བསྒྱུར་བ་དེ་ཉིད་སློང་ཞིང་སད་པར་བྱེད༌དོ། །འདིར་ཕྱག་དཔེ་ལ་ལར། མེ་ལོང་མེ་ཤེལ་ཆུ་ཤེལ་གསུམ། །ཞེས་ཀྱང་འབྱུང་ངོ༌།།

ལྔ་པ་རྨོངས་པའི་དབང་གིས་རང་བཞིན་གྱིའང་ལྡང་བའི་དཔེ་བསྟན་པ་ནི།

མེ་ལོང་མཚོ་རླབས། ཞེས་པ་ནས། རྒྱུ་ཡིས་རང་བཞིན་ལྡང༌། །ཞེས་པའི་བར་གྱིས་བསྟན་ཏེ།

མེ་ལོང་མཚོ་རླབས་ས་རླངས་གསུམ། །ཇི་སྲིད་དེ་རྒྱུན་བྱུང་ཚོར་རྣམས། །དེ་ཉིད་རྒྱུ་ཡིས་རང་བཞིན་ལྡང་།།

ཇི་ལྟར་བསླང་བས་བག་ཆགས་རང་བཞིན་གྱིའང་ལང་བའི་ཚུལ་དཔེ་གང་གིས་མཚོན་ཞེ་ན། དཔེར་ན་མེ་ལོང་ལས་གཡའ་ལྡང་བ་དང༌། མཚོ་ལས་ཡར་རླབས་མོ་ལྡང་བ་དང༌། ས་ལས་རླངས་པ་འབྱུང་བའི་དཔེ་གསུམ་པོ་ཇི་ལྟ་བ་དེ་བཞིན་དུ་མ་རིག་པས་ནོན་ཏེ་ཡུན་ཇི་སྲིད་ཐོག་མ་མེད་པའི་དུས་ནས་བག་ཆགས་བསགས་པ་དེ་ཡི་སྐད་ཅིག་མའི་རྒྱུན་གྱི་བག་ཆགས་ཀྱི་བྱུང་ཚོར་རྒྱུ་བ་རྣམས་རྐྱེན་གྱིས་མ་བསླང་ཡང་སྔོན་དེ་ཉིད་ལ་གོམས་ཤིང་བརྟས་པའི་རྒྱུ་ཡིས་རང་བཞིན་དུའང་ལྡང་བར་འགྱུར་བ་ཡིན་ནོ། །དཔེ་གསུམ་ནི་རྣམ་པར་སྨིན་པའི་བག་ཆགས་ཀྱི་དཔེ་གཉིས་དང༌། རྒྱུ་མཐུན་པའི་བག་ཆགས་ཀྱི་དཔེ་གཅིག་སྟེ་མཚོན་ཚུལ་གསུམ་གྱི་ཕྱིར་དང༌། ཤེས་པ་ཐ་དད་དཔེ་མོས་ཕྱོགས་ནས་ ༼༡༢༡༽ཤེས་པར་བྱ་བའི་ཕྱིར་ཏེ་བཤད་པ་དང་འཆད་པ་ལའང་སྦྱར་རོ།།

དྲུག་པ་ཀུན་གཞིས་བག་ཆགས་འཛིན་པའི་དཔེ་བཤད་པ་ནི།

མེ་འཛིན་དེ་འཛིན། ཞེས་པ་ནས། དེ་འཛིན་བྱེད་པ་ཡིན། །ཞེས་པའི་བར་གྱིས་བསྟན་ཏེ།

མེ་འཛིན་དེ་འཛིན་འདའ་འཛིན་ལྟར། །དེ་ཉིད་དེ་ཡིས་དེ་རྒྱུན་ལ། །གང་ཞེན་དེ་འཛིན་བྱེད་པ་ཡིན།།

ཀུན་གཞིས་བག་ཆགས་འཛིན་ཞིང་སྨིན་པར་བྱེད་པའི་ཐབས་སུ་གྱུར་པ་དེ་ཉིད་དཔེ་གང་གིས་མཚོན་ཞེ་ན། དཔེར་ན་རྩྭ་ཡིས་མེ་འཛིན་པ་དང་མངལ་གྱིས་ཕོའི་ས་བོན་དེ་ཉིད་འཛིན་པ་དང་སྦྲང་རྒྱས་འདབ་གཤོག་ཅན་གྱི་སྦྲང་མ་འཛིན་པ་དེ་ལྟར་བག་ཆགས་དེ་ཉིད་ཀྱང་ཀུན་གཞིའི་ཤེས་པ་དེ་ཡིས་སྔ་མའི་སྟོབས་ལས་ཕྱི་མ་འབྱུང་བ་དེ་ཡི་སྐད་ཅིག་མའི་རྒྱུན་ལ་ཡུལ་མང་དུ་བཅད་པས་བག་ཆགས་ཆེ་ཕྲ་གང་ཞེན་ཅིང་ཆགས་པ་དེ་ཉིད་མི་གཏོང་བར་འཛིན་ཅིང་དུས་སུ་སྨིན་པར་བྱེད་པ་ཡིན་ནོ།།

བདུན་པ་མ་རིག་པའི་མཐུས་རང་བཞིན་ལ་བག་ཆགས་བསྒོ་བའི་དཔེ་བསྟན་པ་ནི།

རས་དཀར་ལ་སོགས། ཞེས་པ་ནས། བསྒོས་པ་དེ་ཉིད་དུའོ། །ཞེས་པའི་བར་གྱིས་བསྟན་ཏེ།

རས་དཀར་ལ་སོགས་དེ་དག་ནི། །གང་སྒོའི་དབང་དུ་ཉིད་དུའོ།།

དེ་ཉིད་དེ་ལ་དེ་རྒྱུན་དག །གང་ཉིད་བསྒོས་པ་དེ་ཉིད་དུའོ།།

དཔེར་ན་རས་དཀར་པོ་དང༌། དར་དཀར་དང་སྣམ་བུ་དཀར་པོ་ལ་སོགས་པ་དེ་དག་རྣམས་ནི་ཚོན་དང་ཚོས་གང་གིས་བསྒོའི་ཞེས་བསྒོས་ཏེ་བསྒྱུར་བའི་དབང་དུ་རས་སྣམ་ལ་སོགས་པ་དེ་དག་ཉིད་འདུ་ཞིང་དངོས་པོའི་ཁ་དོག་དེར་འགྱུར་བའོ། །དཔེ་དེ་བཞིན་དུ་ཀུན་གཞི་ཉིད་ཀྱང་ཡེ་ནས་དྲི་མ་མེད་པའི་དར་དཀར་པོ་ལྟ་བུ་དེ་ལ་བག་ཆགས་དེ་ཡི་རྒྱུན་དག་ལས། ལས་གང་སྤྱད་ཅིང་གོམས་པ་ཉིད་ཀྱིས་བག་ཆགས་གང་ཇི་ལྟར་བསྒོས་པ་དེ་ཉིད་ཀྱི་དབང་དུ་ཀུན་གཞི་ཡང་འགྱུར་བས་ལས་སྣང་སྣ་ཚོགས་ལ་སྤྱོད་པའོ།།

བརྒྱད་པ་བག་ཆགས་བསྣོན་མར་གསོགས་པའི་དཔེ་བཤད་པ་ནི།

གང་དྲེགས་ལ་སོགས། ཞེས་པ་ནས། དེ་དག་ཉིད་དུའོ། །ཞེས་པའི་བར་གྱིས་བསྟན་ཏེ།

གང་དྲེགས་ལ་སོགས་དེ་དག་ནི། །བསོགས་པས་དེ་དག་ཉིད་དུ་སྣང་།།

དེ་རྒྱུན་འབྱུང་གང་དེ་དག་ནི། །དེ་ཡང་དེ་དག་ཉིད་དུའོ།།

དཔེར་ན་གངས་རིའི་དྲེག་པ་དང༌། ཐེར་སླང་གི་དྲེག་པ་དང༌། ལ་སོགས་པ་ཞེས་དངོས་པོ་གཞན་བསྡུ་བ་ནི་ཕྲུ་ཟངས་ལས་སོགས་པ་སྟེ། དེ་དག་རྣམས་ནི་སྔ་མའི་སྟེང་དུ་ཕྱི་མ་སོགས་ཏེ་བསྣན་པས་དེ་དག་རྒྱུད་མཐུན་པར་འཕེལ་ཞིང་འཐུག་པར་གྱུར་བ་ཉིད་དུ་སྣང་བ་དེ་ལྟར་ཀུན་གཞི་སྐད་ཅིག་མ་དེ་ཡི་རྒྱུན་ལ་ཕྱི་མའི་འབྲས་བུ་འབྱུང་བའི་རྒྱུའི་བག་ཆགས་སྙིང་ཟུག་ཏུ་ཡོད་པ་གང་ཡིན་པ་དེ་དག་རྣམས་ལ་ནི་ཕྱིས་ཀྱི་དགེ་སྡིག་གི་ལས་ཀྱིས་བསྒོས་པས་ཀུན་གཞི་དེ་ཡང་བག་ཆགས་དེ་དག་དང་རྒྱུད་མཐུན་པར་གྱུར་པས་འཕེལ་ཞིང་འཐུག་པའི་བག་ཆགས་ཉིད་དུ་གྱུར་པའོ།།

དགུ་པ་བག་ཆགས་བརྣན་ཏེ་བརྟས་པའི་དཔེ་བསྟན་པ་ནི།

འོ་མ་ཆུ་དང༌། ཞེས་པ་ནས། དེ་ལྟར་སྣང་བ་ཡིན། །ཞེས་པའི་བར་གྱིས་བསྟན་ཏེ།

འོ་མ་ཆུ་དང་ས་བོན་ལས། །དེ་མི་འདྲ་བར་དེ་ལྟས་ཡིན།།

དེ་ཉིད་དེ་ཡི་རྒྱུན་དེ་ལས། །དེ་ཡང་དེ་ལྟར་སྣང་བ་ཡིན།།

༼༡༢༢༽བག་ཆགས་བརྟས་པའི་དཔེ་ཇི་ལྟ་བུ་ཞེ་ན། དཔེར་ན་འོ་མ་ལས་ཞོར་གྱུར་པ་དང༌། ཆུ་ལས་ཆབ་རོམ་དང༌། ས་བོན་གཉིས་ལས་ལུས་སུ་གྱུར་པའང་འོ་མ་དང་ཆུ་དང་ས་བོན་ཡང་བརྟས་པའི་དངོས་པོ་དེ་གསུམ་ཉིད་མ་ཡིན་པས་འབྲས་བུ་དང་དངོས་སུ་མི་འདྲ་བར་གྱུར་པ་ལས་རུ་མ་དང་གྲང་རེག་དང་འབྱུང་བ་བཞིའི་རྐྱེན་གྱིས་དེ་རྣམས་བརྟས་ཏེ་ཞོ་དང་ཆབ་རོམ་དང་ལུས་སུ་གྱུར་པ་ཡིན་པ་ལྟར། བག་ཆགས་དེ་ཉིད་ཀུན་གཞི་དེ་ཡི་སྐད་ཅིག་མའི་རྒྱུན་དེ་ལ་ཡོད་པ་ལས་བརྟན་པར་མ་གྱུར་པ་དེ་ཡང་གློ་བུར་གྱི་ལས་དགེ་སྡིག་མང་དུ་སྤྱད་པས་དེ་ལྟར་འདྲིས་གོམས་སུ་བརྣན་པ་བཞིན་དུ་བག་ཆགས་དེ་ཡང་བརྟན་པར་གྱུར་ཏེ་མཐུ་ཅན་དུ་སྣང་བ་ཡིན་ནོ།།

བཅུ་པ་སྒྲིབ་པ་དག་ཅིང་འབྱངས་པའི་དཔེ་བསྟན་པ་ནི།

གནས་པ་དེ་དག ཅེས་པ་ནས། བ་དེ་དེ་ཉིད་དུའོ། །ཞེས་པའི་བར་གྱིས་བསྟན་ཏེ།

གནས་པ་དེ་དག་གང་ཡིན་པ། །དེ་ལྟར་འབྱུང་བ་དེ་ཉིད་དུའོ།།

བག་ཆགས་འབྱུང་བའི་དཔེ་ནི། དཔེར་ན་རྙོག་ཆུ་མ་བསྒུལ་ན་ཆུ་དེར་རང་བཞིན་གྱིས་དྭངས་པ་ལྟར། ཀུན་གཞི་ལ་བག་ཆགས་ངན་པ་གནས་པ་དེ་དག་གིས་དག་པའི་ངོ་བོ་བསྒྲིབས་པ་གང་ཡིན་པ་དེའང༌། རྣལ་འབྱོར་པས་ལྟ་བ་རྟོགས་ཏེ་ཏིང་ངེ་འཛིན་སྒོམས་པའི་དུས་ན་བག་ཆགས་ངན་པ་བྱང་ནས་དག་པའི་རང་བཞིན་དེར་འབྱུང་བ་དེ་ཡང་སེམས་ཀྱི་དེ་ཁོ་ན་ཉིད་དུ་ཆོས་ཉིད་ཀྱིས་འབྱངས་པ་ཁོ་ནའོ།།

བཅུ་གཅིག་པ་བག་ཆགས་སྨིན་པའི་དུས་དང་དེའི་དཔེ་བཤད་པ་ནི།

མྱུར་སྨིན་དུས་སྨིན། ཞེས་པ་ནས། ཆེ་ཆུང་འཕེལ་འགྲིབ་དེའོ། །ཞེས་པའི་བར་གྱིས་བསྟན་ཏེ།

མྱུར་སྨིན་དུས་སྨིན་དུས་གཉིས་སྨིན། །ས་བོན་ཆེ་ཆུང་འཕེལ་འགྲིབ་དེའོ།།

བག་ཆགས་སྨིན་པའི་དུས་ཉིད་ནི། ཀུན་གཞི་ལ་བག་ཆགས་སྨིན་པ་མྱུར་བུལ་ཡོད་དེ། དཔེར་ན་ཤིང་ཏོག་པ་ན་སེ་ལྟ་བུར་འབྲུ་དུས་གཅིག་ལ་སྨིན་པ་དང༌། དུས་གཉིས་ལ་སྨིན་པ་དང༌། འབྲུ་དུས་གཉིས་ཀྱི་རྗེས་སུ་སྨིན་པའི་ཁྱད་པར་ཡོད་པ་ལྟར། བག་ཆགས་ཀྱི་འབྲས་བུ་དུས་མྱུར་བར་ཚེ་འདི་ལ་སྨིན་པ་མཐོང་ཆོས་མྱོང་འགྱུར་གྱི་ལས་ཏེ་དཔེར་ན་འགོག་པའི་སྙོམས་འཇུག་ལས་ལངས་པ་ལ་ཕན་གནོད་བྱས་པ་ལྟ་བུའོ། །དུས་ཕྱི་མ་ལ་སྨིན་པ་སྐྱེས་ནས་མྱོང་འགྱུར་གྱི་ལས་ཏེ་དཔེར་ན་མཚམས་མེད་བྱས་པ་དམྱལ་བར་སྐྱེ་བ་ལྟ་བུའོ། །དུས་གཉིས་ཕན་ཆད་དུ་སྨིན་པ་ལན་གྲངས་གཞན་ལ་མྱོང་འགྱུར་གྱི་ལས་ཏེ་དཔེར་ན་ཉི་མ་འཆར་བ་ལྟ་བུའོ། །སྨིན་པར་ངེས་པ་མེད་པ་མྱོང་བར་མ་ངེས་པའི་ལས་ཏེ་དཔེར་ན་མེ་བཀབ་པ་ལྟ་བུ་དང་བཞིའོ།།

དེ་ལྟར་སྨིན་པ་དེ་ཉིད་ཅིའི་ཕྱིར་ཞེ་ན། དཔེར་ན་རྒྱུ་ས་བོན་༼༡༢༣༽སྐྱོན་མེད་པ་ཆེ་ཆུང་ངམ་མང་ཉུང་དུ་བཏབ་པ་ལས་འབྲས་བུ་ཡང་འཕེལ་འགྲིབ་བམ་མང་ཉུང་དུ་འགྱུར་བ་ལྟར་བག་ཆགས་སྔ་མའི་ས་བོན་ཆེ་ཆུང་ལ་ཕྱི་མའི་དགེ་སྡིག་གི་ལས་ཆེ་ཆུང་གི་རྐྱེན་གྱིས་འཕེལ་འགྲིབ་ཏུ་གྱུར་ཏེ་དེ་དང་མཐུན་པར་སྣང་བའོ། །ཡང་ན་ཚིག་རྐང་གཉིས་ཀྱི་གོང་མ་དཔེ་དང་འོག་མ་དོན་དུ་སྦྱར་བར་བྱའོ།།

བཅུ་པ་མུན་པ་ཞེས་ཅིའི་ཕྱིར་བགྱི་བའི་ངེས་ཚིག་བཤད་པ་ལ་གསུམ་སྟེ། ཆོས་ཉིད་སྒྲིབ་ཅིང་མ་མཐོང་བས་མུན་པར་བསྟན་པ། བག་ཆགས་སྐྱེ་འགག་དང་བཅས་པས་འབྲས་བུ་ཐ་དད་འབྱུང་བ། རང་གི་རྩལ་ལས་ཚོགས་དྲུག་གི་འབྱུང་འཇུག་རྒྱུན་མི་འཆད་པའོ། །དང་པོ་ནི།

སྤྲིན་དང་ལིང་ཏོག ཅེས་པ་ནས། དེ་ཉིད་མཐོང་མ་ཡིན། །ཞེས་པའི་བར་གྱིས་བསྟན་ཏེ།

སྤྲིན་དང་ལྷིང་ཐོག་མུན་པ་ཡིས། །རྫས་གང་མི་མཐོང་སྒྲིབ་པ་ལྟར།།

དེ་ཡི་རྒྱུན་འཁྲིགས་མུན་པ་ཡིས། །བལྟ་བྱ་དེ་ཉིད་མཐོང་མ་ཡིན།།

བག་ཆགས་ཀྱིས་ཡང་དག་པའི་དོན་མཐོང་དུ་མི་སྟེར་བར་སྒྲིབ་པའི་དཔེ་ཇི་ལྟ་བུ་ཞེ་ན། དཔེར་ན་སྤྲིན་གྱིས་ནམ་མཁའ་དང་ཉི་མ་མི་མཐོང་བར་སྒྲིབ་པ་དང་ལིང་ཏོག་གིས་གཟུགས་སྣང་གི་ཡུལ་མི་མཐོང་བར་བྱེད་པ་དང་མུན་པ་ཡིས་གསེར་ལ་སོགས་པའི་རྫས་གང་ཡིན་པ་མི་མཐོང་བར་སྒྲིབ་པ་ལྟར་དུ། ཀུན་གཞི་དེ་ཡི་རྒྱུན་ལ་བག་ཆགས་ཀྱི་ཚོགས་སྟུག་པོ་དེ་ཉིད་འཁྲིགས་ཏེ་མུན་པ་ལྟ་བུ་དེ་ཡིས་ཤེས་པའི་རྒྱུད་སྒྲིབ་པས་བལྟ་བར་བྱ་བ་རྩ་བ་ཆེན་པོ་ཀུན་གཞིའི་དེ་ཁོ་ན་ཉིད་སྙིང་པོ་བྱང་ཆུབ་ཀྱི་དོན་ཉིད་མཐོང་དུ་སྟེར་བ་མ་ཡིན་པས་ཆོས་ཉིད་མཐོང་བར་མི་འགྱུར་རོ། །ཡང་ན། སྤྲིན་དང་ལིང་ཏོག་དང་མུན་པ་གསུམ་གྱིས་མཁའ་ཉི་དང་གཟུགས་དང་གསེར་ལ་སོགས་པའི་རྫས་གང་མི་མཐོང་ཞེས་སྦྱར་ཏེ་དོན་དུ་འདྲའོ།།

གཉིས་པ་བག་ཆགས་སྐྱེ་འགག་དང་བཅས་པས་འབྲས་བུ་ཐ་དད་འབྱུང་བ་ནི།

དང་པོ་གཉིས་དང༌། ཞེས་པ་ནས། སྣ་ཚོགས་ཐ་དད་ལེན། །ཞེས་པའི་བར་གྱིས་བསྟན་ཏེ།

དང་པོ་གཉིས་དང་ཕྱི་མ་ལ། །གསལ་དང་འགགས་དང་ཐ་དད་སྣང་། །དེ་ཉིད་ཀུན་ལས་འགྲོ་བའི་ཕྱིར།།

ཚོགས་དྲུག་བར་མ་དོར་འགགས་པ་བག་ཆགས་ཀྱི་དབང་གིས་ཕྱིས་སྣང་དུ་འདོད་པའི་དཔེ་ནི། དཔེར་ན་ཏིལ་དང་མེ་ཏོག་སྣ་མ་ཡུན་རིང་དུ་ལྷན་ཅིག་བཞགས་པས་ཏིལ་མར་ལ་སྣ་མའི་དྲི་འབྱུང་བ་བཞིན་སྔ་མའི་ལས་ཀྱི་བག་ཆགས་ཀྱིས་ཚོགས་དྲུག་དང་པོ་ཚེ་འདི་དང་གཉིས་པ་ཤི་ནས་བར་མ་དོ་དང་གསུམ་པ་སྐྱེ་བ་ཕྱི་མ་རྣམས་ལ་དང་པོ་ཚེ་འདིར་གསལ་བ་དང་བར་མ་དོར་འགགས་པ་དང་ཉམས་པར་གྱུར་ཀྱང་སླར་ཕྱི་མའི་སྐྱེ་བ་ལ་སྔ་མར་ཞེན་པའི་མཐུས་ཚོགས་དྲུག་མངོན་དུ་སྣང་སྟེ་ལས་གང་བྱེད་ཀྱི་འབྲས་བུ་སྤྱོད་ཡུལ་དང་ཚེ་ཚད་ལ་སོགས་པ་ཐ་དད་དུ་སྣང་བར་འགྱུར་བའོ། །འོ་ན་ཤེས་པ་ཐ་དད་ཡིན་ནམ་ཞེ་ན། ཤེས་པའི་རྒྱུན་ཐ་དད་མིན་༼༡༢༤༽ཡང་བག་ཆགས་ཀྱིས་འབྲས་བུ་ཐ་དད་ལེན་པའི་དཔེ་སྟོན་ཏེ། དཔེར་ན་ལག་པས་ཡི་གེ་བྲིས་པའི་སྒྲ་ཐ་དད་པ་ལྟར། ཀུན་གཞི་བག་ཆགས་དང་བཅས་པ་དེ་ཉིད་ཆོས་ཀུན་གྱི་རྒྱུ་ཡིན་པས་དགེ་སྡིག་ལུང་དུ་མ་བསྟན་པའི་ཡུལ་ཀུན་ལ་ཚང་བར་འགྲོ་བའི་གཏན་ཚིགས་ཀྱི་ཕྱིར་ཀུན་གཞི་བག་ཆགས་དང་བཅས་པ་གཅིག་གིས་ལས་སྣ་ཚོགས་གསོགས་ཏེ་འབྲས་བུ་མཐོ་རིས་དང་ངན་སོང་ཐ་དད་པའི་སྐྱེ་གནས་མང་པོ་ལེན་པར་བྱེད་པའོ།།

གསུམ་པ་རང་གི་རྩལ་ལས་ཚོགས་དྲུག་གི་འབྱུང་འཇུག་རྒྱུན་མི་ཆད་པ་ནི།

དེ་ཉིད་རྩལ་ལས། ཞེས་པ་ནས། སྨིག་རྒྱུ་ཇི་བཞིན་ནོ། །ཞེས་པའི་བར་གྱིས་བསྟན་ཏེ།

གཅིག་གིས་སྣ་ཚོགས་ཐ་དད་ལེན། །དེ་ཉིད་རྩལ་ལས་འཇུག་པ་དྲུག།

སླར་འཇུག་པ་ཡང་དེ་ཉིད་ལ། །ཆུ་རྒྱུན་སྨིག་རྒྱུ་ཇི་བཞིན་ནོ།།

བག་ཆགས་རྒྱུ་བའི་དཔེ་སྤྱིར་བསྟན་པ་ནི། ཀུན་གཞི་དེ་ཉིད་ཀྱི་རྩལ་ལས་ཡུལ་ལ་འཇུག་པ་རྣམ་པར་ཤེས་པའི་ཚོགས་དྲུག་ཏུ་བྱུང་ནས་ཡུལ་བཅད་དེ་མགོ་མཉམ་དུ་ཚོགས་དྲུག་གི་ཡུལ་དང་ཤེས་པ་གཉིས་ཀའི་བག་ཆགས་ཀུན་གཞི་ལ་བསྒོས་ཏེ་སླར་འཇུག་པ་ཡང་མཚོ་རླབས་མཚོ་ལ་སྡུད་པ་ལྟར་ཀུན་གཞི་དེ་ཉིད་ལ་འདུ་ཞིང་བག་ཆགས་གསོགས་ལ་དེ་ལས་སླར་ཡང་འབྱུང་བའང་དཔེར་ན་རྒྱུན་མི་ཆད་པར་དུམ་བུ་དུམ་བུར་འབྱུང་བ་ཆར་རྒྱུན་ལྟ་བུ་དང་ཚ་སྒོ་དང་སེར་བུ་ལ་སོགས་པའི་རྐྱེན་གྱིས་ནམ་མཁའ་ལ་སྨིག་རྒྱུ་མེད་བཞིན་དུ་གཡོ་ཞིང་ཐ་མར་ཡང་ནམ་མཁར་འཇུག་པ་ཇི་ལྟ་བ་བཞིན་ནོ། །དེ་སྐད་དུ་ཡང༌། ཐེག་བསྡུས་ལས། ཆོས་ཀུན་རྣམ་པར་ཤེས་ལ་སྦྱོར། །དེ་དག་ལ་ཡང་དེ་དེ་བཞིན། །ཕན་ཚུན་འབྲས་བུའི་དངོས་པོ་དང༌། །རྒྱུ་ཡི་དངོས་པོ་དག་ཏུ་སྦྱོར། །ཞེས་ཆོས་མངོན་པའི་མདོ་ལས་གསུངས་པར་བཤད་དོ།།

བཅུ་གཅིག་པ་མུན་པ་ཉིད་ཅིའི་ཕྱིར་འཐིབས་པའི་རྒྱུ་མཚན་བཤད་པ་ལ་ལྔ་སྟེ། ཀུན་གཞི་ལ་ཡུལ་སྣང་ཡང་བྱེ་བྲག་མི་གསལ་བའི་དཔེ། ཀུན་གཞི་དང་བག་ཆགས་འདྲེས་པ་ལས་འབྲས་བུའི་ནུས་པ་སྣང་བའི་དཔེ། བག་ཆགས་རྒྱུའི་དུས་ན་མི་སྣང་བར་འབྲས་བུའི་ཚེ་ན་སྣང་བའི་དཔེ། ཀུན་གཞི་དང་བག་ཆགས་མི་འདྲ་ཡང་བསྒོ་རུ་བཏུབ་པའི་དཔེ། བག་ཆགས་ཐེར་ཟུག་མ་ཡིན་པས་གནས་སྐབས་འགྱུར་བར་བསྟན་པའོ། །དང་པོ་ནི།

མིག་ནད་དབང་གིས། ཞེས་པ་ནས། མ་ཡིན་ངོ་བོ་ཙམ། །ཞེས་པའི་བར་གྱིས་བསྟན་ཏེ།

མིག་ནད་དབང་གིས་ཡུལ་དག་ལ། །ཐ་དད་མ་ཡིན་ངོ་བོ་ཙམ།།

བག་ཆགས་མི་གསལ་བར་གྱུར་བའི་དཔེ་ནི། དཔེར་ན་རབ་རིབ་ཅན་དང་མིག་ནད་ཡོད་པའི་དབང་གིས་གཟུགས་སྣང་གི་ཡུལ་དག་མཐོང་ཡང་མི་གསལ་བ་ལྟར་དུ། ཀུན་གཞིའི་བག་ཆགས་ཀྱི་རྒྱུ་བའང་ཤིན་ཏུ་ཆ་ཕྲ་བ་ལ་ཡུལ་༼༡༢༥༽ཡོར་པོར་སྣང་ཡང་ཚོགས་དྲུག་གིས་བསྒྲིབས་པས་བྱེ་བྲག་ཐ་དད་དུ་གསལ་བ་མ་ཡིན་པར་སྤྱིར་རགས་པའི་ངོ་བོ་ཙམ་མཐོང་བ་ཡིན་པས་རིས་སུ་བཅད་དེ་བརྟགས་པར་དཀའ་བའོ།།

གཉིས་པ་ཀུན་གཞི་དང་བག་ཆགས་འདྲེས་པ་ལས་འབྲས་བུའི་ནུས་པ་སྣང་བའི་དཔེ་ནི།

གང་དང་འདིར་གཅིག ཅེས་པ་ནས། ལས་བྱུང་དེ་རྣམས་འབྱེད། །ཅེས་པའི་བར་གྱིས་བསྟན་ཏེ།

གང་དང་འདིར་གཅིག་འདྲེས་པ་ལས། །སྒྱུ་རྩལ་དེ་འབྱེད་དེ་དག་ལེན། །དེ་ཉིད་ལས་བྱུང་དེ་རྣམས་འབྱེད།།

ཀུན་གཞི་རྒྱུའི་དུས་ཀྱི་བག་ཆགས་ངན་པ་སྤངས་ནས་འབྲས་བུའི་བག་ཆགས་བཟང་པོ་ལེན་པའི་དཔེ་ཇི་ལྟ་བུ་ཞེ་ན། ཀུན་གཞི་གང་དང་དགེ་སྡིག་གི་བག་ཆགས་འདི་གཉིས་ཚེ་འདིར་བསགས་པ་མཐུ་བརྟས་པ་དེས་གཅིག་པ་ལྟ་བུར་གྱུར་ཏེ་ཆུ་དང་འོ་མ་འདྲེས་པ་ལྟར་སྣང་བ་དག་ལས་ཀུན་ནས་ཉོན་མོངས་པའི་བག་ཆགས་སྤོང་ལ་རྣམ་པར་བྱང་བའི་བག་ཆགས་དང་དུ་ལེན་པ་ནི་དཔེར་ན་ངང་པའི་རྒྱལ་པོ་རབ་དགའི་མཆུ་ལ་སྐྱུར་རྩི་ཡོད་པའི་སྒྱུར་རྩལ་གྱི་ནུས་པས་ཆུ་དང་འོ་མ་འདྲེས་པ་དེ་གཉིས་འབྱེད་ནས་ཆུ་བཞག་ནས་འོ་མ་དེ་དག་ལེན་པ་ལྟར། ཀུན་གཞི་དེ་ཉིད་ལ་བག་ཆགས་གཉིས་གནས་པས་གནས་མཐོ་དམན་ཉིད་དུ་སྣང་བར་བྱེད་པའང་ཀུན་གཞི་གནས་གྱུར་པའི་རིག་པ་ལས་བྱུང་བའི་རྩལ་གྱིས་དགེ་སྡིག་གི་བག་ཆགས་དེ་རྣམས་འབྱེད་ཅིང་སྤོང་ལེན་བྱེད་པ་སྟེ། རྒྱན་སྟུག་པོ་བཀོད་པ་ལས། ཉི་མ་ཟླ་བའི་ནོར་བུ་དག །ཡོངས་སུ་དག་པའི་མཚན་ཉིད་ཅན། །ཉི་ཟླའི་ཟེར་གྱིས་ཕོག་པ་དང༌། དེ་དག་རང་གི་ཡོན་ཏན་འབྱིན། །དེ་བཞིན་ཀུན་གཞི་རྣམ་ཤེས་པ། །དེ་བཞིན་གཤེགས་པའི་དགེ་སྙིང་པོ། །ཟག་མེད་ལེགས་དང་ལྡན་གྱུར་ཏེ། །གཞན་དུ་གྱུར་ན་རབ་ཏུ་འབྱིན། །ཞེས་དང༌། གང་ཚེ་ཀུན་གཞི་འདི་འདྲ་བར། །རྣམ་པ་སྣ་ཚོགས་ཀུན་མཐོང་སྟེ། །འགྲོ་བ་རང་སེམས་མཐོང་བ་དང༌། །དེ་ཚེ་སེམས་ནི་ཕྱིར་ལོག་གོ །ཆོས་རྣམ་ཐམས་ཅད་ཀུན་གྱི་གཞི། །བག་ཆགས་སྙེམས་ལ་སོགས་པ་དང༌། །རྟོག་པས་རྙོག་པ་ཅན་དུ་བྱས། །གཞན་དུ་གྱུར་ནས་ཟག་པ་མེད། །ཅེས་སོགས་མང་ངོ༌།།

གསུམ་པ་བག་ཆགས་རྒྱུའི་དུས་ན་མི་སྣང་བར་འབྲས་བུའི་ཚེ་ན་སྣང་བའི་དཔེ་ནི།

གང་འདིར་སྦྱོར་ཞིང༌། ཞེས་པ་ནས། དེ་དག་འབྱུང་བའོ། །ཞེས་པའི་བར་གྱིས་བསྟན་ཏེ།

གང་འདིར་སྦྱོར་ཞིང་མི་སྣང་ཡང་། །གང་གི་དབང་གིས་ཐ་དད་སྣང་།།

དེ་ལས་དེ་བྱུང་དེ་ཉིད་ལས། །དེ་བཞིན་དེ་དག་འབྱུང་བའོ།།

ཀུན་གཞིའི་བག་ཆགས་རྒྱུའི་དུས་ན་མི་མངོན་པ་ལས། འབྲས་བུའི་དུས་ན་མངོན་པའི་དཔེ་གང་ཞེ་ན། དཔེར་ན་དར་གྱི་བྱེ་བྲག་ཧཱ་རིས་ཅན་གྱི་ཚིག་གུའི་དངོས་པོ་གང་དེ་ཉིད་རྒྱུའི་དུས་འདིར་ནི་ཧཱ་རིས་ཀྱི་ཚོན་ལ་སྦྱོར་ཞིང་ཧཱ་དངོས་སུ་གསལ་བར་མི་༼༡༢༦༽སྣང་ཡང༌། ཚོན་དང་རྐྱེན་མཚུར་གྱི་རྩི་གང་གི་དབང་གིས་ཚི་གུའི་རྣམ་པའི་རི་མོ་དང་ཕྲད་དེ་ཡང་ནས་ཡང་དུ་ཞེན་པའི་སྟོབས་ཀྱིས། ཧཱའི་ཚི་གུའི་རི་མོ་དང་བཅས་པ་འབྲས་བུའི་དུས་སུ་ཐ་དད་དུ་སྣང་ཞིང་ཤིན་ཏུ་གསལ་བར་མངོན་པ་ལྟར། ཀུན་གཞི་དེ་ཉིད་ལ་རྣམ་པར་སྨིན་པའི་བག་ཆགས་དགེ་མི་དགེ་མི་གཡོ་བའི་ལས་གསུམ་གྱི་སྒོ་ནས་ཇི་སྙེད་དུ་བསགས་པའང་རྒྱུའི་དུས་ན་མངོན་པར་གསལ་བ་མེད་ཀྱང་ལས་གསུམ་གང་ཡང་སྟོབས་ཅན་དུ་གྱུར་ཏེ་རྐྱེན་གྱི་སད་པར་བྱས་པ་ན་འབྲས་བུའི་ཁྱད་པར་དེ་ལྟར་བྱུང་ནས་སྔ་མའི་བག་ཆགས་དེ་ཉིད་ལས་རྣམ་སྨིན་མངོན་པར་སྣང་བ་ཡང༌། དཔེ་ཇི་ལྟ་བ་དེ་བཞིན་དུ་རྒྱུ་དུས་ན་མི་གསལ་ཡང་འབྲས་དུས་ན་མཐོ་རིས་དང་ངན་སོང་དེ་དག་ཐ་དད་དུ་འབྱུང་བར་སྣང་བ་ལ་དཔགས་ན་རྒྱུའི་ངོ་བོའང་ངོ་ཤེས་པར་འགྱུར་བའོ།།

བཞི་པ་ཀུན་གཞི་དང་བག་ཆགས་མིའདྲ་ཡང་བསྒོ་རུ་བཏུབ་པའི་དཔེ་ནི།

དྲི་ངའི་དྲི་འབྱུང༌། ཞེས་པ་ནས། གཞན་ལ་དེ་རྒྱུན་གཞན། །ཞེས་པའི་བར་གྱིས་བསྟན་ཏེ།

དྲི་ངའི་དྲི་འབྱུང་གང་གི་དྲི། །གང་མེད་གང་ལ་ཞེན་པ་ནི།།

མི་འདྲ་མི་གཅིག་དེ་ཉིད་ལ། །དེ་ཉིད་གཞན་ལ་དེ་རྒྱུན་གཞན།།

ཀུན་གཞི་ལ་བག་ཆགས་མེད་ཀྱང་བག་ཆགས་བསྒོ་རུ་བཏུབ་པའི་དཔེ་ནི། འོ་ན་ཀུན་གཞི་ལ་བག་ཆགས་བསྒོར་མི་བཏུབ་སྟེ། དེ་གཉིས་རང་ལྡོག་གི་མཚན་ཉིད་ཐ་དད་པའི་ཕྱིར་ཞེ་ན། ཐ་དད་ཡིན་ཀྱང་བསྒོར་བཏུབ་སྟེ། དཔེར་ན་སྒོག་པའི་དྲི་ངའི་ཞེས་དྲི་ང་བའི་དྲི་དེ་གཞན་ལ་བྱུང་བ་ཡང་སྒོག་པ་གང་གི་དྲི་ང་བ་དེ་ཉིད་ཕོར་བུ་གང་ལ་སྔོན་ཆད་མེད་ཀྱང༌། སྒོག་པ་ཡུན་རིང་དུ་བརྡུངས་ན་སྒོག་པའི་དྲི་ཕོར་བུ་གང་ལ་ཞེན་ནས་མཇུག་ཏུ་སྒོག་པ་མེད་ཀྱང་ཕོར་བུ་ལ་བྲོ་ཞིང་མནམ་པ་དེ་ནི། སྒོག་པ་དང་ཕོར་པ་གཉིས་ངོ་བོ་མི་འདྲ་བས་མི་མཐུན་པར་ཐ་དད་ཡིན་ལ་རྒྱུ་ཡང་མི་གཅིག་པར་སོ་སོར་གྱུར་ཏེ་ཐ་དད་ཡིན་ཀྱང་ཡུན་རིང་ན་དེ་ཉིད་ལ་བསྒོར་བཏུབ་པས་ཕོར་པ་ལ་སྒོག་དྲི་འགོས་པ་ལྟར་ཀུན་གཞི་ལུང་མ་བསྟན་དེ་ཉིད་ཀྱང་གཞན་ལ་དགེ་སྡིག་གི་བག་ཆགས་ལུང་དུ་བསྟན་པ་དེ་དག་གི་རྒྱུན་ཡང་གཞན་དུ་གྱུར་མོད་ཀྱི། དེ་ལྟར་ན་ཡང་མ་རིག་པའི་དབང་གིས་ཚོགས་དྲུག་གི་ལས་མང་པོ་སྤྱད་པས་བག་ཆགས་བསྒོར་བཏུབ་སྟེ་ཀུན་གཞི་ཡང་བག་ཆགས་དང་མཐུན་པར་སྣང་བའོ།།

ལྔ་པ་བག་ཆགས་ཐེར་ཟུག་མ་ཡིན་པས་གནས་སྐབས་འགྱུར་བར་བསྟན་པ་ནི།

གང་གི་ངོ་བོ། ཞེས་པ་ནས། གནས་དང་སྐབས་ཀྱིས་འགྱུར། །ཞེས་པའི་བར་གྱིས་བསྟན་ཏེ།

གང་གི་ངོ་བོ་དེ་གཅིག་ལ། །དེ་ཡང་གནས་དང་སྐབས་ཀྱིས་འགྱུར།།

ཀུན་གཞི་རྒྱུ་འབྲས་གཉིས་ཀ་ཡིན་པའི་དཔེ་ནི་གང་ཞེ་ན། དཔེར་ན་ཤིང་ཏོག་པ་ན་སེ་སྨིན་པ་ལྟ་༼༡༢༧༽བུ་གང་གི་ངོ་བོར་གཅིག་པ་ལ་དེ་ཡང་གནས་དང་སྐབས་ཀྱི་ཆོས་སྔ་མའི་འབྲས་བུ་ཕྱི་མའི་རྒྱུར་འགྱུར་བ་ལྟར་དུ་ཀུན་གཞི་བག་ཆགས་དང་བཅས་པའི་ངོ་བོ་ཡང་སྐད་ཅིག་མ་དེ་ཡི་རྒྱུན་དུ་གཅིག་པ་ལ་སྔ་མ་དེ་ཡི་འབྲས་བུ་ཡང་ཕྱི་མ་དག་གི་རྒྱུར་འགྱུར་བས་དགེ་བ་དང་མི་དགེ་བའི་ལས་དང་མཐུན་པར་མཐོ་རིས་དང་ངན་སོང་ལ་སོགས་པར་གནས་དང་སྐབས་ཀྱིས་རྐྱེན་གྱི་དབང་ལྟར་འགྱུར་ཏེ་སྣ་ཚོགས་སུ་སྣང་བའོ། །མུན་པ་གང་དུ་འཐིབས་ཀྱི་ལན་འདིར་མ་ཟིན་ཀྱང་གོང་དུ་སོང་ངོ༌།།

བཅུ་གཉིས་པ་མུན་པ་གང་གིས་སེལ་བ་ཡེ་ཤེས་རང་སྣང་དུ་ནི།

གང་ལ་བག་ཆགས། ཞེས་པ་ནས། སྤྱོད་ཡུལ་པ་དག་འཛིན། །ཞེས་པའི་བར་གྱིས་བསྟན་ཏེ།

གང་ལ་བག་ཆགས་རྣམ་དག་པ། །དང་བས་ཐམས་ཅད་གསལ་བ་བཞིན།།

གང་གི་རྒྱུན་སངས་ཀུན་ཁྱབ་རྒྱས། །དབུ་མ་རྣམ་དག་དེ་ཉིད་ཅེས། །མུན་པའི་སྤྱོད་ཡུལ་པ་དག་འཛིན།།

བག་ཆགས་བྱང་བའི་དཔེ་ནི། རྣལ་འབྱོར་པ་གང་སུ་ཞིག་གི་རིག་པ་ལ་བག་ཆགས་ཀྱི་སྒྲིབ་པ་གཏན་ནས་སྦྱངས་ཏེ་ཤིན་ཏུ་རྣམ་པར་དག་པའི་ཡེ་ཤེས་ཤར་བ་ན། དཔེར་ན་ནམ་མཁའ་དང་བ་ལ་ཉི་མ་ཤར་བས་མཐོང་སྣང་ཐམས་ཅད་གསལ་བ་བཞིན་དུ། ཀུན་གཞི་བག་ཆགས་དང་བཅས་པའི་སྒྲིབ་པ་དག་པས་ཆོས་ཐམས་ཅད་སེམས་ཀྱི་ཆོས་ཉིད་དེ་ཁོ་ན་ཉིད་རང་རིག་པའི་ཡེ་ཤེས་སུ་གསལ་་བར་གྱུར་ནས་རྣལ་འབྱོར་པ་གང་ཞིག་གི་རྒྱུད་ལ་བག་ཆགས་ཀྱི་རྒྱུན་ཡོད་པའི་ས་བོན་སྣང་གཞི་དང་བཅས་པ་སངས་ཏེ་ཡང་དག་པར་སྦྱངས་པས་ཚོགས་གཉིས་དབྱེར་མེད་དུ་རྫོགས་ཤིང་ཡེ་ཤེས་ཀུན་ཁྱབ་ཏུ་རྒྱས་པར་གྲུབ་པ་ནི། མཐའ་དང་བྲལ་བས་དབུ་མ་ཆོས་ཀྱི་སྐུ་རྣམ་པར་དག་པ་དེ་ཉིད་ཡིན་ནོ་ཞེས་ཞེ་བས་འདོད་པ་ནི་གསང་སྔགས་ལ་ལྟོས་ཏེ་མུན་པའི་སྤྱོད་ཡུལ་དུ་གྱུར་པ་སེམས་ཙམ་པ་ལ་སོགས་པ་དག་བག་ཆགས་ངན་པ་བྱང་ནས་བཟང་པོ་ཐོབ་པར་འཛིན་པ་ལྟར་ཡིན་པས་རྒྱུའི་ཐེག་པ་མདོ་སྡེ་པའི་ལུགས་ཡིན་ནོ། །དེས་ན་འདིར་ནི་རང་བྱུང་བདེ་བ་འཁོར་ལོའི་རྒྱུད་ལས། ཀུན་གཞིའི་དོན་ནི་འདུས་བྱས་ལ། །དེ་ལ་གཉེན་པོ་མེད་མི་སྲིད། །ལྷག་མཐོང་རང་བྱུང་ཡེ་ཤེས་ཀྱིས། །ཀུན་གཞི་གཏན་ནས་འཇོམས་པར་བྱེད། །ཅེས་དང༌། ཀུན་གཞི་རྣམ་པར་ཤེས་པ་ནི། །ཇི་ལྟར་གནས་པའི་དོན་རྟོགས་པས། །ཡོད་མེད་གང་ཡང་མི་ལྟུང་ཞིང༌། །རྟག་ཆད་གཉིས་དང་བྲལ་བས་ན། །མྱ་ངན་འདས་པའི་འབྲས་བུ་ཡང༌། །དེ་ཡི་ངང་གི་ཐོབ་པར་འགྱུར། །ཞེས་དང༌། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། མ་རིག་རྐྱེན་བཞིས་བསྐྱེད་པ་ཡི། །༼༡༢༨༽ཉོན་མོངས་བག་ཆགས་བསགས་པས་གོལ། །སྔ་ཕྱི་མེད་ཤེས་གདམས་ངག་གིས། །མཚན་ཉིད་བཞི་ལྡན་ཉམས་སུ་མྱོང༌། །གཞི་ལ་སྔ་ཕྱི་དོན་ལ་མེད། །དེ་ཕྱིར་འབྲས་བུ་ཆོས་ཀྱི་སྐུ། །ཞེས་དང༌། རིན་པོ་ཆེ་རྒྱན་ལས། རྒྱུ་ལས་རྐྱེན་གྱི་བསྒྱུར་མིན་ལ། །མཐར་ཕྱིན་སྐྱེད་དུ་བྱར་མེད་པས། །སྨིན་པའི་འབྲས་བུ་བརྡར་བཏགས་པ། །མཐུན་པའི་མིང་དུ་ངེས་པ་ཡིན། །ཞེས་པ་ལ་སོགས་པ་ལྟར་རོ། །དེ་ཕྱིར་ངོ་བོ་བྱང་ཆུབ་ཀྱི་སེམས་སུ་འདུས་པས་རྣམ་བྱང་གི་རྩ་བར་བསྟན་པའང་ཡིན་ནོ།།

གསུམ་པ་ཞབས་བསྡུ་བ་ནི།

རྐང་པ་གཅིག་གི་འོག་ནས། མུན་པའི་རང་བཞིན། ཞེས་པ་ནས། ཆོས་རྣམས་གསུངས་པའོ། །ཞེས་པའི་བར་གྱིས་བསྟན་ཏེ།

མུན་པའི་རང་བཞིན་ངོ་བོ་དང་། །མཚན་ཉིད་ཡན་ལག་རྩ་བ་དང་། །གནས་དང་སྒྲིབ་པ་བྱེ་བྲག་ཆོས། །གང་དུ་གང་གིས་གང་ཕྱིར་གང་། །དེ་དག་ངེས་པར་དབྱེ་བར་བྱའོ། །ལངྐའི་བདག་པོ་དེ་དག་ནི་གཞིའི་མདོ་ཞེས་བྱ་སྟེ། གང་མུན་པའི་སྤྱོད་ཡུལ་བ། ལས་ཀྱི་རྣམ་པ་ལས་དགོངས་ཏེ། མུན་པའི་ཆོས་རྣམས་སུ་གསུངས་པའོ།།

མུན་པར་དྲིས་པའི་ལན་རྣམས་བྱེ་བྲག་གི་ཁྱད་པར་གྱི་ལན་ཀུན་གཞིའི་སྐབས་སུ་མཇུག་བསྡུས་ཏེ་གསལ་བར་བསྟན་པའི་ཕྱིར། དེ་ལ་མུན་པའི་སྣང་བ་འདི་ཉིད་ཅི་ལས་བྱུང་ན་གཞན་ལས་མ་བྱུང་བར་མ་རིག་པའི་དབང་གིས་རང་སྣང་འཁྲུལ་ཏེ་ཡུལ་ཆེད་དུ་བྱེད་པ་ལས་བྱུང་བའོ། །རང་བཞིན་ནི་ཀུན་གཞིའི་རང་བཞིན་དུ་བསྟན་པའོ། །ངོ་བོ་ནི་ཚོར་བ་བཏང་སྙོམས་དང་ལྡན་པས་མི་གསལ་བའོ། །མཚན་ཉིད་ནི་སྐད་ཅིག་མའི་རྒྱུན་དུ་བསྟན་པའོ། །ཡན་ལག་ནི་འཁོར་ལྔ་བདུན་དང་ལྡན་པའོ། །རྩ་བ་ནི་རང་བཞིན་དོན་དུ་ཡོད་པར་སྒྲུབ་པ་སྟེ་མ་རྟོགས་པ་དང་བརྟགས་པའི་དབང་གིས་འཁོར་བའི་ཡན་ལག་ཏུ་སྣང་བའོ། །གནས་པའི་ཡུན་ནི་དཔེ་རྣམས་ཀྱིས་མཚོན་ཏེ་འཁྲུལ་སྣང་དང་བག་ཆགས་ཀྱི་གཞིར་བཞག་པའོ། །གང་ལ་སྒྲིབ་པ་ནི་སྤྲིན་དང་ལིང་ཏོག་ལྟར་དོན་མཐོང་བ་ལ་སྒྲིབ་པར་བསྟན་པ་སྟེ་ཀུན་གཞིའི་བྱེད་ལས་སོ། །བྱེ་བྲག་ནི་མིང་གི་རྣམ་གྲངས་དང་ཁྱད་པར་གཉིས་བསྟན་པའོ། །ཆོས་ནི་ཀུན་གཞིའི་ཆོས་དེ་གང་དང་མཐུན་པར་བསྟན་པའོ། །གང་དུ་འཐིབས་པའམ་སྒྲིབ་ན་མུན་པའི་ཁམས་སུ་འཐིབས་པས་ས་ལྔའི་སྐབས་སྐབས་སུ་ཕྲ་རགས་ཀྱིས་མཐོང་དུ་མི་སྟེར་བའོ། །གཉེན་པོ་གང་གིས་སེལ་ན་ས་ལྔ་པོའི་སྐབས་ཀྱི་ཡེ་ཤེས་ཀྱིས་སྤང་ངོ༌། །སྒྲུབ་བྱེད་དང་ངེས་ཚིག་གང་གི་ཕྱིར་ན། དོན་མཐོང་དུ་མི་སྟེར་བའི་ཕྱིར་ཏེ་དམིགས་པའི་ཡུལ་དང་གནས་འགྱུར་གྱི་སྐབས་ལས་ཤེས་པར་བྱའོ། །གཏན་ཚིགས་ཅིའི་ཕྱིར་འཐིབས་ན་ཀུན་ནས་མུན་ཁམས་སུ་གྱུར་པས་དོན་མི་གསལ་བར་བག་ཆགས་མཐུ་ཅན་དུ་སྣང་༼༡༢༩༽བའོ། །རྩ་བ་གང་དུ་འདུས་ན། གཞི་རྩ་མེད་པའི་ཆོས་ཉིད་ཡེ་ནས་དག་པར་འདུས་སོ། །དེ་ལྟར་བཤད་པ་དེ་དག་ངེས་པར་རྣམ་པར་དབྱེ་སྟེ་རྣམ་གྲངས་ལྔ་གསུམ་གྱི་དབྱེ་བར་ཤེས་པར་བྱའོ། །དེ་དག་གི་གནས་སྣང་གི་དོན་ལ་མཁས་པར་གྱུར་ན་མུན་པའི་སྤྱི་དང་བྱེ་བྲག་གི་གནད་རྣམས་ཕྱིན་ཅི་མ་ལོག་པར་ངེས་ཏེ་ཟབ་གསང་སྙིང་པོའི་དོན་ལ་བློ་མིག་གསལ་བར་འགྱུར་རོ། །ལང་ཀའི་བདག་པོ་ཞེས་སྡུད་པ་པོ་ལ་བོས་ནས། ཇི་སྐད་བསྟན་པ་དེ་དག་ནི་གཞིའི་མདོ་ཞེས་བྱ་བ་སྟེ། ཐ་མལ་གྱི་སྐྱེ་བོའམ་རྒྱུའི་ཐེག་པ་བ་ལྟ་བུ་གང་ཟག་གང་གི་དངོས་པོ་བློ་ཆུང་བས་མུན་པའི་སྤྱོད་ཡུལ་དུ་གྱུར་པ་རང་གི་ལས་ཀྱིས་བསྒྱངས་ཏེ་གདུང་བ་རྣམས་འདུས་པ་ལ་དགོངས་ཏེ་མུན་པའི་ཁམས་སུ་སྣང་བའི་ཀུན་གཞིའི་ཆོས་རྣམས་འདིར་ཡང་གསུངས་ཏེ་རྒྱས་པར་བཀའ་སྩལ་པའོ།།

གཉིས་པ་དམིགས་པའི་མདོ་ཉོན་མོངས་པ་ཅན་གྱི་ཡིད་བཤད་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་དམིགས་པའི་མདོ་གང་ཞེ་ན། འདི་ལྟ་སྟེ།

མུན་པའི་ལན་མདོ་གཉིས་པའི་མཚན་ཉིད་ཇི་ལྟ་བུ་སྙམ་པ་ལ། ལང་ཀའི་བདག་པོ། ཞེས་བོས་ནས། དེ་ལ་དམིགས་པའི་མདོ་འཁོར་བའི་གཟུང་འཛིན་གྱི་རྟོག་པ་ཉོན་མོངས་པ་ཅན་གྱི་ཡིད་ཉེ་བར་བསྟན་པ་གང་ཞེ་ན། འདི་ལྟ་སྟེ།

གཉིས་པ་རྒྱས་པར་བཤད་པ་ལ་བདུན་ཏེ། ཉོན་མོངས་པ་ཅན་གྱི་ཡིད་ཀྱི་གནས་གང་ཡིན་དང་མཚན་ཉིད་བཤད་པ། དེ་ཡི་དམིགས་པའི་ཡུལ་གྱི་ངོས་འཛིན་དང་རྣམ་པ་བསྟན་པ། ཉོན་ཡིད་ཀྱི་འཛིན་སྟངས་ལ་བརྟེན་པའི་ངེས་ཚིག་བཤད་པ། དེ་ཉིད་འཁོར་གང་དང་མཚུངས་པར་ལྡན་ཚུལ་བསྟན་པ། དེ་ཉིད་ཚོར་བ་གང་དང་ལྷན་ཅིག་ལྡན་ཚུལ་བཤད་པ། དེ་ཡི་ངོ་བོ་སྒྲིབ་ལ་ལུང་མ་བསྟན་དུ་ངེས་ཚུལ་བསྟན་པ། ཉོན་ཡིད་སྒྲུབ་བྱེད་ཀྱི་རིགས་པའི་རྣམ་གྲངས་བཤད་པའོ། །དང་པོ་ནི།

གཟུགས་ཁམས་དེ་འཛིན་གནས་གཅིག་ཉིད། །ཅེས་པས་བསྟན་ཏེ།

གཟུགས་ཁམས་དེ་འཛིན་གནས་གཅིག་ཉིད།།

ཉོན་མོངས་པ་ཅན་གྱི་ཡིད་ནི་ཁམས་གསུམ་ལས་འཛིན་པ་རགས་པས་གཟུགས་ཁམས་དང་ཆོས་མཐུན་པའི་སྒོ་ནས་བཞག་ཅིང་ཀུན་གཞི་དེ་ཉིད་ལ་བདག་ཏུ་འཛིན་པས་གནས་ཀུན་གཞི་གཅིག་པུ་ལ་བརྟེན་ཏེ། བྱེད་ལས་ཀྱིས་ཡིད་ཤེས་ཀྱིས་བདག་རྐྱེན་བྱེད་དེ། ཚོགས་དྲུག་༼༡༣༠༽ཟག་བཅས་ཀྱི་མཚན་མ་ལ་འཆིང་བ་དང༌། དེ་དག་གིས་ཀུན་གཞི་ལ་ས་བོན་འདེབས་པར་བྱེད་པ་ཉིད་དེ། རྒྱན་སྟུག་པོ་བཀོད་པ་ལས། ཇི་ལྟར་ས་ལ་ཀུན་བརྟེན་ཅིང༌། །ས་སྐྱེ་ཀུན་ཀྱང་འབྱུང་བ་བཞིན། །སེམས་ཅན་ཀུན་གྱི་གནས་ཡིན་ཏེ། །འབྱུང་ཁུངས་ཀུན་གྱི་ཁྱད་པར་དུ། །དེ་བཞིན་ཀུན་གཞི་རྣམ་ཤེས་ཀྱང༌། །རྣམ་ཤེས་རྣམས་ཀྱི་གནས་ཡིན་ཏེ། །སེམས་དང་སེམས་ལས་བྱུང་བར་ལྡན། །དབའ་རླབས་བཞིན་དུ་རབ་ཏུ་འབྱུང༌། །ཞེས་དང༌། ཡིད་ནི་བདག་ལ་བདག་ཅེས་ཏེ། །ངར་སེམས་རབ་ཏུ་འཇུག་པ་ཡིན། །རྣམ་ཤེས་ཁ་དོག་ཁྱད་པར་དང༌། །ཀུན་ཏུ་གཅོད་པར་རབ་ཏུ་བྱེད། །ཞེས་དང༌། ལང་ཀར་གཤེགས་པ་ལས། ཀུན་གཞི་ཡིད་ཀྱི་བདག་ཡིན་ཏེ། །ཤེས་པ་ཉིད་ནི་བདག་གི་ཡིན། །གཉིས་སུ་འཛིན་པས་རབ་ཏུ་འཇུག །ཡོངས་སུ་རྟོགས་ན་ལྡོག་པར་འགྱུར། །ཞེས་དང༌། བདག་གི་ས་བོན་གཟུང་འབྲེལ་ལས། །བདག་ཏུ་འཛིན་པ་རབ་ཏུ་འབྱུང༌། །སེམས་ནི་བརྟགས་བྱར་འཇུག་པ་ཡིས། །ཆོས་སུ་འཛིན་པ་སྤོང་བར་གྱུར། །ཞེས་དང༌། སེམས་ནི་རང་བཞིན་དྭང་བ་སྟེ། །རྙོག་པར་བྱེད་པ་ཡིད་ཡིན་ནོ། །རྣམ་པར་ཤེས་དང་བཅས་པའི་ཡིད། །རྟག་ཏུ་བག་ཆགས་འདེབས་པར་བྱེད། །ཞེས་སོགས་གསུངས་པ་ལྟར་རོ། །དེའང་ཀུན་གཞི་ཉོན་ཡིད་ཀྱི་གནས་སུ་བཞག་པ་ནི། ཇི་ལྟར་མིག་གི་རྣམ་ཤེས་ལ་སོགས་པ་རྣམས་ཀྱི་གནས་མིག་ལ་སོགས་པ་ཡིན་པ་ལྟར་ཀུན་གཞི་རྣམ་པར་ཤེས་པ་ནི་དེའི་བག་ཆགས་ཀྱི་གནས་ཡིན་ཏེ། དེ་བས་ན་དེ་ལ་གནས་བཅས་ནས་འབྱུང་ཏེ་རྒྱུན་གྱིས་སྐྱེའོ་ཞེས་བྱ་བའི་ཐ་ཚིག་གོ།

གཉིས་པ་དེ་ཡི་དམིགས་པ་ཡུལ་གྱི་ངོས་འཛིན་དང་རྣམ་པ་བསྟན་པ་ནི།

དེ་འཛིན་དེ་ཉིད་དེ་ལ་ལྟ། །ཞེས་པས་བསྟན་ཏེ།

དེ་འཛིན་དེ་ཉིད་དེ་ལ་ལྟ།།

ཉོན་ཡིད་ཀྱི་ཡུལ་ཡང་ཐུན་མོང་མ་ཡིན་པའི་འཁོར་དང་བཅས་ཏེ་ཀུན་གཞི་དེ་ལ་དམིགས་ཏེ་བདག་ཏུ་འཛིན་ཅིང་གནས་སྐབས་གསུམ་མ་གཏོགས་པར་དེ་ཉིད་ལ་ངར་རློམ་སེམས་སུ་བྱེད་དེ་རྒྱུན་ལྡན་དུ་འབྱུང་བ་སྟེ། ལང་ཀར་གཤེགས་པ་ལས།

གང་ཞིག་རྟོག་པས་བརྟག་བྱ་བ། །དེ་ནི་བརྟགས་པའི་མཚན་ཉིད་དེ། །བརྟགས་པ་ལ་ནི་རྟེན་བཅས་ཏེ། །རྣམ་པར་རྟོག་པ་རབ་ཏུ་འཇུག །ཕན་ཚུན་མ་ཕྱེས་འབྲེལ་བ་ཡིས། །བག་ཆགས་གཅིག་གི་རྒྱུ་ལས་བྱུང༌། །ཞེས་དང༌། རྒྱན་སྟུག་པོ་བཀོད་པར། ངར་སེམས་བདག་ཉིད་ཡིད་ཡིན་ནོ། །ཞེས་སོ། །༼༡༣༡༽འོ་ན་བདག་ཏུ་ལྟ་བ་དང་མཚུངས་པར་ལྡན་པ་དེ་ཉིད་འཇིག་ཚོགས་ལ་ལྟ་བའང་ཡིན་ནམ་སྙམ་ན། གཞི་དང་སྣང་ཚུལ་གྱི་ཆ་ནས་ངེས་ཚིག་དང་འབྲེལ་བའི་ཐ་སྙད་ཀྱི་དབང་དུ་ཉོན་མོངས་པ་ཅན་གྱི་ཡིད་དང་ཡིད་ཤེས་ཐུན་མོང་དུ་འཇུག་པ་ན་ཡིད་ཀྱི་རྣམ་པར་ཤེས་པ་ནི་འཁོར་འཇིག་ཚོགས་ལ་ལྟ་བ་དང་མཚུངས་པར་ལྡན་ཏེ། དེའང་འཇིག་ཚོགས་ནི་ཕུང་པོ་ཡིན་ཞིང༌། དེ་ལ་བདག་དང་བདག་གིར་ལྟ་བ་དང་ལྡན་ལ། ཕུང་པོའི་གཞི་ནི་ཀུན་གཞི་ཡིན་པས་ཀུན་གཞི་ལ་བདག་ཏུ་ལྟ་བའི་ཚེ་ཉོན་ཡིད་ཀྱིས་ཀྱང་ཀུན་གཞི་ལ་བདག་ཏུ་ལྟ་བས་འཇིག་ཚོགས་ལྟ་བ་དང་མཚུངས་པར་ལྡན་པ་སྟེ། ལང་ཀར་གཤེགས་པ་ལས། བདག་ནི་བརྟགས་པའི་བདེན་པ་སྟེ། །རྫས་སུ་ཡོད་པ་མ་ཡིན་ནོ། །ཕུང་པོ་ཕུང་པོ་ཉིད་དེ་བཞིན། །བརྟགས་པས་ཡིན་གྱིས་རྫས་སུ་མེད། །ཞེས་དང༌། སེམས་དང་ཡིད་དང་རྣམ་ཤེས་དྲུག །དེ་དག་བདག་དང་ལྡན་པ་སྟེ། །གཅིག་དང་ཐ་དད་བྲལ་བ་ཡི། །ཀུན་གཞི་དེ་ནི་རབ་ཏུ་འཇུག །ཅེས་སོ། །དེ་ལ་དམིགས་པ་ཞེས་བྱ་བ་ནི་དཔེར་ན་མིག་གི་རྣམ་ཤེས་ལ་སོགས་པས་དམིགས་པ་གཟུགས་ལ་སོགས་པར་གྲགས་པ་བཞིན་དུ་ཉོན་མོངས་པ་ཅན་གྱི་ཡིད་ཀྱིས་ཀུན་གཞི་རྣམ་པར་ཤེས་པ་ཉིད་ལ་དམིགས་པ་སྟེ། འཇིག་ཚོགས་ལ་ལྟ་བ་ལ་སོགས་པ་དང་མཚུངས་པར་ལྡན་པས་ཀུན་གཞི་རྣམ་པར་ཤེས་པ་ལ་ང་དང་ང་ཡིར་དམིགས་པའི་ཕྱིར་རོ། །དེས་ན་འདིས་ནི་ཀུན་གཞི་རྣམ་པར་ཤེས་པ་དང༌། འཇུག་པའི་རྣམ་པར་ཤེས་པ་ལས་རྣམ་པར་འབྱེད་པའང་ཡིན་ནོ། །དེ་ལྟར་གནས་དང་དམིགས་པ་གཉིས་ནི། སུམ་ཅུ་པར་ཡང༌། དེ་ལ་གནས་ཏེ་རབ་འབྱུང་ཞིང༌། །དེ་ལ་དམིགས་པ་ཡིད་ཅེས་བྱ། །ཞེས་གསུངས་པས་རྣམ་པར་ཤེས་པ་ཉིད་ནི་གནས་དང་དམིགས་པ་ལ་མི་ལྟོས་པར་མི་རུང་བས་ན་ཉོན་མོངས་པ་ཅན་གྱི་ཡིད་ཀྱི་གནས་དང་དམིགས་པ་ཁྱད་པར་དུ་བསྟན་པའོ།།

གསུམ་པ་ཉོན་ཡིད་ཀྱི་འཛིན་སྟངས་ལ་བརྟེན་པའི་ངེས་ཚིག་བཤད་པ་ནི།

དེ་འཛིན་དེར་བྱེད་མུན་པ་ཅན། །ཞེས་པས་བསྟན་ཏེ།

དེ་འཛིན་དེར་བྱེད་མུན་པ་ཅན།།

དེ་ལ་ཁམས་སམ་ས་གང་དུ་ཀུན་གཞི་རྣམ་པར་ཤེས་པ་རྣམ་པར་སྨིན་པ་ཐོབ་པ་དེ་ལ་ཉོན་ཡིད་ཀྱིས་བདག་ཏུ་འཛིན་པ་ཡིན་པས་ཉོན་ཡིད་དེ་ཡང་ཁམས་དེ་དང་ས་དེའི་ཡིན་ཏེ་ཀུན་གཞི་དེ་ལ་རག་ལས་པས་འཇུག་ལ། དེར་ཡང་བདག་གམ་ངའོ་སྙམ་དུ་རྟག་ཏུ་རློམ་སེམས་སུ་བྱེད་དེ་སྒྲིབ་༼༡༣༢༽པའི་མུན་པ་ཅན་དུ་གྱུར་པ་ཡིན་པས་ངེས་པའི་ཚིག་གི་ཚུལ་གྱིས་ཡིད་ཅེས་བྱ་སྟེ། ལང་ཀར་གཤེགས་པ་ལས། སེམས་ཀྱིས་སུ་ནི་ལུས་འཛིན་ཏེ། །ཡིད་ནི་རྟག་ཏུ་རློམ་སེམས་བྱེད། །རྣམ་པར་ཤེས་པ་སེམས་ཡུལ་ལ། །རྣམ་ཤེས་བཅས་པས་བྱེ་བྲག་འབྱེད། །ཅེས་དང༌། སུམ་ཅུ་པ་ལས། རྣམ་ཤེས་ངར་སེམས་བདག་ཉིད་ཅན། །ཞེས་སོ།།

བཞི་པ་དེ་ཉིད་འཁོར་གང་དང་མཚུངས་པར་ལྡན་ཚུལ་བསྟན་པ་ནི།

ཕྱོགས་འཛིན་ཕྱོགས་མེད་རྣམས་དང་གཅིག །ཅེས་པས་བསྟན་ཏེ།

ཕྱོགས་འཛིན་ཕྱོགས་མེད་རྣམས་དང་གཅིག།

དེ་ཡང་གཏན་ལ་དབབ་པ་བསྡུ་བ་ལས། ཡིད་གང་ཡིན་པ་དེ་ནི་དུས་རྟག་ཏུ་ཀུན་གཞི་རྣམ་པར་ཤེས་པ་དང་ལྷན་ཅིག་འབྱུང་ཞིང་འཇུག་སྟེ། དེ་ནི་ཡང་དག་པར་མ་བཅོམ་གྱི་བར་དུ་དུས་རྟག་པ་ཁོ་ནར་ལྷན་ཅིག་སྐྱེས་པའི་རང་བཞིན་འདྲ་བའི་ཀུན་ནས་ཉོན་མོངས་པ་རྣམ་པ་བཞི་པོ་འཇིག་ཚོགས་ལ་ལྟ་བའི་ཀུན་ནས་ཉོན་མོངས་པ་དང༌། ངའོ་སྙམ་པའི་ང་རྒྱལ་གྱི་ཀུན་ནས་ཉོན་མོངས་པ་དང༌། བདག་ལ་ཆགས་པའི་ཀུན་ནས་ཉོན་མོངས་པ་དང༌། མ་རིག་པའི་ཀུན་ནས་ཉོན་མོངས་པ་དང་མཚུངས་པར་ལྡན་པ་ཡིན་པར་བལྟ་བར་བྱའོ། །ཞེས་སོགས་གསུངས་པ་ལྟར་ཉོན་མོངས་ཅན་གྱི་ཡིད་ཀྱི་འཁོར་ནི་གཉིས་ཏེ། ཁྱད་པར་ཕྱོགས་འཛིན་གྱི་འཁོར་ནི། བཤད་མ་ཐག་པ་ལྟར། སུམ་ཅུ་པ་ལས། བསྒྲིབས་ལ་ལུང་དུ་མ་བསྟན་པའི། །ཉོན་མོངས་ཞི་དང་རྟག་ཏུ་འགྲོགས། །བདག་ཏུ་ལྟ་དང་བདག་ཏུ་རྨོངས། །བདག་རྒྱལ་བདག་ཆགས་འདུ་ཤེས་པ། །གང་དུ་སྐྱེས་པ་དེ་ཡི་འོ། །ཞེས་པ་ལྟར་རྣམ་པ་བཞི་སྟེ། ཉེ་བར་ལེན་པའི་ཕུང་པོ་རྣམས་ལ་བདག་ཏུ་མཐོང་ནས་བདག་ཏུ་ལྟ་བ་དང༌། དེ་ལ་རྨོངས་པས་ བདག་མེད་མི་ཤེས་པས་བདག་ཏུ་རྨོངས་པ ་དང༌། བདག་ཡོད་པར་རློམ་པ་ལ་བརྟེན་ནས་བདག་གི་ཡུལ་ལ་ངར་སེམས་ཏེ་ངའོ་སྙམ་པའི་ང་རྒྱལ་དང༌། བདག་ཏུ་བཟུང་བས་དེ་ལ་སྲེད་ཅིང་ཆགས་པ་དང་བཞིའོ། །དེའང་ཀུན་གཞི་རྣམ་པར་ཤེས་པའི་རང་གི་ངོ་བོ་ལ་རྨོངས་པར་གྱུར་ན་ཀུན་གཞི་རྣམ་པར་ཤེས་པ་ལ་བདག་ཏུ་ལྟ་བ་འབྱུང་ངོ་། །བདག་ཏུ་མཐོང་བས་སེམས་ཁེངས་པ་གང་ཡིན་པ་དེ་ནི་ངའོ་སྙམ་པའི་ང་རྒྱལ་ལོ། །དེ་གསུམ་ཡོད་ན་བདག་ཏུ་བསམ་པའི་དངོས་པོ་ལ་མངོན་པར་ཆགས་པ་གང་ཡིན་པ་དེ་ནི་བདག་ལ་ཆགས་པའོ།།

དེ་བས་ན་སློབ་དཔོན་བློ་གྲོས་བརྟན་པས་སུམ་ཅུ་པའི་འགྲེལ་པ་ལས། མ་རིག་པ་དང་བདག་ལྟ་དང༌། །ངའོ་ང་རྒྱལ་སྲེད་པའི་༼༡༣༣༽བཞིས། །ཀུན་གཞི་ཉོན་མོངས་ཅན་འགྱུར་ཡིད། །ངར་སེམས་པ་ཡི་མཚན་ཉིད་དེ། །ཕྱིན་ཅི་ལོག་གི་རྒྱུ་བྱེད་པའང༌། །ཡིད་དེ་དེ་དག་ཉོན་མོངས་ཅན། །སེམས་དགེ་ལུང་དུ་མ་བསྟན་ཚེ། །རྟག་ཏུ་ངར་འཛིན་རྒྱུ་ཡིན་ནོ། །ཞེས་གསུངས་སོ། །འོ་ན་རང་གི་ས་པ་ཉིད་དང་མཚུངས་པར་ལྡན་ནམ། གཞན་གྱི་ས་པ་དག་དང་མཚུངས་པར་ལྡན་ཞེ་ན། ཁམས་དང་ས་གང་དུ་སྐྱེས་པ་དེ་ཡི་ཁམས་དེ་དང་ས་དེ་ཉིད་ཀྱི་དང་མཚུངས་པར་ལྡན་གྱི། ཁམས་དང་ས་གཞན་དག་དང་ལྡན་པ་མ་ཡིན་ནོ། །ཐུན་མོང་ཕྱོགས་མེད་ཀྱི་འཁོར་ནི་སུམ་ཅུ་པ་ལས། གཞན། རེག་སོགས་ཀྱང་དེ་དགྲ་བཅོམ་མེད། །ཅེས་སོགས་གསུངས་པ་ལྟར་ལྔ་ཀུན་ཏུ་འགྲོ་བ་དང་མཚུངས་པར་ལྡན་ཏེ། དེ་དག་ནི་རྣམ་པར་ཤེས་པ་ཐམས་ཅད་དང་མཚུངས་པར་ལྡན་པས་སོ། །དེ་དག་ཀྱང་གང་དུ་སྐྱེས་པ་དེ་ཉིད་དང་མཚུངས་པར་ལྡན་གྱི། ཁམས་དང་ས་གཞན་གྱི་དང་ནི་མ་ཡིན་ནོ། །འོན་ཀྱང་རྩ་བའི་རྣམ་པར་ཤེས་པའི་རེག་པ་ལ་སོགས་པ་ནི་མ་བསྒྲིབས་ལ་ལུང་དུ་མ་བསྟན་པ་ཡིན་ལ་ཉོན་མོངས་པ་ཅན་གྱི་ཡིད་ཀྱི་འཁོར་ནི་ཡིད་བཞིན་དུ་བསྒྲིབས་ལ་ལུང་དུ་མ་བསྟན་པ་ཡིན་པས་ཁྱད་པར་དབྱེ་བར་བྱའོ། །དེ་ལྟར་འཁོར་དགུ་པོ་རྣམས་དང་ལྷན་གཅིག་ཏུ་མཚུངས་པར་ལྡན་པ་གང་ཡིན་པའོ།།

ལྔ་པ་དེ་ཉིད་ཚོར་བ་གང་དང་ལྷན་ཅིག་ལྡན་ཚུལ་བཤད་པ་ནི།

མ་ངེས་སྤྱིར་འགྲོ་གཉིས་མི་དམིགས། །ཞེས་པས་བསྟན་ཏེ།

མ་ངེས་སྤྱིར་འགྲོ་གཉིས་མི་དམིགས།།

ཉོན་མོངས་པ་ཅན་གྱི་ཡིད་དེ་ཚོར་བ་གང་དང་མཚུངས་པར་ལྡན་ན། བག་ཆགས་གང་འཛིན་ཕྱོགས་གཅིག་ཏུ་མ་ངེས་པས་སྤྱིར་ཐམས་ཅད་ཀུན་ལ་ཁྱབ་པར་འགྲོ་བས་ཚོར་བ་བཏང་སྙོམས་ཁོ་ན་དང་མཚུངས་པར་ལྡན་གྱི། བདེ་སྡུག་གཉིས་ཀྱི་ཕྱོགས་རིས་ཅན་དུ་མི་དམིགས་པས་དེ་གཉིས་དང་ལྡན་པ་མ་ཡིན་ནོ།།

དྲུག་པ་དེ་ཡི་ངོ་བོ་སྒྲིབ་པ་ལུང་མ་བསྟན་དུ་ངེས་ཚུལ་བསྟན་ པ་ནི།

སྣ་ཚོགས་མེད་དེ་བདག ་ཉིད་འཛིན། །ཞེས་པས་བསྟན་ཏེ།

སྣ་ཚོགས་ མེད་དེ་བདག་ཉིད་འཛིན།།

དེ་ཡང་ཉོན་མོངས་པ ་ཅན་གྱི་ཡིད་ནི་ས་བོན་གྱི་གནས་ལས་གཞན་པའི་ལྷན་ཅིག་འབྱུང་བའི་གནས་དང་ལྡན་པ་མ་ཡིན་པས་དགེ་བ་དང་མི་དགེ་བ་ལ་སོགས་པའི་ཆོས་ཀྱི་བྱེ་བྲག་སྣ་ཚོགས་སུ་གྱུར་པའི་ཐ་དད་ཀྱི་རིས་སུ་དབྱེ་བ་མེད་དེ། དེས་ན་ངོ་བོ་ནི་བསྒྲིབས་ལ་ལུང་དུ་མ་བསྟན་པ་ཁོ་ནར་ངེས་པ་ཡིན་པས། གཏན་ལ་དབབ་པ་བསྡུ་བ་ལས། དགེ་བ་ལ་སོགས་པ་དག་ལ་འགལ་བ་མེད་པར་འཇུག་པ་དང༌། བསྒྲིབས་ལ་ལུང་དུ་མ་བསྟན་པ་ཡིན་པར་བལྟ་བར་༼༡༣༤༽བྱའོ། །ཞེས་སོ། །དེའི་ཕྱིར་བསྒྲིབས་ལ་ལུང་མ་བསྟན་གྱི་ཤེས་པ་རྒྱུན་བརྟན་པ་སྟེ། དེའང་ཟག་མེད་ཀྱི་ལམ་དང་ལྷན་ཅིག་མངོན་གྱུར་དུ་མི་འབྱུང་བས་ཐར་པ་ཐོབ་པ་ལ་སྒྲིབ་ཅིང༌། དགེ་བ་དང་མི་དགེ་བ་ཉིད་དུ་ལུང་སྟོན་དུ་མེད་པའི་ཕྱིར་ལུང་དུ་མ་བསྟན་པ་ཡིན་ནོ། །ལས་ཀྱི་མཐུ་ལས་མཐོ་རིས་དག་ངན་སོང་གི་རྣམ་སྨིན་གྱི་འབྲས་བུ་བསྐྱེད་པར་མི་ནུས་པས་བདག་ཏུ་འཛིན་པ་ཉིད་ཀྱི་རྒྱུ་མཐུན་པའི་བག་ཆགས་ཀུན་གཞི་ལ་གསོགས་ཤིང་ངའོ་སྙམ་དུ་རློམ་སེམས་སུ་བྱེད་པ་མི་གཏོང་བར་འཛིན་པའི་རྣམ་པ་ཅན་ཡིན་ཏེ། སྔ་མ་ལས། འདི་ལྟར་ངར་འཛིན་པ་དང༌། ངའོ་སྙམ་པའི་ང་རྒྱལ་དང༌། རློམ་པའི་རྣམ་པ་ཅན་གྱི་ཡིད་གང་ཡིན་པ་དེ་ནི་སེམས་ཡོད་པ་དང་སེམས་མེད་པའི་གནས་སྐབས་དག་ན་ཡང་དུས་རྟག་ཏུ་ཀུན་གཞི་རྣམ་པར་ཤེས་པ་དང་ལྷན་ཅིག་འབྱུང་ཞིང་འཇུག་སྟེ། དེ་ནི་ཀུན་གཞི་རྣམ་པར་ཤེས་པ་ལ་ངའོ་སྙམ་པ་དང་བདག་གོ་སྙམ་དུ་དམིགས་ཤིང་རློམ་པའི་རྣམ་པ་ཅན་ཡིན་ནོ། །ཞེས་སོ།།

བདུན་པ་ཉོན་ཡིད་སྒྲུབ་བྱེད་ཀྱི་རིགས་པའི་རྣམ་གྲངས་བཤད་པ་ནི།

དྲི་མེད་འཛིན་མེད། ཅེས་པ་ནས། གཉིས་པ་ཆགས་ཁམས་སོ། །ཞེས་པའི་བར་གྱིས་བསྟན་ཏེ།

དྲི་མེད་འཛིན་མེད་གཞན་འདྲ་མེད། །དེ་འཇུག་རྟེན་མེད་ཁྱད་པར་མེད། །དུས་གསུམ་དུས་སུ་དེ་འཛིན་མེད།།

དེ་འཛིན་དེ་ལ་དེར་འཛིན་པས། །གཟུགས་མིང་གཉིས་ལ་ཆགས་ཁམས་སོ།།

དེ་ཡང་དམིགས་པའི་མདོ་ཉོན་མོངས་པ་ཅན་གྱི་ཡིད་ཡོད་པར་སྒྲུབ་བྱེད་ཀྱི་རིགས་པ་འཆད་དེ། གལ་ཏེ་ཉོན་མོངས་པ་ཅན་གྱི་ཡིད་མེད་ན་སྐྱོན་ལྔ་གནས་ཏེ།

དང་པོ་ཚོགས་དྲུག་གང་གིའང་འཁོར་དུ་མི་འབྱུང་བས་གཞན་དང་མ་འདྲེས་པའི་མ་རིག་ པ་མེད་པར་འགྱུར་བའི་སྐྱོན་ནི། གཙོ་བོ་མེད་པར་འཁོར་ཡོད་པར་མི་སྲིད་པས་བདག ་ཏུ་གཏི་མུག་ཅེས་བྱ་བའི་སེམས་ལས་བྱུང་བ་ང་ མེད་བཞིན་དུ་བདག་ཏུ་རློམ་སེམས་སུ་འཛིན་པའི་མ་འདྲེས་པའི་མ་རིག་པ ་དྲི་མ་ཅན་མེད་པར་འགྱུར་ཏེ། ཆོས་མངོན་པའི་མདོ་ལས། ཡང་དག་དོན་ལ་འཇུག་པ་ཡི། །སེམས་ཀྱི་གེགས་སུ་བརྟན་གྱུར་གང༌། །དུས་རྣམས་ཀུན་ཏུ་འབྱུང་བ་དེ། །མ་འདྲེས་པ་ཡི་མ་རིག་འདོད། །ཅེས་གསུངས་ པ་ལྟར། དེ་ཉིད་ཇི་སྲིད་རྒྱུད་ལ་ཡོད་ཀྱི་བར་ལ་བདག་མེད ་མཐོང་བའི་ཡེ་ཤེས་འབྱུང་བའི་གེགས་བྱེད་ཅིང༌། ཉོན་ཡིད་ཁོ་ནའི་འཁོར་དུ་རྒྱུན་བརྟན་པར་འབྱུང་ལ། ཆགས་སོགས་ཉོན་མོངས་པ་གཞན་ཡང་འདྲེན་པར་བྱེད་པ། ངའམ་བདག་ཏུ་རྨོངས་པའི་རྣམ་པ་ཅན་ནི་མ་འདྲེས་པའི་མ་རིག་པ་ཞེས་བྱ་སྟེ། གལ་ཏེ་སེམས་ཅན་གྱི་རྒྱུད་༼༡༣༥༽ལ་རྟེན་ཉོན་མོངས་པ་ཅན་གྱི་ཡིད་མེད་ན། བརྟེན་པ་མ་འདྲེས་པའི་མ་རིག་པའང་མེད་པར་ཐལ་བར་འགྱུར་ཏེ། དེ་ནི་ཚོགས་དྲུག་མི་བརྟན་པ་དང་དུས་མི་མཚུངས་ཤིང༌། ཁྱད་པར་དུ་སྒོ་ལྔ་ཕྱིར་བལྟས་དང་དམིགས་པ་མི་མཚུངས་ལ། ཀུན་གཞི་མ་བསྒྲིབས་པ་དང་ངོ་བོ་མི་མཚུངས་པས། རྣམ་ཤེས་གཞན་ལ་བརྟེན་ནས་འབྱུང་བའང་མ་ཡིན་པའི་ཕྱིར་རོ། །དེ་བས་ན་མ་འདྲེས་པའི་མ་རིག་པ་ནི་ཡོད་པས་དེའི་རྟེན་ཉོན་ཡིད་ཀྱང་ཡོད་པར་གྲུབ་པའོ།།

གཉིས་པ་ངེས་ཚིག་མེད་པར་འགྱུར་པའི་སྐྱོན་ནི། གལ་ཏེ་ཉོན་མོངས་ པ་ཅན་གྱི་ཡིད་མེད་ན། དུས་རྟག་ཏུ་བདག ་ཏུ་འཛིན་ཞིང་རློམ་པའམ་ངར་སེམས་པས་ན་ཡིད་ཅེས་བྱ་བའི་ངེས་ཚིག་ཏུ་འཇོག་པའི་གཞི་མེད་པར་འགྱུར་ཏེ། ཉོན་ཡིད་མ་གཏོགས་རྣམ་ཤེས་གཞན་ལ་དེ་ལྟར་བཤད་དུ་མི་རུང་བའི་ཕྱིར་ཏེ། སྒོ་ལྔ་ནི་རྟོག་མེད་ཡིན་ཞིང༌། ཡིད་ཤེས་ནི་རེ་འགའ་བ་ཡིན་ལ། ཀུན་གཞི་ནི་མ་བསྒྲིབས་པ་ཡིན་པས་དེ་རྣམས་ལ་ངར་འཛིན་པ་མེད་པའི་ཕྱིར་རོ། །དེ་བས་ན། ལང་ཀར་གཤེགས་པ་ལས། ངར་སེམས་ཉིད་ནི་ཡིད་ཡིན་ནོ། །ཞེས་དང༌། ཡིད་ནི་རྟག་ཏུ་རློམ་སེམས་བྱེད། །ཅེས་སོགས་ཀྱིས་ངེས་ཚིག་ཡང་དག་ཏུ་གསུངས་པས་དེའི་གཞི་ཉོན་ཡིད་ཡོད་པར་ངེས་པའོ།།

གསུམ་པ་སྒོ་ལྔ་ལ་བདག་པོའི་རྐྱེན་དགོས་པ་དང་འདྲ་བར་ཡིད་ཀྱི་རྣམ་པར་ཤེས་པ་ལ་བདག་པོའི་རྐྱེན་མེད་པར་འགྱུར་བའི་སྐྱོན་ནི། གལ་ཏེ་ཉོན་ཡིད་མི་འདོད་ན་གཞན་དབང་ཤེས་ལྔ་པོ་ལ་ལྷན་ཅིག་སྐྱེ་བའི་གནས་ཀྱི་ བདག་རྐྱེན་ཡོད་པ་དང་འདྲ་བ་མེད ་པར༌། ཡིད་ཤེས་དེ་ཉིད་རང་ཡུལ་ལ་ཀུན་ནས་ཉོན་མོངས་པའི་མཚན་མ་ཅན་དུ་འཇུག་པར་བྱེད་པས་རྟེན་དུ་གྱུར་པའི་བདག་རྐྱེན་ཡོད་པ་མ་ཡིན་པར་ཐལ་བར་འགྱུར་ཏེ། དེའི་ལྷན་ཅིག་སྐྱེ་བའི་གནས་ཉོན་ཡིད་མེད་ཅིང་གཞན་ཡང་མེད་པའི་ཕྱིར་ཏེ། དྲུག་པོ་འདས་མ་ཐག་པའི་ཡིད་ནི་རྫས་སུ་མེད་ཅིང་ཡིད་ཤེས་དང་དུས་མི་མཉམ་པ་དེ་དབང་ཤེས་དང་འདྲ་བའི་ལྷན་ཅིག་འབྱུང་བའི་གནས་སུ་མི་རུང་བའི་ཕྱིར་དང༌། སློབ་དཔོན་ཡོན་ཏན་འོད་ཀྱིས་སའི་རྣམ་བཤད་དུའང༌། མཚན་མ་ལ་འཆིང་བའི་གནས་ནི་ཉོན་མོངས་པ་ཅན་གྱི་ཡིད་ཡིན་ཏེ། འདི་ལྟར་རྣམ་པར་གཏན་ལ་དབབ་པ་བསྡུ་བ་ལས་ཀྱང༌། ཡིད་ཀྱི་རྣམ་པར་ཤེས་པ་དེ་༼༡༣༦༽ཡང་ཡིད་ལ་གནས་པ་ཞེས་བྱ་སྟེ། རྒྱུ་མཚན་གྱི་ཡིད་མ་འགགས་ན་རྣམ་པར་རིག་པ་རྣམས་ཀྱང་མཚན་མ་ལ་བཅིངས་པ་ལས་མི་འགྲོལ་ལ། 47འགགས་ན་དེ་ལས་གྲོལ་བར་འགྱུར་རོ། །ཞེས་འབྱུང་བར་གསུངས་པ་ལ་སོགས་པའི་ཕྱིར་དང༌། ཀུན་གཞིའང་རྒྱུའི་རྐྱེན་ཡིན་གྱི་བདག་རྐྱེན་མ་ཡིན་པའི་ཕྱིར་རོ། །དེས་ན་ཡིད་ཤེས་ཀྱི་བདག་རྐྱེན་དུ་གྱུར་པའི་ཉོན་ཡིད་ནི་ཡོད་པ་ཉིད་དེ། ལང་ཀར་གཤེགས་པར་ཡང༌། ཡིད་དང་རྣམ་པར་ཤེས་པ་དང༌། །རྣམ་པར་སྨིན་པར་གྱུར་པ་སྟེ། །ཡིད་ནི་ཀུན་གཞི་ལས་བྱུང་བ། །རྣམ་པར་ཤེས་པ་ཡིད་ལས་བྱུང༌། །ཞེས་སོ། །གལ་ཏེ་གནས་བརྟན་པའི་སྡེ་པ་དག་གིས། ཡིད་ཀྱི་བདག་པོའི་རྐྱེན་ནི་སྙིང་གིས་བྱའོ། །ཞེ་ན། གཟུགས་མེད་ཀྱི་སེམས་ཅན་ལ་སྙིང་མེད་པས་ཉོན་ཡིད་ཡོད་དགོས་པའོ། །གཞན་ཡང་དགེ་སློང་དག་ཡིད་ནི་ནང་གི་སྐྱེ་མཆེད་ཡིན་ཏེ། གཟུགས་ཅན་མིན་པ་བསྟན་དུ་མེད་ལ་ཐོགས་པ་མེད་པའོ། །ཞེས་གསུངས་པའི་ལུང་གིས་ཀྱང་གནོད་དོ།།

བཞི་པ་སྙོམས་འཇུག་གཉིས་ལ་བྱེ་བྲག་མེད་པར་འགྱུར་བའི་སྐྱོན་ནི། ཉོན་ཡིད་མེད་ན་འདུ་ཤེས་མེད་པའི་སྙོམས་འཇུག་དང་འགོག་པའི་སྙོམས་པར་འཇུག་པ་གཉིས་ལ་ཁྱད་པར་མེད་པར་ཐལ་བར་འགྱུར་ཏེ། གཉིས་ཀའི་ཚོགས་དྲུག་བཀག་ཙམ་དུ་མཚུངས་པའི་ཕྱིར་རོ། །སྙོམས་འཇུག་གཉིས་ལ་ཁྱད་པར་མེད་མོད་སྙམ་པ་ལ། ཁྱད་པར་ཡོད་དེ། འདུ་ཤེས་མེད་པའི་སྙོམས་འཇུག་ནི་ཉོན་ཡིད་ཏིང་ངེ་འཛིན་གྱི་ངོ་བོར་བྱས་པ་ཡིན་པས་འཁོར་བ་ལས་མི་བརྒལ་ལ། འགོག་པའི་སྙོམས་འཇུག་ནི་ཟག་པ་མེད་པ་ཡིན་པས་ཏིང་ངེ་འཛིན་ལ་རྩལ་སྦྱངས་བས་སམ་མཐོང་ཆོས་ཞི་བས་འདས་པའི་འབྲས་བུ་འཐོབ་པའོ། །གཞན་ཡང་ས་དང་ཡིད་བྱེད་པ་ལ་སོགས་པའི་ཁྱད་པར་ཡོད་ཀྱང་ངོ་བོ་ལ་ཁྱད་པར་མེད་ན་ནི། འདུ་ཤེས་དང་ཚོར་བ་ཞི་མ་ཞིའི་བྱེ་བྲག་ཀྱང་མེད་པར་ཐལ་བ་ལས་འགོག་སྙོམས་ནི་ཉོན་ཡིད་བཀག་སྟེ་ངར་འཛིན་ཞི་བ་ཁྱད་པར་དུ་འཕགས་པ་ཡིན་པས། དེའི་དགག་བྱ་ཉོན་ཡིད་ནི་ཡོད་པར་གྲུབ་པའོ། །དེར་མ་ཟད་རྟེན་ཉོན་ཡིད་མེད་ན་འདུ་ཤེས་མེད་པར་སྐྱེ་བའི་རྒྱུད་ལ་ངར་འཛིན་མེད་པར་འགྱུར་ཞིང༌། དེ་ལྟར་ན་དེ་བཞིན་གཤེགས་པ་དང་འཕགས་པ་རྣམས་ཀྱིས་མི་ཁོམ་པའི་གནས་སུ་གཟིགས་ཏེ་སྨོད་ཅིང་སྤོང་བར་ཡང་མི་འགྱུར་ལ། འཇུག་ཤེས་དང་བྲལ་ཙམ་གྱིས་༼༡༣༧༽སྤངས་ན་ནི་འགོག་པའང་སྤངས་པར་རིགས་པས་ཧ་ཅང་ཐལ་བར་འགྱུར་རོ། །དེ་ནི་ཚོགས་དྲུག་བཀག་ཀྱང་ངར་འཛིན་ཡོད་པའི་ཕྱིར་ཉོན་ཡིད་ངེས་པར་གྲུབ་པའོ།།

དེ་ལྟར་ནའང་ཕྱིར་མི་འོང་བ་ཅི་ཡང་མེད་པའི་སྐྱེ་མཆེད་ཀྱི་འདོད་ཆགས་དང་བྲལ་བས་འགོག་པའི་སྙོམས་འཇུག་ཐོབ་པ་ཡང༌། འདས་ལམ་གྱི་སྟོབས་ཀྱིས་ཐོབ་པ་ཡིན་པས་སྙོམས་འཇུག་གི་དུས་ན་ཉོན་ཡིད་འགག་ཀྱང་འགོག་སྙོམས་ལས་ལངས་པ་ན་སླར་ཡང་ཀུན་གཞི་རྣམ་པར་ཤེས་ པ་ཉིད་ལས་འབྱུང་ངོ༌། །དེ་བཞིན་དུ་བདག་མེད ་མཐོང་བ་ནི་བདག་ལ་སོགས་པར་ལྟ་བའི་གཉེན་པོ་ཡིན་ཞིང༌། གཉེན་པོ་དང་མི་མཐུན་པའི་ཕྱོགས་གཉིས་ཅིག་ཆར་དུ་འཇུག་པ་མེད་པས་འཇིག་རྟེན་ལས་འདས་པའི་ལམ་གྱི་སྐབས་སུ་འགག་ཀྱང་དེ་ལས་ལངས་པའི་ཚེ་ས་བོན་རྩ་བ་ནས་མ་སྤང་བས་སླར་ཡང་ཀུན་གཞི་རྣམ་ཤེས་ཉིད་ལས་འབྱུང་ངོ༌། །དགྲ་བཅོམ་པ་ནི་ཉོན་མོངས་མ་ལུས་པར་སྤངས་པ་ཡིན་པས་ཉོན་ཡིད་ས་བོན་དང་བཅས་པ་མེད་དེ། དེ་ནི་སྲིད་པའི་རྩེ་མོའི་ཉོན་མོངས་པ་སྒོམ་པས་སྤང་བར་བྱ་བ་བཞིན་དུ་དགྲ་བཅོམ་ཉིད་ཐོབ་པའི་ཚེ་བར་ཆད་མེད་ལམ་ཉིད་ཀྱིས་སྤོངས་ཏེ་ཟད་པ་དང་མི་སྐྱེ་བ་ཤེས་པ་ཐོབ་པར་འགྱུར་རོ། །བྱང་ཆུབ་སེམས་དཔའ་ས་བརྒྱད་པ་ལ་ཉོན་མོངས་པའི་དྲི་མ་རྩ་བ་དང་བཅས་པ་ཉེ་བར་ཞི་བས་ཉོན་ཡིད་ས་བོན་དང་བཅས་ཏེ་གནས་གྱུར་པའི་རྣམ་པར་མི་རྟོག་པའི་ཡེ་ཤེས་སོགས་ལ་དབང་ཐོབ་ཅིང༌། མཐར་ཐུག་སངས་རྒྱས་ཀྱི་ས་རུ་མཉམ་པ་ཉིད་ཀྱི་ཡེ་ཤེས་སུ་གནས་འགྱུར་བ་ཡིན་ནོ།།

ལྔ་ པ་དུས་ཀུན་ཏུ་བདག་འཛིན་མེད ་པར་འགྱུར་བའི་སྐྱོན་ནི། གལ་ཏེ་ཉོན་ཡིད་མེད་ན་ངར་འཛིན་གྱི་གནས་སུ་གྱུར་པའི་མ་རིག་པའི་རྟེན་གཞན་མེད་པས་དུས་གསུམ་གྱི་དུས་དང་གནས་སྐབས་རྣམས་སུ་ཀུན་གཞི་རྣམ་ཤེས་ཉེ་བར་ལེན་པའི་ཕུང་པོ་དེ་ལ་ངའམ་ བདག་ཏུ་འཛིན་པ་དེ་ཉིད་མེད ་པར་འགྱུར་ཏེ། དགེ་བ་ལ་སོགས་པ་ཆོས་གསུམ་ཀའི་གནས་སྐབས་སུའང་ངར་འཛིན་པ་མི་འབྱུང་བས་དེ་དག་ངར་འཛིན་གྱིས་མ་བཅིངས་པའི་དགེ་བ་སོགས་སུ་ངེས་པར་འགྱུར་བ་ཡིན་པའི་ཕྱིར་རོ། །འདོད་པར་མི་ནུས་ཏེ། བྱིས་པ་རྣམས་ཀྱི་རྒྱུད་ལ་ང་སྦྱིན་པ་བྱེད་དོ་ཞེས་པ་ལ་སོགས་པ་དགེ་བ་དང༌། ང་གནོད་པར་བྱེད་དོ། །ཞེས་པ་ལ་སོགས་པའི་མི་དགེ་བ་དང༌། ང་བཟོ་གནས་བྱེད་དོ། །ཞེས་པ་ལ་སོགས་༼༡༣༨༽པའི་ལུང་དུ་མ་བསྟན་པའི་གནས་སྐབས་ཐམས་ཅད་དུ་ངར་འཛིན་པ་ཉིད་ཀུན་ཏུ་འགྲོ་བ་དང་འཇུག་པ་ཡིན་ལ། དེ་ཉིད་མ་རིག་པ་ལ་བརྟེན་ཞིང༌། དེའང་ཉོན་ཡིད་ལ་བརྟེན་པ་ཡིན་པས་དེ་ནི་ཡོད་པར་གྲུབ་ཅིང་ཉོན་མོངས་གཞན་གྱི་རྩ་བའང་ཡིན་ཏེ། མདོ་སྡེ་སིལ་བུ་དག་ལས་ཀྱང༌།

ཉོན་མོངས་ཅན་ཡིད་རྟག་ཏུ་ཡང༌། །ཉོན་མོངས་ལྷན་ཅིག་འབྱུང་བ་ཡང༌། །ཉོན་མོངས་ལྷན་ཅིག་འབྱུང་ཞིང་འགག །དེ་ནི་ཉོན་མོངས་པ་དག་ལས། གྲོལ་བར་མ་གྱུར་མི་འགྱུར་རོ། །ཞེས་སོ། །དེ་ལྟར་བཤད་པའི་རིགས་པ་དེ་དག་ནི། ཐེག་བསྡུས་སུ་ཡང༌།

ཉོན་མོངས་ཅན་གྱི་ཡིད་མེད་ན། །མ་འདྲེས་པ་ཡི་མ་རིག་དང༌། །ལྔ་པོ་དག་དང་འདྲ་བ་དང༌། །སྙོམས་པར་འཇུག་པའི་བྱེ་བྲག་དང༌། །ངེས་ཚིག་མེད་པའི་སྐྱོན་དུ་འགྱུར། །འདུ་ཤེས་མེད་པར་སྐྱེ་བའི་རྒྱུད། །ངར་འཛིན་མེད་པའི་སྐྱོན་དུ་འགྱུར། །ངར་འཛིན་པ་དང་ལྡན་པ་ནི། །རྣམ་པ་ཀུན་ཏུ་མི་འཐད་དོ། །ཞེས་གསུངས་ཏེ་ཤིན་ཏུ་གསལ་བར་བསྟན་ལ། དེེས་ན་ཉོན་ཡིད་མེད་ན་མ་འདྲེས་པའི་མ་རིག་པ་དང་ལྔ་པོ་དང་འདྲ་བ་གཉིས་མེད་པར་འགྱུར་ཞིང༌། དེའི་འོག་མ་སྙོམས་པར་འཇུག་པའི་ཁྱད་པར་དང༌། ངར་རློམ་པའི་ཡིད་ཀྱི་ངེས་ཚིག་དང༌། འདུ་ཤེས་མེད་པར་སྐྱེ་བའི་རྒྱུད་ལ་ངར་འཛིན་ཡོད་པ་གསུམ་དང་འགལ་བར་འགྱུར་ལ། ཐ་མ་ཀུན་ཏུ་ཡོད་པར་མི་འགྱུར་བའི་ཕྱིར། གཉིས་མེད་གསུམ་དང་འགལ་བར་འགྱུར། །དེ་མེད་ན་ནི་ངར་འཛིན་པ། །ཀུན་ཏུ་ཡོད་པར་མི་འགྱུར་རོ། །ཞེས་གསུངས་སོ། །དེ་ལྟ་བུའི་འཛིན་སྟངས་ཅན་གྱི་ཉོན་ཡིད་དེ་ཡང་གཟུགས་ཀྱི་ཕུང་པོ་དེ་ལ་བདག་གིར་ལྟ་ཞིང་མིང་བཞིའི་ཕུང་པོ་དེར་ངར་འཛིན་པ་ཡིན་པས་དོན་དུ་འཛིན་སྟངས་དེ་གཉིས་ཁོ་ནས་ཉེར་ལེན་གྱི་ཕུང་པོའི་ཀུན་གཞི་རྣམ་ཤེས་ལ་དམིགས་ཏེ་རྟག་ཏུ་ངའམ་བདག་ཏུ་རློམ་པའི་ཚུལ་གྱིས་གཟུགས་ཕུང་དང་མིང་བཞིའི་ཕུང་པོ་གཉིས་ཏེ་ཀུན་གཞིའི་རྣམ་སྨིན་གང་བླངས་པའི་ཕུང་པོ་ལྔ་ཀ་ལ་ཆགས་ཤིང་ཞེན་པའི་ཁམས་སོ། །དེ་དག་ཀྱང་མུན་པའི་གྲངས་དྲིས་པའི་ལན་དུ་ཅི་རིགས་པར་སྦྱར་ཞིང་འཆད་པ་རྣམས་ལའང་སྦྱར་བར་བྱའོ།།

གསུམ་པ་སྣང་བའི་མདོ་ཡིད་ཀྱི་རྣམ་པར་ཤེས་པ་བཤད་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི

ལང་ཀའི། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་སྣང་བའི་མདོ་གང་ཞེ་ན། འདི་ལྟ་སྟེ།

མུན་པའི་ལན་མདོ་གསུམ་པ་བསྟན་པའི་ཕྱིར། ལང་ཀའི་བདག་པོ། ཞེས་བོས་༼༡༣༩༽ནས། དེ་ལ་ཕྱི་ནང་གི་ཡུལ་ཀུན་དང་རྟོགས་མ་རྟོགས་ཀྱིས་འཁོར་འདས་ཀྱི་ཆོས་སྣ་ཚོགས་པར་སྣང་བའི་མདོ་ཡིད་ཀྱི་རྣམ་པར་ཤེས་པ་ཉེ་བར་བསྟན་པ་གང་ཞེ་ན། འདི་ལྟ་སྟེ། ཞེས་པའོ།།

གཉིས་པ་རྒྱས་པར་བཤད་པ་ལ་བརྒྱད་དེ། ཡིད་ཀྱི་རྣམ་པར་ཤེས་པའི་གནས་བསྟན་པ། དེ་ཡི་ཡུལ་གྱི་རྣམ་གྲངས་ངོས་བཟུང་། དེ་ཉིད་འཁོར་གང་དག་དང་མཚུངས་པར་ལྡན་ཚུལ་བཤད་པ། དེ་ཉིད་ཚོར་བ་གང་དག་དང་ལྡན་པའི་ཁྱད་པར་བསྟན་པ། ཡིད་ཡུལ་ལ་འཇུག་པའི་རྣམ་གྲངས་ཀྱི་དབྱེ་བ་བཤད་པ། དེ་ཡིས་རང་ཡུལ་གཅོད་ཅིང་དངོས་སྣང་ལ་འཇུག་ཚུལ་གྱི་མཚན་ཉིད་བསྟན་པ། དེ་ཉིད་རེ་ཞིག་ཏུ་ལྡོག་པའི་དུས་ཀྱི་རྣམ་གྲངས་བཤད་པ། ཡིད་ཤེས་གང་གི་ཐུན་མོང་དང་ཁྱད་པར་གྱི་བྱེད་ལས་བཤད་པའོ། །དང་པོ་ནི།

འདོད་ཁམས་དེ་འཇུག ཅེས་པ་ནས། འབྱུང་རྟེན་དེ་མ་ཐག །ཅེས་པའི་བར་གྱིས་བསྟན་ཏེ།

འདོད་ཁམས་དེ་འཇུག་དེ་འབྲེངས་ནས། །གསུམ་པ་ཡིན་ཏེ་དེ་དག་ནི། །དེ་ནི་འབྱུང་རྟེན་དེ་མ་ཐག།

ཡིད་ཀྱི་རྣམ་པར་ཤེས་པའི་གནས་འཆད་པ་ནི། ཁམས་གསུམ་ལས་འདོད་པའི་ཁམས་དང་ཆོས་མཐུན་པས་ཡིད་ཀྱི་རྣམ་ཤེས་དེ་ཉིད་ད་ལྟ་བ་ཡུལ་གང་དང་གང་སྣང་བ་ལྟར་ཐམས་ཅད་ལ་གསལ་བར་འཇུག་ལ་དྲན་པ་དང་མངོན་པར་འདོད་པའི་ཚུལ་གྱིས་དེ་ཉིད་འདས་པ་དང་མ་འོངས་པའི་ཡུལ་གྱིའང་རྗེས་སུ་འབྲང་བས་ཡུལ་གྱི་ཆོས་མང་པོ་ལ་གནས་ཏེ་ཡུལ་དང་ཡུལ་ཅན་དུ་འབྲེལ་བ་ནི་ཡིད་ཀྱི་རྣམ་པར་ཤེས་པ་སྣང་བའི་མདོ་ཞེས་བྱ་སྟེ།

དེ་ལའང་གནས་གསུམ་དུ་ཡོད་པ་ཡིན་ཏེ། དེ་དག་ཀྱང་གང་ཞེ་ན་ནི། ས་བོན་ནམ་བག་ཆགས་ཀྱི་གནས་ནི་ཀུན་གཞི་དེ་ཉིད་ཡིན་ཏེ། ཕྱི་རོལ་གྱི་ཡུལ་མང་པོ་བཅད་ནས་ཀུན་གཞི་དེ་ལ་བག་ཆགས་གསོགས་པར་བྱེད་ལ། གོ་འབྱེད་པའི་གནས་ནི་སྐད་ཅིག་མ་སྔ་མས་གོ་ཕྱེས་ནས་ཡུལ་ཀུན་ལ་འབྱུང་ཞིང་འཇུག་སྟེ་རྗེས་སུ་འགྲོ་བ་ཡིན་ནོ། །ལྷན་ཅིག་འབྱུང་བའི་གནས་ནི་ཡིད་ཤེས་དེ་ཉིད་ཡུལ་ལ་དངོས་སུ་འབྱུང་འཇུག་བྱེད་པའི་རྟེན་དུ་གྱུར་པའི་དབང་པོ་སྟེ་དྲུག་པོ་དེ་ཉིད་འགགས་མ་ཐག་པའི་རྣམ་ཤེས་གང་ཡིན་པ་ཉིད་དེ་དེ་ལྟར་གནས་གསུམ་དང་ལྡན་པའོ།།

གཉིས་པ་དེ་ཡི་ཡུལ་གྱི་རྣམ་གྲངས་ངོས་བཟུང་བ་ནི།

འདོད་པ་ལྔ་དང་ཆོས་གཉིས་སོ། །ཞེས་པས་བསྟན་ཏེ།

འདོད་པ་ལྔ་དང་ཆོས་གཉིས་སོ།།

ཡིད་ཀྱི་རྣམ་པར་ཤེས་པའི་ཡུལ་ནི་གཉིས་ཏེ་ཐུན་མོང་བ་འདོད་པའི་ཡོན་ཏན་རྣམ་པ་ལྔ་དང་ཐུན་མོང་མ་ཡིན་པ་འདུས་བྱས་རྣམ་པར་རིག་བྱེད་མ་ཡིན་པའི་གཟུགས་དང༌། ཚོར་བ་དང་འདུ་ཤེས་དང༌། འདུ་བྱེད་བཞི་དང་འདུས་མ་བྱས་ནམ་མཁའ་དང་འགོག་པ་གཉིས་དང་དེ་བཞིན་ཉིད་དང་བཞི་སྟེ་ཆོས་བརྒྱད་དུ་གྱུར་པ་ཡིན་པས་དེ་ལྟར་ཐུན་མོང་དང་ཁྱད་པར་གྱི་ཆོས་གཉིས་པོ་༼༡༤༠༽རྣམས་སོ།།

གསུམ་པ་དེ་ཉིད་འཁོར་གང་དག་དང་མཚུངས་པར་ལྡན་ཚུལ་བཤད་པ་ནི།

བྱེད་པ་ཀུན་དང་རྟག་ཏུ་གཅིག །ཅེས་པས་བསྟན་ཏེ།

བྱེད་པ་ཀུན་དང་རྟག་ཏུ་གཅིག།

ཡིད་ཀྱི་རྣམ་ཤེས་ཀྱི་འཁོར་ནི་གཉིས་ཏེ། ཐུན་མོང་བ་ཀུན་ཏུ་འགྲོ་བ་ལྔ་དང༌། ཐུན་མོང་མ་ཡིན་པ་རིགས་སྤྱིའི་དབང་དུ་བྱས་པས་འདུ་བྱེད་པ་ལྔ་བཅུ་རྩ་གཅིག་ཀུན་དང་ཡང་དུས་རྟག་ཏུ་མཚུངས་པར་ལྡན་ཏེ་ལྷན་གཅིག་པར་རྒྱུན་དུ་འགྲོགས་པ་ཞེས་བྱ་སྟེ་ཐམས་ཅད་ཡིད་ཀྱི་ཆ་ཡིན་པས་སོ།།

བཞི་པ་དེ་ཉིད་ཚོར་བ་གང་དག་དང་ལྡན་པའི་ཁྱད་པར་བསྟན་པ་ནི།

རིགས་གསུམ་དག་དང་ཕྲད་རིགས་འཛིན། །ཞེས་པས་བསྟན་ཏེ།

རིགས་གསུམ་དག་དང་ཕྲད་རིགས་འཛིན།།

དེ་ཉིད་ཚོར་བ་གང་དང་ལྡན་ན་བདེ་བ་དང་སྡུག་བསྔལ་དང་བཏང་སྙོམས་ཀྱི་རིགས་གསུམ་ཀ་དག་དང་ལྡན་པས་དེ་དག་གང་དང་ཕྲད་ཀྱང་དེའི་ངོ་བོ་ཡང་གནས་པའི་ཚུལ་གྱིས་དགེ་བ་དང་མི་དགེ་བ་དང་ལུང་མ་བསྟན་གྱི་རིགས་སུ་གང་གྱུར་ལྟར་འཛིན་ཏེ་དོན་དུ་ཡིད་ཉེ་བར་རྒྱུ་བའི་ཚོར་བ་བཅོ་བརྒྱད་ལས་གང་ཕྲད་ཐམས་ཅད་འཛིན་ཞིང་གཞན་འགག་པའོ།།

ལྔ་པ་ཡིད་ཡུལ་ལ་འཇུག་པའི་རྣམ་གྲངས་ཀྱི་དབྱེ་བ་བཤད་པ་ནི།

དེ་འཇུག་ཚོལ་གཅོད་འབེབས་པའོ། །ཞེས་པས་བསྟན་ཏེ།

དེ་འཇུག་ཚོལ་གཅོད་འབེབས་པའོ།།

ཡིད་ཤེས་ཡུལ་ལ་འཇུག་པའི་རྣམ་གྲངས་ཀྱང༌། ཡུལ་གང་དང་གང་སྣང་བ་དེ་ཡི་རྗེས་སུ་འཇུག་པའི་ཡིད་དང༌། དང་པོ་ཡུལ་ཀུན་ཏུ་ཚོལ་བར་བྱེད་པའི་ཡིད་དང༌། ཡུལ་ལ་རྣམ་པར་རྟོག་པའམ་དེ་ཉིད་ཡོངས་སུ་གཅོད་པའི་ཡིད་དང༌། གང་དོན་དང་མཐུན་པར་གཏན་ལ་འབེབས་པའི་ཡིད་དེ་དེ་ལྟར་བཞིའམ། ཡང་ན་དོན་གྱིས་ངེས་པར་འཇོག་པའི་ཡིད་དང་རྣམ་གྲངས་ལྔར་བསྟན་པའོ།།

དྲུག་པ་དེ་ཡིས་རང་ཡུལ་གཅོད་ཅིང་དངོས་སྣང་ལ་འཇུག་ཚུལ་གྱི་མཚན་ཉིད་བསྟན་པ་ནི།

མ་འགགས་གང་དུ་རྒྱུན་ཁྱབ་འཇུག །ཅེས་པས་བསྟན་ཏེ།

མ་འགགས་གང་དུ་རྒྱུན་ཁྱབ་འཇུག།

དེ་ཡང་ཡུལ་སྣང་གི་དངོས་པོ་མ་འགགས་པར་གསལ་བ་གང་དུ་ཡང་རྒྱུན་དུ་འཇུག་པ་ཡིན་པས་སྒོ་ལྔའི་ཤེས་པ་ཀུན་ལའང་ཁྱབ་པར་རྒྱུ་ཞིང་དེ་དག་གི་རྗེས་སུའང་འཇུག་པར་བྱེད་པ་ཉིད་དེ། དེར་མ་ཟད་འགགས་པ་དང་འབྱུང་འགྱུར་གྱི་ཡུལ་ལའང་ཡོངས་སུ་རྟོག་པའི་མཚན་ཉིད་ཅན་དུ་ངེས་ཏེ། རྒྱན་སྟུག་པོ་བཀོད་པ་ལས། རྒྱུ་ལ་དམིགས་ཤིང་རྣམ་ཤེས་རྣམས། །སྐྱེ་སྟེ་གཞན་ནི་དེ་རྗེས་འབྲང༌། །ཡིད་ལ་དམིགས་ཤིང་གཞན་དག་ཀྱང༌། །མཐར་ཆགས་སུ་ནི་རབ་ཏུ་འབྱུང༌། །ཡིད་རྙེད་ནས་ཀྱང་གཞན་དག་ནི། །དབང་གི་ཡོན་ཏན་རྣམས་ཀྱིས་བྱས། །དབང་ནི་ལྔ་དང་ལྷན་ཅིག་ཏུ། །རྣམ་པར་ཤེས་པ་རབ་ཏུ་བྱེད། །ཅེས་དང༌། གཟུགས་དང་སྣང་བ་ཡིད་བྱེད་དང༌། །རྣམ་ཤེས་ཡུལ་ལ་མངོན་གྱུར་པས། །མྱུར་ཕྱིར་ཁོང་དུ་མི་ཆུད་པ། །སྤྱོད་ཡུལ་དུ་ནི་སེམས་རྒྱུ་བའོ། །ཡིད་སྔོན་འགྲོ་བ་ཆོས་རྣམས་ཏེ། །ལུས་༼༡༤༡༽ཅན་ཀུན་གྱི་དེ་བཞིན་ནོ། །ཡིད་འགྲོ་ཡིད་ནི་གཅེས་པ་དག །ཡིད་དུ་འོང་བས་ཅིར་མི་བཤད། །ཅེས་སོ།།

བདུན་པ་དེ་ཉིད་རེ་ཞིག་ཏུ་ལྡོག་པའི་དུས་ཀྱི་རྣམ་གྲངས་བཤད་པ་ནི།

དུས་གསུམ་སྐབས་གསུམ་འཇུག་མེད་པའོ། །ཞེས་པས་བསྟན་ཏེ།

དུས་གསུམ་སྐབས་གསུམ་འཇུག་མེད་པའོ།།

དེ་ཡང་རེ་ཞིག་པ་དང་གཏན་དུ་ལྡོག་པའི་དུས་གཉིས་ལས། འདིར་རེ་ཞིག་པར་གྱུར་པ་རྟག་ཏུ་འདུ་ཤེས་མེད་པ་པ་དང༌། འདུ་ཤེས་མེད་པའི་སྙོམས་པར་འཇུག་པ་དང༌། འགོག་པའི་སྙོམས་པར་འཇུག་པའི་དུས་དང་གསུམ་དུ་ལྡོག་པ་དང༌། དེ་བཞིན་དུ་ཤིན་ཏུ་མྱོས་པའི་གཉིད་ཀྱི་སྐབས་དང༌། བརྒྱལ་བ་དང་འབོག་པའི་གནས་སྐབས་གསུམ་དུ་ལྡོག་པ་ཡིན་པས་དེ་ལྟར་དུས་སྐབས་དྲུག་ཏུ་འཇུག་པ་མེད་པའོ།།

བརྒྱད་པ་ཡིད་ཤེས་གང་གི་ཐུན་མོང་དང་ཁྱད་པར་གྱི་བྱེད་ལས་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

སྣ་ཚོགས་དེ་ཉིད། ཅེས་པ་ནས། ཐུན་མོང་དེ་ཁྱད་པར། །ཞེས་པའི་བར་དང༌།

སྣ་ཚོགས་དེ་ཉིད་དེ་ལ་འདེབས། །དེ་ཡང་འཇུག་པ་རྣམ་གཉིས་ཏེ། །ལྔ་དང་ཐུན་མོང་དེ་ཁྱད་པར།།

འོག་གི དྲུག་གཉིས་ལྔ་གསུམ། ཞེས་པ་ནས། དེ་འཇུག་བྱེད་པ་ཡིན། །ཞེས་པའི་བར་གྱིས་བསྟན་ཏེ།

དྲུག་གཅིག་ལྔ་གསུམ་བཅུ་གཉིས་གཅིག །ཐམས་ཅད་དེ་འཇུག་བྱེད་པ་ཡིན།།

ཡིད་ཀྱི་རྣམ་པར་ཤེས་པའི་བྱེད་ལས་ནི། སྔ་མ་ལས། ཇི་ལྟར་རྒྱ་མཚོ་ཆུ་བོ་ཡིས། །ཉིན་གཅིག་བཞིན་དུ་དགང་བྱ་ཡང༌། །ཆུ་བོ་རྣམས་ནི་རྒྱུན་མི་འཆད། །རྒྱ་མཚོ་རྟོག་པར་ཡོང་མི་བྱེད། །དེ་བཞིན་ཀུན་གཞི་རྣམ་ཤེས་ཀྱང༌། །ཟབ་ཅིང་མཚོ་ལྟར་གནས་པ་སྟེ། །རྣམ་ཤེས་རྣམས་ཀྱིས་ཉིན་གཅིག་བཞིན། །བག་ཆགས་ཆུ་བོས་རབ་ཏུ་དགང༌། །ཞེས་གསུངས་པ་ལྟར། ཡུལ་མང་པོ་བཅད་པའི་བག་ཆགས་སྣ་ཚོགས་པ་དེ་ཉིད་ཀུན་གཞི་དེ་ལ་འབེབས་ཤིང་བསྒོད་པར་བྱེད་པ་ཡིན་ཞིང༌། དེ་ལ་ཡང་ལས་ཀྱི་འཇུག་པ་རྣམ་པ་གཉིས་སུ་གནས་ཏེ། སྒོ་ལྔ་དང་ཐུན་མོང་གི་ཚུལ་གྱིས་བྱེད་པའི་ལས་ལ་འཇུག་པ་དང༌། ཡིད་ཤེས་དེ་ཡི་རང་གི་ཁྱད་པར་གྱི་ལས་ཀྱིས་ཐུན་མོང་མིན་པར་འཇུག་པའོ། །དེ་ཡང་རྣམ་གྲངས་བསྟན་པ་འདི་ལྟ་སྟེ། མདོར་བསྡུ་ན་ཡིད་ཀྱི་ལས་ནི་ཐུན་མོང་ལ་དྲུག་དང་གཉིས་པ་ལ་ལྔ་ཕྲག་གསུམ་སྟེ། སྤྱིའི་ལས་སུ་བཤད་པ་དྲུག་དང་འོག་གི་ལྔ་གསུམ་བཅོ་ལྔ་བསྡོམས་ཏེ། བཅུ་ཕྲག་གཉིས་དང་གཅིག་ཏུ་གྱུར་པས་ཉི་ཤུ་རྩ་གཅིག་གོ །དེས་ན་ལས་ཀྱི་ཁྱད་པར་དེ་ལྟ་བུ་དང་ལྡན་པའི་སྒོ་ནས་ཐུན་མོང་དང་ཐུན་མོང་མ་ཡིན་པའི་ཡུལ་ཐམས་ཅད་ལ་ཡང་དེ་ལྟར་འཇུག་པར་བྱེད་པ་ཡིན་ནོ།།

གཉིས་པ་རྒྱས་པར་བཤད་པ་ལ་གཉིས་ཏེ། ཐུན་མོང་གི་ལས་བསྟན་པ། ཁྱད་པར་གྱི་ལས་བཤད་པའོ། །༼༡༤༢༽དང་པོ་ནི།

གོང་དུ་བཞག་པའི། ཡུལ་རིག་པ་དང༌། ཞེས་པ་ནས། ཡོངས་སུ་མྱོང་བའོ། །ཞེས་པའི་བར་གྱིས་བསྟན་ཏེ།

ཡུལ་རིགས་པ་དང་། མཚན་ཉིད་རིག་པ་དང་། དུས་རིག་པ་དང་། སྐད་ཅིག་མའི་རྒྱུན་རིག་པ་དང་།

ལས་ལ་འཇུག་པ་དང་། གང་གིས་འབྲས་བུ་ཡོངས་སུ་མྱོང་བའོ།།

དེ་ཡང་ཡིད་ཀྱི་ལས་གཉིས་ཀྱི་ཐུན་མོང་བ་སྒོ་ལྔའི་རྣམ་ཤེས་ལྔ་པོ་རིག་པ་དང༌། འདོད་ཡོན་གྱི་ཡུལ་རིག་པ་དང༌། དུས་ད་ལྟ་བ་ཀུན་ཀྱང་རིག་པ་ཡིན་མོད། སྤྱིའི་ལས་རྣམས་སུ་འདུ་ལ། ཁྱད་པར་གྱི་ལས་ནི། ཡུལ་གྱི་ཆོས་སྣ་ཚོགས་པ་དང་སྤྱོད་ཡུལ་ཐམས་ཅད་རིག་པ་དང༌། ཆོས་རྣམས་ཀྱི་སྤྱི་དང་རང་གི་མཚན་ཉིད་ཤེས་ཤིང་རིག་པ་དང༌། དུས་གསུམ་ཐམས་ཅད་རིག་པ་དང༌། དངོས་པོ་སྐད་ཅིག་མ་དང་ཤེས་པ་སྐད་ཅིག་མའི་རྒྱུན་རིག་ཅིང་ཤེས་པ་དང༌། དགེ་མི་དགེ་ལུང་མ་བསྟན་གྱི་བྱ་བའི་ལས་གསུམ་ཀ་ལ་འཇུག་པ་ཤེས་པ་དང༌། དགེ་སྡིག་གང་གི་རྣམ་སྨིན་གྱི་འབྲས་བུ་རྣམས་ཚོར་བའི་སྒོ་ནས་ཡོངས་སུ་མྱོང་བར་རིག་པ་སྟེ་དེ་ལྟར་རྣམ་གྲངས་དྲུག་ཏུ་བསྟན་པའོ།།

གཉིས་པ་ཁྱད་པར་གྱི་ལས་བཤད་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། ཡུལ་འདི་རྒྱ་ཆེར་བཤད། །ཅེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། གསང་བ་མཆོག་གི་བདག་པོ་དེ།།

གསང་བ་མཆོག་གི་དགྱེས་པ་ན། །དགོངས་ཏེ་རྒྱུད་འདི་རྒྱ་ཆེར་བཤད།།

ལང་ཀའི་བདག་པོ། ཞེས་བོས་ནས་ཁུངས་དང་འབྲེལ་བར་ཡིད་ཀྱི་ཁྱད་པར་གྱི་ལས་ཉེ་བར་སྟོན་པ་ནི་འདི་ལྟ་སྟེ། སྟོན་པ་གསང་བའི་སྐུ་གསང་བ་མཆོག་གི་བདག་པོ་དེ་ཉིད། གསང་བ་མཆོག་གི་དགྱེས་པའི་གནས་ཡུམ་གྱི་ལྷུམས་ན་བཞུགས་ནས་གསང་བའི་ཆོས་ཉིད་སྟོན་པ་ན། འགྲ་ོབ་ལས་ཀྱི་བགོ་སྐལ་ལ་སྤྱོད་པ། ལས་ཀྱིས་བསྒྱངས་པ་ལ་སོགས་པ་རྣམས་ཀྱིས་གློ་བུར་གྱི་བསྒྲིབས་པས་ངེས་པའི་གསང་བ་མ་མཐོང་བར་མུན་པའི་སྤྱོད་ཡུལ་ཅན་དུ་གྱུར་པ་ལ་དགོངས་ཏེ། དེ་དག་འདུལ་བའི་ཆེད་དུ་མུན་པའི་ཡུལ་འདི་མཚན་མ་ཤ་སྟག་ཏུ་རྒྱ་ཆེར་བཤད་དེ་བཀའ་སྩལ་པར་མཛད་དོ། །དེ་ནི། བློ་ལྡན་རྣམས་ལ་འདི་བརྗོད་ཀྱིས། །བླུན་པོའི་ཆེད་དུ་ཤེས་པར་གྱིས། །ཞེས་གསུངས་པའི་ཡང་ཕྱིར་རོ།།

གཉིས་པ་རྒྱས་པར་བཤད་པ་ལ་ལྔ་གསུམ་བཅོ་ལྔ་སྟེ། ལྔ་ཕྲག་དང་པོ་ཚེ་འདིའི་ལས་སུ་བསྟན་པ། ལྔ་ཕྲག་བར་པ་ཚེ་འདིའི་དབང་དུ་བསྟན་པ། ལྔ་ཕྲག་ཐ་མ་ཚེ་འདི་དང་བར་མ་དང་ཕྱི་མའི་དབང་དུ་བསྟན་པའོ། །དང་པོ་ལ་ལྔ་སྟེ། དམིགས་པ་ལ་རྣམ་པར་རྟོག་པའི་ལས་བཤད་པ། དམིགས་པ་ལ་ཉེ་བར་སེམས་པའི་ལས་བསྟན་པ། ར་རོ་བར་བྱེད་པའི་ལས་བཤད་པ། ༼༡༤༣༽སྨྱོ་འབོག་ལ་སོགས་པར་བྱེད་པའི་ལས་བསྟན་པ། གཉིད་ལོག་པར་བྱེད་པའི་ཡིད་ཀྱི་ལས་བཤད་པའོ། །དང་པོ་ནི།

དང་པོ་རྣམ་རྟོག ཅེས་པ་ནས། རྣམ་པར་རྟོག་པའོ། །ཞེས་པའི་བར་གྱིས་བསྟན་ཏེ།

དང་པོ་རྣམ་རྟོག་བདུན་རྟོག་པ། །མཚན་མ་ཅན་དང་མཚན་མ་ཡིན།།

རང་གི་ངང་གི་འཇུག་ཚོལ་བ། །སོ་སོར་རྟོགས་དང་ཉོན་མོངས་ཅན། །དེ་མིན་རྣམ་པར་རྟོག་པའོ།།

དེ་ལ་ལྔ་ཕྲག་གསུམ་གྱི་དང་པོ་བསྟན་པའི་ཕྱིར་འདི་ལྟར་གསུངས་ཏེ། ལྔ་ཕྲག་ཐོག་མའི་དང་པོ་དམིགས་པ་ལ་རྣམ་པར་རྟོག་པའི་ཡིད་ཀྱི་ལས་དེ་ལའང་རྣམ་གྲངས་བདུན་དུ་རྣམ་པར་རྟོག་པ་ཡོད་དེ། གང་ཞེ་ན། སྔར་བྱུང་བའི་མཐོང་ཐོས་ཀྱི་ཐ་སྙད་ལ་མཁས་པ་མི་རྒན་ལྟར་དུ། སྔོན་མཐོང་བ་དང་ཐོས་པ་ལ་སོགས་པའི་རང་བཞིན་ལ་རྟོག་པའི་མཚན་མ་ཅན་དུ་གསལ་བར་ཉམས་སུ་མྱོང་བའི་དོན་དང་ཐ་སྙད་ལ་མཁས་པའི་རྣམ་པར་རྟོག་པ་དང་གཅིག འབྱུང་བར་འགྱུར་པའི་མཐོང་ཐོས་ལ་དགའ་བ་བུ་ཆུང་ལྟར་དུ། ཐ་སྙད་ལ་མི་མཁས་ཀྱང་གང་མ་འོངས་པའི་ཡུལ་ལ་རྟོག་པ་སྒྲ་དོན་གྱི་སྤྱི་ཙམ་ལ་དཔྱད་པ་ལྟ་བུ་དང་ཕྱིས་འབྱུང་བའི་ཐོས་པའི་དོན་དག་བློ་ལ་ཡོད་པ་རྣམས་ཀྱི་མིང་དང་དོན་ཡན་ཆད་སྦྱོར་ཞིང་དཔེ་དོན་བསྡེབས་ཏེ་བརྗོད་པ་ཞེའམ། འདུས་མ་བྱས་བཞི་ལ་རྟོག་པ་ལྟ་བུ་མཚན་མ་མིན་པ་ལ་རྣམ་པར་རྟོག་པ་དང་གཉིས། ཡིད་ཀྱི་ཡུལ་ཉེ་བར་གནས་པ་ལ་རང་གི་ངང་གིས་ཡུལ་གྱི་སྟོབས་ཀྱིས་འཇུག་པར་བྱེད་པའི་རྣམ་པར་རྟོག་པ་ཡིད་ཀྱི་ལས་སུ་གྱུར་པ་དང་གསུམ། ཡུལ་དཀར་ནག་ལ་སོགས་པ་གང་ཡང་ཀུན་ཏུ་ཚོལ་བའི་ཡིད་ཀྱིས་ཡོངས་སུ་ཚོལ་ཞིང་དཔྱོད་པའི་རྣམ་པར་རྟོག་པ་དང་གཏན་ལ་འབེབས་པར་བྱེད་པའི་ཡིད་ཀྱི་ལས་དང་བཞི། ཡུལ་དུ་བཞག་པ་གང་དེ་ལ་སོ་སོར་རྟོག་ཅིང་ཡུལ་ལ་གཅོད་དེ་སྤྱོད་བདོ་བའི་རྣམ་པར་རྟོག་པ་དང༌། འདི་ཉིད་ཡིན་ནོ་ཞེས་ངེས་པར་འཇོག་པར་བྱེ་བྲག་ཕྱེད་པར་ཤེས་པའི་ཡིད་ཀྱི་ལས་གཉིས་གཅིག་ཏུ་བྱས་པ་དང་ལྔ། ཉོན་མོངས་པ་ཅན་གྱི་རྣམ་པར་རྟོག་པ་སྔོན་ཉམས་སུ་མྱོང་བའི་དོན་ལས་སྔར་འདས་པ་དང་མ་འོངས་པ་ལ་མངོན་པར་དགའ་བ་དང་ལྡན་ཞིང༌། ད་ལྟར་བྱུང་བ་ལ་ཆགས་ཤིང་འདོད་པའི་རྟོག་པ་དང་གནོད་པའི་སེམས་རྟོག་གམ། ཉོན་མོངས་ཤིང་སྡུག་བསྔལ་བའམ་དེ་ལ་རྟོག་པའི་ཡིད་ཀྱི་ལས་དང་དྲུག དགེ་སྡིག་དེ་གཉིས་གང་ཡང་མིན་པར་ལུང་མ་བསྟན་གྱི་སྤྱོད་ཡུལ་ལམ་བཟོ་གནས་བྱེད་པ་ལྟ་བུ་ལུང་དུ་མ་བསྟན་པའི་ལས་ལ་རྣམ་པར་རྟོག་པ་སྟེ་དེ་ལྟར་བདུན་དུ་ཡོད་པའོ།།

གཉིས་པ་དམིགས་པ་ལ་ཉེ་བར་སེམས་པའི་ལས་བསྟན་པ་ནི།

གཉིས་པ་ཉེ་བར། ཞེས་པ་ནས། ༼༡༤༤༽རིགས་མིན་གཉིས་ཀ་མིན། །ཞེས་པའི་བར་གྱིས་བསྟན་ཏེ།

གཉིས་པ་ཉེ་བར་སེམས་གསུམ་སྟེ། །རིགས་བསྐྱེད་རིགས་མིན་གཉིས་ཀ་མིན།།

ལྔ་ཕྲག་དང་པོའི་གཉིས་པ་དམིགས་པ་ལ་ཉེ་བར་སེམས་པའི་ཡིད་ཀྱི་ལས་ལའང་གསུམ་སྟེ། དང་པོ་རིགས་པ་དང་མཐུན་པས་བསྐྱེད་པའི་རྟོག་པ་ལའང་རིག་པའི་ཤེས་རབ་གསུམ་སྟེ། རང་གི་རྟོག་པ་ལས་བྱུང་བའི་ཤེས་པ་ནི་ཕྱིན་ཅི་ལོག་བཞི་ལ་སོགས་པ་མི་བདེན་པ་རྣམས་དང་བྲལ་ཏེ་སྒྲོ་སྐུར་མི་བྱེད་པའི་ཤེས་རབ་དང༌། ལུང་བསྟན་པའི་ཤེས་པ་ཐོས་པ་ལས་བྱུང་བའི་ཤེས་རབ་ཀྱིས་གང་ཇི་ལྟ་བུ་བཞིན་དུ་རྟོག་པ་དང་ཡོངས་སུ་ཤེས་པའོ། །ཡང་ན་སྒྲོ་སྐུར་མི་བྱེད་པ་འདི་ལ་སྦྱར་རོ། །མངོན་པར་རྟོགས་པ་ལས་བྱུང་བའི་ཤེས་པ་ནི་ཡང་དག་པ་ཇི་ལྟ་བ་བཞིན་དུ་ཤེས་པ་སྟེ། འཇིག་རྟེན་ལས་འདས་པ་མཐོང་བའི་ལམ་སྐྱེས་པ་ཡན་ཆད་དེ་དེ་ལྟར་གསུམ་མོ། །གཉིས་པ་གོང་མ་དེ་དག་དང་མི་ལྡན་པའི་རིགས་པ་མིན་པས་སྐྱེད་པའི་ཤེས་རབ་ནི་བཤད་པའི་ཤེས་པ་གསུམ་དང་མི་མཐུན་པའི་རྣམ་པར་རྟོག་པ་གསུམ་སྟེ་མི་བདེན་པ་རྣམས་སོ། །གསུམ་པ་གཉིས་ཀ་མིན་པའི་ཤེས་པ་སྐྱེ་བས་ཐོབ་པའི་ཤེས་རབ་ནི། ལུང་དུ་མ་བསྟན་པའི་ཤེས་པ་ཞེའམ། མདོར་ན་འགྲོ་བ་སྐྱེས་མ་ཐག་པར་ལྡན་པའི་ཤེས་རབ་བོ།།

གསུམ་པ་ར་རོ་བར་བྱེད་པའི་ལས་བཤད་པ་ནི།

གསུམ་པ་རྨོངས་བྱེད། ཅེས་པ་ནས། ཚད་ལས་འདས་པའོ། །ཞེས་པའི་བར་གྱིས་བསྟན་ཏེ།

གསུམ་པ་རྨོངས་བྱེད་དཔའ་བྱེད་རྐྱེན། །གང་འདིར་འབྱུང་འགྱུར་དབང་རྟེན་འགྱུར།།

དབང་པོའི་འབྱུང་འགྱུར་རྣམ་ཤེས་ཀྱི། །དེ་དང་ཆ་མཐུན་འབྱུང་ཆ་འཐུན།།

ཉམས་ཆུང་བ་དང་མ་གོམས་དང་། །རྣོ་དང་ཚད་ལས་འདས་པའོ།།

ལྔ་ཕྲག་དང་པོའི་གསུམ་པ་ར་རོ་བར་བྱེད་པའི་ཡིད་ཀྱི་ལས་ནི། དྲན་པ་རྨོངས་ཤིང་ཉམས་པར་བྱེད་པ་དང་སེམས་དཔའ་བ་དང་བག་མེད་པར་བྱེད་པའི་རྐྱེན་དུ་གྱུར་པའི་ཆང་དང་སྦྲང་ཆང་ལྟ་བུར་མྱོས་པར་འཐུང་ན། གང་གི་དུས་འདིར་ལུས་ཀྱི་འབྱུང་བ་བཞི་ཆ་མ་སྙོམས་པར་འགྱུར་བའི་དབང་གིས་དབང་པོའི་རྟེན་འགྱུར་བའི་ཕྱིར་དབང་པོའི་འབྱུང་བ་རྣམས་ཀྱང་འགྱུར་བའི་ཤུགས་ཀྱིས་རྣམ་ཤེས་རྣམས་ཀྱང་སྤྱོད་ཡུལ་སྔ་མ་ལས་འགྱུར་ཏེ་ངོ་བོ་འགྱུར་བ་དང༌། རྣམ་ཤེས་གྱུར་པ་དེ་དང་ཆ་མཐུན་པར་ལུས་ཀྱི་འབྱུང་བའི་སྤྱོད་ཡུལ་ཡང་རྐྱེན་དེ་ཡིས་དེ་ལྟར་ཆ་མཐུན་ཅན་དུ་འགྱུར་བ་དང༌། དེ་དག་གི་དབང་གིས་ལུས་ཉམས་ཆུང་བ་དང༌། སྔར་འཐུང་པ་ལ་མ་གོམས་པའམ། སྔོན་གོམས་པ་རྣམས་ཀྱང་མ་གོམས་པ་ལྟར་ཤེས་པ་མྱོས་པས་བརྗེད་དེ་ཤེས་པའི་ལས་ཀུན་མི་ཤེས་པར་འགྱུར་བ་དང༌། ཆང་བཟང་པོ་རྣོ་བའི་མཐུའམ། ཤེས་པ་སླར་དཔའ་བས་རྣོ་བར་འགྱུར་བ་དང༌། ཆང་མང་པོ་ཚད་ལས་འདས་པར་འཐུང་བའམ་༼༡༤༥༽ཚད་ལས་འདས་ཏེ་ཤེས་པ་སྔོན་བས་གསལ་བར་འགྱུར་བ་སྟེ་དེ་ལྟར་དྲུག་པོ་གང་ཡིན་པའང་ཡིད་ཀྱི་ལས་སུ་གྱུར་པའོ།།

བཞི་པ་སྨྱོ་འབོག་ལ་སོགས་པར་བྱེད་པའི་ལས་བསྟན་པ་ནི།

བཞི་པ་བླ་འཁྱལ། ཞེས་པ་ནས། རྒྱུར་དང་གཞན་གྱིས་བརླམས། །ཞེས་པའི་བར་གྱིས་བསྟན་ཏེ།

བཞི་པ་བླ་བཀྱལ་སྙིང་ཁྲིན་དང་། །གང་མ་སྙོམས་འཇིགས་སྐྲག་པ་དང་།།

གནད་དུ་གྱུར་དང་གཞན་གྱིས་བརླམས།།

ལྔ་ཕྲག་དང་པོའི་བཞི་པ་སྨྱོ་འབོག་བྱེད་པའི་ཡིད་ཀྱི་ལས་ནི། བླ་འཁྱལ་བའམ་འཆལ་ཞིང་སྨྱོ་བར་བྱེད་པ་དང༌། སྙིང་ཁྲིན་ནམ་སྙིང་སྲན་དུ་གྱུར་པའི་སྔོན་གྱི་མཁོན་རྙིང་ལྡང་བ་ཞེ་ལ་བྱེད་པ་དང༌། ལུས་ཀྱི་ཁམས་གང་ཡིན་པ་མ་སྙོམས་པ་དང༌། ཤིན་ཏུ་འཇིགས་ཤིང་སྐྲག་པ་ཡིད་ལ་བྱེད་པའི་སེམས་ཀྱི་ལས་དང༌། ལུས་ཀྱི་གནད་དུ་ཡུལ་བབ་སྟེ་བརྒྱབ་པས་གཟེར་ནད་ལ་སོགས་པ་ཚོར་བ་དྲུག་པོའི་སྡུག་བསྔལ་དུ་གྱུར་པ་དང་། གདོན་བགེགས་དང་འབྱུང་པོ་ལ་སོགས་པ་གཞན་གྱིས་ཡིད་བརླམས་པས་འབོགས་པ་སྟེ། དྲུག་པོ་དེ་རྣམས་ཀྱང་ཡིད་ཀྱི་ལས་ཡིན་ནོ།།

ལྔ་པ་གཉིད་ལོག་པར་བྱེད་པའི་ཡིད་ཀྱི་ལས་བཤད་པ་ནི།

ལྔ་པ་ནང་འཇུག ཅེས་པ་ནས། གོམས་དང་གཞན་རྐྱེན་འགྱུར། །ཞེས་པའི་བར་གྱིས་བསྟན་ཏེ།

ལྔ་པ་ནང་འཇུག་ཉམ་ཆུང་བ། །ངལ་དང་གྲགས་དང་འཐིབ་པ་དང་།།

བཏང་དང་གོམས་དང་གཞན་རྐྱེན་འགྱུར།།

ལྔ་ཕྲག་དང་པོའི་ལྔ་པ་གཉིད་ལོག་པར་བྱེད་པའི་ཡིད་ཀྱི་ལས་ནི། སེམས་རང་དབང་མེད་པར་ནང་དུ་འཇུག་པ་དང༌། ལུས་ཉམ་ཆུང་བ་དང༌། ལུས་སེམས་ངལ་ཞིང་དུབ་པ་དང༌། གཉིད་ཀྱི་རྒྱུ་ཤ་ཆང་ལ་སོགས་པའི་ཟས་དྲགས་པར་ཟོས་པ་དང༌། སེམས་རང་བཞིན་གྱིས་མྱོས་ཤིང་འཐིབས་པ་དང༌། སེམས་ལས་ཀུན་བོར་ཏེ་བྱ་བ་བཏང་བ་དང༌། གཉིད་ལང་ཅན་གཉིད་ལ་གོམས་ཤུགས་ཆེ་བ་དང༌། ནད་ལ་སོགས་པའི་གཞན་རྐྱེན་གྱིས་དབང་དུ་གྱུར་པ་དང་བརྒྱད་ཀྱང་ཡིད་ཀྱི་ལས་སོ།།

གཉིས་པ་ལྔ་ཕྲག་བར་མ་ལའང་ལྔ་སྟེ། ཡིད་ཕྱིར་འབྱུང་བར་བྱེད་པའི་ཡིད་ཀྱི་ལས་བསྟན་པ། ལུས་ངག་གི་ལས་ལ་འཇུག་པར་བྱེད་པའི་ཡིད་ཀྱི་ལས་བཤད་པ། ཆགས་པ་དང་བྲལ་བར་བྱེད་པའི་ཡིད་ཀྱི་ལས་བསྟན་པ། ཆགས་པས་སེམས་ཉམས་པར་བྱེད་པའི་ཡིད་ཀྱི་ལས་བཤད་པ། དགེ་བའི་རྩ་བ་རྒྱུན་ཆད་པར་བྱེད་པའི་ཡིད་ཀྱི་ལས་བསྟན་པའོ། །དང་པོ་ནི།

ལྔ་གཉིས་དང་པོ། ཞེས་པ་ནས། དེར་འཇུག་དེ་ཉིད་དོ། །ཞེས་པའི་བར་གྱིས་བསྟན་ཏེ།

ལྔ་གཉིས་དང་པོ་ཕྱིར་བྱུང་བ། །ལྟས་དང་གང་འདིར་སངས་པ་དང་། །གང་དེ་གློང་བས་ཀུན་དཀྲིས་ཟད།།

གཟའ་གཏད་རྐྱེན་གྱིས་དེ་འཇོམས་དང་། །གཞན་གྱི་རྐྱེན་གྱིས་འགྱུར་བའོ།།

ཐང་ཅིག་འགགས་དང་ད་སངས་པ། །དེ་ཡང་དེར་འཇུག་དེ་ཉིད་དོ།།

ལྔ་ཕྲག་བར་མ་འདི་ལ་སོ་སོའི་ཡན་ལག་གི་བྱེ་བྲག་རྣམས་བགྲང་ན་སུམ་ཅུར་འགྱུར་ཏེ། དེ་ཡང་ལྔ་ཕྲག་གཉིས་པའི་དང་པོ་ཉམས་བདེ་བའི་བྱེ་བྲག་གིས་སེམས་ཕྱིར་ཞེས་ཕྱི་རོལ་དུ་བྱུང་ཞིང་ཡུལ་ལ་འཇུག་པའི་ལས་བསྟན་པ་ལའང་༼༡༤༦༽ལུས་ཀྱི་ཁམས་རྟས་པ་དང༌། གང་འདིར་འཐིབས་པ་དང་གཉིད་ལས་སངས་པར་གྱུར་པ་དང༌། ལུས་གང་དེ་སྒྱིད་ལུག་སྟེ་དྲན་པ་བློང་བས་ཀུན་དཀྲིས་ཀྱིས་ལུས་སྙོམས་པར་བྱེད་པའི་རྐྱེན་ཟད་པ་དང༌། གང་བསམ་པའི་དམིགས་པ་སྔ་མོར་འདི་བྱ་སྙམས་ཏེ་ཆེད་དུ་གཟའ་གཏད་བྱས་པའི་རྐྱེན་གྱིས་དེ་དག་འཇོམས་ཤིང་འཇིག་པར་བྱེད་པ་དང༌། ཕྱི་རོལ་གྱི་ཡུལ་གཞན་གྱི་རྐྱེན་གྱིས་ཡིད་སློང་བའམ། སྒྲ་དྲག་པོ་དང་བྱམས་པའམ་ཡིད་དུ་འོང་བའི་རྐྱེན་ལ་སོགས་པས་ལྡང་བར་འགྱུར་པའོ། །ཡང་ཡུད་ཙམ་སུམ་ཅུའི་ཆ་གཅིག་ལྟ་བུར་ཐང་ཅིག་སྟེ་དེ་ཙམ་དུ་སེམས་ཀྱི་དྲན་པ་འགགས་ཤིང་ཉམས་ཏེ་བརྒྱལ་འབོགས་སུ་གྱུར་པ་དང༌། དེ་ལས་སླར་ཡང་སངས་པ་དང༌། དེ་ལྟར་སངས་པ་དེ་ཡང་སླར་ལ་གཉིད་ལྟ་བུ་དེར་འཇུག་པར་བྱེད་པ་དང་དྲུག་པོ་དེ་དག་ཀྱང་ཡིད་ཀྱི་ལས་ཉིད་དོ།།

གཉིས་པ་ལུས་ངག་གི་ལས་ལ་འཇུག་པར་བྱེད་པའི་ཡིད་ཀྱི་ལས་བཤད་པ་ནི།

གཉིས་པ་གཉིས་བྱེད། ཅེས་པ་ནས། འབྱུང་བ་གཡོ་བར་བྱེད། །ཅེས་པའི་བར་གྱིས་བསྟན་ཏེ།

གཉིས་པ་གཉིས་བྱེད་ལ་འཇུག་པ། །འདིའོ་སྙམ་དུ་སྔོན་འགྲོ་དང་།།

འདུན་པ་སྐྱེ་དང་འབད་རྩོལ་སྦྱོར། །ཐམས་ཅད་འབྱུང་བ་གཡོ་བར་བྱེད།།

ལྔ་ཕྲག་བར་མའི་གཉིས་པ་ལུས་ངག་གཉིས་ཀྱང་ལས་བྱེད་པ་ལ་འཇུག་པར་བྱེད་པ་བརྟས་པས་སྒོ་གསུམ་ལས་ལ་འཇུག་པའང༌། ལས་བྱ་རྒྱུ་འདི་ཉིད་བྱའོ་སྙམ་དུ་སེམས་པ་སྔོན་དུ་འགྲོ་བའམ་སྐྱེ་བ་དང༌། གང་བྱ་བར་བསམ་པའི་ལས་དེ་ལ་འདུན་ཏེ་མོས་པ་སྐྱེ་བ་དང༌། དེ་ལ་འབད་རྩོལ་གྱིས་སྦྱོར་བའི་བརྩོན་འགྲུས་བྱེད་པ་དང༌། དེ་དག་གི་སྒོ་ནས་སྒོ་གསུམ་གྱི་འདུ་བྱེད་ཐམས་ཅད་འབྱུང་བ་དང་གཡོ་ཞིང་སྐྱོད་པར་བྱེད་པ་དང་བཞི་པོ་དག་ཀྱང་ཡིད་ཀྱི་ལས་ཡིན་ནོ།།

གསུམ་པ་ཆགས་པ་དང་བྲལ་བར་བྱེད་པའི་ཡིད་ཀྱི་ལས་བསྟན་པ་ནི།

གསུམ་པ་ཆགས་དང༌། ཞེས་པ་ནས། ཡིད་ལ་བྱེད་པས་བྱེད། །ཅེས་པའི་བར་གྱིས་བསྟན་ཏེ།

གསུམ་པ་ཆགས་དང་བྲལ་བྱེད་པ། །ཆགས་པ་ཡུལ་གནས་ལ་སྐྱོ་ཞིང་།།

གཞན་གྱིས་བྲལ་དང་བར་གཅོད་དང་། །ཡང་དག་དེ་ལས་བྱེད་པ་བྱེད།།

ལྔ་ཕྲག་གཉིས་པའི་གསུམ་པ་འདོད་ཆགས་དང་བྲལ་བར་བྱེད་པའི་ཡིད་ཀྱི་ལས་བསྟན་པ་ལའང༌། སྔར་ཆགས་ཤིང་ཞེན་པའི་ཡུལ་དང་གནས་ལ་སེམས་རབ་ཏུ་སྐྱོ་ཤིང་སུན་པ་སྐྱེ་བ་དང་། ཡུལ་གནས་ཡིད་དང་འཐད་པ་གཞན་མཐོང་བའི་རྐྱེན་གྱིས་སྔ་མ་དང་བྲལ་བར་བྱེད་པ་དང་། གཉེན་པོ་སྐྱེས་པའི་རྐྱེན་གྱིས་ཆགས་པའི་བར་དུ་གཅོད་པ་དང༌། ཡང་དག་པའི་ཆོས་ཉིད་ཀྱི་དོན་ཡིད་ལ་བྱེད་དེ་འདྲིས་གོམས་སུ་བྱས་པས་ཆགས་པ་དང་བྲལ་བར་བྱེད་པ་བཞི་ཡང་ཡིད་ཀྱི་ལས་ཡིན་ནོ།།

བཞི་པ་ཆགས་པས་སེམས་ཉམས་པར་བྱེད་པའི་ཡིད་ཀྱི་ལས་བཤད་པ་ནི།

བཞི་པ་ཆགས་པས། ཞེས་པ་ནས། གཞན་གྱིས་ཟིན་པའོ། །ཞེས་པའི་བར་གྱིས་བསྟན་ཏེ།

བཞི་པ་ཆགས་པ་ཉམས་འགྱུར་བ། །རྨོངས་པའི་ལྟ་བ་བརྟན་པར་གནས། །གང་འདིར་གོམས་པ་ཆུང་བ་དང་།།

རྣམ་པར་རྟགས་དང་མཚན་མ་དང་། །དེ་ཉིད་ཡིད་ཉམས་སོགས་གྱུར་པས།།

ཡང་དག་བླངས་ཏེ་བདེར་འཇུག་པ། །སྒྲིབ་དང་གཞན་གྱིས་ཟིན་བའོ།།

ལྔ་ཕྲག་གཉིས་པའི་བཞི་༼༡༤༧༽པ་ཆགས་པ་དང་བྲལ་བ་ལས་སླར་ཡང་ཆགས་པས་ཉམས་པར་འགྱུར་བའི་ཡིད་ཀྱི་ལས་བསྟན་པ་ཡང༌། ཆགས་པའི་ངོ་བོ་མ་རིག་པའམ་རྨོངས་པའི་ལྟ་བ་རྣམས་སྔར་སྟོབས་ཅན་དུ་བརྟན་པར་གནས་པ་དང༌། གང་འདིར་ཡང་དག་པའི་ལྟ་བའི་དོན་ལ་མ་འདྲིས་པས་གོམས་པ་ཆུང་བ་དང༌། ཆགས་ཡུལ་གྱི་དངོས་པོ་གང་ཡང་རུང་བའི་བྱེ་བྲག་གི་རྣམ་པ་དང་རྟགས་དང་མཚན་མ་ཡོངས་སུ་གཟུང་ནས་ཞེན་ཞིང་རྟོག་པ་དང༌། ཇི་སྐད་དུ། ཕྲ་རྒྱས་སྤངས་པ་མ་ཡིན་དང༌། །ཡུལ་ནི་ཉེ་བར་གནས་པ་དང༌། །ཚུལ་བཞིན་མ་ཡིན་ཡིད་བྱེད་ལས། །ཉོན་མོངས་རྒྱུ་ནི་ཚང་བ་ཡིན། །ཞེས་འབྱུང་བ་ལྟར། གང་དེ་དག་ལ་བརྟེན་ནས་ཚུལ་བཞིན་མ་ཡིན་པར་ཡིད་ལ་བྱེད་པ་ལས་ཡིད་ཀྱི་ཤེས་པ་ཡང་དག་པའི་ལྟ་བ་མ་ཆགས་པ་ལས་ཉམས་པ་དང༌། ལ་སོགས་ཞེས་དངོས་པོ་བསྡུ་བ་ནི། དེ་ལྟར་བསླད་པའི་ཞེན་པ་དེས་ཡིད་ལོག་པ་ལ་ཆགས་པར་འགྱུར་བ་ཡིན་ལ། དེ་བས་ན་རྒྱུ་དེས་འདོད་ཆགས་ཡང་དག་པར་བླངས་ཏེ་དང་དུ་ལེན་པ་དང༌། ཆགས་པ་དེར་ངེས་པར་འཇུག་པར་བྱེད་པ་དང༌། སྒྲིབ་པ་དེས་དམ་པའི་དོན་མཐོང་དུ་མི་སྟེར་བ་དང༌། ཡུལ་སྡུག་གུ་གཞན་གྱིས་ཟིན་ཏེ་སེམས་རང་དབང་མེད་པར་ཕྲོགས་པ་དང་དགུ་ཡང་ཡིད་ཀྱི་ལས་སུ་གྱུར་པའོ།།

ལྔ་པ་དགེ་བའི་རྩ་བ་རྒྱུན་ཆད་པར་བྱེད་པའི་ཡིད་ཀྱི་ལས་བསྟན་པ་ནི།

ལྔ་པ་དོན་རྒྱུན། ཞེས་པ་ནས། གནས་བྱེད་དོན་རྒྱུན་ཆད། །ཅེས་པའི་བར་གྱིས་བསྟན་ཏེ།

ལྔ་པ་དོན་རྒྱུད་ཆད་བྱེད་པ། །གསལ་དང་ལོག་པའི་སྟོབས་ལྡན་དང་། །ལོངས་སྤྱོད་འཐུན་པའི་གྲོགས་རྙེད་དང་། །དེ་དག་རྒྱུན་མི་འཆད་འགྲོ་དང་། །རྒྱུན་དུ་གཅོད་ལྡོག་མི་བྱེད་པ། །ལོག་རྒྱུད་གནས་བྱེད་དོན་རྒྱུན་ཆད།།

ང་ཕྲག་གཉིས་པའི་ལྔ་པ་ཡང་དག་པའི་དོན་གྱི་དགེ་བའི་རྩ་བ་རྒྱུན་གཅོད་པར་བྱེད་པའི་ཡིད་ཀྱི་ལས་བསྟན་པ་ལའང་མཚན་མའི་དངོས་པོར་ཞེན་པའི་ཡུལ་གསལ་བ་དང༌། ཕྱིན་ཅི་ལོག་ཏུ་གྱུར་པའི་ལྟ་བ་སྟོབས་དང་ལྡན་པ་དང༌། འདོད་པའི་ཡོན་ཏན་ཆང་ལ་སོགས་པའི་ལོངས་སྤྱོད་དམན་པ་ལོག་ལྟ་དང་མཐུན་པའི་རྐྱེན་དང་ཕྲད་པའམ་རང་དང་མཚུངས་པའི་སྡིག་པའི་གྲོགས་པོ་རྙེད་པ་དང༌། འདོད་པ་དེ་དག་ལ་སྤྱོད་པའི་ཞེན་ཆགས་རྒྱུན་མི་འཆད་པར་དེ་དག་གི་རྗེས་སུ་སེམས་འགྲོ་ཞིང་རྟག་ཏུ་འབྲང་བར་བྱེད་པ་དང༌། དེ་ལྟ་བུའི་དོན་མེད་པའི་ལས་ངན་པ་རྒྱུན་དུ་བྱེད་པ་དེ་ཡི་རྒྱུན་གཅོད་ཅིང་སྤོང་སྟེ་དེ་ལས་སླར་ལྡོག་པར་མི་བྱེད་པ་དང༌། ལོག་པའི་ལྟ་སྤྱོད་དེ་ལ་རྒྱུན་དུ་གནས་ཏེ་བར་མ་ཆད་པར་བྱེད་པ་དང༌། དེའི་དབང་གིས་ཡང་དག་པར་སྤྱོད་པའི་དགེ་བའི་ལས་ཀྱི་དོན་དུ་འཇུག་པ་རྒྱུན་ཆད་པར་བྱས་པ་དང་བདུན་ཡང་ཡིད་ཀྱི་ལས་ཡིན་ནོ། །དེ་དག་ནི་རྒྱན་སྟུག་པོ་བཀོད་པར། ཐོག་མ་མེད་ནས་བསགས་པ་ཡི། །མི་ཡི་རྣམ་སྤྲོས་བག་ཆགས་ཀྱིས། །སྣ་ཚོགས་གནས་ངན་ལེན་པ་དང༌། །སྣ་ཚོགས་རྟོག་པས་ལས་སུ་བརྟགས། །ཞེས་སོགས་ལྟར་རོ།།

གསུམ་པ་ལྔ་ཕྲག་ཐ་མ་བཤད་པ་ལ་ལྔ་སྟེ། དགེ་བའི་རྩ་བ་མཚམས་སྦྱོར་༼༡༤༨༽བར་བྱེད་ཚུལ་བསྟན་པ། འཆི་བར་བྱེད་པའི་ཆོས་ཀྱི་ཁྱད་པར་བཤད་པ། བར་དོའི་ཆོས་དང་མཚན་ཉིད་ཀྱི་རྣམ་བཞག་སྤྲོས་ཏེ་བསྟན་པ། སྐྱེ་གནས་རྣམས་སུ་ཇི་ལྟར་འཇུག་པར་བྱེད་ཚུལ་བཤད་པ། སྐྱེ་བར་བྱེད་པ་སྤྱི་དང་བྱེ་བྲག་གི་རྣམ་གྲངས་བསྟན་པའོ། །དང་པོ་ནི།

ལྔ་གསུམ་དང་པོ། ཞེས་པ་ནས། ལྡོག་པའི་དོན་རྒྱུན་ལྡན། །ཞེས་པའི་བར་གྱིས་བསྟན་ཏེ།

ལྔ་གསུམ་དང་པོ་མཚམས་སྦྱོར་བ། །དེ་ལས་ལྡོག་པའི་དོན་རྒྱུན་ལྡན།།

ལྔ་ཕྲག་གསུམ་པའི་དང་པོ་དགེ་བའི་རྩ་བ་རྣམས་མཚམས་སྦྱོར་བར་བྱེད་པའི་ཡིད་ཀྱི་ལས་བསྟན་པ་ནི། སྔར་བཤད་པ་ལྟར་སྔ་མའི་མི་དགེ་བའི་ཡིད་ཀྱི་ལས་ཕྱིན་ཅི་ལོག་པ་དེ་དག་ལས་སླར་ལྡོག་སྟེ་དགེ་བའི་ལས་ཀྱི་དོན་བཟང་པོ་དང་རྒྱུན་དུ་ལྡན་པར་བྱེད་པའི་ཡིད་ཀྱི་ལས་ཡིན་པས། དེས་ནི་སྔ་མ་ངན་འགྲོའི་སྐྱེ་བ་ལས་ཕྱི་མ་མཐོ་རིས་ཀྱི་སྐྱེ་གནས་སུ་ཡང་མཚམས་སྦྱོར་བར་བྱེད་དོ། །དེའང་སའི་དངོས་གཞི་ལས། ཇི་ལྟར་དགེ་བའི་རྩ་བ་རྣམས་མཚམས་སྦྱོར་བར་བྱེད་ཅེ་ན། རང་བཞིན་གྱིས་དབང་པོ་རྣོ་བ་དང་། མཛའ་བཤེས་དང་ཉེ་དུ་དང་རྟེན་གྲོགས་རྣམས་བསོད་ནམས་བྱ་བ་ལ་མངོན་པར་བརྩོན་པ་མཐོང་བ་དང༌། སྐྱེས་བུ་དམ་པའི་ཐད་དུ་སོང་ནས་དམ་པའི་ཆོས་ཉན་པ་དང༌། ཐེ་ཚོམ་སྐྱེ་ཞིང་ངེས་པར་རྟོགས་པར་བྱེད་དོ། །ཞེས་སོ།།

གཉིས་པ་འཆི་བར་བྱེད་པའི་ཆོས་ཀྱི་ཁྱད་པར་བཤད་པ་ལ་ལྔ་སྟེ། འཆི་བར་འགྱུར་བའི་དུས་བཤད་པ། དུས་མིན་པར་འཆི་བའི་རྐྱེན་བསྟན་པ། འཆི་བའི་འདུ་ཤེས་དང་ལྟས་བཤད་པ། འཆི་ཀའི་བསམ་པའི་ཁྱད་པར་བསྟན་པ། གནད་ཀྱི་སྡུག་བསྔལ་གང་ལ་ཡོད་ཚུལ་བསྟན་པའོ། །དང་པོ་ནི།

གཉིས་པ་ཉིང་མཚམས། ཞེས་པ་ནས། དུས་མ་ཡིན་དེ་ལ། །ཞེས་པའི་བར་གྱིས་བསྟན་ཏེ།

གཉིས་པ་ཉིང་མཚམས་སྦྱོར་བ་ཡི། །འཆི་བའི་ཆོས་ལ་གཉིས་ཡོད་དེ། །དུས་དང་དུས་མ་ཡིན་དེ་ལ།།

ལྔ་ཕྲག་གསུམ་པའི་གཉིས་པ་སྐྱེ་བ་སྔ་ཕྱིའི་སྲིད་པའི་ཕུང་པོ་ཉིང་མཚམས་སྦྱོར་བར་བྱེད་པ་ཡང་ཡིད་ཀྱི་ལས་ཏེ། དེའང་ཇི་ལྟར་ཞེ་ན། ཐ་སྙད་དུ་སྲོག་གི་དབང་པོ་རིས་གཞན་དུ་འཕོ་བར་འགྱུར་བ་ཡི་འཆི་བའི་ཆོས་དེ་ལ་ཡང་དབྱེ་བ་གཉིས་སུ་ཡོད་དོ། །སྔར་གྱི་བསོད་ནམས་ཀྱི་རྒྱུན་ལས་སྐད་ཅིག་ཙམ་དུའང་གནས་པའི་སྐལ་པ་རྫོགས་ནས་ཚེ་ཟད་དེ་འཕོ་བ་ནི་དུས་སུ་འཆི་བ་སྟེ། སའི་དངོས་གཞི་ལས། འདི་ལྟ་སྟེ། འདི་ན་ཁ་ཅིག་ཇི་ལྟར་འཕངས་པའི་ཚེ་རིལ་གྱིས་ཟད་པར་གྱུར་ནས་འཆི་འཕོ་བ་སྟེ། དེ་ནི་དུས་ལ་བབ་ནས་འཆི་བ་ཞེས་བྱའོ། །ཞེས་གསུངས་པ་ཉིད་དང་། དེ་ལྟར་ཚེ་ཚད་མ་རྫོགས་པར་གློ་བུར་དུ་རྐྱེན་༼༡༤༩༽གྱིས་དབང་དུ་གྱུར་ནས་དུས་མ་ཡིན་པར་འཆི་འཕོ་བ་གང་ཡིན་པ་སྟེ། སྔ་མ་ལས། འདི་ལྟ་སྟེ། འདི་ན་ཁ་ཅིག་ཡོ་བྱད་མེད་པའི་འཆི་འཕོ་བ་ལྟ་བུ་ཡིན་ནོ། །ཞེས་སོ། །དེ་ལ་རྣམ་གྲངས་གཞན་ཡང་ཡོད་དེ་འབྱུང་མ་རག་པའོ།།

གཉིས་པ་དུས་མིན་པར་འཆི་བའི་རྐྱེན་བསྟན་པ་ནི།

ཁ་ཅིག་དུས་མིན། ཞེས་པ་ནས། འགྲོ་དང་སྤྱོད་པས་ཉེས། །ཞེས་པའི་བར་གྱིས་བསྟན་ཏེ།

ཁ་ཅིག་དུས་མིན་འཆི་བ་ནི། །དེ་རྐྱེན་ཟད་དང་དེ་གཞན་རྐྱེན། །དེ་ཚེ་ཡུན་རིང་རྒྱུ་ཡོད་ཀྱང་། །ཡུན་རིང་གནས་པའི་རྐྱེན་མ་ཚང་། །ཡང་ན་མ་སྤངས་ལས་ཀྱི་རྐྱེན། །ཚད་ལས་འདས་དང་མི་འཕྲོད་དང་། །གང་མ་སངས་པར་གང་ནོན་དང་། །སྙིང་འཁྱིམས་འབྱིན་པར་མི་བྱེད་དང་། །གང་དེ་འགག་པས་རྒྱུན་འགོག་དང་། །སོ་སོའི་གཉེན་པོ་རྟེན་མི་བྱེད། །མ་གོམས་འཐུན་འཕྲོད་མི་ཤེས་དང་། །དུས་མིན་འགྲོ་དང་སྤྱོད་པས་ཉེས།།

དུས་སུ་འཕོ་བ་མ་ཡིན་པར་འགྲོ་བ་ཁ་ཅིག་དུས་མིན་པར་འཆི་བ་ཡི་ཚུལ་ནི། ཇི་ལྟ་བུ་ཞེ་ན། སྔ་མའི་རྒྱུ་དེ་ཉིད་ཡོད་ཀྱང་ཕན་སྟོངས་བྱེད་པའི་རྐྱེན་རླག་སྟེ་ཟད་པ་དང༌། དེ་ལས་གཞན་པ་དུག་མཚོན་སོགས་གནོད་པའི་རྐྱེན་རྣམས་ཀྱི་དབང་དུ་གྱུར་པས་འཆི་འཕོ་བྱུང་བ་དེ་ཡི་ཚེ་བསོད་ནམས་ཀྱི་རྒྱུན་མ་ཟད་པས་ཡུན་རིང་དུ་གནས་པའི་རྒྱུ་ཡི་སྐལ་པ་ཡོད་ཀྱང་ཚེ་ཡུན་རིང་དུ་གནས་པའི་ཕན་པའི་རྐྱེན་མ་ཚང་བ་ཡིན་ནོ། །དེའི་རྒྱུ་ཡང་བར་བར་དུ་ཡ་ང་བའི་ལས་ཀྱི་སྤྱོད་ལམ་དུ་སྣང་བའི་སྡིག་པ་མ་སྤང་བར་སྤྱད་པའི་ལས་ཀྱི་རྐྱེན་དེ་ལས་གྱུར་པ་སྟེ། ཕྱི་ནང་གི་ལྷ་འཁྲུགས་པ་དང་མུ་གེ་དང་ཐོག་འབབས་པ་དེར་ཕྲད་པ་ལ་སོགས་པ་དང༌། ཕྱི་ནང་གི་འབྱུང་བ་འཁྲུགས་ཏེ་འདུ་བ་བཞིའི་ནད་དང་མེ་ཆུ་ལ་སོགས་པ་འཇིགས་པ་བརྒྱད་ཀྱིས་འཆི་བ་དང༌། གཉིས་ཀ་འཁྲུགས་པས་འཆི་བ་རྐྱེན་གྱི་དབང་གིས་ལྕེ་འབབས་པ་དང༌། ནད་གཞི་གཉིས་ཀ་ལ་སོགས་པ་རྣམས་སོ། །གཞན་ཡང་རྐྱེན་བསྡུས་པ་དགུ་ཡོད་དེ། གང་ཞེ་ན། ཁ་ཟས་ཐང་མ་ལས་མང་དུ་ཟོས་ཏེ་ཚད་ལས་འདས་པ་དང༌། ཡང་ན་མི་ཐུབ་པ་ལ་དོ་བསྡོས་ཏེ་ཚད་ལས་འདས་པའོ། །རང་གི་ནད་གཞི་ལ་མི་འཕྲོད་པའི་ཟས་མི་མཐུན་པ་ཟོས་པ་དང༌། ཡང་ན་མི་འཕྲོད་པའི་གྲོགས་དང་འགྲོགས་པ་དང༌། མི་མ་ཡིན་གཉན་པའི་ས་རུ་བསྡད་པ་དང༌། འབྱུང་བཞི་མི་མཐུན་པའི་སར་བསྡད་པའོ། །ཟས་སྔ་མ་ཟོས་པ་གང་མ་ཞུ་བ་འམ་མ་སངས་པར་གང་ཕྱི་མའི་ཟས་ཀྱིས་ནོན་པར་ཟ་བ་དང༌། ཡང་ན་མི་དང་མཁོན་སྔ་མ་མ་སྦྱང་བར་ཡང་འཐབ་པ་དང༌། མི་མ་ཡིན་སྔ་མས་གནོད་པ་མ་བསལ་བར་ཕྱི་མ་དང་འགྲས་པའོ། །ཟས་ཟོས་པའི་བཤང་པའི་དྲི་མ་རྙིང་པ་བསགས་ཏེ་འཁྱིགས་པའམ་འཁྱིམས་པ་ཕྱིར་མི་ཐོན་པའམ་ཆེད་དུ་འབྱིན་པར་མི་བྱེད་པར་མི་འདོར་པར་བརྣགས་པ་དང༌། གཞན་ཡང་འཁོར་རྙིང་དང་ནད་ཁྲག་ལྟ་བུ་མི་འབྱིན་པ་ཡང་ངོ་། །སྐྱུགས་སྨན་བཏང་ནས་གང་དེ་ཕྱིར་མི་སྐྱུག་པར་ནན་གྱིས་འགེགས་ཏེ་སྐྱུགས་པ་སྡོམ་པས་ཚེའི་༼༡༥༠༽རྒྱུན་འགོག་པ་དང༌། རྩ་ཆུ་འགེགས་པ་ཡང་འདྲའོ། །ནད་ལ་ཕན་པའི་ཆ་རྐྱེན་ནད་སོ་སོའི་གཉེན་པོ་ལྟར་རྫས་དང་སྨན་མི་འཆང་ཞིང་ནད་གཡོག་བརྩེ་ལྡན་དང༌། སྨན་པའི་ངག་མི་ཉན་པར་ཁ་ཟས་སོགས་མཐུན་པ་བསྟེན་པར་མི་བྱེད་པ་དང༌། སྔར་ནད་གང་ལ་གང་ཕན་གྱི་གསོ་བའི་ཐབས་ལ་མ་གོམས་པས་ནད་ཁམས་དང་མཐུན་ཞིང་འཕྲོད་པའི་མཚན་ཉིད་མི་ཤེས་པ་དང༌། ཡང་ན་སྔར་ནད་གཡོག་ལ་མ་གོམས་པས་ནད་པ་ཟས་གང་ལེན་གྱི་མཐུན་འཕྲོད་མི་ཤེས་པའོ། །དགྲ་གདོན་དང་འཕྲད་ཅིང་གཡང་ཁ་སོགས་སུ་དུས་མིན་པར་མཚན་མོ་ལ་འགྲོ་བར་བྱེད་པ་དང་གཞན་གྱི་ཆུང་མ་ལ་མི་ཚངས་པར་སྤྱོད་པས་ཉེས་ཤིང་འཁྲུགས་པ་དང་དགུ་སྟེ། བཅོམ་ལྡན་འདས་ཀྱིས་ཀྱང༌། ཚེ་མ་ཟད་པར་འཆི་བའི་དུས་བྱེད་པ་ནི་རྒྱུ་དགུ་དང་རྐྱེན་དགུ་ཡོད་དོ། །དགུ་གང་ཞེ་ན། ཁ་ཟས་ཚོད་མ་ཟིན་པར་ཟ་བ་དང༌། མི་འཕྲོད་པ་ཟ་བ་དང༌། མ་ཞུ་བར་ཟ་བ་དང༌། མ་ཞུ་བ་བསགས་པ་འབྱིན་པར་བྱེད་པ་དང༌། སྨིན་པ་དགག་པ་དང༌། སྨན་སོ་སོར་མི་བསྟེན་པ་དང༌། གོམས་པ་དང་མ་གོམས་པ་མ་ཤེས་པ་དང༌། དུས་མ་ཡིན་པར་འགྲོ་བ་དང༌། མི་ཚངས་པར་སྤྱོད་པའོ། །ཞེས་གསུངས་ཏེ་དེ་དག་ནི་དུས་མིན་དུ་འཆི་བ་ཞེས་བྱ་སྟེ། དེ་ལྟ་བས་ན་ལུས་འཚོ་བའི་རིམ་གྲོ་ལ་ཆེར་འབད་པར་བྱའོ།།

གསུམ་པ་འཆི་བའི་འདུ་ཤེས་དང་ལྟས་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ན་འདུ་ཤེས། ཞེས་པ་ནས། ལོག་པ་བཏང་སྙོམས་ལྡན། །ཞེས་པའི་བར་གྱིས་བསྟན་ཏེ།

དེ་ན་འདུ་ཤེས་གསུམ་ལྡན་ཏེ། །དོན་དང་ལོག་པ་བཏང་སྙོམས་ལྡན།།

དེ་ལ་འཆི་ཀ་མའི་དུས་དེ་ཡི་ཚེ་ན་འདུ་ཤེས་གསུམ་མམ་སེམས་གསུམ་དང་ལྡན་ཏེ། དོན་དང་ལྡན་པ་དགེ་བའི་སེམས་དང༌། དེ་ལས་ལོག་པ་སྡིག་པའི་སེམས་དང༌། གང་དེ་གཉིས་སུ་ལུང་མ་བསྟན་པ་བཏང་སྙོམས་ཀྱི་སེམས་ཏེ་དེ་ལྟར་གསུམ་དང་ལྡན་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། དགེ་བ་ཅན་གྱི་འདུ་ཤེས་དང་ལྟས་བསྟན་པ། སྡིག་པ་ཅན་གྱི་འདུ་ཤེས་དང་ལྟས་བཤད་པ། བཏང་སྙོམས་པའི་འདུ་ཤེས་དང་ལྟས་བསྟན་པའོ། །དང་པོ་ནི།

དོན་དེ་གང་ལྡན། ཞེས་པ་ནས། གང་འབྱུང་བདེ་བའོ། །ཞེས་པའི་བར་གྱིས་བསྟན་ཏེ།

དོན་དེ་གང་དང་འགྲོ་བ། །སྔོན་དུ་དེ་རྟེན་དེ་དྲན་ནས། །གཞན་གྱིས་གསལ་བར་བྱས་ཀྱང་ནི། །རགས་པར་འབྱུང་བ་དེ་བར་དུ། །འདུ་ཤེས་འཕྲ་བར་རྒྱུ་བའི་ཚེ། །དེ་ལས་ལྡོག་ཅིང་བཏང་སྙོམས་ལྡན། །དེ་སྔོན་དེ་རྟེན་དེ་འབྱུང་ལ། །བཙལ་བར་མི་ནུས་གཞན་དག་གིས། །བསྐུལ་ཀྱང་དྲན་པར་ཡོང་མི་ནུས། །དེ་དང་གང་ལྡན་བདེ་འགྲོ་སྟེ། །མི་ཟད་དྲག་པོའི་ཚོར་བ་ཡང་། །ཉམས་སུ་མྱོང་བར་མི་འགྱུར་རོ། །དེ་ཡི་དུས་ན་གང་མཐོང་བ། །གང་དུ་མ་མཐོང་དེ་ཉིད་མཐོང་། །ཇི་ལྟར་ཉི་མའི་འོད་རྐྱེན་གྱིས། །སྣང་བ་ཁད་ཀྱིས་འབྱུང་བ་བཞིན། །མུན་པའི་ཁམས་ནས་སྣང་བར་འབྱུང་། །རྨི་ལམ་ལྟ་བུར་གཟུགས་སྣང་བ། །ཡིད་འོང་སྣ་ཚོགས་མཐོང་བར་འགྱུར། །དེ་ཡི་དེ་ཀུན་ཤེས་པར་ངེས། །གང་འདིར་རྨད་ནས་དོར་བར་བྱེད། །དྲོད་དང་སྟེང་དུ་ཡལ་བར་འགྱུར།།

གཙུག་ཏོར་གང་བྱུང་བདེ་བའོ།།

དགེ་བ་ཅན་འཆི་ཀ་མའི་མཚན་ཉིད་ཇི་ལྟ་བུ་ཡིན་ཞེ་ན། དགེ་བའི་བག་ཆགས་ཀྱི་དོན་དེ་དང་གང་ཟག་གང་ཞིག་ཡང་དག་པར་ལྡན་པ་དེ་ཉིད་དེ་ནས་འཕོས་ཏེ་གནས་གཞན་གང་དུ་འགྲོ་བ་དེའི་ཚེ། སྔོན་དུ་དགེ་བའི་སྤྱོད་པ་༼༡༥༡༽དེ་ཉིད་བསྟེན་ཏེ་སྟོབས་ཅན་དུ་གྱུར་པའི་ལས་གང་དེ་རང་གིས་དྲན་ནས་དགེ་བའི་འདུ་ཤེས་དང་ལྡན་པར་འགྱུར་བས། དེ་ལ་མི་གཞན་གྱིས་དགེ་སེམས་མ་བསྐུལ་བར་མི་དགེ་བའི་སྡིག་སེམས་བསྐུལ་ཏེ་གསལ་བར་བྱས་ཀྱང་རུང་སྟེ། དེ་ནི་དགེ་བའི་ཤེས་པ་རགས་པར་རམ་གསལ་བར་འབྱུང་ཞིང་རྒྱུ་བ་དེ་ཡི་བར་དུ་དགེ་བ་ཅིའང་ཤེས་ལ་སྡིག་པའི་འདུ་ཤེས་མི་འབྱུང་བའོ། །དེ་ནས་ཚོགས་དྲུག་སོ་སོར་ཐིམ་ནས་ཕལ་པ་རྣམས་འདུ་ཤེས་ཆ་ཕྲ་བར་རྒྱུ་བ་དང་ལྡན་པའི་དུས་ཀྱི་ཚེ་ན་སྔར་གྱི་དོན་མི་གསལ་བས་དགེ་བའི་ཤེས་པ་དེ་ལས་ལྡོག་ཅིང་ཤེས་པ་བཏང་སྙོམས་དང་ལྡན་ཏེ་གནས་པའོ། །དེའང་གང་ཟག་དེ་ཡིས་སྔོན་དགེ་བའི་སྤྱོད་པ་དེ་ལ་བསྟེན་ཅིང་གོམས་པའི་མཐུས་འཆི་ཀའི་དུས་སུ་དགེ་བའི་སེམས་དེ་ཉིད་གསལ་བར་འབྱུང་ཞིང་དེ་དང་ཆ་མཐུན་ཅན་དུ་འགྱུར་ལ། དེས་ན་སྔར་གོམས་པ་མེད་པའི་ལས་གཞན་ལ་བརྩལ་བར་མི་ནུས་པས། གལ་ཏེ་མི་བསམ་ངན་ཅན་གཞན་དག་གིས་སྡིག་པའི་སེམས་སུ་བསྐུལ་བར་བྱས་ཀྱང་དྲན་ཞིང་གསལ་བར་ཡོང་ཡེ་མི་ནུས་ཏེ་སྔོན་དུ་འདྲིས་གོམས་མེད་པས་སོ། །དེ་བས་ན་འཆི་བའི་ཚེ་དེར་སྔར་དགེ་བ་སྤྱད་པའི་སེམས་ཀྱི་འདུ་ཤེས་དེ་དང་གང་ལྡན་པ་དག་ནི་ངན་སོང་གིས་འཇིགས་སྐྲག་མེད་པར་མཐོ་རིས་ཀྱི་གནས་སུ་བདེ་བར་འགྲོ་བ་སྟེ། དེ་ལ་གནད་ཀྱི་སྡུག་བསྔལ་མི་བཟད་པ་དྲག་པོའི་ཚོར་བ་ཡང་ཉམས་སུ་མྱོང་བར་མི་འགྱུར་ཏེ་བདེ་བར་འཆི་བའི་དུས་བྱེད་པར་འགྱུར་རོ། །དེ་ཡང་དགེ་བ་ཅན་གྱི་ལྟས་ནི། འཆི་ཀ་དེ་ཡི་དུས་ན་གཟུགས་ལ་སོགས་པ་གང་ཅི་ཞིག་མཐོང་བ་ན་ཡང༌། སྤྱོད་ཡུལ་གང་དུ་སྔར་མ་མཐོང་བའི་གཟུགས་ལ་སོགས་པ་དེ་ལྟར་དགེ་བའི་ཆོས་ལ་ཉི་ཚེར་སྤྱོད་པ་འབའ་ཞིག་ཉིད་དུ་མཐོང་བར་འགྱུར་ཏེ། དཔེ་ཇི་ལྟར་ན་ཉི་མའི་དཀྱིལ་འཁོར་འཆར་བ་ཡང་འོད་རིམ་པར་འབྱུང་བའི་རྐྱེན་གྱིས་སྐྱ་རེངས་དང་པོ་ནས་སྣང་བ་ཁད་ཀྱིས་འབྱུང་སྟེ་ཇེ་གསལ་ཇེ་གསལ་དུ་གྱུར་པས་མུན་པ་ལས་ཉིན་མོར་འགྱུར་བ་བཞིན་དུ། གང་ཟག་དེ་ནི་ལུས་སྔ་མ་མུན་པའི་ཁམས་ནས་ཕྱི་མ་སྣང་བའི་མཐར་ཐུག་ཏུ་རིམ་པར་འབྱུང་བ་ཉིད་དོ། །དེ་ཡང་དཔེར་ན་རྨི་ལམ་ལྟ་བུར་གཟུགས་སྣང་མཐོང་བ་ཕྱི་མ་དག་ཀྱང་ཉི་མའི་སྣང་བ་ལྟར་ཡིད་དུ་འོང་བའི་གཟུགས་སྣང་སྣ་ཚོགས་སུ་མཐོང་བར་འགྱུར་ཞིང༌། དེ་དག་ཀྱང་རང་གི་སེམས་ཀྱི་བག་ཆགས་རྣམ་པར་དཀའ་བའི་དགེ་བ་ལ་གནས་པའི་མཐུ་བརྟས་པ་༼༡༥༢༽ཡིན་པས་ཉེ་འཁོར་དང་དྲུང་ན་ཡོད་པ་ཐམས་ཅད་ལྷ་དང་ལྷ་མོར་སྣང་ནས་མགོན་དང་སྐྱབས་སུ་མཐོང་ངོ༌། །དེ་ལྟར་དགེ་བ་ཅན་དེ་ཡི་ཡང་དགེ་བའི་ཆོས་ཀྱི་སྤྱོད་ཡུལ་དེ་དག་ཀུན་ཤེས་ཤིང་མཐོང་བ་དག་པའི་ཡོན་ཏན་གྱི་མཐུ་དེས་དུས་གང་འདིར་རྣམ་པར་ཤེས་པས་ལུས་ཀྱི་རོ་སྨད་ནས་རིམ་པར་གྱེན་དུ་འགྲོ་བས་ལུས་འདོར་བར་བྱེད་དེ། དེས་ན་དེའི་སྨད་གྲང་མོར་གྱུར་ནས་དྲོད་ཀྱང་སྤྱི་བོ་ནས་འབྱུང་སྟེ་སྟེང་དུ་ཡལ་བར་འགྱུར་ཏེ། སྤྱི་གཙུག་གི་ཐོར་ཏོར་ཚངས་པའི་བུ་གར་ལུས་སེམས་རྟེན་པའི་དྲོད་གང་ཡིན་པ་འབྱུང་བ་དེ་ནི་བདེ་འགྲོ་མཐོ་རིས་ཀྱི་སར་སྐྱེ་བ་འབྱུང་བའི་སྔ་ལྟས་སུ་བསྟན་པའོ། །དེའི་ཚུལ་ཡང༌། ས་ཆུར་ཞུགས་ཆུ་མེར་ཞུགས་མེ་རླུང་ལ་འདུ། རླུང་ཡེ་ཤེས་སྙིང་པོ་ལ་འདུས་པས་ལུས་ཉམས་མེད་པ་དང༌། བུ་ག་སྐམས་ནས་དྲོད་ཡལ་ཏེ་མེ་ལོང་ལ་ཧས་བཏབ་པའི་དབུགས་ལྟ་བུར་འདུས་ནས་མཐར་འདོན་པར་འགྱུར་རོ། །འོན་ཀྱང་མེ་ཤེལ་ཆུ་ཤེལ་དང་ས་བོན་དང་བྲག་ཆ་དང༌། ཁ་ཐོན་དང་མར་མེ་དང་མེ་ལོང་དང་རྒྱ་ལྟ་བུར་སྣང་བས། དབུ་མ་རྟེན་འབྲེལ་སྙིང་པོ་ལས། ཁ་ཏོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲས། །ཕུང་པོ་ཉིང་མཚམས་སྦྱོར་བ་ཡང༌། །མི་འཕོ་བར་ནི་མཁས་རྟོགས་བྱ། །ཞེས་གསུངས་པ་ལྟར་དོན་གྱི་ངོ་བོས་སྔ་ཕྱིར་འཕོས་པ་ནི་མེད་ཀྱི། རྟོག་པ་ཅན་ལ་སྐད་ཅིག་མ་སྔ་ཕྱིའི་སྤྱོད་ཡུལ་སྣ་ཚོགས་སུ་སྣང་བ་ནི་ཡོད་དེ། རྒྱན་སྟུག་པོ་བཀོད་པ་ལས། ཡིད་ཀྱི་སྲད་བུས་བཏགས་པ་དག །སེམས་ཅན་ཀུན་ཏུ་རབ་ཏུ་འཁོར། །རྣམ་པར་ཤེས་པ་བརྒྱད་ཀྱི་ཚོགས། །ཁམས་དང་སྐྱེ་མཆེད་ཕུང་པོ་སྟེ། །ཡིད་ཀྱི་སྲད་བུས་བཅིངས་བྱས་ཤིང༌། །ལུས་དང་ལུས་ལ་རབ་ཏུ་རྒྱུ། །འདི་ནི་འགྲོ་བའི་སྐྱེས་བུ་སྟེ། །འགྲོ་བ་རྣམས་ཀྱི་དོན་དུ་བསྟན། །ཞེས་དང༌། ལས་ཀྱི་སྐྱེས་བུ་བསྟན་པ་ནི། །འཁོར་རྣམ་རྟག་ཏུ་འཁོར་བ་སྟེ། །བདེ་དང་སྡུག་བསྔལ་མྱོང་བྱེད་པ། །བྱས་པའི་ལས་ནི་ཆུད་མི་ཟ། །ཞེས་དང༌། འགྲོ་བའི་སྐྱེས་བུ་དེ་ཡོད་ན། །སྲེད་པའི་འཁོར་ལོས་འཁོར་བར་འགྱུར། །འཁོར་དང་བྲལ་ན་ཐར་པ་སྟེ། །བློ་ཞན་རྣམས་ཀྱིས་མི་ཤེས་སོ། །ཞེས་དང༌། ལས་བརྒྱ་པ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་པ་སོགས་ཤིན་ཏུ་མང་ངོ༌། །༼༡༥༣༽ཚུལ་དེ་ནི་སྡིག་པ་དང་ལུང་དུ་མ་བསྟན་པའི་འཆི་འཕོ་ལའང་མཚུངས་སོ།།

གཉིས་པ་སྡིག་པ་ཅན་གྱི་འདུ་ཤེས་དང་ལྟས་བཤད་པ་ནི།

གང་དུ་ལོག་པར། ཞེས་པ་ནས། མཐར་འབྱུང་མི་བདེ་བའོ། །ཞེས་པའི་བར་གྱིས་བསྟན་ཏེ།

གང་དུ་ལོག་པར་དེ་འགྲོ་བ། །གང་ལས་བཟློག་པ་ཇི་བཞིན་ཏེ། །མི་བཟད་དྲག་པོའི་ཚོར་བ་ནི། །ཤིན་ཏུ་ཟུག་གཟེར་མི་བཟོད་དེ། །གཡོ་འགུལ་མི་སྙན་ང་རོ་འདོན། །འཁྲུལ་པའི་གང་སྣང་མཐོང་བ་ན། །བྱམས་པ་ལ་སོགས་གང་ཞིག་ནི། །གཤེད་མ་ལ་སོགས་མི་འདོད་པ། །འཇིགས་པའི་གཟུགས་ནི་སྣ་ཚོགས་སུ། །མཐོང་བས་རྡུལ་འབྱུང་བ་སྤུ་འཛིང་། །ཡན་ལག་གཡོབ་ཅིང་མཁའ་ལ་བསྙབས། །བཤང་གཅི་འབྱུང་ཞིང་མིག་ཀྱང་ལྡོག །སྣང་བའི་ཁམས་ནི་མུན་པར་འབྱུང་། །དེ་ཡི་དེ་ཀུན་ཤེས་འབྱུང་ལྟུང་། །གང་འདི་མཐར་འབྱུང་མི་བདེ་བའོ།།

སྡིག་པ་ཅན་འཆི་ཀའི་མཚན་ཉིད་གང་ཞེ་ན། འཆི་ཀའི་དུས་གང་དུ་མི་དགེ་བའི་འདུ་ཤེས་ཕྱིན་ཅི་ལོག་གི་སེམས་དང་ལྡན་པས་ལོག་པར་ལྟུང་བ་ངན་སོང་གི་གནས་རིས་དེ་རུ་འགྲོ་བའི་སྡིག་པ་ཅན་འཆི་བའི་ཚུལ་བསྟན་པ་ཡང༌། གོང་དུ་དགེ་བ་ཅན་འཆི་བའི་ལྟས་རྣམས་ལས་བཟློག་པ་ཇི་ལྟ་བ་བཞིན་དུ་དེ་དང་མི་མཐུན་པར་ཕྱིན་ཅི་ལོག་ཏུ་སྣང་བ་སྟེ། གནད་ཀྱི་སྡུག་བསྔལ་མི་བཟད་པ་དྲག་པོའི་ཚོར་བ་ཉམས་སུ་མྱོང་བས་ནི། ཤིན་ཏུ་ཟུག་གཟེར་མི་བཟོད་པར་གྱུར་ཏེ། ལུས་འགྲེ་ལྡོག་དང་ཡན་ལག་གཡོ་བ་སྟེ་གཡོ་འགུལ་བྱེད་དེ། ངག་ནས་མི་སྙན་པའི་ང་རོ་འདོན་ཞིང་མི་བཟོད་པའི་འོ་དོད་འབོད་པ་དང༌། ཡིད་དུ་མི་འོང་བའི་ལྟས་སུ་གྱུར་པ་སེམས་འཁྲུལ་པའི་དབང་གིས་གཟུགས་གང་སྣང་ཞིང་ཅི་མཐོང་བ་ན་ཡང༌། བྱམས་པའི་གཉེན་དང་ཕན་པར་བྱེད་པ་ལ་སོགས་པ་གང་སུ་ཞིག་མཐོང་ཚེ་ཕ་མ་དང་ཉེ་དུ་ལྟ་བུ་ཡིན་ཡང་དེ་དག་ནི་གཤེད་མ་དང་གཅན་གཟན་དང་སྲིན་པོ་འབར་བ་ལ་སོགས་པ་མི་འདོད་པའི་ལས་སྣང་དུ་གྱུར་པ་འཇིགས་སུ་རུང་བའི་གཟུགས་ཅན་ལག་ན་ནི་མཚོན་ཆ་སྣ་ཚོགས་སུ་གྱུར་པའི་ལག་ཆ་ཐོགས་པར་མཐོང་ཞིང༌། ངུ་སྐད་ཐམས་ཅད་ཀྱང་སོད་རྒྱོབ་ལ་སོགས་པའི་ངན་འགྲོའི་སྒྲར་ཐོས་ཏེ་བྲོས་པར་འདོད་ཀྱང་འབྲོས་ས་དང་མགོན་སྐྱབས་བཙལ་ཡང་རྙེད་གནས་མེད་པས་ལུས་ལ་རྔུལ་འབྱུང་བ་དང་བ་སྤུ་ཐམས་ཅད་ཟིང་སྟེ་ཞུམ་པ་དང་སྐྲག་སྔངས་སུ་གྱུར་ཏེ་ཡན་ལག་རྣམས་གཡོབ་བཅིང་རྡེབ་པ་དང་ནམ་མཁའ་ལ་ཡང་བརྙེབ་པའམ་སྙེགས་པར་བྱེད་དེ་ཅི་བྱ་གཏོལ་མེད་དུ་གྱུར་ནས་འཇིགས་སྐྲག་ཆེ་བའི་རྟགས་སུ་ལུས་ལས་བཤང་གཅི་འབྱུང་ཞིང་མདངས་ནག་པོར་གྱུར་པས་བྲེད་ཤ་ཐོན་པའི་མིག་ཀྱང་བགྲད་དེ་མིག་རྩ་ཞན་ཅིང་གྱེན་དུ་ལྡོག་པར་བྱེད་ལ་ཁ་ནས་དབུ་བ་འབྱུང་བ་སོགས་སྡུག་བསྔལ་དང་བཅས་པས་འཆི་བའི་དུས་བྱེད་པར་འགྱུར་ཏེ། བཅོམ་ལྡན་འདས་ཀྱིས་དེ་ལ་དགོངས་ནས། དེ་སྔོན་སྡིག་པ་མི་དགེ་བའི་ལས་བྱས་ཤིང་བསགས་པར་གྱུར་པ་གང་ཡིན་པ་དེ་དེའི་ཚེ་དེ་ལ་ཕྱི་མ་རེད་ཀྱི་དུས་ཀྱི་ཚེ་རི་རྣམས་སམ་རིའི་རྩ་མོ་རྣམས་ཀྱི་གྲིབ་མ་བཞིན་དུ་འབབ་ཅིང༌། ལྷག་པར་འབབ་ལ་མངོན་དུ་འབབ་པར་༼༡༥༤༽འགྱུར་རོ། །ཞེས་གསུངས་ཏེ། དེ་ལྟ་བུའི་ལྟས་བྱུང་བ་ནི་ད་ལྟ་མཐོ་རིས་ཀྱི་གནས་བཟང་པོ་སྣང་བའི་ཁམས་ནས་ངན་འགྲོ་ལོག་པར་ལྟུང་བ་མུན་པའི་ཁམས་སུ་མཐར་ཐུག་པ་ཡི་སྤྱོད་ཡུལ་ཅན་དུ་འབྱུང་བར་གྱུར་པ་ཡིན་ནོ། །དེ་ཡི་དུས་ན་ཡང་ཐམས་ཅད་ཞེ་སྡང་གི་ཡུལ་དུ་སྣང་ནས་གནོད་པའི་ལས་ཅན་གྱི་ལོག་པའི་སྣང་བ་དེ་དག་ཀུན་ཤེས་པར་འབྱུང་བས་ཡིད་འཁྲུགས་པ་དེའི་མཐུས་མུན་པའི་གནས་ངན་དུ་ལྟུང་བ་དང་མཐུན་པར་རྣམ་པར་ཤེས་པས་རོ་སྟོད་ནས་ལུས་འདོར་བར་བྱེད་དེ། ལུས་ཀྱི་དྲོད་གང་ཡིན་པ་དེ་ཡང་སྤྱི་བོ་ནས་ཡལ་ཏེ་རིམ་པར་མཐར་རྐང་མཐིལ་དུ་འབྱུང་སྟེ་དེ་ནི་ངན་འགྲོ་མི་བདེ་བའི་གནས་སུ་ལྟུང་བའི་རྟགས་སུ་བསྟན་པའོ།།

གསུམ་པ་བཏང་སྙོམས་པའི་དུས་ཤེས་དང་ལྟས་བསྟན་པ་ལ་གཉིས་ཏེ། ངོ་བོ་བསྟན་པ། དབྱེ་བ་བཤད་པའོ། །དང་པོ་ནི།

བཏང་སྙོམས་དེ་ཡིས། ཞེས་པ་ནས། མི་གསལ་བཏང་སྙོམས་སོ། །ཞེས་པའི་བར་གྱིས་བསྟན་ཏེ།

བཏང་སྙོམས་དེ་ཡིས་མ་གསལ་ལམ། །གཞན་གྱིས་གསལ་བར་མ་བྱས་པའི།།

གཉིས་སུ་མི་གསལ་བཏང་སྙོམས་སོ།།

ལས་ལུང་དུ་མ་བསྟན་པ་བྱེད་པའི་ལྟས་གང་ཞེ་ན། བཏང་སྙོམས་ཀྱི་འདུ་ཤེས་ཅན་ལུང་དུ་མ་བསྟན་པའི་སེམས་དང་ལྡན་པ་གང་གི་སྔར་དགེ་སྡིག་གང་ཡང་མ་སྤྱད་པར་ལུང་དུ་མ་བསྟན་པའི་ལས་ཙམ་བྱས་པ་དེ་ཡིས། འཆི་ཀའི་དུས་དེར་རང་གིས་དྲན་པའི་རྒྱུ་བར་དགེ་སྡིག་གང་རུང་གཅིག་ཀྱང་མ་གསལ་ལམ། དེ་ལ་མི་གཞན་གྱིས་ཀྱང་གསལ་གདབ་པར་མ་བྱས་པ་དེ་ནི་དགེ་སྡིག་གང་ཡང་རུང་བར་གསལ་བར་མི་འགྱུར་བའོ། །དེ་ལྟར་དགེ་སྡིག་གཉིས་སུ་ཡང་འདུ་ཤེས་མི་གསལ་བ་གང་ནི་རྟེན་གཉིས་ཀ་མ་ཡིན་པའི་ལས་ལ་བརྟེན་པའི་སེམས་བཏང་སྙོམས་སུ་གྱུར་པའི་ངང་ནས་འཆི་འཕོ་བྱེད་པ་དེར་ངེས་པར་འགྱུར་བས་སོ། །འོན་ཀྱང་ཕལ་ཆེ་བའི་དབང་དུ་བསྟན་པ་སྟེ། འདི་ལྟ་བུ་ལ་འཆི་ཀའི་གདམས་ངག་བཏབ་ན་ཤིན་ཏུ་ཕན་པར་འགྱུར་རོ།།

གཉིས་པ་དབྱེ་བ་བཤད་པ་ནི།

འོག་ནས། བཏང་སྙོམས་ཁ་ཅིག ཅེས་པ་ནས། མི་འགྱུར་རྫོགས་མི་འགྱུར། །ཞེས་པའི་བར་གྱིས་བསྟན་ཏེ།

བཏང་སྙོམས་ཁ་ཅིག་འགྱུར་བ་ཡིན། །ཁ་ཅིག་མི་འགྱུར་རྫོགས་མི་འགྱུར།།

བཏང་སྙོམས་ཀྱི་ལས་སྤྱོད་པ་ཁ་ཅིག་དག་ནི་བློ་རྐྱེན་དང་འཕྲད་པའི་ཁྱད་པར་ལྟར་དགེ་སྡིག་གང་ཡང་རུང་བར་གྱུར་ཏེ་རྣམ་སྨིན་གྱི་འབྲས་བུ་འབྱུང་བར་འགྱུར་བ་ཡིན་ལ། བཏང་སྙོམས་ཤིན་ཏུ་བརྟན་པ་ཁ་ཅིག་ལ་ནི་བཏང་སྙོམས་ཀྱི་ལས་ཁོ་ནས་རྣམ་སྨིན་དྲག་པོར་མི་འགྱུར་བས་རྣམ་པར་སྨིན་པ་རྫོགས་པར་མི་འབྱུང་སྟེ། ཅིའི་ཕྱིར་ཞེ་ན། རྐྱེན་གྱིས་འགྱུར་བར་མ་ངེས་པའི་ཕྱིར་༼༡༥༥༽ཏེ། ལས་དེ་ཉིད་ཀྱིས་དུས་དེར་འབྲས་བུ་དངོས་སུ་སྨིན་པར་མི་ནུས་པས་ཕྱི་མ་ལ་རྒྱུ་མཐུན་པའི་སྤྱོད་པ་ཙམ་མོ། །དེས་ན་སའི་དངོས་གཞི་ལས་ཀྱང༌། དེ་ལ་ཁ་ཅིག་ནི་འགྱུར་རོ། །ཁ་ཅིག་ནི་མི་འགྱུར་ཏེ། ཀུན་རྫོགས་པར་མི་འབྱུང་ངོ།།ཞེས་སོ།།

གསུམ་པ་ཞབས་བསྡུ་བ་ནི།

གོང་གི འདི་དག་གང་ལྡན། ཞེས་པ་ནས། མི་འགྱུར་གཞན་མི་འཇུག །ཅེས་པའི་བར་གྱིས་བསྟན་ཏེ།

འདི་དག་གང་ལྡན་གང་འགྲོ་ཡང་། །གང་ལྟར་གོམས་པ་ཁོ་ན་ངེས། །གོམས་པ་ལ་གཞོལ་དེ་སྟོབས་ལྡན། །གང་མ་གོམས་པ་གསལ་བྱས་ཀྱས། །མ་ཞེན་དབང་གིས་འགགས་པར་འགྱུར། །གང་དེ་གཉིས་ལ་མཚུངས་གོམས་ན། །དེར་ནི་དང་པོ་གང་གསལ་ལམ། །གཞན་གྱིས་གསལ་བར་བྱས་པ་ལས། །ལྡོག་པར་མི་འགྱུར་གཞན་མི་འཇུག།

འོ་ན་དེ་ལྟར་འདུ་ཤེས་ཀྱི་ཁྱད་པར་དང་ལྟས་གསུམ་དུ་འབྱུང་བ་དེ་ཉིད་ཅིའི་ཕྱིར་ཞེ་ན། གོང་དུ་བཤད་པའི་ལས་གསུམ་པོ་འདི་དག་ཀྱང་སྔར་གང་དང་གང་ལ་གོམས་ཏེ་སྤྱད་པ་ལྟར་འཆི་ཀར་གང་ལ་དྲན་པ་དང་ལྡན་པ་དེ་ནི་ཤི་ནས་གནས་རིས་བཟང་ངན་གང་དུ་འགྲོ་བ་ཡང༌། སྔོན་གྱི་ལས་ཀྱི་ཁྱད་པར་གང་ལྟར་གོམས་ཤིང་མཐུ་སྟོབས་ཅན་གྱི་བག་ཆགས་ཡོད་པ་དེ་ཡི་ཤུགས་ཁོ་ནར་ངེས་པར་འགྱུར་བའི་རྒྱུ་མཚན་གྱི་དབང་གིས་ཡིན་ཏེ། ཅིའི་ཕྱིར་ན། སྔར་དགེ་སྡིག་གི་ལས་གང་ལ་གོམས་པ་དེ་ལ་སེམས་གཞོལ་ཞིང་དེ་ཉིད་སྟོབས་དང་ལྡན་པ་ཡིན་པའི་ཕྱིར་གང་དེའི་དབང་དུ་འགྱུར་བར་ངེས་པའོ། །དེས་ན་གང་སྔར་མ་གོམས་པ་དེ་ནི་གཞན་གྱིས་གསལ་གདབ་པར་བྱས་ཀྱང་དེའི་བག་ཆགས་སྔར་མ་ཞེན་ཏེ་སྟོབས་མེད་པའི་དབང་གིས་འདྲིས་གོམས་ཀྱི་བག་ཆགས་ཡོད་པ་ལྟར་དུ་མི་གསལ་བས་དྲན་པ་སླར་འགག་པར་འགྱུར་ཏེ། སྔ་མ་ལས། གལ་ཏེ་གང་ཟག་དགེ་བ་དང་མི་དགེ་བ་བྱེད་བྱེད་པ་འཆི་བ་ནི་སྔོན་གོམས་པའིདགེ་བ་དང་མི་དགེ་བ་རྣམས་བདག་ཉིད་ཀྱིས་དྲན་ནམ། གཞན་དག་གིས་དྲན་པར་བྱས་ཀྱང་རུང་སྟེ་དེའི་ཚེ་དེས་གང་ལན་མང་དུ་གོམས་པར་བྱས་པ་དེ་ཆེས་སྟོབས་དང་ལྡན་པར་འགྱུར་ཏེ། དེས་སེམས་དེ་གཞོལ་བར་འགྱུར་ལ་གཞན་ནི་བརྗེད་པར་འགྱུར་རོ། །ཞེས་སོ། །གལ་ཏེ་གང་ཟག་གང་སུ་ཞིག་དགེ་སྡིག་དེ་དག་གཉིས་ཀ་ལ་མཚུངས་པར་སྤྱོད་སྤྱོད་དེ་སྔར་གྲངས་མཉམ་པ་ཙམ་དུ་གོམས་པ་ཞིག་ཡིན་ན། འཆི་བའི་དུས་དེར་ནི་ཐོག་མ་དང་པོར་གང་དགེ་བའི་ལས་བྱས་པ་ལྟར་རང་གི་སེམས་གསལ་ལམ། མི་གཞན་གྱིས་དགེ་བ་གསལ་གདབ་པར་བྱས་པ་ལས་སྡིག་པའི་དབང་དུ་མི་འགྲོ་བས་སླར་ལྡོག་པར་མི་འགྱུར་ཏེ་གཞན་སྡིག་སེམས་ལྟ་བུར་མི་འཇུག་པས་ངན་འགྲོའི་གནས་སུ་མི་ལྟུང་སྟེ། དེ་ཉིད་ལས། ཡང་གལ་ཏེ་གཉི་ག་ལ་མཚུངས་པར་གོམས་ན་ནི་དེ་ལས་གང་དང་གང་ཐོག་མ་ཁོ་༼༡༥༦༽ནར་དྲན་ནམ། དྲན་པར་བྱེད་དུ་བཅུག དེ་ལས་ལྡོག་པར་མི་འགྱུར་ཏེ། གཞན་དུ་མི་འཇུག་གོ །ཞེས་སོ།།

བཞི་པ་ལ་འཆི་ཀའི་བསམ་པའི་ཁྱད་པར་བསྟན་པ་ལ་གསུམ་སྟེ། སྔར་གང་གོམས་པ་ཉིད་གསལ་བར་འགྱུར་ཚུལ། འདི་ལ་ཞེ་སྡང་སྐྱེ་ཞིང་ཕྱི་མ་ལ་ཆགས་པ་འབྱུང་བ། འདའ་ཀ་མའི་གདམས་ངག་གཅེས་པར་གདམས་པའོ། །དང་པོ་ནི།

ཐམས་ཅད་ཀྱང༌ནི། ཞེས་པ་ནས། གང་ཆགས་དེ་འབྱུང་ངོ༌། །ཞེས་པའི་བར་གྱིས་བསྟན་ཏེ།

ཐམས་ཅད་ཀྱང་ནི་འཕོ་བའི་ཚེ། །གང་འདིར་རྒྱུ་བ་མི་གསལ་བའི། །སྐབས་སུ་མ་བབ་བར་དག་ཏུ།།

ཡུན་རིང་དུས་ནས་གོམས་པ་ཡི། །གང་ལ་གང་ཆགས་དེ་འབྱུང་ངོ་།།

དེ་ལྟར་སྲོག་ཆགས་པའི་སེམས་ཅན་འདུ་ཤེས་དེ་དག་དང་ལྡན་པ་ཐམས་ཅད་ཀུན་དང་ཁྱད་པར་དུ་ཡང་འདོད་པའི་མི་རིལ་ཐམས་ཅད་གང་ཡིན་ཀྱང་རུང་སྟེ་དེ་དག་རྣམས་ནི་གང་ནས་འཆི་ཞིང་འཕོ་བའི་ཚེ་ན་དུས་གང་འདིར་སྔར་དྲན་པ་གསལ་བ་ལས་ཕྱིས་འདུ་ཤེས་ཀྱི་རྒྱུ་བ་མི་གསལ་བར་གྱུར་པའི་སྐབས་སུ་མ་བབ་ཀྱི་བར་དག་གམ་དེ་ལ་ཐུག་པའི་བར་དུ། སྔོན་ཡུན་རིང་པོའི་དུས་ནས་ བདག་ལ་ཆགས་པ་གོམས་པ་ཡི་དབང་གིས་དགེ་སྡིག་གི་ལས་གྲངས་མེད་པ ་གང་དང་གང་སྤྱད་དེ་མཐུ་བརྟས་པ་དེ་དང་དེ་ལ་དྲན་པ་གང་ཡིན་པ་གསལ་བར་འགྱུར་ཞིང་ཞེན་པའི་བག་ཆགས་དེ་ཡི་རྒྱུ་བ་འཕྲོ་བ་ནི་འཆི་ཀའི་བསམ་པ་ཀུན་ལ་འབྱུང་ངོ༌། །དེས་ན་འཆི་ཀར་ནད་པའི་སྣོད་བརྟགས་ལ་དགེ་བའི་གསོས་གདབ་པ་ནི་ཤིན་ཏུ་གཅེས་སོ། །དེ་ཡང་སྔ་མ་ལས། དེ་ཐམས་ཅད་ཀྱང་འཆི་བའི་ཚེ་ན་འདུ་ཤེས་མི་གསལ་བའི་སྐབས་སུ་མ་བབ་པའི་བར་དུ་ཡུན་རིང་པོ་ནས་གོམས་པས་བདག་ལ་ཆགས་པ་ཀུན་ཏུ་འབྱུང་ངོ༌། །ཞེས་སོ།།

གཉིས་པ་འདི་ལ་ཞེ་སྡང་སྐྱེ་ཞིང་ཕྱི་མ་ལ་ཆགས་པ་འབྱུང་བ་ནི།

དེ་ལས་དེ་ཡི། ཞེས་པ་ནས། སྒྲུབ་པའི་རྟེན་ཡིན་ནོ། །ཞེས་པའི་བར་གྱིས་བསྟན་ཏེ།

དེ་ལས་དེ་ཡི་དེ་དབང་གིས། །འདིར་དེ་མེད་པར་གྱུར་ཤེས་ནས། །དེ་འདི་ཉིད་ལས་ཞེ་སྡང་སྐྱེ།།

གང་མ་འོངས་ལ་འཇུག་པར་འགྱུར། །ཞེ་སྡང་མེ་ཡིས་ཟིལ་མནན་པས། །གནས་པ་འདི་ཡི་རྒྱུ་འགགས་ཏེ།།

གང་མ་བྱུང་ལ་ཆགས་པ་སྟེ། །སྲིད་པ་གསུམ་གྱི་བར་བདུན་པ། །མངོན་པར་འགྲུབ་པའི་རྟེན་ཡིན་ནོ།།

དེ་ནས་སྲིད་པ་བར་མ་སྣང་བའི་རྒྱུ་བསྟན་པའི་ཕྱིར། འཆི་བའི་སེམས་ཅན་དེ་ཡང་སྔ་མའི་ལས་དེ་ཡི་རྣམ་སྨིན་གྱི་འབྲས་བུ་དེ་ཉིད་ཀྱི་སྟོབས་སམ་མཐུའི་དབང་གིས་གནད་ཀྱི་སྡུག་བསྔལ་མྱོང་བ་ན། ད་ནི་ཚེ་འདིར་འདུག་པའི་ལས་དབང་དེ་མེད་པར་ངེས་པར་འཆི་བར་འགྱུར་རོ་སྙམ་དུ་འཆི་བའི་ཆ་ཡོད་པའི་དུས་ལ་བབ་པར་ངོ་ཤེས་ནས། གང་ཟག་དེ་ཡང་ད་ལྟའི་ལུས་འདི་ཉིད་ལ་མྱུར་དུ་ཤི་ན་རུང་སྙམས་ཏེ་ཞེ་སྡང་སྐྱེ་ཞིང༌། ཅི་ནས་ཀྱང་ལུས་གཅིག་ཐོབ་ན་ཅི་མ་རུང་སྙམ་པས་གང་མ་འོངས་པ་ཕྱི་མའི་ལུས་བཟང་པོ་ཐོབ་པ་ལ་དགའ་བ་དང་ཆགས་པའི་སེམས་ཀྱི་འཇུག་པ་འབྱུང་བར་འགྱུར་རོ། །དེ་ལྟར་ད་ལྟར་གྱི་ལུས་འདི་ཉིད་བོར་བར་འདོད་པའི་ཞེ་སྡང་གི་བསམ་པ་མེ་ལྟ་བུ་དེ་ཡིས་ཟིལ་གྱིས་མནན་ཏེ་སྒོ་གསུམ་ལྡང་མི་ནུས་པར་བྱས་པས། ད་ལྟར་སྒོ་གསུམ་དུ་གནས་པ་འདི་ཡི་སྲོག་གི་དབང་པོའི་རྒྱུན་འགགས་ཏེ། གང་མ་བྱུང་བའམ་མ་འོངས་པའི་ཕུང་པོ་ལ་མངོན་པར་ཆགས་པ་སྐྱེ་བའོ། །དེ་ལྟར་འཆི་ཀའི་ཆགས་སྡང་དྲག་པོ་དེ་ནི་༼༡༥༧༽འདི་དང་ཕྱི་མ་བར་དོའི་སྲིད་པ་གསུམ་གྱི་བར་མའི་སྲིད་པ་ཞེས་བྱ་བ་དེའི་ཚེ་ཞག་བདུན་ཕྲག་ཅན་དུ་གྱུར་པ་གང་དེ་ཉིད་མངོན་པར་སྒྲུབ་ཅིང་རིགས་དྲུག་གང་རུང་དུ་སྣང་བར་བྱེད་པའི་རྒྱུའམ་རྟེན་དུ་གྱུར་པ་ཡིན་ནོ། །དེ་ལྟར་འཆི་བའི་སེམས་ལས་བར་མ་དོའི་སྲིད་པ་སྣང་བའི་རྒྱུ་བསྟན་ པ་སྟེ། སྔ་མ་ལས། དེའི་འོག་ཏུ་དེའི་དབང་གིས་བདག་ནི་མེད ་པར་འགྱུར་རོ་སྙམས་ནས་ཕྱི་མའི་ལུས་ལ་མངོན་པར་དགའ་བར་འགྱུར་ཏེ། དེ་ནི་དེའི་བར་མ་དོའི་སྲིད་པ་མངོན་པར་འགྲུབ་པའི་རྟེན་ཡིན་ནོ། །ཞེས་སོ།།

གསུམ་པ་འདའ་ཀ་མའི་གདམས་ངག་གཅེས་པར་གདམས་པ་ནི།

དེ་ཡི་དུས་ན། ཞེས་པ་ནས། དེ་འབྱུང་མི་འགྱུར་རོ། །ཞེས་པའི་བར་གྱིས་བསྟན་ཏེ།

དེ་ཡི་དུས་ན་རྣལ་འབྱོར་པ། །དེ་བཞིན་དེ་ལ་གོམས་ཆེད་ཆེ། །དེ་ཚེ་ཆགས་པ་འབྱུང་མོད་ཀྱི།།

གོམས་པར་གྱུར་པའི་དོན་སྟོབས་ཀྱིས། །ཆགས་པ་དེ་ཟིལ་གནོན་པ་ནི། །མི་གང་རྩལ་དང་ལྡན་པ་ཡི།།

ཤུགས་མེད་གང་དག་གནོན་བཞིན་ནོ། །བྱང་ཆུབ་དེ་བཞིན་རྣལ་འབྱོར་ལ། །གང་ཆགས་དེ་འབྱུང་མི་འགྱུར་རོ།།

དེ་ལྟར་ནམ་འཆི་བ་དེ་ཡི་དུས་ན་རྣལ་འབྱོར་པ་རྣམས་ཀྱིས་འཆི་ཀའི་ཏིང་ངེ་འཛིན་བསྒོམ་པས་ལས་ཀྱི་རྒྱུན་གཅོད་པའི་དགོས་ཆེད་ཡོད་པ་ཡིན་པས་ནུས་པ་ཡོད་ན། འདུ་ལོངས་བསལ་བ་དང༌། ཚོགས་བསགས་པ་དང༌། རྟེན་བཀྲམ་པ་དང༌། མཆོད་པ་བཤམས་པ་དང༌། བཤེས་གཉེན་བསྟེན་པ་དང༌། དགེ་བས་དུས་འདའ་བ་དང་བཅས་ཏེ་འདའ་ཀའི་ཏིང་ངེ་འཛིན་བསྒོམ་པ་ལ་བརྩོན་པར་བྱའོ། །དེ་ནི་འཆི་ཀ་ཁོ་ནར་མ་ཟད་སྔ་ནས་གོམས་པར་བྱས་པ་གཅེས་པས་དུས་ཀུན་ཏུ་དགེ་སྦྱོར་གང་བྱེད་ལ་ནན་ཏན་བགྱིད་པ་དེ་བཞིན་དུ་འདའ་ཀའི་གདམས་ངག་དེ་ལ་འདྲིས་ཤིང་གོམས་པར་བྱ་བ་ལ་ཆེད་དུ་འབད་པར་བྱེད་པ་ནི་ཤིན་ཏུ་གལ་ཆེ་སྟེ། དེའི་བསྒོམ་པའི་ཐབས་བླ་མའི་ཞལ་ལས་ཤེས་པར་བྱའོ། །གལ་ཏེ་འདའ་ཀ་མའི་ཏིང་ངེ་འཛིན་མེད་ཀྱང་སྔོན་ཆད་ཏིང་ངེ་འཛིན་གང་ལ་གོམས་པ་ཉིད་དྲན་པས་ཀྱང་ལས་རྒྱུན་གཅོད་པ་ཡིན་པས་འཆི་བའི་ཚེ་ངེས་པར་དྲན་པར་བྱའོ། །འོ་ན་དེ་ལྟ་བུའི་རྣལ་འབྱོར་པ་ལ་སྲིད་པ་ཕྱི་མའི་ཆགས་པ་འབྱུང་ངམ་ཞེ་ན། ཏིང་ངེ་འཛིན་གྱི་ཡོན་ཏན་འཆད་དེ། འཆི་བའི་དུས་ལ་བབ་པ་དེ་ཡི་ཚེ་ན་རྣལ་འབྱོར་པ་ལའང་མ་འོངས་པའི་ཕུང་པོ་ལ་སྲེད་པའམ་ཆགས་པ་ནི་འབྱུང་མོད་ཀྱི། འོན་ཀྱང་འཆི་ཀའི་ཏིང་ངེ་འཛིན་གྱི་མན་ངག་ལ་གོམས་པར་གྱུར་པའི་དོན་དེ་ཡི་ནུས་པའི་མཐུ་དང་སྟོབས་ཀྱིས། ཕྱི་མའི་ལུས་ལ་ཆགས་པའི་ཉོན་མོངས་པ་དེ་ཉིད་ཟིལ་གྱིས་གནོན་ཏེ་ལྡང་དུ་མི་སྟེར་བ་ནི་དཔེར་ན་མི་གང་དག་རྩལ་ཤུགས་ཆེན་པོ་དང་ལྡན་པ་ཅན་དེ་ཡིས། རྩལ་ཤུགས་མེད་པ་གང་དག་ལྡང་མི་ནུས་པར་གནོན་པར་བྱེད་པ་ཇི་ལྟ་བ་བཞིན་ནོ། །འདིར་སྔ་མ་ལས། དེ་ལ་རྒྱུན་དུ་ཞུགས་པ་དང༌། ལན་༼༡༥༨༽ཅིག་ཕྱིར་འོང་བ་ལ་ཡང་དེའི་ཚེ་བདག་ལ་ཆགས་པ་ཀུན་ཏུ་འབྱུང་མོད་ཀྱི། རྒྱུན་དུ་ཞུགས་པའམ་ལན་ཅིག་ཕྱིར་འོང་བ་དེས་ནི་བདག་ལ་ཆགས་པ་དེ་ཤེས་རབ་ཀྱིས་བརྟགས་ཤིང་48བརྟགས་ཤིང༽་མངོན་པར་སྤོང་བར་བྱེད་ཀྱི་དང་དུ་ལེན་པར་མི་བྱེད་དེ། དཔེར་ན་མི་ཆེས་སྟོབས་དང་ལྡན་པ་ནི། མི་ཆེས་སྟོབས་ཆུང་བ་དང་སྟོབས་འགྱེད་ན་སྟོབས་ཆུང་ངུ་རྡུང་བར་བྱེད་པ་དེ་བཞིན་དུ། འདི་ལ་ཡང་ཚུལ་དེ་དང་འདྲ་བར་བལྟ་བར་བྱའོ། །ཕྱིར་མི་འོང་བ་རྣམས་ནི་དེའི་ཚེ་བདག་ལ་ཆགས་པ་དེ་ཀུན་ཏུ་འབྱུང་བར་མི་འགྱུར་རོ། །ཞེས་གསུངས་ཤིང༌། བྱང་ཆུབ་སེམས་དཔའ་འཕགས་པ་དང་སྔགས་ཀྱི་རིག་པ་འཛིན་པ་དང༌། ཆོས་ཉིད་རྣལ་མའི་དོན་ལ་བློ་འབྱོར་བས་རྣལ་འབྱོར་པ་བཟང་པོ་རྣམས་ལ། གང་ཕྱི་མའི་ལུས་ལ་ཆགས་པའི་འདུ་ཤེས་དེ་ཉིད་སྐྱེ་ཞིང་འབྱུང་བར་མི་འགྱུར་ཏེ་མ་ཆགས་པ་དེ་ལ་སྡུག་བསྔལ་ཡང་མི་འབྱུང་བར་ས་དེ་ཉིད་ལ་སྦྱོར་བར་བྱེད་པའི་ཕྱིར་རོ། །དེས་ན་ནམ་འདའ་བའི་ཚེ་ཆགས་སྡང་གི་སེམས་ཡིད་ལ་མི་བྱའོ།།

ལྔ་པ་གནད་ཀྱི་སྡུག་བསྔལ་གང་ལ་ཡོད་ཚུལ་བསྟན་པ་ནི།

གནད་ཀྱི་སྡུག་བསྔལ། ཞེས་པ་ནས། དེ་ལ་དེར་ཞེན་གཅེས། །ཞེས་པའི་བར་གྱིས་བསྟན་ཏེ།

གནད་ཀྱི་སྡུག་བསྔལ་མི་བཟད་པ། །གང་ལ་མཐོ་དམན་མ་གཏོགས་པ། །གཞན་དག་ཀུན་ལ་འབྱུང་བ་ཡིན།།

ཤིན་ཏུ་ཉེན་དགའ་མེད་ཕྱིར་རོ། །སྡུག་བསྔལ་ཆེ་ཆུང་གཉིས་ཁོ་ན། །གང་འགགས་གཅིག་དང་རིགས་ཀྱིས་འགག །དེ་ཉིད་གོམས་ཏེ་གང་མ་འགགས། །གཙོ་བས་དེ་ལ་དེར་ཞེན་གཅེས།།

འོ་ན་དེའི་རྒྱུ་གནད་ཀྱི་སྡུག་བསྔལ་མི་བཟོད་པ་དེ་འགྲོ་བ་གང་དང་གང་ལ་ཡོད་ཅེ་ན། དེ་ལྟ་བུའི་འཆི་ཀའི་གནད་ཀྱི་སྡུག་བསྔལ་མི་བཟོད་པ་དེ་ནི། འགྲོ་བ་གང་ལ་ཡོད་ན་མཐོན་པོ་ལྷ་དང་དམན་པ་དམྱལ་བ་གཉིས་མ་གཏོགས་པ་གཞན་འགྲོ་བ་རིགས་བཞི་པོ་དག་ཀུན་ལ་འབྱུང་བ་ཡིན་ནོ། །དེའི་ཅིའི་ཕྱིར་ཞེ་ན། དམྱལ་བ་ནི་ཤིན་ཏུ་སྡུག་བསྔལ་གྱིས་ཉེན་ཏེ་གནད་ཀྱི་ངོ་བོར་འདུག་པས་དེ་ལས་ཕར་མནར་དུ་མེད་པའི་ཕྱིར་དང་ལྷ་ནི་བསོད་ནམས་ཀྱི་དགའ་བ་དང་ལྡན་ཏེ་བདེ་བ་ཚད་དུ་ཕྱིན་པས་དེ་ལས་འདའ་བ་མེད་པའི་ཕྱིར་རོ། །དེ་ཡང་འཆི་ཀའི་དུས་སུ་སྡུག་བསྔལ་ཆེ་ཆུང་གི་དབང་གིས་འགག་པའི་ཚུལ་ཡང་གཉིས་ཁོ་ན་ཡིན་པར་བསྟན་ཏེ་ངེས་པར་གཟུང་བ་ནི། གང་སྡུག་བསྔལ་ཆེན་པོར་གྱུར་པས་ནི་སྲོག་གི་དབང་པོ་འགག་པ་ཡང་ཅིག་ཆར་དུ་འགག་པར་འགྱུར་བ་དང༌། སྡུག་བསྔལ་ཆུང་བར་གྱུར་པས་ནི་དབང་པོ་རིམས་ཀྱིས་འགག་པར་འགྱུར་བ་གཉིས་སུ་ངེས་པའོ། །དུས་དེར་ཡང་དམ་པ་གང་ཞིག་སྙིང་པོ་དེ་ཁོ་ན་ཉིད་ཀྱི་ཏིང་ངེ་འཛིན་ལ་གོམས་པ་བརྟན་ཏེ་བསྒོམ་བྱའི་ངོ་བོ་གང་ཡིན་པའི་ངེས་དོན་ནོར་འཁྲུལ་མེད་པ་ཉིད་མ་འགག་པར་གསལ་བ་དེ་ནི་མཆོག་ཏུ་གཙོ་བ་ཡིན་པས་༼༡༥༩༽ཆོས་ཉིད་རྟོགས་པ་དེ་ལ་དེར་ཞེན་ཏེ་ཡང་དག་པར་གོམས་པར་བྱེད་པ་ནི་ཤིན་ཏུ་གཅེས་པ་ཉིད་དེ། སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས། དེ་ཉིད་ངང་གནས་འདྲིས་ཆེན་ལ། །གནས་ལམ་ཕྱོགས་མེད་ཡེ་ཁྱབ་གདལ། །བསྐུལ་ཞིང་གོམས་པ་ལས་རུང་ལ། །དེ་ཡི་ངང་འདའོ་བར་དོའི་ཚེ། །འདོད་ཁྲིད་རིག་པ་དེར་ཤེས་ནས། །ངང་དུ་གནས་པ་དེ་གྲོལ་བ། །གནད་ཀྱིས་རང་གྲོལ་ཉེ་དུས་ཡིན། །ཞེས་དང༌། བདུད་རྩི་ཆུ་རྒྱུན་ལས། ཉིད་ཀྱིས་ཟིན་ན་མཉམ་པར་བཞག །ཐུན་གཅིག་དགོངས་པས་གྲོལ་བའང་ཡིན། །སྦྱངས་པའི་སྔར་ལས་ཤིན་ཏུ་གཅེས། །ཞེས་གསུངས་ཏེ་གང་ཟག་ཁྱད་པར་ཅན་གྱི་དབང་དུའོ། །སྤྱིར་ནི་དགེ་སྡིག་གང་ལ་ཡང་མ་གོམས་པ་ནི་བཤད་པ་ལྟར་གསལ་དུ་མི་བཏུབ་ལ། གོམས་པ་ནི་གསལ་བར་འགྱུར་བ་ཡིན་པས་དགེ་བ་ཉིད་ཁོ་ན་ལ་གོམས་ཤིང་བརྩོན་པར་བྱའོ། །དེ་ལྟར་བསྟན་པའི་གྲངས་དེ་དག་ཀྱང་ཡིད་ཀྱི་ལས་ཡིན་ནོ། །དེ་ལ་སོགས་པ་དོན་མང་པོ་རྣམས་ལ་དགོངས་ཏེ་བཅོམ་ལྡན་འདས་ཀྱིས། དྲུག་པ་ བདག་པོ་རྒྱལ་པོ་ནི། །ཆགས་པར་གྱུར་ན་ཆགས་ཅན་ཡིན། །ཆགས་པ་མེད ་ན་ཆགས་མེད་འགྱུར། །ཆགས་ན་བྱིས་པ་ཞེས་བྱའོ། །ཞེས་དང༌། རིང་དུ་འགྲོ་ཞིང་གཅིག་པུར་རྒྱུ། །ལུས་ཡོངས་མ་ཡིན་ཕུག་གནས་པ། །འདུལ་དཀའི་སེམས་ནི་འདུལ་བ་དེ། །བྲམ་ཟེ་ཡིན་ཞེས་ང་སྨྲའོ། །ཞེས་བཀའ་སྩལ་བར་མཛད་དོ།།

གསུམ་པ་བར་དོའི་ཆོས་དང་མཚན་ཉིད་ཀྱི་རྣམ་གཞག་སྤྲོས་ཏེ་བསྟན་པ་བར་དོའི་ཆོས་བཤད་པ་ལ་བརྒྱད་དེ། བར་དོའི་སྲིད་པའི་ཆ་ལུགས་བསྟན་པ། བར་མར་གནས་པ་དེའི་ལུས་དང་སྤྱོད་ཡུལ་གྱི་སྣང་ཚུལ་བཤད་པ། དེའི་ཚེ་ཚད་དང་སྐྱེ་བ་ཕྱི་མ་ཅི་ཙམ་ན་ལེན་པར་བསྟན་པ། བར་མ་དོའི་ངེས་ཚིག་བཤད་པ། དེའི་མིང་གི་རྣམ་གྲངས་བསྟན་པ། ཁམས་གསུམ་ལ་བར་མ་དོ་ཡོད་མེད་ཀྱི་བྱེ་བྲག་བཤད་པ། སྔར་གྱི་ལས་གང་གོམས་ལ་དགའ་བར་བསྟན་པ། སྐྱེ་བ་ཇི་ལྟར་ལེན་པའི་ཚུལ་བཤད་པའོ། །དང་པོ་ནི།

གསུམ་པ་སྲིད་གསུམ། ཞེས་པ་ནས། འཛིན་ཅིང་ཐོགས་པ་མེད། །ཅེས་པའི་བར་གྱིས་བསྟན་ཏེ།

གསུམ་པ་སྲིད་གསུམ་པར་བདུན་པ། །རྫུས་སྐྱེས་དབང་ལྡན་ལས་ཀྱིས་འགྲོ།།

གང་མཐུན་མཐོང་ཡིན་གང་མཐོང་ཡིན། །ཤིན་ཏུ་བདེ་དང་བདེ་སྡུག་བསྔལ།།

དེ་སོགས་གང་དུ་སྐྱེ་འགྱུར་འདི།།དེ་དབྱིབས་འཛིན་ཅིང་ཐོགས་པ་མེད།།

ལྔ་ཕྲག་གསུམ་པའི་གསུམ་པ་སྲིད་པ་གསུམ་གྱི་བར་མར་གནས་པ་དེའི་མཚན་ཉིད་བཤད་ན། ཚེའི་ཚད་ནི་ཞག་བདུན་པར་གྱུར་པ་སྟེ། དེ་ཡང་སྐྱེ་བ་བཞི་ལས་བརྫུས་ཏེ་སྐྱེས་ཤིང་དབང་པོ་ཀུན་ཚང་བར་ལྡན་ལ་སྔ་མའི་ལས་ཀྱི་འཕེན་པའི་སྟོབས་ཀྱིིས་འགྲོ་བར་བྱེད་པའོ། །དེ་༼༡༦༠༽དག་ནི་གང་རིགས་མཐུན་པ་དང་ལྷ་མིག་དག་པས་མཐོང་བ་ཡིན་གྱི་གང་མ་དག་པ་དང་རིགས་མི་མཐུན་གཞན་དག་གིས་མཐོང་བ་མིན་ནོ། །བར་མ་དོའི་ལུས་ཀྱི་ཆ་ལུགས་ནི། གནས་ཤིན་ཏུ་བདེ་ཞིང་མཐོ་བ་ལྷ་དང་བདེ་བ་འབྲིང་དང་ལྡན་པ་མི་དང་སྡུག་བསྔལ་ཤིན་ཏུ་ཆེ་བས་དམན་པ་དམྱལ་བ་དང༌། དེ་གསུམ་ལ་སོགས་པའི་འགྲོ་བ་རིགས་དྲུག་པོ་རྣམས་ཀྱི་གང་དུ་སྐྱེ་བར་འགྱུར་བ་དེའི་ཤ་ཚུགས་ལྟར་རང་གིས་མཐོང་བས་ཕྱི་མའི་ལུས་དེ་ཡི་དབྱིབས་འཛིན་ཅིང་ཆ་ལུགས་དེར་སྣང་སྟེ། སྤྱོད་པ་དང་ལས་ནི་བྲག་དང་རི་ལའང་ཐོགས་པ་མེད་པར་འགྲོ་བ་ཉིད་དེ། སློབ་དཔོན་ལྷའི་རྒྱལ་པོས་བྱང་སེམས་བདུད་རྩི་ཆུ་རྒྱུན་ལས། དེ་ཚེ་དྲི་ཟ་བར་བདུན་པ། །རྫུ་འཕྲུལ་འོད་ལྡན་ཐོགས་རྡུག་མེད། །མངོན་ཤེས་ལྡན་ཞིང་རྫུས་ཏེ་སྐྱེ། །གདོས་པའི་ལུས་བྲལ་ཕྱིས་འབྱུང་གསལ། །དེ་ཚེ་བདུན་ཚིགས་གྲོགས་ཀྱིས་སྟོངས། །ཞེས་དང༌། གཞན་དག་ལས་ཀྱང༌། སྔོན་བྱུང་སྲིད་པའི་ཤ་ཚུགས་ཅན། །ཞེས་སོགས་གསུངས་སོ།།

གཉིས་པ་བར་མར་གནས་པ་དེའི་ལུས་དང་སྤྱོད་ཡུལ་གྱི་སྣང་ཚུལ་བཤད་པ་ནི།

དེ་ཡི་ལུས་སམ། ཞེས་པ་ནས། གོང་མ་ཉིད་བཞིན་ནོ། །ཞེས་པའི་བར་གྱིས་བསྟན་ཏེ།

དེ་ཡི་ལུས་སམ་སྦྱོད་ཡུལ་ནི། །དྲི་མ་ཅན་དུ་གྱུར་པ་རྣམས། །མཚན་མ་མུན་ནག་རྫས་ནག་ལྟར། །ཐམས་ཅད་ཐམས་ཅད་མཐོང་བར་འགྱུར། །གང་དག་དྲི་མེད་པ་དག་རྣམས། །ཟླ་འོད་དཀར་དང་རྫས་དཀར་ལྟར། །དེ་ཉིད་དེ་མིག་དག་པས་མཐོང་། །གང་དེའི་དེ་ཚད་ཐ་མ་པའི། །སྤྲུལ་པ་འབྱུང་གནས་ལྔ་ཚད་པར། །གང་སྐྱེས་གནས་མ་བླངས་བར་དུ། །དེ་དམིག་དེ་ཡི་མིག་ལྟ་བུར། །གང་ལ་ཐོགས་མེད་སྐལ་མཉམ་པའོ། །གང་ལྟར་ཀུན་ལ་མ་ཡིན་ནོ། །གང་སྐལ་མཉམ་པའི་སྐྱེ་གནས་དང་། །དེ་དག་ཉིད་གནས་མཐོང་བར་འགྱུར། །གང་དག་དྲི་མིག་ཐུར་དུ་གསལ། །སྤྱིའུ་ཚུགས་འགྲོ་ལ་གཞན་མཐོང་མིན། །དྲི་མེད་མཐོང་གསལ་གཞན་དེ་བཞིན།།

གང་གི་ཐད་དུ་དེ་ཉིད་སྣང་། །གཞན་ན་གོང་མ་ཉིད་བཞིན་ནོ།།

དེ་ལྟར་སྔ་ཕྱིའི་སྲིད་པའི་བར་དུ་གནས་པའི་འགྲོ་བ་དེ་ཡི་ལུས་སམ་སྤྱོད་ཡུལ་གྱི་མཐོང་ལུགས་ནི། གང་དག་སྡིག་པ་སྤྱོད་སྤྱོད་ཅིང་དྲི་མ་ཅན་དུ་གྱུར་པ་རྣམས་ཀྱིས་ནི། དཔེར་ན་མཚན་མོ་མུན་ནག་གི་ནང་དུ་ཕྱིན་ན་རྫས་ཐམས་ཅད་མི་གསལ་བར་མུན་ནག་ཏུ་མཐོང་བ་ལྟར་དུ། ཡུལ་དང་གནས་ཀྱི་སྣོད་ཐམས་ཅད་དང་བཅུད་ཐམས་ཅད་རྨུགས་ཤིང་མི་གསལ་བར་མུན་པ་མུན་ནག་གི་སྨག་ཏུ་མཐོང་བར་འགྱུར་ཏེ། སའི་དངོས་གཞི་ལས། ཉེས་པའི་ལས་བྱེད་བྱེད་པ་རྣམས་ཀྱི་བར་མ་དོའི་སྲིད་པ་ནི། དཔེར་ན། ཕྱར་བ་ནག་པོའམ། མཚན་མོའི་མུན་པ་མུན་ནག་ཏུ་སྣང་བ་ལྟ་བུའོ། །ཞེས་སོ། །གང་དག་དྲི་མ་མེད་པར་དགེ་བ་ལ་སྤྱོད་སྤྱོད་དེ་ལས་དག་པ་རྣམས་ཀྱིས་བར་མ་ན་འདུག་པའི་ཚེ་ན་མཐོང་ཡུལ་གསལ་བ་ནི། དཔེར་ན་ཟླ་བའི་འོད་ཟེར་དཀར་པོ་གང་དུ་ཤར་བ་དང་རྫས་ཐམས་ཅད་ཀྱང་དཀར་པོ་གསལ་བར་མཐོང་བ་ལྟར་ཡུལ་གནས་ཀྱི་སྣོད་དང་བཅུད་ཐམས་ཅད་གསལ་ཞིང་སྣང་བར་འགྱུར་ཏེ། སྔ་མ་ལས། ལེགས་པའི་ལས་བྱེད་བྱེད་པ་རྣམས་ཀྱི་ནི་དཔེར་ན། སྣམ་བུ་དཀར་པོའམ། ཟླ་བའི་འོད་དང་བཅས་པའི་མཚན་མོར་སྣང་བ་ལྟ་བུའོ།།༼༡༦༡༽ཞེས་སོ། །འོ་ན་དེ་དག་ལ་ཡིད་ཆེས་པའི་ལོ་རྒྱུས་ཅི་ཡོད། སུའི་སྤྱོད་ཡུལ་དུ་གྱུར་པ་ཡིན་ཞེ་ན། སྣང་ཚུལ་དེའི་ཤེས་བྱེད་བསྟན་པ་ནི། དེ་ལྟར་དགེ་སྡིག་གི་བར་མ་དོ་དེ་གཉིས་ཀྱིས་མུན་སྣང་གི་མཐོང་ཚུལ་དང་བཅས་པ་དེ་ནི་རྨུགས་པ་དང་གཉིད་རྒོད་པ་དང་ཐེ་ཚོམ་ཡིད་མི་བདེ་བ་དང་ལུས་ཀྱི་གནས་ངན་ལེན། སེམས་ཡ་ཡ་བོ། །བག་ཚ་བ། འདུ་ཤེས་སྣ་ཚོགས། སྨྲ་བ་མང་པོ། བསྒོམ་དྲག་པ་སྟེ་སྐྱོན་བཅུ་གཅིག་དང་བྲལ་བའི་ལྷའི་མིག་རྣམ་པར་དག་པས་མཐོང་ཞིང་ཤེས་པའོ། །དེས་ན་སྔ་མ་ལས། དེ་ནི་ལྷའི་མིག་ཤིན་ཏུ་རྣམ་པར་དག་པའི་སྤྱོད་ཡུལ་ཡིན་ནོ། །ཞེས་སོ། །དེ་བས་ན་རིགས་མཐུན་པས་ཀྱང་མཐོང་མོད་ཀྱི། འོན་ཀྱང་དགེ་བ་ཅན་གྱི་བར་མས་ནི་སྡིག་པ་ཅན་གྱི་བར་མ་དང་བདག་དང་མཐུན་པར་རང་གི་རིགས་སུ་གྱུར་པ་མན་ཆད་གཉིས་ཀ་མིག་དག་པས་མཐོང་ལ། སྡིག་པ་ཅན་གྱི་བར་མས་དགེ་བ་ཅན་གྱི་བར་མ་མི་མཐོང་སྟེ་རྒྱུ་འབྲས་བཟང་ངན་གྱི་ཁྱད་པར་ཡོད་པས་སོ། །དེའི་ལུས་ཆེ་ཆུང་གི་ཚད་ནི། གང་བར་མ་དོ་དེ་ཡི་ལུས་དེ་ཉིད་ཆེ་ཆུང་གི་ཚད་ནི་འདོད་པའི་ཁམས་ཀྱི་མཐོ་རིས་ཀྱི་གནས་ཐ་མ་ཡི་སྤྲུལ་པའི་སྐུ་དམ་པ་དོན་གྲུབ་འབྱུང་བའི་མིའི་གནས་ཀྱི་འཛམ་བུ་གླིང་པའི་བྱིས་པ་ལོ་ལྔ་ལོན་པའི་ཚད་དང་མཉམ་པར་ཡོད་དོ། །ཡང་ལ་ལས། བསྐལ་པ་དང་པོའི་མི་བཞིན་དུ་འོད་ཀྱི་ལུས་ཅན་ཆུང་བ་ཞིག་ཡིན་པར་འདོད་དེ། སྔོན་བྱུང་སྲིད་པ། ཞེས་པས་སོ། །དེ་ལ་ལ་ལས་སྔོན་བྱུང་སྲིད་པ་སྐྱེ་བ་སྔ་མ་ལ་བཞེད་ཀྱང༌། འདིར་ནི་སྔོན་ན་ཡོད་པས་སྐྱེ་བ་ཕྱི་མར་བཞེད་དེ། གོང་དུ་འབྱུང་བ་དང་མཐུན་པར་སྔ་མ་ལས་ཀྱང༌། དེ་ནི་གང་དུ་སྐྱེ་བར་འགྱུར་པ་དེའི་ཤ་ཚུགས་ལྟ་བུར་བར་མ་དོའི་སྲིད་པར་སྐྱེ་སྟེ། སྐྱེ་བའི་གནས་མ་བླངས་ཀྱི་བར་དུ་དེའི་མིག་ལྷའི་མིག་ལྟ་བུར་ཐོགས་པ་མེད་དོ། །ཞེས་གསུངས་ཏེ། སྲིད་པ་བར་མའི་འགྲོ་བ་དེས་གང་དུ་སྐྱེ་བར་འགྱུར་བའི་གནས་ཀྱི་ཕྱི་མའི་ལུས་དེ་ཉིད་མ་བླངས་པའི་བར་དུ་བར་མ་དོ་ན་འདུག་པའི་ཚེ། བར་དོ་དེ་ཡི་མིག་དེ་ཉིད་ལྷའི་སྤྱན་ནམ་ལྷ་ཡི་མིག་ལྟ་བུར་གྱུར་པས་འདོད་ཁམས་ཀྱི་སྣོད་བཅུད་ཐམས་ཅད་ཉེ་རིང་མེད་པར་གསལ་བར་མཐོང་བ་དང༌། འབྱུང་བ་ཆེན་པོ་བཞི་གང་ལ་ཡང་ཐོགས་པ་མེད་པའི་རྫུ་འཕྲུལ་ཅན་ཡིན་པས་འདོད་པའི་ལྷ་དང་སྐལ་བ་མཉམ་པའོ། །དེ་ནི་ལྷ་མི་སྟོད་རིམ་གྱི་༼༡༦༢༽དབང་དུ་བྱས་པའམ། ཡང་ན་དགེ་བ་ཅན་དང་ཏིང་ངེ་འཛིན་ཅན་གྱི་བར་མ་ཡིན་གྱི། སྡིག་པ་ཅན་གྱི་བར་མས་ནི་གང་དེ་ལྟར་ཀུན་ལ་མཐོང་བ་གསལ་བ་མ་ཡིན་ཏེ། རྒྱུན་གྱི་སྤྱོད་ཡུལ་རྣམ་པར་གནག་པའི་ཕྱིར་རོ། །ལྷ་མིག་དག་པ་ཞེས་པ་ནི། སྒོམ་པ་ལས་བྱུང་བ་དང་ཟག་པ་མེད་པའི་ལྷའི་མིག་གམ་སྤྱན་ལྟ་བུ་ཡིན་ནོ། །དེས་ན་སྔ་མར་ཡང༌། འགྲོ་བ་ཡང་སྐྱེ་བའི་གནས་མ་བླངས་ཀྱི་བར་དུ་རྫུ་འཕྲུལ་དང་ལྡན་པ་བཞིན་དུ་ཐོགས་ པ་མེད་དོ། །དེའི་མིག་དེས་བར་མ་དོའི་སྲིད་པ་བའི་སེམས་ཅན་བདག ་དང་སྐལ་བ་མཉམ་པ་རྣམས་དང༌། དེ་དག་གི་སྐྱེ་བའི་གནས་དང༌། བདག་གི་སྐྱེ་བའི་གནས་ཀྱང་མཐོང་ངོ། །ཞེས་གསུངས་ཏེ། གང་སྡིག་པ་ཅན་གྱི་བར་དོ་དེས་རང་བྱོལ་སོང་དང་དམྱལ་བ་དང་ཡི་དྭགས་གང་དུ་སྐྱེ་བའི་སྐལ་བ་མཉམ་པའི་སྐྱེ་གནས་དང་དེ་དག་གི་དངོས་པོ་ཡང་ཤེས་པར་འགྱུར་ཏེ། ལས་མཐུན་པའི་དབང་གིས་སོ། །དེ་བཞིན་དུ་དགེ་བ་ཅན་དྲི་མ་མེད་པ་དེས་ཀྱང་ཉེ་རིང་མེད་པར་རང་ལྷ་མི་དང་ལྷ་མ་ཡིན་གང་དུ་སྐྱེ་བར་འགྱུར་བའི་སྐལ་བ་མཉམ་པ་དེ་དག་ཉིད་ཀྱི་གནས་རིས་དང་དངོས་པོ་ཀུན་ཀྱང་མཐོང་ཞིང་ཤེས་པར་འགྱུར་ཏེ། རང་དང་དགེ་བའི་ལས་སྣང་མཐུན་པས་སོ། །དེའང་ལུས་ཀྱི་འགྲོ་ཚུལ་ནི། འགྲོ་བ་གང་དག་སྡིག་པ་མི་དགེ་བའི་ལས་ལ་སྤྱོད་པའི་དྲི་མ་ཅན་རྣམས་ནི་མིག་གི་སྤྱོད་ཡུལ་ཐུར་དུ་གསལ་བས་ལུས་ཀྱང་སྤྱིའུ་ཚུགས་སུ་འགྲོ་བ་སྙམ་བྱེད་དེ་འོག་ཏུ་བལྟས་ནས་འགྲོ་ལ་དེས་ན་མཐོ་རིས་ཀྱི་གནས་གཞན་རྣམས་ནི་མཐོང་བ་མིན་ནོ། །གལ་ཏེ་སྡིག་པའི་དྲི་མ་མེད་པའི་དགེ་བ་ཅན་རྣམས་ཀྱིས་ལུས་གྱེན་དུ་འགྲེང་བས་མངོན་མཐོར་གྱུར་པ་མཐོ་རིས་ཀྱི་མཐོང་བའི་སྤྱོད་ཡུལ་མཐའ་དག་གསལ་ཏེ་རང་ལྷ་མི་གར་སྐྱེ་བའི་སྐལ་པ་མཉམ་པ་ཀུན་ཀྱང་མཐོང་ལུགས་སྔར་བཤད་པ་ལྟར་དང་གཞན་ངན་སོང་གི་གནས་དང་སྤྱོད་ཡུལ་ཡང་མཐོང་སྟེ་ལས་འཕྲོ་མེད་པས་བློ་མི་འཇུག་པའམ། ཡང་ན་བཤད་མ་ཐག་པ་དེ་བཞིན་དུ་ངན་སོང་མཐོང་བ་མིན་ནོ། །དེ་བས་ན་དེ་ཉིད་ལས། ཉེས་པའི་ལས་བྱེད་བྱེད་པ་རྣམས་ཀྱི་མིག་ནི་ཐུར་དུ་གསལ་ཏེ། སྤྱིའུ་ཚུགས་སུ་འགྲོའོ། །ལྷར་སྐྱེ་བ་རྣམས་ནི་གྱེན་དུའོ། །མིར་སྐྱེ་བ་རྣམས་ནི་ཐད་གར་རོ། །ཞེས་གསུངས་པས། མིའི་བར་མས་མཐོང་སྟངས་བྱེ་བྲག་ཏུ་བསྟན་པའམ། གོང་དུ་བསྟན་པ་དེ་ལྟར་ལས་དཀར་ནག་གང་ལ་རང་གི་གོམས་པར་༼༡༦༣༽བྱས་པ་དེའི་ལས་སྣང་གང་དེ་རང་ཉིད་ཀྱི་ཐད་དུ་ལས་ཀྱི་དབང་གིས་སྐྱེ་བ་གང་དང་གང་ལེན་པའི་སྤྱོད་ཡུལ་དེ་ཉིད་རང་ངོ་ལ་སྣང་བར་འགྱུར་བའམ། ཡང་ན་འདི་ཉིད་དགེ་བ་ཅན་གྱི་བར་དོ་ཡིན་པས་རང་ཐད་ཀྱི་སྣང་བ་དཀར་བས་མཐོང་བ་རྒྱ་ཆེ་སྟེ། གོང་དུ་ལྷ་མིག་ཅེས་པས་འགྲོ་དྲུག་གི་གནས་ཀྱང་མཐོང་སྟེ། དེའང་འདོད་ཁམས་ཡིན་ལ་དཔེར་ན་དགའ་ལྡན་དུ་སྐྱེ་ན་དེའི་བར་དོས་དེ་མན་ཆད་མཐོང་བ་ལྟ་བུ་སྟེ། དེས་གཞན་ཀུན་འགྲེའོ་ཞེས་དམ་པ་རིན་པོ་ཆེའི་ཕྱག་མཆན་ལས་འབྱུང་ངོ་། །དེས་ན་སྐལ་མཉམ་གྱི་སྐྱེ་གནས་དང་སྤྱོད་ཡུལ་མཐོང་ཞིང་དེ་ལ་འཇུག་པ་ལས་དེ་ལས་བཟློག་པའམ་གོམས་པ་མེད་པའི་ལས་སྣང་གི་འགྲོ་བ་གཞན་རྣམས་མི་སྣང་བའམ་དེ་ལ་མི་འཇུག་པ་ནི་གོང་དུ་བཤད་མ་ཐག་པ་ཉིད་བཞིན་ཏེ། སྡིག་པ་ཅན་ལ་དགེ་བའི་ལྟས་མི་སྣང་བ་དང་ལས་ཀྱིས་མ་སྒྲུབས་པས་འབྲས་བུ་གང་དང་གང་ཡང་མི་འབྱུང་བར་ཡིད་ཆེས་པའི་གནས་སུ་ངེས་པ་ཡིན་པས་སྣང་ཚུལ་གང་ཡང་བག་ཆགས་དང་བཅས་པ་ལས་གཞན་དུ་མ་དམིགས་པ་བཞིན་ཡིན་ནོ།།

གསུམ་པ་དེའི་ཚེ་ཚད་དང་སྐྱེ་བ་ཕྱི་མ་ཅི་ཙམ་ན་ལེན་པར་བསྟན་པ་ནི།

བར་བདུན་པ་ཡི། ཞེས་པ་ནས། དེ་མེད་ག་ལ་སྲིད། །ཅེས་པའི་བར་གྱིས་བསྟན་ཏེ།

བར་བདུན་པ་ཡི་སྙིང་པོ་ཅན། །སྐྱེ་བའི་དེ་མ་རྙེད་བར་དུ། །རིང་ལྟར་ཐོགས་ན་བདུན་པའོ། །གང་དེ་ལྡན་ན་ངེས་མེད་དེ། །གཅིག་གམ་གཉིས་སམ་གསུམ་ན་འཕོ། །གང་མ་ལྡན་ན་དེ་རྗེས་ནས། །ཡང་བདུན་བར་དུ་དེ་ན་གནས། །གང་ཡོང་དེ་གང་མི་ལྡན་ན། །བདུན་ཕྲག་བདུན་གྱི་བར་དག་ཏུ། །བདུན་ཉིད་རེ་ན་དེ་རྗེ་ཞིང་། །དེ་རྫོགས་སྲིད་དུ་དེ་ན་གནས། །དེས་ནི་གནས་པ་དེ་ཟད་ནས། །གཞན་དུ་གནས་པ་དེ་འཛིན་པའི། །གང་དེས་དེ་སྲིད་ཟིལ་གྱིས་གནོན། །བདུན་ནི་བདུན་རྫོགས་དེ་ཕྱིན་ཆད། །ངེས་པར་དེ་མེད་ག་ལ་སྲིད།།

དེའི་ཚེ་ཚད་དང་སྐྱེ་བ་ཕྱི་མ་ཇི་ཙམ་དུ་ལེན་པ་ཐུན་མོང་དུ་བསྟན་པའི་ཕྱིར། དེ་ཡང༌། རྒྱན་སྟུག་པོ་བཀོད་པ་ལས། དང་པོ་ཚེས་པའི་ཟླ་མདོག་ལྟར། །བྱེ་བའི་ཞིང་དུ་སྣང་བ་སྟེ། །རི་རབ་གནས་ཤིང་འཁོར་བ་ཡང༌། །དངོས་པོ་འཇིག་པ་མ་ཡིན་ནོ། །དེ་བཞིན་ཡིད་སེམས་རྣམ་པར་ཤེས། །སེམས་ཅན་ཁམས་ན་འཁོར་མོད་ཀྱི། །དེ་ལ་འཕེལ་ཞིང་འབྲི་མེད་དེ། །རྟག་ཏུ་རང་བཞིན་འོད་སྣང་བའོ། །ཞེས་དང༌། ལང་ཀར་གཤེགས་པ་ལས། སེམས་ཀྱི་རང་བཞིན་འོད་གསལ་བ། །ཡིད་ལ་སོགས་པའི་ཉོན་མོངས་དང༌། །བདག་དང་ལྷན་ཅིག་ལྡན་པར་ནི། །སྨྲ་བའི་མཆོག་གིས་རབ་ཏུ་བསྟན། །ཞེས་གསུངས་པ་ལྟར། བར་མ་དོའི་སྲིད་པ་ཚེ་ཚད་ཞག་བདུན་དུ་སྡོད་པ་ཡི། སེམས་ཅན་ཆོས་ཉིད་བདེ་བར་གཤེགས་པའི་སྙིང་པོ་ཅན་དེ་ཉིད། ཕྱི་མར་སྐྱེ་བའི་གནས་ཀྱི་རྒྱུ་རྐྱེན་མཐུན་པ་དེ་མ་རྙེད་པའམ་དེ་དང་མ་ཕྲད་ཀྱི་བར་དུ་ཡུན་རིང་པོ་ཇི་ལྟར་ཐོགས་ན་ཡང་བར་མ་དོར་ཞག་བདུན་གྱི་བར་དུ་ཐོགས་པ་སྟེ་དེ་ནས་སྔ་མའི་ལས་དྲན་ཏེ་སྐད་ཅིག་གིས་ལུས་བརྗེ་བའམ་སྐྱེ་བ་ལེན་པའོ། །གང་སྐྱེ་བ་ཕྱི་མ་ལེན་པའི་རྒྱུ་རྐྱེན་དེ་དང་ལྡན་ན་ནི། ངེས་༼༡༦༤༽པ་མེད་དེ། ཞག་གཅིག་གམ་གཉིས་སམ་གསུམ་ནའང་འཕོ་བར་འགྱུར་ཏེ་སྐྱེ་བ་ལེན་པས་བར་མ་ལས་འགྱུར་རོ། །གལ་ཏེ་ཕྱི་མ་ལེན་པའི་རྒྱུ་རྐྱེན་གང་དང་ཡང་མ་ལྡན་ཏེ་སྐལ་བ་མེད་ཅིང་འགལ་རྐྱེན་བྱུང་ན་བདུན་ཕྲག་དང་པོའི་སྐྱེ་བ་དེ་སྲང་མདའི་ཚུལ་དུ་བརྗེས་ནས་ཡང་བདུན་ཕྲག་གཉིས་པའི་བར་དུ་དེ་ན་གནས་པའོ།།

དེ་ཡང་དམ་པ་རིན་པོ་ཆེས། ཞག་བདུན་པར་དོན་གནས་ཚེ་བདུན་ཕྲག་གཅིག་པ་དང༌། དེ་བས་མང་ན་བདུན་ལ་སྔ་མ་ཡིན་ལ། དེ་ནས་འཕོ་ཚུལ་བསྟན་ཏེ་ཕྱིན་ཆད་ཕྱི་མའོ། །གསུངས། གང་དེར་ཡང་འགལ་རྐྱེན་ཡོད་དེ་སྐྱེ་བ་དང་མཐུན་པའི་རྒྱུ་རྐྱེན་དེ་དག་གང་དང་ཡང་མི་ལྡན་པར་གྱུར་ཏེ་ཡུན་རིང་པོར་ཐོགས་ན། ཞག་བདུན་ཕྲག་བདུན་གྱི་བར་ཏེ་བཞི་བཅུ་རྩ་དགུའི་ཡུན་དག་ཏུ་ཐོགས་པ་ཡིན་ཏེ། སྔ་མ་ལྟར་ཞག་བདུན་ཚན་ཉིད་ཀྱི་སྐོར་རེ་ན་ལུས་དེ་རྒྱུད་མཐུན་པར་རྗེ་ཞིང་འཕོ་སྟེ། ཞག་གྲངས་དེ་ཉིད་རྫོགས་པར་མ་གྱུར་བ་དེ་སྲིད་དུ་བར་མ་དོ་དེ་ན་གནས་ཤིང་སྡོད་དོ། །ཞག་གྲངས་དེས་ནི་བར་དོར་གནས་པ་དེ་ཡི་ཚེ་ཚད་ཀྱི་ལས་ཟད་དེ་མཐར་རྫོགས་ནས་འདུག་ཐབས་མེད་དེ་ཕྱི་མའི་སྐྱེ་བ་གཞན་གང་ཡང་རུང་བ་ཉིད་དུ་གནས་པ་དེ་ཡི་ལུས་ལ་འཛིན་པའི་འདོད་ཆགས་སྐྱེ་ཞིང་བར་མའི་ལུས་སྒྱུ་མ་དེ་ལ་ཞེ་སྡང་འབྱུང་བར་འཆད་པར་ཡང་འགྱུར་ཏེ། གང་གི་ལས་དེས་བར་མ་དོ་དེ་ཡི་སྲིད་པའི་ལས་དེ་ཟིལ་གྱིས་གནོན་ཏེ་ལྡང་མི་ནུས་ལ། དེ་ལྟར་ཞག་བདུན་ཕྲག་ཉིད་ནི་བདུན་གྱི་གྲངས་རྫོགས་པ་དེ་ཕྱིན་ཆད་སྐྱེ་བ་ཕྱི་མའི་རྐྱེན་དང་མི་ཕྲད་པ་མི་སྲིད་པས་ངེས་པར་ཕྱི་མ་ལེན་པའི་རྐྱེན་དེ་མེད་པར་རམ་མི་འཛོམ་པར་ག་ལ་སྲིད་དེ་མི་སྲིད་པ་ནི་ཁོ་རང་གི་ཆོས་ཉིད་ཀྱིས་ཡིན་ནོ། །དེ་ཡང་དམིགས་བསལ་དང་བཅས་ཏེ། སའི་དངོས་གཞི་ལས། ཞག་བདུན་གྱིས་ཤི་འཕོས་པ་དེ་ཡང༌། ཡང་ན་ནི་དེ་ཉིད་དུ་མངོན་པར་འགྲུབ་པར་འགྱུར་རོ། །ཡང་ན་ནི་སྐལ་བ་མི་མཉམ་པ་གཞན་དུ་སྟེ། གལ་ཏེ་ལས་གཞན་གྱི་བྱ་བ་ཡོངས་སུ་གྱུར་པས། བར་མ་དོའི་སྲིད་པའི་ས་བོན་ཡོངས་སུ་འགྱུར་བར་བྱེད་པའི་ཕྱིར་རོ། །ཞེས་གསུངས་སོ།།

བཞི་པ་བར་མ་དོའི་ངེས་ཚིག་བཤད་པ་ནི།

གང་ནུབ་གང་སྣང༌། ཞེས་པ་ནས། གནས་པས་བར་མ་དོ། །ཞེས་པའི་བར་གྱིས་བསྟན་ཏེ།

གང་ནུབ་གང་སྣང་དེ་སྐབས་ན། །སྐད་ཅིག་གནས་པས་བར་མ་དོ།།

འོ་ན་ཅིའི་ཕྱིར་བར་མ་ཞེས་བྱ་ཞེ་ན། སྐྱེ་བ་སྔ་མའི་སྲིད་པ་གང་ཡིན་པ་དེ་ནུབ་ཅིང་ཕྱི་མའི་སྲིད་པ་གང་གི་སྣང་བ་དེ་མ་བྱུང་བ་ཡི་གནས་སྐབས་ཀྱི་བར་ན་ཤེས་པ་༼༡༦༥༽སྐད་ཅིག་མའི་རྒྱུད་སྒྱུ་མའི་ཡིད་ལུས་སུ་གནས་པའི་སྲིད་པ་ཡིན་པས་བར་མ་དོ་ཞེས་པའི་ངེས་ཚིག་འགྲུབ་པའོ། །དེས་ན་སའི་དངོས་གཞི་ལས། དེའི་རྣམ་གྲངས་ནི་འཆི་བའི་སྲིད་པ་དང་སྐྱེ་བའི་སྲིད་པ་གཉིས་ཀྱི་བར་མ་དོར་འབྱུང་བས་ན་བར་མ་དོའི་སྲིད་པ་ཞེས་ཀྱང་བྱའོ། །ཞེས་སོ།།

ལྔ་པ་དེའི་མིང་གི་རྣམ་གྲངས་བསྟན་པ་ནི།

བདུན་ཞིང་ནུབ་པའི། ཞེས་པ་ནས། མཚམས་སྦྱོར་ཞེས་ཀྱང་བྱ། །ཞེས་པའི་བར་གྱིས་བསྟན་ཏེ།

བདུན་ནི་ནུབ་པའི་རང་བཞིན་པས། །ནུབ་པའི་སྲིད་པ་ཞེས་ཀྱང་བཤད། །བདུན་ནི་བར་དུ་གནས་པས་ན། །གང་དེ་བར་བདུན་པ་ཞེས་བྱ། །དྲི་ཡི་ཕྱིར་འབྲང་དྲི་ལྟ་བས། །དྲི་ཟ་ཉེ་འཁོར་ཞེས་ཀྱང་བྱ། །དེ་ལ་བརྟེན་ནས་དེ་བྱུང་བས། །དེ་ལས་བྱུང་བ་ཞེས་ཀྱང་བྱ། །སྐྱེ་བའི་དབྱིབས་ཚུལ་དེ་འཛིན་པས། །སྔོན་བྱུང་ཕྱི་མའི་ཚུལ་བཞིན་ཅན། །སྐྱེ་བ་མངོན་དུ་བྱེད་པས་ན། །མངོན་དུ་གྲུབ་པ་ཞེས་ཀྱང་བྱ། །རྟག་ཏུ་ཟས་ལ་ཉེ་འཁོར་བས། །ཉེ་བར་འཁོར་བ་ཞེས་ཀྱང་བྱ། །གཉིས་ཀྱི་བར་སྐབས་ཡིན་པས་ན། །སྲིད་པ་མཚམས་སྦྱོར་བ་ཞེས་བྱ།།

དེའི་མིང་གི་རྣམ་གྲངས་ནི། སྐྱེ་རྒུའི་ཐོག་མ་སྟེ་འོད་གསལ་གྱི་ལྷ་ལས་བབས་པའི་ལུས་འཇའ་ཚོན་ལྟ་བུ་ཞེས་ཀྱང་ཟེར་ཏེ། དོན་དུ་བར་སྲིད་གང་ཡང་ཞག་བདུན་ཕྲག་རེ་ཞིང་ལུས་དེ་ནུབ་པའི་རང་བཞིན་ཅན་ཡིན་པས་ནུབ་པའི་སྲིད་པ་ཡིན་ནོ་ཞེས་ཀྱང་བཤད་དེ་ཕལ་ཆེ་བའི་དབང་དུ་བྱས་པའོ། །བར་དོར་སྐྱེ་ནས་ཞག་བདུན་ཉིད་ཀྱི་ཚེ་ཡི་བར་དུ་གནས་པས་ན། གང་དེ་ལ་སྲིད་པ་བར་བདུན་པ་ཞེས་ཀྱང་བྱའོ། །ཁ་ཟས་དྲི་ཡི་ཕྱིར་འབྲང་ཞིང་སྤྱོད་ལ་དྲི་ཡི་ཟས་ཀྱིས་ལུས་རྟས་པར་བྱེད་པས་ན་དྲི་ཟ་ཉེར་འགྲོའམ་ཉེ་བར་འཁོར་བ་ཞེས་ཀྱང་བྱ་སྟེ། དངོས་སུ་ཉེ་དུ་ལ་འཁོར་བའང་ཡིན་པར་གསུངས། དེ་གཉིས་ཐུན་མོང་སྟེ་གཞན་དག་ཀྱང་མཚུངས་སོ། །སྔ་མའི་ཡིད་དམ་བར་དོ་དེ་ལ་བརྟེན་ནས་ཕྱི་མའི་ལུས་དེ་བྱུང་བས་ན། དེ་ལས་བྱུང་བ་ཡིད་ཀྱི་གཟུགས་ཅན་ཞེས་ཀྱང་བྱའོ། །ཕྱི་མ་གང་དུ་སྐྱེ་བ་ལེན་པའི་ཤ་དབྱིབས་ཀྱི་ཚུགས་དེ་ཉིད་འཛིན་པས། སྔོན་དུ་བྱུང་བའི་སྲིད་ཕྱི་མའི་ཚུལ་བཞིན་ཅན་ཞེས་ཀྱང་བྱའོ། །ཕྱི་མའི་སྐྱེ་བ་མངོན་དུ་སྣང་ཞིང་གྲུབ་པར་བྱེད་པས་ན་མངོན་དུ་གྲུབ་པ་ཞེས་ཀྱང་བྱའོ། །བར་མ་ན་རྟག་ཏུ་ཟས་ཡིད་ལ་བཏགས་ཏེ་ཉེར་འཁོར་བྱེད་པས་ཉེ་བར་འཁོར་བ་ཞེས་ཀྱང་བྱའོ། །ཚེ་སྔ་ཕྱིའི་སྲིད་པ་གཉིས་ཀྱི་བར་སྐབས་ཡིན་པས་ན་སྲིད་པ་མཚམས་སྦྱོར་བ་ཞེས་ཀྱང་བྱའོ།།

དྲུག་པ་ཁམས་གསུམ་ལ་བར་མ་དོ་ཡོད་མེད་ཀྱི་བྱེ་བྲག་བཤད་པ་ནི།

དེ་ནི་གཟུགས་ཅན། ཞེས་པ་ནས། པ་ཡི་གནས་མེད་དོ། །ཞེས་པའི་བར་གྱིས་བསྟན་ཏེ།

དེ་ནི་གཟུགས་ཅན་ཡིན་པས་ན། །གཟུགས་མེད་པ་ཡིན་གནས་མེད་དོ།།

དེ་ལྟར་གང་དུ་སྐྱེ་བ་ལ་བར་དོའི་སྲིད་པ་ཡོད་པར་བསྟན་ཏེ་དེའི་མཚན་ཉིད་བཤད་པ་དེ་དག་ནི་གཟུགས་ཅན་གྱི་ཁམས་སུ་གྱུར་པ་འདོད་ཁམས་དང་གཟུགས་ཁམས་ཀྱི་དབང་དུ་བཤད་པ་ཡིན་པས་ན། གཟུགས་མེད་པ་ཡི་ཁམས་སུ་སྐྱེ་བ་ལ་སྲིད་པ་བར་མའི་གནས་སྣང་གི་ཚུལ་དེ་མེད་དོ་ཞེས་ཤེས་པར་བྱའོ། །དེ་ཅིའི་ཕྱིར་ཞེ་ན། སྔོན་བྱུང་སྲིད་པའི་ཤ་ཚུགས་མེད་པའི་ཕྱིར་རོ། །དེ་བས་ན་གཟུགས་མེད་པའི་ཁམས་ནས་འཕོ་༼༡༦༦༽ན་ཡོད་དོ། །དེས་ན་ཁམས་གཉིས་སུ་སྐྱེ་བ་ལ་ཡོད་ཅེས་བྱ་སྟེ། སྔ་མ་ལས། བར་མ་དོའི་སྲིད་པ་དེ་ཡང་གཟུགས་མེད་པར་སྐྱེ་བའི་གནས་མ་གཏོགས་པར་བལྟ་བར་བྱའོ། །ཞེས་སོ།།

བདུན་པ་སྔར་གྱི་ལས་གང་གོམས་ལ་དགའ་བར་བསྟན་པ་ནི།

དེ་ན་གནས་པའི། ཞེས་པ་ནས། དེ་ལ་མངོན་པར་དགའ། །ཞེས་པའི་བར་གྱིས་བསྟན་ཏེ།

དེ་ན་གནས་པའི་སྲིད་པ་དེ། །སྔར་འགགས་པ་ཡི་སྲིད་པ་ལ། །དེ་དང་དེ་མིན་བཏང་སྙོམས་པ།།

གསུམ་ལ་ཆགས་སྡང་ཞེན་གོམས་པ། །གང་སྔོན་གང་ལ་ཞེན་པ་བཞིན། །དུས་དེར་དེ་ལ་མངོན་པར་དགའ།།

སྲིད་པ་བར་མ་དེ་ཉིད་ལས་ཅི་ལ་དགའ་ཞེ་ན། དེ་ལྟར་བར་མ་དོ་དེ་ན་གནས་པའི་སྲིད་པ་བར་བདུན་པའི་སེམས་ཅན་དེ་ཉིད་སྔར་ཤི་བའམ་འགགས་པར་གྱུར་པ་ཡི་སྲིད་པ་དེའི་དུས་སུ་འདུ་ཤེས་གསུམ་དང་ལྡན་པས་ལུས་ཀྱིས་སྤྱད་པར་བྱས་པའི་སྒོ་གསུམ་གྱི་ལས་དགེ་བ་དེ་དང་དེ་མིན་པ་སྡིག་པ་མི་དགེ་བ་དང་བཏང་སྙོམས་ཏེ་ལུང་དུ་མ་བསྟན་པ་དང་གསུམ་ལ་སྤྱད་དེ་ཆགས་སྡང་རྨོངས་གསུམ་གྱི་དུག་གསུམ་དང་བཅས་པ་གང་ལ་ཞེན་ཅིང་གོམས་པར་བྱས་པས་གང་ཤི་བ་དེ་ཡི་སྔོན་གྱི་སྐྱེ་བས་ལས་གསུམ་པོ་གང་དང་གང་ལ་ཞེན་ཅིང་དགའ་བ་བཞིན་དུ་དེའི་འཕྲོས་ཡིན་པས་བར་དོའི་དུས་དེར་ཡང་ལས་གསུམ་པོ་གང་གོམས་པ་དེ་ལ་མངོན་པར་དགའ་བ་ཉིད་དེ། དགེ་བ་ཅན་གྱི་བར་མ་ནི་དགེ་བ་སྤྱོད་པ་ལ་དགའ་བ་ལ་སོགས་པ་ལྟ་བུའོ། །དེས་ན་རྣམ་པར་སྨིན་པ་ཡང་རྗེས་སུ་མཐུན་ཏེ་ཕལ་ཆེར་གྱི་དབང་དུ་བྱས་པའོ། །དེ་ཅིའི་ཕྱིར་ཞེ་ན། བར་འགའ་བསམ་གཏན་བཞི་པ་ཐོབ་པའི་དགེ་སློང་ལྟ་བུ་ཡང་བར་མར་སྡིག་བསགས་ནས་ངན་འགྲོ་ལྟུང་བའང་ཡོད་པའི་ཕྱིར་རོ།།

བརྒྱད་པ་སྐྱེ་བ་ཇི་ལྟར་ལེན་པའི་ཚུལ་བཤད་པ་ལ་གཉིས་ཏེ། སྐྱེ་བ་ལེན་པའི་ལྟས་བསྟན་པ། སྐྱེ་བ་ལེན་ཚུལ་དངོས་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

སྔོན་ཚེ་ལེགས་ཉེས། ཞེས་པ་ནས། སྔ་ལྟས་བྱུང་བར་འགྱུར། །ཞེས་པའི་བར་གྱིས་བསྟན་ཏེ།

སྔོན་ཚེ་ལེགས་ཉེས་དཔྱད་པའི་ཡུལ། །ཀླུང་དུ་གང་འགྱུར་དེ་ཉིད་སྣང་། །དེ་དག་རྨི་ལམ་བཞིན་མཐོང་ནས།།

མཐོང་ཉིད་ཡུལ་དུ་མངོན་པར་གྱུར། །དེ་ཚེ་འཁྲུལ་པའི་གཟུགས་མཐོང་ལྟར། །གང་གི་སྔ་ལྟས་འབྱུང་བར་འགྱུར།།

བར་མ་དེ་ཕྱིས་ཀྱི་གནས་རིས་མཐོན་དམན་གང་དུ་སྐྱེ་བའི་ལྟོས་བྱུང་བའི་ཚུལ་ནི། སྔོན་གྱི་ཚེ་སྔ་མ་ལ་ལེགས་པའི་ལས་དཀར་པོ་དགེ་བ་དང་ཉེས་པའི་ལས་ནག་པོ་མི་དགེ་བ་དག་ལ་སྤྱོད་པའི་ཡུལ་ཉིད་གོམས་སྟོབས་ཆེ་བས་ཀླུང་དུ་གང་གྱུར་པ་དེ་ཉིད་ཀྱི་མཚན་མ་དངོས་པོ་མེད་ཀྱང་ཡིད་ཡུལ་དུ་རང་སྣང་བས་དེ་དག་རྨི་ལམ་གྱི་གཟུགས་བརྙན་བཞིན་དུ་མཐོང་ནས་གང་མཐོང་བ་དེའི་ལྟས་དེ་ཉིད་ད་ལྟར་དུ་འཇུག་པའི་ཡུལ་དུ་མངོན་སུམ་དུ་སྣང་བར་འགྱུར་རོ། །དེ་ཡང་དཔེར་ན་རྨི་ལམ་གྱི་ལྟས་མངོན་དུ་གྱུར་པ་བཞིན་འདིར་ཡང་དང་པོ་ལྟས་ཙམ་ཕྱི་མ་ལ་༼༡༦༧༽མངོན་སུམ་དུ་གྱུར་པའོ། །དེས་ན་སྐབས་དེ་ཡི་ཚེ་དཔེར་ན་མིག་འཁྲུལ་པའི་རབ་རིབ་ཅན་གྱིས་སྐྲ་ཤད་སོགས་ཀྱི་གཟུགས་མཐོང་བ་ལྟར་དུ་སྔ་མའི་ལས་གང་གིས་དབང་ལྟར་ཕྱི་མར་གང་དུ་སྐྱེ་བ་ལེན་པའི་སྔ་ལྟས་བར་དོའི་དུས་དེར་སོ་སོར་འབྱུང་བར་འགྱུར་བ་སྟེ། གྲོག་སྦུར་དུ་སྐྱེ་ན་རྨི་ལམ་དུ་གྲོག་སྦུར་དང་འགྲོགས་པར་རྨི་བ་ལྟ་བུའོ།།

གཉིས་པ་རྒྱས་པར་བཤད་པ་ལ་གཉིས་ཏེ། སྡིག་པ་ཅན་སྐྱེ་བ་ལེན་པའི་ལྟས་བསྟན་པ། དགེ་བ་ཅན་སྐྱེ་བ་ལེན་པའི་ལྟས་བཤད་པའོ། །དང་པོ་ནི།

བདེ་རྐྱེན་མི་ལྡན། ཞེས་པ་ནས། འཇུག་པའི་མཚན་མ་འབྱུང༌། །ཞེས་པའི་བར་གྱིས་བསྟན་ཏེ།

བདེ་རྐྱེན་མི་ལྡན་པ་ཞིག་ན། །དེ་ན་གནས་དང་དེ་ནུབ་ན། །དམན་པར་འབྱུང་བའི་སྔ་ལྟས་ནི། །སྲོག་ཆགས་ལྡེམ་བུ་ལ་སོགས་པའི། །གང་དུ་འབྱུང་བའི་རིགས་མཐུན་མཐོང་། །ཅ་ཅོའི་སྒྲ་དང་འདམ་བུའི་ཐིབས། །ནགས་ཚལ་ཐིབས་པོ་ལ་སོགས་པ། །ལྡུམ་བུ་ཚལ་དང་དྲི་སྣ་ཚོགས། །ཁ་ཟས་རྫིང་དང་ཁྲིག་སྤྲིན་གྱིས།།

ནང་དུ་འཇུག་པའི་མཚན་མ་འབྱུང་།།

དེ་ཡང་སོ་སོ་ནས་བསྟན་པར་བྱ་བའི་ཕྱིར། གལ་ཏེ་བདེ་བའི་གནས་ཐོབ་པར་བྱེད་པའི་དགེ་བའི་ལས་ཀྱི་རྐྱེན་དང་མི་ལྡན་པ་ཡི་འགྲ་ོབ་ཞིག་ཡིན་ན་ནི་བར་མ་དོ་དེ་ན་གནས་པའི་ཚེ་ཚད་དང་བར་མའི་ལུས་དེ་ནུབ་ནས་བརྗེས་པའི་ཚེ་ན། ཞེས་པ་འདིས་ཕལ་ཆེ་བའི་དབང་དུ་བར་དོའི་ཚེ་སྟོད་སྨད་གཉིས་སྐྱེ་བ་སྔ་ཕྱི་ལ་ཕྱོགས་པར་ཡང་གསལ་ལ། དེ་ནས་ཕྱི་མའི་སྐྱེ་བ་ལ་ངན་འགྲོ་དམན་པའི་འགྲོ་བར་ལྟུང་ཞིང་སྡུག་བསྔལ་ཅན་དུ་འབྱུང་བའི་སྔ་ལྟས་ཀྱི་མཚན་མ་ནི། ངན་སོང་གསུམ་གྱི་དམྱལ་བར་སྐྱེ་བ་ལེན་ཚུལ་འོག་ནས་འབྱུང་བས་འདིར་དུད་འགྲོའི་རིས་ཐམས་ཅད་དང་ཡི་དྭགས་ཀྱང་བསྟན་ཏེ། དེ་ཡང་སྲོག་ཆགས་ལྡེམ་བུ་དང་སྦྲང་བུ་ལ་སོགས་པའི་འགྲོ་བ་གནས་ངན་གང་དུ་འབྱུང་བའི་བདག་དང་རིགས་མཐུན་པ་མང་པོ་མཐོང་བ་འབྱུང་བ་དང༌། འབྲུ་གསལ་བ་མེད་པའི་དུད་འགྲོ་ལ་སོགས་ཅ་ཅོའི་སྒྲ་ཐོས་པ་དང་རྩ་འདམ་བུའི་འཐིབས་པས་སའི་འདམ་པ་ཅན་དང༌། མི་གསལ་བར་སྟུག་པའི་ནགས་ཚལ་འཐིབས་པོ་དང༌། ལ་སོགས་པའི་ཞེས་དངོས་པོ་གཞན་བསྡུ་བ་ནི། མུན་པ་དང་སྤྲིན་ནག་དང་ན་བུན་ནམ་རླངས་པ་འཐིབས་པ་དང༌། བྲག་གི་བར་དང་སྡོང་པོའི་གསེབ་ཀྱི་བུག་པ་དོག་མོ་རྣམས་དང༌། དེ་བཞིན་དུ་ལྡུམ་བུའི་ཚལ་དཀྲིགས་པ་མཐོང་བ་དང༌། དྲི་ང་ཞིང་མི་ཞིམ་པ་སྣ་ཚོགས་དང༌། ཁ་ཟས་ངན་པ་དང༌། རྫིང་ངན་པ་རྙོག་ཆུས་གང་བའི་འདམ་པ་ཅན་དང༌། ཤིན་ཏུ་འཁྲིགས་ཤིང་གཏམས་པའི་སྤྲིན་ཆེན་གྱིས་འཐིབས་པའི་ནང་དུ་ཉམས་མི་དགའ་ཞིང་ཡིད་རྨོང་པར་གྱུར་ཏེ་འཇུག་པར་བྱེད་པའི་མཚན་མ་ལ་སོགས་པ་ཡིད་དུ་མི་འོང་བའི་ལྟས་རྣམས་འབྱུང་ཞིང་སྣང་བར་༼༡༦༨༽འགྱུར་རོ། །འོན་ཀྱང་རང་རྒྱུད་པ་མ་ཡིན་ཏེ། རང་གི་ལས་ཀྱི་རྐྱེན་གྱིས་མ་དག་པའི་སེམས་ཀྱི་སྣང་བའོ།།

གཉིས་པ་དགེ་བ་ཅན་སྐྱེ་བ་ལེན་པའི་ལྟས་བཤད་པ་ནི།

གང་འདིར་དག་པ། ཞེས་པ་ནས། དག་པ་དེ་རིགས་མཐོང༌། །ཞེས་པའི་བར་གྱིས་བསྟན་ཏེ།

གང་འདིར་དག་པ་པ་ཞིག་ན། །རིགས་མཐོར་འགྱུར་བའི་སྔ་ལྟས་ནི། །ཞི་བའི་ཡུལ་དང་སྙན་པའི་སྒྲ། །ཡིད་དང་དབང་པོ་ཚིམ་པ་དང་། །ཁང་བཟང་དང་ནི་གཞལ་མེད་ཁང་། །སྐྱེད་མོས་ཚལ་དང་སྣང་ཡུལ་དུ། །འབྱུང་བའི་མཚན་མ་སྣང་བར་འགྱུར། །འཁོར་ལོས་སྒྱུར་རྒྱལ་ལ་སོགས་པའི། །དག་པས་དག་པ་དེ་རིགས་མཐོང་།།

གལ་ཏེ་གང་འདིར་དགེ་བ་སྤྱོད་སྤྱོད་པས་དག་པའི་སྐྱེ་བ་ལེན་པར་བྱེད་པ་ཞིག་བར་མའི་གནས་སུ་འདུག་ན། རིགས་མངོན་མཐོར་འགྱུར་ཞིང་གྱེན་དུ་འབྱུང་བའི་སྔ་ལྟས་ནི། ཞི་བའི་ཡུལ་གཟུགས་བཟང་བ་སྣ་ཚོགས་པ་དང་སྙན་པར་གྱུར་པའི་སྒྲ་སྐད་སྣ་ཚོགས་པ་དག་མཐོང་ཞིང་ཐོས་པ་དང༌། དེ་བཞིན་དུ་ཡིད་ཉམས་དགའ་བར་བྱེད་པ་དང་མིག་ལ་སོགས་པའི་དབང་པོ་ཚིམ་པར་བྱེད་དེ་འདོད་པའི་རེ་བ་སྐོང་བ་དང༌། གང་དུ་འཇུག་པའི་གནས་རྣམས་ཀྱང་ས་ལ་བརྟེན་པའི་ཁང་བཟང་དང་ནི་ནམ་མཁར་ལྷའི་གཞལ་མེད་ཁང་དུ་སྣང་བ་དང༌། དེ་བཞིན་དུ་ཡིད་དུ་འོང་བའི་སྐྱེད་མོས་ཚལ་དང༌། རྫིང་བུ་མཛེས་པ་དང༌། ཐང་བདེ་བ་དང༌། དྲི་ཞིམ་པ་ལ་སོགས་པ་དེ་དག་རྣམས་ལ་ལོངས་སྤྱོད་པར་སྣང་བའི་ཡུལ་དུ་མངོན་པར་འབྱུང་སྟེ། རྣམ་དཀར་དགེ་བའི་མཚན་མ་བཟང་པོར་གྱུར་པའི་ལས་ཀྱི་ལྟས་སྣ་ཚོགས་པ་སྣང་བར་འགྱུར་ལ། བདག་དང་རིགས་མཐུན་པའི་ཡང་ལྷ་རྣམས་དང་འཁོར་ལོས་བསྒྱུར་བའི་རྒྱལ་པོ་དང༌། རྒྱལ་ཕྲན་དང་བློན་པོ་དང༌། བྲམ་ཟེ་དང༌། རྗེའུ་རིགས་ཤིང་སཱ་ལ་ཆེན་པོ་ལྟ་བུ་ལ་སོགས་པ་བདག་གིས་གང་ཐོབ་པར་འགྱུར་པའི་ལས་དག་པ་ཅན་གྱིས་མཐོང་བས་སྤྱོད་ཡུལ་དག་པ་མངོན་པར་མཐོ་བ་མཐོ་རིས་དེ་ཡི་རིགས་སུ་གྱུར་པ་རྣམས་མཐོང་བར་འགྱུར་བ་ཡིན་ནོ།།

གཉིས་པ་སྐྱེ་བ་ལེན་པའི་ལྟས་བསྟན་པ་ལ་བཞི་སྟེ། དྲོད་གཤེར་ལས་སྐྱེ་བ་ལེན་པའི་ཚུལ། མངལ་དང་སྒོང་ངར་སྐྱེ་བ་ལེན་པའི་ཚུལ། དམྱལ་བར་སྐྱེ་བ་ལེན་པའི་ཚུལ། སྤྱིར་ལས་གང་གོམས་ཀྱི་འབྲས་བུར་སྐྱེ་བ་ལེན་ཚུལ་བཤད་པའོ། །དང་པོ་ནི།

དེ་ན་གནས་པའི། ཞེས་པ་ནས། རྣམས་ཀྱི་སྤྱོད་ཡུལ་མིན། །ཞེས་པའི་བར་གྱིས་བསྟན་ཏེ།

དེ་ན་གནས་པའི་སྙིང་པོ་དེ། །འདོད་ལ་ཞེན་པས་ཞེན་པའི་ཕྱིར། །གང་དུ་དྲི་བྱུང་དེར་འབྲེངས་པས། །ང་དང་མི་ང་དྲི་འབྱུང་ཡུལ། །དེ་ལ་ཞེན་པས་སིམ་འགྱུར་ཏེ། །འཁྲིག་པས་དེ་ལ་ཞེ་སྡང་འབྱུང་། །དེས་ནི་བར་བདུན་རྒྱུན་འགགས་བྱེད། །དེ་ཞེན་བར་དུ་དེ་ཟད་ནས། །དེ་ནི་དེ་ཉིད་དེར་ལྟས་ཏེ། །གང་དུ་ལྟས་པའི་སྙིང་པོ་ལ། །སོགས་པའི་ལུས་ཅན་ཐ་དད་སྣང་། །དྲོད་རྐྱེན་རླན་རྣམས་དེ་འཛིན་རིགས། །དེ་མེད་ཁམས་སུ་དེ་མི་འབྱུང་། །དེ་མེད་མ་ཡིན་མཁའ་རྡུལ་འདྲ། །གང་དུ་ལྟས་པའི་ཡུལ་རྣམས་ནི། །དཔག་པར་གང་ནི་རིང་འགྱུར་ཡང་། །ཐོགས་མེད་དམིག་རིས་མཐོང་ཚོར་ཕྱིན། །གང་གི་དབང་གིས་དེ་འགྲོ་བས། །རིག་པ་ཉིད་ན་ཕྱིན་པ་ཡིན། །དེ་ལ་དེ་རིང་ཐ་སྙད་མེད། །ཅི་ཕྱིར་ཁྱབ་འཇུག་གཏོགས་འདོད་དེ། །ལུས་ཅན་རྣམས་ཀྱི་སྤྱོད་ཡུལ་མིན།།

སྐྱེ་བའི་དབྱེ་བས་དྲོད་གཤེར་ལས་སྐྱེ་བ་གྲོག་སྦུར་ལ་སོགས་པའི་བར་མ་དོའི་སྐྱེ་བ་ལེན་པའི་ཚུལ་དང་ལྟས་ཇི་ལྟ་བུ་སྙམ་ན། དེ་ལྟར་བར་མ་དོའི་གནས་དེ་ན་འདུག་པའམ་གནས་པའི་སྲིད་པ་བདེེ་བར་གཤེགས་པའི་སྙིང་པོ་ཅན་གྱི་སེམས་ཅན་དེ་ཉིད་དྲོད་གཤེར་ལས་སྐྱེ་བའི་རྒྱུ་ཅན་དུ་གྱུར་ན་རང་གི་འདོད་པའི་ཡུལ་ལ་ཤིན་ཏུ་ཞེན་པས་ཞེན་ཆགས་ཆེ་བའི་ཕྱིར། དྲི་ཟ་ཉེ་བར་༼༡༦༩༽འཁོར་བ་ཞེས་པའི་རྣམ་གྲངས་དང་མཐུན་པར། གནས་ཀྱིས་ཕྱོགས་གང་དུ་དྲི་འབྱུང་བ་དེར་འཇུག་ཅིང་ཟས་ཀྱི་རྗེས་སུ་འབྲངས་པས་ན་མི་གཙང་ཞིང་མི་ཞིམ་པའི་དྲི་ང་བ་དང༌། གཙང་ལ་ཞིམ་པའི་མི་ང་བའི་དྲི་རྣམས་འབྱུང་བའི་ཡུལ་དེར་དྲི་དེ་གཉིས་ལ་ཆགས་ཏེ་ཞེན་པར་བྱས་པས་འདོད་པའི་སེམས་སིམ་པའམ་ཚིམ་པ་སྐྱེ་བར་འགྱུར་ཏེ། དེ་ལྟར་དྲི་སྤྱོད་ཅིང་ལན་གྲངས་མང་བས་དེར་ཀུན་ཏུ་འཁྲིགས་སེམས་སམ་ཆགས་པའི་སེམས་འཁྱིགས་པས་སྐབས་སུ་བར་མའི་ལུས་དེ་ལ་ཞེ་སྡང་འབྱུང་སྟེ་འདོར་འདོད་སྐྱེའོ། །རྒྱུ་དེས་ནི་བར་མ་དོ་ཚེ་ཞག་བདུན་པ་དེ་ཡི་རྒྱུན་འགགས་ཤིང་འཕོ་བར་བྱེད་དེ། དྲི་དེ་ལ་ཞེན་ཅིང་ཆགས་པའི་སྐད་ཅིག་གི་བར་དུ་བར་མ་དེ་ཡི་སྐལ་པའི་ཚེ་ཟད་ནས་ཕྱི་མ་ལ་ཆགས་པ་དེས་ནི་བར་མ་དེ་ཡང་བདག་ཉིད་དྲིའི་ཕྱིར་འབྲངས་པས་ཤེས་པ་དེར་བརྟས་ཏེ་ལས་ཀྱིས་སྣང་བའི་ལུས་ངན་གྲོག་སྦུར་ལ་སོགས་པ་དེར་སྐྱེ་བར་བྱེད་དོ། །དེ་ལྟར་གང་དུ་སྐྱེ་བ་བརྟས་པའི་སེམས་ཅན་གང་ཞིག་གསང་བའི་སྙིང་པོ་ལས།

ཨེ་མ་ཧོ་བདེེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྦྲུལ། །ཞེས་སོགས་གསུངས་པ་ལྟར། ཆོས་ཉིད་བདེ་བར་གཤེགས་པའི་སྙིང་པོ་ཅན་ལས་གྲོག་སྦུར་ལ་སོགས་པའི་ལུས་ཅན་གཞན་ཐ་དད་པ་རྐྱེན་གྱིས་རིས་མཐུན་པ་གཟུགས་ཕུང་བཟུང་བའི་འགྲོ་བ་མི་འདྲ་བ་དག་ཀྱང་སྣང་བར་འགྱུར་ཏེ་མ་གྲུབ་བཞིན་དུ་ལས་མཐུན་པའི་དབང་གིས་སྔར་བར་མའི་དུས་སུ་ལྟས་སྣང་ཤར་བ་དང་མཐུན་པར་མཐོང་ངོ༌། །ལུས་ལེན་པའི་ཚུལ་ནི། དེ་ལྟར་དྲོད་ཀྱི་རྐྱེན་དང་རླན་རྣམས་ཆ་སྙོམས་པའི་རྒྱུ་དེས་བར་མ་དོའི་ཤེས་པ་དེ་ཉིད་འཛིན་པར་རིགས་ཏེ། དེ་ཉིད་དེ་ལ་ཆགས་པའི་དབང་གིས་སོ། །དེས་ན་དྲོད་གཤེར་གྱི་རྐྱེན་དེ་མེད་ནས་དེ་དང་མ་ཕྲད་ན་གྲོག་སྦུར་ལ་སོགས་པའི་འགྲོ་བའི་ཁམས་སུ་བར་མ་དེ་སྐྱེ་བ་མི་འབྱུང་སྟེ། དགུན་ལྟ་བུ་དྲོད་གཤེར་དེ་ཡི་རྐྱེན་མེད་ན་དེར་སྐྱེ་བ་མ་ཡིན་པས་ན་བར་མ་ན་ནམ་མཁའ་ཡི་རྡུལ་དང་འདྲ་བར་འདུག་ཅིང་དབྱར་གྱི་དུས་དང་རྐྱེན་དང་ལྡན་པ་ཀུན་ན་སྐྱེ་བའོ། །གང་སྐྱེ་བའི་རྐྱེན་དེ་དག་ཚང་བར་ལྡན་པས་བདག་སྐྱེ་བའི་ཡུལ་གནས་མཐོང་བ་རྣམས་ནི་དཔག་ཚད་ལ་སོགས་པར་མི་དཔོག་པས་ཡུལ་གནས་གང་ནི་རྒྱང་རིང་བར་གྱུར་པ་ན་ཡོད་ཀྱང་དེར་འགྲོ་བ་ལ་ཐོགས་པ་མེད་དེ་ཡིད་དང་འདྲ་བར་མིག་གིས་རིས་སུ་བཅས་དེ་མཐོང་བ་དང་ཚོར་བ་ཙམ་གྱིས་དེར་༼༡༧༠༽ཕྱིན་པ་ཡིན་གྱི། གདོས་བཅས་ཀྱི་ལུས་ལྟར་མིག་གིས་མཐོང་ཞིང་ཚོར་ནས་ས་རིས་སུ་བཅད་དེ་དེར་འགྲོ་བ་ལྟ་བུ་མ་ཡིན་པར་སྔ་མའི་ལས་བསགས་པ་གང་གི་དབང་གིས་དེར་འགྲོའོ་སྙམ་པས་གར་འགྲོ་བའི་ཡུལ་གནས་དེ་ཉིད་རིག་པ་ཙམ་ཉིད་ན་དེར་ཕྱིན་པ་ཡིན་པས་བར་དོ་དེ་ལ་ལམ་དེ་ཉིད་རིང་ཐུང་གི་ཁྱད་པར་གྱི་ཐ་སྙད་མེད་པར་ཐོགས་མེད་དུ་འགྲོ་བ་ཡིན་ནོ། །དེའི་གཏན་ཚིགས་དེ་ཅི་ཡི་ཕྱིར་ཞེ་ན་བར་མའི་ཡིད་ལུས་དེ་ཡིད་ལྟར་གང་དུའང་ཁྱབ་ཅིང་མྱུར་བར་འཇུག་པ་ཡིན་པས་ལུས་གང་དུ་ལེན་ཀྱང་འགྲོ་བ་ལ་ཐོགས་པ་མེད་པའི་གཏོགས་འདོད་ཅན་ཏེ། གདོས་པ་མེད་པ་དེའི་སྤྱོད་ཡུལ་ནི། ད་ལྟའི་བེམས་པོའི་གདོས་པ་དང་བཅས་པའི་ལུས་ཅན་རྣམས་ཀྱི་སྤྱོད་ཡུལ་མིན་པའི་ཕྱིར། ཉེ་རིང་དང་མྱུར་བུལ་མེད་ཅིང་དམིགས་པས་འགྲོ་བ་ལྟ་བུའང་མིན་ནོ།།

གཉིས་པ་མངལ་དང་སྒོང་ངར་སྐྱེ་བ་ལེན་པའི་ཚུལ་ནི།

ལ་ལ་གང་ལ། ཞེས་པ་ནས། དེ་ཡི་གདོས་ཀྱིས་བཟུང༌། །ཞེས་པའི་བར་གྱིས་བསྟན་ཏེ།

ལ་ལ་གང་ལ་ཞེན་པའི་མཐུས། །མཐུན་པར་སྣང་བའི་རིགས་ཅན་དག །གང་དུ་འཕྲོད་བྱེད་མཐོང་བར་འགྱུར། །དེ་ཉིད་དེ་ན་དེར་ཁྱབ་ན། །དེ་ལ་དེ་འཁོར་རྟོག་དཔྱོད་འཛིན། །ཞེན་པས་ཞེན་པའི་རང་བཞིན་ལྡང་། །གང་དེའི་དབང་གིས་དེ་རྨོངས་ནས། །ཕྱིན་ཅི་ལོག་ཏུ་མཐོང་འགྱུར་ཏེ། །སྒྱུ་མ་ལྟ་བུར་འཁྲུལ་པར་སྣང་། །གང་དུ་གང་ཟག་དེ་འདུ་འཕྲོད། །བྱེད་པར་དེ་ལ་དེ་སྣང་གང་། །གལ་ཏེ་གནས་པའི་ཆ་ལེན་ན། །འབྱུང་ལ་ཆགས་པའི་འདོད་པ་འབྱུང་། །དེ་ལས་བཟློག་པ་དེ་བཞིན་ཏེ། །གནས་འགྱུར་གནས་དང་བྲལ་བར་འདོད། །འབྱུང་བར་འགྱུར་བའང་དེ་བཞིན་ཏེ། །གང་དུ་མི་འདོད་དེ་མཐོང་འགྱུར། །དེ་ལ་དེ་ཞེན་དེ་དབང་གིས། །གནས་འབྱུང་མཚན་མ་འབའ་ཞིག་ལས། །གང་གཞན་སྣང་བར་མི་འགྱུར་རོ། །དེ་ཡིས་དེ་མཐོང་དེ་འཁྱིགས་ནས། །དེ་ལ་དེ་མ་རངས་ལྟར་འབྱུང་། །དེ་ཡིས་དེ་ཡི་རྒྱུན་བཀག་ནས། །གང་གིས་གང་ཟིན་ཇི་བཞིན་དུ། །ཞེན་པས་སྲིད་པ་དེ་འཛིན་བྱེད། །གང་དེའི་དེ་ཡི་གདོས་ཀྱིས་བཟུང་།།

མངལ་དང་སྒོང་ངར་འབྱུང་བའི་བར་མ་དོ་དེས་ཇི་ལྟར་མཐོང་ཞིང་སྐྱེ་བ་ལེན་ཞེ་ན། འགྲོ་བ་ལ་ལ་དག་བར་མ་ན་འདུག་པའི་ཚེ་འདོད་པའི་ཡུལ་གང་ལ་ཆགས་ཤིང་ཞེན་པའི་སྟོབས་ཀྱི་མཐུས་ལས་དང་བསོད་ནམས་མཐུན་པར་སྣང་བའི་རིགས་ཅན་གྱི་འགྲོ་བ་བདག་གིས་ཕ་མར་འགྱུར་བ་དག་གང་དུ་འདུ་འཕྲོད་བྱེད་དེ་ཆགས་པ་སྤྱོད་པ་མཐོང་བར་འགྱུར་རོ། །དུས་དེ་ཡི་ཚེ་ན་བར་དོ་དེ་ཉིད་ན་གནས་པའི་སེམས་ཅན་དེ་ཡང་ཆགས་པ་སྐྱེས་ཏེ་གནས་དེར་ཁྱབ་པར་ཕྱིན་ཏེ་འཁྱིམས་ནས། གནས་དེ་ལ་བར་མ་དེ་འཁོར་ཞིང་འཁོད་དེ་ཆགས་པའི་མཚན་མ་དེ་ལ་རྟོག་ཅིང་དཔྱོད་པ་མ་བཏང་བར་ཡིད་ཀྱིས་འཛིན་པ་དག་བཅས་ཏེ་ཞེན་པ་བར་མ་ཆད་པར་བྱས་པས། རྒྱུ་དེ་ཡིས་བདག་ཀྱང་ཕ་མ་ལ་ཆགས་ཤིང་ཞེན་པའི་རྟོག་པ་རང་བཞིན་ངང་གིས་ལྡང་ཞིང་རྣམ་པར་སྐྱེའོ། །གང་ཆགས་པ་དེའི་དབང་གིས་སེམས་ཅན་དེ་ཡང་དོན་མ་མཐོང་བས་དེར་རྨོངས་ནས་བདག་གིས་ཀྱང་དེ་ལ་ཆགས་པ་སྤྱད་པའི་ཡུལ་དུ་སྣང་སྟེ་ཕྱིན་ཅི་ལོག་ཏུ་མཐོང་བར་འགྱུར་ཏེ། མོར་སྐྱེ་ན་ཕ་ལ་ཆགས་ཤིང་ཕོར་སྐྱེ་ན་མ་ལ་ཆགས་ཏེ་དངོས་པོ་ལ་མ་གྲུབ་ཀྱང༌། དཔེར་ན་སྒྱུ་མ་མཁན་གྱིས་སྤྲུལ་པའི་སྐྱེས་ པ་དང་བུད་མེད་བཟང་མོ་ཕྲད་པ་ལྟ་བུར་བདག ་གིས་ཆགས་པ་སྤྱོད་པར་མཐོང་བའི་འཁྲུལ་པར་སྣང་འབྱུང་ངོ༌། །གནས་གང་དུ་ཕ་མའི་གང་ཟག་དེ་གཉིས་༼༡༧༡༽ཀྱི་མངལ་དུ་ས་བོན་འདུ་འཕྲོད་བྱེད་པར་མཐོང་ནས་བར་དོ་དེ་ལ་སེམས་ཅན་སྐྱེ་འབྱུང་གི་གནས་དེ་སྣང་ཞིང་གསལ་བར་འགྱུར་ལ། དེ་ཡང་ཕ་ལས་ས་བོན་འབྱུང་བས་འབྱུང་བ་ཞེས་བྱ་ཞིང་མ་ཡི་ལྟོ་བར་རམ་མངལ་དུ་གནས་པས་གནས་པ་ཞེས་བྱ་སྟེ། གལ་ཏེ་བདག་ཉིད་མོར་སྐྱེས་ཏེ་གནས་པའི་ཆ་ལེན་པ་ཞིག་ཡིན་ན། ས་བོན་གྱི་གཞི་འབྱུང་བ་ཕའི་ས་བོན་དང་མཚན་མ་ལ་ཆགས་པའི་འདོད་པ་འབྱུང་ལ། གལ་ཏེ་དེ་ལས་བཟློག་ཏེ་འབྱུང་བ་ཕོར་སྐྱེ་བ་ལེན་པ་ཞིག་ཡིན་ན་ས་བོན་གྱི་གནས་མའི་ས་བོན་དང་མཚན་མ་ལ་ཆགས་པའི་འདོད་པ་འབྱུང་བའང་དེ་བཞིན་ཏེ། དེས་ན་གནས་པ་མོའི་ཆར་སྐྱེ་བར་འགྱུར་བ་ཞིག་ན་གནས་པ་མ་དང་བྲལ་བར་འདོད་པའི་སེམས་སྐྱེ་ལ། འབྱུང་བ་ཕོའི་ཆར་སྐྱེ་བར་འགྱུར་བ་ཞིག་ན་ཡང་གོང་མ་བཟློག་པ་དེ་བཞིན་དུ་འབྱུང་བ་ཕ་དང་བྲལ་བར་འདོད་པའི་སེམས་སྐྱེས་ཏེ། བདག་རང་ཉིད་ནི་གང་དུ་མི་འཕྲོད་པའམ་མི་འདོད་པར་བྲལ་བར་འདོད་པའི་གཟུགས་སམ་ལུས་གང་ཡིན་པ་དེ་ཁོ་ནར་མཐོང་བར་འགྱུར་རོ། །དེ་ལྟར་ཕོ་མོའམ་དེ་གཉིས་ཀྱི་མཚན་མ་གང་རུང་དེ་ལ་བར་དོ་དེ་ཉིད་ཆགས་ཞེན་སྐྱེས་པ་དེ་ཡི་དབང་གིས་གནས་པ་མོའི་མཚན་མའམ་འབྱུང་བ་ཕོའི་མཚན་མ་འབའ་ཞིག་ལས་མ་གཏོགས་པ་མཚན་མ་གང་ཡིན་པ་གཞན་ནི་སྣང་བར་མི་འགྱུར་རོ། །འོན་ཀྱང་ཕལ་ཆེ་བའི་དབང་སྟེ། གཉིས་ཀྱི་ཆ་འཛིན་པའི་མ་ནིང་ཡང་འབྱུང་ངོ༌། །དེ་ནས་བར་མ་དེ་ཡིས་ཆགས་པའི་ཡུལ་གྱི་མཚན་མ་དེ་མཐོང་བས་དེ་ལ་ཆགས་ཞེན་རྨོངས་པས་སེམས་འཁྱིམས་པའམ་འཁྱིགས་ནས་བར་དོའི་ལུས་དེ་ལ་བར་མ་དེ་ཡི་སེམས་འཁྲིགས་ཏེ་ཞེ་སྡང་སྐྱེས་ནས་མ་རངས་པ་ལྟར་འབྱུང་ཞིང་ཕྱི་མ་ལ་ཆགས་པ་དང་གཉིས་ཀྱི་རྒྱུད་དེ་བར་མ་ཡིས་བར་མ་དོ་དེ་ཡི་ཕོ་མོ་རྒྱུད་འགགས་ནས་དཔེར་ན་སྦྲང་གང་གིས་སྦྲང་མ་གང་ཟིན་པ་དྲི་ཡི་ལྟ་བ་བཞིན་དུ་ཞེན་པའམ་ཆགས་པས་ས་བོན་གཉིས་ཀྱིས་སྲིད་པ་བར་མ་དོའི་ཤེས་པ་དེ་ཉིད་འཛིན་པར་བྱེད་དོ། །དེའང་ལྷ་མི་སྟོད་རིམ་པ་ནི་བར་དོས་ཕ་མའི་མགོ་ནས་རྟོག་དཔྱོད་བྱེད་པས་སྤྱི་བོ་ནས་ཞུགས་ཏེ་ཕའི་ས་བོན་དང་འདྲེས་པར་འགྱུར་རོ། །བར་པ་ནི་ཕ་མའི་གདོད་ནས་རྟོག་དཔྱོད་བྱེད་པས་ཕའི་ཁ་ནས་ཞུགས་ཏེ་ས་བོན་དང་འདྲེས་པ་ཡིན་ལ། དམན་པ་ནི་ཕ་མའི་རྟེན་མ་ནས་རྟོག་དཔྱོད་བྱེད་པས་བཤང་ལམ་དུ་ཞུགས་ཏེ་འདྲེས་པའོ། །༼༡༧༢༽དེ་ལྟར་རྣམ་ཤེས་གང་དེ་ཁུ་ཁྲག་གི་ས་བོན་གཉིས་པོ་དེ་ཡི་རྒྱས་བཏུམ་ནས་གདོས་པའི་ལུས་ཀྱིས་ཟིན་ཏེ་མིང་དང་གཟུགས་འབྱོར་བའི་ཕྱིར་རིགས་ཅན་དེ་ཡི་སྲིད་པ་བཟུང་བ་ཞེས་བྱའོ།།

གསུམ་པ་དམྱལ་བར་སྐྱེ་བ་ལེན་པའི་ཚུལ་ནི།

དམན་འགྲོ་གང་དེ། ཞེས་པ་ནས། ལུས་བླངས་ཉོན་མོངས་མྱོང༌། །ཞེས་པའི་བར་གྱིས་བསྟན་ཏེ།

དམན་འགྲོ་གང་དེ་བར་བདུན་པའོ། །གསོད་དང་ཞེན་གོམས་དེ་བརྩེགས་པས། །གང་གནས་གང་ཡིན་དེ་གནས་ན། །བསད་ལ་སོགས་པ་དེ་སྣང་འགྱུར། །གང་དེ་དེ་ཡིས་མཐོང་མ་ཐག །སྔོན་དུ་གོམས་པས་དེ་རིགས་ནས། །གསད་བྱ་སྙམ་དུ་དེར་རྒྱུག་བྱེད། །བསད་ཡུལ་སྐྱེ་བའི་གནས་མཐོང་ནས། །བསད་ལ་སོགས་པའི་ལས་བརྩམས་པས། །དེ་དག་འཁྱིགས་ནས་ཞེ་སྡང་འབྱུང་། །དེ་ཡིས་བར་བདུན་རྒྱུན་འགགས་ནས།།

དམན་པའི་ལུས་བླངས་ཉོན་མོངས་མྱོང་།།

དམྱལ་བར་འགྲོ་བའི་བར་མ་དོ་ཇི་ལྟར་རྫུས་ཏེ་སྐྱེ་བ་ལེན་ཞེ་ན། གང་སུ་ཞིག་དམན་པ་དམྱལ་བར་འགྲོ་བ་གང་ཡིན་པ་དེ་ཡི་བར་དོའི་སྲིད་པ་ཚེ་ཞག་བདུན་པ་དེ་ནི། ཚེ་སྔ་མར་ཆགས་སྡང་གི་དབང་གིས་སེམས་ཅན་གསོད་ཅིང་སྲོག་གཅོད་པར་བྱེད་པ་དང་དེ་ལ་ལྷག་པར་ཞེན་ཏེ་གོམས་པར་བྱས་པ་དེ་ཡི་བག་ཆགས་ཡང་ཡང་བརྩེགས་ཤིང་བསྣན་ནས་སྟོབས་སུ་གྱུར་པས་ན། གང་དམྱལ་བའི་བར་མའི་གནས་པའི་སྡིག་ཅན་གང་ཡིན་པ་དེ་ཡང་དེར་གནས་པའི་དུས་ན་ཡང་འདོད་ཆགས་དང་ཞེ་སྡང་གི་དབང་གིས་བསད་ཅིང་སྲོག་འཕྲོགས་ཏེ་བཅད་གཏུབ་བྱེད་པ་ལ་སོགས་པ་དེར་ཡང་ལས་ངན་བྱེད་པ་ཤ་སྟག་ཏུ་སྣང་བར་འགྱུར་ཏེ། གང་སེམས་ཅན་གསོད་པ་དེ་དག་བར་མ་དོ་དེ་ཡིས་མཐོང་མ་ཐག་ཏུ་སྤྱོད་ངན་དེ་ཉིད་སྔོན་དུ་ཚེ་སྔ་མ་ལ་གོམས་པར་བྱས་པའི་རྒྱུའི་ལས་ཀྱི་བག་ཆགས་དེ་རྐྱེན་དེས་བསླངས་པས་གསོད་གཅོད་བྱེད་པའི་རྒྱུ་དེ་དག་རིག་ཅིང་ཤེས་ནས། ཕ་རོལ་པོ་དེ་དག་གསད་པར་བྱའོ་སྙམ་དུ་སེམས་པའི་འདུ་ཤེས་ཀྱིས་དེར་གསོད་པ་ལ་འགྲོ་ཞིང་རྒྱུག་པར་བྱེད་དོ། །དེའང་ཆགས་སྡང་གིས་གསད་པའི་འདུ་ཤེས་སྐྱེ་བའི་ཡུལ་དགྲ་དང་ཤ་གཡག་ལ་སོགས་པའི་སྐྱེ་བའི་གནས་ཀྱི་འཁྲུལ་སྣང་གི་འགྲོ་བ་ལྟ་བུ་དེ་མཐོང་ནས་བར་མ་དོ་དེ་ཡང་གསད་པ་ལ་སོགས་པའི་ལས་བརྩམས་ཏེ་ཡང་ཡང་དུ་བྱས་པས་དེ་དག་གི་ལས་དེས་སེམས་འཁྱིགས་པའམ་ཁྱིམ་ནས་བར་དོའི་ལུས་ཞེ་སྡང་བྱུང་སྟེ། རྒྱུ་དེས་དམྱལ་བའི་བར་བདུན་པའི་རྒྱུན་འགགས་པས་ཆ་ལུགས་དེ་ཉིད་འཕོས་ནས་སྐད་ཅིག་གིས་བརྗུས་ཏེ་སྐྱེ་བའི་དམན་པ་དམྱལ་བའི་ལུས་བླངས་ནས་སྡུག་བསྔལ་དྲག་པོར་སྨིན་པས་ཉོན་མོངས་ཤིང་ཉེན་ཏེ་རྣམ་སྨིན་དབལ་ཚ་བར་མྱོང་བར་འགྱུར་ཏེ། སའི་དངོས་གཞི་ལས། གལ་ཏེ་མི་དགེ་བའི་ལས་བྱེད་པ་ལུག་གསོད་པར་གྱུར་ཏམ། བྱ་གསོད་པར་གྱུར་ཏམ། ཕག་འཚོང་དུ་གྱུར་ཏམ། དེ་ལྟར་སྡོམ་པ་མ་ཡིན་པའི་རིས་གང་ཡང་རུང་བ་ལ་གནས་པ་དེས། སེམས་ཅན་དམྱལ་བར་སྐྱེ་བར་འགྱུར་བ་སྡིག་པ་མི་དགེ་༼༡༧༣༽བའི་ལས་བྱས་ཤིང་བསགས་པས་སྐྱེ་བའི་གནས་སུ་དེས་སེམས་ཅན་དེ་ལྟ་བུ་དག་དང༌། ལས་དེ་ལྟ་བུ་དག་དང༌། ལུས་ལ་སོགས་པ་དེ་དག་རྨི་ལམ་བཞིན་དུ་མཐོང་ནས། དེ་སྔོན་གོམས་པའི་མངོན་པར་དགའ་བས་དེ་ཉིད་དུ་རྒྱུག་གོ །སྐྱེ་བའི་གནས་ཀྱི་གཟུགས་དེ་ལ་ཡང་ཁོང་ཁྲོ་བར་གྱུར་ནས་བར་མ་དོའི་སྲིད་པ་དེ་མེད་པར་འགྱུར་ལ། སྐྱེ་བའི་སྲིད་པ་ནི་འགྲུབ་པར་འགྱུར་རོ། །དེ་དེ་ནས་ཤི་འཕོས་པ་ན་སྔར་འཆི་བའི་སྲིད་པའི་ཚེ་འཁྲུལ་པའི་གཟུགས་མཐོང་བ་དེ་བཞིན་དུ་འབྱུང་བར་འགྱུར་རོ། །སྐྱེ་བ་དང་འགག་པའི་ཚུལ་ནི་སྔ་མ་བཞིན་དུ་བལྟ་བར་བྱའོ། །དེར་བརྫུས་ཏེ་སྐྱེས་ནས་སྐྱེ་མཆེད་དྲུག་ཡོངས་སུ་ཚང་བར་འགྱུར་ཏེ། དེ་འདི་སྙམ་དུ་བདག་འདི་དང་ལྷན་ཅིག་ཏུ་རྩེ་བར་བྱའོ། །དགའ་བར་བྱའོ། །དགའ་མགུ་སྤྱད་པར་བྱའོ། །བཟོ་ཡང་བསླབ་པར་བྱའོ། །སྙམ་དུ་སེམས་བཏང་བར་གྱུར་ལ། དེ་དེར་བཟློག་པར་ལས་ཀྱི་གནོད་པ་རྣམ་པ་སྣ་ཚོགས་ཀྱིས་གཟིར་བར་འགྱུར་ཏེ། ཡོངས་སུ་ཚབ་ཆེན་པོས་ཀྱང་རེག་པར་འགྱུར་རོ། །ཞེས་སོ། །འདི་དག་ནི་ཐུན་མོང་གི་དམྱལ་བ་ཕལ་ཆེ་བའི་དབང་དུ་གསུངས་པ་ཡིན་ལ། གསང་སྔགས་རྡོ་རྗེའི་ཐེག་པ་ཆེན་པོའི་རྩ་བ་དང་ཡན་ལག་ཉམས་པ་ལ་སོགས་པ་དག་ནི། ཤིན་ཏུ་ལས་དྲག་པས་རྣམ་སྨིན་དྲག་པ་ནི་ཤི་ནས་སྐད་ཅིག་གིས་ཕྱིན་པར་བྱེད་ལ། དེའི་འཇིག་རྟེན་ཞིག་ནའང་གཞན་གྱི་དམྱལ་བར་སྐད་ཅིག་གིས་ཕྱིན་པར་བྱེད་པར་བར་མ་དོ་མེད་དོ།།

བཞི་པ་སྤྱིར་ལས་གང་གོམས་ཀྱི་འབྲས་བུར་སྐྱེ་བ་ལེན་ཚུལ་བཤད་པ་ནི།

དེ་ལྟར་གང་དུ། ཞེས་པ་ནས། འབྱུང་བ་མ་བྱུང་ལེན། །ཞེས་པའི་བར་གྱིས་བསྟན་ཏེ།

དེ་ལྟར་གང་དུ་བྱུང་བ་ཡི། །གནས་རིས་རྣམས་ཀྱི་བར་བདུན་པ། །གང་དུ་འབྱུང་བའི་གནས་དེ་ན།།

གང་ཞིག་གོམས་པའི་ཡུལ་སྣང་འགྲོ། །དེ་ལ་ཞེ་སྡང་སྤྱོད་འཁྱིགས་པས།།

སྡང་བའི་དབང་གིས་དེ་རྒྱུན་འགགས། །དེས་སྣང་འབྱུང་བ་མ་བྱུང་ལེན།།

དེ་ལྟ་བས་ན། ཚུལ་དེ་དག་ལྟར་འགྲོ་བ་རིགས་དྲུག་གང་དུ་ཡང་སྐྱེ་བ་འབྱུང་བ་ཡི། གནས་རིས་རྣམས་ཀྱི་བར་དུ་སྲིད་པར་བར་བདུན་པ་དེ་ཉིད་གང་དུ་འབྱུང་བའི་གནས་དེ་ན་བར་མ་དོ་གང་ཞིག་ཡོད་པ་དག་གིས་སྔར་གོམས་པའི་ལས་ཀྱིས་སྤྱོད་ཡུལ་དེ་དང་མཐུན་པར་སྣང་ཞིང་དེར་འགྲོ་བ་ཡིན་ལ། དེར་ཡང་རང་ལུས་དེ་ལ་ཞེ་སྡང་ཞིང་སྤྱོད་པའི་ལས་ལ་སེམས་འཁྱིགས་པའམ་འཁྱིམས་ཏེ་སྐྱོ་བར་གྱུར་པས། སྡང་བ་སྐྱེ་བའི་རྒྱུ་དེ་ཡི་དབང་གིས་བར་མ་དོ་དེ་ཡི་ཚེའི་རྒྱུན་འགགས་ནས་རྒྱུ་དེས་ཕྱི་མ་དེ་ཡི་སྐྱེ་བ་གང་ཡིན་པ་ཉིད་སྣང་ཞིང་འབྱུང་བ་ཡིན་པས་སྔར་མ་བྱུང་བའམ་མ་བླངས་པ་ཡི་ལུས་གང་དེ་ཕྱིས་ལེན་པར་འགྱུར་བ་ཉིད་དེ། རྒྱུ་དེ་ལ་ཆགས་པའི་དབང་གིས་༼༡༧༤༽སོ། །དེས་ན་བར་མ་དང་ཕྱི་མ་འབྲེལ་བའི་རྒྱུ་དེ་ནི་སྐབས་དེ་ཉིད་ཀྱི་ཆགས་སྡང་དེ་ཡིན་ནོ། །དེ་ལྟར་བར་མའི་ཆོས་བཅུ་བཞིའང་ཡིད་ཀྱི་ལས་སོ།།

བཞི་པ་སྐྱེ་གནས་རྣམས་སུ་ཇི་ལྟར་འཇུག་པར་བྱེད་པའི་ཚུལ་བཤད་པ་ལ་གཉིས་ཏེ། སྤྱིའི་འཇུག་ཚུལ་བཞི་བཤད་པ། བྱེ་བྲག་ཏུ་མངལ་དུ་འཇུག་ཚུལ་བཤད་པའོ། །དང་པོ་ནི།

བཞི་པ་སྐྱེ་གནས། ཞེས་པ་ནས། བཞིན་དུ་འཇུག་གནས་འབྱུང༌། །ཞེས་པའི་བར་གྱིས་བསྟན་ཏེ།

བཞི་པ་སྐྱེ་གནས་འཇུག་ཆོས་བཞི། །ཤེས་བཞིན་འཇུག་གནས་འབྱུང་བ་དང་། །དེ་བཞིན་འཇུག་གནས་མི་ཤེས་འབྱུང། །ཤེས་འཇུག་མི་ཤེས་གནས་འབྱུང་དང་། །མི་ཤེས་བཞིན་དུ་འཇུག་གནས་འབྱུང་།།

ལྔ་ཕྲག་ཐ་མའི་བཞི་པ་སྐྱེ་གནས་སུ་འཇུག་པའི་ཆོས་ལ་དབྱེ་བའི་རྣམ་གྲངས་བཞི་རུ་བསྟན་པ་ཡིན་ཏེ། གང་ཞེ་ན། སངས་རྒྱས་རྣམས་དང་རིག་པ་འཛིན་པ་དང་བྱང་ཆུབ་སེམས་དཔའ་གང་མངལ་དུ་སྐྱེ་བ་རང་དབང་ཅན་དུ་འཇུག་པའང༌། མི་དམིགས་པའི་ཡེ་ཤེས་ཆེན་པོའམ་ཤེས་རབ་དང་ལྡན་པའི་སྟོབས་ཀྱིས་མངོན་ཤེས་ཀྱང་ཡོད་ལ་སྒྲིབ་པའང་དག་པས་ན། མའི་མངལ་དུ་སྐྱེ་བའང་ཤེས་བཞིན་དུ་དེར་འཇུག་པ་དང༌། ཤེས་བཞིན་དུ་དེ་ན་གནས་པ་དང༌། ཕྱི་རོལ་དུའང་ཤེས་བཞིན་དུ་འབྱུང་བ་དང་སྐྱེ་བ་ཡིན་ཏེ། དེ་རྣམས་ནི་གཞན་གྱི་དོན་དུ་སྐྱེ་བ་བཞེས་པའོ། །དེ་བཞིན་དུ་འཕགས་པ་ཉན་ཐོས་དང་རང་རྒྱལ་བ་རྣམས་ནི། རང་གི་ཏིང་ངེ་འཛིན་གྱིས་ཉོན་མོངས་པ་རགས་པ་སྤོང་བས་མངལ་དུ་ཤེས་བཞིན་དུ་འཇུག་ལ་ཤེས་བཞིན་དུ་དེ་ན་གནས་ཀྱང་བྱང་ཆུབ་སེམས་དཔའ་ལྟར་མི་དམིགས་པའི་ཤེས་རབ་མེད་པའི་རྒྱུད་མངལ་དུ་ཟླ་བ་ཚང་ནས་ཤེས་པ་དེ་ལ་ཉོན་མོངས་པའི་ཆགས་པ་སླར་ལ་ལངས་པས་མངལ་གྱི་དྲི་མས་སྒྲིབས་ཏེ་ཕྱིར་ལ་མི་ཤེས་བཞིན་དུ་འབྱུང་སྟེ་དེ་དག་བདག་གི་དོན་དུ་སྐྱེ་བ་བཞེས་པ་ཡིན་ཏེ། དེ་ནས་གཟོད་ལམ་གོང་མ་ལ་འཇུག་པ་དང་རྟེན་འབྲེལ་ལ་དཔྱོད་པ་དང་ཐེག་པ་ཆེན་པོར་འཇུག་པའི་ཡང་ཕྱིར་རོ། །འཁོར་ལོས་སྒྱུར་བའི་རྒྱལ་པོ་དང་ལྷ་མི་སྟོད་རིམ་རྣམས་ནི། རྣམ་པར་དཀར་བའི་ལས་ཆེར་སྤྱད་པ་དང༌། བར་མ་དོར་དབང་པོ་དྭངས་པས་ཤེས་བཞིན་དུ་འཇུག་པ་ཡིན་ཀྱང་མངལ་ན་གནས་ཙམ་ན་ཁུ་ཁྲག་གདོས་པ་ཅན་གྱིས་བཟུང་བས་མི་ཤེས་བཞིན་དུ་དེར་གནས་ནས་མི་ཤེས་བཞིན་དུ་ཕྱིར་འབྱུང་ཞིང་སྐྱེ་བ་དང༌། ལྷ་མི་ཕལ་པ་མན་ཆད་ཀྱི་སེམས་ཅན་རྣམས་ཀྱི་ལས་ངན་པ་ཚན་ཆེ་བས་ཤེས་པ་ལས་ཀྱིས་བསྒྲིབས་ཤིང་རྙོགས་པར་བྱས་པས་མངལ་དུ་རང་གི་གནས་སུ་མཐོང་ནས་དེར་འགྲོ་བས་མི་ཤེས་བཞིན་དུ་འཇུག་༼༡༧༥༽ཅིང་མི་ཤེས་བཞིན་དུ་དེ་གནས་ཏེ། མི་ཤེས་བཞིན་དུ་ཕྱིར་ཡང་འབྱུང་ཞིང་སྐྱེ་བ་ཡིན་པས། དེ་ལྟར་རིམ་པའི་དབང་དུ་སྐྱེ་བའི་ཁྱད་པར་དེ་ལ་རེ་རེ་ཡོད་དོ།།

སྐབས་འདིར་འགྲེལ་ཆེན་ལས། དཀྲུགས་ན་ནི་ཁྱད་པར་ལྡབ་པ་དང་སུམ་གཉིས་དང་བྱེད་པ་དང་རེ་རེ་ཡོད་པར་འགྱུར་རོ། །ཞེས་གསུངས་ཏེ། འདི་ལ་སོ་སོར་འཇུག་པའི་རིགས་ཅན་གྱི་རྣམ་གྲངས་ལ་བརྟེན་ནས་ཁྱད་པར་དཀྲུགས་ཏེ་བརྗོད་པའི་འཆད་ཚུལ་ཡང་སྤྱིའི་བཀའ་སྲོལ་ལྟར་བྱས་ན་ཡོད་པར་མངོན་ཀྱང༌། འདིར་ཡེ་ཤེས་སྣང་བ་རྒྱན་གྱི་མདོ་ལས་གསུངས་པ་བཞིན་ཏེ། ཞེས་བཞུགས་པའི་ཕྱིར། དེ་ལྟར་ན་མི་དམིགས་པའི་ཤེས་རབ་ཀྱི་ཁྱད་པར་ལ་སྦྱར་བར་གསལ་བས་ཁྱད་པར་ལྡབ་པ་ནི། དེ་ལྟར་འཇུག་པའི་ཆོས་བཞིའི་ཁྱད་པར་ལྡབ་ནས་བསྟན་པ་ཏེ། མདོ་ཉིད་ལས། དེ་བཞིན་ཉིད་ཅེས་བྱ་བ་དེ་ནི་དེ་ཁོ་ནའི་དོན་གྱི་ཚིག་བླ་དྭགས་ཡིན་ནོ། །དེ་ཁོ་ན་ཞེས་བྱ་བ་ནི་དེ་བཞིན་ཉིད་ཁོ་ནའོ། །དེ་བཞིན་ཉིད་དེ་ཁོ་ན་ནི་དེ་བཞིན་ཉིད་དོ། །དེ་བཞིན་ཉིད་དང་ བདག་དེ་ནི་གཉིས་སུ་མེད་དེ་གཉིས་སུ་བྱར་མེད་དོ། །གཉིས་སུ་བྱར་མེད་པའི་དོན་གང་ཡིན་པ ་དེ་ནི་བྱང་ཆུབ་སྟེ། བྱང་ཆུབ་ནི་དོན་རྟོགས་པའོ། །དོན་ཅེས་བྱ་བ་ནི་ཆོས་བསྟན་པ་ཐམས་ཅད་ལ་རྣམ་པར་ཐར་པའི་སྒོ་གསུམ་དུ་འཇུག་པ་ཤེས་པའོ། །ཤེས་པ་ཞེས་བྱ་བ་ནི་ཆོས་ཐམས་ཅད་ལ་དུས་གསུམ་མཉམ་པ་ཉིད་དུ་འཇུག་པའོ། །ཞེས་དང༌། འཇམ་དཔལ་སྟོང་པ་ཉིད་རྗེས་སུ་རྟོགས་པའི་ཕྱིར་ཏེ། སྟོང་པ་ཉིད་རྗེས་སུ་རྟོགས་པ་གང་ཡིན་པ་དེ་ནི་བྱང་ཆུབ་བོ། །ཞེས་དང༌། ངེས་པའི་དོན་དང་དྲང་བའི་དོན་མཉམ་པ་ཉིད་ཀྱིས་དོན་མཉམ་པ་དེ་ནི་སྟོང་པ་ཉིད་དོ། །སྟོང་པ་ཉིད་དུ་དོན་མཉམ་པས་གང་ཟག་མཉམ་པ་ཉིད་མཉམ་མོ། །གང་ཟག་མཉམ་པ་ཉིད་ཀྱིས་ཆོས་མཉམ་པ་ཉིད་མཉམ་མོ། །ཆོས་མཉམ་པ་ཉིད་ཀྱིས་རྣམ་པར་གྲོལ་བ་མཉམ་པ་ཉིད་མཉམ་སྟེ་རྣམ་པར་གྲོལ་བ་མཉམ་པ་ཉིད་རྗེས་སུ་རྟོགས་པ་ནི་བྱང་ཆུབ་བོ། །འཇམ་དཔལ་གཟུགས་ལ་ཆགས་པས་ཆགས་པར་གྱུར་པ་རྣམས་ཀྱིས་མིག་ནི་ཆགས་པ་ཡིན་ནོ། །གཟུགས་དང་མིག་གི་རང་བཞིན་ཤེས་པ་ནི་ཆགས་པ་མེད་པ་ཡིན་ནོ། །ལྟ་བ་ལ་ཆགས་པས་ཆགས་པར་གྱུར་པ་རྣམས་ཀྱིས་རང་གི་ལུས་ནི་ཆགས་པ་ཡིན་ནོ། །ལྟ་བར་གྱུར་པ་ཐམས་ཅད་ཀྱི་རང་གི་ལུས་ཀྱི་རང་བཞིན་སྟོང་པ་ཉིད་དུ་ཤེས་པ་ནི་ཆགས་པ་མེད་པ་ཡིན་ནོ། །ཚུལ་བཞིན་མ་༼༡༧༦༽ཡིན་པ་ཡིད་ལ་བྱེད་པ་ཆགས་པས་ཆགས་པར་གྱུར་པ་རྣམས་ཀྱི་ཆོས་ཀྱི་སྣང་བ་ནི་ཆགས་པ་ཡིན་ནོ། །ཚུལ་བཞིན་ཡིད་ལ་བྱེད་པའི་ཆོས་ལ་སོ་སོར་རྟོག་ཅིང་ངོ་བོ་ཉིད་ཀྱིས་རང་བཞིན་སྟོང་པ་ཉིད་དུ་ཤེས་པ་ནི་ཆགས་པ་མེད་པ་ཡིན་ནོ། །ཐེ་ཚོམ་གྱི་དྲི་མ་ལ་ཆགས་པས་ཆགས་པར་གྱུར་པ་རྣམས་ཀྱི་ཐར་པ་ནི་ཆགས་པ་ཡིན་ནོ། །མོས་པ་དང་རྣམ་པར་གྲོལ་བ་ཡང་དག་པ་ཇི་ལྟ་བ་བཞིན་དུ་ཤེས་པ་ནི་ཆགས་པ་མེད་པ་ཡིན་ནོ། །ལེ་ལོའི་དྲི་མ་ལ་ཆགས་པས་ཆགས་པར་གྱུར་པ་རྣམས་ཀྱི་རྟོགས་པར་བྱ་བ་ལ་བརྩོན་འགྲུས་བརྟན་པ་ཉིད་ནི་ཆགས་པ་ཡིན་ནོ། །ཆོས་ཇི་ལྟ་བ་བཞིན་དུ་རྟོགས་པ་ནི་ཆགས་པ་མེད་པ་ཡིན་ནོ། །སྒྲིབ་པ་ལ་ཆགས་པས་ཆགས་པར་གྱུར་པ་རྣམས་ཀྱི་བྱང་ཆུབ་ཀྱི་ཡན་ལག་རྣམས་ནི་ཆགས་པ་ཡིན་ནོ། །སྒྲིབ་པ་མེད་པའི་རྣམ་པར་ཐར་པ་ཤེས་པ་ནི་ཆགས་པ་མེད་པ་ཡིན་ནོ། །ཞེས་སོགས་གསུངས་པ་ལྟར་རོ།།

སུམ་གཉིས་ནི། དམིགས་པ་མེད་པའི་ཤེས་རབ་ཆེན་པོ་རང་གི་ཁྱད་པར་གྱི་ཆོས་བསྟན་པ་སྟེ། དེ་ཉིད་ལས། འཇམ་དཔལ་བྱང་ཆུབ་ནི་ཞི་བ་དང་ཉེ་བར་ཞི་བ་ཡིན་ཏེ། དེ་ལ་ཞི་བ་ནི་གང༌། ཉེ་བར་ཞི་བ་ནི་གང་ཞེ་ན། ནང་ནི་ཞི་བ་ཡིན་ནོ། །ཕྱི་རོལ་ནི་ཉེ་བར་ཞི་བ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་མིག་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་མིག་སྟོང་པ་ཞེས་བྱ་བར་ཡོངས་སུ་ཤེས་ནས་གཟུགས་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །ཞེས་སོགས་ནས། ལུས་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་ལུས་སྟོང་པ་ཞེས་བྱ་བར་ཡོངས་སུ་ཤེས་ནས་རེག་བྱ་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །འཇམ་དཔལ་ཡིད་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་ཡིད་སྟོང་པ་ཞེས་བྱ་བར་ཡོངས་སུ་ཤེས་ནས་ཆོས་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །འཇམ་དཔལ་བྱང་ཆུབ་ནི་སེམས་ཀྱི་རང་བཞིན་འོད་གསལ་བ་ཉིད་ཀྱིས་རང་བཞིན་འོད་གསལ་བ་ཡིན་ཏེ་ཅིའི་ཕྱིར་འོད་གསལ་བ་ཞེས་བྱ་ཞེ་ན། རང་བཞིན་གང་ཡིན་པ་དེ་ནི་ཀུན་ནས་ཉོན་མོངས་པ་མེད་པ་ནམ་མཁའ་དང་མཉམ་པ། ནམ་མཁའི་རང་བཞིན་ཅན། ནམ་མཁར་ཡང་དག་པར་འདུ་བ། ནམ་མཁའ་ལྟ་བུ་སྟེ། རང་བཞིན་གྱིས་ཤིན་ཏུ་འོད་གསལ་བ་༼༡༧༧༽ཡིན་པའི་ཕྱིར་རོ། །ཞེས་དང༌། འཇམ་དཔལ་སེམས་ནི་རང་བཞིན་གྱིས་འོད་གསལ་བའི་ཕྱིར་ཏེ། དེ་ནི་གློ་བུར་གྱི་ཉེ་བའི་ཉོན་མོངས་པ་ཐམས་ཅད་ཀྱིས་ཉེ་བར་ཉོན་མོངས་པར་ཟད་ཀྱི། རང་བཞིན་གྱིས་ཀུན་ནས་ཉོན་མོངས་པ་ཉིད་མ་ཡིན་ནོ། །རང་བཞིན་གྱིས་འོད་གསལ་བ་ཉིད་གང་ཡིན་པ་དེ་ནི་ཀུན་ནས་ཉོན་མོངས་པ་མེད་པ་ཉིད་ཡིན་ནོ། །ཀུན་ནས་ཉོན་མོངས་པ་མེད་པ་གང་ཡིན་པ་དེ་ལ་ནི་གཉེན་པོ་གང་གིས་ཉོན་མོངས་པ་སྤོང་བར་འགྱུར་བའི་གཉེན་པོ་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་དེ་ནི་དག་པ་ཉིད་ཡིན་པས་དག་པ་ནི་དག་པར་མི་འགྱུར་བའི་ཕྱིར་ཏེ། དག་པ་གང་ཡིན་པ་དེ་ནི་སྐྱེ་བ་མེད་པའོ། །ཞེས་དང༌། འཇམ་དཔལ་བྱང་ཆུབ་ནི་བླང་བ་མེད་པ་ཉིད་དང༌། དོར་བ་མེད་པ་ཉིད་ཡིན་ཏེ། །ཞེས་པ་ནས། བྱང་ཆུབ་ནི་མཚན་མ་མེད་པ་ཉིད་དང༌། དམིགས་པ་མེད་པ་ཉིད་ཡིན་ཏེ། དེ་ལ་མཚན་མ་མེད་པ་ཉིད་ནི་གང༌། དམིགས་པ་མེད་པ་ཉིད་ནི་གང་ཞེ་ན། འཇམ་དཔལ་མིག་གི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཉིད་ཡིན་ནོ། །གཟུགས་ཡང་དག་པར་རྗེས་སུ་མི་མཐོང་བ་ནི་དམིགས་པ་མེད་པ་ཉིད་ཡིན་ནོ། །ཞེས་པ་ནས་རྣམ་པའི་རྣམ་ཤེས་སོགས་ལའང་དེ་ལྟར་སྦྱར་ཏེ། ཡིད་ཀྱི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཡིན་ནོ། །ཆོས་རྣམས་རྣམ་པར་ཤེས་པར་བྱར་མེད་པ་ནི་དམིགས་པ་མེད་པ་ཉིད་ཡིན་ནོ། །འཇམ་དཔལ་དེ་ནི་འཕགས་པ་རྣམས་ཀྱི་སྤྱོད་ཡུལ་ཡིན་ཏེ། འཇམ་དཔལ་གང་ཁམས་གསུམ་པའི་སྤྱོད་ཡུལ་མ་ཡིན་པ་དེ་ནི་འཕགས་པ་རྣམས་ཀྱི་སྤྱོད་ཡུལ་ཡིན་ནོ། །ཞེས་སོགས་གསུངས་པས་བསྟན་ཏོ། །བྱེད་པ་ནི། འཇམ་དཔལ་ཆོས་ཐམས་ཅད་ཀྱི་ངོ་བོ་ཉིད་གང་ཡིན་པ་དེ་ནི་ངོ་བོ་ཉིད་མེད་པ་སྟེ། ངོ་བོ་ཉིད་མེད་པ་གང་ཡིན་པ་དེ་ལ་ནི་གཉིས་སུ་མེད་པའི་ཕྱིར་རོ། །འཇམ་དཔལ་བྱང་ཆུབ་དེ་ནི་དབྱེར་མེད་པའི་གཞི་ཡིན་ཏེ། དེ་ལ་དབྱེར་མེད་པ་ནི་གང༌། གཞི་ནི་གང་ཞེ་ན། མིང་མེད་པ་ནི་དབྱེར་མེད་པའོ། །དེ་བཞིན་ཉིད་ནི་གཞིའོ། །གནས་མེད་པ་ནི་དབྱེར་མེད་པའོ། །ཆོས་ཀྱི་དབྱིངས་ནི་གཞིའོ། །ཐ་དད་པ་མེད་པ་ནི་དབྱེར་མེད་པའོ། །ཡང་དག་པའི་མཐའ་ནི་གཞིའོ། །དམིགས་མེད་པ་ནི་དབྱེར་མེད་པའོ། །གཡོ་བ་མེད་པ་ནི་གཞིའོ། །ཞེས་སོགས་ནས། འཇམ་དཔལ་ཡང་དག་པར་བྱང་ཆུབ་ཡོངས་སུ་ཚོལ་བ་ན་ཡང་ཆོས་ཐམས་ཅད་ཀྱིས་བརྗོད་པར་༼༡༧༨༽བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་ཡང་དག་པར་ནི་ཚིག་ནི་མ་སྐྱེས་པ་དང༌། མ་འགགས་པ་ཡིན་པས་ཡོད་པ་མ་ཡིན་པའི་ཕྱིར་རོ། །འཇམ་དཔལ་བྱང་ཆུབ་ནི་གཟུང་བ་མེད་པ་ཉིད་དང༌། གནས་མེད་པ་ཉིད་ཡིན་ཏེ། འཇམ་དཔལ་དེ་ལ་གཟུང་བ་མེད་པ་ནི་གང༌། གནས་མེད་པ་ནི་གང་ཞེ་ན། འཇམ་དཔལ་མིག་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །གཟུགས་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །ཞེས་པ་ནས། ཡིད་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །ཆོས་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །དེ་བཞིན་གཤེགས་པས་ནི་དེ་ལྟར་གཟུང་བ་མེད་པ་ཉིད་དང་གནས་མེད་པ་ཉིད་དུ་བྱང་ཆུབ་མངོན་པར་རྫོགས་པར་སངས་རྒྱས་ཏེ། མངོན་པར་རྫོགས་པར་སངས་རྒྱས་ནས་ཀྱང་མིག་གཟུང་དུ་མེད་པ་དང༌། གཟུགས་དམིགས་སུ་མེད་པའི་ཕྱིར། མིག་གི་རྣམ་པར་ཤེས་པ་ལ་མི་གནས་སོ། །རྣ་བ་གཟུང་དུ་མེད་པ་སོགས་ནས། ཡིད་གཟུང་དུ་མེད་པ་དང༌། ཆོས་དམིགས་སུ་མེད་པའི་ཕྱིར་ཡིད་ཀྱི་རྣམ་པར་ཤེས་པ་ལ་མི་གནས་ཏེ། དེའི་ཕྱིར་དེ་བཞིན་གཤེགས་པ་དགྲ་བཅོོམ་པ་ཡང་དག་པར་རྫོགས་པའི་སངས་རྒྱས་ནི་རྣམ་པར་ཤེས་པ་ལ་མི་གནས་པ་དང་ལྡན་པ་ཞེས་བྱ་བའི་གྲངས་སུ་འགྲོའོ། །ཞེས་པ་ནས། འཇམ་དཔལ་དེ་ལ་སེམས་ཅན་མ་རིག་པས་ལྡོངས་པར་བྱས་པ། སྲེད་པས་དཀྲུགས་པར་གྱུར་པ་དག་ནི་ཕན་ཚུན་མངོན་པར་ཞེན་པར་གྱུར་ནས་ལེན་པར་བྱེད་ཀྱི་དེ་བཞིན་གཤེགས་པས་ནི་བདག་ཏུ་སྨྲ་བའི་ལེན་པ་རྩ་བ་ཡིན་པར་ཡོངས་སུ་ཤེས་ནས་བདག་རྣམ་པར་དག་པས་སེམས་ཅན་ཐམས་ཅད་རྣམ་པར་དག་པ་རྗེས་སུ་རྟོགས་པར་གྱུར་ཏེ། བདག་རྣམ་པར་དག་པ་གང་ཡིན་པ་དང༌། སེམས་ཅན་ཐམས་ཅད་རྣམ་པར་དག་པ་གང་ཡིན་པ་དེ་ནི་གཉིས་སུ་མེད་དེ་གཉིས་སུ་དབྱེར་མེད་ལ། གཉིས་སུ་མེད་པའི་དོན་གང་ཡིན་པ་དེ་ནི་སྐྱེ་བ་མེད་པ་དང་འགག་པ་མེད་པ་ཡིན་ནོ། །འཇམ་དཔལ་སྐྱེ་བ་མེད་པ་དང༌། འགག་པ་མེད་པ་ལ་ནི་སེམས་དང་ཡིད་དང་རྣམ་པར་ཤེས་པ་འཇུག་པར་མི་འགྱུར་ཏེ། འཇམ་དཔལ་གང་ལ་སེམས་དང་ཡིད་དང་རྣམ་པར་ཤེས་པ་མི་འཇུག་པ་དེ་ལ་ནི་ཡོངས་སུ་རྟོགས་པ་གང་གིས་ཚུལ་བཞིན་མ་ཡིན་པ་ཡིད་ལ་བྱེད་པར་འགྱུར་བའི་ཡོངས་སུ་རྟོག་པ་གང་ཡང་མེད་དོ། །ཚུལ་བཞིན་ཡིད་ལ་བྱེད་པ་ལ་རབ་ཏུ་བརྩོན་པར་དེ་ནི་མ་རིག་པ་ཀུན་ནས་སློང་༼༡༧༩༽བར་མི་བྱེད་དོ། །མ་རིག་པ་ཀུན་ནས་ལྡང་བ་མེད་པ་གང་ཡིན་པ་དེ་ནི་སྲིད་པའི་ཡན་ལག་བཅུ་གཉིས་པོ་དག་གི་ཀུན་ནས་སློང་བ་མེད་པ་ཡིན་ནོ། །སྲིད་པའི་ཡན་ལག་བཅུ་གཉིས་པོ་དག་གི་ཀུན་ནས་ལྡང་བ་མེད་པ་གང་ཡིན་པ་དེ་ནི་སྐྱེ་བ་མེད་པ་ཡིན་ནོ། །ཞེས་པ་ནས། དེའི་ཕྱིར་གང་གིས་རྟེན་ཅིང་འབྲེལ་བར་འབྱུང་བ་མཐོང་བ་དེས་ཆོས་མཐོང་ངོ༌། །གང་གིས་ཆོས་མཐོང་བ་དེས་དེ་བཞིན་གཤེགས་པ་མཐོང་ངོ་ཞེས་གསུངས་ཏེ་ཇི་ལྟར་ཡོངས་སུ་ཚོལ་བ་ན་ཅི་ཡང་མི་མཐོང་བ་དེ་ལྟར་མཐོང་ངོ༌། །འཇམ་དཔལ་དེ་ལ་ཅི་ཡང་ཞེས་བྱ་བ་གང་ཞེ་ན། འདི་ལྟ་སྟེ། སེམས་དང་དམིགས་པ་སྟེ། དེས་གང་གིས་ཚེ་སེམས་དང་དམིགས་པ་ཡང་དག་པར་རྗེས་སུ་མི་མཐོང་བ་དེའི་ཚེ་ན་ཡང་དག་པར་མཐོང་བ་ཡིན་པས། དེ་བཞིན་གཤེགས་པས་ནི་ཆོས་དེ་དག་དེ་ལྟར་མཉམ་པ་ཉིད་ཀྱིས་མཉམ་པར་མངོན་པར་རྫོགས་པར་སངས་རྒྱས་སོ། །ཞེས་སོགས་ནས། དེའི་ཕྱིར་དེ་བཞིན་གཤེགས་པ་རྣམས་བྱུང་ཡང་རུང༌། མ་བྱུང་ཡང་རུང༌། ཆོས་ཉིད་དང་ཆོས་གནས་པ་ཉིད་དང་ཆོས་ཀྱི་དབྱིངས་འདི་ནི་གནས་པ་ཁོ་ན་ཞེས་བྱ་སྟེ། ཇི་ལྟར་ཆོས་ཀྱི་དབྱིངས་ལ་གནས་པ་དེ་བཞིན་དུ་ཤེས་པ་དེ་ཡང་འཇུག་པར་མི་བྱེད་ལྡོག་པར་མི་བྱེད་དོ། །ཇི་ལྟར་ཤེས་པ་དེ་འཇུག་པར་མི་བྱེད། །ལྡོག་པར་མི་བྱེད་པ་དེ་ལྟ་བུའི་ཆོས་ཀྱི་ཚུལ་ལ་འཇུག་པས་ཟག་པ་སྐྱེད་པར་མི་བྱེད་འགག་པར་མི་བྱེད་དོ། །འཇམ་དཔལ་ཟག་པ་ཟད་པ་ཞེས་བྱ་བ་དེ་ནི་ཐ་སྙད་དང་སྒྲ་དང་ཡི་གེ་དང་བརྡར་གདགས་པ་ཡིན་ཏེ། འདི་ལ་ནི་སྐྱེ་བའམ་འགག་པར་འགྱུར་བའི་ཆོས་གང་ཡང་མེད་དོ། །ཞེས་བཀའ་སྩལ་བར་མཛད་དེ༌། དེ་ལྟ་བུའི་བྱེད་ལས་དང་ལྡན་པ་དེ་ནི་མི་དམིགས་པའི་ཤེས་རབ་ཡང་དག་པ་ཡིན་པས་བློ་དང་ལྡན་པ་དག་གིས་ཚུལ་བཞིན་དུ་ངེས་པར་བྱའོ། །འདི་དག་གི་དོན་འགྲེལ་བར་བྱས་ན་ཤིན་ཏུ་མང་བར་འགྱུར་བས་མ་སྤྲོས་ལ། །འདིར་སྐྱེ་གནས་སུ་འཇུག་པའི་ཆོས་བཤད་པའི་སྐབས་སུ་གནད་ཆེ་བའི་ཕྱིར་དང༌། འདི་དག་གི་དོན་གྱི་རང་བཞིན་རྟོགས་པར་དཀའ་ཞིང་དོན་བསྡུས་སུ། དོན་དམ་ངེས་པའི་ཐེག་མཆོག་ལས། །གསང་སྒོ་མཚོན་པའི་མདོ་རྒྱུད་དོན། །ཞེས་འབྱུང་བ་ལྟར། ངེས་དོན་གྱི་མདོ་སྡེ་ཟབ་མོའི་དགོངས་པ་ཕྱིན་ཅི་མ་ལོག་པར་ངེས་ན་ལུང་ཆེན་གསང་མཆོག་རྒྱལ་པོའི་ཇི་བཞིན་པའི་གནས་ལའང་གཞན་དྲིང་མི་འཇོག་པའི་ངེས་པ་རྙེད་པར་འགྱུར་བའི་ཕྱིར་བཀའ་ལུང་གི་༼༡༨༠༽ཚིག་དོན་སྙན་ཅིང་ཟབ་ལ་ཞལ་གསལ་བ་རྣམས་ཅུང་ཟད་དྲངས་པ་ཡིན་ནོ།།

འོན་ཀྱང༌། དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཀུན་ཀྱང་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་རྣམས། །འཇིག་རྟེན་དག་ན་མེད་པའི་ཆོས་ལ་སྤྱོད། །དེ་བཞིན་གཤེགས་པ་ཟག་མེད་དགེ་བ་ཡི། །ཆོས་ཀྱི་གཟུགས་བརྙན་ཡིན་ཏེ་འདི་ལ་ནི། །དེ་བཞིན་ཉིད་མེད་དེ་བཞིན་གཤེགས་པའང་མེད། །འཇིག་རྟེན་ཀུན་ཏུ་གཟུགས་བརྙན་ཀུན་ཏུ་སྣང༌། །ཞེས་གསུངས་ཏེ་གནས་འདི་དག་ཤིན་ཏུ་ཟབ་ཅིང་རྒྱ་ཆེ་བ་ཡིན་པས་རྒྱས་པར་མདོ་ཉིད་དང་མཁས་གྲུབ་གོང་མའི་ལེགས་བཤད་རྣམས་ལས་ཤེས་པར་བྱའོ།།

གཉིས་པ་བྱེ་བྲག་ཏུ་མངལ་དུ་འཇུག་ཚུལ་བཤད་པ་ལ་གཉིས་ཏེ། ཉེ་བར་བསྟན་པ། རླུང་བདུན་ཕྲག་སུམ་ཅུ་རྩ་བརྒྱད་ཀྱིས་སྨིན་ཅིང་སྐྱེ་བ་རྒྱས་པར་བཤད་པའོ། །དང་པོ་ནི།

འཛིན་དང་འདྲེས་པའི། ཞེས་པ་ནས། ཐམས་ཅད་སྨིན་པར་འགྱུར། །ཞེས་པའི་བར་གྱིས་བསྟན་ཏེ།

འཛིན་དང་འདྲེན་པ་ཉེར་གནས་པ། །གནས་གསུམ་འཐུན་པས་སྐྱ་འཛིན་བྱེད།།

སྐྱེ་གནས་ས་བོན་ལས་རྣམས་ཀྱི། །ཉེས་པའི་བར་ཆད་བདུན་མེད་ན། །མངལ་དུ་ཐམས་ཅད་སྨིན་པར་འགྱུར།།

ཇི་སྐད་དུ། མདོ་ལས། གནས་གསུམ་མངོན་དུ་གྱུར་ན་མངལ་དུ་འཇུག་པར་འགྱུར་ཏེ། ༢༽ མ་ཉམས་བདེ་ཞིང་ཟླ་མཚན་དང་ལྡན་པ་དང༌། ༡༽ ཕ་དང་མ་ཆགས་པར་གྱུར་ཅིང་ཕྲད་པ་དང༌། དྲི་ཟ་ཡང་ཉེ་བར་གནས་པར་གྱུར་ནའོ། །ཞེས་གསུངས་པ་ལྟར། ཕ་མ་གཉིས་ཆགས་ཤིང་ཕྲད་པའི་ས་བོན་གྱིས་བར་མའི་སྲིད་པའི་རྣམ་ཤེས་འཛིན་པ་དང༌། མངལ་དུ་ཟླ་མཚན་དང་ཁུ་བ་འདྲེས་པ་དེར་འདྲེན་པའི་ཚུལ་གྱིས། དྲི་ཟ་ཉེར་འཁོར་དེ་ན་གནས་པ་དེ་ཉིད་ཇི་ལྟར་འཛིན་པའི་ཚུལ་ཡང༌། དེ་ལྟར་གནས་གསུམ་མཐུན་པས་བར་མ་དོའི་ཤེས་པ་49མིའི་མངལ་དུ་སྐྱེ་བ་འཛིན་པར་བྱེད་པ་ཡིན་ཏེ། དེའང་མི་མཐུན་པར་གྱུར་པའི་སྐྱེ་གནས་ཀྱི་བར་ཆད་དང༌། ས་བོན་གྱི་བར་ཆད་དང༌། ལས་ཀྱི་བར་ཆད་རྣམས་ཀྱིས་ཉེས་པའི་བར་ཆད་གསུམ་པོ་དག་མེད་པར་བཤད་པ་ལྟར་གནས་གསུམ་མཐུན་པས་དེ་ལས་བཟློག་པ་བཞིན་གྱུར་ན་མའི་མངལ་དུ་སྐྱེ་བའི་སེམས་ཅན་ཐམས་ཅད་སྨིན་པའམ་སྐྱེ་བ་མཐར་ཕྱིན་པར་འགྱུར་བའོ། །དེ་ཡང་སའི་དངོས་གཞི་ལས། དེ་ལ་སྐྱེ་གནས་ཀྱི་ཉེས་པ་གང་ཞེ་ན། གལ་ཏེ་རླུང་གིས་མ་རུང་བར་བྱས་པའམ། མཁྲིས་པས་མ་རུང་བར་བྱས་པའམ། བད་ཀན་གྱིས་མ་རུང་བར་བྱས་པའམ། དབུང་ནས་འདྲ་བའམ། དབུང་ཏིལ་འབྲུ་འདྲ་བའམ། ཁ་ཤིང་རྟ་འདྲ་བའམ། ཁ་དུང་འདྲ་བའམ། མཚན་མ་ཙམ་ཡོད་པའམ། ཡོ་བའམ། སྐྱོན་༼༡༨༡༽ཡོད་པའམ། སྐ་བ་ཡོད་པའམ། དེ་ལྟ་བུ་དང་མཐུན་པ་རྣམས་ནི་སྐྱེ་གནས་ཀྱི་ཉེས་པ་ཡིན་པར་རིག་པར་བྱའོ། །ཞེས་གསུངས་ཏེ། དེའང་གློ་བུར་གྱི་བར་ཆད་དང༌། ལྷན་ཅིག་སྐྱེས་པའི་བར་ཆད་གཉིས་ཏེ། དང་པོ་ནི་འདུ་བ་རྣམ་བཞིའི་ནད་ཀྱིས་འཕྲལ་དུ་མ་རུང་བར་བྱས་པའོ། །གཉིས་པར་ཡང་དབྱིབས་གྱུར་པ་ནི། མངལ་གྱི་དབྱིབས་ནས་འདྲ་བ་དང༌། ཏིལ་དང་ཤིང་རྟ་འདྲ་བ་དང༌། དུང་འདྲ་བ་དང༌། ཐང་པའམ་ཡོ་བའམ། འདི་ལ་ལ་ལར་ཡོབ་ཆེན་ལྟ་བུ་ཞེས་འབྱུང༌། སྦྲ་ལྟ་བུ་འཁྱིལ་བ་དང༌། གྲ་མ་ལྟ་བུས་གང་བ་དང༌། ཕྱིར་ལུག་སྟེ་འབྱུང་གནས་ལྟ་བུ་དང༌། རྔ་མོའི་ཁ་ལྟ་བུ་དང་དེ་དག་སྟེ། དེ་ལྟར་དབྱིབས་གྱུར་པས་ནི་སྐྱེ་གནས་ཀྱིས་ཁུ་ཆུ་གཞིབས་ནས་ཕྱིར་འཛག་པའམ་མི་འཇིབ་པའོ། །གལ་ཏེ་དབྱིབས་མ་གྱུར་ནའང་པགས་ཤུན་ལ་རྨའི་སྐྱོན་ཡོད་དེ། དེར་རྣག་དང་ཆུ་སེར་སོགས་དང་འདྲེས་ན་ཁུ་ཆུ་དེ་རུལ་བར་འགྱུར་ལ། །སྐ་བ་ཡོད་ནའང་ཡང་ནས་ཡང་དུ་སྐམ་པར་འགྱུར་བས་ནལ་ནལ་པོར་མི་འཇུག་སྟེ། དེའི་ཕྱིར་དེར་ཁུ་ཆུ་དང་ཁྲག་ཟད་པར་འགྱུར་རོ། །ཞེས་སའི་རྣམ་བཤད་ལས་བསྟན་ཏོ། །ས་བོན་གྱི་བར་ཆད་ཡང་སྔ་མ་ལས། ས་བོན་གྱི་ཉེས་པ་གང་ཞེ་ན། གལ་ཏེ་ཕའི་ཁུ་བ་བྱུང་ལ་མའི་མ་བྱུང་བའམ། མའི་བྱུང་ལ་ཕའི་མ་བྱུང་བའམ། གཉིས་གའི་མ་བྱུང་བའམ། མའི་རུལ་ཏམ། ཕའི་རུལ་ཏམ། གཉི་གའི་རུལ་ཏམ། དེ་ལྟ་བུ་དང་མཐུན་པ་རྣམས་ནི་ས་བོན་གྱི་ཉེས་པ་ཡིན་པར་རིག་པར་བྱའོ། །ཞེས་ཏེ། ས་བོན་ཨ་རུ་ར་ལྟ་བུར་སྐ་བ་དང༌། སྔ་ཕྱིར་གྱུར་པ་ལ་སོགས་པའོ། །ལས་ཀྱི་བར་ཆད་ཡང་། དེ་ཉིད་ལས། ལས་ཀྱི་ཉེས་པ་གང་ཞེ་ན། གལ་ཏེ་ཕའམ་མའམ། ཡང་ན་གཉི་གས་བུ་ཡོང་བར་འགྱུར་པའི་ལས་མ་བྱས་ཤིང་མ་བསགས་སམ། ཡང་ན་སེམས་ཅན་དེས་ཕ་མ་ཡོད་པར་འགྱུར་བའི་ལས་མ་བྱས་ཤིང་མ་བསགས་སམ། ཡང་ན་ཕ་མ་དེ་གཉིས་ཀྱིས་བུ་དེ་མ་ཡིན་པ་ཡོད་པར་འགྱུར་བའི་ལས་བྱས་ཤིང་བསགས་སམ། ཡང་ན་སེམས་ཅན་དེས་དེ་མ་ཡིན་པ་དབང་ཆེ་བར་གྲགས་པ་དང༌། དབང་ཆེ་བར་གྲགས་པ་མ་ཡིན་པ་ཕ་མར་འགྱུར་བའི་ལས་བྱས་ཤིང་བསགས་པའམ། དེ་ལྟ་བུ་དང་མཐུན་པ་རྣམས་ནི་ལས་ཀྱི་ཉེས་པ་ཡིན་པར་རིག་པར་བྱ་སྟེ། ཉེས་པ་དེ་དག་ཀྱང་མེད་ལ། གནས་གསུམ་ཡང་མངོན་སུམ་དུ་གྱུར་ན་མངལ་དུ་འཇུག་པར་འགྱུར་རོ། །ཞེས་ཏེ། ཕ་མ་དང་༼༡༨༢༽བར་དོ་བསོད་ནམས་ཆེ་ཆུང་དུ་གྱུར་པ་དང༌། བསོད་ནམས་མཉམ་ཡང་ཕན་ཚུན་ཕ་མ་དང་བུར་འགྱུར་བའི་ལས་མ་བསགས་པ་ལ་སོགས་པའོ།།

གཉིས་པ་རླུང་བདུན་ཕྲག་སུམ་ཅུ་རྩ་བརྒྱད་ཀྱིས་སྨིན་ཅིང་སྐྱེ་བ་རྒྱས་པར་བཤད་པ་ནི།

དེ་ཡང་འབྱུང་གནས། ཞེས་པ་ནས། ཟ་བར་འབྱུང་བ་ཡིན། །ཞེས་པའི་བར་གྱིས་བསྟན་ཏེ།

དེ་ཡང་འབྱུང་གནས་གཅིག་ལ་གཅིག །ཞེན་པ་དྲག་པོ་འབྱུང་སྐབས་སུ། །ཐ་མར་འཛིན་པའི་བཅུད་འབྱུང་འགྱུར། །དེ་ནས་དེ་བཞིན་གཉིས་ཀ་ལས། །གང་བཅུད་ཐིག་ལེ་རེ་རེ་དག །གདོན་མི་ཟ་བར་འབྱུང་བར་འགྱུར། །དེ་ཉིད་གང་དེར་འདྲེས་འགྱུར་ན། །གང་དྲོད་ཞམས་བཞིན་འདུལ་བ་ཡིན། །ཐམས་ཅད་པ་དེ་དེར་འཇུག་འགྱུར། །གང་ལ་ངོ་བོ་མེད་པ་དེ། །དངོས་པོས་ཅི་ཕྱིར་འཛིན་པར་འགྱུར། །དཔེར་ན་མཁའ་འགྲོ་འདོད་དབང་གིས། །ས་ཁུང་བྲེས་པའི་སྙིང་འཛིན་ཅིང་། །གང་མེད་ཆགས་པའི་སྙིང་འཛིན་ཏོ། །ཐམས་ཅད་པ་ཡི་དབང་དེས་ན། །མི་འདྲུལ་དངོས་སྨིན་ལྟ་བ་ཡིན། །དེ་དག་མེར་ནུར་ཕྱོགས་གང་དུ། །དེར་ཞུགས་པ་ཉིད་རྟེན་སྙིང་པའོ། །གནས་མ་ཐག་པ་བཏང་སྙོམས་ལྡན། །དེ་མཚམས་དེས་ནི་གཉིས་སུ་འགྱུར། །འདུ་མཆེད་དྲུག་འདོད་སྐབས་དག་ཏུ། །གང་གི་དུས་ན་དངས་སླ་བས། །ཤིན་ཏུ་ལྟ་བས་གྱུར་པ་ཡིན། །དེ་བཞིན་འདྲིས་དུས་འདྲིལ་བ་དེ། །འདྲེན་པ་ནས་འཇུག་དེས་ལྟ་བའོ། །ལྔ་གང་གང་འདིའི་འབྱུང་བས་བསྐྱེད། །གཅིག་ཏུ་གང་རྟེན་འབྱུང་བ་ཉིད། །དེ་ཉིད་རྟེན་ཞུགས་སྙིང་པོའོ། །ཐ་མ་གཉིས་ལ་དབང་འབྱུང་བསྐྱེད། །ཁམས་བཞིས་རྒྱས་སྲས་སྡུད་སྨིན་འཛིན། །ཡན་ལག་རྣམ་འབྱེད་འབྱིན་པ་ཡིན། །གང་དང་གང་གི་བཞིན་མདོག་འགྱུར། །གནས་ཡིན་བཞིན་ཕྱོགས་མཐུན་ལྟ་གཡོན། །འབྱུང་ཉིད་སྣྲེལ་གཞི་ཕན་ཚུན་གཡས། །གནས་ན་གནས་དུས་བརྒྱད་ཉིད་དེ། །མེར་ནུབ་ལྟར་འཕྲང་ཡན་ལག་འགྱུར། །དེ་ལ་དེ་ཕྱིར་འབྱུང་བ་དང་། །དབང་པོ་དང་ནི་མཚན་དོད་པའོ། །ཡོངས་སུ་རྫོགས་པའི་དུས་དེ་ན། །བདུན་ཕྲག་ས་ཡི་རླུང་འབྱུང་སྟེ། །གང་ནི་ནད་ནི་སྐྱེད་པར་བྱེད། །འབྱུང་བའི་ཆར་གཏོགས་རླུང་འབྱུང་བས། །གཡོ་འགུལ་ཅན་དུ་འགྱུར་བ་སྟེ། །སྲིད་འབྱུང་ལུགས་སུ་དེ་ཉིད་ལྡོག །དེ་དག་དེ་ན་གནས་པའི་ཡུན། །བདུན་ཕྲག་སུམ་ཅུ་རྩ་བརྒྱད་ཀྱི། །ཐམས་ཅད་དེས་ནི་རྫོགས་པ་ཡིན། །གང་གི་རྩ་དྲུག་བཞི་རྫོགས་ནས། །གདོན་མི་ཟ་བར་འབྱུང་བ་ཡིན།།

དེ་ཡི་ཚུལ་ཡང་འབྱུང་བའི་ཕ་དང་གནས་ཀྱི་མ་གཉིས་གཅིག་ལ་གཅིག་འདོད་ཆགས་ཆེན་པོ་ལངས་ཏེ་ཞེན་པ་དྲག་པོ་འབྱུང་ནས་འཁྲིག་པ་སྤྱོད་པའི་དུས་ཀྱི་སྐབས་སུ་སྐད་ཅིག་ཐ་མར་ཕྱིར་འཛག་སྟེ་བར་དོའི་རྣམ་ཤེས་འཛིན་པའི་བཅུད་འབྱུང་ཞིང་འབབ་པར་འགྱུར་པས་ན་ཁུ་བ་སྐ་བ་འབྱུང་བའི་རྗེས་དེ་ནས་དེ་བཞིན་དུ་ཕ་མ་གཉིས་ཀ་ལས་རྩ་གནས་གང་གི་བཅུད་ས་བོན་དཀར་དམར་གྱི་ཐིགས་པའི་ཐིག་ལེ་རེ་རེ་དག་ནི་གདོན་མི་ཟ་བར་འབྱུང་ཞིང་འབབས་པར་འགྱུར་རོ། །དེ་ནས་ཐིག་ལེའི་ཐིགས་པ་དེ་དག་ཉིད་སྐྱེ་གནས་གང་དེར་འདྲེས་པར་གྱུར་ནས་དཔེར་ན་གང་འོ་མ་བསྐོལ་བའི་དྲོད་ཀྱི་གྲང་བའི་ཞམས་ལ་སྤྲིས་མ་སྟེང་དུ་འོང་བ་བཞིན་དུ་བདུན་ཕྲག་དང་པོ་ལ་རླུང་ཀུན་སྡུད་ཀྱིས་འདུ་བར་བྱེད་པ་ཡིན་པས་དཔེར་ན་ཞོ་རིམ་པར་འཆགས་པ་ལྟ་བུའོ། །དེ་ལྟར་ས་བོན་གྱི་ཤེས་པ་ལས་ཐམས་ཅད་དང་ལྡན་པ་ཡི་བར་མ་དེ་ནི་མངལ་དེར་འཇུག་པར་འགྱུར་པ་ནི་དུས་དེ་ཉིད་དུ་ཡིན་པས་དེ་ནས་བཟུང་ཉིང་མཚམས་སྦྱོར་བ་ཞེས་བྱ་སྟེ། བདུན་ཕྲག་དང་པོའི་མགོར་ཟིན་པ་ཡིན་ནོ། །དེ་ལ་གཏར་ཀ་གེགས་སེལ་གྱི་ཚུལ་དུ། འོ་ན་བར་མ་དོའི་ཤེས་པ་གང་ལ་དངོས་པོའི་ངོ་བོ་ཐོགས་པ་ཅན་དུ་མེད་པ་དེ་ཉིད་གདོས་པ་ཅན་གྱི་ས་བོན་གྱི་དངོས་པོས་ཅི་ཡི་ཕྱིར་འཛིན་པར་འགྱུར་ཏེ་མི་རིགས་སོ་ཞེས་དྲིས་ནས་རྩོད་པར་བྱེད་ན། དེ་ཡི་ལན་ཉིད་དཔེའི་སྒོ་ནས་གསལ་བར་བསྟན་པའི་ཕྱིར། དཔེར་ན་ནམ་མཁའ་ལ་འགྲོ་བའི་བྱ་ཡང་རང་གི་འདོད་པའི་དབང་གིས་བྱ་བ་ཤོར་བར་བྱེད་པའི་བྱ་མཁན་གྱིས་ས་ཁུང་དུ་བྲུས་པའམ་བྲེས་ནས་བྱ་གཟུང་བའི་ཆེད་དུ་བཙུགས་པའི་སྙིས་འཛིན་པར་བྱེད་པ་ཇི་ལྟ་བ་བཞིན་དུ། གང་དངོས་པོ་མེད་པའི་ཤེས་པ་ཡང་རང་གི་ཆགས་པའི་དབང་གིས་ས་བོན་གདོས་པ་ཅན་གྱི་སྙིས་འཛིན་པ་ནི་དེ་ལྟར་འཐད་པའི་དོན་ཏོ།།

དེའང་སྔ་མ་ལས། རྣམ་པར་ཤེས་པ་ས་བོན་ཐམས་ཅད་པ་དེ་ཡང་ཡོངས་སུ་མྱ་ངན་ལས་འདའ་བའི་ཆོས་ཅན་དག་གི་ས་བོན་ཡོངས་སུ་ཚང་བ་ཡིན་ནོ། །ཡོངས་སུ་མྱ་ངན་ལས་འདའ་བའི་ཆོས་ཅན་མ་ཡིན་པ་༼༡༨༣༽དག་གི་ནི་བྱང་ཆུབ་རྣམ་པ་གསུམ་གྱི་ས་བོན་མེད་པ་ཡིན་ནོ། །ཞེས་གསུངས་པ་ལྟ་བུའི་ཁྱད་པར་ཡོད་ཀྱང༌། མདོར་ན་གང་ཡིན་ནའང༌། དེ་ཉིད་ལས། ལུས་མངོན་པར་འགྲུབ་པ་གང་ཅི་ཡང་རུང་སྟེ་དེ་ཐམས་ཅད་ནི་ས་བོན་ཐམས་ཅད་དང་ལྡན་པ་ཡིན་པར་རིག་པར་བྱ་སྟེ། ཞེས་གསུངས་པ་ལྟར། མངལ་དེ་མི་འདྲུལ་བར་བརྟས་པར་བྱེད་པའི་སྙིང་པོ་བར་མ་དོའི་ཤེས་པ་ས་བོན་ཐམས་ཅད་པ་ཡི་དབང་དེས་བྱས་པ་ཡིན་པས་ན་ཕ་མའི་ས་བོན་དེ་ཉིད་མི་འདྲུལ་ཞིང་སེམས་ཅན་གྱི་དངོས་པོར་སྨིན་ཏེ་ཇེ་ཆེ་ཇེ་བརྟན་དུ་བརྟས་པར་འགྱུར་བ་ཉིད་དཔེ་ཆུང་རང་གནས་ལས་བཤད་པ་བཞིན་ཡིན་པས་འབྱུང་བ་བཞིའི་ཁམས་ཡང་ཚང་སྟེ་སྐྱེད་སྡུད་སྨིན་ཅིང་ཡན་ལག་རྣམ་པར་འབྱེད་པའོ། །དེར་ཡང་ས་བོན་དེ་དག་གི་མེར་མེར་པོ་དང་ནུར་ནུར་པོར་གནས་པའི་ཕྱོགས་ཀྱི་ངོ་བོ་གང་དུ་བར་མ་དོའི་ཤེས་པ་དེ་ཞུགས་པ་ཉིད་ནི་ས་བོན་གྱི་སྙིང་པོ་དང་ཤེས་པའི་རྟེན་ཡིན་པས་ལས་དང་མཐུན་པར་མིང་དང་གཟུགས་སུ་གནས་པའོ། །དེར་ཡང་མ་ཟད་སྔ་མ་ལས་མེར་མེེར་པོའི་ཕྱོགས་གང་དུ་རྣམ་པར་ཤེས་པ་ཞུགས་པར་གྱུར་པ་དེ་ནི་དེའི་ཚེ་དེའི་སྙིང་གི་ཕྱོགས་ཡིན་ནོ། །ཞེས་འབྱུང་བར་ཡང་ཤེས་དགོས་སོ། །དེ་ཡང་ལས་ཀྱི་རླུང་སུམ་ཅུ་རྩ་བརྒྱད་ཞག་བདུན་ཕྲག་སུམ་ཅུ་རྩ་བརྒྱད་ལ་འབྱུང་བས་ལུས་རྫོགས་པར་འགྱུར་བ་ཡང་འདིར་འཁྲུགས་མར་བརྗོད་དེ། མའི་མངལ་དུ་གནས་མ་ཐག་པར་གྱུར་པ་དེའི་དུས་སུ་ཚོར་བ་བཏང་སྙོམས་དང་ལྡན་ཏེ་བདུན་ཕྲག་དང་པོའོ། །དེ་ཉིད་རྫོགས་པའི་མཚམས་དེ་ནས་རྒྱུ་དེས་བརྟེན་ནས་བདུན་ཕྲག་གཉིས་པ་ལ་ནི་ཚོར་བ་བདེ་སྡུག་གཉིས་སུ་ཡང་མྱོང་བར་འགྱུར་རོ། །དེ་ཡང་མངལ་དུ་གནས་པའི་སྐབས་ཀྱི་ཚོར་བ་བཏང་སྙོམས་དེ་ནི་ཀུན་གཞི་རྣམ་པར་ཤེས་པ་དང་མཚུངས་ལྡན་ཡིན་ལ། བདེ་བ་དང་སྡུག་བསྔལ་ནི་ཆེད་འགའ་རྐྱེན་མངོན་དུ་གྱུར་ན་འབྱུང་ལ། ཆེད་འགའ་མི་འབྱུང་བ་ཡིན་པར། སའི་དངོས་གཞི་ལས། མངལ་དུ་གནས་པ་ལ་ནི་རང་བཞིན་གྱིས་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ལ་གནས་པའི་རྣམ་པར་ཤེས་པ་སྐྱེ་བར་འགྱུར་ཏེ། དེའི་ཚོར་བ་དེ་ནི་རྣམ་པར་སྨིན་པས་བསྡུས་པ་ཡིན་ནོ། །དེ་ལས་གཞན་པའི་ཚོར་བ་ཐམས་ཅད་ནི་རྣམ་པར་སྨིན་པ་ལས་བྱུང་བའམ་ཡུལ་གྱི་རྐྱེན་ལས་གྱུར་པ་ཡིན་ནོ། །ཞེས་སོ།།

བདུན་ཕྲག་བརྒྱད་པ་ལ། ལས་ཀྱི་རླུང་རྣམ་པར་འབྱེད་པ་ཞེས་བྱ་བས་ཉེར་སྤྱོད་ཀྱི་འདུ་མཆེད་འབྱུང་བའི་སྐྱེ་མཆེད་དྲུག་གི་དབང་པོའི་སྒོ་དང་བུ་ག་དགུ་དོད་པའི་གནས་སྐབས་དག་ཏུ་འགྱུར་བར་བྱེད་དོ། །ཞག་བདུན་ཕྲག་དང་པོ་གང་གི་དུས་ཀྱི་ཚེ་ན་ས་བོན་གྱི་དྭངས་མ་ཤིན་ཏུ་སླ་བ་དེ་ཉིད་ལས་ཀྱི་རླུང་ཀུན་ཏུ་སྡུད་པ་ཞེས་བྱ་བས་ཕོ་མོ་གར་འབྱུང་གི་མའི་རྩིབས་ལོགས་གཡས་གཡོན་དུ་བུས་ནས་ཤིན་ཏུ་བརྟས་པར་འགྱུར་ཏེ་ཅུང་ཟད་སྲ་བར་བྱེད་པ་ཡིན་ནོ། །དེ་ནས་བདུན་ཕྲག་གཉིས་པ་ལའང༌། ལས་ཀྱི་རླུང་མཛོད་ཅེས་བྱ་བས་སྔ་མ་དེ་བཞིན་དུ་དེ་ལས་ཅུང་ཟད་སྲ་བར་གྱུར་ཀྱང་ཤར་མ་གྱུར་པས་འདྲིལ་བར་གནས་པའི་དུས་དེར་དབྱིབས་ཟླུམ་པོར་འདྲིལ་བར་བྱེད་པ་ཉིད་དེ། རླུང་མཛོད་ལྡན་ནམ་མཛོད་མར་ཡང་གསུངས་སོ། །དགའ་བོ་མངལ་འཇུག་གི་མདོ་ལས་རླུང་མཛོད་ཀ་འདི་ཉིད་གསུམ་པར་བཤད་པ་སོགས་ཅུང་ཟད་འདྲ་མིན་ཡོད་ཀྱང་འདིར་རང་གཞུང་ཁོ་ན་ལྟར་རོ། །དེ་ནས་བདུན་ཕྲག་གསུམ་པ་ལ་ལས་ཀྱི་རླུང་བཀྲེས་པ་དང་སྐོམ་པར་འབྱེད་པའམ་རབ་ཏུ་འབྱེད་པ་ཞེས་བྱ་བས་མ་ཡིས་ཟོས་པའི་ཟས་ཀྱི་བཅུད་རྣམས་བུ་ཡིས་འདྲེན་པའི་སྒོ་ལྟེ་བ་ནས་ནུས་པ་འཇུག་སྟེ་བཅུད་འཛིན་པས་ལུས་དེ་ཉིད་བརྟས་པར་བྱེད་པའོ།།

ཞག་བདུན་ཕྲག་བཞི་པ་ལ་ལས་ཀྱི་རླུང་ཡང་དག་པར་སྡུད་པ་ཞེས་བྱ་བས་ཡན་ལག་གི་རྩ་བ་ལྔ་པོ་གང་ཡིན་པ་གང་གིས་སྐྱེད་ན་ལུས་འདིའི་འབྱུང་བ་བཞི་དང་ནམ་མཁའི་ཁམས་ཀྱིས་གོ་འབྱེད་པས་བསྐྱེད་པ་ཉིད་དེ། རྐང་པའི་རྩ་གཉིས་དང་ལག་པའི་རྩ་གཉིས་དང་སྐེའི་རྩ་དང་ལྔའོ། །དེ་ལྟར་ཡང་གནས་གཅིག་ཏུ་གང་རྟེན་པའི་ས་བོན་གྱི་འབྱུང་བ་དཀར་དམར་གཉིས་པོ་ཉིད་ནི་རྣམ་ཤེས་ཀྱི་གནས་ཏེ། དེ་ཉིད་ཀྱི་རྟེན་དུ་ཤེས་པ་ཞུགས་པ་ནི་ཁོང་ན་གནས་པའི་རྒྱུའི་དོན་དང༌། ཕྱིས་འབྲས་བུ་འབྱུང་བའི་དོན་གྱིས་སྙིང་པོ་ཉིད་དུ་གྱུར་པས་ལུས་ཅན་ནམ་སེམས་ཅན་དུ་སྣང་བའི་མིའི་ལུས་སེམས་སུ་སྨིན་པར་འགྱུར་བའོ། །དེ་བས་ན་མཐར་རྫོགས་པའམ་ཐ་མ་རང་ཉིད་སྨིན་པར་ནུས་པའི་ས་བོན་གཉིས་ལ་དབང་བྱེད་པའི་འབྱུང་བ་བཞི་དང་ལས་ཀྱི་རླུང་རྣམས་ནི་ས་བོན་དེ་ཉིད་ལ་བརྟེན་ནས་སྐྱེ་བ་ཡིན་ནོ། །དེའང་རྐྱེན་འབྱུང་བ་བཞིའི་ཁམས་བཞིས་ལས་ཀྱི་རླུང་གིས་རྒྱས་པར་བྱེད་པ་དང་ས་ཡིས་སྲ་བར་བྱེད་པ་དང་ཆུ་ཡིས་སྡུད་པར་བྱེད་པ་དང་མེ་ཡིས་སྨིན་པར་བྱེད་དེ་ལུས་འཛིན་པ་ཡིན་པས་ཁམས་དེ་དག་ཆ་མ་སྙོམས་ན་སྐྱོན་བཞི་ཡི་དབང་གིས་ལུས་མི་འགྲུབ་ལ། ཆ་སྙོམས་ན་༼༡༨༥༽ལུས་སུ་འགྲུབ་པར་བྱེད་པའོ། །དེ་ལྟར་འབྱུང་བ་ཆ་སྙོམས་པར་གྱུར་པ་ན་ལས་ཀྱི་རླུང་བདུན་ཕྲག་ལྔ་པ་ལ་འབྱུང་བ་ནི་རླུང་ཟས་ཞེས་བྱ་བ་ཡིན་པས་རླུང་དེ་ཡིས་སྔར་གྱི་ཡན་ལག་ལྔའི་འཕྲོ་མགོ་དང་དཔུང་པ་གཉིས་དང་བརླ་གཉིས་རྣམས་སྐྱེད་ཅིང་འབྱུང་བར་བྱེད་དོ།།

ཞག་བདུན་ཕྲག་དྲུག་པ་ལ་ལས་ཀྱི་རླུང་འཁྱིལ་བྱེད་ཅེས་བྱ་བས་ཡན་ལག་ལྔ་པོ་རྣམས་རྫོགས་པར་རྣམ་པར་འབྱེད་དེ་སྐྱེད་པར་བྱེད་དོ། །དེ་ནས་བདུན་ཕྲག་བདུན་པ་ལ་རླུག་ཟློག་སྒྱུར་བྱེད་པ་ཞེས་བྱ་བས་སོར་མོ་དང་བཅས་པ་ཡོངས་སུ་རྫོགས་པར་འབྱིན་པར་བྱེད་པ་ཡིན་ནོ། །དེར་ཡང་མངལ་ན་གནས་པ་དེ་ཡིས་སྔོན་དེ་ལྟ་བུར་འགྱུར་བའི་ལས་དགེ་སྡིག་བྱས་པ་གང་གི་དབང་དང༌། རྐྱེན་མ་ཡི་ཁ་ཟས་གཉིས་དང་སྤྱོད་ལམ་གྱི་དབང་གང་གིས་སེམས་ཅན་དེ་ཉིད་བྱད་བཞིན་ལེགས་ཉེས་དང་མདོག་ཀྱང་སྡུག་མི་སྡུག་ཏུ་འགྱུར་ཏེ། རང་གིས་སྔོན་ལས་ཀྱི་རྒྱུ་ནི་ཀུན་ལ་མཚུངས་ཤིང༌། ད་ལྟར་གྱི་རྐྱེན་ནི། མ་བརྒྱུག་པ་དང༌། འཕར་བ་དང༌། མཆོངས་པ་ལ་སོགས་པའི་སྤྱོད་ལམ་དྲག་པོ་བྱེད་དེ་ཡ་ང་བ་མ་སྤངས་པ་དེས་ན་དེའི་ལུས་མི་སྡུག་པའམ་དབང་པོ་མ་ཚང་བར་འགྱུར་ལ་གཞན་སྤྱོད་ལམ་དལ་བ་སོགས་ཀྱིས་ལུས་ལེགས་པར་འགྱུར་རོ། །དེ་བཞིན་དུ་འཁྲིག་པའི་ཆོས་ཧ་ཅང་བསྟེན་དྲག་པས་རྔོ་ཅན་དུ་འགྱུར་བ་སོགས་སོ། །མས་ལན་ཚའི་རོ་ལྟ་བུའི་ཁ་ཟས་དང༌། འགྱུར་བྱེད་དང་སྐོམ་ཕལ་ཆེར་བསྟེན་པས་དེའི་བ་སྤུ་དང་སྐྲ་ངན་པ་སོགས་སུ་འགྱུར་རོ། །ཡང་ཉི་མ་ལ་སོགས་པ་ཤིན་ཏུ་ཚ་བ་བསྟེན་པས་དེའི་མདོག་གནག་པ་དང་སྔོ་བསངས་སུ་འགྱུར་ལ། ཁྱིམ་གྱི་ནང་ན་ཧ་ཅང་གྲང་བ་ལ་འདུག་པ་དེས་ནི་དེའི་མདོག་དཀར་བར་འགྱུར་ཞིང༌། ཁ་ཟས་ཧ་ཅང་ལྕི་བའམ་ཚ་བ་ཟོས་པ་དེས་ནི་མདོག་མར་པོ་འགྱུར་བ་ལ་སོགས་པའོ།།

གལ་ཏེ་གནས་པ་མོ་ཞིག་ཡིན་ན་ནི་མའི་བཞིན་ཕྱོགས་དང་མཐུན་པ་ལྟར་མདུན་དུ་བལྟས་ཏེ་སྒལ་ཚིགས་ལ་རྒྱབ་བསྟན་ནས་གློ་གཡོན་རོལ་གྱི་ཕྱོགས་ན་འདུག་གོ །གལ་ཏེ་འབྱུང་བ་ཉིད་དུ་འགྱུར་བའི་ཁྱེའུ་ཞིག་ཡིན་ན་འདུག་ཕྱོགས་སྣྲེལ་ཞི་ཞེས་བྱ་བ་ཕན་ཚུན་བསྣོལ་མ་ལྟར་བྱས་ནས་མའི་ལྟོ་ལོགས་སུ་རྒྱབ་བསྟན་པ་སྒལ་ཚིགས་ཕྱོགས་སུ་ཁ་བལྟས་ཏེ་གློ་གཡས་རོལ་གྱི་ཕྱོགས་ན་འདུག་སྟེ་ཕྱིའི་ཕོ་མོ་ཆགས་པ་སྤྱོད་པའི་ཚུལ་དང་མཐུན་པའོ། །དེ་ཡང་མའི་མངལ་དུ་ཡུན་ཅི་ཙམ་གནས་ན་སྤྱིར་ཟླ་བ་བརྒྱད་ཀྱིས་༼༡༨༦༽རྫོགས་ཀྱང་ཤིན་ཏུ་ཡོངས་སུ་རྫོགས་པ་ལ་ནི་ཟླ་བ་དགུའམ་དགུ་ལས་འདས་པའི་བར་དུ་ཐོགས་ཏེ། བཅོམ་ལྡན་འདས་ཀྱི་མངལ་དུ་འཇུག་པའི་མདོ་ལས་བཀའ་སྩལ་པ། དེ་ནི་ཟླ་བ་དགུའམ་དེ་ལས་འདས་ན་ཤིན་ཏུ་རྫོགས་པར་འགྱུར་རོ། །ཟླ་བ་བརྒྱད་ཀྱིས་ནི་རྫོགས་པ་ཡིན་མོད་ཀྱི་ཤིན་ཏུ་རྫོགས་པ་མ་ཡིན་ནོ། །ཟླ་བ་དྲུག་གམ་བདུན་གྱིས་རྫོགས་པར་མི་འགྱུར་ཏེ་ཡན་ལག་མ་ཚང་བར་ཡང་འགྱུར་རོ། །ཞེས་ཇི་སྐད་གསུངས་པ་ལྟ་བུ་སྟེ། དེར་ཡང་གནས་པའི་དུས་སམ་སྐབས་ནི་བརྒྱད་ཉིད་ཡོད་དེ། སའི་དངོས་གཞི་ལས། མངལ་ན་གནས་པ་དེ་ལ་ཡང་དུས་རྣམ་པ་བརྒྱད་ཡོད་དེ། དུས་རྣམ་པ་བརྒྱད་པོ་གང་ཞེ་ན། མེར་མེར་པོའི་དུས་དང༌། ནུར་ནུར་པོའི་དུས་དང༌། ལྟར་ལྟར་པོའི་དུས་དང༌། མཁྲང་འགྱུར་གྱི་དུས་དང༌། རྐང་ལག་འགྱུས་པའི་དུས་དང༌། སྐྲ་དང་བ་སྤུ་དང་སེན་མོ་འབྱུང་བའི་དུས་དང༌། དབང་པོ་དོད་པའི་དུས་དང༌། མཚན་མ་དོད་པའི་དུས་སོ། །ཞེས་གསུངས་པ་ལྟར། བདུན་ཕྲག་དང་པོ་ལ་མེར་མེར་པོ་དང༌། གཉིས་པ་ལ་ནུར་ནུར་པོ་དང༌། གསུམ་པ་ལ་ལྟར་ལྟར་པོ་དང༌། བདུན་ཕྲག་བཞི་པ་ལ་རླུང་རབ་ཏུ་འབྱེད་པས་མཁྲང་འགྱུར་ཏེ་མཆིག་གུ་ལྟ་བུའོ། །བདུན་ཕྲག་ལྔ་པ་ལ་ཡན་ལག་གི་རྩ་བ་ལྔར་འགྱུ་བའམ་འགྱུར་ཏེ་བཤད་པ་བཞིན་ནོ། །བདུན་ཕྲག་དྲུག་པ་དེ་ལ་ལྔ་པ་དེ་ཡི་ཕྱིར་རམ་རྗེས་ཀྱི་རླུང་གིས་ཡན་ལག་གི་འཕྲོ་རྣམས་ཕྱིར་རྫོགས་པར་སྐྱེད་དོ། །བདུན་ཕྲག་བདུན་པ་ལ་ཉིང་ལག་རྣམས་ཀྱང་རྫོགས་པར་འབྱུང་བ་དང༌། དེ་རྣམས་གོང་དུ་བཤད་པ་ལྟར་རྫོགས་ནས། དེ་ནས་བདུན་ཕྲག་བརྒྱད་པ་ལ་མིག་སོགས་དབང་པོ་དང་ནི་ཕོ་མོ་གང་ཡིན་པའི་མཚན་མ་ལ་སོགས་པ་བུ་ག་དགུ་རྣམས་དོད་པའོ།།

དེ་ལྟར་དུས་ཀྱི་རྣམ་པ་བརྒྱད་ཡོངས་སུ་རྫོགས་པར་གྱུར་པའི་དུས་དེ་ཉིད་ཀྱི་སྐབས་ན། བདུན་ཕྲག་དགུ་པ་ལ་སོགས་པ་ཡི་ལས་ཀྱི་རླུང་རྣམས་རིམ་པར་འབྱུང་བ་སྟེ། བདུན་ཕྲག་དགུ་པ་ལ་རླུང་སྲ་བར་བྱེད་པས་ལུས་བུས་ནས་རྐྱལ་པ་ལྟ་བུར་གྱུར་ཏེ་སྲ་བར་ཡང་བྱེད་དོ། །བདུན་ཕྲག་བཅུ་པ་ལ་ལས་ཀྱི་རླུང་རྡོ་རྗེ་ཞེས་བྱ་བས་བུ་ག་དགུ་སྦྱངས་ནས་ཁ་སྣ་ནས་ཁྲག་དང་ཆུ་སེར་ལ་སོགས་པ་ཕྱུངས་ཏེ་སྔ་མ་ལས་དབང་པོ་རྣམས་དོད་པར་བྱེད་དོ། །བདུན་ཕྲག་བཅུ་གཅིག་པ་ལ་རླུང་ཡོན་པོ་སྒོ་ཞེས་བྱ་བའམ། སྨན་ཡོན་པོ་ཞེས་བྱ་བས་ནང་གྲོལ་རྣམས་སྐྱེད་དོ། །བདུན་ཕྲག་བཅུ་གཉིས་པ་ལ་༼༡༨༧༽ལས་ཀྱི་རླུང་ཞོར་ལ་འབྱུང་བའམ་སྤུ་རྒྱུས་པ་ཞེས་བྱ་བས་རུས་བགོ་སུམ་བརྒྱ་སྐྱེད་ཅིང་འབྱོར་བ་གང་གི་འདུ་བ་རྣམ་བཞིའི་ནད་རྣམས་ནི་སྐྱེད་པར་བྱེད་པའོ། །བདུན་ཕྲག་བཅུ་གསུམ་པ་ལ་འབྱུང་བའི་ཆར་གཏོགས་པའི་རླུང་བཀྲེས་སྐོམ་བྱེད་པ་ཞེས་བྱ་བ་འབྱུང་བས་རུས་པ་རྣམས་སྲ་ཞིང་ནད་སྐྱེད་པ་བཤད་པ་བཞིན་ནོ། །བདུན་ཕྲག་བཅུ་བཞི་པ་ལ་ལས་ཀྱི་རླུང་སྐུད་པའི་སྒོ་ཞེས་བྱ་བས་ལུས་ལ་ཆུ་རྒྱུས་གཡོགས་པར་བྱེད་དེ་སྤྱིལ་པོ་ལྟ་བུའོ། །བཅོ་ལྔ་པ་ལས་ཀྱི་རླུང་དམ་ཟིན་ནམ་པདྨ་ཞེས་བྱ་བས་རྩ་ཆེན་པོ་ཉི་ཤུ་ལས་རྩ་བྲན་རྣམས་རྒྱས་པར་བྱེད་དོ། །བཅུ་དྲུག་པ་ལ་ལས་ཀྱི་རླུང་བདུད་རྩི་ཞེས་བྱ་བས་སྙིང་དང་མིད་པའི་སྒོ་འབྱེད་པར་བྱེད་དོ། །བཅུ་བདུན་པ་ལ་རླུང་འབྲི་གཏིང་ཞེས་བྱ་བས་དབང་པོ་རྣམས་དྭངས་པར་བྱེད་དོ། །བཅོ་བརྒྱད་པ་ལ་རླུང་བརྟན་འགྱུར་ཞེས་བྱ་བས་སྔོན་གྱི་ལས་བཞིན་དུ་ལེགས་ཉེས་ཆེ་ཆུང་དུ་བྱེད་དེ་དབང་པོ་ནུས་མཐུ་དང་ལྡན་པར་བྱེད་དོ། །བཅུ་དགུ་པ་ལ་རླུང་ལས་བྱེད་ཅེས་བྱ་བས་སྲོག་དང་ཡིད་དང་ལུས་ཀྱི་དབང་པོ་གསུམ་རྫོགས་པར་བྱེད་དོ། །ཉི་ཤུ་པ་ལ་རླུང་ཤིན་ཏུ་སྲ་བའམ་སྲ་བྱེད་ཅེས་བྱ་བས་རུས་པ་རྣམས་བརྟན་པར་བྱེད་དོ། །ཉེར་གཅིག་པ་རླུང་ཡང་དག་པར་སྐྱེད་པས་ཤ་རྣམས་བསྐྱེད་དེ་དཔེར་ན་འཇིམ་པའི་སྐུའི་ཞལ་ཞལ་བཞིན་ནོ། །ཉེར་གཉིས་པ་ལ་རླུང་ཀུན་ཏུ་རྒྱལ་བ་ཞེས་བྱ་བས་ཁྲག་རྣམས་སྐྱེད་པར་བྱེད་དོ། །ཉེར་གསུམ་པ་ལ་རླུང་ཡོངས་དག་འཛིན་ཞེས་བྱ་བས་པགས་པ་གཡོགས་པར་བྱེད་དོ། །ཉེར་བཞི་པ་ལ་རླུང་སྤྲིན་འཛིན་ཞེས་བྱ་བས་པགས་པ་དེ་ཉིད་ཁ་དོག་དང་ལྡན་པར་བྱེད་དོ། །ཉེར་ལྔ་པ་ལ་རླུང་གྲོང་ཁྱེར་འཛིན་ཞེས་བྱ་བས་ཁྲག་རྣམས་དྭངས་པར་བྱེད་དོ། །ཉེར་དྲུག་པ་ལ་ལས་ཀྱི་རླུང་སྐྱེ་བ་མངོན་དུ་གྲུབ་པར་བྱེད་པ་ཞེས་བྱ་བས་བ་སྤུ་དང་ཆུ་རྒྱུས་དང་སེན་མོ་རྣམས་འབྲེལ་བར་བྱེད་དོ། །ཉེར་བདུན་པ་ལ་རླུང་ཕན་ཡོན་ཆེན་པོ་ཞེས་བྱ་བས་སྔོན་གྱི་ལས་ལྟར་བཞིན་ལེགས་ཉེས་དང་ལུས་བོང་ཆེ་ཆུང་དུ་བྱེད་དོ། །ཉེར་བརྒྱད་པ་ལ་རླུང་རྟོག་པ་ཞེས་བྱ་བས་ཕྱིན་ཅི་ལོག་གི་འདུ་ཤེས་བརྒྱད་བསྐྱེད་པར་བྱེད་དོ། །དགའ་བོ་མངལ་དུ་འཇུག་པའི་མདོ་ལས།

བརྒྱད་གང་ཞེ་ན། འདི་ལྟ་སྟེ། ཁྱིམ་གྱི་འདུ་ཤེས་དང༌། བཞོན་པའི་འདུ་ཤེས་དང༌། ཀུན་དགའ་ར་བའི་འདུ་ཤེས་དང༌། ཁང་པ་བརྩེགས་པའི་འདུ་ཤེས་དང༌། སྐྱེད་མོས་ཚལ་གྱི་འདུ་ཤེས་དང༌། ཁྲི་ལ་འདུག་པའི་འདུ་ཤེས་དང༌། ༼༡༨༨༽ཆུ་བོའི་འདུ་ཤེས་དང༌། རྫིང་གི་འདུ་ཤེས་ཏེ་ཡང་དག་པར་འདི་དག་ཡོད་པ་མ་ཡིན་ཡང་ཡང་དག་པ་མ་ཡིན་པའི་རྣམ་པར་རྟོག་པ་སྐྱེད་པར་བྱེད་དོ། །ཞེས་སོ། །ཉེར་དགུ་པ་ལ་རླུང་མེ་ཏོག་ཕྲེང་ཞེས་བྱ་བས་ལུས་ཀྱི་ཁ་དོག་སོ་སོར་བསྒྱུར་རོ། །སུམ་ཅུ་པ་ལ་རླུང་ལྕགས་སྒོ་ཞེས་བྱ་བའམ་ལྕགས་སྒྲོག་སྡུད་མས་སྤུ་དང་སེན་མོ་རྒྱས་པར་བྱེད་དོ། །སོ་གཅིག་པ་ནས་སོ་ལྔ་པའི་བར་བདུན་ཕྲག་ལྔ་ལ་ལས་ཀྱི་རླུང་ཡངས་པར་བྱེད་པ་ཞེས་བྱ་བའི་མིང་ཅན་གྱིས་མཚན་མ་རིལ་འཕེལ་ཞིང་རྒྱས་པར་བྱེད་དོ། །བདུན་ཕྲག་སོ་དྲུག་པ་ལ་ལས་ཀྱི་རླུང་གཡོ་བར་བྱེད་པ་ཞེས་བྱ་བས་ཕྱི་རོལ་དུ་འབྱུང་བའི་སེམས་སྐྱེད་དེ་གཡོ་འགུལ་ཅན་དུ་འགྱུར་བ་སྟེ། མས་ཀྱང་ཤས་ཆེར་མི་བཟོད་པ་འབྱུང་ངོ་། །བདུན་ཕྲག་སོ་བདུན་པ་ལ་རླུང་ལྡང་བའམ་དྭངས་པ་ཞེས་བྱ་བས་སྐྱེ་བའི་འདུ་ཤེས་ལྔ་བསྐྱེད་པས་ཕྱིར་འབྱུང་བ་ལ་དགའོ། །དེ་ནས་བདུན་ཕྲག་སུམ་ཅུ་བརྒྱད་པ་ལ་ལས་ཀྱི་རླུང་ཐོགས་པ་མེད་པ་ཞེས་བྱ་བས་རྟེན་འབྲེལ་བཅུ་གཉིས་ཀྱི་སྲིད་པ་ལས་མངལ་ནས་འབྱུང་བའི་ལུགས་སུ་སྐྱེ་བས་ལུས་དེ་ཉིད་ཇི་བཞིན་དུ་མགོ་མཇུག་བཟློག་སྟེ་མགོ་ཐུར་དུ་སྟོན་ཏེ་སྐྱེ་བར་བྱེད་དོ། །ཡང་ན་གོང་གི་བདུན་ཕྲག་བཅུ་གསུམ་པའི་རླུང་དེ་བདུན་ཕྲག་སོ་དྲུག་པ་ལ་མར་སྦྱར་ཏེ། སའི་དངོས་གཞིར་གསུངས་པ་ལྟར་དེར་སྐྱེ་བ་འབྱུང་བའི་ཆར་གཏོགས་པའི་རླུང་དག་འབྱུང་བས་དེས་དེ་ལ་གནོད་པ་སྐྱེད་དེ་གཡོ་འགུལ་ཅན་དུ་འགྱུར་བ་སྟོན་པའི་ལུགས་ཞིག་ཀྱང་འདུག་གོ །དེ་ལྟར་རླུང་རྣམས་ཀྱི་རྒྱུད་དུ་མ་ཚང་བ་རྣམས་ནི་འགྲེལ་གྱིས་ཁ་བསྐང་བར་མཛད་པའོ། །འདི་ལ་ཆོས་རྗེ་དམ་པ་རིན་པོ་ཆེའི་ཕྱག་མཆན་ལས། སྔོན་ལ་བྲང་ཐད་དུ་འབྲུ་མནན་ཏེ། དེ་ནས་རྟིང་ལ་འཁྲུགས་སྡེབ་བོ། །ཞེས་གསུངས་པས་འདིར་ཡང་འཁྲུགས་ཏེ་ཡོད་པ་རྣམས་ཅུང་ཟད་བསྡེབ་ན། བདུན་ཕྲག་དང་པོ་ལ་རླུང་ཀུན་ཏུ་སྡུད་པས་ས་བོན་གཉིས་གཅིག་ཏུ་འདུ་བར་བྱས་ཏེ་ཕོ་མོ་གར་འབྱུང་གི་མའི་རྩིབས་ལོགས་གཡས་གཡོན་དུ་བུས་ནས་ཤིན་ཏུ་ཞེས་དབྱེར་མེད་ལྟ་བུར་བརྟས་ཏེ་ཅུང་ཟད་སྲ་བར་བྱས་པས། དེ་ལ་སྤྲིས་མ་ལྟ་བུས་གཡོགས་ལ་ནང་སླན་ཏེ་འདུག་པ་ནི་མེར་མེར་པོའི་དུས་ཡིན་ཏེ་ཚོར་བ་བཏང་སྙོམས་དང་ལྡན་པའོ། །དེ་ནས་བདུན་ཕྲག་གཉིས་པ་ལ་མཛོད་ཅེས་བྱ་བའི་རླུང་གིས་དེ་ལས་ཀྱང་ཅུང་ཟད་སྲ་བར་བྱས་ཏེ་ཕྱི་ནང་མེད་པར་འདྲིལ་བར་གནས་ཤིང་དབྱིབས་ཟླུམ་པོར་བྱེད་དེ། ཕྱི་ནང་བཅས་པར་སྤྲིས་མ་ལྟ་བུར་གྱུར་ཏེ། ཞོ་ལྟ་༼༡༨༩༽བུར་འདུག་ལ་ཤར་མ་གྱུར་པ་ནི་ནུར་ནུར་པོའི་དུས་ཡིན་པས་དེར་ཚོར་བ་བདེ་སྡུག་གཉིས་ཀྱང་མྱོང་བ་ཡོད་དོ། །དེ་ནས་བདུན་ཕྲག་གསུམ་པ་ལ་རླུང་བཀྲེས་པ་དང་སྐོམ་པར་འབྱེད་པའམ་རབ་ཏུ་འབྱེད་པས་མ་ཡིས་ཟོས་པའི་ཟས་ཀྱི་བཅུད་རྣམས་ལྟེ་བ་ནས་འཇུག་པས་ལུས་བརྟས་པར་བྱེད་དེ་ཤར་ནི་གྱུར་ལ་སླ་བ་ཡིན་པས་ལྟར་ལྟར་པོ་ཞེས་བྱའོ། །དེ་ནས་བདུན་ཕྲག་བཞི་པ་ལ་རླུང་ཡང་དག་པར་སྡུད་པས་ཡན་ལག་གི་རྩ་བ་ལྔ་པོ་འབྱུང་བའི་ཁམས་ཀྱིས་སྐྱེད་ཀྱང་འབུར་བའི་རྣམ་པར་མི་མངོན་པས་མཆིག་གུ་ལྟ་བུ་སྟེ་དེར་ནི་སྐ་བར་གྱུར་ཏེ་མནན་དུ་བཟོད་པས་ན་མཁྲང་འགྱུར་ཞེས་བྱའོ། །དེ་ནས་བདུན་ཕྲག་ལྔ་པ་ལ་ལས་ཀྱི་རླུང་ཟས་ཞེས་བྱ་བས་ཡན་ལག་ལྔའི་འཕྲོ་རྣམས་སྐྱེད་པས་དེ་ཉིད་ལས་ཤ་ལྷག་ལྟ་བུར་གྱུར་ཏེ་ཡན་ལག་དང་ཉིང་ལག་གི་མཚན་མ་འབྱུང་བ་ནི་རྐང་ལག་འགྱུས་པའི་དུས་ཡིན་ནོ། །དེ་ནས་བདུན་ཕྲག་དྲུག་པ་ལ་རླུང་འཁྱིལ་བྱེད་ཀྱིས་ཡན་ལག་ལྔ་པོ་རྫོགས་པར་འབྱེད་དེ་སྐྲ་དང་བ་སྤུ་དང་སེན་མོ་ཡང་འབྱུང་བ་ནི་དེ་ཉིད་ཀྱི་དུས་ཡིན་ནོ། །དེ་ནས་བདུན་ཕྲག་བདུན་པ་ལ་རླུང་ཟློག་སྒྱུར་བྱེད་པས་ཡན་ལག་དང་ཉིང་ལག་ཐམས་ཅད་ཡོངས་སུ་རྫོགས་པར་འབྱིན་ཅིང་མིག་ལ་སོགས་པའི་དབང་པོ་རྣམས་མངོན་པར་འགྲུབ་པ་ནི་དེའི་དུས་ཞེས་བྱའོ། །དེ་ནས་བདུན་ཕྲག་བརྒྱད་པ་ལ་ལས་ཀྱི་རླུང་རྣམ་པར་འབྱེད་པས་ཉེར་སྤྱོད་ཀྱི་འདུ་བྱེད་འབྱུང་བའི་སྒོ་དབང་པོ་རྣམས་དང་མཚན་མ་ལ་སོགས་པའི་གནས་ཀུན་གསལ་བར་གྱུར་ཏེ་བུ་ག་དགུ་རྣམས་དོད་པ་ནི་མཚན་དོད་པའི་དུས་ཞེས་བྱའོ། །དེ་ནས་བདུན་ཕྲག་དགུ་པ་མན་ཆད་གོང་དུ་འབྱུང་བ་བཞིན་ཏེ། བདུན་ཕྲག་སོ་བདུན་པའི་སྐབས་སུ་དགའ་བོ་ལ་མངལ་དུ་འཇུག་པ་བསྟན་པའི་མདོ་ལས། ཕྱིན་ཅི་ལོག་ཏུ་མ་གྱུར་པའི་འདུ་ཤེས་རྣམ་པ་ལྔ་འབྱུང་བར་འགྱུར་རོ། །ལྔ་གང་ཞེ་ན། མི་གཙང་བའི་འདུ་ཤེས་དང་། དྲི་མི་ཞིམ་པའི་འདུ་ཤེས་དང༌། བཙོན་རའི་འདུ་ཤེས་དང༌། མུན་ནག་གི་འདུ་ཤེས་དང༌། ཡོངས་སུ་སྐྱོ་ནས་ཕྱིར་འབྱུང་བའི་འདུ་ཤེས་སྐྱེ་བ་གང་ཡིན་པ་སྟེ། མངལ་ན་གནས་པ་དེ་ཡོངས་སུ་སྐྱོ་བའི་བསམ་པ་དེ་ལྟ་བུ་དག་སྐྱེ་བར་འགྱུར་རོ། །ཞེས་པ་ལྟར་དང་མདོ་སྔ་མ་ལས་མི་གཙང་བ་དང༌། དྲི་ང་བ་དང༌། མུན་པ་ལ་མི་དགའ་བ་གསུམ་གསུངས་པ་ལ་སོགས་པའི་འདུ་ཤེས་སྐྱེད་དེ་ཕྱིར་འབྱུང་བར་མོས་སོ། །འདི་དག་སློབ་དཔོན་བདེ་བ་གསལ་མཛད་ཀྱིས་དཔེ་ཆུང་རང་གནས་དང་ཡང་བསྟུན་༼༡༩༠༽ནས་བྲིས་སོ། །དེར་ཡང་སའི་དངོས་གཞི་ལས། ལུས་དེ་ལ་ཡང་བྱིས་པ་རྣམས་ནི་བདག་གོ་སྙམ་པ་དང༌། ངའིའོ་སྙམ་པ་དང༌། ངའོ་སྙམ་དུ་འཛིན་ཏོ།།

འཕགས་པ་རྣམས་ནི་སྡུག་བསྔལ་ཉིད་དུ་འཛིན་ཏོ། །ཞེས་གསུངས་སོ། །དེ་ལྟར་དེ་ཡིས་རྫོགས་པའི་ཕྱིར་འདོད་པའི་ཁམས་ཀྱི་མི་ཁོ་ནའི་དབང་དུ་སེམས་ཅན་དེ་དག་མངལ་དེ་ན་གནས་པའི་ཡུན་རླུང་དང་ཞག་བདུན་ཕྲག་སུམ་ཅུ་རྩ་བརྒྱད་ཀྱིས་ནི་ལུས་དང་ཡན་ལག་ཐམས་ཅད་ཤིན་ཏུ་རྫོགས་པ་ཡིན་ཏེ། སྔ་མ་ལས་ཀྱང༌། མངལ་ན་གནས་པ་དེ་ཡང་ཞག་བདུན་ཕྲག་སུམ་ཅུ་རྩ་བརྒྱད་ཀྱིས་མངལ་དུ་ཡན་ལག་དང་ཉིང་ལག་ཐམས་ཅད་དང་ལྡན་པར་འགྱུར༌རོ། །དེ་ནས་ཞག་བཞི་ལོན་ན་བཙའ་བར་འགྱུར་ཏེ། ཞེས་གསུངས་པ་ལྟར་ཡིན་པས་ངེས་ནི་རྫོགས་པར་གྱུར་པ་ཡིན་ཏེ་ཕལ་ཆེ་བའི་དབང་ངོ༌། །དེ་ལྟར་གང་སུ་ཞིག་མངལ་ན་གནས་པ་དེ་དག་གི་ལུས་ཀྱི་རྩ་བ་གཟུགས་དྲུག་དང་མགོ་དང་པགས་པ་བྲང་དང་ནང་གྲོལ་བཞི་ཡིས་ལུས་རྫོགས་པའམ་རྩ་ཕྲན་གྱི་ཡན་ལག་དྲུག་དང་གཡས་གཡོན་མདུན་རྒྱབ་ཀྱི་རྩ་ཆེན་བཞི་རྣམས་ཡོངས་སུ་རྫོགས་ནས་གདོན་མི་ཟ་བར་ཕྱིར་འབྱུང་ཞིང་སྐྱེ་བ་ཡིན་ནོ། །དེས་ན་ཟླ་བ་དགུ་དང་ངོ་བཅུ་སྟེ་ཟླ་བའི་ཚད་བརྩིས་པའོ། །དེ་སྐད་དུའང་སྔ་མ་ལས། དེ་ནས་ཤ་མས་གཡོགས་བཞིན་དུ་འབྱུང་བར་འགྱུར་ལ་འབྱུང་བ་ན་ཤ་མ་དེ་ཕྱིར་ནང་དུ་ལོག་སྟེ་ལྟོ་ན་གནས་སོ། །མངལ་གྱི་སྒོར་བྱུང་མ་ཐག་ཏུ་བཙས་པའི་དུས་ཞེས་བྱའོ། །དེ་བཙས་ནས་རིམ་གྱིས་སྐྱེ་བའི་ཆར་གཏོགས་པའི་རེག་པ་འདི་ལྟ་སྟེ། མིག་གི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པའི་བར་དུ་རེག་པར་འགྱུར་རོ། །ཞེས་པ་ནས། ཕ་མ་གཉིས་ཀྱིས་ཐོག་མ་ཁོ་ནར་ཁུ་བ་དང་ཁྲག་གིས་སྒྲུབ་པར་བྱེད་དོ། །དེ་ནས་བཙས་པར་རིག་ནས་གཞན་དག་ཀྱང་དེ་དང་མཐུན་པའི་ཟས་སྡུད་པར་བྱེད་གསོ་བར་བྱེད་སྐྱེད་པར་བྱེད་དོ། །དེ་ནས་དུས་མ་ཡིན་པར་འགྲོ་བ་དང༌། ཡ་ང་བར་འགྲོ་ཞིང་རྒྱུ་བ་ལས་དེ་དང་དེར་ཀུན་ཏུ་སྲུང་བའི་བྱ་བ་བྱེད་དོ། །དེ་ནས་སྐྱེས་པའི་རྒྱུས་དབང་པོ་རྣམས་ཡོངས་སུ་སྨིན་ནས་སྨྲ་བའི་ཐ་སྙད་དག་སློབ་ཏུ་འཇུག་སྟེ། དེ་དག་གི་ཀྱང་གཞན་དག་སློབ་ཏུ་འཇུག་གོ །དེ་ལྟར་ན་སེམས་ཅན་འདི་དག་ནི་ཐོག་མ་མེད་པའི་དུས་ནས་བདེ་བ་དང་སྡུག་བསྔལ་བ་སོ་སོར་ཉམས་སུ་མྱོང་སྟེ། སངས་རྒྱས་རྣམས་ཀྱི་བྱང་ཆུབ་ལ་བརྟེན་ནས་གཞན་གྱི་སྒྲའི་རྒྱུ་ལས་བྱུང་བ་དང༌། ནང་གི་ཚུལ་བཞིན་ཡིད་ལ་བྱེད་པས་༼༢༩༡༽ཟག་པ་ཟད་པ་ཐོབ་པར་མ་གྱུར་གྱི་བར་དུ་བདེ་བ་དང་སྡུག་བསྔལ་བ་ལས་འདའ་བར་མི་འགྱུར་རོ། །དེ་བས་ན་འདི་ལྟ་སྟེ། བདག་གི་ནི་གང་ན་ཡང་སུ་ཡང་ཅི་ཡང་མེད་དོ། །བདག་ཀྱང་གང་ན་ཡང་སུ་ཡང་ཅི་ཡང་མ་ཡིན་ནོ། །ཞེས་བྱ་བའིཚིག་འདི་ནི་ཤིན་ཏུ་རྟོགས་པར་དཀའ་སྟེ་ནང་གི་དངོས་པོ་རྣམས་ཀྱི་འཆི་འཕོ་དང་སྐྱེ་བ་ནི་དེ་ལྟ་བུ་ཡིན་ནོ། །ཞེས་གསུངས་ཏེ་བྱམས་པའི་སེམས་སྒྲུབས་པ་དང་དོན་ཟབ་མོ་ལ་འཇུག་པའི་ཕྱིར་ཚད་མའི་ལུང་དུ་དྲངས་པ་ཡིན་ནོ། །དེ་ལྟར་འཇུག་པའི་ཆོས་བཞི་ཡང་ཡིད་ཀྱི་ལས་སོ།།

ལྔ་པ་སྐྱེ་བར་བྱེད་པ་སྤྱི་དང་བྱེ་བྲག་གི་རྣམ་གྲངས་བསྟན་པ་ལ་གཉིས་ཏེ། སྐྱེ་བ་བཅུ་དྲུག་སྤྱིར་བསྟན་ཏེ་ཀུན་ཀྱང་ཡིད་ཀྱི་ཆ་ལ་བསྡུ་བ། བྱེ་བྲག་ཏུ་ལས་ཀྱི་སྐྱེ་བ་ཡིད་ཀྱི་ལས་སུ་བསྟན་པའོ། །དང་པོ་ནི།

ལྔ་པ་འབྱུང་བའི། ཞེས་པ་ནས། བདག་ཀུན་འདུས་པའོ། །ཞེས་པའི་བར་གྱིས་བསྟན་ཏེ།

ལྔ་པ་འབྱུང་བའི་ཆོས་བཞི་ལ། །གང་ལས་རྣལ་འབྱོར་འབྱུང་གནས་ཉིད། །གང་འདིར་དེ་དག་བཞི་ཕྲག་བཞི།།

བཅུ་དྲུག་ཆོས་སུ་གྲགས་པ་ལ། །གང་སྐྱེ་བ་དག་ཀུན་འདུས་པའོ།།

ལྔ་ཕྲག་གསུམ་གྱི་ཐ་མ་སྐྱེ་བ་སྤྱིར་བསྟན་པའི་ཕྱིར་འདི་སྐད་བཀའ་སྩལ་ཏེ། དེ་ལ་ལྔ་ཕྲག་གསུམ་པའི་ལྔ་པ་སྤྱིར་འབྱུང་བའམ་སྐྱེ་བར་བྱེད་པའི་ཆོས་ཀྱི་རྣམ་གྲངས་བསྟན་པ་ལ་བཞི་སྟེ་འཇུག་པའི་ཆོས་ཀྱི་རྗེས་སུ་བསྙད་པས་ཟབ་ཅིང་རྒྱ་ཆེ་ལ་གནད་གལ་པོ་ཆེའང་ཡིན་ནོ། །དེའང་རྒྱུད་རང་གཞུང་དུ་སྔར་བཤད་པའི་གང་ལས་ཀྱི་རྫུ་འཕྲུལ་ལས་སྐྱེ་བ་བཞི་དང༌། རྣལ་འབྱོར་བསྒོམ་པའི་ཏིང་ངེ་འཛིན་ནམ་བསམ་གཏན་གྱི་ཆོ་འཕྲུལ་ལས་སྐྱེ་བ་བཞི་དང༌། རྣམ་འཕྲུལ་ཅིར་ཡང་འབྱུང་བའི་གནས་ཐུགས་རྗེའི་རྫུ་འཕྲུལ་ལས་སྐྱེ་བ་བཞི་དང༌། བཀོད་པ་སྣ་ཚོགས་སུ་སྟོན་པའི་ཆོས་ཉིད་ཀྱི་ཆོ་འཕྲུལ་ལས་སྐྱེ་བ་བཞི་སྟེ། གང་འདིར་དེ་དག་རེ་རེ་ལའང་བཞི་ཕྲག་རེར་དབྱེ་བས་སྐྱེ་བ་བཞི་ལ་རྣམ་གྲངས་ཀྱི་དབྱེ་བ་བཅུ་དྲུག་གི་ཆོས་སུ་གྲགས་པ་དེ་ལ་ནི། གང་སྐྱེ་བ་དག་པ་དང་མ་དག་པ་རིལ་མ་ལུས་པ་ཀུན་འདུས་པར་གྱུར་པ་ཁོ་ནའོ། །དེའང་ལས་ཀྱིས་སྐྱེ་བ་ནི་ལྷ་མི་སྟོད་སྨད་གཉིས་ལ་སོགས་པའོ། །རྣལ་འབྱོར་བསྒོམ་པའི་ཏིང་ངེ་འཛིན་གྱི་སྟོབས་ཀྱིས་སྐྱེ་བ་ནི་བྱང་ཆུབ་སེམས་དཔའ་དང་ཉན་ཐོས་དང་རང་རྒྱལ་རྣམས་ཡིན་ནོ། །གང་དེ་དག་ཀྱང་འདིར་མངལ་གཅིག་པུའི་དབང་དུ་བསྟན་པར་ཟད་ཀྱི་ལྷ་མི་དང་ཉན་རང་བྱང་སེམས་དེ་དག་རེ་རེ་ལའང་སྐྱེ་བ་བཞི་ཆར་དུ་སྐྱེ་བའང་ཡོད་པས་བཅུ་དྲུག་ཏུ་འགྱུར་ཏེ་སྐྱེ་གནས་ཀྱི་སྐྱེ་བ་རིལ་དེར་འདུས་སོ།།

འོ་ན་བྱང་ཆུབ་སེམས་དཔའ་དེ་འདུལ་བའི་དབང་གིས་ཇི་ལྟར་ཡང་རུང་ན། ལྷ་དང་མི་ལ་སྐྱེ་བ་བཞི་ཚང་དུ་བཏུབ་བམ་ཞེ་ན། དེ་ཡང་མི་༼༡༩༢༽ལ་བཙུན་མོ་ལྷ་མཚམས་མའི་བུ་སུམ་ཅུ་རྩ་གཉིས་དང་གནས་བརྟན་བྲག་དང་ཉེ་བའི་བྲག་ལྟ་བུ་སྒོ་ང་ལས་སྐྱེས་པ་དང༌། སྣང་བ་མཐའ་ཡས་ཀྱི་ཞིང་ཁམས་སམ། བསྐལ་པ་དང་པོའི་མི་བརྫུས་ནས་སྐྱེ་བ་དང༌། རྒྱལ་པོ་སྤྱི་བོ་སྐྱེས་དྲོད་གཤེར་ལས་སྐྱེ་བ་དང༌། ཕལ་པ་མངལ་ནས་སྐྱེ་བའོ། །ལྷ་ལའང་བཞི་ཀ་ཚང་སྟེ། ལྷ་མོ་ཨ་འབྲ་སྐྱོང་ཤིང་གི་དྲོད་གཤེར་ལས་སྐྱེས་པ་དང༌། ལྷ་ཚངས་པ་སྒོ་ང་ལས་སྐྱེས་པ་དང༌། འདོད་པའི་ལྷ་དམན་རིགས་རྣམས་སའི་དངོས་གཞི་སོགས་ལས། པང་དང་ཕྲག་པ་ལས་སྐྱེ་བར་གསུངས་པ་ལྟར་མངལ་དང་། བརྫུས་ནས་སྐྱེ་བ་ལྟ་བུའི་ཕྱིར་ཏེ། འོན་ཀྱང་ལྷའི་བུ་མོ་རྣམས་ལ་མངལ་གྱི་གནས་མེད་པ་སོགས་ཀྱིས་བརྫུས་སྐྱེས་སུ་ཡང་བསྡུས་ལ། གཞན་ཡང་དྲེགས་པའི་རབས་རྒྱུད་སོགས་དང་སྦྱར་རོ། །དེ་རྣམས་ནི་ཁྱད་པར་དུ་མངལ་དུ་འཇུག་པའི་རྗེས་སུ་བསྙད་པ་ཡིན་ནོ། །འོ་ན་ལས་དང་རྣལ་འབྱོར་གྱི་སྟོབས་ལས་སྐྱེ་བའི་སེམས་ཅན་དང་ཉན་རང་བྱང་སེམས་ཀྱི་སྐྱེ་བའི་གནས་ཀྱི་དབྱེ་བ་བཅུ་དྲུག་རྣམས་ཡིད་ཀྱི་ལས་སུ་རུང་ཡང༌། ཐུགས་རྗེ་དང་ཆོས་ཉིད་ཀྱི་ཆོ་འཕྲུལ་ལས་སྐྱེ་བ་གཉིས་ཡིད་ཀྱི་ལས་སུ་ཇི་ལྟར་འདུ་ཞེ་ན། སྐྱེ་བ་བཞི་ཀ་ཡིད་ཀྱི་ཆ་ཡིན་ཏེ། ལས་ཀྱི་རྫུ་འཕྲུལ་ནི་ཡིད་ཤེས་རང་ཀ་མའི་ལས་ཡིན་ལ། བསམ་གཏན་གྱི་བཞི་ནི་ཡིད་ཀུན་གཞི་ལ་ཁ་བལྟས་པའི་ཤས་ཆེ་ཆུང་གིས་ལམ་པའི་ཏིང་ངེ་འཛིན་གྱི་ཆ་མཐོ་དམན་བཞི་ཡིན་པས་ཡིད་ཤེས་དག་པའི་ཆ་ཡིན་ཞིང༌། ཐུགས་རྗེ་ནི་ཡིད་དང་ཀུན་གཞི་དབྱེར་མེད་དུ་རྟོགས་ཏེ་ཆོས་སྐུ་ལྷུན་གྲུབ་ཆེན་པོ་ལས་རང་རྩལ་མ་འགགས་པའི་ཐུགས་རྗེ་སྟོན་པས་ཡིད་རང་བྱུང་གི་ཡེ་ཤེས་ཀྱི་ཆོ་འཕྲུལ་ཡིན་ཏེ། ལམ་པའི་དུས་སུ་ཡིད་ཀྱི་ཤེས་པ་ཡུལ་དུ་སྣང་བའོ། །ཆོས་ཉིད་ནི་ཡིད་དང་དབྱེར་མེད་པའི་ཆོས་ཉིད་ཀྱི་ངོ་བོ་རང་སྣང་བའི་ཆོ་འཕྲུལ་ཡིན་པས་ཀུན་གྱི་ཡུལ་ཡང་ཆོས་ཉིད་རང་སྣང་དུ་འདུས་ཏེ། རིན་པོ་ཆེ་རྒྱན་ལས། ཐམས་ཅད་རང་སྣང་ཉིད་གནས་ལ། །སྒྲིབ་པ་མེད་ཀྱང་སྣང་རྐྱེན་བྲལ། །མི་ཤེས་བློ་ཡིས་ནན་བརྟགས་པས། །འཛིན་ལྔ་དངོས་པོར་འཐས་པ་ལས། །འདུ་བྱེད་རླུང་གིས་གཡོས་པས་ན། །སྣོད་བཅུད་སྡུག་བསྔལ་ངོ་བོར་སྨིན། །ཞེས་པ་ལྟར་རོ། །དེ་བས་ན་བཅུ་དྲུག་ཡིད་ཤེས་ཀྱི་ཆ་ལ་འདུས་སོ།།

གཉིས་པ་བྱེ་བྲག་ཏུ་ལས་ཀྱི་སྐྱེ་བ་ཡིད་ཀྱི་ལས་སུ་བསྟན་པ་ནི།

འདི་དག་ལས་ཀྱིས། ཞེས་པ་ནས། མདོར་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

འདི་དག་ལས་ཀྱི་སྐྱེ་བ་སྟེ། །ཐམས་ཅད་ཐམས་ཅད་བྱེད་པ་ནི། །ངང་རིང་མགྱོགས་པའི་ལས་ཡིན་ཏེ། །མུན་པའི་སྤྱོད་ཡུལ་པ་ཡིས་མཐོང་། །ལས་ཀྱི་བསྐྱངས་པས་བསྒྲིབས་པ་ལ། །དགོངས་ཏེ་དེ་ལྟར་མདོར་གསུངས་པའོ། །ལངྐའི་བདག་པོ་དེ་དག་ནི་སྣང་བའི་མདོར་ཤེས་པར་བྱའོ།།

འོ་ན་དེ་ལྟར་ཡིན་ཀྱང་༼༡༩༣༽རང་བཞིན་དང་ཐུགས་རྗེ་ནི་ཡིད་ཀྱི་ལས་སུ་མི་འགྱུར་བས་དེ་ལ་དགོས་པ་མེད་དོ་ཞེ་ན། ལན་དུ། དེ་ལྟར་བཀོད་པ་འདི་དག་གི་དགོས་པས་དག་མ་དག་ཐམས་ཅད་ལས་ཀྱིས་དབང་ལས་སྐྱེ་བ་ཡིན་པར་ངོས་ཟིན་ཏེ་དཀར་ནག་གི་ཁྱད་པར་ལས་གྱུར་པའོ། །དེ་བས་ན་ཡིད་ཀྱིས་ལས་བཟང་ངན་ཐམས་ཅད་དང་འདུས་བྱས་དང་འདུས་མ་བྱས་ཀྱི་ཆོ་འཕྲུལ་དེ་དག་ཐམས་ཅད་སྐྱེད་པར་བྱེད་པ་ནི་སྐད་ཅིག་མའི་རྒྱུན་མ་ཆད་པར་ཡུལ་ལ་འཇུག་པས་ངང་རིང་ཞིང་མྱུར་ལ་མགྱོགས་པའི་ཡིད་ཀྱི་ལས་སུ་གྱུར་པ་ཡིན་ནོ་ཞེས་མུན་པའི་སྤྱོད་ཡུལ་ལ་གནས་པའི་རྒྱུའི་ཐེག་པ་མཚན་ཉིད་པ་ཡིས་མཐོང་བ་ཡིན་ཏེ། དེའང་རང་རྒྱུད་ཀྱི་མུན་པ་དང་ལྟོས་པའི་མུན་པ་གཉིས་སུ་འགྱུར་རོ། །དེ་བས་ན་འདིར་ནི། རྒྱན་སྟུག་པོ་བཀོད་པ་ལས།

དེ་བས་ལས་ཀྱི་འབྲས་གྱུར་པ། །འདི་ནི་སྒྱུ་མའི་བུས་བྱས་བཞིན། །འདི་ན་ལས་མེད་འབྲས་བུ་མེད། །ལས་ཀྱིས་སྒྲུབ་པའང་ཡོད་པ་མིན། །ཞེས་དང༌། དུར་ཁྲོད་ཁུ་བྱུག་རོལ་པ་ལས། བྱང་ཆུབ་སྤྱོད་པའི་གནས་འདི་ཡི། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །དེ་ཉིད་འཇིག་རྟེན་སྣ་ཚོགས་ཏེ། །ཕྱག་རྒྱའི་ཚོགས་ཆེན་དེ་ཉིད་དོ། །ཆོས་སྐུ་སྒྱུ་མས་དབང་བསྒྱུར་བས། །དེ་ལ་དངོས་པོ་ག་ལ་ཡོད། །ཅི་སྤྱོད་ཅི་བསྒོམས་ཅི་བསྒྲུབས་ཀྱང༌། །བྱང་ཆུབ་ཉིད་དེ་ལྟུང་གནས་མེད། །དམྱལ་བའི་གནས་ཉིད་བླ་མེད་གནས། །སྡུག་བསྔལ་ཉིད་ཀྱང་བྱང་ཆུབ་ལ། །འཁོར་བ་ཉིད་ཀྱང་མྱང་ངན་འདས། །སྒྲིབ་པ་ཉིད་ནི་མངོན་སངས་རྒྱས། །ངེས་དོན་དེ་ལ་འདུས་པར་སྦྱོར། །ཞེས་དང༌། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། ཆུ་ཟླ་སྒྱུ་མ་སྨིག་རྒྱུ་བཞིན། །མེད་པ་ཟང་ཐལ་མ་ཡིན་ལ། །ཡོད་པ་ཡང་ནི་མ་ཡིན་ནོ། །ཡོད་མེད་གཉིས་ལས་འདས་པ་ཡིས། །རང་བཞིན་མེད་པ་ཡིད་ལ་དྲན། །ཤེས་རབ་ཆེན་པོའི་རྟོག་པས་བཏགས། །མཁའ་ལྟར་མཉམ་པ་ཉིད་གནས་ན། །ཤེས་རབ་ཆེན་པོས་ཁྱབ་པའི་རྟགས། །ཞེས་སོགས་གསུངས་པ་ལྟར་རོ། །འོ་ན་དོན་དེ་ལྟར་དུ་གནས་པ་ཡིན་ན་ཚུལ་འདི་དག་གང་ལ་དགོངས་ཏེ་གསུངས་ཞེ་ན། རང་གིས་མུན་པས་བསླད་པ་དང་རྩོལ་བའི་ལས་ཀྱིས་ཡུན་རིང་དུ་བསྒྱངས་པས་རྩ་བ་ཆེན་པོ་མ་མཐོང་སྟེ་ཆོས་ཉིད་ཀྱི་དོན་ལ་བསྒྲིབས་པར་གནས་པའི་རྒྱུའི་ཐེག་པ་བ་རྣམས་༼༡༩༤༽ཀྱི་ཡུལ་དང་དེ་འདྲ་བ་ལ་དགོངས་ཏེ་དེ་ལྟར་སྣང་བའི་མདོར་གསལ་བར་གསུངས་ཏེ་རྒྱས་པར་བཀའ་སྩལ་པར་མཛད་པའོ། །དེ་ལྟར་ལྔ་ཕྲག་ཐ་མའི་ཡན་ལག་ཉི་ཤུ་རྩ་དྲུག་ཀྱང་ཡིད་ཀྱི་ལས་སོ། །ལང་ཀའི་བདག་པོ་ཞེས་བོས་ནས། དེ་ལྟར་སྟོན་པ་གསང་བ་མཆོག་གི་བདག་པོས་བཀའ་སྩལ་པ་བཞིན་དུ་ལེགས་པར་བསྟན་པ་དེ་དག་ནི་ཡིད་ཀྱི་ཤེས་པ་སྣང་བའི་མདོར་ཡང་དག་པར་ཤེས་པར་བྱའོ། །ཞེས་དོན་གྱི་ངོ་བོ་བསྟན་པའོ།།

བཞི་པ་འཇུག་པའི་མདོ་སྒོ་ལྔའི་རྣམ་པར་ཤེས་པ་བཤད་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་འཇུག་པའི་མདོ་གང་ཞེ་ན། འདི་ལྟ་སྟེ།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས་གཞན་ཡང་མུན་པའི་དྲིས་ལན་མདོ་ཐ་མ་ཡུལ་ལ་འཇུག་པར་བྱེད་པའི་མདོ་སྒོ་ལྔའི་རྣམ་པར་ཤེས་པ་ཉེ་བར་བསྟན་པ་གང་ཇི་ལྟ་ཞེ་ན། འདི་ལྟ་སྟེ། ཞེས་བྱའོ།།

གཉིས་པ་རྒྱས་པར་བཤད་པ་ལ་བདུན་ཏེ། སྒོ་ལྔའི་རྣམ་པར་ཤེས་པའི་གནས་བསྟན་པ། དེ་ཡི་དམིགས་པའི་ཡུལ་གྱི་ཁྱད་པར་བཤད་པ། དེ་དག་འཁོར་གང་དང་མཚུངས་པར་ལྡན་ཚུལ་བཤད་པ། དེ་རྣམས་ཀྱི་བྱེད་པའི་ལས་ཀྱི་ཁྱད་པར་བསྟན་པ། དེ་དག་ཚོར་བ་གང་དང་མཚུངས་པར་ལྡན་ཚུལ་བཤད་པ། དེ་ཡི་རང་གི་ངོ་བོའི་ཁྱད་པར་གྱི་ཆོས་བསྟན་པ། དེ་དག་ལྡོག་པའི་དུས་བསྟན་ཏེ་མཚན་ཉིད་ངོས་གཟུང་བའོ། །དང་པོ་ནི།

དེ་འདོད་བྱེད་པ། ཞེས་པ་ནས། རྒྱུན་གཅིག་རྒྱུན་གཞན་བྱེད། །ཅེས་པའི་བར་གྱིས་བསྟན་ཏེ།

དེ་འདོད་བྱེད་པ་རྣམ་གསུམ་གནས། །གོ་འབྱེད་རྒྱུ་གཅིག་རྒྱུད་གཞན་བྱེད།།

དེ་ཡང་སྒོ་ལྔའི་ཤེས་པ་དེ་དག་འདོད་པའི་ཡུལ་ལ་འཇུག་པར་བྱེད་པས་ན་འཇུག་པའི་རྣམ་པར་ཤེས་པ་ཞེས་པའི་མིང་ཡང་འགྲུབ་ལ། དེ་ལའང་གནས་རྣམ་པ་གསུམ་སྟེ་གནས་གསུམ་པ་གང་ཞེ་ན། གོ་འབྱེད་པའི་གནས་ཤེས་པ་སྔ་མ་སྔ་མ་འགགས་མ་ཐག་པ་གང་ཡིན་པ་དང༌། རྒྱུན་གཅིག་པའང་ལྷན་ཅིག་འབྱུང་བའི་གནས་དབང་པོ་ལྔ་ཡིན་ལ། བག་ཆགས་ཀྱི་གནས་སྒོ་ལྔས་ཡུལ་བཅད་དེ་ཡུལ་དང་ཤེས་པ་གཉིས་ཀ་འགགས་ནས་ཀུན་གཞི་ལ་བག་ཆགས་བསགས་པའི་རྒྱུ་བྱས་པས་སྔར་མེད་པ་ལས་ཡོད་པར་གྱུར་ཏེ་ཕྱིས་ཀྱི་རྒྱུན་གཞན་ཡང་སྐྱེད་པར་བྱེད་པ་ནི་ས་བོན་གྱི་གནས་ཞེས་བྱ་སྟེ། སའི་དངོས་གཞི་ལས། མིག་གི་རྣམ་པར་ཤེས་པ་གང་ཞེ་ན། གང་མིག་ལ་བརྟེན་ནས་གཟུགས་༼༡༩༥༽སོ་སོར་རིག་པའོ། །མིག་གི་རྣམ་པར་ཤེས་པའི་གནས་གང་ཞེ་ན། མིག་ནི་ལྷན་ཅིག་འབྱུང་བའི་གནས་སོ། །ཡིད་ནི་དེ་མ་ཐག་པའི་གནས་སོ། །ས་བོན་ཐམས་ཅད་ལ་ལུས་ལེན་པར་བྱེད་པ་རྣམ་པར་སྨིན་པས་བསྡུས་པ་ཀུན་གཞི་རྣམ་པར་ཤེས་པ་ནི་ས་བོན་གྱི་གནས་སོ། །ཞེས་དང༌། མིག་གང་ཞེ་ན། གང་འབྱུང་བ་ཆེན་པོ་བཞི་དག་རྒྱུར་བྱས་པ་མིག་གི་རྣམ་པར་ཤེས་པའི་རྟེན་པོ་གཟུགས་དྭང་བ་སྟེ། བསྟན་དུ་མེད་པ་ལ་ཐོགས་པ་དང་བཅས་པའོ། །ཡིད་གང་ཞེ་ན། གང་མིག་གི་རྣམ་པར་ཤེས་པའི་སྔོན་རོལ་དུ་འདས་མ་ཐག་པའི་རྣམ་པར་ཤེས་པའོ། །ས་བོན་ཐམས་ཅད་པའི་རྣམ་པར་ཤེས་གང་ཞེ་ན། སྔོན་གྱི་སྤྲོས་པ། དགའ་བ་རྒྱུར་གྱུར་པ་ལ་བརྟེན་ནས་ས་བོན་ཐམས་ཅད་པ་རྣམ་པར་སྨིན་པ་མངོན་པར་འགྲུབ་པ་གང་ཡིན་པའོ། །ཞེས་དང་རྣ་བའི་རྣམ་པར་ཤེས་པ་གང་ཞེ་ན། གང་རྣ་བ་ལ་བརྟེན་ནས་སྒྲ་སོ་སོར་རྣམ་པར་རིག་པའོ། །ཞེས་སོགས་གཞན་རྣམས་སྔ་མ་ལྟར་འགྲེལ། སྣའི་རྣམ་པར་ཤེས་པ་གང་ཞེ་ན། གང་སྣ་ལ་བརྟེན་ནས་དྲི་སོ་སོར་རྣམ་པར་རིག་པའོ། །ཞེས་སོགས་དང༌། ལྕེའི་རྣམ་པར་ཤེས་པ་གང་ཞེ་ན། གང་ལྕེ་ལ་བརྟེན་ནས་རོ་སོ་སོར་རྣམ་པར་རིག་པའོ། །ཞེས་སོགས་དང༌། ལུས་ཀྱི་རྣམ་པར་ཤེས་པ་གང་ཞེ་ན། གང་ལུས་ལ་བརྟེན་ནས་རེག་བྱ་སོ་སོར་རྣམ་པར་རིག་པའོ། །གནས་གང་ཞེ་ན། ལུས་ནི་ལྷན་ཅིག་འབྱུང་བའི་གནས་སོ། །ཡིད་ནི་དེ་མ་ཐག་པའི་གནས་སོ། །ས་བོན་ཐམས་ཅད་པ་ཀུན་གཞི་རྣམ་པར་ཤེས་པ་དེ་ཉིད་ནི་ས་བོན་གྱི་གནས་སོ། །ལུས་གང་ཞེ་ན། གང་འབྱུང་བ་ཆེན་པོ་བཞི་པོ་དག་རྒྱུར་བྱས་པ་ལུས་ཀྱི་རྣམ་པར་ཤེས་པའི་རྟེན་པོ་གཟུགས་དྭང་བ་སྟེ་བསྟན་དུ་མེད་ལ་ཐོགས་པ་དང་བཅས་པའོ། །ཡིད་དང་ས་བོན་གྱི་རྣམ་པར་དབྱེ་བ་ནི་སྔ་མ་བཞིན་ནོ། །ཞེས་དང༌། གཏན་ལ་དབབ་པ་བསྡུ་བ་ལས། འདི་ལ་ཀུན་གཞི་རྣམ་པར་ཤེས་པ་ནི་རྣམ་པ་གཉིས་ཀྱིས་འཇུག་པའི་རྣམ་པར་ཤེས་པའི་རྐྱེན་གྱི་བྱ་བ་བྱེད་དེ་ས་བོན་གྱི་དངོས་པོ་དང་རྟེན་བྱེད་པས་སོ། །དེ་ལ་ས་བོན་གྱི་དངོས་པོ་ནི་འཇུག་པའི་རྣམ་པར་ཤེས་པ་དགེ་བ་དང་མི་དགེ་བ་དང་ལུང་དུ་མ་བསྟན་པ་འབྱུང་བར་འགྱུར་བ་གང་ཅི་ཡང་རུང་སྟེ། དེ་དག་ཐམས་ཅད་ནི་ཀུན་གཞི་རྣམ་པར་ཤེས་པའི་ས་བོན་དང་ལྡན་པ་ཡིན་ནོ། །དེ་ལ་རྟེན་བྱེད་པ་ནི་ཀུན་༼༡༩༦༽གཞི་རྣམ་པར་ཤེས་པས་ཟིན་པའི་དབང་པོ་གཟུགས་ཅན་རྣམས་ལ་བརྟེན་ནས་རྣམ་པར་ཤེས་པའི་ཚོགས་ལྔ་པོ་དག་འབྱུང་བར་འགྱུར་གྱི་མ་ཟིན་པ་དག་ལས་ནི་མ་ཡིན་ནོ། །ཞེས་དང༌། དེ་ལ་འཇུག་པའི་རྣམ་པར་ཤེས་པ་ནི་རྣམ་པ་གཉིས་ཀྱིས་ཀུན་གཞི་རྣམ་པར་ཤེས་པའི་རྐྱེན་གྱི་བྱ་བ་བྱེད་དེ། ཚེ་འདི་ལ་ས་བོན་ཡོངས་སུ་བརྟས་པར་བྱེད་པ་དང༌། ཚེ་ཕྱི་མ་ལ་དེ་མངོན་པར་འགྲུབ་པའི་ས་བོན་ཡོངས་སུ་འཛིན་པར་བྱེད་པས་སོ། །དེ་ལ་ཚེ་འདི་ལ་ས་བོན་ཡོངས་སུ་བརྟས་པར་བྱེད་པ་ནི། ཇི་ལྟ་ཇི་ལྟར་ཀུན་གཞི་རྣམ་པར་ཤེས་པ་ལ་བརྟེན་པ་འཇུག་པའ་ིརྣམ་པར་ཤེས་པ་དགེ་བ་དང་། མི་དགེ་བ་དང་། ལུང་དུ་མ་བསྟན་པ་འབྱུང་བར་འགྱུར་པ་དེ་ལྟ་དེ་ལྟར་རང་གི་རྟེན་ལ་རྟེན་དེ་དང་ལྷན་ཅིག་སྐྱེ་བ་དང་འགགས་པས་བག་ཆགས་བསྒོ་བར་བྱེད་དོ། །རྒྱུ་དེ་དང་རྐྱེན་དེས་ན་འཇུག་པའི་རྣམ་པར་ཤེས་པ་རྣམས་ཀྱང་ཕྱིར་ཞིང་ཕྱིར་ཞིང་དགེ་བ་ལ་སོགས་པའི་དངོས་པོས་ཤིན་ཏུ་བརྟས་པ་དང༌། ཤིན་ཏུ་སྦྱངས་པ་དང༌། ཤིན་ཏུ་འོད་གསལ་བ་དག་ཏུ་འབྱུང་བར་འགྱུར་རོ། །དེའི་བག་ཆགས་ཀྱི་རིགས་གཞན་ནི་ཕྱི་མ་ལ་ཀུན་གཞི་རྣམ་པར་ཤེས་པ་དེ་དག་ཉིད་ཀྱི་རྣམ་པར་སྨིན་པ་ཡོངས་སུ་འཛིན་པའི་ཕྱིར་འཇུག་པར་འགྱུར་རོ། །ཞེས་སོ།།

གཉིས་པ་དེ་ཡི་དམིགས་པའི་ཡུལ་གྱི་ཁྱད་པར་བཤད་པ་ནི།

སོ་སོའི་རིས་སུ་བཅད་དབང་བྱེད། །ཅེས་པས་བསྟན་ཏེ།

སོ་སོའི་རིགས་སུ་བཅད་དབང་བྱེད།།

སྒོ་ལྔའི་ཤེས་པས་དམིགས་པའི་ཡུལ་ནི། གཟུགས་ལ་སོགས་པ་སོ་སོའི་རིས་སུ་བཅད་དེ་ཐ་དད་དུ་གྱུར་པས་རང་ཡུལ་རང་རང་སོ་སོ་ལ་དབང་བྱེད་པ་ལས་གཞན་དུ་མ་ཡིན་ཏེ། རྒྱན་སྟུག་པོ་བཀོད་པ་ལས། རྣམ་ཤེས་ལྔ་ཡི་ཡུལ་རྣམས་ནི། །སེམས་ཅན་བཞིན་གནས་ལུས་ཅན་ལ། །ཀུན་གཞིར་གྲགས་པའི་ཆུ་རླུང་ལས། །རྦ་རླབས་བཞིན་དུ་རབ་ཏུ་འབྱུང༌། །རྣམ་ཤེས་ཀུན་གཞི་མཚོར་གནས་པ། །བག་ཆགས་རྣམས་ཀྱིས་བརྙོགས་པའི་རྣམས། །ཡུལ་གྱི་རླུང་གིས་བསྐྱོད་པ་དག །རྣམ་པར་རྒྱུན་ཆད་མེད་པར་རྒྱུ། །ཞེས་དང༌། སའི་དངོས་གཞི་ལས། མིག་གི་རྣམ་པར་ཤེས་པའི་དམིགས་པ་གང་ཞེ་ན། གཟུགས་གང་བསྟན་དུ་ཡོད་ཅིང་ཐོགས་པ་དང་བཅས་པའོ། །དེ་ཡང་རྣམ་པ་དུ་མ་ཡོད་དོ། །མདོར་ན་ཁ་དོག་དང་དབྱིབས་དང་རྣམ་པར་རིག་བྱེད་དོ། །ཞེས་དང༌། ཡང་ཁ་དོག་གང་ཞེ་ན་གཟུགས་དང་འདྲ་བ་མིག་གི་རྣམ་པར་ཤེས་པའི་སྤྱོད་ཡུལ་དུ་གྱུར་པའོ། །དབྱིབས་༼༡༩༧༽གང་ཞེ་ན། གང་གཟུགས་རྒྱས་པར་རིང་པོ་ལ་སོགས་པར་ཡོངས་སུ་བཅད་པའི་རྣམ་པའོ། །ཞེས་དང༌། རྣམ་པར་རིག་བྱེད་གང་ཞེ་ན། འདི་ལྟ་སྟེ། ལེན་པ་དང༌། འཇོག་པ་དང༌། བསྐུམ་པ་དང༌། བརྐྱང་པ་དང༌། འགྲེང་བ་དང༌། འདུག་པ་དང༌། ཉལ་བ་དང༌། འགྲོ་བ་དང༌། ལྡོག་པ་དང༌། དེ་ལ་སོགས་པའོ། །ཞེས་སོགས་དང༌། རྣ་བའི་རྣམ་པར་ཤེས་པའི་དམིགས་པ་གང་ཞེ་ན། སྒྲ་རྣམ་པ་དུ་མ་བསྟན་དུ་མེད་ལ་ཐོགས་པ་དང་བཅས་པ་དག་སྟེ། འདི་ལྟ་སྟེ་དུང་གི་སྒྲ་དང་། ཞེས་སོགས་དང་། སྣའི་རྣམ་པར་ཤེས་པའི་དམིགས་པ་གང་ཞེ་ན། དྲི་རྣམ་པ་དུ་མ་བསྟན་དུ་མེད་ལ་ཐོགས་པ་དང་བཅས་པ་དང་སྟེ། དྲི་ཞིམ་པའམ། ཞེས་སོགས་དང༌། ལྕེའི་རྣམ་པར་ཤེས་པའི་དམིགས་པ་གང་ཞེན་རོ་རྣམ་པ་དུ་མ་བསྟན་དུ་མེད་ལ་ཐོགས་པ་དང་བཅས་པ་དག་སྟེ། དེ་དག་ཀྱང་རོ་ཁ་བ་དང༌། ཞེས་སོགས་དང༌། ལུས་ཀྱི་རྣམ་ཤེས་ཀྱི་དམིགས་པ་གང་ཞེ་ན། རེག་བྱ་རྣམ་པ་དུ་མ་བསྟན་དུ་མེད་ལ་ཐོགས་པ་དང་བཅས་པ་དག་སྟེ། འདི་ལྟ་སྟེ། ས་དང་ཆུ་དང༌། མེ་དང་རླུང༌། ཡང་བ་ཉིད་དང༌། ཞེས་སོགས་ནས། དེ་ཡང་རེག་ན་བདེ་བ་དང༌། རེག་ན་སྡུག་བསྔལ་བ་དང༌། བཏང་སྙོམས་ཀྱི་གནས་ཀྱི་རེག་པར་བལྟ་བར་བྱའོ། །ཞེས་སོ།།

གསུམ་པ་དེ་དག་འཁོར་གང་དང་མཚུངས་པར་ལྡན་ཚུལ་བཤད་པ་ནི།

དེ་ཉིད་ལྡན་པ་དེ་ཁོ་ན། །ཞེས་པས་བསྟན་ཏེ།

དེ་ཉིད་ལྡན་པ་དེ་ཁོ་ན།།

སྒོ་ལྔ་དེ་ཉིད་ཀྱི་འཁོར་ནི་ཡིག་རྙིང་ཚད་མའི་ཕྱག་མཚན་ལས་བྱུང་བ་བཞིན་རྐྱེན་ལྟར་ཉེ་བར་གནས་པ་ཞེས་བྱ་སྟེ་བསམ་པ་སྔོན་དུ་མ་བཏང་བ་ན་ཐུན་མོང་དུ་མཚུངས་པར་ལྡན་པ་ལྔ་ཀུན་ཏུ་འགྲོ་བ་དེ་དག་ཁོ་ན་ལས་གཞན་མི་འབྱུང་ལ། ཡིད་ཀྱི་བསམ་པ་སྔོན་དུ་སོང་བའི་འཁོར་གྱི་དབང་དུ་ན་ཡུལ་ངེས་ལྔ་དང་རྟོག་དཔྱོད་རྣམས་ཀྱང་འབྱུང་སྟེ། སའི་དངོས་གཞི་ལས། གྲོགས་གང་ཞེ་ན། དེ་དང་ལྷན་ཅིག་འབྱུང་ཞིང་མཚུངས་པར་ལྡན་པ་སེམས་ལས་བྱུང་བའི་ཆོས་རྣམས་ཏེ། འདི་ལྟ་སྟེ། ཡིད་ལ་བྱེད་པ་དང༌། རེག་པ་དང༌། ཚོར་བ་དང༌། འདུ་ཤེས་དང༌། སེམས་པའོ། །སེམས་ལས་བྱུང་བའི་ཆོས་གཞན་གང་དག་མིག་གི་རྣམ་པར་ཤེས་པ་དང་ལྷག་ཅིག་འབྱུང་ཞིང་མཚུངས་པར་ལྡན་པ་དེ་དག་ནི་དམིགས་པ་གཅིག་ལ་རྣམ་པ་དུ་མ་སྟེ། ལྷན་ཅིག་འབྱུང་བ་དག་ཀྱང་རེ་རེ་འབྱུང་ལ། ཐམས་ཅད་ཀྱང་རང་གི་ས་བོན་ལས་ངེས་པར་འབྱུང་བ་མཚུངས་པར་ལྡན་པ་དམིགས་པ་དང་བཅས་པ་༼༡༩༨༽རྣམ་པ་དང་བཅས་པ། གནས་དང་བཅས་པ་དག་གོ །ཞེས་སོ། །འདིར་དམིགས་པ་གཅིག་ལ་རྣམ་པ་དུ་མ་ཞེས་པ་ནི་དམིགས་པའི་དངོས་པོ་གཅིག་ཡིན་ཀྱང་ཡུལ་གྱི་མཚན་ཉིད་ཐ་དད་པས་འཛིན་པའི་རྣམ་པར་ཐ་དད་པའི་ཕྱིར་རང་གི་རྣམ་པ་ཐ་དད་པ་ལ་བྱའོ། །དེས་ན་འདི་ལྟར་གསུངས་པ་ནི། ཡིད་ཀྱི་བསམ་པ་སྔོན་དུ་སོང་བའི་ས་མང་བཅུ་ལ་སོགས་པའི་དབང་དུ་སྟེ། རྣ་བ་ནས་ལུས་ཀྱི་རྣམ་ཤེས་ཀྱི་བར་དུ་ཡང་དེས་འགྲེའོ།།

བཞི་པ་དེ་རྣམས་ཀྱི་བྱེད་པའི་ལས་ཀྱི་ཁྱད་པར་བསྟན་པ་ནི།

གང་གི་ངོ་བོར་བྱུང་ཙམ་ཉིད། །ཅེས་པས་བསྟན་ཏེ།

གང་གི་ངོ་བོར་འབྱུང་ཙམ་ཉིད།།

ལས་ནི་རྒྱུ་མཐུན་པའི་བག་ཆགས་གང་གི་ངོ་བོར་བྱུང་བ་ཙམ་ཀུན་གཞི་ལ་གསོགས་ཏེ་ཁྱད་པར་གསལ་བར་མ་ཆོད་པས་རྟོག་མེད་ཉིད་ཡིན་པས་རྣམ་པར་སྨིན་པ་གསོགས་པར་མི་ནུས་ཏེ་མངོན་སུམ་ངེས་མེད་ཀྱི་ཤེས་པར་འགྱུར་བའི་ཕྱིར་རོ། །དེས་ན་སྔ་མ་ལས། ལས་གང་ཞེ་ན། དེ་ནི་རྣམ་པ་དྲུག་ཏུ་བལྟ་བར་བྱ་སྟེ། ཐོག་མ་ཁོ་ནར་དེ་རང་གི་ཡུལ་ལ་དམིགས་པ་རྣམ་པར་རིག་པའི་ཡུལ་ལས་དང༌། ཡང་རང་གི་མཚན་ཉིད་རྣམ་པར་རིག་པ་དང༌། ཡང་ད་ལྟར་གྱི་དུས་རྣམ་པར་རིག་པ་དང༌། ཡང་སྐད་ཅིག་གཅིག་རྣམ་པར་རིག་པ་དང༌། ཡང་རྣམ་པ་གཉིས་ཀྱིས་ཡིད་ཀྱི་རྣམ་པར་ཤེས་པའི་རྗེས་སུ་འཇུག་པ་སྟེ། དགེ་བ་ཉོན་མོངས་པ་ཅན་གྱི་རྗེས་འཇུག་པ་དང༌། ལས་ཀུན་ནས་སློང་བའི་རྗེས་སུ་འཇུག་པ་དང༌། ཡང་སྡུག་པ་དང་མི་སྡུག་པའི་འབྲས་བུ་ཡོངས་སུ་རིག་པ་སྟེ་ལས་དྲུག་པའོ། །ཞེས་གསུངས་ཏེ། འདི་དག་ནི་ཡིད་ཀྱི་རྣམ་པར་ཤེས་པ་ལས་བྱེ་བྲག་ཏུ་བསྟན་པའི་ཕྱིར་ཏེ། དེ་ནི་རང་གི་ལུས་དང༌། གཞན་གྱི་ཡུལ་དང༌། རང་གི་མཚན་ཉིད་དང་སྤྱི་དང་འབྲེལ་བ་ཅན་གྱི་མཚན་ཉིད་ལ་སོགས་པ་དང༌། དུས་གསུམ་དང༌། རྒྱུན་ལ་ཡང་དམིགས་པས་ན་དེ་ལས་རྣམ་པར་དབྱེ་བའི་ཕྱིར་ཚིག་དང་པོ་བཞི་སྨོས་ལ། ཡིད་ཀྱི་རྣམ་པར་ཤེས་པ་ནི་རང་དབང་སོགས་ཀྱིས་དགེ་བ་ལ་སོགས་པ་དང་ལས་ཀུན་ནས་སློང་བ་དང༌། སྡུག་པ་དང་མི་སྡུག་པའི་འབྲས་བུ་ཡོངས་སུ་འཛིན་པར་རིག་པ་ཡིན་ཀྱང་ལྔ་པོ་དག་ནི་རང་ལ་རྣམ་པར་རྟོག་པ་མེད་པའི་ཕྱིར་དེའི་རྗེས་སུ་འཇུག་པས་ཡིན་ཏེ་གཞན་གྱི་དབང་ཁོ་ནར་ཟད་དོ། །ཚུལ་དེས་ན་ཕྱི་མ་གཉིས་སྨོས་པ་ཡིན་ཏེ། དེ་ཉིད་ལས། འདི་ལྟར་མིག་ཀྱང་ཡོངས་སུ་མ་ཉམས་ལ་གཟུགས་ཀྱང་སྣང་བར་གྱུར་ཅིང༌། དེ་དང་༼༡༩༩༽འབྱུང་བ་ཡིད་ལ་བྱེད་པ་ཡང་ཉེ་བར་གནས་པར་གྱུར་ན་དེའི་ཕྱིར་དེ་ལས་སྐྱེས་པའི་མིག་གི་རྣམ་པར་ཤེས་པ་འབྱུང་བར་འགྱུར་རོ། །མིག་གི་རྣམ་པར་ཤེས་པ་ཇི་ལྟ་བ་བཞིན་དུ། རྣ་བ་དང༌། སྣ་དང༌། ལྕེ་དང༌། ལུས་ཀྱི་རྣམ་པར་ཤེས་པ་རྣམས་ལའང་དེ་བཞིན་དུ་བལྟ་བར་བྱའོ། །དེ་ལ་མིག་གི་རྣམ་པར་ཤེས་པ་བྱུང་བ་ན་ཉེ་བར་གནས་པ་ལས་བྱུང་བ་དང༌། ཚོལ་བ་དང༌། ངེས་པའི་སེམས་རྣམ་པ་གསུམ་རིམ་བཞིན་དུ་དམིགས་པར་འགྱུར་ཏེ། དེ་ལ་དང་པོ་ནི་མིག་གི་རྣམ་པར་ཤེས་པ་ཉིད་དོ། །གཉིས་པ་ནི་ཡིད་ཀྱི་རྣམ་པར་ཤེས་པའོ། །དེ་ལ་ངེས་པའི་སེམས་ཕན་ཆད་ནས་ཀུན་ནས་ཉོན་མོངས་པ་དང༌། རྣམ་པར་བྱང་བར་འགྱུར་བར་བལྟའོ། །དེ་ནས་དེའི་རྒྱུ་མཐུན་པའི་མིག་གི་རྣམ་པར་ཤེས་པ་ཡང་དགེ་བ་དང་མི་དགེ་བར་འབྱུང་བར་འགྱུར་ཏེ་རང་གི་རྟོག་པའི་དབང་གིས་ནི་མ་ཡིན་ནོ། །ཇི་སྲིད་དུ་ཡིད་དེ་གཞན་ལ་རྣམ་པར་གཡེངས་པར་མ་གྱུར་པ་དེ་སྲིད་དུ་ཡིད་ཀྱི་རྣམ་པར་ཤེས་པ་དང་མིག་གི་རྣམ་པར་ཤེས་པ་གཉི་ག་དགེ་བའམ་ཉོན་མོངས་པ་ཅན་དུ་འགྱུར་རོ། །མིག་གི་རྣམ་པར་ཤེས་པ་བྱུང་བ་ན། ཇི་ལྟ་བ་བཞིན་དུ་ལུས་ཀྱི་རྣམ་པར་ཤེས་པའི་བར་དུ་ཡང་དེ་བཞིན་དུ་རིག་པར་བྱའོ། །ཞེས་སོ།།

ལྔ་པ་དེ་དག་ཚོར་བ་གང་དང་མཚུངས་པར་ལྡན་ཚུལ་བཤད་པ་ནི།

གང་ཡང་མ་ཡིན་དེ་དབུ་མ། །ཞེས་པས་བསྟན་ཏེ།

གང་ཡང་མ་ཡིན་དེ་དབུ་མ།།

དེ་ལྟར་འཇུག་པའི་རྣམ་ཤེས་ལྔ་པོ་དེ་ཉིད་ཚོར་བ་བདེ་སྡུག་གང་དང་ཡང་ལྡན་པ་མ་ཡིན་པས་དེ་གཉིས་ཀྱི་ཕྱོགས་རིས་སུ་མ་ཆད་པའི་ཚོར་བ་དབུ་མའམ་བཏང་སྙོམས་དང་མཚུངས་པར་ལྡན་པ་ཡིན་ནོ། །གལ་ཏེ་གཞན་གྱི་དབང་དུ་གཟུང་ན་ནི། དེ་ཙམ་དུ་མ་ཟད་བདེ་བ་དང་སྡུག་བསྔལ་གཉིས་དང་དེ་གཉིས་གང་རུང་གིས་གཅིག་ཤོས་ཟིལ་གྱི་མནན་པ་རྣམས་དང་ཡང་ལྡན་ཏེ། དེ་དག་ཀུན་གཞིའི་རྣམ་པར་ཤེས་པའི་ཁམས་ལ་རྟེན་ནས། འདི་ལྟར་ཚུལ་བཞིན་ནམ་ཚུལ་བཞིན་མ་ཡིན་པ་སེམས་པར་བྱེད་པ་དང༌། རྗེས་སུ་རྟོགས་པར་བྱེད་པའམ། སེམས་མཉམ་པར་གཞག་པའམ། སེམས་མཉམ་པར་མ་བཞག་པ་གཅིག་གི་ལུས་ལ་ཚོར་བ་རྣམ་པ་དུ་མ་རྣམ་པ་མང་པོ་སྣ་ཚོགས་པ་འབྱུང་བའི་དབང་ཡིན་པའི་ཕྱིར། གཏན་ལ་དབབ་པ་བསྡུ་བ་ལས། ཀུན་གཞི་རྣམ་པར་ཤེས་པ་དེ་ཡང་རེས་འགའ་ནི་བདེ་བ་དང༌། སྡུག་བསྔལ་བ་དང༌། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་༼༢༠༠༽རྣམས་དང་འདྲེན་མར་འཇུག་སྟེ། འཇུག་པའི་རྣམ་པར་ཤེས་པ་ལ་བརྟེན་ནས། ཚོར་བ་གང་དག་ཡིན་པ་དེ་དག་དེ་ལ་བརྟེན་ནས་འབྱུང་བའི་ཕྱིར་རོ། །ཞེས་གསུངས་པ་ལ་སོགས་པ་ལྟར་ཏེ་ཞིབ་པར་རྟོགས་པར་བྱའོ།།

དྲུག་པ་དེ་ཡི་རང་གི་ངོ་བོའི་ཁྱད་པར་གྱི་ཆོས་བསྟན་པ་ནི།

ཀུན་ཏུ་མི་ཆོད་རང་བཞིན་བླུན། །ཞེས་པས་བསྟན་ཏེ།

ཀུན་ཏུ་མི་ཆོད་རང་བཞིན་བླུན།།

རང་གི་ངོ་བོ་ནི་ཀུན་གཞི་ལྟར་ཡུལ་ཀུན་ལ་དམིགས་མི་ནུས་ཤིང་ཡིད་ཤེས་ལྟར་ཡུལ་གྱི་བྱེ་བྲག་ཐམས་ཅད་གཅོད་མི་ནུས་པས་དུས་ཀུན་ཏུ་དོན་གྱི་ཁྱད་པར་རྣམ་པར་འབྱེད་དེ་མི་འཆོས་པའམ་མི་ཆོད་པར་རང་ཡུལ་ཙམ་འཛིན་ཏེ་རང་བཞིན་བླུན་པས་རྟོག་མེད་ཀྱི་ཤེས་པ་ཉིད་དེ། ལང་ཀར་གཤེགས་པ་ལས། སེམས་ནི་གར་མཁན་བཞིན་དུ་གནས། །ཡིད་ནི་བཞད་གད་པ་འདྲ་སྟེ། །ལྔ་དང་བཅས་པའི་རྣམ་པར་ཤེས། །སྣང་བ་ཚོན་དང་འདྲ་བར་རྟོག །ཅེས་དང༌། རྒྱན་སྟུག་པོ་བཀོད་པ་ལས། རྩྭ་དང་ཤིང་དང་གྱོ་མོ་དག །སྒྱུ་མའི་མཁན་པོས་རྒྱུར་བྱས་ཏེ། །སྔགས་ཀྱིས་ཅི་དང་ཅི་འདོད་པར། །གཟུགས་ཀྱི་དངོས་ནི་རབ་ཏུ་བྱེད། །གཟུགས་དང་སྣང་བ་ཡིད་བྱེད་དང༌། །སྲེད་དང་མིག་རྣམས་རྒྱུར་བྱས་ཤིང༌། །མིག་གི་རྣམ་ཤེས་སྒྱུ་མ་བཞིན། །སྨིག་རྒྱུ་བཞིན་དུ་དེ་གཡོའོ། །གང་གི་ཡུལ་དུའང་འོང་བ་མེད། །ཡུལ་གཞན་དག་ཏུའང་འགྲོ་བ་མིན། །འདི་ལྟའི་རྣམ་ཤེས་འབྱུང་བ་ལ། །ཡོད་དང་མེད་པར་བརྟགས་མི་བྱ། །ཞེས་སོ།།

བདུན་པ་དེ་དག་ལྡོག་པའི་དུས་བསྟན་ཏེ་མཚན་ཉིད་ངོས་གཟུང་བ་ནི།

གསུམ་གསུམ་གཉིས་དང༌། ཞེས་པ་ནས། ཡོངས་སུ་རྫོགས་པ་ཡིན། །ཞེས་པའི་བར་གྱིས་བསྟན་ཏེ།

གསུམ་གསུམ་གཉིས་དང་རྐྱེན་གསུམ་འདུས། །འདོད་ཁམས་ཡོངས་སུ་རྗོགས་པ་ཡིན།།

ལྡོག་པའི་དུས་ནི་དགུ་སྟེ། གཉིད་ལོག་པ་དང༌། བརྒྱལ་བ་དང༌། འབོགས་པའི་དུས་ཏེ་གསུམ་དང༌། ལམ་དག་པའི་དུས་དང༌། མཉམ་པར་བཞག་པའི་དུས་དང༌། ངེས་པ་རྙེད་པའི་དུས་གསུམ་སྟེ། དེ་ལྟར་གསུམ་ཕྲག་གཉིས་དང༌། རྐྱེན་འོན་ལོང་ལ་སོགས་པ་དབང་པོ་ཉམས་པ་དང༌། ཡུལ་དང་མ་འཕྲད་པ་དང༌། དབང་པོ་མ་ཚང་བ་གསུམ་སྟེ་དུས་དེ་དག་རྣམས་སུ་ལྡོག་པ་ཉིད་དོ། །མཐར་ཐུག་སངས་རྒྱས་ཀྱི་སར་ནི་འདི་ཉིད་བྱ་བ་གྲུབ་པའི་ཡེ་ཤེས་དང་ཡིད་ཀྱི་རྣམ་ཤེས་ནི་སོ་སོར་རྟོག་པའི་ཡེ་ཤེས་སུ་གནས་འགྱུར་བའོ། །དེ་ལྟར་སྒོ་ལྔའི་རྣམ་ཤེས་ལྔ་ནི་འདོད་པའི་ཡོན་ཏན་ལྔ་དང་མི་འབྲལ་བས་འདོད་ཁམས་དང་ཆ་མཐུན་པའི་ཕྱིར་ཁམས་གསུམ་རྒྱུད་ལ་ཚང་བའི་དབང་༼༢༠༡༽སྟེ། དེས་ན་འདིས་འདོད་ཁམས་ཡོངས་སུ་རྫོགས་པ་ཡིན་ཏེ། དེ་ནི་སྒོ་ལྔའི་དོན་མཐར་ཐུག་པའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། འགྲོལ་བར་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་མདོ་བཞི་ཞེས་བྱ་སྟེ། དེས་དེ་ཡོངས་ཡོངས་སུ་དགྲོལ་བར་ཤེས་པར་བྱའོ།།

ལང་ཀའི་བདག་པོ་ཞེས་བོས་ནས། རྒྱས་པར་བསྟན་པ་དེ་དག་ནི་མདོ་བཞི་ཡི་དོན་རྣམ་པར་འགྲེལ་བ་ཞེས་བྱ་སྟེ། ཚུལ་དེས་མདོ་བཞི་པོ་དེ་དག་རྩ་བ་ཆེན་པོ་ལ་ཡོངས་སུ་འགྲེལ་བར་བྱེད་དེ། དོན་ཡང་དག་པར་འགྲོལ་བར་ཤེས་པར་བྱ་སྟེ་མུན་པའི་ངོ་བོ་གསང་བའི་དབྱིངས་སུ་ཤེས་ནས་མ་འདྲེས་ཡོངས་རྫོགས་ལ་འཇུག་པར་བྱའོ། །དེ་བས་ན་ལང་ཀར་གཤེགས་པ་རིན་པོ་ཆེའི་མདོ་ལས།

སེམས་ནི་གར་མཁན་བཞིན་དུ་གནས། །ཡིད་ནི་རམ་བུ་ཐོགས་པ་འདྲ། །རྣམ་ཤེས་ལྔ་ནི་གྲོགས་ལྟ་བུ། །རྣམ་རྟོག་གར་རྣམས་རབ་ཏུ་ལྟ། །ཞེས་དང༌། རྒྱན་སྟུག་པོ་བཀོད་པ་ལས། ཡིད་དང་དབང་པོར་ལྡན་པ་ནི། །རྣམ་ཤེས་ལྔ་ཡི་རྒྱུ་ཡིན་ཏེ། །རྟག་ཏུ་ཡང་དག་ཡེ་ཤེས་ཀྱིས། །འཇིག་རྟེན་རྒྱུ་ལ་རྣམ་པར་ལྟ། །དེ་ལྟར་བྱེད་དང་བྱ་བ་མེད། །དེ་བཞིན་ཉིད་འདི་རྣམ་གཞན་མིན། །ཐམས་ཅད་ཆོས་ཀྱི་དེ་བཞིན་ཉིད། །ཕན་ཚུན་སྟོབས་ཀྱིས་འབྱུང་བ་སྟེ། །རྣལ་འབྱོར་ཅན་རྣམས་དེ་ལྟར་ལྟ། །དེ་བཞིན་ཉིད་དུ་གསལ་བར་མཐོང༌། །ཞེས་གསུངས་པ་ལྟར་མདོ་སྔགས་ཀྱི་དགོངས་དོན་ཟབ་མོ་ལ་ངེས་པ་རྙེད་པར་བྱའོ།།

གསུམ་པ་༼མུན་པའི་རྩ་བའམ་༽འབྱིན་པའི་རྩ་བ་གསུམ་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི། ཞེས་པ་ནས། ཐམས་ཅད་པའི་རྩ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་རྩ་བ་གསུམ་ཞེ་ན། འདི་ལྟ་སྟེ། དངོས་པོའི་རྩ་བ་དང་།

བརྗོད་པའི་རྩ་དང་། ཐམས་ཅད་པའི་རྩ་བའོ།།

ཡན་ལག་གསུམ་པ་གང་སྙམ་པ་ལ། ལང་ཀའི་བདག་པོ་ཞེས་སྡུད་པ་པོ་ལ་བོས་ནས། དེ་ལ་རྩ་བ་གསུམ་གང་ཞེ་ན། འདི་ལྟ་སྟེ། སྣང་བ་དངོས་པོའི་རྩ་བ་ལུས་དང༌། སྒྲ་གྲགས་བརྗོད་པའི་རྩ་བ་ངག་དང༌། ཆོས་ཐམས་ཅད་པའི་རྩ་བ་སེམས་སམ་ཡིད་དེ་རྣམ་གྲངས་གསུམ་དུ་ཉེ་བར་བསྟན་པའོ།།

གཉིས་པ་རྒྱས་པར་བཤད་པ༌ནི།

ལང་ཀའི། ཞེས་པ་ནས། ཅིར་ཡང་རིག་པ་ཉིད་དོ། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ་དེ་ལ་དངོས་པོའི་རྩ་བ་ནི། ཅི་ཡང་མེད་པ ་ལས་ཅིར་ཡང་སྣང་བའོ། །བརྗོད་པའི་རྩ་བ་ནི། ཅི་ཡང་མེད་པ་ལས་ཅིར་ཡང་འགྱུར་བའོ། །ཐམས་ཅད་པའི་རྩ་བ་ནི། གང་ཅི་ཡང་ མེད་པ་ལས་ཅིར་ཡང་རིག་པ་ཉིད་དོ།།

ལང་ཀའི་བདག ་པོ་ཞེས་བོས་ནས། དེ་ལ་དངོས་པོའི་རྩ་བ་ལུས་ནི། ངོ་བོ་ཆོས་ཉིད་ཀྱི་ངང་ལ་གང་ཅི་ཡང་གྲུབ་པ་མེད་པ་ལས། འཁྲུལ་པ་དང་ལམ་པའི་ངོ་ལ་བཟང་ངན་དང་ཆེ་༼༢༠༢༽ཆུང་སྣ་ཚོགས་པར་ཅིར་ཡང་སྣང་བས་ན་ལས་དང་ངོ་བོ་གཉིས་ཀྱིས་འཁོར་འདས་ཀྱི་སྣང་བ་གཉིས་སུ་ཤར་བའོ། །དེ་བཞིན་དུ་བརྗོད་པའི་རྩ་བ་དག་ནི། སྒྲའི་གཞི་ངག་གི་ངོ་བོ་ཅི་ཡང་གྲུབ་པ་མེད་པའི་རང་བཞིན་མཉམ་པ་ལས། ཇི་ལྟར་ཡང་བརྗོད་པའི་སྒྲ་མི་མཐུན་པར་གྱུར་པས་ཅིར་ཡང་འགྱུར་ཞིང་འབྱུང་བ་སྟེ་སྣང་བ་གཉིས་སུ་གྲགས་པ་སྣ་ཚོགས་པའོ། །དེ་ལྟར་ཆོས་ཐམས་ཅད་པའི་རྩ་བའམ་རྒྱུར་གྱུར་པའི་སེམས་སམ་ཡིད་ནི། གཉུག་མ་ཇི་བཞིན་པའི་ངོ་བོ་གང་ཅི་ཡང་བསྟན་དུ་མེད་པ་ལས་ཅིར་ཡང་མ་འགག་པར༌གསལ་ཏེ་ཐམས་ཅད་ཤེས་ཤིང་རིག་པ་ཉིད་དོ།།

དེས་ན་དོན་གྱི་ངོ་བོ་ནི། ཡེ་ཤེས་རྫོགས་པ་ལས། རིག་པ་མཐའ་མེད་དཀྱིལ་འཁོར་ལ། །ལུས་ཀྱིས་བརྩལ་མེད་ཆོས་སྐུར་གསལ། །རང་སྣང་རིག་པའི་འོད་གསལ་ལ། །ངག་གིས་བསྩལ་མེད་རིག་པའི་གསུང༌། མི་འགྱུར་ཀུན་བཟང་ཡེ་ཤེས་ལ། །ཐུགས་ཀྱིས་བསྩལ་མེད་བསམ་དང་བྲལ། །སྣང་བ་གཟུགས་ཀྱི་རྣམ་པ་ཀུན། །མཉམ་ཉིད་ཆོས་ཀྱི་སྐུར་རུ་ཐིམ། །གྲགས་པ་སྒྲ་ཡི་རྣམ་པ་ཀུན། །མཚོན་པའི་རང་རྟགས་གསུང་དུ་ཐིམ། །ཤེས་རིག་མ་ལུས་ཇི་སྙེད་པ། །ཐུགས་ཀྱི་མཚོན་པའི་རང་རྟགས་ཏེ། །ཡེ་ཤེས་རིག་པའི་ཐུགས་སུ་ཐིམ། །རིག་པ་འགྱུར་མེད་རྡོ་རྗེ་ལྟར། །དབྱེར་མེད་ཡེ་ཤེས་བྱ་རྩོལ་བྲལ། །ཞེས་གསུངས་པ་ལྟར་ལ་བཟླ་བར་བྱ་ཞིང༌། དེ་ཡང་རྒྱལ་བའི་གསུངས་པའི་ལུང་ཚད་མ་དང༌། བླ་མ་མཁས་པའི་མན་ངག་ཚད་མ་དང༌། རང་གིས་སྒོམས་པའི་ཉམས་མྱོང་ཚད་མ་གསུམ་གྱིས་ཡིད་ཆེས་ཏེ་རིན་པོ་ཆེ་གསེར་གླིང་གི་དགོངས་པ་ལ་བསླབ་པར་བྱ་སྟེ། ཡེ་ཤེས་གསང་བ་སྒྲོན་མ་རིན་པོ་ཆེ་མན་ངག་གི་རྒྱུད་ལས། ཡིན་པ་གསུམ་གྱིས་ཐག་བཅད་དེ། །སྐུ་གསུང་ཐུགས་ལ་ཡིད་ཆེས་སྐྱེ། །རིན་པོ་ཆེ་ཡི་གསེར་གླིང་དུ། །ཕྱིན་པས་ཐམས་ཅད་གསེར་དུ་སྣང༌། །འཁོར་འདས་བཟང་ངན་མེད་པར་ཤེས། །ལྕེ་སྤྱང་ཨེ་ནའི་མིག་བཞིན་དུ། །གཉིས་སུ་མེད་པར་ཐག་ཆོད་དོ། །ཞེས་གསུངས་པ་སོགས་རྒྱས་པར་རྫོགས་པ་ཆེན་པོའི་རྒྱུད་དང་དགོངས་འགྲེལ་རྣམས་ལས་ཤེས་པར་བྱའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། འབྱིན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་རྩ་བ་སྟེ། དེས་ཐམས་ཅད་ངེས་པར་འབྱིན་པའོ།།

ལང་ཀའི་བདག་པོ། ཞེས་བོས་ནས། ཇི་སྐད་བཤད་པ་གསུམ་༼༢༠༣༽པོ་དེ་དག་ནི་ཐམས་ཅད་ཀྱི་གཞིར་གྱུར་པས་རྩ་བ་ཞེས་བྱ་སྟེ། དེས་སྒོ་ནས་ཕྱི་ནང་ཐམས་ཅད་གསལ་བར་སྟོན་ཏེ་ངེས་པར་འབྱིན་པར་བྱེད་པའོ། །ཞེས་ངོ་བོ་བསྟན་པ་ནི་ངེས་ཚིག་ཏུ་ཡང་འགྱུར་རོ། །འོ་ན་ཡིད་ཀྱི་ཤེས་པ་ནི། ཡན་ལག་དྲུག་དང༌། མདོ་བཞི་དང༌། རྩ་བ་གསུམ་གྱི་སྐབས་ཀུན་ཏུ་བྱུང་བས་བལྡབས་པར་གྱུར་ཏེ་དེ་བས་མ་ངེས་སོ་ཞེ་ན། དེ་དག་ཀུན་ཀྱང་ཡིད་ཤེས་ཀྱི་རྩལ་ཀ་ཡིན་པས་འགལ་བ་མེད་དེ། ཡན་ལག་དྲུག་ནི་ཡིད་ཤེས་ཀྱི་མ་འགག་པའི་རྩལ་ཅིར་ཡང་སྣང་བའི་སྒོ་ཡིན་ལ། ཀུན་གཞི་ནི་ཡིད་ཤེས་ཀྱི་རང་བཞིན་དང༌། ཉོན་ཡིད་ནི་ཡིད་ཤེས་ཀྱི་བདག་པོའི་རྐྱེན་ནམ་འཛིན་པའི་ཆ་ཡིན་ཞིང༌། སྒོ་ལྔ་ནི་ཡིད་ཤེས་གསལ་བའི་ལམ་ལྟ་བུའོ། །རྩ་བ་གསུམ་ནི་ཡིད་ཤེས་ཀྱི་གཞི་ཡིན་ཏེ་དེ་བས་ན་མ་རྟོགས་པའི་དུས་སུ་དེ་ལྟར་སྣང་ཡང༌། རྟོགས་ན་རང་སྣང་རིག་པའི་ཡེ་ཤེས་ཡིན་ཏེ། ཡེ་ཤེས་རྫོགས་པ་ལས། འཁོར་བའི་ཤེས་པ་གློ་བུར་བ། །རང་བཞིན་མ་ཡིན་རྐྱེན་གྱིས་སྣང༌། །བརྗོད་པའི་བརྙན་མ་ཉིད་དང་མཚུངས། །རྣམ་པར་རྟོག་པའི་སེམས་ཉིད་ནི། །གང་ལྟར་བརྟགས་པ་གཞན་དུ་མཐོང༌། །དུ་མ་རིམས་གྱི་རྟོག་པ་དག །སྒོ་རྣམས་ཀུན་ཏུ་རྒྱུ་བ་སྟེ། །མི་གཅིག་སྐར་ཁུང་དུ་མ་བཞིན། །དོན་གྱི་རྣམ་བྱང་དུ་མ་མིན། །ཞེས་དང༌། སྣ་ཚོགས་འཁོར་བའི་རྟོག་པ་དང༌། །རྫོགས་ཉིད་ཡེ་ཤེས་རང་བཞིན་གཅིག །རྫོགས་པའི་ཡེ་ཤེས་རྟོག་པ་ཉིད། །རྟོག་པ་གང་ཡིན་ཡེ་ཤེས་ཉིད། །ཐ་དད་ཡོད་པ་མ་ཡིན་ཏེ། །ཡེ་ཤེས་རྫོགས་པའི་རང་བཞིན་ནི། །ཀུན་སྤངས་ཀུན་གྱི་དངོས་གཞི་ཅན། །འཛིན་པ་དུ་མའི་རྟོག་པ་འདི། །བྱང་ཆུབ་སེམས་སུ་བརྗོད་པ་ཡིན། །ཞེས་དང༌། རྩོལ་བའི་སེམས་བྲལ་མངོན་སངས་རྒྱས། །རྒྱུ་འབྲས་གཉིས་མེད་འགྱུར་པ་བྲལ། །རྣམ་བྱང་ཤེས་པ་རང་གནས་པ། །བྱེད་པ་ཉིད་ཀྱིས་མཐོང་བར་གྱིས། །ཤེས་པའི་རྣམ་གྲངས་གང་སྐྱེས་ཀྱང༌། །རྣམ་བྱང་ཉིད་ལས་གཞན་མ་ཡིན། །བསམ་གྱིས་མི་ཁྱབ་དུས་ན་ཤེས། །ཞེས་གསུངས་པ་སོགས་ཤིན་ཏུ་མང་བས་ཟབ་གསང་སྙིང་པོའི་མན་ངག་གི་གནད་ལ་མཁས་པ་ནི་ཤིན་ཏུ་གཅེས་སོ།།

གསུམ་པ་རྒྱུད་ལུང་མན་ངག་གི་དཔེས་མུན་པའི་ཐེ་ཚོམ་བསལ་བ་ལ་གཉིས་ཏེ། ཐེ་ཚོམ་དུ་རྟོག་ཚུལ་བསྟན་པ། དེའི་རྟོག་པའི་ཐེ་ཚོམ་བསལ་བའོ། །དང་པོ་ནི།

ལང་ཀའི། ཞེས་པ་ནས། འདི་ལ་རྣམ་རྟོག་པ། །༼༢༠༤༽ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི། འདི་ལྟ་སྟེ། ཆོས་ཀྱི་རྒྱལ་པོས་གང་གསུངས་པ། །ཐུགས་དང་ཞལ་དང་ཞུས་ལན་གསུམ། །དོན་དམ་ལུང་དང་རྒྱུད་ཅེས་པ། །གང་འདིར་གསུམ་དུ་གྲགས་པ་ལས། །གང་དག་འདི་ལ་རྣམ་རྟོག་པ།།

ལང་ཀའི་བདག་པོ་ཞེས་སྡུད་པ་པོ་ལ་བོས་ནས། ལམ་གྱི་དུས་ན་བཤད་པའི་ཡན་ལག་དྲུག་དང་མདོ་བཞི་མཚན་མར་བསྟན་ཏེ་རྩ་བ་གསུམ་ངོས་གཟུང་བ་དེ་དག་ནི་དེ་ཁོ་ན་ཉིད་དུ་ལམ་དངོས་ཀྱི་ཡན་ལག་དང་མདོ་དང་རྩ་བ་གསུམ་དུ་བསྟན་པའི་ཕྱིར་བཀའ་སྩལ་པ། དེ་ལྟར་ལོག་པའི་ཤེས་པ་ཚོགས་དྲུག་དང་རྣམ་གྲངས་བཞི་དང་སྒོ་གསུམ་རྣམས་ལམ་གྱི་རྩ་བར་ཉེ་བར་སྟོན་པ་ནི་འདི་ལྟ་སྟེ། ཞེས་གླག་ཁྲ་མོ་གཟན་ལ་འཇུམས་པ་ལྟར་གཏར་ཀ་གེགས་སེལ་གྱི་ཚུལ་དུ། སྟོན་པ་རིགས་ཀྱི་བདག་པོ་ཆོས་ཀྱི་རྒྱལ་པོ་ཆེན་པོས་ཆོས་ཀྱི་དངོས་པོ་གང་གསུངས་ཏེ་བཀའ་སྩལ་པ་ཟབ་མོ་དག་ནི། ཐུགས་ཀྱི་དགོངས་པ་ལ་བཞག་པ་དང་ཞལ་དུ་ཕྱུང་སྟེ་གསུངས་པ་དང༌། དེས་མགོ་བ་ལ་ཞུས་ལན་དུ་འཕྲོས་ཏེ་འདྲེན་མར་གསུངས་པ་གསུམ་སྟེ། དེ་དག་གང་ཡིན་ཞེ་ན། དང་པོ་ལ་དོན་དམ་པའམ་མན་ངག་ཅེས་བྱ་བ་དང༌། གཉིས་པ་ལ་ལུང་ཞེས་བྱ་བ་དང༌། གསུམ་པ་ལ་རྒྱུད་ཅེས་བྱ་བ་ཡིན་པར་བསྟན་པས་ན་གང་འདིར་དེ་ལྟར་ངོ་བོ་གསུམ་དུ་གྲགས་པ་ལ། གང་ཟག་གང་དག་གཞི་འདི་ལ་རྣམ་པར་རྟོག་སྟེ་ལྡེའུ་མིག་གསུམ་རྒྱུད་ལུང་མན་ངག་གསུམ་དང་མཐུན་པ་གང་དེ་ཇི་ག་ལྟར་ཡིན་སྙམ་ནས་ཐེ་ཚོམ་ཟོས་ནས་དོགས་པ་སྐྱེ་བ་ལ། ཞེས་པའི་དོན་ནོ།།

གཉིས་པ་དེའི་རྟོག་པའི་ཐེ་ཚོམ་བསལ་བ་ལ་གཉིས་ཏེ། གནས་སྐབས་ཀྱིས་བརྟག་པ་བསྟན་ཏེ་ཆོས་མཐུན་ངོས་གཟུང་བ། མཚོན་ཚུལ་གྱིས་བརྟག་པ་བསྟན་ཏེ་མཚན་ཉིད་ངེས་པར་བྱ་བའོ། །དང་པོ་ནི།

ཆོས་ཀྱི་རྒྱལ་པོའི། ཞེས་པ་ནས། རྒྱལ་པོའི་བཀའ་རྒྱུད་ཡིན། །ཞེས་པའི་བར་གྱིས་བསྟན་ཏེ།

ཆོས་ཀྱི་རྒྱལ་པོ་གསུང་གཅིག་ལ། །རྒྱུད་དང་ལུང་དང་དོན་དམ་ཞེས། །གསུམ་དུ་སྣང་བ་འདི་ཇི་ལྟ། །མཉམ་དུ་རྟོགས་པ་དེ་གང་དག །ཉིད་ཀྱིས་མཁྱེན་ཏེ་དེ་གསལ་བར། །དགོངས་ཏེ་གསུམ་ཉིད་རྣམ་པར་གསུངས།།

གང་དེ་སྐབས་དང་སྐབས་འཕྲོས་པའོ། །སྐྱེས་བུའི་ཐུགས་ལ་གང་གནས་པ། །ཞལ་དུ་མ་བྱུང་དོན་དམ་ཉིད།།

གསུང་གི་འགྱུར་བས་དེ་མཚོན་ན། །སྐྱེས་བུ་རྒྱལ་པོའི་བཀའ་ལུང་ཡིན། །

ཞུས་ལན་འཕྲ་མིན་འཕེལ་རྒྱས་ན། །སྐྱེས་བུ་རྒྱལ་པོའི་བཀའ་རྒྱུད་ཡིན།།

དེ་ལྟར་ཆོས་ཀྱི་རྒྱལ་པོ་སྟོན་པ་ཀུན་ཏུ་བཟང་པོའི་གསུང་ཚད་མ་གསང་སྔགས་ཟབ་མོའི་ངོ་བོ་གཅིག་ལ་ཡང་རྒྱུད་དང་ལུང་དང་དོན་དམ་མམ་མན་ངག་ཅེས་བྱ་བ་གསུམ་དུ་སྣང་བ་འདི་ཉིད་ཇི་ལྟ་བུ་ཡིན་སྙམ་དུ་རྣམ་པར་རྟོག་སྟེ་ཐེ་ཚོམ་ཟ་བ་དེ་གང་དག་རྣམས་སྟོན་པ་ཉིད་ཀྱིས་མཁྱེན་ཏེ་ཐེ་ཚོམ་སྐྱེས་པ་དེ་ཉིད་བསལ་བར་བྱ་བའི་ཕྱིར་ཆེད་དུ་དགོངས་ཏེ་ཐབས་གསུམ་ཉིད་རྣམ་པར་གསུངས་པ་གང་ཞེ་ན། འདི་དག་རང་རྒྱུད་མ་ཡིན་པར་གང་དེ་ཐུགས་ལ་མངའ་བའི་སྐབས་སུ་མན་ངག་དང་ཞལ་དུ་ཕྱུང་བའི་སྐབས་སུ་ལུང་དང༌། དེའི་སྐབས་ལ་ཞུས་ལན་དུ་གཅིག་ལས་དུ་མར་འཕྲོས་པ་ནི་རྒྱུད་དུ་བསྟན་པའོ། །དེ་དག་༼༢༠༥༽སོ་སོ་ནས་བསྟན་པའི་ཕྱིར། དེ་ཡང་སྟོན་པ་འཆད་པའི་སྐྱེས་བུའི་ཉིད་ཀྱི་ཐུགས་ཀྱི་དགོངས་པ་ལ་དོན་གྱི་མཆོག་གང་ཡིན་པ་མ་འདྲེས་ལ་ཡོངས་སུ་རྫོགས་པར་གནས་ཤིང་མངའ་བ་གང༌། དངོས་སུ་བརྗོད་པ་དང་བྲལ་བས་ཞལ་དུ་མ་བྱུང་བ་དེ་ནི་དོན་དམ་པའི་མན་ངག་ཟབ་མོ་ཉིད་ཡིན་ལ། གལ་ཏེ་ཚུལ་གང་དེ་ཞལ་ནས་གསུངས་པའི་བརྡ་ཚིག་གི་འགྱུར་བ་ཇི་ལྟར་ཡང་བརྗོད་པས་དོན་གྱི་དངོས་པོ་དེ་ཉིད་སྒྲོ་སྐུར་མེད་པར་ཡང་དག་པར་མཚོན་ན་ནི། སྟོན་པ་སྐྱེས་བུ་རྒྱལ་པོའི་བཀའ་ལུང་གི་ངོ་བོ་དགོངས་པ་ཇི་བཞིན་པ་ཉིད་གསུང་གིས་མཚོན་པ་ཆེན་པོ་ཡིན་ཞིང༌། དོན་དེ་ཉིད་འཁོར་གྱིས་མགོ་བས་སྡུད་པ་པོས་ཞུས་པ་དང༌། སྟོན་པས་ལན་བཀའ་སྩལ་པ་རྣམས་སྤེལ་མར་བྱུང་བས་ཕྲ་མེན་གྱི་ཚུལ་དུ་ཚིག་ཏུ་འཕེལ་ཞིང་དོན་རྒྱས་པར་སྟོན་པའི་ཐབས་སུ་གྱུར་ན་ནི། སྟོན་པ་སྐྱེས་བུ་རྒྱལ་པོའི་བཀའ་རྒྱུད་ཀྱི་ངོ་བོ་ཡིན་པས་ཚུལ་དེ་ཡིས་གསང་བའི་དོན་ལ་ངེས་པ་རྙེད་པ་སྟེ། རྫོགས་པ་ཆེན་པོ་འཁོར་བ་རྩད་གཅོད་ཀྱི་རྒྱུད་ལས། ཡེ་ནས་གནས་པའི་རང་བྱུང་དེ། །ལུང་ལྡན་རྐྱེན་གྱིས་རྟོགས་པའི་ཕྱིར། །རང་བྱུང་ཡེ་ཤེས་འཛོམ་པ་ནི། །མར་གྱི་ཡང་ཞུན་ལྟ་བུར་གསུངས། །ཞེས་དང༌། ངེས་དོན་འདུས་པ་ལྟ་བའི་སྙིང་པོ་ལས། ཡང་དག་སངས་རྒྱས་རྣམས་གསུངས་པའི། །ངེས་པའི་ལུང་ལ་ཡིད་ཆེས་པས། །ཐེ་ཚོམ་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །ཞེས་སོགས་གསུངས་སོ། །དེ་བས་ན་ཡན་ལག་དྲུག་རྒྱུད་དང་མཐུན་པ་ཡིན་ཏེ། སྔར་བསྟན་པའི་ཡན་ལག་དྲུག་ལ་ཡང་ཡུལ་དྲུག་གི་ཆོས་རྩ་བ་དང་ཡན་ལག་ཏུ་བཅས་ཏེ་གཟུགས་བཅོ་ལྔ། ཚོར་བ་བཅོ་བརྒྱད། འདུ་ཤེས་གསུམ། འདུ་བྱེད་ལྔ་བཅུ་རྩ་གཅིག་ལ་སོགས་པའི་ཡན་ལག་སྣ་ཚོགས་སུ་འབྲེལ་བ་རྣམས་ཀྱི་རང་བཞིན་མ་རྟོགས་པས་འཁོར་བར་སྣང་ལ། དེའི་གཉེན་པོ་ལམ་གྱི་ཆོས་ནི། རྒྱུད་ཀྱི་ཕུན་སུམ་ཚོགས་པ་དྲུག་དང༌། ཞུས་ལན་ཕྲ་མེན་དུ་འཕེལ་ཞིང་རྒྱས་པ་ཉིད་ཀྱིས་འཁོར་བའི་ཆོས་སུ་སྣང་བ་རྣམས་གཞི་ལམ་འབྲས་བུ་གསུམ་དུ་གཏན་ལ་འབེབས་པར་བྱེད་པའོ། །མདོ་བཞི་ལུང་དང་ཆོས་མཐུན་ཏེ། གཞིའི་མདོ་ཀུན་གཞི་བག་ཆགས་དང་བཅས་པ་ལས། དམིགས་པ་དང་སྣང་བ་དང་འཇུག་པ་རྣམས་རྩལ་དུ་སྣང་ལ། དེ་ཡང་དབྱིངས་དང་ཡེ་ཤེས་སུ་གཏན་ལ་ཕབས་༼༢༠༦༽ཏེ་ཀུན་གཞིའི་དོན་མཐོང་བའི་ཐབས་སུ་གྱུར་པས་ཡང་དག་པའི་ལུང་ཡིན་ནོ། །རྩ་བ་གསུམ་མན་ངག་དང་མཐུན་ཏེ། མ་རྟོགས་ན་འཁོར་བའི་ཆོས་སུ་སྣང་ལ། རྟོགས་ན་མྱ་ངན་ལས་འདས་པའི་ཆོས་སུ་སྣང་བའི་རང་རྩལ་ལུས་ངག་ཡིད་གསུམ་ཀྱང་ངོ་བོ་བྱང་ཆུབ་ཀྱི་སེམས་སུ་འདུས་པས་སོ། །ཡང་ན་འདི་ཉིད་རྩ་བ་གསུམ་གྱི་གེགས་བསལ་དུ་གསུངས་པ་ལྟར་ན། ལུས་སྣང་བ་རྒྱུད་དང་ཆོས་མཐུན། ངག་བརྗོད་པ་ལུང་དང་ཆོས་མཐུན། སེམས་ཅི་ཡང་མིན་པ་ལས་ཅིར་ཡང་འཆར་བ་མན་ངག་དང་ཆོས་མཐུན་པར་བརྩིས་ཏེ་བསྟན་པ་ཡིན་པས་གཞུང་དུ་ཀུན་གཞི་གཟུགས་མེད་ཁམས་དང༌། ཉོན་ཡིད་གཟུགས་ཁམས་དང༌། ཚོགས་དྲུག་འདོད་ཁམས་དང་ཆོས་མཐུན་སྦྱར་ཏེ་བསྟན་པ་བཞིན་ནོ།།

གཉིས་པ་མཚོན་ཚུལ་གྱིས་བརྟག་པ་བསྟན་ཏེ་མཚན་ཉིད་ངེས་པར་བྱ་བ་ནི།

ཐབས་ཆེ་ཚེགས་ཆུང༌། ཞེས་པ་ནས། གསང་བ་མཆོག་དེས་བཤད། །ཅེས་པའི་བར་གྱིས་བསྟན་ཏེ།

ཐབས་ཆེ་ཚེགས་ཆུང་དོན་དཔག་མེད། །བྱ་སླ་དཔག་དཀའ་མན་ངག་གམ། །དེ་ཉིད་ངེས་པས་དེ་ཁོ་ན། །མ་སླད་ཇི་བཞིན་བཅད་པ་ལུང་། །བཅས་གཞི་གཏམ་རྒྱུད་ལས་རྒྱུད་དང་། །རྟོག་ཆེན་ཡན་ལག་འབྲེལ་བཅས་རྒྱུད། །གསུམ་དུ་སྣང་ལ་གཅིག་ཏུ་ཟད། །དབེྱར་མེད་ཚུལ་གཅིག་རང་བཞིན་ལ། །རྩལ་དང་རྣམ་པར་སྣང་བ་དག།

ཅིག་སྟེ་རྣམ་པ་ཡོངས་ཀྱི་མེད། །དེ་སྐད་གསང་བ་མཆོག་དེས་བཤད།།

ངོ་བོའི་རྗེས་སུ་མཚན་ཉིད་གསལ་བར་བསྟན་ཏེ་ངེས་ཚིགས་བརྗོད་པ་ནི་གང་སྙམ་པ་ལ། མན་ངག་ཅེས་གསུངས་པ་ནི། སྐད་ཅིག་གིས་ཀྱང་འབྲས་བུ་ལ་སྦྱོར་བ་དང༌། ཉོན་མོངས་པ་ལམ་དུ་ཤར་བ་དང་། བྱ་བརྩལ་གྱིས་མ་སྒྲུབས་པ་ཉིད་འབྲས་བུའི་སྟོགས་སུ་གྱུར་པས་བརྩལ་བ་མེད་པར་འགྲུབ་པའི་ཐབས་ཤིན་ཏུ་ཆེ་བ་དང༌། འོག་མ་ལ་ལྟོས་ན་འབད་པའི་གྲོན་ཚེགས་ཆུང་བས་གྲུབ་ཐག་མཆོག་ཏུ་ཉེ་བ་དང༌། རྟོགས་པ་དོན་གྱི་ངོ་བོ་བློས་དཔག་ཏུ་མེད་པས་རང་བྱུང་གི་ཡེ་ཤེས་དེ་ཁོ་ན་ཉིད་ཇི་བཞིན་པར་ངེས་པ་དང༌། གྲངས་མེད་གསུམ་ལ་སོགས་པའི་འོག་མའི་བྱ་བརྩལ་ལས་འདས་པས་བྱ་བ་མེད་པའི་རྣལ་འབྱོར་ལ་རྩོལ་མཐའི་དཀའ་བ་མེད་པར་ཤིན་ཏུ་སླ་བ་དང༌། དོན་གྱི་རང་བཞིན་མཆོག་ཏུ་ཟབ་པའི་ཕྱིར་ས་བཅུ་པ་མན་ཆད་ཀྱིས་ཀྱང་དཔག་པར་དཀའ་བའི་ཐུགས་ཀྱི་དགོངས་པར་གནས་པ་སྟེ། དེ་ལྟར་ཆོས་ལྔའི་སྒོ་ནས་མན་ངག་གི་དམ་པ་ཉིད་དུ་ངེས་པར་གྲུབ་པས་སྐལ་ལྡན་དབང་པོ་ཡང་རབ་ཀྱི་དོན་དུ་བསྟན་པའོ། །ལུང་ཞེས་གསུངས་པ་ནི་དེ་བཞིན་ཉིད་ཀྱི་དགོངས་པ་གསང་བ་མི་བསླུ་བས་ངེས་པ་དམ་པ་སྤྲོས་པ་དང་བྲལ་བའི་དེ་ཁོ་ན་ཉིད་རྒྱུ་རྐྱེན་གྱིས་མ་བསླད་པས་གསང་སྔགས་ཇི་བཞིན་པ་ཉིད་སྒྲོ་སྐུར་མེད་པར་ཐུགས་ལ་མངའ་བ་བཞིན་དུ་བཀའ་ཡི་ཚིག་གིས་བཅད་དེ་ཞལ་དུ་ཕྱུང་ནས་བཀའ་སྩལ་པ་ནི་ལུང་དམ་པར་ངེས་པས་སྐལ་ལྡན་༼༢༠༧༽དབང་པོ་རབ་ཀྱི་དོན་དུ་བསྟན་པའོ།།

རྒྱུད་ཅེས་གསུངས་པ་ནི། རྒྱུད་འབྱུང་བའི་རྒྱུ། བཅས་གཞིའི་གླེང་གཞི་དང་རྐྱེན་གཏམ་རྒྱུད་བརྗོད་དེ་གླེང་བསླང་བ་དང༌། རྒྱུད་དོན་ཟབ་མོ་ཉམས་སུ་བྱ་བའི་ལས་དང་རྒྱུད་ཀྱི་ཚིག་ཡན་ལག་ངེས་པ་དང༌། སྦྱོར་བའི་རྟོག་པ་ཆེན་པོ་ཡན་ལག་དགོས་འབྲེལ་དང་བཅས་པའི་ཆོས་བཞིའི་སྒོ་ནས་རྒྱུད་དམ་པ་ཉིད་དུ་བཞག་པ་ཡིན་པས་དབང་པོའི་ཁྱད་པར་དང་མཐུན་པར་བསྟན་པའོ། །ཡང༌། ཆོས་རྗེའི་ཕྱག་མཆན་ལྟར་ན༌། བཅས་གཞི་དང་གཏམ་རྒྱུད་གཉིས་འདྲ་ལ། དེ་ནས་རྒྱུ་རྐྱེན་དེ་གཉིས་ལས་རྒྱུད་ཀྱི་ཚིག་དོན་དངོས་སུ་བྱུང་བ་དང༌། དེ་ནས་རྟོག་ཆེན་མཛད་དེ་གདམས་ཤིང་གཏད་པ་ཉིད་དང༌། དེ་དག་གི་ཡན་ལག་དགོས་འབྲེལ་བསྟན་པ་དང་བཅས་ཏེ་ཆོས་ལྔ་ཡི་ཕྱིར་རྒྱུད་དུ་བཞག་གོ །ཞེས་གསུངས་ཤིང༌། ཡང་དབུས་པ་ཇོ་འབུམ་གྱི་ཕྱག་མཆན་ལས། དང་པོ་གཉིས་འདྲ་ལ། དེ་ནས་དེ་གཉིས་ལས་རྒྱུད་ཀྱི་ཚིག་དང་དོན་རྣམས་ཞུས་ལན་ལས་འཕྲོས་པས་རྟོག་པ་ཆེན་པོ་དང༌། ཡན་ལག་དགོས་འབྲེལ་དང་བཅས་པ་བསྟན་ཏེ་གདམས་གཏད་ཤུགས་ལ་མཚོན་པ་ནི་རྒྱུད་ཡིན་ནོ། །ཞེས་གསུངས་སོ། །དེ་ལྟར་མཚན་ཉིད་སོ་སོར་གསལ་ཏེ་མཚོན་ཚུལ་གསུམ་དུ་སྣང་བ་ལ་ཡང་དོན་གྱི་ངོ་བོ་རྣམ་དབྱེ་མེད་པར་རང་རིག་པ་གཅིག་ཏུ་འདུས་པར་ཟད་པས་མ་འདྲེས་སོ་སོར་གསལ་ཡང་རང་བཞིན་དབྱེར་མེད་ཆེན་པོ་ཆོས་ཀྱི་དབྱིངས་སུ་ཚུལ་གཅིག་པའི་རང་སྣང་དེ་བཞིན་ཉིད་ལ་རོལ་པ་འགག་པ་མེད་པར་ཅིར་ཡང་འཆར་བས་ཤེས་རབ་ཀྱི་རྩལ་དང་མཐུན་པར་ལྟ་སྤྱོད་ཀྱི་འཕངས་མཐོ་དམན་དང༌། གདུལ་བྱའི་ངོ་ལ་རྒྱུད་ལུང་མན་ངག་གི་བྱེ་བྲག་མ་འདྲེས་པར་རྣམ་པར་སྣང་བའི་མཚན་ཉིད་བསྟན་པ་དག་ཀྱང༌། དོན་གྱི་ངོ་བོ་ངེས་པར་རང་རིག་ཆོས་ཀྱི་དབྱིངས་སུ་ངང་གཅིག་པ་ཡིན་ཏེ། དེ་བས་ན་ཐ་དད་རྣམ་པ་སྣ་ཚོགས་ཀྱི་དབྱེ་བ་ཡོངས་ཀྱིས་མེད་པར་དབྱེར་མེད་ཐིག་ལེ་ཉག་གཅིག་ཏུ་ཡོངས་སུ་རྫོགས་ཤིང་འདུས་པ་ཡིན་པས་དེ་ལྟར་རྟོགས་ཚེ་གཅིག་ཤེས་ཀུན་གྲོལ་དུ་འགྱུར་བ་ཉིད་དེ། སྒྲོན་མ་བརྩེགས་པའི་རྒྱུད་ལས།

ཆོས་གཅིག་བྱ་བའི་རང་བཞིན་ནི། གཞི་ཡི་ཀློང་ལས་མཚོན་མེད་ཀྱང༌། །རྩལ་ཟེར་ཤེས་རིག་གཅིག་ཅེས་བརྗོད། །རིན་ཆེན་གསལ་དྭངས་༼༢༠༨༽ངང་དངས་དེ། །ཡོད་པ་མ་ཡིན་དངོས་པོ་མེད། །མེད་པ་མ་ཡིན་གསལ་ཞིང་རིག །དངོས་མེད་ཡེ་ཤེས་ཟང་ཀ་མ། །མི་སྣང་གསལ་བའི་རང་བཞིན་ཅན། །དེ་ཀ་ཉིད་ལས་གྲོལ་ཞེས་བཤད། །དེས་ན་གཅིག་ཤེས་ཀུན་གྲོལ་ལོ། །ཞེས་སོ། །དེ་ལྟར་ཚད་མའི་ལུང་ལ་བརྟེན་ནས་ཡང་དག་པའི་དོན་མཆོག་རྙེད་པ་ནི་རྒྱལ་བའི་དགོངས་པ་ནོར་འཁྲུལ་དང་བྲལ་བ་ཡིན་ཏེ། དགོངས་པ་བཀའ་བགྲོས་ཡོན་ཏན་ཀུན་འབྱུང་གི་རྒྱུད་ལས། ངེས་པ་དོན་གྱི་རིག་པ་ནི། །རིགས་དང་བཤད་དང་འོས་པ་དང༌། །འཐད་དང་མ་ནོར་དོན་དང་ལྡན། །ངེས་དོན་བཀའ་ནི་ཡིད་ཆེས་ཁུངས། །རིག་པ་ཉམས་མྱོང་གདེང་གིས་ཟིན། །ལུང་རིགས་གཉིས་འཇོམ་རྟོགས་པས་ཆོག །ཅེས་དང༌། ངེས་དོན་འདུས་པ་ལྟ་བའི་སྙིང་པོ་ལས། དེ་ཡང་འདུས་པའི་སྙིང་པོ་ཉོན། །ཡེ་ཤེས་ཡོད་ན་མ་རིག་མེད། །དེ་ཕྱིར་ལུང་ལྡན་ངེས་པའི་དོན། །བཀའ་རྒྱུད་ཆོས་འདི་སངས་རྒྱས་གསུངས། །མ་རིག་སེལ་བའི་སྒྲོན་མེ་ཡིན། །ཉི་ཟླས་དེ་ལ་འགྲན་མི་ནུས། །མ་རིག་མེད་ཕྱིར་སངས་རྒྱས་འགྲུབ། །ཡེ་ཤེས་ཤར་བས་ཐམས་ཅད་མཁྱེན། །ཞེས་སོགས་ཚད་མེད་དོ། །དེ་ཡང་རྒྱུད་ལུང་མན་ངག་གི་གོལ་སྒྲིབ་དང་འཁྲུལ་པ་བསལ་ཏེ་གནད་ཀྱི་ངོ་བོ་ངོས་བཟུང་ན། རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པའི་རྒྱུད་ལས། རྒྱུད་ཀྱི་རང་བཞིན་བསྟན་པ་ནི། །སེམས་ཆོས་གཉིས་སུ་མེད་པར་འགྲེལ། །གཉིས་མེད་འགྲེལ་བར་མ་ཤེས་ན། །རྒྱུད་ཀྱི་སྒྲིབ་པ་ཡིན་པར་བཤད། །གཉིས་སུ་མེད་པར་འགྲེལ་བ་ལ། །གཉིས་མེད་འབྲེལ་བར་མ་རྟོགས་ཏེ། །སེམས་ཆོས་གཉིས་སུ་ལྟ་བ་ནི། །རྒྱུད་ཀྱི་གོལ་ས་ཡིན་པར་བཤད། །ཐ་དད་རྩེ་གཉིས་སྐྱེས་པ་ནི། །རྒྱུད་ཀྱི་འཁྲུལ་པ་ཡིན་པར་བཤད། །ལུང་གི་རང་བཞིན་ཡིན་པ་ནི། །གཏན་ལ་འབེབས་ཤིང་ངེས་པར་སྟོན། །གཏན་ལ་འབེབས་པར་མ་ཤེས་ན། །ལུང་གི་སྒྲིབ་པ་ཡིན་པར་བཤད། །གཏན་ལ་འབེབས་པའི་ལུང་དེ་ལ། །ཐོག་ཏུ་ཕེབས་པར་མ་རྟོགས་ཏེ། །ཐོག་ཏུ་མི་ཕེབས་ཟེར་བ་ནི། །ལུང་གི་གོལ་ས་ཡིན་པར་བཤད། །སྒྲ་ཚིག་རང་ཐད་ཁྱེར་ནས་ནི། །དོན་དང་མི་མཐུན་ཚིག་རྗེས་འབྲང༌། །ལུང་གི་འཁྲུལ་པ་ཡིན་པར་བཤད། །མན་ངག་རང་བཞིན་བསྟན་པ་ནི། །གཉིས་༼༢༠༩༽སྣང་མེད་པར་ལ་ཟློས་ནས། །སྤྲོས་པ་མེད་པར་མ་ཤེས་ན། །མན་ངག་དག་གི་སྒྲིབ་པ་ཡིན། །སྒྲོ་སྐུར་བྲལ་བའི་མན་ངག་ལ། །སྤྲོས་པ་མེད་པར་མ་རྟོགས་ཏེ། །སྒྲོ་སྐུར་ཡོད་པར་འདོགས་པ་ནི། །མན་ངག་དག་གི་གོལ་སར་བཤད། །སྤྲོས་པའི་མཐའ་ལ་མངོན་ཞེན་ན། །མན་ངག་འཁྲུལ་པ་ཡིན་པར་བཤད། །དབྱེ་ན་དེ་ལྟར་ཡོད་མོད་ཀྱང༌། །བསྡུ་ན་གསུམ་ལས་མེད་པར་བཤད། །ཅེས་སོགས་གསུངས་པ་ལྟར་རོ། །དེ་བས་ན་མན་ངག་གི་རྩ་བ་ལུང་ཆེན་གསང་མཆོག་རྒྱལ་པོའི་རྒྱུད་འདི་ནི་རྒྱུད་ལུང་མན་ངག་གསུམ་ཀ་ཡིན་པར་ཐེ་ཚོམ་མེད་དོ། །ཚུལ་དེ་སྐད་ཅེས་སྟོན་པ་ཀུན་ཏུ་བཟང་པོ་གསང་བ་མཆོག་གི་བདག་པོ་དེས་བཤད་དེ་བཀའ་སྩལ་པ་ཇི་ལྟ་བ་བཞིན་དུ་ངེས་པར་བསྟན་པ་ཡིན་ནོ། །དེ་ལྟར་རྒྱུད་ལུང་མན་ངག་གི་གེགས་བསལ་བ་འདི་ལ། ལྷ་རྗེ་སྒྲོ་ཕུག་པའི་ཞལ་ནས། ཡིད་ཀྱི་རྣམ་ཤེས་དེ་མུན་པའི་ཡན་ལག་དྲུག་གི་ཁོངས་སུ་ཡང་སོང༌། མུན་མདོ་བཞིའི་ཁོངས་སུ་ཡང་སོང་ལ། མུན་རྩ་གསུམ་གྱི་ཁོངས་སུ་ཡང་སོང་བས་དེ་ལ་ཐེ་ཚོམ་ཟོས་པ་ལ། རྒྱལ་བའི་གསུང་གཅིག་ལ་རྒྱུད་དང་ལུང་དང་མན་ངག་གསུམ་དུ་བྱུང་བའི་དཔེ་དེས་གེགས་སེལ་ལོ། །ཞེས་གསུངས། འདི་ལ་ཀུན་མཁྱེན་དམ་པ་རིན་པོ་ཆེས། ཁོ་བོ་ནི་འདི་ལྟར་ཡང་གོ་སྟེ་ཡན་ལག་དྲུག་རྒྱུད་དང་ཆོས་མཐུན༌། མདོ་བཞི་ལུང་དང་ཆོས་མཐུན། རྩ་བ་གསུམ་མན་ངག་དང་མཐུན་པ་ལ་ཐེ་ཚོམ་ཟོས་པ་ལ། དཔེར་ན་རྒྱལ་བའི་གསུང་གཅིག་ལ་རྒྱུད་ལུང་མན་ངག་གསུམ་དུ་བྱུང་བ་ལྟར་ཡིན་ནོ། །ཞེས་པས་གེགས་བསལ་བར་གོ་བས་གེགས་སེལ་བར་བདེའོ། །ཞེས་གསུངས་ཏེ་གོང་དུ་རང་སྐབས་སུ་བསྟན་པ་བཞིན་ནོ། །ཡང་ས་གཅོད་ཚུལ་ལ་ལར། གོང་གི་མུན་པའི་ཡན་ལག་དྲུག་དང་མདོ་བཞི་དང་རྩ་བ་གསུམ་གྱི་དོན་ལ་བརྩད་པའི་སྐྱོན་སྤོང་གི་མགོ་བསྒྲེར་འདི་ཉིད་འཆད་པ་ཡང་ཡོད་དོ།།

བཞི་པ་ཞབས་བསྡུ་བ་ནི།

ལས་ཀྱིས་བསྐྱངས་པ། ཞེས་པ་ནས། ཤེས་པར་གྱིས། །ཞེས་པའི་བར་གྱིས་བསྟན་ཏེ།

ལས་ཀྱིས་བསྐྱངས་པ་གང་དག་ལ། །གང་འདིར་མུན་པའི་ཕྱོགས་བཤད་པ། །གོ་ཆ་བགོས་པར་ཤེས་པར་གྱིས།།

དེ་ལྟར་རང་རང་གི་ལས་ཀྱིས་བསྒྱངས་པའི་མཚན་ཉིད་པ་སོགས་གསང་སྔགས་མ་མཐོང་པའི་འགྲོ་བ་གང་དག་རྣམས་ལ་དགོངས་ཏེ་ཇི་སྐད་གསུངས་པ་ལྟར་གང་འདིར་མུན་པའི་མཚན་ཉིད་སྣང་བའི་༼༢༡༠༽སྤྱོད་ཡུལ་དང་མ་འདྲེས་པའི་ཕྱོགས་རྣམས་ཡང་དག་པར་བཤད་དེ་བཀའ་སྩལ་པ་ཉིད་ནི་སྔར་གོང་དུ་བཤད་པར་དམ་བཅས་ཏེ་གོ་ཆ་བགོས་པར་མཛད་པ་དེ་ཡི་དོན་བགྲོས་པ་ཡིན་པར་ཤེས་ཤིང་རྟོགས་པར་གྱིས་ཤིག ཅེས་གསུངས་པར་མཛད་དོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཆོས་ཐམས་ཅད་ཀྱི་རྩ་བ་གང་མུན་པའི་སྤྱོད་ཡུལ་བསྟན་པའི་ལེའུ་སྟེ་ལྔ་བཅུ་ལྔ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཆོས་ཐམས་ཅད་ཀྱི་མི་མཐུན་པ་སྐྱོན་གྱི་རྩ་བ་གང་གི་གསང་སྔགས་ལ་ལྟོས་ཏེ་མུན་པའི་སྤྱོད་ཡུལ་དུ་གྱུར་པའི་མཆན་ཉིད་རྣམས་གསལ་བར་བསྟན་པའི་ལེའུ་སྟེ་ལྔ་བཅུ་རྩ་ལྔ་པ་ཉིད་རྒྱས་པར་འགྲེལ་ཏེ་རྣམ་པར་བཤད་པའོ།། །།

ལེའུ་ང་དྲུག་པ་ཆོས་ཐམས་ཅད་ཀྱི་རྩ་བ་གང་སྣང་བ་དག་པའི་སྤྱོད་ཡུལ་བསྟན་པ།

༈ གསུམ་པ་དོན་ངེས་པའི་རྩ་བ་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས། ཞེས་པ་ནས། ཡོངས་སུ་བགྲོ་བར་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ལངྐའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་ཡང་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་རྩ་བ་གང་ལ་གང་གིས་སྣང་བ་ཡོངས་སུ་དག་པའི་སྤྱོད་ཡུལ་གང་ལགས། དེ་སྐད་ཅེས་གསོལ་བ་ལས། གསང་བ་པའི་བདག་པོས་སྨྲས་པ། ལངྐའི་བདག་པོ་གང་ཡོངས་སུ་དག་པའི་དྲི་བ་དེ་ནི་ལེགས་སོ། །ཤིན་ཏུ་རབ་ཏུ་ལེགས་སོ། །ལངྐའི་བདག་པོ་དེ་ཡང་འདི་ལྟར་བཅོམ་ལྡན་འདས་ངོ་བོ་ཉིད་དག་པ་དེ། ཡོངས་སུ་དག་པ་ཞེས་བྱ་བའི་ཞིང་ཁམས་ན་ངང་གིས་བཞུགས་པ་དེའི་ཚེ་དེའི་དུས་ན། གང་དཔག་ཏུ་མེད་པའི་རྒྱལ་བ་དག་དགོངས་པ་ཀུན་ནས་འདུས་པ་དག་ལ། གང་སྣང་བ་ཡོངས་སུ་དག་པའི་སྤྱོད་ཡུལ་དུ་དགོངས་ཏེ་དེ་ཁོ་ན་ཉིད་སྣང་བ་དེ། ཁོ་བོས་ཕྱིན་ཅི་མ་ལོག་པར་ཡོངས་སུ་བགྲོ་བར་བྱའོ།།

དབུ་ཞབས་ན་ལེའུ་འདི་ཉིད་ཟབ་སྟེ་ངེས་དོན་ཁོ་ན་སྟོན་ནོ། །སྤྱིར་དྲང་ངེས་ཀྱི་རྣམ་བཞག་འདི་ལའང༌། དབུ་མ་པ་སོགས་ཀྱིས་ཀུན་རྫོབ་སྟོན་པ་དྲང་དོན་དང༌། དོན་དམ་སྟོན་པ་ངེས་དོན་དུ་འདོད་པས་དེ་ལྟར་ན་རང་རང་གི་བདེན་གཉིས་ཀྱི་འཇོག་ཚུལ་ལྟར་ལུང་ཡང་དེ་དང་མཐུན་པར་བཞེད་དོ། །གསང་སྔགས་འཛིན་པ་ཁ་ཅིག་གིས། རྒྱུའི་ཆོས་སྟོན་པ་དྲང་ལུང༌། འབྲས་བུའི་ཆོས་སྟོན་པ་ངེས་ལུང་དུ་འདོད་དེ། དེ་ལྟར་ན་མཚན་ཉིད་ཀྱི་ཐེག་པ་དྲང་དོན། སྔགས་ཀྱི་ཐེག་པ་ངེས་དོན་ནོ། །ཡང་གསང་སྔགས་གསར་མའི་རྒྱུད་འགའ་ཞིག་ལྟར་ན། ཀུན་བརྟགས་བསྐྱེད་རིམ་གྱི་རྣལ་འབྱོར་སྟོན་པའམ། རྣམ་པར་རྟོག་པའི་ལམ་བསྐྱེད་རྫོགས་སོགས་རྒྱ་ཆེ་བར་སྟོན་པ་དྲང་ལུང་ཡོངས་གྲུབ་རྫོགས་རིམ་གྱི་རྣལ་འབྱོར་སྟོན་པའམ་རྣམ་པར་མི་རྟོག་པ་གཅིག་ཆར་དུ་སྒོམ་པའི་ཐབས་སྟོན་པ་ངེས་ལུང་དུ་འདོད་དེ། དེ་ལྟར་ན་ཐེག་པ་ཐམས་ཅད་ལའང་རང་རང་གི་ལུགས་ཀྱིས་རྒྱ་ཆེ་བ་དང་མི་རྟོག་པ་སྒོམ་ཚུལ་སོ་སོར་ཡོད་པས་ཐམས་ཅད་ལ་དྲང་ངེས་གཉིས་རེ་ཡོད་པར་འགྱུར་རོ། །དེས་ན་ལུང་ཆེན་པོ་འདིའི་དྲང་ངེས་འཇོག་ཚུལ་ནི། རྒྱུ་འབྲས་ཀྱི་རྣམ་གྲངས་སྟོན་པའི་ཐབས་ལ་བརྟེན་ནས་ཆོས་ཉིད་བརྒྱུད་ནས་སྟོན་པ་དྲང་དོན་དང༌། རྒྱུ་འབྲས་ཀྱི་དབྱེ་བ་ལས་འདས་པའི་ཐབས་ལ་བརྟེན་ནས་ཆོས་ཉིད་ཅར་ཕོག་ཏུ་སྟོན་པ་ངེས་དོན་དུ་བཞེད་པ་ཉིད་དོ། །དེ་ལྟར་ན་ཨ་ནུ་མན་ཆད་དྲང་ལུང་དང་ཨ་ཏི་ངེས་ལུང་དུ་༼༢༡༡༽བཞེད་པ་ཡིན་ནོ། །དེར་མ་ཟད་ལེའུའི་གནས་འདི་ནི། ཀུན་བྱེད་རྒྱལ་པོ་ལས། ཀུན་བྱེད་ང་ཡི་རང་བཞིན་སྒྲོ་སྐུར་བྲལ། །ང་ཡི་རང་བཞིན་དེ་བཞིན་ཉིད་གཅིག་ལ། །སྐུ་གསུམ་སྟོན་པས་སོ་སོར་བསྟན་པ་ཡང༌། །དེ་བཞིན་ཉིད་ལ་དྲང་བའི་ལུང་བསྟན་ཡིན། །ཞེས་གསུངས་པ་ལྟར། ངེས་པའི་དོན་མཆོག་མཐར་ཐུག་པའི་རྩ་བའང་ཡིན་ཏེ། བཤད་རྒྱུད་ངེས་དོན་མདོ་བཅུ་ལས། རིམ་པ་དགུ་ཡི་དོན་བདུན་ནི། །ཚིག་དང་ཡི་གེ་ཡོད་བསྟན་པས། །དྲང་བའི་ལུང་ཞེས་ང་ཡིས་བཤད། །ངེས་པའི་ལུང་གི་དོན་འདི་ནི། །བྱང་ཆུབ་སེམས་ཀྱི་ཆོས་ཉིད་ལ། །རྡོ་རྗེ་སེམས་དཔའ་ང་ཡིས་བཤད། །ཡང་དག་ངེས་པ་འདི་ཡིན་ཞེས། །ཚིག་དང་ཡི་གེས་མཚོན་དུ་མེད། །སྒྲ་དང་ཐ་སྙད་རིལ་ལས་འདས། །སྒྲོ་དང་སྐུར་པ་ཀུན་དང་བྲལ། །ཀུན་ལས་འདས་པའི་དོན་འདི་ལ། །འདི་ཡིན་མཚོན་དུ་མེད་པས་ན། །ངེས་པའི་ལུང་ཞེས་མིང་ཙམ་བཏགས། །ངེས་པར་གདགས་སུ་ཡོད་པ་མིན། །ཞེས་གསུངས་པ་སོགས་ཀྱིས་བསྟན་པ་ལྟར་རོ། །དེའང་མུན་པའི་རྗེས་སུ་གསང་སྔགས་ཀྱི་ཐབས་ངེས་པའི་རྩ་བ་སྣང་བའི་སྤྱོད་ཡུལ་དམ་པ་ཟླ་ཡིས་གསལ་བར་བསྟན་པའི་ཕྱིར། རྩ་བ་གསུམ་ལས་མཚོན་པ་དཔེའི་རྩ་བ་དང༌། འཁོར་འདས་དབྱེར་ མེད་ཀྱི་མུན་པ་བསྟན་པ་དེ་ནས་ཡང་ལང་ཀའི་བདག ་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྟོན་པ་གསང་བ་པའི་བདག་པོ་ལ་བོས་ནས་ཡང་ཡོངས་སུ་དྲི་བ་མི་མཐུན་པ་ནི། སྣང་བ་དག་པའི་ངོ་བོ་འཁོར་འདས་དབྱེར་མེད་ཀྱི་རྩ་བ་ཆེན་པོའི་དོན་ཡང་དག་པར་དྲིས་པ། ཀྱེ་གསང་བ་པའི་བདག་པོ། གསང་ཆེན་སྔགས་ཀྱི་དོན་ངེས་པའི་རྩ་བ་གང་ལ་དབྱེར་མེད་བྱང་ཆུབ་ཀྱི་སེམས་གང་གི་དོན་མཆོག་བླ་ན་མེད་པ་དེ་ཉིད་སྣོད་དང་ལྡན་པའི་རིག་པ་གང་ལ་སྣང་བ་ལགས། ཡོངས་སུ་དག་པའི་སྤྱོད་ཡུལ་དེ་ཡང་བུདྡྷ་དང་རྣལ་འབྱོར་པ་གང་སུའི་ཡུལ་དུ་སྣང་བ་ལགས། དེ་སྐད་ཅེས་གསོལ་ཏེ་དྲིས་པ་ནི་ལེའུ་བཞི་བཅུ་དྲུག་པའི་རྩ་བ་ལས་འཕྲོས་པས་འདིར་རང་བཞིན་ལྟ་བའི་ངེས་དོན་གྱི་གནད་དམ་པའོ། །དེའི་ལན་དུ། སྟོན་པ་གསང་བ་འདུས་པའི་མངའ་བདག་ཆེན་པོས་བཀའ་སྩལ་ཏེ་སྨྲས་པ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས་གང་རྩ་བ་ཆེན་པོ་ཡོངས་སུ་དག་པའི་དྲི་བ་དེ་ནི་རང་དོན་དུའང་ལེགས་སོ། །གཞན་དོན་དུའང་ཤིན་ཏུ་རབ་ཏུ་ལེགས་སོ། །ཞེས་པའམ། སྡུད་པས་དྲི་བ་གཉིས་ལ་ལེགས་པ་གཉིས་གནང་ནས་བཀའ་སྩལ་པ་གང་ཞེ་ན། ལང་ཀའི་བདག་པོ། དེ་ཡི་དོན་ཡང་དག་པར་བསྟན་པ་དེ་ཡང་ལོ་རྒྱུས་སུ་བརྗོད་པ་འདི་ལྟར། སྟོན་པ་ཕུན་སུམ་ཚོགས་པ་རྒྱལ་བ་ཀུན་གྱི་སྤྱི་མེས་འཁོར་འདས་དབྱིངས་སུ་རང་གྲོལ་བར་བཅོམ་ཞིང་ཡོན་ཏན་མ་བརྩལ་ལྷུན་གྲུབ་ཏུ་རང་གསལ་བར་ལྡན་ཏེ་མཐའ་ཡིས་སྒྲིབ་པ་ཀུན་ལས་འདས་པའི་བདག་ཉིད་སངས་རྒྱས་ངོ་བོ་ཉིད་ཀྱི་སྐུ་ཆེན་པོ་རང་བཞིན་རྣམ་པར་དག་པ་སྟེ། ངེས་དོན་མདོ་བཅུ་ལས། སྟོན་པ་ཀུན་ཏུ་བཟང་པོ་ནི། །སངས་རྒྱས་ཀུན་གྱི་སྤྱི་མེས་པོ། །བླང་དོར་མེད་པའི་རང་བཞིན་གྱིས། །སྟོན་པ་ཀུན་ལས་ཁྱད་པར་འཕགས། །དེས་ན་མངོན་པར་ཆེ་བར་བཤད། །ཅེས་སོ།།

གནས་ཕུན་སུམ་ཚོགས་པ། རང་བཞིན་གྱིས་བསལ་བ་མེད་པར་མཐར་འཛིན་ཡོངས་སུ་དག་པའི་གནས་མཆོག་དབྱིངས་མུ་མཐའ་བྲལ་བ་ཞེས་བྱ་བའི་ཞིང་ཁམས་ཏེ། སྔ་མ་ལས། ཡངས་པ་ཆོས་དབྱིངས་ཀུན་བཟང་གནས། །ཐམས་ཅད་འདུས་པའི་གནས་ཆེན་དེ། །མཐའ་དབུས་མེད་པའི་རང་བཞིན་གྱིས། །བཞུགས་གནས་ཀུན་ལས་ཁྱད་པར་འཕགས། །གནས་དེ་མངོན་པར་ཆེ་བར་བཤད། །ཅེས་གསུངས་པ་ལྟ་བུའི་གནས་ན། བཞུགས་བྱ་བཞུགས་བྱེད་གཉིས་སུ་མེད་པར་ཡེ་ནས་ངང་གིས་བཞུགས་ཐབས་གཅིག་དང་དུ་མར་བྲལ་བའི་ཚུལ་གྱིས་བཞུགས་པ་དེའི་ཚེ་དང་དེའི་སྐབས་ཀྱི་དུས་ཕུན་སུམ་ཚོགས་པ་སྟེ། དེ་ཉིད་ལས། དུས་ནི་དུས་གསུམ་ཁྱད་པར་གཅིག །དུས་ལ་སྐྱེ་འཇིག་མེད་པས་ན། །གཅིག་ཏུ་གསལ་བའི་རང་བཞིན་གྱིས། །སྔ་ཕྱི་ཀུན་ལས་ཁྱད་པར་འཕགས། །དུས་དེ་མངོན་པར་ཆེ་བར་བཤད། །ཅེས་པ་ལྟ་བུའི་བླ་ན་མེད་པའི་དུས་ན། འཁོར་ཕུན་སུམ་ཚོགས་པ་གང་ཡིན་པ་སྡུད་པ་པོ་ལ་སོགས་པ་དཔག་ཏུ་མེད་པའི་རྒྱལ་བ་རྒྱ་མཚོ་ཡེ་ཤེས་ཆོས་ཀྱི་སྐུ་ལ་སོགས་པའི་ཚོགས་མཐའ་དག་གསང་བའི་དབྱིངས་ཡེ་སངས་རྒྱས་པའི་ཆོས་ཀྱི་དགོངས་པ་ཀུན་ནས་ཡོངས་སུ་འདུས་པ་དག་ཏུ་བཞུགས་པ་སྟེ། སྔ་མ་ལས། སྡུད་པ་སེམས་དཔའ་ཆེན་པོ་ནི། །སངས་རྒྱས་སེམས་ཅན་འཁོར་རྣམས་ལ། །སྐྱེ་འཇིག་མེད་པས་ཁྱད་པར་འཁོར། །སྡུད་པ་ཀུན་ལས་ཁྱད་པར་༼༢༡༣༽འཕགས། །འཁོར་དེ་མངོན་པར་ཆེ་བར་བཤད། །ཅེས་སོ། །དེ་ལྟ་བུའི་འཁོར་ལ་གང་འཁྲུལ་སྣང་འཁྲུལ་འཛིན་ཀུན་དང་བྲལ་བའི་དེ་ཁོ་ན་ཉིད་སྣང་བ་ཡོངས་སུ་དག་པའི་མཉམ་པ་ཆེན་པོ་རིག་པ་ལ་ཇི་བཞིན་དུ་གསལ་བའི་འཁོར་འདས་དབྱེར་མེད་ཚོགས་བརྒྱད་ཡེ་ཤེས་ལྔར་སྣང་བ་རང་བཞིན་རྫོགས་པ་ཆེན་པོའི་བསྟན་པ་ཕུན་སུམ་ཚོགས་པ་སྟེ། སྔ་མ་ལས། བསྟན་པ་ལྟ་བ་རྫོགས་ཆེན་འདི། །ཆོས་ཉིད་ཀུན་གྱི་སྙིང་པོ་སྟེ། །ཐམས་ཅད་ཀུན་གྱི་རང་བཞིན་གྱིས། །ཐེག་པ་ཀུན་ལས་ཁྱད་པར་འཕགས། །དེས་ན་བསྟན་པ་མངོན་པར་ཆེ། །ཞེས་སོ།།

དེ་ལྟ་བུའི་ཆོས་ཉིད་རང་སྣང་གི་ངོ་བོ་དེ་ཉིད་ཐེག་པ་གཞན་གྱིས་ཡུལ་མིན་ཏེ། རྒྱུད་ཡོངས་སུ་དག་པའི་རྒྱལ་བ་དང༌། རྣལ་འབྱོར་གྱི་དབང་ཕྱུག་དམ་པ་རྣམས་ཀྱི་སྤྱོད་ཡུལ་དུ་གྱུར་པར་དགོངས་ཏེ་བསྟན་པ་ཀུན་གྱི་ཡང་སྙིང་དེ་ཁོ་ན་ཉིད་གསང་བ་ཇི་བཞིན་པའི་དོན་དུ་བཀའ་སྩལ་པར་མཛད་པས་འཁོར་གྱི་རིག་པ་ལ་རང་སྣང་བའི་དོན་མཆོག་བླ་ན་མེད་པ་དེ་ནི་ཐེག་མཆོག་འོད་གསལ་སྙིང་པོའི་ཐུན་མོང་མ་ཡིན་པའི་ཕུན་སུམ་ཚོགས་པ་ལྔ་ཡིས་མངོན་སུམ་པར་སངས་རྒྱས་པའི་ཆེ་བ་རྨད་དུ་བྱུང་བ་ཉིད་དེ། སྔ་མ་ལས། དེས་ན་ཕུན་སུམ་ཚོགས་པ་ལྔས། །མངོན་པར་སངས་རྒྱས་ཆེ་བར་བཤད། །ཅེས་སོ། །དེ་ལྟར་ཕུན་སུམ་ཚོགས་པ་ལྔའི་ངོ་བོ་ནི། སྒྲ་ཐལ་འགྱུར་ཆེན་པོ་གསང་བ་སྒྲའི་རྒྱུད་ལས། འཁོར་དང་འདས་པའི་ཐོག་མར་ནི། །རང་བྱུང་བྱས་པ་མེད་པ་ལས། །འབྱུང་བ་འདུས་པའི་ཕུང་པོར་ཤར། །ས་ཆུ་མེ་རླུང་རིན་ཆེན་བཞི། །དབུས་སུ་རླུང་སེམས་རྒྱུ་དང་རྐྱེན། །འདུས་ཤིང་བསྐྱེད་པའི་གཞལ་མེད་ཁང༌། །རང་བྱུང་རིག་པ་བཅོས་པ་མེད། །འཁྲུལ་བ་ཡོངས་སུ་དག་པ་ལ། །བདེ་ཆེན་འདུས་པའི་ཐབས་ཀྱི་འཁོར། །སྐུ་དང་ཡེ་ཤེས་ཤེས་རབ་རླུང༌། །མི་ཕྱེད་སྣ་ཚོགས་དམིགས་མེད་པས། །རྩ་རླུང་ཐབས་ཀྱི་བདེ་ཆེན་ཆོས། །སོ་སོའི་ཉམས་དང་མཐུན་པར་བཤད། །འདས་དང་མ་འོངས་ད་ལྟར་མེད། །མི་ཕྱེད་འབྱེད་པ་ཡོངས་སུ་མེད། །ཐམས་ཅད་རང་བྱུང་ཡེ་ཤེས་སོ། །ཞེས་ཐུན་མོང་མིན་པའི་གླེང་གཞིའི་སྐབས་སུ་གསུངས་ཤིང༌། དེ་ནས་ཐུན་མོང་གི་གླེང་གཞི་རྒྱས་པར་བསྟན་པའི་མཇུག་ཏུ། མི་འབྱེད་རང་བཞིན་རྣམ་དག་པ། །ཐམས་ཅད་ངོ་བོ་དབྱེར་མེད་༼༢༡༤༽པར། །བརྗོད་ཅིང་སྒྲ་ཚིག་བདེ་རིག་སྟེ། །ཆོས་ཀྱི་སྐུ་ཡང་རྒྱུ་མེད་པ། །ལོངས་སྐུ་གདལ་བ་ཀུན་ཁྱབ་པར། །སྤྲུལ་སྐུ་སྤྲོས་གཞི་རྫོགས་པ་ལས། །དབྱེར་མི་ཕྱེད་པས་སྙོམས་ཞུགས་ཏེ། །རང་བཞིན་རྫོགས་པ་ཆེན་པོ་ཡི། །དཀྱིལ་འཁོར་གཅིག་ཏུ་ཐབས་གཅིག་འཁོད། །དེ་ལྟར་ངང་གཅིག་དབྱེར་མེད་དོ། །ཞེས་གསུངས་པ་ལྟར་རྟོགས་པ་མངོན་གྱུར་གྱི་ཕུན་སུམ་ཚོགས་པ་འབྲས་བུ་རྫོགས་པ་ཆེན་པོ་རང་བྱུང་རིག་པའི་དཀྱིལ་འཁོར་ཏེ། སེམས་ཕྱོགས་རྫོགས་པ་ཆེན་པོའི་མན་ངག་གི་སྐབས་དུ་མར། འབད་རྩོལ་མེད་པར་ལྷུན་གྲུབ་ཆེན་པོའི་དཀྱིལ་འཁོར། ལྷག་ལུས་མེད་པར་ཁམས་གསུམ་དོང་སྤྲུགས་ཀྱི་དཀྱིལ་འཁོར། ཕྱི་ནང་མེད་པར་ཡེ་ཤེས་རང་སྣང་གི་དཀྱིལ་འཁོར། སྤང་བླང་མེད་པར་རང་གྲོལ་ཆེན་པོའི་དཀྱིལ་འཁོར། གཙོ་འཁོར་མེད་པར་མཉམ་པ་ཉིད་ཀྱི་དཀྱིལ་འཁོར། མཐའ་དབུས་མེད་པ་གདལ་ཁྱབ་ཆེན་པོའི་དཀྱིལ་འཁོར། སྒྲིབ་གཡོགས་མེད་པ་ཡེ་ཤེས་ཟང་ཐལ་གྱི་དཀྱིལ་འཁོར་ཞེས་པ་ལ་སོགས་པ་ཇི་སྐད་གསུངས་པ་ལྟ་བུ་སྟེ། དེ་ལྟར་ཁྱབ་བདག་ངོ་བོ་ཉིད་སྐུའི་དཀྱིལ་འཁོར་དུ་ཐབས་གཅིག་པར་འཁོད་པའི་སྐབས་ཀྱི་དགོངས་པ་རང་སྣང་བའི་དོན་ཕུལ་དུ་བྱུང་བ་དེ་ཉིད་ཁོ་བོ་སྡུད་པ་པོ་ཕྱག་ན་རྡོ་རྗེ་གསང་བའི་མངའ་ བདག་ཆེན་པོས་ཇི་ལྟ་བ་བཞིན་དུ་ནོར་བ་མེད་ཅིང་ཕྱིན་ཅི་མ་ལོག་པར་ལང་ཀ་ལ་སོགས་པ ་ཁྱེད་རྣམས་ལ་ཡོངས་སུ་བགྲོ་བར་བྱའོ་ཞེས་གསུངས་ནས་བཤད་པར་ཞལ་གྱིས་བཞེས་པ་སྟེ། ཀུན་བྱེད་རྒྱལ་པོ་ལས། ནམ་མཁའ་ལྟ་བུའི་ཆོས་ཉིད་ལ། །ནམ་མཁའ་ལྟ་བུའི་དཔེ་ཡིས་མཚོན། །དམིགས་སུ་མེད་པའི་ཆོས་ཉིད་ལ། །དམིགས་སུ་མེད་པར་མཚོན་ཏེ་བསྟན། །ཚིག་ཏུ་བརྗོད་དུ་མེད་པ་ལ། །བརྗོད་དུ་མེད་པའི་ཚིག་བརྗོད་དེ། །དམིགས་མེད་དོན་གྱི་ངོ་བོར་བསྟན། །ཞེས་གསུངས་པ་ལྟ་བུའོ། །འོ་ན་འདིར་ངོ་བོ་ཉིད་སྐུ་ཁོ་ནའི་གླེང་གཞི་འོང་ཞིང་སྟོན་པ་དང་། སྨོས་པ་ཅི་དགོས་གཞན་ཡང་ཡོད་དམ་ཞེ་ན། དེ་ཁོ་ན་ཉིད་སྣང་བ་དམ་པ་དག་པ་མཐར་ཕྱིན་པ་ནི་ངོ་བོ་ཉིད་ཆོས་ཀྱི་སྐུ་འཁོར་དང་བཅས་པ་ཁོ་ནའི་ཕྱིར་རོ། །དེས་ན་གནས་ལུགས་དོན་གྱི་རྫོགས་ཆེན་ནི་ངོ་བོ་ཉིད་སྐུའི་བསྟན་པ་སྟེ། མདོ་བཅུ་ལས། འདི་ཡི་དོན་གྱི་རང་བཞིན་ལས། །རྟོགས་ནས་བྱིན་རླབས་འབྱུང་བ་ནི། །༼༢༡༥༽རྫོགས་པ་ཆེན་པོའི་རང་བཞིན་ནི། །སངས་རྒྱས་རྫོགས་ལ་སེམས་ཅན་རྫོགས། །འཇིག་རྟེན་རྫོགས་ལ་འདས་པ་རྫོགས། །བདེ་དང་སྡུག་བསྔལ་གཉིས་མེད་རྫོགས། །ཐེག་པ་རྫོགས་ལ་ཆོས་ཉིད་རྫོགས། །ཡོད་པའི་མཐའ་རྫོགས་མེད་མཐའ་རྫོགས། །གཅིག་རྫོགས་ཀུན་རྫོགས་ཐམས་ཅད་རྫོགས། །ཡོངས་སུ་རྫོགས་པའི་མདོ་འདི་ནི། །དུས་གསུམ་སངས་རྒྱས་ཐམས་ཅད་ཀྱིས། །སྔར་གྲུབ་དགོངས་པ་འདི་ཡིས་གྲུབ། །ད་ལྟར་བཞུགས་པའི་རྣལ་འབྱོར་པ། །མི་ཡེངས་དགོངས་ལམ་འདི་ལ་གནས། །སླད་ནས་བྱོན་པའི་གདུང་འཚོབ་རྣམས། །དགོངས་པའི་ལུང་བསྟན་འདི་ཡིས་མཛད། །གང་སུ་འདི་ལ་གནས་པ་ཡི། །རྣལ་འབྱོར་དེ་ནི་ཆེན་པོ་ཡིན། །ཞེས་སོགས་གསུངས་པ་ལྟར་ཡིན་ཀྱང༌། མཚོན་བྱེད་སྒྲ་རྒྱུད་ཀྱི་རྫོགས་པ་ཆེན་པོ འི་ངོས་ནས་ཆོས་སྐུའི་བསྟན་པར་གསུངས་པའང་གནད་མཆོག་ཏུ་གསང་བ་ལ་བརྟེན་པའི་ངེས་པའི་གསང་སྒོ་རྨད་བྱུང་དམ་པ་ཡིན་ནོ། །དེ་ལྟར་ངོ་བོ་ཉིད་སྐུའི་གླེང་གཞི་འདི་ནི། རིན་པོ་ཆེ་རྒྱན་ལས་ཀྱང༌། ངོ་བོ་ཉིད་སྐུས་ཆོས་སྐུ་ལ། །དུས་བཞི་མཉམ་པའི་དུས་ཉིད་ལ། །ཐ་དད་མི་གནས་པ་ཡི་གནས། །ཀུན་འདུས་རང་གྲོལ་བསྟན་པ་སྟེ། །མ་བསྒྲིབས་མཐོང་ཐོས་རང་ཤར་བའོ། །ཞེས་གསུངས་ཏེ། ཆོས་ལོངས་སྤྲུལ་གསུམ་གྱི་གླེང་གཞི་ནི་ཐེག་པ་སྤྱིའི་གཞུང་དང་མཐུན་ལ། གསང་བའི་གླེང་གཞི་ནི་གདུལ་བྱ་ཆགས་ཅན་དང་མཐུན་པར་དོན་ལ་དྲང་བ་ཡིན་པའི་ཕྱིར་མཐར་ཐུག་ཐུན་མོང་མིན་པ་ནི་ངོ་བོ་ཉིད་སྐུའི་གླེང་གཞི་འདི་ཉིད་ཁོ་ན་ཡིན་པས་ཐེག་པ་ཀུན་གྱི་གནས་དང་ཕུན་སུམ་ཚོགས་པ་ཀུན་གྱི་གཙོ་བོ་ཡིན་ཏེ། དེ་ཉིད་ལས། དང་པོ་གསུམ་ནི་སྤྱི་གཞུང་ལ། །གཅིག་ནི་གདུལ་བྱ་མཐུན་པར་དྲངས། །མཐར་ཐུག་ཐ་མ་ཐུན་མོང་མིན། །ཀུན་གྱི་གནས་ཡིན་ཀུན་གྱི་གཙོ། །ཀུན་གྲོལ་ཆེན་པོའི་རྒྱུད་ལས་གྲགས། །ཞེས་གསུངས་པ་ལྟར་ཏེ་རྒྱས་པར་རྫོགས་པ་ཆེན་པོའི་རྒྱུད་སྡེ་རྣམས་ལས་ཤེས་པར་བྱའོ།།

གཉིས་པ་རྒྱས་པར་བཤད་པ་ལ་བཞི་སྟེ། དོན་ངེས་པའི་རྩ་བ་དངོས་བཤད་པ། དེ་ཉིད་རྟོགས་མ་རྟོགས་ཀྱི་ཁྱད་པར་བཤད་པ། མ་རྟོགས་པ་རྣམས་གཏན་ལ་ཕབས་ཏེ་རང་གཞུང་དུ་བསྟན་པ། དེ་ལྟར་སྟོན་པའི་བླ་མ་དམ་པ་ཇི་ལྟར་བཀུར་ཚུལ་བཤད་པའོ། །དང་པོ་ལ་༼༢༡༦༽གཉིས་ཏེ། གང་གི་གསུངས་པའི་ཁུངས་བཤད་པ། ཇི་ལྟར་བསྟན་པའི་ངོ་བོ་བཤད་པའོ། །དང་པོ་ནི།

ལང་ཀའི། ཞེས་པ་ནས། དགོངས་པ་བརྒྱུད་ནས་གསུངས། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། མུན་ཁུང་གསེར་སྟོར་སྒྲོན་མས་རང་སྣང་ལྟར། །མ་རིག་མུན་པར་སེམས་སྟོར་རང་སྣང་བ། །དགོངས་པ་ཀུན་ནས་འདུས་པའི་རྩ་བ་འདི། །སྔ་རབས་འདས་པའི་དགོངས་པ་འདུས་ནས་གསུངས།།

དེ་ཡང་དཔེར་ན་མེ་ལོང་གཡས་གཡོགས་པ་ཉིད་དལ་གྱིས་རིམ་པར་ཕྱི་བ་དང༌། ཚ་མར་དང་ཉི་མ་ལ་གདུང་སྟེ་ཅིག་ཆར་ཕྱི་བ་གཉིས་དག་པའི་ཚེ་གསལ་བ་དང་གཟུགས་བརྙན་ངེས་པར་འཆར་བ་ལྟར་འདིར་མེ་ལོང་ཅིག་ཆར་དུ་ཕྱི་བའི་དཔེས་སེམས་ཀྱི་ཆོས་ཉིད་ཇི་བཞིན་པར་རྟོགས་པའི་སྐད་ཅིག་གིས་ཉོན་ཡིད་ནི་གཟུང་འཛིན་གྱི་རྟོག་པ་ཡིན་པས་གཞི་ནས་དག་སྟེ་ཚོགས་བརྒྱད་ཡེ་ཤེས་ལྔར་དག་པའི་ངོ་བོ་རྒྱས་པར་བཤད་པ་ཉིད་དེ། ལང་ཀའི་བདག་པོ་ཞེས་བོས་ནས་ཐོག་མར་ཅིག་ཆར་དུ་རྟོགས་པའི་ཐབས་ཀྱི་ཁུངས་ཉེ་བར་བསྟན་པ་ནི་འདི་ལྟ་སྟེ། དཔེར་ན་མུན་ཁུང་དུ་གསེར་སྟོར་བ་ཉིད་སྣང་གསལ་སྒྲོན་མས་རྐྱེན་ལས་རྙེད་པ་ན་བྱས་པ་མེད་པར་རང་སྣང་བ་ལྟར་དུ་འཁོར་བའི་སྲིད་པ་མ་རིག་པའི་མུན་པར་རང་རིག་བྱང་ཆུབ་སེམས་ཀྱི་གསེར་སྟོར་བ་ཉིད་རང་སྣང་ཞིང་རྙེད་པར་བྱེད་པའི་རྐྱེན་དུ་གྱུར་པ་སྒྲོན་མ་ལྟ་བུའི་རྒྱུད་ཆེན་པོ་རྒྱལ་བ་ཐམས་ཅད་ཀྱི་བརྗོད་བྱ་དང་རྗོད་བྱེད་ཀྱི་དགོངས་པ་མཐའ་དག་འདུས་པའི་རྩ་བ་རྫོགས་པའི་སངས་རྒྱས་མ་ལུས་པའི་དགོངས་པའི་ཞེ་ཕུགས་དམ་པར་གྱུར་པའི་འབྲས་བུར་ངེས་པ་འདི་ནི་སྔ་རབས་འདས་པའི་དུས་སུ་བྱོན་པའི་ཕྱོགས་བཅུ་དུས་བཞིའི་རྒྱལ་བ་རྫོགས་པའི་སངས་རྒྱས་ཀུན་གྱིས་ཀྱང་ཐུགས་ཀྱི་དགོངས་པ་ལ་བརྒྱུད་ནས་གསུངས་ཤིང་བཀའ་སྩལ་པར་མཛད་པའི་ཁུངས་དང་ལྡན་པའོ།།

གཉིས་པ་ཇི་ལྟར་བསྟན་པའི་ངོ་བོ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཆོས་ཀུན་རྩ་བ། ཞེས་པ་ནས། ནོན་པར་འདུས་པས་གསུངས། །ཞེས་པའི་བར་གྱིས་བསྟན་ཏེ།

ཆོས་ཀུན་རྩ་བ་སེམས་འདི་ཉིད་དེ་ལ་འདུས། །སེམས་ཉིད་གནས་གྱུར་ཡེ་ཤེས་ལྔར་གནས་པ། །དེ་ཉིད་དོན་ལ་ངེས་པར་བཞག་པས་ན། །སེམས་ཉིད་གནས་གྱུར་པ་ཡང་དེ་ཉིད་ཡིན། །ཡེ་ཤེས་ལྔ་ཉིད་དེ་ལ་རྗོགས་པས་ན། །ཡེ་ཤེས་ལྔ་ཡང་གཅིག་ཏུ་འདུས་པ་ཡིན། །སེམས་ཀྱི་ཆོས་ཉིད་ཇི་བཞིན་དེ་རྟོགས་ན། །ཡེ་ནས་སངས་རྒྱས་མ་ནོར་མ་བཅོས་པར། །དལ་ཁྱབ་པ་ཉིད་ནོན་པར་འདུས་པར་གསུངས།།

དེ་ཡང་ཇི་སྐད་དུ་ངེས་དོན་མདོ་བཅུ་ལས། ཨ་ནུ་ཡོ་གའི་ཨ་ཏི་ནི། །བྱང་ཆུབ་སེམས་ཀྱི་ཆོས་ཉིད་དེ། །རྒྱུ་རྐྱེན་བྲལ་བའི་རང་བཞིན་གྱིས། །གསང་བའི་ཡེ་ཤེས་རང་བྱུང་བའོ། །ཞེས་གསུངས་པའི་དོན་གྱི་སྙིང་པོ་དེ་ཉིད། ཨ་ཏི་ཡོ་གའི་ཨ་ནུ་ནི། །རང་བཞིན་མ་བཅོས་ཆོས་ཉིད་དེ། །སྒྲིབ་པ་མེད་པའི་རང་བཞིན་གྱིས། །དབྱིངས་དང་ཡེ་ཤེས་རང་བྱུང་བའོ། །ཞེས་གསུངས་པའི་ངོ་བོ་དང་གནད་མཐུན་པར། ཨ་ནུ་ཡོ་༼༢༡༧༽གའི་ལ་བཟླས་ནི། །འདུ་འབྲལ་མེད་པའི་ཆོས་ཉིད་དེ། །གཟུང་འཛིན་བྲལ་བའི་རང་བཞིན་གྱིས། །ཆོས་ཉིད་ཟབ་མོར་རང་བྱུང་བའོ། །ཞེས་གསུངས་པའི་ཆོས་ཉིད་དོན་གྱི་ལ་བཟླ་དེ་ཉིད། ཨ་ཏི་ཡོ་གའི་ལ་བཟླས་ནི། །བརྗོད་དུ་མེད་པའི་ཆོས་ཉིད་དེ། །སྒྲོ་སྐུར་བྲལ་བའི་རང་བཞིན་གྱིས། །བདེ་བ་ཆེན་པོར་རང་བྱུང་བའོ། །ཞེས་གསུངས་པ་ལྟར་ཕྱོགས་མེད་བདེ་བ་ཆེན་པོ་རང་རིག་རང་གྲོལ་གྱི་ངང་དུ་ལ་བཟླ་བའི་རང་བཞིན་རྫོགས་པ་ཆེན་པོ་མ་འདྲེས་མཐའ་བྲལ་ཡོངས་རྫོགས་དབྱེར་མེད་ཕྱོགས་བྲལ་གདལ་ཁྱབ་ཆེན་པོའི་དགོངས་དོན་ཟབ་མོ་ཇི་བཞིན་པར་སྟོན་ཏེ། འཁོར་བ་དང་མྱ་ངན་ལས་འདས་པས་བསྡུས་པའི་དངོས་པོ་གཉིས་ཀྱི་ཆོས་ཐམས་ཅད་ཀུན་གྱི་གཞི་དང་རྩ་བ་ནི་རང་གི་རིག་པ་བྱང་ཆུབ་ཀྱི་སེམས་སྤྲོས་པ་དང་བྲལ་བའི་རྣམ་ཤེས་དགུ་པ་འདི་ཉིད་ཁོ་ན་ལ་འདུས་ཤིང་རྫོགས་པ་ཡིན་པས་ཀུན་གཞི་བྱང་ཆུབ་སེམས་ཀྱི་རང་རྩལ་སེམས་ཉིད་ཚོགས་བརྒྱད་ཀྱི་དངོས་པོར་གྱུར་པ་རྣམས་སྐབས་ལྔའམ་བཅུར་གནས་གྱུར་ཏེ་ཡེ་ནས་ཡེ་ཤེས་ལྔར་གནས་པ་ཉིད་རིག་པ་ལ་ཤར་ཞིང་སྣང་བའི་བླ་དྭགས་སུ་གནས་གྱུར་ཞེས་བརྗོད་པ་སྟེ། རྟོགས་པ་དེ་ཉིད་ཀྱི་དོན་ལ་རང་གི་བློ་ཡིད་ཀྱི་བྱ་བསམ་དང་རྩོལ་བ་མེད་པར་ངེས་པར་བཞག་པས་མ་བཅོས་རང་གྲོལ་གྱི་ངང་ལ་རང་བབ་ཏུ་འདུག་ཅིང་གཡོ་བ་མེད་པར་གནས་ན། སེམས་ཉིད་ཡེ་ཤེས་ལྔར་གནས་གྱུར་པ་ཡང་དེ་ཉིད་ཡིན་པས་དེ་ཁོ་ན་ལས་གཞན་ན་མེད་དོ། །དེ་ལྟ་བུའི་ཡེ་ཤེས་ལྔ་ཡང་རིག་པ་གཅིག་དང་དུ་མ་བྲལ་བའི་ཆོས་ཉིད་བྱང་ཆུབ་ཀྱི་སེམས་རྟོགས་པ་དེ་ལ་མཚན་ཉིད་རྣམ་ལྔ་མ་འགགས་པར་གསལ་བའི་ཚུལ་གྱིས་ཡོངས་སུ་རྫོགས་པ་ཡིན་པས་ན་ཡེ་ཤེས་ལྔ་ཡང་ངོ་བོ་ཐ་དད་མེད་པར་རང་རིག་པར་རང་བྱུང་གི་ཡེ་ཤེས་གཅིག་པུ་ཉིད་དུ་འདུས་ཤིང་རིམ་པ་མིན་པར་ཅིག་ཆར་དུ་རྫོགས་པ་ཡིན་ཏེ། ཡེ་ཤེས་གསང་བ་ལས། མི་གནས་ཐུགས་ལ་ཕྱི་ནང་མེད། །སྟོང་པའི་ཡེ་ཤེས་དངོས་པོ་མེད། །མེ་ལོང་ལྟ་བུའི་ཡེ་ཤེས་ནི། །ཤེས་བྱ་ཀུན་ལ་མངོན་ཕྱོགས་མེད། །མཉམ་ཉིད་ཡེ་ཤེས་ཆེ་ཆུང་མེད། །སོ་སོར་རྟོག་པ་མ་འདྲེས་གསལ། །བྱ་བ་ནན་ཏན་ཐུགས་རྗེ་དངོས། །རང་བྱུང་ཡེ་ཤེས་ཉག་གཅིག་ལ། །ཡོན་ཏན་ཆ་རེས་དུ་མར་བགྲངས། །ཞེས་སོ། །དེས་ན་རང་རིག་པའི་སེམས་ཀྱི་ཆོས་ཉིད་མ་བཅོས་མ་བསླད་༼༢༡༨༽པའི་ཇི་བཞིན་པ་དེ་ཁོ་ན་བ་དེ་ཉིད་ཅིར་ཡང་མ་མཐོང་བའི་ཚུལ་གྱིས་ཡང་དག་པར་རྟོགས་ཤིང་རིག་པ་ན། དེ་ལྟར་རྟོགས་པའི་ཡོན་ཏན་གྱིས་སེམས་འཕྲལ་དུ་སངས་རྒྱས་མིན་པ་ལས་ཡིན་པར་བཟོས་མ་བསྒྱུར་བར་ཡེ་ནས་འཁྲུལ་པ་མེད་པར་སངས་རྒྱས་པའི་དོན་རྒྱུ་རྐྱེན་ཀྱིས་བསླད་པ་མེད་པར་མ་ནོར་མ་བཅོས་པར་མངོན་དུ་གྱུར་པ་ཡིན་པས་དེ་ལས་གཞན་དུ་བགྲོད་པ་མེད་པའི་ཕྱིར་སེམས་ཉིད་གདལ་བ་ཆེན་པོས་ཆོས་ཀུན་ལ་ཁྱབ་པས་ཀུན་ཏུ་བཟང་པོ་དབྱེ་བ་མེད་པའི་ས་མཆོག་དེ་ཉིད་ཆེད་དུ་མ་མནན་པར་ནོན་པ་ཡིན་ཏེ། སྔ་མ་ལས། རང་གསལ་ཉག་གཅིག་དྲི་མ་མེད། །རྩོལ་མེད་ནམ་མཁའ་བཞིན་དུ་གནས། །སངས་རྒྱས་སེམས་ཅན་ཀུན་ལ་ཁྱབ། །དེ་ཉིད་རྟོགས་པས་འབྲས་བུའི་ས། །ཞེས་དང༌། བྱང་ཆུབ་སེམས་ཀྱི་རང་བཞིན་ལ། །དབྱིངས་དང་ཡེ་ཤེས་དབྱེར་མེད་པས། །ཀུན་བཟང་དབྱེ་བ་མེད་པའི་ས། །མ་སྦྱངས་སེམས་ཉིད་ས་དག་ལ། །ས་རྣམས་མ་ལུས་ཐམས་ཅད་འདུས། །ཞེས་དང༌། ཀུན་བྱེད་རྒྱལ་པོའི་སྤྱིའི་བཤད་རྒྱུད་སྡེ་བཞིའི་ཡ་གྱལ་ནམ་མཁའ་དང་མཉམ་ པ་ཡེ་གེ་མེད་པའི་རྒྱུད་ལས། ཁྱབ་བདག ་དོན་འདི་སུས་རྟོགས་པ། །རྒྱལ་སྲས་བཞིན་དུ་དབུལ་བ་སངས། །འདུ་འབྲལ་གཉིས་མེད་ཀུན་ཏུ་བཟང༌། །མཚན་མ་མ་སྤངས་རང་སར་གྲོལ། །འཁོར་བ་མ་བཀག་གནས་སུ་དག །འཁྲུལ་པ་མ་བསལ་རྩད་ནས་ཆོད། །དུག་ལྔ་མ་བསྒྱུར་ཆོས་ཉིད་ཀློང༌། །རྩོལ་སྒྲུབ་མེད་པར་ཡེ་སངས་རྒྱས། །ཡིན་པའི་དོན་ལ་ཡིན་པར་ཤེས། །དཔེར་ན་གསེར་ལ་གསེར་མཐོང་བཞིན། །ཡིད་ཀྱི་རྣམ་རྟོག་ཟད་པའོ། །ནམ་མཁའ་ཆེན་པོའི་ཀློང་ཆེན་བཞིན། །ཁྱབ་གདལ་མི་འགྱུར་ཀུན་རྫོགས་གྲོལ། །ཉི་མ་སྤྲིན་མེད་སྙིང་པོ་བཞིན། །དུས་གསུམ་སྒྲིབ་མེད་དེ་བཞིན་ཉིད། །བརྒྱ་བྱིན་གཙུག་གི་ནོར་བུ་བཞིན། །འདོད་རྒུ་འབྱུང་ལ་འགྲན་ཟླ་མེད། །མ་གི་ཏ་ཡི་སྨན་བཞིན་དུ། །གང་ལ་རེག་པ་སྨན་དུ་འགྱུར། །ཞེས་སོགས་གསུངས་པ་ལྟར་རོ། །དེ་ལྟར་སེམས་ཉིད་མ་ནོར་བར་རྟོགས་པ་ལ་ཐམས་ཅད་རྫོགས་པར་རྒྱལ་བ་ཀུན་གྱི་དགོངས་པ་འདུས་པའི་སྟོན་པ་ཁྱབ་བདག་དམ་པས་བཀའ་སྩལ་བར་མཛད་དེ་ངེས་པར་གསུངས་པའོ། །ཞེས་གསང་བདག་ཆེན་པོས་ལོ་རྒྱུས་སུ་བརྗོད་པའོ།།

གཉིས་༼༢༡༩༽པ་རྒྱས་པར་བཤད་པ་ལ་བདུན་ཏེ། ལྟ་བས་ཐག་བཅད་པར་གདམས་པ། རྟོགས་ནས་ཅི་ཡང་མི་འགེག་པར་སྤྱད་ཅིང་བློ་བཞག་ཐབས་བསྟན་པ། བཞག་པ་བཞིན་ཉམས་སུ་བླང་བས་ཀུན་གྱི་སྒོ་དང་མཐུན་པར་དམ་པའི་དགོངས་པ་མྱོང་བར་བསྟན་པ། དེ་ལྟར་དགོངས་པ་རྙེད་པས་ཕ་རོལ་ཕྱིན་པ་དྲུག་ཀྱང་རྫོགས་པར་བསྟན་པ། མ་བཅོས་མཉམ་པའི་ངང་ལས་ཉམས་པའི་སྐྱོན་བྱུང་ན་བཅོས་ཐབས་བཤད་པ། ཏིང་འཛིན་མ་ཡེངས་པའི་ངོ་བོ་ལ་རྣལ་འབྱོར་གསུམ་གྱི་དོན་ཀུན་རྫོགས་པར་བསྟན་པ། དོན་དེ་ཤེས་ཤིང་གོམས་པ་ཉིད་རྒྱལ་བའི་དགོངས་སྤྱོད་མཐར་ཐུག་ཏུ་ངེས་པར་གདམས་པའོ། །དང་པོ་ནི།

གནས་སྐབས་དེ་ན། ཞེས་པ་ནས། གྲོས་ཀྱིས་ཆོད་པར་བྱ། །ཞེས་པའི་བར་གྱིས་བསྟན་ཏེ།

གནས་སྐབས་དེ་ན་ཡོད་མེད་ལྟ་མཐར་ཐུག །སེམས་ཀྱི་དེ་བཞིན་ཇི་ལྟར་ཡིན་པ་དང་། །དེ་ལ་དེ་རྒྱུན་ཡོད་མེད་ཤེས་པར་བྱ། །དེ་བཞིན་ཉིད་ལ་གང་འདིར་ཇི་ལྟར་བལྟ། །དེ་ཉིད་སྣང་བ་ཡིན་ནམ་མི་སྣང་བ། །འོན་ཏེ་སངས་རྒྱས་ཡིན་ནམ་སངས་རྒྱས་མིན། །དེ་ལ་གཞན་ན་སངས་རྒྱས་ཡོད་དམ་མེད།།

འདི་ལྟར་ཅི་བཞག་གྲོས་ཀྱིས་ཆོད་པར་བྱ།།

རྟོགས་པའི་ཡོན་ཏན་དེ་ལྟ་བུ་དང་ལྡན་པས་ན་རྗེས་སུ་འཇུག་པ་པོ་རྣམས་ཀྱིས་དང་པོར་ལྟ་བས་ཐག་བཅད་པར་གཅེས་ཏེ། དེའི་ཚུལ་ནི་ཆོས་ཉིད་ཇི་བཞིན་པ་ཇི་ལྟ་བར་ཤེས་ཤིང་ཐག་ཆོད་པའི་གནས་སྐབས་ཀྱི་དུས་དེ་ཉིད་ན་ཡང༌། དེ་ལྟ་བུའི་རང་རིག་པ་ལ་ཉན་རང་བྱང་སེམས་ལྟར་ཡོད་མེད་ཀྱི་མཐའི་ལྟ་བ་རྗེས་བཅད་པ་དང༌། གསང་སྔགས་སྤྱིའི་དགོངས་པ་ལྟར་མཐར་ཐུག་གི་བསྒྲུབ་བྱ་ཟབ་མོ་གཏན་ལ་དབབ་པ་དང༌། ཚོགས་བརྒྱད་སེམས་ཀྱི་རང་བཞིན་རྣལ་མའི་དབྱིངས་ཀྱི་ངོ་བོ་ཆོས་ཉིད་དེ་བཞིན་ཉིད་རང་བྱུང་བའི་གནས་ལུགས་ཇི་ལྟར་ཡིན་པ་དང༌། སེམས་ཉིད་དེ་ལ་ཡང་སེམས་ཙམ་སྐད་ཅིག་མ་དེ་ཡི་རྒྱུན་ཡོད་མེད་ཐག་བཅད་དེ་མཚན་མའི་ཚོགས་བརྒྱད་དང་གསང་བའི་དབྱིངས་ཀྱི་རང་བཞིན་མ་འདྲེས་ཡོངས་རྫོགས་སུ་རྟོགས་པའི་ཡེ་ཤེས་དམ་པར་ངེས་པ་རྙེད་པར་བྱའོ། །དེ་ལའང་གལ་པོའམ་གཏར་ཀ་གེགས་སེལ་ལྟ་བུར། གལ་ཏེ་ལྟ་སྒོམ་གྱི་ངོ་བོ་སེམས་མ་བཅོས་པའི་དེ་བཞིན་ཉིད་ལ་སྐབས་གང་འདིར་ཚུལ་ཇི་ལྟར་ལྟ་བར་བྱ་ཞེ་ན། འདི་ལྟར་རྩད་བཅད་པར་བྱ་སྟེ། སེམས་ཀྱི་རང་བཞིན་ཆོས་ཉིད་ཇི་བཞིན་པ་དེ་ཉིད་འདི་ལྟར་ཡོད་དེ་མངོན་སུམ་དུ་སྣང་བ་ཞིག་ཡིན་ནམ། གལ་ཏེ་མེད་ཅིང་མི་སྣང་བ་ཞིག་ཏུ་གྱུར་ཏམ། འོན་ཏེ་རང་སྣང་བའི་སེམས་ཉིད་ཡེ་ནས་སངས་རྒྱས་པ་ཞིག་ཡིན་ནམ། ཡང་ན་སངས་རྒྱས་མིན་པར་སེམས་ཅན་འབའ་ཞིག་ཏུ་གྱུར་པ་ཞིག་ཡིན་ཞེས་སྤྲོས་པ་གཅོད་པ་དང༌། དེ་བཞིན་དུ། སེམས་ཀྱི་དེ་ཁོ་ན་ཉིད་འདི་ལས་སངས་རྒྱས་ཆོས་ཀྱི་སྐུ་ཞེས་བྱ་བ་དེ་ཉིད་གཞན་༼༢༢༠༽ལོགས་ཞིག་ན་ཡོད་དམ། འོན་ཏེ་གཞན་ན་མེད་པར་འདི་ཉིད་ཁོ་ན་ཡིན་ནམ། ཞེས་ཚུལ་འདི་ལྟར་རྩད་བཅད་ལ། ལྟ་བ་ཇི་ལྟར་ཡིན་པ་དང༌། སྒོམ་པས་དོན་ཇིར་གྱུར་པའི་བློ་ཡི་ངེས་པ་གང་ལ་གཞག་པ་རྣམས། ཡིན་དོན་ལེགས་པར་རྟོགས་པ་དང་སྣང་སྤྱོད་ཡེ་ཤེས་སུ་ཤར་བའི་ཕྱིར་དང་པོར་ལྷག་མཐོང་གི་གྲོས་ཀྱིས་ཐག་ཆོད་པར་བྱ་བ་ཁོ་ན་གལ་ཆེ་སྟེ། ཀུན་འདུས་རིག་པ་ལས།

ཀློང་ཡངས་ནམ་མཁའི་སྙིང་པོ་ལ། །སྤྲིན་མེད་ཉི་མ་འབུམ་གྱིས་བརྡལ། །ཅིར་སྣང་ཅི་ཡང་མ་ཡིན་པ། །མི་སྐྱེ་མི་འགག་ངོ་བོ་ལས། །ཇི་ལྟར་བལྟས་རྒུ་དེར་སྣང་བ། །ཐེག་མཆོག་སྤྱི་རྒྱ་རླབས་ཀྱིས་བཅད། །དེ་ཡང་ལྟ་བའི་ཁྱད་པར་གྱིས། །བདག་ཉིད་ཆེན་པོའི་རྣལ་འབྱོར་དང༌། །ལྷུན་གྱིས་གྲུབ་དང་ཀློང་ཡངས་ཆུབ། །གསུམ་རྫོགས་རང་བྱུང་གདལ་བའོ། །ཞེས་དང༌། ཀུན་བྱེད་རྒྱལ་པོ་ལས། ཀྱེ་སེམས་ཀྱི་རང་བཞིན་ལྷུན་གྱིས་གྲུབ་པའི་ཕྱིར། །གྲུབ་དང་མ་གྲུབ་གཉིས་སུ་ལུང་མི་སྟོན། །བདེ་དང་སྡུག་བསྔལ་གཉིས་སུ་རྟོག་མི་བྱེད། །འཁོར་དང་མྱ་ངན་འདས་པར་རེ་དོགས་བྲལ། །ལྷུན་གྲུབ་སེམས་ཀྱི་རང་བཞིན་ཅིར་སྣང་བས། །མ་བྱུང་སྟོང་པའི་དོན་དུ་སྨྲ་མི་བྱེད། །གཞི་རྩ་སྙིང་པོ་རྟོག་དཔྱོད་ལས་འདས་པས། །གྲུབ་ཅིང་བརྟན་པའི་ཕྱོགས་སུ་ཞེན་མི་བྱེད། །ཅེས་གསུངས་པ་ལྟར་ཇི་བཞིན་པའི་དོན་ཟབ་མོ་ལ་ངེས་པ་ལེགས་པར་རྙེད་པའི་ཆེད་དུ་བཤད་པ་འདི་དག་ལ་བརྟགས་པ་རྒྱས་པར་བྱ་སྟེ་ཞིབ་ཏུ་འཕྲུལ་གྱི་མེ་ལོང་གི་གདམས་པ་བཞིན་ནོ།།

གཉིས་པ་རྟོགས་ནས་ཅི་ཡང་མི་འགེག་པར་སྤྱད་ཅིང་བློ་བཞག་ཐབས་བསྟན་པ་ནི།

འདི་ལྟར་ངེས་ནས། ཞེས་པ་ནས། དེ་ཉིད་ཡེ་སངས་རྒྱས། །ཞེས་པའི་བར་གྱིས་བསྟན་ཏེ།

འདི་ལྟར་ངེས་ནས་དེ་ལྟར་གྱུར་ན་ཡང་། །གློ་བུར་ལས་ལམ་མི་འགག་དེ་བཞིན་སྤྱད།།

དེས་ན་ཀུན་གྱི་རང་བཞིན་དེ་ཉིད་འདུས། །དེ་ལ་བསམ་མེད་དམིགས་མེད་དེར་བཞག་ན།།

ཅིར་སྣང་ཅིར་སྲིད་མཚན་མེད་དེར་གཅིག་པས། །སྐྱེ་འགག་མེད་པ་དེ་ཉིད་ཡེ་སངས་རྒྱས།།

ལྟ་བས་འདི་ལྟར་ངེས་པ་རྙེད་དེ་གཏན་ལ་ཕེབས་ནས་སྒོམ་པས་དེ་ལྟར་གདེངས་དང་ལྡན་ཏེ་ཀླུང་དུ་གྱུར་ན་ཡང་གཞན་གྱི་དོན་དུ་འདུས་བྱས་ཀྱི་དགེ་རྩའམ་གློ་བུར་གྱི་ལས་ལམ་དཀར་པོའི་ཕྱོགས་རྣམས་མི་འགེག་པའམ་མི་སྤང་བར་ནུས་ཚད་ཐམས་ཅད་དེ་བཞིན་དུ་སྤྱད་པར་བྱ་སྟེ། དེ་ཉིད་སྤང་བྱ་མིན་པ་དང༌། ཆོས་ཉིད་དེ་ལས་གཞན་པའང་མ་ཡིན་པའི་ཕྱིར་རོ། །དེས་ན་ངང་གི་རང་བཞིན་མ་རྟོགས་པར་ཞེན་རྩོལ་གྱིས་བྱས་ན་ཆུ་སས་རྙོགས་པ་དང་འདྲ་ཡང་ངང་ལས་མི་འདའ་བའི་རང་བཞིན་དུ་སྤྱད་ན་མ་འདྲེས་ཡོངས་རྫོགས་སུ་འགྱུར་བའོ། །དེ་ལྟར་རྟོགས་ཏེ་ཐག་༼༢༢༡༽ཆོད་པ་དེས་ན་ཆོས་ཀུན་གྱི་རང་བཞིན་ལ་སྤང་བླང་གང་ཡང་མེད་པ་དང་ཐམས་ཅད་དགོངས་པ་དེ་ཉིད་དུ་གསལ་བར་འདུས་པ་ཡིན་པས་བཀོལ་སྤང་གི་སྤྲོས་མཐའ་གང་ཅི་ཡང་མེད་པའོ། །དེ་ལྟར་རྟོགས་ནས་ཉམས་སུ་ཏིང་ངེ་འཛིན་གྱིས་བླངས་པའི་ཚེ་ཐོག་མར་བློ་བཞག་པའི་ཐབས་འཆད་དེ། སྙེགས་པའི་རྟོགས་པ་དེ་དང་དོན་གྱི་གཞི་ལ་མ་ནོར་བར་རྗེས་སུ་འཇོག་པ་དེ་ནི། ཆོས་ཉིད་མཉམ་པ་ཉིད་ཇི་བཞིན་པར་རྟོགས་པས་བློས་བསམ་བྱ་མེད་ཅིང་སྒོམ་པས་དམིགས་སུ་མེད་པའི་ངང་དེར་ཡིད་ལ་བྱ་བ་དང་གཏོང་འཛིན་མེད་དེ་འདུ་ཤེས་གང་དུའང་མ་ཞུགས་པར་གྱིན་འདའ་བར་བཞག་པ་ནི། བསམ་པ་གང་དུའང་མ་གཡོས་པས་བཞག་པའི་མིང་ཐོབ་པས་ཐབས་དམ་པ་ཉིད་དེ། ཀུན་བྱེད་ལས། ཇི་བཞིན་རྩོལ་བྲལ་བདེ་བ་ཆེན་པོ་ལ། །སྒོ་གསུམ་མི་རྩོལ་བཅོས་ཤིང་དམིགས་མི་བྱེད། །ཡིད་ལ་མི་བྱེད་མཚན་མའི་རྗེས་མི་འབྲངས། །རང་བྱུང་ཡེ་ཤེས་བདེ་བའི་དོན་ལ་བཞག །འདི་ནི་རང་བྱུང་འོད་གསལ་དགོངས་པ་སྟེ། །ཀུན་བྱེད་རྒྱལ་པོའི་དགོངས་པའི་ཕྲིན་ལས་སོ། །ཞེས་གསུངས་པ་ལྟར་རོ། །དེ་བས་ན། ཚེ་སྐབས་ཀྱི་དོན་ནི་དེ་ལྟ་བུར་རིག་པ་མི་གཡོ་བ་ཆེན་པོར་གནས་པ་ལ་ཐ་སྙད་ཅི་སྣང་ཇི་སྲིད་ཀྱི་ཆོས་སོ་ཅོག་མཐའ་དག་ཐམས་ཅད་མཚན་ཉིད་དང་བྲལ་བའི་ཆོས་ཀྱི་དབྱིངས་སུ་གསལ་བའི་ངང་སྤྲོས་པ་མེད་པ་དེར་དགོངས་པ་ལྷུན་གྱིས་གྲུབ་པར་གཅིག་ཏུ་གྲོལ་བས་རང་གི་ངོ་བོ་རྒྱུ་ལས་སྐྱེ་བ་དང་རྐྱེན་གྱིས་འགག་པ་མེད་པར་དེ་ཁོ་ན་ཉིད་དུ་ཡེ་ནས་སངས་རྒྱས་པ་ཡིན་ཏེ། སྔ་མ་ལས། ཇི་ལྟར་སྣང་གྲགས་ཆོས་རྣམས་ཐམས་ཅད་ལ། །སྙིང་པོ་རྟོགས་གོམས་དོན་ཉིད་གཅིག་ལས་མེད། །སྙིང་པོ་མངོན་དུ་ཕྱུང་ནས་གང་བསྟན་པ། །རང་བཞིན་སྐྱེ་བ་མེད་པའི་དོན་དུ་རྟོགས། །མ་ཡེངས་རེ་དོགས་ཆད་པའི་དགོངས་པ་ཡིན། །ཞེས་སོགས་གསུངས་སོ།།

གསུམ་པ་བཞག་པ་བཞིན་ཉམས་སུ་བླང་བས་ཀུན་གྱི་སྒོ་དང་མཐུན་པར་དམ་པའི་དགོངས་པ་མྱོང་བར་བསྟན་པ་ནི།

དེ་ཉིད་མ་ཡེངས། ཞེས་པ་ནས། དམ་པའི་དགོངས་པ་མྱོང༌། །ཞེས་པའི་བར་གྱིས་བསྟན་ཏེ།

དེ་ཉིད་མ་ཡེངས་པས་ན་མ་བཙལ་ཡང་། །རྗོགས་པའི་སྤྱིར་ཆིབ་ས་ཉིད་ཡེ་ནས་ནོན། །དེ་ཉིད་ཉམས་དྲོད་ཉམས་སུ་གསལ་ན་ཡང་། །ཆོས་ཀུན་སྒོ་དང་མི་འགལ་བསྟན་པའི་ཕྱིར། །ཏིང་འཛིན་གསུམ་ལྡན་གོལ་བའི་སྒོ་བཀག་ནས། །དྲོད་ཆེན་གསུམ་གྱིས་དམ་པའི་དགོངས་པ་མྱོང་།།

དེ་ལྟ་བུའི་དགོངས་པ་དམ་པ་དེ་ཉིད་ལ་འཛིན་པའི་རྣམ་པ་གང་ཡང་མེད་ཅིང་ཡེངས་བྱ་ཡེངས་བྱེད་དང་བྲལ་ཏེ་ཀུན་ཏུ་མ་ཡེངས་པར་གྱུར་པས་ན་གཞན་དུ་མ་བརྩལ་ན་ཡང་དོན་གྱི་ངོ་བོ་མཐའ་བྲལ་ཀུན་རྫོགས་སུ་གསལ་བ་ཙམ་ཉིད་བགྲོད་པའི་གནས་མཆོག་མཐར་ཐུག་པ་༼༢༢༢༽ཉིད་ལ་གནས་པ་ཡིན་པས་རྫོགས་པ་ཐམས་ཅད་ཀྱི་སྤྱིར་རམ་སྤྱི་བོར་ཆིབས་པའི་ས་མཆོག་དམ་པ་ཉིད་གསར་དུ་མནན་པ་མ་ཡིན་པར་ཡེ་ནས་ནོན་པ་ཉིད་མངོན་དུ་སྣང་བ་ཡིན་པས་ད་ལྟ་ཉིད་ནས་འབྲས་བུར་མངོན་བྱང་ཆུབ་པ་ཉིད་དེ། ཀློང་རབ་འབྱམས་ལས། ཀློང་ཡངས་འུབ་ཆུབ་གདལ་ཁྱབ་ས། །སྤྱིར་ཆིབས་ས་བཅུ་འདུས་པའི་ཀློང༌། །གཅིག་ལས་བྱེ་བྲག་ཕྱེ་བའི་ཕྱིར༌། །ས་བཅུ་སྣང་བ་ཡོན་ཏན་ཡིན། །ཞེས་དང༌། སྔ་མ་ལས། དགོས་ནི་ཁམས་གསུམ་སེམས་ཅན་ཐམས་ཅད་ཀུན། །རང་སེམས་དེ་བཞིན་ཉིད་དེ་མཐོང་གྱུར་ན། །སངས་རྒྱས་ཚིག་གི་ས་ལ་མི་གནས་ཏེ། །ད་ལྟ་ཉིད་ནས་ཤིན་ཏུ་རྣལ་འབྱོར་ཐོབ། །ཅེས་སོ། །དེ་ལྟར་ཆོས་ཉིད་བྱང་ཆུབ་ཀྱི་སེམས་དེ་ཉིད་ཇི་བཞིན་དུ་རྟོགས་ནས་བློས་བསམ་དུ་མེད་པའི་བསམ་གཏན་ལ་ཡུན་རིང་དུ་གནས་པས་མཇུག་དྲག་དལ་གྱི་གོམས་པ་ཆུ་དང་མཚོ་གཏིང་གི་དཔེས་ཉམས་ཐ་མ་དང་ལྡན་ཞིང༌། དྲོད་མཆོག་དམ་པ་ཐོག་ཏུ་ཕེབས་ཏེ་རྟོགས་པའི་ཉམས་སུ་སྒྲིབ་བྱེད་མ་དམིགས་པར་རང་གསལ་བར་འགྱུར་ལ། དེ་ལྟར་ན་ཡང་མི་མཐུན་པ་ནི། གསང་མཆོག་ཐེག་པ་ཆེན་པོ་ནི་ཆོས་ཀུན་གྱི་ བདག་ཉིད་ཡིན་པས་འདི་ཉིད་ལ་བསླབ་པས་སྣང་སྟོང་དབྱེར་མེད་གསུམ་དང་ཏིང་འཛིན་རྣམ་པ ་གསུམ་སོགས་ཐེག་པའི་སྒོ་རྣམས་དང་མི་འགལ་ཞིང་མཐུན་པར་བསྟན་པའི་ཕྱིར་རམ་ཆེད་དུ། དཀྱིལ་འཁོར་གསུམ་དབྱེར་མེད་པར་རྟོགས་པའི་ཕྱོགས་བྲལ་ལྷུན་གྲུབ་གསུམ་གྱི་རིག་པ་ལ་སྟོང་ཆེན་དེ་བཞིན་ཉིད་དང་ཀུན་ཏུ་སྣང་བ་དང་རྒྱུའི་ཏིང་ངེ་འཛིན་གསུམ་ཡང་རྫོགས་པར་ལྡན་ཏེ་ཡོངས་སུ་གྲོལ་བས། རང་བཞིན་སྟོང་པའམ་དེ་བཞིན་ཉིད་ཀྱིས་སྐྱེ་བོར་གོལ་བའི་སྒོ་དང༌། སྣང་བ་དང་རྒྱུས་བྱང་སེམས་སུ་གོལ་བའི་སྒོ་དང༌། དབྱེར་མེད་དང་སྙིང་རྗེས་ཉན་རང་དུ་གོལ་བའི་སྒོ་དང༌། གསུམ་ཆར་ངང་ལ་རྫོགས་པས་སྔགས་ཕྱི་ནང་གི་རྟོགས་པ་ཕྱོགས་རིས་སུ་གོལ་བའི་སྒོ་རྣམས་བཀག་ནས་དགོངས་པ་ཡོངས་རྫོགས་ལྷུན་གྲུབ་ཆེན་པོར་གནས་པ་ཡིན་ཏེ། ཇི་བཞིན་པ་ཉིད་མ་བསླད་པར་གསལ་བ་ནི་རིལ་གྱི་འབྱུང་གནས་སུ་གྱུར་པའི་ཕྱིར་རོ། །དེ་ལྟ་བས་ན་དགོངས་པ་འདི་ལ་མཐའ་རྣམས་མ་བསལ་བྲལ་བས་གོལ་སྒྲིབ་ཏུ་ལྟུང་བའི་གནས་རྣམས་མ་སྤངས་ལ་མི་འབྱུང་བར་ཡང་དག་པར་༼༢༢༣༽ཤེས་པའི་ངོ་བོར་གྱུར་པའོ། །རྟོགས་པ་དེ་ཉིད་ལ་མཚན་མའི་ཉམས་དྲོད་བརྟག་ཏུ་མེད་ན་ཡང༌། སྔ་མའི་དགོས་པ་དང་བསྟུན་ཏེ་ཉམས་དྲོད་དང་ཉམས་དྲོད་ཆེན་པོའི་དབྱེ་བས་ཕྱི་ནང་གསང་བའི་དྲོད་མཆོག་གཡོ་ཐོབ་བརྟན་པ་གསུམ་གྱིས་རྒྱལ་བ་རྣམ་འདྲེན་དམ་པའི་དགོངས་པ་ཇི་ལྟ་བ་བཞིན་དུ་ཉམས་སུ་མྱོང་ནས་རོ་བསྟར་བར་འགྱུར་རོ།།

བཞི་པ་དེ་ལྟར་དགོངས་པ་རྙེད་པས་ཕ་རོལ་ཕྱིན་པ་དྲུག་ཀྱང་རྫོགས་པར་བསྟན་པ་ནི།

དེས་ན་ཏིང་འཛིན། ཞེས་པ་ནས། ཕྱིན་དྲུག་རང་བཞིན་རྫོགས། །ཞེས་པའི་བར་གྱིས་བསྟན་ཏེ།

དེས་ན་ཏིང་འཛིན་རྣམ་གསུམ་ཉམས་རྙེད་པ། །འབྲས་བུ་ཕ་རོལ་ཕྱིན་དྲུག་རང་བཞིན་རྗོགས།།

དེ་ལྟར་ཇི་ལྟ་བ་ཉིད་ཀྱི་རོ་བསྟར་བའི་ཚུལ་དེས་ན་དགོངས་པའི་ཏིང་ངེ་འཛིན་རྣམ་པ་གསུམ་གྱི་ཉམས་དུས་གཅིག་ལ་རྙེད་པའི་ཕྱིར་ན་རྟོགས་པ་དེ་ཉིད་མཐར་ཕྱིན་པས་རྒྱལ་བའི་ཡོན་ཏན་འབྲས་བུ་སྐུ་གསུམ་དང་རྒྱུ་ཕ་རོལ་ཏུ་ཕྱིན་པ་དྲུག་པོ་རྣམས་ཀྱང་རང་བཞིན་གྱིས་ཡོངས་སུ་རྫོགས་པར་ཅི་སྟེ་བར་མི་ཆུད་དེ། དཔེར་ན་ཉི་མའི་ཆོས་ཉིད་གསལ་བ་དང་མཚུངས་པར་རང་བཞིན་གྱི་གཏན་ཚིགས་དང༌། ཆོས་ཉིད་ཀྱི་རིགས་པས་ཤིན་ཏུ་གསལ་ལོ། །དེའི་ཚུལ་ནི། དགོངས་པ་དང་པོ་ནི་ཆོས་ཀྱི་སྐུའོ། །བར་མ་ནི་ལོངས་སྤྱོད་རྫོགས་པའོ། །ཐ་མ་ནི་སྤྲུལ་པའི་སྐུའོ། །དེ་ལྟ་བུ་ལ་ཟིན་ཆགས་མེད་པར་གདལ་བས་སྦྱིན་པའི་ཕར་ཕྱིན་དང༌། དྲི་མ་གཉིས་དང་བྲལ་བའི་དོན་ལས་མི་འདའ་བས་ཚུལ་ཁྲིམས་དང༌། མཉམ་པའི་དོན་ཆེན་པོ་གང་ལའང་ཉམ་མི་ང་ཞིང་མི་སྐྲག་པས་བཟོད་པ་དང༌། ཅིར་ཡང་མི་གཡོ་བས་བསམ་གཏན་དང༌། དུས་གསུམ་དུ་ཡེངས་བྲལ་མེད་པས་བརྩོན་འགྲུས་དང༌། ཇི་བཞིན་པར་རིག་པ་རང་གསལ་བས་ཤེས་རབ་ཀྱི་ཕ་རོལ་དུ་ཕྱིན་པའོ།།

ལྔ་པ་མ་བཅོས་མཉམ་པའི་ངང་ལས་ཉམས་པའི་སྐྱོན་བྱུང་ན་བཅོས་ཐབས་བཤད་པ་ནི།

སེམས་ཉིད་མ་བཅོས། ཞེས་པ་ནས། རྣམས་ཀྱིས་ཡིན་པར་བསྔགས། །ཞེས་པའི་བར་གྱིས་བསྟན་ཏེ།

སེམས་ཉིད་ནམ་མཁའ་མ་བཅོས་ངང་ལ་གཞག །དེ་ན་དྲན་ཞིང་རྟོགས་པ་ཅི་བྱུང་ཡང་།།

དེ་བཞིན་མ་བཅོས་ཉིད་ཀྱི་ལ་བཅད་པས། །ངང་གིས་མ་བཅོས་ཡོང་གིས་འོད་གསལ་བ།།

གསང་བ་འདུས་པ་རྣམས་ཀྱིས་ཡིན་པར་བསྔགས།།

སེམས་ཀྱི་ཆོས་ཉིད་རྟོག་པས་མ་བཅོས་པའི་རང་བཞིན་ནི། ངོས་གཟུང་མེད་པ་དང༌། ཆོ་འཕྲུལ་འབྱུང་བ་དང་ཐོག་མ་དང་མཐའ་དབུས་བྲལ་བའི་ཆོས་གསུམ་གྱི་ནམ་མཁའི་དབྱིངས་དང་མཚུངས་པ་ཉིད་ནི་བྱས་པ་མེད་པར་རང་རིག་པ་ལྷུན་གྱིས་གྲུབ་པའི་ངང་སྟེ། དོན་དེ་ལ་དེ་ཉིད་དུའང་མ་བསམ་པ་ནི་ངང་གནས་སུ་བཞག་པ་ཉིད་དེ། ཀུན་བྱེད་ལས། ཀྱེ་སེམས་དཔའ་རྡོ་རྗེ་ཇི་བཞིན་ཉིད་སྒོམས་ཤིག །མ་བཅོས་ཇི་བཞིན་ཉིད་ལ་འཇུག་པ་ལ། །ཚད་མ་མི་དགོས་གཉེན་པོས་༼༢༢༤༽བཅོས་མི་དགོས། །རྟོགས་པའི་དོན་ལ་མ་བཅོས་དེ་བཞིན་ཞོག །ཅེས་སོ། །འོན་ཏང་དེ་ལྟར་སྒོམ་པ་དེ་ཡི་ཚེ་ན་ཡང་དྲན་ཞིང་རྟོག་པའི་རྣམ་པ་ཕྲ་རགས་ཅི་ཞིག་བྱུང་སྟེ་འཕྲོ་བར་སྣང་ན་ཡང༌། བློ་བཅོས་པའི་ཐབས་ནི། ཡེ་ཤེས་ཀྱི་རོལ་པར་ཤེས་ནས་དེ་བཞིན་ཉིད་ལས་མ་གཡོས་པའི་ངང་ལ་བསམ་པ་གང་དུའང་འབྱུང་འཇུག་མེད་པར་གདེང་དུ་ཆུད་པ་ཉིད་ཀྱིས་དྲན་རྟོག་ཐམས་ཅད་ལ་བཟླས་ཏེ་ལྟ་བས་ཐག་བཅད་པས་དྲན་རྟོག་གི་རྒྱུ་བ་གང་ཡང་མ་དམིགས་ཏེ་བློས་ཆེད་དུ་མ་གཏད་པར་རྟོགས་པའི་ཏིང་ངེ་འཛིན་གྱི་ངོ་བོར་ངང་གིས་གྲོལ་བས་རྒྱུ་རྐྱེན་ནམ་བྱེད་པ་པོས་མ་བཅོས་པར་རང་བཞིན་ཡོངས་ཀྱིས་འོད་གསལ་བ་ཉིད་དུ་མ་བཀག་ལ་མི་ལྡན་པར་ཡོངས་སུ་དག་པ་ནི། གསང་བ་སྔགས་ཀྱི་སྟོན་མཆོག་རྒྱལ་བའི་དགོངས་པ་ཀུན་ནས་འདུས་ཤིང་རྫོགས་པ་རྣམས་ཀྱིས་སེམས་ཉིད་དོན་གྱི་ངོ་བོ་མ་ནོར་བ་ཡིན་པར་ཆེད་དུ་བསྔགས་ཏེ་ཡོན་ཏན་ཐམས་ཅད་ཀྱི་འབྱུང་གནས་ཉིད་དུ་ངེས་པར་བསྟན་ནས་ཆེ་བ་བརྗོད་པའི་ཚུལ་གྱིས་བཀའ་སྩལ་བ་ཉིད་དེ། སྔ་མ་ལས།

ཇི་བཞིན་མ་བཅོས་རྒྱལ་བའི་དགོངས་པ་ལ། །སེམས་དང་སེམས་ལས་བྱུང་བ་ཅི་སྐྱེས་ཀྱང༌། །དེ་ཉིད་སྐྱེ་མེད་ཉིད་དུ་གནས་ཤེས་ན། །བྱ་རྩོལ་མཚོན་མའི་འདུ་ཤེས་ཀུན་དང་བྲལ། །ཀྱེ་སེམས་དཔའ་རྡོ་རྗེ་ཇི་བཞིན་ཉིད་སྒོམས་ཤིག རྟོགས་པ་རང་སར་གྲོལ་བའི་ལྟ་བ་ལ། །མ་ཡེངས་རང་བཞིན་བཞག་པས་བྱ་བཙལ་མེད། །ཀུན་ཀྱང་རང་བྱུང་རང་སར་གྲོལ་བ་ཡིན། །ཞེས་དང༌། རང་བྱུང་སྙིང་པོ་མཆོག་གི་དཀྱིལ་འཁོར་ལ། །སྒོ་གསུམ་ལྷུག་པས་ཇི་བཞིན་ངང་བཞག་ན། །ཀུན་བྱེད་ང་ཡི་དགོངས་པར་གནས་པ་ཡིན། །སྔ་རབས་འདས་པའི་ཀུན་བྱེད་རྒྱལ་པོས་ཀྱང༌། །དགོངས་པ་རྣལ་དུ་བཞག་པས་དོན་རྫོགས་ལ། །མ་བྱོན་དུས་ཀྱི་ཀུན་བྱེད་རྒྱལ་པོས་ཀྱང༌། །མ་བཅོས་རྣལ་དུ་བཞག་པས་དོན་རྫོགས་འགྱུར། །ད་ལྟར་བཞུགས་པའི་ཀུན་བྱེད་རྒྱལ་པོས་ཀྱང༌། །དགོངས་པ་རྣལ་དུ་བཞག་སྟེ་གནས་པ་ཡིན། །ཞེས་དང༌། ཀྱེ་སྟོན་པ་ཀུན་བྱེད་ང་ཡི་ཡེ་ཤེས་ཉིད། །བགྲང་དུ་མེད་ལ་བགྲང་ན་མཐའ་ལས་འདས། །ཆེ་བ་རེ་ལ་ཡེ་ཤེས་གྲངས་བསྟན་པས། །བརྗོད་པས་དེ་དག་མི་རྫོགས་ལུང་༼༢༢༥༽བསྟན་ཏོ། །ཀྱེ་ཀུན་བྱེད་རྒྱལ་པོ་ང་ཡི་ཡེ་ཤེས་ནི། །རྣམ་པར་མི་རྟོག་སྤྲོས་པ་ཀུན་དང་བྲལ། །རབ་ཞི་གདུལ་མེད་མཁའ་ལྟར་གནས་པ་སྟེ། །སྐྱེ་བ་མེད་པ་ཞེས་སུ་བསྟན་པ་ཡིན། །རང་བྱུང་ཡེ་ཤེས་གཅིག་ལས་མ་གཡོས་ཀྱང༌། །རྣམ་པའི་ཁྱད་པར་མ་བཅོས་སོ་སོར་གསལ། །དེ་ལྟར་གང་གིས་རིག་ཅིང་རྟོགས་པ་ཉིད། །ཀུན་བྱེད་རྒྱལ་པོའི་སྲས་སུ་ལུང་བསྟན་ཏོ། །ཞེས་སོགས་གསུངས་པ་ལྟར་རོ།།

དྲུག་པ་ཏིང་འཛིན་མ་ཡེངས་པའི་ངོ་བོ་ལ་རྣལ་འབྱོར་གསུམ་གྱི་དོན་ཀུན་རྫོགས་པར་བསྟན་པ་ནི།

མ་ཡེངས་སྐྱེ་འགག ཅེས་པ་ནས། དེ་ཡི་སྐབས་ན་རྫོགས། །ཞེས་པའི་བར་གྱིས་བསྟན་ཏེ།

མ་ཡེངས་སྐྱེ་འགག་མེད་ཉིད་ཏིང་འཛིན་ཏེ། །རྣལ་འབྱོར་གསུམ་དོན་དེ་ཡི་སྐབས་ན་རྗོགས།།

དེ་ཡང་རྟོགས་པའི་ངོ་བོ་བྱང་ཆུབ་སེམས་ཀྱི་ངང་ལས་གཞན་པའི་ཡུལ་དུ་གྱུར་པའི་ཆོས་གང་ཡང་མ་དམིགས་པས་ཕྱོགས་བྲལ་བདེ་བ་ཆེན་པོའི་དོན་ལས་མ་ཡེངས་པར་དང་པོར་སྐྱེ་བ་དང་ཐ་མ་འགག་པ་མེད་པའི་ཆོས་ཉིད་རང་གསལ་བ་ནི་རང་བྱུང་རྫོགས་པའི་ཏིང་ངེ་འཛིན་ཀྱི་ངོ་བོ་ཡིན་ཏེ། རང་རིག་པ་མཉམ་པའི་ངང་ལས་མ་གཡོས་པས་སོ། །དེ་བས་ན། ཀློང་རབ་འབྱམས་ལས། དམིགས་པའི་མཐའ་ལས་འདས་པས་ན། །མི་གནས་ཆོས་སྐུའི་ངོ་བོ་ཉིད། །རྒྱུ་རྐྱེན་མེད་པར་རང་བྱུང་བས། །རང་བྱུང་ཡེ་ཤེས་ནམ་མཁའ་ཆེ། །ཐམས་ཅད་དེ་རུ་འདུས་པས་ན། །མ་འདྲེས་ཡོངས་རྫོགས་ཐེག་པའི་རྒྱན། ཞེས་གསུངས་པ་ལྟར། རང་རིག་གདལ་ཁྱབ་ཆེན་པོ་རྟོགས་ནས་ངང་ལ་གནས་པའི་རང་བཞིན་ལ། མ་ཧཱ། ཨ་ནུ། ཨ་ཏི་གསུམ་མམ། བྱ་བ་དང༌། བྱ་བ་བྱེད་པ་དང༌། བྱ་བ་མེད་པའི་རྣལ་འབྱོར་གསུམ་གྱི་དོན་ཡང་དུས་གཅིག་ཏུ་དབྱེར་མེད་པར་དེ་ཡི་སྐབས་ན་རིག་པ་ལ་མ་འདྲེས་ཡོངས་སུ་རྫོགས་པ་ཡིན་ནོ།།

བདུན་པ་དོན་དེ་ཤེས་ཤིང་གོམས་པ་ཉིད་རྒྱལ་བའི་དགོངས་སྤྱོད་མཐར་ཐུག་ཏུ་ངེས་པར་གདམས་པ་ལ་ལྔ་སྟེ། མ་ནོར་བར་ཤེས་དགོས་པར་གདམས་པ། དེ་ལྟར་རྟོགས་པའི་ཡོན་ཏན་བསྟན་པ། ཡེངས་མེད་དུ་བསྒོམ་དགོས་པར་གདམས་པ། དེ་ལྟར་བསྒོམ་པའི་ཡོན་ཏན་བསྟན་པ། ཚུལ་དེ་ཉིད་ཐུན་མོང་མ་ཡིན་པའི་དགོངས་སྤྱོད་དུ་བསྟན་པའོ། །དང་པོ་ནི།

དེས་ན་ཀུན་གྱི། ཞེས་པ་ནས། སེམས་ཉིད་ཤེས་པར་བྱ། །ཞེས་པའི་བར་གྱིས་བསྟན་ཏེ།

དེས་ན་ཀུན་གྱི་བཤེས་གཉེན་དགོངས་རྒྱུད་ནས། །དམ་པའི་དོན་དུས་སེམས་ཉིད་ཤེས་པར་བྱ།།

དགོངས་པ་མཆོག་གི་ཏིང་ངེ་འཛིན་གྱི་ཆེ་བའི་ཡོན་ཏན་ལ་སྙེགས་པ་དེས་ན་གཏན་ཚིགས་ལྟ་བུར་གྱུར་པ་ནི། བདེ་བར་གཤེགས་༼༢༢༦༽པ་ཀུན་གྱི་བཤེས་གཉེན་སྟོན་མཆོག་ཀུན་བཟང་རྡོ་རྗེ་སེམས་དཔའི་གསང་བའི་དབྱིངས་ཀྱི་དགོངས་པ་ཟབ་མོ་གསང་བདག་རྡོ་རྗེ་འཛིན་པ་ནས་རིག་འཛིན་དྲ་མ་ལ་བརྒྱུད་པའི་རྒྱུད་འདིའི་དོན་ཇི་བཞིན་དུ་རྟོགས་ནས་འབྲས་བུ་དམ་པའི་དོན་དུ་ངེས་པ་ནི་དཀྱིལ་འཁོར་རྣམ་གསུམ་དབྱེར་མེད་པའི་རང་རིག་ལྷུན་མཉམ་ཆེན་པོ་སེམས་ཉིད་བྱང་ཆུབ་ཀྱི་སེམས་སུ་ཡེ་སངས་རྒྱས་པ་ཉིད་དུ་ཡང་དག་པར་ཤེས་པར་བྱ་སྟེ། དེ་ལྟར་མཐར་ཐུག་དོན་གྱི་ངོ་བོ་ཇི་བཞིན་པར་ཤེས་ནས་བསྒོམ་པ་གཅེས་པར་བསྟན་པའོ།།

གཉིས་པ་དེ་ལྟར་རྟོགས་པའི་ཡོན་ཏན་བསྟན་པ་ནི།

དེ་ཉིད་རྡོ་རྗེ། ཞེས་པ་ནས། བཤེས་གཉེན་ཡིན་པར་གྲགས། །ཞེས་པའི་བར་གྱིས་བསྟན་ཏེ།

དེ་ཉིད་རྡོ་རྗེ་སེམས་དཔའ་ཡིན་པས་ན། །གང་གིས་འདི་མཐོང་དེ་ཡི་ཞལ་མཐོང་ཡིན།།

དེ་མཐོང་ཕན་ཆད་དམ་པ་ཉིད་ཡིན་པས། །དེས་ན་ཀུན་གྱི་བཤེས་གཉེན་ཡིན་པར་གྲགས།།

དེ་ཅིའི་ཕྱིར་ཞེ་ན། རྒྱུད་འདིའི་དོན་སྟོན་པ་དེ་ཉིད་རྒྱལ་མཆོག་རྡོ་རྗེ་སེམས་དཔའ་ཉིད་ཡིན་ཏེ། འདུལ་བའི་དབང་གིས་མཚན་སོ་སོར་གྲགས་པའང་ངོ་བོ་ལ་བྱེ་བྲག་མེད་པས་ན་དམ་པ་གང་ཞིག་གིས་རྒྱུད་ཀྱི་དགོངས་པ་ཇི་བཞིན་པ་རྡོ་རྗེ་ལྟ་བུའི་ཆོས་ལྔ་དང་ལྡན་པའི་རང་བཞིན་འོད་གསལ་མཐའ་བྲལ་བྱང་ཆུབ་སེམས་ཀྱི་ཆོས་ཉིད་འདི་ཡི་བདེན་པ་མཐོང་ན་བཅོམ་ལྡན་འདས་དཔལ་རྡོ་རྗེ་སེམས་དཔའ་དེ་ཡི་ཞལ་ངེས་པར་མཐོང་བ་ཁོ་ན་ཡིན་ཏེ། ཡང་འབྱེད་འཕྲུལ་གྱི་ལྡེ་མིག་ལས། ཏིང་འཛིན་རབ་ལ་ལུང་བསྟན་པ། །གསེར་རི་གཡུ་ཡིས་བརྒྱན་པ་འདྲ། །ཡེ་ཤེས་གསལ་ལ་གདུགས་བརྡལ་འདྲ། །རྡོ་རྗེ་སེམས་དཔར་དེ་མ་ཐག །སངས་རྒྱས་ཀུན་གྱི་སྙིང་པོར་འགྱུར། །རྣལ་འབྱོར་དབང་ཕྱུག་ཆེན་པོ་ཡིན། །ཞེས་དང༌། ནམ་མཁའ་ཆེ་རྒྱས་པའི་རྒྱུད་ལས། རྡོ་རྗེ་སེམས་དཔའ་ནམ་མཁའ་ཆེ། །ཀུན་བཟང་ཡངས་པ་ཆོས་ཀྱི་དབྱིངས། །རྣམ་དག་ལམ་ཆེན་ཀུན་སྒྲོལ་ཕྱིར། །མ་སྐྱེས་མ་འགགས་ཅིར་མི་དགོངས། །དེ་བཞིན་གཤེགས་པ་ཐམས་ཅད་ལ། །དམ་པ་འདི་ལས་གཞན་མི་མངའ། །འདས་དང་ད་ལྟར་བྱུང་བ་ཀུན། །འདི་ཉིད་བརྙེས་ནས་ལྷུན་གྱིས་གྲུབ། །ཅེས་སོ།།

རྟོགས་པའི་ཡོན་ཏན་ཇི་ལྟ་བུ་སྙམ་པ་ལ། དེ་ལྟར་ངེས་པར་མཐོང་ནས་དོན་གྱི་གནད་ཟབ་མོ་ཁོང་དུ་ཆུད་པའི་དུས་དེ་ཉིད་ཕན་ཆད་འཁོར་བར་ལྟུང་བ་མེད་པ་དང་རྒྱལ་བ་དམ་པ་ཉིད་དང་སྤྱོད་ཡུལ་གཅིག་པ་ཡིན་པས་སངས་རྒྱས་ཉིད་དེ། དེས་ན་རྡོ་རྗེ་སེམས་དཔའ་རྒྱལ་བ་ཀུན་གྱི་སྟོན་པ་འགྲོ་བ་ཡོངས་༼༢༢༧༽ཀྱི་བཤེས་གཉེན་དམ་པ་དེ་ཉིད་ཡིན་པར་རྡོ་རྗེ་གསང་བའི་རྒྱུད་ལས་གྲགས་པ་ཡིན་ཏེ། ཀློང་ཆེན་རབ་འབྱམས་ལས། དོན་འདི་ཚིག་ཏུ་མ་ཁྱེར་བར། །གནད་ཀྱི་གདེང་དུ་ཆུད་པ་གང༌། །དམན་པའི་ལུས་ལ་དམ་པའི་སེམས། །དུས་གསུམ་སངས་རྒྱས་སྲས་གཅིག་པོ། །འཇིག་རྟེན་དྲེགས་པས་བཅིངས་པ་ཡི། །ལྷ་སྲིན་སྡེ་བརྒྱད་ཐམས་ཅད་ཀྱང༌། །ཇོ་བོའི་ཚུལ་དུ་ཁུར་བར་བྱེད། །སངས་རྒྱས་ཀུན་དང་དགོངས་པ་མཉམ། །ནམ་མཁའ་ཉིད་ལ་ནམ་མཁའ་སྤྱོད། །ཅེས་དང༌། མདོ་བཅུ་ལས། ལུས་ནི་གང་ཟག་འཇིག་རྟེན་ཡང༌། །སེམས་དགོངས་རྫོགས་ཆེན་སངས་རྒྱས་ཡིན། །འདི་ཡིས་སེམས་ཅན་དོན་བྱས་ཀྱང༌། །དོན་ལ་ནོར་བ་ངེས་མི་འབྱུང༌། །ཡིན་པ་དག་ལ་ནོར་བ་མེད། །ངེས་པ་དག་ལ་ཐེ་ཚོམ་མེད། །རྫོགས་པ་ཆེན་པོའི་ལུང་འདི་ལ། །ཡོད་མེད་ཚིག་དང་མ་ངེས་པའི། །དོན་ལ་འདའ་བ་མི་མངའ་བས། །བརྗོད་པའི་ཚིག་ལས་འདའ་མི་མངའ། །ཞེས་སོ།།

གསུམ་པ་ཡེངས་མེད་དུ་བསྒོམ་དགོས་པར་གདམས་པ་ནི།

དེ་ལྟའི་དོན་མཐོང༌། ཞེས་པ་ནས། ཡོངས་སུ་དག་ཅེས་བྱ། །ཞེས་པའི་བར་གྱིས་བསྟན་ཏེ།

དེ་ལྟའི་དོན་མཐོང་གང་དང་གང་ཞིག་གིས། །ཅི་ལའང་མི་ལྟ་དེ་ལ་ཞེན་པར་བྱ།།

དེས་ན་བྱས་ཟིན་བཙལ་མེད་དེར་ངེས་ནས། །རང་བྱུང་ཡེ་ཤེས་ཡོངས་སུ་དག་ཅེས་བྱ།།

དེ་ལྟའི་རྣལ་མ་མ་བཅོས་པའི་དོན་མཐོང་ཞིང་རྟོགས་པའི་སྐྱེས་བུ་དམ་པ་བློ་ཡང་རབ་ཏུ་གྱུར་པ་གང་དང་གང་ཞིག་གིས། བྱ་བ་ཐམས་ཅད་བཏང་ནས་ཅི་ལའང་མི་ལྟ་བར་ཆོས་ཉིད་དེ་ཁོ་ན་ལ་ཞེན་ཏེ་བསྒོམ་པར་བྱའོ། །དེ་ལྟར་གོམས་པ་དེས་ཏིང་ངེ་འཛིན་ལས་སུ་རུང་བར་གྱུར་ན་བྱ་བ་ཐམས་ཅད་མ་བསྒྲུབ་པར་བྱས་ཟིན་ཏེ་མཐར་ཕྱིན་ཅིང་དོན་གཉིས་ལྷུན་གྱིས་གྲུབ་པའི་ངང་ལ་འབད་རྩོལ་མེད་པར་རང་སྣང་རིག་པའི་ངོ་བོ་དེར་ངེས་ཏེ་མི་འགྱུར་བར་གནས་ན་རྒྱུ་རྐྱེན་མེད་པས་རང་བྱུང་རང་གསལ་བས་ཡེ་ཤེས་ཆེན་པོ་ཉིད་བྱིང་རྨུགས་རྒོད་འཐོར་གྱི་སྐྱོན་རྣམས་ཡོངས་སུ་དག་ཅིང་མཐའ་ཐམས་ཅད་དང་བྲལ་བའི་ངོ་བོ་སྣང་བའམ་མངོན་དུ་གྱུར་པ་ཞེས་བྱ་བ་ཡིན་པར་བཀའ་ཟབ་མོ་དག་ལས་འབྱུང་བའོ། །དེ་ལ་བྱིང་བ་ནི་ཡེ་མི་གསལ་བ་དང༌། རྨུགས་པ་ནི་རིག་པ་མ་སྟོར་ཡང་མི་གསལ་བ་དང༌། རྒོད་པ་ནི་ཡེ་གཡོ་བ། འཐོར་བ་ནི་ཅུང་ཟད་གསལ་ཡང་འཐོར་ནས་བྱ་བས་ཁྲིད་པ་སྟེ། སྒོམ་པའི་ཀློང་ལས། བྱིང་བས་རིག་པ་གསལ་མ་ཐོན། །རྨུགས་པས་ཤེས་བྱའི་དོན་མ་གསལ། །ཤིན་ཏུ་བྱིང་ན་དྲན་པ་འགག །རབ་ཏུ་རྨུགས་ན་༼༢༢༨༽འདུ་ཤེས་སྤངས། །རྒོད་པ་རིག་པ་ཡུལ་ལ་འཕྲོ། །གཡེང་བ་བྱ་བའི་ལས་ཀྱིས་ཁྲིད། །རབ་ཏུ་རྒོད་ན་ཡིད་ལ་བྱེད། །ཤིན་ཏུ་གཡེངས་ན་མཚན་མར་སྨིན། །ཞེས་སོ།།

བཞི་པ་དེ་ལྟར་བསྒོམ་པའི་ཡོན་ཏན་བསྟན་པ་ནི།

དེས་ན་ཟིན་ཆགས། ཞེས་པ་ནས། མཐུན་པར་ས་རྣམས་ནོན། །ཞེས་པའི་བར་གྱིས་བསྟན་ཏེ།

དེས་ནི་ཟིན་ཆགས་བདེ་སྡུག་ཅི་བྱུང་བ། །ཚོགས་གཉིས་མ་བསགས་རྗོགས་པར་དམ་བཅའ་འོ།།

མི་རྟོག་ཏིང་འཛིན་མཚན་མ་རྣམ་དག་པ། །ཆོས་ཉིད་མཐོན་གྱུར་ཆེ་ཡོན་རྒྱུན་མི་འཆད།།

སྒྲིབ་པ་གཉིས་བྱང་ཚོགས་ཆེན་རྗོགས་པས་ན། །གང་གི་ཕྱོགས་རྣམས་འཐུན་པར་ས་རྣམས་ནོན།།

དེ་ལྟ་བུའི་སྤྱོད་ཡུལ་ལ་གདེང་དུ་ཆུད་ཅིང་གོམས་པའི་སྟོབས་དང་ལྡན་པ་དེས་ན་ཆོས་ཅན་གྱི་རྟོག་པ་དང་སྤྱོད་པ་ཟིན་ཆགས་ཅི་བྱས་ཅི་སྤྱད་དེ་ཐོགས་ཤིང་ཞེན་པ་དང་བདེ་བ་དང་སྡུག་བསྔལ་ཅི་ཞིག་ལྟར་བྱུང་ཡང༌། དེ་ཉིད་མི་འགོག་པར་ཐབས་སྤྱོད་པ་མ་འགགས་པའི་བདེ་བ་དང༌། དེ་ལ་ངོ་བོ་ཡེ་ནས་མ་དམིགས་པ་ཡིན་པའི་དོན་གསལ་བས་སྣང་བ་མ་འགགས་པ་བསོད་ནམས་ཀྱི་ཚོགས་དང་རང་བཞིན་མེད་པ་ཡེ་ཤེས་ཀྱི་ཚོགས་ཏེ་ཚོགས་གཉིས་ཆེད་དུ་བརྩལ་བས་མ་བསགས་ཀྱང་རང་བཞིན་ལྷུན་གྱིས་གྲུབ་པར་རྫོགས་པའི་ངོ་བོ་ཡིན་པར་དམ་བཅའ་བ་སྟེ་ཞེ་བས་འདོད་པར་བྱའོ། །དེ་ལྟར་བསྒོམ་པའི་ཡོན་ཏན་ཅི་ལྟ་བུ་ཞེ་ན། མོས་པ་ལས་བྱུང་བའི་མི་དམིགས་པ་དང༌། ཤིན་ཏུ་མི་དམིགས་པ་དང༌། རྗེས་སུ་མི་དམིགས་པའི་རིམ་པ་མཐར་ཕྱིན་ནས་ཅིར་ཡང་མི་རྟོག་པའི་ཏིང་ངེ་འཛིན་དམ་པ་ཇི་ལྟར་ཡང་མི་གཡོ་བར་གསལ་བ་ལ། དེ་ཁོ་ན་ཉིད་ཐོབ་པར་རྟོག་པའི་མཚན་མ་ཡང་རྣམ་པར་དག་ཅིང་ཡང་དག་པར་བྲལ་བའི་རིག་པ་ནི་ཤེས་རབ་ཀྱི་དབང་པོ་དང་ཡེ་ཤེས་ཀྱི་སྤྱན་གྱིས་རང་རིག་པའི་ཆོས་ཉིད་དེ་ཁོ་ན་ཉིད་རང་སྣང་རིག་པའི་མངོན་སུམ་དུ་གྱུར་པ་ཡིན་པས། དེ་ལྟ་བུ་ལ་ནི་དཔེར་ན་འབྲས་ལེགས་པས་ཕུབ་སོག་ཞོར་ལ་འབྱུང་བ་ལྟ་བུར་གནས་སྐབས་དང་མཐར་ཐུག་གི་ཆེ་བའི་ཡོན་ཏན་རྣམས་ཀྱང་དུས་ཀུན་ཏུ་རྒྱུན་མི་འཆད་པར་འབྱུང་བའོ། །དེའང་ཉོན་མོངས་པ་དང་ཤེས་བྱའི་སྒྲིབ་པར་བསྙད་པ་གཉིས་དང་མཚན་མའི་སྤྱོད་ཡུལ་ཐམས་ཅད་བྱང་ཞིང་དག་ནས་ཡང་དག་པའི་སྤྱོད་ཡུལ་ཚོགས་ཆེན་རྣམ་གཉིས་ཡོངས་སུ་རྫོགས་པས་ན། ཐོབ་བྱ་སྐུ་གསུམ་གྱི་འབྲས་བུའང་བཞིན་དང་མེ་ལོང་གི་ཚུལ་དུ་རང་སྣང་བའི་ཕྱིར་ཨ་ནུ་མན་ཆད་ཀྱི་ཐེག་པ་གང་གི་ཕྱོགས་ཀྱི་སྒོ་རྣམས་དང་མི་འགལ་མཐུན་པར། ཇི་སྐད་དུ། རྒྱུ་འབྲས་ཁྱད་པར་ལྷུན་གྱིས་རྫོགས། །ཞེས་པ་ལྟར་རིམ་གྱིས་མིན་པར་གཅིག་ཆར་གྱི་ཚུལ་དུ་འོག་མས་བགྲོད་པའི་ས་རྣམས་ཀྱང་ད་ལྟ་ཉིད་༼༢༢༩༽དུ་ནོན་པ་ཡིན་ཏེ། ཡེ་ཤེས་གསང་བ་ལས། རྒྱུད་དང་མདོ་སྡེ་བླ་མེད་ས། །ཀུན་ཏུ་འོད་དང་རྡོ་རྗེ་འཛིན། །མ་ཆགས་པདྨ་སྟུག་པོ་བཀོད། །ཚོགས་ཆེན་ཡི་གེ་འཁོར་ལོ་དང༌། །ཀུན་ཏུ་དབྱེ་བ་མེད་པའི་ས། །ས་དྲུག་སེམས་ལ་བགྲངས་པ་ཡང༌། །མ་བཅོས་རྫོགས་པ་ཆེན་པོའི་ས། །རྟོགས་པའི་ཡོན་ཏན་དྲུག་ཏུ་བསྟན། །མ་བཅོས་ས་ལ་སྦྱངས་པ་མེད། །འོད་གསལ་ལྷུན་རྫོགས་ཆེན་པོ་ལ། །ས་ཡི་རིམ་པ་གང་ཡང་མེད། །རང་བྱུང་རིག་པ་རྟོགས་གྱུར་ན། །ནོར་བུ་རིན་ཆེན་ལྷུན་གྲུབ་ལྟར། །ཐམས་ཅད་སེམས་ལས་བྱུང་བའི་ཕྱིར། །རང་སྣང་བྱང་ཆུབ་སེམས་ཀྱི་ས། །ཞེས་སོ།།

ལྔ་པ་ཚུལ་དེ་ཉིད་ཐུན་མོང་མ་ཡིན་པའི་དགོངས་སྤྱོད་དུ་བསྟན་པ་ནི།

འདི་ནི་ཀུན་འདུས། ཞེས་པ་ནས། སྤྱོད་ཡུལ་མ་ཡིན་ནོ། །ཞེས་པའི་བར་གྱིས་བསྟན་ཏེ།

འདི་ནི་ཀུན་འདུས་དགོངས་སྤྱོད་ཟབ་མོ་ཡིན། །གང་དག་ཀུན་གྱི་སྤྱོད་ཡུལ་མ་ཡིན་ནོ།།

དེ་ལྟར་སྐབས་འདིར་བསྟན་པའི་དོན་འདི་ནི་བདེ་བར་གཤེགས་པ་ཀུན་གྱི་དགོངས་པ་འདུས་པའི་བསྟན་པ་ཐམས་ཅད་ཀྱི་འབྱུང་གནས་རྒྱལ་བའི་དགོངས་པ་དང་མཛད་སྤྱོད་ཟབ་མོ་ཤིན་ཏུ་དཔག་པར་དཀའ་བ་ཉིད་མངོན་དུ་ཕྱུང་བ་ཡིན་པས། གང་དག་འོག་མ་ཀུན་གྱིས་མི་རྟོགས་པས། སྣོད་བཞི་དང༌། ཕྱི་པ་སོགས་བློ་ཆུང་དམན་པ་རྣམས་ཀྱི་སྤྱོད་ཡུལ་དུ་གྱུར་པ་མ་ཡིན་ནོ། །དེ་སྐད་དུའང་ཀུན་བྱེད་ལས། དགོངས་པ་རྣལ་དུ་བཞག་པའི་དོན་འདི་ནི། །ཀུན་གྱིས་སྤྱོད་ཡུལ་མིན་པས་མིཤེས་ཤིང༌། །མཉམ་པར་བཞག་པས་རྟོགས་པའི་ཡུལ་ལས་འདས། །ཀུན་བྱེད་རྒྱལ་པོ་དེ་ལ་གནས་པར་བྱེད། །ཅེས་སོ།།

གཉིས་པ་དེ་ཉིད་རྟོགས་མ་རྟོགས་ཀྱི་ཁྱད་པར་བཤད་པ་ལ་གསུམ་སྟེ། སངས་རྒྱས་དང་སེམས་ཅན་གྱི་ཁྱད་པར་བཤད་པ། ཐེག་པས་བགྲོད་པའི་ས་གོང་འོག་གི་ཁྱད་པར་བསྟན་པ། སྟོང་པ་དང་མ་སྐྱེས་པའི་ཁྱད་པར་བཤད་པའོ། །དང་པོ་ནི།

གང་གིས་གང་ལྟར། ཞེས་པ་ནས། མུན་པ་སངས་དཀའ་འོ། །ཞེས་པའི་བར་གྱིས་བསྟན་ཏེ།

གང་གིས་གང་ལྟར་དེ་ཡི་དོན་མཐོང་ལྟར། །གང་དག་འཁྲུལ་པ་རྣམས་ཀྱིས་མ་མཐོང་བས།།

གདོད་ནས་ཞེན་པའི་མུན་པ་སངས་དཀའ་འོ།།

དེ་ལྟར་ཀུན་གྱི་སྤྱོད་ཡུལ་མིན་པ་ཅིའི་ཕྱིར་ཞེ་ན། སྐལ་པ་མཆོག་དང་ལྡན་པའི་དམ་པ་གང་གིས་ཚུལ་གང་ལྟར་ཐུན་མོང་མ་ཡིན་པ་དེ་ཡི་དོན་ཉིད་ཡང་དག་པར་མཐོང་ཞིང་ཕྱིན་ཅི་མ་ལོག་པར་ཆུད་པ་ལྟར་དུ་སེམས་ཅན་གང་དག་འཁྲུལ་པར་གནས་པའི་སྐྱེ་བོ་རང་རྒྱུད་པ་དང་རྒྱུའི་ཐེག་པའི་ས་ལ་གནས་པའི་སེམས་དཔའ་མན་ཆད་དམ་སྔགས་ཕྱི་པ་མན་ཆད་ཞེས་ཀྱང་གསུངས་ཏེ་ཐམས་ཅད་ཀུན་ལྟོས་པས་ནོར་བ་སྟེ། དེ་༼༢༣༠༽རྣམས་ཀྱིས་གསང་སྔགས་ཐེག་པ་མཆོག་གི་ངོ་བོ་ཇི་བཞིན་པ་ཉིད་མ་མཐོང་བར་མ་རིག་པའི་རྒྱུད་དམ་ཆ་ཅན་དུ་གྱུར་པས་ན་ཡེ་གདོད་མའམ་ཐོག་མ་མེད་པ་ནས་བག་ཆགས་བསགས་པས་ཞེན་པའི་མུན་པ་ལས་དང་ཉོན་མོངས་པའི་སྒྲིབ་པ་དག་ཤིན་ཏུ་འབྱོངས་པ་དང་སངས་པར་དཀའ་བའི་ཕྱིར། རྟོགས་པ་དང་མ་རྟོགས་པའི་དབང་གིས་སངས་རྒྱས་དང་སེམས་ཅན་དུ་འཇོག་པའི་ཁྱད་པར་ངེས་པར་གྲུབ་པའོ།།

གཉིས་པ་ཐེག་པས་བགྲོད་པའི་ས་གོང་འོག་གི་ཁྱད་པར་བསྟན་པ་ནི།

ས་དང་ས་ཡི། ཞེས་པ་ནས། ལྷུན་གྱིས་གྲུབ་ངེས་པའོ། །ཞེས་པའི་བར་གྱིས་བསྟན་ཏེ།

ས་དང་ས་ཡི་ཁྱད་པར་ཡོད་ཅེས་པ། །མཐོང་དང་མ་མཐོང་གཉིས་མེད་གསལ་དུས་ན།།

དམ་པའི་དགོངས་པ་ལྷུན་གྱིས་གྲུབ་ངེས་པའོ།།

བཀའ་རྒྱུད་རྣམས་ལས་བྱང་ཆུབ་སེམས་དཔའི་ས་དང་སངས་རྒྱས་ཀྱི་ས་ཡི་ཁྱད་པར་ལ་རྒྱུ་དང་འབྲས་བུའི་རིམ་པས་མཐོ་དམན་ཡོད་དོ་ཅེས་སུ་གསུངས་པ་ཡང༌། ཇི་སྐད་དུ། ཀུན་བྱེད་ལས། ཐེག་པ་རེ་ལ་གནས་ས་རེ། །བྱང་ཆུབ་ལམ་གྱི་གཞི་རྟེན་བྱེད། །རྫོགས་ཆེན་བྱང་ཆུབ་སེམས་ས་ལ། །དུས་གསུམ་སངས་རྒྱས་ཐམས་ཅད་དང༌། །སྐུ་གསུམ་སྟོན་པ་བཞུགས་པ་དང༌། །ཁམས་གསུམ་སེམས་ཅན་མ་ལུས་དང༌། །སྣང་སྲིད་སྣོད་བཅུད་གནས་པའི་ཕྱིར། །ས་ལ་སྦྱངས་ཤིང་བགྲོད་དུ་མེད། །ཅེས་དང༌། ཡེ་ཤེས་གསང་བ་ལས། མ་བཅོས་རང་སྣང་བླ་མའི་ས། །སྦྱངས་པས་མ་ཡིན་ཡེ་ནས་གྲུབ། །རང་བྱུང་རྣམ་དག་ཀུན་བཟང་ས། །དབྱེར་མེད་ཆེ་མཆོག་ཆོས་ཀྱི་སྐུ། །ཞེས་གསུངས་པ་ལྟར། འདིར་རིག་མ་རིག་གཉིས་ཀ་དབྱེར་མེད་པའི་དོན་གྱི་སྙིང་པོ་མངོན་དུ་གྱུར་ཏེ། སྔགས་དང་འབྲས་བུས་མཐོང་བ་དང༌། སྲིད་པ་དང་རྒྱུ་ཡིས་མ་མཐོང་བ་གཉིས་ཀ་དབྱེར་མེད་ཆེན་པོ་རང་རིག་པའི་ཆོས་ཉིད་དུ་གསལ་བའི་དུས་ན། གང་ཡང་མ་འདྲེས་ལ་ཡོངས་སུ་རྫོགས་པས་མཐའི་ཐ་སྙད་ཡང་མེད་པར་རྒྱལ་བ་དམ་པའི་དགོངས་པ་བླ་ན་མེད་པ་ཆོས་ཐམས་ཅད་ཀྱི་ངོ་བོ་ཉིད་ཡེ་ནས་ལྷུན་གྱིས་གྲུབ་པར་ངེས་པའི་གསང་བ་དམ་པ་ཡང་དག་པར་རྟོགས་པ་ཡིན་པས་སྐྱེད་དུ་བྱ་བ་དང་བྲལ་བའོ། །དེས་ན་ཀུན་བྱེད་ལས་ཀྱང༌། སངས་རྒྱས་སེམས་ཅན་གཉིས་སུ་མ་མཐོང་སྟེ། །དེ་བཞིན་ཉིད་དུ་ཐམས་ཅད་གཅིག་པར་མཐོང༌། །དེ་བཞིན་ཉིད་ལ་གཅིག་དང་དུ་མ་མེད། །མ་བྱུང་མ་སྐྱེས་པ་ཡི་སྙིང་པོ་ལ། །སྒྲོས་ཀྱིས་བཏགས་པའི་ཐ་སྙད་ག་ལ་ཡོད། །ཅེས་སོགས་ཤིན་ཏུ་མང་ངོ༌།།

གསུམ་པ་སྟོང་པ་དང་མ་སྐྱེས་པའི་ཁྱད་པར་བཤད་པ་ནི།༼༢༣༡༽

སྟོང་དང་རང་བཞིན། ཞེས་པ་ནས། ཡོངས་སུ་རྫོགས་པའི་ཚུལ། །ཞེས་པའི་བར་གྱིས་བསྟན་ཏེ།

སྟོང་དང་མ་སྐྱེས་རང་བཞིན་ཁྱད་པར་ཅི། །ཡོད་མེད་རྟག་ཆད་བྱ་བཙལ་ལ་སོགས་པ།།

ཀུན་ནས་ལྷུན་གྱིས་གྲུབ་པ་ཡེ་གནས་པའོ། །རྒྱུ་དང་འབྲས་བུ་ཅི་སྣང་ཅི་སྲིད་ཀྱང་།།

ཆོས་ཉིད་དེ་བཞིན་ཉིད་ཀྱི་རྒྱན་དུ་སྣང་། །དེ་ཉིད་མ་བཀག་ཡོངས་སུ་རྗོགས་པའི་ཚུལ།།

སྟོང་པ་དང་རང་བཞིན་མེད་པའི་ཁྱད་པར་ནི། སྟོང་པ་ནི། ཉན་ཐོས་གང་ཟག་གི་ བདག་མེད་དང༌། སེམས་ཙམ་པས་སེམས་འཁྲུལ་པ ་གཟུང་འཛིན་གྱིས་སྟོང་པ་དང༌། དབུ་མ་པས་རྟེན་འབྲེལ་གྱི་སྣང་བ་མ་གྲུབ་པས་སྟོང་པ་སོགས་ཕྱི་ནང་གཉིས་ཀ་མ་གྲུབ་པ་ཙམ་སྟེ། དོན་དམ་པར་སྟོང་པ་འབའ་ཞིག་གོ །རང་བཞིན་མེད་པ་ནི། གསང་ཆེན་སྔགས་ཀྱི་མཐའ་གཉིས་ཀྱིས་སྟོང་པའི་སྣང་བ་ཉིད་ན་ངོ་བོ་མེད་དེ་བདེན་པ་གཉིས་དབྱེར་མེད་པས་འཕགས་པའོ། །མ་སྐྱེས་པ་དང་མི་གཡོ་བའི་ཁྱད་པར་ནི། མ་སྐྱེས་པ་ནི་ཆོས་རྣམས་རྒྱུ་རྐྱེན་དང་བྲལ་བས་ངོ་བོ་མེད་པ་སྟེ་རྒྱུའི་ཐེག་པའི་དོན་མཐར་ཐུག་པ་མི་རྟོག་པའི་ཡེ་ཤེས་ཀྱི་སྤྱོད་ཡུལ་དུ་བྱེད་པ་ཉིད་དེ་སྔགས་ཕྱི་པའང་ཕྱོགས་མཚུངས་སོ། །མི་གཡོ་བ་ནི་གསང་སྔགས་དེ་ཁོ་ན་ཉིད་ཀྱི་ཡེ་ཤེས་སྤྱོད་ཡུལ་དང་བྲལ་བ་ལ་འབྱུང་འཇུག་མེད་པའོ། །གཉིས་སུ་མེད་པ་དང་ལྷུན་གྱིས་གྲུབ་པའི་ཁྱད་པར་ཅི་ཞིག་གིས་འབྱེད་ན། གཉིས་སུ་མེད་པ་ནི་མི་བདེན་པ་རིས་སུ་མ་ཆད་ཅིང་སྤྱོད་ཡུལ་དང་གཉིས་ཐ་དད་མེད་དེ་རང་རིག་པ་ཙམ་མོ། །ལྷུན་གྱིས་གྲུབ་པ་ནི་རྒྱལ་བའི་སྐུ་དང་ཡེ་ཤེས་ཀྱི་ཡོན་ཏན་རྒྱུ་མེད་པར་འཆར་བས་འཕགས་ཏེ། རྒྱུ་འབྲས་དང་བསྐྱེད་རྫོགས་ལས་རྫོགས་ཆེན་ཆེ་བའི་ཁྱད་པར་དུ་ཡང་འགྱུར་བས་མ་ཧཱ་དང་ཨ་ནུས་གཉིས་མེད་དང་རྫོགས་པ་ཆེན་པོའི་མཐའ་བཞི་རང་གྲོལ་གྱི་ཤན་འབྱེད་དུའང་འགྱུར་རོ། །དེ་ནི་གཏར་ཀ་གེགས་སེལ་གྱི་ཚིག་ལྟ་བུའོ། །དེ་ལྟ་བུའི་ལྷུན་གྱིས་གྲུབ་པའི་དོན་ནི་ཡོད་མེད་དང་རྟག་ཆད་དང་བྱ་བརྩལ་ལ་སོགས་པ་མཐའ་གཉིས་པར་བསྙད་པ་རིལ་མ་སྤངས་བྲལ་བའི་ངོ་བོ་ལ་གང་ཡང་བཀོལ་བ་མེད་པར་ཀུན་ནས་ལྷུན་གྱིས་གྲུབ་པར་ཡེ་གསལ་དུ་གནས་པའོ། །དེ་ཅིའི་ཕྱིར་ཞེ་ན། ལོག་པ་དང་མ་ལོག་པའི་རྒྱུ་དང་འབྲས་བུ་ཉིད་ཀྱི་ཆོས་ཅིར་སྣང་ཅིར་སྲིད་ཐམས་ཅད་ཀུན་ཀྱང་གསང་བ་ཆེན་པོའི་མ་སྐྱེས་པའི་ཆོས་ཉིད་ཇི་བཞིན་པ་སྙིང་པོ་དེ་བཞིན་ཉིད་ཀྱི་ངོ་བོ་དང་དབྱེར་མེད་པར་ལྡན་པའི་རང་བཞིན་མ་ནོར་བའི་རྒྱུན་དུ་རང་སྣང་བ་ཉིད་ཡེ་ནས་ཡིན་པའོ། །དེའི་ཚུལ་ནི། དེ་དག་ཀུན་ཀྱང་ཆོས་ཉིད་ཀྱི་ངང་ལ་སྤངས་ཡང་མ་སྤང་བཀག་ཀྱང་མ་བཀག་པར་ངོ་བོ་ཐ་༼༢༣༢༽དད་དུ་རྒྱ་ཆད་པའང་མེད་དེ་མ་འདྲེས་ལ་ཡོངས་སུ་རྫོགས་པའི་ཚུལ་དུ་རང་གྲོལ་བའི་ཕྱིར་ཏེ། ཀློང་རབ་འབྱམས་ལས། བྱ་བྲལ་ངང་དུ་ཀུན་རྫོགས་པས། །མ་འདྲེས་ཡོངས་སུ་རྫོགས་པའི་རྒྱན། །མ་སྤངས་རང་སར་གྲོལ་བའི་ཀློང༌། །སངས་རྒྱས་སྐུ་དང་སེམས་ཅན་ལུས། །ཇི་ལྟར་སྣང་བ་དབྱིངས་ཀྱི་རྒྱན། །ཞེས་སོ།།

གསུམ་པ་མ་རྟོགས་པ་རྣམས་གཏན་ལ་ཕབས་ཏེ་རང་གཞུང་དུ་བསྟན་པ་ལ་ལྔ་སྟེ། ཆོས་ཉིད་ཇི་བཞིན་པའི་ངོ་བོ་གཏན་ལ་དབབ་པ། ཕབས་པའི་དོན་ཉིད་རྫོགས་ཆེན་དུ་ལ་བཟླ་བ། དེ་ལྟར་རྟོགས་པའི་ཡོན་ཏན་བཤད་པ། དེ་ཉིད་ཀྱི་དོན་དེ་མ་བཅོས་པར་སྒོམ་ཚུལ། བསྒོམ་པའི་ཡོན་ཏན་ལྷུན་རྫོགས་སུ་བསྟན་པའོ། །དང་པོ་ལ་གསུམ་སྟེ། སྐྱོན་ཡོན་ཀུན་དེ་བཞིན་ཉིད་དུ་གཅིག་པར་དམ་བཅའ་བ། དེའི་གཏན་ཚིགས་དེ་བཞིན་ཉིད་ལས་གཞན་མེད་པར་བསྟན་པ། དེ་ལ་ཏིང་ངེ་འཛིན་གྱིས་ཀྱང་དམིགས་སུ་མེད་པར་བསྟན་པའོ། །དང་པོ་ནི།

གོང་འོག་ལ་སོགས། ཞེས་པ་ནས། ཉིད་དུ་གཅིག་པར་ཟད། །ཅེས་པའི་བར་གྱིས་བསྟན་ཏེ།

གོང་འོག་ལ་སོགས་སྐྱོན་ཡོན་གཉིས་པོ་དག །མཐོང་དང་མ་མཐོང་རེ་རྩོལ་རྐྱེན་ཙམ་གྱིས།།

རྒྱུ་འབྲས་སོ་སོར་གསལ་ཞེས་སྨྲ་བ་ཡང་། །ཐམས་ཅད་དེ་བཞིན་ཉིད་དུ་གཅིག་ཏུ་ཟད།།

དེའི་དོན་ཇི་ལྟ་བུ་ཞེ་ན། ཉན་རང་ནས་གསང་སྔགས་མཆོག་གི་བར་གྱི་ཐེག་པ་གོང་འོག་གི་རིམ་པ་བསྟན་པའི་མཐོ་དམན་དང༌། ལ་སོགས་པ་ཞེས་གཞན་བསྡུ་བའི་དོན་གྱིས་ལྟ་སྤྱོད་དང་གྲུབ་མཐའི་ཁྱད་པར་གྱིས་འོག་མའི་སྐྱོན་དང་གོང་མའི་ཡོན་ཏན་གྱི་རྣམ་པ་གཉིས་པོ་ཇི་ལྟར་སྣང་ཞིང་བསྟན་པ་དག་དང༌། དེ་ལས་གཞན་ཡང་གོལ་སྒྲིབ་དང་དེ་དག་སེལ་བའི་གཉེན་པོ་དག་གི་དོན་གསང་སྔགས་ཀྱིས་ཇི་ལྟ་བར་མཐོང་ཞིང་ཤེས་པ་དང༌། ཐེག་པ་འོག་མས་དེ་ལྟར་མ་མཐོང་ཞིང་མ་ཤེས་པའི་ཁྱད་པར་བསྟན་ཏེ། གང་མི་ཤེས་པའི་བྱིས་པ་དག་འབྲས་བུ་ལ་རེ་ཞིང་སེམས་ཀྱི་སྨོན་པས་འབད་པ་ཤ་ཐང་བར་བྱེད་པ་དང༌། གང་ཤེས་པ་དག་གིས་ཀྱང་དམ་ཚིག་སེམས་དཔས་ཡེ་ཤེས་སེམས་དཔའ་ལ་བརྟེན་པ་དང༌། དབྱེར་མེད་དུ་སྒྲུབ་པའི་ཐབས་ཀྱིས་ཀུན་ཏུ་རྩོལ་བར་གནས་པའི་རྐྱེན་ཙམ་གྱིས་སྒོ་ནས་ཐེག་པ་སོ་སོའི་ཆོས་རྒྱུ་ངེས་པ་དང་འབྲས་བུ་ངེས་པའི་ཚུལ་གྱིས་མ་འདྲེས་པར་སོ་སོར་གསལ་བར་ཡོད་དོ་ཞེས་སྨྲ་བ་ཡང༌། འདིར་དེ་སྐད་ཟེར་བ་དག་ཀྱང་རྟོག་གེའི་སྤྱོད་ཡུལ་དུ་སྣང་བ་ཁོ་ནར་ངེས་པས་རང་ངོ་ལ་བརྟགས་པ་ཙམ་སྟེ། ངོ་བོ་ཉིད་ཇི་ལྟ་བར་ཐག་ཆོད་ན་སྐྱོན་ཡོན་རྒྱུ་འབྲས་ཀྱི་ཆོས་དེ་དག་ཐམས་ཅད་ཏིལ་འབྲུ་དང་མར་ཀྱི་དཔེ་ལྟ་བུར་ལྷུན་གྱིས་གྲུབ་པའི་༼༢༣༣༽ཆོས་ཉིད་དེ་བཞིན་ཉིད་དུ་དབྱེར་མེད་པར་གཅིག་ཏུ་ངེས་པར་ཟད་དེ་གཉིས་སུ་སྣང་བ་ཡེ་ནས་མེད་དོ་ཞེས་དམ་བཅའ་འོ།།

གཉིས་པ་དེའི་གཏན་ཚིགས་དེ་བཞིན་ཉིད་ལས་གཞན་མེད་པར་བསྟན་པ་ནི།

དེ་ལ་ཡེ་ནས། ཞེས་པ་ནས། ཚོགས་རྫོགས་ཐབས་ཤེས་འབྲེལ། །ཞེས་པའི་བར་གྱིས་བསྟན་ཏེ།

དེ་ལ་ཡེ་ནས་འདུ་འབྲལ་མེད་བཞིན་དུ། །མི་སྣང་སྣང་བའི་སྤྱོད་ཡུལ་ཅིར་སྣང་ཡང་།།

ཇི་བཞིན་འདི་ཉིད་མ་ཡིན་གང་ཡང་མེད། །དེ་ཉིད་དེ་ལ་ཚོགས་རྗོགས་ཐབས་ཤེས་འབྲེལ།།

འོ་ན་ཅི་ཡང་མི་སྣང་བ་ཞིག་གམ་ཞེ་ན། ཡེ་ཤེས་གསང་བ་ལས། མི་འགྱུར་གདལ་ཁྱབ་ཕོ་བྲང་ན། །ཅིས་ཀྱང་མི་བསྐྱོད་སེམས་ཉིད་ཆེ། །འདུ་འབྲལ་གཉིས་མེད་རྡོ་རྗེ་ཉིད། །ཕྱི་ནང་མེད་པར་གསལ་ཁྱབ་ལ། །ཕྱི་ནང་གསང་བའི་སྒོ་ཕུགས་མེད། །ཡུལ་དང་དབང་པོ་གདོད་ནས་དག །མཚན་མ་འཇིལ་བའི་སྐུ་མེད་པས། །རྡོ་རྗེ་སེམས་དཔའ་མི་འགྱུར་ཆེ། །ཡེ་ཤེས་མཁའ་གསལ་ཀུན་ཏུ་བཟང༌། །བསམ་མེད་མཁའ་གསལ་ཡེ་སངས་རྒྱས། །ཞེས་གསུངས་པ་བཞིན་དུ། དེ་ལ་ཞེས་སྙེགས་པས་གཞིར་བཞག་པ་ནི། ཐམས་ཅད་དེ་བཞིན་ཉིད་དུ་གཅིག་པའི་དོན་ཉིད་ལ་ལྟ་སྒོམ་སྤྱོད་པའི་རྣམ་གྲངས་སོགས་ཀྱིས་ཡེ་ནས་ཚོགས་ཤིང་འདུ་བ་དང་གྱེས་ཆོས་ཀྱི་འབྲལ་བ་མེད་པ་ཉིད་ཀྱི་རང་བཞིན་དུ་དུས་གསུམ་དུ་གནས་པ་ལས་མི་གཡོ་བས་ན་སེམས་ཅན་ནམ་འོག་མ་འཁྲུལ་པས་མི་མཉམ་པ་དང་སངས་རྒྱས་སམ་གོང་མ་མ་འཁྲུལ་པས་མཉམ་པའི་སྤྱོད་ཡུལ་དུ་བཞག་པའི་སོ་སོའི་ཡུལ་དང་ཤེས་པ་གང་ཅིར་སྣང་ཡང་རུང་སྟེ་ངོ་བོ་ལ་དབྱེར་མེད་པས་ཆོས་ཉིད་ཇི་བཞིན་པའི་དེ་བཞིན་ཉིད་འདི་ཉིད་མ་ཡིན་པ་གང་ཡང་མེད་པར་དེ་ཁོ་ན་ཉིད་དུ་ངེས་པའི་ཕྱིར་གཏན་ཚིགས་ཐུན་མོང་མིན་པར་ཆོས་ཉིད་ཀྱི་རིགས་པས་གྲུབ་པ་ཡིན་ཏེ། ཀུན་བྱེད་ལས། དེ་བཞིན་ཉིད་ལ་གང་ཞིག་སུ་གནས་པ། །དེ་ཡིས་མ་ནོར་མ་བཅོས་འགྲུབ་པར་འགྱུར། །དེ་ནི་མ་ནོར་བཞིན་ནི་མ་བཅོས་ཡིན། །ཉིད་ནི་མ་ནོར་ངོ་བོ་ཉིད་ལ་བྱ། །དེ་བཞིན་ཉིད་ལས་སངས་རྒྱས་ཆོས་མེད་དོ། །ཞེས་དང༌། རང་བྱུང་ཡེ་ཤེས་ཆོས་ཀྱི་སྙིང་པོ་ལས། །སྣང་ཞིང་སྲིད་པའི་ཆོས་རྣམས་ཐམས་ཅད་ཀུན། །མི་སྣང་བ་ལ་མངོན་དུ་འབྱིན་ནུས་པས། །ཆོས་ཀྱི་སྙིང་པོ་ཡིན་པར་ཡིད་ཀྱང་ཆེས། །རང་བྱུང་ཡེ་ཤེས་གཅིག་གི་ངོ་བོ་དེ། །དོན་དམ་ཀུན་རྫོབ་བདེན་རྫུན་གཉིས་མེད་པར། །མ་ནོར་ངེས་པའི་བྱང་ཆུབ་སེམས་སྟོན་པས། །ཐེ་ཚོམ་སོམ་ཉི་མེད་པར་ཡིད་ཀྱང་ཆེས། །རང་བྱུང་ཡེ་ཤེས་གཅིག་གི་ངོ་བོ་དེ། །རྒྱུ་༼༢༣༤༽ལ་མི་བརྟེན་རྐྱེན་ལས་མི་སྒྲུབ་པས། །གཞན་ལ་རག་མ་ལས་པའི་རང་བཞིན་གྱིས། །རང་བྱུང་ཡེ་ཤེས་ཡིན་པར་ཡིད་ཀྱང་ཆེས། །རང་བྱུང་ཡེ་ཤེས་གཅིག་གི་ངོ་བོ་དེ། །རྒྱུ་རྐྱེན་མེད་པར་ལྷུན་གྱིས་གྲུབ་པའི་ཕྱིར། །ཕྲིན་ལས་བཙལ་ཞིང་བྱ་བྱེད་བྱ་མི་དགོས། །མ་བཙལ་ལྷུན་གྱིས་གྲུབ་པར་ཡིད་ཀྱང་ཆེས། །རང་བྱུང་ཡེ་ཤེས་གཅིག་གི་ངོ་བོ་དེ། །རང་བྱུང་ཡེ་ཤེས་ཡེ་ནས་མ་བསྒྲིབས་པས། །ཇི་ལྟར་སྣང་བའི་ཆོས་རྣམས་ཐམས་ཅད་གསལ། །ཆོས་རྣམས་ཐམས་ཅད་གཏན་ལ་འབེབས་པའི་ཕྱིར། །སྟོན་པའི་སྒྲོན་མ་ཡིན་པར་ཡིད་ཀྱང་ཆེས། །ཞེས་དང༌། ཀློང་རབ་འབྱམས་ལས། དེ་བཞིན་ཉིད་ལས་མ་གཡོས་པར། །རོལ་པ་སྐྱེ་བ་ལྟར་སྣང་ཡང༌། །འཕོ་འགྱུར་མེད་པས་སྐྱེ་མེད་དང༌། །འཇིག་འདྲལ་མེད་པས་རྡོ་རྗེའི་ཀློང༌། །ཅེས་ཀྱང་མི་ཤིགས་འདུ་འབྲལ་མེད། །དབྱིངས་ལ་འདུ་འབྲལ་མེད་པའི་ཕྱིར། །ཞེས་དང༌། རྒྱུ་འབྲས་དབྱེར་མེད་ཐིག་ལེ་ཆེ། །རྩ་བ་མེད་པའི་བྱང་ཆུབ་སེམས། །ཐམས་ཅད་རང་སེམས་རིག་པའི་རྒྱན། །ཡང་དག་ལམ་གཅིག་བདེ་བའི་མཆོག །བདེ་ཆེན་ལམ་ལ་འཇུག་ལྡོག་མེད། །དབྱིངས་ལ་དབྱིངས་ཤར་རིག་པའི་སྟོབས། །མི་རྟོག་བསྒོམ་པ་བཟང་རྟོག་ཡིན། །རྣམ་པར་རྟོག་དང་ཁྱད་མེད་དེ། །གཉིས་ཀ་བཟང་ངན་མེད་པར་མཉམ། །དེ་ཡང་རིག་པ་རང་གི་སྟོབས། །ཞེས་དང༌། སྒྲ་ཐལ་འགྱུར་ལས། འདིར་ནི་རང་ཡུལ་བསྟན་པ་ལས། །འཁོར་རྐྱེན་འཇུག་པ་མ་ཡིན་པར། །ཟང་མ་ཉིད་དང་ཐལ་བྱུང་དུ། །ཡུལ་དང་ཤེས་པའི་སྣང་ཆ་ལས། །ཐད་ཀ་སོ་སོའི་གཞི་ལ་གྲོལ། །འདོད་ཡོན་རྣམས་ནི་རང་རྫོགས་ཏེ། །སྣ་ཚོགས་འགྱུ་བ་སོ་སོའི་གནད། །གཅིག་ཤེས་པ་ཡིས་གྲོལ་བར་གནས། །དེས་ན་ཆོས་ཉིད་རྟོགས་པ་སྟེ། །ཆ་ཤས་ཉིད་དང་བྲལ་བའོ། །ཞེས་སོ། །དེ་ལྟར་ཇི་བཞིན་པ་དེ་ཡི་ངོ་བོ་ཉིད་རྟོགས་པའི་སྐབས་དེ་ཁོ་ནར་མཉམ་པའི་དབྱིངས་དེ་ལ་སྐུ་གསུམ་དང་ཚོགས་གཉིས་རྫོགས་ཏེ་ཐབས་དང་ཤེས་རབ་ཟུང་དུ་འབྲེལ་བ་ཉིད་དེ། ཡེ་ནས་དབྱེར་མེད་པ་དང༌། རིལ་ཆོས་ཉིད་ཀྱི་རྒྱན་དུ་རྫོགས་པ་དང༌། ཅིར་ཡང་མ་འགགས་པར་སྣང་བ་དང་མི་དམིགས་པ་ཉིད་དུ་གསལ་བ་ལ་སྤྱོད་ཡུལ་ཐམས་ཅད་དུ་མི་འགོག་པར་གཉིས་མེད་རང་གྲོལ་དུ་གྱུར་པའི་ཕྱིར་རོ།།

གསུམ་༼༢༣༥༽པ་དེ་ལ་ཏིང་ངེ་འཛིན་གྱིས་ཀྱང་དམིགས་སུ་མེད་པར་བསྟན་པ་ནི།

དེས་ན་དམ་པ། ཞེས་པ་ནས། དམིགས་པ་ཀུན་དང་བྲལ། །ཞེས་པའི་བར་གྱིས་བསྟན་ཏེ།

དེས་ན་དམ་པ་འདུས་པའི་དགོངས་པ་རྣམས། །དོན་དམ་མ་བཅོས་སེམས་ཉིད་དེ་ལ་འདུས།།

སེམས་ཀྱི་རང་བཞིན་མ་བྱས་རང་བྱུང་བས། །ཏིང་ངེ་འཛིན་ཞེས་དམིགས་པ་ཀུན་དང་བྲལ།།

དེ་ལྟར་བྱང་ཆུབ་ཀྱི་སེམས་ཆོས་ཉིད་དེ་བཞིན་ཉིད་ལ་ཡོན་ཏན་ཐམས་ཅད་རྫོགས་པ་དེས་ན། རྒྱལ་བ་དམ་པ་མང་པོ་འདུས་ནས་སྐུ་བཞིའམ་ལྔ་ཡིས་གདུལ་བྱ་ལ་བསྟན་པ་སོ་སོར་ཇི་ལྟར་མཚོན་ཏེ་བཀའ་སྩལ་པའི་དགོངས་པ་རྣམས་ནི་མཐར་ཐུག་དོན་དམ་གྱི་མཆོག་ཏུ་གྱུར་པ་བྱ་བ་དང་བྲལ་བར་རང་རིག་པ་ཡེ་ནས་མ་བཅོས་པར་སངས་རྒྱས་པའི་སེམས་ཀྱི་ཆོས་ཉིད་ཐམས་ཅད་ཀྱི་གཞིའི་ངོ་བོ་དེ་ལ་འདུས་ཤིང་ངང་གཅིག་ཏུ་ཡོངས་སུ་རྫོགས་པ་ཡིན་ཏེ། ཇི་ལྟར་བསྟན་ཀྱང་དེ་ཉིད་ཀྱི་ཡོན་ཏན་གྱི་མཚན་གྱི་རྣམ་གྲངས་ཐ་དད་དུ་གྲགས་པར་གྱུར་པའི་ཕྱིར་རོ། །དེ་ལྟར་བསྒོམ་པའི་ངོ་བོ་གང་ཞེ་ན། ཚིག་ཕྱེད་ནི་གཏན་ཚིགས་ལྟ་བུ་སྟེ། སེམས་ཀྱི་ངོ་བོ་རང་བཞིན་མེད་ཀྱང་མི་འགག་པས་ཡེ་ཤེས་ཆེན་པོ་སྤྱོད་ཡུལ་དང་བྲལ་བ་འཁོར་འདས་དབྱེར་མེད་ཀྱི་གནས་ལུགས་རྒྱུ་ཡིས་མ་བྱས་རྐྱེན་ལས་མ་བྱུང་བར་ཡུལ་མེད་རང་བྱུང་དུ་གྲོལ་བས་ཐིག་ལེ་ཉག་གཅིག་ཏུ་ཤར་བའི་ཕྱིར་ངང་ལས་མི་འདའ་ཞིང་རང་བཞིན་ལ་བརྗེད་པ་མེད་པས་ན་རྗེས་སུ་བསྒོམ་པའི་ཏིང་ངེ་འཛིན་ཞེས་ཨ་ནུ་མན་ཆད་ལྟ་བུའི་ཡུལ་བྱས་ཀྱི་བསམ་པས་དམིགས་པར་བྱ་བ་ཀུན་དང་བྲལ་ཏེ་འདུ་ཤེས་ཐམས་ཅད་ལས་གྲོལ་བར་རང་གསལ་བ་ལ་བློ་ཡི་ལྡང་ལྡོན་གྱི་མིང་ཡང་མེད་པ་ཁོ་ནའོ།།

གཉིས་པ་ཕབས་པའི་དོན་ཉིད་རྫོགས་ཆེན་དུ་ལ་བཟླ་བ་ལ་གསུམ་སྟེ། ཐམས་ཅད་རྫོགས་ཆེན་དུ་ལ་བཟླ་བ། མཐའ་དབུས་ཅན་མཐའ་དབུས་མེད་པར་ལ་བཟླ་བ། སྟོང་པར་འདོད་པ་སྣང་སྟོང་གཉིས་སུ་མེད་པར་ལ་བཟླ་བའོ། །དང་པོ་ནི།

འདི་ལྟར་ངེས་པའི། ཞེས་པ་ནས། ཆེན་པོར་ལ་བཟླས་པའོ། །ཞེས་པའི་བར་གྱིས་བསྟན་ཏེ།

འདི་ལྟར་ངེས་པའི་བྱང་ཆུབ་སེམས་དེ་ལ། །བགྲོད་པའི་གནས་དང་ལྟ་བའི་གཟུགས་མེད་པས།།

མཚན་མ་ཀུན་མཁྱེན་སྐྱོན་ཡོན་ཡོང་ཡེ་མེད། །ཐེག་ཆེན་གཉིས་རྗོགས་ཐེ་ཚོམ་ཀུན་བཅད་ཅིང་།།

བླ་མེད་རྗོགས་པ་ཆེན་པོར་ལ་ཟླའོ།།

གསང་ཆེན་ཨ་ཏིའི་གཞུང་ཆེན་པོའི་དོན་ཕུལ་དུ་བྱུང་བ་ཉིད་འདི་ལྟར་བློ་གྲོས་ཟབ་ཅིང་རྒྱ་ཆེ་བས་ཡང་དག་པར་ངེས་པའི་སྐྱེས་བུ་མཆོག་གི་དགོངས་པ་རང་རིག་བྱང་ཆུབ་སེམས་ཀྱི་རང་བཞིན་རྩོལ་མེད་བདེ་བ་ཆེན་པོའི་ངང་དེ་ཉིད་རྟོགས་ཏེ་དེ་ལས་འདའ་བ་མེད་པ་ལ། ཡུལ་དུ་བྱས་ཏེ་ལམ་ལྔ་དང་ས་བཅུར་བགྲོད་པ་ལྟ་བུར་བགྲོད་པའི་གནས་ཀྱི་གྲུབ་པའི་འབྲས་བུ་གཞན་ན་མེད་པར་ངོ་བོ་ཉིད་དུ་གནས་པ་དང༌། དེ་བཞིན་དུ་ལྟ་བས་ཤེས་པར་བྱ་བའི་ཡུལ་དངོས་པོ་གཟུགས་སྣང་དུ་གྱུར་བ་དང་༼༢༣༦༽དངོས་མེད་སྟོང་པར་ལྟ་བའང་མེད་པས་ཡུལ་ལོགས་ནས་མི་ཚོལ་བར་དངོས་པོ་དང་དངོས་པོ་མེད་པའི་ཆོས་ཀྱི་མཚན་མ་ཐམས་ཅད་ཀུན་ཆོས་ཉིད་སེམས་ཀྱི་དཀྱིལ་འཁོར་འོད་གསལ་བའི་རང་བཞིན་དུ་མཁྱེན་ཅིང་རྟོགས་པས་ན་སྐྱོན་དང་ཡོན་ཏན་གྱི་རིས་སུ་བསྙད་པ་གང་ཡང་ཐོག་མ་ཉིད་ནས་ཡོང་ཡེ་མེད་དེ་མ་དམིགས་པས་གདལ་ཁྱབ་བྱང་ཆུབ་སེམས་ཀྱི་དཀྱིལ་འཁོར་ཉིད་དུ་འུབ་ཆུབ་པ་ཡིན་ཏེ། ཀློང་རབ་འབྱམས་ལས། དཀྱིལ་འཁོར་དཀྱིལ་འཁོར་ཞེས་བྱ་བ། །ཐམས་ཅད་འདུས་ཤིང་རྫོགས་པས་ན། །བྱང་ཆུབ་སེམས་ཀྱི་དཀྱིལ་འཁོར་ཡིན། །ཕྱི་ནང་སྒོ་ཕུགས་བྲལ་བས་ན། །མཉམ་པ་ཉིད་ཀྱི་དཀྱིལ་འཁོར་ཡིན། །མཐའ་དབུས་གཉིས་སུ་མེད་པའི་ཕྱིར། །མུ་མཐའ་མེད་པའི་དཀྱིལ་འཁོར་ཡིན། །འཁོར་འདས་སྟེང་འོག་མེད་པའི་ཕྱིར། །མཐོ་དམན་མེད་པའི་དཀྱིལ་འཁོར་ཡིན། །སྒྲིབ་པ་གཉིས་དང་བྲལ་བའི་ཕྱིར། །མ་བཀོད་གསལ་བའི་དཀྱིལ་འཁོར་ཡིན། །རིག་པ་ཕྱི་ནང་མེད་པའི་ཕྱིར། །དབྱེར་མེད་ཟང་ཐལ་དཀྱིལ་འཁོར་ཡིན། །དགག་སྒྲུབ་གཉིས་དང་བྲལ་བའི་ཕྱིར། །རྒྱ་ཆེན་སྣང་བའི་དཀྱིལ་འཁོར་ཡིན། །མ་སྤངས་རང་སར་གྲོལ་བས་ན། །རང་བཞིན་ལྷུན་གྲུབ་དཀྱིས་འཁོར་མཆོག །ཅེས་དང༌། གཅིག་ཏུ་འདུས་པས་མཐོ་དམན་མེད། །མཐོ་དམན་མེད་པས་ཡངས་དོག་མེད། །མཐའ་དབུས་བྲལ་བས་ཕྱི་ནང་མེད། །སྐྱེ་འགག་མེད་པས་དུས་གསུམ་མེད། །དུས་གསུམ་མེད་པས་སྐྱེ་ཤི་མེད། །འདུ་འབྲལ་མེད་པ་རྒྱལ་བའི་སྐུ། །དགོངས་པ་མཉམ་པ་ཉིད་དུ་གཅིག །རྒྱལ་བའི་དགོངས་སྤྱོད་བསམ་ཡས་ཀྱང༌། །རང་བྱུང་ཡེ་ཤེས་གཅིག་གི་ཀློང༌། །གཞན་དུ་གཡོས་པ་རྡུལ་ཙམ་མེད། །ཅེས་སོ། །དེ་བས་ན། ཐེག་རྩེ་གསང་བ་ཆེན་པོའི་དོན་འདིར་མདོ་སྔགས་ཀྱི་ལྟ་བ་དང་ཚོགས་གཉིས་ཀྱི་སྒོ་ཐམས་ཅད་སྟོང་ཉིད་དང་སྙིང་རྗེ་དབྱེར་མེད་པའི་ངང་ཀློང་དུ་རྫོགས་ཏེ་རྒྱུ་འབྲས་རིལ་ལྷུན་གྱིས་གྲུབ་པ་ཡིན་པས་རང་རིག་རང་གྲོལ་གྱི་གཞི་ལ་གཏན་ཚིགས་ཚད་མས་ཐ་དད་ཕྱོགས་འཛིན་གྱི་ཐེ་ཚོམ་ཟ་བའི་གེགས་ཐམས་ཅད་བསལ་ནས་ཆེད་བྱས་དང་རྩོལ་སྒྲུབ་ཀྱིས་ཡུལ་དུ་བྱེད་པའི་བློ་ཐག་ཀུན་བཅད་ཅིང༌། ཐམས་ཅད་ཐེག་༼༢༣༧༽མཆོག་བླ་ན་མེད་པ་འོད་གསལ་རྫོགས་པ་ཆེན་པོར་མ་འདྲེས་ཡོངས་རྫོགས་ཀྱི་དགོངས་པར་ཤར་གྲོལ་དུས་མཉམ་དུ་གྱུར་པས་ཐེག་པའི་རྒྱལ་པོའི་དགོངས་སྤྱོད་མ་ཡིན་པ་མེད་པའི་དོན་ཉིད་གདེང་ཆེན་ཚད་དུ་འཁྱོལ་བར་ལ་བཟླས་པ་ཡིན་པའི་ཕྱིར་མཐར་ཐུག་གི་དགོངས་པའི་སྐྱེལ་སོ་ལ་ངེས་པ་རྙེད་པར་བྱའོ། །དེ་སྐད་དུའང་སྔ་མ་ལས། འཁོར་འདས་རིག་པ་ཆིག་ཆོད་ལ། །མཉམ་དང་མི་མཉམ་སེམས་ཀྱི་སྟོབས། །དབྱེ་བསལ་མེད་དོ་གཅིག་གི་ཀློང༌། །གཉིས་མཐའི་གྲས་ཐག་བཅད་པའི་ཕྱིར། །མཚུངས་མེད་ཕྱོགས་མེད་གཏན་ཚིགས་ཀྱིས། །ཡུལ་སྣང་ཞེན་པ་ཀུན་བཀྲོལ་ནས། །ཕྱོགས་རིས་མེད་དོ་ཡེ་གདལ་ཆེ། །དེ་དོན་འགྱུར་མེད་གནད་ལ་ཕེབས། །ཕྱོགས་མེད་རིག་པ་ཁ་ཡན་གྱིས། །མཐར་འཛིན་སྤྲོས་པ་ཀུན་བཅད་ནས། །དགག་སྒྲུབ་མེད་པར་ཡེ་ནས་མཉམ། །ཡུལ་སེམས་རིས་སུ་མི་འབྱེད་པས། །ཡུལ་མེད་རིག་པ་རང་ཤར་གྱིས། །གཏན་ཚིགས་ཞེན་པའི་གཏིང་ཕྱུང་ནས། །རྒྱུ་འབྲས་མེད་དོ་ཆོས་ཉིད་ཆེ། །དེ་ལ་ཕྱོགས་སུ་རྩོལ་འདོད་པ། དག་དང་མ་དག་གོལ་ས་སྟེ། །རིམ་པ་བརྒྱད་པོ་ལམ་གྱི་གནས། །ཡིད་ཆེས་རང་གཞན་གཉིས་ཀྱི་ལུང༌། །ཐེ་ཚོམ་གོལ་ས་ཤུགས་ཀྱིས་ཆོད། །ཕྱི་ནང་མེད་པར་འོད་གསལ་བས། །མཐའ་ཡི་མུན་པ་ཀློང་དུ་དག །རྒྱུ་རྐྱེན་གཉེན་པོས་མི་གཡོ་བས། །འཇིག་འདྲལ་མེད་པ་ཆོས་ཀྱི་སྐུ། །མ་རིག་མེད་པ་ཡེ་ཤེས་ཀློང༌། །ཐམས་ཅད་གྲོལ་བ་ནམ་མཁའི་ཀློང༌། །ཞེས་དང༌། སྣང་སྲིད་སྐྱེ་འགུལ་ཡོད་པ་དང༌། །མི་སྲིད་སྐྱེ་འགུལ་ཡོད་པ་དང༌། །མི་སྲིད་མེད་པའི་ཆོས་རྣམས་ཀུན། །རང་བྱུང་ཡེ་ཤེས་ཀློང་དཀྱིལ་དུ། །མ་རྫོགས་པ་ནི་མེད་པའི་ཕྱིར། །རྫོགས་ཆེན་ལྷུན་གྲུབ་བླ་ན་མེད། །མཉམ་པ་ཉིད་དུ་ཐག་ཆོད་པས། །ཀུན་ཀྱང་རང་བྱུང་ཡེ་ཤེས་ཉིད། །དུས་ལ་སྔ་ཕྱི་མ་མཆིས་པས། །ཨ་ཏི་དུས་གསུམ་ཆིག་ཆོད་ལ། །ཨ་ནུ་མན་ཆད་འོག་མ་ཡི། །བསྐལ་པའི་གྲངས་དང་མི་ཆེའི་གྲངས། །བརྒྱུད་ནས་འབྲས་བུ་འདོད་པ་དེ། །མ་སྤངས་གཅིག་ཏུ་འདུས་པའི་ཕྱིར། །དུས་གསུམ་ཐ་དད་མེད་པ་རུ། །རང་བཞིན་གཅིག་པས་ཀློང་དུ་གྲོལ། །དེ་ཡི་ངང་ལ་རྒྱུད་ཆད་མེད། །རྒྱུན་ཆད་མེད་པའི་རང་བཞིན་ལ། །འཁོར་འདས་མཉམ་པ་རིས་མེད་༼༢༣༨༽ལས། །གཞན་དུ་ལྟ་བ་མེད་པའི་ཕྱིར། །ཡེ་སངས་རྒྱས་པའི་ཆོས་ཉིད་ཡིན། །དེ་ལ་རང་རང་ལོངས་སྤྱོད་པས། །ཕྱོགས་མེད་གཏེར་ཆེན་འབྲས་བུ་ཡིན། །ཞེས་སོགས་མང་ངོ་། །དེས་ན་རྫོགས་པ་ཆེན་པོའི་བྱང་ཆུབ་ཀྱི་སེམས་རང་བྱུང་རིག་པའི་ཡེ་ཤེས་ཇི་བཞིན་དུ་རྟོགས་པས་འོག་མའི་ཐེག་པའི་ལྟ་བ་ཀུན་ལས་འཕགས་ཚུལ་ཉུང་ངུར་བརྗོད་ན། ཉན་ཐོས་ཀྱིས་གང་ཟག་གི་ བདག་མེད་ཙམ་ལས་མ་རྟོགས་པར་ཆོས་བདག་གཟུང་འཛིན་ཕྲ་བ་དོན་དམ་དུ་འདོད་པ ་ལ་ལྟོས་ན། རང་རྒྱལ་གྱིས་དེའི་སྟེང་དུ་ཆོས་ཀྱི་ཕྱོགས་གཅིག་གཟུང་བ་རང་བཞིན་མེད་པར་རྟོགས་པས་འཕགས་ལ། དེ་ལས་སེམས་ཙམ་པས་གཟུང་འཛིན་གཉིས་མེད་ཀྱི་ཤེས་པ་རང་རིག་རང་གསལ་དུ་རྟོགས་པས་འཕགས་ཤིང༌། དེ་བས་དབུ་མ་པས་དོན་དམ་པར་རང་རིག་རང་གསལ་དུའང་མ་གྲུབ་སྟེ། ཆོས་ཉིད་སྤྲོས་བྲལ་ནམ་མཁའ་ལྟར་ བདག་མེད་གཉིས་ཀ་རྟོགས་པས་འཕགས་ལ། དེ་ལས་ཀྲི་ཡ་བས་དོན་དམ་རང་སེམས་དག་པ ་མཐའ་བཞི་དང་བྲལ་བ། ཀུན་རྫོབ་དེ་རྟོགས་ཀྱི་ཡོན་ཏན་རིགས་གསུམ་གྱི་དཀྱིལ་འཁོར། དེ་གཉིས་ཀྱང་དབྱེར་མེད་དུ་རྟོགས་པས་འཕགས་པ་དང༌། དེ་ལས་ཡོ་ག་བས་དོན་དམ་སེམས་ཉིད་རང་བཞིན་གྱིས་འོད་གསལ་བའམ། སྐྱེ་འགག་མེད་པའི་ཆོས་སྐུ་རྣམ་སྣང་ཀུན་ཏུ་ཞལ་དང༌། ཀུན་རྫོབ་དེ་རྟོགས་ཀྱི་བྱིན་རླབས་ཐུན་མོང་གི་རིགས་ལྔའམ། རྡོ་རྗེ་དབྱིངས་ཀྱི་ལྷ་སོ་བདུན། དེ་གཉིས་ཀྱང་དབྱེར་མེད་དུ་རྟོགས་པས་འཕགས་ཤིང༌། དེ་ལས་མ་ཧཱ་པས། དོན་དམ་རིག་པ་སྤྲོས་བྲལ་སྣང་བ་ངོ་བོ་ཉིད་རྒྱུར་ལྷུན་གྱི་གྲུབ་པ། ཀུན་རྫོབ་རིག་པ་སྒྱུ་མ་རྣམ་དག་ཆེན་པོ། དེ་གཉིས་ཚིག་ལ་སྔ་ཕྱི་ཡོད་ཀྱང་དོན་ལ་དབྱེར༌མེད་སྤྱོད་ཡུལ་དང་བྲལ་བར་རྟོགས་པས་འཕགས་ལ། དེ་ལས་ཨ་ནུ་པས་དབྱིངས་སྣང་བ་རྩལ་རྫོགས་ཀུན་ཏུ་བཟང་མོའི་མཁའ་ཀློང༌། ཡེ་ཤེས་འགག་པ་མེད་པར་ཀུན་ཏུ་བཟང་པོའི་རོལ་པ། དེ་གཉིས་དབྱེར་མེད་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར། དེ་ཡང་སྤྱོད་ཡུལ་དང་བྲལ་བར་རྟོགས་པས་འཕགས་ཤིང༌། ཨ་ནུས་དེ་ལྟར་རྟོགས་ཀྱང་རྒྱུ་འབྲས་སྒོ་ཕུགས་སུ་འབྱེད་པ་ལ། ཨ་ཏི་ཡོ་ག་པས། ཇི་སྐད་དུ། ཇི་བཞིན་མ་བསླད་བཙལ་དུ་མེད་པ་ལ། །སྒོ་ཕུགས་དཀྱིལ་༼༢༣༩༽འཁོར་བསྐྱེད་དང་མ་བྲལ་ནོར། །འཇུག་སྐྱེད་ཡེ་བྲལ་ངང་ཉིད་ཁྱོད་ཀྱིས་ཀྱང༌། །ཕྱོགས་ཙམ་མ་ཤེས་རང་བྱུང་ང་ཉིད་འཕགས། །ཞེས་གསུངས་པ་ལྟར་ཆོས་ཐམས་ཅད་བྱང་ཆུབ་ཀྱི་སེམས་སྐྱེ་འགག་གཉིས་སུ་མེད་རང་བྱུང་གི་ཡེ་ཤེས་སྒྲ་ཇི་བཞིན་མ་ཡིན་པར་བློ་དང་དངོས་པོ་གཉིས་མེད་པའི་རང་གྲོལ་དུ་རྟོགས་པས་ཁྱད་པར་འཕགས་པ་ཡིན་ནོ། །དེ་བས་ན་འདིར་ཐེག་དགུ་རྫོགས་ཆེན་དུ་འདུས་ཤིང་ཀུན་ལས་འཕགས་པའི་ཚུལ་ནི། འཇམ་པའི་དབྱངས་དངོས་ཀུན་མཁྱེན་ཀཿཐོག་པ་ཆེན་པོས་འདྲ་མཐུན་ཁྱད་པར་ངང་པའི་རྒྱལ་པོ་ལས། སྣང་བ་འགོག་ཏུ་མེད་པ་ནི། །སེམས་ཅན་དང་ཡང་མཐུན་པ་སྟེ། །རང་རྒྱུད་དངོས་པོར་མི་འཛིན་པས། །འགྲོ་བ་དྲུག་ལས་ཁྱད་པར་འཕགས། །གང་ཟག་ བདག་མེད་འདོད་པ ་ནི། །ཉན་ཐོས་དང་ཡང་མཐུན་པ་སྟེ། །རྡུལ་ཕྲན་རྫས་སུ་མི་འཛིན་པས། །ཉན་ཐོས་ལས་ཀྱང་ཁྱད་པར་འཕགས། །རྒྱུ་རྐྱེན་དག་པར་འདོད་པ་ནི། །རང་སངས་རྒྱས་དང་མཐུན་པ་སྟེ། །རྟེན་འབྲེལ་མཚན་མར་མི་ལྟ་བས། །རང་རྒྱལ་ལས་ཀྱང་ཁྱད་པར་འཕགས། །སྣང་བ་སེམས་སུ་འདོད་པ་ནི། །སེམས་ཙམ་དང་ཡང་མཐུན་པ་སྟེ། །རིག་པ་རྫས་སུ་མི་སྒྲུབ་པས། །སེམས་ཙམ་ལས་ཀྱང་ཁྱད་པར་འཕགས། །དོན་དམ་སྤྲོས་བྲལ་འདོད་པ་ནི། །དབུ་མ་དང་ཡང་མཐུན་པ་སྟེ། །བདེན་པ་རིས་སུ་མི་འབྱེད་པས། །དབུ་མ་ལས་ཀྱང་ཁྱད་པར་འཕགས། །རང་བཞིན་དག་པར་འདོད་པ་ནི། །ཀྲ་ཡ་དང་ཡང་མཐུན་པ་སྟེ། །དག་བྱེད་དངོས་པོར་མི་འཛིན་པས། །ཀྲ་ཡ་ལས་ཀྱང་ཁྱད་པར་འཕགས། །ཡུལ་སེམས་ཟུང་འཇུག་འདོད་པས་ནི། །ཨུ་པ་ཡ་དང་མཐུན་པ་སྟེ། །ལྟ་སྤྱོད་གོང་འོག་མི་འབྱེད་པས། །ཨུ་པ་ལས་ཀྱང་ཁྱད་པར་འཕགས། །སྣང་སེམས་དབྱེར་མེད་འདོད་པས་ནི། །ཡོ་ག་དང་ཡང་མཐུན་པ་སྟེ། །བྱང་ཆུབ་ཆོ་འཕྲུལ་མི་འདོད་པས། །ཡོ་ག་ལས་ཀྱང་ཁྱད་པར་འཕགས། །བླང་དོར་མེད་པར་སྤྱོད་པས་ནི། །མ་ཧཱ་དང་ཡང་མཐུན་པ་སྟེ། །དེ་ཉིད་དངོས་པོར་མི་འཛིན་པས། །མ་ཧཱ་ལས་ཀྱང་ཁྱད་པར་འཕགས། །དབྱིངས་དང་ཡེ་ཤེས་འདོད་པས་ནི། །ཨ་ནུ་དང་ཡང་མཐུན་པ་སྟེ། །དེ་ཉིད་རྒྱུ་འབྲས་མི་ལྟ་བས། །༼༢༤༠༽ཨ་ནུ་ལས་ཀྱང་ཁྱད་པར་འཕགས། །ཤིན་ཏུ་རྣལ་འབྱོར་ལྟ་བ་ནི། །རང་བཞིན་སྐྱེ་བ་མེད་པ་ཡིན། །རོལ་པ་འགག་པ་མེད་པ་ཡིན། །མཚན་ཉིད་དབྱེ་བ་མེད་པ་ཡིན། །རིག་པ་རང་སར་གྲོལ་བ་ཡིན། །འཁྲུལ་ཆོས་རང་སར་ཞི་བ་ཡིན། །འབྲས་བུ་རང་སྣང་ལྷུན་གྲུབ་ཡིན། །ཞེས་གསུངས་པ་ལྟར་ཐེག་མཆོག་རྒྱལ་པོའི་དགོངས་དོན་བླ་ན་མེད་པ་ལ་ངེས་པ་རྙེད་པར་བྱ་བ་ཤིན་ཏུ་གཅེས་ཏེ། འདིར་གནད་ཙམ་བསྟན་པ་ཡིན་གྱི་རྒྱས་པར་སྤྲོས་ཀྱང་ཆོག་གོ།

གཉིས་པ་མཐའ་དབུས་ཅན་མཐའ་དབུས་མེད་པར་ལ་བཟླ་བ་ལ་གཉིས་ཏེ། མཐའ་དབུས་མེད་པར་ཁུངས་ཀྱིས་བསྟན་པ། གཏན་ཚིགས་ཀྱིས་མཐའ་གུད་ན་མེད་པར་བསྟན་པའོ། །དང་པོ་ནི།

དེས་ན་མཐའ་དབུས། ཞེས་པ་ནས། དོན་དུ་ཀུན་འདུས་གསུངས། །ཞེས་པའི་བར་གྱིས་བསྟན་ཏེ།

དེས་ན་མཐའ་དབུང་འབྱེད་པ་ཆ་འཕྲ་བ། །མཐའ་དབུས་མེད་པ་ཉིད་དུ་ཀུན་གཅིག་སྟེ།།

ཁྱབ་པར་འཕགས་པའི་དོན་དུ་ཀུན་འདུས་གསུངས།།

དེ་བས་ན་རྒྱུ་འབྲས་ཀྱི་ཐེག་པ་ལས་ཆེ་བའི་ཁྱད་པར་ཡོད་པའི་ཕྱིར་ཏེ། འདི་ལྟར་གསང་སྔགས་བླ་ན་མེད་པའི་ལྟ་བ་གང་ཡང་སྤོང་ལེན་མེད་པའི་དོན་དེ་ལྟར་ཡིན་པ་དེས་ན། དབུ་མ་པ་སོགས་གང་སུ་ཞིག་གིས་དབྱེ་གཞི་ཟད་པའི་དབྱེར་མེད་ཆེན་པོ་ལ་མཐའ་དང་དབུས་སུ་འབྱེད་དེ་མཐའ་བསལ་ནས་དབུ་མར་མི་དམིགས་པའི་དོན་དུ་འདོད་པ་དང༌། སེམས་ཙམ་སོགས་ཤེས་པ་རང་རིག་རང་གསལ་དང༌། བདེན་གཉིས་དབྱེར་མེད་དུ་སྒྲུབས་ཏེ་ཤིན་ཏུ་བརྟག་དཀའ་བའི་ངོ་བོ་ཆ་ཕྲ་བ་ལ་བློ་གནས་པར་འདོད་པ་རྣམས་ཀྱང་ཀུན་བྲལ་ཉག་གཅིག་ཅི་ཡང་མ་ཡིན་པའི་དོན་ཆེན་པོ་མཐོང་བ་ལས་གོལ་བ་ཁོ་ནའོ། །འོན་ཀྱང་དེ་དག་ཐམས་ཅད་ཐེག་པ་ཆེན་པོའི་མདོ་མཐའ་དབུས་སུ་འཛིན་པ་མེད་པའི་མཉམ་པ་ཉིད་དབུ་མ་དང་དབྱེར་མེད་ཀྱི་ཐ་སྙད་ལས་ཀྱང་གྲོལ་བའི་ཀློང་ཆེན་པོ་ཉིད་དུ་ཀུན་རྣམ་དབྱེ་མེད་པར་གཅིག་ཏུ་འདུས་པ་ནི། །དཔེར་ན་ཕུལ་ཁྱོར་བྲེ་ནང་དུ་ཤོང་བ་དང་མཚུངས་པ་ཉིད་དུ་ངེས་ཏེ། དེ་བས་ན་གསང་སྔགས་ཐེག་མཆོག་རྒྱལ་པོ་འོད་གསལ་སྙིང་པོའི་དགོངས་པ་ཉིད་འོག་མ་ཀུན་ལས་ཁྱད་པར་དུ་འཕགས་པའི་ཆེ་བ་རྨད་དུ་བྱུང་བ་རྣམས་ཡང་དག་པར་རིག་ཅིང་རྟོགས་པར་བྱ་བའི་དོན་གྱི་ཆེད་དུ་དགོངས་པ་ཀུན་འདུས་ཀྱི་རྒྱུད་མཆོག་ཆེན་པོ་འདི་ལྟ་བུ་ཉིད་བཀའ་སྩལ་བར་མཛད་དེ་གསུངས་པ་ཡིན་པར་ཤེས་པར་བྱའོ།།

གཉིས་པ་གཏན་ཚིགས་ཀྱིས་མཐའ་གུད་ན་མེད་པར་བསྟན་པ་ནི།

རྒྱུར་འདོད་ལ་སོགས། ཞེས་པ་ནས། ༼༢༤༡༽འདོད་ན་སྐྱོན་ཆེན་ཡིན། །ཞེས་པའི་བར་གྱིས་བསྟན་ཏེ།

སྒྱུར་འདོད་ལ་སོགས་ཕྱི་ནང་ཡུལ་ཀུན་ལ། །དགའ་བའི་མཚན་མ་ཙམ་དུ་གནས་པ་དང་། །གང་དག་སྤྱོད་པས་ཆོས་རྣམས་སེམས་སུ་འདུས། །མཐའ་གཉིས་ངང་གིས་གསལ་ཞེས་སྨྲ་བ་ཡང་། །མ་བཅོས་མཐོང་བས་གུད་ན་ཡོང་མེད་དོ། །གལ་ཏེ་ཡོད་པར་འདོད་ན་སྐྱོན་ཆེན་ཡིན།།

སེམས་ཉིད་སངས་རྒྱས་ཀྱི་རྒྱུར་འདོད་པ་རྒྱུའི་ཐེག་པ་རྣམས་དང༌། ལ་སོགས་ཞེས་དངོས་པོ་གཞན་བསྡུ་བ་ནི་ཡོ་ག་ཕྱི་པ་དག་སྟེ་དེ་རྣམས་ཀྱིས་ཕྱི་ནང་སྣོད་བཅུད་ཀྱི་ཡུལ་དུ་སྣང་བའི་དངོས་པོ་དག་ལ་འཕགས་པ་ཉན་ཐོས་ཀྱིས་དངོས་པོ་རྣམས་བརྟགས་ན་བརྟགས་མི་བཟོད་དེ་མ་བརྟགས་ན་ཉམས་དགའ་བ་ཙམ་སྟེ་རང་བཞིན་ཆ་མེད་གཉིས་ལས་མ་འདས་པར་མཐོང་བ་དང༌། སྔགས་ཕྱི་པས་ཀུན་རྫོབ་ཏུ་སྣང་བའི་མཚན་མ་རྣམས་ཀྱང་དག་པའི་ཆོས་ཉིད་དུ་ངེས་པས་མཚན་མ་མེད་པ་ཙམ་དང་དབྱེར་མེད་དུ་གནས་པས་རྟོགས་ན་ཡོན་ཏན་དང་བྱིན་རླབས་རིགས་གསུམ་དང་རིགས་ལྔའི་ལྷར་སྣང་བས་ན་སྤྱོད་པ་རྣམ་པར་དཀར་བ་དང་གཙང་སྦྲས་འགྲོ་བ་འདུལ་བའི་ཐབས་ལ་མོས་པས་གནས་པ་དང༌། གང་དག་རྣམ་རིག་པ་དང་རྣལ་འབྱོར་སྤྱོད་པའི་དབུ་མ་པས་དངོས་པོ་ཕྱི་ནང་གི་ཆོས་རྣམས་ཀུན་གཞི་གཟུང་ཆ་དང་འཛིན་ཆ་འཁྲུལ་པར་སྣང་བ་རབ་རིབ་ཅན་གྱིས་རྫས་མཐོང་བ་ལྟར་གྱུར་པས་འཁྲུལ་པར་སྣང་བའི་སེམས་སུ་གཅིག་ཏུ་འདུས་པས་ཡུལ་ལོགས་ན་མེད་པར་འདོད་པ་དང༌། དབུ་མ་ཆེན་པོས་ཀུན་རྫོབ་ཏུ་རྟེན་ཅིང་འབྲེལ་བར་འབྱུང་བ་སྒྱུ་མ་ཙམ་དང༌། དོན་དམ་པར་མཐའ་གཉིས་སམ་བཞི་པོ་ཀུན་དང་བྲལ་བའི་ཆོས་ཉིད་མ་སྐྱེས་བའི་ངོ་བོར་ངང་གིས་གསལ་ལོ་ཞེས་སུ་འདོད་པའི་གཞུང་སོ་སོ་ལ་བརྟེན་ཏེ་འབད་པས་འབྲས་བུ་ཐོབ་པའི་ཕྱིར་རྒྱུ་འབྲས་སྔ་ཕྱི་ཡོད་པར་སྨྲ་ཞིང་གྲུབ་མཐའ་སོ་སོར་འཛིན་པ་རྣམས་ཀྱིས་མཚན་ཉིད་ཐེག་པས་སེམས་ཉིད་སངས་རྒྱས་ཀྱི་རྒྱུ་ཙམ་དུ་འདོད་པ་དང༌། གསང་སྔགས་ཀྱིས་སེམས་ཆོ་འཕྲུལ་དང་བཅས་པ་འབྲས་བུར་འདོད་དེ་རང་རང་གི་ལུགས་སྲོལ་སྒྲུབ་པར་བྱེད་པ་ཡང༌། ཀུན་ཟླུམ་ཐིག་ལེ་ཉག་གཅིག་གསང་སྔགས་མཉམ་པ་ཆེན་པོའི་ངོ་བོར་ལ་བཟླས་ཏེ་ཐག་བཅད་པའི་སྙིང་པོ་དོན་གྱི་གནས་ལུགས་ཇི་ལྟ་བ་བཞིན་དུ་རྟོགས་ཤིང་མཐོང་ན་དེ་དག་ཀུན་ཀྱང་སྤང་བྱ་མིན་པར་དབྱིངས་ལ་རྫོགས་པས་གསང་སྔགས་སུ་གཅིག་པ་ཉིད་ལས་གུད་ན་ཡོང་ཡེ་མེད་པ་ཉིད་དོ། །དེས་ན་ཀློང་ཆེན་རབ་འབྱམས་ལས། ཇི་བཞིན་པ་དང་དེ་ལས་གཞན། །མ་ནོར་བ་དང་འཁྲུལ་པ་དང༌། །མ་བཅོས་པ་དང་བཅོས་པ་དང༌། །༼༢༤༢༽གཞན་མ་ཡིན་དང་རང་ཡིན་དང༌། །ཆོས་ཅན་དང་ནི་ཆོས་ཉིད་དང༌། །དབྱིངས་དང་དངོས་པོ་ལ་སོགས་པ། །བཟང་ངན་བྱེ་བྲག་འབྱེད་པ་ནི། །འདི་ཀུན་རང་བཞིན་འཁྲུལ་པའི་བློ། །བྱང་ཆུབ་སེམས་ལ་དབྱེ་བ་མེད། །སྟོང་ཉིད་སྙིང་པོའི་ཀློང་ཆེན་འདི། །སྐད་ཅིག་རྟོགས་པ་ཙམ་གྱིས་ཀྱང༌། །བྱང་ཆུབ་ཀློང་དུ་དེར་སོན་པས། །མཚན་མའི་ཆོས་ལ་རག་མི་ལས། །སྟོང་པའི་ཆོས་ལ་བློ་མི་གནས། །ཅིར་ཡང་མེད་ལས་གར་ཡང་སྣང༌། །མཐོང་བ་མེད་པར་ཀུན་ཏུ་གསལ། །བརྟགས་ན་མ་རྙེད་ཅིར་ཡང་འཆར། །དངོས་པོ་མེད་ལས་སྙིང་པོ་འབྱུང༌། །རང་བཞིན་མེད་པར་ཀུན་ལ་ཁྱབ། །དངོས་གཞི་མེད་པར་ཐམས་ཅད་འབྱུང༌། །བསྒྲུབ་ཏུ་མེད་པར་ཅིར་ཡང་འགྲུབ། །བཏང་བཞག་མེད་པར་རང་ལ་གནས། །འདོད་པ་མེད་པར་དོན་ཀུན་འགྲུབ། །འདོད་རྒུ་འབྱུང་བས་བཙལ་མི་དགོས། །ཡེ་ཤེས་ཉི་མ་རང་ལ་ཤར། །གསང་སྔགས་དོན་ཀུན་བསྐྱེད་པའི་གཞི། །གདུལ་བྱ་མ་ལུས་འདུལ་བའི་ཞིང༌། །ཐམས་ཅད་བདག་ཉིད་བྱང་ཆུབ་ཀློང༌། །མི་མཛད་མཛད་པ་མཐར་ཕྱིན་པས། །དུས་གསུམ་རྒྱལ་བ་མ་ལུས་ཀྱིས། །ཕྲིན་ལས་མཛད་པ་འདི་ཡིས་མཛད། །ཅེས་སོགས་གསུངས་སོ། །དེ་བས་ན་གསང་སྔགས་མཆོག་གི་དོན་ཟབ་མོ་དེ་དག་གིས་ཇི་བཞིན་པར་མ་མཐོང་ཡང༌། གལ་ཏེ་ངོ་བོས་གསང་དོན་ལ་རྒྱ་ཆད་ནས་ལོགས་ཤིག་པར་གྱུར་ཏེ་གུད་ན་ཡོད་པར་འདོད་པའི་ཕྱོགས་འཛིན་ན་མཐའ་བྲལ་གསང་སྔགས་ཀྱི་ངེས་དོན་མཐོང་དུ་མི་སྟེར་བའི་སྐྱོན་ཆེན་པོ་བག་ཆགས་ངན་པས་ནད་ཀྱིས་ཟིན་པ་ཡིན་པའི་ཕྱིར་ཏེ། དཔེར་ན་མཛུབ་མོས་ཟླ་བ་མཚོན་པ་ན་མཛུབ་རྩེ་ལ་ཆགས་པས་ཟླ་བ་སྒྲིབ་པ་བཞིན་ནོ།།

གསུམ་པ་སྟོང་པར་འདོད་པ་སྣང་སྟོང་གཉིས་སུ་མེད་པར་ལ་བཟླ་བ་ནི།

དེས་ན་བསམ་གཏན། ཞེས་པ་ནས། སྣང་ལ་རང་བཞིན་མེད། །ཅེས་པའི་བར་གྱིས་བསྟན་ཏེ།

དེས་ན་བསམ་གཏན་སོ་སོར་ཅིར་ཡང་སྣང་། །བུས་པའི་སྤྱོད་ཡུལ་འཁྲུལ་པ་ཉིད་སྣང་ཡིན། །དམ་པ་དམན་པ་སྒྱུ་མ་སྨིག་རྒྱུའི་ཚུལ། །རང་བཞིན་སྐྱེ་འགག་མེད་པ་ནམ་མཁའ་བཞིན། །དེར་ནི་ཀུན་འདུས་ཀུན་ལ་མཐོང་བ་མེད། །ཅི་ཡང་མི་སྣང་བ་ཉིད་སྐྱོན་མེད་འདོད། །འདི་ནི་འཁྲུལ་པ་ཡིན་པས་བཏུབ་མ་ཡིན།།

མཐོང་དང་མ་མཐོང་སྣང་ལ་རང་བཞིན་མེད།།

དེ་ལྟར་གསང་སྔགས་ཀྱི་དོན་དུ་རིལ་འདུས་པ་དེས་ན་ཉན་ཐོས་ནས་སྔགས་ཕྱི་པའི་བར་གྱིས་ཐེག་པ་རྣམས་ཀྱི་ལྟ་བ་དང་བསམ་གཏན་ནམ་ཏིང་ངེ་འཛིན་རིམ་པ་སོ་སོ་བར་གྱུར་ཏེ་ཐེག་པ་ཆེན་པོའི་ཁྱད་པར་ལས་རང་རང་གི་ངོ་ལ་ཐ་དད་དུ་ཅིར་ཡང་སྣང་བ་ཀུན་ཀྱང་གསང་སྔགས་ཀྱི་དོན་ཆེན་པོ་ལ་ཤེད་མ་བྱེ་བས་བྱིས་པའི་སྤྱོད་ཡུལ་རང་གི་༼༢༤༣༽བློས་བརྟགས་པའི་ལྟ་བ་དང་ཏིང་ངེ་འཛིན་ལ་ཞེན་པ་དེ་ཡང་དཔེར་ན་བྱིས་པ་ཆུང་ངུས་ཁང་པ་བརྩེགས་པ་བྱས་པ་དང་མཉམ་དུ་འཇིག་པ་བཞིན་དུ་འཁྲུལ་པ་ཉིང་འཁྲུལ་ཉིད་དུ་སྣང་བ་ཡིན་པས་ལྟོས་པའི་འཁྲུལ་སྣང་ཁོ་ན་ཡིན་ནོ། །དེ་ཅིའི་ཕྱིར་ཞེ་ན། དམ་པ་གསང་སྔགས་ཐེག་པ་ཆེན་པོ་ལ་གཉིས་ལས་སྔགས་ཕྱི་པ་ལྟ་འཕང་ཞན་པ་དག་དང་དམན་པ་གསང་སྔགས་ལ་ལྟོས་ནས་རྒྱུའི་ཐེག་པ་ཆེན་པོ་པ་དག་གིས། ལྟ་བས་ཀུན་རྫོབ་སྒྱུ་མ་ཙམ་དུ་ཡུལ་རང་རྒྱུད་དུ་ལྟ་བ་ནི་དཔེར་ན་སྒྱུ་མས་འཁྲུལ་ཤེས་འདྲེན་པའི་བྱ་བ་བྱེད་ཀྱང་དངོས་པོ་མེད་པ་ལྟ་བུ་དང༌། ཏིང་ངེ་འཛིན་གྱི་རྣམ་པ་ལ་ཞེན་པ་ནི་སྨིག་རྒྱུའི་ཆུའི་ཚུལ་ལ་རི་དྭགས་སྐོམ་པས་བདས་ཀྱང་སྐོམ་པས་གདུང་བ་མི་འཇིལ་བ་བཞིན་དང༌། དོན་དམ་པར་རང་བཞིན་སྐྱེ་འགག་མེད་པས་ནམ་མཁའ་བཞིན་དུ་འདོད་པའི་སྐབས་དེས་ནི་རྟོགས་པར་དཀའ་བའི་གསང་སྔགས་ཐེག་པ་ཆེན་པོ་ཇི་བཞིན་པའི་ཆོས་ཉིད་རྒྱལ་བའི་དགོངས་པ་ཀུན་ནས་འདུས་པའི་ངོ་བོ་ཆོས་ཀུན་རྫོགས་པའི་རང་བཞིན་བདེན་པ་རྣམ་གཉིས་དབྱེར་མེད་པའི་དོན་གྱི་ངང་ལ་གནས་པར་གྱུར་པ་ཉིད་མཐོང་བ་མེད་དེ་རང་གི་ལྟ་བས་སྒྲིབ་པས་སོ། །དེ་ཅིའི་ཕྱིར་ཞེ་ན། མདོ་སྡེའི་བྱང་ཆུབ་སེམས་དཔས་ནི། དོན་དམ་པར་མ་སྐྱེས་པ་ཟད་མ་ཅིར་ཡང་མི་སྣང་བའམ་སྣང་མ་མྱོང་བ་ཉིད་མཐའ་དང་བྲལ་བའི་ལྟ་བ་དམ་པ་སྐྱོན་མེད་པ་ཡིན་པར་ཞེ་བས་འདོད་དེ། དེ་ནི་གསང་སྔགས་དོན་གྱི་སྙིང་པོ་མ་མཐོང་བའི་འཁྲུལ་པ་ནོར་བའི་ཡུལ་ཡིན་པས་དེས་རྒྱུ་འབྲས་དབྱེར་མེད་པའི་དོན་མ་ནོར་བ་ཉིད་རྟོགས་སུ་བཏུབ་པ་མ་ཡིན་པའི་ཕྱིར་ཏེ་སྣང་སྟོང་དབྱེར་མེད་མཐའ་བྲལ་ཆེན་པོ་མ་རྟོགས་པར་སྟོང་པ་ལ་དམ་པར་འཛིན་པས་སོ། །འོ་ན་དབུ་མ་སྣང་མེད་པའི་ལུགས་སུ་དེ་ལྟར་ངེས་ཀྱང༌། སྔགས་ཕྱི་པ་ནི་དེ་ལ་བསྐྲུན་དུ་མེད་དོ་སྙམ་ན། འདིར་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ལ་ལྟོས་ན། སྔགས་ཕྱི་པ་གསུམ་གྱི་འདོད་པ་ཡང༌། ལྟ་བའི་ཀློང་ལས། ཀུན་རྫོབ་སྣང་བ་ལྷ་ཚིགས་གསུམ། །རྗེ་དང་འབངས་འདྲ་དོན་དམ་པར། །དག་པའི་མཐའ་རུ་ལྟ་བ་དང༌། །རིགས་བཞི་དཔོན་གཡོག་དོན་དམ་པར། །སྤྲོས་དང་བྲལ་བར་ལྟ་བ་དང༌། །སྣང་བ་རིགས་ལྔ་གྲོགས་པོའི་ཚུལ། །དམ་པར་རྣམ་སྣང་ཆེན་པོར་ལྟ། །ཞེས་གསུངས་པ་ལྟར་མཐར་ཐུག་དབྱེར་མེད་དུ་འདོད་པ་ཙམ་ཡོད་ཀྱང༌། བདེན་གཉིས་ཀྱི་ཁས་ལེན་ཅན་དུ་སོང་བས་ན། མཐའ་བྲལ་ཕྱོགས་རིས་སུ་གྱུར་པའི་དོན་དམ་དུ་བཞག་པ་དེ་ཉིད་ཀུན་རྫོབ་སྣང་བ་དང་བྲལ་བར་འགྱུར་བས། རིན་པོ་ཆེ་གཏེར་གཏད་པ་ལས། དག་༼༢༤༤༽བདེན་གཙང་སྦྲ་དགོས་པས་འཁྲུལ། །ཞེས་པ་དང༌། སྔ་ཕྱི་གཉིས་སྐྱོན་རྗེས་སུ་གནོད། །ཅེས་པ་དང༌། རྣམ་སྣང་ཆེན་པོ་ཕྱོགས་མེད་ན། །ཐ་དད་རིགས་ལྔ་ཕྱོགས་བཅས་ཅི། །རེས་འཇོག་བསམ་གཏན་གཅིག་སྒྲུབ་པ། །ཚ་གྲང་རེག་པ་གཅིག་བསྡུས་ནས། །གཅིག་སྒྲུབ་འདོད་པའི་བླུན་པོ་འདྲ། །ཞེས་གསུངས་པ་ལྟར་ངེས་པར་འགྱུར་ཏེ། ཞིབ་པར་འདི་ཉིད་དང་གཡུ་ཐང་སོགས་ལས་ཤེས་པར་བྱའོ། །དེས་ན་སྒྲ་ཐལ་འགྱུར་ཆེན་པོ་ལས། ལ་ལ་ཡུལ་ལ་བརྟེན་པ་ཡིས། །བདེན་དང་རྫུན་གྱི་ཁྱད་པར་འབྱུང༌། །ལ་ལ་དམིགས་པ་མེད་པ་ལས། །གཟུ་བོ་ཙམ་གྱིས་ཤེས་པར་གཟུང༌། །ལ་ལ་འཁོར་འདས་འདོད་པ་ཡང༌། །བདེན་པ་གཉིས་ལས་སེམས་གཉིས་འཁྲུལ། །དེ་ལ་སྣང་རྐྱེན་ཉོན་མོངས་སོགས། །ཞེས་གསུངས་པ་ལྟ་བུའི་ཕྱིར་རོ། །དེ་བས་ན་དབུ་མ་སོགས་ཀྱི་ཀུན་རྫོབ་དང་དོན་དམ་དུ་བཞག་པའང་སྐབས་འདིས་དེ་དག་ཐམས་ཅད་སེམས་ཀྱི་ཆོས་ཉིད་སྣང་བ་མཐོང་བ་དང་སྟོང་པ་མ་མཐོང་བ་གཉིས་དབྱེར་མེད་སྤྱོད་ཡུལ་དང་བྲལ་བའི་སྣང་ལ་རང་བཞིན་མེད་པའི་ངང་དུ་འདུས་པ་ཡིན་པས་ཕྱོགས་རིས་སུ་གྱུར་པའི་ཁས་ལེན་གཞན་ལྟ་ཅི་དབྱེར་མེད་ཙམ་དུ་འདོད་པའང་རྣམ་པ་ཀུན་ཏུ་མེད་དོ།།

གསུམ་པ་དེ་ལྟར་རྟོགས་པའི་ཡོན་ཏན་བཤད་པ་ནི།

ཀུན་འདུས་གསང་བའི། ཞེས་པ་ནས། མི་བརྩལ་བཞག་པའོ། །ཞེས་པའི་བར་གྱིས་བསྟན་ཏེ།

ཀུན་འདུས་གསང་བའི་དགོངས་སྤྱོད་ཟབ་མོ་ནི། །རང་བྱུང་རང་རིག་མངོན་དུ་སྣང་དུས་ན། །རང་བྱུང་ཡེ་ཤེས་དེ་ཉིད་མཐོང་ཞེས་བྱ། །དེ་ལྟར་དགོངས་པ་དམ་པ་མཐོང་བའི་ཚེ། །རྟོག་ཆགས་ཀུན་སངས་མཐོང་ཡུལ་འདས་པ་སྟེ། །བྱ་མེད་སྣང་མེད་མི་བཙལ་བཞག་པའོ།།

འོ་ན་ཐེག་པ་ཆེན་པོའི་གསང་སྔགས་ཀྱི་ལུགས་ཉིད་གང་ཞེ་ན། ཕྱོགས་བཅུ་དུས་བཞིའི་སངས་རྒྱས་མ་ལུས་པ་ཀུན་འདུས་ནས་བཀའ་སྩལ་བར་མཛད་པའི་དོན་གྱི་སྙིང་པོ་རྟོགས་པར་དཀའ་བ་གསང་སྔགས་ཐེག་པ་ཆེན་པོའི་ལྟ་བའི་དགོངས་པ་དང་སྤྱོད་པ་གཏིང་དཔག་དཀའ་བས་འོག་མའི་ཡུལ་དུ་མ་གྱུར་པའི་ཟབ་མོ་དམ་པ་མཆོག་ཏུ་འཕགས་པའི་དོན་ནི་ཡོད་མེད་སོགས་ཀྱི་མཐའ་དང་བྲལ་ཞིང་བདེན་པ་གཉིས་ཀྱི་ཐ་སྙད་ལས་འདས་པར་རྒྱུ་རྐྱེན་མེད་པས་རང་བྱུང་གི་ཆོས་ཉིད་ཡུལ་མེད་དུ་གསལ་བས་རང་རིག་པའི་ཡེ་ཤེས་ཆེན་པོ་མངོན་སུམ་དུ་མ་འདྲེས་ཡོངས་རྫོགས་སུ་སྣང་སྟེ་མཐའ་གྲོལ་གཅིག་རྫོགས་ཀྱི་ངང་དུ་གྲོལ་བའི་དུས་ན། ཆོས་ཐམས་ཅད་ལྷུན་མཉམ་རྫོགས་པ་ཆེན་པོའི་རང་རིག་པའི་ཡེ་ཤེས་སུ་ལྷག་མ་མེད་པར་གསལ་བས་ན་དེ་ལ་༼༢༤༥༽མིང་དུ་རང་བྱུང་གི་ཡེ་ཤེས་དེ་ཁོ་ན་ཉིད་དེ་ཡང་དག་པར་མཐོང་བ་ཡིན་ནོ། །ཞེས་བྱ་སྟེ། ཀུན་བྱེད་ལས།

ཀྱེ་བྱ་མེད་ཡུལ་ནི་མི་གནས་ནམ་མཁའ་འདྲ། །མི་གནས་དམིགས་པའི་ཡུལ་མེད་མི་རྟོག་ཆོས་ཀྱི་ལམ། །བསྔོ་བའི་ཆ་ཤས་ཕྲ་མོའི་ཡུལ་ལ་བྱུང་བ་སྟེ། །རྟོག་སྒོམ་ཆོས་ཀྱི་སྐུ་ནི་ཁྱད་པར་དོན་མེད་པས། །རང་བྱུང་ཡེ་ཤེས་ཀུན་ཏུ་མི་རྟོག་ཇི་བཞིན་གནས། །བྱ་བྲལ་ཡུལ་ལ་མི་གནས་གཉེན་པོས་བཅོས་སུ་མེད། །ཅེས་སོ། །དེ་ལྟ་བུའི་ཡེ་ཤེས་ཆེན་པོ་དེ་ལ་དབྱེ་ན་ཡང་དག་པའི་དུག་ལྔའི་ལམ་གྱི་བདུད་རྩི་ཆེན་པོ་ལྔ་ཡོད་དེ། དེ་ཉིད་ལས། རང་བྱུང་ཡེ་ཤེས་རྣམ་པ་ལྔ་ལམ་ནི། །རང་བྱུང་རྒྱུ་རྐྱེན་མེད་པར་འབྱུང་བ་ཡིན། །ཡེ་ཤེས་འགག་པ་མེད་པར་གསལ་བ་ཡིན། །ལམ་ནི་རྒྱུ་རྐྱེན་མེད་པས་བགྲོད་མི་དགོས། །མི་བགྲོད་རང་བྱུང་ལྔ་ལ་ལམ་ལྔར་བཤད། །འདོད་པ་ཆོས་རྣམས་བདག་ཏུ་འདོད་པ་ཡིན། །ཆགས་པ་བདག་ཏུ་འདོད་པ་དེ་ལ་ཆགས། །ཞེ་བ་སྐྱེ་བ་མེད་པའི་རང་བཞིན་ལ། །སྡང་བ་ཆོ་འཕྲུལ་སྣ་ཚོགས་དེ་ལ་སྡང༌། །གཏི་མུག་མི་རྟོག་པ་ཡི་ཏིང་འཛིན་གྱིས། །ཆོས་ཉིད་མཉམ་པ་ཉིད་ལ་དབྱེ་བསལ་མེད། །ང་ནི་མ་ནོར་བ་ཡི་བྱང་ཆུབ་སེམས། །དེ་བཞིན་ཉིད་དུ་ཡེ་ནས་རྒྱལ་བར་བྱེད། །ཐམས་ཅད་དེ་བཞིན་ཉིད་དུ་གཅིག་པ་ལ། །ཡིན་མིན་སྒྲོ་སྐུར་འདེབས་ལ་ཕྲག་དོག་བྱེད། །བགྲོད་དུ་མེད་པའི་ལམ་ལྔ་བསྟན་པ་ཡིན། །ཞེས་སོ། །དེ་ལྟར་སྤྱི་དང་ཁྱད་པར་གྱི་ངེས་ཚིག་དེ་དང་ལྡན་པའི་རིག་པ་རང་བྱུང་གི་ཡེ་ཤེས་ནི་ཐེག་པ་གཞན་གྱི་ཡེ་ཤེས་ལས་མཆོག་ཏུ་འཕགས་པ་ཡིན་ཏེ། བང་མཛོད་འཕྲུལ་གྱི་ལྡེའུ་མིག་ལས། རང་བྱུང་རྒྱུ་རྐྱེན་མེད་པ་ཡིན། །ཡེ་ཤེས་སྒྲིབ་པ་མེད་པ་ཡིན། །རང་བྱུང་ཡེ་ཤེས་ཆེན་པོ་དེ། །རྒྱུ་རྐྱེན་གཞན་གྱིས་མ་བསྐྱེད་ཅིང༌། །རྩོལ་སྒྲུབ་དག་ལས་མི་འབྱུང་བས། །རང་བྱུང་གཞན་ལ་རག་མ་ལས། །ཡུལ་ལས་བྱུང་བའི་ཡེ་ཤེས་དེ། །ཡུལ་ལས་བྱུང་བས་རང་བྱུང་མིན། །ཡུལ་ལ་འཕེལ་འགྲིབ་ཡོད་པའི་ཕྱིར། །ཡེ་ཤེས་དེ་ཡང་གསལ་འགྲིབ་བཅས། །ཞེས་སོ། །དེ་ལྟ་བུའི་རང་བྱུང་ཆེན་པོའི་ཡེ་ཤེས་དེ་ནི་མ་འདྲེས་ཡོངས་སུ་རྫོགས་པ་ཉིད་དེ། སྔ་མ་ལས། མཁའ་ལ་གཟུགས་སོགས་མ་འདྲེས་པ། །ཆུ་ནང་ཕྱོགས་སུ་ཡོངས་སུ་རྫོགས། །འབྱུང་བ་རྣམ་བཞི་མ་འདྲེས་པ། །ནམ་མཁའི་ངང་དུ་ཡོངས་སུ་རྫོགས། །སྣ་ཚོགས་སྣལ་མ་མ་འདྲེས་པ། །ཟ་འོག་སྣམ་བུར་ཡོངས་སུ་རྫོགས། །ཚོན་རྩི་སྣ་ལྔ་མ་འདྲེས་པར། དཀྱིལ་འཁོར་ཆེན་པོར་༼༢༤༦༽ཡོངས་སུ་རྫོགས། །རིན་ཆེན་སྣ་ལྔ་མ་འདྲེས་པ། །མཆོག་རབ་རི་ལ་ཡོངས་སུ་རྫོགས། །ཆོས་ཅན་ཕྱོགས་ནས་མ་འདྲེས་པ། །ཆོས་ཉིད་ཕྱོགས་སུ་ཡོངས་སུ་རྫོགས། །བསམ་དབང་ཕྱོགས་ནས་མ་འདྲེས་པ། །དངོས་དབང་ཕྱོགས་སུ་ཡོངས་སུ་རྫོགས། །ཀུན་རྫོགས་ཕྱོགས་ནས་མ་འདྲེས་པ། །དོན་དམ་ཕྱོགས་སུ་ཡོངས་སུ་རྫོགས། །འཁྲུལ་རྟོག་ཕྱོགས་ནས་མ་འདྲེས་པ། །གཉིས་མེད་ཡེ་ཤེས་ཡོངས་སུ་རྫོགས། །བརྒྱད་ཀྱི་ལྟ་སྤྱོད་མ་འདྲེས་པ། །ཨ་ཏི་ཡོ་གར་ཡོངས་སུ་རྫོགས། །ཞེས་གསུངས་ཏེ་དཔེ་ཡི་མཚོན་པས་ཚིག་གི་ལྡེ་མིག་གིས་དོན་དམ་ངེས་པའི་གསང་སྒོ་ཕྱེ་བའོ། །དེ་ལྟ་བུའི་དོན་གྱི་ནོར་བུ་མཆོག་གི་ཡེ་ཤེས་རང་རིག་པའི་ངོ་བོ་ལྷག་མ་མེད་པར་ཕྱོགས་བྲལ་དུ་རྫོགས་པ་དེ་ཉིད་རྫོགས་པ་ཆེན་པོ་ཁོ་ན་མ་གཏོགས་ཐེག་པ་འོག་མས་རྟོགས་པ་མེད་དེ། དང་པོ་ལྷ་མིའི་ཐེག་པས་མི་རྟོགས་པའི་ཚུལ་ནི། དེ་ཉིད་ལས། མུན་པའི་འཁོར་སྒོ་ཕྱེ་བ་ནི། །ཉོན་མོངས་དུག་གསུམ་སྒོ་ཡིས་བཅད། །ཉོན་མོངས་དུག་གསུམ་སྒོ་ཕྱེ་བས། །ཀུན་གཞི་སེམས་ཀྱི་ཁང་བུ་ན། །རང་ལ་ཡོད་པའི་རིན་པོ་ཆེ། །གཟུང་འཛིན་རྣམ་རྟོག་མཚན་མས་སྦས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེ་བཞིན་དུ་མཚན་ཉིད་ཀྱི་ཐེག་པས་རྟོགས་པ་མེད་དེ། སྔ་མ་ལས། སྤྱོད་པའི་འདྲེན་སྒོ་ཕྱེ་བ་ནི། །མདོ་སྡེ་འདུལ་བ་མངོན་པ་གསུམ། །སྡེ་སྣོད་གསུམ་གྱི་སྒོ་ཡིས་བཅད། །སྡེ་སྣོད་གསུམ་གྱི་སྒོ་ཕྱེ་ནས། །ཆོས་སྤྱོད་དགེ་བའི་ལྡེ་མིག་གིས། །མཚན་ཉིད་ཐེག་པའི་སྒོ་ཕྱེ་སྟེ། །ལ་ལ་བདེན་བཞིའི་སྒོ་ནས་འཇུག །ལ་ལ་རྟེན་འབྲེལ་སྒོ་ནས་འཇུག །ལ་ལ་བདེན་གཉིས་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །ཕྲ་རགས་ཤེས་པའི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེར་མ་ཟད་སྔགས་ཕྱི་པ་གསུམ་གྱིས་ཀྱང་རྟོགས་པ་མེད་དེ།

དང་པོ་བྱ་རྒྱུད་ཀྱིས་མི་རྟོགས་པའི་ཚུལ་ནི། སྔ་མ་ལས། ཐབས་ཀྱི་སྦྱོར་བའི་སྒོ་ཕྱེ་བས། །དག་པ་གསུམ་གྱི་སྒོར་ཞུགས་ཏེ། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །གཟུང་འཛིན་ཕྲ་མོའི་རྟོག་པས་བསྒྲིབས། །༼༢༤༧༽ནོར་བུ་རིན་ཆེན་དེ་རུ་སྟོར། །ཞེས་སོ།།

གཉིས་པ་སྤྱོད་རྒྱུད་ཀྱིས་ཀྱང་མ་རྟོགས་ཏེ། དེ་ཉིད་ལས། ལྟ་སྤྱོད་གཉིས་ཀྱི་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །ཡེ་རྔམས་ཆོས་ཀྱི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ།།

གསུམ་པ་ཡོ་ག་པས་མ་རྟོགས་ཏེ། དེ་ཉིད་ལས། ཕྱག་རྒྱ་བཞི་ཡི་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །བླང་དོར་གཉིས་ཀྱི་རྟོག་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེར་མ་ཟད་མ་ཧཱ་ཡོ་གས་ཀྱང་ཡང་དག་པར་མ་རྟོགས་ཏེ། སྔ་མ་ལས། ཐབས་དང་ཤེས་རབ་སྒོ་ཕྱེ་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །རྩོལ་ཞིང་བསྒྲུབ་པའི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེར་མ་ཟད་ཨ་ནུ་ཡོ་གས་ཀྱང་ཇི་བཞིན་པར་མ་རྟོགས་ཏེ། སྔ་མ་ལས། དབྱིངས་དང་ཡེ་ཤེས་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །རྒྱུ་འབྲས་འདས་པའི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེ་བས་ན་ཐེག་པ་བརྒྱད་ཀྱིས་མ་རྟོགས་ཏེ། དེ་ཉིད་ལས། རིམ་པ་བརྒྱད་ཀྱི་ལྟ་བ་ཡིས། །རང་ལ་ཡོད་པའི་རིན་པོ་ཆེ། །རང་རང་ལྟ་སྤྱོད་རྩོལ་བས་བསྒྲིབས། །ནོར་བུ་རིན་ཆེན་མཐོང་བ་མེད། །ཞེས་སོ། །དེ་ལྟ་བུའི་རྟོགས་པར་དཀའ་བའི་གསང་བ་ཟབ་མོ་དབྱིངས་ཇི་བཞིན་པའི་ངོ་བོ་དེ་ཉིད་ཐེག་མཆོག་རྫོགས་པ་ཆེན་པོས་རང་རིག་རང་གྲོལ་དུ་རྟོགས་པ་ཡིན་ཏེ། སྔ་མ་ལས། ངེས་པའི་གསང་སྒོ་ཕྱེས་ནས་ནི། །གཉིས་མེད་ཡེ་ཤེས་སྒོར་ཞུགས་ཏེ། །རང་བྱུང་ཡེ་ཤེས་ཆེན་པོ་ཡིས། །མ་བཅོས་མཉམ་བཞག་མིག་གིས་བལྟས། །སྣང་མེད་སེམས་ཀྱི་དོན་མཐོང་བས། །མ་མཐོང་བ་ཡི་མཐོང་བའི་མིག །བརྒྱད་ཀྱིས་མ་མཐོང་རིན་པོ་ཆེ། །ཤིན་ཏུ་རྣལ་འབྱོར་མིག་གིས་མཐོང༌། །མཐོང་ཡང་དེ་ལ་ངོས་བཟུང་མེད། །ཞེས་སོ། །དེ་ལྟར་རྟོགས་པ་ནི་ཐེག་མཆོག་རྒྱལ་པོའི་ལྟ་བ་ནོར་འཁྲུལ་དང་བྲལ་བ་ཉིད་དེ། དེ་ཉིད་ལས། རྫོགས་པ་ཆེན་པོའི་ལྟ་བ་ནི། །མ་འདྲེས་ཡོངས་སུ་རྫོགས་པ་ཡིན། །ཀུན་བྲལ་ཅི་མ་སྤངས་པ་ཡིན། །རྒྱ་ཆད་ཕྱོགས་ལྷུང་མེད་པ་༼༢༤༨༽ཡིན། །ཡིན་ཚུལ་ངེས་པ་མེད་པ་ལ། །སྣང་ཚུལ་ཅིར་ཡང་སྣང་བ་ཡིན། །རང་བཞིན་གཅིག་ཏུ་མ་ངེས་པས། །ལྟ་བ་ངོས་གཟུང་མེད་པ་ཡིན། །ཞེས་སོ། །དེ་ལྟ་བུའི་དོན་གྱི་གནས་ལུགས་མཐོང་བ་ནི་མཐའ་བྲལ་ཡོངས་རྫོགས་ཀྱི་ལྟ་བ་མཚན་ཉིད་པ་ཡིན་པས། ཡོད་པའི་མཐའ་དང་བྲལ་བས་དངོས་པོའི་ཕྱོགས་སུ་མ་ལྷུང༌། མེད་པའི་མཐའ་དང་བྲལ་བས་སྟོང་པའི་ངོ་བོར་མི་འཛིན། གཉིས་ཀའི་མཐའ་དང་བྲལ་བས་རང་རྒྱུད་དུ་འཛིན་པ་གང་ཡང་མི་གནས། གཉིས་མེད་ཀྱི་མཐའ་དང་བྲལ་བས་ཕྱོགས་རིས་ཀྱིས་ངོས་གཟུང་ཕྲ་བའང་མེད་དོ། །དེ་བས་ན་སྟོང་པའི་མཐའ་དང་བྲལ་བས་ཡུལ་མེད་དུ་རང་གསལ་མི་སྟོང་པའི་མཐའ་དང་བྲལ་བས་བློ་དངོས་ཀྱི་ཆོས་ལས་འདས། གཉིས་ཀའི་མཐའ་དང་བྲལ་བས་གསལ་སྟོང་གང་དུ་ཡང་མི་རྟོག གཉིས་མེད་ཀྱི་མཐའ་དང་བྲལ་བས་དགག་སྒྲུབ་གང་ཡང་མེད་དེ། མཐའ་དང་བྲལ་བས་དུ་མ་མ་གྲུབ། ཡོངས་སུ་རྫོགས་པས་གཅིག་ཏུ་མ་ངེས་ཏེ་བརྗོད་བྲལ་བློ་ལས་འདས་པ་ཉིད་དོ། །འོ་ན་རྫོགས་ཆེན་མ་ཡིན་ཏེ་མཐའ་སྤོང་བར་འདུག་གོ་ཞེ་ན། ཡོད་པ་རྫོགས་པས་བརྩལ་དུ་མེད། མེད་པར་རྫོགས་པས་སྤང་དུ་མེད། གཉིས་ཀ་རྫོགས་པས་རྒྱ་གར་ཡང་མ་ཆད། གཉིས་མིན་རྫོགས་པས་ཕྱོགས་གང་དུའང་མ་ལྷུང་བར་མངོན་སུམ་དུ་རྟོགས་པས་འཁོར་བའི་ལམ་རྒྱུད་བཅད་པ་ཡིན་ཏེ། སྒྲ་ཐལ་འགྱུར་ལས། འཁོར་བའི་ལམ་རྒྱུད་གཅད་འདོད་ན། །བྱ་བ་བྲལ་བར་རྫོགས་པས་རྫོགས། །མཐའ་དང་བྲལ་བས་དབུས་མི་གནས། །ཡོངས་སུ་རྫོགས་པས་དངོས་དང་བྲལ། །ལྷག་མ་མེད་པས་ཆ་ཤས་མིན། །གཅིག་ཏུ་མ་ཡིན་གཉིས་མཐའ་ཟད། །དུ་མར་མི་སྣང་གཅིག་ལས་འདས། །བརྗོད་དུ་མེད་པས་ཚིག་གི་གཞི། །དངོས་བྲལ་སྟོང་པ་སྙིང་པོའི་དོན། །ཕྱོགས་སུ་མ་ལྟུང་ལྟ་བའི་དོན། །འདི་ཤེས་འཁོར་བའི་ལམ་འགག་གོ །ཞེས་དང༌། མཐའ་གྲོལ་འགག་པ་མེད་པ་ལས། །ཡོངས་སུ་༼༢༤༩༽རྫོགས་པས་ཏིང་འཛིན་གནས། །ཆེན་པོ་ཡིན་པས་གོང་ན་མེད། །རང་བཞིན་གཡོས་པ་མེད་ཕྱིར་རོ། །ཞེས་སོ། །ཚུལ་འདི་ལྟ་བུའི་དོན་ལ་གཞན་དྲིང་མི་འཇོག་པའི་ངེས་པ་རྙེད་པའི་ཚེ་ན། ཡེ་ཤེས་རྫོགས་པ་ལས། མཐའ་དབུས་མེད་པའི་གཞལ་ཡས་ན། །རང་འབར་ཡེ་ཤེས་རྫོགས་སངས་རྒྱས། །རང་བྱུང་རིག་པ་འཁོར་མཐའ་མེད། །ལྷུན་གྲུབ་ཕོ་བྲང་ཆེན་པོར་ནི། །སྤྱན་དྲངས་མ་ཡིན་ཡེ་སངས་རྒྱས། །ཞེས་དང༌། ཀུན་བཟང་འབར་བའི་ཡེ་ཤེས་ལ། །གཟུང་འཛིན་གཉེན་པོ་བརྟེན་མི་དགོས། །ཐོགས་མེད་རང་བྱུང་ཕྱོགས་དང་བྲལ། །བྱང་ཆུབ་རང་སེམས་ཁོ་ན་བས། །ལམ་གྱིས་མ་བཅོས་ཡེ་སངས་རྒྱས། །གང་སྣང་རིག་པ་ཅིར་རྟོག་ཀྱང༌། །རང་རིག་བདེ་ཆེན་མངོན་སུམ་གསལ། །འདོད་པའི་སྐབས་བྲལ་གང་མཐོང་ཚོར། །རང་གཞག་ཡེ་ཤེས་རྫོགས་པ་མཐོང༌། །ཞེས་གསུངས་པའི་དོན་ལ་ཡིད་ཆེས་ལྷག་པར་སྐྱེ་བར་འགྱུར་རོ། །དེ་བས་ན། སེམས་ཙམ་པས་མྱོང་བ་གཉིས་མེད་རང་གསལ་དང་ཨ་ནུ་མན་ཆད་ཀྱི་རང་རིག་པའི་ཡེ་ཤེས་ལས། རྫོགས་པ་ཆེན་པོའི་མ་འདྲེས་ཡོངས་རྫོགས་མཐའ་བྲལ་རང་གྲོལ་ཆེན་པོའི་རང་བྱུང་གི་ཡེ་ཤེས་ཕྱོགས་མེད་བདེ་བ་ཆེན་པོ་ཀུན་བྲལ་ཅི་མ་སྤང་བའི་རང་རིག་འོད་གསལ་སྙིང་པོ་ཉིད་ཁྱད་པར་དུ་འཕགས་པའི་ཆེ་བ་ཟབ་མོ་ལ་ངེས་པ་རྙེད་པའི་ཕྱིར་ཅུང་ཟད་བསྟན་པ་ཡིན་ནོ། །འོན་ཀྱང་དོན་གྱི་ངོ་བོ་རང་སྣང་གི་དེ་བཞིན་ཉིད་ལ་ལེགས་པར་བསམ་ན། སྙིང་པོ་དོན་གྱི་རྒྱུད་ལས། ལྟ་བ་རང་བྱུང་རྫོགས་པའི་ལུང༌། །མ་ལུས་ཀུན་འདུས་རྣམ་པར་དག །ཐིག་ལེ་གཅིག་ཏུ་ཀུན་རྫོགས་པས། །རང་བྱུང་སྙིང་པོ་གཅིག་ལ་རོལ། །གསང་བའི་ཐིག་ལེ་ཀུན་གྱི་དབྱིངས། །མུ་མཐའ་མེད་པར་རང་བཞིན་གནས། །ཐམས་ཅད་གསང་བ་རང་བྱུང་སེམས། །རང་རིག་མ་རིག་རྣམ་པར་དག །རྟོག་འགྱུས་རིག་པའི་འདུ་ཤེས་སྤངས། །རིག་༼༢༥༠༽པ་ཏིང་འཛིན་གཏེར་གྱི་ལུང༌། །རེ་དོགས་མེད་པའི་དབྱིངས་ལ་རོལ། །རང་རིག་ཡུལ་དབྱིངས་ལ་མི་གོས། །ཀུན་བཟང་སྟོང་ཉིད་མ་བཅོས་པས། །ཀུན་བཟང་ཐབས་ཀྱི་ཁྱད་པར་ཀུན། །མ་འདྲེས་གསལ་བར་རྫོགས་པའི་ཕྱིར། །མཁའ་ལ་གཟའ་སྐར་བཀྲམ་པ་འདྲ། །ཞེས་གསུངས་པ་ལྟར་ངེས་པས་མཆོག་ཏུ་རློམ་པའི་ཆོས་ནི་གང་ཡང་མེད་པར་ལ་བཟླའོ། །འོ་ན་ལྟ་བའི་དོན་དེ་ལྟར་ན་ཏིང་ངེ་འཛིན་ཇི་ལྟ་བུ་སྙམ་པ་ལ། དེ་ལྟར་བཤད་པའི་དགོངས་པ་དམ་པ་ཤེས་བརྗོད་ལས་འདས་པའི་དོན་ཉིད་ཇི་ལྟར་བར་རྟོགས་ཤིང་མཐོང་བའི་དུས་ཀྱི་ཚེ་ན། རྣམ་པར་རྟོག་པ་དང་གཟུང་འཛིན་གྱི་བག་ཆགས་མ་ལུས་པ་ཀུན་དུས་གཅིག་ཏུ་སངས་ཏེ་ཡེ་ཤེས་ཆེན་པོའི་ཀློང་དུ་རང་ཤར་བས་ན་དམིགས་པའི་མཐོང་ཡུལ་གཟུགས་སྒྲ་ལ་སོགས་པ་ཀུན་ལས་འདས་ནས་རང་གྲོལ་བར་གྱུར་པ་ཁོ་ན་སྟེ། དེའི་དོན་ལ་ཆེད་དུ་བྱ་བ་དང་ཕྱོགས་ཆར་གསལ་བ་ཅི་ཡང་མེད་པར་ངོ་བོ་གང་དུའང་སྣང་བ་མེད་དེ་བསམ་དཔྱོད་དང་དམིགས་པའི་སྒོ་ནས་འབྲས་བུའི་དོན་དུ་མི་བརྩལ་བར་གཡོ་བ་མེད་པར་གནས་པ་ཉིད་ནི། ཇི་བཞིན་པ་ཉིད་དུ་རྣལ་མར་ཕེབས་ཟིན་པས་ཐ་སྙད་དུ་མཉམ་པར་བཞག་པ་ཞེས་བྱ་བའོ། །དེ་སྐད་དུའང༌། རྫོགས་པ་ཆེན་པོ་ཡེ་ཤེས་བདུན་འབྱུང་གི་རྒྱུད་ལས། དུས་གསུམ་རྒྱལ་བའི་སྙིང་པོ་ནི། །རིག་པའི་ཡེ་ཤེས་རང་གསལ་ཡིན། །ཟབ་མོ་གསང་བའི་ངེས་དོན་ལ། །ཕྱོགས་དང་ཕྱོགས་མིན་ཆོས་མི་གནས། །རིག་པ་རང་གསལ་ཡེ་ཤེས་ཉིད། །སྦྱང་བ་མ་ཡིན་གདོད་ནས་གྲུབ། །གཉེན་པོས་མ་བཙལ་དེ་བཞིན་ཉིད། །མ་བཅོས་མི་གནས་རང་བཞག་པས། །ཇི་བཞིན་རང་བྱུང་གནས་པས་གསལ། །སྣང་སྲིད་འཁོར་དང་འདས་པ་ཀུན། །རང་བྱུང་རིག་པར་རང་གསལ་བས། །སྒྲོ་དང་སྐུར་བའི་ཆོས་མི་གནས། །ཞེས་དང༌། ས་ལེ་དམིགས་བྲལ་གཅིག་གི་ངང༌། །མི་སྤྱད་མི་འཛིན་བསམ་དུ་མེད། །མཐའ་ཡི་འདུ་ཤེས་རྒྱུ་བ་མེད། །བསམ་པས་སྒྲིབ་པས་དོན་མི་ཤེས། །གང་དུའང་མི་བསམ་མི་སྤྱད་དེ། །རང་བཞག་རིག་པ་ཉིད་ཀྱིས་གསལ། །ཉམས་མྱོང་བསམ་རྟོག་ཡུལ་ཞེས་བྲལ། །ཞེས་སོ།།

བཞི་པ་དེ་ཉིད་ཀྱི་དོན་དེ་མ་བཅོས་པར་སྒོམ་ཚུལ་ལ་༼༢༥༡༽གཉིས་ཏེ། གཉིས་མེད་རང་གསལ་དུ་བསྒོམ་དགོས་པར་བསྟན་པ། བློ་བཅོས་ནས་བསྒོམ་པའི་སྐྱོན་བཤད་པའོ། །དང་པོ་ནི།

དམིགས་པའི་ཡུལ་མེད། ཅེས་པ་ནས། དེ་ཉིད་ཚོགས་གཉིས་རྫོགས། །ཞེས་པའི་བར་གྱིས་བསྟན་ཏེ།

དམིགས་པའི་ཡུལ་མེད་ཆོས་ལམ་ཆགས་པ་སྤངས། །མཐོང་ཚོར་བདེ་ལམ་མུ་མེད་བདལ་བའི་དབྱིངས། །གང་འགྱུར་གང་སྣང་དེ་ལས་གར་མ་གཡོས། །དེ་ཡི་གཏན་ཚིགས་དེ་བཞིན་ཉིད་ཀྱིས་གསལ། །དེ་ཡི་དོན་ལ་ཀུན་འདུས་སྤྱོད་མི་མཛད། །ཆོས་ཀུན་རང་བྱུང་རང་རིག་ཡེ་ཤེས་སྣང་། །དེ་ཉིད་གདོད་ནས་མ་བྱུང་མ་སྐྱེས་ཏེ།།

རྒྱུ་དང་འབྲས་བུར་བཏགས་པ་ཡོང་ཡེ་མེད། །དེ་ལྟར་གང་རིག་དེ་ཉིད་ཚོགས་གཉིས་རྗོགས།།

དེ་ལྟར་རྟོགས་ནས་ཡང་དག་པར་སྒོམ་པ་དེའི་དུས་ན་དམིགས་པར་བྱ་བའི་ཡུལ་མེད་པར་རིག་པ་ཇི་བཞིན་པ་ཉིད་དུ་རང་སྣང་བ་ལ་ཆོས་ཉིད་ཡུལ་དུ་བྱེད་པའི་ལམ་གྱི་རྣམ་པར་སྣང་བའི་ཏིང་ངེ་འཛིན་གྱི་རོ་ལ་ཞེན་ཅིང་ཆགས་པ་ཡོངས་སུ་སྤངས་པས་འཛིན་མེད་རང་གྲོལ་དུ་གནས་པར་བྱའོ། །དེ་ལ་བློ་བཅོས་པའི་ཐབས་གང་ཞེ་ན། དེ་ལྟར་དོན་སྒོམ་པའི་ཚེ་ཐམས་ཅད་གཉིས་མེད་མཉམ་གྲོལ་དུ་ཤེས་པས་རྣམ་རྟོག་ཅི་སྐྱེས་དང་གཟུགས་མཐོང་སྒྲ་ཐོས་ལ་སོགས་པའི་བྱུང་ཚོར་ཇི་ལྟར་བྱུང་ཡང་། དེ་ཉིད་ཀུན་མཉམ་བདེ་བ་ཆེན་པོའི་དོན་དུ་རྟོགས་པའི་ལམ་མཆོག་ཉིད་དུ་རང་གསལ་བའི་ངོ་བོར་གྱུར་པས་སྤོང་དུ་མེད་པར་མུ་མེད་མཐའ་དབུས་ལས་གྲོལ་བས་རང་བྱུང་མཉམ་པ་ཉིད་དུ་གདལ་བའི་ཆོས་ཉིད་ཀྱི་དབྱིངས་སུ་གསལ་བ་ལས། འགྲེ་ལྡོག་དང་སྤྱིའུ་ཚུགས་ལ་སོགས་པ་གང་ལྟར་འགྱུར་ཞིང་གང་ལྟར་སྣང་བར་གྱུར་ཀྱང་སྙིང་པོ་དོན་གྱི་དབྱིངས་དེ་ལས་གར་ཡང་མ་གཡོས་པར་འབྱུང་བ་ལ་འབྱུང་རྒྱུ་མེད་དེ་ཚོགས་དྲུག་རང་གྲོལ་གྱི་དེ་ཁོ་ན་ཉིད་ལས་འཕོ་འགྱུར་མེད་པའོ། །དེ་ལྟར་རྣམ་རྟོག་སྤོང་དུ་མེད་པ་དེ་ཡི་གཏན་ཚིགས་ནི། ཆོས་ཐམས་ཅད་སེམས་ཉིད་མ་བཅོས་པའི་དེ་བཞིན་ཉིད་ཀྱི་ཆོས་ཉིད་ཡིན་པས་རང་བཞིན་གྱི་གཏན་ཚིགས་ཀྱིས་མངོན་པར་གསལ་ཞིང་ཡང་དག་པར་གྲུབ་པའོ། །དེ་བས་ཆོས་ཉིད་བྱང་ཆུབ་ཀྱི་སེམས་མ་ནོར་བར་རྟོགས་པ་དེ་ཡི་དོན་ལ་རྒྱལ་བའི་དགོངས་པ་མ་ལུས་པ་ཀུན་འདུས་པ་ཉིད་ཡིན་ཀྱང་གཞུང་ཆེན་པོ་འདིའི་ལུགས་ཀྱིས་དེ་ལའང་རིག་པའི་ཡུལ་དུ་རྟོག་ཅིང་དཔྱོད་པར་མི་མཛད་པས་མཉམ་ཉིད་རྫོགས་པ་ཆེན་པོའི་དོན་དུ་ངེས་པའོ། །དེ་ཅིའི་ཕྱིར་ཞེ་ན། འཁོར་འདས་ཀྱི་ཆོས་ཇི་སྙེད་པ་ཐམས་ཅད་ཀུན་ཀྱང་རྒྱུ་རྐྱེན་མེད་པར་རང་བྱུང་བས་རང་རིག་པའི་ཡེ་ཤེས་ཆེན་པོའི་ངོ་བོར་རང་གསལ་བར་སྣང་བ་ལ། རྒྱུ་རྐྱེན་མེད་པར་ཤར་བའི་རང་སྣང་དེ་ཉིད་ཀྱང་ངོ་བོ་ཡེ་གདོད་མ་ནས་འདི་འདྲར་མི་ཟིན་པས་མ་བྱུང་མ་སྐྱེས་པའི་ཆོས་ཀྱི་དབྱིངས་ཏེ། དེས་༼༢༥༢༽ན་དབྱིངས་ཉིད་རིག་པའི་ཡེ་ཤེས་ལ་ཡེ་ཤེས་ཉིད་ཀྱང་དབྱིངས་ཡིན་པས་དབྱེར་མེད་པ་ལ་ཡུལ་མེད་པའི་ཕྱིར་རོ། །དེ་བས་ན་འཁྲུལ་ངོ་ལ་རྒྱུ་འབྲས་སུ་སྣང་ཡང་། དོན་གྱི་ངོ་བོ་ལ་ད་ལྟ་རྒྱུ་ལ་འབད་པ་དང་། དེའི་འབྲས་བུ་ཕྱིས་སུ་སྣང་བའི་འཕོ་འགྱུར་དུ་བཏགས་པ་ཡོང་ཡེ་མེད་པར་རང་བཞིན་འདུས་མ་བྱས་པ་ཉིད་དེ། དེ་ལྟར་དབྱེར་མེད་པའི་དོན་མཆོག་ཟབ་མོ་གང་གིས་ཡང་དག་པར་རིག་ཅིང་ངེས་པར་རྟོགས་པ་དེ་ཉིད་ཀྱིས་ནི་ཚོགས་གཉིས་མ་བསགས་པར་དུས་གཅིག་ཏུ་རྫོགས་ཤིང་འབྲས་བུ་རྣམ་གཉིས་ལྷུན་གྱིས་གྲུབ་པར་དངོས་སུ་གྱུར་པ་སྟེ། ཀློང་རབ་འབྱམས་རྒྱལ་པོ་ལས། བསོད་ནམས་ཡེ་ཤེས་བྱང་ཆུབ་སེམས་ལ་རྫོགས། །སྤྱད་པས་མི་འཛད་མ་བསགས་བྲི་བ་མེད། །ཀློང་ཡངས་ནམ་མཁའ་རྒྱ་མཚོ་ལྟ་བུ་ཡི། །ཚོགས་ཆེན་རྣམ་གཉིས་རང་རིག་ངང་ལ་རྫོགས། །ཞེས་སོ། །དེ་ལྟར་དོན་ངེས་པར་མཐོང་ནས་སྒོམ་པས་ཉམས་སུ་ལེན་པའི་ཚུལ་རྒྱུད་དང་མན་ངག་རྣམས་ལས་ཤིན་ཏུ་མང་པོར་གསུངས་ཀྱང་། གནད་ཀྱི་ཡང་སྙིང་ཙམ་ནི། ཀུན་བྱེད་རྒྱལ་པོའི་སྤྱིའི་བཤད་རྒྱུད་རྒྱ་མཚོ་དང་མཉམ་པ་རྙོག་པ་མེད་པ་ལས། དང་པོ་ཞི་གནས་དུས་སུ་ནི། །དྲན་པ་ཤེས་བཞིན་རྩི་ཡིས་བཟུང་། །དཔེར་ན་གླང་ཆེན་ལྕགས་ཀྱུ་བཞིན། །མ་ཡེངས་དྲན་པས་རང་སར་གྲོལ། །གཉིས་པ་མཉམ་བཞག་དུས་སུ་ནི། །ཤེས་བྱ་ཆོས་ཉིད་བུམ་པར་གཞུག །གསེར་བུམ་ཏིལ་གྱི་སྒྲོན་མ་བཞིན། །འགྱུར་མེད་རིག་པ་ནང་ན་གསལ། །གསུམ་པ་རྗེས་ཐོབ་དུས་སུ་ནི། །དབང་པོ་མི་དགག་རང་ཡན་བཞག །གསེར་གླིང་བརྡལ་བའི་ཀླུང་ཆེན་བཞིན། །གང་བལྟས་རྫོགས་པ་ཆེན་པོའི་ཀློང་། །ཐ་མ་ལྷག་མཐོང་དུས་སུ་ནི། །མཚན་མ་རང་གྲོལ་བློས་50མ་རེག །དུག་སྦྲུལ་འབར་བའི་མདུད་པ་བཞིན། །རྩོལ་སྒྲུབ་མེད་པར་རང་སར་གྲོལ། །ཞེས་གསུངས་པ་ལྟར་ངེས་ནས་བརྩོན་པར་བྱའོ།།

གཉིས་པ་བློ་བཅོས་ནས་བསྒོམ་པའི་སྐྱོན་བཤད་པ་ནི།

དོན་ལ་མཉམ་བཞག ཅེས་པ་ནས། དོན་དང་འཕྲད་མི་འགྱུར། །ཞེས་པའི་བར་གྱིས་བསྟན་ཏེ།

དོན་ལ་མཉམ་བཞག་བློ་བཅོས་སྐྱོན་ཉིད་ནི། །དེ་དང་འགལ་ཞིང་དེ་དང་ཕྲད་མི་འགྱུར།།

འོ་ན་བྱུང་ཚོར་གང་ཡང་མི་བཅོས་སམ་ཞེ་ན། བློས་ཆོས་ཉིད་ཀྱི་དོན་ཕྱོགས་གཅིག་ཏུ་གྱུར་པ་ལ་དམིགས་ཏེ་མཉམ་པར་བཞག་ནས་བྱུང་ཚོར་གྱི་བློ་ཐམས་ཅད་གཉིས་ཅན་༼༢༥༣༽དུ་མཐོང་སྟེ་བཅོས་པར་བྱས་ནས་སྒོམ་པའི་སྐྱོན་ཉིད་ནི། ད་དུང་གཉིས་སུ་མཐོང་བ་དང་མ་བྲལ་བས་གསང་སྔགས་ཐེག་པ་ཆེན་པོ་འདིའི་གཞུང་གི་གསང་བ་གཉིས་མེད་མཉམ་ཉིད་རང་གྲོལ་དེ་དང་འགལ་ཞིང་། བསམ་རྟོག་གི་འཛིན་པ་དེའི་སྐྱོན་གྱིས་དོན་གྱི་ཆོས་ཉིད་དངོས་དང་འཕྲད་དེ་ཡང་དག་པར་རྟོགས་པར་ཡང་མི་འགྱུར་ཏེ། ཡེ་ཤེས་བདུན་འབྱུང་གི་རྒྱུད་ལས། །རང་བཞག་རིག་པའི་རྒྱུད་ཚིག་གིས། །ཇི་བཞིན་མ་བཅོས་ངོ་བོ་ལ། །བརྗོད་བྲལ་རང་བཞག་དགོངས་པ་ཡིན། །རང་བྱུང་དབྱིངས་ལས་གསལ་བར་བྱེད། །མ་བཅོས་གསང་བའི་དགོངས་པ་ལ། །བཅོས་མའི་རྣལ་འབྱོར་ལོག་པའི་ལམ། །མཚན་བྲལ་བཅོས་མེད་སྙིང་པོ་ལ། །འཛིན་པའི་རྣམ་རྟོག་ལོག་པའི་ལུང་། །གང་དག་རང་འདོད་ཕྱོགས་ཆ་ཡིས། །འཛིན་པ་སོ་སོར་མཐོང་བ་ཡིས། །ཕྱོགས་བྲལ་ཡེ་ཤེས་ཆེན་པོ་ལ། །བཙལ་ཞིང་སྤྱད་པས་དོན་མི་མཐོང་། །ཅིར་སྣང་གཅིག་གི་ངོ་བོ་ལ། །ཡེངས་པ་མེད་པས་ཀུན་ཏུ་གསལ། །ཉམས་མྱོང་བརྗོད་བྲལ་གསལ་འཛིན་མེད། །འདི་ལ་ཕྱོགས་རིས་གདོད་ནས་མེད། །ཅེས་དང་། རྒྱ་མཚོ་དང་མཉམ་པ་རྙོག་པ་མེད་པའི་རྒྱུད་ལས། རྫོགས་ཆེན་རིས་མེད་ཆོས་ཆེན་པོ། །ཐོད་རྒལ་བློ་ཡི་བདུད་རྩི་འདི། །སྐལ་མེད་རྨོངས་པའི་བདུད་དུ་འགྱུར། །དཔེར་ན་དུག་གི་རང་བཞིན་ལ། །རྨ་བྱ་དག་ལ་རྒྱན་གྱིས་མཛེས། །གཞན་རྣམས་ལ་ནི་དུག་གིས་འཇིག །ཐམས་ཅད་རྫོགས་པའི་བདེ་ཆེན་པོ། །སྐྱེ་འགག་མེད་པར་ལྷུན་གྱིས་གྲུབ། །ཁྱབ་གདལ་མ་བཅོས་ཡེ་སངས་རྒྱས། །སྤྲོས་བྲལ་གཉིས་མེད་ཁོ་ནའོ། །ཞེས་སོགས་མང་ངོ་།།

ལྔ་པ་བསྒོམ་པའི་ཡོན་ཏན་ལྷུན་རྫོགས་སུ་བསྟན་པ་ལ་གཉིས་ཏེ། ཡོན་ཏན་ལྷུན་གྱིས་གྲུབ་ཚུལ་བཤད་པ། དྲོད་རྟགས་རྫོགས་ཤིང་ཐེ་ཚོམ་དང་བྲལ་བར་བསྟན་པའོ། །དང་པོ་ནི།

དེ་ལ་ངེས་བློ། ཞེས་པ་ནས། རྒྱུ་འབྲས་ལྷུན་གྱིས་གྲུབ། །ཞེས་པའི་བར་གྱིས་བསྟན་ཏེ།

དེ་ལ་ངེས་བློ་ཁྱད་པར་བཏང་བ་ནི། །དེ་དང་མི་འགལ་དེ་ཉིད་ངེས་པ་སྟེ།།

རང་རིག་དུས་ན་དེ་ལ་གཉིས་སུ་མེད། །སྙིང་པོ་དེ་ཉིད་རྒྱུ་འབྲས་ལྷུན་གྱིས་གྲུབ།།

འོ་ན་དོན་མ་ནོར་བ་དངོས་གང་ཡིན་ཞེ་ན། དེ་ལྟར་གཉིས་སུ་མེད་པའི་དོན་དེ་ལ་ཡང་དག་པར་ངེས་པའི་བློ་གྲོས་ཀྱིས་འཛིན་པ་མེད་པར་རིག་པ་རང་གསལ་དུ་རྟོགས་པ་ཉིད་གདེངས་དང་ལྡན་པར་གྱུར་པས་དེ་ཉིད་གདལ་ཁྱབ་ཆེན་པོའི་ངང་དུ་ཕྱོགས་རིས་མེད་པར་བཏང་ནས་དམིགས་བཅོས་ཀྱིས་རྩོལ་བ་གང་ཡང་མེད་པ་ནི། ༼༢༥༤༽གཉིས་མེད་མཉམ་པ་ཉིད་ཀྱི་དོན་དེ་དང་མི་འགལ་བས་མི་མཐུན་པ་མེད་ཅིང་སེམས་ཀྱི་རང་བཞིན་ཡེ་ནས་དག་པ་དེ་ཉིད་མ་ནོར་བར་ངེས་པ་སྟེ། དེས་ན་རང་རིག་པའི་ཡེ་ཤེས་དེ་ཉིད་ཇི་ལྟ་བར་རྟོགས་ཏེ་རང་གསལ་དུ་གདལ་བའི་དུས་ན་དེ་ལ་གཉིས་པའི་ཆོས་གང་ཡང་མ་དམིགས་པས་ཡེ་ནས་གཉིས་སུ་མེད་པའི་རང་གྲོལ་ཆེན་པོ་ཡིན་ཏེ། སྙིང་པོ་བྱང་ཆུབ་དེ་ཉིད་ཆོས་ཀུན་གྱི་བཅུད་དུ་གྱུར་པས་རྒྱུ་ལམ་དང་འབྲས་བུ་སངས་རྒྱས་ཀྱི་ཆོས་ཐམས་ཅད་འདུས་ཤིང་གཉིས་སུ་མེད་པར་ལྷུན་གྱིས་གྲུབ་པ་ཡིན་པའི་ཕྱིར། ཁམས་གསུམ་སྒྲོན་མ་རྐྱེན་དང་བྲལ། །མ་རིག་མུན་སེལ་བློས་མ་རེག །གཞན་ནས་བཙལ་བས་རྙེད་མི་འགྱུར། །ཐིག་ལེ་བརྡལ་བའི་རང་བྱུང་བདེ། །རིག་པ་རང་ཤར་བཅོས་སུ་མེད། །ལྷུན་གྲུབ་བཙལ་དུ་གདོད་ནས་མེད། །སྙིང་པོའི་སྙིང་པོ་གཉིས་མེད་མཆོག །ཡེ་ནས་ཐ་སྙད་ཀུན་དང་བྲལ། །ཇི་བཞིན་གསལ་ལ་རྟོག་མེད་དེ། །དོན་དམ་སྤྲོས་མེད་ཡང་དག་དབྱིངས། །བཙལ་དུ་མེད་པས་སྒོམ་ཚིག་འདས། །ཇི་བཞིན་ཀློང་དུ་གྱུར་པས་ན། །རྣམ་དག་དོན་ལ་མཁས་པ་ཡིན། །གདོད་ནས་མ་སྐྱེས་བརྡལ་བའི་ཀློང་། །དོན་དམ་རྟོགས་པས་ཆོས་ཀྱི་སྐུ། །ལོངས་སྤྱོད་བདེ་ཆེན་རྒྱལ་པོའི་སྐུ། །ཡེ་ཤེས་རོལ་པ་སྤྲུལ་པའི་སྐུ། །ཐུགས་རྗེ་བྱང་ཆུབ་སེམས་དཔའི་ལམ། །མ་གཡོས་རྟོག་མེད་ཆོས་ཀྱི་ལམ། །རང་བཞིན་གནས་པས་བདེ་བའི་ཀློང་། །ཁམས་གསུམ་གསལ་བྱེད་སྒྲོན་མའི་མཆོག །བདེ་ཆེན་རང་བྱུང་ཐུགས་རྗེར་གསལ། །རིན་ཆེན་སྒྲོན་མས་ཐུགས་རྗེ་རྫོགས། །ཞེས་ཀུན་བྱེད་རྒྱལ་པོའི་སྤྱིའི་བཤད་རྒྱུད་རིན་པོ་ཆེ་དང་མཉམ་པ་སྐྱེ་བ་མེད་པའི་རྒྱུད་ལས་གསུངས་སོ། །དེ་བས་ན་ཐེག་མཆོག་རྫོགས་པ་ཆེན་པོའི་དགོངས་པ་ཐུན་མོང་མ་ཡིན་པའི་རང་རིག་གཉིས་མེད་བདེ་བ་ཆེན་པོ་རྩོལ་མེད་བྱ་བ་དང་བྲལ་བའི་རང་བྱུང་གི་ཡེ་ཤེས་ཇི་ལྟ་བ་བཞིན་ངེས་པ་ཤིན་ཏུ་གཅེས་པས་འདིར་ཡང་ཅུང་ཟད་བརྗོད་ན། འཇིག་རྟེན་ཕལ་པ་དང་མུ་སྟེགས་རྟག་ལྟ་བ་དང་། ཉན་རང་དང་སེམས་ཙམ་པ་རྣམས་ཀྱིས་ཡོད་པར་འདོད་ལ། མུ་སྟེགས་ཆད་སྨྲ་སྡེ་གསུམ་གྱིས་མེད་པར་འདོད་ཅིང་། དབུ་མ་དང་སྔགས་ཕྱི་པ་གསུམ་གྱིས་གཉིས་ཀར་འདོད་ལ། གསང་སྔགས་ནང་པ་གཉིས་ཀྱིས་གཉིས་མེད་དུ་བཞེད་པ་ལས། ༼༢༥༥༽འདིར་ཞེན་པ་དགྲོལ་ཕྱིར་བསྟན་པ་མ་གཏོགས་དོན་ལ་མཐའ་བཞི་མ་སྤངས་བྲལ་ཏེ་རང་སར་གྲོལ་བས་མཐའ་སྣང་ཆོས་ཉིད་དུ་རྫོགས་པའི་རང་རིག་བདེ་བ་ཆེན་པོ་ཡིན་པས་ཁྱད་པར་མཆོག་ཏུ་འཕགས་པའི་གནད་ཟིན་པར་བྱ་སྟེ། བཀྲ་ཤིས་རིག་པ་ཁུ་བྱུག་གི་རྒྱུད་ལས། ཡང་དག་དབྱིངས་ལ་མཉམ་སྦྱར་བས། །ཆོས་རྣམས་ངོ་བོ་ཉིད་ཀྱི་ཞིང་། །མི་སྐྱེ་མི་འགག་མི་དགོངས་ཕྱིར། །དེ་ལ་རྟག་ཆད་མཐར་མི་ཆགས། །ཡེ་ཤེས་རིག་པས་དོན་རིག་པས། །ཉམས་སུ་བླང་མེད་རང་རིག་ཉིད། །ཡེ་ཤེས་རང་རིག་འདི་འདྲ་ཞེས། །རྡོ་རྗེ་སེམས་དཔས་བསྟན་དུ་མེད། །ཀུན་རྫོབ་བརྗོད་ཡོད་མ་གཏོགས་པ། །ཡང་དག་བདེན་པ་ཉིད་དུ་ནི། །འཁོར་བ་མྱ་ངན་འདས་པའི་ཆོས། །རང་བཞིན་མེད་པས་ཡེ་ནས་ཞི། །གཅིག་ལས་དུ་མ་མེད་པར་གྱུར། །གཅིག་ལས་མཉམ་ཉིད་ཕྱོགས་བྲལ་བས། །དེ་དག་རང་བཞིན་མི་དམིགས་ཕྱིར། །ཐམས་ཅད་དེ་བཞིན་ཉིད་དུ་བཞག །རང་བྱུང་རང་ཞི་མཉམ་བཞག་པས། །མཚན་མའི་འགོག་པར་ལྟུང་མི་སྲིད། །དེ་ལྟར་དོན་ལ་རེག་གྱུར་ན། །ཅི་ལ་གནས་ཤིང་གང་ལ་ཆགས། །གང་ཞིག་འགོག་ཅིང་ཅི་ཞིག་བླང་། །མ་སྤངས་ལྷུན་གྲུབ་ཀུན་ཏུ་བཟང་། །སྐུ་གསུམ་ལྡན་པས་ཕོ་བྲང་མཆོག །ཅེས་དང་། ཀློང་རབ་འབྱམས་ལས། གསང་བའི་མདུད་འགྲོལ་འདི་ལྟ་སྟེ། །མཐའ་ལ་སྐྱོན་དུ་མི་ལྟ་བས། །འཆིང་དང་གྲོལ་བར་མི་བྱེད་དེ། །མཐའ་གཉིས་མ་སྤངས་རང་གྲོལ་བས། །གཉིས་མེད་ཙམ་དུ་མི་གནས་ཤིང་། །གཉིས་ཀ་ལྟར་ཡང་རང་ཤར་བས། །མཐའ་བཞི་རྒྱ་ཡན་ནམ་མཁའི་ཀློང་། །འཆིང་གྲོལ་གཉིས་མེད་རང་སར་བདེ། །ཞེས་དང་། སྒྲ་ཐལ་འགྱུར་ལས། རང་བཞིན་རྫོགས་པ་ཆེན་པོའི་མཐའ། །ཆོས་རྣམས་རང་སར་བཞག་པ་སྟེ། །སྣང་ཤེས་ཆོས་ཉིད་ཟུང་འཇུག་པས། །ཡེ་གྲོལ་ཅོག་བཞག་ཉིད་ལ་ཐུག །དགོངས་པ་བློ་ལས་འདས་པ་དང་། །མཚན་བཅས་རང་སར་དག་པ་དང་། །སྟོང་དང་དངོས་པོའི་མཐའ་གྲོལ་དང་། །འགྱུ་ཟད་རྟོག་པ་མེད་པ་དང་། །བློ་ཟད་ཡིད་ལས་འདས་པའོ། །ཞེས་སོགས་མང་ངོ་། །འདི་ལྟ་བུའི་རང་རིག་བདེ་བ་ཆེན་པོ་ཇི་བཞིན་པའི་དོན་འདི་ལ། ༼༢༥༦༽ཇི་ལྟར་བསྟན་ཀྱང་ངོ་བོ་འདྲ་བ་ལས་དམ་པ་རྣམས་ཀྱི་བཞེད་པའི་ཁྱད་པར་ཅུང་ཟད་བསྟན་ན། ཡང་སྤྲུལ་དགའ་རབ་རྡོ་རྗེས་རང་རིག་ལྷུན་གྲུབ་ཆེན་པོར་བཞེད། ཨོ་རྒྱན་མ་ཧཱ་རཱ་ཛ་དང་བི་མ་ལ་མི་ཏྲ་སོགས་ཀྱིས་གཟའ་གཏད་དང་བྲལ་བར་བཞེད། དགེ་སློང་མ་ཀུན་དགའ་སོགས་ཀྱིས་རང་བྱུང་གི་ཡེ་ཤེས་སུ་བཞེད། སངས་རྒྱས་གསང་བ་སོགས་ཀྱིས་བྱ་བརྩལ་དང་བྲལ་བར་བཞེད། ཀུ་ཀུ་རཱ་ཛ་དང་ཤྲི་སིངྷ་སོགས་ཀྱིས་བདེ་བ་ཆེན་པོར་བཞེད། འཇམ་དཔལ་བཤེས་གཉེན་གྱིས་གཉིས་སུ་མེད་པར་བཞེད། སྲས་ཐུ་བོ་རཱ་ཛ་ཧསྟིས་ཐིག་ལེ་ཆེན་པོར་བཞེད། ལོ་ཙཱ་བ་ཆེན་པོ་བཻ་རོ་ཙ་ན་སོགས་ཀྱིས་བདག་ཉིད་ཆེན་པོར་བཞེད། ཡང་གསང་བདག་དགའ་རབ་དཔའ་བོས་སྤྱིར་གོང་མ་རྣམས་ཀྱང་གསལ་བར་སྟོན་མོད། ཁྱད་པར་དུའང་རྗེ་དེ་དང་། རྒྱལ་པོ་དྷ་ཧེ་ཏ་ལོ་དང་། གནུབས་སངས་རྒྱས་རིན་པོ་ཆེ་སོགས་ཀྱིས་མཐའ་རིལ་མ་སྤངས་བྲལ་བའི་རིང་ལུགས་ཆེན་པོ་ཇི་བཞིན་པ་ཉིད་དུ་བཞེད་དོ། །རྒྱས་པར་བསམ་གཏན་མིག་གི་སྒྲོན་མ་ལས་ཤེས་པ་བྱའོ། །དེ་བཞིན་དུ་བླ་མ་སྔ་མ་རྣམས་ཀྱིས་ཀ་དག་ཏུ་བཞེད་ཅིང་ལྷ་རྗེ་ཟུར་ཆུང་པས་ལྷུན་གྲུབ་ཏུ་བཞེད་པ་དང་། ཀུན་མཁྱེན་དམ་པ་རིན་པོ་ཆེས། མ་འདྲེས་ཡོངས་རྫོགས་ལྷུན་གྲུབ་ཆེན་པོར་བཞེད་དེ། དེའི་དོན་མ་འདྲེས་ལྷུན་གྲུབ་གསུམ་གྱི་དོན་དང་ཡོངས་རྫོགས་དབྱེར་མེད་མཉམ་གྲོལ་དུ་བཞེད་པ་ཡིན་ཏེ། ལྷུན་གྲུབ་གསུམ་ནི་རང་བཞིན་སྤྲོས་བྲལ་ལྷུན་གྲུབ། རྣམ་པ་སྒྱུ་མ་ལྷུན་གྲུབ། མཚན་ཉིད་རང་རིག་ལྷུན་གྲུབ་གསུམ་སྟེ། ཡེ་ཤེས་གསང་བ་ལས། སེམས་དཔའ་རྡོ་རྗེ་ད་ཉོན་ཅིག །ཡེ་ཤེས་གསང་བའི་རང་བཞིན་ནི། །སངས་རྒྱས་སེམས་ཅན་གཉིས་སུ་མེད། །ནམ་མཁའ་བཞིན་དུ་ཀུན་ལ་ཁྱབ། །མ་རིག་ཡེ་ཤེས་ཐ་དད་མེད། །མ་རྟོགས་རྟོགས་པ་ལམ་དུ་གཅིག །ཡེ་ཤེས་གསང་བའི་མཚན་ཉིད་ནི། །རང་རིག་འོད་གསལ་རྣམ་པར་དག །རྣམ་རྟོག་ཡེ་ཤེས་ཉིད་དུ་གནས། །གཞི་བཞག་རང་ལུགས་རིན་ཆེན་མཛོད། །རང་བྱུང་མ་བརྩལ་གདོད་ནས་གནས། །ཡེ་ཤེས་གསང་བའི་རྣམ་པ་ནི། །སྣ་ཚོགས་སྣང་ལ་ངོས་བཟུང་མེད། །མི་དམིགས་སྒྱུ་མ་ལྷུན་གྲུབ་ནི། །༼༢༥༧༽རྟག་པར་གསལ་ན་ལྟ་བ་ཡིན། །ཞེས་གསུངས་པ་དང་། ཡོངས་རྫོགས་དབྱེར་མེད་མཉམ་གྲོལ་ནི། །རྡོ་རྗེ་སེམས་དཔའ་ནམ་མཁའ་ཆེ་ལས། གཅིག་སྟེ་རྣམ་པ་ཡོངས་ཀྱིས་མེད། །རྣལ་འབྱོར་ནམ་མཁའི་བྱ་ལམ་གནས། །མ་བྱུང་མ་སྐྱེས་སྙིང་པོ་ལ། །སྒྲོ་བཏགས་ཆོས་ཀུན་ག་ལ་ཡོད། །ཅེས་གསུངས་པ་ལྟར་ཏེ། ཞིབ་པར་སེམས་ཕྱོགས་རྫོགས་པ་ཆེན་པོའི་དགོངས་པ་ལྟར་སྟོན་ཀྱང་མན་ངག་གི་གནད་ཐུན་མོང་མ་ཡིན་པར་འཆད་པས་དོན་དངོས་ནི་རིན་པོ་ཆེ་གཏེར་གཏད་པ་ཉིད་དང་གནད་མཐུན་པའོ། །རྒྱལ་བའི་དབང་པོ་ཀུན་མཁྱེན་ཀློང་ཆེན་རབ་འབྱམས་ཀྱིས་ནི། ཀ་དག་དང་ལྷུན་གྲུབ་དབྱེར་མེད་པའི་རང་རིག་ཐུགས་རྗེ་ཀུན་ཁྱབ་ཏུ་བཞེད་དེ། སྒྲ་ཐལ་འགྱུར་ལས། གཞན་ཡང་ཆོས་ཉིད་ངོ་བོ་ནི། །རང་བཞིན་ཉིད་ལས་ངོ་བོར་གྲུབ། །སྣང་ཚུལ་གཅིག་ཏུ་མ་ངེས་པས། །འཇུག་པའི་ལམ་ཡང་ཐ་དད་དོ། །ངོ་དང་ཤེས་དང་གྲོལ་མཐོང་གིས། །འཇུག་དང་མཐོང་དང་གོམས་པ་ལས། །ངོ་ཤེས་པ་ལས་རང་ངོ་སྟེ། །ཡིད་ཆེས་པ་ཡིས་ཐུག་སའོ། །ཐག་ཆོད་པས་ནི་གདེང་དུ་ཚུད། །དེ་ལྟར་གསུམ་གྱི་ངེས་པ་ལས། །ངོ་བོ་རྫོགས་པས་རྒྱུ་འགགས་སོ། །གཞན་ཡང་ཆོས་ཉིད་རང་བཞིན་བཤད། །འདི་འདྲ་གཅིག་ཏུ་མ་ངེས་པས། །གང་ལྟར་བཏགས་པ་དེ་ལྟར་སྣང་། །སྣ་ཚོགས་མིིང་གི་གདགས་གཞི་ལས། །སྒྲ་ཚིག་དུ་མས་སྤྲོས་པར་སྣང་། །ངེས་མེད་མིང་ནི་སྣ་ཚོགས་ལས། །དོན་ཡང་བཏགས་པ་ཙམ་གྱིས་སྟོང་། །སྟོང་ཉིད་གང་ཡང་མ་གྲུབ་པས། །རང་བཞིན་དག་པ་ལྟར་སྣང་ངོ་། །གཞན་ཡང་ཆོས་ཉིད་ཐུགས་རྗེ་བཤད། །གདུལ་བྱའི་ཡུལ་ནི་སྣ་ཚོགས་པས། །འདུལ་བྱེད་སྐུ་ཡང་དེ་བཞིན་ནོ། །རིགས་དང་དབང་པོའི་རྣམ་འཕྲུལ་ལས། །འཁོར་འདས་རྟོག་པ་ཐ་དད་དེ། །དེ་ཉིད་སོ་སོའི་ཡུལ་བཞག་ན། །མ་བཅོས་དོན་གྱི་དགོངས་པའོ། །ཞེས་གསུངས་པ་ལྟར། ངོ་བོ་དང་། རང་བཞིན་དང་། ཐུགས་རྗེ་གསུམ་གྱི་གནད་གསུམ་ལས། ངོ་བོའི་གནད་ནི་རང་ཐོག་ཏུ་ངོ་ཤེས། ཡིན་ཐོག་ཏུ་ཐག་ཆོད། གྲོལ་ཐོག་ཏུ་གདེངས་བཅའ་བ་གསུམ་ལས། དང་པོ་ནི། རང་བཞིན་འོད་དུ་སྣང་ཡང་། ངོ་བོ་རིག་གདངས་གཅིག་ལས་མ་འདས་པས་ངང་གི་རིག་པ་སྟོང་གསལ་ཟང་ཀ་དེ་ཀ་དག་གི་རང་ངོ་ཡིན་པར་ཐག་བཅད་པ་ནི་མཐར་ཐུག་གི་གྲོལ་ས་ཅེར་མཐོང་དུ་ངོ་སྤྲོད་པའོ། །༼༢༥༨༽གཉིས་པ་ནི། དེའི་ངང་དེར་བཏང་བཞག་མེད་པར་རང་བཞིན་གྱི་བསམ་གཏན་དུ་ཐག་རྦད་ཀྱིས་བཅད་ལ་མ་ཡེངས་ལ་མི་འཛིན་པས་བསྒོམ་པའོ། །གསུམ་པ་ནི། དེའི་ཚེ་བསྒོམ་བྱ་སྒོམ་བྱེད་ལས་འདས་པའི་རིག་པ་ཟང་ཐལ་དུ་ཤར་ཞིང་གྲོལ་བས་བཟང་ངན་གྱི་རྟོག་ཚོགས་མ་སྤངས་པར་རང་གྲོལ་བའི་གདེང་ལ་ཡིད་ཆེས་ཤིང་ལ་ཟློས་པར་བྱེད་པ་སྟེ། གནད་གལ་པོ་ཆེའི་ཆིངས་གཅིག་ཐལ་ལོ། །རང་བཞིན་གྱི་གནད་ལ། སྣ་ཚོགས་སུ་སྣང་ཡང་སྣང་ངོ་ལས་དོན་རང་གསལ་རྗེན་པའི་ཡེ་ཤེས་གཅིག་ཏུ་འུབས་ཆུབ་པར་བསྡུས་ཏེ་རང་གསལ་རང་བྱུང་གི་ཡེ་ཤེས་སུ་ལ་བཟླས་ནས་བསྒོམས་པས་དེའི་འཛིན་པ་ཡང་གྲོལ་ལས་གཞན་ཡང་མེད་པ་ནི་འོད་སྣང་ཆོས་ཉིད་དུ་གྲོལ་བའི་གདམས་པ་སྟེ། ཕར་ལ་བལྟས་པས་ཚུར་ལ་གསལ་བའི་རིག་པ་སྐད་ཅིག་རྗེན་པར་བུད་པའི་ངོ་བོ་སྤྲད་པ་སྟེ། སྣང་བ་ལ་བལྟས་ན་མཐའ་ཡས་ཀྱང་། རིག་པ་ལ་བལྟས་ན་གཅིག་ཀྱང་མེད་པར་ཟང་མར་རང་ཤར་བས། གྲོལ་ས་བར་གྱིས་བཏབ་པའི་མན་ངག་གནད་གལ་པོ་ཆེའི་ཆིངས་གཉིས་ཐལ་ལོ། །ཐུགས་རྗེའི་གནད་ནི། ཕྱིའི་གདུལ་ཡུལ་སྣ་ཚོགས་པའི་རྐྱེན་རེ་ལ་ནང་གི་གདུལ་བྱེད་དམ་འཆར་བའི་རིག་པ་དུ་མ་འཕྲོ་དུས་ཕྱིར་འཕྲོ་བའི་རྗེས་མི་བཅད། རང་ངོ་མི་བརྟག ནང་དུ་མི་དགག་པར་གང་ཤར་དེ་ཀའི་ཐད་དེར་ཅོག་གིས་བཞག་ལ། བར་མེད་ཀྱི་ཤེས་པ་རྗེན་པར་ཟང་ངེ་ཐལ་ལེ་བ་དེ་ངོས་བཟུང་བས་གྲོལ་ས་ཅེར་མཐོང་དུ་ཟིན་ཏེ་ཤར་གྲོལ་རང་ཡལ་གྱི་རིག་པ་ཧར་སངས་བར་མེད་རྗེན་པར་ཟང་ཐལ་བ་དེ་ཀ་འདི་དང་བར་དོའི་ཤེས་པ་འཆར་བྱེད་མ་འགགས་པ་ལ་ངོས་བཟུང་བས། ཀ་དག་ཐུགས་རྗེའི་རིག་པ་ཟིན་ནས་གྲོལ་བ་སྟེ་གནད་གལ་པོ་ཆེའི་ཆིངས་གསུམ་ཐལ་ལོ། །འདི་གསུམ་ནི་གསང་བ་སྙིང་གི་བདུད་རྩི་ཡང་ཞུན་གྱི་ཐིགས་པ་རབ་ཏུ་གསང་བ་སྟེ། ཁ་འདུམས་ལ་ཆོད་ཆེ་བ། མདོ་འདུས་ལ་ཆིང་ཆེ་བ། གནད་ཟབ་ལ་གལ་ཆེ་བ། སྙིང་གི་བུ་མཆོག་དག་ལས་གཞན་ལ་གསང་བའི་རྒྱས་གདབ་པའི་མན་ངག་གོ །༼༢༥༩༽ཞེས་གསུངས་ཏེ། དེས་ན་རྒྱལ་བ་ཀཿཐོག་པ་ཆེན་པོས་བཞེད་པ་འདི་ནི། སྣང་བ་སེམས་མཐར་སོང་བའི་སེམས་སྡེ་སྟེ། སེམས་ཕྱོགས་རྒྱ་མཚོའི་དགོངས་པའི་ཡང་བཅུད་དུ་གྱུར་པས་ཀུན་མཁྱེན་དྲི་མེད་འོད་ཟེར་དང་དགོངས་པའི་བབ་སོ་གཅིག་ཏུ་འགྱུར་བ་ཡིན་ནོ།།

གཉིས་པ་དྲོད་རྟགས་རྫོགས་ཤིང་ཐེ་ཚོམ་དང་བྲལ་བར་བསྟན་པ་ནི།

དེ་ཡི་དུས་ན། ཞེས་པ་ནས། ཐེ་ཚོམ་འདིར་བཅད་པའོ། །ཞེས་པའི་བར་གྱིས་བསྟན་ཏེ།

དེ་ཡི་དུས་ན་དོན་དམ་ཉམས་དྲོད་རྗོགས། །སྣང་དང་མི་སྣང་རྟག་ཆད་ལ་སོགས་པ།།

ཉམས་དྲོད་ངེས་པ་དོན་གྱི་གཏིང་ཕོལ་ཏེ། །ཐ་དད་ཕྱོགས་ཀྱི་ཐེ་ཚོམ་འདིར་བཅད་པའོ།།

དེ་ལྟར་རིག་པ་གཉིས་མེད་དུ་གསལ་བ་དེ་ཡི་དུས་ཀྱི་སྐབས་ན་དོན་དམ་མཉམ་ཉིད་ཆེན་པོ་དེ་ཉིད་ཀྱི་ཉམས་དང་དྲོད་ཀྱི་མཆོག་ཀྱང་སྐྱེད་དུ་བྱ་བ་མེད་པར་རྫོགས་པ་ཁོ་ན་ཡིན་ནོ། །དེ་ཅི་སྟེ་ཞེ་ན། སྤྲོས་པས་མཐར་བརྟགས་པའི་སྣང་བ་དང་མི་སྣང་བ་དང་རྟག་པ་དང་ཆད་པ་དང་ཡིན་པ་དང་མིན་པ་ལ་སོགས་པ་ཀུན་ཀ་ནས་དག་པར་རྟོགས་པའི་གདེངས་རྙེད་པས་ཤེས་རབ་ཟབ་མོས་དབྱེར་མེད་བྱ་བརྩལ་དང་བྲལ་བའི་ངོ་བོ་མངོན་དུ་བྱས་ནས་ཉམས་དྲོད་ཡང་དག་པར་ངེས་པས་དོན་གྱིས་གནས་ལུགས་ཇི་བཞིན་པའི་གཏིང་ཕོལ་ཏེ་ཐག་ཆོད་པས་རྟོགས་པ་མཐར་ཕྱིན་པ་ནི་གཞུང་མི་མཐུན་པ་ཐ་དད་པའི་ཕྱོགས་ཀྱི་ངེས་པ་མ་རྙེད་པའི་ཐེ་ཚོམ་དང་ཞེན་པ་རྣམས་འདིར་ཡང་དག་པར་བཅད་དེ་ཟབ་དོན་གྱི་གདེངས་དང་ལྡན་པར་བྱས་ཏེ་ངེས་པའི་ཉམས་དྲོད་ཆེན་པོ་རྙེད་པར་གྱུར་པའོ། །དེ་སྐད་དུའང་སྙིང་པོ་དོན་གྱི་རྒྱུད་ལས། སུ་ཞིག་རིག་པ་འཕྲུལ་གྱི་ལྡེ་མིག་གིས། །རང་བྱུང་ཐབས་ཀྱི་དཀྱིལ་འཁོར་སྒོ་ཕྱེ་ནས། །མ་བཙལ་རང་བྱུང་ལྷུན་གྲུབ་བདེ་མཆོག་མཐོང་། །དུས་གསུམ་འདུ་འབྲལ་མེད་པ་རིག་པའི་གཏེར། །མ་བཅོས་ལྷུན་གྱིས་གྲུབ་པས་བཙལ་དུ་མེད། །དམིགས་པའི་འདུ་ཤེས་ཆད་པས་ཡེངས་སུ་མེད། །རང་བྱུང་གཅིག་ལ་རྣམ་པ་བགྲང་དུ་མེད། །གཉིས་མེད་ཐིག་ལེར་གནས་པས་བགྲོད་དུ་མེད། །འགྲོ་དོན་སེམས་སུ་གསལ་བས་བྱས་པ་ཟིན། །མ་ལུས་ལྷུན་གྱིས་རྫོགས་པས་འབྲས་མི་བསྒྲུབ། །མ་སྐྱེས་རྣམ་པར་དག་པའི་སྒྲིབ་མི་སྦྱང་། །མ་བྱས་རང་བཞིན་རྫོགས་པས་ཕྲིན་ལས་བྲལ། །འདི་ཉིད་རྟོགས་པས་ཀུན་འགྲུབ་ཀུན་རྫོགས་པས། །རྫོགས་ཆེན་ཐིག་ལེ་གཅིག་ཏུ་གནས་པར་བཤད། །ཅེས་དང་། ལྟ་བ་ཡེ་ཤེས་གཏིང་རྫོགས་ཀྱི་རྒྱུད་ལས། དེ་ཡང་འདུས་པའི་འཁོར་ཚོགས་ཡིད་ཀྱིས་ཉོན། །༼༢༦༠༽བླ་མ་མཁས་པས་མན་ངག་དོན་ཟབ་མོས། །ཀུན་གཞི་གཞི་ཆ་ཆོས་སྐུའི་ངོ་བོ་ཉིད། །བཅོས་སུ་མེད་ལ་རང་སེམས་ནམ་མཁའ་འདྲ། །སྒོ་ལྔ་ཡུལ་ཉིད་འཁྲུལ་ཕྱིར་འབྲེལ་བ་ཆོད། །ཡིད་ལ་ལྟ་བ་བརྟན་པས་ཉོན་མོངས་གྲོལ། །དེ་ཕྱིར་བཀའ་དོན་ཤིན་ཏུ་གཅེས་པར་གསུངས། །ཞེས་སོ།།

བཞི་པ་དེ་ལྟར་སྟོན་པའི་བླ་མ་དམ་ཇི་ལྟར་བཀུར་ཚུལ་བཤད་པ་ནི།

དེ་ཉིད་དེ་ལ། ཞེས་པ་ནས། ནོར་བུ་བཞིན་དུ་བལྟ། །ཞེས་པའི་བར་གྱིས་བསྟན་ཏེ།

དེ་ཉིད་དེ་ལ་ཞེན་ངེས་བློ་བརྟན་ཞིང་། །གང་དང་འབྲེལ་བའི་ལྟ་བའི་ཐག་གཅོད་ན། །དམན་པའི་ལུས་ལ་དམ་པའི་གོ་འཕངས་ཅན། །དབང་ཕྱུག་ཡིན་པས་དེ་ལ་ཀུན་ཕྱག་འཚལ། །གཡོ་སྒྱུ་མེད་པའི་ཡོ་བྱད་ཆེན་པོ་ལྔས། །དབང་པོ་སྤྱི་གཙུག་ནོར་བུ་བཞིན་དུ་བལྟ།།

དེ་ལྟར་བསྒོམ་པའི་ཡོན་ཏན་ནི་གང་སྙམ་པ་ལ། སྐྱེས་བུ་དམ་པ་གང་སུ་ཞིག་དེ་ཁོ་ན་ཉིད་དེ་ལ་ཞེན་གོམས་ངེས་པའི་སྟོབས་ཀྱིས་དོན་གྱི་རྟོགས་པ་ལ་བློ་གྲོས་བརྟན་པ་ཐོབ་ནས་ལས་སུ་རུང་ཞིང་ཆོས་གང་ཡང་ཚིག་དང་དོན་དུ་འབྲེལ་བར་ལྟ་བས་ཐག་ཆོད་དེ་རྟོགས་པ་གནད་དུ་ཆུད་ན། ས་ལྔ་པ་མན་ཆད་ལྟ་བུ་འགྲོ་བ་དམན་པའི་ལུས་ལ་དགོངས་པ་བདེ་བར་གཤེགས་པ་དམ་པའི་གོ་འཕང་དང་ལྡན་པ་ཅན་ནི་རྟོགས་པའི་དབང་ཕྱུག་ཆེན་པོ་རྒྱལ་བ་རྫོགས་སངས་རྒྱས་པ་ཉིད་ཡིན་པས་དེ་ལ་ལྷ་སྲིན་སྡེ་བརྒྱད་ཀྱིས་ཀྱང་སྒོ་གསུམ་གུས་པས་ཕྱག་འཚལ་ཞིང་མོས་པས་འདུད་པར་བྱེད་པ་ཉིད་དེ། ཀུན་བྱེད་ལས། བྱ་མེད་འདི་ལ་གང་གནས་པ། །ལུས་འདི་གང་ཟག་ལྷ་མི་ཡང་། །དགོངས་པ་ཆོས་ཉིད་སངས་རྒྱས་ཡིན། །འདི་ཡིས་སེམས་ཅན་དོན་བྱས་ན། །རྩོལ་སྒྲུབ་མི་བྱེད་བདེ་བར་འགྱུར། །ཞེས་དང་། ཡེ་ཤེས་གཏིང་རྫོགས་རྒྱལ་པོའི་རྒྱུད་ལས། བྱང་ཆུབ་སེམས་ལ་སྔ་ཕྱི་མེད་པའི་ཕྱིར། །འཇིག་རྟེན་མཐོ་དམན་གར་སྐྱེས་ལུས་ཉིད་ཀྱང་། །སྐྱེ་འགག་མེད་པའི་སེམས་ལ་སེམས་གནས་ན། །འདུ་འབྲལ་མེད་པའི་དགོངས་པ་ཉམས་མྱོང་རྟགས། །རྟགས་ཆེན་དེ་ལྡན་རྣལ་འབྱོར་རྣམས་ཀྱིས་ནི། །ཅི་སྤྱོད་ཐམས་ཅད་ཡེ་ཤེས་སངས་རྒྱས་ཐུགས། །མི་ཡི་ལུས་ལ་སྒྲིབ་གཡོགས་འདི་ཉིད་ལ། །ལྷ་མི་རྣམས་ཀྱིས་ཕྱག་འཚལ་མཆོད་པར་འགྱུར། །ཞེས་དང་། ཆོས་ཆེན་པོ་རྨད་དུ་བྱུང་བ་ལས། ལྟ་བ་རྨད་དུ་བྱུང་བའི་དོན། །རྡོ་རྗེ་སེམས་དཔའ་བདག་ཉིད་ཀྱིས། །སྔོན་ཆད་རྟོགས་པར་མ་གྱུར་པ། །ཐུགས་ཀྱི་སྒྲོན་མེས་དོན་༼༢༦༡༽བསྟན་པ། །གང་ལ་སངས་རྒྱས་གུས་མཛད་པ། །དོན་དེ་ལ་ཡང་ཕྱག་འཚལ་ལོ། །ཞེས་དང་། ཀུན་ཏུ་བཟང་པོ་ཀློང་དྲུག་པ་ལས། མ་བཙལ་བཞག་པའི་རིན་པོ་ཆེ། །ཀུན་གྱི་སྤྱོད་ཡུལ་མིན་པས་ན། །འདི་ཉིད་རྟོགས་པའི་རྣལ་འབྱོར་པ། །མི་ཡི་ནང་ན་རྒྱལ་བའི་སྐུ། །དབང་ཕྱུག་ཡིན་གྱིས་གུས་ཕྱག་51འཚལ། །ཞེས་སོ། །འདི་ལྟ་བུའི་རྣལ་འབོྱར་མཆོག་མཐོང་ན་བདག་ཅག་གིས་ཀྱང་གཡོ་དང་སྒྱུ་མེད་པའི་བསམ་པས་འདོད་པའི་ཡོན་ཏན་གྱི་ཡོ་བྱད་ཆེན་པོ་ལྔས་མཆོད་པར་བྱས་ཤིང་རྒྱལ་སྲིད་ལ་སོགས་པའང་བསྟབས་ཏེ་གུས་པ་མཆོག་གིས་བཀུར་བ་ནི། དཔེར་ན་བརྒྱ་བྱིན་ལྷ་ཡི་དབང་པོ་དང་ཀླུའི་རྒྱལ་པོའི་སྤྱི་གཙུག་གི་ནོར་བུ་རིན་པོ་ཆེ་བཞིན་དུ་བལྟ་བར་བྱ་སྟེ། ཀུན་བྱེད་རྒྱལ་པོའི་སྤྱིའི་བཤད་རྒྱུད་ཉི་ཟླ་དང་མཉམ་པ་དྲི་མ་མེད་པ་ལས། སློབ་དཔོན་ཚད་མར་མ་གྱུར་སྤྲེའུ་འདྲའི་ལུང་། །བརྟེན་ནས་ལམ་ནོར་རྟོག་པས་ཟིན་ཏ་རེ། །དེ་བས་གསེར་ལ་ནག་ཚུར་བཏང་འདྲ་ཡི། །སློབ་དཔོན་རིན་ཆེན་ལྟ་བུ་མཁས་པ་དེ། །རིན་ཐང་དཔག་ཏུ་མེད་པའི་རིན་གྱིས་བསླུའོ། །ཞེས་སོགས་གསུངས་སོ།།

གསུམ་པ་ཞབས་བསྡུ་བ་ནི།

ཀུན་ནས་འདུས་པའི། ཞེས་པ་ནས། རང་རིག་ཁོ་ནར་ཟད། །ཅེས་པའི་བར་གྱིས་བསྟན་ཏེ།

ཀུན་ནས་འདུས་པའི་དགོངས་པ་ཚིག་གསུམ་པོ། །ཡིད་ཆེས་ངེས་པ་བློ་ཡི་གདེང་དུ་བྱ།།

ཚིག་གསུམ་དོན་ལ་ངེས་རྙེད་མངོན་གྱུར་ན། །ངེས་པའི་དོན་ནི་རང་རིག་ཁོ་ནར་ཟད།།

གདམས་ངག་གི་ནན་ཏན་གལ་ཆེ་བར་བསྟན་པའི་ཕྱིར། ཐེག་པ་ཀུན་གྱི་དོན་དང་རྒྱལ་བ་རྣམས་ཀྱི་དགོངས་པ་མ་ལུས་པ་ཀུན་གདོད་ནས་འདུས་པའི་དོན་མ་ནོར་བ་ནི། ལེའུ་གཉིས་པ་ལས། བློ་དང་ལྡན་པར་བྱའོ། །གྲོས་ཀྱིས་ཆོད་པར་བྱའོ། །ཐབས་ཀྱིས་ཟིན་པར་བྱའོ། །ཞེས་བཀའ་སྩལ་པའི་རྒྱལ་བའི་དགོངས་པ་བློ་དང་གྲོས་དང་ཐབས་ཀྱི་ཚིག་གསུམ་པོ་ཉིད་དེ། དེ་བས་ན་དེ་གསུམ་གྱི་དོན་ལ་ཐེ་ཚོམ་ཆོད་པས་ཡིད་ཆེས་པར་བྱས་ཏེ་ངེས་པར་རྟོགས་པས་བློ་ཡི་གདེང་དུ་ཆུད་པའི་ཚད་དང་ལྡན་པར་བྱ་སྟེ། དེ་ལྟར་ཚིག་གསུམ་གྱི་དོན་ལ་ངེས་པ་རྙེད་ནས་འབད་པས་གདེངས་དང་ལྡན་ཏེ་སྒོམ་པས་མངོན་དུ་གྱུར་པའི་ཚེ་ན། ངེས་པའི་དོན་ནི་གཞན་ཞིག་མེད་དེ་རང་གི་རིག་པ་ཡེ་ཤེས་ལྔ་ཆོས་ཉིད་བྱངཆུབ་ཀྱི་སེམས་སུ་རྫོགས་པའི་རང་སྣང་སེམས་ཀྱི་དེ་ཁོ་ན་ཉིད་མ་བཅོས་༼༢༦༢༽པ་འབའ་ཞིག་ཁོ་ནར་ཟད་པས་དེ་ལ་ངེས་པར་གཟུང་བར་བྱ་སྟེ་དེ་ལས་ལྷག་པ་གང་ཡང་མེད་དོ། །དེས་ན་ཡེ་ཤེས་རྫོགས་པ་ལས། རང་སེམས་སྟོན་པར་མ་ཤེས་ན། །རང་བྱུང་མཐོང་བར་ཡོང་མི་འགྱུར། །དེས་ན་ཡེ་ཤེས་རྫོགས་པའི་དོན། །རང་རིག་བདེ་བས་ཤེས་པར་གྱིས། །རང་བྱུང་རྒྱལ་པོ་སྟོན་པའི་མཆོག །ཡེ་ཤེ་མ་འགགས་ཅིར་ཡང་གསལ། །རིག་པ་ཀློང་གི་འཁོར་དུ་རྫོགས། །རང་སེམས་བདེ་བར་ཀུན་རྫོགས་པས། །བསྟན་པ་རྒྱ་མཚོ་རིག་པའི་ཀླུངས། །རྣམ་དག་རང་སེམས་སྐྱེ་མེད་པས། །འགྱུར་མེད་འཁོར་ལོ་རིག་པའི་གནས། །ཞེས་དང་། གསང་བདག་དགའ་རབ་དཔའ་བོས་འབྲས་བུའི་ཀློང་ལས། ཤིན་ཏུ་རྣལ་མའི་ཡེ་ཤེས་ལ། །སེལ་མེད་གནས་པའི་རང་བཞིན་ནི། །སྤྲོས་པ་ཀུན་བྲལ་དེ་མཁྱེན་པའི། །ཡེ་ཤེས་མཚན་ཉིད་རང་རིག་གསལ། །དེ་འོད་རྣམ་པ་ཅིར་ཡང་ཤར། །དབྱེར་མེད་ཀུན་བྲལ་ཅི་མ་སྤངས། །རང་བཞིན་ཅིས་ཀྱང་སྟོང་པས་ཡོད་པའི་མཐའ་ལས་འདས། །དེ་མཁྱེན་ཐམས་ཅད་རྫོགས་པས་མེད་པའི་མཐའ་ལས་འདས། །མཚན་ཉིད་ཐ་དད་བྲལ་བས་གཉིས་ཀྱི་མཐའ་ལ་འདས། །གཉིས་མེད་ངོས་བྲལ་རོལ་པས་དེར་འཛིན་ངང་ལས་འདས། །ཀུན་བྲལ་ཇི་མ་སྤངས་པས་ཀུན་མཁྱེན་སྟོང་ཉིད་རྫོགས། །ཡེ་ཤེས་ཡོད་མེད་མཐའ་ལས་འདས་པར་བཞུགས། །ཀུན་མཁྱེན་གསལ་བས་ཡེ་ཤེས་ལྷག་ཆད་མེད། །སྤྲོས་དང་བྲལ་བས་ཆོས་དབྱིངས་ལྷག་ཆད་མེད། །ངོ་བོས་མ་འདྲེས་བདེན་གཉིས་ལྷག་ཆད་མེད། །རང་བཞིན་དབྱེར་མེད་མཉམ་ཉིད་ལྷག་ཆད་མེད། །ཐམས་ཅད་ལྷུན་གྲུབ་རོལ་པ་ལྷག་ཆད་མེད། །རྒྱ་མ་ཆད་པས་ཀ་དག་ལྷག་ཆད་མེད། །དེ་ལྟར་མཁྱེན་ལ་ངོས་མེད་རོལ་པར་ཤར། །མ་བཅོས་ལྷུན་གནས་ཡེ་ཤེས་བདེ་ཆེན་ཡིན། །ལྷག་མ་མེད་པར་རྫོགས་པ་ཆེན་པོ་ཡིན། །ཞེས་སོ། །ཡང་ན་འདི་ཉིད་དོན་ངེས་པའི་རྩ་བ་ཁོ་ནས་ཞབས་སྡུད་མི་བྱེད་པར་བསྡུས་དོན་ལས་སྔར་ཡང་བསྟན་པ་ལྟར་ངེས་པའི་གསང་སྒོར་འཇུག་པའི་ཞབས་བསྡུ་བར་བྱས་ན།

གསུམ་པ་༼༢༦༣༽མཇུག་བསྡུ་བ་ནི།

ཀུན་ནས་སོགས་ཚིགས་བཅད་གཅིག་ཡོན་ཏན་དང་བཅས་པས་བསྟན་ཏེ།

52༼ཀུན་ནས་འདུས་པའི་དགོངས་པ་ཚིག་གསུམ་པོ། ཡིད་ཆེས་ངེས་པ་བློ་ཡི་གདེང་དུ་བྱ།།

ཚིག་གསུམ་དོན་ལ་ངེས་རྙེད་མངོན་གྱུར་ན། །ངེས་པའི་དོན་ནི་རང་རིག་ཁོ་ནར་ཟད།།༽

གསང་བ་པའི་བདག་པོས་དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས། ཆོས་ཐམསཅད་ཀྱི་རྩ་བ་གཏན་ལ་ངེས་པར་ཕེབས་པར་གྱུར་ཏོ།།

དེ་ལྟར་ཐེག་པ་རྣམས་དང་སངས་རྒྱས་ཐམས་ཅད་ཀྱི་དགོངས་པའི་གསང་མཛོད་ཀུན་ནས་འདུས་པ་ནི། ལེའུ་དྲུག་པ་ལས། རྒྱལ་བའི་དགོངས་པ་ཚིག་གསུམ་པོ། །འཕྲུལ་གྱི་བློ་དང་གྲོས་མཆོག་སྟེ། །ཡུན་གྱི་དོན་སྲིད་ཆེན་པོ་བས། །བློ་གྲོས་དམ་པའི་ཡུལ་དུ་སྣང་། །ཞེས་གསུངས་པ་ལྟར། རྒྱལ་བའི་དགོངས་པ་ཚིག་གསུམ་པོ་གདམས་ངག་གསུམ་ཚོ་ལྔ་རུ་བསྟན་པ་འདི་ནི་ཐེག་པ་ཀུན་གྱི་ཡང་བཅུད་ལྷ་གནས་སུ་གྲགས་པའི་བསྟན་པ་རིན་པོ་ཆེ་ཐམས་ཅད་ཀྱི་གསང་མཛོད་དུ་ངེས་པའི་དགོངས་པ་དམ་པ་ཡིན་པས་ཐེ་ཚོམ་དང་བྲལ་བར་ཡིད་ཆེས་ངེས་པར་རྙེད་ནས་མ་ནོར་བར་རྟོགས་པས་བློ་ཡི་གདེང་དུ་བྱའོ། །དེ་ལྟར་ཚིག་གསུམ་གྱི་དོན་ལ་ངེས་པ་རྙེད་དེ་འབད་ཅིང་བསྒོམས་པས་དོན་གྱི་ངོ་བོ་མཐར་ཐུག་པ་མངོན་དུ་གྱུར་ན། ངེས་པའི་དོན་ནི་རང་གི་སེམས་ཀྱི་ཆོས་ཉིད་གསལ་སྟོང་གཉིས་སུ་མེད་ཅིང་བདེ་སྟོང་རྣམ་དབྱེར་མེད་པའི་དཀྱིལ་འཁོར་གསུམ་མ་འདྲེས་ཡོངས་རྫོགས་ཀྱི་ངོ་བོ་རང་རིག་ཕྱོགས་མེད་བདེ་བ་ཆེན་པོ་འོད་གསལ་ཐིག་ལེ་ཉག་ཅིག་ཁོ་ནར་ཟད་པ་ཡིན་པས་དེར་མཐར་ཕྱིན་པ་འབའ་ཞིག་ཏུ་འགྱུར་རོ།།

དེས་ན་དཔལ་གསང་བའི་སྙིང་པོ་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགསཏེ། །རང་བྱུང་ཡེ་ཤེས་གནས་མེད་སྣང་། །ཞེས་དང་། ཀུན་འདུས་ལས། ཐབས་ཆེ་གཏིང་ཟབ་ཤེས་རབ་ལམ། །སྤྲོས་བྲལ་མཚན་མའི་འཕྲང་ལས་འདས། །གཏོས་ཆེ་ཡངས་པས་ལམ་གཉིས་བྲལ། །དབུས་མཐའ་མི་དམིགས་མཉམ་པའི་ལམ། །གཅིག་ཏུ་མཉམ་པར་ཆུད་ནས་ནི། །ཡུལ་མེད་ཚོལ་བའི་སེམས་བྲལ་ཏེ། །བླང་དོར་གཉིས་ཀྱི་མཐའ་སྤངས་ནས། །གནས་པ་མེད་པའི་ཚུལ་གྱིས་གནས། །ཆོས་ཉིད་དབྱིངས་སུ་རོ་གཅིག་ཕྱིར། །ཤེས་དང་ཤེས་བྱ་གཉིས་མེད་དེ། །ཡེ་ནས་ཆོས་ཉིད་ཆོས་ཤེས་ན། །ཆོས་ཉིད་གཞན་ནས་བརྩལ་མི་དགོས། །ཞེས་དང་། ཡེ་ཤེས་གསང་བ་ལས། མ་འགགས་༼༢༦༤༽རང་རིག་རྒྱུ་མེད་གསལ། །རང་བྱུང་ཡེ་ཤེས་འགྱུར་མེད་སེམས། །འོད་གསལ་བསམ་གྱིས་མི་ཁྱབ་པ། །ཀུན་བཟང་རོལ་པ་མཐའ་དབུས་མེད། །མི་རྩོལ་མཐའ་བྲལ་དབུ་མའི་སེམས། །མཚོན་འདས་རང་རིག་ཞེན་རྟོག་མེད། །གཉིས་མེད་རང་རིག་ཡུལ་དང་བྲལ། །རང་རིག་ཡེ་ཤེས་ཐིག་ལེ་དྲུག །ལྟ་སྤྱོད་དགོངས་པའི་རང་བཞིན་ནོ། །ཞེས་སོགས་ཤིན་ཏུ་མང་ངོ་། །ཞེས་གསང་བ་ཀུན་གྱི་མཛོད་འཛིན་པའི་སྟོན་པ་གསང་བ་པའི་བདག་པོས་དེ་སྐད་ཅེས་སྨྲས་ཏེ་བཀའ་སྩལ་པས། འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས་ཆོས་ཐམས་ཅད་ཀྱི་རྩ་བ་ཆེན་པོའི་དོན་གཏན་ལ་ངེས་པར་ཕེབས་ཏེ་རྟོགས་པའི་གདེངས་དང་ལྡན་པར་གྱུར་ཏོ། །དེ་བས་ན་ཀུན་གཟིགས་རོང་ཟོམ་པཎྜི་ཏས་ཐེག་པའི་བྱེ་བྲག་ཆེན་པོར། འདི་དག་ཙམ་གྱིས་ཐུན་མོང་ཁྱད་པར་ཤེས། །འདི་ལྟར་སྨྲས་ན་སྒྲོ་དང་སྐུར་པ་མེད། །འདི་ལྟར་ཤེས་ན་ཡིད་གཉིས་རྣམ་པར་བྲལ། །རང་གི་འདོད་པ་མ་ཡིན་གཟུ་བོའི་ཚིག །ཅེས་གསུངས་པ་ལྟར་ཚད་མའི་ལུང་གིས་བརྒྱན་ཏེ་ཅུང་ཟད་རྒྱས་པར་བཤད་པ་ཡིན་ན་ཡང་། བསྒོམ་ཐབས་སྒྲོན་མ་ལས། སྐྱེ་རྒུ་ཕལ་ཆེར་བློ་གྲོས་ཕྱོགས་ལྷུང་མཁྱེན་པའི་རྩལ་མ་རྫོགས་པས་མ་བཅོས་ལྷུན་རྫོགས་ཆོས། །མོས་འདུན་དད་མེད་པར་ཡང་མ་ཟད་ཕྲག་དོག་བསམ་པས་སྒྲོ་སྐུར་འདེབས་པར་བྱེད། །དེས་ན་འདི་ལྟར་སྙིང་རྗེས་བཀོད་ཀྱང་ཀུན་ལ་ཕན་ཞེས་ངེས་པར་ཡིད་བརྟན་མེད། །རང་དང་རིགས་མཐུན་འཇམ་དབྱངས་བུ་དང་ཕྱི་རབས་དྲྭ་མ་ཆེན་པོའི་དོན་དུ་དགོད། །ཞེས་གསུངས་པ་དང་ཚུལ་ཙམ་མཐུན་པར་ཕྱོགས་ཞེན་ཅན་ལ་ཟབ་དོན་སྨྲ་བའི་དུས་མིན་པར་ཤིན་ཏུ་ངེས་པར་གྱུར་ཀྱང་། སློབ་དཔོན་དཔའ་བོས། ཡ་རབ་རྣམས་དང་འཕྲད་ན་སྐྱེས་ཀྱི་མཆོག །ཚོགས་ཀྱི་ནང་ནས་མཁས་པ་དགའ་བར་འགྱུར། །ཞེས་གསུངས་པ་ལྟར་སྐྱེས་བུ་དམ་པ་རྣམས་ལ་ལེགས་པར་བཤད་པའི་མཆོད་རྫས་སུ་ཕུལ་བ་ཡིན་ནོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཆོས་ཐམས་ཅད་ཀྱི་རྩ་བ་གང་སྣང་བ་དག་པའི་སྤྱོད་ཡུལ་བསྟན་པའི་ལེའུ་ལྔ་བཅུ་དྲུག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཆོས་ཐམས་ཅད་ཀྱི་༼༢༦༥༽ རྩ་བ་ཆེན་པོ་གང་བྱང་ཆུབ་ཀྱི་སེམས་སྣང་བ་རྣམ་པར་དག་པ་དེ་ཡི་དོན་རྟོགས་པའི་སྐལ་བ་མཆོག་གི་སྤྱོད་ཡུལ་དུ་གྱུར་པའི་གསང་ཆེན་ངེས་པའི་སྙིང་པོ་བསྟན་པའི་ལེའུ་སྟེ་ལྔ་བཅུ་རྩ་དྲུག་པ་ཉིད་གསལ་བར་བཤད་པའོ།། །།

ལེའུ་ང་བདུན་པ་རྣལ་འབྱོར་རང་བཞིན།

༈ བམ་པོ་དགུ་པར་ཟུག་པ། 53 གཉིས་པ་རང་བཞིན་མ་བཅོས་པར་བྱ་བ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས། ཞེས་པ་ནས། སྤྱོད་པའི་རང་བཞིན་ནོ། །ཞེས་པའི་བར་གྱིས་བསྟན་ཏེ།

དེ་ནས་ལངྐའི་བདག་པོ་ལ་སོགས་པ་དམན་པའི་ལུས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱིས། གསང་བ་པའི་བདག་པོ་ལ་ཡང་གང་གི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་འདི་ཉིད་ཀྱི་ཆོས་ཀྱི་རྣམ་གྲངས་བཅུར་བཀོད་པ་ལས་རང་བཞིན་མ་བཅོས་པར་བྱའོ། །ཞེས་ཐོས་ནས། དེ་ཇི་ལྟར་ཡོངས་སུ་ཤེས་པར་བྱ། རང་བཞིན་ནི་གང་། གང་ལྟར་ན་མ་བཅོས། དེ་གང་གི་རང་བཞིན་ལགས། དེ་སྐད་ཅེས་གསོལ་པ་དང། གསང་བ་པའི་བདག་པོས་སྨྲས་པ། ཀྱེ་དམན་བའི་གྲོགས་པོ་དག གང་རང་བཞིན་ནི་མི་འགྱུར་བའོ། །མ་བཅོས་པ་ནི་རྣལ་མའོ། །འདི་དག་ནི་གསང་སྔགས་ཀྱི་རང་བཞིན་དང་། དེ་ལ་ལྟ་བའི་རང་བཞིན་དང་། དེ་ལས་མི་འདའ་བའི་རང་བཞིན་དང་། དེ་ལྟར་སྤྱོད་པའི་རང་བཞིན་ནོ།།

ལེའུ་འདིས་ངེས་དོན་སྟོན་ནོ། །ལེའུ་བཞི་བཅུ་ཞེ་ལྔ་པའི་རྣམ་གྲངས་བཅུའི་དང་པོའི་རྗེས་སུ་གཉིས་པ་དེ་ཉིད་རྒྱས་པར་འགྲེལ་བའི་ཕྱིར། སྣང་བ་དག་པའི་སྤྱོད་ཡུལ་བསྟན་པའི་དེ་མ་ཐག་པ་དེ་ནས་ཡང་འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་བྱང་ཆུབ་སེམས་དཔའ་མ་འདྲེས་ཡོངས་རྫོགས་དབྱེར་མེད་དུ་རྟོགས་པས་འོག་མ་ལས་འཕགས་པའི་སེམས་དཔའ་ཆེན་པོ་རྣམས་ཀྱིས། སྟོན་པ་གསང་བ་པའི་བདག་པོ་ལ། ཡང་རང་བཞིན་མ་བཅོས་པའི་ཚུལ་གང་གི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། བྱུང་ཚུལ་བཅུ་གཉིས་པའི་སྐབས་འདིར་སྟོན་པ་ཉིད་ཀྱིས་ལེའུ་ཞེ་ལྔ་པར་ཆོས་ཀྱི་རྣམ་གྲངས་བཅུར་བཀོད་པ་ལས། དང་པོ་མཛོད་དུ་འཇུག་པ་སོང་ནས་གཉིས་པ་རང་བཞིན་མ་བཅོས་པར་བྱའོ། །ཞེས་གསུངས་པར་ཐོས་ན། ཐབས་དེ་ཉིད་ངོ་བོ་ཇི་ལྟར་ཡོངས་སུ་ཤེས་པར་བྱ་སྟེ། རང་བཞིན་ནི་གང་ཞིག་ཡིན། དེ་གང་ལྟར་ན་མ་བཅོས། མ་བཅོས་པ་དེ་གང་གི་རང་བཞིན་ལགས། ཞེས་དེ་སྐད་ཅེས་གསོལ་ཏེ། དྲིས་པ་འདིའི་དོན་ནི་འདྲེན་པ་བཅུའི་ལྟ་བ་ཡིན་ལ། དེའང་དཔེ་ཡིས་འཆད་པ་ཤས་ཆེ་བས། དྲང་དོན་གྱི་དཔེ་ལ་བརྟེན་ནས་ངེས་དོན་དངོས་སྟོན་པའོ། །དེ་ལྟར་དྲིས་པ་དང་། སྟོན་པ་གསང་བ་པའི་བདག་པོས་སྨྲས་ཏེ་བཀའ་སྩལ་པ། ཀྱེ་དམན་པའི་གྲོགས་པོ་དག ཅེས་བོས་ནས། དྲི་བ་གཅིག་ལ་གསུམ་དྲིས་པའི་ལན་དུ་གསུངས་པ། དེ་ཁོ་ན་ཉིད་ཀྱི་རང་བཞིན་སྙིང་པོའི་དོན་ནི། དངོས་པོ་ཐམས་ཅད་དང་བྲལ་ཏེ་ངང་ལས་མི་འདའ་བས་མི་འགྱུར་བའོ། །མ་བཅོས་༼༢༦༦༽ པ་ནི་ཡེ་ནས་ཡིན་པའི་དོན་གཞི་ཇི་བཞིན་པའི་ངོ་བོ་རྣལ་མའོ། །མ་བཅོས་རྣལ་མ་འདི་དག་ནི། ཤེས་པར་བྱ་བའི་དེ་བཞིན་ཉིད་གསང་སྔགས་ཀྱི་རང་བཞིན་དང་། ཇི་ལྟར་རྟོགས་པའི་ཚུལ་གྱིས་དེ་ལ་ལྟ་བའི་རང་བཞིན་དང་། རྟོགས་པ་དེ་ལས་མི་འདའ་བའི་དམ་ཚིག་གི་རང་བཞིན་དང་། དེ་ལྟར་རང་ལས་མི་ཉམས་པར་ལུས་ངག་ཡིད་ཀྱིས་བྱ་བ་བྱེད་པ་སྤྱོད་པའི་རང་བཞིན་ཏེ་རྣམ་པ་བཞིར་གསུངས་པས་གསུམ་པོ་གོ་རིམས་བཞིན་ནོ།།

གཉིས་པ་རྒྱས་པར་བཤད་པ་ལ་བཞི་སྟེ། སྔགས་ཀྱི་རང་བཞིན་བཤད་པ། ལྟ་བའི་རང་བཞིན་བསྟན་པ། དམ་ཚིག་གི་རང་བཞིན་བཤད་པ། སྤྱོད་པའི་རང་བཞིན་བསྟན་པའོ། །དང་པོ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

གྲོགས་པོ་དག ཅེས་པ་ནས་འདི་ལྟ་སྟེ། ཞེས་པའི་བར་གྱིས་བསྟན་ཏེ།

གྲོགས་པོ་དག་འདི་ལ་གསང་སྔགས་ཀྱི་རང་བཞིན་ནི་འདི་ལྟ་སྟེ།།

དེ་ལ་ལན་ཐ་མ་བཞིའི་དང་པོ་བསྟན་པའི་ཕྱིར། གླེང་གཞི་གསུམ་ལས་བྱིན་བརླབས་བྱུང་ཁུངས་ཀྱི་གླེང་གཞིའི་དབང་དང་རང་བཞིན་མཉམ་པ་ཉིད་ལ་དགོངས་ཏེ་གྲོགས་པོ་དག་ཅེས་བོས་ནས། འདི་ལ་གསང་སྔགས་ཀྱི་རང་བཞིན་ཉེ་བར་སྟོན་པ་ནི། འདི་ལྟ་སྟེ། ཞེས་པའོ།།

གཉིས་པ་རྒྱས་པར་བཤད་པ་ནི།

ནམ་མཁའ་ལྟ་བུའི། ཞེས་པ་ནས། མ་བསླད་དེ་བཞིན་པའོ། །ཞེས་པའི་བར་གྱིས་བསྟན་ཏེ།

ནམ་མཁའ་ལྟ་བུའི་རང་བཞིན་པས། །རྣམ་པར་རྟོག་བྲལ་གང་མི་རྟོག །དེ་བཞིན་ས་ཡི་རང་བཞིན་པས། །ཐམས་ཅད་འབྱུང་བའི་རང་བཞིན་ནོ། །མེ་ཡི་རང་བཞིན་ལྟ་བུ་བས། །དངོས་པོ་ཐམས་ཅད་མེད་པར་བྱེད། །རླུང་གི་རང་བཞིན་ལྟ་བུ་བས། །གཡོ་རྡུལ་མི་གཡོ་རྡུལ་ཀུན་སེལ། །ཆུ་ཡི་རང་བཞིན་ཁོ་ན་བས། །གཞན་མེད་དེ་བཞིན་ཉིད་དུ་འདུས། །སྨན་གྱི་རང་བཞིན་ཡིན་པས་ན། །འཁོར་བའི་གཅོང་རྙིང་རྣམ་པར་འབྱིན། །འདི་ལྟར་འཚོ་བའི་རང་བཞིན་པས། །འཚོ་བ་དག་པ་ཀུན་གྱི་གསོས། །གཅོད་པའི་རང་བཞིན་ལྟ་བུ་བས། །སྡུག་བསྔལ་རྒྱ་མཚོ་རྣམ་པར་གཅོད། །ཉི་མ་ལྟ་བུའི་རང་བཞིན་པས། །མུན་ཁང་སྣང་སྟོང་གསལ་བ་ཉིད། །རི་རབ་ལྟ་བུའི་རང་བཞིན་པས། །ཅིས་ཀྱང་སྐྱོད་ཅིང་གཡོ་བ་མེད། །རྒྱ་མཚོ་ལྟ་བུའི་རང་བཞིན་པས། །མི་གཡོ་བ་ལས་བྱིན་རླབས་འབྱུང་། །དེ་བཞིན་རྩི་ཡི་རང་བཞིན་པས། །དུག་ལ་སྨན་འགྱུར་ཇི་བཞིན་ནོ། །དེ་ལ་སོགས་པ་མཐའ་ཡས་མཆོག །རྣམ་པ་རྟོག་བྲལ་ཐམས་ཅད་འབྱུང་། །མ་བཅོས་མ་སླད་དེ་བཞིན་པའོ།།

གཞིའི་ཆོས་རང་བཞིན་ཆོས་ཉིད་དབྱིངས་ཀྱི་རྣལ་འབྱོར་ནི། དཔེར་ན་ནམ་མཁའ་ནི་ཕྱོགས་རིས་དང་མཐའ་དབུས་བྲལ་བས་རྟོག་མེད་ཡིན་པ་ལྟ་བུའི་ཚུལ་དུ་གསང་སྔགས་དེ་ཁོ་ན་ཉིད་ཀྱང་ཆེད་འཛིན་དང་བྲལ་བའི་ངོ་བོའི་རང་བཞིན་ཡིན་པས། ཡུལ་ལ་རྣམ་པར་རྟོག་པའི་མཚན་ཉིད་ཐམས་ཅད་དང་བྲལ་ཞིང་། གང་རང་བཞིན་དེ་ཉིད་དུ་ཡང་རྣམ་པར་མི་རྟོག་པར་ངོས་གཟུང་ལས་འདས་པའི་ཆོས་ཉིད་དོ། །དེ་བཞིན་དུ་དཔེར་ན་ས་གཞི་ནི་རྩི་བཅུད་ཐམས་ཅད་འཁྲུངས་པའི་འབྱུང་ཁུངས་ཡིན་པ་ལྟར། དབྱིངས་ཆེན་གཞི་ཡི་རང་བཞིན་ཡང་འཁོར་འདས་ལམ་གསུམ་གྱི་ཆོས་ཀུན་གྱི་བསྐྱེད་གཞིར་གྱུར་པས་རྒྱུ་དང་འབྲས་བུའི་ཆོས་ཐམས་ཅད་འབྱུང་བའི་གནས་ཀྱི་རང་བཞིན་དམ་པ་ཡིན་ནོ། །དེ་དང་མཚུངས་པར་དཔེར་ན་མེ་ཡི་རང་བཞིན་རྫས་ཀྱི་དངོས་པོ་ཐམས་ཅད་༼༢༦༧༽སྲེག་བྱེད་ཡིན་པ་ལྟ་བུ་རང་རིག་པའི་ཡེ་ཤེས་ཉིད་ཀྱང་། ཉོན་མོངས་དང་གཟུང་འཛིན་གང་ཡང་སྟོང་ཉིད་ཀྱི་ངང་དུ་སྲེག་པར་བྱེད་པ་ཡིན་པས། མཐའ་ཡི་དངོས་པོ་གཉིས་འཛིན་དང་བཅས་པ་ཐམས་ཅད་བསྲེག་སྟེ་མེད་པར་སྦྱོངས་པར་བྱེད་པའི་མཛད་པ་ཅན་དུ་ངེས་པའོ། །དེ་དང་འདྲ་བར་དཔེར་ན་རླུང་གི་རང་བཞིན་གྱིས་དྭངས་སྙིགས་ཐམས་ཅད་འབྱེད་པར་བྱེད་པ་ལྟ་བུ་ཆོས་ཉིད་རང་གྲོལ་གྱི་རིག་པ་ཡང་རྣམ་པར་རྟོག་པའི་མཚན་མ་ཀུན་མི་གནས་པར་བྱེད་པ་ཡིན་པས་གཡོ་རྡུལ་དང་མི་གཡོའི་རྡུལ་དུ་སྣང་བའི་སྒྲིབ་པ་དང་ཆོད་པའི་གཟུང་འཛིན་གྱི་རྟོག་པའི་རྡུལ་ཀུན་མི་གནས་པ་སེལ་ཏེ་བྲལ་བར་བྱེད་པའི་ཕྱིར་ཡེ་ཤེས་ཀྱི་རླུང་ཆེན་པོའི་རང་བཞིན་ཡིན་ནོ། །དེ་བཞིན་དུ་ཀླུང་རྣམས་ཐམས་ཅད་རྒྱ་མཚོར་རོ་གཅིག་པ་བཞིན་དུ་འབྱུང་བ་ཆུ་ཡི་རང་བཞིན་དང་བྱེད་ལས་འདྲ་བར་ཡེ་ཤེས་ཆེན་པོའི་ཆུ་དེ་ཁོ་ན་ཉིད་ཡིན་པས། ཐམས་ཅད་དབྱིངས་ལས་གཞན་མེད་པར་སྐྱེ་མེད་དེ་བཞིན་ཉིད་ཀྱི་ངང་དུ་སྡུད་དེ་མཉམ་ཉིད་དུ་འདུས་པར་བྱེད་པ་ཡིན་ནོ། །འདི་ཡང་ཨ་ནུའི་ཨ་ཏིའི་རང་ལུགས་ལྟར་ན། སེམས་ཉིད་དོན་གྱི་སྟོན་པ་རྣལ་མ་དབྱིངས་ཀྱི་ངོ་བོ་ཉིད་འབྱུང་བ་ལྔའི་སྐུར་མངོན་དུ་ཕྱུང་བའི་བཀོད་པ་ཞི་བ་དང་ཁྲོ་བོའི་རྩལ་གྱིས། གྲུབ་མཐས་བློ་མ་བསྒྱུར་བའི་གདུལ་བྱ་འདོད་ལ་ཞེན་པ་དང་དྲག་པོ་གདུལ་བར་དཀའ་བ་ལ་འཁོར་ལོ་རྒྱུན་དང་། ཆོ་འཕྲུལ་མངོན་པར་ཕྱུང་བས་དོན་མཛད་ཚུལ་སྔར་བཤད་པ་ལྟར་དང་། བློ་བསྒྱུར་བ་དྲང་དོན་ལ་ཞུགས་པའི་ལས་སྒྲིབ་དག་པའི་གདུལ་བྱ་རིག་འཛིན་ཆེན་པོ་དང་ས་བཅུའི་བྱང་ཆུབ་སེམས་དཔའ་ལ་འབྱུང་ལྔ་ངོ་བོ་ཉིད་དུ་དག་པའི་སྐུས་བདག་རྐྱེན་ལས། ལོངས་སྤྱོད་རྫོགས་པ་ཡེ་ཤེས་སྒྱུ་མའི་སྐུ་ཤར་ནས་ཐེག་པ་མཆོག་གི་ཆོས་ལ་ལོངས་སྤྱོད་པར་བཞེད་པ་ཡིན་ནོ། །དེར་མ་ཟད་སྐྱེས་བུ་མཁྱེན་རྩལ་ཅན་ལ་གསང་སྔགས་མཚོན་པའི་སྒོར་མ་གྱུར་པ་མེད་པས་ཆོས་ཀྱི་སྒོར་གྱུར་པའི་གསང་མཛོད་དུའང་བཞེད་མོ་ཀྱི། འོད་གསལ་རྫོགས་པ་ཆེན་པོ་ལྟར་ན། ཀུན་བྱེད་ལས། ཀུན་བྱེད་རྒྱལ་པོ་ང་ཡིས་ནི། །ཀུན་རྒྱུ་བྱང་ཆུབ་སེམས་ལས་ནི། །སེམས་ཀྱི་ངོ་བོ་འབྱུང་ཆེན་ལྔ། །སྟོན་པ་བྱང་ཆུབ་སེམས་ལྔ་ཕྱུང་། །སྐུ་ནི་ལོངས་༼༢༦༨༽སྤྱོད་རྫོགས་པའི་སྐུ། །ཆོས་ནི་རང་གི་ངོ་བོས་འཆད། །སྟོན་ནི་རང་གི་རང་བཞིན་སྟོན། །སྟོན་པ་ལོངས་སྤྱོད་རྫོགས་སྐུ་དེ། །དགོངས་པ་ཉིད་ལ་ཉིད་མི་རྟོག །ཡུལ་ཆོས་གཞན་ལའང་རྟོག་མི་བྱེད། །བྱང་ཆུབ་སེམས་ཀྱི་སྟོན་པ་ལྔས། །ཀུན་ཀྱང་ཆོས་ཉིད་དེ་བཞིན་སྟོན། །ཞེས་དང་། བཤད་རྒྱུད་མདོ་བཅུ་ལས། ནམ་མཁའ་སྣང་བྱེད་ཁྱབ་པའི་དབྱིངས། །མ་བསྒྲིབས་པ་ཡི་བྱང་ཆུབ་སེམས། །སྒྲིབ་ པ་མེད་པའི་ཁྱད་པར་གྱིས། །ཀུན་ལ་ཁྱབ་པའི་བདག ་ཉིད་དོ། །ས་ནི་སྲ་བྱེད་རྡོ་རྗེ་དབྱིངས། །སྐྱེ་བ་མེད་པའི་བྱང་ཆུབ་སེམས། །འཇིག་པ་མེད་པའི་ཁྱད་པར་གྱིས། །འགྱུར་བ་མེད་པའི་ཆོས་ཉིད་དོ། །ཆུ་ནི་རིན་ཆེན་གཏེར་གྱི་དབྱིངས། །ཐམས་ཅད་སྣུམ་པའི་བྱུང་ཆུབ་སེམས། །ཐམས་ཅད་སྡུས་པའི་ཁྱད་པར་གྱིས། །འབྱེད་པར་བྱེད་པའི་ཆོས་ཉིད་དོ། །མེ་ནི་རྣམ་དག་པདྨའི་དབྱིངས། །གཟུང་འཛིན་དག་པའི་བྱང་ཆུབ་སེམས། །རྣམ་པར་དག་པའི་རང་བཞིན་གྱིས། །སྐྱོན་དང་བྲལ་བའི་ཆོས་ཉིད་དོ། །རླུང་ནི་བརྩོན་འགྲུས་ཡངས་པའི་དབྱིངས། །ཐོགས་པ་མེད་པའི་བྱང་ཆུབ་སེམས། །ཡང་ཞིང་གཡོ་བའི་ཁྱད་པར་གྱིས། །འགག་པ་མེད་པའི་ཆོས་ཉིད་དོ། །ཞེས་གསུངས་ཏེ། བྱང་ཆུབ་སེམས་ཀྱི་ཆོས་ཉིད་སྔར་སངས་རྒྱས་པས། འབྱུང་གནས་ཀུན་ལས་ཁྱད་པར་དུ་འཕགས་པས་ཆོས་ཀྱི་དབྱིངས་སུ་སངས་རྒྱས་པའི་ཆེ་བ་ཕུལ་དུ་བྱུང་བ་ཉིད་དེ། ལོངས་སྤྱོད་རྫོགས་སྐུར་བཞག་པ་ནི། ངོ་བོ་དབྱེར་མེད་ཡིན་ཀྱང་མཚན་ཉིད་ཀྱི་ཚུལ་ནས་ཐེག་འོག་ལ་འདོད་པའི་ལོངས་སྐུ་རིགས་ལྔ་དང་འབྱུང་བ་ལྔ་ཚུལ་མཚུངས་ཤིང་དོན་གཅིག་པ་དང་། རང་སྣང་ཕྱོགས་མེད་དུ་ཤར་ནས་ལོངས་སྤྱོད་པའི་ཕྱིར་ཡིན་ལ། སྐལ་ལྡན་ཤིན་ཏུ་རྣལ་འབྱོར་ལ་རང་གི་ངོ་བོས་ཆོས་སྟོན་ཏེ་རང་བཞིན་གསལ་བར་བྱེད་པའོ། །དེས་ན་འདི་ནི་སྟོན་པ་དང་བསྟན་པ་ཐ་དད་མེད་པར་རྩོལ་བས་མ་བྱས་པར་ཡུལ་མེད་རང་བཞིན་ལྷུན་རྫོགས་ཆེན་པོར་བསྟན་པ་རང་གསལ་དུ་བཀྲམ་པའོ། །འོ་ན་འདི་ཉིད་དང་ཀུན་བྱེད་སོགས་ལས། ལོངས་སྐུའི་བསྟན་པ་ཀྲི་ཡོག་གསུམ་༼༢༦༩༽དུ་བཤད་དོ་སྙམ་ན། དེ་ནི་བརྒྱུད་ནས་སྟོན་པས་ཡེ་ཤེས་སྒྱུ་མའི་ལོངས་སྐུའི་མཚོན་བྱེད་སྒྲའི་བསྟན་པ་ཡིན་ལ། འདིར་ནི་མཚོན་བྱའི་ངོས་ནས་གནས་ལུགས་དོན་གྱི་རྫོགས་ཆེན་དང་། དེ་ལྟར་ཡིན་པ་ལ་ཡིན་པར་སྟོན་པ་རྗོད་བྱེད་ཀྱི་སྒྲའི་རྫོགས་ཆེན་ནོ། །དེས་ན་རང་སྣང་ལོངས་སྤྱོད་རྫོགས་སྐུའི་རང་རིག་བདེ་བ་ཆེན་པོའི་བསྟན་པ་ཡིན་པས་ཁྱད་པར་ཤིན་ཏུ་ཆེ་སྟེ་ཚུལ་དེས་གཞན་ཡང་མཚོན་ནོ། །འདི་དག་གི་དོན་གྱི་གནས་མཐར་ཐུག་པ་ནི་ཡང་གསང་བ་སྙིང་ཏིག་གི་དགོངས་པ་ལྟར་ཐེག་མཆོག་རིན་པོ་ཆེའི་མཛོད་སོགས་ལས་ཤེས་པར་བྱའོ། །དེ་བཞིན་དུ་གཞན་ཡང་ཡང་དག་པའི་སྨན་གྱི་རང་བཞིན་དང་འདྲ་བ་ཡིན་པས་ན། རྒྱུན་དུ་འགྲོགས་པས་ཟུག་རྔུ་བསྐྱེད་པའི་འཁོར་བར་བརྟགས་པའི་ནད་ཀྱི་གཅོང་རྙིང་ཐོག་མ་མེད་པ་ནས་ཡོད་པ་ཐམས་ཅད་དུས་གཅིག་ལ་རྣམ་པར་འབྱིན་པར་བྱེད་དོ། །འདི་ལྟར་འཚོ་བའི་ཟས་སྐོམ་དང་འདྲ་བར་རང་བཞིན་བསྐྱེད་པའི་གནས་སུ་ནར་སོན་པར་བྱེད་པས། བརྟགས་པས་དག་པ་བསོད་སྙོམས་སོགས་མིན་པར་སུ་ཞིག་ཡང་དག་པའི་ཏིང་ངེ་འཛིན་དང་ལྡན་པས་འཚོ་བ་དག་པ་སངས་རྒྱས་དངབྱང་ཆུབ་སེམས་དཔའ་རིག་འཛིན་ཀུན་གྱི་ཡིད་བཞིན་གྱིས་གསོས་དང་བཏུང་བར་གྱུར་པའོ། །རང་བཞིན་ནམ་ཆོས་ཉིད་རྟོགས་པའི་ཤེས་རབ་ནི། དཔེར་ན་རལ་གྲི་སོགས་གནོད་པའི་རང་བཞིན་གྱི་མཚོན་རྣོན་པོ་ལྟ་བུ་ཡིན་པས་སྡུག་བསྔལ་གྱིས་གདུང་བའི་འཁོར་བའི་རྒྱ་མཚོ་ཐར་དཀའ་བ་རྣམས་རྟོགས་མ་ཐག་ཏུ་རྩད་ནས་རྣམ་པར་གཅོད་པ་ཡིན་ན་གོམས་ན་ལྟ་ཅི་སྨོས་པའོ། །མཚན་ཉིད་མ་ནོར་བར་རྟོགས་པ་ནི། དཔེར་ན་ཉི་མ་ལྟ་བུའི་རང་བཞིན་ཡིན་པས་མ་རིག་པའི་མུན་ཁང་དང་སྣང་སྟོང་གི་མཐའ་གཉིས་དག་པའི་རང་སྣང་གི་ཆོས་ཉིད་སྟོན་ཏེ་རང་གསལ་བར་བྱེད་པ་ཉིད་དོ། །གོམས་པའི་ཏིང་ངེ་འཛིན་བརྟན་པ་ནི། དཔེར་ན་རི་རབ་ཆུས་མི་བསྒུལ་བ་ལྟ་བུའི་རང་བཞིན་དུ་གྱུར་པས། རྟོགས་པ་ངང་ལས་མི་འགྱུར་བ་ནི། འདོད་ཡོན་ལ་ཞེན་པའི་ལོག་པར་རྟོག་པ་དང་འཁོར་བའི་གཡང་ས་ཅིས་ཀྱང་མི་བསྐྱོད་ཅིང་གཡོ་བར་བྱ་བ་དང་གཡོ་བྱེད་མེད་པར་འཕེལ་འགྲིབ་དང་༼༢༧༠༽བྲལ་བའོ། །རྟོགས་པའི་ཡོན་ཏན་རྒྱ་མཚོ་ལས་རླབས་འབྱུང་བ་ལྟ་བུའི་རང་བཞིན་དུ་ངེས་པས། དགོངས་པ་མི་གཡོ་བ་སྐྱེ་བ་མེད་པའི་ངང་ལས་དུས་བཞིར་མ་བཙལ་བར་སྣང་བ་སྣ་ཚོགས་ཀྱི་ཐུགས་རྗེའི་ཆོས་རྣམས་བྱིན་རླབས་ཀྱི་ཆོ་འཕྲུལ་དུ་འབྱུང་བའོ། །དེ་བཞིན་དུ་གསང་དོན་རྟོགས་པས་སྐྱེ་བ་མེད་པའི་རོས་བྱུག་པས་དུག་ལྔའང་ཡེ་ཤེས་ལྔར་དག་པའི་རྩི་ཡི་རང་བཞིན་དུ་གྱུར་པས། དཔེར་ན་སྔགས་སམ་རྩི་སྦྱོར་གྱིས་དུག་ལ་སྨན་དུ་འགྱུར་བ་དང་གསེར་འགྱུར་གྱི་རྩི་བཞིན་དུ་གཟུང་འཛིན་གྱི་དྲི་མའི་དུག་ཉིད་མ་སྤངས་པར་མཉམ་པ་ཆེན་པོར་སངས་རྒྱས་པར་བྱེད་པ་ཡིན་ནོ། །དེ་ལྟར་རང་བཞིན་བཅུ་གཉིས་དང་། ལ་སོགས་པ་ཞེས་བསྡུ་བའི་དོན་གྱིས་རང་བཞིན་མཐའ་ཡས་པ་མཆོག་གང་ཇི་སྙེད་དང་ལྡན་ཏེ། རིལ་གསང་སྔགས་མཚོན་པའི་སྒོར་མ་གྱུར་པ་མེད་པའི་ཕྱིར་རོ། །དེས་ན་ཆོས་ཉིད་ངོ་བོ་ཉིད་ཀྱི་གསང་སྔགས་ནི། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལྟར། རྣམ་པར་རྟོག་པ་ཐམས་ཅད་བྲལ་བཞིན་ཅིར་ཡང་མི་རྟོག་པའི་ངང་ལས་ཡོན་ཏན་ཇི་སྙེད་པ་ཐམས་ཅད་རང་བྱུང་དུ་འཆར་བ་ཡང་། ལམ་པས་འཕྲལ་དུ་མེད་པ་ལས་བྱས་ཏེ་མ་བཅོས་ཤིང་སེལ་ཞུགས་པ་མེད་པས་མ་བསླད་པར་ཡེ་ནས་མ་བྱས་མ་བཅོས་པའི་ངོ་བོ་དེ་ཁོ་ན་ཉིད་ཇི་བཞིན་པ་གཉིས་སུ་མེད་པ་ལས་བྱིན་རླབས་རང་སྣང་བ་ཉིད་དུ་གྱུར་པའོ།།

གསུམ་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། རྣམ་པར་བགྲོས་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་གསང་སྔགས་ཀྱི་རང་བཞིན་དུ་ཤེས་པར་བྱའོ། །ཞེས་ཐོས་པ་རྣམ་པར་བགྲོས་པའོ།།

གྲོགས་པོ་དག ཅེས་བོས་ནས། བསྟན་པ་དེ་དག་ནི་གསང་སྔགས་ཀྱི་རང་བཞིན་དུ་ཤེས་པར་བྱའོ། །ཞེས་སྡུད་པ་པོ་ཕྱག་ན་རྡོ་རྗེས་རྒྱལ་བ་མང་པོ་ལས་ཐོས་པ་རྣམས་འདིར་བཀའ་སྩལ་ཏེ་རྣམ་པར་བགྲོས་པས་རང་བཞིན་དང་པོའི་ངོ་བོ་བསྟན་པའོ།།

གཉིས་པ་ལྟ་བའི་རང་བཞིན་བསྟན་པ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

གྲོགས་པོ་དག ཅེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་ལ་ལྟ་བའི་རང་བཞིན་གང་ཞེ་ན། འདི་ལྟ་སྟེ།

གྲོགས་པོ་དག དེ་ལ་སྐྱེས་བུ་དམ་པས་ལྟ་བའི་རང་བཞིན་ཁྱུང་ལྡིང་བ་ལྟ་བུ་ཉེ་བར་བསྟན་པ་གང་ཞེ་ན། འདི་ལྟ་སྟེ།

གཉིས་པ་རྒྱས་པར་བཤད་པ་ལ་༼༢༧༡༽གཉིས་ཏེ། ཅི་ལ་ཡང་ཉམ་མི་ང་བར་རྟོགས་པར་གདམས་པ། ལྟ་བའི་ཁྱད་པར་མ་འདྲེས་པར་བཤད་པའོ། །དང་པོ་ནི།

ཕྱག་དཔེ་གཅིག་ན། ཆོས་ཉིད་ནམ་མཁའ་ལྟ་བུ་འདིར། །མ་ནོར་ཞེས་དང་། གཞན་ཀུན་ན། མ་ནོར་མི་འགྱུར། ཞེས་པ་ནས། ཅན་གྱིས་བལྟ་བར་བྱ། །ཞེས་པའི་བར་གྱིས་བསྟན་ཏེ།

མ་ནོར་མི་འགྱུར་ངེས་བཅད་དེ། །མ་ཆགས་མི་བརྟག་ཉམ་མི་ང་། །དཔེར་ན་ནམ་མཁའི་རང་བཞིན་ལས།།

སྤྲིན་དང་ན་བུན་ཁུ་རླངས་དང་། །ཟླ་བ་ཉི་མ་སྐར་ཚོགས་དག །སྣང་ཡང་ནམ་མཁའ་བཞིན་དུ་གནས།།

དེ་བཞིན་ཉིད་ཀྱི་ནམ་མཁའ་ལས། །མཚན་མའི་རྣམ་རྟོག་ཅི་བྱུང་ཡང་།།

ཆོས་ཉིད་ནམ་མཁའ་བཞིན་གནས་པར། །རྣལ་འབྱོར་ཅན་གྱིས་བལྟ་བར་བྱ།།

དེ་ཡང་ཆོས་ཉིད་ནམ་མཁའ་ལྟ་བུ་ལྟ་བ་མཐའ་དབུས་མེད་པར་སྟོན་པའི་སྐབས་འདིར། ཆོས་རྣམས་ཀྱི་ཆོས་ཉིད་དེ་ཁོ་ན་ཉིད་ཀྱི་དོན་མཆོག་མ་ནོར་ཞིང་མི་འགྱུར་བའི་དོན་དུ་བློ་ཡིས་ངེས་པ་ཐག་བཅད་དེ། དེ་ལྟར་ཐག་ཆོད་པའི་ཤེས་རབ་ཟིན་ཆགས་ཀྱི་རྟོག་པ་དང་བྲལ་བས་གང་ལའང་མ་ཆགས་ལ་ཡུལ་དུ་མི་རྟོག་པར་རང་རིག་པར་ལྷུན་གྱིས་གྲུབ་པའི་ངང་དུ་གྱུར་པས་གོལ་སྒྲིབ་ཏུ་ལྟུང་བའི་མཐའ་སྣང་གང་ལའང་ཉམ་མི་ང་བས་བསྙེངས་པ་ཐམས་ཅད་དང་བྲལ་བའི་ལྟ་བའོ། །དེའི་ཚུལ་ཇི་ལྟ་བུ་ཞེ་ན། དཔེར་ན་ནམ་མཁའི་རང་བཞིན་ལས། སྤྲིན་དང་ན་བུན་དང་ཁུག་རླངས་དང་ཟླ་བ་དང་ཉི་མ་དང་སྐར་ཚོགས་ལ་སོགས་པ་གང་དང་ཅི་ཞིག་སྣང་ཡང་ནམ་མཁའ་ཉིད་ཀྱི་རང་བཞིན་ལས་མ་གཡོས་པར་དེའི་ཀློང་དུ་གནས་ཤིང་སོ་སོར་གསལ་བའོ། །དཔེ་དེ་ལྟར་དུ་དོན་གྱི་རང་བཞིན་ཆོས་ཉིད་དེ་བཞིན་ཉིད་ཀྱི་ནམ་མཁའ་རྣམ་པར་དག་པའི་ངང་ལས་མཚན་མའི་རྣམ་པར་རྟོག་པའི་རྒྱུ་འགྲུལ་ཅི་ལྟར་བྱུང་ཡང་ཆོས་ཉིད་དོན་གྱི་ནམ་མཁའ་དག་པའི་རང་བཞིན་དུ་གནས་པས་མ་བཀག་ཀྱང་བྱུང་ཚོར་གྱི་རྒྱུ་བ་མེད་པར་ཆོས་ཉིད་རང་སྣང་གི་དགོངས་པ་ཡིན་པའི་དོན་དེ་ཉིད་ཤེས་རབ་ཀྱིས་ལྟ་བ་རྟོགས་པ་དང་ཏིང་ངེ་འཛིན་དུ་ལྡན་པས་རྣལ་འབྱོར་ཅན་གྱིས་བལྟ་ཞིང་ཤེས་པར་བྱ་བའོ།།

གཉིས་པ་ལྟ་བའི་ཁྱད་པར་མ་འདྲེས་པར་བཤད་པ་ནི།

ཇི་བཞིན་མ་བཅོས། ཞེས་པ་ནས། ཉིད་དུ་སྣང་བར་ཟད། །ཅེས་པའི་བར་གྱིས་བསྟན་ཏེ།

ཇི་བཞིན་མ་བཅོས་དེ་བཞིན་ལ། །མཐོང་དང་མ་མཐོང་ཁྱད་པར་གྱིས། །ལྟ་བའི་ཁྱད་པར་སོ་སོར་ལྟ། །རྣམ་པར་རྟོག་ལ་རྣམ་རྟོག་ཉིད། །ལོག་སྲེད་ཅན་ལ་ལོག་རྟོག་གཉིས། །ཕྱོགས་འཛིན་ཙམ་ལ་ཐ་སྙད་རྫས། །ཕྱོགས་ཤེས་དག་ལ་སྒྱུ་མར་སྣང་། །དེ་ཉིད་དེར་ངེས་ནམ་མཁར་མཐོང་། །ནམ་མཁའ་བཞིན་གནས་ནམ་མཁའ་ལའང་།།

ནམ་མཁའ་ཉིད་དུ་སྣང་བར་ཟད།།

འོ་ན་ཐེག་པ་སོ་སོའི་ལྟ་བའི་སྣང་ལུགས་ནི་གང་ཞེ་ན། ཆོས་ཉིད་ཇི་བཞིན་པའི་གསང་སྔགས་མ་བཅོས་ལྷུན་གྱིས་གྲུབ་པའི་ཆོས་དབྱིངས་དེ་བཞིན་ཉིད་ལ་དམིགས་པ་ཐ་དད་ཀྱིས་ལ་ལས་མཐོང་ཞིང་རྟོགས་པ་དང་། ལ་ལས་མ་མཐོང་ཞིང་མ་རྟོགས་པའི་ཤེས་རབ་ཀྱི་ཁྱད་པར་གྱིས་འཇིག་རྟེན་པ་དང་ཐེག་པ་དགུ་ཡི་༼༢༧༢༽ལྟ་བའི་ཁྱད་པར་སྐས་གདངས་ལྟ་བུར་སོ་སོར་ཐ་དད་དུ་འཕྲོས་པ་ཡིན་པར་བལྟ་ཞིང་ཤེས་པར་བྱའོ། །དེ་དག་རྟོགས་པའི་ཚུལ་ཇི་ལྟ་བུ་ཡིན་ཞེ་ན། བྱང་ཆུབ་སེམས་ཀྱི་དེ་ཁོ་ན་ཉིད་དེ་ནི་སོ་སོའི་སྐྱེ་བོ་བརྟགས་པའི་རྣམ་པ་རྟོག་པ་ཅན་ལ་སྒྲིབ་པའི་དབང་གིས་རྣམ་རྟོག་ཉིད་དུ་སྣང་བའོ། །མུ་སྟེགས་བྱེད་ལྟ་བ་ངན་པའི་ལོག་སྲེད་ལ་ཆགས་པ་ཅན་ལ་ལོག་པར་རྟོག་པའི་དབང་གིས་རྩབ་རྟག་ཆད་ཉིད་དུ་སྣང་ངོ་། །ཉན་ཐོས་དང་རང་རྒྱལ་ཕྱོགས་ཙམ་རྟོགས་པའི་འཛིན་པ་ཅན་ལ་ཐ་སྙད་ཐ་དད་ཀྱི་མཐོང་བ་རྡུལ་ཕྲ་རབ་འདུས་པ་དང་རྟེན་འབྲེལ་འཇུག་ལྡོག་གི་ཆོས་ཙམ་དང་འཛིན་ཤེས་སྐད་ཅིག་མའི་རྫས་སུ་སྣང་བའོ། །དོན་དམ་པའི་ཕྱོགས་ཙམ་ཤེས་ཤིང་རྟོགས་ཀྱང་ཡང་དག་ཉིད་མ་མཐོང་བའི་རྣམ་རིག་པ་དང་དབུ་མ་པ་བདེན་པ་རེས་མོས་པ་ཅན་དག་ལ་ཀུན་རྫོབ་ཏུ་རྨི་ལམ་ལྟ་བུ་དང་སྒྱུ་མར་མཐོང་ལ་དོན་དམ་པར་རང་རིག་རྒྱུན་དང་བཅས་པ་དང་མ་སྐྱེས་པའི་ཆོས་ཉིད་དུ་སྣང་བའོ། །གསང་སྔགས་ཀྱི་དམ་པ་ཆེན་པོའི་ཤེས་པས་དོན་མ་ནོར་བ་དེ་ཉིད་རྟོགས་ཏེ་ངང་དེར་བློ་ངེས་པ་ལ་སྤྱོད་ཡུལ་ཐམས་ཅད་ཆོས་ཉིད་ཀྱི་ནམ་མཁར་མཐོང་སྟེ། དཔེར་ན་ནམ་མཁའ་དང་བའི་རང་བཞིན་ལྟ་བུར་ཆོས་ཐམས་ཅད་མཐའ་དང་བྲལ་བར་གནས་པའི་ཆོས་ཉིད་མཉམ་པའི་ནམ་མཁའ་ཆེན་པོར་རྟོགས་པའི་རིག་པ་རང་ཤར་བ་ལ་མཐོང་ཐོས་ཐམས་ཅད་ཀྱང་ནམ་མཁའ་ལྟ་བུའི་ཆོས་ཉིད་དུ་སྣང་བར་ཟད་དེ། དེ་ལྟ་བུའི་དབྱིངས་ཀྱི་ངང་དུ་གསལ་བ་ལས་མཚན་མ་འཁྲུང་པར་སྣང་བའི་གཉིས་སུ་གྱུར་པ་མེད་པའོ།།

གསུམ་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། ངེས་པར་བགྲོས་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་ལྟ་བའི་རང་བཞིན་དུ་ཤེས་པར་བྱའོ། །ཞེས་ཐོས་པ་ངེས་པར་བགྲོས་པའོ།།

གྲོགས་པོ་དག དེ་དག་ནི་ལྟ་བའི་རང་བཞིན་གྱི་དོན་དེའི་ངོ་བོ་ཉིད་དུ་ཤེས་པར་བྱའོ། །ཞེས་ཐོས་པ་དམ་པ་ངེས་པར་བགྲོས་ཏེ་བསྟན་པའོ།།

གསུམ་པ་དམ་ཚིག་གི་རང་བཞིན་བཤད་པ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

གྲོགས་པོ་དག ཅེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་ལས་མི་འདའ་བའི་རང་བཞིན་གང་ཞེ་ན། འདི་ལྟ་སྟེ།

གྲོགས་པོ་དག ཅེས་བོས་ནས། དེ་ལས་མི་༼༢༧༣༽འདའ་བའི་དམ་ཚིག་གི་རང་བཞིན་གང་ཞེ་ན། ཉེ་བར་བསྟན་པ་འདི་ལྟ་སྟེ།

གཉིས་པ་རྒྱས་པར་བཤད་པ་ལ་བདུན་ཏེ། བསྲུང་དུ་མེད་པ་ཅིག་ཆར་བའི་དམ་ཚིག་བསྟན་པ། དེ་ལྟར་བསྲུང་དུ་མེད་པའི་ཆེ་བ་བཤད་པ། རིས་སུ་སྲུང་བ་གོལ་བར་བསྟན་པ། བསྲུང་དུ་མེད་པའི་སྲུང་ཚུལ་བཤད་པ། བསྲུང་དུ་མེད་པ་ལ་བློ་དང་འཚམས་པར་གྲགས་ལུགས་བསྟན་པ། དམ་ཚིག་གི་ངེས་ཚིག་བཤད་པ། བསྲུང་དུ་མེད་པ་ལས་མ་གཡོས་པར་བསྲུང་བར་བསྟན་པའོ། །དང་པོ་ནི།

ཆོས་ཉིད་ནམ་མཁའ། ཞེས་པ་ནས། ཚད་གཟུང་ག་ལ་ཡོད། །ཅེས་པའི་བར་གྱིས་བསྟན་ཏེ།

ཆོས་ཉིད་ནམ་མཁའ་ལྟ་བུ་འདིར། །ཐམས་ཅད་ཡོངས་ཀྱིས་གཅིག་པ་ལ།།

བསྲུངས་དང་མི་བསྲུང་ཕྱོགས་དང་བྲལ། །བསྲུང་བའི་ཚད་བཟུང་ག་ལ་ཡོད།།

སྐྱེས་མཆོག་ཅིག་ཆར་བའི་ལྟ་བའི་དམ་ཚིག་དམ་པ་ནི། ཡེ་ནས་མ་བརྟགས་མ་བསྙད་པའི་ངོ་བོ་ཆོས་ཉིད་ནམ་མཁའ་ལྟ་བུ་འདི་ཡི་ངང་འདིར་བསྲུང་བར་བྱ་བ་དང་ཆོས་ཐམས་ཅད་ཀུན་དབྱེར་མེད་ཆེན་པོར་ཡོངས་ཀྱིས་གཅིག་པར་གནས་པ་ལ་ནི་གཅིག་པུའི་དམ་ཚིག་ཞེས་ཀྱང་བྱ་སྟེ། གསང་བདག་དགའ་རབ་དཔའ་བོས་དམ་ཚིག་གི་ཀློང་ལས། འཁོར་འདས་ བདག་གཞན་བཟང་ངན་དུ། །དབྱེར་མེད་གཅིག་པུའི་དམ་ཚིག་ཡིན། །ཞེས་གསུངས་པ ་ལྟར་ཏེ། ཐིག་ལེ་ཉག་གཅིག་གི་ངང་ལས་འདའ་བ་མེད་པའོ། །དོན་ཕྱོགས་མེད་ཆེན་པོ་ལ་རིས་སུ་ཕྱེ་བའི་བསྲུང་བ་དང་མི་བསྲུང་བའི་བླང་དོར་གྱི་ཕྱོགས་དང་བྲལ་བ་ལ། འདི་སྲུང་འདི་མི་སྲུང་ཞེས་པའམ། རྩ་བ་དང་ཡན་ལག་གི་བསྲུང་བར་བྱ་བའི་ཚད་གཟུང་དུ་ག་ལ་ཡོད་དེ་མེད་པར་གཏད་འཛིན་ཀུན་དང་བྲལ་བ་ནི་ཕྱལ་བའི་དམ་ཚིག་ཆེན་པོ་ཞེས་ཀྱང་བྱ་སྟེ། དེ་ཉིད་ལས། ཡིན་མིན་ཡོད་མེད་བདེན་རྫུན་གྱི། །འཛིན་པ་བྲལ་བས་ཕྱལ་བ་ཡིན། །ཞེས་གསུངས་ཏེ། དེ་ལྟར་བསྲུང་དུ་མེད་པའི་ངང་དུ་འགགས་བསྡམས་པའོ།།

གཉིས་པ་དེ་ལྟར་བསྲུང་དུ་མེད་པའི་ཆེ་བ་བཤད་པ་ནི།

ནམ་མཁའ་ལྟ་བུའི། ཞེས་པ་ནས། ཐམས་ཅད་སྲུང་བ་ཡིན། །ཞེས་པའི་བར་གྱིས་བསྟན་ཏེ།

ནམ་མཁའ་ལྟ་བུའི་རྣལ་འབྱོར་པས། །ནམ་མཁའ་ལྟ་བུའི་དམ་ཚིག་བསྲུངས།།

གང་འདི་བསྲུང་མཚམས་མེད་པ་དེ། །དེས་ན་ཐམས་ཅད་བསྲུངས་པ་ཡིན།།

ཆོས་ཉིད་ནམ་མཁའ་ལྟ་བུའི་ངང་དུ་རང་རིག་པ་ཤར་བས་ས་དགུ་པ་དང་བཅུ་པའི་རྣལ་འབྱོར་པ་བློ་ཤིན་ཏུ་ཆེ་ཞིང་ཡངས་པས་ཕྱོགས་རིས་མེད་པ་ལས་མི་འདའ་བར་ནམ་མཁའ་ལྟ་བུའི་དམ་ཚིག་ཅི་ལའང་འཛིན་རྟོག་དང་བླང་དོར་མེད་པ་བསྲུང་བར་བྱའོ། །དེ་༼༢༧༤༽ལྟར་གང་སུ་ཡང་རུང་བ་སྒོ་འདིར་བསྲུང་བའི་རྣམ་གྲངས་ཀྱི་མཚམས་དང་བྲལ་ཏེ་འདའ་ཉམས་ཀྱིས་དཀའ་ཐུབ་མེད་པར་རིག་པ་ཀློང་དུ་གྱུར་ན་ནི་ཐིག་ལེ་བདེ་བ་ཆེན་པོའི་ངང་ལ་ཕྱོགས་རིས་མེད་པས་གང་དང་ཡང་མི་འགལ་བ་དེས་ནི་དམ་ཚིག་ཐམས་ཅད་མ་ཉམས་པར་སྲུང་བའང་ཡིན་པས་མེད་པའི་དམ་ཚིག་ཆེན་པོ་ཞེས་ཀྱང་བྱ་སྟེ། སྔ་མ་ལས། ཕྱོགས་དང་གྲངས་ཀྱི་བསྲུང་བྱ་དང་། །བྲལ་བས་མེད་པའི་དམ་ཚིག་ཡིན། །ཞེས་སོ།།

གསུམ་པ་རིས་སུ་སྲུང་བ་གོལ་བར་བསྟན་པ་ནི།

ཅི་ཕྱིར་ཐམས་ཅད། ཅེས་པ་ནས། གྱུར་པ་ག་ལ་ཡིན། །ཞེས་པའི་བར་གྱིས་བསྟན་ཏེ།

ཅི་ཕྱིར་ཐམས་ཅད་ཐམས་ཅད་ཀུན། །དམ་པ་ཡིན་པར་ངེས་པས་ན། །ཚད་འཛིན་ཚད་ཡོད་བྱེད་ཉིད་ཉམས། །གང་ལ་བསྲུང་མི་བསྲུང་བ་ཡི། །རྣམ་རྟོག་དེ་དག་མེད་ཀྱང་བླ། །དེ་འདྲ་བསྲུང་བའི་མཚམས་འཛིན་པ། །སྒྱུ་མ་ཡིན་པས་དམ་པ་མིན། །དེ་ལ་བསྲུང་ཞེས་སུ་ཞིག་ཟེར། །བསྲུངས་དང་མི་བསྲུང་ཚིག་མེད་དེ།།

ཆོས་ཉིད་དེ་ལ་བླང་དོར་མེད། དམ་པར་གྱུར་པ་ག་ལ་ཡིན།།

གཏན་ཚིགས་ཅི་ཡི་ཕྱིར་ན་བསྲུང་མཚམས་མེད་པའི་དམ་ཚིག་ཞེས་བྱ་ཞེ་ན། འཁོར་བའམ་བསྲུང་བྱའམ་རྩ་བའི་དམ་ཚིག་ཐམས་ཅད་དང་མྱ་ངན་ལས་འདས་པའམ་སྲུང་བྱེད་དམ་ཡན་ལག་གི་དམ་ཚིག་ཐམས་ཅད་ཀུན་ཀྱང་ཆོས་ཉིད་མཉམ་པ་ཆེན་པོའི་དམ་ཚིག་མཆོག་ཏུ་ཡེ་ནས་བྱུང་ཐེབས་པའི་ཉིད་ངེས་པར་ཡིན་པས་ན་ལྷུན་གྱིས་གྲུབ་པའི་དམ་ཚིག་ཞེས་ཀྱང་བྱ་སྟེ། སྔ་མ་ལས། ངང་གནས་ཉམས་པ་ལས་གྲོལ་བས། །བརྩལ་མེད་ལྷུན་རྫོགས་ཡེ་གྲུབ་པའོ། །ཞེས་གསུངས་པའི་ཕྱིར་ཏེ་རང་མཚན་རྟོག་ན་ངེས་པར་བསྲུང་ཉམས་མེད་པའོ། །གལ་ཏེ་འགྱུར་བ་ཅན་གྱི་དོན་ནི། དེ་ལྟར་མ་རྟོགས་པར་རིས་སུ་ཕྱེ་ནས་བསྲུང་བྱའི་ཁྱད་པར་ཚད་དུ་འཛིན་ཞིང་ཚད་སོ་སོར་ཡོད་པར་བྱེད་པ་ཉིད་ནི་རང་བཞིན་མཉམ་པའི་དམ་པ་ཆེན་པོ་འདི་ལས་ཉམས་པ་ཡིན་པའི་ཕྱིར་ན་རྣལ་འབྱོར་པ་གང་སུ་ཡང་རུང་བའི་བློ་ལ་བསྲུང་བ་དང་མི་བསྲུང་བའི་རྣམ་པར་རྟོག་པ་དེ་དག་མེད་ཀྱང་བླ་ཞེས་མེད་པ་ཁོ་ན་མཆོག་ཡིན་ཏེ་རྟོག་པའི་ཚུལ་དེས་མི་སྟོངས་པས་སོ། །དེ་ཅིའི་ཕྱིར་ཞེ་ན། དེ་འདྲའི་ཕྱོགས་རིས་ཅན་གྱི་བསྲུང་བའི་མཚམས་རྩ་བ་དང་ཡན་ལག་ཏུ་ཕྱེ་ནས་ཚད་འཛིན་བྱེད་དེ་བསྲུང་བ་ནི་དོན་མ་མཐོང་བར་སྒྱུ་མས་བསླུ་བ་ལྟ་བུར་གསོག་གསོབ་ཡ་མ་བརླ་ཙམ་ཡིན་པས་ཐེག་པ་མཆོག་གི་དམ་ཚིག་དམ་པ་མིན་པའི་ཕྱིར་ཏེ། དེ་བས་ན་དམིགས་ལྟ་ཅན་དེ་ལ་དམ་ཚིག་བསྲུང་ཞེས་བྱ་བའི་མིང་དུ་སུ་ཞིག་ཟེར་ཞིང་སྨྲ་སྟེ་དོན་ལ་མཁས་པ་སུ་ཡང་མི་སྨྲའོ། །༼༢༧༥༽དེའི་ཕྱིར་ཐབས་ཆེན་པོ་འདིར་བསྲུང་མཚམས་དང་བྲལ་བའི་ཆོས་ཉིད་ཀྱི་ངང་ལ་བསྲུང་སྟེ་མ་ཉམས་པར་དང་དུ་བླང་བ་དང་མི་བསྲུང་བར་ཉམས་པས་དོར་བར་བྱེད་པའི་ཚིག་ཡང་མེད་པ་དེ་ནི་ཐེག་པ་མཆོག་གི་དམ་ཚིག་ཡིན་པས་ཆོས་ཉིད་མཉམ་པའི་ངང་དེ་ལ་བསྲུང་མི་བསྲུང་གི་མཐའ་ཡི་བླང་དོར་གང་ཡང་མེད་པས་ན་དེ་ལྟར་ཡོད་པའི་དཀའ་ཐུབ་ཀྱི་རྟོག་པ་ཅན་ནི་དམ་ཚིག་མཆོག་ལ་གནས་པར་གྱུར་པ་ག་ལ་ཡིན་ཏེ་མ་ཡིན་པར་ངེས་སོ།།

བཞི་པ་བསྲུང་དུ་མེད་པའི་སྲུང་ཚུལ་བཤད་པ་ནི།

བསྲུང་དང་མི་བསྲུང་། ཞེས་པ་ནས། མེད་པའི་ངང་དུ་བསྡམ། །ཞེས་པའི་བར་གྱིས་བསྟན་ཏེ།

བསྲུངས་དང་མི་བསྲུང་ཆོས་རྣམས་ནི། །བསྲུང་དུ་མེད་པས་དེ་བཞིན་བཞག།

དེ་བཞིན་ཉིད་ཀྱི་དོན་དམ་ལ། །ཇི་བཞིན་པ་ཡི་བློ་བཞག་སྟེ། །བརྗོད་པ་མེད་པའི་ཐ་ཚིག་གིས།།

བསྲུང་མཚམས་མེད་པའི་ངང་དུ་བསྡམས།།

དེ་ལ་དམ་ཚིག་ཆེད་དུ་བྱེད་དེ་བསྲུང་བ་དང་ཆེད་དུ་བྱ་བ་མེད་པར་མི་བསྲུང་བའི་ཕྱོགས་ཆར་གྱུར་པའི་ཐེག་པ་མཐོ་དམན་གྱིས་ཆོས་རྣམས་གང་ཡང་འདིར་ནི་རང་བཞིན་ལ་ལྷུན་གྱིས་གྲུབ་པས་ཅི་ཡང་དང་དུ་བླངས་ཏེ་བསྲུང་དུ་མེད་པས་མཉམ་པའི་ངང་ལ་བྱ་བ་མེད་པར་དེ་བཞིན་ཉིད་ཀྱི་དོན་དུ་བློ་གཞག་པར་བྱ་སྟེ། ཐབས་ཇི་ལྟར་ཞེ་ན། ཆོས་ཉིད་མ་བཅོས་མ་བསླད་པས་དེ་བཞིན་ཉིད་ཀྱི་ངོ་བོ་སྤྲོས་པ་དང་བྲལ་བས་དོན་དམ་མཆོག་ལ་རིག་པའང་ཡེ་ཇི་བཞིན་པར་རང་སྣང་བ་ཡི་དུས་ན་བློ་ཅིར་ཡང་མ་སྐྱེས་ཏེ་མི་གཡོ་མི་འཛིན་པར་བཞག་པ་ནི་རྣལ་མ་ཉིད་ལ་བབ་པ་སྟེ། དེ་ཉིད་ཀྱི་ངང་དེ་ བདག་ཉིད་ཀྱི་རིག་པ་ལ་ཡེངས་བརྗེད་ཀྱིས་བྲལ་བ་མེད ་པར་དམ་བཅའ་བརྟན་པའི་ཐ་ཚིག་མཆོག་གིས་དོན་ལས་མི་འགྱུར་བར་འདི་བསྲུང་བ་དང་འདི་མི་བསྲུང་ཞེས་པའི་བསྲུང་མཚམས་ཀྱི་དབྱེ་བ་མེད་པའི་ངང་དུ་བསྡམས་ནས་གདེང་དང་སྲོག་ལས་མི་ཉམས་པར་བྱ་བ་སྟེ། དེ་ཉིད་ལས། བྱང་སེམས་ལྷུན་གནས་དམ་པའི་ངང་། །རྩོལ་བྲལ་གནས་ལ་ཉམས་པ་ཡི། །འཇིགས་དོགས་གདོད་ནས་མི་གནས་ཏེ། །ཀ་དག་ཡོན་ཏན་ལྷུན་གནས་གདེང་། །དེས་ན་བསྲུང་བྱ་ཕྱོགས་རིས་གྲངས། །རྣམ་པར་དབྱེ་བ་བཟང་ངན་དང་། །མཚམས་བཟུང་མི་གནས་བདེ་བ་ཆེ། །རྩོལ་བྲལ་ངེས་པའི་སྲོག་གིས་གནས། །ཞེས་གསུངས་པ་ལྟར་ལ་བཟླ་སྟེ་ལྟ་བའི་དམ་ཚིག་གིས་ཆིངས་ཀྱིས་བཅིངས་པར་བྱའོ།།

ལྔ་པ་བསྲུང་དུ་མེད་པ་ལ་བློ་དང་འཚམས་པར་གྲགས་ལུགས་བསྟན་པ་ནི།

བསྲུང་མེད་ནམ་མཁའི། ཞེས་པ་ནས། ངོ་ལ་སོ་སོར་གྲགས། །ཞེས་པའི་བར་གྱིས་བསྟན་ཏེ།

བསྲུང་མེད་ནམ་མཁའི་དམ་ཚིག་འདི། །ཇི་ལྟར་གྲགས་པའི་རང་བཞིན་ལ། །སྡོམ་དང་ཚུལ་ཁྲིམས་སོ་སོར་སྣང་། །འཇིག་རྟེན་པ་ལ་ཆད་མདོ་བཙན། །བྱིས་པ་རྣམས་ལ་ཚུལ་ཤེས་པ། །ནར་སོན་པ་ལ་སྡོམ་པར་གྲགས།།

བླ་མེད་མཆོག་ལ་དམ་པར་སྣང་། །གཅིག་གི་དོན་ལས་མ་གཡོས་ཀྱང་། །འདུལ་བའི་ངོ་ལ་སོ་སོར་གྲགས།།

༼༢༧༦༽དེ་ལྟར་སྒོ་གསུམ་ཆེད་དུ་བསྡོམས་ཏེ་བསྲུང་བ་མེད་པར་ཆོས་ཉིད་ནམ་མཁའི་དགོངས་པ་གནས་པའི་དམ་ཚིག་ཆེན་པོ་འདི་ཡི་ཁྱད་པར་ལས་བློའི་རིམ་པ་བཞིན་དུ་གདུལ་བྱ་སོ་སོར་རང་རང་གི་འདུལ་བའི་ཚད་དུ་ཇི་ལྟར་གྲགས་པ་ལྟར་སྣང་བའི་རང་བཞིན་ལ་སྡོམ་པ་དང་དམ་ཚིག་རྒྱ་མཚོ་ལྟ་བུ་དང་ཉིས་བརྒྱ་ལྔ་བཅུའི་ཚུལ་ཁྲིམས་ལ་སོགས་པ་ངེས་ཚིག་སོ་སོར་གསལ་ཞིང་སྣང་བ་ནི་འདི་ལྟ་སྟེ། འཇིག་རྟེན་གྱི་སྐྱེ་བོ་ཕལ་པ་རྣམས་ལ་ཆད་མདོ་དང་མནའ་ཉིད་བཙན་པ་རུ་སྣང་ངོ་། །དོན་ལ་ཤེད་མ་བྱེ་བས་བྱིས་པ་ཉན་ཐོས་རྣམས་ལ་ཚུལ་ཁྲིམས་ཀྱི་བསླབ་པ་སྤོང་བའི་ཤེས་པ་ཞེས་སུ་གྲགས་ཤིང་སྣང་ངོ་། །དོན་ཕྱོགས་ལ་ཤེད་བྱེ་བས་ནར་སོན་པ་བྱང་ཆུབ་སེམས་དཔའ་ལ་སྡོམ་པ་ཞེས་བྱ་བར་གྲགས་སོ།།

ཐེག་པ་ཆེན་པོའི་གསང་སྔགས་ཕྱི་པ་དང་བླ་མེད་ནང་པ་མཆོག་ལ་རྩ་བ་དང་ཡན་ལག་གི་དམ་ཚིག་ཉིད་དུ་ངེས་པར་སྣང་ཞིང་གྲགས་སོ། །དེ་ལྟ་བུའི་སྣང་ལུགས་དེ་དག་རྣམས་ནི། དམ་ཚིག་ཆེན་པོ་ནོར་བུ་རིན་པོ་ཆེ་ལྟར་དམ་པ་མང་པོའི་དངོས་གཞིར་གྱུར་པས་རང་བཞིན་གཅིག་གི་དོན་ལས་མ་གཡོས་པར་གནས་ཀྱང་སྐྱེ་བོ་ནས་ཨ་ནུའི་བར་གྱི་གདུལ་བྱ་རྣམས་ཇི་ལྟར་འདུལ་བའི་སྣང་ངོ་དང་འཚམས་པར་རང་རང་ལ་སོ་སོར་སྣང་ཞིང་གྲགས་པར་གྱུར་པ་ཁོ་ན་ཡིན་ནོ།།

དྲུག་པ་དམ་ཚིག་གི་ངེས་ཚིག་བཤད་པ་ནི།

དེ་བཞིན་ཉིད་ལྡན། ཞེས་པ་ནས། འདས་ན་ཚིག་པར་འགྱུར། །ཞེས་པའི་བར་གྱིས་བསྟན་ཏེ།

དེ་བཞིན་ཉིད་ལྡན་དམ་པ་སྟེ། །དེ་ལས་འདས་ན་འཚིག་པར་འགྱུར།།

དེ་བས་ན་དེ་ཁོ་ན་ཉིད་ཆོས་ཉིད་དེ་བཞིན་ཉིད་ཀྱི་དོན་རྟོགས་པ་དང་ལྡན་ཅིང་གོམས་པ་ཅན་ནི་དམ་པར་ངེས་པ་སྟེ་དུས་བཞི་ཀུན་ཏུ་འདའ་བ་དང་ཉམས་པ་མེད་པར་རྣམ་རྟོག་ཀུན་སྲེག་པར་བྱེད་དོ། །གལ་ཏེ་ལྟ་བ་དང་བྲལ་ནས་དོན་དེ་ལས་འདས་པར་གྱུར་ན་རང་གི་རྒྱུད་ཚིག་སྟེ་འོག་ཏུ་ལྟུང་བར་འགྱུར་བས་དམ་ཚིག་ཆེན་པོ་ཞེས་པའི་ངེས་ཚིག་གིས་བསྟན་པ་ཡིན་ཏེ། རིན་པོ་ཆེ་རྒྱན་ལས། བྱང་ཆུབ་སེམས་ཉིད་དམ་པའི་དོན། །གནས་དང་མི་གནས་ཁྱད་པར་ལས། །རྣམ་པར་རྟོག་དང་རང་རྒྱུད་སྲེག །དམ་ཚིག་ཅེས་སུ་དཔའ་བོས་གསུངས། །ཞེས་སོ།།

བདུན་པ་བསྲུང་དུ་མེད་པ་ལས་མ་གཡོས་པར་བསྲུང་བར་བསྟན་པ་ནི།

གཅིག་བསྲུང་བས་ན། ཞེས་པ་ནས། དོན་དུ་འགྱུར་བར་བྱ། །༼༢༧༧༽ཞེས་པའི་བར་གྱིས་བསྟན་ཏེ།

གཅིག་བསྲུངས་པས་ན་ཀུན་བསྲུངས་པའི། །དམ་པའི་དམ་ཚིག་ཆེན་པོ་འདི།།

ཀུན་དང་འགལ་བར་མི་བྱ་ཞིང་། །གཅིག་གི་དོན་དུ་འགྱུར་བར་བྱ།།

ངེས་པའི་ཆོས་ཉིད་དེ་བཞིན་ཉིད་ཀྱི་དོན་རྟོགས་ནས་རིས་མེད་མཉམ་པ་ཆེན་པོའི་དམ་ཚིག་གཅིག་བསྲུང་བས་དོན་ལས་འདའ་ཉམས་གང་ཡང་མེད་པས་ན་བསྲུང་མཚམས་ཅན་གྱི་དམ་ཚིག་སྡོམ་པ་ཐམས་ཅད་ལ་ཞིག་རལ་ལྟ་བུར་བྱུང་ཡང་ཀུན་ཀྱང་དོན་ལ་བསྲུང་བར་འགྱུར་བས་སྐྱོན་དང་བྲལ་བའི་དམ་པའི་དམ་ཚིག་ཆེན་པོ་འདི་ནི། གོང་དུ་བཤད་པའི་སོ་སོའི་སྐྱེ་བོ་ནས་ཨ་ནུ་མན་ཆད་ཐེག་པ་སོ་སོ་ཀུན་གྱིས་བསྲུང་མཚམས་རྣམས་དང་འགལ་བར་མི་བྱ་བ་ནི་འདིར་བྲེ་ཕུལ་གྱི་ཚུལ་གྱིས་ཚང་བ་དང་། རྒྱལ་པོ་དང་འབངས་ལྟ་བུའི་ཚུལ་གྱིས་ཐེག་པ་ཀུན་གྱི་བསྲུང་བ་རྣམས་དང་དུ་བླང་ཞིང་ངོ་བོས་དག་པར་གྱུར་པ་དེ། འོན་ཀྱང་དེ་དག་ཐམས་ཅད་དམ་པ་ཆེན་པོ་གང་གཅིག་གི་རང་བཞིན་གྱིས་རྒྱས་ཐེབས་པའི་དོན་གྱི་རང་བཞིན་རྟོགས་ནས་གདེང་དུ་ཆུད་དེ་དོན་ལས་འགྱུར་བ་མེད་པར་མི་ཉམས་པར་བྱ་བའི་དོན་ཏེ། འདི་ནི་སྡོམ་པ་གསུམ་ལྡན་གྱི་ལུང་དུའང་དྲང་ངོ་ཞེས་གསུངས་སོ།།

གསུམ་པ་ཞབས་བསྡུ་བ་ནི།

གྲོགས་པོ་དེ་དག ཅེས་པ་ནས། དག་པར་བགྲོས་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་མི་འདའ་བའི་རང་བཞིན་དུ་ཤེས་པར་བྱའོ།།

ཞེས་ཐོས་པ་ཡོངས་སུ་དག་པར་བགྲོས་པའོ།།

གྲོགས་པོ་དག དེ་དག་ནི་མི་འདའ་བའི་རང་བཞིན་དུ་ཤེས་པར་བྱའོ། །ཞེས་ཐོས་པ་དམ་པ་ཡོངས་སུ་དག་པར་བགྲོས་ཏེ་དམ་ཚིག་གི་ངོ་བོ་བསྟན་པའོ།།

བཞི་པ་སྤྱོད་པའི་རང་བཞིན་བསྟན་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ཀྱེ་གྲོགས་པོ། ཞེས་པ་ནས། དམ་པའི་རིགས་ཞེས་བཤད། །ཅེས་པའི་བར་གྱིས་བསྟན་ཏེ།

ཀྱེ་གྲོགས་པོ་དག་དེ་དེ་ལྟར་སྤྱོད་པའི་རང་བཞིན་གང་ཞེ་ན། འདི་ལྟ་སྟེ། ལུས་དང་ངག་དང་ཡིད་གསུམ་གྱིས།།

མཐའ་གསུམ་ཡོངས་སུ་དག་རྫོགས་ན། །དམ་པའི་སྤྱོད་པ་ཡིན་པས་ན།།

དམན་མིན་དམ་པའི་རིགས་ཞེས་བཤད།།

ཀྱེ་གྲོགས་པོ་དག ཅེས་བོས་ནས་ལྟ་བ་དང་དམ་ཚིག་བསྟན་པ་དེ་ལྟར་འདིར་གསང་བ་མཆོག་གི་རང་དོན་གྱི་སྤྱོད་པའི་རང་བཞིན་ཉེ་བར་བསྟན་པ་གང་ཞེ་ན། འདི་ལྟ་སྟེ། ལས་དང་པོ་པའི་ས་ནས་ལུས་དང་ངག་དང་ཡིད་ཀྱི་སྒོ་གསུམ་གྱི་ལས་ཀྱི་མཐའ་གསུམ་ཉེས་པས་མ་གོས་པར་ཡོངས་སུ་དག་པའི་རང་བཞིན་དུ་རྫོགས་ཏེ་མཐར་ཕྱིན་པ་ན། དེ་ནི་ཐེག་པ་ཆེན་པོའི་སྤྱོད་པ་རྨད་དུ་བྱུང་བ་ཡིན་པའི་ཕྱིར། སྐྱེས་བུ་དམ་པ་ལམ་ལ་ཞུགས་པའི་སྤྱོད་པ་དམ་པ་ཡིན་པས་ན་རིགས་ངན་དུ་གྱུར་པ་༼༢༧༨༽དམན་པའི་སྤྱོད་པ་མིན་ཏེ། ཐེག་པ་ཆེན་པོའི་རྒྱུད་འཛིན་པ་ཞེས་བཀའ་ལས་གསུངས་པས་གསང་སྔགས ་དམ་པའི་རིགས་ཅན་གྱིས་སྤྱོད་པ་ཞེས་སུ་སྟོན་མཆོག་ཀུན་ཏུ་བཟང་པོས་བཤད་དེ་བཀའ་སྩལ་པ་ཡིན་ནོ།།

གཉིས་པ་རྒྱས་པར་བཤད་པ་ལ་གསུམ་སྟེ། ལུས་ཀྱི་སྤྱོད་པ། ངག་གི་སྤྱོད་པ། སེམས་ཀྱི་སྤྱོད་པ་བཤད་པའོ། །དང་པོ་ལ་གཉིས་ཏེ། རྡོ་རྗེ་ལུས་ཀྱི་སྤྱོད་པ་སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ནི།

རྡོ་རྗེ་ལུས་ཀྱི། ཞེས་པ་ནས། ཇི་ལྟར་བདེ་ལྡན་སྦྱར། །ཞེས་པའི་བར་གྱིས་བསྟན་ཏེ།

རྡོ་རྗེ་ལུས་ཀྱི་སྤྱོད་པ་ནི། །ཕྱིན་པ་མེད་པར་ཚུལ་མི་འཆོས། །གཅིག་པུ་ཉིད་ལས་གཅིག་པུ་གནས། །གླང་པོའི་ལྟ་སྟངས་ཇི་བཞིན་དང་། །དེ་བཞིན་རྣལ་མས་གནས་པར་བྱ། །གང་དུ་གནས་པར་རྟག་པར་གནས། །གནས་པ་དེ་ལའང་ཆགས་མི་བྱ། །སྤྱོད་ལམ་རྣམ་བཞི་གར་ལྡན་པ། །མ་བཅོས་རྣལ་མར་གནས་པར་བྱ། །གང་གིས་གདུང་བས་མི་ཉེན་པའི། །གནོད་པའི་སྐྱོབ་པ་དག་ཙམ་ལས། །བཟང་དང་རྒྱན་ཕྱིར་ཆས་མི་བྱ།།

གང་དུ་ཇི་ལྟར་བདེ་ལྡན་སྦྱར།།

སྒོ་གསུམ་གྱི་སྤྱོད་པ་སོ་སོ་ནས་བསྟན་པའི་ཕྱིར། ཁྱད་པར་དུ་ཡང་ས་ལྔ་པ་མན་ཆད་ཀྱི་ཡུལ་ཐེག་པ་ཆེན་པོའི་རྣལ་འབྱོར་པ་ཡང་དག་པའི་དོན་དང་མི་ཕྱེད་པས་གསང་སྔགས་རྡོ་རྗེ་ལྟ་བུའི་སྒོར་ཞུགས་པའི་དམ་པ་རྣམ་ཀྱི་ལུས་ཀྱི་སྤྱོད་པ་ནི་ཇི་ལྟར་སྤྱོད་ཅེ་ན། ཐར་པ་དེ་ཉིད་འདོད་གཟུགས་དང་གཟུགས་མེད་ལྟ་བུ་མིན་པས། ཚིག་ཕྱེད་ཕྱེད་ཀྱིས་དོན་དང་བྱ་བར་འགྱུར་ཏེ། ཡུལ་ལ་དམིགས་ནས་ཆེད་དུ་བྱེད་པ་དང་བྲལ་བས་རིལ་མཉམ་པའི་ངང་ལ་ བདག་མཐོ་སར་ཕྱིན་པ་མེད ་ལས་དོན་གྱི་ངོ་བོར་གྱུར་པའི་ཕྱིར་ལུས་ཀྱི་ཚུལ་མི་འཆོས་པའམ་བཅོས་པར་མི་བྱ་བ་དང་། ཆོས་སོ་ཅོག་སེམས་ཀྱི་ཆོས་ཉིད་དུ་གཅིག་པས་བདག་ཀྱང་། ལུས་སེམས་དང་བྱ་བའི་ལས་དང་གྲོགས་རྣམས་གང་ཡང་གཉིས་གཉིས་ཐམས་ཅད་རྣམ་པར་སྤངས་ནས་གཅིག་པུ་ཉིད་དུ་གྱུར་པས། དགོན་གནས་དབེན་པ་ཞིག་ཏུ་གཅིག་ཏུ་གནས་ཏེ་འདུག་པར་བྱ་བ་དང་། དེ་ནས་ཚིག་ཕྱེད་ཕྱེད་ཀྱིས་དོན་དང་བྱ་བར་མི་སྦྱོར་བར། ཚམ་ཚོམ་མེད་པར་གླང་པོ་ཆེན་པོའི་ལྟ་སྟངས་ལྟར་ཇི་བཞིན་པ་ལས་མ་བཅོས་པར་བག་ཚ་བ་མེད་དེ་ཟོན་བག་ཆེ་བ་དང་ལྡན་པར་བྱ་བ་དང་། དེ་བཞིན་དུ་ལུས་ཀྱི་སྤྱོད་པ་བཅོས་བསླད་མེད་པར་སེམས་རང་ལུགས་སུ་རྣལ་མས་གནས་ཏེ་འདུག་པར་བྱ་བ་དང་། གནས་གང་དུ་གནས་པ་དེར་ཡང་རྟོགས་པའི་ངང་ལ་དོན་དང་ལྡན་པར་རྟག་ཏུ་འདུག་སྟེ་དབེན་པ་ལ་མི་སྐྱོ་བར་བྱ་འཕུར་བ་བཞིན་མིན་པར་གནས་ཏེ་མ་ངེས་པའི་སྐྱོན་མེད་པར་བྱ་བ་དང་། འོ་ན་དེ་ལ་ཆགས་སམ་ཞེ་ན། དོན་ལ་༼༢༧༩༽ གནས་པ་དང་ལྡན་པས་རྟག་པར་འདུག་པའི་དབེན་གནས་དེ་ཉིད་ལའང་མི་དམིགས་པར་ཤེས་ནས་ཡུལ་གྱི་ས་ལ་ལྷག་པར་ཆགས་ཞེན་མི་བྱ་བ་དང་། འགྲོ་ཉལ་འདུག་པ་དང་ལོངས་སྤྱོད་བྱེད་པའི་སྤྱོད་ལམ་རྣམ་བཞིར་ཇི་ལྟར་གང་དང་ལྡན་པར་གནས་པ་དེར་ཡང་ལུས་ལ་ཆེད་དུ་བཅོས་པ་མེད་པར་མ་བཅོས་རྣལ་མར་རང་ལུགས་སུ་གནས་པར་བྱ་བ་དང་། གོས་རྒྱན་གྱི་རྣམ་པ་གང་ཡང་ཚ་གྲང་གིས་གདུང་བས་ལུས་སེམས་མི་ཉེན་པར་བྱེད་པའི་ཕྱིར་གནོད་པ་སྐྱོབ་པ་དེ་དག་གི་རྐྱེན་ཙམ་ལས་གཞན་ལྷག་པར་བཟང་བ་དང་མཛེས་པའི་རྒྱན་གྱི་ཕྱིར་དུ་བཅོས་པར་མི་བྱ་བ་དང་། གནས་གང་དུ་ཡང་ལུས་སྤྱོད་ཇི་ལྟར་བདེ་བ་ལྟར་བག་ཡངས་དང་ལྡན་པར་ལུས་དང་འཚམས་པར་སྦྱར་ཏེ་དོན་དང་ལྡན་པར་བྱ་བའོ། །ལས་དང་པོ་པས་རང་དོན་དུ་སྤྱོད་པར་བྱ་བར་མ་ཟད་དེ་ཁོ་ན་ཉིད་ཀློང་དུ་གྱུར་ཀྱང་གཞན་གྱི་ཕྱིར་ལུས་སྤྱོད་དགུ་པོ་ལས་མི་འདའ་བར་བྱའོ།།

གཉིས་པ་བྱེ་བྲག་ཏུ་བཤད་པ་ལ་བཞི་སྟེ། བྱ་བྱེད་མི་བཅོས་པར་བསྟན་པ། ཁ་ཟས་མི་བཅོས་པར་བཤད་པ། མཚམས་བཅད་པའི་ཚུལ་བསྟན་པ། གནས་མི་བཅོས་པར་བཤད་པའོ། །དང་པོ་ནི།

རྡོ་རྗེ་སྔགས་ཀྱི། ཞེས་པ་ནས། རྣལ་མས་གནས་པར་བྱ། །ཞེས་པའི་བར་གྱིས་བསྟན་ཏེ།

རྡོ་རྗེ་སྔགས་ཀྱི་སྤྱོད་ཡུལ་ནི། །བྱ་བ་མེད་པའི་རྣལ་འབྱོར་པས། །མཆོད་རྟེན་དག་གི་ལས་མི་བྱ། །གླེགས་བམ་བཀླག་པར་མི་བྱ་ཞིང། །གཟུགས་བརྙན་ཙམ་པའི་ལས་མི་བྱ། །ལག་གི་ཕྱག་རྒྱ་མི་བཅིང་ཞིང་། །ངག་གི་བཟླས་པ་དེ་ལ་སྒྲིབ། །རྣལ་འབྱོར་ལུས་ཀྱི་ཕྱག་མི་བྱ། །རྙེད་དང་བཀུར་སྟི་བལྟ་མི་བྱ། །ཁེ་ཕྱིར་མ་ཡིན་གྲགས་ཕྱིར་མིན། །ཅི་ཕྱིར་ཕྱི་རོལ་གཡེང་བ་དང། །ཤིན་ཏུ་གཡེང་བ་ཡིན་པའི་ཕྱིར། །དེ་ལ་ཉེ་བ་མ་ཡིན་པས།།

ལུས་འདི་རྣལ་མས་གནས་པར་བྱའོ།།

དེ་བཞིན་དུ། རྡོ་རྗེ་ཐེག་པ་གསང་བ་སྔགས་ཀྱི་ལུས་ཀྱི་སྤྱོད་ཡུལ་ནི། སྤྱིར་བྱ་བ་མེད་པའི་རྣལ་འབྱོར་སྒོམ་ལམ་པ་དང་། ཁྱད་པར་དུ་ཡང་མཐར་ལམ་ཐ་མ་བདག་ཉིད་ཆེན་པོའི་རྣལ་འབྱོར་དང་། ལྷུན་གྱིས་གྲུབ་པའི་རྣལ་འབྱོར་དང་། ཀློང་ཡངས་ཆུབ་པའི་རྣལ་འབྱོར་ལ་གནས་པས་བྱ་བ་གང་གིས་བསྟངས་སུ་མེད་པའི་ཕྱིར། མཆོད་རྟེན་མི་བརྩིག་པ་དང་། གླེགས་བམ་མི་ཀློག་པ་ལ་སོགས་པ་དགུ་པོ་མི་བྱའོ། །རྣམ་པ་གཞན་དུ་ན་ཡང་བློ་ཆེན་པོས་གནས་ལུགས་མ་བཅོས་པར་རང་གྲོལ་བྱ་བ་མེད་པའི་དོན་རྟོགས་ནས་མཉམ་པ་ཉིད་སྒོམ་པའི་རྣལ་འབྱོར་པ་ཀུན་གྱིས་ཀྱང་ཏིང་ངེ་འཛིན་ལ་གནས་པའི་དུས་སུ། མཆོད་རྟེན་བརྩིགས་པ་དག་གི་ལས་ཆེད་དུ་མི་བྱ་ལ་གླེགས་བམ་ཀླག་པའམ་གདོན་པར་ཡང་མི་བྱ་ཞིང་བྲིས་སྐུ་དང་དཀྱིལ་འཁོར་གྱི་བྱ་བ་སོགས་གཟུགས་བརྙན་༼༢༨༠༽བརྩམ་པའི་ལས་ཀྱི་བྱ་བ་མི་བྱ་བ་དང་། དེ་བཞིན་དུ་རྩོལ་བས་དོན་ལས་གཡེང་བར་འགྱུར་བས་ལག་གི་ཕྱག་རྒྱ་མི་བཅིང་ཞིང་ངག་གི་སྔགས་བཟླས་པ་བྱས་པས་ཏིང་འཛིན་དེ་ལ་སྒྲིབ་པར་འགྱུར་ལ། རྣལ་འབྱོར་པས་སུ་ལའང་ལུས་ཀྱི་ཕྱག་འཚལ་བར་མི་བྱ་སྟེ། སྒོམ་ཆེན་གྱི་ཕྱག་ལྕི་བས་སོ། །གལ་ཏེ་ཁ་ན་མ་ཐོ་བས་འཇིགས་ནའང་། ཕྱག་གི་གནས་གང་ཡིན་པའི་སྤྱི་བོར་ལྷའམ་བླ་མ་གནས་པར་བྱས་ལ་ཕྱག་འཚལ་བ་དང་། ནོར་རྫས་སྣ་ཚོགས་རྙེད་པ་དང་། མང་པོས་བཀུར་སྟི་བྱ་བའི་ཆེད་དུ་བལྟ་བ་མ་ཡིན་ཞིང་། འཇིག་རྟེན་གྱི་ཁེ་སྒྲུབ་པའི་ཕྱིར་ཡང་མ་ཡིན་ལ་གྲགས་པ་འདོད་པའི་ཕྱིར་ཡང་སྤྱད་པ་མིན་ཏེ་དེ་ལྟར་དགུའོ། །དེའི་དགོས་ཆེད་ནི། དེ་དག་ཅི་ཡི་ཕྱིར་ཞེ་ན། ལས་དང་པོ་པ་དང་མཚན་མ་རྟགས་ཀྱི་རྣལ་འབྱོར་པ་ཡང་ལུས་བརྟན་ན་སེམས་བརྟན་ལ་སེམས་བརྟན་ན་ཏིང་ངེ་འཛིན་སྟོབས་སུ་འགྱུར་བས་ན། གཡེང་བ་དྲུག་ལས་ཕྱི་རོལ་གྱི་གཡེང་བ་འབའ་ཞིག་ཡིན་པ་དང་། ཤིན་ཏུ་ཡང་བསམ་གཏན་གྱི་དགྲར་གྱུར་ཏེ། སྒོ་གསུམ་དོན་ལས་གཡེང་བར་འགྱུར་བ་ཡིན་པའི་ཕྱིར་གྱི་གཏན་ཚིགས་དེས་ན་དོན་མཉམ་པའི་ངང་དུ་བློ་མི་ཕེབས་ཏེ་དེ་ལ་ཉེ་བ་མ་ཡིན་པར་དོན་ལས་རིང་བར་བྱེད་པས་ལུས་འདི་མ་བཅོས་རང་གནས་སུ་རྣལ་མས་གནས་པར་བྱའོ། །འདི་དག་ཀྱང་ལུས་སྤྱོད་དུ་འགྱུར་ཏེ་བསྡོམས་པའི་རྣམ་གྲངས་བཅོ་བརྒྱད་དོ།།

གཉིས་པ་ཁ་ཟས་མི་བཅོས་པར་བཤད་པ་ནི།

རྣལ་འབྱོར་ངེས་པའི། ཞེས་པ་ནས། ཡོངས་སུ་མ་དག་པའོ། །ཞེས་པའི་བར་གྱིས་བསྟན་ཏེ།

རྣལ་འབྱོར་ངེས་པའི་བསམ་གཏན་པས། །རྡོ་རྗེ་སྔགས་ཀྱི་ཁ་ཟས་ནི། །ལུས་ཟུངས་འཛིན་པའི་རྟེན་ཙམ་དུ། །གང་ལྡན་འབྱོར་ལྡན་མ་གཏོགས་པ། །ཟས་ཕྱིར་ཕྱེད་དུ་བསྒྲུབ་མི་བྱ། །ཆག་དང་ཉམས་ཕྱིར་ག་ལ་ཡིན། །མ་བཅོས་རྣལ་མ་ཇི་བཞིན་བཟའི། །འཚོ་བའི་ཆེད་དུ་བཅོས་མི་བྱ། །ཆགས་དང་མ་ཆགས་སྤང་བླང་མེད། །བླང་བར་བྱ་བ་མ་ཡིན་ཞིང་། །སློང་མོས་འཚོ་བར་ཡོང་མི་བྱ། །ཅི་ཕྱིར་དོན་དུ་མི་འགྱུར་ཕྱིར།།

འཚོ་བ་ཡོངས་སུ་མ་དག་པའོ།།

ཐེག་པ་ཆེན་པོའི་རྣལ་འབྱོར་པ་གསང་སྔགས་སུ་རིགས་ངེས་ཤིང་རྟོགས་པའི་གདེངས་དང་ལྡན་ཏེ་བསྒོམ་པར་འདོད་པའི་བསམ་གཏན་པས་སྐུ་གསུང་ཐུགས་ཀྱི་རྡོ་རྗེ་སྒྲུབ་ཅིང་གསང་བ་སྔགས་ཀྱི་ཡོན་ཏན་འབྱུང་བའི་གནས་སུ་གྱུར་པའི་ཁ་ཟས་ཀྱི་སྤྱོད་པ་ཡང་ནི། ལུས་ཀྱི་གཟུངས་སམ་ཟུངས་འཛིན་ཅིང་གསོ་བར་བྱེད་པའི་རྟེན་གྱི་ཆེད་ཙམ་དུ་བདག་རང་ལ་གང་ལྡན་ཏེ་སྔར་གྱི་བསོད་ནམས་དང་མཐུན་པར་ཡོ་བྱད་གང་ཡོད་དང་འབྱོར་པ་ཇི་ལྟར་ལྡན་པ་དེ་ལས་མ་གཏོགས་པར་ཞིམ་པ་ལ་སོགས་པའི་རོ་ལ་ཆགས་པས་ཟས་ཀྱི་དོན་གྱི་ཕྱིར་༼༢༨༡༽ཆེད་དུ་གཉེར་ནས་བསྒྲུབ་པར་མི་བྱ་བ་དང་། ལུས་ཀྱི་དྲོད་རྒྱས་ཏེ་མཚག་པར་རེ་བ་དང་ཉམས་བསྐྱེད་པའི་ཕྱིར་ཁ་ཟས་ཟ་ཞིང་བཙལ་བ་ག་ལ་ཡིན་ཏེ་མ་ཡིན་པར། བསམ་པ་མི་དམིགས་པའི་དོན་དང་མ་བྲལ་བས་ཁ་ཟས་ཆེད་དུ་མ་བཅོས་པར་གཡོ་སྒྱུ་སྤངས་པས་རྣལ་མ་རང་ཐད་ཙམ་དུ་ཇི་བཞིན་པར་བཟའི་ཞེས་བཟའ་བར་བྱ་ཡི། འཚོ་བའི་ཟས་ཀྱི་ཆེད་དུ་ཆགས་ཤིང་ཞེན་པས་གཡོས་ཀྱི་བྱེ་བྲག་སྣ་ཚོགས་ཀྱིས་བཅོས་ཤིང་བསྒྱུར་བར་མི་བྱ་བ་དང་། ཟས་ཀྱི་ནང་ནས་རོ་ཞིམ་པ་ལ་ཆགས་པ་དང་མི་ཞིམ་པ་ལ་མ་ཆགས་པས་སྤང་ལེན་མི་བྱ་བར་བླང་དོར་མེད་པར་བྱ་བ་དང་། གཞན་གྱིས་འཚོ་བ་སྦྱར་བ་ལྟ་བུར་རང་ལ་ཁ་ཟས་ཡོད་བཞིན་དུ་ལྷག་པར་ཆགས་པས་བླང་བར་བྱ་བ་མ་ཡིན་ཞིང་བསོད་སྙོམས་དང་སློང་མོས་འཚོ་བར་ཡོང་ཡེ་མི་བྱ་སྟེ། ཅི་ཡི་ཕྱིར་ན་གཏན་ཚིགས་ནི་བདག་གཞན་དང་གཉིས་ཀ་དང་ཆོས་ཀྱི་དོན་ཏུ་མི་འགྱུར་བའི་ཕྱིར་ཏེ་སློང་བ་ལ་མི་དགའ་བ་འོང་བས་གཡེང་བ་སྐྱེས་ན་བདག་གི་དོན་དུ་མི་འགྱུར་བ་དང་། རྐྱེན་དེས་ཕ་རོལ་པོ་ལ་ཆགས་སྡང་སྐྱེས་ན་ཁོའི་དོན་དུ་མི་འགྱུར་བས་ན་དོན་གཉིས་དང་བྲལ་བ་ནི། འཚོ་བ་ཡོངས་སུ་མ་དག་པ་ཞེས་བྱའོ། །དེ་ལྟར་བདུན་ཀྱང་རྩ་བའི་དབང་གིས་ལུས་སྤྱོད་དུ་འགྱུར་རོ།།

གསུམ་པ་མཚམས་བཅད་པའི་ཚུལ་བསྟན་པ་ནི།

མཚམས་མེད་པ་ལས། ཞེས་པ་ནས། འདྲུལ་རྣམས་གཅད་པར་བྱ། །ཞེས་པའི་བར་གྱིས་བསྟན་ཏེ།

མཚམས་མེད་པ་ལས་མཚམས་གཅོད་པ། །འདི་ནི་རྣལ་འབྱོར་ཅན་གྱི་ལས། །ཤེས་བྱ་ནང་གི་ཆོས་ཉིད་ལ།།

རྣལ་འབྱོར་དོན་དུ་འཇུག་པ་ན། །ཕྱི་ཡི་འདུ་འཛིས་གཡེངས་པ་ཡིས། །བར་དུ་གཅོད་པ་གསལ་བའི་ཕྱིར།།

ཕྱི་དང་ནང་གི་ས་མཚམས་སུ། །འགྲོ་འོང་འགྲུལ་རྣམས་གཅད་པར་བྱ།།

དེ་ཡང་ཇི་སྐད་དུ་ཡེ་གདལ་བ་ལས། ཕྱི་ནང་ བདག་གཞན་མེད། །ཅེས་གསུངས་པ་ལྟར། ཆོས་ཉིད་ལ་མཚམས་མེད ་པའམ་ཡང་ན་སྔར་མཚམས་དང་མི་ལྡན་པ་ལས་ཕྱིས་དགོན་པར་ཉམས་པའམ་བསམ་དགྲ་རྣམས་གཅོད་ཅིང་ལམ་པས་འགྲུས་པར་འགྱུར་པའི་ཕྱིར་གྲོང་ཡུལ་ན་གནས་ཀྱང་རུང་སྟེ་མ་འདྲུལ་བར་མཚམས་གཅོད་པར་བྱེད་པ་འདི་ནི་རྣལ་འབྱོར་པ་ལྟ་སྒོམ་ཅན་གྱི་ལས་སུ་བྱ་བ་དམ་པ་ཡིན་ནོ། །དེས་ན་ཕྱིའི་རྟོག་རྒྱུན་བཅད་དེ་ཤེས་བྱ་དམ་པའི་ངོ་བོ་ནང་གི་སེམས་ཀྱི་ཆོས་ཉིད་ལ་སྒོམ་པའི་རྣལ་འབྱོར་གྱི་ཐབས་ལ་བརྟེན་ནས་ངེས་པའི་དོན་དུ་འཇུག་པ་ཡི་དུས་ཀྱི་ཚེ་ན་ཕྱི་རོལ་ཡུལ་དུ་གྱུར་པ་ཡི་འདུ་འཛི་དང་རྣམ་པར་གཡེང་བ་ཡིས། བསམ་གཏན་མཆོག་གི་ལམ་གྱི་བར་དུ་གཅོད་པ་བསལ་༼༢༨༢༽ཞིང་སྤང་བའི་དགོས་ཆེད་ཀྱི་ཕྱིར་དུ་ཕྱི་ཡི་གྲོང་ཡུལ་ལམ་འགྲོ་བ་གཞན་གྱི་གནས་དང་། ནང་གི་རང་གནས་ཀྱི་ས་མཚམས་སུ་གྱུར་པའི་བར་དུ་རང་ཉིད་ཕྱིར་འགྲོ་བ་དང་གཞན་རྣམས་ནང་དུ་འོང་བའི་རྒྱུ་འགྲུལ་རྣམས་གཅད་པར་བྱ་བའི་རྟགས་ཐོ་ཡང་བརྩིགས་པར་བྱའོ།།

བཞི་པ་གནས་མི་བཅོས་པར་བཤད་པ་ནི།

གང་ལ་གནས་གཞི། ཞེས་པ་ནས། མེད་པར་རང་བྱུང་བའོ། །ཞེས་པའི་བར་གྱིས་བསྟན་ཏེ།

གང་ལ་གནས་གཞི་རྟེན་མེད་པས། །གནས་དེར་ལུས་བཅོས་ཁ་ན་མེད། །ཞེན་པས་ཆོས་ལམ་བཅོས་བྱེད་པ།།

དེས་ནི་ལུས་བཅོས་བསླད་པ་ཡིན། །བསམ་གཏན་ལུས་དབེན་བཅོས་མི་བྱ། །དེ་ལ་དེ་དབེན་མ་བཅོས་པ།།

དེ་ཉིད་ཡེ་ནས་དབེན་པའི་གནས། །འདི་ནི་རྣལ་འབྱོར་མཆོག་གི་ཡུལ། །རི་ཕུག་གཞལ་མེད་བཅོས་མི་བྱ།།

དེ་ཉིད་དཔག་མེད་མ་བཅོས་པའི། །འདི་ནི་ཡེ་ནས་རྨད་བྱུང་གཞལ། །བྱེད་པ་མེད་པར་རང་བྱུང་བའོ།།

དེ་ལྟར་མཚམས་བཅད་པའི་གནས་དེར་ལུས་ཇི་ལྟར་སྤྱད་ཞེ་ན། གཅིག་ཆར་བའི་རྣལ་འབྱོར་མཆོག་སུ་ཞིག་བསྒོམ་པའི་ཚེ་བློ་ཆེ་བ་གང་གི་ཡུལ་ནི་ཐམས་ཅད་རང་རིག་པའི་ངོ་བོར་འོད་གསལ་བར་ཤར་བ་ལ་ལུས་སེམས་གནས་པར་བྱ་བའི་གཞི་རྟེན་མ་དམིགས་ཏེ་ངོ་བོ་མེད་པར་རྟོགས་པས་ལུས་གནས་ཀྱི་རང་བཞིན་མ་གྲུབ་པའི་ཕྱིར་གནས་དེ་ཡང་ཆེད་དུ་བདེར་ཞེས་བདེ་བར་བྱ་བ་དང་། ཆོས་ཉིད་ཀྱི་ངང་ལ་ལུས་བཅོས་པས་ཁ་ན་མེད་དེ། མཁན་པོ་གཉན་དཔལ་དབྱངས་ཀྱིས། ལུས་སེམས་མ་སྐྱེས་གཞི་མེད་པས། །མཁའ་ལྟར་བཅོས་པའི་ཁ་ན་མེད། །ཅེས་དང་། སྒྱུ་མ་བཞིན་དུ་ལུས་ཤེས་ན། །དྲང་འདུག་སྐྱིལ་ཀྲུང་འཆའ་བའང་མེད། །སྤྱོད་ལམ་གསུམ་གྱིས་གནས་པ་གང་། །ཆེད་དུ་བྱ་མེད་བྱེད་པའང་མེད། །ཅེས་སོ། །དེ་བས་ན་ལུས་སྐྱིལ་ཀྲུང་ལ་སོགས་པ་ཆོས་དྲུག་གིས་བཅོས་པར་མི་བྱའོ། །འོ་ན་དེ་དག་སྐྱོན་ནམ་ཞེ་ན། གང་ཞིག་ལུས་གནས་ལ་ཞེན་ཞིང་ཆགས་པས་གནས་སུ་ལུས་འཆོས་པའི་སྤྱོད་ལམ་ཆེད་དུ་སྤྱོད་པར་བྱེད་པ་དེས་ནི། ལུས་གནས་བཅོས་པས་ཡང་དག་པའི་དོན་ལ་བསླད་དེ་སེལ་ཞུགས་པ་ཡིན་ནོ། །དེ་བས་ན་ལོ་ཙཱ་བ་ཀ་བ་དཔལ་བརྩེགས་ཀྱིས་ལྟ་རིམ་སྣང་བ་བཅུ་བདུན་པ་ལས། ལུས་ངག་མ་སྐྱེས་གཞི་མེད་ཕྱིར། །སྐྱིལ་ཀྲུང་སྨྲ་བཅད་ཁ་ན་མེད། །དེ་བཞིན་སེམས་ཀྱང་དངོས་བྲལ་བས། །རྟོག་སྤངས་སྒོམ་པའི་ཁར་མི་འོང་། །དེ་ལྟར་རྟོགས་པའི་སྒོམ་པ་པོ། །ཡལ་བར་འདུག་པ་ནམ་ཡང་མེད། །ཅི་ཕྱིར་བདག་ཉིད་དེ་ཕྱིར་ཏེ། །རང་གི་དབྱིངས་ལས་གཡོས་པ་མེད། །ཅེས་གསུངས་པ་ལྟར། བློ་མཆོག་ཏུ་ཆེ་བའི་སྒོམ་པ་པོས་བསམ་གཏན་བྱེད་པའི་དུས་སུ་ལུས་སེམས་ཀྱི་དངོས་པོ་ཡེ་མ་དམིགས་པས་དབེན་པ་རང་གནས་ཡིན་པ་ལ་ལུས་སུ་མཐོང་ནས་ཆེད་དུ་བཅོས་པར་མི་བྱའོ། །༼༢༨༣༽འོན་ཀྱང་ལུས་སེམས་ཀྱི་རང་བཞིན་འོད་གསལ་བ་དེ་ལ་ལུས་སེམས་ཀྱི་དངོས་པོ་དེ་ལས་དབེན་པས་མ་བཅོས་མ་བསླད་པ་དེ་ཉིད་ཡེ་ནས་ཆོས་ཉིད་མཐའ་ཐམས་ཅད་ལས་རིང་བས་དབེན་པའི་གནས་མཆོག་དམ་པ་ཉིད་དེ་འདི་ནི་རྣལ་འབྱོར་ཆེན་པོ་མཆོག་གི་སྤྱོད་ཡུལ་ཁོ་ནའོ། །དེར་མ་ཟད་དོན་ཆེན་པོ་སྤྱོད་པ་བས་རི་ཕུག་དང་དགོན་པ་དག་མཁར་ལེན་གྱི་བྱ་བས་གཞལ་མེད་ཁང་དུ་བཅོས་པར་མི་བྱ་སྟེ། དེ་ཅིའི་ཕྱིར་ཞེ་ན། རི་ཕུག་ལ་སོགས་པའི་ངོ་བོ་དེ་ཉིད་སེམས་ཀྱི་རང་བཞིན་ཡེ་ཇི་བཞིན་པ་བློས་དཔག་ཏུ་མེད་པའི་གནས་ལུགས་མ་བཅོས་མ་བསླད་པས་ཆོས་ཉིད་ཟབ་མོ་བྱེད་པས་མ་བྱས་པའི་ངང་གི་ཐིག་ལེའི་ངོ་བོ་འདི་ནི་ཡེ་གདོད་མ་ནས་དུས་གསུམ་གྱི་རྒྱལ་བ་ཐམས་ཅད་ཀྱི་བཞུགས་གནས་རྨད་དུ་བྱུང་བའི་གཞལ་མེད་ཁང་ཆེན་པོར། ལམ་པའི་བློས་བྱེད་པ་མེད་པར་རང་བྱུང་བ་ཡིན་པའི་ཕྱིར། ཀུན་འདུས་ལས།

བསམ་གཏན་ལུས་ནི་གཙོར་བྱེད་དང་། །གནས་བདེ་ལུས་ཀྱི་ཕྱག་རྒྱ་ཀུན། །མཚན་མར་མངོན་པར་ཞེན་ལས་བྱུང་། །མཚན་མེད་སེམས་ལ་བྱ་བརྩལ་མེད། །སྨིག་རྒྱུ་བཞིན་དུ་ལུས་རེད་ན། །གནས་དང་ཕྱག་རྒྱར་དམིགས་པ་མེད། །བྱེད་སྤྱོད་ཆེད་དུ་སྟོན་བྱེད་ཅིང་། །བྱ་མེད་བྱ་བའི་དམིགས་པའང་མེད། །དེ་ཉིད་མ་སྐྱེས་གཞི་མེད་པས། །གནས་དེར་ལུས་བཅོས་ཁ་ན་མེད། །ཞེན་པར་འཆོས་ལམ་སྤྱོད་བྱེད་པ། །དེ་ཉིད་གཟུང་འཛིན་རྣམ་རྟོག་སྟེ། །བསམ་གཏན་ལུས་དབེན་དབེན་མ་ཡིན། །མཁའ་ལ་སེམས་དབེན་དབེན་པའི་མཆོག །སེམས་ཉིད་དབེན་པའི་གནས་ཡིན་ཏེ། །འདི་ནི་རྣལ་འབྱོར་སྤྱོད་མཆོག་གནས། །བླ་གབ་རི་ཕུག་གཞལ་མེད་མིན། །སེམས་ཉིད་དཔག་ཡས་གཞལ་མེད་མཆོག །ཅེས་གསུངས་ཏེ་གང་ཞིག་རི་ཕུག་འཆོས་པ་ལ་ནི་དགོན་པར་ཞེན་པ་ཡོད་པས་དེ་དག་བསལ་བའི་ཆེད་དུའང་མི་འཆོས་པའོ། །འོ་ན་གཏན་ནས་དགོན་པ་དང་དུ་མི་བླང་ངམ་ཞེ་ན། དེ་ལྟར་ཐག་ཆོད་ནས་དགོན་པར་འབྱུང་བ་དང་། གནས་ཉམས་དགའ་བར་བྱ་བ་ནི་འཛིན་པ་མེད་པས་བྱ་བ་དང་གང་ཡང་སྤང་བ་མིན་པས་མི་འགལ་བར་ཐེ་ཚོམ་མེད་དོ། །༼༢༨༤༽དེ་དག་ནི་རྣལ་འབྱོར་མཆོག་གི་ལུས་སྤྱོད་དེ་རྣམ་གྲངས་བསྡོམས་ནས་ཉི་ཤུ་རྩ་བརྒྱད་དུ་འགྱུར་རོ།།

གཉིས་པ་ངག་གི་སྤྱོད་པ་ནི།

རྡོ་རྗེ་ངག་གི ཞེས་པ་ནས། ངག་གི་སྤྱོད་པར་བཤད། །ཅེས་པའི་བར་གྱིས་བསྟན་ཏེ།

རྡོ་རྗེ་ངག་གི་སྤྱོད་ཡུལ་ཡང་། །དམ་པའི་ཆེད་དུ་སྙན་སྨྲ་ལས། །གཞན་དུ་ཁ་གསག་ག་ཞ་མིན། །བརྗོད་པ་ཐམས་ཅད་ངེས་པ་ཉིད། །གསོང་པོར་སྨྲ་ཞིང་ཚིག་མི་འགྱུར། །ཇི་ལྟར་བརྗོད་པ་དེ་བཞིན་བྱ། །ཐམས་ཅད་ཀུན་ཏུ་སྨྲ་མ་ཡིན། །གང་བརྗོད་དོན་དང་འབྲེལ་བར་བྱ། །སྐབས་དང་དགོས་ཆེད་མ་གཏོགས་པ། །རྣམ་པར་འཆལ་བར་བྱ་བ་མིན། །ཀུན་ལ་དཔེས་མཚོན་ཐོག་ཏུ་དབབ། །ཐམས་ཅད་ཚད་པས་ཚད་མར་བྱ།།

མ་བཅོས་ངང་གི་རྣལ་འབྱོར་པ། །རྡོ་རྗེ་ངག་གི་སྤྱོད་པར་བཤད།།

རྣལ་འབྱོར་ཆེན་པོའི་རྡོ་རྗེ་ངག་གི་སྤྱོད་ཡུལ་བསྟན་པ་ཡང་། བླ་མ་དང་གྲོགས་དམ་པ་དང་ཆོས་དང་མཐུན་པར་བྱ་བའི་དགོས་ཆེད་དུ་སྙན་པར་སྨྲ་བ་དང་། དེ་ལས་གཞན་དུ་ཁ་གསག་ལ་སོགས་པ་ཁ་གཏོགས་དང་ག་ཞའམ་ཀུ་རེ་དང་རྟ་གད་བྱ་བ་མིན་ལ་སྨྲ་ཞིང་བརྗོད་པ་ཐམས་ཅད་མི་འགྱུར་བར་ངེས་པར་བདེན་པ་ཉིད་དུ་སྨྲ་བ་དང་། སྨྲ་བའི་དོན་ཇི་ལྟ་བར་རྫུན་མེད་པར་དྲང་པོར་འགྱུར་བའི་གསོང་པོར་སྨྲ་ཞིང་ཚིག་དེ་ལས་ཕྱིས་མི་འགྱུར་བར་བྱ་བ་དང་། ངག་གིས་ཇི་ལྟར་བརྗོད་པ་དེ་བཞིན་དུ་དོན་ཀྱང་དེ་དང་མཐུན་པར་བྱ་བ་དང་། སྐབས་དང་དགོས་ཆེད་མེད་པར་ཐམས་ཅད་ཀུན་ཏུ་སྨྲ་བ་མ་ཡིན་པ་དང་། ངག་གིས་གང་བརྗོད་ཅིང་རྗོད་བྱེད་ཚིག་དེ་བརྗོད་བྱའི་དོན་དང་འབྲེལ་བར་དོན་དང་ལྡན་པར་བྱ་བ་དང་། གཞན་གྱིས་དྲིས་པ་དང་ཁ་ཏ་ལྟ་བུ་སྐབས་དང་དགོས་ཆེད་ཡོད་པ་མ་གཏོགས་པར་དེ་ལྟར་མ་ཡིན་པ་ཀུན་ཏུ་ཅི་ཐོད་དུ་རྣམ་པར་འཆལ་བའི་གཏམ་མང་པོ་སྨྲ་བར་བྱ་བ་མིན་པ་དང་། སྨྲ་བརྗོད་ཀུན་ལ་དཔེས་མཚོན་ཏེ་དོན་གྱི་ཐོག་ཏུ་དབབ་ནས་གོ་ངེས་སུ་འཇལ་བར་བྱེད་པ་དང་། ཆོས་ཐམས་ཅད་ཚད་མས་གཞལ་ཏེ་དོན་སྒྲོ་སྐུར་ མེད་པར་སྨྲས་པས་བདག་ཀྱང་ཚད་མར་སྨྲ་བའི་ཚིག་གི་རྗོད་པ ་ཅན་དུ་བྱ་བ་དང་། སྤྱོད་པ་ཆེད་དུ་མ་བཅོས་པར་དོན་ལ་ངང་གིས་གནས་པའི་རྣལ་འབྱོར་པ་དམ་པ་ཡིས་རྡོ་རྗེ་ངག་གི་སྤྱོད་པ་དེ་ལྟར་ཡིན་པར་སྟོན་པ་མཆོག་གིས་བཤད་དེ་བཀའ་སྩལ་བ་ཡིན་པས་རྣལ་འབྱོར་མཆོག་གི་ངག་གི་སྤྱོད་པ་རྣམ་པ་བཅུའོ།།

གསུམ་པ་སེམས་ཀྱི་སྤྱོད་པ་བཤད་པ་ནི།

རྡོ་རྗེ་ཡིད་ཀྱི། ཞེས་པ་ནས། ཉི་འོད་གསལ་འདོད་འདྲའོ། །ཞེས་པའི་བར་གྱིས་བསྟན་ཏེ།

རྡོ་རྗེ་ཡིད་ཀྱི་སྤྱོད་ཡུལ་ནི། །མ་བཅོས་མ་ཡེངས་བསམ་དང་བྲལ། །མི་གཡེང་མ་རྨུགས་གསལ་ཞིང་གནས། །འདོད་ལ་མ་ཆགས་སྒྲོ་སྐུར་བྲལ། །བླང་མེད་དོར་མེད་ཆགས་སྡང་མེད། །འཆབ་སྤྱོམ་མེད་དེ་རྙེད་འབྱོར་མིན། །ཕྱོགས་བྲལ་མུ་མེད་ཡོངས་སུ་དག །གོ་བགོས་ལམ་ཉིད་དྲང་པོར་སྲོང་། །དུག་འགྱུར་སྨན་བསྲེལ་མཚོན་ཆར་ལྡན། །རྡོ་རྗེ་རྫོང་ལ་ཞེན་པ་དང་། །ཡིད་བཞིན་ནོར་བུ་བློ་གྲོས་ལྡན། །གང་དུ་མི་འགྱུར་གང་མི་འགྱུར། །དབྱིངས་འདིར་ཀུན་དང་གཅིག་པ་དང་། །གང་གི་བློ་ལ་མངོན་པའི་ཕྱིར། །ཡོངས་སུ་ཤེས་དང་བག་ཡོད་དང་། །དེ་ཉིད་དབང་བས་ཁྲེལ་ཡོད་དང་། །དེ་ལ་ངའམ་ང་མེད་པས། །ཀུན་ལ་ཡོངས་སུ་ལྡན་པ་དང་། །ཐམས་ཅད་དེ་བས་ངེས་པ་དང་། །གང་འདི་སྟོང་པས་ཅིར་མི་རྟོགས། །དེ་ཉིད་ཞི་བས་འཁྲུག་མེད་དང་། །གང་ནས་ཅི་ཡང་མི་འབྱུང་བས། །གཞན་དུ་ཚོལ་བ་མེད་པ་དང་། །ཟང་ཟིང་མེད་པ་ཚུལ་མི་འཆོས། །གདུང་བ་མེད་པས་འདོད་པ་མེད། །མ་ཆགས་འབྱུང་བས་ཆོག་པར་འཛིན། །གང་ལ་མཚན་མར་མི་འཛིན་པས། །གཙང་སྨེ་མེད་ཅིང་དུས་གསུམ་མེད། །དེ་བཞིན་གདམས་པ་ཡོད་མ་ཡིན། །སེམས་ཉིད་ནམ་མཁའི་སྙིང་པོ་དེ། །བློ་བུར་སྤྲིན་གྱིས་གཏིབས་དཔུངས་པས། །ཤེས་རབ་རླུང་གིས་མ་སྟོར་བར། །ག་ཞ་མཁན་གྱི་སྤྱོད་འདྲ་ཡིས། །སྒྲིབ་གསལ་ཆོས་ཉིད་གསལ་འདོད་པ། །ཇི་ལྟར་ཆུས་གཤེར་བྱིས་པ་དག །ཉི་མ་སྤྲིན་དང་གྲིབ་མ་ཡིས། །ཤིན་ཏུ་བསྒྲིབས་པར་གྱུར་པ་ན། །བྱིས་པའི་རང་བཞིན་མི་ཤེས་པས། །སྤྲིན་ཆེན་འདུས་པའི་ཕུང་པོ་ལ། །ཁ་ཡི་དབུགས་ཀྱིས་བུས་བྱས་ནས། །སྤྲིན་གསལ་ཉི་འོད་གསལ་འདོད་འདྲའོ།།

རྡོ་རྗེ་གསང་བའི་ཐེག་པ་ཆེན་པོའི་ཡིད་ཀྱི་སྤྱོད་ཡུལ་བསྟན་པ་ནི། བློ་ཆེད་དུ་མ་བཅོས་པ་དང་། དོན་གྱི་ངང་ལས་ཡུལ་ལ་མ་གཡོས་པ་དང་། དོན་ལའང་ཡིད་ཀྱིས་ཆེད་དུ་བསམ་པ་དང་བྲལ་བ་དང་། རྟོགས་པའི་དོན་ལས་མི་གཡེང་བ་དང་། ༼༢༨༥༽མི་རྟོག་པའི་ཏིང་ངེ་འཛིན་མ་རྨུགས་པ་དང་། རྟོག་པའི་ཟུག་རྔུ་དང་བྲལ་ཏེ་དགོངས་པ་གསལ་ཞིང་གནས་པ་དང་། འདོད་པའི་ཡུལ་ལ་ཞེན་པ་མེད་པས་མ་ཆགས་པ་དང་། རྟོགས་པའི་ཏིང་ངེ་འཛིན་དང་སེམས་ཉིད་རང་ལ་སྒྲོ་སྐུར་གྱི་བསམ་པ་དང་བྲལ་བ་དང་། ཡོན་ཏན་ལ་བཟང་པོར་བལྟས་ནས་བླང་བ་མེད་ཅིང་སྐྱོན་ལ་ངན་པར་དམིགས་ཏེ་དོར་བ་མེད་པ་དང་། ཆགས་སྡང་གི་སེམས་ཀྱི་ཡིད་བྱེད་མེད་པ་དང་། ཉེས་པ་འཆབ་སེམས་མེད་པ་དང་། ཡོན་ཏན་གྱི་ཆེ་བས་སྤྱོམ་པ་མེད་པ་དང་། དེ་བཞིན་དུ་ནོར་རྫས་དང་རྙེད་འབྱོར་ལ་ཚོལ་ཞིང་ཆགས་པའི་སེམས་དང་ལྡན་པ་མིན་པ་དང་། རིག་པ་ཕྱོགས་རིས་དང་བྲལ་བར་རྟོགས་པ་དང་མུ་མཐའི་སྣང་བ་མེད་པས་བསམ་པ་ཡོངས་སུ་དག་པ་དང་། དོན་གཉིས་སྒྲུབ་པས་དམ་བཅའ་བའི་གོ་ཆ་བགོས་ནས་སྒོ་གསུམ་གྱི་གཞུང་ལམ་ཉིད་དྲང་པོར་སྲོང་བ་དང་། མ་དག་པའི་ལྟ་བའི་དུག་བདུད་རྩིར་འགྱུར་བས་ཏིང་ངེ་འཛིན་གྱི་སྨན་སྲེལ་ཞིང་ཡང་དག་པའི་ལྟ་བའི་གདེང་གིས་མཚོན་ཆར་ལྡན་པ་དང་། གཉིས་མེད་ཀྱི་ལྟ་བའི་ངང་ལས་མི་འགྱུར་བས་རྡོ་རྗེའི་རྫོང་ལ་འདྲིས་ཞེན་གྱི་གནས་པ་དང་། བྱང་ཆུབ་ཀྱི་སེམས་ཡིད་བཞིན་ནོར་བུ་འཆང་བར་བྱེད་པས་ཞི་ལྷག་གི་བློ་གྲོས་དང་ལྡན་པ་དང་ལྟ་བ་དང་ཏིང་ངེ་འཛིན་གདེང་དུ་ཆུད་དེ་གང་དུ་ཡང་མི་འགྱུར་བས་རྐྱེན་གང་ཅིས་ཀྱང་མི་འགྱུར་བ་དང་། རང་རིག་མཉམ་པའི་དབྱིངས་འདིར་ཆོས་ཀུན་དབྱེར་མེད་པས་བདག་གཞན་ཐམས་ཅད་དང་ངང་གཅིག་ཉིད་དུ་རྟོགས་པར་བྱ་བའི་ཕྱིར་དང་། གདུལ་བྱ་གང་གི་བློ་ལ་མངོན་པར་སྣང་ཞིང་གསལ་བའི་ཆེད་དམ། ཡང་ན་དབྱིངས་རྟོགས་པས་ལྟ་བ་བརྟན་པའི་ཕྱིར་སྤྱོད་པ་ཀུན་ནས་ཡོངས་སུ་ལེགས་པའམ་ཆེ་བའི་ཡོན་ཏན་རང་སྣང་བས་མཛེས་པ་དང་། དེ་ལྟར་མི་མཐུན་པ་མེད་པས་བདུད་རྩིའི་གནས་ཀྱི་བག་ཡོད་དང་ལྡན་པ་དང་། ཆོས་ཀྱི་དེ་ཉིད་རྟོགས་པའི་དབང་ལས་ཕྱིན་ཅི་ལོག་གི་སེམས་མེད་པས་ཁྲེལ་ཡོད་དང་མི་འབྲལ་བ་དང་། སེམས་ཉིད་དེ་ལ་ང་རྒྱལ་གྱིས་རློམ་པའམ་ང་ བདག་ཏུ་འཛིན་པ་མེད ་པས་སེམས་ཀུན་དང་མཐུན་པས་ཐམས་ཅད་ལ་ཡོངས་སུ་ལྡན་ཏེ་ཞི་བའི་སེམས་དང་ལྡན་པར་བྱ་བ་དང་། ཆོས་ཐམས་ཅད་༼༢༨༦༽རིལ་ཞི་བ་ཆེན་པོའི་ཆོས་ཉིད་དེ་ཡིན་པར་རྟོགས་པས་སེམས་མཆོག་ཏུ་ངེས་པར་བྱ་བའམ་དོན་དེ་གོ་བ་ངེས་པར་སྒྲོགས་པ་དང་། གང་འདིར་ཆོས་ཐམས་ཅད་སྟོང་པ་ཉིད་པས་བསམ་པ་ཅིར་ཡང་མི་རྟོག་པ་དང་། ཆོས་ཉིད་རྟོགས་པའི་དེ་ཁོ་ན་ཉིད་ཀྱི་ཞི་བ་དང་ལྡན་པས་སེམས་འཁྲུགས་པ་ མེད་པ་དང་། བདག ་ཉིད་ཀྱི་དབྱིངས་ལས་མ་གཏོགས་པར་གཞན་གང་ནས་ཀྱང་དངོས་གྲུབ་དང་ཡོན་ཏན་ཅི་ཡང་མི་འབྱུང་བས་སེམས་ཉིད་ལས་གཞན་དུ་དངོས་གྲུབ་དང་ཡོན་ཏན་ཆོལ་བའི་སེམས་པ་དང་མེད་པ་དང་། ཟང་ཟིང་ལ་འདོད་ཅིང་ཆགས་པ་མེད་པས་ཚུལ་མི་འཆོས་ཏེ་བཅོས་མའི་ཚུལ་འཆོས་མི་བྱེད་པ་དང་། འདོད་ཡོན་གྱི་ཡུལ་ལ་སེམས་ཆགས་པས་གདུང་བ་མེད་པས་དེ་དང་ཕྲད་པར་འདོད་པའི་བསམ་པ་མེད་པ་དང་། སེམས་ཅི་ལའང་མ་ཆགས་པའི་དོན་གྱི་ཡེ་ཤེས་རང་བྱུང་དུ་ཤར་བས་ཆོག་པར་འཛིན་པ་དང་ལྡན་པ་དང་། དངོས་པོ་གང་ཅི་ལའང་རང་རིག་པར་རྟོགས་པའི་ཕྱིར་མཚན་མར་རྟོག་ཅིང་རྣམ་པར་མི་འཛིན་པས་གཙང་སྨེ་མེད་ཅིང་དུས་གསུམ་ལ་སྔ་ཕྱིར་ལྟ་བའང་མེད་པས་དེ་བཞིན་ཉིད་ལ་དམ་པར་བལྟས་ནས་དང་དུ་ལེན་པའང་ཡོད་པ་མ་ཡིན་པར་བྱ་བ་སྟེ་དེ་ལྟར་སུམ་ཅུ་རྩ་བདུན་གྱིས་སེམས་ཀྱི་སྤྱོད་པ་ཡང་དག་པར་བསྟན་པའོ། །དེ་ལྟ་བས་ན་རང་རིག་པ་ཆོས་ཀྱི་སྐུ་སེམས་ཉིད་ནམ་མཁའི་རང་བཞིན་ཆོས་ཉིད་བདེ་བར་གཤེགས་པའི་སྙིང་པོ་དེ་ལ་འགྲོ་བ་རྣམས་ཀྱིས་གློ་བུར་དུ་བརྟགས་པའི་རྟོག་པ་སྤྲིན་ལྟ་བུ་རྣམས་ཀྱི་གཏིབས་ཤིང་སྤུངས་པས་སྒྲིབ་ནས་སེམས་ཀྱི་རང་བཞིན་མ་རྟོགས་པ་དེ་ཉིད་ཡང་དག་པའི་ཤེས་པའི་ཤེས་རབ་ཀྱི་རླུང་གིས་ཆོས་ཉིད་ཀྱི་ངང་དུ་རང་དེངས་པར་བྱས་ནས་མ་གཏོར་བར་སྐྱེ་བོ་མ་གྲངས་པ་ག་ཞ་མཁན་གྱི་རྟ་གད་སྐྱེད་པ་དང་མཚུངས་པའི་འཇིག་རྟེན་གྱི་སྤྱོད་པ་བཞའ་ལེ་བ་དང་འདྲ་བ་ལྟ་བུ་ཡིས་སྒྲིབ་པ་བསལ་ཞིང་དག་པས་ཆོས་ཉིད་ཀྱི་དོན་གསལ་བར་འདོད་པ་ཉིད་ནི་ཚེ་ཆད་པའི་ཕྱིར་དཔེ་ཇི་ལྟར་ན་ཆུས་གཤེར་བར་བྱས་པས་བྱིས་པ་དག་ཉི་མ་སྤྲིན་དང་ལྡན་པའི་གྲིབ་མ་ཡིས་ཤིན་ཏུ་སྒྲིབ་པར་གྱུར་ནས་གྲང་བས་སྦྲེབས་པ་ན་བྱིས་པའི་རང་བཞིན་ཅི་ཡང་མི་ཤེས་པས་སྤྲིན་ཆེན་འདུས་པའི་ཕུང་པོ་དེ་ལ་རང་གི་ཁ་ཡི་ཕུ་བཏབ་པའི་དབུགས་ཀྱིས་བུས་པར་བྱས་ནས་སྤྲིན་བསལ་ཏེ། ཉི་མའི་འོད་སྣང་གསལ་བར་འདོད་པ་དང་འདྲ་བར་འགྱུར་བ་ཁོ་ནའོ།།༼༢༨༧༽

གསུམ་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། བགྲོས་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་དེ་ལྟར་སྤྱོད་པའི་རང་བཞིན་དུ་ཤེས་པར་བྱའོ།།

ཞེས་ཐོས་པ་ཕྱིན་ཅི་མ་ལོག་པར་བགྲོས་པའོ།།

གྲོགས་པོ་དག བཤད་པ་དེ་དག་ནི་དེ་ལྟར་སྒོ་གསུམ་གྱི་སྤྱོད་པོ་རང་བཞིན་དུ་ཤེས་པར་བྱའོ། །ཞེས་ཐོས་པ་དམ་པ་ཕྱིན་ཅི་མ་ལོག་པར་བགྲོས་ཏེ་སྤྱོད་པའི་ངོ་བོ་བསྟན་པའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྣལ་འབྱོར་རང་བཞིན་གྱི་ལེའུ་སྟེ་ལྔ་བཅུ་བདུན་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རང་བཞིན་མ་བཅོས་པའི་གསང་སྔགས་ཀྱི་ལྟ་བ་རྟོགས་པའི་རྣལ་འབྱོར་གྱི་རང་བཞིན་གྱི་རྣམ་གྲངས་བཞི་ངེས་པར་བསྟན་པའི་ལེའུ་ཞེས་བྱ་སྟེ། ལྔ་བཅུ་རྩ་བདུན་པ་ཉིད་རྣམ་པར་བཀྲོལ་ཏེ་བཤད་པའོ།། །།

ལེའུ་ང་བརྒྱད་པ་དེ་ཁོ་ན་ཉིད་གསང་བ་དམ་པའི་ལྗོན་ཤིང་བསྐྱེད་པ།

༈ 54 གསུམ་པ་ལྗོན་ཤིང་བསྐྱེད་པར་བྱ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང་། ཞེས་པ་ནས། རྣམ་པར་བགྲོ་བར་བྱ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱིས་གསང་བ་པའི་བདག་པོ་ལ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ་ལྗོན་ཤིང་བསྐྱེད་པར་བྱའོ་ཞེས་དམ་བཅས་པར་གསུངས་པ་དེ། ཇི་ལྟར་ཡོངས་སུ་ཤེས་པར་བགྱི། དེ་གང་གི་ལྗོན་ཤིང་ལགས་ཞེས་དྲིས་པ་ལས། ཀྱེ་གསང་བ་པའི་བདག་པོ་ལྗོན་ཤིང་བསྐྱེད་པར་བྱའོ་ཞེས་དམ་བཅས་པར་གསུངས་པ་དེ། ཇི་ལྟར་ཡོངས་སུ་ཤེས་པར་བགྱི། དེ་གང་གི་ལྗོན་ཤིང་ལགས་ཞེས་དྲིས་པ་ལས། གསང་པ་བའི་བདག་པོས་སྨྲས་པ། ཀྱེ་གྲོགས་པོ་དག་ཤིང་ནི་བྱང་ཆུབ་ཀྱི་ལྗོན་ཤིང་སྟེ། བླ་ན་མེད་པའི་འབྲས་བུ་སྨིན་པས། གང་མཐའ་དག་གི་གསོས་སུ་གྱུར་པའི་ཕྱིར་ལྗོན་ཤིང་དེ་བསྐྱེད་པར་བྱའོ། །གྲོགས་པོ་དག་འདི་ལྟ་སྟེ། དེ་ཉིད་རྡོ་རྗེ་སྙིང་པོ་ལས། །གང་གི་ཟུག་རྔུ་ཀུན་བྱ་དེར། །མ་ལུས་ཡོངས་སུ་རྫོགས་པ་ལ། །གང་གི་དགོངས་པ་ངེས་འགྲེལ་བ། །སྦྱོར་བའི་སྐབས་སུ་བཤད་པ་དག །དེ་ཉིད་རྣམ་པར་བགྲོ་བར་བྱ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དེ་ནས་ཡང་འཁོར་ལང་ཀའི་བདག་པོ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སྟོན་པ་གསང་བ་པའི་བདག་པོ་ལ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ཞེ་ལྔ་པར་ཆོས་ཀྱི་རྣམ་གྲངས་བཅུར་བཀོད་པ་ལས།།

གསུམ་པ། ལྗོན་ཤིང་བསྐྱེད་པར་བྱའོ། །ཞེས་དམ་བཅའ་བར་གསུངས་པ་དེ་ཉིད། རྟོགས་པ་དང་གོམས་པའི་ཐབས་གང་གིས་ཚུལ་ཇི་ལྟར་ཡོངས་སུ་ཤེས་པར་བགྱི། སྤྱོད་ཡུལ་གྱི་དངོས་པོ་དེ་གང་གི་ལྗོན་ཤིང་ལགས། ཞེས་དྲི་བ་གཉིས་ནི་ཤེས་པར་བྱ་བའི་ཐབས་དང་སྤྱོད་ཡུལ་གཉིས་ཏེ། དེ་ལྟར་དྲིས་པ་ལས། སྟོན་པ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་གྲོགས་པོ་དག ཅེས་བོས་ནས། ཤིང་གི་ངོ་བོ་ན་བྱང་ཆུབ་སེམས་ཀྱི་ལྗོན་ཤིང་ཞེས་བྱ་བ་སྟེ། རིམས་ཀྱིས་འཕེལ་བ་དང་འབྲས་བུ་ལྷུན་རྫོགས་སུ་རྒྱས་པར་འགྱུར་བས་སོ།།

བསྐྱེད་པའི་དགོས་པ་ནི། གོང་ན་མེད་ཅིང་རྟོགས་པར་དཀའ་བས་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་གི་འབྲས་བུར་མཆོག་ཏུ་སྨིན་པར་འགྱུར་བས་གང་སངས་རྒྱས་དང་༼༢༨༨༽སེམས་ཅན་ཆོས་ཉིད་དང་ཆོས་ཅན་ལམ་པ་དང་འབྲས་བུ་མཐའ་དག་གི་ངོ་བོ་ཉིད་ཀྱི་སྲོག་འཛིན་པའི་གསོས་སུ་འགྱུར་ཏེ་སྐུ་གསུང་ཐུགས་ཡོན་ཏན་ཕྲིན་ལས་དང་རྣམ་རོལ་ཅིར་ཡང་འཆར་བའི་ཕྱིར་ཏེ། དེ་བས་ན་སྐལ་པ་མཆོག་ལྡན་རྣམས་ཀྱིས་དེ་ལྟ་བུའི་རྡོ་རྗེ་ལྟར་གྱུར་བའི་ལྗོན་ཤིང་དམ་པ་དེ་ཉིད་དོན་ལ་འཇུག་རིམ་བཅུ་ཚན་གྱི་སྒོ་ནས་བསྐྱེད་པར་བྱ་བ་ལ་བརྩོན་པར་བྱའོ། །གྲོགས་པོ་དག་དེའི་ཚུལ་ཉེ་བར་བསྟན་པ་འདི་ལྟ་སྟེ། རྫོགས་པར་བསྐྱེད་པའི་ངེས་ཚིག་གི་གོ་ནས་རིམ་པར་སྦྱོར་བའི་ཚུལ་བསྟན་ཏེ། ཆོས་ཉིད་དབྱིངས་ཀྱི་རང་བཞིན་ཆོས་རྣམས་ཀྱི་དེ་ཁོ་ན་ཉིད་འདུས་མ་བྱས་པའི་ངོ་བོ་རྡོ་རྗེ་ལྟ་བུའི་ཆོས་ལྔ་དང་ལྡན་པའི་སྙིང་པོའམ་བཅུད་དུ་གྱུར་པའི་རྩ་བ་ཆེན་པོ་དེ་ལ། གདོད་ནས་འཁོར་བའི་གཟུང་འཛིན་དང་ལམ་པས་རྩོལ་བའི་རྟོག་པ་གང་གི་ཟུག་རྔུ་དང་འཚེ་བ་ཕྲ་རགས་ཀུན་རྣམ་པར་བྱང་ཞིང་དག་པ་དེར་འཁོར་འདས་ཀྱི་ཆོས་མ་ལུས་པ་མཐའ་དག་ཡོངས་སུ་ཆུབ་སྟེ་ལྷུན་གྱིས་གྲུབ་པའི་ངོ་བོར་རྫོགས་པ་ལ་ནི་བྱང་ཆུབ་སེམས་ཀྱི་ལྗོན་ཤིང་ཞེས་བྱ་སྟེ་གསང་སྔགས་དམ་པ་འདི་ཉིད་དོ། །དེས་ན་རྒྱལ་བ་རྫོགས་པའི་སངས་རྒྱས་གང་གི་དགོངས་པ་མཐར་ཐུག་པ་དེ་ཉིད་ངེས་པར་བསྐྱེད་དེ་གསལ་བར་འགྲེལ་པས་དོན་རྟོགས་ཏེ་རྣམ་པར་རྟོག་པ་བསལ་བར་བྱེད་པའི་ཐབས་ཀྱི་སྒོ་ནས་དོན་ལ་རིམ་པར་སྦྱོར་བའི་སྐབས་སུ་རྣམ་གྲངས་བཅུ་ཚན་གྱིས་བཤད་པ་དེ་དག་རྣམས། དེ་ཇི་ལྟ་བར་མ་ནོད་པ་ཉིད་རིགས་ཅན་དམ་པ་ཁྱོད་རྣམས་ལ་རྣམ་པར་བགྲོ་སྟེ་ཡང་དག་པར་བཤད་པར་བྱ་ཡིས་གཞན་དུ་མ་ཡེངས་པར་རྣ་བ་ལྷོགས་ལ་ཉོན་ཅིག་པར་གདམས་པར་མཛད་པའོ། །འདིར་ལམ་རིམ་གྱིས་པ་ལ་དོན་ལ་རིམ་པར་འཇུག་ཚུལ་དུ་ངེས་ལ། ཅིག་ཆར་བའང་བགྲོད་པ་མྱུར་བས་རིམ་པ་མེད་པ་ལས་དོན་ལ་རྟོགས་རིགས་ཚང་ཞིང་རྫོགས་པར་མངོན་ནོ།།

གཉིས་པ་རྒྱས་པར་བཤད་པ་ལ་བཞི་སྟེ། སེམས་ཉིད་དོན་ལ་སྦྱོར་བའི་སྐབས་བཅུ་བཤད་པ། དེ་དག་གི་སྐབས་སུ་འབྱུང་བའི་རིག་པ་བྱང་ཆུབ་ཀྱི་སེམས་བཅུ་བསྟན་པ། དེ་རྣམས་མཚོན་པར་བྱེད་པའི་དཔེ་བཅུ་བཤད་པ། དེ་གསུམ་སྦྱར་ཏེ་ཤིན་ཏུ་གསལ་བར་བསྟན་པའོ། །དང་པོ་ནི།

དེ་ལ་དགོངས་འགྲེལ། ༼༢༨༩༽ཞེས་པ་ནས། གང་དེ་ནུབ་པར་འགྱུར། །ཞེས་པའི་བར་གྱིས་བསྟན་ཏེ།

དེ་ལ་དགོངས་འགྲེལ་སྦྱོར་སྐབས་བཅུ། །འདུན་པ་བསྐྱེད་དང་རྩོལ་བ་སྦྱོར། །བསླབ་པ་འཇུག་དང་འདུ་ཤེས་འཇུག །སྦྱོར་ནས་རོ་ཚོར་ཡུལ་ལ་འཇུག །རྟོག་ཆེན་གདེང་འགྱུར་ལས་སུ་རུང་། །རྒྱུན་དང་བཅས་པའི་སེམས་སྐབས་བཅུ། །སྙིང་པོ་དེ་དག་རྒྱུན་བཅས་ཕྱིར། །རྣལ་འབྱོར་ཆེན་པོ་སྐབས་བཅུ་ཡིས། །རྣལ་འབྱོར་རྣམ་ལྔའི་ཁྱད་པར་ལས། །བཅུ་དྲུག་རྒྱུན་གྱིས་ངེས་པར་རྫོགས། །དེ་བཞིན་ཤེས་བྱ་ཐམས་ཅད་ལ། །རྣམ་པ་བཅུ་ཡི་ཁྱད་པར་གྱིས། །དང་པོ་ནས་བཟུང་རྫོགས་བར་དུ། །སྦྱར་བས་གང་དེ་ནུབ་པར་འགྱུར།།

དེ་ཞེས་གདམས་པ་ལ་སྙེགས་པས་མཚན་མ་མེད་པའི་དོན་ལ་འཇུག་པའི་ལམ་གྱི་གཞི་ལ་ལྗོན་ཤིང་བསྐྱེད་པའི་ཐབས་ཀྱིས་སྐབས་རྣམས་རྒྱུ་དང་འབྲས་བུའི་ཚུལ་དུ་འབྲེལ་བ་ཡིས། རྒྱལ་བའི་དགོངས་པ་ངེས་པར་འགྲེལ་པ་ལས་དོན་ལ་ཡང་དག་པར་སྦྱོར་བའི་སྐབས་ཆེན་པོ་ནི་རྣམ་གྲངས་བཅུ་སྟེ། ཚོགས་ཀྱི་ལམ་ས་དང་པོ་ལ་ཡུལ་ཆོས་ཉིད་རྟོགས་པར་འདོད་དེ་འདུན་པ་སྐྱེད་པའི་གནས་སྐབས་དང་། ས་གཉིས་པ་ལ་དེ་ལ་རྩོལ་བ་དྲག་པོས་སྦྱོར་བའི་གནས་སྐབས་དང་། སྦྱོར་བའི་ལམ་ས་གསུམ་པ་ལ་མཐའ་བཅུའི་བསླབ་པར་འཇུག་པའི་གནས་སྐབས་དང་། ས་བཞི་པ་ལའང་འདུ་ཤེས་ཆོས་སུ་འགྱུར་བའི་གནས་སྐབས་དང་། ས་ལྔ་པ་ལ་དོན་ལ་སྦྱོར་ནས་སྦྱོང་ལེན་ལ་འཇུག་པའི་གནས་སྐབས་ཏེ་དེ་རྣམས་ཟག་བཅས་སོ། །མཐོང་བའི་ལམ་ས་དྲུག་པ་ལ་ཆོས་ཉིད་ཀྱི་རོ་ཚོར་བའི་གནས་སྐབས་དང་། སྒོམ་པའི་ལམ་ས་བདུན་པ་ལ་ཡུལ་ཆོས་ཉིད་རང་གི་མཚན་ཉིད་ལ་འཇུག་སྟེ་གོམས་པའི་གནས་སྐབས་དང་། མཐར་ལམ་ས་བརྒྱད་པ་ལ་དོན་དམ་རྣམ་པར་མི་རྟོག་པའི་རྟོག་ཆེན་ལ་ཕེབས་པའི་གནས་སྐབས་དང་། ས་དགུ་པ་ལ་དེ་ཁོ་ན་ཉིད་གདེང་དུ་གྱུར་པའི་གནས་སྐབས་དང་། ས་བཅུ་པ་ལ་མཐར་ཕྱིན་ཏེ་ལས་སུ་རུང་བའི་གནས་སྐབས་ཏེ་དེ་རྣམས་ནི་ཟག་མེད་དོ། །དེ་ལྟར་རིག་པ་སྐད་ཅིག་མའི་ངོ་བོའི་རྒྱུན་དང་བཅས་པའི་བྱང་ཆུབ་སེམས་ཀྱི་གནས་སྐབས་བཅུ་སྟེ། ཀུན་འདུས་ལས།

དོན་གྱི་རྗེས་སུ་འཇུག་པ་ཡང་། དོན་ནི་ཆོས་ཉིད་སྙིང་པོ་ལ། །རྗེས་སུ་འཇུག་པ་སེམས་ཡིན་ཏེ། །སེམས་ཉིད་ཆོས་ལ་སྦྱོར་བའི་སྐབས། །རྣམ་པ་བཅུ་ཞེས་འདྲེན་པས་བཤད། །བཅུ་ཉིད་གང་དང་གང་ཞེ་ན། །འདུན་པ་སྐྱེ་བའི་གནས་སྐབས་དང་། །རྩོལ་བ་སྦྱོར་བའི་གནས་སྐབས་དང་། །བསླབ་པ་ལ་འཇུག་གནས་སྐབས་དང་། །འདུ་ཤེས་འགྱུར་བའི་གནས་སྐབས་དང་། སྦྱོར་ཆེན་ལ་འཇུག་གནས་སྐབས་དང་། །རོ་ཉིད་ཚོར་བའི་གནས་སྐབས་དང་། །ཡུལ་ལ་འཇུག་པའི་གནས་སྐབས་དང་། །རྟོག་ཆེན་ཉིད་ལ་ཕེབས་སྐབས་དང་། །དེ་ཉིད་གདེང་དུ་གྱུར་པའི་སྐབས། །༼༢༩༠༽ལས་སུ་རུང་བའི་སྐབས་དང་བཅུ། །ཞེས་སོ། །དེ་ལྟར་རྩ་བ་ལྗོན་ཤིང་གི་སྙིང་པོ་དེ་དག་གི་དོན་རྣམས་རྒྱུན་དུ་བསམ་ནས་འབད་པ་དང་བཅས་པའི་ཕྱིར། །རྣལ་འབྱོར་མཆོག་གི་ཐེག་པ་ཆེན་པོའི་སྐབས་རྣམས་སུ་གནས་ཏེ་སེམས་དང་ཆོས་འཕྲད་པས་དོན་ལ་ཕེབས་པའི་རྣལ་འབྱོར་བཅུ་སྐབས་བཅུ་ཡིས་མཐར་ཕྱིན་པ་ཡང་གཞན་བཤད་པའི་རྣལ་འབྱོར་གྱི་རྩ་བ་རྣམ་པ་ལྔ་ཡི་ཁྱད་པར་ལས་སྣང་བར་གྱུར་པ་སྟེ། དེ་ཡང་རྣལ་འབྱོར་བཅུ་དང་། སྐབས་བཅུ་དང་། བྱང་ཆུབ་ཀྱི་སེམས་བཅུ་དང་། རྟགས་དང་དཔེ་བཅུ་དང་། ས་བཅུ་དང་། བསླབ་པའི་མཐའ་བཅུ་སྟེ་བཅུ་ཕྲག་ཚན་དྲུག་གིས། སྐར་ཕྲན་ནས་ཚེས་བཅུ་དྲུག་གི་བར་ལྟ་བུའི་རྒྱུན་གྱིས་ངེས་པར་ཟླ་བའི་དཀྱིལ་འཁོར་ཆ་གང་བར་སྣང་བ་ལྟར་ཡོངས་སུ་རྫོགས་ཤིང་མཐར་ཕྱིན་པའོ། །དེ་ལྟར་བསྟན་པ་བཞིན་དུ་གནས་སྐབས་ཀྱི་ཤེས་པར་བྱ་བའི་ཡུལ་ཐམས་ཅད་ཀུན་ལ་གྲངས་ཀྱི་རྣམ་པ་རྩ་བ་བཅུ་ཡི་བྱེ་བྲག་གི་ཁྱད་པར་གྱིས་གོང་འོག་གི་མཐོ་དམན་གྱི་རིམ་པ་སྐྱེ་བོ་པ་དང་པོ་སེམས་བསྐྱེད་པ་ཡན་ཆད་ནས་བཟུང་སྟེ་མཐར་འབྲས་བུ་ཡོངས་སུ་རྫོགས་པ་ཐོབ་པའི་བར་དུ་རིམ་པས་དོན་ལ་སྦྱོར་བའི་ཏིང་ངེ་འཛིན་གྱི་ངོ་བོ་འོག་ནས་གོང་དུ་འཕར་བས་སྔ་མ་སྔ་མ་རྒྱུ་དང་ཕྱི་མ་ཕྱི་མ་འབྲས་བུའི་ཚུལ་གྱིས་ཡེ་ཤེས་རེ་རེ་སྐྱེས་ཏེ་གང་སྒྲིབ་པ་བཅུ་པོ་དེ་དག་རེ་རེ་ནུབ་ཅིང་སྦྱོང་ནུས་པའི་རྩལ་དང་ལྡན་པར་འགྱུར་པའོ།།

གཉིས་པ་དེ་དག་གི་སྐབས་སུ་འབྱུང་བའི་རིག་པ་བྱང་ཆུབ་ཀྱི་སེམས་བཅུ་བསྟན་པ་ནི།

གང་གིས་གང་མཐོང་། ཞེས་པ་ནས། གནས་དང་རྫོགས་པའོ། །ཞེས་པའི་བར་གྱིས་བསྟན་ཏེ།

གང་གིས་གང་མཐོང་དེ་རེ་ན། །རིག་པ་བྱང་ཆུབ་སེམས་རེ་འབྱུང་། །དེ་ཉིད་དེར་ནུབ་གང་ཞེ་ན།།

གཡོ་དང་སྨོན་པ་ལྡང་བ་དང་། །སྦྱོར་བ་འཇུག་དགའ་མི་འགྱུར་བ། །རིག་དང་གནས་པ་རྫོགས་པའོ།།

རྟེན་གྱི་གང་ཟག་ས་དང་པོ་ཡན་ཆད་ནས་བཅུ་པའི་བར་ལ་འོག་མ་གང་གིས་གོང་མ་དག་གི་ཆོས་ཉིད་ཀྱི་དོན་གང་ལ་སེམས་ཉིད་རྗེས་སུ་འཇུག་པས་ཡང་དག་པར་རྟོགས་ཤིང་མཐོང་བའི་གནས་སྐབས་དེ་དག་རེ་རེའི་ཚེ་ལ་ཡང་རིམ་པར་རྟོགས་པའི་རིག་པ་བྱང་ཆུབ་ཀྱི་སེམས་རེ་འབྱུང་བས་དོན་གྱི་རྟོགས་པ་ཇེ་གསལ་དུ་གྱུར་པས་གནས་སྐབས་བཅུའི་སྒྲིབ་པ་དེ་ཉིད་བྱང་ཆུབ་སེམས་ཀྱི་ངང་གི་རྣམ་པ་དེར་ནུབ་སྟེ་ཡེ་ཤེས་བཅུ་འཆར་བ་ཡང་སྐབས་བཅུར་འདུས་ཏེ་སྐྱེ་བར་འགྱུར་བ་གང་ཞེ་ན། ལས་དང་པོ་པས་འཁོར་བའམ་མཐའ་གཉིས་ལས་འདས་པར་གསང་བའི་དོན་ལ་ཅུང་ཟད་གཡོ་བའི་བྱང་ཆུབ་ཀྱི་སེམས་དང་། ༼༢༩༡༽དེ་ཉིད་སྟོབས་སུ་གྱུར་པས་འདས་པའམ་སྔགས་དོན་ལ་སྨོན་པ་བྱང་ཆུབ་ཀྱི་སེམས་དང་། དེ་ལས་འཕགས་ཏེ་འབྲས་བུའི་རྣམ་པ་ལ་ལན་རེ་ལྡང་བ་བྱང་ཆུབ་ཀྱི་སེམས་དང་། མཐའ་བཅུ་ལ་འབད་པས་གཉིས་མེད་ལ་སྦྱོར་བ་བྱང་ཆུབ་ཀྱི་སེམས་དང་། ཤེས་རབ་གསུམ་གྱི་སྒོ་ནས་དོན་ལ་གཉིས་མེད་དུ་འཇུག་པའི་བྱང་ཆུབ་ཀྱི་སེམས་དང་། ཆོས་ཉིད་རང་གི་མཚན་ཉིད་མངོན་སུམ་དུ་མཐོང་བས་རབ་ཏུ་དགའ་བ་བྱང་ཆུབ་ཀྱི་སེམས་དང་། དེ་ཉིད་སྒོམ་པས་དེ་ལས་མི་འགྱུར་བར་གནས་པའི་བྱང་ཆུབ་ཀྱི་སེམས་དང་། ཐམས་ཅད་རང་རིག་པའི་ཡེ་ཤེས་སུ་ཤར་བའི་མིག་གཡོ་བ་བྱང་ཆུབ་ཀྱི་སེམས་དང་། དེའི་ངང་ལ་གནས་ཤིང་ཡོན་ཏན་ཐོབ་པ་བྱང་ཆུབ་ཀྱི་སེམས་དང་། མཐར་ཐུག་ཏུ་རྫོགས་ཏེ་སྤྱི་བོར་ཆིབས་པའི་བྱང་ཆུབ་ཀྱི་སེམས་དང་རྣམ་གྲངས་བཅུ་སྟེ། སྔ་མ་ལས།

དགུ་པོ་དེ་དག་རེ་རེ་ཡི། །སྐབས་སུ་སེམས་དང་ཆོས་ཕྲད་པས། །རིག་པ་བྱང་ཆུབ་སེམས་རེ་འབྱུང་། །བྱང་ཆུབ་སེམས་ནི་གང་ཞེ་ན། །འདི་ཡི་གྲངས་ཀྱང་རྣམ་པ་བཅུ། །གཡོ་བ་བྱང་ཆུབ་སེམས་ཉིད་དང་། །དེ་བཞིན་སྨོན་པ་བྱང་ཆུབ་སེམས། །ལྡང་བ་བྱང་ཆུབ་ཆེན་པོའི་སེམས། །དེ་བཞིན་སྦྱོར་བ་བྱང་ཆུབ་སེམས། །འཇུག་པའི་སེམས་དང་དགའ་བའི་སེམས། །མི་འགྱུར་བ་དང་རིག་པ་དང་། །གནས་པ་དང་ནི་རྫོགས་པའོ། །བྱང་ཆུབ་སེམས་ཞེས་གྲགས་པས་ན། །སེམས་བཅུ་དག་ཏུ་རྒྱལ་བས་བཤད། །ཅེས་གསུངས་ཏེ། དེ་ལྟར་བྱང་ཆུབ་ཀྱི་སེམས་རྣམ་པ་བཅུའོ།།

གསུམ་པ་དེ་རྣམས་མཚོན་པར་བྱེད་པའི་དཔེ་བཅུ་བཤད་པ་ནི།

གང་གི་གཟུགས་བརྙན། ཞེས་པ་ནས། བཅུ་དྲུག་ལྟ་བུར་སྣང་། །ཞེས་པའི་བར་གྱིས་བསྟན་ཏེ།

གང་གི་གཟུགས་བརྙན་གང་སྣང་བ། །དངོས་མེད་རང་སྣང་མཐུན་པའི་དཔེ།།

ཕྲ་མོ་ཐ་མལ་ཆེན་པོ་ཡི། །སྐར་མ་ཟླ་ཚེས་གཉིས་པ་དང་།།

གསུམ་དང་བཞི་དང་ལྔ་པ་དང་། །བརྒྱད་དང་བཅུ་དྲུག་ལྟ་བུར་སྣང་།།

གང་གི་རྟོགས་པ་དང་གོམས་པའི་ཁྱད་པར་ལྟར་བྱང་ཆུབ་སེམས་ཀྱིགཟུགས་བརྙན་གང་ཡིན་པ་རིག་པ་ལ་སྣང་བ་ཡི་རྟགས་དང་། དངོས་པོ་མེད་པར་ངོ་བོ་རང་སྣང་དང་མཐུན་པར་སེམས་སྐྱེ་ལུགས་ཀྱི་མཚོན་པར་འགྱུར་པའི་དཔེ་གཉིས་ཐུན་མོང་གི་རྣམ་གྲངས་སུ་བསྟན་པ་ནི། དཔེར་ན་སྐར་མ་ཕྲ་མོ་ལྟ་བུ་དང་། ཐ་མལ་དུ་གྱུར་བའི་འབྲིང་པོ་ལྟ་བུ་དང་། ཆེན་པོ་ཡི་སྐར་མ་ཤར་བ་ལྟ་བུ་དང་། ཟླ་བ་ཚེས་གཅིག་པ་ལྟ་བུ་དང་། དེ་བཞིན་དུ་ཚེས་གཉིས་པ་དང་ལྟ་བུ་དང་། གསུམ་པ་ལྟ་བུ་དང་། བཞི་པ་ལྟ་བུ་དང་། ཚེས་ལྔ་པ་ལྟ་བུ་དང་ནི། ཚེས་བརྒྱད་པ་ལྟ་བུ་དང་། ཚེས་བཅུ་དྲུག་པ་ཆ་ཤས་ཡོངས་སུ་གང་བ་ལྟ་བུར་སྣང་བ་སྟེ། དེ་ཉིད་ལས།

བྱང་ཆུབ་སེམས་ཀྱི་རང་བཞིན་དེ། །སྐབས་བཅུ་དག་ཏུ་སྦྱོར་བ་ན། །གཟུགས་བརྙན་ཆོས་ཉིད་ངོ་ལ་སྣང་། །གཟུགས་བརྙན་རང་བཞིན་ཇི་ལྟར་སྣང་། །ཕྲ་མོ་ཙམ་གྱི་སྐར་མ་དང་། །དེ་བཞིན་སྐར་མ་ཐ་མལ་པ། །སྐར་མ་ཆེན་པོ་དག་དང་ནི། །ཟླ་བ་ཚེས་གཅིག་རྣམ་པ་དང་། །གཉིས་དང་གསུམ་དང་བཞི་དང་ལྔ་། །བརྒྱད་དང་བཅུ་དྲུག་རྣམ་པ་ཡི། །གཟུགས་བརྙན་དག་ཏུ་སྣང་བ་སྟེ། །དངོས་པོར་སྣང་བ་ཅང་མ་ཡིན། །ཆུ་ཟླ་ལྟ་བུར་གཟུང་དུ་མེད། །སེམས་ཀྱི་གཟུགས་བརྙན་སྣང་བ་དང་། །ཆོས་ཉིད་གསལ་བའི་ཉི་མ་གཉིས། །ཡུལ་དང་དབང་པོའི་ཚུལ་ལྟ་བུར། །དབྱིངས་དང་ཡེ་ཤེས་རང་བཞིན་གསལ། །འདི་ནི་རྣལ་འབྱོར་སྦྱོར་བའི་ལམ། །བགྲོད་པར་བྱེད་པའི་ཐབས་ཆེན་ཡིན། །ཞེས་གསུངས་ཏེ། འདི་དག་ཆོས་ཉིད་ཀྱི་དོན་ལ་མི་སྦྱར་བར་རང་གི་སེམས་ཀྱི་སྐྱེ་ལུགས་ལ་སྦྱར་ཏེ་སེམས་འཕེལ་ཞིང་འབོགས་སུ་དབྱུང་བའི་མཚོན་དཔེར་བྱས་ནས་ལམ་བཅུ་ཚན་གྱི་གོ་བ་བསྐྱེད་པར་བྱའོ།།

བཞི་པ་དེ་གསུམ་སྦྱར་ཏེ་ཤིན་ཏུ་གསལ་བར་བསྟན་པ་ལ་བཅུ་སྟེ། འདུན་པ་སྐྱེ་བའི་སྐབས་ཀྱི་སེམས་དཔེ་དང་བཅས་པ། རྩོལ་བར་སྦྱོར་བའི་སྐབས་ཀྱི་སེམས་དཔེ་དང་བཅས་པ། བསླབ་པར་འཇུག་པའི་སྐབས་ཀྱི་སེམས་དཔེ་དང་བཅས་པ། འདུ་ཤེས་འགྱུར་བའི་སྐབས་ཀྱི་སེམས་དཔེ་དང་བཅས་པ། སྦྱོར་ཆེན་འཇུག་པའི་སྐབས་ཀྱི་སེམས་དཔེ་དང་བཅས་པ། རོ་མྱོང་བ་ཡི་སྐབས་ཀྱི་སེམས་དཔེ་དང་བཅས་པ། ཡུལ་ལ་འཇུག་པའི་སྐབས་ཀྱི་སེམས་དཔེ་དང་བཅས་པ། རྟོག་ཆེན་དག་པའི་སྐབས་ཀྱི་སེམས་དཔེ་དང་བཅས་པ། གདེང་དུ་གྱུར་པའི་སྐབས་ཀྱི་སེམས་དཔེ་དང་བཅས་པ། ལས་སུ་རུང་བའི་སྐབས་ཀྱི་སེམས་དཔེ་དང་བཅས་པ་བཤད་པའོ། །དང་པོ་ནི།

འདུན་པ་སྐྱེ་བའི། ཞེས་པ་ནས། སྐར་མ་རབ་རིབ་སྣང་། །ཞེས་པའི་བར་གྱིས་བསྟན་ཏེ།

འདུན་པ་སྐྱེ་བའི་སྐབས་དག་ལ། །གཡོ་བ་ལྷག་པའི་སེམས་འབྱུང་སྟེ།།

མུན་པའི་སྤྲིན་རུམ་ལྟ་བུ་ཡི། །གཟེར་འཕྲོ་སྐར་མ་རབ་རིབ་སྣང་།།

གོང་དུ་རྣལ་འབྱོར་ཆེན་པོའི་སྐབས་བཅུ་ཡིས། ཞེས་གསུངས་པས་དོན་གྱིས་ཐུན་མོང་མ་ཡིན་པའི་ལམ་འབའ་ཞིག་ཏུ་འགྱུར་ཏེ། ས་དང་པོ་ཚོགས་ལམ་གྱི་ཐོག་མར་སྐྱེ་བོའི་ས་དང་རྒྱུའི་ས་གང་ནས་ཀྱང་གསང་སྔགས་མཆོག་འདིར་སེམས་བསྐྱེད་ཀྱང་འདི་ཉིད་རྟེན་གཞི་ལས་དང་པོ་པར་འགྱུར་བས་ཐོག་མ་སྔོན་གྱི་དུས་ནས་རྒྱུ་མཚུངས་པ་ཡོད་པ་ཉིད་བླ་མ་དམ་པ་ལས་རྒྱུད་ཆེན་པོ་ཐོས་པའི་རྐྱེན་གྱིས་བསླད་ནས་ཐུན་མོང་མ་ཡིན་པའི་སྒོ་འདིར་མོས་ཤིང་འབྲས་བུ་ལ་འདུན་པ་དང་པོ་སྐྱེ་བའི་གནས་སྐབས་དག་གི་ཚེ་དེ་ཁོ་ན་ལ་ས་གཉིས་གང་རུང་ནས་འཇིག་རྟེན་གྱི་ཆོས་འདི་རྫུན་པ་མི་བདེན་པ་ཡིན་ནོ་སྙམ་དུ་བདེན་པ་གཉིས་སྤྱིའི་ལམ་པོ་ཆེའི་མཚན་ཉིད་ཙམ་དུ་ཤེས་པས་དོན་ལ་གོ་བ་དངོས་མེད་ཀྱང་དུས་དུས་སུ་མོས་པ་སྐྱེས་ཏེ་སེམས་གཡོ་བ་བྱུང་བ་ནི་ས་གཉིས་ལ་མེད་པར་མུན་པའི་ཤེས་པ་ལས་འཕགས་པས་ལྷག་པའི་བྱང་ཆུབ་ཀྱི་སེམས་ཞེས་བྱ་བ་འབྱུང་སྟེ།

དཔེར་ན་དབྱར་གྱི་ཆར་སྤྲིན་འཐིབས་པས་མུན་པའི་སྤྲིན་རུམ་ལྟ་བུ་ཡི་གསེབ་བམ་མཐོངས་ནས་ཟེར་འཕྲོ་བའི་སྐར་མ་ཕྲ་མོ་བྱུང་བ་དང་འདྲ་བར་སྣང་ཡང་ཡུན་ཐུང་སྟེ། དེ་མ་ཐག་ནུབ་པར་འགྱུར་བས་རབ་རིབ་ཙམ་དུ་སྣང་བ་ཉིད་དེ། བློ་མུན་པ་ལྟ་བུའི་གསེབ་ལས་བྱང་ཆུབ་ཀྱི་སེམས་རྒྱུ་རྐྱེན་གྱི་དབང་གིས་དེ་ཙམ་སྐྱེས་པ་ཡིན་པས་དུས་དེར་དེ་ལྟ་བུ་དངོས་སུ་ཡང་མཐོང་བར་འགྱུར་ཏེ། འོན་ཀྱང་སྣང་ངོ་སྙམ་ནས་བརྟགས་ན་མི་མངོན་པས་མེ་ཁྱེར་རྩ་བ་ནས་བལྟས་ན་ཡོད་ཀྱང་རྒྱང་ནས་བལྟས་ན་མེད་པ་དང་འདྲ་བར་སེམས་དེ་ཙམ་སྐྱེས་ཀྱང་མི་རྟག་སྟེ་གྲོགས་ངན་གྱི་སྟོབས་ཀྱིས་ཀྱང་མི་གསལ་བར་འགྱུར་རོ།།

གཉིས་པ་རྩོལ་བར་སྦྱོར་བའི་སྐབས་ཀྱི་སེམས་དཔེ་དང་བཅས་པ་ནི།

རྩོལ་བ་སྦྱོར་བའི། ཞེས་པ་ནས། རབ་རིབ་ལྟ་བུའོ། །ཞེས་པའི་བར་གྱིས་བསྟན་ཏེ།

རྩོལ་བ་སྦྱོར་བའི་སྐབས་དག་ལ། །སྨོན་པ་ལྷག་པའི་སེམས་འབྱུང་སྟེ།།

ཤིན་ཏུ་སྐར་མ་ཕལ་པ་དག །གང་ལ་རབ་རིབ་ལྟ་བུའོ།།

ས་གཉིས་པ་ཚོགས་ཀྱི་ལམ་ཕྱི་མར་དེ་ལྟར་འདུན་པ་གཡོ་བའི་རྒྱུ་ལ་བརྟེན་ནས་རྩོལ་བ་དང་བཅས་པས། བཙལ་ཞིང་ཡུལ་གསང་སྔགས་ལ་སྦྱོར་ཏེ་གྲུབ་པ་དང་རྟོགས་པར་འདོད་པའི་གནས་སྐབས་དག་ལ་གསང་སྔགས་འབྲས་བུའི་དོན་དེ་ཉིད་ལ་སློབ་ཅིང་རྟོགས་པར་སྨོན་པའི་ཁྱད་པར་གྱིས་ས་འོག་མ་འདུན་པ་པ་ལ་མེད་པས་ལྷག་པའི་བྱང་ཆུབ་ཀྱི་སེམས་འབྱུང་ཞིང་སྐྱེ་སྟེ། དེའི་ཚུལ་ནི་སྔ་མ་བས་ཅུང་ཟད་གསལ་ཡང་མི་བརྟན་ཞིང་བརྟགས་ཏུ་མི་བཟོད་པས་མུན་པ་ནས་ཤིན་ཏུ་མི་གསལ་བའི་སྐར་མ་ཕལ་པ་འབྲིང་པོ་དག་མཐོང་ཡང་གང་ལ་རབ་རིབ་ཅན་གྱི་སྤྲིན་གྱིས་བསྒྲིབས་པ་ལྟ་བུ་ཉིད་དུ་སྣང་བ་ཙམ་སྟེ། ད་དུང་གསང་སྔགས་དེ་ཁོ་ན་ཉིད་ལ་ཞུགས་པ་ནི་མ་ཡིན་ཏེ། དོན་ལ་སྨོན་པ་ཙམ་དུ་གྱུར་བའོ། །དེ་གཉིས་ནི་རྣལ་འབྱོར་དང་པོའི་ཁྱད་པར་རོ།།

གསུམ་པ་བསླབ་པར་འཇུག་པའི་སྐབས་ཀྱི་སེམས་དཔེ་དང་བཅས་པ་ནི།

བསླབ་པར་འཇུག་པའི། ཞེས་པ་ནས། ལྟ་བུར་རབ་རིབ་སྣང་། །ཞེས་པའི་བར་གྱིས་བསྟན་ཏེ།

བསླབ་པ་འཇུག་པའི་སྐབས་དག་ལ། །ལྡང་བ་བྱང་ཆུབ་སེམས་འབྱུང་སྟེ།།

ཇི་ལྟར་མེ་ཡི་གཟེར་ཆེན་ལྟར། །སྐར་ཆེན་ལྟ་བུར་རབ་རིབ་སྣང་།།

ས་གསུམ་པ་སྦྱོར་ལམ་དང་པོར་དེ་ལྟར་རྩོལ་བ་དང་སྨོན་པའི་རྒྱུ་ལས་གསང་མཆོག་ཐེག་པ་ཆེན་པོ་ལ་ཞུགས་ནས་བསླབ་པའི་མཐའ་བཅུ་ལ་ཡང་དག་པར་འཇུག་ཅིང་སློབ་པའི་གནས་སྐབས་ཀྱི་ཚེ་དག་ལ། བླ་མའི་སྟོབས་དང་བསླབ་མཐའ་བཅུའི་མཐུ་ཡིས་འོག་མ་ལ་མེད་པས་ལྷག་པ་སྨོན་པ་ལས་གྱེན་དུ་འཕགས་ཏེ་བདེན་གཉིས་དབྱེར་མེད་ཀྱི་དོན་ལ་སྐབས་སུ་ལྡང་བ་བྱང་ཆུབ་ཀྱི་སེམས་འབྱུང་ཞིང་སྐྱེ་སྟེ། དེའི་ཚུལ་ནི་རྩ་བ་མ་རྟོགས་ཀྱང་འོད་སྣང་བས་དཔེ་ཇི་ལྟར་ན་མཚན་མོ་མེ་ཡི་འོད་ཟེར་ཆེན་པོ་ལྟར་རམ་སྐར་མ་ཆེན་པོའི་འོད་ལྟ་བུར་བརྟག་ཏུ་ཡོད་ཀྱང་རང་གི་མཚན་ཉིད་མི་གསལ་བས་རབ་རིབ་ལྟར་སྣང་བ་ཉིད་སྐྱེ་བར་འགྱུར་རོ།།

བཞི་པ་འདུ་ཤེས་འགྱུར་བའི་སྐབས་ཀྱི་སེམས་དཔེ་དང་བཅས་པ་ནི།

འདུ་ཤེས་འགྱུར་བའི། ཞེས་པ་ནས། ཟླ་ཚེས་ལྟ་བུར་སྣང་། ཞེས་པའི་བར་གྱིས་བསྟན་ཏེ།

འདུ་ཤེས་འགྱུར་བའི་སྐབས་དག་ལ། །སྦྱོར་བ་ལྷག་པའི་སེམས་སྐྱེ་སྟེ།།

ཇི་ལྟར་མགལ་མེའི་འཁོར་ལོ་དང་། །གཅིག་པའི་ཟླ་ཚེས་ལྟ་བུར་སྣང་།།

ས་བཞི་པ་སྦྱོར་ལམ་གཉིས་པར་དེ་ལྟར་བསླབ་པ་དང་ལྡང་བའི་རྒྱུ་ལ་བརྟེན་ནས་སྔར་གྱི་སྤྱོད་ཡུལ་ལས་འཕགས་ཏེ་གསང་སྔགས་ཡང་དག་པའི་དོན་དུ་འདུ་ཤེས་སྔ་བར་འགྱུར་བའི་གནས་སྐབས་དག་ལ་འབད་རྩོལ་གྱིས་ཡུལ་དུ་བྱེད་དེ་རྟོགས་པའི་རིག་པས་གསང་སྔགས་གཉིས་མེད་ཀྱི་དོན་ལ་སྦྱོར་ཞིང་གཏན་ལ་འབེབས་པ་འོག་མ་ལས་ལྷག་པའི་བྱང་ཆུབ་ཀྱི་སེམས་འབྱུང་ཞིང་སྐྱེ་སྟེ། དེའི་ཚུལ་ནི། དཔེ་ཇི་ལྟར་ན་འགལ་མེའི་འཁོར་ལོ་མྱུར་ལ་རྒྱུན་མི་འཆད་པ་ལྟ་བུ་དང་། ཅུང་ཟད་གསལ་ལ་སྐྱེད་དུ་བྱ་བར་ཡོད་པས་ཚེས་གཅིག་པའི་ཟླ་ཚེས་ལྟ་བུར་སྣང་ཞིང་མཐོང་བ་ནི་རྟགས་ཏེ་དེ་ཡང་མུན་ནང་ནས་སྣང་བ་ནི་སྐྱེ་ཚུལ་ལོ།།

ལྔ་པ་སྦྱོར་ཆེན་འཇུག་པའི་སྐབས་ཀྱི་སེམས་དཔེ་དང་བཅས་པ་ནི།

སྦྱོར་ཆེན་འཇུག་པའི། ཞེས་པ་ནས། གཉིས་པ་ལྟ་བུར་སྣང་། །ཞེས་པའི་བར་གྱིས་བསྟན་ཏེ།

སྦྱོར་ཆེན་འཇུག་པའི་སྐབས་དག་ལ། །འཇུག་པ་ལྷག་པའི་སེམས་སྐྱེ་སྟེ།།

ཇི་ལྟར་སྒྲོན་མེ་ལྟ་བུ་འམ། །ཟླ་ཚེས་གཉིས་པ་ལྟ་བུར་སྣང་།།

ས་ལྔ་པ་སྦྱོར་ལམ་ཐ་མར། དྲོད་རྟགས་ཀྱི་རྣལ་འབྱོར་ཞེས་འདུ་ཤེས་འགྱུར་བ་དང་དོན་ལ་སྦྱོར་བའི་རྒྱུ་ལ་བརྟེན་ནས་གསང་སྔགས་མཉམ་པ་ཉིད་ཀྱི་དོན་མངོན་དུ་བྱེད་པ་ལ་སྦྱོར་བའི་ཤེས་རབ་སྦྱངས་ནས་ལྷག་པའི་སེམས་ཆེན་པོ་དེས་མཐོང་ལམ་ལ་འཇུག་པར་འགྱུར་བའི་གནས་སྐབས་ཀྱི་ཚེ་དག་ལ། གཉིས་སུ་མེད་པའི་དོན་ལ་རྣལ་འབྱོར་མངོན་སུམ་གྱིས་འཇུག་པར་བྱེད་པས་སྔར་གྱི་ལྟ་བ་ལས་ལྷག་པའི་བྱང་ཆུབ་ཀྱི་སེམས་སྐྱེ་ཞིང་འབྱུང་སྟེ། དེའི་ཚུལ་ནི། དཔེ་ཇི་ལྟར་ན་བཏེགས་པས་གསལ་ཡང་རླུང་གིས་གཡོ་བ་མུན་པར་བལྟམས་པའི་སྒྲོན་མེ་ལྟ་བུའམ། ཟླ་བ་ཚེས་གཉིས་པ་ལྟ་བུར་སྣང་བ་འབྱུང་བའོ། །རྟགས་དང་ཐུན་མོང་བ་དང་སྐབས་ཀྱི་སེམས་དེ་དག་གསལ་མི་གསལ་གྱི་ཁྱད་པར་ས་གོང་འོག་ལྟར་སེམས་ཀྱི་སྐྱེད་དུ་འཕར་བས་ཕྱེ་བ་དང་། འོག་མ་ལས་ལྷག་པའི་སེམས་སུ་འགྱུར་བ་བཤད་པ་དང་འཆད་པ་རིལ་རྗེས་སུ་མཐུན་ནོ། །དེ་གསུམ་རྣལ་འབྱོར་གཉིས་པའི་ཁྱད་པར་རོ།།

དྲུག་པ་རོ་མྱོང་བ་ཡི་སྐབས་ཀྱི་སེམས་དཔེ་དང་བཅས་པ་ནི།

རོ་མྱོང་བ་ཡི། ཞེས་པ་ནས། ལྟ་བུར་དེ་སྣང་ངོ་། །ཞེས་པའི་བར་གྱིས་བསྟན་ཏེ།

རོ་མྱོང་བ་ཡི་སྐབས་དག་ལ། །དགའ་བའི་ལྷག་པའི་སེམས་འབྱུང་སྟེ།།

སྣོད་ཀྱི་སྒྲོན་མེ་ལྟ་བུ་འམ། །གསུམ་པ་ལྟ་བུར་དེ་སྣང་ངོ་།།

ས་དྲུག་པ་མཐོང་བའི་ལམ་དུ། ཤེས་རབ་གསུམ་གྱིས་སྦྱོར་བ་དང་འཇུག་པའི་རྒྱུ་ལ་བརྟེན་ནས་གསང་སྔགས་ཇི་བཞིན་པ་སྐྱེ་བ་མེད་པའི་སེམས་ཀྱི་ཆོས་ཉིད་མ་ནོར་བའི་དོན་རྟོགས་ཏེ་རོ་མྱོང་ཞིང་བདེན་པ་མཐོང་བ་ཡི་གནས་སྐབས་དག་ཏུ་གྱུར་པ་ལ། སྔར་དེ་ལྟ་བུ་མེད་པས་འཁོར་བར་མི་ལྡོག་ཅིང་ཟག་མེད་ཀྱི་མཐོང་བ་མཐར་ཕྱིན་པར་མྱོང་ནས་ལོངས་སྐུ་མཐོང་བས་ཤིན་ཏུ་དགའ་བ་དང་ལྡན་པར་མཆོག་ཏུ་ལྷག་པའི་བྱང་ཆུབ་ཀྱི་སེམས་འབྱུང་སྟེ་སྐྱེ་ཞིང་རིག་པ་ལ་གསལ་བ་ནི་དཔེར་ན་བུམ་པའི་སྣོད་ཀྱི་སྒྲོན་མ་མི་གཡོ་བར་གསལ་བ་ལྟ་བུའམ། ཟླ་བ་ཚེས་གསུམ་པ་ལྟ་བུར་དོན་དེ་ཡང་སྣང་བའོ། །དེ་ཉིད་རྣལ་འབྱོར་གསུམ་པའི་ཁྱད་པར་དུ་གཟུང་ངོ་། །དེ་དག་ནི་ཤེས་པའི་མཚན་ཉིད་དུའང་འགྱུར་ཏེ། རྟོགས་པ་བཞི་ལ་སོགས་པའི་ཡན་ལག་གི་རྐྱེན་དང་ལྡན་པས་སོ།།

བདུན་པ་ཡུལ་ལ་འཇུག་པའི་སྐབས་ཀྱི་སེམས་དཔེ་དང་བཅས་པ་བཤད་པ་ནི།

ཡུལ་ལ་འཇུག་པའི། ཞེས་པ་ནས། ལྟ་བུའི་རང་བཞིན་སྣང་། །ཞེས་པའི་བར་གྱིས་བསྟན་ཏེ།

ཡུལ་ལ་འཇུག་པའི་སྐབས་དག་ལ། །མི་འགྱུར་ལྷག་པའི་སེམས་འབྱུང་སྟེ།།

ཐོབ་དང་བརྟན་ལ་ཉེ་བ་ཡིན། །བཞི་པ་ལྟ་བུར་རང་བཞིན་སྣང་།།

ས་བདུན་པ་སྒོམ་པའི་ལམ་དུ། དེ་ལྟར་ཟག་མེད་རང་གི་མཚན་ཉིད་རྟོགས་ནས་ཡུལ་ཆོས་ཉིད་མཐོང་བའི་ཡེ་ཤེས་ལ་གོམས་ཏེ་ངེས་པར་འཇུག་པའི་གནས་སྐབས་དག་གི་ཚེ་ལ། ལྟ་བའི་གདེངས་དེ་དང་ལྡན་ཏེ་གཉིས་མེད་དེ་ཉིད་རང་རིག་པའི་མངོན་སུམ་དུ་སྒོམ་ནས་མཐོང་བའི་དོན་ལས་མི་གཡེངས་པས་ཚོར་བ་ལ་༼༢༩༦༽སོགས་པའི་དབང་དུ་མི་འགྱུར་བའི་མཆོག་ཏུ་ལྷག་པའི་བྱང་ཆུབ་ཀྱི་སེམས་འབྱུང་ཞིང་སྐྱེ་སྟེ། དེའི་དུས་ན་དྲོད་རྟགས་ཆེན་པོ་གཡོ་བའི་སྐབས་ཏེ། ས་དང་པོའི་ཐོབ་པ་དང་གཉིས་པ་དང་གསུམ་པ་བརྟན་པར་གྱུར་ལ་བཞི་པ་ནས་བདུན་པའི་བར་གྱིས་ཉེ་བ་ཡིན་པས་ཆོས་བཞིས་ལུང་ཆེན་གསང་མཆོག་རྒྱལ་པོའི་དགོངས་དོན་བླ་ན་མེད་པའི་རྟོགས་པ་དམ་པ་ཉིད་འབྱུང་མ་རག་པ་སྟེ། དེ་ནི་དཔེར་ན་ཟླ་བ་ཚེས་བཞི་པ་ལྟ་བུའི་རང་བཞིན་དུ་སྣང་བ་ཡིན་ནོ། །འདིར་བཤད་པའི་རང་རིག་མངོན་སུམ་ནི། གསང་བ་སྒྱུ་འཕྲུལ་གྱི་རིང་ལུགས་ལྟར། བཤད་རྒྱུད་རྒྱ་མཚོ་ལས། རང་བྱུང་རང་སྣང་ཆོས་འདི་དག །གཉིས་མེད་རང་རིག་མ་སྐྱེས་པ། །གསལ་བར་མངོན་སུམ་ཐེ་ཚོམ་མེད། །རྟོགས་པ་ཀུན་གྱི་མཆོག་ཏུ་བཤད། །ཅེས་དང་། མན་ངག་ལྟ་བའི་ཕྲེང་བ་ལས།

ཆོས་ཐམས་ཅད་ཡེ་ནས་སངས་རྒྱས་པར་གནས་པ་དེ་ཡང་། ལུང་དང་མན་ངག་དང་འགལ་བ་ཡང་མ་ཡིན་ལ། ལུང་དང་མན་ངག་གི་ཚིག་ཙམ་ལ་བརྟེན་པའང་མ་ཡིན་པར་རང་རིག་པས་བློའི་གཏིང་དུ་ཡིད་ཆེས་པས་མངོན་སུམ་དུ་རྟོགས་པའོ། །ཞེས་གསུངས་པ་ལྟར་དམིགས་པ་བཟུང་ནས། རྣམ་གྲངས་རྣམ་པར་ཕྱེ་ན། ཐུགས་ཐིག་ལས། དབང་པོ་དྲུག་གི་ཆར་སྣང་ཡང་། །སྤྱན་ལ་མཆོག་ཏུ་བརྗོད་པ་ནི། །ཤེས་རབ་ཡུལ་ལ་དབྱེར་མེད་པས། །མངོན་སུམ་རྟོགས་པ་རྟོགས་པའི་མཆོག །རང་རིག་ཡེ་ཤེས་ཚོགས་གཅིག་པུ། །ཞེས་དང་། ལམ་རིམ་ལས།

ཤེས་དང་སྤྱོད་ཡུལ་གཉིས་མེད་པས། །ཐམས་ཅད་མ་ལུས་གཅིག་པའི་དང་། མ་འདྲེས་ཡོངས་རྫོགས་གསལ་སྟོང་གཟུགས། །ལྟ་དང་བལྟ་བར་བྱར་མེད་པར། །ཕྱོགས་བཅུའི་ཞིང་ཁམས་ཐམས་ཅད་མཐོང་། །གང་དུའང་མ་མཐོང་སྤྱན་གྱི་མཆོག །ཁྱབ་གསལ་རང་བཞིན་གོ་བའི་སྒྲ། །ཐོས་པ་མེད་པར་ཐོས་པའི་ཕུལ། །དྭང་བས་ཚིམ་བྱེད་ཆོས་ཀྱི་དྲི། །སྣོམ་བྱེད་མེད་པར་ཚོར་བའི་ཤངས། །དོན་བཅུད་ཉམས་སུ་མྱོང་བའི་རོ། །མྱོང་བའི་བྱ་བྱེད་མེད་ཉིད་མྱོང་། ཡང་དག་དོན་ལ་རེག་པ་ཉིད། །རེག་པ་ཀུན་དངོས་རེག་དང་བྲལ། །ཆོས་ཁམས་སྣ་ཚོགས་ཀུན་མཁྱེན་པ། །རང་རིག་རྒྱལ་པོར་རང་སྣང་བའོ། །དེ་བས་བདག་འཛིན་རང་གསལ་བ། །༼༢༩༧༽བདག་བཅས་བདག་དང་བྲལ་བའི་ཡིད། །དོན་དང་སེམས་ཅན་རྟོག་མེད་གསལ། །རང་བྱུང་ཡེ་ཤེས་ཐམས་ཅད་མཁྱེན། །ཞེས་གསུངས་ཏེ་དམ་པ་སྔ་མ་རྣམས་ཀྱིས་ཤེས་རབ་ཀྱི་ཚོགས་དྲུག་གི་ངེས་གསང་དམ་པའམ། ཚོགས་བརྒྱད་ཀྱི་ལྟ་བར་བཞེད་པ་ལྟར་བྱས་ནས་སྐབས་དོན་ལ་སྦྱར་ན་གཞུང་གི་གསང་བ་དང་འབྱོར་པར་འགྱུར་གྱི། དེ་མན་ཆད་ལ་གྲགས་པའི་རང་རིག་མངོན་སུམ་དང་མི་འདྲ་བར་ཤེས་དགོས་སོ།།

འོན་ཀྱང་གྲུབ་ཐོབ་ཆེན་པོ་ཀུ་ཀུ་རཱ་ཛས། ངེས་དོན་མདོ་ལས་རྒྱུན་གྲོལ་ཡེ་ཤེས་བསྔགས། །འཕགས་པ་རིགས་པ་ཅན་གྱིས་དངོས་ལྟ་སྨད། །ཅེས་སོགས་གསུངས་པ་ལྟར། །ངེས་དོན་གྱི་མདོ་དང་རྒྱུད་དོན་ཟབ་མོ་ཇི་བཞིན་དུ་གཟིགས་པའི་འཕགས་བོད་ཀྱི་མཁས་གྲུབ་སྔ་མ་རྣམས་ཀྱིས་ཚད་མའི་གསུང་གི་གསང་བ་བཞེད་ཚུལ་ཅུང་ཟད་མི་འདྲ་བ་རྣམས་ཀྱང་དགོངས་གཞི་ཉིད་མ་ནོར་བའི་དོན་དུ་གནས་པ་ལ་གཟུ་བོས་བློས་ངེས་པ་རྙེད་ན་མཐར་ཐུག་གི་དོན་དུ་སོ་སོ་རང་རིག་པའི་ཡེ་ཤེས་ལ་དགོངས་གནད་གཅིག་ཏུ་འབབ་པར་འགྱུར་རོ།།

བརྒྱད་པ་རྟོག་ཆེན་དག་པའི་སྐབས་ཀྱི་སེམས་དཔེ་དང་བཅས་པ་ནི།

རྟོག་ཆེན་དག་གི་ཞེས་པ་ནས། ལྟ་བུའི་རང་བཞིན་སྣང་། །ཞེས་པའི་བར་གྱིས་བསྟན་ཏེ།

རྟོགས་ཆེན་དག་གི་སྐབས་དག་ལ། །རིག་པ་ལྷག་པའི་སེམས་འབྱུང་སྟེ།།

རྟགས་ཆེན་དང་པོ་ཉེ་བར་བསྙེན། །ལྔ་པ་ལྟ་བུའི་རང་བཞིན་སྣང་།།

ས་བརྒྱད་པ་མཐར་ལམ་དང་པོར། དེ་ལྟར་འཇུག་པ་དང་མི་འགྱུར་བའི་རྒྱུ་ལ་བརྟེན་ནས་སྒོམ་ལམ་མཐར་ཕྱིན་པས། ཆོས་ཐམས་ཅད་རང་རིག་ཡུལ་དང་བྲལ་བས་རང་བྱུང་གི་ཡེ་ཤེས་སུ་གསལ་བའི་རྟོག་པ་ཆེན་པོ་དག་གི་ཏིང་ངེ་འཛིན་ཤར་བའི་གནས་སྐབས་དེའི་ཚེ་དག་ལ། །ཆོས་ཇི་བཞིན་པ་གཉིས་སུ་མེད་པར་རང་རིག་པའི་ཏིང་ངེ་འཛིན་རང་གསལ་བར་སྒོམས་ཏེ་ཏིང་ངེ་འཛིན་བྱེ་བ་བརྒྱ་ལ་འཇུག་ཅིང་སོ་སོར་ཆོས་ཉན་པ་དང་མངོན་ཤེས་དང་རྫུ་འཕྲུལ་རྫོགས་པར་ལྡན་ པ་ཡུལ་མེད་པར་མཆོག་ཏུ་ལྷག་པའི་བདག ་ཉིད་ཆེན་པོ་རང་བྱུང་གི་ཡེ་ཤེས་ཡིན་པར་ཝལ་གྱིས་གསལ་ཏེ་རིག་པའི་ཆོ་འཕྲུལ་ཏུ་སྣང་བའི་བྱུང་ཆུབ་ཀྱི་སེམས་འབྱུང་ཞིང་སྐྱེ་སྟེ། །ཐམས་ཅད་མཁྱེན་པའི་ཡེ་ཤེས་ཀྱི་མགོ་ཤར་བས་དེར་ནི་མཐར་ཕྱིན་པའི་རྟགས་ཆེན་དང་པོར་ཉེ་བར་བསྙེན་ཏེ་ཐོག་མར་དོན་ལ་རྣལ་དུ་ཕེབས་པའི་ཡེ་ཤེས་ཉིད་དང་ལྡན་པ་ནི་དཔེར་ན་ཟླ་བ་ཚེས་ལྔ་པ་ལྟ་བུའི་རང་བཞིན་དུ་སྣང་ཞིང་གསལ་བར་མཐོང་བ་ཡིན་ནོ།།

དགུ་པ་གདེང་དུ་གྱུར་པའི་སྐབས་ཀྱི་སེམས་དཔེ་དང་བཅས་པ་ནི།

གདེང་དུ་གྱུར་པའི། ཞེས་པ་ནས། ཉིད་ན་གྲུབ་ཅེས་བྱ། །ཞེས་པའི་བར་གྱིས་བསྟན་ཏེ།

རྡེང་དུ་གྱུར་པའི་སྐབས་དག་ལ། །གནས་པ་ལྷག་པའི་སེམས་འབྱུང་སྟེ།།

ཤིན་ཏུ་བརྟན་པའི་སྒྲོན་མ་དང་། །བརྒྱད་པ་ལྟ་བུའི་རང་བཞིན་སྣང་། །རྟགས་ཐོབ་ཉིད་ན་གྲུབ་ཅེས་བྱ།།

ས་དགུ་པ་མཐར་ལམ་བར་པ་ལ་དེ་ལྟར་གོམས་པར་འབད་པས་རྟོག་ཆེན་རིག་པ་དག་པའི་རྒྱུ་ལ་བརྟེན་ནས་རྟོགས་པའི་ཏིང་ངེ་འཛིན་ཤིན་ཏུ་སྟོབས་དང་ལྡན་ཏེ་གདེང་ཅན་དུ་གྱུར་པའི་གནས་སྐབས་ཀྱི་ཚེ་དག་ལ། རང་རིག་པ་གཉིས་མེད་ཆེན་པོ་མཐའ་དང་བྲལ་བའི་དོན་ཉིད་དང་རྣམ་དབྱེར་མེད་པར་འབད་པ་མི་དགོས་ཏེ་ངང་གིས་གཡོ་བར་གནས་པ་མཆོག་ཏུ་ལྷག་པའི་བྱང་ཆུབ་ཀྱི་སེམས་འབྱུང་བས་ཡོན་ཏན་དུ་མ་ལ་དབང་འབྱོར་བར་འགྱུར་ཏེ།

དཔེར་ན་ཤིན་ཏུ་གསལ་ཞིང་བརྟན་པའི་སྒྲོན་མ་ཉི་མས་མུན་པ་གཞི་བྲལ་དུ་བྱས་ཏེ་ཕྱོགས་ཀུན་ཏུ་གསལ་བ་ལྟ་བུ་དང་། ཟླ་བ་ཚེས་བརྒྱད་པ་ལྟ་བུའི་རང་བཞིན་དུ་གསལ་ཞིང་སྣང་བར་འགྱུར་པའི་མཐོང་བ་དག་པ་འབྱུང་སྟེ། ཐམས་ཅད་མཁྱེན་པའི་རང་བྱུང་གི་ཡེ་ཤེས་ཕྱེད་མངོན་དུ་བྱས་པའི་དཔེ་ཡིན་ནོ་ཞེས་གསུངས། དེའི་དུས་ན་སྟོན་པ་ཀུན་གྱི་བཤེས་གཉེན་གྱིས་ཕྱག་བརྐྱང་ནས་མངོན་སུམ་དུ་ལུང་སྟོན་པའི་མཐའི་དྲོད་རྟགས་རྣམས་ཡང་དག་པར་ཐོབ་པར་འགྱུར་ཏེ། དེ་ལྟར་ཐོབ་བ་ཉིད་ན་ཡེ་ཤེས་ལྔ་ཉིད་སྐུར་སྨིན་ནས་ཆོས་ཉིད་མི་རྟོག་པའི་ངོ་བོར་ངེས་པར་གྲུབ་པ་ཡིན་ནོ་ཞེས་བྱའོ། །སྤྱིར་ས་བདུན་པ་རྣལ་འབྱོར་བཞི་པའི་ཁྱད་པར་དང་། བརྒྱད་པ་དགུ་པ་བཅུ་པ་རྣམས་རྣལ་འབྱོར་ལྔ་པའི་ཁྱད་པར་ཡིན་ཡང་། འགྲེལ་ཆེན་ལས། བདུན་པ་བརྒྱད་པ་དགུ་པ་རྣམས་རྣལ་འབྱོར་བཞི་པའི་ཁྱད་པར་དུ་གསུངས་པ་ལྟ་བུར་བཞུགས་པའི་ལུང་སྟོན་པའི་རྟགས་ཀྱི་ངེས་ཚིག་དང་བསྟན་པར་མངོན་པས་ཐ་སྙད་དེ་ལྟར་བསྟན་ཀྱང་སྒོམ་ལམ་པ་དང་མཐར་ལམ་པ་ལུང་སྟོན་ཚུལ་གྱི་ཁྱད་པར་དབྱེ་ན་ས་བདུན་པ་ལུང་ཆེན་ཐོབ་པ་དང་། བརྒྱད་པ་ནས་རྩལ་ཆེན་རྫོགས་པའི་ཁྱད་པར་དུ་འགྱུར་བར་འགྲེལ་པའི་བབ་ཀྱིས་དངོས་དོན་དུ་གསལ་ལོ་སྙམ་མོ།།

བཅུ་པ་ལས་སུ་རུང་བའི་སྐབས་ཀྱི་སེམས་དཔེ་དང་བཅས་པ་བཤད་པ་ནི།

ལས་སུ་རུང་བའི། ཞེས་པ་ནས། ངེས་པས་གྲུབ་ཆེན་ཡིན། །ཞེས་པའི་བར་གྱིས་བསྟན་ཏེ།

ལས་སུ་རུང་བའི་སྐབས་དག་ལ། །རྫོགས་པ་ལྷག་པའི་སེམས་འབྱུང་སྟེ། །གཉེན་པོ་མེད་པའི་སྒྲོན་མ་དང་།།

ཆ་ལ་རྫོགས་པ་ལྟ་བུར་སྣང་། །བརྟན་པར་ངེས་པས་གྲུབ་ཅེས་ཡིན།།

ས་བཅུ་པ་མཐར་ལམ་ཐ་མ་ལ་དེ་ལྟར་གདེང་དུ་གྱུར་ཏེ་ངང་གིས་མི་གཡོ་བར་གནས་པའི་རྒྱུ་ལས་བསྒོམ་མི་དགོས་པར་ཏིང་ངེ་འཛིན་ལས་སུ་རུང་སྟེ་གཉིས་མེད་ཙམ་མ་ཡིན་པར་ལྷུན་གྱིས་གྲུབ་པར་གཉིས་མེད་ཀྱི་ཐ་སྙད་ལས་གྲོལ་བར་རང་གསལ་བའི་གནས་སྐབས་དག་ཏུ་མཐར་ཕྱིན་པའི་ཚེ་ལ་༼༢༩༩༽དབྱིངས་དང་ཡེ་ཤེས་ཀྱང་ཚིག་གི་ཐ་སྙད་ཙམ་དུ་ཆུད་དེ་ཏིང་ངེ་འཛིན་དང་རིག་པ་ཡེ་ཤེས་ཀྱི་རྩ་ལ་མ་འདྲེྲས་ལ་ཡོངས་སུ་རྫོགས་པར་རྟོགས་པས་དེ་ལས་སྐྱེད་དུ་བྱ་བ་མེད་པར་རྫོགས་པ་མཆོག་ཏུ་ལྷག་པའི་བྱང་ཆུབ་ཀྱི་སེམས་དམ་པ་མཐར་ཐུག་པ་འབྱུང་ཞིང་སྐྱེ་བ་སྟེ། དཔེར་ན་གཉེན་པོ་མེད་པའི་སྒྲོན་མ་མེ་ཆེན་པོ་རླུང་གིས་མ་བསྐྱོད་པའམ་དུས་མཐའི་མེས་ཐམས་ཅད་སྲེགས་ཏེ་མེར་སྣང་བ་དང་། ཚེས་བཅུ་དྲུག་ཆ་ལ་རྫོགས་པའི་ཟླ་བ་ཉ་གང་བ་ལྟ་བུར་དེ་བས་སྐྱེད་དུ་བྱར་མེད་པར་སྣང་ཞིང་གསལ་བར་མཐོང་བར་འགྱུར་རོ། །དེའི་དུས་ན་དྲོད་རྟགས་ཆེན་པོ་བདུད་དང་མི་མཐུན་པའི་ཕྱོགས་ཀྱིས་མི་འཕྲོགས་པར་ཡེ་ཤེས་མི་འགྱུར་ཏེ་བརྟན་པར་ངེས་པས་མཐར་ཕྱིན་པའི་འབྲས་བུ་གྲུབ་པའི་ཆེན་པོ་ཡིན་པས་ལམ་ཡོངས་རྫོགས་པ་ཞེས་བྱའོ།།

གསུམ་པ་ཞབས་བསྡུ་བ་ནི།

སེམས་ཉིད་ཡེ་ནས། ཞེས་པ་ནས། བགྲོས་པའོ། །ཞེས་པའི་བར་གྱིས་བསྟན་ཏེ།

སེམས་ཉིད་ཡེ་ནས་སངས་རྒྱས་ལ། །རྟོག་པས་བསྒྲིབས་པས་དེ་མ་ཤེས། །བྱང་ཆུབ་སེམས་ཀྱི་ལྗོན་ཤིང་ལས།།

བླ་མེད་འབྲས་བུར་སྨིན་པ་ཡིན། །དེས་ན་གྲོགས་པོ་དམ་པ་དག །དམ་པ་རྣམས་ཀྱི་བྱང་ཆུབ་སེམས།།

ཀུན་ཏུ་རྒྱུན་དང་བཅས་པ་སྟེ། །རྒྱུན་མེད་ཆད་པ་དམ་པ་ཡི། །རྒྱུན་ཉིད་ཀྱིས་ནི་ངེས་སྨིན་པ།།

གང་དུ་སྨན་པའི་སྐྱེད་ཤིང་དེ། །བྱང་ཆུབ་དམ་པ་ལྗོན་པའི་ཤིང་། །འབྲས་བུ་དམ་པར་སྨིན་ངེས་པའོ།།

གྲོགས་པོ་དག་དེ་དག་ནི་ལྗོན་ཤིང་དམ་པ་བསྐྱེད་པའི་དགོངས་པ་ངེས་པར་བགྲོས་པའོ།།

འོ་ན་གསང་སྔགས་ཐམས་ཅད་མཉམ་པ་ཉིད་ལ་སེམས་བཅུ་དཔེ་བཅུ་སྐབས་བཅུས་ཅི་ཞིག་བྱ་སྟེ་འོག་མ་དང་མི་འདྲའམ་ཞེ་ན། དེ་ལྟར་མིན་པར་འགྲོ་བའི་སེམས་ཉིད་ཡེ་ནས་སངས་རྒྱས་ཏེ་ཆོས་ཀྱི་སྐུའི་ངོ་བོ་ཡིན་ཡང་། དེ་ཉིད་ལ་རང་གི་ང་ོབོ་མ་རིག་པའི་རྟོག་པ་དང་བརྟགས་པས་བསྒྲིབས་པས་ལྗོན་ཤིང་དེ་རུ་མ་ཤེས་ཏེ་དོན་མ་མཐོང་བ་ཉིད་རྟོགས་པའི་ཐབས་དམ་པའི་རིམ་པར་འཇུག་པའི་ཚུལ་གྱིས་རང་རིག་བྱང་ཆུབ་སེམས་ཀྱི་སྐབས་བཅུ་ཡི་སྒོ་ནས་ལྗོན་ཤིང་མཆོག་ཉིད་བསྐྱེད་དེ་གོང་དུ་འཕེལ་བ་ལས། དེ་ལྟར་རྫོགས་ཤིང་མཐར་ཕྱིན་པས་བླ་ན་མེད་པའི་འབྲས་བུར་སྨིན་ཏེ་ལྷུན་གྱིས་གྲུབ་པ་ཡིན་པས། དམན་པའི་ལུས་ཅན་ཁྱེད་ཅག་གིས་ཀྱང་། རྒྱལ་བའི་དགོངས་པ་བྱང་ཆུབ་སེམས་ཀྱི་ལྗོན་ཤིང་དེ་ཉིད་དུས་ཐམས་ཅད་དུ་སྒོམས་པར་གྱིས་ཤིག་པའོ། །དེ་བས་རྟོགས་པའི་ཡེ་ཤེས་ཉིད་འབབ་ཆུ་ལྟར་བར་མ་ཆད་པར་འཕེལ་བས་མཐར་ཕྱིན་པ་ཡིན་པའི་ཕྱིར། རྒྱུ་མཚན་དེས་ན་སྲིན་པོ་བློ་གྲོས་ཐབས་ལྡན་ལ་སོགས་པའི་གྲོགས་པོ་དམ་པ་དག ཅེས་བོས་ནས། ལྗོན་ཤིང་གི་མཚན་ཉིད་འཆད་པ་ནི། བདེ་བར་གཤེགས་པ་རྫོགས་པའི་སངས་རྒྱས་དམ་པ་རྣམས་ཀྱི་བྱང་ཆུབ་སེམས་ཀྱི་ཤིང་བུ་ནི་དུས་གསུམ་ཀུན་ཏུ་ཡོན་ཏན་གྱི་རྒྱུན་དང་བཅས་ཏེ་དུས་བཞིའི་ཕྱོགས་རིས་ཀྱི་ཆར་མ་༼༣༠༠༽ཆད་པར་སྣང་བ་སྟེ། དེ་ལྟར་སྣང་བ་ཡང་སྐད་ཅིག་མའི་རྒྱུན་ལས་གྲོལ་ཏེ་ངོ་བོ་ངོས་གཟུང་མེད་པར་དམིགས་པའི་ཡུལ་ལས་འདས་པ་ནི་འཁྲུལ་སྣང་གཞི་དང་བཅས་པའི་འཇུག་པ་ཆད་དེ་དོན་མཆོག་ཏུ་གྱུར་པ་དམ་པ་ཡིན་ནོ། །དེ་ཡི་ཚིག་གི་ལྷག་མ་ནི། གལ་ཏེ་དེ་ལྟར་སྣང་བ་ལ་ངོ་བོ་སྐད་ཅིག་མའི་རྒྱུན་ལས་གྲོལ་ཀྱང་སྐབས་བཅུས་སྐད་ཅིག་མའི་རྒྱུན་ཆད་ན་མུ་སྟེགས་ཆད་པའི་ཕྱོགས་སུ་ལྟུང་བར་འགྱུར་བས་དམ་པ་མིན་པར་བསྟན་པའོ། །དེ་ལྟ་བུར་བྱང་ཆུབ་སེམས་ཀྱི་ངོ་བོའི་དོན་ལ་ལམ་པས་སྐད་ཅིག་མའི་རྒྱུན་དུ་འབད་དེ་གོམས་པ་ཉིད་ཀྱིས་ནི་གོང་ནས་གོང་དུ་བོགས་དང་ལྡན་པར་གྱུར་ཏེ་ངེས་པར་འབྲས་བུ་མཆོག་ཏུ་སྨིན་པ་ཡང་གང་བྱང་ཆུབ་སྙིང་པོ་ཉིད་དུ་ལམ་རྣལ་འབྱོར་ལྔ་དང་ས་བཅུས་རིམ་པར་སྨིན་པའི་ཡོན་ཏན་རྒྱ་མཚོའི་དཔག་བསམ་གྱི་ལྗོན་པ་ཉིད་ནི་སྐྱེད་ཤིང་དེ་ཡི་ངོ་བོ་སྟེ་བྱང་ཆུབ་དམ་པ་བླ་ན་མེད་པར་གྱུར་བའི་བྱང་ཆུབ་སེམས་ཀྱི་ལྗོན་པའི་ཤིང་བུ་མཆོག་ཏུ་རྒྱས་པས་འབྲས་བུ་དམ་པ་ཡང་དག་པར་རྫོགས་པའི་སངས་རྒྱས་ཉིད་དུ་སྨིན་ངེས་པར་གྱུར་པའོ། །ཇི་ལྟར་བགྲོས་པའི་ཁུངས་དང་འབྲེལ་བར་གྲོགས་པོ་དག་བཤད་པ་དེ་དག་ནི། ལྗོན་ཤིང་དམ་པ་ཇི་ལྟར་བསྐྱེད་པའི་ཚུལ་གྱིས་རྒྱལ་བའི་དགོངས་པ་མ་ནོར་བ་ཉིད་ངེས་པར་བགྲོས་ཏེ་བསྟན་པའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

དེ་ཁོ་ན་ཉིད་གསང་བ་དམ་པའི་ལྗོན་ཤིང་བསྐྱེད་པའི་ལེའུ་སྟེ་ལྔ་བཅུ་བརྒྱད་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། དེ་ཁོ་ན་ཉིད་གསང་བ་དམ་པ་བྱང་ཆུབ་སེམས་ཀྱི་ལྗོན་ཤིང་བསྐྱེད་པའི་ལེའུ་སྟེ་ལྔ་བཅུ་རྩ་བརྒྱད་པ་ཉིད་རྣམ་པར་འགྲེལ་ཏེ་བཤད་པའོ།། །།

ལེའུ་ང་དགུ་པ་རྣལ་འབྱོར་རྗེས་སུ་འཇུག་པ།

༈ 55 བཞི་པ་དམ་པར་འཇུག་པར་བྱ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང་། ཞེས་པ་ནས། ལམ་དམ་པ་ལ་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོ་ལ་སོགས་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། དམ་པ་རྣམས་ཀྱི་རྗེས་སུ་འཇུག་པར་བྱའོ། །ཞེས་དམ་བཅས་པར་དགོངས་པ་དེ། དམ་པ་རྣམས་ཀྱི་རྗེས་སུ་ཇི་ལྟར་འཇུག་པར་བགྱི། དེ་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་ཡོངས་སུ་དྲིས་པ་ལས། གསང་བ་པའི་བདག་པོས་སྨྲས་པ། ཀྱེ་གྲོགས་པོ་དག་དེ་ནི་འདི་ལྟར་དམ་པ་རྣམས་ཀྱི་རྗེས་ནི། གང་ངེས་པར་གཤེགས་པའི་ལམ་དམ་པ་ལ་བྱའོ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །ལྗོན་ཤིང་བསྐྱེད་པ་བསྟན་མ་ཐག་པ་དེ་ནས་ཡང་ལང་ཀའི་བདག་པོ་ལ་སོགས་པ་འཁོར་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས། ལེའུ་ཞེ་ལྔ་པའི་རྣམ་གྲངས་བཅུའི་བཞི་པའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་དམ་པ་རྣམས་ཀྱི་རྗེས་སུ་འཇུག་པར་བྱའོ། །༼༣༠༡༽ཞེས་དམ་བཅའ་བར་དགོངས་པ་དེ་ལ། དམ་པ་རྣམས་ཀྱི་རྗེས་སུ་ཇི་ལྟར་འཇུག་པར་བགྱི། དེ་ཉིད་ཚུལ་ཇི་ལྟར་ཡོངས་སུ་ཤེས་པར་བགྱི། ཞེས་དེ་སྐད་ཅེས་འཇུག་པའི་ཐབས་དང་ཤེས་པར་བྱ་བའི་ཐབས་གཉིས་ཡོངས་སུ་དྲིས་པ་ལས། འཆད་པའི་སྐྱེས་བུ་གསང་བ་པའི་བདག་པོས་ལན་སྨྲས་ཏེ་གསུངས་པ། ཀྱེ་གྲོགས་པོ་དག དྲིས་པ་དེ་ནི་འདི་ལྟར། རྒྱལ་བ་རྫོགས་པའི་སངས་རྒྱས་དམ་པ་རྣམས་ཀྱི་རྗེས་སམ་ཤུལ་ནི། གང་ངེས་པར་སྔར་སངས་རྒྱས་པར་གཤེགས་པའི་ལམ་དམ་པ་གསང་སྔགས་ཐེག་པ་ཆེན་པོའི་སྙིང་པོ་ཆོས་ཀྱི་དབྱིངས་ཡང་དག་པར་རྟོགས་པ་ལ་བྱའོ།།

གཉིས་པ་རྒྱས་པར་བཤད་པ་ལ་གཉིས་ཏེ། ལོག་པར་ལྟ་བ་ལམ་དུ་གཞུག་ལུགས་ལྡེམ་དགོངས་ཀྱིས་བསྟན་པ། ངེས་པའི་ལམ་དུ་འཇུག་ལུགས་མ་འདྲེས་ཡོངས་རྫོགས་སེམས་ཀྱི་གསང་ལམ་དུ་བསྟན་པའོ། །དང་པོ་ལ་བཞི་སྟེ། ལྡེམ་དགོངས་ཀྱིས་བསྟན་པ་དངོས་བཤད་པ། དེ་ལ་ཐེ་ཚོམ་ཟ་བ་དྲིས་ཚུལ་བསྟན་པ། ལན་དུ་དྲང་དོན་གྱིས་ཁྲིད་པའི་ཐབས་ཚུལ་གསུངས་པ། ཆོས་ཉིད་དུ་ཤེས་ན་ལོག་པ་ཉིད་ངེས་པའི་ལམ་དུ་བསྟན་པའོ། །དང་པོ་ནི།

གྲོགས་པོ་དག ཅེས་པ་ནས། དམ་པར་གསུངས་པ་ལས། ཞེས་པའི་བར་གྱིས་བསྟན་ཏེ།

གྲོགས་པོ་དག་ལམ་དམ་པ་གང་ཞེ་ན། དེ་ལྟར་དེ་ཁོ་བོས་མཐོང་ཐོས་པའི་སྐབས་གཅིག་ན། བཤེས་གཉེན་དམ་པ་ཉིད་ཀྱི་ངེས་པར་གསུངས་པ། ངོ་བོ་ཉིད་ཀྱི་སྐུ་གཉེན་པོ་མེད་པས། རྣམ་པར་རྟོག་པ་ཐམས་ཅད་དང་ལྡན་ཏེ། རྟག་པ་ཉིད་དང་། ཆད་པ་ཉིད་དང་། སྐྱེ་བ་དང་། དམིགས་པ་དང་། འདོད་ཆགས་པ་ཉིད་དང་། ཞེ་སྡང་བ་ཉིད་དང་། གཏི་མུག་པ་ཉིད་དང་། ང་རྒྱལ་བ་ཉིད་དང་། ཕྲག་དོག་པ་ཉིད་དང་། འདོད་པ་ལྔ་དང་། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་པ་དང་། ཕྲ་མ་དང་། ངག་རྩུབ་མོ་དང་། ཚིག་འཁྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་ཉིད་དོ། །མཚམས་མེད་པ་ལྔ་དང་། དེ་དང་ཉེ་བ་ལྔ་དང་། ལྕི་བ་བཞི་དང་། ལོག་པ་བརྒྱད་དང་། སྨེ་ཤ་དང་། བཤང་བ་དང་། གཅི་བ་དང་། ཁྲག་དང་། ཁུ་བ་ལ་སོགས་པ་དག་ལ་ངེས་པར་སྤྱོད་པ་ནི། དམ་པ་རྣམས་ཀྱི་ལམ་དམ་པ་ཡིན་པར་ཤེས་པར་བྱའོ་ཞེས་ངེས་པ་དམ་པར་གསུངས་པ་ལས།

གྲོགས་པོ་དག ཅེས་བོས་ནས། ལམ་དམ་པ་གང་ཞེ་ན། དེ་ལྟར་དེ་ཉིད་བསྟན་པ་ནི། སྐྱེས་བུ་ཉིད་ཀྱིས་བྱུང་ཁུངས་ཀྱི་སྐབས་སུ་ཕྱག་ན་རྡོ་རྗེ་ཁོ་བོས་བྱིན་རླབས་འབྱུང་བའི་བསྟན་པ་རིན་པོ་ཆེའི་གསང་བ་ཟབ་མོ་མཐོང་ཞིང་ཐོས་པའི་སྐབས་གཅིག་གི་ཚེ་ན། སྟོན་པ་བཤེས་གཉེན་དམ་པ་སྐུ་ལྔ་རྣམས་ཀྱིས་ངེས་པར་གསུངས་པ་གང་ཉིད་གསན་པའི་ལོ་རྒྱུས་འདིར་བཀའ་སྩལ་པ་ནི། རང་རྒྱུད་པ་ནི་འཁོར་བ་ཡིན་ཀྱང་རང་བཞིན་ནི་ཆོས་ཀྱི་སྐུ་ཡིན་པས། འདིར་དབྱེར་མེད་ཀྱི་བྱ་བའི་རྣལ་འབྱོར་གཞིའི་དོན་འཁོར་འདས་གཉིས་མེད་གསང་སྔགས་ངོ་བོ་ཉིད་ཀྱི་སྐུ་གཉེན་པོ་མེད་པར་རང་བཞིན་མ་བཅོས་པས་ཐམས་ཅད་ཀྱི་གཞིར་གྱུར་པ་ནི། རིལ་དེ་ཉིད་ཀྱི་ཕྱིར་དང་མི་མཐུན་པ་མེད་པའི་ཕྱིར། ལོག་པའི་རྣམ་པར་རྟོག་པ་ཐམས་ཅད་མ་སྤངས་པར་རྫོགས་པ་དང་ལྡན་ཏེ། དེའི་ཚུལ་ནི། ལྟ་བ་ངན་པ་རྟག་པ་ཉིད་དང༌། ཆད་པ་ཉིད་དེ། དེ་གཉིས་༼༣༠༢༽ནི་ལྡེམ་དགོངས་ཀྱི་དབང་དུ། རང་བཞིན་མི་འགྱུར་བ་དང་དངོས་པོ་མེད་པ་ལ་དགོངས་པ་དང༌། དངོས་པོར་སྐྱེ་ཞིང་འགག་པ་དང༌། ཡུལ་ལ་དམིགས་པ་ཉིད་དེ། དེ་གཉིས་ནི། སྐྱེ་བ་མེད་པའི་ཆོ་འཕྲུལ་དང༌། རང་སྣང་མི་འགག་པ་ལ་དགོངས་པ་དང༌། ཉོན་མོངས་པ་ལྔ་སྟེ། སྲེད་པས་ཀུན་ལ་ཞེན་པའི་འདོད་ཆགས་པ་ཉིད་དང༌། མནར་སེམས་པས་ཞེ་སྡང་བ་ཉིད་དང༌། ཀུན་ནས་རྨོངས་པས་གཏི་མུག་པ་ཉིད་དང༌། སེམས་གྱོང་ཞིང་ཁེངས་པས་ང་རྒྱལ་བ་ཉིད་དང༌། གཞན་གྱི་ཡོན་ཏན་སེམས་ཀྱི་ཕྲག་ཏུ་མི་ཤོང་བས་ཕྲག་དོག་པ་ཉིད་དེ། དབྱིངས་དང་ཡེ་ཤེས་དབྱེར་མེད་པར་ཆགས་པ་དང༌། རྟོག་པའི་ཆོ་འཕྲུལ་ལ་སྡང་བ་དང༌། ཆོས་ཉིད་ཀྱི་ངང་ལ་འབྱེད་མེད་པ་དང༌། མཉམ་ཉིད་ཀྱི་ལྟ་བ་གཤོངས་སུ་མི་འབབ་པ་དང༌། མཐར་འཛིན་གྱིས་སྒྲོ་སྐུར་ལ་ཕྲག་དོག་བྱེད་པ་དང་ལྔ་ལ་དགོངས་པ་དང༌། འདོད་པ་ལྔ་ནི་ཆོས་ཉིད་དབྱིངས་ཀྱི་རྒྱན་སེམས་ཉིད་ལ་ཚང་བར་དགོངས་པ་དང༌། མི་དགེ་བ་བཅུ་སྟེ། ལུས་ཀྱི་སྡིག་པ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པས་ལོག་པར་གཡེམ་པ་དང་གསུམ་ཉིད། དངོས་འཛིན་འཇིག་པ་དང༌། སངས་རྒྱས་ཀྱི་ཡེ་ཤེས་རང་སྟོབས་ཀྱིས་ལེན་པ་དང༌། ཆོས་དབྱིངས་ལ་རིག་པ་ཆགས་པས་འཁོར་བ་ལས་ལོག་པ་རྣམས་ལ་དགོངས་པ་དང༌། ངག་གི་སྡིག་པ། ངོ་བོ་དང་རྣམ་པའི་རྫུན་སྨྲ་བ་དང༌། ཕྲ་མ་བྱེད་པ་དང༌། ངག་རྩུབ་མོ་དང༌། ཚིག་འཁྱལ་པ་སྨྲ་བ་དང་བཞི་ཉིད། ཕྱོགས་རིས་མི་བདེན་པ་དང༌། འཁོར་འདས་འབྱེད་པ་དང༌། ལོག་ལྟ་ཚར་གཅོད་པ་དང༌། རང་བཞིན་མ་ངེས་པ་རྣམས་ལ་དགོངས་པ་དང༌། ཡིད་ཀྱི་སྡིག་པ། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་ཉིད་དེ། འབྲས་བུ་ལ་འདུན་པ་དང༌། ལོག་ལྟ་ཉིད་འཇོམས་པ་དང༌། འཁོར་བ་ལས་ལོག་པའི་ཡང་དག་པའི་དོན་ལ་ལྟ་བ་གསུམ་ལ་དགོངས་པ་ཉིད་དོ། །མཚམས་མེད་པ་ལྔ་ཉིད། ཕ་མ་དང་དགྲ་བཅོམ་གསོད་པ། བདེར་གཤེགས་ཀྱི་སྐུ་ལ་ངན་སེམས་ཀྱིས་ཁྲག་འབྱིན་པ། དགེ་འདུན་འཁོར་ལོའམ་མཐུན་པའི་དབྱེན་བྱེད་པ་སྟེ། ཡེ་ཤེས་ལྔ་ལ་དགོངས་པ་དང༌། དེ་དང་ཉེ་བ་ལྔ་སྟེ། ཕྱག་མཆན་༼༣༠༣༽ལས། སློབ་དཔོན་དང་བྱང་ཆུབ་སེམས་དཔའ་གསོད་པ། གཙུག་ལག་ཁང་གི་དཀོར་འཇོམས་པའམ་དགེ་འདུན་འདུ་བའི་སྒོ་ཕྲོག་པ། དགེ་འདུན་སུན་འབྱིན་པ། མཆོད་རྟེན་བཤིག་པ་རྣམས་དམ་ཚིག་ཏིང་འཛིན་སོགས་ལ་དགོངས་པ་དང༌། ཡང་ན་མ་ཡང་ཡིན་ལ་དགྲ་བཅོམ་མ་ཡིན་པ་འདོད་ལོག་གིས་སུན་ཕྱུང་བ། ཕྱིར་མི་ལྡོག་པའི་བྱང་སེམས་ངེས་གནས་གསོད་པ། འཕགས་པ་སློབ་པ་གསོད་པ་སྟེ་གཞན་གཉིས་འདྲའོ། །ཕྱི་ནང་གི་ལྕི་བ་བཞི་ལ། ཉམས་པའི་ལྕི་བ་བཞི་ནི། སྐྱེ་བོ་ལ་མི་ཆོས་མནའ་ལྕི། ཉན་ཐོས་ལ་འདུལ་ཁྲིམས་ལྕི། བྱང་སེམས་ལ་སྡོམ་པ་ལྕི། སྔགས་པ་ལ་དམ་ཚིག་ལྕི་བའོ། །ལོག་པའི་ལྕི་བ་བཞི་ནི། མཁས་པའི་གོང་ལྕི། སྒོམ་ཆེན་གྱི་ཕྱག་ལྕི། སྒྲུབ་པ་པོའི་ཟས་ལྕི། སྔགས་པའི་ནོར་ལྕི་བའོ། །སྨད་པའི་ལྕི་བ་བཞི་ནི། གཏི་མུག་གི་དབང་གིས་འཕགས་པའི་སྐུ་ལ་སྨད་པ་ལྕི། ཕྱོགས་རིས་ཀྱི་དབང་གིས་དམ་པའི་ཆོས་ལ་བླང་དོར་བྱས་པ་ལྕི། ང་རྒྱལ་གྱི་དབང་གིས་བདེན་པའི་ཚིག་ལ་སྨད་པ་ལྕི། ཕྲག་དོག་གི་དབང་གིས་གྲོགས་ཀྱི་ཡོན་ཏན་ལ་སྨད་པ་ལྕིའོ། །སྐུར་བའི་ལྕི་བ་བཞི་ནི། མཉམ་ཉིད་ཆོས་ལ་ཁྱད་འདོན་ལྕི། །རང་བཞིན་ངན་ལ་གལ་འཛུག་ལྕི། །མི་དགེ་བཅུ་ལ་ལོག་ལྟ་ལྕི། །མཚམས་མེད་ལྔ་ལ་ཁྲག་འབྱིན་ལྕི། །ཞེས་གསུངས་ཏེ། ལྟ་སྒོམ་སྤྱོད་འབྲས་བཞིའི་རང་བཞིན་རྟོགས་ན་སྤངས་དང་རྟོགས་པའི་ཡོན་ཏན་གྱི་ལྕི་བ་ལ་དགོངས་པའམ། གསང་བདག་དགའ་རབ་དཔའ་བོས་སྤྱོད་པའི་ཀློང་ལས། གལ་ཏེ་མཐུན་པས་བཀྲིར་བཏུབ་ལ། །ཤན་པ་སྨད་འཚོང་མཚམས་མེད་པ། །རང་བཞིན་བཅས་པའི་མ་ཐོ་ཀུན། །དེ་ཡིས་དེ་དྲང་དོན་ལ་སྦྱར། །ངེས་པར་དགོངས་ལ་སྒྲིབ་མི་གནས། །ཞེས་པ་ལྟར་རང་གི་རྟོགས་པ་མཐར་ཕྱིན་ནས། མཐུན་པས་འདྲེན་པའི་ཐབས་མཁས་ལ་དགོངས་པ་དང༌། ལོག་པའི་སྤྱོད་པ་བརྒྱད་དེ་ཕྱིའི་ལོག་པ་བཞི་ནི། དཀར་པོའི་ཕྱོགས་སྨོད་པ། ནག་པོའི་ཕྱོགས་བསྟོད་པ། དད་པ་ཅན་གྱི་ཚོགས་བཅག་པ། དགེ་བ་ཅན་གྱི་ཐུགས་དཀྲུག་པ་རྣམས་དང༌། ནང་གི་ལོག་པ་བཞི་ནི། སློབ་དཔོན་སྨད་པ། བྱང་སེམས་སྤངས་པ། མཆེད་ལ་༼༣༠༤༽གདུང་སེམས་བསྐྱུངས་པ། དཀྱིལ་འཁོར་གཉན་པོ་འདྲལ་བ་རྣམས་ཏེ། ལྟ་བ། སྒོམ་པ། སྔགས། སྤྱོད་པ། ཕྲིན་ལས། ཆོས། མཆོད་རྫས། དམ་རྫས་རྣམས་མི་མཐུན་པའི་ཕྱོགས་ལས་ལོག་པ་ལ་དགོངས་པ་དང༌། སྔར་བཤད་པ་ལྟར་སྨེ་ཤ་ཅན་ཤ་ལྔ་དང༌། བཤང་བ་དང༌། གཅི་བ་དང༌། ཁྲག་དང༌། ཁུ་བ་ལ་སོགས་པ་བདུད་རྩི་ལྔ་དག ཤུགས་ལ་བློ་དམན་པ་ལ་སྨེ་བ་དང༌། ལམ་མ་རྟོགས་པ་ལ་བསྟིང་བ་ཡང་སྦྱར་ཏེ། དེ་ལྟ་བུ་རྟོག་དཔྱོད་ངན་པ་མང་པོ་ལ་ངེས་པར་སྤྱོད་པ་ནི་འདིར་སྐྱེས་བུ་དམ་པ་རྣམས་ཀྱི་ཐར་པའི་ལམ་གྱི་དམ་པ་མཆོག་ཏུ་བསྟན་པ་ཉིད་མཉམ་པ་ཉིད་ལ་དགོངས་པ་དང༌། འདི་དག་ལ་དགའ་བའི་འདུ་ཤེས་མཐུན་པ་རྣམས་དེའི་སྒོ་ནས་འདྲེན་ཞིང་དོན་ལ་གཞུག་པའི་ཕྱིར་དང༌། ལམ་གཞན་དུ་ཞེན་པ་དགག་པའི་ཕྱིར། རང་དོན་དང་གཞན་དོན་གྱི་སྤྱོད་པ་རྣ་ཕྲུག་བྲག་རྩེད་ཀྱི་འགྲོས་སུ་དགོངས་པས་བཀའ་སྩལ་པ་ཡིན་པར་ཤེས་པར་བྱའོ། །ཞེས་སྟོན་པ་གསང་བ་མཆོག་གི་བདག་པོས་ངེས་པ་དམ་པར་རིགས་ཀྱི་བདག་པོ་ཕྱག་ན་རྡོ་རྗེ་ཉིད་ལ་གསུངས་པ་ལས།

གཉིས་པ་དེ་ལ་ཐེ་ཚོམ་ཟ་བ་དྲིས་ཚུལ་བསྟན་པ་ནི།

ཁོ་བོས་དེ་ལ། ཞེས་པ་ནས། ཞུ་བ་འདུན་པ་ལས། །ཞེས་པའི་བར་གྱིས་བསྟན་ཏེ།

ཁོ་བོས་དེ་ལ་འདི་སྐད་དུ། ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་སྨྲ་རྣམས་ཀྱི།།

ཡང་དག་ཚད་མའི་གསུང་དག་ལས། །ཕྱིན་ཅི་ལོག་ཀུན་འབྱུང་ཅི་ལགས། །དེ་སྐད་ཞུ་བ་བདུན་པ་ལས།།

གསང་འཛིན་ཕྱག་ན་རྡོ་རྗེ་ཁོ་བོས་དེ་ཡི་ཚེ་སྟོན་པ་ཆེན་པོ་ལ་ཞུས་པའི་ཚིག་ཉེ་བར་བཤད་པ་ནི། རྟོགས་པའི་ཕྱོགས་ནས་སྟོན་པ་ལ་ཡོན་ཏན་མངའ་བར་དམ་པ་དང༌། གཞིའི་རྣལ་འབྱོར་ལ་ངམ་པ་དང༌། ལམ་ལོག་པར་སྨྲ་བས་དོན་ལ་འདྲེན་པ་ལ་ངམ་པ་དང༌། ཐབས་གང་ཡང་མ་སྤངས་པ་ལ་ངམ་པ་ཡིན་ན་ཡང༌། མ་སྨིན་པའི་འཁོར་གྱི་བསམ་པ་དང་བསྟུན་ནས། སྟོན་པས་ལམ་ལོག་པ་རྣམས་ལམ་མ་ནོར་བ་ཡང་དག་ཏུ་གསུངས་པ་ལ་ངམ་ནས་འདི་སྐད་དུ། ཨེ་མའོ། །ཞེས་ངོ་མཚར་བ་སྐྱེས་པས། དོན་རྨད་དུ་བྱུང་བའི་ཡོན་ཏན་གྱི་མངའ་བདག་ཆོས་ཀྱི་རྗེ་བཙན་ཚོགས་གཉིས་རྫོགས་པའི་བདག་པོ་རྒྱལ་བ་སངས་རྒྱས་བཅོམ་ལྡན་འདས་ཆོས་སྟོན་པའི་སྨྲ་བ་དམ་པ་སྐུ་ལྔའམ་དུས་གསུམ་དུ་གཤེགས་པ་རྣམས་ཀྱི་དགོངས་པ་རྣམ་དག་ཡང་དག་པས་བརྗོད་པ་ཚད་མའི་གསུང་གི་བསྟན་པ་དག་ནི་ལམ་འབྲས་རྣམ་པར་དཀར་བ་ཡིན་པ་ལས། ༼༣༠༥༽འདི་ལྟར་མི་དགེ་བ་བཅུ་ལ་སོགས་པ་ཕྱིན་ཅི་ལོག་གི་ཆོས་ཀུན་མ་ནོར་བའི་ལམ་དུ་བཀའ་སྩལ་བར་འབྱུང་བ་འདི་ཅི་ལྟ་བུ་ལགས། ཞེས་དེ་སྐད་ཞུ་བ་འདུན་པའི་ཚུལ་གྱིས་ཞུས་པ་ལས།

གསུམ་པ་ལན་དུ་དྲང་དོན་གྱིས་ཁྲིད་པའི་ཐབས་ཚུལ་གསུངས་པ་ལ་གསུམ་སྟེ། དྲང་དོན་དུ་བསྟན་པ་དངོས་བཤད་པ། ཐབས་དེ་ལྟར་བསྟན་པའི་དགོས་ཆེད་བཤད་པ། ཚུལ་དེའི་མཚོན་ཚུལ་མཐུན་དཔེས་བསྟན་པའོ། །དང་པོ་ནི།

བཤེས་གཉེན་དམ་པས། ཞེས་པ་ནས། ཐབས་སུ་བསྟན་པ་ཡིན། །ཞེས་པའི་བར་གྱིས་བསྟན་ཏེ།

བཤེས་གཉེན་དམ་པས་བཀའ་སྩལ་པ། །ཕྱིན་ཅི་ལོག་ལ་ཞེན་པ་རྣམས། །ཐབས་མཆོག་དཔག་གིས་མི་ལང་བས། །ངེས་པའི་དོན་ལ་གཟུད་པའི་ཕྱིར། །ཁྲིད་པའི་ཐབས་སུ་བསྟན་པ་ཡིན།།

སྟོན་པ་གསང་བ་མཆོག་གི་མངའ་བདག་ཆེན་པོ་བཤེས་གཉེན་དམ་པས་ལན་དུ་བཀའ་སྩལ་པ་ནི། འདི་ལྟར་བསྟན་པ་གང་དེ་ཉིད། གདུལ་བྱ་ཕྱིན་ཅི་ལོག་གི་ལས་ལ་ཞེན་ཅིང་ཆགས་པ་རྣམས་ཀྱང༌། སྟོན་པ་དམ་པ་ཐེག་ཆེན་གསང་བ་རྒྱལ་པོའི་ཐེག་པའི་བྱེ་བྲག་མང་ལ་ཡངས་པས་ཐབས་མཆོག་དཔག་གིས་མི་ལང་བའི་སྤྲིན་ཕུང་ཐམས་ཅད་མཁྱེན་པ་ཐབས་ཀྱི་མངའ་བདག་ལགས་པས་དེ་ཉིད་མིན་པར་གཞན་གྱིས་མི་འདྲོངས་པས་ན་དེ་ལྟར་བསྟན་ཅིང་ཁྲིད་ནས་མཐར་གསང་སྔགས་ངེས་པའི་དོན་གྱི་སྒོ་འདི་ལ་གཟུད་ཅིང་འཇུག་པའི་དགོས་ཆེད་ཀྱི་ཕྱིར་དུ། ལོག་པར་ལྟ་བ་ཅན་དག་ཁྲིད་པའི་ཐབས་སུ་དོན་གཉིས་མེད་ལ་དགོངས་ཏེ་ལྡེམ་དགོངས་སྒྲ་ཇི་བཞིན་མ་ཡིན་པས་ཕྱིན་ཅི་ལོག་རྣམས་ཡང་དག་པའི་ལམ་དུ་བསྟན་ཅིང་གསུངས་པ་ཡིན་ནོ།།

གཉིས་པ་ཐབས་དེ་ལྟར་བསྟན་པའི་དགོས་ཆེད་བཤད་པ་ནི།

ལོག་ཞེན་དག་ལ། ཞེས་པ་ནས། བསྟན་བྲིད་ཐབས་སུ་གསུངས། །ཞེས་པའི་བར་གྱིས་བསྟན་ཏེ།

ལོག་ཞེན་དག་ལ་ངེས་བསྟན་ཡང་། །འཇུག་པར་མི་འགྱུར་སྤོང་འགྱུར་རྣམས། །ལོག་སྤྱོད་ཐབས་ཀྱིས་དེ་དྲངས་ན། །ཐེ་ཚོམ་མེད་པར་འབྱུང་བར་འགྱུར། །བསླུ་བའི་ཐབས་ཀྱིས་གཟུད་པའི་ཕྱིར། །སོ་སོར་མོས་པ་སྣ་ཚོགས་ཀྱི། །ལྟ་འདོད་རྣམས་དང་འཐུན་འཇུག་ཏུ། །སྦྱར་ནས་རྟེན་འབྲིད་ཐབས་སུ་གསུངས།།

འོ་ན་དེ་དག་ལའང་དང་པོ་ནས་ཟབ་མོ་བསྟན་ན་ཅི་མ་རུང་སྟེ་རྣལ་མ་མི་སྟོན་པ་དེ་ཅིའི་ཕྱིར་ཞེ་ན། ལོག་པའི་སྤྱོད་པ་ལ་ཞེན་ཅིང་ཆགས་པ་དག་ལ་ཐོག་མ་ནས་ངེས་དོན་ཟབ་མོ་སྒྲ་ཇི་བཞིན་དུ་བསྟན་ཡང༌། བློ་དང་མི་འཚམས་པས་འཇུག་པར་མི་འགྱུར་ཞིང༌། དེར་མ་ཟད་སླར་ཡང་མི་མོས་པས་དེ་ཉིད་འགེགས་ཏེ་སྤོང་བར་འགྱུར་ཞིང་དེའི་སྐྱོན་གྱིས་ངན་སོང་དུ་ལྟུང་བའི་རིགས་རྣམས་ཀུན་ཀྱང་ཐེག་པ་ཆེན་པོའི་སྒོ་འདིས་ཆུད་མ་ཟོས་པར་ལོག་སྤྱོད་དེ་ལྟ་བུ་དང་མཐུན་པའི་ཐབས་ལ་མཁས་པ་ཉིད་ཀྱིས་གདུལ་བྱ་དེ་ཉིད་དྲངས་ནས་དོན་ལ་ཁྲིད་ན་གཟོད་རིམས་ཀྱིས་གསང་སྔགས་རྣལ་མའི་དེ་ཉིད་ལ་ཐེ་ཚོམ་མེད་པར་ངེས་པས་ཡིད་ཆེས་འབྱུང་བར་༼༣༠༦༽འགྱུར་ཏེ། དཔེར་ན་ཤེད་མ་བྱེ་བའི་བྱིས་པ་མེའི་ནང་དུ་འཇུག་པ་ཐབས་ཀྱིས་དྲང་བའི་དཔེ་བཞིན་ནོ། །དེའི་ཕྱིར་དོན་ཆེན་པོ་ལ་དགོངས་ཏེ་ཐབས་སྣ་ཚོགས་པར་རང་དང་མཐུན་པས་བཙུད་ནས་དེ་ཉིད་ལ་མི་གནས་པར་བྱེད་པ་ནི་བསླུ་བའི་ཐབས་ཏེ། རེ་ཞིག་པར་བསྟན་པ་དེ་ཉིད་ཀྱིས་མཐར་ངེས་པའི་དོན་ལ་གཟུད་པའི་ཕྱིར་དུ་གདུལ་བྱ་ལོག་པའི་ལྟ་བ་སོ་སོ་ལ་ཞེན་པས་འདོད་ཅིང་མོས་པ་དང་མཐུན་པར་ཐབས་ཀྱི་འཇུག་སྒོ་སྣ་ཚོགས་པ་རྣམས་ཀྱིས་རང་རང་གི་ལོག་པའི་ལྟ་སྤྱོད་རྣམས་དང་སྒོ་བསྟུན་པས་མཐུན་འཇུག་གི་ཚུལ་དུ་ཆ་འདྲ་བའི་སྤྱོད་ཡུལ་ཅན་དུ་སྦྱར་ནས་བསྟན་པས་གདུལ་བྱ་བྲིད་དེ་མཐར་གསང་སྔགས་དམ་པ་ལ་གཞུག་པའི་ཐབས་སུ་གསུངས་ཏེ་བཀའ་སྩལ་བར་མཛད་པའོ།།

གསུམ་པ་ཚུལ་དེའི་མཚོན་ཚུལ་མཐུན་དཔེས་བསྟན་པ་ནི།

དཔེར་ན་ལོག་སྤྱོད། ཅེས་པ་ནས། རྒལ་བའི་གྲུ་བཞིན་འདོར། །ཞེས་པའི་བར་གྱིས་བསྟན་ཏེ།

དཔེར་ན་ལོག་སྤྱོད་བྱིས་པ་རྣམས། །ཕ་མས་སྡིག་བྲིད་ཐབས་ཀྱིས་ནི། །བྱ་བའི་ལས་ལ་གཟུད་པ་ལྟར།།

བརྩེ་བས་དོན་ལ་འདྲེན་པའོ། །དེ་ཡང་ཇི་ལྟར་ལ་ལ་ཞིག །ཆུ་བོ་ཕ་མཐར་འགྲོ་འདོད་པ།།

གྲུ་བོ་དག་ལ་བརྟེན་ནས་འགྲོ། །མཐར་སོང་བ་ན་འབོར་བ་བཞིན། །ཐབས་སམ་ཐེག་པའི་བྱེ་བྲག་རྣམས།།

བརྟེན་པས་དྲང་བའི་ཐབས་ཡིན་ཡང་། །དོན་གྱི་ངེས་པ་རྙེད་མ་ཐག །ཆུ་བོ་རྒལ་བའི་གྲུ་བཞིན་དོར།།

དེའི་མཚོན་དཔེ་བརྡ་ལ་ཤེད་མ་བྱེ་བ་དང་དོན་ལ་ཤེད་མ་བྱེ་བ་གཉིས་ཀ་སྦྱར་ཏེ། དཔེར་ན་ལོག་པར་སྤྱོད་པའི་བྱིས་པ་རྣམས། རང་གི་དངོས་ཀྱི་ཕ་མས་འཇིགས་པས་བསྡིགས་པ་དང་དགའ་བས་བྲིད་པར་བྱེད་པའི་ཐབས་ཀྱིས་ནི། རུང་བ་དང་མི་རུང་བའི་བྱ་བའི་ལས་ལ་གཟུད་དེ་ལུས་ངག་གི་བྱ་བརྩལ་བཟང་པོ་ཆེད་དུ་འཛིན་པར་གཞུག་པ་ལྟར། སྟོན་པ་རྣམ་འདྲེན་དམ་པས་ཉེས་པ་ལས་བཟློག་སྟེ་བཀྲི་དྲང་གི་ཐབས་ལ་བརྟེན་ནས་ཐུགས་བརྩེ་ཆེན་དམ་པས་གསང་བའི་དོན་ལ་རིམ་པར་འདྲེན་པར་མཛད་པའོ། །འོ་ན་ཐབས་དེ་ཉིད་ལ་ཆགས་པས་ཉེས་པས་གོས་པར་མི་འགྱུར་རམ་ཞེ་ན། དེ་ཡང་དཔེ་ཇི་ལྟར་ན་གང་ཟག་ལ་ལ་ཞིག་ཆུ་བོ་ཆེན་པོའི་ཕ་མཐར་འགྲོ་བར་འདོད་པ་ན། ཆུའི་ཀླུང་དེར་གྲུ་བོ་དག་ལ་བརྟེན་ནས་བརྒལ་ཏེ་འགྲོ་ཡང་ཕ་རོལ་གྱི་མཐར་སོན་པ་ན་གྲུ་བོ་འབོར་བར་བྱེད་པ་བཞིན་དུ་གདུལ་བྱ་འདུལ་བའི་ཐབས་སམ་ཐེག་པའི་བྱེ་བྲག་གི་རིམ་པ་རྣམས་དང༌། འདིར་ལོག་པའི་སྤྱོད་པ་ལམ་དུ་བཀའ་སྩལ་པ་ལྟ་བུ་དེ་དག་ལ་བརྟེན་པས་དོན་རྣལ་མ་ལ་དྲང་བའི་ཐབས་ཆེན་པོ་ཡིན་ཡང་ཐམས་ཅད་དུ་ལྡན་པ་མ་ཡིན་ཏེ་གསང་སྔགས་ཟབ་མོའི་དོན་གྱི་ངེས་པ་ཡང་དག་པར་རྙེད་མ་ཐག་ཏུ་ཆུ་བོ་རྒལ་བའི་གྲུ་བཞིན་དུ་དོན་དེ་དག་ཐབས་དེ་ཉིད་ལ་ཞེན་པ་དང་རྩོལ་བའང་༼༣༠༧༽མཐར་འདོར་བ་ཉིད་དེ། རང་གི་ངོ་བོ་འདོར་བ་དང༌། ཞེན་པ་འདོར་བ་གཉིས་ལས་འདིར་ལྟ་སྤྱོད་ངན་པ་རང་གི་ངོ་བོ་ཡང་འདོར་བའི་དཔེ་དང་སྦྱར་རོ།།

བཞི་པ་ཆོས་ཉིད་དུ་ཤེས་ན་ལོག་པ་ཉིད་ངེས་པའི་ལམ་དུ་བསྟན་པ་ནི།

དེས་ན་དེ་བཞིན། ཞེས་པ་ནས། མི་གསུང་བར་བཞུགས་སོ། །ཞེས་པའི་བར་གྱིས་བསྟན་ཏེ།

དེས་ན་དེ་བཞིན་ཉིད་ཤེས་ན། །ཐམས་ཅད་ཐམས་ཅད་གང་ཡང་རུང་། །དམ་པའི་ལམ་དུ་ངེས་པས་ན།།

ལམ་གྱི་ནང་ན་ཉེ་ལམ་ཡིན། །དེ་སྐད་ཅེས་གསུངས་ནས་ཅང་མི་གསུང་བར་བཞུགས་སོ།།

གསང་སྔགས་ཀྱི་ལམ་མ་ཡིན་པ་མེད་པའི་ཕྱིར་ཞེན་པ་དང་ངོ་བོ་གཉིས་ལ་མི་གནས་པའི་ཚུལ་དེས་ན་གསང་བ་མཆོག་གི་ཆོས་ཀྱི་དབྱིངས་གཉིས་སུ་མེད་པའི་དེ་བཞིན་ཉིད་མ་ནོར་བར་ཤེས་ནས་དོན་གོ་ན། ལྟ་བ་ངན་པ་ཐམས་ཅད་དང་སྤྱོད་པ་ངན་པ་ཐམས་ཅད་གང་ཡང་རུང་སྟེ་རིལ་རང་རིག་པའི་ངོ་བོར་རྟོགས་ཏེ་དམ་པའི་ལམ་དུ་མཐོང་བས་མ་སྤངས་པར་སྤྱད་པ་ཉིད་ཀྱིས་མཐར་ཕྱིན་པར་ངེས་པས་ན་ལམ་གཞན་ན་མེད་ཅིང་འབྲས་བུ་ལོགས་སུ་མི་ཚོལ་བའི་ཕྱིར་ལོག་པའི་ལྟ་སྤྱོད་ཀྱང་སྤངས་མི་དགོས་པར་གྲོལ་བས་ལམ་ཐམས་ཅད་ཀྱི་ནང་ན་ཉེ་ལམ་དམ་པ་རྨད་དུ་བྱུང་བ་ཡིན་ནོ། །ཚུལ་དེས་ན་སྐྱེ་བ་མེད་པའི་དེ་བཞིན་ཉིད་ཤེས་ན་དམ་པའི་ལམ་དུ་མ་གྱུར་པ་གང་ཡང་མེད་པར་བསྟན་པའོ། །འོ་ན་སྤྱོད་ངན་དེ་ལྟར་གཟུགས་བརྙན་ཙམ་ཡིན་ན་ཡང༌། ལྟ་ངན་དེ་ཉིད་ཇི་ལྟར་ཡོད་ཅེ་ན། ཆོས་ཉིད་ཀྱི་དོན་མངོན་དུ་གྱུར་ཙ་ན་ལྟ་ངན་གྱི་གཞི་ཡང་རང་རིག་པའི་ཆོས་ཉིད་དུ་དག་པ་ཡིན་པས་ཆེད་དུ་སྤངས་པ་མ་ཡིན་པར་རང་གྲོལ་བ་ཁོ་ན་ཡིན་ནོ། །དེ་སྐད་ཅེས་སྟོན་པ་མཆོག་གིས་གསུངས་ཤིང་བཀའ་སྩལ་ནས་དེའི་ཚེ་ཕྲིན་ལས་གྲུབ་པས་ཅང་མི་གསུང་བར་བཞུགས་སོ།།

གཉིས་པ་ངེས་པའི་ལམ་དུ་འཇུག་ལུགས་མ་འདྲེས་ཡོངས་རྫོགས་སེམས་ཀྱི་གསང་ལམ་དུ་བསྟན་པ་ལ་གཉིས་ཏེ། ལམ་ཤེས་པའི་དགོས་པ་བསྟན་པ། ལམ་རང་གི་ངོ་བོ་བཤད་པའོ། །དང་པོ་ནི།

ཀྱེ་གྲོགས་པོ། ཞེས་པ་ནས། ལམ་འདི་ཤེས་པར་བྱ། །ཞེས་པའི་བར་གྱིས་བསྟན་ཏེ།

ཀྱེ་གྲོགས་པོ་དག་དེ་བས་ན་དམ་པ་རྣམས་ཀྱི་རྗེས་ལམ་དམ་པ་འདིར་ཞུགས་ན། ཐམས་ཅད་ནས་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་ཤེས་པ་དང་། གསལ་བ་དང་མ་འདྲེས་པ་དང་། ཡོངས་སུ་རྫོགས་པར་འགྱུར་ཏེ། འཁོར་བ་ཡོངས་སུ་ཤེས་པར་འདོད་པས་ཀྱང་ལམ་འདི་ཤེས་པར་བྱའོ། །མྱ་ངན་ལས་འདས་པ་ཡོངས་སུ་ཤེས་པར་འདོད་པས་ཀྱང་ལམ་འདི་ཤེས་པར་བྱའོ། །གཞན་ཡང་ཆོ་འཕྲུལ་ཆེན་པོ་ཉི་ཤུ་ཐོབ་པར་འདོད་པས་ཀྱང་ལམ་འདི་ཡོངས་སུ་ཤེས་པར་བྱའོ། །རྟོག་པའི་རི་བོ་བརྒྱད་ཅུ་གཞིལ་བར་འདོད་པས་ཀྱང་ལམ་འདི་ཤེས་པར་བྱའོ། །ལྟུང་བའི་སྒོ་དགུ་ཆུད་པར་འདོད་པས་ཀྱང་ལམ་དམ་པ་འདི་ཤེས་པར་བྱའོ། །དེ་ལ་སོགས་པ་མཐའ་ཡས་པའི། །ཐམས་ཅད་ཐམས་ཅད་ཡོངས་རྫོགས་པའི། །ཤེས་པར་འདོད་པ་གང་དག་གིས།།

དམ་པའི་ལམ་འདི་ཤེས་པར་བྱ།།

དེ་ལྟར་ཞུས་པའི་ཡོན་ཏན་གང་སྙམ་པ་ལ། འཆད་པའི་སྐྱེས་བུ་གསང་བདག་ཆེན་པོས། ཀྱེ་གྲོགས་པོ་དག ཅེས་བོས་ནས་ཡོན་ཏན་གསུངས་པ་ནི། སྔར་བཤད་པའི་ཚུལ་དེ་བས་ན། རྒྱལ་བ་དམ་པ་རྣམས་ཀྱི་གཤེགས་ཤུལ་གྱིས་རྗེས་ལྟར་ཐེག་པ་ཆེན་པོའི་ཉེ་ལམ་དམ་པ་མཆོག་གི་སྒོ་འདིར་སྤྱད་ཅིག་ཞུགས་ཏེ་རང་གི་གཞུང་ལས་མ་ཉམས་ན་དུས་སྔ་མ་ཐམས་ཅད་ནས་ཕྱི་མ་ཐམས་ཅད་དང་ད་ལྟར་གྱི་རྣམ་པ་ཐམས་ཅད་ཀྱི་བྱེ་བྲག་གི་ལྟ་བའི་དོན་དང་༼༣༠༨༽སྤྱོད་པའི་ཁྱད་པར་ཇི་སྙེད་པ་ཐམས་ཅད་དུ་རང་སྣང་གི་རིག་པ་དེ་ཉིད་གསང་སྔགས་ཀྱི་ངོ་བོར་ཤེས་ཤིང་རྟོགས་པ་དང༌། སེམས་ཀྱི་དཀྱིལ་འཁོར་དུ་གསལ་བ་དང༌། རང་གི་མཚན་ཉིད་སོ་སོའི་བྱེ་བྲག་མ་འདྲེས་པར་ཕྱེད་པ་དང༌། སྤྱིའི་མཚན་ཉིད་དེ་ཉིད་ཀྱི་ངོ་བོར་དབྱེར་མེད་པར་ཡོངས་སུ་རྫོགས་པ་རྟོགས་པར་འགྱུར་ཏེ། ཚིག་ལྷག་མ་ནི་དེ་ལྟ་བུའི་གདམས་པར་འབྱུང་བའོ། །དེས་ན་ཆོས་ཉིད་མཉམ་པ་ཉིད་མ་རྟོགས་པ་ལས་འཁོར་བ་ཉིད་ལས་ཉོན་གྱི་རྒྱུ་འབྲས་ཅན་དུ་སྣང་བའང༌། སྐྱེ་བ་མེད་པའི་ཆོས་ཉིད་དུ་ཡོངས་སུ་ཤེས་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། །མྱ་ངན་ལས་འདས་པ་སངས་རྒྱས་ཀྱི་མཚན་ཉིད་ལམ་དང་འབྲས་བུའི་རང་བཞིན་མཉམ་པ་ཉིད་དུ་ཡོངས་སུ་ཤེས་པར་འདོད་པས་ཀྱང་ལམ་འདི་ཉིད་ཤེས་ཤིང་རྟོགས་པར་བྱའོ། །དེ་བས་ཆོས་ཉིད་ཀྱི་ངོ་བོ་འཁོར་འདས་རིས་མེད་ཡིན་ཏེ་དེའི་ཕྱིར་མཉམ་ཉིད་རྟོགས་པས་འཁོར་འདས་ཤེས་པའོ། །གཞན་ཡང་སྔར་ལེའུ་བཅུ་དྲུག་པར་བཤད་པའི། རང་བཞིན་བསམ་གཏན་ལས་ཐུགས་རྗེ་བཞི་ལ་ཡན་ལག་བཅུ་དྲུག་སྟེ་ཆོ་འཕྲུལ་ཆེན་པོ་ཉི་ཤུ་ཐོབ་པར་འདོད་པས་ཀྱང་དམ་པ་འདི་ཉིད་ཡོངས་སུ་ཤེས་པར་བྱའོ། །དེ་བཞིན་དུ་མཐར་ལམ་པས་གོལ་སྒྲིབ་ཆེད་དུ་བྱས་པའི་བཟང་རྟོག་སྔར་བཤད་པ་ལྟ་བུའི་རྟོག་པའི་རི་བོ་བརྒྱད་ཅུ་རྩ་གཅིག་མི་དམིགས་མཉམ་པའི་ངང་དུ་གཞིལ་བར་འདོད་པས་ཀྱང་ལམ་དམ་པ་འདི་ཡོངས་སུ་ཤེས་པར་བྱ་སྟེ། ཀུན་འདུས་ལས། དངོས་གཞིའི་རྟོག་པ་དགུ་དང༌། མཚན་མའི་རྟོག་པ་དགུ་དང༌། རྟགས་ཀྱི་རྟོག་པ་དགུ་དང༌། རྐྱེན་གྱི་རྟོག་པ་དགུ་དང༌། ལས་ཀྱི་རྟོག་པ་དགུ་དང༌། སྤྱོད་པའི་རྟོག་པ་དགུ་དང༌། བསྐྱེད་པའི་རྟོག་པ་དགུ་དང༌། ཞེན་པའི་རྟོག་པ་དགུ་དང༌། མངོན་པར་རྟོག་པ་དགུའོ། །ཞེས་གསུངས་པས་དགྲོལ་བར་བྱའོ། །ཟག་པ་དང་བཅས་པའི་ལམ་པས་ལྟུང་བའི་སྒོ་དགུ་ཆད་པར་འདོད་པས་ཀྱང་ལམ་དམ་པ་འདི་ཉིད་ཡོངས་སུ་ཤེས་པར་བྱའོ། །དེའང་སྔ་མ་ལས། བདུད་ཆེན་པོའི་རིས་སུ་ལྟུང་བའི་སྒོ་དང༌། མུ་སྟེགས་ཀྱི་ཁམས་སུ་ལྟུང་བའི་སྒོ་དང༌། སྲིན་པོའིཁམས་སུ་ལྟུང་བའི་སྒོ་དང༌། གནོད་སྦྱིན་གྱི་རིས་སུ་ལྟུང་བའི་སྒོ་དང༌།༼༣༠༩༽རུ་ཏྲ་ཆེན་པོར་ལྟུང་བའི་སྒོ་དང༌། བགེགས་ཆེན་པོར་ལྟུང་བའི་སྒོ་དང༌། ལྷ་ཆེན་པོའི་རིས་སུ་ལྟུང་བའི་སྒོ་དང༌། ཤོ་གམ་གཅན་ཆེན་གྱི་རིས་སུ་ལྟུང་བའི་སྒོ་དང༌། དམྱལ་བ་ཆེན་པོར་ལྟུང་བའི་སྒོའོ། །ཞེས་གསུངས་ཏེ། སོ་སོའི་མཚན་ཉིད་བསྟན་ན། བདུད་དུ་ལྟུང་བའི་སྒོ་ནི། ངེས་དོན་འདུས་པ་ལས། གཞན་གྱི་བསམ་སྦྱོར་བཟང་པོ་ལ། །བར་ཆད་བྱེད་པ་བདུད་ཡིན་ཏེ། །གཞན་གྱི་རྫས་ལ་སེར་སྣ་བྱེད། །མ་རྟོགས་བདུད་ཀྱི་སྒོར་ལྟུང་འཁྱམས། །ཞེས་སོ། །མུ་སྟེགས་སུ་ལྟུང་བ་ནི། དེ་ཉིད་ལས། མ་རྟོགས་ང་དང་ བདག་འཛིན་པས། །གསང་སྔགས་ལྟ་སྤྱོད་ལོག་པའི་ཕྱིར། །བརྩེ་མེད་སྡིག་པ ་ཀུན་སྤྱད་པས། །མུ་སྟེགས་སྒྲོ་སྐུར་རྟག་ཏུ་འཁྱམས། །ཞེས་སོ། །སྲིན་པོར་ལྟུང་བ་ནི། མཉམ་ཉིད་ཆོས་སྐུ་མ་རྟོགས་པར། །རང་རྒྱུད་ཆགས་སྡང་ཕོ་ཚོད་སྤྱོད། །སྙིང་རྗེ་མེད་པར་གསོད་ལ་དགའ། །སྲིན་པོའི་སྒོར་ལྟུང་དམྱལ་བར་སྐྱེ། །ཞེས་སོ། །གནོད་སྦྱིན་དུ་ལྟུང་བ་ནི། མ་རྟོགས་མཐུ་ཆེ་ཚད་མེད་ཀྱང༌། །ང་རྒྱལ་དྲེགས་པའི་ཉོན་མོངས་ཅན། །འཇིག་རྟེན་འདི་རུ་བཙན་ཕྱུག་ཀྱང༌། །གནོད་སྦྱིན་སྒོར་ལྟུང་རྟག་ཏུ་འཁྱམས། །ཞེས་སོ། །རུ་ཏྲར་ལྟུང་བ་ནི། ཇི་བཞིན་མ་ནོར་མ་རྟོགས་པར། །ལོག་རྟོག་སྤྱོད་ཅིང་སྣ་ཚོགས་སྤྱོད། །རང་གིས་མི་ཤེས་གཞན་འགྲོ་བ། །རུ་ཏྲའི་སྒོར་ལྟུང་དམྱལ་བར་སྐྱེ། །ཞེས་སོ། །བགེགས་སུ་ལྟུང་བ་ནི། མ་རྟོགས་ཕྲིན་ལས་ཅི་མཁས་ཀྱང༌། །ཚིག་ལ་དངོས་པོར་འཛིན་པ་ཡིན། །རང་རྒྱུད་དམ་རྫས་མངོན་ཞེན་པས། །བགེགས་དང་བྱ་རོག་སྒོར་ལྟུང་འཁོར། །ཞེས་སོ། །འདིའི་རྐང་པ་དང་པོར་དཔེ་ལ་ལར། མ་རྟོགས་ཕྲ་མེན་ཅི་མཁས་ཀྱང༌། །ཞེས་འབྱུང༌། ལྷ་ཆེན་པོར་ལྟུང་བ་ནི། ཐབས་ལམ་དབང་ལ་ཁུངས་ཕྱུང་སྟེ། །འདོད་ཆགས་རང་དགར་རྟག་སྤྱོད་པ། །ལྟ་བས་མ་ཟིན་བདེ་ལ་ཞེན། །ལྷ་ཆེན་འདོད་ཆགས་མངལ་སྒོར་ལྟུང༌། །ཞེས་སོ། །ཤོ་གམ་ཅན་དུ་ལྟུང་བ་ནི། རང་དབང་ཏིང་འཛིན་མ་ཐོབ་པར། །སྡིག་པས་འཁོར་དང་རིས་སུ་བཅད། །བདག་ཉིད་ཆེ་འདོད་འཁོར་སྡུད་པ། །ཤོ་གམ་༼༣༡༠༽གཅན་ཆེན་གནས་སུ་ལྟུང༌། །ཞེས་སོ། །ངན་སོང་དུ་ལྟུང་བའི་སྒོ་ནི། སྔ་མ་ལས། རང་སེམས་ཆོས་སྐུར་མ་རྟོགས་པར། །མདོ་རྒྱུད་མང་པོ་ཤེས་བཤད་ཀྱང༌། །བདག་བསྟོད་གཞན་ལ་སྨོད་པའི་ཕྱིར། །ངན་སོང་གསུམ་གྱི་སྒོར་ལྟུང་འཁོར། །ཞེས་སོ། །དེ་ལ་སོགས་པ་སྔར་ཡང་བཤད་པ་གཞན་འདི་དག་བསྡུ་བའི་དོན་གྱིས་རྔམ་ཉི་ཤུ་དང༌། ཆེ་བ་ཉི་ཤུ་དང༌། བརྗིད་ཉི་ཤུ་ལ་སོགས་པ་རྩ་བའི་རྒྱུད་ལས་སྨོས་པ་དང༌། རྒྱུའི་རྣལ་འབྱོར་དང༌། རྐྱེན་གི་རྣལ་འབྱོར་དང༌། འབྲས་བུའི་རྣལ་འབྱོར་ཏེ། འཁོར་འདས་ལམ་གསུམ་གྱིས་བསྡུས་པ་མཐའ་ཡས་པའི་ཆོས་ཇི་སྙེད་པ་ཐམས་ཅད་ནས་ཐམས་ཅད་དུ་ཡོངས་སུ་རྫོགས་པ་ཀུན་ཤེས་ཤིང་རྟོགས་པར་འདོད་པ་རྣམས་གང་དང་གང་དག་གིས་ཀྱང་གསང་སྔགས་གསང་བ་དམ་པའི་ལམ་ཆེན་པོ་འདི་ཉིད་ཡང་དག་པར་ཤེས་པར་བྱ་སྟེ། ཀུན་འདུས་ཀྱི་ལེའུ་དང་པོ་ལས། དེ་ལྟར་ཆོས་ཀྱི་ཚུལ་ཤིན་ཏུ་མང་པོ་རྒྱས་པར་བཀའ་སྩལ་ཏེ་མཇུག་ཏུ། འདུས་པ་ཆེན་པོའི་ཚོགས་དེ་བས་ན། སངས་རྒྱས་ཀྱི་ཆོས་དེ་རྣམས་ལ་སྤྱོད་པར་འདོད་པས། ལམ་འདི་ལ་བསླབ་པར་བྱའོ། །ཤེས་པར་བྱའོ། །གོམས་པར་བྱའོ། །ཀློང་དུ་གྱུར་བར་གྱིས་ཤིག །ཅེས་གདམས་པར་མཛད་དོ།།

གཉིས་པ་ལམ་རང་གི་ངོ་བོ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

སེམས་ཉིད་དམ་པའི། ཞེས་པ་ནས། ལོག་མེད་དམ་པའི་ལམ། །ཞེས་པའི་བར་གྱིས་བསྟན་ཏེ།

སེམས་ཉིད་དམ་པའི་ལམ་ཉིད་དེ། །མཁའ་ལ་བྱ་ལམ་རྗེས་མེད་བཞིན། །ཉམ་ང་ལོག་མེད་དམ་པའི་ལམ།།

ཡང་དག་པར་ཤེས་ན་དགོས་པ་དེ་ལྟ་བུ་དང་ལྡན་པའི་ལམ་གྱི་ངོ་བོ་ནི་སེམས་ཀྱི་དཀྱིལ་འཁོར་རང་བཞིན་གྱིས་འོད་གསལ་བ་དབྱེར་མེད་མཉམ་པ་ཆེན་པོར་རྟོགས་པ་དེ་ཉིད་རྒྱལ་བ་རྣམས་ཀྱི་གཤེགས་ཤུལ་ཡིན་པས་རྣལ་འབྱོར་པའི་ཡང་འཇུག་ངོགས་དམ་པ་རྣལ་མ་མ་ནོར་བའི་ལམ་མཆོག་རྨད་དུ་བྱུང་བ་ཉིད་དེ་དཔེར་ན་ཁྱུང་ཆེན་ནམ་མཁའ་ལ་ལྡིང་ཡང་བྱ་ལམ་གྱི་རྗེས་མེད་པ་བཞིན་དུ། དེ་ལྟ་བུའི་རྟོགས་པའི་གདེངས་དང་ལྡན་པ་ཅན་ལ་ཅིས་ཀྱང་མི་གོས་པས་ཟོན་ཆགས་ཀྱིས་ཉམ་ང་བ་དང་ལོག་པར་ལྟུང་བའི་བག་ཚ་བ་མེད་པར་ནོར་བ་མི་འབྱུང་བ་ནི་དམ་པའི་ལམ་མཆོག་ཏུ་གྱུར་བར་ངེས་པ་ཡིན་ནོ། །མཆན་༼༣༡༡༽ལས། འདི་གཉིས་སེམས་ཉམས་ཀྱང་ཡིན་ནོ། །ཞེས་འབྱུང་མོད། རང་མཚན་རྟོགས་ནས་དོན་ལ་འདའ་ཉམས་མེད་པའི་གདེངས་དང་ལྡན་པ་ལ་དགོངས་ཀྱི། ངོ་བོ་མ་རྟོགས་པར་ཏིང་ངེ་འཛིན་བརྟན་པ་དང༌། སྤྱི་མཚན་ཙམ་གྱིས་གོ་མྱོང་ལ་གནས་པས་ནི་མི་བསྟོངས་ཏེ། དམ་ཚིག་གི་ཀློང་ལས། དམ་ལ་མི་གནས་སྔགས་པ་དེ། །ན་རག་རྡོ་རྗེའི་གཏན་གཞི་སྟེ། །རྟོགས་པ་སྤྱི་ཡིས་དེ་མི་སྐྱོབས། །སེམས་འཛིན་གནས་པས་ཆུ་ལོན་མིན། །ཞེས་གསུངས་སོ།།

གཉིས་པ་རྒྱས་པར་བཤད་པ་ལ་དྲུག་སྟེ། ལམ་མཆོག་ཤེས་པར་བྱ་བའི་ཕྱིར་ཚིག་གིས་མཚོན་དགོས་པར་བསྟན་པ། ལམ་གྱི་གོལ་ས་ཉེས་དམིགས་དང་བཅས་པ་བཤད་པ། དོན་ལམ་གྱི་ངོ་བོ་དངོས་བསྟན་པ། དེ་ལྟར་མཐོང་གོམས་ཀྱི་དྲོད་རྟགས་བཤད་པ། ལམ་པ་དེ་ཉིད་ཐེག་པ་གཞན་གྱི་ལམ་ཞུགས་ལས་དཔག་པར་བསྟན་པ། དོན་ལམ་གྱི་རྣལ་འབྱོར་པ་ལ་ཡོན་ཏན་ཐམས་ཅད་རྫོགས་པར་བཤད་པའོ། །དང་པོ་ནི།

འདི་ལྟར་ངེས་པའི། ཞེས་པ་ནས། ཉེ་ལམ་གཏེར་བཙལ་བ། །ཞེས་པའི་བར་གྱིས་བསྟན་ཏེ།

འདི་ལྟར་ངེས་པའི་ལམ་འདི་ཡང་། །ཀུན་གྱིས་ཤེས་པར་བྱ་བའི་ཕྱིར། །ཚིག་གི་ལམ་གྱིས་ཉེར་མཚོན་ཏེ། །བརྗོད་མེད་ཚིག་གི་ཡུལ་བྲལ་བ། །དེ་ཡི་རང་བཞིན་དེ་ཡིན་ན། །རང་བཞིན་མ་བཅོས་དེ་བཞིན་ཉིད། །དེ་ལ་མིང་མེད་མིང་གདགས་རྒྱུས། །མཐོང་དང་མ་མཐོང་ཐ་དད་འགྱུར། །དེ་ལས་བརྗོད་པའི་གཞིར་གྱུར་ཏེ། །བརྗོད་པ་དེ་ཉིད་མཐོང་བྱའི་ཕྱིར། །ཚིག་གི་ལམ་ནི་རྣམ་གྲངས་ལས། །ཚིག་ལམ་སྒོ་མོ་དཔག་མེད་འགྱུར། །དེ་ལས་དམ་པའི་རྗེས་བཅད་པ། །གང་གི་ཐུགས་ལས་བྱུང་བའི་ལུང་། །སྒྲོན་མས་ཉེ་ལམ་དེར་བཙལ་བ།།

འདི་ལྟར་ཐེག་པ་ཆེན་པོ་བླང་དོར་མེད་པར་གསང་དོན་ངེས་པའི་ལམ་མཆོག་དམ་པ་འདི་ཡང་སྐལ་བ་དང་ལྡན་པའི་ལམ་པ་བློ་རབ་འབྲིང་ཐ་མ་ཀུན་གྱིས་རིམ་གྱིས་ཤེས་ཤིང་རྟོགས་པར་བྱ་བའི་ཕྱིར་རམ་ཆེད་དུ་བརྗོད་འབྱུང་ཚིག་གི་ལམ་གྱིས་ཆེད་དུ་གཉེར་ནས་ཡི་གེས་དོན་མཚོན་ཏེ་བསྟན་དགོས་པའོ། །ཚིག་ལྷག་མ་ནི། འོན་ཏེ་དེ་ལྟར་བསྟན་ཀྱང་དོན་གྱི་ངོ་བོ་བརྗོད་དུ་མེད་ཅིང་ཚིག་གི་ཡུལ་དང་བྲལ་བ་ཉིད་བརྗོད་ཚིག་གིས་མི་ཕེབས་ཏེ་སྨྲར་མེད་པས། ལམ་དམ་པ་དེ་ཡི་རང་བཞིན་དེ་ལྟ་བུ་མ་ནོར་བའི་མཚན་ཉིད་ཅན་དུ་ངེས་པ་ཡིན་ན་ལམ་པས་འཕྲལ་དུ་བྱས་ཏེ་རང་བཞིན་མ་བཅོས་ཤིང་བསམ་པ་ལས་འབྱུང་བ་མ་ཡིན་པས་ཆོས་ཉིད་དེ་བཞིན་ཉིད་དམ་པའོ། །འོན་ཀྱང་ཚིག་ཏུ་བརྗོད་པས་ལམ་མཚོན་པའི་ཚུལ་ནི། ཆོས་ཀྱི་དབྱིངས་མཉམ་པའི་དོན་དེ་ལ་མིང་མེད་ཅིང་བརྗོད་དུ་མེད་པས་མ་བཅོས་པའི་ངང་ལས། གདུལ་བྱ་ལ་མིང་དུ་བཏགས་ཏེ་རྣམ་གྲངས་ཐ་སྙད་དུ་བསྙད་པའི་རྒྱུས་ཕྱིན་ཅི་མ་ལོག་པར་མཐོང་ཞིང་རྟོགས་པ་དང༌། དེ་ལྟར་མ་མཐོང་ཞིང་མ་རྟོགས་པས་ཐེག་པ་སྣ་ཚོགས་ཐ་དད་༼༣༡༢༽དུ་གྱུར་པའོ། །དེ་ཡི་རྒྱུ་ལས་སོ་སོའི་ངོ་ལ་བརྗོད་པ་ཐ་དད་པའི་གཞིར་གྱུར་ཏེ་རང་རང་གིས་ལྟ་བའི་གཞུང་སྒྲུབ་ཅིང་རྩོད་པས་སྨྲ་བརྗོད་འཕེལ་ཞིང་རྒྱས་པར་འགྱུར་རོ། །ཚིག་ལམ་བསྟན་པ་དེའི་དགོས་པ་ནི། ཚིག་ཏུ་སྨྲ་ཞིང་བརྗོད་པས་དོན་གྱི་ངོ་བོ་དེ་ཁོ་ན་ཉིད་མཐོང་ཞིང༌། རྟོགས་པར་བྱའི་ཞེས་བྱ་བའི་ཕྱིར་དུ། ཚིག་གི་ལམ་གྱིས་མཚོན་ཐབས་ནི་རྣམ་གྲངས་ཀྱི་བྱེ་བྲག་སྣ་ཚོགས་པ་མང་པོར་བསྡེབས་པ་ལས་ཚིག་གི་ལམ་གྱི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ལ་སོགས་པ་མི་མཐུན་པ་དཔག་ཏུ་མེད་ཅིང་བསམ་ཡས་པར་འགྱུར་བ་ཡིན་ནོ། །དེ་བས་ན་ཚིག་གི་སྤྲོས་པ་དེ་དག་ལས་ཤེས་བྱའི་དོན་མ་ནོར་བ་དམ་པ་ལྐོག་ཏུ་གྱུར་པའི་མཚན་ཉིད་མཚོན་པས་རྗེས་བཅད་དེ་རིགས་པས་དཔྱད་པར་བྱ་བའི་ཐབས་མཆོག་ཏུ་གྱུར་པ་ནི། གདུལ་བྱའི་བློ་དང་བསྟུན་ཏེ་དྲང་བའི་ཐབས་སུ་བཀའ་སྩལ་པ་ཙམ་མིན་པར། རྒྱལ་བ་རྫོགས་པའི་སངས་རྒྱས་དམ་པ་གང་གི་ཐུགས་ཀྱི་དགོངས་པ་ལས་བྱུང་ནས་ཡང་དག་པའི་བཀའི་ཚིག་ཏུ་བྱུང་བའི་ངེས་པའི་ལུང་སྣང་གསལ་འོད་ལྡན་ལྟ་བུའི་སྒྲོན་མས་ཡོན་ཏན་ལྷུན་གྱིས་གྲུབ་པར་རང་ལ་གནས་པའི་དོན་གྱི་ཉེ་ལམ་འཛམ་བུའི་ཆུ་བོའི་གསེར་གྱི་གཏེར་དང་འདྲ་བ་བཙལ་ཏེ་རྟོགས་པར་བྱ་བ་ཡང་བརྗོད་པ་ཚིག་ལམ་དམ་པ་ལ་བརྟེན་ནས་མཚོན་པར་ཟད་དོ།།

གཉིས་པ་ལམ་གྱི་གོལ་ས་ཉེས་དམིགས་དང་བཅས་པ་བཤད་པ་ནི།

ཉེ་ལམ་བྱང་ཆུབ། ཅེས་པ་ནས། ནས་ནི་གྲིབ་ཚོལ་འདྲ། །ཞེས་པའི་བར་གྱིས་བསྟན་ཏེ།

ཉེ་ལམ་བྱང་ཆུབ་དམ་པ་ནི། །གང་འབྱུང་རྗེས་སུ་དེ་འབྲངས་ན། །འཁོར་བའི་འཁོར་ལོས་འཁོར་བར་འགྱུར། །གང་འབྱུང་གཡོ་བ་གང་བཀག་པ། །རྒྱུན་གྱི་འགོག་པ་ཉིད་དུ་འགྱུར། །གང་འབྱུང་མེད་པར་བླུན་པ་ཡི། །མུར་འཛིན་མུན་པའི་ལམ་དུ་འགྱུར། །འདི་ཞེས་གཅིག་ཏུ་གང་བཟུང་བ། །མཚན་མར་རྟོག་པའི་རི་བོ་ཡིན། །སྔ་ཕྱི་མེད་ཅེས་མུ་བཅད་ན། །དེ་མེད་ཆད་པའི་མུ་ཅན་ཡིན། །མ་བཅོས་ཉིད་ལ་ཡུད་ཙམ་ཞིག །ཅིར་གཡོས་སྐྱེ་འགག་བྱུང་བ་དེ། །དེ་ལས་གང་བྱུང་གང་འཕེལ་བ། །རྣམ་གྲངས་ལམ་འདི་འཕེལ་འགྱུར་གྱི། །དམ་པའི་ལམ་ཉིད་རྙེད་མ་ཡིན། །དཔེར་ན་འགྲོ་གང་བྱིས་པ་དག །གྲིབ་མ་སྤངས་ནས་རྣམ་དག་ཚོལ། །ང་ལས་བྱུང་བ་དེ་ཉིད་ཀྱིས། །བཙལ་ཡང་གྲིབ་འཕེལ་དག་མི་རྙེད། །དེ་ཉིད་ཡེ་ནས་དེ་བཞིན་དུ། །གང་འདིར་སྡུག་བསྔལ་སྣ་ཚོགས་ཀྱིས། །ཤ་ཐང་བར་ནི་ལམ་ཚོལ་བ། །དོན་མེད་བདུད་ཀྱི་ལམ་ཡིན་ནོ། །དེ་ལ་ཚིག་ཏུ་གང་བརྗོད་པ། །ནམ་མཁའ་དག་ལ་རྩོད་པ་འདྲའོ། །ཚིག་ཏུ་སྨན་དང་དཔྱད་བཤད་ཀྱང་། །ནད་པའི་ཚོགས་ལ་མི་སྨིན་ནོ། །དེ་ཉིད་དེ་བཞིན་མ་གྱུར་ན། །ཚིག་ལམ་དེ་བརྗོད་དེ་མ་ཡིན། །གང་འདིར་གང་སྤངས་གང་ཚོལ་བ།།

གཟུགས་སྤངས་ནས་ནི་གྲིབ་ཚོལ་འདྲ།།

དེ་ཡང་ཇི་ལྟར་རྒྱུད་དགྲོལ་བའི་བསླབ་པ་ལ་གནས་པས་དམིགས་མེད་བསམ་ལས་འདས་པར་ཐག་ཆོད་ནས་ཉེ་ལམ་བྱང་ཆུབ་དམ་པ་མཆོག་ཉིད་རྙེད་པ་ན་ནི། དེའི་ངང་ལ་གནས་ཏེ་སྒོམ་དགོས་པས། དེ་ལྟར་སྒོམ་པའི་དུས་སུ་དེའི་རིག་པ་དེ་དག་དྲན་པ་གང་དང་སྒོ་དྲུག་གི་མཚན་མའི་བྱུང་ཚོར་གྱི་རྗེས་སུ་དེ་ལྟར་འབྲངས་ན། བྱུང་ཚོར་གྱི་དབང་གིས་གཡེངས་པར་གྱུར་པ་མར་མེ་རླུང་གིས་སྐྱོད་པ་ལྟ་བུའི་སྐྱོན་དུ་སོང་བས་འཇིག་རྟེན་པར་ལྟུང་སྟེ་རྟེན་འབྲེལ་བཅུ་གཉིས་ཀྱིས་འཁོར་བའི་འཁོར་ལོར་འཁོར་བར་འགྱུར་ཏེ་འདི་ལ་སྐྱེ་བོ་རང་ཀ་མ་དང་སྒོམ་པའི་ཤེས་པ་གཉིས་སུ་སྦྱར་རོ། །གང་མཚན་མའི་བྱུང་ཚོར་དང་རྟོག་པ་གཡོ་བའི་རྒྱུ་བ་ལ་སྐྱོན་དུ་བལྟས་ནས་དབང་པོའི་༼༣༡༣༽ སྒོ་སྡོམས་པས་གང་བཀག་ནས་སྒོམ་པ་ནི། འཛིན་ཆགས་ཀྱི་དབང་གིས་འགོག་པར་གྱུར་པ་ཁྱིམ་བདག་འཇུར་བུ་ཅན་ལྟ་བུའི་སྐྱོན་དུ་སོང་བས་རྒྱུན་གྱི་འགོག་པ་ཉིད་དུ་ལྟུང་བར་འགྱུར་ཏེ། འདི་ལའང་ཉན་ཐོས་འགོག་པ་དང་སྒོམ་པའི་ཤེས་པ་གོལ་བ་གཉིས་སུ་སྦྱར་རོ། །གང་དྲན་པ་དང་བྱུང་ཚོར་ཡང་མེད་ལ་དོན་རྟོགས་པའི་ཤེད་ཀྱང་མ་བྱེ་བར་གང་དུའང་མི་རྒྱུ་བར་འཐོམ་ཞིང་བླུན་པོ་པ་ཡི་སྒོམ་པ་ནི། བྱིང་རྨུགས་ཀྱི་དབང་གིས་འཐིབས་པར་གྱུར་པ་འབེན་ཐིམ་པའི་མདའ་ལྟ་བུའི་སྐྱོན་དུ་སོང་བས་མ་རིག་རྨོངས་པའི་མུར་འཛིན་གྱིས་ནོན་པས་མུན་པའི་ལམ་ཀྱི་ཁྲིད་དུ་ལྟུང་བར་འགྱུར་ཏེ། འདི་ལའང་འདུ་ཤེས་མེད་པའམ་བྱོལ་སོང་དང་སྒོམ་པའི་ཤེས་པ་གཉིས་སུ་སྦྱར་རོ། །གང་ཟག་གི་བདག་གམ་སེམས་སྣང་བ་འདི་ཉིད་དོ་ཞེས་བདག་གིས་ངོ་བོ་གཅིག་ཏུ་གང་ལ་ངེས་པར་བཟུང་ནས་སྒོམ་པ་ནི་ཐེར་ཟུག་གི་དབང་གིས་འཐས་པར་གྱུར་པ་སྐྱེས་བུ་བྱ་རོག་གི་ཁུ་འཕྲིག་ཅན་གྱིས་མཐའ་ལ་རྟོག་པ་ལྟ་བུའི་སྐྱོན་དུ་སོང་བས་རྟག་པའི་མཚན་མ་ལ་རྟོག་པའི་རི་བོ་ཉིད་དུ་ལྟུང་བ་ཡིན་ཏེ། འདི་ལའང་མུ་སྟེགས་རྟག་ལྟ་བ་དང་སྒོམ་པའི་ཤེས་པ་གཉིས་སུ་སྦྱར་རོ། །ཚེའམ་རྒྱུ་འབྲས་སམ་དོན་ལ་དུས་སྔ་ཕྱི་གང་ཡང་མེད་ཅེས་མུ་མཐའ་བཅད་དེ་ད་ལྟ་འབའ་ཞིག་མ་ཁེགས་པར་ཡོད་པ་ཙམ་དུ་མཐོང་ནས་སྒོམ་ན་ནི། ཕྱལ་བའི་དབང་གིས་མེད་པར་གྱུར་པ་ཁྱི་འགྲོན་ཕྱོགས་གཉིས་པ་ལྟ་བུའི་སྐྱོན་དུ་སོང་བས། དེ་ལྟར་མེད་པ་ཆད་པའི་མུ་ཅན་དུ་ལྟུང་བ་ཡིན་ཏེ། འདི་ལའང་མུ་སྟེགས་ཆད་ལྟ་བ་དང་སྒོམ་པའི་ཤེས་པ་གོལ་བ་གཉིས་སུ་སྦྱར་རོ། །དེ་བས་ན་མ་བཅོས་པའི་ཆོས་ཉིད་ཇི་བཞིན་པའི་དོན་གྱི་ལམ་ཉིད་རིག་པ་ལ་སྐད་ཅིག་ཡུད་ཙམ་ཞིག་གསལ་ནས་སླར་དེ་ཉིད་འགག་སྟེ་བླ་ཡི་རྟོག་པ་ཅིར་ཡང་གཡོས་པས་རྣམ་རྟོག་གི་རྗེས་སུ་འབྲངས་ནས་སྐྱེ་འགག་འབྱུང་བ་དེ་ལ་སྔ་མའི་རྗེས་སུ་དྲན་པར་བྱས་པས་དེ་ལས་སྔར་ལྟར་བསྒོམ་བྱ་གང་དེ་ཡུན་དུ་གསལ་བར་འབྱུང་བས་གང་རྟོགས་པ་ཇེ་བས་ཇེ་འཕེལ་དུ་བྱུང་ནས་སེམས་ལས་བོགས་སུ་གྱུར་པ་ན་ཡང༌། ས་བཅུ་དང་རྣལ་འབྱོར་བཅུ་ལ་སོགས་པ་རིམ་གྱིས་པ་ཇི་ལྟར་འཇུག་པའི་རྣམ་གྲངས་ཀྱི་ལམ་དེ་ཉིད་འཕེལ་ཞིང་གོང་ནས་གོང་དུ་འགྲོ་༼༣༡༤༽བར་ནི་འགྱུར་གྱི། གང་གཅིག་ཆར་དུ་འཇུག་པའི་དམ་པའི་ལམ་མཆོག་ཉིད་དུ་གདངས་རྙེད་དེ་ཀློང་དུ་ཕེབས་པ་ནི་མ་ཡིན་ཏེ་དྲན་པར་བྱེད་པ་ཉིད་ཀྱིས་བསྒྲིགས་པའོ། །དེས་མི་མཐོང་བ་ཉེ་བར་མཚོན་པ་ནི། དཔེར་ན་འགྲོ་བ་གང་བརྡལ་ཤེད་མ་བྱེ་བའི་བྱིས་པ་དག་གིས་གྲིབ་མ་ལ་འབྲོས་ཏེ་སྤངས་ནས་གྲིབ་མ་མེད་པའི་ལུས་གཟུགས་རྣམ་པར་དག་པ་ཚོལ་བ་ཡང༌། གྲིབ་མ་རང་རྒྱུ་གང་ལས་བྱུང་བ་མ་ཤེས་པ་དེ་ཉིད་ཀྱིས་གྲིབ་མ་མེད་པའི་ལུས་གཟུགས་བཙལ་ཡང་སླར་གྲིབ་མ་འཕེལ་ཞིང་དེ་མེད་པའི་ལུས་དང་གཟུགས་དག་པ་ནི་མི་རྙེད་པ་དང་མཚུངས་པར་རང་གི་སྒོ་གསུམ་གྱིས་བསྡུས་པའི་ཆོས་ཀུན་སེམས་ཀྱི་དེ་ཁོ་ན་ཉིད་ཡེ་ནས་རང་རིག་པའི་དེ་བཞིན་ཉིད་དམ་པའི་ལམ་མཆོག་མ་ནོར་བ་ཡིན་བཞིན་དུ་གང་དེ་ཉིད་མི་ཤེས་པར་རྒྱུ་འབྲས་དང་བཅས་པའི་ལམ་འདིར་སྡུག་བསྔལ་སྣ་ཚོགས་ཀྱིས་རྩོལ་བ་མང་པོའི་གདུང་བས་ཆོས་ཉིད་ཀྱི་དོན་ལ་བྱ་བའི་རྣལ་འབྱོར་པ་ལྟར་ཤ་ཐང་བར་ནི་འབད་དེ་ལམ་གཞན་དུ་ཚོལ་བ་ནི་ བདག་ཉིད་ཆེན་པོ་མཐོང་དུ་མི་སྟེར་བས་དོན་མེད་པའི་བདུད་ཀྱི་ལས་འབད་པ ་དོན་མེད་པ་ཁོ་ན་ཡིན་ནོ། །དེས་ན་ཆོས་ཉིད་རང་གི་ངོ་བོ་ཐ་སྙད་དང་བྲལ་བའི་དོན་དེ་ལ་ལམ་གཞན་དུ་ཚོལ་བའི་གཞུང་མི་མཐུན་པ་རྣམས་ཀྱིས་ཚིག་ཏུ་གང་བརྗོད་དེ་བདེན་རྫུན་ལ་རྩོད་པར་བྱེད་པ་ནི་དཔེར་ན་ནམ་མཁའ་དག་ལ་བགོ་བཤའ་བྱས་ཏེ་ཡོད་མེད་དུ་རྩོད་པར་བྱེད་པ་དང་འདྲ་ཞིང་མཚུངས་སོ། །དེའི་ཕྱིར་གཞན་ཡང་དཔེར་ན་ཚིག་ཏུ་སྨན་དང་དཔྱད་བཟང་པོ་བཀླག་སྟེ་བཤད་ཀྱང་སྨན་མ་བཏང་ན་ནད་པའི་ཚོགས་ལ་ཕན་པ་མེད་པས་མི་སྨན་ནོ། །དཔེ་དེ་ལྟར་དོན་གྱི་ངོ་བོ་རང་རིག་པ་དེ་ཁོ་ན་ཉིད་ལ་དེ་བཞིན་ཉིད་ལྟར་གནད་དུ་ཆུད་དེ་རྟོགས་པ་མངོན་དུ་མ་གྱུར་ན། ཚིག་ལམ་ཙམ་གྱི་ཐབས་ཇི་སྙེད་པ་མང་པོ་དེ་དག་བརྗོད་ཀྱང་དོན་གྱི་ཡིན་ལུགས་ཆོས་ཉིད་དེ་མཐོང་བར་འགྱུར་བ་མ་ཡིན་ནོ། །འོན་ཀྱང་དོན་རྟོགས་པ་ལ་གལ་ཆེ་བར་བསྐུལ་བ་ལས་ཇི་ལྟ་བ་བཞིན་སྟོན་པའི་ཚིག་བཀག་པ་ནི་མ་ཡིན་ནོ། །དེ་བས་ན་ལམ་གཞན་དུ་ཚོལ་བའང་དོན་མེད་པའི་ཕྱིར་གང་འདིར་རྣལ་འབྱོར་ཆེན་པོའི་གསང་བའི་ལུང་གི་དོན་ལམ་གྱི་སྒོར་ཞུགས་ནས་འཁོར་བའི་ལམ་གང་ཡིན་པ་སྤངས་ཏེ་མྱ་ངན་ལས་འདས་༼༣༡༥༽པའི་ལམ་མཆོག་གང་ཞིག་གཞན་ནས་ཚོལ་བ་ནི། དཔེར་ན་གཟུགས་སྤངས་ནས་ནི་གྲིབ་མ་ཚོལ་བ་དང་འདྲ་སྟེ་གཞན་གང་ལས་མི་རྙེད་པར་ངེས་སོ། །དེ་བས་ན་བྱང་ཆུབ་ཀྱི་སེམས་སྒོམ་པ་ལས། འཁོར་བའི་ལམ་གསུམ་སྤོངས་ཤིང་མྱ་ངན་འདས་ལམ་སྒོམ་བྱེད་པ་ཡང་བདུད་ཉིད་དེ། དེ་ཉིད་རང་བཞིན་མ་ཞི་རང་བཞིན་རྩལ་སྤངས་གར་མི་གནས། །འཕགས་པ་ཀུན་གྱི་ཡུལ་དང་གནས་ཀྱང་འདས་སོགས་ལམ་འདི་གཞན་ན་མེད། །ལྡང་དང་མི་ལྡང་ཆེད་དུ་མི་སྤོང་སེམས་རྟེན་མི་འཆའ་མངོན་དུ་མིན། །འཇམ་དཔལ་མ་ཡིན་རྡུལ་ཙམ་གཡོ་བ་དེ་ཉིད་དེ་ཡིན་དེར་མི་གནས། །བསྒོམ་པའི་ས་མི་རྙེད་ཕྱིར་སྒོམས་པས་རྙེད་པར་མི་འགྱུར་ཏེ། །སེམས་ཀྱི་སྤྱོད་ཡུལ་ཤེས་པ་དེ་དག་ཆོས་རྣམས་ཀྱི་ནི་ཆོས་ཉིད་ཡིན། །རྣམ་བྲལ་གང་ལའང་མཆོག་དང་ཐ་མ་མེད་པར་ལམ་མཆོག་འདི་བསྒོམ་མོ། །ཞེས་གསུངས་སོ།།

གསུམ་པ་དོན་ལམ་གྱི་ངོ་བོ་དངོས་བསྟན་པ་ལ་བཞི་སྟེ། སེམས་ཉིད་གཉིས་མེད་དམ་པའི་ལམ་དུ་བསྟན་པ། སེམས་ཀྱི་དཀྱིལ་འཁོར་རང་བཞིན་གྱིས་འོད་གསལ་བར་བཤད་པ། སེམས་ལ་དྲན་རྟོག་ཤར་ཡང་རང་བྱུང་རང་ཞིར་བསྟན་པ། ལམ་དེའི་ཡོན་ཏན་སངས་རྒྱས་འབྱུང་བའི་ངོ་བོར་བསྟན་པའོ། །དང་པོ་ནི།

སེམས་ཉིད་དམ་པའི། ཞེས་པ་ནས། དེ་ལས་གཞན་མི་དམིགས། །ཞེས་པའི་བར་གྱིས་བསྟན་ཏེ།

སེམས་ཉིད་དམ་པའི་ལམ་ཉིད་པས། །མ་རིག་ཡེ་ཤེས་ཐ་དད་མིན། །མི་རྟོག་རྟོག་པ་ལམ་འདིར་གཅིག།

སེམས་ཉིད་སྣ་ཚོགས་པར་སྣང་བས། །སྣ་ཚོགས་ལམ་འདིར་གཅིག་པ་ཡིན། །དཔེར་ན་གསེར་གྱི་རྒྱུ་གཅིག་ལས། །དབྱིབས་དང་གཟུགས་ནི་ཐ་དད་པར། །བྱས་པས་དེ་དག་མིང་དེར་གྲགས། །གང་གྲགས་གསེར་གྱི་ངོ་བོར་གཅིག །དེ་ལྟར་སེམས་ཉིད་རང་བཞིན་ལ། །མཐོང་དང་མ་མཐོང་ཁྱད་པར་གྱིས།།

གང་ལྟར་བལྟས་གུ་དེ་ལྟར་སྣང་། །སྣང་ཡང་དེ་ལས་གཞན་མི་དམིགས།།

འོ་ན་གང་ནས་བཙལ་བར་བྱ་ཞེ་ན། གནས་ལུགས་ཇི་བཞིན་པ་ཆོས་སོ་ཅོག་གི་རྩ་བ་སེམས་ཉིད་རང་རིག་པ་ཆེན་པོ་ནི་ཐར་པ་དམ་པའི་ལམ་མཆོག་མ་ནོར་བ་ཉིད་ཡིན་པས་འཁོར་བའི་རྩ་བ་མ་རིག་པ་དང་རིག་པ་ཡེ་ཤེས་ཆེན་པོ་གཉིས་གསེར་དང་གཡའི་ཚུལ་ཙམ་ལས་ངོ་བོ་ཐ་དད་མིན་པར་དབྱེར་མེད་དུ་གནས་པའི་དོན་ལ་འཁོར་བ་དང་སངས་རྒྱས་ཀྱི་རིས་སུ་མི་འཛིན་ཏེ་བླང་དོར་མེད་པར་གཉིས་སུ་མི་རྟོག་པ་ཡི་ལམ་ཆེན་པོ་བགྲོད་དུ་མེད་པ་འདིར་རང་བཞིན་གཅིག་པ་ཡིན་པས་གཞན་དུ་མི་ཚོལ་ཏེ། ཀུན་འདུས་ལས།

ལམ་ཉིད་ཇི་ལྟར་ཡིན་ཞེ་ན། །མ་རིག་ཡེ་ཤེས་ཐ་དད་མིན། །མ་རྟོགས་རྟོགས་པ་ལམ་དུ་གཅིག །སེམས་འདི་སྣ་ཚོགས་པར་སྣང་བས། །སྣ་ཚོགས་སེམས་སུ་གཅིག་པ་ཡིན། །ཞེས་སོ། །དེ་ཅིའི་ཕྱིར་ཏེ། འོ་ན་སྟོང་པ་ཕྱོགས་གཅིག་པ་ཞིག་གོ་ཞེ་ན། སེམས་རང་རིག་པ་དེ་ཉིད་འཁོར་འདས་སུ་འགྲོ་བའི་མཐོ་དམན་གྱི་ལམ་ཇི་སྙེད་པ་སྣ་ཚོགས་པར་སྣང་༼༣༡༦༽བས་རྟོགས་པ་དང་མ་རྟོགས་པའི་དབང་གིས་སྣ་ཚོགས་ཅིར་ཡང་འཆར་བ་ཉིད་སེམས་ཀྱི་ཆོས་ཉིད་མཉམ་པ་ཉིད་ཀྱི་ལམ་འདིར་དབྱེར་མེད་དུ་གཅིག་པ་ཡིན་པས་འཁོར་བའི་ལམ་མ་སྤངས་ལ་འདས་པ་བཙལ་དུ་མེད་པར་ཆོས་ཉིད་རང་རིག་རང་གྲོལ་དུ་རྟོགས་པ་དེ་ཉིད་མ་ནོར་བའི་ལམ་ཡིན་ནོ། །དེ་ཉིད་ཉེ་བར་མཚོན་ཚུལ། དཔེར་ན་གསེར་གྱི་རྒྱུ་གཅིག་ལས་སྐུ་དང་ཆོལ་ཟངས་ལ་སོགས་པ་དབྱིབས་དང་གཟུགས་ནི་ཐ་དད་པར་བྱས་ཏེ་སོ་སོར་སྣང་བས་སྣང་ཚུལ་དེ་དག་ལ་མིང་ཡང་དེ་དང་དེར་ཐ་དད་རེ་རེར་གྲགས་མོད། གང་ལྟར་གྲགས་ཀྱང་དོན་གསེར་གྱི་ངོ་བོར་གཅིག་པ་ལས་འགྱུར་བ་མེད་དོ། །དཔེ་དེ་ལྟར་ཆོས་ཐམས་ཅད་སེམས་ཉིད་བྱང་ཆུབ་ཀྱི་སེམས་སུ་རང་བཞིན་གཅིག་ཅིང་ངོ་བོ་རྣམ་པར་དག་པ་ལ། འཇིག་རྟེན་པ་དང་འདས་པའི་ཐེག་པ་གོང་འོག་གིས་དོན་དེ་མཐོང་ཞིང་རྟོགས་པ་དང་མ་མཐོང་ཞིང་མ་རྟོགས་པའི་ཁྱད་པར་གྱིས་དོན་ཕྱོགས་མེད་ལ་ཇི་ལྟར་བལྟས་པ་ལྟར་སེམས་ཉིད་གང་ལྟར་བལྟས་རྒུ་དེ་ལྟར་སྣང་སྟེ། སྣ་ཚོགས་སུ་གསལ་ཞིང་སྣང་བ་ཡིན་ཡང་ངོ་བོ་སེམས་ཉིད་དེ་ཁོ་ན་ཉིད་མ་གཏོགས་དེ་ལས་གཞན་དུ་གྱུར་པ་ནི་གང་ཡང་མི་དམིགས་པས་སེམས་ཉིད་དུ་མ་འདུས་པའི་ཆོས་མེད་དོ།།

གཉིས་པ་སེམས་ཀྱི་དཀྱིལ་འཁོར་རང་བཞིན་གྱིས་འོད་གསལ་བར་བཤད་པ་ནི།

སྒྲོན་མ་འབར་བའི། ཞེས་པ་ནས། རང་བཞིན་ཡོང་གིས་གསལ། །ཞེས་པའི་བར་གྱིས་བསྟན་ཏེ།

སྒྲོན་མ་འབར་བའི་རིན་ཆེན་ནི། །ཇི་ལྟར་ངན་ཁུང་སྦས་འགྱུར་ཡང་། །དེ་ཡི་རང་བཞིན་རང་སྣང་བས། །འོད་ནི་མཁའ་ལ་གསལ་བར་འགྱུར། །དེ་བཞིན་སེམས་ཉིད་རིན་ཆེན་སྒྲོན། །ལུས་ངན་འདམ་དུ་བྱིང་འགྱུར་ཡང་།།

རང་བྱུང་རང་ཞི་རང་སྣང་བས། །མ་བཅོས་རང་བཞིན་ཡོངས་ཀྱིས་གསལ།།

འོ་ན་སེམས་ཀྱི་རང་བཞིན་ཇི་ལྟ་བུ་ཞེ་ན། དཔེར་ན་སྣང་བྱེད་གསལ་བའི་སྒྲོན་མ་འོད་འབར་བ་དང་ལྡན་པའི་རིན་ཆེན་དམ་པ་ནི། ཇི་ལྟར་འདམ་གྱི་ངན་ཁུང་དུ་སྦས་པར་གྱུར་ན་ཡང་དེ་ཡི་རང་བཞིན་རང་གསལ་དུ་སྣང་བ་ཡིན་པས་འོད་ནི་ནམ་མཁའ་ལ་གསལ་བར་འགྱུར་རོ། །དཔེ་དེ་བཞིན་དུ་རིག་པ་བྱང་ཆུབ་ཀྱི་སེམས་ཉིད་ཡེ་ནས་རང་བཞིན་གྱིས་འོད་གསལ་བའི་རིན་ཆེན་མཆོག་གི་སྒྲོན་མ་དེ་ཉིད་ལུས་ངག་ཡིད་ཀྱི་བག་ཆགས་ངན་པའི་འདམ་དུ་བྱིང་སྟེ་བསྒྲིབས་པར་གྱུར་ན་ཡང་རང་རིག་པ་ཡེ་ཤེས་ཆེན་པོ་ལས་ཉམས་པ་མེད་དེ། ཇི་ལྟར་རྒྱུ་རྐྱེན་བྲལ་བར་རང་བྱུང་ཞིང་སྤྲོས་པ་མ་སྤངས་རང་སར་ཞི་སྟེ་རིལ་རིག་པ་ཉིད་དུ་ཤར་ཞིང་དེ་ཉིད་སྣ་ཚོགས་པར་མ་འགགས་ཏེ་རང་སྣང་བར་ནུས་པ་ཡིན་པས་ན་བློས་ཆེད་དུ་མ་བཅོས་པར་སེམས་ཀྱི་རང་བཞིན་ཡེ་ནས་འབྱེད་པ་མེད་པར་ཡོང་གིས་འོད་གསལ་བ་ནི་སུས་ཀྱང་མ་བྱས་པར་བྱུང་༼༣༡༧༽བའོ།།

གསུམ་པ་སེམས་ལ་དྲན་རྟོག་ཤར་ཡང་རང་བྱུང་རང་ཞིར་བསྟན་པ་ནི།

སེམས་འདི་ནམ་མཁའ། ཞེས་པ་ནས། མ་ཡེངས་ཁོ་ནར་ཟད། །ཅེས་པའི་བར་གྱིས་བསྟན་ཏེ།

སེམས་འདི་ནམ་མཁའ་ཇི་བཞིན་ཏེ། །ཀུན་ཁྱབ་སྟོང་གསལ་སྣ་ཚོགས་འབྱུང་། །བྱུང་ཚོར་གཡོ་འགོག་ཐམས་ཅད་ཀྱང་། །རང་བཞིན་གྱིས་འབྱུང་ངང་གིས་ཞི། །མདོར་ན་ཇི་ལྟར་བརྟགས་བསམས་བཞིན། །འགྱུར་བས་ཐམས་ཅད་ངོ་བོར་སྣང་། །མ་བཅོས་གཡོ་བ་མེད་ཉིད་ལས། །སྣ་ཚོགས་རྒྱུ་འབྱུང་མི་སྐྱོན་ཞིང་། །ཆོ་འཕྲུལ་མི་འགག་ཉམ་ང་མེད། །ཇི་བཞིན་ནམ་མཁའི་རང་བཞིན་ལ། །བློ་བཞག་མ་ཡེངས་ཁོ་ནར་ཟད།།

དེ་ལྟ་བུའི་བྱང་ཆུབ་ཀྱི་སེམས་འདི་ནི་ནམ་མཁའ་ཇི་ལྟ་བུའི་རང་བཞིན་ཅན་ཏེ། ཇི་ལྟར་ན་ཀུན་ལ་ཁྱབ་པ་ངོ་བོ་སྟོང་པ་མཚན་ཉིད་གསལ་བ་ཆོས་ཇི་སྙེད་པ་སྣ་ཚོགས་ཆོ་འཕྲུལ་དུ་འབྱུང་བའི་གཞིར་གྱུར་པའི་ཕྱིར་རོ། །དེ་ལྟ་བུའི་བྱང་ཆུབ་ཀྱི་སེམས་དེ་བསྒོམ་པའི་དུས་སུ་སེམས་ཀྱི་བྱུང་ཚོར་དང་རྣམ་རྟོག་གི་རྒྱུ་འགྲུལ་གཡོ་ཞིང་སྐྱེ་བ་དང་སྔ་མ་འགག་པ་དང་གཉིས་ཆ་འགོག་པ་ཐམས་ཅད་ཀུན་ཀྱང་བྱང་ཆུབ་སེམས་ཀྱི་ངང་ལས་རང་བཞིན་གྱིས་འབྱུང་ཞིང་རང་སྣང་བ་དེ་ཉིད་དུ་ངེས་པས་ཟིན་ཆགས་མེད་པའི་ཕྱིར་ངང་གིས་ཞི་བར་འགྱུར་རོ། །མདོར་ན་སེམས་ཉིད་རང་རིག་པ་ནི་ཇི་ལྟར་བརྟགས་ཤིང་བསམ་པ་ལྟར་དེ་ཁོ་ན་བཞིན་དུ་སྣང་བར་འགྱུར་བས་ཆོས་གང་ཅིར་ཡང་སྣང་དུ་བཏུབ་པའི་ཕྱིར་ཆོས་ཐམས་ཅད་ཀྱི་ངོ་བོར་བྱུང་བས་རང་རིག་པ་དངོས་གཞི་ཐམས་ཅད་པར་རང་སྣང་བ་ཉིད་དོ། །དེ་བས་ན་བློ་ཆེ་བས་སེམས་ཉིད་རྟོགས་ནས་ཡེ་མ་བཅོས་མ་བསླད་པའི་ངང་ལ་ཅིར་སྣང་ཅི་སྲིད་ཀྱང་དེ་ཉིད་ལས་གཡོ་བ་མེད་པའི་དབྱིངས་ཉིད་ལས་དྲན་པ་དང་རྣམ་རྟོག་སྣ་ཚོགས་ཀྱི་རྒྱུ་བ་ཇི་ལྟར་འབྱུང་བ་ཡང་མཚན་མར་མི་འཆར་བས་སྐྱོན་དུ་བྱ་བ་མེད་པར་ངང་སྐྱོང་ཞིང་གནས་ཏེ། ཅི་སྟེ་ན་དེ་རྣམས་སེམས་ཀྱི་ཆོ་འཕྲུལ་ཡིན་པས་རྟོགས་རྒྱུན་ཅིར་ཡང་མི་འགག་པར་སྐྱེས་ཀྱང་ཆེད་དུ་མ་འགོག་པར་དེ་དག་སྐྱེས་པ་གང་ལའང་ཉམ་ང་བ་དང་བག་ཚ་བ་མེད་དེ། རིལ་དེ་ཁོ་ན་ཉིད་དུ་ཐག་ཆོད་པའི་ཕྱིར་རོ། །དེ་ལྟར་ཆོས་ཉིད་མ་བཅོས་པས་ཡེ་ཇི་བཞིན་པ་ལ་རང་རིག་པ་ཇི་བཞིན་པ་ཉིད་དུ་རང་སྣང་བས་ཡུལ་ལ་མི་དཔྱོད་ཡུལ་ཕས་མི་སྣང་སྟེ་ཆོས་ཉིད་དངོས་ནམ་མཁའ་ལྟ་བུ་ཉིད་དུ་རིག་པ་དངོས་ནམ་མཁའི་རང་བཞིན་ལྟར་རང་ཤར་བ་ལ་བློ་རང་གསལ་དུ་བཞག་ཅིང་དོན་ལས་མ་ཡེངས་ཏེ་མི་འཛིན་པ་ལ་བྲལ་བ་མེད་པ་ཙམ་ཉིད་ལ་བློ་གཞག་སྟེ་སྒོམ་པ་ཞེས་པའི་མིང་བཏགས་པ་ཁོ་ནར་ཟད་དོ།།

བཞི་པ་ལམ་དེའི་ཡོན་ཏན་སངས་རྒྱས་འབྱུང་བའི་ངོ་བོར་བསྟན་པ་ནི།

དེ་ནི་ཚེགས་མེད། ཅེས་པ་ནས། འབྱུང་བའི་ངོ་བོ་ཡིན། །ཞེས་པའི་བར་གྱིས་བསྟན་ཏེ།

དེ་ནི་ཚེགས་མེད་དོན་པོ་ཆེ། །དེ་ཉིད་དུས་གསུམ་ཐམས་ཅད་ཀྱི། །སངས་རྒྱས་འབྱུང་བའི་ངོ་བོ་ཡིན།།

དེ་ལྟ་བུར་གཅིག་ཆར་དུ་རྟོགས་པའི་ངང་ལ་མ་བཅོས་པར་བཞག་སྟེ་སྒོམ་པ་མ་ནོར་བ་ལ་གནས་པ་ནི་འབད་པའི་གྲོན་ཚེགས་ཀྱི་དཀའ་བ་བྱར་མེད་༼༣༡༨༽པར་དེ་ཉིད་དུ་ས་ནོན་པས་དོན་ཆེན་པོ་རྨད་དུ་བྱུང་བའི་ཆེ་བ་དང་ལྡན་པ་གྲུབ་པ་ཡིན་པས་རིམ་པར་མ་བགྲོད་པར་འབྲས་བུར་རང་སྣང་བ་དེ་ཉིད་ནི་དུས་གསུམ་དུ་གཤེགས་པའི་རྒྱལ་བ་ཐམས་ཅད་ཀྱི་རྣམ་གྲོལ་སངས་རྒྱས་འབྱུང་བའི་གནས་ཀྱི་ངོ་བོ་མ་ནོར་བ་རྒྱུ་ཡང་ཡིན་ལ་ལམ་ཆེན་པོ་ཉིད་དུའང་བསྟན་པ་ཡིན་ནོ།།

བཞི་པ་དེ་ལྟར་མཐོང་གོམས་ཀྱི་དྲོད་རྟགས་བཤད་པ་ནི།

དེ་ཡི་དོན་ལ། ཞེས་པ་ནས། ཉིད་པས་དམ་པ་ཡིན། །ཞེས་པའི་བར་གྱིས་བསྟན་ཏེ།

དེ་ཡི་དོན་ལ་ཇི་སྙེད་ནས། །མཐོང་བས་དེ་ཉིད་དེར་གོམས་ན། །དེ་ཉིད་དེར་འགྲོ་ལམ་རྙེད་ཡིན། །ལམ་རྙེད་ལམ་མཐོང་ཉམ་དྲོད་ནི། །དོན་གྱིས་ངེས་པར་འབྱུང་བ་ཡང་། །གང་མ་ཡིན་ལ་ཟིན་འབྱུང་བ། །བྱང་ཆུབ་དམ་པ་འབྱུང་བར་འགྱུར། །མཚན་མ་རྟོགས་པའི་ཆོས་རྣམས་ལ། །ངེས་པའི་བློ་གྲོས་འབྱུང་བ་ཡིན། །ཆོས་ཀུན་འདི་ལྟར་ཡིན་པ་ལ། །དེ་ལྟར་མ་མཐོང་ངོ་མཚར་ཆེ། །དེ་ཡང་དེ་མཐོང་ངོ་མཚར་ཆེ། །ཨེ་མའོ་ཇི་ག་སྙམ་དུ་བྱུང་། །དེ་ཉིད་མ་མཐོང་གང་སུ་དག །རྩོལ་བསྒྲུབ་དཀའ་བའི་ཚོགས་ཆེན་གྱིས། །དམ་པའི་ལམ་འཚོལ་ལམ་རེ་རིང་། །དེ་ཡི་དེ་བྱུང་དེ་ཡོད་ཀྱང་། །ལམ་དེ་རྙེད་པར་ཡོང་མི་འགྱུར། །དམ་པ་རྣམས་ཀྱི་ལམ་རྙེད་པ།།

དམ་པ་ཉིད་པས་དམ་པ་ཡིན།།

དེ་ལྟར་ཆོས་ཉིད་མཉམ་པ་ཉིད་རྟོགས་པ་དེ་ཡི་དོན་ལ་ཡུན་ཇི་སྙེད་པར་རིང་དུ་གནས་པས། ཇི་ལྟ་བ་ཉིད་མཐོང་ཞིང་རྟོགས་པ་དེ་ཉིད་ཀྱི་ཏིང་ངེ་འཛིན་དེར་གོམས་པར་བྱེད་པའི་ཚེ་ན། ཡང་དག་པའི་ལམ་རྙེད་དེ་དོན་ལམ་མ་ནོར་བ་ཉིད་མཐོང་ཞིང་རྟོགས་ནས་གོམས་པར་བྱས་པས་ཉམས་དྲོད་ཀྱི་རྟགས་ནི། དྲོད་ཆུང་ངུ་ནི་ས་བཞི་པར་ཡང་འབྱུང་ལ། དྲོད་ཆེན་པོ་རྣམས་སྐབས་བརྒྱད་པར་གཡོས་ནས་དགུ་པ་དང་བཅུ་པར་འབྱུང་བའང་ཐོབ་པ་དང་བརྟན་པའི་ཚུལ་ནི། རྒྱུ་ཆོས་ཉིད་ཀྱི་དོན་ལ་བློ་རེག་པའི་ཤུགས་ཀྱིས་ངེས་པར་འབྱུང་བ་ཡང་དང་པོ་ཁོ་ནར་དོན་མ་རྟོགས་པའི་འགྲོ་བ་གང་སེམས་ཉིད་ཀྱི་དོན་ངོས་ཟིན་པ་མ་ཡིན་པ་རྣམས་ལ་སྙིང་རྗེ་ཆེན་པོས་ངེས་པར་ཟིན་པའི་སེམས་འབྱུང་བ་ཉིད་པས་ཀུན་རྫོབ་ཀྱི་བྱང་ཆུབ་ཀྱི་སེམས་དམ་པ་འབྱུང་བར་འགྱུར་བ་དང༌། དངོས་པོ་དང་མཚན་མར་རྟོག་པའི་ཆོས་རྣམས་ལ་ཡིད་མི་ཆེས་ཤིང་སྒྱུ་མ་ལྟ་བུར་མི་བདེན་པར་ངེས་པའི་ཤེས་རབ་ཀྱི་བློ་གྲོས་འབྱུང་ཞིང་སྐྱེ་བ་ཡིན་པ། ཆོས་ཐམས་ཅད་ཀུན་འདི་ལྟར་ཡེ་ནས་དེ་ཁོ་ན་ཉིད་ཡིན་པ་ལ་འགྲོ་བ་རྣམས་ཀྱིས་མ་རྟོགས་ནས་འཁྲུལ་པས་དེ་ལྟར་མི་ཤེས་ཏེ་ས་མཆོག་གཉིས་མེད་ཆེན་པོར་མ་མཐོང་བ་དེ་ངོ་མཚར་ཆེའོ་སྙམ་པ་དང༌། ཇི་བཞིན་པའི་དོན་བརྟག་པར་དཀའ་བ་དེ་ཉིད་ལམ་པས་མ་འཁྲུལ་བར་ཡང་དག་པར་མཐོང་བ་དེ་ཡང་ངོ་མཚར་ཆེ་བ་འདི་ལྟ་བུ་ཞིག་སྙམས་ནས་ཡ་མཚན་པའི་འདུ་ཤེས་སྐྱེས་ཏེ། ཨེ་མའོ་ཇི་ག་སྙམ་དུ་འབྱུང་བ་དང༌། དེ་ལྟར་དེ་ཁོ་ན་ཉིད་ཀྱི་དོན་མ་མཐོང་བའི་འགྲོ་བ་གང་སུ་དག་རྣམས་རྩོལ་སྒྲུབ་སྣ་ཚོགས་ཀྱིས་ཤ་ཐང་བར་འབད་དེ་དཀའ་བའི་ཚེགས་ཆེན་པོའི་ཐབས་ཀྱིས། བྱང་ཆུབ་དམ་པའི་ལམ་གཞན་ནས་ཚོལ་མི་དགོས་པ་ལ་རྩོལ་བས་གཞན་ནས་ཚོལ་བ་དེ་ཉིད་ལམ་ཐག་རེ་རིང་ངོ་སྙམ་པ་དང༌། དེ་ལྟ་བུ་ལ་འབད་ཀྱང་བརྒྱུད་པའི་རྒྱུ་ཙམ་དུ་༼༣༡༩༽འགྱུར་བས། དེ་ཡི་དོན་གནས་སྐབས་ཀྱི་འབྲས་བུ་མཐོ་རིས་ཙམ་འགྲུབ་ཅིང་འབྱུང་བ་དེ་ཡོད་མོད་ཀྱང༌། ཡང་དག་པའི་ལམ་ཆེན་པོ་དེ་ཡི་དོན་འདི་དངོས་སུ་རྙེད་ཅིང་རྟོགས་པར་ནི་ཡོང་ཡེ་འབྱུང་བར་མི་འགྱུར་རོ་སྙམ་པ་དང༌། བདེ་བར་གཤེགས་པ་རྒྱལ་བ་རྫོགས་པའི་སངས་རྒྱས་དམ་པ་རྣམས་ཀྱི་ལམ་མ་ནོར་བ་རྣལ་མ་ཉིད་རྙེད་ཅིང་ཐོབ་པའི་རྣལ་འབྱོར་པ་ནི། བདེར་གཤེགས་དམ་པ་ཉིད་དང་མཉམ་པ་ཡིན་པས་ལམ་དམ་པ་ལ་གནས་པ་ཡིན་པར་ངེས་པའོ། །དེ་དག་ནི་དོན་མཐོང་བའི་དྲོད་ཀྱི་ཕྱིར་ལྔ་པ་དང་དྲུག་པར་ཟག་མེད་སྐྱེ་བ་ལ་སྦྱོར་བ་དང་དངོས་སུ་སྐྱེ་བའི་རིགས་སོ།།

ལྔ་པ་ལམ་པ་དེ་ཉིད་ཐེག་པ་གཞན་གྱི་ལམ་ཞུགས་ལས་དཔག་པར་བསྟན་པ་ནི།

དེ་ནི་རྟེན་བརྙན། ཞེས་པ་ནས། དེ་འདྲ་དེ་མི་མཚུངས། །ཞེས་པའི་བར་གྱིས་བསྟན་ཏེ།

དེ་ནི་བརྟེན་བརྙན་མཚུངས་མ་ཡིན། །ཞི་ལུས་མཐར་འགོག་ཉིད་མཚུངས་མིན། །སློབ་པའི་ས་དང་དེ་མི་མཚུངས། །རྣལ་འབྱོར་སེམས་ཀྱི་རྟོག་མཐའ་དང་། །གང་མཚུངས་དེ་འདྲ་དེ་མི་མཚུངས།།

ལམ་དེའི་ཡོན་ཏན་ཡང༌། དེ་ལྟ་བུའི་རྟོགས་པའི་དྲོད་ཆེན་པོ་དང་ལྡན་པའི་རྣལ་འབྱོར་མཆོག་དེ་ནི། རྟེན་དུ་གྱུར་པའི་སྐུའི་གཟུགས་བརྙན་དང་དྲོད་དེ་བྲལ་བ་རྣམས་ཡོན་ཏན་གྱི་ཁྱད་པར་འདྲ་ཞིང་མཚུངས་པ་མ་ཡིན་པའོ། །དེ་བས་ན་གཞི་ལ་དབྱེར་མེད་ཡིན་ཀྱང་རྟེན་གྱི་ཁྱད་པར་ལས་བསོད་ནམས་ཀྱི་ཡུལ་ཡིན་ཀྱང་ཡེ་ཤེས་ཀྱི་ཡུལ་མ་ཡིན་པ་དང༌། བརྒྱུད་པའི་རྒྱུ་ཡིན་ཀྱང༌། དངོས་ཀྱི་རྒྱུ་མ་ཡིན་པ་དང༌། རིག་པའི་ངོ་བོ་ཡིན་ཀྱང་རྟོགས་པས་མ་ཁྱབ་པས། མི་མཚུངས་པའི་གཏན་ཚིགས་བཀོད་པ་སྟེ། ཉན་ཐོས་ཟག་མེད་ཞི་བའི་ལུས་ཅན་དང་རང་རྒྱལ་རྟེན་འབྲེལ་མཐར་འགོག་གི་ཆོས་ཉིད་མཐོང་བ་གཉིས་ཀྱིས་ཀྱང་བསྒྲུན་དུ་མེད་པས་མཚུངས་པ་མིན་ཏེ། ལང་ཀར་གཤེགས་པ་ལས། ཇི་ལྟར་ཤིང་དག་རྒྱ་མཚོ་ལ། །རླབས་རྣམས་ཀྱིས་ནི་རྣམ་པར་གཡེངས། །དེ་བཞིན་ཉན་ཐོས་རྨོངས་པ་ཡང༌། །མཚན་ཉིད་རྣམས་ཀྱིས་རབ་ཏུ་གཡེངས། །ཀུན་ནས་ལྡང་དང་བྲལ་མོད་ཀྱི། །ཉོན་མོངས་བག་ཆགས་རྣམས་དང་འབྲེལ། །ཏིང་འཛིན་མྱོས་པས་རབ་མྱོས་ཏེ། །ཟག་པ་མེད་པའི་དབྱིངས་ན་འཁོད། །མཐའ་མར་ཕྱིན་པ་དེ་ལ་མེད། །ཕྱིར་ཡང་དེ་ལས་མི་ལྡོག་སྟེ། །ཏིང་ངེ་འཛིན་གྱི་ལུས་ཐོབ་ནས། །བསྐལ་པའི་བར་དུ་དེ་མི་སད། །ཇི་ལྟར་སྐྱེས་བུ་ར་རོ་བ། །ཆང་དང་བྲལ་ནས་སངས་འགྱུར་བཞིན། །དེ་ན་དེ་དག་ང་ཡི་ཡང༌། །ཆོས་ཀྱི་སྐུ་ནི་ཐོབ་པར་འགྱུར། །ཞེས་དང༌། འབྲས་བུའི་ཀློང་ལས། རྐྱེན་རྟོགས་༼༣༢༠༽གཟུང་ཡུལ་མ་གྲུབ་པར། །འཛིན་པས་ཤེས་འདོད་དེ་ཇི་བཞིན། །ཞེས་གསུངས་པ་ལྟ་བུའི་ཕྱིར་དང༌། རྒྱུའི་བྱང་ཆུབ་སེམས་དཔའ་སློབ་པའི་ས་བཅུ་ལ་གནས་པ་དག་དང་ཡང་རྣལ་མ་རྟོགས་པ་དེ་ཉིད་མི་མཚུངས་ཏེ། སྔགས་ཀྱི་མཉམ་པ་ཉིད་མ་མཐོང་བ་དང༌། ལམ་རིང་བ་དང༌། བདེན་པ་རེས་མོས་པ་དང༌། གཞན་དོན་ལ་ངར་འཛིན་ཡོད་པའི་ཕྱིར་དང༌། ཐེག་པ་ཆེན་པོའི་རྣལ་འབྱོར་གསང་སྔགས་ཕྱི་པའི་རིག་འཛིན་བྱང་ཆུབ་སེམས་དཔའ་དོན་ལ་རྟོག་ཅིང་དཔྱོད་པའི་མཐའ་ཅན་ནམ། ཀུན་མཁྱེན་དམ་པ་རིན་པོ་ཆེས། རྣལ་འབྱོར་ཡོ་ག་དང༌། སེམས་དཔའ་ཨུ་པ་དང༌། རྟོག་མཐའ་ཀྲི་ཡར་གསུངས་པས། དེ་དག་དང༌། གང་ལུས་ཀྱི་ཆ་བྱད་དང་ཤེས་བྱ་ཙམ་མཚུངས་ཡང་རྟོགས་པ་དང་ཏིང་ངེ་འཛིན་དེ་འདྲ་བ་མིན་པས་ཡོན་ཏན་དེ་དང་མི་མཚུངས་པ་ཉིད་དེ་སྔགས་ཕྱི་པ་འདི་དག་གསང་སྔགས་ཡིན་ཀྱང་ནང་པ་བླ་མེད་ལ་མི་སླེབ་པའི་ཕྱིར་ཏེ། ཆེད་འཛིན་དང་བཅས་པ་དང༌། རང་སྣང་མཉམ་པ་ཉིད་མ་མཐོང་བས་སོ། །འོ་ན་དེ་དག་ཅིའི་ཕྱིར་ཞེ་ན། ཡེ་ཤེས་ལྔ་དང་ལྡན་པའི་ཕྱིར་དང༌། ཐེག་པ་ཆེན་པོའི་དྲོད་རྟགས་མཆོག་དང་ལྡན་པའི་ཕྱིར་དང༌། བདེན་པར་རེས་མོས་པ་མེད་པའི་ཕྱིར་དང༌། ཐེག་ཆེན་གསང་བའི་དོན་ཉིད་ལའང་འཛིན་རྟོག་དམིགས་པ་དང་བྲལ་བའི་ཕྱིར་རོ།།

དྲུག་པ་དོན་ལམ་གྱི་རྣལ་འབྱོར་པ་ལ་ཡོན་ཏན་ཐམས་ཅད་རྫོགས་པར་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེས་ན་རྣམ་དག ཅེས་པ་ནས། ཐམས་ཅད་གྲུབ་པ་ཡིན། །ཞེས་པའི་བར་གྱིས་བསྟན་ཏེ།

དེས་ན་རྣམ་དག་ལམ་ཆེན་ཡིན། །སེམས་ཀྱི་གསང་འདི་ཡིན་པས་ན། །དགོངས་པ་ཀུན་ནས་འདུས་པ་ཡི།།

གསང་བའི་ལམ་འདི་ཤེས་བྱས་པས། །བཙལ་བའི་བྱ་བ་རྒྱུ་མེད་དེ། །ལམ་འདི་མཐོང་བ་དེ་ཉིད་ཀྱིས།།

དཀའ་བ་བརྩོལ་བ་གང་མེད་པར། །ཐམས་ཅད་ཐམས་ཅད་གྲུབ་པ་ཡིན།།

དེས་ན་ཡོན་ཏན་གྱི་ངོ་བོ་དེ་ལྟ་བུའི་ཚུལ་གྱིས་ཐེག་པ་མཆོག་གི་རྣམ་པར་དག་པའི་ལམ་ཆེན་པོའི་ངོ་བོ་ནི། དཔེར་ན་ལུས་ཀྱི་གསང་མིག་གིས་གཟུགས་མཐོང་གི་དེ་ལས་གཞན་གྱིས་མིན་པ་ལྟར་འདིར་རང་རིག་པ་བྱང་ཆུབ་སེམས་ཀྱི་གསང་བ་རྟོགས་པར་དཀའ་བ་འདི་ཉིད་རྟོགས་པ་ཁོ་ནས་སངས་རྒྱས་པ་ཡིན་གྱི། གཞན་གང་གིས་ཀྱང་མ་ཡིན་པའི་ཕྱིར་གྱི་གཏན་ཚིགས་དེ་བས་ན་རྒྱལ་བ་རྫོགས་པའི་སངས་རྒྱས་དགོངས་པ་ཀུན་ནས་འདུས་པ་ཡི་རྩ་བ་གསང་མཆོག་སྔགས་ཀྱི་རང་བཞིན་སེམས་ཉིད་ཇི་ལྟར་ཡིན་པའི་ལམ་འདི་ཤེས་ཤིང་རྟོགས་པར་བྱས་པས་འབྲས་བུ་རང་གསལ་ལྷུན་གྲུབ་ཏུ་འབྱུང་བ་ལ་དགོངས་པ་ཡིན་གྱི། འདི་༼༣༢༡༽ལས་གཞན་དུ་འབད་པས་བཙལ་བར་བྱ་བའི་རྒྱུ་མེད་ལ་བཙལ་ཡང་མི་དགོས་པ་ཉིད་དེ། སེམས་ཉིད་དེ་ཁོ་ན་ཉིད་ཀྱི་ལམ་དམ་པ་འདི་ཉིད་མ་ནོར་བར་མཐོང་ཞིང་རྟོགས་པ་དེ་ཉིད་ཀྱིས་གཞན་དུ་དཀའ་བས་བཙལ་བའི་ཚེགས་ཆེན་པོས་རྩོལ་བ་གང་ཡང་མེད་པར་མཆོག་དང་ཐུན་མོང་གི་དངོས་གྲུབ་ཐམས་ཅད་དང་ཇི་ལྟ་དང་ཇི་སྙེད་མཁྱེན་པའི་ཡེ་ཤེས་ཐམས་ཅད་ངང་གིས་གྲུབ་ཟིན་ཏེ་ལམ་དང་འབྲས་བུའི་ཡོན་ཏན་མ་ལུས་པ་ཀུན་མཐར་ཕྱིན་པར་གྱུར་པ་ཡིན་པས་དབྱེར་མེད་མཉམ་པ་ཆེན་པོའི་རྟོགས་པ་ཡོངས་སུ་རྫོགས་པའོ།།

གཉིས་པ་རྒྱས་པར་བཤད་པ་ལ་བཅུ་སྟེ། གནས་རྫོགས་པ། གཞལ་ཡས་རྫོགས་པ། ཚོགས་རྫོགས་པ། ཡོ་བྱད་རྫོགས་པ། སྒོམ་ལམ་རྫོགས་པ། དམ་ཚིག་རྫོགས་པ། མཉམ་པ་ཉིད་རྫོགས་པ། བརྟུལ་ཞུགས་རྫོགས་པ། དངོས་གྲུབ་རྫོགས་པ། མཐོང་ལམ་རྫོགས་པར་བཤད་པའོ། །དང་པོ་ནི།

སེམས་ཀྱི་གསང་བ། ཞེས་པ་ནས། ཀུན་ནས་འདུས་པས་གསུངས། །ཞེས་པའི་བར་གྱིས་བསྟན་ཏེ།

སེམས་ཀྱི་གསང་བ་གང་གནས་པ། །དེ་ནི་བདེན་པ་དམ་པ་སྟེ།།

དགོན་པ་ཆེན་པོའི་མཆོག་ཉིད་དུ། །དགོངས་པ་ཀུན་ནས་འདུས་པ་གསུངས།།

དེ་བས་ན་རྟོགས་པར་དཀའ་བའི་སེམས་ཀྱི་གསང་བ་རང་བཞིན་གྱིས་འོད་གསལ་བའི་དོན་མཆོག་གང་ཡིན་པ་དེ་ཉིད་སྐྱེས་བུ་སུ་ཡིས་ཡང་དག་པར་རྟོགས་པའི་ངང་ལ་གནས་ཏེ་བློ་ལ་འཆང་བ་དེ་ནི་གཉིས་སུ་མེད་པའི་བདེན་པ་སྒྲོ་སྐུར་དང་བྲལ་བས་དོན་དམ་པའི་ལྟ་བ་མཆོག་ཉིད་མངོན་དུ་བྱས་པ་སྟེ། དེ་ཉིད་མཐའ་ཐམས་ཅད་ལས་རིང་དུ་གྱུར་པའི་ཕྱིར་དགོན་པ་ཆེན་པོའི་གནས་མཆོག་དམ་པ་ཉིད་དུ་གྱུར་པར་རྒྱལ་བ་རྣམས་ཀྱི་དགོངས་པ་ཀུན་ནས་འདུས་པའི་སྟོན་པས་ཀྱང་རིགས་པ་འཛིན་པའི་འཁོར་ལ་བཀའ་སྩལ་ཏེ་གསུངས་པར་མཛད་དོ།།

གཉིས་པ་གཞལ་ཡས་རྫོགས་པ་ནི།

དེ་ཉིད་དཔག་མེད། ཅེས་པ་ནས། ནང་དུ་གྱུར་ པ་ཡིན། །ཞེས་པའི་བར་གྱིས་བསྟན་ཏེ།

དེ་ཉིད་བདག་མེད ་གཞལ་ཡས་མཆོག །རྨད་བྱུང་ནོར་བུ་ཡིད་བཞིན་ཁང་།།

མ་བྱས་རང་བྱུང་ཕྱི་ནང་མེད། །ཀུན་ཏུ་ནང་དུ་གྱུར་པ་ཡིན།།

དེས་ན་གཉིས་བྲལ་གྱི་ལྟ་བ་ཐམས་ཅད་ཀྱི་དངོས་གཞིར་གྱུར་པས་བྱ་བརྩལ་མེད་ལ་གནས་ཚུལ་གྱི་ཆ་ནས་འཁོར་འདས་ལམ་གསུམ་གྱི་གནས་སུ་གྱུར་པའི་བྱང་ཆུབ་ཀྱི་སེམས་དེ་ཉིད་བློ་ཡིས་དཔག་ཏུ་མེད་ཅིང་རྟོགས་པར་དཀའ་བ་ཡིན་པས། དེ་ལྟར་མ་ནོར་བར་མཐོང་བ་ནི་དེ་བཞིན་གཤེགས་པ་རྣམས་ཀྱི་ཡང་བཞུགས་པའི་གཞལ་ཡས་དམ་པ་མཆོག་ཁྱད་པར་ཅན་ཡོན་ཏན་ཅིར་ཡང་འཆར་བས་རྨད་དུ་བྱུང་བའི་༼༣༢༢༽རིན་ཆེན་མཆོག་གི་ཡིད་བཞིན་གྱི་ཁང་པ་ཡིན་པས། དེའི་ངོ་བོ་འཕྲལ་དུ་བྱེད་པ་པོའམ་རྒྱུ་རྐྱེན་གྱི་མ་བྱས་ཤིང་མ་སྒྲུབས་པར་ཡེ་ནས་རང་བྱུང་བའི་ཡེ་ཤེས་ཉིད་ལ་སྤྱོད་ཡུལ་མ་དམིགས་པས་ཕྱི་དང་ནང་མེད་དེ་ཡེ་ཤེས་ཀྱིས་མ་ཁྱབ་པ་མེད་པས་ཀུན་ཏུ་ཡང་ནང་དུ་གྱུར་པ་ཡིན་ནོ། །དེ་བས་ན་གནས་གཞན་དུ་བཙལ་མི་དགོས་སོ།།

གསུམ་པ་ཚོགས་རྫོགས་པ་ནི།

གང་འདིར་གང་འདུས། ཞེས་པ་ནས། རྒྱལ་བ་དགྱེས་པའི་མཆོག །ཅེས་པའི་བར་གྱིས་བསྟན་ཏེ།

གང་འདིར་གང་འདུས་ཚོགས་མ་ཡིན། །དེ་ལ་དེ་ཉིད་ཚོགས་འདུས་མཆོག།

ཆོས་ཀུན་བསྡུས་པས་འབྱུང་བ་མེད། །དཔག་མེད་རྒྱལ་བ་དགྱེས་པའི་ཚོགས།།

རྣལ་འབྱོར་པ་གང་ཐེག་པ་ཆེན་པོར་ངེས་པའི་སྒོ་འདིར་རྫས་དང་ཡོ་བྱད་ལྡན་པའི་ལྷ་མི་མང་པོ་གང་འདུས་པ་ནི་མཆོག་ཏུ་ངེས་པའི་ཚོགས་ཆེན་པོ་མ་ཡིན་ཏེ། རང་གི་རིག་པའི་ཆོས་ཉིད་དེ་ཁོ་ན་ཉིད་ལ་ཆོས་ཐམས་ཅད་དང་འདོད་པའི་ཡོན་ཏན་ལྔ་ཡང་མ་བཙལ་ལྷུན་གྱིས་རྫོགས་པའི་ངང་དུ་རྟོགས་པ་དེ་ཉིད་ཚོགས་ཆེན་ཡོངས་སུ་འདུས་པའི་མཆོག་ཉིད་ཡིན་པས། འཁོར་འདས་ལམ་གསུམ་གྱི་ཆོས་སོ་ཅོག་ཀུན་རང་རིག་པར་འོང་བསྡུས་མེད་པར་མ་འདྲེས་ཡོངས་རྫོགས་ཆེན་པོར་རྟོགས་པས་ཐ་སྙད་གཉིས་པ་རིལ་འབྱུང་འཇུག་དང་བྲལ་བ་མེད་པར་དེ་ཁོ་ན་ཉིད་ཕྱི་མོའི་མཆོད་པར་གནས་སུ་སྟོབས་པ་ཉིད་དོ། །དེ་ལྟ་བུ་ནི་དཔག་ཏུ་མེད་པའི་རྒྱལ་བ་ཐམས་ཅད་གཉེས་ཤིང་དགྱེས་པའི་དབྱེར་མེད་རྣམ་དག་གི་མཆོད་པ་མཆོག་དམ་པ་ཡིན་ནོ།།

བཞི་པ་ཡོ་བྱད་རྫོགས་པ་ནི།

གང་འདིར་འདོད་སྤྱོད། ཅེས་པ་ནས། ཀུན་གྱི་རྩ་བ་ཡིན། །ཞེས་པའི་བར་གྱིས་བསྟན་ཏེ།

གང་འདིར་འདོད་སྤྱོད་ཡོ་བྱད་མིན། །དེ་ཉིད་ཡོ་བྱད་ཆེན་པོ་སྟེ།།

ལྷག་པའི་ཡོ་བྱད་འདི་ཤེས་ན། །ཡོ་བྱད་ཀུན་གྱི་རྩ་བ་ཡིན།།

ལམ་ཆེན་པོའི་སྐབས་གང་འདིར་གཟུགས་སྒྲ་དྲི་རོ་རེག་བྱ་ལ་སོགས་པ་འདོད་པའི་ཡོན་ཏན་ལྔར་ལོངས་སྤྱོད་པ་ནི་ཡོ་བྱད་ཆེན་པོ་མིན་ཏེ། ཀུན་རྫོབ་ཀྱི་འབྱོར་པ་ཡིན་པས་སོ། །དེ་བས་ན་སེམས་ཀྱི་དེ་ཁོ་ན་ཉིད་མཉམ་པ་ཆེན་པོ་མ་ནོར་བར་རྟོགས་ནས་གཉིས་མེད་དུ་འབྱོར་བ་ནི་ཡང་དག་དོན་གྱི་ཡོ་བྱད་ཆེན་པོ་མཆོག་ཏུ་གྱུར་པ་སྟེ། དེ་ཅིའི་ཕྱིར་ཞེ་ན། དེ་ནི་རིལ་གྱི་རྒྱུ་ཆེན་པོའི་ཕྱིར་ཏེ། དམན་པ་དག་ལ་མེད་པས་ལྷག་པའི་ཡོ་བྱད་དམ་པ་ཅིར་ཡང་འཆར་ཞིང་༼༣༢༣༽དགའ་བ་སྐྱེད་པ་འདི་ཉིད་ཤེས་ན། བྱང་ཆུབ་ཀྱི་སེམས་འབྲས་བུའི་ཆོས་ཀྱི་ཡོ་བྱད་ཀུན་གྱི་རྩ་བ་འཁོར་འདས་ཀྱི་ཡོན་ཏན་ཐམས་ཅད་འབྱུང་བའི་གཞི་ཆེན་པོ་ཡིན་ནོ།།

ལྔ་པ་སྒོམ་ལམ་རྫོགས་པ་ནི།

སྒོམ་པར་བྱེད་པ། ཞེས་པ་ནས། དམ་པ་འདི་ཉིད་དོ། །ཞེས་པའི་བར་གྱིས་བསྟན་ཏེ།

སྒོམ་པར་བྱེད་པ་བསྒོམ་པ་མེད། །བསམ་བྱ་དམིགས་སུ་མེད་པ་སྟེ།།

དམ་པའི་གསང་ལམ་འདི་ཤེས་པ། །བསྒོམ་ལམ་དམ་པ་འདི་ཉིད་དོ།།

ཆོས་ཉིད་ཇི་བཞིན་པའི་རྗེས་སུ་བློ་འབྲངས་ནས་ཆེད་དུ་སྒོམ་སྟེ་མངོན་དུ་ཅི་འགྱུར་བར་བྱེད་པ་ནི་ཡང་དག་པའི་བསྒོམ་པ་མིན་པར་འདིར་ཆོས་ཉིད་བྱ་བ་བསམ་བྱ་བློའི་ཡུལ་སྣང་དང་ཡུལ་ཅན་ཤེས་པ་དབྱེར་མེད་པར་རྟོགས་པ་ལ་ཆོས་ཉིད་དུའང་འདུ་ཤེས་ཀྱིས་དམིགས་སུ་མེད་པ་ནི་སྒོམ་པའི་མཆོག་སྟེ། དེ་ནི་དུས་གསུམ་གྱི་བདེ་བར་གཤེགས་པ་དམ་པ་རྣམས་ཀྱི་གཤེགས་ཤུལ་རྟོགས་པར་དཀའ་བའི་གསང་ལམ་མ་ནོར་བ་ཡིན་པས་དེ་ལྟར་རྟོགས་ནས་འདི་ལྟར་སྒོམ་ཤེས་ན་བསྒོམ་པའི་ལམ་ཇི་སྙེད་པ་རྣམས་ཀྱི་ཕུལ་དམ་པ་རིམ་པར་བགྲོད་པ་ལས་འདས་ཏེ་དམིགས་རྩོལ་གྱིས་གཡོ་བ་དང་བྲལ་བའི་ངང་ལས་ལོགས་སུ་མེད་པ་འདི་ཉིད་དོན་གྱི་དགོངས་པ་འཁྲུལ་པ་དང་བྲལ་བ་ཉིད་དོ།།

དྲུག་པ་དམ་ཚིག་རྫོགས་པ་ནི།

བསྲུང་ཞེས་སྲུང་བར། ཞེས་པ་ནས། གསང་བ་དམ་པའོ། །ཞེས་པའི་བར་གྱིས་བསྟན་ཏེ།

བསྲུང་ཞེས་བསྲུང་བར་བྱ་མི་དམིགས། །སྟོང་ཉིད་མེད་འབྱུང་གསང་ལམ་འདི།།

དབུས་མཐར་ཕྱེ་བས་ཚིག་ཤེས་ན། །བསྲུང་བའི་གསང་བ་དམ་པའོ།།

འདིར་བསྲུང་མཚམས་མེད་པར་རྟོགས་པ་ལ་རྩ་བ་དང་ཡན་ལག་གི་དམ་ཚིག་བསྲུང་ངོ་ཞེས་ཆེད་དུ་སྲུང་བར་བྱ་བ་ཅི་ཡང་མི་དམིགས་པའི་དོན་ལ་ཉམས་པའང་མེད་དེ་སྟོང་ཉིད་ཆེན་པོ་མཐའ་གཉིས་མ་གྲུབ་པའི་ངང་ལ་བསྲུང་རྒྱུ་མེད་ཅིང་ཡོན་ཏན་ཅིར་ཡང་འབྱུང་བའི་ཟབ་དོན་རེག་པར་དཀའ་བས་གསང་བ་དམ་པ་ནི། ལམ་མ་ནོར་བ་སྟེ་འདི་ལྟར་སེམས་ཀྱི་ཆོས་ཉིད་རྩོལ་བྲལ་རིག་པའི་དམ་ཚིག་གོ །དེའི་དོན་ལ་སོ་སོར་རྟོག་པའི་ཤེས་རབ་ཀྱིས་དབུས་མཐར་ཕྱེ་ནས་བརྟགས་པས་མཐའ་དབུས་དང་ཕྱོགས་རིས་ཀྱི་ཐ་སྙད་བསྲེགས་ནས་མཉམ་པའི་དམ་ཚིག་གི་དོན་མ་ནོར་བ་ཤེས་ཤིང་རྟོགས་ན་དམ་ཚིག་ཇི་སྙེད་པ་ཀུན་སྲུངས་པའི་གསང་བ་དམ་པ་ཁོ་ནའོ།།

བདུན་པ་མཉམ་པ་ཉིད་རྫོགས་པ་ནི།

ཚིག་ལམ་མཉམ་བརྗོད། ཅེས་པ་ནས། ཀུན་ནས་འདུས་དང་མཉམ། །ཞེས་པའི་བར་གྱིས་བསྟན་ཏེ།

ཚིག་ལམ་མཉམ་བརྗོད་མཉམ་མི་དམིགས། །གསང་འདི་ཐམས་ཅད་གཅིག་པ་ལ།།

མཉམ་ཞེས་ལྷག་པར་ག་ལ་ཡོད། །དགོངས་པ་ཀུན་ནས་འདུས་དང་མཉམ།།

དོན་ཆེན་པོ་རྟོགས་པའི་གདེངས་མེད་ན། ཚིག་གི་ལམ་དུ་མཉམ་པ་༼༣༢༤༽ཉིད་ཡིན་ནོ་ཞེས་བརྗོད་དེ་སྨྲས་ཀྱང༌། དེ་ལ་མཉམ་པའི་དོན་གང་ཡང་མི་དམིགས་པས་མཉམ་དོན་མེད་དོ། །དེ་ཅིའི་ཕྱིར་ཞེ་ན། གསང་སྔགས་གསང་བ་དམ་པའི་ངོ་བོ་འདིར་ཐམས་ཅད་མ་འདྲེས་ཡོངས་རྫོགས་སུ་གཅིག་པ་ལ། དེ་ལས་གཞན་དུ་མཉམ་པའི་དོན་ཞེས་བརྗོད་དེ་མཆོག་ཏུ་ལྷག་པ་ཞིག་བཟང་པོར་བལྟ་རྒྱུ་ག་ལ་ཡོད་དེ་མེད་པས་ན། འདི་ལྟར་རྟོགས་ན་རིལ་རྒྱལ་བའི་ཐུགས་དང་མཉམ་པར་སངས་རྒྱས་ཀྱི་དགོངས་པ་ཀུན་ནས་འདུས་པའི་ཞེ་ཕུགས་འདིའི་དོན་ཉིད་དང་མཉམ་པ་ཡིན་པ་ལ་བླང་དོར་མ་དམིགས་པའི་ཕྱིར་རོ།།

བརྒྱད་པ་བརྟུལ་ཞུགས་རྫོགས་པ་ནི།

གང་གཞན་བརྟུལ་ཞུགས། ཞེས་པ་ནས། མཆོག་ཏུ་ཀུན་འདུས་གསུངས། །ཞེས་པའི་བར་གྱིས་བསྟན་ཏེ།

གང་གཞན་བརྟུལ་ཞུགས་སྤྱོད་པ་མིན། །དེ་ལ་དེ་གཞོལ་རོལ་སྤྱོད་པ།།

ཐམས་ཅད་འདིར་བརྟུལ་འདིར་ཞུགས་པས། །བརྟུལ་ཞུགས་མཆོག་ཏུ་ཀུན་འདུས་གསུངས།།

ལུང་ཆེན་གསང་བའི་རྣལ་འབྱོར་ཆེན་པོ་བླ་ན་མེད་པ་མཆོག་གི་སྐབས་འདིར། གང་ཐེག་པ་གཞན་དག་གི་བརྟུལ་ཞུགས་སྨེ་ཤ་ལ་སོགས་པ་ལ་སྤྱོད་པ་ནི་འདིའི་སྤྱོད་པ་ཆེན་པོ་དམ་པ་ཉིད་མིན་ནོ། །དེས་ན་འདི་ཉིད་ཀྱི་སྤྱོད་པ་ནི། ཆོས་ཉིད་ཇི་བཞིན་པ་དེ་ལ་དེར་རྟོགས་པའི་རིག་པ་གཉིས་མེད་དུ་གཞོལ་ཏེ་དབྱིངས་རིག་དབྱེར་མེད་ཀྱི་ངང་ལ་གནས་པས་ཆོས་ཉིད་ལ་སེམས་ཉིད་རོལ་པའི་སྤྱོད་པ་ནི་འཁོར་འདས་ཀྱི་ཆོས་སོ་ཅོག་ཐམས་ཅད་ཆོས་ཉིད་དེའི་ངང་འདིར་བཅོམ་པས་བརྟུལ་ཞིང་སྤྱོད་པ་ཕྱོགས་མེད་ཀྱི་དོན་འདིར་བཅུགས་ཏེ་ཞུགས་པས་བླང་དོར་གཉིས་སུ་མེད་པར་མ་བརྩལ་དོན་ཀུན་གྲུབ་པར་བྱས་པ་ལ་སྤྱོད་པ་མི་འགོག་སྤྱད་པ་མེད་པ་ཉིད་ནི་བརྟུལ་ཞུགས་བླ་ན་མེད་ཅིང་མཆོག་ཏུ་གྱུར་བ་ཡིན་པར་བདེ་བར་གཤེགས་པ་ཀུན་ནས་འདུས་པ་རྣམས་ཀྱིས་ཀྱང་གསུངས་ཏེ་བཀའ་སྩལ་པའོ།།

དགུ་པ་དངོས་གྲུབ་རྫོགས་པ་ནི།

ལམ་འདི་དངོས་ཉིད། ཅེས་པ་ནས། དམ་པ་ཀུན་འདུས་གསུངས། །ཞེས་པའི་བར་གྱིས་བསྟན་ཏེ།

ལམ་འདི་དངོས་ཉིད་སེམས་ཀྱི་གསང་། །ཡེ་གྲུབ་ཟིན་པས་གསོལ་ཐོབ་མེད།།

དངོས་གྲུབ་རྒྱུན་མི་འཆད་པ་ཞེས། །དགོངས་པ་དམ་པ་ཀུན་འདུས་གསུངས།།

ཤིན་ཏུ་རྣལ་འབྱོར་གྱི་ལམ་མཆོག་འདི་ཡི་སྐབས་འདིར་དངོས་གྲུབ་ཀྱི་དམ་པ་དེ་ཁོ་ན་ཉིད་ཀུན་གཞི་བྱང་ཆུབ་སེམས་ཀྱི་ངེས་གསང་བརྗོད་པ་དང་བྲལ་བ་ཉིད་ཡིན་པའི་ཕྱིར་གཞན་ནས་མི་གཉེར་ཏེ། འབྲས་བུའི་སྙིང་པོར་ཡེ་ནས་གྲུབ་ཟིན་དུ་གནས་པ་ལ་བྱ་བ་བྱས་ཟིན་པས་ད་གཟོད་ལྷ་ལ་རེ་རྩོལ་གྱིས་གསོལ་བ་གདབ་ཅིང་དངོས་གྲུབ་གཞན་ནས་ཐོབ་པར་བྱ་བ་མེད་དོ། །དེ་ལྟ་བུ་ལ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་རྒྱུན་མི་འཆད་ཅིང་བར་ཆད་༼༣༢༥༽མེད་པ་ཞེས་བྱ་བར་དགོངས་པ་དམ་པ་ཀུན་ནས་འདུས་པའི་རྒྱལ་བ་རྣམས་ཀྱིས་གསུངས་ཏེ་བཀའ་སྩལ་པའོ།།

བཅུ་པ་མཐོང་ལམ་རྫོགས་པར་བཤད་པ་ནི།

དེ་ལྟར་སེམས་ཀྱི། ཞེས་པ་ནས། སྣང་བ་ལམ་མཐོང་ཡིན། །ཞེས་པའི་བར་གྱིས་བསྟན་ཏེ།

དེ་ལྟར་སེམས་ཀྱི་གསང་མཐོང་ན། །སྔོན་མ་མཐོང་བའི་ལམ་མཐོང་བས།།

མཐོང་བ་ཅི་ཡང་མེད་པ་ཉིད། །གང་ལ་སྣང་བ་ལམ་མཐོང་ཡིན།།

དེ་ལྟར་བཤད་པ་བཞིན་སེམས་ཀྱི་དེ་བཞིན་ཉིད་གསང་སྔགས་ཀྱི་དོན་ཇི་ལྟ་བར་མཐོང་ཞིང་རྟོགས་ན་སྔོན་ཆད་མ་མཐོང་བའི་ཆོས་ཉིད་དོན་གྱི་ལམ་ཆེན་པོ་ཡང་དག་པར་མཐོང་ཞིང་རྟོགས་པ་ཡིན་པས་དེ་ལ་ནི་དངོས་པོའི་ངོ་བོ་འདི་འདྲར་མཐོང་ཞིང་ཤེས་པར་བྱ་བ་ཅི་ཡང་མེད་པ་ཉིད་དེ། དེ་ཉིད་ལམ་པ་གང་སུ་ཞིག་གི་རིག་པ་ལ་གསལ་བར་སྣང་སྟེ་མངོན་སུམ་དུ་ཤར་བ་ནི་ལམ་མཆོག་བདེ་བ་ཆེན་པོ་མཐོང་བ་ཡིན་ཏེ། དབུགས་ཆེན་འབྱིན་པའི་རྣལ་འབྱོར་པ་ཐོག་མཐར་ལས་ཀྱང་ཐ་མ་ཆེན་པོ་པ་མཐོང་ལམ་ཡོངས་སུ་རྫོགས་པ་ཉིད་དེ། ཀུན་འདུས་ལས།

དེ་ལྟ་བུ་ཡི་དོན་མཐོང་ན། །མཚན་མར་མཐོང་བ་ཅི་ཡང་མེད། །སྒྱུ་མ་ཙམ་དུ་ཚུལ་ཤེས་ན། །ནམ་མཁའ་མཉམ་པའི་དོན་སྣང་འགྱུར། །ཁ་ཅིག་དག་ནི་དེ་དོན་ལ། །མཐོང་བ་ཅི་ཡང་མེད་གྱུར་ན། །སྣང་བ་ཞེས་ནི་ཅི་ཕྱིར་གདགས། །མེད་པའི་དོན་དང་འགལ་འགྱུར་ཞེས། །ཐེ་ཚོམ་ཟ་འགྱུར་དེ་དག་ལ། །མཐོང་བ་མེད་པའི་དོན་དེ་ཉིད། །ཡིད་ཀྱི་ངོ་ལ་སྣང་འགྱུར་ན། །སྣང་ཞེས་དེ་ཕྱིར་བརྗོད་པར་བྱ། །ཞེས་གསུངས་པ་སོགས་འདི་དག་ཐམས་ཅད་གསལ་བར་བསྟན་ནོ།།

གསུམ་པ་ཞབས་བསྡ་ུབ་ནི།

གྲོགས་པོ་དག ཅེས་པ་ནས། བགྲོས་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་དམ་པ་རྣམས་ཀྱི་རྗེས།

ལམ་དམ་པ་ཞེས་བྱ་བ་འདི་སྐད་ཐོས་པ་ཡོངས་སུ་བགྲོས་པའོ།།

གྲོགས་པོ་དག་ཇི་ལྟར་བཤད་པ་དེ་དག་ནི། དེ་བཞིན་གཤེགས་པ་དམ་པ་རྣམས་ཀྱི་རྗེས་སུ་འཇུག་པའི་ལམ་དམ་པ་རང་གི་ངོ་བོ་ཞེས་བྱ་བ། འོག་མིན་ཆེན་པོར་འདི་སྐད་དུ་ཐོས་པའི་དགོངས་པ་ཡོངས་སུ་བགྲོས་པ་ཡིན་པར་ཤེས་པར་བྱའོ། །ཞེས་གསང་བདག་ཆེན་པོས་དམ་པའི་རིགས་ཅན་ལ་བཀའ་སྩལ་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྣལ་འབྱོར་རྗེས་སུ་འཇུག་པའི་ལེའུ་སྟེ་ལྔ་བཅུ་དགུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྐལ་བ་དང་ལྡན་པའི་རྣལ་འབྱོར་པ་རྣམས་རྒྱལ་བའི་ཤུལ་ལམ་གྱི་རྗེས་སུ་འཇུག་པའི་ལྟ་བ་དང་ཏིང་ངེ་འཛིན་མཆོག་གི་དོན་གྱི་ཁྱད་པར་བསྟན་པའི་ལེའུ་སྟེ། ལྔ་བཅུ་རྩ་དགུ་པ་ཉིད་གསལ་བར་བཤད་པའོ།། །།

#div2 ལེའུ་དྲུག་ཅུ་པ་རྣལ་འབྱོར་མིག་གི་སྒྲོན་མ་བསྟན་པ།

༈ 56 ལྔ་པ་སྒྲོན་མ་སྲེལ་བར་བྱ་བ་ལ་དོན་གསུམ་སྟེ། སྤྱིར་བསྟན་པ། བྱེ་བྲག་ཏུ་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་ པ་ནས། མི་ཤེས་པའི་གཞི་མེད་དོ། །ཞེས་པའི་བར་༼༣༢༦༽གྱིས་བསྟན་ཏེ།

དེ་ནས་ཡང་ལངྐའི་བདག ་པོ་ལ་སོགས་པ་གྲོགས་ཀྱི་སེམས་དཔའ་རྣམས་ཀྱིས། གསང་བ་པའི་བདག་པོ་ལ་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་འདིར་རིན་པོ་ཆེའི་སྒྲོན་མ་བསྲེལ་བར་བྱའོ། །ཞེས་དམ་བཅས་པར་དགོངས་པ་དེ་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་དྲི་བ་ཡོངས་སུ་དྲིས་པ་ལས། གསང་བ་པའི་བདག་པོས་སྨྲས་པ། ཀྱེ་གྲོགས་པོ་དག་རིན་པོ་ཆེ་འབར་བ་ནི་འོད་ཀྱི་འབྱུང་གནས་ལགས་ཏེ། འཐོར་རླུང་གི་ཚོགས་ཀྱིས་ཀྱང་མི་གསོད་པས། མུན་པ་སེལ་བར་བྱེད་པ་ཁོ་ན་བས་སྒྲོན་མེ་ཞེས་བྱའོ། །དེ་ནི་འདི་ལྟར་མི་ཤེས་པས་སེལ་བའི་ཤེས་པ་ཉིད་ཡིན་ཏེ། ཉི་མའི་སྙིང་པོ་འམ་རིན་པོ་ཆེའི་སྒྲོན་མ་ལ་མུན་པའི་གཞི་མེད་པ་བཞིན། གང་ཤེས་པའི་རང་བཞིན་ན་མི་ཤེས་པའི་གཞི་མེད་དོ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །རྗེས་འཇུག་བཀའ་སྩལ་མ་ཐག་པ་དེ་ནས་ཡང་འཁོར་ལང་ཀའི་མངའ་བདག་ལ་སོགས་པ། གྲོགས་ཀྱི་སེམས་དཔའ་དམ་པ་རྣམས་ཀྱིས་སྟོན་པ་གསང་བ་པའི་བདག་པོ་ལ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ལེའུ་ཞེ་ལྔ་པ་འདིར་ཆོས་ཀྱི་རྣམ་གྲངས་བཅུ་བཀོད་པ་ལས་ལྔ་པ་རིན་པོ་ཆེ་འབར་བའི་སྒྲོན་མ་བསྲེལ་བར་བྱའོ། །ཞེས་དམ་བཅའ་བར་དགོངས་པ་དེ་ཉིད་ཇི་ལྟར་ཡོངས་སུ་ཤེས་པར་བགྱི། ཞེས་དེ་སྐད་ཅེས་དྲི་བ་ཡོངས་སུ་དྲིས་པ་ལས། སྟོན་མཆོག་འཆད་པའི་སྐྱེས་བུ་གསང་བ་པའི་བདག་པོས་ལན་སྨྲས་ཏེ་གསུངས་པ། ཀྱེ་གྲོགས་པོ་དག ཅེས་བོས་ནས། རིན་པོ་ཆེ་འབར་བ་ནི་འོད་ཀྱི་འབྱུང་གནས་ལགས་ཏེ། འོད་དེ་ཉིད་འཐོར་རླུང་གི་ཚོགས་ཀྱིས་ཀྱང་མི་སོད་པས། དེའི་བྱེད་ལས་ནི་མུན་པ་སེལ་བར་བྱེད་པ་ཁོ་ན་ཡིན་པས་དེའི་ཕྱིར་ངེས་པའི་ཚིག་གིས་མཚོན་ཏེ་སྒྲོན་མ་ཞེས་བྱ་བར་གྲུབ་པའོ། །དེས་ན་དཔེ་དེ་ལྟར་དོན་ཀྱང་རྗེས་སུ་སྦྱར་ཏེ་དཔེ་དོན་མཚུངས་པའི་ངོ་བོར་བལྟའོ། །དེ་ལྟར་ངེས་ཚིག་དང་ལྡན་པ་དེའི་རང་གི་ངོ་བོ་བསྟན་པ་ཇི་ལྟ་བུ་ཞེ་ན། དེ་ནི་འདི་ལྟར་མ་རིག་པའམ་མི་ཤེས་པའི་རྨོངས་པ་སེལ་བའི་རང་རིག་པའི་ཤེས་རབ་ཆེན་པོ་ཡེ་ཤེས་རང་གསལ་བ་ཉིད་ཡིན་ཏེ། དེ་ཉེ་བར་མཚོན་པ་ནི་དཔེར་ན་ཉི་མའི་སྙིང་པོའམ་རིན་པོ་ཆེའི་སྒྲོན་མ་འོད་འབར་བ་ལ་མུན་པའི་གཞི་ངང་གིས་མེད་པ་བཞིན་དུ་གང་དག་པའི་ཤེས་རབ་ཆེན་པོ་རིག་པ་གསལ་བའི་རང་བཞིན་དེ་ལ་ཡང་མི་ཤེས་པའི་མ་རིག་པ་ནི་གཞི་ཡང་མེད་པས་འཁྲུལ་ པ་མིང་མེད་ཆེན་པོར་བསྟན་པ་ཡིན་ཏེ། གསང་བདག ་དགའ་རབ་དཔའ་བོས་དབང་གི་ཀློང་ལས། དེ་ཉིད་དེ་ཡི་རང་བཞིན་ཏེ། །དེ་རིག་དེ་སྣང་དེ་ཁོ་ན། །ཉི་མའམ་རིན་ཆེན་འབར་བ་བཞིན། །འོད་དང་ངོ་བོ་དེ་ཉིད་ལས། །ཡུལ་དང་གཞན་གྱིས་བྱས་པ་མིན། །ཞེས་གསུངས་པ་ལྟར་རང་གསལ་རྣམ་དག་ཆེན་པོ་ཡིན་ཡང་གསལ་རྐྱང་རང་རྒྱུད་པ་མིན་པར་རིས་མེད་ལྷུན་རྫོགས་ཆེན་པོ་ཉིད་དོ། །དེ་ལྟར་གསལ་བར་སྟོན་པ་ནི་ངེས་པ་དོན་གྱི་ལུང་ཆེན་མཐར་ཐུག་པ་ཡིན་ནོ།།

གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། མདོར་བསྟན་པ། རྒྱས་༼༣༢༧༽པར་བཤད་པའོ། །དང་པོ་ནི།

དེ་ཡང་འདི་ལྟར། ཞེས་པ་ནས། ཉིད་ཀྱི་ཤེས་པའོ། །ཞེས་པའི་བར་གྱིས་བསྟན་ཏེ།

དེ་ཡང་འདི་ལྟར་སྒྲོན་མ་དམ་པ་ནུབ་པར་གྱུར་པ་ན། ཀུན་གྱིས་དེ་ཉིད་གཅིག་ཁོ་ན་ལ་ཁྱད་པར་གྱི་རྣམ་པར་འབྱུང་བ་ནི་འདི་ལྟ་སྟེ། མུན་པའི་ཤེས་པ་དང་། ཡ་མཚན་ཅན་གྱི་ཤེས་པ་དང་། བྱིས་པ་རྣམས་ཀྱི་ཤེས་པ་དང་། ཕྱོགས་སུ་རིག་པའི་ཤེས་པ་དང་། མཐའ་དབུས་འབྱེད་པའི་ཤེས་པ་དང་། དམ་པ་ཉིད་ཀྱི་ཤེས་པའོ།།

དེ་བས་ན་ཡང་དག་པའི་ཤེས་རབ་མེད་པ་ལས་ལྟ་བ་ཐ་དད་དུ་བྱུང་བར་བསྟན་པའི་ཕྱིར། དེ་ཡང་འདི་ལྟར་སྤྲུལ་པའི་སྐུ་མཆོག་སྒྲོན་མ་དམ་པོ་ཐུབ་པའི་དབང་པོ་མྱ་ངན་ལས་འདས་ནས་ཡང་དག་པའི་ཤེས་རབ་གསལ་བ་ཆེན་པོ་དེ་ཉིད་མ་གོ་བའི་དབང་གིས་རང་རིག་པའི་ཉི་མ་ནུབ་པར་གྱུར་པའི་དུས་སུ་སྣང་བ་ན། ཆོས་རྣམས་ཀུན་གྱི་དེ་བཞིན་ཉིད་གསང་བའི་དབྱིངས་གཅིག་གི་ངོ་བོ་དབྱེར་མེད་པའི་དེ་ཁོ་ན་ཉིད་ཀྱི་ངང་ལ་མཉམ་པར་གནས་ཀྱང༌། ཆོས་ཉིད་དེ་རིག་པ་དང་མ་རིག་པའི་ཁྱད་པར་གྱིས་ལྟ་བའི་མཐོ་དམན་དང་བཟང་ངན་མི་འདྲ་བའི་རྣམ་པར་གྱུར་ཏེ་ཐ་དད་དུ་འབྱུང་ཞིང་སྣང་བར་གྱུར་པའི་ཚུལ་ཉེ་བར་བསྟན་པ་ནི་འདི་ལྟ་སྟེ། མུན་པའི་ས་པ་སོ་སོའི་སྐྱེ་བོའི་ཤེས་པ་དང༌། ཡ་མཚན་ཅན་མུ་སྟེགས་བྱེད་ཀྱི་ཤེས་པ་དང༌། བྱིས་པ་ཉན་རང་རྣམས་ཀྱི་ཤེས་པ་དང༌། ཕྱོགས་སུ་རིག་པ་སེམས་ཙམ་པའིཤེས་པ་དང༌། མཐའ་དབུས་འབྱེད་པ་དབུ་མ་པའི་ཤེས་པ་དང༌། ངེས་པ་དམ་པ་གསང་སྔགས་ཉིད་ཀྱིཤེས་པའོ།།

གཉིས་པ་རྒྱས་པར་བཤད་པ་ལ་དྲུག་སྟེ། མུན་པའི་ཤེས་པ་བསྟན་པ། ལོག་སྲེད་ཅན་གྱི་ཤེས་པ་བཤད་པ། བྱིས་པའི་ཤེས་པ་བསྟན་པ། ཕྱོགས་སུ་རིག་པའི་ཤེས་པ་བཤད་པ། མཐའ་དབུས་འབྱེད་པའི་ཤེས་པ་བསྟན་པ། དམ་པ་ཆེན་པོའི་ཤེས་པ་བཤད་པའོ། །དང་པོ་ནི།

ཀྱེ་གྲོགས་པོ། ཞེས་པ་ནས། ལོག་པར་ཤེས་པའོ། །ཞེས་པའི་བར་གྱིས་བསྟན་ཏེ།

ཀྱེ་གྲོགས་པོ་དག་གང་མུན་པའི་ཤེས་པ་ནི། གང་འདི་ལས་ལོག་པར་ཤེས་པའོ།།

དེ་དག་སོ་སོ་ནས་བསྟན་པའི་ཕྱིར། ཀྱེ་གྲོགས་པོ་དག ཅེས་བོས་ནས། དང་པོ་གང་མུན་པའི་ཤེས་པ་ཉེ་བར་སྟོན་ པ་ནི། གང་གཉིས་སུ་མེད་པའི་དེ་ཁོ་ན་ཉིད་འདི་ལ་བརྟགས་ཞེན་གྱིས་བདག ་གཞན་དུ་བཟུང་བ་ལས་གཟུང་འཛིན་གྱི་རྣམ་པར་ཕྱིན་ཅི་ལོག་པར་མཐོང་བ་སྐྱེ་བོ་པ་རྣམས་ཀྱི་ཤེས་པའོ།།

གཉིས་པ་ལོག་སྲེད་ཅན་གྱི་ཤེས་པ་བཤད་པ་ནི།

ལོག་སྲེད། ཅེས་པ་ནས། གཉིས་སུ་འདོད་པའོ། །ཞེས་པའི་བར་གྱིས་བསྟན་ཏེ།

ལོག་སྲེད་ཅན་གྱི་ཤེས་པ་ནི་ཐ་དད་དུ་སྨྲ་ཞིང་གཉིས་སུ་འདོད་པའོ།།

གང་ལོག་པར་ལྟ་བ་ལ་ཆགས་སྲེད་ཅན་རྣམས་ཀྱི་ཤེས་པ་ནི། ལྟ་གཞུང་མི་མཐུན་པ་སུམ་བརྒྱ་དྲུག་ཅུ་ལ་སོགས་པ་ཐ་དད་དུ་སྨྲ་ཞིང༌། རྩ་༼༣༢༨༽བ་རྟག་པ་དང་ཆད་པ་གཉིས་སུ་འདོད་པ་མུ་སྟེགས་བྱེད་ཀྱི་ཤེས་པའོ།།

གསུམ་པ་བྱིས་པའི་ཤེས་པ་བསྟན་པ་ནི།

བྱིས་པ། ཞེས་པ་ནས། ཆུང་བས་དེ་ལས་མིན། །ཞེས་པའི་བར་གྱིས་བསྟན་ཏེ།

བྱིས་པ་རྣམས་ནི་འདི་ལྟ་སྟེ། གང་མེད་པར་སྨྲ་ཞིང་ཐམས་ཅད་ཡོད་པར་འདོད་པའོ། །དེ་ཡང་འདི་ལྟར། རྡུལ་ནས་དཔག་ཚད་སྐད་ཅིག་མ། །བསྐལ་པ་སྐར་མ་ཉི་མའི་དང་། །རི་བོ་ཁོར་ཡུག་ལུས་ཅན་ལུས། །སེམས་དང་ཚེ་ལ་ལོངས་སྤྱོད་ཚད། །དུས་ན་འཇིག་ནུབ་མཚན་ཉིད་ལས། །ཐ་དད་བྱེ་བྲག་ཐམས་ཅད་དུ།།

བཤིག་ནས་མེད་སྨྲ་ཡོད་ཅེས་འདོད། །མོས་པ་ཆུང་བས་དེ་ལས་མིན།།

གང་བྱིས་པ་རྣམས་ཀྱི་ལྟ་བ་ནི་ཉེ་བར་བསྟན་པ་འདི་ལྟ་སྟེ། མུ་སྟེགས་ཀྱི་ཆོས་རྣམས་སམ་སྣང་བ་རགས་པ་གང་ཡིན་ པ་དང་གང་ཟག་གི་བདག་མེད ་པར་སྨྲ་ཞིང་ཕྱི་གཟུང་བའི་ཡུལ་ཐམས་ཅད་རྡུལ་ཕྲ་རབ་ཀྱི་ཆོས་ཙམ་དང་ནང་འཛིན་པའི་ཤེས་པ་སྐད་ཅིག་ཙམ་རྫས་སུ་ཡོད་པར་འདོད་པའོ། །དེ་ཡི་ཚུལ་རྒྱས་པར་བསྙད་པ་ཡང་འདི་ལྟར། དང་པོ་གཟུགས་ཀྱི་མཐའ་རྡུལ་ཕྲ་རབ་དང༌། རྡུལ་ཕྲན་དང༌། ལྕགས་རྡུལ་ལ་སོགས་པར་བརྩིས་ནས་དཔག་ཚད་ཀྱི་བར་དང༌། དེ་ལས་སའི་དཀྱིལ་འཁོར་ཆེན་པོ་ལ་སོགས་པར་སྣང་བ་ཡང་རྡུལ་གྱི་ངོ་བོར་འདོད་པ་དང༌། དུས་ཀྱི་ཚད་ཀྱང་དུས་ཀྱི་མཐའ་སྐད་ཅིག་མ་དང༌། དེ་ཉིད་བརྒྱ་དང་ཉི་ཤུ་ལ་དེ་ཡི་སྐད་ཅིག་ལ་སོགས་པ་ནས་ཡར་བརྩིས་པས་ཉིན་ཞག་དང་ཟླ་བ་དང་ལོ་དང་བསྐལ་པ་ཆེན་པོའི་ཡུན་དུ་བརྩིས་པ་དང༌། མིང་གི་མཐའ་ཡི་གེའི་སིལ་བུ་ནས་མིང་ཚིག་ལ་སོགས་པ་ཐ་སྙད་སྣ་ཚོགས་པར་གྱུར་ཏེ་སྐར་མ་དང་ཉི་ཟླ་དང་རི་བོ་མཆོག་རབ་ནས་ཁོར་ཡུག་གི་བར་དང་འགྲོ་བ་ལུས་ཅན་རྣམས་ཀྱི་ལུས་བོང་ཆེ་ཆུང་དང་ཁྲུ་ལ་སོགས་ནས་དཔག་ཚད་སོགས་ཀྱི་བར་དུ་ཚད་སྣ་ཚོགས་པར་བརྩི་བ་དང༌། སེམས་ཅན་དེ་དག་གི་སེམས་སམ་ཤེས་པ་སྐྱེ་བ་སྐད་ཅིག་མའི་ཡུན་དང༌། གྲངས་དང༌། ཚེ་ཚད་ལ་སོགས་པ་དང་ལོངས་སྤྱོད་ཆེ་ཆུང་གི་ཚུལ་སོགས་སོ་སོའི་ཚད་ཀྱི་རྣམ་པར་གཞག་པ་དང༌། འགྲོ་བའི་སྣང་ཚུལ་དང་སྣོད་ཀྱི་དུས་བཞི་གནས་པ་དང༌། འཇིག་པ་དང༌། ནུབ་སྟེ་སྟོངས་པ་དང༌། ཆགས་པ་ལ་སོགས་པའི་མཚན་ཉིད་ལས་ཐ་དད་ཀྱི་བྱེ་བྲག་གི་རྣམ་གྲངས་སྣ་ཚོགས་སུ་ཕྱེ་བས་ཐམས་ཅད་དུ་ཡང་མི་རྟག་པ་ལ་སོགས་པར་ཡང་མཐོང་སྟེ། རྡུལ་དང་སྐད་ཅིག་མར་བཤིགས་ནས་དོན་དམ་དུ་རགས་པར་གྲུབ་པ་མེད་པར་སྨྲ་ཞིང་ཤེས་ཡུལ་སྐད་ཅིག་མ་དང༌། རྡུལ་ཙམ་ཡོད་དོ་ཅེས་སུ་འདོད་པ་སྟེ། རང་ཉིད་མྱ་ངན་ལས་འདས་པ་ལ་མོས་པ་དང་ཤེས་རབ་ཆུང་བས་འཁོར་བ་ལས་ངེས་པར་འབྱུང་བའི་འཇུག་ཐབས་དེ་ཙམ་ལས་མ་གཏོགས་པར་ལྷག་པའི་ལྟ་བ་ཡོད་པ་༼༣༢༩༽མིན་ནོ།།

བཞི་པ་ཕྱོགས་སུ་རིག་པའི་ཤེས་པ་བཤད་པ་ནི།

གང་འདིར་རྣལ་འབྱོར། ཞེས་པ་ནས། ཆོས་སྐུ་རྟག་པར་འདོད། །ཅེས་པའི་བར་གྱིས་བསྟན་ཏེ།

གང་འདིར་རྣལ་འབྱོར་ཕྱོགས་རིག་པ། །འདི་ཀུན་གང་འདི་ཁོ་ན་བས། །དངོས་མེད་རྣམ་ཤེས་གཉིས་སུ་སྣང་།།

དེ་ཉིད་མ་བཅོས་དེ་བཞིན་ཉིད། །ཡོད་པས་ཆོས་སྐུ་རྟག་པར་འདོད།།

སྐབས་གང་འདིར་རྣམ་པར་རིག་པ་དང་རྣལ་འབྱོར་སྤྱོད་པའི་ཀུན་རྫོབ་པ་དོན་གྱི་ཕྱོགས་ཙམ་ཤེས་ཤིང་རིག་པ་དག་གི་སྤྱིའི་གཞུང་ནི། ཡུལ་དུ་སྣང་བ་འདི་ཀུན་ཕྱི་དོན་དུ་གྲུབ་པ་མེད་པར་གང་སེམས་ཀྱི་བག་ཆགས་ལས་འདི་ལྟར་སྣང་བ་ཁོ་ན་ཡིན་པས་སེམས་སུ་ངེས་པར་གཟུང་བར་བྱ་སྟེ། ཕྱི་རོལ་ཡུལ་གྱི་དངོས་པོ་ལོགས་སུ་མ་གྲུབ་པས་གཟུང་འཛིན་རང་རྒྱུད་པ་མེད་དེ། དཔེར་ན་མིག་ཤེས་རབ་རིབ་དང་ཚ་བའི་རིམས་ཀྱིས་བསྐྱོད་པ་ལྟར་ཀུན་གཞི་རྣམ་པར་ཤེས་པ་འཁྲུལ་པ་ཉིད་གཟུང་ཆ་དང་འཛིན་ཆའི་ཡུལ་སེམས་གཉིས་ཀྱི་རྣམ་པ་ཉིད་དུ་སྣང་བ་ཡིན་པས་ཤེས་པའི་ངོ་བོར་འདོད་དེ། དཀར་དམར་གྱི་རྣམ་པ་རྣམས་ཤེས་པའི་ཆོས་སུ་བདེན་པར་སྨྲ་བ་རྣམ་བདེན་པའམ་རྣམ་བཅས་པའི་གཞུང་ངོ༌། །དེ་ལྟ་བུའི་སེམས་དེ་ཉིད་གཉིས་མེད་ཀྱི་རང་རིག་ཤེལ་དག་པ་ལྟ་བུར་སུས་ཀྱང་མ་བཅོས་མ་བྱས་པར་དོན་དམ་པར་དེ་བཞིན་ཉིད་དུ་ཡོད་པར་འདོད་པས། དཀར་དམར་གྱི་རྣམ་པ་འདི་དག་ཤེས་པའི་ཡང་མི་བདེན། ཕྱི་རོལ་གྱི་དོན་དུའང་མི་བདེན་པར་རྫུན་པ་དངོས་མེད་ཀྱི་སྣང་བར་སྨྲ་བ་རྣམ་རྫུན་པའམ་རྣམ་མེད་པའི་གཞུང་སྟེ། འདི་ཡིས་གཞན་དབང་གི་ཤེས་པ་སྐད་ཅིག་མ་དོན་དམ་དུ་འདོད་པས། རྣམ་རིག་ཙམ་ཞིག་རྟག་ཏུ་རྣམ་པར་སྣང་སྟེ་ཆོས་ཀྱི་སྐུ་ཡང་རྒྱུན་གྱི་རྟག་པར་འདོད་པ་ཡིན་ནོ།།

ལྔ་པ་མཐའ་དབུས་འབྱེད་པའི་ཤེས་པ་བསྟན་པ་ལ་གསུམ་སྟེ། གཞུང་ཕྱི་མོའི་དབུ་མ། རྣལ་འབྱོར་སྤྱོད་པའི་དབུ་མ། མདོ་སྡེ་སྤྱོད་པའི་དབུ་མའོ། །དང་པོ་ནི།

ངེས་པར་འབྱེད་པའི། ཞེས་པ་ནས། དབྱེ་བ་མེད་པའོ། །ཞེས་པའི་བར་གྱིས་བསྟན་ཏེ།

ངེས་པར་འབྱེད་པའི་རྣལ་འབྱོར་པ། །ལ་ལ་འདི་དག་སོ་སོ་ཡི། །གང་དག་སྒྱུ་མའི་མཚན་ཉིད་དུ།།

སྣང་བས་ཀུན་རྫོབ་བྱ་བ་བྱེད། །ངེས་པར་དབྱེ་བ་མེད་པའོ།།

མཐའ་དབུས་ངེས་པར་འབྱེད་དེ་མཐའ་གཉིས་ལས་ངེས་པར་འབྱུང་བར་བྱེད་པའི་རྣལ་འབྱོར་པ་གཞུང་ཕྱི་མོའི་དབུ་མ་རབ་ཏུ་མི་གནས་པ་ལ་ལ་དག་གི་འདོད་པ་ནི། དངོས་པོ་ཡུལ་སེམས་ཀྱི་སྣང་བ་འདི་དག་སོ་སོ་ཡི་རྣམ་པ་གང་དང་གང་དག་ཏུ་སྣང་ཡང་རྟེན་ཅིང་འབྲེལ་བར་འབྱུང་བ་སྒྱུ་མའི་མཚན་ཉིད་ཙམ་དང་ཤིང་རྟ་བཞིན་དུ་རྒྱུ་རྐྱེན་འདུས་བདོ་བ་ཙམ་ཞིག་སྣང་བས་ཀུན་རྫོབ་ཏུ་མཐུན་པར་སྣང་བའི་བྱ་བ་དང་དོན་བྱེད་ནུས་པ་ཡིན་ནོ། །དེ་ལའང་༼༣༣༠༽ཡང་དག་པའི་ཀུན་རྫོབ་དང་ལོག་པའི་ཀུན་རྫོབ་ཀྱི་མཚན་ཉིད་དང་ངེས་ཚིག་ཇི་ལྟར་འཇིག་རྟེན་ན་གྲགས་པ་ལྟར་བར་ཆ་དབྱེ་བས་ཐ་སྙད་དུའང་རང་གི་མཚན་ཉིད་དུ་གྲུབ་པར་མི་བཞེད་དེ། དེས་ན་ཡུལ་དུ་གསལ་བར་འདོད་པའི་མདོ་སྡེ་སྤྱོད་པ་དང༌། སེམས་སུ་གསལ་བར་འདོད་པའི་རྣལ་འབྱོར་སྤྱོད་པའི་ཀུན་རྫོབ་གང་ན་གང་དུ་འདོད་པའང་བློ་གཉིས་སྣང་གི་སྤྱོད་ཡུལ་ཙམ་སྟེ་ངེས་པར་དོན་དམ་དུ་ཀུན་རྫོབ་སྒྱུ་མ་ཉིད་ཀྱང་མེད་དེ་མ་སྐྱེས་པའི་ཆོས་ཉིད་དུ་གཅིག་པས་བདེན་པ་གཉིས་སུ་དབྱེ་བ་མེད་པར་སྤྲོས་བྲལ་མཉམ་ཉིད་ཆེན་པོ་བློའི་སྤྱོད་ཡུལ་ལས་འདས་པའོ། །ཞེས་བཞེད་དེ། དེའང་སྤྲོས་པ་དང་སྤྲོད་མེད་ཀྱི་དབྱེ་བ་དང༌། མཚན་ཉིད་དང་ངེས་ཚིག་གི་རྣམ་པར་བསྙད་ནས་ཆོས་ཉིད་རྟོགས་པར་བྱེད་པའོ།།

གཉིས་པ་རྣལ་འབྱོར་སྤྱོད་པའི་དབུ་མ་ནི།

ལ་ལ་དེ་ལྟར། ཞེས་པ་ནས། ཉིད་དུ་མེད་པའོ། །ཞེས་པའི་བར་གྱིས་བསྟན་ཏེ།

ལ་ལ་དེ་ལྟར་དེ་ངེས་པས། །དེ་ལས་མ་གཏོགས་དེ་འོང་མེད།།

དེ་ཉིད་དེས་ནི་དངོས་མེད་ཕྱིར། །དམ་པ་ཉིད་དུ་མེད་པའོ།།

ལ་ལ་རྣལ་འབྱོར་སྤྱོད་པའི་དབུ་མ་པ་དག་གི་ལུགས་ཀྱིས་དོན་དམ་མཐར་ཐུག་ཏུ་དེ་ལྟར་མ་སྐྱེས་པ་དེ་ཁོ་ནར་ངེས་ཀྱང༌། ཀུན་རྫོབ་ཏུ་སེམས་སྣང་བ་ཡིན་ཏེ། སེམས་འཁྲུལ་པ་སྒྱུ་མ་ལྟ་བུའི་རང་བཞིན་དུ་སྣང་བ་དེ་ལས་མ་གཏོགས་པར་ཡུལ་སྒྱུ་མ་དེ་ཉིད་ལོགས་ཤིག་ན་ཡོད་ཅིང་འོང་བ་མིན་པས་རྣམ་རིག་པའི་དོན་དམ་དང་མཐུན་པའོ། །དོན་དམ་པར་ནི། སེམས་སྐད་ཅིག་མའི་སྣང་བ་དེ་ཉིད་ཀྱང་རྡོ་རྗེ་གཟེགས་མ་ལ་སོགས་པའི་གཏན་ཚིགས་ཀྱིས་གཞལ་བ་དེས་ནི་སེམས་ཙམ་གྱི་དངོས་པོར་ཡང་གྲུབ་པ་མེད་པའི་ཕྱིར་ན། དམ་པ་ཉིད་དུ་ངོ་བོ་སྟོང་པ་ཉིད་ཡིན་པས་དངོས་པོའི་རང་བཞིན་ཅིར་ཡང་གྲུབ་པ་མེད་པར་འདོད་པའོ།།

གསུམ་པ་མདོ་སྡེ་སྤྱོད་པའི་དབུ་མ་ནི།

ལ་ལ་གང་མ། ཞེས་པ་ནས། པ་ལྟར་ཡོད་མ་ཡིན། །ཞེས་པའི་བར་གྱིས་བསྟན་ཏེ།

ལ་ལ་གང་མི་ཟིན་པའི་ཕྱིར། །དེ་སྣང་བ་ནི་ག་ལ་རུང་།།

འཕྲ་རབས་པ་འདི་རྣམ་ཀུན་འཁྱེན། །བསླུ་འདྲིད་པ་ལྟར་ཡོད་མ་ཡིན།།

ལ་ལ་མདོ་སྡེ་སྤྱོད་པའི་དབུ་མ་པ་དག་གིས་དངོས་པོ་ཀུན་རྫོབ་སྒྱུ་མ་ཙམ་ཞིག་སྣང་བ་ནི། གང་མ་ཟིན་པ་ཡིན་པའི་ཕྱིར་སེམས་ཀྱི་གཟུང་ཆ་སྣང་བ་མ་ཡིན་ཏེ། སེམས་འཁྲུལ་པ་དེ་ཉིད་ཡུལ་དུ་སྣང་བར་ནི་གང་ན་རུང་སྟེ་མི་རུང་ངོ༌། །དེ་བས་ན་ཀུན་རྫོབ་ཏུ་རྡུལ་ཕྲ་རབ་ཀྱི་ས་པ་དེ་ནི་ཕྱི་རོལ་གྱི་དོན་དུ་ཡོད་པ་ཡིན་པས་འདི་ལས་བརྩམས་ཏེ་ཡུལ་གྱི་རྣམ་པ་ཀུན་སྣ་ཚོགས་སུ་བཀྲ་བར་ཉན་ཐོས་དགྲ་བཅོམ་པས་ཀྱང་མཁྱེན་༼༣༣༡༽པ་ཉིད་པས་དེ་ལྟར་སྣང་བ་ཡིན་ཀྱང༌། དོན་དམ་པར་ནི། ཀུན་རྫོབ་ཀྱི་རྡུལ་ཕྲ་རབ་ཀྱི་རྣམ་པ་ཉིད་ཀྱང་ཕྱོགས་ཆས་རྣམ་པར་དབྱེ་བས་མ་གྲུབ་པས་ན་ཀུན་རྫོབ་སླུ་བ་དང་འདྲིད་པ་ཅན་གྱི་ཆོས་ལྟར་དུ་ཡོད་པ་མ་ཡིན་པས་གཉིས་སུ་མེད་པར་འདོད་དེ་སྟོང་པ་ཉིད་དོ། །དེ་བས་ན་བློ་གྲོས་མི་ཟད་པས་བསྟན་པའི་མདོ་ལས། བློ་གྲོས་ཆེན་པོ་རྡུལ་ཕྲ་རབ་ཀྱིས་གཞིག་ན་བ་ལང་གི་རྭ་ལ་དངོས་པོར་མི་འདུག་གོ །ཞེས་པའི་དོན་ཏོ།།

དྲུག་པ་དམ་པ་ཆེན་པོའི་ཤེས་པ་བཤད་པ་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ནི།

དམ་པ་ཉིད་ཀྱི། ཞེས་པ་ནས། མི་རྟོག་ཚིག་མི་བརྗོད། །ཅེས་པའི་བར་གྱིས་བསྟན་ཏེ།

དམ་པ་ཉིད་ཀྱི་དམ་པ་གང་། །ཆོས་ཉིད་ཡེ་ནས་སངས་རྒྱས་ལ། །དེ་མིན་ལྟ་བ་བཟློག་པའི་ཕྱིར། །ཡེ་ནས་སངས་རྒྱས་ཞེས་བརྗོད་པས། །ཐ་སྙད་ཙམ་དུ་བརྗོད་པར་ཟད། །ཡེ་ནས་དགོས་པའི་ཚིག་གི་ལམ། །ཐ་སྙད་གཉིས་དང་བྲལ་བ་ལ། །སྒྲོ་སྐུར་ཚིག་གིས་སྙད་མི་གདགས། །བརྗོད་པའི་ཐ་སྙད་ཚིག་ལམ་བཟླས། །ནམ་མཁའ་འདི་ནི་ཡོད་མེད་ཅེས། །བླུན་པོ་རྣམས་ནི་རྩོད་པར་འགྱུར། །འཁས་པ་རྣམས་ནི་དེ་ལྟ་མིན། །གང་འདི་རྩོད་ལ་ངོ་མཚར་སྐྱེ། །དེ་བཞིན་ཉིད་འདི་ཡོད་མེད་ཅེས། །བྱིས་པ་རྣམས་ནི་རྩོད་པར་འགྱུར། །སྐྱེས་བུ་གང་དག་དེ་ལྟར་མིན། །རྩོད་པ་ཤེས་རབ་འཆལ་པར་ཟད། །འདི་ལྟར་སྣང་བའི་ཆོས་ཐམས་ཅད། །ཡེ་འམ་ངང་གི་སངས་རྒྱས་ལ། །མིན་ལས་ཡིན་པར་འགྱུར་མ་ཡིན། །ངོ་བོ་ཉིད་ཀྱིས་དེ་ཉིད་ལ། །ཡིན་དང་མིན་ཞེས་ཅི་བྱར་ཡོད། །ནམ་མཁའ་འདི་ནི་མེད་དོ་ཞེས། །མི་ཤེས་གང་གིས་རྟོག་པར་བྱེད། །གང་ཤེས་ཡེ་ནས་ཡོང་མི་རྟོག།

ཡིན་པར་མི་རྟོག་ཚིག་མི་བརྗོད།།

གསང་སྔགས་དམ་པ་བླ་ན་མེད་པ་ཉིད་ཀྱི་ལྟ་བ་དམ་པ་མཆོག་ཏུ་གྱུར་པ་གང་གི་བཞེད་པ་ནི། ཆོས་སོ་ཅོག་ཡེ་ཇི་བཞིན་པའི་ཆོས་ཉིད་དུ་ཡེ་གདོད་མ་ནས་སངས་རྒྱས་པ་ཡིན་པ་ལ་གདགས་བརྗོད་ཐམས་ཅད་དང་བྲལ་ཞིང་དེ་ཉིད་ཀྱང་མངོན་དུ་བྱ་ཞིང་དོན་དུ་གཉེར་བ་དང་བྲལ་བའོ། །འོ་ན་ཚིག་ཏུ་བཏགས་པ་ལ་དགོས་པ་མེད་དོ་བར་དོགས་པ་ལ། དེ་ལྟ་བུའི་དོན་རྟོགས་པ་མིན་པར་གདེངས་མ་ཆུད་པ་དག་གི་གཉིས་སུ་འཛིན་པའི་ལྟ་བ་ངན་པ་ཟློག་ནས་དོན་མ་ནོར་བ་ལ་གཟུད་པའི་ཕྱིར་དུ་ཡེ་ནས་གཉིས་སུ་མེད་པར་སངས་རྒྱས་པ་ཡིན་ནོ། །ཞེས་དེ་སྐད་ཅེས་བརྗོད་པ་ཡང་ཐ་སྙད་ཙམ་དུ་བཏགས་ཏེ་བརྗོད་པར་ཟད་ཀྱི། དོན་གྱི་ངོ་བོ་ཉིད་ལ་ཡེ་གདོད་ནས་བཀོད་པ་ཚིག་གི་ལམ་གྱི་ཐ་སྙད་ཡོད་མེད་གཉིས་ཀྱི་བརྗོད་པ་དང་བྲལ་བའི་ཐིག་ལེ་ཆེན་པོ་ཆོས་ཀྱི་སྐུར་གསལ་བ་ལ། བདེན་པ་གཉིས་སུ་ཡོད་ཅེས་སྒྲོ་འདོགས་པ་དང་མེད་ཅེས་སྐུར་པ་གདག་པའི་ཚིག་གི་ཐ་སྙད་དོན་ལ་མི་གདགས་ཏེ་ཚིག་བརྗོད་ཀྱིས་བཙལ་བའི་འོས་མིན་པས་གཏན་ཚིགས་ཀྱིས་གཙེ་བས་དོན་གྱི་བཞག་ས་ཚོལ་བའི་ཚིག་རྣམས་ཀྱིས་བདེན་པ་གཉིས་ཀྱི་བརྗོད་པའི་ཐ་སྙད་སོ་སོའི་ཚིག་ལམ་ལས་འདས་ཏེ་གདགས་པ་དང་བྲལ་བའོ། །དེ་ལྟ་བུ་ལ་ནི་བདེན་པ་གཉིས་ཡོད་དོ། །ཞེས་པ་དང༌། མེད་དོ་ཞེས་པའི་ཐ་སྙད་གདགས་སུ་མེད་དེ་བརྗོད་པས་མི་ཕེབས་པས་གདགས་པ་ལས་གྲོལ་བ་ཁོ་ནའོ། །དེ་བས་ན་མཉམ་པ་ཆེན་པོ་ལ་བདེན་པ་གཉིས་སུ་རྩོད་པ་ནི་དོན་མི་མཐོང་བའི་ནད་ཡིན་པའི་༼༣༣༢༽ཕྱིར་རོ། །དེའང་དཔེར་ན་ནམ་མཁའ་འདི་ནི་ཡོད་པའམ་མེད་པ་ཉིད་དོ་ཞེས་བླུན་པོ་མི་མཁས་པ་རྣམས་ནི་ཕྱོགས་སུ་བཟུང་ནས་རྩོད་པར་འགྱུར་གྱི། ནམ་མཁའི་མཚན་ཉིད་ལ་མཁས་པ་རྣམས་ནི་དེ་ལྟར་མིན་པས་རྩོད་པ་དང་བྲལ་ཏེ། གང་དེ་ལྟར་རྩོད་པ་ལ་ཇི་ག་སྙམ་ནས་ངོ་མཚར་ཆེར་སྐྱེ་བར་བྱེད་དེ་མཐུན་པའི་དཔེ་ལས་དོན་གྱི་དཔེར་བླངས་པའོ།།

དཔེ་དེ་བཞིན་དུ། ཆོས་ཉིད་དེ་བཞིན་ཉིད་འདི་མཐའ་ཡོད་པ་དང་མེད་པ་ཉིད་ཅེས་བདེན་པ་རིས་སུ་ཕྱེ་ནས་གསང་སྔགས་པ་ཤེད་མ་བྱེ་བའི་བྱིས་པ་ཉན་རང་དབུ་སེམས་རྣམས་ནི་རྩོད་པར་འགྱུར་རོ། །ཐེག་པ་ཆེན་པོ་གསང་སྔགས་ཀྱི་དོན་རྟོགས་པའི་སྐྱེས་བུ་གང་དག་ཡེ་གཉིས་སུ་མེད་པའི་ངང་ལ་དེ་ཉིད་དུའང་མི་རྟོག་པ་ནི་དེ་ལྟར་མིན་ཏེ་རྩོད་པའི་ཐ་སྙད་དང་བྲལ་བའོ། །དེ་བས་ན་དེ་བཞིན་ཉིད་ལ་མཐར་བཟུང་ནས་རྩོད་པ་ནི་ཤེས་རབ་འཆལ་བར་ངེས་པ་ཁོ་ནར་ཟད་དོ།།

དེ་ཅིའི་ཕྱིར་ཞེ་ན། འདི་ལྟར་འཁྲུལ་པའི་ངོ་ལ་སྣང་བའི་སྣོད་བཅུད་ལ་སོགས་པའི་ཆོས་ཐམས་ཅད་ཀུན་ཡེ་ནས་གཉིས་སུ་མེད་པའམ་ལྷུན་གྱིས་གྲུབ་པའི་ངང་གིས་སངས་རྒྱས་པ་ཡིན་པའི་དོན་གྱིས་ཡོད་མེད་རྟག་ཆད་སྣང་སྟོང་ལས་གྲོལ་བའི་ཆོས་སྐུ་ཆེན་པོ་ཉིད་དུ་གནས་པ་ལ། བྱིས་པས་འཕྲལ་དུ་བརྩལ་ཏེ་སྔར་དངོས་པོ་ལ་སངས་རྒྱས་པའི་དོན་མཆོག་དམ་པ་མིན་པ་ཞིག་ལས་ཡིན་པར་སྒྲུབས་པས་སངས་རྒྱས་པར་གྱུར་པ་མ་ཡིན་པའི་ཕྱིར་ཏེ། ཆོས་རྣམས་ཀྱི་མཉམ་པ་ཉིད་ནི་ངོ་བོ་ཉིད་ཀྱིས་རྟོགས་རུང་མ་རྟོགས་རུང་ཡེ་ནས་དེ་བཞིན་ཉིད་ཆེན་པོ་ལས། འཕྲལ་དུ་རྨོངས་པ་དག་གིས་ཡེ་ནས་སངས་རྒྱས་པ་ཡིན་ཞེས་བྱ་བ་དང་མིན་ཞེས་བརྗོད་པས་ཅི་ཞིག་བྱར་ཡོད་དེ་མེད་དོ།།

དེས་ན་དེ་སྐད་སྨྲ་བ་ཉིད་ལ་ད་དུང་ཡུལ་དུ་བྱེད་པའི་སྒྲིབ་པ་ཡོད་པས་དོན་ཡང་དག་པར་མ་མཐོང་བའོ། །དཔེར་ན་ནམ་མཁའ་ཡེ་ནས་སྟོང་པའི་དག་པ་ཆེན་པོ་ལ་ནམ་མཁའ་འདི་ནི་མེད་དོ་ཞེས་ནམ་མཁའི་དོན་མི་ཤེས་པའི་བླུན་པོ་གང་ཞིག་དངོས་པོ་མེད་པར་ཡིད་ལ་རྟོག་པར་བྱེད་དོ། །ནམ་མཁའ་གང་གི་མཚན་ཉིད་ཤེས་པ་དག་ནི་མེད་དོ་བར་བསམ་པར་ཡང་མི་འཛིན་ཚིག་ཏུའང་མི་བརྗོད་དེ་བསམ་པ་ཅིར་ཡང་མི་སྐྱེའོ། །དེ་ལྟར་དོན་མ་མཐོང་བས་༼༣༣༣༽ཆོས་ཉིད་ཡང་དག་པར་མི་ཤེས་པའི་མུན་སྤྲུལ་རྣམས་གང་དག་གིས་ནི་དེ་ཁོ་ན་ཉིད་ནི་མཐའ་དང་བྲལ་བའོ་ཞེས་ཞེ་བས་འཛིན་ཞིང་རྟོག་པར་བྱེད་དེ་ཚིག་ཏུའང་བརྗོད་པར་བྱེད་དོ། །གང་ཆོས་ཉིད་ཇི་ལྟ་བའི་དོན་མཐོང་ཞིང་ཤེས་པའི་མི་ཆེན་པོ་རྣམས་ནི་ཡེ་ནས་མཐའ་དང་བྲལ་བ་ཉིད་དུའང་ཡོང་ཡེ་མི་རྟོག་པར་ཡིད་ལ་མི་བྱེད་རྗེས་སུ་མི་འབྲང་ཞིང་མཐའ་དང་བྲལ་བ་མིན་པར་ཡང་ཀུན་ནས་མི་རྟོག་ཞེ་བས་མི་འཛིན་རྗེས་སུའང་མི་འབྲང་སྟེ། དེ་བས་ན་ཡོད་མེད་དང་ཡིན་མིན་ལ་སོགས་པའི་ཚིག་ཏུའང་མི་བརྗོད་པ་ནི་དོན་ལ་རྣལ་དུ་ཕེབས་པའི་མི་རྟོག་པ་ཉིད་དོ།

།དེ་ལྟ་བུའི་གདེང་མ་ཆུད་པའི་མུན་སྤྲུལ་པ་དག་རང་གི་ཞེན་ཕྱོགས་ཀྱི་བསམ་ངན་གྱི་དབང་གིས་བཙལ་དུ་མེད་ཅིང་ཡུལ་དང་བྲལ་བ་ནི་རྒྱལ་བའི་སྤྱོད་ཡུལ་ཡིན་གྱི། གང་ཟག་གི་སྤྱོད་ཡུལ་མ་ཡིན་ནོ་ཞེས་སྨྲ་བ་དག་ནི་ཐེག་པ་ཆེན་པོར་གཅིག་ཆར་དུ་འཇུག་པར་ཁས་འཆེས་ནས་ཐེག་པ་ཆུང་ངུའི་ལྟ་བ་ལ་གནས་པ་སྟེ། རྒྱལ་པོ་དམངས་སུ་འབབ་པ་ལྟ་བུའོ། །ཞེས་གནུབས་ཆེན་མཁྱེན་བརྩེའི་གཏེར་མཛོད་ཀྱིས་གདམས་པར་མཛད་དོ།།

གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ཡང་འདི་ལྟར། ཞེས་པ་ནས། དགོས་ཆེད་རེ་རེར་འབྱུང༌། །ཞེས་པའི་བར་གྱིས་བསྟན་ཏེ།

དེ་ཡང་འདི་ལྟར་སོ་སོར་རྟོག །རྒྱུ་དང་ལས་དང་རྣམ་གྲངས་ལ།།

མཚན་ཉིད་ངེས་པའི་ངོ་བོ་དང་། །འབྲས་བུ་དགོས་ཕྱེད་རེ་རེ་འབྱུང་།།

ཡང་དག་པའི་ཤེས་རབ་ཆེན་པོ་དེ་ལ་ཡང་ཚུལ་འདི་ལྟར་སོ་སོར་རྟོག་པའི་བློ་གྲོས་ཀྱིས་རྣམ་པར་འབྱེད་དེ། ཤེས་རབ་སྐྱེད་པའི་རྒྱུ་དང༌། དེའི་བྱེད་ལས་དང༌། རྣམ་གྲངས་དང༌། མཚན་ཉིད་དང༌། ངེས་པ་ཡི་ཚིག་དང༌། ངོ་བོ་དང༌། འབྲས་བུ་དང༌། དགོས་ཆེད་དེ། དེ་ལྟར་རེ་རེར་བྱས་པས་རྣམ་གྲངས་རྣམ་པར་བརྒྱད་དུ་འབྱུང་བའོ།།

གཉིས་པ་རྒྱས་པར་བཤད་པ་ལ་བརྒྱད་དེ། ཤེས་རབ་མཆོག་གི་རྒྱུ་བསྟན་པ། དེའི་བྱེད་ལས་བཤད་པ། ཤེས་རབ་དམ་པའི་རྣམ་གྲངས་བསྟན་པ། དེའི་མཚན་ཉིད་བཤད་པ། ཤེས་རབ་ཟབ་མོའི་ངེས་ཚིག་བསྟན་པ། ཤེས་རབ་གསལ་བའི་ངོ་བོ་བཤད་པ། ཤེས་རབ་ངེས་པའི་འབྲས་བུ་བསྟན་པ། ཤེས་རབ་མཆོག་གི་དགོས་ཆེད་བཤད་པའོ། །དང་པོ་ནི།

འདི་ལྟར་འདིར་ནི། ཞེས་པ་ནས། འདི་དག་ཉིད་ཀྱི་རྒྱུ། །ཞེས་པའི་བར་༼༣༣༤༽གྱིས་བསྟན་ཏེ།

འདི་ལྟར་འདིར་ནི་གང་གི་རྒྱུ། །རང་བྱུང་དེ་ཉིད་རྟོག་སྤྱོད་བཅས།།

གང་དག་གང་ལ་སྐྱེ་མཆེད་པ། །གཉིས་པོ་འདི་དག་ཉིད་ཀྱི་རྒྱུ།།

འདི་ལྟར་རྣམ་གྲངས་དང་པོ་འདིར་གསང་སྔགས་ཀྱི་ཤེས་རབ་འདི་ཉིད་ནི་རྟོགས་པར་བྱེད་པ་གང་གི་རྒྱུ་ལས་ཇི་ལྟར་བྱུང་བ་ཡིན་ཞེ་ན། རང་བྱུང་གི་ཡེ་ཤེས་ཀྱི་ངོ་བོ་ཇི་ལྟར་ཡིན་པ་དེ་ཉིད་ཐོས་བསམ་ཡང་དག་པ་ལ་བརྟེན་ནས་རྩིང་ཞིབ་ཀྱི་ཚུལ་དུ་རྟོག་ཅིང་དཔྱོད་པ་དང་བཅས་པའི་སོ་སོར་རྟོག་པའི་ཤེས་རབ་དང་ལྡན་པས་རྣལ་འབྱོར་པ་ལྟ་བས་མ་འདྲེས་ཡོངས་རྫོགས་སུ་གཞལ་ཏེ་དོན་ལ་འཇུག་པ་གང་དག་རིག་པའི་ཤེས་རབ་ཆེན་པོ་གང་ལ་གཡོ་ཐོབ་བརྟན་ཅིང་མཐར་ཕྱིན་པའི་ཚུལ་གྱིས་བོགས་སུ་སྐྱེ་ཞིང་འོག་ནས་གོང་དུ་མཆེད་པར་འགྱུར་པ་ཡིན་པའི་ཕྱིར་ཇི་ལྟ་ཇི་སྙེད་ཀྱི་གནས་ལ་རྟོག་ཅིང་དཔྱོད་པས་སོ་སོར་རྟོག་པའི་ཤེས་རབ་གཉིས་པོ་དེ་ནི་མི་དམིགས་པའི་ཤེས་རབ་དང་སོ་སོར་རྟོག་པའི་ཤེས་རབ་ཆེན་པོ་འདི་དག་ཉིད་ཀྱི་རྒྱུ་མ་ནོར་བ་སྐྱེད་པར་བྱེད་པའི་ཐབས་དམ་པ་ཡིན་ནོ།།

གཉིས་པ་དེའི་བྱེད་ལས་བཤད་པ་ནི།

གང་ལས་གང་མིན། ཞེས་པ་ནས། དོན་འདོད་འབྲེལ་བའོ། །ཞེས་པའི་བར་གྱིས་བསྟན་ཏེ།

གང་ལས་གང་མིན་ཇི་སྙེད་པ། །ཁྱད་པར་བྱེ་བྲག་ཐ་དད་པར། །ངེས་འབྱེད་འཇུག་འགྲེལ་སྦྱོར་བཅས་པས།།

དེ་ཉིད་ཕྱིན་ཅི་མ་ལོག་པར། །མངོན་འབྱིན་དོན་འདོད་དངོས་འབྲེལ་བའོ།།

ཡང་དག་པའི་ཤེས་རབ་ཆེན་པོ་གང་དེའི་བྱེད་ལས་ནི། གང་གཉིས་མེད་ཀྱི་ངོ་བོ་མིན་པར་བརྟགས་པས་ཐ་དད་དུ་གྱུར་པའི་ཆོས་ཇི་སྙེད་པ་མང་པོའི་མཐོ་དམན་གྱི་ཁྱད་པར་དང་རྣམ་པའི་བྱེ་བྲག་མ་འདྲེས་པ་ལ་ཐ་དད་པར་ཡང་ངེས་པར་འབྱེད་ཅིང༌། སོ་སོར་རྟོག་པའི་ཤེས་རབ་ཀྱིས་དེ་དག་ལ་ཤེས་པ་འཇུག་པ་དང༌། དེ་དག་གི་འབྲེལ་བ་བསྒྲུབ་པ་དང༌། དེ་དག་ལ་ཡང་དག་པའི་ལུང་དང་མན་ངག་ཚད་མའི་སྦྱོར་བ་ཚང་བར་དགོད་ཅིང༌། གཏན་ཚིགས་རྒྱས་པ་འབའ་ཞིག་གིས་སྦྱོར་བ་བྱེད་པ་དང༌། ཆོས་མཐུན་པའི་དཔེ་ཡིས་སྦྱོར་བ་དང༌། མི་མཐུན་པ་ཉིད་ཅན་གྱིས་སྦྱོར་བ་འགོད་པ་དང་བཅས་ཏེ་ཆོས་རྟགས་ཀྱི་དོན་དང་མི་འགལ་བའི་སྦྱོར་བ་དང་ལྡན་པས། ཆོས་ཉིད་ཡོངས་སུ་རྫོགས་པའི་ངོ་བོ་ཡང་དག་པའི་དོན་དེ་ཉིད་མི་དམིགས་པའི་ཤེས་རབ་ཀྱིས་ངོས་འཛིན་ཞིང་ཕྱིན་ཅི་མ་ལོག་པར་གཏན་ལ་ཕབས་ནས་མ་ནོར་བའི་དོན་དུ་མཐར་ཕྱིན་པར་བྱེད་པས་གསང་སྔགས་གཉིས་མེད་ཀྱི་ངོ་བོ་དངོས་མངོན་དུ་འབྱིན་ཅིང་དོན་གྱི་གནས་ལུགས་རིག་པའི་མངོན་སུམ་དུ་གསལ་བར་འདོད་པ་༼༣༣༥༽དག་གིས་དེ་ལྟར་བརྩོན་ཏེ་དོན་གྱི་ལམ་ལ་གནས་པར་བྱས་པས་རྟོགས་པར་དཀའ་བའི་ཤེས་རབ་དང་དོན་ཇི་བཞིན་པའི་ངོ་བོ་དབྱེར་མེད་དུ་འབྲེལ་བའི་ཉག་གཅིག་ཐིག་ལེའི་ཀློང་དུ་གྲོལ་བར་བྱེད་པའོ། །འདི་ནི་གོལ་སྒྲིབ་ཤན་འབྱེད་ཀྱི་གནད་ཕྱེད་དེ་གསང་བའི་དོན་ལ་འཇུག་པའང་ཡིན་ནོ།།

གསུམ་པ་ཤེས་རབ་དམ་པའི་རྣམ་གྲངས་བསྟན་པ་ནི།

རྣམ་གྲངས་རྣམ་གཉིས། ཞེས་པ་ནས། ངེས་པར་འབྱེད་པ་ཡིན། །ཞེས་པའི་བར་གྱིས་བསྟན་ཏེ།

རྣམ་གྲངས་རྣམ་གཉིས་དོན་བཞིན་ནོ། །ཀུན་ལ་ངེས་པར་འབྱེད་པ་ཡིན།།

ཡང་དག་པའི་ཤེས་རབ་དེའི་རྣམ་གྲངས་ནི། སོ་སོར་རྟོགས་པའི་ཤེས་རབ་དང༌། མི་དམིགས་པའི་ཤེས་རབ་རྣམ་པ་གཉིས་ཏེ། གཏན་ལ་དབབ་ཅིང་རྟོགས་པར་བྱ་བའི་ཡུལ་དོན་གྱི་ངོ་བོ་མ་འདྲེས་པ་དང་ཡོངས་སུ་རྫོགས་པ་བཞིན་དུ་ཕྱེ་ནས་བསྟན་པ་ཡིན་ནོ། །དེས་ན་ཤེས་བྱའི་ཡུལ་ཀུན་ལ་མཚན་ཉིད་མ་འདྲེས་པར་ངེས་པར་འབྱེད་ཅིང་ཡོངས་སུ་རྫོགས་པའི་ཆོས་ཉིད་དུ་རྟོགས་ནས་ཐོས་བསམ་སྒོམ་པའི་ཤེས་རབ་གསུམ་ཉིད་ལྡན་པས་དོན་མངོན་དུ་བྱེད་པ་ཡིན་ཏེ། ཆོས་ཇི་ལྟ་བ་ཇི་སྙེད་པ་ཀུན་རང་གསལ་ལྷུན་རྫོགས་སུ་བསྟན་པའོ།།

བཞི་པ་དེའི་མཚན་ཉིད་བཤད་པ་ནི།

དེ་ཉིད་མ་འདྲེས། ཞེས་པ་ནས། དེ་ལྟར་ཇི་བཞིན་བྱེད། །ཅེས་པའི་བར་གྱིས་བསྟན་ཏེ།

དེ་ཉིད་མ་འདྲེས་ཡོངས་རྫོགས་པ། །དངོས་མེད་མི་རྟོག་ཡོངས་སུ་རྫོགས།།

སོ་སོ་ཐ་དད་བསམ་མི་ཁྱབ། །མ་འདྲེས་དེ་ལྟར་ཇི་བཞིན་འབྱེད།།

ཤེས་རབ་དམ་པ་དེ་ཉིད་ཀྱི་མཚན་ཉིད་ནི། སོ་སོར་རྟོག་པས་མ་འདྲེས་པ་དང༌། མི་དམིགས་པས་ཡོངས་སུ་རྫོགས་པར་ཤེས་པ་ཡིན་ལ། མི་དམིགས་པ་དེ་ཡང་ཆོས་རྣམས་ཐམས་ཅད་ཀུན་ངོ་བོ་མ་གྲུབ་པས་དངོས་པོ་མེད་པར་རྟོགས་ཤིང་དངོས་མེད་དེ་ཉིད་དུའང་མི་རྟོགས་པར་མི་དམིགས་པའི་ངང་གཅིག་ཏུ་ཡོངས་སུ་རྫོགས་པའོ། །སོ་སོར་རྟོག་པ་དེ་ཡང༌། སོ་སོར་སྣང་བའི་ཆོས་བརྟགས་པ་ཐ་དད་པ་དང༌། འཁྲུལ་པ་ལ་ངོ་བོ་དང་བཏགས་པ་ཐ་དད་པའི་ཆོས་བསམ་གྱིས་མི་ཁྱབ་ཅིང་མཐའ་ཡས་པའི་བྱེ་བྲག་ཇི་སྙེད་པ་ཀུན་དེ་དག་ཇི་ལྟ་བར་མ་འདྲེས་པར་གསལ་ཞིང་རིག་པར་བྱེད་པའོ། །མདོར་ན་དེ་ལྟར་གསལ་ལ་མ་འདྲེས་པ་དང་དེ་ཉིད་ཇི་བཞིན་པའི་ངོ་བོར་མི་དམིགས་པར་གསལ་ལ་ཡོངས་སུ་རྫོགས་པར་མངོན་དུ་བྱེད་པའི་མཚན་ཉིད་དང་ལྡན་པའོ།།

ལྔ་པ་ཤེས་རབ་ཟབ་མོའི་ངེས་ཚིག་བསྟན་པ་ནི།

གང་འདིར་ཕྱིན་ཅི། ཞེས་པ་ནས། ཆུབ་པ་ཕུལ་ཉིད་དོ། །ཞེས་པའི་༼༣༣༦༽བར་གྱིས་བསྟན་ཏེ།

གང་འདིར་ཕྱིན་ཅི་མ་ལོག་པར། །ཡོངས་སུ་ནུབ་པ་ཕུལ་ཉིད་དོ།།

འོ་ན་ཅིའི་ཕྱིར་ཤེས་རབ་ཅེས་བྱ་ཞེ་ན། གང་འདིར་གསང་སྔགས་དེ་ཁོ་ན་ཉིད་ཀྱི་དོན་ཕྱིན་ཅི་མ་ལོག་པ་ཉིད་མ་ནོར་བར་ཁོང་དུ་ཆུད་པའི་ཕྱིར་ཏེ། ཤེས་བྱའི་དོན་མཆོག་དམ་པ་ཡོངས་སུ་ཆུབ་ཅིང་ཤེས་པས་ཤེས་བྱེད་རྣམས་ཀྱི་དམ་པ་མཆོག་གམ་ཕུལ་དུ་གྱུར་པས་ན་ཤེས་རབ་ཅེས་བརྗོད་པ་ཉིད་དོ།།

དྲུག་པ་ཤེས་རབ་གསལ་བའི་ངོ་བོ་བཤད་པ་ནི།

ཀུན་ནས་མ་རྨོངས། ཞེས་པ་ནས། གང་མ་རིག་པ་གཅོད། །ཅེས་པའི་བར་གྱིས་བསྟན་ཏེ།

ཀུན་ནས་མ་རྨོངས་ཐམས་ཅད་གསལ། །གང་ལ་མ་འགགས་ཐོགས་པ་མེད།།

ཀུན་འཇུག་གང་མ་རིག་པ་གཅོད།།

ཤེས་རབ་ཆེན་པོའི་ངོ་བོ་ཉིད་ནི། ཆོས་ཐམས་ཅད་ཀྱི་མཚན་ཉིད་ལ་ཀུན་ནས་མ་རྨོངས་པར་ཐམས་ཅད་རང་གསལ་སྒྲིབ་མེད་དུ་གཟིགས་ཏེ། ཤེས་བྱ་གང་ལ་ཡང་མཁྱེན་ཆ་མ་འགགས་པར་ཐོགས་པ་མེད་པར་ཀུན་ཤེས་པ་ལ་འཇུག་པར་བྱེད་ཅིང༌། གང་སྔར་གསང་དོན་ཟབ་མོ་མི་ཤེས་པ་རྣམས་ཤེས་པར་བྱེད་དེ་མ་རིག་པ་དང་ཐེ་ཚོམ་གྱི་དྲི་མ་གཅོད་ཅིང་ཡིད་ཆེས་པའི་གདེངས་དང་ལྡན་པར་བྱེད་པ་ཉིད་ཡིན་ནོ།།

བདུན་པ་ཤེས་རབ་ངེས་པའི་འབྲས་བུ་བསྟན་པ་ནི།

སྐྱེ་མཆེད་ཀུན་ཏུ། ཞེས་པ་ནས། ཡེ་ཤེས་ཚད་མེད་པའོ། །ཞེས་པའི་བར་གྱིས་བསྟན་ཏེ།

སྐྱེ་མཆེད་ཀུན་ཏུ་འགྱུར་བ་ཉིད། །གང་མཆོད་གང་གི་ཀླུང་ཞུགས་པ།།

མཁས་པའི་ཡེ་ཤེས་ཚད་མེད་པའོ།།

ཡང་དག་པའི་ཤེས་རབ་ཆེན་པོའི་འབྲས་བུ་ནི། ཤེས་རབ་གསལ་བ་དེ་ཉིད་ཡང་དག་པའི་རྟོག་དཔྱོད་ཀྱིས་སྐྱེ་ཞིང་མཆེད་དེ་ཀུན་ཏུ་འཕེལ་ཞིང་རྒྱས་པར་གྱུར་པ་ཉིད་ཀྱི་སྒོ་ནས། གསང་སྔགས་མཆོག་གི་དོན་གང་ལ་རྟོགས་པའི་རིག་པའམ་ཡེ་ཤེས་གོང་འཕེལ་དུ་མཆེད་པ་གང་གི་བསླབ་པའི་མཐའ་ཀུན་ལ་མཁས་པར་ཆུབ་པའི་ཤེས་རབ་ཀྱིས། ཆོས་ཉིད་སེལ་མེད་པའི་དོན་གྱི་ཀླུང་དུ་གཉིས་སུ་མེད་པར་ཞུགས་པར་གྱུར་པས་འབྲས་བུ་ཐམས་ཅད་མཁྱེན་པ་དང༌། མི་དམིགས་པའི་ཡེ་ཤེས་མ་འདྲེས་ཡོངས་རྫོགས་སུ་ཐོབ་པར་འགྱུར་བའི་འདུ་ཤེས་ཀློང་དུ་ཆུད་པས་གསང་སྔགས་བླ་ན་མེད་པའི་དོན་མཆོག་གང་ལ་མཁས་ཤིང་གདེང་དུ་གྱུར་པའི་ཡེ་ཤེས་ཚད་མེད་དུ་རྒྱས་ཏེ་མུ་མཐའ་མེད་པར་འཕེལ་བར་གྱུར་པའོ།།

བརྒྱད་པ་ཤེས་རབ་མཆོག་གི་དགོས་ཆེད་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གང་ལ་ལོག་པ། ཞེས་པ་ནས། དེ་ལ་བལྟ་བར་བྱ། །ཞེས་པའི་བར་གྱིས་བསྟན་ཏེ།

གང་ལ་ལོག་པ་དེ་ཉིད་དག །དེ་ཉིད་ཕུལ་དུ་ཕྱིན་པའི་ཕྱིར།།

དམིགས་སུ་བསལ་བའི་སྒྲོན་མ་ཡི། །དེ་བཞིན་ཉིད་ལ་བལྟ་བར་བྱ།།

ཤེས་རབ་དེ་ཉིད་དམ་པ་གང་ལ་བསྟན་༼༣༣༧༽པའི་དགོས་ཆེད་ནི། ལམ་པ་དང་འགྲོ་བ་སུ་ཞིག་ལོག་པར་ལྟ་བ་ལ་གནས་ཏེ་མ་རྟོགས་པ་དེ་ཉིད་རྣམ་པར་དག་སྟེ། ཐེག་པ་ཆེན་པོའི་དོན་བླ་ན་མེད་པ་དེ་ཉིད་གདེང་དུ་ཆུད་དེ་ཕུལ་དུ་ཕྱིན་པར་བྱ་བའི་ཕྱིར་དུ། མ་རིག་པའི་ལིང་ཏོག་བསལ་བར་བྱེད་པས་དམིགས་བུ་ཡང་དག་པའི་ཤེས་རབ་མཆོག་ཏུ་གསལ་བའི་སྒྲོན་མ་ཡིས་ཆོས་ཉིད་ཇི་བཞིན་པ་གསང་སྔགས་ཀྱི་དེ་ཁོ་ན་ཉིད་དེ་ལ་མ་ནོར་བར་བལྟ་བར་བྱ་བའོ།།

གཉིས་པ་རྒྱས་པར་བཤད་པ་ལ་གཉིས་ཏེ། གཞན་སེལ་བའི་དགོས་པ་བསྟན་པ། དོན་དུ་གཉེར་བའི་དགོས་པ་བཤད་པའོ། །དང་པོ་ནི།

སྒྲོན་མའི་སྣང་བ། ཞེས་པ་ནས། གྲོང་ཁྱེར་ཆེན་པོར་འགྲོ། །ཞེས་པའི་བར་གྱིས་བསྟན་ཏེ།

སྒྲོན་མའི་སྣང་བ་མི་ཤེས་པ། །མཐོང་བྱ་ཀུན་ལ་མུན་པས་བསྒྲིབས།།

ནམས་ཀྱང་སྣང་བར་མི་འགྱུར་ཏེ། །ལོང་བའི་གྲོང་ཁྱེར་ཆེན་པོར་འགྲོ།།

འོ་ན་དེ་མེད་ན་སྐྱོན་ཅི་ཡོད་ཅེ་ན། ཡང་དག་པའི་ཤེས་རབ་ཀྱི་སྒྲོན་མའི་སྣང་བ་མི་ཤེས་པར་རྨོངས་པ་མི་ཤེས་པས་མདོངས་པར་གྱུར་པ་རྣམས་ནི་ཤེས་ཤིང་མཐོང་བར་བྱ་བ་ཐུན་མོང་དང་ཐུན་མོང་མ་ཡིན་པ་ཀུན་ལ་ཡང་རང་གི་མ་རིག་པའི་མུན་པས་བསྒྲིབས་ཏེ་ཡང་དག་པའི་དོན་མཐོང་དུ་མི་སྟེར་བས་དུས་ནམ་དུ་གྱུར་ཀྱང་གསང་སྔགས་ཀྱི་ཟབ་དོན་སྣང་ཞིང་གོ་བར་མི་འགྱུར་ཏེ། མདོངས་པའམ་ལོང་བའི་གྲོང་ཁྱེར་ཆེན་པོར་ལྟུང་སྟེ་ཁམས་གསུམ་དུ་འགྲོ་བའི་ཕྱིར་ཡང་དེ་ལ་དགོངས་ཏེ་བསྟན་པར་མཛད་པའོ།།

གཉིས་པ་དོན་དུ་གཉེར་བའི་དགོས་པ་བཤད་པ་ནི།

སྒྲོན་མ་འབར་བ། ཞེས་པ་ན། དམིགས་བུས་མཐོང་བར་འགྱུར། །ཞེས་པའི་བར་གྱིས་བསྟན་ཏེ།

སྒྲོན་མ་འབར་བ་གང་བསྲེལ་བ། །ཀུན་ལ་མུན་པ་སངས་གསལ་བའི།།

མ་ནོར་མ་བཅོས་དེ་བཞིན་ཉིད། །སྒྲོན་མ་དམིགས་བུས་མཐོང་བར་འགྱུར།།

ཤེས་རབ་ཆེན་པོ་ཡོད་པའི་ཡོན་ཏན་ནི། དེ་བས་ན་ཤེས་རབ་མཆོག་གི་སྒྲོན་མ་འོད་འབར་བ་གང་ཉིད་ལེགས་པར་སྲེལ་ཏེ་མཁྱེན་རབ་དམ་པ་དང་ལྡན་པ་ནི། ཤེས་ཤིང་མཐོང་བར་བྱ་བའི་ཆོས་ཀུན་ལ་མ་རིག་པའི་མུན་པ་དག་ཅིང་སངས་ནས་བློ་གྲོས་མཆོག་ཏུ་གསལ་བའི་སྒོ་ནས་ཆོས་ཉིད་ཇི་བཞིན་པ་རྒྱལ་བའི་དགོངས་པ་མ་ནོར་མ་བཅོས་པའི་དེ་བཞིན་ཉིད་ཀྱི་དོན་མཐར་ཐུག་པ་ཡང་སྒྲོན་མའི་དམིགས་བུས་ངེས་པར་ཁྲིད་ནས་ཡང་དག་པར་མཐོང་ཞིང་རྟོགས་པར་འགྱུར་བའི་ཕྱིར་དགོས་ཆེད་དེ་ལྟ་བུ་ལ་དགོངས་ཏེ་བསྟན་པ་ཡིན་ནོ།།

གསུམ་པ་ཞབས་བསྡུ་བ་ནི།

དེ་ལྟར་དམ་པའི། ཞེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ།

དེ་ལྟར་དམ་པའི་གྲོགས་པོ་དག །རིན་ཆེན་སྒྲོན་མ་འབར་བའི་མེ། །མུན་སྣང་དམིགས་བུ་མ་བསྲེལ་བར།།

དེ་ཉིད་གསེར་མཐོང་ག་ལ་རིགས། །གྲོགས་པོ་དག་དེ་དག་ནི་སྒྲོན་མ་དམ་པ་བསྲེལ་བར་བྱའོ། །ཞེས་དགོངས་པ་དམ་པ་ལེགས་པར་བགྲོས་པར་བྱའོ།།

༼༣༣༨༽བླ་ན་མེད་པའི་ཤེས་རབ་ཀྱི་ཚུལ་ནི་ཇི་སྐད་བསྟན་པ་དེ་ལྟར་དུ་ངེས་པ་ཡིན་པས་ལང་ཀ་ལ་སོགས་པ་དམ་པའི་གྲོགས་པོ་ཁྱོད་རྣམས་ཀྱིས་ཀྱང་ཡང་དག་པའི་ཤེས་རབ་ནོར་བུ་རིན་ཆེན་མཆོག་གི་སྒྲོན་མ་རབ་ཏུ་འབར་བའི་མེ་འོད་གསལ་བ་དེ་ཉིད་སེམས་ཀྱི་མུན་པར་སྣང་བྱེད་ཀྱི་དམིགས་བུར་མ་སྲེལ་བར་རྨོངས་པས་ནོན་པར་གྱུར་ན། དོན་ཇི་བཞིན་པའི་དེ་ཁོ་ན་ཉིད་ཀྱི་གནས་ལུགས་རང་སྣང་རིག་པའི་གསེར་བཟང་པོ་རྨད་དུ་བྱུང་བ་དེ་ཉིད་མ་ནོར་བར་མཐོང་ཞིང་རྟོགས་པར་ག་ལ་རིགས་ཏེ་རིགས་པ་མ་ཡིན་པས་དེ་ལ་ཆེད་དུ་གྱིས་ཤིག་པར་གདམས་པ་སྟེ་ཐག་ལྟ་བས་བཅད་པར་འགྱུར་རོ། །གྲོགས་པོ་དག བཤད་པ་དེ་དག་ནི། སྒྲོན་མ་དམ་པ་སྲེལ་བར་བྱའོ་ཞེས་སྔར་དམ་བཅས་པ་དེ་ཡི་དགོངས་པ་དམ་པའི་ངོ་བོ་ཉིད་ཡང་དག་པར་ནོར་བ་མེད་པར་ལེགས་པར་བགྲོས་ཏེ་བསྟན་པ་ཡིན་པར་ཤེས་པར་བྱའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པ་ཆེན་པོའི་མདོ་ལས།

རྣལ་འབྱོར་མིག་གི་སྒྲོན་མ་བསྟན་པའི་ལེའུ་སྟེ་དྲུག་ཅུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྣལ་འབྱོར་མཆོག་གི་སྣང་བྱེད་མིག་གི་སྒྲོན་མ་ཤེས་རབ་ཀྱི་སྤྱན་དང་ལྡན་པར་བྱ་བའི་ཚུལ་བསྟན་པའི་ལེའུ་སྟེ་དྲུག་ཅུ་ཐམ་པ་ཉིད་ལེགས་པར་བཤད་དེ་འགྲེལ་པའོ།། །།

ལེའུ་རེ་གཅིག་པ་རྣལ་འབྱོར་སའི་སྒྲོན་མ་བསྟན་པ།

༈ 57 དྲུག་པ་ཁྱད་པར་དུ་བླ་མར་འགྲོ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང་། ཞེས་པ་ནས། མཐོ་དམན་རིམ་པར་ཟད། །ཅེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་མངའ་བདག་ལ་སོགས་པ་དམན་པའི་སེམས་དཔའ་ཆེན་པོ་རྣམས་ཀྱིས་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཁྱད་པར་བླ་མར་བགྲོ་བར་བྱའོ། །ཞེས་དམ་བཅས་པ་དགོངས་པ་དེ་ཇི་ལྟར་ཡོངས་སུ་ཤེས་པ་བྱ། དེ་སྐད་ཅེས་གསོལ་པ་ལས། གསང་བ་པའི་བདག་པོས་སྨྲས་པ། ཀྱེ་གྲོགས་པོ་དག་ཁྱད་པར་དུ་བགྲོ་བར་བྱ་བ་དེ་ནི་ལེགས་སོ། །ཤིན་ཏུ་རབ་ལེགས་སོ། །ས་དེ་ནི་འདི་ལྟར་ས་མཁན་དམ་པ་རྣམས་ཀྱིས། རྣལ་འབྱོར་གྱི་ས་ཡོངས་སུ་སྣང་བ་ཞེས་བྱ་བའི་སྒྲོན་མ་ལེགས་པར་བཀོད་པ་ནི། འདི་ལྟ་སྟེ། ས་དང་ས་ཡི་ཁྱད་པར་ནི། །གང་འདིར་ཡོངས་ཀྱིས་མེད་པ་ལ། །ཤེས་བྱ་གཅོད་པའི་ཁྱད་པར་གྱིས།།

རང་རིག་མཐོང་དམན་རིམ་པར་ཟད།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །སྒྲོན་མ་བསྟན་མ་ཐག་པ་དེ་ནས་ཡང་འཁོར་ལང་ཀའི་མངའ་བདག་ལ་སོགས་པ་དམན་པ་དམ་པའི་སེམས་དཔའ་ཆེན་པོ་རྣམས་ཀྱིས་དགོས་པའི་དོན་གྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ལེའུ་ཞེ་ལྔ་པར། ཁྱད་པར་དུ་བླ་མར་འགྲོ་བར་བྱའོ། །ཞེས་དམ་བཅའ་བར་དགོངས་པ་དེ་ཉིད་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་གསོལ་ཏེ་ཆོས་ཀྱི་རྣམ་གྲངས་དྲུག་པ་དྲིས་པ་ལས། འཆད་པའི་སྐྱེས་བུ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་གྲོགས་པོ་དག་ཁྱད་པར་དུ་འགྲོ་བར་བྱ་བ་ཞུ་བ་དེ་ནི་རང་གི་དོན་དུ་༼༣༣༩༽ལེགས་སོ། །གཞན་དོན་དུའང་ཤིན་ཏུ་རབ་ཏུ་ལེགས་སོ། །དེ་བས་ལན་དངོས་གང་ཞེ་ན། ས་ཡི་ཁྱད་པར་འོག་ནས་གོང་དུ་བགྲོད་པར་བྱ་བ་དེ་ནི་འདི་ལྟར། དཔེར་ན་ས་གཞི་ཆེན་པོ་ལ་བརྟེན་ནས་ལོ་ཏོག་སྣང་བ་བཞིན། སྔ་མ་ལ་བརྟེན་ནས་ཕྱི་མར་སྨིན་པར་བྱེད་པའི་ཕྱིར་སའི་མིང་འཐོབ་སྟེ། དེ་ཡང་སྟོན་པ་ས་མཁན་དམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་རྣལ་འབྱོར་པ་ལམ་པ་རྣམས་ཀྱི་ས་ཡི་ཁྱད་པར་ཡོངས་སུ་སྣང་ཞིང་གསལ་བར་བྱེད་པ་ཞེས་བྱ་བའི་མཚོན་པ་ཐབས་ཀྱི་སྒྲོན་མ་ལེགས་པར་བཀོད་དེ་སྒྲོ་སྐུར་མེད་པར་རིམ་པར་ཉེ་བར་བསྟན་པ་ནི་གང་ཞེ་ན། འདི་ལྟ་སྟེ། གོང་མའི་ས་དང་འོག་མའི་ས་ཡི་ཁྱད་པར་མཐོ་དམན་ཉིད་དུ་འབྱུང་བའི་རྒྱུ་ནི། སའི་གྲངས་དང་ལྟ་སྤྱོད་ཀྱི་ཁྱད་པར་ཀུན་ཐེག་པ་ཆེན་པོ་བླ་ན་མེད་པ་གང་འདིར་ཡོངས་ཀྱིས་ཆོས་ཉིད་དུ་གཅིག་ཅིང་དོན་ལ་དབྱེར་མེད་ཡིན་པ་ལ། ཐེག་པ་ཆེན་པོའི་དོན་གྱི་ཤེས་བྱ་ཉིད་གཏན་ལ་འབེབ་པའི་ཤེས་རབ་ཀྱིས་སྒྲོ་འདོགས་གཅོད་པར་བྱེད་པའི་ཚེ་ཇི་ལྟར་རྟོགས་པའི་ཚུལ་གྱི་བློ་རྩལ་ཆེ་ཆུང་གི་ཁྱད་པར་གྱིས་རང་གི་རིག་པ་ཉིད་རྟོགས་པའི་ཤེས་རབ་ཆེ་ཆུང་དང་མཐུན་པར་མཐོ་དམན་གྱི་རིམ་པར་སྣང་བར་ཟད་ཀྱི་དེ་ལས་གཞན་པ་མེད་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། སའི་ཁྱད་པར་འབྱུང་བ་སྤྱིར་བསྟན་པ། ཇི་ལྟར་འབྱུང་བའི་བྱེ་བྲག་སོ་སོར་བཤད་པའོ། །དང་པོ་ལ་བཞི་སྟེ། རྒྱལ་པོའི་དཀོར་མཛོད་ཀྱི་དཔེས་ཁྱད་པར་ཡོད་པར་བསྟན་པ། སྐས་ཀྱི་གདང་བུའི་དཔེས་ཁྱད་པར་ཡོད་པར་བསྟན་པ། ཁང་པ་སྒོ་མངས་ཀྱི་དཔེས་ཁྱད་པར་ཡོད་པར་བསྟན་པ། རི་དང་མིའི་དཔེས་ཁྱད་པར་ཡོད་པར་བསྟན་པའོ། །དང་པོ་ནི།

དཔེར་ན་རྒྱལ་པོའི། ཞེས་པ་ནས། འཇུག་སྒོ་ཀུན་ན་སྤྱོད། །ཅེས་པའི་བར་གྱིས་བསྟན་ཏེ།

དཔེར་ན་རྒྱལ་པོའི་དཀོར་མཛོད་ནས། །ཆེ་ཆུང་ཐབས་འདོད་གང་སུ་དག །དཀའ་ཐུབ་ཕྱི་ནང་ཁྱད་པར་གྱིས།།

སྤྱོད་སྒོ་འཇུག་པའི་ལས་ཐབས་ལས། །མཐོ་དམན་རྩལ་གྱིས་གང་ལེན་པ། །རྒྱལ་པོ་གཅིག་ལ་སྤྱོད་ན་ཡང་།།

རིན་ཆེན་སྣང་འགའི་ཁྱད་པར་དག །ཐབས་ཆེན་སྒོ་དགུ་སོ་སོར་སྤྱོད། །རྒྱལ་པོར་གྱུར་ན་དེ་ཀུན་ལ།།

དབང་སྒྱུར་བྱེད་པའི་ བདག་པོ་ཡིན། །མི་གནས་མ་བཅོས་དེ་བཞིན་ཉིད། །ཤེས་བྱ་དེ་ལས་མེད་པ ་ལ།།

གང་འདི་རྩལ་གྱི་ཁྱད་པར་གྱིས། །སོ་སོའི་འཇུག་སྒོ་ཀུན་ན་སྤྱོད།།

དེ་ཡང་སའི་ཁྱད་པར་ཉེ་བར་མཚོན་པ་ནི། དཔེར་ན་རྒྱལ་པོ་ཆེན་པོའི་དཀོར་མཛོད་ཀྱི་ནང་ནས་ནོར་ཆེ་ཆུང་ཇི་ཙམ་ཞིག་དབང་བ་ཐབས་ཀྱིས་བླངས་ནས་སྤྱོད་པར་འདོད་པ་གང་སུ་ཡང་རུང་བ་དག་ནི། མི་རིགས་བཞི་ལས་མངའ་འོག་ཏུ་གྱུར་པ་དག་ནི། རྒྱལ་པོའི་ཆོས་ཀྱིས་ནོར་སྲུན་པ་སོགས་དཀའ་བ་ཐུབ་པ་དང་མི་ཐུབ་པའི་དབང་༼༣༤༠༽ལས་གོ་ཆོད་པ་དང་མི་ཆོད་པ་ཡི་འབངས་རིགས་རང་རེ་ཕྱི་འཁོར་དང་ནང་འཁོར་མཐོ་དམན་གྱི་ཁྱད་པར་ལྟར་གྱིས་དཀོར་ནོར་ལ་སྤྱོད་པ་དང་སྒོ་སོ་སོར་འཇུག་པའི་སྐལ་བ་དང་བྱ་བྱེད་ཀྱི་ལས་དང་ཐབས་ཀྱི་རིམ་པ་ལས་དབང་ཆེ་ཆུང་དང་ངོ་མཐོ་དམན་གྱི་ཁྱད་པར་དང་མཐུན་པར་རང་རང་གི་རྩལ་གྱིས་རིན་པོ་ཆེ་དང་ཡིག་ཚང་གང་ཞིག་ལེན་པ་ན་ཡང༌། གང་ལས་བླང་བར་བྱ་བའི་ཡུལ་རྒྱལ་པོ་གཅིག་གི་ནོར་ལ་སྤྱོད་པ་ལས་མེད་ན་ཡང༌། གསེར་དངུལ་དང་གཡུ་ལ་སོགས་པའི་རིན་ཆེན་སྣ་འགའི་རྣམ་གྲངས་ཐོབ་པའི་ཁྱད་པར་ལས་ཐབས་ཆེ་ཆུང་གང་གིས་ཐོབ་པའི་རྟགས་དེ་དག་དང་མཐུན་པར་རང་སྐལ་གང་ལ་དབང་བ་ལྟར་ཐབས་ཆེན་སྒོ་རྒུ་སོ་སོར་ཡིག་ཚང་སྒོ་རྒུའི་རིམ་པ་ལྟར་སྤྱོད་པ་ཉིད་དོ། །འདིར་རྒུ་ཞེས་པ་ཡོད་དོ་ཅོག་ལྟ་བུའི་དོན་ཏེ། གྲངས་ངེས་མེད་པར་དོན་ཡང་ཐེག་པ་མཐའ་ཡས་པ་དང་སྦྱར། ཞེས་མཆན་རྙིང་ལས་འབྱུང་ངོ༌། །དེ་ནི་རིམས་ཀྱིས་པའི་དཔེ་ཡིན་ནོ། །གཅིག་ཆར་བའི་དཔེ་ནི། གལ་ཏེ་རྒྱལ་པོ་ཆེན་པོར་གྱུར་པ་ཞིག་ན་དེ་ནི་ནོར་ཐམས་ཅད་ཀུན་ལ་རང་དབང་དུ་མངའ་བསྒྱུར་བྱེད་པའི་བདག་པོ་ཉིད་དུ་འགྱུར་བ་ཡིན་ནོ། །དཔེ་དེ་བཞིན་དུ། མཚན་ཉིད་གང་དུའང་མི་ཟིན་པས་མི་གནས་པའི་གསང་བ་ཆོས་ཉིད་མ་བཅོས་པའི་དེ་བཞིན་ཉིད་ནི་ཐེག་པ་ཆེན་པོ་སྟེ། ཤེས་བྱ་ཐམས་ཅད་དེ་ཡི་ངང་ལས་གཞན་དུ་མེད་པ་ལ། གང་འདི་ལ་རང་རང་གི་རིག་པའི་ཤེས་རབ་ཀྱིས་ཇི་ལྟར་རྟོགས་པའི་བློ་རྩལ་གྱི་ནུས་པ་ཆེ་ཆུང་གི་ཁྱད་པར་གྱིས་རིམས་ཀྱིས་པ་ལ་སོ་སོའི་ལྟ་སྤྱོད་དང་ཏིང་ངེ་འཛིན་གྱི་འཇུག་སྒོ་མི་མཐུན་པར་སྣ་ཚོགས་སུ་སྣང་ལ། གཅིག་ཆར་བས་ནི་དེ་ཀུན་ལ་རིམ་པ་ནས་འཇུག་མི་དགོས་པར་རྟོགས་པ་རྫོགས་པར་འགྱུར་བའི་ཕྱིར་ཁྱད་པར་སོ་སོར་སྤྱོད་པ་ནི་དེ་ལྟར་ངེས་པ་ཡིན་ནོ།།

གཉིས་པ་སྐས་ཀྱི་གདང་བུའི་དཔེས་ཁྱད་པར་ཡོད་པར་བསྟན་པ་ནི།

དེ་ཡི་དེ་ཉིད། ཅེས་པ་ནས། དེ་ལྟར་སྣང་བ་ཡིན། །ཞེས་པའི་བར་གྱིས་བསྟན་ཏེ།

དེ་ཡི་དེ་ཉིད་དེ་གཅིག་ལ། །རྩལ་འཕང་མཐོ་དམན་ཁྱད་པར་གྱིས།།

ས་ཡི་གོ་འཕང་ཁྱད་པར་དུ། །རིམ་པ་དེ་ལྟ་སྣང་བ་ཡིན།།

དེ་བས་ན་རྟོགས་པར་བྱ་བའི་དོན་དེ་ཡི་ངོ་བོ་ནི་རང་རིག་པ་དེ་བཞིན་ཉིད་ཆོས་ཉིད་དབྱིངས་ཀྱི་རང་བཞིན་དེ་ཁོ་ན་ཉིད་ཀྱི་ངང་གཅིག་ཏུ་དབྱེར་མེད་མཉམ་པ་ཆེན་པོར་གནས་པ་ལ། དེ་ཉིད་རྟོགས་པའི་ཚུལ་གྱིས་ལྟ་བའི་རྩལ་འཕང་མཐོ་དམན་༼༣༤༡༽གྱི་ཁྱད་པར་གྱིས། ཐེག་པའི་རིམ་པ་དང་ས་ཡི་གོ་འཕང་ཀྱང་མཐོ་དམན་གྱི་ཁྱད་པར་ཅན་དུ་གྱུར་ཏེ། རྒྱུ་རིམ་གྱིས་རྩོལ་བ་དང་འབྲས་བུ་ཅིག་ཆར་བ་གཉིས་སུ་སྣང་ལ། དེར་ཡང་རིམ་པར་བགྲོད་པའི་སྐབས་ཉིད་དུ་དཔེར་ན་སྐས་ཀྱི་གདང་བུ་བཞིན་དུ་ཡན་ལག་གི་རིམ་པ་ཡང་འགྱུར་དབང་མ་ངེས་པ་ནས་རྫོགས་པ་སྤྱིར་ཆིབས་ཀྱི་བར་དུ་མཐོ་དམན་གྱི་ཁྱད་པར་དེ་ལྟར་དུ་སྣང་བ་ཡིན་པས་སོ་སོར་འབྱུང་ཞིང་བསྟན་པའོ།།

གསུམ་པ་ཁང་པ་སྒོ་མངས་ཀྱི་དཔེས་ཁྱད་པར་ཡོད་པར་བསྟན་པ་ནི།

གང་འདིར་ཐམས་ཅད། ཅེས་པ་ནས། ཐ་དད་ཡོངས་ཀྱིས་མེད། །ཅེས་པའི་བར་གྱིས་བསྟན་ཏེ།

གང་འདིར་ཐམས་ཅད་གཅིག་པ་ལ། །དེ་མཐོང་མི་མཐུན་དེ་དབང་གིས། །དཔེར་ན་འབྱུང་གནས་སྒོ་མངས་བཞིན། །ས་དང་རྣམ་ཐར་སོ་སོའི་སྒོ །གཅིག་ལ་སྣ་ཚོགས་དེ་ལྟར་སྣང་། །ས་དང་རྣམ་ཐར་གང་དག་ལ། །འཇུག་པ་ལ་སོགས་མ་སྦྱངས་ཀྱང་། །ཀུན་གྱི་རྩ་བ་འདིར་བཅད་པས། །གཅིག་སྟེ་ཐ་དད་ཡོངས་ཀྱིས་མེད།།

གང་གཞི་མཉམ་པ་ཉིད་ཀྱི་ཆོས་ཉིད་འདིར་ཐམས་ཅད་ཀུན་གནས་ལུགས་ཇི་ལྟ་བའི་ངང་དུ་གཅིག་པ་ལ་ཐ་དད་ཀྱི་སྤྲོས་པ་མེད་ན་ཡང༌། གནས་ལུགས་དེ་ཉིད་མཐོང་བ་དང་རྟོགས་པའི་ཁྱད་པར་མི་མཐུན་པ་དེ་ཡི་དབང་གིས་སོ་སོར་གྱུར་པ་ནི་དཔེར་ན་ཕྱོགས་ཀུན་ནས་འབྱུང་ཞིང་མང་པོ་གནས་པའི་ཁང་པ་ཆེན་པོ་སྒོ་མངས་ཀྱི་དཔེ་བཞིན་དུ་ས་ཡི་རིམ་པ་དང་རྣམ་པར་ཐར་པའི་ཐེག་པའི་རྣམ་གྲངས་སོ་སོའི་སྒོ་མང་པོ་བློ་རིམ་དང་མཐུན་པར་གཞིའི་ཆོས་ཉིད་ཀུན་གཞི་བྱང་ཆུབ་ཀྱི་སེམས་གཅིག་གི་ངང་ལ་མི་མཐུན་པ་སྣ་ཚོགས་པ་དེ་ལྟར་མཐོང་སྟངས་ཐ་དད་པར་སྣང་བ་ནི་རིམས་ཀྱིས་པའི་སྣང་ཚུལ་ལོ། །འོན་ཏེ་ན་གྲུབ་པའི་མཐའ་ཡང་ཐ་དད་པར་འགྱུར་རོ་བར་དོགས་པ་ལ། ཐེག་པ་ཆེན་པོ་གསང་སྔགས་གཅིག་ཆར་བས་ནི་ཚེ་འདིར་ས་དང་རྣམ་པར་ཐར་པའི་སྒོ་གང་དག་ཇི་སྙེད་པ་ལ་རྒྱུ་མཚན་ཉིད་ནས་རིམ་པར་འཇུག་པ་ལ་སོགས་པས་མ་སྦྱངས་མ་བཙལ་ཀྱང༌། ཐེག་པ་ཆེན་པོ་གསང་ཆེན་ངེས་པའི་སྙིང་པོ་ནི་ཀུན་གྱི་དོན་གྱི་ཡང་གཞིར་གྱུར་པས་རྩ་བ་ཆེན་པོ་འདིར་བཅད་དེ་མ་འདྲེས་ཡོངས་རྫོགས་སུ་རྟོགས་པར་གྱུར་ན་གཞན་ཀུན་ཀྱང་རྟོགས་པ་ཡིན་པས་གསར་དུ་རྟོགས་པར་བྱ་བ་མི་དགོས་ལ། དེས་ན་ཀུན་གྱི་གྲུབ་པའི་མཐའ་ཡང་འདིར་གཅིག་སྟེ་ཐེག་པ་ཐ་དད་ཀྱི་རིམ་པ་སྣ་ཚོགས་སུ་གྲུབ་པ་ནི་གནས་ལུགས་ལ་ཡོངས་ཀྱིས་མེད་པས་གྲུབ་པའི་མཐའ་ཆེན་པོ་འདིར་ངང་གིས་དབྱེར་མེད་ཅིང་གཅིག་པ་ཁོ་ནའོ།།

བཞི་པ་རི་དང་མིའི་དཔེས་ཁྱད་པར་ཡོད་པར་བསྟན་པ་ནི།

དེ་ནི་རི་དང༌། ཞེས་པ་ནས། དེ་ལྟར་ཡོད་པ་ཡིན། །ཞེས་པའི་བར་གྱིས་བསྟན་ཏེ།

དེ་ནི་རི་དང་ལྷུན་པོ་དང་། །ཀུན་ཏུ་རྒྱུ་དང་གཞོན་ནུ་ལྟར།།

མཐོང་ཐོས་སྟོན་པའི་ཁྱད་པར་ནི། །དོན་གྱིས་དེ་ལྟར་ཡོད་པ་ཡིན།།

དེར་ཡང་མ་ཟད་ཁྱད་པར་དེ་ནི་དཔེར་ན་རི་ཕལ་པའི་རྩེ་ནས་མཐོང་བ་མི་གསལ་བ་དང༌། ལྷུན་པོ་མཆོག་རབ་ཀྱི་རྩེ་ནས་གླིང་རྣམས་ཐམས་ཅད་གསལ་བར་མཐོང་བ་ལྟ་བུ་དང༌། ཚོང་དཔོན་ལྟ་བུ་ཀུན་ཏུ་རྒྱུ་བའི་མིས་ཡུལ་ཇི་སྙེད་པ་བགྲོད་པས་ཐོས་པ་ཆེ་བ་དང༌། གཞོན་ནུ་ན་ཚོད་དར་ལ་བབ་པ་རང་རྩར་གནས་པར་དེ་ལྟ་བུའི་ཐོས་པ་མེད་པའི་ཁྱད་པར་ཡོད་པ་ལྟར་དུ། རྒྱུ་འབྲས་ཀྱི་ཐེག་པ་གཞན་གྱིས་ས་དང་རྣམ་ཐར་གྱི་ཁྱད་པར་མཐོང་ཐོས་སྟོན་པ་དང༌། ཐེག་མཆོག་འདིའི་ས་དང་རྣམ་པར་ཐར་པའི་གནས་ཀྱི་ཁྱད་པར་ནི། རིག་པ་དང་མ་རིག་པའི་དོན་གྱིས་ཇི་ལྟ་བར་མཐོང་བ་དང༌། མཚོན་པའི་ཚིག་ཐོས་པ་ཆེ་བ་དང༌། དེ་ལྟར་སྟོན་པའི་ཁྱད་པར་དང་སའི་རིམ་པ་དང་ཁྱད་པར་ཡང་མཐོ་དམན་ཡོད་པ་ཡིན་པས་རིམ་པར་བསྟན་པ་ཡིན་ནོ།།

གཉིས་པ་ཇི་ལྟར་འབྱུང་བའི་བྱེ་བྲག་སོ་སོར་བཤད་པ་ལ་གཉིས་ཏེ། སའི་ཁྱད་པར་ཤེས་པར་གདམས་པ། ཁྱད་པར་ཅན་གྱི་སའི་རིམ་པ་དངོས་བཤད་པའོ། །དང་པོ་ནི།

དེ་ནས་ཆོས་རྣམས། ཞེས་པ་ནས། བདེར་རྙེད་གྲུབ་པའོ། །ཞེས་པའི་བར་གྱིས་བསྟན་ཏེ།

དེས་ན་ཆོས་རྣམས་ཐམས་ཅད་ཀྱི། །གནས་པའི་ས་ཉིད་སེམས་ཡིན་པས། །ནམ་མཁའ་ལྟ་བུའི་དཔེར་མཚོན་ཏེ། །ཀུན་གྱིས་འདི་ནི་ཤེས་པར་བྱ། །འདི་ལྟར་གང་ཤེས་རྣལ་འབྱོར་པ། །ལམ་གྱི་ཐབས་ལ་མཁས་པ་ཡི།།

ལམ་སྟོར་ལམ་བཙལ་ལམ་རྙེད་པས། །ཉེ་ལམ་བདེར་རྙེད་གྲུབ་པའོ།།

ས་ལ་ཁྱད་པར་ཡོད་པའི་ཚུལ་དེས་ན་ཆོས་རྣམས་ཐམས་ཅད་ཀུན་གྱི་གནས་ཤིང་རྟེན་པའི་ས་ཆེན་པོ་ཉིད་ནི་གསང་སྔགས་ཐེག་པ་ཆེན་པོའི་དོན་བླ་ན་མེད་པ་བྱང་ཆུབ་ཀྱི་སེམས་མཉམ་པ་ཉིད་འདི་ཁོ་ན་ཡིན་པས། མཐུན་པ་དཔེ་ཡིས་མཚོན་བྱེད་ནམས་མཁའ་ལྟ་བུ་དཔེས་ཉེ་བར་མཚོན་ཏེ། རང་རིག་པའི་སེམས་ཉིད་ཀུན་གཞི་ཀུན་གྱིས་ཆེན་པོ་འདི་ཉིད་ཡང་དག་པར་ཤེས་ཤིང་རྟོགས་པར་བྱའོ། །འདི་ཤེས་པའི་ཡོན་ཏན་གང་ཞེ་ན། འདི་ལྟར་བྱང་ཆུབ་སེམས་ཀྱི་མཚན་ཉིད་རྒྱུད་འདིར་བསྟན་པ་ལྟ་བུར་གང་ཤེས་པའི་རྣལ་འབྱོར་དམ་པ་སུ་ཡིན་ཀྱང་ལམ་ཁྱད་པར་ཅན་གྱི་ཐབས་ལ་མཁས་པ་ཡི་གང་ཟག་སྟེ། དེས་ཡང་དག་པའི་ལམ་མུན་པའི་ཁམས་སུ་སྟོར་རླག་ཏུ་གྱུར་པ་ཉིད་སླར་ལམ་བཙལ་བ་ན་ལམ་མཆོག་མ་ནོར་བར་རྙེད་པ་ཡིན་པས་གཞན་དུ་བཙལ་བས་མི་རྙེད་པའི་ཕྱིར་ཉེ་ལམ་དམ་པ་བདེར་ཞེས་པ་བདེ་བར་རྙེད་དེ་སེམས་ཀྱི་ཆོས་ཉིད་རྟོགས་ནས་ངེས་པར་གྲུབ་ཅིང་ཐོབ་པའོ།།

གཉིས་པ་ཁྱད་པར་ཅན་གྱི་སའི་རིམ་པ་དངོས་བཤད་པ་ལ་གཉིས་ཏེ། རིམས་ཀྱིས་པའི་ས་བཤད་པ། ཅིག་ཆར་བའི་ས་བཤད་༼༣༤༣༽པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

གང་རྙེད་དེར་རྙེད། ཅེས་པ་ནས། བཅུ་ཕྲག་གཅིག་གིས་རྫོགས། །ཞེས་པའི་བར་གྱིས་བསྟན་ཏེ།

གང་རྙེད་དེར་རྟེན་དེར་གནས་པ། །རྣལ་འབྱོར་སྤྱོད་པའི་ས་པ་སྟེ། །ས་ཀུན་གཅིག་ཏུ་ཡོངས་རྫོགས་པ།།

རིག་པ་མཆོག་འབྲིང་ཐ་མའི་ཕྱིར། །གཅིག་ལའང་ཁྱད་པར་བཅུར་སྣང་བ། །གང་དག་ཆེད་དུ་བགྲང་བར་བྱ།།

འདི་དག་གནས་འཛིན་སྤྱོད་པའི་ས། །རྣམ་པ་བཅུ་ཕྲག་གཅིག་གིས་རྫོགས།།

རྣལ་འབྱོར་པ་གང་སུ་ཞིག་གིས་ཉེ་ལམ་མཆོག་ཉིད་རྙེད་པ་ཡང་སེམས་ཀྱི་ཆོས་ཉིད་ཀྱི་དོན་དེར་རྙེད་ཅིང་མཐོང་བ་ནི་དོན་ཆེན་པོ་དེར་གནས་ཏེ་འདུག་པའི་ཕྱིར་ན་སྐྱེས་བུ་དམ་པ་རྣལ་འབྱོར་མཆོག་གི་དོན་ལ་སྤྱོད་པའི་ས་པ་ཡིན་ཏེ། དེ་ལའང་སྤྱིར་རིམས་ཀྱིས་པ་དང་ཅིག་ཆར་བ་གཉིས་ལས་ཅིག་ཆར་བ་ལ་ས་ཡི་རིམ་པ་ཀུན་རང་རིག་པའི་ཡེ་ཤེས་ཆེན་པོ་གཅིག་ཏུ་ཡོངས་སུ་རྫོགས་ཤིང་དེ་ལ་འདུས་པ་ཡིན་ཀྱང༌། རིམས་ཀྱིས་པའི་དབང་དུ་རྣམ་པའི་ཁྱད་པར་གྱི་གཞི་སྟོན་པ་ནི་རང་བྱུང་གི་རིག་པ་རྟོགས་པའི་ཤེས་རབ་མཆོག་གམ་རབ་ཏུ་གྱུར་པ་དང་འབྲིང་པོ་དང་ཐ་མའི་རིམ་པ་ཡོད་པའི་ཕྱིར། ཆོས་ཉིད་བྱང་ཆུབ་ཀྱི་སེམས་སུ་གཅིག་ཀྱང༌། རབ་ལ་ལམ་ལྔ་ལ་རྣལ་འབྱོར་ལྔར་སྣང༌། འབྲིང་ལ་སའི་ཁྱད་པར་ལྟར་རྣལ་འབྱོར་བཅུར་སྣང༌། ཐ་མ་ལ་རྣལ་འབྱོར་སུམ་ཅུ་སོ་བཞིའམ་བཞི་བཅུར་དབྱེ་བ་འབྱུང་བའོ། །དེ་ཡང་རིམ་པར་འཇུག་པ་གང་དག་གི་དོན་གྱི་ཆེད་དུ་དང་པོ་ལྔ་གཞན་ན་གསལ་བས་འདིར་དང་པོ་ལྔའི་གཞི་ལ་བརྟེན་ནས་ཕྱི་མ་གཉིས་ཀྱི་ངོ་བོ་རྒྱས་པར་བགྲང་སྟེ་བསྟན་པར་བྱའོ་ཞེས་དམ་བཅའ་བར་མཛད་དོ། །དེ་ལྟར་དམ་བཅས་ནས་ངེས་ཚིག་གི་ཚུལ་གྱིས་བསྟན་པ་འདི་དག་ལ་གནས་པ་དང་འདི་དག་གིས་འཛིན་པ་དང་འདི་དག་གི་དོན་ལ་སྤྱོད་པའི་ཕྱིར་ས་གཞི་དང་འདྲ་བས་ན་ས་ཞེས་བྱ་སྟེ་རྣམ་གྲངས་བསྟན་པ་ནི་བཅུ་ཕྲག་གཅིག་གིས་ཡོངས་སུ་རྫོགས་ཏེ་མཐར་ཐུག་པར་འགྱུར་རོ། །དེ་ལ་འདིར་ཐུན་མོང་བྱང་ཆུབ་སེམས་དཔའི་ས་བཅུ་དང་། ཁྱད་པར་གསང་སྔགས་ནང་པའི་ས་བཅུ་ལས། འདིར་ཁྱད་པར་དུ་འཕགས་པའི་ས་བཅུ་བསྙད་དེ། ཐུན་མོང་མ་ཡིན་པ་ལུང་ཆེན་གསང་སྔགས་མཆོག་གི་ལམ་ཤ་སྟག་ཏུ་འགྱུར་ཏེ། ཐུན་མོང་གི་རིམ་པར་བརྒྱུད་པའང་འགོག་པ་མ་ཡིན་ནོ། །འདིར་གཞུང་བཙན་པར་བྱ་བའི་ཆེད་དུ་གསང་སྔགས་རྗེས་སུ་རྣལ་འབྱོར་གྱི་༼༣༤༤༽ལམ་ཉིད་དུ་འཇལ་བར་སྦྱར་ཏེ་མཚན་བཅས་མཚན་མེད་གཉིས་ཀ་ལ་ལན་གཉིས་བཤད་དོ།།

གཉིས་པ་རྒྱས་པར་བཤད་པ་ལ་བཅུ་སྟེ། ས་བཅུ་ལམ་ལྔར་སྡུད་པ་ནི་ཚོགས་ལམ་ས་གཉིས་ཀྱི་བདག་ཉིད་དུ་བཤད་པ། སྦྱོར་ལམ་ས་གསུམ་གྱི་བདག་ཉིད་དུ་བཤད་པ། མཐོང་ལམ་ས་གཅིག་གི་བདག་ཉིད་དུ་བཤད་པ། སྒོམ་ལམ་ས་གཅིག་གི་བདག་ཉིད་དུ་བཤད་པ། མཐར་ལམ་ས་གསུམ་གྱི་བདག་ཉིད་དུ་བཤད་པའོ། །དང་པོ་ལ་གཉིས་ཏེ། འགྱུར་དབང་མ་ངེས་པའི་ས་བསྟན་པ། བརྟེན་པ་གཞིའི་ས་བཤད་པའོ། །དང་པོ་ནི།

འགྱུར་དབང་མ་ངེས། ཞེས་པ་ནས། སྤྱོད་པའི་ས་ཞེས་བྱ། །ཞེས་པའི་བར་གྱིས་བསྟན་ཏེ།

འགྱུར་དབང་མ་ངེས་ས་འདི་ལ། །བཅོས་མ་ཕྲ་མེན་སྤྱོད་པ་དང་། །ཚུལ་རྟགས་འཛིན་དང་སྤྱོད་པ་དང་། །ལེགས་པར་འདུན་པའི་རྣལ་འབྱོར་ལྔ། །འཇུག་ལྡོག་ལྟུང་དང་བཅས་པ་ཡི། །ཀུན་ཏུ་འཁོར་ཞིང་མ་ངེས་པའོ། །འདུན་པ་སེམས་དཔའི་རྣལ་འབྱོར་པ། །གནས་ཞིང་སྤྱོད་པའི་ས་ཞེས་བྱ།།

གསང་སྔགས་ངེས་དོན་ལ་འཇུག་པའི་རྒྱུ་སྟེ། རྒྱུ་རྐྱེན་རྣམས་ཀྱིས་ཉན་རང་བྱང་སེམས་ཐུན་མོང་གི་ས་དང་སོ་སོ་སྐྱེ་བོ་པ་གང་ཡང་རུང་བ་ལས་ཐེག་པ་ཆེན་པོ་གསང་བ་དམ་པ་ལ་བློ་འགྱུར་ཡང༌། ད་དུང་ཐེག་པ་ཆེན་པོ་ལ་ཇི་ལྟ་བ་བཞིན་སྤྱོད་པའི་གདེངས་མེད་པས་རྐྱེན་དབང་ལ་རག་ལས་ཤིང་རིགས་མ་ངེས་པ་ལ་གནས་ཏེ་རྟེན་པའང་ས་ཞེས་བྱ་བར་དེས་གོང་དུ་སྐྱེས་པས་མིང་འགྲུབ་སྟེ་འཆད་པའང་རྗེས་སུ་མཐུན་པའོ། །གཞི་འདི་ལ་ཉེ་རིང་དང་མཐོ་དམན་གྱི་བྱེ་བྲག་གིས་རྣལ་འབྱོར་ལྔ་སྟེ། ཐོག་མར་བློ་གྱེན་དུ་འགྱུར་བའི་རྒྱུས་གསང་སྔགས་ཀྱི་དོན་བློ་ལ་མ་ཤར་ཡང༌། ལྷ་བསྒོམ་པ་དང་བསམ་དཔྱོད་རྣམས་གསང་བ་དམ་པའི་ཚུལ་དུ་བསྒྱུར་ནས་སྤྱོད་པ་ལ་དགའ་བས་བཅོས་མ་ཙམ་གྱི་རྣལ་འབྱོར་དོན་གསལ་བ་མེད་པ་དང༌། སྒོ་གསུམ་གྱི་སྤྱོད་པ་གསང་བའི་ཚུལ་དེར་འཇུག་པ་དང་གཞན་འདྲེན་མར་སྤྱོད་ཅིང་བསྒོམ་པའང་རྟོག་པ་དང་འདྲེན་མར་རྒྱུ་བས་ཕྲ་མེན་སྤྱོད་པའི་རྣལ་འབྱོར་དུ་བ་ལྟ་བུ་དང༌། གསང་སྔགས་ལ་མོས་པས་དེའི་ཚུལ་རྟགས་དང་ལྷའི་ཆ་ལུགས་འཛིན་པའི་རྣལ་འབྱོར་སྨིག་རྒྱུ་ལྟ་བུ་དང་དེ་བས་ཀྱང་ཁྱད་པར་དུ་གསང་བའི་ལྷ་དང་སྔགས་དོན་ལ་ཤིན་ཏུ་མོས་པའི་བསམ་པ་ལ་སྤྱོད་པར་སྒོམ་པའི་རྣལ་འབྱོར་སྤྲིན་ཕུང་ལྟ་བུ་དང༌། གསང་སྔགས་ལ་སོམ་ཉི་དང་ཐེ་ཚོམ་གྱི་དྲི་མ་དང་བྲལ་བས་ལེགས་པར་འདུན་པར་བྱེད་ཅིང་ལྷ་བསྒོམ་པའི་རྣལ་འབྱོར་མར་མེ་ལྟ་བུ་དང་ལྔའོ། །དེ་རྣམས་༼༣༤༥༽ལ་ཏིང་ངེ་འཛིན་ཡང་དག་པ་མེད་ཀྱང་སྐབས་ཀྱི་བསམ་པ་དང་ལྷ་སྒོམ་པ་ལ་གནས་པའང་བྱ་བས་ཡིད་ལ་བྱེད་པའི་ཏིང་ངེ་འཛིན་ཡོད་པས་རྣལ་འབྱོར་གྱི་མིང་ཡང་ངེས་པར་འགྲུབ་བོ། །དེ་དག་ལ་ནི་གསང་སྔགས་ལ་འཇུག་པའང་ཡོད་ཅིང༌། ཞུགས་ནས་སླར་ལྡོག་པ་དང༌། དེས་དབང་ལས་ངན་འགྲོར་ལྟུང་བ་དང་བཅས་པ་ཡིས་ཐེག་པའི་གནས་ཀུན་ཏུ་འཁོར་ཞིང་འཁྱམ་སྟེ་རིགས་མ་ངེས་པ་ཡིན་པས་ལས་དང་པོ་པར་གྱུར་པའི་ས་འདིའི་མིང་གི་ངེས་ཚིག་ཀྱང་འགྲུབ་པའོ། །འདིར་རྣལ་འབྱོར་ལྔ་དང་བཅུ་ལས། དེ་དག་གི་དོན་ལ་སྒོམ་མོ་སྙམ་དུ་འདུན་པ་སེམས་པའི་རྣལ་འབྱོར་ཉིད་བཤད་པའི་སྐབས་དེ་ས་འདི་ལ་བརྟེན་པའི་ཕྱིར་ས་པ་དེ་ལ་རྣལ་འབྱོར་དྲུག་གོ །དེ་བས་ན་དེ་དག་ལ་རྟེན་ནས་གནས་ཤིང་མོས་པ་སྤྱོད་པའི་ས་ཞེས་བྱ་བ་གྲངས་དང་པོ་ཡིན་ནོ། །འདི་ལའང་མཚན་བཅས་ལྷ་བསྒོམ་པ་དང་། མཚན་མེད་ཆོས་ཉིད་བསྒོམ་པ་གཉིས་ལས། དང་པོ་ཡི་གེའི་རྗེས་སུ་འཇུག་པ་ལྷ་བསྒོམ་པའི་དབང་དུ། ཀུན་འདུས་ལས། དེས་ན་ཏིང་འཛིན་ཁྱད་པར་ཡང༌། །དབྱིངས་ཉིད་གཅིག་ལ་སྒོམ་མོད་ཀྱི། །རྣལ་འབྱོར་རྩལ་གྱིས་ཁྱད་པར་གྱིས། །བསམ་པའི་ཡུལ་ནི་སྣ་ཚོགས་ཏེ། །དང་པོའི་ས་ལ་གནས་པ་ཡི། །བརྩམ་པ་ལས་ཀྱི་རྣལ་འབྱོར་པ། །འདུན་པ་སེམས་ཀྱི་རྣལ་འབྱོར་ལས། །སོགས་པའི་རྣལ་འབྱོར་རྣམ་དྲུག་པོ། །ཤེས་རབ་བརྩལ་གྱི་འཕང་དམས་པས། །ཏིང་འཛིན་རྩལ་ཡང་ཆུང་བ་སྟེ། །དོན་ལ་མཐོང་བར་མི་འགྱུར་ཏེ། །རང་གི་མོས་པའི་ལྷ་བསྒོམ་ན། །ལྷ་ཡི་ས་བོན་གང་ཡིན་པ། །ཁ་དོག་ཚོན་གྱིས་ཕྱེ་ནས་ནི། །སྣ་ཡི་དབུགས་ལ་རྒྱུ་བྱས་ཏེ། །དབུགས་ཀྱི་ཡུལ་དུ་གྱུར་ཚད་དུ། །ཟུང་སྒྲིལ་ཕར་འཕྲོ་གསལ་བ་ལས། །འཕྲོ་འདུའི་གནས་སུ་བསྐྱེད་པར་བྱ། །རང་གི་ཆག་ཚད་དང་སྦྱར་བའི། །སྐུ་ཡི་ཁྱོན་ཡང་དེ་ཙམ་མོ། །ཞེས་གསུངས་ཏེ། ལུང་འདིའི་མདོར་བསྟན་ཐུན་མོང་ཡིན་ཀྱང༌། རྒྱས་བཤད་ནས་ལྷ་དང་སྦྱར་བར་གསལ་བས། དེ་ལྟར་ན་འདི་ལ་རྣལ་འབྱོར་དྲུག་སྟེ། འདུན་པ་སེམས་པའི་རྣལ་འབྱོར་ནི། ཉམས་གཡོ་བ་མི་བརྟན་པ་ལྷ་ཁ་དོག་ཙམ་ལས་དབྱིབས་མི་གསལ་བར་༼༣༤༦༽ཡིད་ལ་བྱེད་པ་ཙམ་མོ། །བཅོས་མའི་རྣལ་འབྱོར་ནི། ཉམས་གཡོ་བ་བརྟན་པ་ལྷ་རབ་རིབ་ཙམ་ལ་སེམས་བཅོས་པའོ། །ཕྲ་མེན་སྤྱོད་པའི་རྣལ་འབྱོར་ནི། ཉམས་ཐོབ་པ་ལྷ་རེས་གསལ་རེས་མི་གསལ་བར་འདྲེས་མའོ། །ཚུལ་རྟགས་འཛིན་པའི་རྣལ་འབྱོར་ནི། ཉམས་གོམས་པ་ལྷ་རྒྱན་ཆས་མི་གསལ་ཏེ་ལྷའི་ཚུལ་འཛིན་པའོ། །མོས་པའི་རྣལ་འབྱོར་ནི། ཉམས་བརྟན་པ་ལྷ་རྒྱན་ཆས་བག་རེ་གསལ་བ་ལ་མོས་པའོ། །ལེགས་པར་འདུན་པའི་རྣལ་འབྱོར་ནི། ཉམས་མཐར་ཕྱིན་ཏེ་ཏིང་ངེ་འཛིན་ལ་སྐྱོན་མེད་པའོ། །རྣལ་འབྱོར་དེ་ཚོའི་ཉམས་ནི་བྱ་བ་བྱེད་པའི་ཏིང་ངེ་འཛིན་ལ་སྦྱོར། འཕྲོ་འདུ་ནི་དབུགས་ཀྱི་བསྙེགས་ཚད་དུ་བྱེད། ཁྱོན་ནི་ཁྲུ་བཞི་སྟེ་རང་གི་ལུས་པོ་ཙམ་དུ་སྒོམ། གྲངས་ནི་ལྷ་གཅིག རྣམ་པའི་ཁྱད་པར་ནི་རྟོག་པའི་ལྷའོ། །གཉིས་པ་མཚན་མེད་ཆོས་ཉིད་བསྒོམ་པའི་དབང་དུ། ས་དང་པོ་འདུན་པ་སྐྱེ་བའི་སྐབས། གཡོ་བ་བྱང་ཆུབ་ཀྱི་སེམས་དཔེ་སྐར་མ་རབ་རིབ་ལྟ་བུ་སྟེ། སྒོམ་ཐབས་སྒྲོན་མ་ལས། དང་པོ་མིང་ཙམ་འཛིན་ལྟ་བྱ་བྱེད་སྒོམ། །རྣམ་པར་དཀར་བའི་སྤྱོད་པའོ། །ཞེས་གསུངས་ཏེ། ལྟ་བ་ནི་གསང་བ་མཆོག་གི་དེ་ཁོ་ན་ཉིད་ཀྱི་མིང་ཙམ་དུ་འཛིན་པ་དང༌། སྒོམ་པ་ནི་བྱ་བ་བྱེད་པའི་ཏིང་ངེ་འཛིན་དང༌། སྤྱོད་པ་ནི་བསོད་ནམས་ཀྱི་དཔུང་གིས་རྣམ་པར་དཀར་བའི་སྤྱོད་པའོ། །ཉམས་དང་རྣལ་འབྱོར་ཕྲ་མོ་ཀུན་མཚན་བཅས་ཀྱི་སྐབས་དང་ཐུན་མོང་ཡིན་ཀྱང་འདིར་མཚན་མེད་ཀྱི་རྣལ་འབྱོར་དྲུག་ལས། འདུན་པ་སེམས་པའི་རྣལ་འབྱོར་ནི། ཆོས་ཉིད་ཀྱི་མིང་ཙམ་ལ་མོས་ཤིང་འདུན་པའོ། །བཅོས་མའི་རྣལ་འབྱོར་ནི། ཆོས་ཉིད་མིང་ཙམ་ལ་བཅོས་པའོ། །ཕྲ་མེན་སྤྱོད་པ་ནི་མིང་ཙམ་གྱི་ཆོས་ཉིད་དེ་རང་གསལ་མི་གསལ་འདྲེས་མའོ། །ཚུལ་རྟགས་འཛིན་པའི་རྣལ་འབྱོར་ནི། ཆོས་ཉིད་མི་རྟོག་པའི་མིང་ཙམ་གྱི་ཚུལ་འཛིན་པའོ། །མོས་པའི་རྣལ་འབྱོར་ནི། དེ་ཉིད་ལ་དད་ཅིང་མོས་པའོ། །ལེགས་པར་འདུན་པའི་རྣལ་འབྱོར་ནི། ཆོས་ཉིད་མི་རྟོག་པའི་སྤྱིའི་རྣམ་པ་ཙམ་ལ་གནས་པ་ལ་སྐྱོན་མེད་པའོ། །ཚུལ་དེས་གཞན་ཡང་མཚོན་ནོ། །ཐུན་མོང་དུ་༼༣༤༧༽ནི་ཕལ་པའི་སེམས་བརྒྱད་ལས་རྣལ་འབྱོར་ལྔས་རིམ་པར་སྐྱེ་ཞིང་ཐོག་མར་འདུན་པ་སེམས་པའི་རྣལ་འབྱོར་དང་དྲུག་སྟེ། དེ་ཉིད་ལས། དེ་ལ་རྣལ་འབྱོར་ཕྲ་མོ་བཞི་བཅུ་སྟེ། དང་པོ་ལ་དྲུག་འདུན་པ་སེམས་པ་ཉིད། །བསྙུང་བར་གནས་པའི་སེམས་དང་ས་བོན་ལྟར། །བཅོས་མའི་སྙིང་རྗེའི་གནས་གཏོང་སྡོང་ལྟ་བུ། །ཕྲ་མེན་དགེ་སྦྱོང་ལ་གཏོང་ལོ་མ་ལྟར། །ཚུལ་འཛིན་ལྷུག་པར་གཏོང་སེམས་མེ་ཏོག་ལྟར། །མོས་པ་ཁྲིམས་སྲུང་སེམས་བསྐྱེད་གསོས་སུ་འགྱུར། །དགེ་བར་འདུན་པ་ལྷ་མཆོད་འཇིག་རྟེན་ལམ། །ཞེས་གསུངས་ཏེ། དེའང་ས་དང་པོ་ལ་རྣལ་འབྱོར་དྲུག་ལས་ལྷ་དང་མི་རྟོག་པར་བསྒོམ་པ་ལ་འདུན་པ་ཙམ་དུ་སེམས་པའི་རྣལ་འབྱོར་ཉིད་བསྙུང་བར་གནས་པའི་སེམས་ཏེ་བརྒྱད་ཀྱི་དང་པོ་ས་བོན་ལྟ་བུ་དང༌། དེ་ནས་ཕ་མ་དང་ཉེ་དུ་ལྟ་བུ་ལ་སྦྱིན་པ་བྱེད་དེ་མྱུ་གུ་ལྟ་བུ་དང༌། ལྟ་སྤྱོད་སྔགས་ཀྱི་ཚུལ་དུ་བཅོས་མའི་རྣལ་འབྱོར་ཉིད་སྙིང་རྗེའི་སྦྱིན་གནས་ལ་གཏོང་བ་སྡོང་པོ་ལྟ་བུ་དང༌། སྔགས་དང་ཚུལ་གཞན་ཕྲ་མེན་དུ་སྤྱོད་པའི་རྣལ་འབྱོར་ཉིད་བྲམ་ཟེ་དང་དགེ་སྦྱོང་དག་ལ་གཏོང་བ་ལོ་མ་ལྟ་བུ་དང༌། འདི་ལ་མོས་པས་དེའི་ཚུལ་རྟགས་འཛིན་པའི་རྣལ་འབྱོར་ཉིད་བླ་མ་དང་རོལ་མོ་མཁན་ལ་ལྷུག་པར་གཏོང་བ་མེ་ཏོག་ལྟ་བུ་དང༌། དེ་ནས་གང་འདོད་པ་ལ་གཏོང་བས་འབྲས་བུ་ལྟ་བུ་དང་དྲུག་གིས་སྦྱིན་པའི་བསླབ་པ་དང་ལྷ་དང་མི་རྟོག་པ་སྒོམ་པ་ལ་མོས་པའི་རྣལ་འབྱོར་ཉིད་སྦྱིན་པས་རྒྱུ་བྱས་ནས་ཚུལ་ཁྲིམས་སྲུང་བ་ལ་མོས་པས་སེམས་བསྐྱེད་དེ་སྲུང་བ་གསོས་སུ་འགྱུར་བ་ལྟ་བུ་དང༌། ཐེ་ཚོམ་མེད་པར་དགེ་བར་ལེགས་པར་འདུན་པའི་རྣལ་འབྱོར་ཉིད་དེ་བས་ཀྱང་ལྷ་ལ་མཆོད་པ་ཕུལ་བ་ཤེས་སྟོབས་ཅན་དུ་འགྱུར་སྙམ་ནས་ཚངས་པ་ལ་སོགས་པ་མཆོད་པ་སྟེ། དེ་དག་ནི་འཇིག་རྟེན་ཕལ་པའི་སེམས་སམ་ལམ་བརྒྱད་ཅེས་ཀྱང་བྱའོ།།

གཉིས་པབརྟེན་པ་གཞིའི་ས་བཤད་པ་ནི།

རྟེན་པ་གཞི་ཡི། ཞེས་པ་ནས། སྤྱོད་པའི་ས་ཞེས་བྱ། །ཞེས་པའི་བར་གྱིས་བསྟན་ཏེ།

རྟེན་པས་གཞི་ཡི་ས་འདི་ལ། །དང་པོའི་ལས་ཅན་རྣལ་འབྱོར་པ། །བསླབ་པའི་སྦྱོར་དང་ངེས་པ་ལ།།

དག་དང་མ་དག་གིས་སྤྱོད་པའོ། །བཀའ་སྡོད་ལས་ཀྱི་རྣལ་འབྱོར་པ། །གནས་ཤིང་སྤྱོད་པའི་ས་ཞེས་བྱ།།

དེ་ལྟར་འདུན་པའི་སྟོབས་དང་སྒོ་གསུམ་གྱི་རྩོལ་བའི་ལས་ལ་རྟེན་པ་ཡི་སྒོ་ནས་གོང་མ་རྣམས་ཀྱི་ཡོན་ཏན་འབྱུང་བའི་གཞི་ཡི་ངོ་བོར་གྱུར་པའི་ཕྱིར་ས་ཞེས་བྱའོ། །༼༣༤༨༽གཞི་འདི་ལ་ཡང་རྣལ་འབྱོར་གསུམ་དུ་འགྱུར་ཏེ། གཞིའི་དང་པོའི་ལས་ཅན་གསང་སྔགས་ལ་སྔར་ལྟ་བས་གདེང་ཅན་དུ་མ་སྤྱད་པ་ལས་ཐོག་མར་གསང་བ་མཆོག་གི་དོན་སྤྱིའི་མཚན་ཉིད་ཤེས་ནས་རང་གི་མཚན་ཉིད་ཀྱི་མགོ་གོ་བ་ལ་དཔྱོད་པའི་རྣལ་འབྱོར་དང༌། གསང་སྔགས་ཀྱི་སྒོ་དང་པོར་བསླབ་པའི་མཐའ་དམ་པ་བཅུ་ལ་སྦྱོར་ཏེ་སྤྱོད་པས་སློབ་ཅིང་ལྷའི་སྐུ་དང་མི་རྟོག་པ་ཡིད་ལ་དམིགས་པར་བྱེད་དེ་སྦྱོང་བའི་རྣལ་འབྱོར་དང༌། ཐེག་པ་ཆེན་པོའི་བསླབ་པ་བཅུ་ལས་མི་འགྱུར་བར་བྱ་བའི་བསམ་པ་ངེས་པའི་རྣལ་འབྱོར་ཏེ། སྤྱིའི་བདེན་པ་གཉིས་ལ་རང་གི་མཚན་ཉིད་དུ་གོ་བའི་བསམ་པས་མཐོ་དམན་གྱིས་བྱེ་བྲག་གསུམ་མོ། །ཚུལ་དེ་དག་གིས་སློབ་པ་ཡང་བསམ་དཔྱོད་དག་པས་སྤྱོད་པ་དང༌། མ་དག་པས་སྤྱོད་པ་གཉིས་ཀ་ཡོད་པས་དགེ་སྡིག་གིས་ཕྱོགས་དཀར་བ་དང་གནག་པ་གང་འདྲེན་མར་སྤྱོད་པའོ། །འདི་དག་ཀྱང་ཚོགས་ལམ་པའི་ཕྱིར་དང་པོར་རྣམ་པར་དཀར་བའི་སྤྱོད་པ་ལ་གནས་པ་ཞེས་བྱའོ། །འདི་དག་ནི་རྒྱལ་བའི་བཀའ་ལུང་དང་བླ་མའི་བཀའ་ལ་རག་ལས་ཏེ་སྡོད་ཅིང་དེ་དག་གི་གནང་བ་ཐོབ་ནས་ས་གོང་མ་གོང་མར་རིགས་ཕྱེ་ནས་ངེས་པར་འགྱུར་ཞིང་སྒོ་གསུམ་གྱི་རྩོལ་བས་བསླབ་པ་ལ་མི་གཡེལ་བའི་ལས་ཅན་གྱི་རྣལ་འབྱོར་ཏེ་དེ་ལྟར་ན་ས་པ་དེ་ལ་རྣལ་འབྱོར་བཞི་སྟེ་འདུན་པའི་རྣལ་འབྱོར་ཉིད་ཀྱི་བྱེ་བྲག་གཉིས་པ་ལ་གནས་ཤིང་མོས་པས་སྤྱོད་པའི་ས་ཞེས་བྱའོ། །འདི་དག་ནི་གསང་བ་ལ་སློབ་ཀྱང་རིགས་ངེས་པར་མ་གྱུར་ཏེ་དེ་ནི་རྩོལ་བས་སྦྱོར་བའི་སྐབས་སུ་གྱུར་པས་གསང་བ་ལ་འབད་པའོ། །འདི་ལའང་མཚན་བཅས་མཚན་མེད་གཉིས་ལས། དང་པོ་ནི་ཀུན་འདུས་ལས། གཉིས་པའི་ས་ལ་གནས་པ་ཡི། །བཀའ་སྡོད་ལས་ཀྱི་རྣལ་འབྱོར་ལས། །སོགས་པའི་རྣལ་འབྱོར་རྣམ་བཞི་པོ། །ཏིང་འཛིན་རྩལ་གྱི་ཁྱད་པར་ནི། །ས་བོན་རང་བཞིན་ཡི་གེ་ལས། །འོད་ཟེར་འབར་བར་བཅས་པ་དེ། །དྲི་འབྱུང་ཡུལ་ནི་ཚུན་ཆད་དུ། །འཕྲོ་འདུ་གསལ་བར་བསྐྱེད་པ་ལས། །རང་གི་ཆག་ཚད་གཉིས་བསྒྱུར་བའི། །སྐུ་ཡི་ཁྱོན་ཡང་དེ་ཙམ་མོ། །ཞེས་གསུངས་ཏེ། བཀའ་སྡོད་༼༣༤༩༽ལས་ཀྱི་རྣལ་འབྱོར་ནི། ཉམས་ཐོབ་པ་དྲོད་རྟགས་དང་རྟོག་པའི་ལྷ་དེ་ལྷག་མཐོང་གི་དོན་ལ་སྦྱོར་བར་བྱེད་དེ། སྟོན་པ་དང་བླ་མའི་བཀའ་ལ་སྡོད་པའོ། །ལས་དང་པོའི་རྣལ་འབྱོར་ནི། ཉམས་གོམས་པ་ཐོག་མར་བསླབ་པའི་ལས་ལ་མགོ་འཛུག་པའོ། །བསླབ་པ་སྦྱོང་བའམ་སྦྱོར་བའི་རྣལ་འབྱོར་ནི་ཉམས་བརྟན་པ་བསླབ་པའི་མཐའ་བཅུ་ལ་མི་ལྕོག་པ་མེད་པར་འདྲིས་གོམས་སུ་བྱེད་པའོ།།

ངེས་པའི་རྣལ་འབྱོར་ནི། ཉམས་མཐར་ཕྱིན་པ་ཡེངས་ཐུབ་ལ་སེམས་བརྟན་ཞིང་མི་བསླུ་བའོ། །ཉམས་དེ་ཚོ་རིན་ཆེན་མྱུ་གུའི་ཏིང་ངེ་འཛིན་ལ་སྦྱར་ཏེ་འཕྲོ་འདུ་ནི་སྣ་ཡིས་58དྲི་ཚོར་ཚད་དུའོ། །ཁྱོན་ནི་ཁྲུ་བརྒྱད་དེ་ལུས་གཉིས་འགྱུར་རོ། །གྲངས་ནི་ཡབ་ཡུམ་གཉིས་ཡན་ལག་གི་ལྷ་དང་བཅས་པའོ། །རྣམ་པ་ནི་མཚན་མའི་ལྷའོ། །གཉིས་པ་མཚན་མེད་ཀྱི་དབང་དུ། ས་གཉིས་པ་རྩོལ་བར་སྦྱོར་བའི་སྐབས་སྨོན་པ་བྱང་ཆུབ་ཀྱི་སེམས་དཔེ་སྐར་མ་ཕལ་པ་ལྟ་བུ་སྟེ། སྒོམ་ཐབས་སྒྲོན་མ་ལས། གཉིས་པ་ནི། ཡིད་ལ་བྱེད་ལྟ་དུག་འཇོམས་སྨན་ཏིང་འཛིན། །ཕྲ་མེན་སྤྱོད་པའོ། །ཞེས་གསུངས་ཏེ། ཆོས་ཉིད་ཡིད་ལ་བྱེད་པའི་ལྟ་བ་དང་ལས་ཀྱི་བག་ཆགས་ཀྱི་དུག་ཐོག་མར་འཇོམས་པའི་སྨན་གྱི་ཏིང་ངེ་འཛིན་དང༌། དག་མ་དག་ཕྲ་མེན་དུ་སྤྱོད་པའོ། །དཀའ་འགྲེལ་ལས། འདི་ལ་རིན་ཆེན་མྱུ་གུའི་ཏིང་ངེ་འཛིན་གསུངས་ཏེ་གསང་སྔགས་ཀྱི་བསླབ་པ་མཆོག་གི་གཞིར་གྱུར་པའི་དབང་སྟེ་དོན་དུ་འདྲའོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། སེམས་བརྒྱད་ལ་བརྟེན་སྟོང་སེམས་གཞི་ལ་གཞི། །བདེ་གཤེགས་བླ་མའི་བཀའ་སྡོད་ལས་ལ་བརྟེན། །དང་པོའི་ལས་ཅན་སྟོང་པར་བདག་དག་བསྒོམ། །བསླབ་པ་སྦྱོང་བར་བྱེད་པས་བྱས་པར་སྤྱོད། །ངེས་པར་རྒྱུ་མེད་འབྲས་བུ་གྲུབ་པར་ལྟ། །ཞེས་གསུངས་ཏེ། སེམས་བརྒྱད་ལ་བརྟེན་ནས་སྟོང་པ་ཉིད་ཀྱི་སེམས་སྐྱེ་བའི་གཞི་ལ་རྣལ་འབྱོར་བཞི་སྟེ་བདེ་གཤེགས་དང་བླ་མའི་བཀའ་ལ་སྡོད་ཅིང་སྒོ་གསུམ་གྱི་བྱ་བའི་ལས་ལ་བརྟེན་པའི་རྣལ་འབྱོར་དང༌། ཐོག་མར་སྔགས་ལ་སྤྱོད་པས་དང་པོའི་ལས་ཅན་གྱི་རྣལ་འབྱོར་སྟོང་པ་༼༣༥༠༽ཉིད་དུ་བདག་དག་པར་བསྒོམ་པ་དང༌། སྔགས་ཀྱི་བསླབ་པའི་མཐའ་བཅུ་ལ་སྦྱོར་བར་བྱེད་དེ་དོན་ཡིད་ལ་བྱས་ཏེ་སྤྱོད་པའི་རྣལ་འབྱོར་དང༌། བསླབ་པའི་མཐའ་དེ་ལས་མི་འགྱུར་བའི་བསམ་པས་ངེས་པའི་རྣལ་འབྱོར་གྱིས་སྟོང་པའི་རྒྱུའམ་རྒྱུ་ མེད་པ་ལས་འབྲས་བུ་གྲུབ་པར་ལྟ་བའོ།།

ལམ་གཉིས་པ་སྦྱོར་ལམ་ས་གསུམ་གྱི་བདག ་ཉིད་དུ་བཤད་པ་ལ་གསུམ་སྟེ། གལ་ཆེན་སྦྱོང་བའི་ས་བཤད་པ། བསླབ་པ་རྒྱུན་གྱི་ས་བཤད་པ། བསོད་ནམས་གཏེར་གྱི་ས་བསྟན་པའོ། །དང་པོ་ནི།

གལ་ཆེན་སྦྱོང་བའི། ཞེས་པ་ནས། སྟོབས་ཆེན་འགྱེད་པའོ། །ཞེས་པའི་བར་གྱིས་བསྟན་ཏེ།

གལ་ཆེན་སྦྱོང་བའི་ས་འདི་ལ། །རིགས་ཆེན་འབྱེད་པའི་རྣལ་འབྱོར་པ། །གནས་ཤིང་སྤྱོད་པའི་ས་ཡིན་ཏེ།།

ཡ་ང་མི་ངའི་ས་རྣམས་ཀུན། །གཅོད་སྦྱོང་སྦྱོར་བའི་ཚུལ་ཉིད་ཀྱིས། །ལེགས་ཉེས་སྟོབས་ཆེན་འགྱེད་པའོ།།

ཤིན་ཏུ་བརྩོན་འགྲུས་དང་ལྡན་པས། གསང་སྔགས་ཀྱི་དོན་ལ་མཆོག་ཏུ་ཆེད་ཆེ་བའམ་གལ་ཆེན་པོར་བྱས་ཏེ་སྒོ་གསུམ་གྱི་རྩོལ་བས་བག་ཆགས་ཆེད་དུ་སྦྱོང་ཞིང་སྦྱོར་བར་བྱེད་པའི་ས་འདི་ལ་གསང་སྔགས་དང་གསང་བ་མ་ཡིན་པ་རྣམས་ཀྱི་རིགས་ཆེན་པོར་ལུང་དང་མོས་པའི་ཉམས་ཀྱིས་འབྱེད་པའི་རྣལ་འབྱོར་ཉིད་དེ། འདི་ནས་སླར་ལྡོག་པ་དང་གྱེན་དུ་འབྱུང་བའི་གནས་ཕྱེད་པ་ཡིན་པའི་ཕྱིར་རྣལ་འབྱོར་གྱི་མིང་འགྲུབ་སྟེ། རྣལ་འབྱོར་དེ་ཉིད་རྟེན་ཏེ་དོན་ལ་གནས་ཤིང་སྤྱོད་པའི་ས་ཡིན་ཏེ། ས་འདིར་ཡང་ཡ་ང་བ་སྡིག་པའི་ལས་ཀྱི་བག་ཆགས་དང་ཡ་མི་ངའི་དགེ་བའི་ལས་ཀྱི་བག་ཆགས་རྣམས་འཕྲོ་འདུ་གཅིག་པའི་ཏིང་ངེ་འཛིན་དང་བདེན་པ་གཉིས་ཀྱི་རྟོགས་པ་བརྟན་པས་ཀུན་ནས་གཅོད་ཅིང་སྦྱོང་བ་དང་ཡང་དག་པའི་དོན་ལ་སྦྱོར་བའི་ཚུལ་ཉིད་ཀྱིས་འདིར་བརྩོན་འགྲུས་ཀྱིས་དགེ་བའི་ལས་དབང་དུ་འབྱོངས་ན་མི་འགྱུར་བས་ལས་སྟོབས་ལེགས་པ་དང༌། ལེ་ལོའི་དབང་གིས་མ་འབྱོངས་ན་འགྱུར་བས་ལས་སྟོབས་ཉེས་པ་གཉིས་ཀྱི་སྟོབས་ཆེན་པོ་འགྱེད་དེ་བརྩོན་འགྲུས་དང་ཤེས་རབ་ཀྱི་བྱེད་པ་འབྱུང་བའོ། །དེས་ན་བརྩོན་འགྲུས་གལ་ཆེ་སྟེ་སོ་མཚམས་ཀྱི་མཁར་དང་འདྲའོ། །ཚུལ་དེ་ལྟ་བུའི་སྒོ་ནས་བསླབ་པ་ལ་འཇུག་པའི་སྐབས་སོ། །འདི་ལའང་མཚན་བཅས་མཚན་མེད་གཉིས་ལས། དང་པོ་ནི། ཀུན་འདུས་ལས། གསུམ་པའི་ས་ལ་གནས་པ་ཡི། །ཞེས་སོགས་བཞི་པ་དང་ཐུན་མོང་དུ་གསུངས་པས་རྣལ་འབྱོར་གཅིག་སྟེ། རིགས་ཆེན་འབྱེད་པའི་རྣལ་འབྱོར་ཞེས་བྱ་བ་འཁོར་འདས་༼༣༥༡༽ཀྱི་རིགས་འབྱེད་པའོ། །ཉམས་དེ་ཉིད་དུག་འཇོམས་སྨན་གྱི་ཏིང་ངེ་འཛིན་ལ་གནས་པ་དང་སྦྱར་ཏེ། འཕྲོ་འདུ་ནི་རྣ་བས་ཐོས་ཚད་དུའོ། །ཁྱོན་ནི་ཁྲུ་བཅུ་དྲུག་ཙམ་སྟེ་ལུས་བཞི་འགྱུར་རོ། །གྲངས་ནི་རིགས་གཅིག་འཁོར་དང་བཅས་པ་ཙམ་མོ། །རྣམ་པ་ནི་ལྷ་ཆུ་ཟླ་ལྟ་བུའོ། །གཉིས་པ་མཚན་མེད་ཀྱི་དབང་དུ། ས་གསུམ་པ་བསླབ་པ་ལ་འཇུག་པའི་སྐབས་ལྡང་བ་བྱང་ཆུབ་ཀྱི་སེམས་དཔེ་སྐར་མ་ཆེན་པོ་ལྟ་བུ་སྟེ། སྒོམ་ཐབས་སྒྲོན་མ་ལས། གསུམ་པའི་ལྟ་སྒོམ་སྤྱོད། །དེ་ཁོ་ན་ཉིད་མཐོང་མ་རག་པ་དང༌། །རིན་ཆེན་མྱུ་གུ་བརྩོན་འགྲུས་སྤྱོད་པའོ། །ཞེས་གསུངས་ཏེ། དེ་ཁོ་ན་ཉིད་མཐོང་མ་རག་པའི་ལྟ་བ་དང༌། གསང་བ་དམ་པའི་རིགས་ཀྱི་གཞི་རིན་ཆེན་མྱུ་གུའི་ཏིང་ངེ་འཛིན་དང༌། ལེགས་ཉེས་སྟོབས་འགྱེད་པའི་བརྩོན་འགྲུས་ཀྱི་སྤྱོད་པའོ། །དཀའ་འགྲེལ་དང་མཆན་གཞན་ལས། ཉོན་སྒྲིབ་རགས་པའི་དུག་འཇོམས་པས་སྨན་གྱི་ཏིང་ངེ་འཛིན་ཏེ་དོན་འདྲ་ཡང་འཆད་ཚུལ་གཉིས་ཀར་མཁས་པས་ལམ་གནད་ལ་གོ་སྐྱེད་ཆེའོ། །དེས་ན་སྔ་མ་ལས། གལ་ཆེན་རིགས་ཆེན་འབྱེད་དེ་ལོག་ལྟ་སེལ། །ཉོན་མོངས་རགས་པ་འཇོམས་པས་རིགས་ཆེན་འབྱེད། །ཅེས་གསུངས་ཏེ། རིགས་ཆེན་འབྱེད་པའི་རྣལ་འབྱོར་གྱིས་གོང་གི་ལོག་ལྟ་དེ་དག་སེལ་ཞིང་ཉོན་མོངས་པའི་སྒྲིབ་པ་རགས་པ་འཇོམས་པས་རིགས་ཆེན་པོ་འབྱེད་དེ་གྱེན་དུ་འབྱུང་བའི་གནས་སོ།།

གཉིས་པ་བསླབ་པ་རྒྱུན་གྱི་ས་བཤད་པ་ནི།

བསླབ་པ་རྒྱུན་གྱི། ཞེས་པ་ནས། སྤྱོད་པའི་ས་ཞེས་བྱ། །ཞེས་པའི་བར་གྱིས་བསྟན་ཏེ།

བསླབ་པ་རྒྱུན་གྱི་ས་འདི་ལ། །གཡོ་དང་ཐོབ་དང་བརྟན་པའི་དྲོད། །དེ་བཞིན་རྟགས་ཆེན་གཡོ་བ་དང་། །ཐོབ་པ་ཉིད་དང་བརྟན་པའི་སྒོ། །རྣལ་འབྱོར་རྣམ་པ་དྲུག་པོ་དག །བསླབ་པའི་མཐའ་བཅུ་མཐར་ཕྱིན་ཅིང་། །ཇི་ལྟར་ཟླ་བ་ཡར་གསལ་ཞིང་། །བསླབ་པའི་ཡེ་ཤེས་འཕེལ་འགྱུར་ཏེ། །དོན་ལ་མི་སྐྲག་ངོ་མཚར་ཆེ། །དཔྱོད་སེམས་འཇུག་པའི་སེམས་དཔའ་དེ། །ངན་འགྲོར་མ་ལྡོག་དགོན་པར་འཇུག །བར་ཆད་དག་ཀྱང་དེ་ལ་འབྱུང། །གསང་སྒོའི་ལུང་གི་རྣལ་འབྱོར་དང་། །སྤྱོད་པ་རྒྱུན་གྱི་རྣལ་འབྱོར་དང་། །མཚན་མ་རྟགས་ཀྱི་རྣལ་འབྱོར་གསུམ། །གནས་ཤིང་སྦྱོང་བའི་ས་ཞེས་བྱ།།

དེ་ལྟར་རིགས་ཕྱེ་ནས་ཐེག་པ་ཆེན་པོར་ངེས་པའི་རིགས་བསྟན་པའི་ཕྱིར། འདིར་གཟོད་ཅིག་ཐེག་པ་ཆེན་པོའི་གསང་བ་མཆོག་གི་བསླབ་པའི་མཐའ་བཅུ་ལ་གནས་པ་ཉིད་རྒྱུན་གྱི་བར་ཆད་པ་མེད་པར་སློབ་པར་བྱེད་པའི་ས་འདི་ལ་ཡང་རྣལ་འབྱོར་དྲུག་སྟེ། དེ་ཡང་རྟོགས་པའི་དྲོད་རྟགས་དང་བསྒོམ་པའི་དྲོད་རྟགས་ཆེ་ཆུང་ལས། འདིར་རྟོགས་པ་དང་ལྷ་སྒོམ་པའི་དྲོད་རྟགས་ཆུང་ངུ་སྟེ། སྔ་མ་དག་ལ་ལྷ་བསྒོམ་པ་དང་རྩོལ་བ་ཡོད་ཀྱང་རིགས་མ་ངེས་པས་གསང་སྔགས་རང་གི་ངོ་བོ་གཉིས་སུ་མེད་པའི་དོན་གཏན་ནས་མ་སྐྱེས་པ་དེ་ཉིད། འདིར་བསླབ་པའི་༼༣༥༢༽མཐའ་བཅུ་ལ་སྦྱངས་པས་རྟོགས་པའི་དྲོད་མགོ་གཡོ་བ་ལ་གནས་པ་དང༌། དྲོད་དེ་ཐོབ་ནས་མགོ་ལྡང་བ་དང༌། དེ་ཡང་མི་འགྱུར་བར་བརྟན་པའི་དྲོད་དང་གསུམ་འབྱུང་ངོ༌། །དེ་དག་ཤིང་ལ་མེའི་དྲོད་ལྟར་ཐུན་མོང་གི་དྲོ་བ་ལྟ་བུའོ། །དེ་བཞིན་དུ་རྟགས་ཆེན་པོ་གཏོས་ཆེན་གྱི་འཇིག་རྟེན་རང་བཞིན་མེད་ཅིང་མི་འཇིགས་པའི་མཚན་མ་དག་མགོ་གཡོ་བ་དང༌། དེ་ཐོབ་པ་ཉིད་དང༌། དེ་ནས་བརྟན་ཞིང་མི་གཡོ་བ་ཡི་རྣལ་འབྱོར་དང་གསུམ་སྟེ། དེ་ལྟར་རྣལ་འབྱོར་རྣམ་པ་དྲུག་པོ་དེ་དག་རྣམས་ཀྱི་བསླབ་པ་གང་ཞེ་ན། རྒྱུད་ཐོས་པས་དགྲོལ་བར་བསླབ་པ་ལ་སོགས་པ་འཆད་པར་འགྱུར་བའི་བསླབ་པའི་མཐའ་ཆེན་པོ་བཅུ་དག་ཟག་པ་དང་བཅས་པས་མཐར་ཕྱིན་པར་བྱེད་ཅིང་གནས་པའོ། །དེ་ལས་རིག་པ་སྐྱེ་བའི་ཚུལ་ནི། དེ་ལྟར་བསླབ་པས་དྲོད་རྟགས་སྐྱེས་ནས་རྟོགས་པའི་ཡེ་ཤེས་འཕེལ་བ་ནི། དཔེ་ཇི་ལྟར་ན་ཟླ་བ་ཡར་གྱི་ངོ་ལ་ཚེས་གཅིག་ནས་ཉ་ཡི་བར་དུ་གསལ་བར་འཕེལ་ཏེ་འགྲོ་བ་བཞིན་ས་བཅུ་ཡིས་སྒྲུབས་པས་བསླབ་པའི་ཡེ་ཤེས་སྐྱེད་དུ་གསལ་ཞིང་འཕེལ་བར་འགྱུར་ཏེ་ཡེ་ཤེས་གཅིག་ཏུ་མི་སྡོད་པས་ཐུན་མོང་གི་རྩེ་མོ་ལྟ་བུའོ། །ཚིག་ལྷག་མ་ནི། དེ་ནས་གསང་སྔགས་བདེན་པ་གཉིས་མཉམ་པ་ཆེན་པོའི་དོན་ལ་བཟོད་པ་ཐོབ་ནས་མི་སྐྲག་ཅིང་སྔངས་པ་དང་བྲལ་བའི་རྟོགས་པ་འབྱུང་བས་དེ་ལ་ངོ་མཚར་ཆེ་བའམ་ཡ་མཚན་སྐྱེ་བ་ཉིད་དེ། ཇི་སྐད་དུ། ས་ཐོབ་འཇིགས་པ་ལྔ་དང་བྲལ། །བཟོད་ཐོབ་ངན་སོང་ཡོང་མི་ལྟུང༌། །ཞེས་གསུངས་པ་ལྟར་ངན་འགྲོའི་འཇིགས་པ་དང་བྲལ་བའོ། །དེས་ན་ཆོས་མཉམ་པའི་ཡུལ་ལ་སོ་སོར་རྟོག་ཅིང་དཔྱོད་པའི་སེམས་ཀྱི་ཤེས་རབ་ཀྱིས་དོན་ཇི་ལྟ་བ་ཉིད་ལ་འཇུག་པར་འགྱུར་བའི་ཚུལ་གྱིས་ཞུགས་ནས་རྟོགས་པར་བྱེད་པའི་སེམས་དཔའ་དེས་ཆོས་མཉམ་པ་ལ་དཔྱོད་པའི་ཤེས་རབ་ཀྱིས་ངན་འགྲོར་འགྲོ་བའི་ཡ་ང་བའི་གནས་ཀྱི་རྒྱུད་སྦྱངས་ནས་སླར་ངན་སོང་དུ་མི་ལྡོག་སྟེ། དེ་ནི་དགོན་པར་དབེན་པའི་གནས་སུ་འཇུག་ཅིང་ཡེ་ཤེས་ཚོལ་བར་བྱེད་དེ་ཐུན་མོང་གི་འཇིག་རྟེན་པའི་ཆོས་ཀྱི་མཆོག་ལ་ཞུགས་པ་ལྟ་བུའོ། །དེའི་ཚེ་བསམ་པའི་བར་ཆད་ཀྱི་སེམས་གཡེང་འཁྲུག་དང་འདུ་བྱེད་༼༣༥༣༽ལ་སོགས་པ་དག་ཀྱང་དེ་ལ་འབྱུང་སྟེ། བདུད་ས་ལྟ་བུ་ཉེ་དུ་ལ་འཛིན་པ། ཆུ་ལྟ་བུ་གྲགས་སྙན་འདོད་པ། མེ་ལྟ་བུ་འདོད་སྲེད་སྐྱེ་བ། རླུང་ལྟ་བུ་ཁེ་གྲགས་གཉེར་བ། མུན་པ་ལྟ་བུ་བླ་མ་ངན་པས་དབང་ལས་མི་ཤེས་པ་སོགས་དང༌། གཞན་ཡང་དཀར་པོའི་ཕྱོགས་ཀྱི་བདུད་ཀྱི་སྤྱོད་ཡུལ་བཅོ་བརྒྱད་རྣམས་འབྱུང་ངོ་། །དེ་ལྟར་དྲུག་ཀྱང་བསྡུ་ན་གསུམ་སྟེ། གསང་སྔགས་མཚོན་པའི་སྒོ་ལུང་གི་གནས་ཟབ་མོ་ལ་བརྟེན་ཅིང་གཉིས་མེད་ཀྱི་དོན་ལ་བཟོད་པ་ཐོབ་ཀྱང་ད་དུང་དྲོད་གཡོ་བ་ཙམ་ལས་མ་ཐོབ་པར་སྒོམ་པའི་རྣལ་འབྱོར་དང༌། དེ་ལས་གོམས་ནས་སྤྱོད་ལམ་བཞིར་བསླབ་པའི་མཐའ་བཅུ་དང་མི་འབྲལ་བར་གནས་པས་སྤྱོད་པ་རྒྱུན་གྱི་རྣལ་འབྱོར་གཉིས་མེད་ཀྱི་རྟོགས་པ་གཡོས་པའི་ཡེ་ཤེས་འཕེལ་བར་བྱེད་པ་དང༌། དེ་ལ་རྒྱུན་དུ་གནས་པས་རྟོགས་པའི་མཚན་མ་ལ་བརྟེན་ནས་དྲོད་དང་རྟགས་ཀྱི་རྣལ་འབྱོར་དང་གསུམ་ལྡན་ཏེ། འདི་ལ་གཡོ་ཐོབ་ཀྱི་ཆ་ཕྱེ་བས་རྣལ་འབྱོར་དྲུག་གོ །དེ་དག་ཀྱང་དེ་ལ་གནས་ཤིང་སྤྱོད་པའི་ཕྱིར་ས་ཞེས་བྱ་སྟེ་འདུ་ཤེས་འགྱུར་བའི་སྐབས་སོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ནི། ཀུན་འདུས་ལས། རྣལ་འབྱོར་ལུང་གི་བཀའ་སྒོ་ལས། །སོགས་པའི་རྣལ་འབྱོར་རྣམ་གསུམ་པོ། །དམིགས་པའི་ཏིང་འཛིན་འདི་ལྟར་འདོད། །ལྷ་ཡི་ས་བོན་གང་ཡིན་པ། །རང་བཞིན་ཡི་གེར་བསྒྱུར་བྱས་ཏེ། །འོད་ཟེར་འབར་དང་བཅས་པ་ཡིས། །ཐོས་པའི་ཡུལ་ནི་ཚུན་ཆད་དུ། །འཕྲོ་འདུ་གསལ་བར་བྱས་པ་ལས། །རང་གི་ཆག་ཚད་བཞི་བསྒྱུར་ཙམ། །སྐུ་ཡི་ཁྱོན་ཡང་དེ་ཙམ་མོ། །ཞེས་གསུངས་ཏེ། གསང་སྒོ་ལུང་གི་རྣལ་འབྱོར་ནི། ཉམས་ཐོབ་པ་ཤིན་ཏུ་གསལ་བར་བརྟན་དུ་འདོད་ཅིང་ལུང་ཟབ་མོ་ལ་བརྟེན་ནས་བསྒོམ་པའོ། །སྤྱོད་པ་རྒྱུན་གྱི་རྣལ་འབྱོར་ནི། ཉམས་གོམས་པ་སྤྱོད་ལམ་བཞིར་ཟག་བཅས་ཀྱི་བསླབ་པ་ལ་མངོན་དུ་སྤྱོད་པའོ། །མཚན་མ་རྟགས་ཀྱི་རྣལ་འབྱོར་ནི། ཉམས་བརྟན་པ་ཏིང་ངེ་འཛིན་ལ་རྒྱུན་དུ་གནས་པས་རྟགས་དང་མཚན་མ་འབྱུང་བའོ། །དེ་ལ་དྲོད་གཡོ་ཐོབ་བརྟན་པ་གསུམ། རྟགས་གཡོ་ཐོབ་བརྟན་༼༣༥༤༽པ་གསུམ་སྟེ་དྲུག་ཏུ་ཕྱེ་ན་རྣལ་འབྱོར་བཞི་བཅུར་འགྱུར་རོ། །ཉམས་དེ་ཚོ་ནི་རྩེ་གཅིག་འཕྲོ་བའི་ཏིང་ངེ་འཛིན་ལ་སྦྱར་ཏེ། འཕྲོ་འདུ་ནི་མིག་གིས་གཟུགས་མཐོང་ཚད་དུའོ། །ཁྱོན་ནི་ཁྲུ་སུམ་ཅུ་སོ་གཉིས་ཙམ་སྟེ་ལུས་བརྒྱད་འགྱུར་རོ། །གྲངས་ནི་རིགས་གསུམ་འཁོར་དང་བཅས་པ་ཙམ་མོ། །རྣམ་པ་ནི་གཟུང་འཛིན་དང་བྲལ་བའི་ལྷའོ། །གཉིས་པ་མཚན་མེད་ཀྱི་དབང་དུ་ས་བཞི་པ་འདུ་ཤེས་བསྒྱུར་བའི་སྐབས། སྦྱོར་བ་བྱང་ཆུབ་ཀྱི་སེམས་དཔེ་ཟླ་བ་ཚེས་གཅིག་པ་ལྟ་བུ་སྟེ། སྒོམ་ཐབས་སྒྲོན་མ་ལས། བསླབ་པ་གཅིག་ལྟ་ཚོགས་ཆེན་རྫོགས་པ་དང༌། །རྩེ་གཅིག་པ་ཡི་སྤྱོད་པ་བཞི་པ་ཡིན། །ཞེས་གསུངས་ཏེ། གསང་སྔགས་ཀྱི་བསླབ་པའི་དོན་ལ་གཅིག་ཏུ་ལྟ་བ་དང༌། ཟག་པ་དང་བཅས་པའི་ཚོགས་ཆེན་རྫོགས་པའི་ཏིང་ངེ་འཛིན་སྒོམ་པ་དང་བྱ་བ་བརྩེ་གཅིག་པའི་སྤྱོད་པ་ལ་སློབ་པའོ། །དཀའ་འགྲེལ་ལས། རྩེ་གཅིག་འཕྲོ་བའི་ཏིང་ངེ་འཛིན་དུ་གསུངས་པ་ནི། དམིགས་པ་རྩེ་གཅིག་གི་ངང་ནས་འཕྲོ་འདུ་ནུབ་པ་དང་པོར་ཐོབ་པ་སྟེ་དོན་གཅིག་གོ །འདིའི་རྣལ་འབྱོར་ཕྲ་མོ་ནི། དེ་ཉིད་ལས། སྦྱོར་གནས་བསླབ་རྒྱུན་ལ་གསུམ་གསང་སྒོ་ལུང༌། །དྲོད་ལ་བསླབ་པས་རྩེ་མོར་འཕེལ་བ་དང༌། །ཆོས་ཉིད་དོན་ལ་མི་སྐྲག་བཟོད་པ་ཐོབ། །སྤྱོད་པ་རྒྱུན་གྱིས་གོང་ནས་གོང་དུ་འཕེལ། །མཚན་མ་རྟགས་ལ་སེམས་ཀྱི་དྲོད་རྟགས་ཏེ། །གཡོ་ཐོབ་བརྟན་པའི་དྲོད་གསུམ་རྟགས་ལ་གསུམ། །གཞི་པོ་གསུམ་དང་དོན་དགུར་གནས་པ་ཡིན། །ཞེས་གསུངས་ཏེ། སྦྱོར་ལམ་ལ་གནས་པའི་བསླབ་པ་རྒྱུན་གྱི་ས་ལ་རྣལ་འབྱོར་གསུམ་སྟེ། གསང་སྒོ་ལུང་གི་རྣལ་འབྱོར་ལུང་ཟབ་མོ་ལ་བརྟེན་ཅིང་སྒོམས་པས་དྲོད་གཡོ་བ་ཙམ་ཐོབ་ནས་བསླབ་པའི་མཐའ་བཅུ་ལ་མི་འབྲལ་བར་བསླབས་པས་རྟོགས་པའི་ཡེ་ཤེས་རྩེ་མོར་འཕེལ་བ་དང༌། ཆོས་ཉིད་མཉམ་པ་ཆེན་པོ་གསང་སྔགས་ཀྱི་དོན་ལ་མི་སྐྲག་ཅིང་བཟོད་པ་ཐོབ་པས་ངོ་མཚར་སྐྱེ་བའོ། །སྤྱོད་པ་རྒྱུན་གྱི་རྣལ་འབྱོར་གྱིས་བསླབ་པ་བཅུ་ལ་དུས་རྒྱུན་དུ་གནས་པས་ཡེ་ཤེས་གོང་ནས་གོང་དུ་འཕེལ་བ་དང༌། མཚན་མ་རྟགས་ཀྱི་རྣལ་འབྱོར་སེམས་ཉིད་རྟོགས་པ་དང་གོམས་པའི་དྲོད་རྟགས་བྱུང་བ་སྟེ། དེ་ལ་དབྱེ་ན་དྲོད་ལ་གཡོ་བའི་རྣལ་འབྱོར། ཐོབ་པའི་རྣལ་འབྱོར། བརྟན་པའི་༼༣༥༥༽རྣལ་འབྱོར་གསུམ། རྟགས་ལའང་དེ་ལྟར་གསུམ་སྟེ་རྣལ་འབྱོར་དྲུག་དང༌། གཞི་པོ་གསུམ་སྟེ་དོན་ལ་དགུའོ།།

གསུམ་པ་བསོད་ནམས་གཏེར་གྱི་ས་བསྟན་པ་ནི།

བསོད་ནམས་གཏེར་གྱི། ཞེས་པ་ནས། མཐའ་བཅུ་སྤྱིར་ཆིབས་པའོ། །ཞེས་པའི་བར་གྱིས་བསྟན་ཏེ།

བསོད་ནམ་གཏེར་གྱི་ས་འདི་ལས། །སྤྱོད་པ་རྒྱུན་གྱི་རྣལ་འབྱོར་ཉིད། །མོས་པ་དག་ཅིང་འདུན་པའི་གནས།།

རྩལ་ཆེན་བློ་ཡི་བསྟི་གནས་པ། །བསླབ་པའི་མཐའ་བཅུ་སྤྱིར་ཆིབས་པའོ།།

དེ་ལྟར་བསླབ་པའི་ཡེ་ཤེས་འཕེལ་བའི་བསོད་ནམས་སྐད་ཅིག་མ་ལ་བརྟེན་ནས་ཟད་པ་མེད་པར་རཏྣའི་གཏེར་གྱི་ཡོན་ཏན་ལྟར་དུ་འབྱུང་བ་དང་ལྡན་པའི་ཕྱིར་ས་ཡི་མིང་ཡང་འགྲུབ་བོ། །དེ་ལྟ་བུའི་ས་འདི་ལ་ཡང་གོང་དུ་བསླབ་པའི་མཐའ་བཅུ་དང་མ་བྲལ་བར་གནས་ཏེ་སྤྱོད་པ་རྒྱུན་གྱི་རྣལ་འབྱོར་ཉིད་ཀྱི་དོན་དང་མ་བྲལ་བར་མཐར་ཕྱིན་པ་དེ་ཡིས་བསམ་པའི་མོས་པ་དང་ཏིང་ངེ་འཛིན་གྱིས་གཟུང་འཛིན་རགས་པའི་མི་ཤེས་པའི་དྲི་མ་དག་ཅིང་མཉམ་པའི་དོན་ལ་བློ་འདུན་པའི་སྒོ་ནས་བདེ་བ་ཆེན་པོ་ནམ་མཁའི་ངོགས་བཞིན་མཐོང་ལ་མ་རག་པར་གནས་པ་ནི་བར་ཆད་མེད་པའི་ལམ་སྟེ། བསླབ་པ་ལ་རྒྱུན་དུ་གནས་ནས་ཤིན་ཏུ་གསལ་བརྟན་དུ་གྱུར་པས་འཕགས་པའི་ས་དང་པོ་ཤེས་རབ་མཆོག་གི་རྩལ་ཅན་མཐོང་བའི་ལམ་དུ་འགྲོ་བའི་བློ་དང་ལྡན་པ་ཡི་ས་དྲུག་པའི་སྟེགས་ལྟ་བུའི་བསྟི་གནས་ཀྱི་ས་ཡིན་ཏེ། འདིར་མི་སྡོད་པའི་ཕྱིར་རོ། །དེར་ནི་རྟོགས་པར་བྱེད་པའི་ཟག་པ་དང་བཅས་པའི་བསླབ་པའི་མཐའ་བཅུ་ཉིད་མཐར་སྐྱེད་དུ་བྱ་བ་མེད་པར་སྤྱིར་ཆིབ་ཅིང་ཁོང་དུ་ཆུད་པར་གྱུར་པའོ། །དེ་ནི་སྤྱོད་ཆེན་ལ་འཇུག་པའི་སྐབས་ཀྱི་ས་སྟེ། དེ་ཡན་ཆད་དུ་འཁོར་བར་མི་ལྡོག་པ་མ་ཐོབ་པས་ལྡོག་པའང་ཡོད་དོ། །ས་དེ་གསུམ་རྣལ་འབྱོར་གཅིག་གི་ཁྱད་པར་ཏེ། ལྡོག་བཅས་ཀྱི་སའོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ནི། ཀུན་འདུས་ལས། དེ་བཞིན་རྣལ་འབྱོར་རིམ་པ་བཞིན། །ལྷ་ཡི་ཁྱད་པར་གང་ཡིན་པ། །ཡི་གེའི་རིམ་པ་བཞིན་བྱས་ནས། །འཕྲོ་འདུའི་ཚད་ཀྱང་དེ་བཞིན་ཏེ། །རིམ་པ་བཞིན་དུ་སྦྱར་ནས་ཀྱང༌། །འཕྲོ་འདུ་གསལ་བར་གྱུར་པ་དང༌། །སེམས་ཀྱིས་ལྕོགས་ཚད་ཚུན་ཆད་དུ། །སྐུ་ཡི་ཁྱོན་གྱི་ཁྱད་པར་ཡང༌། །ཆོས་ཀྱི་དབྱིངས་ཀྱི་མཐའ་ཀླས་པར། །སྐུ་ཡི་ཁྱོན་གྱིས་གང་བར་བསྒོམ། །ཞེས་ས་ལྔ་པ་ནས་བཅུ་པའི་བར་༼༣༥༦༽ཐུན་མོང་དུ་གསུངས་པས། ས་འདིར་རྣལ་འབྱོར་གཅིག་སྟེ། སྤྱོད་པ་རྒྱུན་གྱི་རྣལ་འབྱོར་ཞེས་བྱ་བ་ས་ལྔ་པའི་སྤྱོད་པ་རྒྱུད་ལ་བསྟེན་ནས་འདི་ཉིད་ཀྱི་བར་ཆད་མེད་པའི་བསླབ་པ་མངོན་དུ་སྤྱོད་དེ་དེ་ལ་རྒྱུན་དུ་གནས་པའོ། །རྣལ་འབྱོར་འདིར་ནི་ཚོགས་རྟེན་རྫོགས་པའི་ཏིང་ངེ་འཛིན་ལ་གནས་པ་སྟེ། འཕྲོ་འདུ་ནི་གླིང་གཅིག་ཚུན་ཆད་དུའོ། །ཁྱོན་ནི་ཁྲུ་དྲུག་ཅུ་རྩ་བཞི་ཙམ་སྟེ་ལུས་བཅུ་དྲུག་འགྱུར་རོ། །གྲངས་ནི་རིགས་ལྔ་གཙོ་འཁོར་དང་བཅས་པའོ། །རྣམ་པ་ཆོས་ཉིད་མཉམ་པ་ཉིད་ཀྱི་ལྷའོ། །གཉིས་པ་མཚན་མེད་ཀྱི་དབང་དུ། ས་ལྔ་པ་སྦྱང་ཆེན་ལ་འཇུག་པའི་སྐབས། འཇུག་པ་བྱང་ཆུབ་ཀྱི་སེམས་དཔེ་ཟླ་བ་ཚེས་གཉིས་པ་ལྟ་བུ་སྟེ། སྒོམ་ཐབས་སྒྲོན་མ་ལས། བར་ཆད་མེད་ལྟ་རྩེ་གཅིག་འཕྲོ་བ་དང༌། །བཏང་སྙོམས་རྒྱུན་གྱི་སྤྱོད་པ་ལྔ་པའོ། །ཞེས་གསུངས་ཏེ། བར་ཆད་མེད་པར་ཟག་མེད་དུ་སྦྱོར་བའི་ལྟ་བ་དང༌། རྩེ་གཅིག་ལས་མི་འགྱུར་བར་འཕྲོ་བའི་ཏིང་ངེ་འཛིན་སྒོམ་པ་དང༌། ཟག་བཅས་ཀྱི་བསླབ་པ་མཐར་ཆིབ་ཅིང་དེ་དང་མི་འབྲལ་བར་བཏང་སྙོམས་རྒྱུན་གྱི་སྤྱོད་པ་ལ་སློབ་པའོ། །དཀའ་འགྲེལ་དང་མཆན་གཞན་ལས། ཚོགས་ཆེན་རྫོགས་པའི་ཏིང་ངེ་འཛིན་དུ་གསུངས་པ་ནི། བསླབ་པ་སྤྱིར་ཆིབ་པས་ཏེ་དོན་འདྲ་ཡང་ཟུར་གཉིས་ཀ་ལྟར་ཤེས་པས་ལམ་གནད་ལ་མཁས་པར་འགྱུར་པའོ། །དེས་ན་སྔ་མ་ལས། བསོད་ནམས་གཏེར་ལ་སྤྱོད་པ་རྒྱུན་ཉིད་དེ། །འཇིག་རྟེན་ཆོས་མཆོག་བསླབ་པ་མཐར་ཕྱིན་ཡིན། །ཞེས་གསུངས་ཏེ། གོང་གི་བསླབ་པ༌བཅུའི་སྤྱོད་པ་དང་མ་བྲལ་བའི་རྒྱུན་གྱི་རྣལ་འབྱོར་ཉིད་དེ་གཟུང་འཛིན་གྱི་དྲི་མ་རགས་པ་དག་པས་ཐུན་མོང་གི་འཇིག་རྟེན་ཆོས་མཆོག་ལྟ་བུ་སྟེ་ཟག་བཅས་ཀྱི་བསླབ་པ་བཅུ་སྐྱེད་དུ་བྱར་ མེད་པར་མཐར་ཕྱིན་པ་ཡིན་ནོ།།

གསུམ་པ་མཐོང་ལམ་ས་གཅིག་གི་བདག ་ཉིད་ས་དྲུག་པ་རྟེན་པས་ཁྱད་པར་དུ་འགྲོ་བའི་ས་བཤད་པ་ནི།

བརྟེན་པས་ཁྱད་པར། ཞེས་པ་ནས། དམ་པར་འབྱིན་པའོ། །ཞེས་པའི་བར་གྱིས་བསྟན་ཏེ།

བརྟེན་པས་ཁྱད་པར་འགྲོ་འདི་ལ། །དབུགས་ཆེན་འབྱིན་པའི་རྣལ་འབྱོར་པ། །རིགས་ཆེན་འཛིན་དང་མཉམ་རྫོགས་ཆེ། །ངེས་པར་སྤྱོད་དང་རྩལ་ཆེན་སྦྱོར། །ཡུལ་ལ་འཇུག་དང་རིག་པར་སྦྱོར། །བདུན་ཉིད་རྫོགས་པར་འགྲོ་བ་སྟེ། །བསླབ་པའི་རྒྱུ་འབྲས་མཐའ་བཅུ་ལ། །གོམས་པར་བྱེད་པའི་ཚུལ་དུ་སྦྱོར། །ངལ་བསོ་བ་ལ་ཐམས་ཅད་མཐོང་། །མི་ལྡོག་པ་ལ་གོམས་བྱར་མེད། །འདི་དག་སྦྱོར་བའི་གཞི་གཅིག་ཀྱང། །སོ་སོའི་ཐུན་མོང་མ་ཡིན་ཀྱང་། །སྒྲིབ་པ་ས་ཞེས་རྩ་བྱེད་ཅིང་། །ཡེ་ཤེས་རེ་རེ་འཆར་བའོ། །དེས་ན་བསླབ་པའི་མཐའ་གཅིག་ལ། །མི་ལྡོག་ལ་སོགས་རྫོགས་ཆེན་རྣམས། །གང་དེར་བདེན་པ་དེ་རེ་ལ། །རྩལ་འབྱུང་རེ་རེ་འཆར་བ་སྟེ། །ཐ་མ་རང་བྱུང་ཉིད་ཀྱིས་རྫོགས། །མཐར་ཕྱིན་པ་དང་ཐོབ་པ་དང་། །མི་ལྡོག་རྣམས་ལ་རིམ་པ་བཞིན། །རྨི་ལམ་དང་ནི་སྒྲ་བརྙན་དང་། །མངོན་སུམ་ངེས་པ་ཅི་རིགས་པར། །རྣལ་འབྱོར་རྡོར་རྗེ་ལུང་སྟོན་པ། །རྡོ་རྗེ་རྡོ་རྗེ་རྣལ་འབྱོར་པ།།

ཞེས་བྱར་ཉིད་དང་ས་ཁམས་དང་། །ཞིང་ཁམས་ཀུན་ཏུ་བསྒྲགས་བྱས་ནས།།

རྣལ་འབྱོར་དམ་པར་འབྱིན་པའོ།།

འདིར་གོང་དུ་བསླབ་པའི་མཐའ་བཅུ་རྩེར་ཆིབ་པས་ཆོས་ཉིད་ཟབ་མོ་གསང་སྔགས་ཀྱི་དོན་སྒོམས་ཏེ་ནམ་མཁའི་ངོས་བཞིན་༼༣༥༧༽རྟོགས་པས་མཐོང་ལམ་སྟེ། རྟོགས་པའི་དོན་འདི་ལ་རྟེན་ནས་མཐར་ཐུག་གི་བར་དུ་རྟོགས་པ་ཇེ་གསལ་དུ་གྱུར་པས་འདི་ཉིད་ཀྱི་རྒྱུད་མཐུན་པའི་ཁྱད་པར་སྐྱེད་དུ་འགྲོ་བ་ཡིན་པའི་ཕྱིར་མིང་གི་ངེས་ཚིག་ཀྱང་འགྲུབ་བོ། །ས་འདི་ལ་ཡང་རྣལ་འབྱོར་གྱི་བྱེ་བྲག་གིས་བདུན་ཏེ། དང་པོ་ཇི་ལྟ་བའི་བདེན་པ་མཐོང་བས་འཁོར་བའི་དུཿ ཁ་དང་ཟག་བཅས་ཀྱི་ལམ་དུ་རྩོལ་བ་ལས་ཐོག་མར་དབུགས་ཆེན་པོ་འབྱིན་ཏེ་ངལ་སོས་པ་ཐོབ་པའི་རྣལ་འབྱོར་ཉིད་དེ། ཐུན་མོང་བྱང་ཆུབ་སེམས་དཔའི་ས་དང་པོ་པ་ལྟ་བུའོ། །འོན་ཀྱང་ལྟ་བ་མཉམ་པ་ནི་མ་ཡིན་ནོ། །དེར་མ་ཟད་དེ་བཞིན་གཤེགས་པའི་མཚན་ཐོས་པ་དང༌། ཞལ་མཐོང་བ་དང༌། སེམས་བསྐྱེད་པ་དང༌། ལམ་སྦྱང་བ་རྣམས་ཀྱི་དབུགས་འབྱིན་པའང་འདིར་ཐོབ་བོ། །ཐེག་པ་ཆེན་པོ་གསང་བའི་དོན་གདེང་དུ་གྱུར་པས་དེའི་རྒྱུད་དུ་འབྱུང་ཞིང་འཇུག་པ་མི་གཏོང་བའི་ཕྱིར་རིགས་ཆེན་འཛིན་པའི་རྣལ་འབྱོར་དང༌། བླང་དོར་དང་བཟང་ངན་མི་འབྱེད་པའི་ལྟ་བའི་སྟོབས་ཀྱིས་ཡོན་ཏན་མ་འདྲེས་ཡོངས་རྫོགས་སུ་གསལ་བར་གྱུར་པས་མཉམ་རྫོགས་ཆེ་བའམ་ཆེན་པོའི་རྣལ་འབྱོར་དང༌། སྤྱོད་ལམ་ཅི་སྤྱད་པ་ཐམས་ཅད་གསང་བ་ཇི་བཞིན་པ་ཉིད་དུ་གདེང་ཅན་དུ་ངེས་པར་སྤྱོད་པའི་རྣལ་འབྱོར་དང༌། ཤེས་རབ་ཀྱི་གདེང་གི་རྩལ་ཆེན་པོར་སྦྱོང་བས་ལྷུན་གྲུབ་ཀྱི་དོན་ལ་སྦྱོར་བའི་རྣལ་འབྱོར་དང༌། རིག་པ་ཉིད་ཆོས་ཉིད་ཇི་བཞིན་པའི་ཡུལ་དང་དབྱེར་མེད་པར་ཞུགས་པས་སྒོམ་ལམ་ལ་འཇུག་པར་བྱེད་པའི་རྣལ་འབྱོར་དང༌། ཐམས་ཅད་ཡེ་ཤེས་ཆེན་པོ་ཡུལ་དང་བྲལ་བར་རྟོགས་པས་སྒོམ་ལམ་ཐོབ་ལ་མ་རག་པར་ཆོས་ཉིད་རིག་པ་ལ་སྦྱོར་བའི་རྣལ་འབྱོར་ཏེ། དེ་དག་ཀྱང་ཐུན་མོང་གི་ས་དང་པོ་རབ་ཏུ་དགའ་བ་ནས་བདུན་པ་རིང་དུ་སོང་བའི་བར་ལྟ་བུ་སྟེ། སྤྱིར་མཐོང་སྒོམ་གྱི་ལམ་གཉིས་ཀ་ཚང་ཡང་འདིར་མཐོང་ལམ་འབའ་ཞིག་གི་ཁྱད་པར་དུ་རིགས་ཏེ་ས་བདུན་པོ་དེ་ཉིད་འདིར་རྫོགས་པར་གྱུར་པས་སྐྱེད་དུ་འགྲོ་བའོ། །སྟེ་ཞེས་ཚིག་ལྷག་མ་ནི་སློབ་པའི་ཚུལ་འབྱུང་བའོ། །དེ་བས་ན་མི་ལྡོག་པར་བསླབ་པར་བྱ་བའི་ཟག་པ་མེད་པའི་༼༣༥༨༽རྒྱུ་བཅུ་དང་འབྲས་བུའི་མཐའ་བཅུ་ལ་ལོབས་པར་གྱུར་པ་ཉིད་ས་ལྔ་པར་གོམས་པར་བྱེད་པའི་ཚུལ་དུ་འདིར་སྦྱོར་བར་བྱེད་པས་དབུགས་ཆེན་པོ་འབྱིན་པའི་ཚེ་ངལ་བསོ་བ་ལ་གནས་པ་ལས་ཆོས་སོ་ཅོག་ཐམས་ཅད་ཀྱི་རང་གི་མཚན་ཉིད་མ་འདྲེས་ལ་ཡོངས་སུ་རྫོགས་པར་ཇི་ལྟ་བ་བཞིན་མཐོང་ཞིང་རྟོགས་པའོ། །དེས་ན་འཁོར་བར་རམ་མཚན་མར་མི་ལྡོག་པ་ཡང་དག་པར་ཐོབ་པ་ལ་ད་བསླབ་པ་བཅུ་ཀ་སྔ་མ་ལྟར་གོམས་པར་བྱར་མེད་དེ། ཟག་བཅས་ཀྱི་སྐབས་ལྟར་སློབ་མི་དགོས་པས་འདིའི་སྐབས་སུ་མ་བརྗོད་པའོ། །དེ་ཡང་སྤྱིར་ལམ་གྱི་སྒྲིབ་པ་དག་ཅིང་ཡེ་ཤེས་འཆར་ཚུལ་གྱི་སའི་རིམ་པ་སྨོས་པ་འདི་དག་རྣམས་ཀྱང་མི་དམིགས་པའི་དོན་མཐར་ཐུག་པ་སྙིང་པོ་བྱང་ཆུབ་ལ་སྦྱོར་བའི་གཞི་ཡི་དམིགས་གཅིག་པ་ཡིན་ཀྱང་མི་མཐུན་པ་ནི་ས་འོག་མ་སོ་སོ་རང་རང་གི་སྤྱོད་ཡུལ་དུ་གོང་མ་གོང་མར་གྱུར་ཏེ་ཐུན་མོང་མ་ཡིན་པའི་གནས་སུ་གྱུར་པ་འོག་མས་གོང་མའི་དོན་མ་མཐོང་བས་སྒྲིབ་པ་སྟེ་རྟེན་པ་དང་སྐྱེད་བྱེད་ཀྱི་སྐབས་ལ་ས་ཞེས་འདོགས་ཏེ་རྩི་བར་བྱེད་ཅིང་འོག་མ་རང་གི་ཞེན་པ་སྤངས་ནས་གོང་མའི་དོན་མཐོང་བའི་ཡེ་ཤེས་རེ་རེ་འཆར་ཏེ་བོགས་སུ་འབྱུང་བས་ན་སའི་རིམ་པ་བཀོད་པའོ། །ཚུལ་དེས་ན་ས་རྣམས་ཐམས་ཅད་སྙིང་པོ་བྱང་ཆུབ་ཀྱི་བསླབ་པའི་མཐའ་རུ་དོན་གཅིག་ལས་མེད་པ་ལ། ས་དྲུག་པར་འཁོར་བར་མི་ལྡོག་པ་དང༌། ས་བརྒྱད་པས་མཚན་མར་མི་ལྡོག་པ་དང༌། ལ་སོགས་པ་ཞེས་གཞན་བསྡུ་བའི་དོན་གྱིས་རྫོགས་པ་སྤྱིར་ཆིབས་ཀྱི་ས་ཆེན་པོའི་བར་རྣམས་སུ་རང་རིག་པ་ལ་མཉམ་པར་བཞག་པའི་ཏིང་ངེ་འཛིན་ས་ལྔ་པ་ནས་རིམ་པ་དྲུག་པོར་བྱིང་རྒོད་ལ་སོགས་པ་ལས་རིང་དུ་གྱུར་པའི་ས་གང་དེར་གོང་མའི་བདེན་པ་མཐོང་བའི་བོགས་རེ་རེ་འབྱུང་བ་ལ་སྐབས་དེའི་སྒྲིབ་པ་རེ་འཇོམས་པའི་ནུས་པའི་རྩལ་རེ་འབྱུང་བ་དང་བཅས་པའི་ཡེ་ཤེས་རེ་རེ་འཆར་བ་སྟེ། དེ་ཡང་གྲངས་ཀྱི་ཐ་མ་རང་བྱུང་གི་ཡེ་ཤེས་ཆེན་པོ་ཤར་ནས་སྐྱེད་དུ་བྱ་བ་མེད་པ་ཉིད་ཀྱིས་རྫོགས་པར་གྱུར་པའོ། །དེ་དག་གི་སྐབས་སུ་ཡང་མཐར་ཕྱིན་པ་ས་བཅུ་པ་ཆོས་ཀྱི་སྤྲིན་ནམ་རྫོགས་པ་༼༣༥༩༽སྤྱིར་ཆིབས་དང༌། དགུ་པ་ལེགས་པའི་བློ་གྲོས་སམ་གདལ་བ་ཆོས་ཉིད་ཀྱི་ས་ཐོབ་པ་དང་བདུན་པ་ལུང་ཆེན་ཐོབ་པ་སྒོམ་ལམ་པ་དང༌། བརྒྱད་པ་མཚན་མར་མི་ལྡོག་པའམ་གནས་པ་མི་འགྱུར་པའི་ས་མཐར་ལམ་པ་དང༌། དྲུག་པ་མཐོང་ལམ་མི་ལྡོག་པ་རྣམས་ལ་རིམ་པ་བཞིན་དུ་ལུང་བསྟན་པ་འབྱུང་བ་ཡང༌། དྲུག་པའམ་བརྒྱད་པ་ལ་རྨི་ལམ་དུ་ལུང་བསྟན་པ་འབྱུང་བ་དང་ནི། བདུན་པའམ་དགུ་པ་ལ་དེ་ལས་གསལ་བར་སྒྲ་སྙན་པ་བར་སྣང་དང་གཞལ་ཡས་ལ་སོགས་པ་ལས་བྱུང་ནས་ལུང་སྟོན་པ་དང༌། མཐར་ལམ་བཅུ་པ་ལ་རྒྱལ་བའི་སྐུ་མངོན་སུམ་དུ་བྱུང་ནས་ངེས་པར་ཤིན་ཏུ་གསལ་བར་ལུང་སྟོན་པ་རྣམས་འབྱུང་ངོ༌། །དེ་ལྟར་ཅི་རིགས་པར་ཡང་འདིར་རྨི་ལམ་ན་ལུང་སྟོན་པ་འབྱུང་བའི་ཚུལ་གྱིས་རྨི་ལྟས་ཀྱི་མཚན་མ་བརྒྱད་ཀྱང་རྣལ་འབྱོར་གྱི་སྐབས་སྐབས་སུ་འབྱུང་བས། སྒྲ་བརྙན་དང་མངོན་སུམ་གྱི་ཡང་སྤྲུལ་པ་དང་ལོངས་སྤྱོད་རྫོགས་པ་སོ་སོར་སྣང་བས་སོ་སོ་ལ་ལུང་བསྟན་པ་སྦྱར་ཏེ་འཆད་པར་ཡང་འགྱུར་རོ། །དེ་ལྟར་འཚམས་པར་ལུང་སྟོན་པའི་ཚུལ་ཡང༌། རྣལ་འབྱོར་དེ་དག་རྡོ་རྗེ་ཐེག་པའི་ལམ་གྱི་རིག་འཛིན་དུ་ལུང་སྟོན་པ་དང༌། རྡོ་རྗེ་འཆང་ཆེན་པོ་ཉིད་གྲུབ་པའི་འབྲས་བུར་ལུང་སྟོན་པ་སྟེ། དེ་ཡང་མིང་གི་ལུང་གསང་བའི་མཚན་རྡོ་རྗེ་རྣལ་འབྱོར་པ་ཆེ་གེ་མོ་ཞེས་བྱར་བོས་ནས་དེ་ཉིད་དང་མཐུན་པར་རིག་པ་འཛིན་པའི་ས་གནས་ཀྱི་ཁམས་ཇི་སྙེད་པ་དང༌། སངས་རྒྱས་ཀྱི་ཞིང་ཁམས་ཀུན་ཏུ་བསྒྲགས་ཏེ་གྲགས་པར་བྱས་ནས་འབྲས་བུའི་རྣལ་འབྱོར་དམ་པར་མངོན་དུ་འབྱིན་པར་བྱེད་པའོ། །ས་འདི་དང་ལུང་ཆེན་ཐོབ་པའི་རྣལ་འབྱོར་གྱི་རྩ་བ་གཉིས་ལས་ཡན་ལག་མཚན་ཉིད་ཀྱི་ས་བཅུར་འགྱུར་བའོ། །སྐབས་བཅུ་ལས་རོ་ཉིད་ཚོར་བའི་སྐབས་སོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ནི། ལྷའི་མཚན་ཉིད་མཉམ་པ་ཉིད་དུ་གསལ་བའི་རྣལ་འབྱོར་གྱི་རིམ་པ་བདུན་ཏེ། དབུགས་ཆེན་འབྱིན་པའི་རྣལ་འབྱོར་ནི། ཉམས་གཡོ་བ་ཟག་བཅས་ཀྱི་རྩོལ་བས་དུབ་པ་ལ་ཟག་མེད་དུ་སློབ་པས་དབུགས་འབྱིན་པའོ། །༼༣༦༠༽རིགས་ཆེན་འཛིན་པའི་རྣལ་འབྱོར་ནི་ཉམས་ཐོབ་པ་ཏིང་ངེ་འཛིན་ལ་གྲིམས་ཕྱུང་བས་མཐོང་བའི་དོན་ལས་མི་འགྱུར་བའོ། །མཉམ་རྫོགས་ཆེན་པོའི་རྣལ་འབྱོར་ནི། ཉམས་གོམས་པ་མཉམ་པ་ཉིད་ཀྱི་ལྷའི་ཏིང་ངེ་འཛིན་ཚད་དུ་ཕྱིན་པའོ། །ངེས་པར་འབྱིན་པའི་རྣལ་འབྱོར་ནི། ཉམས་བརྟན་པ་མཐོང་བའི་དོན་གདེང་དུ་བྱས་པའོ། །རྩལ་ཆེན་སྦྱོང་བའི་རྣལ་འབྱོར་ནི། ཉམས་མཐར་ཕྱིན་པའི་ཐོབ་པ་ཤིན་ཏུ་གདེང་དུ་བྱས་ཏེ་ཏིང་ངེ་འཛིན་བརྒྱ་སྟོང་ལ་རྩལ་སྦྱོང་བའོ། །ཡུལ་ལ་འཇུག་པའི་རྣལ་འབྱོར་ནི། ཉམས་མཐར་ཕྱིན་པའི་གོམས་པ་མཐོང་བ་ལ་རྩལ་འབྱོངས་པས་སྒོམ་ལམ་ལ་འཇུག་པའོ། །རིག་པར་སྦྱོང་བའི་རྣལ་འབྱོར་ནི། ཉམས་མཐར་ཕྱིན་པའི་བརྟན་པ་སྒོམ་ལམ་ལ་སྦྱོར་ངེས་པར་བདེན་པའོ། །དེ་ཚོའི་ཉམས་ནི་མངོན་པར་རྟོགས་པའི་ཏིང་ངེ་འཛིན་ལ་སྦྱར་ཏེ། འཕྲོ་འདུ་ནི་གླིང་བཞི་རི་རབ་དང་བཅས་པ་ཚུན་ཆད་དུའོ། །ཁྱོན་ནི་ཁྲུ་བརྒྱ་ཉི་ཤུ་རྩ་བརྒྱད་དམ་ཡང་ན་གླིང་གཅིག་ཁེངས་པ་ཙམ་མོ། །གྲངས་ཀྱང་གླིང་གཅིག་ལྷས་ཁེངས་པའོ། །རྣམ་པ་ནི་རང་གི་མཚན་ཉིད་གསལ་བའི་ལྷའོ། །གཉིས་པ་མཚན་མེད་ཀྱི་དབང་དུ། ས་དྲུག་པ་རོ་མྱོང་བའི་སྐབས། དགའ་བ་བྱང་ཆུབ་ཀྱི་སེམས། དཔེ་ཟླ་བ་ཚེས་གསུམ་པ་ལྟ་བུ་སྟེ། སྒོམ་ཐབས་སྒྲོན་མ་ལས། མངོན་རྟོགས་པ་ཡི་ལྟ་བ་ཏིང་ངེ་འཛིན། །ཤེས་རབ་མཐུན་པའི་སྤྱོད་པ་དྲུག་པ་ཡིན། །ཞེས་གསུངས་ཏེ། དབྱིངས་དང་ཡེ་ཤེས་དབྱེར་མེད་ཀྱི་དོན་མངོན་སུམ་དུ་རྟོགས་པའི་ལྟ་བ་དང༌། དེའི་ངང་ལ་གནས་པའི་ཏིང་ངེ་འཛིན་སྒོམ་ལ་ཤེས་རབ་ཆེན་པོས་བདེན་པ་མཐོང་བ་དང་མཐུན་པའི་མི་དམིགས་པའི་སྤྱོད་པ་ལ་སློབ་པའོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། དྲུག་པ་ལ་བདུན་དབུགས་ཆེན་འབྱིན་པ་ནི། །བདག་གཉིས་མེད་རྟོགས་མཐོང་ལམ་ས་རབ་དགའོ། །རིགས་ཆེན་འཛིན་པས་གཉིས་པ་དྲི་མ་བྲལ། །མཉམ་རྫོགས་བདེན་པ་གཉིས་མཉམ་གསུམ་པ་བྱེད། །ངེས་སྤྱོད་ཐུགས་ཆུད་དོན་མཛད་བཞི་པ་འཕྲོ། །རྩལ་སྦྱོང་དབྱེར་མེད་སྦྱོང་བས་ས་ལྔ་པ། །རིག་པས་ཆོས་ཉིད་༼༣༦༡༽ཡུལ་ལ་འཇུག་པས་དྲུག །རིག་པར་སྦྱོར་བས་ཉོན་མོངས་དག་པས་བདུན། །ཞེས་གསུངས་ཏེ། འཁོར་བའི་དུཿཁ་ལས་ངལ་སོས་པས་དབུགས་ཆེན་འབྱིན་པའི་རྣལ་འབྱོར་ནི། བདག་གཉིས་མེད་པའི་དོན་ཇི་ལྟ་བ་བཞིན་རྟོགས་པས་ཐུན་མོང་བྱང་ཆུབ་སེམས་པའི་མཐོང་ལམ་རབ་དགའ་ལྟ་བུ་སྟེ་ལྟ་བ་མཉམ་པའང་མ་ཡིན་ནོ། །གསང་སྔགས་ཀྱི་རིགས་ཆེན་འཛིན་པའི་རྣལ་འབྱོར་ས་གཉིས་པ་དྲི་མ་མེད་པ་ལྟ་བུ། མཉམ་རྫོགས་ཆེན་པོའི་རྣལ་འབྱོར་བདེན་པ་གཉིས་མཉམ་ཉིད་དུ་རྫོགས་པར་རྟོགས་པས་ས་གསུམ་པ་འོད་བྱེད་པ་ལྟ་བུ། ངེས་པར་སྤྱོད་པའི་རྣལ་འབྱོར་གསང་བ་ཇི་བཞིན་པ་ཉིད་ཐུགས་སུ་ཆུད་ནས་དོན་མཛད་པས་ས་བཞི་པ་འོད་འཕྲོ་ལྟ་བུ། རྩལ་ཆེན་སྦྱོང་བའི་རྣལ་འབྱོར་ཤེས་རབ་ཀྱི་རྩལ་ཆེན་པོས་དབྱེར་མེད་ཀྱི་དོན་སྦྱོང་བས་ས་ལྔ་པ་སྦྱང་དཀའ་བ་ལྟ་བུ། རིག་པས་ཆོས་ཉིད་ཇི་བཞིན་པའི་ཡུལ་ལ་འཇུག་པའི་རྣལ་འབྱོར་ས་དྲུག་པ་མངོན་དུ་གྱུར་པ་ལྟ་བུ། ཡེ་ཤེས་ཆེན་པོ་ཡུལ་མེད་དུ་རྟོགས་པས་སྒོམ་ལམ་གྱི་རིག་པར་སྦྱོར་བའི་རྣལ་འབྱོར་ཉོན་མོངས་པའི་སྒྲིབ་པ་དག་པས་ས་བདུན་པ་རིང་དུ་སོང་བ་ལྟ་བུ་སྟེ། འདིར་མཐོང་ལམ་གྱི་ཁྱད་པར་དུ་གྱུར་པར་རིག་པར་བྱའོ།།

བཞི་པ་སྒོམ་ལམ་ས་གཅིག་གི་བདག་ཉིད་བདུན་པ་དམིགས་པས་འབྲས་བུ་སྐྱེ་བའི་ས་བཤད་པ་ནི།

དམིགས་པས་འབྲས་བུ། ཞེས་པ་ནས། ཏིང་འཛིན་སྦྱོར་བའོ། །ཞེས་པའི་བར་གྱིས་བསྟན་ཏེ།

དམིགས་པའི་འབྲས་བུ་སྐྱེ་འདི་ལ། །གྲུབ་པའི་རྣལ་འབྱོར་རྣལ་འབྱོར་ཆེ། །ངེས་པར་འབྱུང་བའི་རྣལ་འབྱོར་གསུམ། །རྒྱལ་བའི་ཐུགས་ལས་རྒྱལ་སྐྱེས་ཤིང་། །རྒྱལ་བའི་སྲས་པོ་གདུང་འཚོབ་བ།།

ཁྱད་པར་རྩལ་འཕགས་ཀུན་རྫོགས་ཤིང་། །གང་ལ་ཏིང་འཛིན་སྦྱོར་བའོ།།

ལུང་ཆེན་ཐོབ་པའི་རྣལ་འབྱོར་སྒོམ་ལམ་དངོས་གང་སྙམ་པ་ལ། དེ་ལྟ་གསང་སྔགས་མཐོང་བའི་དོན་ལ་འཇུག་ཅིང་དམིགས་ཏེ་གོམ་པས་མཐར་ལམ་གྱི་འབྲས་བུ་སྐྱེ་བ་ནི་སྐབས་བཅུ་ལས་ཡུལ་ལ་འཇུག་པའི་སྐབས་ཏེ། བསྒོམ་པའི་དྲོད་རྟགས་ད་དུང་མ་ཐོབ་སྟེ་དེ་ལ་ཉེ་བའོ། །དེ་ལྟ་བུ་རྟེན་སྐྱེད་ཀྱི་གནས་སུ་གྱུར་པའི་ས་འདི་ལ་ཡང་དབྱེ་ན་གསུམ་སྟེ། ཕྱག་རྒྱ་ཆེན་པོའི་རིགས་འཛིན་གྲུབ་པའི་རྣལ་འབྱོར་སྒོམ་ལམ་ཐོབ་པ་ཀྲི་ཡ་དང༌། དེ་ལ་གོམས་ཤིང་ཉམས་པ་མེད་པས་རྣལ་འབྱོར་ཆེའམ་ཆེན་པོ་ཨུ་པ་ཡ་དང༌། མཚན་མ་ལས་ངེས་པར་འབྱུང་སྟེ་མཐར་ལམ་ལ་སྦྱོང་བའི་རྣལ་འབྱོར་ཡོ་ག་དང་གསུམ་སྟེ་བྱང་༼༣༦༢༽ཆུབ་སེམས་དཔའི་ས་བརྒྱད་པ་ནས་བཅུ་པའི་བར་དང་ཡང་སྦྱར་རོ། །དེ་ཡང་འདིར་ཆོས་ཉིད་ཇི་བཞིན་པར་རིག་པ་རྣལ་དུ་འབྱོར་བ་དང༌། དེ་བས་ཀྱང་སྐྱེད་དུ་གྱུར་པས་ལྟོས་ནས་ཆེན་པོར་འདོགས་པ་དང་མཚན་མ་གཉིས་ལས་ཀྱང་ངེས་པར་འབྱུང་བའི་ཕྱིར་ཏེ། འདི་དག་ཐུན་མོང་གི་རྣལ་འབྱོར་སྒོ་སོ་སོའི་ཀྲི་ཡོག་མ་ཡིན་ཏེ། རྒྱུད་གཅིག་གི་ལམ་དབང་དུ་གཞག་པའི་ཕྱིར་ཏེ་དག་པའི་ས་གསུམ་ཡང་དེ་ལྟར་ངེས་སོ། །རྒྱལ་བ་རིགས་ལྔ་ལ་སོགས་པའི་དབང་བསྐུར་ཞིང་ཐུགས་ཀྱི་བྱིན་རླབས་ལས་རྒྱལ་བའི་སྲས་ཀྱི་རྒྱུད་དུ་སྐྱེས་པས་སེམས་དཔའ་བཅུ་དྲུག་ལྟ་བུར་འབྱུང་ཞིང༌། ལྷའི་ཆ་ལུགས་འཛིན་པས་རྒྱལ་བའི་སྲས་པོ་སེམས་དཔའ་བཅུ་དྲུག་གི་སྤྲུལ་པའི་རྒྱལ་ཚབ་བྱེད་པས་གདུང་འཚོབ་པ་རྟོགས་པ་དང་གོམས་པས་ཁྱད་པར་གྱིས་ཤེས་རབ་དང་ཏིང་ངེ་འཛིན་གྱི་རྩལ་འཕང་ཀུན་རྫོགས་ཤིང་ཆུབ་པར་བྱེད་དེ། ཡང་དག་པར་རྫོགས་ཏེ་མཐར་ཕྱིན་པའི་ས་གང་ལ་ངེས་པའི་ཏིང་ངེ་འཛིན་རྣལ་འབྱོར་དུ་སྒོམས་པས་སྦྱོར་བར་བྱེད་ཅིང་རིགས་རྒྱུད་འཛིན་པ་རྡོ་རྗེ་འཛིན་མཆོག་དམ་པ་དང༌། རྒྱལ་བ་མང་པོ་མཐོང་བས་སྟུག་པོ་བཀོད་པའོ། །ཐུན་མོང་མ་ཡིན་པར་འདི་ཉིད་ཀྱི་རྟོགས་པ་ཁོ་ནའི་དབང་དུ་ན་གསང་སྔགས་གཉིས་སུ་མེད་པར་མཐོང་ནས་སྒོམ་ལམ་དེ་ལ་ཤིན་ཏུ་མི་གཡོ་བའི་རྣལ་འབྱོར་གྲུབ་པ་དང༌། དེ་ལ་གནས་པ་རྣལ་འབྱོར་མཆོག་ཏུ་ཆེ་བའི་མི་གཡོ་བ་ཐོབ་པ་དང༌། དེ་ཉིད་བརྟན་པས་ངེས་པར་འབྱུང་སྟེ་མཐར་ཕྱིན་པའི་ལམ་ཐོབ་ལ་མ་རག་པ་ནི། རྒྱལ་བའི་ཐུགས་ལས་སྐྱེས་པའི་རྒྱལ་སྲས་སུ་དབང་བསྐུར་བྱིན་གྱིས་བརླབས་པ་ལས་འབྱུང་ཞིང་གདུང་འཚོབ་པས་ཁྱད་པར་རྩལ་འཕང་གི་གོམས་པ་མཐར་ཕྱིན་ཏེ་བསླབ་པ་རྫོགས་པའི་དོན་གང་ལ་ཏིང་ངེ་འཛིན་མཆོག་གི་རྣལ་འབྱོར་དུ་གནས་པའོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ལའང་རྣལ་འབྱོར་གསུམ་སྟེ། གྲུབ་པའི་རྣལ་འབྱོར་ནི་ཉམས་ཐོབ་མ་ཐག་པ་ཕྱག་རྒྱ་ཆེན་པོའི་རིག་འཛིན་གྲུབ་པའོ། །རྣལ་འབྱོར་ཆེན་པོ་ནི། ཉམས་བརྟན་པ་དེའི་ངང་ལ་གནས་པའོ། །ངེས་༼༣༦༣༽པར་འབྱུང་བའི་རྣལ་འབྱོར་ནི། ཉམས་མཐར་ཕྱིན་པ་མཐར་ལམ་ལ་སྦྱོར་ངེས་པའོ། །ཉམས་དེ་ཚོ་ནི་མི་ཟད་མཛོད་ཀྱི་ཏིང་ངེ་འཛིན་ལ་སྦྱོར་ཏེ། འཕྲོ་འདུ་ནི་སྟོང་གསུམ་ཚུན་ཆད་དུའོ། །ཁྱོན་ནི་ཁྲུ་ཉིས་བརྒྱ་ལྔ་བཅུ་ང་དྲུག་གམ་ཡང་ན་སྟོང་གསུམ་ལྷས་ཁེངས་པའོ། །གྲངས་ཀྱང་སྟོང་གསུམ་ལྷས་གང་བའོ། །རྣམ་པ་ནི་ཆོས་ཉིད་ཟག་མེད་ཀྱི་ལྷའོ། །གཉིས་པ་མཚན་མེད་ཀྱི་དབང་དུ། ས་བདུན་པ་ཡུལ་ལ་འཇུག་པའི་སྐབས། མི་འགྱུར་བ་བྱང་ཆུབ་ཀྱི་སེམས། དཔེ་ཟླ་བ་ཚེས་བཞི་པ་ལྟ་བུ་སྟེ། སྒོམ་ཐབས་སྒྲོན་མ་ལས། བདུན་པ་མི་གཡོ་བ་ཡི་ལྟ་བ་དང༌། །མི་ཟད་མཛོད་ཀྱི་ཏིང་འཛིན་མི་གཡོ་སྤྱོད། །ཅེས་གསུངས་ཏེ། ཆོས་ཉིད་མི་གཡོ་བའི་དོན་རྟོགས་པའི་ལྟ་བ་དང༌། དམིགས་མེད་ཀྱི་དོན་སྒོམ་པའི་མི་ཟད་མཛོད་ཀྱི་ཏིང་ངེ་འཛིན་དང༌། ནང་དུ་ཡང་དག་འཇོག་ལས་མི་གཡོ་བར་སྤྱོད་པ་རྣམས་སོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། བདུན་པ་ལ་གསུམ་གྲུབ་པའི་རྣལ་འབྱོར་ནི། །མཚན་མ་ལས་གྲོལ་མི་གཡོར་གནས་པས་བརྒྱད། །ལེགས་པ་ཆེར་ལྡན་རྣལ་འབྱོར་ཆེན་པོར་དགུ། །ངེས་འབྱུང་གཞིར་གནས་ཆོས་ཀྱི་སྤྲིན་ཆེན་ཏེ། །དམ་ཚིག་ཡེ་ཤེས་འབྱེད་པས་ཕྱི་རྒྱུད་གསུམ། །ཞེས་གསུངས་ཏེ། ཆོས་ཉིད་རིག་པ་ལ་གྲུབ་པའི་དོན་རྣལ་མ་ལ་འབྱོར་པ་ནི། མཚན་མ་ལས་གྲོལ་ཏེ་ཅིས་ཀྱང་མི་གཡོ་བར་གནས་པས་ས་བརྒྱད་པ་མི་གཡོ་བའོ། །དེ་བས་ཀྱང་སྐྱེད་དུ་གྱུར་ཏེ་ལེགས་པ་ཆེར་ལྡན་པའི་རྣལ་འབྱོར་ཆེན་པོ་ནི་ས་དགུ་པ་ལེགས་པའི་བློ་གྲོས་སོ། །ངེས་པར་འབྱུང་བའི་རྣལ་འབྱོར་ནི། དེ་ཉིད་ཆོས་ཀྱི་གཞིར་གནས་པས་ས་བཅུ་པ་ཆོས་ཀྱི་སྤྲིན་ཆེན་ཉིད་དེ། རིམ་པ་བཞིན་དམ་ཚིག་པ་དང་ཡེ་ཤེས་པ་འབྱེད་ཅིང་འཕྲོ་འདུ་བྱེད་པས་ཕྱི་རྒྱུད་ཀྲི་ཡ་ཨུ་པ་ཡོ་ག་གསུམ་མོ།།

ལམ་ལྔ་པ་མཐར་ལམ་ས་གསུམ་གྱི་བདག་ཉིད་དུ་བཤད་པ་ལ་གསུམ་སྟེ། གནས་པ་མི་འགྱུར་བའི་ས་བཤད་པ། གདལ་བ་ཆོས་ཉིད་ཀྱི་ས་བསྟན་པ། རྫོགས་པ་སྤྱིར་ཆིབས་ཀྱི་ས་བཤད་པའོ། །དང་པོ་ནི།

གནས་པ་མི་འགྱུར། ཞེས་པ་ནས། གནས་ན་ལོངས་སྤྱོད་པའོ། །ཞེས་པའི་བར་གྱིས་བསྟན་ཏེ།

གནས་པས་མི་འགྱུར་ས་འདི་ལ། །རྨད་བྱུང་རོལ་པའི་རྣལ་འབྱོར་དང་། །ཚོགས་ཆེན་འདུས་དང་རྩལ་ཆེན་རྫོགས། །གསུམ་དུ་རྫོགས་པར་ཤེས་བྱ་སྟེ། །ཕྱག་རྒྱ་ཆེན་པོ་སྒྱུ་མ་ཡིན། །འཁོར་ལོས་སྒྱུར་བའི་རྒྱལ་ཆེན་པོ། །མཐོང་བའི་གནས་ནས་བཅུ་དྲུག་པ། །རྫོགས་པའི་གནས་ན་ལོངས་སྤྱོད་པའོ།།

གཉིས་༼༣༦༤༽སུ་མེད་པའི་དོན་ལ་རིག་པ་རྣལ་དུ་གནས་པ་ཉིད་ལས་མི་འགྱུར་བའི་ངང་དུ་ཕེབས་པས་སྐབས་བཅུ་ལས་ཀྱང་རྟོག་ཆེན་ལ་ཕེབས་པའི་སྐབས་ཉིད་དུ་གསུངས་ཏེ། ཏིང་ངེ་འཛིན་མཐར་ཕྱིན་པ་ལ་སྐྱོན་དབང་དུ་འགྱུར་བ་མེད་པས་རྟགས་ཆེན་པོ་དང་ལྡན་པའི་ས་འདི་ལ་ཡང་རྣལ་འབྱོར་གསུམ་སྟེ། ཐམས་ཅད་ཀྱང་རང་རིག་པའི་ཆོ་འཕྲུལ་སྣང་བར་རྟོགས་པས་དབང་བསྒྱུར་ཐབས་ཀྱི་ཏིང་ངེ་འཛིན་དང་ལྡན་པ་སྟེ། སྦྱོར་སྒྲོལ་ལ་སོགས་པ་བླང་དོར་མེད་པའི་སྤྱོད་པ་རྨད་དུ་བྱུང་བར་སྤྱོད་ཅིང་དམ་རྫས་སོགས་ལ་ཉམ་ང་མེད་པར་རོལ་པའི་རྣལ་འབྱོར་དང༌། འདོད་ཡོན་ལྔ་ལ་སོགས་པ་ཅི་སྤྱད་ཀྱང་ཚོགས་གཉིས་སུ་འགྱུར་བར་ཤེས་པས་ཚོགས་ཆེན་འདུས་པའི་རྣལ་འབྱོར་དང་། འདི་ནས་ལུང་ཆེན་པོའི་ཚོགས་སྒྲུབ་པས་དེ་གྲུབ་ནས་ཚོམ་བུ་དང་བཅས་པ་རིགས་འཛིན་གྱི་སར་གཤེགས་པར་ཡང་གསུངས་སོ། །མཉམ་པ་ཆེན་པོའི་ལྟ་སྤྱོད་ཟུང་དུ་འབྲེལ་བས་རིག་པའི་རྩལ་ཆེན་པོ་དང་ལྡན་པས་ཆོ་འཕྲུལ་བཞི་འཐོབ་ཅིང་འཆད་པའི་སྐྱེས་བུར་ནུས་པས་ཡོན་ཏན་རྫོགས་པའི་རྣལ་འབྱོར་དང་གསུམ་དུ་རྫོགས་པར་ཤེས་པར་བྱ་སྟེ། དེ་དག་ནི་ཆ་ལུགས་ལྷའི་སྐུ་ཕྱག་རྒྱ་ཆེན་པོ་ཉིད་དུ་གསལ་བས་སྒྱུ་མ་ལྟ་བུའི་སྐུ་ཅན་ཕྱག་རྒྱ་ཆེན་པོའི་རིག་འཛིན་ལ་གནས་པ་ཡིན་ནོ། །དེ་ནི་དཔེར་ན་འཁོར་ལོས་སྒྱུར་བའི་རྒྱལ་པོ་ཆེན་པོ་གང་གི་མཚན་དཔེ་དང་ལོངས་སྤྱོད་མཐོང་བ་དང་འདྲ་སྟེ་བདག་ཉིད་ཆེན་པོ་རྒྱལ་བ་རྡོ་རྗེ་འཆང་ཆེན་པོའི་ཞལ་མཐོང་བས་དགོངས་པ་ལྷུན་གྱིས་གྲུབ་པའི་ངང་ནས་དབང་ཕྱུག་ཆེན་པོའི་གནས་ཀྱི་འོག་མིན་ཆེན་པོའི་འཁོར་དུ་འདུས་ནས་སེམས་དཔའ་བཅུ་དྲུག་གི་མཚན་དཔེ་ཐུན་མོང་མ་ཡིན་པ་དང་ལྡན་ཏེ་འབྲས་བུའི་གཞིའི་ས་མཆོག་རྫོགས་པའི་འཁོར་སྨིན་པ་ཞིང་ཁམས་དག་པའི་གནས་ན་ཐམས་ཅད་ལ་མ་ཆགས་པར་ལོངས་སྤྱོད་པས་པདྨ་སྤྱན་གྱི་ས་ནོན་ཏེ་དགོངས་པ་བརྡའི་ཆོས་བསྟན་པ་ལ་སྤྱོད་པའོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ལའང་རྣལ་འབྱོར་གསུམ་སྟེ། རྨད་བྱུང་རོལ་པའི་རྣལ་འབྱོར་ནི། ཉམས་ཐོབ་པ་སྤྱོད་པ་བླང་དོར་མེད་པར་ཞུགས་ནས་༼༣༦༥༽སློབ་པའོ། །ཚོགས་ཆེན་འདུས་པའི་རྣལ་འབྱོར་ནི། ཉམས་གོམས་པ་བླང་དོར་མེད་པ་ལ་སློབ་པའི་ཚོགས་བསྒྲུབ་པའོ། །རྩལ་ཆེན་རྫོགས་པའི་རྣལ་འབྱོར་ནི། ཉམས་མཐར་ཕྱིན་པ་ཚོགས་གྲུབ་ནས་རིག་འཛིན་གྱི་རྩལ་རྫོགས་པའོ། །ཉམས་འདི་དག་ནི་འབྱུང་ཆེན་སྤྲུལ་པའི་ཏིང་ངེ་འཛིན་དང༌། དབང་བསྒྱུར་ཐབས་ཀྱིས་ཏིང་ངེ་འཛིན་ལ་སྦྱོར་ཏེ། འཕྲོ་འདུ་ནི་རྣམ་རྟོག་གི་སེམས་ཀྱིས་ཁྱབ་ཚད་དུའོ། །ཁྱོན་ཀྱང་སེམས་ཀྱིས་ཁྱབ་ཚད་དོ། །གྲངས་ཀྱང་སེམས་ཀྱིས་ཁྱབ་ཚད་དོ། །རྣམ་པ་ནི་ལྷུན་གྲུབ་ཀྱི་ལྷ་ཐོབ་པའོ། །གཉིས་པ་མཚན་མེད་ཀྱི་དབང་དུ་ས་བརྒྱད་པ་རྟོག་ཆེན་ལ་ཕེབས་པའི་སྐབས། རིག་པ་བྱང་ཆུབ་ཀྱི་སེམས་དཔེ་ཟླ་བ་ཚེས་ལྔ་པ་ལྟ་བུ་སྟེ། སྒོམ་ཐབས་སྒྲོན་མ་ལས། བརྒྱད་པ་ཡེ་ཤེས་རིག་པའི་ལྟ་བ་དང༌། །འབྱུང་ཆེན་སྤྲུལ་པའི་ཏིང་འཛིན་བརྟུལ་ཞུགས་སྤྱོད། །ཅེས་གསུངས་ཏེ། གཉིས་མེད་ཀྱི་ཡེ་ཤེས་ལ་རིག་པ་རྣལ་དུ་ཕེབས་པའི་ལྟ་བ་དང༌། འབྱུང་བ་ཆེན་པོ་ལྔ་ལ་གཞལ་ཡས་དང་ལྷར་སྤྲུལ་པའི་ཏིང་ངེ་འཛིན་དང༌། སྤང་བླང་མེད་པ་བརྟུལ་ཞུགས་ཀྱི་སྤྱོད་པ་ལ་གནས་པའོ། །རྩ་བའི་རྒྱུད་ལས་ཏིང་ངེ་འཛིན་བཅུ་གཉིས་གསུངས་པས་འདིར་ཡང་དབང་བསྒྱུར་ཐབས་ཀྱི་ཏིང་ངེ་འཛིན་སྦྱར་རོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། བརྒྱད་པ་ལ་གསུམ་རྨད་བྱུང་རོལ་པ་ནི། །རྣལ་འབྱོར་ཆེན་པོ་བསྐྱེད་པའི་སྐྱེད་པའོ། །ཚོགས་ཆེན་འདུན་པས་བསྐྱེད་པའི་རྫོགས་པར་རྫོགས། །རྩལ་ཆེན་རྫོགས་པ་བསྐྱེད་པའི་རྫོགས་པ་ཆེ། །ཞེས་གསུངས་ཏེ། བླང་དོར་མེད་པར་རྨད་བྱུང་རོལ་པར་སྤྱོད་པའི་རྣལ་འབྱོར་ནི། རྣལ་འབྱོར་ཆེན་པོ་བསྐྱེད་པའི་སྐྱེད་པའི་རིམ་པའོ། །ཅི་སྤྱད་ཚོགས་ཆེན་གཉིས་སུ་ཤེས་ཏེ་འདུན་པའི་རྣལ་འབྱོར་ནི་བསྐྱེད་པའི་རྫོགས་པར་རྫོགས་པ་ཡིན་ལ། ལྟ་སྤྱོད་འབྲེལ་བའི་རིག་པའི་རྩལ་ཆེན་རྫོགས་པའི་རྣལ་འབྱོར་ནི། བསྐྱེད་པའི་རྫོགས་པ་ཆེན་པོ་སྟེ་ཕྱག་རྒྱའི་རིགས་འཛིན་ཆེན་པོའོ།།

གཉིས་པ་གདལ་བ་ཆོས་ཉིད་ཀྱི་ས་བསྟན་པ་ནི།

གདལ་བ་ཆོས་ཉིད། ཅེས་པ་ནས། སྒྱུ་མ་ཡིན་སྤྱོད་པའོ། །ཞེས་པའི་༼༣༦༦༽བར་གྱིས་བསྟན་ཏེ།

བདལ་བ་ཆོས་ཉིད་ས་འདི་ལ། །རོལ་པ་རྒྱན་གྱི་རྣལ་འབྱོར་དང་། །བདེ་བ་ཆེ་དང་ཐིག་ལེ་རྫོགས།།

གསུམ་ཉིད་དུ་ནི་སྣང་བ་ལ། །ཡུལ་དོན་ཡེ་ཤེས་དེས་སྦྱར་བ། །ཤེས་པར་བྱས་པས་ཐམས་ཅད་རྫོགས།།

སྒྱུ་མ་སྒྱུ་མ་ཡིན་དཔྱོད་པའོ།།

དབྱིངས་དང་ཡེ་ཤེས་གཉིས་སུ་མེད་པའི་ཆོས་ཉིད་མཉམ་པ་ཉིད་དུ་ལྷུན་གྱིས་གྲུབ་པས་ཐམས་ཅད་རིག་པའི་རྩལ་དུ་སྣང་བར་རྟོགས་པ་ཉིད་གདེང་དུ་གྱུར་པས་རིག་པ་ཕྱི་ནང་གི་ཆོས་ཀུན་ལ་གདལ་བར་ཁྱབ་སྟེ་མུ་མེད་པ་ཉིད་དུ་བསྣུམས་པའི་ཆོས་ཉིད་དག་པར་གསལ་བས་གདེང་དུ་གྱུར་པའི་སྐབས་སུའང་གསུངས་ཏེ། བསྒོམ་པའི་མཐའི་རྟགས་ཆེན་པོ་འདིར་ཐོབ་པའི་ས་མཆོག་འདི་ལ་ཡང་རྣལ་འབྱོར་གསུམ་སྟེ། སྣང་བ་ཀུན་ཏུ་བཟང་མོའི་རོལ་པར་རྟོགས་ཏེ་དབྱིངས་སུ་སྤྱོད་པ་ལ་འདོད་ཡོན་ལྔ་ཆོས་ཉིད་ཀྱི་རྒྱན་དུ་རྫོགས་པར་ཤེས་པས་ལོངས་སྤྱོད་རྫོགས་པ་ཉིད་ཀྱི་རྣལ་འབྱོར་དམ་པ་དང༌། སྟོང་པ་ཉིད་དང་སྙིང་རྗེ་རོ་མཉམ་པས་ཉོན་མོངས་དང་སྡུག་བསྔལ་ལ་སོགས་པ་ཆོས་ཐམས་ཅད་བདེ་བ་ཆེའམ་ཆེན་པོ་བྱང་ཆུབ་ཀྱི་སེམས་རང་བྱུང་གི་ཡེ་ཤེས་ཀུན་ཏུ་བཟང་པོར་རྟོགས་པའི་རྣལ་འབྱོར་དང༌། དབྱིངས་དང་ཡེ་ཤེས་གཉིས་སུ་མེད་པར་ངང་ཆེན་པོའི་ཐིག་ལེར་ཡོངས་སུ་རྫོགས་པར་རྟོགས་པའི་རྣལ་འབྱོར་དང་གསུམ་ཉིད་དུ་ནི་སྣང་བ་ལ་ཡང༌། ཆོས་ཀྱི་དབྱིངས་ཀྱི་ཡུལ་ལ་སྦྱོར་བ་དང༌། སྙིང་རྗེ་འབྱུང་བས་དོན་མི་འགོག་པ་དང༌། སྙིང་རྗེ་དང་ཆོས་ཉིད་ཐ་མི་དད་པའི་ཕྱིར་རིག་པའི་ཡེ་ཤེས་དེ་ཉིད་དང་སྦྱར་བ་སྟེ་ཤེས་བྱ་རིལ་དེ་ལྟར་ཤེས་པར་བྱས་པས་དབྱིངས་དང་ཡེ་ཤེས་གཉིས་མེད་ཀྱི་ངང་དུ་འབྲས་བུ་ཐམས་ཅད་རྫོགས་ཏེ་མཐར་ཕྱིན་པའོ། །འདི་དག་ཀྱང་ལྷུན་གྱིས་གྲུབ་པའི་རིག་འཛིན་ཆེན་པོ་སྟེ། སྤྱོད་ཡུལ་ཡེ་ཤེས་འགག་མེད་སྒྱུ་མ་ལྟ་བུའི་སྐུར་ཡེ་ནས་རང་གསལ་བའང་དེ་ལྟར་རྣམ་པར་དག་པའི་སྒྱུ་མ་ལྟ་བུར་ཤར་བ་ཡིན་ཏེ་རིག་པས་གཉིས་སུ་མེད་པར་གསལ་བའི་ངང་ལ་གཞན་དོན་སྤྱོད་པའི་མཛད་པ་ཡང་སྣང་བར་འགྱུར་བས་ཡི་གེ་འཁོར་ལོ་ཚོགས་ཆེན་གྱི་སའོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ལའང་རྣལ་འབྱོར་གསུམ་སྟེ། རོལ་པ་རྒྱན་གྱི་རྣལ་འབྱོར་ནི། ཉམས་ཐོབ་པ་འདོད་ཡོན་ལྔ་མ་སྤང་པར་ཆོས་ཉིད་ཀྱི་རྒྱན་དུ་ལོངས་སྤྱོད་པའོ། །བདེ་བ་ཆེན་པོའི་རྣལ་འབྱོར་ནི། ཉམས་གོམས་པ། ཉོན་མོངས་པ་དང་སྡུག་བསྔལ་༼༣༦༧༽བདེ་ཆེན་དུ་གསལ་བའོ། །ཐིག་ལེ་རྫོགས་པའི་རྣལ་འབྱོར་ནི། ཉམས་བརྟན་པ་ཆོས་ཐམས་ཅད་ཡེ་ཤེས་ཀྱི་ཐིག་ལེར་མཇལ་བའོ། །ཉམས་དེ་ཚོ་ནི་རྣམ་དག་དབྱིངས་ཀྱི་ཏིང་ངེ་འཛིན་ལ་སྦྱོར་ཏེ། འཕྲོ་འདུ་དང་ཁྱོན་དང་གྲངས་གསུམ་ཆར་ནམ་མཁས་ཁྱབ་ཚད་དོ། །རྣམ་པ་ནི་ལྷུན་གྲུབ་ཀྱི་ལྷ་ཤིན་ཏུ་ཐོབ་པའོ། །གཉིས་པ་མཚན་མེད་ཀྱི་དབང་དུ། ས་དགུ་པ་གདེང་དུ་གྱུར་པའི་སྐབས། གནས་པ་བྱང་ཆུབ་ཀྱི་སེམས་དཔེ་ཟླ་བ་ཚེས་བརྒྱད་པ་ལྟ་བུ་སྟེ། སྒོམ་ཐབས་སྒྲོན་མ་ལས། དགུ་པ་གཉིས་མེད་དབྱིངས་ཀྱི་ལྟ་བ་དང༌། །རྣམ་དག་དབྱིངས་ཀྱི་ཏིང་འཛིན་དབང་བསྒྱུར་ཐབས། །ཞེས་གསུངས་ཏེ། དབྱིངས་དང་ཡེ་ཤེས་གཉིས་མེད་ཆོས་དབྱིངས་བརྡལ་བ་ཆེན་པོའི་ལྟ་བ་དང༌། རྟོག་པ་རྣམས་ལྷའི་དཀྱིལ་འཁོར་དུ་རྣམ་པར་དག་སྟེ་རང་བཞིན་མེད་པ་དབྱིངས་ཀྱི་ཏིང་ངེ་འཛིན་སྒོམ་པ་དང༌། འདོད་ཡོན་ལ་དབང་བསྒྱུར་བའི་ཐབས་ཀྱི་སྤྱོད་པ་དང་ལྡན་པའོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས།

དགུ་པ་ལ་གསུམ་རོལ་པ་རྒྱན་དེ་ཡི། །རྫོགས་པའི་བསྐྱེད་པ་རྩོལ་བཅས་རྣལ་འབྱོར་ཡིན། །བདེ་བ་ཆེན་པོ་རྫོགས་པའི་རྫོགས་པ་དངོས། །ཐིག་ལེར་རྫོགས་པ་རྫོགས་པའི་ངང་གནས་པའོ། །ཞེས་གསུངས་ཏེ། འདོད་ཡོན་ལྔ་ཆོས་ཉིད་ཀྱི་རྒྱན་དུ་སྤྱོད་པས་རོལ་པ་རྒྱན་གྱི་རྣལ་འབྱོར་དེ་ནི་རྫོགས་པའི་བསྐྱེད་པ་སྟེ་རྩོལ་བ་དང་བཅས་པའི་རྣལ་འབྱོར་ཡིན་ལ། ཉོན་མོངས་དང་སྡུག་བསྔལ་བདེ་ཆེན་དུ་གསལ་བས་བདེ་བ་ཆེན་པོའི་རྣལ་འབྱོར་ནི་རྫོགས་པའི་རྫོགས་པ་དངོས་ཡིན་ཅིང༌། དེ་ཉིད་བརྟན་པས་ཡེ་ཤེས་ཀྱི་ཐིག་ལེར་རྫོགས་པའི་རྣལ་འབྱོར་ནི་རྫོགས་པ་ཆེན་པོའི་ངང་ལ་གནས་པའོ། །འདི་དག་ཕྱག་རྒྱ་ཆེན་པོའི་རིགས་འཛིན་དུ་གསུངས་པའང་བཞུགས་མོད་ཀྱི། ཞིབ་པར་དབྱེ་ན། དང་པོ་ཕྱག་རྒྱའི་རིགས་འཛིན་མཐར་ཐུག་པ། གཉིས་པ་དེས་ལྷུན་གྲུབ་རིག་འཛིན་ལ་སྦྱོར་བའི་སྐབས། གསུམ་པ་ལྷུན་གྲུབ་དངོས་ཐོབ་པར་བྱས་ན་གཞུང་གི་གསུང་སྒྲོས་དང་ཤིན་ཏུ་མཐུན་ནོ།།

གསུམ་པ་རྫོགས་པ་སྤྱིར་ཆིབས་ཀྱི་ས་བཤད་པ་ནི།

རྫོགས་པ་སྤྱིར་ཆིབས། ཞེས་པ་ནས། རང་བྱུང་གདལ་བའོ། །ཞེས་པའི་བར་གྱིས་བསྟན་ཏེ།

རྫོགས་པ་སྤྱིར་ཆིབས་ས་འདི་ནི། །བཅུ་པའི་ཐ་མ་དང་པོ་ལས། །མཐར་རྫོགས་ཀུན་གྱི་རྟོག་ཡིན་ཏེ།།

ཀློང་ཡངས་ནམ་མཁའི་སྙིང་པོ་ལ། །སྤྲིན་མེད་ཉི་མ་འབུམ་གྱིས་བརྡལ། །ཅིར་སྣང་ཅིར་ཡང་མ་ཡིན་པ།།

མི་སྐྱེ་མི་འགག་ངོ་བོ་ལ། །ཇི་ལྟར་བལྟས་དགུ་དེར་སྣང་བ། །བདལ་ཁྱབ་སྤྱི་རྒྱ་རླབས་ཀྱིས་བཅད།།

དེ་ཡང་དམ་པའི་ཁྱད་པར་གྱིས། །བདག་ཉིད་ཆེན་པོའི་རྣལ་འབྱོར་དང་།།

ལྷུན་གྱིས་གྲུབ་དང་ཀློང་ཡངས་ཆུབ། །གསུམ་རྫོགས་རང་བྱུང་བདལ་བའོ།།

སའི་རིམ་༼༣༦༨༽པ་ཀུན་ལྷུན་གྱིས་རྫོགས་པ་ཉིད་ཀྱི་སྤྱིར་ཞེས་སྤྱི་བོར་ཕྱིན་ཏེ་ཡོངས་སུ་ཆིབས་པའི་ས་མཆོག་དམ་པ་འདི་ནི་རྣལ་འབྱོར་བཅུ་ཡི་གྲངས་ཀྱི་ཐ་མ་མཐར་ཐུག་ཅིང་སངས་རྒྱས་ཀྱི་ས་ལ་འཇུག་པའི་གྲལ་གྱི་དང་པོ་འདིར་ལས་སུ་རུང་སྟེ་སྐྱེད་དུ་བྱ་བ་གཏན་མེད་པར་མཐར་ཕྱིན་པར་རྫོགས་པ་ཡིན་པས། ལས་སུ་རུང་བའི་སྐབས་སུའང་གསུངས་ཏེ། དེས་ན་མཐའི་རྟགས་རྨད་དུ་བྱུང་བ་རིལ་མ་ལུས་ལ་ཀུན་མི་འགྱུར་བར་བརྟན་པ་ཉིད་ཀྱི་ས་མཆོག་གང་ཞིག་གྲལ་གྱི་ཡང་ཐོག་འདིར་ས་རྣམས་མཐར་ཕྱིན་པའི་རྩེ་མོའི་ཏོག་ཆེན་པོ་ཡིན་ཏེ། འདིའི་ངོ་བོ་ནི་ཐམས་ཅད་ཀྱང་རང་བྱུང་གི་ཡེ་ཤེས་ཆེན་པོ་རང་སྣང་བའི་ཀློང་ཡངས་པ་འབའ་ཞིག་ལ་གང་ཡང་མ་ཆུད་པ་མེད་པས་ནམ་མཁའི་དབྱིངས་ལྟ་བུའི་སྙིང་པོར་གྱུར་པའི་འབྲས་བུའི་བཅུད་ཆེན་པོ་ལ་ཀུན་ཡོངས་སུ་རྫོགས་པར་གསལ་བ་ནི། དཔེར་ན་སྤྲིན་མེད་པའི་ནམ་མཁའ་ལ་ཉི་མ་འབུམ་དུས་གཅིག་ཏུ་ཤར་བ་ལྟར་གྱིས་ཡེ་ཤེས་སྒྲིབ་མེད་དུ་གསལ་བའི་ངོ་བོར་ཡོངས་སུ་རྫོགས་པར་གདལ་བ་དེ་ནི་ཅི་སྣང་ཇི་སྲིད་གང་དུའང་མི་འགོག་ལ་རྣམ་པ་གང་ཅིར་ཡང་གྲུབ་པ་མ་ཡིན་པ་སྟེ་རང་བཞིན་གང་དུའང་མི་སྐྱེ་བས་མཐའི་སྣང་བ་མི་འབྱུང་ཞིང་གང་ལྟར་སྣང་བའང་མི་འགག་པས་ཐ་སྙད་དུ་མཐའ་རིལ་ལས་གྲོལ་བའི་ངོ་བོ་ཉིད་དུ་རྫོགས་པ་ལས་དང་རྣམ་པར་ཐར་པའི་སྒོ་ཐ་དད་པར་ཇི་ལྟར་བལྟས་རྒུ་དེ་ལྟར་བསམ་པ་དེར་རང་སྣང་བ་ཉིད་ཀྱང་འདིར་ཆུབ་པས་གདལ་ཁྱབ་ཆེན་པོས་སྤྱི་རྒྱ་རླབས་ཀྱིས་བཅད་པ་ཁོ་ནའོ། །དེ་ལྟ་བུའི་རྫོགས་པ་ཆེན་པོ་དེ་ལ་ཡང་ལྟ་བ་དམ་པའི་ཁྱད་པར་གྱིས་དབྱེ་ན་རྣལ་འབྱོར་གསུམ་སྟེ། དབྱིངས་དང་ཡེ་ཤེས་ཀྱང་ཐ་སྙད་ཙམ་དུ་རྟོགས་ཏེ། ཆོས་ཐམས་ཅད་རིལ་ བདག་ཉིད་ཆེན་པོ་རིག་པ་རང་བྱུང་གི་ཡེ་ཤེས་གཉིས་མེད ་ཆེན་པོའི་རྣལ་འབྱོར་ཡུལ་མེད་རང་གསལ་གྱི་ངང་གཅིག་ཏུ་རྟོགས་པ་དང༌། དེ་ཉིད་ལའང་རྒྱུ་འབྲས་རིལ་མ་བརྩལ་ལྷུན་གྱིས་གྲུབ་པར་དགོངས་པས་མ་འདྲེས་ཡོངས་རྫོགས་ཆེན་པོའི་རྣལ་འབྱོར་དང༌། དེ་ཉིད་ཀྱི་ཐ་སྙད་ལའང་མི་གནས་ཏེ་གང་ཡང་མ་སྤངས་བཀོལ་མ་མེད་པས་ཆོས་ཉིད་ཀྱི་ཀློང་ཡངས་པར་ཆུབ་སྟེ་མ་འདྲེས་མཐའ་བྲལ་ཡོངས་རྫོགས་དབྱེར་མེད་དུ་གསལ་༼༣༦༩༽བའི་དཀྱིལ་འཁོར་དུ་དགོངས་པའི་རྣལ་འབྱོར་ཏེ། དེ་ལྟར་གསུམ་པོ་དེ་དག་རིལ་ལྷུན་གྱིས་རྫོགས་པས་གསུམ་གྱི་ཐ་སྙད་ཀྱང་མེད་པར་རང་བྱུང་ཡེ་ཤེས་ཀྱི་ཉི་མ་འཆར་ནུབ་མེད་པར་གདལ་ཁྱབ་ཏུ་གྱུར་པ་ནི་འབྲས་བུ་ཆེན་པོ་མཐར་ཐུག་པ་ཉིད་དུ་ཕྱིན་པའོ། །འདི་ཉིད་ལྷུན་གྱིས་གྲུབ་པའི་རིག་འཛིན་ཆེན་པོ་རྒྱུ་དག་པའི་སངས་རྒྱས་སོ། །འདི་ལའང་མཚན་བཅས་ལྷ་སྒོམ་ པ་དང་མཚན་མེད་ཆོས་ཉིད་སྒོམ་པ་གཉིས་ལས། དང་པོ་ལའང༌། རྣལ་འབྱོར་གསུམ་སྟེ། བདག ་ཉིད་ཆེན་པོའི་རྣལ་འབྱོར་ནི། ཉམས་ཐོབ་པ་ལྷ་དང་ཆོས་ཐམས་ཅད་རང་རིག་ཏུ་གསལ་བའོ། །ལྷུན་གྱིས་གྲུབ་པའི་རྣལ་འབྱོར་ནི། ཉམས་བརྟན་པ་རྒྱུ་འབྲས་ཐམས་ཅད་གཉིས་མེད་ཀྱི་ངང་དུ་ལྷུན་གྱིས་གྲུབ་པའོ། །ཀློང་ཡངས་ཆུབ་པའི་རྣལ་འབྱོར་ནི་ཉམས་མཐར་ཕྱིན་པ་རྩོལ་བ་མེད་པར་གསལ་བ་ལ་མི་མཐུན་པའི་སེལ་མེད་པའོ། །ཉམས་དེ་ཚོ་ནི་ཐམས་ཅད་རྫོགས་པའི་ཏིང་ངེ་འཛིན་དང༌། སྣང་གསལ་ཡེ་འཕྱོའི་ཏིང་ངེ་འཛིན་ལ་སྦྱར་ཏེ། འཕྲོ་འདུ་དང་ཁྱོན་དང་གྲངས་གསུམ་གཅིག་ཆར་ཆོས་ཀྱི་དབྱིངས་ཀྱིས་ཁྱབ་ཚད་དོ། །རྣམ་པ་ནི་ལྷུན་གྲུབ་ཀྱི་ལྷ་བརྟན་ཞིང་མཐར་ཕྱིན་པའོ། །གཉིས་པ་མཚན་མེད་ཀྱི་དབང་དུ། ས་བཅུ་པ་ལས་སུ་རུང་བའི་སྐབས། རྫོགས་པ་བྱང་ཆུབ་ཀྱི་སེམས། དཔེ་ཟླ་བ་ཚེས་བཅུ་དྲུག་པ་ལྟ་བུ་སྟེ། སྒོམ་ཐབས་སྒྲོན་མ་ལས། ཐ་མ་གཟའ་གཏད་མེད་པའི་ལྟ་བ་དང༌། །སྣང་གསལ་ཡེ་འཕྱོའི་ཏིང་འཛིན་ལྷུན་གྲུབ་སྤྱོད། །ཅེས་གསུངས་ཏེ། རང་བྱུང་ཡེ་ཤེས་འབའ་ཞིག་ལས་སེལ་མེད་པས་གཟའ་གཏད་མེད་པའི་ལྟ་བ་དང༌། ཐམས་ཅད་མཁྱེན་པས་སྣང་གསལ་ཡེ་འཕྱོའི་ཏིང་ངེ་འཛིན་དང་བྱ་བརྩལ་མེད་པར་ལྷུན་གྱིས་གྲུབ་པའི་སྤྱོད་པ་དང་ལྡན་པའོ། །འདིར་ཐམས་ཅད་རྫོགས་པའི་ཏིང་ངེ་འཛིན་ཡང་སྦྱར་རོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། ཐ་མ་ལ་གསུམ་བདག་ཉིད་ཆེན་པོ་ནི། །རྣལ་འབྱོར་ཆེན་པོ་རྫོགས་པར་ལ་བཟླ་སྟེ། །ལྷུན་གྱིས་གྲུབ་པ་རྗེས་སུ་འབྱོར་པ་ཉིད། །ཀློང་ཡངས་ཆུབ་པ་དེ་ཡིས་གཤིས་མཐོང་བས། །དེ་ལས་སེམས་བསྐྱེད་དོན་ལ་རེག་འདོད་ཡིན། །ཞེས་༼༣༧༠༽གསུངས་ཏེ། ཐམས་ཅད་རང་བྱུང་གི་ཡེ་ཤེས་སུ་རྟོགས་པས་བདག་ཉིད་ཆེན་པོའི་རྣལ་འབྱོར་ནི། རྣལ་འབྱོར་ཆེན་པོ་རྫོགས་ཆེན་དུ་ལ་བཟླ་བ་དང༌། དེ་ལ་ཐམས་ཅད་མ་བརྩལ་བར་རྫོགས་པས་ལྷུན་གྱིས་གྲུབ་པའི་རྣལ་འབྱོར་ནི་རྗེས་སུ་རྣལ་འབྱོར་ཉིད་དེར་ལ་བཟླ་བ་དང༌། ཐ་སྙད་ལ་མི་གནས་ཏེ་ཀློང་ཡངས་སུ་ཆུབ་པའི་རྣལ་འབྱོར་དེ་ཡིས་གཤིས་མཐོང་བས་ལྷུན་གྲུབ་རིག་འཛིན་རང་རྒྱུད་དག་པའི་སངས་རྒྱས་སོ། །དེ་ལྟར་སེམས་བཅུ་བསྐྱེད་དེ་རྣལ་འབྱོར་གྱི་རིམ་པ་རྫོགས་པ་ལས་མཐར་ཐུག་གི་དོན་ལ་རེག་པར་འདོད་པ་ནི་རྗེས་སུ་རྣལ་འབྱོར་གྱི་གཞུང་གི་གསང་བ་ཡང་དག་པ་ཉིད་ཡིན་ནོ། །དེ་བས་ན་མཐར་ལམ་གསུམ་པོ་འདིའི། དང་པོ་གཉིས་མེད་རིག་པའི་དོན་ལ་འབྱོར་ངེས་པས་ཆོས་སྐུའི་སས་བསྡུས་ལ། གཉིས་པ་ཡེ་ཤེས་ཀྱི་སྐུ་ཐོབ་པར་ངེས་པས་ལོངས་སྐུའི་སས་བསྡུས་ཤིང༌། གསུམ་པ་ལ་དོན་གཉིས་ཀྱི་མཛད་པ་རྫོགས་ངེས་པས་སྤྲུལ་སྐུའི་སས་བསྡུས་པར་ཡང་གསུངས་ཏེ་དེ་ལྟར་སྐུ་གསུམ་དབྱེར་མེད་ཀྱི་ཆོས་སྐུ་ཆེན་པོ་ནི་ངོ་བོ་ཉིད་སྐུའི་འཁོར་དུ་གྱུར་པས་སྐད་ཅིག་སྙིང་པོ་བྱང་ཆུབ་ཏུ་སངས་རྒྱས་པ་ཉིད་དེ། རིན་པོ་ཆེ་རྒྱན་ལས། དུས་ལ་ཐོག་མེད་མཐར་མི་ནུབ། །གནས་ལུགས་སྐབས་བཞིན་འདིར་ཤེས་བྱ། །རྒྱུད་དག་དུས་ཀྱི་དང་པོ་ནི། །རང་རང་གྲོལ་ཚེ་སྐབས་ལས་སྦྱར། །ཞེས་གསུངས་པ་སོགས་རྒྱུད་དང་མན་ངག་དག་ལས་རྒྱ་ཆེར་འབྱུང་ངོ༌། །མདོར་ན་ཐུན་མོང་མ་ཡིན་པའི་ལམ་འདི་དག་གང་ཟག་རྒྱུད་གཅིག་གི་དབང་དུ་ཐེག་པ་རིལ་རྫོགས་པ་ཆེན་པོར་འདུས་ཤིང་འབྲས་བུ་དེར་གཅིག་པ་ནི་ཆུ་བོ་བརྒལ་བའི་ཐབས་མི་མཐུན་ཡང་བརྒྱུད་ནས་མཐར་འདིར་སོན་པས་ན་གཅིག་པ་དང་འདྲ་བའི་སྤྱིར་བཀོད་དོ། །སྤྱི་ཉིད་གསང་སྔགས་ནང་པ་མན་ཆད་ཀྱིས་ཡང་དག་པར་རྫོགས་པའི་སངས་རྒྱས་ཀྱི་ས་རྫོགས་པ་སྤྱིར་ཆིབས་ཀྱི་ས་ཆེན་པོ་མཐོང་བ་ལ་ཕྱིན་ནས་ཐུག་པ་མེད་པར་བགྲོད་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། མདོ་སྡེ་ཀུན་ཏུ་འོད་དང་ཀྲི་ཡ་རྡོ་རྗེ་འཛིན་པའི་སངས་རྒྱས་ཀྱི་ས་ཡན་ཆད་རྫོགས་པ་ཆེན་པོ་ཉིད་ཀྱི་བསྟི་གནས་ཀྱི་ཕྱིར། ནམ་གནས་འདིར་སངས་རྒྱས་པ་ན་འདིར་རྫོགས་པ་༼༣༧༡༽ཆེན་པོ་ཐོབ་ཅེས་བྱའོ། །རང་རེའི་སྒོས་མཐར་ཐུག་ཏུ་བསྟན་པ་ནི་རྒྱུད་སོ་སོའི་མོས་དབང་དུ་བསྟན་པའོ།།

གསུམ་པ་ཞབས་བསྡུ་བ་ནི།

འདི་དག་རྣལ་འབྱོར། ཞེས་པ་ནས། ས་འདིར་སྦྱར་བར་བྱའོ། །ཞེས་པའི་བར་གྱིས་བསྟན་ཏེ།

འདི་དག་རྣལ་འབྱོར་པ་ཡི་ས། །ཁྱད་པར་གང་ལ་ཁྱད་པར་སྣང་། །གང་ཁྱད་མེད་ལ་དེ་ཁྱད་མེད། །རྩལ་འཕང་མཐོ་དམན་རྣལ་འབྱོར་པས། །མཐོ་དམན་གོ་འཕང་ས་བགྲོད་བྱ། །གང་འདིར་འདྲི་བའི་མཆོག་སྣང་བ། །དམ་པར་གྱུར་པ་ལངྐའི་བདག །གང་འདིར་རྣལ་འབྱོར་ཀུན་སྦྱོར་བ། །ངེས་པར་ས་བཅུ་རྩ་བ་འདིར། །གང་གི་རྩ་བ་ཡན་ལག་ལས། །བཅུ་གཉིས་བདུན་དང་གཉིས་རྫོགས་པའོ། །དེས་ན་ས་ཡི་ཁྱད་པར་ལས།།

རྒྱ་ཆེ་བ་དང་གྲངས་མང་ཡང་། །རྣལ་འབྱོར་ས་འདི་སྦྱར་བར་བྱའོ།།

འདིར་སའི་རིམ་པ་ཐུན་མོང་མ་ཡིན་པར་སྨོས་པ་འདི་དག་རྣམས་ནི། གསང་སྔགས་ཀྱི་དོན་ལ་རྣལ་འབྱོར་དུ་བྱེད་པ་རྣམས་ཀྱི་རིམ་པར་སྤྱོད་པའི་ས་ཡི་རིམ་པ་ཡིན་ཏེ། སའི་རིམ་པ་ལ་ཁྱད་པར་ཡོད་པར་སྣང་ནས་རིམས་ཀྱིས་འཇུག་པར་མོས་པ་གང་ལ་དེ་དང་མཐུན་པར་སའི་ཁྱད་པར་མཐོ་དམན་དུ་སྣང་སྟེ་རིམས་ཀྱིས་གསང་སྔགས་ལ་འཇུག་པའོ། །གང་སའི་རིམ་པ་ཁྱད་པར་ཅན་དུ་མཐོང་བ་མེད་པར་གཅིག་ཆར་དུ་འཇུག་པར་མོས་པ་རྣམས་ལ་དེ་ལྟར་ས་མཐོ་དམན་གྱི་ཁྱད་པར་མེད་པར་རྫོགས་པ་སྤྱིར་ཆིབས་ཀྱི་ས་ཉིད་དུ་སྣང་བའོ། །དེས་ན་ཤེས་རབ་ཀྱི་རྩལ་འཕང་མཐོ་བ་རྣམས་ཀྱིས་ས་མཆོག་ལ་གཅིག་ཆར་བགྲོད་པར་བྱའོ། །འོན་ཀྱང་སྟེས་དབང་མ་ཡིན་ཏེ། སྔར་སྦྱངས་པས་འདི་ལས་གཞན་མ་བགྲོད་པར་སའི་ཏོག་ཆེན་པོ་ཉིད་ལ་འཇུག་པ་མི་འགལ་བ་དང༌། སེམས་ཉིད་ཡིད་བཞིན་ནོར་བུའི་རིན་པོ་ཆེ་གང་ལྟར་བསླབ་པ་ལྟར་འགྱུར་དུ་བཏུབ་པ་གཉིས་ཀའི་ཕྱིར་རོ། །སྐལ་པ་དང་ཤེས་རབ་ཀྱི་རྩལ་འཕང་ཞན་ཏེ་སའི་རིམ་པར་མཐོ་དམན་དུ་འཇུག་པའི་རྣལ་འབྱོར་པས་མཐོ་དམན་གྱི་རིམ་པའི་གོ་འཕང་ལྟར་འགྱུར་དབང་མ་ངེས་པའི་ས་ནས་ཡར་སྐས་ཀྱི་གདངས་བུ་ལྟར་བགྲོད་པར་བྱའོ།།

འོ་ན་གསང་སྔགས་ཀྱི་དབང་པོ་ཐ་ཤལ་རིམ་འཇུག་ནི་མདོ་སྡེ་བས་ཀྱང་ལམ་རིང་སྟེ་ཕྱིན་པའི་དུས་མེད་པར་འགྱུར་རོ་ཞེ་ན། འདིར་ཏིང་ངེ་འཛིན་དང་པོར་དམིགས་པ་བརྟན་པས་གཞན་རྣམས་ལ་རྩོལ་བའི་ཡུན་མེད་པར་འགྲོ་ཞིང་ཐབས་ཁྱད་པར་ཅན་གྱིས་སྐད་ཅིག་ཙམ་དུ་གནས་པའི་རིམ་པ་ལ་སར་བསྙད་ཀྱི། བསྐལ་པའི་གྲངས་དང་ཡུན་དུ་ཐོགས་པ་མེད་པས་དེ་ཉིད་ལ་སྦྱོར་བའི་ཕྱིར་རིང་བ་མིན་པ་དང༌། རྒྱུ་ཡིས་བསྐལ་པར་སྤྱད་ཀྱང་ཐབས་འདི་དག་དང་འཕྲད་ནས་འདིར་བཞིན་དུ་གྲུབ་པས་གཟོད་འཚང་རྒྱ་བའི་ཕྱིར་ཐེ་ཚོམ་མེད་དོ། །ཐུན་མོང་དུ་བསྙད་ན་དབུགས་ཆེན་འབྱིན་པའི་རྣལ་འབྱོར་རྟེན་པས་ཁྱད་པར་དུ་༼༣༧༢༽འགྲོ་བ་མན་ཆོད་འཇིག་རྟེན་པ་དང་རྒྱུའི་ཐེག་པའི་སར་འགྱུར་བས་དེ་ནས་གཟོད་གསང་སྔགས་ཀྱི་དམིགས་པས་འབྲས་བུ་སྐྱེ་བའི་ས་ལ་འཇུག་གོ་ཞེ་གཞན་པ་དག་འདོད་དོ། །ཁོ་བོ་ནི་འདིར་བཤད་པའི་ཡིད་ལ་བྱེད་པའི་ཏིང་ངེ་འཛིན་ལ་སོགས་པ་དང༌། དབང་གི་ཚུལ་དང༌། འཆད་པའི་ལྷའི་ཏིང་ངེ་འཛིན་གྱིས་གསང་སྔགས་ཀྱིས་འབའ་ཞིག་ལ་ཐེ་ཚོམ་མེད་པའི་ཕྱིར་འདིར་ཐུན་མོང་མ་ཡིན་པར་བསྙད་པ་ལ་འགལ་བ་མེད་དོ། །ཞེས་གནུབས་ཆེན་མཁྱེན་པའི་གཏེར་མཛོད་བསྟན་འགྲོའི་དཔལ་མགོན་མཆོག་གིས་གསུངས་སོ།།

སྐབས་གང་འདིར་སྡུད་པས་དྲིས་ཏེ་དྲི་བར་བྱ་བའི་མཆོག་སའི་ཁྱད་པར་རྣམས་ལན་དུ་གསལ་བར་བཤད་པས་ཐུན་མོང་མིན་པའི་སའི་དོན་ལ་སྣང་བ་ཐོབ་པ་ཉིད། དྲི་བའི་མཆོག་དྲི་བའི་དམ་པར་གྱུར་པ་ལང་ཀའི་མངའ་བདག་སྲིན་པོ་མགྲིན་བཅུ་ཞེས་སྡུད་པ་པོ་ལ་དོན་གྱིས་བོས་ནས། ལུང་གི་རྒྱུད་ཆེན་པོ་གང་ལ་འདིར་རྣལ་འབྱོར་གྱི་རིམ་པ་ཆེ་ཆུང་ཀུན་སྦྱོར་ཏེ་རྫོགས་པར་བསྟན་པ་ཡང༌། གསང་སྔགས་ཀྱི་དོན་མཐར་ཐུག་ངེས་པའི་ས་མཆོག་ཆེན་པོ་བཅུ་ནི། ས་ཀུན་གྱི་ཡང་རྩ་བའི་གཞིར་གྱུར་པའོ། །དེས་ན་འདིར་བསྟན་པའི་སའི་རིམ་པ་འདི་ནི་ཁྱད་པར་གྱིས་ལམ་དུ་འཐད་དེ། གང་དེ་དག་གི་རྩ་བ་ཆེན་པོ་དོན་མ་ནོར་བར་ངེས་པའི་ས་བཅུ་འདི་ཉིད་ཀྱི་ཡན་ལག་གི་རིམ་པའི་དབྱེ་བ་ལས། རྣལ་འབྱོར་ཕྲ་མོ་བཅུ་ཚན་གཉིས་ཏེ་ཉི་ཤུ་དང་བདུན་ཕྲག་གཉིས་ལ་བཅུ་བཞི་སྟེ་རྣལ་འབྱོར་སུམ་ཅུ་རྩ་བཞིར་ཕྱེ་བས་ཀུན་འདུས་ཤིང་རྫོགས་པ་ཉིད་དེ། ས་བཞི་པའི་རྣལ་འབྱོར་ཕྲ་མོ་དྲུག་ནི་མཚན་མ་རྟགས་ཀྱི་རྣལ་འབྱོར་ལ་འདུས་པས་ལོགས་སུ་མ་བགྲང་བའོ། །དེ་ལྟ་བུའི་ས་བཅུ་པོར་ས་གཞན་གྱི་རྩ་བ་དང་ཡན་ལག་ཏུ་ཕྱེ་བ་ཀུན་འདུས་པ་ནི་གང་ཞེ་ན། མདོ་སྡེ་བྱང་ཆུབ་སེམས་དཔའི་ས་བཅུ་དང༌། གསང་སྔགས་ཀྱི་ཁྱད་པར་འཕགས་པའི་ས་བཅུ་སྟེ་བཅུ་ཕྲག་གཉིས་དང༌། ཉན་ཐོས་ཀྱི་ས་བདུན་དང༌། རང་སངས་རྒྱས་ཀྱི་ས་གཉིས་ལ་སོགས་པ་རིལ་རྫོགས་པའོ། །དེ་ཅིའི་ཕྱིར་ཞེ་ན། དེ་དག་ཀྱང་གསང་སྔགས་ཀྱི་སར་བརྒྱུད་ནས་ནོན་པར་བྱེད་པའི་རྒྱུར་གྱུར་པ་དང༌། དེ་དག་གི་མཐར་གཏུགས་པའི་འབྲས་བུ་ཆེན་པོ་འདི་ཡིན་པའི་ཕྱིར་༼༣༧༣༽དང༌། བྲེ་ཕུལ་གྱིས་ཚུལ་གྱིས་བསྟན་པའོ། །དེས་ན་གསང་སྔགས་ལུང་གི་ས་བཅུ་ནི་ས་ཡི་ཡོན་ཏན་གྱི་ཁྱད་པར་ལས་མཆོག་ཏུ་ཆེ་བ་སྟེ། ས་རིལ་གྱི་རྩ་བ་ཡིན་པས་རྒྱུ་འབྲས་ཀྱི་ཐེག་པའི་ས་རྒྱ་ཆེ་བ་དང་གྲངས་མང་ཡང་གཞན་ལ་འཇུག་ཅིང་བགྲོད་པར་མི་བྱ་སྟེ། གསང་སྔགས་ངེས་དོན་གྱི་རྣལ་འབྱོར་རྫོགས་པའི་ས་མཆོག་འདི་ལ་སྐལ་བས་ཕྱེ་ནས་སྒོ་འདིར་ཚུལ་གཉིས་ཀྱིས་སྦྱར་བར་བྱ་ཞིང་འཇུག་པར་གྱིས་ཤིག་པའོ།།

གཉིས་པ་ཅིག་ཆར་བའི་ས་བཤད་པ་ནི།

ས་དང་ས་ཡི། ཞེས་པ་ནས་སྐད་ཅིག་ཙམ་བགྲོད་པའོ། །ཞེས་པའི་བར་གྱིས་བསྟན་ཏེ།

ས་དང་ས་ཡི་འབྱུང་གནས་པ། །ཀུན་གཞི་ཀུན་གྱི་ས་ཆེན་ཏེ།།

གང་གིས་ས་ཆེན་འདི་ནོན་ན། །ས་རྣམས་སྐད་ཅིག་ཙམ་བགྲོད་པའོ།།

བྱང་ཆུབ་སེམས་དཔའ་དང་རིག་འཛིན་རྣམས་ཀྱིས་ས་དང༌། སངས་རྒྱས་རྣམས་ཀྱིའང་ས་ཡི་འབྱུང་གནས་ཀྱི་གཞིར་གྱུར་པ། ཀུན་གཞི་བྱང་ཆུབ་ཀྱི་སེམས་བདེ་བ་ཆེན་པོ་གང་དེ་ཐམས་ཅད་ཀུན་གྱི་གནས་མཆོག་ས་ཆེན་པོ་དེ་ཉིད་ཡིན་ཏེ། གང་སུ་ཞིག་གིས་ཀུན་གཞི་བྱང་ཆུབ་ཀྱི་སེམས་ཀྱི་ས་ཆེན་པོ་འདི་ཉིད་ནོན་ཏེ་དོན་མངོན་དུ་གྱུར་ན་གཞན་རྣམས་བགྲོད་ཅིང་སྦྱངས་མི་དགོས་པའི་ཕྱིར་ས་རྣམས་ཀུན་རིག་པའི་སྐད་ཅིག་ཙམ་གྱིས་བགྲོད་ཅིང་ཡང་དག་པར་ནོན་པའོ། །དེས་ན་གཅིག་ཆར་འཇུག་པའི་དོན་ནི་མཆོག་གི་མཆོག་ཏུ་གྱུར་པའོ།།

གསུམ་པ་ཞབས་བསྡུ་བ་ནི།

གྲོགས་པ་དག ཅེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་ཁྱད་པར་བླ་མར་བགྲོ་བར་བྱའོ།།

ཞེས་དམ་བཅས་པར་དགོངས་པ་ཡོངས་སུ་བགྲོས་པར་ཤེས་པར་བྱའོ།།

གྲོགས་པོ་དག དེ་དག་ནི་ཁྱད་པར་བླ་མར་བགྲོ་བར་བྱའོ། །ཞེས་དམ་བཅའ་བར་མཛད་པའི་སའི་རིམ་པ་འོག་ནས་གོང་དུ་འཕར་བའི་ཚུལ་དང་གཅིག་ཆར་དུ་བགྲོད་པའི་ཚུལ་གྱིས་དགོངས་པ་དམ་པ་ཡོངས་སུ་བགྲོས་ཏེ་བསྟན་པ་ཡིན་པར་ཤེས་པར་བྱའོ།།

ལེའུ་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྣལ་འབྱོར་སའི་སྒྲོན་མ་བསྟན་པའི་ལེའུ་སྟེ་དྲུག་ཅུ་གཅིག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཏིང་ངེ་འཛིན་གྱི་རྣལ་འབྱོར་བཅུ་ཡིས་སའི་རིམ་པ་གསལ་བར་བྱེད་པས་སྒྲོན་མ་དམ་པ་ཉིད་བསྟན་པའི་ལེའུ་སྟེ་དྲུག་ཅུ་རྩ་གཅིག་པ་ཉིད་རྣམ་པར་བཤད་པའོ།། །།

ལེའུ་རེ་གཉིས་པ་ཡུལ་དམ་པ་ལ་འཇུག་པ།

༈ 59 བདུན་པ་ཡུལ་ལ་འཇུག་པར་བྱ་བ་ལ་གསུམ་སྟེ། སྤྱིར་བསྟན་པ། བྱེ་བྲག་ཏུ་བཤད་པ། ཞབས་བསྡུ་བའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས་ཡང༌། ཞེས་པ་ནས། དེ་སྐད་ཅེས་སྨྲས་པས། ཞེས་༼༣༧༤༽པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོ་ལ་སོགས་པ་དམན་པ་དམ་པ་རྣམས་ཀྱིས། གསང་བ་པའི་བདག་པོ་ལ་དྲིས་བ། ཀྱེ་གསང་བ་པའི་བདག་པོ་ཡུལ་ལ་འཇུག་པར་བྱའོ་ཞེས་དམ་བཅའ་བར་དགོངས་པ་དེ། ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་ཡོངས་སུ་དྲིས་པ་ལས། གསང་བ་པའི་བདག་པོས་ཡོངས་སུ་སྨྲས་པ། ཀྱེ་གྲོགས་པོ་དག ཡུལ་ནི་འདི་ལྟར་གང་གི་ཞིང་ཡོངས་སུ་སྦྱོང་བར་འདོད་པ་རྣམས་ཀྱིས་གང་དུ་དགོངས་པའི་བདག་ཡུལ་དེ་ཁོ་ན་ཉིད་དང་། གང་ལས་འབྱུང་བའི་ཡུལ་མཐའ་ཡས་པའི་འཁོར་བ་རྣམས་ལ་འཇུག་པར་བྱའོ། །དེ་ནི་དཔེར་ན་བཙོ་བླག་མཁན་དག་གིས། །རས་སྦྱངས་གང་དུ་བྱ་བ་འཇེན་པ་ལྟར། །གང་འདིར་ལས་ཀྱི་དང་པོ་ལས། །གང་དེར་སྦྱར་བ་རབ་ཏུ་གཅེས། །དེ་སྐད་ཅེས་སྨྲས་པས།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །སའི་སྒྲོན་མ་བསྟན་མ་ཐག་པ་དེ་ནས་ཡང་ལང་ཀའི་བདག་པོ་ལ་སོགས་པ་འཁོར་དམན་པ་དམ་པ་རྣམས་ཀྱིས། སྟོན་པ་གསང་བ་པའི་བདག་པོ་ལ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ལེའུ་ཞེ་ལྔ་པར་ཆོས་ཀྱི་རྣམ་གྲངས་བཅུ་བཀོད་པ་ལས། བདུན་པ། ཡུལ་ལ་འཇུག་པར་བྱའོ། །ཞེས་དམ་བཅའ་བར་དགོངས་པ་དེ་ཉིད། ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་ཡོངས་སུ་དྲིས་པ་ལས། གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་གྲོགས་པོ་དག ཅེས་སྐྱེས་བུས་བོས་ནས། ཡུལ་གྱི་ངོ་བོ་བསྟན་པ་ཤེས་པར་བྱ་བ་ནི་འདི་ལྟར་གང་སུ་ཞིག་གི་སངས་རྒྱས་ཀྱི་ཞིང་ཡོངས་སུ་སྤྱོད་པར་འདོད་པ་རྣམས་ཀྱིས། གང་དུ་ཏིང་ངེ་འཛིན་དང་ཡེ་ཤེས་ཀྱི་དགོངས་པའི་ཡུལ་ཆོས་ཉིད་ཇི་བཞིན་པ་དེ་ཁོ་ན་ཉིད་དང༌། གང་ལ་གཉིས་སུ་མེད་པའི་ཐུགས་རྗེ་ཆེན་པོ་འབྱུང་བའི་ཡུལ་མཐའ་ཡས་ཤིང་བསམ་གྱིས་མི་ཁྱབ་པའི་འགྲོ་བ་འཁོར་བ་ན་གནས་པ་རྣམས་ཀྱི་དོན་དང་གཉིས་ལ་དགོངས་སྤྱོད་ཀྱིས་འཇུག་པར་བྱའོ། །ཚུལ་དེ་ནི། དཔེར་ན་བཙོ་བླག་མཁན་དག་གིས་རས་སྦྱངས་པ་གང་དུ་ཚོན་གྱི་བྱ་བ་ཇེན་པ་ལྟར་དུ། གང་འདིར་ལས་ཀྱི་དང་པོ་པའི་རྣལ་འབྱོར་པས། གང་དེར་དོན་དམ་པ་དང་ཀུན་རྫོབ་ཀྱི་བྱང་ཆུབ་ཀྱིས་སེམས་རྣམ་པ་གཉིས་ཀྱི་རྒྱུས་བདག་གཞན་གྱི་སྒྲིབ་པ་སྦྱང་བ་ལ་རབ་ཏུ་བརྩོན་པ་ཤིན་ཏུ་གཅེས་ཤིང་གལ་ཆེ་བ་ཉིད་དོ། །དེ་སྐད་ཅེས་སྨྲས་ཏེ་བཀའ་སྩལ་པས།

གཉིས་པ་རྒྱས་པར་བཤད་པ་ནི།

བྱང་ཆུབ་སེམས་དཔའ། ཞེས་པ་ནས། ཞུགས་པ་ཉིད་དུ་རིག་པར་བྱའོ། །ཞེས་པའི་བར་གྱིས་བསྟན་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོ་ལངྐའི་བདག་པོས། གསང་བའི་བདག་པོ་ལ་འདི་སྐད་ཅེས་སྨྲས་སོ། །གསང་བ་པའི་བདག་པོ་གང་ཐམས་ཅད་ནས་ཐམས་ཅད་དུ་ཡེ་ནས་སངས་རྒྱས་པས་ན། ད་གདོད་སངས་རྒྱས་པར་བྱར་མེད་ཕན་ཆད། དགོངས་པ་དམ་པའི་ཡུལ་ལ་སྦྱོར་བ་དང་། སྙིང་རྗེའི་ཡུལ་དུ་གྱུར་པ་གང་ཡང་མེད་ལགས་ན། འདིར་སྙིང་རྗེའི་ཡུལ་དུ་གྱུར་པ་གང་ལགས། སུ་ཞིག་སྙིང་རྗེའི་ཡུལ་དུ་གྱུར། དེ་སྐད་ཅེས་སྨྲས་པ་དང་། གསང་བ་པའི་བདག་པོས་སྨྲས་པ། ཀྱེ་ལངྐའི་བདག་པོ་དེ་དེ་ལྟར་ཀུན་ཀྱང་ཡེ་སངས་རྒྱས་ཕན་ཆད། དེ་ཁོ་ན་ཉིད་ལས་སྙིང་རྗེའི་ཡུལ་དང་། དགོངས་པའི་ཡུལ་གང་ཡང་མེད་ན་ཡང་། གང་ཇི་ལྟར་ཡང་ཆོས་ཉིད་ལས་མི་འདའ་བའི་ཚུལ་གྱིས་གང་དང་ཡང་འགལ་ཞིང་འགལ་བར་མི་བྱའོ། །གང་གི་དོན་བྱེད་པ་དེ་ཉིད་དམ་ཚིག་ཆེན་པོ་ཡིན་ལ། ཡེ་སངས་རྒྱས་པས་དོན། བྱར་མེད་པ་ནི་སྙིང་རྗེ་ཆེན་པོ་ཡིན་ནོ། །དགོངས་པ་དམ་པ་ལ་འཇུག་མི་དགོས་པར་ཤེས་པ་ནི། དགོངས་པ་དམ་པའི་ཡུལ་དེ་ཁོ་ན་ཉིད་ལ་བཞུགས་པ་ཉིད་དུ་རིག་པར་བྱའོ།།

དེ་ལ་སྡུད་པ་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ལང་ཀའི་བདག་པོ་དེས་འདི་སྐད་ཅེས་གསོལ་ཏེ་སྨྲས་སོ། །གསང་བ་པའི་བདག་པོ་ཞེས་སྟོན་པ་ལ་བོས་ནས། གང་སྔར་གྱི་དུས་ཐམས་ཅད་ནས་ཕྱིས་ཀྱི་དུས་ཐམས་ཅད་ཀུན་ཏུ། འཁོར་བ་ཉིད་ཡེ་ནས་སངས་རྒྱས་པ་ཡིན་པས་འཕྲལ་དུ་མ་གྲུབ་པ་ཉིད་གྲུབ་པར་བྱར་མེད་པར་བཀའ་སྩལ་པ་དེ་ལྟར་ངེས་ན། ད་༼༣༧༥༽གདོད་སངས་རྒྱས་པར་བྱར་མེད་ཕན་ཆད། དགོངས་པ་དམ་པའི་ཡུལ་དེ་ཁོ་ན་ཉིད་ལ་བློས་སྦྱོར་བའི་སྒོམ་པ་དང་སྙིང་རྗེའི་ཡུལ་དུ་བྱས་ཏེ་དོན་བྱ་རྒྱུ་ཉིད་དུ་གྱུར་པ་གང་ཡང་མ་དམིགས་པས་མེད་པ་ཉིད་དུ་ངེས་ལགས་ན། འདིར་སྙིང་རྗེའི་ཡུལ་དུ་དགོངས་ཏེ་དོན་བྱ་བའི་གནས་སུ་གྱུར་པ་གང་ལགས། དེ་ལས་ཀྱང་ཁྱད་པར་དུ་འགྲོ་བ་གང་སུ་ཞིག་སྙིང་རྗེའི་ཡུལ་དུ་གྱུར་པ་ལགས། དེ་སྐད་ཅེས་སྨྲས་ཏེ་དྲིས་པ་དང༌། འཆད་པའི་སྐྱེས་བུ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་ལང་ཀའི་བདག་པོ། ཞེས་བོས་ནས། ཆོས་རྣམས་ཀྱི་རང་བཞིན་དེ་ཉིད་སྔར་བཤད་པ་དེ་ལྟར་ཀུན་ཀྱང་ཡེ་ནས་སངས་རྒྱས་པའི་རང་བཞིན་ཡིན་ཕན་ཆད་དེ་ཁོ་ན་ཉིད་དུ་ངེས་པས། དོན་དམ་པར་སྙིང་རྗེའི་ཡུལ་ཐུགས་རྗེས་བཟུང་བར་བྱ་བའི་འགྲོ་བ་དང་དགོངས་པའི་ཡུལ་སྒོམ་པར་བྱ་བའི་ངོ་བོ་ཉིད་གང་ཡང་མེད་ཅིང་མ་དམིགས་ན་ཡང༌། གང་གིས་དགོངས་སྤྱོད་ཀྱི་དངོས་པོ་ཇི་ལྟར་བྱས་ན་ཡང་དེ་ཉིད་ཆོས་ཉིད་མཉམ་པ་ཆེན་པོའི་དོན་གྱི་དེ་ཁོ་ན་ཉིད་ལས་མི་འདའ་བར་གཞན་དུ་མ་གྱུར་པའི་ཚུལ་གྱིས་དགོངས་སྤྱོད་གང་ཡང་ཐེག་པའི་སྒོ་གང་དང་ཡང་འགལ་བ་མིན་ཞིང་འགྲོ་བའི་བསམ་པ་ཀུན་དང་འགལ་བར་མི་བྱ་བ་གཉིས་སུ་བཀའ་སྩལ་པའོ། །དེ་ཅིའི་ཕྱིར་ཞེ་ན། འགྲོ་བ་སེམས་ཅན་རྣམས་སམ་གདུལ་བྱ་གང་དག་གི་དོན་ཉིད་བྱེད་པ་ནི་ཐུགས་ཀྱི་དམ་ཚིག་ཆེན་པོ་ཡིན་ལ། ཡེ་ནས་སངས་རྒྱས་པ་ཡིན་པས་དོན་བྱར་མེད་དེ་སེམས་ཅན་རིལ་ལམ་ཡང་དག་པར་སྦྱང་བས་བྱ་བྱེད་དང་བྲལ་བར་སངས་རྒྱས་ཐོབ་ཟིན་པར་རྟོགས་པ་ནི་སྙིང་རྗེ་ཆེན་པོ་ཡིན་ནོ། །གཏན་ཚིགས་དེ་གཉིས་ཀྱི་ཕྱིར་དང༌། དོན་དམ་པའི་བྱང་ཆུབ་ཀྱི་སེམས་རང་གི་སེམས་ཉིད་དུ་ངེས་པས་དགོངས་པ་དམ་པ་ལ་འཕྲལ་དུ་འཇུག་མི་དགོས་པར་ཤེས་པ་ནི། དགོངས་པ་དམ་པའི་ཡུལ་ཡང་དག་པ་ཉིད་རྣལ་དུ་ཕེབས་པ་ཡིན་པས་ཆོས་ཉིད་དེ་ཁོ་ན་ཉིད་ལ་ཞུགས་ཟིན་པ་ཉིད་དུ་རིག་ཅིང་ཤེས་པར་བྱའོ། །ཞེས་གདམས་པའི་ཕྱིར་རོ།།

གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། དགོངས་པའི་ཡུལ་ལ་འཇུག་པ་བསྟན་པ། སྙིང་རྗེའི་ཡུལ་ལ་འཇུག་པ་བཤད་པའོ། །དང་པོ་ལ་ལྔ་༼༣༧༦༽སྟེ། དགོངས་པ་གསང་བའི་ཕྱིར་གསང་བའི་ཡུལ་དང་ལྷན་ཅིག་མི་གནས་པ། བྱ་བ་མེད་པས་གཞན་དོན་བྱ་བ། ཉམས་པའི་ཡོ་བྱད་མི་སྤྱད་པ། སྤྱད་པར་གྱུར་ན་དེའི་ཉེས་པ། ཐེག་པའི་སྒོ་གང་དང་ཡང་མི་འགལ་བར་དགེ་བའི་དཔུང་བསྐྱེད་པའོ། །དང་པོ་ནི།

ལང་ཀའི་བདག་པོ། ཞེས་པ་ནས། ཅི་ལའང་མི་བརྣལ་ལོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། དགོངས་པ་དམ་པ་གང་བཞུགས་པ། །ཟབ་པ་བས་ཀྱང་ཆེས་ཟབ་པ། །དེ་ཉིད་གཏིང་ནས་ཐག་བཅད་ཕྱིར། །གསང་བའི་ཡུལ་བཞི་སྐྱེ་བོ་དང་། །ལྷན་ཅིག་ཅི་ཡང་མི་བརྣལ་ལོ།།

ལང་ཀའི་བདག་པོ་ཞེས་བོས་ནས། དེ་ཉིད་ཤེས་པར་བྱ་བའི་ཐབས་དང་། དགོས་པ་ཉེ་བར་སྟོན་པ་ནི་འདི་ལྟ་སྟེ། ཆོས་ཉིད་ཇི་བཞིན་པའི་དགོངས་པ་དམ་པར་གང་སུ་ཞིག་འཇུག་ཏུ་མེད་པར་ཤེས་ཏེ་ཞུགས་ཟིན་པ་གང་གི་ཤེས་རབ་ཐུན་མོང་གི་ཟབ་མོ་ཤིན་ཏུ་ཟབ་པ་བས་ཀྱང་ཆེས་ཁྱད་པར་དུ་བློ་གྲོས་ཟབ་པ་དེ་ཉིད་ཀྱི་དགོངས་པས་སེམས་ཀྱི་དེ་ཁོ་ན་ཉིད་ཇི་ལྟ་བའི་མཚན་ཉིད་གཏིང་ནས་རྟོགས་པར་བྱ་ཞིང་ངེས་པར་ཐག་བཅད་དེ། གསང་བའི་རྟོགས་པ་འཕེལ་བ་དང༌། དམ་ཚིག་མི་ཉམས་པ་དང༌། གདུལ་བྱ་ཆུད་མི་ཟ་བའི་ཕྱིར་དུ།

གསང་སྔགས་མི་བསྟན་པའི་ཡུལ་བཞི་ནི། སོ་སོའི་སྐྱེ་བོ་དང༌། མུ་སྟེགས་པ་དང༌། ཐེག་པ་ཆུང་ངུ་བ་དང༌། ཐེག་པ་ཆེན་པོ་ལ་གསར་དུ་ཞུགས་པ་རྣམས་སམ། མུ་སྟེགས་པ། ཐེག་འོག་པ་ཆེ་ཆུང༌། གསང་སྔགས་ལ་གསར་དུ་ཞུགས་པ་བཞིར་ཡང་གསུངས་ཏེ་སྐྱེ་བོ་དེ་རྣམས་དང་ལྷན་ཅིག་ཅི་ལའང་མི་བསྡད་ཅིང་ཉལ་ཏེ་མི་གཟིམས་པས་མི་བརྣལ་ལོ། །ཞེས་བཀའ་སྩལ་ཏེ། ཀུན་འདུས་ལས། བསྟན་པའི་གནས་མིན་སྣོད་ངན་དང་། །རྣམ་པ་བཞིས་བསྡུས་བྱེ་བྲག་རྣམས། །མ་འོངས་རྣལ་འབྱོར་བཅུད་ཅན་གྱིས། །ཤེས་ནས་སྤང་བར་བྱ་ཕྱིར་བཤད། །ཅེས་སོགས་དང༌། ཟབ་མོར་འཇུག་པའི་སྔོན་ལོགས་ནས། །སེམས་ཉིད་གཏིང་ནས་ཚར་གཅད་ཕྱིར། །ཐེག་པ་དམན་པའི་སྐྱེ་བོ་དང༌། །ལྷན་ཅིག་ཅི་ལའང་མི་བརྣལ་ལོ། །ཞེས་སོ། །དེས་ན་འདི་ཉིད་ལྟར་ན་གསང་ཡུལ་བཞི་དང་ཉན་ཐོས་ཀྱི་ནང་དུ་མི་གནས་པ་དང་སྦྱར་ཡང་རུང་བར་མངོན་ནོ།།

གཉིས་པ་བྱ་བ་མེད་པས་གཞན་དོན་བྱ་བ་ནི།

དེ་ཡང་ཡོངས་སུ། ཞེས་པ་ནས། གང་འདིར་ཕན་པར་བྱ། །ཞེས་པའི་བར་གྱིས་བསྟན་ཏེ།

དེ་ཡང་ཡོངས་སུ་རྫོགས་པ་གང་། །བྱ་བས་བྱ་བ་མེད་ན་ཡང་།།

དེ་ཡི་རང་བཞིན་ཕན་གཞན་པ། །ཡིན་པས་གང་འདིར་ཕན་པར་བྱ།།

དེ་བས་ན་དེ་ཅིའི་ཕྱིར་ཞེ་ན།༼༣༧༧༽དེ་དག་གང་ཡང་ཆོས་ཉིད་མཉམ་པ་ཆེན་པོར་ལྷུན་གྱིས་གྲུབ་པའི་ངང་ལ་ཡོངས་སུ་རྫོགས་པ་ཉིད་ཀྱི་ཕྱིར་གང་ཡང་རིས་མེད་པར་ལྷན་མི་གཅིག་པའི་བྱ་བས་སོ་སོར་འདུག་ཏུ་མེད་ཅིང༌། སངས་རྒྱས་ལྟ་བུའི་ཕྲིན་ལས་ཀྱིས་དགོངས་པའི་ཡུལ་ལ་འཇུག་པ་དང་ཐུགས་རྗེའི་ཡུལ་ལ་འཇུག་པ་རང་བཞིན་ཡིན་པས་མཚན་མའི་ཡུལ་ལ་རྩོལ་བས་ཆེད་དུ་བྱ་བ་མེད་པར་གྱུར་ན་ཡང༌། རྣལ་འབྱོར་པ་བློ་ཆེ་བ་དེ་ཡི་ཐུགས་ཀྱི་རང་བཞིན་ཉི་མ་ལྟར་དུ་ཀུན་ལ་སྙོམས་ཤིང་ཕན་པར་བྱེད་པས་གཞན་གྱི་དོན་མཛད་པ་ཡིན་པས་ཡུལ་བཞི་པོ་དག་གི་རང་བཞིན་ལྟ་སྤྱོད་ཀྱི་ནུས་པ་ཆུང་བ་གང་ཡིན་པ་འདིར་ཡང་ཐེག་ཆེན་གསང་བ་མཆོག་གི་ལྟ་སྤྱོད་ཟབ་མོ་དྲང་ཐད་དུ་བསྟན་ན་ཇི་བཞིན་དུ་མི་གོ་ཞིང་སྐུར་པས་ལྟུང་བའི་ཕྱིར་ལྷན་མི་གཅིག་པར་བྱས་ཏེ་ཕྱིའི་སྤྱོད་པ་འཚམས་པས་ཐམས་ཅད་ལ་ཕན་པར་དོན་བྱ་བའོ།།

གསུམ་པ་ཉམས་པའི་ཡོ་བྱད་མི་སྤྱད་པ་ནི།

གང་གི་དོན་དང༌། ཞེས་པ་ནས། དམ་པ་ཉིད་ལས་མིན། །ཞེས་པའི་བར་གྱིས་བསྟན་ཏེ།

གང་གི་དོན་དང་འགལ་འགྱུར་བ། །དེ་ལས་གྱུར་པའི་ཡོ་བྱད་དག །རུས་སྦལ་མགོ་ལ་འོང་བ་ལྟར། །མུ་མཐའ་མེད་པར་བཤུག་པར་བྱ། །ཅི་ཕྱིར་ཀུན་ཏུ་རྣལ་འབྱོར་པས། །རྣལ་འབྱོར་དམ་པ་ཉིད་ལས་མིན།།

རྣལ་འབྱོར་པ་གང་སུ་ཞིག་གི་གསང་སྔགས་ཟབ་མོའི་གཞུང་དོན་དང་འགལ་བར་གྱུར་ཅིང་དམ་ཚིག་ཉམས་པ་དེ་ལས་བྱུང་བར་གྱུར་པའི་ནོར་རྫས་ལ་སོགས་པའི་ཡོ་བྱད་དག་དཔེར་ན་རུ་སྦལ་རང་གི་མགོ་ལ་མི་ཕྱིན་བརྒྱ་ལ་འོངས་ན་འཆི་ལྟས་ཡིན་པས་མྱུར་དུ་འདོར་བ་བཞིན་ནམ། རུ་སྦལ་གྱི་མགོ་ལ་ཡོད་པའི་ནོར་བུ་རིན་པོ་ཆེ་ནི་ཉེན་ཅན་དང་འབྲེལ་བར་མི་བྱ་བ་ཡིན་པ་ལྟར་དུ་དམ་ཉམས་ཀྱི་རྫས་ནི་ཉེས་པ་ཆེན་པོ་དང་འབྲེལ་བས་རྒྱ་མཚོས་བར་བཅད་པ་ལྟར་རྩལ་སྐྱེད་ནས་མུ་མཐའ་མེད་པར་བཤུག་སྟེ་སྤང་བར་བྱ་བའོ། །དེའི་དགོས་པ་ཅི་ཡི་ཕྱིར་ན་དུས་ཀུན་ཏུ་རྣལ་འབྱོར་མཆོག་དམ་པ་གཞུང་མ་ཉམས་པས་རྣལ་འབྱོར་དམ་ཚིག་དང་ལྡན་པ་ཉིད་དང་ནང་འགྲུལ་ཏེ་བཤེས་པར་བྱ་བ་ལས་མ་རྟོགས་པ་དང་དམ་ཉམས་པ་རྣམས་དང་བཤེས་པར་བྱ་བ་མིན་པས་སྤང་སྟེ་ཁ་ཙམ་ཡང་མི་གཏམ་པར་བྱེད་དེ། ཀུན་འདུས་ལས། དེ་ལས་གྱུར་པའི་ཡོ་བྱད་དག །རུས་སྦལ་མགོ་ལ་འོངས་པ་དང༌། །ཤིན་ཏུ་འཁྲུགས་པའི་སེམས་ཆེན་གྱིས། །རྒྱ་མཚོས་བཤུགས་ཏེ་སྤང་བར་བྱ། །ཞེས་སོ།།༼༣༧༨༽

བཞི་པ་སྤྱད་པར་གྱུར་ན་དེའི་ཉེས་པ་ལ་གཉིས་ཏེ། ཉེས་པ་དངོས་བཤད་པ། ཉེས་པ་དེ་འབྱུང་མི་འབྱུང་གི་ཁྱད་པར་རྟོགས་པར་གདམས་པའོ། །དང་པོ་ནི།

གལ་ཏེ་གང་གི ཞེས་པ་ནས། མི་མཐུན་ཉེན་ཆེན་འབྱུང་། །ཞེས་པའི་བར་གྱིས་བསྟན་ཏེ།

གལ་ཏེ་གང་གི་དབང་གིས་ན། །དམ་པའི་དོན་དང་འགལ་འགྱུར་ཏེ། །དེ་དང་མི་མཐུན་ཉེན་ཆེན་འབྱུང་།།

བརྒྱ་ལ་གལ་ཏེ་གང་ཟག་འགའ་ཞིག་གི་དོན་མ་རྟོགས་པའི་དབང་གིས་ངོ་བསྲབ་ཅིང་འདོད་པའི་རྐྱེན་དབང་དུ་གྱུར་ནས་ཉམས་པ་དང་འགྲུལ་ན་གསང་སྔགས་ཐེག་པ་ཆེན་པོའི་གཞུང་གི་དམ་པའི་དོན་དང་འགལ་བར་འགྱུར་ཏེ། ཉམས་པ་དེ་དང་འགྲུལ་བས་བསམ་པ་དང་མི་མཐུན་པའི་ཉམས་པའི་བཀའ་ཆད་ཀྱི་ཉེན་ཆེན་པོ་འབྱུང་བའི་སྐྱོན་དུ་འགྱུར་རོ།།

གཉིས་པ་ཉེས་པ་དེ་འབྱུང་མི་འབྱུང་གི་ཁྱད་པར་རྟོགས་པར་གདམས་པ་ནི།

གལ་ཏེ་དེ་ལས། ཞེས་པ་ནས། མི་ཟིན་འབན་ཐག་ཆད། །ཅེས་པའི་བར་གྱིས་བསྟན་ཏེ།

གལ་ཏེ་དེ་ལ་དེ་བྱུང་ན། །མགོན་བཙུན་དེ་ལ་དེ་ལས་མེད། །དེ་གང་མ་ཟིན་འབེན་ཐག་ཆད།།

གལ་ཏེ་གང་ཟག་ཉམས་པ་དང་བཤེས་པའི་རྣལ་འབྱོར་དེ་ལ་བཀའི་ཆད་པ་དེ་ཉིད་བྱུང་ན་དེ་ལ་སྐྱབས་སུ་གྱུར་པའི་མགོན་བཙུན་ནི་ཆོས་ཉིད་བྱང་ཆུབ་སེམས་ཀྱི་ལྟ་བ་རྟོགས་ནས་དེ་ཡི་ངང་ལ་གནས་པའི་མི་དམིགས་པའི་ཤེས་རབ་དེ་ལས་གཞན་གང་གིས་ཀྱང་སྐྱོབ་པར་ནུས་པ་མེད་དོ། །དེ་བས་ན་ཆོས་ཉིད་བྱང་ཆུབ་སེམས་ཀྱི་ལྟ་བ་དེ་ཡི་དོན་གང་གིས་མ་ཟིན་ན་གཉིས་ཀ་ཉམས་པས་འགོས་ཏེ་དགེ་བ་ཅི་སྤྱད་ཀྱང་འབན་ཐག་ཆད་དེ་རྡོ་རྗེ་དམྱལ་བ་ཆེན་པོར་འགྱུར་རོ། །དེས་ན་ཀུན་འདུས་ལས། གལ་ཏེ་གང་ཟག་དབང་གིས་ན། །ཉམས་པའི་ཆད་པ་བྱུང་བ་ན། །མགོན་ཚུན་ཆོས་ཉིད་ཆུ་ཕབ་ནས། །སྐོང་ཟློག་ཆོ་ག་རྒྱ་ཆེར་བྱ། །ཞེས་སོ། །འོ་ན་གཞན་གྱིས་ཉམས་པ་མ་ཉམས་པ་ལ་འགོས་བཏུབ་བམ་ཞེ་ན། འདི་ཉིད་ཀྱི་གཞུང་གི་དམ་ཚིག་གི་སྐབས་ལས། དཔེར་ན་རྟེའུ་རིད་རྔོ་ཅན་གྱིས་ཡུ་མ་ཁྱུ་ཕུང་བ་དང༌། འོ་མ་རུལ་བ་ཐིགས་པ་གཅིག་མ་རུལ་བའི་ནང་དུ་བླུགས་ནས་ཀུན་རུལ་བ་བཞིན་ཏེ། དེ་ཉིད་ཀྱི་དམ་ཚིག་གསང་བ་མཆོག་གི་ལེའུ་ལས། དེ་ལྟ་མོད་ཀྱི་འདི་ཀུན་རྣམས། །རྨི་ལམ་དུ་ཡང་མཐོང་མི་བྱ། །ཅིའི་ཕྱིར་འོ་མ་ཉུང་ངུ་ཞིག །རུལ་བས་འོ་མ་ཀུན་རུལ་བཞིན། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུང་འགྱུར། །འཁོར་བའི་གཡུལ་རྒྱལ་བྱེད་པ་ཡི། །ལོག་པའི་རྣལ་༼༣༧༩༽འབྱོར་ཐམས་ཅད་ཀུན། །དོན་ལ་མཁས་པའི་རྣལ་འབྱོར་པས། །ཐམས་ཅད་བསྒྲིམས་ཏེ་སྤང་བར་བྱ། །གལ་ཏེ་མ་སྤངས་ལོག་སྤྱོད་ན། །འཁོར་བའི་གཡུལ་ནི་རྒྱལ་འགྱུར་ཏེ། །བདེན་པའི་བྱིན་རླབས་མཐུ་ཆུང་འགྱུར། །ཞེས་སོགས་གསུངས་སོ། །དེ་བས་ན་ཉམས་པ་དང་འདྲིས་པ་ཉིད་ཀྱིས་ཀྱང་རྒྱལ་བའི་བཀའ་བཅག་པའི་ལས་བྱས་པའི་ཕྱིར་རོ།།

ལྔ་པ་ཐེག་པའི་སྒོ་གང་དང་ཡང་མི་འགལ་བར་དགེ་བའི་དཔུང་བསྐྱེད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

གང་གི་དོན་དུ། ཞེས་པ་ནས། གྱིས་ནི་དགའ་ནས་བྱ། །ཞེས་པའི་བར་གྱིས་བསྟན་ཏེ།

གང་གི་དོན་དུ་གང་གྱུར་བ། །ཕྲ་མོའི་ཕྲ་མོ་ཕྲ་ཡན་ཆད།།

ཐམས་ཅད་ཐམས་ཅད་ཇི་ལྟ་བར། །ནན་ཏན་གྱིས་ནི་དགའ་ནས་བྱ།།

འོ་ན་ཉམས་པའི་དོན་གཏན་འདིར་དགག་གམ་ཞེ་ན། རྣལ་འབྱོར་པ་གང་གི་དགེ་བའི་རྩ་བ་སྣ་ཚོགས་ཉམས་པ་ལ་སོགས་པ་བདག་དང་གཞན་གྱི་དོན་དུ་གང་འགྱུར་བའི་སྤྱོད་པར་ངེས་ན་དགེ་བ་དཀར་ཕྱོགས་ཕྲ་མོའི་ཕྲ་མོའམ་ཆུང་ངུའི་ཆུང་ངུར་གྱུར་པའི་ཕྲ་བ་ཡན་ཆད་ནས། ཆེན་པོའི་ཆེན་པོ་མན་ཆད་རིལ་ཐམས་ཅད་ནས་ཐམས་ཅད་དུ་ཇི་ལྟར་བར་མོས་པ་རྣམས་དོན་ཆུད་མི་གསན་པར་ནན་ཏན་གྱིས་ནི་འབད་དེ་སྙིང་རྗེ་ཆེན་པོ་དང་ལྡན་པར་དགའ་བ་དང་ལྡན་ནས་བཏང་སྙོམས་སྤངས་པས་སྒྲུབ་པར་བྱའོ།།

གཉིས་པ་རྒྱས་པར་བཤད་པ་ལ་བཅུ་གསུམ་སྟེ། ཐེག་པ་འོག་མ་པ་སྙིང་རྗེའི་ཡུལ་དུ་དམིགས་ཏེ་འདེགས་པ། ཆུ་གཏོར་རྒྱ་ཆེན་པོ་གཏང་བ། སློབ་མ་གྲྭ་གཟུགས་པ། ཀློག་འདོན་བྱ་བ། ཆོས་ཀྱི་སྦྱིན་པ་བཏང་བ། བསྒོམ་ཆེན་འདེགས་པ། ཆོས་འཁོར་བྱ་བ། ལམ་སྲང་བཅོས་པ། ཚྭ་ཚྭ་གདབ་པ། བཤགས་པ་བྱ་བ། སྦྱིན་བསྲེག་བྱ་བ། དཀྱིལ་འཁོར་བྲི་བ། དགེ་བ་སྣ་ཚོགས་བྱ་བའོ། །དང་པོ་ནི།

སློངས་མོ་པ་དང༌། ཞེས་པ་ནས། ཁུད་པའི་ཞིང་དུ་བྱ། །ཞེས་པའི་བར་གྱིས་བསྟན་ཏེ།

སློང་མོ་པ་དང་སློངས་ནས་དགའ། །སློང་ལ་འཚོ་བའི་ཚེ་སྤྱོད་རྣམས།།

སྡེ་དང་ཚན་དང་གྲར་བྱས་ཏེ། །སྙིང་རྗེའི་ཁུད་པའི་ཞིང་དུ་བྱ།།

ཐེག་པ་ཆེན་པོ་གསང་སྔགས་ཀྱི་རྣལ་འབྱོར་པས། སློངས་མོ་བྱས་ཏེ་འཚོ་བའི་ཉན་ཐོས་པ་དང༌། དེའི་རིགས་སུ་གཏོགས་པའི་སློང་བ་ལ་དགའ་བས་རང་རྒྱལ་ཡང་བསྡུས་ཤིང༌། མདོ་སྡེའི་བྱང་སེམས་སློང་མོ་ལ་བརྟེན་པའི་བསོད་སྙོམས་ཀྱིས་འཚོ་བའི་ཆོས་ལ་ཚེ་གཅིག་ཏུ་སྤྱོད་པ་རྣམས། རང་རང་གི་སྡེ་དང་ཚན་པ་དང་གྲྭར་བྱས་པའམ། ཡང་ན་ཉན་ཐོས་ཀྱི་སྡེ་དང་རང་རྒྱལ་གྱི་ཚན་དང་བྱང་༼༣༨༠༽སེམས་རྣམས་གྲྭར་བྱས་ཏེ། མཆོད་གནས་སུ་མི་བཀུར་བ་ལྷག་པར་ཡང་སྙིང་རྗེ་སྒོ་ཁུད་པའི་ཞིང་དུ་དགོངས་ཏེ་ཡུལ་དུ་བྱ་སྟེ། འཇིག་རྟེན་པ་བསོད་ནམས་ཆེ་ཆུང་གིས་སློང་བའི་ས་པ་དག་ཀྱང་དེ་བཞིན་དུ་བལྟ་བའོ།།

གཉིས་པ་ཆུ་གཏོར་རྒྱ་ཆེན་པོ་གཏང་བ་ནི།

སྨན་དང་འབྲུ་དང༌། ཞེས་པ་ནས། ཆགས་མེད་སྦྱིན་པར་བྱ། །ཞེས་པའི་བར་གྱིས་བསྟན་ཏེ།

སྨན་དང་འབྲུ་དང་རྩི་རྣམས་དང་། །བཅུད་ཀྱི་མཆོག་ཏུ་གྱུར་པ་དག །བཏགས་སམ་ཕྱེ་མར་བྱས་ནས་ཀྱང་།།

ཀླུང་ངམ་ཆུ་གང་མཚོ་ཆེན་དུ། །དོར་ཏེ་ཆགས་མེད་སྦྱིན་པར་བྱ།།

སྨན་རྣམ་པ་ལྔ་སོགས་པ་དང༌། འབྲུ་ལྔ་ལ་སོགས་པ་དང༌། རྩི་ཏོག་ལྔ་ལ་སོགས་པ་རྣམས་དང༌། སྙིང་པོ་ལྔ་ལ་སོགས་པ་བཅུད་ཀྱི་རིགས་དང༌། རིན་པོ་ཆེ་ལྔ་ལ་སོགས་པའི་མཆོག་ཏུ་གྱུར་པ་དག ཞིབ་ཏུ་བཏགས་སམ། ཕྱེ་མར་བྱས་ཏེ་བསྲེས་ནས་ཀྱང༌། ཆུ་ཆེན་པོའི་ཀླུང་ངམ་སྣོད་ཀྱི་ཆུ་གང་དག་གམ་མཚོ་ཆེན་པོ་ལ་སོགས་པ་ཉིད་དུ་བླུགས་ཤིང་དོར་ཏེ། འཕགས་པ་དང་འགྲོ་བ་རྣམས་ལ་ཚུལ་བཞིན་དུ་བྱིན་གྱིས་བརླབས་ལ་ཆགས་པ་མེད་པར་མི་དམིགས་པས་ཟིན་པས་དབུལ་ཞིང་སྦྱིན་པར་བྱའོ། །ཡང་ན་ལྔ་པོ་དག་གི་ཡུལ་དེ་རྣམས་བསམ་པས་དེ་ལྟར་གཟུང་ལ་སྦྱིན་པའི་དངོས་པོ་འདི་རྣམས་གཏང་བར་བཤད་དེ་ཆུའི་སྒྲས་མི་བཤད་པར་འགྲེལ་པ་ལུང་བསྟན་ལས་འབྱུང་བར་ཡང་གསུངས་སོ།།

གསུམ་པ་སློབ་མ་གྲྭ་གཟུགས་པ་ནི།

གང་གི་རྟེན་དུ། ཞེས་པ་ནས། འཁོར་ལོའི་མཆོད་སྦྱིན་བྱ། །ཞེས་པའི་བར་གྱིས་བསྟན་ཏེ།

གང་གི་རྟེན་དུ་ཁས་བླངས་ཏེ། །ནད་གསོ་གང་སློང་སྤྱོད་སྒོམ་གྲ།།

བཙུགས་ཏེ་བསྟི་གནས་མཆོག་བྱ་ཞིང་། །དུས་ཀྱི་འཁོར་ལོའི་མཆོད་སྦྱིན་བྱ།།

ཐེག་པ་ཆེན་པོ་བས་དགེ་བའི་གནས་གང་གི་མཆོད་པའི་རྟེན་དུ་དམ་བཅས་ཤིང་ཁས་བླངས་ཏེ། ཉེ་རིང་མེད་པའི་ནད་པ་གསོ་བ་དང་གང་ཆོས་ལ་སློབ་སྦྱང་བྱེད་པའི་བྲི་ཀློག་གི་གྲྭ་གཟུག་པ་དང༌། ཆོས་སྤྱོད་ཀྱི་གྲྭ་བྱ་བ་དང༌། སྒོམ་པའི་གྲྭ་བཙུགས་ཏེ་བསྟི་གནས་མཆོག་ཏུ་བྱ་ཞིང་བཀུར་སྟི་ཆེན་པོ་བྱེད་པ་དང༌། དུས་དུས་སུ་ཆོས་ཀྱི་འཁོར་ལོའི་གྲྭ་གཟུག་པ་དང༌། ཚོགས་ཀྱི་མཆོད་པ་རྒྱ་ཆེན་པོ་དང༌། འཕགས་པ་མཆོད་པར་བྱ་བ་དང་འགྲོ་བ་སེམས་ཅན་རྣམས་ལ་སྦྱིན་པ་རྒྱ་ཆེན་པོ་བཏང་བ་དང་ལྔ་བྱ་བའོ།།

བཞི་པ་ཀློག་འདོན་བྱ་བནི།

གང་ལ་དམ་པའི། ཞེས་པ་ནས། ཡངས་པའི་ལས་རྣམས་བྱ། །ཞེས་པའི་བར་གྱིས་བསྟན་ཏེ།

གང་ལ་དམ་པའི་ལུང་བྱུང་བ། །གསུང་གི་མཆོད་རྟེན་ཀུན་རྟེན་ཏེ།།

བརྗོད་དང་བསྙེན་བཀུར་བསྟི་གནས་ཀྱིས། །རྒྱ་ཆེ་ཡངས་པའི་ལམ་རྣམས་བྱ།།

གསུང་སྒྲ་རྒྱ་མཚོ་སྒྲོགས་པ་གང་སུ་ཞིག་ལ་རྒྱལ་བ་རྣམ་འདྲེན་དམ་པའི་ལུང་གི་བརྒྱུད་པ་བྱུང་ཞིང་ཐོབ་པ་ཡོད་པ་དེས་གསུང་གི་མཆོད་རྟེན་གླེགས་བམ་ཟབ་མོ་ཕྱི་ནང་༼༣༨༡༽ཀུན་བསྡུས་ནས་དེ་དག་ལ་བསྟེན་ཏེ། གཞན་ལ་བརྗོད་ཅིང་བཤད་པ་དང་བསྙེན་བཀུར་དང་བསྟི་གནས་སུ་བྱ་ཞིང་མཆོད་རྫས་སྣ་ཚོགས་ཀྱིས་མཆོད་པ་དང༌། དེ་དག་གི་ཚིག་དོན་ལ་མཉན་བསམ་སྒོམ་པ་བྱ་བ་དང༌། ཀློག་འདོན་བྱེད་པ་དང༌། གཞན་ལ་ཟབ་དོན་སྟོན་པ་སོགས་རྒྱ་ཆེར་ཡངས་པའི་དགེ་བའི་ལས་རྣམ་པར་དཀར་བ་རྣམས་ལ་འབད་པར་བྱ་སྟེ། ཀུན་འདུས་ལས། གསུང་སྒྲ་རྒྱ་མཚོ་སྒྲོགས་པ་ཡི། །གླེགས་བམ་ཟབ་མོ་ཀུན་བསྟེན་ཏེ། །བརྗོད་དང་བསྙེན་བཀུར་བསྟི་གནས་ཀྱིས། །རྒྱ་ཆེ་ཡངས་པའི་ལས་རྣམས་བྱ། །ཞེས་སོ།།

ལྔ་པ་ཆོས་ཀྱི་སྦྱིན་པ་བཏང་བ་ནི།

གང་གི་དམ་པ། ཞེས་པ་ནས། ཡེ་ཤེས་ཚད་མེད་འགྱུར། །ཞེས་པའི་བར་གྱིས་བསྟན་ཏེ།

གང་གི་དམ་པ་འཕེལ་འགྱུར་བ། །འདི་ལྟར་ངེས་པའི་དམ་པ་དག།

སྨྲ་འམ་སྦྱིན་ནམ་བསྟན་ནམ་ཁྲི། །དེས་ནི་ཡེ་ཤེས་ཚད་མེད་འགྱུར།།

འོ་ན་དེ་ལ་ཡོན་ཏན་ཅི་ཡོད་ཅེ་ན། དེ་ལྟར་གླེགས་བམ་ལ་བརྟེན་ནས་གང་དེའི་ཤེས་རབ་མཆོག་གི་རྒྱུད་དམ་པ་གོང་ནས་གོང་དུ་འཕེལ་ཞིང་གསལ་བར་འགྱུར་བ་སྟེ། ཚོགས་མཆོག་ཡེ་ཤེས་ཀྱི་རྒྱུའོ། །དེས་ན་གསང་རྒྱུད་འདི་ལྟར་ངེས་ཏེ་སྤྱོད་པ་མི་འགྱུར་བའི་རྣལ་འབྱོར་པ་དམ་པ་དག་གིས་ཆོས་ཀྱི་གཏམ་སྨྲ་བའམ། གླེགས་བམ་སྣ་ཚོགས་ལེགས་པར་སྦྱིན་ནམ། འདུ་ཤེས་བསྒྱུར་བའི་སློབ་དཔོན་གཞན་ལ་བསྟེན་ནམ། རྒྱུ་ཡི་ཆོས་ཀྱིས་རིམ་པར་དྲངས་ནས་ཁྲིད་པར་བྱས་ན། དེ་ལྟ་བུའི་རྣལ་འབྱོར་པ་དེ་ཡི་ཡང་དག་པའི་ཡེ་ཤེས་ཉིད་ཚད་མེད་པར་གསལ་ཞིང་མངོན་དུ་འགྱུར་བ་ཡིན་ཏེ། སྔ་མ་ལས། ཡེ་ཤེས་ཚོགས་རྣམས་རྫོགས་བྱའི་ཕྱིར། །ཤེས་རབ་ཚོགས་ཀྱི་སྦྱིན་མཆོག་དག །བསྟན་ཏམ་གླེགས་བམ་ལ་སོགས་པའི། །བློ་མཆོག་ལྡན་པ་རྣམས་ལ་སྦྱིན། །ཞེས་སོ།།

དྲུག་པ་བསྒོམ་ཆེན་འདེགས་པ་ནི།

གོམས་དང་གོམས་པར། ཞེས་པ་ནས། ཡུལ་གྱི་རྩལ་རྣམས་སྦྱངས། །ཞེས་པའི་བར་གྱིས་བསྟན་ཏེ།

གོམས་དང་གོམས་པར་བྱེད་པ་ཡིས། །གང་དེ་དག་པར་བྱ་བའི་ཕྱིར།།

བསམ་ཡུལ་བྱེ་བ་མང་པོ་ལ། །དེ་ཉིད་ཡུལ་གྱི་རྩལ་རྣམས་སྦྱངས།།

ཏིང་ངེ་འཛིན་སྔར་གོམས་ཟིན་པ་དང་ཕྱིས་སུ་གོམས་ཤིང་འདྲིས་པར་བྱེད་པ་ཡིས་སྒོ་ནས་ཀུན་གཞི་ལ་ཡོད་པའི་སྒྲིབ་པའི་ཕུང་པོ་གང་དེ་རྣམས་སྦྱངས་ཤིང་དག་པར་བྱ་བའི་དགོས་ཆེད་ཀྱི་ཕྱིར་དུ་བསམ་བསྒོམ་བྱེད་པའི་ཡུལ་ཏིང་ངེ་འཛིན་གྱི་སྒོ་བྱེ་བ་མང་པོ་ལ་འཇུག་ཅིང་བློ་མཆོག་དང་ལྡན་པས་དེ་ལྟར་མ་འདྲེས་ཡོངས་རྫོགས་ཉིད་དུ་ཏིང་ངེ་འཛིན་གྱི་ཡུལ་སྣ་ཚོགས་ཀྱི་དོན་ལ་ཡང་ནས་༼༣༨༢༽ཡང་དུ་རྩལ་རྣམས་སྦྱངས་ཏེ་གྲུབ་པར་གྱུར་པ་དེ་ལྟར་ཀུན་ཏུ་གོམས་པར་བྱེད་དེ་སྒོམ་ཆེན་གཞན་ཡང་འདེབས་པར་བྱ་སྟེ། སྔ་མ་ལས། བསྒོམ་དང་གོམས་པར་བྱ་བ་ཡིས། །ཀུན་གཞི་དག་པར་བྱ་བའི་ཕྱིར། །ཏིང་འཛིན་བྱེ་བ་མང་པོ་ལ། །བློ་མཆོག་ཡིད་ཀྱི་རྩལ་དེ་སྦྱང་། །ཞེས་སོ།།

བདུན་པ་ཆོས་འཁོར་བྱ་བ་ནི།

དམ་པའི་འཁོར་ལོ། ཞེས་པ་ནས། ལྷག་པའི་ཤེས་རབ་བལྟ། །ཞེས་པའི་བར་གྱིས་བསྟན་ཏེ།

དམ་པའི་འཁོར་ལོ་རབ་བསྐོར་ཏེ། །རྒྱུད་སྦྱངས་ལྷག་པའི་ཤེས་རབ་བལྟ།།

གསང་སྔགས་རྒྱུད་ཀྱི་དམ་པ་ལ་སོགས་པའི་ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བའི་ཡོན་བདག་བྱས་ཏེ། བདག་གཞན་གྱི་ཤེས་རྒྱུད་སྦྱང་བ་དང་ལྷག་མཐོང་ཟབ་མོའི་ཡེ་ཤེས་སྐྱེད་དེ་གཞི་དོན་རྟོགས་པའི་ཤེས་རབ་མཆོག་ཏུ་གསང་བ་ལ་ཡང་དག་པར་བལྟ་བར་བྱའོ།།

བརྒྱད་པ་ལམ་སྲང་བཅོས་པ་ནི།

ཤོ་གམས་སྲང་དང༌། ཞེས་པ་ནས། འཁོར་ལོ་རྒྱུན་མི་གཅད། །ཅེས་པའི་བར་གྱིས་བསྟན་ཏེ།

ཤོ་གམ་སྲང་དང་ཤོ་གམ་ལམ། །མི་བདེའི་གནོད་པ་ཀུན་བསལ་ཏེ།།

ཚད་མེད་སྙིང་རྗེའི་འཁོར་ལོ་བསྐོར། །སྦྱིན་པའི་འཁོར་ལོ་རྒྱུན་མི་བཅད།།

ཤོ་གམས་གཅན་ཆེན་གྱི་འཕྲང་དང་ལམ་སྲང་ངན་པ་དང༌། ཤོ་གམས་ཀྱི་ལམ་དུ་འཚེ་བས་མི་བདེ་བའི་གནོད་པ་དེ་ཀུན་བསལ་ཏེ་ཚད་མེད་པའི་སྙིང་རྗེའི་འཁོར་ལོ་ཆེན་པོ་བསྐོར་ཏེ་སྤྱོད་པ་རྒྱུན་དུ་བྱ་བ་དང༌། རྫས་དང་ལུས་དང་སྐྱབས་དང་ཆོས་ཀྱི་སྦྱིན་པའི་འཁོར་ལོ་བཞི་སྟེ། དེ་ལ་དང་པོའང་བུ་དང་བུ་མོ་དང་ཡུལ་དང་རྒྱལ་སྲིད་མན་ཆད་དོ། །གཉིས་པ་ཤ་དང་ཁྲག་དང་མགོ་དང་རྐང་ལག་གོ །གསུམ་པ་གནོད་པའི་རྒྱུན་ལས་སྐྱོབ་པ་དང༌། སྲོག་གི་བར་ཆད་ལས་སྐྱོབ་པ་དང༌། འཁོར་བའི་གཡང་ས་ལས་སྐྱོབ་པའོ། །བཞི་པ་ཆོས་བསྟན་པ་དང་གླེགས་བམ་དང་མཁན་པོར་ལུང་བསྟན་པ་སྟེ། དེ་དག་རྒྱུན་མི་གཅད་པའོ།།

དགུ་པ་ཚྭ་ཚྭ་གདབ་པ་ནི།

ཆུའམ་སའམ། ཞེས་པ་ནས། ལས་ཆེན་འཁོར་ལོར་བྱ། །ཞེས་པའི་བར་གྱིས་བསྟན་ཏེ།

ཆུའམ་ས་འམ་ནམ་མཁའ་འམ། །མེ་འམ་དེ་བཞིན་རླུང་རྣམས་ལ།།

སྐུ་གདུང་སྤེལ་མཆོད་རིང་སྲེལ་རྣམས། །བརྩམ་པའི་ལས་ཆེན་འཁོར་ལོར་བྱ།།

ཆུའམ་སའམ་ནམ་མཁའམ། མེའམ་དེ་བཞིན་དུ་རླུང་སྟེང་འབྱུང་བ་ལྔ་པོ་རྣམས་ལ་སྐུ་གདུང་དང་མཆོད་རྟེན་གྱི་སཙྪ་མང་པོ་བཏབ་སྟེ་སྤེལ་བ་ལ་ཡུན་རིང་པོར་མཆོད་པ་འབུལ་བ་དང༌། རིང་བསྲེལ་དང་ལྡན་པའི་སྐུ་མང་པོ་རྣམས་བྱས་ཤིང་བཏབས་ན་ལུས་ངག་གི་བརྩམ་པའི་ཐུན་མོང་གི་དགེ་བའི་ལས་ཆེན་པོ་ཡིན་པས་དེ་ལྟར་རྒྱུན་གྱི་འཁོར་ལོར་བྱ་ཞིང་དེ་དག་ལ་ཡེ་ཤེས་པ་སྤྱན་དྲངས་ཏེ་བསྟིམ་ཞིང་མཆོད་པ་དང་བསྟོད་པ་སོགས་པར་མི་བཅད་པར་༼༣༨༣༽བྱའོ།།

བཅུ་པ་བཤགས་པ་བྱ་བ་ནི།

མཚམས་མེད་བཟློག་པར། ཞེས་པ་ནས། ལུས་ཀྱི་མཆོད་སེམས་བཤགས། །ཞེས་པའི་བར་གྱིས་བསྟན་ཏེ།

མཚམས་མེད་ཟློག་པར་བྱེད་པ་ཡི། །ལུས་སེམས་རྒྱུད་ལ་རྡུལ་བརླགས་ཏེ།།

འཕགས་པའི་སྤྲིན་ཚོགས་ཕོ་བྲང་དུ། །རྡུལ་སྙེད་ལུས་ཀྱིས་མཆོད་སེམས་བཤགས།།

མཚམས་མེད་པ་ལྔའི་སྡིག་པའི་ལས་ཀྱིས་རྣམ་པར་སྨིན་པས་མི་གོས་པར་ཟློག་པར་བྱེད་པ་ཡི་ཐབས་སུ་རང་གི་ལུས་ངག་དང་སེམས་རྒྱུད་ལ་ཞེན་འཛིན་རྡུལ་དུ་རླགས་པར་བྱ་ཞིང༌། འདི་ཉིད་བརྩོན་འགྲུས་ཀྱི་དོན་ཡང་ཡིན་ཏེ། དེ་བས་རྒྱལ་བ་སྲས་དང་བཅས་པའི་འཕགས་པའི་སྤྲིན་ཚོགས་མང་པོ་ཕོ་བྲང་དུ་ཡིད་ཀྱིས་སྤྱན་དྲངས་ལ། བདག་གི་ལུས་ཀྱང་རྡུལ་སྙེད་དུ་སྤྲུལ་ཏེ། དེ་དག་རེ་རེའི་སྤྱན་སྔར་གུས་པ་ཆེན་པོའི་ཚུལ་གྱིས་འདུག་པས་ལུས་ངག་དང་བ་དང་བཅས་ཏེ་དངོས་སམ་ཡིད་ཀྱིས་མཆོད་པ་ཕུལ་ལ། ལས་ངན་པ་ཡ་ང་བ་སྤྱོད་པ་ལ་འགྱོད་པ་དྲག་པོ་དང་བཅས་པའི་སེམས་ཀྱིས་ཡང་ཡང་བཤགས་པར་བྱའོ། །ཡན་ལག་བདུན་པ་བྱ་བར་ལུང་བསྟན་གྱིས་བཤད་དོ། །ཞེས་བྱ་འབྱུང་ངོ༌།།

བཅུ་གཅིག་པ་སྦྱིན་བསྲེག་བྱ་བ་ནི།

རྒྱལ་མཉེས་ལས་ཀྱི། ཞེས་པ་ནས། མཚམས་མེད་བཟློག་པ་ཡིན། །ཞེས་པའི་བར་གྱིས་བསྟན་ཏེ།

རྒྱལ་མཉེས་ལམ་གྱི་ཤིང་བསྲེགས་པ། །ཐབས་ཆེན་སྦྱོར་བའི་ལམ་ཆེན་ལས།།

རྣམ་བཞི་མེ་ཡི་ལས་མཆོག་བྱ། །དེས་ནི་མཚམས་མེད་བཟློག་པ་ཡིན།།

རྒྱལ་བ་ཀུན་མཉེས་ཤིང་དགྱེས་པ་བསྐྱེད་པའི་ཕྲིན་ལས་རྣམ་པ་བཞིའི་སྒོ་ནས་ཐབས་ཁྱད་པར་ཅན་གྱི་བུད་ཤིང་བསྲེགས་པའི་སྦྱིན་སྲེག་བྱས་པ་ན། ཞི་བས་ཉོན་སྒྲིབ་སྦྱང་ཞིང་རྒྱས་པར་ཤེས་སྒྲིབ་སྦྱང་ལ། དབང་གིས་ལྟ་སྒྲིབ་སྦྱང་སྟེ། དྲག་པོས་ལས་སྒྲིབ་སྦྱང་བ་ཡིན་པས། གསང་སྔགས་ཀྱི་ཐབས་ཆེན་པོ་མཆོག་གིས་འབྲས་བུ་ལ་སྦྱོར་བའི་སྤྱིའི་ལམ་ཆེན་པོ་ཉིད་ལས། དད་པར་རླབས་པོ་ཆེའི་མེ་དང༌། འགྱོད་པ་དྲག་པོའི་མེ་དང༌། ཏིང་ངེ་འཛིན་གྱི་མེ་དང༌། ཤེས་རབ་ཀྱི་མེ་སྟེ་རྣམ་པ་བཞི་དང་ལྡན་པས་མེ་ཡི་ལས་མཆོག་ཞི་རྒྱས་དབང་དྲག་གམ་ཀུན་འདུས་ལྷུན་གྱིས་གྲུབ་པར་བྱ་བ་དེས་ནི་མཚམས་མེད་པ་ལྔའི་དབང་དུ་མི་འགྱུར་བར་བཟློག་པར་བྱེད་པ་ཡང་ཡིན་ནོ།།

བཅུ་གཉིས་པ་དཀྱིལ་འཁོར་བྲི་བ་ནི།

སྙིང་རྗེ་འབྱུང་བའི། ཞེས་པ་ནས། གོམས་ལྟར་ནན་ཏན་བྱ། །ཞེས་པའི་བར་གྱིས་བསྟན་ཏེ།

སྙིང་རྗེ་འབྱུང་བའི་དཀྱིལ་འཁོར་དག །གང་ལྟར་གོམས་ལྟར་ནན་ཏན་བྱ།།

ཐུགས་རྗེ་ཆེན་པོའམ་སྙིང་རྗེ་འབྱུང་བའི་གཞིར་གྱུར་པས་གསང་སྔགས་ཕྱི་ནང་གི་དཀྱིལ་འཁོར་ཆེན་པོ་དེ་དག་རྣམས་རྒྱུད་གང་དང་གང་ལས་འབྱུང་བ་ལྟར་རང་༼༣༨༤༽གང་ལ་གོམས་པ་ཡོད་པ་ལྟར་བཞེངས་སུ་གསོལ་ཏེ་འབད་རྩོལ་གྱིས་མཆོད་པ་ནན་ཏན་དུ་བྱ་བ་སྟེ། ཀུན་འདུས་ལས་ནི། ཐུགས་རྗེ་འབྱུང་བའི་འཁོར་ལོ་དག །གང་ལྟར་གོམས་ལྟར་འབད་རྩོལ་བྱ། །བསྟན་པ་སྐྱོང་བའི་ཚོགས་རྣམས་ལ། །སྦྱིན་མཆོད་སྤེལ་བའི་ལས་རྣམས་བྱ། །ཞེས་གསུངས་པ་སོགས་འདི་དག་གསལ་བར་བསྟན་ནོ།།

བཅུ་གསུམ་པ་དགེ་བ་སྣ་ཚོགས་བྱ་བ་ནི།

དེ་ལ་སོགས་པའི། ཞེས་པ་ནས། ཚོགས་ཀྱིས་དཔུང་ཆེན་བསྐྱེད། །ཅེས་པའི་བར་གྱིས་བསྟན་ཏེ།

དེ་ལ་སོགས་པའི་རྩ་བ་དག །དོན་དུ་མི་འགྱུར་ཀུན་སྤངས་ཏེ། །ནན་ཏན་ཚོགས་ཀྱིས་དཔུང་ཆེན་བསྐྱེད།།

མདོར་ན་དེ་ལྟར་དགེ་བའི་ལས་རྣམ་གྲངས་སོ་སོར་བཤད་ན་བཅུ་བདུན་དུ་འགྱུར་བ་ལ་སོགས་པ་གཏོར་མ་ཆ་གསུམ་དང་ཐ་ན་ཁམ་གཅིག་ཙམ་སྦྱིན་པ་ཡན་ཆད་ཀྱི་དགེ་བའི་རྩ་བ་སྣ་ཚོགས་པ་དག སྔ་མ་ལས། བདག་དང་གཞན་དང་གཉི་ག་དང༌། །ཆོས་ཀྱི་དོན་དུ་མི་འགྱུར་བའི། །སྐྱོན་བཞི་པོ་དག་སྤངས་ནས་ནི། །དེ་ལས་བཟློག་པའི་ཚུལ་ལྡན་པས། །རྣལ་འབྱོར་སྙིང་དང་མིག་ལྟ་བུར། །གདུང་བའི་འདུ་ཤེས་ཉེར་བཞག་སྟེ། །ཅི་བཞིན་འདོད་པ་ཉེ་བར་སྦྱར། །ཞེས་སོགས་གསུངས་པ་ལྟར། བདག་དང་གཞན་དང་གཉིས་ཀ་དང་ཆོས་ཀྱི་དོན་དུ་མི་འགྱུར་བ་དང་བཞི་པོ་ཀུན་སྤངས་ཤིང་བསལ་ཏེ་ནན་ཏན་དང་ལྡན་པས་བསོད་ནམས་རྒྱ་མཚོ་ལྟ་བུའི་དགེ་བའི་ཚོགས་ཀྱིས་དཔུང་ཆེན་པོ་བསྐྱེད་པར་བྱ་བ་ཉིད་དོ།།

གསུམ་པ་ཞབས་བསྡུ་བ་ནི།

འདི་ལྟར་ལས་ཀྱི། ཞེས་པ་ནས། སྟངས་ཆེན་ཀུན་བསྡོངས་ཏེ། །ཞེས་པའི་བར་གྱིས་བསྟན་ཏེ།

འདི་ལྟར་ལས་ཀྱི་སྟངས་བསོག་པ། །གཞན་ན་སྤྱོད་པ་མ་ཡིན་ཏེ། །རྩེ་གཅིག་དོན་ལྡན་རྣལ་འབྱོར་པ།།

རྒྱུད་སྦྱངས་དོན་ལྡན་བྱ་ཕྱིར་དང་། །གལ་ཏེ་རྩལ་ཞན་མ་ལྡན་ན། །དགེ་བསགས་ལྟང་ཆེན་ཀུན་སྡོངས་ཏེ།།

དེ་དག་གི་དགོས་པ་ཅི་ཞིག་སྙམ་པ་ལ། འདི་ལྟར་གཞུང་འདིར་བཤད་པ་བཞིན་དུ་དགེ་བའི་ལས་ཀྱི་སྟངས་མ་བསོད་ནམས་ཀྱི་ཚོགས་རྒྱ་ཆེན་པོ་ལ་སོགས་པ་གསོགས་པའང་དགོས་པ་གཞན་ཞིག་གི་ཆེད་དུ་སྤྱོད་པ་མ་ཡིན་ཏེ། ཚེ་འདིར་དང་ཁེ་གྲགས་ལྟ་བུའི་དབང་དུ་མ་སོང་བར་བསམ་གཏན་ལ་སེམས་མཉམ་པ་རྩེ་གཅིག་ཏུ་གནས་ཤིང་བློ་མི་དམིགས་པའི་དོན་དང་ལྡན་པའི་བསམ་པས་ཡུལ་གཉིས་སུ་མེད་པར་ཡིད་ལ་བྱ་བའི་རྣལ་འབྱོར་པ་ཡིད་གཉིས་མེད་པ་རྣམས་ཀྱིས་བསྒྲུབ་པའི་སྔོན་དུ་བྱ་བའི་ལས་དང་བསམ་པ་ལ་མི་གནོད་པ་ཙམ་དུ་བྱ་བའང་རང་གི་ཤེས་པའི་རྒྱུད་སྦྱོང་བ་དང༌། བདག་གཞན་གྱི་དོན་དང་ལྡན་པར་བྱ་བའི་ཕྱིར་སྤྱོད་པ་ཡིན་པས་ཡོན་ཏན་འཆར་བར་ངེས་པ་དང༌། ༼༣༨༥༽བརྒྱ་ལ་གལ་ཏེ་སྒོ་གསུམ་གྱི་ནུས་པ་ཆུང་ཞིང་ཤེས་རབ་ཀྱི་རྩལ་ཞན་པས་དེ་དག་མ་ལུས་པ་རྣམས་མི་དམིགས་པ་དང་ལྡན་པར་མ་གྲུབ་ན་ཡང་སྔར་དང་ཚེ་རབས་ཀྱི་དགེ་བ་ཅི་སྤྱད་ཅིང་བསགས་པའི་སྟངས་ཆེན་ཡོད་དོ་ཅོག་ཀུན་བསྡོངས་ཤིང་བསྡོམས་ཏེ་དོན་བགྲང་ཞིང་བསྔོ་བ་སོགས་ལ་འབད་དོ།།

གཉིས་པ་སྙིང་རྗེའི་ཡུལ་ལ་འཇུག་པ་བཤད་པ་ནི།

གང་འདིར་བསགས་པའི། ཞེས་པ་ནས། ཆེན་པོ་དེ་ཉིད་དོ། །ཞེས་པའི་བར་གྱིས་བསྟན་ཏེ།

གང་འདིར་བསགས་པའི་དོན་བགྲངས་ཤིང་། །གདུང་བའི་ཤུགས་ཕྱུང་རྩལ་སྤྲུགས་ན། །ཉི་ཤར་ཆུ་ཀླུང་ཟླ་བརྙན་ལྟར། །རང་བཞིན་ཤུགས་ཀྱིས་འབྱུང་བར་གཅེས། །དེ་ཕྱིར་ཆུང་ངུ་ཡན་ཆད་ཀྱང་། །དམ་པའི་དོན་དུ་འགྱུར་བར་བྱ། །གང་འདིར་ཟིན་དང་མ་ཟིན་པའི། །དངོས་པོ་བརྟན་གཡོ་ལ་སོགས་ཀུན།།

དེ་བཞིན་ཉིད་དུ་བློ་བཞག་ན། །སྙིང་རྗེ་ཆེན་པོ་དེ་ཉིད་དོ།།

དེ་ལྟར་གང་གི་སྐབས་འདིར་ཡང་འགྲོ་བ་སེམས་ཅན་ཐམས་ཅད་སྙིང་རྗེའི་ཡུལ་དུ་གཟུང་སྟེ། ཚེ་རབས་ཀྱི་དགེ་སྡིག་ཅི་སྤྱད་པ་དང་ཚེ་འདིར་ཡང་སྔར་ཇི་ལྟར་བསགས་པའི་དོན་རྣམས་བགྲངས་ཤིང་བསྡོམས། དགེ་བ་ནི་མཚམས་མེད་ཟློག་པར་བྱེད་པའི་སྐབས་སུ་བཤད་པ་ལྟ་བུར་བསམ་ལ་བྱང་ཆུབ་ཆེན་པོར་བསྔོའོ། །སྡིག་པ་རྣམས་ནི་ལུས་ངག་ཡིད་ཀྱིས་གདུང་བའི་ཤུགས་ཆེན་པོ་ཕྱུང་ཞིང་མཆི་མ་བླགས་ཏེ་འགྱོད་སེམས་ཀྱིས་རྩལ་དྲག་པོས་བཤགས་པར་བྱའོ། །དེ་ལྟར་སྒོ་གསུམ་རྩལ་སྤྲུགས་ཀྱིས་ཤུགས་བྱུང་ནས་ཉི་མ་རེ་རེ་བཞིན་བྱས་ན་སྒྲིབ་པ་དག་ནས་དངོས་གྲུབ་འབྱུང་བ་ནི། དཔེར་ན་ཉི་མ་ཤར་བའི་གཟུགས་བརྙན་ཆུ་ཀླུང་དྭངས་པར་གསལ་བའམ། དེའི་ནང་དུ་ཟླ་བའི་གཟུགས་བརྙན་སྣང་ལ་རང་བཞིན་མེད་པར་འཆར་བ་ལྟར་དུ་ཡེ་ཤེས་རང་གསལ་གྱི་དངོས་གྲུབ་རང་བཞིན་ཤུགས་ཀྱིས་རང་དབང་མེད་པར་འབྱུང་བ་ཡིན་པས་དེ་ལྟར་ལེགས་པའི་ལས་ལམ་ལ་འབད་པར་བྱེད་པ་ཤིན་ཏུ་གཅེས་སོ། །གཏན་ཚིགས་དེ་ཡི་ཕྱིར་ན་དགེ་བ་ཆུང་ངུ་ཕྲ་མོ་ཡན་ཆད་ཀྱང་རང་བཞན་གྱི་རྒྱུད་ལ་བྱང་ཆུབ་དམ་པ་རྫོགས་སངས་རྒྱས་ཀྱིས་འབྲས་བུ་འགྲུབ་པའི་དོན་དུ་འགྱུར་བའི་གཞིར་ངེས་པར་དཔྱོད་དེ་ལེགས་པར་བརྩོན་པར་བྱ་བའོ། །འདིར་ཀུན་འདུས་ལས་ནི། ཁམས་གསུམ་སྙིང་རྗེའི་གནས་རྣམས་ལ། །ཡོ་བྱད་སྦྱིན་ཚོགས་ཆེན་པོ་ལས། །འདོད་པའི་བསམ་པ་རངས་བྱས་ན། །མགུ་བས་སྐོངས་པའི་སྟོབས་སུ་འགྱུར། །ཞེས་སོགས་སྐོང་བའི་ཐབས་ཀྱི་སྟོངས་ཡང་རྒྱ་ཆེར་འབྱུང་ངོ༌། །འོ་ན་གཅིག་ཆར་འཇུག་པའི་བློ་མཆོག་གིས་ཀྱང་ཐམས་ཅད་དུ་དེ་ལྟར་སྤྱད་ཅིང་དེ་ལ་རག་ལས་སམ་ཞེ་ན། ཐེག་ཆེན་གསང་བ་མཆོག་གི་སྒོ་གང་འདིར་ཤེས་པས་ཟིན་པ་དང་མ་༼༣༨༦༽ཟིན་པའི་དངོས་པོ་བརྟན་པ་སྣོད་དང་གཡོ་བ་བཅུད་ཐམས་ཅད་རིལ་དང༌། ལ་སོགས་པ་ཞེས་བསྡུ་བའི་དོན་གྱིས་མྱ་ངན་ལས་འདས་པའི་ཆོས་རྣམས་དང་བཅས་པ་མ་ལུས་པ་ཀུན་ཆོས་དབྱིངས་དེ་བཞིན་ཉིད་དུ་གཉིས་སུ་མེད་པར་རྟོགས་པའི་ཡེ་ཤེས་ཆེན་པོ་ལ་འཁོར་བ་སངས་རྒྱས་ཀྱི་སར་བཀོད་ཟིན་པས་དོན་བྱར་མེད་པའི་དོན་ལ་དེ་ཉིད་དུའང་འཛིན་པ་མེད་པར་བློ་བཞག་སྟེ་སྒོམ་ན་སྙིང་རྗེ་ཆེན་པོ་བླ་ན་མེད་པས་འགྲོ་དོན་མ་བྱས་རྫོགས་པའི་ཕྱིར་ཡུལ་གཉིས་ཀ་ལ་ཞུགས་ཟིན་པས་གཉིས་སུ་མེད་པའི་དེ་ཁོ་ན་ཉིད་ཡིན་ཏེ། དེ་བས་ན་སྐྱེས་བུ་མཆོག་གི་ལས་ལ་སྤང་བླང་ མེད་དོ།།

གསུམ་པ་ཞབས་བསྡུ་བ་ནི།

ལང་ཀའི་བདག ་པོ། ཞེས་པ་ནས། རྙེད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་ བདག་པོ་དེ་ལྟར་ན། །ཡུལ་གང་མེད་པའི་ཚུལ་གྱིས་ནི། །འཇུག་པ ་མེད་ལས་གང་འཇུག་པ། །ཡུལ་ལ་འཇུག་པ་དམ་པའོ། །དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པ་ལུས་ཀྱི་སེམས་དཔའ་རྣམས། གང་གི་རྒྱུན་དུ་ཡུལ་ལ་འཇུག་པའི་ངེས་པ་དམ་བརྙེད་པར་གྱུར་ཏོ།།

འཆད་པའི་སྐྱེས་བུ་ཆེན་པོས། ལང་ཀའི་བདག་པོ་ཞེས་བོས་ནས། བཤད་ལ་དེ་ལྟར་ན་དགོངས་པ་དང་དོན་བྱ་བའི་ཡུལ་གང་གཞན་ན་མེད་པའི་དོན་དེའི་ཚུལ་གྱིས་ནི་སྤྱོད་ཡུལ་གྱི་དངོས་པོ་གང་ཡང་སྣང་ལ་འཛིན་ པ་མེད་པས་བདག ་ལས་གཞན་དུ་སྣང་སྟེ་ཡུལ་དང་ཡུལ་ཅན་གྱི་དངོས་པོས་འཇུག་པ་མེད་པར་རྟོགས་པའི་ལུང་ཆེན་པོ་ཐ་དད་དུ་འཇུག་ཏུ་མེད་པའི་ངོ་བོ་ཉིད་ལས་མི་གཡོ་བར་དེ་ལྟར་གང་གིས་ཡང་དག་པར་ཤེས་ཏེ་འཇུག་པ་ཉིད་ནི། ཆོས་ཉིད་དང་སྙིང་རྗེ་ཆེན་པོའི་ཡུལ་ལ་འཇུག་པ་རྣམས་ཀྱི་ནང་ནས་མཆོག་དམ་པ་ཕུལ་དུ་བྱུང་བ་སྟེ། དགོངས་སྤྱོད་གཉིས་ཀ་ལྷུན་གྱིས་གྲུབ་པས་རྩོལ་མེད་བདེ་བ་ཆེན་པོ་ཁོ་ནའོ། །དེ་སྐད་ཅེས་བཀའ་སྩལ་ཏེ་ཚིག་སྨྲས་པས་འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས་གང་གི་རྒྱུན་དུ་ཡུལ་ལ་འཇུག་པའི་དོན་དེའི་ཐེ་ཚོམ་ཆོད་དེ་ངེས་པ་དམ་པ་རྙེད་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཡུལ་དམ་པ་ལ་འཇུག་པའི་ལེའུ་སྟེ་དྲུག་ཅུ་གཉིས་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ལམ་གྱི་སྔོན་དུ་འགྲོ་བའི་དགོངས་པ་དང་སྙིང་རྗེའི་ཡུལ་དམ་པ་འཇུག་པ་བསྟན་པའི་ལེའུ་ཞེས་བྱ་སྟེ་དྲུག་ཅུ་རྩ་གཉིས་པ་ཉིད་ལེགས་པར་འགྲེལ་བའོ།། །།

ལེའུ་རེ་གསུམ་པ་ཉེ་བར་མཚོན་པ།

༈ 60 བརྒྱད་པ་མེ་ལོང་བརྟག་པར་བྱ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། སྣང་དུ་བཏུབ་པའི་དཔེ། །ཞེས་པའི་བར་གྱིས་བསྟན་ཏེ། ༼༣༨༧༽

དེ་ནས་ཡང་ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་དེ་དག་གིས། གསང་པ་པའི་བདག་པོ་ལ་མཚོན་པའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། མེ་ལོང་བརྟག་པར་བྱའོ་ཞེས་དམ་བཅའ་བར་དགོངས་པ་དེ། ཇི་ལྟར་ཡོངས་སུ་བརྟག་པར་བགྱི། དེ་སྐད་ཅེས་དྲིས་པ་དང་། གསང་བ་པའི་བདག་པོས་སྨྲས་པ། ཀྱེ་གྲོགས་པོ་དག གང་ལ་གང་གིས་མཚོན་པས་ཤེས་པར་འགྱུར་བའི་མེ་ལོང་ནི་འདི་ལྟ་སྟེ། སྣང་དང་བཏགས་དང་འབྱུང་བ་དང་། །མི་ཆགས་འབྱུང་སྣང་དག་པ་དང་། །གནས་འབྱུང་འཐུན་པ་རྣམ་པ་བཅུ། །སྒྱུ་མ་སྨིག་རྒྱུ་ཆུ་ཟླ་དང་། །རྨི་ལམ་སྒྲ་བརྙན་མིག་ཡོར་དང་། །ནམ་མཁའ་དྲི་ཟའི་གྲོང་ཁྱེར་དང་། །སྤྲུལ་པ་གཟུགས་བརྙན་མེ་ལོང་བཅུ། །མཐུན་པའི་དམིགས་བཅུ་མཚོན་པར་བཞག།

དངོས་པོ་མེད་ཀྱང་དངོས་པོར་སྣང་། །དངོས་པོར་སྣང་དུ་བཏུབ་པའི་དཔེ།།

ལེའུ་འདིས་ངེས་དོན་སྟོན་ཏེ་དོན་དང་ཡི་གེའི་རྣལ་འབྱོར་གཉི་གའི་ལྟ་བ་གཅིག་ཡིན། དེའང་ཡི་གེའི་རྣལ་འབྱོར་གྱི་ཤས་ཆེའོ། །ཡུལ་ལ་འཇུག་པ་བཤད་མ་ཐག་པ་དེ་ནས་ཡང་འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་དེ་དག་གིས། སྟོན་པ་གསང་བ་བའི་བདག་པོ་ལ། ལེའུ་ཞེ་ལྔ་པར་ཆོས་ཀྱི་རྣམ་གྲངས་བཅུར་བཀོད་པའི་བརྒྱད་པ་གསང་སྔགས་ཀྱི་གཞི་བཅུ་དཔེས་མཚོན་པའི་དོན་རྣམས་ཀྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་སྔར་གོང་དུ་མེ་ལོང་བརྟག་པར་བྱའོ། །ཞེས་དམ་བཅའ་བར་དགོངས་པ་དེ་ཉིད་ཇི་ལྟར་ཡོངས་སུ་བརྟག་པར་བགྱི། དེ་སྐད་ཅེས་དྲིས་པ་ལས།

སྟོན་པ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་གྲོགས་པོ་དག ཅེས་འཁོར་ལ་བོས་ནས་དོན་གྱི་དངོས་པོ་གང་ཡང་རུང་བ་ལ་དེ་དང་མཐུན་པར་གང་གིས་ཉེ་བར་མཚོན་པས། བཅུ་ཀ་དེ་ཁོ་ན་ཉིད་དུ་ཤེས་པར་འགྱུར་བའི་མཚོན་པ་དཔེའི་མེ་ལོང་ནི་དོན་དང་བཅས་ཏེ་རྣམ་གྲངས་བཅུ་ཕྲག་གཉིས་ཀྱིས་འདི་ལྟར་བསྟན་ཏེ་གང་ཞེ་ན། དོན་བཅུ་ནི། སྒྲུབ་པ་སྣང་བ་དང༌། གསང་སྔགས་ཀྱི་མིང་བརྟགས་པ་དང༌། སྐུ་ཕྱག་རྒྱ་འབྱུང་བ་དང༌། སྤྱོད་པ་མི་ཆགས་པ་དང༌། བཟླས་བརྗོད་ནུས་པ་འབྱུང་བ་དང༌། ལྟ་བ་སྣང་བ་མེད་པ་དང༌། ཏིང་ངེ་འཛིན་དག་པ་དང༌། གཞལ་ཡས་ཁང་གནས་དང༌། ཆོ་འཕྲུལ་སྣ་ཚོགས་འབྱུང་བ་དང༌། དངོས་གྲུབ་དོན་དང་མཐུན་པ་རྣམ་པ་བཅུའོ། །དཔེ་བཅུ་ནི། སྒྱུ་མ་ལྟ་བུ་དང༌། སྨིག་རྒྱུ་དང༌། ཆུ་ཟླ་དང༌། རྨི་ལམ་དང༌། སྒྲ་བརྙན་དང༌། མིག་གཡོར་དང༌། འགལ་མེའམ་ཆུ་བུར་དང༌། དྲི་ཟའི་གྲོང་ཁྱེར་དང༌། སྤྲུལ་པ་དང༌། གཟུགས་བརྙན་ལྟ་བུའི་མཚོན་པས་མེ་ལོང་བཅུ་སྟེ། བཤད་པའི་དོན་རྣམས་དང་མཐུན་པའི་དཔེའི་དམིགས་བཅུ་ཡིས་དཔེ་རེས་དོན་རེ་རིམ་པར་མཚོན་ནས་རྣམ་པར་གཞག་པ་ཉིད་དེ། ཀུན་འདུས་ལས།

ཟབ་མོར་སྤྱོད་པ་ལ་མོས་པས། །གང་ཞིག་དོན་ལ་འདྲིས་པ་ཡི། །གསང་སྔགས་སྤྱོད་པའི་རང་བཞིན་ནི། །མཐུན་པའི་དམིགས་བཅུ་དཔེར་བཞག་སྟེ། །རྣལ་འབྱོར་ཅན་གྱིས་ཤེས་པར་བྱ། །སྒྱུ་མ་སྨིག་རྒྱུ་རྨི་ལམ་དང༌། །གཟུགས་བརྙན་དྲི་ཟའི་གྲོང་ཁྱེར་དང༌། །༼༣༨༨༽བྲག་ཆ་ཆུ་ཟླ་མིག་ཡོར་དང༌། །ཆུ་བུར་འཁྲུལ་དང་འགལ་མེར་སྣང༌། །སྒྲུབ་དང་གསང་སྔགས་སྤྱོད་པ་དང༌། །གྲུབ་པ་དང་ནི་གནས་དག་དང༌། །བཟླས་པའི་སྒྲ་དང་ཕྱག་རྒྱར་རྟོག །ཏིང་འཛིན་ལྟ་བ་ཆོ་འཕྲུལ་བརྟག །ཅེས་གསུངས་ཏེ་དཔེ་རྣམས་དེ་ལྟར་ཡང་ཤེས་པས་དོན་ལ་ངེས་པ་ལྷག་པར་འདྲེན་པས་དྲང་ངོ༌། །དེའང་བྱང་ཆུབ་སེམས་ཀྱི་ངོ་བོ་ཉིད་མཚན་ཉིད་ཐམས་ཅད་དང་བྲལ་བས་དངོས་པོ་མེད་ཀྱང་མི་མཐུན་པ་གསང་སྔགས་ཀྱི་དངོས་པོ་བཅུར་སྣང་བས་ན་དངོས་མེད་ཀྱི་ངོ་བོས་དངོས་པོར་སྣང་དུ་བཏུབ་པའི་ཚུལ་མཚོན་པ་དཔེ་ཡིས་སྟོན་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། དཔེ་དོན་སྦྱར་ཏེ་སོ་སོར་བསྟན་པ། དཔེས་མཚོན་པའི་དོན་གྱི་མཇུག་བསྡུ་བའོ། །དང་པོ་བཅུ་སྟེ། གསང་སྔགས་ཀྱི་སྒྲུབ་པ་སྒྱུ་མ་ལྟ་བུར་སྣང་བར་བསྟན་པ། མིང་སྨིག་རྒྱུ་ལྟ་བུར་བཏགས་པར་བཤད་པ། ཕྱག་རྒྱ་ཆུ་ཟླ་ལྟ་བུར་འབྱུང་བར་བསྟན་པ། སྤྱོད་པ་རྨི་ལམ་ལྟ་བུར་མ་ཆགས་པར་བཤད་པ། བཟླས་པ་སྒྲ་བརྙན་ལྟ་བུར་འབྱུང་ཞིང་གྲུབ་པར་བསྟན་པ། ལྟ་བ་མིག་ཡོར་ལྟ་བུར་སྣང་ཡང་མེད་པར་བཤད་པ། ཏིང་ངེ་འཛིན་ཆུའི་ཆུ་ལྦུར་ལྟ་བུར་དག་པར་བསྟན་པ། གནས་དྲི་ཟའི་གྲོང་ཁྱེར་ལྟ་བུར་ངེས་པ་མེད་པར་བཤད་པ། ཆོ་འཕྲུལ་སྤྲུལ་པ་ལྟ་བུར་ཅིར་ཡང་འབྱུང་བར་བསྟན་པ། དངོས་གྲུབ་གཟུགས་བརྙན་ལྟ་བུར་སྐབས་དང་མཐུན་པར་བཤད་པའོ། །དང་པོ་ནི།

ཇི་ལྟར་སྒྱུ་མའི། ཞེས་པ་ནས། སྣང་འབྱུང་རང་བཞིན་མེད། །ཅེས་པའི་བར་གྱིས་བསྟན་ཏེ།

ཇི་ལྟར་སྒྱུ་མའི་རང་བཞིན་ནི། །སྐྱེས་བུ་གང་གི་རྩོལ་བ་དང་། །སྨན་དང་སྔགས་དང་སྦྱོར་བ་ལས། །དབང་པོ་ཡིད་འཕྲོགས་ཅིར་སྣང་ཡང་། །དེ་ལ་འགྲོ་འོང་དངོས་པོ་མེད། །འདི་ལྟར་གསང་བའི་རང་བཞིན་ཡང་།།

མེད་རྒྱུ་འབྱུང་བའི་སྦྱོར་བ་ལས། །ཇི་ལྟར་སྣང་འབྱུང་རང་བཞིན་མེད།།

དེ་དག་སོ་སོ་ནས་བསྟན་པ་ནི། དཔེ་ཇི་ལྟར་ན་རྒྱུ་རྐྱེན་ལས་སྣང་བའི་སྒྱུ་མའི་རང་བཞིན་ཡང་ནི། སྐྱེས་བུ་སྒྱུ་མ་མཁན་གང་གི་ལག་པས་རྩོལ་བ་བྱེད་པའི་ཐབས་དང༌། རྡེའུ་ཤིང་སོགས་ཀྱི་སྨན་དང་ཤེའུ་རིའུ་ཨི་ན་ཡ་ཨ་མོ་ཀ་ཨ་འགུས་ས་འགུས་སོགས་ཀྱི་སྔགས་དང་རྫས་ཀྱི་སྦྱོར་བ་འཛོམ་པ་ལས་འགྲོ་བ་བཟང་མོ་ལ་སོགས་པར་སྣང་བས་ལྟད་མོ་བའི་མིག་གི་དབང་པོ་དང་ཡིད་འཕྲོག་ཅིང་དགའ་བར་བྱེད་པའི་དངོས་པོ་གང་ཅིར་སྣང་ཡང༌། རྒྱུ་རྐྱེན་ལས་སྣང་བའི་སྒྱུ་མའི་དངོས་པོ་དེ་དག་ལའང་འགྲོ་འོང་གི་ངོ་བོའི་དངོས་པོ་མེད་པ་ལྟར་དུ། དཔེས་མཚོན་པའི་དོན་ནི། འདི་ལྟར་ཚུལ་དེ་བཞིན་༼༣༨༩༽དུ་གསང་སྔགས་མཆོག་གི་སྒྲུབ་པའི་རང་བཞིན་ཡང༌། ངོ་བོ་ཅི་ཡང་མེད་པའི་རྒྱུ་ཡི་ངང་ལས་དངོས་གྲུབ་འབྱུང་བའི་ཚུལ་ཡིག་འབྲུ་དང་ཆོ་ག་དང་རྫས་ཀྱི་སྦྱོར་བ་ལས་སུ་རུང་བ་ལས་སྔགས་ཀྱི་དངོས་གྲུབ་སྣ་ཚོགས་འགྲུབ་སྟེ་ཇི་ལྟར་སྣང་ཞིང་འབྱུང་ན་ཡང་དེའི་ངོ་བོ་འདི་འདྲར་གྲུབ་པའི་རང་བཞིན་བསྟན་དུ་མེད་དོ། །དེ་ལྟར་ཡང་ཀུན་འདུས་ལས། ཇི་ལྟར་སྒྱུ་མའི་མཚན་ཉིད་ནི། །སྐྱེས་བུ་དག་གི་རྩོལ་བ་དང༌། །སྨན་དང་སྔགས་ཀྱི་སྦྱོར་བ་ལས། །དབང་པོ་ཡིད་འཕྲོག་ཅིར་སྣང་ཡང༌། །དེ་ལ་འགྲོ་འོང་ག་ལ་ཡོད། །དེ་ལྟར་སྒྲུབ་པའི་མཚན་ཉིད་ཀྱང༌། །ཡིག་འབྲུ་རྫས་ཀྱི་སྦྱོར་བ་ལས། །གྲུབ་པར་སྣང་ཡང་རང་བཞིན་མེད། །ཅེས་སོ།།

གཉིས་པ་མིང་སྨིག་རྒྱུ་ལྟ་བུར་བཏགས་པར་བཤད་པ་ནི།

གང་འདིར་སྨིག་རྒྱུའི། ཞེས་པ་ནས། སྟོང་པས་དེ་མི་དམིགས། །ཞེས་པའི་བར་གྱིས་བསྟན་ཏེ།

གང་འདིར་སྨིག་རྒྱུའི་རང་བཞིན་ནི། །འཇིག་འབྱུང་གཡོ་བའི་དུས་དག་ལ། །དེ་དག་དེ་ཡི་རང་བཞིན་ལས།།

བྱིས་པ་གདུངས་པའི་འདུ་ཤེས་ཀྱིས། །ཆུ་ཡི་འདུ་ཤེས་ཉེར་བཞག་ཀྱང་། །སིམ་པའི་རྒྱུ་དེ་ག་ལ་འགྱུར།།

རང་བཞིན་དེ་ཡི་ཁྱད་པར་ཡང་། །ཀུན་ནས་རང་བཞིན་སྟོང་པ་ལ།།

ཐ་སྙད་མཚན་མའི་མིང་དུ་བཏགས། །དེ་ཉིདསྟོང་པས་དེ་མི་དམིགས།།

དཔེར་ན་གང་འདིར་སྨིག་རྒྱུའི་རང་བཞིན་ནི། དཔྱིད་དྲོད་གཡོ་བའི་དུས་ནས་ཚ་སྒོ་ཅན་དུ་ཉི་མ་ཕྱེད་ལ་ཉེ་བར་རླུང་གཞོལ་ཕྱོགས་སུ་བབ་པའི་ཚེ་ལྟ་བ་པོ་རྒྱང་ན་གནས་པའི་རྐྱེན་དང་བཞི་ལྡན་པས་ཆུར་སྣང་སྟེ། ནམ་ཟླ་དུས་བཞིའི་འཇིག་ཆགས་བཞི་ལས་དགུན་གྱི་གྲང་རེག་འཇིག་ཅིང་དྲོད་འབྱུང་བ་གཡོ་བའི་དཔྱིད་ཟླ་ཐ་ཆུང་གི་དུས་དག་ལ་བབ་ནས་དྲོད་དང་ཉི་མ་འཛོམ་པ་སོགས་ཀྱིས་རྐྱེན་དེ་དག་ལྡན་པ་དེ་ཡི་རང་བཞིན་ལས་སྨིག་རྒྱུ་བ་ན་བྱིས་པ་སྐོམ་གྱིས་གདུང་བའི་ཆུར་བཟུང་སྟེ་སྐོམ་སེལ་བའི་འདུ་ཤེས་ཀྱིས་ཆུ་ཡི་འདུ་ཤེས་སྐྱེད་ཅིང་བསམ་པ་ཉེར་ཞེས་ཉེ་བར་བཞག་ནས་བདས་ཀྱང་དེ་ལ་ཆུ་མེད་པས་ངོམས་ཤིང་སིམ་པའམ་ཚིམ་པའི་རྒྱུ་དེར་ག་ལ་འགྱུར་ཏེ་མི་འགྱུར་རོ། །དཔེ་དེ་བཞིན་དུ་གསང་སྔགས་ཐེག་པ་ཆེན་པོ་དེ་ཡི་མིང་གི་ངོ་བོའི་ཁྱད་པར་ཡང་ཆོས་ཀུན་མཚན་ཉིད་གདོད་མ་ནས་རྣམ་པ་ཀུན་ལྡན་གྱི་རང་བཞིན་སྟོང་པ་ཆེན་པོ་མི་དམིགས་པའི་ངང་ལ་ཐ་སྙད་མཚོན་པས་མཚན་མའི་མིང་དུ་བཏགས་པ་ཡིན་ཀྱང་མིང་སྣ་ཚོགས་པ་དེ་ཉིད་སྟོང་པ་ཉིད་པས་དེ་ཡི་རང་བཞིན་མི་དམིགས་ཏེ་ངོ་བོ་འདི་འདྲར་མེད་པ་སྟེ། སྔ་མ་ལས། ཇི་ལྟར་སྨིག་རྒྱུའི་མཚན་ཉིད་ནི། །ཞིང་པའི་དུས་ཀྱི་ཟླ་བ་ལ། །དྲོད་དང་ཉི་མའི་སྦྱོར་བ་ལས། །བྱིས་པ་གདུངས་པའི་རང་བཞིན་གྱིས། །ཆུ་ཡི་འདུ་ཤེས་ཅི་བསྐྱེད་ཅིང༌། །ཚིམ་པའི་རྒྱུར་ནི་ག་ལ་འགྱུར། །གསང་༼༣༩༠༽སྔགས་མིང་གི་ཁྱད་པར་ཡང༌། །རང་བཞིན་མི་དམིགས་སྟོང་པ་ལས། །མཚན་མའི་ཐ་སྙད་མིང་དུ་བཏགས། །དེ་ཉིད་སྟོང་པས་མིང་མི་དམིགས། །ཞེས་སོ།།

གསུམ་པ་ཕྱག་རྒྱ་ཆུ་ཟླ་ལྟ་བུར་འབྱུང་བར་བསྟན་པ་ནི།

གང་འདིར་ཆུ་ཡི། ཞེས་པ་ནས། དངོས་མེད་འཛིན་རྟོག་བྲལ། །ཞེས་པའི་བར་གྱིས་བསྟན་ཏེ།

གང་འདིར་ཆུ་ཡི་ཟླ་བ་ནི། །སྒྲིབ་མེད་མཁའ་ལ་ཟླ་ཤར་བ། །གཟུགས་བརྙན་དངས་པའི་ཆུ་ནང་སྣང་།།

དེ་ལ་བཏགས་པའི་དངོས་པོ་མེད། །དེ་བཞིན་གང་ཡང་བཀོད་མེད་པར། །དེ་ཉིད་མཁའ་ལ་གང་གསལ་བ།།

གང་འདིར་སྣང་བ་དེ་ཉིད་དེ། །དེ་ཉིད་དངོས་མེད་འཛིན་རྟོག་བྲལ།།

དཔེར་ན་སྐབས་གང་འདིར་ཆུ་ཡི་ཟླ་བ་ནི་སྤྲིན་ལ་སོགས་པའི་སྒྲིབ་པ་མེད་པར་དྭངས་པའི་ནམ་མཁའ་ལ་ཟླ་བའི་དཀྱིལ་འཁོར་ཤར་བ་ན། དེའི་གཟུགས་བརྙན་རྙོག་པ་དྭངས་པའི་ཆུ་ཡི་ནང་དུ་གསལ་བར་སྣང་ཡང་དེ་ལ་ཟླ་བར་བརྟགས་པའི་དངོས་པོའི་ངོ་བོ་གང་ཅིར་ཡང་གྲུབ་པ་མེད་དོ། །དཔེ་དེ་བཞིན་དུ་དོན་གྱི་རང་བཞིན་གསང་སྔགས་ཀྱི་ལྷའི་སྐུ་དང་ཕྱག་རྒྱ་གང་ཡང་ཆེད་དུ་བཀོད་པ་མེད་པར་ལྷར་སྣང་དེ་ཉིད་ཆོས་ཉིད་རིག་པའི་ནམ་མཁའ་ལས་སྣང་སྲིད་གང་སྣང་ཐམས་ཅད་སྐུ་དང་ཞིང་གི་ཕྱག་རྒྱ་སྣ་ཚོགས་སུ་གསལ་བར་གདལ་བ་ཉིད་དུ་ཕྱག་རྒྱ་ཆེན་པོའི་རིག་འཛིན་གང་གི་རིག་པའི་ངོ་འདིར་རང་སྣང་བ་དེ་ཉིད་དེ་ལྟར་གསལ་ཡང་དག་པར་ལྷར་སྣང་དེ་ཡི་ངོ་བོ་ཉིད་ཡེ་གདོད་ནས་དངོས་པོའི་རང་བཞིན་དུ་གྲུབ་པ་མེད་པས་ཡོད་མེད་དུ་འཛིན་ཅིང་རྟོག་པའི་མཐའ་དང་བྲལ་བ་ཉིད་དེ། དེ་ཉིད་ལས། ཇི་ལྟར་ཆུ་ཡི་ཟླ་བ་ནི། །སྒྲིབ་མེད་མཁའ་ལ་ཟླ་ཤར་བ། །གཟུགས་བརྙན་དྭངས་པའི་ཆུ་ནང་སྣང༌། །སྣང་ཡང་གཟུང་བའི་རྟོག་པ་མེད། །དེ་བཞིན་གཟུགས་སྣང་ཕྱག་རྒྱ་ཡང༌། །སེམས་ཀྱི་མཁའ་ལས་སྐུར་གསལ་བ། །ཕྱག་རྒྱའི་རིག་འཛིན་ངོ་ལ་སྣང༌། །དེ་ལྟར་སྣང་ཡང་འཛིན་རྟོག་བྲལ། །ཞེས་སོ།།

བཞི་པ་སྤྱོད་པ་རྨི་ལམ་ལྟ་བུར་མ་ཆགས་པར་བཤད་པ་ནི།

ཇི་ལྟར་རྨི་ལམ། ཞེས་པ་ནས། དམིགས་པ་ཀུན་དང་བྲལ། །ཞེས་པའི་བར་གྱིས་བསྟན་ཏེ།

ཇི་ལྟར་རྨི་ལམ་རང་བཞིན་ནི། །གང་ཞིག་གཉིད་ཀྱིས་ནོན་པ་ན། །ཐང་ཅིག་སྐད་ཅིག་ཡུད་ཙམ་དང་།།

ལོ་ལ་སོགས་པ་ཇི་སྙེད་དུ། །བདེ་སྡུག་སྣ་ཚོགས་མྱོང་བར་སྣང་། །དེ་སངས་ཅི་ཡང་མི་དམིགས་ལྟར།།

སྟོང་ཉིད་ཅི་ཡང་མེད་པ་ལ། །སྤྱོད་པའི་ཁྱད་པར་ཅི་སྤྱད་ཀྱང་།།

སྤྱོད་ལ་མ་ཆགས་ཇི་བཞིན་པས། །བརྟགས་ན་དམིགས་པ་ཀུན་དང་བྲལ།།

དཔེ་ཇི་ལྟར་ན་རྨི་ལམ་དག་གི་རང་བཞིན། སྐྱེས་བུ་གང་ཞིག་གཉིད་ཀྱི་ནོན་པ་དེའི་རྨི་ལམ་ན། སྐད་ཅིག་ཐང་ཅིག་ཡུད་ཙམ་དང་ལོ་དང་ཟླ་བ་ལ་སོགས་པ་ཡུན་རིང་ཐུང་ཇི་སྙེད་པའི་བར་བར་དུ་བདེ་སྡུག་རྣམ་པ་སྣ་ཚོགས་ཇི་སྙེད་ཅིག་མྱོང་བར་སྣང་ན་ཡང་གཉིད་དེ་ཉིད་སངས་པའི་དུས་ན་དེ་གཉིས་ཀ་ཅི་ཡང་མི་དམིགས་པ་ལྟར་དུ། དོན་གསང་སྔགས་ཀྱི་སྤྱོད་པ་ཡང་སྟོང་པ་ཉིད་ཆེན་པོ་ཅི་ཡང་མེད་པ་ཡི་ངང་ལ། སྤྱོད་པའི་ཁྱད་པར་ལེགས་ཉེས་ཇི་ལྟར་སྤྱད་ཀྱང༌། སྤྱོད་༼༣༩༡༽བཞིན་པ་ལ་ཡང་མ་ཆགས་པའི་ཤེས་རབ་ཇི་བཞིན་པའི་ངང་ལས་མ་གཡོས་ཤིང་ཞེན་པ་དག་པས་མ་རིག་པའི་གཉིད་སད་པ་དག་གིས་བརྟགས་ན་སྤྱོད་པའི་ངོ་བོ་ཉིད་ལ་དམིགས་པ་ཀུན་དང་བྲལ་བ་ཉིད་དེ། སྔ་མ་ལས། དཔེར་ན་རྨི་ལམ་རང་བཞིན་ནི། །སྐྱེས་བུ་གཉིད་ཀྱི་དབང་གྱུར་ན། །ཐང་ཅིག་སྐད་ཅིག་ཡུད་ཙམ་དང༌། །ལོ་ལ་སོགས་པ་དེ་བཞིན་དུ། །བདེ་དང་སྡུག་བསྔལ་དེ་བཞིན་མྱོང༌། །སངས་ནས་ཅི་ཡང་མི་དམིགས་ལྟར། །དེ་བཞིན་སྔགས་ཀྱི་སྤྱོད་པ་དག །སྟོང་པ་ཉིད་ཀྱི་རང་བཞིན་ལ། །སྤྱོད་པའི་རྣམ་པ་ཅིར་སྣང་ཡང༌། །བརྟགས་ན་དམིགས་པ་ཀུན་དང་བྲལ། །ཞེས་སོ།།

ལྔ་པ་བཟླས་པ་སྒྲ་བརྙན་ལྟ་བུར་འབྱུང་ཞིང་གྲུབ་པར་བསྟན་པ་ནི།

སྒྲ་བརྙན་འབྱུང་བའི། ཞེས་པ་ནས། བཏགས་ཆགས་བལྟས་པར་སྣང༌། །ཞེས་པའི་བར་གྱིས་བསྟན་ཏེ།

སྒྲ་བརྙན་འབྱུང་བའི་རང་བཞིན་ནི། །གང་གི་གནས་ལ་སྒྲས་རྟེན་པ། །དེ་བཞིན་དེ་ལྟར་སྒྲ་རྟེན་པ། །དེ་བཞིན་དེ་ལྟར་སྒྲ་བརྙན་འབྱུང་། །དེ་ཉིད་ཅི་ཡང་མེད་འབྱུང་ཞིང་། །གསང་སྔགས་གསང་བའི་བྱིན་རླབས་དག །གང་གི་ཆེད་དུ་མེད་འབྱུང་བ། །ཅི་ཡང་མེད་ལས་ཅིར་ཡང་བྱུང་། །མེད་རྒྱུ་བཏགས་ཆགས་བལྟས་པར་སྣང་།།

དཔེར་ན་བྲག་ཆའམ་སྒྲ་བརྙན་འབྱུང་བའི་རང་བཞིན་ནི། བྲག་གང་གི་གནས་ཀྱི་ངོས་ལ་མིའི་སྒྲས་རྐྱེན་དང་འཕྲད་པས་ཇི་སྐད་སྨྲས་པ་དེ་ཁོ་ན་བཞིན་གྲགས་ཏེ་དེ་ལྟར་སྒྲ་བརྙན་འབྱུང་བ་ཡིན་ཡང༌། དེ་ཉིད་ཀྱི་ངོ་བོ་ཅི་ཡང་མེད་པ་ལས་འབྱུང་བ་ཡིན་པས་རང་བཞིན་དམིགས་པ་མེད་པ་ལྟར། བྲག་གི་ངོས་དང་མིའི་སྒྲ་ལྟ་བུའི་གསང་སྔགས་གསང་བའི་བྱིན་རླབས་ཀྱི་རྣམ་པར་འཕྲུལ་པ་དག་གདུལ་བྱ་གང་གི་དངོས་གྲུབ་ཀྱི་ཆེད་དུ་གསང་སྔགས་ཀྱི་བཟླས་བརྗོད་ཀྱི་སྒྲ་རྣམས་ཀྱིས་ལེགས་པར་བསྒྲུབ་ན་རང་བཞིན་མེད་པའི་དབྱིངས་ལ་བཟླས་པའི་སྒྲའི་ཚིག་གི་ནུས་པ་མཐུ་ཅན་དུ་འབྱུང་བ་ཉིད་ཀྱང་སྒྲ་བརྙན་གྲགས་པ་ལྟ་བུའི་སྒོ་གསུམ་གྱི་ཆོས་ཉིད་ཅི་ཡང་མེད་ཅིང་མཐའ་སྣང་གང་ཡང་མ་ཡིན་པའི་ངང་ལས་བཟླས་པའི་སྒྲའི་ནུས་པའི་བྱིན་རླབས་ཅི་ཡང་འབྱུང་ཞིང་སྣང་སྟེ། དེ་ཉིད་ཅི་ཡང་མེད་འབྱུང་ལྟ་བུའི་གཞིའི་གནས་ལུགས་མཚན་ཉིད་མེད་པའི་རྒྱུ་ལས་ཇི་ལྟར་བསམས་ཤིང་བཏགས་པ་ལྟར་ཆགས་ཏེ་གང་དུ་བལྟས་པར་དེ་ལྟར་སྒྲ་སྣ་ཚོགས་སུ་སྣང་ཡང་ངོ་བོ་ཉིད་དུ་བསྟན་དུ་མེད་པ་ཉིད་དེ། དེ་ཉིད་ལས། བྲག་ཆ་གྲགས་པའི་མཚན་མ་ནི། །དཔེར་ན་ངོས་ལ་སྒྲས་རྐྱེན་པས། །ཅི་བཞིན་སྒྲ་ལྟར་བྲག་ཆ་འབྱུང༌། །བྱུང་ཡང་སྒྲར་ཐོས་དམིགས་པ་མེད། །དེ་བཞིན་སྔགས་ཚིག་བཟླས་པའི་སྒྲ། །དཔེར་ན་མེད་ལས་ཡོད་བརྟགས་པའི། །མཚན་མ་ལ་བརྟེན་སྟོང་༼༣༩༢༽པའི་སྒྲ། །བརྗོད་པ་ཙམ་དུ་བསྟན་པར་ཟད། །ཅེས་སོ།།

དྲུག་པ་ལྟ་བ་མིག་ཡོར་ལྟ་བུར་སྣང་ཡང་མེད་པར་བཤད་པ་ནི།

གང་འདིར་མིག་གཡོར། ཞེས་པ་ནས། དེ་དག་གང་ཡང་མེད། །ཅེས་པའི་བར་གྱིས་བསྟན་ཏེ།

གང་འདིར་མིིག་ཡོར་རང་བཞིན་ནི། །མིག་ནད་ཅན་ལ་རྫས་སྣང་བ། །འཁྲིལ་པའི་ངོ་ལ་སྣང་བར་ཟད།།

ཇི་ལྟར་སྣང་བ་གང་ཡང་མེད། །སྤྲོས་བྲལ་རང་བཞིན་སྟོང་ཉིད་ལས། །ཆོ་འཕྲུལ་རྣམ་པ་ཅིར་སྣང་བ།།

ཆོ་འཕྲུལ་ཉིད་དུ་སྣང་བར་ཟད། །སྣང་བ་དེ་དག་གང་ཡང་མེད།།

དཔེར་ན་གང་འདིར་མིག་ཡོར་གྱི་རང་བཞིན་ནི་གསུམ་སྟེ། མིག་ནད་ཅན་དང་རབ་རིབ་ཀྱིས་ཁྱེར་བ་སོགས་ལ་དུང་གི་སེར་སྣང་སོགས་མེད་པའི་རྫས་སུ་སྣང་བ་འབྱུང་སྟེ། འཁྲུལ་རྒྱུ་ཡུལ་ལ་ཡོད་པ་དང༌། དབང་པོ་ལ་ཡོད་པ་དང༌། ཕྱི་རོལ་གྱི་རྟེན་ལ་ཡོད་པ་དང༌། ནང་ན་ཡོད་པའི་རྒྱུ་བཞིས་མཐོང་སྟེ་འཁྲུལ་པའི་ངོ་ལ་སྣང་བར་གྱུར་པའི་ངོ་བོ་ཙམ་དུ་ཟད་དེ། དེ་ཉིད་ཇི་ལྟར་སྣང་བ་ན་ཡང་དབང་པོ་མངོན་སུམ་གྱི་ཚད་མ་མ་ཡིན་པས་མིག་ཡོར་ལ་ངོ་བོ་གང་ཡང་མེད་པའོ། །དེ་བཞིན་དུ་གསང་སྔགས་ཀྱི་ལྟ་བ་ཡང་ངན་རྟོག་གི་མཐའ་རྣམས་ཀྱི་སྤྲོས་པ་ལྟ་ཅི་སྨོས་ཀྱི། བཟང་རྟོག་གི་ཡུལ་དབྱིངས་དང་ཡེ་ཤེས་ལ་སོགས་པའི་ཐ་སྙད་ཀྱི་སྤྲོས་པ་ཙམ་ཡང་བྲལ་བ་ཡི། རང་བཞིན་སྟོང་པ་ཉིད་ཀྱི་ངང་ལས་ཆོས་སོ་ཅོག་ཇི་ལྟར་བལྟས་པ་ལྟར་ཆོ་འཕྲུལ་གྱི་རྣམ་པ་མཚན་ཉིད་ཅིར་ཡང་མ་ངེས་པར་སྣ་ཚོགས་སུ་སྣང་བ་ཡང་རང་རིག་པའི་ཆོ་འཕྲུལ་ཉིད་དུ་རོལ་པ་ཅིར་ཡང་སྣང་བ་ཙམ་དུ་ངེས་པར་ཟད་པས་སྣང་བ་དེ་དག་གང་ལ་ཡང་ངོ་བོ་མེད་པར་མཚན་ཉིད་བརྗོད་པ་ལས་འདས་པ་ཉིད་དེ། སྔ་མ་ལས། འཁྲུལ་པ་སྣང་བའི་རང་བཞིན་ནི། །སྤྲོས་བྲལ་དངོས་པོ་སྟོང་པ་ལས། །སྲོག་དང་ཤེད་ཅན་བྱེད་པ་པོ། །སེམས་ཅན་པ་ལ་སོགས་པར་སྣང༌། །མིག་ནད་ངོ་ལ་རྫས་ལྟར་སྣང༌། །འཁྲུལ་པ་ཁོ་ན་སྣང་བར་ཟད། །དེ་བཞིན་སྔགས་ཀྱི་ལྟ་བ་ཡང༌། །ཆོ་འཕྲུལ་མང་པོ་ཅིར་འཕྲུལ་བ། །སྣང་བ་མེད་པའི་རང་བཞིན་ལ། །འཁྲུལ་པ་སྣ་ཚོགས་སྣང་བར་ཟད། །རྣལ་འབྱོར་ཅན་གྱིས་དེ་ལྟར་བལྟ། །ཞེས་སོ།།

བདུན་པ་ཏིང་ངེ་འཛིན་ཆུའི་ཆུ་ལྦུར་ལྟ་བུར་དག་པར་བསྟན་པ་ནི།

ཆུ་དང་ནམ་མཁའ། ཞེས་པ་ནས། ཉིད་དུ་ངེས་པའོ། །ཞེས་པའི་བར་གྱིས་བསྟན་ཏེ།

ཆུ་དང་ནམ་མཁའ་དྭངས་པ་ལ། །ཆུ་བུར་སྤྲིན་ཚོགས་ཐ་དད་འབྱུང་། །རང་བྱུང་རང་ཞི་རང་བཞིན་པས།།

ཆུ་ཉིད་ནམ་མཁའ་ཉིད་དུ་དག །སྣང་དང་མི་སྣང་ཇི་སྙེད་པ། །ཐམས་ཅད་ཐང་སམས་ཅད་དེ་ཉིད་ལས།།

རང་བྱུང་རང་ཞི་ཇི་བཞིན་པར། །དག་པ་ཉིད་དུ་ངེས་པའོ།།

ཏིང་ངེ་འཛིན་གྱི་དཔེ་དོན་ལའང་གསུམ་སྟེ། དཔེར་ན་ཆུ་དྭངས་པ་དང་ནམ་མཁའ་དྭངས་པ་ལས་ཆུ་བུར་དང་སྤྲིན་ཚོགས་མང་པོ་ཐ་དད་པར་འབྱུང་བ་ཡང་ཆུ་དང་ནམ་མཁའ་ཉིད་ལས་རང་བྱུང་ཞིང་སླར་ཡང་དེ་ཉིད་དུ་རང་སར་ཞིའི་ཞེས་ཞི་བའི་རང་བཞིན་ཡིན་པས་ཆུ་ཉིད་དང་༼༣༩༣༽ནམ་མཁའ་ཉིད་མ་དམིགས་པ་བཞིན་དུ་རྣམ་པར་དག་པ་ཡིན་ནོ། །དཔེ་དེ་ལྟར་གསང་སྔགས་ཐེག་པ་ཆེན་པོ་སྣང་བ་མཚན་མ་དང་བཅས་པའི་ཏིང་ངེ་འཛིན་དང༌། མི་སྣང་བ་མཚན་མ་མེད་པའི་ཏིང་ངེ་འཛིན་སོགས་ཏིང་ངེ་འཛིན་གྱི་སྒོ་འབུམ་ཕྲག་ཇི་སྙེད་པ་ཡི་མཚན་མ་ཐམས་ཅད་དང་མཚན་མ་མེད་པ་ཐམས་ཅད་ཀུན་རང་རིག་པ་བྱང་ཆུབ་ཀྱི་སེམས་དེ་ཉིད་ཡིན་པས་རིག་པའི་དཀྱིལ་འཁོར་འོད་གསལ་བ་དེ་ཁོ་ན་ཉིད་ལས་རང་བྱུང་ཞིང་ཤར་ནས་དེ་ཉིད་ཀྱི་ངང་དུ་རང་སར་ཞི་སྟེ་དབྱེར་མེད་པ་ཡིན་པས་མདོ་སེམས་ཀྱི་ཆོས་ཉིད་ཇི་བཞིན་པ་ཉིད་རྣམ་པར་དག་པ་ཉིད་དུ་ངེས་པ་ཁོ་ནའོ། །དེ་སྐད་དུའང་དེ་ཉིད་ལས། ཇི་ལྟར་ཆར་གྱི་རྒྱུན་བཞིན་དུ། །ཆུ་ལས་ཆུ་བུར་རྣམ་པར་འབྱུང༌། །དེ་ཡང་གཅིག་གི་རྣམ་པ་ལས། །མང་པོའི་རྣམ་གྲངས་དུ་མ་འབྱུང༌། །སྡུད་ཅིང་ཕྱིར་ཡང་དུམ་བུར་འཆད། །དེ་བཞིན་རྣལ་འབྱོར་སྒྲུབ་པ་ཡི། །ཏིང་འཛིན་རྣམ་པ་མང་པོར་འདོད། །ཅེས་སོ།།

བརྒྱད་པ་གནས་དྲི་ཟིའི་གྲོང་ཁྱེར་ལྟ་བུར་ངེས་པ་མེད་པར་བཤད་པ་ནི།

དྲི་ཟའི་གནས་ལ། ཞེས་པ་ནས། དེ་ལྟར་གནས་མ་ཡིན། །ཞེས་པའི་བར་གྱིས་བསྟན་ཏེ།

དྲི་ཟའི་གནས་ལ་ངེས་མེད་པས། །དེ་ཡི་གཟུགས་ན་གར་བྱུང་བར། །གྲོང་ཁྱེར་དེ་ཡང་དེ་བཞིན་འབྱུང་།།

བྱུང་བ་ཉིད་ན་དེ་མི་རྟག །ཇི་བཞིན་པ་ཡི་དེ་བཞིན་ཉིད། །གནས་པས་གནས་པ་གར་གནས་པར།།

དེ་ཉིད་གཞལ་མེད་ཁང་ཆེན་སྣང་། །སྣང་བ་དེ་ལྟར་གནས་མ་ཡིན།།

དཔེར་ན་དྲི་ཟའི་གྲོང་ཁྱེར་གྱི་གནས་ལ་ངེས་པ་མེད་པ་ཡིན་པས་ཁྱད་པར་གསུམ་སྟེ། དྲི་ཟ་དེ་ཡི་གཟུགས་ནི་ནམ་མཁའི་གནས་ཀྱི་གར་བྱུང་བར་གྲོང་ཁྱེར་དེ་ཡང་དེ་ཁོ་ན་བཞིན་དུ་འབྱུང་ལ། དེ་ལྟར་བྱུང་བ་ཉིད་ན་ཡང་དེར་མ་ངེས་པ་ཡིན་པས་དེ་ཁོ་ནར་མི་རྟག་པས་བརྟན་པ་མེད་པ་ལྟར། གསང་སྔགས་ཀྱི་གཞལ་ཡས་ཁང་ནི་ཆོས་ཉིད་ཇི་བཞིན་པ་ཡི་དེ་ཁོ་ན་ཉིད་ཇི་ལྟ་བ་དེ་བཞིན་ཉིད་དུ་བློ་གནས་པས་རང་རིག་པ་ནམ་མཁའི་ངང་ལ་གནས་པ་དང་ལྡན་བཞིན་དུ་ལྷའི་སྐུ་ཕྱག་རྒྱར་སྒོམ་སྟེ་གར་གནས་ཏེ་གསལ་བར་འབྱུང་བ་དེར་རང་སྣང་དེ་ཉིད་གཞལ་མེད་ཁང་ཆེན་པོར་རིག་པའི་བྱིན་རླབས་ལས་ཤར་བར་སྣང་སྟེ། གནས་སུ་འབྱུང་བའི་སྣང་བ་དེ་ལྟར་ཐེར་ཟུག་པའི་གནས་རྟག་པ་ཅན་མ་ཡིན་པར་སེམས་ཀྱི་དེ་ཁོ་ན་ཉིད་རང་སྣང་བ་ཉིད་དེ། སྔ་མ་ལས། དྲི་ཟ་གནས་པའི་རང་བཞིན་ནི། །མཁའ་འམ་སྟོང་པའི་ངོས་དག་ལ། །དྲི་ཟའི་གཟུགས་ནི་གར་བྱུང་ཡང༌། །གྲོང་ཁྱེར་དེ་ཡང་དེ་ནས་འབྱུང༌། །བྱུང་ནས་དེ་ཡང་མི་རྟག་ལྟར། །གསང་སྔགས་གྲུབ་པའི་གནས་དག་ཀྱང༌། །ཆོས་སམ་ཡིད་ཀྱི་མཁའ་༼༣༩༤༽ངོས་ལ། །རྣལ་འབྱོར་གསང་བདག་གར་བསྐྱེད་པར། །དེ་ཉིད་གནས་པའི་གཞལ་ཡས་ཁང་། །བྱུང་ཡང་དེ་ལ་གནས་མི་འགྱུར། །ཞེས་སོ།།

དགུ་པ་ཆོ་འཕྲུལ་སྤྲུལ་པ་ལྟ་བུར་ཅིར་ཡང་འབྱུང་བར་བསྟན་པ་ནི།

ཇི་ལྟར་སྤྲུལ་པའི། ཞེས་པ་ནས། ཟད་མེད་འཕེལ་བ་མེད། །ཅེས་པའི་བར་གྱིས་བསྟན་ཏེ།

ཇི་ལྟར་སྤྲུལ་པའི་རང་བཞིན་ནི། །མེད་འབྱུང་གཅིག་ལས་དུ་མར་འབྱུང་། །གང་འབྱུང་འཁོར་ལོའི་རྒྱུན་ལྟར་སྣང་། །སྣང་བའི་འབྱུང་རྒྱུན་འཆད་མ་ཡིན། །མི་མཉམ་མཉམ་པའི་རང་བཞིན་ལས། །ཇི་ལྟར་བ་ལྟར་དེ་བྱུང་བ། །གང་འདིར་འབྱུང་བ་རྒྱུན་མི་འཆད། །དེ་ལ་ཟད་མེད་འཕེལ་བ་མེད།།

དཔེ་ཇི་ལྟར་ན་འགལ་མེའི་སྤྲུལ་པའི་རང་བཞིན་ནི་གསུམ་སྟེ། དངོས་པོ་མེད་བཞིན་དུ་འཁོར་ལོ་ལ་སོགས་པ་སྣ་ཚོགས་སུ་འབྱུང་ཏེ་འགལ་མེ་གཅིག་གི་རྣམ་པ་ལས་ཀྱང་དབྱིབས་སོ་སོར་དུ་མར་མང་པོ་འབྱུང་བས། གང་དག་མེ་ཉིད་བསྐོར་ཏེ་བསྒྱུར་ན་འགལ་མེའི་འཁོར་ལོའི་རྒྱུན་དང་ཐོག་རིས་ལ་སོགས་པ་ལྟར་སྣང་བས། སྣང་བའི་འབྱུང་རྒྱུན་བར་ཆད་པ་མ་ཡིན་ནོ། །དེ་བཞིན་དུ་དོན་སྔགས་ཀྱི་ཆོ་འཕྲུལ་ཡང་མི་མཉམ་པ་འཁོར་བའམ་སེམས་ཅན་དང༌། མཉམ་པའི་མྱ་ངན་ལས་འདས་པའམ་སངས་རྒྱས་གཉིས་ཀྱི་རང་བཞིན་ཆོས་ཉིད་གཉིས་སུ་མེད་པས་བླང་དོར་མེད་པའི་ངོ་བོ་ལས། འདུལ་བྱ་དག་གི་བསམ་པ་ཇི་ལྟ་བ་དེ་ལྟར་ཆོ་འཕྲུལ་བལྟས་རྒུ་སྣ་ཚོགས་པ་དེ་ཉིད་འབྱུང་ཞིང་སྣང་བ་ཡང༌། གང་འདིར་དོན་མཛད་པའི་བཀོད་པ་མང་པོའི་སྣང་འབྱུང་སྟོན་པ་རྒྱུན་གྱི་བར་མི་ཆད་པར་ཤར་ཀྱང་མ་འགགས་པར་སྣ་ཚོགས་སུ་འབྱུང་བ་དེ་ལ་བྲི་ཞིང་འགྲིབ་པས་ཟད་པ་མེད་ཅིང་འོང་བསྡུས་ཀྱིས་དངོས་པར་འཕེལ་བ་གང་ཡང་མེད་པ་ཉིད་དེ། སྔ་མ་ལས། ཇི་ལྟར་འགལ་མེའི་རང་བཞིན་ནི། །གང་དག་ལག་ན་འགལ་མེ་ཐོགས། །བསྐོར་ན་འཁོར་ལོའི་རྒྱུན་ལྟར་སྣང༌། །དེ་ལ་འཁོར་ལོའི་རང་བཞིན་མེད། །དེ་བཞིན་སྔགས་ཀྱི་ཆོ་འཕྲུལ་ཡང་། །མི་མཉམ་མཉམ་པའི་རང་བཞིན་ལས། །ཇི་ལྟར་དམིགས་པའི་དོན་འབྱུང་སྟེ། །ཆོ་འཕྲུལ་སྣ་ཚོགས་རྒྱུན་མི་འཆད། །ཅེས་སོ།།

བཅུ་པ་དངོས་གྲུབ་གཟུགས་བརྙན་ལྟ་བུར་སྐབས་དང་མཐུན་པར་བཤད་པ་ནི།

གང་འདིར་གཟུགས་བརྙན། ཞེས་པ་ནས། ཉིད་དོ་དེ་ཁོ་ནའོ། །ཞེས་པའི་བར་གྱིས་བསྟན་ཏེ།

གང་འདིར་གཟུགས་བརྙན་གང་སྣང་བ། །བཞིན་དང་བཞིན་འབྱུང་སྣང་བ་ལས། །རྟེན་ནས་དེ་བཞིན་གཟུགས་བརྙན་འབྱུང་། །དེ་ཉིད་དེ་ལས་ཐ་དད་མིན། །གང་འདིར་རྒྱུ་འབྲས་ཐ་དད་པ། །རྒྱུ་ཉིད་འབྲས་བུ་དེ་ཉིད་རྒྱུ། །དེ་བས་དེ་ལ་དེ་གཉིས་མིན། །དེ་བཞིན་ཉིད་དོ་དེ་ཁོ་ནའོ།།

དཔེར་ན་གང་འདིར་བཞིན་གྱི་གཟུགས་བརྙན་གང་སྣང་བ་ནི་གསུམ་སྟེ། བྱད་བཞིན་གྱི་གདོང་པ་དངོས་དང་བཞིན་སྣང་འབྱུང་བའི་གཞི་མེ་ལོང་གཡའ་མེད་པར་དྭངས་པ་གཉིས་འཛོམ་ནས་སྣང་བ་ཡོད་པ་གསུམ་དང་ལྡན་པ་ལ་བརྟེན་ནས་འཇོག་པ་པོའི་བྱད་བཞིན་དེ་ཉིད་ཇི་ལྟ་བ་བཞིན་དུ་གཟུགས་བརྙན་གྱི་སྣང་བ་འབྱུང་ངོ༌། །༼༣༩༥༽དེ་ལྟར་འབྱུང་ཡང་གཟུགས་བརྙན་དེ་ཉིད་དང་མེ་ལོང་དེ་གཉིས་དུས་དེར་ཐ་མི་དད་པ་ཡིན་པ་བཞིན་དུ། དོན་གསང་སྔགས་ཀྱི་དངོས་གྲུབ་ཀྱང༌། གང་འདིར་སྤྱིར་རྒྱུ་དང་འབྲས་བུ་གཉིས་སོ་སོ་ཐ་དད་པར་མ་མཐོང་བས་ཐེག་པ་ཆེན་པོའི་དོན་གྱི་ངོ་བོ་མཐོང་ན། དངོས་གྲུབ་ཀྱི་གཞིའམ་རྒྱུ་སེམས་ཀྱི་ཆོས་ཉིད་དེ་འབྲས་བུ་དངོས་གྲུབ་ཆེན་པོ་ཡང་ཡིན་ཏེ། དེ་ཉིད་འབྱུང་བའི་རྒྱུ་ཡང་ཡིན་པས་དོན་ལ་རྒྱུ་འབྲས་དབྱེར་མེད་པའི་ཕྱིར་ཏེ། དེ་བས་ན་ཆོས་ཉིད་དེ་ལ་སེམས་དང་དངོས་གྲུབ་ལ་རྒྱུ་འབྲས་སོ་སོ་དེ་གཉིས་མེད་དེ་སེམས་ཀྱི་དེ་བཞིན་ཉིད་དོ། །དེས་ན་དེ་ཁོ་ན་དངོས་གྲུབ་ཆེན་པོ་མཐར་ཐུག་པའོ། །དེ་ལྟར་ཡང་སྔ་མ་ལས། གཟུགས་བརྙན་སྣང་བའི་མཚན་ཉིད་ནི། །དཔེར་ན་གདོང་དང་མེ་ལོང་ལ། །བརྟེན་ནས་བཞིན་གྱི་གཟུགས་འབྱུང་ཡང་། །རེད་པར་གྱུར་པ་ག་ལ་ཡོད། །དེ་བཞིན་སྔགས་ཀྱི་དངོས་གྲུབ་ཀྱང་། །སྒྲུབ་དང་ཏིང་འཛིན་ཡོ་བྱད་ལས། །བརྟེན་ནས་དངོས་གྲུབ་ཚུལ་འབྱུང་ཡང༌། །གསོལ་ཐོབ་དམིགས་པ་ག་ལ་ཡོད། །ཅེས་སོ། །འདི་དག་ཀྱང་མཚན་མའི་རྣལ་འབྱོར་བཅུས་ཤེས་པར་བྱ་བའི་མཆོག་སྟེ་ཐག་གཅད་པའི་དོན་ཏོ།།

གཉིས་པ་དཔེས་མཚོན་པའི་དོན་གྱི་མཇུག་བསྡུ་བ་ལ་བཅུ་སྟེ། དེ་ཁོ་ན་ཉིད་གཅིག་པར་བསྟན་པ། དེ་བློ་དམན་པའི་ཡུལ་མ་ཡིན་པར་བསྟན་པ། བློ་དམན་པས་མི་རྟོགས་པའི་དཔེ་དོན་བཤད་པ། བློ་དམན་པ་ལ་ཅིག་ཆར་མི་རྟོགས་པས་རིམ་གྱིས་བསྟན་པ། བསམ་དུ་མེད་པའི་དོན་བློ་དམན་ལ་མི་བསྟན་པར་གདམས་པ། དོན་དེ་མཚོན་ཅིང་བརྗོད་དུ་མེད་པར་བསྟན་པ། རྟོགས་ན་མཐའ་དབུས་མེད་པར་བཤད་པ། དོན་ལ་བླང་དོར་མེད་པར་བསྟན་པ། མ་རྟོགས་པའི་གོལ་ས་བཤད་པ། རྟོགས་མ་རྟོགས་ཀྱི་ཁྱད་པར་བསྟན་པའོ། །དང་པོ་ནི།

དེས་ན་ཇི་སྙེད། ཅེས་པ་ནས། བ་ལ་འབྱུང་སྣང་མེད། །ཅེས་པའི་བར་གྱིས་བསྟན་ཏེ།

དེས་ན་ཇི་སྙེད་པ་ཡི་ཆོས། །ཇི་བཞིན་ཉིད་དུ་གཅིག་པས་ན།།

གང་ལྟར་ཅི་སྣང་ཅི་བྱུང་བ། །མི་གཡོ་བ་ལས་འབྱུང་སྣང་མེད།།

གཏན་ཚིགས་ཀྱིས་ཡིད་ཆེས་པར་བྱ་བ་ནི། བཤད་པའི་ཚུལ་དེས་ན་ཇི་སྙེད་དུ་བརྗོད་ཅིང་བསྟན་པ་ཡི་མཚན་མར་སྣང་བའི་ཆོས་སོ་ཅོག་ཐམས་ཅད་མཚན་མ་མེད་པ་ཇི་བཞིན་པའི་དེ་ཁོ་ན་ཉིད་དུ་དབྱེར་མེད་པར་གཅིག་པའི་ཕྱིར་ཏེ་དེ་བས་ན་སྒྲུབ་ཐབས་གང་ཇི་ལྟར་ཡང་སྣང་བ་དེ་༼༣༩༦༽ལྟར་བསྒྲུབ་པ་ལས་དངོས་གྲུབ་ཅིར་སྣང་དང་རྟགས་རྣམས་ཇི་ལྟར་བྱུང་ན་ཡང་ཆོས་ཉིད་མཉམ་པ་ཆེན་པོ་མི་གཡོ་བ་ཡི་ངང་ལས་འབྱུང་སྣང་མེད་པས་བྱང་ཆུབ་ཀྱི་སེམས་ལས་འགྲོ་འོང་མེད་པའོ། །དེ་བས་དཔེ་བཅུས་དོན་མཐོང་ཚུལ་གྱི་ངོ་བོ་དེ་བཞིན་ཉིད་དུ་གཅིག་པར་བསྟན་ཏེ། དེ་ཉིད་ལས། དེ་ཕྱིར་མཚན་མའི་ཆོས་ཐམས་ཅད། །མཚན་མེད་ངང་དུ་གཅིག་པས་ན། །རྟོག་པའི་བག་ཆགས་ཅི་བྱུང་ཡང༌། །ཆོས་ཀུན་དབྱིངས་སུ་གཅིག་པའི་ཕྱིར། །རྟོག་འཇུག་སྤྲོས་པའི་མཚན་མ་ཀུན། །མ་བྱུང་མ་སྐྱེས་དབྱིངས་ཉིད་ལས། །གཡོས་པ་མེད་ཅིང་ཆོ་འཕྲུལ་འབྱུང༌། །ཡོན་ཏན་སྣ་ཚོགས་ཆེར་འབྱུང་བའི། །གཏེར་གྱི་དབྱིག་འདི་གང་མཐོང་བ། །སངས་རྒྱས་ཀུན་གྱི་ཡོན་ཏན་ཡང༌། །སྐད་ཅིག་གཅིག་ལ་དེ་ལ་འདུས། །དེ་བས་ཡིད་བཞིན་རིན་ཆེན་འདི། །ལྡོག་པ་མེད་པས་དང་དུ་བླང༌། །ཞེས་སོ།།

གཉིས་པ་དེ་བློ་དམན་པའི་ཡུལ་མ་ཡིན་པར་བསྟན་པ་ནི།

ཟབ་མོ་གསང་བ། ཞེས་པ་ནས། རྟོགས་པར་མི་འགྱུར་རོ། །ཞེས་པའི་བར་གྱིིས་བསྟན་ཏེ།

ཟབ་མོའི་གསང་བ་དམ་པ་འདི། །མཁའ་ལ་རྟོག་འདྲར་གཏིང་དཔག་དཀའ།།

རྣལ་འབྱོར་མི་ལྡན་གང་རྟོག་པ། །བརྟགས་པས་རྟོགས་པར་མི་འགྱུར་རོ།།

གསང་སྔགས་ཀྱི་དགོངས་དོན་ཟབ་མོ་ཟབ་པའི་ཡང་སྙིང་གསང་བ་དམ་པ་འདི་ནི། ནམ་མཁའ་ལ་མུ་མཐའ་བརྟགས་ཀྱང་རྟོག་པས་མི་རྙེད་པ་དང་འདྲར་ཞེས་འདྲ་བར་གསང་སྔགས་མུ་མཐའ་བྲལ་བའི་ངེས་དོན་གཏིང་དཔག་དཀའ་ཞིང་ཇི་བཞིན་དུ་མཐོང་བ་དཀོན་པ་ལ། རྣལ་འབྱོར་ཆེན་པོ་ཤེས་རབ་ཀྱི་སྤྱན་ནམ་ལྟ་བ་དང་མི་ལྡན་པ་གང་གིས་ཐ་སྙད་ཀྱི་མིང་མང་པོ་བཏགས་ནས་གསང་བའི་གྲུབ་མཐའ་ལ་རྟོག་པ་ནི། བརྟགས་སུ་མེད་པ་ལ་བརྟགས་པ་ཡིན་པས་ཡང་དག་པར་རྟོགས་པར་མི་འགྱུར་ཏེ་རྟོག་པ་ཉིད་ཀྱིས་མི་རྙེད་པའི་ཕྱིར་རོ། །དེས་ན་སྔ་མ་ལས། མི་དམིགས་སྤྲོས་བྲལ་བྱང་ཆུབ་སེམས། །ཟབ་མོར་སྣང་བའི་ངེས་དོན་འདི། །མཁའ་ལ་མདུད་འདྲར་གཏིང་དཔག་དཀའ། །རྣལ་འབྱོར་དམིགས་ལྡན་བློ་ཆུང་ཞིང༌། །གང་ཞིག་རྩལ་ཞན་དེ་རྟོག་པ། །གཡོར་མོའི་ཚུལ་དུ་བདག་བརྟགས་པ། །བརྟགས་ཀྱང་རྟོགས་པར་མི་འགྱུར་རོ། །ཞེས་སོ།།

གསུམ་པ་བློ་དམན་པས་མི་རྟོགས་པར་དཔེ་དོན་བཤད་པ་ནི།

དཔེར་ན་ཉི་མའི། ཞེས་པ་ནས། བྱིས་པ་ག་ཆད་བརྒྱལ། །ཞེས་པའི་བར་གྱིས་བསྟན་ཏེ།

དཔེར་ན་ཉི་མའི་སྙིང་པོ་ལ། །མིག་གི་དབང་པོས་རབ་བརྟགས་ན། །སྙིང་པོ་དེ་གང་མི་རྟོགས་ཀྱི།།

འོད་འབར་ཟིལ་གྱིས་མིག་རྫིར་འགྱུར། །དེ་བཞིན་བྱིས་པའི་བློ་ཞན་པས། །སྙིང་པོའི་དོན་ལ་ཅིར་བརྟགས་ཀྱང་།།

གསང་བའི་སྙིང་པོ་མ་མཐོང་གི །བློ་ཞན་བྱིས་པ་ག་ཆད་བརྒྱལ།།

དེ་ལྟ་བུའི་དོན་དེ་བརྟགས་པའི་ཚུལ་འདིས་མི་རྟོགས་པར་འཆད་དེ། ཇི་བཞིན་དུ་༼༣༩༧༽རྟོགས་པར་དཀའ་བའི་མཚོན་པ། དཔེར་ན་ཉི་མའི་སྙིང་པོ་ལ་མིག་གི་དབང་པོས་གཏད་ནས་རབ་ཏུ་བརྟགས་ན། འོད་ཀྱི་སྙིང་པོ་དེ་ཡང་གང་སུ་ཞིག་གིས་ངེས་པར་མི་རྟོགས་ཀྱི། ཉི་མ་འོད་འབར་བའི་ཟེར་ཕོག་པའི་ཟིལ་གྱིས་མིག་རྫིར་རམ་རྫིལ་བར་བྱས་ནས་མི་མཐོང་བར་འགྱུར་རོ། །དཔེ་དེ་བཞིན་དུ་གསང་བའི་དོན་ལ་ཤེད་མ་བྱེ་བའི་བྱིས་པ་བློ་རྩལ་ཞན་པས་རྨོངས་པ་དག་གིས། གསང་སྔགས་སྙིང་པོའི་དོན་ལ་བློས་ཅིར་བརྟགས་ཏེ་ཇི་ལྟ་བར་དཔྱད་ཀྱང་རྟོག་པ་དེས་གསང་བའི་སྙིང་པོ་གཉིས་སུ་མེད་པའི་སྔགས་ཀྱི་དོན་རྟོགས་པར་མི་འགྱུར་བས་ཡང་དག་པར་མི་མཐོང་གི སླར་བཙལ་བ་པོ་བློ་ངན་པའམ་ཞན་པའི་བྱིས་པ་དེ་ཉིད་ཚི་ཆད་ཅིང་དོན་ལ་མདོངས་ཏེ་ག་ཆད་དུ་བརྒྱལ་བར་འགྱུར་བའི་ཕྱིར་དེ་ཉིད་ལས། དཔེར་ན་ཉི་མའི་སྙིང་པོ་ལ། །མིག་གི་དབང་པོས་རབ་བརྟགས་ན། །དེ་བརྟགས་དོན་དེ་མི་རྟོགས་ཀྱི། །འོད་ཀྱི་ཟེར་གྱིས་མིག་རྫིར་འགྱུར། །དེ་འདྲར་བྱིས་པའི་རང་བཞིན་གྱིས། །ཟབ་མོའི་དོན་ལ་ཅིར་བརྟགས་ཀྱང་། །ཡང་དག་དོན་དེ་མི་མཐོང་གི །བློ་ཞན་བྱིས་པ་ག་ཆད་བརྒྱལ། །ཞེས་སོ།།

བཞི་པ་བློ་དམན་པ་ལ་ཅིག་ཆར་མི་རྟོགས་པས་རིམ་གྱིས་བསྟན་པ་ནི།

དེས་ན་གསང་བ། ཞེས་པ་ནས། ཅན་ལ་ཕྱོགས་ཙམ་མོ། །ཞེས་པའི་བར་གྱིས་བསྟན་ཏེ།

དེས་ན་གསང་བ་དམ་པ་འདི། །མཚོན་པར་ཤེས་པར་མི་ནུས་ཀྱང་།།

གང་ལ་རྨོངས་པའི་ཕྱོགས་མཚོན་ཕྱིར། །རྣལ་འབྱོར་ཅན་ལ་ཕྱོགས་ཙམ་མོ།།

དེས་ན་གསང་སྔགས་གསང་བ་དམ་པ་འདི་ནི། རྟོགས་པར་དཀའ་བའི་ཚུལ་གྱིས་དཔེས་མཚོན་པར་ཡང་དཀའ་བས་ཤེས་པར་མི་ནུས་ཏེ་ཡུལ་ལས་འདས་པའོ། །ཀྱང་ནི་མི་མཐུན་པ་སྟེ་འོན་ཀྱང༌། བློ་ལྡན་ལ་བརྒྱུད་ནས་མཚོན་པའི་ཚུལ་གྱིས་གང་གསང་སྔགས་གཉིས་སུ་མེད་པའི་དོན་ལ་རྨོངས་པའི་མདོངས་པ་དག་ལ་དོན་གྱི་ངོ་བོ་ཕྱོགས་ཙམ་མཚོན་ནས་ཤེས་པར་བྱ་བའི་དགོས་ཆེད་ཀྱི་ཕྱིར་དུ་ཐེག་འོག་པའམ་ལྷའི་རྣལ་འབྱོར་སོགས་དང་ལྡན་པའི་སྐལ་བ་ཅན་ལ་ཏིང་ངེ་འཛིན་དོན་དང་འབྲེལ་བའམ། སྐུ་ཕྱག་རྒྱ་ལ་སོགས་པས་དོན་ལ་སྦྱོར་ཚུལ་ཕྱོགས་མཚོན་དུ་བསྟན་པ་ཙམ་མོ། །དེ་སྐད་དུའང་སྔ་མ་ལས། སྟོང་པར་སྦས་པའི་དོན་འདི་ལ། །དཔེས་མཚོན་ཚིག་གི་ལྡེ་མིག་གིས། །མཉམ་ཉིད་རིག་པའི་སྒོ་དབྱེ་བྱས། །སྦས་པའི་དོན་འབྱིན་གསལ་བྱེད་པ། །སཱ་ལུ་ཕུབ་ཁྲོད་སྣང་མེ་བཞིན། །བསལ་བཏེག་སྣང་༼༣༩༨༽རྙེད་ས་ལེར་འདུག །ཅེས་སོ།།

ལྔ་པ་བསམ་དུ་མེད་པའི་དོན་བློ་དམན་ལ་མི་བསྟན་པར་གདམས་པ་ནི།

བསམ་དུ་མེད་པའི། ཞེས་པ་ནས། རྣམས་ལ་ངས་མ་བསྟན། །ཞེས་པའི་བར་གྱིས་བསྟན་ཏེ།

བསམ་དུ་མེད་པའི་ཆོས་ཉིད་འདི། །བསམ་དང་བྲལ་བས་དེ་བཞིན་བཞག།

མི་རྟག་བཞག་པའི་ཆོས་འདི་གང་། །བྱིས་པ་རྣམས་ལ་ངས་མ་བསྟན།།

སྤྱོད་ཡུལ་ཀ་ནས་དག་པས་བསམ་དུ་མེད་པའི་ཆོས་ཉིད་འདི་ལ་ཡེ་ནས་ཡིད་ལ་བྱ་བསམ་དང་བྲལ་ཏེ་རྟོག་དཔྱོད་ཀྱིས་ཡུལ་དུ་མེད་པས་དེ་ལྟར་ངེས་པའི་ལམ་པས་ཀྱང་དེ་ཉིད་དུའང་འདུ་ཤེས་མ་ཞུགས་པར་དེ་བཞིན་དུ་གཞག་པར་བྱས་ན་རྣལ་དུ་ཕེབས་པའོ། །དེ་ལྟར་ཕེབས་པའི་ངང་ལ་མི་རྟོག་པར་གཞག་པས་ཅི་ལྟར་སྤྱད་ཀྱང་འཆིང་བ་མེད་པའི་དོན་གྱི་ཆོས་ཉིད་ཟབ་མོ་འདི་ནི་ཤིན་ཏུ་རྟོགས་པར་དཀའ་བས་གསང་དོན་ལ་ཤེད་མ་བྱེ་བའི་བྱིས་པ་བློ་ཆུང་རྣམས་ལ་སྟོན་པ་ངས་མ་བསྟན་ཞིང་བཀའ་སྩལ་བར་མ་མཛད་དོ་ཞེས་པའི་དོན་ཏེ། དེ་ཉིད་ལས། བརྟག་ཏུ་མེད་པའི་ཆོས་རྣམས་ནི། །རྟོག་པ་ཅན་གྱིས་མི་རྟོགས་ཏེ། །གང་ཞིག་དེ་དོན་མི་རྟོག་ཕྱིར། །གཡང་སར་ལྟུང་བ་ཅི་ཆ་ཡོད། །གདོད་ནས་མ་ཐོས་ཤིན་ཏུ་དགེ །བསམ་དང་བྲལ་བས་དེ་བཞིན་གཞག །མི་བརྟགས་བཞག་པའི་ཆོས་འདི་གང༌། །བྱིས་པ་རྣམས་ལ་ངས་མ་བསྟན། །བསྟན་ཀྱང་གོ་བར་མི་འགྱུར་ཏེ། །བསྟན་དུ་མེད་ཅིང་གོ་བར་དཀའ། །ཞེས་སོ།།

དྲུག་པ་དོན་དེ་མཚོན་ཅིང་བརྗོད་དུ་མེད་པར་བསྟན་པ་ནི།

བརྗོད་པའི་མཚོན་པ། ཞེས་པ་ནས། ཆོས་ལ་ཚིག་ལམ་མེད། །ཅེས་པའི་བར་གྱིས་བསྟན་ཏེ།

བརྗོད་པས་མཚོན་པ་ལས་འདས་པས། །འདི་ཞེས་བསྟན་དུ་ག་ལ་ཡོད།།

མེད་པས་བསྟན་པའི་དམིགས་མི་རྙེད། །མི་དམིགས་ཆོས་ལ་ཚིག་ལམ་མེད།།

གསང་བའི་དབྱིངས་ཇི་བཞིན་པ་ནི་ཚིག་ཏུ་བརྗོད་པས་དོན་ལ་མི་ཕེབས་པའི་ཕྱིར་ཚིག་གི་མཚོན་པ་ལས་འདས་ཏེ་བརྗོད་པ་དང་བྲལ་བ་ཡིན་པ་ལ་བཟླས་པའི་སྒྲ་དང་སྒྲུབ་པར་གྱིས་ཤིག་ཅེས་པ་ལ་སོགས་པ་ངོ་བོ་ངེས་པར་བརྗོད་པས་འདི་ཞེས་བསྟན་དུ་ག་ལ་ཡོད་དེ་མེད་པའི་ཕྱིར་རོ། །དེས་ན་དེ་ཁོ་ན་ཉིད་བརྗོད་པ་དང་བྲལ་བའི་ཕྱིར་ཕྱོགས་གཅིག་ཏུ་གྲུབ་པ་མེད་པས་ངོ་བོ་ངེས་པར་མི་ཟིན་པའི་ཆོས་ཉིད་དེ་དེ་ལ་འདི་ཞེས་བསྟན་པའི་དམིགས་པ་དག་གིས་མི་རྙེད་དེ་མཐའ་གང་དུའང་མི་དམིགས་པའི་ཆོས་ཉིད་ཀྱི་དབྱིངས་ལ་བརྗོད་པའི་ཚིག་ལམ་མེད་པར་ཐ་སྙད་ཐམས་ཅད་ལས་འདས་པ་ནི་ལྟ་བའི་མཆོག་དམ་པ་ཡིན་ཏེ། སྔ་མ་ལས། ཚིག་གིས་བརྗོད་པ་ཀུན་དང་བྲལ། །འདི་ཞེས་བསྟན་དུ་ག་ལ་ཡོད། །མེད་པས་བསྟན་པའི་དམིགས་མི་ཕྱེད། །མི་དམིགས་ཆོས་ལ་བློ་སྦྱང་ཤིང༌། །ཡིད་ཀྱི་མེ་ལོང་གསལ་བྱས་ནས། །ནམ་མཁའ་དག་ལ་རབ་བརྟགས་ན། །སྣང་བ་མེད་པའི་རང་བཞིན་ནི། །ནམ་མཁའ་ལྟ་བུར་དེ་ཉིད་འགྱུར། །ཞེས་སོ།།

བདུན་པ་རྟོགས་ན་མཐའ་དབུས་མེད་པར་བཤད་པ་ནི།

ཆོས་ཀུན་ནམ་མཁའ། ཞེས་པ་ནས། མཐའ་དབུས་མུ་དང་བྲལ། །ཞེས་པའི་བར་གྱིས་བསྟན་ཏེ།

ཆོས་ཀུན་ནམ་མཁའ་ལྟ་བུ་སྟེ། །ནམ་མཁའ་ལ་ཡང་མཚན་ཉིད་མེད།།

ནམ་མཁའི་དབུས་མཐའ་མི་དམིགས་བཞིན། །ཆོས་ཀུན་མཐའ་དབུས་མུ་དང་བྲལ།།

ཆོས་སོ་ཅོག་ཀུན་གྱི་དེ་ཁོ་ན་ཉིད་ནི་གསལ་ལ་མི་གཡོ་བ་ནམ་མཁའ་ལྟ་བུ་དང་འདྲ་བ་སྟེ། དེས་ན་ཆོས་ཉིད་ཀྱི་ནམ་མཁའ་ལ་ཡང་མཚན་ཉིད་འདི་ཡིན་ནོ། །ཞེས་གཟུང་དུ་མེད་དེ། དེ་ཉིད་ལས། ཆོས་ཉིད་ནམ་མཁའ་ལྟ་བུ་སྟེ། །ནམ་མཁའ་ལ་ཡང་མཚན་ཉིད་བྲལ། །ཞེས་སོ། །དེ་བས་ན་ནམ་མཁའ་ལ་དབུས་མཐའ་མི་དམིགས་པ་བཞིན་དུ་ཆོས་ཀུན་ཀྱང་མཐའ་དབུས་ཀྱི་མུ་དང་བྲལ་བའི་རིག་པ་ཅིར་ཡང་མ་གཡོས་པ་ནི་ཏིང་ངེ་འཛིན་དམ་པའི་ཕྱིར་རོ།།

བརྒྱད་པ་དོན་ལ་བླང་དོར་མེད་པར་བསྟན་པ་ནི།

ནམ་མཁའ་གང་མིང༌། ཞེས་པ་ནས། གཉིས་མེད་འགལ་མི་འགྱུར། །ཞེས་པའི་བར་གྱིས་བསྟན་ཏེ།

ནམ་མཁའ་གང་མིང་བརྗོད་བྱེད་པ། །བརྗོད་པ་དེ་ཉིད་དངོས་པོ་སྟེ། །དེ་ཡི་ཐ་སྙད་མིང་བརྗོད་ཀྱང་།།

ནམ་མཁའ་དེ་ལ་འགག་མི་འགྱུར། །འདི་ལ་མི་རྟོག་གང་བརྗོད་པ། །བརྗོད་པ་དེ་ཉིད་རྣམ་རྟོག་སྟེ།།

རྣམ་རྟོག་རྣམ་རྟོག་ཅི་བརྗོད་ཀྱང་། །དེ་ལ་གཉིས་མེད་འགལ་མི་འགྱུར།།

དཔེར་ན་ནམ་མཁའ་ལ་གང་ཟག་གང་ཞིག་མིང་གི་སྒོ་ནས་ཡོད་མེད་དུ་བརྗོད་པར་བྱེད་པ་ན་ཡང༌། བརྗོད་པ་དེ་ཉིད་ཚིག་གི་དངོས་པོ་ཡིན་ཏེ། དེས་ན་ནམ་མཁའ་དེ་ཡི་ཐ་སྙད་ཡོད་མེད་ལ་སོགས་པར་མིང་གིས་བརྗོད་ཀྱང་ནམ་མཁའ་ཉིད་མིང་ལས་མི་སྐྱེ་བས་དེ་ལ་སྐྱེ་འགག་གི་དངོས་པོ་ཡོད་པར་མི་འགྱུར་རོ། །དེ་བཞིན་དུ་ཆོས་ཉིད་མི་རྟོག་པ་ཆེན་པོ་འདི་ལ་ཡང་རྣམ་པར་མི་རྟོག་པའོ་ཞེས་གང་དག་དོན་མི་རྟོགས་པར་སྨྲ་ཞིག་བརྗོད་དེ་ཞེ་བས་འདོད་པ་ནི། འདོད་པ་དང་བརྗོད་པ་དེ་ཉིད་རྣམ་རྟོག་ཁོ་ན་སྟེ་ཆོས་ཉིད་མི་རྟོག་པ་ལ་རེག་པ་མེད་དོ། །འོ་ན་རྣམ་པར་རྟོག་པ་སྤང་བ་ཞིག་གམ་ཞེ་ན། གསང་བའི་དབྱིངས་མཉམ་པ་ཉིད་ལ་རྣམ་པར་རྟོག་པ་དང་རྣམ་པར་མི་རྟོག་པ་གང་ཅི་ཞིག་བརྗོད་པར་བྱས་ཀྱང་དེ་ཉིད་ཡིན་པས་ངོ་བོ་ལ་གཉིས་སུ་མེད་པས་འགལ་བར་ཡང་མི་འགྱུར་ཏེ། ཅིར་ཡང་བཏགས་པ་ལྟར་ཆགས་པའི་ཕྱིར་ཏེ། དེ་བས་ན་དེ་བཞིན་ཉིད་དེ་ནི་རྒྱལ་བ་ཐམས་ཅད་ཀྱི་བཞུགས་གནས་ཆེན་པོའི་ཕྱིར། སྔ་མ་ལས། ནམ་མཁའ་གང་མིང་རྗོད་བྱེད་པ། །བརྗོད་པ་དེ་ཉིད་དངོས་པོ་སྟེ། །དངོས་པོ་དེ་ཡི་མིང་བརྗོད་ཀྱང༌། །ནམ་མཁའ་དེ་ལ་འགག་མི་འགྱུར། །དེ་བཞིན་མི་རྟོག་བརྗོད་བྱེད་པ། །བརྗོད་པ་དེ་ཉིད་རྣམ་རྟོག་སྟེ། །རྣམ་རྟོག་དེ་ཡི་མིང་༼༤༠༠༽བརྗོད་ཀྱང༌། །མི་རྟོག་དེ་ལ་འགག་མི་འགྱུར། །དེ་འདྲར་སེམས་ཀྱང་དེ་ལྟར་ལྟ། །སེམས་ཉིད་གཞན་དུ་མ་གྲུབ་སྟེ། །དེ་བཞིན་ཆོས་ཀྱང་གྲུབ་མ་ཡིན། །སེམས་དང་ཆོས་ཉིད་གཉིས་མེད་དེ། །སེམས་ཉིད་གང་ཡིན་ཆོས་ཉིད་དེ། །ཆོས་ཉིད་ཀྱང་ནི་དེ་བཞིན་ནོ། །ཆོས་སེམས་གཉིས་མེད་ལྡན་གྱུར་པ། །བླ་མེད་བྱང་ཆུབ་ཆེན་པོར་བཤད། །ཅེས་སོ།།

དགུ་པ་མ་རྟོགས་པའི་གོལ་ས་བཤད་པ་ནི།

གང་འདིར་གཉིས་སུ། ཞེས་པ་ནས། དབུས་མཐར་འབྱེད་ལས་བྱུང༌། །ཞེས་པའི་བར་གྱིས་བསྟན་ཏེ།

གང་འདིར་གཉིས་སུ་འདོད་པ་དང་། །དབུས་མཐར་འབྱེད་པ་ཐམས་ཅད་གོལ།།

མཉམ་ཞེས་བྱ་བའི་ཐ་སྙད་ཀྱང་། །གཉིས་དང་དབུས་མཐར་འབྱེད་ལས་འབྱུང་།།

ཐིག་ལེ་ཆེན་པོ་ཆོས་ཀྱི་སྐུའི་བདག་ཉིད་ལ་སྐབས་གང་འདིར་ཆོ་འཕྲུལ་ཐ་དད་གཞི་དང་སྣང་བ་གཉིས་སུ་འདོད་པ་ལ་སོགས་པ་དང༌། དབུས་དང་མཐའ་འབྱེད་དེ་ཆོས་ཉིད་ཀྱི་མུ་ཚོལ་བ་ཐམས་ཅད་ནི་ནོར་བ་དང་གོལ་སར་འཕྱན་པའོ། །དེ་ཅིའི་ཕྱིར་ཞེ་ན། མཉམ་པ་ཉིད་ལ་དེ་ཉིད་དུའང་བརྗོད་ཅིང་མངོན་དུ་བྱ་བ་དང་བྲལ་བ་ལས་མི་མཉམ་པ་ལ་ལྟོས་ནས་མཉམ་པ་ཉིད་ཅེས་བྱ་བ་དེ་ཉིད་དུ་བཏགས་པའི་ཐ་སྙད་ཀྱི་སྣང་བ་ཉིད་ཀྱང་མཉམ་མི་མཉམ་གཉིས་དང་དབུས་མཐར་འབྱེད་པ་ལས་གྱུར་ཏེ་ལྟོས་པའི་དབང་ལས་བྱུང་བ་སྟེ་སྐྱོན་ཡིན་ནོ། །དེ་བས་ན་ཆོ་འཕྲུལ་གྱི་མཚན་ཉིད་དང་མཐའ་དབུས་ཅི་སྣང་ཡང༌། ཡེ་ཐ་སྙད་དང་བྲལ་བ་ལ་དེ་ཉིད་དུ་འདོད་ཅིང་མངོན་དུ་བྱེད་པའང་མེད་པའོ།།

བཅུ་པ་རྟོགས་མ་རྟོགས་ཀྱི་ཁྱད་པར་བསྟན་པ་ནི།

ཀྱེ་མ་འདི་གཅིག ཅེས་པ་ནས། ངེས་པ་འདི་ལྟར་ཞོག །ཅེས་པའི་བར་གྱིས་བསྟན་ཏེ།

ཀྱེ་མ་འདི་གཅིག་ཆོས་ཀྱི་སྤུན། །ཐམས་ཅད་དེ་ལས་མེད་བཞིན་དུ།།

གཉིས་འདི་ཕན་ཆད་རྣམ་རྟོག་ཡིན། །ཀུན་ཀྱང་ངེས་པ་འདི་ལྟར་ཞོག།

ཀྱེ་མའོ་ཞེས་ངོ་མཚར་བའི་ཚིག་གིས་བོས་ནས་འདིར་གསུངས་པ་ལྟར་མཉམ་པའི་རང་བཞིན་འདི་ཉིད་གཅིག་ཏུ་ངེས་པས་ཆོས་ཀྱི་སྤུན་གྱི་ངེས་ཚིག་ཀྱང་འགྲུབ་སྟེ་དངོས་གྲུབ་དང་བསྒྲུབ་པར་བྱ་བ་ཐམས་ཅད་ཇི་སྙེད་པའང་དོན་དེ་ཁོ་ན་ཉིད་གཅིག་པུ་དེ་ལས་མེད་བཞིན་དུ་རྒྱུ་འབྲས་དང་མཐའ་གཉིས་ལ་སོགས་པར་སྣང་བ་འདི་ཀུན་གཉིས་སུ་འབྱེད་ཕན་ཆད་ཐམས་ཅད་རིལ་རྣམ་པར་རྟོག་པ་ཆེན་པོ་ཡིན་ནོ། །དེ་བས་ན་དོན་བཅུ་དང་དཔེ་བཅུ་རིལ་ཀུན་གྱིས་ཀྱང་ངེས་པར་བརྗོད་པའི་དོན་གྱི་སྙིང་པོ་དམ་པ་འདི་ལྟར་ཡིད་ལ་ཞོག་ལ་ལེགས་པར་ཟུངས་ཤིག་པའོ།།

གསུམ་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་མེ་ལོང་བརྟག་པར་བྱའོ། །ཞེས་དགོངས་པ་དམ་པ་ངེས་པར་བགྲོས་པར་ཤེས་པར་བྱའོ། །དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས།

ཡང་དག་པར་ངེས་པ་གཅིག་ཏུ་ངེས་པར་གཞོག་པར་གྱུར་ཏོ།།

གྲོགས་པོ་དག ཅེས་བོས་ནས། དེ་དག་ནི་དཔེ་ཡི་མེ་ལོང་ལ་བརྟག་ནས་དོན་བཙལ་བར་བྱའོ། །ཞེས་པའི་དགོངས་པ་མ་ནོར་བའི་ངོ་བོ་དམ་པ་ངེས་པར་བགྲོས་པ་ཡིན་པར་ཤེས་པར་བྱའོ། །དེ་༼༤༠༡༽སྐད་ཅེས་སྨྲས་ཏེ་བཀའ་སྩལ་པས། འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་ཆེན་པོ་རྣམས་ཀྱིས་ཀྱང་དེའི་ཐེ་ཚོམ་ཆོད་དེ་དོན་ཡང་དག་པར་ངེས་པ་དེ་ཁོ་ན་ཉིད་གཅིག་ཏུ་གདེངས་རྙེད་དེ་ཆོས་ཉིད་ཀྱི་ངང་དུ་ངེས་པར་མཉམ་པར་འཇོག་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཉེ་བར་མཚོན་པ་ཞེས་བྱ་བའི་ལེའུ་སྟེ་དྲུག་ཅུ་གསུམ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། དཔེ་ལ་བརྟེན་ནས་དོན་ཉེ་བར་མཚོན་པ་ཞེས་བྱ་བའི་ལེའུ་སྟེ་དྲུག་ཅུ་རྩ་གསུམ་པ་ཉིད་རྣམ་པར་བཤད་པའོ།། །།

ལེའུ་རེ་བཞི་པ་སྒྱུ་མ་རོལ་པས་རྣམ་པར་གྲོལ་བ།

༈ དགུ་པ་མཐུན་པར་འཇུག་པར་བྱ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། དོན་དུ་ངེས་པར་སྦྱར། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོ་ལ་སོགས་པ་དམན་པ་དམ་པ་རྣམས་ཀྱིས། གསང་བ་པའི་བདག་པོ་ལ་གང་འདིར་མདོ་བཅུ་བཀོད་པའི་དགུ་པ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ་ཆ་མཐུན་པར་སྦྱར་བར་བྱའོ། །ཞེས་དམ་བཅའ་བར་དགོངས་པ་དེ། ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ལངྐའི་བདག་པོ་དེ་དག་ནི་འདི་ལྟར་ཡོངས་སུ་ཤེས་པར་བྱའོ། །མུན་པ་ཆེན་པོ་མུན་འཁྲིགས་པའི། །བྱིས་པའི་ཁམས་ཀྱི་གྲོང་ཁྱེར་དུ། །རྟག་པར་རྒྱུན་གྱི་འཁོར་མོར་འདིར། །ངེས་པར་འཇུག་པའི་བྱ་བ་དག །དགོངས་པ་དམ་པ་ཀུན་འདུས་པས། །གང་གི་སྤྱོད་ཡུལ་གང་གྱུར་པ། །ཇི་ལྟར་གསུངས་པ་ཇི་སྙེད་པ། །འདིར་ནི་གསུམ་དུ་ཤེས་པར་བྱ། །ཆ་མཐུན་མཐུན་འཇུག་ཐབས་འཇུག་པ། །སྦྱོར་དང་སྲེད་པ་བསྲེ་བ་ཡིས། །ཐམས་ཅད་ཐམས་ཅད་ཅི་རིགས་པར། །དམ་པའི་དོན་དུ་ངེས་པར་སྦྱོར།།

ལེའུ་འདིས་དྲང་དོན་ལྡེམས་དགོངས་ཀྱི་བཤད་པ་སྟོན་ནོ། །མེ་ལོང་བརྟག་པ་བསྟན་མ་ཐག་པ་དེ་ནས་ཡང་འཁོར་ལང་ཀའི་བདག་པོ་ལ་སོགས་པ་དམན་པའི་དམ་པ་རྣམས་ཀྱིས། སྟོན་པ་གསང་བ་པའི་བདག་པོ་ལ། སྐབས་གང་འདིར་ལེའུ་ཞེ་ལྔ་པར་མདོ་དོན་འགྲོ་བའི་༼༢༽ཆོས་ཀྱི་རྣམ་གྲངས་བཅུ་བཀོད་པའི་དགུ་པ་གང་གི་དོན་གྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་སྔར་ཆ་མཐུན་པར་སྦྱར་བར་བྱའོ། །ཞེས་དམ་བཅའ་བར་དགོངས་པ་དེ་ཉིད་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་ཡོངས་སུ་དྲིས་པ་ལས། སྐྱེས་བུ་ཆེན་པོ་གསང་བ་པའི་བདག་པོས་ལན་དུ་བཀའ་སྩལ་ཏེ་སྨྲས་པ། ལང་ཀའི་བདག་པོ། དེ་དག་ཉེ་བར་སྟོན་པ་ནི་གང་ཞེ་ན་ལམ་པས་གཞན་དོན་གྱི་སྤྱོད་པ་ཉིད་དེ། དེ་ཡང་འདི་ལྟར་ཡོངས་སུ་ཤེས་པར་བྱ་སྟེ། འགྲོ་བ་མ་རིག་པའི་མུན་པ་ཆེན་པོ་ཀུན་ནས་འཁྲིགས་པ་ཡི་གཉིད་ཀྱིས་འཐིབས་པས་དོན་ལ་ཤེད་མ་བྱེ་བས་བྱིས་པའི་ཁམས་ཀྱི་གྲོང་ཁྱེར་གསུམ་གྱི་གནས་སུ་དུས་གསུམ་དུ་འཁྱམས་པའི་གདུལ་བྱ་རྣམས་དྲང་བའི་ཆེད་དུ། དུས་རྟག་པ་རྒྱུན་གྱི་འཁོར་མོར་ཉན་རང་བྱང་སེམས་ལས་དགར་ཏེ་འདིར་འཁོར་བར་འགྲོ་དོན་ལ་ངེས་པར་འཇུག་པའི་དོན་བྱ་བའི་ཐབས་གྱི་འདྲེན་ཚུལ་རྣམ་པ་མང་པོ་དག་ཀྱང༌། ཐབས་ལ་མཁས་པས་དོན་མཛད་པའི་དགོངས་པ་དམ་པ་ཐམས་ཅད་ཀུན་འདུས་པས་རྒྱལ་བ་རིལ་འདུས་ནས་བཀའ་སྩལ་བའི་མདོ་རྒྱུད་ཆོས་ཀྱི་མེ་ལོང་འདི་ལས་དམ་པ་གང་གི་སྤྱོད་ཡུལ་གང་གིས་འདྲེན་པའི་སྒོར་གྱུར་པར་ངེས་པ་གདུལ་བྱའི་དོན་དུ་འགྱུར་བའི་ཐབས་མང་པོ་ཇི་ལྟར་གསུངས་པ་ཇི་སྙེད་པ་ཐམས་ཅད་བསྡུས་ན། འདིར་ནི་གཞན་དོན་གྱི་སྤྱོད་པ་རྣམ་གྲངས་གསུམ་དུ་ཤེས་པར་བྱ་སྟེ། ཆ་མཐུན་སྦྱོར་བའི་སྤྱོད་པ་དང༌། མཐུན་འཇུག་ཐབས་ཀྱི་སྤྱོད་པ་དང༌། ཐབས་འཛུད་བསྲེ་བའི་སྤྱོད་པ་དང་གསུམ་ཡིན་ཏེ། རིམ་པ་བཞིན་དུ། གཞན་དང་ཆ་འདྲ་བ་ལ་བརྟེན་ནས་དོན་ལ་སྦྱོར་བ་དང༌། གཞན་ཇི་བཞིན་དུ་སྤྱོད་པས་༼༣༽གྲོལ་ཐབས་སྟོན་པ་དང༌། རེས་རང་ལྟར་དང་རེས་གཞན་ལྟར་སྤྱོད་དེ་བསྲེ་བ་ཡིས་གདུལ་བར་བྱེད་པའོ། །དེས་ན་དེ་གསུམ་གྱི་ཁྱད་པར་བསྟན་ན། ཆ་མཐུན་སྦྱོར་བའི་སྤྱོད་པ་ནི། དཔེར་ན་རྩེ་ལྡེ་མངའ་རིས་གཅོད་པ་དང་འདྲ་སྟེ། སྔོན་ལ་གཞན་དང་མཐུན་པར་བྱས་ནས་གཞུག་ཏུ་རང་ལྟར་བསྒྱུར་བའོ། །མཐུན་འཇུག་གི་སྤྱོད་པ་ནི། དཔེར་ན་དུག་ཟ་བ་ལ་དུག་སྔགས་བྱིན་ནས་ཟས་སུ་འཇུག་པ་དང་འདྲ་བར་གདུལ་བྱ་ཉོན་མོངས་པ་ལ་ཞེན་པ་ལ་ཉོན་མོངས་ལམ་དུ་ཁྱེར་བའི་ཐབས་ཁྱད་པར་ཅན་བསྟན་ནས་ཉོན་མོངས་པ་ལ་སྤྱོད་དུ་འཇུག་པའོ། །ཐབས་འཛུད་བསྲེ་བའི་སྤྱོད་པ་ནི། དཔེར་ན་གཉེན་ཁ་ལེན་བྱེད་པ་དང་འདྲ་བར་གདུལ་བྱ་དང་སྤྱོད་པ་འདྲེན་མར་སྤྱོད་ནས་འདུལ་བའོ། །དེ་ལྟར་ཐབས་ཀྱི་སྤྱོད་པ་གསུམ་གྱིས་དུས་སམ་གདུལ་བྱ་བློ་ཆེ་ཆུང་ཐམས་ཅད་སྐབས་སམ་ཐབས་ཐམས་ཅད་ཇི་ལྟར་རིགས་པར་འགྲོ་དོན་བློ་དང་འཚམས་པར་བྱས་ཏེ། ཐེག་པ་ཆེན་པོ་ངེས་པ་དམ་པའི་དོན་གྱི་ཆོས་ཉིད་དུ་རིགས་ངེས་པར་སྦྱར་བར་བྱ་བའོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཆ་མཐུན་སྦྱོར་བའི་སྤྱོད་པ་བཤད་པ། ཐབས་འཛུད་བསྲེ་བའི་སྤྱོད་པ་བསྟན་པ། མཐུན་འཇུག་ཐབས་ཀྱི་སྤྱོད་པ་བཤད་པའོ། །དང་པོ་ལ་གསུམ་སྟེ། སྤྱོད་པ་དངོས་བཤད་པ། དེ་ཉིད་ལོ་རྒྱུས་ཀྱིས་བསྟན་པ། ཞབས་བསྡུ་བའོ། །དང་པོ་ནི།

ལང་ཀའི་བདག་པོ། ཞེས་པ་ནས། དམ་པའི་ཡུལ་ལ་འཇུག །ཅེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། ཆ་མཐུན་སྦྱོར་བ་གང་འཇུག་པ། །གང་ཞིག་གང་དུ་དེར་ངེས་ལ། །དེ་དག་ཉིད་དང་མཐུན་པར་སྤྱད། །ཡོངས་ཀྱིས་དེ་དང་མཐུན་རྟེན་ན། །དེ་ཉིད་དེ་ལ་འགྱུར་བར་བྱ། །དེ་དག་དམ་པར་བྱ་བའི་ཕྱིར། །དེ་དག་མཐུན་པར་གང་སྦྱར་བས། །ཡིད་ཀུན་གྲངས་ཏེ་བཅུག་ཅིང་བྱ། །གང་གིས་ཡིད་འཕྲོག་འདྲེན་འཇུག་པ། །ཇི་ལྟར་ཡིད་འོང་དེ་ཁོ་ན། །ནན་ཏན་གྱིས་ནི་དེ་ཉིད་དོ། །དཔེར་ན་མུན་པའི་ཁམས་དག་ན། །གང་གིས་གང་དག་གང་གྱུར་པ། །དེ་ཡི་ཡིད་ལ་དེ་ཞུགས་ཏེ། །དེ་དང་དེ་གཅིག་མི་ཞན་པས། །དེ་ནས་དེ་ཡི་དེ་རིགས་ནས། །དེ་ཡི་དབང་སྒྱུར་དབང་ཐོབ་སྟེ། །དེ་ཉིད་བསྒྱུར་པའི་ཚིག་ལམ་འབྱུང་། །དེ་འདས་དམ་པ་ཁོ་ན་ཡི། །ཡིད་ལ་ཞུགས་པས་ཨེ་མའོ་འཁྲུལ། །འདིར་ཉེས་འདིར་ལོག་བསྟང་སོགས་བསྔོ། །དེས་ན་འདི་ནི་ཁོ་ནར་བྱས། །གང་འདིར་དམ་པར་འཇུག་འདི་ལ། །དམ་པ་ཁོ་ནར་འཇུག་པར་འོས། །དེས་ན་དེ་ཡི་དེ་ཉིད་དེ།། འུན་པས་གང་གི་དེ་ཉིད་ཀྱང་། །འུན་ཅིང་དམ་པའི་ཡུལ་ལ་འཇུག།

ལང་ཀའི་བདག་པོ་ཞེས་སྡུད་པ་པོ་ལ་བོས་ནས། དེ་དག་སོ་སོ་ནས་ཉེ་བར་སྟོན་པ་ནི། ཐོག་མར་ཆ་མཐུན་སྦྱོར་བའི་སྒོ་ནས་སུ་ཞིག་གིས་འགྲོ་དོན་བྱེད་པའང་ཇི་ལྟ་བུ་ཞེ་ན་འདི་ལྟ་སྟེ། ཐབས་ལ་མཁས་པའི་དམ་པ་གང་གིས་ཆ་མཐུན་སྦྱོར་བར་བརྟེན་ནས་གདུལ་བྱ་གང་གི་དོན་ལ་འཇུག་པ་ནི། འགྲོ་བ་གང་ཞིག་སྤྱོད་ཡུལ་གང་དུ་མཚན་མ་ཅན་དེར་སྤྱོད་པས་ལོག་པར་འགྲོ་བར་ངེས་པ་ལ། རྣལ་འབྱོར་དམ་པ་རྔོན་དང་སྨད་འཚོང་སོགས་སྐྱེ་བ་རང་དབང་ཅན་དུ་གྱུར་པས་ཀྱང་ཐབས་ཀྱི་སྒོ་ནས་གདུལ་བྱ་ཁོའི་སྤྱོད་པ་དེ་དག་ཉིད་དང་ངོ་བོ་མཐུན་པར་སྤྱད་དེ་རྣལ་འབྱོར་མཆོག་གི་ཐབས་ཡོངས་ཀྱིས་མཚན་མ་ཅན་དེ་དང་ཆ་མཐུན་པའི་སྤྱོད་པ་བསྟེན་ཅིང་བྲིད་པར་བྱས་ན། རིམ་པས་གདུལ་བྱའི་འགྲོ་བ་དེ་ཉིད་ཡང་དག་པའི་དོན་དེ་ལ་ཁ་ལོ་འགྱུར་བར་བྱ་བའོ། །དེས་ན་༼༤༽སེམས་ཅན་དེ་དག་དམ་པའི་དོན་ལ་འཛུད་པར་བྱ་བའི་ཕྱིར་དུ་གདུལ་བྱ་དེ་དག་གམ་འགྲོ་བ་དྲུག་པོ་རྣམས་དང་བདག་གིས་མཐུན་པའི་སྤྱོད་པར་སྤྱད་དེ་བྱིས་པ་གང་དག་རྣམས་ཚུལ་དེ་ལ་སྦྱར་བས་ཡིད་ཀུན་ནས་དྲངས་ཏེ་རིམ་པར་ཁ་ལོ་བསྒྱུར་ནས་གསང་སྔགས་མ་ནོར་བའི་དོན་ལ་ངེས་པར་བཅུག་ནས་རྟོགས་པ་ལ་བཙུད་ཅིང་དེ་ལས་མི་ལྡོག་པར་ནན་ཏན་ལ་སྦྱར་བར་བྱ་བའོ། །དེ་ལྟར་གདུལ་བྱ་གང་གི་བསམ་པའི་མོས་ཕྱོགས་དང་མཚམས་པར་ཡིད་འཕྲོག་ནས་རང་དབང་མེད་པར་འཇུག་པའི་ཆ་མཐུན་གྱི་སྤྱོད་པས་དགའ་བར་བྱས་ཏེ་ཐབས་ལ་མཁས་པས་འདྲེན་ཅིང་དོན་ལ་འཇུག་པ་ཡང༌། ཁོའི་འདོད་ཕྱོགས་ཇི་ལྟར་ཡིན་པ་དེ་ལྟར་དེ་དག་གི་ཡིད་དུ་འོང་བའི་སྤྱོད་པ་དེ་ཁོ་ན་ལ་སྤྱོད་དུ་བཅུག་ནས་དེས་ཆུད་མ་གསན་པར་གསང་ཆེན་ངེས་པའི་དོན་ལ་ནན་ཏན་དུ་སྦྱོར་བའི་ཐབས་ཀྱིས་རྗེས་སུ་འཛིན་པ་ཉིད་ནི་ཆ་མཐུན་གྱི་སྤྱོད་པ་དེ་ཡིས་གདུལ་བྱ་དོན་ལ་སྦྱོར་བར་བྱ་བ་ཉིད་དོ། །དེ་སྐད་དུ་རྩ་བའི་རྒྱུད་ལས། མཚན་མ་ཡིན་ཕྱིར་དེར་ངེས་པ། །མཚན་མ་ཅན་དང་མཐུན་བྱའི་ཕྱིར། །ཐབས་ཀྱིས་དེ་དང་མཐུན་སྤྱོད་ལ། །ཡང་དག་དོན་ལ་ཁ་ལོ་སྒྱུར། །དེ་དག་རྣམ་པར་སྦྱང་བ་དང༌། །འགྲོ་དྲུག་ཤིན་ཏུ་གཡེང་བ་ཅན། །ཡིད་རྣམས་དྲངས་ཏེ་བརྟེན་བྱས་ནས། །ཐབས་ཀྱིས་དོན་ལ་སྦྱར་བའི་ཚིག །རྒྱུ་དྲུག་འདུས་པའི་ས་གཞི་ལ། །གླུ་བྲོ་གར་གྱི་རོལ་པ་ཡིས། །སྲིད་གསུམ་ཟིལ་གནོན་དབང་སྡུད་པ། །འཇིག་རྟེན་མཐུན་འཇུག་སྤྱད་པར་བྱ། །ཞེས་སོ། །དེ་ཉིད་ཉེ་བར་མཚོན་པ་ནི། །དཔེར་ན་སྲིད་པའི་འཇིག་རྟེན་མ་རིག་པའི་མུན་པའི་ཁམས་ཀྱི་གནས་དག་ན། མི་ལ་སོགས་པའི་འགྲོ་བ་མཁས་ཤིང་མཛངས་པ་གང་གིས་མི་སོགས་མི་ཤེས་པའི་འགྲོ་གཞན་གང་དག་རྣམས་ལ་གང་གིས་འདུལ་བར་གྱུར་པའི་སྤྱོད་པ་མཐུན་པར་སྤྱད་པས་འགྲོ་བ་མི་ཤེས་པ་དེ་ཡི་ཡིད་དགའ་བའི་ཤེས་པ་ལ་འདུལ་བྱེད་ཀྱི་ཐབས་དེ་ཞུགས་ཏེ་ཞེན་པའི་ངོར་འདུལ་བྱེད་དེ་དང་གདུལ་བྱ་དེ་ཉིད་སྤྱོད་པ་གཅིག་པས་སོ་སོ་བ་མེད་པར་མི་གཞན་པས་ཡིད་གཅུག་ཏུ་མཛའ་བར་གྱུར་པའི་དོན་དུ་གནས་པ་དེ་ནས་འདུལ་བྱེད་མཆོག་དེས་ཕ་རོལ་པོ་དེ་ཡི་བསམ་པའི་དྲོད་དེ་རིག་ཅིང་ལོན་ནས་འཇུག་གདུལ་བྱའི་འགྲོ་བ་དེ་ཡི་བསམ་པ་དབང་དུ་བྱས་ཏེ་ཁ་ལོ་བསྒྱུར་བར་བཏུབ་པའི་ཐབས་༼༥༽ལ་དབང་ཐོབ་སྟེ་སྐབས་སུ་བབ་པ་ན་གཟོད་གདུལ་བྱ་དེ་ཉིད་ཀྱི་འདུ་ཤེས་བསྒྱུར་བའི་ཚིག་གི་ལམ་འབྱུང་བ་ནི་དཔེ་དོན་མཚུངས་པར་རྣལ་འབྱོར་དམ་པས་ཀྱང་དེ་ལྟར་མཐུན་པར་སྤྱད་ཟིན་ནས་འདི་སྐད་བརྗོད་པར་བྱ་སྟེ། དེ་ལྟར་འདས་པར་གྱུར་པའམ་ད་སྔ་ཡན་ཆད་དུ་གྲོགས་མཆོག་དམ་པ་དག་གི་མཐུན་འཇུག་ཐབས་ཀྱི་སྤྱོད་པ་ཁོ་ན་ཡི་ཚུལ་ཡིན་པས་རང་རང་དང་མཐུན་པར་དགོངས་པ་ཅན་གྱི་སྤྱོད་པར་ཟད་དེ། ངེས་པར་ཁྱོད་ཀྱི་ཡིད་ལ་ཞུགས་པས་ཞེན་པའི་སྤྱོད་པ་ངན་པ་འདི་ནི་སྤྱོད་པའི་ལུགས་མེད་དེ། མར་ལ་ངམ་པས་ཨེ་མའོ་ཞེས་འུ་ཅག་གི་སྤྱོད་པ་འདི་ནི་ཤིན་ཏུ་འཁྲུལ་ཞིང་ནོར་ཏེ། ཚུལ་འདིར་སྤྱོད་པ་ནི་ཤིན་ཏུ་ཉེས་པ་ཆེ་བས་འདིར་ལོག་སྤྱོད་འདི་ལས་ཕྱིར་ལོག་ལ་བཤགས་པ་བྱ་བ་དང་དགེ་བའི་ལས་ཀྱི་ལྟང་བསགས་པ་ནི་བགྲང་ཞིང་སྤེལ་བ་སོགས་ཀྱིས་བྱང་ཆུབ་ཆེན་པོར་བསྔོ་བར་གྱིས་ཤིག་པའོ། །ཁོ་བོ་ཅག་གི་སྤྱོད་པ་དེ་ནི་འདི་ལྟར་ཉེས་པ་ཡིན་ན་ཡང་སྔར་གྱི་སྐབས་འདི་ན་ཁོ་བོས་ཁྱེད་ཅག་དགའ་བར་བྱས་ཏེ། ཁྱེད་རྣམས་དང་མཐུན་པ་ཁོ་ནར་སྤྱོད་པ་བྱས་པ་ཡིན་པས། དེང་གི་སྐབས་གང་འདིར་བདག་དགའ་བའི་ལམ་དམ་པ་མ་ནོར་བར་ཡང་དག་པའི་དོན་དུ་འཇུག་པའི་སྤྱོད་པ་འདི་དང་བསྟུན་ལ་ཁྱོད་རྣམས་ཀྱང་ངེས་པ་དམ་པ་དེ་ཁོ་ནར་ཤིན་ཏུ་འཇུག་པར་འོས་ཤིང་རིགས་པ་ཡིན་པས་གྲོགས་པོ་དག་ཡང་དག་པར་འཇུག་དགོས་སོ། །ཞེས་ཟེར་བ་བཞིན་དཔེ་དོན་མཚུངས་ཏེ། དེ་ལྟར་བརྗོད་པ་དེས་ན་ཕ་རོལ་པོའམ་གདུལ་བྱ་དེ་ཡི་སེམས་དེ་ཉིད་དེ་ལྟར་མཐུན་པར་བདག་གིས། འུན་ཞེས་བྲུ་ཤའི་སྐད་དེ་བོད་སྐད་དུ་ཟིན་ཞེས་པར་འགྱུར་བས། ཐབས་ཀྱིས་ཟིན་པས་ཕ་རོལ་ལམ་གདུལ་བྱ་དེ་གང་དག་གི་ཕྱིས་ཀྱི་སེམས་དེ་ཉིད་ཀྱང་འུན་ནམ་ཟིན་ཏེ་བདག་གི་ངག་ཉན་ཅིང་ཡིད་དགའ་བས་དམ་པར་ངེས་པ་ཡང་དག་པའི་སྤྱོད་ཡུལ་ལ་འཇུག་པར་འགྱུར་ཞིང་སླར་མི་ལྡོག་པར་ཡང་ངེས་པ་སྟེ། སྔ་མ་ལས། དཔེར་ན་འཇིག་རྟེན་ཁམས་དག་ན། །འགྲོ་བས་འགྲོ་བ་འདུལ་བྱེད་པ། །དེ་དགའི་ལས་ལ་དེ་ཞུགས་ཏེ། །དེ་དང་བསམ་པ་མཐུན་སྤྱད་པས། །དེ་དང་འདྲིས་ནས་དེ་དགའ་བྱས། །དེ་ནས་དེ་ཡི་དྲོད་ལོན་ནས། །དེ་ཡི་འདུ་ཤེས་སྒྱུར་བའི་ཚིག །དེ་སྔ་བདག་གི་གྲོགས་ཁྱོད་ཀྱི། །ལས་ལ་༼༦༽ཞུགས་པ་ཤིན་ཏུ་ནོར། །འདིར་ཉེས་ལས་ཀྱི་བསགས་པ་བགྲང༌། །ཉེས་ཀྱང་བདག་གིས་ཁྱོད་དགར་བྱས། །ད་ནི་བདག་དགའི་ལས་འདི་ལ། །གྲོགས་ཁྱོད་ཤིན་ཏུ་འཇུག་དགོས་སོ། །བྱས་པས་དེ་ཡི་སྔ་སེམས་དེ། །ཟིན་པས་གཅིག་གི་ཕྱི་སེམས་ཀྱང༌། །འཛིན་ཅིང་དེ་དགའི་ལས་ལ་འཇུག །ཅེས་སོ།།

གཉིས་པ་དེ་ཉིད་ལོ་རྒྱུས་ཀྱིས་བསྟན་པ་ལ་གཉིས་ཏེ། ཆ་མཐུན་གྱི་སྤྱོད་པ་གྱིས་ཤིག་པར་བསྐུལ་བ། འཁོར་གྱིས་དེ་ལྟར་བྱས་པའི་ཚུལ་ལོ། །དང་པོ་ནི།

ལང་ཀའི་བདག་པོ། ཞེས་པ་ནས། དེ་ཡིས་དེ་གསུངས་པས། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་ཇི་ལྟར་ན། །དེ་ཡང་ཇི་ལྟར་བུ་ཞེ་ན། །ཁོ་བོས་མཐོང་ཐོས་སྐབས་གཅིག་ན། །བདག་གི་བཤེས་གཉེན་དམ་པ་དེས། །འདུས་པ་ཕལ་མོ་དེ་དག་ལ། །ལམ་འདི་རྒྱ་ཆེར་བསྟན་པའི་ཚེ། །འཁོར་དེར་འདུས་པར་གྱུར་པ་ཡི། །ལྷ་མོ་ཀླུ་མོ་རིགས་ངན་མོ། །བུ་མོ་དྲུག་གི་འཁོར་འདུས་པས། །དགའ་བས་གླུ་བྲོ་གར་གྱིས་བསྟན། །དགྱེས་པ་ཆེན་པོས་མཉེས་པ་སྟབས། །དེ་ཚེ་དམ་པའི་ཡུལ་མིན་ཡང་། །དམ་པ་གསང་བ་མཆོག་ཉིད་ཀྱིས། །དེ་ཉིད་སྤྱོད་མཐུན་དགྲོལ་བ་ཡིས། །ཡུལ་གྱི་དམ་པ་ཉིད་དུ་དགོངས། །གང་དེས་སྲས་ཀྱི་ཚོགས་འདུས་ལ། །ཀྱེ་མ་འདུས་པ་ཆེན་མོའི་ཚོགས། །ང་ཡི་གདུང་བརྒྱུད་རིགས་བྱུང་གང་། །ལྷ་མོའི་རོལ་མོ་གླུ་བྲོ་གར། །སྙན་དང་འཇོ་སྒེག་མཛེས་པའི་སྟབས། །གང་གི་ཡིད་འཕྲོག་འཇུ་འདྲེན་ཐབས། །གླུ་ཡི་ཡན་ལག་སུམ་བརྒྱ་དང་། །སྟབས་དང་གར་སྟབས་མི་ཟད་པས། །ཀུན་སྡུད་ཀུན་མཉེས་ཆ་མཐུན་སྦྱོར། །དམ་པ་དེ་ཡིས་དེ་གསུངས་པས།།

དེ་དག་སྔོན་གྱི་ལོ་རྒྱུས་ཀྱིས་ཡིད་ཆེས་པར་བསྙད་པའི་ཕྱིར། འཆད་པའི་སྐྱེས་བུས་ལང་ཀའི་བདག་པོ་ཞེས་སྡུད་པ་ལ་བོས་ནས། ཇི་ལྟར་ན་སྔོན་བྱུང་བ་དེ་ཡང་ཇི་ལྟ་བུ་ཞེ་ན། ཚུལ་དེ་ཉིད་གསལ་བར་བརྗོད་པ་ནི། སྟོན་པ་གསང་བའི་བདག་པོ་ཕྱག་ན་རྡོ་རྗེ་ཁོ་བོས་འདི་ཉིད་ཀྱིས་ཆ་མཐུན་གྱི་སྤྱོད་པ་དངོས་སུ་མཐོང་ཞིང་ཐོས་པའི་དུས་སྐབས་གཅིག་ན་བདག་གི་སྟོན་པ་བཤེས་གཉེན་དམ་པ་གསང་བ་མཆོག་གི་བདག་པོ་དེས་སྔོན་བྱུང་བའི་འདུས་པའི་འཁོར་ཚོགས་ཕལ་མོ་ཆེ་དེ་དག་རྣམས་ལ་རྒྱུད་མཆོག་འདི་ཉིད་བཀའ་སྩལ་ཏེ་རྨད་བྱུང་གསང་བའི་ལམ་འདི་རྒྱ་ཆེར་བསྟན་པའི་དུས་དེའི་ཚེ་ན། འཁོར་དེར་གཏོགས་ཤིང་ལྷན་ཅིག་ཏུ་འདུས་པར་གྱུར་པ་ཡི། ལྷ་མོ་དང་ཀླུ་མོ་དང་མི་དང་ལྷ་མ་ཡིན་དང་ཡི་དྭགས་ལ་སོགས་པ་རིགས་ངན་མོ་སྟེ་འགྲོ་བ་རིགས་དྲུག་ཏུ་གཏོགས་པའི་བུ་མོ་དྲུག་གི་ཚོགས་འཁོར་དང་བཅས་ཏེ་འདུས་པས་གཙོ་འཁོར་རྣམས་བྲོ་གླུ་ལ་དགའ་བས་སྟོན་པ་ལ་གླུ་བྲོ་གར་གྱིས་སྟབས་ལ་བརྟེན་ནས་དགྱེས་པ་ཆེན་པོ་མཉེས་པས་མཆོད་པ་ཕུལ་ཞིང་བསྟབས་པའི་དུས་དེ་ཡི་ཚེ་ན་གླུ་བྲོ་གར་རྣམས་ཡང་དག་དམ་པའི་སྤྱོད་ཡུལ་མིན་ཡང༌། སྟོན་པ་དམ་པ་གསང་བ་མཆོག་གི་བདག་པོ་ཉིད་ཀྱིས་གདུལ་བྱ་བུ་མོ་དྲུག་འཁོར་དང་བཅས་པ་དེ་ཉིད་སྤྱོད་པ་མཐུན་པས་དགྲོལ་བར་བྱ་བ་ཡིས་དགོས་ཆེད་ཀྱི་ཕྱིར་ཐུགས་རྗེས་གཟུང་བའི་ཡུལ་གྱི་དམ་པ་ཉིད་དུ་དགོངས་ནས། གང་དེར་གདུལ་བར་བྱེད་པའི་སྲས་ཀྱི་ཚོགས་འདུས་པ་ཕལ་མོ་ཆེའི་འཁོར་རྣམས་ལ་བཀའ་སྩལ་པ་ནི། ཀྱེ་མ་འདུས་པ་ཆེན་པོའི་ཚོགས། །ཞེས་བོས་ནས། བུ་མོ་དྲུག་ལ་དོན་མཐུན་པས་དོན་སྤྱོད་པར་བསྐུལ་ཏེ། གང་གི་སྟོན་པ་ང་ཡི་གདུང་འཚོབ་ཅིང་༼༧༽རྒྱུད་འཛིན་པའི་རིགས་ཅན་དུ་བྱུང་བ་གང་ཡང་རུང་བ་དག་གིས། ལྷ་ཡི་རོལ་མོ་དང་གླུ་དང་བྲོ་དང་གར་དང་སྙན་པ་དང༌། འཇོ་ཚུལ་དང༌། སྒེག་པ་དང་མཛེས་ཤིང་ལེགས་པའི་སྟབས་སྣ་ཚོགས་བྱས་པས་གདུལ་བྱ་གང་གི་ཡིད་རང་དབང་མེད་པར་འཕྲོག་ནས་དོན་ལ་འཇུག་ཅིང་འདྲེན་པའི་ཐབས། གླུ་ཡི་རྩ་བ་དྲུག་ལ་ཡན་ལག་བཅུ་བཅུ་དང་དེ་རེ་རེ་ལ་དྲུག་དྲུག་སྟེ་གསུམ་བརྒྱ་དྲུག་ཅུ་དང༌། རྐང་ལག་གི་སྟབས་དང་གར་ཐབས་སྣ་ཚོགས་པ་མང་པོ་མི་ཟད་ཅིང་ཚད་མེད་པས། འཇིག་རྟེན་གྱི་གདུལ་བྱ་ཀུན་སྡུད་ཅིང་རྒྱལ་བ་ཀུན་མཉེས་པར་བྱེད་པས་དེ་དག་དང་ཆ་མཐུན་དུ་སྦྱོར་བའི་གླུ་བྲོ་གྱིས་ཤིག་ཅེས། སྟོན་པ་དམ་པ་དེ་ཡིས་དེ་སྐད་ཅེས་གསུངས་ཏེ་བཀའ་སྩལ་པས།

གཉིས་པ་འཁོར་གྱིས་དེ་ལྟར་བྱས་པའི་ཚུལ་ལ་གསུམ་སྟེ། གར་བྱས་པ། གླུ་བླང་བ། བྲོ་བྱས་པའོ། །དང་པོ་ནི།

དེ་ནས་སྲས་ཀྱི། ཞེས་པ་ནས། སྟབས་ཀྱིས་གར་བྱེད་ཅིང༌། །ཞེས་པའི་བར་གྱིས་བསྟན་ཏེ།

དེ་ནས་སྲས་ཀྱི་དེ་ཁོ་ན། །བློ་གྲོས་ཐབས་ལྡན་ཉིད་ཀྱིས་འདིར། །གང་དག་གང་གིས་འདུལ་རིག་ནས། །འཇིག་རྟེན་དྲུག་དང་མཐུན་སྦྱོར་ཕྱིར། །གང་གི་གནས་ནས་མཐུན་གཡོས་ཏེ། །གར་མཆོག་གློག་ལྟར་འགྱུ་བ་ཡི། །དཔལ་ལྡན་ལག་པ་བྱེ་བ་ཡིས། །ནམ་མཁའི་ཁམས་འདི་ཡོངས་བཀང་ནས། །གོམ་པའི་སྟབས་ཀྱིས་གར་བྱེད་ཅིང་།།

དེ་ནས་སྲས་ཀྱི་དམ་པ་དེ་ཁོ་ན་ལང་ཀའི་བདག་པོ་སྤྲུལ་པའི་བློ་གྲོས་ཐབས་ལྡན་ཞེས་བྱ་བ་ཉིད་ཀྱིས་སྟོན་པས་དྲང་བས་འདིར་གདུལ་བྱ་གང་དག་རྣམས་གླུ་བྲོ་གང་གིས་ཐབས་ཀྱིས་འདུལ་བར་རིག་ཅིང་ཤེས་ནས། འཇིག་རྟེན་དྲུག་གི་བུ་མོ་འཁོར་བཅས་དང་ཆ་མཐུན་གྱི་སྤྱོད་པས་དོན་ལ་སྦྱོར་བར་དྲང་བའི་དགོས་ཆེད་ཀྱི་ཕྱིར་དུ། ལང་ཀ་གང་གི་ཉིད་ཀྱིས་གནས་ནས་འཇིག་རྟེན་པ་དང་སྤྱོད་པ་མཐུན་པ་ཀུན་ཏུ་སྣང་བར་བྱས་པས་ལུས་གཡོས་ཏེ། ཚུལ་ཇི་ལྟར་ན་གཞི་མ་ངེས་པ་ལས་ཅིར་ཡང་སྣང་ལ་དངོས་པོ་མེད་པས་གར་མཆོག་མྱུར་བ་གློག་ལྟར་འགྱུ་བས་འཁོར་བའི་མུན་ནག་ཏུ་སྐད་ཅིག་ལ་དོན་གསལ་བར་གྱུར་པ་ཡི་སྒོ་ནས་བདག་གཞན་གྱི་དོན་ཕུན་སུམ་ཚོགས་པའི་དཔལ་གཉིས་དང་ལྡན་པའི་རྟགས་སུ་ལག་པ་གཡས་གཡོན་བྱེ་བ་སྙེད་དུ་གྱུར་པ་ཡིས་ནམ་མཁའི་ཁམས་འདི་ཀུན་རིག་པ་རང་སྣང་བའི་སྐུས་ཡོངས་སུ་བཀང་ནས་གདུལ་བྱའི་དོན་ལ་གཤེགས་བཞུད་ལྟ་བུར་ཅིར་ཡང་སྣང་བའི་གོམ་པའི་སྟབས་དང་མཐུན་པར་ལག་པ་རྣམས་ཀྱིས་གར་སྣ་ཚོགས་བྱེད་ཅིང་གདུལ་བྱ་གདུལ་བའི་ཐབས་ཀྱི་སྒྱུ་འཕྲུལ་མཛད་དོ།།

གཉིས་གླུ་བླང་པ་ནི།

གླུ་ཡི་ཡན་ལག ཅེས་པ་ནས། བུ་མོ་དྲུག་དང་རོལ། །ཞེས་པའི་བར་གྱིས་བསྟན་ཏེ།

གླུ་ཡི་ཡན་ལག་སུམ་བརྒྱའི་སྒྲ། །སྲིད་གསུམ་འབྲུག་སྒྲས་གང་བ་ལྟར། །མཐར་ཐུག་མེད་པའི་འཇིག་རྟེན་དྲུག །གང་བས་ཡིད་འཕྲོག་འདྲེན་པར་བྱེད། །ཐེག་ཆེན་རྨད་བྱུང་གསང་བའི་ཚིག །ཚིག་གཅིག་བསྒྱུར་བས་ཚིག་མཐའ་ཡས། །ཚིག་ལམ་རབ་ཏུ་བྲལ་བའི་དོན། །ཟབ་མོ་སངས་རྒྱས་སྤྱོད་ཡུལ་སྟོན། །ཨེ་མའོ་ངོ་མཚར་རྨད་ཀྱི་ཆོས། །རྨད་བྱུང་རོལ་པའི་དོན་འབྱུང་ངོ་། །ཆ་མཐུན་སྦྱོར་བའི་ཁྱད་པར་ལས། །འཇིག་རྟེན་དྲུག་ཏུ་རོལ་པ་འབྱུང་། །འཁོར་བའི་ལམ་རྒྱུད་བཅད་པའི་ཕྱིར། །འཇིག་རྟེན་དྲུག་གི་སྙིང་པོ་ལ། །ཐུགས་རྗེ་ཐབས་ཀྱི་འོད་འཕྲོས་པས། །རྒྱུད་དྲུག་དངོས་པོ་ཐམས་ཅད་བསྲེག །སྤྱོད་ལ་མ་ཆགས་ཡེ་ཤེས་ཀྱིས། །ཆ་མཐུན་ཐབས་སུ་སྦྱར་བའི་ཕྱིར། །འཇིག་རྟེན་བྱིས་པའི་སྤྱོད་པ་བཞིན། །འཇིག་རྟེན་བུ་མོ་དྲུག་དང་རོལ།།

བཤད་པ་ལྟ་བུའི་གླུ་ཡི་ཡན་ལག་གསུམ་བརྒྱའི་སྒྲ་སྐད་སྲིད་ཁམས་འབྲུག་གི་སྒྲ་ཡིས་གང་བ་ལྟར་ནམ་མཁའ་བཀང་ནས། མུ་མཐའ་ཐུག་པ་མེད་༼༨༽པའི་འཇིག་རྟེན་དྲུག་གི་གནས་རིགས་ཀུན་གླུའི་སྒྲས་གང་བས་གདུལ་བྱ་འགྲོ་བ་དྲུག་གི་ཡིད་འཕྲོག་ཅིང་བྱང་ཆུབ་ཆེན་པོའི་དོན་ལ་འདྲེན་པར་མཛད་པས་དབྱངས་ཀྱི་བྱེད་པར་སྣང་ངོ༌། །འོ་ན་གླུའི་ཚིག་ཉིད་ཇི་ལྟ་བུ་ཞེ་ན། ཐེག་པ་ཆེན་པོའི་ལྟ་སྤྱོད་རྨད་དུ་བྱུང་བ་ཉིད་ཕལ་གྱིས་ཡུལ་མིན་པས་གསང་སྔགས་གསང་བ་དམ་པའི་ཚིག་ལས་ཚིག་གཅིག་བསྒྱུར་བས་ཀྱང་གདུལ་བྱའི་ངོ་ལ་སྒྲ་དབྱངས་ཐ་དད་ཀྱི་ཚིག་གི་རྣམ་འགྱུར་མཐའ་ཡས་པ་འབྱུང་ཞིང༌། དེའང་བློ་ཆེ་བ་ལ་ཚིག་ལམ་གྱི་བརྗོད་པ་དང་རབ་ཏུ་བྲལ་བའི་གསང་བ་མཆོག་གི་དོན་ཟབ་མོ་ཤིན་ཏུ་རྟོགས་པར་དཀའ་བ་རྒྱལ་བའི་དགོངས་པ་སངས་རྒྱས་ཉག་གཅིག་གི་སྤྱོད་ཡུལ་མཚོན་ཅིང་རྟོགས་པར་དཀའ་བ་ཉིད་སྟོན་པའོ། །དེ་ལྟ་ནའང་ཐབས་ཁྱད་པར་ཅན་གྱི་བཀའི་ཚིག་ལས་དོན་མཚོན་པའི་སྒོ་མང་པོ་འབྱུང་བ་ལ་ངམ་པས་ཨེ་མའོ་ཞེས་པས་དྲངས་ཏེ། གདུལ་བྱ་ལོག་པ་ཅན་རྣམས་རང་ལ་གནས་ཀྱང་མ་རྟོགས་པ་ལ་བསྟིང་བ་དང་སྨྲེ་བས་ངོ་མཚར་ཞིང་ལྟ་སྤྱོད་རྨད་ཀྱི་ཆོས་ཟབ་མོ་དེའི་ཆེད་དུ་བྲོ་གླུས་དོན་མཆོག་ཁྱད་པར་ཅན་ལ་སྦྱོར་བས་རྨད་དུ་བྱུང་བའི་རོལ་པ་ལ་སྤྱད་པས་གསང་སྔགས་བླ་ན་མེད་པའི་དོན་གསལ་བར་འབྱུང་ངོ༌། །དེ་ཡང་མཛད་པ་གདུལ་བྱ་དང་ཆ་མཐུན་པས་དོན་ལ་སྦྱོར་བའི་སྤྱོད་པའི་ཁྱད་པར་ལས་འཇིག་རྟེན་དྲུག་གི་གནས་སུ་མཐུན་པས་དོན་མཛད་པའི་སྐུ་གསུང་ཐུགས་ཀྱི་རོལ་པའི་སྤྲུལ་པ་འབྱུང་བ་དེས་འཁོར་བའི་ལས་དང་ཉོན་མོངས་པའི་རྒྱུའི་ལམ་རྒྱུད་རྩ་བ་ནས་གཅད་པའི་ཕྱིར་དུ་འཇིག་རྟེན་དྲུག་གི་ངོ་བོ་བདེ་བར་གཤེགས་པའི་སྙིང་པོ་གསང་སྔགས་དམ་པ་ཉིད་ཀྱི་རང་བཞིན་ཅན་ལ། ཐུགས་རྗེ་ཆེན་པོའི་ཐབས་ཀྱི་རྩལ་ལས་གླུ་བྲོ་གར་གྱི་སྤྲུལ་པ་ཤར་བའི་འོད་ཟེར་འགག་མེད་དུ་འཕྲོས་པས། རྒྱུད་དྲུག་གི་འགྲོ་བ་རྣམས་ཀྱི་སྒོ་གསུམ་གྱི་དངོས་པོ་ཐམས་ཅད་སྦྱངས་ཤིང་བསྲེགས་པར་མཛད་པའོ། །དེ་ལྟ་བུའི་ཆ་མཐུན་གྱི་སྤྱོད་པ་ལ་ཟིན་ཆགས་མེད་པས་མ་ཆགས་པའི་ཡེ་ཤེས་ཀྱིས་གདུལ་བྱའི་འགྲོ་བ་དང་ཆ་མཐུན་པའི་ཐབས་སུ་ཤར་བའི་མཛད་པས་དྲང་སྟེ་དོན་ལ་སྦྱོར་བའི་ཕྱིར་དུ། འཇིག་རྟེན་པ་དོན་ལ་ཤེད་མ་བྱེ་བ་བྱིས་པའི་སྤྱོད་པ་ཁོ་ན་བཞིན་དུ་འཇིག་རྟེན་གྱི་བུ་མོ་དྲུག་དང་རོལ་པའི་སྦྱོར་བས་གླུ་དང་གར་གྱིས་དོན་མཛད་པ་ཉིད་དེ། ཀུན་འདུས་ལས། སྤྱོད་པའི་ལས་ཀྱང་འདི་ལྟ་སྟེ། ༼༩༽རྒྱུ་དྲུག་འདུས་པའི་ཕུང་པོ་ལ། །ངན་སོང་གནས་འཇོམས་རྡོ་རྗེའི་རྟགས། །ཡེ་ཤེས་ཐབས་ཀྱིས་སྙན་པའི་གླུ། །རྨད་བྱུང་གསང་ཆེན་སྒྲོགས་པའི་ཚིག །ཅེས་སོ།།

གསུམ་པ་བྲོ་བྱས་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

སྟབས་དྲུག་བསྐྱོད་པས། ཞེས་པ་ནས། བསྒྲགས་པས་དོན་དྲུག་རྫོགས། །ཞེས་པའི་བར་གྱིས་བསྟན་ཏེ།

སྟབས་དྲུག་བསྐྱོད་པས་འགྲོ་དྲུག་སྒྲོལ། །གླུ་དྲུག་བླངས་པས་ཡུལ་དྲུག་དྲངས།།

ཚིག་དྲུག་བསྒྲགས་པས་དོན་དྲུག་རྫོགས།།

འཆད་པའི་གོམ་སྟབས་དྲུག་གི་བསྐྱོད་པས་འགྲོ་བ་རིགས་དྲུག་གནས་ནས་བསྒྲལ་བ་སྟེ། ཅང་ཤེས་འཕྲུལ་གྱི་སྟབས། དཔའ་བོ་ཚམ་རྔམ་གྱི་སྟབས། ཁྱུ་མཆོག་རོལ་པའི་སྟབས། སེང་གེ་རྔམ་པའི་སྟབས། ཁྱུང་ཆེན་ལྡིངས་པའི་སྟབས། ཁྲོ་བོ་མ་རངས་པའི་སྟབས་རྣམས་སོ། །འཆད་པའི་གླུ་དྲུག་བླངས་པས་གདུལ་བྱའི་ཡུལ་དྲུག་དྲངས་པ་སྟེ། ཚངས་དབྱངས། སིལ་སྙན། གླུ་གར། ཀ་ལ་པིང་ཀ འབྲུག་ཆེན། སྲིན་མོ་ཁྲོས་པའི་གླུ་རྣམས་སོ། །སོ་སོའི་བསམ་སྐད་དང་མཐུན་པའི་ཚིག་དྲུག་བསྒྲགས་པས་གསང་སྔགས་ཀྱོ་དོན་དྲུག་རྫོགས་པར་བྱེད་པ་སྟེ། དོན་གྲུབ་རྡོ་རྗེ་གསང་བའི་ཚིག །ཞི་གནས་མི་རྟོག་ནམ་མཁའི་ཚིག །འཛིན་པའི་རྟོད་ཕུར་འབྱིན་པའི་ཚིག །ཡེ་ཤེས་དོན་གྱི་གསལ་བའི་ཚིག །ཡིད་བཞིན་ནོར་བུ་འབར་བའི་ཚིག །རྡོ་རྗེ་བུ་ཡུག་སྐར་མདའི་ཚིག་རྣམས་སོ།།

གཉིས་རྒྱས་པར་བཤད་པ་ནི།

ལེ་ལོ་གཡེང་བའི། ཞེས་པ་ནས། བུ་ཡུག་སྐར་མདའི་ཚིག །ཅེས་པའི་བར་གྱིས་བསྟན་ཏེ།

ལེ་ལོ་གཡེང་བའི་ས་གཞི་ལ། །བརྩོན་འགྲུས་མྱུར་མགྱོགས་ཅང་ཤེས་སྟབས། །ཚངས་པའི་དབྱངས་ཀྱིས་སྙན་པའི་གླུ། །དོན་དྲུག་རྡོ་རྗེ་གསང་བའི་ཚིག །ང་རྒྱལ་རི་བོ་ས་གཞི་ལ། །དཔའ་བོ་ཚམ་ངམ་གྱད་ཀྱི་སྟབས། །སིལ་སྙན་འབུམ་གྱིས་སྙན་པའི་གླུ། །ཞི་གནས་མི་རྟོག་ནམ་མཁའི་ཚིག །ཀུན་ནས་འདུས་པའི་ས་གཞི་ལ། །ཁྱུ་མཆོག་ང་ཡིས་རོལ་པའི་སྟབས། །གླུ་གར་ཡིད་འཕྲོག་སྙན་པའི་གླུ། །འཛིན་པའི་སྟོད་ཕུར་འབྱིན་པའི་ཚིག །གཏི་མུག་འདུས་པའི་ས་གཞི་ལ། །སེང་གེ་རྔམ་པས་རོལ་པའི་སྟབས། །ཀ་ལ་པིངྐའི་དབྱངས་སྙན་གླུ། །ཡེ་ཉིད་དོན་གྱིས་གསལ་བའི་ཚིག །ཆགས་པ་འདུས་པའི་ས་གཞི་ལ། །རྡོ་རྗེ་ཁྱུང་ཆེན་ལྡིང་བའི་སྟབས། །འབྲུག་ཆེན་ལྡིར་བས་སྙན་པའི་གླུ། །ཡིད་བཞིན་ནོར་བུ་འབར་བའི་ཚིག །ཞེ་སྡང་འདུས་པའི་ས་གཞི་ལ། །ཁྲོ་མོ་མ་རངས་ཁྲོས་པའི་སྟབས། །སྲིན་མོ་མ་རངས་ཁྲོས་པའི་གླུ། །རྡོ་རྗེ་བུ་ཡུག་སྐར་མདའི་ཚིག།

དེ་དག་རེ་རེ་ནས་རྒྱས་པར་བསྟན་པའི་ཕྱིར། དང་པོ་ལྷ་འདུལ་བའི་བྲོ་ནི། ལྷ་འདུ་བྱེད་ཀྱིས་ལེ་ལོ་ཅན་རྣམས་འདོད་པའི་ཡུལ་ལ་གཡེང་བའི་ངོ་བོ་ནི་གླུ་བྲོའི་ས་གཞིའམ་ཡུལ་ཡིན་ལ། སྟབས་ནི་ལེ་ལོའི་གཉེན་པོ་ཤིན་ཏུ་བརྩོན་འགྲུས་ཆེ་བ་སྟེ་མྱུར་མགྱོགས་ཅང་ཤེས་རྟ་མཆོག་གི་སྟབས་མཛད་པའོ། །གླུ་ནི་ཚངས་པའི་དབྱངས་ཀྱིས་སྙན་པའི་གླུ་དུང་ངེ་བ་ཉིད་ཤེས་རབ་མའི་སྐད་ལ་དཔེ་བླངས་ཏེ་བཟླས་པས་མ་མོ་ཐམས་ཅད་རྡོ་ཁབ་ལེན་ལ་ལྕགས་འདུ་བའི་ཚུལ་དུ་དབང་དུ་སྡུད་པ་སྟེ། ཚངས་པའི་དབྱངས་ཀྱིས་འདྲེན་ཚུལ་གྱིས། །སྲིད་པའི་བུ་མོ་དབང་དུ་སྡུད། །ཅེས་གསུངས་པས་ལེ་ལོ་མེད་པར་འབྲས་བུའི་དོན་གྲུབ་པས་རྡོ་རྗེ་གསང་བའི་སྔགས་ཀྱི་ཚིག་ལྷ་རྣམས་ལ་སྟོན་པ་སྟེ། ལམ་དབང་དུ་དོན་དྲུག་ལས་འཁོར་སྡུད་པའི་གསང་སྔགས་ཀྱི་ཚིག་སྟོན་པའོ། །གཉིས་པ་ལྷ་མ་ཡིན་འདུལ་༼༡༠༽བའི་བྲོ་ནི། ལྷ་མ་ཡིན་ང་རྒྱལ་བསྒྱུར་དཀའ་བས་རི་བོའི་ས་ཡི་བྲོ་གཞིའམ་ཡུལ་ལ། ཁྲོ་གཏུམ་ང་རྒྱལ་འཇོམས་པའི་གཉེན་པོ་ལྷ་མ་ཡིན་རྣམས་དཔའ་བ་ལ་རྩི་བས་དཔའ་བོ་ཚམ་ངམ་གྱ་རྩལ་ཚད་འགྲན་ཟླ་མེད་པ་གྱད་ཀྱི་དོར་སྟབས་ཀྱིས། གཡུལ་ཕམ་རྒྱལ་གྱི་སྒྲ་འབྱུང་བས་རོལ་མོ་སིལ་སྙན་འབུམ་གྱིས་སྙན་པའི་དབྱངས་ལྷ་མ་ཡིན་གྱི་ཡིད་འཕྲོག་པའི་གླུ་བྲེང་ངེ་བ་ཉིད། དཔེ་སྦྲང་མ་རྫ་མར་བཅུག་པ་ལྟར་མཆུ་བཙུམ་ལ་འཁུར་བའི་དབྱངས་སུ་བླངས་པས་ཤངས་དང་ཞལ་གྱི་དབུགས་དང་བཅས་ཏེ་ཁྱབ་པར་བྱུང་ནས་འབྲོས་ཐབས་མེད་པར་ཕྲག་དོག་འདུལ་བ་སྟེ། འཁུར་བ་དབུགས་ཀྱི་རླུང་འབྱིན་གྱིས། །སྤྲུལ་པའི་ཆོ་འཕྲུལ་ཐམས་ཅད་འགྱེད། །ཅེས་པའི་དོན་རྫོགས་ཏེ་ཚིག་ནི་ང་རྒྱལ་ཞི་བ་ཆེན་པོར་གནས་གྱུར་པས་ཅིར་ཡང་མི་རྟོག་པ་ནམ་མཁའ་ལྟ་བུར་སྟོན་པ་དང་ལམ་པའི་དབང་དུ་ཞི་གནས་ནམ་མཁའི་ཚིག་ཀྱང་ཡིན་ནོ། །གསུམ་པ་འགྲོ་བ་ཀུན་གྱི་ས་བོན་གསོགས་པས་མི་འདུལ་བའི་བྲོ་ནི། མི་རྣམས་ཉོན་མོངས་པ་ལྔ་པོ་ཀུན་ནས་འདུས་ཏེ་ཆ་མཉམ་པར་ཡོད་པས་བདག་གཞན་དུ་འཛིན་པའི་ས་ཡི་བྲོ་གཞིའམ་ཡུལ་ལ། ཉོན་མོངས་པ་ལྔའི་གཉེན་པོར་འདོད་ཡོན་ལྔའི་ཞེན་པ་འཇོམས་པའི་གླང་པོའི་གཙོ་བོ་ཁྱུ་མཆོག་རིགས་ལྔ་ཡིས་རོལ་པའི་སྟབས་ཆེན་འགྱིང་བགས་ཅན་གྱིས། གླུ་དང་གར་གྱིས་མིའི་ཡིད་འཕྲོག་པར་བྱེད་པས་སྙན་ཅིང་ཡིད་དུ་འོང་བའི་པང་ཀ་དེའུའི་གླུ་དབྱངས་ཉིད། དཔེ་འབྲུག་གི་སྒྲ་ལ་བླངས་ཏེ་གདུག་པ་ཟིལ་གྱིས་གནོན་པའི་གསུང་རུ་ལུའི་སྒྲ་བསྒྲགས་པས་མ་ཏྲཾ་འཁོར་བཅས་རྣམས་ཀྱིས་སེམས་ཅན་ཟ་འཕྲོ་བཅད་ནས་ཉན་པ་ལྟ་བུས་འདུལ་ཞིང་གྲོལ་བར་བྱེད་པ་སྟེ། དྲག་ཅིང་འབྲུག་ལྟར་སྒྲ་བསྒྲགས་པས། །དྲག་པོ་གཏུམ་པོའང་ལྷན་ནེར་འགྱུར། །ཞེས་པའི་དོན་རྫོགས་ཏེ། དེས་སྒོ་ནས་མི་རྣམས་ཀྱིས་བདག་གཞན་དུ་འཛིན་པའི་ཉོན་མོངས་ལྔའི་རྟོད་ཕུར་དྲུང་ནས་འབྱིན་པར་བྱེད་པའི་དོན་སྟོན་པ་དང༌། ལམ་པའི་དབང་དུ་བདག་ལྟའི་འཛིན་རྟོག་ངེས་པར་དགྲོལ་བས་ བདག་མེད་སྟོན་པའི་ཚིག་ཀྱང་ཡིན་ནོ། །བཞི་པ ་དུད་འགྲོ་འདུལ་བའི་བྲོ་ནི། བྱོལ་སོང་མ་རིག་པས་ནོན་ཏེ་ཀུན་རྨོངས་གཏི་མུག་འདུས་པའི་ས་ཡི་བྲོ་གཞི་ནི་ཡུལ་ཡིན་ལ། དེ་ཉིད་འདུལ་བའི་གཉེན་པོ་སེང་གེ་ཡི་དམ་བརྟན་པ་ལྟ་བུ་རྔམ་པས་འགྱིང་ཞིང་ཟིལ་༼༡༡༽གྱིས་གནོན་པས་རོལ་པའི་སྟབས་ཀྱིས་ཀླུ་ལ་བྱ་ཁྱུང་གྲགས་པས་དཀོན་མཆོག་ལ་སྐྱབས་འགྲོ་དྲན་པ་ལྟ་བུར་གསུངས་པས་ཀྱང་མཚོན་ཏེ་བྱ་ཀ་ལ་པིང་ཀའི་སྒྲ་དབྱངས་སྙན་པས་བྱོལ་སོང་གི་ཡིད་འཕྲོག་པ་ཅང་ཀ་དེའུའི་གླུ་ཉིད། དཔེ་གཡང་དཀར་ལུག་ཁྱུ་ལམ་དུ་བཅུག་པ་ལ་བླངས་ཏེ་བཟླས་པས་ཁོའི་ཕུང་ཁམས་སྐྱེ་མཆེད་ཐམས་ཅད་ལྷའི་དཀྱིལ་འཁོར་དུ་བརླབས་ཤིང་རིག་པ་གསལ་བར་བྱེད་པ་སྟེ། སྔགས་ཀྱི་ཡི་གེའི་སྒྲ་བསྒྲགས་པས། །འབར་བའི་དཀྱིལ་འཁོར་མེ་ལྟར་མཆེད། །ཅེས་པའི་དོན་རྫོགས་ཏེ། རྨོངས་པའི་གཏི་མུག་ཡེ་ཉིད་ནས་དོན་གྱི་ཡེ་ཤེས་སུ་གསལ་བའི་གསང་བ་མཆོག་གི་ཚིག་སྟོན་པ་དང༌། ལམ་པའི་དབང་དུ། རང་བྱུང་གི་ཡེ་ཤེས་རང་གྲོལ་དུ་འཆར་བའི་ཚིག་ཀྱང་ཡིན་ནོ། །ལྔ་པ་ཡི་དྭགས་འདུལ་བའི་བྲོ་ནི། ཡི་དྭགས་རྣམས་འདོད་ཆགས་ཀྱིས་བསྐྱེད་པ་དང་སེམས་ཆགས་པས་བསྡུས་པ་ཅན་ཀུན་འདུས་པའི་གླུ་བྲོའི་ས་ཡི་གཞིའམ་ཡུལ་ལ། འདུལ་བའི་གཉེན་པོ་རྡོ་རྗེ་ཁྱུང་ཆེན་ལྡིངས་པའི་ཤགས་རྩལ་ལྟ་བུའི་གར་སྟབས་བྱས་ཤིང༌། འབྲུག་གི་སྒྲ་ཆེན་ལྡིར་བས་ཆར་འབེབས་པ་དང་འདྲ་བར་མཆོད་སྦྱིན་ཐོབ་པར་གྲགས་པའི་སྒྲ་སྙན་གྱི་ཡི་དྭགས་རྣམས་ཡིད་འཕྲོག་པར་བྱེད་པ་གྷར་དྷ་བའི་གླུ་ཉིད། དཔེ་མཛོ་མོ་བུ་སྟོར་བའི་ངུར་སྒྲ་ལ་བླངས་ཏེ་བཟླས་པས་མ་ཏྲཾ་ཟིལ་གྱིས་མནན་ཏེ་ཁ་ཊཱྃ་རྩེ་གཅིག་བརྒྱབ་པས་མགོ་བོ་ལྷོ་ནུབ་ཏུ་བསྟན་ནས་འགྱེལ་བའི་མཁུན་སྒྲ་དང་བསྟུན་ཏེ་ལྷང་ཙེར་དུ་བརྗོད་པས་འཁྲུལ་སྣང་གཅོད་པར་བྱེད་པ་སྟེ། མཁུན་ཞིང་གདུལ་བའི་སྒྲ་འབྱིན་པས། །གདུག་བྱེད་ཐམས་ཅད་ཐལ་བར་རློག །ཅེས་པའི་དོན་རྫོགས་ཏེ། ལྟོགས་དབུལ་སེལ་ཞིང་འདོད་པ་འབྱུང་བས་རེ་བ་སྐོང་བ་ཡིད་བཞིན་ནོར་བུ་འབར་བའི་ཡོན་ཏན་ལྟ་བུའི་གསང་བའི་ཚིག་སྟོན་པ་དང༌། ལམ་པའི་དབང་དུ་འདོད་རྒུ་རང་རྫོགས་ཀྱི་ཚིག་ཀྱང་ཡིན་ནོ། །དྲུག་པ་དམྱལ་བ་འདུལ་བའི་བྲོ་ནི། དམྱལ་བ་ཞེ་སྡང་ཅན་རྣམས་འདུས་ཤིང་རྫོགས་པའིབྲོ་ཡི་ས་གཞིའམ་ཡུལ་ལ། ཞེ་སྡང་གི་གཉེན་པོ་ཐུགས་རྗེའི་ཁྲོ་བོ་ཨ་བ་གླང་མགོ་ཁྲོས་པའི་ཚིག་གིས་ལས་བགྲང་བ་ལྟ་བུར་མ་རངས་ཁྲོས་པའི་སྟབས་ཆེན་བྱས་ཤིང༌། ཧ་དང་པ་ཙ་ལྟ་བུ་སྲིན་པོ་མ་རངས་ཁྲོས་པའི་གླུ་ཤ་ཏ་པ་ཉིད། དཔེ་རྫ་རོང་ནས་ཆུ་འབབ་པ་ལ་བླངས་ཏེ་བཟླས་པས། ༼༡༢༽ལོངས་སྐུའི་ཁྲོ་བོར་བཞེངས་ཏེ། མ་ཏྲཾ་གི་གམ་དུ་སྡིགས་མཛུབ་དང་བཅས་པར་སྔགས་བཟླས་པས་ཁོ་འདར་ཡེད་ཡེད། འཁོར་རྣམས་སྙིང་ཞུམ་ནས་མིག་རྩ་རིག་རིག་ཏུ་འདུག་པ་དང་མཐུན་པར་གནས་ངན་ཡོངས་སུ་སྒྲོལ་བ་སྟེ། རྡོ་རྗེ་སྲིན་པོའི་ངུར་སྒྲ་ཡིས། །གདུག་བྱེད་ཐམས་ཅད་སྤ་ཡང་བཀོང༌། །ཞེས་པའི་དོན་རྫོགས་ཏེ། རྡོ་རྗེ་ཐེག་པའི་ཡེ་ཤེས་རླུང་གི་བུ་ཡུག་དང་སྐར་མདའི་འོད་ཀྱིས་ཞེ་སྡང་འཇོམས་ཤིང་འཁོར་བའི་ཚ་གྲང་ཡང་སེལ་བའི་ཚིག་བརྗོད་པ་དང༌། ལམ་པའི་དབང་དུ། གདུག་པ་འདུལ་བའི་ནུས་རྩལ་འགྱེད་པའི་སྔགས་ཚིག་ཀྱང་ཡིན་ནོ། །ཚུལ་འདི་དག་རྣམས་ལས། རྩ་རྒྱུད་དུ་ནི། ཉོན་མོངས་ལྔ་ཡི་ས་གཞི་ལ། །ཡི་གེ་ཡེ་ཤེས་ལྔ་གསལ་བས། །འབར་བ་ཁྲག་འཐུང་སྤྲིན་ཕུང་བཞིན། །ཁྱུ་མཆོག་ལྔ་ཡི་སྟབས་ཀྱིས་རོལ། །སེང་གེའི་ང་རོ་རྔམ་པའི་གླུ། །རྡོ་རྗེ་དོན་རབ་སྒྲོགས་པའི་ཚིག །རྨད་བྱུང་རོལ་པའི་དོན་འབྱུང་བ། །ཨེ་མ་ཧོ་ངོ་མཚར་ཡ་མཚན་ཆེ། །དགྱེས་པས་རོལ་པའི་བྱིན་རླབས་ལས། །རྒྱུད་དྲུག་ཙད་གཅོད་ངོ་མཚར་ཆེ། །ཞེས་ཤར་དུ་དུག་ལྔ་འཇོམས་ཤིང་ངན་སོང་གནས་སྒྲོལ་གྱི་བྲོ་དང༌། མཉམ་པ་ཆེན་པོའི་ནམ་མཁའ་ལས། །ཡེ་ཤེས་འབར་བའི་མེ་བྱུང་བས། །འཁོར་བ་ཁྲག་གི་རྒྱ་མཚོ་བསྐམས། །སྡུག་བསྔལ་དབྱིངས་སུ་ཟད་མཛད་པའི། །མི་གནས་ཀློང་ནས་ཆོ་འཕྲུལ་བ། །གཏུམ་རྔམ་འཁྲུག་པའི་ངོ་བོར་འབར། །ཁྲག་འཐུང་འབར་བའི་སྤྲིན་འཕྲོས་པས། །སྲིད་གསུམ་ཁྲག་མཚོ་རྔོ་ནས་སྐམས། །དཔའ་བོ་ཚམ་ངམ་གྱད་ཀྱི་སྟབས། །སྲིན་པོ་མ་ཏྲཾ་ཁྲོས་པའི་གླུ། །ཐེག་ཆེན་རྨད་བྱུང་གསང་བའི་ཚིག །ཆགས་པའི་རྟོད་ཕུར་གཏིང་ནས་ཕྱུང༌། །ཞེས་ལྷོ་རུ་ཁྲག་འཐུང་རོལ་པས་འདུལ་སྦྱོང་གྲགས་པའི་བྲོ་དང༌། མཁའ་བཞི་དབྱིངས་ཀྱི་བདེ་ཀློང་ནས། །ཚོམ་བུ་འབུམ་གྱི་ཆོ་འཕྲུལ་འཕྲོས། །དགྱེས་མཆོག་རོལ་པའི་ཕྲིན་ལས་ལས། །ལ་ལ་ཤེས་རབ་ཐབས་ལ་རོལ། །ལ་ལ་ཐུགས་རྗེ་ལས་ལ་རོལ། །ལ་ལ་གདུལ་བྱའི་ཡུལ་ལ་རོལ། །ལ་ལ་ཡེ་ཤེས་དབྱིངས་ལ་རོལ། །ཐབས་ཀྱི་རྒྱལ་པོ་རྟོགས་པའི་དབང༌། །ཆེ་བ་ལུང་གི་ཁྱད་པར་ལས། །རྒྱལ་བ་ཀུན་དང་མཉམ་པར་སྦྱོར། །རྡོ་རྗེ་པདྨ་རོལ་པའི་སྟབས། །ཆགས་མེད་མཁའ་ལ་༼༡༣༽གསལ་བའི་ཚིག །དུག་གསུམ་ཟིལ་གྱིས་གནོན་པའི་གླུ། །འཇིག་རྟེན་རིམ་གྱིས་61སྦྱང་བའི་ཕྱིར། །འཇིག་རྟེན་ཁམས་སུ་རོལ་པ་བྱུང༌། །འཇིག་རྟེན་དྲུག་གི་སྙིང་ལ་རོལ། །བདག་པོ་གཙོ་བོ་ཟིལ་མནན་ནས། །འཁོར་ནི་སྙན་པའི་ཚིག་གིས་བསྟེན། །འཁོར་བའི་ལམ་ལྔ་རྒྱུན་བཅད་ནས། །རྣམ་ཐར་ནམ་མཁའི་ངང་དུ་བརླན། །གར་མཆོག་གློག་ལྟར་འགྱུ་བ་ཡིན། །རྨད་བྱུང་གསང་བའི་དཀྱིལ་འཁོར་ནས། །ཡི་གེ་འབར་བའི་ཆོ་འཕྲུལ་འཕྲོས། །འཕྲོ་འདུ་སྐར་ལྟར་འཁྲུག་པ་ལས། །ཁམས་གསུམ་བུད་ཤིང་ཐལ་བར་རླགས། །རྡོ་རྗེ་བུ་ཡུག་སྐར་མདའི་སྟབས། །རྡོ་རྗེ་འབྲུག་ཆེན་ལྡིར་བའི་གླུ། །དོན་གྲུབ་རྡོ་རྗེ་གསང་བའི་ཚིག །གདུག་པའི་དཔུང་རྣམས་རྣམ་པར་འཇོམས། །ཞེས་ནུབ་ཏུ་རྟ་གདོང་ཞགས་ཀྱི་བྲོ་དང༌། རྡོ་རྗེ་སྤྲུལ་པའི་དཀྱིལ་འཁོར་པས། །ཐབས་ཀྱི་བྱང་ཆུབ་སེམས་སྤྲིན་འཕྲོས། །དབང་སྡུད་ཆགས་པའི་ཁྱད་པར་ལས། །འཇིག་རྟེན་བུ་མོ་དྲུག་དང་རོལ། །སེང་གེ་རྣམ་པར་རོལ་པའི་སྟབས། །རྡོ་རྗེ་ཁྱུང་སྐད་འགྱུར་པའི་གླུ། །ཆགས་པ་རྩད་ནས་གཅོད་པའི་ཚིག །རྡོ་རྗེ་རོལ་པའི་དོན་ཆེན་པོ། །ཞེས་བྱང་དུ་བུ་མོ་དྲུག་དང་རོལ་པའི་བྲོ་དང་བཞིར་གསུངས་སོ།།

གསུམ་པ་ཞབས་བསྡུ་བ་ནི།

རྨད་བྱུང་གསང་བའི། ཞེས་པ་ནས། འདུས་པའི་འདམ་རྫབ་བསྐམས། །ཞེས་པའི་བར་གྱིས་བསྟན་ཏེ།

རྨད་བྱུང་གསང་བའི་དཀྱིལ་འཁོར་ནས། །ཡེ་ཤེས་འབར་བའི་མེ་བྱུང་ནས། །ཁམས་གསུམ་འཁོར་བའི་བུད་ཤིང་བསྲེག །སྲིད་གསུམ་འཁོར་བའི་ཁྲག་མཚོ་བསྐམས། །ང་རྒྱལ་རི་བོ་རྨང་ནས་ཤིག །ཞེ་སྡང་འབར་བའི་མེ་དཔལ་བསད། །གཏི་མུག་མུན་པ་གཏན་ནས་བཅོམ། །འཁོར་བ་འདུས་པའི་འདམ་རྫབ་བསྐམས།།

བྲོ་སྟབས་ཀྱིས་དོན་ཅི་འགྲུབ་སྙམ་པ་ལ། ཡོན་ཏན་རྨད་དུ་བྱུང་བའི་སྟོན་པའི་ཐུགས་ཀྱི་བཀོད་པ་ཆོས་དབྱིངས་གསང་བའི་དཀྱིལ་འཁོར་ནས། ཡེ་ཤེས་འོད་ལྔར་འབར་བའི་མེ་ཉིད་བྱུང་བས། ལྷའི་ལེ་ལོ་སོགས་ཁམས་གསུམ་འཁོར་བའི་བུད་ཤིང་བསྲེགས་པ་དང༌། ཡི་དྭགས་ཀྱི་ཆགས་པ་སོགས་སྲིད་གསུམ་འཁོར་བའི་ཁྲག་གི་རྒྱ་མཚོ་བསྐམས་ཤིང༌། ལྷ་མ་ཡིན་སོགས་ཀྱི་ང་རྒྱལ་གྱི་རི་བོ་རྨིང་ནས་བཤིག་སྟེ། དམྱལ་བ་སོགས་ཀྱི་ཞེས་སྡང་འབར་བའི་མེ་དབལ་བསད་ནས། བྱོལ་སོང་སོགས་ཀྱི་གཏི་མུག་གི་མུན་པ་གཏན་ནས་བཅོམ་པས། མི་ལ་སོགས་པ་རིགས་དྲུག་གི་ས་བོན་གསོགས་པའི་འཁོར་བ་འདུས་པའི་འདམ་རྫབ་བསྐམས་པར་མཛད་པ་ནི་ཐུགས་རྗེས་དོན་གྲུབ་པའོ། །དེ་དག་ནི་ལོ་རྒྱུས་བརྗོད་པས་རྒྱལ་བའི་མཛད་པ་སྟེ་རྗེས་སུ་འཇུག་པའང་མཐུན་ནོ།།

གསུམ་པ་ཞབས་བསྡུ་བ་ནི།

ལང་ཀའི་བདག་པོ། ཞེས་པ་ནས། འདྲིད་པའི་རོལ་༼༡༤༽པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་དག་ནི། །གང་གི་ཆ་དང་མཐུན་སྦྱར་ནས།།

དམ་པའི་དོན་ལ་སྦྱོར་བ་ཡིས། །བྱིས་པ་འདྲིད་པའི་རོལ་པའོ།།

ལང་ཀའི་བདག་པོ། ཞེས་བོས་ནས་འདི་དག་ནི། གདུལ་བྱ་གང་གི་ཆ་དང་མཐུན་པར་སྦྱར་བའི་སྤྱོད་པས་གཞུག་ཏུ་དམ་པའི་དོན་ལ་སྦྱོར་བར་བྱེད་པ་ཡིས་མཛད་པ། དོན་ལ་ཤེད་མ་བྱེ་བས་བྱིས་པ་རྣམས་ཐབས་ཀྱིས་འདྲིད་པའི་རོལ་པ་ཅིར་ཡང་འཆར་བས་ཡིད་འདྲེན་པའི་སྤྱོད་པ་སྟེ་ཆ་མཐུན་སྦྱོར་བའི་ལུང་གི་ངོ་བོ་བསྟན་པའོ།།

གཉིས་པ་ཐབས་འཛུད་བསྲེ་བའི་སྤྱོད་པ་བསྟན་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལག་ཀའི་བདག་པོ། ཞེས་པ་ནས། སྤྱོད་པའི་ཁྱད་པར་སྤྱོད། །ཅེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་གང་། །ཐབས་བྱུང་བསྲེ་བའི་བརྟུལ་ཞུགས་ནི།།

འཇིག་རྟེན་ལོག་སྲེད་ཇི་ལྟར་བར། །བརྟུལ་ཞུགས་སྤྱོད་པའི་ཁྱད་པར་སྤྱོད།།

ལང་ཀའི་བདག་པོ། ཞེས་སྐྱེས་བུས་བོས་ནས། གཞན་ཡང་ཐབས་མཁས་ཀྱི་སྤྱོད་པ་གང་ཞིག རེས་ཁོའི་སྤྱོད་པ་ལྟར་དང་རེས་རང་གི་སྤྱོད་པ་ལྟར་བྱས་ནས་གཞུག་ཏུ་དོན་མཆོག་རྫོགས་པའི་ཐབས་ཀྱི་ཐེག་པ་ཆེན་པོ་ལ་གཟུད་པའི་མཛད་པ་ཐབས་འཛུད་བསྲེ་བའི་བརྟུལ་ཞུགས་ནི་མི་མཐུན་པ་བརྟུལ་ཞིང་དོན་ཆེན་པོ་ལ་ཞུགས་པའི་ཕྱིར་མིང་ཡང་འགྲུབ་བོ། །དེའི་དོན་རྒྱས་པར་འཆད་པ་ནི། འཇིག་རྟེན་ན་ལོག་སྲེད་ཅན་རྣམས་ཀྱི་སྤྱོད་པ་ཇི་ལྟ་བ་དེ་དང་མཐུན་པར། གསང་བ་བས་ཀྱང་འོག་གི་བརྟུལ་ཞུགས་ཀྱི་སྤྱོད་པའི་ཁྱད་པར་ཉེར་གསུམ་པོ་འདི་དག་དེ་ལྟར་སྤྱོད་པའོ།།

གཉིས་པ་རྒྱས་པར་བཤད་པ་ནི།

ཝ་དང་ཅང་ཤེས། ཞེས་པ་ནས། བག་ལེན་རྒྱལ་འཁོར་སྐྱོང༌། །ཞེས་པའི་བར་གྱིས་བསྟན་ཏེ།

ཝ་དང་ཅང་ཤེས་གྱི་ལིང་དང་། །ཤིན་ཏུ་གླང་ཆེན་མྱོས་འདྲའི་སེམས། །དཔའ་གཏུམ་ཟ་བྱེད་གཏུམ་རྔམ་འཁྲུག །མཁའ་ལྡིང་ཁྱུང་ཆེན་གང་མི་ལྟ། །གཏུམ་ཐུང་དོམ་ཆེན་འཇིགས་འདྲིལ་བ། །གང་ཐུབ་མི་ལྡོག་རྒྱ་མཚོའི་གསེར། །མུན་ལྟར་ལྐུག་པའི་བློ་ཚུལ་ལྡན། །ལྷུན་པོ་མི་འགྱུར་བརྟན་པ་ཆེ། །མཁའ་ལྟར་ཡངས་དོག་ཀུན་དང་བྲལ། །གནམ་ལྕགས་ལྕེ་ཡི་དྲག་ཤུགས་ཅན། །དྲག་ཤུལ་ཆེན་པོའི་བརྟུལ་ཞུགས་དག །ཁུ་འཕྲིག་ལྟ་བུའི་ཟོན་ཆེན་བློ། །ངེས་པའི་ང་རྒྱལ་གླང་ཆེན་བརྟུན། །ཟླ་མེད་སེང་གེ་གཅིག་བརྗོད་པ། །རེ་འབྱམ་བྱ་ལྟར་ཆགས་འགྲོགས་པ། །སྒྱུ་མ་སྒྱུ་མའི་ཚུལ་འདྲིད་པ། །གང་ལ་རྟོགས་མེད་ཀུན་སྤྱོད་པ། །ཐོགས་མེད་འགྱུར་སྤྱོད་ཟ་བྱེད་ཁང་། །ཡུད་ལྟར་མྱུར་མགྱོགས་གློག་ལྟར་འགྱུ། །གང་གི་གང་བསྲུང་ནམ་མཁའ་ལྡིང་། །ས་ཐུབ་བག་ལེན་རྒྱལ་འཁོར་སྐྱོང་།།

དེ་ལ་བརྟུལ་ཞུགས་སྤྱོད་པའི་དམ་ཚིག་བཅུ་ཚན་གཉིས་དང་གསུམ་ནི། ཐོག་མར་ཝ་ཡི་བརྟུལཞུགས་ནི་སྲོག་ལ་བབ་ན་རང་གི་ལག་པའང་བཅད་དེ་འབྲོས་པ་སྟེ། དེ་བཞིན་དུ་རྣལ་འབྱོར་མཆོག་གིས་བླ་མ་དང་མཆེད་ཀྱི་ནང་དུ་སྲོག་ལ་བབ་ཀྱང་མི་འདའ་བར་བསྲུང་ཞིང་སྐྱོན་སྤང་བའི་ཚུལ་གྱིས་བསྲུང་བྱ་ལ་འཛེམ་པའི་བརྟུལ་ཞུགས་ཏེ། བཤད་རྒྱུད་སྒྱུ་འཕྲུལ་རྔམ་གློག་ལས། ཝ་ཡི་བརྟུལ་ཞུགས་ཆེན་པོ་ཡིས། །སྤང་བར་བྱ་བའི་ཐབས་སུ་སྤྱད། །ཅེས་སོ། །འོ་ན་དེ་ཉིད་བཤད་པའི་ལོག་སྲེད་ཅན་གྱི་སྤྱོད་པར་འགྱུར་རམ་ཞེ་ན། མུ་སྟེགས་པ་དག་ནི་ཝ་དང་ཅང་ཤེས་ལ་སོགས་པ་ལས་མཐོ་རིས་སུ་འགྲོ་བ་མངོན་པར་ཤེས་པས་མཐོང་ནས་རྒྱུ་དངོས་མ་ཤེས་པ་དེ་དག་གི་སྤྱོད་པའི་དངོས་པོར་གྱུར་སྙམ་ནས་སེམས་ཅན་དེ་དག་གི་སྤྱོད་པ་ཅི་འདྲ་བར་སྤྱོད་པའི་ལོག་པའི་བརྟུལ་ཞུགས་ཅན་དག་སྟེ། འདིར་རྣལ་འབྱོར་ཆེན་པོ་བས་ཀྱང་བསྲུང་༼༡༥༽བའི་དཔེར་ཡང་འགྱུར་ལ། སྤྱོད་པ་དངོས་མཐུན་པར་སྤྱད་པས་དྲང་བའང་ཡིན་ཏེ། དེ་ལྟར་ཀུན་ལའང་སྦྱར་བར་བྱ་བ་དང༌། ཅང་ཤེས་ནི་རྫུ་འཕྲུལ་མྱུར་མགྱོགས་དང་ལྡན་པ་ལྟར་དམ་ཚིག་བསྲུང་མཚམས་ཤེས་པས་ཐོགས་པ་མེད་པར་མཐར་ཕྱིན་པར་མཁས་ཤིང་ཤེས་བྱ་ཀུན་ལ་ཞུགས་ཏེ་གང་ཡང་སྐད་ཅིག་གི་འགྲུབ་པར་བྱ་བའི་མྱུར་མགྱོགས་བརྩོན་འགྲུས་དྲག་པོའི་བརྟུལ་ཞུགས་ཏེ། ཅང་ཤེས་བརྟུལ་ཞུགས་ཆེན་པོ་ཡིས། །ཤེས་བྱ་ཀུན་ལ་འཇུག་པར་བྱ། །ཞེས་སོ། །གྱི་ལིང་ནི། ལུས་ཀྱི་རྩལ་ཕུན་སུམ་ཚོགས་པ་དང་ལྡན་པས་བདག་པོའང་གནས་མིན་ལས་སྲུང་བར་བྱེད་པ་ལྟར་ལུས་ཀྱི་རྩལ་གྱི་བྱ་བའང་གསང་དོན་བསྲུང་ཞིང་གདམས་པ་མི་གཡེལ་བར་རྩལ་ཤུགས་ཆེ་བའི་བརྟུལ་ཞུགས་ཏེ། ལུས་ཀྱི་རྩལ་གྱི་བྱ་བ་དག །གྱི་ལིང་བརྟུལ་ཞུགས་ཆེན་པོས་བྱ། །ཞེས་པ་ལྟར་དང༌། ཤིན་ཏུ་སྟོབས་དྲག་པའི་གླང་ཆེན་རྒུན་ཆང་གིས་མྱོས་པས་ཕ་རོལ་གྱི་དཔུང་འཇོམས་པ་ལྟར། དེ་དང་འདྲ་བར། དགྲ་བཞིའམ་གདུག་པ་དང་གདུལ་བྱ་རིལ་འདུལ་ཞིང་ཚར་གཅོད་པས་བླང་དོར་མེད་པའི་བརྟུལ་ཞུགས་ཏེ། གླང་ཆེན་མྱོས་པའི་བརྟུལ་ཞུགས་ཀྱིས། །མི་འབྱེད་རྨོངས་ཚུལ་བསྟན་པར་བྱ། །ཞེས་སོ། །དཔའ་རྟུལ་ལྡན་པའི་ཟ་བྱེད་སྟག་ནི་གཏུམ་རྔམ་འཁྲུག་པའི་རང་བཞིན་གྱིས་གསོད་བྱ་འཇོམས་པ་ལྟར། ཐུགས་རྗེའི་ཐབས་ཀྱིས་ཞིང་བཅུ་སྒྲོལ་བའི་རྣལ་འབྱོར་མཆོག་གི་སྤྱོད་པའི་བརྟུལ་ཞུགས་ཏེ། སྟག་མཆོག་རྔམ་པའི་བརྟུལ་ཞུགས་ཀྱིས། །དཔའ་རྟུལ་གཏུམ་པའི་ལས་ཆེན་བྱ། །ཞེས་སོ། །མཁའ་ལྡིང་གི་རྒྱལ་པོ་ཁྱུང་ཆེན་གྱིས་གྱེན་ཕྱོགས་གང་ལ་མི་ལྟ་བའམ་ཁོབ་འོག་ཐམས་ཅད་མ་བལྟས་པར་གསལ་བ་ལྟར། བླ་མ་དང་གྲོགས་ལས་རང་བཟང་བར་མི་ལྟ་ཞིང་རང་གསལ་ལྟ་བའི་བརྟུལ་ཞུགས་ཏེ། ཁྱུང་ཆེན་མཁའ་ལྡིང་བརྟུལ་ཞུགས་ཀྱིས། །ལྟ་བའི་སྤྱི་རྒྱ་རླབས་ཀྱིས་གཅད། །ཅེས་སོ། །དོམ་ནི་ཞེ་སྡང་ཆེ་བས་ལུས་གཏུམ་ཞིང་སེམས་ཐུང་སྟེ་སྡོང་ཆེན་འཇིགས་པ་འདྲིལ་བ་བཞིན་རྨིང་ནས་ཕ་རོལ་ཚར་གཅོད་པ་ལྟར་རྣལ་འབྱོར་མཆོག་གིས་ཁྲོ་བོའི་མཛད་པ་དྲག་པོའི་ལས་གཅིག་ཚུགས་སུ་བྱེད་པའི་བརྟུལ་ཞུགས་ཏེ། གཏུམ་ཐུང་དོམ་གྱི་བརྟུལ་ཞུགས་ཀྱིས། །རེ་བ་མེད་པའི་ལས་ཆེན་བྱ། །ཞེས་སོ། །གསང་བའི་དོན་མཆོག་གང་༼༡༦༽ཡང་སྲུང་ཐུབ་པ་དཔེར་ན་སླར་མི་ལྡོག་ངེས་པ་རྒྱ་མཚོའི་གཏིང་དུ་གསེར་གྱི་གར་བུ་ལྷུང་བ་ཁར་མི་འོང་བ་ལྟར་དོན་ཆེན་པོ་ལས་མི་ལྡོག་ཅིང་སྣོད་མིན་ལ་གསང་བ་མི་སྤེལ་བའི་བརྟུལ་ཞུགས་ཏེ། རྒྱ་མཚོ་གཏེར་གྱི་བརྟུལ་ཞུགས་ཀྱིས། །ཡིད་ཐུབ་མི་ལྡོག་བརྟན་པར་བྱ། །ཞེས་སོ། །ཕག་གམ་ལུག་ནི་ཡིད་ཀྱི་མུན་པ་གཏི་མུག་ཆེ་བས་བླུན་ཞིང་ལས་གདོང་ཚུགས་སུ་བྱེད་པ་ལྟར་རྣལ་འབྱོར་པས་ལྐུག་པའི་བློ་ཡི་ཚུལ་དང་ལྡན་པས་སྔགས་དང་ཕྱག་རྒྱ་གཞན་ལ་མི་སྟོན་ཅིང་གང་ལའང་རིས་སུ་མི་འབྱེད་པར་མཐར་ཕྱིན་པར་བྱེད་པ་མཉམ་པའི་བརྟུལ་ཞུགས་ཏེ། ལྐུག་པ་ལུག་གི་བརྟུལ་ཞུགས་ཀྱིས། །གཏི་མུག་བཞིན་དུ་ཤེེས་རབ་ལྡན། །ཞེས་སོ། །དཔེ་ལ་ལར་ལྐུག་པ་ལྟ་བུའི། ཞེས་ཀྱང་བཞུགས་ཏེ་ཕག་དང་ལུག་གང་ཡིན་ཀྱང་དོན་འདྲའོ། །རི་རབ་ལྷུན་པོ་ལྟར་བླ་མ་ལ་ལྕི་བར་སེམས་ཤིང་མི་འགྱུར་བར་བརྟན་པ་ཆེ་བའི་བརྟུལ་ཞུགས་ཏེ། རི་བོ་ལྟ་བུའི་བརྟུལ་ཞུགས་ཀྱིས། །མི་འགྱུར་རབ་ཏུ་བརྟན་པར་བྱ། །ཞེས་སོ། །དཔེར་ན་ནམ་མཁའ་ལ་ཡངས་དོག་མེད་པ་ལྟར་རྣལ་འབྱོར་པས་ཀྱང་ཏིང་ངེ་འཛིན་རྒོད་འཕྱར་གྱི་དབང་དུ་མི་འགྱུར་བ་དང་མཆེད་ལྕམ་གྱི་ནང་དུ་ཤོང་ཡངས་ཆེ་ཞིང་གུ་དོག་མེད་པར་གང་ལའང་སྤོང་ལེན་དང་རེ་དོགས་ཀྱི་རྣམ་རྟོག་ཀུན་དང་བྲལ་བའི་བརྟུལ་ཞུགས་ཏེ། ནམ་མཁའ་ལྟ་བུའི་བརྟུལ་ཞུགས་ཀྱིས། །ཡངས་དོག་ཀུན་དང་བྲལ་བར་བྱ། །ཞེས་སོ། །དཔེ་གནམ་ལྕགས་ལྕེ་ཡི་ཐོགས་ཆེན་གང་ལ་བབ་ཀྱང་འཇོམས་པ་ལྟར་ཁྲོ་བོའི་བཟླས་པ་དྲག་པོའི་ཕྲིན་ལས་གང་བཙུག་པ་མཐར་ཕྱིན་ཏེ་དྲག་ཤུལ་ཅན་དུ་བྱེད་པའི་བརྟུལ་ཞུགས་ཏེ། གནམ་ལྕགས་ལྕེ་ཡི་བརྟུལ་ཞུགས་ཀྱིས། །དྲག་ཤུལ་ལས་ལ་སྦྱར་བར་བྱ། །ཞེས་སོ། །དཔལ་ཕྱག་ན་རྡོ་རྗེ་དྲག་ཤུལ་ཆེན་པོ་ནི་གདུལ་དཀའ་འཇོམས་པའི་ཕྲིན་ལས་ཀྱི་བརྟུལ་ཞུགས་མཆོག་གི་བདག་པོ་ཡིན་པ་ལྟར་རྣལ་འབྱོར་པས་ཀྱང་ཁྲོ་བོ་སྒོམས་ནས་ཕྲིན་ལས་དྲག་པོའི་མཐུ་སྟོབས་ཀྱིས་དགྲ་བགེགས་འཇོམས་པའི་བརྟུལ་ཞུགས་ཏེ། ལག་ན་རྡོ་རྗེའི་བརྟུལ་ཞུགས་ཀྱིས། །མཐུ་སྟོབས་དག་ལ་སྤྱད་པར་བྱ། །ཞེས་སོ། །ཁྭའམ་བྱ་རོག་ནི་ཟོན་ཆེ་ཞིང་ཁུ་འཕྲིག་དང་ལྡན་པ་ལྟ་བུའི་རྣལ་འབྱོར་པའང་བླ་མ་དང་མཆེད་ཀྱི་ནང་སོགས་གང་ལ་ཡང་ཁུ་འཕྲིག་དང་ཟོན་བག་ཆེན་པོ་ཅན་གྱི་བློ་དང་ལྡན་པའི་བརྟུལ་༼༡༧༽ཞུགས་ཏེ། ཁྭ་རོག་བརྟུལ་ཞུགས་ཆེན་པོ་ཡིས། །ཟོན་བག་ཁུ་འཕྲིག་སྤྱད་པར་བྱ། །ཞེས་སོ། །ངེས་པའི་དོན་ལ་ང་རྒྱལ་གྱིས་གདིང་སྐྱེད་པ་དཔེར་ན་སྟོབས་ལྡན་གླང་ཆེན་རྦ་ཀློང་ལ་མི་ལྟ་བར་ཆུ་རྒལ་བ་བཞིན་དུ་ཡིན་པའི་དོན་ལ་ངེས་པར་བསྟུན་ཏེ་སྲན་ཚུགས་པས་ཅི་ལའང་མི་ལྟ་བའི་བརྟུལ་ཞུགས་ཏེ། གླང་ཆེན་ཆུར་འཇུག་བརྟུལ་ཞུགས་ཀྱིས། །ངེས་པའི་ང་རྒྱལ་སྤྱད་པར་བྱ། །ཞེས་སོ། །ཟླ་སྤངས་ཏེ་གྲོགས་མེད་པར་སེང་གེ་གཅིག་པུར་གནས་ཏེ་མི་འཇིགས་པར་བརྟན་པ་ལྟར་རྣལ་འབྱོར་པས་དགོན་པར་གྲོགས་ངན་སྤངས་ཏེ་གཅིག་པུར་གནས་པས་ལྟ་སྒོམ་གྱི་བརྗིད་པ་དོན་ཆེན་པོ་འགྲུབ་པའི་བརྟུལ་ཞུགས་ཏེ། རི་དྭགས་སེང་གེའི་བརྟུལ་ཞུགས་ཀྱིས། །གྲོགས་ངན་ལ་སོགས་སྤང་བར་བྱ། །ཞེས་སོ། །དཔེར་ན་རེག་འཇམ་གྱི་བྱ་ནི། གཤོག་པས་བསྐྱབས་པས་མཚོན་གྱིས་མི་ཚུགས་ཤིང་ཁྱོ་ཤུག་གཅིག་ལ་གཅིག་བརྩེ་བས་ཤིན་ཏུ་ཆགས་ནས་མི་འབྲལ་བ་ལྟར། བླ་མ་དང་མཆེད་ཀྱི་བར་དུ་དབྱེན་གྱིས་མི་ཚུགས་པར་ཐབས་ཤེས་སམ་སེམས་ཅན་རྣམས་ལ་བརྩེ་བའི་ཆགས་སེམས་དང་མི་འབྲལ་བའི་གདུང་བའི་ཡིད་ཀྱིས་འགྲོགས་པ་བདེ་བའི་བརྟུལ་ཞུགས་ཏེ། རེག་འཇམ་བྱ་ཡི་བརྟུལ་ཞུགས་ཀྱིས། །འགྲོགས་ན་བདེ་ཞིང་ཆགས་པར་བྱ། །ཞེས་སོ། །དཔེར་ན་སྒྱུ་མ་མཁན་གྱིས་སླུ་སེམས་ཀྱིས་རྟ་དང་གླང་པོ་བྱེད་དེ་སྒྱུ་མའི་ཚུལ་གྱིས་འདྲིད་པ་ལྟར་རྣལ་འབྱོར་ཆེན་པོ་བས་སྐུ་ཕྱག་རྒྱ་སྒྱུ་མའི་དཀྱིལ་འཁོར་བསྒོམ་ནས་དེ་ལའང་མི་གནས་པར་ཐབས་ལ་མཁས་པས་དོན་བྱེད་པའི་བརྟུལ་ཞུགས་ཏེ། སྒྱུ་མའི་ཕྱག་རྒྱའི་བརྟུལ་ཞུགས་ཀྱིས། །ཐབས་ལ་མཁས་པའི་ལས་ཆེན་བྱ། །ཞེས་སོ། །ཀུན་འདུས་ལྟར་ན་ཕག་གོང་དུ་སོང་བས་ཁྱིའམ་ཕག་པ་རྣམས་ཟས་གང་ལ་ཡང་གཙང་སྨེའི་རྟོག་པ་མེད་པར་ཀུན་ཟ་ཞིང་སྤྱོད་པ་ལྟར། རྣལ་འབྱོར་པའང་ཁ་ཟས་ལ་བླང་དོར་མེད་པའི་བརྟུལ་ཞུགས་ཉིད་དེ། ཕག་གི་བརྟུལ་ཞུགས་ཆེན་པོ་ཡིས། །གཙང་སྨེ་མེད་པར་ཀུན་ལ་སྤྱད། །ཅེས་སོ། །ལྕེ་སྤྱང་གིས་ཐོགས་པ་མེད་པར་མྱུར་དུ་གསོད་ཅིང་སྤྱོད་པ་དང༌། ཟ་བྱེད་ཁྲ་ནི་དེ་ལྟར་གསོད་ཅིང་མང་པོ་ཟ་བར་བྱེད་པའི་དཔེ་ལྟར། རྣལ་འབྱོར་པའང་ཞིང་བཅུ་ལ་སོགས་པ་སྐད་ཅིག་ལ་སྒྲོལ་ཞིང་ཞལ་དུ་གསོལ་བའི་བརྟུལ་ཞུགས་ཏེ། ལྕེ་སྤྱང་ཁྲ་ཡི་བརྟུལ་ཞུགས་༼༡༨༽ཀྱིས། །ཐོགས་མེད་གསོད་ལ་བརྩོན་པར་བྱ། །ཞེས་སོ། །འདིར་སྤར་མ་ལ་རྐང་པ་གསུམ་ཡོད་ཀྱང༌། ཕྱག་མཆན་གཉིས་སུ་དྲངས་པར་མི་འདུག་གོ །དཔེ་ཡུད་ལྟར་མྱུར་མགྱོགས་ལྡན་པ་གློག་ལྟར་དུ་འགྱུ་སྟེ་ཐུགས་རྗེ་ཆེན་པོས་ཡུད་ཙམ་ལའང་བདག་གཞན་གྱི་དོན་མཛད་པའི་བརྟུལ་ཞུགས་ཏེ། བར་སྣང་གློག་གི་བརྟུལ་ཞུགས་ཀྱིས། །ཅི་ལའང་མྱུར་མགྱོགས་བརྩོན་པར་བྱ། །ཞེས་ཕྱག་དཔེ་གཉིས་ལ་དྲངས་སོ། །ཡང་ན་ཀུན་འདུས་ལས། ཆེ་བའི་ང་རྒྱལ་སྟག་མཆོག་བློ། །ཞེས་གསུངས་པ་ནི། རྣལ་འབྱོར་པ་ཐེག་མཆོག་རྒྱལ་པོར་ཞུམ་པ་མེད་པར་འཇུག་པའི་བརྟུལ་ཞུགས་ཏེ། ང་རྒྱལ་སྟག་མཆོག་བརྟུལ་ཞུགས་ཀྱིས། །ཆེ་བའི་ང་རྒྱལ་བསྐྱེད་པར་བྱ། །ཞེས་སོ། །དཔེར་ན་བྱ་རྒོད་གང་གིས་སྲོག་མི་གཅོད་པར་སྡོམ་པ་སྲུངས་ཤིང་གཞན་གྱི་གོད་གང་ལ་འབྲང་སྟེ་བསྲུང་བས་ནམ་མཁའ་ལྡིང་གི་དབང་པོ་ལྟར། རྣལ་འབྱོར་པས་བླ་མ་དང་མཆེད་ཀྱི་དཀོར་དང་ཁ་ན་མ་ཐོ་ལ་འཛེམ་ཞིང་གདུལ་བྱར་གྱུར་པའི་རྫས་མ་བྱིན་པར་བླངས་པས་ཀྱང་གཞན་དོན་སྒྲུབ་པའི་བརྟུལ་ཞུགས་ཏེ། མཁའ་ལྡིང་ལྟ་བུའི་བརྟུལ་ཞུགས་ཀྱིས། །ཀུན་ཏུ་འཛེམ་པའི་ལས་ཆེན་བྱ། །ཞེས་སོ། །ས་བདག་གང་རྒྱལ་ས་ཐུབ་ཅིང་གདན་ནོན་ལ་དགོངས་པའི་ཉམས་བག་ཆེན་པོས་བློ་རྩལ་ལེན་པའི་རྒྱལ་པོ་མཆོག་གིས་ཡུལ་འཁོར་ངེས་པར་སྐྱོང་བའི་དཔེ་ལྟར། རྣལ་འབྱོར་པས་དགོངས་པ་མཉམ་པའི་གཞི་ལས་མ་གཡོས་པར་གསལ་ཞིང་རིག་པས་ཉེས་པ་ཐུབ་ལ་གདུལ་བྱ་རྣམས་ཐབས་ཀྱིས་འདྲེན་ཅིང་སྐྱོང་བས་བྱིན་རླབས་ཆེ་བའི་བརྟུལ་ཞུགས་ཏེ། རྒྱལ་པོ་འཁོར་སྐྱོང་བརྟུལ་ཞུགས་ཀྱིས། །ས་ཐུབ་འཁོར་དང་ལྡན་པར་བྱ། །ཞེས་སོ། །འོན་ཀྱང་རྩ་བའི་རྒྱུད་ལས། ཅང་ཤེས་དང་གྱི་ལིང་གཉིས་གཅིག་ཏུ་བྱས་ཏེ། བླང་དོར་མི་འབྲལ་ཁོན་ཆེན་བདག །ཅེས་གསུངས་པས་ཉི་མའི་བརྟུལ་ཞུགས་ནི་ཀུན་ལས་སྙོམས་པའི་བླང་དོར་མེད་པའི་ལས་དང་མི་འབྲལ་བར་ཁོན་ཆེན་མུན་པ་འཇོམས་པའི་ བདག་ཉིད་ཡིན་པ་ལྟར། རྣལ་འབྱོར་མཆོག་གིས་ཅི་ལའང་རྣམ་རྟོག་མེད་པའི་ཡེ་ཤེས་མངའ་བས་མ་རིག་པ ་འཇོམས་པའི་བརྟུལ་ཞུགས་བསྣན་ནས་གྲངས་ངེས་སུ་མཛད་དེ་འགྲེལ་ཆེན་ཀྱང་དེ་དང་མཐུན་མོད། འདིར་ཆོས་རྗེ་དམ་པ་རིན་པོ་ཆེའི་ཕྱག་མཆན་སོགས་ན་བཞུགས་པ་ལྟར་རྔམ་གློག་གི་༼༡༩༽ལུང་དང་བཅས་པ་དྲངས་ཏེ་བསྟན་པའོ།།

གསུམ་པ་ཞབས་བསྡུ་བ་ནི།

རྣལ་འབྱོར་བརྟུལ་ཞུགས། ཞེས་པ་ནས། ཐམས་ཅད་གཅིག་སྤྱོད་པའོ། །ཞེས་པའི་བར་གྱིས་བསྟན་ཏེ།

རྣལ་འབྱོར་བརྟུལ་ཞུགས་ཆེན་པོ་ནི། །བཅུ་གཉིས་དང་ནི་གསུམ་བློ་ལྡན།།

གང་འདིར་ཉམས་སུ་ལེན་བྱེད་པ། །རྣལ་འབྱོར་གསང་བའི་ཐབས་མཆོག་སྟེ།།

གང་ལ་འཛུད་པས་བསྲེ་བ་ཡི། །ཚུལ་གྱིས་ཐམས་ཅད་གཅིག་སྤྱོད་པའོ།།

དེ་ལྟར་རྣལ་འབྱོར་མཆོག་གི་སྤྱོད་པའི་བརྟུལ་ཞུགས་ཆེན་པོ་ཐབས་འཛུད་བསྲེ་བའི་དམ་ཚིག་ཀུན་གྱི་ཐོག་མར་འགྲོ་བ་ནི། བཅུ་ཕྲག་གཉིས་དང་སླར་ནི་གསུམ་སྟེ་ཉེར་གསུམ་གྱི་སྤྱོད་ཚུལ་རྣམས་ལ་མཁས་བློར་ལྡན་པས་དམ་པ་གང་སུ་ཞིག་གིས་སྒོ་འདིར་ཉམས་སུ་བླངས་ཏེ་དང་དུ་ལེན་ཅིང་སྤྱོད་པར་བྱེད་པ་དེ་དག་རྣལ་འབྱོར་དམ་པས་གསང་ཆེན་ཐེག་པའི་རྒྱལ་པོས་གདུལ་བྱ་འདྲེན་པའི་ཐབས་མཆོག་ཕུལ་དུ་བྱུང་བ་སྟེ། ཚུལ་དེས་བདག་ཉིད་ཐེག་པ་ཆེན་པོ་གང་ལ་ཞུགས་ནས་གདུལ་བྱ་གཞན་ཡང་འཛུད་པར་བྱེད་པས་བདག་དང་ཁོའི་སྤྱོད་པ་བསྲེ་བ་ཡི་ཚུལ་གྱིས་གདུལ་བྱ་ཐམས་ཅད་དང་སྤྱོད་པ་རྣམ་དབྱེ་མེད་པར་གཅིག་ཏུ་བྱ་བའི་ཕྱིར་ཐབས་ལ་མཁས་པའི་སྤྱོད་པའོ། །སྤྱིར་ན་དཀའ་ཐུབ་དང་བརྟུལ་ཞུགས་ནི་དཀའ་ཐུབ་དམ་ཚིག་ཏུ་འགྱུར་ཞིང་སྤྱོད་པར་ཡང་སྟོན་ཏོ། །བརྟུལ་ཞུགས་ནི་སྤྱོད་པ་ཁོ་ནར་འཆད་དེ། འདིར་ཡང་གདུལ་བྱའི་དབང་གིས་སྤྱོད་པར་རིགས་སོ། །འོ་ན་བརྟུལ་ཞུགས་ཀྱི་དཔེ་དག་ནི་ལོག་སྲེད་ཅན་ཡིན་ནོ་ཞེ་ན། དེ་དག་ལོག་པ་ལ་སྣང་བ་ཡིན་ཀྱང་ལོག་སྲེད་ཅན་དུ་མི་འགྱུར་བའི་ཕྱིར། མུ་སྟེགས་ཅན་ཁོ་ནར་ངེས་པར་དེ་དག་གི་སྒོ་ནས་ཐབས་ཀྱིས་གཟུད་པ་ལ་ཐེ་ཚོམ་མེད་དོ།།

གསུམ་པ་མཐུན་འཇུག་ཐབས་ཀྱི་སྤྱོད་པ་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ལང་ཀའི་བདག་པོ། ཞེས་པ་ནས། འདྲ་ཚུལ་གང་ཡིན་པའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གཞན་ཡང་གང་། །མཐུན་པར་འཇུག་པར་སྤྱོད་ན་ནི།།

དེ་ཉིད་དེ་ལྟར་དེ་བཞིན་ཏེ། །གང་འདྲ་ཚུལ་གང་ཡིན་པའོ།།

ལང་ཀའི་བདག་པོ། ཞེས་སྡུད་པ་པོ་ལ་བོས་ནས་གཞན་ཡང་གང་གདུལ་བྱའི་ཆ་དང་མཐུན་པས་དོན་ལ་འཇུག་པར་བྱེད་པའི་ཐབས་ཀྱི་སྤྱོད་པའི་ལུང་འཆད་པ་ནི། གདུལ་བྱ་གང་ཡང་རུང་བ་ཉིད་ཀྱི་སྤྱོད་པ་དེ་ཉིད་དང་མཐུན་པ་དེ་ལྟར་བདག་གི་སྤྱོད་པའང་དེ་ཇི་ལྟ་བ་བཞིན་དུ་མཐུན་འཇུག་ཏུ་སྤྱོད་པས་དྲང་ཐབས་ཏེ། གང་གདུལ་བྱ་འཇིག་རྟེན་པའི་སྤྱོད་པ་དང་ཚུལ་འདྲ་བར་ཆ་མཐུན་དུ་སྤྱོད་པ་གང་ཡིན་པ་ལ་དེ་སྐད་ཅེས་བྱའོ།།

གཉིས་པ་རྒྱས་པར་བཤད་པ་ནི།

འདོད་ལ་ཆགས་པས། ཞེས་པ་ནས། མུན་པར་སྣང་བ་མཐུན་འཇུག་སྤྱོད། །ཅེས་པའི་བར་གྱིས་བསྟན་ཏེ།

འདོད་ལ་ཆགས་པས་ཕོ་མོར་གྱུར་པ་ལ། །ཕོ་མོར་འདོད་པས་ཕོ་མོར་སྣང་བ་གང་ཡིན་ལ། །ཕོ་མོ་མེད་ལས་ཕོ་མོར་སྣང་བ་མཐུན་འཇུག་སྤྱོད། །འདོད་ལ་ཆགས་པས་ཁྲོ་འགྱུར་ལ། །ཁྲོ་བར་འདོད་པས་ཁྲོ་བར་སྣང་བ་གང་ཡིན་པ། །ཁྲོ་བར་མེད་ལས་ཁྲོ་བར་སྣང་བ་འཐུན་འཇུག་སྤྱོད། །འདོད་ལ་ཆགས་པས་མུན་སྣང་བ། །མུན་པར་འདོད་པས་མུན་པར་གྱུར་བ་གང་ཡིན་ལ། །མུན་པ་མེད་ལས་མུན་པར་སྣང་བ་མཐུན་འཇུག་སྤྱོད།།

དེ་དག་གི་ཚུལ་ཉིད་༼༢༠༽ཇི་ལྟར་སྤྱོད་སྙམ་པ་ལ། ཆགས་པ་ནི་ཞེ་སྡང་དང་གཏི་མུག་གཉིས་ཀའི་གཞིར་གྱུར་པས་གཉིས་ཀ་ལའང་སྨོས་ཏེ། འགྲོ་བ་རྣམས་ཀྱིས་འདོད་པ་ལ་ཆགས་པས་ལས་ཀྱི་རྒྱུ་རྐྱེན་གྱི་དབང་ལས་ཕོ་མོར་སྨིན་ཏེ་ཆགས་ཡུལ་གྱི་ལུས་སུ་གྱུར་པ་ལ། འཁྲུལ་པའི་སྤྱོད་ཡུལ་ཕོ་མོར་སྣང་ནས་འདོད་ཆགས་ལ་ཞེན་པ་དག་ལ། འདུལ་བྱེད་ཀྱང་ལྷ་ཡབ་ཡུམ་ལ་སོགས་པ་རྣམ་པ་ཕོ་མོར་སྣང་བ་གང་ཡིན་པ་ནི། སེམས་ཀྱི་ཆོས་ཉིད་རང་འོད་གསལ་བ་ཇི་ལྟ་བའི་ངང་ལ་ཕོ་མོ་མ་དམིགས་པས་མེད་པར་གྱུར་པ་ལ་ཐུགས་རྗེའི་བྱིན་རླབས་ཡབ་ཡུམ་གྱི་དཀྱིལ་འཁོར་ལ་སོགས་པར་ཕོ་མོར་ཤར་བའི་ཚུལ་གྱིས་ཡབ་ཡུམ་དུ་རྣམ་པར་སྣང་བ་དག་གིས་འདོད་ཆགས་ཅན་དང་མཐུན་པར་འཇུག་པའི་སྤྱོད་པས་འདུལ་ཞིང་དོན་མཛད་པའོ། །དེ་བཞིན་དུ་རྒྱུ་འདོད་པ་ལ་ཆགས་པས་སམ་ཡང་ན་ཞེ་སྡང་གི་ལས་ལ་ཞེན་པས་གཞན་ལ་ཁྲོ་བར་གྱུར་པ་ལ། འཁྲུལ་པ་ལ་ཞེན་ནས་ཁྲོ་བར་འདོད་པའི་དབང་གིས་ལས་ཀྱི་ཁྲོ་བོར་སྣང་བ་ལ་འདུལ་བྱེད་ཐུགས་རྗེའི་ཁྲོ་བོའི་སྐུར་རྣམ་པར་སྣང་བ་གང་ཡིན་པ་ཡང༌། ཆོས་ཉིད་མཉམ་པ་ཆེན་པོ་ལ་རང་རྒྱུད་པའི་ཁྲོ་བོར་སྣང་བ་མེད་པ་ལས་ལས་ཀྱི་ཀེའུ་སེང་ལ་ཡེ་ཤེས་ཀྱི་ཀེའུ་སེང་གིས་དོན་མཛད་པ་ལ་སོགས་པ་ལྟ་བུར་བྱིན་རླབས་ཀྱིས་ཁྲོ་བར་སྣང་བ་མཐུན་འཇུག་གི་སྤྱོད་པས་དོན་མཛད་ཅིང་འདུལ་བ་ཡིན་པ་ལྟ་བུའོ། །དེ་བཞིན་དུ་རྒྱུ་འདོད་པ་ལ་ཆགས་པས་དབང་ལས་མ་རིག་པའི་མུན་པས་ནོན་པར་སྣང་བ་དག་ལ། བླང་དོར་མ་ཤེས་པས་གཏི་མུག་གི་མུན་པར་འདོད་པའི་དབང་ལས་གདུལ་བྱའི་ངོ་ལ་གཏི་མུག་ཆེན་པོ་འབྱེད་པ་མེད་པའི་མུན་པར་སྣང་བར་གྱུར་པ་གང་ཡིན་པ། ཆོས་ཉིད་དབྱིངས་ཀྱི་ངང་ལ་ལོག་པའི་མུན་པ་མེད་པ་ལས། བླང་དོར་གྱི་དམིགས་པ་མེད་པར་ཡང་དག་པའི་མུན་པར་སྣང་བ་དེ་ཡང་མཐུན་འཇུག་གི་སྤྱོད་པ་ཡུལ་དང་མཐུན་པས་འདུལ་ཞིང་དོན་མཛད་པ་ཡིན་ནོ།།

གསུམ་པ་ཞབས་བསྡུ་བ་ནི།

ཇི་ལྟར་གང་ལྟར། ཞེས་པ་ནས། སྤྱོད་པས་དོན་བྱེད་ཡིན། །ཞེས་པའི་བར་གྱིས་བསྟན་ཏེ།

ཇི་ལྟར་གང་ལྟར་དེ་བཞིན་དུ། །དེ་ལ་སོགས་པ་མཐའ་ཡས་པར།།

ཐམས་ཅད་ཐམས་ཅད་དེར་སྣང་བ། །མཐུན་འཇུག་སྤྱོད་པས་དོན་བྱེད་ཡིན།།

དེ་བས་ན་གདུལ་བྱ་ཇི་ལྟར་སྤྱོད་པ་དང་གང་ལྟར་སྤྱོད་པ་དེ་བཞིན་དུ་སྤྱད་ཅིང་དོན་མཛད་པའོ། །དུག་གསུམ་འདུལ་བ་དེ་དག་དང་ལ་སོགས་པ་ཞེས་དངོས་པོ་གཞན་བསྡུ་བའི་སྒྲས་འགྲོ་བའི་ཉོན་མོངས་པའི་སྤྱོད་པ་མཐའ་ཡས་པར་སྣང་བ་རྡུལ་སྙེད་པའི་༼༢༡༽གནས་ཐམས་ཅད་རིལ་དུ་འདས་པ་དང་མ་འདས་པའི་སྤྱོད་པ་ནང་རིས་མི་མཐུན་པ་ཇི་སྙེད་པ་ཐམས་ཅད་གང་གིས་འདུལ་བའི་དུས་ལ་བབ་པ་དེ་དང་དེར་སོ་སོའི་སྣང་བ་དང་མཐུན་པར་འཇུག་པའི་ཚུལ་གྱིས་བྱིན་རླབས་སྣང་བའི་སྤྱོད་པས་དོན་བྱེད་ཅིང་གདུལ་བར་མཛད་པ་ཡིན་ནོ།།

གསུམ་པ་འཇུག་བསྡུ་བ་ནི།

ལང་ཀའི། ཞེས་ པ་ནས། མེད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག ་པོ་དེ་དག་ནི་འཐུན་པར་འཇུག་པར་བྱའོ། །ཞེས་དེ་སྐད་ཅེས་སྨྲས་པས། ལངྐའི་ བདག་པོ་ལ་སོགས་པ་དམན་པ་རྣམས། མཐའ་ཐུག་པ་མེད ་པའི་ལྟ་སྤྱོད་ལ་ཡོངས་སུ་རྟོག་ པ་མེད་པར་གྱུར་ཏོ།།

ལང་ཀའི་བདག ་པོ། བཤད་པ་དེ་དག་ནི་མཐུན་པར་འཇུག་པར་བྱའོ། །ཞེས་སྔར་དམ་བཅའ་བར་མཛད་པའི་དགོངས་པ་ཡོངས་སུ་བགྲོས་པར་ཤེས་པར་བྱའོ། །ཞེས་བཀའ་སྩལ་ཏེ་རྗེས་སུ་འཇུག་པའང་མཐུན་ནོ། །དེ་སྐད་ཅེས་སྨྲས་པས་ལང་ཀའི་ བདག་པོ་ལ་སོགས་པ་འཁོར་དམན་པ་དམ་པ་རྣམས་ཀྱི་མཐའ་ཐུག་པ་མེད ་པའི་ལྟ་སྤྱོད་ལ་ངེས་པའི་གདེངས་རྙེད་དེ་ཡོངས་སུ་རྟོག་པ་མེད་པར་གྱུར་ཏོ།།

ལེའུ་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

སྒྱུ་མ་རོལ་པས་རྣམ་པར་གྲོལ་བའི་ལེའུ་སྟེ་དྲུག་ཅུ་བཞི་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྒྱུ་མ་ལྟ་བུའི་མཛད་པ་གསུམ་གྱི་རོལ་པས་མཚན་མ་ཅན་དང་ལོག་སྲེད་ཅན་དང་ཉོན་མོངས་པ་ཅན་གྱི་གདུལ་བྱ་གསུམ་གཟུང་འཛིན་རྣམ་པར་གྲོལ་ཏེ་ཐར་པ་ལ་སྦྱོར་བར་བསྟན་པའི་ལེའུ་ཞེས་བྱ་སྟེ་དྲུག་ཅུ་རྩ་བཞི་པ་ཉིད་རྣམ་པར་འགྲེལ་ཏེ་བཤད་པའོ།། །།

ལེའུ་རེ་ལྔ་པ་རང་བྱུང་བདུད་རྩི།

༈ བཅུ་པ་ནད་གསོ་བར་བྱ་བ་ལ་གསུམ་སྟེ། ནད་གསོ་བའི་ཐབས་ཀྱི་ཁྱད་པར་སྤྱིར་བཤད་པ། བྱེ་བྲག་ཏུ་སྨན་གྱི་དྲིས་ལན་ལོ་རྒྱུས་ཀྱིས་བསྟན་པ། ཞབས་བསྡུ་བའོ། །དང་པོ་ལ་གཉིས་ཏེ། དྲིས་པ་དང༌། ལན་ནོ། དང་པོ་ནི།

དེ་ནས་ཡང༌། ཞེས་པ་ནས། ཡོངས་སུ་དྲིས་པ་ལས། ཞེས་པའི་བར་གྱིས་བསྟན་ཏེ།

དེ་ནས་ལངྐའི་བདག་པོས། གསང་བའི་བདག་པོ་ལ་དྲི་བ་ཡོངས་སུ་དྲིས་པ།

ལེའུ་འདིས་ངེས་དོན་སྟོན༌ནོ། །རྣམ་གྲངས་དགུ་པ་བསྟན་མ་ཐག་པ་དེ་ནས་ཡང༌། སྡུད་པ་པོ་ལང་ཀའི་བདག་པོས། སྟོན་པ་གསང་བ་པའི་བདག་པོ་ཉིད་ལ་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱི་ལེའུ་ཞེ་ལྔ་པར་ཆོས་ཀྱི་རྣམ་གྲངས་བཅུར་བཀོད་པ་ལས། བཅུ་པ་ནད་གསོ་བར་བྱའོ་ཞེས་དམ་བཅའ་བར་དགོངས་པ་དེ་ཉིད། ཚུལ་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་ཡོངས་སུ་དྲིས་པ་ལས།

གཉིས་པ་ལན་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གསང་བ་པའི་བདག་པོས། ཞེས་པ་ནས། གཉེན་པོར་གྱུར་པར་བྱའོ། །ཞེས་པའི་བར་གྱིས་བསྟན་ཏེ།

ཀྱེ་གསང་བ་པའི་བདག་པོ། ནད་པ་གསོ་བར་བྱའོ་ཞེས་དམ་བཅའ་བར་དགོངས་པ་དེ། ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་ཡོངས་སུ་དྲི་པ་ལས། གསང་བ་པའི་བདག་པོས་སྨྲས་པ། ལངྐའི་བདག་པོ་དེ་ནི་འདི་ལྟར་གྲོང་ཁྱེར་གསུམ་གྱི་ནད་པ་གསོ་བར་བྱའོ། །ནད་ཀྱི་གཞི་རྩ་ལ་མཁས་པར་བྱའོ། །ནད་སྦྱང་བའི་ཐབས་ལ་བརྩོན་པར་བྱའོ། །སྨན་པ་དམ་པ་རྣམས་བརྟེན་པར་བྱའོ། །གཉེན་པོ་དམ་པའི་སྨན་བསྲེལ་ཞིང་སྤེལ་བར་བྱའོ། །སྨན་སྦྱར་བ་ལ་མཁས་པར་བྱའོ། །སྨན་གྱི་ལམ་བསྲུང་བར་བྱའོ། །ནད་པའི་ཚོགས་དང་མི་འབྲལ་བར་བྱའོ། །ནད་ཀྱི་རྒྱུན་གཅད་པར་བྱའོ། །ནད་ཀྱི་གཉེན་པོར་འགྱུར་བར་བྱའོ།།

སྐྱེས་བུ་གསང་བ་པའི་༼༢༢༽བདག་པོས་ལན་གསུངས་ཏེ་སྨྲས་པ། ལང་ཀའི་བདག་པོ། དྲིས་པ་དེ་དག་ནི་འདི་ལྟར་ཏེ། བསོད་ནམས་དང་ལྡན་པའི་བདག་གཞན་ཁམས་ཀྱི་གྲོང་ཁྱེར་གསུམ་གྱི་འགྲོ་བ་ནད་62གཅོད་ཆེན་པོ་ཅན་རྣམས་ཐབས་དམ་པ་རྨད་དུ་བྱུང་བས་གསོ་བར་བྱའོ། །ནད་ཀྱི་གཞི་རྩ་ལ་མཁས་པས་ལྟ་བས་ཐག་བཅད་པར་བྱའོ། །ནད་སྦྱང་བའི་ཐབས་སྔོན་དུ་ཆོས་མཉན་པ་ལ་བརྩོན་པར་བྱའོ། །སྨན་པ་དམ་པ་བླ་མ་རྣམས་བསྟན་པར་བྱའོ། །གཉེན་པོ་དམ་པའི་སྨན་སྒོམ་པའི་ངོ་བོ་སྲེལ་ཞིང་སྤེལ་བར་བྱའོ། །སྨན་སྦྱར་བ་ལ་མཁས་པས་བློ་བཞག་པར་བྱའོ། །སྨན་གྱི་ལམ་མཆོག་སྐྱོན་བཅོས་ཐབས་ཀྱིས་བསྲུང་བར་བྱའོ། །འབྲས་བུ་གཞན་དོན་གྱི་སྤྱོད་པ་ནད་པའི་ཚོགས་དང་མི་འབྲལ་བར་བྱའོ། །འབྲས་བུ་བདག་དོན་གྱི་སྤྱོད་པ་ནད་ཀྱི་རྒྱུན་གཅོད་པར་བྱའོ། །དོན་དུ་ནད་ཀྱི་གཉེན་པོར་གྱུར་པར་བྱའོ། །ཞེས་རྣམ་གྲངས་བཅུ་གསུངས་པ་ནི་གྲངས་ཀྱི་རྩ་བ་བསྟན་པའོ།།

གཉིས་པ་རྒྱས་པར་བཤད་པ་ནི།

ལང་ཀའི། ཞེས་པ་ནས། ཡོངས་སུ་སྒྲོལ་བའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ལ་གྲོང་ཁྱེར་གསུམ་ནི། མི་སྣང་བའི་གྲོང་ཁྱེར་དང་། ཀུན་སྣང་བའི་གྲོང་ཁྱེར་དང་། ཕྱེད་སྣང་བའི་གྲོང་ཁྱེར་རོ། །ནད་ཀྱི་གཞི་རྩ་ནི་མུན་པ་ཆེན་པོ་ལས་བྱུང་བའི་ཟུག་རྔུའོ། །ནད་སྦྱང་བའི་ཐབས་ནི་སྨན་དང་སྨན་པར་སྦྱར་བའོ། །སྨན་པ་དམ་པ་ནི་བཤེས་གཉེན་དམ་པའོ། །གཉེན་པོ་དམ་པའི་སྨན་ནི་ཞི་གནས་དང་ལྷག་མཐོང་ངོ་། །སྨན་སྦྱར་བ་ནི་དེ་དང་དེ་ཉིད་དུ་སྦྱོར་བའོ། །སྨན་གྱི་ལམ་བསྲུང་བ་ནི་དེ་བཞིན་ཉིད་ལས་མི་འདའ་བའོ། །ནད་པའི་ཚོགས་དང་མི་འབྲལ་བ་ནི་འཁོར་བ་ལ་མི་སྐྱོ་བའོ། །ནད་ཀྱི་རྒྱུན་གཅད་པར་བྱ་བ་ནི་ཆོས་ཐམས་ཅད་དེ་བཞིན་ཉིད་དུ་ངེས་པའོ། །ནད་ཀྱི་གཉེན་པོར་གྱུར་པ་ནི་འཁོར་བ་ཡོངས་སུ་སྒྲོལ་བའོ།།

ལང་ཀའི་བདག་པོ། ཞེས་བོས་ནས། དེ་ལ་སེམས་བསྐྱེད་པའི་ཡུལ་གྲོང་ཁྱེར་གསུམ་ནི། གཟུགས་མེད་པའི་ཁམས་མི་སྣང་བའི་གྲོང་ཁྱེར་དང༌། གཟུགས་ཀྱི་ཁམས་ཀུན་སྣང་བའི་གྲོང་ཁྱེར་དང༌། འདོད་པའི་ཁམས་ཕྱེད་སྣང་བའི་གྲོང་ཁྱེར་རང་གི་ཉོན་མོངས་པའི་ནད་ཀྱིས་གཟིར་བ་དག་སྟེ། ནང་དུ། ཡིད་དང༌། ལུས་དང༌། ངག་དང་ཡང་སྦྱར་རོ། །ནད་ཀྱི་གཞི་རྩ་ནི་ལྷན་ཅིག་སྐྱེས་པའི་མ་རིག་པའི་མུན་པ་ཆེན་པོ་དང་ཀུན་ཏུ་བརྟགས་པ་ལས་བྱུང་བའི་གཟུང་འཛིན་གྱི་སྣང་བ་དང་ཉོན་མོངས་པའི་ཟུག་རྔུ་སྟེ། ལྟ་བས་ཐག་གཅད་པ་ལ་མཁས་པས་ཆོས་ཉིད་དུ་ངོ་ཤེས་པར་བྱའོ། །ནད་སྦྱང་བའི་ཐབས་ནི། སྨན་གྱི་མཆོག་ཏུ་གྱུར་པ་དམ་པའི་ཆོས་ཟབ་མོ་ཉན་པ་དང་སྨན་པར་ངེས་པའི་བླ་མ་མན་ངག་ཅན་གྱིས་བསྟན་པ་བློ་ལ་འཇོག་སྟེ་དོན་དུ་སྦྱོར་བའོ། །སྨན་པ་དམ་པ་ནི། དགེ་བའི་བཤེས་གཉེན་མཁས་མཆོག་བླ་མ་དམ་པ་གསེར་ལ་ནག་མཚུར་གཏོང་བ་ལྟ་བུ་ལས་ཁུངས་ཀྱི་དབང་དང་མན་ངག་ཐོབ་ཅིང་དགོངས་པ་གསལ་བ་སྟེ་འཆད་པའི་མཚན་ཉིད་རྣམས་དང་ལྡན་པ་ལེགས་པར་བསྟེན་པའོ། །ནད་ཀྱི་གཉེན་པོ་དམ་པའི་སྨན་ནི། སྒོམ་པའི་ངོ་བོ་ཞི་གནས་ཀྱི་ཏིང་ངེ་འཛིན་དང་ཤེས་རབ་རང་གསལ་སྒྲིབ་པ་མེད་པས་གསང་བའི་༼༢༣༽ལྷག་མཐོང་ངོ༌། །སྨན་སྦྱར་བ་ནི། ལྟ་བས་རྟོགས་པའི་དོན་ཏེ། ཏིང་ངེ་འཛིན་གྱིས་ཉམས་སུ་བླངས་ཏེ་ཞི་གནས་དང་ལྷག་མཐོང་དེ་དག་ཟུང་དུ་འབྲེལ་བ་ཉིད་དུ་སྦྱོར་བར་བྱེད་པའི་བཞག་ཐབས་ལ་མཁས་པའོ། །སྨན་གྱི་ལམ་བསྲུང་བ་ནི་སྐྱོན་བཅོས་པའི་ཐབས་ཏེ། ཅི་སྤྱད་ཐམས་ཅད་མཉམ་པའི་དོན་དང་མ་བྲལ་བར་ཆོས་ཉིད་དེ་བཞིན་ཉིད་ལས་མི་འདའ་བར་སྤྱོད་པ་ཉིད་དུ་བསྟན་པའོ། །སྒོམ་པའི་འབྲས་བུ་ནད་པའི་ཚོགས་དང་མི་འབྲལ་བ་ནི་གཞན་དོན་གྱི་སྤྱོད་པ་སྟེ་འཁོར་བ་སྒྱུ་མའི་རང་བཞིན་དུ་རྟོགས་པ་ལས་བསྐལ་པ་རྒྱ་མཚོར་འགྲོ་དོན་མཛད་པ་ལ་མི་སྐྱོ་བ་དང་དུབ་པའང་མི་མངའ་བའོ། །ནད་ཀྱི་རྒྱུན་གཅད་པར་བྱ་བ་ནི། རང་དོན་གྱི་འབྲས་བུ་སྟེ། དངོས་པོ་དང་དངོས་པོ་མེད་པའི་ཆོས་ཐམས་ཅད་རང་རིག་པ་དེ་ཁོ་ན་ཉིད་རང་བཞིན་འོད་གསལ་བ་ཉིད་དུ་ངེས་པར་མཇལ་ཏེ་གདེངས་དང་ལྡན་པའོ། །ནད་ཀྱི་གཉེན་པོར་གྱུར་པ་ནི། འདིའང་གཞན་དོན་ཕུན་སུམ་ཚོགས་པ་སྟེ། ཐུགས་རྗེ་ཆེན་པོའི་མཛད་སྤྱོད་ཀྱིས་འཁོར་བ་ཡོངས་སུ་སྒྲོལ་བར་བྱེད་པ་རྒྱལ་བ་ཉིད་ཀྱི་མཛད་པའོ།།

གཉིས་པ་བྱེ་བྲག་ཏུ་སྨན་གྱི་དྲིས་ལན་ལོ་རྒྱུས་ཀྱིས་བསྟན་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ལན་གྱི་ཡོན་ཏན་བསྟན་པའོ། །དང་པོ་ནི།

ལང་ཀའི་བདག་པོ། ཞེས་པ་ནས། ངེས་པར་གསུངས་པ་ལས། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ཡང་གང་། །ཁོ་བོས་མཐོང་ཐོས་སྐབས་གཅིག་ན། །ཀུན་གྱི་བཤེས་གཉེན་དམ་པ་དེས། །དུར་ཁྲོད་བདག་པོ་བཏུལ་བའི་ཚེ། །འཇིག་རྟེན་གཙོ་བོ་ཀུན་འདུས་ནས། །སྲས་ཀྱི་ཚོགས་སུ་བཀོད་པ་ཡི། །འདུས་པ་ཕལ་མོ་ཆེ་དག་ལས། །འཁོར་དེར་འདུས་པར་གྱུར་པ་ཡི། །ཞར་ལས་གྱུར་པའི་ལོག་སྡེ་པ། །སྨན་གྱི་བརྟུལ་ཞུགས་ཆེར་སྤྱོད་པ། །དྲང་སྲོང་ནག་པོ་ཀ་ལ་ཡིས། །གང་དེར་འདུན་ནས་དོན་གསོལ་བ། །ཆེ་མཆོག་སྨན་གྱི་རྒྱལ་པོ་ཁྱོད། །དུག་འཇོམས་སྨན་གྱི་དཀྱིལ་འཁོར་འཛིན། །ནད་དོ་ཅོག་གི་དགྲ་གྱུར་པས། །ཟུག་རྔུའི་ནད་རྣམས་ཞི་བར་མཛོད། །དེ་སྐད་ཞུ་བ་འདུན་པ་ལས། །ཆེ་མཆོག་སྨན་གྱི་རྒྱལ་པོ་དེས། །དྲང་སྲོང་དེ་ལ་རྗེས་དགོངས་ནས། །སྔོན་དུས་གསུངས་པ་ཡང་གསུངས་པ། །ཁམས་གསུམ་ཟ་མ་ཏོག་ནང་དུ། །སྲིད་གསུམ་སེམས་ཅན་དུག་ཆེན་རྣམས། །དུས་གསུམ་སངས་རྒྱས་རྩི་སྦྱར་ནས། །རང་བྱུང་བདུད་རྩིའི་དཀྱིལ་འཁོར་རྫོགས།།

དེ་སྐད་ངེས་པར་གསུངས་པ་ལས།།

དེ་དག་སྐྱེས་བུ་ཆེན་པོས་སྔོན་གྱི་ལོ་རྒྱུས་ཀྱིས་ཡིད་ཆེས་པར་བྱ་བའི་ཕྱིར། ལང་ཀའི་བདག་པོ། ཞེས་བོས་ནས། དེ་ཡང་ཆོས་ཀྱི་རྣམ་གྲངས་བཅུ་པའི་དོན་གང་སྔོན་གསང་བདག་ཉིད་ཀྱིས་ཐོས་པའི་ལོ་རྒྱུས་བརྗོད་པ་ནི། གསང་བའི་བདག་པོ་ཁོ་བོས་སྔོན་མ་ནོར་བར་མཐོང་ཞིང་ཐོས་པའི་སྐབས་གཅིག་གི་དུས་ཀྱི་ཚེ་ན། སངས་རྒྱས་ཀུན་གྱི་དགེ་བའི་བཤེས་གཉེན་སྟོན་པ་རྡོ་རྗེ་སེམས་དཔའ་གསང་བ་དམ་པ་ཧེ་རུ་ཀ་དེས། དུར་ཁྲོད་ཀྱི་བདག་པོ་ཆེན་པོ་རུ་ཏྲ་བཏུལ་བའི་ཚེ་ཉིད་ན། འཇིག་རྟེན་སོ་སོའི་གཙོ་བོ་ལྷ་ཆེན་དང་ཕྱོགས་སྐྱོང་ཀུན་སྤྱན་སྔར་རང་དབང་མེད་པར་འདུས་ནས་རིགས་ངེས་པའི་སྲས་ཀྱི་ཚོགས་སུ་བཀོད་པར་གྱུར་པ་ཡི་འཁོར་དམན་པའི་ལུས་ཅན་འདུས་པ་ཕལ་མོ་ཆེ་ཡི་ཚོགས་དག་ལས་ཀྱི་ཁྱད་པར་མཐོ་དམན་མང་པོ་ལས་ཐུགས་རྗེའི་མཛད་པ་རླབས་པོ་ཆེའི་འཁོར་དེར་འདུས་པར་གྱུར་པ་ཡི་ནང་ནས་སངས་རྒྱས་བསྟན་པའམ་འཁོར་འདུས་༼༢༤༽པའི་ཞར་ལ་བྱུང་བ་དྲེགས་པ་འཁོར་བཅས་བརྟུལ་བའི་ཞོར་ལ་དབང་དུ་འདུས་པར་གྱུར་པའི་ལྟ་སྤྱོད་ལོག་པའི་སྡེ་པ་མུ་སྟེགས་ཀྱི་ཆ་འཛིན་པ་གང་ཞིག་དམ་རྫས་ལ་རང་རྒྱུད་དུ་སྤྱོད་པས་སྨན་གྱི་བརྟུལ་ཞུགས་ཆེར་སྤྱོད་དེ་ཞེན་པས་འཛིན་ཅིང་དེས་འབྲས་བུ་སྒྲུབས་པ་འདི་དག་དྲང་སྲོང་རང་རྒྱུད་ཀྱི་སྐབས་ལས་གདུལ་བའི་འཁོར་དུ་གྱུར་པ་རྣམས་ཏེ།

གཙོ་བོ་རུ་ཏྲ་ཉིད་གསང་སྔགས་ལ་སྤྱོད་པའི་མིང་ནི་སྒོ་གསུམ་དྲག་པས་ལོག་པའི་སྡེ་པ་དྲང་སྲོང་ནག་པོ་ཀཱ་ལ་ཞེས་བྱ་བ་ཡིས། སྟོན་པ་གང་དེ་ཡི་སྤྱན་སྔར་གུས་པས་འདུན་ནས་སྨན་གྱི་དོན་གསོལ་བ་བཏབ་པ་ནི། སྟོན་པ་དམ་པ་ཆེ་མཆོག་སྨན་གྱི་རྒྱལ་པོ། ཞེས་དྲང་སྲོང་གིས་བོས་ནས། རང་ཉིད་སྨན་གྱི་བརྟུལ་ཞུགས་འཛིན་པའི་ངོས་ནས། སྟོན་མཆོག་ཁྱོད་ནི་འགྲོ་བའི་ལོག་དུག་ཐམས་ཅད་འཇོམས་ཤིང་སེལ་བའི་བདུད་རྩི་ཆེན་པོ་སྨན་གྱི་དཀྱིལ་འཁོར་འཛིན་པའི་མངའ་བདག་ཉོན་མོངས་པ་ཕྲ་རགས་སུ་གྲགས་པའི་ནད་དོ་ཅོག་གི་དགྲར་གྱུར་པའི་གཉེན་པོ་འཇོམས་བྱེད་ཆེན་པོ་ལགས་པས། སྟོན་པ་དམ་པ་ཁྱོད་ཀྱིས་འགྲོ་བའི་རྒྱུད་ལ་ཡོད་པའི་ལས་དང་ཉོན་མོངས་པའི་ཀུན་རྟོག་གིས་གཟིར་བས་ཟུག་རྔུའི་ནད་རྣམས་ཞི་ནས་མེད་པར་མཛོད་ཅིག་པར་གསོལ་བ་བཏབ་པ་སྟེ་ནག་པོ་ཀཱ་ལས་གཞན་དོན་དུ་དེ་སྐད་ཞུ་བ་འདུན་ཏེ་གུས་པས་གསོལ་བ་ལས།

ལན་དུ་རང་བཞིན་ལྷུན་གྱིས་གྲུབ་པའི་དམ་རྫས་ཀྱི་མངའ་བདག སྟོན་པ་ཆེ་མཆོག་ཧེ་རུ་ཀར་སྣང་བའི་སྨན་གྱི་རྒྱལ་པོ་དེས་དྲང་སྲོང་དེ་ལ་ཐུགས་རྗེ་ཆེན་པོས་རྗེས་སུ་དགོངས་ནས་ལྟ་བ་ལོག་པ་རྣམས་འདུལ་བའི་ཕྱིར་ཞུ་བ་པོ་ལ་དགྱེས་པས་སྔོན་དུ་འདུས་པའི་འཁོར་ལ་གསུངས་ཏེ་བཀའ་སྩལ་ཟིན་པ་ཉིད་དེ། ཕྱིས་ཞར་ལ་བཏུལ་ནས་འདུས་པའི་འཁོར་ལ་ཡང་ལོ་རྒྱུས་སུ་བཀའ་སྩལ་བར་གསུངས་པ། ཁམས་གསུམ་ཉིད་མགོ་བཅད་པའི་དུང་ཆེན་ཏེ་ཟ་མ་ཏོག་ཆེན་པོའི་སྣོད་ཀྱི་ནང་དུ། འཆད་པའི་སྲིད་པ་གསུམ་གྱི་སེམས་ཅན་ཀུན་གྱི་ལྟ་བ་ངན་པའམ་ཉོན་མོངས་པ་ལྔའི་དུག་ཆེན་ཇི་སྙེད་པ་རྣམས། དེ་དག་ཏུ་སྣང་བ་ཉིད་ནའང་ཡེ་ནས་མ་བཅོས་མ་བསླད་པར་མཐའ་གཉིས་ལས་གྲོལ་བས་དུས་གསུམ་གྱི་རྒྱལ་བ་རྫོགས་པའི་སངས་རྒྱས་ཐམས་ཅད་ཀྱི་བདུད་རྩི་ཆེན་པོའི་ངོ་བོར་རང་བྱུང་གི་ཡེ་ཤེས་སུ་མཇལ་བ་ནི་སྦྱར་བ་སྟེ། རང་བཞིན་ལྷུན་གྱིས་གྲུབ་པ་ཉིད་སྦྱངས་པ་ལས་བྱུང་བའི་དམ་ཚིག་གི་རྫས་སུ་གྲུབ་པས་རྒྱུ་རྐྱེན་༼༢༥༽གྱིས་འཕྲལ་དུ་མ་བྱས་པས་རང་བྱུང་ཆེན་པོར་རྟོག་པའི་བདུད་ལ་རང་རིག་མཉམ་པའི་རྩིའི་དཀྱིལ་འཁོར་ཡོངས་སུ་རྫོགས་པས་ལྷག་པའི་བྱང་ཆུབ་ཀྱི་སེམས་སུ་ཤར་བ་ཉིད་ན་དོན་དམ་པའི་རྩིས་སྤྲོས་པའི་དུག་འཇོམས། རྫོགས་སྐུ་ཡེ་ཤེས་ཀྱི་རྩིས་ཕུང་ཁམས་སྐྱེ་མཆེད་ཀྱི་བདུད་འཇོམས་པར་རང་བྱུང་དོན་གྱི་བདུད་རྩི་ཆེན་པོར་སངས་རྒྱས་ཏེ་མཐར་ཐུག་པར་གྱུར་པས་སྐྱེད་དུ་བྱ་བ་མེད་པའོ། །ཞེས་དེ་སྐད་ངེས་པར་གསུངས་ཏེ་བཀའ་སྩལ་པ་ལས།

གཉིས་པ་རྒྱས་པར་བཤད་པ་ལ་གསུམ་སྟེ། རྫས་ལྔ་བདུད་རྩི་ལྔ་ཡིན་པར་ཞུས་པ། ལན་དུ་རང་བྱུང་ཡེ་ཤེས་ཉིད་བདུད་རྩིར་གསུངས་པ། རྫས་ལྔ་རང་བྱུང་གི་བདུད་རྩི་ཡིན་པའི་དྲིས་ལན་འཕྲོས་སུ་བསྟན་པའོ། །དང་པོ་ནི།

ནག་པོ་ཀཱ་ལས། ཞེས་པ་ནས། ངེས་པར་བདུན་པ་ལས། །ཞེས་པའི་བར་གྱིས་བསྟན་ཏེ།

ནག་པོ་ཀ་ལས་དོན་གསོལ་བ། །རང་བཞིན་སྣང་བའི་ལུས་འདི་ལས། །ཡོ་བྱད་ཆེན་པོ་ལྔ་བྱུང་བ།།

དུག་ལྔ་སེལ་བའི་བདུད་རྩི་སྟེ། །དྲང་སྲོང་རྣམས་ཀྱི་སྨན་གྱི་མཆོག །དེ་སྐད་ངེས་པར་འདུན་པ་ལས།།

ནག་པོ་ཆེན་པོ་ཉིད་ཀཱ་ལའི་སྒྲ་སྟེ། དེས་ན་ཀཱ་ལས་སླར་ཡང་སྟོན་པ་ལ་དོན་གསོལ་ཏེ་ཞུས་པ། སྟོན་པ་མཆོག་གི་ཐུགས་རྗེའི་བྱིན་རླབས་རང་བཞིན་ལྷུན་གྲུབ་ཏུ་སྣང་བའི་ངང་ནས་སྒྲོ་སྐུར་མེད་པར་བཀའ་སྩལ་བའི་རྒྱུད་ཀྱི་ལུང་ཆེན་པོ་འདི་ཉིད་ལས་ནི། ལུས་ལ་བཀོད་པའི་རྨད་དུ་བྱུང་བའི་ཡོ་བྱད་ཆེན་པོ་དམ་རྫས་ལྔ་རུ་རང་བྱུང་བ་ནི། དེས་དུག་ལྔ་དང་ནད་ལྔ་ལ་སོགས་པ་སེལ་བའི་བདུད་རྩི་ཆེན་པོ་འགྲུབ་པའི་རྒྱུ་ལྔར་གསུངས་པ་སྟེ་འགྲོ་བའི་དུག་ལྔ་འབྱིན་པས་བདུད་རྩི་རྒྱལ་བ་དང་དྲང་སྲོང་རྣམས་ཀྱི་སྤྱད་པར་བྱ་བའི་སྨན་གྱི་མཆོག་ཆེན་པོ་ཉིད་ལགས་སོ། །ཞེས་དེ་སྐད་ངེས་པར་འདུན་པའི་སྒོ་ནས་ཞུས་པ་ལས།

གཉིས་པ་ལན་དུ་རང་བྱུང་ཡེ་ཤེས་ཉིད་བདུད་རྩིར་གསུངས་པ་ནི།

སྨན་པ་དམ་པས། ཞེས་པ་ནས། མི་གསུང་བར་བཞུགས་སོ། །ཞེས་པའི་བར་གྱིས་བསྟན་ཏེ།

སྨན་པ་དམ་པས་འདི་སྐད་གསུངས། །རངབྱུང་གདོད་ནས་དག་པ་སྟེ། །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་བའི་རྫས། །རྒྱུད་ལྔའི་སེམས་ཅན་ཀུན་སྒྲོལ་ཕྱིར། །དུག་ལྔ་སེལ་བའི་བདུད་རྩི་མཆོག །དེ་སྐད་ཅེས་གསུངས་ནས་ཅི་ཡང་མི་གསུངས་པར་བཞུགས་སོ།།

སྟོན་པ་གསང་བ་མཆོག་གི་བདག་པོ་སྨན་པ་དམ་པས་ལན་དུ་ཀཱ་ལའི་ཞུ་བའང་མ་ནོར་བའི་དོན་དུ་བཀའ་སྩལ་པ་འདི་སྐད་གསུངས་ཏེ། གསང་སྔགས་གསང་བའི་སྨན་གྱི་ཁྱད་པར་ཕྱི་ནང་གསང་བའི་སྐབས་ཀྱིས་འདིར་ནང་དང་གསང་བར་སྐབས་སུ་ངེས་པ་ནི། ནང་གི་སྨད་པའི་རྫས་ལྔའི་ཡང་རྒྱུ་རུ་གྱུར་པ་འབྱུང་བ་ཉིད་ཀྱང་གསང་བ་རང་རིག་པ་བྱང་ཆུབ་ཀྱི་སེམས་རང་བྱུང་གི་ཡེ་ཤེས་སུ་རང་བྱུང་བ་ཉིད་ལས་གདོད་ནས་རྒྱུ་རྐྱེན་གྱིས་མ་བསྐྱེད་པར་རང་ཤར་ཞིང་མཐའི་སྐྱོན་ཉིད་རྣམ་པར་དག་པ་ཉིད་ཀྱི་ཕྱིར་རང་བཞིན་ལྷའི་དཀྱིལ་འཁོར་དུ་སྣང་བ་སྟེ། རྡོ་རྗེ་སེམས་༼༢༦༽དཔའ་སྒྱུ་འཕྲུལ་དྲྭ་བའི་རྒྱུད་ལས། རྒྱུ་ཡི་མཚན་ཉིད་དག་པ་ནི། །ཕྱི་རོལ་ཆེན་པོ་ལྔ་རྣམས་ཏེ། །རྒྱུ་ཉིད་རང་གི་སེམས་ཡིན་པས། །འབྱུང་བ་ཆེན་པོ་རྒྱུ་ལས་དག །འབྲས་བུ་ཡོངས་སུ་དག་པ་ནི། །སེམས་ཅན་ཀུན་གྱི་རུས་པ་སྟེ། །རྡོ་རྗེ་བྱང་ཆུབ་སེམས་ཡིན་ལ། །ཤ་ནི་པདྨའི་རཀྟ་ཡིན། །དྲི་ཆེན་དྲི་ཆུ་གུར་གུམ་ཆུ། །སོ་སོའི་ལུས་ལ་གནས་པ་དག །ཅེས་གསུངས་པའི་དོན་ཏོ། །དེ་བས་ན་གསང་བའི་སེམས་རྣམ་པར་ཤེས་པའི་ཚོགས་བརྒྱད་ཀྱི་རྩ་བ་ལས། རིག་པ་སྣང་སྟོང་གཉིས་སུ་མེད་པར་རྟོགས་པའི་སྨན་པ་ཆེན་པོ་སྟེ། ཚོགས་བརྒྱད་ཉིད་རིགས་ལྔ་ཡེ་ཤེས་ལྔའི་དངོས་གཞིའོ། །ནང་དུ་བྱང་ཆུབ་སེམས་ཀྱི་རྩ་བ་བརྒྱད་ནི། ཡབ་ཀྱི་རྒྱུ་བཞི་ཡུམ་གྱི་གནས་བཞིའོ། །དེ་ལྟར་མཱཾ་ས་ལ་སོགས་པ་གཅིག་ཀྱང་རྩ་བ་བརྒྱད་བརྒྱད་སྣང་བས་ན། ཡན་ལག་སྟོང་དུ་བྱུང་བ་རྣམས་ལས་སྦྱར་ཏེ་གཅིག་ཏུ་བསྲེས་པའི་སྨན་གྱི་བདུད་རྩི་ནི། གདོད་ནས་རིགས་ལྔ་དང་ཡེ་ཤེས་ལྔར་གྲུབ་པའི་ངོ་བོ་དམ་ཚིག་མཆོག་གི་རྫས་ལྔ་ཡི་དངོས་པོར་ཤར་བ་ཉིད་དེ། བདུད་རྩི་ཆེན་པོའི་རྒྱུད་ལས། དྲི་ཆེན་གསེར་མདོག་རྣམ་སྣང་མཛད། །བྱང་ཆུབ་སེམས་ནི་དཀར་བས་ན། །མཱཾ་ས་འབྱུང་ལྡན་ཡིད་བཞིན་སྔོ། །རཀྟ་ཆགས་མེད་དམར་བས་ན། །དྲི་ཆུ་དག་བྱེད་ལྗང་གུའི་མདོག །ཅེས་གསུངས་ཤིང༌། རྔམ་གློག་ལས། དྲི་ཆེན་སྣང་མཛད་གཙོ་བོ་ཡིན། །དྲི་ཆུ་གདོན་མི་ཟ་གྲུབ་པ། །རཀྟ་སྣང་བ་མཐའ་ཡས་སྐུ། །མཱཾ་ས་རིན་ཆེན་འབྱུང་ལྡན་གཙོ། །བྱང་ཆུབ་སེམས་ནི་རྡོ་རྗེ་སེམས། །ཞེས་སོགས་ཤིན་ཏུ་མང་ངོ༌། །དེ་ལྟ་བས་ན་ཡེ་ཤེས་ལྔ་ཉིད་རྫོགས་པའི་དོན་གྱི་དངོས་གྲུབ་སྒྲུབ་པར་བྱེད་པའི་རྟེན་གྱི་ཕྱིར་རྫས་ཏེ། འདིས་ན་དོན་ཀྱང་ནང་གི་ཚུལ་ཁོ་ནར་རིགས་སོ། །དེས་གཙང་སྨེ་ལ་སོགས་པའི་རྟོག་པའི་གྲངས་ཇི་སྙེད་པ་ལས་གྲོལ་བའི་བྱིན་རླབས་ཀྱིས་འགྲོ་བ་ལམ་རྒྱུད་ལྔའི་སེམས་ཅན་ཀུན་དབྱིངས་སུ་སྒྲོལ་བར་བྱེད་པའི་ཕྱིར་གྱི་གཏན་ཚིགས་དེས་ན། དུག་ལྔ་རྩ་བ་ནས་གཅོད་ཅིང་སེལ་བའི་ཡང་བདུད་རྩི་ཆེན་པོ་མཆོག་ཏུ་གྱུར་པའོ། །དེ་སྐད་ཅེས་གསུངས་ནས་ཀཱ་ལའི་རྟོགས་ཚད་བརྟག་པའི་ཆེད་དུ་ཅང་མི་གསུང་བར་བཞུགས་སོ།།

གསུམ་པ་རྫས་ལྔ་རང་བྱུང་གི་བདུད་རྩི་ཡིན་པའི་དྲིས་ལན་འཕྲོས་སུ་བསྟན་པ་ལ་བདུན་ཏེ། རྫས་ལྔ་རང་བྱུང་བདུད་རྩི་ཡིན་པའི་དྲིས་ལན། དེ་མིན་ན་རང་བྱུང་མི་རྙེད་པའི་དྲིས་ལན། སྤང་དུ་མི་བཏུབ་པས་ན་རང་བྱུང་ཡིན་པར་སྨྲས་༼༢༧༽པའི་ལན། ཕན་འདོགས་པས་བདུད་རྩི་ཡིན་པར་སྨྲས་པའི་ལན། རྒྱལ་བའི་དམ་ཚིག་ཡིན་པས་བདུད་རྩི་ཡིན་པར་སྨྲས་པའི་ལན། རྟག་ཅིག་མི་འབྲལ་བས་དམ་ཚིག་ཡིན་པར་སྨྲས་པའི་ལན། སྤང་ན་མཉམ་པ་དང་འགལ་བར་སྨྲས་པའི་ལན་ནོ། །དང་པོ་ནི།

དེ་ནས་ཀཱ་ལ། ཞེས་པ་ནས། དམ་པས་དེ་སྨྲས་པས། །ཞེས་པའི་བར་གྱིས་བསྟན་ཏེ།

དེ་ནས་ཀ་ལ་ནག་པོས་ཡང་གསོལ་པ། །རང་ལས་བྱུང་བས་གཞན་དུ་མིན། །དྭངས་སྙིགས་ཁོ་ནར་ཟད་པས་

དག །རྩ་བ་བརྒྱད་དང་ཡན་ལག་སྟོང་། །གཉིས་སྦྱར་ལྔ་དག་རྫོགས་པར་འགྱུར། །དེ་སྐད་ཞུ་བ་འདུན་པ་ལས།།

འཁོར་དེར་འདུས་པར་གྱུར་བའི་སྲས། །བློ་གྲོས་ཐབས་ལྡན་ཁྱེད་ཉིད་ཀྱིས། །ཞེན་པ་དགྲོལ་བའི་ཐབས་འདི་སྨྲས། །ཟག་པ་ཕྱི་མའི་རྫས་ལྔ་པོ། །འབྱུང་བ་དང་ནི་ཟས་ཁམས་ཀྱིས། །རྒྱུན་གྱི་རྒྱུ་ལས་བྱུང་བས་ན། །རང་ལས་མ་བྱུང་གཞན་འབྱུང་ཡིན། །གྲོགས་པོ་དམ་པ་དེས་སྨྲས་པ།།

དེ་ནས་ཀཱ་ལ་ནག་པོས་ཡང་རང་གི་འདོད་པའི་དོན་གྱི་རྟོགས་ཚད་སྟོན་པ་དང་མི་མཐུན་པའི་ཁྱད་པར་སྙན་དུ་གསོལ་བ་ནི། དམ་རྫས་ལྔ་བདག་རང་ཉིད་ཀྱི་ལུས་ལས་བྱུང་བའི་ཕྱིར་ཏེ་དེ་བས་ན་གཞན་ལས་བྱུང་བ་མིན་པས་རང་བྱུང་སྟེ། འབྱུང་བ་དང་བཟའ་བཏུང་གི་དྭངས་མ་དང་སྙིགས་མ་ཁོ་ནར་ངེས་པར་གཟུང་བ་ཙམ་དུ་ཟད་པ་དག་ལས་གཞན་མེད་པས་ཕྱི་ནང་གི་རྩ་བ་བརྒྱད་བརྒྱད་དང་ཡན་ལག་སྟོང་གནས་པའི་ཀུན་རྫོབ་བྱང་ཆུབ་སེམས་ཀྱི་རྩ་བ་དང་ཡན་ལག་ཏུ་སྨོས་པ་གཉིས་སྦྱར་བས་ཡེ་ཤེས་ལྔ་དང་རིགས་ལྔའི་གོ་འཕང་དག་ཀྱང་མཐར་ཐུག་ཏུ་རྫོགས་པར་འགྱུར་རོ། །དེ་སྐད་ཅེས་ཞུ་བ་འདུན་ཏེ་གསོལ་བ་ལས། དུས་དེའི་ཚེ་སྟོན་པ་ལ་བཀུར་བ་དང་ཀཱ་ལའི་རྟོག་པ་བསལ་བའི་ཚུལ་གྱིས། འཁོར་དེར་འདུས་པར་གྱུར་པ་འཆད་པའི་སྟོན་མཆོག་གསང་བདག་ཆེན་པོའི་ཐུགས་ཀྱི་སྲས་དམ་པ་ལང་ཀ་བློ་གྲོས་ཐབས་ལྡན་ཁྱོད་ཀྱང་འཁོར་དེ་ན་གནས་པ་ཉིད་ཀྱིས་ཀཱ་ལའི་ཞེན་པ་དགྲོལ་བའི་ཕྱིར་ཐབས་འདི་ཉིད་ལན་དུ་སྨྲས་པ་ནི། ལུས་ཀྱི་ཟག་པ་ཕྱིར་འབྱུང་བས་ཕྱི་ས་དང་དྲི་ཆུ་ལ་སོགས་པ་དྭངས་མ་དང་སྙིགས་མའི་རྫས་ལྔ་པོ་རྣམས་ནི། ལུས་ཀྱི་འབྱུང་བ་བཞི་དང་ནི་ཟས་ཁམས་ཀྱི་བཟའ་བཏུང་ལ་སྤྱོད་པ་རྒྱུན་དུ་མ་བྲལ་བ་ཉིད་ཀྱི་རྒྱུ་ལས་འབྱུང་བས་ན། ཀཱ་ལ་ཁྱོད་ཀྱིས་སྨྲས་པ་ནི་རང་ལས་མ་བྱུང་བས་རང་བྱུང་མིན་ཏེ་གཞན་ཟས་ཀྱི་རྒྱུ་མཐུན་ལས་བྱུང་བ་ཁོ་ན་ཡིན་ནོ། །ཞེས་བདུད་རྩིའི་གོལ་ས་གཅོད་པའི་ཕྱིར་གྲོགས་པོ་དམ་པས་སུན་དབྱུང་བ་གཏར་ཀ་གེགས་སེལ་གྱི་ཚུལ་དུ་རྫས་ལྔ་རང་བྱུང་མ་ཡིན་པའི་ཚིག་དེ་སྐད་ཅེས་སྨྲས་པས།

གཉིས་པ་དེ་མིན་ན་རང་བྱུང་མི་རྙེད་པའི་དྲིས་ལན་ནི།

ཀཱ་ལ་ནག་པོས། ཞེས་པ་ནས། རང་བྱུང་ཉིད་དུ་འདོད། །ཅེས་པའི་བར་གྱིས་བསྟན་ཏེ།

ཀ་ལ་ནག་པོས་ཡང་སྨྲས་པ། །ཇི་ལྟར་གལ་ཏེ་དེ་ལྟར་ན། །འགལ་བ་ཉིད་དུ་ཡིན་ཟིན་ན། །རང་བྱུང་རང་བྱུང་ཞེས་བྱ་བའི། །ཆོས་དེ་གང་ནས་རྙེད་པར་འགྱུར། །དེ་སྐད་དྲི་བ་དྲིས་པ་དང་། །དམ་པ་ཉིད་ཀྱིས་དེ་བླན་པ། །རྒྱུ་དང་རྐྱེན་ལས་མ་རྟེན་པར། །གང་ཞིག་འབྱུང་བའི་ཆོས་ཡོད་ན། །གཞན་ལས་མ་བྱུང་བྱེད་མེད་པས།།

ཆོས་དེ་རང་བྱུང་ཉིད་དུ་འདོད།།

ཀཱ་ལ་ནག་པོས་གྲོགས་པོ་ཆོས་ཀྱི་སྤུན་ལང་ཀ་ལ་ཡང་དེའི་དོན་ཉིད་དྲི་བའི་ཚིག་སྨྲས་པ། ཚུལ་ཇི་ལྟར་ན་༼༢༨༽གལ་ཏེ་དམ་རྫས་ལྔ་པོ་གཞན་ལས་བྱུང་བ་དེ་ལྟར་ན་རང་བྱུང་མ་ཡིན་པར་འགལ་བ་ཉིད་དུ་འགྱུར་བ་ཡིན་དུ་ཟིན་ན། རང་བྱུང་རང་བྱུང་ཞེས་བྱ་བའི་ཆོས་དེ་ཉིད་གང་ནས་རྙེད་པར་འགྱུར་ཏེ་གཞན་གང་ལས་ཀྱང་རྙེད་པར་མི་འགྱུར་རོ། །ཞེས་དེ་སྐད་དུ་དྲི་བ་དྲིས་པ་ལས། ལང་ཀའི་བདག་པོ་དམ་པ་ཉིད་ཀྱིས་དེ་ལ་སླར་ཡང་ལན་བླན་ཏེ་སྨྲས་པ་ནི། གང་རྒྱུ་དང་རྐྱེན་ལ་མ་བརྟེན་པར་གང་ཞིག་རང་བྱུང་དུ་འབྱུང་བའི་ཆོས་ཤིག་ཡོད་པར་གྱུར་ན། དེ་ནི་རྒྱུ་རྐྱེན་གཞན་ལས་མ་བྱུང་ཞིང་དེ་ལ་སྐྱེད་པར་བྱེད་པའི་མཁན་པོ་གང་ཡང་མེད་པར་ངེས་པས་ན། ཆོས་དེ་ཉིད་ནི་རང་བྱུང་ཉིད་དུ་འབྱུང་བར་ངེས་པར་འདོད་པ་ཡིན་ཏེ། ཀུན་བྱེད་ལས། རང་བྱུང་ཞེས་ནི་བྱ་བ་ནི། །རྒྱུ་རྐྱེན་མེད་པའི་སྙིང་པོ་པས། །རྩོལ་སྒྲུབ་ཀུན་ལས་འདས་པ་ཡིན། །ཞེས་གསུངས་པ་ལྟ་བུའོ།།

གསུམ་པ་སྤང་དུ་མི་བཏུབ་པས་ན་རང་བྱུང་ཡིན་པར་སྨྲས་པའི་ལན་ནི།

དེ་སྐད་སྨྲས་པས། ཞེས་པ་ནས། འགག་ན་དེ་རྒྱུན་འགག །ཅེས་པའི་བར་གྱིས་བསྟན་ཏེ།

དེ་སྐད་སྨྲས་པ་དེའི་ལན་དུ། །ཀ་ལ་ནག་པོས་འདི་སྐད་དུ། །སྤངས་པས་སྤོང་བར་མི་འགྱུར་ཏེ།།

བདག་ལས་རྒྱུན་དུ་འབྱུང་བའི་ཆོས། །གཞན་ལས་མ་བྱུང་རྒྱུ་འབྲས་མེད། །ཆོས་དེ་གང་ཡིན་རང་བྱུང་ཡིན།།

དེ་ལ་དེ་ཡིས་འདི་སྐད་དུ། །མི་སྤང་དང་དུ་བླང་བའི་ཆོས། །དུས་དང་རྣམ་པ་ཐམས་ཅད་དུ།།

འདུ་བྲལ་མེད་པར་གནས་འོས་ན། །འབྱུང་རྒྱུན་འགགས་ན་དེ་རྒྱུན་འགགས།།

ཞེས་དེ་སྐད་ཅེས་སྨྲས་པས། དེ་ཡི་ལན་ཏུ་སླར་ཡང་ཀཱ་ལ་ནག་པོས་འདི་སྐད་དུ་སྨྲས་ཏེ། ཉོན་མོངས་པ་ལྔ་དང་དམ་རྫས་སྨད་པ་རྣམས་ཆེད་དུ་སྤངས་པས་སྤོངས་པར་མི་འགྱུར་ཏེ་བདག་ཉིད་ཀྱི་ལུས་དང་སེམས་ལས་དུས་ཀྱི་རྒྱུན་དུ་འབྱུང་བའི་ཆོས་སུ་གྱུར་པ་ཉིད། རྒྱུ་རྐྱེན་གཞན་ལས་མ་བྱུང་བས་གཞན་གྱི་རྒྱུ་འབྲས་མེད་པའི་ཕྱིར། རྫས་ལྔའི་ཆོས་དེ་གང་ཡིན་པ་ནི་རང་བྱུང་ཡིན་པར་ངེས་པའོ། །ཞེས་སྨྲས་པ་དེ་ལ་ལང་ཀ་དེ་ཡིས་སླར་ཡང་ལན་དུ་འདི་སྐད་དུ་སྨྲས་ཏེ། མི་སྤང་ཞིང་དང་དུ་བླང་བའི་ཆོས་ཉོན་མོངས་པ་ལྔ་དང་དམ་རྫས་ལྔ་པོ་རྣམས་ཁྱོད་ལྟར་རང་ཁོ་ན་ལས་བྱུང་བ་ཡིན་ན། དུས་དང་རྣམ་པ་ཐམས་ཅད་དུ་ བདག་ཉིད་དང་ཐོག་མར་འདུ་བ་དང་ཐ་མར་འབྲལ་བ་མེད་པར་གཏན་དུ་གནས་པ ་ཉིད་དུ་འོས་ཞིང་རིགས་པ་ཡིན་ན། སེམས་ཀྱི་བག་ཆགས་དང་ལུས་ཀྱི་འབྱུང་བ་དང་བཟའ་བཏུང་གི་རྒྱུན་འགག་ཅིང་ཆད་དེ་ཤི་ན་དེ་དག་ཀྱང་རྒྱུན་འགག་སྟེ་ཆད་པར་འགྱུར་བས་བདག་ལས་གཏན་དུ་མི་འབྱུང་བའི་ཕྱིར་མི་བདེན་པར་གསལ་ལོ། །ཞེས་ལན་བཏབ་བོ།།

བཞི་པ་ཕན་འདོགས་པས་བདུད་རྩི་ཡིན་པར་སྨྲས་པའི་ལན་ནི།

དེ་ལ་འདི་ལྟར། ཞེས་པ་ནས། མཐུ་དང་ཡོང་མི་ལྡན། །ཞེས་པའི་བར་གྱིས་བསྟན་ཏེ།

དེ་ལ་འདི་ལྟར་འདི་སྐད་དུ། །ནག་པོ་ཀ་ལས་སླར་བླན་པ། །བདུད་རྩི་ཡིན་པས་རང་གཉེར་གྱི། །ལས་རྣམས་སོ་སོར་བྱེད་པར་ནུས། །འཇིག་རྟེན་དག་ན་ཕན་འདོགས་པ། །གང་ནུས་དེ་ལ་རྩི་ཞེས་གྲགས། །དེ་ལ་འདིར་ནི་འདི་སྐད་དུ། །གྲོགས་མཆོག་དམ་པས་དེ་ལོན་པས། །བདུད་རྩི་ཞེས་ནི་བརྗོད་པ་ལ། །བདུད་རྩིའི་ལས་ནི་གཉིས་ཡོད་དེ། །ནད་གསོ་ཤི་བ་སློང་བྱེད་ན། །དེ་གཉིས་མཐུ་དང་ཡོང་མི་ལྡན།།

ལང་ཀའི་གཏམ་༼༢༩༽དེ་ལ་ཀཱ་ལས་འདི་ལྟར་ཡང་ལན་འདི་སྐད་དུ་ཞུས་ཏེ། ནག་པོ་ཀཱ་ལས་སླར་བླན་པ། སྨད་པ་ལྔ་ཉིད་བཅུད་མཆོག་བདུད་རྩི་ཡིན་པས། རང་གཉེར་གྱི་ལས་རྣམས་སོ་སོར་བྱེད་པར་ནུས་ཏེ། དྲི་ཆུས་སྐད་སྙན་པ་ལ་སོགས་པ་དང༌། དྲི་ཆེན་གྱི་དུག་ཐུབ་པ་དང༌། ཤ་ཆེན་གྱི་མཛེ་ཐུབ་པ་དང༌། པདྨའི་རཀྟས་ཐོར་སྨྱོན་དང་གཞན་དུ་གྲང་བ་ཐུབ་པ་དང༌། བྱང་ཆུབ་སེམས་ཀྱི་ཚ་བའི་ནད་ཐུབ་པ་དང༌། དྲི་ཆུས་གླང་སྣ་དང་གག་པ་ཐུབ་པ་དང་རིགས་ལྔ་གྲུབ་པའི་ནུས་མཐུ་ཡོད་པས། འཇིག་རྟེན་དག་ན་ཡང་དེ་ལྟ་བུར་ཕན་འདོགས་པ་གང་གིས་ནུས་པ་ཡོད་པ་དེ་ལ་བདུད་རྩི་ཞེས་གྲགས་པས་འཇིག་རྟེན་དང་མི་འགལ་བའི་ཕྱིར་བདུད་རྩི་ཡིན་ནོ། །ཞེས་སྨྲས་པ་དེ་ལ་འདིར་ནི་འདི་སྐད་དུ། ཆོས་ཀྱི་གྲོགས་མཆོག་དམ་པས་ལན་དེ་ཉིད་ཉེ་བར་བླན་པ། ཆོས་ཀྱི་སྤུན་ཀཱ་ལ་ཁྱོད་ཀྱིས་དེ་ལྟར་མ་ཡིན་ཏེ། སྤྱིར་བདུད་རྩི་ཞེས་ནི་དེ་ལྟར་གྲགས་ཤིང་བརྗོད་པ་ལ་བདུད་རྩིའི་ལས་ནི་ངེས་ཚིག་རྣམ་པ་གཉིས་ཀྱིས་གྲུབ་པ་ཡོད་དེ། རྟོག་པའི་ནད་རྣམས་གསོ་བ་དང༌། འཁོར་བར་ཤི་བ་སློང་བར་བྱེད་པ་ཡིན་པའི་ཕྱིར་ན། ཁྱོད་ཀྱིས་བདུད་རྩི་ལ་ལས་དེ་གཉིས་ཀྱིས་མཐུ་དང་ཡོང་ཡེ་མི་ལྡན་པའི་ཕྱིར་མ་ཡིན་ནོ། །དེ་ཅིའི་ཕྱིར་ཞེ་ན། འོན་ཏེ་དེ་དག་དང་ལྡན། ཕྱིན་ཆད་བདག་ཉིད་ཀྱི་རྒྱུན་འགགས་པ་མི་རིགས་པའི་ཕྱིར་རོ། །ཞེས་པའོ།།

ལྔ་པ་རྒྱལ་བའི་དམ་ཚིག་ཡིན་པས་བདུད་རྩི་ཡིན་པར་སྨྲས་པའི་ལན་ནི།

དེ་སྨྲས་ལན་དུ། ཞེས་པ་ནས། ཆད་ནས་འབྲལ་འགྱུར་འགལ། །ཞེས་པའི་བར་གྱིས་བསྟན་ཏེ།

དེ་སྨྲས་ལན་དུ་འདི་སྐད་དུ། །ཀ་ལ་ནག་པོས་དེ་བླན་པ། །སྔོན་གྱི་རྒྱལ་བ་གྲངས་མེད་པས། །བརྟུལ་ཞུགས་འདི་ལྔ་གཙོར་བྱས་ནས། །དམ་ཚིག་དམ་པར་བཟུང་བས་ན། །སྔོན་གྱི་དམ་ཚིག་ཡིན་པར་གྲགས། །དེ་ལ་དམ་པས་འདི་སྐད་དུ། །སངས་རྒྱས་དམ་ཚིག་ཡིན་ངེས་ན། །དང་པོ་ནས་བཟུང་རྫོགས་བར་དུ། །དེ་དང་མི་འབྲལ་ལྡན་དགོས་ན། །ཟག་རྒྱུན་ཆད་ནས་འབྲལ་འགྱུར་འགལ།།

ལང་ཀ་ཐབས་ལྡན་གྱིས་དེ་སྐད་སྨྲས་པའི་ལན་དུ་སླར་ཡང་འདི་སྐད་དུ་ཀཱ་ལ་ནག་པོ་དེས་བླན་པ། སྔོན་གྱི་རྒྱལ་བ་གྲངས་མེད་པ་རྣམས་ཀྱིས་བཀའ་རྒྱུད་ལས་དམ་རྫས་ཀྱི་བརྟུལ་ཞུགས་འདི་ལྔ་སྤྱད་པར་བྱ་བའི་གཙོར་བྱས་ནས། དང་དུ་བླང་བའི་དམ་ཚིག་དམ་པར་བཟུང་སྟེ་གསུང་བས་ན། སྔོན་གྱི་དམ་ཚིག་ཡིན་པར་གྲགས་པའི་ཕྱིར་བདུད་རྩི་ཡིན་ནོ། །ཞེས་ལན་བཏབ་པ་དེ་ལ་ལང་ཀ་དམ་པས་ལན་འདི་སྐད་དུ་མཛད་དེ། གལ་ཏེ་རྫོགས་པའི་སངས་རྒྱས་ཀྱི་དམ་ཚིག་རྒྱལ་བའི་ཐུགས་དམ་ཡིན་པར་ངེས་ན། རྒྱལ་བའི་ཐུགས་དམ་ལ་འདུ་འབྲལ་མེད་པས་དམ་རྫས་ལྔ་ཡང་དང་པོ་སེམས་བསྐྱེད་བླངས་ནས་དམ་ཚིག་ཏུ་བཟུང་༼༣༠༽བ་དང་མཐར་མངོན་པར་རྫོགས་ཏེ་སངས་རྒྱས་པའི་བར་དུ་དམ་རྫས་དེ་དག་དང་མི་འབྲལ་བར་ལྡན་ཞིང་འགྲོགས་དགོས་པ་ཡིན་ན། འདི་ནི་མཐར་ཟག་པ་ཟད་པའི་དངོས་གྲུབ་ཐོབ་ན་ཡང་མི་འབྱུང་བའི་ཕྱིར་མི་བདེན་པ་དང༌། འབྱུང་བ་དང་བཟང་བཏུང་གི་རྒྱུན་ཆད་ན་ཡང་འབྲལ་བར་འགྱུར་ཞིང་མི་འབྱུང་སྟེ་འགག་པས་མི་བདེན་པའི་ཕྱིར་རྒྱལ་བའི་དམ་ཚིག་ཏུ་འགལ་བ་ཡིན་ནོ། །ཞེས་ལན་བཏབ་བོ།།

དྲུག་པ་རྟག་ཅིང་མི་འབྲལ་བས་དམ་ཚིག་ཡིན་པར་སྨྲས་པའི་ལན་ནི།

དེ་ལ་ཀཱ་ལས། ཞེས་པ་ནས། ཀུན་སྣང་ཟག་ལམ་ཟད། །ཅེས་པའི་བར་གྱིས་བསྟན་ཏེ།

དེ་ལ་ཀཱ་ལས་འདི་སྐད་དུ། །བདག་དེ་རྟག་པར་གྱུར་པ་ཡིས། །ཟག་པ་འདི་ཡང་རྟག་པ་སྟེ། །ཀུན་ནས་ཀུན་ཏུ་མི་འབྲལ་ཞིང་། །ཟད་ནས་བྲལ་བ་ག་ལ་ཡོད། །དེ་ལ་དམ་པས་འདི་སྐད་དུ། །ཕྱི་དང་ནང་གི་ཟག་པ་རྣམས། །ཐམས་ཅད་ཐམས་ཅད་ཀུན་ཟད་པར། །ས་དང་རྣམ་ཐར་ལམ་རྣམས་ལྟ། །ཅི་སྨོས་ཀུན་སྣང་ཟག་པ་ཟད།།

དེ་སྐད་སྨྲས་པ་ལ་ཀཱ་ལས་སླར་ཡང་ལན་འདི་སྐད་དུ་ཞུས་ཏེ། གང་ཟག་གི་བདག་དེ་ཉིད་རྟག་པ་ཅན་དུ་ངེས་པར་གྱུར་པ་ཡིས་ཕྱིར་ན། དམ་རྫས་ཀྱི་ཟག་པ་ལྔ་པོ་དེ་ཡང་རྟག་པ་ཡིན་ཏེ་དེས་ན་ཀུན་ནས་ཀུན་ཏུ་མི་འབྲལ་ཞིང་ལྡན་པ་ལ་དེ་ཟད་ནས་བྲལ་བར་གྱུར་པ་ག་ལ་ཡོད་དེ་མེད་དོ་བར་ཞུས་པའོ། །ཚིག་འདིས་ཀྱང་མུ་སྟེགས་ཞར་བྱུང་བའི་ཆེད་དུ་ཞུས་པར་གསལ་ལོ། །དེ་ལ་ཡང་ལན་དུ་ལང་ཀ་དམ་པས་འདི་སྐད་དུ་གསུངས་ཏེ། དེ་ལ་ཕྱི་ཡི་ཟག་པ་དམ་རྫས་ལྔ་དང་ནང་ཟག་པ་ཉོན་མོངས་པ་དང༌། དམ་པ་རིན་པོ་ཆེའི་ཞལ་ནས། ཞར་ལ་གསང་བའི་ཟག་པ་བདག་ཏུ་རྟོག་པ་དང་གཟུང་འཛིན་ནོ། །ཞེས་གསུངས་ལ། དེ་ལྟར་ལུས་ལ་གནས་ཤིང་རྟེན་པའི་ཕྱི་དང་ནང་གི་ཟག་པ་རྣམས། ཆོས་ཉིད་དེ་ཁོ་ན་ཉིད་རྟོགས་པའི་སྐབས་ན་ཕྱིའི་ཟག་པ་ཐམས་ཅད་དང་ནང་དང་གསང་བའི་ཟག་པ་ཐམས་ཅད་ཀུན་ཟད་ཅིང་བྲལ་བར་གྱུར་པ་ནི། ས་བཅུ་དང་རྣམ་པར་ཐར་པའི་ལམ་བཅུ་པོ་རྣམས་ལ་གནས་པ་དང༌། གཅིག་ཆར་བ་རྣམས་ཀྱིས་བགྲོད་མི་དགོས་པར་ཤེས་ཤིང་རྟོགས་པ་ན་ངེས་པར་བྲལ་བར་ལྟ་ཡང་ཅི་སྨོས་ཏེ། གཟུགས་ཁམས་པ་ཀུན་སྣང་བའི་གྲོང་ཁྱེར་དང༌། གཟུགས་མེད་པ་ལའང་བཤང་གཅིའི་ཟག་པ་ཟད་དེ་ མེད་པ་ཡིན་ན་བདག ་དང་མི་འབྲལ་བ་ག་ལ་བཏུབ་སྟེ་མི་བཏུབ་བོ། །ཞེས་ལན་བཏབ་སྟེ། དམ་པ་རིན་པོ་ཆེས། ནང་གི་ཉོན་མོངས་པའི་དགྲ་བཅོམ་པའི་དུས་སུ་ཟག་པ་ཟད་པས་ཕྱིའི་ཟག་པ་དང་ཡང་བྲལ་ཏེ་གསང་བའི་ཟག་པ་ནི་ཚོགས་ལམ་གྱི་དུས་སུ་ཟད་པའི་རྒྱུ་དང༌། སྦྱོར་ལམ་གྱི་དུས་སུ་ཟད་པའི་རྐྱེན་དུ་གྱུར་ཏེ་༼༣༡༽མཐོང་ལམ་དུ་ཟད་པ་ཡིན་ཀྱང་གཞན་དོན་དུ་ཟག་པ་ལེན་པ་འབག་གྱོན་པ་ལྟ་བུའོ། །ཞེས་གསུངས་ཏེ་ཟག་པ་དང་བཅས་པའི་མཚན་ཉིད་དང་བསྟུན་པའོ།།

བདུན་པ་སྤང་ན་མཉམ་པ་དང་འགལ་བར་སྨྲས་པའི་ལན་ལ་གཉིས་ཏེ། དྲིས་པ་དང༌། ལན་ནོ། །དང་པོ་ནི།

དེ་ལ་ཀཱ་ལས། ཞེས་པ་ནས། ཉིད་དང་མི་འགལ་ལམ། །ཞེས་པའི་བར་གྱིས་བསྟན་ཏེ།

དེ་ལ་ཀཱ་ལས་འདི་སྐད་དུ། །ཇི་ལྟར་གལ་ཏེ་དེ་ལྟར་ན། །འགལ་བ་ཉིད་དུ་ཡིན་ཟིན་ན།།

ཐམས་ཅད་མཉམ་པ་མཁས་པ་རྣམས། །མཉམ་པ་ཉིད་དང་མི་འགལ་ལམ།།

དེ་ལ་ཡང་ཀཱ་ལས་འདི་སྐད་དུ་ལན་ཞུས་ཏེ། གོང་དུ་བསྟན་པ་ཇི་ལྟ་བ་དེ་ལྟར་གལ་ཏེའམ་བརྒྱ་ལ་དམ་རྫས་ལྔ་པོ་ཡང་དག་པའི་བདུད་རྩི་མ་ཡིན་པ་དེ་ལྟར་དུ་ངེས་པ་ན་དང༌། བདག་གིས་སྨྲས་པའང་འགལ་བ་ཉིད་དུ་གྱུར་ཏེ་ལོག་པ་ཡིན་ཏུ་ཟིན་ན། ཆོས་ཐམས་ཅད་མཉམ་པར་སྨྲ་བ་དང༌། དམ་རྫས་ལྔ་བདུད་རྩི་ཡིན་པ་འགོག་པ་གཉིས་འགལ་བས། རྒྱལ་བ་རྣམས་ཀྱིས་ཆོས་ཐམས་ཅད་མཉམ་པ་ཡིན་པར་བཀའ་སྩལ་ཞིང་ཞལ་གྱིས་འཆེས་པ་རྣམས་དང་མི་མཐུན་པས་མཉམ་པ་ཉིད་དུ་གསུངས་པ་དང་མི་འགལ་ལམ། ཞེས་ཞུས་པའོ།།

གཉིས་པ་ལན་ལ་གསུམ་སྟེ། མ་རྟོགས་ན་མཉམ་པའི་སྤྱོད་པའང་ལོག་པར་འགྲོ་བ། རྫས་ལྔ་མ་བཅོས་པར་རྟོགས་ན་བདུད་རྩིར་འགྲོ་བ། ཡང་དག་པའི་བདུད་རྩིའི་ངེས་ཚིག་བསྟན་པའོ། །དང་པོ་ནི།

དེ་ལ་དམ་པས། ཞེས་པ་ནས། ལོག་པའི་ལམ་པ་ཡིན། །ཞེས་པའི་བར་གྱིས་བསྟན་ཏེ།

དེ་ལ་དམ་པས་འདི་སྐད་དུ། །ཀུན་ཏུ་མ་འདྲེས་མི་ཤེས་པར། །བཟང་པོའི་ཆོས་ལ་བློ་སྟོད་ཅིང་། །ཀུན་ཏུ་བཟང་པོར་ཁས་འཆེས་པ། །མུན་པའི་སྐྱེ་མཆེད་ཉིད་དུ་འགྱུར། །ཡོངས་སུ་རྫོགས་པར་ཀུན་མཉམ་ཡང་། །མ་འདྲེས་པར་ཡང་ཀུན་ཏུ་སྣང་། །ཡོངས་རྫོགས་དོན་དུ་མ་མཐོང་བར། །རྫོགས་སྤྱོད་ལོག་པའི་ལམ་པ་ཡིན།།

དེ་ལ་ཡང་ལང་ཀ་ཐབས་ལྡན་དམ་པས་ལན་འདི་སྐད་དུ་གསུངས་ཏེ། རྩ་བའི་རྒྱུད་ལས། མ་སྐྱེས་པ་དང་མ་བྱུང་བ། །མི་གནས་པ་ལ་ཆགས་པ་མེད། །དོན་གྱི་ཁྱད་པར་རྟོགས་ཆུད་ན། །ཀུན་ཏུ་བཟང་པོ་མཆོག་གི་སའོ། །ཞེས་གསུངས་པ་ལྟར། ཆོས་ཐམས་ཅད་ཀྱི་རང་གི་མཚན་ཉིད་ཀུན་ཏུ་མ་འདྲེས་ལ་ངོ་བོ་ཇི་བཞིན་པར་མཉམ་པའི་གནས་ལུགས་ཡང་དག་པའི་དོན་མཆོག་ཕྱོགས་མེད་རང་གསལ་ཆེན་པོར་མི་ཤེས་ཤིང་མངོན་སུམ་དུ་རྟོགས་པ་མེད་པར། ཡོངས་སུ་རྫོགས་པས་བཟང་པོའི་ཚིག་ཙམ་ལ་བློ་གཏོད་ནས་ཡིད་ལ་བྱེད་ཅིང༌། མཉམ་ཉིད་ཀུན་ཏུ་བཟང་པོར་ཆོས་ཐམས་ཅད་གནས་པ་ཉིད་དུ་ཁས་འཆེས་ཏེ་ཚིག་གི་ལྟ་བ་ལ་བརྟེན་ནས་སྤོང་ལེན་མེད་པར་སྤྱོད་པ་རྣམས་ནི་གཟུགས་མེད་དང་མུ་སྟེགས་ལ་སོགས་པ་མུན་པའི་སྐྱེ་མཆེད་ཉིད་དུ་ལྟུང་བར་འགྱུར་བ་ཡིན་ནོ། །དེ་ཅིའི་ཕྱིར་ཞེ་ན། ཆོས་རྣམས་ཐམས་ཅད་རང་༼༣༢༽བཞིན་ཐིག་ལེ་ཆེན་པོར་ཡོངས་སུ་རྫོགས་པས་རང་རིག་ཆོས་ཀྱི་སྐུའི་ངོ་བོར་ཆེ་ཆུང་མེད་པར་ཀུན་ནས་མཉམ་པ་ཉིད་དུ་གྱུར་པ་ཡིན་ཡང༌། རང་གི་མཚན་ཉིད་ཐ་དད་དུ་བཟང་ངན་ལ་སོགས་པར་སོ་སོར་མ་འདྲེས་པར་ཡང་ཀུན་ཏུ་སྣང་བ་མ་འགགས་སོ། །དེ་བས་ན་མ་འདྲེས་ཡོངས་རྫོགས་དབྱེར་མེད་པའི་དོན་དུ་རང་གསལ་སྤྱོད་ཡུལ་དང་བྲལ་བར་མ་མཐོང་བར་བླང་དོར་མེད་པར་འཁོར་བའི་ཆོས་ལ་རྫོགས་ཚུལ་དུ་སྤྱོད་པར་བྱེད་པ་ནི། ལྟ་བ་ཁ་ལ་ཡོད་ཀྱང་སྙིང་ལ་མེད་པར་སྤྱོད་པ་རྩིང་པོར་ཞུགས་པས་ལོག་པའི་ལམ་པ་ཞེས་བྱ་བ་ཡིན་ཏེ་ངན་འགྲོའི་རྒྱུད་དུ་ཞུགས་པའི་ཕྱིར་རོ།།

གཉིས་པ་རྫས་ལྔ་མ་བཅོས་པར་རྟོགས་ན་བདུད་རྩིར་འགྲོ་བ་ནི།

གསང་ཆེན་ཐེག་པའི། ཞེས་པ་ནས། ངེས་པ་དེ་ཁོ་ནའོ། །ཞེས་པའི་བར་གྱིས་བསྟན་ཏེ།

གསང་ཆེན་ཐེག་པའི་ཚིག་དང་འདྲ། །གཅིག་ལ་མི་གཅིག་སོ་སོར་སྣང་། །ངོ་བོ་ཉིད་ཀྱིས་རྣམ་པར་ཕྱེ།།

གང་ཉིད་ངེས་པར་གྲོལ་བར་སྣང་། །ཉེས་པ་ཟག་འབྱུང་རྩིར་འདོད་ན། །དེ་དག་དེ་བཞིན་མ་བཅོས་པར།།

ཡེ་ནས་སྟོང་ཉིད་རྟོག་པ་མེད། །ཡིན་པར་ངེས་པ་དེ་ཁོ་ནའོ།།

གསང་བ་ཆེན་པོ་བླ་ན་མེད་པའི་ཐེག་པས་དོན་མཚོན་པའི་ཚིག་དང་སྒྲ་ནི། དོན་གཅིག་ལ་སྒྲ་དུ་མར་འགྱུར་བ་དང་སྒྲ་གཅིག་ལའང་དོན་མི་གཅིག་པར་ཐ་དད་སོ་སོར་སྣང་བ་ཡིན་པས་གསང་སྔགས་དོན་གྱི་ངོ་བོ་རྟོགས་པར་དཀའ་བ་ཉིད་ཀྱིས་ན་གཞན་དང་ཁྱད་པར་མཐོང་བ་དང་མ་མཐོང་བའི་སྒོ་ནས་རྣམ་པར་ཕྱེ་སྟེ་གཉིས་སུ་སྣང་བའོ། །རྣལ་འབྱོར་པ་གང་སུ་ཞིག་གིས་ཆོས་ཉིད་མ་ནོར་བར་རྟོགས་ནས་གདེང་དང་ལྡན་པ་ནི་འཆིང་བ་དང་བྲལ་ནས་ངེས་པར་གྲོལ་བར་སྣང་ལ། གལ་ཏེ་དོན་ཇི་བཞིན་དུ་མ་ངེས་ན་བཅིངས་པའི་ངོ་བོ་ཡིན་པས་མ་རྟོགས་པ་དག་གིས་ངེས་པར་ཟག་པའི་འབྱུང་ཁམས་ཁོ་ནར་ཡང་དག་པའི་བདུད་རྩིར་འདོད་ན། དོན་རྟོགས་པར་གཅེས་པས་འདི་ལྟར་ཤེས་པར་བྱ་དགོས་ཏེ། བཤད་པའི་ཟག་པའི་དམ་རྫས་དེ་དག་གི་རང་བཞིན་ཆོས་ཉིད་དེ་བཞིན་ཉིད་རྒྱུ་རྐྱེན་གྱིས་མ་བྱས་ཐ་སྙད་ཀྱིས་མ་བཏགས་པར་དེ་ཁོ་ན་ཉིད་མ་བཅོས་པར་ལྷུན་གྱིས་གྲུབ་པས་ཡེ་གདོད་མ་ནས་ངོ་བོ་མེད་པས་སྟོང་པ་ཉིད་ལ། དེ་ཉིད་དུའང་རྟོག་པ་མེད་པར་དམིགས་པ་དང་བྲལ་བའི་དོན་མ་ནོར་བ་ཡིན་པར་རྟོགས་ན་བཤད་པའི་བདུད་རྩི་ལྔའང་ཡང་དག་པའི་བདུད་རྩི་ཆེན་པོ་ཡིན་པས་མཉམ་པ་ཉིད་དང་འགལ་བ་མེད་པར་ངེས་པའི་གསང་བ་ཇི་བཞིན་པའི་དེ་ཁོ་ན་ཉིད་དུ་གནས་པའོ། །ཞེས་ལན་བཏབ་པའོ།།

གསུམ་པ་ཡང་དག་པའི་བདུད་རྩིའི་ངེས་ཚིག་བསྟན་པ་ནི།

དེ་དག་ཅི་ཕྱིར། ཞེས་པ་ནས། ནད་གསོ་ཤི་སློང་བའོ། །༼༣༣༽ཞེས་པའི་བར་གྱིས་བསྟན་ཏེ།

དེ་དག་ཅི་ཕྱིར་རྩི་ཞེ་ན། །རྣལ་འབྱོར་ནད་ནི་རྣམ་རྟོག་སྟེ། །རྟོག་པས་འཁོར་བའི་གཏིང་མཐར་འཆིང་།།

རྟོག་པའི་རྩ་བ་ཕྱི་ནང་གི །ཀུན་ནས་ཟག་པ་རྣམ་ལྔ་ཡིན། །དེ་ཀུན་དེ་བཞིན་སྟོང་ཉིད་དུ།།

རྟོག་བྲལ་མུ་མཐའ་མེད་བྱུང་བས། །གང་གི་ནད་གསོ་ཤི་སློང་བའི།།

དེ་དག་གི་ཡིད་ཆེས་པའི་རྒྱུ་གང་སྙམ་པ་ལ། དོན་གྱི་ངེས་ཚིག་དང་འབྲེལ་བར་སྟོན་ཏེ། བཤད་པ་དེ་དག་གི་རང་བཞིན་སྟོང་པ་ཆེན་པོ་ལ་ཅི་ཡི་ཕྱིར་བདུད་རྩི་ཞེས་བྱ་ཞེ་ན། རྣལ་འབྱོར་པ་ལམ་པ་རྣམས་ཀྱི་ནད་ཆེན་པོའི་ངོ་བོ་ནི་ཆེད་དུ་བྱས་པ་དང་མ་བྱས་པའི་རྣམ་པར་རྟོག་པ་གཉིས་དང༌། གཟུང་བ་དང་འཛིན་པའི་རྩ་བའི་རྟོག་པ་དང་ཡན་ལག་གི་རྟོག་པ་རྣམས་ཡིན་ཏེ། དེ་དག་གིས་ཡང་དག་པར་སོས་ནས་གྲོལ་དུ་མི་བཏུབ་པའི་ཕྱིར་ཏེ། དེས་ན་རྟག་པར་འཁོར་བའི་ཁྲི་མུན་གྱི་ནང་དུ་འཆིང་ནས་སྲིད་པའི་གཏིང་མཐར་འཆི་བར་བྱེད་པའི་ཕྱིར་བདུད་ཅེས་བྱ་ལ། འོ་ན་དེ་དག་བདུད་རྩིར་འགྱུར་བའི་ཚུལ་ཇི་ལྟ་བུ་ཞེ་ན། རྟོག་པ་འབྱུང་བའི་གཞིའམ་རྩ་བ་ཕྱི་ཡི་རྫས་ལྔ་དང་ནང་གི་ཉོན་མོངས་པ་ལྔ་དང་བཅས་པས་ཀུན་ནས་གཙང་སྨེར་ལྟ་བ་དང༌། འཁོར་བར་ཟག་པར་བྱེད་པ་རྣམ་པ་ལྔ་པོ་ཡིན་པས་དེ་དག་ལས་འཁོར་བའི་གཟུང་འཛིན་དུ་སྣང་བ་འབྱུང་ལ། དེ་དག་རིལ་མ་ལུས་པ་ཀུན་དེ་བཞིན་ཉིད་མཉམ་པ་ཆེན་པོ་མ་འདྲེས་ཡོངས་རྫོགས་ཀྱི་གནས་ལུགས་རང་རང་གི་དེ་ཁོ་ན་ཉིད་ཡོད་སྟོང་གཉིས་ཀ་ལས་གྲོལ་བའི་ངོ་བོ་ཉིད་དུ་ཐག་ཆོད་དེ། རྩ་བའི་རྒྱུད་ལས། མཉམ་ཉིད་སྟོང་པའི་དོན་འདི་ལ། །དོན་ལྡན་སྟོང་པར་སྒྲོ་མི་འདོགས། །མ་བཅོས་རང་བཞིན་ཞི་བ་ཡི། །མཚན་མའི་རྟོག་བྲལ་ཤེས་ལྡན་པས། །མེད་དོ་ཙམ་དུའང་མི་དམིགས་ན། །བྱུང་ཚོར་འཛིན་པར་ག་ལ་འགྱུར། །ཐམས་ཅད་མི་གནས་བྱང་ཆུབ་པས། །བཙལ་ནས་གྲུབ་པ་མ་ཡིན་ཡང༌། །སྒྱུ་མ་སངས་ནས་འཁྲུལ་བྲལ་བཞིན། །སྤྲོས་བྲལ་ཡེ་ཤེས་སྙིང་པོར་གནས། །ཞེས་གསུངས་པ་ལྟར་ཡང་དག་པར་རྟོགས་ན། འཛིན་རྟོག་ཐམས་ཅད་དང་བྲལ་ཏེ་ཡོན་ཏན་མུ་མཐའ་མེད་པར་འབྱུང་བས་རྣམ་རྟོག་འཇིལ་ཞིང་འཁོར་བར་མི་ལྟུང་བས་ན་བདུད་རྩི་གང་གི་བྱེད་ལས་རྟོག་པའི་ནད་གསོ་བ་དང༌། འཁོར་བར་ཤི་བ་ལས་སློང་བ་གཉིས་དང་ལྡན་པའི་སྒོ་ནས་བདུད་རྩིའི་ངེས་ཚིག་འགྲུབ་པའི་ཕྱིར་ཏེ། སྔ་མ་ལས། རྨི་ལམ་སྒྱུ་འཕྲུལ་མི་བཟད་པས། །ཤིན་ཏུ་ཉམ་ཐག་གདུང་བའི་ཚེ། །འཆི་བདག་བདུད་ཀྱི་ཟིན་འདྲ་ལ། །མགོན་བཙུན་གཞན་གྱིས་མི་ཕན་ཏེ། །བདུད་༼༣༤༽སེལ་རྩི་དང་འདྲ་བར་ནི། །ཡང་དག་ལམ་མཆོག་རྟོགས་པར་བྱ། །ཞེས་སོ། །དེ་བས་ན་ཡིད་ཆེས་ངེས་པའི་རྒྱུ་དེ་ལྟ་བུ་དང་ལྡན་པའོ།།

གསུམ་པ་ལན་གྱི་ཡོན་ཏན་བསྟན་པ་ནི།

དམ་པ་མཆོག་དེས། ཞེས་པ་ནས། ཆེ་མཆོག་སྨན་པར་འགྱུར། །ཞེས་པའི་བར་གྱིས་བསྟན་ཏེ།

དམ་པའི་མཆོག་དེས་དེ་བླན་པས། །མཚན་མར་ཞེན་ལས་དེ་གྲོལ་ཏེ།།

དེ་ཉིད་དེར་ངེས་རྙེད་གཞན་མིན། །དེ་ཉིད་ཆེ་མཆོག་སྨོན་པར་འགྱུར།།

དེ་ལྟར་ལང་ཀ་དམ་པ་ཐབས་ལྡན་མཆོག་དེས་ལན་དེ་སྐད་དུ་བླན་ཏེ་བསྟན་པས། ངེས་པ་རྙེད་པའི་ཡོན་ཏན་ནི། ཀཱ་ལ་63ལ་སོགས་པའི་དྲང་སྲོང་རྣམས་མཚན་མར་ཞེན་པའི་འཛིན་པ་རང་རྒྱུད་པ་ལས་དེ་ཉིད་དུ་གྲོལ་ཏེ། དེ་ཁོ་ན་ཉིད་དེར་ལྟ་བས་ངེས་པ་རྙེད་ནས་ལྟ་སྤྱོད་ཀྱི་གདེང་ཁྱད་པར་ཅན་དང་ལྡན་ཏེ་དོན་གཞན་དུ་གྱུར་པ་མིན་པར་རང་རིག་པའི་ཆོས་ཉིད་དུ་རྟོགས་པས། བདག་རྟག་པར་ལྟ་བའི་བློ་དང་བྲལ་ཏེ་དོན་གྱི་དེ་ཉིད་མཐོང་བའི་ཆེ་མཆོག་སྨན་གྱི་རྒྱལ་པོ་དམ་པར་འགྱུར་བ་ཉིད་ཡང་དག་པར་གྲུབ་པའོ།།

གསུམ་པ་ཞབས་བསྡུ་བ་ནི།

ལང་ཀའི། ཞེས་པ་ནས། གྲོལ་བར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི་ནད་པ་གསོ་བར་བྱའོ་ཞེས་ངེས་པར་ཐོས་པ་རྣམ་པར་བགྲོས་པ་སྟེ། འདི་ལྟར་ངེས་པར་ཤེས་པར་བྱའོ། །གསང་པའི་བདག་པོས་དེ་སྐད་ཅེས་སྨྲས་ནས། ལངྐའི་བདག་པོ་ལ་སོགས་པ་དམན་པ་དམ་པ་རྣམས་མཚན་མའི་རྟོག་པ་ལས་ཡོངས་སུ་གྲོལ་བར་གྱུར་ཏོ།།

ལང་ཀའི་བདག་པོ་ཞེས་བོས་ནས། དེ་དག་ནི། ནད་གསོ་བར་བྱའོ། །ཞེས་པའི་དོན་སྐྱེས་བུས་ངེས་པར་ལོ་རྒྱུས་སུ་སྔར་གསན་ཏེ་ཐོས་པ་ཉིད་ཡང་དག་པར་རྣམ་པར་བགྲོས་པ་སྟེ། དོན་གྱི་ངོ་བོ་བསྟན་པ་འདི་ལྟར་ངེས་པར་ཤེས་པར་བྱའོ། །སྟོན་པ་གསང་བ་པའི་བདག་པོས་དེ་སྐད་ཅེས་སྨྲས་པས་འཁོར་ལང་ཀའི་བདག་པོ་ལ་སོགས་པ་དམན་པ་དམ་པ་རྣམས་བསྟན་པའི་ཡོན་ཏན་གྱིས་རང་བྱུང་བདུད་རྩིའི་དོན་རྟོགས་པས་མཚན་མའི་རྟོག་པ་ལས་ཡོངས་སུ་གྲོལ་བར་གྱུར་ཏོ། །དེ་དག་ནི་ལེའུ་ཞེ་ལྔ་པའི་ཡན་ལག་ཏུ་འཕྲོས་པར་མཇལ་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོོ་ལས།

རང་བྱུང་བདུད་རྩིའི་ལེའུ་སྟེ་དྲུག་ཅུ་ལྔ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སེམས་ཉིད་རང་བྱུང་གི་བདུད་རྩིའི་དོན་གྱི་ནོ་པི་ཀའི་བསམ་གཏན་བསྟན་པའི་ལེའུ་ཞེས་བྱ་སྟེ་དྲུག་ཅུ་རྩ་ལྔ་པ་ཉིད་རྣམ་པར་འགྲེལ་ཏེ་བཤད་པའོ།།

ཨེ་མ་རྨད་བྱུང་ཆེ་བ་བདུན་ལྡན་པའི། །རྒྱལ་ཀུན་དགོངས་པ་འདུས་པའི་སྤྱི་མདོ་འདི། །སྟོན་མཆོག་སྐུ་ལྔའི་ཐུགས་ཀྱི་གསང་མཛོད་དེ། །རྒྱུད་ལུང་མན་ངག་ཀུན་གྱི་ཡང་དེམས་ཡིན། །དེ་ཕྱིར་འདི་ན་བཤད་པའི་རྒྱུད་ཆེན་གྱི། །བཀའ་ཡི་ངེས་གསང་ཟབ་དོན་ཕྱི་མའི་རྒྱུད། །མཁས་གྲུབ་གོང་མའི་གསུང་སྒྲོས་ཇི་ལྟ་བར། །མན་ངག་ཚད་མའི་ལམ་ནས་དེང་འདིར་གསལ། །བསིལ་སྦྱིན་༼༣༥༽དབང་པོས་བཅོ་ལྔའི་ཐུན་གསུམ་བསལ། །སྣང་བྱེད་རྒྱལ་པོས་འཛམ་གླིང་ཉིན་མོར་བྱས། །ལུང་རིགས་དག་པས་གསང་ཆེན་མདོ་དོན་བཀྲལ། །བསྟན་འཛིན་མཆོག་རྣམས་དགྱེས་པའི་མཆོད་རྫས་ལགས། །ཞེས་ཀྱང་སྨྲས་སོ།། །།

ལེའུ་རེ་དྲུག་པ་དམ་ཚིག་གསང་མཆོག

༈ བམ་པོ་དགུ་པ་བཤད་ཟིན་ནས། བམ་པོ་བཅུ་པ་སྟེ་ཐ་མར་ཟུག་པའོ།།

བམ་པོ་བཅུ་པ་སྟེ་ཐ་མར་ཟུག་པའོ།།

ད་ནི་དགོངས་པ་རྣམ་པར་བགྲོ་བའི་གཉིས་པ་མཚན་གང་དུ་འདུས་པར་བགྲོ་བ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས་ཡང༌། ཞེས་པ་ནས། འདུས་པར་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས། གསང་བ་པའི་བདག་པོ་ལ་གསོལ་པ། ཀྱེ་གསང་བ་པའི་བདག་པོ། ཉིད་ཀྱིས་རྒྱ་ཆེར་བགྲོས་པའི་གསང་བ་དམ་པ་འདི་ཇི་སྐད་དུ་བརྗོད་པར་བགྱི། མདོ་ནི་གང་དུ་འདུས་པ་ལགས། དེ་སྐད་ཅེས་གསོལ་བ་ལས། གསང་བ་པའི་བདག་པོས་སྨྲས་པ། ཀྱེ་ལངྐའི་བདག་པོ། ཁོ་བོས་ཇི་ལྟ་བ་བཞིན་བགྲོས་པས་གསང་བ་དམ་པ་འདི་ནི། བརྗོད་པའི་རྣམ་གྲངས་བརྒྱད་དུ་བརྗོད་པར་བྱའོ། །མདོ་ནི་བཅུར་འདུས་པར་ཤེས་པར་བྱའོ།།

རྣམ་གྲངས་བཅུ་པོ་བསྟན་མ་ཐག་པ་དེ་ནས་ཡང་རིགས་ཅན་གྱི་འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་དམ་པ་རྣམས་ཀྱིས། སྟོན་པ་གསང་བ་པའི་བདག་པོ་ལ་གསོལ་པ། ཀྱེ་གསང་བ་པའི་བདག་པོ། སྟོན་པ་ཉིད་ཀྱིས་བྱུང་ཚུལ་བཅུ་གཉིས་ཀྱི་དོན་རྒྱ་ཆེར་བགྲོས་པའི་ལུང་གི་མདོ་ཆེན་པོ་གསང་བ་དམ་པ་འདི་ཉིད་ཀྱི་མཚན་ནི་ཇི་སྐད་དུ་བརྗོད་པར་བགྱི། དོན་བསྡུས་པའི་མདོ་ནི་གང་དུ་འདུས་པ་ལགས། དེ་སྐད་ཅེས་གསོལ་པ་ལས། འཆད་པའི་སྐྱེས་བུ་ཆེན་པོ་གསང་བ་པའི་བདག་པོས་ལན་སྨྲས་པ། ཀྱེ་ལང་ཀའི་བདག་པོ། ཞེས་བོས་ནས། གསང་བདག་རྡོ་རྗེ་འཛིན་པ་ཁོ་བོས་སྔོན་ཐོས་པ་ཇི་ལྟ་བ་བཞིན་དུ་དོན་མ་ནོར་བར་ཁྱེད་རྣམས་ལ་བགྲོས་ཏེ་བསྟན་པའི་གསང་བ་དམ་པ་འདི་ནི། རྒྱུད་ཀྱི་ཐུན་མོང་མིན་པའི་ངེས་པ་བརྗོད་པའི་མཚན་ནི་རྣམ་གྲངས་རྣམ་པ་བརྒྱད་དུ་བརྗོད་པར་རིག་པར་བྱའོ། །མདོ་ནི་བསླབ་པའི་མཐའ་བཅུར་འདུས་པར་ཤེས་པར་བྱའོ། །ཞེས་བཀའ་སྩལ་ཏོ།།

གཉིས་པ་རྒྱས་པར་བཤད་པ་ལ་གཉིས་ཏེ། མཚན་གཏན་ཚིགས་དང་བཅས་པ་བསྟན་པ། མདོ་གང་དུ་འདུས་པར་བཤད་པའོ། །དང་པོ་ནི།

ལང་ཀའི་བདག་པོ། ཞེས་པ་ནས། བྱུང་ཞིང་འབྱུང་བའི་ཕྱིར་རོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ། དེ་ལ་རྣམ་གྲངས་བརྒྱད་གང་ཞེས་ན། སངས་རྒྱས་ཀུན་གྱི་དགོངས་པ་འདུས་པའི་མདོ་ཞེས་ཀྱང་བྱའོ། །དོན་གྱི་སྙིང་པོ་ཞེས་ཀྱང་བྱའོ། །རྡོ་རྗེ་བཀོད་པའི་རྒྱུད་ཅེས་ཀྱང་བྱའོ། །རྣལ་འབྱོར་རྫོགས་པའི་ལུང་ཞེས་ཀྱང་བྱའོ། །ཀུན་འདུས་རིག་པའི་མདོ་ཞེས་ཀྱང་བྱའོ། །ཐེག་པ་ཆེན་པོ་མངོན་པར་རྟོག་པ་ཞེས་ཀྱང་བྱའོ། །ཆོས་ཀྱི་རྣམ་གྲངས་རྣམ་པར་བཀོད་པ་ཞེས་ཀྱང་བྱའོ། །ཐེག་པ་ཆེན་པོ་བྱུང་ཚུལ་བསྟན་པའི་མདོ་ཞེས་ཀྱང་བྱའོ། །དེ་ཅི་ཕྱིར་ཞེས་ན། ལངྐའི་བདག་པོ་གང་ལས་དགོངས་པ་དེ་ཉིད་ལས་མི་མངའ་བ་དང་། གང་གི་སྤྱོད་ཡུལ་མ་ཡིན་ཞིང་། མེད་ལ་ཐམས་ཅད་བྱུང་བ་དང་། གང་གི་ཡེ་ཤེས་ཡོངས་སུ་བཀོད་པ་དང་། འདི་ལྟར་གང་ངེས་པ་རྣལ་འབྱོར་དུ་ལུང་སྟོན་པ་དང་། འདིར་ཀུན་ནས་རྔུབ་པ་དང་། དམ་པ་རྣམས་ཀྱིས་མངོན་པར་ཆུབ་པ་དང་། གང་ལ་མ་འདྲེས་པ་བཀོད་པ་དང་། གནས་སྐབས་བཅུ་གཉིས་སུ་ངེས་པར་བྱུང་ཞིང་འབྱུང་བའི་ཕྱིར་རོ།།

ལང་ཀའི་བདག་པོ། དེ་ལ་མཚན་གྱི་རྣམ་གྲངས་བརྒྱད་བསྟན་པ་གང་ཞེ་ན། བརྒྱད་ཕྲག་གཉིས་ཀྱི་སྔ་མ་དོན་དང་ཕྱི་མ་གཏན་ཚིགས་སུ་རིམ་པར་སྦྱར་བར་བྱ་སྟེ། རྒྱལ་བ་རྫོགས་པའི་སངས་རྒྱས་ཀུན་གྱི་ཐུགས་ཀྱི་དགོངས་པ་མ་འདྲེས་ཡོངས་རྫོགས་སུ་འདུས་པའི་མདོ་ཞེས་ཀྱང་བྱའོ། །འབྲས་བུ་༼༣༦༽ཐམས་ཅད་རྫོགས་པས་དོན་གྱི་སྙིང་པོ་ཞེས་ཀྱང་བྱའོ། །ཡེ་ཤེས་རང་ལ་ལྷུན་གྱིས་གྲུབ་པར་སྟོན་པས་རྡོ་རྗེ་བཀོད་པའི་རྒྱུད་ཅེས་ཀྱང་བྱའོ། །རྣལ་འབྱོར་བཞི་བཅུ་ལ་སོགས་པ་ངེས་པར་ལུང་བསྟན་པས་རྣལ་འབྱོར་གྲུབ་པའམ་ལམ་གྱི་བྱ་བ་རྫོགས་པའི་ལུང་ཞེས་ཀྱང་བྱའོ། །རྒྱུ་འབྲས་ཀྱི་བསྟན་པ་ཀུན་འདིར་འདུས་པས་ཀུན་འདུས་རིག་པའི་མདོ་ཞེས་ཀྱང་བྱའོ། །ཆོས་ཐམས་ཅད་ཀྱི་སྙིང་པོར་ངེས་པའི་དགོངས་པ་རང་གི་མངོན་སུམ་དུ་སྟོན་པས་ཐེག་པ་ཆེན་པོ་མངོན་པར་རྟོགས་པ་ཞེས་ཀྱང་བྱའོ། །འཇིག་རྟེན་དང་འཇིག་རྟེན་ལས་འདས་པའི་ལྟ་བ་ཐམས་ཅད་འདིར་རྫོགས་པས་ཆོས་ཀྱི་རྣམ་གྲངས་རྣམ་པར་བཀོད་པ་ཞེས་ཀྱང་བྱའོ། །བྱུང་ཚུལ་བཅུ་གཉིས་ཀྱི་དུས་སུ་གསང་སྔགས་འབྱུང་བར་སྟོན་པས་ཐེག་པ་ཆེན་པོའི་བྱུང་ཚུལ་བསྟན་པའི་མདོ་ཞེས་ཀྱང་བྱའོ། །དེ་དག་གཏན་ཚིགས་ཅིའི་ཕྱིར་ཞེ་ན། ལང་ཀའི་ བདག་པོ། གང་དེ་བཞིན་གཤེགས་པ་དམ་པ་རྣམས་ལ་དཀྱིལ་འཁོར་གསུམ་དབྱེར་མེད་པའི་དགོངས་པ ་དེ་ཉིད་ལས་མི་མངའ་བར་ངེས་པས་མཚོན་བྱའི་མིང་མཚོན་བྱེད་ལ་བཏགས་པ་ཡིན་པའི་ཕྱིར་དང༌། རྒྱལ་བ་རྫོགས་པའི་སངས་རྒྱས་དང་རྒྱུད་དག་པ་གང་གི་སྤྱོད་ཡུལ་གཞན་གྱིས་ཡུལ་མ་ཡིན་ཞིང༌། རྒྱུ་ཆོས་ཀྱི་དབྱིངས་དངོས་པོ་མེད་པ་ལས་འབྲས་བུའི་ཆོས་ཐམས་ཅད་འབྱུང་བ་དང་རྟོགས་ན་རྣམ་ཀུན་མཁྱེན་པའི་བྱང་ཆུབ་འབྱུང་བས་གསང་བའི་ཡེ་ཤེས་ཡིན་པའི་ཕྱིར་དང༌། རྒྱལ་བ་སྐུ་ལྔའི་སྟོན་མཆོག་གང་གི་ཡེ་ཤེས་ཐམས་ཅད་མ་འདྲེས་པར་ཡོངས་སུ་བཀོད་པ་ཡིན་པའི་ཕྱིར་དང༌། འདི་ལྟར་གང་བློ་ལ་ངེས་པ་དག་འབྲས་བུའི་རྣལ་འབྱོར་དུ་ལུང་སྟོན་པ་ཡིན་པའི་ཕྱིར་དང༌། འདིར་དམ་པ་རྣམས་ཀྱི་དགོངས་པ་ཀུན་ནས་རུབ་པའམ་འདུས་པ་ཡིན་པའི་ཕྱིར་དང༌། དོན་མཆོག་བླ་ན་མེད་པ་འདི་རྒྱལ་བ་དམ་པ་རྣམས་ཀྱིས་མངོན་སུམ་པར་ཐུགས་སུ་ཆུད་དེ་བྱང་ཆུབ་པ་ཡིན་པའི་ཕྱིར་དང༌། གང་སྐུ་གསུང་ཐུགས་ཀྱི་གསང་བ་ལས་ཆོས་ཀྱི་ཚུལ་ལ་མ་འདྲེས་པར་བཀོད་པ་ཡིན་པའི་ཕྱིར་དང༌། བྱུང་ཚུལ་གྱི་གནས་སྐབས་བཅུ་གཉིས་སུ་སྔར་ངེས་པར་བྱུང་ཞིང་ཕྱིས་སུ་འབྱུང་བ་ཡིན་པའི་ཕྱིར་རོ། །དེ་དག་གི་དོན་རྒྱས་པ་ནི་ཀླད་དུ་བཀོད་པ་བཞིན་ནོ།།

གཉིས་པ་མདོ་གང་དུ་འདུས་པར་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ལང་༼༣༧༽ཀའི་བདག་པོ། ཞེས་པ་ནས། མདོ་གཅིག་ཏུ་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་མདོ་བཅུར་འདུས་པ་གང་ཞེ་ན། གང་མཐའ་བཅུ་ཁོ་ནར་འདུས་པ་སྟེ། དེ་ཡང་འདི་ལྟར་གཞི་གཟུང་བར་བྱའོ། །རྒྱུད་དགྲོལ་བར་བྱའོ། །སྒོ་དབྱེ་བར་བྱའོ། །མཐར་ཕྱིན་པར་བྱའོ། །ཐམས་ཅད་འདུ་བར་བྱའོ།།

ལ་དོར་བར་བྱའོ། །ས་གཅད་པར་བྱའོ། །ཉམས་རྙེད་པར་བྱའོ། །ཚེགས་ཆུང་བར་བྱའོ། །མདོ་གཅིག་ཏུ་བྱའོ།།

ལང་ཀའི་བདག་པོ། ཞེས་བོས་ནས། མདོར་བཅུར་འདུས་པར་བསླབ་པ་གང་ཞེ་ན། གང་བསླབ་པའི་མཐའ་བཅུ་ཁོ་ནར་འདུས་པ་སྟེ། དེ་དག་གི་རྣམ་གྲངས་བརྗོད་པ་ཡང་འདི་ལྟར། རྩ་བའི་རྒྱུད་ཀྱི་ལེའུ་གཉིས་པ་ལས་གསུངས་པའི་རྣལ་འབྱོར་གྱི་བསླབ་པའི་མཐའ་བཅུ་ཉིད་འདིར་རྒྱས་པར་ལེའུ་རེ་རེས་འཆད་པའི་ཕྱིར་ཏེ། དེ་ཉིད་ལས། ཇི་ལྟར་ས་གཞི་གཤིན་པ་ལ། །བརྟེན་ནས་ས་བོན་བཏབ་པ་ལས། །འབྲས་དྲུག་སྨིན་པར་གྱུར་པ་ཡིས། །འཚོ་བར་བྱེད་པའི་སྲོག་འཛིན་ལྟར། །ཆོས་ཉིད་ཀུན་གྱི་གཞིར་གྱུར་པའི། །དམ་ཚིག་འདི་ལ་བརྟེན་ནས་ནི། །དངོས་གྲུབ་ལོ་ཏོག་སྨིན་པ་ཡིས། །དགེ་བའི་སྲོག་འཛིན་དམ་པའོ། །བསླབ་པ་འདི་ཡི་དམ་ཚིག་སྟེ། །བསླབ་པ་ཀུན་གྱི་གཞི་འཛིན་དུ། །གོམས་པར་བྱ་བ་རབ་ཏུ་གཅེས། །ཞེས་གསུངས་པ་ལྟར། གཞི་དམ་ཚིག་གིས་གཟུང་བར་བསླབ་པར་བྱ་སྟེ་ལེའུ་འདི་ཉིད་ལས་འབྱུང་བའོ། །དེ་བཞིན་དུ། ཇི་ལྟར་ཅང་ཤེས་གྱི་ལིང་དག །སྡོམ་བྱེད་སྒྲོག་གིས་བཅིངས་གྱུར་པ། །བཀྲོལ་བྱས་བདེ་བླག་བྱང་འགྱུར་ན། །ཅི་ལའང་ཐོགས་མེད་འགྲོ་བ་ལྟར། །སེམས་ཀྱི་ཅང་ཤེས་དབང་པོ་འདི། །མི་ཤེས་བཅིངས་པས་བཅིངས་གྱུར་པ། །རྣམ་གྲོལ་ཐོས་པའི་སྒོ་མོ་ཡིས། །ཤེས་རྒྱུད་ཀུན་གྲོལ་ཐོགས་མེད་འགྲོ། །འདི་ནི་མི་ཤེས་རྒྱུད་འགྲོལ་བའི། །བཅིང་བར་བྱ་བ་བཀྲོལ་བ་སྟེ། །རྒྱུད་ནས་དགྲོལ་བའི་བསླབ་པ་རུ། །གོམས་པར་བྱ་བ་རབ་ཏུ་གཅེས། །ཞེས་གསུངས་པ་ལྟར། རྒྱུད་ཐོས་པས་དགྲོལ་བར་བསླབ་པར་བྱ་སྟེ་ལེའུ་རེ་བདུན་པའོ། །དཔེར་ན་བུང་བ་ཁུང་ཚོལ་བ། །ཀུན་ཏུ་འཇུག་ཅིང་བྱུང་ནས་ནི། །རང་གི་འཛུལ་ཁུང་གང་ཡིན་པར། །ངེས་པར་འཇུག་ཅིང་གནས་པ་ལྟར། །རྣལ་འབྱོར་དོན་གྱི་རྗེས་ཚོལ་བ། །སྤྱོད་སྒོ་ཅི་ཡོད་བསྟུན་ཏེ་བསྡུ། །ལྟ་སྒོར་འཇུག་ཅིང་བརྟགས་བསྡུར་ན། །མ་ནོར་ངེས་པའི་དབུ་མ་ལ། །ཆོས་ཉིད་དོན་གྱི་རྗེས་གཅད་ཕྱིར། །སྒོ་མོ་ཀུན་ནས་བསྡུར་བ་ཡི། །བསླབ་པར་བྱ་བའི་མཐའ་ཡིན་ཏེ། །གོམས་པར་བྱ་བ་རབ་ཏུ་གཅེས། །ཞེས་གསུངས་པ་ལྟར་སྒོ་ཀུན་ནས་བསྡུར་ཏེ་དབྱེ་བ་ལ་བསླབ་༼༣༨༽པར་བྱ་སྟེ་ལེའུ་རེ་བརྒྱད་པའོ། །ཇི་ལྟར་རི་མཐོན་རྩེ་མོ་ལ། །སྒྱིད་མི་ལུག་པར་བརྩོན་འཛེགས་ན། །མཐོ་སར་ཕྱིན་ཅིང་རྩེ་ནོན་པས། །ཡུལ་ཁམས་རྟོགས་ཤིང་ལམ་ལ་མཁས། །དེ་བཞིན་ཤེས་རབ་མཐོན་རེ་ལ། །སྒྱིད་མི་ལུག་པར་མཉན་བསམ་ན། །ཀུན་གྱི་ཕུལ་དུ་ཤེས་རབ་ཕྱིན། །མཁས་པའི་ཡེ་ཤེས་ཚད་མེད་དོ། །དོན་ལ་མཁས་པར་བྱ་བ་དེ། །ཕུལ་དུ་དབྱུང་བའི་བསླབ་པ་སྟེ། །ཤེས་རབ་ཆེན་པོ་འདི་དག་ལ། །གོམས་པར་བྱ་བ་རབ་ཏུ་གཅེས། །ཞེས་གསུངས་པ་ལྟར། ཕུལ་དུ་མཁས་པས་དབྱུང་ནས་མཐར་ཕྱིན་པར་བྱ་བ་ལ་བསླབ་པར་བྱ་སྟེ་ལེའུ་རེ་དགུ་པའོ། །ཇི་ལྟར་རྒྱལ་རིགས་རྒྱུད་བྱུང་བ། །མང་པོའི་དབང་པོར་དཔོན་བསྟབས་ཏེ། །འཁོར་ལོ་ལ་སོགས་རིན་ཆེན་གྱིས། །ཀུན་ལ་དབང་སྒྱུར་ཐོབ་པ་ལྟར། །དེ་བཞིན་རྣལ་འབྱོར་རྒྱུད་བྱུང་བ། །ཆོས་ཀྱི་དབང་པོར་དཔོན་བསྟབས་ཏེ། །ཕྱག་རྒྱ་ལ་སོགས་རྟགས་ཆེན་གྱིས། །རིམ་པར་ཀུན་གྱི་ཐོག་མར་འགྲོ། །འདི་ནི་དབང་གི་ཁྱད་པར་ཏེ། །ས་ལ་རིམ་པར་འབྱུང་བ་ཡི། །རྩལ་གྱིས་འགྲོད་ཅིང་བསླབ་པའི་མཐའ། །གོམས་པར་བྱ་བ་རབ་ཏུ་གཅེས། །ཞེས་གསུངས་པ་ལྟར། རིམ་པ་དབང་གིས་བགྲོད་དེ་དབང་ཐམས་ཅད་འདུ་བ་ལ་བསླབ་པར་བྱ་སྟེ་ལེའུ་བདུན་ཅུ་པའོ། །ཇི་ལྟར་གླང་པོ་ཆུར་འཇུག་པ། །ཚམ་ཚོམ་ཆགས་ཐོགས་ཡོང་མེད་པར། །དགའ་བའི་ལོངས་སྤྱོད་བྲོད་ཚུལ་གྱིས། །མི་ལྡོག་ཕ་རོལ་ཕྱིན་པ་ལྟར། །རྣལ་འབྱོར་ངེས་པར་སྤྱོད་པའི་བློ། །བརྟུལ་ཞུགས་རྒྱ་མཚོའི་ཆུར་འཇུག་པ། །རྩལ་ཆེན་སྦྱོང་བའི་བྲོད་ཚུལ་དུ། །ཆགས་ཐོགས་མེད་པར་ལ་དོར་བའོ། །བསླབ་པར་བྱ་བའི་མཐའ་ཡིན་ནོ། །སྤྱོད་པའི་བསླབ་པ་དམ་པར་ནི། །གོམས་པར་བྱ་བ་རབ་ཏུ་གཅེས། །ཞེས་གསུངས་པ་ལྟར། ལ་སྤྱོད་པས་དོར་བ་ལ་བསླབ་པར་བྱ་སྟེ་ལེའུ་དོན་གཅིག་པའོ། །ཇི་ལྟར་ཁྱུང་ཆེན་མཁའ་ལྡིང་བ། །གཤོག་པའི་རྩལ་གྱིས་ནམ་འཕང་གཅོད། །ངམ་གྲོག་ཆུ་ཀླུང་མཐའ་ཡས་ཀྱང༌། །གཤོག་རླབས་འོག་ཏུ་ཀུན་ཆུད་ལྟར། །རྣལ་འབྱོར་མཉམ་ཉིད་མཁར་ལྡིང་བ། །ཐེག་པའི་སྤྱོད་སྒོ་མཐའ་ཡས་ཀྱང༌། །མཉམ་པ་ཆེན་པོའི་དོན་གྱིས་ནི། །ལྟ་འཕང་རླབས་ཀྱིས་ཐག་གཅོད་པའོ། །འདི་ནི་རེ་དང་དོགས་པ་ཡི། །ཐེ་ཚོམ་༼༣༩༽གཅོད་པའི་ལྟ་བ་སྟེ། །དོན་ལ་སེམས་ཀྱི་བལྟ་བ་སྟེ། །བསླབ་པ་འདི་དག་གོམས་པ་གཅེས། །ཞེས་གསུང་པ་ལྟར། ཐག་ལྟ་བས་བཅད་དེ་ས་གཅད་པ་ལ་བསླབ་པར་བྱ་སྟེ་ལེའུ་དོན་གཉིས་པའོ། །དཔེར་ན་རྒྱ་མཚོར་ནོར་ལེན་མི། །སྦྲུལ་དང་ཆུ་སྲིན་སྦྲང་མ་ལས། །སོགས་པ་གདུག་པའི་སྡུག་བསྔལ་ཀུན། །དཀའ་བ་ཉམས་སུ་བླངས་ནས་འགྲུབ། །དེ་བཞིན་རྣལ་འབྱོར་བདེ་ཚོལ་བ། །རྣམ་རྟོག་བྱིང་རྨུགས་འཕྱར་གཡེང་དགྲ། །གཞོམ་པར་དཀའ་བའི་ལས་འདི་དག །ཉམས་སུ་བླངས་ན་བདེ་འཐོབ་རྙེད། །འདི་ནི་ཏིང་འཛིན་དམ་པ་ཡི། །ཉམས་སུ་བླངས་པའི་བསླབ་པ་སྟེ། །སེམས་ཀྱིས་གོམས་པར་བྱ་བའི་ལས། །འདྲིས་པར་བྱ་བར་རབ་ཏུ་གཅེས། །ཞེས་གསུངས་པ་ལྟར། ཉམས་སུ་ཏིང་ངེ་འཛིན་གྱིས་བླངས་ཏེ་དགོངས་པའི་ཉམས་རྙེད་པ་ལ་བསླབ་པར་བྱ་སྟེ། ལེའུ་དོན་གསུམ་པའོ། །ཇི་ལྟར་མུན་པ་དུག་དང་རྫས། །སྨན་སྣང་གསེར་དུ་བསྒྱུར་བས་ན། །འགྱུར་རྩིའི་མན་ངག་མེད་པའི་མིས། །དཀའ་བའི་ལས་ཆེན་སྣ་ཚོགས་པས། །སྡུག་བསྔལ་སྤྱད་ཀྱང་མི་འགྲུབ་སྟེ། །སུ་ཞིག་མན་ངག་ལྡན་པའི་མིས། །ཚེགས་མེད་གྱི་ནའི་ཚུལ་གྱིས་ན། །བསྒྱུར་བས་སྨན་སྣང་གསེར་འགྱུར་ལྟར། །རྣལ་འབྱོར་ཆེན་པོའི་དོན་སྒྲུབ་པ། །ཀུན་གཞི་གནས་འགྱུར་མན་ངག་དང༌། །གང་དག་མི་ལྡན་པས་ཀྱང་ནི། །དཀའ་བ་སྤྱད་ཀྱང་འགྲུབ་པ་མིན། །སེམས་ཀྱི་གསང་འདི་སུས་མཐོང་བ། །དེ་དག་མན་ངག་ལྡན་པ་སྟེ། །འདོད་པའི་དོན་མཆོག་གང་ཡིན་པ། །དེ་དག་ཚེགས་མེད་གྱི་ནས་འགྲུབ། །དོན་རྣམས་སྒྲུབ་པར་གང་བྱེད་པ། །མན་ངག་ཅན་གྱིས་འགྲུབ་པའི་ཕྱིར། །དོན་རྣམས་འགྲུབ་པར་འགྱུར་བ་ཡི། །བསླབ་པ་འདི་དག་རབ་ཏུ་གཅེས། །ཞེས་གསུངས་པ་ལྟར། དོན་མན་ངག་གི་སྒྲུབ་པ་ལ་མཁས་པས་ཚེགས་ཆུང་བར་བསླབ་པར་བྱ་སྟེ་ལེའུ་དོན་བཞི་པའོ། །དཔེར་ན་ཀུན་ཏུ་རྒྱུ་བའི་མི། །འདོད་པའི་ཡུལ་དུ་འགྲོ་བྱེད་ན། །ཡུལ་གྱི་རྣམ་པ་མཐའ་ཡས་ཀྱང༌། །བགྲོད་པའི་ལམ་གནས་གཅིག་ལས་མེད། །དེ་བཞིན་བསམ་གྱིས་མི་ཁྱབ་པའི། །བརྒྱད་ཁྲི་བཞི་སྟོང་ཆོས་བསྟན་ཀྱང༌། །བཀྲི་ཞིང་དྲང་བའི་ཚིག་ཡིན་ཏེ། །བསམ་པའི་ཡུལ་མི་གཅིག་པའོ། །དོན་རྣམས་གཅིག་ཏུ་སྡུད་པ་༼༤༠༽ཡི། །བསླབ་པར་བྱ་བ་དམ་པ་སྟེ། །ངེས་པར་གཅིག་ལས་མེད་པའི་ཕྱིར། །འདི་དག་གོམས་པར་བྱ་བ་ཡིན། །ཞེས་གསུངས་པ་ལྟར། མདོ་དོན་གཅིག་ཏུ་བསྡུ་བ་ལ་བསླབ་པར་བྱ་སྟེ་ལེའུ་དོན་ལྔ་པས་གསལ་བར་སྟོན་པའོ། །དེ་དག་ནི་གསང་སྔགས་གསང་བ་ཆེན་པོའི་བསླབ་པའི་མཐའ་བཅུ་སྟེ། བསླབ་པ་དེ་རྣམས་ལ་གོམས་པར་བྱས་པའི་ཡོན་ཏན་ཡང༌། སྔ་མ་ལས། བསླབ་པ་འདི་ལ་གོམས་གྱུར་ན། །ལོབས་པའི་ཡོན་ཏན་མཐའ་ཡས་ཏེ། །ལོབས་པས་ལམ་ལ་མཁས་པར་འགྱུར། །སྔགས་ཀྱི་ཡོན་ཏན་ཆེན་པོ་ཡང༌། །རྨད་དུ་བྱུང་བ་ཐོབ་པར་འགྱུར༌། །ཞེས་སོགས་སྤྱི་དང་བྱེ་བྲག་གི་དགོས་ཆེད་ཤིན་ཏུ་མང་ངོ་།།

གཉིས་པ་རྒྱས་པར་བཤད་པ་ལ་བཅུ་སྟེ། གཞི་དམ་ཚིག་གིས་གཟུང་བ་ས་གཞི་གཤིན་པ་ལྟར་བཤད་པ། རྒྱུད་ཐོས་པས་དགྲོལ་བ་གྱི་ལིང་སྒྲོག་བཀྲོལ་བ་ལྟར་བཤད་པ། སྒོ་ཀུན་ནས་བསྡུར་ཏེ་དོན་གནད་བསྡུ་བ་བུང་བ་64ཚོང་ཚོལ་བ་ལྟར་བཤད་པ། ཕུལ་དུ་མཁས་པས་དབྱུང་བ་རི་རབ་ལྷུན་པོའི་རྩེར་ཕྱིན་པ་ལྟར་བཤད་པ། རིམ་པ་དབང་གིས་བགྲོད་པ་རྒྱལ་བུ་རྒྱལ་སར་བཏོན་པ་ལྟར་བཤད་པ། ལ་སྤྱོད་པས་དོར་བ་གླང་པོ་ཆེ་ཆུར་འཇུག་པ་ལྟར་བཤད་པ། ཐག་ལྟ་བས་གཅད་པ་ཁྱུང་ཆེན་པོ་ནམ་མཁའ་ལ་ལྡིང་བ་ལྟར་བཤད་པ། ཉམས་སུ་ཏིང་ངེ་འཛིན་གྱིས་བླངས་པ་ཚོང་དཔོན་མཁས་པས་རྒྱ་མཚོའི་ནོར་བུ་ལོན་པ་ལྟར་བཤད་པ། དོན་མན་ངག་གིས་སྒྲུབ་པ་གསེར་འགྱུར་གྱི་རྩི་ལྟར་བཤད་པ། མདོ་དོན་གཅིག་ཏུ་བསྡུ་བ་ཚོང་པ་ཁེ་སྤོགས་སྡུད་པ་ལྟར་བཤད་པའོ། །དང་པོ་ལ་བཞི་སྟེ། མདོར་བསྟན་པ། རྒྱས་པར་བཤད་པ། བསླབ་པ་གཅེས་པར་གདམས་པ། ཞབས་བསྡུ་བའོ། །དང་པོ་ནི།

ལང་ཀའི་བདག་པོ། ཞེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོོ་དེ་ལ་ཆོས་ཐམས་ཅད་ཀྱི་གཞི་ནི་དམ་ཚིག་ཡིན་པར་ཤེས་པར་བྱའོ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །ཁས་བླངས་པའི་ལེའུ་རེ་རེས་འཆད་པའང་ཐོག་མར་གཞི་དམ་ཚིག་གིས་གཟུང་བ་ལེའུ་འདི་ཉིད་ཀྱིས་འཆད་པའི་ཕྱིར། སྐྱེས་བུ་ཆེན་པོས་ལང་ཀའི་བདག་པོ་ཞེས་བོས་ནས། གྲངས་ལ་སྙེགས་པས་དེ་ལ་ཞེས་དམ་ཚིག་བཀར་བ་ནི་སྒྲུབ་པའི་གཞི་སྟེ་ལམ་དང་འབྲས་བུའི་ཆོས་ཐམས་ཅད་ཀྱི་རྟེན་པའི་གཞི་ལྟ་བུ་ནི་དམ་ཚིག་ཡིན་པས་དཔེར་ན་ས་གཞི་ཆེན་པོ་ཉིད་སྐྱེ་༼༤༡༽འཁྲུངས་ཐམས་ཅད་ཀྱི་རྟེན་དུ་གྱུར་པར་གནས་པ་ལྟར་ཤེས་དགོས་པས་ཐོག་མར་བསྟན་པར་རིག་པར་བྱའོ། །དེས་ན་ཀུན་འདུས་ལས་ཀྱང༌། ཆོས་ཐམས་ཅད་ཀྱི་སྲོག་ནི་དམ་ཚིག་ཡིན་པར་ཤེས་པར་གྱིས་ཤིག ཅེས་གདམས་པར་མཛད་དོ།།

གཉིས་པ་རྒྱས་པར་བཤད་པ་ལ་གཉིས་ཏེ། གཅིག་ཆར་བར་སྲུང་དུ་མེད་པའི་དམ་ཚིག་བསྟན་པ། རིམས་ཀྱིས་པར་སྲུང་མཚམས་དང་བཅས་པའི་དམ་ཚིག་བཤད་པའོ། །དང་པོ་ནི།

དམ་ཚིག་གི་གནས། ཞེས་པ་ནས། འདི་ནི་རྨད་པོ་ཆེ། །ཞེས་པའི་བར་གྱིས་བསྟན་ཏེ།

དམ་ཚིག་གི་གནས་ནི་འདི་ལྟ་སྟེ། བསྲུང་བྱ་བསྲུང་དུ་མེད་པ་ནི། །ཆོས་ཉིད་དམ་ཚིག་དམ་པ་ཡིན། །ཀུན་ཀྱང་དམ་པ་ཉིད་ཡིན་པས། གང་ལའང་འགལ་བར་མི་བྱའོ། །སུ་ལའང་དམ་པ་འདི་གནས་པ། །རིག་འཛིན་དམ་པའི་ས་པ་ཡིན། །བསྲུང་བར་བྱའི་ཡུལ་རྣམས་ལ། །རྒྱུ་བསོག་གཡོ་མེད་དམ་པ་ཉིད། །ཟབ་ཡང་རྒྱ་ཆེ་དམ་པ་འདིར།།

ཇི་སྐད་གྲགས་པའི་ཚུལ་ཁྲིམས་དང་། །རྟོག་པར་བྱ་བ་ཇི་སྙེད་པ། །ཀུན་འདིར་དམ་བསྲུང་རྣམ་པར་དག།

དམ་ཚིག་འདི་ནི་རྨད་པོ་ཆེ།།

དེ་ལ་དམ་ཚིག་རང་གི་ངོ་བོ་ནི་ལྟ་བ་དང་སྤྱོད་པ་ཡིན་ཞིང་ངེས་ཚིག་ནི་བསྲུང་བ་དང་མ་སྲུང་བ་ལས་འཁོར་བ་དང་འདས་པ་ཚིག་པའི་ཕྱིར་ཏེ། དེ་ལྟ་བུའི་ཁེ་ཉེན་ཅན་གྱི་དམ་ཚིག་སྲུང་བའི་གནས་སམ་གཞི་ཉེ་བར་བསྟན་པ་ནི་འདི་ལྟ་སྟེ། བསྲུང་བར་བྱ་བའི་དམ་ཚིག་ཇི་སྙེད་པ་ལའང་ཐེག་པ་ཆེན་པོའི་སྒོ་འདིར་བློ་ཆེ་བའི་ཡུལ་དུ་ཕྱོགས་རིས་སུ་བསྲུང་དུ་མེད་པས་ཆེད་དུ་སྲུང་མཚམས་མ་དམིགས་པ་ནི། གཅིག་ཆར་བ་རྣམས་ཀྱི་ཆོས་ཉིད་ལྟ་བའི་དམ་ཚིག་དམ་པ་བློ་དམན་གྱིས་སྤྱོད་ཡུལ་མིན་ཅིང་རྟོགས་པར་དཀའ་བས་མཉམ་པ་ཆེན་པོ་འདའ་ཉམས་མེད་པ་ཉིད་ཡིན་ཏེ། དེ་ཅིའི་ཕྱིར་ཞེ་ན། ཕྱི་ནང་གི་ཆོས་སོ་ཅོག་ཀུན་ཀྱང་དམ་ཚིག་དམ་པ་ཇི་བཞིན་པའི་ཆོས་ཉིད་དུ་མ་གྱུར་པ་ནི་གང་ཡང་མེད་པ་ཡིན་པས་འདའ་ཉམས་མ་དམིགས་ཏེ་གང་ལའང་བཀོལ་བ་མེད་པས་འགལ་བར་མི་འགྱུར་བ་དང་སྤང་དུ་མེད་པའི་ཕྱིར་ཏེ། ལྟ་བས་མི་འགལ་ཏེ་ཕྱོགས་ལྷུང་དང་བྲལ་བ་ཡིན་ལ། སྤྱོད་པས་མི་འགལ་ཏེ་སྤང་བླང་དང་བྲལ་བ་ཡིན་ཞིང༌། དམ་ཚིག་གིས་མི་འགལ་ཏེ་རིས་སུ་སྲུང་བ་དང་བྲལ་བའི་ཕྱིར་ཏེ། ངང་དེ་ལས་ནམ་ཡང་གཡོ་བ་མེད་པར་བྱ་བའོ། །སྐྱེས་བུ་སུ་ལ་དེ་ལྟ་བུའི་དམ་པ་ཆེན་པོ་འདི་ཉིད་གནས་ཏེ་ཡང་དག་པར་འཆར་བ་ནི། རྣལ་འབྱོར་པ་ཆེ་བའི་ཡོན་ཏན་དང་ལྡན་པ་རིག་པ་འཛིན་པའི་ནང་ནས་ཀྱང་མཆོག་དང་དམ་པར་གྱུར་པའི་སངས་རྒྱས་ཀྱི་ས་ལ་གནས་པ་ཡིན་ནོ། །དམ་ཚིག་མཆོག་གི་ཆེ་བ་བསྟན་པའི་ཕྱིར། གསང་སྔགས་རྨད་དུ་བྱུང་བའི་རྩ་བ་དང་ཡན་ལག་གི་དམ་ཚིག་བསྲུང་བར་བྱ་བའི་ཡུལ་ཕྱི་ནང་གསང་བས་བསྡུས་པ་རྣམས་ལ། ཡོད་པ་ལ་མེད་ཅེས་པ་སོགས་ཀྱིས་སྒྱུ་དང་ལྷད་༼༤༢༽བཙུད་པ་སོགས་ཀྱིས་གསོག་དང་བྲེ་ཕུལ་ཁ་དམའ་བ་ལྟ་བུ་སོགས་ཀྱིས་གཡོ་སྟེ་དེ་ལ་སོགས་པ་སྐྱོན་གྱིས་གོས་པ་མེད་པར་དམ་ཚིག་དམ་པ་ཉིད་སྲུང་བ་ལ་ནན་ཏན་དུ་བྱ་བའོ། །དེ་ལྟ་བུའི་དམ་ཚིག་དཔག་པར་དཀའ་བས་ཟབ་ཅིང་སྒོ་ཡངས་ལ་ཀུན་ལ་ཁྱབ་པས་རྒྱ་ཆེ་བའི་ཕྱིར་ཐེག་ཆེན་གསང་བ་མཆོག་གི་དམ་ཚིག་དམ་པ་བསྲུང་བ་འདིར་ནི། གདུལ་བྱ་ལ་བསམ་དབང་དུ་ཇི་སྐད་གྲགས་པའི་ཉན་ཐོས་ཀྱི་ཉིས་བརྒྱ་ལྔ་བཅུ་ལ་སོགས་པའི་ཚུལ་ཁྲིམས་དང༌། བྱང་ཆུབ་སེམས་དཔའི་སྡོམ་པ་རྒྱ་མཚོ་དང༌། གསང་སྔགས་ཕྱི་ནང་གི་དམ་ཚིག་ཏུ་གྲགས་པ་རྡུལ་སྙེད་དང༌། མི་ཆོས་ཀྱི་མནའ་ཡན་ཆད་རྟོག་པས་སྲུང་བའི་བྱ་བ་མང་པོ་ཇི་སྙེད་པར་གྱུར་པ་ཐམས་ཅད་ཀུན་འདིར་འདུས་པས་དམ་ཚིག་མཆོག་འདི་ཉིད་བསྲུང་ན་ཀུན་བསྲུང་བ་ཡིན་ལ། འདི་དག་ལ་ཉམས་རལ་གྱི་སྐྱོན་ཡང་མེད་པས་རྣམ་པར་དག་པ་ཉིད་དེ། དེ་བས་ན་ཡོན་ཏན་སངས་རྒྱས་དང་མཉམ་པའི་ལྟ་བའི་དམ་ཚིག་དམ་པ་འདི་ནི་རྨད་དུ་བྱུང་བ་ཆེན་པོ་ངོ་མཚར་མཆོག་ཏུ་ཆེ་བའི་ཆོས་ཉིད་གསང་བའི་དམ་ཚིག་ཡིན་ཏེ། སེམས་ལུང་ཆེན་པོའི་མདོ་ལས། ཐ་ཚིག་སྡོམ་དང་མི་སྡོམ་དང༌། །བསྲུང་དང་མི་བསྲུང་ཕྱོགས་མེད་པར། །མཉམ་ཉིད་སྡོམ་པར་གང་གནས་པ། །མཉམ་པ་ཆེན་པོའི་དམ་ཚིག་སྟེ། །ནམ་མཁའ་ལྟ་བུར་མངོན་ཤེས་ན། །དེ་ནི་ཡང་དག་དམ་ཚིག་སྟེ། །ལྟ་བ་རྣམ་དག་དམ་ཚིག་མཆོག །དག་པ་ཞི་བ་གང་བསྲུང་བ། །རྣམ་དག་དམ་ཚིག་ཆེན་པོ་ཡིན། །ཡང་དག་ཆོས་དབྱིངས་ཟབ་མོ་ལ། །བསྲུང་དང་མི་བསྲུང་ག་ལ་ཡོད། །བསྲུང་མེད་ནམ་མཁའ་ལྟར་ཤེས་ན། །དེ་ནི་ཡང་དག་གསང་བའི་དམ་ཚིག་གོ །ཞེས་སོ།།

གཉིས་པ་རིམས་ཀྱིས་པར་སྲུང་མཚམས་དང་བཅས་པའི་དམ་ཚིག་བཤད་པ་ལ་གཉིས་ཏེ། དམ་ཚིག་རིས་སུ་བསྲུང་བར་གདམས་པ། ཇི་ལྟར་བསྲུང་ཐབས་ཀྱི་ཡན་ལག་རྒྱས་པར་བཤད་པའོ། །དང་པོ་ནི།

ཀུན་གྱི་ཐུན་མོང༌། ཞེས་པ་ནས། མཚམས་དག་གཟུང་བར་བྱའོ། །ཞེས་པའི་བར་གྱིས་བསྟན་ཏེ།

ཀུན་གྱི་ཐུན་མོང་མ་ཡིན་ཕྱིར། །མོས་པ་ཆུང་ངུ་ཐམས་ཅད་ལ། །བསྲུང་བའི་མཚམས་དག་གཟུང་བར་བྱ།།

དེ་ལྟ་བུའི་མཉམ་པ་ཆེན་པོའི་དམ་ཚིག་ནི། རྣལ་འབྱོར་མཆོག་གི་སྤྱོད་ཡུལ་ཡིན་པས་གསང་བའི་སྒོར་ཞུགས་པའི་བློ་དམན་པ་དག་གིས་བྱ་བ་སྟོན་པའི་ཕྱིར། གོང་གི་དམ་ཚིག་འདི་ནི་ལམ་པ་བློ་༼༤༣༽དམན་ཞིང་སྐལ་བ་ཆུང་བ་ཀུན་གྱི་ཐུན་མོང་གི་སྤྱོད་ཡུལ་མ་ཡིན་པའི་ཕྱིར་གྱི་གཏན་ཚིགས་དེས་ན་གསང་སྔགས་ཀྱི་རྣལ་འབྱོར་ཤེས་རབ་དང་མོས་པ་ཆུང་ངུ་རིམ་གྱིས་འཇུག་པ་ཐམས་ཅད་ལ། བློ་དང་འཚམས་ཚད་དུ་བསྲུང་བའི་མཚམས་དང་བཅས་པར་རྩ་བ་དང་ཡན་ལག་གི་དམ་ཚིག་མཐའ་དག་གཟུང་བར་བྱ་ཞིང་ཡང་དག་པར་བསྲུང་བར་གྱིས་ཤིག་ཅེས་གདམས་པའོ།།

གཉིས་པ་ཇི་ལྟར་བསྲུང་ཐབས་ཀྱི་ཡན་ལག་རྒྱས་པར་བཤད་པ་ལ་ལྔ་སྟེ། དམ་ཚིག་གི་སྣོད་བསྟན་པ། ཆེ་བའམ་ཐུབ་པའི་ཡོན་ཏན་བཤད་པ། ངོ་བོའི་སྒོ་ནས་དབྱེ་བ་བསྟན་པ། ཉམས་པའི་སྐྱོན་བཤད་པ། ཉམས་ན་བསྐང་ཐབས་བསྟན་པའོ། །དང་པོ་ལ་གཉིས་ཏེ། སྣོད་ངན་པའི་ཁྱད་པར་བསྟན་པ། བཟང་པོའི་མཚན་ཉིད་བཤད་པའོ། །དང་པོ་ལ་ལྔ་སྟེ། སྣོད་ཀྱི་སྐྱོན་བཞི་སོགས་ལ་མི་བསྟན་པའི་ཚུལ། ཞེ་སྡང་གིས་བསྐྱེད་པའི་སྐྱོན་གསུམ་བསྟན་པ། དམ་པ་ལ་མ་མོས་པའི་སྐྱོན་བཤད་པ། བསླབ་བྱའི་ཡོན་ཏན་དང་བྲལ་བའི་སྐྱོན་བཤད་པ། ཉམས་པའི་སྣོད་ངན་དང་མི་འགྲོགས་པར་གདམས་པའོ། །དང་པོ་ལ་ལྔ་སྟེ། སྣོད་ངན་ལ་སྦ་ཞིང་གསང་བར་བསྟན་པ། སྣོད་ངན་ལ་མི་བསྟན་པའི་དགོས་པ་བཤད་པ། སྣོད་ཀྱི་སྐྱོན་བཞི་ངོས་གཟུང་བ། ངན་པ་ལ་བཤད་ཀྱང་མི་གོ་བས་མི་བསྟན་པར་གདམས་པ། བསྟན་ན་འདི་ཕྱིར་ཕུང་བའི་སྐྱོན་བཤད་པའོ། །དང་པོ་ནི།

ཐེག་ཆེན་ཡོངས་སུ། ཞེས་པ་ནས། ཐབས་སུ་བསྲུང་བར་བྱ། །ཞེས་པའི་བར་གྱིས་བསྟན་ཏེ།

ཐེག་ཆེན་ཡོངས་སུ་གསང་བ་དག །སྣོད་མ་ཡིན་པར་གྱུར་པ་ལ།།

ཕྱི་དང་ནང་དང་གསང་བ་ཡི། །སྦས་པའི་ཐབས་སུ་བསྲུང་བར་བྱ།།

དེ་ལ་གསང་བའི་མན་ངག་མི་སྤེལ་བའི་ཚུལ་ནི། ཐེག་པ་ཆེན་པོ་ཡོངས་སུ་རྣལ་འབྱོར་གྱི་གསང་དོན་ཤིན་ཏུ་ཟབ་པ་དག་ནི། སྣོད་མ་ཡིན་པའི་གང་ཟག་འཆད་པར་འགྱུར་བ་ལྟར་ལོག་པར་གྱུར་པ་རྣམས་ལ། ཕྱི་གྲོལ་ལམ་ཐུན་མོང་ཙམ་དང་ནང་སྟེང་སྒོ་འཁོར་ལོ་བཞིའི་མན་ངག་དང༌། གསང་བ་འོག་སྒོ་ལྷན་ཅིག་སྐྱེས་པའི་ཡེ་ཤེས་སྐྱེད་པ་གསུམ་དུ་ཕྱེ་སྟེ་འཇུག་པ་ཡི་སྒོ་ནས་སམ། སྐྱོ་སྟོན་ཆེན་པོ་སོགས་རྩ་རྒྱུད་འཆད་པ་དག་གིས་ཕྱི་ཀྲི་ཡོག་སྡེ་གསུམ་དང་། ནང་བསྐྱེད་རྫོགས་གཉིས་དང༌། གསང་བ་རྫོགས་པ་ཆེན་པོ་གསུམ་དུ་ཡང་གསུངས་ཏེ། དེ་ལྟར་གསང་དོན་གྱི་ཁྱད་པར་བཤད་ཐབས་གསུམ་དུ་ཕྱེ་ལ་ནང་དང་གསང་བའི་གནད་རྣམས་སྦ་བའི་ཐབས་སུ་བྱ་ཞིང་ཕྱི་རོལ་གྱི་སྒོ་ཙམ་ཐུན་མོང་དུ་བསྟན་ཏེ་༼༤༤༽རྗེས་སུ་བསྲུང་བར་བྱའོ།།

གཉིས་པ་སྣོད་ངན་ལ་མི་བསྟན་པའི་དགོས་པ་བཤད་པ་ནི།

བསྟན་པའི་གནས་མིན། ཞེས་པ་ནས། ཐབས་ཀྱིས་ཤིན་ཏུ་གསང༌། །ཞེས་པའི་བར་གྱིས་བསྟན་ཏེ།

བསྟན་པའི་གནས་མིན་སྣོད་གང་དག །རྣམ་པ་བཞིས་བསྡུས་བྱེ་བྲག་རྣམས། །མ་འོངས་རྣལ་འབྱོར་དམ་པ་ཡིས།། བརྟགས་ནས་གསང་བར་བྱ་ཕྱིར་བཤད། །གསང་ཆེན་ཡིད་བཞིན་ནོར་བུ་འདི། །སྐྱོན་ཡོད་ངེས་པ་མ་ཡིན་ཏེ།།

བློ་ཆུང་རྣམས་ལ་ཕན་དོན་དུ། །ཐུགས་རྗེའི་ཐབས་ཀྱིས་ཤིན་ཏུ་གསང་།།

བསྟན་པའི་སྣོད་དུ་མ་གྱུར་པ་དུ་ཞེ་ན། གསང་དོན་ཇི་བཞིན་དུ་བསྟན་པའི་གནས་མིན་པའི་སྣོད་ངན་གྱི་རྣམ་གྲངས་ཤིན་ཏུ་མང་ཡང་གང་དག་ཁ་སྦུབ་ལ་སོགས་པ་འཆད་པའི་རྣམ་པ་བཞིས་བསྡུས་པའི་བྱེ་བྲག་སོ་སོར་གྱུར་པ་རྣམས་ཀྱི་མཚན་ཉིད། ཕྱིས་སུ་འབྱོན་པའི་མ་འོངས་པའི་རྣལ་འབྱོར་དམ་པ་ཚུལ་མ་ནོར་བར་སྤྱོད་པ་རྣམས་ཀྱང་ངེས་པའི་བློ་ཡིས་སྣོད་བརྟགས་ཏེ་ངོ་ཤེས་པར་བྱས་ནས་སྣོད་མིན་པ་དེ་དག་ལ་མི་བསྟན་པར་གསང་བར་བྱ་བའི་ཕྱིར་སྣོད་ངན་པ་བཞིའི་བྱེ་བྲག་འདི་དག་བཤད་ཅིང་བཀའ་སྩལ་པའོ། །དེ་ལ་གང་གསང་ན་གསང་སྔགས་ཐེག་པ་ཆེན་པོ་ཡོན་ཏན་མཆོག་ཏུ་གྱུར་པའི་ཡིད་བཞིན་གྱི་ནོར་བུ་འདི་ཉིད་དོ།།

གསང་བའི་གཏན་ཚིགས་ནི། འོ་ན་སྐྱོན་ཆེ་བས་གསང་ངམ་ཞེ་ན། སྐྱོན་ཅན་དང་མཚང་ཡོད་པའི་ཉེས་པས་གསང་བ་མ་ཡིན་ཀྱང་གནད་ཁྱད་པར་ཅན་དང་ལྡན་ཏེ་གསང་དགོས་པ་ཡིན་ནོ། །ཡུལ་གང་ལ་གསང་ན། གསང་སྔགས་ལ་མི་མོས་པའམ་མ་རྟོགས་པའི་བློ་ཆུང་བ་རྣམས་ལའོ། །འོ་ན་གང་གི་ཕྱིར་གསང་སྟེ་ཐུགས་རྗེ་མེད་དམ་ཞེ་ན། བློ་ཆུང་དེ་དག་ལའང་བརྒྱུད་ནས་ཕན་གདགས་པའི་དོན་གྱི་ཆེད་དུ་གསང་བའོ། །གང་གི་གསང་ན་ཐུགས་རྗེ་ཆེན་པོའི་བརྡ་དང་ཐབས་ཀྱིས་ཤིན་ཏུ་གསང་བར་བྱེད་པའོ།།

གསུམ་པ་སྣོད་ཀྱི་སྐྱོན་བཞི་ངོས་གཟུང་བ་ལ་བཞི་སྟེ། སྣོད་ཁ་སྦུབ་ལྟ་བུའི་སྐྱོན་བསྟན་པ། སྣོད་ཞབས་རྡོལ་ལྟ་བུའི་སྐྱོན་བཤད་པ། སྣོད་གཞོག་རོལ་ལྟ་བུའི་སྐྱོན་བསྟན་པ། སྣོད་དུག་ཅན་ལྟ་བུའི་སྐྱོན་བཤད་པའོ། །དང་པོ་ནི།

འཇིག་རྟེན་པ་དང༌། ཞེས་པ་ནས། འདམ་དུ་ཁ་སྦུབ་ཡིན། །ཞེས་པའི་བར་གྱིས་བསྟན་ཏེ།

འཇིག་རྟེན་པ་དང་ཐེག་དམན་དག །ལོག་སྲེད་ལོག་ལྟའི་ཕྱོགས་ལ་ཞེན། །དད་མེད་བློ་ཞེན་གཡེངས་རྨུགས་ཤིང་། །གང་ལ་མི་བརྩོན་མུན་པར་མཚུངས། །འདི་ལོག་གང་ཉམས་འདི་ལས་ལོག །བྱང་ཆུབ་ཐག་པ་གཏིང་ནས་ཆད། །སེམས་ཀྱི་མྱུ་གུ་རྩ་ཚིག་པས། །ངན་འགྲོ་འདམ་བུ་ཁ་བུབ་ཡིན།།

གསང་བའི་ཡུལ་བཞི་ཁས་འཆེས་པ་རྣམས་རེ་རེ་ནས་བསྟན་པའི་ཕྱིར། དང་པོ་ཐེག་པ་ཆེན་པོའི་སྣོད་མ་ཡིན་པ་ཁ་སྦུབ་ཀྱི་མཚན་ཉིད་ནི། འཇིག་རྟེན་པ་སོ་སོའི་སྐྱེ་བོ་དང་ཐེག་པ་དམན་པ་ཉན་རང་དང༌། ལོག་སྲེད་ཅན་མུ་སྟེགས་པ་དང༌། དེ་དང་མཐུན་པར་ལོག་ལྟའི་དངོས་ལ་ཆགས་པ་དང༌། བྱང་ཆུབ་སེམས་དཔའ་དང་གསང་བར་ཞུགས་ཀྱང་ལྟ་བའི་ཕྱོགས་འཛིན་ལ་ཞེན་པ་ཅན་དང༌། གསང་སྔགས་ཐེག་པ་ཆེན་པོ་ལ་དད་པའི་དབང་པོ་མེད་པ་དང༌། ཤེས་རབ་ཀྱི་དབང་པོ་༼༤༥༽མེད་པས་རྟོགས་པའི་བློ་གྲོས་ཀྱི་ནུས་པ་ཆུང་བ་དང༌། ཏིང་འཛིན་གྱི་དབང་པོ་མེད་པས་བྱིང་རྒོད་ཀྱིས་གཡེང་བ་ཅན་དང༌། དྲན་པའི་དབང་པོ་མེད་པས་གླེན་རྨུགས་ཆེ་བར་གནས་ཤིང༌། བརྩོན་འགྲུས་ཀྱི་དབང་པོ་མེད་པས་བསླབ་པའི་དོན་གང་ལ་ཡང་མི་བརྩོན་པ་དང༌། གཏི་མུག་ཆེ་བས་གསང་དོན་གྱི་སྣང་བ་ལས་དབེན་ཏེ་བློ་མུན་པར་མཚུངས་པའི་མཚན་ཉིད་འདི་དག་ལྡན་པས། གསང་བའི་དོན་མཆོག་མི་གོ་ཞིང་མོས་པ་དང་བྲལ་ཏེ་དོན་དུ་མི་གཉེར་བས་སྣོད་ཁ་སྦུབ་པའི་རྒྱབ་ཏུ་ཆུ་བླུག་པ་ལྟ་བུ་ཡིན་ནོ། །དེ་བཞིན་དུ། ཐེག་ཆེན་གསང་བ་འདི་ལོག་པར་འཛིན་པ་དང༌། གང་གསང་བའི་དམ་ཚིག་ཉམས་པ་དང༌། གང་ཐེག་པ་ཆེན་པོ་གསང་བ་འདི་ལས་སླར་ལོག་པ་དང་བཅུ་བཞི་ནི། བྱང་ཆུབ་ཏུ་འདྲེན་པའི་ཐབས་ཀྱི་ཐག་པ་གཏིང་ནས་ཆད་དེ། བྱང་ཆུབ་སེམས་ཀྱི་མྱུ་གུ་རྩ་བ་ནས་ཚིག་པ་ཡིན་པའི་ཕྱིར་མཚན་ཉིད་འདི་དག་ལྡན་པས་ངན་འགྲོའི་གནས་ཡ་ང་བ་གསུམ་གྱི་འདམ་དུ་སྤྱིའི་ཚུགས་སུ་ལྷུང་སྟེ་ཁ་སྦུབ་པ་ཡིན་པས་ཐར་པའི་དུས་མེད་པར་རིགས་ཆད་འབྲས་བུ་མེད་པར་འགྱུར་བ་དང་གཉིས་ཀྱིས་མིང་ངེས་པར་འགྲུབ་པའོ། །དེས་ན་སྣོད་མ་བརྟགས་པར་དེ་ལྟ་བུ་ལ་སྨྲ་བར་མི་རུང་སྟེ། རྩ་བའི་རྒྱུད་ལས། སྣོད་མེད་ཁ་སྦུབ་དེ་དག་ལ། །གསང་བ་སྨྲ་བར་བྱ་བ་མིན། །སྨྲས་ན་དེ་ཉིད་ཁ་སྦུབ་འགྱུར། །ཞེས་སོ།།

གཉིས་པ་སྣོད་ཞབས་རྡོལ་ལྟ་བུའི་སྐྱོན་བཤད་པ་ནི།

གསང་བའི་དོན་རྣམས། ཞེས་པ་ནས། འཁོར་བར་ཟག་པ་ཡིན། །ཞེས་པའི་བར་གྱིས་བསྟན་ཏེ།

གསང་བའི་དོན་རྣམས་སྒྲར་སྨྲ་ཡང་། །གབ་བའི་གསང་བ་དེ་མི་ཤེས། །གཡོན་ཅན་ཤེས་རློམ་སྒྲོགས་རྣམས་ལ།།

གསང་བ་འོས་པ་ལྷུག་པར་སྨྲ། །ཡན་ལག་རྣམ་བཞི་དེ་ཉིད་ལ། །སྒྲ་ཐོས་དོན་མེད་ཉམས་མི་ལེན།།

གང་གིས་གང་གཏད་མི་ཐུབ་པ། །བཅུད་མེ་འཁོར་བ་ཟག་པ་ཡིན།།

གསང་སྔགས་གསང་བའི་དོན་རྣམས་སྒྲར་བརྗོད་དེ་ཚིག་ཙམ་དུ་གཞན་ལ་སྨྲ་ཡང༌། ཆོས་ཉིད་གབ་པའི་གསང་བ་འདི་ཉིད་མི་ཤེས་པས་གསང་སྔགས་ཀྱི་ལྟ་བའི་གདེང་མེད་པར་མི་ཤེས་བཞིན་དུ་གཡོན་ཅན་ཤེས་པའི་ཚུལ་དུ་བཅོས་ནས་ང་ཤིན་ཏུ་མཁས་སྙམ་དུ་རློམ་སྟེ་ང་རྒྱལ་བྱེད་ཅིང་གཞན་ལ་གསང་སྔགས་འཆད་དེ་སྒྲོགས་པར་བྱེད་པ་རྣམས་ནི། གཞན་སྣོད་ངན་པ་ཀུན་ལའང་གསང་བར་འོས་པའི་ཆོས་དམ་པ་གསང་རྒྱུ་དེ་ལྷག་པར་ཡང་སྨྲ་བ་དང༌། བསྙེན་བསྒྲུབ་ཡན་ལག་བཞི་དང་བྱང་སེམས་སྤྱིར་བཏང་གི་རྩ་བ་རྣམ་པ་བཞི་ཡི་དེ་ཉིད་རྣམས་ལ་སྒྲ་ཡི་ཚིག་ཙམ་ཐོས་པ་ཡོད་ཀྱང་དོན་བཞིན་དུ་རྟོགས་པ་མེད་པས་ཡང་དག་པར་བསྒྲུབ་མི་ཤེས་ཤིང་ཉམས་སུ་མི་ལེན་ལ། བླ་མ་དམ་པའམ་མཆེད་དམ་ལྡན་གང་གིས་གསང་བའི་གཉེར་གང་གཏད་པ་རྣམས་མི་ཐུབ་པ༼༤༦༽རྣམས་ལ་གསང་བའི་བཅུད་ཁོང་ན་མེད་པར་ཟག་པས་འཁོར་བར་བྱིང་ཞིང་ཟག་སྟེ་འཁྱམས་པ་ཡིན་པས་སྣོད་ཞབས་རྡོལ་དང་འདྲ་བའི་མཚན་ཉིད་དུ་བསྟན་པའོ། །དེ་ལྟ་བུ་ལའང་གསང་བ་སྨྲ་བར་མི་རུང་སྟེ། དེ་ཉིད་ལས། གསང་དོན་མི་ཐུབ་སྣོད་ངན་ལ། །གསང་བ་སྨྲ་བར་གང་བྱེད་པ། །དེ་དང་སྣོད་མེད་སྣོད་ངན་གཉིས། །འཁོར་བའི་ཁམས་སུ་ཟག་པར་མཉམ། །ཞེས་སོ།།

གསུམ་པ་སྣོད་གཞོག་རོལ་ལྟ་བུའི་སྐྱོན་བསྟན་པ་ནི།

ལྟ་དང་དམ་ཚིག ཅེས་པ་ནས། ཕམ་འགྱུར་འཁོར་བར་འབོ། །ཞེས་པའི་བར་གྱིས་བསྟན་ཏེ།

ལྟ་དང་དམ་ཚིག་སྤྱོད་པ་ཡི། །དམ་པའི་མཛོད་གསུམ་སྒྲར་སྨྲ་ཡང་། །ཞེན་པའི་མཐུ་མེད་གནས་མ་གྱུར།།

གཡོ་སྒྱུ་ཕྲག་དོག་སེར་སྣས་གདུངས། །བྱ་མེད་ཆོས་ལ་ངེས་འཛིན་ཅིང་། །དེ་ལ་དེ་ཉིད་དེ་མེད་པར།།

རྣལ་འབྱོར་ཅན་ལ་སྨན་ཟེར་བ། །དམ་པས་འཕམ་གྱུར་འཁོར་བར་འབོ།།

གསང་ཆེན་གསང་བ་དམ་པའི་སྒོར་ཞུགས་པར་ཁས་འཆེས་ནས། བུདྡྷའམ་གསང་བ་མཆོག་གི་ལྟ་བ་དང་དམ་ཚིག་དང་སྤྱོད་པ་ཡི་དམ་པའི་མཛོད་གསུམ་ཉིད་ཚིག་ཏུ་འདི་ལྟ་བུའོ་ཞེས་སྒྲར་སྨྲ་བ་ཙམ་ཡོད་པ་ཡིན་ན་ཡང་གང་དག་རང་ཉིད་ལ་དེ་གསུམ་གྱི་དོན་ལ་ཞེན་པའི་མཐུ་མེད་པས་གཟུང་འཛིན་ཡང་དག་པར་གྲོལ་བའི་བསམ་པའི་ནུས་པ་མ་བརྟས་ཏེ་ཤེས་པ་སོ་སོའི་སྐྱེ་བོ་ལས་གནས་མ་གྱུར་པའི་དབང་གིས་གཡོ་སྒྱུ་དང་ཕྲག་དོག་དང་སེར་སྣས་སེམས་གདུང་སྟེ་དེ་བཞིས་རྒྱུད་ནོན་པས་རྩོལ་བའི་བྱ་བ་དང་བྲལ་བས་སྤྲོས་པ་མེད་པའི་ཆོས་ཉིད་ཆེན་པོ་ལ་ཚིག་ཙམ་དུ་ངེས་པར་འཛིན་ཅིང༌། དངོས་ཞེན་དང་བཅས་པས་སྨྲ་བ་ལས་གང་ཟག་དེ་ཡང་རང་ཉིད་ལ་བྱ་བྲལ་དེ་ཁོ་ན་ཉིད་ཀྱི་དོན་རྟོགས་པའི་གདེངས་དང་རྩ་བ་དང་ཡན་ལག་གི་དམ་ཚིག་ལ་གནས་པ་མེད་པར། གཞན་ཐེག་པ་ཆེན་པོའི་ལྟ་བ་དང་ཏིང་ངེ་འཛིན་གྱི་རྣལ་འབྱོར་ལྡན་པ་ཅན་ལའང་ཁྱོད་ཀྱི་ལྟ་བ་ནི་དམན་པ་ཡིན་ནོ་ཞེས་ཟེར་ཞིང་སྨོད་པ་སྨྲ་བ་དག་ནི། དམ་ཚིག་ཉམས་པ་དང་འབྲས་བུའི་གོ་འཕང་ངམ་དོན་ཟབ་མོས་ཕུང་སྟེ་ཕམ་པར་འགྱུར་བས་འཁོར་བར་འགྲོ་བའི་སྐལ་པ་ཅན་དུ་གྱུར་ཏེ་སྡུག་བསྔལ་བའི་གནས་སུ་འབོ་ཞིང་ལྟུང་བར་འགྱུར་པ་ནི་སྣོད་ངན་པ་གཞོག་རལ་གྱི་མཚན་ཉིད་ཡིན་པས། གསང་བ་སྨྲ་བར་མི་བྱ་སྟེ། དེ་ཉིད་ལས། སྣོད་ངན་འཁོར་བར་འཕོ་བ་ལ། །གསང་བའི་དོན་རྣམས་སྨྲ་བྱེད་པ། །གསང་བ་ཉམས་པའི་དབང་གིས་ན། །ཉམས་པ་དེ་དང་དེ་འདྲར་འགྱུར། །ཞེས་སོ།།

བཞི་པ་སྣོད་དུག་ཅན་ལྟ་བུའི་སྐྱོན་བཤད་པ་ནི།

ཚུལ་རྟོག་ཚོད་ལེན། ཞེས་པ་ནས། དུག་ཅན་ཐ་མར་ལྷུང༌། །ཞེས་པའི་བར་གྱིས་བསྟན་ཏེ།

ཚུལ་རྟོག་ཚོད་ལེན་ཁྱད་ཚིག་འདྲེན། །ཁ་གསག་ལྕེ་གཉིས་སྒྱུར་བྱེད་ཅིང་། །གང་ལ་སྨོད་རྨོངས་དམ་ཅན་དེ།། ཆེ་ཚིག་དྲེགས་པའི་ཆེད་ཕྱི་རུ། །རྐུ་དང་གཡོ་སྒྱུ་བསླུ་འདྲིད་པ། །ཟང་ཟིང་ཕྱིར་འབྲེང་ཚིག་སྒྲ་ལ།།

རློམ་སེམས་བརྗོད་འདོད་ཚུལ་འཆོས་པ། །ལོག་སྨྲ་དུག་ཅན་ཐ་མར་ལྷུང་།།

གང་དག་ཐེག་པ་ཆེན་པོའི་སྒོར་ཞུགས་ནས་ཕ་རོལ་གྱི་ཚུལ་རྟོག་ཅིང་ཚོད་ལེན་ཏེ་ང་ཆེ་དང་ཁྱད་ཚིག་འདྲེན་ནས་ཚིག་སྨྲ་བ་དང་ཁ་གསག་དང་ངོ་ལྐོག་གི་ལྕེ་༼༤༧༽གཉིས་སྒྱུར་བར་བྱེད་པས་ལོག་ཚིག་བརྗོད་ཅིང་བླ་མ་དང་གྲོགས་པོ་མཁས་པ་གང་དག་རྣམས་ལ་སྨོད་པ་དང་རྨོངས་པས་ཉེས་དམིགས་མི་ཤེས་པར་དམ་ཚིག་གི་སྲི་ཅན་གཅན་གཟན་དེ་ནི། ད་ལྟར་གྱི་ཚེ་གཅིག་པོ་འདི་ལ་རང་ཆེ་རང་བཙན་གྱི་ཆེ་བ་འདོད་པས་དྲེགས་པའི་གོ་ས་ཐོབ་པའི་ཆེད་ཀྱི་ཕྱིར་དུ། མཆེད་ལྕམ་གྱི་ནོར་རྫས་ལ་སོགས་པ་རྐུ་བ་དང༌། ངན་གཡོ་དང་གྱ་གྱུའི་སྒྱུ་དང་ལྡན་པས་གཞན་རྣམས་སླུ་ཞིང་འདྲིད་པ་དང༌། ཟང་ཟིང་གི་རྫས་ཀྱི་ཕྱིར་ཤེས་པ་འབྲེང་བས་གསང་སྔགས་ཀྱི་ཚིག་ཙམ་སྨྲ་བ་ལ་དགའ་སྟེ། རང་གིས་ཤེས་རློམ་དང་མཁས་སེམས་ཀྱིས་བརྗོད་འདོད་དང་བཅས་ཏེ་ཕ་རོལ་གྱི་སློབ་དཔོན་དུ་ཚུལ་འཆོས་པར་བྱེད་པ་ཡི་ལོག་པར་སྨྲ་བ་དག་ནི་ཁོང་ན་དུག་ཆེན་འཁྱིལ་བ་ཅན་གྱི་སྐྱོན་དང་ལྡན་པའི་སྣོད་ངན་ཡིན་པས་འདོད་ཁམས་ཀྱི་གནས་ཐ་མར་ལྷུང་སྟེ་དམྱལ་བར་སྐྱེ་བ་ནི། སྣོད་དུག་ཅན་གྱི་མཚན་ཉིད་ཡིན་པས། དེ་ལ་གསང་དོན་མི་སྨྲ་སྟེ། སྔ་མ་ལས།

དུག་ཅན་ལྟུང་བའི་སྣོད་དེ་ལ། །གསང་བའི་དམིགས་རྣམས་སྨྲ་བ་ནི། །རྣལ་འབྱོར་ཉམས་པ་ཆེན་པོ་སྟེ། །འཁོར་བའི་ཐ་མར་དེ་ལྷུང་འགྱུར། །ཞེས་སོ།།

བཞི་པ་ངན་པ་ལ་བཤད་ཀྱང་མི་གོ་བས་མི་བསྟན་པར་གདམས་པ་ནི།

འདི་ལྟར་ཕམ་འགྱུར། ཞེས་པ་ནས། བསྟན་པར་བྱ་བ་མིན། །ཞེས་པའི་བར་གྱིས་བསྟན་ཏེ།

འདི་ལྟར་འཕམ་འགྱུར་སྣོད་ངན་ལ། །གསང་ཆེན་གསང་བ་དེ་ཁོ་ན། །ཟབ་ཅིང་གཏིང་དཔག་དཀའ་བ་ནི།།

བསྟན་ཀྱང་འཕམ་ལྷུང་གནས་སུ་འགྱུར། །དེ་བས་བསྟན་པར་བྱ་བ་མིན།།

འདི་ལྟར་གང་ཞིག་སྣོད་བཞི་པོ་ཚུལ་འདི་བཞིན་དུ་དོན་གྱི་འབྲས་བུ་དབུལ་ཞིང་ཕམ་པར་འགྱུར་པས་སྣོད་ངན་པ་རྣམས་ལ་རྒྱུད་འདི་ལྟ་བུའི་གསང་སྔགས་ཆེན་པོ་གསང་བའི་དོན་དམ་པ་དེ་ཁོ་ན་ཉིད་ཀྱི་མཛོད་མཆོག་ཉིད་ནི་ཟབ་ཅིང་གཏིང་དཔག་དཀའ་བས་ན། བསྟན་པར་བྱས་ཀྱང་དོན་ཡང་དག་པར་མི་གོ་བས་སྙིང་པོའི་བཅུད་ཀྱིས་ཕམ་སྟེ་ཚིག་ཙམ་ལ་འཆེལ་བའི་ཚུལ་དེས་ངན་འགྲོའི་འགྲོ་བར་ལྷུང་བའི་གནས་སུ་འགྱུར་ཞིང་གྲོལ་བར་མི་འགྱུར་རོ། །དེ་བས་ན་སྣོད་སྐྱོན་ཅན་དེ་དག་ལ་གསང་བ་བསྟན་པར་བྱ་བ་མིན་ནོ།།

ལྔ་པ་བསྟན་ན་འདི་ཕྱིར་ཕུང་བའི་སྐྱོན་བཤད་པ་ནི།

གལ་ཏེ་བསྟན་པར། ཞེས་པ་ནས། ཕུང་བྱེད་གཉིས་བསྲེག་འགྱུར། །ཞེས་པའི་བར་གྱིས་བསྟན་ཏེ།

གལ་ཏེ་བསྟན་པར་གྱུར་ན་ནི། །སྟོན་སྨྲ་ཉན་བྱེད་དེ་གང་དག །མཐོང་ཡུལ་ཕུང་བྱེད་གཉིས་བསྲེག་འགྱུར།།

དེ་ཅིའི་ཕྱིར་ཞེ་ན། གལ་ཏེ་བསྟན་པར་གྱུར་ན་ནི། །སྟོན་ཅིང་སྨྲ་བའི་སློབ་དཔོན་དང་ཉན་པར་བྱེད་པའི་སློབ་མ་དེ་དག་གང་ཡིན་པ་དཔེར་ན་བེའུ་སྦྲེལ་གཡང་དུ་བསྐྱུར་བ་ལྟར་མཐོང་བ་ཚེ་འདི་ལ་ཚེ་ཐུང་ནད་མང་སོགས་དང་མ་མཐོང་བ་ཕྱི་མར་བསྐལ་པ་གསུམ་ལ་སོགས་པའི་ཡུན་དུ་ཕུང་བར་བྱེད་ཅིང་གཉིས་ཀ་རྒྱུད་བསྲེག་པས་༼༤༨༽གདུང་བར་འགྱུར་ཏེ་གཅིག་གི་རྒྱུ་གཅིག་གིས་བྱས་པའི་ཕྱིར་རོ།།

གཉིས་པ་ཞེ་སྡང་གིས་བསྐྱེད་བའི་སྐྱོན་གསུམ་བསྟན་པ་ལ་གསུམ་སྟེ། ཕྲག་དོག་གི་སྐྱོན་གཉིས་བཤད་པ། སྒྲོ་སྐུར་གྱི་སྐྱོན་བསྟན་པ། ཁྲོ་ཞིང་རང་རྒྱུད་ངན་པའི་སྐྱོན་བཤད་པའོ། །དང་པོ་ནི།

རྣལ་འབྱོར་མཁས་གསལ། ཞེས་པ་ནས། དེ་ལ་སྐྱོབ་མི་ནུས། །ཞེས་པའི་བར་གྱིས་བསྟན་ཏེ།

རྣལ་འབྱོར་མཁས་གསལ་དོན་ལྡན་ལ། །རྣལ་འབྱོར་མི་ཤེས་གང་དག་གིས། །དྲེགས་པའི་དབང་གིས་ཕྲག་དོག་གི །བསམ་པའི་རྣམ་གྲངས་ཅི་བསྐྱེད་པ། །དེ་སྙེད་བསྐལ་པའི་གྲངས་མཉམ་པར། །འབྲས་བུ་མི་ཟད་མྱོང་བར་འགྱུར། །གལ་ཏེ་བདེ་བར་རྗེས་ལེན་པ། །དེ་སྣོད་བསྐལ་བར་བཟོད་འཇུག་དགོས། །མཁས་གསལ་འོད་ལྡན་གྱིས་ཀྱང་ནི། །གོང་མ་བཞིན་དུ་དེ་བསམས་ན། །དེ་ཡང་གནས་ངན་ལེན་པ་སྟེ། །མཁས་པས་དེ་ལ་སྐྱོབ་མི་ནུས།།

རྣལ་འབྱོར་གང་ཞིག་ལྟ་བ་ལ་མཁས་ཤིང་ཏིང་ངེ་འཛིན་གསལ་བའི་དོན་དང་ལྡན་པ་ལ། རྣལ་འབྱོར་པ་བྱིས་པའི་བློ་ཅན་དོན་མི་ཤེས་པ་གང་དག་གིས། ང་རྒྱལ་གྱི་དྲེགས་པའི་དབང་གིས་ཕྲག་དོག་གི་བསམ་པས་བརྙས་པར་འདོད་པའི་རྟོག་ངན་གྱི་རྣམ་གྲངས་ཅི་ཙམ་བསྐྱེད་པར་བྱེད་པ་ན་ཡང༌། བསྐྱེད་པ་དེ་སྙེད་དང་བསྐལ་པའི་གྲངས་མཉམ་པར་འབྲས་བུ་དམྱལ་བའི་སྡུག་བསྔལ་མི་བཟད་པ་མྱོང་བར་འགྱུར་རོ། །གལ་ཏེ་རྣམ་སྨིན་ཟད་ནས་བདེ་བར་སྐྱེས་པའི་ལུས་རྗེས་སུ་ལེན་པ་ན་ཡང༌། ཕྲག་དོག་གི་སེམས་ཅི་ཙམ་སྐྱེས་པ་དེ་སྙེད་ཙམ་གྱི་བསྐལ་པའི་གྲངས་སུ་ངེས་པར་གཟོད་གོ་ཆ་བསྒོས་ཏེ་གཞི་ནས་འཇུག་དགོས་སོ། །གལ་ཏེ་རྣལ་འབྱོར་པ་མཁས་གསལ་དོན་དང་ལྡན་པ་ཉིད་ཀྱིས་ཀྱང་ནི། གོང་མ་དེ་བཞིན་དུ་རྣལ་འབྱོར་པའི་ནང་ངམ་མི་མཁས་པ་ལ་ཕྲག་དོག་གིས་ངན་རྟོག་དེ་ཉིད་བསམས་ན། དེ་ཡང་དོན་མི་ཤེས་པས་རྨོངས་ནས་གནས་ངན་ལེན་པ་སྟེ། ཚིག་ལ་མཁས་པས་དོན་ཉམས་པ་དེ་ལ་ངན་སོང་ལས་སྐྱོབ་པར་བྱེད་མི་ནུས་སོ།།

གཉིས་པ་སྒྲོ་སྐུར་གྱི་སྐྱོན་བསྟན་པ་ནི།

རྣལ་འབྱོར་ཚུལ་བྱུང༌། ཞེས་པ་ནས། བ་ཉིད་དེ་ལྟར་འགྱུར། །ཞེས་པའི་བར་གྱིས་བསྟན་ཏེ།

རྣལ་འབྱོར་ཚུལ་བྱུང་དམ་པ་ལ། །མཚོན་ཆའི་ཚིག་གིས་དེ་བཀུག་ཅིང་། །སྒྲོས་སྐུར་དགུ་བླང་ངན་བརྗོད་ན། །དམྱལ་བ་རྡོ་རྗེར་དེ་ལྟུང་འགྱུར། །ཞར་ལ་འབྱུང་བའི་རྣམ་སྨིན་ཡང་། །ཇི་ལྟར་དེ་ཉིད་དེ་ལྟར་འགྱུར།།

རྣལ་འབྱོར་པ་ལྟ་སྤྱོད་ཚུལ་བཞིན་དུ་ལྡན་པར་བྱུང་བའི་དམ་པ་ལ། ངག་རྩུབ་མོ་མཚོན་ཆའི་ཚིག་གིས་དེ་ཡི་ཐུགས་རྒྱུད་དཀྲུགས་ཤིང༌། སྐྱོན་གྱིས་སྒྲོ་འདོགས་པ་དང་ཡོན་ཏན་གྱིས་སྐུར་པ་འདེབས་པའི་ཚིག་གིས་རྐུ་བ་དང་ངག་བརླང་པོའི་སྒོ་ནས་སྐྱོན་གང་དང་གང་གིས་ངན་དུ་བརྗོད་ན་ཡང༌། རྣམ་སྨིན་གྱི་འབྲས་བུ་དམྱལ་བ་རྡོ་རྗེར་དེ་ཉིད་ལྟུང་བར་འགྱུར་ཞིང༌། དམྱལ་བ་ལས་ཐོན་ནས་ཀྱང་ཞར་ལས་བྱུང་བ་རྒྱུ་མཐུན་པའི་རྣམ་པར་སྨིན་པ་ཚེ་ཐུང་ནད་མང་སྡུག་བསྔལ་ལྡན་པར་སྐྱེ་བ་དང༌། ཚེ་འདི་རང་ལ་ཡང་བདག་གིས་ཕར་ལ་སྐུར་པ་བཏབ་པ་ཇི་ལྟ་བ་ཉིད་ཚུར་ལ་འདེབས་པས་དེ་ལྟར་སྨོད་དེ་སེམས་དཀྲུགས་པར་འགྱུར་བ་ཡིན་ནོ།།

གསུམ་པ་ཁྲོ་ཞིང་རང་རྒྱུད་ངན་པའི་སྐྱོན་བཤད་པ་ནི།

སྐལ་པ་དམན་པའི། ཞེས་པ་ནས། ཕྲ་མེན་ལས་སྤྱོད་བྱེད། །༼༤༩༽ཅེས་པའི་བར་གྱིས་བསྟན་ཏེ།

སྐལ་བ་དམན་པའི་རྣལ་འབྱོར་པ། །རྩ་ཉམས་སྐྱོན་ཅན་རང་བཞིན་ནི།།

ངན་རྒྱུ་ཁྲོ་གཏུམ་ལྡན་པ་དང་། །མི་བཟད་ཕྲ་མེན་ལས་སྤྱོད་དེ།།

ལས་འཕྲོ་ཞན་ཅིང་སྐལ་པ་དམན་པས་མི་ཤེས་པར་སྤྱོད་པའི་རྣལ་འབྱོར་པ་རྩ་བའི་དམ་ཚིག་ཉམས་པའི་སྐྱོན་ཅན་རྣམས་ཀྱི་རང་བཞིན་ནམ་མཚན་ཉིད་ནི་ཇི་ལྟ་བུ་ཞེ་ན། བསམ་ངན་གྱི་སྒྱུ་དང་ཁྲོ་གཏུམ་ཆེན་པོ་དང་ལྡན་པ་དང༌། དགེ་སྡིག་གི་ལས་མི་བཟད་པ་ཕྲ་མེན་དུ་སྦྲེལ་ཏེ་འདྲེན་མའི་ཚུལ་གྱིས་ལས་དྲག་པོ་སྤྱོད་པར་བྱེད་པའོ།།

གསུམ་པ་དམ་པ་ལ་མ་མོས་པའི་སྐྱོན་བཤད་པ་ལ་གསུམ་སྟེ། མི་མོས་པའི་རྒྱུ་ཚུལ་འཆོས་ཅན་ལ་བརྟེན་པ། མི་མོས་པ་དངོས་བཤད་པ། མི་མོས་པའི་སྐྱོན་བསྟན་པའོ། །དང་པོ་ནི།

གང་དག་མི་ཤེས། ཞེས་པ་ནས། པ་ལ་ལྟོས་པར་བྱེད། །ཅེས་པའི་བར་གྱིས་བསྟན་ཏེ།

གང་དག་མི་ཤེས་ངང་ཚུལ་ཅན། །བྱིས་པའི་རང་བཞིན་བློ་ཞེན་པས།།

ཤིན་ཏུ་དམན་པའི་ལྟ་བ་ཡིས། །ཚུལ་འཆོས་པ་ལ་ལྟོས་པར་བྱེད།།

རྣལ་འབྱོར་པ་གང་དག་དོན་ཟབ་མོ་མི་ཤེས་པར་ངན་པའི་ངང་ཚུལ་ཅན་གྱི་བྱིས་པའི་རང་བཞིན་བློ་ཞན་པར་གྱུར་པས་བླ་མའི་མཚན་ཉིད་བརྟགས་པ་ལ་མི་མཁས་པས་ཤིན་ཏུ་དམན་པའི་ཕྱོགས་རིས་ཀྱི་ལྟ་བ་ཅན་དུ་གྱུར་ཏེ། ཀླུ་རྒྱལ་ཡོན་ཏན་སྙིང་པོས་རིམ་པ་གསུམ་པའི་མན་ངག་ལས། ཕྱོགས་འཛིན་བདག་རྟོགས་རྨོངས་པ་ལ། །ནམ་ཡང་རང་གྲོལ་དོན་མི་ལྡན། །བདག་ཕུང་གཞན་བརླག་སླུ་བྲིད་མཁན། །ཟང་ཟིང་གདུང་བས་ཆེ་བཅོས་སླུ། །ཞེས་གསུངས་པ་ལྟར་ཆེན་པོའི་གོ་ས་གཟུང་བ་ལ་བརྟེན་པ་ཡིས་སྒོ་ནས་བླ་མར་ཚུལ་འཆོས་པ་ཅན་ལ་ལྟོས་པར་བྱེད་དེ་བཤེས་གཉེན་ངན་པ་རྟེན་པའི་དབང་གིས་རང་ཉིད་དོན་ཡང་དག་ལ་མོས་པས་དབུལ་བར་འགྱུར་བའོ། །འདི་ནི་ཀུན་མཁྱེན་དམ་པ་རིན་པོ་ཆེ་སློབ་དཔོན་ངན་པ་དང་སློབ་མ་བླུན་པ་གཉིས་ཀའི་མཚན་ཉིད་དུ་གསུངས་སོ།།

གཉིས་པ་མི་མོས་པ་དངོས་བཤད་པ་ནི།

གང་དག་དམ་པའི། ཞེས་པ་ནས། གང་དག་འདུན་པ་མེད། །ཅེས་པའི་བར་གྱིས་བསྟན་ཏེ།

གང་དག་དམ་པའི་དམ་པར་ལྡན། །བྱམས་ཚུལ་རྟག་ཏུ་བཟོད་གནས་པ།།

ཚུལ་ཤིས་དོན་རྣམས་དེ་བཞིན་སྲོང་། །དེ་ལ་གང་དག་འདུན་པ་མེད།།

རྣལ་འབྱོར་པ་གང་སུ་དག་ལྟ་བ་དམ་པའི་དགོངས་པ་དང་སྤྱོད་པ་དམ་པར་ལྡན་ཏེ་བྱམས་པ་ཆེན་པོ་དང་ཚུལ་ཁྲིམས་ཕུན་སུམ་ཚོགས་པ་རྟག་ཏུ་བཟོད་པ་ལ་གནས་པ་མི་རྒྱུད་ཀྱི་ཚུལ་ཤེས་ཤིང་གསང་ཆེན་གསང་བའི་ཡང་གསང་གི་དོན་རྣམས་རྒྱུད་རྒྱལ་འདི་ནས་འབྱུང་བ་དེ་བཞིན་དུ་མ་ནོར་བར་གཞུང་སྲོང་བར་བྱེད་པའི་རྣལ་འབྱོར་དབང་པོ་ནི་བྱང་ཆུབ་ཆེན་པོ་འགྲུབ་པའི་རྒྱུ་ཁོ་ན་ཡིན་ཀྱང༌། དམ་པ་དེ་ལྟ་བུ་ལ་ཡང་སྐལ་བ་ཞན་པ་གང་ཡིན་པ་དེ་དག་འདུན་པ་མེད་ཅིང་མི་མོས་པས་གསང་དོན་མི་འགྲུབ་པའི་རྒྱུ་ལ་གནས་པའོ།།

གསུམ་པ་མི་མོས་པའི་སྐྱོན་བསྟན་པ་ལ་གསུམ་སྟེ། སངས་རྒྱས་མི་ཐོབ་པའི་སྐྱོན་བསྟན་པ། ཐར་པ་མི་ཐོབ་པའི་སྐྱོན་བཤད་པ། ལོག་པའི་༼༥༠༽ལམ་པར་འགྲོ་བའི་སྐྱོན་བསྟན་པའོ། །དང་པོ་ནི།

དམ་ཚིག་སྤྲེའུ་ལྟར། ཞེས་པ་ནས། ཡང་དག་ངས་མ་མཐོང༌། །ཞེས་པའི་བར་གྱིས་བསྟན་ཏེ།

དམ་ཚིག་སྤྲེའུ་ལྟར་སྤྱོད་བཞིན་དུ། །བྱང་ཆུབ་སྙིང་པོ་འཐོབ་པ་ཡི།།

སངས་རྒྱས་ནམ་ཡང་མི་འབྱུང་ངོ་། །འབྱུང་བར་ཡང་དག་ངས་མ་མཐོང་།།

རྩ་བ་དང་ཡན་ལག་གི་དམ་ཚིག་རྣམས་བྱ་བ་མང་ལ་དོན་གྱི་གཏད་མེད་པ་སྤྲེའུ་ལྟར་ཆེད་དུ་སྲུང་བ་མེད་པར་ཁ་ལ་ཁྱེར་ཏེ་ཅི་རུང་རུང་དག་སྤྱོད་པར་བྱེད་བཞིན་དུ། བླ་ན་མེད་པའི་བྱང་ཆུབ་སྙིང་པོ་ཐོབ་པ་ཡི་སངས་རྒྱས་ཀྱི་གོ་འཕང་འགྲུབ་པ་ནི་སྔ་ཕྱིའི་དུས་ཐམས་ཅད་ནམ་དུ་ཡང་མི་འབྱུང་བར་ངེས་པ་ཉིད་དུ་མཐོང་ངོ༌། །དེས་ན་སྔར་ཡང་མ་བྱུང་བས་ན་དུས་ཕྱིས་སུ་ཡང་འབྱུང་བར་འགྱུར་བ་ཡང་དག་པའི་གནས་དང་གནས་མིན་ཀུན་མ་འདྲེས་པར་མཁྱེན་པ་གསང་བདག་ཆེན་པོ་ངས་ཀྱང་ཡེ་ཤེས་དག་པའི་སྤྱན་གྱིས་མ་མཐོང་བས་ཚུལ་བཞིན་དུ་སྤྱོད་ཅིག་པའོ།།

གཉིས་པ་ཐར་པ་མི་ཐོབ་པའི་སྐྱོན་བཤད་པ་ནི།

རྒྱལ་བའི་སྲས་གྱུར། ཞེས་པ་ནས། ཐར་པའི་ཁར་མི་འབྱུང༌། །ཞེས་པའི་བར་གྱིས་བསྟན་ཏེ།

རྒྱལ་བའི་སྲས་འགྱུར་རྣལ་འབྱོར་པ། །ལམ་སྟོན་སྐྱོན་སེལ་མཁས་པ་ལ། །གང་དག་ཁ་ཅིག་དྲེགས་དབང་གིས།། དེ་སྤོང་ཐབས་ཀྱིས་དེར་སྨད་བྱེད། །དེ་ནི་འཁོར་བའི་གཏིང་རྡོ་སྟེ། །ནམས་ཀྱང་ཐར་པའི་ཁར་མི་འབྱུང་།།

རྒྱལ་བའི་སྲས་སུ་གྱུར་པའི་རྣལ་འབྱོར་པ་ཡང་དག་པའི་ལམ་སྟོན་ཞིང་ངན་པའི་སྐྱོན་སེལ་ལ་མཁས་ཤིང་ཚུལ་དང་ལྡན་པ་ལ་གང་དག་མི་ཤེས་པ་ཁ་ཅིག་གི་ཕྲག་དོག་དང་དྲེགས་པའི་ང་རྒྱལ་གྱི་དབང་གིས་མཁས་པ་དེ་ཉིད་སྤོང་བར་བྱེད་པའི་ཐབས་ཀྱིས་དེ་ལ་སྨོད་དེ་དམའ་བར་བྱེད་པ་དེ་ནི་འཁོར་བའི་གཏིང་རྡོ་ཉིད་དུ་གནས་པ་ཡིན་པས་དམྱལ་བར་ལྟུང་སྟེ་ནམས་ཀྱང་ཐར་པ་ཡང་དག་པའི་ཁར་མི་འབྱུང་བར་འགྱུར་བའོ།།

གསུམ་པ་ལོག་པའི་ལམ་པར་འགྲོ་བའི་སྐྱོན་བསྟན་པ་ནི།

མི་ཤེས་རྨོངས་པའི། ཞེས་པ་ནས། ལོག་པའི་ལམ་པ་ཡིན། །ཞེས་པའི་བར་གྱིས་བསྟན་ཏེ།

མི་ཤེས་པ་ཡི་རྣལ་འབྱོར་པ། །ཡང་དག་དམ་པས་ངེས་འགྲོ་བའི།།

རྗེས་སུ་འགྲོ་བར་མི་བྱེད་ཅིང་། །ཟང་ཟིང་འདོད་པར་གང་ལྟ་བའི།།

རྗེས་སུ་འགྲོ་ཞིང་དེར་འདུན་བྱེད། །དེ་ནི་ལོག་པའི་ལམ་པ་ཡིན།།

མི་མཁས་པའི་རྗེས་སུ་འབྲང་ཞིང་ལོག་པའི་སྤྱོད་པ་ལ་འདུན་ནས་མི་ཤེས་རྨོངས་པའི་རྣལ་འབྱོར་པ་དམན་པའི་གང་ཟག་རྣམས་ཡང་དག་པའི་དོན་ལ་མཁས་པའི་བླ་མ་དམ་པ་ཆོས་ཟབ་མོ་ལ་བརྟེན་ནས་ལམ་རབ་ཏུ་གསང་བར་ཞུགས་ཏེ་གོ་འཕང་མཆོག་ལ་ངེས་པར་འགྲོ་བའི་རྗེས་སུ་འདུད་དེ་འགྲོ་བར་མི་བྱེད་ཅིང༌། དེའི་གདམས་པ་ལ་མི་སློབ་པར་ཟང་ཟིང་གི་ནོར་རྫས་འདོད་ཅིང་སྒྲུབ་པར་བྱེད་པའི་ཐབས་ལ་གང་ལྟ་བའི་ཕྱོགས་སུ་ཞེན་པའི་བླ་མའི་རྗེས་སུ་འགྲོ་ཞིང་དེར་འདུན་པར་བྱེད་དེ་རྙེད་པ་ལ་ལྟ་བ་དེ་དག་ནི་ལམ་གོལ་བ་ལ་ཞུགས་པའི་ལོག་པའི་ལམ་པར་གྱུར་པ་དག་ཡིན་ནོ།།

བཞི་པ་བསླབ་བྱའི་ཡོན་ཏན་དང་བྲལ་བའི་སྐྱོན་བཤད་པ་ལ་གསུམ་སྟེ། བྲལ་བར་བྱེད་པའི་རྒྱུ་ལོག་པའི་ཁེ་བསྒྲུབ་པ། ཡོན་ཏན་ཡོད་མེད་ལུས་འདྲ་ཡང་དོན་གྱིས་ཁྱད་པར་ཡོད་པ། ཚིག་ཏུ་བརྗོད་ཅིང་དོན་དུ་མི་གཉེར་བའི་སྐྱོན་བཤད་པའོ། །དང་པོ་ནི།

༼༥༡༽རྣལ་འབྱོར་ལྟང་དང༌། ཞེས་པ་ནས། ཅིས་སྒྲུབ་སྲོག་དང་བསྡོ། །ཞེས་པའི་བར་གྱིས་བསྟན་ཏེ།

རྣལ་འབྱོར་ལྟ་དང་བྱང་ཆུབ་ཁེ། །འབན་ཐག་ཆད་པར་བློ་མི་འགྱུར།།

ཟང་ཟིང་འདོད་དང་གཡོ་སྤྲུལ་ཁེ། །ཆུང་ངུ་ཅིས་བསྒྲུབ་སྲོག་དང་བདོ།།

དེ་ལ་ནི་རྣལ་འབྱོར་དམ་པ་ལྟ་སྒོམ་གྱི་ལྟང་བསག་པ་དང༌། བྱང་ཆུབ་ཆེན་པོའི་ཁེ་སྤོགས་སྒྲུབ་པའི་བསམ་པས་ཐོས་པའི་བྱ་བ་ལ་སོགས་པ་དུས་ནམ་དུ་ཡང་འབན་ཐག་ཆད་པར་གྱུར་ཏེ་ཤེས་པའི་བློ་ལ་མི་རྒྱུ་བས་འབྱུང་བ་མེད་དོ། །འོ་ན་ཅི་ཞིག་འབྱུང་ཞིང་བྱེད་ཅེ་ན། ཟང་ཟིང་གི་ནོར་རྫས་ལ་དུང་ཞིང་འདོད་པ་དང༌། དེ་ཉིད་གཡོ་སྒྱུ་དང་ཚོང་སྤྲུལ་གྱིས་བཙལ་བའི་ཁེ་སྤོགས་ངན་པ་ལ་ནི། ཤིན་ཏུ་གདུང་སྟེ་ཟས་ནོར་ཆུང་ངུ་གཅིག་ཉིད་ཐོབ་ཏུ་འདོད་ན་ཡང་ཅིས་ཀྱང་སྒྲུབ་སྟེ་སྲོག་དང་བསྡོ་བས་དོན་དུ་གཉེར་བར་བྱེད་དོ། །དེ་ནི་ཡི་དྭགས་ཆེན་པོའི་གནས་ན་ཤིན་ཏུ་སྙིང་རྗེ་བར་གནས་སོ།།

གཉིས་པ་ཡོན་ཏན་ཡོད་མེད་ལུས་འདྲ་ཡང་དོན་གྱིས་ཁྱད་པར་ཡོད་པ་ནི།

རྣལ་འབྱོར་དམ་པའི། ཞེས་པ་ནས། གཉིས་མཚུངས་ཁྱད་མེད་འདྲ། །ཞེས་པའི་བར་གྱིས་བསྟན་ཏེ།

རྣལ་འབྱོར་དམ་པའི་རང་བཞིན་ཅན། །བུམ་སྒྲོན་ནང་གི་སྣང་བ་ལྟར། །རིག་པ་མཛོད་ཀྱི་དོན་ལྡན་ཡང་།།

སྲོག་ཆགས་རྐུན་མོའི་སྡེར་མོ་ལྟར། །ཁོང་ནས་གབ་སྦས་དོན་སྟོན་པ། །གང་འདིར་བླུན་པོས་ཅིར་མི་མཐོང་།།

དཔེར་ན་འདི་འདྲར་ཚུལ་ཅིག་སྟེ། །གང་གི་ལུས་ལ་གཏེར་འཆང་མི། །བླུན་མོར་གྱུར་པའི་མི་དག་གཉིས།། གནས་གཅིག་གཉིས་མཚུངས་ཁྱད་མེད་འདྲ།།

དེ་བས་ན་དོན་ལ་སེམས་མི་འབྲལ་བར་བྱ་བའི་ཕྱིར་ལྟ་སྒོམ་ཟབ་མོ་ལ་རྣལ་དུ་འབྱོར་པའི་དམ་པ་ཆེན་པོ་མ་ནོར་བའི་དོན་དང་ལྡན་པ་རྣམས་ཀྱི་དགོངས་སྤྱོད་ཀྱི་རང་བཞིན་ཅན་ནི། དཔེར་ན་བུམ་པའི་སྣོད་ཀྱི་ནང་གི་སྒྲོན་མ་འོད་གསལ་བ་ནང་ན་སྣང་ཡང་གཞན་གྱིས་མི་མཐོང་བ་ལྟར་དུ། ཡང་དག་པའི་རིག་པ་གསང་བའི་མཛོད་གསུམ་གྱི་དོན་དགོངས་པ་ལ་གསལ་བ་དང་ལྡན་ཡང་སྲོག་ཆགས་བྱི་ལའམ་རྐུན་མོའི་སྡེར་མོ་བསྐུངས་ནས་རྫས་ལེན་པ་ལྟར་དོན་ཟབ་མོ་ཁོང་ནས་གབ་ཅིང་སྦས་ཏེ་སྤྱོད་པའི་ཐབས་ཀྱིས་གཞན་ལ་དོན་སྟོན་པ་ནི་ཐབས་ལ་མཁས་པས་མངོན་དུ་མི་སྣང་བའི་ཕྱིར་གང་འདིར་སོ་སོའི་སྐྱེ་བོ་བླུན་པོས་ཚོགས་རྣམས་དེ་ལ་ཡོན་ཏན་ཅན་དུ་ཅིར་ཡང་མི་མཐོང་ཞིང་མི་བརྩིའོ། །དཔེར་ན་འདི་གཉིས་དོན་ལ་འབྱོར་པས་ཁྱད་ཡོད་ཀྱང་ཕྱི་ནས་འདྲ་ཚུལ་གཅིག་ཏུ་གྱུར་ཏེ་འགྲོན་པོ་གང་གི་ལུས་ལ་རིན་པོ་ཆེའི་གཏེར་འཆང་བའི་མི་དང༌། བླུན་པོར་གྱུར་ཏེ་ནོར་ཅི་ཡང་མེད་པའི་མི་དག་དང་གཉིས་ཀ་གནས་གཅིག་ཏུ་འདུག་ན། དེ་གཉིས་ཕྱི་ནས་མིར་འདྲ་ཞིང་མིར་མཚུངས་པར་གཅིག་སྟེ་ཁྱད་མེད་པར་མཐོང་བ་དང་འདྲའོ། །དེ་བས་ན་གསང་དོན་ནི་དེ་བཞིན་དུ་སྤྱད་ན་བྱང་ཆུབ་ཤིན་ཏུ་མྱུར་རོ།།

གསུམ་པ་ཚིག་ཏུ་བརྗོད་ཅིང་དོན་དུ་མི་གཉེར་བའི་སྐྱོན་བཤད་པ་ནི།

གསང་འདི་བསྔགས་པ། ཞེས་པ་ནས། ཉིད་དང་ཕྲད་པར་དཀའ། །ཞེས་པའི་བར་གྱིས་བསྟན་ཏེ།

གསང་འདི་བསྔགས་པ་རྗོད་བྱེད་ཅིང་། །གསང་བའི་དོན་དུ་གཉེེར་བ་མེད། །ཏིང་འཛིན་བསྔགས་པ་རྗོད་བྱེད་ཅིང་། །ཏིང་འཛིན་དོན་དུ་གཉེར་བ་མེད། །ཡང་དག་མངགས་པ་རྗོད་བྱེད་ཅིང་། །ཡང་དག་དོན་དུ་གཉེར་བ་མེད། །དམ་ཚིག་བསྔགས་པ་རྗོད་བྱེད་ཅིང་། །དམ་ཚིག་དོན་དུ་གཉེར་བ་མེད། །ཇི་ལྟར་འགྲོ་གང་ལ་ལ་དག །ནོར་བུ་རིན་ཆེན་འདི་འདྲ་སྟེ། །འདོད་པའི་ཡོན་ཏན་ཀུན་འབྱུང་ཞེས། །དེ་ཡི་ཡོན་ཏན་རྒྱ་ཆེར་བརྗོད། །དེ་ལ་འགྲོ་གང་གཞན་དག་གིས། །དེ་ལྟར་འདོད་པ་འབྱུང་འགྱུར་པ། །དེ་དག་ཅུང་ཟད་ཡོད་དམ་ཞེས། །དྲིས་ཀྱང་མེད་པར་སླར་སྨྲས་པ། །གང་ཞིག་དགོས་ པ་སྐོང་བ་ཡི། །ཡོན་ཏན་ཅུང་ཟད་སྨོས་པར་ཟད། །དེ་ཉིད་བདག་ལ་མེད ་ཅེས་སྨྲ། །དེ་བཞིན་རྣལ་འབྱོར་མི་བརྩོན་པས། །བསླབ་པར་བྱ་བའི་ཆོས་བྲལ་བས། །དམ་པའི་བསྔགས་པ་རྗོད་བྱེད་ཀྱང་། །དེ་དག་ལ་ནི་དམ་པ་མེད། །དེ་ལ་སོགས་པ་ལོག་སྤྱོད་རྣམས། །དམ་པ་ཉིད་དང་འཕྲད་པར་དཀའ།།

ཚིག་ཏུ་བརྗོད་ཀྱང་དང་དུ་མ་བླངས་པས་མི་འགྲུབ་པའི་ཕྱིར། གང་ཟག་ཁ་ཅིག་སྤྱིར་གསང་སྔགས་གསང་ཆེན་དམ་༼༥༢༽པ་འདི་ཡི་བསྔགས་པ་གཞན་ལ་ཚིག་ཏུ་བརྗོད་པར་བྱེད་ཅིང༌། རང་ཉིད་ཀྱིས་གསང་བའི་ངེས་པ་ཟབ་མོ་དོན་དུ་གཉེར་བ་མེད་ལ། བྱེ་བྲག་ཏུ་གསང་བའི་སྒོ་ཡི་ཏིང་ངེ་འཛིན་གྱི་བསྔགས་པ་བརྗོད་པར་བྱེད་ཅིང༌། དགོངས་པའི་ཏིང་ངེ་འཛིན་དོན་དུ་གཉེར་བ་མེད་པ་དང༌། དེ་བཞིན་དུ། ཡང་དག་ལྟ་བའི་བསྔགས་པ་བརྗོད་པར་བྱེད་ཅིང༌། ཡང་དག་ལྟ་བའི་ངེས་གསང་དོན་དུ་གཉེར་བ་མེད་པ་དང༌། དམ་ཚིག་མཆོག་གི་བསྔགས་པ་བརྗོད་པར་བྱེད་ཅིང༌། དམ་ཚིག་གི་གསང་མཛོད་དོན་དུ་གཉེར་བ་མེད་པའི་མཚན་གཞིར་གྱུར་པ་དག་ནི་རྩ་བ་དམ་ཚིག་ལ་དགོངས་པའི་ཕྱིར་བསྙད་པའོ། །དེ་ཉེ་བར་མཚོན་པ་ནི། དཔེ་ཇི་ལྟར་ན་འགྲོ་བ་མི་གང་ལ་ལ་དག་གིས། ནོར་བུ་རིན་ཆེན་འདི་ནི་དགོས་འདོད་འདི་འདྲ་སྟེར་བ་སྟེ། འདོད་པའི་ཡོན་ཏན་ཀུན་འབྱུང་བ་ཡིན་ནོ་ཞེས། དེ་ཡི་ཡོན་ཏན་གྱི་བསྔགས་པ་རྒྱ་ཆེར་བརྗོད་པ་ན། དེ་ལ་འགྲོ་བ་མི་གང་གཞན་དག་གིས། དེ་ལྟར་དགོས་འདོད་ཕུན་སུམ་ཚོགས་པ་འབྱུང་བར་འགྱུར་བ་ཡི་ནོར་བུ་དེ་དག་ལས་ཁྱོད་རང་ལ་ཅུང་ཟད་ཡོད་དམ་ཞེས་དྲིས་ཀྱང་རང་ལ་མེད་པས་སླར་ལན་དུ་སྨྲས་པ། གང་ཞིག་དགོས་པ་སྐོང་བ་ཡི་ནོར་བུ་རིན་པོ་ཆེའི་ཡོན་ཏན་ཅུང་ཟད་སྨོས་པར་ཟད་ཀྱི། དེ་ཉིད་ བདག་ལ་མེད་དོ་ཅེས་སྨྲ་བར་བྱེད་དེ་དེས་དབུལ་བ་སེལ་མི་ནུས་པ ་དང་འདྲའོ། །དཔེ་དེ་བཞིན་དུ་རྣལ་འབྱོར་པ་ཡང་དག་པའི་དམ་ཚིག་གི་དོན་ལ་མི་བརྩོན་པས་ནི། བསླབ་པར་བྱ་བའི་ཆོས་ཀྱི་གཞི་རྟེན་དང་བྲལ་བ་ཡིན་པས། དམ་ཚིག་དམ་པའི་ཡོན་ཏན་གྱི་བསྔགས་པ་བརྗོད་པར་བྱེད་ཀྱང་གང་ཟག་དེ་དག་ལ་ནི་དམ་ཚིག་དམ་པ་མེད་དོ། །དེ་ལ་སོགས་པའི་ལོག་པར་སྤྱོད་པ་རྣམས་ནི། མཆོག་གི་གནས་དམ་པ་ཉིད་དང་ཕྲད་པར་དཀའ་བས་དམ་ཚིག་མེད་ན་ཡོན་ཏན་བརྗོད་ཀྱང་མི་འགྲུབ་པར་གསུངས་པའོ། །འདི་ལ་བུས་པ་གསུམ་ཆོས་སློབ་དུ་འོངས་པས་གཉིས་ཀྱིས་ལོབས། གཅིག་མས་ཡུལ་དུ་ཡང་ཡང་བོས་པས་མ་ལོབས་པའི་སྒྲུང་གི་ལོ་རྒྱུས་འཆད་སྲོལ་ཀྱང་ཡོད་དོ།།

ལྔ་པ་ཉམས་པའི་སྣོད་ངན་དང་མི་འགྲོགས་པར་གདམས་པ་ལ་བཞི་སྟེ། རྣལ་འབྱོར་པས་ཉམས་པར་སྤང་བར་བསྟན་པ། ཉམས་པའི་མགོན་བྱས་པའི་ཉེས་པ་བཤད་པ། མ་ཚོར་ཏེ་ཉམས་པས་གཞན་གྱི་དམ་པ་ཡིན་ཡང་མི་འགྲོགས་པར་བསྟན་པ། ཉམས་པ་དང་འགྲོགས་པའི་སྐྱོན་བཤད་པའོ། །དང་པོ་ནི།

རྣལ་འབྱོར་ཆོས་འཛིན། ཞེས་པ་ནས། སྣང་བ་གྲགས་པར་འགྱུར། །༼༥༣༽ཞེས་པའི་བར་གྱིས་བསྟན་ཏེ།

རྣལ་འབྱོར་ཆོས་འཛིན་གང་དག་གིས། །རྣལ་འབྱོར་ཉམས་འགྱུར་ལོག་སྲེད་ཅན། །གསང་བ་འཇིག་པའི་དགྲར་ལྟས་ན། །དེ་དག་སྡིག་པ་མཐོང་བ་ལྟར། །བཅད་ཅིང་ས་བཅིང་གང་བྱེད་པ། །སྐྱེས་བུ་དེ་ནི་དམ་པའི་སྲས། །དཔེར་ན་གང་དེ་གང་དག་གིས། །གང་གི་རྒྱ་ལས་འདས་གྱུར་ན། །གང་དགར་མི་སྟོང་ལུགས་དང་སྦྱོར། །བཀའ་ཡི་ཡོ་སྲོང་དཀའ་བ་དེ། །རྒྱལ་པོ་ཐུགས་ཉེན་དམ་པ་ཞེས། །ཀུན་ལ་སྣང་བ་གྲགས་པར་འགྱུར།།

རྣལ་འབྱོར་དམ་པ་གསང་བ་མཆོག་གི་ཆོས་འཛིན་ཞིང་དམ་ཚིག་ལ་གནས་པ་གང་དག་གིས། རྣལ་འབྱོར་པ་དམ་ཚིག་ཉམས་པར་གྱུར་པའི་ལོག་སྲེད་ཅན་དག་ནི་གསང་སྔགས་གསང་བ་དམ་པ་ཉིད་འཇིག་པར་བྱེད་པའི་དགྲར་གྱུར་པར་བལྟས་ནས་ཉམས་པ་དེ་དག་དང་མི་འགྲོགས་པར་དཔེར་ན་སྡིག་པ་མཐོང་བ་ལྟར་བཀའ་ཆད་དབབ་སྟེ་ཚར་བཅད་ཅིང་གནས་ནས་བསྐྲད་དེ་སླར་མི་འོང་བར་ས་བཅིངས་པ་དང་བསྒྲལ་བའི་ཞིང་དུ་གང་བྱེད་པ་ཡི་སྐྱེས་བུ་དེ་ནི་དམ་པའི་སྲས་ཀྱི་ཡོན་ཏན་འཆང་བའི་རིག་འཛིན་དུ་འགྱུར་རོ། །དེ་ཉིད་ཉེ་བར་མཚོན་པ་ནི། དཔེར་ན་རྒྱལ་པོས་ཁྲིམས་བཅས་པའི་ས་གང་དེར། མི་གང་དག་གིས་རྒྱལ་པོ་གང་གི་བཀའི་རྒྱ་དང་འགལ་ཏེ་རྒྱལ་ཁྲིམས་ལས་འདས་པར་གྱུར་ན། དེ་ཉིད་རྒྱལ་བློན་གྱིས་རང་གང་དགར་མི་གཏོང་བར་རྒྱལ་པོའི་ཆོས་ལུགས་ཀྱི་ཁྲིམས་དང་སྦྱོར་ཏེ་སྲོག་ལ་འབབ་པ་སོགས་ཀྱིས་རྒྱལ་པོའི་བཀའ་ཡི་ཡོ་སྲོང་བའི་བཀའ་པ་རྒྱལ་ཁྲིམས་འཚོ་བའི་བློན་པོ་དེ་ཡིས་དེ་ལྟར་བྱེད་པ་ནི། རྒྱལ་པོའི་ཐུགས་ཟིན་ནས་མཉེས་པ་སྒྲུབས་པའི་བློན་འབངས་དམ་པ་ཞེས་མགོ་ནག་ཀུན་ལ་སྣང་ཞིང་མཐོང་བ་ཉིད་ཀྱིས་རྒྱལ་ཁམས་སུ་ཡང་དེ་ལྟར་གྲགས་པར་འགྱུར་བ་ལྟར་རྣལ་འབྱོར་པའང་རྗེས་སུ་མཐུན་ནོ།།

གཉིས་པ་ཉམས་པའི་མགོན་བྱས་པའི་ཉེས་པ་བཤད་པ་ནི།

ལྡུམ་རར་དུག་གི ཞེས་པ་ནས། གསང་བའི་དམ་སྲི་ཡིན། །ཞེས་པའི་བར་གྱིས་བསྟན་ཏེ།

ལྡུམ་རར་དུག་གི་སྡོང་སྐྱེས་ན། །ལྡུམ་པས་དུག་ཏུ་ཤེས་མ་ཐག །རྩད་ནས་ཕྱུང་སྟེ་མེད་པར་བྱེད། །ཅི་ཕྱིར་ལྡུམ་ཟས་དེ་དག་ལ། །དུག་འཕེལ་གྱུར་ན་འཆི་ཕྱིར་རོ། །གང་དག་ཉམས་གྱུར་དུག་ཅན་དེ། །བརྟུལ་ཞུགས་ཅན་གྱི་རྣལ་འབྱོར་པས། །གནས་སམ་ལོ་ཡིས་བཤུགས་ཏེ་སྤངས། །གང་དག་མི་སྤོང་མགོན་བྱེད་པ།།

དེ་དག་གསང་བའི་དམ་སྲི་ཡིན།།

དེ་བས་ན་ཉམས་པའི་མགོན་བྱེད་པ་ནི་ཉེས་པ་ཆེ་སྟེ། དཔེར་ན་ལྡུམ་རར་དུག་གི་སྡོང་པོ་སྐྱེས་པ་ན། ལྡུམ་རའི་བདག་པོ་གཉེར་པས་དུག་ཏུ་ངོ་ཤེས་མ་ཐག་ཏུ། རྩད་ནས་ཕྱུངས་ཏེ་འབྱིན་ཅིང་མེད་པར་བྱེད་དོ། །ཅི་ཡི་ཕྱིར་ན། གལ་ཏེ་མ་ཕྱུངས་པར་ལྡུམ་ཟས་དེ་དག་ལ་དུག་འཕེལ་བར་གྱུར་ན་བདག་པོ་ལ་སོགས་པ་ཀུན་དུག་གིས་འཆི་བར་འགྱུར་བའི་ཕྱིར་རོ། །དཔེ་དེ་བཞིན་དུ་གང་དག་ཉམས་པར་གྱུར་པའི་གང་ཟག་དུག་ཅན་དེ་ཉིད་སྤྱོད་པའི་བརྟུལ་ཞུགས་ཅན་གྱི་རྣལ་འབྱོར་པས་ཐབས་དྲག་པོས་གནས་སོ་སོར་བསྐལ་པའང་ལོ་ཡིས་མི་སླེབས་པའི་གནས་སམ་ལོ་ཡིས་ཡུན་དུ་མི་ཕྲད་པར་བཤུགས་ཏེ་སྤངས་ནས་གཏང་བར་བྱའོ། །གལ་ཏེ་གང་དག་གིས་མི་སྤང་བར་སྙིང་རྗེ་དང་དམ་ཚིག་ལ་མོས་པར་ཚུལ་འཆོས་ཤིང་ཟང་ཟིང་ལ་ལྟ་སྟེ། ཉམས་པའི་གང་ཟག་དང་འགྲོགས་ཤིང་དེའི་སྐྱབས་གྲོགས་དང་མགོན་བྱེད་པ་དེ་དག་ནི་གསང་སྔགས་གསང་བའི་དམ་༼༥༤༽སྲི་ཆེན་པོ་ཡིན་ཏེ་རྡོ་རྗེ་དམྱལ་བ་ལས་ནམ་ཡང་ཐར་པའི་སྐབས་མི་སྲིད་དོ། །དེ་ལ་མ་ཉམས་པར་གཞན་གྱིས་ཁ་ཡོགས་བྱུང་ནས་འགལ་བ་ལྟ་བུ་ལ་མགོན་བྱས་པ་ནི་མིན་ཏེ་རྩ་བ་མ་ཉམས་པས་སོ། །ཞེས་ཆོས་རྗེའི་ཕྱག་མཆན་ལས་གསུང༌། སྤྱིར་ལུང་ལས། གནོད་པར་བྱེད་པའི་དམ་སྲིད། ལས་ལས་གྲུབ་པའི་དམ་སྲི། རྐྱེན་ལས་གྱུར་པའི་དམ་སྲི་གསུམ་འབྱུང་བ་ལས་ཐ་མར་ངོས་གཟུང་ངོ༌།།

གསུམ་པ་མ་ཚོར་ཏེ་ཉམས་པས་གཞན་གྱི་དམ་པ་ཡིན་ཡང་མི་འགྲོགས་པར་བསྟན་པ་ནི།

དོན་ལ་རྣལ་འབྱོར། ཞེས་པ་ནས། དུ་ཡང་མཐོང་མི་བྱ། །ཞེས་པའི་བར་གྱིས་བསྟན་ཏེ།

དོན་ལ་རྣལ་འབྱོར་གང་ཞིག་གིས། །ཐ་ཚིགས་ཟབ་མོར་བཅས་རྣམས་ལས། །བསྲུང་བའི་བསམ་པ་མི་གཡོ་བཞིན། །རྩ་བ་ཡན་ལག་བཅས་རྣམས་ལས། །གལ་ཏེ་མ་ཚོར་ཞིག་གྱུར་ཀྱང་། །རྣམ་སྨིན་ཡོད་ཀྱང་རྩ་མི་ཉམས། །ཇི་ལྟར་གླང་པོ་ཨེ་ན་ཡ། །ཤི་ནས་རོར་ནི་གྱུར་མོད་ཀྱང་། །འགི་ཧང་རྩིས་ནི་དོན་བྱེད་ལྟར། །རྣལ་འབྱོར་ཉམས་ཏེ་རོར་གྱུར་ཀྱང་། །གཞན་གྱི་དམ་པ་དེ་འགྱུར་ཞིང་། །དེ་ཡི་དོན་བྱེད་ནུས་པ་ཡིན།།

དེ་ལྟར་མོད་ཀྱང་འདི་ཀུན་རྣམས། །རྨི་ལམ་དུ་ཡང་མཐོང་མི་བྱ།།

གསང་བའི་དོན་ལ་རྣལ་འབྱོར་དང་ལྡན་ཞིང་ཚུལ་བཞིན་དུ་བྱེད་པ་གང་ཞིག་དེ་དག་གིས་དམ་ཚིག་དམ་པར་ཐ་ཚིག་ཟབ་མོར་བཅས་པ་རྣམས་ལ་སྲུང་བའི་བསམ་པ་མི་གཡོ་བཞིན་དུ་ཡང་དྲན་པ་དང་ཤེས་བཞིན་ཆུང་བས་རྩ་བ་ཡན་ལག་དང་བཅས་པ་རྣམས་ལས་གལ་ཏེ་མ་ཚོར་བཞིན་དུ་ཡན་ལག་གི་དམ་ཚིག་འགའ་ཞིག་ཉམས་ཏེ་ཞིག་པར་གྱུར་ཀྱང་ཡན་ལག་ཉམས་པས་ཉེས་པའི་རྣམ་སྨིན་ཡོད་ཀྱང་རྩ་བ་མི་ཉམས་པས་ལྟུང་བར་མི་འགྱུར་བ་ནི་དཔེ་ཇི་ལྟར་ན་གླང་པོ་ཨེ་ན་ཡ་ཞེས་བྱ་བ་ཀུན་འདུས་ཀྱི་མཆན་རྙིང་ལས་ས་སྲུང་ངམ་གླ་བ་ལ་གསུངས་ཏེ་དེ་ཉིད་ཤི་ནས་རོར་ནི་གྱུར་མོད་ཀྱང༌། རྣ་སྤབས་སམ་གི་ཝང་རྩིས་ནི་དོན་བྱེད་པ་ལྟར་རྣལ་འབྱོར་པའང་མ་ཚོར་བར་དོན་གྱི་ཡན་ལག་ཉམས་ཏེ་རོར་གྱུར་ཀྱང༌། ཐེག་འོག་པ་གཞན་གྱི་དམ་པར་དེ་ཉིད་འགྱུར་ཞིང༌། དེ་ཡི་དོན་ཀྱང་བྱེད་ནུས་པ་ཡིན་ནོ། །མ་ཚོར་བར་ཉམས་པ་རྣམ་སྨིན་ཆུང་བ་དེ་ལྟ་མོད་ཀྱང་གསང་སྔགས་རང་གི་ནང་དུ་ཐ་ན་འདི་ཀུན་རྣམས་དང་དངོས་སུ་ལྟ་ཨ་ཅང་ཡང་ཆེས་ཏེ་རྨི་ལམ་དུ་ཡང་མཐོང་ཞིང་ཕྲད་པར་མི་བྱའོ།།

བཞི་པ་ཉམས་པ་དང་འགྲོགས་པའི་སྐྱོན་བཤད་པ་ནི།

ཅི་ཕྱིར་འོ་མ། ཞེས་པ་ནས། ངན་འགྲོར་སྤྱི་ཚུགས་ལྷུང༌། །ཞེས་པའི་བར་གྱིས་བསྟན་ཏེ།

ཅི་ཕྱིར་འོ་མ་ཉུང་ངུ་ཞིག །རུལ་བས་འོ་མ་ཀུན་བསྲུལ་བཞིན། །རྣལ་འབྱོར་ཉམས་འགྱུར་གཅིག་གིས་ནི། །རྣལ་འབྱོར་ཅན་ཀུན་མ་རུང་འགྱུར། །འཁོར་བའི་གཡུལ་རྒྱལ་བྱེད་པ་ཡི། །ལོག་པའི་རྣལ་འབྱོར་ཐམས་ཅད་ཀུན། །དོན་དམ་ངེས་པའི་རྣལ་འབྱོར་པས། །ཐམས་ཅད་བསྒྲིམས་ཏེ་སྤང་བར་བྱ། །གལ་ཏེ་མ་སྤངས་ལོག་སྤྱོད་ན། །འཁོར་བའི་གཡུལ་ནི་རྒྱལ་འགྱུར་ཏེ། །བདེན་པའི་བྱིན་རླབས་མཐུ་ཆུང་འགྱུར། །ཀུན་ཀྱང་དགེ་སྤྱོད་དོན་ཆུང་ཞེས། །ཡང་དག་དོན་ལ་ཡིད་འབྱུང་ཞིང་། །ལོག་པའི་དོན་ལ་གཞོལ་བར་འགྱུར། །ཀུན་གྱིས་ལོག་པའི་ལས་དཔྱད་པས། །ཡིད་དུ་མི་འོང་སྣ་ཚོགས་འབྱུང་། །དེས་ན་སྒྲོ་སྐུར་གཉིས་བྱས་པས། །བཀའ་ཡི་ཆད་པ་གང་ཡིན་པ། །ཡེ་ཤེས་ཅན་ལྟ་རང་བཞིན་གྱིས། །ནམས་ཀྱང་གནོད་པ་ཡོང་མི་མཛད། །དེ་ཡི་འཁོར་ན་གནས་པ་ཡི། །གང་དག་མ་རུངས་མཐུ་ཆེན་རྣམས། །རྣལ་འབྱོར་ལོག་པར་སྤྱོད་རྣམས་ཀྱིས། །སྐྱོན་མཐོང་ཙམ་ན་ཆད་པས་གཅོད།། ཐམས་ཅད་ངན་འགྲོར་སྤྱི་ཚུགས་ལྷུང་།།

དེ་བས་ན་ཉམས་པ་དང་ཕྲད་ཅིང་བཤེས་པའི་སྐྱོན་འབྱུང་བ་རྒྱུ་མཚན་ཅི་ཡི་ཕྱིར་ཞེ་ན། མཐུན་པའི་དཔེ་འོ་མ་ཉུང་ངུ་ཞིག་རུལ་བས་དེ་དང་འདྲེས་པའི་འོ་མ་ཐམས་ཅད་ཀུན་རུལ་བར་འགྱུར་བཞིན་དུ། དོན་ནི་རྣལ་འབྱོར་པ་ཉམས་པར་གྱུར་པ་གཅིག་གིས་ནི། རྣལ་འབྱོར་དམ་ཚིག་ཅན་ཀུན་ཀྱང་མ་རུངས་པར་འགྱུར་བས་ཉམས་པ་བཞིན་སྤྱད་པ་ཐམས་ཅད་དེ་བཞིན་དུ་འགྱུར་རོ། །འོ་ན་དགེ་སློང་ཐུགས་དཀས་སངས་རྒྱས་ཐོབ། དན་ཕག་གིས་རྩལ་ཆེན་རྫོགས། ཐར་པ་ནག་པོ་དམྱལ་བར་ལྟུང་བ་དེ་གསུམ་འགལ་ཞེ་ན། གཉིས་པོ་སེམས་ལ་ཞེ་སྡང་མ་སྐྱེས། སྤྱོད་༼༥༥༽པ་ཁོ་བཞིན་མ་སྤྱད་པས་མི་འགལ་ལོ། །དེ་བས་ན་དམ་ཚིག་ཉམས་པས་འཁོར་བར་འགྱུར་ལ། དེ་ལ་བརྟེན་པ་མང་པོས་འཁོར་བ་འཕེལ་བས། འཁོར་བའི་གཡུལ་ཉིད་རྒྱལ་བར་བྱེད་པ་ཡི་ལོག་པའི་རྣལ་འབྱོར་ཐམས་ཅད་ཀུན། གསང་ཆེན་དོན་དམ་སྙིང་པོ་ཡང་དག་པར་ངེས་པའི་རྣལ་འབྱོར་པས། དེ་དག་བརྟགས་ནས་ཐམས་ཅད་བསྒྲིམས་ཏེ་སྤང་བར་བྱ་དགོས་ལ། གལ་ཏེ་གཞུང་དང་མི་འགལ་བ་ལྟར་བྱས་ནས་མ་སྤངས་པར་སྐྱོན་ཅན་དེ་དང་ལྷན་ཅིག་ལོག་པར་སྤྱོད་ན། འཁོར་བའི་གཡུལ་ནི་རྒྱལ་བར་འགྱུར་ཏེ། བསྒྲུབ་པ་ལ་ཡུན་བསྐྱལ་ཀྱང་ཉམས་པའི་གྲིབ་ཀྱིས་བྱིན་རླབས་མ་བརྟས་པ་ལྟར་བདེན་པའི་བྱིན་རླབས་མཐུ་ཆུང་བར་འགྱུར་བས་རང་དང་གཞན་ཀུན་ཀྱང་དགེ་བ་སྤྱོད་པ་དོན་ཆུང་ངོ་ཞེས་ཟེར་ནས་ཡང་དག་པའི་དོན་ལ་ཡིད་འབྱུང་ཞིང་ལོག་པའི་ཆོས་ཀྱི་རྗེས་ཕྱོགས་ལ་གཞོལ་བར་འགྱུར་ཏེ་ཀུན་གྱིས་དམ་ཚིག་ལས་ལོག་པའི་ལས་ལམ་སྤྱོད་པས་ཆོས་སྐྱོང་བའི་སྲུང་མ་རྣམས་མི་དགའ་བས་ཡིད་དུ་མི་འོང་བ་སྣ་ཚོགས་འབྱུང་བར་སྣང་ལ། དེས་ན་ཆོས་བསྒྲུབས་པས་འདི་ལྟར་འགྱུར་ཤེས་སྒྲོ་འདོགས་པ་དང་ཡོན་ཏན་མ་བྱུང་ཞེས་སྐུར་པ་འདེབས་པའམ་ཅི་འདོད་བྱས་པས་སྒྲོ་འདོགས་ཤིང་དམ་ཚིག་མི་སྲུངས་པས་སྐུར་པ་གཉིས་བྱས་པས་བཀའ་ཡི་ཆད་པ་དྲག་པོ་གང་ཡིན་པ་ཡང་འབྱུང་སྟེ། དེའང་ཡེ་ཤེས་ཅན་གྱི་ལྷ་མཆོག་ལྟ་བུ་འཇིག་རྟེན་ལས་འདས་པའི་ལྟ་བ་མངའ་བ་རྣམས་རང་བཞིན་ཤུགས་ཀྱིས་ཐུགས་རྗེ་ལ་གནས་པས་ནམས་ཀྱང་གནོད་པ་ཡོང་ཡེ་མི་མཛད་ཀྱང༌། དེ་ཡི་འཁོར་ན་གནས་པ་ཡི་མ་མོ་དང་མཁའ་འགྲོ་གང་དག་མ་རུངས་ཤིང་མཐུ་ཆེན་པོ་ཅན་རྣམས་ཀྱིས། རྣལ་འབྱོར་ལོག་པར་སྤྱོད་པ་རྣམས་ཀྱི་སྐྱོན་མཐོང་བ་ཙམ་ན་ཚེ་འདི་ལ་ཆད་པས་གཅོད་ཅིང་ཕྱི་མ་ལ་ཐམས་ཅད་ངན་འགྲོར་དམྱལ་བ་ཆེན་པོའི་གནས་སུ་སྤྱིའུ་ཚུགས་སུ་ལྷུང་ནས་རྣམ་པར་སྨོན་པ་དབལ་ཚ་བ་མྱོང་བར་འགྱུར་རོ།།

གཉིས་པ་བཟང་པོའི་མཚན་ཉིད་བཤད་པ་ལ་གཉིས་ཏེ། བཟང་པོའི་མཚན་ཉིད་བཤད་པ། བཟང་པོ་ལ་སྔོན་དུ་འགྲོ་བའི་དམ་ཚིག་བསྟན་པའོ། །དང་པོ་ནི།

བསྒྲུབ་པའི་སྣོད་མཆོག ཅེས་པ་ནས། གསང་སྒོ་དབྱེ་བར་བྱ། །ཞེས་པའི་བར་གྱིས་བསྟན་ཏེ།

བསྒྲུབ་པའི་སྣོད་མཆོག་ཅིག་ཡོད་དེ། །འདི་དང་མི་མཐུན་ཀུན་རྫོགས་པའི། །རྒྱུད་བསྙེན་དོན་ལྡན་ངང་ཚུལ་བཟང་། །ཅི་ལའང་ཆགས་མེད་གཏོང་ལྡན་སེམས། །ཤེས་པར་རྣམ་གྲོལ་ལྡེ་མིག་གིས། །གཏི་མུག་ཐར་ལམ་སྒོ་ཕྱེ་ནས། །ཆོས་ཉིད་སྙིང་པོ་མིག་ལྡན་པས། །མཐའ་དང་དབུས་བྲལ་དམ་པའི་ཡུལ། །མ་ནོར་ལམ་དུ་འཇུག་ཤེས་པས། །སྡོང་ཆེན་སྡོང་པོ་རབ་དུལ་བའོ། །ཐ་ཚིག་ལུང་ལས་འབྱུང་བ་བཞིན། །དྲང་སྲོང་དཀའ་ཐུབ་དམ་པ་དེ།།

དམ་པའི་དམ་པ་ཉིད་ཡིན་པས། །དེ་ལ་གསང་སྒོ་དབྱེ་བར་བྱ།།

འོ་ན་གསང་སྔགས་ཀྱི་སྣོད་མ་ནོར་བ་ཇི་ལྟ་བུ་སྙམ་པ་ལ། ཐེག་པ་ཆེན་པོའི་གསང་བའི་བསྒྲུབ་པ་དོན་དུ་གཉེར་བར་བྱེད་པའི་ཐབས་དམ་པ་བསྟན་པའི་སྣོད་མཆོག་བཟང་པོ་རབ་ཏུ་གྱུར་པ་ནི་གཅིག་སྟེ། ༼༥༦༽དེ་ལ་དམ་པའི་མཚན་ཉིད་འདི་ལྟར་ཡོད་དེ། སྣོད་ངན་པ་བཞི་པོ་འདི་རྣམས་དང་མཚན་ཉིད་མི་མཐུན་པས་དེ་ལས་བཟློག་པའི་ཡོན་ཏན་ཀུན་རྫོགས་པར་ཡོད་པའི་རྣལ་འབྱོར་ནི། རྒྱུད་མཉེན་པ་དང༌། དོན་དང་ལྡན་པ་དང་། ངང་རིང་བ་དང༌། ཚུལ་65ཤིས་པ་དང༌། རང་བཞིན་བཟང་བ་དང༌། ཅི་ལའང་འཛིན་ཆགས་མེད་པ་དང༌། གཏོང་ཕོད་ཆེན་པོ་དང་ལྡན་པའི་སེམས་དང༌། ཤེས་རབ་ཀྱི་སྤྱན་མངའ་བ་དང༌། རྒྱུད་སྦྱངས་པའི་ཡོན་ཏན་གྱིས་རྣམ་གྲོལ་གསང་བའི་ཐབས་ལ་མཁས་པའི་ལྡེ་མིག་གིས་གཏི་མུག་རྨོངས་པའི་མ་རིག་པའི་ཐ་རམ་གྱི་སྒོ་ཕྱེ་ནས་ཆོས་ཀྱི་སྙིང་པོའི་དོན་མཐོང་བའི་བློ་གྲོས་ཀྱི་མིག་དང་ལྡན་པས་གསང་སྔགས་ཇི་ལྟ་བའི་གནས་ལུགས་མཐའ་དང་དབུས་ཀུན་བྲལ་བའི་སྐྱེས་བུ་དམ་པའི་སྤྱོད་ཡུལ་ལ་ངེས་པ་རྙེད་དེ་མ་ནོར་བའི་ལམ་དུ་འཇུག་པའི་ཐབས་ཤེས་པ་ནི་སེམས་ཞི་བས་ཡོན་ཏན་གྱི་ལྗོན་པའི་སྡོང་པོ་ཆེན་པོ་ང་རྒྱལ་གྱི་དུག་གི་སྡོང་པོ་སོགས་ཉོན་མོངས་པའི་རྟོག་ཚོགས་དང་བྲལ་ཞིང་རབ་ཏུ་དུལ་བའོ། །དེ་ལྟ་བུའི་སྣོད་དང་ལྡན་པ་ནི། དམ་པ་མཆོག་གི་ཐ་ཚིག་ཟབ་མོ་རྒྱུད་ལུང་ལས་འབྱུང་བ་བཞིན་དུ་ཡང་དག་པར་བསྲུང་བའི་མཚན་ཉིད་དྲུག་གཉིས་དང་ལྡན་པའི་དྲང་སྲོང་མཆོག་གི་དཀའ་ཐུབ་དམ་པ་ལ་གནས་པ་དེ་ཉིད་ཐེག་ཆེན་གསང་བའི་དམ་ཚིག་རྣམས་སྲུང་སྟེ་རྒྱལ་བའི་སྲས་རྒྱུད་འཛིན་པའི་དམ་པ་ཉིད་ཡིན་པས་དེ་ལ་གསང་སྔགས་ཀྱི་གབ་པ་དང་སྦས་པའི་དོན་རྣམས་ཀྱི་མན་ངག་གི་གསང་སྒོ་དབྱེ་སྟེ་བསྟན་པར་བྱའོ།།

གཉིས་པ་བཟང་པོ་ལ་སྔོན་དུ་འགྲོ་བའི་དམ་ཚིག་བསྟན་པ་ནི།

འོག་ནས། རྣལ་འབྱོར་དམ་པའི་རིགས་རྒྱུད། ཅེས་པ་ནས། དབྱིག་གི་སྣོད་ཆེན་ཡིན། །ཞེས་པའི་བར་གྱིས་བསྟན་ཏེ།

རྣལ་འབྱོར་དམ་པའི་རིགས་རྒྱུད་ལས། །ངེས་པར་བརྟགས་ཏེ་སྤྱོད་པའི་བུ། །ཟབ་མོར་རྫོགས་སྤྱོད་མཆོག་བདེ་བའི། །བློ་ལ་ངེས་པའི་ལུང་བསྟན་འདི། །འདི་ཡི་སྔོན་འགྲོ་དམ་ཚིག་སྟེ། །ཟབ་མོ་ལ་སོགས་ཀུན་སྔོན་དུ། །རྡོ་རྗེ་ཐ་ཚིག་དྲང་པོ་ཡི། །གཅན་འཕྲང་ལས་རྣམས་བསྲུང་བའི་ཕྱིར། །སྤྱི་དང་ཁྱད་པར་དམ་ཚིག་རྣམས། །ངེས་པའི་དོན་གྱིས་བཙན་རེད་ན། །འདི་ནི་དབྱིག་གི་སྣོད་ཆེན་ཡིན།།

རྣལ་འབྱོར་གྱི་མཆོག་དམ་པ་གསང་སྔགས་བླ་ན་མེད་པའི་རྒྱལ་བའི་རིགས་འཛིན་ཅིང་རྒྱུད་དུ་བྱུང་བ་དག་རྒྱུད་རྒྱལ་འདི་ལྟ་བུའི་དོན་ལས་ངེས་པར་བརྟགས་ཏེ་གཞུང་གི་དམ་ཚིག་ཇི་བཞིན་དུ་སྲུང་ཞིང་སྤྱོད་པའི་རྒྱལ་སྲས་རིགས་ཀྱི་བུ་མཆོག་དེ་ནི། སྣོད་དམ་པ་ཡིན་པའི་ཕྱིར་ལྟ་བའི་དམ་ཚིག་ཟབ་མོ་གཏིང་དཔག་དཀའ་བའི་ཤེས་རབ་དང༌། བསྒྲུབ་པའི་དམ་ཚིག་ཉི་ཤུ་རྩ་བཞི་རྫོགས་པར་བསྟན་པ་དང༌། བརྟུལ་ཞུགས་ཀྱི་སྤྱོད་པ་མཆོག་གི་དམ་ཚིག་ཉི་ཤུ་རྩ་གསུམ་དང༌། རྣལ་འབྱོར་ཆེན་པོའི་སྤྱོད་པ་རྒྱུན་གྱི་དམ་ཚིག་བཞི་ལ་སོགས་པས་འབྲས་བུ་ལ་བློ་འབྱོར་བར་ཉེ་བས་བདེ་བ་མཆོག་ཉིད་སྟོན་པ་ཡི་མན་ངག་བློ་ལ་ཤོང་བ་དེ་ལྟ་བུ་ལ༼༥༧༽མ་ནོར་ངེས་པའི་དམ་ཚིག་གི་ལུང་འདི་རྣམས་བསྟན་ཞིང་བཤད་པར་བྱ་བའོ། །དེ་བས་ན་ལམ་གྱི་རིམ་པ་རྐྱེན་དང་བཅས་པ་དག་བསྟན་པའོ། །དེ་ཡང་ལམ་གྱི་ཐོག་མར་དགོས་པའི་ཡན་ལག་གང་སྙམ་པ་ལ། དམ་ཚིག་འདི་ནི་ལམ་དང་བསླབ་པ་ཀུན་གྱི་སྔོན་དུ་འགྲོ་བས་གཞི་དམ་ཚིག་གིས་གཟུང་དགོས་པའི་ཕྱིར་ཏེ་དེས་ན་ལྟ་བ་ཟབ་མོ་ལ་སོགས་པ་བསླབ་པ་དགུ་པོ་ཀུན་གྱིས་ཀྱང་ཐོག་མར་སྔོན་དུ་འགྲོ་བ་ཡིན་ཞིང༌། ཉམས་མ་ཉམས་ཀྱི་རྣམ་སྨིན་གཉིས་ཀ་རླབས་པོ་ཆེའི་ཕྱིར་ཡང་རྡོ་རྗེ་ལྟ་བུའི་འདའ་བར་དཀའ་བའི་ཐ་ཚིག་དྲག་པོའམ་དམ་ཚིག་གི་མིང་ཡང་འཐོབ་སྟེ། དེ་ལྟར་ལེགས་ཉེས་སྟོབས་ཆེ་བ་ཡི་སྒོ་ནས་ཤིན་ཏུའང་བསྲུང་དཀའ་བ་གཅན་འཕྲང་དོག་མོ་དང་འདྲ་བའི་ལམ་གྱི་དམ་ཚིག་རྣམས་བསྲུང་བར་བྱས་ཏེ་སྐྱེ་རྒ་ན་འཆིའི་གནས་ལས་གདོན་པའི་དགོས་ཆེད་ཀྱི་ཕྱིར་དུ། ཐེག་པ་སྤྱིའམ། སྤྱིའི་དམ་ཚིག་ཉི་ཤུ་རྩ་བརྒྱད་དང༌། གསང་ཆེན་ནང་པ་རང་གི་ཁྱད་པར་རམ། ཁྱད་པར་གྱི་དམ་ཚིག་བཞི་ལ་སོགས་པ་བཤད་པ་རྣམས་གསང་བར་ངེས་པའི་དམ་ཚིག་ལ་ཐེ་ཚོམ་མི་ཟ་བར་ནན་ཏན་དུ་བྱེད་པའི་དོན་གྱིས་མཉམ་པའི་ངང་དུ་བློ་བརྟན་ཅིང་བརྩན་པར་རེད་ནས་མ་ཉམས་པར་བསྲུང་ན་དེ་ནི་མན་ངག་དང་དངོས་གྲུབ་ཀྱི་དབྱིག་གི་སྣོད་མཆོག་ཆེན་པོ་ཡིན་པར་བསྟན་པས་དོན་ཟབ་མོའི་ལམ་གྱི་ནང་ནས་ཀྱང་འབྲས་བུའི་སྡོང་པོའི་གཞི་དང་རྩ་བར་ངེས་པའོ།།

གཉིས་པ་ཆེ་བའམ་ཐུབ་པའི་ཡོན་ཏན་བཤད་པ་ནི།

གོང་ནས་སྔར་ཀྱི་འཕྲོར། ཇི་ལྟར་དཀའ་ཐུབ། ཅེས་པ་ནས། གཡུལ་ལས་རྒྱལ་བར་བྱེད། །ཅེས་པའི་བར་གྱིས་བསྟན་ཏེ།

ཇི་ལྟར་དཀའ་ཐུབ་ཐུབ་པ་ལྟར། །དེ་ལྟར་ཡིད་བཞིན་ནོར་བུ་སྟེ། །ཡིད་འོང་འདོད་དང་བདེ་བ་འབྱུང་། །རིག་འཛིན་རྒྱལ་བ་ཀུན་ཡུམ་མོ། །དེ་བཞིན་དཀའ་ཐུབ་དམ་པ་འདི། །གནས་པས་རྟེན་པའི་གཞི་ཡིན་ནོ། །དཀའ་ཐུབ་ཀུན་གྱི་སྲོག་ཀྱང་ཡིན། །དམ་པ་ཀུན་གྱི་ནོར་མཆོག་གོ །དམ་པ་འདི་ནི་འཇིགས་པའི་སྐྱབས། །དམ་པ་བགྲོད་པའི་ལམ་གྱི་མཆོག །དམ་པ་ཆུ་བོ་སྒྲོལ་བའི་གྲུ། །དེ་བཞིན་དངོས་གྲུབ་དམ་པ་ཡིན། །དམ་ཚིག་གྲོགས་ཀྱི་མཆོག་ཡིན་ཏེ། །དམ་ཚིག་ལོང་བའི་དམིགས་བུ་བཞིན། །གཞན་སྡེ་འཇོམས་པའི་དམག་དཔུང་ཡིན།། འཁོར་བའི་གཡུལ་ལས་རྒྱལ་བར་བྱེད།།

དམ་ཚིག་གི་ཡོན་ཏན་དང་དཔེ་ཐུན་མོང་དུ་བསྟན་པ་གང་ཞེ་ན། རྒྱུད་གཞུང་ནས་ཇི་ལྟར་བསྟན་པ་བཞིན་དུ་དམ་ཚིག་གི་དཀའ་ཐུབ་མ་ཉམས་པར་བསྲུང་ཐུབ་པ་ལྟར། ཡོན་ཏན་ཇི་འདོད་པ་ཡང་དེ་ལྟར་འབྱུང་བ་ནི། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་སྟེ། བདག་གི་ཡིད་དུ་འོང་བའི་དངོས་གྲུབ་རྣམ་པ་གཉིས་ཀྱི་གནས་སྐབས་ཇི་ལྟར་འདོད་པ་དང་མཐར་ཐུག་མཆོག་གི་བདེ་བ་ཕུན་སུམ་ཚོགས་པ་ཉིད་འབྱུང་བའོ། །དེས་ན་རིགས་འཛིན་དང་རྒྱལ་བ་ཀུན་ཀྱང་དམ་ཚིག་མ་ཉམས་པ་ལས་འབྱུང་བའི་ཕྱིར་དེ་དག་གི་ཡང་བསྐྱེད་པའི་ཡུམ་མོ། །དེ་བཞིན་དུ་དཀའ་ཐུབ་མཆོག་གི་དམ་ཚིག་དམ་པ་འདི་ནི་དམ་ལ་གནས་པས་ལམ་དང་འབྲས་བུ་ཀུན་རྟེན་པའི་གཞིའི་ཕྱིར་ས་གཞི་ཆེན་པོ་དང་འདྲ་བའང་ཡིན་ཏེ། དམ་ཚིག་མ་ཉམས་ན་བྱང་ཆུབ་ཆེན་པོར་འཚོ་ཞིང་འཛིན་༼༥༨༽པས་ཡང་དག་པའི་དཀའ་ཐུབ་ཀུན་གྱི་སྲོག་ཏུ་གྱུར་པས་སྲོག་གི་དབང་པོ་དང་འདྲ་བ་ཉིད་ཀྱང་ཡིན་ནོ། །དཔེར་ན་ནོར་དང་འདྲ་བར་རྣལ་འབྱོར་པ་རབ་འབྲིང་ཐ་མ་དམ་ཚིག་མ་ཉམས་པ་ཀུན་གྱི་འདོད་པ་འབྱུང་བའི་རྒྱུ་ཡི་ནོར་རྣམས་ཀྱིའང་མཆོག་གོ །དམ་ཚིག་མ་ཉམས་པ་འདི་ནི་འདི་དང་ཕ་རོལ་གྱི་འཁོར་བའི་འཇིགས་པའམ་འཇིགས་པ་བརྒྱད་གྱིས་མི་ཚུགས་པར་སྐྱོབ་པའི་སྐྱབས་སུ་གྱུར་པས་རྫོང་ཆེན་པོ་དང་ཡང་འདྲའོ།།

འཇིགས་པ་བརྒྱད་ནི། མེ་ཆུ། མཚོན། དགྲ། སྦྲུལ། སེང་གེ གླང་པོ་ཆེ། གཅན་གཟན་ཁྲོ་བོ་དང་བརྒྱད་དུ་ཕྱག་མཆན་གཅིག་ལས་གསུང༌། གཞི་དམ་ཚིག་དམ་པ་འདི་ལ་བརྟེན་ནས་མཐར་ཕྱིན་པར་བྱ་བའི་ཕྱིར་བགྲོད་པར་བྱེད་པའི་ལམ་གྱི་མཆོག་ཀྱང་ཡིན་ནོ། །དམ་ལ་གནས་པ་འདི་ཉིད་འཁོར་བའི་ཆུ་བོ་ལས་སྒྲོལ་བའི་གྲུ་ཆེན་པོའང་ཡིན་ནོ། །དེ་བཞིན་དུ་སྐུ་གསུང་ཐུགས་ཀྱི་དངོས་གྲུབ་དང་ཐུན་མོང་གི་དངོས་གྲུབ་སྒྲུབ་པའི་ཐབས་དམ་པའམ་གཞན་ནས་བཙལ་མི་དགོས་པའི་ཕྱིར་བསྒྲུབ་བྱའི་ངོ་བོའང་ཡིན་ནོ། །དམ་ཚིག་དང་ལྡན་པ་ལ་བར་ཆད་ཀྱིས་མི་ཚུགས་པས་བྱང་ཆུབ་ཆེན་པོའི་ལམ་དུ་ཞུགས་ནས་མཐར་ཐུག་གི་བར་དུ་འགྲོགས་ཤིང་དེས་ཕན་འདོགས་པའི་ཕྱིར་གྲོགས་ཀྱི་མཆོག་ཀྱང་ཡིན་ཏེ། དམ་ཚིག་འདི་ནི་བློ་གྲོས་ཀྱི་མིག་ལོང་བ་དག ཡང་དག་པའི་ལམ་མ་ནོར་བར་ཁྲིད་ཅིང་གཡང་སར་མི་འགྲོ་བས་དམིགས་བུའི་ཐག་པ་ལྟ་བུ་ཡང་ཡིན་ནོ། །དམ་ཚིག་སྲུང་བ་ལས་མ་ཉམས་པ་འདི་ནི་བྱང་ཆུབ་སྒྲུབ་ནས་སྒྲིབ་པའི་དཔུང་དང་སྡུག་བསྔལ་དང་བདུད་དང་མུ་སྟེགས་ལ་སོགས་པ་གཞན་གྱི་སྡེ་རྣམས་འཇོམས་པའི་དམག་དཔུང་ལྟ་བུ་ཡང་ཡིན་ནོ། །དམ་ཚིག་མ་ཉམས་པ་འདི་ནི་འཁོར་བའི་གཡུལ་ལས་རྒྱལ་བར་བྱེད་པའི་དཔའ་བོ་ལྟ་བུ་ཡང་ཡིན་ནོ། །དེ་བས་བསྲུང་བ་རྣམ་པ་གཉིས་ཀྱང་དུས་གཅིག་ཏུ་ཚང་ངོ་།།

གསུམ་པ་ངོ་བོའི་སྒོ་ནས་དབྱེ་བ་བསྟན་པ་ལ་གཉིས་ཏེ། དབྱེ་བ་དངོས་བསྟན་པ། དེའི་མཇུག་བསྡུ་བའོ། །དང་པོ་ལ་བཅུ་སྟེ། གལ་མདོ་ངེས་པའི་དམ་ཚིག་གསུམ་བཤད་པ། ཐུན་མོང་གི་དམ་ཚིག་ཉེར་བརྒྱད་བསྟན་པ། ལྷག་པའི་དམ་ཚིག་བཞི་བཤད་པ། བརྟུལ་ཞུགས་ཀྱི་དམ་ཚིག་ཉེར་གསུམ་བཤད་པ། བསྒྲུབ་པའི་དམ་ཚིག་ཉི་ཤུ་བསྟན་པ། སྤྱོད་ལམ་རྒྱུན་ཀྱི་དམ་ཚིག་བཞི་བཤད་པ། ཚོགས་སུ་མི་ཆུད་པའི་སྐྱོན་ཟུང་དགུ་བསལ་བ། བདུད་ལྔ་སྤང་བ། དགྲ་བཞི་གཞོམ་པ།༼༥༩༽ ལྟ་བའི་དམ་ཚིག་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེས་ན་དམ་པའི། ཞེས་པ་ནས། གསུམ་གྱི་མཐའ་བཟུང་ནས། །ཞེས་པའི་བར་གྱིས་བསྟན་ཏེ།

དེས་ན་དམ་པའི་གཏན་ཚིགས་འདི། །ཅི་ནས་གང་གི་སྒོ་གསུམ་མོ། །དག་པ་གསུམ་གྱི་མཐའ་བཟུང་ནས།།

དམ་ཚིག་གི་ཡོན་ཏན་རྒྱ་ཆེན་པོ་དེ་ལྟ་བུ་ཡོད་པ་དེས་ན་དུས་གསུམ་གྱི་རྒྱལ་བ་ཐམས་ཅད་འདི་ལས་བྱུང་བའི་ཕྱིར་གྱི་དམ་པའི་གཏན་ཚིགས་ཚད་མར་ངེས་པ་ཐེག་པ་མཆོག་གི་དམ་ཚིག་འདི་ནི་རྣམ་པ་ཅི་ཡི་སྒོ་ནས་ཀྱང་རྣལ་འབྱོར་དམ་པ་གང་དག་རང་གི་ལུས་ངག་ཡིད་ཀྱི་སྒོ་གསུམ་པོ་ཉིད་ཉེས་བྱས་མེད་པར་དག་པ་གསུམ་དང་ལྡན་པས་རྩ་བའི་དམ་ཚིག་གསུམ་གྱི་དག་པའི་མཐའ་ཡི་གཞི་བཟུང་ནས་བསྲུང་བར་བྱའོ།།

གཉིས་པ་རྒྱས་པར་བཤད་པ་ནི།

གང་འདིར་དཔང་བཞི། ཞེས་པ་ནས། གྱིས་ནི་བསྲུང་བར་བྱ། །ཞེས་པའི་བར་གྱིས་བསྟན་ཏེ།

གང་འདིར་དབང་བཞི་སུན་མི་དབྱུང་། །ཚུལ་བཞིན་མི་གནོད་དམ་བཅས་བཟུང་། །ཡོངས་སུ་མ་ཉམས་མདོ་བཞི་པོ། །མཐར་ཕྱིན་རྒྱ་བརྟགས་རྣམ་བཞིར་བཅས། །མདོ་དོན་དྲན་པ་ལ་བགྲང་བསྔོ། །འདུལ་བའི་རྒྱུད་ལྡན་ཐ་ཚིག་ཅན། །མོས་པ་ཆུང་ངུའི་བུ་རྣམས་ཀྱིས། །ཕྲ་མོའི་ཕྲ་མོ་ཕྲ་ཡན་ཆད། །ནན་ཏན་གྱིས་ནི་བསྲུང་བར་བྱ།།

དམ་ཚིག་བསྲུང་བར་བྱ་བའི་རྩ་བ་དང་ཡན་ལག་གང་སྙམ་པ་ལ། ཐོག་མར་གལ་མདོ་ངེས་པའི་དམ་ཚིག་གི མ་ཁྲེལ་བའི་ཚུལ་དང༌། མ་ཉམས་པའི་མདོ་དང༌། མཐར་ཕྱིན་པའི་རྟགས་གསུམ་རིམ་པར་སྟོན་ཏེ། ཐེག་པ་མཆོག་ལ་ཞུགས་པས་སྒོ་གང་འདིར་དབང་ཕྱུག་ཆེན་པོ་བླ་མ་དང༌། ཡི་དམ་གྱི་ལྷ་དང༌། གྲོགས་མཆོག་དམ་པ་དང༌། རང་གི་སེམས་ཀྱི་དཔང་པོ་བཞི་ལུང་ལས་འབྱུང་བ་བཞིན་སུན་མི་དབྱུང་བར་བཀུར་ཏེ། སྲི་ཞུ་བླ་མས་མ་ཁྲེལ། སྒྲུབ་པའམ་སྲུང་བ་ཡི་དམ་གྱིས་མ་ཁྲེལ། གདུང་སེམས་མཆེད་ལྕམ་གྱིས་མ་ཁྲེལ། གཡོ་སྒྱུ་རང་སེམས་ཀྱིས་མ་ཁྲེལ་བའི་སྒོ་ནས། ལུས་ངག་ཡིད་ཀྱི་ཚུལ་གསུམ་དག་པའམ། དམ་པར་བྱུང་བའི་ཚུལ་དང༌། སྒོ་གསུམ་ཉེས་པ་མེད་པའི་ཚུལ་དང༌། དམ་པར་རོ་གཅིག་པའི་ཚུལ་དང་གསུམ་གྱིས་དག་པའི་ཚུལ་ཤེས་པས་མཉེས་པར་བྱ་སྟེ། ཁྲེལ་བ་དང་ཕྱིས་གནོང་འགྱོད་ཀྱིས་མི་གནོད་པར་བྱས་ཏེ་དམ་བཅས་པའི་ཚུལ་བརྟན་པར་གཟུང་སྟེ་ངེས་པར་བསྲུང་ཞིང་ནམ་དུའང་གཏང་བར་མི་བྱའོ། འདིའི་དཔང་པོ་བཞི་ལ། རྒྱུད་འགྲོལ་བའི་བླ་མ། དབང་བསྐུར་མཆོག་གི་བླ་མ། མན་ངག་སྟོན་པའི་བླ་མ། མ་རིག་པ་འདྲེན་པའི་བླ་མ་དང་བཞིར་གསུངས་པའི་འཆད་ཚུལ་ཞིག་ཀྱང་བཞུགས་སོ། །བླ་མ་དང་མཆེད་དང་ལྷ་དང་བདག་ཉིད་ཀྱིས་མ་ཁྲེལ་བ་བཞིས་ཡོངས་སུ་མ་ཉམས་པའི་མདོའམ། རྩ་བ་དང༌། ཡན་ལག་དང༌། ཞར་དང༌། ཟླས་ཡོངས་སུ་མ་ཉམས་པའི་མདོ་བཞི་༼༦༠༽པོ་དག་དང་ལྡན་པ་སྟེ། འགྲེལ་ཆེན་ལས།

ཡང་ན་ཀུན་ཏུ་མ་ཉམས་པ་དང༌། རྩ་བ་དང་ཡན་ལག་མ་ཉམས་པ་དང༌། ཟླས་མ་ཉམས་པ་དང༌། ཞར་གྱིས་མ་ཉམས་པའི་ངོ་བོ་ནི་མདོར་བསྡུས་པའི་གྲངས་ཏེ་རྩ་བའི་རྒྱུད་ལས་ལྔར་གསུངས་སོ། །ཞེས་ཀྱང་འབྱུང་ལ། དེ་ལྟར་བསྲུང་བ་མཐར་ཕྱིན་ན་ཕྱག་རྒྱ་ཆེན་པོ་བཞིའི་རྟགས་ཀྱི་དངོས་གྲུབ་དམ་ཅན་འདུ་ཞིང་མཐུ་རྩལ་ཆེ་བ་དང༌། བྱིན་རླབས་ཆེ་ཞིང་རིག་པ་འཆར་བ་དང༌། ཡིད་འོང་འབྱུང་ཞིང་འདོད་པ་གྲུབ་པ་དང༌། མང་པོས་བཀུར་ཞིང་གྲགས་པ་འཐོབ་པ་རྣམ་པ་བཞིར་འབྱུང་བ་དང་བཅས་པས་མདོ་གཟུང་བར་བྱའོ། །མདོར་ན་དམ་ཚིག་གི་དོན་རྣམས་དྲན་པ་ལ་བཏགས་ཏེ་ཉམས་པ་དང་མ་ཉམས་པའི་གྲངས་ཉིན་ཞག་རེ་བཞིན་བསྔོ་བགྲང་བྱ་ཞིང༌། ཉམས་པ་རྣམས་ནི་ཐབས་བཞིས་བཤགས་ལ། མ་ཉམས་པ་རྣམས་བྱང་ཆུབ་ཆེན་པོར་བསྔོ་སྟེ་དཔེར་གྲངས་ནི་ཕྱུག་པོ་ནོར་བསྔོ་ལྟར་བྱའོ། །དེ་སྐད་དུའང་རྩ་བའི་རྒྱུད་ལས།

མདོར་ན་བདག་གི་སྒོ་གསུམ་པོ། །དག་པ་གསུམ་གྱི་མཐའ་བཟུང་ནས། །ལྷ་དང་གྲོགས་དང་སློབ་དཔོན་དང༌། །བདག་ཉིད་དག་པ་མ་ཁྲེལ་བའི། །ཚུལ་གསུམ་མི་གནོད་དམ་བཅས་གསུམ། །ཡོངས་སུ་མ་ཉམས་མདོ་བཞི་པོ། །མཐར་ཕྱིན་རྒྱ་རྟགས་རྣམ་བཞིར་བཅས། །མདོ་དོན་དྲན་པ་ལ་བགྲང་བསྔོ། །ཞེས་སོ། །དེ་ལྟར་སྒོ་གསུམ་དང་ཉོན་མོངས་པའི་ཁེངས་པ་དུལ་བའི་རྒྱུད་དང་ལྡན་ཏེ་ཐ་ཚིག་བརྟན་པ་ལ་གནས་པ་ཅན་དུ་གྱུར་པའི་ཤེས་རབ་ཀྱི་བློ་སྟོབས་དང་མོས་པ་ཆུང་ངུའི་ས་པར་གནས་ཤིང་གཅིག་ཆར་དུ་འཇུག་མི་ནུས་པའི་བུ་མཆོག་དམ་ལྡན་རྣམས་ཀྱིས། དགེ་བཅུ་དང་འདུལ་སྡོམ་ལ་སོགས་པ་ཉིང་ལག་ཕྲ་མོའི་ཕྲ་མོ་དང་ཡན་ལག་ཕྲ་མོ་ཡན་ཆད་ཆུད་མི་གསན་པར་བདག་དང་གཞན་གྱི་དོན་དུ་ནན་ཏན་གྱིས་ནི་ཡོངས་སུ་བསྲུང་བར་བྱའོ།།

གཉིས་པ་ཐུན་མོང་གི་དམ་ཚིག་ཉེར་བརྒྱད་བསྟན་པ་ནི།

སྐུ་དང་གསུང་ཐུགས། ཞེས་པ་ནས། ཤེས་བྱ་གྲུབ་པ་དང༌། །ཞེས་པའི་བར་གྱིས་བསྟན་ཏེ།

སྐུ་དང་གསུང་དང་ཐུགས་རྡོ་རྗེའི། །བསྲུང་དང་སྤྱད་དང་ཡིད་འོང་དང་། །མི་དོར་ཤེས་བྱ་གྲུབ་པ་དང་།།

རྩ་བའི་བསྲུང་བྱ་གང་སྙམ་པ་ལ། འདི་བཞིན་དུ་བསྲུང་བར་བྱ་སྟེ། སློབ་དཔོན་ལྟ་བུར་སྤྲུལ་པའི་བདུད་ཉིད་དང༌། །དངོས་གྲུབ་ལེན་པའི་བར་དུ་གཅོད་པ་དང༌། །སློབ་དཔོན་རྩོལ་བའི་ཚིག་བཅག་མ་གཏོགས་པར། །བཀའ་ཡི་ཟུར་ཡང་བཅག་པར་མི་བྱའོ། །དགེ་ལ་བསྐུར་དང་ཕན་འདོགས་མ་ཡིན་པ། །གྲོགས་མཆོག་ཐུགས་ནི་ནམ་ཡང་དཀྲུག་མི་བྱ། །༼༦༡༽ཞེས་སྐུ་ཡི་དམ་ཚིག་དང༌། ཏིང་འཛིན་དཀྱིལ་འཁོར་རྣལ་འབྱོར་བསམ་གཏན་དང༌། །སྙིང་པོ་བཟླས་པ་བར་དུ་མི་གཅད་དོ། །ཞེས་གསུང་གི་དམ་ཚིག་དང༌། བྱང་ཆུབ་དོན་དུ་གཉེར་བ་མ་ཡིན་པ། །སྲོག་གི་ཕྱིར་ཡང་གསང་ཚིག་མི་སྤེལ་ལོ། །སེམས་ཅན་དོན་དུ་འགྱུར་བ་མ་ཡིན་པ། །གསང་སྔགས་ཕྱི་དང་ནང་གི་དམ་ཚིག་དང༌། །བྱང་ཆུབ་སྡོམ་དང་ཉན་ཐོས་ཚུལ་ཁྲིམས་དང༌། །ས་བདག་རྒྱལ་ཁྲིམས་འགལ་བར་མི་བྱའོ། །ཞེས་ཐུགས་ཀྱི་དམ་ཚིག་གི་དོན་ཏེ། རྡོ་རྗེ་ཐེག་པ་ཆེན་པོ་ཡི་རྩ་བའི་དམ་ཚིག་བསྲུང་བ་དང༌། བློ་ཆེ་བའི་དབང་དུ། རྗེས་སུ་རྣལ་འབྱོར་རང་གི་ཐུན་མོང་མིན་པའི་དམ་ཚིག་སྣང་སྲིད་དབྱིངས་དང་ཡེ་ཤེས་སུ་གསལ་བས་གཉིས་མེད་ཀྱི་ངང་དུ་སྒོ་གསུམ་སྐུ་གསུང་ཐུགས་སུ་རྟོགས་པ་ལས་མི་འདའ་བའི་ཐ་ཚིག་མཆོག་ཏུ་གསུངས་ཏེ། སྔ་མ་རྩ་བའི་རྒྱུད་ལས། སྣོད་དུ་གྱུར་པ་ཡུམ་གྱི་དབྱིངས། །བཅུད་རྣམས་རྒྱལ་བ་ཡབ་ཀྱི་མཁའ། །འབྱུང་འཇུག་རིག་པས་ལོངས་སྤྱོད་དེ། །འདི་ནི་རྡོ་རྗེ་ཐ་ཚིག་ཡིན། །སྲིད་པའི་སེམས་ཅན་ཐམས་ཅད་དང༌། །ཐར་པ་ཆོས་ཀྱི་རྣམ་གྲངས་ཀུན། །སོ་སོར་ཐམས་ཅད་སྣང་བ་སྟེ། །ཀུན་ཀྱང་མཉམ་པའི་ངང་དུ་གསལ། །སྤྱོད་པའི་ལས་དང་རྟོག་པ་དང༌། །མཚན་མར་གྱུར་པ་ཐམས་ཅད་ཀྱང༌། །སེམས་ཀྱི་ཕྱི་ནང་སྤྱོད་ཡུལ་དེ། །བརྟགས་ན་ལོངས་སྤྱོད་ཚོགས་སུ་འགྱུར། །མ་སྐྱེས་སྟོང་པ་སྐུ་ཡི་རྒྱ། །རང་བཞིན་སྨོན་མེད་གསུང་གི་དོན། །མཚན་མེད་ཡིད་ལས་འདས་པ་ཐུགས། །རྣམ་གསུམ་བདེ་ཆེན་སངས་རྒྱས་སོ། །མཉམ་པའི་ལྟ་བས་དབང་སྒྱུར་ན། །འཁོར་བ་ཐམས་ཅད་དབྱིངས་ལ་སྣང༌། །ལས་ཀུན་རྫོགས་པའི་མཆོག་ཡིན་ཏེ། །གཞན་དུ་ཕྲིན་ལས་ལུས་པ་མེད། །སྡུག་བསྔལ་བྱང་ཆུབ་ཆེན་པོ་སྟེ། །འཁོར་བ་ཡེ་ནས་མྱ་ངན་འདས། །སྒྲིབ་པ་རྣམ་དག་ཆོས་ཀྱི་དབྱིངས། །ཉོན་མོངས་ཀུན་ཀྱང་བྱང་ཆུབ་དོན། །སྣང་བ་མེད་པའི་དོན་མཐོང་དང་། །ས་དང་ས་ཡི་རིམ་པར་ནི། །འདི་དང་འདི་ཞེས་གཟུང་དུ་མེད། །འདི་ནི་སྣང་མེད་ཐོབ་པའི་གནས། །སྐུ་དང་གསུང་ཐུགས་མི་གཡོ་བའི། །ཇི་བཞིན་ཉིད་ཀྱི་ངང་ལ་གནས། །ཞེས་སོ། །དེ་ནས་ཡན་ལག་བསྲུང་བ་ནི་འདི་ལྟ་སྟེ། དམ་པའི་ཆོས་འཇིག་དམ་པ་གསོད་པ་དང༌། །མཚམས་མེད་ལྔ་བྱེད་ཀུན་ལ་གནོད་པ་དང་། །ཆོས་ཀྱི་སྤུན་དང་བྱང་ཆུབ་ཕྱིར་གནོད་པ། །༼༦༢༽ཚད་མེད་ནན་ཏན་རྡོ་རྗེ་མཚོན་གྱིས་གསད། །དོན་མེད་གང་ཡོད་སེར་སྣས་འཇུངས་པའི་ནོར། །ཁ་ན་མ་ཐོ་མེད་པར་བླངས་ནས་སུ། །དེ་ཡི་བསོད་ནམས་ཆེན་པོ་འཐོབ་བྱའི་ཕྱིར། །མཆོད་དང་སྤྱད་དང་སྦྱིན་པ་ཆེན་པོར་བྱ། །སློབ་དཔོན་དཀོར་དང་སྲོག་ཆགས་བསྐྱབས་པ་དང༌། །སེམས་ཅན་བྱང་ཆུབ་ལམ་དུ་དྲང་བའི་རྫུན། །མེད་ལས་ཡོད་སྨྲ་ཡོད་ལས་མེད་སྨྲ་དང༌། །བག་དང་ལྡན་པར་རྟག་ཏུ་སྨྲ་བར་བྱ། །དམ་པ་སུན་འབྱིན་མི་མཐུན་གོལ་བ་དག །དོན་དང་ལྡན་པས་ཚར་བཅད་ཚིག་རྩུབ་སྨྲ། །དགེ་སྡིག་འགྲོགས་འབྲས་བཟང་ངན་ལྟ་དབྱེའི་ཕྱིར། །ཕྲ་མའི་ཚིག་དོན་རྟག་ཏུ་དབྱེ་བར་བྱ། །རྟོགས་ནས་བདག་གཞན་དོན་ཕྱིར་སྤྱད་པའོ། །ཞེས་སྤྱད་པར་བྱ་བ་ལྔ་དང༌། ཤ་ཆེན་བཤང་གཅི་ཁྲག་དང་བྱང་ཆུབ་སེམས། །གྲུབ་པ་བཞི་དང་ཡིན་པའི་མཐུ་ལྡན་པ། །བླང་དོར་མེད་པར་བསྟེན་པས་མཆོག་འགྲུབ་ཕྱིར། །གཙང་དམེ་མེད་པའི་སེམས་ཀྱིས་མི་འབྲལ་ལོ། །ཞེས་ཡིད་འོང་དང་དུ་བླང་བ་ལྔ་དང༌། དངོས་དང་གདུག་པ་འཇོམས་བྱེད་ཞེ་སྡང་གཉིས། །གང་ལའང་རྣམ་རྟོག་ཕྱོགས་མེད་གཏི་མུག་དང༌། །གཉིས་མེད་དོན་དང་མོ་རིགས་སྦྱོར་ཞིང་ཆགས། །ཡང་དག་དོན་ལ་སྲན་འཛུགས་དྲེགས་འཇོམས་ང་རྒྱལ་དང༌། །ལོག་དང་སྣོད་ངན་མི་ཚུད་ཕྲག་དོག་ཆེན་པོ་རྣམས། །ཤེས་ནས་ནམ་དུའང་མི་སྤང་གཉིས་མེད་སྤྱོད། །ཅེས་མི་འདོར་བ་ལྔ་དང༌། ཕུང་པོ་ལྔ་དང་འབྱུང་ལྔ་ཡབ་ཡུམ་ལྔ། །རྣམ་ཤེས་ཉོན་མོངས་རིགས་ལྔ་ཡེ་ཤེས་ལྔ། །ཁ་དོག་ལྔ་དང་དབང་ལྔ་ཡུལ་ལྔ་སོགས། །རང་བཞིན་སེམས་ཕྱིར་གཅིག་དང་ཐ་དད་གྲོལ། །དེ་ཕྱིར་ལྔ་ལྔར་སྦྱར་ཞིང་ཤེས་པར་བྱ། །ཞེས་ཤེས་པར་བྱ་བ་ལྔ་དང་། རྣམ་སྣང་མི་བསྐྱོད་འབྱུང་ལྡན་འོད་དཔག་མེད། །དོན་གྲུབ་ལ་སོགས་སངས་རྒྱས་ལྔ་པོ་རྣམས། །འབྲས་བུའི་བདག་ཕྱིར་ཏིང་འཛིན་བརྩོན་ལྡན་པས། །ཕྱི་མར་མི་སྨོན་ཚེ་འདི་ཉིད་ལ་གྲུབ་པར་བྱའོ། །ཞེས་སྒྲུབ་པར་བྱ་བའམ་གྲུབ་པ་ལྔ་སྟེ་མདོར་ན་ཡན་ལག་ཉི་ཤུ་རྩ་ལྔ་དང་རྩ་བ་གསུམ་བཅས་དམ་ཚིག་ཉི་ཤུ་རྩ་བརྒྱད་དོ།།

གསུམ་པ་ལྷག་པའི་དམ་ཚིག་བཞི་བཤད་པ་ནི།

མེད་དང་ཕྱལ་བ། ཞེས་པ་ནས། བྱ་བའི་ནོར་མཆོག་ཡིན། །ཞེས་པའི་བར་གྱིས་བསྟན་ཏེ།

མེད་དང་ཕྱལ་པ་གཅིག་པུ་དང་། །ལྷུན་གྱིས་གྲུབ་པ་རྣམ་པ་བཅུ། །ལྟ་བ་འདི་ལས་འབུམ་ཕྲག་འབྱུང་།།

རྣལ་འབྱོར་རྣལ་འབྱོར་ཐམས་ཅད་ཀྱི། །སྤྱད་པར་བྱ་བའི་ནོར་མཆོག་ཡིན།།

ཤིན་ཏུ་བྱ་བ་མེད་པའི་རྣལ་འབྱོར་གྱི་ཨ་ཏི་ཡོ་གའི་དམ་ཚིག་བཞི་ནི། བསྲུང་དང་མི་བསྲུང་གི་ཕྱོགས་རིས་མེད་པར་ཐམས་༼༦༣༽ཅད་ཆོས་ཀྱི་དབྱིངས་སུ་ངེས་པས་གྲངས་སུ་བཅད་ལ་སོ་སོར་བསྲུང་དུ་མེད་པ་དང༌། གང་ཡང་དམ་པར་ངེས་པས་དམ་ཚིག་བླང་དོར་མེད་དེ་གཟའ་གཏད་དང་བྲལ་བས་ཕྱལ་བ་དང༌།  བདག་ཉིད་ཆེན་པོར་ཐིག་ལེ་ཉག་གཅིག་གི་ངོ་བོར་དབྱེར་མེད་པ ་མ་གཏོགས་གཞན་མེད་པས་མཉམ་པ་ཆེན་པོ་གཅིག་གི་ངང་ལས་མི་འདའ་བ་དང༌། བསྲུང་བྱ་ཐམས་ཅད་ཆེད་དུ་མ་བསྲུང་བར་རྩོལ་མེད་བདེ་བ་ཆེན་པོར་བསྲུང་མཚམས་དང་བྲལ་བས་ལྷུན་གྱིས་གྲུབ་པའི་ངང་ཆེན་པོར་ཡོངས་སུ་རྫོགས་པ་ཉིད་དང་ལྷག་པའི་དམ་ཚིག་དམ་པ་བཞི་སྟེ། རྩ་རྒྱུད་ལས། མེད་དང་ཕྱལ་བ་གཅིག་པོ་དང༌། །ལྷུན་གྱིས་རྫོགས་པའི་དམ་ཚིག་ཆེ། །འདི་ཞེས་རིས་སུ་ཆད་མེད་པ། །འདི་ནི་བསྲུང་བའི་དམ་ཚིག་གོ །ཞེས་སོ། །དེ་ལྟར་རྣལ་འབྱོར་ཆེན་པོའི་རྩ་བའི་དམ་ཚིག་མན་ཆད་ཡན་ལག་ཚན་ལྔ་དང་བཅས་ཏེ་རྣམ་པ་བཅུ་པོར་བསྟན་པ་ཡང༌། ཁྱད་པར་དུའང་རྩལ་ཆེན་རྫོགས་པའི་ས་དང་རྫོགས་པ་སྤྱིར་ཆིབས་ཀྱི་སྐབས་སུ་ལྡན་ནོ། །དེས་ན་ལྟ་བའི་དམ་ཚིག་ལ་སོགས་པ་རྩ་བ་བཅུ་པོ་འདི་ལས་དམ་ཚིག་ས་མ་ཡ་འབུམ་ཕྲག་གི་སྡེ་རྣམས་འབྱུང་བའི་གཞིར་གྱུར་པས་དམ་པའི་མཆོག་ཏུ་བསྟན་ཏེ། བློ་ཆེ་ཆུང་གིས་ཕྱེ་བའམ། རྣལ་འབྱོར་པ་ལས་དང་པོ་དང་ལམ་ལ་གནས་པ་དང་རིམ་དང་གཅིག་ཆར་བའི་རྣལ་འབྱོར་པ་ཐམས་ཅད་ཀུན་གྱི་སྒོ་གསུམ་གྱི་སྤྱད་ཅིང་བསྲུང་བར་བྱ་བའི་ནང་ནས་འདོད་པ་འབྱུང་བའི་ནོར་མཆོག་ཏུ་གྱུར་པ་ཁོ་ན་ཡིན་ནོ།།

བཞི་པ་བརྟུལ་ཞུགས་ཀྱི་དམ་ཚིག་ཉེར་གསུམ་བཤད་པ་ནི།

འོག་ནས། དེ་ལྟར་དམ་པའི། ཞེས་པ་ནས། མཐུན་ཕྱིར་དེ་ལྟར་སྤྱད། །ཅེས་པའི་བར་གྱིས་བསྟན་ཏེ།

དེ་ལྟར་དམ་པའི་སྡོམ་པ་ལ། །གནས་དང་དུས་ཀྱི་སྐབས་དག་ཏུ། །བསྲུང་བྱ་ཐུབ་པར་བྱ་བ་ནི།།

བརྟུལ་ཞུགས་སྤྱོད་པའི་དམ་ཚིག་ཅན། །དམ་ཚིག་ཀུན་གྱི་ཐོག་མར་འགྲོ། །དོན་དུ་མི་འགྱུར་ཀུན་སྤངས་ནས།།

ཀུན་དང་འཐུན་ཕྱིར་དེ་ལྟར་སྤྱད།།

བཤད་པ་དེ་ལྟར་ཐེག་པ་ཆེན་པོ་སྤྱིའི་དམ་ཚིག་དང་རྣམ་པར་དག་པའི་སྡོམ་པ་ལ་གནས་ནས་བསྒྲུབ་པའི་དུས་ཀྱི་སྐབས་དག་ཏུ་ཁྱད་པར་གྱི་བསྲུང་བར་བྱ་བ་རྣམས་ཡང་དག་པར་ཐུབ་པར་བྱ་བ་ནི། བརྟུལ་ཞུགས་སྤྱོད་པའི་དམ་ཚིག་ཉི་ཤུ་རྩ་གསུམ་དེ་དག་དམ་ཚིག་གམ་སྒྲུབ་པ་ཀུན་གྱི་ཡང་ཐོག་མར་འགྲོ་བ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་དོན་དུ་མི་འགྱུར་བ་བཞི་པོ་ཀུན་སྤངས་ནས། ལམ་ཐམས་ཅད་དང་བདག་གཞན་གཉིས་ཀ་མ་ལུས་པ་ཀུན་དང་མཐུན་པར་བྱ་བའི་ཕྱིར་སྔོན་དུ་ལེའུ་རེ་བཞི་པར་ཝ་དང་ཅང་ཤེས་གྱི་ལིང་སོགས་བཤད་པ་དེ་ལྟར་སྤྱོད་པའོ།།

ལྔ་པ་བསྒྲུབ་པའི་དམ་ཚིག་ཉི་ཤུ་བསྟན་པ་ནི།

མི་བཤིགས་པ་ནི། ཞེས་པ་ནས། དག་གི་ནོར་མཆོག་ཡིན། །ཞེས་པའི་བར་གྱིས་༼༦༤༽བསྟན་ཏེ།

མི་ཤིགས་པ་ནི་སེང་གེ་སྟེ། །གཅན་གཟན་རྒྱལ་པོ་ཡིན་པས་སོ། །ཟ་མ་ཏོག་ནི་རྒྱལ་པོའི་མཛོད། །དུག་སྤྱོ་བ་ནི་དེར་མི་རིགས། །རིན་ཆེན་མྱུ་གུའི་ལྕུག་ཕྲན་དག །བྲེགས་ཏེ་འབྱུང་རྒྱུན་བཅད་མ་ཡིན། །གངས་ཀྱི་ཞུན་ཆུ་ཕལ་པ་ཡང་། །མཁས་པས་བཏུང་བར་མིི་བྱའོ། །པདྨའི་ཟེ་འབྲུ་ཁ་མ་ཕྱེ། །ཟླ་ཟེར་མ་ཡིན་དབྱེ་མི་བྱ། །མ་བརྟགས་བུག་རྡོལ་ཅན་སྣོད་དུ། །བདུད་རྩི་སྨན་བླུགས་ཟག་པར་འགྱུར། །དོན་མེད་བཅོས་པའི་ཚུལ་བརྟགས་ཅན། །བསྲེལ་ཞིང་སྤྱད་པར་བྱ་བ་མིན། །ཤེལ་དཀར་རིན་ཆེན་སྒོ་ང་དག །འདམ་ཁུང་རྫབ་ཏུ་བསྣུབ་མི་བྱ། །སེང་གེ་དཀར་མོའི་འོ་མ་དག །གསེར་སྣོད་མ་ཡིན་བླུགས་མི་བྱ། །ཡིད་བཞིན་ནོར་བུ་རིན་པོ་ཆེ། །བསྲེག་པར་བྱ་བ་ཡོང་མི་བྱ། །ཁྱུང་ཆེན་གཤོག་པ་མཁར་བརྐྱང་བ། །དེ་དག་གཅག་པར་བྱ་བ་མིན། །གནམ་ལྕགས་མེ་ཡི་ངུར་མོ་དག །བརྡབ་པར་བྱ་བ་མ་ཡིན་ནོ། །སྟག་སེང་རོལ་པས་ལས་བྱས་པའི། །ལས་ཀྱི་རྗེས་ལ་བཟླས་མི་བྱ། །རྡོ་རྗེ་བྲག་ཆེན་བལྟམས་པའི་གཞི། །གཞིག་པར་བྱ་བ་ག་ལ་ཡིན། །རྡོ་རྗེ་ར་བའི་རེ་ག་དེ། །བསྔམ་བྱ་ཧྲལ་བར་བྱ་བ་མིན། །བུད་ཤིང་བསྲེགས་པའི་སྒྲོན་མ་དེ། །འཐོར་རླུང་དྲག་པོས་སྐྱོད་མི་བྱ། །རྡོ་རྗེ་ཚིག་གི་ཆུ་རྒྱུན་དག །འོལ་ཀར་བཅད་པར་བྱ་བ་མིན། །རྒྱལ་པོ་བཀའ་རྟགས་ཕྱག་རྒྱ་དག །ནམ་ཞར་དབྱི་བར་མི་བྱའོ། །རྡོ་རྗེ་ཕ་ལམ་བལྟམས་པའི་མཁར། །རྨང་ནས་བཟློག་པར་མི་བྱའོ། །གཙུག་གི་ཡིད་བཞིན་ནོར་བུ་དེ། །རྒྱལ་མཚན་རྩེ་ལས་དབོག་མི་བྱ། །རྣལ་འབྱོར་ཐབས་ཀྱི་ཁྱད་པར་ཅན། །རྩལ་ཅན་རྣམས་ཀྱི་དམ་ཚིག་སྟེ།།

སྐལ་ལྡན་རྣམས་ཀྱི་ནོར་མཆོག་གོ།

ཁས་འཆེས་པའི་བསྒྲུབ་པའི་དམ་ཚིག་གང་སྙམ་པ་ལ། རྣམ་གྲངས་ཉི་ཤུ་ཉིད་ལྡེམ་དགོངས་ཀྱི་ཚིག་གིས་བཤད་ཅིང་སྟོན་ཏེ། མི་བཤིགས་པ་ནི་སེང་གེ་ཆེན་པོའི་ཁྲི་སྟེ། གཅན་གཟན་ཀུན་གྱི་རྒྱལ་པོ་ཡིན་པས་སོ། །ཞེས་སེང་གེས་རི་དྭགས་ཟིལ་གྱིས་གནོན་པ་དང་འདྲ་བར་ལྟ་ངན་ཟིལ་གྱིས་གནོན་པའི་རྒྱལ་བ་ཀུན་གྱི་ཡབ་མེས་བླ་མ་རྡོ་རྗེ་སློབ་དཔོན་གཟི་བརྗིད་ཅན་གྱི་སྐུ་ལ་མི་གཙེ་ཞིང་བཀའ་མི་བཅག་པའོ། །ཟ་མ་ཏོག་ནི་རྒྱལ་པོའི་མཛོད་ཡིན་པས་དུག་སྦྱོ་བར་བྱེད་པ་ནི་དེར་མི་རིགས་སོ། །ཞེས་པ་བླ་མ་རྡོ་རྗེ་སློབ་དཔོན་གྱི་ཡུམ་ལ་མི་སྤྱད་པའོ། །སྤྱད་ན་ལུས་ལྕགས་ཀྱི་ཕོ་མཚན་འཁོར་ལོ་ཅན་གྱིས་གང་བའི་དམྱལ་བར་སྐྱེའོ། །འདི་ཉིད་རྡོ་རྗེ་སློབ་དཔོན་གྱི་ཐུགས་མི་དཀྲུགས་པར་ཡང་བཤད་དོ། །རིན་ཆེན་གྱི་མྱུ་གུའི་ལྕུག་ཕྲན་དག་བྲེགས་པར་བྱས་ཏེ་འབྱུང་བའི་རྒྱུན་གཅད་པ་མ་ཡིན་ནོ། །ཞེས་པ་དད་ཅན་རྣམས་ཀྱི་ཚོགས་མི་བཅག་ཅིང་དད་པ་མི་བཟློག་པའོ། །ཞུ་དཀའ་ཞིང་ནད་སྐྱེད་པས་གངས་ཀྱི་ཞུན་ཆུ་ཕལ་པ་ཉིད་ནམ་ཡང་མཁས་པས་བཏུང་བར་མི་བྱའོ། །ཞེས་པ་རྣལ་འབྱོར་མཁས་པ་ཚུལ་བཞིན་སྤྱོད་པ་རྣམས་ཀྱི་གཟུངས་མ་ལ་མི་སྤྱད་པའོ། །མན་ངག་ལས་ཉམས་པའི་ཆང་མི་བཏུང་བ་དང༌། ཡང་མུ་སྟེགས་ཀྱི་ལྟ་བ་ལ་མི་འཇུག་པར་ཡང་བཤད་དོ། །པདྨའི་ཟེའུ་འབྲུ་ཁ་མི་དབྱེ་བ་ཉིད་ཟླ་ཟེར་མ་ཡིན་པར་དབྱེ་བར་མི་བྱའོ། །ཞེས་པ་གྲོགས་དམ་ཚིག་ཅན་རྣམས་ཀྱི་གཟུངས་མ་ལ་གྲོགས་ཉིད་ཀྱིས་སྤྱོད་ཅིག་པར་གནང་བ་ཐོབ་པ་མ་ཡིན་པར་གཞན་རང་དགར་ནམ་དུའང་མི་སྤྱད་དེ། རྣམ་སྨིན་བཤད་པ་བཞིན་ནོ། །ཡང་མན་ངག་ནོར་དང་རིན་པོ་ཆེས་སླུ་བར་ཡང་གསུངས། ལེགས་པར་མ་བརྟགས་པའི་བུག་རྡོལ་ཅན་གྱི་སྣོད་དུ་བདུད་རྩི་སྨན་མཆོག་བླུགས་ན་ཟག་པར་འགྱུར་བས་མི་རུང་ངོ༌། །ཞེས་པ་མཚན་མེད་ཅིང་བཀྲ་མི་ཤིས་པའི་མི་མོ་ལ་གཟུངས་མར་མི་བྱའོ། །ཡང་གསང་སྔགས་སྣོད་ངན་ལ་མི་བསྟན་བསྟན་ན་དམ་ཉམས་པར་ཡང་གསུངས། བཟང་པོའི་དོན་མེད་པར་བཅོས་མའི་ཚུལ་རྟགས་ཅན་རྣམས་སྲེལ་ཞིང་སྤྱད་པར་བྱ་བ་མིན་ནོ། །ཞེས་པ་བྱིན་གྱིས་མ་བརླབས་པ་དང་བཀྲ་མི་ཤིས་པའི་རྫས་རྣམས་བཅང་བར་མི་བྱ་བའོ། །ཡང་ལོག་སྲེད་ཅན་གྱིས་ཐབས་འཛུད་བསྲེ་བའི་ཆོས་མི་སྲེལ་བར་ཡང་གསུངས། ཤེལ་དཀར་རིན་ཆེན་གྱི་སྒོ་ང་དག་༼༦༥༽འདམ་ཁུང་གི་རྫབ་ཏུ་བསྣུབ་པར་མི་བྱའོ། །ཞེས་པ་བདག་གིས་ཤེས་རབ་ཅན་གྱིས་ཡོན་ཏན་གསལ་བ་མི་བསུབ་པའོ། །ཡང་ལྟ་བ་རྣམ་པར་དག་པར་བྱ་བ་ལའང་གསུངས། སེང་གེ་དཀར་མོའི་འོ་མ་དག་རིན་ཆེན་གསེར་སྣོད་མ་ཡིན་པར་བླུགས་པར་མི་བྱའོ། །ཞེས་པ་གསང་བའི་མན་ངག་རྣམས་སྣོད་བཟང་པོ་མ་ཡིན་པ་སྣོད་ངན་པ་བཞི་ལ་དུས་ནམ་དུའང་བསྟན་ཅིང་སྤེལ་བར་མི་བྱ་བའོ། །ཡིད་བཞིན་གྱི་ནོར་བུ་རིན་པོ་ཆེ་ཉིད་བསྲེག་པར་བྱ་བ་ཡོང་ཡེ་མ་ཡིན་ནོ། །ཞེས་པ་བྱང་ཆུབ་ཀྱི་སེམས་ཐམས་ཅད་དུ་ལྟ་སྤྱོད་ངན་པ་དང་ཕྱིན་ཅི་ལོག་གི་དབང་དུ་མི་བསད་ཅིང་བཏང་བར་མི་བྱ་བའོ། །ཀུན་རྫོབ་བྱང་སེམས་ཀྱང་གསུངས། ཁྱུང་ཆེན་པོས་གཤོག་པ་ནམ་མཁར་བརྐྱང་བ་དེ་དག་བཅག་པར་བྱ་བ་མིན་ནོ། །ཞེས་པ་གསང་བའི་གཟུངས་མ་དང་ཐབས་ཤེས་རབ་གཉིས་སུ་རྟག་ཏུ་མི་འབྲལ་བར་བྱ་བའོ། །ཡང་ཞི་ལྷག་འཛོམ་པར་བྱ་བ་ལ་ཡང་གསུངས། གནམ་ལྕགས་ཀྱི་མེ་ཡི་ངུར་མོ་དག་བརྡབ་པར་བྱ་བ་མ་ཡིན་ནོ། །ཞེས་པ་དུས་ཐམས་ཅད་དུ་རྐྱེན་ཅི་ཡིས་དཀྲུགས་ཀྱང་རྣལ་འབྱོར་པ་ནང་འཐབ་མི་བྱ་བའོ། །སྟག་སེང་གིས་རོལ་པས་ལས་བྱས་པའི། ལས་ཀྱི་རྗེས་ལ་བཟླས་པར་མི་བྱའོ། །ཞེས་པ་བམ་ཆེན་ལ་སོགས་པ་གཞན་གྱིས་སྤྱད་པའི་རྫས་ཀྱི་ལྷག་མ་མི་བསྡུ་ལ་མི་སྤྱད་པའོ། །ཡང་ཚད་མ་གཉིས་ཀྱིས་གཞལ་བའི་དོན་དེ་ཕྱིས་མི་བསླད་པར་ཡང་གསུངས། རྡོ་རྗེ་བྲག་ཆེན་གྱིས་གཏམས་པའི་གཞི་ཉིད་བཤིག་པར་བྱ་བ་ག་ལ་ཡིན་ཏེ་མ་ཡིན་ནོ། །ཞེས་པ་བླ་མ་རྡོ་རྗེ་སློབ་དཔོན་གྱི་གདན་ས་ལ་དུས་ནམ་དུའང་མི་འདུག་ཅིང་ན་བཟའ་བརླབས་པར་མི་བྱ་བའོ། །ཡང་གསང་སྔགས་ཀྱི་བསྟན་པ་མི་བཤིགས་པར་ཡང་གསུངས། རྡོ་རྗེ་ར་བའམ་དྲ་བའི་རེ་ག་དེ་ཉིད་བསྡམ་པར་བྱ་ཡི་འདྲལ་བར་བྱ་བ་མིན་ནོ། །ཞེས་པ་མཚམས་མི་འདྲལ་ཞིང་མི་བཤིག་པ་སྟེ། བདག་དང་གཞན་གཉིས་ཀའོ། །བུད་ཤིང་སྲེག་པར་བྱེད་པའི་སྒྲོན་མ་དེ་ཉིད་འཐོར་རླུང་དྲག་པོས་བསྐྱོད་པར་མི་བྱའོ། །ཞེས་པ་ཏིང་ངེ་འཛིན་བྱིང་རྒོད་དང་གཡེང་འཕྱར་དུ་མི་གཏང་བའོ། །རྡོ་རྗེ་ཚིག་གི་ཆུ་རྒྱུན་བར་མ་ཆད་པ་དག་འོལ་ཀར་གཅད་པར་བྱ་བ་མིན་ནོ། །ཞེས་པ་བཟླས་བརྗོད་དང་ཆོ་གའི་བྱེ་བྲག་མི་ཚིག་ལ་སོགས་པའི་དབང་དུ་མི་གཏང་བའོ། །རྒྱལ་པོའི་བཀའ་རྟགས་ཀྱི་ཕྱག་རྒྱ་དག་ནམ་ཞར་༼༦༦༽ཡང་དབྱི་བར་མི་བྱའོ། །ཞེས་པ་དབང་རྟགས་ཀྱི་ཕྱག་རྒྱ་ལས་མི་འདའ་བར་བྱེད་པའོ། །རྡོ་རྗེ་ཕ་ལམ་གྱིས་གཏམས་པའི་མཁར་ཉིད་རྨང་ནས་བཟློག་པར་མི་བྱའོ། །ཞེས་པ་རྣལ་འབྱོར་པའི་དཀྱིལ་འཁོར་གཉེན་པོ་དང་གྲལ་མི་དཀྲུགས་པའོ། །གཙུག་གི་ཡིད་བཞིན་ནོར་བུ་དེ་ཉིད་རྒྱལ་མཚན་གྱི་རྩེ་མོ་ལས་དབོག་པར་མི་བྱའོ། །ཞེས་པ་དུས་ནམ་དུའང་བླ་མ་རྡོ་རྗེ་སློབ་དཔོན་སྤྱི་བོས་བཀུར་བ་ལས་མི་ཉམས་པར་བྱ་བ་སྟེ་ཉི་ཤུའོ། །དེ་ལྟར་ཐེག་པ་མཆོག་གི་རྣལ་འབྱོར་པས་སྒྲུབ་པ་ཐབས་ཀྱི་དམ་ཚིག་ཁྱད་པར་ཅན་འདི་དག་ཐེག་པ་ཆེན་པོ་རྟོགས་ནས་བསྒྲུབ་པའི་ནུས་མཐུ་དང་ལྡན་པའི་ཤེས་རབ་གྱི་བློ་རྩལ་ཅན་རྣམས་ཀྱི་ཐུགས་དམ་དུ་བྱེད་པའི་དམ་ཚིག་སྟེ་གསང་སྔགས་ཀྱི་སྐལ་བ་དང་ལྡན་པ་དག་གི་དངོས་གྲུབ་ཀྱི་འདོད་པ་འབྱུང་བའི་ཕྱིར་ནོར་གྱི་མཆོག་ཏུ་གྱུར་པ་ཡིན་ནོ།།

དྲུག་པ་སྤྱོད་ལམ་རྒྱུན་ཀྱི་དམ་ཚིག་བཞི་བཤད་པ་ནི།

རྒྱུན་དུ་སྤྱད་པའི། ཞེས་པ་ནས། དགྲ་བཅོམ་བརྩོན་པར་འབད། །ཅེས་པའི་བར་གྱིས་བསྟན་ཏེ།

རྒྱུན་དུ་སྤྱད་པའི་ནོར་མཆོག་ནི། །རྡོ་རྗེ་ལས་ཀྱི་བསམ་གཏན་དག །རྡོ་རྗེ་གོ་སུར་ཏྲོམ་ཆེན་གྱིས། །སྲོག་ལ་བར་ཆད་བྱེད་པའི་དགྲ། །ཉོན་མོངས་འཐིབ་པ་དེ་གཞོམ་བྱ། །སྙོམས་ལས་ལེ་ལོའི་གཞིར་གྱུར་པ། །ཐུགས་ཐུབ་ར་ཆོད་ང་རྒྱལ་རི། །དྲེགས་བྱེད་དབང་པོ་ཉམས་པའི་བཅུད། །དཔའ་བྱེད་རྐྱེན་ཡང་བསྡམ་པར་བྱ། །ཐེག་ཆེན་གསང་སྔགས་མ་གཏོགས་པ། །མཚན་མ་གང་ཟག་བྱིས་པ་དག །ཟུར་ཡང་བརྗོད་པར་མི་བྱ་ཞིང་། །ཐམས་ཅད་དེ་ཉིད་ཁོ་ནར་བྱ། །ཇི་ལྟར་གསོད་པའི་མི་གང་དག །གཤེད་མའི་མིས་ནི་གསོད་པའི་ཚེ། །ཐར་པའི་ཐབས་ལ་བརྩོན་པ་ལྟར། །ལེ་ལོའི་དགྲ་གཞོམ་བརྩོན་པར་འབད།།

ཁས་འཆེས་པའི་སྤྱོད་པ་རྒྱུན་གྱི་དམ་ཚིག་གང་སྙམ་པ་ལ། སྤྱོད་པ་རྒྱུན་དུ་མི་འབྲལ་བར། འདུན་པ་སེམས་པ་ནས་བཟུང་སྟེ་རྒྱུན་དུ་སྤྱོད་ན་དངོས་གྲུབ་གཉིས་འབྱུང་པའི་ནོར་མཆོག་ནི། བསྒོམ་ཞིང་བསྒྲུབ་པའི་ཚེ་རྡོ་རྗེ་གསུམ་གྲུབ་པར་བྱེད་པས་ལས་ཀྱི་བསམ་གཏན་དོན་དང་ཡི་གེའི་རྣལ་འབྱོར་དག་ཐེར་ཟུག་ཏུ་བྱ་ཞིང་རྡོ་རྗེའི་གོ་བསྒོ་བ་དང་སྐབས་དང་འཚམས་པར་ཕུར་སྐོར་དང་རུ་ལུ་ཏྲོམ་ཆེན་གྱི་དབྱངས་དང༌། བྲོ་སྐོར་བྱ་བ་དང་ཚར་གཅད་པ་ལ་སོགས་པ་གསེང་བའི་ཐབས་རྣམས་ཀྱིས་དགེ་བའི་སྲོག་ལ་བར་ཆད་བྱེད་པའི་ཏིང་ངེ་འཛིན་གྱི་དགྲ་ཡེ་ཤེས་མི་གསལ་བར་བྱེད་པས་ཉོན་མོངས་པའི་ཐིབས་པོ་གཉིད་དེ་ཉིད་གཞོམ་པར་བྱ་བ་དང༌། མི་འཇུག་པས་སྙོམས་ལས་དང་བརྩོན་པ་ཆུང་བས་ལེ་ལོའི་གཞིར་གྱུར་པ་དང་ཡིད་ཀྱི་ལས་ཐུག་ཐུབ་དང་ལུས་ངག་གི་ལས་ཀྱིས་66ར་ཆོད་བྱེད་ཅིང་ང་རྒྱལ་གྱི་རི་དང་དྲེགས་པ་སྐྱེ་བར་བྱེད་པ་དང་དབང་པོ་དྲུག་ནུས་པ་ཉམས་པས་སྐྱོན་བདུན་དང་ལྡན་པའི་མྱོས་བྱེད་བཅུད་ཀྱིས་ནོན་པས་དཔའ་བར་བྱེད་པའི་རྐྱེན་དུ་འགྱུར་བ་སོགས་ཀྱིས་ཆང་ཡང་བསྡམ་པར་བྱ་ཞིང་ཚོད་ཟིན་པར་བཏུང་བ་དང༌། ཐེག་ཆེན་གསང་སྔགས་ལ་གྲགས་པའི་བརྡ་ཡིས་བརྗོད་པ་མ་གཏོགས་པར། དངོས་པ་མཚན་མ་དང་གང་དག་འཇིག་རྟེན་གྱི་བྱིས་པའི་ཚིག་གི་ཟུར་ཙམ་༼༦༧༽ཡང་བརྗོད་པར་མི་བྱ་ཞིང༌། བརྗོད་པ་ཐམས་ཅད་དེ་ཉིད་ཀྱི་དོན་དུ་འགྱུར་པའི་གསང་བ་བརྡ་ཡི་བརྗོད་པ་ཁོ་ནར་བྱ་སྟེ། རྩ་རྒྱུད་ལས། བརྡ་ཡི་ཡོན་ཏན་ཆེན་པོ་ནི། །གྲངས་ཀྱང་བསམ་གྱིས་མི་ཁྱབ་ན། །མདོར་བསྡུས་རྣམ་པ་བཞི་ཡོད་དེ། །གཞན་གྱི་སྤྱོད་ཡུལ་མ་ཡིན་དང༌། །རྣལ་འབྱོར་རིག་པའི་སྤྱོད་ཡུལ་དང༌། །སྦས་པས་གྲུབ་ཐག་ཉེ་བ་དང༌། །གསང་བའི་དམ་ཚིག་མི་ཉམས་ཤིང༌། །བརྡ་ལ་དགའ་བའི་མ་སྲིང་རྣམས། །ཉེ་ཞིང་གདུང་བའི་ཐབས་སུ་འགྱུར། །ཞེས་འབྱུང་བས་གསང་བའི་བརྡ་བསྲུང་ཞིང༌། གསང་བ་མི་སྨྲ་བ་དང༌། དཔེ་ཇི་ལྟར་ན་གསོད་པར་བྱ་བའི་མི་གང་དག་མི་ཤ་བའི་གཤེད་མའི་མིས་ནི་གསོད་པའི་ཚེ་ན་ཐར་པའི་ཐབས་ལ་བརྩོན་པ་ལྟར་དུ་གཤེད་མ་དང་འདྲ་བའི་ལེ་ལོའི་དགྲ་དཔུང་བཅོམ་ལ་བརྩོན་འགྲུས་ཆེར་བསྐྱེད་པར་འབད་པ་དང་བཞི་ཡིན་ནོ།།

བདུན་པ་ཚོགས་སུ་མོ་ཆུད་པའི་སྐྱོན་ཟུང་དགུ་བསལ་བ་ནི།

རྣལ་འབྱོར་སྒྲུབ་པའི། ཞེས་པ་ནས། བར་དུ་གཅོད་པར་བྱེད། །ཅེས་པའི་བར་གྱིས་བསྟན་ཏེ།

རྣལ་འབྱོར་སྒྲིབ་པའི་གེགས་བསལ་བ། །དཀའ་ཐུབ་སྡོམ་པའི་འདུན་པ་ཅན། །འདོད་སྤྱོད་ཞེན་དང་མི་མཐུན་དང་། །གཅིག་ལ་གང་འདིར་མི་གཅིག་པ། །ཕྱི་ནང་ཅན་དང་གནོད་སྦྱོར་ཅན། །འདོད་མྱོས་བྱིང་རྨུགས་བརྐམ་པ་དང་། །དད་མེད་རྩ་ཉམས་འཕྱར་གཡེང་ཅན། །མཁས་པ་ཡོངས་ཀྱིས་སྤང་བར་བྱ། །དེ་ནི་རྣལ་འབྱོར་གེགས་ཡིན་ཏེ། །རྣལ་འབྱོར་བར་དུ་གཅོད་པར་བྱེད།།

རྣལ་འབྱོར་གྱི་སྤྱི་སྐྱོན་དགུ་བསྟན་པའི་ཕྱིར། སྤྱིར་རྒྱུ་འབྲས་ཀྱི་ཐེག་པ་ལ་གནས་པ་དག་གི་སྐྱོན་ནི། འདིར་རྣལ་འབྱོར་པས་བསྒྲུབ་པ་བྱེད་པའི་ཚེ་ན་དེའི་སྒྲིབ་པའི་ཕྱོགས་ཀྱི་གེགས་བསལ་བ་ཉིད་དེ། ཉན་ཐོས་ལྟར་དཀའ་ཐུབ་ལ་དམ་དུ་འཛིན་པ་དང༌། བྱང་ཆུབ་སེམས་དཔའ་ལྟར་སྡོམ་པའི་བསྲུང་མཚམས་ལ་དམ་དུ་འཛིན་པ་གཉིས་ཀྱང་མ་གྲོལ་ན་སྒོ་གསུམ་བཅིང་བས་མདུད་པ་ཅན་དུ་གྱུར་པ་གཡེང་བའི་རྒྱུ་སྟེ་རྣལ་འབྱོར་དང་མི་མཐུན་པའོ། །འདོད་པའི་ཆགས་པ་ཆེ་བ་དང་ལོངས་སྤྱོད་ལ་ཆགས་ཤིང་ཞེན་པ་གཉིས་དང༌། ལྟ་སྤྱོད་མི་མཐུན་པ་སྟེ་རྩོད་པའི་རྒྱུ་ལ་ཞེན་པ་དང༌། སྤྱིར་གསང་བ་ཙམ་དུ་ལྟ་བ་དང་ཐེག་པའི་སྒོ་གཅིག་ལ་གང་འདིར་རང་གི་འཇུག་སྒོའི་སྤྱོད་ལུགས་མི་གཅིག་པས་སྒྲོ་སྐུར་བྱེད་པ་དང༌། འདི་དག་ཡོ་ག་ཕྱི་པའི་ཡང་སྐྱོན་བཞིའོ། །ནང་པ་ལ་རྟོག་པ་ཆེ་བས་མཆེད་ལྕམ་ནང་དུ་ཚིག་ཕྱི་མ་ནང་དུ་བྱེད་པ་དང༌། ནང་པ་ལ་མི་གཏོད་པར་ཕྱི་པ་ལ་སེམས་གཏོད་པ་ཅན་དང༌། བསྒྲུབ་པར་འོངས་ནས་རང་བཞིན་ངན་པས་མཆེད་ལྕམ་ལ་སྒོ་གསུམ་གྱིས་གནོད་སྦྱོར་ཉི་ཚེ་བྱེད་པ་ཅན་གྱིས་འགྲོགས་ན་སྐྱོ་བ་དང་གསུམ་མོ། །ཐེག་པ་ཆེན་པོའི་སྒོས་སྐྱོན་བསྟན་པའི་ཕྱིར། འདོད་པའི་ཡོན་ཏན་ལྔ་ལ་ཆགས་པ་ཆེ་བ་དང༌། སེམས་གཏི་མུག་དང་གཉིད་ཀྱིས་མྱོས་པ་གཉིས་དང་བསམ་༼༦༨༽པའི་དོན་ལ་འཇུག་མི་ནུས་པར་ལུས་སེམས་དམའ་བས་བྱིང་བ་དང་དམིགས་པ་མི་གསལ་བས་རྨུགས་པའི་དབང་དུ་གྱུར་པ་གཉིས་དང༌། རྫས་དང་ཟས་ལ་བརྐམ་ཆགས་ཆེ་བ་དང༌། གསང་བ་ལ་དད་པ་མེད་པས་བསྙེན་བསྒྲུབ་གཡེལ་བ་གཉིས་དང༌། རྩ་བའི་དམ་ཚིག་ཉམས་པ་དང༌། བློ་མཚན་མ་ལ་དགའ་བས་འཕྱར་བ་ཕྱི་རོལ་དུ་ཡང་སྨྲ་བ་མང་བ་དང༌། འདུ་ཤེས་ཀྱིས་གཡེང་བ་མང་བས་རྒོད་ཅིང་འདུ་བྱེད་ཆེ་བ་ཅན་དང་དགུ་སྟེ་བསྡོམས་པས་བཅོ་བརྒྱད་དང་ལྡན་པ་དག་ཉེས་དམིགས་ཤེས་པའི་རྣལ་འབྱོར་པ་མཁས་པ་ཡོངས་ཀྱིས་སྤང་བར་བྱ་སྟེ། དེ་ཅིའི་ཕྱིར་ཞེ་ན། དེ་དག་ནི་བསྒྲུབ་པའི་རྣལ་འབྱོར་གྱིས་དངོས་གྲུབ་དམ་པའི་བགེགས་ཡིན་པའི་ཕྱིར་ཏེ། རྣལ་འབྱོར་པ་ལ་བར་དུ་གཅོད་པར་བྱེད་པའི་ཕྱིར་རོ། །འདིར་ནི་རང་གཞུང་གིས་ཀུན་ཀྱང་ཐེག་པ་ཆེན་པོ་ཉིད་ཀྱི་སྒོས་སྐྱོན་དུ་ཡང་རིགས་པས་མི་འགལ་ལོ། །བཤད་པ་དག་ནི་བཀའ་སྤྱིའི་དབང་དུའང་སྦྱར་རོ།།

བརྒྱད་པ་བདུད་ལྔ་སྤང་བ་ནི།

རྣལ་འབྱོར་ངེས་པར། ཞེས་པ་ནས། ཆེན་པོའི་ངང་དུ་བཟློག །ཅེས་པའི་བར་གྱིས་བསྟན་ཏེ།

རྣལ་འབྱོར་ངེས་པར་ཞུགས་པ་ལ། །རྒྱུན་གྱི་བར་དུ་གཅོད་པའི་བདུད། །རྣམ་རྟོག་འཁྲིག་པ་ཆེན་པོ་དང་།།

གང་ལ་བཏང་སྙོམས་ལེ་ལོ་དང་། །ལོངས་སྤྱོད་འདུ་འཛི་གཡེང་བ་དང་། །ཚིག་རྩུབ་མཚོན་ཆ་རྣོན་པོ་དང་།། ཁྲོ་གཏུམ་ངང་ཐུང་ཤིན་ཏུ་འཁྲུག །རྣལ་འབྱོར་སྦྱོར་བའི་བདུད་ལྔ་ཡིན། །ཡང་དག་དོན་ལ་སྒྲིབ་པ་སྟེ།།

གཉེན་པོ་བྱང་ཆུབ་སེམས་མཆོག་གིས། །ཞི་བ་ཆེན་པོའི་ངང་དུ་བཟློག།

ཐེག་པ་ཆེན་པོའི་རྣལ་འབྱོར་ངེས་པར་སྤྱོད་ཅིང་ཏིང་ངེ་འཛིན་ལ་ཞུགས་པ་ལ་དུས་རྒྱུན་དུ་ཡང་དག་པའི་དོན་གྱི་བར་དུ་གཅོད་པའི་བདུད་ཀྱི་སྐྱོན་ལྔ་འབྱུང་སྟེ། ལྟ་བ་མ་རྟོགས་པ་ལས་བྱུང་བའི་རྣམ་རྟོག་སྣ་ཚོགས་པས་ཐེ་ཚོམ་ཟ་བ་དང་ཁུ་འཕྲིག་བྱེད་པ་ལ་སོགས་བར་དུ་གཅོད་པའི་བདུད་ཆེན་པོ་དང་གཅིག་སྟེ། དེའང་ལྟ་བའི་རྣམ་རྟོག་རིག་པ་གདེང་མ་ཆོད་པར་བླ་མ་ངན་པ་དང༌། ཐེག་པ་དམན་པ་དང༌། ཤེས་རབ་ཆུང་བ་ལ་རྟེན་པའོ། །སྒོམ་པའི་རྣམ་རྟོག་སྒོམ་པའི་དུས་སུ་འདི་བས་འདི་ཨེ་བཟང་སྙམ་པ་ལྟ་བུ། སྤྱོད་པའི་རྣམ་རྟོག་གཙང་སྨེར་འཛིན་པའོ། །དེ་དག་ནི་ནང་གི་འཛིན་རྟོག་གི་ཚོམས་སོ། །ཞེས་ཆོས་རྗེའི་ཕྱག་མཆན་ལས་སོ། །བརྩོན་པའི་སྟོབས་མེད་པ་ལས་བྱུང་བའི་སྒོམ་སྤྱོད་གང་ལ་ཡང་བཏང་སྙོམས་དང་ལེ་ལོ་ཆེ་བའི་བདུད་དང་གཉིས། ལོངས་སྤྱོད་ཕུན་སུམ་ཚོགས་པ་ལས་བྱུང་བའི་འདུ་འཛི་གཡེང་བ་འཕེལ་བའི་བདུད་དང་གསུམ། རང་རྒྱུད་ངན་པ་ལས་བྱུང་བའི་ཚིག་རྩུབ་མཚོན་ཆ་རྣོན་པོ་འདེབས་པའི་བདུད་དང་བཞི། ཁྲོ་གཏུམ་ངང་ཐུང་ཤིན་ཏུ་འཁྲུག་པའི་བདུད་དང་ལྔ་ནི་རྣལ་འབྱོར་པ་འབྲས་བུ་ལ་སྦྱོར་བའི་བར་དུ་གཅོད་པའི་བདུད་ཀྱི་ལས་སུ་གྱུར་པ་ལྔ་ཡིན་ནོ། །དེས་ན་༼༦༩༽ལྔ་པོ་དེ་ཉིད་བློ་མི་མཉམ་པ་ལས་བྱུང་བས་ཆོས་ཉིད་ཡང་དག་པའི་དོན་ལ་སྒྲིབ་པ་ཡིན་ཏེ། དེ་རྣམས་བཟློག་པའི་ཐབས་ཀྱི་གཉེན་པོ་བདུད་ལྔ་ཉིད་སྣང་ལ་མ་དམིགས་པར་རྟོགས་པའི་སྙིང་པོ་བྱང་ཆུབ་སེམས་མཆོག་གིས་ཆོས་ཉིད་ཞི་བ་ཆེན་པོའི་ངང་དུ་བཟློག་པར་བྱའོ།།

དགུ་པ་དགྲ་བཞི་གཞོམ་པ་ནི།

རྣལ་འབྱོར་ནོར་ལ། ཞེས་པ་ནས། དགྲ་བཞི་བཟློག་པར་བྱ། །ཞེས་པའི་བར་གྱིས་བསྟན་ཏེ།

རྣལ་འབྱོར་ནོར་ལ་འཇོམས་པའི་དགྲ། །ཐབས་ལ་མཁས་པས་གདུལ་བར་བྱ། །གང་གི་རྣལ་འབྱོར་རང་བཞིན་བཅོས། །དྲང་སྲོང་ཉིད་ལས་ཉམས་འགྱུར་ཏེ། །ཁ་ན་མ་ཐོ་གྲགས་པ་ཡིས། །དེ་དག་བཅས་གར་འགྱུར་བའི་དགྲ། །ལྟ་དམན་སྤྱོད་ཅིང་འཆོས་པ་ཡིས། །ལུགས་བོར་འདི་ལས་ལོག་པར་སྤྱོད། །བཀའ་ལོག་ཕྲ་མེན་ལས་སྤྱོད་པ། །དོན་དུ་མི་འགྱུར་འཆལ་པའི་དགྲ། །འདའ་དཀའ་རྡོ་རྗེ་དཀའ་ཐུབ་དམ། །ཀླུང་དུ་མ་གྱུར་ཕྱལ་བས་འཆལ། །རྩ་བ་རུལ་བའི་ལྗོན་ཤིང་བཞིན། །བཅད་པ་དགྲ་བོ་འབྱུང་བའི་དགྲ། །རྣལ་མ་ཉིད་ལ་སྦྱོར་བ་དེ། །གང་ལ་ངེས་པའི་ཚད་མེད་ན། །དོན་རྣམས་འགྲུབ་པ་མ་ཡིན་ཏེ། །འབྲས་བུར་མི་འགྱུར་གོལ་བའི་དགྲ། །རྣལ་འབྱོར་རྣལ་འབྱོར་སྤྱོད་པ་ལ། །དམ་པའི་ནོར་མཆོག་འཕྲོག་པའི་དགྲ། །ཐབས་ལ་མཁས་པའི་བློ་གྲོས་ཀྱིས།།

སྐྱོན་གྱི་དགྲ་བཞི་བཟློག་པར་བྱ།།

རྣལ་འབྱོར་པས་འཕགས་པའི་དཀོར་བདུན་ཀྱི་ནོར་ལ་འཇོམས་པ་དང་ཕྲོག་པར་བྱེད་པའི་དགྲ་བཞི་འབྱུང་བ་ཉིད་ཐབས་ལ་མཁས་པས་གདུལ་བར་བྱ་བ་ནི་ཇི་ལྟ་ཞེ་ན། རྣལ་འབྱོར་པ་གང་སུ་ཞིག་གི་གསང་བ་འཕེལ་ཞིང་ལེ་ལོ་ལ་སོགས་པར་གྱུར་ནས་ལྟ་སྒོམ་སྤྱོད་པའི་རྣལ་འབྱོར་གྱི་རང་བཞིན་བཅོས་ཏེ། ལྟ་བའི་རང་བཞིན་བཅོས་པ་ཆེད་འཛིན། སྒོམ་པའི་རང་བཞིན་བཅོས་པ་དམིགས་འཛིན། སྤྱོད་པའི་རང་བཞིན་བཅོས་པ་ཚུལ་འཆོས་སུ་ལྟ་སྒོམ་སྤྱོད་གསུམ་མམ་ཏིང་ངེ་འཛིན་གྱི་དོན་དྲང་པོར་སྲོང་བའི་ཆོས་ཉིད་ལས་ཉམས་པར་གྱུར་ཏེ་བསླད་པར་བྱས་པས་གསང་བ་འཕེལ་བ་དང་བཅོས་པའི་སྐྱོན་གཉིས་ཀྱིས་བཅས་པའི་ཁ་ན་མ་ཐོ་བས་ཕོག་པར་གྱུར་པའི་གྲགས་པ་ངན་པ་ཡིས་ཡ་ག་དང་མཚང་འདོགས་པ་དང༌། མི་ནག་དེ་དག་ཡོངས་ཀྱིས་ཀྱང་བཅས་ཀར་དང་དཔྱ་ལོང་དུ་འགྱུར་བའི་དགྲ་སྟེ། དཔེར་ན་ཁ་གཏོང་བྱེད་པའི་དགྲ་དང་འདྲ་བས་དེའི་དབང་དུ་མི་གཏོང་བའོ། །ལྟ་བ་དམན་པ་སྤྱོད་པ་རྩིང་བ་ནི་ལྟ་སྤྱོད་འཆོལ་བ་ཡིན་པས་དེ་ལྟར་བྱེད་པ་དེ་ཡིས་བཀའི་གཞུང་ལུགས་འདི་ཉིད་བོར་ནས་འདི་ལས་ལོག་པར་སྤྱོད་པ་ལགས་པས་དེ་རྣམས་ཀྱི་ལྟ་སྤྱོད་ཡང་དག་པའི་བཀའ་གཞུང་ལས་ལོག་སྟེ་མི་མཐུན་པ་བསྲེས་ནས་ཕྲ་མེན་གྱི་ལས་ལ་སྤྱོད་པ་ཉིད་དེ། དེ་དག་ནི་རང་གཞན་གཉིས་ཀའི་དོན་དུ་མི་འགྱུར་བར་འཆལ་བའི་དགྲ་སྟེ་དཔེར་ན་མཁར་ལེན་གྱི་ལག་པ་གཅོག་པའི་དགྲ་དང་འདྲའོ། །ཤིན་ཏུ་བསྲུང་མཚམས་དམ་པས་འདའ་བར་དཀའ་བ་ནི་རྡོ་རྗེ་ཐེག་པ་ཆེན་པོའི་དཀའ་ཐུབ་མཆོག་གི་དམ་ཚིག་རྣམས་ཏེ། དེ་ཀུན་དང་དུ་བླངས་ཏེ་ཀློང་དུ་མ་གྱུར་ཅིང་གོམས་པ་མེད་པར་རྩ་བ་དང་ཡན་ལག་ཕྱལ་བར་ཤོར་ཏེ་ཡལ་བར་བོར་བས་དོན་ལས་འཆལ་ནས་འབྲས་བུ་མི་འབྱུང་བ་ནི། དཔེ་རྩ་བ་རུལ་བའི་ལྗོན་ཤིང་བཞིན་དུ་གཞི་རྩ་བཅད་པས་བཀའི་ཆད་པ་དྲག་པོ་འབྱུང་ཞིང་འབེབས་པའི་དགྲ་སྟེ་༼༧༠༽དཔེར་ན་སྲོག་ལ་འབེབས་པའི་དགྲ་དང་འདྲའོ། །གསང་སྔགས་ཀྱི་གཞུང་ལུགས་མ་ནོར་བས་རྣལ་མ་ཉིད་ལ་སྦྱོར་བའི་ལྟ་སྒོམ་སྤྱོད་པ་དང་ཕྲིན་ལས་བྱེད་པའི་ཚེ་ཡང༌། དེ་ལྟ་བུའི་གང་ཟག་གང་ལ་དེ་དག་གི་དོན་གནད་ངེས་པའི་མན་ངག་ཚད་མ་མེད་ན་འབྲས་བུའི་དོན་རྣམས་གྲུབ་པ་མ་ཡིན་ཏེ་འབད་པའི་རྩལ་ཤུགས་ཆུང་བས་བརྩོན་མེད་ལེ་ལོའི་དབང་གིས་འབྲས་བུར་མི་འགྱུར་བར་གོལ་སར་ལྟུང་བའི་དགྲ་སྟེ་སླར་ལོག་པར་འགྱུར་བས་དཔེར་ན་ནོར་འཕྲོག་པའི་དགྲ་དང་འདྲའོ། །དེ་ལྟར་རྣལ་འབྱོར་པ་རྣམས་རྣལ་འབྱོར་ཆེན་པོའི་ལུང་གི་གཞུང་བཞིན་སྒྲུབ་ཅིང་སྤྱོད་པ་ལ་ཐུན་མོང་མ་ཡིན་པའི་དམ་པའི་ནོར་མཆོག་དཀོར་བདུན་ཉིད་འཕྲོག་ཅིང་འཇོམས་པར་བྱེད་པའི་དགྲ་བཞི་པོ་དག་བཟློག་ཅིང་འཇོམས་པའི་ཐབས་ལ་མཁས་པའི་རྣལ་འབྱོར་པའི་ལྟ་བའི་བློ་གྲོས་ཀྱིས་སྐྱོན་གྱི་དགྲ་བཞི་པོ་དེ་དག་གི་དབང་ཀར་མི་གཏང་བར་བཟློག་པར་བྱ་བའོ།།

བཅུ་པ་ལྟ་བའི་དམ་ཚིག་བཤད་པ་ལ་བཞི་སྟེ། སྲིད་གསུམ་ཡོངས་སྒྲོལ་གྱི་ལྟ་བ། རྨད་བྱུང་མཆོད་པའི་ལྟ་བ། འཁོར་བ་བདེ་གནས་ཀྱི་ལྟ་བ། དུག་ལྔ་རྩིར་འགྱུར་གྱི་ལྟ་བའོ། །དང་པོ་ནི།

སྲིད་གསུམ་སྣང་བའི། ཞེས་པ་ནས། དག་པའི་མཆོག་ཡིན་ནོ། །ཞེས་པའི་བར་གྱིས་བསྟན་ཏེ།

སྲིད་གསུམ་སྣང་བའི་ཞིང་འདི་དག །རྣམ་དག་ཞིང་དུ་ངེས་པ་སྟེ།།

ས་རྣམས་ཅིག་ཅར་སྦྱངས་པས་ན། །ཞིང་རྣམས་དག་པའི་མཆོག་ཡིན་ནོ།།

ལྟ་བའི་དམ་ཚིག་བསྟན་པ་ལས། འདིར་རང་བཞིན་ལྟ་བའི་དམ་ཚིག་བསྟན་པའི་ཕྱིར་སྲིད་གསུམ་ཡོངས་སྒྲོལ་གྱི་དགོངས་པ་ནི། བློ་ཆེ་བའམ་མཐར་ལམ་པའི་ཡུལ་ཏེ། སྲིད་པ་ཁམས་གསུམ་དུ་སྣང་བའི་གདུལ་བྱའི་ཞིང་ཁམས་འདི་དག་རིལ་གདོད་ནས་མཐའ་གྲོལ་བའི་ངོ་བོ། མ་སྤང་རྣམ་པར་དག་པའི་རྫོགས་པའི་སངས་རྒྱས་ཀྱི་ཞིང་དུ་ཡེ་ནས་གནས་པར་རྟོགས་ཏེ་ངེས་པའི་གདེང་རྙེད་དེ་བློ་གཤིས་སུ་ཕེབས་པ་ནི་སྲིད་གསུམ་རང་གྲོལ་དུ་ཤར་བའི་ལྟ་བ་སྟེ། དེ་ཉིད་རྟོགས་པས་ཁམས་གསུམ་གྱི་ས་དགུ་རྣམས་གཅིག་ཆར་དུ་སྦྱངས་ཤིང་དག་པར་མཛད་དེ་ལམ་གྱི་ས་བཅུ་ལ་བགྲོད་མི་དགོས་པའམ་མཐར་ཕྱིན་པས་ན་ཁམས་གསུམ་སངས་རྒྱས་ཀྱི་ས་ལམ་མ་བགྲོད་པར་བཏོན་པས་རྒྱལ་བའི་ཞིང་དུ་བསྙད་པ་རྣམས་ཀྱི་དག་པ་དམ་པའི་མཆོག་སྟེ་དེ་ལས་འདའ་བ་མེད་པའི་དམ་ཚིག་ཉིད་ཡིན་ནོ།།

གཉིས་པ་རྨད་བྱུང་མཆོད་པའི་ལྟ་བ་ནི།

འདོད་སྤྱོད་མཆོད་པའི། ཞེས་པ་ནས། བྱུང་བའི་མཆོད་པའོ། །ཞེས་པའི་བར་གྱིས་བསྟན་ཏེ།

འདོད་སྤྱོད་མཆོད་པའི་ཚོགས་འདི་དག །ཡོ་བྱད་ཆེན་པོའི་མཆོག་ཡིན་ཏེ།།

དགོངས་པ་དམ་པ་ཀུན་མཉེས་པའི། །རྨད་དུ་བྱུང་བའི་མཆོད་པའོ།།

འདོད་སྤྱོད་རྨད་བྱུང་མཆོད་པའི་ལྟ་བ་༼༧༡༽བསྟན་པའི་ཕྱིར་འདོད་སྤྱོད་ལྔ་པོ་ཇི་སྙེད་པ་ཐམས་ཅད་མཉམ་པ་ཆེན་པོའི་ངང་དུ་ལྷུན་གྱིས་རྫོགས་པས་མཆོད་པའི་ཚོགས་ཀྱི་རྒྱལ་པོ་ཆེན་པོ་འདི་དག་ནི་རྣལ་འབྱོར་པས་བྱང་ཆུབ་འགྲུབ་པའི་རྒྱུའི་ཡོ་བྱད་ཆེན་པོའི་མཆོག་ཕུལ་དུ་བྱུང་བ་ཡིན་ཏེ། དུས་གསུམ་གྱི་སངས་རྒྱས་དང་ཁམས་གསུམ་གྱི་སེམས་ཅན་ཐམས་ཅད་ བདག་ཉིད་ཆེན་པོ་ཡིན་པར་མཇལ་བས་གཉིས་སུ་མེད་པའི་མཆོད་པ ་དགོངས་པ་དམ་པ་མངའ་བའི་རྒྱལ་བ་ཀུན་མཉེས་ཤིང་རོ་བསྟར་ལ་མ་ཆགས་པའི་ཕྱིར་རྨད་དུ་བྱུང་བའི་མཆོད་པ་ཆེན་པོ་བླ་ན་མེད་པ་ཁོ་ནའོ།།

གསུམ་པ་འཁོར་བ་བདེ་གནས་ཀྱི་ལྟ་བ་ནི།

འཁོར་བ་དུར་ཁྲོད། ཅེས་པ་ནས། ལྷུན་གྱིས་གྲུབ་པའི་སའོ། །ཞེས་པའི་བར་གྱིས་བསྟན་ཏེ།

འཁོར་བ་དུར་ཁྲོད་གནས་འདི་དག །བདེ་བ་ཆེན་པོའི་གནས་ཡིན་ཏེ།།

མ་ནོར་མ་བཅོས་ཆོས་ཀྱི་དབྱིངས། །བཙལ་མེད་ལྷུན་གྱིས་གྲུབ་པའི་སའོ།།

འཁོར་བ་གནས་སྟོབ་ཀྱི་ལྟ་བ་བསྟན་པའི་ཕྱིར། ཁམས་གསུམ་འཁོར་བ་དུར་ཁྲོད་ཀྱི་གནས་སུ་འཁྲུལ་པ་ལ་སྣང་བ་འདི་དག་ཉིད་ཇི་བཞིན་པའི་དེ་ཁོ་ན་ཉིད་དུ་རྟོགས་ན་མ་བརྩལ་མ་བསྒྲུབ་པར་བདེ་བ་ཆེན་པོའི་ཞིང་མཆོག་རྒྱལ་བའི་བཞུགས་གནས་ཡེ་ཤེས་རང་སྣང་གི་གཞལ་ཡས་ཁང་ཆེན་པོ་ཡིན་ཏེ། དེ་ལྟ་བས་ན་དངོས་པོ་རྣམས་ཀྱི་དེ་ཁོ་ན་ཉིད་མ་ནོར་མ་བཅོས་པར་མུ་མཐའ་ལས་གྲོལ་བའི་ཆོས་ཀྱི་དབྱིངས་མཉམ་པ་ཆེན་པོར་ཆེད་དུ་བྱ་བརྩལ་མེད་པར་གནས་སུ་སྟོབ་ཟིན་པས་ལྷུན་གྱིས་གྲུབ་པའི་སངས་རྒྱས་ཀྱི་ས་ཉིད་དུ་གྱུར་པའོ།།

བཞི་པ་དུག་ལྔ་རྩིར་འགྱུར་གྱི་ལྟ་བ་ནི།

ཀུན་གྱི་རྩ་བ། ཞེས་པ་ནས། རང་རིག་མིག་ལྡན་པའོ། །ཞེས་པའི་བར་གྱིས་བསྟན་ཏེ།

ཀུན་གྱི་རྩ་བ་དུག་ཆེན་ལྔ། །ཡེ་ཤེས་ཆེན་པོ་ལྔ་ཉིད་དེ།།

ཀུན་ཤེས་རང་རིག་རང་བྱུང་བས། །རྣལ་འབྱོར་རང་རིག་མིག་ལྡན་པའི།།

དུག་ལྔ་རྩིར་འགྱུར་གྱི་ལྟ་བ་གང་ཞེ་ན། མ་རྟོགས་ན་འཁོར་བའི་ཆོས་རིལ་ཀུན་གྱི་གཞི་དང་རྩ་བ་གཏི་མུག་ཆགས་སྡང་ང་རྒྱལ་ཕྲག་དོག་སྟེ་དུག་ཆེན་པོ་ལྔ་པོ་དེ་ཉིད་ངོ་བོ་ཡེ་ནས་མཐའ་ལས་གྲོལ་བའི་ཡེ་ཤེས་ཆེན་པོ་ལྔ་རུ་ལྷུན་གྱིས་གྲུབ་པ་ཉིད་དེ། དོན་གང་དེ་ཆོས་ཀུན་གྱི་མཚན་ཉིད་ཇི་ལྟ་བའི་དོན་དུ་རྟོགས་ཤིང་ཤེས་ན། ཡེ་ཤེས་ལྔའི་བདུད་རྩི་ཆེན་པོ་གཞན་ནས་བཙལ་མི་དགོས་པར་རང་རིག་པ་ལ་གནས་པའི་དུག་ལྔ་ཉིད་ཡེ་ཤེས་ལྔར་མ་བྱས་པར་རང་བྱུང་བ་ཡིན་པས། དོན་དེ་མཐོང་བ་མེད་པར་མཐོང་བ་ནི་རྣལ་འབྱོར་གྱི་སྤྱན་ལྔའི་མཆོག་རང་རིག་པའི་ཡེ་ཤེས་ཀྱི་མིག་དང་ལྡན་པ་ཡིན་པས་ཤེས་རབ་ཀྱི་སྤྱན་ཉིད་དུ་བསྟན་པའོ།།

གཉིས་པ་དེའི་མཇུག་བསྡུ་བ་ནི།

ལང་ཀའི་བདག་པོ། ཞེས་པ་ནས། ངེས་པའི་རྣལ་འབྱོར་ཡིན། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་དག་ནི། །དམ་ཚིག་གསང་བའི་མཆོག་ཡིན་ཏེ།།

དམ་པས་གདམས་པའི་ཚིག་འདི་ལ། །གང་དག་ངེས་པའི་རྣལ་འབྱོར་ཡིན།།

སྐྱེས་༼༧༢༽བུས། ལང་ཀའི་བདག་པོ་ཞེས་སྡུད་པ་ལ་བོས་ནས་སྔར་བཤད་པ་འདི་དག་རྣམས་ནི། ཐེག་པ་ཆེན་པོ་རྗེས་སུ་རྣལ་འབྱོར་གྱི་དམ་ཚིག་སྣོད་བཞི་ལ་མི་བསྟན་པས་གསང་བ་མཆོག་དམ་པ་ཡིན་ཏེ། རྒྱལ་བ་རྣམ་འདྲེན་དམ་པས་བསྲུང་བར་གདམས་ངག་དུ་གསུངས་པའི་ཚིག་ཡིན་པའི་ཕྱིར་མིང་ཡང་འགྲུབ་བོ། །འདི་དག་ལ་རྣལ་འབྱོར་གང་སུ་དག་བློ་མི་འགྱུར་བར་ངེས་པའི་བརྟན་པར་གནས་ན་དེ་ནི་གསང་བ་མཆོག་གི་དམ་ཚིག་དང་ལྡན་པའི་རྣལ་འབྱོར་པ་ཉིད་ཡིན་ནོ་ཞེས་བྱའོ།།

བཞི་པ་ཉམས་པའི་སྐྱོན་བཤད་པ་ལ་གཉིས་ཏེ། ཉེས་དམིགས་བསྟན་པ། རྣམ་གྲངས་བཤད་པའོ། །དང་པོ་ནི།

འོག་ནས། གལ་ཏེ་ཉམས་པར། ཞེས་པ་ནས། མཚོན་ཆ་བཞིན་དུ་འཁོར། །ཞེས་པའི་བར་གྱིས་བསྟན་ཏེ།

གལ་ཏེ་ཉམས་པར་གྱུར་པ་ན། །ཆད་པའི་སྐྱེ་གནས་དམྱལ་ཆེན་བརྒྱད།།

མི་བཟད་སྡུག་བསྔལ་དྲག་པོ་ཡིས། །འཁོར་ལོའི་མཚོན་ཆ་བཞིན་དུ་འཁོར།།

གལ་ཏེ་དམ་ཚིག་ཉམས་པར་གྱུར་པ་ན་ནི་འདིར་དེའི་སྤྱི་སྐྱོན་སྟོན་ཏེ། འབྲས་བུ་ལས་ཕམ་པས་རིགས་ཆད་པའི་སྐྱེ་གནས་ཚ་བའི་དམྱལ་བ་ཆེན་པོ་བརྒྱད་ལ་སོགས་པ་མི་བཟད་པ་དང་རྡོ་རྗེ་དམྱལ་བའི་སྡུག་བསྔལ་དྲག་པོ་ཡིས་རྒྱུན་ཆད་མེད་པར་དེ་ཉིད་དུ་ཡང་ནས་ཡང་དུ་བརྒྱུད་པས་འཁོར་ལོ་སྡུག་བསྔལ་བཟོད་བླགས་མེད་པས་མཚོན་ཆ་བཞིན་དུ་ཐོན་དཀའ་བར་འཁོར་བར་འགྱུར་རོ།།

གཉིས་པ་རྣམ་གྲངས་བཤད་པ་ནི།

ལང་ཀའི་བདག་པོ། ཞེས་པ་ནས། རྒྱུན་གྱི་འཁོར་མོར་འབྱུང༌། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་གང་འདི་ལས། །ཉམས་པར་གྱུར་པ་གང་ཞེ་ན། །ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་བཟླས་ཉམས་ཞར་ཉམས་ལྔ། །རྟག་པར་རྒྱུན་གྱི་འཁོར་མོར་འབྱུང་།།

ལང་ཀའི་བདག་པོ་ཞེས་བོས་ནས་གང་རྒྱུད་འདི་ཡི་གཞུང་ལས་ཉམས་པར་གྱུར་པ་ལྔ་འབྱུང་བ་གང་ཞེ་ན། རྩ་བ་དང་ཡན་ལག་ལ་སོགས་པའི་དམ་ཚིག་ཀུན་ཏུ་ཕྱོགས་མེད་དུ་ཉམས་པ་ཆེན་པོ་དང༌། རྡོ་རྗེ་སློབ་དཔོན་ལ་ཉམས་ན་དེའི་རྐྱེན་གྱིས་ཀུན་ཉམས་པས་རྩ་བ་ཉམས་ཏེ་རྨེད་མེད་པར་འགྱུར་བ་དང༌། ཡན་ལག་ལྔ་ལ་སོགས་པ་ཉམས་པས་67རྨེད་མེད་པར་མི་འགྱུར་ཡང་གནས་སྐབས་ཀྱི་འབྲས་བུ་མེད་ཅིང་མི་འབྱུང་བ་དང༌། དེ་བཞིན་དུ་ཉམས་པ་དང་དམ་འདྲེས་པ་དང་འགྲོགས་པ་གང་ཡིན་པ་ཟླས་ཉམས་པ་དང༌། ཉམས་པའི་མགོན་ནམ་ཆེད་བྱས་ཏེ་མཚོར་བར་ཉམས་པའམ་གྲོགས་པོའི་ངོ་དགར་དབང་མེད་དུ་ཉམས་པའི་ལས་སུ་གྱུར་པ་ཞར་གྱིས་ཉམས་པ་དང་ལྔའོ། །དེ་དག་ཀྱང་ཉམས་པར་རེས་འགའ་གང་བྱུང་བས་ཡང་ཡང་ཉམས་ཏེ་རྣལ་འབྱོར་པ་གཅིག་ལ་ཡང་རྟག་པ་རྒྱུན་གྱི་འཁོར་མོར་ཉམས་པ་འབྱུང་བའི་ཕྱིར་ཤིན་ཏུ་བསྒྲིམས་ཏེ་འབད་དོ།།

ལྔ་པ་ཉམས་ན་བསྐང་ཐབས་བསྟན་པ་ལ་གཉིས་ཏེ། མདོར་བསྟན་པ། ༼༧༣༽རྒྱས་པར་བཤད་པའོ། །དང་པོ་ནི།

གང་དེ་བསྐང་པར། ཞེས་པ་ནས། འཛིན་དང་དེ་ཉིད་དོ། །ཞེས་པའི་བར་གྱིས་བསྟན་ཏེ།

གང་དེ་བསྐང་བར་བྱ་བའི་ཐབས། །རྣམ་པ་ལྔར་ནི་བཤད་པར་བྱ།།

ལས་དང་རྫས་དང་འདུན་པ་དང་། །ཏིང་ངེ་འཛིན་དང་དེ་ཉིད་དོ།།

འོ་ན་དེ་དག་ལ་གསོ་བའི་ཐབས་ཡོད་དམ་མེད་སྙམ་པ་ལ། ཚོན་གྱི་རི་མོ་དང༌། གསེར་དངུལ་གྱི་སྐྱོགས་ཞོམ་པ་དང༌། མར་མེ་ཤི་བ་ལྟར་གསོ་བའི་ཐབས་ཡོད་པའི་ཕྱིར། ཉམས་པ་ལྔ་པོ་གང་དེ་ཡང་དག་པར་བསྐང་ཞིང་གསོ་བའི་ཕྱིར་བཤགས་པར་བྱ་བའི་ཐབས་རྣམ་པ་ལྔར་ནི་བཤད་པར་བྱའོ་ཞེས་ཁྱད་པར་དུ་དམ་བཅའོ། །དེའང་ཉམས་པའི་རྒྱུས་ཐབས་ཀྱང་ལས་ཀྱིས་བསྐང་བ་དང༌། རྫས་ཀྱིས་བསྐང་བ་དང༌། འདུན་པ་དྲག་པོས་བསྐང་བ་དང༌། ཏིང་ངེ་འཛིན་གྱིས་བསྐང་བ་དང༌། ཆོས་ཉིད་དེ་ཁོ་ན་ཉིད་རྟོགས་པས་བསྐང་བ་སྟེ་གྲངས་རྗེས་སུ་མཐུན་པ་ཉིད་དོ།།

གཉིས་པ་རྒྱས་པར་བཤད་པ་ལ་ལྔ་སྟེ། སྦྱིན་བསྲེག་གི་ལས་ཀྱིས་བསྐང་བ། རྫས་ཀྱིས་བསྐང་བ། འདུན་པས་བསྐང་བ། ཏིང་ངེ་འཛིན་གྱིས་བསྐང་བ། རྟོགས་པའི་དོན་གྱིས་བསྐང་བའོ། །དང་པོ་ནི།

ལས་ནི་རྣམ་ལྔས། ཞེས་པ་ནས། གཅིག་གསུམ་དག་གིས་སྐོངས། །ཞེས་པའི་བར་གྱིས་བསྟན་ཏེ།

ལས་ནི་རྣམ་ལྔས་སྐོངས་འགྱུར་ཏེ། །དང་པོ་འབུམ་ལྔ་ཁྲི་གསུམ་སྟེ། །རྩ་ཉམས་ཁྲི་ལྔ་སྟོང་གསུམ་མོ།།

ཡན་ལག་ཉམས་པར་གྱུར་པ་ལ། །སྟོང་ལྔ་བརྒྱ་གསུམ་ཐོན་པར་བྱ། །བཟླས་ཉམས་བརྒྱ་ལྔ་བཅུ་གསུམ་མོ།།

ཞར་གྱིས་ཉམས་པར་གྱུར་པ་ལ། །བཅུ་ལྔ་གཅིག་གསུམ་དག་གིས་སྐོངས།།

དེ་ལ་སྤྱད་པ་ལས་ཀྱི་ཉམས་པ་ལྔ་བསྐང་བ་ནི་ཇི་ལྟ་ཞེ་ན། རྣམ་པ་ལྔས་སྐོངས་པར་འགྱུར་ཏེ། སྦྱིན་བསྲེག་གམ། རྣམ་པ་གཅིག་ཏུ་བཟླས་བརྗོད་ཀྱང་ཡིན་ཏེ། དང་པོ་ཀུན་ཏུ་ཉམས་པ་ཆེན་པོ་ལ་ནི་འཛབ་འབུམ་ཕྲག་ལྔ་དང་ཁྲི་ཕྲག་གསུམ་གྱི་གྲངས་ཏེ་དེས་དག་པར་བྱེད་དོ། །གཉིས་པ་རྩ་བ་ཉམས་པ་ལ་ནི་ཁྲི་ཕྲག་ལྔ་དང་སྟོང་ཕྲག་གསུམ་མོ། །གསུམ་པ་ཡན་ལག་ཉམས་པར་གྱུར་པ་ལ་ནི་སྟོང་ཕྲག་ལྔ་དང་བརྒྱ་ཕྲག་གསུམ་གྱི་བཟླས་པ་ཐོན་པར་བྱའོ། །བཞི་བཟླས་ཉམས་པ་ལ་ནི་བརྒྱ་ཕྲག་ལྔ་དང་བཅུ་ཚོ་གསུམ་མོ། །ལྔ་པ་ཞར་གྱིས་ཉམས་པར་གྱུར་པ་ལ་ནི། ལྔ་བཅུ་པ་གཅིག་དང་གསུམ་སྟེ་བཅུ་ཕྲག་ལྔ་དང་གསུམ་དག་གིས་སྐོངས་པའོ། །དེས་ན་གྲངས་ཀྱི་བྱེ་བྲག་ནི་བསྐང་བ་དཀའ་སླས་ཕྱེ་བའོ།།

གཉིས་པ་རྫས་ཀྱིས་བསྐང་བ་ནི།

རྫས་ནི་རིན་ཆེན། ཞེས་པ་ནས། གང་བརླག་ནོར་དེས་བླུ། །ཞེས་པའི་བར་གྱིས་བསྟན་ཏེ།

རྫས་ནི་རིན་ཆེན་སྣ་ལྔ་ཡིས། །རིགས་ཀྱི་དམ་ཚིག་ཉམས་པ་ལས།།

བླ་མ་རིགས་ལྔ་གང་དག་ལ། །ཐ་ཚིག་གང་བརླག་ནོར་དེས་བླུ།།

རྫས་ཀྱིས་བསྐང་བ་ནི་གསེར་ལ་སོགས་པ་རིན་ཆེན་སྣ་ལྔ་ཡིས། རིགས་ལྔའི་རིགས་ཀྱི་དམ་ཚིག་གང་དང་གང་ཉམས་པ་ལས། དམངས་རིགས་ལ་སོགས་པའི་བླ་མ་རིགས་ལྔ་སྤྱན་དྲངས་པ་༼༧༤༽གང་དག་ལ། དེ་བཞིན་གཤེགས་པའི་རིགས་ལ་སོགས་པའི་ཐ་ཚིག་གང་བརླག་པ་དེ་ཉིད་ནོར་དེ་དང་དེས་བླུ་བར་བྱེད་དེ་བསྐང་བ་ནི། རྩ་བའི་རྒྱུད་ལས། རྫས་ཀྱིས་བསྐང་བའི་ཐབས་མཆོག་ནི། །གལ་ཏེ་བསྲུང་བ་འགའ་ཞིག་ལས། །བྱང་སེམས་ཐ་ཚིག་རལ་གྱུར་ན། །གཏི་མུག་རིགས་ཀྱི་ཐ་ཚིག་བསྐང༌། །དམངས་རིགས་བླ་མ་སྤྱན་དྲངས་ལ། །ཉེས་འགལ་མི་བཅབ་སྟོང་དུ་བཤགས། །གསེར་ལ་སོགས་པའི་རྫས་ཆེན་གྱིས། །ཐ་ཚིག་གང་བརླག་ནོར་དེས་བླུ། །བྱང་ཆུབ་སེམས་བསྐྱེད་རྒྱུད་སྦྱངས་མཉན། །རྡོ་རྗེའི་ཐ་ཚིག་རལ་གྱུར་ན། །ཞེ་སྡང་རིགས་ཀྱི་ཐ་ཚིག་བསྐང༌། །རྗེའུ་རིགས་བླ་མ་སྤྱན་དྲངས་ལ། །ཉེས་བྱས་མི་འཆབ་འབུམ་དུ་བཤགས། །ཤེལ་ལ་སོགས་པའི་རྫས་ཆེན་གྱིས། །ཐ་ཚིག་གང་བརླག་ནོར་དེས་བླུ། །བསམ་གཏན་ཏིང་འཛིན་བསྒོམ་བརྩོན་བྱ། །རིན་ཆེན་ཐ་ཚིག་རལ་གྱུར་ན། །ང་རྒྱལ་རིགས་ཀྱི་ཐ་ཚིག་བསྐང༌། །རྒྱལ་རིགས་བླ་མ་སྤྱན་དྲངས་ལ། །ཉེས་བྱས་མི་འཆབ་བརྒྱད་ཁྲིར་བཤགས། །བཻ་ཌཱུར་ལ་སོགས་རྫས་ཆེན་གྱིས། །ཐ་ཚིག་གང་བརླག་ནོར་དེས་བླུ། །སྐུ་གདུང་རིང་བསྲེལ་རྣམ་པར་སྤེལ། །པདྨའི་ཐ་ཚིག་རལ་གྱུར་ན། །འདོད་ཆགས་རིགས་ཀྱི་ཐ་ཚིག་བསྐང༌། །གདོལ་རིགས་བླ་མ་སྤྱན་དྲངས་ལ། །ཉེས་བྱས་མི་འཆབ་བརྒྱར་བཤགས་བྱ། །བྱེ་རུ་ལ་སོགས་རྫས་ཆེན་གྱིས། །ཐ་ཚིག་གང་བརླག་ནོར་དེས་བླུ། །བཤགས་བྱ་ཟབ་མོའི་གླེགས་བམ་བརྗོད། །ལས་ཀྱི་ཐ་ཚིག་རལ་གྱུར་ན། །ཕྲག་དོག་རིགས་ཀྱི་དམ་ཚིག་བསྐང༌། །བྲམ་ཟེ་རིགས་བཤེས་སྤྱན་དྲངས་ལ། །ཉེས་བྱས་མི་བཅབ་བཅོ་ལྔར་བཤགས། །ཨིནྡྲ་ལ་སོགས་རྫས་ཆེན་གྱིས། །ཐ་ཚིག་གང་བརླག་ནོར་དེས་བླུ། །མཆོད་སྦྱིན་བསོད་ནམས་ལས་ཆེན་བྱ། །དེས་ནི་བསྐང་བའི་ལས་ཆེན་འགྲུབ། །ཅེས་གསུངས་པའི་དོན་ཏོ།།

གསུམ་པ་འདུན་པས་བསྐང་བ་ནི།

འདུན་པ་དད་པ། ཞེས་པ་ནས། སྐོང་བ་དམ་པའོ། །ཞེས་པའི་བར་གྱིས་བསྟན་ཏེ།

འདུན་པ་དད་པ་དང་བ་ཡིས། །གདུང་བའི་ཤུགས་ཀྱི་ང་རོ་ཡིས། །རྟག་པར་རྨ་ག་ཆད་པར་ནི།།

དམྱལ་ཆེན་གནས་ན་སྦྱོང་ཞིང་ངུའོ། །གཉེན་པ་མཆོག་ཏུ་དེ་གྱུར་ཞིང་། །དེ་ནི་སྐོང་པ་དམ་པའོ།།

གང་ཞིག་ཉམས་པ་དེས་འདུན་པ་དང་དད་པ་ལྷག་པར་སྐྱེད་དེ་དང་བ་དང་བཅས་པ་ཡིས་ཤིན་ཏུ་གདུང་བའི་ཤུགས་ཀྱི་ང་རོ་ཡིས་བཤགས་ཏེ། རྟག་པར་68རྨད་ག་ཆད་པར་རམ་ཕལ་ཆེར་དུ་ནི་དམྱལ་བ་ཆེན་པོའི་གནས་ན་ང་རོ་འདོན་པ་བཞིན་དུ་སྡུག་བསྔལ་གྱི་སྒྲ་འབྱིན་ཏེ་འགྱོད་པ་དྲག་པོས་ཉམས་པ་སྦྱོང་བའི་ཐབས་ལ་འབད་བཞིན་དུ་ཞིང་༼༧༥༽བཤགས་ནས་བསྐང་བའོ། །དེ་བས་འགྱོད་པ་དྲག་པོ་བསྐྱེད་དེ་བཤགས་ན་གཉེན་པོ་མཆོག་ཏུ་དེ་ཉིད་ངེས་པར་འགྱུར་ཏེ། བསྐང་བར་ནུས་པས་ན་རྒྱུན་དུ་བཤགས་པ་དེ་ནི་སྐོང་བ་དམ་པའི་ཐབས་སུ་གྱུར་པའོ། །དེ་ཡང་འདི་ཉིད་ཉམས་པའི་རྒྱུས་ལྔར་འགྱུར་ཏེ། རྩ་བའི་རྒྱུད་ཉིད་ལས། དོན་གྱིས་བསྐང་བའི་ཐབས་མཆོག་ཀྱང༌། །རྣམ་ལྔའི་ཚུལ་དུ་བཤགས་པར་བྱ། །ཆོས་ཀུན་ནམ་མཁར་བསྒོམས་ནས་ཀྱང༌། །བག་ཆགས་བཟང་ངན་ཐམས་ཅད་ཀུན། །ཅི་ཡང་མེད་པར་བློ་ལ་བཞག །དེ་ལ་གོམས་བྱས་ཉེས་པ་མེད། །ཀུན་ལ་མཁས་པའི་བླ་མ་ལ། །རྒྱ་ཆེ་ཡངས་པའི་ཆོས་མཉན་ཏེ། །བསམ་པའི་ལས་རྣམས་རྒྱ་ཆེར་བྱ། །ཡིད་ཀྱིས་དམིགས་པའི་ལས་དག་ན། །རྩ་བ་ཉམས་པ་སྐོངས་པར་འགྱུར། །གལ་ཏེ་ཡན་ལག་ཉམས་གྱུར་ན། །ཆོས་ཉིད་ནམ་མཁའི་དོན་སྟོན་པའི། །གླེགས་བམ་ཟབ་མོ་ཀུན་རྟོག་སྟེ། །དོན་རྣམས་རྒྱ་ཆེར་བརྟགས་པར་བྱའོ། །དེས་ནི་ཡན་ལག་ཉམས་པ་མིན། །ཟླས་ནི་ཐ་ཚིག་ཉམས་གྱུར་ན། །བླ་མ་སྐྱེས་བུ་མཁས་པ་ལ། །གཞུང་ཆེན་བཙུགས་པའི་བསྟན་པ་ཞིག །སྟོན་པའི་ཡོན་བདག་དང་བླངས་ཏེ། །བློ་ཡི་རྩལ་ཅན་ཀུན་བསྡུས་ནས། །དམ་ཆོས་བདུད་རྩིའི་བསྟན་པ་བསྒྲགས། །གལ་ཏེ་ཞར་གྱིས་ཉམས་གྱུར་ན། །བསྟན་པའི་གླེགས་བམ་རྒྱ་ཆེན་རྣམས། །བྲིས་ནས་ཆོས་ཀྱི་སྦྱིན་པར་བཏང༌། །དེས་ནི་ཞར་ཉམས་སྐོངས་པར་འགྱུར། །ཞེས་དེ་བཞིན་དུའང་བཀའ་སྩལ་ཏོ།།

བཞི་པ་ཏིང་ངེ་འཛིན་གྱིས་བསྐང་བ་ནི།

ཏིང་ངེ་འཛིན་གྱི། ཞེས་པ་ནས། སྐོངས་པ་དམ་པའི་མཆོག །ཅེས་པའི་བར་གྱིས་བསྟན་ཏེ།

ཏིང་ངེ་འཛིན་གྱི་ཐབས་ཆེན་ཡང་། །འཇིག་རྟེན་བསྲེག་ལ་མེ་དགོས་ཀྱང་། །བག་ཆགས་འཚིག་ལ་མེ་མི་དགོས། །རིག་པའི་ཡེ་ཤེས་མེ་བྱུང་བས། །སྒྲིབ་པའི་བུད་ཤིང་ཐམས་ཅད་སྲེག །འཇིག་རྟེན་འཐོར་ལ་རླུང་དགོས་ཀྱང་། །མཚན་མ་འབུད་ལ་རླུང་མི་དགོས། །རིག་པའི་ཡེ་ཤེས་རླུང་བྱུང་བས། །མཚན་མའི་རྡུལ་ཀུན་རྣམ་པར་འཕྱག །ལུས་བཀྲུ་བ་ལ་ཆུ་དགོས་ཀྱང་། །སེམས་བཀྲུ་བ་ལ་ཆུ་མི་དགོས། །རིག་པའི་ཡེ་ཤེས་ཆུ་བྱུང་བས། །བག་ཆགས་ལྗན་ལྗིན་ཐམས་ཅད་དག །སྟོང་ཉིད་ཆུ་བོ་ཁྲུས་ཀྱི་རྫིང་། །དེ་བཞིན་ཉིད་ཀྱི་ནམ་མཁའི་ལངས། །འབར་འཕྲོ་མེ་ཡི་བསྐལ་པར་འཚིག །དེ་ནི་སྐོང་བ་དམ་པའི་མཆོག།

ཏིང་ངེ་འཛིན་གྱི་ཐབས་ཆེན་པོས་བསྐང་བ་ཡང༌། རང་གི་སྤྱི་བོར་འོད་ཀྱི་ཐིག་ལེ་གསུམ་ལས་སྐུ་གསུང་ཐུགས་ཀྱི་ས་བོན་ཨ་དཀར་པོ་ཁྱབ་པ་ཆེན་པོས་ལུས་སྒྲིབ། ཨཱཾཿདམར་པོ་ཆགས་པ་ཆེན་པོས་ངག་སྒྲིབ། ཧཱུྃ་མཐིང་ག་ཐུགས་ཀྱི་ས་བོན་གྱིས་ཡིད་སྒྲིབ་སྦྱངས་ཏེ་སླར་འདུས་པའི་ངང་ལས་རྃ་ཡྃ་ཁྃ་གསུམ་འཕྲོས་པས་དང་པོས་སྦྱང༌། གཉིས་པས་གཏོར། གསུམ་པས་བཀྲུས་ཏེ་སྒོ་གསུམ་གྱི་ཉམས་པ་བསྐངས་པས། འཇིག་རྟེན་གྱི་དངོས་པོ་བསྲེག་པ་ལ་མེ་དགོས་ཀྱང་བག་ཆགས་ཀྱི་དྲི་མ་བསྲེག་པ་ལ་མེ་མི་དགོས་ཏེ། ཏིང་འཛིན་གསལ་བའི་རང་འོད་རིག་པའི་ཡེ་ཤེས་ཀྱི་མེ་བྱུང་བས་སྒྲིབ་པའི་༼༧༦༽བུད་ཤིང་ཐམས་ཅད་བསྲེགས་པར་བྱེད་དོ། །དེ་བཞིན་དུ་འཇིག་རྟེན་གཏོར་བ་ལ་རླུང་དགོས་ཀྱང་འཁྲུལ་པའི་མཚན་མ་ཐམས་ཅད་འབུད་པ་ལ་རླུང་མི་དགོས་ཏེ། རིག་པའི་ཡེ་ཤེས་ཀྱི་རླུང་བྱུང་བས། མཚན་མའི་དམིགས་རྡུལ་ཕྲ་རགས་ཀུན་རྣམ་པར་འཕྱག་པར་བྱེད་དོ། །དེ་ལྟར་ལུས་བཀྲུ་བ་ལ་ཆུ་དགོས་ཀྱང༌། སེམས་ཀྱི་དྲི་མ་བཀྲུ་བ་ལ་ཆུ་མི་དགོས་ཏེ། རིག་པའི་ཡེ་ཤེས་ཀྱི་ཆུ་བྱུང་བས་བག་ཆགས་ཀྱི་ལྗན་ལྗིན་ཐམས་ཅད་དག་པར་བྱེད་དོ། །དེ་བས་ན་སྟོང་ཉིད་མཉམ་པ་ཆེན་པོའི་ཆུ་བོ་ནི་ཁྲུས་ཀྱི་རྫིང་དམ་པ་སྟེ། རང་རིག་དེ་བཞིན་ཉིད་ཀྱི་ནམ་མཁའ་ནས་འགྱོད་པ་དྲག་པོའི་མེ་དང༌། ཤེས་རབ་ཀྱི་མེ་དང༌། ཏིང་ངེ་འཛིན་གྱི་མེ་དང༌། དད་པ་རླབས་པོ་ཆེའི་འོད་འབར་བར་འཕྲོ་བའི་མེ་ཡི་བསྐལ་པས་སྒྲིབ་པ་བག་ཆགས་དང་བཅས་པ་རྣམ་པར་ཚིག་སྟེ་སྲེག་པ་དེ་ནི་སྐོངས་པ་དམ་པའི་མཆོག་དང་ཕུལ་དུ་གྱུར་པ་ཡིན་ནོ། །དེ་ཡང་རྩ་བའི་རྒྱུད་ཉིད་ལས། ཏིང་འཛིན་རྩལ་གྱི་ཐབས་མཆོག་ནི། །བག་ཆགས་ཅན་གྱི་སྤྱི་གཙུག་ཏུ། །ཙན་དམར་འོད་ནི་མེ་ལོང་ཙམ། །ཤིན་ཏུ་འབར་ཞིང་འཚེར་གསལ་བས། །ཆགས་དང་བཅས་པའི་ཕུང་པོ་བསྲེག །རྣམ་གྲོལ་སེམས་ཀྱི་རང་བཞིན་དང༌། །འོད་ཀྱི་རང་བཞིན་གཅིག་པ་ལས། །དཀར་དང་དམར་དང་མཐིང་ག་ཡི། །འོད་ཀྱི་ཐིག་ལེ་གསུམ་དུ་གྱུར། །དཀར་པོ་འཕྲོས་པས་ཁྱབ་པ་ཆེ། །དམར་པོ་སྤྲོས་པས་ཆགས་པ་ཆེ། །མཐིང་ག་ཐུགས་ཀྱི་ས་བོན་ཏེ། །རྣམ་གསུམ་གཅིག་ཏུ་འདུས་པ་ལས། །ངག་ཡིད་གསུམ་གྱི་བག་ཆགས་བསྲེགས། །སྐུ་གསུང་ཐུགས་ཀྱི་དམ་ཚིག་སྐོངས། །དཀར་པོ་རླུང་ཟླའི་དཀྱིལ་འཁོར་ལ། །དམར་པོ་འབུད་པའི་རླུང་བྱུང་བས། །མཚན་མའི་བག་ཆགས་རྣམ་པར་གཏོར། །དམར་པོ་ཆུ་ཟླའི་དཀྱིལ་འཁོར་ལས། །མཐིང་ག་ཡེ་ཤེས་ཆུ་བྱུང་བས། །དངོས་པོའི་ལྗན་ལྗིན་ཐམས་ཅད་བཀྲུས། །དེ་ལྟར་གསལ་བར་གྱུར་པ་དང༌། །རྣལ་འབྱོར་ཅན་གྱིས་ཚིག་འདི་བརྗོད། །རྫས་བསྲེག་པ་ལ་མེ་དགོས་ཀྱང༌། །བག་ཆགས་འཚིག་ལ་མེ་མི་དགོས། །རིག་པའི་ཡེ་ཤེས་མེ་བྱུང་བས། །མཚན་མ་ཡི་ནི་བུད་ཤིང་བསྲེགས། །འཇིག་རྟེན་གཏོར་ལ་རླུང་དགོས་ཀྱང༌། །མཚན་མ་གཏོར་ལ་རླུང་མི་དགོས། །རིག་པའི་ཡེ་ཤེས་རླུང་བྱུང་བས། །མཚན་མའི་རྡུལ་ཚོགས་རྣམ་པར་འཕྱག །ལུས་བཀྲུ་བ་ལ་ཆུ་དགོས་༼༧༧༽ཀྱང༌། །སེམས་བཀྲུ་བ་ལ་ཆུ་མི་དགོས། །མཉམ་ཉིད་ཆུ་བོ་ཁྲུས་ཀྱི་རྫིང༌། །ཡེ་ཤེས་ཆུ་བོའི་རྒྱུན་བྱུང་བས། །བག་ཆགས་ལྗན་ལྗིན་ཐམས་ཅད་བཀྲུས། །ཨ་ཀྲོ་དྷི་ཤྭ་རི་སརྦ་ཏྲ་ཕྱམ་ཤོ་དྷ་ཡ་ཨ་ཨཱཾ་ཧཱུྃ། རྃ་ཡྃ་ཁྃ། དེ་སྐད་ཚིག་ཏུ་བརྗོད་པ་ཡིས། །ཉམས་པའི་ཆད་པ་མི་འབྱུང་ངོ༌། །ཞེས་གསལ་གདབ་ཅིང་བསྐུལ་བའི་ཚིག་བརྗོད་དོ། །བཤད་རྒྱུད་འདི་ཉིད་ཀྱི་དབང་དུ་གཞུང་བཙན་པར་འདོད་དེ་མི་བསྐུལ་ལོ། །གཞན་དག་ཀྱང་རྗེས་སུ་མཐུན་པར་སྦྱར་ཏེ་རྩ་བ་ནི་མི་མཐུན་པར་ཤེས་པ་དང་རྒྱས་པར་བསྟན་པའི་ཕྱིར་དྲངས་པའོ།།

ལྔ་པ་རྟོགས་པའི་དོན་གྱིས་བསྐང་བ་ནི།

དེ་ཉིད་དེ་ཡི། ཞེས་པ་ནས། མི་བསྐང་ཚིག་ལམ་བྲལ། །ཞེས་པའི་བར་གྱིས་བསྟན་ཏེ།

དེ་ཉིད་དེ་ཡི་ཐབས་མཆོག་ཀྱང་། །རྣལ་འབྱོར་དམ་པ་གང་ཞིག་དག །ཉམས་པའི་ཆད་པ་བྱུང་བ་ལ། །དེ་བཞིན་དེ་ཉིད་མ་གཡོས་ན། །མགོན་སྐྱབས་དེ་ལས་གཞན་མེད་དེ། །ཉམས་དང་མ་ཉམས་ཐ་སྙད་མེད།། བསྐང་ངམ་མི་བསྐང་ཚིག་ལམ་བྲལ།།

དེ་ཁོ་ན་ཉིད་རྟོགས་པ་དེ་ཡི་སྒོ་ནས་གང་ཉམས་པ་ལྔ་ཉིད་མན་ངག་གིས་བསྐང་བའི་ཐབས་མཆོག་ཕུལ་དུ་བྱུང་བ་ཉིད་ཀྱང༌། རྣལ་འབྱོར་པ་དམ་པ་གང་སུ་ཞིག་དག་ཉམས་པའི་དབང་དུ་གྱུར་པས་བཀའི་ཆད་པ་བྱུང་བ་ལ་ཐར་པར་བྱ་བའི་ཐབས་ཇི་ལྟ་བུ་ཞེ་ན། ཆོས་རྣམས་ཀྱི་ཆོས་ཉིད་དེ་བཞིན་ཉིད་ཇི་བཞིན་པ་བྱང་ཆུབ་སེམས་ཀྱི་དེ་ཁོ་ན་ཉིད་ཇི་ལྟ་བར་མཇལ་ཞིང་རྟོགས་པའི་ངང་ལས་མ་གཡོས་པར་རྒྱུན་དུ་ཏིང་ངེ་འཛིན་ལ་འགྱུར་བ་མེད་ན། ཉམས་པས་དུཿཁ་ལས་སྐྱོབ་པའི་མགོན་སྐྱབས་དམ་པ་དེ་ལས་མཆོག་ཏུ་གྱུར་པ་གཞན་གང་ཡང་མེད་དེ། དུར་ཁྲོད་ཁུ་བྱུག་རོལ་པ་ལས། དམ་ཚིག་དམ་ཚིག་ཅེས་བྱ་བ། །རྟོགས་པའི་ལྟ་བ་དམ་ཚིག་སྟེ། །དེ་ལས་འདས་ན་འཚིག་པར་བཤད། །ཆོས་ཉིད་མཉམ་པར་བློ་བཞག་ན། །གསོ་བའི་ཐབས་ནི་དེ་ལྟར་རོ། །ཉམས་པའི་ཆད་པ་བྱུང་བ་ན། །མགོན་སྐྱབས་དེ་ལས་གུད་ན་མེད། །མཉམ་ཉིད་དབྱིངས་ཀྱི་རང་བཞིན་དུ། །དམ་ཚིག་ཐམས་ཅད་གཅིག་པར་ནི། །བདེ་གཤེགས་རྒྱལ་བ་ཀུན་གྱིས་གསུངས། །ཞེས་སོ། །དེ་ཅིའི་ཕྱིར་ཞེ་ན། དེ་ཉིད་ཀྱི་ངང་དེ་ལ་ཉམས་པ་དང་མ་ཉམས་པའི་ཐ་སྙད་གཉིས་ཉིད་མེད་པ་དེ་བས་ན་བསྐང་ངམ་མི་བསྐང་ཞེས་བྱ་བའི་ཚིག་ལམ་ཙམ་ཡང་བྲལ་བས་བརྗོད་དུ་མེད་པའི་ཕྱིར་རོ། །རྩ་བའི་རྒྱུད་ཀྱི་དབང་དུ་ནི། །ཐབས་འདི་ཉིད་ལའང་ལྔ་སྟེ། །མན་ངག་ཐབས་ཀྱི་དོན་མཆོག་ནི། །རྩ་བ་ཡན་ལག་དེ་རྣམས་ལས། །གང་དག་ཉམས་པར་གྱུར་པ་ལ། །མན་ངག་ཐབས་མཆོག་ལྔ་ཡིས་བསྐངས། །ཉམས་པ་ཆེན་པོར་ལྟུང་༼༧༨༽གྱུར་ན། །བླ་མར་གྱུར་པའི་སྐྱེས་བུ་དག །རྒྱལ་པོ་དགུ་ཡི་སྤྱན་ལམ་དུ། །སྒྲུབ་པ་ཆེན་པོ་དགུ་བརྩམ་ཞིང༌། །མཆོག་ཆེན་དགུ་ཡི་བརྟུལ་ཞུགས་སྤྱད། །རང་གི་གཟུངས་མ་གང་ཡིན་པ། །བླ་མ་དགུ་ལ་གཟུངས་མར་འབུལ། །དེ་བཞིན་རྩ་བ་ཡན་ལག་དང༌། །ཟླ་དང་ཞར་ལས་ཉམས་པ་ལ། །སྒྲུབ་པ་དོན་གྱི་ཁྱད་པར་རྣམས། །བདུན་ནམ་ལྔའམ་གསུམ་མམ་གཅིག །རིམ་པ་བཞིན་དུ་སྦྱར་བྱས་ན། །དེ་ནི་སྐོངས་པའི་མཆོག་ཏུ་འགྱུར། །ཞེས་གསུངས་པ་བཞིན་འབད་པར་བྱའོ། །དེ་ལྟ་བུའི་ཉམས་པ་རྣམས་བཤགས་པ་ནི། འགྱོད་པ་དྲག་པོ་བསྐྱེད་དེ་མཆི་མ་བླགས་ལ་བ་སྤུ་གཟེང་ནས་བཤགས་པ་ནི། ཤེས་རབ་ཆེན་པོའི་རྒྱུད་ཀྱི་བག་ཆགས་ཐམས་ཅད་ལྟ་བའི་དོན་དྲན་པས་རང་བཞིན་མེད་པར་བཤགས་པ་དང༌། ཏིང་ངེ་འཛིན་ཆེན་པོའི་མེས་བག་ཆགས་ཐམས་ཅད་བསྲེགས་ཏེ་མེད་པར་བྱ་བ་དང༌། བྱང་ཆུབ་སེམས་ཀྱི་འོད་ཟེར་གྱིས་བག་ཆགས་ཀྱི་མུན་པ་ཐམས་ཅད་བསལ་ཏེ་དག་པར་བྱ་བ་དང༌། སྤྱོད་པ་རླབས་པོ་ཆེའི་ཆུས་བཀྲུ་བའི་ཐབས་དང་བཞིས་བཤགས་པའི་ཡུལ་སངས་རྒྱས་དང༌། རིག་འཛིན་དང༌། ལྷ་དང་བླ་མ་དང༌། གླེགས་བམ་དང༌། གྲོགས་པོ་དང༌། རྟེན་དུ་གྱུར་པ་རྣམས་སོ། །དེ་ལྟ་བུའི་ལས་ལ་བརྩོན་པར་བྱ་བའི་ཐ་ཚིག་གོ།

གསུམ་པ་བསླབ་པ་གཅེས་པར་གདམས་པ་ནི།

གོང་གི་ཇི་ལྟར་ས་གཞི། ཞེས་པ་ནས། སྲོག་འཛིན་དམ་པའོ། །ཞེས་པའི་བར་གྱིས་བསྟན་ཏེ།

ཇི་ལྟར་ས་གཞི་གཤིན་པ་ལ། །རྟེན་ནས་ས་བོན་བཏབ་པ་ལས། །འབྲས་དྲུག་སྨིན་པར་གྱུར་པ་ཡིས།།

གང་དག་འཚོ་བའི་སྲོག་འཛིན་ལྟར། །ཆོས་རྣམས་ཀུན་གྱི་གཞིར་གྱུར་པ། །དམ་ཚིག་འདི་ལ་གནས་པས་ནི།། བླ་མེད་བྱང་ཆུབ་རྣམ་སྨིན་པས། །དགེ་བའི་སྲོག་འཛིན་དམ་པའོ།།

དམ་ཚིག་གི་གཞི་བཟུང་བ་དངོས་ཀྱི་དཔེ་གང་སྙམ་པ་ལ། དཔེ་ཇི་ལྟར་ན་ས་གཞི་གཤིན་པ་ལ་བརྟེན་ནས་ས་བོན་གྲུང་མོ་བཏབ་པ་ལས་མྱུ་གུ་ནས་སྡོང་བུ་དང༌། ཡལ་ག་དང༌། མེ་ཏོག་དང༌། འབྲས་བུར་སྨིན་པའི་བར་དུ་གྱུར་པ་ཡིས། འགྲོ་བ་སེམས་ཅན་གང་དག་གི་འཚོ་བའི་སྲོག་འཛིན་པ་ལྟར་དུ་དོན་གྱི་རང་བཞིན་ལམ་དང་འབྲས་བུའི་ཆོས་རྣམས་ཀུན་གྱི་གཞིར་གྱུར་པས་ས་གཞི་དང་འདྲ་བའི་དམ་ཚིག་རྩ་བ་དང་ཡན་ལག་གི་རིམ་པ་འདི་ལ་མ་ཉམས་པར་གནས་པ་དེ་ནི། དགེ་བའི་མྱུ་གུ་ནས་བླ་ན་མེད་པའི་བྱང་ཆུབ་ཀྱི་འབྲས་བུ་ཆེན་པོའི་བར་དུ་རྣམ་པར་སྨིན་པས་རང་དོན་རྫོགས་ནས། གཞན་དོན་དུ་ལམ་དང་འབྲས་བུའི་དགེ་བའི་སྲོག་གི་ངོ་བོ་ཉིད་འཛིན་པའི་གཞི་ནི་དམ་ཚིག་དམ་པ་མ་ཉམས་པར་བསྲུང་བ་ཉིད་དུ་ངེས་པའོ།།

བཞི་པ་ཞབས་བསྡུ་བ་ནི།

འོག་ནས། ༼༧༩༽ལང་ཀའི་བདག་པོ། ཞེས་པ་ནས། སྤྱོད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི། །གཞི་ཡོངས་སུ་བཟུང་བར་རྣམ་པར་བགྲོས་པར་ཤེས་པར་བྱའོ། །དེ་སྐད་ཅེས་སྨྲས་པས། ལངྐའི་བདག་པོ་ལ་སོགས་པ་དམན་པ་དམ་པ་རྣམས། དམ་པ་རྣམས་ཀྱི་ནོར་ལ་ཡོངས་སུ་སྤྱོད་པར་གྱུར་ཏོ།།

ལང་ཀའི་བདག་པོ། ཞེས་བོས་ནས། ཇི་སྐད་བཤད་པ་དེ་དག་ནི། ལམ་དང་འབྲས་བུ་ཐམས་ཅད་ཀྱི་གཞི་དམ་ཚིག་གིས་ཡོངས་སུ་གཟུང་བ་ཉིད་ཀྱི་དོན་རྣམ་པར་བགྲོས་པར་ཤེས་པར་བྱའོ། །ཞེས་དོན་གྱི་ངོ་བོ་བསྟན་པའོ། །སྟོན་པ་གསང་བདག་དམ་པས་དེ་སྐད་ཅེས་སྨྲས་པས། ལང་ཀའི་བདག་པོ་ལ་སོགས་པ་ཞེས་པས་ཕྱི་རབས་པ་ཐམས་ཅད་ཀྱང་བསྡུ་སྟེ་དེ་ལྟར་དམན་པ་དམ་པ་རྣམས། དམ་པ་རྣམས་ཀྱི་ཡང་དག་པའི་ནོར་ལ་ཡོངས་སུ་སྤྱོད་དེ་དམ་ཚིག་དང་ལྡན་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

དམ་ཚིག་གསང་བ་མཆོག་གི་ལེའུ་སྟེ་དྲུག་ཅུ་དྲུག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། གསང་ཆེན་ལུང་གི་དམ་ཚིག་འོག་མ་ལ་གསང་བ་ཁྱད་པར་མཆོག་གི་གནས་བསྟན་པའི་ལེའུ་ཞེས་བྱ་བ་སྟེ་དྲུག་ཅུ་རྩ་དྲུག་པ་ཉིད་རྣམ་པར་བཀྲོལ་ཏེ་བཤད་པའོ།། །།

ལེའུ་རེ་བདུན་པ་བསྙེན་བཀུར་དམ་པ་མཆོག།

༈ གཉིས་པ་རྒྱུད་ཐོས་པས་དགྲོལ་བ་ལ་བསླབ་པ་གྱི་ལིང་སྒྲོག་བགྲོལ་བ་ལྟར་བཤད་པ་ལ་བཞི་སྟེ། ཐོས་པ་བྱ་བའི་གནས་བླ་མ་ཤེས་པར་གདམས་པ་ཉེ་བར་བསྟན་པ། དེ་ཉིད་རྒྱས་པར་བཤད་པ། བསླབ་པ་གཅེས་པར་གདམས་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། ངེས་པར་ཤེས་པར་བྱ། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས་སྨྲས་པ། ཀྱེ་གྲོགས་པ་དམ་པ་དག རྒྱུད་ཡོངས་སུ་དགྲོལ་བ་ནི་དམ་པ་དག་ལ་རག་ལས་པ་སྟེ། དེ་གང་ཞེ་ན། འདི་ལྟ་སྟེ། བླ་མེད་སྙིང་པོས་སྨིན་པའི་རྟེན། །བློ་གྲོས་ཆེན་པོ་དྲི་བའི་ཡུལ། །ལམ་སྟོར་ས་མཁན་བཤེས་གཉེན་མགོན། །མུན་སེལ་སྒྲོན་མེ་རིན་པོ་ཆེ། །མཐོང་མིག་དབང་པོ་ཡིད་རྣམས་ཤེས། །ཆུ་བོ་རབ་མེད་སྒྲོལ་བའི་གྲུ། །འཇིགས་བའི་རྫོགས་ཆེན་རྟེན་པའི་མཁར། །འཁོར་བའི་གཅོང་འབྱིན་སྨན་པའི་མཆོག །མཚོ་གླིང་རིན་ཆེན་ལེན་བྱེད་པའི། །དེད་དཔོན་དམ་པའི་བླ་མ་དེ། །སྔོན་དུ་ངེས་པར་ཤེས་པར་བྱ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན༌ནོ། །དེ་ནས་ཡང་སྟོན་པ་སྐྱེས་བུ་ཆེན་པོ་གསང་བ་པའི་བདག་པོས་སྨྲས་པ། ཀྱེ་གྲོགས་པོ་དམ་པ་དག ཅེས་བོས་ནས། བསླབ་པ་གཉིས་པ་ཤེས་རྒྱུད་ཐོས་པས་ཡོངས་སུ་དགྲོལ་བར་བསླབ་པ་ནི། དང་པོར་ཡུལ་དམ་པ་བླ་མ་མཆོག་བསྟེན་པ་ལ་རག་ལས་པ་སྟེ། དེ་ཡང༌། དེའི་མཚན་ཉིད་ཉེ་བར་བསྟན་པ་གང་ཞེ་ན། འདི་ལྟ་སྟེ། བླ་མ་དམ་པའི་མཚན་ཉིད་བརྟགས་པའི་དོན་བསྟན་པའི་ཕྱིར། བླ་ན་མེད་པའི་བྱང་ཆུབ་ཀྱི་སྙིང་པོར་སྨིན་ཏེ་རྫོགས་པའི་སངས་རྒྱས་ཀྱི་གོ་འཕང་གི་འབྲས་བུ་དམ་པ་འགྲུབ་པས་རྐྱེན་དུ་གྱུར་པའི་སྟོན་པ་ཆེན་པོ་སྟེ། སྤྱིར་རྒྱུ་རྐྱེན་དྲུག་ཀ་བླ་མ་ལ་ཚང་བར་གསུངས་ལ། དེ་ཡང༌། བློ་གྲོས་ཆེན་པོ་མངའ་བས་གསང་སྔགས་ཐེག་པའི་རྒྱལ་པོའི་ལམ་དང་འབྲས་བུའི་ཆོས་ཀྱི་ཐེ་ཚོམ་གཅོད་ཅིང་དོན་མ་ནོར་བ་འབྱུང་བས་ཞུ་ཞིང་དྲི་བར་བྱ་བའི་ཡུལ་བླ་མ་རྡོ་རྗེ་སློབ་དཔོན་ནི། དཔེ་དོན་གཉིས་ཀུན་ལ་སྦྱར་ཏེ། འགྲོ་བ་ཐར་པའི་ལམ་༼༨༠༽སྟོར་བ་རྣམས་ཀྱིས་69རྒྱུས་མཁན་དང་འདྲ་ལ། འཁོར་བའི་སྡུག་བསྔལ་གྱིས་ཉེན་པ་དག་གི་བཤེས་གཉེན་དང་མགོན་སྐྱབས་དམ་པར་གྱུར་པ། མ་རིག་པའི་མུན་པ་སེལ་བའི་སྒྲོན་མ་གཞན་ལས་འཕགས་པར་གྱུར་པས་རིན་པོ་ཆེ་འབར་བ་ལྟ་བུ། དོན་མཐོང་བར་བྱེད་པའི་མིག་གི་དབང་པོ་དང་འདྲ་བ། དོན་གྱི་རང་བཞིན་ཤེས་པར་བྱེད་པའི་ཡིད་ཀྱི་རྣམ་པར་ཤེས་པ་དང་མཚུངས་པ། འཁོར་བའི་ཆུ་བོ་ཆེན་པོ་རབ་མེད་པ་བཞི་ལས་སྒྲོལ་བས་གྲུ་དང་འདྲ་བ། སྲིད་པའམ་ངན་སོང་གི་འཇིགས་པ་བརྒྱད་ཀྱིས་མི་ཚུགས་པས་མཁྲེགས་པར་གྱུར་པའི་རྫོང་ཆེན་པོ་ལྟ་བུ། འཁོར་བའི་དམག་དཔུང་གིས་མི་ཚུགས་པས་རྟེན་པར་གྱུར་པའི་འཁར་དང་འདྲ་བ། འཁོར་བའི་གཅོང་རྙིང་ཉོན་མོངས་དུག་ལྔ་དང་མ་རིག་པའི་ནད་འབྱིན་པས་སྨན་པའི་མཆོག་དང་མཚུངས་པ། སྲིད་པའི་རྒྱ་མཚོ་བརྒལ་ནས་མྱ་ངན་ལས་འདས་པའི་ནོར་ལེན་པའམ་ཆོས་ཉིད་ཀྱི་མཚོ་གླིང་ནས་ཡང་དག་པའི་དོན་གྱི་རིན་ཆེན་ལེན་པར་བྱེད་པའི་དེད་དཔོན་མཁས་པ་ལམ་མཐུན་མི་མཐུན་དང་རྟགས་རྣམས་ལ་བློ་གྲོས་ཡངས་པ་དང་འདྲ་བའོ། །དེ་ལྟར་བརྟེན་པར་བྱ་བ་དམ་པའི་བླ་མ་དེ་ལ་ཡོན་ཏན་བཅུ་དང་ལྡན་པའི་ཕྱིར་ཐོས་པ་བྱེད་པའི་སྔོན་དུ་མཚན་ཉིད་ཇི་ལྟ་བ་བཞིན་དུ་ངེས་པར་ཤེས་པར་བྱ་སྟེ། གང་མ་བརྟགས་ན་བླ་མ་ངན་པའི་སྐྱོན་འཆད་པར་འགྱུར་བ་ལྟ་བུའི་ཉེན་ཡོད་པའི་ཕྱིར་རོ།།

གཉིས་པ་དེ་ཉིད་རྒྱས་པར་བཤད་པ་ལ་གསུམ་སྟེ། ཐོས་པ་བྱ་བའི་གནས་བླ་མ་བརྟག་ཅིང་བཀུར་ཐབས། ཐོས་པ་བྱས་པས་རྒྱུས་གྲོལ་བ་དངོས། ཐོས་བསམ་ཆུབ་པའི་མཐར་དགོན་པར་བསྒོམ་པའོ། །དང་པོ་ལ་བཞི་སྟེ། སྔོན་དུ་བླ་མ་བརྟགས་པ། བཟང་པོ་ལ་ལྟོས་པ། ངན་པ་ལ་མི་ལྟོས་པ། ཇི་ལྟར་བཀུར་བའི་ཐབས་བཤད་པའོ། །དང་པོ་ནི།

སྡེ་མཛོད་གཏེར་ཁྱིམ། ཞེས་པ་ནས། ཡུལ་ནས་བརྟག་པར་བྱ། །ཞེས་པའི་བར་གྱིས་བསྟན་ཏེ།

སྡེ་མཛོད་གཏེར་ཁྱིམ་ཁང་ཆེན་དང་། རྣམ་གྲོལ་ལྡེ་མིག་བཅུ་གཉིས་དང་། །ངེས་དོན་རྣམ་པ་དེ་ཉིད་བཅུ།།

མཐའ་བཅུ་ཡན་ལག་མདོ་རྩ་བ། །གང་འདིར་སྐབས་བཅུར་རྫོགས་ལྡན་ནམ། །སྐྱོན་གྱི་མཐའ་རྣམས་ཟད་གྱུར་ཅིང་། །ཡོན་ཏན་རྒྱ་མཚོ་ཕ་རོལ་ཕྱིན། །དམ་པའི་ཚད་ལ་བབ་མ་བབ། །དེ་ལ་བཤེས་གཉེན་མགོན་ལྟོས་ན།། མཐར་ཆུབ་ཡོངས་སུ་རྫོགས་ཞེའམ། །རང་རིག་དེ་ཡུལ་མ་ཡིན་པར། །ཐབས་དང་ཡན་ལག་བཅས་པ་ཡིས།། གཞན་གྱི་ཡུལ་ནས་བརྟག་པར་བྱ།།

སྡེ་སྣོད་རིན་པོ་ཆེ་རྣམ་པ་གསུམ་གྱི་ཚིག་དོན་ལ་མཁས་པ་དང༌། ལྷུན་གྱིས་གྲུབ་པ་རང་གི་བྱང་ཆུབ་སེམས་ཀྱི་དོན་སྟོན་པའི་མཛོད་གསུམ་འཆང་བ་སྟེ། གཏེར་དང་ཁྱིམ་དང་ཁང་ཆེན་གསུམ་སྡེ་སྣོད་གསུམ་དང་མཛོད་གསུམ་གྱི་དཔེར་ཡང་འཐད་ལ། ཡང་ན་གཏེར་དང་འདྲ་བ་ཡིད་ཤེས། ཁྱིམ་དང་འདྲ་བ་ཉོན་ཡིད། ཁང་ཆེན་དང་འདྲ་བའི་ཀུན་གཞི་རྣམས་ཀྱི་གཞིའི་མཚན་ཉིད་ལ་མཁས་པ་དང༌། དེ་༼༨༡༽བཞིན་དུ་བླ་མ་དེ་ལ། སྒོ་དམ་ངེས་བསམ་དམིགས་བཟླས་སྦྱོར། །སྤྱོད་ཐོབས་གནས་ས་ལྟ་ཡན་ལག །ཅེས་གསུངས་པའི་དོན་ལྟར། དེ་དག་གི་དོན་སྣང་བས་རྣམ་པར་གྲོལ་བ་གསང་སྔགས་ཕྱི་ནང་གི་སྒོ་དྲུག་འབྱེད་པའི་ལྡེ་མིག་སྐོལ་མདོ་ཡན་ལག་བཅུ་གཉིས་དང༌། ཡང་ན་བསྟན་པའི་སྣོད་ཞེན་ཆགས་ཅན་ལ་སོགས་པ་བཞི་ལ། སྟོན་པའི་ཚིག་འདོད་པ་རང་རྐྱེན་ལ་སོགས་པ་བཞིའི་སྒོ་ནས་རྣམ་པར་གྲོལ་བར་བྱེད་པ་ལ་ལྡེ་མིག་བཅུ་གཉིས་ཏེ། གདགས་པ་བཞི་ནི། དགོས་ཆེད། ངེས་ཚིག་དོན་གྱི་ངོ་བོ། འབྱིན་པའི་གལ་ལོ། །སྒྲུབ་པ་བཞི་ནི། བཀའ་ལས་སྣང༌། དོན་དང་མི་འགལ། གཏན་ཚིགས་ཀྱི་རྒྱས། རིགས་པས་འཐད་པའོ། །གལ་དོན་གྱི་འབྱིན་པ་བཞི་ནི། འགལ་བ་བསྒྲུབ། དགོས་པ་བསྡུ། སྒོ་དགག་སུན་དབྱུང་བའོ། །ཞེས་ཆོས་རྗེའི་ཕྱག་མཆན་ལས་གསུངས། དོན་ངེས་པ་གསུམ་དང༌། མདོ་བཞི་མན་ངག་དང་ལུང་གི་དོན་དང༌། བསྒྲུབ་དང་གསང་སྔགས་སྤྱོད་པ་དང༌། །གྲུབ་པ་དག་དང་གནས་པ་དང༌། །བཟླས་པའི་སྒྲ་དང་ཕྱག་རྒྱ་རྟགས། །ཏིང་འཛིན་ལྟ་བ་ཆོ་འཕྲུལ་བརྟག །ཅེས་པ་ལྟར་དམ་པ་སྔགས་ཀྱི་རང་བཞིན་གཞིའི་དེ་ཉིད་ཀྱི་དཔེ་བཅུ་དང་བཅས་པ་དང༌། རྣལ་འབྱོར་གྱི་བསླབ་པའི་མཐའ་བཅུ་དང༌། ཡན་ལག་དྲུག་མདོ་བཞི། རྩ་བ་གསུམ་ལ་སོགས་པ་རྣམས་ཀྱི་དངོས་པོ་ནི། གང་འདིར་རྒྱུད་གཞུང་འདི་ཉིད་ཀྱི་ལམ་རྣལ་འབྱོར་བཅུ་སྐབས་བཅུར་སེམས་བཅུ་སྐྱེས་པས་ས་བཅུ་ནོན་པའི་ཁྱད་པར་གྱིས་ཡོན་ཏན་རྣམས་རྫོགས་པར་ལྡན་པ་ཅན་ནམ་བར་སྐབས་སུ་ཆ་རྐྱེན་ཚང་ཞིང་རྫོགས་པར་ཡོངས་སུ་ཤེས་པའོ། །དོན་འདིས་ནི་རྣལ་འབྱོར་ལྔ་དང་བཅུའི་སྐབས་སྐབས་སུ་བཤད་པ་དག་ལ་བླ་མ་དེ་རྐྱེན་གང་གང་དང་ལྡན་ཞིང་གང་གང་དང་མི་ལྡན་པ་དང༌། ཀུན་ཏུ་དགོས་པ་དང༌། ས་འོག་རིམ་ལ་དགོས་པ། གོང་མ་ལ་མི་དགོས་པ་དང༌། གོང་མ་ལ་ལྡན་པ་འོག་མའི་ཡུལ་མིན་པ་ལ་སོགས་པ་མཁྱེན་པའི་ཡོན་ཏན་རིལ་རྫོགས་པར་ལྡན་པ་གང་ཡིན་པ་ལ་སོགས་པ་ཞིབ་ཏུ་གཅེས་ཏེ། འདིར་ཡི་གེ་མང་བས་སྒྲས་འཇིགས་ནས་མ་སྦྱར་ཡང་གཞུང་དོན་ཡོངས་རྫོགས་ལ་སྒྲོ་འདོགས་ཆོད་ན་ངེས་པར་འགྱུར་རོ། །བཤད་པའི་ཆོས་རྣམས་ཀྱི་ཙེར་ཆིབས་པས་རང་བཞིན་ཡོན་ཏན་ཏེ་ཕྱིན་ཅི་ལོག་གི་སྐྱོན་༼༨༢༽གྱི་མཐའ་རྣམས་ཟད་པར་གྱུར་ཅིང༌། དེ་ལྟར་སྦྱངས་པའི་ཡོན་ཏན་རྒྱ་མཚོ་ལྟ་བུའི་ཕ་རོལ་ཏུ་ཕྱིན་ནས་ཡོངས་སུ་རྫོགས་སམ་མ་རྫོགས་བརྟགས་པ་དང༌། དེ་ཉིད་དམ་པའི་སློབ་དཔོན་དུ་བསྟེན་པར་བྱ་བའི་ཚད་ལ་ཕབ་པ་དང་མ་ཕབ་པ་གང་ཡིན་བརྟགས་པ་དང༌། མི་དགེ་བའི་གྲོགས་པོའམ་གཞན་གྱི་ཕྱིར་མི་འབྲང་བར་དེ་ལ་སློབ་དཔོན་དུ་བཟུང་ནས་བཤེས་གཉེན་མགོན་དུ་ལྟོས་པར་བྱས་ཏེ་བསྟེན་ན་བསླབ་པ་བཅུ། མཐར་ཆུབ་སྟེ་ཡོངས་སུ་རྫོགས་པར་འགྱུར་ཞེའམ་མི་འགྱུར་ཞེས་འབྲས་བུ་ཐོབ་སྟེ་འོང་མི་འོང་བརྟགས་པ་རྣམས་ཏེ། གང་བརྟགས་པའི་རིག་པ་དེ་ཡང་བླ་མ་དེ་ཡི་སྤྱོད་ཡུལ་མ་ཡིན་ཞིང་མངོན་སུམ་དུ་རིག་པར་མི་བྱ་བར། བརྟག་པའི་ཐབས་དང་དེའི་ཡན་ལག་དང་བཅས་པ་ཡིས་སྒོ་ནས་གཞན་གྱི་ཡུལ་ནས་ཡོན་ཏན་ཡོད་མེད་འཆད་པ་རྣམས་ཀྱི་ཚུལ་འདྲི་ཞིང་ལོགས་པར་དཔྱད་དེ་བཟང་ངན་རང་གིས་བརྟག་སྟེ་ངེས་པར་བྱའོ།།

གཉིས་པ་བཟང་པོ་ལ་ལྟོས་པ་ལ་གསུམ་སྟེ། བཟང་པོའི་རང་བཞིན་བསྟན་པ། དཀའ་བས་དང་དུ་བླངས་ཏེ་བཀུར་ཚུལ། གདམས་ངག་ཞུས་ཏེ་མི་འགལ་བར་སྤྱོད་པའོ། །དང་པོ་ནི།

འོག་ནས། དམ་པ་དེ་ཡི་རང་བཞིན་ཡང༌། །ཞེས་པ་ནས། བཟུང་ཞིང་དམ་པར་བྱ། །ཞེས་པའི་བར་གྱིས་བསྟན་ཏེ།

དམ་པ་དེ་ཡི་རང་བཞིན་ཡང་། །ཡིད་བརྟན་སེམས་དང་དུལ་བ་དང་། །ཚད་མེད་ཡངས་པའི་བློ་གྲོས་དང་། །རྐྱེན་ཐུབ་བཟོད་ལྡན་ཀུན་ཏུ་དྲང་། །གསོང་པོར་སྤྱོད་ལ་གྱ་གྱུ་མེད། །སེམས་ཅན་ཉེན་ཅན་ཐམས་ཅད་ལ། །ཐབས་ཀྱིས་མི་འཇིགས་སྣ་ཚོགས་བྱིན། །དཔའ་བོ་མཐུར་ལྡན་བརྩོན་འགྲུས་ཆེ། །ཤེས་བྱའི་ཡུལ་ནི་ཐམས་ཅད་ལ། །ཇི་ལྟར་འདོད་པ་བཞིན་དུ་འབྱུང་། །སྲིད་པས་ཞུས་ཀྱང་ཟད་མི་ཤེས། །བརྟགས་ཤིང་ཡོན་ཏན་ཕྱི་ཕྱིར་འབྱུང་། །བདེན་པར་སྨྲ་ཞིང་ཚིག་མི་འགྱུར། །ཇི་སྐད་སྨྲས་པ་དེ་བཞིན་བྱེད། །ལེགས་དང་ཉེས་པའི་ལས་རྣམས་ལ། །དགའ་དང་མི་དགའ་རྟོག་འཛིན་མེད། །རི་དྭགས་རྒྱལ་པོ་སེང་གེ་ལྟར། །གཟི་ལྡན་གཟི་ཆེ་ཡུལ་མི་འཇུག །འདུ་འཛི་དམན་པའི་ལས་རྣམས་སྤངས། །འཕྱོ་དང་གཡེང་བྲལ་གང་ན་བརྟག །སེང་གེའི་བུ་ལྟར་གཅིག་པུར་གནས། །དགོན་པའི་རྒྱུད་དང་དབེན་ལམ་དབེན། །འདི་དང་གང་ལྡན་དམ་པའི་འོས།།

དམ་པ་ཐམས་ཅད་བཀུར་གནས་སོ། །རང་བཞིན་དེ་དང་མི་ལྡན་ཡང་། །དམ་པའི་མཛོད་དང་ཉེར་ལྡན་ན།།

དམ་པར་བཟུང་ཞིང་དམ་པར་བྱ།།

བླ་མའི་རང་བཞིན་བརྟགས་པ་གང་སྙམ་པ་ལ། བླ་མ་དམ་པ་དེ་ཡི་རང་བཞིན་གྱི་མཚན་ཉིད་ཡང༌། ཐུགས་ཡིད་བརྟན་པ་དང༌། གཞན་དོན་ལ་སེམས་རབ་ཏུ་དྭངས་པ་དང༌། ཁོང་ནས་དུལ་བ་དང༌། ཕྱོགས་རིས་ལས་གྲོལ་ཏེ་ཚད་མེད་པར་ཡངས་པས་ལྷག་པའི་ཤེས་རབ་མཆོག་གི་བློ་གྲོས་མངའ་བ་དང༌། རྐྱེན་ཐུབ་པ་དང༌། བཟོད་པ་དང་ལྡན་པ་དང༌། སྒོ་གསུམ་ཀུན་ཏུ་དྲང་བ་དང༌། ཅི་ལའང་གསོང་པོར་སྤྱོད་པ་དང༌། ལུས་ངག་ཡིད་ལ་གྱ་གྱུ་མེད་པ་དང༌། རང་ལ་ཉེ་བར་བསྐྱབས་པའི་སེམས་ཅན་ཉེན་ཅན་ཐམས་ཅད་ལ། ཅིའི་ཐབས་ཀྱིས་ཀྱང་མི་འཇིགས་པའི་སྒོ་སྣ་ཚོགས་སྤྱིན་པ་དང༌། བུའི་སྒྲིབ་པ་འཇོམས་པའི་དཔའ་བོ་རང་བཞིན་དང་སྦྱངས་པའི་རྩལ་གྱིས་མཐུར་ལྡན་པ་དང༌། བདག་གཞན་གྱི་དོན་སྒྲུབ་པ་ལ་བརྩོན་འགྲུས་ངེས་པར་ཆེ་བ་དང༌། མཁྱེན་རབ་གསལ་བས་ཆོས་དང་གདམས་ངག་གི་ཤེས་བྱའི་ཡུལ་ནི་ཐམས་ཅད་ལ་རིག་པ་ཕྱོགས་མེད་དུ་ཤར་ཏེ་སློབ་མས་ཇི་ལྟར་འདོད་པ་བཞིན་དུ་འབྱུང་༼༨༣༽བས་མཁྱེན་པ་རྒྱ་ཆེ་བ་དང༌། སྲིད་པ་གསུམ་གྱིས་རང་གི་མོས་པས་ཞུས་ཀྱང་དགོངས་པ་ཀློང་ནས་རྡོལ་བས་ཟད་མི་ཤེས་པ་མངའ་བ་དང༌། ཇི་ལྟར་བརྟག་ཤིང་ཡོན་ཏན་ཕྱིར་འབྱུང་བས་སློབ་མས་མི་དཔོགས་པའམ་ཟད་པ་མེད་པ་དང༌། དོན་དང་མཐུན་པར་བདེན་པར་སྨྲ་ཞིང་ཚིག་རྗེས་ཚིག་གིས་གསོབ་སྟེ་མི་འགྱུར་བ་དང༌། ཇི་སྐད་སྨྲས་པ་དེ་བཞིན་ཚིག་དང་མཐུན་པར་དོན་མཆོག་སྒྲུབས་པར་བྱེད་པ་དང༌། མཉམ་ཉིད་ཀློང་དུ་གྱུར་ཅིང་ཐུགས་བཟང་བས། ལེགས་པ་དང་ཉེས་པའི་ལས་རྣམས་ལ་དགའ་བ་དང་མི་དགའ་བའི་རྟོག་འཛིན་མེད་པ་དང༌། གཞན་གྱིས་བསྙེན་དཀའ་བས་རི་དྭགས་ཀྱི་རྒྱལ་པོ་སེང་གེ་ལྟར་གཟི་མདངས་ལྡན་ཞིང་བརྗིད་ཆེ་བ་དང༌། ལྟ་དགོངས་ལྡན་པས་མཚན་མའི་ཡུལ་གྱི་བླ་མ་གཞན་གྱི་ཆོས་ལ་མི་འཇུག་པ་དང༌། འཁོར་བར་གཏོགས་པའི་འདུ་འཛི་དང་དམན་པའི་ལས་རྣམས་སྤངས་པ་དང༌། འཇིག་རྟེན་གྱི་བྱ་བས་འཕྱོ་བ་དང་གཡེང་བའི་འདུ་ལོང་བྲལ་བ་དང༌། གནས་གང་ན་རྟག་ཅིང་བརྟན་པར་བཞུགས་པ་དང༌། སེང་གེའི་སྤུ་ལྟར་གཅིག་པུར་གནས་ཏེ་གཡེང་བ་དང་འབྲེལ་བ་མེད་པ་དང༌། དགོན་པའི་རྒྱུད་གང་དང་དབེན་པར་བྱང་ཆུབ་ཀྱི་ལམ་མཆོག་བསྟེན་པས་རྣམ་པར་གཡེང་བ་དང་བྲལ་བ་སྟེ། དངོས་ཉི་ཤུ་ལྔ་དང་ལྡན་ན་དམ་པའི་མཆོག་གོ །དེས་ན་ཡོན་ཏན་ཉེར་ལྔ་པོ་འདི་དག་གང་ལྡན་པ་དེ་ནི་དམ་པའི་བླ་མར་བསྟེན་འོས་པ་ཡིན་པས་བཤེས་གཉེན་དམ་པ་ཉིད་དུ་ཞུས་ནས་དུས་ཐམས་ཅད་དུ་བཀུར་བར་བྱེད་པའི་གནས་སོ། །འོ་ན་དེ་ལྟ་བུ་མ་རྙེད་ན་གང་ལ་བསྟེན་སྙམ་པ་ལ། གལ་ཏེ་གང་གི་མཚན་ཉིད་ཀྱི་རང་བཞིན་དེ་དག་དང་རྫོགས་པར་མི་ལྡན་ན་ཡང༌། ལྟ་བ་དང་དམ་ཚིག་དང་སྤྱོད་པ་གསུམ་གྱི་དམ་པའི་མཛོད་གསུམ་འཆང་བ་དང༌། ཤེས་རབ་དང་ཕན་སེམས་ཀྱིས་སློབ་བུའི་རྒྱུད་གྲོལ་བར་བྱེད་པའི་གཉེར་དང་ལྡན་ན། བླ་མ་དམ་པར་གཟུང་ཞིང་བསྙེན་བཀུར་གྱི་གནས་དམ་པར་བྱས་ཏེ་དགོངས་སྤྱོད་ལ་བསླབ་པར་བྱའོ།།

གཉིས་པ་དཀའ་བས་དང་དུ་བླངས་ཏེ་བཀུར་ཚུལ་ལ་བདུན་ཏེ། བླ་མ་བཟང་པོ་ལས་གཞན་དུ་མི་ཞུ་བར་དང་དུ་བླང་བ། དམ་པར་ངེས་ན་འཇིག་རྟེན་པའི་སྐྱོན་ལ་སྐྱོན་དུ་མི་ལྟ་བ། བཟོད་པར་དཀའ་བ་ཐམས་ཅད་བཟོད་པར་བྱ་བ། སྒྱུ་མའམ་ཡུན་ཐུང་བར་བསམ་སྟེ་བཟོད་པར་བྱ་བ། ཆོས་ཀྱི་དོན་ལ་བསམ་སྟེ་བཟོད་པར་བྱ་བ། ཡུན་གྱི་དོན་སྲིད་ལ་བསམ་སྟེ་བཟོད་པར་བྱ་བ། མགོན་སྐྱབས་དམ་པར་དམིགས་ཏེ་བསྙེན་བཀུར་བྱ་བའོ། །དང་པོ་ནི།

སྔར་གྱི་འཕྲོར། བརྟགས་པས་བསྔོ་བ། ཞེས་པ་ནས། ཡུལ་ལ་འགྲོ་མི་བྱ། །ཞེས་པའི་བར་གྱིས་བསྟན་ཏེ།

བརྟག་པ་བསྔོ་བ་ཀུན་ལྡན་ན། །གཞན་གྱི་ཡུལ་དུ་འགྲོ་མི་བྱ།།

དེ་ལྟར་ལེགས་པར་བརྟགས་པས་ཡོན་ཏན་གྱི་མཚན་ཉིད་བསྔོ་བགྲང་བྱས་པ་ཀུན་ནམ་དམ་པའི་མཛོད་གསུམ་ཡན་ཆད་རྫོགས་པར་ལྡན་ན་དེ་ཉིད་བདག་གི་བླ་མར་བཟུང་ལ་གཞན་གྱི་ཡུལ་ལ་འགྲོ་བར་མི་བྱ་ཞིང་བླ་མ་གཞན་ལ་ཆོས་ཞུ་བའང་མིན་ཏེ། དེ་ཉིད་བསྟེན་པས་དོན་གྲུབ་པར་འགྱུར་རོ།།

གཉིས་པ་དམ་པར་ངེས་ན་འཇིག་རྟེན་པའི་སྐྱོན་ལ་སྐྱོན་དུ་མི་ལྟ་བ་ནི།

དམ་པའི་ཡོ་བྱད། ཅེས་པ་ནས། རྨོངས་ལ་ག་ལ་སྲིད། །ཅེས་པའི་བར་གྱིས་བསྟན་ཏེ།

དམ་པའི་ཡོ་བྱད་ལྔ་རྫོགས་ན། །དམན་པའི་ཡོ་བྱད་མེད་ལ་མིན། །ངེས་པར་ཀུན་ཏུ་བཟང་ཉིད་ན།།

གང་གི་ལྟ་ཡུལ་ངན་ལ་མིན། །སྒྲོན་མེ་འཚུབ་རླུང་བསྐྱོད་ལ་མིན། །འདོད་འཆལ་ཚིག་འཆལ་དམན་ལ་མིན།།

བླུན་རྨོངས་རྨུགས་ལ་ག་ལ་སྲིད།།

དེ་ལྟ་བུའི་བླ་མ་དེ་ལ། དམ་ཚིག་ཏིང་འཛིན་ཤེས་རབ་དང༌། །བྱང་ཆུབ་སེམས་དང་སྙིང་རྗེ་ལྔ། །ཞེས་པ་ལྟར། དམ་པའི་ཡོ་བྱད་ཆེན་པོ་ལྔ་ཉིད་རྫོགས་པར་ལྡན་ན། འཇིག་རྟེན་དམན་པའི་རྫས་ཀྱི་ཡོ་བྱད་མེད་དེ་དབུལ་ཡང་དེ་ལ་བལྟས་ནས་མི་ཞུ་བ་མིན་ནོ། །ངེས་པར་བླ་མ་དགོངས་པ་དོན་དང་འབྱོར་ནས་གདེང་དུ་འབེབས་པས་ཚིག་ཀྱང་ཆོས་ཉིད་ཀྱི་རང་དང་མཐུན་པར་དོན་དང་ཚིག་ཀུན་མཆོག་ཏུ་བཟང་བ་ཉིད་ཡིན་ན་ཞལ་ནས་གསུངས་པའི་ཆོས་ལ་རྟོན་གྱི། གང་གི་ངང་ཚུལ་གྱི་བལྟ་ཡུལ་ལ་སྐུ་ལུས་ཆུང་ལ་ཞལ་རས་ངན་པར་གྱུར་ཀྱང་དེ་ལ་ལྟ་བ་མིན་ཞིང༌། སྒྲོན་མེ་ལྟ་བུའི་མན་ངག་གསལ་བའི་དྲོད་དང་ལྡན་ན། རང་བཞིན་རྒོད་ཅིང་འཚུབ་རླུང་གིས་བསྐྱོད་པ་ལྟ་བུའི་འཕྱང་གཡེང་དུ་གྱུར་པ་ལ་ཡང་ལྟ་བ་མིན་ལ། དེ་བཞིན་དུ་འདོད་པ་ཆེ་བ་དང་དོན་གཞན་ལ་མི་སྟོན་པར་འཆབ་པ་དང༌། གསུང་ཚིག་འཆལ་བར་སྨྲ་བ་དང༌། རིགས་ངན་ལས་སྐྱེས་པའི་གཡུང་པོ་དང་སྡིག་ཅན་གྱི་དམན་རིགས་ཡིན་ཡང་དེ་དག་ལ་ལྟ་བ་མིན་པ་དང༌། བླ་མ་དེ་ཉིད་མིའི་ཆོས་ལུགས་མི་ཤེས་ཤིང་བླུན་རྨུགས་རྨོངས་པར་གྱུར་ཀྱང་དེ་ལ་ལྟ་བ་ག་ལ་སྲིད་དེ་ཆོས་ལ་མཁས་པ་དང་མན་ངག་ལ་བལྟས་ཏེ་བརྟེན་པར་བྱ་བ་ཁོ་ནའོ།།

གསུམ་པ་བཟོད་པར་དཀའ་བ་ཐམས་ཅད་བཟོད་པར་བྱ་བ་ནི།

འཇིག་རྟེན་པ་ཡི། ཞེས་པ་ནས། ཐམས་ཅད་བཟོད་པར་བྱ། །ཞེས་པའི་བར་གྱིས་བསྟན་ཏེ།

འཇིག་རྟེན་པ་ཡི་དེ་བཞིན་དུ། །དམ་པ་དེ་དག་ཇི་ལྟར་ཡང་། །ས་མཁན་ལམ་ན་མཁས་ངེས་ན།།

ཇི་ལྟར་བཟོད་པར་བྱ་དཀའ་ཡང་། །ཐམས་ཅད་ཐམས་ཅད་བཟོད་པར་བྱ།།

དེ་ལྟར་འཇིག་རྟེན་པ་ཡི་མཚང་སྐྱོན་འདུག་ཀྱང་སྐྱོན་དུ་མི་ལྟ་བ་དེ་བཞིན་དུ། སློབ་དཔོན་དམ་པ་དེ་དག་ཇི་ལྟར་གྱུར་ན་ཡང༌། ཐེག་པ་ཆེན་པོ་ཡང་གསང་མཆོག་གི་ས་མཁན་ཡིན་པས་ཐུན་མོང་མིན་པའི་ས་དང་ལམ་གྱི་རིམ་པ་ལ་མཁས་ཤིང་རྟོགས་པའི་གདེང་དང་ལྡན་པར་ངེས་ན། ཇི་ལྟར་དང་དུ་བླངས་ཤིང་བཟོད་པར་བྱ་དཀའ་བ་གང་དང་གང་ཡང་བདག་གི་སྒོ་གསུམ་གྱིས་ཐེག་པར་ཁུར་ཏེ་༼༨༥༽དུས་ཐམས་ཅད་ནས་གནས་སྐབས་ཐམས་ཅད་དུ་འབྲས་བུ་འདོད་པའི་ཕྱིར་བཟོད་པར་བྱའོ།།

བཞི་པ་སྒྱུ་མའམ་ཡུན་ཐུང་བར་བསམ་སྟེ་བཟོད་པར་བྱ་བ་ནི།

དམ་པ་འདི་ནི། ཞེས་པ་ནས། ཙམ་དུ་བཟོད་པར་ཟད། །ཅེས་པའི་བར་གྱིས་བསྟན་ཏེ།

དམ་པ་འདི་ནི་ས་མཁན་ཏེ། །འདི་ནི་བདག་གི་མགོན་ཡིན་པས། །འཇིག་རྟེན་པ་ཡི་ཐ་སྙད་ཀུན།།

ངེས་པར་ཐམས་ཅད་སྒྱུ་མ་ཡིན། །གང་འདིར་གྱི་ན་རྩམ་འདི་དག །དམ་པར་གང་ལ་འགོག་མ་ཡིན།།

སྐད་ཅིག་ཙམ་གྱིས་མཐོང་འདི་ལ། །དེ་ལྟ་ཞིག་ལ་འདི་ལྟ་ལ། །དེ་སྲིད་ཙམ་དུ་འདོད་པར་ཟད།།

དེ་ལྟ་བུའི་བཀའ་སྩལ་མི་ཐེག་པ་རྣམས་ལ་ཇི་ལྟར་བསམ་ཞེ་ན། སློབ་དཔོན་དམ་པ་འདི་ནི་ཐར་པ་ཐོབ་པར་བྱེད་པའི་ས་མཁན་ཉིད་ཡིན་ཏེ། འདི་ནི་བདག་གི་འཁོར་བའི་སྡུག་བསྔལ་ལས་སྐྱོབ་པའི་མགོན་དམ་པ་ཡིན་པས། ཡུན་ཐུང་བའི་དུས་འདི་ཙམ་དུ་བླ་མའི་བཀའ་བཀྱོན་ལ་སོགས་པ་འཇིག་རྟེན་པ་ཡི་ཐ་སྙད་ཀུན་ནི་ཅིས་ཀྱང་བཟོད་པར་ནུས་ཏེ་ཁྱད་པར་སྤྱིར་བཏང་གི་དབང་དུ་ངེས་པར་ཆོས་ཐམས་ཅད་སྒྱུ་མ་ལྟ་བུ་ཡིན་ནོ། །ཞེས་བསམ་པར་བྱའོ། །གང་འདིར་བླ་མའི་བཀའ་སྩལ་པ་བདག་གིས་མི་བཟོད་པ་དེ་ལ་བརྟགས་ན། དེ་ཁོ་ན་ཉིད་ཀྱི་སྐབས་སུ་གྱིན་འདའ་འམ་ཡ་མ་བརླ་ཙམ་ཡིན་པས་འདི་དག་དོན་དམ་པར་ཆོས་ཉིད་ཀྱི་ངོ་བོ་གང་ལ་འགོག་ཅིང་སྤང་བའང་མ་ཡིན་པར་ཐམས་ཅད་སྟོང་པ་ཉིད་ལ་མི་ཤོང་རྒྱུ་ཡང་མེད་པས། བཀའ་སྩལ་བའི་དུས་འཇིག་རྟེན་སྐད་ཅིག་ཙམ་གྱི་མཐོང་བ་ཚེ་འདི་ལ་སྐལ་བ་ཆེ་བས་དེ་ལྟ་བར་ཚེ་རིང་བ་ཞིག་ན་ཡང་ལོ་གྲངས་འདི་ཚོད་ཙམ་གྱི་བར་དེ་ལྟ་བུ་གཅིག་ལ་གནས་པའི་སྐབས་ཀྱི་ཡུན་དེ་སྲིད་ཙམ་དུ་བཀུར་བའི་ཚེགས་འདི་ལ་བཟོད་པར་བྱ་བར་ཟད་ན། དེ་ཕྱིན་ཆད་ངེས་པ་རྙེད་ནས་དུས་ཕྱི་མ་ཕན་ཆད་བཟོད་པར་དཀའ་བའང་མི་འབྱུང་སྟེ། ཚེ་འདིའི་བར་ཙམ་དུ་ཟད་པས་དེ་ལྟ་བུའི་ཡུན་ལ་ཅང་མེད་དོ་ཞེས་བསམ་པར་བྱའོ།།

ལྔ་པ་ཆོས་ཀྱི་དོན་ལ་བསམ་སྟེ་བཟོད་པར་བྱ་བ་ནི།

ཅི་གར་གར་གཅིག ཅེས་པ་ནས། བརྟགས་ཏེ་དམ་པར་བྱ། །ཞེས་པའི་བར་གྱིས་བསྟན་ཏེ།

ཅི་གར་གར་ཅིག་འབྱུང་འཇོམས་སྐབས། །ལོག་པས་གྱི་འདའ་གྱི་འདའ་འདིར།།

དམ་པའི་དོན་དུ་མི་སྦྱོར་རམ། །སྙམ་དུ་བརྟགས་ཏེ་དམ་པར་བྱ།།

དེ་ལྟ་བས་ན་ཅི་གར་བླ་མ་དང་ལྷན་ཅིག་པའི་དུས་དང་བར་འགའ་གར་གཅིག་མཇལ་བའི་དུས་དང༌། བཀའ་ལུང་འབྱུང་བའི་དུས། རང་བཞིན་གྱིས་གནས་གཅིག་ཏུ་འཛོམས་པའི་དུས་ཀྱི་སྐབས་རྣམས་སུ། རེས་འགའ་དགྱེས་ལ་རེས་འགའ་བཀྱོན་པ་དང༌། རང་བཞིན་དུ་བསྐུལ་ཞིང་ཞི་བས་གསུངས་པས་ཆོག་པ་ལ་ཡང༌། བཀའ་སྩལ་དྲག་པོར་གསུངས་པའི་མཛད་སྤྱོད་ཀྱིས་བདག་སྡུག་བསྔལ་བ་ཉིད་དུ་མཛད་ཀྱང་ཐུགས་ལོག་པར་སྣང་བ་གྱིན་འདའ་དང་གསུང་བཀའ་སྩལ་དྲག་པོ་གྱིན་འདའ་ཕྲ་མོ་ཡ་མ་བརླ་འདི་ནི་སྒྱུ་མ་ལྟ་བུ་ཡིན་པས་ཆོས་ཉིད་དམ་པའི་དོན་དུ་མི་སྦྱོར་རམ་༼༨༦༽སྙམ་དུ་བསམ་ཞིང་བླ་མས་བཀའ་སྩལ་ཉེས་པ་ཅི་གསུངས་ཀྱང༌། དེ་དག་ལ་བློས་ལེགས་པར་བརྟགས་ཏེ་མི་དགའ་བའི་བསམ་པ་མེད་པར་བྱས་ལ་ངས་ཆོས་ཀྱི་དོན་དུ་ལེགས་པར་མི་བསམ་པའི་ལུགས་ཇི་ཡོད་སྙམ་ནས་བཟོད་པ་དམ་པར་བྱ་སྟེ་ཡང་དག་པར་དམིགས་ལ་ལྷག་པར་བལྟ་བའོ།།

དྲུག་པ་ཡུན་གྱི་དོན་སྲིད་ལ་བསམ་སྟེ་བཟོད་པར་བྱ་བ་ནི།

ཡུན་གྱི་དོན་སྲིད། ཅེས་པ་ནས། བྱ་བ་ག་ལ་སྲིད། །ཅེས་པའི་བར་གྱིས་བསྟན་ཏེ།

ཡུན་གྱི་དོན་སྲིད་ཆེན་པོ་ལ། །དམིགས་ནས་བློ་གྲོས་ཆེར་བསྐྱེད་དེ། །བདེ་མཆོག་བདེ་བའི་དམ་པ་དང་།།

སྐད་ཅིག་ཙམ་གྱི་ཐ་སྙད་ནི། །བཏང་སྙོམས་བྱ་བ་ག་ལ་སྲིད།།

དེ་ཅིའི་ཕྱིར་ཞེ་ན། མན་ངག་གི་ཐབས་ལ་བརྟེན་ནས་བདག་གི་ཡུན་གྱི་དོན་སྲིད་ཆེན་པོ་ནམ་ཞིག་ཚེ་རབས་གཏན་གྱི་འདུན་མ་བྱང་ཆུབ་ཀྱི་སྙིང་པོ་བླ་མས་སྟེར་བ་ལ་དམིགས་ནས། བསམ་པས་གུས་པ་དང་བཀུར་སྟི་བྱེད་པའི་བློ་གྲོས་ཆེར་བསྐྱེད་དེ་རྒྱུད་སྦྱངས་པ་ལ་འབད་དོ། །ཆོས་ཟབ་མོའམ་ཐར་པ་གཏན་གྱི་འབྲས་བུ་བདེ་མཆོག་བདེ་བའི་གོ་འཕང་དམ་པ་མཆོག་ཏུ་གྱུར་པ་འབྱུང་བ་འདི་དང༌། དུས་སྐད་ཅིག་ཙམ་གྱི་ཐ་སྙད་བླ་མས་བཀའ་སྩལ་ཉེས་པའི་མི་དགའ་བ་གཉིས་བཏང་སྙོམས་སུ་མཉམ་པོར་བྱས་ལ་མི་བཟོད་པར་སྙོམས་ལས་བྱ་བ་ལུགས་མེད་པའི་ཕྱིར་ག་ལ་སྲིད་དེ་མི་སྲིད་པས་གོ་འཕང་མཆོག་ཏུ་བལྟས་ལ་བཟོད་པར་བྱ་དགོས་སོ།།

བདུན་པ་མགོན་སྐྱབས་དམ་པར་དམིགས་ཏེ་བསྙེན་བཀུར་བྱ་བ་ནི།

གང་འདིར་མགོན་མེད། ཅེས་ པ་ནས། ཤིན་ཏུ་བསྟེན་པར་བྱ། །ཞེས་པའི་བར་གྱིས་བསྟན་ཏེ།

གང་འདིར་མགོན་མེད་བདག ་འཁྱམས་ན། །གང་གིས་ས་ཕྱོགས་འདི་དག་ནི། །ཕན་བྱུང་རིགས་ཅན་སུ་ག་ན།།

དམ་པ་མ་གཏོགས་ཅི་འགའ་མེད། །འདི་ན་ཕན་དང་མགོན་མང་ཞིང་། །དམན་དང་འབྲེལ་བར་གང་ཡོད་ཡང་། །ལོག་པར་བསྒྲུབ་པའི་བློ་གྲོས་མཁན། །གཡང་ལ་མཆོང་བའི་སྔ་འགྲོས་པ། །དོན་ལ་འགོག་མཉམ་ཡོང་མིན་ཏེ། །བཤེས་གཉེན་སྐྱབས་མེད་ཅི་དད་དུ། །ཀུན་ཀྱང་དམན་རིགས་གྲོང་ཁྱེར་འགྲོ། །བྱམས་བློའི་ཡུལ་དུ་ག་ལ་རུང་། །གང་འདིར་མུན་པར་འཁྱམས་པ་ལ། །བདེ་མཆོག་སྣང་བའི་ལམ་སྟོན་པ། །སྐྱབས་ཆེན་དམ་པ་གང་དེ་ལགས། །གཞན་གྱིས་སྐྱབས་པར་ནུས་མ་ཡིན། །དེས་ན་དམ་པ་གང་དག་ལ། །བསྙེན་པས་ཤིན་ཏུ་བསྟེན་པར་བྱ།།

བླ་མ་མཚན་ཉིད་དང་ལྡན་པ་ཉིད་བདག་གི་སྐྱབས་དམ་པ་ཡིན་པའི་ཕྱིར་བཀུར་བའང༌། གང་འདིར་འཁོར་བར་ལྟུང་ཞིང་བརྒྱུད་ནས་མགོན་སྐྱབས་ མེད་པར་བདག་འཁྱམས་ཏེ་གནས་པ ་ན། གང་སྲིད་པ་གསུམ་པོ་དག་གི་ས་ཕྱོགས་ཉམ་ང་བ་ངན་སོང་གསུམ་ལ་སོགས་པའི་གཡང་ས་ཅན་འདི་དག་ན་ནི། འཁོར་བ་འདི་ལས་ཐར་བར་བྱེད་པའི་ཐབས་དམ་པ་སྟོན་པའི་སྒོ་ནས་བདག་ལ་ཕན་བསོད་བྱེད་པའི་རིགས་རྒྱུད་ཅན་སུ་ཞིག་གང་ན་ཡོད་དེ་མེད་དོ། །དེ་བས་ན་བླ་མ་རྡོ་རྗེ་སློབ་དཔོན་དམ་པ་ཉིད་མ་གཏོགས་པར་ཕན་འདོགས་ཁྱད་པར་ཅན་གྱི་མགོན་སྐྱབས་གཞན་ནི་གཅིག་འགའ་ཡང་མེད་དོ། །ད་ལྟར་གྱི་མཐོང་བའི་ཚེ་འདི་ལ་ཕན་འདོགས་པའི་ཕ་མ་དང་གཉེན་ཚན་ལ་སོགས་པ་སྡུག་བསྔལ་གྱི་གྲོགས་བྱེད་པའི་མགོན་མང་ཞིང༌། སྡུག་བསྔལ་སྐྱོབ་པར་ཁས་འཆེས་པས་གང་ཟག་ལྟ་སྤྱོད་དམན་པར་གྱུར་པ་དག་དང་དམ་ཚིག་གི་འབྲེལ་བ་ཡི་སློབ་དཔོན་མང་པོ་གང་ཇི་ལྟར་ཡོད་ཀྱང༌། དེ་དག་གི་ཐར་བར་མི་ནུས་པའི་ཚུལ་ནི། དམན་པའི་བླ་༼༨༧༽མས་སླར་བདག་གི་ལྟ་བ་ཕྱིན་ཅི་ལོག་པར་བསྒྲུབ་པའི་བློ་གྲོས་མཁན་དུ་བྱས་ནས་བླ་མ་ངན་པ་དེ་ཉིད་ཀྱིས་སྣ་དྲངས་ཏེ་འཁོར་བའི་གཡང་སར་འཕྱོང་བའི་སྔ་འགྲོས་མཁན་དུ་གྱུར་པ་ཡིན་པས། བྱང་ཆུབ་ཀྱི་དོན་བཟང་པོ་ཐོབ་པ་ནི་སླར་ལ་ཡང་འགོག་པར་བྱེད་པ་ཡིན་ནོ་སྙམ་དུ་བསམ་དགོས་ཏེ། འདི་ལྟར་བླ་མ་འདི་ལ་བརྟེན་པས་བྱང་ཆུབ་ཐོབ་པ་ཡོད་པ་མིན་ཏེ། དེ་ཅིའི་ཕྱིར་ཞེ་ན། བཤེས་གཉེན་ངན་པ་འཁོར་བ་ལས་སྐྱོབ་པའི་ནུས་པ་མེད་པའི་སྤྱན་སྔར་ཕྱིན་ནས་དེ་ལ་ལམ་ལྟོས་ཏེ་ཅི་ལྟར་ཐར་པའི་སླད་དུ་དད་པར་བྱས་ན། ཐར་པའི་འབྲས་བུ་མི་འབྱུང་བར་མཁན་སློབ་ཏུ་འབྲེལ་བ་ཀུན་ཀྱང་དམན་པའི་རིགས་ཅན་གྲོང་ཁྱེར་གསུམ་གྱི་ཡང་ཐ་མའི་ཐ་མར་འཁྱམས་ཤིང་འགྲོ་བས་དེ་ནི་འགྲོ་བ་ཀུན་ལ་བྱམས་པ་ཆེན་པོ་ཡོད་པའི་ཤེས་རབ་ཅན་གྱིས་དམ་པའི་བློའི་ཞེས་བློ་གྲོས་ཀྱི་ཡུལ་དུ་དམིགས་ཏེ་བླ་མར་བསྟེན་པ་ག་ལ་རུང་སྟེ་མི་རིགས་སོ། །དེ་བས་ན་གང་འདིར་འཁོར་བའི་མུན་པར་འཁྱམས་པ་ལ་བདེ་མཆོག་སྣང་བ་རྣམ་པར་དག་པས་ཐར་པའི་ལམ་སྟོན་པ་ཉིད་ཀྱི་བླ་མར་གྱུར་ན་སྐྱབས་ཆེན་དམ་པ་ཉིད་ནི་གང་དེ་ཉིད་ཁོ་ན་ལགས་པས། གཞན་གྱིས་བསྐྱབ་པར་ནུས་པ་མ་ཡིན་ནོ། །དེས་ན་བླ་མ་དམ་པ་ལྟ་སྤྱོད་ཡང་དག་པ་ལ་མཁས་པ་གང་དག་ལ། སློབ་བུ་མཁས་པ་རྣམས་ཀྱིས་ངེས་པར་བསྙེན་ཏེ་གུས་པས་ཤིན་ཏུ་བསྟེན་པར་བྱའོ།།

གསུམ་པ་གདམས་ངག་ཞུས་ཏེ་མི་འགལ་བར་སྤྱོད་པ་ནི།

གང་འདིར་སྣང་བའི། ཞེས་པ་ནས། དེ་ལ་ལྟོས་དགོས་སོ། །ཞེས་པའི་བར་གྱིས་བསྟན་ཏེ།

གང་འདིར་སྣང་བའི་ཚུལ་བྱུང་ན། །དམ་པ་ཉིད་དུ་འདུན་པར་གསོལ། །དམ་པར་སྣང་བ་ཐོབ་ཕན་ཆད།།

དམ་པ་དེ་ལས་འགལ་འགྱུར་ལས། །རྡུལ་གྱི་ཆ་ཡང་མི་བྱའོ། །རྒྱ་མི་བཅག་ཅིང་ལུགས་མི་བོར།།

འདུན་པ་ནས་བཟུང་ལས་རུང་བའི། །བར་དུ་དེ་ལ་ལྟོས་དགོས་སོ།།

དུས་གང་འདིར་དེ་ལྟ་བུའི་དམ་པའི་བླ་མ་དེ་ཡིས་མཉེས་པར་སྣང་བའི་ཚུལ་གྱིས་མན་ངག་གནང་བའི་ལྟས་ཀྱི་ཚུལ་བྱུང་ན། བླ་མར་ལ་གོར་བརྩམས་ལ་དམ་པ་ཉིད་དུ་འདུན་པར་ཞུ་བ་དབུལ་ཏེ་གུས་པས་གསོལ་བ་འདེབས་སོ། །དེས་བདག་གི་བླ་མ་དམ་པར་མཛད་ནས་གདམས་ངག་གནང་བ་རྣམས་ཐོབ་སྟེ་བླ་མར་གྱུར་ཕན་ཆད། དམ་པ་དེ་ཡི་ཐུགས་དམ་ལས་འགལ་བར་གྱུར་པའི་ལས་ཐ་ན་ཕྲ་མོ་རྡུལ་གྱི་ཆ་ཙམ་ཡང་མི་བྱའོ། །དམ་པ་དེའི་བཀའ་ལུང་གི་རྒྱ་གང་ཡང་མི་བཅག་ཅིང་གསུང་གི་སྒྲོས་སམ་བཀའི་ཆོས་ལུགས་མི་དོར་བ་དང༌། དང་པོར་ཞུགས་ཏེ་འདུན་པ་སེམས་པ་ནས་བཟུང་སྟེ་མཐར་ལས་སུ་རུང་བས་རྩལ་ཆེན་རྫོགས་པའི་ཏིང་ངེ་འཛིན་མངོན་དུ་གྱུར་གྱི་བར་དུ་བླ་མ་དམ་པ་དེ་ལ་༼༨༨༽བརྟེན་ཞིང་ལྟོས་དགོས་སོ། །ཞེས་ཐ་ཚིག་ངེས་པ་ལྟ་བུའོ།།

གསུམ་པ་ངན་པ་ལ་མི་ལྟོས་པ་ནི།

གང་འདིར་ངོས་གང༌། ཞེས་པ་ནས། དགོན་པ་ཉིད་དུ་ལྟུང༌། །ཞེས་པའི་བར་གྱིས་བསྟན་ཏེ།

གང་འདིར་ངོ་གང་མ་ཟིན་པས། །བཏང་སྙོམས་ཙམ་དུ་ཚུལ་བཟུང་བས། །དེ་ལ་དམ་པའི་དོན་མེད་དེ།།

དེ་རྐྱེན་དེ་དང་མི་ལྡན་པས། །བསླབ་པའི་ཡུལ་བཟླས་ཐེ་ཚོམ་ཟོས། །ལེ་ལོས་ཡུལ་ལ་མི་བརྩོན་ཞིང་།།

ཕྱལ་བས་དེ་ལ་མ་གུས་པས། །ཤེས་བྱ་མུན་པའི་ཚོགས་ཀྱིས་བསྒྲིབས། །གང་གི་རྣམ་མཐོང་ཐིབས་ཀྱིས་འགགས། །གང་ལ་བྱིས་པ་ཤེད་མ་བྱེ། །མདུད་པའི་བཅིང་བ་དེ་ལས་བྱུང་། །ཤེས་རྒྱུད་གྲོལ་བར་ག་ལ་སྲིད།། དམ་པའི་ཡོ་བྱད་ལྔ་འབུལ་བའི། །འཕོངས་པ་དེ་ཡིས་གཞན་བསྒྲལ་ན། །དེ་ཡང་དབུལ་པོ་ཉིད་དུ་འགྱུར།། འཚོ་བ་དམ་པ་དང་བྲལ་ནས། །ལོངས་སྤྱོད་ཆེན་པོས་འཕོངས་པ་ཡིས། །མུ་གེའི་དགོན་པ་ཉིད་དུ་ལྟུང་།།

ཐེག་པ་ཆེན་པོའི་སྒོ་གང་འདིར་བླ་མའི་དོན་གྱི་ཁྱད་པར་ངོ་བོའི་མཚན་ཉིད་གང་ཡིན་པ་ངོས་མ་ཟིན་ཏེ་བཟང་ངན་གྱི་སྐྱོན་ཡོན་མ་ཤེས་པས། ཞིབ་ཏུ་བརྟགས་པ་མེད་པར་བཏང་སྙོམས་ཀྱི་འོལ་རྟོག་ཙམ་དུ་གསང་སྔགས་ཀྱི་སྤྱོད་ཡུལ་ཙམ་ལ་ལྟོས་ནས་སློབ་དཔོན་གྱི་ཚུལ་བཟུང་བ་ལ་བརྟེན་པས་གུས་འདུན་བྱས་ཀྱང༌། བླ་མ་རང་ཉིད་ཀྱིས་དོན་མ་རྟོགས་པས་དེ་ལ་གསང་སྔགས་དམ་པའི་དོན་མ་ནོར་བ་མེད་ཅིང་བླ་མ་དེ་ཉིད་སློབ་བུ་གྲོལ་བ་དེ་ཡི་ཡོན་ཏན་གྱི་རྐྱེན་དེ་དག་གང་དང་ཡང་མི་ལྡན་པས་སློབ་བུས་གསང་སྔགས་ཀྱི་བསླབ་པའི་ཡུལ་རྣམས་ལ་སྔར་མཁས་པར་སྦྱང་ཀྱང་སླར་བཟླས་ཏེ་བསྐྱར་དགོས་པ་དང༌། དེར་མ་ཟད་ཐེ་ཚོམ་ཟོས་ཏེ་ཡིད་གཉིས་ཀྱི་ཆོས་སུ་གྱུར་པས་སླར་སྙོམས་ལས་དང་ལེ་ལོས་ཐེག་པ་ཆེན་པོ་གསང་བ་མཆོག་གི་བསླབ་བྱའི་ཡུལ་ལ་མི་བརྩོན་ཞིང་སློབ་སྙིང་མི་འདོད་དེ་ཕྱལ་བར་བཞག་པའི་སེམས་སྐྱེ་བས་ན། དེ་ལྟ་བུའི་བླ་མ་ལ་ཆོས་ཀྱིས་མ་ཚིམ་པས་མ་གུས་པའི་ལས་བྱེད་པར་འགྱུར་བས། དེའི་རྒྱུ་ལས་ཤེས་པར་བྱ་བའི་ཆོས་ཉིད་ཀྱི་དོན་མི་རྟོགས་པར་མ་རིག་པས་མུན་པའི་ཚོགས་ཀྱིས་སྒྲིབ་པ་ཆེན་པོ་གསོགས་པར་འགྱུར་རོ། །དེ་ཇི་ལྟར་ཞེ་ན། དཔེར་ན་མུན་པ་དང་སྤྲིན་འཁྲིགས་པ་གང་གིས་ནམ་མཁའི་མཐོངས་སྣང་འཐིབས་ཀྱིས་སྒྲིབ་པ་ལྟར་རང་གིས་སེམས་ཉིད་ཀྱི་ནམ་མཁའི་དོན་སྣང་དུ་རེ་ན་སླར་ཡང་འགགས་ཏེ་མི་རྟོག་པའི་སྒྲིབ་པ་འབྱུང་ངོ༌། །དེ་ཡང་དཔེར་ན་བྱ་བ་གང་ལ་བྱིས་པ་ཤེད་མ་བྱེ་བ་བཞིན་དུ། དོན་ལ་ཤེད་མ་བྱེ་བའི་རྒྱུ་ལས་རྟོག་པའི་མདུད་པ་དམ་པོར་གྱུར་པའི་རྒྱ་ཡིས་བཅིངས་པ་ཡང་དམན་པ་བླ་མར་བཟུང་བས་མཇུག་ཏུ་བཀའ་ཉམས་པའི་དབང་དུ་སོང་བ་དེ་དག་ལས་འབྱུང་བ་བཤད་པ་ལྟ་བུའོ། །དེ་ལྟ་བུ་ནི་ནམ་དུ་ཡང་ཤེས་པའི་རྒྱུད་གྲོལ་བར་ག་ལ་སྲིད་དེ་མི་སྲིད་པས་སྐྱོན་ཆེན་པོར་འགྱུར་པའོ། །སྐྱོན་གྱི་ངོ་བོ་ཇི་ལྟ་བུ་ཞེ་ན། དམ་ཚིག་ལྟ་ཏིང་བྱང་སྙིང་རྗེ། །ཞེས་པ་ལྟར། བླ་མ་གང་དམ་པའི་ཡོ་བྱད་ལྔ་ཡིས་དབུལ་བར་གྱུར་ན། བླ་མ་ཆོས་ཀྱིས་འཕོངས་པ་དེ་ཡིས་སློབ་བུ་གཞན་བསྒྲལ་ན་ཡང༌། དམ་པའི་རྒྱུ་ཆད་ཅིང་དོན་དང་མི་ལྡན་པས་སློབ་བུ་དེ་ཡང་ཆོས་ཀྱིས་དབུལ་བོ་ཉིད་དུ་འགྱུར་ཏེ། ཡང་༼༨༩༽དག་པའི་འཚོ་བ་དམ་པ་དང་བྲལ་བས། གསང་བའི་ཆོས་ཀྱི་ལོངས་སྤྱོད་ཆེན་པོས་འཕོངས་པ་ཡི་མུ་གེའི་དགོན་པ་ཉིད་དུ་རྣམ་པར་ལྟུང་སྟེ་འཁྱམས་པར་འགྱུར་རོ།།

བཞི་པ་ཇི་ལྟར་བཀུར་བའི་ཐབས་བཤད་པ་ལ་ལྔ་སྟེ། བླ་མའི་བཀའ་མི་བཅག་པ། ཆོས་སྲུང་མ་བསྲུངས་ཀྱི་སྐྱོན་ཡོན། བླ་མ་བཀུར་བའི་ལོ་རྒྱུས། ཁུར་བའི་ཡོན་ཏན། བཀུར་ཐབས་རྒྱས་པར་བསྟན་པའོ། །དང་པོ་ལ་གསུམ་སྟེ། བཀའ་མི་བཅག་ཅིང་ལུགས་མི་འདོར་བ། བཀའ་བཅག་པའི་སྐྱོན་བསྟན་པ། དེས་ན་བཀའི་ཟུར་ཡང་མི་བཅག་པའོ། །དང་པོ་ནི།

དེ་ལྟའི་གང་ཟག ཅེས་པ་ནས། ལུགས་བོར་ག་ལ་སྲིད། །ཅེས་པའི་བར་གྱིས་བསྟན་ཏེ།

དེ་ལྟའི་གང་ཟག་དམན་པ་དེ། །དམ་པར་གཟུང་བར་གྱུར་ཕན་ཆད།།

དམ་པར་ངེས་དང་མ་ངེས་ཀྱང་། །བཀའ་བཅག་ལུགས་བོར་ག་ལ་སྲིད།།

འོན་ཏེ་ངན་པ་བསྟེན་ཡང་བླ་མར་མི་བྱེད་དོ་ཞེ་ན། དེ་ལའང་དམ་ཚིག་བསྲུང་ཞིང་བཀུར་བར་བྱ་བའི་ཕྱིར། དེ་ལྟའི་གང་ཟག་དམན་པ་དེ་ཡང་ཐོག་མར་བརྟགས་ལ་སྤང་གི་བླ་མ་དམ་པར་བཟུང་བར་བྱས་ནས་བསྟེན་པར་གྱུར་ཕན་ཆད། བླ་མ་དེ་ཉིད་མཁས་པ་དམ་པར་ངེས་པ་དང་མ་ངེས་པའམ། དོན་དང་ལྡན་ནམ་མི་ལྡན་པ་དང༌། བཟང་བའམ། ངན་པ་དང༌། བདེན་ནམ་རྫུན་ཀྱང་རུང་སྟེ། བཀའ་བཅག་པ་དང་ལུགས་བོར་བ་ག་ལ་སྲིད་དེ་མི་སྲིད་པས་བླ་མ་དམ་པ་ལ་བྱ་བ་ཁོ་ན་བཞིན་བྱའོ།།

གཉིས་པ་བཀའ་བཅག་པའི་སྐྱོན་བསྟན་པ་ནི།

གལ་ཏེ་དེ་ཡི། ཞེས་པ་ནས། ལས་ལ་དུས་མི་འདོར། །ཞེས་པའི་བར་གྱིས་བསྟན་ཏེ།

གལ་ཏེ་དེ་ཡི་རྒྱ་ཉམས་ན། །དམྱལ་བ་རྡོ་རྗེར་དེ་འགྲོ་སྟེ། །མི་བཟད་སྡུག་བསྔལ་མྱོང་བར་འགྱུར། །དམྱལ་བ་སྲུངས་ཀྱི་ནི་ལུས་བདེ་ཞེས། །གྲགས་པ་སེང་གེའི་གཟུགས་འདྲ་བ། །མཆེ་བ་གཟངས་རིང་དབལ་རྣོ་བས། །འབང་ཅིང་མཚོན་ཆའི་ལམ་དུ་བདས། །སྤུ་གྲི་རྣོ་དབལ་རལ་གྲི་ནགས། །གང་དུ་ག་ཆད་རྒྱུག་སྐྱབས་མེད། །ཁྲོ་ཆུ་ཁོལ་མ་ཐལ་སྐྱོ་ཡིས། །ཆུ་བོ་རབ་མེད་ནང་དུ་འབྱིང་། །རྩེ་གསུམ་མདུང་དང་མདའ་བོ་ཆེ། །ཁབ་འདྲ་དབལ་རྣོ་གཟངས་རིང་དང་། །སྤུ་གྲི་རལ་གྲིའི་རྣོས་གང་བའི། །མུན་དོང་མེ་འབར་ནང་དུ་ལྷུང་། །སྡུག་བསྔལ་བརྒྱད་པོ་དེ་དག་ལས། །ཐར་པའི་སྐབས་ནི་མི་སྲིད་དོ། །སློབ་མར་གྱུར་ནས་སེམས་གཏད་པས། །དམ་པ་དེ་ལ་ཉེས་བྱེད་གང་། །སངས་རྒྱས་ཀུན་ལ་ཉེས་བྱས་པས། །དེ་དག་རྟག་ཏུ་སྤྱི་ཚུགས་འགྲོ །དམ་པ་ཀུན་དང་མཉམ་སྦྱོར་བའི་། །དམ་པ་ཉིད་ལས་གང་འདས་པ། །རྣལ་འབྱོར་དམ་པ་དབང་བསྒྱུར་བ། །ཐམས་ཅད་འཁྲུགས་ནས་ཁྲག་ཆེན་འཐུང་། །དམ་པའི་ཡི་གེ་འབྲུ་བཀོད་པ། །དབུགས་ཆེན་ནང་དུ་ཤར་ནས་ཀྱང་། །ལྕགས་ཀྱི་སྡིག་པ་མགོ་དགུ་པ། །རཀྵ་ཡཀྵ་གྱུར་པ་དེས། །བསད་ནས་དམྱལ་བ་ཆེན་པོར་རྒྱུད། །རྣམ་པར་འཚེ་དང་ནོར་འཕྲོག་དང་། །བགེགས་དང་སྡིག་པའི་དུག་དབལ་གྱིས། །ཉམས་པ་དེ་ལ་འཚེ་བར་བྱེད། །སྡིག་ཅན་ཡིན་ཏེ་འཆི་བར་འགྱུར། །རྒྱལ་པོའི་ཆད་པ་ལ་སོགས་པ། །འཇིགས་པ་བརྒྱད་རྣམས་དེ་ལ་འབྱུང་། །ཤོ་གམ་ཅན་ཆེན་ལ་སོགས་པ། །གནོད་སྦྱིན་གྱིས་བསད་མི་བདེར་འགྲོ། །ཅི་ཕྱིར་ལྷ་སྲིན་སྡེ་བརྒྱད་ལས། །གཏུམ་པོ་གཏུམ་མོ་དམ་ཅན་ཀུན།། ཆོས་སྲུང་བཀའ་ཡི་ལས་མཁན་ཡིན། །བཀའ་ཡི་ལས་ལ་དུས་མི་འདོར།།

གལ་ཏེ་དམན་པའི་བླ་མ་ལམ་བཀུར་ཏེ་ཚུལ་བཞིན་མ་བྱས་པའི་སྐྱོན་ནི་དམན་པའི་བླ་མ་དེ་ཡི་ཡང་བཀའི་རྒྱུ་བཅག་ཅིང༌། དམ་ཉམས་པའི་དབང་དུ་གྱུར་ན། རྣམ་སྨིན་དབལ་ཚ་བས་དམྱལ་བ་རྡོ་རྗེེར་དེ་ཉིད་འགྲོ་སྟེ་མི་བཟད་པའི་སྡུག་བསྔལ་དྲག་པོ་མྱོང་བར་འགྱུར་རོ། །དམྱལ་བའི་བསྲུང་མ་ལྕགས་ཀྱི་ཁྱི་ནི་ལུ་འདི་ཞེས་སུ་ཀུན་ལ་གྲགས་པ་སེང་གེའི་གཟུགས་དང་འདྲ་བ་མཆེ་བ་གཟེངས་རིངས་ཤིང་དབལ་རྣོ་བས་དབད་ཅིང་མཚོན་ཆའི་ལམ་དུ་བདས་ནས་སྤུ་གྲི་རྣོ་དབལ་ལྡན་པའི་སོ་ཡི་རལ་གྲིའི་ལོ་མ་ཅན་གྱི་ནགས་ཚལ་གང་གི་ནང་དུ་ག་ཆད་པར་བརྒྱུགས་ཀྱང་མགོན་སྐྱབས་གང་ཡང་མེད་ཅིང༌། ཁྲོ་ཆུ་ཁོལ་མ་དང་ཐལ་སྐྱོ་ཡི་ཆུ་བོ་རབ་མེད་ཀྱི་ནང་དུ་འབྱིང་ཞིང༌། རྩེ་གསུམ་དང་མདུང་དང་མདའ་བོ་ཆེ་དང༌། ཁབ་འདྲ་བའི་དབལ་རྣོ་ཞིང་གཟེངས་རིང་བ་དང༌། ཆུ་གྲི་དང་རལ་གྲི་རྣོ་དབལ་ཅན་གྱིས་གང་བའི་མུན་པའི་དོང་གི་འོབས་མེ་འབར་བ་ཅན་གྱི་ནང་དུ་ལྷུང་བར་འགྱུར་༼༩༠༽ལ། དེ་ལྟར་སྡུག་བསྔལ་བརྒྱུད་པ་དེ་དག་ལས་ཐར་པའི་སྐབས་ནི་ནམ་ཡང་མི་སྲིད་དོ། །སློབ་མར་གྱུར་ནས་ངན་པའི་སེམས་དང་ལྡན་པས་སམ་གལ་ཏེ་སློབ་མར་བྱས་པའི་རྟིང་ལ་བླ་མ་ངན་པ་སེམས་ཅན་དུ་གྱུར་བར་མཐོང་ནས་དམ་པ་དེ་ལ་ཉེས་པ་གཏིང་ནས་བྱེད་པ་གང་ཡིན་པ་དེ་ཉིད་སངས་རྒྱས་ཀུན་ལ་ཉེས་པར་བྱས་པ་ཡིན་པས་དེ་དག་རྟག་ཏུ་སྤྱིའུ་ཚུགས་སུ་དམྱལ་བར་འགྲོ འོ། །སངས་རྒྱས་དམ་པ་ཀུན་དང་མཉམ་པར་སྦྱོར་བའི་བླ་མ་དམ་པ་ཉིད་ཀྱི་དམ་ཚིག་ལས་གང་ཞིག་འདས་པ་དེ་ནི། རྣལ་འབྱོར་དམ་པ་རྡོ་རྗེ་གནོད་སྦྱིན་ཞེས་བྱ་བ་ཐོག་མར་དམ་དབོག་པའི་དཔང་པོར་གྱུར་པ་དེ་ཉིད་ཐམས་ཅད་དུ་འཁྲུགས་ནས་ཉམས་པ་དེའི་ཁྲག་ཆེན་འཐུང་བས་ཆད་པ་གཅོད་པ་དང༌། དམ་ཚིག་དབོག་པའི་དུས་སུ་གནས་གསུམ་དུ་དམ་པའི་ཡི་གེ་འབྲུ་གསུམ་བཀོད་དེ། སྙིང་ལ་བཞག་པ་ཉིད་གཉེན་པོར་གྱུར་ཏེ་དབུགས་ཆེན་གྱི་ནང་དུ་ཤར་ནས་ཀྱང་ཐུགས་ཀའི་ཧཱུྃ་ཉིད་ལྕགས་ཀྱི་སྡིག་པ་མགོ་དགུ་པ་ཉིད་དུ་སྣང་བའི་རཀྵ་ཡཀྵ་རམ་རྡོ་རྗེ་སྲིན་པོ་དང་རྡོ་རྗེ་གནོད་སྦྱིན་དུ་གྱུར་པ་དེས་བསད་ནས་དམྱལ་བ་ཆེན་པོར་བརྒྱུད་པར་འགྱུར་ཞིང༌། ཚེ་འདིར་ཡང་གདོན་དང་རིམས་ཀྱིས་རྣམ་པར་འཚེ་བ་དང༌། གཞན་གྱིས་ནོར་འཕྲོག་པ་དང༌། བགེགས་དང་སྡིག་པའི་དུག་དབལ་རྣམས་ཀྱིས། ཉམས་པ་དེ་ལ་ཀུན་ནས་འཚེ་བར་བྱེད་དོ། །དེ་ལྟར་སྡིག་ཅན་དུ་གྱུར་པ་ཡིན་ཏེ་རྟག་ཏུ་སྲིད་པ་དང་ངན་འགྲོའི་ཁམས་སུ་འཆི་བར་འགྱུར་རོ། །དེ་ཡང་ཚེ་འདི་ལ་སྨིན་པ་དང༌། ཕྱི་མ་ལ་འབྱུང་བ་གཉིས་སུ་སྦྱར་རོ། །ཚེ་འདིར་ཡང་རྒྱལ་པོའི་ཆད་པ་དང༌། ལ་སོགས་པ་ཞེས་པས། མུ་གེ་དང༌། མེས་འཇིགས་པ་དང༌། ཆུས་འཇིགས་པ་དང༌། དུག་དང༌། མཚོན་དང༌། ཕ་རོལ་གྱི་དམག་ཚོགས་དང་ལྕེ་འབབས་པས་འཇིགས་པ་ཆེན་པོ་བརྒྱད་རྣམས་ཀྱང་ཉམས་པ་དེ་ལ་འབྱུང་ངོ༌། །དེ་བཞིན་དུ་ཤོ་གམས་གཅན་ཆེན་ལ་སོགས་པ་རྣམས་སུ་སྲོག་ལ་གནོད་པ་སྦྱིན་པའི་ཚོགས་ཀྱིས་བསད་ནས་མི་བདེར་གྱུར་པའི་གནས་སུ་འགྲོ་སྟེ་འདི་དང་ཕྱི་མ་གཉིས་ཀར་འགྱུར་རོ། །དེ་ལྟར་ཉམས་མི་བདེ་བ་འབྱུང་བ་གཏན་ཚིགས་ཅི་ཡི་ཕྱིར་ན། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྟོ་འཕྱེ་ཆེན་པོ་དང་། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་སྟེ། ལྷ་སྲིན་སྡེ་བརྒྱད་དང༌། ཆོས་སྐྱོང་བའི་སྲུང་མ་ལས་༼༩༡༽བྱེད་དྲག་པོར་གྱུར་པའི་གཏུམ་པོ་དང་གཏུམ་མོར་འཁྲུགས་པའི་དམ་ཅན་ཀུན་ནི་བསྟན་པའི་ཆོས་སྐྱོང་བའི་སྲུང་མ་ལེགས་ཉེས་ཀྱི་ཤན་འབྱེད་ཅིང་ཉམས་པ་ལ་ཆད་པས་གཅོད་པའི་བཀའ་ཡི་ལས་མཁན་ཡིན་པས་བཀའ་ཡི་ལས་བྱེད་པའི་སྐབས་ལ་བབ་ན་དམ་བཅས་པའི་དབང་གིས་དུས་སུ་ཡལ་བར་མི་འདོར་བར་ཆད་པས་གཅོད་པའི་ཕྱིར་རོ།།

གསུམ་པ་དེས་ན་བཀའི་ཟུར་ཡང་མི་བཅག་པ་ནི།

དེས་ན་ཆོས་ལ། ཞེས་པ་ནས། བཅག་པར་མི་བྱའོ། །ཞེས་པའི་བར་གྱིས་བསྟན་ཏེ།

དེས་ན་ཆོས་ལ་སྤྱོད་པ་ཡི། །དམ་པར་འཇུག་པའི་བུ་རྣམས་ཀྱིས།།

ནམ་ཡང་ཞབས་ལ་མི་སྨད་ཅིང་། །བཀའ་ཟུར་བཅག་པར་མི་བྱའོ།།

དེས་ན་སྐྱོན་ཡོན་ཤེས་པའི་མཁས་པ་རྣམ་གྲོལ་གསང་བའི་ཆོས་ལ་སྤྱོད་པ་ཡི་སྒོ་ནས་ཐར་པ་དམ་པར་འཇུག་པའི་རིགས་ཀྱི་བུ་མཆོག་རྣམས་ཀྱིས། ནམ་དུ་ཡང་བླ་མའི་ཞབས་ལ་མི་སྨད་ཅིང་བཀའ་ཡི་ལུང་གི་ཟུར་ཙམ་ཡང་བཅག་པར་མི་བྱའོ་ཞེས་ངེས་པར་བསྲུང་བར་གདམས་པའོ།།

གཉིས་པ་ཆོས་སྲུང་མ་བསྲུངས་ཀྱི་སྐྱོན་ཡོན་ལ་གཉིས་ཏེ། ཆོས་བསྲུང་བའི་ཡོན་ཏན་བསྟན་པ། སྲུང་མི་བསྲུངས་ཀྱི་ངོ་བོ་བཤད་པའོ། །དང་པོ་ནི།

གང་གིས་རྩེ་གཅིག ཅེས་པ་ནས། རྟག་ཏུ་སྲུང་བར་བྱེད། ཅེས་པའི་བར་གྱིས་བསྟན་ཏེ།

གང་གིས་རྩེ་གཅིག་ཆོས་བསྲུངས་ན། །ཆོས་ལ་སྲུང་བའི་བསྲུངས་མ་རྣམས།།

གཏུམ་པོ་མཐུ་ཆེན་རྣམས་ཀྱིས་ཀྱང་། །བུ་བཞིན་རྟག་ཏུ་སྲུང་བར་བྱེད།།

དེས་བས་ན་སློབ་མ་མཁས་པ་གང་གིས་བླ་མ་དོན་གྱིས་བཀུར་ཞིང་རྩེ་གཅིག་ཏུ་དམ་པའི་ཆོས་སྲུང་པར་གྱུར་ན་བསྟན་པའི་ཆོས་ཀྱི་གནས་ལ་སྲུང་བར་མཛད་པའི་ཆོས་སྐྱོང་བསྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ལས་ལས་བྱེད་དྲེགས་པ་ཕོ་མོ་གཏུམ་པོ་མཐུ་ཆེན་པོ་དང་ལྡན་པ་རྣམས་ཀྱིས་ཀྱང་རང་གི་བུ་བཞིན་དུ་རྟག་ཏུ་སྲུང་ཞིང་སྐྱོབ་པར་བྱེད་པ་ཡིན་ཏེ་བསྟན་པ་སྲུངས་པའི་ཡོན་ཏན་དུ་འགྲེལ་ཏོ།།

གཉིས་པ་སྲུང་མི་བསྲུངས་ཀྱི་ངོ་བོ་བཤད་པ་ནི།

ཆོས་སྲུང་བ་ཡང༌། ཞེས་པ་ནས། ཆོས་ནི་སྲུང་མི་འགྱུར། །ཞེས་པའི་བར་གྱིས་བསྟན་ཏེ།

ཆོས་སྲུང་བ་ཡང་གང་ཞེ་ན། །ཆོས་རྣམས་ཀུན་ལ་མ་རྨོངས་ཤིང་། །ངེས་པར་ཤེས་པ་གང་ཡིན་པ།།

ཆོས་སྲུང་བ་ལ་མཁས་པར་འགྱུར། །གང་ཞིག་ཆོས་ལ་མི་མཁས་ཤིང་། །རྨོངས་པའི་ལྟ་བ་བརྟན་པ་ཅན།།

བསྒྱུར་བས་ཅིས་ཀྱང་མི་འགྱུར་ཏེ། །ནམ་ཡང་ཆོས་ནི་བསྲུང་མི་འགྱུར།།

འོ་ན་ཆོས་སྲུང་བར་བྱེད་པ་ཡི་དམ་པར་གྱུར་པ་དེ་ཡང་གང་ཞེ་ན། ཤེས་བྱའི་ཆོས་རྣམས་ཀུན་ལ་མ་རྨོངས་ཤིང༌། བསྲུང་བྱའི་ངོ་བོ་དང་ཐབས་ཀྱི་ཁྱད་པར་ཀུན་ཀྱང་ངེས་པར་ཤེས་པ་གང་ཡིན་པ་དེ་ནི་ཡང་དག་གསང་བའི་ཆོས་སྲུང་བ་ལ་ཤིན་ཏུ་མཁས་ཏེ་བསྟན་པ་འཛིན་པར་འགྱུར་རོ། །གང་ཟག་གང་ཞིག་ཆོས་ཀྱི་སྤང་བླང་གི་གནས་ལ་མི་མཁས་ཤིང་རྨོངས་པའི་ལྟ་བ་རྒྱུད་ལ་བསྟན་པ་ཅན་དུ་གྱུར་པས། བློ་ཐབས་ཀྱིས་བསྒྱུར་བས་སྒོ་ཅིས་བསྟན་ཀྱང་ཡང་དག་པའི་དོན་ལ་མི་འགྱུར་ཏེ་ཐ་མལ་དུ་གནས་པ་དེས་ནི། ནམས་ཀྱང་དམ་ཚིག་གསང་བ་རྣམས་དང་དམ་པའི་ཆོས་ནི་སྲུང་བར་མི་འགྱུར་ཏེ་ཆོས་ལས་ཉམས་པ་ཅན་དུ་ངེས་པར་ལྷུང་བའོ།།༼༩༢༽

གསུམ་པ་བླ་མ་བཀུར་བའི་ལོ་རྒྱུས་ལ་གསུམ་སྟེ། བླ་མའི་ལུང་མི་བཅག་ཅིང་དམ་པར་བྱ་བ། སངས་རྒྱས་བས་ཀྱང་གཉན་པར་བཀུར་བ། བླ་མ་ཉིད་སངས་རྒྱས་དང་རིགས་འཛིན་གྱིས་ཁུར་བའི་ཡོན་ཏན་གྱི་ཡུལ་དུ་ཤེས་པར་གདམས་པའོ། །དང་པོ་ནི།

གལ་ཏེ་དུས་ནི། ཞེས་པ་ནས། ལུགས་ཀྱང་དམ་པར་བྱ། །ཞེས་པའི་བར་གྱིས་བསྟན་ཏེ།

གལ་ཏེ་དུས་འདི་ཐམས་ཅད་དུ། །དམ་པ་དེ་དང་དེ་གཅིག་ན། །རྒྱུད་གཞན་སྐྱོ་ངས་སྙོམས་ལས་ཀྱིས།།

དེ་དང་འགལ་ན་ལྟུང་སྒྲིབ་རྒྱུ། །དེས་ན་དམ་པའི་ལུང་མི་བཅག །ཚད་མར་ངེས་པའི་དམ་པའི་ལུང་།།

ཐམས་ཅད་ལྡེམ་དགོངས་ཅན་ཡིན་ཏེ། །ཡུལ་དང་མཚན་མར་སྦྱོར་བ་ཡིན། །དེ་ཡང་ཇི་ལྟ་བུ་ཞེ་ན།།

ཇི་སྲིད་ལོག་སྲེད་ཅན་དག་གིས། །སུ་དག་འཇིག་རྟེན་འདྲེན་གང་ལགས། །ཀྱེ་མ་འཇིག་རྟེན་དགའ་བྱེད་ཁྱོད།།

ཐམས་ཅད་དགའ་བར་སྟོན་ཞེ་ན། །བདག་ལྟར་དགའ་བའི་དོན་བསྟན་ནས། །འབྲས་བུ་གདོན་མི་ཟ་ཤེས་ན།། ཐམས་ཅད་མཁྱེན་ཅེས་དེ་ལ་བྱ། །དེ་ལྟར་མོས་པ་གང་བསྟན་པ། །ཕ་མ་བྲམ་ཟེ་རྒྱལ་པོ་རྣམས།།

བསད་བརླག་ཡོངས་སུ་བཅོམ་བྱས་ན། །དེ་དག་རྟག་ཏུ་བདེ་བའི་མཆོག །དེ་བསྟན་དེ་ཡིས་དེ་སྤྱད་པས།།

བདེ་མཆོག་བདེ་དང་ལྡན་པ་ཡིན། །དེ་བཞིན་བཀའ་ཡི་ལྡེམ་དགོངས་ལ། །མདོ་དང་དོན་འགལ་ཆེ་ཡོད་པས།།

སྐྱབས་ཆེན་དམ་པར་བཟུང་བ་དེ། །ཚད་མ་དམ་པར་ཡིད་ཆེས་ན། །དེ་ཡི་ལུགས་ཀྱང་དམ་པར་བྱ།།

གལ་ཏེ་དུས་ནི་ཐམས་ཅད་དུ་སློབ་དཔོན་དམ་པ་དེ་དང་སློབ་པ་དེ་གཉིས་གནས་གཅིག་ཏུ་ཡུན་རིང་དུ་འགྲོགས་ན་སྐྱོན་ནི། སྒོ་གསུམ་གྱི་རྒྱུད་ཞན་ཅིང་བཀུར་གནས་ཆུང་བ་དང༌། ཞབས་ཏོག་གི་སྐྱོ་བའམ་སྐྱོ་ངས་སྐྱེས་ཏེ་སྙོམས་ལས་བྱེད་པའི་ལེ་ལོ་འབྱུང་བ་ཉིད་ཀྱིས། བླ་མ་དེ་ཡི་ཐུགས་དང་འགལ་ན་ལྟུང་བ་དང་སྒྲིབ་པའི་རྒྱུ་ཡིན་པ་དེས་ན་ཆེད་དུ་ཞབས་འབྲིང་དང་ཆོས་ཞུ་བ་མ་གཏོགས་མི་འགྲོགས་ཏེ་བླ་མ་དམ་པའི་བཀའ་ལུང་མི་གཅག་གོ །དེ་ཉིད་ཅི་སྟེ་ཞེ་ན། ཚད་མ་ངེས་པས་བླ་མ་དམ་པའི་བཀའ་ལུང་ཅི་གསུང་པ་ཐམས་ཅད་ནི་ལྡེམ་དགོངས་ཅན་ཡིན་ཏེ་བུའི་ཤེས་རབ་ཀྱི་ཡུལ་དང་འཚམས་པར་སྦྱོར་ནས་གསུངས་པ་ཡིན་པའི་ཕྱིར་རོ། །དེ་ཡང་སྔོན་གྱི་ལོ་རྒྱུས་ཀྱིས་ཡིད་ཆེས་པར་བྱ་བའི་ཕྱིར། ལྡེམ་དགོངས་སུ་བཀའ་སྩལ་བའི་ཚུལ་དེ་ཡང་ཇི་ལྟ་བུ་ཞེ་ན། ཇི་ལྟར་འཇིག་རྟེན་གྱི་ལོག་སྲེད་ཅན་གྱི་ལྟ་བ་ལ་གནས་པ་དག་གིས། ཐེག་པ་ཆེན་པོ་སྟོན་པའི་མཆོག་དམ་པ་ཞིག་ལ། འདི་སྐད་དུ་སུ་དག་འཇིག་རྟེན་པ་རྣམས་འདྲེན་པའི་དེད་དཔོན་དམ་པར་གྱུར་པ་གང་ལགས་ཞེས་ཞུས་པ། ཀྱེ་མ་ཞེས་བོས་ནས་འཇིག་རྟེན་དགའ་བར་བྱེད་པའི་སྟོན་པ་ཁྱོད་ཀྱིས། འཇིག་རྟེན་པ་ཐམས་ཅད་དགའ་བར་སྟོན་ཤེས་པ་ཉིད་ན། བདག་ལྟར་དགའ་བ་ལ་ཡང་དེ་དང་མཐུན་པའི་དོན་བསྟན་ནས། འབྲས་བུ་གདོན་མི་ཟ་བར་ཐོབ་པ་སྟོན་ཤེས་ན། ཐམས་ཅད་མཁྱེན་པ་ཞེས་ཀྱང་དེ་ལ་བྱའོ། །ཞེས་ཟེར་བ་ལ། སྟོན་པས་ལན་དུ་དེ་ལྟར་ལྡེམ་པོར་དགོངས་པའི་ཚིག་གིས། རང་ཉིད་གང་ལ་མོས་པ་དང་མཐུན་པར་འདྲེན་པའི་ཐབས་གང་བསྟན་པ་ཉིད་ཇི་ལྟ་བུ་སྙམ་པ་ལ། ཞེ་སྡང་ངམ་མ་རིག་པ་ཕ་དང་འདོད་ཆགས་མ་དང་ང་རྒྱལ་ལམ་ཚུལ་ཁྲིམས་དང་སྡོམ་པ་གཟུང་བའི་རྟོག་པའམ་གཙང་མར་འཛིན་པའི་རྣམ་རྟོག་བྲམ་ཟེ་དང་ཀུན་གཞི་བག་ཆགས་དང་བཅས་པའི་རྒྱལ་པོ་རྣམས། ཕ་མ་གཉིས་བསད་པ་དང་། བྲམ་ཟེ་རླག་པ་དང་། རྒྱལ་པོ་རྣམས་ཡོངས་སུ་བཅོམ་པར་བྱས་ཏེ་མི་དམིགས་༼༩༣༽པའི་ཤེས་རབ་ཀྱིས་སྦྱངས་ནས། དེ་ལྟ་བུའི་དོན་ལ་སྤྱོད་པ་གང་དག་རྣམས་རྟག་ཏུ་བདེ་བ་དམ་པའི་མཆོག་སངས་རྒྱས་ཀྱི་གོ་འཕང་ཉིད་ཐོབ་པ་ཡིན་ནོ། །ཞེས་ལྡེམ་དགོངས་ཀྱི་ཚིག་དེ་ལྟར་སྟོན་པས་བསྟན་ཅིང་བཀའ་སྩལ་པས། ལོག་སྲེད་ཅན་དེ་ཡིས་དོན་དེ་ལྟར་སྤྱད་པས་མཇུག་ཏུ་ཐར་པའི་གོ་འཕང་གི་བདེ་བ་མཆོག་ཐོབ་ནས་གཏན་དུ་བདེ་བ་དང་ལྡན་པ་ཡིན་ནོ། །དེ་བཞིན་དུ་བླ་མ་དམ་པའི་བཀའ་ཡི་ཚིག་ལྡེམ་དགོངས་སུ་གསུངས་པ་ལའང་། དོན་འདུས་པའི་མདོ་དང་བསྒྲུབ་ན་དགོངས་པའི་དགོས་དོན་གལ་ཆེ་བ་ཡོད་པའི་ཕྱིར། མ་བསྒྲུབ་ནའང་ཉེས་འགལ་ཆེན་པོ་ཡོད་པས་མཚན་ཉིད་བརྟགས་པའི་བླ་མ་སྐྱབས་ཆེན་དམ་པར་བཟུང་བ་དེ་ཡི་བཀའ་ལུང་ཚད་མ་ཡང་དག་པ་ཉིད་སྒྲོ་སྐུར་མེད་པའི་ངེས་དོན་དམ་པར་ཡིད་ཆེས་རྙེད་ན། དེ་ཡི་བསྟན་པའི་བཀའ་ལུང་གི་ཆོས་ཀྱི་ལུགས་ཀྱང་ངེས་པ་དམ་པར་གཟུང་ཞིང་ཉམས་སུ་བླངས་པར་བྱའོ།།

གཉིས་པ་སངས་རྒྱས་བས་ཀྱང་གཉན་པར་བཀུར་བ་ནི།

ལང་ཀའི་བདག་པོ། ཞེས་པ་ནས། དམ་པའི་ལུང་དང་འགལ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་ཡང་གང་གི་ཚེ། །གསང་བ་མཆོག་གི་བདག་པོ་དེས། །ཁོ་བོ་ལ་ནི་འདི་སྐད་བསྒོ། །སེམས་དཔའ་རྡོ་རྗེ་འཛིན་པ་ཉོན། །བསྐལ་པ་འབུམ་གྱི་སངས་རྒྱས་པས། །སློབ་དཔོན་གཉན་པར་ཤེས་པར་བྱ། །ཅི་ཕྱིར་བསྐལ་པའི་སངས་རྒྱས་རྣམས། །སློབ་དཔོན་དག་ལ་བརྟེན་ནས་འབྱུང་། །སློབ་དཔོན་དག་ལ་མ་བརྟེན་པའི།།

སངས་རྒྱས་རྣམས་ཀྱང་མི་འབྱུང་སྟེ། །འབྱུང་བར་ཡང་དག་ངས་མ་མཐོང་།།

བྱུང་ན་དམ་པའི་ཐུགས་དང་འགལ།།

དེ་ལྟར་བླ་མ་བཀུར་བའི་དོན་དེ། ཉིད་ཀྱི་ལོ་རྒྱུས་བརྗོད་པས་ཡིད་ཆེད་པར་བྱ་བའི་ཕྱིར། ལང་ཀའི་བདག་པོ། ཞེས་བོས་ནས་དེ་ཡང་སྔོན་གྱི་དུས་གང་གི་ཚེ་ན་སྟོན་པ་གསང་བ་མཆོག་གི་བདག་པོ་དེས། སྡུད་པ་པོ་ཁོ་བོ་ལ་ནི་འདི་སྐད་ཅེས་བསྒོ་སྟེ། སེམས་དཔའ་ཆེན་པོ་རྡོ་རྗེ་འཛིན་པ་ཁྱོད་ཉོན་ཅིག བླ་མ་དམ་པ་ཉིད་སངས་རྒྱས་བས་ཀྱང་ལྷག་པར་བཀུར་བའི་ཁུངས་བསྟན་ཏེ། འདི་ནི་བསྐལ་པ་ཆེན་པོ་འབུམ་གྱི་སངས་རྒྱས་བས་ཀྱང༌། སློབ་དཔོན་བཤེས་གཉེན་དམ་པ་ཉིད་གཉན་པའམ་ལྷག་པར་ཤེས་པར་བྱ་སྟེ། ཅི་ཡི་ཕྱིར་ན་འབུམ་ཕྲག་གི་བསྐལ་པའི་སངས་རྒྱས་དེ་རྣམས་ཀྱང་སློབ་དཔོན་དག་ལ་བསྟེན་ནས་འབྱུང་བ་ཁོ་ན་ཡིན་ལ། དེས་ན་སློབ་དཔོན་དག་ལ་མ་བརྟེན་པའི། སངས་རྒྱས་རྣམས་ནི་དུས་ནམས་ཀྱང་མི་འབྱུང་སྟེ། སློབ་དཔོན་མེད་ཀྱང་སངས་རྒྱས་འབྱུང་བ་ནི་ཡང་དག་པར་སྟོན་པ་ངས་ཀྱང་མ་མཐོང་ངོ༌། །གལ་ཏེ་བླ་མ་ལ་མ་བརྟེན་པར་སངས་རྒྱས་འབྱུང་བ་ཉིད་ན་བུདྡྷ་རྣམས་སམ་གསང་སྔགས་དམ་པའི་ལུང་ལས་བླ་མའི་མན་ངག་ཐོབ་ནས་འབྲས་བུར་སྦྱོར་བར་གསུངས་པ་དང་འགལ་བས་སོ།།

གསུམ་པ་བླ་མ་ཉིད་སངས་རྒྱས་དང་རིག་འཛིན་གྱིས་ཁུར་བའི་ཡོན་ཏན་གྱི་ཡུལ་དུ་ཤེས་པར་གདམས་པ་ནི།

དོན་དང་ལྡན་པའི། ཞེས་པ་ནས། དམ་པ་༼༩༤༽ཤེས་པར་གྱིས། །ཞེས་པའི་བར་གྱིས་བསྟན་ཏེ།

དོན་དང་ལྡན་པའི་དམ་པ་ལ། །དུས་གསུམ་དུས་ནི་ཐམས་ཅད་དུ། །ཕྱོགས་བཅུའི་ཞིང་ན་བཞུགས་པ་ཡི། །བདེ་གཤེགས་རྒྱལ་བ་ཀུན་བྱོན་ནས། །སྔགས་དང་འདུན་པས་ཕྱག་མཛད་དོ། །སེམས་དཔའ་ལྷ་དང་མི་དག་དང་། །དེ་བཞིན་ཀླུ་དང་གནོད་སྦྱིན་དང་། །སྲིན་པོ་ལོག་ལྟ་ཅན་དག་གི །རིག་པ་འཛིན་པ་ཀུན་འདུས་ནས། །སྤྲུལ་པའི་མེ་ཏོག་མངོན་འཐོར་ཞིང་། །བླ་མ་བཤེས་གཉེན་དམ་པ་ཁྱོད། །བདག་ཅག་རྣམས་ཀྱི་ཕ་ལགས་སོ། །བླ་མ་བཤེས་གཉེན་དམ་པ་ཁྱོད། །བདག་ཅག་རྣམས་ཀྱི་མ་ལགས་སོ། །བླ་མ་བཤེས་གཉེན་དམ་པ་ཁྱོད། །བདག་ཅག་རྣམས་ཀྱི་མགོན་ལགས་སོ། །མི་ཤེས་རྨོངས་པའི་བློ་གྲོས་མཁན། །ལམ་སྟོར་རྣམས་ཀྱི་ས་མཁན་ལགས། །མུན་ཁུང་འཁྱམས་པའི་སྒྲོན་མེ་ལགས། །གདུང་བ་སེལ་བའི་རིན་པོ་ཆེ། །ཉི་མའི་ཞལ་ལ་ཕྱག་འཚལ་འདུད། །ནམ་མཁའི་ཐུགས་ལ་ཕྱག་འཚལ་འདུད། །ཟླ་བའི་སྐུ་ལ་ཕྱག་འཚལ་འདུད། །པདྨའི་ཞབས་ལ་ཕྱག་འཚལ་འདུད། །འདི་ལྟར་དགའ་དང་གུས་པ་ཡིས། །སྔགས་དང་འདུན་པས་ཕྱག་མཛད་དོ། །དེ་ཕྱིར་རྒྱལ་བ་ཐམས་ཅད་དང་། །སེམས་དཔའ་རིག་པ་འཛིན་པ་རྣམས། །དམ་པའི་དམ་པ་ལས་བྱུང་བས། །དཔེར་ན་མ་ཡིས་བུ་བསྐྱེད་ལྟར། །དེ་བཞིན་དམ་པ་ཤེས་པར་གྱིས།།

བླ་མ་དམ་པ་ཉིད་རྣལ་འབྱོར་པ་དང་གང་ཟག་གིས་བཀུར་བར་མ་ཟད་ཕྱོགས་བཅུའི་རྒྱལ་བས་ཀྱང་འདུན་པས་བཀུར་བར་མཛད་པའི་ཕྱིར་ཕྱི་རབས་རྗེས་སུ་འཇུག་པ་རྣམས་ཀྱང་བཀུར་འོས་པར་བསྟན་ཏེ། མཚན་ཉིད་ཐམས་ཅད་ཚང་ཞིང་གསང་བའི་དབྱིངས་རྟོགས་པའི་དོན་དང་ལྡན་པའི་བླ་མ་དམ་པ་ལ། དུས་གསུམ་གྱི་དུས་ནི་ཐམས་ཅད་དུ་ཕྱོགས་བཅུའི་འཇིག་རྟེན་གྱི་ཞིང་ན་བཞུགས་པ་ཡི་བདེར་གཤེགས་རྒྱལ་བ་ཀུན་བྱོན་ནས་ཡོན་ཏན་གྱི་བསྔགས་པ་བརྗོད་པ་དང་རབ་ཏུ་འདུན་པས་ཕྱག་ཀྱང་མཛད་དོ།།

སྤྱིར་ཕྱག་ལ་མང་ཡང་འདིར་མི་ཕྱེད་པའི་ཕྱག་གོ །དེ་བཞིན་དུ་བྱང་སེམས་རིག་པ་འཛིན་པ་རྣམས་ཀྱིས་ཀྱང་བཀུར་བར་མཛད་དེ། བྱང་ཆུབ་སེམས་དཔའ་དམ་པ་ལྷ་དབང་པོ་བརྒྱ་བྱིན་དང་མི་ལི་ཙཱ་བི་ལ་སོགས་པ་དག་དང༌། དེ་བཞིན་དུ་ཀླུ་འཇོག་པོའི་བུ་དང་གནོད་སྦྱིན་ཀུ་བེ་ར་དང༌། སྲིན་པོ་ལང་ཀའི་བདག་པོ་དང་ལོག་ལྟ་ཅན་མུ་སྟེགས་དང་བྲམ་ཟེ་ལ་སོགས་པ་དག་གི་རིག་པ་འཛིན་པ་སྔགས་ཀྱི་སྣོད་དུ་གྱུར་པའི་རིགས་ཕལ་མོ་ཆེན་ཀུན་འདུས་ནས། ནམ་མཁའ་ལས་སྤྲུལ་པའི་མེ་ཏོག་ཀུན་ནས་འཐོར་ཞིང་འདི་སྐད་བརྗོད་དེ། བླ་མ་བཤེས་གཉེན་དམ་པ་ཁྱེད། །བདག་ཅག་རྣམས་ཀྱི་ཕ་ལགས་ཏེ། ཡང་དག་པའི་ཆོས་ཀྱི་ནོར་སྦྱིན་པས་སོ། །བླ་མ་བཤེས་གཉེན་དམ་པ་ཁྱོད་བདག་ཅག་རྣམས་ཀྱི་མ་ལགས་ཏེ་ཡང་དག་པའི་འཚོ་བ་སྟེར་ཞིང་སྡུག་བསྔལ་ལས་སྐྱོབ་པས་སོ། །བླ་མ་བཤེས་གཉེན་དམ་པ་ཁྱོད་བདག་ཅག་རྣམས་ཀྱི་མགོན་ལགས་ཏེ་ཡང་དག་པའི་གྲོགས་བྱེད་ཅིང་འཁོར་བའི་སྡུག་བསྔལ་ལས་གྲོལ་བས་སོ།།

དེ་བཞིན་དུ་ཡང་དག་པའི་དོན་མི་ཤེས་པས་རྨོངས་པ་རྣམས་ཀྱི་ཤེས་རྒྱུད་གྲོལ་བའི་ཐབས་སྟོན་པས་བློ་གྲོས་མཁན་དུ་གྱུར་པའོ། །འཁོར་བར་ཡང་དག་པའི་ལམ་སྟོར་བ་རྣམས་ཀྱི་ལམ་གྱི་བྱེ་བྲག་འབྱེད་དེ་ཡང་དག་པའི་ལམ་སྟོན་པའི་ས་མཁན་ལགས་སོ། །གཏི་མུག་གི་མུན་ཁུང་དུ་འཁྱམས་པ་རྣམས་ཀྱི་ཡེ་ཤེས་ཀྱི་སྣང་བ་གསལ་བར་བྱེད་པའི་སྒྲོན་མ་ལགས་སོ། །སྡུག་བསྔལ་བའམ་བཀྲེས་སྐོམ་གྱིས་གདུང་བ་སེལ་ཞིང་དགོས་འདོད་སྟེར་བའི་ཡིད་བཞིན་ཀྱི་ནོར་བུ་རིན་པོ་ཆེ་ལྟ་བུའོ། །དེ་ལྟ་བུའི་བླ་མ་དམ་པ། ཐུགས་ལ་སྒྲིབ་པ་ཡེ་ནས་བྲལ་ཞིང་ཕྱོགས་རིས་མེད་པའི་གསུང་གིས་དོན་མཛད་པས་ཉི་མའི་ཞལ་ལ་ཕྱག་༼༩༥༽འཚལ་ཏེ་འདུད་དོ། །དགོངས་པའི་ཡེ་ཤེས་མཐའ་དང་བྲལ་བས་ནམ་མཁའི་ཐུགས་ལ་ཕྱག་འཚལ་ཞིང་འདུད་དོ། །ཡོན་ཏན་གྱི་ཆ་ཤས་རྫོགས་ཤིང་དྲི་མ་མེད་པས་ཟླ་བའི་སྐུ་ལ་ཕྱག་འཚལ་ཏེ་འདུད་དོ། །འཁོར་བའི་སྐྱོན་གྱིས་མ་གོས་ཤིང་ཇི་ལྟར་སྤྱད་ཀྱང་ཉེས་པས་མི་གོས་པས་པདྨའི་ཞབས་ལ་ཕྱག་འཚལ་ཞིང་འདུད་དོ། །འདི་ལྟར་སེམས་དགའ་བ་དང་ལུས་ཀྱི་གུས་པ་དང་བཅས་པ་ཡིས། ངག་གིས་བསྔགས་པ་དང་ཆབ་གཅིག་པར་ཡིད་རབ་ཏུ་འདུན་པས་ཕྱག་འཚལ་བར་མཛད་དེ་བཀུར་བར་བྱེད་དོ། །དེ་ཡང་ཉི་ཟླ་ལ་སོགས་པ་ནི་དཔེར་སྦྱར་ཏེ། རྒྱུ་མཚན་དེ་དག་གི་ཕྱིར་ན་རྒྱལ་བ་རྫོགས་པའི་སངས་རྒྱས་ཐམས་ཅད་དང༌། བྱང་ཆུབ་སེམས་དཔའ་དང༌། རིག་པ་འཛིན་པ་ཆེན་པོ་རྣམས་ཀྱི་དམ་པའི་ཆོས་ཀྱི་མན་ངག་ཀྱང་བླ་མ་དམ་པ་ལས་བྱུང་བ་ལ་བརྟེན་ནས་ལམ་དང་འབྲས་བུའི་ཡོན་ཏན་རྫོགས་པ་ཡིན་པས། དཔེར་ན་མ་ཡིས་བུ་བསྐྱེད་པ་ལྟར་དེ་བཞིན་དུ་སངས་རྒྱས་བྱང་སེམས་རིག་འཛིན་རྣམས་བླ་མ་དམ་པ་བསྟེན་པ་ལས་འབྱུང་བ་ཡིན་པར་ཤེས་པར་གྱིས་ཤིག

བཞི་པ་ཁུར་བའི་ཡོན་ཏན་ལ་གཉིས་ཏེ། ཡོན་ཏན་དངོས་བསྟན་པ། སེམས་བསྐྱེད་པ་ལ་སོགས་པའི་ཡོན་ཏན་བཤད་པའོ། །དང་པོ་ནི།

འོག་ནས། ཆོས་ཀུན་མི་ཤེས། ཞེས་པ་ནས། མི་སྟོར་འཕེལ་སྨིན་འགྱུར། །ཞེས་པའི་བར་གྱིས་བསྟན་ཏེ།

ཆོས་ཀུན་མི་ཤེས་མི་རྟོགས་ཀྱང་། །དམ་པར་གྱུར་པའི་བླ་མ་ལ། །བཀུར་གནས་རིམ་གྲོ་ཆེར་བྱས་པས།།

འཁོར་བའི་རྒྱ་མཚོ་ལས་རྒལ་འགྱུར། །ཅི་ཕྱིར་ཞིང་རབ་ཤིན་པ་ལ། །ས་བོན་བཏབ་ན་རྒྱས་འཕེལ་བཞིན།།

བསོད་ནམས་དམ་པའི་ཞིང་རབ་ལ། །ཏིལ་འབྲུ་མི་སྟོར་འཕེལ་སྨིན་འགྱུར།།

ཆོས་ཀུན་མི་ཤེས་པས་བློ་དམན་ཞིང་རྟོགས་པ་ཆུང་བའི་བླ་མ་དམན་པ་ཡང་བཀུར་བའི་ཡོན་ཏན་ནམ། ཡང་ན་སློབ་བུས་ཆོས་ཀུན་མི་ཤེས་ཤིང་དོན་ཇི་བཞིན་དུ་མ་རྟོགས་ཀྱང་བསོད་ནམས་ཀྱི་ཞིང་དུ་ངེས་པས་དམ་པར་གྱུར་པའི་བླ་མ་ལ་བཀུར་གནས་སུ་མཆོད་དེ་རིམ་གྲོ་ཆེར་བྱས་པས་བདག་ཉིད་འཁོར་བའི་རྒྱ་མཚོ་ལས་རྒལ་ཏེ་དོན་ལ་སྦྱོར་བར་འགྱུར་རོ། །དེ་གཏན་ཚིགས་ཅི་ཡི་ཕྱིར་ཞེ་ན། དཔེར་ན་ཞིང་ས་རབ་ཏུ་གཤིན་པ་ལ་ས་བོན་བཏབ་ན་དེ་ཉིད་གོང་ནས་གོང་དུ་རྒྱས་པ་དང་མང་དུ་འཕེལ་བར་འགྱུར་བ་བཞིན་དུ། བསོད་ནམས་དམ་པའི་ཞིང་ས་རབ་ཏུ་གྱུར་པའི་བླ་མ་རྣམས་ལ་བསྙེན་བཀུར་རྒྱས་པར་བྱས་ན་ལྟ་ཡང་ཅི་སྨོས་ཐ་ན་དགེ་བའི་བྱ་བ་ཕྲ་མོ་ཏིལ་འབྲུ་ཙམ་དུ་བསགས་ན་ཡང་འབྲས་བུ་མི་སྟོར་བར་གོང་ནས་གོང་དུ་འཕེལ་ཞིང་རྒྱས་ཏེ་མཐར་རྫོགས་པའི་སངས་རྒྱས་ཀྱི་བར་དུ་ཡོངས་སུ་སྨིན་པར་འགྱུར་རོ།།

གཉིས་པ་སེམས་བསྐྱེད་པ་ལ་སོགས་པའི་ཡོན་ཏན་བཤད་པ་ནི།

འཁོར་བའི་མཐའ་ལས། ཞེས་པ་༼༩༦༽ནས། གསུངས་ནས་ཅང་མི་གསུང༌། །ཞེས་པའི་བར་གྱིས་བསྟན་ཏེ།

འཁོར་བའི་མཐའ་ལས་སྐྱོབ་པ་ཡི། །བཤེས་གཉེན་དམ་པ་བཞི་ཡོད་དེ། །ཁུངས་དང་ལུང་དང་དབང་གྱུར་ན། །བློ་གྲོས་ངེས་པའི་ཚད་ལྡན་བཞི། །དེ་ལས་གཉེན་པོ་བཞི་འབྱུང་སྟེ། །སེམས་བསྐྱེད་སྟོབས་དང་འགྱོད་སྟོབས་དང་། །ལས་ཀྱི་སྟོབས་དང་དམིགས་མེད་སྟོབས། །ལོག་པའི་སྟོབས་རྣམས་འཇོམས་པར་བྱེད། །ཆུ་བོ་བཞི་ལས་རྒལ་བར་འགྱུར། །རྒྱུད་ཀུན་ཡོངས་སུ་གྲོལ་འགྱུར་ཏེ། །དམ་པའི་དམ་པར་དེ་ཉིད་འགྱུར་།།

དེ་སྐད་གསུངས་ནས་ཅང་མི་གསུང་།།

བླ་མ་དེས་འཁོར་བའི་སྡུག་བསྔལ་གྱི་མཐའ་ལས་སྐྱོབ་པར་ངེས་པའི་ཚད་དང་ལྡན་པ་ཡི་འདྲེན་པའི་བཤེས་གཉེན་དམ་པ་ལ་མཚན་ཉིད་ཁྱད་པར་ཅན་གྱི་ཆོས་བཞི་ཡོད་དེ། མན་ངག་ཁུངས་ནས་ཁོངས་སུ་བརྒྱུད་པའི་བཀའ་ལུང་བར་མ་ཆད་པར་ཐོབ་པ་དང་ལྡན་པ་དང༌། ལུང་གི་དོན་ལ་མཁས་ཤིང་ལུང་བཞིན་མི་འགལ་བར་སྟོན་པ་དང༌། དབང་རྣམས་རིམ་པར་རྫོགས་ཤིང་དགོངས་པ་ཀློང་དུ་གྱུར་པ་དང༌། ཤེས་རབ་མཆོག་གི་བློ་གྲོས་ཀྱིས་རྒྱུད་ངེས་པར་གྲོལ་བའི་དགོངས་པ་ཚད་དུ་ཕྱིན་པ་དང་ལྡན་པ་བཞིའོ། །བླ་མ་དམ་པ་ཚད་དེ་ལྟ་བུ་དང་ལྡན་པ་བསྟེན་པ་དེ་ལས་སློབ་བུའི་སྒྲིབ་པ་འཇོམས་པའི་གཉེན་པོ་བཞི་རིམ་པར་འབྱུང་ཞིང་སྐྱེ་སྟེ། ཐོག་མར་ཐེག་པ་ཆེན་པོ་གསང་སྔགས་བླ་ན་མེད་པ་ལ་སེམས་བསྐྱེད་པའི་སྟོབས་དང༌། དེ་ལྟར་སེམས་བསྐྱེད་པས་སྔར་སྡིག་པའི་ལས་བྱས་པ་དང༌། ཐེག་པ་ཆེན་པོ་ལ་མ་ཞུགས་པ་ལའང་འགྱོད་པའི་སྟོབས་དང༌། དེ་ནས་ཐེག་པ་ཆེན་པོའི་བསླབ་པའི་མཐའ་བཅུ་ལ་འབད་རྩོལ་བྱེད་པའི་ལས་ཀྱི་སྟོབས་དང༌། འཇུག་ཏུ་དམིགས་པ་མེད་པའི་ལྟ་བས་མཉམ་པ་ཆེན་པོ་ཇི་ལྟ་བར་རྟོགས་པའི་སྟོབས་ཀྱི་མཐུས་ལོག་ལྟ་དང་སྒྲིབ་པའི་ཕུང་པོ་གསུམ་པོ་དག་གི་སྟོབས་རྣམས་འཇོམས་པར་བྱེད་དོ། །དེ་ལྟར་ཡོན་ཏན་གྱི་སྡེབས་བཞིའི་ནུས་པས་སྐྱེ་རྒ་ན་འཆིའི་ཆུ་བོ་བཞི་ལས་རབ་ཏུ་རྒལ་བར་འགྱུར་ཞིང་རྒྱུད་སྡེའི་དོན་ཀུན་ལ་མཁས་པས་ཤེས་པའི་རྒྱུད་ཡོངས་སུ་གྲོལ་བར་འགྱུར་ཏེ། གསང་ཆེན་དམ་པའི་ཆོས་ཀྱི་དབང་ཕྱུག་དམ་པར་སློབ་བུ་དེ་ཉིད་ངེས་པར་འགྱུར་རོ། །དེ་སྐད་སྟོན་པ་གསང་བ་མཆོག་གི་བདག་པོས་སྔོན་བདག་ལ་བཀའ་སྩལ་ཞིང་གསུངས་ནས་ཅང་མི་གསུང་བར་བཞུགས་སོ། །ཞེས་པའི་དོན་ཏོ།།

ལྔ་པ་བཀུར་ཐབས་རྒྱས་པར་བསྟན་པ་ལ་གཉིས་ཏེ། བྱ་བ་མ་ཡིན་པའི་ཆ་དོར་ལ་བྱ་བའི་ཆ་ནས་བཀུར་བ། མཉེས་པའི་ཡོ་བྱད་བརྒྱད་འཕུལ་བའོ། །དང་པོ་ལ་བརྒྱད་ཕྲག་བཞི་སྟེ། བརྒྱད་ཕྲག་དང་པོ་ལ་བརྒྱད་དེ། ལྷ་ཕྱག་འཚལ་ཞིང་ཞབས་ལ་སྤྱི་བོས་གཏུག་པར་བྱ་བ། བླ་མ་དང་མཁས་པ་གཞན་ལ་སྲི་ཞུ་བྱ་བ། བཀའ་ལུང་གནང་བར་ཞེ་སས་ལན་བླན་པར་བྱ་བ། གུས་པས་གྱོང་ཁེང་མེད་པར་བྱ་བ། བག་དང་ལྡན་ཞིང་གྱ་གྱུ་མེད་པར་བྱ་བ། བཟང་སྤྱོད་བྱ་ཞིང་མཐུན་པས་གོ་དབྱེ་བར་༼༩༧༽བྱ་བ། སྤྱན་སྔར་ངག་འཁྱལ་ལ་སོགས་པ་མི་བྱ་བ། བཀའ་བཀྱོན་པའི་ལན་མི་བླན་ཅིང་ཆོས་གསུམ་སྤངས་པར་བྱ་བའོ། །དང་པོ་ནི།

དེས་ན་ལང་ཀའི། ཞེས་པ་ནས། སྤྱི་བོས་གཏུག་པར་བྱ། །ཞེས་པའི་བར་གྱིས་བསྟན་ཏེ།

དེས་ན་ལངྐའི་བདག་པོས་འདིར། །བློ་ལྡན་དགའ་དང་གུས་པ་ཡིས། །དམ་པར་གྱུར་དེ་འཚལ་རྣམས་ལ།།

འདུན་པར་ལན་གསུམ་གུས་བྱས་ཏེ། །ཞབས་ལ་སྤྱི་བོས་གཏུག་པར་བྱ།།

བླ་མ་བཀུར་ཞིང་བསྲུང་བའི་ཐབས་ཉིད་གང་ཞེ་ན། བཤད་པ་དེ་ལྟ་བུའི་དགོས་པ་ཡོད་པ་དེས་ན་ལང་ཀའི་བདག་པོ། ཞེས་བོས་ནས། འདིར་ཡང་སློབ་བུ་བློ་དང་ལྡན་པས་ཡིད་དགའ་བ་དང་ལྡན་ཞིང་ལུས་གུས་པ་དང་བཅས་པ་ཡིས་དངོས་སམ་ཡིད་ཀྱིས་ཀྱང་དམིགས་ཏེ། བདག་རང་ཉིད་ཀྱི་བླ་མ་དམ་པར་གྱུར་ཏོ་འཚལ་གྱི་མཁས་ཤིང་རྟོགས་པ་དང་ལྡན་པ་རྣམས་ལ། གང་དུ་མཇལ་བའི་འདུན་སར་དམ་པ་བཞུགས་པ་ལ་ལྷ་ཕྱག་ལན་གསུམ་གུས་པས་འཚལ་བར་བྱས་ཏེ། དབང་གིས་དུས་སོགས་སུ་ཞབས་ལ་སྤྱི་བོས་གཏུག་སྟེ་བསྙེན་པར་བྱའོ།།

གཉིས་པ་བླ་མ་དང་མཁས་པ་གཞན་ལ་སྲི་ཞུ་བྱ་བ་ནི།

དམ་པའམ་ཡང་ན། ཞེས་པ་ནས། སྲི་ཞུའི་འདུན་པ་བྱ། །ཞེས་པའི་བར་གྱིས་བསྟན་ཏེ།

དམ་པའམ་ཡང་ན་མ་ངེས་རྣམས། །དམ་པའི་ཆོས་སོགས་འདུས་བྱས་ཏེ།།

ཁ་ན་མ་ཐོ་གཞོམ་བྱའི་ཕྱིར། །འཇིག་རྟེན་སྲིད་ཞུའི་འདུན་པ་བྱ།།

རང་གི་བླ་མ་དམ་པའམ་ཡང་ན་རང་གི་བླ་མར་མ་ངེས་ཀྱང་སྤྱིར་དགེ་བའི་བཤེས་གཉེན་མཁས་པ་གཞན་རྣམས་ཀྱིས་དམ་པའི་ཆོས་སོགས་བཀའ་སྩལ་པའི་གྲྭ་ཆེན་པོ་སོགས་སུ་མང་པོ་འདུས་པའི་ཚེ་བླ་མ་དེ་ལ་འདུན་པར་བྱས་ཏེ། བཅས་པ་དང་རང་བཞིན་གྱི་ཁ་ན་མ་ཐོ་བ་བསལ་ཞིང་གཞོམ་བྱའི་ཞེས་བྱ་བའི་དགོས་ཆེད་ཀྱི་ཕྱིར་དུ་འཇིག་རྟེན་གྱི་སྲི་ཞུའི་བཀུར་སྟི་ཆེན་པོས་འདུན་པ་བྱ་ཞིང་གུས་པ་བསྟེན་ནོ།།

གསུམ་པ་བཀའ་ལུང་གནང་བར་ཞེ་སས་ལན་བླན་པར་བྱ་བ་ནི།

ལུང་བྱུང་གང་རྨེད། ཞེས་པ་ནས། རྣམས་ནི་ཅི་བདེར་བླན། །ཞེས་པའི་བར་གྱིས་བསྟན་ཏེ།

ལུང་བྱུང་གང་རྨེད་འཕེལ་གཏམ་ལ། །ཡང་དུ་འདུན་པས་འདུན་ཐབ་སྦྱར།།

སྲིད་ཞུའི་སྒྲ་ཡིས་མཚམས་བཟུང་སྟེ། །གང་དེ་རྣམས་ནི་ཅི་བདེར་གླན།།

བླ་མ་དམ་པའི་བཀའ་ལུང་གི་ཚིག་བྱུང་ནས་བདག་ལ་གླེང་བསླང་བའི་ཚུལ་གྱིས་གང་རྨེད་ཅིང་འབེལ་གཏམ་མང་པོ་བླ་མ་དང་མོལ་བའི་ཚེ། དེ་ལ་ཡང་ནས་ཡང་དུ་འདུན་པས་ཞེས་བྱ་བ་དང༌། འདུན་པའི་ཐབས་ཀྱི་སྤྱན་ཕྱག་དང་སྦྱར་ཏེ་སྲི་ཞུ་དང་ལྡན་པའི་ཞེ་སའི་སྒྲ་ཡིས་བཀའ་ལུང་ལ་བདག་གིས་ལན་སྨྲ་བའི་མཚམས་བཟུང་སྟེ། གང་བཀའ་སྩལ་པ་དེ་རྣམས་ལ་ནི་བླ་མ་དགྱེས་པའི་ལན་ཅི་བདེར་ཞུས་ཏེ་ངག་འཇམ་པོས་བླན་པར་བྱ་བ་ཉིད་དོ།།

བཞི་པ་གུས་པས་གྱོང་ཁེངས་མེད་པར་བྱ་བ་ནི།

བདེ་དང་བླང་བ། ཞེས་པ་ནས། མེད་པར་ནན་ཏན་བྱ། །ཞེས་པའི་བར་གྱིས་བསྟན་ཏེ།

བདེ་དང་བླང་བ་ལངས་པ་དང་། །དོན་མེད་ཞུ་སོགས་སྐབས་རྣམས་སུ།།

རྒྱུད་གཉེན་སྲིད་ཞུ་གུས་ལྡན་པས། །གྱོང་ཁེངས་ མེད་པར་ནན་ཏན་བྱ།།

བདག་ཉིད་བདེ་བར་བཟའ་བཏུང་ལ་ལོངས་སྤྱོད་པ ་དང༌། བླ་མའི་ཕྱག་གནས་རྫས་བླང་བའམ་ལེན་པ་དང་བདག་ལངས་ཏེ་འགྲོ་བ་༼༩༨༽དང༌། དོན་དང་ལྡན་པའི་ལས་བྱེད་པ་དང༌། ཞུ་བ་འབུལ་བ་དང་ཆོས་ཞུ་བ་ལ་སོགས་པའི་སྐབས་རྣམས་སུ། རང་རྒྱུད་མཉེན་ཅིང་དུལ་བའི་སྒོ་ནས་བླ་མའི་ཐུགས་རྒྱུད་མཉེས་པའི་སྲི་ཞུ་དང་ལེགས་པར་གུས་པ་ཉིད་དང་ལྡན་པས་བསྙེན་པར་བྱ་བ་ཡང་ང་རྒྱལ་རྣམས་ཀྱི་གྱོང་ཁེངས་མེད་པར་ཤིན་ཏུ་ནན་ཏན་དུ་བྱའོ།།

ལྔ་པ་བག་དང་ལྡན་ཞིང་གྱ་གྱུ་མེད་པར་བྱ་བ་ནི།

ཀུན་ནས་གཟེམ་མདོག ཅེས་པ་ནས། རྡོ་རྗེར་དེ་ལྟུང་འགྱུར། །ཞེས་པའི་བར་གྱིས་བསྟན་ཏེ།

ཀུན་ནས་ཟོ་མདོག་བག་ལ་གནས། །གསོང་པོར་སྨྲ་ཞིང་གྱ་གྱུ་མེད། །ཅི་ཕྱིར་དམ་པར་གྱུར་པ་ལ།།

མ་ངེས་གྱ་གྱུར་ལས་བྱས་པས། །དམ་པར་གྱུར་པ་ཀུན་བསླུས་ཏེ། །དམྱལ་བ་རྡོ་རྗེར་དེ་ལྟུང་འགྱུར།།

སྒོ་གསུམ་ཀུན་ནས་བླ་མ་ལ་གཟེམ་མདོག་གམ་ཟོན་བག་ཆེ་བས་བག་དང་ལྡན་པ་ལ་གནས་པར་བྱ་བ་དང༌། གཡོ་སྒྱུ་མེད་པར་ངག་གསོང་པོར་སྨྲ་ཞིང་སེམས་ལ་གྱ་གྱུ་མེད་པས་སྤྱོད་པ་དག་པར་བྱ་དགོས་སོ། །དེ་ཅི་ཡི་ཕྱིར་ན་བཀུར་བར་མ་བྱས་པའི་སྐྱོན་གལ་ཏེ་བླ་མ་དམ་པར་གྱུར་པ་ལ་ཚོད་ཡོད་ཙམ་དུ་མ་ངེས་གྱ་གྱུའི་ལས་བྱས་པས་ཕྱོགས་བཅུའི་སངས་རྒྱས་སོགས་དམ་པར་གྱུར་པ་ཀུན་བསླུས་ཏེ། རྣམ་སྨིན་དམྱལ་བ་རྡོ་རྗེར་དེ་ཉིད་ལྟུང་བར་འགྱུར་རོ།།

དྲུག་པ་བཟང་སྤྱོད་བྱ་ཞིང་མཐུན་པས་གོ་དབྱེ་བར་བྱ་བ་ནི།

བརྩོན་དང་འགྲུས་ལྡན། ཞེས་པ་ནས། དག་པའི་གོ་རྣམས་དབྱེ། །ཞེས་པའི་བར་གྱིས་བསྟན་ཏེ།

བརྩོན་དང་འགྲུས་ལྡན་ངང་ཚུལ་བཟང་། །སྡིག་ཅིང་གསང་ཐུབ་སྤྱོད་པ་དག།

ཡ་བག་བཞིན་བཟང་མཛེས་ཐབས་ལྡན། །སྒོ་གསུམ་བཟང་སྤྱོད་མཐའ་གསུམ་བསྡམ།།

དམ་པ་ཉིད་དང་མཐུན་ཞིང་སྤྱོད། །གསལ་ལ་དག་པས་གོ་རྣམས་དབྱེ།།

སློབ་བུ་རང་གི་མཚན་ཉིད་ཇི་ལྟ་བུ་སྙམ་པ་ལ། བརྩོན་པ་དང་འགྲུས་པ་ཆེན་པོ་དང་ལྡན་པ་དང་ངང་རིང་བ་དང༌། ཚུལ་དུ་ཤིས་པ་དང༌། རང་བཞིན་བཟང་བ་དང༌། ཁོང་བརྡིག་ཅིང་བརྟན་པ་དང༌། གསང་ཐུབ་པ་དང༌། སྤྱོད་པ་དག་པ་དང༌། ཟོན་ཆེ་ཞིང་ཡ་བག་དང་ལྡན་པ་དང་ལུས་ཀྱི་བཞིན་ཁྲོ་གཉེར་མེད་པར་བཟང་བ་དང༌། ལེགས་པར་སྤྱོད་ཅིང་འཛུམ་པའི་མཛེས་ཐབས་དང་ལྡན་པ་དང༌། སྒོ་གསུམ་བཟང་པོར་སྤྱོད་པ་དང༌། དེའི་ཉེས་པ་མ་དག་པའི་མཐའ་ཡི་ངན་སྤྱོད་གསུམ་བསྡམས་པ་དང༌། བླ་མ་དམ་པ་ཉིད་དང་ཇི་ལྟར་མཐུན་པ་བཞིན་དུ་ལེགས་པར་སྤྱོད་དེ། ཚིག་དང་སྤྱད་པ་གསལ་ལ་དག་པས་དོན་དང་ལྡན་པའི་བྱ་བ་དག་གི་སྒོ་རྣམས་དབྱེ་ཞིང་ཕྱི་ནང་གི་བརྡ་དོན་ཕྲད་པར་བྱེད་པའོ།།

བདུན་པ་སྤྱན་སྔར་ངག་འཁྱལ་ལ་སོགས་པ་མི་བྱ་བ་ནི།

དམ་པའི་ནང་ན། ཞེས་པ་ནས། སྨོད་པ་ཡོང་མི་བྱ། །ཞེས་པའི་བར་གྱིས་བསྟན་ཏེ།

དམ་པའི་ནང་ན་བདེར་འདུག་ཚེ། །ཀུན་གྱི་ཚིག་ལམ་ལམ་མི་འབྱུང་།།

གང་དག་བཟང་དང་ངན་སྤྱོད་པ། །འཐིང་སླད་སྨོད་པ་ཡོངས་མི་བྱ།།

བླ་མ་དམ་པའི་སྤྱན་སྔར་རང་ཉིད་དམ་འཁོར་གྱི་ནང་ན་བདེར་ཞེས་བདེ་བར་འདུག་པའི་ཚེ་ན། ངག་འཆལ་བ་ཀུན་གྱི་ཚིག་གི་ལམ་མི་སྨྲ་བར་འཁྱལ་བའི་ཚིག་གི་ལམ་མི་དབྱུང་བ་དང༌། བླ་མའི་མཛད་སྤྱོད་གང་དག་བཟང་བ་དང་ངན་༼༩༩༽སྤྱོད་དུ་སྣང་བ་གང་ཡང་རུང་བ་ལ་ཡང་ཀུ་རེ་ཐིང་སླད་ཙམ་དུའང་སྨོད་པ་ཡོང་ཡེ་མི་བྱ་ཞིང་བཀའ་ལ་གུས་པ་རྟེན་ནོ།།

བརྒྱད་པ་བཀའ་བཀྱོན་པའི་ལན་མི་བླན་ཅིང་ཆོས་གསུམ་སྤང་བར་བྱ་བ་ནི།

བདག་ལ་བཟང་དང༌། ཞེས་པ་ནས། ཚིག་རྩུབ་འཁྱལ་མི་སྨྲ། །ཞེས་པའི་བར་གྱིས་བསྟན་ཏེ།

བདག་ལ་བཟང་དང་ངན་སྤྱོད་ཅིང་། །ཀུན་མཐོང་ཀུན་བརྗོད་སྒྲོ་སྐུར་དང་།།

གང་དག་ཚིག་ལམ་འདྲེན་འདོད་ན། །ཚིག་ལམ་བཅད་ན་བདེ་བ་ཐོབ།།

དམ་པའི་ཡུལ་ན་གནས་རྣམས་སུ། །ཁོང་ཁྲོ་ཚིག་རྩུབ་འཁྱལ་མི་སྨྲ།།

བླ་མས་བདག་ལ་བཀའ་ལུང་བཟང་པོ་དང་ངན་པ་ཅི་བརྗོད་ཅིང་གསུང་བ་དང༌། དུས་ཀུན་ཏུ་ཀུ་རེ་བརླང་པོ་དང་མཐོང་བའི་ཡུལ་དུ་བདག་གི་མཚང་ཀུན་བརྗོད་ཅིང་སྒྲོ་འདོགས་དང་སྐུར་འདེབས་ཅི་ཞིག་གསུངས་ཀྱང་ངན་དུ་མི་སེམས་ཤིང་ལོག་པར་མ་བལྟས་པ་དང༌། གང་བླ་མ་དག་གིས་བདག་ལ་ཚིག་གི་རྩོད་པའི་ལམ་གྱིས་བཀྱོན་ཚིག་མང་པོ་ཡ་ང་བ་འདྲེན་པར་འདོད་པ་ན་ཡང༌། དེ་དག་གི་ལན་མ་སྨྲས་པར་ཚིག་ལམ་བཅད་ནས་བཟོད་པར་བྱས་ན་བདེ་མཆོག་ཐར་པའི་གོ་འཕང་དམ་པ་འཐོབ་བོ། །ཡང་ན་དལ་གྱིས་ཐུགས་དང་འཐད་པའི་ལན་གདབ་གསུང༌། བླ་མ་དམ་པའི་ཡུལ་ལམ་སྤྱན་སྔ་ན་གནས་པ་གཞན་རྣམས་སུ་ལ་ཡང༌། ཁོང་ཁྲོ་བ་དང་ཚིག་རྩུབ་མོ་དང་ངག་འཁྱལ་བ་ནམ་ཡང་མི་སྨྲ་བར་ཞི་བའི་སྤྱོད་ལམ་བྱའོ།།

བརྒྱད་ཕྲག་གཉིས་པ་ལ་བརྒྱད་དེ། ལུས་ངག་བག་ཡངས་ཀྱི་སྤྱོད་པ་མི་བྱ་བ། ཕོད་ལྕོགས་ལ་སོགས་མི་བྱ་བ། ཡོན་དབུལ་བར་བྱ་བ། སྐབས་བཞི་མ་གཏོགས་པར་གནས་གཅིག་ཏུ་མི་འདུག་ཅིང་ཞབས་དྲུང་ལས་མི་གཡེལ་བར་བྱ་བ། གྲིབ་མ་ལ་སོགས་པ་འགོམ་པར་མི་བྱ་བ། བཀའ་ལུང་མིང་གིས་བསྒྲུབ་པར་བྱ་བ། དཀོར་དང་ཉེ་འཁོར་ལ་སོགས་བསྲུང་བར་བྱ་བ། ཆེ་ཐབས་ཀྱི་སྤྱོད་པ་གང་ཡང་མི་བྱ་བའོ། །དང་པོ་ནི།

བག་ཡངས་ཚུལ་གྱིས། ཞེས་པ་ནས། མེད་པར་སྨྲ་མི་བྱ། །ཞེས་པའི་བར་གྱིས་བསྟན་ཏེ།

བག་ཡངས་ཚུལ་གྱིས་བྱ་བ་མིན། །ཚུལ་མིན་ཚུལ་དང་མི་ལྡན་པའི། །ཉམ་ང་མེད་པར་སྨྲ་མི་བྱ།།

བླ་མའི་སྤྱན་སྔར་སྒོ་གསུམ་གྱི་སྤྱོད་པ་གཉེན་པོ་མེད་པར་བག་ཡངས་ཟོན་མེད་ཀྱི་ཚུལ་གྱིས་གང་དགའ་དགར་བྱ་བ་མིན་ཞིང༌། བཟང་པོའི་ཚུལ་མེད་པའམ་ཚུལ་དང་མི་ལྡན་པའི་སྤྱོད་པ་ཡིས་བླ་མ་ལ་གཉན་ཞིང་ལྕི་བའི་སེམས་དང་བྲལ་བས། ཉམ་ང་དང་བག་ཚ་བ་མེད་པར་གར་ཐོད་ཐོད་དུ་མ་རབས་ཀྱི་སྤྱོད་པ་དང་བརྗོད་པ་མང་པོ་སྨྲ་བར་མི་བྱའོ།།

གཉིས་པ་ཕོད་ལྕོགས་ལ་སོགས་མི་བྱ་བ་ནི།

ཕོད་དང་ལྕོགས་དང་། ཞེས་པ་ནས། གཅད་པར་མི་བྱའོ། །ཞེས་པའི་བར་གྱིས་བསྟན་ཏེ།

ཕོད་དང་ལྕོགས་དང་གང་མཐོང་དང་། །སྟོང་ཕྱིར་རྔོམ་ལས་བསོག་མི་བྱ།།

གཞན་ལ་ཁྱོད་ཀྱིས་བསད་པའི་ཚིག །གང་རིས་སྤྱོད་པར་མི་བྱའོ།།

དེ་བཞིན་དུ་བླ་མའི་སྤྱན་སྔར་ཕོད་ཚད་དམ་ཕོ་ཚོད་ཆེན་པོ་ཅིའང་མི་བྱ་བ་དང༌། ལྕོགས་ཚད་དམ་ལྕོགས་སུ་རེ་བ་མི་བྱ་བ་དང༌། གང་རང་མཐོང་༼༡༠༠༽སྒེ་རུའི་ལས་མི་བྱ་བ་དང༌། རང་བསྟོད་དང༌། སྒེག་འཕྱོར་དང༌། རྔོམ་དང་ཁྱད་ཚིག་ལ་སོགས་པ་གཏན་ནས་མི་བྱ་བ་དང༌། གྲོགས་གཞན་ལ་ཁྱད་ཀྱིས་གསད་པའི་ཚིག་གིས་ཁྱོད་དང་ང་ཞེས་གང་བཟང་ངན་རིས་སུ་བཅད་པའི་ཚིག་ཟུར་ཙམ་ཡང་སྨྲ་བར་མི་བྱའོ།།

གསུམ་པ་ཡོན་དབུལ་བར་བྱ་བ་ནི།

དམ་པའི་གནས་སུ། ཞེས་པ་ནས། འདེབས་པར་མི་འགྱུར་རོ། །ཞེས་པའི་བར་གྱིས་བསྟན་ཏེ།

དམ་པའི་གནས་སུ་གྱུར་པ་ལ། །རྗེས་སུ་རིགས་དང་འཐད་པ་ཡི། །ནོར་གྱི་དབྱིག་དང་ན་བཟའི་མཆོག།

རྩི་མཆོག་འཚོ་བ་ཟས་སོགས་རྣམས། །དབུལ་དང་གསོལ་བས་མཉེས་པར་བྱ། །དེས་ནི་ནད་དང་དབུལ་ལ་སོགས། །བཀྲེས་དང་ཚ་བའི་སྡུག་བསྔལ་གྱིས། །ནམས་ཀྱང་འདེབས་པར་མི་འགྱུར་རོ།།

དམ་པའི་བླ་མ་ཚོགས་གསོག་པའི་ཞིང་དང་མཆོད་པའི་གནས་སུ་གྱུར་པ་ལ། དང་པོ་ཞུ་བ་དང་རྗེས་ཀྱི་གཏང་རག་གཉིས་ཀའི་སྐབས་སུ་ཡི་དམ་ལྷའི་རིགས་དང་མཐུན་པའམ་ཐུགས་ལ་འཐད་པའི་ཡོན་འབུལ་ཏེ། རིན་པོ་ཆེའི་ནོར་གྱི་དབྱིག་བཟང་ལ་རིན་ཐང་ཆེ་བ་དང༌། ན་བཟའི་མཆོག་སྣ་ཚོགས་དང༌། རྩི་ཡི་མཆོག་དམ་པ་དང༌། འཚོ་བ་བཟང་པོའི་ཟས་མཆོག་ལ་སོགས་པ་རྣམས་ཀྱི་བཟའ་བཏུང་གིས་ཞབས་ཏོག་བྱས་ཏེ་ནོར་དབྱིག་དབུལ་བ་དང༌། ན་བཟའ་དང་ཞལ་ཟས་སོགས་གསོལ་བས་མཉེས་པར་བྱའོ། །དེ་ལྟར་ལེགས་པར་ཕུལ་བའི་ཕན་ཡོན་ནམ་ཡོན་ཏན་དེས་ནི། རྩི་མཆོག་ཕུལ་བས་ནད་དང༌། ནོར་དབྱིག་ཕུལ་བས་དབུལ་བ་ལ་སོགས་པ་དང༌། འཚོ་བ་ཕུལ་བས་བཀྲེས་སྐོམ་དང༌། ན་བཟའ་ཕུལ་བས་ཚ་བ་དང་གྲང་བའི་སྡུག་བསྔལ་གྱིས་ནམས་ཀྱང་འདེབས་པ་དང་གནོད་པར་མི་འགྱུར་རོ།།

བཞི་པ་སྐབས་བཞི་མ་གཏོགས་པར་གནས་གཅིག་ཏུ་མི་འདུག་ཅིང་ཞབས་དྲུང་ལས་མི་གཡེལ་བར་བྱ་བ་ནི།

ཞུ་བ་དབུལ་བ། ཞེས་པ་ནས། མ་སྤྱད་ཉེས་བྱས་སོ། །ཞེས་པའི་བར་གྱིས་བསྟན་ཏེ།

ཞུ་བ་དབུལ་བ་ནོད་པ་དང་། །ལུང་བྱུང་འདུན་པར་འདུག་པ་དང་། །དམ་པ་སྤྱོད་པ་མ་གཏོགས་པ།།

དམ་པ་གང་དག་གནས་གཅིག་ཏུ། །ཞ་འབྲིང་མ་གཏོགས་ནམས་ཀྱང་མིན། །འདི་ལྟར་མ་སྤྱད་ཉེས་བྱས་སོ།།

ཆོས་ཞུ་བ་དང་ཡོན་དབུལ་བ་གང་གི་དུས་དང༌། གདམས་ངག་གི་བཀའ་དྲིན་ནོད་པ་ཉིད་ཀྱི་དུས་དང༌། སྤྱན་སྔར་མཆིས་ཤིག་པར་བཀའ་ལུང་བྱུང་ནས་འདུན་པར་འདུག་པ་ཉིད་ཀྱི་དུས་དང༌། དབང་དང་སྒྲུབ་པ་ཟབ་མོའི་དམ་པའི་སྤྱོད་པ་བྱེད་པའི་དུས་བཞི་མ་གཏོགས་པ་གཞན་དུ་བླ་མ་དམ་པ་གང་དང་རང་བཞིན་གྱི་གནས་གཅིག་ཏུ་ཞབས་འབྲིང་བྱེད་པ་མ་གཏོགས་དུས་ནམས་ཀྱང་ལྷན་ཅིག་ཏུ་འདུག་པ་མིན་ནོ། །ཚུལ་འདི་ལྟར་མ་སྤྱད་ན་ཉམས་པའི་ཉེས་བྱས་ཀྱིས་ཕོག་པར་འགྱུར་བས་སོ།།

ལྔ་པ་གྲིབ་མ་ལ་སོགས་པ་འགོམ་པར་མི་བྱ་བ་ནི།

སྐུ་ཡི་གྲིབ་མ། ཞེས་པ་ནས། འགོམ་པར་བྱ་བ་མིན། །ཞེས་པའི་བར་གྱིས་བསྟན་ཏེ།

སྐུ་ཡི་གྲིབ་མ་མི་འགོམ་ཞིང་། །ཞབས་རྗེས་བརླམ་པར་མི་བྱའོ།།

ན་བཟའ་ཕྱག་གདན་རྟེན་ལ་སོགས། །ནམས་ཀྱང་བགོ་བར་བྱ་བ་མིན།།

བླ་མ་དམ་པའི་སྐུ་ཡི་གྲིབ་མ་མི་འགོམ་ཞིང༌། ཞབས་རྗེས་བརླམ་པར་མི་བྱའོ། །དེ་བཞིན་དུ་ན་བཟའ་དང༌། འཆགས་ས་གདན་དང་བཅས་པའམ་ཆགས་གདན་ཉིད་དང༌། བཞུགས་༼༡༠༡༽སའི་སྟེགས་རྟེན་དང་ལྔ་ལ་སོགས་པ་རྣམས་དུས་ནམས་ཀྱང་འགོམ་པར་བྱ་བ་མིན་ནོ།།

དྲུག་པ་བཀའ་ལུང་མིང་གིས་བསྒྲུབ་པར་བྱ་བ་ནི།

དམ་པའི་ལུང་བྱུང༌། ཞེས་པ་ནས། མེད་པར་མནས་དོར་རོ། །ཞེས་པའི་བར་གྱིས་བསྟན་ཏེ།

དམ་པའི་ལུང་བྱུང་མིང་གིས་བསྒྲུབ། །མི་ལྕོགས་མ་ཡིན་མ་ལྕོགས་ན། །སྒྱུ་གསོག་མེད་པར་མནས་དོར་རོ།།

བླ་མ་དམ་པའི་བྱ་བ་བཅོལ་བའི་ལུང་གི་བཀའ་ཤོ་བྱུང་ན་ཐོག་མར་མིང་གིས་བསྒྲུབ་ནས་ཁ་ཡིས་མི་ལྕོགས་ཞུ་བ་མ་ཡིན་པར་དེ་སྙིང་ནས་ཞེ་ཐག་པས་ལུས་སྲོག་དང་བསྡོས་ལ་ཅི་འགྲུབ་བྱའོ། །རྒྱ་ལ་དེ་ཡོངས་ཞིག་ཀྱང་རྩལ་སྟོབས་རང་གིས་མ་ལྕོགས་པའམ་མ་ཁྱོགས་པ་ཞིག་ན། སྤྱན་སྔར་གཡོ་སྒྱུ་དང་གསོག་གསོབ་མེད་པར་མནས་དོར་ཏེ་དན་དཔང་འདོར་རོ།།

བདུན་པ་དཀོར་དང་ཉེ་འཁོར་ལ་སོགས་བསྲུང་བར་བྱ་བ་ནི།

དམ་པའི་དཀོར་རྣམས། ཞེས་པ་ནས། མཉམ་པའི་སེམས་ཀྱི་བལྟ། །ཞེས་བར་གྱིས་བསྟན་ཏེ།

དམ་པའི་དཀོར་རྣམས་སྲོག་བཞིན་བསྲུང་། །དེ་ཡི་ཉེས་གནས་དམ་པ་བཞིན།།

དེ་ཡི་འཁོར་གཡོག་ཉེ་དུ་བཞིན། །རྟག་ཏུ་མཉམ་པའི་སེམས་ཀྱིས་བལྟ།།

བླ་མ་དམ་པའི་དཀོར་རྣམས་ལ་ཏིལ་གྱི་ཕུབ་མ་ཙམ་ཡང་མི་འབགས་པར་རང་སྲོག་བཞིན་དུ་བསྲུང་བ་དང༌། བླ་མ་དེ་ཡི་ཉེ་དྲུང་ན་གནས་པའི་སྣག་གི་གཉེན་མཚམས་རྣམས་དང༌། བཙུན་མོ་ཅན་ཡིན་ན་གཟུངས་མ་དང་བཅས་པ་སོགས་ཀྱང་དམ་པ་ཉིད་དང་འདྲ་བ་བཞིན་དུ་བལྟའོ། །བླ་མ་དེ་ཡི་འཁོར་གཡོག་རྣམས་ལའང་ཉེ་དུ་བཞིན་དུ་བལྟ་ཞིང་བཀུར་བར་བྱ་ལ། མདོར་ན་བླ་མའི་ཉེ་འཁོར་དུ་གཏོགས་པ་ཐམས་ཅད་ཀུན་དུས་རྟག་པ་རྒྱུན་དུ་བླ་མ་ཉིད་དང་མཉམ་པའི་སེམས་ཀྱིས་འདྲ་བ་ཙམ་དུ་བལྟ་ཞིང་བཀུར་བར་བྱའོ།།

བརྒྱད་པ་ཆེ་ཐབས་ཀྱི་སྤྱོད་པ་གང་ཡང་མི་བྱ་བ་ནི།

ཁྲི་མལ་སྟན་བདེ། ཞེས་པ་ནས། ལུས་རྟེན་དེ་བཞིན་བསྟོད། །ཅེས་པའི་བར་གྱིས་བསྟན་ཏེ།

ཁྲི་ལམ་གཏན་བདེ་བླ་མའི་ཐབས། །མི་གུས་ལ་སོགས་མི་ཚུལ་རྣམས། །དམ་པའི་ཐད་དུ་ཡོང་མི་མཛེས།།

བྱས་ན་སྲི་ཞུ་དམ་ཚིག་ཉམས། །མགོ་ལ་ཟེའུ་ལྡིར་གདུགས་ཐོགས་ནས། །ལག་རྟེན་ལུས་རྟེན་དེ་བཞིན་སྟོང་།།

བླ་མའི་སྤྱན་སྔར་ཁྲི་དང་མལ་སྟན་བདེ་བ་ལ་བླ་མའི་བཞུགས་ཐབས་ཁོ་ན་ལྟར་མི་གུས་པའི་སྤྱོད་པ་ལ་སོགས་པ་དང་མི་ཆེན་པོའི་ཚུལ་ལྟར་རིགས་པ་མ་ཡིན་ཚུགས་འཛིན་པ་དང་བག་མེད་པའི་ལས་རྣམས་དམ་པའི་ཐད་དུ་ཡོང་ཡེ་མི་མཛེས་པས་ནམ་ཡང་བྱ་བར་མི་རུང་ངོ༌། །གལ་ཏེ་དེ་དག་བྱས་ན་སྲི་ཞུའི་དམ་ཚིག་ཉམས་པས་ལྟུང་བ་ཆེའོ། །བླ་མའི་སྤྱན་སྔར་རང་གི་མགོ་ལ་ཟེའུ་ལྡིར་རམ་ཞྭ་ཆེད་དུ་མི་བགོ་བ་དང་ཐོད་བཅིངས་པར་མི་བྱ་བའོ། །དེ་བཞིན་དུ་རང་ལ་བཀུར་བའི་གདུགས་ཐོགས་པར་མི་བྱ་བ་དང༌། འཕྲལ་དུ་ལག་པ་ལུས་ལ་རྟེན་ཏེ་འགྱིང་འཁར་མི་བྱ་ཞིང་ལུས་སྐེད་འཕྲེད་ལ་རྟེན་པ་དང༌། དེ་བཞིན་དུ་འདུག་ས་མཐོ་བ་ལྟ་བུ་རང་བསྟོད་ཀྱི་རྟེན་གང་ཡང་མི་བྱ་བ་ཁོ་ནའོ།།

བརྒྱད་ཕྲག་གསུམ་པ་ལ་བརྒྱད་དེ། །མ་རབས་ཀྱི་༼༡༠༢༽སྤྱོད་པ་མི་བྱ་བ། གཞུང་བཞིན་དུ་སྤྱོད་ཅིང་བག་དང་ལྡན་པར་བྱ་བ། ལུས་སེམས་ཀྱི་སྤྱོད་པ་ངན་པ་དོར་བར་བྱ་བ། ལུས་ཀྱི་སྤྱོད་པ་བག་དང་ལྡན་ཞིང་མཛེས་པར་བྱ་བ། སྲི་ཞུ་དང་གདན་བཏིང་བར་བྱ་བ། སྤྱོད་ལམ་བཞི་ཀར་སྲི་ཞུ་བྱ་བ། གུས་པའི་སེམས་ཀྱིས་སྲི་ཞུ་དང་སྐུ་ཁམས་རྨེལ་བར་བྱ་བ། གཉན་པའི་སེམས་ཀྱིས་སྲི་ཞུ་བྱ་བའོ། །དང་པོ་ནི།

གང་འདིར་མ་རབས། ཞེས་པ་ནས། དམ་པའི་ཡུལ་དུ་མིན། །ཞེས་པའི་བར་གྱིས་བསྟན་ཏེ།

གང་འདིར་མ་རབས་ཐོར་བུའི་ཐབས། །སྣང་བའི་ཡུལ་ནས་བྱ་མ་ཡིན།།

དམངས་རིགས་གདོལ་པ་གཡུང་པོའི་ཚུལ། །དམ་པའི་གཟིགས་ཡུལ་རྣམས་ཀྱི་མིན།།

ཀུ་ཅོ་སྨྱོན་པ་ཀུན་ཏུ་རྒྱུའི། །སྤྱོད་པ་དམ་པའི་ཡུལ་དུ་མིན།།

གང་འདིར་མ་རབས་ཀྱི་སྤྱོད་པ་ཐོར་བུའི་ལས་ཐབས་དམན་པའི་རྩེད་མོ་དང་བྱ་བྱེད་མང་པོ་རྣམས་བླ་མའི་སྣང་བའི་ཡུལ་ནས་ནམ་དུ་ཡང་བྱ་བ་མ་ཡིན་ལ། དམངས་རིགས་ཕྱག་དར་བ་ལྟ་བུ་དང་ཁྱི་ཕག་དང་སྤྱོད་པ་མཐུན་པའི་གདོལ་པ་དང་གཡུང་པོའི་ཚུལ་ལྟར་གཙང་བཙོག་མེད་པའི་སྤྱོད་པ་དེ་དག་གཏན་ནས་མི་བྱ་ཞིང༌། ཁྱད་པར་དུའང་བླ་མའི་གཟིགས་ཡུལ་དུ་བྱ་བ་མིན་ནོ། །ཅིའི་ཕྱིར་ཞེ་ན། ངན་པ་གསུམ་གྱི་སྤྱོད་པ་ནི་བླ་མ་དམ་པའི་གཟིགས་པའི་ཡུལ་དུ་ནམས་ཀྱང་བྱ་བ་མིན་པའི་ཕྱིར་རོ། །ཁུ་ལྗོའམ་བྱིས་པ་ཆེན་པོར་སྨིན་ཏེ་སྐྱེས་པ་ཀུན་ཏུ་རྒྱུའི་ཞེས་རྒྱུ་ཞིང་འགྲོ་བའི་ཚོང་པ་ལྟ་བུའི་སྤྱོད་པ་མི་གཅིག་པ་རྣམས་དམ་པའི་སྤྱོད་ཡུལ་དུ་བྱ་བ་མིན་ནོ།།

གཉིས་པ་གཞུང་བཞིན་དུ་སྤྱོད་ཅིང་བག་དང་ལྡན་པར་བྱ་བ་ནི།

སྣང་བའི་ལུང་ལས། ཞེས་པ་ནས། ལྡན་པས་གནས་པར་བྱ། །ཞེས་པའི་བར་གྱིས་བསྟན་ཏེ།

སྣང་བའི་ལུས་ལས་གང་བྱུང་སྤྱོད། །ཇི་ལྟར་སྤྱོད་འབྱུང་བྱེད་ལ་འབྱུང་།།

འཇམ་དལ་ཐོས་འཕྲིགས་དགོས་བཞིན་བྱ། །དམ་པའི་སྤྱོད་པའི་སྣང་ཡུལ་ནས།།

བག་མེད་ཆེ་བའི་ཐབས་མི་བྱ། །སྒྲིབས་ནས་མཛེས་པའི་ཚུལ་བཟུང་སྟེ། །བག་དང་ལྡན་པས་གནས་པར་བྱ།།

དེ་ཡང་སྤྱོད་པ་ནི་དེ་བཞིན་གཤེགས་པའི་དམ་པའི་སྤྱོད་ཡུལ་གསལ་བར་སྣང་བའི་བཀའ་རྒྱུད་ཟབ་མོའི་ལུང་ལས་གང་ལྟར་འབྱུང་བ་བཞིན་སྤྱོད་ཅིང༌། དེ་ལས་བདག་གིས་ཇི་ལྟར་སྤྱོད་པའི་ལུགས་བླ་མའི་ཞལ་ནས་གསུངས་པ་བཞིན་སྤྱོད་དེ། བཀའ་འདི་ལྟ་བུ་ཉིད་ལས་སྤྱོད་པ་ཇི་ལྟ་སྤྱད་པ་འབྱུང་ཞེས་རྩོད་པ་བྱེད་པ་མི་འབྱུང་བའི་ཕྱིར་རོ། །ཁོང་འཇམ་ལ་སྤྱོད་པ་དལ་བའི་སྒོ་ནས་བླ་མའི་ཐོས་ཤིང་གསན་པ་དང་འཕྲིགས་སུ་དོགས་པ་བཞིན་དུ་སྤྱོད་པ་དང་བླ་མ་དམ་པའི་མཛད་སྤྱོད་ལྟར་གསན་པའི་དུས་དང་གཟིགས་པའི་སྣང་ཡུལ་གཉིས་ཀ་ནས་དུས་ནམ་དུ་ཡང་བག་མེད་པ་དང་རང་གི་ཆེ་བའི་ཐབས་མི་བྱ་བར། སྒོ་གསུམ་གྱི་སྤྱོད་པ་བརྩོན་པས་བསྒྲིམས་ནས་མཛེས་པའི་ཚུལ་བཟུང་སྟེ། དོན་དང་མ་འབྲལ་བར་ཟོན་བག་ཅན་དང་ལྡན་པས་ཡང་དག་པར་གནས་པར་བྱའོ།།

གསུམ་པ་ལུས་སེམས་ཀྱི་སྤྱོད་པ་ངན་པ་དོར་བར་བྱ་བ་ནི།

ལུས་ཀྱི་དོར་བ། ཞེས་པ་ནས། ཡུལ་ནས་མི་བྱའོ། །ཞེས་པའི་༼༡༠༣༽བར་གྱིས་བསྟན་ཏེ།

ལུས་ཀྱི་དོར་བ་གང་དག་ཀུན། །མཐོང་ཚོར་ཡུལ་ལས་ཡོངས་མི་བྱ། །སྣང་བ་ལུས་ཀྱི་བྱ་བྱེད་རྣམས།།

བློ་གྲོས་ལྡན་པས་བྱ་བ་མིན། །འདུས་ནས་འདུ་གང་བྱེད་སྤྱོད་རྣམས། །དམ་པའི་འདུན་པར་རིགས་མ་ཡིན།། འཕྱོ་གཡེང་བརྐམ་དང་མ་ཞི་བའི། །སྤྱོད་ཚུལ་ཡུལ་ནས་མི་བྱའོ།།

ལུས་ཀྱི་བཤང་གཅི་འབྱུང་བ་སོགས་དོར་བར་བྱ་བ་གང་དག་ཀུན་ཀྱང་བླ་མའི་གསན་པ་དང་མཐོང་ཚོར་གྱི་ཡུལ་དུ་གཏན་ནས་ཡོང་ཡེ་མི་བྱའོ། །དེ་ལྟ་བུ་ལུས་སེམས་ཀྱི་སྤྱོད་པ་བཅུ་གསུམ་དང༌། ལྟད་མོ་དང༌། རྩེད་འཇོ་དང༌། ཤོ་དང༌། རྒྱན་པོ་འགྱེད་པ་ལ་སོགས་པ་གྲགས་པ་ཉམས་པར་འགྱུར་བ་དྲུག་ལ་སོགས་པ་དག་ཏུ་སྣང་བའི་ལུས་ཀྱི་བྱ་བྱེད་རྣམས་བློ་གྲོས་དང་ལྡན་པས་ནམ་དུ་ཡང་བྱ་བ་མིན་ནོ། །སྒོ་གསུམ་གྱི་སྤྱོད་པ་ནི་བཤད་པ་དང་འཆད་པ་དག་ལས་ཁྲིའུ་རུ་ཤེས་པར་བྱའོ། །བླ་མའི་ཕོ་བྲང་དུ་འདུས་པ་དང་འདུག་ནས་དང་སློབ་མ་མང་པོ་འདུ་བ་སོགས་གང་བྱེད་ཀྱང༌། ཚོགས་པ་རྣམས་ཀྱིས་རྩེ་བ་དང་རྟ་གད་ལ་སོགས་པ་ཡི་བྱེད་སྤྱོད་རྣམས་དམ་པའི་སྤྱན་སྔར་གྱུར་པའི་འདུན་སར་བྱ་བ་རིགས་པ་མ་ཡིན་པ་དང༌། དེ་བཞིན་དུ་འཕྱོ་བ་དང༌། གཡེམ་པ་དང༌། རྫས་ལ་བརྐམ་པ་དང༌། སེམས་མ་ཞི་བའི་སྤྱོད་ཚུལ་བཞི་གཏན་དུ་སྤྱན་སྔའི་ཡུལ་ནས་མི་བྱའོ།།

བཞི་པ་ལུས་ཀྱི་སྤྱོད་པ་བག་དང་ལྡན་ཞིང་མཛེས་པར་བྱ་བ་ནི།

ཁམས་ལས་བྱུང་བའི། ཞེས་པ་ནས། དེ་ལ་ཇི་མཛེས་བྱ། །ཞེས་པའི་བར་གྱིས་བསྟན་ཏེ།

ཁམས་ལས་འབྱུང་བའི་ལུས་སྤྱོད་རྣམས། །སྒྲིབས་སམ་ཕག་གམ་བསྐྱོར་བཀབ་ནས།།

ཐམས་ཅད་དེ་སྐྱུང་འཇམ་བྱས་ཏེ།།

གླལ་བ་དང་སྦྲིད་པ་ལ་སོགས་པ་ཁམས་ལས་བྱུང་བའི་ལུས་སྤྱོད་རྣམས་ཀྱང༌། ཁ་དགབ་པས་སྒྲིབས་སམ་ཕག་གམ་སྐྱོར་བས་བཀབ་ནས་ཐམས་ཅད་བདེ་བར་སྒྲ་བསྐྱུང་ཞིང་འཇམ་པར་བྱས་ཏེ། བླ་མ་དམ་པ་དེ་ལ་ཇི་མཛེས་སུ་བྱའོ།།

ལྔ་པ་སྲི་ཞུ་དང་གདན་བཏིང་བར་བྱ་བ་ནི།

དམ་པ་གདན་བསྐྱོད། ཅེས་པ་ནས། ཉིད་ལས་ཅི་བདེར་སྦྱར། །ཞེས་པའི་བར་གྱིས་བསྟན་ཏེ།

དམ་པ་དེ་ལ་ཇི་མཛེས་བྱ། །དམ་པ་བརྟན་བསྐྱེད་གང་ཕྱོགས་ནས། །བདག་གནས་སྒྲིམས་ཏེ་སྲི་ཞུ་བྱ།།

སྐྱོད་བཅག་རྫི་སད་གདན་ཐབས་སྦྱར། །མ་ལྡན་ཉིད་ལས་ཅི་བདེར་སྦྱར།།

བླ་མ་དམ་པ་གདན་ལས་བསྐྱོད་དེ་གང་གི་ཕྱོགས་སུ་གཤེགས་པ་ན་ཡང་བདག་དེར་འགྲོ་བར་གནས་པས་སྒྲིམས་ཏེ་སྲི་ཞུ་བྱ་བ་དང༌། སྐུ་དམ་པ་བསྐྱོད་དམ་འཆགས་ན་ཡང་ཞབས་འབྲིང་བྱས་ཏེ་དེར་གདན་ཁྱེར་ལ་གདིང་བ་དང༌། གཞན་ལས་བརྫི་ནས་བཞུགས་ཏེ་མནལ་བར་བཞེད་པའི་ཚེ་ལ་གོར་གདན་བཏིང་བ་དང༌། མནལ་བ་ལས་སད་ནས་བསྐྱོད་ནའང་དེ་བཞིན་དུ་བྱ་བ་དང༌། བསྐྱོད་ནས་བཞུགས་ནའང་གདན་ཁྱེར་ནས་ཐབས་དང་སྦྱར་ཏེ་བཏིང་བ་དང༌། གལ་ཏེ་གདན་མེད་ཅིང་མ་ལྡན་ན་གར་བཞུགས་སར་རང་ཉིད་ཀྱི་ལུས་ལས་གོས་ཕུད་ནས་ཅི་བདེར་སྦྱར་ཏེ་གདན་དུ་བཏིང་བར་བྱའོ།།

དྲུག་པ་སྤྱོད་ལམ་བཞི་ཀར་སྲི་ཞུ་བྱ་བ་ནི།

སྔོན་རྩོལ་ལུང་བྱུང༌། ཞེས་པ་ནས། གུས་པས་དེ་བཞིན་སྦྱར། །ཅེས་པའི་བར་གྱིས་༼༡༠༤༽བསྟན་ཏེ།

སྔོན་རྩོལ་ལུང་བྱུང་སྲི་ཞུས་བསྡུ། །དེ་རྫོགས་ནས་ཀྱང་དེ་བཞིན་ནོ།།

བློ་ལྡན་སྤྱོད་ལམ་བཞིས་སྤྱོད་ན། །སྲི་ཞུ་གུས་པས་དེ་བཞིན་སྦྱར།།

བླ་མའི་ཞལ་ནས་བདག་གི་སྔོན་དུ་རྩོལ་བའི་ལས་ངོ་ཚ་བ་ཅན་ལྟ་བུ་ཐ་ན་ཁྱོད་གཅེར་བུར་ཕྱུངས་ལ་བྱ་བ་འདི་གྱིས་ཤིག་པའི་བཀའ་ལུང་སྩལ་ཏེ་བྱུང་ན་ཡང༌། དེ་བཞིན་དུ་བཀའ་མི་བཅག་པར་ལུས་གོས་དོར་བར་བྱས་ཏེ་སྲི་ཞུས་བསྡུ་བར་བྱ་ཞིང་ལས་བྱེད་དེ། ལས་དེ་རྫོགས་ཏེ་བྱ་བ་ཟིན་ནས་ཀྱང༌། སླར་གཅེར་བུ་མི་བྱ་བར་ལུས་གོས་དང་བཅས་པས་སྔར་དེ་ཀ་ཇི་བཞིན་དུ་སྲི་ཞུ་བྱ་བ་ཡིན་ནོ། །བློ་ལྡན་གུས་པའི་སློབ་བུས་འགྲོ་ཉལ་འཆགས་སམ་སྡོད་འདུག་གི་སྦྱོད་ལམ་བཞིས་གང་དུ་སྦྱོད་ན་ཡང་སྲི་ཞུ་གུས་པས་སྔ་མ་དེ་བཞིན་མཛེས་པར་སྦྱར་བར་བྱའོ།།

བདུན་པ་གུས་པའི་སེམས་ཀྱིས་སྲི་ཞུ་དང་སྐུ་ཁམས་རྨེལ་བར་བྱ་བ་ནི།

གང་མ་གུས་དང་། ཞེས་པ་ནས། ལ་སོགས་སྲི་ཞུས་ཞུ། ཞེས་པའི་བར་གྱིས་བསྟན་ཏེ།

གང་མ་གུས་དང་བཏང་སྙོམས་དག །ནམ་ཡང་བྱ་བ་ཡོང་མ་ཡིན། །སྲི་ཞུ་བསྟི་གནས་རིམ་གྲོ་རྣམས།།

བྱ་བའི་མདུན་དང་དེ་ཟིན་དུ། །སྲི་ཞུ་བཅུག་སྟེ་ཅི་བདེར་འགྲོ། །བདེ་ཞེས་ལས་ཚོགས་སྲི་ཞུས་ཞུས།།

སྤྱོད་པ་གང་ལ་ཡང་མ་གུས་པ་དང་གུས་པ་གཉིས་བཏང་སྙོམས་སུ་བྱ་བ་དག་ག་ལ་ཡིན་ཏེ་ནམ་ཡང་བྱ་བར་ཡོང་ཡེ་མ་ཡིན་པས་གྲིམས་ནས་གུས་པར་བྱ་བ་དང༌། བླ་མ་ལ་སྲི་ཞུ་དང་བསྟི་གནས་སམ་བཀུར་སྟི་དང་རིམ་གྲོ་བྱེད་པ་རྣམས་བླ་མའི་བྱ་བ་མ་ཟིན་པའི་བར་སྤྱན་སྔར་མདུན་དུ་འདུག་ནས་རྫོགས་པར་བྱེད་པ་དང༌། དེ་ཉིད་བྱས་ཟིན་མ་ཐག་ཏུ། སྲི་ཞུ་བཅུག་སྟེ་ཞེ་ས་དང་བཅས་པས་བྱས་ཟིན་པར་བརྗོད་ལ། བདག་སེམས་བདེ་བས་རང་གི་གནས་སུ་ཅི་བདེར་འགྲོ་བར་བྱ་བ་དང༌། ནང་ནུབ་ཏུ་མཇལ་བའི་ཚེ་འདུན་པའི་ལྷ་ཕྱག་གསུམ་གསུམ་བྱས་ལ། སྐུ་ཁམས་བདེའམ་ཞེས་པ་ལ་སོགས་པའི་སྙུན་རྨེལ་བ་གུས་པའི་སྲི་ཞུས་ཞུ་ཞིང་སྨྲ་བར་བྱ་བའོ།།

བརྒྱད་པ་གཉན་པའི་སེམས་ཀྱིས་སྲི་ཞུ་བྱ་བ་ནི།

ཡ་ང་བཀའ་ཐོབ། ཞེས་པ་ནས། གར་སྐབས་སྲི་ཞུ་དབུལ། །ཞེས་པའི་བར་གྱིས་བསྟན་ཏེ།

ཡ་ང་བཀའ་ཐོབ་མདུན་ཉིད་དུ། །གར་སྤྱོད་གར་སྟབས་སྲི་ཞུ་དབུལ།།

བླ་མ་ལ་ཤིན་ཏུ་གཉན་ཞིང་ལྕི་བ་དང་འཇིགས་པའི་སེམས་ཀྱི་ཡ་ང་བའི་སྒོ་ནས་ད་གདོད་ཀྱི་དུས་སུ་བཀའ་ཐོབ་པར་བྱ་བའི་ཕྱིར་བླ་མའི་མདུན་ཉིད་དུ་ཙོག་ཙོག་པོར་འདུག་ལ་ཐལ་མོ་སྦྱར་ཏེ་གང་དུ་བཀའ་ཟབ་མོ་ལ་སྤྱོད་པར་འགྱུར་བའི་དུས་གར་སོན་ཏེ་ཡུན་ཇི་ཙམ་མངའ་བ་དང་གནས་གང་གི་སྐབས་སུ་བཀའ་སྩལ་པ་འབྱུང་བར་འགྱུར་ཞེས་གུས་པའི་སྲི་ཞུས་ཞུ་བ་དབུལ་བར་བྱའོ།།

བརྒྱད་ཕྲག་ཐ་མ་ལ་བརྒྱད་དེ། མཚན་ནས་མི་བརྗོད་ཅིང་སྲི་ཞུའི་སྒྲ་གཞུག་པར་བྱ་བ། བཀའ་ལུང་གཟུང་ཞིང་དེའི་རྗེས་སུ་འབྲང་བར་བྱ་བ། གུས་པས་ལན་གསུམ་དུ་ཞུ་བ་དབུལ་བར་བྱ་བ། ཞབས་ཏོག་བྱ་ཞིང་རྒྱན་དང་མཚོན་གདགས་པར་མི་བྱ་བ། རང་༼༡༠༥༽ལ་དཔྱས་བཅུག་ལ་བཟང་སྤྱོད་བྱ་ཞིང་ངན་སྤྱོད་མི་བྱ་བ། འགྲོ་དོན་མ་གནང་བར་བྱ་མི་བྱའི་བྱེ་བྲག་བསྟན་པ། བླ་མའི་སློབ་མ་ལ་ཆོས་བཤད་དུ་རུང་མི་རུང་གི་བྱེ་བྲག་བཤད་པ། ཟས་ནོར་གནང་ན་སྲི་ཞུ་བྱ་ཞིང་གཞུང་ལས་མི་ཉམས་པར་བྱ་བའོ། །དང་པོ་ནི།

མཚན་ནས་ནམ་ཡང༌། ཞེས་པ་ནས། ཅིར་ཡང་དབྱེ་བར་བྱ། །ཞེས་པའི་བར་གྱིས་བསྟན་ཏེ།

མཚན་ནས་ནམ་ཡང་མི་བརྗོད་ཅིང་། །དམ་པ་བླ་མ་བཤེས་གཉེན་ཞེས།།

བརྗོད་པའི་ཐ་མར་ཞུས་གྲ་གཞུག །ཁྱད་པར་ཅིས་ཀྱང་དབྱེ་བར་བྱ།།

བོད་པའི་ཚེ་ན་མིང་དང་བླ་དྭགས་ཀྱི་མཚན་ནས་ནམ་ཡང་མི་བརྗོད་ཅིང༌། བླ་མ་ཞེས་བོད་པ་དང༌། དམ་པ་ཞེས་བོད་པ་དང༌། བཤེས་གཉེན་དམ་པ་ཞེས་དང༌། དཔའ་བོ་ལྷ་རྗེ་ཞེས་བརྗོད་པའི་ཐ་མར་ཞེས་ཞུ་བའི་ཚིག་བཅུག་པའམ་སྒྲ་གཞུག་ལ་མི་གཞན་དང་བླ་མ་ལ་ཁྱད་པར་ཅིས་ཀྱང་དབྱེ་བར་བྱའོ།།

གཉིས་པ་བཀའ་ལུང་གཟུང་ཞིང་དེའི་རྗེས་སུ་འབྲང་བར་བྱ་བ་ནི།

ལུང་བྱུང་བཀའ་བཞིན། ཞེས་པ་ནས། སྲི་ཞུས་མཚོན་པ་ཡིན། ཞེས་པའི་བར་གྱིས་བསྟན་ཏེ།

ལུང་འབྱུང་བཀའ་བཞིན་ཞུ་ཞེས་བརྗོད། །ཐལ་སྦྱར་བསྲུང་བ་གཟུང་བར་བྱ།།

དམ་པའི་ལུང་བྱུང་རྗེས་སུ་འབྲང་། །དེ་ཀུན་སྲི་ཞུས་མཚོན་པ་ཡིན།།

མན་ངག་གནང་བའི་བཀའ་ལུང་བྱུང་ན་བཀའ་བཞིན་ཞུའོ་ཞེས་བརྗོད་ཅིང་སྨྲ་བ་དང༌། ལུས་ཙོག་པུའི་ཐལ་མོ་སྦྱར་ལ་ཞལ་ནས་གདམས་ངག་ཅི་གསུངས་པ་ཡིད་ལ་གཟུང་བར་བྱ་བ་དང༌། བླ་མ་དམ་པའི་བཀའ་ལུང་ཅི་བྱུང་བ་དེ་ཁོ་ན་ལྟར་རྗེས་སུ་འབྲང་སྟེ་དྲན་པར་བྱ་ཞིང་ཟོལ་ཟོག་མེད་པར་བསྒྲུབ་པར་བྱ་སྟེ། དེ་ལྟར་བྱེད་པ་ཀུན་ཀྱང་གུས་པའི་སྲི་ཞུས་མཚོན་པ་དང་བཅས་པས་ལེགས་པར་བྱེད་པ་ཡིན་ནོ།།

གསུམ་པ་གུས་པས་ལན་གསུམ་དུ་ཞུ་བ་དབུལ་བར་བྱ་བ་ནི།

མཛེས་པའི་ཚུལ་བཟུང༌། ཞེས་པ་ནས། ནས་ནི་འོང་ཞེས་ཞུ། ཞེས་པའི་བར་གྱིས་བསྟན་ཏེ།

མཛེས་པའི་ཚུལ་བཟུང་གུས་འདུན་ནས། །སྤོབས་པ་ནོད་པ་གསུམ་དུ་ཞུ། །གནང་ཐོབ་ནས་ནི་འོང་ཞེས་སུ།།

བླ་མའི་སྤྱན་སྔར་སྤྱོད་ལམ་མཛེས་པའི་ཚུལ་བཟུང་སྟེ་ལུས་གུས་པ་དང་བཅས་པར་སེམས་ཀྱིས་འདུན་ནས། ཞུ་བ་སྤོབས་པ་དང༌། བཀའ་ནོད་པ་དང༌། ཆོས་ཞུ་བ་ལན་གསུམ་དུ་ཞུ་ཞིང༌། རུའི་གནང་བ་ཐོབ་ནས་ནི་སླར་ལེགས་པར་འོང་བ་ཡིན་ནོ་ཞེས་ཞུ་བར་བྱའོ།།

བཞི་པ་ཞབས་ཏོག་བྱ་ཞིང་རྒྱན་དང་མཚོན་གདགས་པར་མི་བྱ་བ་ནི།

གྱོང་ཁེངས་མེད་པའི། ཞེས་པ་ནས། མཚོན་ཐོགས་སྤང་བར་བྱ། །ཞེས་པའི་བར་གྱིས་བསྟན་ཏེ།

ཁོང་ཁེངས་མེད་པའི་གཉེན་ལྕུག་གིས། །ཞ་འབྲིང་དགོས་པ་ཐམས་ཅད་བྱ། །དགེ་སློང་གསར་པའི་སྤྱོད་པ་ཡིས། །ངོ་ཚ་ཁྲེལ་ཡོད་བག་ལ་གནས། །བགེག་པ་ལ་སོགས་བྱ་བྱེད་དང་། །རྒྱན་དང་མཚོན་འདོགས་སྤང་བར་བྱ།།

གྱོང་ཁེངས་ཀྱི་རྣམ་པའི་སེམས་མེད་པའི་མཉེན་ལྕུགས་གིས་ཚུལ་ལྡན་པར་ཇི་སྲིད་འཚོ་བའི་བར་དུ་ཞབས་འབྲིང་ངམ་ཞབས་ཏོག་གང་དང་གང་དགོས་པ་ཐམས་ཅད་བྱ་ཞིང་། ཇི་ལྟར་དགེ་སློང་གསར་པའི་སྤྱོད་པ་བཞིན་དུ་གཟོབ་པ་དང་ལྡན་པ་ཡིས། ངོ་ཚ་ཁྲེལ་ཡོད་བག་དང་ལྡན་ལ་གནས་པར། ལུས་སྒེག་པ་དང་ཁོང་དུ་གཡོ་ལ་སོགས་པའི་བྱ་བྱེད་དང༌། ༼༡༠༦༽རྒྱན་ཆས་དང་མཚོན་ཆ་ཐོགས་པའི་མི་འོས་པ་རྣམས་སྤང་བར་བྱའོ།།

ལྔ་པ་རང་ལ་དཔྱས་བཅུག་ལ་བཟང་སྤྱོད་བྱ་ཞིང་ངན་སྤྱོད་མི་བྱ་བ་ནི།

བློ་གྲོས་གུས་པ། ཞེས་པ་ནས། གང་ཡིན་དེ་སྤྱོད་སྤང༌། །ཞེས་པའི་བར་གྱིས་བསྟན་ཏེ།

བློ་གྲོས་གུས་པ་དེ་ཉིད་ཀྱང་། །ཉིད་ཀྱིས་ཉིད་ལ་དཔྱས་བཅུག་སྟེ། །གཞན་གྱིས་དབྱེ་བའི་གཞི་རྣམས་སྤངས།། ཀུན་ཏུ་མཐུན་པར་བཟང་བརྗོད་པའི། །སྐྱེས་བུ་གང་ཡིན་དེ་ལྟར་བྱ། །ཀུན་གྱིས་མཐུན་པར་མ་བསྔགས་པའི།།

ཐ་ཤལ་གང་ཡིན་དེ་སྤྱོད་སྤང་།།

བློ་གྲོས་ཀྱི་ཤེས་རབ་དང་ལྡན་པ་ཤིན་ཏུ་གུས་པ་དང་བཅས་པ་དང་བཅས་པས་ཆོས་ཞུ་བ་དང་འབེལ་གཏམ་བྱེད་པ་དེ་ཉིད་ཀྱང་སློབ་བུ་རང་ཉིད་ཀྱིས་རང་ཉིད་ལ་དཔྱས་བཅུག་སྟེ་གཞན་གྱི་དཔྱ་འདོགས་ཏེ་འཕྱ་བའི་གཞི་ཡི་སྤྱོད་པ་རྣམས་སྤང་ཞིང་ཀུན་ཏུ་འགྲོ་བའི་ཡིད་དང་མཐུན་པར་བཟང་པོར་བརྗོད་པའི་ཡ་རབས་ཀྱི་སྤྱོད་པ་སྐྱེས་བུ་དམ་པའི་ལེགས་པར་སྤྱད་པ་གང་ཡིན་པ་དེ་ལྟར་བདག་གིས་ཀྱང་བྱ་ཞིང༌། ཀུན་གྱིས་མཐུན་སྣང་གིས་ལེགས་པར་མ་བསྔགས་པའི་གཞིའི། ཐ་ཤལ་གང་ཡིན་པ་དེ་ཡི་སྤྱོད་པ་དོན་དང་མི་མཐུན་པ་ནི་ཡོངས་སུ་སྤང་བར་བྱའོ།།

དྲུག་པ་འགྲོ་དོན་མ་གནང་བར་བྱ་མི་བྱའི་བྱེ་བྲག་བསྟན་པ་ནི།

དཀྱིལ་འཁོར་ལ་སོགས། ཞེས་པ་ནས། ཅི་བླངས་ལྷག་མ་བླངས། །ཞེས་པའི་བར་གྱིས་བསྟན་ཏེ།

དཀྱིལ་འཁོར་ལ་སོགས་སྦྱིན་སྲེག་དང་། །སློབ་མ་བཟུང་དང་ཆོས་སྨྲ་བ། །ལུང་མ་བྱུང་བར་མི་བརྩམ་སྟེ།།

དམ་པའི་ཡུལ་ནས་དེ་མི་རིགས། །གལ་ཏེ་གཞན་གྱི་དོན་བྱས་ན། །དེ་ཡི་ཡོ་བྱད་མི་དཔྱད་དེ།།

དེ་ཀུན་དམ་པ་དེ་ལ་དབུལ། །དམ་པའི་ཅི་བླངས་ལྷག་པར་བླངས།།

གཞན་དོན་གྱི་སྤྱོད་པ་སྒྲུབ་པའི་དཀྱིལ་འཁོར་དང༌། ལ་སོགས་པ་ཞེས་པས་གནས་ཆོག་དང་རབ་གནས་དང༌། དེ་བཞིན་དུ་སྦྱིན་སྲེག་དང༌། དཔོན་ཆ་འཛིན་པས་སློབ་མ་གཟུང་ཞིང་དབང་བསྐུར་བ་དང་ཆོས་སྨྲ་བ་དེ་དག་གང་ཡང༌། བླ་མས་གནང་བའི་བཀའ་ལུང་མ་བྱུང་བར་ནམ་ཡང་མི་བརྩམ་སྟེ། དམ་པའི་སྤྱོད་ཡུལ་ནས་དེ་དག་བྱ་བར་མི་རིགས་སོ། གལ་ཏེ་ཡུལ་གཞན་གྱི་འགྲོ་བའི་དོན་དུ་བྱས་ན་ཡང་དེ་ཡིས་ཕུལ་བ་ཡི་ཡོ་བྱད་དེ་དག་རང་གིས་མི་སྤྱད་དེ། དེ་དག་ཀུན་བླ་མ་དམ་པ་དེ་ལ་ལེགས་པར་དབུལ་ལོ། །དེ་ནས་དམ་པའི་ཕུད་ཅི་བླངས་པའི་ལྷག་མ་ཚུར་ལ་གནང་བ་རྣམས་གུས་པས་བླང་བར་བྱའོ།།

བདུན་པ་བླ་མའི་སློབ་མ་ལ་ཆོས་བཤད་དུ་རུང་མི་རུང་གི་བྱེ་བྲག་བཤད་པ་ནི།

དམ་པའི་སློབ་མ། ཞེས་པ་ནས། སྲི་ཞུ་ལ་སོགས་མིན། །ཞེས་པའི་བར་གྱིས་བསྟན་ཏེ།

དམ་པའི་སློབ་མ་སློབ་མར་སྤང་། །དམ་པའི་མདུན་དུ་མི་རིགས་སོ།།

གལ་ཏེ་དམ་པས་བཀའ་སྩལ་ན། །བཀུར་སྟི་སྲི་ཞུ་ལ་སོགས་མིན།།

བླ་མ་དམ་པའི་སློབ་མ་ཉིད་རང་གི་སློབ་མར་བྱ་བ་ཡང་དམ་པའི་ཉེ་གམ་གྱི་མདུན་དུ་མི་རིགས་སོ། །གལ་ཏེ་བླ་མ་དམ་པས་གནང་ནས་བཀའ་སྩལ་ན་ཡང༌། བླ་མའི་སློབ་མ་ལ་བཀུར་སྟི་དང་སྲི་ཞུ་ལ་སོགས་པ་རང་ལ་བྱེད་དུ་གཞུག་པ་མིན་ནོ།།

བརྒྱད་པ་ཟས་ནོར་གནང་ན་སྲི་ཞུ་བྱ་ཞིང་གཞུང་ལས་མི་ཉམས་པར་བྱ་བ་ནི།

གང་བྱིན་དམ་པ། ཞེས་པ་ནས། སྤྱོད་ལམ་འདའ་མི་བྱ། །ཞེས་པའི་བར་གྱིས་བསྟན་ཏེ།

གང་བྱིན་དམ་པ་དེ་ཉིད་མངའ། །སྙིང་རྗེས་དམ་པས་ཅི་གནང་བ། །སྲི་ཞུས་མདུན་བསུ་ལག་གཉིས་ཀྱིས།།

བློ་དང་ལྡན་པས་བླང་བར་བྱ། །རྨུགས་མེད་དྲན་གསལ་རབ་བསྒྲིབས་ནས། །རང་གི་སྤྱོད་ལམ་འདའ་མི་བྱ།།

གང་བྱིན་པའི་ཟས་ནོར་དམ་པ་དེ་ཉིད་ལ་མངའ་བ་རྣམས་ལས། སྙིང་རྗེས་ངེས་པར་རྗེས་སུ་དགོངས་ཏེ་དམ་པས་རང་ལ་ཅི་གནང་པ་ཐམས་༼༡༠༧༽ཅད་སྲི་ཞུས་མདུན་བསུས་ལ་ལག་པ་གཉིས་ཀྱིས་གུས་པ་དང་བཅས་ཏེ་བློ་དང་ལྡན་པས་བླང་བར་བྱ་ཞིང༌། བློ་རྨུགས་པ་མེད་པར་དྲན་པ་གསལ་བས་རབ་ཏུ་སྒྲིམས་ནས་རང་གི་གནས་སྐབས་ལ་བབ་པའི་སྤྱོད་ལམ་ལས་འདའ་བར་མི་བྱ་བར་དོན་དང་ལྡན་པར་བྱའོ།།

གཉིས་པ་མཉེས་པའི་ཡོ་བྱད་བརྒྱད་འཕུལ་བ་ནི།

བློ་གྲོས་ལྡན་པའི། ཞེས་པ་ནས། དེ་ལ་རྫོགས་པར་དབུལ། །ཞེས་པའི་བར་གྱིས་བསྟན་ཏེ།

བློ་གྲོས་ལྡན་པའི་ཉི་མ་དེས། །དམ་པ་ལྷ་ལྟར་མཆོད་བྱའི་ཕྱིར། །མཉེས་པར་བྱ་བའི་ཡོ་བྱད་བརྒྱད།།

དམ་པ་དེ་ལ་རྫོགས་པར་དབུལ། །སྐྱོ་དུབ་མེད་པའི་དད་པ་དང་། །གྱོང་ཁེངས་མེད་པའི་གཉེན་ལྕུག་དང་།།

སེར་སྣ་མེད་པའི་ཟང་ཟིང་དང་། །སོམ་ཉི་མེད་པའི་སྲི་ཞུ་དང་། །གཡོ་སྒྱུ་མེད་པའི་དྲན་རྐང་དང་།།

ཁ་གསགས་མེད་པའི་རང་རྒྱུད་དང་། །རྨོངས་པ་མེད་པའི་ཤེས་རབ་དང་། །དྲི་མ་མེད་པའི་ལྷག་སེམས་བརྒྱད།། དམ་ལ་དེ་ལ་རྫོགས་པར་དབུལ།།

ཤེས་རབ་ཆེན་པོའི་བློ་གྲོས་ལྡན་པའི་སློབ་བུ་གསལ་བ་ཉི་མ་ལྟ་བུ་དེས། བླ་མ་དམ་པ་ཉིད་སྦྱི་བོའི་ལྷ་ལྟར་གུས་པ་མཆོག་གིས་མཆོད་བྱའི་ཕྱིར་སྤྱོད་པ་འཇམ་པས་མཉེས་པར་བྱ་བའི་ཡོ་བྱད་བརྒྱད་རྣམས་དམ་པ་དེ་ལ་རྫོགས་པར་དབུལ་བར་བྱ་སྟེ། འཕགས་པ་རྟག་ཏུ་ངུ་ལྟ་བུར་སྐྱོ་དུབ་མེད་པའི་དད་པ་དང༌། དར་ཐག་ལྟ་བུར་གྱོང་ཁེངས་ཀྱི་སེམས་མེད་པའི་མཉེན་ལྕུགས་དང༌། རྒྱལ་པོ་ཟླ་འོད་ལྟ་བུར་སེར་སྣ་མེད་པའི་ཟང་ཟིང་དང༌། དགེ་སློང་བྲམ་ཟེ་ལྟ་བུར་སོམ་ཉི་མེད་པའི་སྲི་ཞུ་དང༌། དགེ་སློང་ཐུབ་དཀའ་གཞོན་ནུ་ལྟ་བུར་གཡོ་སྒྱུ་མེད་པའི་དྲང་སྐད་དང༌། དྲང་སྲོང་སྒོམ་ཆེན་ལྟ་བུར་ཁ་གསག་མེད་པའི་རང་རྒྱུད་དང༌། ཤཱ་རིའི་བུ་ལྟ་བུར་རྨོངས་པ་མེད་པའི་ཤེས་རབ་དང༌། རྒྱལ་ཚབ་སྐྱེས་བུ་ལྔ་ལྟ་བུར་སྡིག་པའི་དྲི་མ་མེད་པར་བླ་མེད་བྱང་ཆུབ་འཐོབ་པར་བྱ་སྙམ་པའི་ལྷག་པའི་སེམས་དང་བརྒྱད་པོ་དེ་དག་བླ་མ་དམ་པ་དེ་ལ་རྫོགས་པར་དབུལ་བར་བྱའོ།།

གཉིས་པ་ཐོས་པ་བྱས་པས་རྒྱུས་གྲོལ་བ་དངོས་ནི།

དམ་པས་བསྒོ་བ། ཞེས་པ་ནས། མཁའ་ལ་བྱ་བཞིན་རྒྱུ། །ཞེས་པའི་བར་གྱིས་བསྟན་ཏེ།

དམ་པས་བགོ་བ་བསླབ་པའི་མཐའ། །ཆུབ་པར་རྫོགས་པས་རྒྱུད་དགྲོལ་ཏེ། །ཤེས་བྱ་ཀུན་ལ་ཐོགས་མེད་འགྲོ།།

རང་རྒྱུད་མདུད་པ་ཀུན་དགྲོལ་བའི། །ཤེས་རབ་མཁའ་ལ་བྱ་བཞིན་རྒྱུ།།

དེ་ལྟར་བླ་མ་དམ་པས་བདག་ལ་ལུང་གི་དོན་བཞིན་ཇི་ལྟ་བ་ཉིད་དུ་བསྒོ་བ་ཡི་བསླབ་པའི་མཐའ་བཅུ་པོ་ཁོང་དུ་ཆུད་པར་གྱིས་ཤིག་དང༌། དེ་ལྟར་ལེགས་པར་ཆུབ་སྟེ་མ་འདྲེས་པར་ཡོངས་སུ་རྫོགས་པའི་ཐོས་བསམ་བླ་ན་མེད་པས་མི་ཤེས་པའི་རྒྱུད་དགྲོལ་ཏེ་ཤེས་རབ་མཆོག་དང་ལྡན་པས་ཤེས་བྱ་ཀུན་ལ་ཐོགས་རྡུགས་མེད་པར་འགྲོ་སྟེ། རང་གི་རྒྱུད་ཀྱིས་གཟུང་འཛིན་གྱི་མདུད་པ་མི་ཤེས་རྨོངས་པའི་འཆིང་བ་ཀུན་གྲོལ་ཏེ་གྲོལ་བ་ཐོབ་པའི་ཕྱིར་བློ་གྲོས་ནོར་འཁྲུལ་མེད་པའི་ཤེས་རབ་དང་ལྡན་པ་ནི་དཔེར་ན་ནམ་མཁའ་ལ་བྱེ་བཞིན་དུ་རྣམ་པར་རྒྱུ་བས་ཅི་ལའང་ཆགས་ཐོགས་མེད་དོ།།

གསུམ་པ་ཐོས་བསམ་ཆུབ་པའི་མཐར་དགོན་པར་བསྒོམ་པ་ལ་བཞི་སྟེ། ཡུལ་སྤང་ཞིང་བླ་མ་ལ་ཡོན་འབུལ་བ། དགོན་པར་བསྒོམ་པར་བྱ་བ། བསྒོམ་པས་༼༡༠༨༽འབྲས་བུ་ཐོབ་པའི་ལོ་རྒྱུས། ཡུན་དུ་བླ་མ་བསྟེན་པར་གདམས་པ་ཡོན་ཏན་དང་བཅས་པའོ། །དང་པོ་ནི།

མཐར་ཆིབ་རྒྱུད་དགྲོལ། ཞེས་པ་ནས། གང་ཡིན་ནོར་གྱིས་བླུ། །ཞེས་པའི་བར་གྱིས་བསྟེན་ཏེ།

མཐར་ཆིབ་རྒྱུད་འགྲོལ་ཡུལ་སྤངས་ཏེ། །རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག།

རབ་ཏུ་གཅེས་དང་ཡིད་འཐད་པའི། །ནོར་མཆོག་དམ་པ་དེ་ལ་དབུལ། །རང་གི་ལུས་ཀྱང་ཅི་རིགས་པར།།

རིན་ཐང་གང་ཡིན་ནོར་གྱིས་བསླུ། །དེ་ནས་ཇི་བཞིན་གང་བདེ་བར། །རྣལ་འབྱོར་ཡང་དག་འཇོག་ལ་ཞུགས།། སྔོན་གྱི་དམ་པ་དམ་པ་རྣམས། །བདེ་བར་གཤེགས་པའི་རྗེས་སུ་འགྲོ།།

དེ་ལྟར་མི་དམིགས་པའི་བློ་གྲོས་རྙེད་པས་བྱ་ལམ་བཞིན་ཅི་སྤྱོད་པ་སྐྱོན་དུ་མི་འགྱུར་ཞིང་བསླབ་པ་མཐར་ཕྱིན་པར་ཆིབ་ནས་ཤེས་རབ་ཀྱིས་རྒྱུད་གྲོལ་བ་ན་ཕྱིན་ཅི་ལོག་གི་ཡུལ་ཀུན་སྤངས་ཏེ། བདེ་བ་ཐོབ་པར་འགྱུར་བའི་ཕྱིར། དྲིན་ལ་ལན་དུ་བྱ་བ་དང་ཐོག་མར་མཉེས་པས་གནང་བར་བྱ་བའི་ཕྱིར།

སྤྱིར་འཁོར་གསུམ་ཡོངས་དག་གི་མཆོད་པ་ཕུལ་ཞིང༌། བྱེ་བྲག་ཟང་ཟིང་གི་དབང་དུ། རྒྱལ་སྲིད་དང་ནི་རང་གི་ལུས་དང་བུ་དང་ཆུང་མ་དང་ནོར་གྱི་དབྱིག་མཆོག་དམ་པ་དང༌། མདོར་ན་རང་གིས་རབ་ཏུ་གཅེས་པ་དང་བླ་མའི་ཐུགས་ཡིད་དུ་འཐད་པའི་ནོར་མཆོག་དམ་པ་རྣམས་བླ་མ་དམ་པ་དེ་ལ་ལེགས་པར་དབུལ་བར་བྱའོ། །ཁྱད་པར་དུ་རང་གི་ལུས་ཀྱང་ཡོན་ཏན་དང་ལྡན་ན་གུས་པས་ཕུལ་ལ་སླར་ཅི་ལྟར་རིགས་པར་རིན་ཐང་གང་ཡིན་པའི་རིན་པོ་ཆེ་སོགས་ནོར་གྱིས་བླུ་བར་བྱེད་དོ། །བརྒྱད་ཀྱི་ཕྱོགས་གཅིག་པོ་འདིས་ཀྱང་མན་ངག་ཞུ་བའོ།།

གཉིས་པ་དགོན་པར་བསྒོམ་པར་བྱ་བ་ནི།

དེ་ནས་ཇི་བཞིན། ཞེས་པ་ནས། གཤེགས་པའི་རྗེས་སུ་འགྲོ། །ཞེས་པའི་བར་གྱིས་བསྟན་ཏེ།

དེ་ནས་ཇི་བཞིན་གང་བདེ་བར། །རྣལ་འབྱོར་ཡང་དག་འཇོག་ལ་ཞུགས།།

སྔོན་གྱི་དམ་པ་དམ་པ་རྣམས། །བདེ་བར་གཤེགས་པའི་རྗེས་སུ་འགྲོ།།

མན་ངག་གནང་ནས་ཆུད་མི་གསན་པའི་ཕྱིར། གདམས་ངག་ཐོབ་ཅིང་དོན་རྙེད་མ་ཐག་པ་དེ་ནས་གནས་ཇི་བཞིན་གར་བདེ་བར། གསང་སྔགས་ཀྱི་ཆོས་ཉིད་དེ་ཁོ་ན་ཉིད་ཀྱི་དོན་ལ་བློ་རྣལ་དུ་འབྱོར་བར་ནང་དུ་ཡང་དག་འཇོག་ལ་ཞུགས་ཏེ་ཇི་ལྟར་བདེ་བ་ལྟར་བསྒོམ་པར་བྱའོ། །ཞེས་གདམས་པའོ། །དེ་བས་ན་སྔོན་གྱི་རྒྱལ་བ་དམ་པ་དག་དང་ད་ལྟར་གྱི་དབང་ཕྱུག་བླ་མ་དམ་པ་རྣམས་ཀྱང༌། བདེ་བར་གཤེགས་པའི་ཡབ་བླ་མ་དམ་པ་བཤེས་གཉེན་མགོན་གྱི་རྗེས་སུ་འབྲང་ནས་ཐོབ་པ་ཡིན་པས་བདག་ཉིད་དེའི་རྗེས་སུ་འགྲོ་བར་བྱ་དགོས་སོ།།

གསུམ་པ་བསྒོམ་པས་འབྲས་བུ་ཐོབ་པའི་ལོ་རྒྱུས་ནི།

སྔོན་གྱི་དམ་པ། ཞེས་པ་ནས། དམ་པ་མཉེས་པར་འགྱུར། །ཞེས་པའི་བར་གྱིས་བསྟན་ཏེ།

སྔོན་གྱི་དམ་པར་བདེ་གཤེགས་འགྲོ། །དེད་དཔོན་དམ་པ་མཉེས་བྱས་ནས།།

ཀུན་སྤངས་དགོན་པའི་མཐར་གཤེགས་པས། །ཉིད་ལས་དམ་པ་མཉེས་པར་འགྱུར།།

དེ་ཇི་ལྟ་བུ་ཞེ་ན། སྔོན་གྱི་རྒྱལ་བ་དམ་པ་བདེ་གཤེགས་འདྲེན་པའི་དབང་པོ་རྣམས་ཀྱིས་ཀྱང༌། དེད་དཔོན་དམ་པ་བླ་མ་རྡོ་རྗེ་སློབ་དཔོན་མཉེས་པར་བྱས་ནས་གསང་སྔགས་ཀྱི་མན་ངག་རྙེད་པ་དང་འཁོར་བའི་སྤྱོད་ཡུལ་གྱི་བྱ་བ་ཀུན་སྤངས་ནས་དགོན་པའི་བས་མཐར་གཤེགས་ཏེ་དོན་༼༡༠༩༽ལ་རྣལ་དུ་བཞག་སྟེ་བསྒོམ་པས་བླ་ན་མེད་པའི་འབྲས་བུ་རང་ཉིད་ལས་ཤར་ཏེ་བླ་མ་དམ་པ་དང་རྒྱལ་བ་ཀུན་དགྱེས་པ་བསྐྱེད་དེ་མཉེས་པར་བྱས་པའི་ཕྱིར་རྗེས་སུ་འཇུག་པ་རྣམས་ཀྱིས་ཀྱང་ཐེ་ཚོམ་མེད་པར་སྤྱོད་ཅིག་དང་དོན་གྲུབ་པར་འགྱུར་རོ། །ཞེས་པའོ།།

བཞི་པ་ཡུན་དུ་བླ་མ་བསྟེན་པར་གདམས་པ་ཡོན་ཏན་དང་བཅས་པ་ནི།

དེས་ན་དེད་དཔོན །ཞེས་པ་ནས། དྲིས་ན་དམ་པར་འགྱུར། །ཞེས་པའི་བར་གྱིས་བསྟན་ཏེ།

དེས་ན་དེད་དཔོན་དམ་པ་དང་། །ནམ་དུའང་བྲལ་བའང་མ་ཡིན་ཏེ།།

ཇི་ལྟར་ལུས་དང་གྲིབ་མ་བཞིན། །བློ་གྲོས་དྲིས་ན་དམ་པར་འགྱུར།།

དུས་གསུམ་གྱི་རྒྱལ་བ་རྣམས་ཀྱི་ཚུལ་དེ་ལྟར་དུ་ངེས་པ་དེས་ན། དུས་དེང་སང་གི་རྣལ་འབྱོར་བ་རྣམས་ཀྱིས་ཀྱང༌། ནམ་དོན་གྱི་གདིང་དང་མ་ཕྲད་ཀྱི་བར་དུ་ཐར་པའི་དེད་དཔོན་དམ་པ་བླ་མ་དང་ནམ་དུའང་འབྲལ་བ་མ་ཡིན་ཏེ། ཇི་ལྟར་ལུས་དང་གྲིབ་མ་བཞིན་དུ་འགྲོགས་ཤིང་བློ་གྲོས་སྦྱངས་ནས་བླ་མ་ལ་བསྲུང་ཞིང་སྒོ་གསུམ་གྱིས་མཉེས་པའི་ཐབས་རྒྱས་པར་བརྒྱ་རྩ་བརྒྱད་པོ་དག་ལྟར་སྤྱད་ནས་དམ་པའི་གསང་དོན་ཞུས་ཏེ་དགོངས་པ་རྣལ་མ་དྲིས་ན་བུ་རང་ཉིད་ཀྱང་གསང་སྔགས་ལ་མཁས་པ་ཕུལ་དུ་ཕྱིན་ནས་གཞན་གྱི་སློབ་དཔོན་བྱེད་པའི་བླ་མ་དམ་པར་འགྱུར་རོ།།

གསུམ་པ་བསླབ་པ་གཅེས་པར་གདམས་པ་ནི།

ཇི་ལྟར་ཅང་ཤེས། ཞེས་པ་ནས། བྱ་བ་རབ་ཏུ་གཅེས། །ཞེས་པའི་བར་གྱིས་བསྟན་ཏེ།

ཇི་ལྟར་ཅང་ཤེས་གི་ལིང་ནི། །སྡོམ་བྱེད་སྒྲོག་གིས་བཅིངས་གྱུར་ན། །དགྲོལ་བྱས་བདེ་ལག་འབྱུང་བར་འགྱུར།། ཅི་ཡང་ཐོགས་མེད་འགྲོ་འོང་ལྟར། །སེམས་ཀྱི་ཅང་ཤེས་དབང་པོ་འདི། །མི་ཤེས་བཅིངས་པས་བཅིངས་འགྱུར་བ། དམ་པས་རྣམ་གྲོལ་སྒོ་ཕྱེ་བས། །ཤེས་རྒྱུད་ཀུན་གྲོལ་ཐོོགས་མེད་འགྲོ། །འདི་ནི་མི་ཤེས་རྒྱུད་འགྲོལ་བའི།།

མདུད་པའི་བཅིངས་པ་འགྲོལ་བ་སྟེ། །རྒྱུད་རྣམས་དགྲོལ་བའི་བསླབ་པ་རུ། །གོམས་པར་བྱ་བ་རབ་ཏུ་གཅེས།།

རྒྱུད་ཐོས་པས་དགྲོལ་བར་བསླབ་པའི་དཔེ་དོན་ཏེ། དཔེ་ཇི་ལྟར་ན་རྟ་རྒྱལ་ཅང་ཤེས་ཀྱི་ལིང་དག སྡོམ་བྱེད་སྒྲོག་གིས་བཅིངས་པར་གྱུར་པ་དེ་ཉིད་བཀྲོལ་བར་བྱས་ཏེ་བདེ་བླག་ཏུ་བཏང་བར་གྱུར་ན་ས་དང་ནམ་མཁའ་ཅི་ལའང་ཐོགས་པ་མེད་པར་འགྲོ་བ་ལྟར། མཚོན་པའི་དོན་ཀྱང་སེམས་ཀྱི་ངོ་བོ་ཅང་ཤེས་ཀྱི་དབང་པོ་འདི་ཉིད་མི་ཤེས་མ་རིག་པས་བཅིང་བས་བཅིངས་པར་གྱུར་པ་ཉིད། བླ་མ་དམ་པས་རྣམ་གྲོལ་གསང་བའི་ཆོས་ཀྱིས་སྒོ་ཕྱེ་བས། ཤེས་རྒྱུད་ཀུན་ཏུ་གྲོལ་ནས་ཤེས་བྱ་ལ་ཐོགས་པ་མེད་པར་འགྲོ་བར་འགྱུར་རོ། །འདི་ནི་ཐོས་པའི་ཤེས་རབ་ཀྱིས་མི་ཤེས་རྨོངས་པའི་རྒྱུད་འགྲོལ་བའི་ཐབས་ཀྱིས། གཟུང་འཛིན་གྱིས་མདུད་པའི་བཅིང་པ་ལས་དགྲོལ་བ་སྟེ། ཤེས་པའི་རྒྱུད་རྣམས་གྲོལ་བའི་བསླབ་པ་རུ། གོམས་པར་བྱ་བ་ནི་རབ་ཏུ་གཅེས་པ་ཉིད་དོ།།

བཞི་པ་ཞབས་བསྡུ་བ་ནི།

ལང་ཀའི་བདག་པོ། ཞེས་པ་ནས། ཤེས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་དེ་དག་ནི། རྒྱུད་ཡོངས་སུ་དགྲོལ་བའི་བསླབ་པའི་མཐའ་ཡོངས་སུ་བགྲོས་པར་ཤེས་པར་བྱའོ། །དེ་སྐད་ཅེས་སྨྲས་པས། དམན་པའི་ལུས་ཀྱི་སེམས་དཔའ་རྣམས། །དཔག་ཏུ་མེད་པའི་སངས་རྒྱས་རྣམས།། སློབ་དཔོན་དམ་པས་བསྐྲུན་པར་ཤེས་པར་གྱུར་ཏོ།།

ལང་ཀའི་བདག་པོ། ཞེས་བོས་ནས། ཇི་སྐད་བཤད་པ་དེ་དག་ནི། ཤེས་བྱེད་རྒྱུད་ཀྱི་དོན་ཡོངས་སུ་དགྲོལ་བར་བསླབ་པའི་མཐའ་དམ་པ་ཉིད་ཡོངས་སུ་བགྲོས་པ་ཡིན་པར་ཤེས་པར་བྱའོ། །གསང་༼༡༡༠༽བ་པའི་བདག་པོས་དེ་སྐད་ཅེས་སྨྲས་པས། དམན་པའི་ལུས་ཀྱི་སེམས་དཔའ་རྣམས་ཀྱིས་དཔག་ཏུ་མེད་པའི་སངས་རྒྱས་རྣམས་སེམས་ཉིད་སྟོན་པའི་སློབ་དཔོན་དམ་པས་བསྐྲུན་པ་ལས་བྱུང་བར་ཤེས་པར་གྱུར་ཏོ། །ཞེས་དོན་གྱི་ངོ་བོ་བསྟན་པ་དང༌། འཁོར་གྱིས་རྟོགས་པར་སྦྱར་བར་བྱའོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

བསྙེན་བཀུར་དམ་པར་མཆོག་གི་ལེའུ་སྟེ་དྲུག་ཅུ་བདུན་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། བསྙེན་བཀུར་གྱི་གནས་བླ་མ་དམ་པ་མཆོག་གི་མཚན་ཉིད་དང་ཇི་ལྟར་བསྟེན་པའི་ཁྱད་པར་རྣམས་བསྟན་པའི་ལེའུ་སྟེ་དྲུག་ཅུ་རྩ་བདུན་པ་ཉིད་གསལ་བར་བཀྲོལ་ཏེ་བསྟན་པའོ།། །།

ལེའུ་རེ་བརྒྱད་པ་ཆོས་ཐམས་ཅད་ཀྱི་སྒོ་རྣམ་པར་དབྱེ་བ།

༈ གསུམ་པ་སྒོ་མོ་ཀུན་ནས་བསྡུར་ཏེ་དོན་གནད་བསྡུ་བའི་བསླབ་པ་བུང་བ་ཚང་ཚོལ་བ་ལྟར་བཤད་པ་ལ་བཞི་སྟེ། མདོར་བསྟན་པ། རྒྱས་པར་བཤད་པ། བསླབ་པ་གཅེས་པར་གདམས་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། དུ་མ་མང་པོར་གྱུར། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས། དམན་པའི་ལུས་ཀྱི་སེམས་དཔའ་རྣམས་སྨྲས་པ། ཀྱེ་གྲོགས་པོ་དག་སྒོ་དབྱེ་བར་བྱ་བ་ནི་འདི་ལྟ་སྟེ། ཇི་བཞིན་པ་ཡི་དེ་ཁོ་ན། །ཉིད་དུ་ངེས་པའི་ངོ་བོ་ལ། །རིག་དང་མ་རིག་རྣམ་པ་ཡིས།། ཀུན་ཤེས་སྤྱོད་དང་ཀུན་ཏུ་རྨོངས། །དམ་པ་གཉིས་སུ་སྣང་བ་ལ། །ཐ་དད་དུ་མ་མང་པོར་འགྱུར།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དེ་ནས་ཡང་འཆད་པའི་སྐྱེས་བུ་གསང་བ་པའི་བདག་པོས། འཁོར་དམན་པའི་ལུས་ཀྱི་བྱང་ཆུབ་སེམས་དཔའ་རྣམས་ལ་བསླབ་པ་གསུམ་པ་སྒོ་ཀུན་ནས་བསྡུར་བ་ཉིད་བཀའ་སྩལ་ཏེ་སྨྲས་པ། ཀྱེ་གྲོགས་པོ་དག འཇིག་རྟེན་པ་དང་འཇིག་རྟེན་ལས་འདས་པའི་གསང་སྒོ་དབྱེ་བར་བྱ་བ་ཉེ་བར་སྟོན་པ་ནི་འདི་ལྟ་སྟེ། གསང་སྔགས་ཀྱི་རང་བཞིན་ཆོས་རྣམས་ཀྱི་ཆོས་ཉིད་ཇི་བཞིན་པ་ཡི་གནས་ལུགས་ཡེ་ནས་མ་བསླད་པས་དེ་ཁོ་ན་ཉིད་མ་ནོར་མ་བཅོས་པར་དོན་མཆོག་མི་འགྱུར་བ་ཉིད་དུ་ངེས་པའི་ངོ་བོ་གཞིའི་གསང་དོན་ལ་ཡེ་ནས་གནས་པ་ནི་ལྟ་བ་ཐ་དད་འབྱུང་བའི་གཞིར་གྱུར་པའོ། །འདིར་དེ་ཉིད་རྟོགས་པར་བྱ་བའི་ཐབས་ལ་གོལ་སྒྲིབ་ཀྱི་གཡང་ས་མེད་པར་བྱ་བའི་ཕྱིར། ལྟ་བ་མ་དག་པ་དང་དག་པ་ཐ་དད་སྨོས་པ་ནི་གང་སྙམ་པ་ལ། སྔ་མར་སྦྱངས་པ་དང༌། ཡང་དག་པའི་རྐྱེན་གྱིས་ཆོས་ཐམས་ཅད་ཀྱི་དེ་ཁོ་ན་ཉིད་མ་ནོར་བར་རྟོགས་ཤིང་རིག་པ་དང༌། རྟོག་པ་མང་པོས་བསླད་ཅིང་ཞེན་པས་དོན་མ་རྟོགས་ཤིང་མ་རིག་པ་ཡི་ལྟ་བའི་མཐོ་དམན་གཉིས་ཀྱི་རྣམ་པའི་ཁྱད་པར་ལ་བརྟེན་པ་ཡིས་སྒོ་ནས། སྔ་མ་ཡང་དག་པར་རིག་པའི་ཆོས་ཀུན་གྱི་དེ་ཁོ་ན་ཉིད་ཤེས་ནས་སྤྱོད་པ་འཇིག་རྟེན་ལས་འདས་པའི་ཐེག་པ་རྣམས་དང༌། ཕྱི་མ་རིག་པར་༼༡༡༡༽ཀུན་ཏུ་རྨོངས་པའི་སྤྱོད་པ་རྣམ་པ་གཉིས་སུ་སྣང་བ་ལས་ནང་རིས་མི་མཐུན་པ་ཐ་དད་དུ་མ་མང་པོར་གྱུར་ཏེ་སྣ་ཚོགས་སུ་གྱེས་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། འཇིག་རྟེན་པའི་ལྟ་བ་བསྟན་པ། འདས་པའི་ཐེག་པ་བཤད་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཤིན་ཏུ་རྒྱས་པར་བཤད་པའོ། །དང་པོ་ནི།

རྨོངས་པ་རྣམ་པ། ཞེས་པ་ནས། པ་དང་ལོག་པར་ཤེས། །ཞེས་པའི་བར་གྱིས་བསྟན་ཏེ།

རྨོངས་པ་རྣམ་པ་གཉིས་སྣང་བ། །མི་ཤེས་པ་དང་ལོག་པར་ཤེས།།

དེ་ལ་འཇིག་རྟེན་པ་ལས་ཐ་དད་དུ་གྱེས་པ་གང་ཞེ་ན། དོན་གང་ལ་རྐྱེན་གང་གིས་སྒྲིབ་སྟེ་མ་ཤེས་པ་ནི། འཇིག་རྟེན་པའི་མ་རིག་པའི་ལྟ་བ་ལ་བརྟེན་པས་རྨོངས་པ་རྣམ་པ་གཉིས་སུ་སྣང་བ་དག་སྟེ། གང་རྐྱེན་དང་མ་འཕྲད་ཀྱང་རྒྱུ་འབྲས་ལ་མ་དཔྱད་པས་མི་ཤེས་པ་མ་རྟོགས་པ་དང༌། རྐྱེན་དང་འཕྲད་དེ་དཔྱད་ཀྱང་ཕྱིན་ཅི་ལོག་པར་ཤེས་པ་ལོག་པར་རྟོག་པ་དང་གཉིས་སོ། །འདི་དག་ཕྱོགས་སྔ་ཕྱིས་མདོ་རྒྱས་སུ་འགྲེལ་པ་རིམ་པ་ལྔར་འགྱུར་རོ།།

གཉིས་པ་རྒྱས་པར་བཤད་པ་ནི།

མི་ཤེས་ཕྱལ་བ། ཞེས་པ་ནས། བྱུང་བ་ཞེས་ཀྱང་བཤད། །ཅེས་པའི་བར་གྱིས་བསྟན་ཏེ།

མི་ཤེས་ཕྱལ་བ་རྒྱང་འཕེན་གཉིས། །ལོག་རྟོག་མུར་རྟུག་མུ་སྟེགས་པ།།

དེ་ཡང་ཞེན་ཆགས་ལོག་སྲེད་ཅན། །འཇིག་རྟེན་འཇིག་རྟེན་ པ་ཞེས་བྱ།།

མུ་སྟེགས་ལོག་དང་གཞན་རྐྱེན་ལོ། །ཞར་ལས་བྱུང་བ་ཞེས་ཀྱང་བཤད།།

དེ་ཡང་བདག་མེད ་རྟོགས་པའི་ཤེས་རབ་ཀྱང་མ་སྐྱེས་ལ་ལས་རྒྱུ་འབྲས་ཀྱི་མཚན་ཉིད་ཀྱང་མ་རྟོགས་པས་མི་ཤེས་པ་ལའང༌། བདག་དང་ཡུལ་གྱི་དངོས་པོར་ཞེན་ཅིང་ཆགས་པ་ཅན་གྱི་ཕྱལ་བ་དང་རྒྱང་འཕེན་གཉིས་དང༌། ཕྱིན་ཅི་ལོག་གི་མུ་བཟུང་ནས་ཤེས་པར་བྱ་བའི་ཡུལ་དུ་རྟོག་པ་ལའང༌། ཆད་པའི་མུར་ཐུག་པ་དང༌། རྟག་པའི་མུ་ལ་སྟེགས་འཆའ་བ་དང་གཉིས་སོ། །དེ་ཡང་ཕྱལ་བ་ནི། ཡང་དག་པའི་རྐྱེན་དང་ཤེས་རབ་མེད་པར་རྒྱུ་དང་འབྲས་བུ་ལ་ཀུན་ཏུ་རྨོངས་པའི་ལྟ་བ་ལ་ཞེན་ཆགས་ཅན་དང་། རྒྱང་འཕེན་ནི། འཇིག་རྟེན་གྱི་གསང་ཚིག་ལ་བརྟེན་ཅིང་ཚེ་འདི་གཅིག་པུའི་བཙན་ཕྱུག་དང་མཐུ་སྟོབས་ཀྱིས་ཕན་བདེ་བསྒྲུབ་པའི་ལོག་པའི་ལྟ་བ་ལ་སྲེད་པ་ཅན་ནོ། །མུར་ཐུག་པ་ནི། འཇིག་རྟེན་འདི་གང་ཙམ་ལས་ཚེ་སྔ་ཕྱི་ཁས་མི་ལེན་པས་ཆད་པའི་མུར་ཐུག་པའི་ཕྱིན་ཅི་ལོག་གི་ལྟ་བ་ལ་རྟེན་པ་ཅན་དང༌། མུ་སྟེགས་པ་ནི། འཇིག་རྟེན་སྔ་ཕྱི་ཡོད་ཀྱང་རང་བཞིན་དང་བྱེད་པ་པོ་རྟག་པར་ཁས་ལེན་པ་ཡིན་པས་རྟག་པའི་མུ་ལ་སྟེགས་འཆའ་བའི་ལོག་པར་ལྟ་བ་ཅན་ཞེས་བྱའོ། །མུ་སྟེགས་པ་དེ་ལའང་རང་བཞིན་གྱིས་ལོག་པར་དམུས་ལོང་ལྟ་བུ་དང༌། ༼༡༡༢༽གཞན་གྱི་རྐྱེན་གྱིས་ལོག་པ་འཕྲལ་དུ་ལོང་བ་ལྟ་བུ་དང་གཉིས་ཏེ་དེ་ལྟར་ལྔའོ། །ལོག་རྟོག་དེ་དག་ལ་ཡང་རྟག་ཆད་གཉིས་དང་ཐེག་པའི་ཞར་ལས་བྱུང་བའམ་ཞལ་ལས་བྱུང་བའི་ལོག་པ་ཞེས་ཀྱང་བཤད་དེ་གསུམ་དུའང་བཀའ་སྩལ་ཏོ།།

གསུམ་པ་ཤིན་ཏུ་རྒྱས་པར་བཤད་པ་ལ་གཉིས་ཏེ། མི་ཤེས་པ་བཤད་པ། ལོག་པར་ཤེས་པ་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

མི་ཤེས་འདི་གཉིས་བཞིར་སྣང་བ། །ཞེས་པས་བསྟན་ཏེ།

མི་ཤེས་འདི་གཉིས་བཞིར་སྣང་བ།།

མི་ཤེས་པའམ་མ་རྟོགས་པ་ཕྱལ་བ་དང་རྒྱང་འཕེན་འདི་གཉིས་ཀྱི་རེ་རེ་ལའང་གཉིས་རེ་སྟེ་མ་རྟོགས་སྡེ་བཞིར་རྒྱས་པར་སྣང་བ་གང་ཞེ་ནའང་འདི་ལྟ་སྟེ། ཞེས་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། ཕྱལ་བ་བསྟན་པ། རྒྱང་འཕེན་བཤད་པའོ། །དང་པོ་ནི།

དམན་རིགས་དང་ནི་རིགས་མ་ངེས། །ཞེས་པས་བསྟན་ཏེ།

དམན་རིགས་དང་ནི་རིགས་མ་ངེས།།

དང་པོ་ཕྱལ་བ་ལའང་དམན་པའི་རིགས་ཅན་གྱི་ཤེས་པ་མ་རིག་པས་མགོ་རྨོངས་ནས་གང་དུའང་མི་འཇུག་པ་དང་ནི། ཡང་དག་པ་དང་ལོག་པའི་ཐལ་བ་གང་དུའང་རིགས་མ་ངེས་པས་རྐྱེན་ལ་རག་ལས་ཏེ་འགྱུར་བ་ཅན་དང་གཉིས་སོ།།

གཉིས་པ་རྒྱང་འཕེན་བཤད་པ་ནི།

རིགས་ཆད་འདུ་ཤེས། ཞེས་པ་ནས། འཛིན་པའི་ཞིང་དུ་སྣང༌། །ཞེས་པའི་བར་གྱིས་བསྟན་ཏེ།

རིགས་ཆད་འདུ་ཤེས་ཅན་འདི་དག །ཀུན་ནས་དཀྲིས་པའི་མུན་པ་ཡིན། །འདུ་ཤེས་ཅན་བཞི་ཆགས་པ་དང་།།

གང་ལ་གཡེང་དང་ཡ་ང་ཅན། །མོས་པ་ཅན་ཞེས་གྲགས་པ་རྣམས། །ས་བོན་འཛིན་པའི་ཞིང་དུ་སྣང་།།

གཉིས་པ་རྒྱང་འཕེན་ལའང༌། རིགས་ཆད་པས་བྱང་ཆུབ་ཀྱི་མྱུ་གུ་རྩ་བ་ནས་ཚིག་པ་ཅན་དང༌། འདུ་ཤེས་ཅན་པ་འདི་དག་དང་གཉིས་སོ། །འདི་གཉིས་ནི། ཆོས་ཉིད་ཡང་དག་པའི་དོན་མཐོང་དུ་མི་སྟེར་བས་སྔར་འཇུག་སྒོ་མི་གསལ་བར་ཀུན་ནས་དཀྲིགས་པའི་མུན་པར་གྱུར་པ་ཉིད་དུ་བསྟན་པ་ཡིན་ནོ། །རྒྱང་འཕེན་གཉིས་པ་འདུ་ཤེས་ཅན་ལའང་དབྱེ་ན་བཞི་སྟེ། ཚེ་འདིའི་འཚོ་བ་དང་ལོངས་སྤྱོད་དང་མཐུ་དང་ལང་ཚོ་ལ་སོགས་པ་ལ་ཆགས་པའི་འདུ་ཤེས་ཅན་གྱི་འདོད་ཆེན་པ་དང༌། གང་མོ་དང་བོན་གྱི་བྱ་བ་དང་ཉོ་ཚོང་དང་ལོངས་སྤྱོད་ལ་སོགས་པ་རྣམས་ཀྱི་ཕྱིར་མཚན་མའི་གཡེང་བ་འཇིག་རྟེན་གྱི་གཙུག་ལག་ལྟ་བུའི་འདུ་བྱེད་ལ་རྟེན་པའི་འདུ་ཤེས་ཅན་དང༌། བདག་དང་འཁོར་གྱི་ཕྱིར་ལས་རྒྱུ་འབྲས་ལ་རྟེན་པར་ཚེ་འདིའི་ཁྱད་པར་གྱི་ཆེད་དུ་ཡ་ང་བའི་སྡིག་པ་སྤྱོད་དེ་ཕྱུགས་ཀྱི་མཆོད་སྦྱིན་སོགས་བྱེད་པའི་འདུ་ཤེས་ཅན་དང༌། རང་གི་ལྟ་བ་ལོག་པར་འཁྲིགས་ཏེ། སྡིག་པ་སྤང་བ་དང་གཞན་གྱི་དགེ་བ་བྱེད་པ་ལ་སོགས་སངས་རྒྱས་པ་ལ་ཤིན་ཏུ་མོས་པ་ཅན་ཞེས་བཀའ་རྒྱུད་ལས་༼༡༡༣༽གྲགས་པ་ཡི་འདུ་ཤེས་ཅན་བཞི་པོ་རྣམས་ཏེ། འདི་དག་གཏན་ནས་རིག་ཆད་པ་མ་ཡིན་པར་བདེ་བར་གཤེགས་པའི་རྒྱུའི་བྱང་ཆུབ་སེམས་ཀྱི་ས་བོན་ཙམ་འཛིན་པ་ཅན་ཡིན་པས་ལོག་པའི་རྐྱེན་དང་འཕྲད་ན་འཆིང་ཀྱང་ཡང་དག་པའི་རྐྱེན་དང་འཕྲད་ན་གྲོལ་ཐར་གྱི་རྟེན་ཡོད་པས་རྒྱལ་བའི་ཞིང་ཁམས་མི་མཇེད་འདི་ཉིད་དུ་སྣང་ཞིང་འབྱུང་སྟེ་བརྒྱུད་ནས་ལན་གཅིག་ཐར་པའང་ཐོབ་བོ། །འདི་དག་དང་རིགས་ཆད་དང་རྒྱང་འཕེན་ཉིད་དང་དྲུག་ནི་བཤད་པའི་ལོག་ཞེན་སྡེ་དྲུག་བརྒྱུད་པའོ། །ཞེས་པར་ཡང་འཇལ་ཏོ། །ཞེས་འགྲེལ་ཆེན་ཉིད་ཀྱི་དགོངས་པ་སྟེ། སྔར་ལེའུ་སོ་བདུན་པར་བཤད་པ་ནི་ཆོས་རྗེའི་ཕྱག་མཆན་གྱི་དགོངས་པའོ།།

གཉིས་པ་ལོག་པར་ཤེས་པ་བསྟན་པ་ལ་གཉིས་ཏེ། རང་བཞིན་ལོག་པར་བསྟན་པ། གཞན་རྐྱེན་ལོག་པ་བཤད་པའོ། །དང་པོ་ནི།

ལོག་པར་རྟོག་འདི། ཞེས་པ་ནས། ལོག་པས་ལོག་པ་ཉིད། །ཅེས་པའི་བར་གྱིས་བསྟན་ཏེ།

ལོག་པར་རྟོག་འདི་ཡ་མཚན་ཅན། །བརྒྱ་ཕྲག་གསུམ་དང་དྲུག་ཅུ་གཉིས། །ཉི་ཤུའམ་སྟེ་བཅོ་ལྔ་གཉིས། །ཐ་དད་རྣམ་པ་དུ་མར་སྣང་། །ཡོད་དང་མེད་པའི་ཕྱོགས་འཛིན་ལས། །འཇིག་པའི་ཚོགས་དང་མཐར་འཛིན་དང་།།

ལོག་པར་འཛིན་དང་ལྟ་ཁྱད་ཅན། །རང་གི་བརྟུལ་ཞུགས་མཆོག་འཛིན་ཏེ།།

རིགས་མི་མཐུན་པ་སྡེ་ལྔར་གྲགས། །རང་བཞིན་ལོག་པའི་ལོག་པ་ཉིད།།

རང་བཞིན་ལོག་པ་རྣམས་བསྟན་པའི་ཕྱིར། མུར་ཐུག་པ་དང་མུ་སྟེགས་ཀྱི་ལྟ་བ་རང་བཞིན་གྱིས་ལོག་པར་རྟོག་པའི་ནང་ནས་རིགས་མང་པོར་གྱེས་པ་རྣམས་ཏེ། འདི་ལ་བསྟིང་ཚིག་གིས་ངོ་མཚར་རམ་ཡ་མཚན་གྱི་མངོན་ཤེས་ལ་བརྟེན་ནས་སྒྲོ་བཏགས་པ་ཅན་ཡང་ཡོད་དོ། །དེ་དག་གང་ཞེ་ན། བརྒྱ་ཕྲག་གསུམ་དང་དྲུག་ཅུ་གཉིས། །ཉི་ཤུའམ། ཞེས་པ་རྣམས་མས་ནས་ཡར་བགྲང་སྟེ། ལྟ་ངན་དྲུག་ཅུ་པོ་དེ་ཉིད་སྟོན་པ་དྲུག་གིས་དྲུག་ཅུར་བཤད་པས་བརྒྱ་ཕྲག་གསུམ་སྟེ་སུམ་བརྒྱ་དང་དྲུག་ཅུའོ། །འདས་པའི་ཕུང་པོ་ལྔ་ལ་ཉི་ཤུ། ད་ལྟར་གྱི་ཕུང་པོ་ལྔ་ལ་ཉི་ཤུ། མ་འོངས་པའི་ཕུང་པོ་ལྔ་ལ་ཉི་ཤུ་སྟེ་དྲུག་ཅུ་དང་རྩ་བའི་རྟག་ཆད་གཉིས་སོ། །ཡང་ན་སུམ་བརྒྱ་ནི་ཕུང་པོ་ལྔ་རེ་རེ་ལ་སྡེ་བཅུ་བཅུར་ཕྱེ་བས་ལྔ་བཅུ། དེ་མུ་སྟེགས་ཀྱི་སྟོན་པ་དྲུག་གིས་འབྲས་བུ་ལྔ་བཅུར་བཤད་པས་སུམ་བརྒྱའོ། །ལྟ་བ་དྲུག་ཅུ་ནི། སྔོན་གྱི་མཐའ་ལ་རྟོག་པ་བཞི་ཅུ་རྩ་གཉིས་དང༌། ཕྱི་མའི་མཐའ་ལ་རྟོག་པ་བཅོ་བརྒྱད་དེ། །སྔོན་མུ་སྟེགས་ཀྱིས་མངོན་ཤེས་སྐྱེས་པའི་ལོ་རྒྱུས་ཀྱིས་བསྟན་པ་རྣམས་དང༌། གཞི་མ་རྟག་ཆད་གཉིས་ཏེ་དྲུག་ཅུ་རྩ་གཉིས་སོ། །ལོག་པའི་རི་བོ་ཉི་ཤུ་ནི། ཕུང་པོ་ལྔ་ཡི་གཟུགས་གཅིག་པུ་ལའང་གཟུགས་བདག་ཉིད་ཡིན་པ་དང༌། གཟུགས་བདག་གི་ཡིན་པ་དང༌། གཟུགས་བདག་ལ་གནས་པ་དང༌། གཟུགས་བདག་དང་ལྡན་པ་བཞིར་༼༡༡༤༽རྟོག་པ་དང་དེ་བཞིན་དུ་ཕུང་པོ་བཞི་རེ་རེ་ལའང་བཞི་བཞི་སྟེ་བཞི་ཕྲག་ལྔ་ལ་ཉི་ཤུའོ། །འདི་དག་ལ་དུས་གསུམ་ལོག་པའི་རི་བོ་ཉི་ཤུ་ཞེས་དུས་གསུམ་གྱི་ཕུང་པོ་ལ་རྟོག་པས་དྲུག་ཅུར་ཡང་འགྱུར་ཏེ་གོང་མ་དང་མཐུན་ནོ། །དེ་ལྟར་དབྱེ་བའམ། ཡང་སྟོན་པ་དྲུག་གིས་ལྟ་བའི་སྡེ་མི་མཐུན་པ་འོག་ནས། བཅོས་མར་སྤྱོད་དང་མུ་ཅོར་སྨྲ། །ལུང་གི་ཕྱོགས་ཙམ་བརྟེན་པ་དང༌། །ཕྱོགས་ལོག་གོལ་དང་བསླབ་པ་འཆལ། །ཕྱོགས་ལྟོས་གཅོད་པ་རྣམ་བཞིར་གྲགས། །ཞེས་པས་ཕྱོགས་ལྟོས་གཅོད་པ་ཡན་ཆད་དྲུག །དེ་རང་ལའང་ཕྲ་མེན་སྤྱོད། །ལུང་ལ་རྟེན་དང་རྟགས་ཙམ་འཛིན། །ཞེས་པ་ལྟར་ཕྲ་མེན་སྤྱོད་པ་དང༌། །སངས་རྒྱས་པའམ་ལོག་པའི་ལུང་ལ་བརྟེན་པ་དང༌། ཐར་པ་ལོག་པར་རྟེན་པ་དང༌། རྟགས་ཙམ་འཛིན་པ་བཞིའོ། །དེ་ལྟར་ལྟ་བའི་སྡེ་མི་མཐུན་པ་བཅུ་གསུངས་པ་དང༌། འཇིག་པའི་ཚོགས་དང་མཐར་འཛིན་དང༌། །ལོག་པར་འཛིན་དང་ལྟ་ཁྱད་ཅན། །རང་གི་བརྟུལ་ཞུགས་མཆོག་འཛིན་ཏེ། །རིགས་མི་མཐུན་པ་སྡེ་ལྔར་གྲགས། །ཞེས་པ་ལྟར་ལོག་ལྟ་དང་འཇིག་ཚོགས་ལ་སོགས་པ་ལྔ་དང༌། ཡོད་དང་མེད་པའི་ཕྱོགས་འཛིན་ལས། །ཞེས་པས་གསལ་བ་ལྟར་གཞི་རྟག་ཆད་གཉིས་ལ་སོགས་པ་ལྟ་བའི་རི་བོ་གྲངས་ཐ་དད་ཅིང་རྣམ་པ་མི་མཐུན་པ་དུ་མར་སྣང་བ་རྣམས་སོ། །ཡོད་པ་རྟག་པའི་ཕྱོགས་དང་མེད་པ་ཆད་པའི་ཕྱོགས་སུ་འཛིན་པའི་སྡེ་གཉིས་ནི་ལྟ་བའི་གཞི་ཡིན་པས་རྩ་བ་འདི་ཉིད་དེ། ཆད་པ་འབྲིང་ཧས་པའི་ལུགས་ཚེ་འདིར་གློ་བུར་དུ་སྐྱེས་ལ་མཐའ་ཆད་པར་བསྒྲུབ་པ་དང༌། རྟག་པར་ལྟ་བའི་ལུགས་ཀྱིས་སྙིང་གི་དཀྱིལ་ན་ཡོད་པའི་ངོ་བོ་དེ་གཏན་ཚིགས་ལྔ་དང་བཞིས་བསྒྲུབ་པ་དང༌། ལས་ཞེས་འབྱུང་ཁུངས་ཀྱི་དོན་གྱིས་དེ་གཉིས་ནི་ལྟ་བ་ཐམས་ཅད་ཀྱི་རྩ་བའོ། །གཞི་དེ་ལས་ལྔར་གྱེས་པའི་ཕྱིར། ལོག་ལྟ་སྡེ་ལྔ་གང་ཞེ་ན། སྔར་བཤད་པའི། གང་དུ་དམུས་ལོང་ལམ་ཞུགས་པ། །ཡིད་ཀྱིས་གོམས་པའི་ཚད་དཔགས་ནས། །ཉམ་ངའི་ལམ་དུ་རྒྱུག་པ་ལྟར། །ཚོད་དཔག་ཙམ་ལ་གཙོར་འཛིན་འབྱུང༌། །དེ་ཡང་ཇི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །གང་དུ་མུན་པས་ཟིན་པ་ཡིས། །བརྟུལ་ཞུགས་མཆོག་འཛིན་ལྔ་སྡེ་པའོ། །ཞེས་གསུངས་པའང་འདིར་འཇལ་ཏེ། གང་གིས་གང་འཇིག་པ་ལ་འཇིག་པའི་རྒྱུ་༼༡༡༥༽ཡོད་པས་ཕུང་པོ་ལྔའི་འཇིག་ཚོགས་ལ་ལྟ་བ་དང༌། རྟག་ཆད་གང་ལ་འཛིན་པ་སྟེ་70མཐའ་ཡིན་ཀྱང་མ་རྟོགས་པས་མཐར་འཛིན་པར་ལྟ་བ་དང༌། སངས་རྒྱས་མེད་པ་སོགས་ཡང་དག་པ་མ་ཡིན་པ་ལ་དེར་བཟུང་བས་ལོག་པར་འཛིན་པའི་ལྟ་བ་དང༌། དེ་གསུམ་ལ་ལྟ་བ་ཁྱད་པར་ཅན་དུ་ཞེན་ནས་ཡང་དག་པ་ལ་སུན་བཏོན་ཏེ་ང་རྒྱལ་དུ་བཟུང་བས་ལྟ་བ་མཆོག་ཏུ་འཛིན་པ་དང༌། ཁྱི་ཕག་གི་བརྟུལ་ཞུགས་དང༌། མེ་ལྔ་བསྟེན་པ་དང༌། དབྱུག་གུ་གསུམ་ལ་སོགས་རང་གི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་རྣམས་ཏེ། ལྟ་བའི་རིགས་མི་མཐུན་པ་སྡེ་ལྔར་གྲགས་པ་འདི་ནི་རྐྱེན་གྱིས་མ་བསྒྱུར་བར་ཐོག་མ་ཉིད་ནས་རང་བཞིན་གྱིས་ལོག་སྡེ་པར་གྱུར་པས་དམུས་ལོང་ལྟ་བུའི་ལོག་པ་ཉིད་དོ། །འདི་དག་ལེའུ་སོ་བདུན་པར་ནི། གསང་བ་ཉིད་ལས་གོལ་བའི་ལོག་པར་སྨྲ་བའི་ལོག་སྲེད་ཅན་དུ་གྱུར་པ་ཞེའོ།།

གཉིས་པ་གཞན་རྐྱེན་ལོག་པ་བཤད་པ་ལ་བཞི་སྟེ། མདོར་བསྟན་པ། རྒྱས་པར་བཤད་པ། ཤིན་ཏུ་རྒྱས་པར་བཤད་པ། མཇུག་བསྡུ་བའོ། །དང་པོ་ནི།

གཞན་རྐྱེན་ལོག་པ། ཞེས་པ་ནས། རྟེན་དང་རྟགས་ཙམ་འཛིན། །ཞེས་པའི་བར་གྱིས་བསྟན་ཏེ།

གཞན་རྐྱེན་ལོག་པ་ཕྲ་མེན་སྤྱོད། །ལུང་ལ་རྟེན་དང་རྟགས་ཙམ་འཛིན།།

ཞར་བྱུང་རུ་ངན་པ་ལ་སོགས་གཞན་རྐྱེན་གྱིས་བསླད་ནས་ལོག་ལྟར་གྱུར་བ་ལྟ་བ་དག་མ་དག་དང་དགེ་སྡིག་འདྲེས་མར་གྱུར་ཏེ་ཕྲ་མེན་དུ་སྤྱོད་པ་དང༌། ཕྱིན་ཅི་མ་ལོག་པའི་ལུང་གི་ཤེས་རབ་དང་མན་ངག་གིས་མ་ཟིན་པར་སངས་རྒྱས་པའི་ལུང་གི་ཕྱོགས་ཙམ་མམ་ལོག་པའི་ལུང་ལ་བརྟེན་པ་དང༌། རྟེན་སྐྱབས་ལོག་པའམ་ལོག་པའི་ཐར་པ་ལ་རྟེན་དུ་བཅས་པ་དང༌། འདི་ནི་རྟེན་དང་སྐྱབས་ལོག་པས་ཕྱོགས་ལོག་གོལ་བ་དང་བསླབ་པ་འཆལ་བའོ། །དོན་ལོག་པར་གནས་ཀྱང༌། གསང་བའི༌ཚིག་དང་གསང་རྫས་འཆང་བའམ་ཆོས་གོས་ལ་སོགས་པ་སངས་རྒྱས་པའི་རྟགས་ཙམ་འཛིན་པ་དང་བཞིའོ།།

གཉིས་པ་རྒྱས་པར་བཤད་པ་ནི།

བཅོས་མར་སྤྱོད་དང༌། ཞེས་པ་ནས། བཅོད་པ་རྣམ་བཞིར་གྲགས། །ཞེས་པའི་བར་གྱིས་བསྟན་ཏེ།

བཅོས་མར་སྤྱོད་དང་མུར་ཅོར་སྨྲ། །ལུང་གི་ཕྱོགས་ཙམ་རྟེན་པ་དང་།།

ཕྱོགས་ལོག་གོལ་དང་བསླབ་པ་འཆལ། །ཕྱོགས་ལྟོས་སྤྱོད་པ་རྣམ་བཞིར་གྲགས།།

དེ་ལའང་སྤྱིར་ཡན་ལག་དྲུག་སྟེ། ལོག་སྡེ་པ་དང་ཆ་མཐུན་གོལ་བའི་རྣམ་གྲངས་གཉིས་ཉིད་དེ། དངོས་རྣམ་པ་དྲུག་གི རྐང་པ་དང་པོ་ལ་ལོག་པའི་སྤྱོད་པ་ལ་ཡང་དག་ཏུ་རློམ་ནས་བཅོས་མར་སྤྱོད་པ་དང་མི་བདེན་པའི་གཞུང་ལ་བརྟེན་ནས་རང་ལ་དོན་དང་མཐུན་པའི་རིགས་པ་མེད་པར་གང་རུང་རུང་གི་མུ་ཅོར་སྨྲ་བ་དང་གཉིས་༼༡༡༦༽ཏེ། ཕྱི་མ་འདི་ལས་མུ་ཅོར་སྨྲ་བ་བཞི་སྡེ་པའོ། །ཞེས་པར་ཡང་དབྱེ་སྟེ་དོན་འོག་ནས་འབྱུང་བ་དང་ཕྱོགས་ལོག་ཏུ་མཐུན་ནོ། །རྐང་པ་གཉིས་པ་ལ་སངས་རྒྱས་པའི་ལུང་གི་ཕྱོགས་ཙམ་ལ་རྟེན་ཏེ་སྡེ་སྣོད་ལས་གོལ་བ་དང་ལོག་པའི་ལུང་ལ་རྟེན་པས་གོལ་བ་སྟེ་དོན་ལོག་པ་གཅིག་ཏུ་གྱུར་པ་དང༌། རྐང་པ་གསུམ་པ་ལ། བདེན་རྫུན་ལ་མི་འཛེམ་པར་སྨྲ་བའི་ཕྱོགས་ལོག་གོལ་བ་དང༌། བསླབ་ཐབས་ལོག་པས་བསླབ་པ་འཆལ་བ་གཉིས་སོ། །རྐང་པ་བཞི་པ་ལ། ཡང་དག་པའི་ལམ་གྱི་གསང་བའི་ཕྱོགས་ཙམ་ལ་ལྟོས་ནས་བདག་ཏུ་འཛིན་ཏེ་ལོག་པར་གཅོད་པ་སྟེ། འོག་ནས་འབྱུང་བའི་ཕྱི་རོལ་པ་དང༌། ཡང་དག་པ་དང༌། གསང་སྔགས་པ་དང༌། གསང་ཆེན་པ་སྟེ་ཞར་བྱུང་རྣམ་པ་བཞིར་གྲགས་སོ།།

གསུམ་པ་ཤིན་ཏུ་རྒྱས་པར་བཤད་པ་ལ་གསུམ་སྟེ། ཕྲ་མེན་སྤྱོད་པ། ལུང་ལོག་པ། རྟགས་ཙམ་འཛིན་པའོ། །དང་པོ་ལ་གཉིས་ཏེ། བཅོས་མར་སྤྱོད་པ། མུ་ཅོར་སྨྲ་བའོ། །དང་པོ་ནི།

བཅོས་མ་གཞན་ལས། ཞེས་པ་ནས། རྣམ་པར་མི་གཡེང་ལྟ། །ཞེས་པའི་བར་གྱིས་བསྟན་ཏེ།

བཅོས་མ་གཞན་ལས་གྱུར་པ་དང་། །འདི་ལས་གྱུར་བ་གཉིས་ཁོ་ན། །གནས་དང་འཁོར་དང་ཡོ་བྱད་ནོར།།

ལོངས་སྤྱོད་ལྔ་ལྡན་གཞན་ལས་གྱུར། །དྲན་པ་རྟག་ལྟ་ལྟོས་འཛིན་རྒྱུ། །མེད་པའི་མཐའ་དང་མཐའ་མེད་ཤེས།། ཀུན་ནས་རྣམ་པར་མི་གཡེང་ལྟ།།

ཕྱོགས་ཕྱི་མ་རྒྱས་པའི་ཡན་ལག་ཏུ་འགྲེལ་པ་ནི། དང་པོ་མུ་སྟེགས་བཅོས་མ་ལ་སྤྱོད་པར་ཡང་གཉིས་ཏེ། གཞན་སྟོན་པ་དྲུག་གམ་བདག་གི་བ་ལས་གྱུར་པ་དང་། གསང་སྔགས་སམ་བདག་ཉིད་འདི་ལས་གྱུར་པ་གཉིས་ཁོ་ནའོ། །དེ་ཡང་ཉིད་ཀྱི་ཡན་ལག་གཞན་ལས་གྱུར་པའི་ལྟ་ངན་ནི། ལོག་པའི་གནས་ལ་བདག་གིར་འཛིན་པ་དང༌། སྡིག་པའི་འཁོར་ལ་བདག་གིར་འཛིན་པ་དང༌། ལོག་པའི་ཡོ་བྱད་ལ་བདག་གིར་འཛིན་པ་དང༌། 71བྲིད་པའི་ནོར་ལ་བདག་ཏུ་འཛིན་པ་དང༌། ལོངས་སྤྱོད་ཀྱི་ཁྱད་པར་ལ་བདག་གིར་འཛིན་པ་ལྔ་དང་ལྡན་པའི་ལྟ་བ་ཅན་ཏེ། དངོས་པོ་དེ་ཉིད་ཀྱིས་གཞན་ལས་གྱུར་པའི་རྩ་བའི་མིང་ཡང་ངེས་པར་འགྲུབ་བོ། །འདི་ལས་གྱུར་པའང་བདག་གི་སྔ་མ་ལ་ཅི་བྱས་པ་དྲན་པའི་ཕྱིར། དྲན་པའི་སེམས་པ་རྟག་པར་ལྟ་བ་དང༌། དེ་ལ་ལྟོས་ཤིང་བདག་གིར་འཛིན་ཏེ། དེ་ལ་ཀུན་འབྱུང་བའི་བྱེད་རྒྱུ་རྡུལ་དང་མུན་པ་སྙིང་སྟོབས་དག་གིས་འགྱུར་བ་བདག་གིར་གྱུར་པས་རང་བཞིན་གྱི་རྟག་པའི་རྒྱུར་ལྟ་བ་དང༌། རྒྱུར་ལྟ་བ་དེའང་དྲན་པ་རྟག་པ་ལ་ལྟོས་པ་མིན་པས་ཆོས་ཐམས་ཅད་དང་རྒྱུ་འབྲས་མེད་པར་ཤེས་པས་ལན་ཅིག་སྣང་བའི་མཐའ་མེད་པར་འདོད་པ་དང༌། དེ་རང་ཡང་མཐའ་ མེད་པར་༼༡༡༧༽ཤེས་ཏེ་སྟོང་པ་འབའ་ཞིག་ཏུ་ལྟ་བ་དང༌། བདག ་ཏུ་ལྟ་བ་ལ་བརྟེན་ནས་སྣང་ལ་མི་རྟོག་པ་ལ་སོགས་པ་བསྒོམ་ནས་ཀུན་ནས་རྣམ་པར་མི་གཡེང་བར་དོན་རྟོགས་པ་མེད་པར་དབང་པོ་བསྡམས་ཏེ་རྩེ་གཅིག་ཏུ་ལྟ་བ་མུ་སྟེགས་ཀྱི་བསམ་གཏན་ལ་གནས་པ་སྙོམས་པར་འཇུག་པ་བདུན་སྡེབ་ལྟ་བུ་སྟེ། དང་པོ་གཉིས་དང༌། ཐ་མ་རྟག་ལྟའི་བྱེ་བྲག་དང་བར་པ་གཉིས་ཆད་ལྟ་བྱེ་བྲག་པའོ།།

གཉིས་པ་མུ་ཅོར་སྨྲ་བ་ནི།

གང་དུ་ཤེས་པ། ཞེས་པ་ནས། ཚེ་འདི་མྱ་འདས། ཞེས་པའི་བར་གྱིས་བསྟན་ཏེ།

གང་དུ་ཤེས་པ་ཡོད་སྨྲ་ལྟ། །དེ་བཞིན་མེད་པར་ལྟ་བ་དང་། །འདིར་གང་འདི་ལས་གྱུར་ལྟ་བ།།

གང་དུ་ཡོད་མེད་མེད་མིན་ལྟ། །བདག་ཤི་འདི་ཚེ་མྱ་ངན་འདས།།

མུ་ཅོར་སྨྲ་བ་བཞིའང་མི་བདེན་པའི་གཞུང་སྨྲ་བས་མིང་ངེས་པར་འགྲུབ་སྟེ། དེ་ཡང་གང་དུ་རྣམ་པར་ཤེས་པ་གཉེན་པོ་མེད་པའི་རྟག་པའི་རྫས་སུ་ཡོད་པར་སྨྲ་ཞིང་དེ་ལ་ལྟ་བ་རྣམ་ཤེས་མཐའ་ཡས་སྐྱེ་མཆེད་ལྟ་བུ་སྟེ། ང་ནི་རྟག་ལ་བློ་ནི་འགྱུར། །འཇིག་རྟེན་འདི་ནས་ཕ་རོལ་ཏུ། །ཕུང་པོ་ཉིང་མཚམས་སྦྱོར་བ་ཡང༌། །རྫ་བཅག་བྱེའུ་འཕུར་ཇི་བཞིན་དུ། །རྟག་པ་ཐེ་བོང་ཡུངས་འབྲུ་ཙམ། །བདག་ཅེས་བྱ་བ་དེས་ལེན་ཏོ། །ཞེས་སྨྲ་བར་བྱེད་པ་དང༌། དེ་བཞིན་དུ་རྣམ་པར་ཤེས་པའང་རྫས་སུ་མ་གྲུབ་པའི་ཕྱོགས་ནས་བལྟས་པས་ཅི་ཡང་མེད་པར་སྨྲ་བའི་ལྟ་བ་ཅན་ཅི་ཡང་མེད་པའི་སྐྱེ་མཆེད་ལྟ་བུ་དང༌། ད་ལྟར་གྱི་ཚེ་འདི་ལ་བཟང་ངན་གང་དུ་སྣང་བ་ཀུན་ཡུལ་མེད་པར་རྟག་པའི་ངོ་བོ་འདི་ལས་འབྱུང་ཞིང་གྱུར་པར་ལྟ་བ་ནམ་མཁའ་མཐའ་ཡས་སྐྱེ་མཆེད་ལྟ་བུ། དངོས་པོ་འདི་དག་གང་དུ་ཡོད་པར་འགྱུར་རམ་མེད་པར་འགྱུར་ལྟ་བའང་ཡོད་ན་རྟག་ལ་མེད་ན་ཆད་པའི་ཕྱིར་འདུ་ཤེས་ནི་ཡོད་པའང་མིན་མེད་པའང་མིན་པར་ལྟ་བ་ཡོད་མིན་མེད་མིན་སྐྱེ་མཆེད་ལ་སོགས་པ་དཔེ་དཔེ་ཅན་བརྒྱད་དུ་ལྟ་བ་དག་དང༌། བདག་གི་ད་ལྟར་གྱི་ཚེ་འདི་ཡོད་ལ་ཤི་ནས་ཚེ་ཕྱི་མ་ཕན་ཆད་མེད་པར་ལྟ་བས་སྤྱོད་ཡུལ་འདི་ཀུན་ཀྱང་མྱ་ངན་ལས་འདས་ཏེ་ཕྱིས་མི་སྐྱེ་བར་འདོད་པའོ། །འདི་ཉིད་གསུམ་པ་དང་ཕྱོགས་གཅིག་གོ །དེས་ན་བཤད་པ་ལས་ནི། མུ་ཅོར་སྨྲ་བ་སྡེ་བཞི་པའོ། །ཞེས་གསུངས་པས་འདིར་དེ་དོན་བརྟག་པར་གཅེས་སོ།།

གཉིས་པ་ལུང་ལོག་པ་ནི།

གང་འདིར་ཕྱོགས་ཙམ། ཞེས་པ་ནས། ཡིན་པ་མ་ཡིན་ཉིད། །ཅེས་པའི་བར་གྱིས་བསྟན་ཏེ།

གང་འདིར་ཕྱོགས་ཙམ་རྟེན་པ་ནི། །གང་མ་ཡིན་པ་མ་ཡིན་ཉིད།།

ལུང་ལོག་པ་གང་འདིར་ཡང་རྒྱལ་བའི་ལུང་གི་ཕྱོགས་ཙམ་ལ་བརྟེན་ནས་ཅི་ཡང་མ་ཡིན་པར་ཡིད་ལ་བྱེད་པ་ནི། གང་ཡོད་པའང་མ་ཡིན་ལ་མེད་པའང་མ་ཡིན་ཏེ་ཅི་༼༡༡༨༽ཡང་མ་ཡིན་པ་ཉིད་ཀྱང་མ་ཡིན་པ་ཞིག་བདག་ཏུ་ཡོད་པར་འདོད་པ་སྟེ། རིན་པོ་ཆེ་གཏེར་གཏད་པ་ལས། ལ་ལས་ལུང་ཙམ་ལ་བརྟེན་ནས། །ཐམས་ཅད་ཅི་ཡང་མ་ཡིན་ལ། །མ་ཡིན་པ་ཡང་མ་ཡིན་འདོད། །འདི་ནི་བསྒྱུར་དཀའ་ཉེན་ཆེ་ལ། །སླུ་བྱེད་ལམ་གྱི་གཟུགས་བརྙན་ཡིན། །ཞེས་པ་ལྟར་རོ།།

གསུམ་པ་རྟགས་ཙམ་འཛིན་པ་ལ་གསུམ་སྟེ། ཕྱོགས་ལོག་གོལ་བ། བསླབ་པ་འཆལ་བ། ཕྱོགས་ལྟོས་གཅོད་པའོ། །དང་པོ་ནི།

ཕྱོགས་ལོག་གོལ་བར། ཞེས་པ་ནས། རྟེན་པ་དྲག་པོ འོ། །ཞེས་པའི་བར་གྱིས་བསྟན་ཏེ།

ཕྱོགས་ལོག་ལོག་པར་གང་གྱུར་པ། །དྲུག་སྟེ་སོ་སོར་ཐ་དད་དང་། །སྤྱིར་ལྟ་གང་རིག་སྐྱོན་མེད་པའོ།།

རྒྱུར་ལྟ་སྤྱད་པས་དག་པར་ལྟ། །འཚོ་བ་བཅོས་པས་དག་ལྟ་དང་། །རྒྱུན་ལ་ལྷམ་དང་གོས་བཅོས་པ།།

སྐྲ་སྤུ་བཅོས་པས་རྒྱན་ཅན་དང་། །དཀའ་ཐུབ་རྟེན་པ་དྲག་པོའོ།།

རྟེན་སྐྱབས་དང་ལྟ་བའི་ཕྱོགས་རིལ་ལོག་པས་གོལ་བར་འཕྱན་ཏེ་ལོག་པའི་དབང་དུ་གང་དེ་དག་གྱུར་པའི་ངེས་ཚིག་ཀྱང་འགྲུབ་སྟེ། དེའི་འདོད་གཞུང་བསྟན་པའང་གཉིས་ཏེ། སྟོན་པ་དྲུག་ལྟ་བ་མི་མཐུན་པའི་སྡེའམ། འཆད་པའི་ལྟ་བའི་སྡེ་དྲུག་གི་བྱེ་བྲག་སོ་སོ་ཐ་དད་ཀྱི་ཕྱོགས་སུ་འདོད་པ་དང༌། སྤྱིར་མུ་སྟེགས་ཀྱི་ལྟ་བ་གང་ལྟར་ཤེས་ཤིང་རིག་ཀྱང་སྐྱོན་མེད་དེ། དེས་ཐར་པའི་འབྲས་བུ་ཐོབ་པར་ལྟ་བ་དང་གཉིས་སུ་འདོད་པའོ། །དེ་ལ་ཁས་བླངས་པའི་སྡེ་དྲུག་དངོས་ནི། རྒྱུར་ལྟ་བའི་སྡེ་ལའང་བྱེད་པ་པོ་རྒྱུར་ལྟ་བ་དང༌། དུས་རྒྱུར་ལྟ་བ་དང༌། ངོ་བོ་ཉིད་རྒྱུར་ལྟ་བ་དང༌། རང་བཞིན་རྒྱུར་ལྟ་བ་དང༌། དབང་ཕྱུག་རྒྱུར་ལྟ་བ་དང༌། རྡུལ་ཕྲ་རབ་རྒྱུར་ལྟ་བ་དྲུག་ལས། འདིར་བྱེད་པ་པོ་རྒྱུར་ལྟ་བ་དང་པོའོ། །སྤྱོད་པ་ཁྲུས་དང་གཙང་སྦྲ་འབའ་ཞིག་སྤྱད་པས་དག་པར་ལྟ་བ་གཉིས་པའོ། །འཚོ་བ་བཟའ་བཏུང་བཅོས་ཏེ་ཟས་གཅིག་གམ་གཙང་མ་ཤ་སྟག་ཟོས་པས་དག་པའམ་ཐར་པར་ལྟ་བ་དང་གསུམ་མོ། །རྒྱུན་གྱི་དུས་ཐམས་ཅད་དུ་ཆ་ལུགས་བཅོས་ནས་སྤྱོད་པས་ཐར་པར་ལྟ་བ་ལའང༌། ལྷྭམ་དང་གོས་ཁ་དོག་བསྒྱུར་ཞིང་བཅོས་པས་དག་པར་ལྟ་བ་དང་བཞིའོ། །འདི་ལ། རྒྱན་ལ་ལྷྭམ་དང་གོས་བཅོས་པ། །ཞེས་པའང་བཞུགས་སོ། །གཅེར་བུ་དང་སྐྲ་དང་ཁ་སྤུ་འཆོས་ཤིང་བྲེགས་པ་དང༌། རལ་བར་བྱས་ནས་གནས་པ་སྟེ་མདོར་གཅེར་བུ་པ་དང༌། མ་ཕམ་སྐྲའི་ལྭ་བ་ཅན་ལྟ་བུའོ། །ལུས་ལ་ཐོད་པའི་རུས་པ་དང་ཐལ་བས་བརྒྱན་པའི་རྒྱན་ཅན་པ་དང་ལྔའོ། །ཡང་ན་རྒྱུར་ལྟ་སོ་སོ་ཐ་དད་ལ་སྦྱར་ནས་འདི་གཉིས་ལོགས་སུ་བགྲང་བར་བཞེད་པའང་ཡོད་དོ། །བྱ་དང་ཁྱི་དང་མི་ལྔ་བརྟེན་པ་དང་ཉི་ཟླ་བཟུང་བ་དང༌། ཆུ་མི་བཏུང་བ་ལ་སོགས་པའི་དཀའ་ཐུབ་རྟེན་པ་དྲག་པོ་བྱེད་པའོ། །དེའང་༼༡༡༩༽བྱེད་པ་པོ་རྒྱུ་ནི་ཐམས་ཅད་ཀྱི་ལྟ་གཞི་སྟེ་དོན་ལ་གཞན་དྲུག་གོ།

གཉིས་པ་བསླབ་པ་འཆལ་བ་ནི།

བསླད་པས་འཆལ་བ། ཞེས་པ་ནས། ཡོངས་སུ་འཆལ་བའོ། །ཞེས་པའི་བར་གྱིས་བསྟན་ཏེ།

བསླད་པས་འཆལ་བ་གང་འདི་ལ། །རྟེན་པས་དག་ལྟ་རྟེན་རྟོག་དང་།།

རྟེན་ཆགས་བྱིན་ཆགས་བཀྲ་ཤིས་མཚན། །སྐྱབས་ལོག་ཡོངས་སུ་འཆལ་བའོ།།

ལྟ་ངན་གྱི་སེལ་ཞུགས་ཏེ་བསླད་པའི་གཞུང་ངན་པ་ལ་བསླབ་པས་ཤེས་པ་འཆལ་བ་གང་འདི་ལ་གསུམ་སྟེ། དབང་ཕྱུག་རྒྱུར་ལྟ་བ་དག་འཇིག་རྟེན་འདི་ལ་ཕྱའམ་དབང་ཕྱུག་བསྟེན་པས་དག་པར་ལྟ་སྟེ་ཕྱིའི་དབང་ཕྱུག་ལ་རྟེན་དུ་རྟོག་ནས་དེས་མཐོ་རིས་དང་ངན་སོང་དུ་གཏོང་བར་འདོད་དེ། གང་ཞིག་ཕྲ་རྒྱུ་གཅིག་པུ་སྐྱེ་གནས་འདུག་དེ་ཡིས་འདི་ཀུན་སྐྱེ་ཞིང་འཇིག་པར་བྱེད། སྐྱེ་བ་པོ་འདི་ཤེས་པ་ཡོད་མིན་ཏེ། །དབང་ཕྱུག་གིས་བཏང་ཡང་ན་གཡང་སའམ། །མཐོ་རིས་དག་ཏུ་འགྲོ་བ་ཁོ་ནར་བྱེད། །ཅེས་འབྱུང་བ་ལྟ་བུར་འདོད་པ་དང༌། རྡུལ་ཕྲ་རབ་རྒྱུར་སྨྲ་བ་བས། དང་པོར་འཇིག་རྟེན་ཆགས་པའི་ཚེ་རྡུལ་ཕྲ་རབ་ཀྱི་རྫས་འདུས་པ་ལས་ལྷ་ཚངས་པའི་སྒོ་ང་ཤིན་ཏུ་འོད་འབར་བ་ཞིག་བྱུང་ནས་དེ་སྨིན་པ་ལས་ལྷ་ཚངས་པ་ཆེན་ཕོ་གདོང་བཞི་ལ་རལ་པ་ཅན་ཞིག་བྱུང་ནས་འཇིག་རྟེན་ཐམས་ཅད་བྱས་ཏེ་ཆགས་པར་འདོད་པ་དང༌། ཆོས་མི་དགེ་བ་ལུས་ངག་གི་བདུན་བསྲུང་བའི་ཁྲིམས་ཀྱིས་ལྷའི་བྱིན་ཆགས་ཤིང་བཀྲ་ཤིས་པའི་མཚན་མ་ཐོབ་པར་འདོད་པ་དང་གསུམ་སྟེ། དེ་དག་ནི་འཁོར་བའི་འཇིགས་པ་ལས་སྐྱབས་པའི་རྟེན་ལོག་པས་བསླབ་པ་ཡོངས་སུ་འཆལ་བའི་དབང་དུ་གྱུར་པའོ།།

གསུམ་པ་ཕྱོགས་ལྟོས་གཅོད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཕྱོགས་ལྟོས་གཅོད་པ། ཞེས་པ་ནས། པ་དང་གསང་ཆེན་པའོ། །ཞེས་པའི་བར་གྱིས་བསྟན་ཏེ།

ཕྱོགས་ལྟོས་སྤྱོད་པ་གང་ཞེ་ན། །ཕྱི་རོལ་པ་དང་ཡང་དག་པ། །གསང་སྔགས་པ་དང་གསང་ཆེན་པོ།།

ཡང་དག་པའི་ལམ་གྱི་ཕྱོགས་སུ་སྤྱི་ཡུད་ཙམ་ལ་ལྟོས་ནས་བདག་འཛིན་དང་མ་བྲལ་བའི་ཕྱིར་རང་གི་གྲུབ་མཐའ་ལོག་པར་གཅོད་པར་གང་ཞེ་ན། མཚན་ཉིད་ཀྱི་ཐེག་དམན་ལས་གོལ་བ་ཕྱི་རོལ་པ་དང༌། ཐེག་ཆེན་མདོ་སྡེ་ལས་གོལ་བ་ཡང་དག་པ་དང༌། ཕྱི་རྒྱུད་ལས་གོལ་བ་གསང་སྔགས་པ་དང༌། ནང་རྒྱུད་ལས་གོལ་བ་གསང་ཆེན་པའོ།།

གཉིས་པ་རྒྱས་པར་བཤད་པ་ལ་བཞི་སྟེ། ཕྱི་རོལ་པ་བསྟན་པ། ཡང་དག་པ་བཤད་པ། གསང་སྔགས་པ་བསྟན་པ། གསང་ཆེན་པ་བཤད་པའོ། །དང་པོ་ནི།

གང་འདི་ཕྱི་རོལ། ཞེས་པ་ནས། གཅིག་ཕྱོགས་གཅོད་པའོ། །ཞེས་པའི་བར་གྱིས་བསྟན་ཏེ།

གང་འདིར་ཕྱི་རོལ་རྣམ་པ་གསུམ། །བྱེ་བྲག་པ་དང་ཐ་སྙད་པ། །རང་སྣང་གཅིག་ཕྱོགས་གཅོད་པའོ།།

གང་འདིར་མུ་སྟེགས་ཕྱི་རོལ་པ་ལ་ཡང་རྣམ་པ་གསུམ་སྟེ། ཉན་ཐོས་བྱེ་སྨྲ་ལས་གོལ་ཏེ་རྡུལ་ཕྲ་རབ་༼༡༢༠༽དང་དུས་གསུམ་རྟག་པར་འདོད་པ་མུ་སྟེགས་བྱེ་བྲག་པ་དང༌། ཉན་ཐོས་མདོ་སྡེ་པ་ལས་གོལ་ཏེ་འདུས་པའི་ཐ་སྙད་ཀྱི་རང་བཞིན་ཐ་དད་དུ་རྟག་པར་འདོད་པ་མུ་སྟེགས་ཐ་སྙད་པའམ་མདོ་སྡེ་པ་དང༌། རང་རྒྱལ་ལས་གོལ་ཏེ་ཡུལ་མེད་པའི་ཤེས་པ་རྟག་པར་འདོད་པ་མུ་སྟེགས་རང་སངས་རྒྱས་པའམ། རང་སྣང་གཅིག་གི་ཕྱོགས་གཅོད་པ་སྟེ། དེ་དག་གི་ལྟ་བ་དང་གཞི་མཐུན་པ་ལ་བདག་འཛིན་དང་ལ་མ་བྲལ་བའི་ཆ་མཐུན་པའོ།།

གཉིས་པ་ཡང་དག་པ་བཤད་པ་ནི།

ཡང་དག་ཕྲ་དང༌། ཞེས་པ་ནས། ཡངས་པ་དེ་ཁོ་ན། །ཞེས་པའི་བར་གྱིས་བསྟན་ཏེ།

ཡང་དག་ཕྲ་དང་ཟབ་པ་དང་། །རྒྱ་ཆེ་ཡངས་པ་དེ་ཁོ་ན།།

ལྟོས་ནས་བཏགས་པའི་མུ་སྟེགས་ཡང་དག་པ་ལའང་གསུམ་སྟེ། སེམས་ཙམ་པ་དང་རྣལ་འབྱོར་སྤྱོད་པའི་དབུ་མ་ལས་གོལ་ཏེ་རྣམ་བཅས་དང་རྣམ་མེད་ཀྱི་ཤེས་པ་གཉིས་ཀ་རྟག་པར་སྨྲ་བ་མུ་སྟེགས་ཙེན་མིན་ཡང་དག་ཕྲ་བ་རྣལ་འབྱོར་སྤྱོད་པའི་དབུ་མ་པ་དང༌། མདོ་སྡེ་སྤྱོད་པའི་དབུ་མ་ལས་གོལ་ཏེ། གློ་བུར་ལ་ཅིའང་མ་ཡིན་པ་གཅིག་རྟག་པར་སྨྲ་ཞིང་ཡིད་ལ་བྱེད་པ་མུ་སྟེགས་ཙན་མིན་ཟབ་པ་བ་མདོ་སྡེ་སྤྱོད་པའི་དབུ་མ་པ་དང་གཞུང་ཕྱི་མོའི་དབུ་མ་ལས་གོལ་ཏེ། ཅི་ལ་ཡང་མི་གནས་པ་ཉིད་དུ་ཡིད་ལ་བྱེད་པ་མུ་སྟེགས་རྒྱ་ཆེ་ཡངས་པ་དེ་ཁོ་ན་ཏོན་མིན་གཞུང་ཕྱི་མོའི་དབུ་མ་པ་སྟེ། ཡང་དག་པའི་ཐེག་པ་གསུམ་དང་ལྟ་བའི་ཆ་མཐུན་པ་དེ་ཉིད་བདག་ཏུ་འཛིན་པའི་ཕྱིར་གོལ་བར་སྦྱར་རོ།།

གསུམ་པ་གསང་སྔགས་པ་བསྟན་པ་ནི།

གསང་སྔགས་རིག་བྱེད། ཅེས་པ་ནས། དམ་པར་ཕྱོགས་ལྟོས་གཅོད། །ཅེས་པའི་བར་གྱིས་བསྟན་ཏེ།

གསང་སྔགས་རིགས་བྱེད་རིགས་སྤྱོད་དང་། །རིགས་སྦྱོར་དམ་པར་ཕྱོགས་ལྟོས་གཅོད།།

ཆ་མཐུན་པའི་མུ་སྟེགས་གསང་སྔགས་པ་ལའང་གསུམ་སྟེ། ཀྲི་ཡ་ལས་གོལ་ཏེ་རིགས་གསུམ་རྟག་པར་འདོད་པ་མུ་སྟེགས་རིག་བྱེད་ཀྲི་ཡ་པ་དང༌། སྤྱོད་རྒྱུད་ལས་གོལ་ཏེ་ལྟ་སྤྱོད་གཉིས་མེད་དུ་འཛིན་པའམ་ལྟ་སྤྱོད་ཐ་དད་རྟག་པར་འདོད་པ་མུ་སྟེགས་རིགས་སྤྱོད་ཨུ་པ་ཡ་དང༌། རྣལ་འབྱོར་ལས་གོལ་ཏེ་སེམས་རྟག་པའི་བྱིན་རླབས་ལྷར་སྣང་བའང་རྟག་པར་འདོད་པ་མུ་སྟེགས་པའི་རིགས་སྦྱོར་ལོག་པ་སྤྱོད་པ་གཙོར་མི་བྱེད་པ་སྤྱི་ཡུད་ཙམ་དུ་ཏིང་ངེ་འཛིན་དམ་པར་ཕྱོགས་ལྟོས་ཏེ་དེ་འབའ་ཞིག་གཅོད་ཅིང་གཙོར་སྤྱོད་པའོ།།

བཞི་པ་གསང་ཆེན་པོ་བཤད་པ་ནི།

གསང་ཆེན་བརྟུལ་ཞུགས། ཞེས་པ་ནས། པ་དང་རྒྱལ་ཐབས་པའོ། །ཞེས་པའི་བར་གྱིས་བསྟན་ཏེ།

གསང་ཆེན་བརྟུལ་ཞུགས་ཆེར་སྤྱོད་པ། །རྒྱལ་དཔོག་པ་དང་རྒྱལ་ཐབས་པའོ།།

མུ་སྟེགས་གསང་སྔགས་པ་ལས་ཁྱད་པར་དུ་གྱུར་པ་གསང་ཆེན་པ་ལའང་གསུམ་སྟེ། མ་ཧཱ་ལས་གོལ་ཏེ་དམ་རྫས་༼༡༢༡༽ལ་བླང་དོར་མེད་པར་སྤྱོད་ཅིང་ཐབས་ཤེས་རབ་རྟག་པར་འདོད་པ་མུ་སྟེགས་བརྟུལ་ཞུགས་ཆེར་སྤྱོད་མ་ཧཱ་ཡོ་ག་པ་དང་། ཨ་ནུ་ཡོ་ལས་གོལ་ཏེ་རྒྱལ་པོ་ཨ་ཏི་ཡོ་གའི་རྗེས་སུ་དཔོགས་ཏེ་འཇུག་པས་དབྱིངས་དང་ཡེ་ཤེས་རྟག་པར་འདོད་པ་མུ་སྟེགས་རྒྱལ་དཔོགས་པ་ཨ་ནུ་ཡོ་ག་པ་དང༌། ཨ་ཏི་ཡོ་ག་ལས་གོལ་ཏེ་དགོངས་པ་མཐའ་ཐུག་བྱ་བ་དང་བྲལ་བའི་ངོ་བོ་རང་བྱུང་ཡེ་ཤེས་སུ་འཛིན་ཅིང་ཐམས་ཅད་ཀྱི་བདག་པོར་འདོད་པ་མུ་སྟེགས་རྒྱལ་ཐབས་པ་ཨ་ཏི་ཡོ་ག་པའོ། །འདི་དག་གི་ལྟ་བའི་གཞུང་ནི་བསྒྲུབ་མི་དགོས་ཏེ་ཡང་དག་པའི་ལམ་གྱི་ལྟ་བ་ལ་བདག་འཛིན་ཅན་གྱི་ཞེན་པ་སྟེ། ཡང་དག་པའི་ལྟ་བ་དང་སྐད་ཚུལ་ཇི་ལྟ་བ་གཅིག་ཀྱང་རྟོག་འཛིན་གྱིས་ཕྱེ་བའོ། །མུ་སྟེགས་འདི་དག་ནི་དུས་དེང་སང་གི་ལམ་པར་ཁས་འཆེས་པ་དག་ལའང་ཤིན་ཏུ་མང་ངོ༌། །དེ་བས་ནན་ཏུར་དུ་བྱ་ཞིང་བཤད་པའི་བླ་མ་དག་ལ་གཏུགས་ཏེ་སྒོ་ཀུན་ནས་བསྡུར་བར་རིགས་སོ།།

བཞི་པ་མཇུག་བསྡུ་བ་ནི།

ཞར་ལས་བྱུང་བ། ཞེས་པ་ནས། བྱུང་བའང་དེ་བཞིན་ནོ། །ཞེས་པའི་བར་གྱིས་བསྟན་ཏེ།

ཞར་ལས་བྱུང་བ་གང་འདི་དག །མཐའ་ཡས་སྡེ་བཅུར་རྫོགས་པ་སྟེ། །གང་མུ་ཟིན་པ་དེ་རྟགས་འཛིན།།

སངས་རྒྱས་ཀུན་གྱི་ཉེ་གནས་སོ། །ལངྐའི་བདག་པོ་གཞན་ཡང་གང་། །ཞར་ལས་བྱུང་བ་ཇི་ལྟ་བ།།

འཇིག་རྟེན་སྒྲོན་མ་ནུབ་རྗེས་ན། །གང་དག་མོས་པས་ཐ་དད་ནས། །ལྟ་བའི་ཁྱད་པར་དེ་བཞིན་འབྱུང་།།

ཞར་ལས་བྱུང་བའང་དེ་བཞིན་ནོ།།

ཡང་དག་པའི་བསྟན་པའི་ཞར་ལས་བྱུང་བའི་མུ་སྟེགས་ཕྲ་མེན་པ་ཡན་ཆད་གང་འདི་དག་ལ་བྱེ་བྲག་གི་རྣམ་གྲངས་མང་པོ་བསམ་གྱིས་མི་ཁྱབ་ཅིང་མཐའ་ཡས་པ་ཞིག་སྤྱིར་ཡོད་ཀྱང༌། འདིར་མུ་སྟེགས་གསང་སྔགས་པ་ཆེ་ཆུང་དྲུག་མན་ཆད་ཀུན་བཤད་པའི་རྩ་བ་བཞི་ཡན་ལག་དྲུག་སྟེ་སྡེ་བཅུར་རྫོགས་ཤིང་འདུས་པར་བརྩི་བ་ཡང་རང་བཞིན་ལོག་པ་དང་གཞན་རྐྱེན་ལོག་པའི་ཆ་ལས་གྱུར་པ་སྟེ། འགྲེལ་པ་ལུང་བསྟན་ནས་ཕྱི་རོལ་གསུམ། གསང་བ་གསུམ། གསང་ཆེན་གསུམ། ཡང་དག་གསུམ་གཅིག་ཏུ་བརྩིས་པ་རྣམས་སུ་གསུངས་པར་བཤད་དོ། །དེ་ལྟ་བུ་གང་དེ་དག་བདག་ཏུ་ལྟ་ལ་གནས་ཏེ། རང་རང་གི་ལྟ་བའི་མུ་འཛིན་ཞིང་ཞེན་པ་དེ་དག་ནི་དོན་ཐོག་ཏུ་མ་ཕེབས་པས་རྟགས་ལ་འཛིན་པ་ཙམ་ལས་བྱང་ཆུབ་འགྲུབ་པའི་རྒྱུ་ཙམ་ཡོད་ཅིང་དང་པོ་ཐར་པ་ལ་མོས་པ་སྐྱེས་པས། རྒྱལ་བ་དང་སངས་རྒྱས་རིང་བར་བརྒྱུད་ནས་འགྲུབ་ཏུ་རུང་བར་ཀུན་ནས་གྱུར་པ་ཉིད་ཀྱི་ཉེ་གནས་ཏེ། རྟགས་ཙམ་འཛིན་པ་དང་ཞར་བྱུང་གཉིས་ངོ་བོ་གཅིག་པར་ཡང་གྱུར་བས་སོ།།

འོ་ན་འདིར་བཤད་པ་ལས་ཞར་བྱུང་ནི་ལོག་པ་ཆ་གཉིས་པོ་ལས་བརྟགས་པ་འདྲའོ་ཞེ་ན། དེ་ནི་ངོ་བོས་ཕྱིས་འཆད་པ་ཉིད་ལས་བསྙད་པ་སྟེ། དེ་བསྟན་ པ་ཉིད་ཀྱི་ཕྱིར་སྐྱོན་མེད་པའོ། །ལང་༼༡༢༢༽ཀའི་བདག ་པོ། ཞེས་བོས་ནས། དེ་ལས་མི་མཐུན་པ་གཞན་ཡང་བསྟན་པ་གང་ཡིན་པ་ནི། བཀའི་ཞལ་ནས་བྱུང་བ་ཐེག་པའི་གཞུང་ཇི་ལྟ་བ་བཞིན་དུ་ཞར་ལས་བྱུང་བ་ཞེས་པ་ཡང་འཆད་པ་སྟེ། དེ་ཡང་ཇི་ལྟ་ཞེ་ན། འཇིག་རྟེན་གྱི་སྒྲོན་མ་སྟོན་པ་ཐུབ་པའི་དབང་པོ་སྐུ་མྱ་ངན་ལས་འདས་ཏེ་ནུབ་པའི་རྗེས་སུ་ཕྱིན་པ་ན། གང་ཟག་གང་དག་གི་བློའི་མོས་པ་མི་མཐུན་པ་ཐ་དད་པ་མང་པོར་གྱུར་པས་སངས་རྒྱས་ཀྱི་ཞལ་ནས་གསུངས་པའི་ལྟ་བའི་ཁྱད་པར་གྱི་བཀའ་ཉིད་ལས་མུ་སྟེགས་པ་དང་ཆ་མཐུན་པའི་ལྟ་བའི་བྱེ་བྲག་མང་པོ་ཇི་ལྟ་བར་སྨྲ་བ་དེ་བཞིན་དུ་འབྱུང་ངོ༌། །བཤད་པའི་མུ་སྟེགས་ཞར་ལས་བྱུང་བའང་ཆོས་དང་ལྟ་བ་ཆ་མཐུན་པར་འབྱུང་ལུགས་ཀྱང་དེ་བཞིན་དུ་རྗེས་སུ་མཐུན་པ་ཡིན་ནོ། །དེ་དག་ནི་སྒོ་བསྡུར་ལ་སྤང་བར་བྱ་བ་འབའ་ཞིག་གོ།

གཉིས་པ་འཇིག་རྟེན་ལས་འདས་པའི་ཐེག་པ་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

ཀུན་ཤེས་སྤྱོད་པའང༌། ཞེས་པ་ནས། པ་དང་གཅིག་ཆར་བའོ། །ཞེས་པའི་བར་གྱིས་བསྟན་ཏེ།

ཀུན་ཤེས་སྤྱོད་པའང་རྣམ་པ་གཉིས། །རིམས་སྐྱེས་པ་དང་ཅིག་ཅར་བའོ།།

ཡང་དག་པའི་ལམ་ཀུན་ནས་ཤེས་ཤིང་སྤྱོད་པའི་འཇིག་རྟེན་ལས་འདས་པའི་ཐེག་པ་ལའང་རྣམ་པ་གཉིས་ཏེ། བློ་དམན་པའི་དབང་དུ་རིམ་གྱིས་པ་རྒྱུའི་ཐེག་པ་བསྟན་པ་དང༌། བློ་མཆོག་གི་དོན་དུ་གཅིག་ཆར་བ་གསང་སྔགས་ཀྱི་ཐེག་པ་བསྟན་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། རིམ་གྱིས་པ་བཤད་པ། གཅིག་ཆར་བ་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

རིམ་གྱིས་འཇུག་པ། ཞེས་པ་ནས། ཆེ་ཆུང་གཉིས་གསུམ་དྲུག །ཅེས་པའི་བར་གྱིས་བསྟན་ཏེ།

རིམས་ཀྱིས་འཇུག་པ་རྣམ་གསུམ་དུ། །ཕྱིན་ཅི་མ་ལོག་པ་ཉིད་དང་། །བསྒྲུབ་སྤྱོད་མངོན་རྟོགས་གསུམ་ཉིད་དོ།།

འདི་ཡང་ཁྱད་པར་རྣམ་གཉིས་ཀྱིས། །གསུམ་གསུམ་གཉིས་སུ་དམ་པ་ཡིས།།

གསུངས་པ་ཁྱོད་ཅི་མི་ཤེས་སམ། །དེས་ན་ཆེ་ཆུང་གཉིས་གསུམ་དྲུག།

དེ་ལ་རིམ་གྱིས་འཇུག་པ་རྒྱུ་ཡི་ཐེག་པ་པ་དཔེར་ན་རྒྱ་གར་གྱི་འཕོང་སློབ་པའི་ཚུལ་ལྟ་བུས་སློབ་ཅིང་འཇུག་པ་ལའང་རྣམ་པ་གསུམ་དུ་ཡོད་དེ་དོན་ཇི་ལྟ་བ་བཞིན་དུ་ཕྱིན་ཅི་མ་ལོག་པ་ཉིད་དང་མ་ནོར་བར་བསྒྲུབ་པར་བྱེད་པ་དང༌། དེའི་རྗེས་སུ་སྤྱོད་པ་དང༌། ལྟ་བས་རང་རིག་པའི་དོན་རྣལ་འབྱོར་མངོན་སུམ་གྱི་རྟོགས་པ་དང་རྣམ་གྲངས་གསུམ་ཉིད་དོ། །འདི་ལ་ཡང་རྒྱུའི་ཐེག་པ་ཆུང་ངུ་རིམ་འཇུག་པ་དང༌། རྒྱུའི་ཐེག་པ་ཆེན་པོ་རིམ་འཇུག་པའི་ཁྱད་པར་རྣམ་པ་གཉིས་ཀྱིས། ཆུང་ངུ་ལའང་བསྒྲུབ་པའི་ཐབས་དང༌། སྤྱོད་པ་དང༌། ལྟ་བ་རྟོགས་༼༡༢༣༽པའི་ཚད་གསུམ་དང༌། ཆེན་པོ་ལའང་བསྒྲུབ་པའི་ཐབས་དང་སྤྱོད་པ་དང༌། ལྟ་བ་རྟོགས་པའི་ཚད་གསུམ་གྱི་མཚན་ཉིད་ཀྱི་ཐེག་པའི་རང་གཞུང་རྣམ་པ་གཉིས་སུ་སངས་རྒྱས་རྣམ་འདྲེན་དམ་པ་ཡིས་གསུངས་པ་ཁྱོད་ཀྱིས་ཅི་ཞིག་ཇི་ལྟ་བར་མི་ཤེས་སམ། དེས་ན་ཐེག་པ་ཆེ་ཆུང་གཉིས་ལ་གསུམ་གསུམ་སྟེ་རྣམ་གྲངས་དྲུག་ཏུ་གསུངས་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། བསྒྲུབ་པ་བཤད་པ། སྤྱོད་པ་བསྟན་པ། མངོན་རྟོགས་བཤད་པའོ། །དང་པོ་ནི།

བསྒྲུབ་པ་ཟབ་པ། ཞེས་པ་ནས། ཟབ་པ་དམ་པ་ཉིད། །ཅེས་པའི་བར་གྱིས་བསྟན་ཏེ།

བསྒྲུབ་པ་ཟབ་པ་ཕྲ་བ་གཉིས། །བློ་ཆེ་ཟབ་པ་དམ་པ་ཉིད།།

དེ་ལ་ཐེག་པ་ཆེ་ཆུང་གི་རིམ་འཇུག་གི་དོན་གསུམ་གང་སྙམ་པ་ལ། དགོངས་པ་བསྒྲུབ་པའི་ཐབས་ཀྱང་རྣམ་པ་གཉིས་ཏེ་བློ་ཆུང་བ་རང་རྒྱལ་བ་དང་ཉན་ཐོས་རྣམས། ཤེས་པ་སྐད་ཅིག་མ་ཤིན་ཏུ་ཟབ་པ་དང་ཕྱི་སྣོད་རྡུལ་ཕྲ་རབ་ཤིན་ཏུ་ཆ་ཕྲ་བ་ཙམ་ཡོད་པར་རྟོགས་པ་གཉིས་ཀྱི་སྒོ་ནས་བསྒྲུབ་པ་དང༌། བློ་ཆེ་བ་རྒྱུའི་ཐེག་པ་ཆེན་པོ་ཤེས་རབ་མཆོག་དང་ལྡན་པའི་མདོ་སྡེ་པས་དེ་བཞིན་ཉིད་མ་སྐྱེས་པའི་དོན་གཏིང་ཟབ་པ་ཡི་ཤེས་བྱའི་མཆོག་ཏུ་གྱུར་པའི་དམ་པ་ཉིད་བསྒོམ་ཞིང་བསྒྲུབ་པའོ། །ཡང་ན་སེམས་ཙམ་པས་ཟབ་པ་སེམས་ཉིད་གཉིས་མེད་དུ་ཤེས་པ་དང་དབུ་མ་པས་དོན་དམ་པ་མ་སྐྱེས་པ་ཉིད་སྒོམ་སྟེ་བསྒྲུབ་པར་བཞེད་དོ།།

གཉིས་པ་སྤྱོད་པ་བསྟན་པ་ནི།

སྤྱོད་པ་རླབས་ཆེན། ཞེས་པ་ནས། གསང་ཆེན་གསང་བར་བཤད། །ཅེས་པའི་བར་གྱིས་བསྟན་ཏེ།

སྤྱོད་པ་རླབས་ཅན་ཆ་ཤས་ཅན། །རྒྱ་ཆེ་བ་དང་མཚན་མ་སྤྱོད།།

དེ་ནི་གསང་ཆེན་གསང་བར་བཤད།།

དེའི་རྗེས་སུ་སྤྱོད་པ་ལའང་གཉིས་ཏེ། རྒྱུའི་ཐེག་པ་ཆེན་པོའི་བྱང་ཆུབ་སེམས་དཔའ་ནི་མིག་དང་མགོ་སྦྱིན་པ་དང༌། ཕྱོགས་དང་ཕ་རོལ་ཏུ་ཕྱིན་པ་རླབས་ཆེན་སྤྱོད་པ་དང༌། ཉན་ཐོས་རང་རྒྱལ་ནི་རང་དོན་གཙོ་བོར་སྤྱོད་པ་དང་གཞན་དོན་ཆ་ཤས་ཅན་དུ་སྤྱོད་པ་ཡིན་ཞིང༌། དེ་བཞིན་དུ། བྱང་སེམས་ནི་སྡོམ་པའི་ཚུལ་ཁྲིམས་དང་གཞན་དོན་རྒྱ་ཆེ་བ་ཉིད་དུ་བྱེད་ཅིང་མི་དམིགས་པའི་སྤྱོད་པ་དང༌། ཉན་རང་ནི་སྡོམ་པའི་ཚུལ་ཁྲིམས་དང་གཞན་དོན་མཛད་པའང་མཚན་མར་འཛིན་པ་དང་མ་བྲལ་བར་སྤྱོད་པ་ཉིད་དེ། སྤྱོད་པ་དེ་གཉིས་ནི་མདོ་སྡེ་དང་ཐེག་པ་ཆུང་ངུ་ཁོ་རང་གི་གསང་ཆེན་དང་གསང་བར་བཤད་དེ། ཐེག་པ་ཆེན་པོའི་སྤྱོད་པ་ནི་འོག་མའི་སྤྱོད་ཡུལ་མིན་ལ། ཉན་རང་གི་སྤྱོད་པ་ནི་མུ་སྟེགས་པའི་སྤྱོད་ཡུལ་མིན་པས་སོ།།

གསུམ་པ་མངོན་རྟོགས་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

མངོན་རྟོགས་རྣམ་གཉིས། ཞེས་པ་ནས། སོ་སོར་འདོད་པ་འབྱུང༌། །ཞེས་པའི་བར་གྱིས་བསྟན་ཏེ།

མངོན་རྟོགས་རྣམ་གཉིས་ཕྱི་ནང་འཇུག །མི་མཐུན་ཕྱོགས་ཀྱི་གལ་བཟུང་ནས།།

ཆ་གཉིས་སོ་སོར་འདོད་པ་འབྱུང་།།

རིམ་པར་འཇུག་པའི་ལྟ་བས་མངོན་པར་རྟོགས་པ་ནི། བློའི་བྱེ་བྲག་གིས་རྣམ་པ་གཉིས་ཏེ། ཕྱི་རོལ་དོན་དམ་དུ་ཡོད་པར་འདོད་པ་ཐེག་པ་ཆུང་ངུ་བ་དང་། ཤེས་བྱ་ནང་གི་དོན་དང་སྐྱེ་བ་མེད་པའི་ཆོས་ཉིད་ལ་འཇུག་པ་ཐེག་པ་ཆེན་པོ་སྟེ་དེ་ལྟར་ལྟ་བ་ཞིག་གཅིག་ལ་ཐེག་པ་ཆེ་ཆུང་གི་གཞུང་མི་མཐུན་པའི་ཕྱོགས་ཀྱི་གལ་པོ་བཟུང་ནས་ཐེག་པ་ཆེ་ཆུང་གི་གྲུབ་མཐའ་ཆ་གཉིས་སུ་སོ་སོར་འདོད་པ་འབྱུང་བས་ཕན་ཚུན་མི་མཐུན་པར་རྩོད་པར་བྱེད་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། ཕྱི་རོལ་ཐེག་པ་ཆུང་ངུའི་ལྟ་བ། ནང་པ་ཐེག་པ་ཆེན་པོའི་ལྟ་བའོ། །དང་པོ་ནི།

ཕྱི་རོལ་བྱེ་བྲག ཅེས་པ་ནས། གཅིག་ལས་རྩོད་པ་འབྱུང་། །ཞེས་པའི་བར་གྱིས་བསྟན་ཏེ།

ཕྱི་རོལ་བྱེ་བྲག་ཐ་སྙད་གཉིས། །ཆ་གཉིས་གཅིག་ལས་རྩོད་པ་འབྱུང་།།

དེ་ལ་ཐེག་པ་ཆུང་ངུ་ཕྱི་རོལ་པའི་ལྟ་བ་གང་སྙམ་པ་ལ། ཕྱི་རོལ་དོན་དམ་དུ་ཡོད་པར་སྨྲ་བ་ལའང་གཉིས་ཏེ། བྱེ་བྲག་ཏུ་སྨྲ་བ་དང༌། མདོ་སྡེ་ལ་ཚད་མར་བྱེད་པས་མདོ་སྡེ་པར་ཐ་སྙད་བཏགས་པ་གཉིས་ཀྱི་ལྟ་བའི་གྲུབ་མཐའ་ཆ་གཉིས་སུ་བྱུང་བ་ཡང་ཕྱི་རོལ་རྡུལ་ཕྲན་དུ་ཁས་ལེན་པར་གཞི་གཅིག་པ་ལས་ཕྱི་རོལ་གྱི་དོན་རང་ལ་མི་མཐུན་པར་བྱེ་སྨྲས་བསྐོར་བ་བར་དང་བཅས་པ་དང༌། མདོ་སྡེ་པས་མ་འབྱར་ལ་བར་མེད་པར་འདོད་པས་ཕན་ཚུན་རྩོད་པ་འབྱུང་བའོ།།

གཉིས་པ་ནང་པ་ཐེག་པ་ཆེན་པོའི་ལྟ་བ་ནི།

ནང་འཇུག་སེམས་སྣང༌། ཞེས་པ་ནས། འབེབས་པ་དེ་བཞིན་འབྱུང༌། །ཞེས་པའི་བར་གྱིས་བསྟན་ཏེ།

ནང་འཇུག་སེམས་སྣང་དབུས་མཐའ་མེད། །ཕྱི་ནང་སྣྲེལ་བཞི་ཕྱོགས་འཛིན་ཅིང་། །གང་དེ་ངེས་པར་སྤྱོད་པར་འབྱུང་། །དབུས་མཐའ་བྱེད་དང་ངེས་པར་འཇུག །གཏན་ལ་འབེབས་པ་དེ་བཞིན་འབྱུང་།།

དེ་ཡང་ཕྱི་ནང་གི་སྤྱོད་ཡུལ་དག་མ་དག་གིས་ཀྱང་ཕྱེ་བ་སྟེ། འདིར་ཐེག་པ་ཆེན་པོ་ནང་རྣམ་པར་དག་པ་ལ་འཇུག་པ་ལའང་གཉིས་ཏེ། རྣམ་རིག་པ་སྤྱི་ཡིས་དཔེར་ན་ཐོ་ཡོར་ལ་མི་དང་སྐྲའི་འཁོར་ལོ་མིག་འཁྲུལ་པ་ལ་སྣང་བ་ལྟར། ཡུལ་ཉིད་ཕྱི་དོན་དུ་མ་གྲུབ་པར་སེམས་སམ་ཤེས་པ་འཁྲུལ་པ་ཉིད་ཡུལ་ལྟར་སྣང་བར་འདོད་པ་དང༌། ཐེག་པ་ཆེན་པོ་དབུ་མ་པ་དབུས་དང་མཐའ་བཞི་འབྱེད་ནས་མི་དམིགས་པར་འདོད་པ་གཉིས་སོ། །དེ་ལ་སེམས་ཙམ་པ་ནི། ཕྱོགས་རིས་སུ་རིག་པས་ཕྱི་ནང་སྣོད་བཅུད་ཐམས་ཅད་སྣྲེལ་ཞིར་འཆོལ་ཏེ་ཤེས་པ་སྣང་བའི་ཕྱོགས་སུ་འདོད་པས་ཡུལ་གྱི་ཕྱོགས་གཏན་ནས་མེད་པར་ཕྱོགས་དུས་ཀྱི་སྣང་བ་ཐམས་ཅད་ཤེས་པའི་སྣང་ཆར་འདོད་དེ་གྲུབ་མཐའ་འཛིན་ཅིང་གང་འདིར་ཡུལ་གྱི་སྒྲོ་འདོགས་ངེས་པར་༼༡༢༥༽གཅོད་པ་འབྱུང་ངོ༌། །འདིར་སྤར་མར། རང་དང་ལྟ་བའི་ཕྱོགས་འཛིན་ཅིང༌། །རྩོད་པས་ཐེ་ཚོམ་འབྱུང་བ་དང༌། །ཞེས་བཞུགས་པ་ཕྱག་དཔེ་གཞན་ལ་མེད་ཀྱང༌། འགྲེལ་ཆེན་གྱི་ཚིག་སྒྲོས་ལས་འབྱུང་བར་མངོན་པས། དེ་ལྟར་ན། དབུ་མ་པ་ནི་ཕྱིའི་ཡུལ་དང་ནང་གི་སེམས་ཕན་ཚུན་སྣང་བས་ཤེས་པ་ཡུལ་དུ་སྣང་བར་མི་འདོད་དེ། ཀུན་རྫོབ་ཏུ་སྒྱུ་མ་ཙམ་སླུ་བར་མི་བདེན་པར་ཡོད་པ་འཁྲུལ་པའི་ངོ་ལ་བདེན་པར་སྣང་ཡང༌། དོན་དམ་པར་མཐའ་བསལ་ནས་གཏན་ལ་དབབ་པས་མ་སྐྱེས་པར་འདོད་དེ། དེས་ན་རང་རང་གི་གྲུབ་མཐའ་དང་ལྟ་བའི་ཕྱོགས་འཛིན་ཅིང་རྩོད་པས་ཐེ་ཚོམ་འབྱུང་བ་དང་བཅས་པའི་ཕྱིར། དབུ་མའི་ལུགས་ཀྱིས་ཇི་ལྟར་གཞལ་ན། བདེན་པ་གཉིས་ཀྱི་དབུས་དང་མཐའ་འབྱེད་པ་དང༌། དེའི་སྒོ་ནས་མཐའ་དབུས་ཀྱི་སྐྱོན་དག་པའི་དོན་མ་ནོར་བ་ལ་བློ་ངེས་པར་འཇུག་སྟེ་དོན་དེ་ཉིད་ལུང་དང་རྟེན་འབྲེལ་ཆེན་པོའི་གཏན་ཚིགས་ལ་སོགས་པའི་རིགས་པས་གཏན་ལ་འབེབས་པས་ནོར་དུ་རུང་བར་བྱས་ཏེ། གནོད་པ་རྣམས་བསལ་ནས་དེ་བཞིན་དུ་ངེས་པར་བྱེད་དེ་དོན་མ་ནོར་བར་རྟོགས་པ་འབྱུང་བའོ། །དེ་དག་འདིར་ཡི་གེའི་སྒྲས་འཇིགས་པས་རྒྱས་པར་མ་བཀོད་ཀྱང་འདི་ཙམ་གྱིས་མི་ཆོག་པ་མེད་དོ།།

གཉིས་པ་གཅིག་ཆར་བ་བསྟན་པ་ལ་གཉིས་ཏེ། གཅིག་ཆར་བའི་ལྟ་བ་བསྟན་པ། སྤྱོད་པ་སྣོད་བཞི་དང་མཐུན་པར་སྤྱད་པའོ། །དང་པོ་ནི།

གཅིག་ཆར། ཞེས་པ་ནས། མཁའ་ལྟར་མ་འདྲེས་གཅིག །ཅེས་པའི་བར་གྱིས་བསྟན་ཏེ།

ཅིག་ཆར་འཇུག་པའི་རྣལ་འབྱོར་པ། །བྱ་དང་བྱ་ཐབས་བྱ་མེད་པ། །སྐྱེ་དང་མི་སྐྱེ་སྐྱེ་འགག་མེད།།

འདི་ཀུན་མ་འདྲེས་ཡོངས་སུ་རྫོགས། །མ་འདྲེས་མཁའ་ལ་གཟའ་སྐར་བཀྲམ།།

ཡོངས་སུ་རྫོགས་པ་མཁའ་ཁྱབ་བརྡལ། །འཇའ་སྣང་མཁའ་ལྟར་མ་འདྲེས་གཅིག།

གསང་སྔགས་འབྲས་བུའི་ཐེག་པ་ཡང་དག་པར་རྟོགས་པ་ནི་གཅིག་ཆར་དུ་འཇུག་པའི་རྣལ་འབྱོར་པ་ཆེན་པོ་སྟེ། དེའི་ཚུལ་རབ་ཏུ་དབྱེ་བ་ནི། བྱ་བ་གཙོར་བྱེད་པ་ཀྲི་ཡ་དང༌། བྱ་བ་དང་ཐབས་ཀྱི་ལྟ་སྤྱོད་གོང་འོག་གཉིས་ལ་བརྟེན་པ་ཨུ་པ་ཡ་དང༌། ཀྲི་ཡ་ལྟར་ལུས་ངག་གི་བྱ་བ་དང་དུ་ལེན་པ་མེད་པར་ཏིང་ངེ་འཛིན་ལ་གཙོར་བྱེད་པ་ཡོ་ག་དང༌། ཏིང་ངེ་འཛིན་གསུམ་ལ་སོགས་པའི་རིམ་འཇུག་གིས་ལྷར་བསྐྱེད་པའམ་སྐྱེས་པ་མ་ཧཱ་དང༌། རིམ་གྱིས་མ་བསྐྱེད་པར་འོད་ཀྱི་ཏིང་ངེ་འཛིན་གྱི་ཤུགས་ཀྱིས་རྫོགས་ཚུལ་དུ་བསྐྱེད་པའམ་སྐྱེས་པ་ཨ་ནུ་དང༌། དེ་དག་གི་ཐ་སྙད་ལས་གྲོལ་ཏེ་སྐྱེ་འགག་མེད་པའི་ལྟ་བ་རྟོགས་པ་ཨ་ཏི་ཡོ་ག་སྟེ། གསང་སྔགས་ཀྱི་ཐེག་པ་དྲུག་པོ་འདི་ཀུན་སོ་སོའི་གཞུང་དོན་མ་འདྲེས་པར་གསལ་བཞིན་དུ་མཉམ་པ་ཆེན་པོར་ལྷུན་གྱིས་གྲུབ་པའི་༼༡༢༦༽ངང་ལ་ཡོངས་སུ་རྫོགས་པས་བསྟན་དུའང་མེད་དོ། །འོ་ན་མེད་པ་འབའ་ཞིག་གོ་ཞེ་ན། མ་འདྲེས་པར་སོ་སོར་གསལ་བ་དཔེ་ནམ་མཁའ་ལ་གཟའ་སྐར་བཀྲམ་པ་དང་འདྲ་སྟེ། དེ་ཉིད་སེམས་ཀྱི་ཆོས་ཉིད་གཅིག་ཏུ་ཡོངས་སུ་རྫོགས་པས་ཀུན་ལ་མ་བསྒོས་པར་མཁའ་ཁྱབ་ཏུ་གདལ་བར་གྲུབ་པས་ཐ་སྙད་གཉིས་ཀ་ལས་གྲོལ་བ་ནི། དཔེར་ན་འཇའ་ཚོན་གྱི་སྣང་བ་ནམ་མཁའ་ལ་ཤར་བ་དང་འདྲ་སྟེ། དེ་ལྟར་མཚན་ཉིད་མ་འདྲེས་ལ་དབྱིངས་སུ་གཅིག་པར་ཡོངས་རྫོགས་ཆེན་པོར་དམ་པ་གང་ཞིག་གིས་རིག་པ་ནི་གཅིག་ཆར་དུ་ཞུགས་པ་མེད་པར་ཞུགས་པ་སྟེ། སོ་སོ་ནས་བགྲོད་པ་མེད་དོ། །དེས་ན་གསང་སྔགས་འདི་ཉིད་དུ་ཐོབ་བྱ་འབྲས་བུ་དང༌། དེའི་ཕྱིར་ལམ་གྱི་ཐབས་ཀྱིས་བརྩལ་བའང་མེད་དེ། ཆོས་སོ་ཅོག་ལ་སྐྱེས་མ་སྐྱེས་དང་སྐྱེ་འགག་མེད་པར་བརྗོད་པ་རིལ་རང་གི་མཚན་ཉིད་མེད་པར་རང་བྱུང་ཡེ་ཤེས་སེམས་ཉིད་དུ་བསྡུས་པ་མེད་པར་རྫོགས་པའི་དཔེ་ཇི་ལྟ་བ་བཞིན་བསྟན་པའོ། །འོ་ན་མདོ་སྔགས་གཉིས་ཀ་ལ་འཇུག་ལུགས་གཉིས་གཉིས་ཡོད་བཞིན་དུ་འདིར་རྒྱ་ཆད་པར་བསྟན་པ་ཇི་ལྟ་བུ་ཞེ་ན། རྒྱུ་ཡིས་ཇི་ལྟར་བགྲོད་ཀྱང་མཐར་གསང་སྔགས་ལ་རག་ལས་དགོས་ལ། ཐབས་ཆེན་ཐེག་པ་ནི། གཞན་ལ་རག་མ་ལས་པའི་ཕྱིར་རོ།།

གཉིས་པ་སྤྱོད་པ་སྣོད་བཞི་དང་མཐུན་པར་སྤྱད་པ་ནི།

ཚིགས་བཅད་གཅིག་གི་འོག་ནས། སྤྱོད་པ་བློ་ལྡན། ཞེས་པ་ནས། སྣོད་ཀྱི་རྐྱེན་དང་སྦྱར་བ་ཡིན། །ཞེས་པའི་བར་གྱིས་བསྟན་ཏེ།

སྤྱོད་པའི་བློ་ལ་དབང་སྒྱུར་ཐབས། །གང་འདི་སྣོད་ཀྱང་བཞིར་གཟིགས་ཏེ། །ཞེན་ཆགས་ལོག་སྲེད་རིགས་རྒྱུད་ཅན། །བློ་གྲོས་ཅན་གྱི་སྣོད་རྣམས་ལ། །བསྟན་པ་རྣམ་པ་བཞིར་གསུངས་པ། །འདོད་རྐྱེན་དཀྲིད་དྲང་རྒྱུད་པའི་ཚིག །ལྡེམ་དགོངས་དོན་དམ་ངེས་པ་བཞི། །སྣོད་ཀྱི་རྐྱེན་དང་སྦྱར་བ་ཡིན།།

གསང་བའི་ཤེས་རབ་འཇིག་རྟེན་གྱི་མ་རིག་པ་ལས་ཁྱད་པར་དུ་གྱུར་པའི་སྤྱོད་པའི་ཐབས་ཀྱི་རང་བཞིན་དོན་ཆེན་པོ་དེ་ལྟ་བུས་འགྲོ་བའི་དོན་བྱེད་པའི་ལྟ་བ་མཆོག་གི་བློ་གྲོས་དང་ལྡན་པས་གདུལ་བྱའི་ཁམས་དབང་ལྟར་དབང་དུ་བསྒྱུར་ཏེ་དོན་བྱ་བའི་ཐབས་ཀྱང་ཇི་ལྟར་ཞེ་ན། ཡུལ་གྱི་སྣོད་དང་འཚམས་པར་སྟོན་པའི་ཕྱིར། གང་འདིར་ནི་བསྟན་པའི་སྣོད་ཀྱང་བསྡུ་ན་རྣམ་པ་བཞིར་གཟིགས་ཏེ། འདོད་པའི་ཞེན་ཆགས་ཅན་གྱི་གདུལ་བྱ་དང༌། ལྟ་བ་ལོག་པ་ལ་སྲེད་པ་ཅན་གྱི་གདུལ་བྱ་དང༌། སྤྱོད་པ་ལ་ལོག་པར་ཞེན་ཀྱང་བརྒྱུད་པའི་རིགས་རྒྱུད་ཅན་གྱི་གདུལ་བྱ་དང༌། བློ་གྲོས་མཆོག་དང་ལྡན་པ་ཅན་གྱི་གདུལ་བྱའི་སྣོད་བཞི་པོ་རྣམས་ལ། གདུལ་བའི་ཐབས་ཀྱི་བསྟན་པའང་རྣམ་པ་བཞིར་གསུངས་པ་ཉིད་དེ། སྟོན་པ་གསང་བའི་སྐུས་འདོད་པ་རང་རྐྱེན་གྱི་བསྟན་པ་༼༡༢༧༽རྣལ་འབྱོར་མ་ཧཱ་ཡོ་ག་ལྟ་བུར་བཀའ་སྩལ་པ་དང༌། སྟོན་པ་སྤྲུལ་པའི་སྐུས་བཀྲི་དྲང་བརྒྱུད་པའི་ཚིག་ཏུ་བསྟན་ཏེ་རྒྱུའི་ཐེག་པ་གསུངས་པ་དང༌། སྟོན་པ་ལོངས་སྤྱོད་རྫོགས་སྐུས་ལྡེམ་དགོངས་བཀའི་ཚིག་ཀྲི་ཡོག་གི་ཐེག་པ་གསུངས་པ་དང༌། སྟོན་པ་ཆོས་ཀྱི་སྐུས་དོན་དམ་ངེས་པའི་ཚིག་ཏུ་ཨ་ནུ་དང་ཨ་ཏི་གསུངས་པ་དང་བཞི་རིམ་པ་བཞིན་ནོ། །དེས་ན་སྐབས་ཉིད་དུ་སྣོད་ཀྱི་རྐྱེན་དང་སྦྱར་ཏེ། འདོད་ཆགས་ལ་སྦྱོར་བ་ལ་སོགས་པ་དང༌། ལོག་སྲེད་ཅན་གྱི་ལྟ་བ་ལ་བརྒྱུད་པའི་ལྟ་བ་ཆ་འདྲར་བསྟན་པ་དང༌། སྤྱོད་པས་རིགས་རྒྱུད་ཅན་ལ་སྤྱོད་པའི་ལྡེམ་དགོངས་སུ་བསྟན་པ་དང༌། བློ་གྲོས་ཅན་ལ་དོན་མ་ནོར་བ་སྒྲ་ཇི་བཞིན་དུ་གབ་སྦས་མེད་པར་བསྟན་པ་རྣམས་ཡིན་ནོ། །དེ་བས་ན་བསྟན་པ་དེ་དག་ཐེག་པ་ཆེན་པོ་གསང་ཆེན་བླ་ན་མེད་པ་འདི་ཉིད་ལ་ཚང་ཡང༌། འདིར་སྒོ་བསྡུར་བའི་དབང་དུ་ཐེག་པ་ཀུན་ལ་སྦྱར་རོ།།

གསུམ་པ་ཞབས་བསྡུ་བ་ནི།

གོང་གི་རྨོངས་རིམ་གཅིག་ཆར། ཞེས་པ་ནས། འཇིག་རྟེན་རྟོག་འཕགས་པ། །ཞེས་པའི་བར་དང༌།

རྨོངས་རིགས་ཅིག་ཅར་འཇུག་སྤྱོད་པ། །འདོད་པའི་ཡུལ་ལ་ཞེན་སྤོང་དང་།།

འབྱོར་རྒྱུར་ཤེས་རྟོགས་སྤྱོད་དབང་བྱེད། །ཤེས་པའི་འཇིག་རྟེན་རྟོག་འཕགས་པ།།

འོག་ནས། འདི་ཀུན་ཤེས་བྱའི། ཞེས་པ་ནས། འབེབས་པ་དམ་པའོ། །ཞེས་པའི་བར་གྱིས་བསྟན་ཏེ།

འདི་ཀུན་ཤེས་པའི་གཞི་གཅིག་ལ། །འདོད་པས་མཐོང་བ་ཐ་དད་པའོ། །འདི་ལྟར་མཐོང་སྒོ་ཐ་དད་བཞིན། །རྣམ་པར་སྣང་འབྱུང་བཀོད་པ་ལ། །གང་གིས་ཀུན་ལ་ཞུགས་བལྟས་ནས། །གཅིག་ཏུ་འབེབས་པ་དམ་པའོ།།

དེ་ལྟར་གཉིས་སུ་མེད་པའི་དོན་གསང་བ་ལ་རྨོངས་པའི་རྒྱུའི་ཐེག་པ་རྣམས་རིམ་གྱིས་འཇུག་པ་དང༌། གསང་སྔགས་པ་རྣམས་ཡང་དག་པའི་དོན་ཆེན་པོར་གཅིག་ཆར་འཇུག་པའི་སྤྱོད་པ་སྟེ། གཉིས་ཀའི་སེམས་སྦྱོང་ལུགས་དང༌། ཉོན་མོངས་པ་དག་པའི་ཚུལ་གང་ཞེ་ན། འཇིག་རྟེན་པས་འདོད་ཡོན་ལྔ་ལ་སོགས་པའི་ཡུལ་གྱི་ཆོས་འདི་དག་ལ་ཞེན་པས་འཇོལ་ཉོག་ཏུ་སྤྱོད་པ་དེ་དག་འཕགས་པ་ཉན་ཐོས་དང་རང་རྒྱལ་བས་སྤོང་ཞིང་བཀག་ནས་དག་པར་བྱེད་པ་དང༌། བྱང་ཆུབ་སེམས་དཔས་མི་དམིགས་པའི་ཤེས་རབ་དང་སྤྱོད་པ་རྒྱ་མཚོས་སྦྱོང་བར་བྱེད་པ་དང༌། རིག་སྔགས་ཀྲི་ཡ་པ་དང་ཨུ་པ་ཡས་དུག་གསུམ་སྐུ་གསུང་ཐུགས་སུ་བསྒྱུར་བ་ལ་སོགས་པ་བྱེད་པ་དང༌། རྣལ་འབྱོར་ཡོ་ག་པས་དེའི་མཚན༌ཉིད་ཇི་ལྟ་བར་ཤེས་ནས་ལྷ་ལ་མཆོད་པ་ཙམ་བྱེད་ཅིང་སྤྱོད་པ་དང༌། རྣལ་འབྱོར་ཆེན་པོ་མ་ཧཱ་ཡོ་ག་པས་སེམས་སྣང་བ་ལྷའི་དཀྱིལ་འཁོར་དུ་རྟོགས་ནས་ཆེད་དུ་སྤྱོད་དེ་ཉོན་མོངས་ཀྱིས་ཉོན་མོངས་དབང་དུ་བྱེད་པ་དང༌། རྗེས་སུ་འཇུག་པའི་རྣལ་འབྱོར་ཨ་ནུ་ཡོ་ག་པས་ཇི་ལྟ་༼༡༢༨༽བའི་མཚན་ཉིད་ཤེས་ཤིང་རྟོགས་པས་ཆོག་སྟེ་འགེགས་ཀྱང་མི་འགེགས་དང་དུ་མ་བླངས་ཀྱང་མཉམ་པར་མི་ལྟ་སྟེ་བཏང་སྙོམས་སུ་བྱེད་པ་དང༌། རྣལ་འབྱོར་མཆོག་ཨ་ཏི་ཡོ་ག་བ་ནི་འདི་ཉིད་སྤུ་མ་བརྗེས་མདོག་མ་འགྱུར་བཟོ་མ་བྱས་པར་ཡེ་ནས་ཐ་སྙད་ཐམས་ཅད་མ་སྤངས་བྲལ་བར་རྟོགས་པ་ཉིད་ལ་བྱ་བ་ཅིའང་མེད་དེ་ཡལ་བར་འདུག་པའང་མེད་པར་ཤེས་ཏེ་གདེངས་དང་ལྡན་པ་ཉིད་ཀྱིས་ཆོག་པ་རྣམས་ཏེ་དེ་ལྟར་རང་བཞིན་ནམ་ལྟ་བའི་ཁྱད་པར་གྱིས་འཇིག་རྟེན་གྱི་ཞེན་པའི་རྟོག་པའམ་ཉོན་མོངས་པ་འཆིང་བ་གཅོད་པའི་ཚུལ་རིམ་པས་གོང་མ་ཁྱད་པར་དུ་འཕགས་ཏེ་རྫོགས་པ་ཆེན་པོར་མཐར་ཕྱིན་པ་ཡིན་ནོ། །དེ་ལྟ་བུའི་ཐེག་པ་འདི་ཀུན་ཤེས་བྱའི་ལྟ་གཞི་གཏན་ནས་ཐ་དད་པ་མ་ཡིན་པར་དབྱིངས་གཅིག་ལ་འབབ་པ་ཡིན་ཡང༌། རང་རང་གི་ལྟ་བའི་འདོད་གཞུང་མི་མཐུན་པས་མཐོང་བ་ཐ་དད་པའི་སྒོ་ལྟར་འཇིག་རྟེན་དང་འཇིག་རྟེན་ལས་འདས་པ་སོ་སོར་གྱུར་པའོ། །དེས་ན་ཚུལ་འདི་ལྟར་དུ་ལྟ་བས་མཐོང་སྒོ་སོ་སོར་རྟོགས་ནས་ཏིང་ངེ་འཛིན་གྱི་ཉམས་སུ་ལེན་པའི་ཐབས་ཐ་དད་མི་མཐུན་པ་ཇི་སྙེད་པར་སྣང་བ་བཞིན་དུ། ཐེག་པའི་སྒོའི་རིམ་པ་འདི་ལྟར་རྣམ་པར་སྣང་ཞིང་བྱེ་བྲག་བསམ་ཡས་པར་འབྱུང་བའི་མ་འདྲེས་པའི་འཇུག་སྒོ་མང་པོར་གྲལ་དུ་བཀོད་པ་ལ། རྣལ་འབྱོར་པ་གང་གིས་ཐེག་པའི་རིམ་པ་ལྟར་ཀུན་ལ་ཞུགས་ཏེ་ལྟ་བའི་མཐའ་བརྟགས་ཤིང་ལེགས་པར་བལྟས་ནས་གཡང་ས་དང་དོན་གྱི་ཁྱད་པར་ངོ་ཤེས་པར་བྱས་ཏེ་སྒོ་ཀུན་ནས་བསྡུར་བས་མཐར་ཡང་དག་པའི་དོན་མ་ནོར་བ་ཉིད་ནོར་དུ་རུང་བར་བྱས་པས་རྩ་བ་གཅིག་ཏུ་གཏན་ལ་འབེབས་པར་བྱས་ནས་དེ་ལ་འཇུག་པ་ཉིད་ནི་ངེས་པའི་སྙིང་པོ་དམ་པ་མཐར་ཐུག་པའོ། །དེ་སྐད་དུའང་རྩ་བའི་རྒྱུད་ལས། མཉམ་དང་མི་མཉམ་མཉམ་པ་ཡི། །སངས་རྒྱས་མེད་ཅིང་སེམས་ཅན་མེད། །འཁོར་བ་མེད་ཅིང་ཆོས་ཉིད་མེད། །དམིགས་པ་མེད་ཅིང་མི་དམིགས་མེད། །དེ་ལྟར་ཤེས་པ་མཁས་པ་ཡིན། །རིག་དང་མ་རིག་ཚུལ་གཅིག་སྟེ། །དེ་ལྟར་ཤེས་པ་རྒྱལ་བ་ཡིན། །སེམས་ཅན་རང་བཞིན་སངས་རྒྱས་ཉིད། །སངས་རྒྱས་རང་བཞིན་སེམས་ཅན་ཏེ། །སེམས་ཅན་སངས་རྒྱས་གཅིག་པ་ཡིན། །དེ་ལྟར་ཤེས་པ་རྒྱལ་བའི་སྲས། །བྱང་ཆུབ་ཕྱིར་ནི་གང་མ་བརྙེས། །མ་བརྙེས་གང་ཡང་དེ་མ་བརྙེས། །༼༡༢༩༽བརྙེས་པ་མེད་པའི་དོན་མཐོང་ན། །དེ་ནི་བརྙེས་པའི་མཆོག་ཡིན་ནོ། །ཞེས་སོ།།

གསུམ་པ་བསླབ་པ་གཅེས་པར་གདམས་པ་ནི།

ཇི་ལྟར་བུང་བ། ཞེས་པ་ནས། བྱ་བ་རབ་ཏུ་གཅེས། །ཞེས་པའི་བར་གྱིས་བསྟན་ཏེ།

ཇི་ལྟར་བུང་བ་ཁུང་འཚོལ་བ། །ཀུན་ཏུ་འཇུག་ཅིང་བྱུང་ནས་ཀྱང་། །རང་གི་གསང་ཁུང་གང་ཡིན་པར།།

ངེས་པར་འཇུག་ཅིང་གནས་པ་ལྟར། །རྣལ་འབྱོར་དོན་གྱི་རྗེས་འཚོལ་བ། །སྤྱོད་སྒོ་ཅི་ཡོད་བསྟུན་ཏེ་བསྡུ།།

ལྟ་སྒོར་འཇུག་ཅིར་རྟགས་བསྡུར་ནས། །དོན་དམ་ངེས་པའི་གསང་ཉིད་ལའོ། །དེ་ཉིད་དོན་གྱི་རྗེས་བཅད་ཕྱིར།། སྒོ་མོ་ཀུན་ནས་བསྡུར་བ་ཡི། །བསླབ་པར་བྱ་བའི་མཐའ་ཡིན་ཏེ། །གོམས་པར་བྱ་བ་རབ་ཏུ་གཅེས།།

སྒོ་ཀུན་ནས་བསྡུར་བའི་དཔེ་དོན་དག་དགོས་ཆེད་བསྟན་པ་སྟེ། དཔེ་ཇི་ལྟར་ན་བུང་བ་ཁུང་གི་ཚང་དུ་རྩི་བཅུད་ཚོལ་ཞིང་བསྡུ་བ་དག་གིས་ཀྱང༌། རང་དང་འཚམས་པའི་བུག་པ་ཀུན་ཏུ་འཇུག་ཅིང་དེ་ལས་སླར་ཡང་བྱུང་ནས་ནི། རང་གི་གནས་ཀྱི་གསེང་ཁུང་གང་ཡིན་པར། ངེས་པར་འཇུག་ཅིང་གནས་ཏེ་བཅུད་ཀྱི་སྙིང་པོ་ལེན་པ་ལྟར། རྣལ་འབྱོར་པ་གསང་ཆེན་གསང་བའི་དོན་གྱི་རྗེས་སུ་ཞུགས་ཏེ་ཤེས་བྱའི་སྙིང་པོ་དམ་པ་ཉིད་ཚོལ་བ་ན་ཡང༌། ཐེག་པའི་སྤྱོད་སྒོ་ཅི་ཡོད་པ་ཀུན་བསྟུན་ཏེ་བསྡུར་བས་ལྟ་བའི་སྒོར་འཇུག་ཅིང་ཉམས་སུ་ལེན་བཞིན་ལུང་དང་མན་ངག་གི་གནད་ལ་བརྟེན་ནས་དངོས་པོ་སྟོབས་ཞུགས་ཀྱི་རིགས་པས་བརྟགས་ཏེ་སྒོ་ཀུན་བསྡུར་བར་བྱས་ནས་དོན་དམ་ངེས་པའི་སྙིང་པོ་དམ་པ་གསང་སྔགས་མ་ནོར་བ་ཉིད་ལ་འཇུག་པར་བྱེད་པའོ། །ཚུལ་དེ་ཉིད་ཀྱིས་རང་རིག་དོན་གྱི་རྗེས་སུ་འཇུག་ཅིང་ཕྱིན་ཅི་མ་ལོག་པར་གཅོད་པའི་ཕྱིར། སྒོ་མོ་ཀུན་ནས་བསྡུར་བ་ཡི་བསླབ་པར་བྱ་བའི་མཐའ་དམ་པ་ཡིན་ཏེ། དེ་བས་ན་ཚུལ་འདི་ལ་གོམས་པར་བྱ་བ་རབ་ཏུ་གཅེས་སོ། །ཞེས་གདམས་པར་མཛད་དོ།།

བཞི་པ་ཞབས་བསྡུ་བ་ནི།

ལང་ཀའི། ཞེས་པ་ནས། ཤེས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་དག་ནི། ཕྱིས་འབྱུང་བར་སྣང་བའི་སྒོ་ཡོངས་སུ་དབྱེ་བ་ཡིན་ཏེ། ཀུན་ནས་བསྡུར་བའི་བསླབ་པའི་མཐའ་ཡོངས་སུ་བགྲོས་པར་ཤེས་པར་བྱའོ། །དེ་སྐད་ཅེས་སྨྲས་པས། དམན་པའི་ལུས་ཀྱི་སེམས་དཔའ་རྣམས་ཆོས་ཐམས་ཅད་ཀྱི་སྒོ་རང་སྣང་བར་ཤེས་པར་གྱུར་ཏོ།།

ལང་ཀའི་བདག་པོ་ཞེས་བོས་ནས། ཇི་སྐད་བཤད་པའི་དོན་དེ་དག་གིས། ཕྱིས་འབྱུང་བར་སྣང་སྟེ་འཆད་པར་འགྱུར་བའི་ཕུལ་དུ་མཁས་པས་དབྱུང་བར་བསླབ་པའི་སྒོ་ཡོངས་སུ་དབྱེ་ཞིང་འབྱུང་བར་ངེས་པའི་རྒྱུ་མ་ནོར་བ་ཉིད་ཡིན་ཏེ། དེས་ན་ཐེག་པའི་སྒོ་ཀུན་ནས་བསྡུར་བར་བསླབ་པའི་མཐའ་རབ་ཏུ་གསང་བ་ཉིད་ཡོངས་སུ་བགྲོས་ཏེ་དོན་གྱི་ངོ་བོ་བསྟན་པར་ཤེས་པར་བྱའོ། །སྟོན་པ་སྐྱེས་བུ་ཆེན་པོས་དེ་སྐད་ཅེས་སྨྲས་ཏེ་བཀའ་སྩལ་པས། འཁོར་དམན་པའི་ལུས་ཀྱི་སེམས་དཔའ་རྣམས་ཀྱིས། ཆོས་ཐམས་ཅད་ཀྱི་སྒོ་ཀུན་ཆོས་ཉིད་རང་སྣང་དམ་པར་ཡང་དག་པར་ཤེས་ཤིང་རྟོགས་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཆོས་ཐམས་ཅད་ཀྱི་སྒོ་རྣམ་པར་དབྱེ་བའི་ལེའུ་སྟེ་དྲུག་ཅུ་བརྒྱད་པའོ།། །།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། འཇིག་རྟེན་པ་དང་འཇིག་རྟེན་ལས་འདས་པའི་ཆོས་ཐམས་ཅད་ཀྱི་ལྟ་བའི་༼༡༣༠༽འཇུག་སྒོ་རྣམ་པར་དབྱེ་བ་ཞེས་བྱ་བའི་ལེའུ་སྟེ་དྲུག་ཅུ་རྩ་བརྒྱད་པ་ཉིད་རྣམ་པར་བཀྲོལ་ཏེ་བཤད་པའོ།། །།

ལེའུ་རེ་དགུ་པ་བསམ་གྱིས་མི་ཁྱབ་པ་བསྟན་པ།

༈ བཞི་པ་ཕུལ་དུ་མཁས་པས་དབྱུང་བ་ལ་བསླབ་པ་རི་རབ་ལྷུན་པོའི་རྩེར་ཕྱིན་པ་ལྟར་བཤད་པ་ལ་བཞི་སྟེ། སྤྱིར་བསྟན་པ། བྱེ་བྲག་ཏུ་བཤད་པ། གཅེས་པར་གདམས་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། ཉིད་དུ་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས། དམན་པའི་ལུས་ཀྱི་སེམས་དཔའ་རྣམས་ལ་སྨྲས་པ། ཀྱེ་གྲོགས་པོ་དག་མཐར་ཕྱིན་པར་བྱ་བ་ནི་གང་ཞེ་ན། འདི་ལྟ་སྟེ། བསམ་གྱིས་མི་ཁྱབ་པ་རྣམས་ནི་བསམ་དུ་མེད་པས་མཐར་ཕྱིན་པར་བྱའོ། །བསམ་དུ་མེད་པ་ནི་སེམས་ཀྱི་དེ་ཁོ་ན་ཉིད་དུ་མཐར་ཕྱིན་པར་བྱའོ། །སེམས་ཀྱི་དེ་ཁོ་ན་ཉིད་ནི་དགོངས་པ་དམ་པ་འདུས་པའི་དེ་ཁོ་ན་ཉིད་དུ་མཐར་ཕྱིན་པར་བྱའོ། །དེ་ཅིའི་ཕྱིར་ཞེ་ན། དགོངས་པ་དམ་པ་འདུས་པའི་དེ་ཁོ་ན་ཉིད་ལ་མཁས་ན་སེམས་ཀྱི་དེ་ཁོ་ན་ཉིད་ལ་མཁས་པར་འགྱུར་རོ། །སེམས་ཀྱི་དེ་ཁོ་ན་ཉིད་ལ་མཁས་ན་བསམ་དུ་མེད་པ་ལ་མཁས་པར་འགྱུར་རོ། །བསམ་དུ་མེད་པ་ལ་མཁས་ན་བསམ་གྱིས་མི་ཁྱབ་པའི་རྣམ་པ་ལ་མཁས་པར་འགྱུར་རོ། །བསམ་གྱིས་མི་ཁྱབ་པའི་རྣམ་པ་ལ་མཁས་པར་འགྱུར་ན། རྣམ་པ་ཐམས་ཅད་མཁྱེན་པ་ཉིད་ཡིན་ཏེ། དེ་ནི་དགོངས་པ་དམ་པ་ཀུན་ནས་འདུས་པ་ཉིད་དུ་ཤེས་པར་བྱའོ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དེ་ནས་ཡང་སྐྱེས་བུ་གསང་བ་པའི་བདག་པོས། འཁོར་དམན་པའི་ལུས་ཀྱི་སེམས་དཔའ་རྣམས་ལ་སྨྲས་ཏེ་གསུངས་པ། ཀྱེ་གྲོགས་པོ་དག ཅེས་བོས་ནས། བསླབ་པ་མཐར་ཕྱིན་པར་བྱ་ཞིང་ཕུལ་དུ་མཁས་པས་དབྱུང་བར་བསླབ་པ་ནི། གང་ཞེ་ན། ཉེ་བར་སྟོན་པ་འདི་ལྟ་སྟེ། ཐེག་པ་ཆེན་པོ་བསྒྲུབ་པའི་ཐབས་མང་པོ་བསམ་གྱིས་མི་ཁྱབ་ཅིང་ཆོས་ཇི་སྙེད་པའི་རྣམ་པར་མ་འདྲེས་པ་རིལ་ཐམས་ཅད། ཆོས་ཅན་གྱི་གྲངས་དང་ནུས་པའི་ཁྱད་པར་དང༌། ཉོན་མོངས་པའི་རྟོག་པ་རྣམས་དང༌། སེམས་བྱུང་འདུ་བྱེད་ཀྱིས་བསྡུས་པ་དང༌། ལམ་གྱི་བྱེ་བྲག་སྣ་ཚོགས་བསམ་གྱིས་མི་ཁྱབ་པ་དང་བཞིར་འདུའོ། །དེ་ཐམས་ཅད་ནི་ཆོས་ཉིད་དབྱིངས་ཀྱི་ངོ་བོ་དོན་གྱི་གནས་ལུགས་བྱ་བ་དང་བསམ་དུ་མེད་པར་ཡོངས་སུ་རྫོགས་ཏེ། ཆོས་ཅན་ནུས་པ་དང་བཅས་པ་ཆོས་ཉིད་དང༌། ཉོན་མོངས་པ་ཡེ་ཤེས་དང༌། སེམས་བྱུང་རྣམས་རྣམ་ཤེས་དགུ་པ་དང༌། ལམ་གྱི་བྱེ་བྲག་རྣམས་རང་བྱུང་ཡེ་ཤེས་སུ་མཐར་ཐུག་ཅིང་ཕུལ་དུ་ཕྱིན་པར་ཤེས་པར་བྱའོ། །དེའི་དོན་གྱི་ངོ་བོ་བསམ་དུ་མེད་པ་ཉིད་ནི། ཆོས་རྣམས་ཀྱི་ཆོས་ཉིད་ཇི་བཞིན་པ་སེམས་ཀྱི་དེ་ཁོ་ན་ཉིད་རང་རིག་པ་འོད་གསལ་བ་ཉིད་དུ་མཐར་ཕྱིན་པར་ངེས་པར་གཟུང་བར་བྱའོ། །སེམས་ཀྱི་རང་བཞིན་ངོ་བོ་རྣམ་པར་དག་པའི་དེ་ཁོ་ན་ཉིད་ནི། རྒྱལ་བ་ཐམས་ཅད་ཀྱི་དགོངས་པ་མཆོག་ཏུ་གསང་བའི་ཞེ་ཕུགས་དམ་པ་ཀུན་ཡོངས་སུ་འདུས་པའི་རང་བཞིན་དེ་ཁོ་ན་ཉིད་དུ་མཐར་ཕྱིན་པར་ཤེས་པར་བྱ་སྟེ། དེ་ཉིད་རྟོགས་ཕྱིན་ཆད་སྐྱེད་དུ་བྱ་བ་གཞན་མེད་པའོ། །དེ་ནི་བསྡུས་པའི་ཚུལ་ལོ། །དེ་དག་གཏན་ཚིགས་ཀྱིས་ཡིད་ཆེས་པར་བྱ་བའི་ཕྱིར། དེ་ཅིའི་ཕྱིར་ཞེ་ན། སྤྲོས་པའི་ཚུལ་ནི། རྒྱལ་བ་ཀུན་གྱི་དགོངས་པ་དམ་པ་ཀུན་ནས་འདུས་པའི་ཆོས་རྣམས་ཀྱི་དེ་ཁོ་ན་ཉིད་ལ་མཁས་ཏེ་ཕྱིན་ཅི་མ་ལོག་པར་རྟོགས་པ་ན། དེ་ཉིད་ཤེས་པའི་ཕུལ་༼༡༣༡༽ཡིན་པས། སེམས་ཀྱི་དེ་ཁོ་ན་ཉིད་རང་རིག་པའི་དོན་ལ་མཁས་པར་ངེས་པ་ཁོ་ནར་འགྱུར་རོ། །སེམས་ཀྱི་རྩ་བ་ཆོད་དེ་དེ་ཁོ་ན་ཉིད་ལ་མཁས་ཤིང་གདེང་དུ་ཆུད་པ་ན། སྤྱོད་ཡུལ་དང་བྲལ་བས་ཡེ་ཤེས་བསམ་དུ་མེད་པ་ལ་མཁས་ཏེ། གསང་མཆོག་ཐེག་པ་ཆེན་པོའི་དོན་རྟོགས་པར་འགྱུར་རོ། །དེ་ལྟར་ཆོས་ཉིད་བསམ་དུ་མེད་པ་ལ་མཁས་པར་གྱུར་ན། བློ་ཡིས་བསམ་གྱིས་མི་ཁྱབ་པའི་རྣམ་པ་ཇི་སྙེད་པའི་ཆོས་རྣམས་ལ་རྟོགས་པ་གསལ་ཞིང་མཁས་པར་འགྱུར་རོ།།

དེ་ལྟར་བསམ་གྱིས་མི་ཁྱབ་པའི་རྣམ་པ་ལ་མཁས་ཏེ་ཆོས་ཐམས་ཅད་ཀྱི་མཚན་ཉིད་རྟོགས་པ་ན། གཞི་ལམ་འབྲས་བུའི་ངོ་བོ་མ་འདྲེས་ཡོངས་རྫོགས་སུ་གཟིགས་ཏེ། ཤེས་བྱའི་རྣམ་པ་ཐམས་ཅད་མངོན་སུམ་དུ་མཁྱེན་པའི་རྫོགས་པའི་སངས་རྒྱས་དམ་པ་ཉིད་ཡིན་ཏེ། རྒྱལ་བ་རྣམས་ལ་དགོངས་པ་དེ་ལས་ལྷག་པ་མི་མངའ་བའི་ཕྱིར་རོ། །དེ་ལྟར་མཁྱེན་པ་དེ་ནི། བདེ་བར་གཤེགས་པ་རྣམས་ཀྱི་དགོངས་པ་དམ་པ་ཀུན་ནས་འདུས་པའི་རྒྱུད་ཀྱི་རྒྱལ་པོ་བླ་ན་མེད་པ་འདི་ཉིད་ཀྱི་དོན་མཐར་ཐུག་པ་ཇི་བཞིན་པ་ཉིད་དུ་ཤེས་པར་བྱའོ། །ཞེས་གདམས་པའོ། །དེས་ན་རྗོད་བྱེད་ཀྱིས་བརྗོད་བྱ་གོ་ཞིང༌། བརྗོད་བྱས་ཀྱང་བརྗོད་བྱེད་གོའོ་གསུངས།

གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གྲོགས་པོ་དག་དེ་བས། ཞེས་པ་ནས། མེད་པའི་རྣལ་འབྱོར་རོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་བས་ན་བསམ་གྱིས་མི་ཁྱབ་པའི་རྣམ་པ་གང་ཞེ་ན། འདི་ལྟར་བསམ་གྱིས་མི་ཁྱབ་པའི་ཆོས་ཐམས་ཅད་ཀྱི་རྣམ་པ་ནི། རྣལ་འབྱོར་རྣམ་པ་གསུམ་གྱིས་ཡོངས་སུ་འགྲེལ་པ་སྟེ། གསུམ་གང་ཞེ་ན། བྱ་བའི་རྣལ་འབྱོར་དང་། བྱ་བ་བྱེད་པའི་རྣལ་འབྱོར་དང་། བྱ་བ་མེད་པའི་རྣལ་འབྱོར་རོ།།

དེ་ཉིད་རྟོགས་པར་བྱ་བའི་ཐབས་གང་སྙམ་པ་ལ། གྲོགས་པོ་དག ཅེས་བོས་ནས། དེ་བས་ན་བསམ་གྱིས་མི་ཁྱབ་པའི་རྣམ་པ་གང་ཞེ་ན། འདི་ལྟར་བསམ་གྱིས་མི་ཁྱབ་པའི་ཆོས་ཐམས་ཅད་ཀྱི་རྣམ་པའི་མཚན་ཉིད་རྟོགས་པར་བྱ་བ་ནི། རྣལ་འབྱོར་རྣམ་པ་གསུམ་དུ་ཕྱེ་བ་ཉིད་ཀྱིས་ཡོངས་སུ་འགྲེལ་བས་བརྡ་འཇལ་ཞིང་གོ་བར་འགྱུར་བ་སྟེ། གསུམ་གང་ཞེ་ན། ཤེས་པར་བྱ་བའི་རྒྱུའི་ངོ་བོ་རང་བཞིན་གྱི་རྣལ་འབྱོར་ཡེ་ནས་གཉིས་སུ་མེད་པ་དང༌། ཤེས་པར་བྱེད་པའི་རྐྱེན་ལམ་པས་རྩོལ་བ་ཆེན་པོའི་བྱ་བ་བྱེད་པས་དོན་གཏན་ལ་འབེབས་པའི་རྣལ་འབྱོར་དང༌། ཤེས་ཤིང་གྲུབ་པར་གྱུར་ཏེ་བྱ་བ་མེད་པར་འབྲས་བུ་གཉིས་སུ་མེད་པར་གྱུར་ཟིན་པས་ལྷུན་གྱིས་གྲུབ་པའི་རྣལ་འབྱོར་གསུམ་གྱི་འགྲེལ་པས་མཐར་ཕྱིན་པའི་ཕྱིར་རོ། །དེ་སྐད་དུ་ཀུན་འདུས་ཀྱི་ལེའུ་དང་པོ་ལས་ཀྱང༌། རྒྱུའི་རྣལ་འབྱོར་༼༡༣༢༽དང༌། རྐྱེན་གྱི་རྣལ་འབྱོར་དང༌། འབྲས་བུའི་རྣལ་འབྱོར་གསུམ་དུ་འདུས་པར་བཀའ་སྩལ་ཞིང༌། དོན་བསྡུས་ལས་ཀྱང༌། དོན་དམ་ངེས་པའི་ཐེག་མཆོག་ལས། །གསང་སྒོ་མཚོན་པའི་མདོ་རྒྱུད་དོན། །རྣམ་པ་གསུམ་དུ་ཤེས་བྱ་སྟེ། །བྱ་བའི་གཞི་དང་བྱེད་པའི་རྐྱེན། །བྱ་བྲལ་འབྲས་བུའི་མཐར་ཕྱིན་དག །ཇི་སྙེད་ཆོས་ཀྱི་རྩ་བར་བཤད། །ཅེས་སོ།།

གཉིས་པ་རྒྱས་པར་བཤད་པ་ལ་གསུམ་སྟེ། བྱ་བའི་རྣལ་འབྱོར། བྱ་བ་བྱེད་པའི་རྣལ་འབྱོར། བྱ་བ་མེད་པའི་རྣལ་འབྱོར་བཤད་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

གྲོགས་པོ་དག་བྱ་བའི། ཞེས་པ་ནས། ཕྱི་ནང་གི་རྣལ་འབྱོར་རོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་བྱ་བའི་རྣལ་འབྱོར་ཡང་གསུམ་དུ་ཤེས་པར་བྱ་སྟེ། གང་ཞེ་ན། ཕྱིའི་རྣལ་འབྱོར་དང་།

ནང་གི་རྣལ་འབྱོར་དང་། ཕྱི་ནང་གི་རྣལ་འབྱོར་རོ།།

དེ་གསུམ་སོ་སོ་ནས་བསྟན་པའི་ཕྱིར། གྲོགས་པོ་དག ཅེས་བོས་ནས། དང་པོ་བྱ་བའི་རྣལ་འབྱོར་ཡང་རྣམ་གྲངས་གསུམ་དུ་ཤེས་པར་བྱ་སྟེ། གསུམ་གང་ཞེ་ན། ཡུལ་གྱི་རྣམ་པར་སྣང་བ་ཕྱིའི་རྣལ་འབྱོར་དང༌། ཤེས་པས་ཟིན་པར་སྣང་བ་ནང་གི་རྣལ་འབྱོར་དང༌། དེ་གཉིས་འཕྲད་པར་སྣང་་བ་ཕྱི་ནང་གི་རྣལ་འབྱོར་རོ།།

གཉིས་པ་རྒྱས་པར་བཤད་པ་ལ་གསུམ་སྟེ། ཕྱིའི་རྣལ་འབྱོར། ནང་གི་རྣལ་འབྱོར། ཕྱི་ནང་གི་རྣལ་འབྱོར་བཤད་པའོ། །དང་པོ་ནི།

གྲོགས་པོ་དག དེ་ལ་ཕྱིའི། ཞེས་པ་ནས། ཕུལ་དུ་གྱུར་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་ལ་ཕྱིའི་རྣལ་འབྱོར་གང་ཞེ་ན། འདི་ལྟ་སྟེ། ས་རྡོ་རྗེ་ཞེས་བྱ་བའི་རྣལ་འབྱོར་ཆེན་པོ་དང་། དེ་བཞིན་ཆུ་རྡོ་རྗེ་དང་། མེ་རྡོ་རྗེ་དང་། རླུང་རྡོ་རྗེ་དང་། ནམ་མཁའ་རྡོ་རྗེ་དང་། གཟུགས་རྡོ་རྗེ་དང་། སྒྲ་དང་། དྲི་དང་། རོ་དང་། རེག་དང་། ཆོས་རྡོ་རྗེ་ཞེས་བྱ་བའི་རྣལ་འབྱོར་ཆེན་པོ་རྣམས། དགོངས་པ་དམ་པ་དེ་ཁོ་ན་ཉིད་དུ་མཐར་ཕྱིན་ཅིང་ཕུལ་དུ་གྱུར་པའོ།།

གྲོགས་པོ་དག དེ་ལ་ཕྱིའི་རྣལ་འབྱོར་གང་ཞེ་ན། བཀར་ནས་བསྟན་པ་འདི་ལྟ་སྟེ། འཇིག་རྟེན་གང་སྲ་བ་དང་འདེགས་པའི་མཚན་ཉིད་ཀྱི་ལས་གཉིས་དང་ལྡན་པའི་འབྱུང་བས་ཉིད་དབྱེར་མེད་པས་རྡོ་རྗེ་ཞེས་བྱ་བའི་རྣལ་འབྱོར་ཆེན་པོ་དང༌། དེ་བཞིན་དུ། གཤེར་ཞིང་སྡུད་པའི་མཚན་ཉིད་ཀྱི་ལས་གཉིས་དང་ལྡན་པའི་འབྱུང་བ་ཆུ་ཉིད་དབྱེར་མེད་པས་རྡོ་རྗེ་ཞེས་བྱ་བའི་རྣལ་འབྱོར་ཆེན་པོ་དང༌། ཚ་ཞིང་སྲེག་པའི་མཚན་ཉིད་ཀྱི་ལས་གཉིས་དང་ལྡན་པའི་འབྱུང་བ་མེ་ཉིད་དབྱེར་མེད་པས་རྡོ་རྗེ་ཞེས་བྱ་བའིརྣལ་འབྱོར་ཆེན་པོ་དང༌། ཡང་ཞིང་འཐོར་བའི་མཚན་ཉིད་ཀྱི་ལས་གཉིས་དང་ལྡན་པའི་འབྱུང་བ་རླུང་ཉིད་དབྱེར་མེད་པ་རྡོ་རྗེ་ཞེས་བྱ་བའི་རྣལ་འབྱོར་ཆེན་པོ་དང༌། གསལ་ཞིང་གོ་འབྱེད་པའི་མཚན་ཉིད་ཀྱི་ལས་གཉིས་དང་ལྡན་པའི་འབྱུང་བ་ནམ་མཁའ་ཉིད་དབྱེར་མེད་པས་རྡོ་རྗེ་ཞེས་བྱ་བའི་རྣལ་འབྱོར་ཆེན་པོ་དང་ལྔ་ནི་འབྱུང་བ་ཆེན་པོ་ལྔ་སྟེ། འདིར་དེ་དག་གི་ངོ་བོ་ཉིད་སེམས་ཀྱི་དཀྱིལ་༼༡༣༣༽འཁོར་འོད་གསལ་བའི་ངོ་བོའི་ཆོས་ཉིད་ཡེ་ནས་ཡིན་པ་ནི། ཆེད་དུ་མ་བཙལ་བ་དང༌། རྒྱུ་རྐྱེན་ལས་མ་བྱས་པ་དང༌། མཚན་ཉིད་མི་ཕྱེད་པའི་ཕྱིར་རྡོ་རྗེར་བརྗོད་པས་རྣལ་འབྱོར་གྱི་མིང་འཐོབ་པའོ། །དེ་བཞིན་དུ་གཟུགས་ཉི་ཤུ་རྩ་ལྔ་ཉིད་ཀྱང་མི་ཕྱེད་པས་རྡོ་རྗེ་དང༌། སྒྲ་བདུན་དང༌། དྲི་བདུན་དང༌། རོ་དགུ་དང༌། རེག་བྱ་ཉི་ཤུ་རྩ་གཉིས་དང༌། ཆོས་བརྒྱད་ཀྱང་རྡོ་རྗེ་ཞེས་བྱ་བའི་རྣལ་འབྱོར་ཆེན་པོ་ཉིད་དུ་རྗེས་སུ་མཐུན་པར་སྦྱར་ཏེ། དེ་རྣམས་ཐམས་ཅད་དགོངས་པ་དམ་པ་སེམས་ཀྱི་དེ་ཁོ་ན་ཉིད་ཀྱི་ངོ་བོའི་ཆོས་ཉིད་དུ་མཐར་ཕྱིན་ཅིང་ཕུལ་དུ་གྱུར་བར་འཇལ་བ་ནི་ལྟ་བའི་མཆོག་དམ་པ་ཉིད་མངོན་དུ་བྱས་པ་སྟེ། ཀུན་བྱེད་རྒྱལ་པོ་ལས། སྣང་སྲིད་སྣོད་བཅུད་ཀུན་གྱི་ངོ་བོ་ཡང༌། །ང་ཡི་ངོ་བོར་བྱུང་བ་སྣང་བ་ས། །ང་ཉིད་ཡེ་ནས་སྣང་བ་སངས་རྒྱས་ཡིན། །ང་ལ་གཉིས་མེད་གཅིག་ཏུ་འདུས་པ་ཆུ། །སྡུད་པར་བྱེད་པས་སེམས་ཉིད་ཆུ་ཡིན་ནོ། །ང་ནི་ཐམས་ཅད་མཉམ་པ་དྲོད་སྙོམས་མེ། །ཀུན་ལ་མཉམ་པར་གནས་པས་མེ་སངས་རྒྱས། །ང་ནི་ཐོགས་མེད་ཡང་ཞིང་གཡོ་བ་ཡིན། །ཐོགས་མེད་གཡོ་བས་རླུང་དུ་མངོན་སངས་རྒྱས། །ང་ནི་མ་བསྒྲིབས་ཀུན་ཁྱབ་གསལ་བའི་ཕྱིར། །ནམ་མཁའ་ཞེས་ནི་མིང་བཏགས་སངས་རྒྱས་ཡིན། །ང་ལས་མ་བྱས་པ་ཡི་སངས་རྒྱས་ནི། །འབྱུང་ཆེན་སྲིད་པས་བསྡུས་པའི་ཆོས་ལ་མེད། །ཅེས་དང༌། ལོངས་སྤྱོད་ལྔ་ནི་ཆོས་ཉིད་ལོངས་སྤྱོད་གཅིག །གཟུགས་ལ་སོགས་པའི་ལོངས་སྤྱོད་ལྔ་ལ་ནི། །གཅིག་ལའང་ལྔ་ལྔ་ཉི་ཤུ་རྩ་ལྔར་སྤྱོད། །རྩ་ལྔ་ལོངས་སྤྱོད་དེ་ནི་སྐུ་ལྔའི་ཚུལ། །ཚུལ་ནི་ཆོས་ཉིད་དོན་གྱི་ངོ་བོ་ཉིད་དུ་བཤད། །ཅེས་སོགས་འབྱུང་བ་ལྟར་རྟོགས་པར་བྱའོ།།

གཉིས་པ་ནང་གི་རྣལ་འབྱོར་ནི།

གྲོགས་པོ་དག ནང་གི ཞེས་པ་ནས། ཕུལ་དུ་གྱུར་པའོ། །ཞེས་བའི་བར་གྱིས་བསྟན་ཏེ།

གྲོགས་པོ་དག་ནང་གི་རྣལ་འབྱོར་ནི་འདི་ལྟ་སྟེ། སེམས་རྡོ་རྗེ་ཞེས་བྱ་བའི་རྣལ་འབྱོར་ཆེན་པོ་དང་། དེ་བཞིན་དུ་རྟོག་པ་དང་སྤྱོད་པ་ལ་སོགས་པ། གང་ཟིན་པ་རྡོ་རྗེ་ཞེས་བྱ་བའི་རྣལ་འབྱོར་རྣམས་དགོངས་པ་དམ་པ་དེ་ཁོ་ན་ཉིད་དུ་མཐར་ཕྱིན་ཅིང་ཕུལ་དུ་གྱུར་པའོ།།

གྲོགས་པོ་དག ཅེས་བོས་ནས། ནང་གི་རྣལ་འབྱོར་བསྟན་པ་ནི། འདི་ལྟ་སྟེ། གང་འགྲོ་བ་རྣམས་ཀྱི་རྒྱུད་ཀྱི་སེམས་རྣམ་པར་ཤེས་པའི་ཚོགས་བརྒྱད་ཉིད་བཤད་པ་ལྟར་གཏན་ཚིགས་གསུམ་གྱིས་རྡོ་རྗེ་ཞེས་བྱ་བའི་རྣལ་འབྱོར་གྱི་ངོ་བོར་དབྱེར་མེད་པ་རྣམས་དང༌། དེ་བཞིན་དུ་ཚུལ་དེ་ལྟར་དེ་ལ་སྣང་བའི་རྟོག་པ་དོན་གྱི་བྱེ་བྲག་ལ་མི་འཇུག་པས་རྩིང་བའི་རྣམ་པ་ཅན་དང༌། དོན་གྱི་བྱེ་བྲག་ལ་འཇུག་པས་ཞིབ་པའི་རྣམ་པ་ཅན་གྱི་དཔྱོད་༼༡༣༤༽པ་ལ་སོགས་པ་གང་སེམས་ཀྱིས་ཟིན་པས་ཤེས་པའི་དྲན་རྟོག་སེམས་དང་སེམས་ལས་བྱུང་བའི་དངོས་པོར་གྱུར་པ་ཇི་སྙེད་པའང་རྡོ་རྗེ་ཞེས་བྱ་བའི་རྣལ་འབྱོར་ཆེན་པོ་ཉིད་དུ་རྗེས་སུ་མཐུན་པ་རྣམས་ཏེ། དེ་ལྟར་མཐའ་ལས་གྲོལ་བ་ཉིད་རྒྱལ་བ་ཀུན་གྱི་དགོངས་པའི་ཞེ་ཕུགས་མཆོག་ཏུ་གསང་བ་དམ་པ་ཆོས་ཉིད་དེ་ཁོ་ན་ཉིད་དུ་མཐར་ཕྱིན་ཅིང་ཇི་ལྟ་བར་གདེང་དུ་ཆུད་པ་ནི་ཕུལ་དུ་གྱུར་པའི་མཁས་ པ་བླ་ན་མེད་པའོ། །དེ་སྐད་དུའང་སྔ་མ་ལས། ཡེ་ནས་རྒྱས་པའི་བདག ་ཉིད་མངོན་སུམ་གནས་པ་ལ། །གྲིབ་མ་གཟུགས་ཀྱི་དཔེ་བཞིན་དེ་ལ་རྟོག་པ་འབྱུང༌། །མེད་དེ་མེད་པ་མ་ཡིན་མེད་པའི་སྙིང་པོ་འབྱུང༌། །སྟོང་སྟེ་སྟོང་པ་མ་ཡིན་སྟོང་པའི་ཡུལ་ལ་གནས། །ནམ་མཁའི་རང་བཞིན་དེ་ལ་འབྱུང་བའི་དྲན་པ་སྐྱེ། །བྱ་བྲལ་ཟིན་པའི་བདེ་བ་འདོད་པ་མེད་པས་ལེན། །ཞེས་སོགས་ཤིན་ཏུ་མང་ངོ༌།།

གསུམ་པ་ཕྱི་ནང་གི་རྣལ་འབྱོར་བཤད་པ་ནི།

གྲོགས་པོ་དག་ཕྱི་ནང༌། ཞེས་པ་ནས། ཕུལ་དུ་གྱུར་པའོ། །ཞེས་པའི་བར་གྱིས་བསྟན་ཏེ།

གྲོགས་པ་དག་ཕྱི་ནང་གི་རྣལ་འབྱོར་གང་ཞེ་ན། འདི་ལྟ་སྟེ། ཐམས་ཅད་དང། དཀར་པོ་དང་། ནག་པོ་དང་། ངེས་པ་དང་། མ་ངེས་པ་དང་། དམན་པ་དང་། དམ་པ་དང་། འབྱུང་བ་དང་། མི་འབྱུང་བ་དང་། བྱས་པ་དང་། མ་བྱས་པ་དང་། བཅས་པ་དང་། མ་བཅས་པ་དང་། སྤྱི་མཐུན་དང་། ཁྱད་པར་གྱི་རྣམ་པ་རྣམས། དགོངས་པ་དམ་པ་དེ་ཁོ་ན་ཉིད་དུ་མཐར་ཕྱིན་པའི་ཕུལ་དུ་གྱུར་པའོ།།

གྲོགས་པོ་དག ཅེས་བོས་ནས། སྣོད་བཅུད་ཆ་གཉིས་ལས་སྣང་བའི་ཕྱི་ནང་གི་རྣལ་འབྱོར་ཉེ་བར་བསྟན་པ་གང་ཞེ་ན། འདི་ལྟ་སྟེ། ཡུལ་དང་ཤེས་པ་གཉིས་ཀའི་ཆ་ལས་སྣང་ངོ་ཅོག་གི་སྣོད་བཅུད་ཐམས་ཅད་དང༌། ཐ་སྙད་གཉིས་པའི་ཆོས་གཅིག་ལ་ལྟོས་ནས་བཞག་པ། ཁ་དོག་དཀར་པོ་དང༌། ནག་པོ་གཉིས་སམ། དགེ་སྡིག་གཉིས་དང༌། སྨྲ་བསམ་ལ་སོགས་པའི་རིགས་ངེས་པ་དང་མ་ངེས་པ་གཉིས་དང༌། སེམས་ཅན་དང་སངས་རྒྱས་སམ་དམན་པ་ངན་སོང་ལྟ་བུ་ངན་པ་དང༌། དམ་པ་ལྷ་མི་ལྟ་བུ་བཟང་པོ་དང༌། ཅི་ཡང་སྐྱེ་བས་འབྱུང་བ་དང༌། སྐྱེ་བ་མེད་པས་མི་འབྱུང་བ་དང༌། རྒྱུ་རྐྱེན་འདུས་པས་བྱས་པ་དང༌། དེ་ལྟར་རྒྱུ་རྐྱེན་གྱིས་མ་བྱས་པ་དང༌། ཐ་ཚིགས་སུ་བཅས་པ་དང༌། མ་བཅས་པ་གཉིས་དང༌། ཉི་ཟླ་ལ་སོགས་པ་ཀུན་གྱི་སྤྱི་མཐུན་དང༌། རང་གི་ལུས་སོགས་ཁྱད་པར་གྱི་རྣམ་པར་གྲགས་པ་ལ་སོགས་པ་ཆོས་སུ་སྣང་ཞིང་ཐ་སྙད་72བྱེད་པ་ཇི་སྙེད་པ་རིལ་དུ་གྱུར་པ་རྣམས་ཐམས་ཅད་ལམ་པས་མ་བྱས་པར་གདོད་ནས་རྒྱལ་བའི་དགོངས་པ་དམ་པ་སེམས་ཀྱི་རང་བཞིན་རྣལ་མ་དེ་ཁོ་ན་ཉིད་དུ་གཏན་ཚིགས་རྣམ་པ་གསུམ་གྱི་རྣམ་པར་ཡེ་ནས་འབྱོར་བས་མཐར་ཕྱིན་ཟིན་ཅིང༌། གཉིས་པའི་ཆོས་མ་སྤངས་ངང་གིས་བྲལ་བས་གཉིས་སུ་མེད་པའི་དོན་ཇི་ལྟ་༼༡༣༥༽བ་ཉིད་རྟོགས་ན་མཁས་པའི་ཕུལ་དུ་གྱུར་པའོ། །དེ་ལྟ་བུའི་དགོངས་པ་ཁྱད་པར་དུ་གྱུར་པ་ཉིད་ཡུལ་མེད་པར་གསལ་ལ་མི་གཡེང་བས་རྣལ་འབྱོར་གྱི་མིང་ཡང་ངེས་པར་འགྲུབ་སྟེ། དེ་ཉིད་ལས།

རྣམ་པ་ཅིར་ཡང་མི་འབྱེད་ཡེ་ཤེས་གཏི་མུག་དང༌། །ཐོགས་མེད་གསལ་བའི་མར་མེ་བསམ་པ་ཀུན་དང་བྲལ། །ངང་གིས་མི་གཡོ་རྨུགས་ཤིང་ཏིང་འཛིན་རྒྱལ་པོར་གནས། །མངོན་སུམ་མཐོང་བས་མཐོང་མེད་མངོན་སུམ་མཐོང་བའི་མིག །དེ་ཕྱིར་ཐམས་ཅད་མཁྱེན་པའི་སྤྱན་ཞེས་དེ་ལ་བྱ། །མཐའ་དད་དབུས་མེད་ཡངས་པའི་སྙིང་པོ་ལ། །མི་ལེན་མི་འདོར་མཉམ་པའི་རྒྱལ་པོར་གནས། །སེམས་དང་བག་ཆགས་གཉིས་མེད་འདྲེས་ཤིང་མཚུངས། །འཛིན་པས་བརྟགས་ཤིང་སྣང་བའི་ཆོས་རྣམས་ནི། །རང་གི་རྒྱན་དུ་སྣང་བས་མི་འདོར་སྤོང་མི་བྱེད། །ཅིར་ཡང་མི་དགོངས་ཐབས་ཀྱིས་དེ་ལ་རོལ། །ཞེས་སོགས་གསུངས་སོ།།

གསུམ་པ་ཞབས་བསྡུ་བ་ནི།

གྲོགས་པོ་དག་དེ་དག ཅེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་བྱ་བའི་རྣལ་འབྱོར་དུ་ཤེས་པར་བྱའོ།།

གྲོགས་པོ་དག ཅེས་བོས་ནས། བཤད་པ་དེ་དག་ནི། གདོད་ནས་མ་བཅོས་མ་བསླད་མ་བསྒྱུར་བའི་ངང་དུ་ཐམས་ཅད་རྒྱས་ཐེབས་པའི་སྙིང་པོ་བྱང་ཆུབ་ཀྱི་ངོ་བོ་ཐ་སྙད་ཐམས་ཅད་མ་སྤངས་བྲལ་བའི་ཡེ་ཇི་བཞིན་པའི་གཞིའི་གནས་ལུགས་བྱ་བའི་རྣལ་འབྱོར་ཞེས་བྱ་བ་ཐ་སྙད་དུ་གསང་སྔགས་དངོས་པོའི་རྒྱུད་དུའང་གྲགས་པ་ངོ་བོ་འདི་འདྲར་བརྗོད་དུ་མེད་ཅིང་ཐ་སྙད་དེ་ཉིད་དུའང་ཞེན་པས་གཟུང་བ་དང་བྲལ་བའི་ཆོས་ཉིད་ཀྱི་ངང་དུ་ཤེས་པར་བྱའོ། །ཞེས་རྣལ་འབྱོར་དང་པོའི་ངོ་བོ་བསྟན་པའོ།།

གཉིས་པ་བྱ་བ་བྱེད་པའི་རྣལ་འབྱོར་ལ་གཉིས་ཏེ། རྒྱས་པར་བཤད་པ། ཞབས་བསྡུ་བའོ། །དང་པོ་ལ་གསུམ་སྟེ། ལམ་ཕུལ་དུ་ཕྱིན་པར་བྱ་བ། ལམ་དང་འབྲས་བུ་ཕུལ་དུ་ཕྱིན་པར་བྱ་བ། ཏིང་འཛིན་མཚོན་པའི་སྒོ་ཕུལ་དུ་ཕྱིན་པར་བྱ་བའོ། །དང་པོ་ནི།

བྱ་བ་བྱེད་པའི། ཞེས་པ་ནས། ཕུལ་དུ་གྱུར་པའོ། །ཞེས་པའི་བར་གྱིས་བསྟན་ཏེ།

བྱ་བ་བྱེད་པའི་རྣལ་འབྱོར་གང་ཞེ་ན། འདི་ལྟ་སྟེ། རྟེན་པ་དང་། སྤྱོད་པ་དང་། དམིགས་པ་དང་། ཁྱད་པར་དང་། མི་འགྱུར་བ་དང་། རྩལ་གྱིས་གནོན་པ་དང་། ཀུན་ནས་རིག་པའོ། །གྲོགས་པོ་དག་དེ་དག་ཀྱང་དགོངས་པ་དམ་པ་དེ་ཁོ་ན་ཉིད་དུ་མཐར་ཕྱིན་ཅིང་ཕུལ་དུ་གྱུར་པའོ།།

ཐུན་མོང་གི་ལམ་རྒྱུའི་ཐེག་པ་ཉིད་འཆད་པར་ཁས་བླངས་པ་གང་སྙམ་པ་ལ། ལམ་བྱ་བ་བྱེད་པའི་རྣལ་འབྱོར་གང་ཞེ་ན། ཉམས་སུ་ལེན་པའི་ཐབས་བསྟན་པ་འདི་ལྟ་སྟེ། ལམ་གྱི་རྟེན་གཞི་བྱང་ཆུབ་སེམས་དཔའི་སྡོམ་པ་དང༌། ཕ་རོལ་ཏུ་ཕྱིན་པ་དྲུག་ལ་སོགས་པའི་སྤྱོད་པ་དང༌། ལྟ་བའམ་ཤེས་༼༡༣༦༽རབ་ཀྱི་མིག་དང༌། ལྟ་སྤྱོད་ཏིང་འཛིན་རྣམས་གོང་ནས་གོང་དུ་འགྲོ་བའམ། ཐེག་པ་ཆུང་ངུ་ལས་དུས་དཔག་པའི་སའི་ཁྱད་པར་དང༌། མི་འཇིགས་པ་བཞི་ཐོབ་པས་སམ། མཐའི་སྣང་བས་མི་འགྱུར་བ་ཡོངས་སུ་གྲུབ་པ་ཉིད་དང༌། ཏིང་ངེ་འཛིན་གྱིས་སྒྲིབ་པའི་ཕུང་པོ་འཇོམས་པའམ། སྟོབས་བཅུའི་རྩལ་གྱི་ཟིལ་གྱིས་གནོན་པ་དང༌། མངོན་པར་ཤེས་པ་ལྔ་དང་རིག་པའི་གནས་བཅོ་བརྒྱད་ཤེས་པའམ། ཤེས་རབ་ཀྱིས་ཇི་སྙེད་པ་དང་ཇི་ལྟ་བའི་དོན་ཀུན་ནས་རིག་པས་ཐམས་ཅད་མཁྱེན་པའི་རྒྱུ་ཉིད་དུ་གྱུར་བའོ། །སྐྱེས་བུའི་གྲོགས་པོ་དག ཅེས་ལང་ཀའི་བདག་པོ་ལ་སོགས་པ་ལ་བོས་ནས། རྒྱུའི་ཆོས་ཀྱི་རྣམ་གྲངས་དེ་དག་ཀྱང་འདིར་རྒྱལ་བའི་དགོངས་པ་དམ་པ་དེ་ཁོ་ན་ཉིད་སྙིང་པོ་བྱང་ཆུབ་ཀྱི་ངང་དུ་མཐར་ཕྱིན་ཅིང་མ་འདྲེས་པར་རྫོགས་པའི་མཁས་པ་ཕུལ་དུ་གྱུར་པ་ཡིན་པས། གསང་སྔགས་མཐོང་བའི་བརྒྱུད་པའི་རྒྱུར་ནི་འགྱུར་གྱི། དོན་ཕྱོགས་ཙམ་ལ་འདིར་གཏིང་ཕྱིན་པར་རྒྱུ་ཡིས་རྟོགས་པ་ནི་མ་ཡིན་ནོ། །ཡང་ན་ལམ་ལ་གནས་པས་རང་བཞིན་ཇི་བཞིན་ཡིན་པའི་དོན་ལ་ཉམས་སུ་ལེན་ཅིང་རྩོལ་བས་རྣལ་དུ་ཕེབས་པའི་ཐབས་ཉེ་བར་བསྟན་པ་ནི། གཞི་དམ་ཚིག་གིས་འཛིན་པས་བསླབ་པའི་རྩ་བར་གྱུར་པ་དང༌། རྗེས་སུ་མཐུན་པའི་སྤྱོད་པ་རྣམས་དང༌། དེ་ཁོ་ན་ཉིད་ཇི་ལྟ་བར་མཐོང་བའི་ལྟ་བ་དང༌། ཕྲིན་ལས་ཀྱི་བྱེ་བྲག་དང༌། དཀྱིལ་འཁོར་གྱི་ངོ་བོ་གང་གིས་ཀྱང་བཤིགས་པར་དཀའ་བ་དང༌། ཐབས་ཀྱི་ཏིང་ངེ་འཛིན་གྱིས་སྒྲིབ་པའི་ཕུང་པོ་རྣམས་ལྡང་མི་ནུས་པར་བྱེད་པ་དང༌། གསང་བའི་ཤེས་རབ་ཀྱིས་ཇི་སྙེད་པ་དང༌། ཇི་ལྟ་བ་གསལ་བར་བྱེད་པ་དག་ཀྱང་ལམ་གྱི་ཡན་ལག་རྣལ་འབྱོར་ལྔ་བཅུའི་ཡན་ལག་གི་བྱ་བ་བྱེད་པ་ཡིན་པའི་ཕྱིར་དོན་རྟོགས་ན་མཁས་པའི་ཕུལ་དུ་གྱུར་པའོ།།

གཉིས་པ་ལམ་དང་འབྲས་བུ་ཕུལ་དུ་ཕྱིན་པར་བྱ་བ་ནི།

གྲོགས་པོ་དག གཞན་ཡང༌། ཞེས་པ་ནས། གྱུར་པ་ཡིན་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་གཞན་ཡང་འདི་ལྟ་སྟེ། སྦྱོར་བ་དང་། མི་གནས་པ་དང་། སྐྱོད་པ་དང་སྒྱུར་བ་དང་། རྩལ་དང་། འ

བྱུང་བ་དང་། འཇུག་པ་དང་། སྒོ་དང་། ཤེས་པ་དང་། གནས་པ་དང་། རིག་པ་དང་། ལམ་དང་། འཇུག་པ་དང་། ཡེ་ཤེས་དང་། ཁྱབ་པའི་རྣམ་པ་དེ་དག་ཀྱང་དགོངས་པ་དམ་པ་དེ་ཁོ་ན་ཉིད་དུ་མཐར་ཕྱིན་ཅིང་ཕུལ་དུ་གྱུར་པ་ཡིན་ནོ།།

གྲོགས་པོ་དག ཅེས་བོས་ནས། མི་མཐུན་པ་གཞན་ཡང་ཉེ་བར་བསྟན་པ་ནི་འདི་ལྟ་སྟེ། རྩ་བའི་རྒྱུད་ཀྱི་ལེའུ་དང་པོར་གསུངས་པའི་མཚན་ཉིད་གསུམ་གྱིས་སྦྱོར་བའི་ཕྱིར། ཀུན་བརྟགས་མཐུན་པ་ལ་ཡོད་པའི་ཚུལ་དང༌། གཞན་དབང་མི་མཐུན་པ་ལ་མེད་པའི་ཚུལ་དང༌། རྗེས་སུ་དཔགས་པ་གཉིས་ཀ་མ་ཡིན་པའི་ཕྱིར་ཚུལ་ཞེས་བྱའོ། །ཞེས་གསུངས་པ་ལྟར། རྒྱུ་རྐྱེན་འབྲས་བུའི་མཚན་ཉིད་གསུམ་གྱི་དོན་ལ་སྦྱོར་བའི་ཕྱིར་༼༡༣༧༽རམ། ཡང་ན་ཀུན་བརྟགས་ལ་སོགས་པ་ཚུལ་གསུམ་སྟེ། ཀུན་བརྟགས་ཀྱིས་འཁྲུལ་པ་ལ་སྦྱོར། གཞན་དབང་གིས་རྟེན་འབྲེལ་ལ་སྦྱོར། ཡོངས་གྲུབ་ཀྱིས་དོན་དམ་པ་ལ་སྦྱོར་བར་གསུངས་པ་ལྟར་དང༌། ཤེས་རབ་དང་སྙིང་རྗེས་འཁོར་བ་དང་མྱ་ངན་ལས་འདས་པ་ལ་མི་གནས་པའི་སྐུ་གསུམ་གྱི་འབྲས་བུ་ཐོབ་པ་དང༌། སྣ་ཚོགས་སུ་འཕྲུལ་པའི་ཕྱིར། ཏིང་ངེ་འཛིན་གྱི་ཆོ་འཕྲུལ་དང༌། སྣང་བའི་ཆོ་འཕྲུལ་དང༌། རྫུ་འཕྲུལ་གྱི་ཆོ་འཕྲུལ་དང༌། ཀུན་བརྗོད་པའི་ཆོ་འཕྲུལ་དང༌། རྗེས་སུ་བསྟན་པའི་ཆོ་འཕྲུལ་དང༌། བསམ་གཏན་གྱི་ཆོ་འཕྲུལ་དང་། བྱིན་གྱི་རླབས་ཀྱི་ཆོ་འཕྲུལ་དང་། དབང་བསྐུར་བའི་ཆོ་འཕྲུལ་དང་། སྐྱེ་བའི་ཆོ་འཕྲུལ་དང་། སྟོབས་ཀྱི་ཆོ་འཕྲུལ་དང་། ཡོན་ཏན་གྱི་ཆོ་འཕྲུལ་དང་། འབྲས་བུའི་ཆོ་འཕྲུལ་གྱི་ཕྱིར་ཆོ་འཕྲུལ་ཞེས་བྱའོ། །ཞེས་པ་ལྟར་རམ་ཡང་ན། ལེའུ་བཅུ་དྲུག་པའི་ལས་ཀྱི་ཆོས་འཕྲུལ་མ་གཏོགས་པ་སྣ་ཚོགས་སུ་འཕྲུལ་པའི་བསྐྱོད་པ་ཆོ་འཕྲུལ་བཅུ་གཉིས་དང༌། ལྡེམ་དགོངས་བརྒྱད་ཀྱིས་གདུལ་བྱའི་འདུ་ཤེས་བསྒྱུར་བ་དང༌། མཁས་པས་ཟིན་པའི་ཕྱིར་ཁད་ཀྱིས་འཇུག་པའི་ཐབས་དང༌། རྐྱེན་ལ་སྦྱོར་བའི་ཐབས་དང༌། མངོན་པར་འཇུག་པའི་ཐབས་དང༌། ཐམས་ཅད་རྫོགས་པའི་ཕྱིར་ཐབས་ཞེས་བྱའོ། །ཞེས་པ་ལྟར་ཐབས་བཞིའི་རྩལ་གྱིས་ཟིན་པར་བྱ་བ་དང༌། རྒྱུ་ཡི་ནུས་པ་ལས་ཕྱིས་འབྱུང་བའི་འབྲས་བུ་མངོན་པར་ཤེས་པ་དྲུག་གམ་རྒྱུ་ལ་དོན་ཡོད་པའི་ཕྱིར་གཅིག་ཏུ་རྫོགས་པ་དང༌། ཐམས་ཅད་དུ་མཁྱེན་པ་དང༌། ཡོངས་སུ་ཁྱབ་པ་དང༌། ཚོགས་སུ་འབྱུང་བ་དང༌། ཀུན་ཏུ་དབང་བ་དང༌། དགོས་པ་ཚང་བའི་ཕྱིར་འབྲས་བུ་ཞེས་བྱའོ། །ཞེས་པ་ལྟར་དང༌། བཀོད་ཅིང་བདག་དོན་དུ་འཇུག་པའི་ཁྱད་པར་གྱི་ལམ་རྣམ་པ་ལྔ་དང༌། འཇུག་པའི་སྒོ་བདེན་པ་གཉིས་དང༌། ལམ་དེ་ཉིད་མ་ནོར་བར་ཤེས་པས་ཤེས་པ་གཅིག་དང་ཕྱི་ནང་གི་ཆོས་ཐམས་ཅད་ཤེས་པའི་ཕྱིར་སྟོང་པ་བཅོ་བརྒྱད་དང༌། རང་བཞིན་གྱི་གནས་པའི་ཕྱིར་ཆོས་ལྔ་སྟེ། དེ་ཉིད་ལས། རང་བཞིན་ལ་གནས་པའི་ཕྱིར། རྒྱུའི་ཆོས་དང༌། ལམ་གྱི་ཆོས་དང༌། བཤད་པའི་ཆོས་དང༌། རྟོགས་པའི་ཆོས་དང༌། འབྲས་བུའི་ཆོས་ལ་གནས་པའི་ཕྱིར་ཆོས་ཞེས་བྱའོ། །ཞེས་པ་ལྟར་དང༌། ཀུན་བརྗོད་ཅིང་ངོ་བོ་ཉིད་དུ་གནས་པའི་སྐུ་བཞི་དང༌། རྟེན་ཏེ་གནས་པའི་ཕྱིར་ས་བཅུའི་རིམ་པ་བཅུ་གཅིག་དང༌། ཡུལ་རིག་པ་མངོན་ཤེས་དྲུག་གམ་ས་བཅུའི་དོན་རྟོགས་༼༡༣༨༽པའི་རིག་པ་བཅུ་སྟེ། མི་གོས་པར་རིག་པ་དང༌། མི་ཉམས་པར་རིག་པ་དང༌། མི་སྒྲིབ་པར་རིག་པ་དང༌། རྫོགས་པར་རིག་པ་དང༌། མ་གཡོས་པར་རིག་པ་དང༌། མཉམ་པ་ཉིད་དུ་རིག་པ་དང༌། གཉིས་སུ་མེད་པར་རིག་པ་དང༌། ཡོངས་སུ་དག་པར་རིག་པ་དང༌། ཀུན་ཏུ་ལེགས་པར་རིག་པ་དང༌། དེ་མ་ཐག་པར་རིག་པ་དང༌། རྫོགས་པར་ཆུབ་པར་རིག་པ་ལ་བརྟེན་པའི་ཕྱིར་ས་ཞེས་བྱའོ། །ཞེས་པ་ལྟར་དང་། ལམ་ལྔའམ་རྣམ་ཐར་བརྒྱད་དང༌། འགྲོ་དོན་དུ་འཇུག་པའི་མཛད་པ་བཅུ་གཉིས་དང༌། ཡེ་ཤེས་བཞིའམ་བཅོ་བརྒྱད་དང༌། ཁྱབ་པའི་རྣམ་པ་བཞི་ཚད་མེད་པ་བཞིའམ། མངོན་པར་རྫོགས་པའི་ཕྱིར་བྱང་ཆུབ་ཆེན་པོར་རོ་གཅིག་སྟེ། དེ་དག་གི་དོན་ཀྱང་བཤད་པ་བཞིན་སོ་སོའི་མཚན་ཉིད་རྟོགས་ནས་དགོངས་པ་དམ་པ་དེ་ཁོ་ན་ཉིད་ཇི་བཞིན་པའི་ངང་དུ་མཐར་ཕྱིན་ཅིང་ཐག་ཆོད་ཀྱི་གདེང་དང་ལྡན་ན་མཁས་པའི་ཕུལ་དུ་གྱུར་པ་ཡིན་པའོ། །འོ་ན་འདིར་སྐུ་གསུམ་དང་མཛད་པ་དང་ཡེ་ཤེས་ལ་སོགས་པ་ཁ་ཅིག་ནི་བྱ་བ་མེད་པའི་རྣལ་འབྱོར་དུ་མི་འགྱུར་རམ་ཞེས་པར་དོགས་པ་ལ། དེ་དག་ནི་བསྒྲུབ་པར་བྱ་བའི་དམིགས་པའི་སྒོ་ནས་བཞག་པ་དང༌། ལ་ལ་ཆ་མཐུན་པར་རྗེས་སུ་འཇུག་པར་བྱ་བ་དང་། ལ་ལ་ལམ་གྱི་རྒྱུད་བསྙད་པའི་སྒོ་ནས་སྨོས་ཏེ། ལམ་ཉིད་མ་ཡིན་ཡང་དེ་དག་ལ་མཁས་པ་ཆ་རྐྱེན་དུ་ཚང་དགོས་པས་ཐེ་ཚོམ་གྱི་དོགས་པ་མེད་དོ།།

གསུམ་པ་ཏིང་འཛིན་མཚོན་པའི་སྒོ་ཕུལ་དུ་ཕྱིན་པར་བྱ་བ་ནི།

གཞན་ཡང་མཐོང་བ། ཞེས་པ་ནས། ཕུལ་དུ་གྱུར་པའོ། །ཞེས་པའི་བར་གྱིས་བསྟན་ཏེ།

གཞན་ཡང་མཐོང་བ་དང་། མ་གཡེངས་པ་དང་། དོན་དང་། མིང་དང་། ཚིག་དང་། སྔགས་དང་། ཡི་

གེའི་སྒོའི་རྣམ་པ་དེ་དག་ཀྱང་། དགོངས་པ་དམ་པ་དེ་ཁོ་ན་ཉིད་དུ་མཐར་ཕྱིན་ཅིང་ཕུལ་དུ་གྱུར་པའོ།།

གཞན་ཡང་མི་གནས་པའི་རྣམ་པར་བསྟན་པ་ནི། བདེན་པ་མཐོང་བའི་ལྷག་མཐོང་ལྟ་བ་དང༌། བྱིང་རྒོད་མེད་པའི་སེམས་རྩེ་གཅིག་པའི་ཞི་གནས་ཏེ། དེའང་ཏིང་ངེ་འཛིན་ནི་མ་ཡེངས་པའི་ཕྱིར་སྐད་ཅིག་མའམ་སྔ་ཕྱིར་དྲན་པའི་ཕྱིར་དྲན་པ་དང་། འགག་པ་མེད་དེ་ཡོད་ན་ཕྲ་བ་དང་ཡིད་ལ་བྱེད་པར་འགྱུར་བས་ཐམས་ཅད་དུ་ལྷན་ནེ་བའོ།།

དབྱེ་ན། ནམ་མཁའི་སྙིང་པོའི་ཏིང་ངེ་འཛིན། ཉི་མའི་སྒྲོན་མ། མི་ཟད་མཛོད་ཀྱི། མ་ནོར་རྫོགས་པ། ཐམས་ཅད་དུ་འཕྲོས་པ། རིན་ཆེན་མྱུ་གུ། དུག་འཇོམས་སྨན་གྱི། བྱ་བ་བྱེད་པ། ཆོས་ཀྱི་རྒྱུན་ནོ། །ཞེས་ཆོས་རྗེའི་ཕྱག་མཆན་ལས་གསུངས་པ་དང་ཚིག་ལས་དོན་འབྱུང་བས་དོན་དང་མི་འབྲལ་བའི་སྒོའི་གཟུངས་དང༌། ཡི་གེ་ལས་མཚོན་པ་འབྱུང་བའི་སྒོའི་གཟུངས་དང་། དེ་བཞིན་དུ་བསྐྱེད་པ་སྔགས་ཀྱི་སྒོའི་ཚིག་བཙན་པར་རེད་པའི་གཟུངས༼༡༣༩༽དང༌། གང་གིས་གང་ལ་བྲིས་པ་ཡི་གེའི་སྒོའི་གཟུངས་ཏེ། དེ་བཞི་ཡང་ཕྱེ་བས་ཆ་བརྒྱད་དུ་འགྱུར་ལ། རྣམ་པ་དེ་དག་གི་དོན་ཀྱང་ཇི་ལྟ་བར་བཤད་པ་བཞིན་དུ་དགོངས་པ་དམ་པ་དེ་ཁོ་ན་ཉིད་དུ་མཐར་ཕྱིན་ཅིང་ཡང་དག་པར་འཇལ་བ་ནི། གསང་བའི་རྒྱུད་གཙོ་བོར་སྟོན་པའི་དོན་མཁས་པའི་ཕུལ་དུ་གྱུར་པར་བྱེད་པ་ཁོ་ནར་ཤེས་པར་བྱའོ།།

གཉིས་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་བྱ་བ་བྱེད་པའི་རྣལ་འབྱོར་དུ་ཤེས་པར་བྱའོ།།

གྲོགས་པོ་དག ཅེས་བོས་ནས། བསྟན་པ་དེ་དག་ནི་ལམ་མམ་རྒྱུའི་ཐེག་པ་སྟེ། གསང་སྒོ་མཚོན་པའི་བྱ་བ་བྱེད་པའི་རྣལ་འབྱོར་དུ་ཤེས་པར་བྱའོ། །དེ་དག་རྣལ་འབྱོར་པའི་དབུ་མ་ངོར་བསྟན་པར་འཇལ་ཏོ།།

གསུམ་པ་བྱ་བ་མེད་པའི་རྣལ་འབྱོར་བཤད་པ་ནི།

ཀྱེ་གྲོགས་པོ་དག ཅེས་པ་ནས། ཕུལ་དུ་གྱུར་བར་བྱའོ། །ཞེས་པའི་བར་གྱིས་བསྟན་ཏེ།

ཀྱེ་གྲོགས་པོ་དག་བྱ་བ་མེད་པའི་རྣལ་འབྱོར་གང་ཞེ་ན། འདི་ལྟ་སྟེ། ས་དང་། བསླབ་བ་དང་། སྦྱོར་བ་དང་། རྣལ་འབྱོར་དང་། རྟོག་པ་དང་། ལྟུང་བ་དང་། མ་ནོར་བ་དང་། ངེས་པ་དང་། དགོངས་པ་དང་། ཡེ་ཤེས་དང་། ཚོགས་དང་། བསྒྲུབ་པ་དང་། དངོས་གྲུབ་དང་། ཡོན་ཏན་དང་། ཏིང་ངེ་འཛིན་དང་། ཆེན་པོ་དང་། ཡེ་ཤེས་དང་། བྱུང་ཚུལ་དང་། ཆེ་བ་དང་། རོལ་པ་དང་། རྔོམ་པ་དང་། བརྗིད་པ་དང་། མཐུ་དང་། ཆོ་འཕྲུལ་དང་། ཡོངས་སུ་རྫོགས་པའི་རྣམ་པ་དག དགོངས་པ་དམ་པ་ཁོ་ན་ཉིད་དུ་མཐར་ཕྱིན་ཅིང་ཕུལ་དུ་བྱུང་བར་བྱའོ།།

འབྲས་བུ་གསང་སྔགས་ཐུན་མོང་མ་ཡིན་པ་གཞུང་འདིར་འདོད་པ་ཉིད་གང་སྙམ་པ་ལ། སྐྱེས་བུ་ཆེན་པོས། ཀྱེ་གྲོགས་པོ་དག ཅེས་བོས་ནས། རྣལ་འབྱོར་ཐ་མ་བྱ་བ་མེད་པའི་རྣལ་འབྱོར་བསྟན་པ་གང་ཞེ་ན། གསང་སྔགས་ཅིག་ཆར་འཇུག་པས་རྒྱུ་འབྲས་འབྱེད་པའི་རྩོལ་བ་མི་བྱེད་པའི་གཞུང་ཆེན་པོའི་རྣམ་གྲངས་ཉེ་བར་སྟོན་པ་འདི་ལྟ་སྟེ། ས་ནི་བཅུ་གཅིག་སྟེ། རྩ་བའི་རྒྱུད་ལས། འགྱུར་དབང་མ་ངེས་པའི་ས་དང༌། རྟེན་པ་གཞིའི་ས་དང༌། གལ་ཆེན་སྦྱོང་བའི་ས་དང༌། མི་ལྡོག་གནས་པའི་ས་དང་། བསླབ་པ་རྒྱུན་གྱི་ས་དང་། ཆོ་འཕྲུལ་སྤྲུལ་པའི་ས་དང་། རྟེན་པའི་ཁྱད་པར་དུ་འགྲོ་བའི་ས་དང་། དམིགས་པས་འབྲས་བུ་སྐྱེ་བའི་ས་དང་། གནས་པ་མི་འགྱུར་བའི་ས་དང༌། གདལ་བ་ཆོས་ཉིད་ཀྱི་ས་དང༌། རྫོགས་པ་སྤྱིར་ཆིབ་ཀྱི་ས་སྟེ་ས་འདི་དག་ནོན་པར་འདོད་པས་ཀྱང་ལམ་འདི་ལ་བསླབ་པར་བྱའོ། །ཞེས་སོ། །འདི་ལྟར་ན་སྦྱོར་ལམ་ལ་ས་བཞི་སྟེ། མི་ལྡོག་གནས་པ་ནི། གལ་ཆེན་སྦྱོང་བའི་ས་ལས། རིགས་ཕྱེད་ནས་སླར་མི་ལྡོག་པར་གནས་པའི་ས་ཡིན་ལ། ཆོ་འཕྲུལ་སྤྲུལ་པའི་ས་ནི། དངོས་སུ་བསོད་ནམས་གཏེར་གྱི་ས་དང་གཅིག་པར་གསུངས་པ་དང༌། གཞི་དམ་ཚིག་གིས་གཟུང་བར་བསླབ་པ་དང༌། རྒྱུད་ཐོས་པས་དགྲོལ་བར་བསླབ་པ་དང། ཕུལ་དུ་མཁས་པས་དབྱུང་བར་བསླབ་པ་དང་། སྒོ་ཀུན་ནས་བསྡུར་བར་བསླབ་པ་དང༌། རིམ་པ་དབང་གིས་བགྲོད་པར་བསླབ་པ་དང༌། ལ་སྤྱོད་པས་དོར་བར་བསླབ་པ་དང༌། ལྟ་བས་ཐག་བཅད་པར་༼༡༤༠༽བསླབ་པ་དང༌། ཉམས་སུ་ཏིང་ངེ་འཛིན་གྱིས་བླང་བར་བསླབ་པ་དང༌། དོན་མན་ངག་གིས་བསྒྲུབ་པར་བསླབ་པ་དང་། མདོ་གཅིག་ཏུ་བསྡུ་བར་བསླབ་པའོ། །ཞེས་པ་ལྟར་འདི་ཉིད་ཀྱི་བསླབ་པའི་མཐའ་བཅུ་ནི་ལམ་གྱི་རྐྱེན་ཡིན་པ་དང༌། རྒྱུ་དང་འབྲས་བུར་སྦྱོར་བ་དང་། ཐབས་དང་ཤེས་རབ་ཏུ་སྦྱོར་བ་དང་། དབྱིངས་དང་ཡེ་ཤེས་སུ་སྦྱོར་བ་དང༌། སེམས་དང་ཆོས་སུ་སྦྱོར་བ་དང༌། ལས་དང་ཐུགས་རྗེར་སྦྱོར་བས་སྦྱོར་བ་ཆེན་པོ་ཞེས་བྱའོ། །ཞེས་པས་སྦྱོར་བ་ལྔ་ནི། མཚན་ཉིད་ཐེག་པ་ནང་རྒྱུད་གསུམ། སྔགས་ཕྱི་པའི་ལྟ་སྤྱོད་བསྡུ་བ་དང༌། འདུན་པ་སེམས་པའི་རྣལ་འབྱོར་དང༌། བཀའ་སྡོད་ལས་ཀྱི་རྣལ་འབྱོར་དང༌། རིགས་ཆེན་འབྱེད་པའི་རྣལ་འབྱོར་དང༌། གསང་སྒོ་ལུང་གི་རྣལ་འབྱོར་དང༌། སྤྱོད་པ་རྒྱུན་གྱི་རྣལ་འབྱོར་དང༌། མཚན་མ་རྟགས་ཀྱི་རྣལ་འབྱོར་དང༌། ལུང་ཆེན་ཐོབ་པའི་རྣལ་འབྱོར་དང༌། རིག་པ་འཛིན་པའི་རྣལ་འབྱོར་དང༌། རྩལ་ཆེན་སྦྱོང་བའི་རྣལ་འབྱོར་དང༌། ཡོངས་སུ་རྫོགས་པའི་རྣལ་འབྱོར་དང༌། ལྷུན་གྱིས་གྲུབ་པའི་རྣལ་འབྱོར་དུ་གནས་པའི་ཕྱིར་རྣལ་འབྱོར་ཞེས་བྱའོ། །ཞེས་གསུངས་པ་ལྟར་རྣལ་འབྱོར་བཅུ་གཅིག་དང༌། སྒྲིབ་པ་དང་ཆད་པའི་གནས་ནི་རྟོག་པ་བརྒྱད་ཅུ་རྩ་གཅིག་གམ། དགུ་བཅུ་ཉིད་ལམ་དམ་པ་ཕྲ་རགས་ཀྱིས་གཅད་པ་དང༌། དེ་བཞིན་དུ་བདུད་ཆེན་པོའི་རིས་སུ་ལྟུང་བའི་སྒོ་དང༌། མུ་སྟེགས་ཀྱི་ཁམས་སུ་ལྟུང་བའི་སྒོ་དང༌། སྲིན་པོའི་ཁམས་སུ་ལྟུང་བའི་སྒོ་དང༌། གནོད་སྦྱིན་གྱི་རིས་སུ་ལྟུང་བའི་སྒོ་དང༌། རུ་ཏྲ་ཆེན་པོར་ལྟུང་བའི་སྒོ་དང༌། བགེགས་ཆེན་པོར་ལྟུང་བའི་སྒོ་དང༌། ལྷ་ཆེན་པོའི་རིགས་སུ་ལྟུང་བའི་སྒོ་དང༌། ཤོ་གམས་གཅན་ཆེན་གྱི་རིས་སུ་ལྟུང་བའི་སྒོ་དང༌། དམྱལ་བ་ཆེན་པོར་ལྟུང་བའི་སྒོ་དང༌། ལྟུང་བའི་སྒོ་དགུ་གསང་བ་སྤྱོད་ཉེས་པའི་སྐྱེ་གནས་ཉིད་དང༌། རྒྱུ་ཉིད་འབྲས་བུར་གྲུབ་པའི་ཕྱིར་གཏན་ལ་ཕེབས་པས། མ་ནོར་བ་ཞེས་བྱའོ། །ཞེས་པ་ལྟར། རྒྱུ་འབྲས་གཉིས་སུ་མེད་པའི་ལྟ་བ་གཏན་ལ་འབེབས་པའི་ཕྱིར་མ་ནོར་བ་གཅིག་སྟེ། ལྟ་བ་དང་གཞི་ཉིད་བསྟན་པ་དང༌། སྤྱོད་པ་དང་ལྟ་བ་ལ་མོས་པའི་དབང་དུ། རྩ་རྒྱུད་ལས། ཐེ་ཚོམ་མི་ཟ་བའི་ཕྱིར་ཐབས་ཀྱིས་ངེས་པ་དང༌། ཤེས་རབ་ཀྱིས་ངེས་པ་ཞེས་བྱའོ། །ཞེས་པ་ལྟར། ཐབས་དང་ཤེས་རབ་ཀྱིས་ངེས་པའི་༼༡༤༡༽ལམ་གཉིས་ཏེ་རྒྱུད་ཀྱི་ལས་ཀྱི་རྩ་བ་བཤད་པ་དང༌། སྤྱོད་པ་གཞན་དོན་གྱི་མཛད་པ་དགོངས་པ་རྣམ་པ་བཞི་སྟེ། ཐབས་ཀྱིས་ལྡེམ་པོར་དགོངས་པའི་ཕྱིར་མཉམ་པ་ཉིད་ལ་དགོངས་པ་དང༌། མཚན་ཉིད་ཀྱི་ཕྱིར་དུས་གཞན་ལ་དགོངས་པ་དང༌། གཉེན་པོའི་ཕྱིར་ལན་གྲངས་གཞན་ལ་དགོངས་པ་དང༌། བསྒྱུར་བའི་ཕྱིར་དོན་གཞན་ལ་དགོངས་པས་ན་དགོངས་པ་ཞེས་བྱའོ། །ཞེས་གསུངས་པས། དེའི་ཕྱིར་དགོས་ཆེད་དང་ངོ་བོས་བརྒྱད་དུའང་འགྱུར་བ་དང༌། ཡེ་ཤེས་ནི། ཡེ་ཤེས་ལྔ་དང་རང་བྱུང་གི་ཡེ་ཤེས་རྣམས་སམ། ཡང་ན། སྟོང་པ་ཉིད་ཀྱི་ཡེ་ཤེས་དང༌། རྒྱུའི་ཡེ་ཤེས་དང༌། ཐམས་ཅད་འབྱུང་བའི་ཡེ་ཤེས་དང༌། ཡི་གེའི་ཡེ་ཤེས་དང༌། ཕྱག་རྒྱའི་ཡེ་ཤེས་དང༌། སྤྲུལ་པའི་ཡེ་ཤེས་དང༌། ཅིར་ཡང་མཛད་པའི་ཡེ་ཤེས་དང་། མེ་ལོང་ལྟ་བུའི་ཡེ་ཤེས་དང༌། ནམ་མཁའ་ལྟ་བུའི་ཡེ་ཤེས་དང༌། སྒྱུ་མ་ལྟ་བུའི་ཡེ་ཤེས་དང༌། རིན་པོ་ཆེ་ལྟ་བུའི་ཡེ་ཤེས་དང༌། ཉི་མ་ལྟ་བུའི་ཡེ་ཤེས་དང༌། སྣང་སྟོང་གསལ་བའི་ཡེ་ཤེས་དང་། མཉམ་པ་ཉིད་ཀྱི་ཡེ་ཤེས་དང༌། སོ་སོར་རྟོག་པའི་ཡེ་ཤེས་དང༌། བྱ་བ་ནན་ཏན་གྱི་ཡེ་ཤེས་དང༌། རྣམ་པར་མི་རྟོག་པའི་ཡེ་ཤེས་དང༌། ཆོས་ཀྱི་དབྱིངས་ཀྱི་ཡེ་ཤེས་སུ་གསལ་བའི་ཕྱིར་ཡེ་ཤེས་ཆེན་པོ་ཞེས་བྱའོ། །ཞེས་གསུངས་པ་ལྟར་དང༌། ཚོགས་ནི། ཀུན་ནས་ཚང་བའི་ཕྱིར་མཉམ་པ་ཆེན་པོ་དང༌། འབྱོར་པ་ཆེན་པོ་དང༌། འདུས་པ་ཆེན་པོ་དང༌། རིག་པ་ཆེན་པོ་དང༌། དབང་ཆེན་པོ་དང་། འདྲེས་པ་ཆེན་པོའི་ཕྱིར་ཚོགས་ཞེས་བྱའོ། །ཞེས་པ་ལྟར་རྣམ་གྲངས་དྲུག་དང༌། མཉམ་པ་ཉིད་དུ་གྲུབ་པ་དང༌། བདེ་བ་ཆེན་པོར་གྲུབ་པ་དང༌། ཡོངས་སུ་རྫོགས་པར་གྲུབ་པ་དང༌། ཐམས་ཅད་ལྷུན་གྱིས་གྲུབ་པའི་ཕྱིར་གྲུབ་པ་ཆེན་པོ་ཞེས་བྱའོ། །ཞེས་པ་ལྟར་འབྲས་བུ་ཉིད་དང་ལྟ་བའི་གྲུབ་མཐའ་ཐུན་མོང་བ་བསྒྲུབ་པ་བཞི་དང༌། གང་བསྒྲུབ་པ་དངོས་སུ་གྲུབ་པའི་ཕྱིར། སྲིད་པ་རྒྱ་མཚོ་དབྱིངས་སུ་ཐིམ་པར་གྲུབ་པ་དང༌། འཁོར་བ་རྒྱ་མཚོ་བདག་གིར་གྲུབ་པར་གྱུར་པ་དང༌། བདག་ཉིད་ཆེན་པོར་ལྷུན་གྱིས་གྲུབ་པར་གྱུར་པ་དང༌། དམིགས་པ་གང་ཡིན་པ་དེ་བཞིན་གྲུབ་པར་གྱུར་པ་དང༌། ཆོ་འཕྲུལ་རྫུ་འཕྲུལ་ཐོགས་པ་མེད་པར་གྲུབ་པ་དང༌། དོན་དམ་བཅུད་ཀྱི་རྣམ་ཤེས་རྒྱས་པར་གྲུབ་པའི་ཕྱིར་དངོས་གྲུབ་ཆེན་པོ་ཞེས་བྱའོ། །ཞེས་པ་ལྟར་དྲུག་སྟེ་རབ་འབྲིང་ཐ་མ་གསུམ་དུ་གྱུར་པ་དང་། ལེགས་པ་དང་ལྡན་པའི་ཕྱིར་ཡོན་ཏན་ཏེ། སྔ་༼༡༤༢༽མ་ལས། འདོད་པ་འབྱུང་བའི་ཕྱིར་ཡང་ཡོངས་སུ་ཁྱབ་པ་དང༌། རླབས་སུ་ཆེ་བའི་ཡོན་ཏན་དང༌། རྩིས་ལས་འདས་པའི་ཕྱིར་ཡོན་ཏན་ཞེས་བྱའོ། །ཞེས་པ་ལྟར་རྣམ་གྲངས་གསུམ་དང༌། ཏིང་ངེ་འཛིན་བཅུ་གཉིས་ནི་ལམ་དུ་འཆད་དེ། གསལ་ཞིང་མི་གཏོང་བའི་ཕྱིར་སེམས་ཀྱི་སྤྱོད་པ་སྟེ། རྣམ་དག་དབྱིངས་ཀྱི་ཏིང་ངེ་འཛིན་དང༌། ཞེས་སོགས་གསུངས་པ་ལྟར། རྣམ་དག་དབྱིངས་ཀྱི་ཏིང་ངེ་འཛིན་དང༌། ཐམས་ཅད་རྫོགས་པའི་ཏིང་ངེ་འཛིན་དང༌། སྣང་གསལ་ཡེལ་འཕྱོའི་ཏིང་ངེ་འཛིན་དང༌། འབྱུང་ཆེན་སྤྲུལ་པའི་ཏིང་ངེ་འཛིན་དང༌། དབང་བསྒྱུར་ཐབས་ཀྱི་ཏིང་ངེ་འཛིན་དང༌། མི་ཟད་མཛོད་ཀྱི་ཏིང་ངེ་འཛིན་དང༌། མངོན་པར་རྟོགས་པའི་ཏིང་ངེ་འཛིན་དང༌། ཚོགས་ཆེན་རྫོགས་པའི་ཏིང་ངེ་འཛིན་དང༌། རྩེ་གཅིག་འཕྲོ་བའི་ཏིང་ངེ་འཛིན་དང༌། རིན་ཆེན་མྱུ་གུའི་ཏིང་ངེ་འཛིན་དང༌། དུག་འཇོམས་སྨན་གྱི་ཏིང་ངེ་འཛིན་དང༌། བྱ་བ་བྱེད་པའི་ཏིང་ངེ་འཛིན་ཏེ་དེ་ཡང་སྤྱི་དང་བྱེ་བྲག་ལས། བྱེ་བྲག་ལ་ས་བཅུ་པ་ལ་གསུམ། དགུ་པ་མན་ཆད་གོ་རིམས་སུ་སྦྱར་རོ། །སྤྱིར་མཚན་མའི་བསྒྲུབ་པ་ཐ་དད་དང༌། ཇི་བཞིན་པའི་བྱེ་བྲག་གི་སྦྱར་བ་དང༌། ལྷག་པར་འཕགས་པའི་ཕྱིར་མངོན་པ་དང༌། བདག་ཉིད་ཆེན་པོ་དང༌། དེ་ཡིན་པ་དང༌། ཐམས་ཅད་དུ་ཆེ་བ་དང༌། ཀུན་ཏུ་རྫོགས་པའི་ཕྱིར་ཆེན་པོ་ཞེས་བྱའོ། །ཞེས་པ་ལྟར་ཐེག་པ་གཞན་ལས་ལྟ་བས་ལྷག་པར་འཕགས་པའི་ཕྱིར། ལོག་སྲེད་ཅན་ཟིལ་གྱིས་གནོན་པས་མངོན་པར་སངས་རྒྱས་པའི་ཆེ་བ་དང༌། མཐར་ཟད་གནོན་པས་བདག་ཉིད་ཆེན་པོར་སངས་རྒྱས་བའི་ཆེ་བ་དང༌། ཐེ་ཚོམ་གནོན་པས་དེ་ཉིད་ཡིན་པར་སངས་རྒྱས་པའི་ཆེ་བ་དང༌། ཐེར་ཟུག་གནོན་པས་ཆོས་ཀྱི་དབྱིངས་སུ་སངས་རྒྱས་པའི་ཆེ་བ་དང༌། རྩོལ་བ་ཟིལ་གྱིས་གནོན་པའི་ཐམས་ཅད་ནས་ཐམས་ཅད་དུ་སངས་མ་རྒྱས་པ་མེད་པའི་ཆེ་བས་འཕགས་པའི་ཆེན་པོ་ལྔ་དང༌། གསལ་བའི་ཕྱིར་ཡེ་ཤེས་ཏེ། སྟོང་པ་ཉིད་ཀྱི་ཡེ་ཤེས་དང༌། ཞེས་པ་ནས། ཆོས་ཀྱི་དབྱིངས་སུ་གསལ་བའི་ཡེ་ཤེས་ཏེ་འབྲས་བུ་ཉིད་དོ། །ཞེས་པའི་བར་རྣམ་གྲངས་གོང་དུ་བསྟན་པ་བཞིན་དུ་ཡེ་ཤེས་བཅོ་བརྒྱད་དེ། དེ་ཡང་མ་ཟད། ཕྱི་ནང་གི་ཆོས་ཐམས་ཅད་ཤེས་པའི་ཕྱིར། ནང་གི་ཆོས་ཐམས་ཅད་ཤེས་པའི་ཡེ་ཤེས་དང༌། ཕྱིའི་ཆོས་ཐམས་ཅད་ཤེས་པའི་ཡེ་ཤེས་དང༌། ཕྱི་ནང་གི་ཆོས་ཐམས་ཅད་ཤེས་པའི་ཡེ་ཤེས་༼༡༤༣༽དང༌། སྟོང་པའི་ཆོས་ཐམས་ཅད་ཤེས་པའི་ཡེ་ཤེས་དང༌། ཆེན་པོའི་ཆོས་ཐམས་ཅད་ཤེས་པའི་ཡེ་ཤེས་དང༌། དོན་དམ་པའི་ཆོས་ཉིད་ཤེས་པའི་ཡེ་ཤེས་དང༌། འདུས་བྱས་ཀྱི་ཆོས་ཐམས་ཅད་ཤེས་པའི་ཡེ་ཤེས་དང༌། འདུས་མ་བྱས་ཀྱི་ཆོས་ཐམས་ཅད་ཤེས་པའི་ཡེ་ཤེས་དང༌། མཐའ་མི་དམིགས་པའི་ཆོས་ཐམས་ཅད་ཤེས་པའི་ཡེ་ཤེས་དང༌། དུས་གསུམ་གྱི་ཆོས་ཐམས་ཅད་ཤེས་པའི་ཡེ་ཤེས་དང༌། བླང་དོར་མི་དམིགས་པའི་ཆོས་ཐམས་ཅད་ཤེས་པའི་ཡེ་ཤེས་དང༌། རང་བཞིན་གྱི་ཆོས་ཐམས་ཅད་ཤེས་པའི་ཡེ་ཤེས་དང༌། ཆོས་ཅན་གྱི་ཆོས་ཐམས་ཅད་ཤེས་པའི་ཡེ་ཤེས་དང༌། མཚན་ཉིད་འཛིན་པའི་ཆོས་ཐམས་ཅད་ཤེས་པའི་ཡེ་ཤེས་དང༌། དམིགས་པ་མེད་པའི་ཆོས་ཐམས་ཅད་ཤེས་པའི་ཡེ་ཤེས་དང༌། མཚན་མར་མི་རྟོག་པའི་ཆོས་ཐམས་ཅད་ཤེས་པའི་ཡེ་ཤེས་དང༌། ངོ་བོ་ཉིད་ཀྱི་ཆོས་ཐམས་ཅད་ཤེས་པའི་ཡེ་ཤེས་དང༌། དངོས་པོ་མི་དམིགས་པའི་ཆོས་ཐམས་ཅད་ཤེས་པའི་ཡེ་ཤེས་ཀྱི་ཕྱིར་ཡེ་ཤེས་ཞེས་བྱའོ། །ཞེས་པ་ལྟར་རྐྱེན་གྱི་རྣལ་འབྱོར་གྱི་སྐབས་སུ་གསུངས་པའི་ལམ་གྱི་ཡེ་ཤེས་བཅོ་བརྒྱད་པོ་འདི་དག་སྟོང་ཉིད་བཅོ་བརྒྱད་རྟོགས་པའི་མཁྱེན་པ་མ་འདྲེས་ཀུན་ཏུ་གསལ་བ་ཉིད། འདིར་འབྲས་བུའི་ཡེ་ཤེས་བཅོ་བརྒྱད་ཀྱི་ངོ་བོར་ཡོངས་སུ་རྫོགས་པས། ཤེས་བྱ་དེ་བཞིན་ཉིད་དུ་གྲོལ་བས་སྟོང་པ་ཉིད་ཀྱི་ཡེ་ཤེས་དང༌། སྒྱུ་མ་ལྟར་མཁྱེན་པ་ཀུན་སྣང་བས་རྒྱུའི་ཡེ་ཤེས་དང༌། ཡོན་ཏན་ཐམས་ཅད་འབྱུང་བའི་ཡེ་ཤེས་དང༌། གསུང་དབྱངས་ཀྱི་སྒོ་ཡི་གེའི་ཡེ་ཤེས་དང༌། ཐུགས་སོ་སོར་གསལ་ཡང་གཉིས་སུ་མེད་པ་ཕྱག་རྒྱའི་ཡེ་ཤེས་དང༌། སྐུ་སྣ་ཚོགས་འཕྲུལ་པ་སྤྲུལ་པའི་ཡེ་ཤེས་དང༌། ཕྲིན་ལས་ཅིར་ཡང་མཛད་པའི་ཡེ་ཤེས་བདུན་ནི་དོན་གྱི་སྒོ་ནས་བསྟན་པ་དང༌། ཤེས་བྱའི་གཟུགས་བརྙན་སྣང་བ་མེ་ལོང་ལྟ་བུའི་ཡེ་ཤེས་དང༌། དབྱིངས་ཀུན་ཁྱབ་པར་བྱེད་པ་ནམ་མཁའ་ལྟ་བུའི་ཡེ་ཤེས་དང༌། སྣང་ལ་རང་བཞིན་མེད་པ་སྒྱུ་མ་ལྟ་བུའི་ཡེ་ཤེས་དང༌། རེ་བ་སྐོང་བ་རིན་པོ་ཆེ་ལྟ་བུའི་ཡེ་ཤེས་དང༌། གསལ་ལ་འཚེར་བ་ཉི་མ་ལྟ་བུའི་ཡེ་ཤེས་དང་ལྔ་ནི་དཔེ་ཡིས་མཚོན་པའི་ཡེ་ཤེས་དང༌། རང་བཞིན་གྱིས་གསལ་བ་སྣང་སྟོང་གསལ་བའི་ཡེ་ཤེས་དང༌། སྐྱེ་བ་མེད་པ་མཉམ་པ་ཉིད་ཀྱི་ཡེ་ཤེས་དང༌། ཕྱིན་ཅི་མ་ལོག་པར་སྒྲིབ་མེད་དུ་གསལ་བ་སོ་སོར་རྟོག་པའི་ཡེ་ཤེས་དང༌། མཐར་ཕྱིན་པ་བྱ་བ་ནན་ཏན་༼༡༤༤༽གྱི་ཡེ་ཤེས་དང༌། གང་དུའང་མི་དམིགས་པ་རྣམ་པར་མི་རྟོག་པའི་ཡེ་ཤེས་དང༌། སྤྱིར་ཕྱོགས་རིས་གྲོལ་ཏེ་ཐམས་ཅད་ངང་ལ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་སུ་གསལ་བ་དང་དྲུག་ནི་མཚན་ཉིད་དང་ལས་ཀྱི་སྒོ་ནས་བསྟན་པའི་ཕྱིར་རང་བཞིན་མཉམ་པའོ། །དེ་ལྟར་མ་འདྲེས་པ་དང་ཡོངས་སུ་རྫོགས་པ་དབྱེར་མེད་དུ་མཁྱེན་པ་ནི་བྱ་བ་མེད་པའི་ཡེ་ཤེས་རྣམ་པར་དག་པ་ཉིད་དུ་མཐར་ཕྱིན་པ་ཡིན་པས་ཡེ་ཤེས་སྔ་མ་བཅོ་བརྒྱད་ཀྱང་གོང་དུ་མ་དྲངས་པར་འདིར་དྲངས་ཏེ་བསྟན་པ་དང༌། བྱུང་ཚུལ་ནི། གཞན་གྱི་དོན་དུ་བྱུང་ཞིང་འགྲོ་བའི་ཚུལ་དང་མཐུན་པའི་ཕྱིར་གནས་སུ་བསྐྱོད་པ་དང༌། མཉམ་པར་གྱུར་པ་དང༌། མཛེས་པར་གཤེགས་པ་དང༌། སྤྲོ་བར་སྤྱོད་པ་དང༌། གསང་བར་སྦྱོར་བ་དང་། མཚན་མ་བཅོམ་པ་དང་། མཛད་པ་མེད་པ་དང་། སེང་གེའི་གསུང་སྒྲ་དང་། ངེས་པར་རྫོགས་པ་དང་། ཚམ་ངམ་ཆེན་པོ་དང་། སྤྲུལ་པ་མཛད་པ་དང་། ཡོངས་སུ་དག་པའི་ཕྱིར་བྱུང་ཚུལ་ཆེན་པོ་ཞེས་བྱའོ། །ཞེས་པ་ལྟར་རྒྱལ་བའི་ཕྲིན་ལས་བཤད་པ་དང༌། ཆེ་བ་ནི། ཡོན་ཏན་གྱི་ཆེ་བ་སྤྱོམ་པའི་ཕྱིར་རྣམ་གྲངས་ཉི་ཤུ་བསྟན་པ་སྟེ། གཉེན་པོ་མེད་པའི་ཆེ་བ་དང༌། འགྲན་ཟླ་མེད་པའི་ཆེ་བ་དང༌། ཁྱད་པར་འཕགས་པའི་ཆེ་བ་དང༌། ཆེ་བཙན་གཅིག་བུའི་ཆེ་བ་དང༌། ཚམ་ངམ་རླབ་ཀྱི་ཆེ་བ་དང༌། རྨད་དུ་བྱུང་བའི་ཆེ་བ་དང༌། ཐམས་ཅད་དུ་མ་ཕམ་པའི་ཆེ་བ་དང༌། མངའ་དབང་རྫོགས་པའི་ཆེ་བ་དང༌། ཀུན་ལས་རྒྱལ་བའི་ཆེ་བ་དང༌། ཡོངས་སུ་མི་ནུབ་པའི་ཆེ་བ་སྟེ། དོན་ཕ་རོལ་ཏུ་ཕྱིན་པ་ཐུན་མོང་མ་ཡིན་པ་བཅུ་དང༌། རྟགས་བཅུ་སྟེ། ཡེ་ཤེས་ཀྱི་རྡོ་རྗེ་དང༌། བཟོད་པའི་བྷནྡྷ་དང༌། སྟོབས་ཀྱི་ཁ་ཊྭཱྃ་ག་དང༌། སྨོན་ལམ་གྱི་ཞིང་ཆེན་དང༌། ཐབས་ཀྱི་ཐོང་གཤོལ་དང༌། ཤེས་རབ་ཀྱི་རྔ་དང༌། ཚུལ་ཁྲིམས་ཀྱི་པདྨ་དང༌། བསམ་གཏན་གྱི་འཁོར་ལོ་དང༌། བརྩོན་འགྲུས་ཀྱི་རལ་གྲི་དང༌། སྦྱིན་པའི་རིན་པོ་ཆེ་སྟེ་གོ་རིམས་སུ་སྦྱར་བ་དང༌། རོལ་པ་ནི། ལེའུ་བཅུ་དྲུག་པར་རོལ་པ་ལས་གྲུབ་པའི་བདག་དོན་ལས་ཕྱེ་བ་མ་སྐྱེས་པའི་དབུ་དང༌། མ་རྨོངས་པའི་སྤྱན་ལ་སོགས་བཅུ་དང༌། གཞན་དོན་དུ་མཛད་པ་ལས་ཕྱེ་བ་སྤྱན་གྱི་ལས་གདུལ་བྱ་༼༡༤༥༽གཟིགས་པར་མཛད་པ་དང༌། ཤངས་ཀྱི་ལས་སྤྲུལ་པ་འགྱེད་པར་མཛད་པ་ལ་སོགས་པ་བཅུར་བསྟན་པ་ཉིད་དང༌། ཆེ་བ་དང༌། རོལ་པ་འདི་གཉིས་གསང་བ་སྒྱུ་འཕྲུལ་གྱི་ལུགས་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔ་རེ་རེ་ལའང་བཞི་བཞིར་བསྟན་པར་ཁྲོ་བོའི་གླུ་ལས་འབྱུང་བ་དང༌། འཁོར་ལོ་ལྷ་མོ་ཉི་ཤུ་དང་རོལ་པ་ལ་བརྩིས་པར་ལྷ་མོར་སྒྱུ་འཕྲུལ་ལས་འབྱུང་བར་བཤད་དོ། །རྔོམ་པ་ཡང་གོང་གི་ལེའུ་དེ་ཉིད་ལས། སྐུའི་རྔོམ་སྤྱོད་བྱེ་བ་ས་ཡར་མངོན་པ་དང༌། གསུང་གི་རྔོམ་སྤྱོད་བསྟན་པ་རྒྱ་མཚོར་མངོན་པ་དང༌། ཐུགས་ཀྱི་རྔོམ་སྤྱོད་ཆོས་ཉིད་ནམ་མཁར་མངོན་པ་དང༌། མཐུའི་རྔོམ་སྤྱོད་ནམ་མཁའི་དབྱིངས་ལྟར་མངོན་པ་བཞི་ལས། ཡན་ལག་བཞི་བཞི་སྟེ་ཚུལ་བཅུ་དྲུག་དང་ཉི་ཤུའོ། །བརྗིད་པ་ནི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལ་བརྗིད་བཞི་བཞི་སྟེ་ཉི་ཤུ་གསུངས་པ་དེ་ཉིད་དང༌། མཐུ་ཉི་ཤུ་ཡང༌། རྩ་རྒྱུད་ལས། འཇིག་རྟེན་ཆེན་པོ་དྲུག་འཕང་བར་འདོད་པ་དག ཆུའི་ཕུང་པོ་ཆེན་པོ་བརྔུབ་སྟེ་བསྐམ་པར་འདོད་པ་དང༌། རླུང་གི་བསྐལ་བ་བཅིང་བར་འདོད་པ་དང༌། ཉི་མའི་དཀྱིལ་འཁོར་འབུམ་དགྱེ་བར་འདོད་པ་དང༌། སྲེག་པའི་བསྐལ་བ་ཆེན་པོ་གསུམ་གཞིལ་བར་འདོད་པ་དང༌། ནམ་མཁའ་ཐམས་ཅད་བ་སྤུ་གཅིག་གིས་དགང་བར་འདོད་པ་དང༌། བ་སྤུ་གཅིག་ལས་སངས་རྒྱས་བྱེ་བ་དགྱེ་བར་འདོད་པ་དང༌། སངས་རྒྱས་བྱེ་བ་བ་སྤུ་གཅིག་གི་ནང་དུ་ཤོང་བར་འདོད་པ་དང༌། འཁོར་བ་ཐམས་ཅད་བ་སྤུ་གཅིག་ཏུ་རྔུབ་པར་འདོད་པ་དང༌། བ་སྤུ་གཅིག་གི་འཁོར་བ་ཐམས་ཅད་ལ་ཁྱབ་པར་འདོད་པ་དང༌། བསྐལ་པའི་འཁོར་ལོ་རིང་དུ་སྲུབ་པར་འདོད་པ་དང༌། ཐུང་ངུ་སྦུབ་པར་འདོད་པ་དང༌། དུས་ཀྱི་འཁོར་ལོ་ཆེན་པོ་མཉམ་པར་བསྐོར་བར་འདོད་པ་དང༌། འཁྲུག་པར་བསྐོར་བར་འདོད་པ་དང༌། ལས་ཀྱི་འཁོར་ལོ་ཆེན་པོ་རྒྱུན་དུ་བསྐོར་བར་འདོད་པ་དང༌། རྒྱུན་གཅད་པར་འདོད་པ་དང༌། སྲིད་པའི་འཁོར་ལོ་བཟློག་པར་འདོད་པ་དང༌། ལུགས་སུ་བསྐོར་བར་འདོད་པ་དང༌། སྡུག་བསྔལ་གྱི་འཁོར་ལོ་ཆེན་པོ་རྒྱུན་གཅད་པར་འདོད་པ་དང༌། དམྱལ་བའི་འཁོར་ལོ་ཆེན་པོ་དོང་སྤྲུགས་པར་འདོད་པས་ཀྱང་ལམ་འདི་ལ་བསླབ་པར་བྱའོ། །ཞེས་པ་ལྟར་དང༌། ཆོས་འཕྲུལ་ཞེས་༼༡༤༦༽པའང་ཉི་ཤུ་སྟེ། གོང་གི་ལེའུ་དེ་ཉིད་ལས། ལས་ཀྱི་རྫུ་འཕྲུལ་ལས་སྐྱེ་བའི་ཆོ་འཕྲུལ་དང༌། བསམ་གཏན་གྱི་རྫུ་འཕྲུལ་ལས་སྐྱེ་བའི་ཆོ་འཕྲུལ་དང༌། ཆོས་ཉིད་ཀྱི་རྫུ་འཕྲུལ་ལས་སྐྱེ་བའི་ཆོ་འཕྲུལ་དང༌། ཐུགས་རྗེའི་རྫུ་འཕྲུལ་ལས་སྐྱེ་བའི་ཆོ་འཕྲུལ་བཞི་ལ་ཡན་ལག་བཞི་བཞི་སྟེ་བཅུ་དྲུག་དང་ཉི་ཤུའོ། །ཡོངས་སུ་རྫོགས་པའི་རྣམ་པ་ནི། ཀུན་འདུས་ལས། རྣམ་གྲངས་ཐམས་ཅད་བྱང་ཆུབ་ཀྱི་སེམས་བདེ་བ་ཆེན་པོར་རྫོགས་པར་གྲུབ་པའི་ཕྱིར་རྫོགས་པ་ཆེན་པོ་གཅིག་ཅེས་བྱའོ། །ཞེས་གསུངས་པ་ལྟར་གནས་ལུགས་བྱང་ཆུབ་ཀྱི་སེམས་དེ་ཁོ་ན་ཉིད་གཅིག་ཏུ་རང་བཞིན་རྣམ་པར་དག་པ་སྟེ་གཞི་ཉིད་ཁོ་ནའོ། །དེ་བས་ན་འབྲས་བུའི་རྣལ་འབྱོར་འདི་ནི་གཞི་ཉིད་དང་ལམ་དང་འབྲས་བུར་བསྡུས་ཏེ་འགྲེལ་པའོ། །དེ་ལྟ་བུ་བྱ་བ་མེད་པ་གསང་སྔགས་ཀྱི་རྣམ་གྲངས་དེ་དག་ནི། ཆོས་ཉིད་བསམ་དུ་མེད་པའི་དགོངས་པ་དམ་པ་དེ་ཁོ་ན་ཉིད་དུ་གནས་ཟིན་པ་དང༌། དེ་ཉིད་དུ་བྱ་བ་མེད་པས་ཡོངས་སུ་འབྱིན་པ་དང༌། དེས་མཐར་ཕྱིན་ཅིང་མཆོག་ཏུ་ལྷུན་གྱིས་གྲུབ་པའི་ཕྱིར། འདི་དག་ཇི་ལྟར་བར་མ་འདྲེས་ཡོངས་སུ་རྫོགས་པར་རྟོགས་པ་ནི་མཁས་པའི་ཕུལ་དུ་གྱུར་པ་ཡིན་པས། མ་ནོར་བར་ངེས་ཏེ་མངོན་དུ་གྱུར་པར་བྱའོ། །འོ་ན་འདིར་ཡང་བྱ་བ་མེད་པའི་ལམ་རྣམས་སྨོས་པས་བྱ་བ་མེད་པར་མི་འགྱུར་རོ་ཞེ་ན། འདིར་དེ་དག་གཙོ་བོའི་དབང་དུ་བྱ་བ་མེད་པའི་ཡོན་ཏན་དེ་དག་ཏུ་སྣང་བས་རིལ་འབྲས་བུ་ལ་རྫོགས་པའི་ཕྱིར་སྨོས་པ་མི་འགལ་བ་དང༌། འབྲས་བུ་གྲུབ་པར་བྱེད་པའི་རྒྱུ་རྐྱེན་འདིར་འབྲེལ་བའི་སྒོ་ནས་སྨོས་ཀྱང་གཙོ་བོར་འབྲས་བུ་ཉིད་དུ་བསྟན་པའི་ཕྱིར་འགལ་བ་མེད་དོ། །མདོར་རྐྱེན་གྱི་རྣལ་འབྱོར་ལ་འབྲས་བུ་སྨོས་པ་དང༌། འབྲས་བུའི་རྣལ་འབྱོར་ལ་ལམ་སྨོས་པ་གཉིས་ཀའང༌། གཙོ་བོར་གང་སྟོན་པ་དབང་དུ་གྱུར་པས་མི་མཐུན་པས་སྨོས་པ་བཞིན་དུ་འགྱུར་རོ། །ཆོས་འདི་དག་གི་རྣམ་གྲངས་ལ་དཔག་ནས་ལེའུའི་ཚོམས་རྣལ་འབྱོར་གསུམ་བསྡུ་བར་བཤད་པའང་ཤིན་ཏུ་གསལ་བར་ངེས་སོ།།

གསུམ་པ་གཅེས་པར་གདམས་པ་ནི།

དེ་ཡང་ཇི་ལྟ། ཞེས་པ་ནས། བྱ་བ་རབ་ཏུ་གཅེས། །ཞེས་པའི་བར་གྱིས་བསྟན་ཏེ།

དེ་ཡང་ཇི་ལྟར་ཞེ་ན། གྲོགས་པོ་དག་འདི་ལྟ་སྟེ། ཇི་ལྟར་མཐོན་རི་རྩེ་དག་ལ། །སྒྱིད་མི་ལུག་པར་བརྩོན་འཛེགས་ན། །མཐོན་པོར་སྣང་མཐོང་ཀུན་གསལ་བས། །ཐམས་ཅད་ཀུན་སྣང་ལམ་ལ་མཁས། །དེ་བཞིན་ཤེས་རབ་མཐོན་རི་ལ། །བརྩོན་པ་དམ་པས་ཀུན་བལྟས་ན། །ཀུན་གྱི་ཕུལ་དུ་ཤེས་རབ་ཕྱིན། །མཁས་པའི་ཡེ་ཤེས་ཚད་མེད་དོ། །དོན་ལ་མཁས་པར་བྱ་བ་དེ། །ཕུལ་དུ་བྱུང་བའི་བསླབ་པ་སྟེ། །དགོངས་པ་དམ་པ་དེ་ཉིད་ལ།། མཁས་པར་བྱ་བ་རབ་ཏུ་གཅེས།།

ཕུལ་དུ་དབྱུང་བའི་མདོར་དཔེ་དོན་གྱིས་གཅེས་པར་བསྟན་པའི་ཕྱིར། དེ་ཡང་༼༡༤༧༽ཇི་ལྟ་བུ་ཞེ་ན། གྲོགས་པོ་དག ཅེས་བོས་ནས། ཕུལ་དུ་མཁས་པས་དབྱུང་བའི་དཔེ་དོན་བསྟན་པ་འདི་ལྟ་སྟེ། དཔེ་ཇི་ལྟར་ན་མཐོན་པོའི་རི་ཡི་རྩེ་མོ་དག་ལ་སྒྱིད་མི་ལུག་པར་བརྩོན་པས་འཛེགས་པར་བྱས་ན། མཐོ་བའི་སར་སྣང་ཡུལ་གྱི་མཐོང་བ་ཀུན་གསལ་བས། མཐོང་ཡུལ་གྱི་བྱེ་བྲག་ཐམས་ཅད་ཀུན་སྣང་སྟེ། འགྲོ་བའི་ལམ་ལ་མཁས་པར་ཕུལ་དུ་ཕྱིན་ནོ། །དེ་བཞིན་དུ་དོན་ལ་མཁས་པའི་ཤེས་རབ་ཀྱིས་མངོན་པར་མཐོ་བས་མཆོག་ཏུ་མཐོན་པོའི་རི་རྩེ་ལ། སྒོ་ཀུན་ནས་བསྡུར་བའི་བརྩོན་པ་དམ་པས་འཛེགས་ནས་ཀུན་ལ་བལྟས་ཏེ་དོན་གྱི་སྙིང་པོ་བླངས་ན། ཀུན་གྱི་ཕུལ་དུ་གྱུར་པར་ཤེས་རབ་མཐར་ཕྱིན་པས། དོན་ལ་མཁས་པའི་རང་བྱུང་གི་ཡེ་ཤེས་ཚད་མེད་པ་ཉིད་མངོན་དུ་བྱེད་དོ། །དེ་བས་ན་དོན་ལ་མཁས་པར་བྱ་བ་དེ་ནི་རབ་ཀྱི་ཕུལ་དུ་དབྱུང་བའི་བསླབ་པ་མཆོག་སྟེ། དེ་ལྟར་རྒྱལ་བའི་དགོངས་པ་དམ་པ་དེ་ཉིད་ལ་ཐོགས་པ་མེད་པར་མཁས་པར་བྱ་བ་ནི་རབ་ཏུ་གཅེས་པ་ཡིན་པས་བརྩོན་པ་མི་ལྷོད་པར་བྱའོ།།

བཞི་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། ཐོབ་པར་གྱུར་ཏོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་མཐར་ཕྱིན་པར་བྱ་བ་རབ་ཏུ་ཤེས་པར་བྱའོ། །དེ་སྐད་ཅེས་སྨྲས་པས།

དམན་པའི་ལུས་ཀྱི་སེམས་དཔའ་རྣམས། ཀུན་གྱི་ཕུལ་དུ་གྱུར་པར་དགོངས་པ་དམ་པ་དེ་ཁོ་ན་ཉིད་ལ་བཟོད་པ་ཐོབ་པར་གྱུར་ཏོ།།

གྲོགས་པོ་དག ཇི་སྐད་བཤད་པ་དེ་དག་ནི། ཕུལ་དུ་མཁས་པས་དབྱུང་སྟེ་མཐར་ཕྱིན་པར་བྱ་བ་ཉིད་རབ་ཏུ་བགྲོས་པ་ཡིན་པར་ཤེས་པར་བྱའོ། །དེ་སྐད་ཅེས་སྨྲས་པས། འཁོར་དམན་པའི་ལུས་ཀྱི་སེམས་དཔའ་རྣམས་ཀྱིས། ཀུན་གྱི་ཕུལ་དུ་གྱུར་པའི་དགོངས་པ་དམ་པ་གཉིས་སུ་མེད་པའི་དེ་ཁོ་ན་ཉིད་ལ་མཆོག་ཏུ་མཁས་པར་གྱུར་པས་དོན་ཟབ་མོ་ལ་བཟོད་པར་ཐོབ་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

བསམ་གྱིས་མི་ཁྱབ་པ་བསྟན་པའི་ལེའུ་སྟེ་དྲུག་ཅུ་དགུ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཕུལ་དུ་མཁས་པས་དབྱུང་སྟེ་མཐར་ཕྱིན་པའི་ངོ་བོ་བསམ་གྱིས་མི་ཁྱབ་པའི་རྣམ་པ་ཉིད་བསྟན་པའི་ལེའུ་སྟེ་དྲུག་ཅུ་རྩ་དགུ་པ་ཉིད་རྣམ་པར་འགྲེལ་ཏེ་བཤད་པའོ།། །།

ལེའུ་བདུན་ཅུ་པ་རྣལ་འབྱོར་དམ་པ་ལུང་བསྟན་པ།

༈ ལྔ་པ་རིམ་པ་དབང་གིས་བགྲོད་པར་བསླབ་པ་རྒྱལ་བུ་རྒྱལ་སར་བཏོན་པ་ལྟར་བཤད་པ་ལ་བཞི་སྟེ། མདོར་བསྟན་པ། རྒྱས་པར་བཤད་པ། གཅེས་པར་གདམས་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། བསྒྱུར་བས་༼༡༤༨༽སོ། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་བའི་བདག་པོས། དམན་པ་དམ་པ་རྣམས་ལ་སྨྲས་པ། ཀྱེ་གྲོགས་པོ་དག་ཐམས་ཅད་དུ་འདུ་བར་བྱ་བ་ནི་འདི་ལྟ་སྟེ། བྱ་བ་དང་། རང་བཞིན་དང་། བསྒྱུར་བས་སོ།།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །ཐབས་ཀྱི་ངེས་པའི་ལམ་དམ་པ་ཤེས་རབ་ཀྱི་སྔོན་དུ་བྱ་བ་བསྟན་པའི་ཕྱིར། བསླབ་པ་བཞི་པ་བསྟན་མ་ཐག་པ་དེ་ནས་ཡང་སྟོན་པ་འཆད་པའི་སྐྱེས་བུ་གསང་བ་པའི་བདག་པོས་འཁོར་དམན་པའི་ལུས་ཀྱི་རིགས་ཅན་དམ་པ་རྣམས་ལ་བསླབ་པ་ལྔ་པ་ཉིད་སྨྲས་ཏེ་བཀའ་སྩལ་པ། ཀྱེ་གྲོགས་པོ་དག ཅེས་བོས་ནས། གསང་བའི་འདུ་བ་རིག་པ་ལྷུན་གྲུབ་ཀུན་རྫོགས་སུ་འདུ་ཞིང༌། ནང་གི་འདུ་བ་སྣང་བ་སེམས་སུ་འདུ་བ་དང༌། ཕྱིའི་འདུ་བ་མི་དང་མི་མ་ཡིན་པའམ་དམ་ཅན་འདུ་བར་འགྱུར་བའི་ལམ་གྱི་སྔོན་དུ་ཐམས་ཅད་དབང་དུ་འདུ་བར་བྱ་སྟེ་རིམ་པ་དབང་གིས་བགྲོད་པའི་བསླབ་པ་ཉེ་བར་བསྟན་པ་ནི་འདི་ལྟ་སྟེ། འབྲས་བུ་ཐོབ་པར་བྱ་བ་དང༌། འབྲེལ་པའམ་མཚུངས་ལྡན་གྱི་རྒྱུའི་རང་བཞིན་དང༌། བསྐུར་བའི་ཐབས་བསྟེན་ཏེ་བསྒྱུར་བས་སོ། །ཞེས་དེ་ལ་གསུམ་དུ་ཕྱེ་བའོ།།

གཉིས་པ་རྒྱས་པར་བཤད་པ་ལ་གསུམ་སྟེ། བྱ་བ་བཤད་པ། རང་བཞིན་བསྟན་པ། བསྒྱུར་བ་བཤད་པའོ། །དང་པོ་ནི།

གྲོགས་པོ། ཞེས་པ་ནས། བསྡུ་བའི་བྱ་བས་སོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་ལ་བྱ་བ་ནི་བསྡུ་བའི་བྱ་བས་སོ།།

དེ་དག་སོ་སོ་ནས་གསལ་བར་བསྟན་པའི་ཕྱིར། གྲོགས་པོ་དག ཅེས་བོས་ནས། དེ་ལ་དང་པོ་ཐོབ་པར་བྱ་བ་བཀར་ནས་སྟོན་པ་ནི། ཐོབ་བྱ་འབྲས་བུའི་ཡོན་ཏན་རང་དབང་དུ་བྱེད་པས་དབང་ཐོབ་པར་བྱ་བའི་ཕྱིར་ནོད་པ་ལ་སོགས་པ་བསྡུ་བའི་ཐབས་ཀྱི་བྱ་བ་ལ་བསྟེན་པས་ལས་རྣམས་རྩོམ་པ་ཉིད་དེ་དབང་གི་སྔོན་འགྲོ་བསྐུར་ལ་མ་རག་པ་ཚུན་ཆོད་རྣམས་སོ།།

གཉིས་པ་རང་བཞིན་བསྟན་པ་ནི།

རང་བཞིན་ནི་ཆོས་ཉིད་ཀྱིས་སོ། །ཞེས་པས་བསྟན་ཏེ།

རང་བཞིན་ནི་ཆོས་ཉིད་ཀྱིས་སོ།།

དབང་གི་རང་བཞིན་ནི། ཡེ་ནས་རང་གི་ལུས་སེམས་ཀྱི་གནས་ཚུལ་ལ་མཚུངས་ལྡན་གྱི་མཚན་ཉིད་དུ་ལམ་གྱི་རིམ་པ་ལྟར་རྟེན་འབྲེལ་གྱི་མཐུ་དང་ཆོས་ཀྱིས་མ་བརྩལ་བར་གནས་ཏེ་དབང་གི་ངོ་བོར་བཞུགས་པ་ཉིད་ཀྱི་གནས་ལུགས་སོ། །དེས་ན་སྤྱི་དབང་བསྐུར་བའི་རྒྱུད་ལས། དབང་མཆོག་སེམས་ལ་ཡོད་པ་ནི། །དུས་གསུམ་རྒྱལ་བའི་ལུང་ལས་བྱུང༌། །དབང་མཆོག་རང་ལ་མེད་པ་ནི། །བསྐུར་བས་ཐོབ་པར་ཡོངས་མི་འགྱུར། །བྲ་སྲན་འབྲས་སུ་དབང་བསྐུར་ཡང༌། །དེ་ལ་༼༡༤༩༽འབྲས་ཀྱི་མངོན་སྣང་མེད། །ཅེས་སོ།།

གསུམ་པ་བསྒྱུར་བ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

བསྒྱུར་བས་འདུ་བར། ཞེས་པ་ནས། ཐོབ་པའོ། །ཞེས་པའི་བར་གྱིས་བསྟན་ཏེ།

རྒྱུར་འདུ་བར་བྱ་བ་ནི་འདི་ལྟ་སྟེ། རྒྱུ་དང་། དུས་དང་། ཚད་དང་། གྲགས་པ་དང་། གེགས་དང་།

རྟགས་དང་། ཐོབ་པའོ། །གྲོགས་པོ་དག་དེ་ལ་རྒྱུ་ནི་ཡོ་བྱད་ཆེན་པོ་ལྔ་ཁོ་ནའོ།།

གང་ཟག་འདི་ལ་དབང་འདིས་འབྲས་བུ་འདི་ཉིད་དུ་བསྒྱུར་བས་བསྐུར་བའི་ཐབས་རྐྱེན་གྱིས་དབང་དུ་འདུ་ཞིང་སློང་བར་བྱ་བའི་དོན་ཉེ་བར་བསྟན་པ་ནི། འདི་ལྟ་སྟེ། ཐུན་མོང་གི་རྒྱུ་དང༌། དབང་ཐོབ་པའི་དུས་དང༌། དེ་ལྟར་ཐོབ་པའི་ཚད་དང༌། དབང་ཐོབ་ནས་གྲགས་པ་དང༌། དབང་ཐོབ་ཏུ་མི་སྟེར་བའི་གེགས་དང༌། ཚུལ་བཞིན་ཐོབ་པའི་རྟགས་དང༌། དབང་ཐོབ་པའི་ཚུལ་བསྟན་པའོ།།

གཉིས་པ་རྒྱས་པར་བཤད་པ་ལ་བརྒྱད་དེ། ཐུན་མོང་གི་རྒྱུ་བསྟན་པ། ཐོབ་པའི་དུས་སོ་སོར་བཤད་པ། ལེགས་པར་ཐོབ་པའི་ཚད་བསྟན་པ། དབང་ཐོབ་པས་གྲགས་པ་བཤད་པ། མི་ཐོབ་པའི་གེགས་བསྟན་པ། ངེས་པར་ཐོབ་པའི་རྟགས་བཤད་པ། ཇི་ལྟར་ཐོབ་པའི་ཚུལ་བསྟན་པ། ཞར་ལ་མ་ཐོབ་པར་བཤད་པའི་སྐྱོན་བསྟན་པའོ། །དང་པོ་ནི།

གྲོགས་པོ་དག ཅེས་པ་ནས། ལྔ་ཁོ་ནའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག དེ་ལ་ཡོ་བྱད་ཆེན་པོ་ལྔ་ཁོ་ནའོ།།

སྐྱེས་བུ་ཆེན་པོས་གྲོགས་པོ་དག ཅེས་བོས་ནས། དེ་ཡང་གྲངས་ལ་སྙེགས་པས་རྒྱུ་བཀར་ནས་སྟོན་པ་ནི། བསྐུར་བའི་རྒྱུ་དང་ཐོབ་པར་བྱ་བའི་རྒྱུ་གཉིས་ལས། འདིར། དམ་ཚིག་ཏིང་འཛིན་ཤེས་རབ་དང༌། །བྱང་ཆུབ་སེམས་དང་སྙིང་རྗེ་ལྔ༌། །ཞེས་པ་ལྟར། ཐུན་མོང་མ་ཡིན་པའི་ཡོ་བྱད་ཆེན་པོ་ལྔ་ཡིས་ཕྱུག་པའི་བླ་མའི་བྱིན་རླབས་དང༌། སློབ་བུ་ཡང་ལྔ་དང་ལྡན་པའི་སྣོད་གཉིས་ཀ་ཐུན་མོང་དུ་འཇལ་བར་བྱ་བ་ཁོ་ནའོ།།

གཉིས་པ་ཐོབ་པའི་དུས་སོ་སོར་བཤད་པ་ནི།

དུས་ནི་མཐའ་བཅུ། ཞེས་པ་ནས། བྱ་བ་རྫོགས་པའོ། །ཞེས་པའི་བར་གྱིས་བསྟན་ཏེ།

དུས་ནི་མཐའ་བཅུ་རྫོགས་པ་དང་། ཉེ་བར་འདྲིས་པ་དང་། རིགས་ཅན་འདུ་བ་དང་། གསལ་བ་ཐོབ་པ་དང་། ལས་སུ་རུང་བ་དང་། མཚན་མ་བྱུང་བ་དང་། མང་པོས་བསྔགས་པ་དང་། ཉམས་རྙེད་པ་དང་། བྱ་བ་རྫོགས་པའོ།།

དབང་བསྐུར་བའི་དུས་ནི། རྣལ་འབྱོར་པ་གཅིག་གི་རྒྱུད་ལ་ཟག་བཅས་ཀྱི་བསླབ་པའི་མཐའ་བཅུ་རིམ་པར་ཡོངས་སུ་རྫོགས་ཤིང་མཐར་ཕྱིན་པ་བསོད་ནམས་གཏེར་གྱི་ས་ལྟ་བུ་དང༌། མཚན་མ་དང་བཅས་པ་ཡི་དམ་ལྷའི་སྐུ་དང་མཚན་མེད་ལ་བློ་ཉེ་བར་འདྲིས་ཤིང་གོམས་པ་བརྟན་པའི་དུས་དང༌། མ་སྲིང་དམ་ཅན་དང༌། གཟུངས་མ་མཚན་ལྡན་དང༌། མཁས་པ་ཉམས་རྟོགས་ལྡན་པའི་རིགས་ཅན་གྱི་ཚོགས་མང་པོ་འདུ་བ་དང༌། གསང་སྔགས་བླ་ན་ མེད་པའི་ལྟ་བའི་རྟོགས་པ་གསལ་བ་ཐོབ་པ་དང༌། བདག ་དོན་དུ་བསྒོམ་མི་དགོས་པར་ཏིང་ངེ་འཛིན་གཉིས་ཀྱི་སེམས་ལས་སུ་རུང་བ་དང༌། ཏིང་ངེ་འཛིན་མཐར་ཕྱིན་པའི་དྲོད་རྟགས་དང་རྨི་ལམ་གྱི་མཚན་མ་འབྱུང་བ་དང༌། ངེས་༼༡༥༠༽མ་ངེས་ཀྱི་སྐྱེ་བོ་མང་པོས་བསྔགས་པ་དང༌། སྒྲ་ཇི་བཞིན་མིན་པར་དོན་ལ་རིག་པ་གདིང་དང་ལྡན་ཞིང་དགོངས་པའི་ཉམས་རྙེད་པ་དང༌།  བདག་གཞན་གྱི་དོན་དུ་བྱ་བ་རྫོགས་ཏེ་ལས་བཞི་གང་ལའང་ཐོགས་པ་མེད ་པར་མཛད་པ་རྣམས་མངོན་པར་ཤེས་པའི་ཡོན་ཏན་དགུ་དང་ལྡན་ན་དུས་སུ་ཕྱི་པའོ། །འོ་ན་འདི་དག་འདུན་པའི་རྣལ་འབྱོར་ལ་ལྡན་ནམ་ཞེ་ན། འདུན་པའི་རྣལ་འབྱོར་ལ་རིལ་མི་ལྡན་པས་དབང་ཡོངས་སུ་རྫོགས་པར་མ་བསྐུར་ཏེ། སྔོན་དུ་བྱ་བའི་ལས་སུ་གྱུར་པས་ཉན་པའི་དབང་གླེགས་བམ་གྱིས་བསྐུར་བ་ཙམ་མོ། །དེས་ན་འདི་དག་ནི་སྤྱིར་དབང་རྫོགས་པར་བསྐུར་བའི་དུས་སུ་བསྟན་པ་སྟེ། ས་པ་ལའང་རིམ་པ་ལྟར་མང་ཉུང་དུ་ལྡན་པའོ།།

གསུམ་པ་ལེགས་པར་ཐོབ་པའི་ཚད་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གྲོགས་པོ་དག ཅེས་པ་ནས། སྨིན་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་ཚད་ནི་འདི་ལྟ་སྟེ། དེད་དཔོན་དང་། སྔ་ལྟས་དང་། སྨིན་པའོ།།

གྲོགས་པོ་དག དབང་ཐོབ་པའི་ཚད་ཉེ་བར་བསྟན་པ་ནི་འདི་ལྟ་སྟེ། འདྲེན་པའི་དེད་དཔོན་བླ་མར་གྱུར་པ་དང༌། དབང་ཐོབ་པའི་སྔ་ལྟས་དང༌། ཐོབ་པའི་འབྲས་བུ་སྨིན་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། དེད་དཔོན་བཤད་པ། སྔ་ལྟས་བསྟན་པ། སྨིན་པ་བཤད་པའོ། །དང་པོ་ནི།

གྲོགས་པོ་དག ཅེས་པ་ནས། རྫོགས་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེད་དཔོན་གང་ཞེ་ན། འདི་ལྟ་སྟེ། གོམས་པ་དང་། རིག་པ་དང་། འདུ་བ་དང་། འཐོབ་པ་དང་། རྫོགས་པའོ།།

གྲོགས་པོ་དག ཅེས་བོས་ནས་དབང་ཐོབ་པས་བདག་གཞན་གྱི་འདྲེན་པ་དེད་དཔོན་དམ་པའི་བླ་མ་ཉིད་དུ་གྱུར་པ་ནི་གང་ཞེ་ན། འདི་ལྟ་སྟེ། ཤེས་བྱ་ཐམས་ཅད་ལ་བསླབས་ཏེ་ལས་དང་བྱ་བ་ལ་གོམས་པས་གཞན་གྱི་སློབ་དཔོན་བྱེད་ནུས་པ་འདུན་པ་སེམས་པའི་སྐབས་ལྟ་བུ་དང༌། གསང་བའི་དོན་མ་ནོར་བར་ཇི་ལྟ་བར་རིག་སྟེ་རྟོགས་པའི་གདེང་དང་ལྡན་པ་རིགས་ཆེན་འབྱེད་པའི་སྐབས་ལྟ་བུ་དང༌། མན་ངག་དང་ལྡན་ཞིང་འགྲོགས་པ་བདེ་བས་ཕྱག་རྒྱ་མོ་རང་དབང་མེད་པ་འདུ་བ་དབུགས་ཆེན་འབྱིན་པའི་སྐབས་ལྟ་བུ་དང༌། དབང་རྒྱུད་མ་ཆད་པར་རྫོགས་ཤིང་བླ་མའི་གབ་ཚུལ་བསྟན་པ་རྣམས་ཐོབ་པ་ལུང་ཆེན་ཐོབ་པའི་སྐབས་ལྟ་བུ་དང༌། བསླབ་པ་དང་བསྙེན་སྒྲུབ་དང་དབང་གི་དོན་གྱི་བྱ་བ་དང་མན་ངག་གི་གསང་བ་ཟབ་མོ་མཐར་ཐུག་པར་རྫོགས་པ་རྩལ་ཆེན་རྫོགས་པའི་སྐབས་ལྟ་བུ་སྟེ། རྒྱུའི་རྣལ་འབྱོར་ལའང་དེ་ལྟར་སྦྱར་བར་བྱའོ།།

གཉིས་པ་སྔ་ལྟས་བསྟན་པ་ནི།

གྲོགས་པ་དག ཅེས་པ་ནས། ཐོས་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་སྔ་ལྟས་ནི་འདི་ལྟ་སྟེ། མཐོང་བ་དང་། འབྱོར་པ་དང་། འཕོ་བ་དང་། ནུས་པའོ།།

གྲོགས་པོ་དག ༼༡༥༡༽དབང་ཐོབ་པའི་སྔ་ལྟས་བསྟན་པ་བཞི་ནི་འདི་ལྟ་སྟེ། ལྟ་བས་དོན་མ་ནོར་བར་མཐོང་བའི་ལྟས་ཐོབ་པ་དབུགས་ཆེན་གྱི་སྐབས་ལྟ་བུ་དང༌། ལྟ་བའི་དོན་ལ་གོམས་པས་རྫས་དང་ནུས་པ་འབྱོར་བའི་ལྟས་ཐོབ་ཅིང་ངོ་མཚར་ཅན་གྱི་རྫས་རྙེད་པ་ལུང་ཆེན་གྱི་སྐབས་ལྟ་བུ་དང༌། གཞན་ལ་རག་མ་ལས་པར་འདོད་པ་གྲུབ་པ་དང༌། འགྲོ་བ་ལ་ཕན་ཐོགས་པའི་བྱིན་རླབས་ཀྱི་ནུས་པ་ཐོབ་པ་རྩལ་ཆེན་གྱི་སྐབས་ལྟ་བུ་དང༌། བླ་མས་གནང་བ་སྦྱིན་ཏེ་དབང་ཐོབ་པས་ལུང་བསྟན་པ་དང༌། སྤྱི་དང་བྱེ་བྲག་གི་རྣམ་པས་ལུང་སྟོན་པའི་ཁྱད་པར་ཐོས་པ་དང་མཐོང་བ་ལ་སོགས་པ་གཙོ་བོར་རྣལ་འབྱོར་དང་པོ་གཉིས་ཀྱི་སྐབས་ལྟ་བུའོ། །དེ་ཡང་ལུང་བསྟན་པ་ལོ་རྒྱུས་སྦྱར་ཏེ། མདོར་ན་དུར་ཁྲོད་ཁུ་བྱུག་རོལ་པའི་མདོ་ལས། དབང་མཆོག་ཐོབ་པའི་སྔ་ལྟས་ཀྱི། །རྨི་ལམ་དག་ཀྱང་འབྱུང་བར་ངེས། །རང་གི་སེམས་ལ་དབང་ཐོབ་དང༌། །སྣ་ཚོགས་འཕྲུལ་པ་ལྟ་བུ་དང༌། །འགྲོ་གང་དབང་དུ་འདུས་པ་དང༌། །རྫུ་འཕྲུལ་དག་གིས་འགྲོ་བ་དང༌། །ས་ལ་མི་ཐོགས་ཆུར་མི་འབྱིང༌། །ནམ་མཁའ་དག་ལ་བྱ་བཞིན་འཕུར། །སེམས་ཅན་མང་པོ་བསྒྲལ་བ་དང༌། །གཡུལ་ངོ་དག་ལས་རྒྱལ་བ་དག །མཐོང་ན་རྡོ་རྗེ་འཛིན་པ་ཡི། །དབང་ཐོབ་སྔ་ལྟས་ཡིན་པར་ངེས། །ལུས་ཀྱི་རྫུ་འཕྲུལ་ཐོབ་པ་དང༌། །འཁོར་ལོ་ལག་ཏུ་བབས་པ་དང༌། །ས་བདག་རྒྱལ་པོར་གྱུར་པ་དང༌། །རྡོ་རྗེ་བླ་མར་བྱེད་པ་དང༌། །འགྲོ་བ་གཞན་ལ་ཆོས་སྟོན་དང༌། །རྣལ་འབྱོར་ཚོགས་ཀྱི་བླ་མ་དང༌། །ཀུན་གྱི་ཁ་དཔོན་བྱེད་པ་ལ། །སོགས་པའི་རྨི་ལམ་མཐོང་བ་ནི། །འཁོར་ལོ་ཅན་གྱི་དབང་ཐོབ་ལྟས། །རིན་ཆེན་སྣ་ཚོགས་སྤྱོད་པ་དང༌། །ཁ་ཟས་སྣ་ཚོགས་ཟ་བ་དང༌། །རྒྱན་དང་བགོ་བ་ཁྱད་པར་དང༌། །དེ་དག་གཞན་ལའང་བཏང་བ་དང༌། །དམ་པའི་ཆོས་ནི་ཉན་སེམས་དང༌། །སྣ་ཚོགས་སྒྲ་རྣམས་ཐོས་པ་དང༌། །སྔོན་མ་ཐོས་པའི་ཚིག་ཐོས་དང༌། །དེ་ལ་སོགས་པའི་རྣམ་པ་ནི། །རིན་ཆེན་འཛིན་གྱི་དབང་ཐོབ་ལྟས། །པདྨའི་རྫིང་ན་རྩེ་བ་དང༌། །དེ་ལ་རྩེ་ཞིང་ཟ་བ་དང༌། །གླེགས་བམ་ཟབ་མོ་རྙེད་པ་དང༌། །དེ་ལ་འཆད་ཅིང་ཀློག་པ་དང༌། །འགྲོ་བ་དག་ལ་ཆོས་སྟོན་དང༌། །དགེ་སློང་དགེ་འདུན་རྣམས་ཀྱིས་བསྐོར། །དེ་ལ་སོགས་པའི་ལྟས་རྣམས་ནི། །རྡོ་རྗེ་ཆོས་ཀྱི་དབང་ཐོབ་ཡིན། །ལས་རྣམས་ཀུན་ལ་འཇུག་པ་དང༌། །རལ་གྲི་ལག་ཏུ་ཐོགས་པ་དང༌། །རི་རབ་ཀླད་ལ་བསྐོར་བ་དང༌། །ཉི་ཟླ་ལག་པས་བཟུང་བ་དང༌། །གསོད་དང་གསད་དང་རྒྱལ་བ་དང༌། །ཐེག་པ་རྣམས་ལ་ཞེན་པ་དང༌། །དེ་ལ་སོགས་པའི་ལྟས་རྣམས་ནི། །སྣ་ཚོགས་རྡོ་རྗེའི་དབང་ཐོབ་ལྟས། །རྨི་ལྟས་མཚན་མ་ཇི་སྙེད་པ། །ཇི་ལྟར་རྨི་ཞིང་མཐོང་བའམ། །ཡང་ན་ཅི་ཡང་མ་མཐོང་བའམ། །མངོན་སུམ་གསལ་བ་ཐམས་ཅད་ཀུན། །སྤྱི་ཡི་དབང་ཐོབ་ལྟས་སུ་རུང༌། །ཞེས་གསུངས་པ་ལ་སོགས་པ་ཇི་ལྟ་བ་བཞིན་ནོ།།

གསུམ་པ་སྨིན་པ་བཤད་པ་ནི།

གྲོགས་པོ་དག ཅེས་པ་ནས། མི་སྐྱོར་བའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་སྨིན་པ་ནི་འདི་ལྟ་སྟེ། མངོན་སྤྱོད་དང་། མི་སྐྱོར་བའོ།།

གྲོགས་པོ་དག དབང་ཐོབ་པའི་ཚད་ཀྱིས་འབྲས་བུར་གྱུར་པའི་སྨིན་པ་ནི་འདི་ལྟ་སྟེ། དབང་གང་ལ་ཐོབ་པའི་ཆོས་སྨིན་པ་དེ་ཉིད་དུ་གྱུར་པ་ན། ལྟ་བའི་ཉམས་སྐྱེས་ཏེ་བྱིན་རླབས་ཆེ་བ་དང༌། ཐུགས་རྗེ་འབྱུང་བས་བདག་གཞན་གྱི་དོན་དུ་མངོན་པར་སྤྱོད་པར་དངོས་སུ་བྱེད་པ་ནི། ཉན་དབང་ཐོབ་ནས་ཉན་པ་ལ་སོགས་པ་ལྟ་བུ་སྟེ། ཀུན་འདུས་ལས། དབང་གི་ཚད་ནི་འདི་ལྟ་སྟེ། །དད་ལྡན་སྲི་ཞུར་ལྡན་པ་ལ། །གསང་བ་ཉན་པའི་དབང་ཆེན་བསྐུར། །རྣམ་བཞི་ལས་ཀྱི་དོན་ཚང་ན། །ལས་རྣམས་བྱེད་པའི་དབང་ཐོབ་བོ། །ལྟ་བའི་དམིགས་བུས་ཆོས་མཐོང་ན། །རྒྱལ་ཐེབས་འཆད་པའི་དབང་ཐོབ་བོ། །རྐྱེན་ཐུབ་ཚད་མ་གསུམ་ལྡན་ན། །བླ་མ་རྡོ་རྗེ་སློབ་དཔོན་དབང༌། །དམ་པ་མཛོད་གསུམ་ཐམས་ཅད་ལ། །ཕྱོགས་མེད་པར་ནི་འཆད་ཤེས་ན། །རབ་འབྱམས་རྒྱལ་པའི་དབང་ཐོབ་བོ། །ཞེས་གསུངས་པའང་སྨིན་པའི་ཚད་ཡིན་ལ། ཁྱད་པར་དུ་རང་གི་ལམ་དང་སྦྱར་བ་འོག་ནས་འབྱུང་བ་ལྟར་དང༌། ཐོབ་ནས་དབང་གང་གི་ནུས་པ་རྫོགས་པའི་ཕྱིར་གང་ལའང་ཉམ་མི་ང་བས་དོན་ལས་མི་སྐྱོར་ཏེ་ཡང་ཟློས་བྱས་ནས་ཕྱིས་བསྐུར་མི་དགོས་པའོ།།

བཞི་པ་དབང་ཐོབ་པས་གྲགས་པ་བཤད་པ་ནི།

གྲོགས་པ་དག ཅེས་པ་ནས། ཐོབ་པ་ཉིད་དོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་གྲགས་པ་གང་ཞེ་ན། འདི་ལྟ་སྟེ། གང་ཆུ་བོ་བཞིའི་རྒྱུད་དུ་བྱུང་བ་དང་། གང་དག་ལས་འཕགས་པ་དང་། གང་དང་ལྡན་པ་དང་། གང་ལ་མཁས་པ་དང་། གང་ཐོབ་པ་ཉིད་དོ།།

གྲོག་པ་དག ཅེས་བོས་ནས། དབང་ཐོབ་པས་གྲགས་པ་ལྔ་འཐོབ་པར་འགྱུར་པ་གང་ཞེ་ན། འདི་ལྟ་སྟེ། གང་བཤད་པའི་ཆུ་བོ་བཞིའི་སྔོན་བྱུང་གི་རྒྱུད་འཛིན་པ་ཉིད་དུ་བྱུང་བ་དང༌། འཇིག་རྟེན་པའི་ལམ་དང་ཐེག་པ་གཞན་གང་དག་དབང་མ་ཐོབ་པ་ལས་དབང་ཐོབ་པས་ཁྱད་པར་དུ་འཕགས་པར་གྱུར་པ་དང༌། དབང་གི་དོན་ཉིད་ཇི་ལྟ་བར་ཆུ་བོ་བཞི་ལ་སོགས་པ་བླ་མའི་ཚད་ཀྱི་མཚན་ཉིད་གང་དག་དང་མི་འབྲལ་བར་ལྡན་པ་དང༌། གང་རྒྱུད་ཀྱི་ཚིག་དོན་དང༌། དམ་པའི་མཛོད་གསུམ་དང༌། ཕྲིན་ལས་ཀྱིས་འགྲོ་བ་འདུལ་བའི་ཐབས་ཚུལ་རིལ་ལ་མཁས་ཤིང་གོམས་པ་དང༌། གང་དབང་དུ་བྱ་བ་རིགས་ཀྱི་ཆུ་བོ། དབང་གི་༼༡༥༣༽ཆུ་བོ། མན་ངག་གི་ཆུ་བོ། ཉམས་ཀྱི་ཆུ་བོ་བཞིའི་ཁྱད་པར་རིལ་ཐམས་ཅད་ཐོབ་པ་ཉིད་དེ། དེ་དག་ནི་རྣལ་འབྱོར་ལྔའི་རིམ་པར་ཡང་འགལ་བ་མེད་དོ། །དེས་ན་དེ་དག་གང་དང་གང་ལ་ཇི་ལྟར་གྲགས་པ་ལྟར་སྦྱར་རོ།།

ལྔ་པ་མི་ཐོབ་པའི་གེགས་བསྟན་པ་ནི།

གྲོགས་པོ་དག ཅེས་པ་ནས། སྲེག་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་གེགས་གང་ཞེ་ན། འདི་ལྟ་སྟེ། མི་ཐོབ་པ་དང་། མི་ཆགས་པ་དང་། མི་གོས་པ་དང་། སྲེག་པའོ།།

གྲོགས་པོ་དག ཅེས་བོས་ནས། དབང་ཐོབ་ཏུ་མི་སྟེར་བའི་གེགས་སྒྲིབ་པ་ཆུ་བོའི་རྙོག་མ་ལྟ་བུ་ནི་གང་ཞེ་ན། བསྡུ་ན་རྣམ་པ་བཞི་ཉིད་འདི་ལྟ་སྟེ། ཡང་དག་པར་མ་བསྐུར་བ་དང༌། སྣོད་དང་མི་ལྡན་པ་དང༌། དུས་ལ་མ་བབ་པ་དང༌། དད་གུས་དང་ཡོན་མེད་པས་ནི་དབང་མི་ཐོབ་པ་ཉིད་དེ། རྩ་རྒྱུད་ལས། སྣོད་མེད་བཅུད་བྲལ་ཀུན་སྟོངས་པ། །དེ་ན་དབང་ཐོབ་མ་ཡིན་ནོ། །ཞེས་པ་ལྟར་དང༌། ནུས་པ་མེད་པའི་ཕྱིར་དབང་མི་ཆགས་པ་ནི། གསང་མེད་བརྗེད་ངས་དབང་མི་ཆགས། །ཞེས་པ་ལྟར་དང༌། དད་པ་དང་དམ་ཚིག་མེད་པས་དབང་གིས་མི་གོས་པ་ནི། དད་དང་གཡེང་རྨུགས་དབང་མི་འགོས། །ཞེས་པ་ལྟར་དང༌། ལོག་པ་དང་སྐུར་བ་ཅན་ཉིད་དབང་གིས་སྲེག་པ་ནི། དད་མེད་བློ་ཞན་རྫོབ་པ་ཆེ། །ཚུལ་འཆོས་མཁན་ལ་རས་ཆོས་བྱེད། །དེ་ནི་དབང་གིས་འཚིག་པར་བཤད། །ཅེས་གསུངས་པའི་དོན་དུ་བསྟན་པའོ།།

དྲུག་པ་ངེས་པར་ཐོབ་པའི་རྟགས་བཤད་པ་ནི།

རྟགས་གང་ཞེ་ན། ཞེས་པ་ནས། འབྱུང་བའོ། །ཞེས་པའི་བར་གྱིས་བསྟན་ཏེ།

རྟགས་གང་ཞེ་ན། འདི་ལྟ་སྟེ། གྲགས་པ་དང་། འགྱུར་བ་དང་། བཙན་པ་དང་། འབྱུང་བའོ།།

དབང་ཚུལ་བཞིན་ཐོབ་པའི་རྟགས་ཉིད་གང་ཞེ་ན། རྣམ་པ་བཞི་ཉིད་འདི་ལྟ་སྟེ། ཐམས་ཅད་དུ་ཡོན་ཏན་གྱིས་གྲགས་པ་འབྱུང་བ་འདུན་པའི་གནས་སྐབས་དང༌། སྤྱོད་པ་དང་འདུ་ཤེས་བཟང་པོས་སྔ་མའི་སྤྱོད་ཡུལ་ལས་གྱེན་དུ་འགྱུར་བར་འབྱུང་བ་རིགས་ཆེན་གྱི་གནས་སྐབས་དང༌། བྱིན་རླབས་དང་མན་ངག་དང་རྟེན་འབྲེལ་གྱི་ནུས་པ་སྟོབས་ཅན་དུ་གྱུར་པས་འཁོར་བ་རྒྱུན་ཆད་དེ་གཞན་གྱིས་མི་ཚུགས་ཤིང་འཇིགས་པ་མེད་པར་རང་གི་གཞུང་བཙན་པར་བརྟན་པ་དབུགས་ཆེན་གྱི་གནས་སྐབས་དང༌། སྒྲུབས་པའི་ལས་དང་དངོས་གྲུབ་ཐམས་ཅད་མངོན་དུ་ཤར་ཞིང་ཡོན་ཏན་ལྷུན་རྫོགས་སུ་འབྱུང་བར་སྣང་བ་ཡང༌། ལུང་ཆེན་དང༌། རྩལ་ཆེན་གྱི་གནས་སྐབས་ཉིད་དེ་དེ་ལྟར་རྒྱུས་དབྱེ་བར་བྱའོ།།

བདུན་པ་ཇི་ལྟར་ཐོབ་པའི་ཚུལ་བསྟན་པ་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་བསྐུར་བས་ཐོབ་ཚུལ་ལོ། །དང་པོ་ནི།

གྲོགས་པོ་དག ཅེས་པ་ནས། ཐོབ་པའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་ཐོབ་པ་དག་གང་ཞེ་ན། འདི་ལྟ་སྟེ། བསྐུར་བས་ཐོབ་དང་། །རྩལ་གྱིས་ཐོབ་པའོ།།

གྲོགས་པོ་དག ཅེས་བོས་ནས། དང་པོ་ཐོབ་པའི་ཚུལ་༼༡༥༤༽བསྟན་པ་གང་ཞེ་ན། འདི་ལྟ་སྟེ། རྡོ་རྗེ་རྒྱལ་པོ་བླ་མས་དབུ་རྒྱན་ལ་སོགས་པ་བྱིན་ཏེ་བསྐུར་བས་ཐོབ་པ་དང༌། རང་གི་རིག་པའི་རྩལ་གྱིས་ཐོབ་པའོ། །འདི་དག་རྒྱུད་གཅིག་དང་ཐ་དད་པ་གཉིས་ཀ་ཐུན་མོང་དུ་འགྱུར་རོ།།

གཉིས་པ་བྱེ་བྲག་ཏུ་བསྐུར་བས་ཐོབ་ཚུལ་ནི།

གྲོགས་པ་དག ཅེས་པ་ནས། འབར་བ་བླ་མེད་ཐོབ། ཅེས་པའི་བར་གྱིས་བསྟན་ཏེ།

གྲོགས་པོ་དག་དེ་ཡང་འདི་ལྟར་ཐོབ་པར་བྱ་སྟེ། གང་འདིར་སྙིང་རྗེའི་ཡུལ་རྣམས་ལ།།

བྱིན་རླབས་འབྱུང་བ་གང་ཡང་རུང་། །འདུན་པའི་རྣལ་འབྱོར་པ་དག་ལ། །གླེགས་བམ་བཅུ་གཉིས་སྦྱིན་པར་བྱ།།

གང་སྦྱོར་བ་ཡི་རྣལ་འབྱོར་ལ། །ཉི་ཟླ་གཉིས་ནི་སྦྱིན་པར་བྱ། །དབུགས་ཆེན་ཕྱིན་པའི་རྣལ་འབྱོར་ལ།།

རིན་ཆེན་བདུན་ཉིད་ངེས་པར་འཐོབ། །ལུང་ཆེན་ཐོབ་པའི་རྣལ་འབྱོར་ལ། །གཡུང་དྲུང་བརྒྱད་དག་ཐོབ་པ་ཡིན།།

རྩལ་ཆེན་རྫོགས་པའི་རྣལ་འབྱོར་པས། །རྩལ་བཅུའི་ཁྱད་པར་དེ་ཉིད་ཐོབ། ཀུན་གྱི་བླ་མ་དམ་པས་ནི།།

ཏོག་སྟོང་འབར་བ་བླ་མེད་ཐོབ།།

གྲོགས་པོ་དག ཅེས་བོས་ནས། དེ་ཡང་བསྐུར་བས་ཐོབ་ཚུལ་བསྟན་པ་ཉིད་འདི་ལྟར་ཐོབ་པར་རིག་པར་བྱ་སྟེ། གང་འདིར་བླ་མ་དམ་པ་ལམ་ལྔ་གོང་མ་གོང་མ་ལ་བཞུགས་པ་དག་གིས་དབང་གི་ཐུགས་རྗེའམ་སྙིང་རྗེའི་ཡུལ་དུ་གྱུར་པའི་སློབ་བུ་ལམ་ལྔ་འོག་མ་འོག་མར་ཞུགས་པ་རྣམས་ལ་རྟོགས་པ་དང་ནུས་པ་ཁྱད་པར་ཅན་ལ་ཕན་པའི་བྱིན་རླབས་ལྔ་པོ་སོ་སོར་འབྱུང་བ་ཡི་དབང་ལྔ་གང་ཡང་རུང་བ་བསྐུར་བ་ནི། རིམ་པས་དང་པོར་འདུན་པ་སེམས་པའི་རྣལ་འབྱོར་པ་ཚོགས་ལམ་ལས་དང་པོ་པ་དག་ལ། གསུང་རབ་སྡེའི་གླེགས་བམ་ཡན་ལག་བཅུ་གཉིས་ཀྱི་དབང་རྫས་སྦྱིན་ནས་ཉན་པའི་དབང་བསྐུར་བར་བྱ་སྟེ་ཉན་ཅིང་སློབ་པའི་རྟེན་ཡིན་པས་སོ། །འདིར་གསུང་རབ་ཡན་ལག་བཅུ་གཉིས་ནི་མདོ་སྔགས་སྤྱི་ཁྱབ་ཡིན་པ་དང༌། དེའི་འཐད་པ་དང་བཅས་ཀུན་མཁྱེན་དམ་པ་རིན་པོ་ཆེས་གསུངས་པར་ཕྱག་མཆན་ལས་འབྱུང༌། གང་སྦྱོར་ལམ་པ་རིགས་ཆེན་འབྱེད་པ་ཡི་རྣལ་འབྱོར་ པ་དག་ལ། ཐབས་དང་ཤེས་རབ་སྣང་སྟོང་གཉིས་མེད་ཀྱི་དོན་བསྒོམ་སྟེ། བདག ་གཞན་གྱི་དོན་ལ་སྦྱོར་བའི་ཕྱིར་དབང་རྫས་ཉི་ཟླ་གཉིས་ཀྱི་གཟུགས་ཉིད་ནི་སྦྱིན་ཏེ་ཐབས་དང་ཤེས་རབ་དབྱེར་མེད་པའི་དབང་མཆོག་བསྐུར་བར་བྱ་བ་ཡིན་ཞིང༌། རྣམ་པ་གཞན་དུ་ཐབས་དང་ཤེས་རབ་ཀྱི་བྱང་སེམས་སྦྱིན་པའང་ཡིན་ནོ།།

རང་གི་མཚན་ཉིད་མངོན་སུམ་དུ་མཐོང་བས་དབུགས་ཆེན་འབྱིན་པའི་རྣལ་འབྱོར་འཇིགས་པ་ལྔ་ལས་འདས་པའི་མཐོང་ལམ་པ་དག་ལ་འཁོར་ལོར་སྒྱུར་བའི་རྒྱལ་པོའི་ཆ་བྱད་ཀྱིས་བདག་གཞན་གྱི་དོན་བྱ་བའི་ཕྱིར། དབང་རྫས་རིན་ཆེན་སྣ་བདུན་ཉིད་ལ་བརྟེན་ནས་དོན་གཉིས་ཕུན་སུམ་ཚོགས་པ་ལ་སྤྱོད་པའི་དབང་དམ་པ་ངེས་པར་ཐོབ་པ་ཡིན་ནོ། །མཐོང་བའི་དོན་ལ་མཉམ་པར་བཞག་པས་ལུང་བསྟན་པ་ཆེན་པོ་གསུམ་ཐོབ་པའི་རྣལ་འབྱོར་པ་སྒོམ་ལམ་པས་ནི་དམ་པ་རྣམས་ཀྱི་ཐུགས་འགྱུར་བ་མེད་པས་གཡུང་དྲུང་གི་རྫས་སུ་བྱིན་གྱིས་བརླབས་པའི་བཀྲ་ཤིས་རྫས་བརྒྱད་དག་གི་དབང་རྫས་སྦྱིན་ཏེ་བསྐུར་བས་དབང་མཆོག་ལེགས་པར་ཐོབ་པ་ཡིན་ནོ། །༼༡༥༥༽དངོས་གྲུབ་དང་མཐུ་ལ་སོགས་པའི་རྩལ་ཆེན་པོ་རྫོགས་པའི་རྣལ་འབྱོར་པ་མཐར་ལམ་པས་ནི་སྟོབས་བཅུས་མི་མཐུན་པ་གནོན་པའི། སྟོབས་ཆེན་པོའི་རྩལ་བཅུའི་ཁྱད་པར་དེ་ཉིད་ཀྱིས་དབང་མཆོག་དམ་པ་ངེས་པར་ཐོབ་པར་འགྱུར་རོ། །ས་ཀུན་གྱི་བླ་མའམ་ཡང་ཐོག་ཏུ་ཕྱིན་ཏེ་རྫོགས་པ་སྤྱིར་ཆིབ་ཀྱི་ས་གནས་པའི་དམ་པས་ནི། རིན་པོ་ཆེ་ཏོག་སྟོང་འོད་འབར་བའི་རྫས་ཏེ་དབུ་རྒྱན་རྩེ་བྲན་བཅུ་གསུམ་པ་ལ་བརྟེན་ཏེ་བསྐུར་བས་ཀུན་རྫོགས་བླ་ན་མེད་པའི་དབང་མཆོག་ཐོབ་པ་ཡིན་ནོ། །དེ་ལྟར་དེ་དག་ནི་རང་རང་གི་རྩལ་དང་ཆ་མཐུན་དུ་སྦྱིན་པའོ།།

བརྒྱད་པ་ཞར་ལ་མ་ཐོབ་པར་བཤད་པའི་སྐྱོན་བསྟན་པ་ནི།

དགོངས་པ་ཀུན་འདུས། ཞེས་པ་ནས། མཐོང་བར་མི་འགྱུར་རོ། །ཞེས་པའི་བར་གྱིས་བསྟན་ཏེ།

དགོངས་པ་ཀུན་འདུས་གསང་ཆེན་འདི། །མ་ཐོབ་གཟུ་ལུམ་རང་བཤད་པ།།

རབ་འབྱམ་བསྟན་པ་གང་བཙལ་ཡང་། །དམ་པ་མཐོང་བར་མི་འགྱུར་རོ།།

རྒྱལ་བའི་དགོངས་པ་ཀུན་ནས་འདུས་པའི་གསང་བ་ཆེན་པོའི་རྒྱུད་རྒྱལ་དཔག་དཀའ་བ་འདི་ཉིད་དབང་མ་ཐོབ་པར་གཟུ་ལུམ་དང་རས་ཆོས་བྱེད་དེ་རང་དབང་དུ་བཤད་པའི་ཉེས་པ་ནི། བཀའ་རབ་འབྱམས་ཀྱི་བསྟན་པ་ཀུན་ལ་བལྟས་ཏེ་དོན་ལ་བརྩལ་ཞིང་སྒྲུབས་པར་བྱས་ན་ཡང༌། ཆོས་ཉིད་རྟོགས་པའི་དོན་གྱི་འབྲས་བུ་དམ་པ་ཡང་དག་པར་མཐོང་བར་མི་འགྱུར་ཏེ། དེ་ཅིའི་ཕྱིར་ཞེ་ན། བཀའ་རྣམ་གཉིས་བཅག་པ་དང༌། གཞུང་དང་འགལ་བའི་ལས་གཉིས་བྱས་པའི་ཕྱིར་རོ།།

གསུམ་པ་གཅེས་པར་གདམས་པ་ནི།

ཇི་ལྟར་རྒྱལ་རིགས། ཞེས་པ་ནས། བྱ་བ་རབ་ཏུ་གཅེས། །ཞེས་པའི་བར་གྱིས་བསྟན་ཏེ།

ཇི་ལྟར་རྒྱལ་རིགས་རྒྱུད་བྱུང་བས། །མང་པོས་དབང་པོར་དཔོན་བསྟབས་ཏེ། །འཁོར་ལོ་ལ་སོགས་རིན་ཆེན་གྱིས། །ཀུན་ལ་དབང་སྒྱུར་ཐོབ་པ་ལྟར། །དེ་བཞིན་རྣལ་འབྱོར་རྒྱུད་བྱུང་བ། །ཆོས་ཀྱི་རྒྱལ་པོར་དབང་བསྟབས་ཏེ། །ཏོག་སྟོང་འབར་བ་ལ་སོགས་པས། །ཁྱད་པར་བླ་མ་དམ་པར་འགྲོ། །འདི་ནི་བླ་མའི་ཁྱད་པར་ཏེ། །རྒྱལ་སར་ངེས་པར་འབྱུང་བ་ཡི། །རྩལ་གྱིས་བགྲོད་ཅིང་བསླབ་པའི་མཐའ། །གོམས་པར་བྱ་བ་རབ་ཏུ་གཅེས།།

རིམ་པ་དབང་གིས་བགྲོད་དགོས་པར་དཔེ་དོན་གཉིས་བསྟན་པ་སྟེ། དཔེ་ཇི་ལྟར་ན་འཁོར་ལོས་སྒྱུར་བའི་རྒྱལ་པོའི་རིགས་རྒྱུད་དུ་བྱུང་བའི་རྒྱལ་བུ་མཚན་དང་ལྡན་པ་ལ་འབངས་མང་པོས་དབང་པོར་གྱུར་པའི་དཔོན་གྱི་གོ་ས་བསྟབས་ཏེ་འཁོར་ལོ་ལ་སོགས་པ་རིན་ཆེན་སྣ་བདུན་རྣམས་ཀྱིས་དབང་བསྐུར་བས། མགོ་ནག་ཀུན་ལ་དབང་བསྒྱུར་པའི་རྒྱལ་སྲིད་ཀྱི་མངའ་ཐང་ཆེན་པོ་ཐོབ་པ་ལྟར། དོན་ཡང་དེ་བཞིན་དུ་གསང་སྔགས་གསང་བ་དམ་པའི་རྣལ་འབྱོར་མཆོག་གི་རྒྱུད་དུ་བྱུང་བའི་རིགས་ལྡན་དམ་པ་ལ་རྩལ་དང་འཚམས་པར་དབང་བསྐུར་བའི་རིམ་པས་ཆོས་ཀྱི་རྒྱལ་པོར་འགྱུར་བའི་དབང་མཆོག་རྣམས་ཀྱིས་གོ་ས་བསྟབས་ཏེ། རིན་པོ་ཆེ་ཏོག་སྟོང་འོད་ཟེར་འབར་བ་ལ་སོགས་པའི་དབང་རྫས་རྣམས་ལ་བརྟེན་པས། འོག་མའི་ས་ལས་གོང་མའི་ཁྱད་པར་གྱི་བླ་མ་དམ་པར་རིམ་པར་འགྲོ་ཞིང་བགྲོད་པ་ཉིད་དེ། ཐབས་འདི་༼༡༥༦༽ནི་རིག་པའམ་བླ་མའི་ཁྱད་པར་ལ་བརྟེན་ཏེ། མཐར་ཐུག་གི་རྒྱལ་སར་ངེས་པར་འབྱུང་བ་ཡི་དབང་གིས་སྒྲིབས་པའི་རིམ་པ་ལྟར་རང་གི་རིག་པའི་རྩལ་གྱིས་གོང་ནས་གོང་དུ་བགྲོད་ཅིང་མཐར་ཕྱིན་པར་འགྱུར་བའི་བསླབ་པའི་མཐའ་དམ་པ་ཡིན་པས། ཚུལ་འདི་ལ་འབད་ཅིང་གོམས་པར་བྱ་བ་ཉིད་རབ་ཏུ་གཅེས་པ་ཉིད་དོ། །ཞེས་གདམས་པར་མཛད་པའོ།།

བཞི་པ་ཞབས་བསྡུ་བ་ནི།

ཀྱེ་གྲོགས་པོ། ཞེས་པ་ནས། ཐོབ་པར་འགྱུར་རོ། །ཞེས་པའི་བར་གྱིས་བསྟན་ཏེ།

ཀྱེ་གྲོགས་པོ་དག་དེ་དག་ནི། ཐམས་ཅད་འདུ་བར་བྱ་བ་ཡོངས་སུ་བགྲོས་པར་ཤེས་པར་བྱའོ། །དེ་སྐད་ཅེས་སྨྲས་པས། དམན་པ་དམ་པ་དག་ལུང་དམ་པ་བསྟན་པའི་དྲོད་ཐོབ་པར་གྱུར་ཏོ།།

ཀྱེ་གྲོགས་པོ་དག བཤད་པ་དེ་དག་ནི། ཐམས་ཅད་དབང་དུ་འདུ་བར་བྱ་བའི་ཐབས་རྨད་དུ་བྱུང་བ་ཉིད་ཡོངས་སུ་བགྲོས་པ་ཡིན་པར་ཤེས་པར་བྱའོ། །སྟོན་པ་སྐྱེས་བུ་ཆེན་པོས་དེ་སྐད་ཅེས་སྨྲས་ཏེ་བཀའ་སྩལ་པས། འཁོར་དམན་པ་རིགས་ཅན་དམ་པ་དག་རང་རང་གི་རྩལ་ཚད་ཀྱིས་དབང་སོ་སོར་བསྐུར་བའི་ཡོན་ཏན་གྱིས་གར་འབྱུང་བའི་ལུང་དམ་པ་བསྟན་པའི་དྲོད་ཐོབ་སྟེ་རིག་པའི་ཉམས་རྙེད་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྣལ་འབྱོར་དམ་པ་ལུང་བསྟན་པའི་ལེའུ་སྟེ་བདུན་ཅུ་པའོ།།

སངས་རྒྱས་ཀུན་གྱི་དགོངས་འདུས་པའི་མདོ་ཆེན་པོ་ལས། རྣལ་འབྱོར་དམ་པ་ལམ་ལྔར་ལུང་བསྟན་ཏེ་མཐར་བྱང་ཆུབ་ཆེན་པོར་སངས་རྒྱས་པའི་ཚུལ་བསྟན་པའི་ལེའུ་སྟེ་བདུན་ཅུ་པ་ཉིད་རྣམ་པར་འགྲེལ་ཏེ་བསྟན་པའོ།། །།

ལེའུ་དོན་གཅིག་པ་རྣལ་འབྱོར་སྤྱོད་འཇུག

༈ དྲུག་པ་སྤྱོད་པས་ལ་དོར་བ་ལ་བསླབ་པ་གླང་པོ་ཆེ་ཆུར་འཇུག་པ་ལྟར་བཤད་པ་ལ་བཞི་སྟེ། ཆོས་ཉིད་ཀྱི་རྗེས་སུ་སྤྱོད་པར་གདམས་པ་སྤྱིར་བསྟན་པ། སྤྱོད་པའི་ངོ་བོ་བྱེ་བྲག་ཏུ་བཤད་པ། བསླབ་པ་གཅེས་པར་གདམས་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། དག་ཀྱང་དེ་ལྟར་རོ། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་བའི་བདག་པོ་དེས། དམན་པའི་ལུས་ཀྱི་སེམས་དཔའ་རྣམས་ལ་སྨྲས་པ། ཀྱེ་གྲོགས་པོ་དག་ལ་དོར་བར་བྱ་བ་ནི་འདི་ལྟ་སྟེ། གང་གོ་ཆ་གྱོན་པའི་རྗེས་སུ་མི་ལྡོག་པར་འགྲོ་བ་སྟེ། འདི་ལྟར་ཇི་བཞིན་པའི་རྗེས་སུ་ཇི་སྙེད་པ་འགྲོ་ལ། ནམ་མཁའི་རྗེས་སུ་འབྱུང་བ་འགྲོ་བ་བཞིན། སེམས་ཉིད་ཀྱི་རྗེས་སུ་སེམས་ལས་བྱུང་བ་འགྲོ་བ་ཡིན། ཆོས་ཉིད་ཀྱི་རྗེས་སུ་ཆོས་ཐམས་ཅད་འགྲོ་བ་ཡིན། དེ་བཞིན་དུ་དགོངས་པ་དམ་པའི་རྗེས་སུ་གང་གསུངས་པ་དང་། གང་མཛད་པ་ཐམས་ཅད་འགྲོ་བས་ན། དགོངས་པ་ཀུན་ནས་འདུས་པ་ཇི་ལྟར་བཤད་པ་བཞིན་དུ། གང་དུ་སྤྱོད་པ་དག་ཀྱང་དེ་ལྟར་རོ།།

ལེའུ་འདིས་དྲང་དོན་སྟོན་ནོ། །རིམ་པ་དབང་གིས་བགྲོད་པ་བསྟན་མ་ཐག་པ་དེ་ནས་ཡང་སྐྱེས་བུ་ཆེན་པོ་གསང་བ་པའི་བདག་པོ་དེས། འཁོར་དམན་པའི་ལུས་ཀྱི་སེམས་དཔའ་རྣམས་ལ་སྨྲས་པ། ཀྱེ་གྲོགས་པ་དག ཅེས་བོས་ནས་དྲུག་པ་ལ་སྤྱོད་པས་དོར་བར་བྱ་བའི་བསླབ་པ་ཉེ་བར་བསྟན་པ ནི།འདི་ལྟ་སྟེ། སྤྱིར་ཟག་བཅས་ཀྱི་སྤྱོད་པ་ཡང་ཟག་མེད་མཐོང་བའི་ཐབས་ཀྱིས་རྗེས་སུ་འགྲོ་བ་ཡིན་ཞིང་། ཁྱད་པར་དུ་ཟག་བཅས་པས་རང་གཞན་གྱི་དོན་དུ་སྤྱོད་པ་རང་རང་གི་ལྟ་བ་དང་ཏིང་ངེ་འཛིན་དང་མི་འགལ་བར་རྗེས་སུ་འགྲོ་བ་དང་། ཟག་པ་མེད་པས་སྤྱོད་པའང་དེ་ལྟར་རྟོགས་པ་དང་མཐུན་པ་དང་། ལམ་ཅིག་ཆར་བའང་དེ་བཞིན་དུ་ངེས་པས་གང་ཡིད་ལ་གོ་ཆ་གྱོན་ཏེ་དམ་༼༡༥༧༽བཅས་པའི་ལྟ་བས་ཆོད་ཚད་ཀྱི་རྗེས་སུ་སྤྱོད་པ་མི་ལྡོག་པར་འགྲོ་བ་སྟེ། ཚུལ་དེའི་འཐད་པ་ཡང་འདི་ལྟར་ཆོས་རྣམས་ཀྱི་ཆོས་ཉིད་མ་བཅོས་པའི་གནས་ལུགས་ཇི་བཞིན་པའི་རྗེས་སུ་འཁོར་བ་དང་མྱ་ངན་ལས་འདས་པའི་ཆོས་མང་པོ་བརྗོད་པ་ལས་འདས་པའི་ཇི་སྙེད་པ་རྣམས་འགྲོ་ཞིང་འགག་པ་མེད་པའི་ངང་ལས་མི་འདའ་བ་ནི། དཔེར་ན་ནམ་མཁའི་རྗེས་སུ་འབྱུང་བ་ཆེན་པོ་བཞི་འགྲོ་བ་ཇི་ལྟ་བ་བཞིན་ཏུ། རང་རིག་པའི་སེམས་ཀྱི་དེ་ཁོ་ན་ཉིད་ཀྱི་རྗེས་སུ་སེམས་ལས་བྱུང་བའི་འདུ་བྱེད་སྣ་ཚོགས་པ་རྣམས་འགྲོ་བ་ཡིན་ཞིང༌། ཆོས་ཉིད་མ་བཅོས་པའི་དེ་བཞིན་ཉིད་ཀྱི་རྗེས་སུ་ཆོས་ཅན་དུ་སྣང་བའི་ཆོས་སོ་ཅོག་ཐམས་ཅད་འགྲོ་བ་ཡིན་པ་ནི་འདིར་དོན་དཔེར་བླང་བ་ཁོ་ནའོ། །དོན་དཔེར་བླང་བ་དེ་བཞིན་དུ་རྒྱལ་བ་རྣམས་ཀྱི་དགོངས་པ་དམ་པ་གསང་བའི་དབྱིངས་མཉམ་པ་ཆེན་པོ་རྟོགས་པའི་ལྟ་བའི་རྗེས་སུ་གང་གསུང་དུ་བརྗོད་པའི་ངག་གི་སྤྱོད་པ་དང༌། གང་ཕྲིན་ལས་ཀྱི་མཛད་པའི་ལུས་ཀྱི་སྤྱོད་པ་ཐམས་ཅད་དེ་ལས་མི་འདའ་བར་འགྲོ་ཚུལ་གསུམ་གྱི་ཚུལ་ལྟར་རྗེས་སུ་འགྲོ་བས་ན། དགོངས་པ་ཀུན་ནས་འདུས་པའི་རྒྱུད་མཆོག་དམ་པ་འདི་ལས་ཇི་ལྟར་བཀའ་སྩལ་ཞིང་བཤད་པ་ཇི་ལྟ་བ་བཞིན་དུ། གང་རྣལ་འབྱོར་པ་ལམ་པ་རྣམས་ཀྱི་ངག་དང་ལུས་ཀྱི་ཀུན་ཏུ་སྤྱོད་པ་དག་ཀྱང་ཚུལ་དེ་ལྟར་ལྟ་བའི་རྗེས་སུ་མཐུན་པར་སྤྱོད་པ་ནི་སྤྱད་ཐབས་དོན་དང་མཐུན་པ་ཡང་དག་པ་ཁོ་ནར་འགྱུར་རོ།།

གཉིས་པ་སྤྱོད་པའི་ངོ་བོ་བྱེ་བྲག་ཏུ་བཤད་པ་ལ་གཉིས། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཀྱེ་གྲོགས་པོ་དག དེ་ཡང༌། ཞེས་པ་ནས། མེ་དཔུང་ཆུ་བོ་འདྲ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་ཡང་འདི་ལྟ་སྟེ། མཉམ་དང་མི་མཉམ་མི་མཉམ་མཉམ། །ཀུན་ནས་མི་མཉམ་ཡོངས་ཀྱིས་མཉམ། །གསང་སྔགས་སྤྱོད་པའི་ཁྱད་པར་ཡང་། །གང་དང་དོན་གྱིས་མཉམ་པར་སྤྱད། །བྱིན་གྱིས་བརླབས་ཀྱིས་སྤྱོད་པ་འམ། །དབང་སྒྱུར་ཐབས་ཀྱི་སྤྱོད་པ་སྟེ། །དཔེར་ན་ནམ་མཁའ་རྒྱལ་པོ་འམ། །ཇི་ལྟར་མེ་དཔུང་ཆུ་བོ་འདྲ།།

དེ་དག་རྒྱས་པར་བསྟན་པའི་ཕྱིར། ཀྱེ་གྲོགས་པོ་དག ཅེས་བོས་ནས། ལྟ་བའི་རྗེས་སུ་སྤྱོད་ཐབས་ཀྱི་གྲོགས་ཉེ་བར་བསྟན་ཏེ་ལྟ་སྤྱོད་མཐུན་པ་དགོས་པའི་ཚུལ་དེ་ཡང་རྒྱས་པར་ཉེ་བར་སྟོན་པ་འདི་ལྟ་སྟེ། མཉམ་ཉིད་ཆེན་པོ་བླང་དོར་མེད་པའི་དོན་མངའ་བའི་རྒྱལ་བ་རྣམས་དང༌། དེ་ལྟར་མི་མཉམ་པར་བཟང་ངན་སྤང་ལེན་གྱི་མཐའ་ལ་ཞེན་པའི་འཁོར་བ་ནི། རྟོགས་པ་དང་མ་རྟོགས་པའི་དབང་གིས་མི་མཉམ་པ་དང་མཉམ་པའི་བདེ་སྡུག་གི་ཁྱད་པར་ཤིན་ཏུ་ཆེ་ཡང༌། ངོ་བོ་ཉིད་མཐའ་གཉིས་ལས་གྲོལ་བའི་མཉམ་པ་ཆེན་པོའི་དོན་ལ་ཆེ་ཆུང་མེད་པར་ཡེ་ཤེས་སུ་མཉམ་པ་ཡིན་པས། རྒྱུ་རྐྱེན་སོ་སོ་ལས་འབྲས་བུའི་ཁྱད་པར་སྣང་བས་ཀུན་ནས་མི་མཉམ་པ་ཡང་སེམས་༼༡༥༨༽ཀྱི་དཀྱིལ་འཁོར་འོད་གསལ་བའི་ཆོས་ཉིད་དུ་ཡོངས་ཀྱིས་མཉམ་པ་ཆེན་པོ་ཁོ་ནའོ། །འོ་ན་ཐམས་ཅད་དུ་གཅིག་པ་ཁོ་ནའམ་ཞེ་ན། དེ་ལྟར་མི་མཉམ་པའང་རྒྱུ་རྐྱེན་འབྲས་བུ་རིལ་ནས་སོ་སོ་བར་གྱུར་པས་མི་མཉམ་པའི་ཆ་ཤས་ཡོངས་ཞིག་ཀྱང་འཁྲུལ་པའི་ངོ་ལ་ཁྱད་པར་ལྟར་སྣང་བའོ། །འོན་ཀྱང་དེ་དག་གསང་སྔགས་ཀྱི་ངོ་བོ་སེམས་ཀྱི་དཀྱིལ་འཁོར་འོད་གསལ་བས་སྣུམས་ཚབས་ཆེ་ཆུང་མེད་པའི་ཕྱིར། མ་འདྲེས་ལ་ཡོངས་སུ་རྫོགས་པ་ཁོ་ན་སྟེ། དེ་ལྟར་རྟོགས་པ་ནི་ལྟ་བའི་མཆོག་དམ་པར་གྱུར་པའོ། །འོ་ན་ཇི་ཙམ་གྱིས་མཉམ་ཇི་ཙམ་གྱིས་མི་མཉམ་ཞེ་ན། འཁོར་བའི་རྒྱུ་མ་རིག་པ། རྐྱེན་ལས་དང་ཉོན་མོངས་པ། འབྲས་བུ་སྡུག་བསྔལ་ཡིན་ལ། མྱ་ངན་ལས་འདས་པའི་རྒྱུ་ཀུན་གཞི། རྐྱེན་ལུང་རིགས་མན་ངག་དང་རང་རིག་པའི་ཚད་མ། འབྲས་བུ་སྐུ་དང་ཡེ་ཤེས་ཡིན་པས་རང་བཞིན་སེམས་ཉིད་དོན་གྱི་དཀྱིལ་འཁོར་ངང་གི་ཐིག་ལེ་ཆེན་པོར་མཉམ་པ་ཡིན་ཏེ། གསང་བདག་དགའ་རབ་དཔའ་བོས་དཀྱིལ་འཁོར་གྱི་ཀློང་ལས། འཁོར་འདས་ཕྱི་ནང་ཆོས་ཐམས་ཅད། །རང་བཞིན་མཚན་ཉིད་རྣམ་པར་དག །མ་འདྲེས་ཡོངས་རྫོགས་ལྷུན་གྱིས་གྲུབ། །བདེ་ཆེན་ངང་དུ་མཉམ་པས་གདེང༌། །ཞེས་དང༌། ཀུན་གྱི་ངོ་བོ་བྱང་ཆུབ་སེམས། །སྙིང་པོ་མ་བཅོས་རང་གསལ་བ། །དབྱེར་མེད་ཡེ་ནས་དོན་གྱིས་རྫོགས། །ཀུན་ནས་བཟླུམས་པར་གནས་པ་ཡིན། །ཞེས་སོ། །ཚུལ་དེ་ལྟ་བས་ན་གསང་སྔགས་གསང་མཆོག་སྙིང་པོའི་ལྟ་བའི་རྗེས་སུ་འགྲོ་བར་སྤྱོད་པའི་ཁྱད་པར་སྤྱོད་པ་ཡང་རྣལ་འབྱོར་པ་གང་དག་ལྟ་བ་མཉམ་པ་ཆེན་པོ་རྟོགས་པའི་ལམ་ལྔའི་རིམ་པའི་ཏིང་ངེ་འཛིན་གྱི་དོན་དང་ཡ་ཆར་མ་གྱུར་བར་བླང་དོར་མེད་པའི་ཚུལ་གྱིས་མཉམ་པར་སྤྱོད་དགོས་པ་ཉིད་དོ། །དེ་དག་གི་སྤྱོད་ཡུལ་གྱི་ཚུལ་ཇི་ལྟར་སྤྱད་ན། ལྟ་བས་ཇི་ལྟ་བར་མཇལ་བའི་ཕྱིར། རྟོགས་པའི་ཏིང་ངེ་འཛིན་གྱི་དགོངས་པའི་བྱིན་གྱིས་བརླབས་པའི་རང་སྣང་གི་ཤུགས་ཀྱིས་སྤྱོད་པའམ། སྦྱོར་སྒྲོལ་ལ་སོགས་པ་ལ་རྟོགས་པའི་ལྟ་བས་དབང་བསྒྱུར་ནས་སྤྱོད་པའམ། ཐབས་ཚུལ་གང་ཡང་མི་འགག་པར་འགྲོ་བ་འདུལ་བའི་ཐབས་ཀྱི་བརྟུལ་ཞུགས་ཆེན་པོའི་སྤྱོད་པ་སྟེ་གསུམ་མོ། །དེ་དག་གི་མཐུན་པའི་དཔེ་ཇི་ལྟ་བུ་ཞེ་ན། དེ་དག་དཔེས་མཚོན་ན། སྤྱོད་པ་དང་པོ་ནི་དཔེར་ན་ནམ་མཁའ་དང་འདྲ་བ་དང༌། གཉིས་པ་ནི་དཔེར་ན་རྒྱལ་པོ་དང་འདྲ་བ་ལྟ་བུའི་སྤྱོད་པའམ། གསུམ་པ་ནི་ཇི་ལྟར་མེ་དཔུང་༼༡༥༩༽ཆེན་པོ་དང་ཆུ་བོ་ཆེན་པོ་དང་འདྲ་བ་ལྟ་བུར་སྤྱོད་དེ། དེ་དག་གི་དོན་དུ་གཅིག་པ་དཔེ་བཞིར་ཡང་འགྱུར་རོ། །དེ་ཡང་མེ་ཆུ་གཉིས་ནི་ཐབས་ཀྱིས་ཟིན་མ་ཟིན་གྱི་དཔེ་སྟེ། མེ་ཐབས་ཀྱིས་ཟིན་པ་དང་འདྲ་བར་ས་གོང་འོག་གི་སྤྱོད་པ་མ་འཁྱུགས་པ་དང༌། ཐབས་ཀྱིས་མ་ཟིན་པ་དང་འདྲ་བར་ས་འོག་མ་བས་གོང་མའི་སྤྱོད་པ་བྱས་པ་ལྟ་བུ་དང༌། དེས་ན་ཐབས་དང་ལྡན་ན་མེས་རྩྭ་སྤུར་བསྲེགས་པ་དང་འདྲ་བར་དུས་ཀྱི་སྤྱོད་པས་ལས་དང་ཉོན་མོངས་པ་དང་ཤེས་བྱའི་སྒྲིབ་པ་བསྲེག་པར་བྱེད་ལ། ཆུ་ཡང་ཐབས་ཀྱིས་ཟིན་མ་ཟིན་མེ་དང་འདྲ་ཞིང་སྒྲིབ་པ་གསུམ་འཁྲུད་པར་བྱེད་དོ། །ཡང་ན་མེ་ནི་དངོས་འཛིན་སྲེག་པའི་དཔེ། ཆུ་ནི་རྒྱུན་མི་ཆད་པའི་དཔེ་དང༌། མེ་ཆུ་ལྟ་སྒོམ་དང་ལྡན་ན་འགལ་རྐྱེན་རྣམས་མཐུན་རྐྱེན་དུ་ཤར་བའི་ཡང་དཔེའོ། །དེ་ལྟར་སྤྱོད་པ་གསུམ་གྱི་ཁྱད་པར་ཡང༌། རྩ་བའི་རྒྱུད་ལས། གསང་སྔགས་ཆེན་པོའི་ཁྱད་པར་ནི། །ཐམས་ཅད་ཐམས་ཅད་བྱའོ་ཅོག །བྱིན་གྱིས་རླབས་ཀྱིས་སྤྱོད་པའམ། །དབང་བསྒྱུར་ཐབས་ཀྱིས་སྤྱོད་པ་སྟེ། །དཔེར་ན་ནམ་མཁའ་རྒྱ་མཚོའམ། །ཇི་ལྟར་མེ་དཔུང་རྒྱལ་པོ་འདྲའོ། །ཞེས་པ་ལྟར་ཏེ། དེ་བས་ན་བྱིན་གྱིས་བརླབས་ཀྱི་སྤྱོད་པ་ནི་དཔེར་ན་ཡུལ་ཆེ་ན་ནམ་མཁའ་ཆེ། ཡུལ་ཆུང་ན་ནམ་མཁའ་ཆུང་བ་དང་འདྲ་བར་ལམ་གོང་འོག་ལ་ཆོས་ཉིད་རྟོགས་ཚབས་ཆེ་ཆུང་ཡོད་པས། སྤྱོད་པ་ལ་ཡངས་དོག་འོངས་ཏེ། བདག་དོན་གྱི་སྤྱོད་པའོ། །དབང་བསྒྱུར་གྱི་སྤྱོད་པ་ནི། རྒྱལ་པོ་ལ་གདུལ་ཞིང་རྒྱ་ཆེ་ཆུང་ཡོད་པ་ལྟར། ལམ་གོང་འོག་ལ་བློ་ཆེ་ཆུང་ཡོད་པས་སྤྱོད་པ་རྒྱ་ཆེ་ཆུང་ཡོད་དེ་གཞན་དོན་གྱི་སྤྱོད་པའོ། །ཐབས་ཀྱི་སྤྱོད་པ་ནི། གླང་པོ་ཆེ་ཆུར་འཇུག་པ་དང་འདྲ་སྟེ། རབ་ཐད་ཀར་གཅོད་པ། རྩལ་ཞན་པའི་སྒྱིད་ཆུའི་གཞོལ་ཕྱོགས་སུ་འགྲོ་བ་བཞིན་ལམ་པ་ལ་བློ་ཆེ་ཆུང་ཡོད་པས་སྤྱོད་པ་བཟང་ངན་འོངས་ཏེ། བདག་གཞན་གཉིས་ཀའི་སྤྱོད་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། བྱིན་གྱིས་རླབས་ཀྱི་སྤྱོད་པ། དབང་བསྒྱུར་གྱི་སྤྱོད་པ། འགྲོ་འདུལ་ཐབས་ཀྱི་སྤྱོད་པའོ། །དང་པོ་ནི།

དེ་ཡང་དེ་ཡུལ། ཞེས་པ་ནས། ཉིད་ཀྱི་བརླབས་པ་ཡིན། །ཞེས་པའི་བར་གྱིས་བསྟན་ཏེ།

དེ་ཡང་དེ་ཡུལ་ཆེ་ཆུང་གིས། །ཁྱད་པར་ཉིད་ཀྱིས་བརླབས་པ་ཡིན།།

བྱིན་གྱིས་རླབས་ཀྱི་སྤྱོད་པ་དེ་ཡང་དཔེར་ན་དེ་ཉིད་སྣང་བའི་ཡུལ་ཆེ་ཆུང་གི་ནམ་མཁའ་ལ་ཁྱད་པར་ཡོད་པ་ལྟར་དགོངས་པ་ཆེ་ཆུང་གིས་རིམ་པའི་མཐོ་དམན་ལྟར་སྤྱོད་པའི་ཁྱད་པར་ལ་ཆེ་ཆུང་གིས་རྣམ་པར་བྱུང་བ་ཡང་༼༡༦༠༽ལྟ་བ་ཉིད་ཀྱིས་བྱིན་གྱིས་བརླབས་པ་ཡིན་པས་རྣལ་འབྱོར་ལྔ་དང་བཅུའི་རིམ་པ་ལྟར་སྤྱོད་པ་ཡང་ཁྱད་པར་ཅན་དུ་ངེས་པའོ།།

གཉིས་པ་དབང་བསྒྱུར་གྱི་སྤྱོད་པ་ནི།

རྒྱལ་པོ་དེ་ཡང༌། ཞེས་པ་ནས། སྔགས་ཚུལ་དེ་ལྟར་སྣང༌། །ཞེས་པའི་བར་གྱིས་བསྟན་ཏེ།

རྒྱལ་པོ་དེ་ཡང་ཁྱད་པར་གྱིས། །དབང་སྒྱུར་བྱ་བའི་ཁམས་རྣམས་ལ།།

ཆེ་ཆུང་རིམ་པར་ཡོད་པ་བཞིན། །རྣལ་འབྱོར་སྔགས་ཚུལ་དེ་ལྟར་སྣང་།།

དཔེར་ན་རྒྱལ་པོ་དེ་ཡང་སྐུ་བསོད་ནམས་ཀྱི་སྟོབས་ཆེ་ཆུང་གི་ཁྱད་པར་གྱིས་མངའ་ཐང་གི་དབང་བསྒྱུར་བར་བྱ་བའི་ཡུལ་ལྗོངས་དང་གྲོང་ཁྱེར་དང་རྒྱལ་ཁམས་རྣམས་ལ་ཆེ་ཆུང་གི་རིམ་པ་ཡོད་པ་བཞིན་དུ། ཐེག་པ་མཆོག་གི་རྣལ་འབྱོར་པ་ཡིས་བདག་གཞན་གྱི་དོན་དུ་གསང་སྔགས་མཆོག་གི་སྤྱོད་ཚུལ་གྱི་ཁྱད་པར་ཡང༌། རྣལ་འབྱོར་རྣམ་པ་ལྔ་དང་བཅུའི་སྐབས་ཀྱི་སྤྱོད་པའང་དེ་ལྟར་སྐས་ཀྱི་གདངས་བུ་བཞིན་དུ་ཁྱ་པར་གྱི་རིམ་པར་སྣང་བ་ཡོད་དོ། །ལྔའི་སྤྱོད་པ་ནི་སྔར་བཤད་པ་དག་གོ །དེའང་དཔེར་ན། མཁར་གྱི་རྒྱལ་པོ་རྒྱལ་ཆེན་ལ་ངོ་དགའ་དགོས་པ་བཞིན་ཟག་བཅས་ཀྱི་རྣལ་འབྱོར་ལ་གནས་པའང་བག་ཚ་བ་དང་བཅས་ཏེ་ཟག་མེད་མཐོང་བའི་ཐབས་སྤྱོད་ལ་འབད་དགོས་ཤིང༌། གླིང་གཅིག་ལ་དབང་བའི་འཁོར་བསྒྱུར་ཡང་གོང་མ་ལ་བག་ཚ་བ་ཡོད་པ་ལྟར་དབུགས་ཆེན་འབྱིན་པའི་རྣལ་འབྱོར་པ་ཡང༌། གོང་མའི་ལྟ་དགོངས་ལ་གོམས་རིམ་གྱི་རྗེས་སུ་སྤྱོད་པ་ལྟོས་པའང་ཡིན་ལ། གླིང་བཞི་ལ་དབང་བའི་འཁོར་སྒྱུར་ལ་བག་ཚ་བ་མེད་པ་བཞིན་རྩལ་ཆེན་རྫོགས་པ་ལ་ལྟ་བའི་ཁྱད་པར་ལ་ལྟོས་པའི་སྤྱོད་པའི་ཐ་སྙད་མི་མངའ་འོ། །བཅུའི་སྤྱོད་པ་ནི་འཆད་པར་འགྱུར་རོ།།

གསུམ་པ་འགྲོ་འདུལ་ཐབས་ཀྱི་སྤྱོད་པ་ལ་གསུམ་སྟེ། སྤྱིར་བསྟན་པ། བྱེ་བྲག་ཏུ་བཤད་པ། ཞབས་བསྡུ་བའོ། །དང་པོ་ལ་གཉིས་ཏེ། དཔེ་དོན་སྦྱར་ཏེ་བསྟན་པ། བློ་ཆུང་གིས་བློ་ཆེ་བའི་རྗེས་སུ་སྤྱོད་ན་ལྟུང་བའོ། །དང་པོ་ནི།

ཐབས་ཆེན་སྤྱོད་ལ། ཞེས་པ་ནས། ཅིར་ཡང་བསྟན་པ་ཡིན། །ཞེས་པའི་བར་གྱིས་བསྟན་ཏེ།

ཐབས་ཆེན་སྤྱོད་ལ་འཇུག་པ་ཡང་། །བབ་རྩོད་ཐད་དུ་འཇུག་པ་སྟེེ། །དཔེར་ན་གླང་ཆེན་ཆུར་འཇུག་པ། །རབ་དང་ཀློང་ཆེན་བབ་མི་ལྟ། །དེ་ཡང་རྩལ་བགྱིད་དྲག་ཞན་གྱིས། །ལ་ལ་ཐད་དུ་གཅོད་པ་ལ། །ལ་ལ་ཆུ་ཡི་གཞོལ་ཕྱོགས་སོ། །དེ་ལྟར་རྣལ་འབྱོར་སྤྱོད་འཇུག་པ། །འབྲས་བུ་དོན་ལ་བབ་གཅོད་ཀྱང་། །རྩལ་འཕང་མཐོ་དམན་ཁྱད་པར་གྱིས། །ཇི་ལྟར་ནུས་ཚད་དེ་སྤྱོད་ཕྱིར། །ས་དང་གནས་སྐབས་ཡེ་ཤེས་དང་། །སྒྲིབ་དང་གོལ་ས་རྟོག་པ་དང་། །སྤྱོད་དང་དམ་ཚིག་ཏིང་འཛིན་དང་། །དུས་དང་དངོས་གྲུབ་མཐར་ཕྱིན་དང་། །ལྟ་བའི་ཁྱད་པར་གནས་འགྱུར་རྣམས། །ཐམས་ཅད་གཅིག་ལས་མེད་ན་ཡང་། །གྲངས་སམ་དབྱེ་བའི་བྱེ་བྲག་རྣམས། །སྣོད་ཀྱི་རྩལ་དང་སྦྱར་ནས་ནི། །ཁྱད་པར་ཅིར་ཡང་བསྟན་པ་ཡིན།།

དེ་ཡང་དཔེས་ཉེ་བར་མཚོན་པའི་ཕྱིར། ཐབས་མཆོག་གསང་བ་ཆེན་པོའི་སྤྱོད་པ་ལ་དངོས་སུ་འཇུག་པ་ན་ཡང༌། ཐེ་ཚོམ་མེད་པར་རང་རང་གི་བབ་ཚོད་ཀྱི་ཐད་དུ་ལྟ་བའི་རྗེས་སུ་མཐུན་པར་འཇུག་པ་སྟེ། དཔེར་ན་གླང་པོ་ཆེན་པོ་ཆུར་འཇུག་པ་ན། ཆུའི་རབ་དང་ཀློང་ཆེན་གྱི་བབ་གང་ལ་ཡང་མི་ལྟ་བར་འཇུག་པ་ཡིན་ལ། དེ་ཡང་སྟོབས་ཀྱི་རྩལ་དང་སྒྱིད་ཀྱི་ཁྱད་པར་དྲག་པ་དང་ཞན་པའི་རིམ་པ་ཉིད་ཀྱིས་རྩལ་དྲག་པ་ལ་ལ་དག་ཐད་ཀ་ཉིད་དུ་དྲང་པོར་གཅོད་པ་སྟེ། སྒྱིད་ཞན་པ་ལ་ལ་ཆུ་བོའི་གཞོལ་ཕྱོགས་སུ་བསེགས་སུ་འགྲོ་བའམ་བཤན་ཐབས་སུ་འགྲོ་བ་ལྟར་དུ་དོན་ལ་ཅིག་ཆར་བ་དང་རིམ་༼༡༦༡༽གྱིས་པའི་དཔེར་ཤེས་སོ། །ཚུལ་དེ་ལྟར་རྣལ་འབྱོར་པ་ཐབས་ཆེན་གསང་བའི་སྤྱོད་པ་ལ་འཇུག་པ་ཉིད་ན་ཡང༌། དགོངས་པ་དམ་པའི་འབྲས་བུའི་དོན་ལ་བབ་ཚོད་དུ་འཇུག་སྟེ་གཅོད་པར་བྱེད་ཀྱང༌། རྣལ་འབྱོར་པའི་བློ་ལ་ལམ་ལྔའི་རྩལ་འཕང་མཐོ་དམན་གྱི་ཁྱད་པར་ཡོད་པ་ཉིད་ཀྱིས་རང་རང་གི་ཇི་ལྟར་ནུས་པའི་ཚད་དེ་ལྟ་བའི་ཁྱད་པར་དང་སྦྱར་ནས་སྤྱོད་པ་ཡིན་པའི་ཕྱིར། རྩ་རྒྱུད་ལས། ས་དང་གནས་སྐབས་ཡེ་ཤེས་དང༌། །སྒྲིབ་དང་གོལ་ས་རྟོག་པ་དང༌། །སྤྱོད་དང་ཏིང་འཛིན་དམ་ཚིག་དང༌། །དུས་དང་དངོས་གྲུབ་མཐར་ཕྱིན་དང༌། །ལྟ་བའི་ཁྱད་པར་གནས་འགྱུར་རྣམས། །ཐམས་ཅད་གཅིག་ལས་མེད་ན་ཡང༌། །གྲངས་སམ་དབྱེ་བའི་བྱེ་བྲག་རྣམས། །སྣོད་ཀྱི་རྩལ་དང་སྦྱར་ནས་ནི། །ཆོས་རྣམས་ཀུན་གཞིར་གཅིག་པ་ལ། །ཀུན་གཞི་གནས་འགྱུར་རྣམ་པ་ལྔ༌། །བྱེ་བྲག་ལམ་ལྔའི་ཆོས་སུ་སྣང༌། །ཞེས་གསུངས་པ་ལྟར། ལྔར་བགྲང་བ་ནི་བཅུའི་ཡང་རྩ་བར་འགྱུར་པའི་ཕྱིར། བློ་རིམ་དུ་སྦྱོར་བའི་རབ་ཀྱི་ཆེད་དུ་བསྟན་ལ། དེ་བཞིན་དུ་བཅུར་བསྟན་པ་ནི་གསང་སྔགས་རིམ་འཇུག་གི་འབྲིང་གི་ཡུལ་དང༌། དེ་ལས་བཞི་བཅུར་སྤྲོས་པ་ནི་ཐ་མའི་དབང་དུ་གསུངས་པའོ། །དེ་བས་ན། ས་དང་ཞེས་པ་ལྔར་བགྲང་ན། འགྱུར་བ་མ་ངེས་པའི་ས། གལ་ཆེན་སྦྱོང་བའི་ས། རྟེན་པས་ཁྱད་པར་དུ་འགྲོ་བའི་ས། དམིགས་པས་འབྲས་བུ་སྐྱེ་བའི་ས། རྩལ་ཆེན་རྫོགས་པའི་སའོ། །དེ་ལས་བཅུར་བགྲང་བ་ནི། གཉིས་རྟེན་པ་གཞིའི་ས་དང༌། གལ་ཆེན་དེའི་ཆ་བཞི་པ་བསླབ་པ་རྒྱུན་གྱི་ས་དང༌། ལྔ་པ་བསོད་ནམས་གཏེར་གྱི་ས་དང༌། ཐ་མ་ལས་དབྱེ་བ། བརྒྱད་པ་གནས་པ་མི་འགྱུར་བའི་ས་དང༌། དགུ་པ་གདལ་བ་ཆོས་ཉིད་ཀྱི་ས་དང༌། བཅུ་པ་རྫོགས་པ་སྤྱིར་ཆིབ་ཀྱི་ས་རྣམས་སོ། །གནས་སྐབས་ཞེས་པ་རྩ་རྒྱུད་ལྟར་ན་གནས་དང་སྐབས་གཅིག་ཏུ་སྟོན་ཡང༌། བཤད་རྒྱུད་འདིར་ནི། འདུ་ཤེས་གནས་འགྱུར་བའི་གནས་དང་སྐབས་སོ་སོར་སྟོན་ཏེ། དེའང་གནས་ལྔ་ལས། དང་པོ་འདོད་པ་གྲུབ་པ་མཐར་ཕྱིན་པའི་གནས་ནི། ཇི་སྐད་དུ། རྐྱེན་གྱི་རྣལ་འབྱོར་བྱ་བྱེད་དང༌། །ཕྱི་པའི་སྟེགས་ལམ་རྫོགས་པ་དང༌། །འདི་ཉིད་སྔར་སྤྱོད་ཐམས་ཅད་ཀྱི། །འདོད་པའི་གསང་ལམ་རྙེད་པ་ནི། །ལས་མཐར་ཕྱིན་པས་འདིར་འཕྲད་ཅིང༌། །དེ་ལ་རྟེན་ཕྱིར་གནས་སུ་བརྗོད། །ཅེས་བྱའོ། །གཉིས་པ་བཟོད་པ་གྲུབ་པ་འཕགས་པའི་གནས་ནི། ཇི་སྐད་དུ། ཡང་དག་དོན་ལ་མི་༼༡༦༢༽སྐྲག་བཟོད། །དེ་ཕྱིར་རིགས་ངེས་གཟུངས་སྔགས་ཡོད། །དེ་ཕྱིར་འཕགས་པ་ཞེས་བྱ་སྟེ། །སྐྱེ་བོ་པ་ལས་འདས་པའི་གནས། །ཞེས་བྱའོ། །གསུམ་པ་བདེན་པ་གྲུབ་པ་ཡང་དག་པའི་གནས་ནི། ཇི་སྐད་དུ། སྒྲོ་སྐུར་མེད་པའི་གཉིས་མེད་དོན། །མཐོང་བ་མཐར་ཕྱིན་མི་བསླུ་ཞིང༌། །ཕྱིན་ཅི་མ་ལོག་ལ་བརྟེན་ཕྱིར། །དང་པོའི་དབུགས་ཆེན་ཕྱིན་པའི་གནས། །ཞེས་བྱའོ། །བཞི་པ་ལས་སུ་རུང་བ་སྦྱོར་བའི་གནས་ནི། ཇི་སྐད་དུ། མཐོང་ནས་གོམས་པ་མི་གཡོ་བའི། །གཉིས་མེད་གསལ་ལ་མི་གཡོ་བའི། །ཏིང་འཛིན་གོམས་པས་འབྲས་བུར་སྦྱོར། །ཐར་ལམ་ཐོབ་ལ་མ་རག་པའོ། །ཞེས་བྱའོ། །ལྔ་པ་ལྷུན་གྱིས་གྲུབ་པ་མཉམ་པའི་གནས་ནི། ཇི་སྐད་དུ། མཐོང་གོམས་སྟོབས་སུ་གྱུར་པ་ཡིས། །འབྲས་བུ་ཐོབ་པའི་སྐབས་ཡིན་ཞིང༌། །ཤིང་འབྲས་ཚོས་ཀྱི་དཔེ་ལྟ་བུས། །ཡོན་ཏན་རྫོགས་པར་བླང་དོར་མེད། །ཅེས་བྱའོ། །བཅུའི་དབང་དུ༌། གཉིས་པ་བརྟེན་པ་གྲུབ་པ་ལམ་གྱི་གནས་ཏེ་ལམ་རྣམས་ཀྱི་གཞིར་གྱུར་པའི་ཕྱིར་རོ། །བཞི་པ་བཟོད་པ་གྲུབ་པ་སློབ་པའི་གནས་ཏེ། ཟབ་མོའི་དོན་ལ་བཟོད་པ་ཐོབ་པས་ཡེ་ཤེས་འཕེལ་བར་བྱ་བའི་ཕྱིར། བསླབ་པ་བཅུ་ལ་སློབ་པའི་ས་ཡིན་པའི་ཕྱིར་རོ། །ལྔ་པ་བསླབ་པ་གྲུབ་པ་སྤྱིར་ཆིབ་པའི་གནས་ཏེ། བསླབ་པ་བཅུ་ཁོང་དུ་ཆུད་ཅིང་རྩེར་ཆིབ་པའི་ས་ཡིན་པའི་ཕྱིར་རོ། །དགུ་པ་གདིང་དུ་གྱུར་པ་ཆོས་ཉིད་ཀྱི་གནས་ཏེ། བསྒོམ་པས་ཕེབས་པ་སྟོབས་སུ་གྱུར་བ་དེ་ཡང་འདིར་ཆོས་ཉིད་གདེང་དུ་གྱུར་པའི་ཕྱིར་རོ། །བཅུ་པ་འབྲས་བུ་གྲུབ་པ་རྫོགས་པའི་གནས་ནི། མཐར་ཕྱིན་པའི་ཕྱིར་རོ། །དེ་བཞིན་དུ། སྐབས་ཞེས་པའང་ལྔ་སྟེ། དང་པོ་སེམས་ཅན་གྱི་སྐབས་ནི། རས་བལ་ས་བོན་ལྟ་བུའི་གཞི། །གཡོ་བས་སྒྲ་ཡི་རྣལ་འབྱོར་གྱི། །བསྒོམ་བྱ་ཡིད་ལ་བྱེད་པའི་གཞི། །ད་དུང་མ་ངེས་དྲན་ཙམ་མོ། །ཞེས་བྱའོ། །གཉིས་པ་འཕགས་པའི་སྐབས་ནི། ཇི་སྐད་དུ། དད་པས་མོས་པས་ལམ་འགྲོ་ཞིང་། །སློབ་པ་པ་འདི་བཟོད་ཐོབ་ཕྱིར། །འདུ་ཤེས་རིགས་ངེས་ཁྱད་པར་འཕགས། །ཡང་དག་རྒྱུད་དུ་ངེས་ཕྱིར་རོ། །ཞེས་སོ། །གསུམ་པ་ས་ཐོབ་པའི་སྐབས་ནི། འདི་སྐད་དུ། མི་སློབ་ཆོས་མིག་རྡུལ་བྲལ་ཞིང༌། །དབུགས་ཆེན་ཕྱིན་ནས་མི་ལྡོག་པའི། །ཏིང་འཛིན་ཐོབ་པའི་དུས་ངེས་ཕྱིར། །དེ་ལ་མཚན་དུ་དེ་སྐད་བརྗོད། །ཞེས་སོ། །༼༡༦༣༽བཞི་པ་རིག་འཛིན་བྱང་ཆུབ་ཐོབ་པའི་སྐབས་ནི། ཇི་སྐད་དུ། བྱང་ཆུབ་སེམས་དཔའ་སེམས་ཆེན་པོར། །བདག་ཕྱིར་བཟློག་མེད་གཞན་དོན་དུ། །ཕྱིར་འོངས་རང་དབང་སྐྱེ་སྤྱོད་ཕྱིར། །རྒྱལ་བའི་སྲས་པོ་གདུང་འཚོབ་སྐབས། །ཞེས་སོ། །ལྔ་པ་འབྲས་བུ་ཐོབ་པའི་སྐབས་ནི། །ཇི་སྐད་དུ། བྱང་ཆུབ་ཆེན་པོར་རྫོགས་སེམས་སྐྱེས། །རྒྱལ་ཚབས་སྐྱེས་བུར་རྩལ་རྫོགས་པ། །ལམ་དུ་གྱུར་པའི་འབྲས་བུའི་ཕྱིར། །འབྲས་བུའི་སྐབས་ཞེས་མཚན་ངེས་པའོ། །ཞེས་སོ། །བཅུའི་དབང་དུ། གཉིས་པ་རྩོམ་པ་སྦྱོར་བའི་སྐབས་ཏེ། སྨོན་པས་བསླབ་པ་ལ་རྩོལ་བའི་ཕྱིར་རོ། །བཞི་པ་འདུ་ཤེས་འགྱུར་བའི་སྐབས་ནི། རིགས་ཕྱེད་པས་སྦྱོར་བའི་སེམས་ཀྱིས་འདུ་ཤེས་ཡང་དག་པའི་ཡེ་ཤེས་སུ་འགྱུར་ཏེ་ཡེ་ཤེས་འཕེལ་བར་བྱེད་པའི་ཕྱིར་རོ། །ལྔ་པ་73སྦྱོར་ཆེན་ལ་འཇུག་པའི་སྐབས་ནི། བསླབ་བཅུའི་ཆིབ་པས་ཐོས་བསམ་གྱིས་མཐོང་བའི་དོན་བསྒོམ་པ་ལ་འཇུག་པའི་ཕྱིར་རོ། །དགུ་པ་གདེང་དུ་གྱུར་པའི་སྐབས་ཏེ། རྟགས་ཆེན་ཐོབ་པའི་ཕྱིར་རོ། །བཅུ་པ་ལས་སུ་རུང་བའི་སྐབས་ཏེ། རྫོགས་སེམས་སྐྱེས་པས་སྐྱེད་དུ་བྱ་བའི་ལམ་མེད་པའི་ཕྱིར་རོ། །ཡེ་ཤེས་དང༌། ཞེས་བྱ་བ་ནི། མཉམ་པར་བཞག་པ་རེ་རེ་ལ། །ཡེ་ཤེས་རེ་རེ་འཆར་བའོ། །ཞེས་པས། སྐབས་ལྔར་སེམས་ལྔ་བསྒོམ་ཤར་གྱི་རྟོགས་པའི་ཡེ་ཤེས་ལྔ་སྟེ། ཇི་སྐད་དུ། ཡང་དག་བདེན་པ་གཉིས་མེད་དོན། །ཡིད་བྱེད་གཡོ་བའི་ཡེ་ཤེས་དང༌། །བཟོད་ཐོབ་འཇུག་སློབ་ཡེ་ཤེས་དང༌། །མ་ནོར་མཐོང་དགའི་ཡེ་ཤེས་དང༌། །དེ་ཉིད་མི་འགྱུར་གནས་ཡེ་ཤེས། །དེ་མཐར་རྫོགས་སེམས་ཡེ་ཤེས་སོ། །ཞེས་བྱའོ། །བཅུའི་དབང་དུ་སྔར་བརྗོད་པའི་གཏན་ཚིགས་ཀྱིས། སྐབས་བཅུར་སེམས་བཅུ་སྐྱེས་པས་སེམས་དང་ཆོས་འཕྲད་པའི་ཡེ་ཤེས་གྲོལ་ཐར་པ་རེའོ། །དེ་ལ་དང་པོ་བརྗོད་ཟིན་པས། །སྨོན་པས་ཁོང་དུ་ཆུད་འདོད་པའི། །བདེན་གཉིས་མགོ་མཐོང་ཡིད་ལ་བྱེད། །སྨོན་པའི་ཡེ་ཤེས་གོང་མའི་རྒྱུ། །དེ་རྒྱུས་དེར་མི་བརྟན་པར་ལྡང༌། །བདེན་གཉིས་རང་གི་མཚན་ཉིད་དུ། །ཤེས་པ་གཅོད་སྦྱོང་སྦྱོར་བ་ཡི། །བསླབ་པའི་ཡེ་ཤེས་ཡེ་ཤེས་གསུམ། །བཞི་པ་དེ་རྒྱུས་སྦྱོར་སེམས་ཀྱིས། །ལྷག་པའི་བདེན་གཉིས་དབྱེར་མེད་དོན། །ཐོས་ལ་མི་སྐྲག་སྤྱོད་ཅིང་འཕེལ། །བཟོད་ཐོབ་ཡེ་ཤེས་ཕྱི་མའི་རྒྱུ། །ལྔ་པ་དེ་རྒྱུས་ཡེ་ཤེས་སྐྱེས། །བདེན་པ་༼༡༦༤༽དབྱེར་མེད་ཐོས་བསམ་གྱིས། །གོ་བའི་དོན་ལ་འཇུག་སེམས་པས། །མཐོང་ལ་སྦྱོར་བའི་ཡེ་ཤེས་སོ། །དྲུག་པ་དང་བདུན་པ་བརྗོད་ཟིན་ཏེ། བརྒྱད་པར་འདི་སྐད་དུ། མཚན་མའི་ཆོས་རྣམས་ཐམས་ཅད་ཀུན། །མཉམ་པ་ཆེན་པོའི་ངང་དུ་གསལ། །ཞེས་གསུངས་ཏེ། རིག་པའི་སེམས་ཀྱིས་མཉམ་ཉིད་མཐོང་བའི་ཡེ་ཤེས་སོ། །དགུ་པར་གནས་པའི་སེམས་ཀྱིས་དབྱིངས་དང་ཡེ་ཤེས་དབྱེར་མེད་པའི་དོན་ཤར་བ་སྟེ། འདི་སྐད་དུ། སྲིད་པའི་སེམས་ཅན་ཐམས་ཅད་དང༌། །ཐར་པའི་ཆོས་ཀྱི་རྣམ་གྲངས་ཀུན། །སོ་སོར་ཐམས་ཅད་སྣང་བ་སྟེ། །ཀུན་ཀྱང་མཉམ་པའི་ངང་དུ་གསལ། །ཞེས་སོ། །བཅུ་པ་རྫོགས་པའི་སེམས་ཀྱིས་རང་བྱུང་ཡེ་ཤེས་རྫོགས་པར་ཤར་བ་སྟེ། འདི་སྐད་དུ། ས་ཆུ་མེ་རླུང་སྣོད་བཅུད་རྣམས། །ཀུན་ཀྱང་རང་བཞིན་ཆོས་ཉིད་དོན། །ཆོས་ཉིད་དོན་ལས་གཞན་མེད་པར། །རང་བྱུང་ཡེ་ཤེས་གསལ་བའོ། །ཞེས་སོ། །སྒྲིབ་དང༌། ཞེས་པའང་འདི་སྐད་དུ། སོ་སོར་ཐུན་མོང་མ་ཡིན་པའི། །སྒྲིབ་ལ་ས་ཞེས་རྩི་བྱེད་ཅིང༌། །ཞེས་སྣང་བས། འོག་མས་གོང་མ་མ་མཐོང་བའི་སྒྲིབ་པ་ལྔ་སྟེ། འདི་སྐད་དུ། སའམ་རྣལ་འབྱོར་རྣམ་ལྔ་པོ། །རང་རང་མཐོང་ལ་ཞེན་པ་ཡིས། །གོང་མ་གོང་མ་མ་མཐོང་ཕྱིར། །ལམ་གྱི་དབྱེ་བས་སྒྲིབ་པའང་ལྔའོ། །ཞེས་སོ། །བཅུའི་དབང་དུ། ས་འོག་མ་བཅུས་གོང་མའི་ལྟ་བ་རྣམས་ཡུལ་དུ་མ་གྱུར་པ་བརྗོད་ཟིན་ཏེ། དེ་ཡང༌། ལས་ཀྱི་བག་ཆགས་ཕྲ་རགས་ནི། །གཉིས་པ་དང་པོ་དག་ལ་སྒྲིབ། །མངོན་དུ་རྒྱུ་བ་རབ་འབྲིང་གསུམ། །གསུམ་པ་བཞི་དང་ལྔ་ལ་སྒྲིབ། །ཀུན་ཏུ་རྒྱུ་བ་དྲུག་པ་སྟེ། །ལྷན་ཅིག་སྐྱེད་པ་བདུན་ལ་གནས། །བག་ལ་ཉལ་བ་ཕྲ་རགས་འབྲིང༌། །བརྒྱད་དང་དགུ་དང་བཅུ་ལ་གནས། །ཞེས་སོ། །གོལ་ས་ཞེས་པའང༌། ས་གོང་མ་འོག་སར་ལྷུང་བའི་གོལ་ས་ལྔ་སྟེ། འདི་སྐད་དུ། ཐུན་མོང་རྒྱུ་ཡི་ལམ་ལྔར་གོལ། །ཁྱད་པར་སྒྲིབ་ལ་ལྟོས་ཚུལ་གྱིས། །ལམ་ལྔ་གོང་དམིགས་འོག་ལྟ་ཅན། །ལྟུང་ནོར་ཕྱིར་ན་སྒྲ་འཇུག་པའོ། །ཞེས་སོ། །བཅུའི་དབང་དུ། རྒྱུ་ཡི་ཚོགས་དང་དྲོད་རྩེ་མོ། །བཟོད་དང་འཇིག་རྟེན་ཆོས་མཆོག་དང༌། །མཐོང་སྒོམ་མཐར་ལམ་རྣམས་སུ་གོལ། །ཡང་ན་འོག་མ་འོག་མ་ཉིད། །ཅེས་སོ། །རྟོག་པ་དང༌། ཞེས་པའང༌། ཆེད་དུ་བྱས་ཏེ་དོན་དང་ལྷ་ལ་རྟོག་པ་ལྔ་སྟེ། འདི་སྐད་དུ། ས་ལྔ་དང་པོ་༼༡༦༥༽ཚིག་ལ་རྟོག །གཉིས་པའི་ཡི་གེ་གསུམ་པ་མིང༌། །བཞི་བརྡ་ཐ་སྙད་ལྔ་པར་རྟོག །བག་ཆངས་ལྔ་ཡོད་སྦྱོང་བའི་ཕྱིར། །ལྟོས་ན་ཕྱག་རྒྱ་འཕྲོ་འདུ་དང༌། །ཤེས་ཡུལ་རྣམས་ལ་གནས་ཕྱིར་རྟོག །ཅེས་སོ། །བཅུའི་དབང་དུ། བག་ཆགས་ལྔ་ཡི་ཕྲ་རགས་བཅུ། །ས་བཅུར་ལྡན་པས་ཆོས་ཉིད་ལ། །ཆེད་དུ་བྱེད་དང་ཕྱག་རྒྱ་ཡང༌། །ཁྱོན་དང་འཕྲོ་འདུའི་རྟོག་ཚོགས་བཅུ། །ཞེས་སོ། །སྤྱོད་དང༌། ཞེས་པའང༌། རྩོལ་བ་དང༌། ཚོགས་ཀྱི་སྤྱོད་པ། བརྩོན་པའི་སྤྱོད་པ། ཤེས་རབ་དང་མཐུན་པའི་སྤྱོད་པ། ཐུགས་རྗེ་ཆེན་པོའི་སྤྱོད་པ། དབང་བསྒྱུར་ཐབས་ཀྱི་སྤྱོད་པའི་ཁྱད་པར་ལྔ་སྟེ། བཞི་ཕྱིར་སྤྱོད་པའང༌། སྐབས་ཀྱི་བདག་དང་གཞན་དོན་དུ། སྔོན་བྱུང་དང་རྗེས་འཇུག་གི་ཚུལ་དུ་འགྱུར་རོ། །དེ་ལ་ས་དང་པོ་ནི་རྩོལ་བ་དང་ཚོགས༌ཀྱི་ལམ་ཡིན་པའི་ཕྱིར། འདི་སྐད་དུ། རྩོལ་ཚོགས་གཉིས་ལའང་ཤིན་ཏུ་འབད། །བྱིན་རླབས་དབང་བསྒྱུར་ཐབས་ཚུལ་གྱིས། །གཞན་དོན་མཐའ་འགའ་རྩོལ་བས་སྤྱོད། །གཉིས་པ་བདག་ཕྱིར་ལེགས་ཉེས་ལ། །གཅོད་སྤྱོད་སྟོབས་ཕྱིར་ཤིན་ཏུའང༌། །བརྩོན་སྤྱོད་དབེན་ལས་ཕྱོགས་གཅིག་སྤྱོད། །སློབ་སྤྱོད་བདག་གཞན་དོན་ཀྱང་བྱེད། །གསུམ་པར་མི་དམིགས་ཤར་བ་ཡིས། །འདོད་པའི་དངོས་པོ་དབྱིངས་སྦྱོར་ཕྱིར། །བདག་ཕྱིར་མི་དམིགས་གཞན་ཆེད་དུ། །འཁོར་ལོ་སྒྱུར་བས་གསང་སྔགས་སྟོན། །བཞི་པར་བདག་ཕྱིར་རྣལ་འབྱོར་སྤྱོད། །གཞན་ལ་ཕྱིར་འོང་པ་ཡིན་ཕྱིར། །རང་དབང་ཅན་དུ་སྐྱེ་ཞེས་ནས། །ཇི་ལྟར་འདོད་ལྟར་ཐབས་མཆོག་སྦྱོར། །ལྔ་པར་ཏིང་འཛིན་རྩལ་རྫོགས་ཕྱིར། །དབང་སྒྱུར་ཐབས་ཀྱི་སྤྱོད་པ་ཡིས། །ཆོ་འཕྲུལ་བཞི་སོགས་སྣ་ཚོགས་སྟོན། །གདུལ་བྱ་སྨིན་ཅིང་འཁོར་ལོའང་བསྐོར། །ཞེས་བྱའོ། །བཅུའི་དབང་དུ། དང་པོ་བཤད་ཟིན་ཏེ། གཉིས་པ་ནི། འདི་སྐད་དུ། བསླབ་པ་སྤྱོང་དང་ངེས་པ་ལ། །དག་དང་མ་དག་གིས་སྤྱོད་པའོ། །ཞེས་འབྱུང་བས་ཕྲ་མེན་གྱི་སྤྱོད་པའོ། །གསུམ་པ་བཤད་ཟིན་ཏེ། བཞི་པ་ནི། ངན་སོང་མི་ལྡོག་དགོན་པར་འཇུག །བར་ཆད་དག་ཀྱང་དེ་ལ་འབྱུང༌། །ཞེས་པས། ཕྱོགས་གཅིག་པ་སྒོམ་པའི་སྤྱོད་པའོ། །ལྔ་པ་ནི། སྤྱོད་པ་རྒྱུན་གྱི་རྣལ་འབྱོར་ཡིན། །ཞེས་པས་རྒྱུན་གྱི་སྤྱོད་པའོ། །དྲུག་པ་ནི། བདག་དོན་ཤེས་རབ་དང་མཐུན་པའོ། །གཞན་དོན་དུ་འདི་སྐད་དུ། སྒྱུ་མས་སྦྱོང་བའི་སྐྱེས་བུ་དེ། །འཁོར་ལོར་༼༡༦༦༽སྒྱུར་བའི་ཆ་བྱད་དུ། རིན་ཆེན་བདུན་དང་དཔུང་ཚོགས་ཀྱིས། །དབང་སྒྱུར་ཐབས་ཀྱི་ཐེག་པ་སྟོན། །ཞེས་སོ། །བདུན་པ་ནི། ཏིང་ངེ་འཛིན་གྱི་སྦྱོར་བའོ། །ཞེས་པས། བདག་དང་གཞན་གྱི་དོན་དུ་སྤྱོད་པ་འདི་སྐད་དུ། །དེ་བས་སྐྱེས་བུ་དམ་པ་དེ། །འབྲས་བུ་ཉིད་ལ་ལམ་ཤེས་པས། །ལམ་གྱི་ཡན་ལག་བདེ་རྫོགས་ཏེ། །གཞན་དག་སྨིན་པར་བྱ་བའི་ཕྱིར། །ཇི་ལྟར་འདོད་པ་ཐབས་མཆོག་སྦྱོར། །ཞེས་སོ། །བརྒྱད་པ་བདག་དོན་སྦྱོར་བའི་སྤྱོད་པ་སྟེ། ཏིང་ངེ་འཛིན་མང་པོ་ལ་བསྒོམ་པའི་ཕྱིར་རོ། །གཞན་དོན་དུ་འདི་སྐད་དུ། །དེ་བས་རྒྱལ་ཚབ་སྐྱེས་བུ་དེ། །ཆོས་ཀྱི་རྒྱལ་པོ་གང་དེ་ཡི། །གདུང་འཚོབ་དགའ་ལྡན་ཐེག་ཆེན་སྟོན། །མི་གནས་བཅུ་དུས་ཆོ་འཕྲུལ་སྣང༌། །ཞེས་སོ། །དགུ་པ་ནི། སྒྱུ་མའང་སྒྱུ་མ་ཡིན་སྤྱོད་པའོ། །ཞེས་པས་ཡེ་ཤེས་སྒྱུ་མའི་སྤྱོད་པའོ། །བཅུ་པ་ནི། ལྷུན་གྱིས་གྲུབ་པའི་སྤྱོད་པའོ། །ཡང་ཀུན་འདུས་ལས། ས་བརྒྱད་པར་འདི་སྐད་དུ། སྦྱོར་དང་སྒྲོལ་བར་བྱེད་པ་དང༌། །མ་ཡིན་ལེན་དང་དག་སྤྲུལ་བྱེད། །རྣལ་འབྱོར་དམ་ཚིག་སྤྱོད་པའི་མཆོག །སྤྱད་པར་བྱ་བའི་ལས་ཡིན་ནོ། །ཞེས་དང༌། དགུ་པར། ཐམས་ཅད་མཉམ་པའི་ངང་ལ་གནས། །ཏིང་ངེ་འཛིན་གྱི་ཆོ་འཕྲུལ་ལས། །དངོས་སུ་སྦྱོར་བ་ཐམས་ཅད་བྱ། །དེ་ནི་དམ་ཚིག་ཆེན་པོ་ཡིན། །ཞེས་དང༌། བཅུ་པར། སྤྱོད་དང་སྤྱོད་པར་བྱ་མེད་པས། །སྲིད་དང་མུ་སྟེགས་འཇིག་རྟེན་པའི། །སྤྱོད་པར་སྣང་བ་ཐམས་ཅད་ཀུན། །ལྷུན་གྱིས་གྲུབ་པའི་མཛད་སྤྱོད་དོ། །ཞེས་གསུངས་སོ། །བསྲུང་བྱའི་ངོ་བོ་གང་ལ་དམ་པ་གང་དང་ལྡན་པའི་དམ་ཚིག་ཞེས་བྱ་བའང༌། སྐབས་ཀྱི་ཆེད་དུ་བྱེད་པ་ལས། །བརྟགས་ཀྱི་རྩ་བ་ཡན་ལག་རྣམས། །ཀུན་བསྲུང་བྱེ་བྲག་དང་པོར་ནི། །བདུད་ལྔ་དགྲ་བཞི་བཟློག་པ་དང༌། །སྤྱོད་པ་རྒྱུན་ནམ་བཞི་ལ་གནས། །འདུན་ཅིང་ཡི་རང་མ་ཉམས་བྱེད། །གཉིས་པ་བསླབ་པ་བཅུ་བྱེད་ལས། །མི་འདའ་བཟོད་ལས་མི་ཉམས་བྱེད། །གསུམ་པར་ལྟ་བའི་དམ་ཚིག་བྱེད། །མཐོང་བ་མི་གནས་བརྩོན་པར་བྱེད། །དེ་ཡང་ཇི་སྐད་དུ། ནམ་མཁའ་ལྟ་བུའི་རྣལ་འབྱོར་པས། །ནམ་མཁའ་ལྟ་བུའི་དམ་ཚིག་བསྲུང༌། །ཞེས་སོ། །བཞི་པར་ཏིང་ངེ་འཛིན་གྱི་སོ་ཉིད་ལས། །མི་ཉམས་མ་ཡེངས་མི་འདའ་བའོ། །དེ་ཡང་འདི་སྐད་དུ། བརྗེད་པ་མེད་པའི་ཏིང་འཛིན་གྱིས། །བསྲུང་བ་མེད་པའི་ངང་དུ་བསྡམ། །ཞེས་༼༡༦༧༽གསུངས་ཏེ། གཞན་དུ་ནི། ཕྱིར་འོང་བར་དམ་བཅས་པ་གང་ཡིན་པའོ། །ལྔ་པར་མེད་དང་ཕྱལ་བ་གཅིག་པུ་དང༌། །ལྷུན་གྱིས་གྲུབ་པ་རྣམ་བཞི་པའོ། །ཞེས་སོ། །བཅུའི་དབང་དུ། བཞེད་ཚིག་ལས། རང་རང་སྤྱོད་ལས་མི་འདའ་བའི། །དམ་བཅའ་བཅུ་ནི་དམ་ཚིག་གོ །ཞེས་གསུངས། དེའི་ཕྱིར་དང་པོ་བཤད་ཟིན་ཏེ། གཉིས་པ་རྩོལ་བ་ལས་མི་འདའ། བཞི་པ་བསླབ་པ་ལས་མི་འདའ། ལྔ་པ་འཇུག་སྒོམ་ལས་མི་འདའ། བརྒྱད་པ་དངོས་པོ་བཞི་ལ་སྤྱོད་པ་ལས་མིའདའ། དགུ་པ་ཆོས་ཉིད་དམ་ཚིག་གསུམ། །བཅུ་པ་བཞི་ལས་མི་འདའ་འོ། །ཀུན་འདུས་ལས་བརྒྱད་པར་འདི་སྐད་དུ། འདོད་པས་ཆགས་པ་འཇོམས་པ་དང༌། །གཏི་མུག་ང་རྒྱལ་ཕྲག་དོག་རྣམས། །རྣལ་འབྱོར་ཆེན་པོའི་དམ་ཚིག་སྟེ། །དོན་དང་ལྡན་པའི་སྐྱེས་བུའི་སྤྱོད། །དགུ་པར། དམ་ཚིག་དམ་པ་གང་ཞེ་ན། །རྟོགས་པ་དམ་པས་དམ་ཚིག་སྟེ། །རྟོགས་པར་བྱེད་པ་གང་ཡིན་པ། །དེ་ནི་དམ་ཚིག་ཆེན་པོའོ། །བཅུ་པར། མེད་པ་ཕྱལ་བ་གཅིག་པུ་དང༌། །ལྷུན་གྱིས་རྫོགས་པའི་དམ་ཚིག་ཆེ། །འདི་ཞེས་རིས་སུ་ཆད་མེད་པ། །འདི་ནི་བསྲུང་བའི་དམ་ཚིག་གོ །ཞེས་གསུངས་སོ། །ཏིང་ངེ་འཛིན་ཡིད་ལ་བྱེད་པ་ཡན་ཆད་ལྔ་དང་བཅུའི་གསལ་མི་གསལ་གྱི་རིམ་པའང༌། ཐོག་མར་ལྔ་སྟེ། རྣམ་པར་མི་རྟོག་པ་དང་ལྷ་བསྒོམ་པའང༌། གང་རུང་དང་པོར་ཡིད་ལ་བྱེད། །གཉིས་པ་འཕྲོ་འདུ་གཅིག་པ་དང༌། །གསུམ་པ་ཡོངས་སུ་མི་ལྡོག་ཅིང་། །བཞི་པར་དེ་བཞིན་ཉིད་བསྒོམ་དང༌། །ལྔ་པར་ཀུན་ཏུ་སྣང་བ་བསྒོམ། །དེ་ཕྱིར་རྣལ་འབྱོར་རྣལ་འབྱོར་ཡིན། །ཞེས་བྱའོ། །བཅུའི་དབང་དུ། དང་པོ་ཡིད་ལ་བྱེད་ཐོབ་ནས། །གཉིས་པ་དེ་གོམས་བརྟན་པའོ། །གསུམ་པ་འཕྲོ་འདུ་གཅིག་པ་ཐོབ། །བཞི་པ་དེ་གོམས་ལྔ་པར་བརྟན། །དྲུག་པར་མི་ལྡོག་བདུན་དེ་ཉིད། །བརྒྱད་པར་ཀུན་སྣང་ཐོབ་ནས་ནི། །དགུ་པར་གོམས་ནས་བཅུ་པར་ནི། །དེ་བརྟན་ལས་སུ་རུང་བའོ། །ཞེས་གསུངས་སོ། །སློབ་དཔོན་བདེ་བ་གསལ་མཛད་ཀྱིས་ནི། འདི་སྐད་དུ། དང་པོ་ཡིད་ལ་བྱེད་པ་སྟེ། །བརྟེན་པས་ཡོན་ཏན་འབྱུང་གཞིའི་ཕྱིར། །རིན་ཆེན་མྱུ་གུའི་ཏིང་འཛིན་ཐོབ། །གསུམ་པ་ཉེས་པ་གཅོད་སྦྱོང་ཕྱིར། །དུག་འཇོམས་སྨན་གྱི་ཏིང་ངེ་འཛིན། །བཞི་པ་བར་ཆད་འབྱུང་བའི་ཕྱིར། །རྩེ་གཅིག་འཕྲོ་བའི་ཏིང་ངེ་འཛིན། །ལྔ་པ་བསོད་ནམས་གཏེར་གྱི་ཕྱིར། །༼༡༦༨༽ཚོགས་ཆེན་རྫོགས་པའི་ཏིང་ངེ་འཛིན། །དྲུག་པ་ཆོས་མིག་རྡུལ་བྲལ་ཕྱིར། །མངོན་པར་རྟོགས་པའི་ཏིང་ངེ་འཛིན། །བསྒོམ་པས་ཡོན་ཏན་འབྱུང་བ་ཡི། །མི་ཟད་མཛོད་ནི་བདུན་པའོ། །བརྒྱད་པ་ཆོ་འཕྲུལ་འབྱུང་བའི་ཕྱིར། །འབྱུང་ཆེན་སྤྲུལ་པའི་ཏིང་ངེ་འཛིན། །དགུ་པ་ཆོས་ཉིད་བརྡལ་བའི་ཕྱིར། །རྣམ་དག་དབྱིངས་ཀྱི་ཏིང་ངེ་འཛིན། །བཅུ་པར་མ་ལུས་ལྷུན་རྫོགས་ཕྱིར། །ཐམས་ཅད་རྫོགས་པའི་ཏིང་འཛིན་དང༌། །སྣང་གསལ་ཡེ་འཕྱོའི་ཏིང་ངེ་འཛིན། །ཞེས་གསུངས་པའོ། །དུས་དང༌། ཞེས་པའང༌། ས་འོག་མ་དག་གིས་གོང་མ་བསྒྲུབ་པའི་དུས་ལའང་ལྔའམ་བཅུ་སྟེ། དང་པོ་ནི། གསང་སྔགས་ཡིད་ལ་བྱེད་ཙམ་ཡོད། །དེ་ཕྱིར་དྲན་པ་ཐོབ་པར་སྨྲ། །གསང་བའི་བསླབ་བཅུ་ཐོབ་པའི་དུས། །གཉིས་མེད་རྟོགས་པ་ཐོབ་པའི་དུས། །དེ་ཉིད་བསྒོམས་པ་གོམས་པའི་དུས། །དེ་མངོན་གྱུར་པས་མཐར་ཕྱིན་དུས། །ཞེས་བྱའོ། །བཅུའི་དབང་དུ། བཞེད་ཚིག་ལས། དང་པོ་རྗེས་སུ་ཡི་རང་ཕྱིར། །འདུན་པ་སྐྱེ་བའི་དུས་ཞེས་བྱ། །གཉིས་པ་སློབ་པ་ལ་བརྩོན་ཕྱིར། །རྩོལ་བ་སྦྱོར་བའི་དུས་ཉིད་དོ། །གསུམ་པ་གལ་ཆེན་སྦྱོར་བའི་ཕྱིར། །བསླབ་པ་འཇུག་པའི་དུས་སུ་བརྗོད། །བཞི་པ་རིགས་ཆེན་འབྱེད་པའི་ཕྱིར། །བསླབ་གནས་འདུ་ཤེས་འགྱུར་པའི་དུས། །ལྔ་པ་མཐོང་དོན་སྦྱོར་བའི་ཕྱིར། །སྤྱོད་ཆེན་འཇུག་པའི་དུས་ཆེན་ཡིན། །དྲུག་པ་ཐམས་ཅད་མཐོང་བའི་ཕྱིར། །དང་པོ་དབུགས་ཆེན་ཕྱིན་པའི་དུས། །བདུན་པ་དེ་དོན་གོམས་བྱའི་ཕྱིར། །ཡུལ་ལ་འཇུག་པའི་དུས་སུ་བརྗོད། །བརྒྱད་པ་ངེས་དོན་ཕེབས་པའི་ཕྱིར། །རྟོགས་ཆེན་ཉིད་ལ་ཕེབས་པའི་དུས། །དགུ་པ་དེ་སྟོབས་གྱུར་པའི་ཕྱིར། །གདེང་དུ་གྱུར་པའི་དུས་ཞེས་བྱ། །བཅུ་པ་ཤིན་ཏུ་མཐར་ཕྱིན་ཕྱིར། །ལས་རུང་ཐ་མའི་དབུགས་ཕྱིན་དུས། །ཞེས་གསུངས་ཏེ། སྤྱིར་བྱང་ཆུབ་ཆེན་པོ་ཉིད་གྲུབ་པའི་དུས་སོ། །དངོས་གྲུབ་ཆེན་པོ་དང་གནས་སྐབས་ཀྱི་ལམ་མཐར་ཕྱིར་པས་གོང་མ་འགྲུབ་པའང༌། འདི་སྐད་དུ། དང་པོ་འདོད་པ་གྲུབ་པ་དང༌། །གཉིས་པ་བཟོད་པ་གྲུབ་པ་དང༌། །གསུམ་པ་བདེན་གྲུབ་བཞི་པ་ལས། །རུང་བ་གྲུབ་པའོ་ལྔ་པ་ནི། །ལྷུན་གྱིས་གྲུབ་པའི་རིགས་ཐོབ་པའོ། །འོན་ཏེ་དང་པོ་གཉིས་པ་ནི། །དམིགས་པ་གྲུབ་པའོ་གསུམ་པ་ནི། །དོན་དམ་བཅུད་ཀྱི་རྣམ་ཤེས་རྒྱས། །བཞི་པ་འཁོར་བའི་དབྱིངས་སུ་འགྲུབ། །༼༡༦༩༽ལྔ་པ་ཐམས་ཅད་འགྲུབ་པར་གསུངས། །ཞེས་སོ། །བཅུའི་དབང་དུ། ས་བཅུ་འོག་མ་འོག་མ་ཡིས། །གོང་མ་གོང་མ་ཐོབ་པ་ཉིད། །སྐབས་ཀྱི་རྒྱུ་འབྲས་ཡོད་པའི་ཕྱིར། །གནས་སྐབས་ཞུགས་པའི་དངོས་གྲུབ་བོ། །འདི་ལྟར་ཡང་འཆད་དེ། དང་པོས་འདོད་པའི་དངོས་གྲུབ་དང༌། །གཉིས་པས་སྦྱོར་བའི་དངོས་གྲུབ་དང༌། །གསུམ་པས་སྦྱོང་སྤྱོད་དངོས་གྲུབ་དང༌། །བཞི་པས་དྲོད་རྟགས་དངོས་གྲུབ་དང༌། །ལྔ་པར་བསླབ་རྫོགས་དངོས་གྲུབ་དང༌། །དྲུག་པར་རྟོགས་པར་གྲུབ་པ་དང༌། །བདུན་པ་མི་གཡོ་ཐོབ་པ་དང༌། །བརྒྱད་པ་ཆོ་འཕྲུལ་གྲུབ་པ་དང༌། །དགུ་པར་ཡེ་ཤེས་སྒྱུ་མ་འགྲུབ། །བཅུ་པར་རང་བྱུང་ཡེ་ཤེས་ཉིད། །ཅེས་སོ། །མཐར་ཕྱིན་དང༌། ཞེས་པ་ལྟ་བའི་རྟོགས་ཚད་ཀྱི་ཁྱད་པར་མཐར་ཕྱིན་པ་ཉིད་དེ། དེ་ལ་ལྔ་ནི། འདི་སྐད་དུ། དགེ་བའི་ལས་མཐའ་གསང་སྔགས་ལ། །འདིར་འཕྲད་དང་པོ་གཉིས་པ་ནི། །བསླབ་མཐའ་བཅུ་ལ་བསླབ་ཕྱིར་རོ། །གསུམ་པ་མཐོང་མཐར་གསང་སྔགས་མཐོང༌། །དེ་རྒྱུས་བཞི་པར་གསང་སྔགས་དོན། །མཐོང་བ་གོམས་བྱ་དེ་ཉིད་མཐར། །ཕྱིན་པའོ་ལྔ་པར་མཐར་ལམ་འབྲས། །རྫོགས་ཕྱིར་འབྲས་བུ་ཀུན་གྱི་མཐར། །རྩལ་ཆེན་རྫོགས་པ་ཐོབ་པའོ། །ཞེས་གསུངས་པས། དགེ་བའི་ལས་མཐར་ཕྱིན་པ། བསླབ་པ་མཐར་ཕྱིན་པ། མཐོང་བ་མཐར་ཕྱིན་པ། གོམས་པ་མཐར་ཕྱིན་པ། ཐོབ་པ་མཐར་ཕྱིན་པའི་ལམ་རྣམས་གསང་བ་ཆེན་པོའིལྟ་བས་ཚད་དང་སྦྱར་བའོ། །བཅུའི་དབང་དུ། འདི་སྐད་དུ། འདུན་པའི་ནང་ནས་འདིར་འདུན་པ། །འབྲས་བུ་འདུན་ཕྱིར་མཐར་ཕྱིན་པའོ། །དེ་བཞིན་རྩོལ་པ་ཐམས་ཅད་ཀྱི། །མཆོག་འདི་རྩོལ་བ་མཐར་ཕྱིན་པའོ། །ངེས་དོན་གྲུབ་ལ་བརྩོན་པའི་ཕྱིར། །བརྩོན་པའི་མཐར་ཕྱིན་གསུམ་པར་ཐོབ། །བཟོད་པའི་ནང་ནས་མཆོག་གྱུར་ཕྱིར། །གསང་དོན་བཟོད་པར་མཐར་ཕྱིན་མཆོག །བསླབ་པ་ལྷག་པ་བཅུ་ཉིད་ཕྱིར། །བསླབ་པ་མཐར་ཕྱིན་ལྔ་པ་ཉིད། །གཉིས་པ་བདེན་རྟོགས་མཆོག་ཡིན་ཕྱིར། །དྲུག་པས་མཐོང་བ་མཐར་ཕྱིན་ནོ། །རང་རིག་དོན་གོམས་མཆོག་ཡིན་ཕྱིར། །བདུན་པར་ཏིང་འཛིན་གོམས་མཐར་ཕྱིན། །དེ་ཉིད་སྟོབས་ཀྱི་རང་རིག་པ། །རིག་པའི་ནང་ན་མཐར་ཕྱིན་པའོ། །དབྱིངས་དང་ཡེ་ཤེས་གཉིས་མེད་ལ། །རིག་པ་གདེང་གྱུར་གནས་མཐར་ཕྱིན། །ཐམས་ཅད་རང་བྱུང་ཀློང་བརྡལ་ཕྱིར། །གོང་ན་མེད་པའི་འབྲས་མཐར་༼༡༧༠༽ཕྱིན། །ཞེས་གསུངས་སོ། །དེ་ལྟར་རྟོགས་ཚད་མཐར་ཕྱིན་པའི་ལྟ་བའི་ཁྱད་པར་རམ་ཤེས་པ་ལྔར་ཡང་བྱུང་བ་ཉིད་དེ། དང་པོ་འདུན་པའི་རྣལ་འབྱོར་པ་ནི། གཡོ་སྨོན་གྱི་གསང་སྔགས་ལ་ཉན་དབང་ནོས་ནས་སློབ་ཏུ་ཟད་ཀྱང༌། ཚིག་གི་ཚོགས་པ་སྒྲའི་རྣལ་འབྱོར་ཡིན་པའི་ཕྱིར། བློ་དམན་པས་གསང་སྔགས་ཀྱི་དོན་ཚིག་ཏུ་སྨྲ་ཞིང་མཐོང་བ་མེད་དེ་ཡིད་ལ་བྱེད་པའི་ལྟ་བའོ། །འོན་ཀྱང་ཕྱོགས་ལས། ད་དུང་བཟོད་པའང་མ་ཐོབ་བོ། །དེའང་འདི་སྐད་དུ། རྩལ་པ་ལས་ཀྱི་རྣལ་འབྱོར་པས། །འདུན་པ་སེམས་པའི་རྣལ་འབྱོར་ལ། སོགས་པའི་རྣལ་འབྱོར་རྣམ་དྲུག་པོ། །ཤེས་རབ་རྩལ་གྱི་འཕང་དམས་པས། །ཏིང་འཛིན་རྩལ་ཡང་ཆུང་བ་སྟེ། །དོན་ལ་མཐོང་བར་མི་འགྱུར་བས། །ཞེས་གསུངས་སོ། །རིགས་ཆེན་འབྱེད་པའི་ལྟ་བ་ནི། །བཅུ་ཡིས་ས་གསུམ་འདུས་པ་སྟེ། །འདིར་རིགས་ཕྱེད་ནས། བསླབ་བཅུའི་ཚེ་བཟོད་པ་ཐོབ་སྟེ། བདེན་པ་རྣམ་གཉིས་དབྱེར་མེད་པར་བསྟན་པ་ལ་མི་སྐྲག་ཅིང་སླར་སྤྱོད་པས། རང་གི་མཚན་ཉིད་དུ་ཐོས་བསམ་གྱི་སྒོ་ནས་ཤེས་ཏེ་འདུ་ཤེས་པའི་ལྟ་བ་ཉིད། འདི་སྐད་དུ། དོན་ལ་མི་སྐྲག་ངོ་མཚར་སྐྱེ། །དཔྱོད་སེམས་འཇུག་པའི་སེམས་དཔའ་དེ། །ངན་སོང་མི་ལྡོག་དགོན་པར་འཇུག །ཅེས་གསུངས་སོ། །དབུགས་ཆེན་འབྱིན་པའི་ལྟ་བ་ནི། ས་ལྔ་བར་བསྒོམ་པས་ཆོས་ཉིད་ཇི་ལྟར་མཐོང་སྟེ། མི་ལྡོག་པའི་ལྟ་བའོ། །དེ་ཡང༌། ངལ་བསོ་བ་ལས་ཐམས་ཅད་མཐོང༌། །ཞེས་གསུངས་སོ། །ལུང་ཆེན་ཐོབ་པའི་རྣལ་འབྱོར་གྱི་ལྟ་བ་ནི། མི་གཡོ་བའི་ལྟ་བ་སྟེ་དེ་ལྟར་མཐོང་བའོ། །རྩལ་ཆེན་རྫོགས་པའི་རྣལ་འབྱོར་གྱི་ལྟ་བ་ནི། རང་བྱུང་ཡེ་ཤེས་སུ་བསྒོམ་པས་མངོན་དུ་གྱུར་པ་སྟེ། འདི་སྐད་དུ། རང་བྱུང་རང་རིག་མངོན་སུམ་སྣང་དུས་ན། །རང་བྱུང་ཡེ་ཤེས་དེ་ཉིད་མཐོང་ཞེས་བྱ། །ཞེས་གསུངས་སོ། །ལ་ལ་དག་ནི་འདི་སྐད་དུ། །ལྟ་བ་ལྔ་ནི་ཤེས་པ་ལྔ༌། །གསང་སྔགས་འདོད་པ་འདམ་ཤེས་དང༌། །རྣམ་པར་ཤེས་པ་སློབ་བཅུ་དང༌། །བཟོད་ཐོབ་རང་གི་མཚན་ཉིད་ཤེས། །ཐམས་ཅད་མ་སྐྱེས་ཡེ་ཤེས་དང༌། །དེ་ལ་ཡོངས་སུ་མི་གཡོར་ཤེས། །ཤེས་པ་ཆེན་པོ་ཀུན་ཏུ་སྣང༌། །མཐོང་བ་དམ་པའི་ལྟ་བ་ཡིན། །ཞེས་སྨྲའོ། །བཅུའི་དབང་དུ། དང་པོ་ཚིག་ཚོགས་སྒྲའི་རྣལ་འབྱོར། །ཡིན་ཕྱིར་ཚིག་ཙམ་ལྟ་བའོ། །གཉིས་པ་ལྷག་པའི་བདེན་པ་གཉིས། །༼༡༧༡༽ཡིད་ལ་བྱེད་པའི་ལྟ་བའོ། །གསུམ་པ་བདེན་གཉིས་རང་མཚན་དུ། །མགོ་མཐོང་གཉིས་མེད་བཟོད་པ་ཐོབ། །བཞི་པ་གཉིས་སུ་མེད་པ་ལ། །མི་སྐྲག་སྤེལ་བྱེད་གཡོ་དང་ཐོབ། །ལྔ་པར་བསླབ་བཅུ་སྤྱིར་ཆིབ་པས། །གཉིས་མེད་ཐག་ཆོད་དེ་ལ་འཇུག །དྲུག་པ་དེ་རྒྱུས་ཇི་བཞིན་མཐོང༌། །དེ་ཡང་འདི་སྐད་དུ། སྔར་ཡང་དྲངས་མོད། རྒྱུད་ཉིད་ལས། ཆོས་ཀུན་མི་མཐོང་ཆོས་ཉིད་ཀྱང༌། །མི་མཐོང་སེམས་ཅན་སེམས་མི་མཐོང༌། །སངས་རྒྱས་མི་མཐོང་གང་མཐོང་བ། །དེས་ནི་ཡང་དག་བདེན་པ་མཐོང༌། །ཞེས་གསུངས་སོ། །བདུན་པ་དེ་ཉིད་གོམས་པ་ཡིས། །མི་གཡོ་ལྟ་བ་ཤེས་རབ་ཅན། །བརྒྱད་པ་རང་རིག་འབྲས་བུ་སྐུ་གསུང་ཐུགས་ཀྱི་བདག་ཉིད་དུ་གོམས་པའི་རྒྱུས་མཐོང་སྟེ། འདི་སྐད་དུ། སངས་རྒྱས་སེམས་ཅན་ཐམས་ཅད་དང༌། །དངོས་པོར་བརྟག་པ་ཐམས་ཅད་ཀུན། །དོན་གྱི་ངང་དུ་གཅིག་པ་སྟེ། །དེ་ཉིད་སྐུ་གསུང་ཐུགས་ཀྱི་བདག །ཅེས་གསུངས་སོ། །དགུ་པར་དབྱིངས་དང་ཡེ་ཤེས་ཡབ་ཡུམ་དབྱེར་མེད་པའི་བདེ་བ་ཆེན་པོ་གདེང་དུ་གྱུར་ཏེ། འདི་སྐད་དུ། སྣོད་དུ་གྱུར་པ་ཡུམ་གྱི་དབྱིངས། །བཅུད་རྣམས་རྒྱལ་བ་ཡབ་ཀྱི་མཁའ། །འབྱུང་འཇུག་རིག་པས་ལོངས་སྤྱོད་དེ། །འདི་ནི་རྡོ་རྗེའི་དམ་ཚིག་ཡིན། །ཞེས་གསུངས་སོ། །བཅུ་པའི་ལྟ་བ་གཟའ་གཏད་དང་བྲལ་བ་སྟེ། འདི་སྐད་དུ། མ་སྤངས་བཞིན་དུ་ལྷུན་གྲུབ་པས། །དབྱེར་མེད་པ་ནི་ཆོས་ཀྱི་དབྱིངས། །དབྱིངས་ལས་གཞན་དུ་ལྟ་ཡུལ་མེད། །འདི་ནི་ལྟ་བའི་དམ་ཚིག་གོ །ཞེས་གསུངས་སོ། །གནས་འགྱུར་རྣམས། ཞེས་པ་ཀུན་གཞི་ལྔར་གནས་གྱུར་པའི་ཚུལ་གྱིས་ལན་བཅུར་ཡང་འགྱུར་བ་སྟེ། རེ་ཞིག་པ་དང་གཏན་དུ་བར་སྦྱར་རོ། །དེ་ཡང་སྐབས་ལྔར་ཀུན་གཞི་ལྔ་བག་ཆགས་ལྔ་དང་བཅས་པ་གནས་འགྱུར་བ་སྟེ། དྲན་པ་ཐོབ་པའི་དུས་སེམས་ཅན་གྱི་སྐབས་སུ་སྐྱེ་བོའི་ཤེས་པ་མ་རིག་པ་ལས་སེམས་གཡོ་བ་འབྱུང་བས། ལམ་གྱི་གཞིར་གྱུར་པས་རྐྱེན་གྱིས་བསྒྱུར་བ་ལས་ཀྱི་བག་ཆགས་གནས་ཏེ། སྦྱོང་ཞིང་འདོད་པ་ཤེས་པར་འགྱུར་བའི་ཕྱིར་དང་པོའོ། །སྤྱོད་པ་ཐོབ་པའི་དུས་འཕགས་པའི་སྐབས་སུ་བསླབ་པ་བཅུ་ཡང་དག་པའི་དོན་ལ་སྦྱོར་བའི་ཕྱིར། སྦྱོར་བ་འདུན་པའི་ཀུན་གཞིར་འགྱུར་ཏེ་མངོན་དུ་རྒྱུ་བ་གནས་ཏེ་སྦྱོང་ངོ༌། །རྟོགས་པ་ཐོབ་པའི་དུས་ས་ཐོབ་པའི་སྐབས་སུ། འོག་གི་འབད་པས་བདེན་པ་མཐོང་བའི་ཕྱིར་སྣང་བ་དོན་གྱི་ཀུན་གཞིར་གནས་འགྱུར་ཏེ། དེའི་ཚེ་ཀུན་༼༡༧༢༽ཏུ་རྒྱུའི་བག་ཆགས་གནས་ཏེ་སྦྱོང་བའོ། །རིག་འཛིན་བྱང་ཆུབ་སེམས་དཔའི་སྐབས་གོམས་པ་ཐོབ་པའི་དུས་སུ། མཐོང་བ་ལ་གོམས་པས་སེམས་མི་གཡོ་བའི་ཕྱིར། འགྱུར་མེད་གནས་པའི་ཀུན་གཞིར་གནས་འགྱུར་ཏེ། བག་ཆགས་ལྷན་ཅིག་སྐྱེས་པའི་གནས་དེ་སྦྱོང་བའོ། །མཐར་ཕྱིན་པའི་དུས་བྱང་ཆུབ་ཆེན་པོའི་འབྲས་བུ་ཐོབ་པའི་སྐབས་སུ། སྔར་གོམས་པས་མངོན་དུ་གྱུར་པའི་ཕྱིར། བཙལ་མེད་གནས་པའི་ཀུན་གཞིར་གནས་འགྱུར་ཏེ། བག་ལ་ཉལ་གནས་པ་སྦྱོང་བའོ། །ཞེས་འཆད་ན། སློབ་དཔོན་སྠི་ར་མ་ཏིས་ཁོ་བོ་ནི། དང་པོ་རིགས་མ་ངེས་པ་དང༌། ཆོས་ཉིད་མ་ཤེས་པའི་ཕྱིར་དེར་གནས་འགྱུར་ཞེས་མི་འདོགས་པའི་ཕྱིར། དང་པོ་ནས་གཉིས་པར་འགྱུར་བ་ནས། ལྔ་པ་ནས་སངས་རྒྱས་ཉིད་དུ་འགྱུར་བ་དང་ལྔ་སྟེ། ལམ་ལྔ་རང་རིག་ཏིང་ངེ་འཛིན་བརྟན་པས་ཡེ་ཤེས་སྐྱེས་ཏེ་སྒྲིབ་པ་རེ་སྦྱང་བས་སྐད་ཅིག་མ་ཕྱི་མ་ལ་ལམ་ལྔར་སྐབས་ལྔའི་ཕྱིར། ཀུན་གཞིའི་གནས་འགྱུར་རྣམ་པ་ལྔས། །བྱེ་བྲག་ལམ་ལྔའི་ཆོས་སུ་བཤད། །ཅེས་གསུངས་སོ། །བག་ཆགས་ལྔ་ནི་སྒྲིབ་པ་ལྔར་ཡང་གསུངས་ཏེ། དེ་དག་ནི་རྒྱུ་འབྲས་ཀྱི་ཕྱིར་ཁྱད་པར་ཡོད་དེ། འདི་སྐད་དུ། དེ་དག་རེ་ཞིང་རྒྱུ་འབྲས་གཉིས། །སྔ་མ་སྔ་མ་གང་དང་གང༌། །ཕྱི་མ་ཕྱི་མ་སྨིན་པའི་རྒྱུ། །དེ་བཞིན་ཀུན་ཏུ་འཁོར་བར་འབྱུང༌། །ཞེས་གསུངས་ཏེ། བཅུ་པོའང་རྒྱུ་འབྲས་སུ་འགྱུར་བར་དགོངས་པས་ལྔའི་ཟླས་བཅུར་འགྱུར་བ་སྟེ། བཞེད་ཚིག་ལས། ས་བཅུར་སེམས་བཅུར་སྐྱེས་པ་ཡིས། །ཏིང་འཛིན་སྟོབས་ལྡན་ཡེ་ཤེས་རེ། །ཤར་བའི་སྐད་ཅིག་སྔ་མ་ཡིས། །རང་རང་སྒྲིབ་བཅོམ་ཕྱི་མ་ལ། །གོང་ནས་གོང་དུ་སངས་རྒྱས་པ། །གནས་འགྱུར་བཅུ་ལ་ལམ་སྟེགས་བཅུ། །ཞེས་གསུངས་སོ། །འོན་ཏེ་ཀུན་གཞིའི་གནས་འགྱུར་བའམ། སྐྱེ་བོ་ནས་འདུན་པའི་རྣལ་འབྱོར་དུ་གནས་འགྱུར་ན་ཡང༌། དེ་བཞིན་གཤེགས་པར་རྩལ་ཆེན་རྫོགས་པའི་སྐད་ཅིག་མ་ལ་བག་ལ་ཉལ་རྡོ་རྗེ་ལྟ་བུའི་ཡེ་ཤེས་ཀྱིས་བཅོམ་ནས། ཕྱི་མ་ལ་སྐུ་ལྔ་མངོན་དུ་བྱས་ཏེ། གཏན་དུ་བར་གནས་འགྱུར་བ་དང་དྲུག་ཏུ་འགྲོ་བས། ཀུན་གཞིའི་གནས་འགྱུར་རྣམ་པ་ལྔས། །བྱེ་བྲག་ལམ་ལྔའི་ཆོས་སུ་སྣང༌། །ཞེས་པ་དང་འགལ། འོན་ཏེ་འདུན་པའི་རྣལ་འབྱོར་དུ་གནས་མ་གྱུར་ཞེ་ན་ཡང༌། འདུན་པའི་རྣལ་འབྱོར་པ་ལ། ཡིད་ལ་བྱེད་པའི་ཏིང་ངེ་འཛིན་གྱིས་ལྷའི་སྐུ་རང་གི་ཆག་ཙམ་དུ་ཕྱོགས་པ་དང༌། གཡོ་བའི་སེམས་སྐྱེས་པ་དང༌། གླེགས་བམ་བཅུ་གཉིས་ཀྱི་དབང་ཐོབ་པས་ བདག་ཉིད་༼༡༧༣༽ནམ་མཁའ་ལ་འགྲོ་བའི་ལྟས་མཐོང་བས། དེ་དག་སྐྱེ་བོ་ལ་མེད་ལ། ས་འདི་པ ་ལ་ཡོད་པའི་ཕྱིར་གནས་མ་འགྱུར་ན་རིགས་པ་དང་འགལ་ལོ། །ཞེས་ཐེ་ཚོམ་སྐྱེ་བ་ལ། དེ་ནི་འདི་ལྟར་དཔྱད་པར་བྱ་སྟེ། དེ་ལྟར་སྣང་མོད་ཀྱི། འདུན་པ་པ་ནི་སྐྱེ་བོ་ལས་འཕགས་མོད་ཀྱང༌། དེར་གནས་འགྱུར་ཞེས་མི་བྱ་སྟེ། སྐྱེ་བོའི་ཚེ་རྒྱུ་རྐྱེན་མེད་པ་མ་ཡིན་ཡང༌། ངེས་པའི་ཤེས་པས་སྦྱང་པས། འདུན་པ་ཐོབ་པ་མ་ཡིན་པའི་ཕྱིར། དེར་གནས་འགྱུར་ན། གནས་འགྱུར་འབྲས་བུར་གྱུར་པ་དང་དྲུག་ཏུ་འགྱུར་བས། གོང་དུ་ལྔས་ཞེས་པའི་ལུང་དང་ཡང་འགལ། རིགས་པས་ལམ་ལྔར་གནས་འགྱུར་ནས་རྩལ་ཆེན་རྫོགས་པར་བརྗོད་ན། དེ་ནི་ལྷུན་གྱིས་གྲུབ་པའི་རིག་འཛིན་ཡིན་གྱི། རྒྱལ་བ་སངས་རྒྱས་ཉིད་མ་ཡིན་པའི་ཕྱིར་རྒྱལ་བར་འགྱུར་དགོས་པས། རིགས་པ་དང་འགལ་ལོ། །དེའིཕྱིར་འདུན་པ་དེ། ཆོས་ཉིད་ལ་ད་དུང་བཟོད་པ་ཙམ་ཡང་མ་ཐོབ་སྟེ། མ་མཐོང་བའི་ཕྱིར་སྐྱེ་བོ་ལས་འཕགས་ཀྱང་གནས་འགྱུར་ཞེས་མི་བྱའོ། །དེས་ན་འདུན་པར། མོས་པའི་ལྷ་བརྟན་པར་བསྒོམས་པས་མཐུ་བརྟན་ཙམ་ན། འདུ་ཤེས་ཀླུངས་སུ་ཞུགས་པས་ལས་བག་ཆགས་བསྲབས་བཀག་སྦྱངས་ནས་སྦྱོར་བ་འདུན་པའི་ཀུན་གཞི་ཐོབ་པ་གནས་འགྱུར་དང་པོའོ། །དེ་བཞིན་དུ་ས་འོག་ནས་གོང་དུ་འགྱུར་བཞིན་རྩལ་ཆེན་ནས་བདེ་གཤེགས་སུ་འགྱུར་བ་དང་ལྔའོ། །དེའི་ཕྱིར་འདུན་པ་ནས་ཡར་སངས་རྒྱས་སུ་ཀུན་གཞི་ལྔ་གནས་ལན་ལྔར་འགྱུར་བའི་ཕྱིར་ལམ་ལྔར་སྣང་སྟེ། དེར་འགྱུར་བར་བྱས་པའོ། །དེས་ན་གོང་གི་ལུང་ཉིད་དང་མི་འགལ་ལ། མཐར་སངས་རྒྱས་ཆེན་པོ་ཉིད་དུ་གནས་འགྱུར་བའི་རིགས་པ་དང་ཡང་མི་འགལ་ལོ། །ཞེས་སློབ་དཔོན་ཆེན་པོ་སྠི་ར་མ་ཏིས་སྐབས་འགྲེལ་བྱེ་བྲག་ཏུ་བཤད་པ་ལས་འབྱུང་བ་ལྟར་རོ། །གནས་འགྱུར་བ་དེ་ཡང་གནས་ངན་ལེན་གནས་འགྱུར་དང༌། ལམ་གནས་གྱུར་དང༌། ཆོས་ཉིད་གནས་གྱུར་དུ་འགྲེལ་ཏོ། །དེ་ལྟར་བཤད་པ་དེ་དག་ཐམས་ཅད་ཀྱི་ངོ་བོ་གཞི་དབྱིངས་གཅིག་ལས་མེད་ན་ཡང༌། རྣམ་གྲངས་སམ་ཁྱད་པར་དུ་དབྱེ་བའི་དགོངས་པ་ལྔ་དང༌། བཅུ་དང༌། སོ་བཞི་དང༌། བཞི་བཅུ་ལ་སོགས་པའི་བྱེ་བྲག་ཇི་སྙེད་དུ་བསྟན་པ་རྣམས་ཀྱང༌། གང་ཟག་ལམ་པ་རྣམས་ཀྱི་བློ་ཆེ་ཆུང་གི་སྣོད་ཀྱི་རྩལ་དང་སྦྱར་ནས་ནི་གདུལ་བྱ་ཆུད་མི་གསན་པའི་འདུལ་ཐབས་སྣ་ཚོགས་ཀྱི་ཁྱད་པར་ཅིར་ཡང་ཐ་དད་པར་ཐམས་ཅད་མཁྱེན་པས་བསྟན་པར་མཛད་པ་ཡིན་པས་སྤྱོད་པའང་དེ་ཡང་བསྟུན་ནས་སྤྱོད་དགོས་པའོ། །དེས་༼༡༧༤༽ན་ཁས་བླངས་པའི་ས་དང་རྣལ་འབྱོར་བཅུའི་སྤྱོད་པ་ནི། སྤྱིར་ཐུན་མོང་དུ་སྤྱད་པ་དང༌། ཁྱད་པར་གྱི་སྤྱོད་པའོ། །དེ་ལ་ཐུན་མོང་དུ་སྤྱད་པ་ནི། སྤྱོད་པ་རྒྱུན་གྱི་དམ་ཚིག་བཞི་དང༌། གསོ་བསླང་གི་སྤྱོད་པ་ཡན་ལག་དང་བཅས་པ་དང༌། བརྟུལ་ཞུགས་ཀྱི་སྤྱོད་པ་ཉི་ཤུ་གསུམ་དང༌། འགྲོ་དོན་གྱི་སྤྱོད་པ་གསུམ་བཤད་པ་དག་གོ།

ཁྱད་པར་བདག་དོན་སྒོའི་སྤྱོད་པ་ནི། ས་དང་པོ་ལ་རྣམ་པར་དཀར་བ་ཚོགས་ཀྱི་སྤྱོད་པ་དང༌། ས་གཉིས་པ་ལ་ཕྲ་མེན་གྱི་སྤྱོད་པའོ། །ས་གསུམ་པ་ལ་བརྩོན་འགྲུས་ཀྱི་སྤྱོད་པའོ། །ས་བཞི་པ་ལ་གཡེང་བ་སྤང་བའི་སྤྱོད་པའོ། །ས་ལྔ་པ་ལ་ཡོངས་སུ་མི་གཏོང་བའི་སྤྱོད་པའོ། །ས་དྲུག་པ་ལ་ཤེས་རབ་དང་མཐུན་པའི་སྤྱོད་པ་དང༌། ས་བདུན་པ་ལ་ཏིང་ངེ་འཛིན་གྱི་སྤྱོད་པ་དང༌། ས་བརྒྱད་པ་ལ་སྤོང་ལེན་མེད་པའི་སྤྱོད་པ་དང༌། ས་དགུ་པ་ལ་ཡེ་ཤེས་ཐུགས་རྗེའི་སྤྱོད་པ་དང༌། ས་བཅུ་པ་ལ་བྱ་བ་མེད་པའི་སྤྱོད་པའོ། །དེ་དག་ཀྱང་བསྡུ་ན་བྱ་བའི་སྤྱོད་པ་དང༌། བྱ་བ་མེད་པའི་སྤྱོད་པ་གཉིས་སུ་འདུས་ཏེ། དགུ་པ་མན་ཆད་དང༌། གཅིག་གོ །དགོས་ཆེད་ནི། གང་ཡང་བདག་གི་དོན་དང༌། གཞན་གྱི་དོན་དུ་འགྲེལ་ཏོ། །དེ་དག་གང་གི་ཡིད་ཆེས་པར་འགྱུར་ཞེ་ན། གཞུང་ཉིད་ལས། འདུན་པ་སེམས་པའི་རྣལ་འབྱོར་པ། །གནས་ཤིང་སྤྱད་པའི་ས་ཞེས་བྱ། །དག་དང་མ་དག་གིས་སྤྱོད་པའོ། །དགེ་དང་མི་དགེའི་ལས་རྣམས་ཀུན། །གཅོད་སྦྱོང་སྦྱོར་བའི་ཚུལ་ཉིད་ཀྱིས། །ལེགས་ཉེས་སྟོབས་ཆེན་འགྱེད་པའོ། །ངན་སོང་མི་ལྡོག་དགོན་པར་འཇུག །སྤྱོད་པ་རྒྱུན་གྱི་རྣལ་འབྱོར་ཉིད། །མོས་པ་དག་ཅིང་འདུན་པའི་གནས། །བདེན་མཐོང་ཅིར་སྤྱོད་མི་དམིགས་ལྡན། །ཁྱད་པར་རྩལ་འཕང་ཀུན་རྫོགས་ཤིང༌། །ཏིང་ངེ་འཛིན་གྱི་སྦྱོར་བའོ། །འཁོར་ལོས་སྒྱུར་བའི་རྒྱལ་ཆེན་པོ། །མཐོང་བའི་གནས་ན་བཅུ་དྲུག་པ། །རྫོགས་པའི་གནས་ན་ལོངས་སྤྱོད་པའོ། །ཡུལ་དོན་ཡེ་ཤེས་དེ་སྦྱར་བས། །ཤེས་པར་བྱ་བ་ཐམས་ཅད་རྫོགས། །སྒྱུ་མའང་སྒྱུ་མ་ཡིན་སྤྱོད་པའོ། །ཅིར་སྣང་ཅི་ཡང་མ་ཡིན་པས། །མི་སྐྱེ་མི་འགག་ངོ་བོ་ལས། །ཇི་ལྟར་བལྟས་དགུ་དེར་སྣང་བས། །ཐེག་མཆོག་སྤྱི་རྒྱ་རླབས་ཀྱིས་བཅད། །ཅེས་གསུངས་པས་ཐེ་ཚོམ་གྱི་དོགས་པ་མེད་པར་མཇལ་ཏོ།།

གཉིས་པ་བློ་ཆུང་གིས་བློ་ཆེ་བའི་རྗེས་སུ་སྤྱོད་ན་ལྟུང་བ་ནི།

དེ་ཡང་རྩལ་གྱི། ཞེས་པ་ནས། དག་གིས་འགྲུབ་པར་དཀའ་འོ། །ཞེས་པའི་བར་གྱིས་བསྟན་ཏེ།

དེ་ཡང་རྩལ་གྱི་ཁྱད་པར་གྱིས། །དང་པོ་ལས་ཀྱི་ཁྱད་པར་ལས། །སོགས་པའི་རྣལ་འབྱོར་ཆུང་ངུ་རྣམས། །རང་རང་རྩ་བ་བོར་ནས་ནི། །རྩལ་ཆེན་རྫོགས་པའི་རྣལ་འབྱོར་པར། །སོགས་པའི་རྣལ་འབྱོར་ཆེན་པོའི་ཚུལ། །སྤྱོད་པར་བྱེད་དང་དོན་འདོད་པ། །སྦལ་བུས་མཁའ་ལྡིང་ལས་སྤྱད་ཀྱང་། །བརྩལ་བའི་ཡུལ་ནི་ཆད་པ་ཡིན། །ནོངས་བུས་ལས་ཀྱི་འཕངས་དམས་པ། །རང་སྐལ་འཚོ་བའི་ཚོད་བོར་ནས། རྒྱལ་པོ་ཐབས་ཀྱི་འཕངས་མཐོ་བའི། །ལོངས་སྤྱོད་ཆེ་ལ་དམིགས་བཅས་ཀྱང་། །དེ་དག་མི་འཐོབ་འཚོ་བྲལ་བཞིན། །སྐལ་ལྡན་ཅན་གྱི་དོན་འདི་དག །སྐལ་ཞན་དག་གིས་གྲུབ་པར་དཀའ་འོ།།

རང་རང་གི་སྤྱོད་པ་དང་མི་འཚམས་པའི་སྤྱོད་པ་གོལ་བར་༼༡༧༥༽བསྟན་པའི་ཕྱིར། དེ་ཡང་རྣལ་འབྱོར་པའི་བློ་གྲོས་ཀྱི་རྩལ་གྱི་ཁྱད་པར་གྱིས་རིམ་པ་ལྟར་ལྟ་སྤྱོད་མ་འབྲེལ་བའི་སྐྱོན་བསྟན་པའང༌། ལས་དང་པོ་པའི་རྣལ་འབྱོར་འདུན་པ་སེམས་པའི་རྣལ་འབྱོར་སོགས་དང༌། བསླབ་པར་སྦྱོར་བའི་རྣལ་འབྱོར་དང༌། ངེས་པའི་རྣལ་འབྱོར་དང༌། བཀའ་སྡོད་ལས་ཀྱི་རྣལ་འབྱོར་གྱི་ཁྱད་པར་ལ་སོགས་པའི་ལྟ་སྤྱོད་དམན་པའི་རྣལ་འབྱོར་ཆུང་ངུ་རྣམས་ཀྱིས། རང་རང་གིས་སྤྱོད་པ་བློ་དང་འཚམས་པའི་ཚད་ཀྱི་རྩ་བ་བོར་བའམ་བཞག་ནས་ནི། རྩལ་ཆེན་རྫོགས་པའི་རྣལ་འབྱོར་ལ་སོགས་པ། རྨད་བྱུང་རོལ་པའི་རྣལ་འབྱོར་དང༌། ཚོགས་ཆེན་འདུས་པའི་རྣལ་འབྱོར་དང༌། རོལ་པ་རྒྱན་གྱི་རྣལ་འབྱོར་དང༌། བདེ་བ་ཆེན་པོའི་རྣལ་འབྱོར་དང༌། ཐིག་ལེ་རྫོགས་པའི་རྣལ་འབྱོར་དང༌། བདག་ཉིད་ཆེན་པོའི་རྣལ་འབྱོར་དང༌། ལྷུན་གྱིས་གྲུབ་པའི་རྣལ་འབྱོར་དང༌། ཀློང་ཡངས་ཆུབ་པའི་རྣལ་འབྱོར་དང་དགུ་ཡི་རང་སྐབས་སུ་བབ་པའི་རྣལ་འབྱོར་ཆེན་པོའི་སྤྱོད་པའི་ཚུལ་ལྟར་དུ་དངོས་སུ་སྤྱོད་པར་བྱེད་པ་དང་དོན་ཆེན་པོའི་འབྲས་བུ་ཐོབ་པར་འདོད་པ་ནི་ཚི་ཆད་པ་ཉིད་དེ།

དཔེར་ན་སྦལ་བུས་ནམ་མཁའ་ལྡིང་གི་ལས་སྤྱད་ནས་མཁའ་ལ་ལྡིང་བར་འདོད་ཀྱང༌། སླར་ཡང་བརྩལ་བའི་ཡུལ་ནི་ཚི་ཆད་དེ་མི་འགྲུབ་པ་བཞིན་ཡིན་ལ། གཞན་ཡང་དཔེར་ན་ནོངས་བུ་བུས་པ་བསོད་ནམས་ལས་ཀྱི་འཕངས་དམས་པའམ་དམའ་བར་གྱུར་པས་རང་སྐལ་དང་འཚམས་པའི་ལས་ཁུར་གྱིས་འཚོ་བའི་ཚོད་རྣམས་བོར་ནས་རྒྱལ་པོ་ཆེན་པོ་བསོད་ནམས་ཀྱི་ཐབས་ཀྱི་འཕངས་མཐོ་བར་གྱུར་བའི་ལོངས་སྤྱོད་རྒྱ་ཆེ་བ་ལ་དམིགས་པ་དང་བཅས་པས་ཅོག་གེ་བསྡད་ཀྱང༌། ལོངས་སྤྱོད་དེ་དག་གི་མྱོང་བ་མི་ཐོབ་པས་འཚོ་བ་དང་བྲལ་བ་ལས་མེད་པ་བཞིན་དུ། སྐལ་པ་དང་ལྡན་པ་ཅན་གྱི་དོན་ཟབ་མོ་འདི་དག་སྐལ་བ་ཞན་པ་དག་གིས་འགྲུབ་པར་དཀའ་བ་ཡིན་ཏེ་འབྲེལ་བ་མེད་པས་སོ། །འོན་ཀྱང་གཏེ་ཆད་པ་མེད་པས་བརྒྱུད་ནས་མི་ཐོབ་པའང་མ་ཡིན་ཏེ། བརྒྱད་པ་ཐོབ་པའི་ལྟས་བྱུང་ནས་སྤྱད་པ་ལྟ་བུའོ།།

གཉིས་པ་བྱེ་བྲག་ཏུ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

དེ་ཕྱིར་དགོངས་པ། ཞེས་པ་ནས། དག་དང་མཉམ་པར་གསུངས། །ཞེས་པའི་བར་གྱིས་བསྟན་ཏེ།

དེ་ཕྱིར་དགོངས་པ་ཀུན་འདུས་པས། །གང་འདིར་རྣལ་འབྱོར་དམན་དོན་དུ།།

གསོ་དང་སྦྱོང་བའི་སྤྱོད་པ་དག །དམ་པ་དག་དང་མཉམ་པར་གསུངས།།

བཤད་པའི་གཏན་ཚིགས་དེ་ཉིད་ཀྱི་ཕྱིར་ན། རྣལ་འབྱོར་དམ་པ་རྒྱལ་བའི་དགོངས་པ་ཀུན་ནས་འདུས་པའི་རྒྱུད་ཆེན་པོ་འདི་ལ་ངེས་པར་གནས་པས། སྐབས་གང་འདིར་ལས་དང་པོ་པའི་རྣལ་འབྱོར་ལ་༼༡༧༦༽སོགས་པ་བློ་དམན་པ་རྣམས་ཀྱི་རྩེ་གཅིག་ཏུ་ཐོབ་པ་ནས་བསྒྲུབ་པའི་དོན་གྱི་ཆེད་དུ་ན་ཤི་གསོ་བསླང་གི་སྤྱོད་པ་དང༌། སྒྲིབ་པ་སྦྱོང་བའི་སྤྱོད་པ་གཉིས་པོ་འདི་ལ་ཁྱད་པར་ལྔ་ལྔའམ་བཅུ་བཅུ་སྟེ་རྣལ་འབྱོར་ལྔ་ལྔའམ་བཅུ་བཅུའི་སྐབས་དག་ཏུ་སྤྱོད་པ་འདི་གཉིས་སྤྱོད་ན། རྒྱལ་བ་རྣམས་ཀྱི་གོ་འཕང་ཐོབ་པའི་ཐབས་ཀྱི་སྤྱོད་པ་དམ་པ་དག་དང་མཉམ་པར་འགྱུར་བར་གསུངས་ཤིང་བཀའ་སྩལ་པ་ཡིན་པས་རྗེས་སུ་སྤྱད་པར་བྱའོ།།

གཉིས་པ་རྒྱས་པར་བཤད་པ་ལ་གཉིས་ཏེ། གསོ་བའི་སྤྱོད་པ་བསྟན་པ། སྦྱོང་བའི་སྤྱོད་པ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གསོ་དང་བསླང་བའི། ཞེས་པ་ནས། ཅན་དང་མཐུན་པར་སྤྱད། །ཅེས་པའི་བར་གྱིས་བསྟན་ཏེ།

གསོ་དང་སླང་བའི་རྟོག་པ་འདི། །རྟོག་པ་ཅན་དང་མཐུན་པར་སྤྱད།།

འཆད་པའི་ནད་གསོ་བ་དང་ལྟ་ངན་དུ་ཤི་བ་བསླང་བའི་ཐབས་ཀྱི་སྤྱོད་པའི་རྟོག་པ་འདི་ནི། ལས་དང་པོ་པ་དང༌། མུ་སྟེགས་པ་ལའང་རོ་ལངས་བསྒྲུབ་པ་ཡོད་པས་དེ་དག་དྲང་བའི་ཕྱིར་རྟོག་པ་ཅན་གང་དང་མཐུན་པར་ཡང་སྤྱད་དེ། འདིར་བརྡ་ཡིས་དངོས་པོར་སྤྱོད་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། རྟོག་པའི་ནད་གསོ་བ་བསྟན་པ། ཤི་བ་བསླང་བའི་གསོ་བ་བཤད་པའོ། །དང་པོ་ནི།

གསོ་བ་རྟོག་པས། ཞེས་པ་ནས། མཉམ་པའི་སྨན་གྱིས་གསོ། །ཞེས་པའི་བར་གྱིས་བསྟན་ཏེ།

གསོ་བ་རྟོག་པས་ཟིན་པའི་ནད། །ལྟ་སྤྱོད་མཉམ་པའི་སྨན་གྱིས་གསོ།།

གསོ་བ་དེ་དངོས་ནི། གང་གསོ་ན། གཙང་དམེ་དང་སྐྱེ་ཤི་ལ་སོགས་པ་གཟུང་འཛིན་གྱི་རྟོག་པས་ཟིན་པའི་ནད་དེ་གསོ་བའོ། །གང་གིས་གསོ་ན་ལྟ་དགོངས་དང་སྤྱོད་པ་མཉམ་པ་ཆེན་པོར་གྱུར་པའི་སྨན་མཆོག་གི་ཐབས་ཀྱིས་གསོ་བ་ཉིད་ཀྱི་ཕྱིར་རོ།།

གཉིས་པ་ཤི་བ་བསླང་བའི་གསོ་བ་བཤད་པ་ལ་གཉིས་ཏེ། རྒྱས་པར་བཤད་པ། ཞབས་བསྡུ་བའོ། །དང་པོ་ལ་བཞི་སྟེ། བསྙེན་པ། ཉེ་བའི་བསྙེན་པ། བསྒྲུབ་པ། བསྒྲུབ་པ་ཆེན་པོའོ། །དང་པོ་ནི།

ཤི་བ་བསླང་བའི། ཞེས་པ་ནས། མེད་པར་བསླང་བའི་ཕྱིར། ཞེས་པའི་བར་གྱིས་བསྟན་ཏེ།

ཤི་བ་སླང་བའི་རྟོག་པ་འདི། །ཁམས་གསུམ་འཁོར་བའི་ནད་པ་རྣམས། །རྟག་ཆད་མཐར་ཤི་རོ་གླིང་ནས།།

གཏི་མུག་བམ་ཆེན་རོ་ལངས་ཏེ། །སྐྱེ་འགག་མེད་པར་བསླང་བའི་ཕྱིར།།

རོ་ལངས་བསྒྲུབ་པ་འདི་ཉིད་ཟག་བཅས་པས་རང་གཞན་གཉིས་ཀའི་དོན་ཡིན་ལ། ཟག་མེད་ནས་རང་དོན་ཁོ་ནར་མི་རིགས་ཀྱང་གཙོ་བོར་གཞན་དོན་དུ་ཡིན་ནོ། །གང་བསླང་ན། ཤི་བ་བསླང་བ་སྟེ། དངོས་སུ་ཤི་བ་རོ་ལངས་བསྒྲུབ་སྟེ་རོ་བསླང་བའི་རྟོག་པ་འདི་ནི། ཁམས་གསུམ་དུ་འཁོར་བའི་འགྲོ་བ་ཉོན་མོངས་པ་ལྔའི་ནད་ཀྱིས་ཟིན་པའི་ནད་པ་རྣམས། རྟག་ཆད་ཀྱི་མཐར་འཛིན་པར་ཤི་བ་རོ་གླིང་དང་འདྲ་བ་བསླང་བའི་བརྡ་རུ་དུར་ཁྲོད་ཀྱི་གནས་ནས་དོན་གཏི་མུག་གི་བརྡ་ཤ་ཆེན་གྱི་ངོ་བོ་བམ་ཆེན་གྱི་རོ་བླངས་ཏེ། དེ་ཉིད་སྐྱེ་འགག་མེད་པར་མཉམ་པ་ཉིད་ཀྱི་ངང་༼༡༧༧༽དུ་འཕོ་འགྱུར་དང་བྲལ་བར་བསླང་བའི་ཕྱིར་རོ་ལངས་བསྒྲུབ་པར་བྱ་བ་སྟེ། དུར་ཁྲོད་ནས་རོ་མ་རུལ་བ། རྨ་མེད་པ། གཉེར་མ་མེད་པ། རིགས་བཟང་བ། གཟུགས་བཟང་བ་ཉིད་བླང་བའོ།།

གཉིས་པ་ཉེ་བའི་བསྙེན་པ་ནི།

རོ་ལ་ཡིད་བཞིན། ཞེས་པ་ནས། རྒྱུན་མི་འཆད་པར་བཟླས། །ཞེས་པའི་བར་གྱིས་བསྟན་ཏེ།

རོ་ལ་ཡིད་བཞིན་ནོར་བུ་ཡི། །སྔགས་ཀྱིས་བཏབ་སྟེ་མནན་པར་བྱ།།

རོ་ཡི་གཉེན་པོར་བདག་གྱུར་ནས། །རོ་སྔགས་རྒྱུན་མི་འཆད་པར་བཟླས།།

དེ་ལྟ་བུའི་རོ་མཚན་དང་ལྡན་པ་མ་སྣད་མཛེས་པ་མ་གཙེས་པའི་ཡིད་དུ་འོང་བ་དེ་ལ་བཤད་ཟིན་པའི་འདོད་པའི་ཡོན་ཏན་མང་པོ་འབྱུང་བས་ཡིད་བཞིན་ནོར་བུ་ཡི་སྙིང་པོའི་སྔགས། ཨ་བྷུར་ཀུར་ཨི་ཙི་ཀི་བྱི་ཡི་ཨུ་ཙཱུསྨ་ཀྲོ་ཏ་ཧཱུྃ་ཕཊཿཅེས་རིན་པོ་ཆེའི་རིགས་ཀྱིས་བཏབ་སྟེ། དང་པོར་བདག་སྒྲུབ་པ་པོ་ཉིད་དེའི་སྟེང་དུ་འདུག་པར་བྱས་ཏེ་གནན་པར་བྱའོ། །དེ་ནས་རོ་ལ་རྟོག་བགེགས་འཇོམས་པའི་གཉེན་པོར་བདག་ལྟ་བའི་ངང་ལས་ཁྲོ་བོ་བདུད་རྩི་འཁྱིལ་པར་གྱུར་པར་བསྐྱེད་ནས་ཡན་ལག་གི་ལྷ་དང་ལྡན་པར་བྱས་ཞིང་ནུས་པ་བསྐྱེད་དེ་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་བསྟིམ། བརྟན་པར་བྱས་ལ་མཆོད་བསྟོད་ཀྱི་ལས་ཟིན་པ་དང༌། ཨ་མྲ་ཏ་ཀུནྡྷ་ལི་བསླང་བའི་དགྲ་ཡིན་པ་དང་བར་ཆོད་བསལ་བ་དང་དངོས་གྲུབ་མྱུར་བ་ཡིན་པས་སམ། ཡང་ན་བཛྲ་ཨ་མྲ་ཏ་ཨྃ་ཨྃ། ཞེས་ཀྱང་གསུངས་ཏེ། རོ་སྔགས་རྒྱུན་མི་ཆད་པར་གསལ་བ་གསུམ་པ་ལྡན་ཞིང༌། རྔམ་གློག་ལས། སྒྲ་ཆེན་མ་ཡིན་ཆུང་བར་མིན། །མགྱོགས་པར་མ་ཡིན་བུལ་བར་མིན། །དྲག་པར་མ་ཡིན་དལ་བར་མིན། །ཡིག་འབྲུ་ཡན་ལག་ཉམས་མ་ཡིན། །ཡེངས་མིན་གླལ་སོགས་པར་གཅོད་མིན། །རྒྱུ་བའི་སེམས་རྣམས་སྤངས་པ་དང༌། །བཟླས་པའི་སྐྱོན་བཅུ་སྤངས་ནས་ནི། །དུས་དང་གྲངས་དང་མཚན་མ་ཡི། །བསྙེན་པར་རབ་ཏུ་རྫོགས་པ་གཅེས། །ཅེས་པ་ལྟར་བཟླས་པར་བྱའོ།།

གསུམ་པ་བསྒྲུབ་པ་ནི།

རོ་ཡི་གཟི་བྱིན། ཞེས་པ་ནས། དྲག་པོ་རྒྱུན་མི་གཅད། །ཅེས་པའི་བར་གྱིས་བསྟན་ཏེ།

རོ་ཡི་གཟི་བྱིན་བྱུང་བ་ན། །བར་ཆད་མེད་པའི་བརྩོན་འགྲུས་བྱ། །རོ་དེ་འགུལ་བར་གྱུར་པ་དང་།།

རང་གི་འགྱུར་རྩིས་བྱུག་པར་བྱ། །རོ་ཡི་ཡན་ལག་ཀུན་བཅིངས་ནས། བཟླས་པ་དྲག་པོ་རྒྱུན་མི་བཅད།།

དེ་ལྟར་བཟླས་པ་དང༌། གློ་གློར་ཕོ་ཉས་ཤེས་པ་དགུག་བསྟིམ་དང་བསྡམ་པར་བྱས་པས་ཡུན་རིང་བ་ན་གྲུབ་པའི་རྟགས་གསུམ་འོང་སྟེ། དང་པོ་སེར་སྐྱ་དང་སྨུག་པ་དང༌། མདོག་སྣུམ་པ་དང༌། གཉེན་ཞིང་བཀྲག་དང་ལྡན་པར་གྱུར་པའི་རོ་ཡི་གཟི་བྱིན་བྱུང་བ་ན། དེ་མ་ཐག་ཏུ་ཞུན་ཆེན་གྱིས་བསྐུས་ལ་ཡན་ལག་བཅིང་བ་དང་གཞུམ་པར་བྱ་བའི་ཕྱིར་བར་ཆད་པ་མེད་པའི་བརྩོན་འགྲུས་བྱའོ། །དེའི་ཚེ་རོ་དེ་ལ་ཤེས་པ་ཞུགས་པས་འགུལ་བར་གྱུར་པ་དང༌། རོ་ལངས་གསེར་དུ་བསྒྲུབ་ན་གསེར་འགྱུར་རྩི་སོགས་གང་དུ་བསྒྱུར་བར་འདོད་པ་དག་གི་འགྱུར་རྩིས་བྱུག་པར་བྱའོ། །དེ་ནས་ལྟ་བའི་ངང་ནས་༼༡༧༨༽ལྷར་བསྐྱེད་དེ། རོ་ཡི་ཡན་ལག་ཀུན་ཞགས་པས་བཅིངས་ནས། འོག་ཏུ་བཅུག་ལ་གསང་སྔགས་ཀྱི་བཟླས་པ་དྲག་པོ་རྒྱུན་མི་གཅད་པར་བཟླས་པར་བྱ་བའོ། །དེས་ན་སྒྲུབ་པ་པོ་ལྷག་པའི་ལྷ་དགུ་ཉིད་དང་བཅུ་ལ་གོམས་པ་གཅིག་གིས་འགྲུབ་ཀྱི་དེ་མན་གྱིས་མིན་ནོ། །གསུངས།

བཞི་པ་བསྒྲུབ་པ་ཆེན་པོ་ལ་བཞི་སྟེ། རོ་གསེར་དུ་བསྒྲུབ་པ། གོ་མཚོན་དུ་བསྒྲུབ་པ། རྐང་མགྱོགས་ལ་སོགས་པར་བསྒྲུབ་པ། དེ་ལྟར་གྲུབ་པའི་ལྟ་སྤྱོད་དོ། །དང་པོ་ནི།

གང་དེར་ལངས་པར། ཞེས་པ་ནས། བརྡབས་ན་གསེར་དུ་འགྱུར། ཞེས་པའི་བར་གྱིས་བསྟན་ཏེ།

གང་དེར་ལངས་པར་གྱུར་པ་དང་། །ཆོ་འཕྲུལ་འཇིགས་ཚུལ་སྟོན་པར་བྱེད།།

བརྟུལ་ཞུགས་ལྡན་པའི་སྐྱེས་བུ་ཡིས། །དེ་ཚེ་རོ་ཡི་ལྕེ་བཅད་ནས། །རོ་ལ་བརྡབས་ན་གསེར་དུ་འགྱུར།།

དེ་ནས་གང་གི་དུས་དེར་རོ་དེ་ཉིད་འཕར་ཞིང་ལངས་པར་གྱུར་པ་དང༌། བདག་ལ་རྒོལ་བ་ལ་སོགས་པ་ཆོ་འཕྲུལ་དང་འཇིགས་ཚུལ་སྟོན་དུ་འོང་བར་བྱེད་དེ། དེའི་མོད་ལ་རྣལ་འབྱོར་པ་བརྟུལ་ཞུགས་དང་ལྡན་པའི་སྐྱེས་བུ་དེ་ཡིས། དེ་ཡི་ཚེ་རོ་ཡི་ལྕེ་དེ་རང་གི་སོ་ཡིས་བཅད་ནས། སླར་རོ་ཉིད་ལ་བརྡབས་ན་གསེར་དུ་འགྱུར་བ་ཡིན་ནོ།།

གཉིས་པ་གོ་མཚོན་དུ་བསྒྲུབ་པ་ནི།

དེ་བཞིན་ཇི་ལྟར། ཞེས་པ་ནས། གཡུལ་ཡང་བཟློག་པར་འགྱུར། །ཞེས་པའི་བར་གྱིས་བསྟན་ཏེ།

དེ་བཞིན་ཇི་ལྟར་འདོད་པ་ཡི། །རྐྱེན་གྱིས་བསྒྱུར་ན་དེ་ལྟར་འགྱུར། །ལྕེ་བཅད་རལ་གྲི་མཚོན་ཆ་དང་།།

རོ་ཡི་མགོ་བོ་བཅད་པ་དེས། །ཇི་ལྟར་འདོད་པའི་རྫས་གྲུབ་སྟེ། །མགོ་ཐོད་གོ་ཆར་བཟུང་ནས་ནི།།

ལྕེ་ཡི་རལ་གྲིའི་མཚོན་ཐོགས་ནས། །ལྷ་མིན་གཡུལ་ཡང་བཟློག་པར་འགྱུར།།

དེ་བཞིན་དུ་རོ་དེ་ལ་རང་གི་དངོས་གྲུབ་ཇི་ལྟར་འདོད་པ་ཡི་རྐྱེན་རྣམས་ཀྱིས་འཕྲལ་དུ་བསྒྱུར་ན་དེ་ལྟར་འགྲུབ་པར་འགྱུར་བའོ། །དེའང་གོ་མཚོན་དུ་བསྒྲུབ་ན། ལྕེ་བཅད་པ་རལ་གྲིའི་མཚོན་ཆ་མཆོག་ཏུ་གྱུར་པ་དང༌། རོ་དེ་ཡི་མགོ་བོ་བཅད་པ་དེས། གཞན་ཡང་དངོས་གྲུབ་ཇི་ལྟར་འདོད་པའི་རྫས་འགྲུབ་པ་འབྱུང་སྟེ། གལ་ཏེ་གོ་ཆར་འདོད་ན་མགོ་ཐོད་ལ་ཕུབ་འོད་དང་ལྡན་པར་འགྱུར་བས་དེ་ཉིད་གོ་ཆར་བཟུང་ནས་ནི། ལྕེ་ཡི་རལ་གྲི་ཉིད་མཚོན་དུ་ཐོགས་ནས་གཡུལ་འགྱེད་ན། ལྷ་མིན་གྱི་དམག་དཔུང་ལྟ་བུའི་ཕ་རོལ་གྱི་གཡུལ་ཡང་བཟློག་པར་འགྱུར་རོ།།

གསུམ་པ་རྐང་མགྱོགས་ལ་སོགས་པར་བསྒྲུབ་པ་ནི།

རོ་ལངས་གྲུབ་པའི། ཞེས་པ་ནས། འདོད་པ་ཐམས་ཅད་འབྱུང༌། །ཞེས་པའི་བར་གྱིས་བསྟན་ཏེ།

རོ་ལངས་གྲུབ་པའི་རྐང་མགྱོགས་ནི། །དཔག་པའི་ཚད་ལས་འདས་པ་སྟེ། །སྐྱེས་བུ་རྩལ་དང་ལྡན་པ་ཡིས། །ཕྱོགས་བཞིར་བལྟས་ཏེ་དུས་གཅིག་ཏུ། །མདའ་འཕངས་ས་ལ་མ་བབ་པར། །མདའ་བླངས་སྐད་ཅིག་འཇིག་རྟེན་བསྐོར། །སྐྱེས་བུ་ལག་ཚོད་མ་ཡལ་བར། །དེ་མ་ཐག་ཏུ་གནས་སུ་སླེབ། །ཡུད་ལྟར་ཤིན་ཏུ་མྱུར་བ་ཐོབ། །དེ་ལ་སོགས་པ་མཐའ་ཡས་པ། །རོ་ལ་འདོད་པ་ཐམས་ཅད་འབྱུང་།།

རོ་ལངས་གྲུབ་པའི་སྒོ་ནས་རྐྱེན་གྱིས་བསྒྱུར་ཏེ་རྐང་བགྱོགས་བསྒྲུབ་པར་བྱེད་པ་ནི། དཔག་པའི་ཚད་ལས་འདས་པ་སྟེ། དཔེར་ན་སྐྱེས་བུ་རྩལ་དང་ལྡན་པ་ཡིས། ཕྱོགས་བཞིར་བལྟས་ཏེ་དུས་གཅིག་ཏུ་མདའ་བཞི་འཕངས་པའང་ས་ལ་མ་བབ་པར་མདའ་རྣམས་བླངས་ཏེ་བར་སྣང་དུ་འཁོར་ཞིང་སྐད་ཅིག་གིས་འཇིག་རྟེན་བསྐོར་བར་བྱེད་དེ། སྐྱེས་བུ་དེ་ཡིས་མདའ་འཕངས་པའི་ནུས་པས་ལག་པའི་དྲོད་ཀྱང་མ་ཡལ་བར། དེ་མ་ཐག་ཏུ་རང་ནས་སླེབ་པ་ལྟ་བུར་ཚད་ལས་འདས་པ་ཐོབ་པས་ཡུད་ལྟར་ཤིན་ཏུ་མྱུར་བ་འཐོབ་པར་འགྱུར་རོ། །༼༡༧༩༽དེས་ན་འདིར་ནི་དངོས་གྲུབ་འགྲུབ་པའི་ཡོན་ཏན་ཆ་ཙམ་སྨོས་པ་སྟེ། དེ་དག་ལ་སོགས་པ་རོ་ལངས་གྲུབ་པའི་དངོས་གྲུབ་མཐའ་ཡས་ཤིང་ཚད་ལས་འདས་པ་སྙེད་འགྲུབ་པར་རོ་ལངས་དངོས་གྲུབ་བརྒྱད་སོགས་གང་ལྟར་འདོད་པ་ཐམས་ཅད་འབྱུང་བའོ།།

བཞི་པ་དེ་ལྟར་གྲུབ་པའི་ལྟ་སྤྱོད་ནི།

རོ་ལ་རོར་བསྒྲུབས། ཞེས་པ་ནས། མཉམ་ཞེས་དམ་པས་བཤད། །ཅེས་པའི་བར་གྱིས་བསྟན་ཏེ།

རོ་ལ་རོ་བསྒྲུབ་རོ་གྲུབ་ན། རོ་ཡི་དངོས་པོ་མི་སྣང་བར། །གང་ལྟར་བསྒྲུབས་པ་དེར་སྣང་ཕྱིར།།

རོ་ལ་རྣམ་རྟོག་ག་ལ་ཡོད། །རོ་ལ་རོ་ཡི་རང་བཞིན་དག །མེད་པར་ཤེས་པ་ཐག་ཆོད་བཞིན།།

སྤྱོད་པས་དེ་ལྟར་མཉམ་སྤྱོད་ན། །ལྟ་སྤྱོད་མཉམ་ཞེས་དམ་པས་བཤད།།

སྔོན་དུ་ལྟ་བས་ཐག་བཅད་པ་བསྟན་པའི་ཕྱིར། དེ་ལྟར་རོ་ཡི་རྫས་ལ་བརྟེན་ནས་རོར་བསྒྲུབས་པས་རོ་ལངས་ཀྱི་དངོས་གྲུབ་ཐོབ་པའི་དུས་ན། ཐོག་མར་རོ་ཡི་དངོས་པོར་མི་སྣང་བར་རང་བཞིན་མེད་པར་ཇི་ལྟར་སྒྲུབ་ཅིང་ཏིང་ངེ་འཛིན་གྱིས་དབང་བསྒྱུར་ཏེ་གང་ལྟར་བསྒྲུབ་པ་དེ་ལྟར་སྣང་བའི་ཕྱིར། གཏན་ཚིགས་དེས་ན་རོ་ལ་རོའི་རྣམ་རྟོག་ཕྱོགས་གཅིག་པར་བཏགས་པ་ལྟར་དུ་ག་ལ་ཡོད་དེ་མེད་པས་ན། རོའི་ངོ་བོ་བྱང་ཆུབ་ཀྱི་སེམས་རང་བཞིན་གྱི་འོད་གསལ་བ་ཡིན་པས། རོ་ཞེས་བྱ་བ་ལ་རོ་ཡི་རང་བཞིན་གྱི་ཐ་སྙད་ཕྱོགས་གཅིག་པའི་རྟོག་པ་དག གཞི་ནས་མ་གྲུབ་པས་དངོས་པོ་མེད་པར་ཤེས་ཏེ་ལྟ་བས་ཐག་ཆོད་དེ་རིམ་པར་རྟོགས་པ་བཞིན་དུ། སྤྱོད་པས་ཀྱང་དེ་ལྟར་རྗེས་སུ་མཐུན་པར་ཤི་བ་བསླང་སྟེ་མཉམ་པ་ཉིད་དུ་སྤྱོད་པར་བྱས་ན། ལྟ་སྤྱོད་ཡ་ཆར་མ་གྱུར་པར་ཟུང་དུ་འབྲེལ་བས་མཉམ་པ་ཉིད་ཡིན་ནོ་ཞེས་རྣམ་འདྲེན་སངས་རྒྱས་དམ་པས་བཤད་ཅིང་བཀའ་ལས་གསུངས་པའོ།།

གཉིས་པ་ཞབས་བསྡུ་བ་ནི།

འདི་ནི་ཤི་བ། ཞེས་པ་ནས། སྤྱོད་པར་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

འདི་ནི་ཤི་བ་སློང་བ་ཡི། །བདུད་རྩི་དམ་པའི་སྤྱོད་པའོ་ཞེས། །དགོངས་པ་དམ་པ་ཀུན་འདུས་གསུང་།།

གྲོགས་པོ་དག དེ་དག་ནི་ཤི་བ་སློང་བའི་རྟོག་པ་ཡོངས་སུ་སྦྱོང་བའི་སྤྱོད་པར་ཤེས་པར་བྱའོ།།

བཤད་པ་འདི་དག་ནི་ཤི་བ་བསླང་བ་ཡི་བདུད་རྩི་དམ་པའི་སྤྱོད་པ་ཡང་དག་པའོ། །ཞེས་དགོངས་པ་དམ་པ་ཀུན་ནས་འདུས་པའི་སྟོན་པ་མཆོག་གིས་གསུངས་སོ། །གྲོགས་པོ་དག སྤྱོད་པ་དེ་དག་ནི་ཤི་བ་སློང་བའི་རྟོག་པ་ཡོངས་སུ་སྦྱོང་ཡིན་པར་ཤེས་པར་བྱའོ། །ཞེས་སྤྱོད་པའི་ངོ་བོ་བསྟན་པའོ། །འདིའང་ས་རེ་རེས་རང་གི་ཏིང་ངེ་འཛིན་བརྟན་ནས་བསྒྲུབ་པ་སྟེ། ཁྱད་པར་ཡོད་པ་བཞིན་གཞན་དག་ཀྱང་འཇལ་བར་བྱའོ།།

གཉིས་པ་སྦྱོང་བའི་སྤྱོད་པ་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གྲོགས་པོ་དག ཅེས་པ་ནས། ཡོངས་སུ་སྦྱང་བའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་ལ་སྦྱོང་བའི་སྤྱོད་པ་གང་ཞེ་ན། འདི་ལྟ་སྟེ། རྟོག་པའི་ཟུག་རྔུ་སྦྱོང་བ་དང་།

རྒྱུད་ཡོངས་སུ་སྦྱང་བའོ།།

གསོ་བ་བསྟན་པའི་རྗེས་སུ། གྲོགས་པོ་དག ཅེས་བོས་ནས། དེ་ལ་སྦྱོང་བའི་སྤྱོད་པ་ཉེ་བར་བསྟན་པ་གང་ཞེ་ན། འདི་ལྟ་སྟེ། རྟོག་པའི་ཟུག་རྔུ་སྦྱང་བ་དང༌། རྒྱུད་ཡོངས་སུ་སྦྱོང་བའིི་ཚུལ་གཉིས་སུ་བསྟན་པའོ།།༼༡༨༠༽

གཉིས་པ་རྒྱས་པར་བཤད་པ་ལ་གཉིས་ཏེ། རྟོག་པའི་ཟུག་རྔུ་སྦྱངས་པ། མཚན་མའི་རྒྱུད་སྦྱངས་པའོ། །དང་པོ་ནི།

དེ་ལ་རྟོག་པའི། ཞེས་པ་ནས། དངོས་པོ་སྦྱང་བའོ། །ཞེས་པའི་བར་གྱིས་བསྟན་ཏེ།

རྟོག་པའི་ཟུག་རྔུ་སྦྱང་བ་ནི། གང་ལ་མི་རྟོག་པའི་དོན་གྱིས་ནི། གང་རྟོག་པའི་དངོས་པོ་སྦྱོང་བའོ།།

དེ་ལ་དང་པོ་རྟོག་པའི་ནད་ཀྱི་ཟུག་རྔུ་སྦྱོང་བའི་སྤྱོད་པ་ནི། དངོས་དོན་མཐོང་ལམ་ཐོབ་ནས་མཚན་མའི་རྒྱུད་སྦྱོང་བ་སྟེ། དམ་རྫས་ལྔ་ལ་སོགས་པ་སྨད་པའི་རྫས་གང་ལ་ཡང་གཙང་དམེར་འཛིན་པ་མེད་པས་མི་རྟོག་པའི་དོན་གྱིས་རྣམ་པར་དག་པའི་ཤུགས་ཀྱིས་ན་འཇིག་རྟེན་པས་སྨད་པའི་རྫས་བཤང་གཅི་ལ་སོགས་པ་གང་དག་ལ་ཡང་བླང་དོར་དུ་རྟོག་པ་དངོས་པོ་མེད་པར་འཛིན་མེད་མི་རྟོག་པའི་ཆོས་ཉིད་དུ་དག་པར་སྦྱོང་བ་ཉིད་དེ། དེ་ནི་གཙང་དམེའི་རྟོག་པ་འདག་པར་བྱེད་པའོ། །དེས་ན་སྒྱུ་འཕྲུལ་ཆེན་པོའི་རྒྱུད་ལས། སེམས་ཅན་རྟོག་པ་བཟློག་ཕྱིར་སྨན། །གཙོ་རུ་དང་དུ་བླང་བར་བྱ། །ཞེས་གསུངས་པའི་དོན་ཏོ།།

གཉིས་པ་མཚན་མའི་རྒྱུད་སྦྱངས་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གྲོགས་པོ་དག ཅེས་པ་ནས། བྱ་བས་སྦྱང་བའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་རྒྱུད་ཡོངས་སུ་སྦྱང་བ་ནི། བཀོད་པའི་བྱ་བས་སྦྱང་བ་དང་། མེའི་བྱ་བས་སྦྱང་བའོ།།

གྲོགས་པོ་དག ཅེས་བོས་ནས་ཤེས་པའི་རྒྱུད་ཀྱི་རྟོག་སྒྲིབ་ཀྱི་བག་ཆགས་ཡོངས་སུ་སྦྱང་བའི་སྤྱོད་པ་ནི། རྣམ་གྲངས་གཉིསཏེ། བཀོད་པའི་དཀྱིལ་འཁོར་གྱི་བྱ་བ་ཚོགས་ཀྱི་དཀྱིལ་འཁོར་བདུན་པོ་རེ་རེ་ལའང༌། རང་བཞིན་གྱི་དཀྱིལ་འཁོར་དང༌། ཏིང་ངེ་འཛིན་གྱི་དཀྱིལ་འཁོར། གཟུགས་བརྙན་གྱི་དཀྱིལ་འཁོར་ཆེན་པོ་བཞེངས་སུ་གསོལ་བ་དང་གསུམ་གྱི་བྱ་བས་རྣམ་པར་སྦྱངས་བ་དང༌། སྦྱིན་སྲེག་རྣམ་པ་བཞི་ཚུལ་བཞིན་དུ་བྱས་ཏེ་མེའི་བྱ་བས་ཡོངས་སུ་སྦྱོང་བ་དང་གཉིས་སུ་གནས་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། བཀོད་པ་དཀྱིལ་འཁོར་གྱིས་སྦྱང་བ། མེ་ཡི་བྱ་བས་སྦྱང་བའོ། །དང་པོ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དེ་ལ། ཞེས་པ་ནས། གང་ཞེ་ན། ཞེས་པའི་བར་གྱིས་བསྟན་ཏེ།

དེ་ལ་བཀོད་པའི་བྱ་བས་སྦྱང་བ་གང་ཞེ་ན།

དེ་ལ་བཀོད་པ་དཀྱིལ་འཁོར་གྱི་སྤྱོད་པའི་བྱ་བས་ཡོངས་སུ་སྦྱང་བ་གང་ཞེ་ན། འདི་ལྟ་སྟེ། ཞེས་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། བསྒྲུབ་པའི་གཞི། བཀོད་པའི་སྦྱང་ཐབས། དཀྱིལ་འཁོར་གྱི་དོན་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འོག་ནས། འཇུག་སྒོ་སྤྱོད་པ་དང༌། ཞེས་པ་ནས། ཚོགས་པས་ཆོས་འདི་སྤྱད། །ཅེས་པའི་བར་གྱིས་བསྟན་ཏེ།

འཇུག་སྒོ་སྤྱོད་དང་ལྟ་བ་མཐུན། །ཐམས་ཅད་གཅིག་པར་གྱུར་པ་ཡི། །རྒྱུ་དང་རྐྱེན་ལྡན་ཕུན་སུམ་ཚོགས། །མཛད་སྤྱོད་རྐྱེན་དང་དགྱེས་སྦྱོར་ལྡན། །ལྷ་དང་རིགས་འཛིན་རྣལ་འབྱོར་རིལ། །མ་ལུས་ཚོགས་པས་ཆོས་འདི་སྤྱད།།

བཤད་པའི་ཚོགས་ཀྱི་དཀྱིལ་འཁོར་དེ་དག་ཀུན་ཀྱང༌། རྣལ་༼༡༨༡༽འབྱོར་པ་དང་པོར་འཇུག་པའི་སྒོ་དང༌། སྤྱིའི་ལས་སྤྱོད་པ་དང༌། རྟོགས་པའི་ལྟ་བ་དག་ནི་ངེས་ཚིག་མཐུན་པས་ཚོགས་ཀྱི་ལོངས་སྤྱོད་ཐམས་ཅད་ཆོས་ཉིད་དུ་གཅིག་སྟེ་ཐ་དད་པ་མེད་ཀྱང་སྐབས་ཀྱི་ཏིང་ངེ་འཛིན་གྱིས་ཕྱེ་བར་མཇལ་ཏོ། །དེས་ན་ཚོགས་ཀྱི་ཏིང་ངེ་འཛིན་ནི། དེ་ལྟར་འཇུག་སྒོ་སྤྱོད་པ་ལྟ་བ་གསུམ་པོ་རིལ་ངང་གཅིག་པར་གྱུར་པ་ཡི། སྐབས་དེ་ཉིད་ཀྱི་ཆོས་ཉིད་དུ་མཉམ་པའི་ཡོ་བྱད་འཁོར་གནས་ཀྱི་རྒྱུ་དང་རྐྱེན་རྣམས་འཛོམ་པར་ལྡན་ཞིང་ཕུན་སུམ་ཚོགས་པའི་དུས་ཀྱི་ཕྱིར་ཏེ། དེ་ཁོ་ན་གང་ཞེ་ན། སྐལ་ལྡན་མིའི་ཚོགས་ནང་མཛའ་ཞིང་འཕྲོད་པས་མཐུན་པ་དང༌། དམ་རྫས་ལྔ་དང་འདོད་ཡོན་ལྔའི་ཆ་རྐྱེན་རྫོགས་པ་དང༌། ཡབ་ཡུམ་འཚམས་པར་འདོད་པའི་དགྱེས་པར་སྦྱོར་བ་དང༌། དོན་གྱི་དགོངས་པ་རིལ་ཚང་བར་ལྡན་པའོ། །དེ་ཉིད་གང་གི་ཡུལ་དུ་གྱུར་ཞེ་ན། སྐབས་འདིར་བསྒོམ་པའི་ངོ་བོ་དགའ་ལྡན་ལྷ་ཡི་ཚོགས་དང༌། དམ་ལྡན་གདུང་འཚོབ་ཀྱི་ས་ལ་གནས་པའི་རིགས་འཛིན་ལྷ་དང་རྟོགས་པའི་ཉམས་རྙེད་པའི་རྣལ་འབྱོར་གྱི་ཚོགས་དང༌། འབྱོར་ལྡན་ཡོ་བྱད་ཀྱི་ཚོགས་རིལ་ཚང་བས། བསྒྲུབ་པའི་རྣལ་འབྱོར་ཕོ་མོ་མ་ལུས་པ་ཚང་ཞིང་འདུས་པར་ཚོགས་པས་མཚན་ངེས་པར་འགྲུབ་སྟེ། དེ་དག་དང་ལྡན་པའི་སྒྲུབ་པ་པོས་ཡུལ་དུ་ཚོགས་ཀྱི་ཆོས་འདི་སྤྱད་པར་བྱ་བ་ཡིན་པས། དཀྱིལ་འཁོར་བདུན་ཆར་གྱི་ཐུན་མོང་དུ་འགྲོའོ།།

གཉིས་པ་རྒྱས་པར་བཤད་པ་ལ་བདུན་ཏེ། དུས་བཤད་པ། གནས་བསྟན་པ། ཡོ་བྱད་བཤད་པ། སྒྲུབ་པ་པོ་བསྟན་པ། དགོས་ཆེད་ཀྱིས་སྤྱད་པར་གདམས་པ། བློ་ཆུང་ལ་མི་བསྟན་པ། སྒྲུབ་པས་འབྲས་བུས་ཐོབ་པར་གསུངས་པའོ། །དང་པོ་ནི།

སྐད་ཅིག་ཡུད་ཙམ། ཞེས་པ་ནས། བརླབས་པའི་དུས་ཆེན་ཡིན། །ཞེས་པའི་བར་གྱིས་བསྟན་ཏེ།

སྐད་ཅིག་ཡུད་ཙམ་ཐང་ཅིག་གམ། །ཡུད་ཙམ་ཉིན་ཞག་ཟླ་རེ་ལ། །ལྷ་ཡི་ཉིི་མ་བཀྲ་ཤིས་ཀྱི།།

དུས་ལ་བབ་པའི་དུས་ཆེན་དག །བྱིན་གྱིས་བརླབས་པའི་དུས་ཆེན་ཡིན།།

དུས་ནི། སྐད་ཅིག་གམ། ཡུད་ཙམ་མམ། ཐང་ཅིག་གམ། ཡུད་ཙམ་མམ་ཉིན་ཞག་གམ་ཟླ་རེའམ་སྒྲུབ་པའི་མགོ་གཟུགས་པའི་དུས་ལྷ་ཡི་ཉི་མ་བཀྲ་ཤིས་ཀྱི་དུས་དང་སྐར་མ་རྒྱལ་ལ་བབ་པ་དང་བདེ་གཤེགས་བལྟམས་པ་ལ་སོགས་པའི་དུས་ཆེན་དག་ནི། བྱིན་གྱིས་བརླབས་པའི་དས་ཆེན་ཡིན་པས། དངོས་གྲུབ་མྱུར་ཏེ། དུས་རིང་པོ་ལོ་ཟླ་ནི་ཡོད་བྱད་དང་སྦྱར་ནས་སྤྱིར་གནས་པའི་སྒྲུབ་དུས་སོ། །དུས་ཐུང་ངུ་རྣམས་ནི། སྔགས་ལ་སེམས་སྐྱེ་བའི་དུས་དང་ལྷ་བསྐྱེད་པའི་དུས་དང༌། ཐབས་དང་ཤེས་རབ་ཀྱི་དགྱེས་པ་སྤྱད་པ་ལ་སོགས་པའི་དུས་ཁོ་ནའོ། །དེ་དག་ལ་མདོར། གནས་དང༌། དུས་དང༌། ཡོ་བྱད་དང༌། དཀྱིལ་འཁོར་ལ་སོགས་གཅིག་ལའང་ཀུན་༼༡༨༢༽ལྡན་པར་སྦྱར་རོ།།

གཉིས་པ་གནས་བསྟན་པ་ནི།

འོག་ནས། ཡིད་འོང་མཚན་ལྡན་དབེན་ཕྱོགས་སུ། །ཞེས་པས་བསྟན་ཏེ།

ཡིད་འོང་མཚན་ལྡན་དབེན་ཕྱོགས་སུ།།

ཐོག་མར་གནས་བཙལ་བའང་ཡིད་དུ་འོང་ཞིང་མཚན་ཉིད་དང་ལྡན་པ་གྲོང་ཡུལ་ལས་རྒྱང་གྲགས་དང་དཔག་ཚད་ཀྱིས་རིང་བས་དབེན་པའི་ཕྱོགས་ཀྱི་ས་བཙལ་ཏེ། ས་དང་བར་སྣང་གི་སྐྱོན་ཡོན་ཞིབ་ཏུ་བརྟགས་པའི་གནས་སུ། སའི་བྱ་བ་བརྟགས་པའི་སྟེགས་ལ། ས་བདག་གཉིས་ལ་བསླང་བ་དང༌། སྦྱོང་བ་དང༌། བྱིན་གྱིས་བརླབ་པ་དང༌། བསྲུང་བ་དང༌། གཟུང་བ་ལ་སོགས་པ་རྒྱས་པར་བྱ་བའོ།།

གསུམ་པ་ཡོ་བྱད་བཤད་པ་ནི།

གོང་གི ཇི་ལྟར་འབྱོར་པའི། ཞེས་པ་ནས། འབྱོར་ལྡན་ནན་ཏན་བྱ། །ཞེས་པའི་བར་དང༌།

ཇི་ལྟར་འབྱོར་པའི་ཡོད་བྱད་རྣམས། །དག་དང་མ་དག་ཁྱད་པར་གྱིས།།

གཙང་མའི་ཁ་ཟས་ལ་སོགས་དང་། །རྣམ་རྟོག་ནད་འཇོམས་བདུད་རྩི་རྣམས།།

རྒྱལ་བའི་ཚོགས་དང་འབྱུང་པོ་ལ། །ཇི་ལྟར་འབྱོར་ལྡན་ནན་ཏན་བྱ།།

འོག་ནས། རྫས་དང་ཡོ་བྱད། ཅེས་པ་ནས། དེ་ལྟར་རྩལ་དང་སྦྱར། །ཞེས་པའི་བར་གྱིས་བསྟན་ཏེ།

རྫས་དང་ཡོ་བྱད་ཐམས་ཅད་ཀྱང་། །ཅིས་འདུལ་དེ་ལྟར་རྩལ་དང་སྦྱར།།

དང་པོ་ཁོ་ནར་གཞུང་དང་མཐུན་པའི་གནས་བཀྲ་ཤིས་ཤིང་ཡོན་ཏན་དང་ལྡན་པ་དེ་ལྟར་བཙལ་ལ་དེར་སྒྲུབ་པ་པོ་ཕོ་མོ་རྣམས་ཀྱིས་ཇི་ལྟར་འབྱོར་བའི་ཡོ་བྱད་རྣམས་གསོག་སྟེ། དཀར་གསུམ་དང་བདུད་རྩི་སོགས་དུག་ལྔས་བསླང་མ་བསླང་སོགས་ཀྱི་ཡོ་བྱད་དག་པ་དང་མ་དག་པའམ་གཙང་མི་གཙང་གི་ཁྱད་པར་ཕྱེ་ལ་དེ་རྣམས་ཀྱིས་གཙང་མ་དཀར་གསུམ་མངར་གསུམ་གྱི་རིགས་ཁ་ཟས་ལ་སོགས་པ་དང༌། སྨན་ལྔ་རྣམ་རྟོག་གི་ནད་འཇོམས་པའི་བདུད་རྩི་རྣམས་སོགས་རྫས་ཀྱི་རིགས་པས་ཆ་གསུམ་ཕྱི་རོལ་དུ་བཏང་སྟེ། རྒྱལ་བའི་ཚོགས་སོགས་འཕགས་པ་དང༌། རྒྱལ་ཆེན་དང་ཕྱོགས་སྐྱོང་སོགས་མགོན་པོ་དང་འབྱུང་པོ་ཐམས་ཅད་མཆོད་ལ། ཇི་ལྟར་འབྱོར་པ་དང་ལྡན་པ་བཞིན་ཚིམ་པར་བྱས་ནས་ལས་ལ་བསྒོ་བ་ནན་ཏན་བྱས་ཏེ་ཕྱི་མཚམས་བཅད་པར་བྱའོ། །དེེ་བས་ན་སྔོན་དུ་གསོགས་པའི་རྐྱེན་ལོངས་སྤྱོད་དང་མཆོད་རྫས་དང་ཡོ་བྱད་ཐམས་ཅད་ཀྱང༌། ལས་དང་པོ་པ་གང་ལ་མོས་ཤིང་འབྱོར་ཚོད་ཅིས་འདུལ་བ་དེ་ལྟར་ཁོང་དག་གི་ཤེས་རབ་ཀྱི་རིམ་པ་དང༌། ཏིང་ངེ་འཛིན་དང་འགྲུབ་སྟོབས་ཀྱི་རྩལ་དང་སྦྱར་ཏེ་བསྒྲུབ་དགོས་པར་བཤད་པའོ།།

བཞི་པ་སྒྲུབ་པ་པོ་བསྟན་པ་ནི།

བདག་དང་གཞན་དང༌། ཞེས་པ་ནས། འདོད་ལྟར་བདེ་74བར་སྦྱར། །ཞེས་པའི་བར་གྱིས་བསྟན་ཏེ།

བདག་དང་གཞན་དང་གཉིས་ཀ་དང་། །ཆོས་ཀྱི་དོན་དུ་མི་འགྱུར་བའི།།

སྐྱོན་བཞི་སྤངས་ཏེ་བཟློག་ཚུལ་སྦྱར། །རྣལ་འབྱོར་སྙིང་དང་མིག་ལྟ་བུར།།

གདུང་བའི་འདུ་ཤེས་ཉེར་བཞག་སྟེ། །ཇི་བཞིན་འདོད་ལྟར་བདེ་བར་སྦྱར།།

དྲངས་ནས་བཤད་པའི་དགོས་དོན་བཞི་ནི་འདི་ལྟ་སྟེ། གང་བདག་ལ་གནོད་པ་དང༌། དེ་བཞིན་དུ་གཞན་དང༌། གཉིས་ཀ་དང༌། ཆོས་ཀྱི་ཁྱད་པར་ལ་གནོད་པ་བཞི་ནི་དོན་དུ་མི་འགྱུར་བའི་སྐྱོན་ཏེ། ཚོགས་ཀྱི་དུས་སུའང་སྐྱོན་བཞི་པོ་དག་སྤངས་ཏེ། དེ་ལས་བཟློག་པའི་ཚུལ་གྱིས་དོན་དུ་འགྱུར་བ་བཞིར་དཔྱད་དེ་སྦྱར་བའང་མགོ་མཇུག་ཀུན་ཏུ་བྱའོ། ༼༡༨༣༽།དེ་ནས་རྣལ་འབྱོར་པ་རྣམས་བླ་མ་སྙིང་ལྟ་བུར་བསམ་པ་དང་མཆེད་ལྕམ་རྣམས་མིག་གི་འབྲས་བུ་ལྟ་བུར་གདུང་བའི་སེམས་ཀྱི་འདུ་ཤེས་ཉེར་ཞེས་ཉེ་བར་བཞག་པ་དང་ལྡན་པས་ནང་དུ་འདུས་ཏེ། སྒྲུབ་པའི་འབྲས་བུ་འབྱུང་བའི་ཐབས་དམ་པ་ཇི་བཞིན་དུ་རང་གི་འདོད་པ་ལྟར། ནང་མཚམས་བཅད་པ་ནས་ལས་གཞུང་ཞི་བའི་དཀྱིལ་འཁོར་ཆེ་འབྲིང་བསྲང་ལ་ཚོགས་རོལ་པ་དང༌། འཁོར་ཁང་ཕྱི་ནང་བར་ལྡན་དུ་གློ་བློར་རོལ་པ་སྤྱད་པ་དང༌། སྐྱོ་བའི་ཚེ་བྲོ་བརྡུང་བ་དང༌། གླུ་བླང་བ་ལ་སོགས་པ་ཇི་ལྟར་བདེ་བར་སྦྱར་ཏེ་སྒྲུབ་པར་བྱའོ།།

ལྔ་པ་དགོས་ཆེད་ཀྱིས་སྤྱད་པར་གདམས་པ་ནི།

ལྷ་རྣམས་མཉེས་པར། ཞེས་པ་ནས། སྤྱད་པར་ཤིན་ཏུ་གཅེས། །ཞེས་པའི་བར་གྱིས་བསྟན་ཏེ།

ལྷ་རྣམས་ཉེ་བར་བྱ་བ་དང་། །བགེགས་རྣམས་ཞི་བར་བྱ་བ་དང་།།

དོན་གྲུབ་ཤི་བ་གསོ་བའི་ཕྱིར། །ལས་འདི་སྤྱད་པར་ཤིན་ཏུ་གཅེས།།

དགོས་ཆེད་བསྟན་པའི་ཕྱིར། བསྒྲུབ་པའི་ལྷ་རྣམས་མཉེས་པར་བྱ་བ་དང༌། བར་དུ་གཅོད་པའི་བགེགས་རྣམས་ཞི་བར་བྱ་བ་དང༌། དོན་གཉིས་ཀྱི་དངོས་གྲུབ་ཐོབ་པར་བྱ་བ་དང༌། རོའི་སྔོན་དུའང་ཤི་བ་གསོ་བར་བྱ་བའི་ཕྱིར་དགོས་ཆེད་བཞིའི་དོན་དུ་བསྒྲུབ་པའི་ལས་གཞུང་འདི་ལྟར་སྤྱད་པར་ཤིན་ཏུ་གཅེས་ཏེ་སྤྱོད་པ་ཀུན་གྱི་དགོས་པའོ།།

དྲུག་པ་བློ་ཆུང་ལ་མི་བསྟན་པ་ནི།

འདི་དག་བློ་ཆུང༌། ཞེས་པ་ནས། བརྗོད་པར་བྱ་མི་རིགས། །ཞེས་པའི་བར་གྱིས་བསྟན་ཏེ།

འདི་དག་བློ་ཆུང་གསར་བཞུགས་པའི། །མདུན་དུ་བརྗོད་པར་བྱ་མི་རིགས།།

འདིའང་དགོས་པ་སྟོན་པ་སྟེ། འདི་དག་ཇི་ལྟར་བར་སྣོད་བློ་ཆུང་ཞིང་གསར་དུ་ཞུགས་པའི་མདུད་དུ་བརྗོད་པར་བྱ་བ་མི་རིགས་པས་དང་པོའི་རྣལ་འབྱོར་དང༌། བྲོད་པ་བསྐྱེད་པ་དང༌། ཚོགས་བསགས་པ་དང༌། རྣལ་འབྱོར་ནར་སོན་པས་གོང་མ་བརྡལ་བ་ཆོས་ཉིད་ཀྱི་ས་ལ་སྦྱོར་བའི་ཕྱིར་རོ།།

བདུན་པ་སྒྲུབ་པས་འབྲས་བུས་ཐོབ་པར་གསུངས་པ་ནི།

འོག་གི །དེས་ན་ལས་འདི། ཞེས་པ་ནས། ཕལ་མོ་ཆེ་ལ་བཤད། །ཅེས་པའི་བར་གྱིས་བསྟན་ཏེ།

དེས་ན་ལས་འདི་ཁྱད་པར་ཡང་། །ཚོགས་ལ་ཚོགས་བསྐྱེད་སྒྲིབ་སྦྱངས་ཏེ།།

བསྙེན་པ་དག་ལ་གོམས་བྱས་ནས། །བསྒྲུབས་པས་འབྲས་བུ་མཐར་ཕྱིན་པའོ།།

དེ་སྐད་སེམས་དཔའི་རྡོ་རྗེ་དེས། །འདུས་པ་ཕལ་མོ་ཆེ་ལ་བཤད།།

རྒྱུ་མཚན་དེས་ན་ལས་གྲུབ་པའི་ཚུལ་བསྟན་པའི་ཕྱིར། ཡོ་བྱད་ཚོགས་ནས་ཚོགས་ཀྱི་ཕྲིན་ལས་ཀྱི་བྱེ་བྲག་གི་རིམ་པའི་ལས་འདི་ཡི་ཁྱད་པར་བསྒྲུབ་པ་ཡང༌། དང་པོ་ཚོགས་བསྒྲུབ་པ་ལ་བརྟེན་ནས་སྔོན་དུ་བསོད་ནམས་ཀྱི་ཚོགས་ཀྱི་དཔུང་བསྐྱེད་ལ། སྒྲིབ་པ་སྦྱངས་པའི་བཤགས་པ་བྱས་ཏེ་འཇུག་པ་ནི་ས་དང་པོའི་སྤྱོད་པ་ཡང་ངོ༌། །བར་དུ་བསྙེན་པ་དང་སྒྲུབ་པའི་ཏིང་ངེ་འཛིན་དག་ལ་གོམས་པར་བྱས་ནས་བསྒྲུབ་པས། རྟགས་དང་མཚན་མ་ཐོབ་ནས་དངོས་གྲུབ་ལ་སྦྱར་བས། འབྲས་བུ་ཆེན་པོ་འགྲུབ་པར་འགྱུར་བའི་སྒྲུབ་པ་མཐར་ཕྱིན་པའི་རིམ་པ་ལྔ་ཐོབ་པར་གྱུར་བའོ། །དེ་སྐད་ཅེས་སྐྱེས་བུ་སེམས་དཔའ་རྡོ་རྗེ་དེས། སྟོན་པ་མཆོག་གིས་སྔར་འདུས་པ་ཕལ་མོ་ཆེ་ལ་བཤད་པ་ཉིད་ཐོས་པ་ཡིན་པར་བརྗོད་པའོ།།

༼༡༨༤༽གཉིས་པ་བཀོད་པའི་སྦྱང་ཐབས་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། སྤྱོད་པར་གདམས་པ། ལས་དང་པོ་པ་ལ་གསང་སྒོ་མི་དབྱེ་བ། བློ་དང་འཚམས་པར་དོན་བྱའོ། །དང་པོ་ནི།

གོང་ནས་སྔར་གྱི་འཕྲོར། བརྩམས་པ་ལས་ཀྱི། ཞེས་པ་ནས། མཚན་མར་བཅས་པ་བྱ། །ཞེས་པའི་བར་གྱིས་བསྟན་ཏེ།

བརྩམས་པ་ལས་ཀྱི་དང་པོ་དང་། །དམ་པའི་དོན་ལ་འཇུག་པ་ན། །ཐབས་མཆོག་ལྔས་ནི་སྤྱད་པར་བྱ།།

རྡོ་རྗེ་དུས་ཚིགས་བསྙེན་པ་དང་། །གང་འདིར་ཉེ་བར་བསྒྲུབ་པ་དང་། །བསྒྲུབ་པ་ཆེན་པོས་སྦྱོར་བ་ལ།།

གྲངས་དུས་མཚན་མར་བཅས་པར་བྱ།།

དེ་ལ་དང་པོ་དཀྱིལ་འཁོར་བསྟན་པའི་ཕྱིར། དེ་ལ་བཀོད་པའི་བྱ་བས་སྦྱངས་པ་གང་ཞེ་ན། གྲངས་ལ་སྙེགས་པས་དཀྱིལ་འཁོར་བཀར་ནས་སྟོན་པ་ནི། ཐོག་མར་བསྒྲུབ་པའི་ལས་བརྩམས་ཏེ་གསང་བ་མཆོག་གི་དཀྱིལ་འཁོར་ལ་ཞུགས་ནས་ལས་ཀྱི་དང་པོ་དབང་དང་དམ་ཚིག་ནོད་པའི་རྣལ་འབྱོར་པས་ཟག་བཅས་ཀྱི་བསྒྲུབ་པ་དང༌། དེ་ཡིས་ཟག་མེད་ཀྱི་སྒྲུབ་པ་གཉིས་མེད་དམ་པའི་དོན་ལ་འཇུག་པ་ཡི་ཚེ་ན། བསྒྲུབ་པའི་ལས་གཞུང་གི་རིམ་པ་བྱ་བའི་ཐབས་མཆོག་དམ་པ་བསྙེན་པ་ལ་གསུམ་དང་སྒྲུབ་པ་ལ་གཉིས་ཏེ་རྣམ་པ་ལྔས་ནི་སྒྲུབ་པའི་སྤྱོད་པ་སྤྱད་པར་བྱའོ། །ལྔ་པོ་གང་ཞེ་ན། རྡོ་རྗེ་གསུམ་གྱི་དངོས་གྲུབ་བསྒྲུབ་པའང༌། དང་པོར་བསྙེན་པ་གཟུགས་པ་ཡང་ཐོག་མ་ཡར་གྱི་ངོ་གཟའ་སྐར་ཤིས་པའི་དུས་ཚིགས་བཟང་པོ་ལ་ཚོགས་བསགས་པས་བསོད་ནམས་ཀྱི་དཔུང་བསྐྱེད་དེ་འཇུག་པ་དང༌། མཐར་ཇི་ཙམ་ན་འདོན་པ་ནི་དུས་ཀྱི་བསྙེན་པ་དང༌། རྫས་དང་ཡོ་བྱད་ཚང་བས་གང་འདིར་དཀྱིལ་འཁོར་ཆེན་པོ་རྩོམ་པ་ནི་ཉེ་བའི་བསྙེན་པ་དང༌། བྱ་བའི་ལས་གཞུང་བསྲངས་ནས་འབད་པ་ནི་བསྒྲུབ་པ་དང༌། རྟགས་དང་མཚན་མ་ཐོན་ནས་བསྒྲུབ་པ་ཆེན་པོས་དངོས་གྲུབ་བླང་བའི་ལས་ལ་སྦྱོར་བ་དང་རྣམ་གྲངས་ལྔའོ། །བསྙེན་པ་ལའང་དབྱེ་ན་གསུམ་སྟེ། ཞག་གྲངས་མང་ཉུང་དུའང་བགྲངས་དམ་བཅས་ནས་འབད་པ་གྲངས་ཀྱི་བསྙེན་པའོ། །དུས་ཀྱི་བསྙེན་པ་ནི་བཤད་པ་ཉིད་དོ། །མཚན་མའི་བསྙེན་པ་ནི་འཛབ་གྲངས་བྱེད་ཅིང་རྟགས་ཀྱི་མཚན་མར་མཐོང་བ་ལ་སྡོད་པའོ། །འདིར་གྲངས་ལྔར་འདོད་པ་ནི། སྔོན་དུ་བསོད་ནམས་ཀྱི་དུས་དང་བསྙེན་པ་གཉིས་ཏེ་གསུམ། བསྒྲུབ་པ་གཉིས་དང་ལྔར་མཇལ་ཏེ། གཞུང་གཟུག་པ་དང་དམ་བཅས་པར་བྱ་བའོ།།

གཉིས་པ་ལས་དང་པོ་པ་ལ་གསང་སྒོ་མི་དབྱེ་བ་ནི།

རྣལ་འབྱོར་སྤྱོད་པའི། ཞེས་པ་ནས། དོན་ལ་གོལ་བར་འགྱུར། །ཞེས་པའི་བར་གྱིས་བསྟན་ཏེ།

རྣལ་འབྱོར་སྤྱོད་པའི་བཀའ་སྒོ་འདིར། །གསང་སྒོ་མི་དབྱེ་སྐྲག་པར་འགྱུར། །ཅི་ཕྱིར་དང་པོ་ཡིན་པས་ན།།

བྱིས་པ་བློ་ཤེད་མ་བྱེ་བས། །མ་ངེས་ལྡོག་འཇུག་བཅས་པ་ཡིས། །ཐེག་ཆེན་དོན་ལས་གོལ་བར་འགྱུར།།

རྣལ་འབྱོར་ཆེན་པོའི་གསང་བའི་དཀྱིལ་འཁོར་གཉན་པོར་སྤྱོད་པའི་བཀའ་སྒོ་ཟབ་མོ་འདིར་ཡང༌། ལས་དང་པོ་པ་ལ་ཐེག་ཆེན་གསང་བའི་སྒོ་མི་དབྱེ་ཞིང་གསལ་བར་མི་བསྟན་ཏེ། ལྟ་སྤྱོད་༼༡༨༥༽བརླང་པོ་བསྟན་ཀྱང་སྐྲག་ཅིང་སྔངས་བ་སྐྱེ་བར་འགྱུར་བས་སོ། །ཅིའི་ཕྱིར་ཞེ་ན། དེའི་གཏན་ཚིགས་ནི། ད་དུང་ལས་དང་པོ་པ་ཡིན་པས་ན་བྱིས་པ་གསང་དོན་མཉམ་པ་ཉིད་ལ་བློ་ཤེད་མ་བྱེ་བར་གྱུར་བའི་རྒྱུས། ངེས་པ་མ་རྙེད་དེ་རིགས་མ་ངེས་པའི་ཕྱིར། གསང་དོན་ཟབ་མོ་ལ་འཇུག་པ་ལས་སླར་ལྡོག་ནས་ལྟུང་བ་དང་བཅས་པ་ཡིས་བློ་ཆུང་བའི་གང་ཟག་ཡོད་པས། ཐེག་ཆེན་གྱི་དོན་ལ་སྐྲག་སྟེ་མ་དད་པས་བློ་ལྡོག་ནས་གསང་དོན་ལས་གོལ་ཏེ་འགྱངས་པར་འགྱུར་བས་སོ།།

གསུམ་པ་བློ་དང་འཚམས་པར་དོན་བྱ་བ་ནི།

གནས་འདིར་འཇུག་པའི། ཞེས་པ་ནས། འཚམས་པར་བདེ་ཐབས་སྦྱར། །ཞེས་པའི་བར་གྱིས་བསྟན་ཏེ།

གནས་འདིར་འཇུག་པའི་བྱིས་པ་དག །འཇིག་རྟེན་དྲུག་ལས་དྲངས་ནས་ཀྱང་།།

འབྱུང་དབང་མ་ངེས་སར་བཞག་སྟེ། །ཇི་ལྟར་འཚམ་པར་བདེ་ཐབས་སྦྱར།།

འོ་ན་དེ་དག་དོན་ལ་དྲང་བའི་ཐབས་འགོག་གོ་བར་དོགས་པ་ལ། ཐེག་པ་མཆོག་གི་གསང་བའི་གནས་འདིར་ངེས་པར་སྦྱོར་ཞིང་འཇུག་པར་འདོད་པའི་བྱིས་པ་གསར་བུ་དག་ནི། འཇིག་རྟེན་གྱི་འགྲོ་བ་དྲུག་གིས་ས་ལས་དྲངས་བའི་སེམས་མཆོག་བསྐྱེད་དུ་གཞུག་ནས་ཀྱང༌། དང་པོ་འགྱུར་དབང་མ་ངེས་པའི་སར་བཞག་སྟེ། དེ་ལ་ད་དུང་ཁོའི་བློ་དང་ཇི་ལྟར་འཚམས་པ་ལས་ཐལ་བ་མེད་པར་བདེ་བའི་ཚད་ཀྱི་འདུལ་ཐབས་དང་སྦྱར་ལ་བསྟན་ཏོ། །འོན་ཏེ་སྐལ་བ་ཅན་ཞིག་ན་དཀྱིལ་འཁོར་ཆེན་པོར་གཞུག་ནས་དབང་བསྐུར་ཅིང་ལྟ་སྤྱོད་ཀྱང་རིམ་པར་བསྟན་པའོ།།

གཉིས་པ་བྱེ་བྲག་ཏུ་བཤད་པ་ལ་བདུན་ཏེ། ཐབས་ཀྱི་སྦས་ཚོགས། ཤེས་རབ་ཀྱི་སྦས་ཚོགས། དུས་བཞི་མཉམ་པའི་ཚོགས། ཐབས་ཤེས་ཉི་ཟླའི་ཚོགས། འབྱོར་ཆེན་ཡི་གེའི་ཚོགས། རྡོ་རྗེ་དྲྭ་བ་འབྲེལ་བའི་ཚོགས། ཐབས་དང་ཤེས་རབ་འབྲེལ་བའི་ཚོགས་སོ། །དང་པོ་ལ་གསུམ། བསྙེན་པ་གཉིས་ཀྱི་དཀྱིལ་འཁོར་བྱ་བ། བསྒྲུབ་པ་བསྟན་པ། སྒྲུབ་པ་ཆེན་པོ་བཤད་པའོ། །དང་པོ་ནི།

རྡོ་རྗེ་ཐབས་ཆེན། ཞེས་པ་ནས། ཡང་ན་བསམ་པའམ། །ཞེས་པའི་བར་གྱིས་བསྟན་ཏེ།

རྡོ་རྗེ་ཐབས་ཆེན་ཚོམ་བུ་ལྔ། །རྡོ་རྗེ་འཛིན་སོགས་བཅུ་དྲུག་ལྡན།།

དབྱིངས་ཀྱི་དཀྱིལ་འཁོར་རྡོ་རྗེ་ཅན། །བྲི་འམ་ཡང་ན་བསམ་པ་འམ།།

ཚོགས་ཀྱི་དཀྱིལ་འཁོར་བདུན་གྱི་དང་པོ་བསྟན་པའི་ཕྱིར། ཐབས་ཀྱི་སྦས་ཚོགས་ནི་ཇི་ལྟ་བུ་ཞེ་ན། བསྒྲུབ་པའི་སྔོན་འགྲོ་ཐམས་ཅད་རྫོགས་ནས། རྡོ་རྗེ་ཐབས་ཀྱི་སྦས་པ་ཆེན་པོའི་ཚོམ་བུ་ལྔ་པ་ནི། དབུས་ཀྱི་གཙོ་བོ་རིགས་ལྔ་སོ་སོའི་དཀྱིལ་འཁོར་ལྔ་ལ། འཁོར་ནི་སེམས་དཔའ་ཆེན་པོ་རྡོ་རྗེ་འཛིན་པའི་རིགས་སོགས་སེམས་དཔའ་བཅུ་དྲུག་སྟེ། རྡོ་རྗེ་སེམས་དཔའ་དང༌། རྡོ་རྗེ་རྒྱལ་པོ་དང༌། རྡོ་རྗེ་འདོད་པ་དང༌། རྡོ་རྗེ་ལེགས་པ་ནི་རྡོ་རྗེའི་རིགས་སོ། །རྡོ་རྗེ་རིན་ཆེན་དང༌། རྡོ་རྗེ་གཟི་བརྗིད་དང༌། རྡོ་རྗེ་རྒྱལ་མཚན་དང༌། རྡོ་རྗེ་བཞད་པ་ནི་རིན་པོ་ཆེའི་རིགས་སོ། །རྡོ་རྗེ་ཆོས་དང༌། ༼༡༨༦༽རྡོ་རྗེ་རྣོན་པོ་དང༌། རྡོ་རྗེ་འཁོར་ལོ་དང༌། རྡོ་རྗེ་སྨྲ་བ་ནི་པདྨའི་རིགས་སོ། །རྡོ་རྗེ་ལས་དང༌། རྡོ་རྗེ་བསྲུང་བ་དང༌། རྡོ་རྗེ་གནོད་སྦྱིན་དང༌། རྡོ་རྗེ་ཁུ་ཚུར་ནི་ལས་ཀྱི་རིགས་སོ། །ཚོམ་བུ་ལྔས་སེམས་དཔའ་རྡོ་རྗེ་དང༌། རིན་ཆེན་རྡོ་རྗེ་དང༌། ཆོས་རྡོ་རྗེ་དང༌། ལས་རྡོ་རྗེ་ནི་བདེ་གཤེགས་རིགས་ཀྱི་དཀྱིལ་འཁོར་རོ། །དེའི་ཕྱི་རོལ་དུ་སྒོ་བ་བཞི་སྟེ། ལྷ་གྲངས་ཉེར་ལྔ་དང་ལྡན་པའོ། །དེས་ན་རྡོ་རྗེ་དབྱིངས་ཀྱི་དཀྱིལ་འཁོར་མུ་ཁྱུད་ཟླུམ་པོའི་རྡོ་རྗེ་ར་བ་ཅན་གྱིས་བསྐོར་བ་དང་ལྡན་པའི་བརྙན་མའོ། །དེ་དག་ལྷག་པ་གཟུགས་བརྙན་གྱི་དཀྱིལ་འཁོར་དུ་བྲི་བར་བྱ་བའམ། ཡང་ན་མ་བྲིས་ཀྱང་རྣལ་འབྱོར་པ་ལྷ་གྲངས་དང་མཉམ་པས་ལྷག་པའི་ཏིང་ངེ་འཛིན་གྱི་དཀྱིལ་འཁོར་དུ་བསམ་སྟེ་བསྒོམ་པའོ། །འམ་ནི་གཟུགས་བརྙན་ཉིད་དང་འདམ་ཀའོ།།

གཉིས་པ་བསྒྲུབ་པ་བསྟན་པ་ལ་གསུམ་སྟེ། དཀྱིལ་འཁོར་བསྐྱེད་པ། སྤྱན་དྲངས་པ་ལ་སོགས་ཀྱི་ལས་རིམ། བསྟོད་དེ་བདག་ལ་བསྡུ་བའོ། །དང་པོ་ནི།

བརྗོད་དམ་དངོས་སམ། ཞེས་པ་ནས། ལ་བསྐྱེད་དྲན་བྱས་ཏེ། །ཞེས་པའི་བར་གྱིས་བསྟན་ཏེ།

བརྗོད་དམ་དངོས་སམ་མཚན་མ་ལ། །འཇིག་རྟེན་དབང་པོའི་ཆོས་ལུགས་ཀྱིས།།

མོས་པ་ལ་བསྐྱེད་དྲན་བྱས་ཏེ།།

དེ་ལྟར་ཡང་ལྷག་དེ་དག་གི་བསྐྱེད་ཐབས་ནི་སྙིང་པོའི་སྔགས་བརྗོད་དམ། ཡིད་ཀྱི་དངོས་སམ། སྐུ་གསུང་ཐུགས་ཀྱི་མཚན་མ་ལ་བརྟེན་ནས་བསྐྱེད་ཀྱང༌། རྒྱལ་པོའི་འཁོར་དང་ལོངས་སྤྱོད་ལྟ་བུར་འཇིག་རྟེན་གྱི་དབང་ཕྱུག་ཆེན་པོའི་མངའ་བདག་སྟོན་པ་གསང་བའི་བདག་པོ་ཉིད་ཀྱི་བཀའ་རྒྱུད་འདིའི་གཞུང་གི་ཆོས་ལུགས་ཀྱིས་ནི། མཐའ་ཐད་དུ་འཛིན་པའི་མོས་པར་མི་བྱ་སྟེ། རང་རིག་པ་ནི་དོན་ལ་གཉིས་སུ་མེད་པར་ངེས་པས། ཏིང་ངེ་འཛིན་གྱི་དཀྱིལ་འཁོར་རང་རང་གི་རིག་པ་ལས་ལྷར་བསྐྱེད་དེ་རང་སྣང་གི་ཆོས་ཉིད་དྲན་པར་བྱས་ཏེ་དབྱེར་མེད་ཀྱི་ངང་དུ་གསལ་བར་བསྒོམ་པར་བྱའོ། །དེས་ན་ཚིག་བར་པ་འཇིག་རྟེན་གྱི་དབང་པོའི་རྒྱལ་པོ་ཉིད་སྤྱན་འདྲེན་པའི་ཆོས་ལུགས་སུ་སྦྱར་རོ་ཟེར་བ་ནི་མི་འཐད་པར་གསུངས་སོ།།

གཉིས་པ་སྤྱན་དྲངས་པ་ལ་སོགས་ཀྱི་ལས་རིམ་ནི།

རང་བཞིན་ཡུལ་ནས། ཞེས་པ་ནས། ལས་གྲུབ་གྲངས་རྫོགས་ནས། །ཞེས་པའི་བར་གྱིས་བསྟན་ཏེ།

རང་བཞིན་ཡུལ་ནས་ཕབ་ནས་ནི། །ཕྱག་བྱ་ལ་སོགས་མཆོད་པ་དང་། །རྡོ་རྗེ་སྨན་དང་རྩི་སྦྱར་ལ།།

ཡོ་བྱད་ཆེན་པོ་ལ་སོགས་པས། །རྡོ་རྗེ་ཐབས་ཀྱི་ཚོགས་ལ་འབུལ། །རྡོ་རྗེ་རྣལ་འབྱོར་གླུ་བླངས་ཏེ།།

མཉེས་བྱས་ལས་གྲུབ་གྲངས་རྫོགས་ལས།།

རང་བཞིན་གྱིས་གྲུབ་པའི་ཡུལ་ལམ་གནས་ནས་སྙན་གསན་ཕབ་པའི་ཡེ་ཤེས་ཀྱི་དཀྱིལ་འཁོར་སྤྱན་དྲངས་ནས་དབྱེར་མེད་པར་བསྟིམ་སྟེ་བརྟན་པར་བཞུགས་པ་ལ་ནི། ཕྱག་རྒྱའི་མཆོད་པ་བྱ་བ་ལ་སོགས་པ་ཐུན་མོང་གི་མཆོད་པ་རྫོགས་པར་ཕུལ་ཞིང༌། ནང་གི་མཆོད་པ་ནི། རྡོ་རྗེ་སྨན་གྱི་དམ་རྫས་ལྔ་དང་བདུད་༼༡༨༧༽རྩི་སྦྱར་བའི་སྨན་གྱི་མཆོད་པ་དང༌། དེ་བཞིན་དུ་མཆོད་པའི་ཡོ་བྱད་ཆེན་པོ་ལ་སོགས་པས་བསྡུ་བ། རཀྟ་དང༌། གཏོར་མ་དང༌། འདོད་ཡོན་དང༌། ཤ་ལྔ་དང༌། སྦྱོར་སྒྲོལ་སོགས་ཀྱི་མཆོད་པ་རྣམས། རྡོ་རྗེ་ཐབས་ཀྱི་དཀྱིལ་འཁོར་གྱིི་ལྷ་ཚོགས་རྣམས་ལ་འབུལ་ཞིང༌། རྡོ་རྗེ་རྣལ་འབྱོར་གྱི་སྲོག་དང་བཅས་པའི་གླུ་བླངས་ཏེ་གླུ་ཡེ་ཤེས་ཀྱི་མཆོད་པ་དང༌། བསྟོད་པ་རྫོགས་པའི་བར་གྱིས་རྒྱ་བ་མཉེས་བར་བྱས་ནས་དོན་གྱི་ལས་གཞུང་བསྲངས་པ་མཐར་ཆགས་སུ་གྲུབ་སྟེ་འཛབ་གྲངས་ཚད་དུ་ཕྱིན་པའི་བཟླས་པ་རྫོགས་པར་བྱས་ནས་སྒྲུབ་པར་བྱ་བའོ།།

གསུམ་པ་བསྟོད་དེ་བདག་ལ་བསྡུ་བ་ནི།

མཉེས་དང་རྒྱུད་སྦྱངས་འདོད་པ་བྱ། །ཞེས་པས་བསྟན་ཏེ།

མཉེས་དང་རྒྱུད་སྦྱངས་འདོད་པ་བྱ།།

སླར་ཡང་མཆོད་པ་དེ་རྣམས་དང་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལ་བསྟོད་པས་མཉེས་པར་བྱ་བ་དང་བཤགས་པའི་སྒོ་ནས་རྒྱུད་སྦྱངས་ཤིང་འདོད་པའི་དོན་ལ་གསོལ་བ་གདབ་པར་བྱ་ཞིང་བདག་ལ་བསྟིམ་སྟེ་སྒོ་གསུམ་དམ་པར་བསམ་ལ། བསྔོ་བ་དང་སྨོན་ལམ་སོགས་ཀྱིས་མཐའ་བརྒྱན་ཏེ། སྒྲུབ་པ་མཐར་ཕྱིན་པ་ན་དཀྱིལ་འཁོར་ཡང་བསྡུ་བར་གསུངས་སོ།།

གསུམ་པ་སྒྲུབ་པ་ཆེན་པོ་བཤད་པ་ལ་གཉིས་ཏེ། དངོས་གྲུབ་བླང་ཞིང་དབང་བསྐུར་བ། ཞོར་ལ་གདམས་པ་བསྟན་པའོ། །དང་པོ་ནི།

སྣོད་དུ་རུང་བའི། ཞེས་པ་ནས། དབང་དང་དངོས་གྲུབ་སྩོལ། །ཅེས་པའི་བར་གིས་བསྟན་ཏེ།

སྣོད་དུ་རུང་བའི་སློབ་མ་དག །དབང་མཁྱེན་ལས་ཚོགས་བྱ་བ་ཡིས།།

འཇུག་ཚུལ་དབང་དང་དངོས་གྲུབ་གསོལ།།

མདོར་རྡོ་རྗེ་དབྱིངས་ཀྱི་ལས་གཞུང་བསྲངས་ཟིན་ནས། སློབ་མ་གཞུག་པའི་ལས་རྩོམ་པའི་ཕྱིར། མན་ངག་བཞག་ཅིང་དབང་དང་དམ་ཚིག་གི་སྣོད་དུ་རུང་བའི་སློབ་མ་དག་གཞུག་པར་བྱ་བའི་ཆེད་དུ། དཔང་པོ་དང་མཁྱེན་པར་གསོལ་བ་དང༌། ལ་སོགས་པ་ཞེས་བསྡུ་བའི་དོན་གྱིས་བཤད་པའི་སློབ་མ་ལ་དམ་དཔོག་པ་དང༌། དབང་བསྐུར་བའི་ལས་ཀྱི་རིམ་པ་ཀུན་རྫོགས་པར་བྱ་བ་ཡིས་དབང་བསྐུར་བ་ཉིད་དེ། དེ་ཡང་དཀྱིལ་འཁོར་དུ་འཇུག་པའི་ཚུལ་ལ་དང་པོ་རྡོ་རྗེ་རྒྱལ་པོ་ཉིད་འཇུག་པ་དང༌། དེ་ནས་སློབ་མ་གཞུག་པའི་རིམ་པ་དང༌། དེ་ལ་ཡོན་དང་སྦྱར་ཏེ་དབང་བསྐུར་བ་རྒྱས་པར་བྱ་བ་དང༌། དེ་དག་ཟིན་ནས་དངོས་གྲུབ་སྩོལ་བར་གསོལ་བ་གདབ་སྟེ་བླང་བའི་བར་བྱ་ཞིང་སྒྲུབ་པའི་མཇུག་ཏུའང་དངོས་གྲུབ་བླང་བར་བྱའོ།།

གཉིས་པ་ཞོར་ལ་གདམས་པ་བསྟན་པ་ལ་བཅུ་གཅིག་སྟེ། བསླབ་པའི་གཉེར་དཔོག་པ། བསྒྲུབ་པ་ཆེ་ཆུང་འདོད་པ་ལྟར་སྦྱིན་པ། བསྒྲུབ་མི་ནུས་པ་ལ་གསང་བར་གདམས་པ། རྨོངས་པ་གསང་སྔགས་སུ་མོས་པ་༼༡༨༨༽བསྒྱུར་བ། ཤེས་རབ་ཅན་ལ་རིམ་པ་བཞིན་བསྟན་པ། བློ་སྐྱེད་ཅན་ལ་སྒོམ་ཐབས་བསྟན་པ། སྤྱོད་པ་རྩིང་པོ་ལ་ལྟུང་བའི་ཉེན་བསྟན་པ། སྣོད་དང་སྦྱར་ལ་དབང་བསྐུར་བར་གདམས་པ། དབང་དང་གདམས་ངག་སྦྱིན་ལུགས་བསྟན་པ། བློ་དང་ལྡན་པ་ལ་བསླབ་པའི་རྩལ་སྦྱོངས་ཤིག་པར་གདམས་པ། ཐོག་མར་གྲལ་དབྱེ་ཞིང་ལྷ་བསྒོམ་ལུགས་བསྟན་པའོ། །དང་པོ་ནི།

རྡོ་རྗེ་ཐ་ཚིག ཅེས་པ་ནས། གལ་ཆེན་མནའ་བོར་རོ། །ཞེས་པའི་བར་གྱིས་བསྟན་ཏེ།

རྡོ་རྗེ་དམ་ཚིག་རྣམ་པ་ལྔ། །བསླབ་པའི་གཉེར་རྣམས་ཅི་རིགས་པར།།

རྩལ་གྱི་རིམ་པར་བྱིན་ནས་ཀྱང་། །རྡོ་རྗེ་གལ་ཆེན་མནའ་བོར་རོ།།

དེ་ལ་ཐབས་ཀྱི་དཀྱིལ་འཁོར་ཀྱི་རྡོ་རྗེ་ལྟ་བུའི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་དམ་ཚིག་གམ་བསོད་ནམས་དང་བསྙེན་སྒྲུབ་བཞིའི་རྡོ་རྗེ་ཐ་ཚིག་རྣམ་པ་ལྔ་ཉིད་དཔོག་པ་ཡིས་དམ་ཚིག་གི་བསླབ་པའི་གཉེར་རྣམས་རང་རང་དང་འཚམས་པར་ཅི་རིགས་པར་བློའི་རྩལ་གྱི་ཆེ་ཆུང་གི་རིམ་པ་བཞིན་དུ་སྐལ་བ་དང་སྦྱར་ལ་ལེགས་པར་བྱིན་ནས་ཀྱང༌། རྡོ་རྗེ་ཐེག་པ་ཆེན་པོ་ལས་སླར་མི་ལྡོག་པར་གལ་ཆེན་བཙུག་སྟེ་ཚུལ་བཞིན་དུ་འབྲས་བུ་བསྒྲུབ་པར་བྱ་བར་བུས་མནའ་བོར་ཏེ་རིགས་ངེས་པར་བྱ་བ་ལ་སྦྱར་རོ།།

གཉིས་པ་བསྒྲུབ་པ་ཆེ་ཆུང་འདོད་པ་ལྟར་སྦྱིན་པ་ནི།

དེ་ནས་བསྒྲུབ་པ། ཞེས་པ་ནས། རྣལ་འབྱོར་བཀའ་བར་བྱའོ། །ཞེས་པའི་བར་གྱིས་བསྟན་ཏེ།

དེ་ནས་བསྒྲུབ་པ་ཆེ་ཆུང་རྣམས། །ཇི་ལྟར་འདོད་པ་ནན་ཏན་གྱིས། །རྡོ་རྗེ་རྣལ་འབྱོར་བཀའ་བྱ་འོ།།

དབང་ཐོབ་ཅིང་རིགས་ངེས་པར་བྱས་པའི་རྟིང་དེ་ནས་སློབ་བུས་ཇི་ལྟར་བཟོད་ཅིང་གསང་བའི་སྒྲུབ་པ་ཆེ་ཆུང་རྣམས་གང་ཞུ་ཞིང་ཇི་ལྟར་འདོད་པ་དེ་ཉིད་བསྟན་ལ་ཆུད་མི་གསན་པར་ནན་ཏན་དུ་སྒྲུབས་པར་གྱིས་ཤིག་གདམས་པར་བྱ་སྟེ། དེ་ཕྱིན་ཆད་སློབ་བུ་དེའང་རྡོ་རྗེ་ཐེག་པ་གསང་སྔགས་ནང་བའི་རྣལ་འབྱོར་སྒྲུབ་པ་ལུང་གི་བཀའ་ལ་གནས་པའི་དམ་པར་འགྱུར་བར་བྱའོ།།

གསུམ་པ་བསྒྲུབ་མི་ནུས་པ་ལ་གསང་བར་གདམས་པ་ནི།

མི་ནུས་ལ་སོགས། ཞེས་པ་ནས། ཚིག་གིས་ནན་ཆགས་བྱ། །ཞེས་པའི་བར་གྱིས་བསྟན་ཏེ།

མི་ནུབ་ལ་སོགས་མི་གནང་བའི། །རྡོ་རྗེ་ཚིག་གིས་ནན་ཆགས་བྱ།།

ཤེས་རབ་དང་ཏིང་ངེ་འཛིན་དང་བརྩོན་འགྲུས་ཆུང་བས་མི་གཤིས་ཀྱིས་སྒོམ་སྒྲུབ་ཆེན་པོ་མི་ནུས་པ་དང་ལ་སོགས་པའི་དོན་གྱིས་བསྡུ་བར་གསང་བའི་སྤྱོད་པ་གཞུང་མི་སྲོང་བ་དང་ཉན་སྒོམ་གྱི་སྐལ་པ་མེད་པ་དག་ལ་བླ་མའི་བཀས་བསྒྲུབ་པར་མི་གནང་བར་གསང་བའི་བཀའ་རྒྱ་དམ་པར་རྡོ་རྗེའི་ཚིག་གིས་ནན་ཆགས་བྱ་སྟེ། གཞན་ལའང་གསང་སྒོ་སྡོམ་ཞིག་པར་བསྒོ་བར་བྱའོ།།

བཞི་པ་རྨོངས་པ་གསང་སྔགས་སུ་མོས་པ་བསྒྱུར་བ་ནི།

རྨོངས་པ་གསང་ཕྱིར། ཞེས་པ་ནས། ཚིག་གིས་འདུ་ཤེས་བསྒྱུར། །ཞེས་པའི་བར་གྱིས་བསྟན་ཏེ།

རྨོངས་པ་གསང་ཕྱིར་སེམས་བསྐྱེད་དེ། །ངོ་མཚར་ཚིག་གིས་འདུ་ཤེས་བསྒྱུར།།

གསང་སྔགས་ཀྱི་དོན་ལ་རྨོངས་པ་དག་ཐབས་ཀྱིས་རིམ་པར་དྲངས་ཏེ་གསང་སྔགས་ལ་གཟུད་པའི་ཕྱིར་ཐོག་མར་རང་དགའ་བ་༼༡༨༩༽ལ་ཡིད་མོས་པར་བྱས་ནས་མཐར་གསང་བ་ལ་སེམས་བསྐྱེད་པར་བྱེད་དེ། དེ་ནས་གསང་སྔགས་ཀྱི་ཆེ་བའི་ཡོན་ཏན་བརྗོད་པའི་ངོ་མཚར་གྱི་ཚིག་གིས་འདུ་ཤེས་གྱེན་དུ་བསྒྱུར་ཏེ་གསང་སྔགས་ལ་མོས་པ་སྐྱེར་གཞུགས་པའོ། །དེ་བས་ན་རྨོངས་པའང་ཆུད་མི་གསན་ཏེ་འཚམས་པས་དོན་བྱ་བའོ།།

ལྔ་པ་ཤེས་རབ་ཅན་ལ་རིམ་པ་བཞིན་བསྟན་པ་ནི།

ཤེས་མིག་ཅན་ལ། ཞེས་པ་ནས། རིམ་བཞིན་བསྟན་པར་བྱ། །ཞེས་པའི་བར་གྱིས་བསྟན་ཏེ།

ཤེས་མིག་ཅན་ལ་ཤེས་བྱའི་ཡུལ། །ཐམས་ཅད་རིམས་བཞིན་བསྟན་པར་བྱ།།

སློབ་བུ་ཤེས་རབ་ཀྱི་མིག་གམ་སྤྱན་དང་ལྡན་པ་ཅན་རྣམས་ལ་ཤེས་བྱའི་ཡུལ་གྱི་སྙིང་པོ་ལྟ་བའི་དོན་གྱི་གནས་ལུགས་མཐར་ཐུག་པ་བསྟན་ཕྱིར་གདམས་ངག་བྱ་ཐབས་ཐམས་ཅད་ཕྱི་ནང་གསང་བའི་རིམ་པ་ཇི་བཞིན་བློ་གོམས་ཚུལ་དང་སྦྱར་ཏེ་བསྟན་པར་བྱས་ནས་བསླབ་པའི་མཐའ་བཅུ་ཀུན་ཆུབ་པར་བྱའོ།།

དྲུག་པ་བློ་སྐྱེད་ཅན་ལ་སྒོམ་ཐབས་བསྟན་པ་ནི།

དྲོད་ཅན་བློ་དཀྱིལ། ཞེས་པ་ནས། ན་སྤར་གསང་སྒོ་དབྱེ། །ཞེས་པའི་བར་གྱིས་བསྟན་ཏེ།

དྲོད་ཆེན་བློ་དགྱེལ་ཆེ་རྣམས་ལ། །རྣལ་འབྱོར་གནས་སྤར་གསང་སྒོ་དབྱེ།།

ལྟ་བའི་ཉམས་དྲོད་ཅན་དུ་གྱུར་ཀྱང་ད་དུང་བློ་དཀྱིལ་ཆེ་བས་ཏིང་ངེ་འཛིན་མ་བརྟན་ཏེ་རྒོད་འཕྱར་དང་བྱིང་བའི་དབང་དུ་འགྲོ་བ་རྣམས་ལ་རྣལ་འབྱོར་གྱི་ཏིང་ངེ་འཛིན་ལ་བྱིང་རྒོད་ཀྱིས་མི་གནོད་པར་ལྟ་བ་སྒོམ་པར་ན་སྤར་ཏེ་བསྒོམ་ཐབས་གོང་མར་སྐྱེད་དུ་འགྲོ་བས་མན་ངག་གི་གསང་སྒོ་མཐར་ཐུག་པ་དབྱེ་ལ་མ་གབ་པར་སྦྱིན་པར་བྱའོ།།

བདུན་པ་སྤྱོད་པ་རྩིང་པོ་ལ་ལྟུང་བའི་ཉེན་བསྟན་པ་ནི།

རྩིང་པོ་འགྲོས་ཀྱི། ཞེས་པ་ནས། འཁོར་བའི་གཡང་རྣམས་བསྟན། །ཞེས་པའི་བར་གྱིས་བསྟན་ཏེ།

རྩིང་པོ་འགྲོས་ཀྱི་རྨུ་རྒོད་ལ། །གཅན་འཕྲང་འཁོར་བའི་གཡང་རྣམས་བསྟན།།

སློབ་མ་བློ་རྩིང་པོ་རྣམ་རྟོག་དང་སྤྱོད་སྒོའི་འགྲོས་ཀྱི་རྟ་དམུ་རྒོད་དང་འདྲ་བ་རྣམས་ལ་ཁེ་ཉེན་དང་བཅས་པའི་དམ་ཚིག་གི་གཅན་འཕྲང་རྣམས་དང་བར་དུ་གཅོད་པའི་རྟོག་ཚོགས་ཀྱིས་འཁོར་བའི་གཡང་ས་ལྟུང་བའི་སྒོ་དགུའི་ཉེས་དམིགས་རྣམས་བསྟན་ཏེ་ངན་སྤྱོད་ལས་ལྡོག་ཐབས་བྱའོ།།

བརྒྱད་པ་སྣོད་དང་སྦྱར་ལ་དབང་བསྐུར་བར་གདམས་པ་ནི།

རྡོ་རྗེ་ལུང་གི ཞེས་པ་ནས། ནུས་པ་དེ་དབང་བསྐུར། །ཞེས་པའི་བར་གྱིས་བསྟན་ཏེ།

རྡོ་རྗེ་ལུང་གི་ཚད་ཅན་ལ། །ཇི་ལྟར་ནུས་པ་དེ་དབང་བསྐུར།།

རྡོ་རྗེ་ཐེག་པའི་ལུང་གི་དོན་ཚད་དུ་ཕྱིན་པ་དང་ལྡན་པ་ཅན་ལ། བདག་གཞན་གྱི་དོན་ནམ་ཕྲིན་ལས་རྣམ་པ་བཞི་ལ་སོགས་པ་ཇི་ལྟར་ནུས་པ་དེ་ལྟར་དབང་ལྔ་པོ་རིམ་པར་བསྐུར་ཏེ་སྦྱིན་པར་བྱའོ།།

དགུ་པ་དབང་དང་གདམས་ངག་སྦྱིན་ལུགས་བསྟན་པ་ནི།

རྩལ་མེད་མི་ནུས། ཞེས་པ་ནས། བསུབ་ཅིང་ལྗིད་མི་དབབ། །ཅེས་པའི་བར་གྱིས་བསྟན་ཏེ།

རྩལ་མེད་མི་ནུས་གང་དག་ལ། །ཕན་པ་འགའ་ཞིག་བསྔགས་པ་ཡིན།།

གནས་འདིར་བསལ་དང་མི་བསལ་དག །འོད་མི་བསྲུབ་ཅིང་ལྗིད་མི་དབབ།།

ཤེས་རབ་དང་ཏིང་ངེ་འཛིན་གྱི་རྩལ་ མེད་པས་བདག་གཞན་གྱི་དོན་དུ་བསྒྲུབ་པར་མི་ནུས་པ ་གང་དག་རྣམས་ལ། ཕན་པའི་དབང་བཅུ་བསྐུར་བ་འབའ་ཞིག་བསྔགས་པ་ཡིན་པས་དེ་ཙམ་སྦྱིན་པར་བྱ་སྟེ་བུམ་པ་ལ་སོགས་པའོ། །དེ་བས་ན་ཐེག་པ་མཆོག་༼༡༩༠༽གི་དཀྱིལ་འཁོར་གྱི་གནས་འདིར་ཤེས་རབ་དང་ཏིང་ངེ་འཛིན་གསལ་བ་དང་དེ་གཉིས་མི་གསལ་བའི་ཁྱད་པར་དག་ལ། སྔ་མ་འོད་མི་བསུབ་པར་དབང་གི་མན་ངག་མི་གབ་པར་སྦྱིན་ཞིང༌། ཕྱི་མ་ལ་མི་འཚམས་པའི་དབང་དང་མན་ངག་གི་ལྗིད་ཀྱི་དོན་མི་དབབ་ཅིང་བསྟན་པར་མི་བྱ་སྟེ། བསྟན་ན་སྒྱིད་མ་བརྟས་པར་ཁལ་བཀལ་བ་བཞིན་དུ་ཆུད་འཛའ་འོ།།

བཅུ་པ་བློ་དང་ལྡན་པ་ལ་བསླབ་པའི་རྩལ་སྦྱོངས་ཤིག་པར་གདམས་པ་ནི།

རྡོ་རྗེ་བློ་ཡི། ཞེས་པ་ནས། སྦྱོང་ཞེས་གདམས་པར་བྱ། །ཞེས་པའི་བར་གྱིས་བསྟན་ཏེ།

རྡོ་རྗེ་བློ་ཡི་ཡུལ་ཅན་ལ། །རྩལ་ཆེན་སྦྱོང་ཞེས་གདམ་པར་བྱ།།

རྣལ་འབྱོར་པ་རྡོ་རྗེ་གསང་བའི་བློ་ཡི་ཤེས་རབ་ཆེན་པོའི་སྤྱོད་ཡུལ་ཅན་དང་ཏིང་ངེ་འཛིན་དང་ལྡན་པ་དག་ལ། བསླབ་པ་བཅུའི་ཡུལ་ལ་རྟོགས་པ་དང་ཏིང་ངེ་འཛིན་གྱི་རྩལ་ཆེན་པོ་ཤིན་ཏུ་འབོད་ལ་སྦྱོང་བར་གྱིས་ཤིག་ཅེས་པའི་གདམས་ངག་བསྟན་པར་བྱའོ།།

བཅུ་གཅིག་པ་ཐོག་མར་གྲལ་དབྱེ་ཞིང་ལྷ་བསྒོམ་ལུགས་བསྟན་པ་ནི།

རྡོ་རྗེ་འདུས་པའི། ཞེས་པ་ནས། ཡང་ན་རེ་རེའོ། །ཞེས་པའི་བར་གྱིས་བསྟན་ཏེ།

རྡོ་རྗེ་འདུས་པའི་དབང་གྲལ་དུ། །རྡོ་རྗེ་དོན་གྱི་ལྟང་ཆེར་བཤེར། །རྩལ་དང་རིམ་པ་ཁྱད་པར་དབྱེ།།

སོ་སོར་རིགས་ཀྱི་ཕྱག་རྒྱ་དག །སྤྱིའམ་ཡང་ན་རེ་རེ་འོ།།

གསང་བའི་དཀྱིལ་འཁོར་ཆེན་པོར། རྡོ་རྗེ་རྒྱལ་པོ་དང༌། རྒྱལ་ཚབ་དང༌། ཀརྨ་དང༌། མཆེད་ལྕམ་མང་པོ་འདུས་པའི་དབང་གྲལ་དུ། རྡོ་རྗེ་ཐེག་པའི་དབང་ཟབ་མོ་སྔར་ཐོབ་མ་ཐོབ་དང༌། སྔ་ཕྱིའི་རིམ་པའམ་ལྟ་བ་དང་སྒོམ་པའི་དོན་གྱི་75ལྟད་ཆེན་པོའི་མཐོ་དམན་ལྟར་བཤེར་ལ། བློ་ཤེས་རབ་ཀྱི་རྩལ་དང་དབང་གི་རིམ་པར་བསྟུན་ཏེ་གྲལ་གྱི་ཁྱད་པར་མཐོ་དམན་དུ་དབྱེ་བར་བྱའོ། །བུ་རྣམས་རང་རང་གི་ཡི་དམ་གྱི་ལྷ་གང་ཡིན་གྱི་སོ་སོ་རིགས་ཀྱི་ཕྱག་རྒྱ་དག་སྒོམ་པའམ། ཐབས་ཀྱི་ཕྱག་རྒྱ་སྤྱི་ལྟར་ཚང་བར་བསྒོམ་པའམ། ཡང་ན་སོ་སོར་བསྟན་ཏེ་མི་རེས་ལྷ་རེ་བསྒོམ་པ་ནི། བློ་ཆེ་བས་སྤྱི་དང་ཆུང་བས་རེ་རེ་བསྒོམ་པའི་ཁྱད་པར་གྱི་དབང་དུའོ། །མི་རེས་ལྷ་རེ་བསྒོམ་ན་སློབ་དཔོན་གྱིས་སྤྱིར་བསྒོམ་པར་ཡང་གསུངས་སོ།།

གཉིས་པ་ཤེས་རབ་ཀྱི་སྦས་ཚོགས་ལ་གཉིས་ཏེ། ཡབ་སྦས་ལ་ཡུམ་བསྒོམ་པ། ལས་ཀྱི་གཞུང་བསྲང་བའོ། །དང་པོ་ནི།

གཞན་ཡང་ཤེས་རབ། ཅེས་པ་ནས། ཕྱག་རྒྱ་མཚན་མར་སྦས། །ཞེས་པའི་བར་གྱིས་བསྟན་ཏེ།

གཞན་ཡང་ཤེས་རབ་གཟུངས་ཀྱི་ཚོགས། །ཇི་ལྟར་ཐབས་ཀྱི་ཚོགས་སྦྱར་ལྟར། །གང་དག་རྣལ་འབྱོར་མར་ལྡན་རྣམས། །རྡོ་རྗེ་འཛིན་མ་ལ་སོགས་པ། །ལྷ་མོའི་ཚོགས་སུ་བཀོད་ནས་ཀྱང་། །གནས་འདིར་འཇུག་དགའ་ལ་སོགས་པ། །ཐབས་ཀྱི་ཕྱག་རྒྱ་མཚན་མར་སྦས།།

གཞན་ཡང་ཤེས་རབ་ཀྱི་སྦས་ཚོགས་ཐབས་དང་མི་མཐུན་པ་ལ་ཡབ་སྦས་ལ་ཡུམ་སྒོམ་པའི་ཤེས་རབ་གཟུངས་ཀྱི་ཚོགས་འཆད་པ་ནི། ཇི་ལྟར་ཐབས་རྡོ་རྗེ་དབྱིངས་ཡབ་ཀྱི་དཀྱིལ་འཁོར་གྱི་ལྷ་ཚོགས་ཉེར་ལྔའི་གྲངས་སུ་སྦྱོར་ཏེ་གཞུང་དུ་བསྟན་པ་ཅི་ལྟ་བ་དེ་ལྟར་ལྷ་གྲངས་མཉམ་པའི་ཡུམ་ཉེར་ལྔའི་ཚོགས་ཉིད་བུད་མེད་གང་དག་རྣལ་འབྱོར་མར་གྱུར་བའི་ཡུམ་ཆེན་ལྔའི་ཚོམ་༼༡༩༡༽བུའི་དཀྱིལ་འཁོར་གསལ་བརྟན་དང་ལྡན་པར་སྒོམ་པ་རྣམས་ཀྱིས། རྡོ་རྗེ་འཛིན་མ་ལ་སོགས་པ་རིགས་ཀྱི་གཙོ་མོ་ཡུམ་ཆེན་ལྔ་དང༌། འཁོར་སེམས་མ་བཅུ་དྲུག་སྒོ་མ་བཞི་སྟེ་ལྷའི་གྲངས་ཉེར་ལྔ་ཡུམ་ཆེན་ལྔའི་ཚོམ་བུ་ལ་སོ་སོའི་འཁོར་གྱི་ལྷ་མོའི་རིགས་ཀྱི་ཚོགས་སུ་སོ་སོར་བཀོད་ནས་སྒྲུབ་པ་ཉིད་ཀྱང༌། བདེ་གཤེགས་རིགས་ལ་བརྟན་མ་རྡོ་རྗེ་དང༌། འབར་མ་རྡོ་རྗེ་དང༌། སྡུད་མ་རྡོ་རྗེ་དང༌། བསྐྱོད་མ་རྡོ་རྗེའོ། །རྡོ་རྗེའི་རིགས་ལ་རྡོ་རྗེ་སྒེག་མོ་དང༌། རྡོ་རྗེ་བདུག་པ་མ་དང༌། རྡོ་རྗེ་ལྕགས་ཀྱུ་མ་དང༌། རྡོ་རྗེ་སྒྲོལ་མའོ། །རིན་ཆེན་རིགས་ལ་རྡོ་རྗེ་ཕྲེང་བ་མ་དང༌། རྡོ་རྗེ་མེ་ཏོག་མ་དང༌། རྡོ་རྗེ་ཞགས་པ་མ་དང༌། རྡོ་རྗེ་བདེ་བ་མོའོ། །པདྨའི་རིགས་ལ། རྡོ་རྗེ་དབྱངས་ལེན་མ་དང༌། རྡོ་རྗེ་མར་མེ་མ་དང༌། རྡོ་རྗེ་ལྕགས་སྒྲོག་མ་དང༌། རྡོ་རྗེ་གསལ་བཀྲ་མའོ། །ལས་ཀྱི་རིགས་ལ་རྡོ་རྗེ་གར་བསྒྱུར་མ་དང༌། རྡོ་རྗེ་དྲི་ཆབ་མ་དང༌། རྡོ་རྗེ་དྲིལ་བུ་མ་དང༌། རྡོ་རྗེ་འབེབས་མའོ། །དེའི་ཕྱི་རོལ་དུ་ཁྲོ་མོ་བཞི་རྣམས་སྒོར་འགོད་པའོ། །དེ་ལྟ་བུར་གནས་དབེན་པར་འཁོར་ཁང་ཕྱི་ནང་བར་ལྡན་དུ་བྱས་པའི་ཤེས་རབ་དབྱིངས་ཀྱི་དཀྱིལ་འཁོར་འདིར་འཇུག་པར་མོས་ཤིང་དགའ་བས་འདུད་པའི་རྣལ་འབྱོར་པ་ལ་སོགས་པ་ཀུན་གྱི་ཐབས་ཡབ་ཀྱི་སྐུ་ཕྱག་རྒྱ་ནི་ཐུགས་ཀར་སྟོང་པ་ཡུམ་གྱི་ངང་དུ་དབྱིངས་ཀྱི་མཚན་མར་སྦས་ཏེ་རབ་ཏུ་གནས་པ་ཡིན་པས་བཤད་པ་ལྟར་བྲི་བའམ། ཏིང་ངེ་འཛིན་གྱིས་ལྷར་བསྐྱེད་པ་ཡན་ལག་དང་ལྡན་པར་བྱས་ནས་བསྒོམ་པ་ཉིད་དོ།།

གཉིས་པ་ལས་ཀྱི་གཞུང་བསྲང་བ་ནི།

རྡོ་རྗེ་མཉམ་པའི། ཞེས་པ་ནས། རྣལ་འབྱོར་མ་རྣམས་བསྒྲུབ། །ཅེས་པའི་བར་གྱིས་བསྟན་ཏེ།

རྡོ་རྗེ་མཉམ་པའི་གཟུངས་རྣམས་ལ། །མཉམ་པའི་མཆོད་པས་མཉེས་པར་བྱ།།

བྲོ་གར་གླུ་ཚིག་ལ་སོགས་པས། །རིག་འཛིན་རྣལ་འབྱོར་མ་རྣམས་བསྒྲུབ།།

དེ་ལྟར་ལས་གཞུང་བསྲང་སྟེ་རྡོ་རྗེ་ཡབ་དང་གྲངས་མཉམ་པའི་གཟུངས་ཆེན་ཡུམ་གྱི་ལྷ་ཚོགས་རྣམས་ལ། ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་བསྟིམས་ཏེ་བརྟན་པར་བྱས་པའི་ཡུམ་གྱི་སྐུ་རྣམས་ལ་བཤད་པ་ལྟར་མཉམ་པའི་མཆོད་པ་ཕྱི་ནང་གསང་བའི་ཚུལ་དུ་ཕུལ་བས་མཉེས་པར་བྱ་ཞིང་དགྱེས་པ་སྐྱེད་པ་སོགས་ལས་གཞུང་རྒྱས་པ་ཐབས་ཚོགས་ལྟར་བྱས་ཏེ། དེ་ནས་སྲོག་དང་ལྡན་པའི་བྲོ་སྟབས་དང་གར་རྣམས་བྱ་བཞིན་གླུ་ཚིག་བརྗོད་པ་ལ་སོགས་པས་ཡོ་བྱད་དང་དགའ་བདེས་རིགས་འཛིན་མཆོག་གི་རྣལ་འབྱོར་མ་རྣམས་ཀྱིས་ལྷ་མོར་བསྒྲུབ་པར་བྱ་བའོ། །དབང་བསྐུར་བ་དང་གདམས་ངག་བྱ་བ་ཐབས་དང་མཐུན་པ་ཉིད་དོ། །འོ་ན་༼༡༩༢༽ཐབས་ཤེས་བྲལ་བ་ལ་དགོས་པ་ཅི་ཡོད་སྙམ་པ་ལ། འདི་དག་ནི་ཐབས་ཀྱི་དཀྱིལ་འཁོར་ལ་མོས་པ་དང༌། ཤེས་རབ་ཀྱི་དཀྱིལ་འཁོར་ལ་མོས་པའི་དབང་དང༌། འགྲོ་བ་ཕོ་མོ་སོ་སོར་བསྒྲུབ་པའི་ཆེད་དུ་གསུངས་ཏེ་དགོངས་པ་ཅན་ཡིན་ནོ། །འོན་ཀྱང་དོན་གྱིས་ཡབ་ཡུམ་བྲལ་བ་ནི་མ་ཡིན་ཏེ། སྐབས་གཉིས་སུ་གཉིས་སྦས་པའི་ཕྱིར་རོ། །འདི་དག་ནི་རྩལ་ཆེན་རྫོགས་པའི་རྣལ་འབྱོར་པའི་སྤྱོད་ཡུལ་དུའང་རིགས་སོ། །ལས་དང་པོ་པ་དག་ནི་སྐལ་བ་དང་སྦྱར་ཞིང་གཟུད་པའོ།།

གསུམ་པ་དུས་བཞི་མཉམ་པ་ཉིད་པའི་ཚོགས་ལ་ལྔ་སྟེ། དུས་བཞི་མཉམ་པར་ལྟ་བས་ཐག་གཅད་པ། དུས་བཞི་ལྷ་མོར་བསྒོམ་ལུགས། ལས་ཀྱི་གཞུང་བསྲང་བ། བསྒོམ་ལུགས་ཀྱི་བྱེ་བྲག་བསྟན་པ། སྒྲུབ་པའི་འབྲས་བུ་བཤད་པའོ། །དང་པོ་ནི།

གཞན་ཡང་དུས་བཞི། ཞེས་པ་ནས། མཉམ་པའི་རང་བཞིན་ནོ། །ཞེས་པའི་བར་གྱིས་བསྟན་ཏེ།

གཞན་ཡང་དུས་བཞི་མཉམ་རིག་ན། །དུས་ཞེས་བྱ་བར་ག་ལ་རིགས།།

དུས་བཞི་མཉམ་པར་རབ་ཤེས་ན། །དེ་ཉིད་མཉམ་པའི་རང་བཞིན་ནོ།།

གཞན་ཡང་དུས་བཞིའི་ཚོགས་ཀྱི་དཀྱིལ་འཁོར་འཆད་པ་ནི། འཆད་པའི་དུས་བཞི་གསང་སྔགས་ཇི་བཞིན་པ་ལ་དུས་བཞི་མ་འགག་བྲལ་བའི་ངོ་བོར་ལྟ་བས་ཐག་བཅད་པ་ལྟར་མཉམ་པ་ཉིད་དུ་རིག་ཅིང་རྟོགས་ན། དུས་བཞི་སོ་སོར་ཐ་སྙད་བརྟགས་པ་དང་བྲལ་བས་མཚན་མ་ཐ་དད་པའི་དུས་ཞེས་བྱ་བ་དེ་ལྟར་གཟུང་བར་ག་ལ་རིགས་ཏེ་མི་རིགས་སོ། །དེས་ན་དུས་བཞི་མཉམ་པ་ཉིད་དུ་རབ་ཏུ་ཤེས་ནས་བདེན་པ་དབྱེར་མེད་ཀྱི་དེ་ཁོ་ན་ཉིད་དུ་རྟོགས་ན། དེ་ཉིད་དུས་བཞི་མཉམ་པའི་རང་བཞིན་ཡིན་པས་དེ་ལྟར་ཐག་ཆོད་པ་ཁོ་ན་ཆོས་ཉིད་དབྱིངས་ཀྱི་མཚན་ཉིད་དུ་ངེས་པ་ཡིན་ནོ།།

གཉིས་པ་དུས་བཞི་ལྷ་མོར་སྒོམས་ལུགས་ནི།

རྡོ་རྗེ་ལྷ་མོ། ཞེས་པ་ནས། འཁོར་དང་འདམ་པའི་དཀྱིལ། །ཞེས་པའི་བར་གྱིས་བསྟན་ཏེ།

རྡོ་རྗེ་ལྷ་མོ་དུས་ཀྱི་ཚོགས། །འདས་དང་ད་ལྟར་བྱུང་བ་དང་། །མི་འབྱུང་མ་ངེས་ཆ་བསྣམས་མ།།

དབང་སྒྱུར་མཉམ་པའི་རྒྱལ་པོ་རྣམས། །འཇིག་དང་སྐྱེ་དང་སྨིན་པ་དང་། །སྟོངས་པར་གྱུར་པ་དེ་དག་ཏུ།།

རྡོ་རྗེ་རྣམ་ཐར་ཚད་མེད་དང་། །སེམས་དང་དེ་བཞིན་མཉམ་པ་ཡི། །ཤེས་རབ་འཁོར་དང་དམ་པའི་དཀྱིལ།།

དུས་བཞི་དབྱེར་མེད་རྡོ་རྗེ་ལྟ་བུའི་ངོ་བོར་ལྷ་མོ་བཞིར་གྱུར་པའི་ཡེ་ཤེས་དུས་ཀྱི་ཚོགས་ནི། འགྲོ་བའི་ངོ་ལ་རྒྱུ་རྐྱེན་འབྲས་བུ་སྤྱད་ཟིན་པའི་བདག་ཉིད་འདས་པའི་དུས་དང༌། རྒྱུ་སྤྱད་ལ་འབྲས་བུ་མ་སྤྱད་པ་ད་ལྟར་འབྱུང་བ་ཡི་དུས་དང༌། རྒྱུ་རྐྱེན་ཚོགས་ལ་མ་སྤྱད་པའམ་མི་འབྱུང་བ་ནི་མ་འོངས་པ་དང༌། རྒྱུ་རྐྱེན་ཡོད་ཀྱང་རྐྱེན་ལ་རག་ལས་པས་འབྱུང་བར་མ་ངེས་པའི་དུས་ཀྱི་ཆ་རྣམས་སུ་སྣང་བ་ལ། དེ་ཉིད་རང་རིག་པས་དབང་བསྒྱུར་ནས་མཉམ་པ་ཆེན་པོའི་མཚན་ཉིད་དུ་རང་སྣང་བའི་དུས་བཞིའི་རྒྱལ་མོ་རྣམས་ནི་ལྷ་མོ་དྷུཔྤེ་མ་དང༌། པུཥྤེ་མ་དང༌། ཨཱ་ལོ་ཀེ་དང༌། གནྡྷེ་དག་གོ །དེས་ན་འགྲོ་བའི་ངོ་ལ། དཔྱིད་འཇིག་པ་དང༌། དབྱར་སྐྱེ་བ་དང༌། ༼༡༩༣༽སྟོན་སྨིན་པ་དང༌། དགུན་སྟོངས་པར་གྱུར་པ་དེ་དག་ཏུ་སྣང་བའི་དུས་བཞི་པོ་ཉིད་རིམ་པར་ལྷ་མོ་བཞི་པོར་སྣང་ངོ༌། །རྡོ་རྗེ་ཐེག་པའི་ཐུན་མོང་མ་ཡིན་པའི་སྟོང་པ་ཉིད་ལ་སོགས་པའི་རྣམ་པར་ཐར་པ་བཞིའི་སྒོ་མོ་བཞི་དང༌། ཚད་མེད་པ་བཞིའི་སྒོ་མོ་བཞི་བསྲུང་བ་དང༌། ཕྱི་ནང་གི་སེམས་དཔའ་དང་ཡང་དེ་བཞིན་གྲངས་མཉམ་པའི་སེམས་མ་དྷུཔྤེ་ལ་སོགས་པ་བཞི་དང༌། མཉམ་པའི་དབྱིངས་བརྗོད་པ་ལས་འདས་པའི་ངོ་བོར་རང་སྣང་བའི་ལ་སྱེ་མ་ལ་སོགས་པ་བཞི་ཡི་ལྷ་མོ་བརྒྱད་ཤེས་རབ་ཀྱི་འཁོར་དང༌། དམ་པའི་དཀྱིལ་རིགས་ཀྱི་གཙོ་བོ་རྣམ་སྣང་ལ་སོགསཔའི་རིགས་བཞི་ཉིད་དེ་བཅུ་གསུམ་མམ། ཡང་ན་ཕྱི་ནང་གི་སེམས་མ་དང་སྒོ་མ་བཞི་སྟེ་ལྷ་མོ་བཅུ་གཉིས་ཤེས་རབ་ཀྱི་འཁོར་དང་། རིགས་ཀྱི་གཙོ་མོའམ། བདེ་བ་ཆེན་པོ་ཡབ་ཡུམ་ནི་དམ་པའི་དཀྱིལ་ཏེ་བཅུ་གསུམ་དུ་བསྒོམ་པར་བྱའོ།།

གསུམ་པ་ལས་ཀྱི་གཞུང་བསྲང་པ་ནི།

ཇི་ལྟར་རིམ་པར། ཞེས་པ་ནས། ཉི་མ་རྣམས་ལའོ། །ཞེས་པའི་བར་གྱིས་བསྟན་ཏེ།

ཇི་ལྟར་རིགས་པར་རྡོ་རྗེ་ཡི། །གླུ་གར་ལ་སོགས་ཡོ་བྱད་ཀྱིས། །མཆོད་དང་འཇུག་ཚུལ་ཇི་ལྟ་བར།།

ཆ་རྣམས་དུས་ལས་མི་འདའ་བར། །ལྷ་ཡི་ཉི་མ་རྣམས་ལ་འོ།།

དེ་ལྟ་བུའི་དཀྱིལ་འཁོར་གྱི་སྒོམ་ལུགས་བསྟན་པ་ཇི་ལྟར་དུ་ཆོ་གའི་ལས་གཞུང་རིམ་པར་བསྲང་ལ། རྡོ་རྗེ་ཡི་གླུ་གར་བྱ་བ་དང༌། ལ་སོགས་པ་ཞེས་བསྡུ་བའི་དོན་གྱིས་མཆོད་རྫས་ཀྱི་ཡོ་བྱད་དང་ལོངས་སྤྱོད་རྣམས་ཀྱིས་ཚུལ་བཞིན་དུ་མཆོད་པ་དང༌། དཀྱིལ་འཁོར་དེར་འཇུག་པའི་ཚུལ་ཡང་ཐབས་ཀྱི་སྦས་ཚོགས་ནས་བཤད་པ་ཇི་ལྟ་བར་སྒྲུབ་པའི་ཕྲིན་ལས་ཀྱི་ཆ་ཤས་བསྙེན་བསྒྲུབ་ཏུ་འཇུག་པ་དབང་དང་དམ་ཚིག་ཕོག་པ་རྣམས་རང་རང་གི་སྐབས་སུ་འབྱུང་བའི་དུས་ལས་གང་འོག་ཏུ་མི་འདའ་བར་བྱ་བ་དང༌། དུས་ཚིགས་བཟང་པོ་གཟའ་པ་སངས་སོགས་གཟའ་སྐར་ཤིས་པ་རྣམས་ནི་ཤིན་ཏུ་བཀྲ་ཤིས་པས་ལྷ་ཡི་ཉི་མ་སྟེ། རྩ་བའི་རྒྱུད་ལས། བཀྲ་ཤིས་ལྷ་ཡི་ཉི་མ་དང༌། འབྱོར་དང་དུས་ཚིགས་བཟང་པོ་རྣམས། །འཇིག་རྟེན་མཚན་མའི་རྟོག་པ་སྟེ། །བརྟགས་ན་བཀྲ་ཤིས་མཚན་མ་འབྱུང༌། །ཞེས་པ་དེ་ལྟ་བུ་རྣམས་ལ་བྱའོ།།

བཞི་པ་བསྒོམ་ལུགས་ཀྱི་བྱེ་བྲག་བསྟན་པ་ནི།

བདེ་བ་ཆེན་པོ། ཞེས་པ་ནས། རེ་རེར་སྦྱར་བར་བྱའོ། །ཞེས་པའི་བར་གྱིས་བསྟན་ཏེ།

བདེ་བ་ཆེན་པོ་ལ་སོགས་པ། །ཚོམ་བུའམ་ཡང་ན་ཕྱག་རྒྱ་རྣམས། །སྤྱི་འམ་རེ་རེར་སྦྱར་བར་བྱ།།

དབུས་ཀྱི་བདེ་བ་ཆེན་པོ་གཙོ་བོ་ཉིད་དང་ལ་སོགས་པ་ཡིས་བསྡུ་བའི་དོན་གྱིས་རིགས་བཞི་དང་ཚོམས་བུ་ལྔར་བསྒོམ་པའམ་ཡང་ན་རྣལ་འབྱོར་པས་ཕྱག་རྒྱ་རྣམས་ལྷ་སྤྱི་བསྒོམ་པའམ་རྣལ་འབྱོར་པ་རེ་རེས་སྐུ་ཕྱག་རྒྱ་རེ་རེར་བསྒོམ་པའོ། །འདིར་ཡང་རྣལ་འབྱོར་པ་དུ་ཡོད་པས་རེ་རེར་ལྷ་རེར་བསྐྱེད་དེ་ལྷ་གྲངས་དང་མཉམ་པར་སྦྱར་ཏེ་༼༡༩༤༽སྒོམ་པར་བྱ་བའང་འཐད་པ་ཉིད་དེ་དོན་དུ་བློ་རིམ་ལྟར་རོ།།

ལྔ་པ་སྒྲུབ་པའི་འབྲས་བུ་བཤད་པ་ནི།

འདས་ལ་རྣམ་ཐར། ཞེས་པ་ནས། མཉམ་པའི་རྒྱལ་པོར་འགྱུར། །ཞེས་པའི་བར་གྱིས་བསྟན་ཏེ།

འདས་ལ་རྣམ་ཐར་ཚོག་བསྐྲུན་དེ། །ད་ལྟར་བྱུང་དང་མི་འབྱུང་ལ།།

ཚད་མེད་སེམས་དང་རྣམ་པར་བསྐྲུན། །དེ་ནི་མཉམ་པའི་རྒྱལ་པོར་གྱུར།།

འདས་པའི་དུས་ཀྱི་ངོ་བོ་ལ་རྣམ་ཐར་བཞིའི་ཚོགས་བསྐྲུན་པ་དང་སྦྱར་ཏེ་བསྟན་པ་དང༌། ད་ལྟར་འབྱུང་བ་དང་མི་འབྱུང་བ་མ་འོངས་པ་ལ་རིམ་པ་བཞིན་ཚད་མེད་པ་བཞི་དང་སེམས་མ་ལཱ་སྱེ་སོགས་བཞི་དང་མཉམ་པར་སྦྱར་ཏེ་ཚོགས་ཀྱི་འབྲས་བུ་བསྐྲུན་པར་བསྟན་ཏེ། དེའང་འདས་པ་དང་རྣམ་ཐར་ངོ་བོ་ཉིད་མ་དམིགས་པའི་ཕྱིར་དང༌། ད་ལྟར་དང་ཚད་མེད་དོན་བྱ་བྱེད་མངོན་སུམ་དུ་ཡོད་པའི་ཕྱིར་དང༌། མ་འོངས་པ་དང་སེམས་མ་དོན་ཤེས་རབ་སྣང་བས་རྟག་ཏུ་མེད་པའི་རང་བཞིན་གྱི་ཕྱིར་རིམ་པར་སྦྱར་བར་བྱའོ། །དེ་ལྟར་སུས་རྟོགས་པ་དེ་ནི་མཉམ་པའི་རྒྱལ་པོར་ཆོས་སྐུ་ཆེན་པོ་ཉིད་དུ་འགྲུབ་པར་འགྱུར་རོ།།

བཞི་པ་ཉི་ཟླའི་ཚོགས་ལ་ལྔ་སྟེ། བསྒྲུབ་པ་ཡོན་ཏན་དང་བཅས་པ། འགྲུབ་པའི་ཚུལ་བསྟན་པ། ཡེ་ཤེས་འཆར་ཚུལ་བཤད་པ། བར་ཆད་བྱུང་ན་སྐོང་ཐབས་བསྟན་པ། བསྒྲུབ་པའི་འབྲས་བུ་བཤད་པའོ། །དང་པོ་ནི།

གཞན་ཡང་རྣལ་འབྱོར། ཞེས་པ་ནས། དུས་ཀྱི་རྒྱུན་ཚོགས་སྦྱར། །ཞེས་པའི་བར་གྱིས་བསྟན་ཏེ།

གཞན་ཡང་རྣལ་འབྱོར་བྱང་ཆུབ་སེམས། །རྫོགས་པ་བཅུ་དྲུག་ཟླ་རྒྱས་ཚུལ། །སྙིང་རྗེ་ཡེ་ཤེས་ཤར་བ་ནི།། མཁའ་ལ་ཉི་ཤར་ཚུལ་བཞིན་དུ། །དམ་པ་རྫོགས་པའི་རྣལ་འབྱོར་པ། །ཡང་དག་ངེས་པའི་ས་པ་ཡིན།།

བཅུ་གསུམ་ས་ལ་བགྲོད་པ་ནི། །རྡོ་རྗེ་དུས་ཀྱིས་རྒྱུན་ཚོགས་སྦྱར།།

ཐབས་ཤེས་རབ་ཟུང་དུ་འབྲེལ་བ་ལ་མོས་པའི་ཆེད་དུ། ཐབས་ཀྱི་ལམ་བསྟན་པའི་ཕྱིར། དུས་བཞིའི་ཚོགས་ལས་གཞན་ཡང་མི་མཐུན་པ་ནི་ཉི་ཟླའི་ཚོགས་ཀྱི་དཀྱིལ་འཁོར་འཆད་པ་སྟེ། དེ་ཡང་གང་ཞེ་ན། ཡང་དག་པའི་ལམ་ལ་གནས་པའི་རྣལ་འབྱོར་པས་གསང་བ་བྱང་ཆུབ་སེམས་ཀྱི་ཐིག་ལེ་འབྲས་བུའི་ས་མཆོག་མཐར་ཕྱིན་པར་རྫོགས་པ་ནི། དཔེ་ཚེས་བཅུ་དྲུག་ལ་ཟླ་བའི་འཕེལ་ཆ་རྒྱས་པའི་ཚུལ་དང་འདྲ་ལ། དེ་ཡང་ཐབས་ཤེས་རབ་ཀྱི་ཆས་ཐབས་ཀྱི་བྱང་ཆུབ་སེམས་དཔའ་བཅུ་དྲུག་ལ། ཤེས་རབ་སེམས་མ་བཅུ་དྲུག་རྫོགས་པ་ནི་ཟླ་བ་རྒྱས་པའི་དཀྱིལ་འཁོར་ཉ་གང་བ་ལྟ་བུའོ། །སྙིང་རྗེའམ་ཐུགས་རྗེའི་ཡེ་ཤེས་ཀུན་ཏུ་གསལ་བ་བཅུ་དྲུག་ཤར་བ་ནི་སེམས་དཔའ་བཅུ་དྲུག་ཏུ་ཤར་བས་དཔེ་ནམ་མཁའ་ལ་ཉི་མ་ཤར་བའི་ཚུལ་ཇི་ལྟ་བ་བཞིན་དུ་འགྲོ་བའི་དོན་མཛད་དོ། །ཡང་ན་བྱང་སེམས་རྫོགས་པ་ཟླ་ཉིའི་དཀྱིལ་འཁོར་རྒྱས་པའི་ཐབས་ཤེས་སུ་བྱས་ཏེ་ཉི་ཟླ་རང་ངོ་ལ་སྦྱར་བའང་སྣང་ངོ༌། །དེ་བས་ན་བྱང་ཆུབ་ཀྱི་སེམས་རྣམ་གཉིས་བདེ་སྟོང་གི་ཆོས་ཉིད་དམ་པ་གཉིས་སུ་མེད་པའི༼༡༩༥༽ངང་དུ་རྫོགས་ཏེ་མཉམ་པ་ཆེན་པོ་མཐར་ཕྱིན་པའི་རྣལ་འབྱོར་པ་ནི་གསང་ཆེན་ཐབས་ཀྱི་སྙིང་པོ་ཡང་དག་པར་ངེས་པའི་སངས་རྒྱས་ཀྱིས་མཆོག་ལ་གནས་པ་ཡིན་ནོ། །དེ་ལྟ་བུའི་འབྲས་བུ་བཅུ་གསུམ་ཡི་གེ་འཁོར་ལོ་ཚོགས་ཆེན་གྱི་ས་ལ་བགྲོད་ཅིང་ཕྱིན་པར་བྱ་བའི་ཐབས་དམ་པ་ནི། རྡོ་རྗེ་ལྟ་བུའི་དུས་བཞིར་བར་གྱི་རྒྱུན་མ་ཆད་པར་ཚོགས་ཀྱི་དཀྱིལ་འཁོར་ལ་གནས་ཏེ་སེམས་ཉིད་དང་མ་བྲལ་བར་ལྟ་བས་མཉམ་པར་རྟོགས་པ་དང༌། སྤྱོད་པ་དུས་བཞིའི་ཚོགས་ལ་མ་འགག་པར་སྤྱོད་དེ་ལྷུན་རྫོགས་སུ་སྦྱར་བ་དེ་ཉིད་ཡིན་ནོ།།

གཉིས་པ་འགྲུབ་པའི་ཚུལ་བསྟན་པ་ནི།

སྐར་ཚོགས་དབུས་ན། ཞེས་པ་ནས། ཚོགས་ཀྱི་རྫོགས་པར་བསྐྲུན། །ཞེས་པའི་བར་གྱིས་བསྟན་ཏེ།

སྐར་ཚོགས་དབུས་ན་ཟླ་ཉ་བ། །བཅུ་དྲུག་ཞག་གིས་རྫོགས་པ་བཞིན། །བཅུ་གསུམ་རྩལ་ཆེན་རྫོགས་པའི་ས།། བཅུ་དྲུག་ཚོགས་ཀྱིས་རྫོགས་པས་ན། །མཛེས་པའི་ཟླ་བ་བཅུ་དྲུག་གིས། །ཉི་གསལ་འོད་ཀྱི་ཕྱག་རྒྱ་ལ།།

མཛེས་པར་སྨྲས་པའི་བདེ་བ་དེ། །བཅུ་དྲུག་ཚོགས་ཀྱིས་རྫོགས་པར་བསྐྲུན།།

དེའི་དཔེ་ཡང་སྐར་མའི་ཚོགས་མང་པོའི་དབུས་ཀྱི་དཀྱིལ་ན་ཟླ་བའི་ཐིག་ལེ་ཉ་གང་བར་སྣང་བའང༌། བཅུ་དྲུག་གི་ཞག་གི་ཟླ་བ་ཚད་དུ་ཕྱིན་ཏེ་ཆ་ཤས་རྫོགས་པ་བཞིན་དུ། ས་མཆོག་བཅུ་གསུམ་པ་ཡི་གེ་འཁོར་ལོ་ཚོགས་ཆེན་ཉིད་ས་ལམ་གྱི་ཐབས་དང་བརྩོན་འགྲུས་ཀྱི་རྩལ་ཆེན་པོ་རྫོགས་པའི་མཐུས་འབྲས་བུའི་ས་རུ་ལྷུན་གྱིས་གྲུབ་ཅིང་ཐོབ་པར་གྱུར་པའང༌། སེམས་དཔའ་ཡབ་ཡུམ་བཅུ་དྲུག་ཟུང་གི་དཀྱིལ་འཁོར་བསྒོམ་པའི་ཚོགས་ཀྱིས་དགའ་བ་བཅུ་དྲུག་གི་ངོ་བོར་རྫོགས་པས་སྙིང་པོ་བྱང་ཆུབ་ཏུ་བསྒྲུབ་པའི་ཕྱིར་ན། མཛེས་པའི་ཟླ་བ་ཤེས་རབ་དབྱིངས་ཀྱི་རང་བཞིན་ཡུམ་མཆོག་སེམས་མ་བཅུ་དྲུག་གིས། ཡེ་ཤེས་ཉི་མ་གསལ་བའི་འོད་ཀྱི་ངོ་བོ་སེམས་དཔའ་བཅུ་དྲུག་གི་སྐུའི་ཕྱག་རྒྱ་སོ་སོར་གསལ་བ་ལ། ཐབས་དང་ཤེས་རབ་ཟུང་འཇུག་གཉིས་སུ་མེད་པར་གཅིག་ལ་གཅིག་མཛེས་པར་སྤྲས་ཏེ་ལེགས་པར་སྤེལ་མར་བཞུགས་པའི་རོལ་པའི་ལོངས་སྤྱོད་ཆེན་པོའི་དགྱེས་པས་བདེ་བ་དམ་པ་དེ་ཉིད་ཀྱང༌། ལྷ་ཡབ་ཡུམ་བཅུ་དྲུག་གི་ཚོགས་ཀྱི་མཐར་ཕྱིན་པར་རྫོགས་པར་བསྐྲུན་ཏེ་འབྲས་བུ་སངས་རྒྱས་སུ་འགྱུར་བའོ།།

གསུམ་པ་ཡེ་ཤེས་འཆར་ཚུལ་བཤད་པ་ནི།

རྫོགས་པ་ཉིད་ན། ཞེས་པ་ནས། སྤྱད་ན་ཉི་མ་འཆར། །ཞེས་པའི་བར་གྱིས་བསྟན་ཏེ།

རྫོགས་པ་ཉིད་ན་མི་དམིགས་པ། །དེ་བཞིན་ཉིད་དུ་སྦྱངས་པས་ན། །མཉམ་པར་སྟོང་པར་གྱུར་པ་ལ། །ཐམས་ཅད་ཆོས་སྐུར་རྫོགས་བྱང་ཆུབ། །སྡུག་བསྔལ་བྱང་ཆུབ་གཉིས་མེད་དེ། །རྨད་བྱུང་སེམས་བསྐྱེད་ལས་ཆེན་སྤྱད།།

ཕྲ་མོ་དྲོད་དུ་གྱུར་པས་ན། །དམ་པར་སྤྱད་ན་ཉི་མ་འཆར།།

དེ་ལྟར་ཚོགས་ཀྱི་དཀྱིལ་འཁོར་གྱི་འབྲས་བུ་མཐར་ཕྱིན་པར་རྫོགས་པ་ཉིད་ན་ཡང༌། དེ་ལ་ངོ་བོ་འདི་འདྲར་མི་དམིགས་པས་བསྟན་ཅིང་བསམ་དུ་མེད་པ་གཉིས་པའི་ཐ་སྙད་བྲལ་བའི་བྱང་ཆུབ་ཀྱི་སེམས་དེ་བཞིན་ཉིད་མ་བཅོས་པའི་ངང་དུ་དག་པར་སྦྱངས་པས་ན། དུས་བཞིའམ་ཆོས་ཐམས་ཅད་མཉམ་པར་ཤར་བས་མཐའ་རིལ་སྟོང་པ་ཆེན་པོར་གསལ་བར་གྱུར་པ་ལ་དངོས་པོ་ཐམས་ཅད་དབྱིངས་སྤྲོས་བྲལ་གྱི་༼༡༩༦༽དོན་རིག་པས་མངོན་དུ་བྱས་པས་ཆོས་སྐུར་རྫོགས་ཏེ་བྱང་ཆུབ་ཆེན་པོའི་ངོ་བོར་བྱུང་ཐེབས་པས། དེ་ལྟ་བུའི་གཞིའི་ངང་ལ་འཁོར་བའི་སྡུག་བསྔལ་དང་བྱང་ཆུབ་ཆེན་པོའི་བདེ་བ་ཡང་རིས་སུ་བཙལ་གྱིས་མི་རྙེད་པར་གཉིས་སུ་མེད་པ་ཉིད་དེ། དོན་དེ་རྟོགས་ཤིང་གྲུབ་པར་བྱ་ན། ཐེག་པ་ཆེན་པོ་རྨད་བྱུང་གསང་བའི་དོན་ལ་སེམས་བསྐྱེད་དེ་གཉིས་སུ་མེད་པར་བློ་ལ་གསལ་བར་བྱ་ཞིང༌། ཐབས་དང་ཤེས་རབ་ཀྱི་སྤྱོད་པའི་ལས་ལམ་ཆེན་པོ་ཚུལ་བཞིན་དུ་སྤྱད་པར་བྱ་བ་དང༌། དེ་ལས་ལྷན་ཅིག་སྐྱེས་པའི་ཡེ་ཤེས་ཀྱི་ཆ་ཤས་ཕྲ་མོ་ཙམ་དུ་ཤར་བའི་ཉམས་དྲོད་ཟིན་ནས་སྐྱེད་དུ་གྱུར་པ་ན། ནང་བྱང་ཆུབ་སེམས་ཀྱི་རྟོགས་པ་དམ་པ་དང་གཉིས་སུ་མེད་པར་སྤྱད་ན་མཇུག་རང་བྱུང་གི་ཡེ་ཤེས་ཆེན་པོའི་ཉི་མ་རང་ལས་འཆར་བར་འགྱུར་རོ།།

བཞི་པ་བར་ཆད་བྱུང་ན་སྐོང་ཐབས་བསྟན་པ་ནི།

དུས་འདི་རྒྱུན་གྱི། ཞེས་པ་ནས། ཆེན་པོའི་ལས་རྣམས་བྱ། །ཞེས་པའི་བར་གྱིས་བསྟན་ཏེ།

དུས་འདི་རྒྱུན་གྱི་བར་ཆད་ན། །བསྙན་པ་དག་གི་བཟློག་པར་དཀའ། །བར་ཆད་བྱུང་ན་བསྐང་གསོ་བྱ།།

མཁའ་ལ་ཟླ་གསལ་གྲ་རྒྱས་བཞིན། །ས་ལ་རྣལ་འབྱོར་གྲ་རྒྱས་སྤྱད། །གང་འདིར་རྒྱས་ན་བསོད་ནམས་དང་།།

བསྔོ་བ་ཆེན་པོའི་ལས་རྣམས་བྱ།།

དང་དུ་མ་བླངས་པའི་སྐྱོན་བསྟན་པའི་ཕྱིར། དུས་ཀྱི་རྒྱུན་དུ་ཚོགས་ཀྱི་དཀྱིལ་འཁོར་འདི་ཉིད་བར་མི་གཅད་པར་བྱ་རྒྱུ་ཡིན་པ་ལས་གལ་ཏེ་རྒྱུན་གྱི་དུས་སུ་བར་ཆད་ཀྱི་དབང་དུ་གྱུར་ན། འདི་ལ་བསྙེན་པ་དང་ཉེ་བསྙེན་ཙམ་བྱས་པ་དག་གིས་བཟློག་པར་དཀའ་བས་མི་སྐོངས་སོ། །དེ་བས་ན་བསྒྲུབ་པ་ཉིད་ལ་བྱའོ། །དེའང་ལེ་ལོ་དང་རྐྱེན་དབང་གི་བར་ཆད་བྱུང་ན། སླར་བསྐང་བ་དང་གསོ་རུ་གཞུག་པའི་ལས་ཆེན་པོའི་སྦྱོར་བ་བརྩམ་པར་བྱ་བ་ནི་བསྐང་བའི་མཆོག་གོ །དཔེར་ན་ནམ་མཁའ་ལ་ཟླ་བ་ཉ་བ་འོད་གསལ་ཞིང་གྲ་ཟུར་རྒྱས་པ་བཞིན་དུ། ས་ལ་ཐབས་ཤེས་དང་ཚོགས་གཉིས་དང་ཕྱག་རྒྱ་མང་པོས་དངོས་གྲུབ་སྒྲུབ་པའི་རྣལ་འབྱོར་པ་ཡབ་ཡུམ་གྲ་རྒྱས་པར་སྤྱད་པའོ། །གང་འདིར་རྣལ་འབྱོར་པ་གྲ་རྒྱས་པར་འདོད་ན། བསོད་ནམས་ཀྱི་དཔུང་ཆེན་པོ་བསྐྱེད་པ་དང༌། དགེ་བ་རྒྱ་ཆེན་པོ་འགྲོ་བ་དང་ཐུན་མོང་དུ་བྱས་ཏེ་བསྔོ་བ་ཆེན་པོའི་ཐབས་ཀྱིས་བླ་མེད་བྱང་ཆུབ་ཏུ་འགྱུར་བའི་ལས་རྣམས་བསྒྲུབ་སྟེ་མི་དམིགས་པ་དང་ལྡན་པར་བྱའོ།།

ལྔ་པ་བསྒྲུབ་པའི་འབྲས་བུ་བཤད་པ་ནི།

དེས་ནི་ཉི་ཟླ། ཞེས་པ་ནས། བཅུ་གསུམ་ས་ལ་གྲུབ། །ཅེས་པའི་བར་གྱིས་བསྟན་ཏེ།

དེས་ནི་ཉི་ཟླ་ཞོན་འགྲོ་བའི། །རིག་འཛིན་ས་ལ་གནས་ཕན་ཆད། །བདེ་ཆེན་བཅུ་གསུམ་ས་ལ་འགྲུབ།།

དེ་ལྟར་སྒྲུབ་པ་དེས་ནི་འབྲས་བུ་ཇི་ལྟར་ཐོབ་ན། ཐོག་མར་ཉི་ཟླ་ཞོན་ཏེ་འགྲོ་བའི་རིགས་འཛིན་ཏེ། ཐབས་ཤེས་ལ་དབང་ཐོབ་ནས་ཕྱག་རྒྱ་ཆེན་པོའི་ས་ཐོབ་པ་ལ་གནས་པར་འགྱུར་རོ། །དེ་ཕན་ཆད་ནས་མཐར་ཐུག་བདེ་བ་ཆེན་པོ་བཅུ་གསུམ་པ་ཡི་གེ་འཁོར་ལོ་ཚོགས་ཆེན་གྱི་ས་མཆོག་ཉིད་ལ་ལྷུན་གྱིས་གྲུབ་སྟེ་སངས་རྒྱས་སུ་འགྱུར་པ་ནི་ངེས་༼༡༩༧༽པའོ།།

ལྔ་པ་ཡི་གེའི་ཚོགས་ལ་གསུམ་སྟེ། ཡོན་ཏན་བསྟན་པ། ལས་ཀྱི་གཞུང་བསྲོང་བ། སྒྲུབ་པའི་འབྲས་བུའོ། །དང་པོ་ནི།

གཞན་ཡང་རྒྱུན་དུ༌། ཞེས་པ་ནས། རྒྱུན་གྱི་ཏིང་འཛིན་འཐོབ། །ཅེས་པའི་བར་གྱིས་བསྟན་ཏེ།

གཞན་ཡང་རྒྱུན་དུ་བྱ་བ་ནི། །ཆོས་ཀུན་རྒྱལ་བའི་རང་བཞིན་ཏེ། །རྒྱལ་བ་སྐུ་གསུང་ཐུགས་སུ་སྣང་།།

སྐུ་དང་གསུང་ཐུགས་ཕྱག་རྒྱ་དག །ཡི་གེ་འཕྲེང་བ་ཉིད་ལ་རྫོགས། །ཡི་གེ་ཕྱག་རྒྱའི་ཡེ་ཤེས་རྣམས།།

རྒྱུན་གྱི་རྒྱུན་དུ་བྱ་བ་ཡིན། །དེས་ནི་རྒྱུན་གྱི་ཏིང་འཛིན་ཐོབ།།

ཉི་ཟླའི་ཚོགས་ལས་མི་མཐུན་པ་གཞན་ཡང་ཡི་གེའི་ཚོགས་ཀྱི་དཀྱིལ་འཁོར་འཆད་པ་སྟེ། དེ་ཡང་དུས་བཞིར་བར་མི་གཅད་པར་རྒྱུན་དུ་བྱ་བའི་ཐབས་དམ་པ་ནི་གང་ཞེ་ན། ཕུང་ཁམས་སྐྱེ་མཆེད་སོགས་དངོས་པོ་གཉིས་པའི་ཆོས་རྣམས་ཀུན་གྱི་ངོ་བོ་ཡེ་ནས་རྒྱལ་བའི་སྐུ་གསུང་ཐུགས་ཀྱི་རང་བཞིན་དུ་སངས་རྒྱས་པ་ཉིད་ཡིན་ཏེ། སངས་རྒྱས་ཀྱི་ངོ་བོ་སེམས་དཔའ་ཡབ་ཡུམ་སུམ་ཅུ་རྩ་གཉིས། སྒོ་བ་ཡབ་ཡུམ་བརྒྱད། གཙོ་བོ་ཡབ་ཡུམ་བཅུ་སྟེ་ལྷ་ལྔ་བཅུའི་རྒྱལ་བའི་དཀྱིལ་འཁོར་གྱི་སྐུ་གསུང་ཐུགས་སུ་སྣང་བ་ཉིད་དོ། །དེའི་སྐུ་དང་གསུང་ཐུགས་སུ་བཏགས་པའི་ཕྱག་རྒྱ་དག་གི་ཡོན་ཏན། ཡི་གེའི་ཕྲེང་བ་ཉིད་ཀྱི་རང་བཞིན་ལ་རྫོགས་པ་ཡིན་པའི་ཕྱིར། དེ་ལྟར་ཐག་ཆོད་ནས་ཨཱ་ལི་ཀཱ་ལིའི་ཡི་གེ་གསུང་ཕྱག་རྒྱའི་ཡེ་ཤེས་རྣམས་ནི། རྣལ་འབྱོར་པ་ལམ་པས་དུས་བཞིའི་རྒྱུན་གྱི་རྒྱུན་མི་ཆད་པ་ཉིད་དུ་སྒོམ་པར་བྱ་བ་ཡིན་ནོ། །དེ་ལྟར་འབད་པ་དེས་ནི་རྒྱུན་གྱི་ཏིང་ངེ་འཛིན་འཐོབ་པར་འགྱུར་བ་ཉིད་དེ་བསྒོམ་པའི་ཡོན་ཏན་ནོ།།

གཉིས་པ་ལས་ཀྱི་གཞུང་བསྲོང་བ་ནི།

རྒྱུན་གྱི་རྒྱུན་དུ། ཞེས་པ་ནས། བཅས་སྦྱར་དེ་བཞིན་ནོ། །ཞེས་པའི་བར་གྱིས་བསྟན་ཏེ།

རྒྱུན་གྱི་རྒྱུན་དུ་མི་གཅད་པ། །རྡོ་རྗེ་ནམ་དང་ཉི་ཚོད་ལ།།

ཡི་གེ་ཚོགས་བསྐྱེད་ཚོགས་སྦྱར་བ། །མཆོད་བསྙེན་བཅས་སྦྱར་དེ་བཞིན་ནོ།།

འདི་ཉིད་རྒྱུན་གྱི་རྒྱུན་དུ་བར་མི་གཅད་པར་ཉམས་སུ་བླང་བའི་ཐབས་ནི། རྡོ་རྗེ་ཐེག་པའི་ཡང་གསང་སྙིང་པོའི་ལུགས་ཀྱི་དངོས་པོ་ཐམས་ཅད་རང་རིག་པའི་ཡེ་ཤེས་ཡིན་པས་ནམ་དང་ཉི་མའམ་ཉིན་མཚན་དུ་སྣང་བའི་དུས་ཀྱང་རྡོ་རྗེ་སྟེ། དེ་དག་གི་དུས་ཚོད་ལ་བསམ་པས་ཡི་གེའི་ཚོགས་བསྒོམ་པ་ལས་ལྷར་བསྐྱེད་ཅིང་ཡི་གེའི་འཕྲོ་འདུ་ལ་བརྟེན་ནས་དོན་དུ་རྫོགས་པའང་དེ་ལྟར་བསམ་པས་ངང་ལས་མི་འདའ་བར་སྦྱར་བར་བྱའོ།།

དེ་ལྟ་བུའི་དཀྱིལ་འཁོར་བསམ་པ་ལ་དྲངས་ཤིང་བསྟིམ་སྟེ་བརྟན་པ་ལ་མཆོད་པ་དང་བཟླས་བརྗོད་བསྙེན་པ་དང་བཅས་པ་སྦྱར་ཏེ་ལས་ལ་འབད་པའང་བཤད་པའི་ཐབས་ཚོགས་ཀྱི་ལས་གཞུང་བསྲང་བ་ཇི་ལྟ་བ་དེ་བཞིན་དུ་བྱ་བ་ཡིན་ནོ། །འོ་ན་ཡི་གེ་ལས་ལྷར་བསྐྱེད་པའི་འཕྲོ་འདུ་བཤད་པ་ལའང་ཡོད་ན། འདི་ཁོ་ན་ཁྱད་པར་དུ་གདགས་པ་ཅི་ཞེ་ན། འདིར་ཡི་གེ་གཙོར་བྱེད་པའི་སྒོ་ནས་མི་འགལ་ཏེ། གཞན་དག་ནི་ལྷ་གཙོར་བྱེདཅིང་ཡི་གེ་ཡན་ལག་ཏུ་བྱེད་པའི་ཕྱིར་རོ།།

གསུམ་པ་སྒྲུབ་པའི་འབྲས་བུ་ནི།

༼༡༩༨༽འདི་ནི་དོན་དང༌། ཞེས་པ་ནས། དམ་པར་དེ་ཉིད་འགྱུར། །ཞེས་པའི་བར་གྱིས་བསྟན་ཏེ།

འདི་ནི་དོན་དང་ཉེ་བའི་ལམ། །དམ་པ་བསྐྲུན་པར་དེ་འགྱུར་རོ།།

འདིར་ནི་རྒྱུན་གྱི་རྒྱུན་ཚོགས་དེས། །དམ་པའི་དམ་པར་དེ་ཉིད་འགྱུར།།

ཡི་གེ་ཚོགས་ཀྱི་དཀྱིལ་འཁོར་འདི་ནི་དོན་དམ་པའི་འབྲས་བུ་དང་ཁྱད་པར་དུ་ཉེ་བའི་ལམ་དམ་པར་གྱུར་པས་འདི་ལ་འབད་ན་འབྲས་བུ་བསྐྲུན་པ་མྱུར་བར་འགྲུབ་པའི་དོན་ཏེ། ལམ་ཀུན་ལའང་འབྲས་བུ་ལ་འདི་ཉིད་ཉེ་བས་དེ་ཉིད་མྱུར་དུ་འགྲུབ་པར་འགྱུར་པའི་ཕྱིར་རོ། །དེ་བས་ན་འདིར་ནི་ཡི་གེ་རྒྱུན་གྱི་ཏིང་ངེ་འཛིན་གྱིས་རྒྱུན་དུ་ཚོགས་ཀྱི་དཀྱིལ་འཁོར་བར་མ་གཅད་པ་འབད་པ་དེས། འབྲས་བུ་རིགས་འཛིན་ལས་ཀྱང་ཁྱད་པར་དུ་གྱུར་པས་དམ་པའི་དམ་པ་ཡང་དག་པར་རྫོགས་པའི་སངས་་རྒྱས་ཀྱི་ས་མཆོག་མཐར་ཐུག་པ་དེ་ཉིད་དུ་འགྱུར་པ་ལ་ཐེ་ཚོམ་མེད་པའོ། །འདི་ལ་ཡི་གེའི་ཕྲེང་བས་ཚེ་སྒྲུབ་པ་ཞེས་ཀྱང་གསུངས་སོ།།

དྲུག་པ་རྡོ་རྗེ་དྲྭ་བ་འབྲེལ་བའི་ཚོགས་ལ་གསུམ་སྟེ། དེའི་ངེས་ཚིག་བསྟན་པ། ལས་ཀྱི་གཞུང་བསྲང་བ། བསྒྲུབ་པའི་འབྲས་བུ་བཤད་པའོ། །དང་པོ་ནི།

གཞན་ཡང་རྡོ་རྗེ། ཞེས་པ་ནས། འབྱུང་བས་དབྱིངས་ཞེས་བྱ། །ཞེས་པའི་བར་གྱིས་བསྟན་ཏེ།

གཞན་ཡང་རྡོ་རྗེ་དྲ་བའི་དབྱིངས། །ཐུགས་ཀྱི་གསང་ཆེན་གསང་བ་འདི། །རྡོ་རྗེ་རྡོ་རྗེ་ཡིན་པས་ན།།

རྡོ་རྗེ་དབང་ཡུལ་འབྲེལ་བས་ནི། །ཐམས་ཅད་འབྱུང་བས་དབྱིངས་ཞེས་བྱ།།

གཞན་ཡང་སྔ་མ་ལས་མི་མཐུན་པ་ཐབས་དང་ཤེས་རབ་རྡོ་རྗེ་དྲྭ་བའིདབྱིངས་སུ་འབྲེལ་བའི་ཚོགས་ཡོན་ཏན་དང་དངོས་གྲུབ་ཀྱི་འབྱུང་གནས་ཐུགས་ཀྱི་དགོངས་པས་བརྣག་པའི་གསང་ཆེན་གསང་བའི་དོན་འཆད་པ་འདི་ནི་བཤད་པའི་དོན་ཉིད་ལས་འགྲེལ་ཏེ། རྡོ་རྗེ་བརྗོད་པ་ནི་འདིར་གསང་བའི་རྡོ་རྗེ་ཡིན་པས་ན། ཐབས་ཀྱི་རྡོ་རྗེ་གསང་བའི་དབང་པོ་དང༌། ཤེས་རབ་ཀྱི་པདྨ་གསང་བའི་ཡུལ་གཉིས་དབྱེར་མེད་པར་གྱུར་ཏེ་བདེ་ཆེན་གྱི་ངང་དང་འབྲེལ་བས་ནི་དྲྭ་བའི་དོན་ཏེ། དེ་ཉིད་ལས་ཐུན་མོང་དང་མཆོག་གི་དངོས་གྲུབ་ཐམས་ཅད་འབྱུང་ཞིང་འཆར་བས་དབྱིངས་ཞེས་བྱ་བའི་མིང་གི་ངེས་ཚིག་ཀྱང་འགྲུབ་པར་འགྱུར་རོ།།

གཉིས་པ་ལས་ཀྱི་གཞུང་བསྲང་བ་ནི།

རྡོ་རྗེ་འཛིན་མ། ཞེས་པ་ནས། རིམ་བཞིན་སྦྱར་བྱས་ནས། ཞེས་པའི་བར་གྱིསབསྟན་ཏེ།

རྡོ་རྗེ་འཛིན་མ་འཛིན་སོགས་བཅས། །འཁྲིལ་མཉམ་པ་ཡང་དེ་བཞིན་ཏེ།།

གཟུགས་བརྙན་ཏིང་འཛིན་རང་བཞིན་གནས། །ཇི་ལྟར་རིམ་བཞིན་སྦྱར་བྱས་ནས།།

དེ་དག་ཀྱང་ཐབས་ཤེས་ཀྱི་ལྷ་དངོས་གང་ཞེ་ན། ཡུམ་རྡོ་རྗེ་འཛིན་མ་དབྱིངས་ཕྱུག་མ་ལ་སོགས་པའི་ཡུམ་ཉི་ཤུ་རྩ་ལྔ་དང༌། ཡབ་རྡོ་རྗེ་འཛིན་པའི་སེམས་དཔའ་ལ་སོགས་པ་ཡབ་ཉི་ཤུ་རྩ་ལྔ་དང་བཅས་ཏེ་ཡི་གེའི་ཚོགས་ཀྱི་ལྷ་གྲངས་ལྟར་ཡབ་ཡུམ་ཐབས་དང་ཤེས་རབ་ཟུང་དུ་འཁྲིལ་ནས་དོན་མཉམ་པའི་ངང་དུ་བཞུགས་པ་ཡང་བཤད་པ་དེ་བཞིན་ཏེ། དེ་ལྟ་བུ་རྣམས་ཀྱང་ཚོགས་ཀྱི་དུས་སུ་གཟུགས་བརྙན་གྱི་དཀྱིལ་འཁོར་དངོས་སུ་བྲིས་པས་བཞེངས་སུ་གསོལ། ༼༡༩༩༽ཏིང་ངེ་འཛིན་གྱི་དཀྱིལ་འཁོར་གསལ་བར་བསྒོམ། རང་བཞིན་གྱི་དཀྱིལ་འཁོར་དབྱིངས་ཀྱི་གནས་ནས་སྤྱན་དྲངས་ཏེ་བསྟིམ་པ་སོགས་ཚོགས་ཀུན་མཐོང་བའི་གཞུང་དོན་ཇི་ལྟར་དུ་ལས་ཀྱི་རིམ་པ་བཞིན་སྦྱར་ཏེ་སྒྲུབ་པར་བྱས་ན་འབྲས་བུ་ངེས་པར་ཐོབ་པའོ།།

གསུམ་པ་བསྒྲུབ་པའི་འབྲས་བུ་བཤད་པ་ནི།

ཇི་ལྟར་འདོད་པ། ཞེས་པ་ནས། ཁམས་ལྟར་མཉམ་པར་གསུངས། །ཞེས་པའི་བར་གྱིས་བསྟན་ཏེ།

ཇི་ལྟར་འདོད་པ་དེ་ལྟར་ནི། །འདོད་པའི་ཁམས་ལྟར་མཉམ་པར་གསུངས།།

དེ་ལྟར་སྒྲུབ་པས་རང་གི་ལས་དང་དངོས་གྲུབ་ཇི་ལྟར་འདོད་ཅིང་བསམ་པ་གང་ལྟར་མོས་པ་དེ་ལྟར་འགྲུབ་པའི་ཚུལ་ནི། དཔེར་ན་ནོར་བུ་རིན་པོ་ཆེའམ། འདོད་པའི་ཁམས་ཀྱི་ལྷ་འཕྲུལ་དགའ་ལྟར་དུ་བདག་གི་རེ་བ་ཇི་སྙེད་པའང་འབྱུང་བས་ལྷ་དང་མཉམ་ཞིང་སངས་རྒྱས་ཀྱི་ཡོན་ཏན་ཇི་ལྟ་བར་བདག་གིས་ཀྱང་ཐོབ་པར་འགྱུར་ཏེ་གོ་འཕང་མཆོག་ཉིད་འགྲུབ་པར་བཀའ་ལས་གསུངས་པ་གང་ཉིད་འཁྲུལ་མེད་དུ་བཤད་པའོ།།

བདུན་པ་ཐབས་ཤེས་རབ་འབྲེལ་བའི་ཚོགས་ལ་ལྔ་སྟེ། སྐལ་ལྡན་སྤྲོ་བ་སྐྱེད༌པ། དཀྱིལ་འཁོར་བསྐྱེད་པ། གདུལ་བྱ་གང་གི་དོན་དུ་བྱུང་བ། དཀྱིལ་འཁོར་གྱི་ངོ་བོ་ལས་རིམ་པ་དང་བཅས་པ། དབང་དང་དངོས་གྲུབ་བསྒྲུབ་པའོ། །དང་པོ་ནི།

གཞན་ཡང་གང་དུ། ཞེས་པ་ནས། དགའ་བའི་ངོ་མཚར་སྐྱེ། །ཞེས་པའི་བར་གྱིས་བསྟན་ཏེ།

གཞན་ཡང་གང་དུ་གང་འབྲེལ་བའི། །གསང་ཆེན་དམ་པའི་དཀྱིལ་འཁོར་ནི། །ཆོས་རྣམས་ཀུན་གྱི་རང་བཞིན་འདི། །ཕན་ཚུལ་དྲ་བར་འབྲེལ་བ་ལས། །སྟོང་ཉིད་ནམ་མཁའི་རང་བཞིན་ལས། །སྤྲུལ་པ་བྱེ་བ་ཅིར་ཡང་སྣང་། །གཉིས་མེད་དྲ་བའི་ཚུལ་དུ་འབྲེལ། །རྣལ་འབྱོར་ཆེན་པོའི་ཡུལ་ཉིད་དེ། །རྩལ་དང་ལྡན་པའི་གསང་སྒོ་ལ། །འདི་ལ་གསང་སྒོ་དབྱེ་བར་བྱ། །གསང་འདིར་ཆུད་པའི་བུ་རྣམས་ནི། །བློ་གྲོས་ཆེན་པོ་ཐབས་ལྡན་པས། །མི་སྐྲག་དགའ་བའི་ངོ་མཚར་སྐྱེ།།

གཞན་ཡང་བཤད་པའི་དོན་ཉིད་མི་མཐུན་པའི་བྱེ་བྲག་སྟོན་པ་ནི། གནས་གང་དུ་ཐབས་དང་ཤེས་རབ་གཉིས་སུ་མེད་པར་གང་འབྲེལ་བའི་ཚོགས་ཀྱི་དོན་ལྟ་བས་ཐག་བཅད་པ་ལྟར་གསང་ཆེན་གསང་མཆོག་དམ་པའི་དཀྱིལ་འཁོར་གྱི་ངོ་བོ་ཉིད་ནི། བསམ་གྱིས་མི་ཁྱབ་ཅིང་ཐ་དད་དུ་སྣང་བའི་ཆོས་རྣམས་ཀུན་གྱི་ངོ་བོ་ཉིད་སེམས་ཉིད་ཇི་བཞིན་པའི་རང་བཞིན་གྱི་ངང་འདི་ཉིད་དུ་གཅིག་པས། ལྷ་ཡུབ་ཡུམ་དུ་རོལ་པ་རྟགས་སུ་བཀོད་པ་ལྟར་དོན་གྱི་ངོ་བོར་ཕན་ཚུན་དྲྭ་བས་འབྲེལ་བའི་དབྱེར་མེད་མཉམ་པ་ཉིད་ཀྱི་ངོ་བོ་ལ་མཐའ་གཉིས་མེད་པས་སྟོང་ཉིད་ནམ་མཁའི་དབྱིངས་ཀྱི་རང་བཞིན་ཉིད་ཐམས་ཅད་ཀྱི་གཞིར་གྱུར་པའི་ངང་ལས་སྤྲུལ་པ་སྣ་ཚོགས་པའི་བཀོད་པ་བྱེ་བ་ཕྲག་མང་ཇི་སྙེད་པའི་ཚུལ་དུ་རིག་པ་ཅིར་ཡང་སྣང་མོད། ངོ་བོ་ཐ་དད་མེད་པར་ཆོས་སྐུ་ཆེན་པོར་གཅིག་པ་ནི་ཐབས་དང་ཤེས་རབ་གཉིས་མེད་ཆེན་པོར་མཉམ་པའི་ཚུལ་དུ་འབྲེལ་བའི་རྣམ་དབྱེར་མེད་པའི་དོན་ཏེ། དཔེ་དྲྭ་བ་དང་འདྲ་བའི་ཚུལ་དུ་འབྲེལ་བར་ཐག་ཆོད་དོ། །དེ་ལྟ་བུའི་དོན་ནི་རྣལ་འབྱོར་པ་ཤེས་རབ་ཆེན་པོའི་བློ་གྲོས་མཆོག་དང་ལྡན་པའི་སྤྱོད་ཡུལ་ཡིན་པས་དེ་ཉིད་ཇི་བཞིན་དུ་རྟོགས་པར་ནུས་པའི་ཤེས་རབ་ཀྱི་རྩལ་༼༢༠༠༽དང་ལྡན་པའི་སློབ་མ་གསང་སྒོ་འདིར་ཞུགས་པའི་སྣོད་དང་ལྡན་པ་འདི་ལ་བླ་མས་མན་ངག་གསང་བའིསྒོ་དབྱེ་སྟེ་ཟབ་མོའི་དོན་རྣམས་སྦྱིན་པར་བྱའོ། །སྐལ་བ་ཅན་ལ་བྱིན་ན་རྟགས་ནི་གསང་བའི་སྒོ་འདིར་རིགས་ངེས་པར་ཆུད་དེ་མི་ལྡོག་པའི་བུ་རྣམས་ནི། ཤེས་རབ་ཀྱི་བློ་གྲོས་ཆེན་པོ་དང་མན་ངག་གི་ཐབས་དང་ལྡན་པས་ན་རྒྱུ་དེ་ལས་ཐེག་པ་མཆོག་གི་དགོངས་སྤྱོད་ཟབ་མོ་ལེན་པར་ཆས་པ་ལ་མི་སྐྲག་ཅིང་སྔངས་པ་མེད་པར་སླར་དད་ཅིང་མོས་པ་དང༌། དགའ་བའི་འདུན་པ་སྐྱེས་ཏེ་ཆོས་ལ་བཟོད་པ་ཐོབ་ནས་ངོ་མཚར་སྐྱེ་བར་འགྱུར་པ་ནི་དངོས་སུ་ན་ས་བཞི་པ་ལྟ་བུའོ།།

གཉིས་པ་དཀྱིལ་འཁོར་བསྐྱེད་པ་ནི།

གསང་ཆེན་གསང་བའི། ཞེས་པ་ནས། སམ་ནི་ཅིག་ཆར་བསྐྱེད། །ཅེས་པའི་བར་གྱིས་བསྟན་ཏེ།

གསང་ཆེན་གསང་བའི་དཀྱིལ་འཁོར་འདིར། །རྡོ་རྗེ་རྒྱལ་པོ་རྒྱལ་མོར་བཅས། །ལྔ་གཉིས་ཟུང་དུ་འཁྲིལ་བ་ནི། །གཡས་ནས་གཡོན་དུ་འཁྲིལ་འཁྱུད་སྦྱོར། །གཡས་ཉིད་བྱང་ཆུབ་རྡོ་རྗེ་དང་། །རང་རང་མཚན་ནམ་འབར་བ་འོ། །གཡོན་ཉིད་སྒྲ་སྙན་དྲིལ་བུ་དང་། །རྟགས་ཀྱིས་མཛེས་པར་གསལ་བ་ལས། །འཇོ་ཞིང་འདུད་པའི་མདངས་ལྡན་པས། །ཆགས་ཤིང་གཡོ་བའི་ཚུལ་གྱིས་ནི། །སེང་ཆེན་ཁྱུང་མཆོག་ལ་སོགས་པ། །སེམས་དཔའ་དམན་པའི་ལུས་ཁྲི་ལ། །རྫོགས་པའི་ཚུལ་གྱིས་བསྒྱིངས་བཅས་ཏེ། །ཁ་དོག་ལྔ་ཡི་འོད་འབར་བ། །བཅུ་གསུམ་ཆ་ལུགས་སྒེག་པ་རྣམས། །རིམས་ཀྱིས་འམ་ནི་ཅིག་ཅར་བསྐྱེད།།

གསང་ཆེན་སྙིང་པོའི་ལུང་དང་འབྲེལ་བའི་ལྷ་གྲངས་སུམ་ཅུ་རྩ་བཞིའི་དཀྱིལ་འཁོར་གྱི་ངོ་བོ་གསང་བ་མཆོག་ཏུ་གྱུར་པའི་དཀྱིལ་འཁོར་གྱི་དོན་འདི་ཉིད་ཉེ་བར་བཟུང་བ་ནི། གཙོ་བོ་རྡོ་རྗེ་རྒྱལ་པོ་རིགས་ལྔ་དང་རྡོ་རྗེ་རྒྱལ་མོ་ཡུམ་ལྔར་བཅས་པའི་ཐབས་དང་ཤེས་རབ་ལྔ་གཉིས་ཏེ་བཅུ་ཉིད་ཟུང་དུ་འཁྲིལ་ཏེ་བཞུགས་པ་ནི། གཙོ་བོ་གཡས་ནས་ཡུམ་གཡོན་དུ་བཞུགས་པས་ཡབ་ཀྱིས་འཁྲིལ་ཞིང་ཡུམ་གྱིས་འཁྱུད་དེ་སྦྱོར་བའི་སྐྱིལ་ཀྲུང་དུ་བཞུགས་པའོ། །ཡབ་རྣམས་ཀྱི་གཡས་ཉིད་ན་ཐུགས་ཀྱི་བྱང་ཆུབ་མཚོན་པས་མི་བསྐྱོད་པའི་རྡོ་རྗེ་དང༌། རང་རང་གི་མཚན་མ་སྣང་མཛད་ཀྱི་འཁོར་ལོ་དང༌། རིན་ཆེན་འབྱུང་ལྡན་རིན་པོ་ཆེ་འབར་བ་དང༌། སྣང་བ་མཐའ་ཡས་ཀྱི་པདྨ་དང༌། དོན་ཡོད་གྲུབ་པ་རལ་གྲི་རྣམས་འོད་འབར་བ་བསྣམས་པའོ། །ཀུན་ཀྱང་གཡོན་ཉིད་ན་སྒྲ་བརྙན་གྱི་དྲིལ་བུ་བསྣམས་པ་ཉིད་དང༌། ཡུམ་རྣམས་ཀྱང་ཆོས་ཀྱི་དབྱིངས་ཀྱི་རང་རྟགས་དྲིལ་བུ་བསྣམས་ཏེ། དེ་ལྟར་ཐུགས་ཀྱི་རང་རྟགས་ཀྱིས་ཕྱག་རྒྱས་མཛེས་པར་བརྒྱན་ཏེ་འོད་དུ་གསལ་བ་ཡི་སྐུ་དེ་དག་ཚུལ་ལ་ཡབ་རྣམས་དབུ་གཡོན་དུ་འབྱོ་ཞིང་ཡུམ་རྣམས་གཡས་སུ་འདུད་པའི་གཟི་མདངས་དང་ལྡན་པས། ཡབ་ཡུམ་གཅིག་ལ་གཅིག་ཆགས་ཆེན་པོའི་རྗས་སུ་ཆགས་ཤིང་དགོངས་པ་གཡོ་ཞིང་ལྡང་བའི་ཚུལ་ཉིད་ཀྱིས་ནི། རྡོ་རྗེའི་རིགས་སེང་ཆེན་གྱི་གདན་དང༌། བདེ་གཤེགས་རིགས་ཁྱུ་མཆོག་གི་གདན། ལ་སོགས་པ་ཞེས་པས་རིན་ཆེན་རིགས་རྟའི་གདན་དང༌། པདྨའི་རིགས་རྨ་བྱའམ་ཁྱུང་གི་གདན་དང༌། ལས་ཀྱི་རིགས་ཤང་ཤང་ཏེའུའི་གདན་ལ་བཞུགས་ཏེ་གདན་རེ་རེའང་ལྔ་བརྩེག་གོ །སེམས་ཅན་གྱི་གདན་རྣམས་ཀྱང་བྱང་ཆུབ་སེམས་དཔའ་རྣམས་དམན་པའི་ལུས་སུ་བྱུང་སྟེ་གུས་པས་ལུས་ཁྲིལ་༼༢༠༡༽ཕུལ་ནས་རྣ་བས་ཆོས་ཉན་པར་བཤད་པ་ཉིད་དོ། །དེ་ལྟར་གཙོ་བོ་རྣམས་ཀྱི་བཞུགས་ཚུལ་རྫོགས་པའི་སྐྱིལ་མོ་ཀྲུང་གི་ཚུལ་གྱིས་འགྱིང་བག་དང་བཅས་ཏེ་བཞུགས་སོ། །འོད་ཟེར་ནི་སྐུ་རེ་རེ་ལའང་ཁ་དོག་ལྔ་ལྔ་ཡི་འོད་འབར་བ་ཉིད་དེ་ཡེ་ཤེས་རྒྱ་མ་ཆད་པར་རྫོགས་པའི་དོན་ཏོ། །དེ་ལྟར་དབུ་རྒྱན་ལ་སོགས་པ་རྒྱན་ཆས་བཅུ་གསུམ་གྱི་ཆ་ལུགས་ཀྱིས་སྒེག་པའི་ཚུལ་སྔར་བཤད་པ་བཞིན་ཏེ་རྣམས་ཞེས་མང་པོའི་སྒྲས་སེམས་དཔའ་དང་སེམས་མ་སྒོ་བ་ཡབ་ཡུམ་ཀྱང་རྒྱུན་དང་འཁྲིལ་ལུགས་དང་འདུད་འབྱོ་རྣམས་རྗེས་སུ་མཐུན་པའོ། །བསྐྱེད་པའི་ཚུལ་ནི། བདག་ཉིད་ས་མཐོ་དམན་དང༌། སྔར་གོམས་མ་གོམས་ཀྱིས་76རིམས་ཀྱིས་སམ་ནི་སྐད་ཅིག་གིས་ཅིག་ཆར་དུ་བསྐྱེད་དེ་གང་འཚམས་པ་ཉིད་དུའོ།།

གསུམ་པ་གདུལ་བྱ་གང་གི་དོན་དུ་བྱུང་བ་ནི།

གང་འདིར་འདོད་ཁམས། ཞེས་པ་ནས། ཡབ་ཡུམ་ཡོང་མི་དམིགས། །ཞེས་པའི་བར་གྱིས་བསྟན་ཏེ།

གང་འདིར་འདོད་ཁམས་ཆགས་ཞེན་པའི། །དབང་པོ་རིམ་པར་སྦྱང་བར་བྱ།།

དེ་མིན་ཡབ་ཡུམ་ཡོང་མི་དམིགས།།

དེའི་དགོས་ཆེད་ནི། གང་འདིར་འདོད་པའི་ཁམས་པ་དག་འཁྲིག་པ་ལ་ཆགས་པ་དང༌། འདོད་ཡོན་སྤྱི་ལ་ཞེན་ཅིང་གཏོང་མི་ཕོད་པའི་འགྲོ་བ་རྣམས་ཀྱི་ཤེས་རབ་ཀྱི་དབང་པོའི་རིམ་པ་དང་སྦྱར་ནས་ལོངས་སྤྱོད་ལྔའི་ཚོགས་ཉིད་རིམ་པ་དང་གཅིག་ཆར་དུ་བརྩམ་པར་བྱ་བ་ཡིན་ཏེ། འདོད་ཁམས་དེ་མིན་པར་གཟུགས་དང་གཟུགས་མེད་ཀྱི་ཁམས་པའི་ཆེད་དུ་ནི་ཡབ་ཡུམ་འབྲེལ་བའི་དཀྱིལ་འཁོར་ཡོང་ཡེ་མི་དམིགས་པས་དེ་ལྟར་བསྟན་པ་མེད་པའོ།།

བཞི་པ་དཀྱིལ་འཁོར་གྱི་ངོ་བོ་ལས་རིམ་པ་དང་བཅས་པ་ནི།

གསང་ཉིད་ཚོགས་ཀྱི། ཞེས་པ་ནས། སྦྱངས་ཕྱིར་རིམ་བཞིན་དབུལ། །ཞེས་པའི་བར་གྱིས་བསྟན་ཏེ།

གསང་ཉིད་ཚོགས་ཀྱི་འཁོར་རྣམས་ཀྱང་། །གནས་པར་གྱུར་པའི་རང་བཞིན་གྱིས། །ཕྱག་རྒྱ་རྒྱལ་པོ་རྒྱལ་མོར་བཅས། །བརྒྱད་གཉིས་ཟུང་སྒྲིལ་འཁྲིལ་འཁྱུད་སྦྱོོོོོོོོོོོོོོོོོོར། །ས་དང་ནམ་ཀ་སྤྱན་རྡོ་རྗེ། །བྱམས་དང་རྡོ་རྗེ་ཀུན་བཟང་དཔལ། །ནང་དང་ཕྱི་ཡི་ཡོ་བྱད་ནི། །བཞི་གཉིས་དག་གིས་མཉེས་སྦྱོར་བ། །བསམ་བྱ་ལ་སོགས་དེ་བཞིན་ནོ། །རྡོ་རྗེ་སྒོ་དང་བཅས་པར་ནི། །རྡོ་རྗེ་འཁྲིལ་འཁྱུད་གསང་བའི་ཚོགས། །རྣལ་འབྱོར་ལོངས་སྤྱོད་ཆེར་སྦྱར་བས། །མཉེས་ནས་སྦྱང་ཕྱིར་རིམ་བཞིན་དབུལ།།

དེ་ལྟར་ཡོ་ག་ཕྱི་པའི་ཡུལ་མ་ཡིན་པས་ཤིན་ཏུ་གསང་བ་ཉིད་ཀྱི་ཚོགས་ཀྱི་དཀྱིལ་འཁོར་གྱི་ལྷ་དེ་དག་རྣམས་ཀྱང༌། གཞན་ཞིག་ནས་རང་རྒྱུད་པ་མ་ཡིན་ཏེ། བདག་ཅག་གི་ཕུང་པོ་ལྔ་དང༌། ཁམས་བཅོ་བརྒྱད་དང༌། སྐྱེ་མཆེད་བཅུ་གཉིས་ཀྱི་རྟོག་པའི་ཚོགས་ཀྱི་ངོ་བོ་ཉིད་མ་བསླད་པར་བཤད་པའི་ལྷ་རྣམས་ཀྱི་རང་བཞིན་དུ་ཡེ་ནས་གནས་པ་ཉིད་མངོན་དུ་འགྱུར་བར་བྱས་པའི་མཚན་ཉིད་གཉིས་སུ་མེད་པ་ཡི་ལྷར་གསལ་བའི་ཡེ་ཤེས་ཀྱི་རང་བཞིན་གྱིས་སྐུ་ཕྱག་རྒྱ་ཉིད་དུ་བསྐྱེད་པ་ནི། དངོས་གཙོ་བོ་རིགས་ལྔ་རྒྱལ་པོ་རྒྱལ་མོ་ཡབ་ཡུམ་དང་བཅས་པའི་འཁོར་སེམས་དཔའ་སེམས་མ་བརྒྱད་ཕྲག་གཉིས་ཟུང་དུ་བསྒྲིལ་ཏེ་ཡབ་ཡུམ་འཁྲིལ་འཁྱུད་དུ་སྦྱོར་བ་གང་ཞེ་ན། ས་ཡི་སྙིང་པོ་དང༌། ནམ་མཁའ་ཡི་སྙིང་པོ་དང༌། སྤྱན་རས་གཟིགས་དང༌། ཕྱག་ན་རྡོ་རྗེ་དང༌། བྱམས་པ་དང༌། སྒྲིབ་པ་སེལ་བའི་རྡོ་རྗེ་དང༌། ཀུན་ཏུ་བཟང་པོ་དང༌། འཇམ་དཔལ་དང་བརྒྱད་དོ། །ནང་དང་ཕྱི་༼༢༠༢༽ཡི་ཡོ་བྱད་ཀྱིས་མཉེས་པར་བྱེད་པ་ནི། ནང་གི་སེམས་མ་ལཱ་སྱེ་དང༌། མཱ་ལྱེ་དང༌། གཱིརྟི་དང༌། ནཱིརྟི་མའོ། །ཕྱིའི་སེམས་མ་དྷུཔྤེ་ལ་སོགས་པ་བཞི་སྟེ་སེམས་མ་བཞི་ཕྲག་གཉིས་ཏེ་བརྒྱད་པོ་དག་གིས་མཉེས་པར་སྦྱོར་ཏེ་དགྱེས་པར་འཁྲིལ་བར་བསྒོམ་པའང་ཇི་ལྟར་བསམ་པར་བྱ་བ་ལ་སོགས་པ་གཙོ་བོ་དེ་བཞིན་དུ་སྒོམ་པར་བྱ་བ་ཡིན་ནོ། །བདུད་དཔུང་འདུལ་བའི་རྡོ་རྗེ་སྒོ་བ་སྟོབས་ཆེན་དང༌། གཤིན་རྗེ་གཤེད་དང༌། རྟ་མཆོག་དང༌། བདུད་རྩི་འཁྱིལ་བ་བཞི་དང་བཅས་པར་ནི། རྡོ་རྗེ་སྒོ་མ་བཞི་དང་དགྱེས་པར་འཁྲིལ་འཁྱུད་དང་སྦྱོར་བར་བསྒོམ་པ་ནི་གསང་བའི་ལོངས་སྤྱོད་རྫོགས་པའི་ལྷའི་ཚོགས་ཏེ་དེ་དག་རྣལ་འབྱོར་སྐལ་ལྡན་མིའི་ཚོགས་ཉིད་ལོངས་སྤྱོད་འབྱོར་བའི་ཡོ་བྱད་ཀྱི་ཚོགས་ཆེན་པོ་དང་ལྡན་པར་བྱས་ཏེ་མཆོད་པ་རྒྱ་ཆེར་སྦྱར་བས་སྐུ་གསུང་ཐུགས་དགྱེས་པ་བསྐྱེད་དེ་མཉེས་པར་བྱས་ནས་སྒོ་གསུམ་གྱི་སྒྲིབ་པ་སྦྱངས་པའི་ཕྱིར་མཆོད་པ་གསུམ་གོ་རིམ་བཞིན་དུ་དབུལ་བར་བྱའོ།།

ལྔ་པ་དབང་དང་དངོས་གྲུབ་བསྒྲུབ་པ་ནི།

གསང་བའི་འཇུག་ཚུལ། ཞེས་པ་ནས། དོན་རྣམས་བསྒྲུབ་པར་བྱ། །ཞེས་པའི་བར་གྱིས་བསྟན་ཏེ།

གསང་བའི་ཚུལ་འཇུག་ལ་སོགས་ཀྱིས། །གསང་བའི་དོན་རྣམས་བསྒྲུབ་པར་བྱ།།

གསང་བའི་ཚོགས་འདི་དག་གི་དུས་སུ་དབང་ལ་འཇུག་པ་དང༌། ཐབས་ཤེས་རབ་ཀྱིས་རོལ་པའི་ཚུལ་དང་ལ་སོགས་པ་ཞེས་བསྡུ་བའི་དོན་གྱིས་བྲོ་བརྡུངས་པ་དང༌། གླུ་བླང་པ་དང༌། བཟའ་བཏུང་གི་ཚོགས་ལ་ལོངས་སྤྱོད་པ་དང༌། རྒྱན་དང་བྱུག་པ་བྱ་བ་དག་དང༌། སྒྲོལ་བ་བྱ་བ་དག་དང༌། དེ་ལྟ་བུ་ཡོན་ཏན་གྱི་ལོངས་སྤྱོད་པར་བྱ་བ་རིལ་ཐམས་ཅད་དེ། དེ་དག་གི་སྒོ་ནས་གསང་བའི་གོ་འཕང་མཆོག་དང་ཐུན་མོང་དུ་བཅས་པའི་ཡོན་ཏན་གྱི་དོན་རྣམས་མཐའ་དག་བསྒྲུབ་པར་བྱའོ།།

གསུམ་པ་དཀྱིལ་འཁོར་གྱི་དོན་བསྟན་པ་ལ་གཉིས་ཏེ། འཁོར་གྱིས་དཀྱིལ་འཁོར་གྱི་དོན་མཐོང་བར་གསོལ་བ། སྟོན་པས་དཀྱིལ་འཁོར་གྱི་དོན་གསུངས་པའོ། །དང་པོ་ནི།

འོག་གི འདུས་པ་ཀུན་གྱི། ཞེས་པ་ནས། དེ་སྐད་གསོལ་པས། ཞེས་པའི་བར་གྱིས་བསྟན་ཏེ།

འདས་པ་ཀུན་གྱི་དོན་མཐོང་བ། །རྡོ་རྗེ་འཛིན་པ་དེ་ལ་གསོལ། །སེམས་དཔའ་ཆེན་པོ་བདག་ཅག་གིས། །ཆོས་རྣམས་ཀུན་གྱི་རང་བཞིན་ནི། །ཐབས་ཉིད་ཤེས་རབ་ཉིད་བཀོད་དང་། །ཀུན་ནས་མཉམ་དང་བཅུ་དྲུག་ཆ། །ཡི་གེ་ཚོགས་དང་འབྱུང་བའི་དབྱིངས། །གཉིས་མེད་དྲ་བར་འབྲེལ་ལ་སོགས། །རང་བཞིན་ཏིང་འཛིན་གཟུགས་བརྙན་དུ། །སྣང་བར་ངེས་པ་མཐོང་ལགས་སོ། །དེ་སྐད་གསོལ་པས།

སྐྱེས་བུས་སྔར་ཐོས་པ་བརྗོད་དེ་ཚོགས་ཀྱི་རྣམ་གྲངས་བསྟན་པའི་ཕྱིར། དེའི་ཚེ་འཁོར་གྱི་འདུས་པ་ཀུན་གྱིས་དཀྱིལ་འཁོར་གྱི་དོན་མཐོང་བ་ཉིད། སྟོན་པ་རྡོ་རྗེ་འཛིན་པ་དེ་ལ་གསོལ་པ། སེམས་དཔའ་ཆེན་པོ་བདག་ཅག་གིས་འཁོར་འདས་ཀྱི་ཆོས་རྣམས་ཀུན་གྱི་རང་བཞིན་ནི། ཐབས་ཤེས་རབ་རེ་རེའི་སྒོ་ནས་གྲུབ་པའམ་དབྱེར་མེད་པར་སྦྱོར་བའི་ཚུལ་གྱིས་འགྲུབ་པའི་ཕྱིར། ཐབས་ཀྱི་སྦས་ཚོགས་ཉིད་དང༌། ཤེས་རབ་ཀྱི་སྦས་ཚོགས་ཉིད་དུ་བཀོད་པ་དང༌། དུས་བཞི་༼༢༠༣༽ཀུན་ནས་མཉམ་པའི་ཚོགས་དང༌། ཐབས་དང་ཤེས་རབ་བཅུ་དྲུག་ཆ་ཡི་ཉི་ཟླ་རྒྱས་པའི་ཚོགས་དང༌། ཡི་གེའི་རྒྱུན་གྱི་ཚོགས་དང༌། རྡོ་རྗེ་དྲྭ་བ་འབྱུང་བའི་དབྱིངས་སུ་གཅིག་པའི་ཚོགས་དང༌། ཐབས་དང་ཤེས་རབ་གཉིས་སུ་མེད་པར་དྲྭ་བས་འབྲེལ་བའི་ཚོགས་ལ་སོགས་པས་བསྡུ་བ་ནི་འདས་པ་ཉིད་ཀྱི་དོན་ནོ། །དེའི་སྐབས་སུ་རང་བཞིན་གྱི་དཀྱིལ་འཁོར་དང༌། ཏིང་ངེ་འཛིན་གྱི་དཀྱིལ་འཁོར་དང༌། གཟུགས་བརྙན་གྱི་དཀྱིལ་འཁོར་རྣམ་པ་གསུམ་དུ་སྣང་བ་བདག་ཅག་གིས་ངེས་པར་མཐོང་ལགས་སོ། །ཞེས་འཁོར་གྱིས་རྟོགས་པ་ཕུལ་བ་དེ་སྐད་དུ་གསོལ་བས།།

གཉིས་པ་སྟོན་པས་དཀྱིལ་འཁོར་གྱི་དོན་གསུངས་པ་ལ་གཉིས་ཏེ། དཀྱིལ་འཁོར་གསུམ་གྱི་དོན་གསུངས་ཚུལ། ལྷག་པ་གཟུགས་བརྙན་གྱི་དཀྱིལ་འཁོར་གྱི་དོན་གསུངས་ཚུལ་ལོ། །དང་པོ་ལ་གཉིས་ཏེ། རྒྱས་པར་བཤད་པ། བསྡུས་ཏེ་བསྟན་པའོ། །དང་པོ་ལ་གསུམ་སྟེ། རང་བཞིན་གྱི་དཀྱིལ་འཁོར། ཏིང་ངེ་འཛིན་གྱི་དཀྱིལ་འཁོར། གཟུགས་བརྙན་གྱི་དཀྱིལ་འཁོར་རོ། །དང་པོ་ནི།

དེས་གསུངས་པ། གང་འདིར། ཞེས་པ་ནས། དཀྱིལ་འཁོར་དེ་ཁོ་ན། །ཞེས་པའི་བར་གྱིས་བསྟན་ཏེ།

དེས་གསུངས་པ། གང་འདིར་འདུས་པའི་ཚོགས་མང་ཀུན། །ཇི་ལྟར་མཐོང་བ་དེ་ལྟར་ཡིན།།

ཡེ་ནས་མ་བཅོས་ཇི་བཞིན་ཉིད། །རང་བཞིན་དཀྱིལ་འཁོར་དེ་ཁོ་ན།།

དེ་ནས་སྟོན་པས་ལན་གསུངས་པ་ཉིད་དོན་མ་ནོར་བར་བསྟན་པའི་ཕྱིར། འཆད་པའི་སྐྱེས་བུ་སེམས་དཔའ་རྡོ་རྗེས། གང་འདིར་འདུས་པའི་འཁོར་ཚོགས་རྣམས། ཞེས་བོས་ནས། དེ་ལྟར་ཚོགས་ཀྱི་དཀྱིལ་འཁོར་མང་པོ་དེ་དག་ཀུན་ཀྱང༌། ཁྱེད་རྣམས་ཀྱིས་ཇི་ལྟར་མཐོང་བ་དེ་ཉིད་ལྟར་དུ་མ་ནོར་བ་ཡིན་ནོ། །ཞེས་གསུངས་པའོ། །དེ་བས་དཀྱིལ་འཁོར་རྣམ་པ་གསུམ་གྱི་ངོ་བོ་ཡང་ཡེ་གདོད་ནས་མ་བཅོས་མ་བསླད་པའི་ཆོས་ཉིད་ཇི་བཞིན་པ་ཉིད་དུ་ལྷུན་གྱིས་གྲུབ་པ་ནི་རང་བཞིན་གྱི་དཀྱིལ་འཁོར་དེ་ཁོ་ན་ཉིད་ཡིན་ནོ།།

གཉིས་པ་ཏིང་ངེ་འཛིན་གྱི་དཀྱིལ་འཁོར་ནི།

དགོངས་པ་དམ་པར། ཞེས་པ་ནས། དཀྱིལ་འཁོར་དམ་པ་ཉིད། །ཅེས་པའི་བར་གྱིས་བསྟན་ཏེ།

དགོངས་པ་དམ་པར་ལྷུན་གྲུབ་པ། །ཏིང་འཛིན་དཀྱིལ་འཁོར་དམ་པ་ཉིད།།

དེའི་དོན་ལ་མི་དམིགས་པ་ཉིད་ལྟར་དགོངས་པ་དམ་པར་ལྷུན་གྱིས་གྲུབ་པ་ཉིད་དུ་རང་ཤར་ལ་མི་གཡོ་བར་བརྟན་པ་ནི་ཏིང་ངེ་འཛིན་གྱི་དཀྱིལ་འཁོར་དམ་པ་ཉིད་ཡིན་ནོ།།

གསུམ་པ་གཟུགས་བརྙན་གྱི་དཀྱིལ་འཁོར་ནི།

དེ་དག་རྩ་བ། ཞེས་པ་ནས། གཟུགས་བརྙན་དཀྱིལ་འཁོར་གསལ། །ཞེས་པའི་བར་གྱིས་བསྟན་ཏེ།

དེ་དག་རྩ་བ་སེམས་ཉིད་པས། །སེམས་ཉིད་གཟུགས་བརྙན་དཀྱིལ་འཁོར་གསལ།།

དཀྱིལ་འཁོར་གཉིས་པོ་དེ་དག་གི་གཞིའམ་རྩ་བ་ཡང་སེམས་ཉིད་རང་རིག་པའི་དེ་ཁོ་ན་ཉིད་ཡིན་པས་འགྲོ་བ་རིགས་དྲུག་གི་སེམས་ཅན་ཉིད་རྟེན་གཞི་ཡིན་པའི་སྒོ་ནས་གཟུགས་བརྙན་གྱི་དཀྱིལ་འཁོར་དུ་གསལ་བ་ཡིན་ཏེ། ལམ་པའི་ངོར་འགྲོ་བ་ལ་དངོས་སུ་༼༢༠༤༽གཟུགས་བརྙན་མཚོན་པར་འབྱུང་བའི་ཕྱིར་རོ།།

གཉིས་པ་བསྡུས་ཏེ་བསྟན་པ་ནི།

རང་བཞིན་ཏིང་ངེ་འཛིན། ཞེས་པ་ནས། ཡེ་ནས་ཞུགས་བཀོད་རྫོགས། །ཞེས་པའི་བར་གྱིས་བསྟན་ཏེ།

རང་བཞིན་ཏིང་འཛིན་དཀྱིལ་འཁོར་དུ། །ཐམས་ཅད་ཡེ་ནས་བཞུགས་བཀོད་རྫོགས།།

དེ་ལྟ་བས་ན་རང་བཞིན་དང་ཏིང་ངེ་འཛིན་དང་གཟུགས་བརྙན་གྱི་དཀྱིལ་འཁོར་གསུམ་དུ་ཐམས་ཅད་རིལ་ཡེ་གདོད་མ་ནས་རང་བཞིན་དུ་ཞུགས་ཟིན། ཏིང་ངེ་འཛིན་དུ་བཀོད་ཟིན། གཟུགས་བརྙན་དུ་རྫོགས་ཟིན་པའོ།།

གཉིས་པ་ལྷག་པ་གཟུགས་བརྙན་གྱི་དཀྱིལ་འཁོར་གྱི་དོན་གསུངས་ཚུལ་ལ་གཉིས་ཏེ། བསོད་ནམས་རྟེན་གྱི་དཀྱིལ་འཁོར། དབང་དང་བསྒྲུབ་པའི་དཀྱིལ་འཁོར་རོ། །དང་པོ་ལ་བརྒྱད་དེ། རས་ལ་རིས་མོར་བྱ་བ། ཁང་བུ་ལ་རིས་མོར་བྱ་བ། གསེར་དངུལ་ལུགས་སུ་བྱ་བ། ཤེལ་རྡོ་ལ་འབུར་དུ་བྱ་བ། ཤིང་ལ་བཟོར་བྱ་བ། འཇིམ་པ་ལ་འདེར་སོ་བྱ་བ། ས་ལ་རྡུལ་ཚོན་གྱི་དཀྱིལ་འཁོར་བྱ་བ། གཟུགས་བརྙན་གྱི་དཀྱིལ་འཁོར་བྱས་པའི་ཡོན་ཏན་ནོ། །དང་པོ་ནི།

དེ་ལས་ཁྱད་པར། ཞེས་པ་ནས། མཚན་མས་དེ་རངས་འགྱུར། །ཞེས་པའི་བར་གྱིས་བསྟན་ཏེ།

དེ་ལས་ཁྱད་པར་སྐལ་ལྡན་མི། །སྤྱོད་ཡུལ་གྱུར་པ་གཟུགས་བརྙན་ཏེ།།

རས་འཇམ་ཁོད་སྙོམས་བཟང་ལ་སོགས། །ཁ་དོག་ལྔ་འམ་ཉི་ཤུ་ལྔས།།

མ་མཐོང་རྨོངས་ལ་བསྟན་ཕྱིར་མཚོན། །མ་ཉམས་མཚན་མས་དེ་རང་འགྱུར།།

གཞི་དེ་ལྟ་བུའི་རང་བཞིན་ལས་སྐབས་འདིར་ཁྱད་པར་དུ་སྐལ་ལྡན་མི་ཡི་ཚོགས་རྣམས་ཀྱི་དབང་པོའི་སྤྱོད་ཡུལ་དུ་གྱུར་པ་ཉིད་ཀྱིས་གཟུགས་བརྙན་གྱི་དཀྱིལ་འཁོར་གྱི་མིང་ཡང་གྲུབ་པ་ཡིན་ཏེ། དེ་ཡང་བྲི་བའི་ཐབས་ཀྱི་རྣམ་གྲངས་ནི། རས་དང་དར་འཇམ་པོ་ཁོད་སྙོམས་ལ་རྒྱུ་གཞི་བཟང་བ་ལ་སོགས་པ་ལ་རི་མོར་བྲིས་སྟེ། ཁ་དོག་ལྔ་པའམ་བྱེ་བྲག་ཏུ་ཕྱེ་བས་ཉི་ཤུ་རྩ་ལྔས་ཡེ་ཤེས་ལྔའམ་བྱེ་བྲག་གིས་ལྷག་པའི་ཡེ་ཤེས་ཉེར་ལྔའི་དོན་མ་མཐོང་བའི་རྨོངས་པ་རྣམས་ལ་གཟུགས་བརྙན་དུ་བསྟན་པའི་ཕྱིར་མཚོན་པར་བྱེད་པའི་རྟགས་ཀྱི་དཀྱིལ་འཁོར་ཏེ། དེ་དག་ཀྱང་སྐུ་ལ་སོགས་པ་རྣམ་པར་བཀོད་པའི་ཡན་ལག་དང་རྒྱན་རྣམས་མ་ཉམས་པར་རྫོགས་པར་བྲིས་པའི་མཚན་མས་གདུལ་བྱ་སློབ་བུ་དེ་སེམས་རངས་ཤིང་ཚིམ་པར་འགྱུར་བས་དོན་འགྲུབ་པ་ཡིན་ཏེ་འདི་དག་ཟག་བཅས་ཀྱི་ལས་སོ།།

གཉིས་པ་ཁང་བུ་ལ་རི་མོར་བྱ་བ་ནི།

བརྟན་ཞིང་ངོས་འཇམ། ཞེས་པ་ནས། ཆོ་འཕྲུལ་སྟོན་པར་ནུས། ཞེས་པའི་བར་གྱིས་བསྟན་ཏེ།

བརྟན་ཞིང་ངོས་འཇམ་ཁང་བུ་ལ། །ཁ་དོག་འབར་བས་གཟུགས་མཚོན་ཏེ།།

ཕྱག་རྒྱ་མ་ཉམས་མཛེས་ལྡན་ན། །མཚན་མའི་ཆོ་ཕྲུལ་སྟོན་པར་ནུས།།

གཞི་བརྟན་ཞིང་ངོས་འཇམ་པའི་ཁང་བུ་བཟང་པོའི་ལོགས་ལ། གོང་ལྟར་ཁ་དོག་འབར་བས་གཟུགས་བྲིས་ནས་ལེགས་པར་མཚོན་ཏེ་སྐུ་ཕྱག་རྒྱ་རྒྱན་དང་བཅས་ཏེ་མ་ཉམས་ཤིང་མཛེས་པ་དང་ལྡན་པའི་གཟུགས་བརྙན་གྱི་གྲངས་རྫོགས་པར་བྱས་ན་དེས་ཀྱང་མཚན་མའི་ཆོ་འཕྲུལ་སྟོན་པར་ནུས་པས་དོན་གྲུབ་བོ།།

གསུམ་པ་གསེར་དངུལ་ལུགས་སུ་བྱ་བ་ནི།

གསེར་དངུལ་ཟངས་ལྕགས། ཞེས་པ་ནས། མཚན་མའི་རྟེན་དུ་འགྱུར། ཞེས་པའི་བར་གྱིས་བསྟན་ཏེ།

གསེར་དངུལ་ཟངས་ལྕགས་ལ་སོགས་ལ། །གར་བླུགས་རྒྱལ་བའི་སྐུ་བྱས་ཏེ།།

ཕྱག་རྒྱ་མ་མཉམ་དང་ལྡན་ན། །དེ་ཡང་མཚན་མའི་རྟེན་དུ་འགྱུར།།

གསེར་དངུལ་དང་ཟངས་ལྕགས་ལ་སོགས་པ་རྣམས་ལ་༼༢༠༥༽གང་ལུགས་སུ་བླུགས་པའི་རྒྱལ་བའི་སྐུ་གཟུགས་བྱས་ཏེ་ཕྱག་རྒྱ་མ་ཉམས་པ་དང་རབ་ཏུ་ལྡན་ན། དེ་ཡང་གཟུགས་བརྙན་གྱི་དཀྱིལ་འཁོར་གྱི་མཚན་མའི་རྟེན་དུ་ངེས་པར་འགྱུར་བས་དོན་འབྱུང་ངོ༌།།

བཞི་པ་ཤེལ་རྡོ་ལ་འབུར་དུ་བྱ་བ་ནི།

ཤེལ་རྡོ་དུང༌། ཞེས་པ་ནས། འབྱུང་བའི་རྟེན་དུ་འགྱུར། །ཞེས་པའི་བར་གྱིས་བསྟན་ཏེ།

ཤེལ་རྡོ་དུང་ལ་སོགས་པ་ལ། །འབུར་ལས་རྒྱལ་བའི་སྐུ་བྱས་པ།།

དེ་བཞིན་མ་མཉམ་རྒྱས་མཛེས་ན། །མཚན་མ་འབྱུང་བའི་རྟེན་དུ་འགྱུར།།

རིན་པོ་ཆེ་ཤེལ་རྡོ་དང་དུང་ལ་སོགས་པ་ལ་འབུར་དུ་བརྐོས་པ་ལས་རྒྱལ་བའི་སྐུ་གཟུགས་བྱས་ནས། གོང་མ་དེ་བཞིན་དུ་ཡན་ལག་མ་ཉམས་པར་རྒྱན་གྱིས་མཛེས་པའི་མཚན་ཉིད་ཀྱི་ཚད་དང་ལྡན་ན། དངོས་གྲུབ་ཀྱི་མཚན་མ་འབྱུང་བའི་རྟེན་དུ་འགྱུར་པ་ཡིན་ནོ།།

ལྔ་པ་ཤིང་ལ་བཟོར་བྱ་བ་ནི།

གླག་ཤ་བྱང་ཆུབ། ཅེས་པ་ནས། མཚན་མའི་རྟེན་དུ་འགྱུར། །ཞེས་པའི་བར་གྱིས་བསྟན་ཏེ།

བླག་ཤ་བྱང་ཆུབ་ཤིང་ལ་སོགས། །མཁས་པས་བཟོར་གཞོགས་གཟུགས་བརྙན་བྱས།།

ཕྱག་རྒྱ་མ་མཉམས་ཀུན་རྫོགས་ན། །འདི་ཡང་མཚན་མའི་རྟེན་དུ་འགྱུར།།

གླག་ཤ་ཞེས་པའི་བྱང་ཆུབ་ཀྱི་ཤིང་སོགས་ལ་མཁས་པར་བཟོར་བཅུག་སྟེ་བཞོགས་ལ་གཟུགས་བརྙན་བྱས་ཏེ་ཕྱག་རྒྱ་མ་ཉམས་པར་ཀུན་ཏུ་རྫོགས་ན། འདི་ཡང་མཚན་མའི་རྟེན་དུ་འགྱུར་བས་དོན་གྲུབ་བོ། །ཤིང་འདི་ལ་དཔེ་ལ་ལར་བླཀྵ་ཡང་འབྱུང་སྟེ་རྒྱ་བལ་དུ་སྐྱེ་བའི་ཤིང་གི་བྱེ་བྲག་ཅིག་ཡིན་པར་ལུང་རྗེས་སུ་རྣལ་འབྱོར་གྱི་དཔལ་འབར་ཁྲོ་མོའི་རྒྱུད་ལས་ལོ་ཙྭ་བའི་མཆན་དུ་སྣང་ངོ༌།།

དྲུག་པ་འཇིམ་པ་ལ་འདེར་སོ་བྱ་བ་ནི།

ས་ལ་སོགས་ལ། ཞེས་པ་ནས། མཚན་མ་རྣམ་གྲོལ་རིགས། །ཞེས་པའི་བར་གྱིས་བསྟན་ཏེ།

ས་ལ་སོགས་ལ་ཕྱག་རྒྱར་བྱས། །ཁ་དོག་མཛེས་དང་ལྡན་པར་བྱ།།

མཚན་མ་འབྱུང་བའི་རྟེན་ཡིན་ཏེ། །མཚན་མས་མཚན་མ་རྣམ་གྲོལ་རིག།

ས་ལ་སོགས་པའི་ལྡེར་སོ་ལ་ཕྱག་རྒྱར་བྱས་ཏེ། ཁ་དོག་མཛེས་པ་དང་ལྡན་པར་བྱས་ན་དངོས་གྲུབ་ཀྱི་མཚན་མ་འབྱུང་བའི་རྟེན་ཡིན་ཏེ། ལྷག་པ་གཟུགས་བརྙན་གྱི་མཚན་མས་འཁྲུལ་པའི་མཚན་མ་རྣམ་པར་གྲོལ་བ་ནི་རིགས་ཤིང་འཐད་པས་དོན་གྲུབ་པ་ཡིན་ནོ།།

བདུན་པ་ས་ལ་རྡུལ་ཚོན་གྱི་དཀྱིལ་འཁོར་བྱ་བ་ནི།

གང་དག་ས་ལས། ཞེས་པ་ནས། རིག་པའི་རྟེན་དུ་འགྱུར། །ཞེས་པའི་བར་གྱིས་བསྟན་ཏེ།

གང་དག་ས་ལས་རྒྱལ་བའི་དབྱིབས། །ཀུན་ཏུ་ལྷམ་པར་བྱས་པ་ལ།།

ཚོན་རྩི་ལྔ་ཡིས་མཛེས་བཀོད་ན། །རྣམ་རོལ་རིག་པའི་རྟེན་དུ་འགྱུར།།

གང་དག་རྡུལ་ཚོན་གྱི་ས་ལས་རྒྱལ་བའི་དཀྱིལ་འཁོར་གྱི་དབྱིབས་ཀུན་ཏུ་ལྷམ་པར་བྱས་པ་ལ། མཚོན་རྩི་ལྔ་ཡིས་མཛེས་པར་དཀོད་དེ་གསལ་བར་བཞེངས་ན། དེ་ཡང་རྣམ་གྲོལ་རིག་པའི་རྟེན་དུ་འགྱུར་བ་ཡིན་པས་དོན་དང་ལྡན་པའོ།།

བརྒྱད་པ་གཟུགས་བརྙན་གྱི་དཀྱིལ་འཁོར་བྱས་པའི་ཡོན་ཏན་ནི།

གང་གི་གཟུགས་བརྙན། ཞེས་པ་ནས། རྣམ་གྲོལ་རིག་པར་འགྱུར། །ཞེས་པའི་བར་གྱིས་བསྟན་ཏེ།

གང་གི་གཟུགས་བརྙན་གང་ཡིན་དང་། །དེ་ཡི་རང་བཞིན་གཅིག་པས་ན།།

འདི་ལ་ཁྱད་པར་ཅུང་ཟད་མེད། །འདི་ཡིས་རྣམ་གྲོལ་རིག་པར་འགྱུར།།

གཟུགས་བརྙན་གྱི་དཀྱིལ་འཁོར་བྱས་པས་འབྲས་བུ་ཐོབ་པའི་གཞིར་འགྱུར་དུ་བཏུབ་པའི་དོན་འཆད་པ་ནི། བཤད་པ་ལྟར་ལྷ་གང་གི་གཟུགས་བརྙན་གྱི་དངོས་པོ་གང་ཡིན་པ་དང༌། དེ་ཡི་རང་བཞིན་གྱི་དཀྱིལ་འཁོར་གྱི་ལྷ་གང་ཡང་རུང་བ་དེ་གཉིས་ངོ་བོ་ཐ་དད་མེད་པར་གཅིག་པས་ན། ༼༢༠༦༽འདི་གཉིས་ལ་བྱང་ཆུབ་ཀྱི་སེམས་ཇི་བཞིན་པ་ཉིད་ཡིན་པ་ལ་རང་བཞིན་བཟང་ངན་གྱི་ཁྱད་པར་ཅུང་ཟད་ཀྱང་མེད་པའི་ཕྱིར་གཟུགས་བརྙན་དང་དངོས་གཞིར་འབྲེལ་བ་ཡོད་པས་འདི་ཡིས་རྣམ་པར་གྲོལ་བའི་རིག་པ་ཐོབ་པར་འགྱུར་བ་ནི་ངེས་པའོ།།

གཉིས་པ་དབང་དང་སྒྲུབ་པའི་དཀྱིལ་འཁོར་ལ་ལྔ་སྟེ། གནས་བཤད་པ། ཐིག་གདབ་ཚུལ། དཀྱིལ་འཁོར་བྲི་ཚུལ། རྒྱན་དགོད་ཅིང་ལས་ཀྱི་རིམ་པ། མཆོད་པའི་ཡོན་ཏན་བསྟན་པའོ། །དང་པོ་ནི།

བདེར་གཤེགས་ཕོ་བྲང༌། ཞེས་པ་ནས། ཚུལ་དུ་གང་བྱེད་པ། ཞེས་པའི་བར་གྱིས་བསྟན་ཏེ།

བདེ་གཤེགས་ཕོ་བྲང་གང་ཡང་རུང་། །དཀྱིལ་འཁོར་ཚུལ་དུ་གང་བྱེད་པ།།

བདེར་གཤེགས་རྒྱལ་བ་རིགས་ལྔ་གང་གི་གཙོ་བོ་བྱས་པའི་དཀྱིལ་འཁོར་གྱི་ཕོ་བྲང་གང་ཡང་རུང་བའི་གཞལ་ཡས་ཁང་རང་བཞིན་གྱི་དཀྱིལ་འཁོར་ལྷུན་གྱིས་གྲུབ་པའི་ཚུལ་དུ་བཞུགས་པ་དེ་ཉིད་ཇི་ལྟ་བར་གང་ཟག་ལམ་པས་རང་བཞིན་ཇི་འདྲ་བར་བྱེད་དེ་གཟུགས་བརྙན་དུ་བཞེངས་སུ་གསོལ་བའི་དུས་སུ་ལྷ་ཡི་ཚོགས་བཞུགས་པའི་གནས་འདི་ལྟར་བྱེད་པའོ། །གཟུགས་བརྙན་གྱི་དཀྱིལ་འཁོར་ལ་ཐིག་གདབ་ཅིང་བྲི་བའི་རིམ་པ་རྒྱས་པར་ལས་ཀྱི་གཞུང་དུ་བསྟན་ནོ།།

གཉིས་པ་ཐིག་གདབ་ཚུལ་ནི།

ཀུན་ནས་ལྷམ་པར། ཞེས་པ་ནས། སྒོ་ཁྱུད་སུམ་ཆར་བྱ། །ཞེས་པའི་བར་གྱིས་བསྟན་ཏེ།

ཀུན་ནས་ལྷམ་པར་མཛེས་བྱས་ན། །སྲད་བུ་བརྒྱད་དང་ལྡན་བྱས་ཏེ། །བསྡུ་བའི་བྱ་བས་མཛེས་པར་བྱ།།

དེ་ནས་སྲད་བུ་གཅིག་གིས་བསྐོར། །དཀྱིལ་འཁོར་ཚུལ་དུ་གྱུར་པ་དང་། །ནང་དུ་ལྷམ་པ་སྲད་བུ་བརྒྱད།།

ལེའུ་ཚེ་ལྷམ་པ་དགུར་གྱུར་ཏེ། །མཐའ་ཟད་སུམ་ཆར་བྱས་པ་ལ། །ཀུན་གྱི་ནང་དུ་སྲད་བུ་གསུམ།།

ཕྲ་མོ་དག་གིས་མཛེས་པར་བྱ། །དགུ་ཡི་ཆར་ནི་བགོས་པ་ལས། །སྒོ་དང་སྒོ་ཁྱུད་སུམ་ཆར་བྱ།།

དེ་ནས་གནས་དེར་སྟེགས་བུ་ཀུན་ནས་གྲུ་བཞི་ལྷམ་པར་ཚད་དང་ལྡན་པ་བརྩིགས་ཏེ། ཤིན་ཏུ་ངོས་མཉམ་པར་མཛེས་པར་བྱས་ལ་གོ་མ་ཡེ་ཡིས་ལེགས་པར་བྱའོ། །དེ་ནས་སྔགས་མཁན་ཆས་གོས་ལྔ་དང་ལྡན་པར་བྱས་ཏེ། ཐིག་གཡོག་གྲོགས་མོ་མཚན་དང་ལྡན་པར་བྱས་ལ། དམ་ཚིག་དང་ཡེ་ཤེས་ཀྱི་སྐུད་པ་རྒྱུ་སོ་སོ་ལས་ལེགས་པར་བསྒྲིལ་ཏེ་རབ་གནས་ཚུལ་བཞིན་བྱ་བ་ཟིན་པ་དང༌། དམ་ཚིག་གི་ཐིག་གདབ་པའང༌། དང་པོར་ཕྱོགས་ཀྱི་འགྲུས་བསྙམས་ལ། ཕྱོགས་མཚམས་ཀྱི་ཆས་སྲད་བུ་བརྒྱད་དང་ལྡན་པའི་ཐིག་བརྒྱད་ཚངས་ཐིག་དང་བཅས་པ་གདབ་པར་བྱས་ཏེ། དེའི་མཐའ་མ་བསྡུ་བའི་ལས་ཀྱི་ཐིག་ལེགས་པར་གདབ་པར་བྱ་བས་མཛེས་པར་བྱ་བ་ཀུན་ཟིན་པ་དང་། དེ་ནས་འགྱིང་ཕུར་ནས་བཟུང་ལ་ཇི་ལྟར་འཚམས་པར་སྲད་བུ་ཐིག་གཅིག་གིས་ལྟེ་བ་ཟླུམ་པོར་བསྐོར་རོ། །དེ་ལྟར་དབུས་མུ་ཁྱུད་དང་བཅས་ཏེ་དཀྱིལ་འཁོར་གྱི་ཚུལ་ལྟ་བུ་ཉིད་དུ་གྱུར་པ་དང༌། ལྟེ་བའི་ནང་དུ་ལྷམ་པ་སྲད་བུ་ཐིག་ཐུང་བརྒྱད་བསྣོལ་བར་བཏབ་པས་ཕོ་བྲང་ལེའུ་ཚེ་ལྷམ་པ་དགུར་འགྱུར་ཏེ་ཐིག་ཐུང་ཟུང་རེའི་བར་ན་ཀ་བ་རེ་སྟེ་ཀ་བ་བརྒྱད་བྱའོ། །དེ་ནས་མུ་ཁྱུད་ཀྱི་ཐ་མ་མཐའ་ཟད་ཀྱི་སྒོ་རྒྱན་མ་གཏོགས་པའི་ཐིག་གསུམ་གྱི་ཆར་༼༢༠༧༽བཏབ་སྟེ་ཆ་ཆེན་གསུམ་དུ་བྱས་པ་ལེའུ་ཚེའི་ཕྱི་དེ་རྡོ་རྗེ་ར་བའི་ཕྱི་ལ་ཆ་གསུམ་མོ། །དེ་ནས་དཀྱིལ་འཁོར་ཀུན་གྱི་རེའུ་ཆ་ལ་ཆ་ཆེན་གསུམ་གདབ་སྟེ་ཆ་ཆེན་ནང་མ་ཉིད་དུ་ཡང་སྲད་བུ་ཐིག་ཕྲན་གསུམ་བཏབ་པས་ཆ་ཕྲན་གསུམ་ལེགས་པར་བྱའོ། །དེ་བཞིན་དུ་ཆ་ཆེན་ཕྱི་མ་གཉིས་ལའང་ཐིག་ཕྲན་གསུམ་གསུམ་སྟེ་ཕྲ་མོ་དག་གིས་མཛེས་པར་བརྒྱན་ཏེ་ཆ་ཆེན་གསུམ་ལ་ཆ་ཕྲན་དགུ་ཡི་ཆར་ནི་ཐིག་གིས་བགོས་པ་ལས་དགུར་འགྱུར་རོ། །དེ་ཡི་ནང་མ་གཉིས་གཉིས་ལ་ལྷ་སྣམ་བྱ་ཞིང་ཕྱི་མ་རེ་རེ་ལ་སྒོ་བྱའོ། །དེའང་དང་པོའི་ཆ་ཆེན་གསུམ་ནི་སྒོ་སུམ་བརྩེགས་རེ་རེ་བྱ་བ་སྟེ། དེའི་ཆ་ཕྲན་གསུམ་གསུམ་པོ་རེ་རེ་ལའང་སྒོ་དང་སྒོ་ཁྱུད་ཐིག་གིས་བསྒོས་ལ་བྱ་བའང་སྒོ་ལ་སུམ་གཉིས་དང་ཁྱུད་ལ་གཅིག་ཆར་དུ་བྱའོ།།

གསུམ་པ་དཀྱིལ་འཁོར་བྲི་ཚུལ་ནི།

ཀ་བ་བརྒྱད་ཀྱིས། ཞེས་པ་ནས། དེ་ཉིད་མཚོན་པར་བྲི། །ཞེས་པའི་བར་གྱིས་བསྟན་ཏེ།

ཀ་བ་བརྒྱད་ཀྱིས་མཛེས་བྱས་ལ། །རིན་ཆེན་ཀ་བའི་ནང་ལོགས་སུ། །སངས་རྒྱས་ཕོ་བྲང་དབུ་རྩེར་བྱ། །བསྡུ་བ་ཚད་མེད་རྣམ་ཐར་སྒོ། །རིམ་པ་གསུམ་གྱིས་མཛེས་པ་ལ། །རྟ་བབས་ཐེམ་སྐས་ཀྱིས་ཀྱང་བརྒྱན། །དབུས་ཀྱི་ཕོ་བྲང་དབུ་རྩེའམ། །འཁོར་ལོ་དཔལ་བེའུ་པདྨ་དང་། །རིན་ཆེན་ཟུར་བརྒྱད་ལ་སོགས་པ། །ཇི་ལྟར་རིགས་པ་དེ་ལྟར་བྲི། །རྒྱན་ནི་རིན་ཆེན་སྣ་ཚོགས་དང་། །པཉྩ་རཱ་ག་ཏྭ་ར་ན། །འཕྲེང་བ་དང་ནི་དྲ་བས་བརྒྱན། །ཟ་ར་ཚགས་དང་ཆུན་འཕྱང་དང་། །དྲིལ་བུ་གཡེར་ཁ་མཐེའུ་ཆུང་འཕྱང་། །རོལ་མོ་སྒྲ་སྒྲོགས་ལྷ་ཡི་བུ། །མང་པོས་ཕྱི་ནང་ནམ་མཁའ་ལས། །མཆོད་པ་སྣ་ཚོགས་འབུལ་བར་བྲི། །ཐེག་ཆེན་གདུང་བཞིས་བརྒྱན་པར་བྱ། །རིན་ཆེན་ཁ་བད་མཆོད་རྟེན་དང་། །རྒྱལ་མཚན་རིན་ཆེན་འོད་འབར་བས། །གཞལ་ཡས་མཛེས་པར་བརྒྱན་པ་ནི། །ཆོས་ཀྱི་ཕོ་བྲང་ཅི་འདྲ་བ། །དེ་འདྲ་དེ་ཉིད་མཆོད་པར་བྲི།།

སྒོའི་གཡས་གཡོན་ནས་ཀ་བ་ཟུང་སྟེ་བརྒྱད་ཀྱིས་མཛེས་པར་བརྒྱན་པར་བྱས་ལ། དེ་ལྟ་བུར་རིན་ཆེན་མཆོག་གི་ཀ་བའི་ནང་ལོགས་ཀྱི་དབུས་སུ་རྒྱལ་བ་རྫོགས་པའི་སངས་རྒྱས་ཀྱི་ཕོ་བྲང་བུམ་པ་ཟླུམ་པོའི་དབུ་རྩེར་བྱ་བའོ། །སྒོ་སུམ་བརྩེག་གི་དོན་ནི། བསྡུ་བ་བཞི་དང༌། ཚད་མེད་བཞི་དང༌། རྣམ་པར་ཐར་པ་བཞིའི་ཕྱིར། སྒོ་མོ་ཆེ་བ། བར་སྒོ། དབུ་རྩེའི་སྒོ་དང༌། སྒོ་ཕྱི་ནང་རིམ་པ་གསུམ་གྱིས་ལེགས་པར་མཛེས་ཤིང་གསལ་བ་ལ། རྟ་བབས་བཞི་དང་ཐེམ་སྐས་བརྒྱད་ཀྱིས་ཀྱང་མཛེས་པར་བརྒྱན་ཅིང་སྤྲས་པའོ། །དེས་ན་ཐིག་ཆེན་བཅུ་གཅིག ཆ་ཕྲན་གྱི་ཐིག་ཕྲན་བཅུ་གསུམ། ཐིག་ཐུང༌བརྒྱད་ལྡབ་ཏུ་འགྱུར་བས་ཕྱོགས་ཆས་རིག་པར་བྱའོ། །དེ་ནས་ཡེ་ཤེས་ཀྱི་ཐིག་གྲངས་དང་མཐུན་པར་གདབ་བོ། །དེ་ནས་བྲི་བའི་ཕྱིར། དབུས་ཀྱི་ཕོ་བྲང་རིགས་ཀྱི་གཙོ་བོ་གང་བྱེད་པས་དབྱེ་བ་ནི། ལས་ཀྱི་རིགས་གཙོ་བོར་བྱེད་ན་ལེའུ་ཚེར་བྱ་བའམ། བདེ་གཤེགས་གཙོ་བོར་བཞུགས་ན་འཁོར་ལོ་རྩིབས་བརྒྱད་དང༌། རྡོ་རྗེའི་རིགས་གཙོ་བོར་བྱེད་ན་རྡོ་རྗེའི་དཔལ་བེའུ་བྱའོ། །པདྨའི་རིགས་གཙོ་བར་བཞུགས་ན་པདྨ་འདབ་བརྒྱད་དུ་བྱ་བ་དང༌། རིན་ཆེན་རིགས་གཙོ་བོ་ན་རིན་ཆེན་ཟུར་བརྒྱད་དུ་བྱའོ། །དེ་དག་ལ་སོགས་པ་ལས་ཀྱི་སྐབས་སུ་ཇི་ལྟར་རིགས་ཤིང་འཐད་པ་དེ་བཞིན་དུ་བྲི་བའང༌། ཚོན་འབྱོར་བ་དང་བསྟུན་ལ་རབ་གནས་བྱ་བ་དེས། ཐིག་གི་ལྷ་རྣམས་བེ་ཀྲ་མས་བཏེགས་ལ། ཕྱོགས་དང་པོར་པཉྩ་རེ་ཀ་རྡོ་རྗེ་རྒྱལ་པོས་སོར་བཅུ་དྲུག་དྲངས་ལ་བཀབ་སྟེ། ༼༢༠༨༽ས་བོན་ཚུལ་བཞིན་བྱས་ལ་ནང་པར་ཐིག་བཏེགས་པ་ལ་ལག་པ་བྱིན་གྱིས་བརླབས་ལ། རྡོ་རྗེ་རྒྱལ་པོའི་དགོངས་པས་གཞལ་ཡས་ཁང་བྲི་བ་བཞིན་བསྐྱེད། བྱན་པོས་དབུས་ནས་ལུགས་བཞིན་དུ་བྲི་བའང་དེ་ལྟར་བྱའོ། །རྒྱན་བྲི་བ་ནི། རིན་པོ་ཆེ་ཁ་དོག་མཛེས་ཆེན་སྣ་ཚོགས་ཀྱི་རྒྱན་བྲི་བ་དང༌། ཡེ་ཤེས་ཀྱི་རྩིག་པ་རིན་པོ་ཆེ་སྣ་ལྔའི་རིམ་པར་བརྩིགས་པའི་ཚུལ་དུ་པཉྩ་རེ་ཁ་བྲིས་པའི་སྟེང་དུ། ཆུ་སྲིན་གྱི་ཏྭ་ར་ན་དང༌། སེང་ཐོད་ཁ་ནས་རཏྣའི་མུ་ཏིག་གི་ཕྲེང་བ་ཧ་རས་བརྒྱན་པ་དང་ནི། གཞལ་ཡས་ཁང་གི་མགུལ་བར་དྲྭ་བ་དང་དྲྭ་བ་ཕྱེད་པས་ལེགས་པར་བརྒྱན་པའོ། །རྟ་བབས་བཞིས་སྒོ་བརྒྱན་ཚུལ་ནི། རིན་པོ་ཆེའི་ཟ་ར་ཚག་དང༌། ཆུན་འཕྱངས་དང༌། ལྕེ་ལ་དྲིལ་བུ་གཡེར་ཁའི་ཐེའུ་ཆུང་འཕྱང་བའི་སྣ་འཕྱང་ངོ༌། །སྟེང་དུ་ཁྱུང་མགོ་དང་བཅས་པ་དེ་དག་ནི་སྒོ་རྒྱན་ཏེ་སྤྱིའི་དབང་དུ་ནི་རྟ་བབ་བརྒྱད་དུ་འགྱུར་རོ། །དེ་ལྟ་ན་ཐིག་ཀྱང་གྲངས་འཕེལ་བར་བྱའོ། །འདིར་ནི་དངོས་སུ་སྨོས་པ་ཙམ་གྱི་ཕྱིར་གྲངས་འགྲིབ་པའོ། །དྲྭ་བའི་ཕྱི་རོལ་ཏུ་འདོད་ཡོན་གྱི་ལྷ་སྣམ་བྲིས་ཏེ། སྒོམ་པའི་དབང་དུ། རོལ་མོའི་སྒྲ་སྒྲོགས་པ་སོགས་ལྷ་ཡི་བུ་མོ་མང་པོས་ཕྱི་ནང་གི་ནམ་མཁའ་དྲྭ་མིག་འཕྱང་བའི་བར་དེ་ལས་མཆོད་པ་སྣ་ཚོགས་འབུལ་བར་བསམ་ཞིང་བྲི་བའི་ཚེ་འདོད་སྣམ་དུའོ། །དབུས་སུ་ཐེག་པ་ཆེན་པོའི་གདུང་བཞིས་བསྣོལ་མར་ནམ་མཁའ་ལ་རབ་ཏུ་བརྒྱན་ཏེ། གདུང་མ་ནི་རིགས་ཀྱིས་དབྱེ་ཞིང་སྣ་ནས་ཀ་བ་བརྒྱད་ཀྱིས་བཏེགས་པའོ། །རིན་ཆེན་གྱིས་ཕ་གུའི་ཁ་བད་ནི་རྩིག་པའི་ཐོག་ཏུའོ། །མཆོད་རྟེན་གྱི་དབྱིབས་ནི་གཞལ་ཡས་ཁང་གི་ཕྱིའི་དབྱིབས་ཏེ། ཡང་ན་སྒོའི་གཡས་གཡོན་དུའང་གསུངས་པ་དང༌། རྒྱལ་མཚན་ནི་དབུ་རྩེར་རིན་པོ་ཆེ་ལས་བྱས་པའམ། རྩ་བའི་རྒྱུད་ལྟར་གྲུ་བཞི་ནས་བརྒྱན་པར་ཡང་རིགས་སོ། །ཏོག་རིན་ཆེན་འོད་འབར་བ་དང་ལྡན་པས་གཞལ་ཡས་ཁང་མཛེས་པར་བརྒྱན་པ་ནི། བཀོད་པ་ཕུན་སུམ་ཚོགས་པ་སྟེ། ཕྱི་རོལ་དུ་ཡང་རིན་པོ་ཆེའི་ཕུང་པོ་དང༌། ཤིང་རྣམས་དང༌། ཕྱོགས་སྐྱོང་ཡང་བྲི་བར་བྱའོ། །འདི་དག་ཚོམ་བུར་བྱེད་པ་ནི་སྐབས་དང་སྦྱར་ལ་ལེའུ་ཚེ་གཅིག་གི་ཐོག་ཏུ་ཕོ་བྲང་རྫོགས་པར་བྲིས་ཏེ། མདོར་རང་རང་གང་བྱེད་ཀྱང་ཕྱོགས་ཕོ་བྲང་ཆུང་ངུ་ལྔ་ལྔར་བྲིས་ཏེ་རང་རང་གི་སེམས་དཔའ་དང་སེམས་མ་འགོད་དོ། །མདོར་ན་འོག་མིན་ཆོས་ཀྱི་མཐོ་བའི་གནས་ཀྱི་གཞལ་ཡས་ཁང་གི་ཕོ་བྲང་ཉིད་ཅི་འདྲ་བ་དེ་དང་འདྲ་བར་དེ་ཉིད་མཚོན་པར་བྲི་བའོ།།

བཞི་པ་རྒྱན་དགོད་ཅིང་ལས་ཀྱི་རིམ་པ་ནི།

གཞལ་ཡས་ཁང་དུ། ཞེས་པ་ནས། རྒྱ་མཚོ་སྙེད་ལ་འབུལ། །ཞེས་པའི་བར་གྱིས་བསྟན་ཏེ།

གཞལ་ཡས་ཁང་དུ་གང་གྱུར་པ། །ཀུན་གྱིས་མཛེས་དང་ལེགས་པར་བརྒྱན། །མཆོད་པ་བླ་ན་ཡོད་མེད་ཀུན།། ཇི་ལྟར་འབྱོར་ལྡན་ཡོ་བྱད་དབུལ། །རྒྱལ་སྲིད་ལོངས་སྤྱོད་བཅས་པ་དང་། །གླུ་བྲོ་གར་དང་རོལ་མོ་བཅས།།

དུག་འཇོམས་སྨན་དང་བདུད་རྩི་རྣམས། །རྒྱལ་བ་རྒྱ་མཚོ་སྙེད་ལ་འབུལ།།

དེ་ལྟར་འོག་མིན་དང་འདྲ་བའི་གཞལ་ཡས་ཁང་གི་རྒྱལ་བའི་ཕོ་བྲང་དུ་གང་བྲིས་པ་དེ་ཉིད་དུ་གྱུར་པ་ན་བཤད་པའི་རྒྱན་དང༌། འདིར་མ་སྨོས་ཀྱང་འོག་མིན་ལ་ཇི་ལྟར་བཞུགས་པའི་རྒྱན་མཚོན་པར་བྲིའོ། །དེ་དག་ཙཀླིའམ་ཡི་གེའམ་ཕྱག་རྒྱ་གང་རུང་གདན་ཐོག་ཏུ་བཀོད་ལ་བཞག་གོ །གཞན་ཡང་ལྷབ་ལྷུབ་ཀྱི་རྒྱན་ལ་སོགས་པ་ཀུན་གྱིས་ཀྱང་མཛེས་པ་དང་ལེགས་པར་བརྒྱན་ཏེ་བསྐོར་བར་བྱའོ། །དེ་ལ་མཆོད་པ་བླ་ན་ཡོད་པ་ཕྱིའི་མཆོད་པ་ཐུན་མོང་ལྔ་དང་། བླ་ན་མེད་པ་ཟབ་མོ་ནང་དང་གསང་བའི་མཆོད་པ་ཀུན་ཀྱང་། དངོས་ཇི་ལྟར་འབྱོར་པ་དང་ལྡན་པ་དང་བསམ་པས་ཆུད་མི་གསན་པར་ནན་ཏན་དུ་བྱས་ལ་དབུལ་ལོ། །དེའང་རིམ་གྱིས་པ་དང་ཅིག་ཆར་བ་གང་ཡང་རུང་བས། རང་ཉིད་ཀྱིས་ལས་ཀྱི་དཀྱིལ་འཁོར་བསྐྱེད་དེ། ལས་རྫོགས་པར་བསྲང་མཆོད་པ་ཕུལ་ནས། གཟུགས་བརྙན་དང་ས་བོན་གང་བཀོད་པ་ལས། གཞལ་ཡས་ཁང་དང་ལྷར་བཞེངས་ནས་སྤྱན་དྲངས་བསྟིམས་བརྟན་བྱས་པ་ལ་དབུལ་ལོ། །རབ་ཏུ་གནས་པར་བྱ་བའི་དཀྱིལ་འཁོར་ལ་ཚོགས་ཀྱི་ཕྱིར་རབ་གནས་ཀྱི་མཆོད་པའང༌། ཕྱིའི་མཆོད་པ་སྣ་ཚོགས་དང༌། རྒྱལ་སྲིད་རིན་ཆེན་སྣ་བདུན་དང༌། འདོད་ཡོན་ལྔའི་ལོངས་སྤྱོད་དང་བཅས་པ་དང༌། དེ་བཞིན་དུ་གླུ་བྲོ་གར་དང་རོལ་མོར་བཅས་པ་དང་། དུག་འཇོམས་པའི་སྨན་དང་བདུད་རྩི་ལ་སོགས་པ་རྣམས་རྒྱལ་བ་རྒྱ་མཚོ་ཇི་སྙེད་པ་ཐམས་ཅད་ལ་འབྱོར་ཚད་དུ་འབུལ་བར་བྱའོ། །གཟུགས་བརྙན་གྱི་དཀྱིལ་འཁོར་གྱི་ཐིག་གདབ་པ་ལས་ཀྱི་རིགས་ཀྱི་གཞུང་དུ་བསྟན་པར་གསུངས་ཏེ་འདིར་མདོར་བསྡུས་ཙམ་ལས་ཡི་གེས་འཇིགས་ཀྱང་སྤྲོས་པས་ཆོག་གོ།

ལྔ་པ་མཆོད་པའི་ཡོན་ཏན་བསྟན་པ་ནི།

མཉམ་པ་ཉིད་ཀྱི། ཞེས་པ་ནས། རྒྱུད་བྱང་རྣམ་གྲོལ་རིག །ཅེས་པའི་བར་གྱིས་བསྟན་ཏེ།

མཉམ་པ་ཉིད་ཀྱི་མཆོད་སྦྱར་བས། །རྒྱུ་བྱང་ཐམས་ཅད་མཉམ་པར་འགྱུར།།

དེ་སྐད་སྨྲས་པས་འདུས་པ་ཀུན། །ཐམས་ཅད་རྒྱུད་བྱང་རྣམ་གྲོལ་རིག།

རབ་གནས་བྱས་པའི་དཀྱིལ་འཁོར་དུ་མཆོད་ཅིང་ཞུགས་པའམ། ལྟ་བ་ཇི་བཞིན་དུ་རྟོགས་ནས་མཉམ་པ་ཉིད་ཀྱི་མཆོད་པ་ཡང་དག་པར་སྦྱར་བས་ཡོན་ཏན་གྱིས་རང་རྒྱུད་ཀྱི་སྒྲིབ་པ་ཀུན་བྱང་ཞིང་དག་ནས་འཁོར་འདས་གཉིས་མེད་མཐོང་བས་ཆོས་ཐམས་ཅད་ཆོས་ཉིད་མཉམ་པར་རྟོགས་ཏེ་རྒྱལ་བ་ཉིད་དུ་འགྱུར་བའོ། །སྟོན་པ་སེམས་དཔའ་རྡོ་རྗེས་དེ་སྐད་ཅེས་སྨྲས་པས་འདུས་པ་ཀུན་ཐམས་ཅད་ཀྱི་དཀྱིལ་འཁོར་གྱི་དོན་མཐོང་བས་རྒྱུད་བྱང་ནས་རྣམ་གྲོལ་གྱི་རིག་པ་སྐྱེས་སོ།།

གསུམ་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། ཡོངས་སུ་སྦྱང་བར་ཤེས་པར་བྱའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་བཀོད་པའི་བྱ་བས་ཡོངས་སུ་སྦྱང་བར་ཤེས་པར་བྱའོ།།

གྲོགས་པོ་དག བཤད་པ་དེ་དག་ནི་བཀོད་པའི་བྱ་བས་གཙོ་བོར་གཞན་དོན་གྱི་ཡོངས་སུ་སྦྱང་བར་ཤེས་པར་བྱའོ།།

གཉིས་པ་མེའི་བྱ་བས་སྦྱང་བ་ལ་གཉིས་ཏེ། ཞུས་པ་དང༌། ལན་ནོ། །དང་པོ་ལ་གཉིས་ཏེ། བསྟོད་པ་ཉེ་བར་བསྟན་པ། བསྟོད་ནས་ཞུས་པ་དངོས་སོ། །དང་པོ་ནི།

གྲོགས་པོ་དག ཅེས་པ་ནས། ངོ་མཚར་དུ་བསྟོད་པ། ཞེས་པའི་བར་གྱིས་བསྟན་ཏེ།

གྲོགས་པོ་དག་འདི་ལ་མེའི་བྱ་བས་ཡོངས་སུ་སྦྱང་བ་གང་ཞེ་ན། འདི་ལྟ་སྟེ། ཆོས་ཐམས་ཅད་ཆོས་ཉིད་དུ་སྦྱང་བའི་ཕྱིར། དངོས་པོ་ཐམས་ཅད་མེའི་རང་བཞིན་དུ་བྱིན་གྱིས་བརླབས་པས། འདུས་པའི་ཚོགས་ཐམས་ཅད་ཀྱི་ཆོས་ཐམས་ཅད་མེའི་རང་བཞིན་དུ་སྣང་བར་མཐོང་སྟེ། ཤིན་ཏུ་ངམ་ནས་ངོ་མཚར་རྨད་དུ་བསྟོད་པ།

གྲོགས་པོ་དག ཅེས་སྐྱེས་བུས་བོས་ནས། འདི་ལ་སྦྱོང་བའི་སྤྱོད་པ་གཉིས་པ་མེའི་བྱ་བས་ཡོངས་སུ་སྦྱོང་བ་ཉེ་བར་བསྟན་པ་གང་ཞེ་ན། འདི་ལྟ་སྟེ། ཆོས་ཅན་ཐམས་ཅད་ཆོས་ཉིད་དུ་སྦྱང་བའི་ཕྱིར་དགོས་ཆེད་དང་ལྡན་པས། དངོས་པོ་ཐམས་ཅད་ཡེ་ཤེས་ཀྱི་མེའི་ངོ་བོ་ཉིད་ཀྱི་རང་བཞིན་དུ་སྟོན་པས་བྱིན་གྱིས་བརླབས་ཏེ་གསལ་བར་མཛད་པས། འཁོར་འདུས་པའི་ཚོགས་ཐམས་ཅད་ཀྱིས་ཆོས་ཐམས་ཅད་ཡེ་ཤེས་ཀྱི་མེའི་རང་བཞིན་དུ་རང་སྣང་བར་གྱུར་པའི་དོན་མཐོང་སྟེ། སྟོན་པ་དང་མེ་ལ་ཤིན་ཏུ་ངམ་ནས་གཞན་དོན་དུ་ཞུ་བའི་ཕྱིར་དོན་ལ་ངོ་མཚར་དུ་གྱུར་པས། དོན་སྟོན་པའི་སྐྱེས་བུ་དང་མེ་ལ་བསྟོད་པ།

གཉིས་པ་བསྟོད་ནས་ཞུས་པ་དངོས་ནི།

ཨེ་མའོ་སེམས་དཔའ། ཞེས་པ་ནས། འདུས་པས་གསོལ་བ་ལས། ཞེས་པའི་བར་གྱིས་བསྟན་ཏེ།

ཨེ་མའོ་སེམས་དཔའ་སེམས་དཔའ་ཆེ། །ཆེ་བས་ཆེ་བ་བྱིན་རླབས་ཆེ། །ཏིང་འཛིན་ཆེན་པོ་སྣང་བ་ཆེ། །ཆོ་འཕྲུལ་ཆེན་པོ་སྣ་ཚོགས་ཆེ། །ཐབས་མཆོག་དཔག་གིས་མི་ལང་སྟེ། །ཆོས་ཀུན་མེ་ཀློང་འབར་བར་སྣང་། །དེ་ཉིད་ཡེ་ཤེས་གསལ་བའི་ཀློང་། །འབར་འཕྲོ་གསལ་བར་གྱུར་པས་ནི། །མུན་བསལ་དངོོས་པོ་ཐམས་ཅད་བསྲེག །བདེ་ཆེན་དབྱིངས་སུ་ཀུན་རྫོགས་པར། །དཔའ་བོ་ཁྱེད་ཀྱིས་མཛད་པ་ལགས། །འབར་བ་ཆེན་པོ་ཨ་ལ་ལ། །གཟི་བྱིན་ཟེར་འཕྲོ་ཨ་ལ་ལ། །མཐའ་ཡས་ཀུན་སྡུད་ཨ་ལ་ལ། །ཐམས་ཅད་སྲེེད་བྱེད་ཨ་ལ་ལ། །ཟ་བྱེད་ཆེན་པོ་ཨ་ལ་ལ། །མཐའ་དང་དབུས་མེད་ཨ་ལ་ལ། །ཐུགས་རྗེས་བདེ་མཆོག་ཨ་ལ་ལ། །དབང་ཕྱུག་འཇིག་བྱེད་ཨ་ལ་ལ། །གསང་མཆོག་རྨད་བྱུང་བྱིན་རླབས་ཀྱིས། །མེ་ཡི་རང་བཞིན་ཆེན་པོ་དག །བདག་ཅག་རྣམས་ལ་བཤད་དུ་གསོལ། །དེ་སྐད་འདུས་པས་གསོལ་བ་ལས།།

ཆོས་སོ་ཅོག་ཡེ་ཤེས་ཀྱི་མེར་གསལ་བའི་དོན་སྟོན་པ་ལ་ཨེ་མའོ། །ཞེས་ངོ་མཚར་བས། སེམས་དཔའ་སེམས་དཔའ་ཆེ་ཞེས་སྐྱེས་བུ་ལ་བོས་ནས་དོན་དུ་སྟོན་པ་དང་མེ་ཐ་མི་དད་པས་ཡོན་ཏན་ཆེན་པོར་མངའ་བར་བསྟོད་པའོ། །ཡོན་ཏན་དེ་ལྟ་བུ་མངའ་བའི་སྐྱེས་བུ་ཁྱོད་ནི། སྐུ་གསུང་ཐུགས་ཀྱི་མཐུའི་ཆོ་འཕྲུལ་ཆེ་བའི་ཆེ་བ་མངའ་བའི་བྱིན་རླབས་མཆོག་ཏུ་ཆེ་བའམ་ཆེན་པོའི་བདག་ཉིད་དམ་པའོ། །དེ་ལྟར་དགོངས་པའི་བྱིན་རླབས་ཀྱི་ཏིང་འཛིན་ཆེན་པོ་བདག་ཅག་འཁོར་ལ་སོགས་པ་ལ་སྣང་བར་མཛད་པ་ཆེའམ་ཆེན་པོ་ཁྱོད་སྐུ་གསུང་ཐུགས་ཀྱི་ཆོ་འཕྲུལ་ཆེན་པོ་ཇི་སྙེད་པ་སྣ་ཚོགས་ཀྱི་ཆེ་བའི་མཛད་པ་ཐ་དད་པར་བསྟན་ནས་འདུལ་བའི་བདག་པོའང་ཡིན་ནོ། །དེ་བས་ན་གསང་སྔགས་ཀྱི་ཐབས་མཆོག་དྲྭ་བའི་སྤྲིན་ཕུང་དཔག་གིས་མི་ལང་བའི་མངའ་བདག་ལགས་ཏེ། འདིར་ཆོས་སོ་ཅོག་ཀུན་མེ་ལོང་ལྟ་བུའི་ཡེ་ཤེས་ཀྱི་མེའི་ངོ་བོར་འོད་འབར་ཞིང་གསལ་བར་སྣང་བར་མཛད་པ་དེ་ཉིད་རང་བྱུང་གི་ཡེ་ཤེས་ཆེན་པོར་གསལ་བ་ལ་མཐའི་སེལ་མེད་པའི་ཀློང་ཡངས་༼༢༡༡༽པའོ། །དེའི་བྱིན་རླབས་ཐམས་ཅད་དུ་སྣང་སྟེ་འབར་ཞིང་འཕྲོ་ལ་མ་སྒྲིབ་པར་གསལ་བར་གྱུར་བའི་མཛད་པས་ནི། མ་རིག་པའི་མུན་པ་བསལ་ཞིང་མཐའི་དངོས་པོ་ཐམས་ཅད་བསྲེགས་ཤིང་སྦྱོངས་ཏེ་དག་པར་མཛད་དོ། །ཆོས་སྐུ་བདེ་བ་ཆེན་པོའི་དབྱིངས་སུ་མཉམ་པའི་ངང་དུ་ཀུན་ནས་ལྷུན་གྱིས་རྫོགས་ཤིང་སངས་རྒྱས་པར་མཛད་པའང༌། གདུལ་དཀའ་འདུལ་བའི་དཔའ་བོ་ཁྱོད་ཀྱིས་མཛད་པ་རྨད་དུ་བྱུང་བ་ལགས་སོ། །ཞེས་པར་མཆོག་ཏུ་བསྟོད་པའོ། །ངོ་བོ་མ་ངེས་པ་ཉིད་མཛད་པ་ངེས་པའི་ཚུལ་དུ་མུན་པ་གསལ་བའི་ཡེ་ཤེས་ཀྱི་མེ་ཀློང་འབར་བ་ཆེན་པོ་འོད་དུ་འཁྱིལ་བས་མཐའ་ཀུན་སེལ་བའི་མཁྱེན་རབ་ཀྱི་བདག་པོ་ཁྱོད་ཉིད་ཨ་ལ་ལ་ཞེས་དགྱེས་པར་མཛོད་ཅིག་པ་དང༌། ཁྱབ་པའི་གཟི་བྱིན་གྱི་ཟེར་འཕྲོ་བའི་ཐུགས་རྗེ་ཀུན་ཏུ་སྣང་བའི་བདག་པོ་ཨ་ལ་ལ་ཞེས་དགྱེས་པར་མཛོད་ཅིག་དང་། མཐའ་ཡས་པའི་ཆོས་ཐམས་ཅད་མཉམ་པའི་དབྱིངས་སུ་ཀུན་ནས་སྡུད་པའི་ཆོས་ཉིད་ཀྱི་མེ་ཡང་ཁྱོད་ཉིད་ཡིན་ཏེ་ཨ་ལ་ལ། ཞེས་དགྱེས་པའི་སྒྲ་ཀུན་ནས་རྗེས་སུ་མཐུན་ནོ། །མཐའི་དངོས་པོ་ཐམས་ཅད་སྲེག་པར་བྱེད་པའི་ཕྲིན་ལས་ཀྱི་དཔལ་དང་ལྡན་པའི་མེ་ཡང་ཁྱོད་ཉིད་ཡིན་པས་ཨ་ལ་ལ། གདུག་པ་ཅན་དང་རྟོག་སྒྲིབ་ཐམས་ཅད་ཟ་བར་བྱེད་པའི་ཀློང་ཆེན་པོ་ཡང་སྐྱེས་བུ་ཁྱོད་ཉིད་ཡིན་ཏེཨ་ལ་ལ། མཐའ་བཞི་ཀུན་དང་བྲལ་ཞིང་དབུས་ཀྱི་ཐ་སྙད་དུའང་གཟུང་དུ་མེད་པར་མཆོག་ཏུ་འདས་པའི་དཀྱིལ་འཁོར་ཆེན་པོའང་ཁྱོད་ཉིད་ཡིན་པས་ཨ་ལ་ལ། ཐུགས་རྗེ་ཞི་བའི་རང་བཞིན་བས་ཐམས་ཅད་བདེ་བ་མཆོག་ལ་འགོད་ཅིང་རྒྱས་པར་མཛད་པའི་ངང་ཡང་ཁྱོད་ཉིད་ཡིན་ནོ་ཨ་ལ་ལ། ལྷུན་གྱིས་གྲུབ་པའི་དབང་ཕྱུག་བདུད་འདུལ་དྲག་པོའི་འཇིགས་པར་བྱེད་པའང་ཁྱོད་ཉིད་ཡིན་པས་ཨ་ལ་ལ། ཞེས་བརྒྱད་ཀྱིས་ཀྱང་བསྟོད་པའོ། །དེ་ལྟར་བསྟོད་ནས་ཞུ་བ་དངོས་ནི། སྟོན་པ་གསང་བ་མཆོག་གི་བདག་པོ་ཡོན་ཏན་རྨད་དུ་བྱུང་བའི་ཁྱད་པར་མངའ་བའི་བྱིན་རླབས་ཀྱིས་ཡེ་ཤེས་གསང་བའི་མེ་ཡི་རང་བཞིན་ཆེན་པོ་དག་གི་རྣམ་གྲངས་འཆད་པ་རྣམས་བདག་ཅག་འདུས་པའི་འཁོར་ཚོགས་རྣམས་ལ་ལེགས་པར་བཤད་དུ་གསོལ། ཞེས་དེ་སྐད་འདུས་པས་ཞུས་ཤིང་གསོལ་བ་བཏབ་པ་ལས།།

གཉིས་པ་ལན་ལ་གཉིས་ཏེ། ཉོན་ཅིག་པར་གདམས་པ། ལན་དངོས་བསྟན་པའོ། །དང་པོ་ནི།

དེ་ཉིད་དགྱེས་པས། ཞེས་པ་ནས། བཤད་ཀྱིས་གུས་པར་ཉོན། །ཞེས་པའི་བར་གྱིས་བསྟན་ཏེ།

དེ་ཉིད་དགྱེས་པས་འདི་སྐད་དུ། །འདུས་པ་ཆེན་པོ་རྣལ་འབྱོར་པ།།

རྡོ་རྗེ་མེ་ཡི་རང་བཞིན་དག །ངེས་པར་བཤད་ཀྱིས་གུས་པར་ཉོན།།

དེ་སྐད་ཅེས་བསྟོད་པས་སྟོན་པ་སྐྱེས་བུ་དེ་ཉིད་དགྱེས་པས། གནང་བའི་ཚིག་འདི་སྐད་དུ། འདུས་པ་ཆེན་པོའི་རྣལ་འབྱོར་བ། ཞེས་འཁོར་ལ་བོས་ནས། རྡོ་རྗེ་མེ་ཡི་རང་བཞིན་དག་འདི་ལྟར་ངེས་པར་བཤད་ཀྱིས་གུས་པས་ལེགས་པར་ཉོན་ཅིག་ཅེས་བཀའ་སྩལ་བར་ཞལ་གྱིས་བཞེས་ནས་གདམས་པ་མཛད་པའོ།།

གཉིས་པ་ལན་དངོས་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཁྱད་པར་བླ་མས། ཞེས་པ་ནས། ལས་ཀྱི་མཆོག་ཏུ་སྦྱངས། །ཞེས་པའི་བར་གྱིས་བསྟན་ཏེ།

ཁྱད་པར་བླ་མའི་ལས་མཆོག་འདིས། །རྣལ་འབྱོར་ཐབས་སུ་བདེ་སྦྱར་བས།།

རྒྱལ་བ་ཀུན་མཉེས་ཀུན་བསྲེགས་སྦྱངས། །དོན་གྲུབ་ལས་ཀྱི་མཆོག་ཏུ་སྦྱངས།།

ཁྱད་པར་ཤིན་ཏུ་ཕུལ་དུ་གྱུར་པའི་བླ་མའི་དགོངས་པ་དམ་པའི་ལས་ཀྱི་བསྲེག་རྫས་ཀྱི་མཆོག་འདིས་རྣལ་འབྱོར་པའི་ཏིང་ངེ་འཛིན་གྱི་དགོངས་པའི་མེ་ཅིར་ཡང་སྣང་ལ་མི་གཡོ་བའི་ཐབས་སུ་བདེ་བ་ཆེན་པོར་སྦྱོར་བར་མཛད་པས། ཚུལ་དེ་ཡིས་རྒྱལ་བ་ཐམས་ཅད་ཀུན་མཉེས་པར་བྱས་ཏེ་གཉིས་སུ་མེད་པའི་མཆོད་པ་ཕུལ་ནས་འགྲོ་བ་ཀུན་གྱི་རྟོག་སྒྲིབ་ཀུན་སྲེག་ཅིང་སྦྱངས་པས་དག་པ་ཆེན་པོར་མཛད་པས། དོན་རྣམ་པ་གཉིས་གྲུབ་པ་ནི་ཕྲིན་ལས་ཀྱི་མཆོག་ཏུ་གྱུར་པས་སྦྱངས་པའོ། །ཞེས་ཆེ་བའི་སྒོ་ནས་མོས་པ་བསྐྱེད་ཕྱིར་སྤྱིར་བཀའ་སྩལ་པའོ།།

གཉིས་པ་རྒྱས་པར་བཤད་པ་ལ་གཉིས་ཏེ། སྦྱིན་བསྲེག་བསྟན་པ། རོ་བསྲེག་བཤད་པའོ། །དང་པོ་ལ་གཉིས་ཏེ། རང་བཞིན་གྱི་ཏིང་ངེ་འཛིན་དང་ཤེས་རབ་ཀྱི་སྦྱིན་སྲེག་ཐུན་མོང་དུ་བསྟན་པ། ལྷག་པ་གཟུགས་བརྙན་གྱི་སྦྱིན་སྲེག་བཤད་པའོ། །དང་པོ་ནི།

ཇི་བཞིན་པ་ཡི། ཞེས་པ་ནས། དངོས་པོ་བསྲེགས་སྦྱངས་ཐིམ། །ཞེས་པའི་བར་ཚིགས་བཅད་བདུན་གྱིས་བསྟན་ཏེ།

ཇི་བཞིན་པ་ཡི་ཧ་ཁུང་དུ། །ཇི་སྙེད་པ་ཡི་ཡམ་ཤིང་ལ། །དེ་བཞིན་ཉིད་ཀྱི་མེ་བྱུང་བས། །ཐམས་ཅད་ཐམས་ཅད་བསྲེགས་སྦྱངས་ཐིམ། །སྐྱེ་མེད་རྣམ་དག་ཧ་ཁུང་དུ། །སྐྱེ་བ་རྣམ་བཞིའི་ཡམ་ཤིང་ལ། །མ་སྐྱེས་སྤྲོས་བྲལ་མེ་བྱུང་བས། །མཚན་མའི་བག་ཆགས་བསྲེགས་སྦྱངས་ཐིམ། །བསམ་དུ་མེད་པའི་ཧ་ཁུང་དུ། །བསམ་གྱིས་མི་ཁྱབ་ཡམ་ཤིང་ལ། །འོད་དཔག་མེད་པའི་མེ་བྱུང་བས། །མཐའ་ཡས་རྡུལ་སྙེད་བསྲེགས་སྦྱངས་ཐིམ། །ཆོོོས་ཉིད་རྣམ་དག་ཧ་ཁུང་དུ། །ཆོས་ཅན་སྣ་ཚོགས་ཡམ་ཤིང་ལ། །སྟོང་ཉིད་ཡེ་ཤེས་མེ་བྱུང་བས། །དངོས་པོའི་བག་ཆགས་བསྲེགས་སྦྱངས་ཐིམ། །སེམས་ཉིད་རྣམ་དག་ཧ་ཁུང་དུ། །སེམས་ཅན་སྐྱེ་འགྲོ་ཡམ་ཤིང་ལ། །རང་བྱུང་ཡེ་ཤེས་མེ་བྱུང་བས། །འཁོར་བའི་བགས་ཆགས་སྲེགས་སྦྱངས་ཐིམ། །ཀུན་གཞི་བྷ་གའི་ཧ་ཁུང་དུ། །ཉོན་མོངས་ལྔ་ཡི་ཡམ་ཤིང་ལ། །ཡེ་ཤེས་ལྔ་ཡི་མེ་བྱུང་བས། །གཟུང་འཛིན་རྟོག་པ་བསྲེགས་སྦྱངས་ཐིམ། །སྣང་སྲིད་ནམ་མཁའི་ཧ་ཁུང་དུ། །འབྱུང་བ་བཞི་ཡི་ཡམ་ཤིང་ལ། །ཕྱག་རྒྱ་འབར་བའི་མེ་བྱུང་བས། །སྣང་སྲིད་དངོས་པོ་བསྲེགས་སྦྱངས་ཐིམ།།

དེ་དག་གི་དོན་རེ་རེ་ནས་རྒྱས་པར་བསྟན་པའི་ཕྱིར། རང་བཞིན་གྱི་ཧོམ་འཆད་པ་སྟེ། ཟབ་པ་ཆོས་ཉིད་ཇི་བཞིན་པ་ཡི་ཧོམ་ཁུང་གི་ཐབ་ཏུ། རྒྱ་ཆེ་བ་ཆོས་སོ་ཅོག་གི་དངོས་པོ་ཇི་སྙེད་པ་ཡི་ཡམ་ཤིང་ལ། གཉིས་མེད་དེ་བཞིན་ཉིད་ཀྱེ་མེ་བྱུང་བས། དེ་དག་གདོད་ནས་རྒྱུ་ཐམས་ཅད་དང་འབྲས་བུ་ཐམས་ཅད་ངོ་བོ་གཉིས་པར་སྣང་བ་མེད་དེ། ཡེ་ཤེས་དེ་བཞིན་ཉིད་དུ་བྱུང་ཐེབས་པས་མཐའ་ལས་གྲོལ་བ་ནི་བསྲེགས་སྦྱངས་ཐིམ་པ་སྟེ་འཆད་པ་རྣམས་ཀྱང་ཕྱོགས་མཐུན་པར་བསྟན་ཏེ་རྣམ་གྲངས་རྗེས་སུ་སྦྱར་བར་བྱའོ། །རྣམ་གྲངས་ནི། ཤེས་རབ་སྐྱེ་མེད་རྣམ་པར་དག་པའི་ཧོམ་ཁུང་དུ། སྐྱེ་བ་རྣམ་བཞི་ཡམ་ཤིང་གི་རྫས་ལ། མ་སྐྱེས་སྤྲོས་བྲལ་དུ་རྟོགས་པའི་མེ་བྱུང་བས། མཚན་མའི་བག་ཆགས་ཐམས་ཅད་བསྲེགས་སྦྱངས་ཐིམ་པའོ། །མཚན་མ་དང་བྲལ་ཏེ་བསམ་དུ་མེད་༼༢༡༣༽པའི་ཧོམ་ཁུང་དུ། བསམ་གྱིས་མི་ཁྱབ་པའི་ཆོས་ཀྱི་ཡམ་ཤིང་ལ། འོད་གསལ་དཔག་ཏུ་མེད་པའི་ཏིང་ངེ་འཛིན་གྱི་མེ་བྱུང་བས། མཐའ་ཡས་རྡུལ་སྙེད་ཀྱི་གཉིས་སྣང་ཀུན་བསྲེགས་སྦྱངས་ཐིམ་པའོ། །ལྟ་བ་ཆོས་ཉིད་རྣམ་པར་དག་པའི་ཧོམ་ཁུང་དུ་ཆོས་ཅན་སྣ་ཚོགས་པའི་བསྲེགས་རྫས་ཀྱི་ཡམ་ཤིང་ལ། སྟོང་ཉིད་ཡེ་ཤེས་གསལ་བའི་མེ་འབར་བས། འཁྲུལ་སྣང་དངོས་པོའི་བག་ཆགས་ཐམས་ཅད་བསྲེགས་སྦྱངས་ཐིམ་པའོ། །རང་རིག་ལྟ་བའི་སེམས་ཉིད་རྣམ་པར་དག་པའི་ཧོམ་ཁུང་དུ། སེམས་ཅན་སྐྱེ་འགྲོ་ཀུན་གྱི་ཡམ་ཤིང་ལ། གཉིས་མེད་རང་བྱུང་ཡེ་ཤེས་ཀྱི་མེ་འབར་བས། ལས་སྣང་འཁོར་བའི་བག་ཆགས་ཐམས་ཅད་བསྲེགས་སྦྱངས་ཐིམས་པའོ། །གཞི་དབྱིངས་ཀུན་གཞི་བྷ་གའི་ཧོམ་ཁུང་དུ། ཉོན་མོངས་དུག་ཆེན་ལྔ་ཡི་ཡམ་ཤིང་ལ། མ་འགག་པར་རྟོགས་པའི་འབྲས་བུ་ཡེ་ཤེས་ལྔ་ཡི་མེ་བྱུང་བས། གཟུང་འཛིན་རྟོག་པ་ཐམས་ཅད་བསྲེགས་སྦྱངས་ཐིམ་པའོ། །མཚན་མའི་ཏིང་འཛིན་སྒོམ་པ་སྣང་སྲིད་ནམ་མཁའི་དབྱིངས་ཀྱི་ཧོམ་ཁུང་དུ། དངོས་པོ་འབྱུང་བ་བཞི་ཡི་ཡམ་ཤིང་ལ། ལྷར་སྣང་ཕྱག་རྒྱ་འབར་བའི་མེ་བྱུང་བས། སྣང་ཞིང་སྲིད་པའི་དངོས་པོ་ཐམས་ཅད་བསྲེགས་སྦྱངས་ཐིམ་པ་དང་བདུན་ནི་རང་བཞིན་ཏེ། དེ་དག་ཇི་འདྲ་བར་རྟོགས་ནས་བསྒོམ་པས་སྤྱོད་ཡུལ་ཡོངས་སུ་དག་པ་སྟེ། དེ་ལྟར་གྱུར་པ་ནི་ཏིང་ངེ་འཛིན་གྱི་ཧོམ་སྟེ་དོན་གྱི་གཉིས་ཀ་ཐུན་མོང་དུ་འགྱུར་རོ།།

གཉིས་པ་ལྷག་པ་གཟུགས་བརྙན་གྱི་སྦྱིན་སྲེག་བཤད་པ་ལ་གཉིས་ཏེ། ཐབ་ཁུང་བསྟན་པ། ལས་ཀྱི་རིམ་པ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

རྣམ་བཞི་ལས་ཀྱི། ཞེས་པ་ནས། རིགས་པ་དེ་ལྟར་སྦྱར། །ཞེས་པའི་བར་གྱིས་བསྟན་ཏེ།

རྣམ་བཞི་ལས་ཀྱི་ཧ་ཁུང་དུ། །བཞི་འམ་བཞི་ཡི་ཡམ་ཤིང་དུ།།

རིགས་བཞི་འབར་བའི་མེ་བྱུང་བས། །མཆོད་སྦྱིན་དངོས་པོ་བསྲེགས་སྦྱངས་ཐིམ།།

འདི་ཡང་སོ་སོའི་ཁྱད་པར་གྱིས། །ཕྱོགས་དང་ཁ་དོག་དབྱིབས་དང་རྫས། །གང་ལྟར་རིག་པ་དེ་ལྟར་སྦྱར།།

གཟུགས་བརྙན་གྱི་ཧོམ་ཁུང་སྤྱིར་འགྲེལ་པ་སྟེ། འཆད་པའི་ཧོམ་གྱི་ཆོས་བཅུ་གཉིས་ལ། ཞི་བ་སོགས་རྣམ་པ་བཞི་ཡི་ལས་ཀྱི་ཧོམ་ཁུང་དུ། ཐབ་ཀྱི་སྦྱིན་སྲེག་གི་ཤིང་སོ་སོར་ཕྱེ་བ་བཞིའམ་དེ་ལ་ཤིང་རྣམ་པ་བཞི་ཡི་ཡམ་ཤིང་གིས་གསོས་ཏེ་མེ་སྦར་བ་དེ་ལ་རིགས་བཞི་ཡི་སྤྲུལ་པས་ལས་བཞིའི་མེ་ལྷ་བསྐྱེད་པ་དང༌། སྤྱན་དྲངས་པ་དང༌། བསྟིམ་པ་དང་། མཆོད་པ་དང༌། བསྟོད་པ་དང༌། ལས་བཅོལ་བ་དག་བྱས་ཏེ་འབར་བའི་མེ་བྱུང་བས་འཕགས་པ་མཆོད་ཅིང་འགྲོ་བ་ལ་སྦྱིན་པའི་བསྲེག་རྫས་སོ་སོར་བསྲེགས་པས་བདག་གཞན་གྱི་སྒྲིབ་པའི་དངོས་པོ་བསྲེངས་ཤིང་སྦྱངས་ཏེ་ལྷའི་ཞལ་དུ་ཐིམ་པར་མཆོད་༼༢༡༤༽པའོ། །གཟུགས་བརྙན་གྱི་ཧོམ་འདི་ལ་ཡང་ལས་བཞི་སོ་སོའི་བྱེ་བྲག་གི་ཁྱད་པར་གྱིས་ཁ་ལྟ་ཕྱོགས་དང༌། ཁ་དོག་དང༌། ཐབས་ཀྱི་དབྱིབས་དང༌། རྫས་རྣམས་ལས་ཀྱི་གཞུང་གང་ལྟར་རིགས་པ་དེ་ལྟར་སྦྱར་ཏེ་མཛེས་པར་བྱའོ།།

གཉིས་པ་རྒྱས་པར་བཤད་པ་ནི།

ཤར་ལྷོ་ནུབ་བྱང༌། ཞེས་པ་ནས། ཡམ་ཤིང་རྫས་ཀྱིས་བརྒྱན། །ཞེས་པའི་བར་གྱིས་བསྟན་ཏེ།

ཤར་ལྷོ་ནུབ་བྱང་དཀར་སེར་དམར། །མཐིང་ཁ་ནག་པོ་ཐལ་མདོག་སྦྱར། །ཟླུམ་པོ་པདྨ་ལེའུ་ཚེ་ན། །འཁོར་ལོ་གྲུ་བཞི་ཟུར་བརྒྱད་རྒྱས། །ཟླ་གམ་གྲུ་ཆད་གཞུང་དབྱིབས་དབང་། །གྲུ་གསུམ་བྷ་ག་མཁའ་མངོན་སྤྱོད། །སུམ་བརྩེགས་མདངས་དང་རི་མོར་མཛེས། །ལས་ཀྱི་ཡམ་ཤིང་རྫས་ཀྱིས་བརྒྱན།།

དེ་ཉིད་རྒྱས་པར་བསྟན་པ་གང་སྙམ་པ་ལ། བྱེ་བྲག་གསལ་བར་བཤད་པ་འདི་དག་སྟེ། འདི་ལ་ཕྱོགས་ནི་ཞི་བའི་ཚེ་ན་ཤར་དུ་ལྟའོ། །རྒྱས་པའི་ཚེ་བྱང་ངམ་ལྷོ་རུའོ། །དབང་དུས་ནུབ་ཏུའོ། །དྲག་པོའི་སྐབས་ལྷོའམ་བྱང་དུའོ། །ཁ་དོག་ནི་ཞི་བ་ལ་རིལ་དཀར་པོའོ། །རྒྱས་པ་ལ་སེར་པོའོ། །དབང་ལ་དམར་པོའོ། །དྲག་པོ་ལ་མཐིང་ག་ནག་པོ་ཐལ་མདོག་གསུམ་པོ་ཉིད་སྦྱར་བའོ། །དབྱིབས་ཀྱང་མེ་ཐབ་ཟླུམ་པོ་དང༌། པདྨ་དང་ལེའུ་ཚེ་བྱ་བ་ཞི་བ་སྟེ། ཚད་ནི་ཟབ་དང་གྱེན་དུ་ཁྲུ་ཕྱེད་ཕྱེད་དེ་གང་ངོ༌། །ཆུ་དང་ཞེང་དུའང་རྗེས་སུ་མཐུན་ཏེ་གཞན་ཡང་དེ་བཞིན་ནོ། །འཁོར་ལོ་དང༌། གྲུ་བཞི་དང༌། རིན་ཆེན་ཟུར་བརྒྱད་དུ་བྱ་བ་ནི་རྒྱས་པའོ། །ཟླ་གམ་དང༌། གྲུ་ཆད་དང་། གཞུ་བརྡུང་བའི་དབྱིབས་ལྟ་བུ་ནི་དབང་ལ་བྱའོ། །གྲུ་གསུམ་དང༌། བྷ་གའི་མཁའ་དང་ཁྲོ་ཞལ་ལྟ་བུར་བྱ་བ་ནི་མངོན་སྤྱོད་དྲག་པོའོ། །དེ་དག་ཀྱང་དབུས་བང་རིམ་སུམ་བརྩེག རྒྱ་དཔང་རེ་རེར་སོར་གསུམ་གསུམ་ཡོད་པ་དེ་ཁ་དོག་གི་མདངས་དང་སོ་སོའི་ཕྱག་རྒྱ་ལེགས་པར་རི་མོར་མཛེས་པའི་མཚན་མ་དགོད་པར་བྱ་སྟེ་བང་རིམ་གྱི་ཕྱེད་ལ་གཏང་ངོ༌། །དེར་ལས་བཞིའི་བྱེ་བྲག་རྣམས་ཀྱི་ཤིང་བརྩིག་པའང་བསྲེག་ཤིང་ཐབ་དབྱིབས་སུ་བརྩིག་ལ། ཡམ་ཤིང་ཡང་གཏང་སྟེ། ཞགས་པ་ལ་སོགས་པ་ཡི་རྫས་ཀྱིས་བརྒྱན་པར་བྱ་བ་ཡིན་ནོ།།

གཉིས་པ་ལས་ཀྱི་རིམ་པ་བཤད་པ་ལ་གཉིས་ཏེ། བླ་མའི་ལས་བསྟན་པ། མཇུག་གི་ལས་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཡེ་ཤེས་རྡོ་རྗེ། ཞེས་པ་ནས། གསུམ་གྱིས་ཐབས་མཆོག་སྦྱར། །ཞེས་པའི་བར་གྱིས་བསྟན་ཏེ།

ཡེ་ཤེས་རྡོ་རྗེ་ལས་རྒྱུད་ལྡན། །བླ་མ་གསུམ་གྱི་ཐབས་མཆོག་སྦྱར།།

དེ་དག་གི་ལས་བྱ་ཐབས་གང་སྙམ་པ་ལ། འདི་དག་བྱ་བའང་ཡེ་ཤེས་རྡོ་རྗེ་ལས་ཀྱི་རྒྱུད་ལ་ཤིན་ཏུ་མཁས་པ་དང་ལྡན་པས་བྱ་བ་སྟེ། དེ་ཡང་ལས་སོ་སོར་བསྐོ་བའི་ཆེད་དུ་འཆད་པའི་བླ་མ་དགོངས་མཛད་པ། ལས་གཞུང་སྲོང་བ། སྦྱིན་སྲེག་བྱེད་པ་གསུམ་གྱིས་ཐབས་མཆོག་དང་སྦྱར་ཏེ་བྱ་བའོ།།

གཉིས་༼༢༡༥༽པ་རྒྱས་པར་བཤད་པ་ལ་གསུམ་སྟེ། རྡོ་རྗེ་རྒྱལ་པོས་དགོངས་པ་བྱ་བ། ལས་སྦྱོར་བླ་མས་ལས་གཞུང་བསྲང་བ། སྐབས་སྦྱོར་བླ་མས་སྦྱིན་སྲེག་བྱ་བའོ། །དང་པོ་ནི།

དག་པའི་མཐའ་འཛིན་མཉེས་མཆོག་འཛིན། །ཞེས་པས་བསྟན་ཏེ།

དག་པའི་མཐའ་འཛིན་མཉེས་མཆོག་འཛིན།།

དེའི་ཚུལ་ནི། སྡིག་སྒྲིབ་ཅི་བྱས་པ་ཐམས་ཅད་དགོངས་པའི་འཕྲོ་འདུས་དག་པར་མཛད་པའི་ལས་ཀྱི་མཐའ་འཛིན་ཞིང་མི་གཏོང་བས་ཚོགས་གཉིས་རྫོགས་པར་མཛད་དེ་རྒྱལ་བ་མཉེས་པའི་དགོངས་པ་མཆོག་གི་མཆོད་པ་འཛིན་པ་རྡོ་རྗེ་རྒྱལ་པོ་བླ་མའི་ཐབས་སོ།།

གཉིས་པ་ལས་སྦྱོར་བླ་མས་ལས་གཞུང་བསྲང་བ་ནི།

རྡོ་རྗེ་གསང་བའི། ཞེས་པ་ནས། གླུ་ཡི་རྒྱུད་སྦྱོར་བྱ། །ཞེས་པའི་བར་གྱིས་བསྟན་ཏེ།

རྡོ་རྗེ་གསང་བའི་གླུ་བྲོ་གར། །མཆོད་པ་ངེས་པར་འབྱོར་ཚོགས་སྦྱར།།

རྡོ་རྗེ་ལས་ཀྱི་བྱིན་རླབས་སྦྱོར། །གསང་བའི་ལས་ཀྱི་རྒྱུད་ལྡན་པས། །བཤར་བཏབ་ཞི་བའི་ལྷ་རྒྱུད་དང་།།

རྒྱས་དང་དབང་བཤད་རྒྱུད་བཤར་པས། །ལྷ་དང་སྔགས་དང་ཕྱག་རྒྱ་དང་། །དེ་བཞིན་གླུ་ཡི་རྒྱུད་འབྱོར་བྱ།།

རྡོ་རྗེ་གསང་བའི་ལས་ལ་སྦྱོར་བའི་བླ་མས་གླུ་བྲོ་གར་ཐབས་དང་བཅས་པས་ལས་གཞུང་ཕྱི་མོ་བྱས་ཏེ་འཛབ་བྱ། བསྟོད་ཅིང་མཆོད་པ་དེས་པའི་འབྱོར་ཚོགས་རྣམས་ཀྱང་སྦྱར་ནས་འབུལ་བ་དག་གོ །དེའང་རྡོ་རྗེ་སྔགས་ཀྱི་ལས་སྦྱོར་མཁན་གྱིས་ལས་རྣམ་པ་བཞི་པོ་གང་བྱེད་ཀྱི་གཞུང་སྲོང་བ་དེ་ལྟར་བྱིན་གྱིས་བརླབས་པའི་སྒྲུབ་པ་ཚུལ་བཞིན་རྫོགས་པར་བྱ་བའང༌། སྦྱིན་སྲེག་བྱེད་པའི་ལས་མཁན་སྐབས་སྦྱོར་བླ་མའི་ལས་གཞུང་དང་མཐུན་པར་མདོ་ཆེན་པོའི་གསང་བ་ལས་ཀྱི་རྒྱུད་གཞུང་གི་བྱེ་བྲག་དང་ལྡན་པས་ལས་གང་བྱེད་ཀྱི་ཕྲེང་བ་གཤར་བཏབ་ལ། ཞི་བ་ན་ཞི་བའི་ལྷ་རྒྱུད་དང༌། རྒྱས་པ་ན་རྒྱས་པའི་ལྷ་རྒྱུད་དང༌། དེ་བཞིན་དུ་དབང་དྲག་གི་ལྷ་རྒྱུད་དག་བཤད་པ་བཞིན་བསྒོམ་ཞིང་ལས་གཞུང་བསྲང་བ་ཚུལ་བཞིན་དུ་གཤར་བས་གསལ་བཏབ་ནས་སོ་སོའི་ལྷ་བསྐྱེད་དེ་བསྒོམ་ཞིང་གསལ་བ་དང༌། སྔགས་དང་ཕྱག་རྒྱ་བཟླ་ཞིང་བཅའ་བ་དང༌། དེ་བཞིན་དུ་མེ་མཆོད་ནས་སོ་སོའི་བསྟོད་ཚིག་གི་གླུ་ཡི་སྒོ་ནས་མཆོད་པའང་རྒྱུད་དང་མཐུན་པར་སྦྱར་ཏེ་རྫོགས་པར་བྱ་བའོ།།

གསུམ་པ་སྐབས་སྦྱོར་བླ་མས་སྦྱིན་སྲེག་བྱ་བ་ནི།

རིགས་ཀྱི་རིགས་རྒྱུད། ཅེས་པ་ནས། བྱ་བའི་ཐབས་ཆེན་བརྩམས། །ཞེས་པའི་བར་གྱིས་བསྟན་ཏེ།

རིགས་ཀྱི་རིགས་རྒྱུད་ལྔ་རྣམས་ནི། །སོ་སོའི་རིགས་སུ་བཤར་བཏབ་སྟེ། །ཀློང་ཡངས་འཁྱིལ་བའི་ཧོམ་ཁུང་དུ། །དམ་རྫས་བདུད་རྩིས་འབར་བ་ཡིས། །སྦྱང་དང་ཐོབ་ཕྱིར་བསྲེག་སྦྱར་འོས། །དཔག་མེད་རྒྱལ་བ་རྒྱ་མཚོའི་ཚོགས། །ཆེ་བ་བསྔགས་པའི་ཡོན་ཏན་དག །རྡོ་རྗེ་གླུ་ཡིས་བརྗོད་ནས་ཀྱང་།།

མཉེས་པར་བྱ་བའི་ཐབས་ཆེན་བརྩམ།།

རིགས་ཀྱི་གཙོ་བོ་ལྔ་སོ་སོར་དབྱེ་བའི་རིགས་ལྔའིརྒྱུད་དུ་བྱུང་བའི་ཁྱད་པར་ལྔ་རུ་སྣང་བའི་ལྷ་རྣམས་ནི། ལས་བཞི་སོ་སོའི་སྐབས་ཀྱི་རིགས་ལྔའི་ཆ་ཡིས་གཙོ་བོ་གང་གིས་བྱེད་པའི་ལྷ་དེའི་རིགས་སུ་ཀུན་གཤར་བཏབ་སྟེ་མཆོད་པའང༌། ཡེ་ཤེས་ཀློང་ཡངས་འཁྱིལ་བའི་ཧོམ་ཁུང་ཆེན་པོ་ཉིད་དུ། དམ་རྫས་ཉིད་ཡེ་ཤེས་ཀྱི་བདུད་རྩི་མཆོག་གི་འོད་དུ་འབར་བ་ཡིས་མཆོད་ཅིང༌། སྡིག་སྒྲིབ་སྦྱངས་པ་དང་དངོས་གྲུབ་ཐོབ་པར་བྱ་བའི་ཕྱིར་བསྲེག་བྱར་སྦྱར་ཏེ་མཆོད་པར་བྱ་བ་ནི་འོས་ཤིང་རིགས་པའོ། །དེ་ཡང་གང་གི་མཆོད་ཅིང་བསྟོད་ཞེ་༼༢༡༦༽ན། ཡོན་ཏན་གྱི་མུ་མཐའ་དཔག་ཏུ་མེད་པ་མངའ་བའི་རྒྱལ་བ་རྫོགས་པའི་སངས་རྒྱས་རྒྱ་མཚོའི་ཆུ་ལྟར་ཟབ་ཅིང་མང་བའི་དཀྱིལ་འཁོར་གྱི་ལྷ་ཚོགས་རྣམས་ཀྱི་ཆེ་བ་སྔགས་པའི་ཡོན་ཏན་ཚད་མེད་པ་དག རྡོ་རྗེ་གླུ་ཡིས་བསྟོད་པའི་ཚིག་གླུ་རུ་བླང་ཞིང་བརྗོད་ནས་ཀྱང་མཚན་རེ་རྫོགས་པ་དང༌། རྩ་བའི་སྔགས་ལ་ཁཱ་ཧི་དང༌། ཤཱིནྟཾ་ཀུ་རུ་སྭཱ་ཧཱ། པིུཥྚཾ་ཀུ་རུ་སྭཱ་ཧཱ། པཱ་ཤང་ཀུ་རུ་སྭཱ་ཧཱ། མཱ་ར་ཡ་ཕཊཿ ཅེས་ལས་སྐབས་དང་སྦྱར་ལ་མཆོད་ཅིང་མཉེས་པར་བྱ་བའི་ལས་ཀྱི་སྦྱིན་སྲེག་གི་ཐབས་ཆེན་པོ་བརྩམས་པར་བྱས་ཏེ་མཇུག་ཏུ་སྨོན་ལམ་མན་ཆད་བྱ་བའོ།།

གཉིས་པ་མཇུག་གི་ལས་བཤད་པ་ལ་གསུམ་སྟེ། མེ་པྲ་བཟང་ངན་བརྟགས་པ། ངན་ན་སྦྱིན་སྲེག་བསྐྱར་ལ་བྱ་བ། བཟང་ན་དངོས་གྲུབ་བླང་བའོ། །དང་པོ་ནི།

མཉེས་པའི་ལས་རྣམས། ཞེས་པ་ནས། ཡོངས་སུ་ཤེས་པར་བྱ། །ཞེས་པའི་བར་གྱིས་བསྟན་ཏེ།

མཉེས་པའི་ལས་རྣམས་རྫོགས་པ་དང་། །གང་བྱང་མ་བྱང་དོན་ཆེན་རྣམས། །གྲུབ་དང་མ་གྲུབ་དེ་རྣམས་དག།

མེ་ལ་མཁས་པས་བརྟག་པར་བྱ། །མེ་སྒྲ་གཉིས་དང་ཁ་དོག་གཉིས།།

འབར་ཚུལ་གཉིས་དང་དབྱིབས་རྣམས་དྲུག །དེ་དག་ཡོངས་སུ་ཤེས་པར་བྱ།།

དེ་དག་ཟིན་པ་དང་མེ་པྲ་བརྟགས་པའི་ཕྱིར། བསྟོད་པ་ཟིན་ནས་མཉེས་པར་བྱ་བའི་ལས་རྣམས་རྫོགས་པ་དང༌། གང་སྒྲིབ་པ་བྱང་ཞིང་དག་པ་དང་མ་བྱང་བས་དག་པ་མིན་པའི་དོན་ཆེན་པོ་དང་དམན་པའི་ཁྱད་པར་རྣམས་དང༌། དངོས་གྲུབ་གྲུབ་བ་དང་མ་གྲུབ་པའི་ལྟས་ཀྱི་རྣམ་པ་དེ་རྣམས་ཐམས་ཅད་དག རྣལ་འབྱོར་པ་མེ་ཡི་མཚན་ཉིད་ལ་མཁས་ཤིང་གོམས་པས་བརྟགས་ཏེ་དཔྱད་པར་བྱ་བའང༌། མེ་སྒྲ་སྙན་པར་འབར་བ་དང༌། མི་སྙན་པར་འབར་བ་གཉིས་དང༌། ཁ་དོག་སྡུག་མི་སྡུག་དང་གསལ་བ་དང་མི་གསལ་བ་གཉིས་དང༌། འབར་བའི་ཚུལ་དྲག་པར་འབར་བ་དང༌། ཞན་པར་འབར་བ་གཉིས་དང༌། མེའི་དབྱིབས་ཀྱང་ལས་བཞིའི་དབྱིབས་སུ་འབར་བ་རྣམ་པ་བཞི་དང༌། འོག་གི་ཡིད་དུ་འོང་མི་འོང་གཉིས་ཏེ་རྩ་བ་དྲུག་གམ། རིགས་ལྔ་ཡབ་ཡུམ་གྱི་ཕྱག་མཚན་དྲུག་གི་དབྱིབས་རྣམ་པ་དྲུག་ཏུའང་གསུངས་ཏེ། སྐུ་གདུང་ཆེན་པོའི་རྒྱུད་ལས། དེ་དག་དག་པ་པདྨ་འདྲ། །མེ་འོད་དེ་འདྲ་འདོད་པ་ལེགས། །དཀར་ལ་མེ་ལྕེ་རྭ་བཞིན་འབྱུང༌། །རྡོ་རྗེའི་རིགས་ཀྱི་མཆོད་རྟེན་ཐོབ། །མེ་འོད་འཁོར་ལོར་འབར་བ་དེ། །འཁོར་ལོ་སྣང་མཛད་ཆོས་སྐུའི་གཟུགས། །མེ་ལྕེ་གཅིག་ལ་རྩེ་རྣོ་བ། །ཁ་དོག་ལྔ་ཀ་ཚང་བ་དེ། །དོན་གྲུབ་མཆོད་རྟེན་དངོས་གྲུབ་ཐོབ། །མེ་ལྕེ་མང་ལ་མ་གྱེས་པར། །མེ་ལྕེ་གསུམ་དང་ལྡན་གྱུར་ན། །རྐང་པ་འདིར། དཔེ་ལ་ལར། མེ་ལ་དྲི་བསུང་ལྡན་གྱུར་ན། །ཞེས་འབྱུང༌། རིན་ཆེན་མཆོད་རྟེན་འགྲུབ་པའི་རྟགས། །ཞི་རྒྱས་དབང་དང་མངོན་སྤྱོད་ཀྱི། །མེ་ཡི་༼༢༡༧༽མདོག་ཀྱང་དེ་འདྲར་བརྟགས། །མེ་ལྕེ་མེད་ལ་མདོག་འགྱུར་ན། །སྒྲིབ་པ་ལས་ཚན་ཆེ་བ་ཡིན། །མེ་འོད་ཆུང་ལ་དམར་ནག་ན། །དེ་བཞིན་གཤེགས་པའི་ཐུགས་རྗེ་ཡིས། །སྡིག་ཅན་དེ་ནི་མ་ཟིན་རྟགས། །མེ་འོད་དཀར་ཞིང་འཆི་འདོད་ན། །བསོད་ནམས་ཞན་ཏེ་སྡིག་ཆུང་རྟགས། །མེ་འོད་ཆད་ཅིང་འབར་བ་དེ། །ལྷ་དང་མི་ཡི་སྒྱུ་སོགས་འདྲ། །ཞི་ལ་དཀར་བའི་མདོག་དང་ལྡན། །སྤྱི་རུ་མེ་ལྕེ་ལེགས་པར་འདོད། །མེ་ལྕེ་ཆད་འདོད་རླུང་ཆེ་ལ། །དྲག་འབར་སྐད་འདོན་བྱེད་པ་སྟེ། །ད་ལྟ་དངོས་སུ་སྡིག་ཞང་ཡོད། །མེ་ལྕེ་ཞི་ལ་དཀར་འཁྱིལ་བ། །མཇུག་ལའང་ཇེ་ཞན་དཀར་ཞན་པ། །དེ་ནི་བྱང་ཆུབ་སེམས་དཔའི་མེ། །མེ་ཡི་མཚན་ཉིད་གཞན་ཡང་བརྟགས། །ཞེས་གསུངས་པའི་དོན་དང་སྦྱར་རོ། །དེ་ལྟ་བུ་དག་ལ་ཤིན་ཏུ་ཡོངས་སུ་མཁས་ཤིང་ཤེས་པར་བྱ་བ་ངེས་པར་གཅེས་སོ།།

གཉིས་པ་ངན་ན་སྦྱིན་སྲེག་བསྐྱར་ལ་བྱ་བ་ནི།

གལ་ཏེ་མཚན་མ། ཞེས་པ་ནས། ཆེན་པོ་རྒྱས་པར་བྱ། །ཞེས་པའི་བར་གྱིས་བསྟན་ཏེ།

གལ་ཏེ་མཚན་མ་མི་སྡུག་ན། །ཡིད་དུ་མི་འོང་རྟགས་ཡིན་པས། །བསྲེགས་སྦྱང་ཆེན་པོ་རྒྱས་པར་བྱ།།

དེ་ལྟར་ཡོངས་སུ་ཤེས་ནས་ཚུལ་དང་ལྡན་པའི་ལས་བརྩམ་པའི་ཕྱིར། གལ་ཏེ་དེ་ལྟར་སྲེག་སྦྱོང་བྱས་པས་མེའི་མཚན་མ་རྣམས་མི་སྡུག་ཅིང་མི་ལེགས་པར་བྱུང་ན། འབྲས་བུ་ཡིད་དུ་མི་འོང་ཞིང་མི་འདོད་པར་ལྟུང་བའི་རྟགས་ཡིན་པས། སླར་ཡང་སྲེག་སྦྱོང་གིས་བཤགས་པ་ཆེན་པོ་བྱ་བའམ། ལས་ལ་ཤིན་ཏུ་གདུང་ཞིང་འགྱོད་པས་སྦྱིན་སྲེག་རྒྱས་པར་བྱ་བ་ལ་ནན་ཏན་དུ་འབད་དོ།།

གསུམ་པ་བཟང་ན་དངོས་གྲུབ་བླང་བ་ནི།

དེ་ནས་ཡིད་འོང༌། ཞེས་པ་ནས། གང་ལྟར་གྲུབ་པ་བླང༌། །ཞེས་པའི་བར་གྱིས་བསྟན་ཏེ།

དེ་ནས་ཡིད་འོང་འདོད་འབྱུང་ན། །མེ་ལ་འདོད་པའི་མཚན་མ་རྣམས། །རྣམ་གསུམ་གང་ལྟར་གྲུབ་པ་བླང་།།

དེ་ནས་མེའི་མཚན་མ་ལེགས་ནས་ཡིད་དུ་འོང་ཞིང་སྡུག་པར་གྱུར་ན། འབྲས་བུ་ཡིད་དུ་འོང་ཞིང་འདོད་པར་ལྟར་འབྱུང་བ་ངེས་པར་གྲུབ་པའི་རྟགས་ཡིན་པས། མེ་ལ་དངོས་གྲུབ་གང་འདོད་པའི་མཚན་མ་རྣམས་དང་བསྟུན་ཏེ་རབ་འབྲིང་ཐ་མ་རྣམ་པ་གསུམ་གང་ལྟར་བྱུང་བ་དེ་ལྟར་གང་གྲུབ་པ་ཡི་དངོས་གྲུབ་བླང་བར་བྱ་སྟེ། གང་ཡོན་བདག་ཚེ་འདས་པ་ཞིག་ན། དེས་བྱས་པ་དང༌། དེས་བླང་བར་བསམ་པར་བྱའོ།།

གཉིས་པ་རོ་བསྲེག་བཤད་པ་ལ་བཞི་སྟེ། རོ་ཆས་སུ་གཞུགས་པ། བསྲེག་ཁང་བརྩེགས་པ། བླ་མ་སོ་སོའི་ལས་རིམ། མཇུག་གི་ལས་བསྟན་པའོ། །དང་པོ་ལ་བཞི་སྟེ། ཁྲུས་བྱ་བ། སྦྱོང་བྱེད་ཀྱི་མཚན་མ་དགོད་པ། སྦྱང་བྱའི་མཚན་མ་དགོད་པ། རོ་སྟེགས་ལ་བཞག་པའོ། །དང་པོ་ནི།

འདུས་པ་ཆེན་པོ། ཞེས་པ་ནས། བྱུག་ཅིང་བཀྲུ་བར་བྱ། །ཞེས་པའོ་བར་གྱིས་བསྟན་ཏེ།

འདུས་པ་ཆེན་པོ་གཞན་ཡང་གང་། །རོ་ཡི་རྫས་རྣམས་བསྲེགས་སྦྱངས་ནས།།

རོ་ལ་སྔགས་ཀྱིས་བཏབ་ནས་ཀྱང་། །ཤིན་ཏུ་དྲི་ཞིམ་སྣ་ཚོགས་ཀྱིས། །རོ་ལ་བྱུག་ཅིང་བཀྲུ་བར་བྱ།།

དེ་ལྟར་བྱ་བ་ལའང་རོ་བསྲེག་པའི་ལས་དངོས་གང་སྙམ་པ་༼༢༡༨༽ལ། འདུས་པ་ཆེན་པོ་ཞེས་སྐྱེས་བུ་སེམས་དཔའ་རྡོ་རྗེས་བོས་ནས་གཞན་ཡང་གང་ལས་བཞིའི་སྦྱིན་སྲེག་ལས་དགར་བར་རོ་ཡི་རྫས་རྣམས་བསྲེག་སྦྱང་བྱ་བ་ཉིད་ན་ཐབས་འདི་ལྟར་བརྩམ་པར་བྱ་སྟེ། ཐོག་མར་རོ་ལ་ཆོས་ཉིད་རྣམ་པར་དག་པའམ་ཡི་གེ་བརྒྱ་པ་བཟླས་པའི་སྔགས་ཀྱིས་བཏབ་ནས་ཀྱང་ཤིན་ཏུ་ཞིམ་པའི་སྤོས་ཆུ་སྣ་ཚོགས་ཀྱིས་རོ་ལ་བྱུག་ཅིང་ཕྱིའི་ཁྲུས་ཀྱིས་བཀྲུ་ཞིང་དག་པར་བྱ་བ་དང༌། ནང་གི་ཁྲུས་ནི་ བདག་མེད་སྒོམ་པའོ།།

གཉིས་པ ་སྦྱོང་བྱེད་ཀྱི་མཚན་མ་དགོད་པ་ནི།

བདུད་རྩི་ཞུན་ཆེན། ཞེས་པ་ནས། ཤིང་ལ་དྲིས་ཏེ་དགོད། །ཅེས་པའི་བར་གྱིས་བསྟན་ཏེ།

བདུད་རྩིས་ཞུན་ཆེན་ཁུ་བ་ཡིས། །རས་ལ་བྱུགས་པས་རོ་དཀྲིས་ཏེ། །རོ་ཡི་གནས་རྣམས་གང་ཡིན་པར།། སྔགས་ཀྱི་སྦྱོར་བ་ཀུན་བཀོད་ནས། །ཕྱག་རྒྱའི་མཚན་མས་གདབ་པར་བྱ། །རྒྱལ་བའི་དཀྱིལ་འཁོར་བཀོད་པ་གང་། །དེ་ཡི་མཚོན་པའི་ཕྱག་རྒྱ་རྣམས། །གང་དུ་བཀོད་པ་དེ་ཉིད་དུ། །སྙིང་པོ་གྲངས་ཀྱང་དེ་བཞིན་བྱ། །སྙིང་པོ་དག་ལ་སོ་སོ་ཡི། །མ་ནོར་རྩ་བའི་ཡིག་འབྲུ་དག །རས་སམ་ཤིང་ལ་བྲིས་ཏེ་དགོད།།

དེ་ནས་བདུད་རྩི་ཞུན་ཆེན་གྱི་ཁུ་བ་ཡིས་རས་ལ་བྱུག་པས་རོ་དཀྲིས་ཏེ་གོས་དང་རྒྱན་བྱས་པས་སྣང་ཚུལ་དུ་ཕྱིའི་གོས་རྒྱན་བྱེད་དོ། །ནང་དུ་གོས་ནི་ཚུལ་ཁྲིམས་དང༌། རྒྱན་ནི་ངོ་ཚ་ཤེས་པའོ། །དེ་ནས་གཉེན་པོ་དགོད་པ་ནི་རོ་ཡི་རྟོག་པའི་གནས་ཉི་ཤུ་རྩ་གཉིས་སམ་བཞི་བཅུ་ཞེ་གཉིས་ལ་སོགས་པ་རྣམས་གང་ཡིན་པར་རྟོག་པ་ལྷར་བསྐྱེད་པའི་ཕྱིར་ལྷ་རྣམས་ཀྱི་ལས་སྔགས་ཀྱི་སྦྱོར་བ་བྱང་བུའམ་ཤོག་བུ་ལ་བྲིས་ཏེ་གསུང་གི་ཕྱག་རྒྱ་ཀུན་རོ་ལ་བཀོད་པ་ནི་རྟོག་པ་ལས་ལྷར་བསྐྱེད་པའི་རྐྱེན་ནོ། །དེ་ནས་གསུང་བཀོད་པའི་ལྷ་རྣམས་ཀྱི་ཐུགས་ཡེ་ཤེས་ཀྱི་ཕྱག་རྒྱའི་མཚན་མས་གདབ་པར་བྱ་བ་མཚོན་བྱེད་སྡོང་བུའི་སྙིང་པོ་རྒྱལ་བའི་དཀྱིལ་འཁོར་བཀོད་པ་གང་གི་ལྷའི་གྲངས་དང་མཉམ་པ་དེ་ཡི་ཐུགས་མཚོན་པའི་ཕྱག་རྒྱ་རྣམས་རས་ལ་བྱས་ཏེ་གསུང་གི་སྙིང་པོ་གང་དུ་བཀོད་པ་དེ་ཉིད་དུ་རས་ཀྱི་སྡོང་བུའི་སྙིང་པོའི་གྲངས་ཀྱང་དེ་ལྟར་དུ་བྱ་ཞིང་གདགས་ཏེ་རྟོག་པ་སྦྱོང་བའི་ཕྱིར་རོ། །དེ་ལྟར་རྟོག་པ་ལྷར་བསྐྱེད་པའི་སྙིང་པོ་དག་ལ་ལྷ་སོ་སོ་ཡི་རྒྱུ་མ་ནོར་བ་རྩ་བའི་ཡིག་འབྲུ་རེ་རེ་བ་ཨ໋་མཱུྃ་ཧཱུྃ་ཏྲཱྃ་ལ་སོགས་པའམ། ཏ་ཐ་ལ་སོགས་པ་དག་རས་སམ་ཤིང་ངམ་ཤོག་བུ་ལ་བྲིས་ཏེ་དགོད་པར་བྱེད་པ་ནི་ས་བོན་གྱི་སྙིང་པོ་བསྐྱེད་གཞིའོ།།

གསུམ་པ་སྦྱང་བྱའི་མཚན་མ་དགོད་པ་ནི།

རོ་ཡི་སྦྱོར་བ། ཞེས་པ་ནས། ཁྱབ་པར་དགོད་པར་བྱ། ཞེས་པའི་བར་གྱིས་བསྟན་ཏེ།

རོ་ཡི་སྦྱོར་བ་རྫོགས་པ་དང་། །རོ་ཡི་ཕྱི་རྒྱབ་ཐམས་ཅད་དུ། །ཉོན་མོངས་འཁོར་བ་ཀུན་བཀོད་དེ། །རས་སམ་ཤིང་ཤུན་གང་དག་ལ། །འཁོར་བའི་ས་བོན་ཐམས་ཅད་བཀོད། །ཉོན་མོངས་དུག་ལྔ་དུག་གསུམ་བཅས།།

སྐྱེ་བཞི་ལམ་ལྔ་རྒྱུད་དྲུག་བཅས། །མིང་ངམ་གཟུགས་སུ་བྱས་ནས་ནི། །གནས་གནས་དག་ཏུ་དགོད་པར་བྱ།།

ས་བོན་འདུ་འཆད་དངོས་པོ་ལྔ། །གཟུང་འཛིན་མིང་དུ་བཅས་པ་རྣམས།།

བརྡ་ཡི་ཚུལ་དུ་བཀོད་ནས་ཀྱང་། །རོ་རྣམས་ཁྱབ་པར་དགོད་པར་བྱ།།

དེ་ལྟར་རོ་ཡི་སྦྱོར་བ་རྫོགས་ཟིན་པ་དང༌། དེ་ནས་རོ་ཡི་ཕྱི་རས་ཀྱི་སྟེང་ཁྱབ་པའི་ལུས་ཀྱི་མགོ་མཇུག་ཐམས་ཅད་དུ་འཁོར་བ་སྲེག་པའི་ཕྱིར་མི་མཐུན་པའི་རྣམ་པ་ཉོན་མོངས་པ་དང་འཁོར་བ་རྒྱུ་འབྲས་ཀུན་བཀོད་པར་བྱེད་དེ། གང་ཞེ་ན། རྒྱུ་ནི་རས་སམ་ཤིང་ཤུན་གང་དག་ལ། འཁོར་བའི་ས་བོན་དྲུག་གི་ཡི་གེ་ཨ་ནྲ་ལ་སོགས་པ་ཐམས་ཅད་དགོད་པ་དང༌། དེ་དྲུག་གི་ལས་ཉོན་མོངས་པ་ལྔ་ཡི་མིང་དང་འཁོར་བའི་རྒྱུ་གཞན་དག་ཀུན་དང༌། ཉོན་མོངས་པ་དུག་གསུམ་དང་བཅས་པ་༼༢༡༩༽ཡང་བྲིས་ལ་གདགས་སོ། །མཇུག་ལ་དེ་དག་དག་པར་གྱུར་ཅིག་ཅེས་བྱ་བའང་བྲིའོ། །དེ་བཞིན་དུ་སྐྱེ་བའི་གནས་བཞི་དང་ལམ་རྒྱུད་ལྔ་རྒྱུ་དྲུག་གི་འགྲོ་བ་རིགས་དྲུག་རྣམས་དང་བཅས་ཏེ་མིང་ཡིག་བྲི་བ་དང་ངམ་ཡང་ན་འདོད་ཆགས་བྱའི་གཟུགས་དང༌། གཏི་མུག་ཕག་གི་གཟུགས་དང༌། ཞེ་སྡང་སྦྲུལ་གྱི་གཟུགས་དང་མ་རིག་པ་རྒན་མོ་ལོང་བ་ལ་སོགས་པ་སོ་སོའི་གཟུགས་སུ་བྱས་ནས་ནི། གནས་དྲུག་དང་གནས་ལྔ་ལ་སོགས་པ་དག་ཏུ་དགོད་པར་བྱའོ། །གཞན་ཡང་ས་བོན་དྲུག་དང་འདུ་མཆེད་བཅུ་གཉིས་དང༌། ཕུང་པོའི་དངོས་པོ་ལྔ་དང༌། གཟུང་བ་དང་འཛིན་པའི་མིང་དུ་བཅས་པ་རྣམས་ཀྱང་ཡི་གེ་མས་ཀློག་གམ། རྒྱལ་ཁམས་ཀྱི་སྡེ་གཞན་གྱི་ཡི་གེར་བྲིས་ཤིང༌། མེ་དང་འདམ་དང་མུན་པ་དང་ཁུར་དང་མདུད་པ་དང་རི་བོ་ལ་སོགས་པ་མཚོན་བྱེད་བརྡ་ཡི་ཚུལ་དུ་རི་ཡི་གནས་རྣམས་ཀུན་ཏུ་བཀོད་ནས་ནི། རོ་རྣམས་རྫོགས་པར་ཁྱབ་པར་དགོད་པར་བྱ་སྟེ། དེ་དག་བསྲེག་པ་དང་སྦྱོང་བའི་དངོས་པོ་ཡིན་པའི་ཕྱིར་རོ།།

བཞི་པ་རོ་སྟེགས་ལ་བཞག་པ་ནི།

དེ་ནས་རོ་ཡི། ཞེས་པ་ནས། མཁས་པས་གཞག་པར་བྱ། །ཞེས་པའི་བར་གྱིས་བསྟན་ཏེ།

དེ་ནས་རོ་ཡི་ཕུང་པོ་དེ། །རྟེན་ནམ་གླེགས་སམ་སྟེགས་བུ་ཡི། །སྟེང་དུ་མཁས་པས་གཞག་པར་བྱ།།

དེ་ནས་རོ་ཡི་ཕུང་པོ་བཅས་ཟིན་པ་དེ་ཉིད། རྟེན་པས་དྲངས་ནས་གླེགས་མ་བརྩིགས་པའི་སྟེགས་བུ་ཡི་སྟེང་དུ་མཁས་པས་བཞག་སྟེ། ཤེས་པ་དགུག་པ་དང༌། གཤེད་དང་བྲལ་བ་དང༌། སྒྲིབ་པ་དྲལ་བ་དག་བརྩམ་པར་བྱའོ།།

གཉིས་པ་བསྲེག་ཁང་བརྩེགས་པ་ལ་ལྔ་སྟེ། མེ་ཐབ་བྱ་བ། བསྲེག་ཁང་རྩིག་ཅིང་རྫས་དགོད་པ། དཔེ་ཆུང་གདགས་པ། གཟུངས་ཐག་བླ་མའི་ཕྱག་ཏུ་འབུལ་བ། དཀྱིལ་འཁོར་དུ་ལྷ་དགོད་པའོ། །དང་པོ་ནི།

ཐབས་ཀྱི་ཆོ་ག ཞེས་པ་ནས། ཡུལ་བཅད་སོ་སོར་བྱ། །ཞེས་པའི་བར་གྱིས་བསྟན་ཏེ།

ཐབས་ཀྱི་ཆོ་ག་བྱ་བ་ཡང་། །མཎྜལ་ཁོར་ཡུག་རན་ཙམ་ལ། །ལྷམ་པའི་གཟུགས་ནི་གང་ཡིན་པ།།

བརྐོ་དང་ཁ་ཁྱེར་ལུགས་བཞིན་བྱ། །ཕྱག་རྒྱ་བཞུགས་པའི་ཕོ་བྲང་དག །ཐིག་གིས་ཡུལ་བཅད་སོ་སོར་བྱ།།

དེ་ནས་ལས་གང་བྱེད་ཀྱི་མེ་ཐབ་ཀྱི་ཆོ་ག་ལྟར་བརྩིགས་པར་བྱ་བ་ཡང༌། མཎྜལ་ལམ་དཀྱིལ་འཁོར་ཆེ་ཆུང་གི་ཁོར་ཡུག་ཁྲུ་གང་ལ་སོགས་པ་རན་པ་ཙམ་དུ་བྱས་ལ། བར་འདིར། ཕྱག་དཔེ་གཅིག་ལ། ལྷམ་པའི་གཟུགས་ནི་གང་ཡིན་པ། ཞེས་བཞུགས་ཏེ་གཞན་ལ་མི་འདུག་གོ །མར་ཟ་བས་སུ་བརྐོ་ཞིང་བྲུ་བ་དང༌། ཡར་ཁ་ཁྱེར་རྩིག་པའང་ཁྲུ་ཕྱེད་ཕྱེད་ཙམ་དུ་རྒྱུད་ཀྱི་ལུགས་བཞིན་བརྩམས་ལ་ལེགས་པར་བྱའོ། །དེར་ཕྱག་རྒྱ་བཞུགས་ཏེ་ལྷ་དགོད་པའི་གནས་སུ་དབུས་ཀྱི་ཕོ་བྲང་དག་ཀྱང་ཐིག་གིས་ཕྱེ་སྟེ། ལས་གང་བྱེད་པའི་དཀྱིལ་འཁོར་གྱི་སྒོ་ཡན་ཆད་ཡུལ་བཅད་དེ་ལེགས་པར་བྲི་ཞིང་གྲུ་ཆད་མན་ཆད་མཉམ་པར་བྲི་བའང་ཚུལ་བཞིན་དུ་སོ་སོར་༼༢༢༠༽བརྩམ་པར་བྱའོ།།

གཉིས་པ་བསྲེག་ཁང་རྩིག་ཅིང་རྫས་དགོད་པ་ནི།

དེ་ཡི་སྟེང་དུ། ཞེས་པ་ནས། བཞིན་ཕྱོགས་རོ་བཞིན་བསྟན། །ཞེས་པའི་བར་གྱིས་བསྟན་ཏེ།

དེ་ཡི་སྟེང་དུ་བསྲེག་ཤིང་རྩིག །དབྱིབས་ནི་རིམ་བཞིན་བལྟམས་པ་ལ། །གྲྭ་ཟུར་ཀ་བས་བརྟན་པར་བརྟེན།།

སུམ་བརྩེགས་ཡང་ཐོག་བར་ཁང་བཅས། །ཐ་མ་ཡམ་ཤིང་བརྫངས་པས་གཏམ།།

བར་ཁང་དག་གི་གླེགས་མ་ལ།། རོ་ཡི་བཞིན་ཕྱོགས་རོ་བཞིན་བསྟན།།

དེ་ཡི་སྟེང་དུ་བསྲེག་ཤིང་བརྩིག་ནས། བསྲེག་ཁང་གི་དབྱིབས་ནི་རིགས་སོ་སོའི་ལས་བཞི་གང་བྱེད་པའི་ཚུལ་དུ་གྲུ་བཞིར་གཏམས་པ་ལ། གྲྭ་ཟུར་ཀ་བས་བརྟན་པར་བརྟེན་ཏེ། སུམ་བརྩེག་གི་རྣམ་པར་ཡང་ཐོག་བར་ཁང་དང་བཅས་པར་བྱ་ཞིང༌། ཐ་མ་ཡམ་ཤིང་བརྫངས་བས་གཏམས་པར་བྱའོ། །དེ་ནས་བར་ཁང་དག་གི་གླེགས་མ་ལ་རོ་དེ་གཞུག་པ་ཡི་བཞིན་གྱི་ཁ་ལྟ་ཕྱོགས་ནི་རོ་བསྲེག་པའི་ལས་ཀྱི་གཞུང་བཞིན་ཏེ། ཞི་བ་ན་ཤར་དུ་བསྟན་པ་ལ་སོགས་པའོ། །ཡང་ན་རྩ་བའི་རྒྱུད་ལས། རོ་ཡི་བཞིན་ཕྱོགས་ཤར་དུ་བསྟན། །ཞེས་པ་ལྟར་ཤར་ཉིད་དུ་བསྟན་ཏོ།།

གསུམ་པ་དཔེ་ཆུང་གདགས་པ་ནི།

རོ་ཡི་སྟེང་ཁང༌། ཞེས་པ་ནས། དཀྱིལ་འཁོར་གསལ་བར་དགོད། །ཅེས་པའི་བར་གྱིས་བསྟན་ཏེ།

རོ་ཡི་སྟེང་ཁང་ཡང་ཐོག་ཏུ། །རས་ལ་སོགས་ལ་བྲིས་པ་ཡི།།

ཕྱག་རྒྱའི་དཀྱིལ་འཁོར་གསལ་བར་དགོད།།

རོ་ཡི་སྟེང་ཁང་གི་ཡང་ཐོག་ཏུ་རས་སམ་གྲོ་ཤོག་ལ་སོགས་པ་ལ་བྲིས་པ་ཡི་ཞི་བ་རྡོ་རྗེ་དབྱིངས་ཀྱི་ཕྱག་རྒྱའི་དཀྱིལ་འཁོར་གསལ་བར་དགོད་དེ་དབུབ་ནས་ལྡིང་དུ་གཞུག་པའོ།།

བཞི་པ་གཟུངས་ཐག་བླ་མའི་ཕྱག་ཏུ་འབུལ་བ་ནི།

རོ་ཁང་གློ་སྐར། ཞེས་པ་ནས། བྱ་བ་རྫོགས་པ་དང༌། ཞེས་པའི་བར་གྱིས་བསྟན་ཏེ།

རོ་ཁང་གློ་དཀར་བཞི་ཕྱེ་ལ། །རྡོ་རྗེ་གཟུངས་ཀྱི་རྒྱུན་ཐབས་བཞི།།

བཏགས་ནས་བླ་མའི་ཕྱག་ཏུ་འབུལ། །ཤིང་གི་བྱ་བ་རྫོགས་པ་དང་།།

རོ་ཁང་གི་གློ་སྐར་ཕྱོགས་བཞིར་བཞི་ཕྱེ་ལ་རྡོ་རྗེ་གཟུངས་ཀྱི་རྒྱུན་ཐག་བཞི་ཕུང་པོའི་ཕྱོགས་བཞིར་བཏགས་ནས་ཕྱོགས་བཞིའི་བླ་མའི་ཕྱག་ཏུ་དབུལ་ལོ། །དེ་ཡང་གཟུངས་ཐག་གི་གྲངས་ནི་གློ་སྐར་དང་མཉམ་པར་རྣམ་པ་བཞིར་སྦྱར་ཏེ། ཞི་བ་ལ་བཞི། རྒྱས་པ་ལ་བརྒྱད། དབང་ལ་དྲུག དྲག་པོ་ལ་གསུམ་མམ། ཡང་ན་ཀུན་ལ་བཞི་སྟེ་བླ་མའི་གྲངས་ཀྱང་རྗེས་སུ་མཐུན་ནོ། །དེ་དག་ཤིང་གི་བརྩིགས་ལུགས་ཀྱི་དབྱིབས་ཀྱིས་ཕྱེ་བ་སྟེ། ཚུལ་དེ་ཡི་བྱ་བ་ཀུན་རྫོགས་པ་དང་ལེགས་པར་བྱའོ།།

ལྔ་པ་དཀྱིལ་འཁོར་དུ་ལྷ་དགོད་པ་ནི།

དེ་ཡི་ཕྱི་མཐའི། ཞེས་པ་ནས། ལས་ཀྱི་ལྷ་རྣམས་དགོད། །ཅེས་པའི་བར་གྱིས་བསྟན་ཏེ།

དེ་ཡི་ཕྱི་མཐའ་སྟེགས་བུ་ལ། །རྣམ་བཞི་ལས་ཀྱི་ལྷ་རྣམས་དགོད།།

ཤིང་དེ་ཡི་ཕྱི་མཐའི་བར་གྱི་མཎྜལ་གྱི་སྟེགས་བུ་ལ་དཀྱིལ་འཁོར་བྲིས་ཏེ། དེར་རྣམ་བཞི་ལས་ཀྱི་ལྷ་རྣམས་དགོད་པ་ཡང་དབུས་སུ་གཙོ་བོ། ཐ་མར་འཁོར་དགོད་དེ། ཕྱི་མཐར་ཚངས་པ་ལ་སོགས་པ་ཡང་གསུངས་པས་སོ་སོའི་ཙཀ་ལི་དགོད་པར་བྱའོ།།

གསུམ་པ་བླ་མ་སོ་སོའི་ལས་རིམ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

སྟེགས་བུ་རྫོགས་པར། ཞེས་པ་ནས། ལས་ཀྱི་སྐོས་གདབ་པ། །ཞེས་པའི་བར་གྱིས་བསྟན་ཏེ།

སྟེགས་བུ་རྫོགས་པར་གྱུར་པ་དང་། །རྡོ་རྗེ་ལས་ཀྱི་བསྐོས་གདབ་པ།།

དེ་ལྟར་ཤིང་དང་སྟེགས་བུ་བཀོད་༼༢༢༡༽པའི་བྱ་བ་ཐམས་ཅད་རྫོགས་པར་གྱུར་ཏེ་ལེགས་པར་ཟིན་པ་དང༌། རྡོ་རྗེ་ལས་ཀྱི་བླ་མ་རྣམས་རང་རང་གི་ལས་ལ་སྒོས་གདབ་པའི་ཚུལ་བསྟན་པ་ནི།

གཉིས་པ་རྒྱས་པར་བཤད་པ་ལ་དྲུག་སྟེ། རྡོ་རྗེ་རྒྱལ་པོས་འཛབ་བྱ་བ། ལས་སྦྱོར་བླ་མས་གཞུང་བསྲང་བ། རྡོ་རྗེ་རྒྱལ་ཐེབ་ཀྱིས་སྡིག་པ་བཤགས་པ། སྐབས་སྦྱོར་བླ་མས་སྦྱིན་སྲེག་བྱ་བ། དགེ་བའི་ལྟངས་འཛིན་གྱིས་དཀར་བྱང་བླ་མ་ལ་དབུལ་བ། སྡིག་པའི་ནག་བྱང་ཐབ་ཏུ་བསྲེག་པའོ། །དང་པོ་ནི།

རྡོ་རྗེ་རྒྱལ་པོ། ཞེས་པ་ནས། འདུ་འཕྲོ་རྒྱུན་དུ་བྱ། །ཞེས་པའི་བར་གྱིས་བསྟན་ཏེ།

རྡོ་རྗེ་རྒྱལ་པོ་བླ་མ་ལ། །འཁོར་བ་བསྲེགས་པར་མངའ་གསོལ་ཏེ།།

མི་གཡོ་མེ་ཆེན་རྩེ་གཅིག་པས། །མེ་ཡི་འདུ་འཕྲོ་རྒྱུན་དུ་བྱ།།

རང་ཉིད་ཀྱི་འཁོར་བ་བསྲེགས་ཟིན་པའི་རྡོ་རྗེ་རྒྱལ་པོ་བླ་མ་དམ་པ་ལ་ཚེ་འདས་ཀྱི་འཁོར་བ་བསྲེག་པར་མངའ་གསོལ་ཏེ། ཤར་དུ་བཞུགས་ནས། རོ་ལ་བཀོད་པའི་ལྷ་རྣམས་གསལ་བར་བྱས་ལ། དགོངས་པ་ཆོས་ཉིད་ལས་མི་གཡོ་བར་ཐམས་ཅད་དེར་སྦྱངས་བའི་ཡེ་ཤེས་ཀྱི་མེ་ཆེན་པོའི་ངང་དུ་རྩེ་གཅིག་པར་གནས་པས། ཚེ་འདས་ཀྱི་རྟོག་སྒྲིབ་སྲེག་པའི་རྡོ་རྗེ་སྔགས་ཀྱི་མེ་ཡི་འདུ་འཕྲོ་བྱ་ཞིང་གཟུངས་ཐག་ནས་བཟུང་ལ་དགོངས་པ་རྒྱུན་དུ་བྱ་ཞིང་བར་མི་གཅད་དོ།།

གཉིས་པ་ལས་སྦྱོར་བླ་མས་གཞུང་བསྲང་བ་ནི།

རྡོ་རྗེ་སྔགས་ཀྱི། ཞེས་པ་ནས། ཕྲེང་བ་རྫོགས་པར་བྱ། །ཞེས་པའི་བར་གྱིས་བསྟན་ཏེ།

རྡོ་རྗེ་སྔགས་ཀྱི་ལས་སྦྱོར་བ། །རྣམ་བཞི་ལས་ཀྱི་མངའ་གསོལ་ཏེ། །ལས་ཀྱི་འཕྲེང་བ་རྫོགས་པར་བྱ།།

དེ་ནས་རྡོ་རྗེ་སྔགས་ཀྱི་ལས་སྦྱོར་མཁན་ལ་ལས་རྣམ་པ་བཞི་གང་བྱེད་པའི་ཕྲིན་ལས་ཀྱི་བདག་པོར་མངའ་གསོལ་ཏེ། བྱང་དུ་ལས་བཞི་གང་རུང་གི་ཕྲིན་ལས་ཀྱི་ཕྲེང་བ་རྫོགས་པར་བྱ་སྟེ་ཞི་ཁྲོ་གཞུང་བསྲང་འཛབ་དུས་སུ་དཀྱིལ་འཁོར་གཉིས་སུ་ཕྱེ་ལ་བསྟིམས་ཏེ་འཕྲོ་འདུ་བྱའོ།།

གསུམ་པ་རྡོ་རྗེ་རྒྱལ་ཐེབ་ཀྱིས་སྡིག་པ་བཤགས་པ་ནི།

བླ་མ་རྡོ་རྗེ། ཞེས་པ་ནས། བསགས་པ་བགྲང་ཞིང་བཤགས། །ཞེས་པའི་བར་གྱིས་བསྟན་ཏེ།

བླ་མ་རྡོ་རྗེ་དམ་པ་ཞིག །རོ་ཡིས་ཉེས་པའི་མཐའ་བཟུང་ནས།།

ལས་ཀྱི་བསགས་པ་བགྲངས་ཞིང་བཤགས།།

བླ་མ་རྡོ་རྗེ་རྒྱལ་ཐེབ་ཏུ་གྱུར་པའི་དམ་པ་ཞིག་གིས་རོ་ཡིས་ཚེ་རབས་སུ་བྱས་པའི་སྡིག་སྒྲིབ་ཀྱི་ཉེས་པའི་མཐའ་བཟུང་ནས་ད་ལྟའི་བར་གྱི་ལས་ཀྱི་བསགས་པ་བསྔོ་བགྲང་བྱ་ཞིང་ནུབ་ཕྱོགས་ནས་བཤགས་པའི་ཐབས་ཟབ་མོ་བྱའོ།།

བཞི་པ་སྐབས་སྦྱོར་བླ་མས་སྦྱིན་སྲེག་བྱ་བ་ནི།

སྐབས་སྦྱོར་རྡོ་རྗེ། ཞེས་པ་ནས། ལས་ཀྱི་མཇུག་ཏུ་བྱ། །ཞེས་པའི་བར་གྱིས་བསྟན་ཏེ།

སྐབས་སྦྱོར་རྡོ་རྗེ་བླ་མའི་ས། །བླ་མེད་མཆོད་པ་རྒྱུན་དུ་བྱ། །བྲོ་གར་གླུ་ཚིག་སྟབས་ཆེན་གྱི།།

མཆོད་པའི་རོལ་མོ་སྣ་ཚོགས་དབུལ། །རྡོ་རྗེ་ལས་ཀྱི་སྨོན་ལམ་གདབ། །མཆོད་སྐབས་ལས་ཀྱི་མཇུག་ཏུ་བྱ།།

སྐབས་སྦྱོར་བྱེད་པའི་རྡོ་རྗེ་བླ་མ་ཡིས། ལྷོ་ཡི་ཕྱོགས་ནས་བླ་ན་མེད་པའི་མེ་ཡི་མཆོད་པ་དང་སྦྱིན་བསྲེག་རྒྱུན་དུ་བྱ་སྟེ། དེའང་དང་པོ་ཐབ་གང་ཡིན་པ་ལས། ཨེ་ཝྃ་མཱ་ཡཱ། ཞེས་མེའི་ས་བོན་བཏགས་པ་བརྗོད་ལ་ཐབ་དང་མཐུན་པར་འབྱམས་ཀླས་པར་བསྐྱེད། དེ་འོག་རྡོ་རྗེའི་བྲག་ཐབ་དང་དབྱིབས་མཐུན་པའི་སྟེང་དུ་༼༢༢༢༽དེ་ལས་ར་སྐྱེས་བསྐྱེད། དེའི་སྒ་གོང་དུ་རིགས་བཞིའི་ས་བོན་གང་རུང་ལས། ལས་བཞིའི་མེ་ལྷ་ལས་དང་མཐུན་པའི་ཁ་དོག་ལ་ཏྲི་ཤུ་ལ་དང༌། ཞགས་པ་དང༌། སྒྲོམ་དང༌། གུནྡྷེ་རྣམས་གཡས་དང༌། གཡོན་བགྲང་ཕྲེང་ཅན་བསམས་ལ། དབང་བསྐུར་བྱིན་གྱིས་བརླབ། ཡེ་ཤེས་ཀྱི་མེ་ལྷ་སྤྱན་དྲངས། དེ་ཡང་ད་རུ་ན་ཞེས་བྱ་བའི་མེ་ལྷ་དང༌། སྟོབས་སྦྱིན་ཞེས་བྱ་བའི་མེ་ལྷ་དང༌། འདོད་པ་སྐྱེས་ཞེས་བྱ་བའི་མེ་ལྷ་དང༌། ཁྲོ་བོ་ཞེས་བྱ་བའི་མེ་ལྷ་དང་བཞིའམ། དེ་དང་ཆ་མཐུན་པའི་ཡེ་ཤེས་ཀྱི་མེ་ལྷའོ། །དེ་དམ་ཚིག་གི་མེ་ལྷ་ལ་བསྟིམ། བརྟན་པར་བྱས་ལ་མཆོད་པ་རྣམས་ཕུལ་ཏེ་བསྟོད་ལ། ལས་བཅོལ་བ་དང༌། དེའི་ལྟོ་སྙིང་དུ་ཚེ་འདས་ཀྱི་རྟོག་ཚོགས་ལྷའི་དཀྱིལ་འཁོར་དུ་གསལ་བར་བསྐྱེད་ལ། སྤྱན་དྲངས་པ་དང་བསྟིམ་བརྟན་བྱས་ལ། བྲོ་གར་དང་གླུ་ཚིག་སྙན་པའི་སྟབས་ཆེན་གྱིས་མཆོད་པའི་ཁྱད་པར་ཀུན་སྦྱར་བ་དང་རོལ་མོ་སྣ་ཚོགས་པ་དབུལ་ལ་བསྟོད་པ་རྫོགས་མ་ཐག་ཏུ། ཧཱུྃ་བཛྲ་དྷྲི་ཀྲ་མཱུྃ་ད་དུ་ཤྭ་རི་ཁཱ་ཧི་ཤཱིནྟཾ་ཀུ་རུ་སྭཱ་ཧཱ། སོགས། བཟླས་པ་སྟོང་རྫོགས་ནས་རྣམ་ལྔ་འབུལ་བ་སྟོང་ཚིགས་ཀྱི་མཆོད་པ་ཟེར་རོ། །སྐབས་སུ་རྡོ་རྗེ་ལས་ཀྱི་སྨོན་ལམ་ལས་མཐུན་དུ་གདབ་སྟེ། མཆོད་པའི་སྐབས་དུག་གསུམ་མཆོད་པའང་བྱ་ཞིང་ལས་ཀྱི་མཇུག་ཏུ་རྫོགས་པའི་བར་མཐར་ཆགས་སུ་བྱའོ།།

ལྔ་པ་དགེ་བའི་ལྟངས་འཛིན་གྱིས་དཀར་བྱང་བླ་མ་ལ་དབུལ་བ་ནི།

རྡོ་རྗེ་ལས་ཀྱི། ཞེས་པ་ནས། དམ་པ་རྣམས་ལ་འབུལ། །ཞེས་པའི་བར་གྱིས་བསྟན་ཏེ།

རྡོ་རྗེ་ལས་ཀྱི་སྟངས་འཛིན་པས། །དཀར་བྱང་ལས་ཀྱི་མཐའ་བཟུང་སྟེ།།

ལེགས་མཐའ་དམ་པ་རྣམས་ལ་དབུལ།།

རྡོ་རྗེ་ལས་ཀྱི་ལྟང་འཛིན་པའི་དམ་པས། ཚེ་འདས་ཀྱི་སྔ་ཕྱིའི་དགེ་བ་ཅི་བསགས་པའམ། མ་ཤི་ཙམ་ན་དགེ་རྩ་ཇི་ལྟར་བྱས་པ་ཐམས་ཅད་ཤོག་བུའམ་རས་ལ་བྲིས་ནས་དཀར་བྱང་ལས་ཀྱི་ལྟང་བཟུང་སྟེ། ལེགས་མཐའ་རྣམས་བླ་མ་དམ་པ་རྣམས་ཀྱི་ཕྱག་ལ་འབུལ་བར་བྱའོ།།

དྲུག་པ་སྡིག་པའི་ནག་བྱང་ཐབ་ཏུ་བསྲེག་པ་ནི།

རོ་ཡི་ཉེས་མཐའ། ཞེས་པ་ནས། སྒྲིབ་སྲེག་དེ་ཉེད་མཁྱེན། །ཞེས་པའི་བར་གྱིས་བསྟན་ཏེ།

རོ་ཡི་ཉེས་མཐའ་གང་འཛིན་པས། །མཚན་མོ་ནག་མོའི་བུད་ཤིང་དག །ཡེ་ཤེས་མེ་ཡི་ཀློང་དུ་བསྲེག།

མེ་སྦྱོར་མེ་ལ་གནས་པའི་ལྷ། །མེ་ཡི་སངས་རྒྱས་འོད་དཔག་མེད། །མེ་ཡི་ལྷ་མོ་གོས་དཀར་མོ།།

རྒྱལ་བ་ཀུན་གྱི་འོད་ཡིན་ཏེ། །འབྱུང་བ་མེ་ལ་དབང་སྒྱུར་ཞིང་། །ཐམས་ཅད་ཀུན་གྱི་དྲོད་བདག་ཡིན།།

སྲིད་གསུམ་སྲེག་པར་ཞལ་གྱིས་འཆེས། །དངོས་པོ་སྲེག་པའི་འཕྲིན་ལས་ལ།།

ཐུགས་དམ་དབང་གིས་ཡོང་མི་མདའ། །གང་གིས་སྒྲིབ་སྲེག་དེ་ཉིད་མཁྱེན།།

རོ་ཡི་ཉེས་མཐའ་གང་ཡིན་རྣམས་འཛིན་པས་ཚེ་འདས་ཀྱི་ཚེ་རབས་སུ་སྡིག་པ་ཅི་བྱས་པའམ། ཚེ་འདིར་བསགས་པ་ཐམས་ཅད་རས་སམ་ཤོག་བུ་ལ་བྲིས་པའི་ནག་བྱང་བཀླགས་ལ། མཚན་མ་ནག་པོའི་བུད་ཤིང་དེ་དག་ཡེ་ཤེས་མི་ཡི་ཀློང་དུ་བསྲེག་སྟེ་ཚིག་ཏུའང་ལྷ་ལ་བསྐུལ་བ་འདི་སྐད་དུ་བརྗོད་དེ། ཀུན་འདུས་ཀྱི་མཆན་རྙིང་ལས། གསང་ཆེན་ནང་པའི་ལུགས་ཀྱིས་མེ་ལྷ་ལོགས་ན་མེད་པས། ཞེས་གསུངས་ལ། ཚུལ་དེ་ལྟར་ལྟ་བ་བསྐུལ་བ་དང་རྗེས་སུ་མཐུན་པར་སྣང་བ་མཐའ་ཡས་༼༢༢༣༽ཡབ་ཡུམ་མེ་ལྷ་དང་དབྱེར་མེད་པར་བྱས་ཏེ། མེ་སྦྱོར་མེ་ལ་གནས་པའི་ལྷ། །མེ་ཡི་སངས་རྒྱས་འོད་དཔག་མེད། །མེ་ཡི་ལྷ་མོ་གོས་དཀར་མོ། །རྒྱལ་བ་ཀུན་གྱི་འོད་ཡིན་ཏེ། །འབྱུང་བ་མེ་ལ་དབང་བསྒྱུར་ཞིང༌། །ཐམས་ཅད་ཀུན་གྱི་དྲོད་བདག་ཡིན། །སྲིད་གསུམ་སྲེག་པར་ཞལ་གྱིས་འཆེས། །དངོས་པོ་བསྲེག་པའི་ཕྲིན་ལས་ནི། །ཐུགས་དམ་དབང་གིས་ཡོང་མི་འདའ། །ཞེས་དབྱངས་སུ་བརྗོད་ལ། དང་པོར་སྡིག་སྒྲིབ་བསྲེག་པར་ཐུགས་དམ་དུ་བཅས་པ་ལགས་པས། ཚེ་འདས་གང་གི་སྡིག་སྒྲིབ་བག་ཆགས་དང་བཅས་པ་སྲེག་པའི་ཐབས་དམ་པ་དེ་ཉིད་མཁྱེན་པར་མཛོད་ལ་བསྲེག་པར་གྱིས་ཤིག་པར་བསྐུལ་ལོ། །དེ་ལྟར་ནག་བྱང་བསྲེག་པར་བྱེད་དེ། མེ་སྦྱོར་མེ་ལ་གནས་པའི་ལྷ། །ཞེས་པ་སོགས་འདི་ནག་བྱང་ལ་འབྱར་བ་ནི་གཞུང་གི་དགོངས་པ་དངོས་ཡིན་པས་འགྲེལ་པས་ཀྱང་དེ་ལྟར་བཤད་ལ་ཀུན་འདུས་དང་ཡང་མཐུན་ནོ།།

བཞི་པ་མཇུག་གི་ལས་བསྟན་པ་ལ་གཉིས་ཏེ། མཇུག་གི་ལས་དངོས་བསྟན་པ། ཞོར་ལ་གདུང་གི་རིམ་པའོ། །དང་པོ་ལ་བཞི་སྟེ། མེ་པྲ་བརྟག་ཅིང་བཟང་ངན་གྱི་བྱ་ཐབས། ཐལ་བ་ཕྱག་རྒྱར་བཞེངས་པ། གདུང་བྱུང་ན་མཆོད་གནས་སུ་དབུལ་བ། སྤྱིའི་མཇུག་བསྡུ་བའོ། །དང་པོ་ནི།

རོ་ཡི་རྣམ་ཤེས། ཞེས་པ་ནས། ལེགས་ན་མེ་དབང་བསྐུར། །ཞེས་པའི་བར་གྱིས་བསྟན་ཏེ།

རོ་ཡི་རྣམ་ཤེས་བྱང་མ་བྱང་། །མེ་ལ་མཁས་པས་དེ་བཞིན་བརྟག།

མི་སྡུག་ཚུལ་བྱུང་བསྲེག་པར་བྱ། །གལ་ཏེ་ལེགས་ན་མེ་དབང་བསྐུར།།

དེ་ནས་རོ་ཡི་རྣམ་ཤེས་ཀྱི་སྡིག་སྒྲིབ་བྱང་མ་བྱང་ངམ་དག་མ་དག་གི་ཁྱད་པར་མེ་ལ་མཁས་པས་བཤད་པ་དེ་བཞིན་དུ་མེ་ལྕེ་ལ་བརྟག་གོ །གལ་ཏེ་མི་སྡུག་པའི་ཚུལ་བྱུང་ནས་མ་ལེགས་ན་སླར་ཡང་བསྲེག་སྦྱང་རྒྱས་པར་བྱ་ཞིང་བཤགས་པ་མང་དུ་བྱའོ། །གལ་ཏེ་མེ་ལྕེ་སྡུག་ཅིང་ལེགས་པར་བྱུང་ན་དེ་ཉིད་ལ་སྒྲིབ་པ་སྲེགས་ཤིག་པར་བརྗོད་ལ་ཡེ་ཤེས་ཀྱི་མེས་སྦྱངས་པར་བསམ་ནས་ཚེ་འདས་ལ་མེ་དབང་བསྐུར་ཞིང་དངོས་གྲུབ་བླང་བར་བྱའོ།།

གཉིས་པ་ཐལ་བ་ཕྱག་རྒྱར་བཞེངས་པ་ནི།

ཐལ་བ་སྐུ་གདུང༌། ཞེས་པ་ནས། དཀྱིལ་འཁོར་ལ་སོགས་བྱ། །ཞེས་པའི་བར་གྱིས་བསྟན་ཏེ།

ཐལ་བ་སྐུ་གདུང་རིང་བསྲེལ་དང་། །ཕྱག་རྒྱའི་དཀྱིལ་འཁོར་ལ་སོགས་བྱ།།

ཐལ་བ་ལ་ཕྱི་ནས་སྐུ་གདུང་མཆོད་རྟེན་དང་རིང་བསྲེལ་དང་ལྡན་པའི་སྐུ་བརྙན་གྱི་གདུང་དང༌། ཕྱག་རྒྱའི་དཀྱིལ་འཁོར་ལ་སོགས་པ་བཞེངས་སུ་གསོལ་ལ་རབ་གནས་ཚུལ་བཞིན་དུ་བྱའོ།།

གསུམ་པ་གདུང་བྱུང་ན་མཆོད་གནས་སུ་དབུལ་བ་ནི།

དམ་པ་ཞིག་ན། ཞེས་པ་ནས། སེམས་དཔའ་མཆོག་དེས་སྨྲས། །ཞེས་པའི་བར་གྱིས་བསྟན་ཏེ།

དམ་པ་ཞིག་ན་གདུང་བརྟགས་ཏེ། །བླ་མའི་རྟེན་དུ་དབུལ་བར་བྱ།།

འདི་ནི་སྦྱོར་བ་ཀུན་གྱི་མཆོག །དེ་སྐད་སེམས་དཔའ་མཆོག་དེས་སྨྲས།།

ཚེ་འདས་དེ་ཉིད་གལ་ཏེ་རྣལ་འབྱོར་དམ་པ་མཆོག་ཏུ་གྱུར་པ་ཞིག་ཡིན་ན། དེ་ལ་སྐུ་གདུང་བྱུང་མ་བྱུང་ཡི་གེ་བརྒྱ་པས་བཤགས་༼༢༢༤༽པའི་སྔགས་ཀྱི་ཐེན་ཚར་ལ་བརྟགས་ཏེ། བྱུང་ན་བླ་མའི་མཆོད་གནས་དམ་པའི་རྟེན་དུ་རྡོ་རྗེ་རྒྱལ་པོ་ལ་དབུལ་བར་བྱ་བའམ། རྣལ་འབྱོར་ཚུལ་བཞིན་བྱེད་པ་གང་ཡང་རུང་བ་ལ་དབུལ་བར་བྱའོ། །འདི་ལྟར་བྱེད་པ་ནི་སྒོ་གསུམ་གྱི་ལས་ཀྱི་སྦྱོར་བ་ཀུན་གྱི་མཆོག་ཏུ་གྱུར་བ་ཡིན་ནོ། །དེ་སྐད་ཅེས་གསང་བའི་མངའ་བདག་སེམས་དཔའ་རྡོ་རྗེ་སྟོན་པ་མཆོག་དེས་སྨྲས་ཏེ་བཀའ་སྩལ་པར་མཛད་དོ། །ཞེས་གསང་བ་པས་གསུངས་སོ།།

བཞི་པ་སྤྱིའི་མཇུག་བསྡུ་བ་ནི།

གྲོགས་པོ་དག ཅེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་མེའི་བྱ་བས་ཡོངས་སུ་སྦྱང་བར་ཤེས་པར་བྱའོ།།

གྲོགས་པོ་དག བསྟན་པ་དེ་དག་ནི་མེའི་བྱ་བས་ཡོངས་སུ་སྦྱང་བ་ཡིན་པར་ཤེས་པར་བྱའོ། །ཞེས་སྤྱོད་པའི་ངོ་བོ་བསྟན་པའོ།།

གཉིས་པ་ཞོར་ལ་གདུང་གི་རིམ་པ་ལ་གཉིས་ཏེ། དང་པོ་ཇི་ལྟར་བྱུང་བའི་ཁུངས་ཀྱི་རིམ་པ། གདུང་བསྒྲུབ་པའི་ཐབས་བཤད་པའོ། །དང་པོ་ལ་ལྔ་སྟེ། གང་ལས་བྱུང་བའི་ཚུལ་དོན་བྱེད་ཚུལ་དང་བཅས་པ། བྱིན་རླབས་དང་ཡོན་ཏན་བསྟན་པ། རིག་འཛིན་དང་བྱང་ཆུབ་སེམས་དཔའ་དག་པ་ལ་སྣང་བ། གདུང་གི་ཁྱད་པར་བཤད་པ། ཕེབས་པའི་ཡོན་ཏན་བསྟན་པའོ། །དང་པོ་ནི།

རྡོ་རྗེ་གསང་བ། ཞེས་པ་ནས། ལས་ཀྱང་དེ་བཞིན་ནོ། །ཞེས་པའི་བར་གྱིས་བསྟན་ཏེ།

རྡོ་རྗེ་གསང་བ་ཆོས་ཀྱི་སྤུན། །མེ་ཡི་བྱ་བ་ལས་བྱུང་བ། །གདུང་ཞེས་གྲགས་པ་ཤ་རི་རམ། །དཔག་མེད་ཇི་སྲིད་དུས་དག་ནས། །གྲངས་མེད་སྤྲུལ་པའི་རྒྱལ་བ་དག །མྱ་ངན་འདས་པར་གྱུར་ཕྱི་ན། །མེད་པ་ལས་བྱུང་སྐུ་གདུང་ནི། །སྐུ་ཡི་གདུང་དང་རིང་བསྲེལ་ཞེས། །འགྲོ་བའི་བསོད་ནམས་རྟེན་དུ་གྲགས། །རྒྱལ་བ་རྣམས་ནི་དངོས་མེད་པས། །སྐུ་གདུང་རིང་བསྲེལ་མི་སྲིད་ན། །སེམས་ཅན་རྣམས་ལ་ཕན་དོན་དུ། །མེད་ལས་ཐུགས་རྗེ་ཆོ་འཕྲུལ་བཞག །དེ་བཞིན་གང་དུ་གང་བྱུང་བའི། །གང་འདིར་སྣང་བའི་སྒྲོན་མ་དག །མྱ་ངན་འདས་པའི་སྐུ་གདུང་ཡང་།། ཤ་རི་རམ་ཞེས་གྲགས་པར་གྱུར། །དེ་ཡི་ལས་ཀྱང་དེ་བཞིན་ནོ།།

གདུང་གི་ལོ་རྒྱུས་བསྟན་པའི་ཕྱིར། རྡོ་རྗེ་གསང་བའི་ཐེག་པ་ཆེན་པོ་བསྒྲུབ་པའི་ཆོས་ཀྱི་སྤུན་77དྲུང་དུ་གྱུར་པ་དག་ལ་བོས་ནས་གང་ཞིག་འདས་པར་བཤད་པ་དེ་བཞིན་དུ་ལྔ་ཕུང་མེ་ཡི་བྱ་བས་སྦྱངས་པ་ཡི་རྐྱེན་ལས་བྱུང་བ་གདུང་ཞེས་གྲགས་པ་ཤ་རི་རམ་ཉིད་ཇི་ལྟར་འབྱུང་བའི་ཚུལ་ཡང༌། བསྐལ་པ་དཔག་ཏུ་མེད་པ་ཇི་སྲིད་པའི་སྔོན་རོལ་གྱི་དུས་དག་ནས་གྲངས་མེད་པའི་སྤྲུལ་པའི་སྐུའི་རྒྱལ་བ་མང་པོ་དག་མྱ་ངན་ལས་འདས་པར་གྱུར་ནས་སྤུར་སྦྱངས་པར་བྱས་པའི་ཕྱི་ན། དགོངས་པ་མཐའ་དང་བྲལ་བའི་སྤྲོས་མེད་ཡེ་ཤེས་ཆེན་པོའི་བྱིན་རླབས་དམ་པ་ལས་བྱུང་བའི་སྐུ་གདུང་ཞེས་སུ་གྲགས་པ་ནི། སྐུ་ཡི་གདུང་དངོས་སམ་ཤ་རི་རམ་དང་རིང་བསྲེལ་ཞེས་གྲགས་པ་གདུལ་བྱ་ལ་སྣང་ནས་འགྲོ་བའི་བསོད་ནམས་ཀྱི་རྟེན་དུ་ཀུན་ལ་གྲགས་ཤིང་སྣང་བའོ། །འོ་ན་རྒྱལ་བ་ལ་དངོས་པོ་ཞིག་ཡོད་དོ་ཞེ་ན། རྒྱལ་བ་རྣམས་ཀྱི་ངོ་བོ་ནི་དངོས་པོ་ཡོད་སྟོང་གི་མཐའ་དང་བྲལ་བའི་སྤྲོས་མཚན་གང་ཡང་མེད་པས་ཆོས་སྐུ་གདལ་ཁྱབ་ཆེན་པོ་ལ། སྐུ་གདུང་དང་རིང་བསྲེལ་གྱི་དངོས་པོ་རང་རྒྱུད་པར་མི་དམིགས་པས་ངེས་པའི་མཚན་མ་ཅན་དུ་འབྱུང་བ་མི་སྲིད་ན་ཡང༌། གདུལ་བྱ་སེམས་ཅན་རྣམས་ལ་ཕན་༼༢༢༥༽གདགས་ཏེ་དྲང་བའི་དགོས་ཆེད་ཀྱི་དོན་དུ། གསང་བའི་དབྱིངས་དངོས་མེད་རང་བཞིན་ལྷུན་གྱིས་གྲུབ་པའི་ངང་ལས་ཐུགས་རྗེའི་ཆོ་འཕྲུལ་དུ་བཞག་པས་སྐལ་ལྡན་ཀུན་ལ་སྣང་བའོ། །དེ་བཞིན་དུ་འཇིག་རྟེན་གྱི་ཁམས་གང་དུ་རྒྱལ་བའི་སྐུ་གང་ལའང་གདུང་བྱུང་བའི་ཚུལ་དེ་ལྟར། ད་ལྟ་མི་མཇེད་ཀྱི་ཞིང་ཁམས་གང་འདིར་སྣང་བའི་སྒྲོན་མ་སྤྲུལ་པའི་སྐུ་ཐུབ་དབང་པོ་དག་མྱ་ངན་འདས་པའི་སྐུ་གདུང་ཡང་ཤ་རི་རམ་ཞེས་སུ་གྲགས་པར་འགྱུར་བ་ཉིད་དེ། གདུང་དེ་ཡི་བསོད་ནམས་ཀྱི་རྟེན་ནམ་མོས་པའམ་དད་པ་སྐྱེད་ནས་འགྲོ་བ་སེམས་ཅན་འདྲེན་པའི་དོན་མཛད་པའི་ཕྲིན་ལས་ཀྱང་བཤད་པ་དེ་དག་ཇི་ལྟ་བ་དེ་བཞིན་ནོ།།

གཉིས་པ་བྱིན་རླབས་དང་ཡོན་ཏན་བསྟན་པ་ནི།

དེ་ལ་སོགས་པའི། ཞེས་པ་ནས། སྨན་གྱི་མཆོག་ཏུ་གྲགས། །ཞེས་པའི་བར་གྱིས་བསྟན་ཏེ།

དེ་ལ་སོགས་པའི་རྒྱལ་བ་རྣམས། །རང་བྱུང་རྗེས་གནས་འབྱུང་བཅས་རྣམས། །ཚུལ་མཐུན་གཅིག་པར་གྱུར་པ་ཡི། །སྐུ་གདུང་ས་བོན་བྱིན་རླབས་ཀྱིས། །ཡོན་ཏན་ཆ་ལས་ཅིར་འཕེལ་བ། །འཛམ་གླིང་ས་སྟེངས་ཁྱབ་པར་སྣང་། །གདུང་ལས་བྱུང་ཕྱིར་སྲ་མཁྲེགས་ཟླུམ། །ཐ་སྙད་རྡོ་རྗེ་རབ་ཏུ་གྲགས། །གང་བུ་ཟུར་གསུམ་ཏིལ་གང་འདྲ། །གཞོན་ཚེ་མར་རམ་འོ་མར་སྣང་། །ནར་སོན་སྨིན་བཏགས་སྲ་ཞིང་མཁྲེགས། །ཙ་ན་ཀ་ཡི་འབྲུ་བཞིན་དུ། །དཀར་ལ་རྩན་དམར་ཁ་དོག་གསལ། །ཟོས་པའི་ཡོན་ཏན་བསམ་མི་ཁྱབ།།

བདུད་རྩི་སྨན་གྱི་མཆོག་ཏུ་གྲགས།།

དེ་ལ་སོགས་པའི་སྙེགས་སྡུད་ཀྱི་རྒྱལ་བ་རྣམས་ནི་ཐུབ་པའི་དབང་པོ་ཡན་ཆད་དང་མ་འོངས་པ་སྟེ་སྔ་མར་རང་བྱུང་བའི་འོད་སྲུང་ལ་སོགས་པ་དང༌། རྗེས་ཐོག་ཏུ་ད་ལྟ་གནས་པ་རྫོགས་ནས་འབྱུང་བའི་བྱམས་པ་དང༌། དེ་ནས་སེང་གེ་ལ་སོགས་པ་དང་བཅས་པ་རྣམས་ཀུན་གྱི་སྐུ་གདུང་ནི་ཚུལ་མཐུན་ཞིང་གཅིག་པར་གྱུར་པ་ཡི་ཤ་རི་རམ་དུ་སྣང་བས་ཐ་དད་མེད་པའོ། །དེ་མི་ཡུལ་དུ་ཇི་ལྟར་འཕེལ་བ་ནི། སྐུ་གདུང་དེའི་ས་བོན་གྱི་བྱིན་རླབས་ཀྱིས། གདུང་གི་ཡོན་ཏན་གྱི་ཆ་ལས་བདུད་རྩིར་འཕེལ་བ་ནི་ལྷོའི་འཛམ་བུའི་གླིང་གི་ས་ཁམས་ཀུན་ཏུ་ཁྱབ་པར་སྣང་སྟེ་རྒྱུ་གདུང་གི་བྱིན་རླབས་ལས་བྱུང་བའི་ཕྱིར་ན་ངོ་བོ་སྲ་ཞིང་མཁྲེགས་ལ་དབྱིབས་ཟླུམ་པོ་ཉིད་དེ། མིང་དུ་ཐ་སྐར་རྡོ་རྗེར་རབ་ཏུ་གྲགས་ཞིང་དབྱིབས་དང་ཆེ་ཆུང་དང་ཁ་དོག་གི་ཚུལ་ཡང་ལྒང་བུ་ཟུར་གསུམ་ཏིལ་གྱི་ལྒང་བུ་དང་འདྲ་ལ། སྨིན་ལུགས་གཞོན་པའི་ཚེ་མར་རམ་འོ་མར་སྣང་ལ། ནར་སོན་པར་སྨིན་པའི་རྟགས་སྲ་ཞིང་མཁྲེགས་པར་འགྱུར་ཏེ། ཚད་ཙ་ན་ཀ་ཡི་འབྲུ་བཞིན་དུ་དཀར་ལ་ཙན་ཙམ་དམར་བས་ཁ་དོག་གསལ་ཞིང་བཟང་བའོ། །དེ་ཉིད་བསྒྲུབས་ནས་ཟོས་པའི་ཡོན་ཏན་བསམ་གྱིས་མི་ཁྱབ་པ་འབྱུང་སྟེ། ལུས་སྲ་བ་སོགས་བདུད་རྩི་སྨན་གྱི་མཆོག་ཏུ་གྲགས་ཤིང་གྲུབ་པའོ།།

གསུམ་པ་རིག་འཛིན་དང་བྱང་ཆུབ་སེམས་དཔའ་དག་པ་ལ་སྣང་བ་ནི།

དེ་བཞིན་རིགས་འཛིན། ཞེས་པ་ནས། མ་དག་ཚུལ་ལ་སྦྱོར། །ཞེས་པའི་བར་གྱིས་བསྟན་ཏེ།

དེ་བཞིན་རིག་འཛིན་སེམས་དཔའ་རྣམས། །མི་ཡི་ལུས་སུ་སྤྲུལ་པ་དང་། །གང་ཟག་ས་པ་ཆོས་མིག་ལྡན། །བསོད་ནམས་དཔལ་ཞིང་དག་པ་དག །སྡོང་བུ་སྙིང་པོར་སྦྱང་ཕྱི་ན། །སྐལ་བ་ཅན་ལ་སྣང་བ་ཡིན། །ལ་ལ་དག་ལ་ཤ་རི་རམ། །ལ་ལ་དག་ལ་རིང་བསྲེལ་སྐུ། །སྐལ་ངན་དག་ལ་སྣང་མི་འགྱུར། །ལ་ལ་སྣང་བར་གྱུར་ན་ཡང་། །སྦྱོར་བ་དག་ན་ཡུན་དུ་བརྟག །མ་དག་ནུབ་ཅིང་འབྲོས་པར་འགྱུར། །ཡིད་དུ་འོང་དང་མི་འོང་བའི། །འབྱུང་བའི་ལྟས་ནི་སྟོན་པར་བྱེད། །ཡོད་པ་རྟག་པ་མ་ཡིན་ལ། །མེད་པ་བརླག་པར་ཡོངས་མི་འགྱུར། །རྣལ་འབྱོར་ལས་དང་འབྱོར་པ་རྣམས། །དག་དང་མ་དག་ཚུལ་ལ་སྦྱོར།།

རྒྱལ་བའི་རྗེས་སུ་འཚོབ་པ་ལའང་སྣང་བའི་ཕྱིར་བཤད་པ་དེ་བཞིན་དུ་རིགས་འཛིན་རྣམས་དང་བྱང་ཆུབ་སེམས་དཔའ་རྣམས། མི་ཡི་ལུས་སུ་སྤྲུལ་པ་དང་། གང་ཟག་ས་པ་ཆོས་མིག་ལྡན་པའི་ཤེས་རབ་ཀྱི་སྤྱན་ཅན་དང༌། བསོད་ནམས་བསགས་༼༢༢༦༽པའི་དཔལ་གྱིས་ཞིང་དག་པར་གྱུར་པ་དག་ཀྱང༌། སྐུ་འདས་པའི་ཚེ་སྡོང་བུ་སྙིང་པོར་བཅས་ཏེ་ཕུང་པོ་ལྔ་ཞུགས་ལ་ལེགས་པར་སྦྱངས་པའི་ཕྱི་ན་འབྱུང་ཞིང་སྐལ་པ་ཅན་ལ་སྣང་བ་ནི། ལ་ལ་དག་ལ་གདུང་ཤ་རི་རམ་དང༌། ལ་ལ་དག་ལ་རིང་བསྲེལ་དང་སྐུ་ལ་སོགས་པའོ། །དེ་དག་རྙེད་པར་དཀའ་བའི་ཕྱིར་སྐལ་བ་ངན་པ་ཕྱོགས་གཅིག་དག་ལ་སྣང་ཞིང་མཐོང་བར་མི་འགྱུར་རོ། །གལ་ཏེ་ལ་ལ་ཞིག་ལས་དག་ནས་སྣང་བར་གྱུར་ན་ཡང་འཕྲལ་དུ་སྒོ་གསུམ་གྱི་སྦྱོར་བ་དག་ན་སྤྱོད་ཡུལ་དུའང་ཡུན་ཅི་ཙམ་དུ་བཞག་པར་རྟག་ཏུ་སྡོད་ལ། འཕྲལ་སྤྱོད་མ་དག་ན་ནུབ་ཅིང་གཞན་དུ་འབྲོས་ཏེ་མི་སྣང་བར་འགྱུར་རོ། །དེ་ཉིད་ཇི་ལྟ་བུའི་དབང་ལས་གྱུར་ཞེ་ན། རྣལ་འབྱོར་པ་དེ་ལ་ཡིད་དུ་འོང་བ་དང་མི་འོང་བའི་སྐྱོན་ཡོན་འབྱུང་བའི་ལྟས་ནི་སོ་སོར་སྟོན་པའི་སྔ་ལྟས་ཀྱི་དབང་སྟེ་དབྱིབས་དང་ཁ་དོག་འགྱུར་བ་དང་། སྣང་མི་སྣང་དུ་འགྱུར་བར་བྱེད་དོ། །འོན་ཀྱང་སྐུ་གདུང་ནི་ཆོས་ཉིད་རྟོགས་པའི་བྱིན་རླབས་ཀྱི་རྟགས་ཡིན་པའི་ཕྱིར། དེའི་མཚན་ཉིད་ཀྱང༌། སྣོད་ན་འདུག་པའི་ཡོད་པ་རྟག་པ་ཐེར་ཟུག་མ་ཡིན་ལ། མེད་ལ་ངོ་བོ་ཆད་པས་གཏན་དུ་བརླག་པར་ཡང་ཡོང་ཡེ་མི་འགྱུར་བས་རྣལ་འབྱོར་པས་ལས་དང་སྦྱོར་བ་རྣམས་དག་ན་མང་དུ་འཕེལ་ལ་བརྟན་པ་དང༌། མ་དག་ན་ཉུང་ཞིང་འགྲིབ་པའི་ཚུལ་ལ་སྦྱོར་ཏེ་དེ་ལྟར་ཤེས་པའི་རྟགས་ཡིན་པས་དག་ན་སྤེལ་ལ་མ་དག་ན་སྦྱོང་ངོ༌།།

བཞི་པ་གདུང་གི་ཁྱད་པར་བཤད་པ་ནི།

དེ་ཡང་བསོད་ནམས། ཞེས་པ་ནས། ལྕགས་ཀྱི་གཏུན་གྱིས་ཡང་མི་ཚོགས། །ཞེས་པའི་བར་གྱིས་བསྟན་ཏེ།

དེ་ཡང་བསོད་ནམས་དག་པ་ཡིས། །གང་ལམ་རྒྱ་ཆེར་མོས་པ་དང་། །རྣལ་འབྱོར་རྩེ་གཅིག་རྟག་བཏུད་ན། །རྡོ་རྗེས་སྦྲེལ་དང་ལས་མཐུན་ན། །རྒྱུད་རྣམས་ཡོངས་སུ་དག་ལ་འབབ། །དེ་ཡང་ཁྱད་པར་རིམ་པས་ནི། །རྒྱལ་བའི་སྐུ་གདུང་ཤ་རི་རམ། །ཞིང་ཁམས་ཀུན་ཏུ་ཁྱབ་པས་ནི། །མགར་དང་བཟོས་ནི་བཟླུམས་པ་བཞིན། །བྱས་པ་མེད་པས་སྣང་བ་དག །དཀར་འཚེར་མདོག་གསལ་འཛག་འདྲ་བ། །བཙན་མར་མདངས་སུ་གསལ་བ་ཡི། །ནམ་མཁའ་གང་བར་ཆར་བཞིན་འབབ། །རིགས་འཛིན་སེམས་དཔའ་སྤྲུལ་པའི་གདུང་། །དཀར་གསལ་འགའ་འགའ་ཙམ་དུ་འབྱུང་། །གང་ཟག་ས་པའི་རྟགས་ཆེན་ནི། །མདོག་མཉམ་གཅིག་གསུམ་གཉིས་གསུམ་གཅིག །ལ་ལར་ལྔ་འམ་དགུ་འབྱུང་ཞིང་། །ཡོན་ཏན་དེ་ནི་དེ་ལྟར་རོ། །དེ་ཡང་སྲ་མཁྲེགས་རྡོ་རྗེ་འདྲ།།

ལྕགས་ཀྱི་གཏུན་གྱིས་ཡོང་མི་ཚོགས།།

དེས་ན་དག་པ་ལས་འབྱུང་བའི་ཕྱིར། གདུང་དེ་ཡང་སྔ་མར་བསོད་ནམས་དྲི་མ་མེད་པར་བསགས་ཏེ་བསྒོམ་པ་ལས་བྱུང་བའི་དངོས་པོས་དག་པ་ཡིས། སྐྱེས་བུ་གང་དག་ཐེག་པ་ཆེན་པོའི་ལམ་ཟབ་ཅིང་རྒྱ་ཆེར་མོས་ཤིང་དད་པ་དང༌། རྣལ་འབྱོར་གྱི་དོན་ལ་རྩེ་གཅིག་ཏུ་དམིགས་པ་བཏུད་པའི་ཏིང་ངེ་འཛིན་མི་འགྱུར་བར་བསྒོམ་ན། རྒྱལ་བའི་སྐུ་གསུང་ཐུགས་ཀྱི་རྡོ་རྗེས་ངང་དང་མི་ཕྱེད་པར་སྦྲེལ་བ་དང་ལས་དང་འབྲས་བུ་མཐུན་པ་མི་འགལ་བས་ན། ཞེན་པ་གཉིས་ཀྱི་རྒྱུད་རྣམས་ཡོངས་སུ་དག་པ་ལ་ཡང་གདུང་འབབ་ཅིང་འབྱུང༌ངོ་། །གྲངས་དང་ཚད་བསྟན་པའི་ཕྱིར། དེ་ཡང་རྒྱལ་བ་དང་རིག་འཛིན་གྱི་ཁྱད་པར་རིམ་པས་བསྟན་ཏེ་གང་ཟག་གི་ཆ་ཡིས་དབྱེ་བ་ནི། རྒྱལ་བའི་སྐུ་གདུང་ཤ་རི་རམ་ཉིད། ཞིང་ཁམས་ཀུན་ཏུ་ཁྱབ་པར་འབྱུང་བ་ནི། དཔེར་ན་མགར་བ་དང་བཟོས་ནི་དབྱིབས་ཟླུམས་པར་བྱས་པ་བཞིན་དུ། དོན་ལ་༼༢༢༧༽བྱས་པ་མེད་པ་ལས་སྣང་བ་དག་ཀྱང༌། ཁ་དོག་དཀར་འཚེར་མདོག་གསལ་ཞིང་འོད་འཛག་པ་འདྲ་བ་ཙན་དམར་གྱི་མདངས་སུ་གསལ་བ་ཡི་རྣམ་པར་སྣང་ནས་ནམ་མཁའ་གང་བ་ཆར་བཞིན་དུ་འབབ་བོ། །གཞན་རིགས་འཛིན་སེམས་དཔའ་སྤྲུལ་པའི་གདུང་ནི། མདོག་དཀར་གསལ་གྲངས་འགའ་འགའ་ཙམ་དུ་འབྱུང་ལ། གང་ཟག་ས་པའི་རྟགས་ཆེན་པོ་ནི། མདོག་སྔ་མ་དང་མཉམ་ལ་གྲངས་ནི་གཅིག་གམ་གསུམ་མམ་གཉིས་སམ་གསུམ་དང་གཅིག་ནི་བཞི་ཡིན་ལ། ལ་ལར་ལྔའམ་ཁ་ཅིག་ལ་བཅུ་འབྱུང་ཞིང༌། གདུང་གི་ཡོན་ཏན་དེ་ནི་བཤད་པ་དེ་ལྟར་དང་ཚུལ་འདི་ལྟར་འགྱུར་རོ། །དེ་ཡང་སྲ་ཞིང་མཁྲེགས་པ་རྡོ་རྗེ་དང་འདྲ་བར་ལྕགས་ཀྱི་གཏུན་གྱིས་ཡང་མི་ཚོགས་པ་ཉིད་ཡིན་ནོ།།

ལྔ་པ་ཕེབས་པའི་ཡོན་ཏན་བསྟན་པ་ནི།

འདི་དག་ཕེབས་པའི། ཞེས་པ་ནས། ཡོན་ཏན་དེ་དག་གོ །ཞེས་པའི་བར་གྱིས་བསྟན་ཏེ།

འདི་དག་འབེབས་པའི་ཡོན་ཏན་ཡང་། །གང་དང་གང་དུ་བབས་པ་ཡི། །ཡུལ་ཁམས་དེ་དག་ཐམས་ཅད་དུ། །ནད་དང་མི་ངས་བགེགས་རྣམས་ཞི། །གནོད་སྦྱིན་སྲིན་པོ་མ་རུངས་པ། །དྲག་པོ་གཏུམ་པོའམ་ལྷན་ནེར་འགྱུར། །རྒྱལ་པོ་འཁྲུགས་དང་ཁམས་འཁྲུགས་དང་། །ཡུལ་ཁམས་འཁྲུགས་པའང་ཞི་བར་འགྱུར། །འབྲས་བུ་ལོ་ཏོག་འཕེལ་སྨིན་ཅིང་། །ཡིད་དུ་འོང་བ་ཐམས་ཅད་འབྱུང་། །ཡུལ་དེའི་དམངས་དང་རྒྱལ་པོ་ཡི། །ས་བོན་ཐམས་ཅད་བུ་ཕོར་འགྱུར། །བདེར་བཙས་མཚན་ལྡན་རིགས་མཐོ་ཞིང་། །བུ་ཕོ་ཀུན་ཀྱང་འབྱུང་བར་འགྱུར། །འདི་དག་སུ་ལ་འཆང་བ་རྣམས། །རིགས་འཛིན་ས་དང་སྐལ་བ་མཉམ། །འཇིག་རྟེན་འདི་ཡི་བསོད་ནམས་ཀྱང་། །འཁོར་ལོས་སྒྱུར་རྒྱལ་དག་དང་མཉམ། །དེ་ཡི་དགོངས་པ་ཀུན་ཏུ་འགྲུབ། །ཚེ་དང་སྐོངས་དང་ལས་འགྲུབ་འགྱུར། །ཕྱིན་ཆད་བླ་མེད་བྱང་ཆུབ་ཀྱི། །ས་ལ་རེག་པའི་རྟགས་ཆེན་ཡིན། །གཞན་ཡང་ཡོན་ཏན་བསམ་མི་ཁྱབ། །དེ་དག་རང་གི་རང་བཞིན་དུ། །གནས་པའི་ཡོན་ཏན་དེ་དག་གོ།

ཕན་ཡོན་ནི། དེ་ལྟར་གདུང་དང་རིང་བསྲེལ་འདི་དག་ཕེབས་ཤིང་འཕེལ་བའི་ཡོན་ཏན་གྱིས་གཞན་ལ་ཕན་པ་ཡང་གང་དང་གང་དུ་བབས་པ་ཡི། ཡུལ་ཁམས་དེ་དག་ཐམས་ཅད་དུ་ནད་དང་མི་ངེས་པ་དང་བགེགས་རྣམས་ཞི་ཞིང་གནོད་སྦྱིན་དང་སྲིན་པོ་སོགས་མ་རུངས་པ་དང་འཇིགས་བྱེད་དྲག་པོ་གཏུམ་པོའང་ལྷན་ནེར་ཞི་བར་འགྱུར་ལ། རྒྱལ་པོ་འཁྲུགས་པ་དང་འབྱུང་ཁམས་འཁྲུགས་པ་དང་ཡུལ་ཁམས་འཁྲུགས་པའང་ཞི་བར་འགྱུར་ཞིང༌། འབྲས་བུ་ལོ་ཏོག་འཕེལ་བ་དང་སྨིན་ཅིང་ཡིད་དུ་འོང་བ་ཐམས་ཅད་འབྱུང་ངོ༌། །ཡུལ་དེའི་དམངས་རྣམས་དང་རྒྱལ་པོ་ཡི་ཡང་ས་བོན་ཐམས་ཅད་ཁྱེའུའམ་བུ་ཕོར་འཕེལ་བར་འགྱུར་ཏེ། བདེར་ཞེས་བདེ་བར་བཙས་ཤིང་མཚན་དང་ལྡན་ལ་རིགས་མཐོར་ཞེས་མཐོ་བར་ནི་གྱུར་བའི་བུ་ཕོ་ཀུན་ཀྱང་འབྱུང་བར་འགྱུར་རོ། །གདུང་བཅངས་པའམ་རྒྱུད་ལ་ཡོད་པའམ་བྱུང་བའི་ཡོན་ཏན་ཡང༌། འདི་དག་སུ་ལ་འཆང་བ་རྣམས་རིགས་འཛིན་གྱི་ས་དང་སྐལ་པ་མཉམ་ཞིང༌། འཇིག་རྟེན་འདི་ཡི་བསོད་ནམས་ཀྱང༌། འཁོར་ལོས་བསྒྱུར་རྒྱལ་དག་དང་མཉམ་སྟེ་དེ་ཡི་དགོས་པ་ཕུན་སུམ་ཚོགས་པའི་དགོངས་པའི་དོན་བཟང་བ་ཀུན་ཏུ་འགྲུབ་ལ། ཚེ་རིང་བ་དང་དགོས་འདོད་སྐོངས་པ་དང་ལས་རྣམས་འགྲུབ་པར་འགྱུར་རོ། །དེ་ནས་ཕྱིན་ཆད་བླ་ན་མེད་པའི་བྱང་ཆུབ་ཀྱི་ས་ལ་རེག་པའི་རྟགས་ཆེན་པོའང་ཡིན་ནོ། །གཞན་ཡང་ཡོན་ཏན་བསམ་གྱིས་མི་ཁྱབ་པ་དེ་ལྟ་བུའི་ཚུལ་དག་འབྱུང་སྟེ་གདུང་དང་རིང་བསྲེལ་རང་གི་རང་བཞིན་དུ་གནས་པའི་ཡོན་ཏན་འབྱུང་ཚུལ་དེ་དག་གོ།

གཉིས་པ་གདུང་བསྒྲུབ་པའི་ཐབས་བཤད་པ་ལ་གཉིས་ཏེ། ཡོན་ཏན་འབྱུང་ཚུལ། བསྒྲུབ་པའི་༼༢༢༨༽ཐབས་བསྟན་པའོ། །དང་པོ་ནི།

བསྒྲུབས་ན་ཡོན་ཏན། ཞེས་པ་ནས། སྦྱངས་ན་མེད་མི་སྲིད། །ཅེས་པའི་བར་གྱིས་བསྟན་ཏེ།

བསྒྲུབས་ན་ཡོན་ཏན་བསམ་མི་ཁྱབ། །སེམས་ཅན་རྣམ་པ་ཐམས་ཅད་ལའང་།།

བྱང་ཆུབ་སྙིང་པོ་ཡོད་པས་ན། །མེ་ཡི་ལས་ཀྱི་བྱ་བ་ཡི། །ལྔ་ཕུང་སྦྱངས་ན་མེས་མི་སྲིད།།

དེ་ཉིད་སྒྲུབ་པ་གང་སྙམ་པ་ལ། སྤྱིར་གདུང་བསྒྲུབས་ན་བསྒྲུབ་པའི་ཡོན་ཏན་བསམ་གྱིས་མི་ཁྱབ་ཅིང་ཚད་མེད་པས་བསྒྲུབ་པའང༌། འགྲོ་དྲུག་གི་སེམས་ཅན་གྱི་རྣམ་པ་ཐམས་ཅད་ལའང༌། བྱང་ཆུབ་སྙིང་པོ་འབྲས་བུའི་ངོ་བོར་གནས་པ་དེ་ཉིད་ཡོད་པས། དེ་ཉིད་རྩོལ་བ་ཙམ་གྱི་རྒྱུ་ཡིན་ཏེ། དེའི་ཕྱིར་བཤད་པ་བཞིན་དུ་མེ་ཡི་ལས་ཀྱི་བྱ་བ་ཡིས་ལྔ་ཕུང་གང་སྦྱངས་ན་ཡང་གདུང་རེ་རེ་མེད་ཅིང་མི་འབྱུང་བ་མི་སྲིད་དོ། །དེས་ན་ལྷ་རྗེ་ཟུར་ཆུང་གིས་རྒྱ་བོར་བྱེའུ་ཤི་བ་བླུག་མེར་བསྲེགས་པས་བྱང་ཆུབ་སྙིང་པོར་གྲུབ་པའི་རྟགས་མང་དུ་བྱུང་སྐད་དོ།།

གཉིས་པ་བསྒྲུབ་པའི་ཐབས་བསྟན་པ་ལ་དྲུག་སྟེ། བསྙེན་པ་བཤད་པ། ཉེ་བའི་བསྙེན་པ་དང་སྒྲུབ་པ་ཐུན་མོང་དུ་བསྟན་པ། གྲུབ་པའི་རྟགས་བཤད་པ། བསྒྲུབ་པ་ཆེན་པོར་དངོས་གྲུབ་བླང་བ། མཆོད་པ་ཡོན་ཏན་དང་བཅས་པ། དེ་ཉིད་བསྒྲུབ་རྫས་སུ་བཅངས་པའོ། །དང་པོ་ནི།

འདི་དག་བསྒྲུབ་པར། ཞེས་པ་ནས། གའུའི་ནང་དུ་བཙའ། །ཞེས་པའི་བར་གྱིས་བསྟན་ཏེ།

འདི་དག་བསྒྲུབ་པ་བྱ་བ་ཡང་། །ཤེལ་གྱི་ཟ་མ་ཏོག་ནང་དུ།།

བསྡུས་ཏེ་ཕྱག་རྒྱའི་རྒྱས་བཏབ་ནས། །ཤེལ་གྱི་ག་འུའི་ནང་དུ་བཙལ།།

དེ་ལྟར་གང་བྱུང་བ་དེ་ལ་བརྟེན་ཏེ་འདི་དག་བསྒྲུབ་པར་བྱ་བ་ཡང༌། ཤེལ་སྣོད་ཀྱི་ཟ་མ་ཏོག་གི་ནང་དུ་བསྡུས་ནས་ལེགས་པར་བཅུགས་ཏེ་རྡོ་རྗེ་རྒྱ་གྲམ་གྱི་ཕྱག་རྒྱའི་དངོས་སུ་རྒྱས་བཏབ་ལ་ཁ་བཅད་ནས་བཞག་གོ །གདུང་གཅིག་པོ་དེ་ཡང་དེ་ལྟར་ཤེལ་གྱི་གའུའི་ནང་དུ་བཙའ་ལ་སྟེགས་བུ་ལ་བཞག་པའོ།།

གཉིས་པ་ཉེ་བའི་བསྙེན་པ་དང་སྒྲུབ་པ་ཐུན་མོང་དུ་བསྟན་པ་ནི།

བསྒྲུབ་པས་དེ་ལ། ཞེས་པ་ནས། བར་ཆད་མེད་པར་བཟླས། ཞེས་པའི་བར་གྱིས་བསྟན་ཏེ།

བསྒྲུབས་ནས་དེ་ལ་སྨོན་ལམ་དང་། །སྒྲིབ་སྦྱང་གསོལ་ཀ་འཕོྲ་འདུ་བྱ། །འཕྲོ་འདུ་བྱ་བའི་ཆོ་ག་ཡང་།།

ནམ་མཁའ་གང་བའི་ཤ་རི་རམ། །ཞིང་ཁམས་གང་བའི་རྒྱལ་བ་ལས། །ཆར་གྱི་རྒྱུན་བཞིན་དེ་ལ་དབབ།།

རྩེ་གཅིག་བཟླས་པའི་གསུང་གི་གདུང་། །མཧཱ་ཤ་རི་རམ་གྱི་ལི་ཧཱུཾ། །གྲངས་མེད་བར་ཆད་མེད་པར་བཟླས།།

དེ་ནས་བསྒྲུབ་པ་པོས་འདུན་པས་དེ་ལ་གང་འདོད་པའི་སྨོན་ལམ་གདབ་པ་དང་སྒྲིབ་པ་སྦྱོང་བའི་བཤགས་པ་དང༌། འདོད་པའི་དོན་ལ་གསོལ་བ་གདབ་པ་བྱས་ལ་དེ་ནས་ཏིང་ངེ་འཛིན་གྱི་ངང་ནས་བཟླས་པའི་འཕྲོ་འདུ་བྱའོ། །དེའང་བདག་རིགས་ཀྱི་སྐུར་གསལ་བས་འཕྲོ་འདུ་བྱ་བའི་ཆོ་ག་ཡང་སྔགས་བཟླས་ཙམ་ན་གདུང་གི་འོད་ཟེར་གྱིས་ནམ་མཁའ་གང་བའི་ཤ་རི་རམ་མང་པོ་ཞིང་ཁམས་རབ་འབྱམས་གང་བའི་ཕྱོགས་བཅུའི་རྒྱལ་བ་ཇི་སྙེད་པ་ལས་བྱུང་བའི་གདུང་བསྡུས་ལ་ཆར་གྱི་རྒྱུན་བཞིན་དུ་གའུ་དེ་ལ་དབབ་པར་བྱའོ། །དེ་ཚེ་རྩེ་གཅིག་ཏུ་བཟླས་པ་གསུང་གི་གདུང་སྔགས་རྒྱུན་དུ་བཟླ་བ་ནི། མ་ཧ་ཤ་རི་རམ་གི་ལི་ཧཱུྃ། ཞེས་པ་སྟེ། དང་པོ་ལྔ་པའི་ཐ་མ་བཞག །དེ་འོག་བདུན་པའི་བཞི་པའོ། །དེ་འོག་བདུན་པའི་དང་པོ་སྟེ། །དེ་འོག་དབྱངས་ཀྱི་བདུན་པ་བཞག །དེ་འོག་ཀ་ལི་༼༢༢༩༽དྲུག་གཉིས་པ། །ལྔ་པའི་ཐ་མ་སྦྱར་བའོ། །དེ་འོག་ཀཱ་ལི་གསུམ་པ་ལ། །དབྱངས་ཀྱི་གསུམ་པས་སྟེང་ནས་བརྒྱན། །དེ་འོག་དབྱངས་ཀྱི་དགུ་པ་བཞག །ཐ་མ་ཐུགས་དང་ལྡན་པའོ། །གྲངས་མེད་བར་ཆད་མེད་པར་བཟླས། །ཞེས་སོ། །སྔགས་འདི་ལ་དཔེ་རྙིང་ལ་ལ་དང་སྤར་མ་ན། མ་ཧཱ་ཤ་རི་རམ་གྱི་ལི་ཧཱུྃ། ཞེས་ཀྱང་བཞུགས་སོ། །དེ་ལྟར་གྲངས་ནི་ཚད་མེད་པར་རྟགས་ཐོན་ཐོན་དུ་བཟླ་ཞིང་འཕྲོ་འདུ་བར་ཆད་པ་མེད་པར་བཟླ་བར་བྱའོ།།

གསུམ་པ་གྲུབ་པའི་རྟགས་བཤད་པ་ནི།

མཆོག་ཏུ་གསལ་ཞིང༌། ཞེས་པ་ནས། གྲངས་འགས་འཕེལ་བར་འགྱུར། །ཞེས་པའི་བར་གྱིས་བསྟན་ཏེ།

མཆོག་ཏུ་གསལ་ཞིང་འཚེར་བ་དང་། །འོད་ཀྱི་ཟེར་ཕྲེང་ཉི་ཟེར་བཞིན། །ཟ་ཟི་བྲང་བྲེང་སྣང་བར་འགྱུར།།

ཟ་མ་ཏོག་གི་ཕྱི་རོལ་ན། །བསལ་བ་དེ་ལ་འབྱུང་བར་འགྱུར། །འགུལ་ཞིང་མང་པོར་འཕེལ་བ་དང་།།

རྒྱལ་བ་སེམས་དཔའི་རིགས་འཛིན་གྱི། །གཟུགས་བརྙན་ཤེལ་དང་དེ་ལས་ནི།།

གསལ་བར་བདག་ལ་སྟོན་པར་འགྱུར། །དང་པོ་སྡོད་དེ་ཁེངས་པ་ཡིན།།

གཉིས་པ་ཕྱེད་དམ་བརྒྱད་རྩ་བརྒྱད། །ཐ་མའང་གྲངས་འགས་འཕེལ་བར་འགྱུར།།

རྟགས་ཇི་ལྟ་བུ་འབྱུང་སྙམ་པ་ལ། གདུང་ཕྱི་རོལ་ནས་མཆོག་ཏུ་གསལ་ཞིང་འཚེར་བར་མཐོང་བ་དང༌། འོད་ཀྱི་ཟེར་ཕྲེང་ཉི་ཟེར་བཞིན་དུ་ཟ་ཟི་དང་བྲང་བྲེང་དུ་སྣང་བར་འགྱུར་བར་ཟ་མ་ཏོག་གི་ཕྱི་རོལ་ནས་ཀྱང་གསལ་བར་མངོན་པ་དེ་ཉིད་ལས་འབྱུང་བར་འགྱུར་རོ། །དེ་བཞིན་དུ་གདུང་འགུལ་ཞིང་དང་པོ་གཅིག་ལས་གྲངས་མང་པོར་འཕེལ་བ་དང༌། རྒྱལ་བ་རྫོགས་པའི་སངས་རྒྱས་དང༌། བྱང་ཆུབ་སེམས་དཔའ་དང་རིག་འཛིན་རྣམས་ཀྱི་སྐུའི་གཟུགས་བརྙན་ཤེལ་གྱི་ཟ་མ་ཏོག་དང་གདུང་གི་སྣོད་བཅུད་དེ་གཉིས་ལས་ནི་གསལ་བར་སྣང་ཞིང་བདག་ལ་ཞལ་སྟོན་པར་འགྱུར་རོ། །རྟགས་དང་པོ་རབ་གྭའུའི་སྣོད་དེ་ཁེངས་པ་ཡིན་ལ། གཉིས་པ་འབྲིང་སྣོད་ཕྱེད་ཙམ་ཁེངས་པ་དང༌། བརྒྱ་རྩ་བརྒྱད་དུ་འཕེལ་བའོ། །ཐ་མའང་གྲངས་འགས་འཕེལ་བར་འགྱུར་པ་ནི་ངེས་པར་འབྱུང་ངོ༌།།

བཞི་པ་བསྒྲུབ་པ་ཆེན་པོར་དངོས་གྲུབ་བླང་བ་ནི།

དེ་དག་སྒྲུབ་པའི། ཞེས་པ་ནས། ཆེ་ལྟར་འགྲུབ་པར་འགྱུར། །ཞེས་པའི་བར་གྱིས་བསྟན་ཏེ།

དེ་དག་འགྲུབ་པའི་རྟགས་ཆེན་ཏེ། །དེ་ཚེ་དངོས་གྲུབ་བླངས་བར་བྱ། །ཐོབ་པའི་ཡོན་ཏན་བསམ་མི་ཁྱབ།། ཚེ་འདིར་རིགས་འཛིན་ས་ལ་གནས། །རྒྱལ་བ་དག་དང་མཉམ་པར་འགྱུར། །ཞར་ལས་བྱུང་བའི་ཡོན་ཏན་ཡང་།།

འགྲོ་བ་ཀུན་གྱི་དོན་སྤྱོད་པ། །སེམས་དཔའ་ཆེ་ལྟར་གྲུབ་པར་འགྱུར།།

དེ་དག་ནི་གྲུབ་པའི་རྟགས་ཆེན་པོ་ཉིད་དེ། དེ་ཡི་ཚེ་འོད་དེ་བདག་གི་ཐུགས་ལ་བསྡུས་ལ་དངོས་གྲུབ་བླང་བར་བྱའོ། །དངོས་གྲུབ་ཐོབ་པའི་ཡོན་ཏན་གང་སྙམ་པ་ལ། ཐོབ་པའི་ཡོན་ཏན་ནི་བསམ་གྱིས་མི་ཁྱབ་སྟེ། ཚེ་འདིར་རིག་པ་འཛིན་པའི་ས་ལ་གནས་ཤིང་རིམ་གྱིས་རྒྱལ་བ་དག་དང་མཉམ་པར་འགྱུར་ལ། ཞར་ལས་བྱུང་བའི་ཡོན་ཏན་ཡང༌། འགྲོ་བ་སེམས་ཅན་ཀུན་གྱི་དོན་སྤྱོད་པའི་མཛད་པ་བྱང་ཆུབ་སེམས་དཔའ་ཆེ་རྣམས་དང་མཚུངས་པ་ལྟར་འགྲུབ་པར་འགྱུར་བའོ།།

ལྔ་པ་མཆོད་པ་ཡོན་ཏན་དང་བཅས་པ་ནི།

རྒྱུན་དུ་དེ་ལ། ཞེས་པ་ནས། འདོད་པ་ཐམས་ཅད་སྐོངས། །ཞེས་པའི་བར་གྱིས་བསྟན་ཏེ།

རྒྱུན་དུ་དེ་ལ་མཆོད་དགོས་ཏེ། །མཆོད་ན་ཡོན་ཏན་དམ་པ་འབྱུང་། །མཆོད་པར་བྱ་བའི་ཆོ་ག་ཡང་།།

སྒྲིབ་སྦྱངས་བསོད་ནམས་དཔུང་བསྐྱེད་དེ། །རང་རྒྱུད་དག་པར་བྱས་ནས་ནི། །ཟླ་བ་དུས་ནི་ཐམས་ཅད་ཀྱི།། བཅུ་དྲུག་ཆ་ལ་རྫོགས་པའི་ཚེ། །བདག་ཉིད་གཅིག་པུ་སེམས་ཡུལ་དུ། །གྱུར་བར་བྱས་ནས་མཆོད་པ་ནི།།

ཟ་མ་ཏོག་དང་བཅས་པ་དག །རྒྱལ་མཚན་རྩེ་མོ་བཏགས་བྱས་ཏེ། །ཇི་ལྟར་འདོད་པར་སྨོན་ལམ་བཏབ།།

དེས་ནི་འདོད་པ་ཐམས་ཅད་བསྐོངས།།

དམ་ཚིག་ཉམས་མ་ཉམས་བརྟགས་ཤིང་བསྐང་བའི་ཕྱིར་རྒྱུན་དུ་དེ་ལྟར་གྲུབ་པའི་གདུང་དེ་ལ་མཆོད་པར་བྱེད་དགོས་ཏེ། མཆོད་ན་ཡོན་༼༢༣༠༽ཏན་དམ་པ་མང་པོ་འབྱུང་བས་སོ། །ཇི་ལྟར་མཆོད་པར་བྱ་བའི་ཐབས་ཀྱི་ཆོ་ག་ཡང་སྔོན་དུ་སྒྲིབ་པ་སྦྱངས་ཤིང་བཤགས་པ་དང་བསོད་ནམས་ཀྱི་དཔུང་བསྐྱེད་དེ། རང་གི་རྒྱུད་དག་པར་བྱས་ནས་ནི། ཟླ་བའི་དུས་ནི་ཐམས་ཅད་ཀྱི་ཡང་ཚེས་བཅུ་དྲུག་གི་ཆ་ལ་བབ་སྟེ་ཟླ་བ་ཡོངས་སུ་རྫོགས་པའི་ཚེ་ན། བདག་ཉིད་གཅིག་པུ་སེམས་དམིགས་པའི་ཡུལ་ལ་རྩེ་གཅིག་ཏུ་གྱུར་བར་བྱས་ནས་མཆོད་པ་ནི། ཟ་མ་ཏོག་གདུང་དང་བཅས་པ་དག་རྒྱལ་མཚན་གྱི་རྩེ་མོར་བཏགས་པར་བྱས་ཏེ། མཆོད་པ་སྣ་ཚོགས་པས་མཆོད་ཅིང་ཇི་ལྟར་འདོད་པར་སྨོན་ལམ་གདབ་པར་བྱའོ། །དེ་ལྟར་མཆོད་པ་དེས་ནི་འདོད་པ་ཐམས་ཅད་སྐོངས་ཤིང་དོན་ཀུན་འགྲུབ་པར་འགྱུར་རོ།།

དྲུག་པ་དེ་ཉིད་བསྒྲུབ་རྫས་སུ་བཅངས་པ་ནི།

དེ་ནི་རྣལ་འབྱོར། ཞེས་པ་ནས། མེད་དུ་མི་རུང་ངོ་། །ཞེས་པའི་བར་གྱིས་བསྟན་ཏེ།

དེ་ནི་རྣལ་འབྱོར་སྐལ་ཅན་གྱི། །ཡིད་བཞིན་ནོར་བུ་རིན་པོ་ཆེ།།

རྣལ་འབྱོར་བསྒྲུབ་པའི་རྫས་མཆོག་ཏུ། །མིང་གིས་མེད་དུ་མི་རུང་ངོ་།།

དེ་ལྟར་གདུང་དེ་ནི་རྣལ་འབྱོར་པ་སྐལ་ལྡན་གྱི། དཔེ་ཡིད་བཞིན་གྱི་ནོར་བུ་རིན་པོ་ཆེ་ལྟ་བུར་རྣལ་འབྱོར་སྒྲུབ་པའི་དམ་རྫས་ཀྱི་མཆོག་ཏུ་སྤྱོད་ཅིང་ལེགས་པར་བཅངས་ན་འདོད་པ་ཐམས་ཅད་འབྱུང་བའི་ཕྱིར་དགོས་པ་ཁྱད་པར་དུ་འཕགས་པའི་མིང་གིས་གདུང་རེ་མེད་དུ་མི་རུང་བ་ལྟ་བུར་སྣང་ངོ༌།།

གསུམ་པ་ཐབས་ཀྱི་སྤྱོད་པའི་མཇུག་སྡུད་ནི།

ཇི་ལྟར་རོ་དག ཅེས་པ་ནས། རྨད་བྱུང་དམ་པའོ། །ཞེས་པའི་བར་གྱིས་བསྟན་ཏེ།

ཇི་ལྟར་རོ་དག་གསེར་འགྱུར་དང་། །དེ་བཞིན་མེ་ཡིས་བསྲེགས་སྦྱངས་བཞིན། །དངོས་པོ་སྤྱོད་པ་ཇི་སྙེད་པ།།

དེ་ཉིད་དམ་པ་ལས་མི་གཡོ། །དེ་ལ་སོགས་པ་མཐའ་ཡས་སྤྱོད། །དངོས་པོ་གཞི་ལ་གནས་སྤྱོད་པ།།

རྡོ་རྗེ་སེམས་དཔའི་ཆོས་ཉིད་དེ། །སྤྱོད་པ་རྨད་བྱུང་དམ་པའོ།།

སྤྱོད་པའི་གྲངས་ནི་བཤད་པ་ལྟར། ཇི་ལྟར་རོ་ལངས་དག་གསེར་དུ་འགྱུར་བར་བསྒྲུབ་པ་དང༌། རྐང་མགྱོགས་དང༌། གོ་མཚོན་དུ་བསྒྲུབ་པ་དང༌། དེ་བཞིན་དུ་ལྔ་ཕུང་མེ་ཡིས་བསྲེགས་སྦྱངས་ལ་སོགས་པ་བཞིན་དུ་དངོས་པོར་སྤྱོད་པ་ཇི་སྙེད་པ་ལ་སྤྱད་ཀྱང༌། དེ་ཁོ་ན་ཉིད་ཀྱི་དམ་ཚིག་དམ་པ་ཡིན་པ་ལས་མི་གཡོ་བས་ཇི་ལྟར་སྤྱད་ཀྱང་སྐྱོན་མེད་དེ། དེས་ན་དེ་ལ་སོགས་པ་མཐའ་ཡས་པའི་སྤྱོད་པ་མཆོག་ཀུན་གྱིས་ཤིག་པའོ། །རྟོག་པ་གསོ་བ། ཤི་བ་སློང་བ། རྟོག་པའི་ཟུག་རྔུ་སྦྱོང་བ། མཚན་མའི་རྒྱུད་སྦྱོང་བ་བཞིའམ། བཤད་པའི་འཁོར་བའི་དངོས་པོ་བཞི་ལ་གནས་ཤིང་སྤྱོད་ལ་མི་འཛིན་པ་ནི། རྡོ་རྗེ་སེམས་དཔའི་དེ་ཁོ་ན་ཉིད་རྒྱལ་བའི་ཐུགས་ཀྱི་ཆོས་ཉིད་དམ་པ་ཡིན་པའི་ཕྱིར་དེ་ལྟར་སྤྱོད་པ་ཉིད་ནི་རྨད་དུ་བྱུང་བའི་སྤྱོད་པ་དམ་པའི་ཕུལ་དུ་གྱུར་པ་ཡང་དག་པའོ།།

གསུམ་པ་གཅེས་པར་གདམས་པ་ནི།

ཇི་ལྟར་གླང་པོ། ཞེས་པ་ནས། ཀླུང་དུ་གྱུར་པ་གཅེས། །ཞེས་པའི་བར་གྱིས་བསྟན་ཏེ།

ཇི་ལྟར་གླང་པོ་ཆུར་འཇུག་པ། །ཐོགས་ཆགས་འཇིགས་པ་ཡོང་མེད་ལྟར། །དགའ་བའི་ལོངས་སྤྱོད་བྲོད་ཚུལ་གྱིས། །མི་ལྡོག་ཕ་རོལ་ཕྱིན་པ་ལྟར། །རྣལ་འབྱོར་ངེས་པར་སྤྱོད་པ་ཡང་། །བརྟུལ་ཞུགས་རྒྱ་མཚོའི་ཆུར་འཇུག་པ། །རྩལ་ཆེན་སྦྱོང་བའི་བྲོད་ཚུལ་གྱིས། །ཐོགས་ཆགས་མེད་པར་ལ་དོར་བའོ། །སྤྱོད་པ་བླང་བར་བྱ་བའི་ཐབས།། གོམས་པར་ཀློང་དུ་གྱུར་པ་གཅེས།།

ལ་སྤྱོད་པས་དོར་བའི་དཔེ་གང་ཞེ་ན། དཔེ་ཇི་ལྟར་ན་གླང་པོ་ཆེན་པོ་ཆུར་འཇུག་པ་ན། ཚམ་ཚོམ་༼༢༣༡༽གྱི་ཆགས་ཐོགས་དང་འཇིགས་པ་ཡོང་ཡེ་མེད་པར་ཚད་པས་གདུང་བས་ཆུར་དགའ་བའི་འཇུག་ཅིང་ལོངས་སྤྱོད་པ་ལ་བྲོད་པའི་ཚུལ་གྱིས་ཚུར་ལ་མི་ལྡོག་པར་ཆུའི་ཕ་རོལ་ཏུ་ཕྱིན་པ་ལྟར། དོན་ཡང༌། རྣལ་འབྱོར་དམ་པས་གསང་བ་ཟབ་མོའི་སྤྱོད་པའི་བསླབ་རིམ་ལ་ངེས་པར་སྤྱོད་པ་ཡང་མཉམ་ཉིད་གསང་བའི་བརྟུལ་ཞུགས་ཀྱི་རྒྱ་མཚོའི་ཆུར་འཇུག་པ་ལ་རྟོགས་པའི་ཤེས་རབ་ཀྱི་རྩལ་ཆེན་པོ་སྦྱོང་བའི་ཕྱིར་དོན་གྱི་བོགས་འདོན་ལ་བྲོད་པའི་ཚུལ་གྱིས་ཐོགས་ཆགས་གང་ཡང་མེད་པར་ལ་དོར་བར་བྱེད་པའོ། །དེས་ན་བསླབ་པའི་མཐའ་དམ་པ་སྤྱོད་པ་བརླང་པོ་ལ་དོན་ཕུལ་དུ་བྱུང་བར་སྤྱད་པར་བྱ་བའི་ཐབས་འདི་ལ་གོམས་པ་ཀླུང་དུ་གྱུར་བར་བྱེད་པ་ནི་ཤིན་ཏུ་གཅེས་པ་ཉིད་དོ། །ཞེས་གདམས་པར་མཛད་དོ།།

བཞི་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་ལ་དོར་བར་ཤེས་པར་བྱའོ།།

གྲོགས་པོ་དག བཤད་པ་དེ་དག་ནི། སྤྱོད་པས་ལ་དོར་བར་བསླབ་པའི་ཚུལ་མ་ནོར་བར་བགྲོས་པར་ཤེས་པར་བྱའོ། །ཞེས་བཀའ་སྩལ་པ་ཉིད་དོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྣལ་འབྱོར་སྤྱོད་འཇུག་གི་ལེའུ་སྟེ་བདུན་ཅུ་གཅིག་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྣལ་འབྱོར་དམ་པའི་རྗེས་སུ་སྤྱོད་པས་ལ་དོར་ཏེ་འཇུག་ཐབས་མཆོག་གི་བསླབ་པ་བསྟན་པའི་ལེའུ་ཞེས་བྱ་སྟེ་བདུན་ཅུ་རྩ་གཅིག་པ་ཉིད་རྣམ་པར་འགྲེལ་ཏེ་བཤད་པའོ།། །།

ལེའུ་དོན་གཉིས་པ་ཐེ་ཚོམ་ཡོངས་སུ་གཅོད་པ།

༈ བདུན་པ་ཐག་ལྟ་བས་གཅད་པ་ཁྱུང་ཆེན་པོ་ནམ་མཁའ་ལ་ལྡིང་བ་ལྟར་བཤད་པ་ལ་བཞི་སྟེ། ཉེ་བར་བསྟན་པ། རྒྱས་པར་བཤད་པ། གཅེས་པར་གདམས་པ། ཞབས་བསྡུ་བའོ། །དང་པོ་ནི།

དེ་ནས་ཡང་། ཞེས་པ་ནས། དེ་ཁོ་ན་ཉིད་དོ། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས། དམན་པ་དམ་པ་རྣམས་ལ་སྨྲས་པ། ཀྱེ་གྲོགས་པོ་དག

གང་ས་གཅད་པར་བྱ་བ་ནི་འདི་ལྟ་སྟེ། དགོངས་པ་དམ་དེ་ཁོ་ན་ཉིད་དོ།།

ལེའུ་འདིས་ངེས་དོན་སྟོན་ནོ། །ཐག་ལྟ་བས་བཅད་པ་གང་སྙམ་པ་ལ། དེ་ནས་ཡང་སྟོན་པ་གསང་བ་པའི་བདག་པོས། སྤྱོད་པ་མི་འཆིང་བའི་ལྟ་བ་རྗེས་ཐོགས་སུ་བསྟན་པའི་ཕྱིར། གྲོགས་ཀྱི་སེམས་དཔའ་ལུས་དམན་པ་ཅན་གྱི་དམ་པ་རྣམས་ལ་སྨྲས་པ། ཀྱེ་གྲོགས་པོ་དག ཅེས་བོས་ནས། གང་དྲི་མ་ཐམས་ཅད་དང་བྲལ་བའི་ས་ཡི་རྩེ་མོར་ཕྱིན་པར་བྱེད་པའི་ཐབས་ཀྱི་སྙིང་པོ་ལྟ་བས་ཐག་བཅད་པར་བྱ་བ་ནི། ཉེ་བར་བསྟན་པ་འདི་ལྟ་སྟེ། ལྟ་བའི་ངོ་བོ་གང་ཡིན་པ་ནི། དགོངས་པ་དམ་པ་སེམས་ཀྱི་ཆོས་ཉིད་ཇི་བཞིན་པའི་དེ་ཁོ་ན་ཉིད་མཐོང་བའི་ཤེས་རབ་ཀྱི་སྤྱན་དག་པ་ཉིད་དོ།།

གཉིས་པ་རྒྱས་པར་བཤད་པ་ལ་བཞི་སྟེ། དེ་ཁོ་ན་ཉིད་ལ་ཐམས་ཅད་འདུས་པར་ཐག་བཅད་པ། དེ་ལྟར་གཅིག་ཆོད་དུ་རྟོགས་པའི་ཡོན་ཏན་༼༢༣༢༽བསྟན་པ། རིམ་གྱིས་པ་ལ་མ་ངེས་པའི་འཇིགས་སྐྱོན་ཡོད་ཚུལ་བཤད་པ། གཞི་ཇི་བཞིན་དུ་ཐག་ཆོད་པ་རང་གི་ངོ་བོ་བསྟན་པའོ། །དང་པོ་ལ་གཉིས་ཏེ། དེ་ཁོ་ན་ཉིད་ལ་བསླབ་པ་ཀུན་འདུས་པར་དམ་བཅའ་བ། དེ་ཉིད་གཏན་ཚིགས་ཀྱིས་ངེས་ཚུལ་བསྟན་པའོ། །དང་པོ་ནི།

དེ་ཅིའི་ཕྱིར་ཞེ་ན། ཞེས་པ་ནས། རྒྱལ་བ་མཐོང་བར་འགྱུར་རོ། །ཞེས་པའི་བར་གྱིས་བསྟན་ཏེ།

དེ་ཅིའི་ཕྱིར་ཞེ་ན། དགོངས་པ་དམ་པ་དེ་ཁོ་ན་ཉིད་གཅིག་བསླབས་པས། བསམ་གྱིས་མི་ཁྱབ་པའི་ཆོས་ལ་བསླབ་པའོ། །དེ་ཁོ་ན་ཉིད་གཅིག་ལ་མཁས་པས། བསམ་གྱིས་མི་ཁྱབ་པ་ལ་མཁས་པའོ། །དེ་ཁོ་ན་ཉིད་ལ་བསྒོམས་ན། བསམ་གྱིས་མི་ཁྱབ་པ་ལ་བསྒོམས་པའོ། །དེ་ཁོ་ན་ཉིད་དེ་ལས་མ་འདས་ན། བསམ་གྱིས་མི་ཁྱབ་པའི་དམ་པ་བསྲུངས་པའོ། །དེ་ཁོ་ན་ཉིད་དེ་ལ་ཞུགས་ན། བསམ་གྱིས་མི་ཁྱབ་པའི་སྒོར་ཞུགས་པའོ། །དེ་ཁོ་ན་ཉིད་དེ་ལ་སྤྱོད་ན། བསམ་གྱིས་མི་ཁྱབ་པའི་ཡོ་བྱད་ལ་སྤྱོད་པའོ། །དེ་ཁོ་ན་ཉིད་དེ་མངོན་དུ་བྱས་ན། བསམ་གྱིས་མི་ཁྱབ་པའི་ལས་རྒྱ་མཚོ་ཉིད་མངོན་དུ་བྱས་པའོ། །དེ་ཁོ་ན་ཉིད་དེ་མ་ནོར་བར་བསྟན་ན། ཆོས་ཀྱི་སྒོ་དཔག་ཏུ་མེད་པ་བསྟན་པའོ། །དེ་ཁོ་ན་ཉིད་དེ་ཕྱིན་ཅི་མ་ལོག་པར་ཐོས་ན། བསམ་གྱིས་མི་ཁྱབ་པའི་ཆོས་ཀྱི་སྒོ་ཐོས་པའོ། །དེ་ཁོ་ན་ཉིད་དེ་མངོན་དུ་འགྱུར་ན། དཔག་ཏུ་མེད་པའི་རྒྱལ་བ་མཐོང་བའོ།།

དེའི་ཡོན་ཏན་གྱི་གཏན་ཚིགས་ཀྱིས་མཆོག་ཏུ་བསྟན་པའི་ཕྱིར། དེ་ལྟར་དམ་བཅའ་བར་བྱེད་པ་དེ་ཅིའི་ཕྱིར་ཞེ་ན། སྦྱོར་ལམ་ལྟ་བུར། དགོངས་པ་དམ་པ་མ་ནོར་མ་བཅོས་མི་འགྱུར་བའི་དེ་ཁོ་ན་ཉིད་གཅིག་ལ་བསླབ་པ་འདི་ནི་ཐམས་ཅད་ཀྱི་རྩ་བར་གྱུར་པས། འདི་ཉིད་ཆུབ་པར་བྱས་ན། བརྗོད་བྱ་ངོ་བོ་དང་རྣམ་གྲངས་བསམ་གྱིས་མི་ཁྱབ། རྗོད་བྱེད་ཐེག་པ་རིམ་དགུས་ཆོས་ཚུལ་བསམ་གྱིས་མི་ཁྱབ། གང་དེས་དོན་མཚོན་པའི་སྒོ་ཡང་བསམ་གྱིས་མི་ཁྱབ་པར་གྱུར་པའི་ཆོས་ཐམས་ཅད་ལ་བསླབ་པ་ཉིད་ལས་བྱ་བ་གཞན་མེད་པས་ན་རིམ་པ་དབང་གིས་བགྲོད་པའང་འདི་ལ་འདུས་པའོ། །མཐོང་ལམ་ལྟ་བུར། དགོངས་པ་དེ་ཁོ་ན་ཉིད་གཅིག་པོ་འདི་ལ་མཁས་ཤིང་འདིའི་དོན་ཇི་ལྟ་བར་རིག་ན། བསམ་གྱིས་མི་ཁྱབ་པའི་ཆོས་ཀྱི་རྣམ་པ་སྤྱི་དང་རང་གི་མཚན་ཉིད་ཐམས་ཅད་མ་འདྲེས་པར་ལྷུན་རྫོགས་སུ་གསལ་ཏེ་དོན་ཀུན་ལ་མཁས་པས་ན། དེ་ལས་ཕུལ་དུ་དབྱུང་དུ་མེད་པའི་ཕྱིར་ཕུལ་དུ་མཁས་པས་དབྱུང་བའང་འདི་ལ་འདུས་པའོ། །སྒོམ་ལམ་ལྟ་བུར། དགོངས་པ་དེ་ཁོ་ན་ཉིད་མ་ནོར་བའི་ངང་དེ་ལ་གོམས་པར་བྱས་ན། སྒོམ་པ་གཞན་ཐམས་ཅད་འདིའི་ཡན་ལག་ཡིན་པས། འདིའི་དོན་ལ་གོམས་པ་ཁོ་ནས། བསམ་གྱིས་མི་ཁྱབ་པའི་ཆོས་ཀྱི་དོན་ཀུན་ལ་གོམས་པ་ཉིད་ལས་གཞན་ཞིག་ལ་གོམས་པར་བྱར་མེད་པས་ཉམས་སུ་ཏིང་ངེ་འཛིན་གྱིས་བླང་བའང་འདི་ལ་འདུས་པའོ། །དེ་ཁོ་ན་ཉིད་དུ་རིག་པ་ཀློང་གདལ་བ་དེ་ལས་མ་འདས་ན་ཉམས་པ་ཀ་ནས་དག་པས་བསམ་གྱིས་མི་ཁྱབ་པའི་དམ་པ་བསྲུངས་པའང་དེ་ལས་འདར་མེད་པས་གཞི་དམ་ཚིག་གིས་གཟུང་བའང་འདི་ལ་འདུ་བའོ། །དེ་ཁོ་ན་ཉིད་གཉིས་སུ་མེད་པ་དེ་ལ་བློ་འཇུག་པ་མེད་པར་ཞུགས་ན་ཐམས་ཅད་དང་རིག་པ་ཐ་མི་དད་ཅིང་འཇུག་སྒོ་ཀུན་གྱི་རྩ་བར་གྱུར་པས་བསམ་གྱིས་མི་ཁྱབ་པའི་ཆོས་ཀྱི་སྒོར་ཞུགས་པའང་དེ་ལས་མེད་པས་དོན་མན་ངག་གིས་བསྒྲུབ་པའང་འདི་ལ་འདུས་པའོ། །དེ་ཁོ་ན་ཉིད་དེ་ལ་རིག་པ་གཉིས་མེད་དུ་རོལ་པས་སྤྱོད་ན། བསམ་གྱིས་མི་ཁྱབ་པའི་ཡོ་བྱད་ལ་༼༢༣༣༽སྤྱད་དོ་ཅོག་ཐམས་ཅད་ཆོས་ཉིད་ཀྱི་མཛད་པ་འཆིང་གྲོལ་མེད་པའི་དོན་དུ་འགྱུར་བས་ལ་སྤྱོད་པས་དོར་བའང་འདི་ལ་འདུས་པའོ། མཐར་ལམ་ལྟ་བུར་དེ་ཁོ་ན་ཉིད་བཞིན་དུ་རིག་པ་སོན་པར་གྱུར་ཏེ་མངོན་དུ་བྱས་ན། བསམ་གྱིས་མི་ཁྱབ་པའི་ལས་རྒྱ་མཚོ་སྙེད་ཀྱི་བསྒྲུབ་པར་བྱ་བ་དང་བྱས་པ་ཐམས་ཅད་ཀྱི་མཆོག་ཏུ་གྱུར་ཅིང་གཞན་བཙལ་རྒྱུ་མེད་པས་མདོ་དོན་གཅིག་ཏུ་བསྡུ་བའང་འདི་ཉིད་དུ་འདུས་པའོ། །དེ་ཁོ་ན་ཉིད་ཆོས་ཉིད་ཇི་བཞིན་པའི་དོན་དེ་ཉིད་མ་ནོར་བར་གཞན་ལ་བསྟན་ན། ཆོས་ཀྱི་སྒོ་མོ་དཔག་ཏུ་མེད་པ་ཀུན་གྱི་གྲུབ་མཐའི་དོན་ཡིན་པས་ཐམས་ཅད་ཀུན་བསྟན་པ་ཉིད་དེ། དེ་ལས་བསྟན་བྱ་གཞན་མེད་པས་སྒོ་ཀུན་ནས་བསྡུར་བའང་འདི་ལ་འདུས་པའོ། །ཚོགས་ལམ་ལྟ་བུར། དེ་ཁོ་ན་ཉིད་ཀྱི་དོན་དེ་ཉིད་མ་ནོར་མ་བསླད་དེ་ཕྱིན་ཅི་མ་ལོག་པར་ཐོས་ན། དེ་ལས་བསམ་གྱིས་མི་ཁྱབ་པའི་ཆོས་ཀྱི་སྒོ་ཐོས་པར་བྱ་བའི་དོན་ལྷག་མ་གཞན་མེད་པས་རྒྱུད་ཐོས་པས་དགྲོལ་བའང་འདི་ལ་འདུས་པའོ། །མཐར་ལམ་རྫོགས་པ་ལྟ་བུར། དེ་ཁོ་ན་ཉིད་དེ་ཤེས་རབ་ཀྱིས་སྤྱན་གྱིས་ཅིར་ཡང་མ་མཐོང་བར་མཐོང་སྟེ་མངོན་དུ་གྱུར་ན། དཔག་ཏུ་མེད་པའི་རྒྱལ་བ་རིལ་གྱི་དངོས་གཞི་ཡིན་པས་ཀུན་གྱི་ཞལ་མཐོང་བའི་མཆོག་ཏུ་ངེས་པས་ཐག་ལྟ་བས་གཅད་པའང་འདི་ལ་འདུས་པར་འགྱུར་རོ།།

གཉིས་པ་དེ་ཉིད་གཏན་ཚིགས་ཀྱིས་ངེས་ཚུལ་བསྟན་པ་ནི།

དེ་ཅིའི་ཕྱིར་ཞེ་ན། ཞེས་པ་ནས། མེད་པའི་ཕྱིར་རོ། །ཞེས་པའི་བར་གྱིས་བསྟན་ཏེ།

དེ་ཅིའི་ཕྱིར་ཞེ་ན། དེ་དག་ཐམས་ཅད་ཀྱི་བཅུད་དུ་བྱ་བ་འམ།

སྙིང་པོར་བྱ་བ་ནི་དེ་ཁོ་ན་ཉིད་དེ། དེ་ལས་མེད་པའི་ཕྱིར་རོ།།

དེ་གཏན་ཚིགས་ཅིའི་ཕྱིར་ཏེ། དེ་དག་གི་དོན་ལ་ཡིད་ཆེས་པར་གང་གིས་བྱ་ཞེ་ན། དེ་ལྟར་ཡོན་ཏན་ལྔ་གཉིས་དེ་དག་ཐམས་ཅད་ཀྱི་བཅུད་དུ་བྱ་བའི་རྩ་བའམ། འབྲས་བུའི་སྙིང་པོར་བྱ་བ་ནི་དེ་ཁོ་ན་ཉིད་ལྷུན་གྱིས་གྲུབ་པ་ཉིད་དེ། དེ་ལས་གཞན་མེད་པའི་ཕྱིར། གཞན་ནི་ཡན་ལག་དང་རྒྱུ་ཙམ་ཡིན་པས། འདི་ལས་ལྷག་པའི་དོན་རྒྱལ་བས་ཀྱང་མི་རྙེད་པའི་དོན་གྱིས་གསལ་ཏེ། རྩ་རྒྱུད་ལས། སོ་སོའི་ཐེག་པའི་སྒོ་རྣམས་ལ། །འཇུག་པ་ལ་སོགས་མ་སྦྱངས་ཀྱང༌། །ཀུན་གྱི་རྩ་བ་འདིར་བཅད་པས། །གཅིག་སྟེ་ཐ་དད་ཡོངས་ཀྱིས་མེད། །ཅེས་དང༌། རང་བཞིན་མེད་པར་ཀུན་གཅིག་པའི། །བདག་མེད་ཕྱོགས་བྲལ་ལྷུན་གྱིས་གྲུབ། །གཅིག་ལས་རྣམ་གྲངས་ངང་གིས་མེད། །ཐ་སྙད་དག་པར་ཡོངས་ཆུད་ན། །ངེས་པའི་དོན་ཆེན་དེ་ཉིད་དེ། །ཐམས་ཅད་དག་པར་འགྱུར་བའོ། །བདག་དང་གཞན་དུ་མི་གཉིས་པས། བདག་ཉིད་བདག་གི་རང་བཞིན་༼༢༣༤༽ཏེ། །སངས་རྒྱས་ཞེས་བྱ་གཞན་ན་མེད། །བདག་ཉིད་ལྷུན་གྲུབ་དབང་ཕྱུག་ཆེ། །ཞེས་སོགས་གསུངས་པ་ལྟར་རོ།།

གཉིས་པ་དེ་ལྟར་གཅིག་ཆོད་དུ་རྟོགས་པའི་ཡོན་ཏན་བསྟན་པ་ནི།

གྲོགས་པོ་དག ཅེས་པ་ནས། ཅི་ལའང་བག་མི་ཚ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་བས་ན་འདི་ལྟར། དེ་བཞིན་ཉིད་ཀྱི་དོན་མཐོང་ན། །མཐོང་བ་ཐམས་ཅད་སྒྱུ་མ་ཡིན། །དེ་བཞིན་ཉིད་དུ་དེ་གནས་ན། །གནས་ཡུལ་ཐམས་ཅད་སྒྱུ་མ་ཡིན། །དེ་བཞིན་གོ་འཕང་མཆོག་འཕགས་ན། །བླ་མེད་མཐོ་བཙུན་མཐའ་དག་བརྫུན། །དེ་བཞིན་ཉིད་དུ་ངེས་ཕན་ཅད། །གང་དམན་སྤ་གོང་ཞུམ་པ་མེད། །དེ་བཞིན་ཉིད་དུ་ཐག་ཆོད་ན། །འཇིག་རྟེན་གནས་ཀྱང་ཆོས་ཀྱི་སྐུ། །དམ་པར་ངེས་ཀྱང་འཇིག་རྟེན་འཇུག །འཁོར་བའི་མཐའ་ལའང་སྐྱོ་བ་མེད། །མུ་མཐའ་ཡས་ཀྱང་གཅིག་ཏུ་རྫོགས། །བདུད་ཀྱི་ཁམས་ལ་ཉམ་མི་ང་། །མི་བཟད་ཁམས་ལ་བག་མི་ཚ། །འདོད་པའི་དངོས་པོ་དབྱིངས་སུ་སྦྱོར། །ཅིག་ཆར་ངེས་པའི་དོན་མཐོང་ན། །རིམས་ཀྱིས་སྦྱོང་བའི་བློ་བྲིད་འདྲ། །དེ་ལ་མོས་པ་ཙམ་གྱིས་ཀྱང་། །ཁམས་གསུམ་ཟིལ་གྱིས་གནོན་པར་འགྱུར། །ཀློང་དུ་གྱུར་པ་སྨོས་ཅི་དགོས། །དཔེར་ན་སེང་ཕྲུག་ཁྱུང་སྒོང་དག །མིག་མ་བྱེ་ཞིང་མཁར་བརླབས་ཀྱང་། །ཀུན་སྐྲག་སྒོ་ངའང་མཁའ་འགྲོ་ལྟར། །དེ་ཉིད་ངེས་པར་གང་གྱུར་པ། །དེ་དག་འཇིག་རྟེན་གནས་འཇུག་ཀྱང་། །གོ་འཕང་དམ་པ་དེ་ཉིད་དུ།། ངེས་པ་ཅི་ལའང་བག་མི་ཚ།།

སྟོན་མཆོག་གསང་བ་པས། གྲོགས་པོ་དག ཅེས་བོས་ནས། དམ་བཅའ་དང་གཏན་ཚིགས་དེ་བས་ན་འདི་ལྟར་བཤད་པའི་ཡོན་ཏན་གྱི་ཚུལ་དེ་བཞིན་དུ་ཡོད་པས་ན། མཐོང་ལམ་ཐོབ་ནས་ལྷུན་གྱིས་གྲུབ་པའི་དེ་བཞིན་ཉིད་ཀྱི་དོན་མཐོང་སྟེ་མངོན་སུམ་དུ་རྟོགས་ན་ཐེག་པ་འོག་མ་ལྟར་ལྟ་བ་གཞན་གྱིས་མཐོང་བ་ཐམས་ཅད་བདེ་བ་ཆེན་པོ་མ་ཡིན་པར་སྣང་བ་སྒྱུ་མ་ལྟ་བུར་ཤར་བ་ཡིན་པས་བྲི་ཏ་ཙམ་དུ་བསྟན་པ་དང༌། དེ་ནས་སྒོམ་ལམ་གྱི་དུས་སུ་ལྷུན་གྲུབ་དེ་བཞིན་ཉིད་ཀྱི་ངང་དུ་རིག་པ་དེ་ཉིད་བརྟེན་པ་མེད་པར་གནས་ན། ས་ལམ་གྱི་རིམ་པ་རྣམས་དང་གནས་ཡུལ་ཐམས་ཅད་རང་སྣང་སྒྱུ་མ་དེ་བཞིན་ཉིད་ཡིན་པ་དང༌། དེ་ནས་མཐར་ལམ་དུ་ཟིན་ཏེ་རྟོགས་པ་དེ་ཉིད་མཐར་ཐུག་པའི་གོ་འཕང་དམ་པ་མ་བསླད་པའི་དོན་དུ་རིག་པའི་རྩལ་འཕང་རྙེད་དེ་མཆོག་ཏུ་འཕགས་པར་གྱུར་ན། རྒྱུའི་ཐེག་པའི་གྲུབ་པ་བླ་ན་མེད་པའི་མཐོ་བཙུན་ཆོས་ཀྱི་སྐུ་མན་ཆད་དང༌། འཇིག་རྟེན་པའི་མཆོག་རིལ་མཐའ་དག་ཐམས་ཅད་རྫུན་པ་སྒྱུ་མ་ལྟར་མི་བདེན་པ་ཡིན་པར་རྟོགས་པའོ། །དེས་ན་རིག་པ་དེ་བཞིན་ཉིད་དུ་ལྷུན་གྱིས་གྲུབ་པ་འདི་ལ་སྤྱོད་ཡུལ་དག་པར་རྟོགས་པའི་ཡོན་ཏན་འབྱུང་བའི་གཏན་ཚིགས་བསྟན་ཏེ། རང་གི་རིག་པ་ཇི་བཞིན་པ་ལས་དེ་བཞིན་ཉིད་དུ་ངེས་པའི་གདེངས་ཚུད་དེ་མི་འགྱུར་བར་བློ་གྲོས་ལ་བརྟན་པ་ཐོབ་ཕན་ཆད། གང་ཟག་དམན་པའི་ལུས་ཅན་ཡིན་ཡང་ཆེ་ཆུང་མ་དམིགས་པས་སྤ་བཀོང་ཞིང་ཞུམ་པ་མེད་པ་དེ་རྣམས་ཀྱང་གསང་དོན་ཟབ་མོའི་བདེན་པ་མཐོང་བའི་ཡོན་ཏན་ནོ། །དེ་ཁོ་ན་ཉིད་ཇི་བཞིན་པའི་ཆོས་ཉིད་རྫོགས་པར་རྟོགས་པས་སྐྱེད་དུ་བྱ་བ་མེད་པར་ཐག་ཆོད་པར་གྱུར་ན། འཁོར་བ་མ་སྤང་བྲལ་བས་འཇིག་རྟེན་གྱི་ལུས་ན་གནས་པ་ཉིད་ཀྱང་མཐའ་ཀུན་གྲོལ་བས་ཆོས་ཀྱི་སྐུ་ཆེན་པོ་ཉིད་དུ་རང་གསལ་བའོ། །དེའི་ཕྱིར་བདག་གི་བློ་ཇི་བཞིན་པར་གནད་ཆུད་པས་དམ་པར་ངེས་ཀྱང་ཆེད་དུ་བྱ་བ་མེད་པར་ཤེས་ནས་རྩོལ་སྒྲུབ་དང་བྲལ་བཞིན་འགྲོ་དོན་མི་འདོར་ཏེ་འཇིག་རྟེན་པའི་སྤྱོད་ཡུལ་དུའང་འཇུག་ཅིང༌། བྱས་པ་ལ་བྱ་བ་དང་ངལ་དུབ་མེད་པས་འཁོར་བའི་སྲིད་པ་མཐའ་མེད་པ་སྐྱོ་བ་མེད་པ་ཡིད་མི་འབྱུང་བ་དང༌། ཇི་སྙེད་པའི་ལས་ཚུལ་མུ་མཐའ་ཡས་པ་ཐམས་ཅད་ཀུན་ཀྱང་དོན་དེ་བཞིན་ཉིད་གཅིག་ཏུ་རྫོགས་༼༢༣༥༽པར་རྟོགས་པའོ། །ལྟ་བའི་ཉམས་རྟགས་ནི། རང་གི་སེམས་ཀྱི་དཀྱིལ་འཁོར་འོད་གསལ་བའི་ངང་དུ་རྟོགས་པའི་སྐྱེས་བུ་ལ་ནི། མ་བསྒོམས་ཀྱང་བདུད་དང་སྲིན་པོའི་གནསཀྱི་ཁམས་ལ་ཡང་ཉམ་མི་ང་བས་འཇིགས་པ་མེད་ཅིང༌། མི་བཟད་དམྱལ་བའི་ཁམས་ལ་ཡང་བག་མི་ཚ་བས་འཇིག་རྟེན་ལ་ཡང་གང་ཡང་མེད་པའོ། །དེས་འདོད་པའི་ཡོན་ཏན་གྱི་དངོས་པོ་གང་ལ་སྤྱད་ཀྱང༌། སྤྱད་པ་ཐམས་ཅད་དབྱིངས་སུ་སྦྱོར་ཏེ་ཟིན་ཆགས་ཀྱི་ནད་མེད་པའོ། །དེ་བས་ན་བརྒྱུད་ནས་མི་ཤེས་པ་གཅིག་ཤེས་པར་བྱ་བ་དང་བྲལ་བའི་གསང་སྔགས་གཅིག་ཆར་དུ་ངེས་པའི་དོན་བཤད་པ་བཞིན་དུ་མཐོང་ཞིང་རྟོགས་ན། དབུ་མ་སོགས་ཐ་སྙད་ཀྱི་བྱ་བས་རིམས་ཀྱི་སྦྱོང་བའི་གྲུབ་པའི་མཐའ་རྟོགས་པ་དག་ནི། བྲི་ཏ་བས་བསླུ་བྲིད་མཁན་དང་འདྲ་བ་ལྟ་བུའི་ཕྱིར་རྟོགས་པ་མཆོག་ཏུ་ཆེ་བར་བསྙད་དོ། །དེ་ལྟ་བུའི་དོན་དེ་མ་རྟོགས་ཀྱང་མོས་པའི་ཡོན་ཏན་ནི། དེ་ཁོ་ན་ཉིད་གཅིག་ཆར་བའི་དོན་དེ་ལ་གདེང་མ་རྙེད་ཀྱང༌། རྒྱུན་དུ་མོས་པ་ཙམ་གྱིས་ཀྱང་དེ་མ་ཐག་པར་འཕྲད་པ་དང༌། ཁམས་གསུམ་གྱི་ས་བོན་རྣམས་ལྡང་མི་ནུས་པར་ཟིལ་གྱིས་གནོན་པར་འགྱུར་བའི་ཕྱིར་ཡོན་ཏན་མཆོག་ཏུ་འཕགས་པ་སྟེ། དེ་བས་ན་དུས་གསུམ་དུ་ཀླུང་དུ་གྱུར་ཏེ་ལྟ་བ་རྣམ་པར་དག་པའི་དོན་དང་མ་བྲལ་བ་ནི་སྨོས་ཅི་དགོས་ཏེ་རྣམ་རྟོག་དང་ལྟ་ངན་ཟིལ་གྱིས་གནོན་པའི་ལྟ་བས་ཁྱད་པར་དུ་འཕགས་པ་སྨོས་སུའང་མེད་པའོ། །དེ་ཉིད་དཔེ་ཡིས་མཚོན་པའི་ཕྱིར། དཔེར་ན་སེང་གེའི་ཕྲུག་གུ་དང་ཁྱུང་གི་སྒོང་ང་དག སྔ་མ་མིག་མ་བྱེ་ཞིང༌། ཕྱི་མ་ནམ་མཁར་རང་རྩལ་བླངས་ཏེ་མ་ལྡིང་ཀྱང༌། སེང་ཕྲུག་མངལ་དང་བྲལ་མ་ཐག་གཅན་གཟན་ཀུན་སྐྲག་པ་དང༌། སྒོང་ངའང་ཤུན་དང་བྲལ་མ་ཐག་མཁའ་ལ་ཐོགས་པ་མེད་པར་འགྲོ་བ་ལྟར། རྣལ་འབྱོར་པ་དེ་ཁོ་ན་ཉིད་ངེས་ཏེ་ཡང་དག་པར་རྟོགས་པས་གང་ཤར་རང་གྲོལ་དུ་གྱུར་པ་དེ་དག་དམན་པའི་ལུས་དང་མ་བྲལ་བར་འཇིག་རྟེན་གྱི་གནས་སུ་འཇུག་ཀྱང༌། གོ་འཕང་དམ་པ་མཆོག་གི་ངང་རྟོགས་པ་དེ་ཉིད་དུ་བརྟན་པ་ལས་མི་འགྱུར་བར་རིགས་ངེས་པས་འཁོར་བའི་གཡང་ས་ཅི་ལའང་བག་མི་ཚ་བ་ཁོ་ནའོ།།

གསུམ་པ་རིམ་གྱིས་པ་ལ་མ་ངེས་པའི་འཇིགས་སྐྱོན་ཡོད་ཚུལ་བཤད་པ་ནི།

རིམས་ཀྱིས་མཚན་མར། ཞེས་པ་ནས། དངངས་པའི་རང་བཞིན་ནོ། །ཞེས་པའི་བར་གྱིས་བསྟན་ཏེ།

རིམས་ཀྱིས་མཚན་མར་སྤྱོད་པ་དག །མེད་དང་དམིགས་དང་མི་དམིགས་དང་།།

བསྒྲུབ་དང་བགྲོད་པར་བྱེད་པ་ཡི། །བྱེ་བྲག་མེད་པར་རྟོག་འཇུག་པ། །བླུན་པོ་དེ་དག་སྟོངས་པ་སྟེ།།

དམ་པ་ངེས་པར་ག་ལ་ཡིན། །གཅན་གཟན་ཕལ་པའི་ཕྲུག་གུ་འདྲ། །སྐྲག་ཅིང་དངངས་པའི་རང་བཞིན་ནོ།།

རིམ་གྱིས་པའི་ལྟ་བ་དག་གོལ་བའི་ཕྱིར། དེ་ལྟར་རྟོགས་པར་མི་ནུས་པར་བློ་དམན་པའི་མིའི་མཚན་ཉིད་ཅན་གང་དག་དོན་ལ་མདོངས་ཏེ་གཅིག་ཆར་མཐོང་༼༢༣༦༽བའི་མིག་དང་མི་ལྡན་པར་རིམས་ཀྱིས་འཇུག་པ་ཉན་ཐོས་རྣམས་ཡུལ་སེམས་སོ་སོར་སྣང་བ་ཀུན་རྫོབ་རྡུལ་ཙམ་དང༌། དོན་དམ་ཤེས་པ་སྐད་ཅིག་མ་རེ་རེར་ཡོད་པར་འདོད་པའི་མཚན་མར་ལྟ་བ་ལ་སྤྱོད་པ་ཅན་དང༌། རང་རྒྱལ་བ་ཡུལ་རྫུན་པ་སྒྱུ་མ་ཙམ་ལས་མེད་པར་འདོད་པ་དང༌། རྣམ་རིག་པ་ཡུལ་ཉིད་དམིགས་པའི་ཤེས་པ་རང་སྣང་བར་འདོད་པ་དང༌། དབུ་མ་པས་ཀུན་རྫོབ་སྒྱུ་མ་ཙམ་དུ་ཡུལ་སེམས་སོ་སོར་སྣང་ཡང་དམ་པར་མི་དམིགས་པར་ལྟ་བ་དང༌། བྱང་ཆུབ་དོན་དུ་གཉེར་ཏེ་ཆེད་དུ་བསྒྲུབ་པ་དང་སའི་རིམ་པར་བགྲོད་པར་བྱེད་པའི་ཀྲི་ཡོག་པ་ཡི་གྲུབ་མཐའ་ལ་གནས་པ་དེ་དག གསང་བ་ཆེན་པོའི་མན་ངག་གི་བྱེ་བྲག་མ་འདྲེས་ཡོངས་རྫོགས་ཀྱི་གསང་གནད་ཡང་དག་པར་མི་ཤེས་པས། སྟོང་པའི་ལྟ་བ་དང༌། རྟོགས་པའི་ལྟ་བ་གཉིས་ལ་བརྟེན་ནས་དོན་ཆེན་པོའི་གདེང་མེད་པར་སྟོང་རྟོག་དེས་དོན་ལ་དམིགས་ནས་འཇུག་པ་ཡི་དོན་མཆོག་མ་མཐོང་བའི་བླུན་པོ་དེ་དག་འབྲས་བུ་ཆེན་པོ་མེད་པས་སྟོངས་པ་སྟེ་རྒྱལ་བའི་གོ་འཕང་དངོས་སུ་ཐོབ་པའི་ཐབས་དམ་པར་ངེས་པ་ག་ལ་ཡིན་ཏེ་མ་ཡིན་པས་རྣམ་གྲོལ་བླ་ན་མེད་པ་མི་ཐོབ་པ་ནི་དཔེར་ན་གཅན་གཟན་ཐ་མའི་ཕྲུ་གུ་ཝ་དང་འདྲ་སྟེ། ཝ་ནི་མ་ཡང་འཇིགས་སྐྲག་དང་བཅས་ལ་བུ་ཡང་སྐྲག་ཅིང་དངངས་པའི་རང་བཞིན་ཡིན་པ་ཇི་ལྟ་བ་བཞིན་ནོ།།

བཞི་པ་གཞི་ཇི་བཞིན་དུ་ཐག་ཆོད་པ་རང་གི་ངོ་བོ་བསྟན་པ་ནི།

མཐའ་ཡས་ཇི་སྙེད། ཞེས་པ་ནས། ཉིད་དུ་ཐག་ཆོད་པའོ། །ཞེས་པའི་བར་གྱིས་བསྟན་ཏེ།

མཐའ་ཡས་ཇི་སྙེད་ཆོས་ཀུན་གྱི། །རང་བཞིན་ཇི་ལྟར་གནས་པ་བཞིན།།

མ་བཅོས་ཕྱིན་ཅི་མ་ལོག་པ། །དེ་བཞིན་ཉིད་དུ་ཐག་ཆོད་པའོ།།

རྟོགས་ཚད་རང་གི་ངོ་བོ་ནི། མཐའ་ཡས་ཤིང་ཇི་སྙེད་པར་སྣང་བའི་འཁོར་འདས་ཀྱིས་བསྡུས་པའི་ཆོས་རྣམས་ཀུན་གྱི་དེ་ཁོ་ན་ཉིད་ཀྱི་རང་བཞིན་ཇི་ལྟར་གནས་པ་བཞིན་དུ་མ་བཅོས་མ་བསླད་པར་ཕྱིན་ཅི་མ་ལོག་པར་རྟོགས་པའི་ཐབས་ཆེན་པོ་དང་ལྡན་པ་ནི། དཔེར་ན་རི་བོ་ཆེན་པོའི་ཁ་ནས་ལྷུང་ན་ལྟུང་བར་མི་བྱ་སྙམ་ཡང་ལྟུང་བ་ལྟར། ཐབས་ཆེན་པོས་གྲོལ་བར་མི་བྱ་སྙམ་ཡང་གྲོལ་བར་འགྱུར་ཏེ། གྲོལ་དུ་མེད་པར་ཐམས་ཅད་དེ་བཞིན་ཉིད་དུ་ཤེས་པ་ཉིད་འཆིང་བ་དང་བྲལ་བས་ཐག་ཆོད་པ་མཐར་ཐུག་པའོ།།

གསུམ་པ་གཅེས་པར་གདམས་པ་ནི།

ཇི་ལྟར་ཁྱུང་ཆེན། ཞེས་པ་ནས་གཅོད་པ་ངེས་པར་གཅེས། །ཞེས་པའི་བར་གྱིས་བསྟན་ཏེ།

ཇི་ལྟར་ཁྱུང་ཆེན་མཁའ་ལྡིང་བ། །འདབ་གཤོག་རྩལ་གྱིས་ནམ་འཕང་གཅོད། །རི་བྲག་ཆུ་ཀླུང་མཐའ་ཡས་ཀྱང་། །འཕུར་རླབས་འོག་ཏུ་ཀུན་ཆུད་ལྟར། །རྣལ་འབྱོར་ཆོས་ཉིད་མཁར་འགྲོ་བ། །ཐེག་པའི་གཅོད་སྒོ་མཐའ་ཡས་ཀྱང་། །ཇི་ཞིན་མ་བཅོས་དོན་གྱིས་ན། །གོ་འཕང་རླབས་ཀྱིས་ཐག་བཅད་པ། །འདི་ནི་རེ་དང་དོགས་པ་ཡི། །ཐེ་ཚོམ་གཅོད་པའི་ངེས་པ་སྟེ། །དམ་པ་ཉིད་ལ་ལྟ་བ་ཡི། །གོ་འཕང་གཅོད་པ་ངེས་པར་གཅེས།།

ཐག་ལྟ་བས་བཅད་པ་གཅེས་པར་གདམས་པའི་དཔེ་ཉེ་བར་མཚོན་པ་ཡང༌། ཇི་ལྟར་ན་ཁྱུང་ཆེན་པོ་ནམ་མཁའ་ལ་ལྡིང་བ་ཉིད། འདབ་གཤོག་གི་རྩལ་གྱིས་གནམ་འཕང་གཅོད་པས། རི་བྲག་དང་ཆུ་ཀླུང་མཐའ་ཡས་པ་ཡོད་ཀྱང༌། གཤོག་རྩལ་གྱིས་འཕུར་བའི་རླབས་འོག་ཏུ་ཀུན་ནས་༼༢༣༧༽ཆུད་པ་ལྟར། དོན་ཡང་རྣལ་འབྱོར་པ་ཆོས་ཉིད་མཉམ་པ་ཉིད་ཀྱི་ནམ་མཁའ་ལ་ལྟ་བའི་རྩལ་གྱིས་འགྲོ་བ་ཉིད། ཐེག་པའི་སྤྱོད་སྒོ་མཐའ་ཡས་པ་ཇི་སྙེད་དུ་སྣང་བ་ཀུན་ཀྱང༌། ཇི་བཞིན་མ་བཅོས་པའི་དོན་དུ་ངེས་པར་རྟོགས་པ་ཉིད་ཀྱིས་ན། མཐར་འབྲས་དམ་པའི་གོ་འཕང་ཇི་ལྟ་བར་རྟོགས་པའི་རླབས་ཀྱིས་ཐག་གཅད་པ་ཉིད་དེ། འདི་ནི་རེ་བ་དང་དོགས་པ་ཡི་དྲྭ་བར་ཆུད་པའི་ཐེ་ཚོམ་གྱི་འཕྱང་མོ་ཉུག་གཞི་མེད་དུ་གཅོད་པའི་ངེས་པ་དམ་པ་སྟེ། འདི་ལྟ་བུའི་གནས་ལུགས་དམ་པ་ཉིད་ལ་མ་ནོར་བར་ལྟ་བ་ཡི་སྙིང་པོའི་གོ་འཕང་གཅོད་པ་ནི་མཆོག་ཏུ་ངེས་པར་གཅེས་པ་ཁོ་ན་ཡིན་ནོ།།

བཞི་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། ཐོབ་པར་གྱུར་ཏོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་ས་ཡོངས་སུ་གཅོད་པར་བགྲོས་པར་ཤེས་པར་བྱའོ། །དེ་སྐད་ཅེས་སྨྲས་པས།

དམན་པ་དམ་པ་རྣམས་རེ་དོགས་མེད་པར་ཐག་ཆོད་པའི་གོ་འཕང་ཐོབ་པར་གྱུར་ཏོ།།

གྲོགས་པོ་དག་བཤད་པ་དེ་དག་ནི། ས་ཡི་རྩེ་མོར་བགྲོད་པའི་ལྟ་བས་ཐག་ཡོངས་སུ་གཅོད་པ་ཉིད་ཕྱིན་ཅི་མ་ལོག་པར་ལེགས་པར་བགྲོས་པ་ཡིན་པར་ཤེས་པར་བྱའོ། །སྟོན་པ་གསང་བ་པས། དེ་སྐད་ཅེས་སྨྲས་པས། དམན་པ་དམ་པ་རྣམས་རེ་དོགས་མེད་པར་ལྟ་བས་ཐག་ཆོད་པའི་གོ་འཕང་དམ་པ་མཐར་ཐུག་པ་ལེགས་པར་ཐོབ་པར་གྱུར་ཏོ། །འདི་ལ་ཀུན་མཁྱེན་དམ་པ་རིན་པོ་ཆེས། འོ་ན་ལྟ་བ་ལ་ལེའུ་ཞེ་དྲུག་པར་སྐོལ་མདོ་བཅུ་གཉིས་ཀྱི་སྐབས་སུ་ལྟ་བ་གཅིག་བྱུང༌། ལེའུ་རེ་གསུམ་པའི་སྔགས་ཀྱི་གཞི་བཅུའི་སྐབས་སུ་ལྟ་བ་གཅིག་བྱུང་། བསླབ་པའི་མཐའ་བཅུའི་ལེའུ་དོན་གཉིས་པ་ཐག་ལྟ་བས་གཅད་པའི་སྐབས་འདིར་ཡང་ལྟ་བ་གཅིག་བྱུང་བས་བལྡབས་སམ་སྙམ་པ་ལ། ངོ་བོ་གཅིག་ལ་མཚོན་ཚུལ་མ་འདྲེས་ཏེ། སྐོལ་མདོ་བཅུ་གཉིས་ཀྱི་སྐབས་ཀྱི་ལྟ་བ་ནི། སྔགས་ཀྱི་ཐེག་པ་གོང་འོག་ཤན་དབྱེ་བའི་ལྟ་བའོ། །གཞི་བཅུའི་ལྟ་བ་དེ་ལྟ་བ་རྟོགས་ནས་འབྲས་བུ་ཐོབ་པའི་གཞི་ཡིན་པའི་ངོས་ནས་བསྟན་པའོ། །བསླབ་པའི་མཐའ་བཅུའི་ལྟ་བ་འདི་ལམ་པའི་བསླབ་བྱའི་ངོས་ནས་བཞག་པའོ། །ཞེས་བཀའ་སྩལ་བར་མཛད་དོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

ཐེ་ཚོམ་ཡོངས་སུ་གཅོད་པའི་ལེའུ་སྟེ་བདུན་བཅུ་གཉིས་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ལྟ་བའི་གདེང་ངེས་ཏེ་རེ་དོགས་དང་ཡིན་མིན་གྱི་ཐེ་ཚོམ་ཡོངས་སུ་གཅོད་པའི་ལེའུ་ཞེས་བྱ་སྟེ། བདུན་ཅུ་རྩ་གཉིས་པ་ཉིད་གསལ་བར་བཤད་པའོ།། །།

ལེའུ་དོན་གསུམ་པ་རྣལ་འབྱོར་དབང་སྒྱུར།

༈ བརྒྱད་པ་ཉམས་སུ་ཏིང་ངེ་འཛིན་གྱིས་བླངས་པ་ཚོང་དཔོན་མཁས་པས་རྒྱ་མཚོའི་ནོར་བུ་ལོན་པ་ལྟར་བཤད་པ་ལ་བཞི་སྟེ། ཉེ་བར་བསྟན་པ། རྒྱས་པར་བཤད་པ། གཅེས་པར་གདམས་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ༼༢༣༨༽ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོས། དམན་པ་དམ་པ་རྣམས་ལ་སྨྲས་པ།

ཀྱེ་གྲོགས་པོ་དག གང་ཉམས་རྙེད་པར་བྱ་བ་ནི་འདི་ལྟ་སྟེ།

ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ཀྱང་ངེས་དོན་གཙོ་ཆེའོ། །ལྟ་བའི་དོན་ལས་སུ་རུང་བས་ཡང་དག་པའི་ས་ལ་སྦྱར་བའི་ཕྱིར། རྗེས་ཐོག་དེ་ནས་ཡང་སྟོན་པ་གསང་བ་པའི་བདག་པོས། གྲོགས་ཀྱི་འཁོར་དམན་པ་དམ་པ་རྣམས་ལ་སྨྲས་པ། ཀྱེ་གྲོགས་པོ་དག་ཅེས་བོས་ནས། གང་ཉམས་སུ་ཏིང་ངེ་འཛིན་གྱིས་བླངས་ཏེ་དགོངས་པའི་ཉམས་རྙེད་པར་བྱ་བ་ནི་ཉེ་བར་བསྟན་པ་འདི་ལྟ་སྟེ།

གཉིས་པ་རྒྱས་པར་བཤད་པ་ལ་ལྔ་སྟེ། ཏིང་ངེ་འཛིན་གྱི་དགོས་ཆེད་བསྟན་པ། གཅིག་ཆར་བའི་མི་རྟོག་པའི་ཏིང་ངེ་འཛིན་བཤད་པ། བསྒོམ་པའི་ལྟས་བསྟན་པ། མཚན་བཅས་ཀྱི་ཏིང་ངེ་འཛིན་བཤད་པ། མདོ་སེམས་སུ་འདུས་པར་བསྟན་པའོ། །དང་པོ་ལ་གཉིས་ཏེ། དོན་དུ་གཉེར་བའི་དགོས་ཆེད། གཞན་སེལ་བའི་དགོས་ཆེད་དོ། །དང་པོ་ནི།

དགོངས་པ་དམ་པ། ཞེས་པ་ནས། དམ་པའི་བསམ་གཏན་བྱ། །ཞེས་པའི་བར་གྱིས་བསྟན་ཏེ།

དགོངས་པ་དམ་པ་ཀུན་འདུས་ལ། །འཇུག་པའི་གཙོར་ནི་བསམ་གཏན་ཏེ། །འཁོར་ལོས་དབང་སྒྱུར་ཇི་བཞིན་དུ། །ཆོས་ཀུན་དབང་སྒྱུར་བསམ་གཏན་ཡིན། །རྣལ་འབྱོར་བསམ་གཏན་ཆེན་པོ་འདི། །དུག་དང་མུན་པ་གསེར་འགྱུར་བཞིན། །ཐམས་ཅད་དབང་སྒྱུར་བསམ་གཏན་ཡིན། །དེས་ན་དམ་པའི་བསམ་གཏན་བྱ།།

སྒོམ་པའི་དགོས་ཆེད་འཆད་པ་སྟེ། རྒྱལ་བ་ཐམས་ཅད་ཀྱི་དགོངས་པའི་ཞེ་ཕུགས་སུ་གྱུར་པའི་རྟོགས་པ་དམ་པ་མཐར་ཐུག་པ་ཀུན་འདུས་པའི་ལྷུན་གྱིས་གྲུབ་པའི་དོན་འདི་ལ་མི་གཉིས་པར་འཇུག་པའི་ལས་དང་ཐབས་ཀྱི་མཆོག་གམ་གཙོར་གྱུར་པ་ནི་བསམ་གཏན་ཟབ་མོའི་ཏིང་ངེ་འཛིན་བརྟན་པ་ཁོ་ན་སྟེ། དེ་ཡང་དཔེར་ན་འཁོར་ལོས་སྒྱུར་བའི་རྒྱལ་པོའི་དཔུང་བཞིའི་ཚོགས་ཐམས་ཅད་ལ། འཁོར་ལོས་དབང་སྒྱུར་བར་འགྲོ་བ་ཇི་ལྟ་བ་བཞིན་དུ། རྒྱུ་དང་འབྲས་བུའི་ཆོས་སོ་ཅོག་ཀུན་ཇི་ལྟ་བར་ཐག་ཆོད་པའི་དོན་ལ་མ་ཡེངས་པར་གནས་པའི་ཏིང་ངེ་འཛིན་གྱིས་དབང་སྒྱུར་ནས་འཐོབ་པ་ལས་ཐབས་གཞན་ཉེ་བའི་རྒྱུ་མ་ཡིན་པའི་ཕྱིར་བསམ་གཏན་ཉིད་བསྒོམ་དགོས་པ་ཡིན་ཏེ། བསླབ་པ་བཅུའི་ཡང་གཙོ་བོ་བསམ་གཏན་ཡིན་ལ། གཞན་དགུ་ནི་འཁོར་ལྟ་བུར་གྱུར་པའོ། །དེ་བས་ན་སྒོམ་པའི་ཡོན་ཏན་ནི་འདི་ལྟ་སྟེ། ཆོས་ཐམས་ཅད་རིལ་རྣལ་མ་ཡེ་ཇི་བཞིན་པའི་ངང་དུ་མི་གཉིས་པའི་དོན་འབྱོར་བར་ཤར་བའི་སྐྱེས་བུ་ནི་གནས་པ་དང༌། བྱེད་པ་གཉིས་ཀ་བསམ་གཏན་གྱི་ཡོན་ཏན་ཏེ། ཇི་བཞིན་པའི་ངོ་བོ་ཉིད་ཡུལ་དང་བྲལ་བ་ལས་ངང་གིས་མི་གཡོ་བར་མ་བཅོས་པའི་རྗེས་སུ་མཐུན་པའི་བསམ་པ་ཡང་རྟོག་རྒྱུན་མ་འགག་ལ་གཡོ་བ་མེད་པ་ནི་ལྷག་པར་ཆེན་པོ་ཞེས་པའི་མིང་ཐོབ་པས་དོན་འདི་ཉིད་མཆོག་ཏུ་ཉེ་བར་བཟུང་བའོ། །དེ་ལྟ་བུས་སྒྲིབ་པ་མ་སྤང་བྲལ་བ་ནི། དཔེར་ན་དུག་དང་མུན་པ་དང་ཟངས་ལྕགས་༼༢༣༩༽མ་བསལ་བར་སྨན་དང་མར་མེ་དང་གསེར་འགྱུར་རྩིས་དེ་ཉིད་དུ་བྱེད་པ་བཞིན། སྒོ་གསུམ་གྱི་སྒྲིབ་པ་ཕྲ་རགས་ཐམས་ཅད་མ་བསལ་བར་དེ་ཉིད་ཡེ་ཤེས་ཆེན་པོའི་འབྲས་བུར་རང་དབང་བསྒྱུར་ཏེ་འཆར་བར་བྱེད་པའི་ལས་ནི་བསམ་གཏན་གྱི་བྱེད་པ་ཡིན་པས་ཟང་ཟིང་ཕྱི་ནང་སྤང་དུ་མེད་པའི་སེམས་ཀྱིས་བོར་ལ། དོན་ཆེན་པོ་དང་ལྡན་པ་དེས་ན་དགོངས་པ་དམ་པའི་བསམ་གཏན་བྱ་བ་ལ་ཤིན་ཏུ་འབད་པར་རིགས་སོ།།

གཉིས་པ་གཞན་སེལ་བའི་དགོས་ཆེད་ནི།

གལ་ཏེ་བསམ་གཏན། ཞེས་པ་ནས། སྙིང་པོ་སྐམས་པ་ཡིན། །ཞེས་པའི་བར་གྱིས་བསྟན་ཏེ།

གལ་ཏེ་བསམ་གཏན་འདི་མེད་ན། །རྒྱ་མཚོ་འཇིངས་ཀྱི་ཕ་བོང་ལྟར།།

དཔག་ཏུ་མེད་པའི་སྒོ་སྤྱད་ཀྱང་། །དོན་མེད་སྙིང་པོར་བསྐམས་པ་ཡིན།།

འོ་ན་མ་བསྒོམ་པའི་སྐྱོན་གང་སྙམ་པ་ལ། སྙོམས་ལས་ཅན་དག་གིས་ཚིག་ལ་ཁུངས་ཕྱུངས་ཏེ་གལ་ཏེ་དོན་ཆེན་པོའི་བསམ་གཏན་འདི་ཉིད་མ་བསྒོམས་ཏེ་རྟོགས་དོན་བརྟན་པའི་གདེངས་མེད་པ་ནི། དཔེར་ན་རྒྱ་མཚོའི་འཇིང་ངམ་གཏིང་གི་ཕ་བོང་ཉིད་རླན་དང་མ་བྲལ་ན་ཡང་སྙིང་པོ་སྐམ་པར་གནས་པ་ལྟར་དུ། རྩོལ་བས་རྣམ་པར་དཀར་བའི་ལས་རྒྱ་མཚོ་ལྟ་བུ་དཔག་ཏུ་མེད་པའི་སྒོ་ལ་སྤྱད་དེ་འབད་པས་ཞུགས་ཀྱང་འཇིག་རྟེན་པའི་བདེ་བ་ཙམ་ལས་སྒྲུབ་པའི་འབྲས་བུ་བླ་ན་མེད་པའི་གོ་འཕང་མཆོག་གི་དོན་མེད་ཅིང་སྙིང་པོ་བྱང་ཆུབ་ཀྱི་མྱུ་གུ་སྐམས་པ་ཡིན་པས་དཔེ་དང་ཚུལ་མཚུངས་པའོ། །འོན་ཀྱང་རྒྱུ་ཙམ་དུ་མི་འདོད་པ་ནི་མ་ཡིན་ནོ།།

གཉིས་པ་གཅིག་ཆར་བའི་མི་རྟོག་པའི་ཏིང་ངེ་འཛིན་བཤད་པ་ལ་བརྒྱད་དེ། ཏིང་ངེ་འཛིན་གྱི་ངོ་བོ་བསྟན་པ། དེ་ལ་ཏིང་ངེ་འཛིན་གསུམ་རྫོགས་པར་བསྟན་པ། ཏིང་ངེ་འཛིན་དེའི་རང་བཞིན་བཤད་པ། གོལ་སྒྲིབ་ཐུན་མོང་བའི་སྐྱོན་བསྟན་པ། དེ་དག་བཅོས་ཐབས་ཀྱི་ངེས་པ་བཤད་པ། རིམ་གྱིས་དང་ཅིག་ཆར་བའི་ཁྱད་པར་བསྟན་པ། ཏིང་ངེ་འཛིན་དེའི་ཁྱད་པར་གྱི་སྐྱོན་བཅོས་ཐབས་ཐུན་མོང་དུ་བསྟན་པ། ཞོར་ལ་ཡོན་ཏན་གྱི་ངེས་འབྱེད་བཤད་པའོ། །དང་པོ་ནི།

རྣལ་འབྱོར་ཆེན་པོའི། ཞེས་པ་ནས། ཆོས་ཉིད་དེ་ཉིད་དོ། །ཞེས་པའི་བར་གྱིས་བསྟན་ཏེ།

རྣལ་འབྱོར་ཆེན་པོའི་བསམ་གཏན་ནི། །ཇི་བཞིན་པ་ཡི་དེ་ཉིད་ལ། །མ་བཅོས་པ་ཡི་བློ་བཞག་སྟེ།།

མ་ཡེངས་སྐྱེ་འགག་མེད་པའོ། །རྣལ་འབྱོར་དམ་པ་ཇི་བཞིན་པ། །སེམས་ཀྱི་ཆོས་ཉིད་དེ་ཉིད་དོ།།

དེ་ལྟ་བུའི་དོན་ཆེན་པོ་ལ་སྦྱོར་བའི་ཏིང་ངེ་འཛིན་གྱི་ངོ་བོ་ཉིད་གང་སྙམ་པ་ལ། ཇི་བཞིན་པའི་ངང་ལ་རྣལ་དུ་འབྱོར་ཏེ་འདུ་ཤེས་གང་དུའང་མ་ཞུགས་པའི་ཁྱད་པར་གྱིས་ཆེན་པོའི་མིང་ཐོབ་ལ། དེ་ལྟ་བུའི་བསམ་གཏན་དེའི་ངོ་བོ་ཉིད་ནི། ཆོས་རྣམས་ཀྱི་ཆོས་ཉིད་ཇི་བཞིན་པ་ཡི་དེ་ཁོ་ན་ཉིད་མ་བསླད་མ་བསྒྱུར་བའི་གསང་དོན་མཐའ་དང་ཡེ་བྲལ་བས་དེ་ཉིད་དུའང་བརྗོད་དུ་མེད་པའི་དོན་ལ་རང་རིག་པས་དེ་ལྟར་རྟོགས་ཏེ་ཇི་བཞིན་པ་དེ་ཉིད་དུ་ཐག་ཆོད་པའི་རྒྱུས། དོན་དེ་ཁོ་ན་བར་རང་རིག་པ་སྣང་བ་ལ་འདུ་ཤེས་ཅིར་ཡང་མ༼༢༤༠༽སྐྱེས་པས། རང་སྣང་མ་བཅོས་པ་ཡི་ངང་དེ་ལ་རང་གི་བསམ་པས་གང་ཡང་བཞག་པ་མེད་པར་བློ་བཞག་སྟེ་རང་གསལ་དུ་གནས་པ་ལས་མ་ཡེངས་པར་ས་ལེར་དྭངས་པའོ། །དེ་བས་ན་ཇི་ཙམ་དུ་རྩོལ་དཔྱོད་དམིགས་པ་ནི་དོན་ལ་མ་རེག་པས་ཡེངས་པ་ཞེས་བྱ་བར་ང་སྨྲའོ། །ཞེས་གནུབས་ཆེན་གྱིས་གདམས་སོ། །དེ་ལྟ་བུའི་ངང་ལ་མངོན་དུ་བྱེད་པ་དང་གསལ་དུ་རེ་བའི་སེམས་པ་མེད་པ་ནི་མཐར་འཛིན་གྱི་སྐྱེ་འགག་གིས་མ་བསླད་པས་ཡང་དག་པའི་ཤེས་རབ་སྐྱོན་མེད་པའོ། །དེ་བས་ན་འགྲེ་ལྡོག་སྤྱིའུ་ཚུགས་གར་འགྲེས་ཀྱང་སྙིང་པོ་བྱང་ཆུབ་པ་ཉིད་པས་སོ་ལ་ཉམས་སུ་དོགས་པ་དང༌། རྟོག་རྒྱུན་བྱུང་དུ་དོགས་པའང་མེད་པས་དུས་ཕྱེད་པར་ངང་གིས་གཡེང་རྨུགས་མེད་ཅིང་རིག་པའི་དོན་ལ་དམིགས་པ་དང་མི་མཐུན་པ་འགོག་པའང་མེད་དེ་དོན་མཐའ་གཉིས་བྲལ་བར་རང་གསལ་བ་ཉིད་དོ། །ཏིང་ངེ་འཛིན་གྱི་རྩ་བ་ཉེ་བར་བསྟན་པའི་ཕྱིར། སྒོམ་པའི་ངོ་བོ་ཏིང་ངེ་འཛིན་གྱི་མཆོག་རྣལ་འབྱོར་དམ་པ་ཇི་བཞིན་པ་ཡི་དེ་ཁོ་ན་ཉིད་མ་བཅོས་པ་ནི། སེམས་ཀྱི་ཆོས་ཉིད་རང་རིག་པའི་དཀྱིལ་འཁོར་འོད་གསལ་བ་དེ་ཉིད་ཁོ་ནར་གྱུར་པས་ཏིང་ངེ་འཛིན་གྱི་སྒོ་འབུམ་ཕྲག་ཀྱང་འདི་ལས་ཤར་བ་ཉིད་དོ།།

གཉིས་པ་དེ་ལ་ཏིང་ངེ་འཛིན་གསུམ་རྫོགས་པར་བསྟན་པ་ནི།

དེ་བཞིན་ཉིད་ཅེས། ཞེས་པ་ནས། འབྱུང་བའི་རྒྱུ་ཞེས་བཤད། །ཅེས་པའི་བར་གྱིས་བསྟན་ཏེ།

དེ་བཞིན་ཉིད་ཅེས་མི་དམིགས་པ། །རྩ་བའི་རྣམ་ཤེས་ཀུན་གཞི་ཉིད། །ཅི་ཕྱིར་མ་བྱས་མ་བཅོས་པས།།

རང་བྱུང་དེ་བཞིན་ཉིད་ཅེས་བཤད། །ཐམས་ཅད་ཀུན་ཏུ་སྣང་བ་ནི། །འཇུག་པའི་རྣམ་ཤེས་ཡུད་ཙམ་ཉིད།།

ཅི་ཕྱིར་ཀུན་ཏུ་སྣང་འཇུག་པས། །ཕྱི་ནང་ཀུན་ཏུ་སྣང་བར་བཤད། །རྒྱུ་ཡི་རྣམ་པར་བཀོད་པ་ནི། །འཇུག་པའི་རྣམ་ཤེས་སྒོ་ལྔ་ཉིད། །གང་བཅད་གང་གིས་རྒྱུར་བཀོད་པས། །ཐམས་ཅད་འབྱུང་བའི་རྒྱུ་ཞེས་བཤད།།

བསྐྱེད་པའི་རྣལ་འབྱོར་པ་རྣམས་ལ་བསྒོམ་པ་རྣམ་པ་གསུམ་བརྗོད་པའི་དོན་རང་ལ་རྫོགས་པ་གང་སྙམ་པ་ལ། ཐོག་མར་དེ་བཞིན་ཉིད་ཀྱི་ཏིང་ངེ་འཛིན་ཞེས་བྱ་བ་ཅིར་ཡང་མི་དམིགས་པའམ་མི་རྟོག་པ་བསྒོམ་པའང་གཞན་མ་ཡིན་ཏེ། དངོས་པོ་གཉིས་ཀྱི་གཞི་དང་རྩ་བའི་རྣམ་པར་ཤེས་པ་ཀུན་གཞི་ནི་བྱང་ཆུབ་ཀྱི་སེམས་ཉིད་དོ། །དེ་ཅི་ཡི་ཕྱིར་ཏེ་གཏན་ཚིགས་གང་གིས་ཡིད་ཆེས་པར་བྱ་ཞེ་ན། རྒྱུ་རྐྱེན་མེད་པས་མ་བྱས་པ། མཁན་པོ་དང་བྲལ་བས་མ་བཅོས་པ། རང་བཞིན་མ་འགག་པར་ཤར་བས་རང་བྱུང་བ་དང་གསུམ་གྱིས་སྤྲོས་པ་དང་བྲལ་བའི་དེ་བཞིན་ཉིད་ཅེས་པའི་མིང་འགྲུབ་པས་བསམ་པ་པོ་དང་རྗེས་སུ་མཐུན་པར་བཤད་དེ་བཀའ་སྩལ་ཏོ། །ཆོས་མཐུན་བརྩི་ནའང༌། ཀུན་གཞི་དམིགས་པ་དང་རྣམ་པ་མ་ཆད་པ་དང༌། དེ་བཞིན་ཉིད་ཀྱི་ཏིང་ངེ་འཛིན་ཡང་ཆོས་ཐམས་ཅད་ལ་ཁྱབ་ཅིང་རྣམ་པ་རྒྱ་མ་ཆད་པས་སོ། །དེ་བས་ན་ངོ་བོ་ཉིད་བསྟན་པ་དང༌། ཚོལ་བའི་ཞེན་པ་དགག་པ་དང༌། དངོས་པོ་ལ་གནས་པའི་དོན་དུ་འགྲེལ་ཏེ་འཆད་པའང་རྗེས་སུ་སྦྱར་རོ། །ཆོས་ཐམས་༼༢༤༡༽ཅད་ཀུན་ཏུ་སྣང་བའི་ཏིང་ངེ་འཛིན་རྫོགས་པ་ནི། ཡུལ་ཀུན་ལ་འཇུག་པར་བྱེད་པའི་ཡིད་ཀྱི་རྣམ་པར་ཤེས་པ་སྐད་ཅིག་ཡུད་ཙམ་དུ་མྱུར་བར་སྐྱེ་བ་ཉིད་དོ། །དེ་ཅི་ཡི་ཕྱིར་ཏེ་གཏན་ཚིགས་གང་ཞེ་ན། ཡིད་ཀྱི་རྣམ་ཤེས་ནི་ཐུན་མོང་དང་ཁྱད་པར་གྱི་ཡུལ་ཀུན་ཏུ་ཕྱི་ནང་གི་སྣང་བ་ཐམས་ཅད་ལ་གསལ་བར་འཇུག་པས། སྤྱི་དང་རང་གི་མཚན་ཉིད་ཀྱི་ཕྱི་ནང་ཀུན་ཏུ་སྣང་བའི་ཡིད་ཉིད་ཡེ་ཤེས་ཆེན་པོའི་ངོ་བོར་གསལ་བའི་ཕྱིར་ཐུགས་རྗེ་ཆེན་པོས་ཁྱབ་པར་ཤར་བའོ། །ཞེས་བཤད་ཅིང་བཀའ་སྩལ་ཏོ། །ཆོས་མཐུན་བརྩི་བའང་ཡིད་སྣ་ཚོགས་ཏེ་ཉོན་ཡིད་དང་སྒོ་ལྔའི་རྗེས་སུའང་འགྲོ་བ་བཞིན་ཀུན་ཏིང་ཡང་སྣ་ཚོགས་སྣང་བ་དང་དེ་ཏིང་གི་ཡང་རྗེས་སུ་འགྲོ་བའོ།།

རྒྱུ་ཡི་ཏིང་ངེ་འཛིན་གྱི་རྣམ་པར་བཀོད་པ་ནི། རང་ཡུལ་ལ་འཇུག་པའི་རྣམ་པ་ཤེས་པ་སྒོ་ལྔ་ཉིད་དོ། །དེ་ཅིའི་ཕྱིར་ཞེ་ན། སྒོ་ལྔས་ཡུལ་གང་བཅད་པའི་བག་ཆགས་ནི། ཀུན་གཞིའི་བག་ཆགས་གསོག་པ་གང་གི་ཡང་མིང་ཐོགས་པར་བྱེད་པའི་རྒྱུར་ཡང་བཀོད་པ་ཡིན་པས་ཕྱི་ནང་མཐོ་དམན་ཐམས་ཅད་ཀུན་འབྱུང་བའི་རྒྱུ་ཞེས་སུའང་བཤད་ཅིང་བཀའ་སྩལ་བའི་ཕྱིར་རོ། །དེ་བས་ན་ཆོས་མཐུན་པའང༌། དེ་ཉིད་ཡི་གེའི་རྣམ་པར་སྒོམ་པ་པོ་ལ་གསལ་བ་ནི། སྒོམ་པ་པོའི་རིག་པ་ཉིད་ཡི་གེར་བྱུང་བ་ཡང་ཤེས་པ་པོའི་ཡུལ་དུ་བག་ཆགས་ཉིད་སྣང་བའོ། །ཤེས་པ་གསུམ་ཁོ་ནར་ངེས་པ་གཞག་པ་ནི། བཤད་པའི་དོན་གསུམ་དང་ཆོས་མཐུན་པས་བསྙད་ཀྱི་རྒྱ་ཆད་པར་འདོད་པ་ནི་མ་ཡིན་ནོ།།

གསུམ་པ་ཏིང་ངེ་འཛིན་དེའི་རང་བཞིན་བཤད་པ་ནི།

གང་གི་དགོངས་པ། ཞེས་པ་ནས། མེད་མིན་ལས་ཀྱང་འདས། །ཞེས་པའི་བར་གྱིས་བསྟན་ཏེ།

གང་གི་དགོངས་པ་དམ་པ་ནི། །སྟོང་པ་མ་ཡིན་ཐེར་ཟུག་མིན།།

དབུ་མར་མི་དམིགས་ཀུན་རིགས་གསལ། །ཡོད་མིན་མེད་མིན་ལས་ཀྱང་འདས།།

ཏིང་ངེ་འཛིན་གྱི་རང་བཞིན་གང་སྙམ་པ་ལ། ཐེག་མཆོག་ཆེན་པོ་གང་གི་ཏིང་ངེ་འཛིན་དགོངས་པ་དམ་པ་ཁྱད་པར་ཅན་གྱི་རང་བཞིན་ནི། རིག་པ་ཇི་བཞིན་པ་ནམ་མཁའི་འོད་བཞིན་སྟོང་པ་མ་ཡིན་པར་རིལ་རང་གསལ་བ་ཉིད་དེ་ཐམས་ཅད་ཀུན་ཏུ་གསལ་བ་ཡིན་ལ། ངོ་བོ་དམིགས་སུ་མེད་པས་ཐེར་ཟུག་པའང་མིན་ཏེ་རྟག་ཆད་ལས་འདས་པ་ཁོ་ནའོ། །དེ་ལྟར་དེ་གཉིས་ཀྱི་མཐའ་མེད་པས་དབུ་མར་ཡང་ཀུན་ཏུ་མི་དམིགས་པའོ། །དེ་བས་ན་བསམ་དུ་མེད་པ་དེ་ཉིད་ཀྱང་མ་ཡིན་གཞན་པའང་མ་ཡིན་པའི་སེམས་ཉིད་མི་རྟོག་པ་ཆེན་པོར་མ་འདྲེས་རྫོགས་པར་ཀུན་རིག་ཅིང་གསལ་བའི་ཕྱིར་འོད་གསལ་རྫོགས་པ་ཆེན་པོ་ཉིད་དེ། རྟག་ཆད་དང་༼༢༤༢༽བྲལ་བའི་ཕྱིར་ཡོད་པ་དང་མེད་པས་ལས་ཀྱང་གྲོལ་ལ། ཡོད་མིན་མེད་མིན་ལས་ཀྱང་འདས་ཏེ། ཅི་ཡང་གཟུང་དུ་མེད་པའི་རང་བཞིན་ཡིན་པའི་ཕྱིར་ཏེ། འདི་གཉིས་ལས་མ་འདས་ན་དེའི་སྐྱེ་མཆེད་དུ་ལྟུང་ངོ༌།།

བཞི་པ་གོལ་སྒྲིབ་ཐུན་མོང་བའི་སྐྱོན་བསྟན་པ་ལ་བཞི་སྟེ། སྐྱེ་བོ་དང་རྒྱུའི་ཐེག་པར་གོལ་བ། མུ་སྟེགས་དང་གཟུགས་མེད་དུ་གོལ་བ། གཟུགས་ཁམས་དང་ཉན་ཐོས་སུ་གོལ་བ། གོལ་བས་མ་རྟོགས་ཀྱང་ཆོས་ཉིད་མེད་པར་མི་འགྱུར་བའོ། །དང་པོ་ནི།

གང་འདིར་ཚོར་འགྲོ། ཞེས་པ་ནས། ཕྱལ་པ་དམིགས་པ་གཅིག །ཅེས་པའི་བར་གྱིས་བསྟན་ཏེ།

གང་འདིར་ཚོར་འགྲོ་མ་རབས་དང་། །གང་འགོག་བྱིས་པའི་སྤྱོད་ཡུལ་དང་།།

འདིར་གང་ཉམས་པའི་ལོག་སྲེད་ཅན། །ཡལ་བ་ཆལ་བ་དམིགས་པ་གཅིག།

དེ་ལྟར་ཇི་བཞིན་དུ་བསྒོམ་པ་ལ་གནོད་པའི་སྐྱོན་དང་སྒྲིབ་པ་གང་སྙམ་པ་ལ། འདི་དག་ཀྱང་ལྷན་ཅིག་སྐྱེས་པའི་སྐྱོན་དང༌། རྐྱེན་གྱིས་བསླད་པའི་སྐྱོན་དང༌། ཆེད་དུ་བྱས་པའི་སྐྱོན་དུ་འགྲེལ་ཏེ་གོལ་ས་བཅུ་གཉིས་སུའང་གསུངས་སོ། །དེ་ལ་སྒོམ་པའི་སྐབས་གང་འདིར་རྣལ་འབྱོར་པ་སུ་ཡང་རུང་བ་ཞིག་ལ། བྱུང་ཚོར་གྱི་རྟོག་པ་ཕྲ་རགས་དང༌། གསལ་མི་གསལ་དང༌། ཆེ་ཆུང་དང༌། རིང་ཐུང་དང༌། མྱུར་བུལ་དུ་བྱུང་ནས་གཡེངས་པའི་རྗེས་སུ་འགྲོ་བ་ནི་སྐྱེ་བོ་མ་རབས་འཇིག་རྟེན་ཐ་མལ་པར་གོལ་བར་འགྱུར་བ་དང༌། གང་བྱུང་ཚོར་དེ་དག་སྐྱོན་དུ་བལྟས་ཏེ་འགོག་པར་བྱེད་པ་ནི་ཉན་རང་བྱིས་པའི་སྤྱོད་ཡུལ་དུ་གོལ་བས་འཛིན་ཆགས་ཀྱི་དབང་གིས་འགོག་པར་འགྱུར་ཏེ་དོན་ལ་ཤེད་མ་བྱེ་པ་དང༌། འདིར་གང་བྱིང་རྨུགས་ཀྱིས་དྲན་པ་ཉམས་པའི་དབང་གིས་འཐིབས་པར་གྱུར་བ་འབེན་ཐིམ་པའི་མདའ་ལྟ་བུ་ནི་ལོག་སྲེད་ཅན་རྒྱང་འཕེན་དང་ཕྱལ་བར་གོལ་བའོ། །སེམས་ཡན་པར་བཏང་ནས་ཡལ་བར་འཇོག་པ་དང༌། ཕྱལ་བ་དོན་མེད་པ་ནི་འཇིག་རྟེན་རང་ཀ་མར་གོལ་ཏེ་ཕྱལ་བའི་དབང་གིས་མེད་པར་འགྱུར་བའོ། །དམིགས་པ་རྩེ་གཅིག་ཏུ་འཛིན་པ་ནི་མཚན་མ་རྩེ་གཅིག་ཏུ་གོལ་བ་སྟེ། འཇིག་རྟེན་རང་གི་མཚན་མ་རྩེ་གཅིག་པའམ། སྤྱིར་དམིགས་པ་གཅིག་ལ་རྩེ་གཅིག་ཏུ་བྱེད་པའམ། ཐེར་ཟུག་གི་དབང་གིས་རྟག་པར་ཡང་འགྱུར་བའོ།།

གཉིས་པ་མུ་སྟེགས་དང་གཟུགས་མེད་དུ་གོལ་བ་ནི།

གང་འདིར་ལྟ་བས་མདོངས། ཞེས་པ་ནས། ཐག་ཏུ་ངན་འགྲོར་འགྲོ། །ཞེས་པའི་བར་གྱིས་བསྟན་ཏེ།

གང་འདིར་ལྟ་བས་མདོངས་པ་དག །བདག་ལ་རྟེན་ནས་མཐའ་བསྒྲུབ་སྟེ།།

མེད་མོས་དེར་འགྲོ་མེད་སྙམ་ནས། །དེ་མ་ཐག་ཏུ་ངན་འགྲོར་འགྲོ།།

གང་འདིར་རྣལ་འབྱོར་ཆེན་པོའི་སྒོར་ཞུགས་ཀྱང་དོན་ཆེན་པོ་ལས་གོལ་ཏེ་ལོག་པར་ལྟ་བས་སྒྲིབ་པའི་ལོང་བ་ལྟ་བུར་དོན་ལ་མདོངས་པ་དག་ནི། བདག་ཏུ་འཛིན་པ་དང་མ་བྲལ་བའི་གཞི་ལ་བརྟེན་ནས་གྲུབ་མཐའ་སྒྲུབ་སྟེ། ཐེར་༼༢༤༣༽ཟུག་རྟག་པར་འདོད་པ་དང༌། ཡང་ཚེ་སྔ་ཕྱི་ལ་སོགས་པ་ཡང་མེད་པར་འདོད་པའི་ལྟ་ངན་གྱི་ཤེས་པ་ཉམས་བཞིན་དེས་འབྲས་བུ་ཐོབ་བོ་བར་རྟོག་པ་ནི་མུ་སྟེགས་སུ་གོལ་བ་སྟེ་ངན་སོང་གི་རྒྱུའོ། །ཡང་འདི་དག་ནི་གཟུགས་མེད་པར་གོལ་བའང་ཡིན་ཏེ་བདག་འཛིན་ལ་བརྟེན་ནས་འཇིག་རྟེན་གྱི་གྲུབ་མཐའ་སྒྲུབ་སྟེ་འདི་ལ་རྟོག་པ་ནི། ཆོས་སོ་ཅོག་མཁན་པོ་ལ་རག་ལས་པར་ལྟ་ཞིང་འདུ་ཤེས་དེ་ཉིད་ཀྱིས་སྐྲག་ཅིང་སྐྱོ་ནས་ཅིའང་མེད་པ་ལ་དགའ་སྟེ་མེད་དོ་སྙམ་པ་ལ་མོས་པའི་དོན་དེ་བསམ་གཏན་དུ་སྒྲུབས་པར་བྱས་ནས་ཁམས་དེར་འགྲོ་བར་འགྱུར་བས་གཟུགས་མེད་པའི་ལྷར་སྐྱེ་སྟེ། དེ་ནས་བསྐལ་པའི་གྲངས་ཚང་བ་དང༌། མྱ་ངན་ལས་འདས་པ་བྱ་བའང་མེད་དོ་སྙམ་པའི་བརྫུ་བའི་འདུ་ཤེས་གཡོས་ནས་ཐལ་བྱུང་དེ་མ་ཐག་ཏུ་ཏིང་ངེ་འཛིན་གྱི་ལུས་ཞིག་སྟེ་སྐད་ཅིག་ལ་དམྱལ་བར་ལྟུང་སྟེ་ངན་འགྲོར་འགྲོ་བ་ཡོད་པའི་ཕྱིར་རོ།།

གསུམ་པ་གཟུགས་ཁམས་དང་ཉན་ཐོས་སུ་གོལ་བ་ནི།

མོས་པ་ཆུང་ངུ༌། ཞེས་པ་ནས། མི་གཡོ་གནས་བཞི་པ། ཞེས་པའི་བར་གྱིས་བསྟན་ཏེ།

མོས་ པ་ཆུང་ངུ་ཐམས་ཅད་ནི། །གང་ལ་བདག་མེད ་རྟེན་བཞིན་མཐོང་། །གང་བཀག་རྟོག་ཡོད་སྤྱོད་མེད་པ།།

བསམ་གཏན་དང་པོ་ཁོ་ནའོ། །ཀུན་སྟོང་ཕྲ་བའི་སྟོང་པ་ལ། །གནས་རྟོག་མེད་ལ་སྤྱོད་ཙམ་ཉིད།།

སྟོང་པ་ཉིད་ལ་ངེས་བཞག་སྟེ། །དགའ་བ་བསྐྱེད་པ་གསུམ་པའོ། །བདག་གམ་གཞན་གྱི་མཐུས་བསྟན་ཏེ།།

སྐྱོན་མེད་མི་གཡོ་གནས་བཞི་པ།།

གཟུགས་ཁམས་སུ་གོལ་བ་གང་སྙམ་པ་ལ། མོས་པ་ཆུང་ངུ་ཉན་ཐོས་ཀྱི་གང་ཟག་ཐམས་ཅད་ནི། བསྒོམ་པའི་རྣམ་གྲངས་མང་མོད་ཀྱི། གཞི་གང་ཟག་ལ་ བདག་མེད་པའི་ལྟ་བ་རྟེན་ནས་འདུས་བྱས་ཐམས་ཅད་ལ་སྤྱིའི་མཚན་ཉིད་ཀྱི་རང་བཞིན་མི་རྟག་པ ་དང༌། སྡུག་བསྔལ་བ་དང༌། སྟོང་ པ་དང༌། བདག་མེད ་པར་མཐོང་ནས་ཡུལ་དྲུག་པོ་གང་བཀག་པའི་འགོག་པ་ལ་ཞུགས་ནས་རྟོག་དཔྱོད་གཉིས་ཀ་ཡོད་པའམ། དཔྱོད་པ་ཡོད་ལ་རྟོག་པ་མེད་པ་འདི་ནི་བསམ་གཏན་དང་པོ་ཁོ་ནའོ། །ཕྱི་ནང་གི་ཆོས་ཐམས་ཅད་ཀུན་སྟོང་པར་བྱས་ནས་འདུ་ཤེས་སྦོམ་པོ་ལ་མི་ལྡང་བར་ཕྲ་བའི་སྟོང་པ་ལ་གནས་པ་ནི། རྟོག་པ་མེད་ལ་དཔྱོད་པ་ཙམ་གྱི་བསམ་གཏན་གཉིས་པའོ། །འདི་ལ་རང་སའི་དྲན་པ་ཕྲ་མོའི་རྗེས་སུ་དཔྱོད་པ་ཙམ་ཡོད་ཀྱང་ས་འོག་མའི་རྟོག་དཔྱོད་ལས་འདས་པ་ཡིན་ནོ། །སྟོང་པ་ཉིད་ལ་བསྒོམ་པ་ཀློང་དུ་གྱུར་པའི་ངེས་པ་བཞག་སྟེ། བདག་གི་གཟེངས་བདག་གིས་བསྟོད་ནས། ད་ནི་སྐྱེ་བ་ཟད་དོ། །བྱ་བ་བྱས་སོ། །ཁུར་བོར་བའོ་སྙམ་དུ་ཡིད་ལ་བྱེད་དེ། དཔྱོད་ པ་མེད་ལ་དགའ་བ་སྐྱེད་པ་ཡོད་པ་ནི་བསམ་གཏན་གསུམ་པའོ། །དེ་ནས་བདག ་ཉིད་ཀྱི་ཚོར་བ་དག་གམ། གཞན་རྒྱལ་བའི་བྱིན་གྱིས་རླབས་སམ། དགེ་བའི་བཤེས་གཉེན་གྱི་མཐུས་ཆོས་བསྟན་ཏེ། རྟོག་༼༢༤༤༽དཔྱོད་དང་དགའ་བ་གསུམ་ཆར་བོར་ནས་སྐྱོན་མེད་པར་སྟོང་པ་མི་གཡོ་བ་ལ་གནས་པ་ནི་བཏང་སྙོམས་ཅན་ཏེ་བསམ་གཏན་བཞི་པ་ཡིན་ནོ། །དེས་དགྲ་བཅོམ་པའི་འབྲས་བུ་ཐོབ་པར་ལྟ་བའོ། །འདི་ནི་ཉན་ཐོས་དང་འཇིག་རྟེན་པ་ཐུན་མོང་དུ་འགྲེལ་ཏེ་དེ་དག་ཏུ་ལྟ་ན་དོན་ཆེན་པོ་ལས་གོལ་བའོ།།

བཞི་པ་གོལ་བས་མ་རྟོགས་ཀྱང་ཆོས་ཉིད་མེད་པར་མི་འགྱུར་བ་ནི།

གང་ཡོད་མཐར་ཡང༌། ཞེས་པ་ནས། མི་བརླག་མེད་མི་འགྱུར། །ཞེས་པའི་བར་གྱིས་བསྟན་ཏེ།

གང་ཡོད་མཐར་ཡང་འགྱུར་སྲིད་ཀྱི། །གང་མེད་གནས་མེད་མཐར་མི་འགྱུར། །གང་དེས་མི་ཤེས་མ་མཐོང་ཞིང་། །བཙལ་བས་རྙེད་པར་མི་འགྱུར་ཡང་། །དེ་ཉིད་མེད་པར་མི་འགྱུར་བས། །རྒྱུ་འབྲས་མེད་ཀྱང་དོན་མེད་མིན། །དཔེར་ན་ལྕགས་བསྲེགས་དབལ་མེད་བཞིན། །ཆེན་པོ་བཞི་མེད་སྟོངས་འགྱུར་ཡང་། །དེ་དང་ནམ་མཁའ་མེད་མིན་བཞིན། །དེ་ཉིད་མེད་མིན་བརླག་མི་འགྱུར།།

སུ་ཞིག་ཡང་དག་པའི་ཤེས་རབ་ཡོད་ན་མཐར་གསང་སྔགས་རྟོགས་པར་འགྱུར་བ་སྲིད་ཀྱི། ཤེས་རབ་མེད་ན་རྟོགས་པའི་གཞི་མེད་པས་མཐར་གསང་སྔགས་རྟོགས་པར་མི་འགྱུར་བའོ། །གཞན་དུ་ན་གང་ཡོད་པར་འཛིན་པའི་གང་ཟག་ལ་ནི། དེ་ཉིད་ཀྱི་རྒྱུས་མེད་པའི་མཐར་ཡང་ཤུགས་ཀྱིས་འགྱུར་བ་འོང་སྲིད་ཀྱི། གང་དམ་པ་དག་ཡོད་པར་འཛིན་པ་མེད་པར་འདུ་ཤེས་དང་བྲལ་ཏེ་ལྟ་བ་དང་རྟོགས་པའི་གནས་མེད་པ་ལ་ནི་དེ་ལ་ལྟོས་པའི་མེད་པའི་མཐར་རམ་མཐའ་མེད་པར་མི་འགྱུར་ཏེ། མཐའ་ལ་མི་གནས་པར་འགྱུར་བས་གསང་སྔགས་ཀྱི་དེ་ཁོ་ན་ཉིད་ཀྱང་རྟོགས་པར་འགྱུར་རོ། །དེ་ལ་གསང་སྔགས་ཀྱི་དེ་ཁོ་ན་ཉིད་ཅེས་བྱ་བ་ཉིད་ཡེ་མེད་པ་ཞིག་གོ་བར་དོགས་པ་ལ། བཤད་པ་དེ་དག་ལྟར་གང་ཞིག་མཐའ་ལ་ཞེན་པ་དེས་མ་རིག་པའི་དབང་གིས་དེ་ཁོ་ན་ཉིད་གསལ་བར་མི་མཐོང་ལ་ཡང་དག་པར་མི་ཤེས་པར་ངེས་པས་དོན་ཇི་བཞིན་དུ་མི་རྟོགས་ཤིང༌། དེའི་དོན་ལ་ཤ་ཐང་བར་འབད་དེ་བཙལ་བར་བྱས་པས་ཀྱང་ངོ་བོ་འདི་འདྲ་བར་རྙེད་པར་མི་འགྱུར་ན་ཡང༌། སེམས་ཀྱི་དེ་ཁོ་ན་ཉིད་མེད་ཅིང་རླག་པར་མི་འགྱུར་བའི་ཕྱིར། ཆོས་ཉིད་གདལ་ཁྱབ་ཆེན་པོ་དེ་ལ་རྒྱུ་འབྲས་ཀྱི་ངོ་བོ་དབྱེར་མེད་ལྷུན་རྫོགས་ཆེན་པོ་ཡིན་ནོ། །དེ་བས་ན་ལ་ལ་དག་རྒྱུ་འབྲས་ཡོད་པར་ལྟ་བ་དང༌། རྒྱུ་འབྲས་མེད་པར་ཞེན་པ་དག་གིས་མ་མཐོང་མ་རྙེད་པར་གྱུར་ཀྱང༌། ཇི་བཞིན་པའི་དོན་ཆེན་པོ་མེད་པ་ཉིད་མིན་ཏེ། ངོ་བོ་ལ་འགྱུར་བ་མེད་པ་ཉིད་དོ། །དེའིི་མཐུན་པའི་ཆོས་ཉེ་བར་བཟུང་བའི་དཔེ་ནི་དཔེར་ན་ལྕགས་བསྲེགས་པ་ལ་ཚ་བའི་དབལ་མེད་པར་སོང་བ་བཞིན་དང༌། འབྱུང་བ་ཆེན་པོ་བཞི་མེད་དེ་སྟོང་པར་གྱུར་ན་ཡང༌། ལྕགས་དེ་དང་ནམ་མཁའ་ནི་མེད་པ་མིན་པར་ཡོད་པ་ཇི་བཞིན་དུ། དམིགས་ལྟ་ཅན་གྱིས་མ་རྙེད་ཀྱང༌། དེ་ཁོ་ན་ཉིད་ཀྱི་ཀློང་ནི་ཅིས་ཀྱང་མི་རླག་མི་ཤིགས་པའི་ངོ་བོ་བས་ནམ་ཡང་མེད་པར་མི་འགྱུར་རོ།།

ལྔ་པ་དེ་དག་བཅོས་ཐབས་ཀྱི་ངེས་པ་བཤད་པ་ལ་བཞི་སྟེ། རང་བྱུང་༼༢༤༥༽རང་ཞིར་བཅོས་པ། དགག་སྒྲུབ་མེད་པར་བཅོས་པ། ཟུང་དུ་འབྲེལ་བར་རྟོགས་ཏེ་བཅོས་སུ་མེད་པར་བསྟན་པ། མ་བཅོས་པར་བཞག་པས་ཉམས་རྙེད་པར་བསྟན་པའོ། དང་པོ་ནི།

དྲུག་གི་སྤྱོད་ཡུལ། ཞེས་པ་ནས། སྤང་ཞིང་བཟློག་ཏུ་མེད། །ཅེས་པའི་བར་གྱིས་བསྟན་ཏེ།

དྲུག་གི་སྤྱོད་ཡུལ་མཚན་མ་སྟེ། །མཚན་མ་དངོས་པོར་སྣང་བ་ན།།

ཅི་དགར་བཞག་པས་དེ་བཟློག་མེད། །དེ་སྟོང་སྤང་ཞིང་བཟློག་ཏུ་མེད།།

རྟོག་པའི་སྐྱོན་རྣམས་ཤེས་ན་ཇི་ལྟར་ཤེས་པར་བྱ་སྙམ་པ་ལ། བསྒོམ་པའི་ཚེ་གཟུགས་མཐོང་སྒྲ་ཐོས་ལ་སོགས་པ་རྣམ་པར་ཤེས་པ་ཚོགས་དྲུག་གི་རྟོག་པའི་སྤྱོད་ཡུལ་ཤར་བ་ནི་མཚན་མ་ཉིད་ཡིན་ཏེ། དེ་ལྟར་མཚན་མའི་དངོས་པོར་ཅི་བྱུང་ཅིར་སྣང་ཡང༌། རང་བཞིན་ལ་རྟོག་པའི་མཚན་མ་ཉིད་ཆུའི་རླབས་ལྟར་དེ་ཁོ་ན་ཉིད་ཀྱི་ངོ་བོ་ཉིད་དུ་རང་སྣང་བས་ན་མི་མཐུན་པའི་སྐྱོན་དུ་བསྙད་དུ་མེད་པའི་ཕྱིར། རྟོག་པ་ཉིད་མ་བཀག་པར་རང་ཅི་དགར་བཞག་པས་ཆོག་གི་དེ་བཟློག་ཅིང་སྤོང་བ་མིན་ནོ། །དེ་ཅིའི་ཕྱིར་ཞེ་ན། རྟོག་པ་ཀ་ནས་མ་གྲུབ་པས་མཚན་མའི་དངོས་པོ་དེ་ཉིད་ཡེ་ནས་མ་སྐྱེས་པའི་སྟོང་པ་ཆེན་པའི་ཆོས་ཉིད་ཡིན་པས་དེ་ལ་སྤང་ཞིང་བཟློག་ཏུ་མེད་པའི་ཕྱིར་རོ། །དེས་ན་དེ་ལྟར་ཤེས་ནས་རང་བྱུང་རང་ཞིར་རྟོགས་པའི་སོ་ལས་མ་འདས་པར་བྱ་བ་ཉིད་དོ།།

གཉིས་པ་དགག་སྒྲུབ་མེད་པར་བཅོས་པ་ནི།

ཐམས་ཅད་སེམས་ཀྱི། ཞེས་པ་ནས། གཉེན་པོ་བསྒོམ་མི་དགོས། ཞེས་པའི་བར་གྱིས་བསྟན་ཏེ།

ཐམས་ཅད་སེམས་ཀྱི་ཆོས་ཉིད་དུ། །ཚིག་མིན་ལྟ་བས་ཐག་ཆོད་ན། །མ་བཅོས་མ་ཡེངས་ཡེངས་ཐུབ་སྙོམས།། རྩོལ་སྒྲུབ་རེ་དོགས་ག་ལ་ཡོད། །མི་མཐུན་གཉེན་པོ་སྒོམ་མི་དགོས།།

དེས་ན་བཤད་པ་བཞིན་དུ་མཚན་མ་ཐམས་ཅད་སེམས་ཀྱི་ཆོས་ཉིད་དུ་གསལ་བར་ཚིག་ཙམ་མིན་པར་ཤེས་ཤིང་ལྟ་བས་ཐག་ཆོད་དེ་གནད་དུ་ཆུད་པ་ན་རྟོག་པ་སྐྱེས་ཀྱང་རྟོག་པར་མཐོང་བ་མེད་པས། མ་བཅོས་པའི་ངང་ལ་རྟོག་པ་མི་འཆོས། ཀློང་ཆེན་པོའི་དབྱིངས་ལ་ཡེངས་པའི་ཡུལ་ཉིད་བྲལ་བས་རྟག་ཏུ་མ་ཡེངས་པར་གནས། གལ་ཏེ་ཡེངས་ཀྱང་ཆོས་ཉིད་དུ་གྲོལ་བར་ལམ་དུ་ཁྱེར་ཐུབ་པས་ཡེངས་པའི་ཐ་སྙད་ཀྱང་མེད་པར། སེམས་ལ་སྒྲིབ་པའང་མེད་དེ་ངང་གིར་རང་གསལ་བ་ནི་སྙོམས་པར་འཇུག་པ་ཆེན་པོ་ཞེས་བྱའོ། །དེ་བས་ན་རྟོག་རྒྱུན་མ་བཀག་ལ་མཐོང་ཐོས་མེད་པར་ཤེས་པའི་སྐྱེས་བུ་ལ། ཆུ་ཡིས་རླན་མི་ཚོལ་བ་ལྟར་རྩོལ་སྒྲུབ་ཀྱིས་ཆོས་ཉིད་ལ་འབད་པ་དང༌། གསལ་ཞིང་ཐོབ་ཏུ་རེ་བ་དང༌། ལྟུང་གོལ་གྱི་དོགས་པ་དང་བྲལ་བས་རྩོལ་སྒྲུབ་དང་རེ་དོགས་ཀྱིས་འཆིང་བ་ག་ལ་ཡོད་དེ་མེད་པས་ན། ནམ་དུའང་མི་མཐུན་པར་སྣང་བ་ལ་གཉེན་པོ་བརྟེན་པར་མི་བྱེད་ཅིང་སྒོམ་ཡང་མི་དགོས་པར་རྟོགས་པར་བྱའོ། །གལ་ཏེ་རྟོགས་པ་གནད་དུ་མ་༼༢༤༦༽ཆུད་པར་ཚུལ་ཆོས་པ་དག་ནི། སྦལ་བུས་ནམ་མཁའ་ལ་ལྡིངས་པ་ལྟར་ཚི་ཆད་པར་འགྱུར་རོ། །དེ་བས་ན་སྤང་བྱ་མི་སྤོང་སྟེ་རྟོག་པས་འཆིངས་པའི་ཕྱིར་རོ།།

གསུམ་པ་ཟུང་དུ་འབྲེལ་བར་རྟོགས་ཏེ་བཅོས་སུ་མེད་པར་བསྟན་པ་ནི།

སྐྱོན་ཡོན་སྤོང་ལེན། ཞེས་པ་ནས། མེད་པས་སྦྱོང་དུ་མེད། །ཅེས་པའི་བར་གྱིས་བསྟན་ཏེ།

སྐྱོན་ཡོན་སྤོང་ལེན་བྱིང་རྒོད་རྣམས། །གང་འདིར་དབྱེར་མེད་ཟུང་འབྲེལ་ན། །ཞི་གནས་ལྷག་མཐོང་སེམས་ལས་བྱུང། །ཞིག་པས་ནམ་མཁའ་མེད་མི་འགྱུར། །འཁྱམས་པས་བྱང་ཆུབ་སེམས་མི་སྟོར། །སྤངས་པས་མི་སྤོངས་མཐའ་ཡས་ཆོས། །བཀྲུས་པས་མི་འདག་སྟོང་ཉིད་དབྱིངས། །གང་སྟོང་ཡོད་པས་ཆད་རྟག་པ། །ཐམས་ཅད་རིག་པས་སྟོང་མ་ཡིན། །དངོས་པོ་མེད་པས་རྟག་མ་ཡིན། །ཅི་ཡང་མེད་པས་སྤང་དུ་མེད།།

དེ་བས་ན་བསམ་གཏན་གྱི་སྐྱོན་དང་ཡོན་ཏན་ལ་སྤོང་བ་དང་ལེན་པར་བྱེད་པ་དང༌། བྱིང་རྒོད་ལ་སོགས་པ་རྣམས་རིལ་སྐབས་གང་འདིར་མ་འགགས་ལ། ངོ་བོ་དབྱེར་མེད་པས་རིས་སུ་ཆད་པའང་མེད་དེ། ཇི་བཞིན་པའི་ངོ་བོར་ཟུང་དུ་འབྲེལ་བར་གསལ་བ་ན་བྱུང་ཚོར་མ་བཀག་ལ་མི་གཡོ་བས་ཞི་གནས་དང་ལྷག་མཐོང་འབྲེལ་བར་གྱུར་ཏེ། དེ་ཉིད་ཀྱང་རང་རིག་པའི་སེམས་ཀྱི་ཆོས་ཉིད་ལས་རང་བྱུང་བར་ཤར་བའོ། །དེ་བས་ན་མ་བཅོས་པའི་ཉམས་རྙེད་དེ་རང་བྱུང་རང་ཞིར་མ་རྟོགས་ན། དཔེར་ན་དངོས་པོ་ཞིག་པས་ཀྱང་ནམ་མཁའ་མེད་པར་བརླག་པར་མི་འགྱུར་པ་དང༌། བསྐལ་པར་འཁོར་བར་འཁྱམས་པས་ཀྱང་བྱང་ཆུབ་ཀྱི་སེམས་མི་སྟོར་བ་ལྟར་དུ་རྟོག་པ་རྣམས་སྤོང་བས་མི་སྤོངས་ཏེ། འདུ་ཤེས་ཉིད་ཀྱིས་འཆིང་བའི་ཕྱིར། མདོ་ལས་ཀྱང༌། འདུ་ཤེས་འདི་ནི་སྤངས་སྙམ་དུ། །གང་གི་འདུ་ཤེས་འབྱུང་འགྱུར་བ། །འདུ་ཤེས་ལས་ནི་དེ་མི་ཐར། །ཞེས་གསུངས་སོ། །དེས་ན་སྒྲིབ་པ་མཐའ་ཡས་པ་ཐམས་ཅད་སེམས་ཀྱི་ཆོས་ཉིད་དུ་མ་ཤེས་ན་སྦྱང་ཞིང་བཀྲུས་པས་མི་འདག་སྟེ། རྩོལ་སྦྱོང་ཉིད་ལྟ་བའི་སྒྲིབ་པ་ཆེན་པོའོ། །དེ་བས་ན་མཐའ་བཞི་རང་གྲོལ་གྱི་སྟོང་ཉིད་ཟབ་མོ་ཆོས་ཉིད་གསང་བའི་དབྱིངས་སུ་ཤེས་པར་བྱའོ། །འོ་ན་ཐབས་དམ་པ་ཉིད་གང་ཞེ་ན། གང་སྟོང་པ་དངོས་པོ་ཞིག་པ་དང༌། ཡོད་པ་དངོས་པོའི་སྣང་བ་དང༌། ཆད་པ་དང་རྟག་པར་འཛིན་པ་ལ་སོགས་པའི་མཐའ་རྣམས་ངང་གིས་དག་པའི་ཚུལ་ནི་ཇི་ལྟ་བུ་ཡིན་ན། མཐའ་སྣང་ཐམས་ཅད་རིལ་ཆོས་ཉིད་དབྱིངས་ཀྱི་ཡེ་ཤེས་ཆེན་པོའི་ཀློང་དུ་གསལ་བར་རིག་པས་ཉི་ཚེ་བའི་སྟོང་པ་མ་ཡིན་ཞིང༌། དེ་ཉིད་ལ་ངོ་བོའི་དངོས་པོ་འདི་འདྲར་མེད་པས་རྟག་པ་ཡོད་པའི་ཆོས་ཀྱང་མ་ཡིན་ཏེ་མཐའ་ཀུན་ལས་འདས་པའོ། །དེ་ལྟར་ན་ཐེར་ཟུག་གི་དངོས་པོ་ མེད་པས་རྟག་པ་མ་ཡིན། འབྲས་བུའི་བདག ་ཉིད་ཡིན་པས་ཆད་པའང་མ་ཡིན་ཏེ། ངོ་བོ་ཉིད་གང་ཡང་མ་བཀོལ་བ་ཉིད་ལ་དབྱིབས་དང་ཁ་དོག་མཚན་མ་དང་ཐ་སྙད་འདི་འདྲར་གཟུང་བ་ཅི་ཡང་མེད་པས་སྒྲིབ་པ་དང་བག་ཆགས་སྦྱང་༼༢༤༧༽དུ་ཡང་མེད་པ་ཉིད་དོ། འདི་ནི་གོལ་ས་བཅད་པའི་གནད་ཆེན་པོའང་ཡིན་ནོ།།

བཞི་པ་མ་བཅོས་པར་བཞག་པས་ཉམས་རྙེད་པར་བསྟན་པ་ནི།

བྱ་བ་ཐམས་ཅད། ཅེས་པ་ནས། དམ་པའི་ཉམས་རྙེད་པའོ། །ཞེས་པའི་བར་གྱིས་བསྟན་ཏེ།

བྱ་བ་ཐམས་ཅད་ཡོངས་བཏང་ནས། །ཡེ་ནས་མ་བཅོས་དེར་བཞག་ན།།

དེ་མེད་པས་ན་དེ་ཡང་མེད། །དེ་ནི་དམ་པའི་ཉམས་རྙེད་པའོ།།

དེ་བས་ན། ལས་སུ་བྱ་བ་ཐམས་ཅད་ཡོངས་སུ་བཏང་ནས་གང་ཡང་རིག་པ་ལས་གཞན་དུ་མེད་པས་མི་ལེན་མི་སྤྱོད་པར་ཡེ་གདོད་ནས་མ་བཅོས་མ་བསླད་པའི་ཆོས་ཉིད་ཀྱི་ངང་དུ། རང་རིག་པ་ཅིར་ཡང་བཞག་ཏུ་མེད་པར་ཤེས་པ་ཉིད་བདེར་ཞེས་བདེ་བ་ཆེན་པོར་རང་བབ་ཏུ་བཞག་པ་ཡིན་པས་ན། དེ་ལྟར་གནད་དུ་ཆུད་ན་དེ་ལ་ཆོས་ཀྱི་དབྱིངས་སུ་འདུ་ཤེས་པ་དེ་ཡང་མེད་པས་ན་སྒྲིབ་པ་དེ་ཡང་མེད་པའམ། སེམས་དེ་ཉིད་མེད་པས་ན་སེམས་ལས་བྱུང་བ་དང་ཀུན་ཏུ་རྟོག་པ་དེ་ཡང་མེད་པར་ངེས་པའི་ཕྱིར་བཙལ་ཡང་མི་རྙེད་པའོ། །དེ་ལྟར་མ་ནོར་བར་རྟོགས་པ་ནི་དམ་པའི་ཉམས་ཀྱི་དགོངས་པའི་གདེངས་རྙེད་པ་སྟེ་བདེན་པ་ཆེན་པོ་མཐོང་བའོ།།

དྲུག་པ་རིམ་གྱིས་དང་ཅིག་ཆར་བའི་ཁྱད་པར་བསྟན་པ་ནི།

འདིར་ནི་ཐེག་ཆེན། ཞེས་པ་ནས། འབྱུང་བ་དེ་ལྟར་ངེས། །ཞེས་པའི་བར་གྱིས་བསྟན་ཏེ།

འདིར་ནི་ཐེག་ཆེན་དམ་པ་ཡི། །ནད་ནི་རིམས་ཀྱིས་ཐོབ་པ་ཡིན། །རིམས་ཀྱིས་པ་ཡི་དུག་དགོད་ནི།།

ཅིག་ཅར་འཆར་བ་ཉིད་ཁོ་ནའོ། །དེས་ན་གང་དག་གང་ཞིག་གིས། །ཇི་ལྟར་གོ་དང་མོས་བཞིན་དུ།།

བསྟན་པ་གང་དང་གང་དག་ལ། །སོ་སོར་ཡིད་བརྟན་ཡུལ་དུ་བྱ། །དེ་བས་སྒྲོན་མ་དཔག་མེད་ཀྱིས།།

དམ་པ་ཇི་སྙེད་གསུངས་པ་རྣམས། །གཅིག་ཏུ་ཆད་དམ་ངེས་མེད་དེ། །ཇི་ལྟར་བྱུང་བ་དེ་ལྟར་ངེས།།

དེ་ལྟ་བུ་དམན་པའི་ཡུལ་མ་ཡིན་པར་བསྟན་པའི་ཕྱིར། འོ་ན་བློ་ཆེན་པོ་གཅིག་ཆར་བ་རྣམས་ཀྱི་དགོངས་པ་དམ་པ་དེ་ཉིད་བློ་ཆུང་རིམ་གྱིས་པ་ལའང་ངེས་པར་བསྟན་པར་བྱའམ་ཞེ་ན། དེ་ལྟར་མ་ཡིན་ཏེ། སྐབས་འདི་ནི་གསང་སྔགས་ཐེག་པ་ཆེན་པོའི་དོན་མཆོག་དམ་པ་ཡི་སྙིང་པོ་གཅིག་ཆར་བའི་དགོངས་དོན་ཟབ་མོ་ནི། རྒྱུའི་ཐེག་པ་རིམ་གྱིས་འཇུག་པ་བ་རང་གི་རྩོལ་མཐའི་ནད་ཆེན་གྱི་རིམས་ཀྱིས་སྒྲིབས་ནས་དོན་ཆེན་པོ་ཐོབ་པ་མ་ཡིན་པས་ཡང་དག་པར་རྟོགས་པར་མི་ནུས་སོ། །དེ་བས་ན་རིམ་གྱིས་པ་ཡི་ཚོགས་དྲུག་གཡེང་བའི་རྒྱུར་བཞག་པའི་བྱིང་རྒོད་ཅན་དུ་བསྟན་པ་ཉིད་ནི། བློ་མཆོག་གཅིག་ཆར་འཆར་བའི་སྐབས་སུ་དེ་ཉིད་ཇི་བཞིན་པ་དེ་ཁོ་ན་ཉིད་ལྷུན་གྱིས་རྫོགས་པའི་ཆོས་ཉིད་དུ་ཤར་བས་མ་བཀག་ལ་མི་གཡོ་བ་ཉིད་དུ་གསལ་བའོ། །དེས་ན་ཞེས་པས་སྙེགས་པ་ནི་འཇུག་སྒོ་གཉིས་གཅིག་གི་ནད་དུ་གཅིག་གྱུར་པས། བློ་ཆུང་བ་རིམ་གྱིས་འཇུག་པ་གང་དང་བློ་ཆེ་བ་ཅིག་ཆར་དུ་འཇུག་པ་གང་དག་གི་གདུལ་བྱའི་དངོས་པོ་རྣམས་ཀྱིས་བབ་ཅོལ་དུ་མི་འཇུག་པར་འཇུག་རིམས་དེ་དག་གིས་ཚུལ་དུ་རིམ་ཅིག་ཆར་གྱིས་རང་གི་བློས་ཇི་ལྟར་གོ་བའི་རྟོགས་ཚད་དང་མོས་པ་ཇི་ལྟ་བ་དེ་བཞིན་དུ་བསྟན་པ་ཆོས་ཀྱི་སྒོ་མོ་རིམས་པར་བསྟན་པ་གང་དང་ཅིག་༼༢༤༨༽ཆར་དུ་རྟོགས་ཐབས་བསྟན་པ་གང་དག་ལ་སོ་སོར་ཡིད་བརྟན་པའི་ཡུལ་དུ་འབད་ནས་ཆུད་མི་ཟ་བར་བྱ་བའི་དོན་ཏོ། །དེ་བས་ན་སོ་སོར་ངེས་པའི་གཏན་ཚིགས་ཡང༌། དེ་ལྟར་སྒོ་སོ་སོ་བར་སྤྱད་དགོས་པའི་དོན་གྱིས་སྒྲོན་མ་བཀོད་པའི་རྒྱལ་བ་དཔག་ཏུ་མེད་པ་མང་པོ་ཉིད་ཀྱིས། ཞིང་སོ་སོར་བཀའ་སྩལ་བའི་དམ་པའི་ཆོས་ཀྱི་སྒོ་དམ་པ་དང༌། ཐབས་སྣ་ཚོགས་པ་ཇི་སྙེད་ཅིག་ཏུ་གསུངས་པ་རྣམས། །གདུལ་བྱའི་བློ་རིམས་དང་བསྟུན་པས་གཅིག་ཏུ་ས་ཟིན་མེད་པར་ཕྱོགས་སུ་མ་ཆད་ཅིང་ངེས་པ་ཅན་དུ་གསུངས་པར་གཟུང་དུ་མེད་དེ། རང་རང་གང་ལ་ཇི་ལྟར་མོས་པ་འབྱུང་བ་དེ་ལྟར་གསུངས་པ་ཡིན་པས་དེ་ཁོ་ན་ལྟར་བདེན་པར་ངེས་པ་ཉིད་དུ་འགྱུར་རོ།།

བདུན་པ་ཏིང་ངེ་འཛིན་དེའི་ཁྱད་པར་གྱི་སྐྱོན་བཅོས་ཐབས་ཐུན་མོང་དུ་བསྟན་པ་ལ་གསུམ་སྟེ། བར་དུ་གཅོད་པའི་སྐྱོན་བཅོས་པ། དུག་ལྔ་ལ་སོགས་ཉོན་མོངས་པ་བཅོས་པ། ཆེད་དུ་བྱས་པའི་སྐྱོན་བཅོས་པའོ། །དང་པོ་ནི།

འདི་ལ་གང་འཇུག ཅེས་པ་ནས། རང་བཞིན་དེ་བཞིན་ཉིད། །ཅེས་པའི་བར་གྱིས་བསྟན་ཏེ།

འདི་ལ་གང་འཇུག་བར་གཅོད་པ། །ལེ་ལོ་བྱ་མང་རྒོད་པ་དང་། །གཡེང་དང་རྨུགས་པ་འདོད་པ་དང་།།

གཉིད་དང་རེ་དོགས་ཐེ་ཚོམ་དང་། །འདུ་འཕྲོ་སྤྱོད་དང་འབྱུང་དགའ་བའོ། །དེ་ཡང་རང་བཞིན་དེ་ཉིད་དུ།།

བསྒོམ་པའི་ཚེ་བར་དུ་གཅོད་པའི་སྐྱོན་བསྟན་པའི་ཕྱིར། མ་ནོར་བའི་དོན་འདི་ལ་གང་འཇུག་སྟེ་སྒོམ་པའི་བསམ་པ་ལས་སུ་མི་རུང་བར་བྱེད་པའི་བར་དུ་གཅོད་པ་བགེགས་ཀྱི་རྣམ་གྲངས་ནི། ལེ་ལོ་གཉིས་བྱེད་པ་དང༌། སྒོ་གསུམ་གྱི་བྱ་བ་མང་བ་དང༌། ཤེས་པ་རྒོད་པ་དང༌། བློ་གཡེང་བ་དྲུག་གི་དབང་དུ་གྱུར་བ་དང༌། དོན་མི་གསལ་བར་སེམས་རྨུགས་པས་བྱིང་དབང་དུ་སོང་བ་དང༌། དོན་གཅིག་གསལ་བར་འདོད་པའམ་འདོད་པ་ཆེ་བ་དང༌། གཉིད་དབང་དུ་འགྲོ་བ་དང༌། རྟགས་དང་མཚན་མ་ལ་རེ་བ་དང༌། གོལ་ཞིང་ལྟུང་བ་དང༌། རྟོག་པ་སྐྱེས་སུ་དོགས་པ་དང༌། ངེས་པའི་དོན་ལ་ཐེ་ཚོམ་ཟ་བ་དང༌། སེམས་ནང་དུ་འདུ་བའམ་དམིགས་པས་ནང་དུ་སྡུད་པ་དང༌། སེམས་ཕྱི་རོལ་དུ་འཕྲོ་བ་དང༌། ཆོས་སྤྱོད་ཀྱི་གཡེང་བ་ལ་མོས་པ་དང༌། བསྒོམ་པའི་དོན་ལ་ཡིད་འབྱུང་སྐྱེས་པ་དང༌། ཏིང་ངེ་འཛིན་གྱི་རོ་དགའ་བདེ་ལ་ཆགས་པ་དང༌། ཅ་ཅོ་ལ་དགའ་བ་སྟེ་དངོས་བསྟན་བཅོ་ལྔའོ། །འོ་ན་དེ་དག་དགག་གམ་ཇི་ལྟར་བྱ་ཞེ་ན། བཅོས་པའི་ཐབས་དམ་པ་ནི། དེ་ཡང་བར་དུ་གཅོད་པའི་བདུད་རྣམས་ཀྱི་རང་བཞིན་སྐྱེས་བདོ་ཙམ་ཉིད་ན། མཐའ་རིལ་ལས་འདས་པའི་དེ་ཁོ་ན་ཉིད་མ་བཅོས་པའི་དེ་བཞིན་ཉིད་སེམས་ཀྱི་དཀྱིལ་འཁོར་འོད༼༢༤༩༽་གསལ་བའི་རང་བཞིན་ལས་སྐྱོན་རྡུལ་ཕྲན་ཙམ་ཡང་མེད་པའི་ཕྱིར། སྐྱེས་མ་ཐག་པར་ཚོར་བ་ཙམ་གྱིས་རྐུན་པོ་ཚོར་བ་ལྟར་དེ་ཁོ་ན་ཉིད་དུ་རང་གསལ་བ་དགག་དང་སྤང་དུ་མེད་པའོ། །འོ་ན་ཚོར་བ་ཞེན་པའི་དངོས་པོ་ཞིག་བརྟེན་ནོ་ཞེ་ན། དེ་ནི་བསྟེན་པ་མེད་དེ། ཅིར་ཡང་མ་ཚོར་བ་ཉིད་ཚོར་བ་ཆེན་པོ་བས་ཚོར་བ་གཅིག་ཅེས་ཀྱང་བྱའོ། །ཚོར་བ་ཉིད་ཡིད་ལ་བྱ་བ་མེད་པ་ཉིད་ཀྱིས་དག་གོ།

གཉིས་པ་དུག་ལྔ་ལ་སོགས་ཉོན་མོངས་པ་བཅོས་པ་ནི།

དུག་ལྔ་ལ་སོགས། ཞེས་པ་ནས། རང་ཞི་དེ་བཞིན་ཉིད། །ཅེས་པའི་བར་གྱིས་བསྟན་ཏེ།

དུག་ལྔ་ལ་སོགས་ཀུན་འབྱུང་བ། །རང་བྱུང་རང་ཞི་དེ་བཞིན་ཉིད།།

བསྒོམ་པའི་ཚེ་ཉོན་མོངས་སྐྱེས་ན་ཇི་ལྟར་བྱ་ཞེ་ན། འདི་ལྟར་ཤེས་པར་བྱ་སྟེ། ཀུན་མཁྱེན་དམ་པ་རིན་པོ་ཆེས། དེ་ལ་སྐྱོན་ནི་རྣམ་པ་དྲུག །གློ་བུར་འདོད་ཆགས་ལྡང་བ་དང༌། །ཞེ་སྡང་ཆེན་པོ་སྐྱེས་པ་དང༌། །ང་རྒྱལ་ཕྲག་དོག་འཁྲུག་པ་དང༌། །ལྟ་བ་སྙེམས་དང་དེ་དྲུག་གོ །ཞེས་གསུངས་པ་ལྟར། དུག་ཆེན་ལྔ་ཡི་ཆགས་སྡང་སྐྱེས་པ་དང༌། ལ་སོགས་པ་ཞེས་གཞན་བསྡུ་བ་ནི། དགོན་པར་སྐྱོ་བ་དང༌། སྒྲིབ་པ་བཅུ་དང་ལྔ་དག་སྟེ། ཉོན་མོངས་པའི་རྟོག་ཚོགས་ཀུན་ཏུ་འབྱུང་བ་རྣམས་ཏེ། དེ་ཉིད་ཇི་ལྟར་ཤེས་པར་བྱ་བ་ནི། དེ་དག་ཉིད་དེ་ཁོ་ན་ཉིད་དང་ཉི་མ་དང་འོད་ཟེར་ལྟ་བུ་བས་མ་སྤངས་པར་རང་བྱུང་བ་ཉིད་རིག་པའི་ངང་དུ་རང་ཞི་བ་ནི་རང་རིག་དེ་བཞིན་ཉིད་དུ་རང་གྲོལ་བ་སྟེ་བཅོས་ཐབས་དམ་པར་འགྱུར་བ་རྗེས་སུ་མཐུན་པའོ།།

གསུམ་པ་ཆེད་དུ་བྱས་པའི་སྐྱོན་བཅོས་པ་ནི།

དམ་པའི་དོན་ལ། ཞེས་པ་ནས། ཁྱད་སྙེམས་བྱུང་ཞི་ཉིད། །ཅེས་པའི་བར་གྱིས་བསྟན་ཏེ།

དམ་པའི་དོན་ལ་གང་སྒྲིབ་པ། །མི་གཡོ་གསལ་བདེ་སྡུག་བསྔལ་དང་།།

སྐྱེ་བ་གསལ་བ་འབྱིན་པ་དང་། །ངེས་དང་ཁྱད་སྙེམས་འབྱུང་ཞི་ཉིད།།

དེ་ཁོ་ན་ཉིད་དམ་པའི་དོན་མཆོག་སྒོམ་པ་ལ་གང་སྒྲིབ་པར་བྱེད་པ་ནི་རྣམ་གྲངས་བཅུ་སྟེ། སེམས་མི་གཡོ་བ་ལ་དགའ་བ་དང༌། དོན་གསལ་བར་འདོད་པ་དང༌། བདེ་བ་ཐོབ་པར་འདོད་པ་དང༌། སྡུག་བསྔལ་བྲལ་བར་འདོད་པའམ། ཡང་ན་བདེ་བའི་རོ་ལ་ཆགས་པ་དང༌། ལས་སུ་མ་རུང་དུ་དོགས་པས་རྩོལ་བའི་སྡུག་བསྔལ་དང༌། རྟོག་པའི་རྐུན་བུ་མང་པོ་སྐྱེ་བའམ་དྲོད་རྟགས་སྐྱེ་བར་འདོད་པ་དང༌། མངོན་ཤེས་གསལ་བར་འདོད་པ་དང༌། མཚན་མའི་རྫུ་འཕྲུལ་འབྱིན་པར་འདོད་པ་དང༌། དོན་ལ་ཞེན་པས་ངེས་པར་འཛིན་པ་དང༌། གཞན་གྱི་ལྟ་བ་ཁྱད་དུ་གསོད་པ་དང༌། རང་གི་ལྟ་བས་སྙེམས་པའོ། །དེ་དག་ཇི་ལྟར་བཅོས་ན། རང་བྱུང་རང་ཞི་ཆེན་པོ་ཉིད་གསལ་བར་བཞག་གོ །དེ་ལྟ་བུ་རང་བྱུང་རང་ཞི་ཆེད་དུ་བསྟེན་པའང་མེད་པ་༼༢༥༠༽ཉིད་བཞག་པར་སྨྲའོ། །འདི་གསུམ་གྱི་སྐྱོན་དང་པོ་གཉིས་ནི་ཚོགས་ལམ་གྱི་རྣལ་འབྱོར་ལ་བར་དུ་གཅོད་ལ། གསུམ་པས་ནི་སྦྱོར་ལམ་དང་མཐོང་ལམ་ལ་ཉེ་བ་ནའང་བར་དུ་གཅོད་དོ།།

བརྒྱད་པ་ཞོར་ལ་ཡོན་ཏན་གྱི་ངེས་འབྱེད་བཤད་པ་ལ་གསུམ་སྟེ། ཡོན་ཏན་དངོས་བཤད་པ། བདུད་ཀྱི་སྤྱོད་ཡུལ་བཅོ་བརྒྱད་རྟགས་དང་སྐྱོན་དུ་ཇི་ལྟར་འགྱུར་བ། མཚན་མ་རང་གྲོལ་ཞིང་གང་ལའང་དགའ་འགྱོད་མེད་ན་ཚད་དུ་ཕྱིན་པའོ། །དང་པོ་ནི།

བསམ་གཏན་ཆེན་པོར། ཞེས་པ་ནས། མེད་ན་རང་བཞིན་ཉིད། །ཅེས་པའི་བར་གྱིས་བསྟན་ཏེ།

བསམ་གཏན་ཆེན་པོར་ངེས་སྣང་བ། །ཀུན་ཏུ་མི་ཉམས་རེ་དོགས་མེད། །དང་བ་མི་སྐྱེ་མི་གཡོ་དང་།།

མ་ཆགས་མི་འཆད་ལེན་པ་མེད། །འཁྲུག་པ་མེད་ན་རང་བཞིན་ཉིད།།

དེ་ལྟར་འབད་དེ་བསྒོམ་པའི་ཡོན་ཏན་ཉམས་བརྟན་པའི་ཚད་བསྟན་པ་ནི། ཇི་བཞིན་པའི་བསམ་གཏན་ཆེན་པོར་གདེང་དུ་ཆུད་དེ་ངེས་པར་གོམས་པའི་ཡོན་ཏན་གྱི་རྟགས་ཉིད་ནི་འདི་ལྟར་སྣང་བ་སྟེ། སྤྱོད་ལམ་བཞི་པོ་ཀུན་ཏུ་ལེགས་ཉེས་ཇི་སྤྱད་ཀྱང་རྟོགས་པའི་དོན་ལས་མི་ཉམས་པ་དང༌། རྟགས་དང་འབྲས་བུ་ལ་རེ་བ་མེད་པ་དང༌། ཁམས་གསུམ་འཁོར་བའི་གཡང་དུ་ལྷུང་བར་དོགས་པ་མེད་པ་དང༌། གནས་གཅིག་ལས་མ་གཡོས་པར་ཞིང་ཁམས་ཐམས་ཅད་སྐྱུ་རུ་ར་རློན་པ་ལག་མཐིལ་དུ་བཞག་པ་བཞིན་མངོན་དུ་གྱུར་བར་མཐོང་ཡང་དང་ཞིང་དགའ་བ་མི་སྐྱེ་བ་དང༌། སྲིན་པོ་འབར་བ་མཐོང་ཀྱང་འཇིགས་པའི་སེམས་མི་གཡོ་བ་དང༌། ལྷའི་བུ་མོ་འོངས་ཀྱང་ཆགས་པའི་འདུ་ཤེས་མི་སྐྱེ་བར་ཀུན་ཏུ་མི་ཆགས་པ་དང༌། བསམ་གྱིས་མི་ཁྱབ་པའི་ཆོས་ཀྱི་དབྱིངས་ལ་གནས་ཀྱང་འདུས་བྱས་ཆོས་སྤྱོད་རྒྱུན་མི་གཅད་པའམ། ཅི་སྤྱད་ཅི་བྱེད་རིལ་བདག་གི་མཛད་སྤྱོད་དམ་པ་བས་དགེ་བ་རྒྱུན་མི་འཆད་པ་དང༌། འདོད་པ་ལྔ་ལ་སྤྱད་ཀྱང་གང་ལའང་དང་དུ་ལེན་པ་མེད་པས་ལེགས་ཉེས་ཀྱི་འབྲས་བུ་མི་འབྱིན་པ་དང༌། ཕུང་པོ་ལ་གཞན་གྱིས་གཙེས་པ་དང༌། ངག་མི་སྙན་པ་ཇི་ལྟར་བརྗོད་ཀྱང་ཡིད་སེམས་འཁྲུག་པ་མེད་ན་དེ་ནི་ཆོས་ཉིད་ཇི་བཞིན་པའི་རང་བཞིན་རིག་པ་དེ་བཞིན་ཉིད་དུ་གསལ་བའི་ཡོན་ཏན་སྣང་སྟེ་ནང་རྟགས་ཕྱི་རུ་འབྱུང་བའོ།།

གཉིས་པ་བདུད་ཀྱི་སྤྱོད་ཡུལ་བཅོ་བརྒྱད་རྟགས་དང་སྐྱོན་དུ་ཇི་ལྟར་འགྱུར་བ་ནི།

རྣལ་འབྱོར་བདུད་ཀྱི། ཞེས་པ་ནས། ཤེས་པ་ལོག་པའི་བདུད། །ཅེས་པའི་བར་གྱིས་བསྟན་ཏེ།

རྣལ་འབྱོར་བདུད་ཀྱི་སྤྱོད་ཡུལ་ནི། །དམ་པར་འདུན་མཐོང་དམ་པར་སྨྲ། །སྤྲུལ་པ་གྲངས་མེད་འགྱེད་མཐོང་དང་། །དམ་པ་སྨྲས་མཐོང་ཀུན་གསལ་མཐོང་། །དུས་ཀུན་ཤེས་གསལ་མཐོང་བ་དང་། །རྒྱུ་དྲུག་ལམ་གནས་ཀུན་སྣང་དང་། །དེ་ལ་གདུང་བའི་ཤུགས་འབྱུང་དང་། །ཀུན་སྣང་གསལ་བར་མཐོང་བ་དང་། །ཅི་ལའང་ཐོགས་མེད་འགྲོ་བ་དང་། །མཁའ་ལ་ས་བཞིན་འགྲོ་འདུག་དང་། །དམ་པའི་ཕྱག་བརྐྱང་ལུང་སྟོན་དང་། །ཀུན་གྱི་སྐད་དུ་ཆོས་སྨྲ་དང་། །དངོས་པོ་བརྟན་གཡོ་བསྟི་གནས་མཐོང་། །ཐམས་ཅད་མཉམ་པར་བཀོད་པ་དང་། །དེ་ཉིད་རང་བཞིན་བསལ་སྣང་དང་། །ལས་སུ་རུང་བས་ཐོགས་མེད་དང་། །དམ་པའི་དོན་ལ་བསྒོ་བ་དང་། །འཇིག་རྟེན་གཙོ་བོས་མཆོད་པ་དག །རང་བཞིན་ཤེས་ན་དམ་པའི་རྟགས། །གང་མི་ཤེས་པ་ལོག་པའི་བདུད།།

བདུད་ཀྱི་སྤྱོད་ཡུལ་བཅོ་བརྒྱད་བརྗོད་པ་གང་ཞེ་ན། དོན་ལས་སུ་རུང་བའི་རྣལ་འབྱོར་པ་ལ་སྐྱེ་བའི་བདུད་ཀྱི་སྤྱོད་ཡུལ་དུའང་འགྱུར་བས་ཆོ་འཕྲུལ་གྱི་རྟགས་ནི་བཅོ་བརྒྱད་ཡོད་དེ། དེ་ལ་འཛིན་ན་གཉིས་མེད་ཀྱི་བདུད་དུ་འཆད་པར་བྱེད་དོ། །དེའང་དངོས་དུ་སངས་༼༢༥༡༽རྒྱས་དང་བྱང་ཆུབ་སེམས་དཔའ་དམ་པ་མང་པོ་བདག་གི་མདུན་དུ་འཁོད་པར་གྱུར་ཏེ་བདག་ཉིད་འདུན་པས་དེ་དག་ལས་ཆོས་ཉན་པར་མཐོང་བ་དང་གཅིག་བདག་ཉིད་ཆོས་ཀྱི་རྒྱལ་པོ་རྣམ་སྣང་ལྟ་བུར་སྟོན་པར་གྱུར་ནས་བྱང་ཆུབ་སེམས་དཔའ་མང་པོ་ལ་ཆོས་དམ་པར་སྨྲ་ཞིང་སྟོན་པ་མཐོང་བ་དང་གཉིས།  བདག་ཉིད་ལས་སྐད་ཅིག་ལ་སངས་རྒྱས་ཀྱི་སྤྲུལ་པ་གྲངས་མེད་པ ་འགྱེད་པ་མཐོང་བ་དང་གསུམ། རྒྱལ་བ་དམ་པས་གསུངས་ཤིང་སྨྲས་པའི་ཆོས་ཀྱི་སྒོ་དཔག་ཏུ་ མེད་པའི་བསྟན་པ་ཀུན་བདག ་གི་གསལ་བར་མཐོང་ཞིང་རྟོགས་པ་སྙམ་བྱེད་པ་དང་བཞི། དུས་བཞིའམ་ཚེ་རབས་སྔ་ཕྱི་ཀུན་ཤེས་ཏེ་ཡིད་ལ་ས་ལེར་གསལ་ཞིང་མཐོང་སྙམ་བྱེད་པ་དང་ལྔ༌། འགྲོ་བ་རྒྱུ་དྲུག་གི་ལམ་ལ་གནས་པའི་སྲིད་པ་བར་མ་ཀུན་སྲིན་བུ་ཡན་ཆད་གང་དུ་སྐྱེ་བ་དྲུང་ན་འཁོད་པ་བཞིན་ཡིད་ལ་སྣང་བ་དང་དྲུག དེ་དག་ལས་ཉམ་ཐག་པ་རྣམས་ལ་གདུང་བའི་སྙིང་རྗེ་ཆེན་པོ་རང་དབང་མེད་པར་བྱིན་རླབས་ཀྱི་ཤུགས་ཀྱིས་འབྱུང་བ་དང་བདུན། ཉིན་དང་མཚན་མོ་མེད་པར་ཀུན་ཏུ་སྣང་ཞིང་གསལ་བའི་འོད་ཆེན་པོ་རབ་ཏུ་འབར་བར་མཐོང་བ་དང་བརྒྱད། བདག་གི་ལུས་འབྱུང་བ་དང་ས་རྡོ་རི་བྲག་མེ་ཆུ་རྩིག་པ་སོགས་ཅི་ལའང་མི་རྡུགས་པར་ཐོགས་པ་མེད་པར་འགྲོ་བར་མཐོང་བ་དང་དགུ། ནམ་མཁའ་ལ་ས་ལ་བྱ་བ་བཞིན་འགྲོ་འདུག་དང་ཉལ་བ་སོགས་བྱེད་པར་ནུས་པ་དང་བཅུ། ཕྱོགས་བཅུའི་རྒྱལ་བ་དམ་པ་རྫོགས་པའི་སངས་རྒྱས་ཐམས་ཅད་ཀྱིས་ཕྱག་གསེར་གྱི་མདོག་ཅན་བརྐྱངས་ནས་བདག་གི་སྤྱི་བོར་བཞག་ནས་ལུང་སྟོན་པར་མཐོང་བ་དང་བཅུ་གཅིག །འགྲོ་བ་སེམས་ཅན་ཀུན་གྱི་སྐད་དང་མཐུན་པ་ཉིད་དུ་ཆོས་སྟོན་ཅིང་སྨྲ་བར་ནུས་སོ་སྙམ་དུ་ཤེས་པ་དང་བཅུ་གཉིས། སྣོད་བཅུད་ཀྱི་དངོས་པོ་བརྟན་གཡོ་ཀུན་གྱིས་བདག་ལ་བསྟི་གནས་སུ་བཀུར་ཏེ་འདུད་ཕྱག་དང་བཀུར་སྟི་བྱེད་པར་མཐོང་བ་དང་བཅུ་གསུམ། སྟོང་གསུམ་འཇིག་རྟེན་གྱི་ཁམས་ཐམས་ཅད་ལག་མཐིལ་ལྟར་མཉམ་པར་བཀོད་པ་མཐོང་བ་དང་བཅུ་བཞི།  བདག་གི་སེམས་ཀྱི་ཆོས་ཉིད་དེ་ཁོ་ན་ཉིད་ཐོགས་པ་མེད ་པར་ཆོས་ཐམས་ཅད་ཀྱི་རང་བཞིན་དུ་གསལ་བར་སྣང་བར་རྟོགས་སྙམ་བྱེད་པ་དང་བཅོ་ལྔ། ང་ནི་ཏིང་ངེ་འཛིན་ལས་སུ་རུང་བས་ཅི་ལའང་ཐོགས་པ་མེད་པར་སེམས་ཅན་གྱི་དོན་ནུས་སྙམ་བྱེད་པ་དང་བཅུ་དྲུག སངས་རྒྱས་དང་བྱང་ཆུབ་སེམས་དཔའ་དམ་པ་མང་པོ་སྣང་བས་རིགས་ཀྱི་བུ་ཁྱོད་འཇིག་རྟེན༼༢༥༢༽གྱི་ཁམས་སུ་སེམས་ཅན་གྱི་དོན་ལ་འགྲོ་ཞིང་ཆོས་སྟོན་པར་རིགས་སོ། །ཞེས་བདག་ལ་བསྒོ་བར་མཐོང་བ་དང་བཅུ་བདུན། ཚངས་པ་དང་བརྒྱ་བྱིན་ལ་སོགས་པ་འཇིག་རྟེན་གྱི་གཙོ་བོ་ལྷ་ཀླུ་མཐུ་བོ་ཆེ་མང་པོས་བདག་ལ་མཆོད་པ་འབུལ་བར་མཐོང་བ་དང་བཅོ་བརྒྱད་དོ། །དེ་ལྟར་བཅོ་བརྒྱད་པོ་འདི་དག་ཇི་ལྟར་སྣང་ཡང་སེམས་ཉིད་རང་བཞིན་གྱི་འོད་གསལ་བའི་དོན་དུ་ཤེས་ཤིང་རྟོགས་ནས་མི་འཛིན་ཅིང་དགའ་བར་མི་བྱེད་ན་དམ་པའི་རྟགས་བཅོ་བརྒྱད་དུ་འགྱུར་ཏེ་སྣང་སྟོང་གི་ཞེན་པས་གང་ཡང་མེད་དོ། །གང་གིས་དེ་ལྟར་ཆོས་ཉིད་དུ་མི་ཤེས་པར་མཚན་མར་བཟུང་སྟེ་དངོས་པོར་ཞེན་པས་དགའ་བར་བྱེད་པ་ནི་དེ་ཁོ་ན་ཉིད་མཐོང་དུ་སྟེར་བར་ལོག་པའི་བདུད་ཆེན་པོ་ཡིན་པས་བདུད་ཀྱི་སྤྱོད་ཡུལ་དུ་ཁས་བླངས་པའི་དོན་བཤད་པའོ། །དེ་བས་ན་རྟགས་དང་བདུད་ནི་ཐུན་མོང་པར་བསྟན་པའོ། །འདི་དག་བསམ་གཏན་ཉམས་ཀྱི་སྒྲོན་མ་དང་ཡང་གོ་རིམས་ཅུང་ཟད་མི་འདྲ་བ་ཙམ་ལས་དོན་ལ་ཁྱད་པར་མེད་དེ་ཚིག་ཀྱང་གཅིག་གོ།

གསུམ་པ་མཚན་མ་རང་གྲོལ་ཞིང་གང་ལའང་དགའ་འགྱོད་མེད་ན་ཚད་དུ་ཕྱིན་པ་ནི།

སྒོ་དྲུག་མཚན་མ། ཞེས་པ་ནས། རང་ཞི་དེ་ཉིད་ཡིན། །ཞེས་པའི་བར་གྱིས་བསྟན་ཏེ།

སྒོ་དྲུག་མཚན་མ་ཅི་སྐྱེས་ཀྱང་། །རང་བྱུང་རང་ཞི་ཅི་དགར་བཞག །མ་སྐྱེས་པས་ན་བཟློག་ཏུ་མེད།།

དེ་ཡང་དེ་བཞིན་དེ་ཉིད་དོ། །འདས་དང་མ་འོངས་ད་ལྟར་གྱི། །ཉེས་དང་ལེགས་པ་གང་ལ་ཡང་།།

དགའ་དང་འགྱོད་པའི་རྟོག་པ་མེད། །རང་བྱུང་རང་བཞིན་དེ་ཉིད་ཡིན།།

སེམས་བཅོས་པའི་རྗེས་སུ་བསྟན་པའི་ཕྱིར། དབང་པོའི་སྒོ་དྲུག་གི་ཤེས་པས་རང་བཞིན་ལ་རྟོག་པའིམཚན་མ་སྣ་ཚོགས་ཅི་ཞིག་སྐྱེས་ཀྱང་དེ་ཁོ་ན་ཉིད་དུ་རང་བྱུང་བས་དགག་ཏུའང་མེད་པར་རང་ཞི་ཡིན་ལ། མཐོང་ཞིང་ཐོས་པ་ལ་སོགས་པ་ཅི་དགར་བཞག་པ་ཉིད་མ་སྐྱེས་པའི་ཆོས་ཉིད་དུ་རྟོགས་པས་ན་དེ་ལ་སྤོང་རྒྱུ་དང་བཟློག་ཏུའང་མེད་དོ། །དེ་ཅིའི་ཕྱིར་ཞེ་ན། དེ་ཡང་རྟོག་པ་དེ་དག་གི་ངོ་བོའི་དེ་བཞིན་ཉིད་ལ་འདི་འདྲར་མི་ཟིན་པས་དགག་བྱ་ངང་གིས་བྲལ་བ་ནི་མ་བཅོས་མ་བསླད་པའི་ཆོས་ཉིད་མ་ནོར་བའི་དེ་ཁོ་ན་ཉིད་དོ། །འདས་དང་མ་འོངས་ད་ལྟར་གྱིས་བསྡུས་པའི་དུས་གསུམ་གྱི་ལས་དང་འབྲས་བུ་ཉེས་པ་དང་ལེགས་པའི་བཟང་ངན་གྱིས་དངོས་པོར་གྱུར་བ་གང་ཅི་ལ་ཡང་ལེགས་ཤིང་བཟང་བ་ལ་དགའ་བ་དང་ངན་པ་མི་བཟང་བ་ལ་མི་དགའ་ཞིང་འགྱོད་པའི་གཉིས་རྟོག་བྱེད་པ་གང་ཡང་མེད་པར་གྱུར་པ་ཉིད་ཚད་དུ་ཕྱིན་པའོ། །དེའང་བཤད་པ་ལྟར་རང་བྱུང་རང་ཞི་སྟེ་དེ་ཉིད་དེ་བཞིན་ཉིད་དུ་རློམ་སེམས་པའང་བྲལ་བའི་ཐབས་ཆེན་པོར་གྱུར་པ་ཁོ་ན་ཡིན་ནོ། །འོན་ཀྱང་སྐྱོན་ནི་སྒོ་གཉིས་དང་ཐུན་མོང་ཡང་བཅོས་ཐབས་འདི་དག་ནི། གཅིག་ཆར་བའི་དབང་དུ་བཀའ་སྩལ་པ་སྟེ། རིམ་གྱིས་པའི་སྐྱོན་དང་དགག་ཐབས་ནི་ཅི་རིགས་སུ་༼༢༥༣༽བསྙད་དུ་ཡོད་ནའང་རྒྱུད་ཉིད་ཀྱི་བཀའ་ལུང་ལས་མ་གསུངས་པ་དང༌། སྒྲ་ཡིས་འཇིགས་པས་མ་བསྙད་དོ།།

གསུམ་པ་བསྒོམ་པའི་ལྟས་བསྟན་པ་ལ་གཉིས་ཏེ། ལྟས་དངོས་བཤད་པ། ཆོ་འཕྲུལ་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

འདིར་ནི་དམ་པར། ཞེས་པ་ནས། དམ་པའི་སྔ་ལྟས་སོ། །ཞེས་པའི་བར་གྱིས་བསྟན་ཏེ།

འདིར་ནི་དམ་པར་གང་ངེས་པ། །རྣལ་འབྱོར་མཚན་མའི་སྔ་ལྟས་ནི། །ཆུ་ཀླུང་མེ་གསེར་གང་ན་བར།།

འདུ་འཕྲོ་འགྱུར་རྩི་ངེས་པ་བཞིན། །དམ་པར་ངེས་ན་དམ་པར་འབྱུང་། །དམ་པར་མ་ངེས་ཐམས་ཅད་བདུད།།

དམ་པར་ངེས་ན་ཆུང་ངུ་ཙམ། །གང་བྱུང་དམ་པའི་སྔ་ལྟས་སོ།།

དེ་ལྟར་བསྒོམ་སྟེ་ཉམས་སུ་བླངས་པའི་འབྲས་བུ་ལ་སྦྱོར་བའི་སྔ་ལྟས་ཀྱི་དཔེ་གང་སྙམ་པ་ལ། དེ་ཡང་གནས་སྐབས་འདིར་ནི་རྒྱུ་ཡི་དུས་ན་ལྟ་བའི་ངོ་བོ་དམ་པར་གང་གིས་ངེས་པ་རྙེད་ནས་དོན་ལ་ཉེ་བའི་རྣལ་འབྱོར་གྱི་མཚན་མའི་སྔ་ལྟས་ལྔ་འབྱུང་བ་ནི། དཔེར་ན་ཆུ་དང་རླུང་དང་མེ་དང་གསེར་རྣམས་འབྱུང་བ་ག་ན་བར་དེ་དག་གི་སྔ་ལྟས་ཆུ་ཡོད་ན་རླབས་དང་སྤབས་དང་སྲོག་ཆགས་སྐྱར་ན་འདུ་ཞིང་འབྱུང་བ་དང༌། རླུང་འབྱུང་བའི་སྔ་ལྟས་སྤྲིན་རྒྱུག་ལ་དུམ་བུར་འཆད་ཅིང་འཕྲོ་བ་དང༌། མེ་ཡི་ལྟས་དུ་བ་འབྱུང་བ་དང༌། རྩི་མཚལ་ལོ་མ་གང་དུ་ཡོད་པ་ན་གསེར་ཡོད་པར་ངེས་པ་བཞིན། བློ་མ་ནོར་བས་ལྟ་བ་དང་ཏིང་ངེ་འཛིན་གྱི་དོན་དམ་པར་ངེས་ནས་དོན་ལ་ཕེབས་ཤིང་གོམས་ན། བློ་དང་ལུས་དང་རྫས་དང་རྨི་ལམ་དང་འདུན་པ་ལྔ་ཡི་ལྟས་ཀྱི་དྲོད་རྟགས་དམ་པ་ངེས་པར་འབྱུང་ངོ༌། །གལ་ཏེ་ལྟས་བྱུང་ཡང་རིག་པ་དམ་པར་གདེང་དུ་ཚུད་དེ་ལྟ་བ་མ་ངེས་པས་དངོས་པོར་ཞེན་པ་འབྱུང་ན་ནི་ཐམས་ཅད་བདུད་དུ་འགྲོ་བར་འགྱུར་རོ། །ལྟ་བ་དང་ཏིང་ངེ་འཛིན་གྱི་གདེང་དམ་པར་ཚུད་དེ་དོན་དུ་ངེས་པ་ན་ལྟས་ཆུང་ངུ་ཙམ་གང་ཞིག་བྱུང་བ་ཡན་ཆད་འབྲས་བུ་དམ་པ་འབྱུང་བའི་སྔ་ལྟས་སུ་ཤེས་པར་བྱ་སྟེ་བློ་རྩལ་གྱིས་བདེན་པ་མཐོང་བའི་དྲོད་རྟགས་སོ།།

གཉིས་པ་རྒྱས་པར་བཤད་པ་ལ་ལྔ་སྟེ། བློ་རྩལ་གྱི་ཁྱད་པར་བསྟན་པ། སྣང་བ་ལུས་ཀྱི་སྔ་ལྟས། ངོ་མཚར་རྫས་རྙེད་ཀྱི་ཚུལ་རྟགས། འདུན་པ་མང་པོའི་སྔ་ལྟས། མཚན་མ་པྲའི་སྔ་ལྟས་བཤད་པའོ། །དང་པོ་ལ་གསུམ་སྟེ། བདེན་པ་མཐོང་བའི་ལྟས་བསྟན་པ། དྲོད་རྟགས་གསལ་བའི་རྩལ་བཤད་པ། ངག་བདེན་གྲུབ་པའི་ལྟས་བསྟན་པའོ། །དང་པོ་ནི།

གང་གིས་དམ་པ། ཞེས་པ་ནས། རྒྱུ་བ་ཐམས་ཅད་འབྱུང༌། །ཞེས་པའི་བར་གྱིས་བསྟན་ཏེ།

གང་གིས་དམ་པ་ཉིད་ཐོས་ན། །མི་སྐྲག་མི་སྔ་དགའ་བ་སྐྱེ། །གང་ཞིག་དམ་པ་ཉིད་ལྟ་བ། །ཐམས་ཅད་དམ་པ་ཉིད་དུ་མཐོང་། །དམ་པའི་ཀློང་དུ་གང་གྱུར་པ། །རྣམ་གྲངས་མང་པོ་དམ་པར་སྡུད། །དམ་པར་ངེས་པ་མཐོང་བ་ན། །ཚིག་ལམ་རྗེས་སུ་དེ་མི་འགྲོ། །དེ་མཐོང་ཐམས་ཅད་དམ་པར་གསལ། །སྣང་བ་མེད་པའི་དམ་པ་ནི། །སྣང་བ་མེད་པར་མཐོང་བར་གྱུར། །དེ་ཉིད་ཀུན་གྱི་རྒྱུ་ཡིན་ཏེ། །ཆོ་འཕྲུལ་རྒྱུ་བ་ཐམས་ཅད་འབྱུང་།།

བདེན་པ་མཐོང་བའི་རྟགས་བློ་རྩལ་གྱི་ཁྱད་པར་གང་སྙམ་པ་ལ། རྣལ་འབྱོར་པ་གང་གིས་ཆོས་ཉིད་མཆོག་ཏུ་གསང་བའི་དོན་ཟབ་མོ་དམ་པ་ཉིད་ཐོས་པ་ན་ཡང་མི་སྐྲག་༼༢༥༤༽ཅིང་མི་དངངས་པར་དགའ་བ་སྐྱེ་བ་ནི་དངོས་སུ་ས་བཞི་པ་ལ་སོགས་པར་ཐོབ་པ་དང༌། གང་ཞིག་རིག་པ་ཕྱིན་ཅི་མ་ལོག་པས་གདལ་ཁྱབ་མཉམ་པ་ཆེན་པོའི་རང་རིག་དམ་པ་གསང་བའི་ཆོས་ཉིད་དུ་ཡང་དག་པར་ལྟ་བ་ལ་བརྟེན་ནས་སྤྱོད་ཡུལ་གྱི་དངོས་པ་ཐམས་ཅད་དེ་ཁོ་ན་ཉིད་དམ་པ་འགག་པ་མེད་པའི་རང་སྣང་ཉིད་དུ་མཐོང་བ་དང༌། དམ་པའི་སྣང་ཡུལ་ཐམས་ཅད་ངེས་པའི་ཀློང་དུ་གང་ཤར་རང་གྲོལ་དུ་གྱུར་པ་ཉིད་ཀྱིས་ཚིག་གི་རྣམ་གྲངས་མང་པོ་རྣམས་ཀྱང་མ་ནོར་བའི་དོན་དམ་པར་ཡང་དག་པར་སྡུད་ཤེས་པ་དང༌། ལྟ་བ་དམ་པས་དོན་ངེས་པར་མཐོང་སྟེ་གནས་པ་ན། ཚིག་ལམ་གྱི་རྗེས་སུ་དེ་ཉིད་མི་འགྲོ་བས་ཚིག་ལ་དགའ་བ་མི་སྐྱེ་བ་དང༌། དེ་ལྟར་མཐོང་བས་ཐམས་ཅད་རིལ་ཆོས་ཉིད་དམ་པར་གསལ་བའོ། །དེ་བས་ན་ཆོས་ཉིད་སྣང་བ་མེད་པའི་དམ་པར་ཆོས་ཅི་ཡང་མ་མཐོང་བ་ནི། གཉིས་སུ་སྣང་བ་མེད་པར་ཡང་དག་པའི་ཆོས་ཉིད་ཀྱི་བདེན་པ་མཐོང་བར་བསྟན་ཏེ། ཉམས་དྲོད་ཀྱང་ཐོབ་པར་འགྱུར་བ་ཡིན་ནོ། །འཆད་པའི་ཆོ་འཕྲུལ་རྣམས་རྒྱུ་གང་ལས་འབྱུང་སྙམ་པ་ལ། ཇི་ལྟ་བ་དེ་ཁོ་ན་ཉིད་གཏིང་ཕྱིན་པར་རྟོགས་པ་དེ་ཉིད་ནི། གང་ཡང་མ་བཀོལ་ཞིང་རིལ་གྱི་དངོས་གཞིར་གྱུར་བས་ཀུན་གྱི་རྒྱུ་ཡང་ཡིན་ཏེ། འཆད་པའི་ཆོ་འཕྲུལ་གྱི་རྒྱུ་བ་ཐམས་ཅད་འབྱུང་བའི་ཡང་རྒྱུའོ། །དེ་སྐད་དུ་རྩ་བའི་རྒྱུད་ལས།

བློ་རྩལ་ལས་ཀྱི་ཁྱད་པར་གྱིས། །ཏིང་འཛིན་དྲོད་ཀྱི་སྔ་ལྟས་འབྱུང༌། །ཡང་དག་བདེན་པའི་དོན་བསྟན་ན། །མི་སྐྲག་མི་སྡང་དགའ་བ་སྐྱེ། །ཡང་དག་དོན་ལ་ངེས་བལྟས་ན། །འཁོར་བའི་ཆོས་ལ་སྐྱོ་བ་སྐྱེ། །ཡང་དག་དོན་ལ་འདྲིས་པ་དང༌། །རྣམ་གྲངས་ཆོས་ལ་དད་མི་འགྱུར། །ཡང་དག་དོན་ཉིད་མཐོང་བ་ན། །ཚིག་ལ་དགའ་བ་མི་སྐྱེ་ཞིང༌། །དོན་ཉིད་ཉེ་བར་འཛིན་པར་བྱེད། །དོན་མཐོང་བ་དང་ཡེ་ཤེས་སྐྱེ། །ཡེ་ཤེས་སྐྱེས་པར་གྱུར་པ་དང༌། །དངོས་པོར་སྣང་བ་ཐམས་ཅད་ཀུན༌། །སྒྱུ་མ་བཞིན་དུ་ཤེས་པར་འགྱུར། །སྒྱུ་མ་ཙམ་དུ་ཤེས་པ་ལ། །བརྟེན་ནས་ཆོས་ཉིད་དོན་བལྟས་ན། །སྣང་བ་མེད་པའི་དོན་ཉིད་ནི། །སྣང་བ་མེད་པར་མཐོང་བར་འགྱུར། །སྣང་མེད་སྲིད་པ་མཐོང་བའི་ཚེ། །ཆོ་འཕྲུལ་རྒྱུ་བ་ཐམས་ཅད་འབྱུང༌། །དེ་ནི་བདེན་པའི་སྔ་ལྟས་སོ། །ཞེས་གསུངས་སོ།།

གཉིས་པ་དྲོད་རྟགས་གསལ་བའི་རྩལ་བཤད་པ་ནི།

གཡོ་དང་དྲོད་ཐོབ། ཞེས་པ་ནས། འབྱུང་བའི་སྐྱེ་མཆེད་སྣང༌། །ཞེས་པའི་བར་༼༢༥༥༽གྱིས་བསྟན་ཏེ།

གཡོ་དང་དྲོད་ཐོབ་བརྟན་པ་དང་། །གསལ་དང་རྟགས་ཐོབ་བརྟན་པ་ནི། །ཉི་ཟེར་རྡུལ་ཕྲན་སྨིག་རྒྱུ་དང་།། མཚོ་རླབས་རླུང་དང་ཆར་གྱི་རྒྱུན། །སྤྲིན་ལྡིང་ཏ་ལ་གང་འཕར་འགྲོ། །ས་གཡོ་འབྱུང་བའི་སྐྱེ་མཆེད་འབྱུང་།།

དྲོད་རྟགས་ཀྱི་རྣམ་གྲངས་དང་དཔེ་གང་སྙམ་པ་ལ། དྲུག་གམ་བརྒྱད་དུ་སྟོན་ཏེ། རྟོགས་པའི་དྲོད་རྟགས་གཡོ་བ་དང༌། དྲོད་རྣམ་པ་གསུམ་བྱུང་བ་དང་། དེ་ནས་དྲོད་ཐོབ་པ་དང༌། དྲོད་བརྟན་པར་འབྱུང་བ་དང༌། ཏིང་ངེ་འཛིན་གསལ་བའི་དྲོད་དམ་གཡོ་རྟགས་དང༌། རྟགས་ཐོབ་ཅིང་བརྟན་པར་གྱུར་པ་རྣམས་ནི་འདི་ལྟར། ཉི་ཟེར་གྱི་རྡུལ་ཕྲན་ལྟ་བུར་མཐོང་བའི་དོན་ནི་གཡོ་བའི་རྟགས་སོ། །སྨིག་རྒྱུ་ལྟ་བུའི་དོན་ནི་དང་པོའི་དྲོད་དོ། །མཚོ་རླབས་ལྟ་བུ་ནི་དྲོད་བར་པའོ། །ལུས་སེམས་རླུང་ལྟར་ཡངས་པ་ནི་ཐ་མའི་དྲོད་དེ་འདི་དག་དྲོད་གཡོ་བའི་རྣམ་གྲངས་ཏེ། དྲུག་ཏུ་བྱེད་ན་རྟགས་གཡོ་བ་དང་དྲོད་གཉིས་སུ་བརྩི་ལ། བརྒྱད་དུ་བྱེད་ན་དྲོད་གཡོ་བ་དང་བྱུང་བ་གསུམ་མོ། །དེ་ནས་ཡིག་འབྲུའི་འཕྲོ་འདུ་ཆར་གྱི་རྒྱུན་འབབ་པ་ལྟར་འབྱུང་བ་ནི་དྲོད་ཐོབ་པའོ། །ལུས་ནམ་མཁའ་ལ་སྤྲིན་བཞིན་ལྡིང་བ་ནི་དྲོད་བརྟན་པའོ། །ལུས་ཏཱ་ལ་གང་ཙམ་དུ་ནམ་མཁའ་ལ་འཕར་ཏེ་འགྲོ་བ་ནི་ཏིང་ངེ་འཛིན་གསལ་བའི་དྲོད་དམ་གཡོ་བའི་རྟགས་སོ། །སྤྱོད་ཡུལ་ཀུན་ས་གཡོ་བ་ལྟར་ཡོམ་ཡོམ་མེར་མེར་དུ་གྱུར་ན་རྟགས་ཆེན་དང་པོ་ཐོབ་པའོ། །དེ་བཞིན་དུ་མེ་རླུང་ས་ཆུའི་འབྱུང་བའི་སྐྱེ་མཆེེད་གང་ལྟར་སྒོམ་པར་སྣང་དུ་བཏུབ་པ་ནི་རྟགས་བརྟན་པ་སྟེ། འདི་དག་མི་འགྱུར་བར་ཡོད་པ་ནི་བརྟན་པ་ཉིད་དེ། སྔ་མའི་ལེའུ་གསུམ་པ་ལས་གསལ་བར་འབྱུང་སྟེ། དེ་ནས་ཉི་མའི་འོད་ཟེར་གྱི། །རྡུལ་ཕྲན་འདྲ་བའི་མཚན་མ་འབྱུང༌། །དེ་ནི་གཡོ་བའི་སྔ་ལྟས་སོ། །དེ་ནས་སྨིག་རྒྱུ་ལྟ་བུར་འབྱུང༌། །དང་པོའི་དྲོད་ཅེས་བྱ་བར་བཤད། །དེ་ནས་མཚོ་ཡི་རླབས་ལྟར་འབྱུང༌། །བར་གྱི་དྲོད་ཅེས་བྱ་བར་བཤད། །དེ་ནས་རླུང་ཆེན་ལྟ་བུར་ཡང༌། །ཐོགས་པ་མེད་པར་འབྱུང་བར་འགྱུར། །ཐ་མའི་དྲོད་ཅེས་བྱ་བར་བཤད། །དེ་ནས་ཡིག་འབྲུའི་དྲོད་སྤྲོས་པས། །ཆར་ཆེན་འབབ་པ་ལྟ་བུར་འབྱུང༌། །དེ་ནི་ཐོབ་པའི་དྲོད་ཅེས་བཤད། །དེ་ནས་མཁའ་ལ་སྤྲིན་ལྡིང་བཞིན། །ཏིང་འཛིན་རྩལ་འཕང་མཐོ་བར་འགྱུར། །དེ་ནི་ཤིན་ཏུ་བརྟན་པའི་དྲོད། །དེ་ནས་ཏཱ་ལ་གཅིག་ཙམ་དུ། །བདག་གི་ལུས་ནི་དབང་མེད་པར། །མཁའ་ལ་འཕར་ཞིང་འཕགས་པར་རྩོལ། །འདི་ནི་ཤིན་ཏུ་གསལ་བའི་དྲོད། །དེ་ནས་ས་ཆེན་གཡོ་བ་ལྟར། །ཤིན་ཏུ་ཡམ་ཡོམ་མར་མེར་འབྱུང༌། །འདི་ནི་དང་པོའི་རྟགས་ཞེས་བྱ། །དེ་ནས་༼༢༥༧༽ཏིང་འཛིན་རྩལ་སྦྱངས་ན། །ཇི་ལྟར་དམིགས་པ་དེར་འགྲུབ་སྟེ། །མེ་ཡི་སྐྱེ་མཆེད་དེར་བསྒོམ་ན། །མེ་ཡི་རང་བཞིན་ཉིད་དུ་འགྱུར། །ཆུ་ཡི་སྐྱེ་མཆེད་དེར་སྒོམས་ན། །ཆུ་ཡི་སྐྱེ་མཆེད་ཉིད་དུ་གྱུར། །རླུང་གི་སྐྱེ་མཆེད་དེར་སྒོམས་ན། །རླུང་གི་སྐྱེ་མཆེད་ཉིད་དུ་འགྱུར། །ཡིག་འབྲུའི་སྐྱེ་མཆེད་དེར་སྒོམས་ན། །ཡིག་འབྲུ་གང་ལྟར་གསལ་བར་འགྱུར། །དེ་ལྟར་རྫས་ཀྱི་སྐྱེ་མཆེད་དུ། །གང་ལྟར་སྒོམ་པ་དེ་ལྟར་འགྱུར། །དེ་ནི་རྟགས་ཆེན་ཐོབ་པ་ཡིན། །ཞེས་གསུངས་པས་ཡིད་ཆེས་པར་བྱའོ།།

གསུམ་པ་ངག་བདེན་གྲུབ་པའི་ལྟས་བསྟན་པ་ནི།

འབྱུང་རྒྱུན་ཟུག་རྔུ། ཞེས་པ་ནས། ཡོངས་སུ་ནད་ཞི་བ། །ཞེས་པའི་བར་གྱིས་བསྟན་ཏེ།

འབྱུང་རྒྱུན་ཟུག་རྔུ་ལ་སོགས་པ། །གང་གིས་ཡོངས་སུ་ནད་ཞི་བའོ།།

བློའི་རྩལ་རྫོགས་ནས་ངག་གི་ལས་གང་སྙམ་པ་ལ། མེ་ཕུང་དང་ཆུ་རླུང་གནོན་པ་དང༌། རླུང་ཆེན་འབྱུང་བ་རྣམས་ཀྱི་རྒྱུན་དང་ནད་ཀྱི་ཟུག་རྔུ་ལ་སོགས་པ་དག་ལ་ཡང་གང་གིས་ཡོངས་སུ་ཞི་བར་གྱུར་ཅིག་ཅེས་བརྗོད་པས་ཞི་བ་དང༌། ནད་པའི་ཚོགས་ལ་གང་ན་བར་སེ་གོལ་གཏོགས་ཤིང་སོས་ཤིག་པར་བརྗོད་པས་ནད་ཞི་བར་འགྱུར་བའི་ངག་གི་རྩལ་གྱིས་བདེན་པའི་ལྟས་འབྱུང་བ་སྟེ། དེ་ཉིད་ལས། བློ་ཡི་ཏིང་འཛིན་རྩལ་རྫོགས་ན། །ངག་གི་བདེན་པའི་རྩལ་འབྱུང་སྟེ། །སྲིད་པའི་མེ་ཆེན་མཐོང་བ་ན། །ཞི་བར་གྱུར་ཅིག་བྱས་པ་ཡིས། །དེ་ཉིད་དུ་ནི་ཆད་པར་འགྱུར། །ཆུ་རླུང་གནོད་པར་རྒྱུན་བྱུང་ན། །འཆད་པར་གྱུར་ཅིག་བརྗོད་པ་ཡིས། །དེ་ཉིད་དུ་ནི་ཆད་པར་འགྱུར། །རླུང་ཆེན་གནོད་པའི་རྒྱུན་བྱུང་ན། །ཞི་བར་གྱུར་ཅིག་བརྗོད་པ་ཡིས། །དེ་ཉིད་དུ་ནི་ཆད་པར་འགྱུར། །ནད་པའི་ཚོགས་ནི་མཐོང་བ་ན། །གང་ན་ན་བའི་དམིགས་དེར་ནི། །སེ་གོལ་གཏོགས་པ་ཙམ་གྱིས་ན། །ནད་རྣམས་ཞི་བར་འགྱུར་ཞེས་བརྗོད། །ནད་ཀྱི་ཚོགས་རྣམས་ཞི་བ་འགྱུར། །དེ་བཞིན་ངག་གིས་བརྗོད་བྱས་པས། །ཐམས་ཅད་མ་ལུས་འགྲུབ་པར་འགྱུར། །ཞེས་སོ།།

གཉིས་པ་སྣང་བ་ལུས་ཀྱི་སྔ་ལྟས་ནི།

མུན་པའི་སྐྱེ་མཆེད། ཅེས་པ་ནས། པ་ལས་གང་འབྱིན་པའོ། །ཞེས་པའི་བར་གྱིས་བསྟན་ཏེ།

མུན་པའི་སྐྱེ་མཆེད་ཆོམས་པ་དང་། །ལུས་ཀྱི་བཟོད་པ་ཐོབ་པ་དང་། །ཀུན་ལ་བདེ་བླག་ཇི་བཞིན་པའོ།།

གང་མིན་གང་དུ་བསྒྱུར་བ་དང་། །གང་མེད་པ་ལས་གང་འབྱིན་པའོ།།

ལུས་ཀྱི་རྩལ་གང་ཞེ་ན། མུན་པའི་སྐྱེ་མཆེད་ཀྱི་གཉིད་ཆོམ་པ་དང༌། ལུས་ཀྱི་བཟོད་པ་ཐོབ་པས། ཚ་གྲང་ལྕི་ཡང་སྙོམས་ཏེ་བཟོད་པ་ནི་དང་པོའི་དྲོད་དོ། །ཁམས་ཀྱི་ཟས་བྲལ་ཡང་མདངས་དང་དབང་པོ་གསལ་བ་དྲོད་གཉིས་པའོ། །ཤིང་བལ་ལྟ་བུར་ཡང་བ་དང་ཁམས་བདེ་མི་བདེ་མེད་པས་ནད་དང་བྲལ་ཞིང་བདེ་བ་ནི་དྲོད་བརྟན་པ་༼༢༥༧༽དང་གསུམ་མོ། །ལུས་ཀྱི་རྟགས་དྲོད་གཉིས་པ་འདི་ནི་ཏིང་ངེ་འཛིན་གྱི་རོ་ཚོར་བའི་རྟགས་སོ། །སྐྱིལ་ཀྲུང་གི་ཁྲུ་གང་ཙམ་དུ་འཕར་བ་དང༌། ཏཱ་ལ་གང་ཙམ་དུ་འགྲོ་བ་རྟགས་ཐོབ་པའོ། །ནམ་མཁའ་ལ་གོམ་པས་འགྲོ་བ་དང་ཆུ་ལ་མི་བྱིང་ས་ལ་འཛུལ་བ་དང་མེས་མི་འཚིག་རླུང་འཆིང་བར་ནུས་པ་སོགས་འབྱུང་བ་ཀུན་ལ་ཐོགས་པ་མེད་པར་བདེ་བླག་ཏུ་འདོད་པ་ཇི་བཞིན་དུ་བསམ་རྒུ་ཀུན་འགྲུབ་པ་ནི་རྟགས་བརྟན་པའོ། །མཐུའི་རྩལ་གང་ཞེ་ན། གང་མིན་པའི་དངོས་པོ་ས་རྡོ་བྱེ་མ་ལས་གསེར་དངུལ་ལ་སོགས་པ་དངོས་པོ་གཞན་གང་དུ་བསྒྱུར་བ་དང་། གང་མེད་པ་ལས་དངོས་པོ་གང་འབྱིན་པ་སྐམས་ལས་ཆུར་འབྱིན་པ་དང༌། སོལ་བ་ལས་ལྗོན་ཤིང་སྐྱེད་པ་ལ་སོགས་པའོ།།

གསུམ་པ་ངོ་མཚར་རྫས་རྙེད་ཀྱི་ཚུལ་རྟགས་ནི།

ཡིད་འོང་འདོད་གྲུབ་རྫས་མཆོག་རྙེད། །ཅེས་པས་བསྟན་ཏེ།

ཡིད་འོང་འདོད་གྲུབ་རྫས་མཆོག་རྙེད།།

ངོ་མཚར་རྫས་རྙེད་ཀྱི་ཚུལ་རྟགས་ནི་གང་སྙམ་པ་ལ། ནོར་བུ་ལ་སོགས་པ་ཡིད་དུ་འོང་བའི་ནོར་རྙེད་པ་དང༌། སེམས་ལ་འདོད་རྒུ་ཐམས་ཅད་གྲུབ་ཅིང་འབྱུང་བ་དང༌། རྫས་མཆོག་ངོ་མཚར་ཅན་རྙེད་པར་འགྱུར་བ་སྟེ། སྔ་མ་ལས། སྤྱོད་པའི་མཐུ་དང་རྩལ་རྫོགས་ན། །འབྱོར་པའི་ཡོན་ཏན་རྫོགས་འགྱུར་ཏེ། །ཡིད་དུ་འོང་བའི་ནོར་འབྱུང་ཞིང༌། །འདོད་པ་བསམ་པ་ཐམས་ཅད་འགྲུབ། །རྫས་ཀྱི་མཆོག་ཏུ་གྱུར་བ་ཡི། །ངོ་མཚར་ཅན་ཡང་རྙེད་པར་འགྱུར། །དེ་དག་རུང་བའི་སྔ་ལྟས་སོ། །ཞེས་སོ།།

བཞི་པ་འདུན་པ་མང་པོའོ་སྔ་ལྟས་ནི།

ཀུན་དགའ་ཀུན་འདུད། ཅེས་པ་ནས། དབང་བསྒྱུར་མཆོག་གྲུབ་ལྟས། །ཞེས་པའི་བར་གྱིས་བསྟན་ཏེ།

ཀུན་དགའ་ཀུན་འདུས་ཀུན་ཡིད་དང་། །ཀུན་ལ་དབང་སྒྱུར་མཆོག་འགྲུབ་ལྟས།།

འགྲོ་གང་འདུན་པའི་སྔ་ལྟས་བསྟན་པའི་ཕྱིར། འགྲོ་བ་ཀུན་བདག་ལ་དགའ་བར་སེམས་པས་ཀུན་གྱིས་བདག་ཁུར་ཞིང་གུས་པས་འདུད་པ་དང༌། བདག་ཀུན་གྱིས་ཡིད་དུ་འོང་ཞིང་འཐད་པ་དང༌། བདག་གིས་ཀུན་ལ་ཇི་ལྟར་འདུལ་བ་ལྟར་དབང་བསྒྱུར་བའི་གཙོ་བོ་མཆོག་གྲུབ་པའི་ལྟས་ཀྱང་འབྱུང་བའོ། །དེ་དག་ལས་རྟགས་ནི། ལྷ་ལ་དམིགས་པ་ལས་དང་པོ་པ་ལའང་འབྱུང་ཞིང༌། མི་རྟོག་པ་ལ་དམིགས་པ་ལས་ནི་ས་བཞི་པ་ཡན་ཆད་དུ་འབྱུང་ལ། ངག་གི་རྩལ་དང་མཐུ་ནི། ལམ་གྱི་རིམ་པ་ལས་འདུན་པ་ནས་སར་ཉེ་བ་ན་ཡང་འབྱུང་བའོ། །སྐབས་སུ་མཚན་མ་སོ་སོར་སྒྲུབས་པས་གྲུབ་པ་ནི། ས་བཞི་པ་ནས་ཡར་འབྱུང་ངོ༌། འདུན་པ་ལ་ནི་རྒྱ་ཆེ་ཆུང་སྦྱར་ཏེ། ངོ་མཚར་རྫས་ནི་དྲོད་རྟགས་ཐོབ་ནས་འབྱུང་བའོ།།

ལྔ་པ་མཚན་མ་པྲའི་སྔ་ལྟས་བཤད་པ་ལ་བརྒྱད་དེ། བག་ཆགས་བྱང་༼༢༥༨༽བའི་ལྟས་བརྒྱད། འཇིགས་པ་དང་བྲལ་བའི་ལྟས་བརྒྱད། ས་ཐོབ་པའི་ལྟས་བདུན། ས་ནོན་པའི་ལྟས་བརྒྱད། སངས་རྒྱས་ཀྱི་སྲས་ཀྱི་ལྟས་བརྒྱད། ཆོས་ལ་དབང་ཐོབ་པའི་ལྟས་བཅོ་ལྔ། བདེན་པ་མཐོང་བའི་ལྟས་བརྒྱད། ལུང་ཆེན་ཐོབ་པའི་ལྟས་བཅུའོ། །དང་པོ་ནི།

ཡུལ་ལས་སྔོན་དུ། ཞེས་པ་ནས། སྤྱོད་པ་དག་པའི་ལྟས། །ཞེས་པའི་བར་གྱིས་བསྟན་ཏེ།

ཡུལ་ལས་མངོན་དུ་བྱུང་བའི་ལྟས། །སྒྲོན་མོར་བྱུང་དང་རྟག་པར་འཁྲུ། །རྣམ་དག་ཆུ་བོ་འབོགས་པ་དང་།།

ཆར་རྒྱུན་བུམ་པའི་ཆུ་བྱུང་དང་། །སྲེག་དང་གཡེང་དང་རྣམ་པར་མཐོར། །འདི་དག་སྦྱོར་བ་དག་པའི་ལྟས།།

མཚན་མ་པྲའི་རྨི་ལྟས་གང་ཞེ་ན། བག་ཆགས་འབྱོང་བའི་ལྟས་ཐོག་མར་འཆད་དེ། ཡུལ་ལ་དངོས་པོར་ཀུན་ཏུ་བརྟགས་པའི་བག་ཆགས་ཀྱི་ཡུལ་རྣམས་འབྱང་བ་ལས་རྟགས་སྔོན་དུ་བྱུང་བའི་ལྟས་ནི། རྟག་པར་སྒྲེན་མོར་འབྱུང་བ་རྨི་བ་དང༌། རྟག་པར་ཆུས་འཁྲུ་ཞིང་ཁྲུས་བྱེད་པར་རྨི་བ་དང༌། དྲི་མ་རྣམ་པར་དག་པར་རྨི་བ་དང༌། ཆུ་བོ་ཆེན་པོ་འབོགས་ཏེ་བརྒལ་བར་འགྱུར་བ་དང༌། མཚོ་ཆུ་ལ་རྐྱལ་བ་དང༌། ཆར་རྒྱུན་གྱིས་འཁྲུ་བ་དང༌། བུམ་ཆུ་འབྱུང་བས་འཁྲུ་བ་དང༌། མེ་དཔུང་གིས་བསྲེགས་པ་དག་རླུང་ཆེན་པོས་གཡེང་བར་བྱེད་པ་དང༌། དེ་ཡིས་རྣམ་པར་འཐོར་བར་བྱ་བ་རྨི་བ་དང་བཅུ་པོ་འདི་དག་གང་རྣམས་ནི་སོ་སོའི་བག་ཆགས་རྣམས་སྦྱོང་བ་ཉིད་རྣམ་པར་དག་ཅིང་འབྱང་བའི་ལྟས་ཏེ་ས་བཅུའི་རིམ་པར་སྐྱེའོ། །ཞེས་འགྲེལ་ཆེན་ལས་སོ། །ཆོས་རྗེའི་ཕྱག་མཆན་ལས། རྣམ་གྲངས་བརྒྱད་ཀྱི་སྒྲེན་མོར་འབྱུང་བ་ས་དང་པོ་དང་གཉིས་པར་སྦྱར་ཏེ་རྐྱེན་གྱིས་འགྱུར་བ་ལས་ཀྱི་བག་ཆགས་དག་པའི་ལྟས་དང༌། ཁྲུས་བྱེད་པ་ས་གསུམ་པ་དང་ས་བཞི་པར་སྦྱར་ཏེ་མངོན་དུ་རྒྱུ་བའི་བག་ཆགས་རགས་པ་དག་པའི་རྟགས་དང༌། རྣམ་པར་དག་པ་ས་ལྔ་པ་དང་སྦྱར་ཏེ་མངོན་དུ་རྒྱུ་བའི་བག་ཆགས་ཆ་ཕྲ་བ་དག་པའི་རྟགས་དང༌། ཆུ་བོ་འབོགས་རྐྱལ་ས་དྲུག་པ་དང་སྦྱར་ཏེ་ཀུན་ཏུ་འགྲོ་བའི་བག་ཆགས་དག་པའི་རྟགས་དང༌། ཆར་རྒྱུན་གྱིས་འཁྲུ་བ་ས་བདུན་པ་དང་སྦྱར་ཏེ་ལྷན་ཅིག་སྐྱེས་པའི་བག་ཆགས་དག་པའི་རྟགས་དང༌། བུམ་ཆུ་འབྱུང་བ་ས་བརྒྱད་པ་དང་སྦྱར་ཏེ་བག་ལ་ཉལ་གྱི་བག་ཆགས་རགས་པ་དག་པའི་རྟགས་དང༌། མེ་དཔུང་གིས་བསྲེགས་པ་ས་དགུ་པ་དང་སྦྱར་ཞིང༌། རླུང་ཆེན་པོས་གཡེང་འཐོར་ས་བཅུ་པ་དང་སྦྱར་ཏེ་བག་ལ་ཉལ་བ་ཆ་ཕྲ་བ་ཤིན་ཏུ་རྣམ་པར་དག་པའི་རྟགས་སོ། །ཞེས་གསུངས། རྩ་བའི་རྒྱུད་ལས། མཚན་མ་པྲ་ཡི་རྨི་ལྟས་ཀྱང༌། །ཤིན་ཏུ་རྒྱ་ཆེར་འབྱུང་བ་སྟེ། །རྣལ་འབྱོར་ཅན་གྱིས་ཤེས་པར་གྱིས། །བག་ཆགས་སྦྱང་བའི་སྔ་ལྟས་ཀྱང༌། །རྟག་པར་༼༢༥༩༽གཅེར་བུར་འབྱུང་བ་དང༌། །ཁྲུས་ཆེན་རྟག་ཏུ་བྱེད་པ་དང༌། །དྲི་མའི་ཚོགས་རྣམས་དག་པ་དང༌། །ཆུ་བོ་དག་ལ་རྒལ་བ་དང༌། །མཚོ་ཆུ་དག་ལ་རྐྱལ་བ་དང༌། ཆར་གྱི་རྒྱུན་གྱིས་འཁྲུ་བ་དང༌། །གཞན་གྱིས་བུམ་པ་གང་བའི་ཆུས། །བདག་གི་ལུས་ལ་ལྡུགས་པ་དང༌། །མེ་དཔུང་ཆེན་པོས་བསྲེགས་པ་དང༌། །ཤིན་ཏུ་མཐོན་པོའི་རྩེ་དག་ལས། །རླུང་གིས་ཤིན་ཏུ་གཡེང་ཞིང་འཐོར། །འདི་དག་བག་ཆགས་སྦྱོང་བའི་ལྟས། །ཞེས་གསུངས་ཏེ། དགུ་པོ་ས་དགུ་མན་ཆད་དང་སྦྱར་བར་གསུངས་སོ།།

གཉིས་པ་འཇིགས་པ་དང་བྲལ་བའི་ལྟས་བརྒྱད་ནི།

གང་འདིར་འཇིགས་དང༌། ཞེས་པ་ནས། བཅད་ལྟས་བཟང་པོ་ཡིན། །ཞེས་པའི་བར་གྱིས་བསྟན་ཏེ།

གང་འདིར་འཇིགས་དང་བྲལ་བ་ཡང་། །གཡུལ་འགྱེད་ཞི་དང་ཟུག་རྔུ་བྱུང་། །ཐ་མར་གྲོལ་དང་གཤེད་ལས་ཐར། །གདུག་པའི་ཚོགས་བྲལ་དུག་ནད་ཞི། །བཅིངས་བཀྲོལ་བཅད་ལྟས་བཟང་པོ་ཡིན།།

གང་འདིར་འཇིགས་པ་དང་བྲལ་བའི་སྔ་ལྟས་བསྟན་པ་ཡང༌། གཡུལ་འགྱེད་པ་ཞི་ནས་སླར་ལོག་པ་རྨི་བ་དང༌། ནད་ཀྱི་ཟུག་རྔུ་བྱང་ཞིང་སོས་པ་དང༌། བཙོན་ར་ལ་ཐ་མར་ཐར་བའམ་ཐག་པ་གྲོལ་བ་དང༌། གཤེད་མའི་ལག་ནས་ཤོར་ཏེ་དེ་ལས་ཐར་བ་དང༌། གཅན་གཟན་གདུག་པའི་ཚོགས་ཀྱི་ནང་ནས་འབྲོས་ཏེ་བྲལ་བ་དང༌། དུག་ནད་སོས་ནས་ཞི་བ་རྨི་བ་དང༌། བཅིངས་པ་ལས་གྲོལ་བ་དང༌། ཐག་པ་བཅད་པ་རྨི་བ་རྣམས་འཇིགས་པ་དང་བྲལ་བའི་ལྟས་བཟང་པོ་ཡིན་ཏེ་ས་བརྒྱད་དང་རིམ་པར་སྦྱར་རོ། །ཡང་ན་དང་པོ་གསུམ་ས་ལྔ་པའི་བར་དུ་སྦྱར་ཏེ། གཡུལ་ཞི་བ་དང་པོ་དང་གཉིས་པར་ངན་འགྲོའི་འཇིགས་པ་ཆེན་པོ་ལས་ཐར་བ་དང༌། ཟུག་རྔུ་བྱང་བ་གསུམ་པ་དང་བཞི་པར་འབྲིང་ལས་ཐར་པ་དང༌། བཙོན་ལས་གྲོལ་བ་ལྔ་པར་ཆུང་ངུ་ལས་ཀྱང་གྲོལ་བའི་ལྟས་སོ། །གཤེད་མ་ལས་ཐར་བ་འཁོར་བའི་འཇིགས་པ་ཆེན་པོ་ལས་ཐར་བའོ། །གདུག་པའི་ཚོགས་བྲལ་བ་མཐོང་ལམ་གྱི་འདུ་བྱེད་ཆུང་ངུ་དང་བྲལ་བ་ས་བདུན་པའོ། །དུག་ནད་ཞི་བ་བརྒྱད་པར་མི་གཡོ་བ་ཐོབ་པའོ། །བཅིངས་པ་གྲོལ་བ་དགུ་པར་ཡེ་ཤེས་མངོན་དུ་བྱེད་པའོ། །ཐག་པ་བཅད་པ་བཅུ་པར་བག་ལ་ཉལ་གྱི་གཞི་རྩ་བཅད་པ་སྟེ། ཆོས་རྗེའི་ཕྱག་མཆན་ལྟར་རོ།།

གསུམ་པ་ས་ཐོབ་པའི་ལྟས་བདུན་ནི།

ཁྱད་པར་དམ་པའི། ཞེས་པ་ནས། གོང་དུ་འཕར་བའི་ལྟས། །ཞེས་པའི་བར་གྱིས་བསྟན་ཏེ།

ཁྱད་པར་དམ་པའི་སྔོན་བྱུང་བ། །ཁྲི་རྐང་ཤིང་དང་ལྗོན་ཤིང་སྐས། །འཛེག་དང་གྱེན་དུ་འགྲོ་བ་དང་།།

རི་རྩེ་མཆོད་རྟེན་ནམ་མཁའི་སྐས། །གོང་ནས་གོང་དུ་འཕར་བའི་ལྟས།།

ཁྱད་པར་དམ་པ་ས་ཐོབ་པའི་སྔོན་དུ་བྱུང་བའི་ལྟས་བསྟན་པ་ནི། ཁྲི་རྐང་ལ་འཛེགས་པ་དང༌། ཤིང་ཕལ་པའི་སྐས་ལ་འཛེགས་པ་དང༌། ལྗོན་ཤིང་ལ་འཛེགས་པ་དང༌། རཏྣའི་སྐས་ལ་འཛེགས་པ་དང༌། གྱེན་༼༢༦༠༽དུ་འགྲོ་བ་དང༌། རི་བོའི་རྩེ་ལ་འཛེགས་པ་དང༌། མཆོད་རྟེན་ལ་འཛེགས་པ་དང༌། ནམ་མཁའི་སྐས་ལ་འཛེགས་པ་དང་བརྒྱད་དེ། སྔ་མ་ལས། ས་རྣམས་ཐོབ་པའི་སྔ་ལྟས་ནི། །ཁྲི་རྐང་དག་ལ་འཛེགས་པ་དང༌། །ཕལ་པའི་སྐས་ལ་འཛེགས་པ་དང༌། །ལྗོན་ཤིང་དག་ལ་འཛེགས་པ་དང༌། །གྱེན་དུ་ཤིན་ཏུ་འགྲོ་བ་དང༌། །རི་བོའི་རྩེ་ལ་འཛེགས་པ་དང༌། རིན་ཆེན་སྐས་ལ་འཛེགས་པ་དང༌། །མཆོད་རྟེན་དག་ལ་འཛེགས་པ་དང༌། །ནམ་མཁའི་སྐས་ལ་འཛེགས་པ་རྣམས། །འདི་དག་དོན་གྱི་སྔ་ལྟས་ཡིན། །ཞེས་ལྟས་བརྒྱད་ས་བརྒྱད་དང་སྦྱར་བར་གསུངས་སོ། །ཆོས་རྗེའི་ཕྱག་མཆན་སོགས་ལས། ཤིང་དང་ལྗོན་ཤིང་གཅིག་ཏུ་བྱས་ནས་བདུན་དུ་བགྲང་སྟེ་རིགས་ཆེན་འབྱེད་པ་ནས་འབྱུང་བས་ས་བཞི་པ་ཡན་ཆད་ཀྱི་ལྟས་སུ་བཞེད་དེ་ས་གོང་ནས་གོང་དུ་འཕར་བའི་ལྟས་དམ་པར་འགྱུར་རོ།།

བཞི་པ་ས་ནོན་པའི་ལྟས་བརྒྱད་ནི།

གང་ལ་གནས་དང༌། ཞེས་པ་ནས། གང་ལ་གནས་པའི་རྟགས། ཞེས་པའི་བར་གྱིས་བསྟན་ཏེ།

གང་ལ་གནས་དང་ནོན་པ་དང་། །ཁྲི་མཐོན་ལ་འདུག་གླང་ཆེན་ཞོན། །སེང་ཆེན་ཁྱུང་ལྡིང་འདབ་ཆགས་དང་།།

མཆོད་རྟེན་རྩེ་དང་རི་བོ་དང་། །ནམ་མཁའི་དབྱིངས་ན་འདུག་པ་དང་། །ལུས་ལ་སྤྲིན་བྱུང་ཉི་ཟླ་ལ།།

འདུག་པ་གང་ལ་གནས་པའི་རྟགས།།

ས་གང་ལ་གནས་པ་དང་ས་གང་དེ་ཉིད་ནོན་པའི་རྟགས་བསྟན་པ་ཡང༌། ཁྲི་མཐོན་པོའི་སྟེང་ལ་འདུག་པ་དང༌། གླང་ཆེན་ཞོན་པ་དང༌། སེང་ཆེན་ཞོན་པ་དང༌། ཁྱུང་ཆེན་མཁའ་ལ་ལྡིང་བའི་འདབ་ཆགས་ཞོན་པ་དང༌། མཆོད་རྟེན་གྱི་རྩེ་ལ་ཕྱིན་པ་དང༌། རི་བོའི་རྩེའི་སྤོ་ལ་འདུག་པ་དང༌། ནམ་མཁའི་དབྱིངས་ན་འདུག་པ་དང༌། ལུས་ལས་སྤྲིན་དཔུང་འབྱུང་བ་དང༌། ཉི་མ་དང་ཟླ་བའི་སྟེང་ལ་འདུག་པ་དང་དགུའོ། །འདི་དག་འགྱུར་དབང་མ་ངེས་པའི་ས་མ་གཏོགས་པ་དགུ་གང་འཐོབ་པར་ཡས་ནས་གོ་རིམས་སུ་སྦྱར་ཏེ་བཤད་པ་དང་འཆད་པ་ལའང་སྦྱར་རོ། །ཁ་ཅིག་ནི་འདི་དག་སྤྱིར་ས་ནོན་པའི་ལྟས་ཏེ་གོ་རིམས་མི་སྦྱར་ཞེས་ཀྱང་འཆད་པ་ཡོད་དེ་མི་རིགས་སོ། །ཆོས་རྗེའི་ཕྱག་མཆན་སོགས་ན། ལུས་ལས་སྤྲིན་འབྱུང་བ་དང་ཉི་ཟླ་ལ་འདུག་ཅིང་ཞོན་པ་རྣམས་གཅིག་གི་དབང་དུ་མཛད་དེ་གྲངས་བརྒྱད་དུ་བྱས་ནས་ས་དང་པོ་ནས་བརྒྱད་པ་མན་ཆད་དུ་སྦྱར་རོ། །རྩ་བའི་རྒྱུད་ལས། ས་རྣམས་ནོན་པའི་སྔ་ལྟས་ཀྱང༌། །ཁྲི་མཐོན་སྟེང་ན་འདུག་པ་དང༌། །གླང་པོ་ཆེ་ལ་ཞོན་པ་དང༌། །སེང་གེ་དག་ལ་ཞོན་པ་དང༌། །ཁྱུང་ཆེན་ལྡིང་ལ་ཞོན་པ་དང༌། །མཆོད་རྟེན་ཁ་ལ་ཕྱིན་པ་དང༌། །རི་བོའི་རྩེ་ལ་འདུག་པ་དང༌། །ནམ་མཁའི་དབྱིངས་ན་འདུག་པ་དང༌། །ལུས་ལས་སྤྲིན་ཕུང་འབྱུང་བ་དང༌། །ཟླ་བའི་སྟེང་ན་འདུག་༼༢༦༡༽པ་དང༌། །ཉི་མའི་སྟེང་ན་འདུག་པ་རྣམས། །རྣལ་འབྱོར་ས་ལ་གནས་པའི་རྟགས། །ཞེས་གསུངས་པས་སྔ་ལྟས་བཅུ་པོ་ས་བཅུ་རེ་རེ་ལ་སྦྱར་བར་བཤད་དོ། །ལྟས་དེ་དག་གང་ལ་བྱུང་བ་ནི་སའི་རིམ་པ་ནོན་ཏེ་གནས་པའི་རྟགས་སོ།།

ལྔ་པ་སངས་རྒྱས་ཀྱི་སྲས་ཀྱི་ལྟས་བརྒྱད་ནི།

དམ་པའི་རིགས་ཀྱི། ཞེས་པ་ནས། མེ་ཏོག་ཐོད་སྐྱེས་པའོ། །ཞེས་པའི་བར་གྱིས་བསྟན་ཏེ།

དམ་པ་རིགས་ཀྱི་སྔོན་བྱུང་བ། །བཀའ་བརྟགས་དབང་པོ་དབང་སྒྱུར་བྱེད།།

འཇིག་རྟེན་བཀོས་ལ་ཕེབས་པ་དང་། །དབང་སྡུད་གཡུལ་རྒྱལ་རྒྱལ་པོར་འགྱུར། །མགོ་ལ་མེ་ཏོག་སྐྱེས་པའོ།།

དམ་པའི་རིགས་ཀྱི་སྔོན་དུ་བྱུང་བའི་སངས་རྒྱས་ཀྱི་སྲས་ཀྱི་སྔ་ལྟས་བསྟན་པ་ནི། རྒྱལ་པོས་བཀའ་ལ་བཏགས་པ་དང༌། བཀའི་དབང་པོའམ་རྒྱལ་པོའི་བློན་པོ་དབང་ཅན་དུ་བསྐོས་པ་དང༌། གཞན་ལ་དབང་བསྒྱུར་བར་བྱེད་པ་དང༌། འཇིག་རྟེན་པ་སྐོས་ལ་འདེབས་པ་དང༌། གཞན་གྱི་སྡེ་པ་དབང་དུ་སྡུད་པ་དང༌། གཡུལ་འཐབ་པ་ལས་རྒྱལ་བ་དང༌། བདག་ཉིད་རྒྱལ་པོར་གྱུར་པ་དང༌། མགོ་ལ་མེ་ཏོག་གི་ཐོད་སྐྱེས་པའམ་བཅིངས་པ་དང་བརྒྱད་དེ། དེ་ཉིད་ལས། སངས་རྒྱས་སྲས་ཀྱི་སྔ་ལྟས་ནི། །རྒྱལ་པོས་བཀའ་ལ་བཏགས་པ་དང༌། །བཀའ་ཡི་དབང་པོར་བསྐོས་པ་དང༌། །གཞན་ལ་དབང་སྒྱུར་བྱེད་པ་དང༌། །འཇིག་རྟེན་སྐོས་ལ་འབེབས་པ་དང༌། །གཞན་གྱི་སྡེ་པ་དབང་སྡུད་དང༌། །གཡུལ་ཆེན་དག་ལས་རྒྱལ་བ་དང༌། །བདག་ཉིད་རྒྱལ་པོར་གྱུར་པ་དང༌། །མགོ་ལ་མེ་ཏོག་སྐྱེད་པ་རྣམས། །རྒྱལ་བའི་སྲས་སུ་གྱུར་པའི་ལྟས། །ཞེས་གསུངས་ཏེ་མཆན་རྙིང་དུ་ས་བརྒྱད་པ་མན་ཆད་དང་སྦྱར་བར་བཤད་ཀྱང༌། ཆོས་རྗེའི་ཕྱག་མཆན་དུ་ས་གསུམ་པ་ཡན་ཆད་ལ་སྦྱར་བར་གསུངས་པ་ཉིད་ལེགས་སམ་སྙམ་སྟེ་གཞུང་གི་དགོས་པའོ།།

དྲུག་པ་ཆོས་ལ་དབང་ཐོབ་པའི་ལྟས་བཅོ་ལྔ་ནི།

ཆོས་གང་དབང་སྒྱུར། ཞེས་པ་ནས། མེ་ཏོག་ཆར་འབེབས་པའོ། །ཞེས་པའི་བར་གྱིས་བསྟན་ཏེ།

ཆོས་གང་དབང་སྒྱུར་སྔོན་བྱུང་བ། །གླེགས་བམ་རྙེད་དང་འདྲི་སྤྱོད་དང་། །གཞན་ལ་སྟོན་དང་གཏན་ལ་འབེབས། །མེ་ལོང་བུམ་གང་ལྟ་རྟོག་འཐུང་། །ནོར་བུ་མཐུ་དང་འཁོར་ལོ་བབས། །ཉི་ཟླ་ཟིན་དང་རི་རབ་བསྐོར། །གང་ལ་སྒྲ་རྒྱས་སྟོང་གསུམ་གང་། །དངོས་པོ་མཐའ་དག་ཡི་གེར་མཐོང་། །བཀླགས་པས་ངོ་མཚར་ཀུན་བསྐྱེད་དང་། །མཁའ་ལས་མེ་ཏོག་ཆར་འབབ་པའི།།

ཆོས་ཀྱི་དངོས་པོ་གང་ལ་དབང་ཐོབ་ཅིང་མངའ་དབང་སྒྱུར་བའི་སྔོན་དུ་བྱུང་བ་ཡི་ལྟས་བཅོ་ལྔ་ནི། གླེགས་བམ་ཟབ་མོ་རྙེད་པ་དང༌། དེ་འབྲི་ཞིང་དེ་ལ་ལྟ་བར་བྱེད་པ་དང༌། དེ་ལ་བསམ་དཔྱོད་བྱེད་པ་དང༌། གཞན་ལ་འཆད་ཅིང་སྟོན་པ་དང༌། དོན་གཏན་ལ་འབེབས་པ་དང༌། མེ་ལོང་ལ་ལྟ་བ་དང༌། ཤེལ་གྱི་བུམ་པ་གང་བ་ལ་ལྟ་རྟོག་བྱེད་ཅིང་བརྟགས་ཏེ་འཐུང་བ་དང༌། རིན་པོ་ཆེ་ནོར་བུ་ཐུ་བ་དང༌། འཁོར་ལོ་ལག་ཏུ་བབ་པ་དང༌། ཉི་ཟླ་ཟིན་པ་དང༌། རི་རབ་ཀླད་ལ་བསྐོར་བ་དང༌། ནམ་མཁའ་གང་ལ་རྔ་དུང་དྲིལ་བུ་སོགས་རོལ་མོའི་སྒྲ་རྒྱས་ཏེ་སྟོང་གསུམ་གང་བ་ཐོས་པ་༼༢༦༢༽དང༌། དངོས་པོ་མཐའ་དག་ཡི་གེར་མཐོང་བ་དང༌། དེ་ཉིད་ཀླགས་པས་ངོ་མཚར་ཆེན་པོ་ཀུན་ལ་སྐྱེད་པ་དང༌། ནམ་མཁའ་ལས་མེ་ཏོག་གི་ཆར་མགོ་ལ་འབེབས་པ་དང་བཅོ་ལྔའང་རིམ་པར་སྦྱར་བའོ། །དེའང་ཆོས་རྗེའི་ཕྱག་མཆན་ལས། གླེགས་བམ་རྙེད་པ་ས་དང་པོ། འབྲི་དཔྱོད་གཉིས་པ། གཞན་ལ་སྟོན་པ་གསུམ་པ། གཏན་འབེབས་བཞི་པ། མེ་ལོང་ལ་ལྟ་བ་ལྔ་པ། བུམ་ཆུ་འཐུང་བ་དྲུག་པ། ནོར་བུ་ཐུ་བ་བདུན་པ། འཁོར་ལོ་བབ་པ་བརྒྱད་པ། ཉི་ཟླ་ཟིན་པ་དགུ་པ། རི་རབ་བསྐོར་བ་མན་ཆད་ས་བཅུ་པ་དང་སྦྱར་རོ་ཞེས་གསུངས། རྩ་རྒྱུད་ལས་ནི། ཆོས་ལ་དབང་ཐོབ་སྔ་ལྟས་ནི། །གླེགས་བམ་ཟབ་མོ་རྙེད་པ་དང༌། དེ་བཞིན་འབྲི་བ་མང་པོ་དང༌། །དེ་དག་ལ་ནི་དཔྱོད་པ་དང༌། །གཞན་ལ་འཆད་ཅིང་སྟོན་པ་དང་ །དོན་ཉིད་གཏན་ལ་འབེབས་པ་དང༌། །མེ་ལོང་དག་ལ་ལྟ་བ་དང༌། །ཤེལ་གྱི་བུམ་པ་གང་བ་ལ། །ལྟ་ཞིང་བརྟགས་ཏེ་འཐུང་བ་དང༌། །རིན་ཆེན་ནོར་བུ་ཐུ་བ་དང༌། །འཁོར་ལོ་ལག་ཏུ་འབབས་པ་དང༌། །ཉི་ཟླ་ལག་པས་ཟིན་པ་དང༌། །རི་རབ་ཀླད་ལ་སྐོར་བ་རྣམས། །ཆོས་ལ་དབང་ཐོབ་སྔ་ལྟས་སོ། །ཞེས་གསུངས་ཏེ། རིགས་འཛིན་ལྔའི་རྣལ་འབྱོར་བཅུ་གཅིག་ལ་སྦྱར་བར་གསུངས་སོ།།

བདུན་པ་བདེན་པ་མཐོང་བའི་ལྟས་བརྒྱད་ནི།

དམ་པ་མཐོང་བའི། ཞེས་པ་ནས། སྙིང་པོ་ལྟ་བའོ། །ཞེས་པའི་བར་གྱིས་བསྟན་ཏེ།

དམ་པ་མཐོང་བ་སྔོན་བྱུང་བ། །སྔོན་མ་མཐོང་བའི་ཡུལ་མཐོང་དང་། །སྟོང་གསུམ་མཐོང་དང་གླིང་རྣམས་བགྲོད། །རི་རབ་རྩེར་ཕྱིན་ཐམས་ཅད་མཐོང་། །ནམ་མཁའ་མཐའ་ཡས་མཐོང་བ་དང་། །རྒྱ་མཚོའི་གཏིང་དུ་ཕྱིན་པ་དང་། །སྒྲོན་མེ་ཐོགས་དང་སྣང་སྲིད་སྤྱོད། །ཉི་མའི་སྙིང་པོ་ལྟ་བའོ།།

བདེན་པ་དམ་པ་མཐོང་བའི་སྔ་ལྟས་སུ་སྔོན་དུ་བྱུང་བ་ཡི་རྟགས་ནི། སྔོན་མ་མཐོང་བའི་ཡུལ་མཐོང་བ་དང༌། སྟོང་གསུམ་རྒྱ་ཆེར་མཐོང་བ་དང༌། གླིང་རྣམས་གཞན་དུ་བགྲོད་དེ་མཐོང་བ་དང༌། རི་རབ་ཀྱི་རྩེར་རམ་ཁ་ལ་ཕྱིན་ནས་ཐམས་ཅད་མཐོང་བ་དང༌། ནམ་མཁའ་མཐའ་ཡས་པ་ཉིད་རྒྱ་ཆེར་མཐོང་བ་དང༌། རྒྱ་མཚོའི་གཏིང་དུ་ཕྱིན་པ་དང༌། ལག་ན་སྒྲོན་མེ་ཐོགས་པ་དང༌། སྣང་སྲིད་ཀུན་ལ་དཔྱོད་པ་དང༌། ཉི་མའི་སྙིང་པོ་ལ་ལྟ་བ་དང་དགུའོ། །དེའང་ཆོས་རྗེའི་ཕྱག་མཆན་སོགས་སུ། སྒྲོན་མེ་ཐོགས་པ་དང་སྣང་སྲིད་དཔྱོད་པ་གཉིས་གཅིག་ཏུ་བྱས་ནས་རྣམ་གྲངས་བརྒྱད་དུ་མཛད་དེ། ནམ་མཁའ་མཐའ་མེད་མཐོང་བའི་བར་ས་གཉིས་པ་ནས་དྲུག་པའི་བར་དང༌། དེ་ནས་རྒྱ་མཚོའི་གཏིང་དུ་ཕྱིན་པ་ཆོས་ཉིད་ཀྱི་དགོངས་པ་ཟབ་མོ་རྟོགས་པའི་ལྟས་ཏེ་བདུན་པ། སྒྲོན་མེ་ཐོགས་ཏེ་སྣང་སྲིད་དཔྱོད་པ་ས་བརྒྱད་པ་དང་དགུ་པ། ཉི་མའི་སྙིང་པོར་ལྟ་བ་རང༌༼༢༦༣༽བྱུང་ཡེ་ཤེས་རྟོགས་པའི་ལྟས་ཏེ་ས་བཅུ་པ་དང་སྦྱར་བར་མཛད་དོ། །རྩ་རྒྱུད་ལས་ནི། བདེན་པ་མཐོང་བའི་སྔ་ལྟས་ཀྱང༌། །སྔོན་མ་མཐོང་གི་ཡུལ་མཐོང་དང༌། །སྟོང་གསུམ་རྒྱ་ཆེར་མཐོང་བ་དང༌། །གླིང་རྣམས་གཞན་དུ་ཕྱིན་པ་དང༌། །རི་རབ་ཁ་ལ་ཕྱིན་པ་དང༌། །ནམ་མཁའ་རྒྱ་ཆེར་མཐོང་བ་དང༌། །རྒྱ་མཚོའི་གཏིང་དུ་ཕྱིན་པ་དང༌། །ལག་ན་སྒྲོན་མ་ཐོགས་པ་དང༌། །ཉི་མའི་སྙིང་པོ་ལྟ་བ་དང༌། །སྣང་སྲིད་དཔྱོད་པར་བྱེད་པ་རྣམས། །ཆོས་ལ་དབང་ཐོབ་ལྟས་ཆེན་ཡིན། །ཞེས་གསུངས་ཏེ་ས་དགུ་པ་མན་ཆད་ཀྱི་བྱང་ཆུབ་ཀྱི་སེམས་དང་སྦྱར་བར་མཛད་དོ།།

བརྒྱད་པ་ལུང་ཆེན་ཐོབ་པའི་ལྟས་བཅུ་ནི།

ལུང་ཆེན་ཐོབ་པའི། ཞེས་པ་ནས། བགྲོ་བར་བྱེད་པའོ། །ཞེས་པའི་བར་གྱིས་བསྟན་ཏེ།

ལུང་ཆེན་ཐོབ་པ་སྔོན་བྱུང་བ། །རོལ་མོ་འབྲུག་སྒྲ་སེང་གེ་དང་། །ཆོས་ཀྱི་བགྲོ་བ་ཐོས་པ་དང་། །གཟུགས་བརྙན་ཞལ་འཛུམ་འོད་འབྱུང་དང་། །དམ་པའི་གསུང་ཐོས་སྐུ་མི་མཐོང་། །ལྷ་མོ་གླུ་དབྱངས་སྒྲོག་པ་དང་། །གཞལ་ཡས་དག་ལས་སྒྲ་བྱུང་དང་། །གྲོགས་པོ་དམ་པ་ཞེས་འབྱུང་ཞིང་། །དེ་ཉིད་བགྲོ་བར་བྱེད་པའོ།།

ལུང་བསྟན་པ་ཆེན་པོ་ཐོབ་པའི་སྔ་ལྟས་སྔོན་དུ་བྱུང་བ་ནི། རོལ་མོ་རྣམས་ཀྱི་སྒྲ་ཐོས་པ་དང༌། འབྲུག་གི་སྒྲ་གྲགས་པ་དང༌། སེང་གེའི་ང་རོ་གྲགས་པ་དང༌། ཆོས་ཀྱི་བགྲོ་བར་བྱེད་པའི་གཏམ་ཐོས་པ་དང༌། གཟུགས་བརྙན་གྱི་སྐུ་ཞལ་འཛུམ་ཞིང་འོད་འབྱུང་བ་དང༌། རྣམ་འདྲེན་སངས་རྒྱས་དམ་པའི་གསུང་ཐོས་ཤིང་སྐུ་མི་མཐོང་བ་དང༌། ལྷ་མོ་རྣམས་གླུ་དབྱངས་སྒྲོགས་པ་དང༌། གཞལ་ཡས་ཁང་དག་ལས་ཆོས་སྒྲ་འབྱུང་བ་དང༌། གཅིག་ལ་གཅིག་གྲོགས་པོ་དམ་པ་ཞེས་བོད་པ་འབྱུང་ཞིང་ཆོས་ཀྱི་དེ་ཉིད་བགྲོ་བར་བྱེད་པ་དང་དགུ་སྟེ་རྩ་བ་བརྒྱད་དང་ཡན་ལག་བཅུ་དྲུག་དྲུག་ཏུ་འགྱུར་བའོ། །དེའང་ལུང་བསྟན་པ་འདི་དག་ཆོས་རྗེའི་ཕྱག་མཆན་ལས། ས་གཉིས་པ་ནས་རིམ་པར་ས་དྲུག་པ་ལ་གཟུགས་བརྙན་ཞལ་འཛུམ་པ་དང་འོད་འབྱུང་བ་གཉིས་དང་གཞན་རྣམས་རེ་རེར་སྦྱར་ནས་གསུངས་སོ། །དགུའི་དབང་ལྟར་རྩ་རྒྱུད་ལས་ཀྱང༌། ལུང་བསྟན་ཐོབ་པའི་སྔ་ལྟས་ནི། །རོལ་མོའི་སྒྲ་རྣམས་ཐོས་པ་དང༌། །འབྲུག་གི་སྒྲ་ནི་གྲགས་པ་དང༌། །སེང་གེ་ང་རོ་གྲགས་པ་དང༌། །ཆོས་ཀྱི་བགྲོ་བའི་གཏམ་ཐོས་དང༌། །གཟུགས་བརྙན་ཞལ་ནི་འཛུམ་པ་དང༌། །སངས་རྒྱས་གསུང་ཐོས་སྐུ་མི་མཐོང༌། །ལྷ་མོ་གླུ་དབྱངས་སྒྲོགས་པ་དང༌། །གཞལ་ཡས་དག་ལས་སྒྲ་འབྱུང་དང༌། །གྲོགས་པོ་གྲོགས་པོ་ཞེས་བརྗོད་ཅིང༌། །ཆོས་ཀྱི་བགྲོ་བ་བྱེད་པ་རྣམས། །ལུང་བསྟན་འབྱུང་བའི་སྔ་ལྟས་སོ། །ཞེས་སོ། །ལས་དང་པོ་པའི་སྐབས་ལམ་དུ་ཞུགས་ཏེ་རྣལ་འབྱོར་སྤྱོད་པའི་ཚེ་ན་རྨི་ལྟས་ལ་སོགས་པ་དེ་དག་བྱུང་ན་ཇི་ལྟར་ཤེས་པར་བྱ་བ་ནི། རྩ་བའི་༼༢༦༤༽རྒྱུད་ལས།

དེ་ལ་སོགས་པའི་མཚན་མ་རྣམས། །ལྟས་ཆེན་ཀུན་ཏུ་སྣང་བ་དང༌། །གང་ཟག་ལས་ཀྱི་དང་པོ་རྣམས། །རིག་འཛིན་སོ་སོའི་ས་པར་ནི། །འགྱུར་བའི་སྔ་ལྟས་བཤད་པ་ཡིན། །རྣལ་འབྱོར་ལས་ཀྱི་དང་པོ་ལ། །ལྟས་ཆེན་འདི་རྣམས་གང་འབྱུང་ཡང༌། །འཁོར་བའི་འདུ་འཛི་ཀུན་བསལ་ནས། །དོན་ལ་རྟོགས་ཤིང་ས་རྣམས་སྦྱོང་། །དེས་ནི་དོན་ལ་རེག་པར་འགྱུར། ཞེས་པའི་དོན་གྱིས་ལྟས་སྐྱེ་བའི་དུས་ནི། འདུན་པའི་རྣལ་འབྱོར་ལས་དང་པོ་པ་ལ་གནས་པའི་ཚེ་སྐྱེ་བར་གསུངས་ཏེ། དེ་ཡང་སྐབས་ཀྱིས་གཉིས་སུ་འགྱུར་ཏེ། གཞིའི་ལས་དང་པོ་པ་དང༌། སྐབས་ཀྱི་ལས་དང་པོ་པའོ། །དེ་ལ་འདུན་པའི་རྣལ་འབྱོར་གཞིའི་ལས་དང་པོའི་དབང་དུ་ནི་སྔ་མར་སྦྱངས་པའི་རྒྱུས་ད་ལྟར་སྐད་ཅིག་ལ་གཞི་བར་སྣང་བའི་ཡང་ལྟས་དང་སྦྱར་ནས་ལྟས་དང་མཐུན་པའི་ས་གོང་མ་གང་ལའང་བགྲོད་པར་མི་འགལ་ཏེ། གཞི་ནས་བརྩམ་མི་དགོས་སོ། །ལྟས་ཀུན་ཀྱང་ད་ལྟར་ས་གར་འབྱུང་བ་དེ་སྐབས་འདིར་སྐྱེ་བ་མི་འགལ་ལོ། །དེ་བས་ན་རྩ་བའི་རྒྱུད་ལས།

ངེས་པའི་སྔ་ལྟས་རྣམ་པ་ལྔ༌། །རྒྱུ་ཡི་དུས་ན་འབྱུང་བ་ནི། །ཞེས་པ་དང༌། སོ་སོའི་ས་པར་ཞེས་སྔར་དྲངས་པའི་སྒྲས་ལྟས་རྣམས་ཀྱང་འཕགས་པ་དཀོན་མཆོག་བརྩེགས་པ་ལས། རྨི་ལམ་བརྒྱ་རྩ་བརྒྱད་གསུངས་པའི་རྩ་བ་ལས། ཡན་ལག་བྱེ་བ་རྣམས་མཐོ་དམན་དང་སྦྱར་བའི་ལྟས་སུ་གསུངས་པ་མཚུངས་པར་འདིར་ཡང་མི་རིགས་པ་མ་ཡིན་ཏེ། རྩ་བ་བརྒྱད་ཀྱི་དབང་དུ་ནི་བག་ཆགས་འབྱང་བའི་ལྟས་བྱུང་ན། འདུན་པའི་རྣལ་འབྱོར་པར་འགྱུར་རོ། །ས་ཐོབ་པ་དང་ཆོས་ལ་དབང་ཐོབ་པའི་ལྟས་བྱུང་ན། རིགས་ཆེན་འབྱེད་པའི་རྣལ་འབྱོར་ཐོབ་བོ། །ས་ནོན་པ་དང༌། འཇིགས་པ་དང་བྲལ་བ་དང༌། བདེན་པ་མཐོང་བའི་སྔ་ལྟས་བྱུང་ན། དབུགས་ཆེན་འབྱིན་པར་འགྱུར་རོ། །ལུང་བསྟན་ཐོབ་པའི་སྔ་ལྟས་བྱུང་ན། ལུང་ཆེན་ཐོབ་པའི་རྣལ་འབྱོར་དུ་འགྱུར་རོ། །སངས་རྒྱས་སྲས་ཀྱི་སྔ་ལྟས་བྱུང་ན། རྩལ་ཆེན་རྫོགས་པའི་རྣལ་འབྱོར་དུ་འགྱུར་རོ།།

དེས་ན་རྟགས་དང་པོའི་ས་གཅིག་ནས་དེ་དག་རེ་རེའང་སོ་སོ་བར་འགྱུར་བའི་ལྟས་ཡིན་པས། མཐུན་པར་འདུ་འཛི་བསལ་ལ་འབད་པར་བྱ་བའི་དོན་ནི། ཡན་ལག་གི་བཤད་པའི་དབང་དུ་སྔར་བསྟན་པ་ལྟར་གོ་རིམས་སུ་ས་བཅུ་དང་སྦྱར་ལ་འབད་དོ། །༼༢༦༥༽དེ་ནི་རྨི་ལམ་ལ་ཁྱད་པར་ཡོད་པའི་ཕྱིར་རེ་རེའི་ཡན་ལག་ཀྱང་ས་རྣམས་དང་སྦྱར་བར་བྱ་སྟེ། དེའི་ཕྱིར་ཆོ་འཕྲུལ་སྒྲུབ་པའི་ཏིང་ངེ་འཛིན་བརྒྱད་དང༌། ཚོགས་ལ་སོགས་པ་གང་འདོད་པའི་རྒྱུ་དེ་ལ། ལས་དང་པོ་ལྷའི་རྣལ་འབྱོར་བརྟན་མ་ཐག་སྦྱར་བས་གཅིག་ཆར་ཚུལ་དུའང་འགྱུར་རོ། །སྐབས་ཀྱི་ལས་དང་པོ་པའི་དབང་དུ་ནི། ས་འོག་མ་ནས་གོང་མར་འཐོབ་མ་ཐག་པ་ནི་རང་གི་ལས་དང་པོ་པ་སྟེ། དེས་ན་རྨི་ལྟས་ཀྱང་གཅིག་ཏུ་མི་སྐྱེ་སྟེ། འོག་མ་ལ་གནས་ཙམ་ན་གོང་མར་འཐོབ་པའི་ལྟས་འབྱུང་བས་སྐབས་ལྔ་དང་བཅུ་གར་སྐྱེ་ཞེས་འཆད་དོ། །དེ་ལ་ལྟས་རྣམས་གཅིག་ཏུ་སྐྱེའོ་ཞེ་ནའང༌། ལས་དང་པོར་ཤིན་ཏུ་མཐོ་བའི་ལྟས་འཆར་བའི་རྒྱུར་མི་རུང་བ་དང༌། གལ་ཏེ་འཆར་དུ་རུང་ཡང་འོག་ནས་མ་བགྲོད་པར་ལྟས་དང་སྦྱར་ཏེ། གོང་མའི་ཡང་གོང་མར་བགྲོད་དུ་བཏུབ་ན། ལམ་རིམ་པར་བཞག་པ་ལའང་དགོས་པ་མེད་ལ། དེ་སྟེ་མིན་ན་རིམ་གྱིས་པ་དང་གཅིག་ཆར་བའང་བྱེ་བྲག་མེད་པར་འགྱུར་རོ་ཞེ་ན། དེ་ལྟར་བདེན་ནའང་ལྟས་རིམ་པ་སྐྱེ་བ་ཁོ་ནར་ངེས་ན། རྩ་བའི་རྒྱུད་ལས། ལས་དང་པོ་པ་ཁོ་ནར་སྐྱེ་བར་གསུངས་པའང་འགལ་བར་འགྱུར་བ། གོང་དུ་བཤད་པའི་དོན་གྱི་ཁོང་ཉིད་ཀྱི་འགྲེལ་ཏེ། ལམ་གཉིས་ནི་ཤེས་རབ་ལ་ཁྱད་པར་ཡོད་པས་ལྟས་ཀྱི་མཚན་མས་སྒྲུབ་སྟེ་འཕར་བའང་མཉམ་པ་མ་ཡིན་ནོ།།

གཉིས་པ་ཆོ་འཕྲུལ་བསྟན་པ་ལ་བཞི་སྟེ། རྫུ་འཕྲུལ་གྱི་ཆོ་འཕྲུལ། རྗེས་སུ་བསྟན་པའི་ཆོ་འཕྲུལ། ཆོས་སྣང་བའི་ཆོ་འཕྲུལ། ཀུན་བརྗོད་པའི་ཆོ་འཕྲུལ་ལོ། །དང་པོ་ནི།

རིགས་འཛིན་དམ་པའི། ཞེས་པ་ནས། རྩལ་གྱིས་སྟོན་པར་ནུས། །ཞེས་པའི་བར་གྱིས་བསྟན་ཏེ།

རིགས་འཛིན་དམ་པའི་ལྟས་ཤར་ན། །བྱིན་རླབས་མཐུའི་ཆོ་འཕྲུལ་ཡང་། །ཉི་ཟླ་ཞོན་ནས་འགྲོ་བ་དང་། །རི་རབ་སྐེད་ནས་གསོར་བ་དང་། །འཇིག་རྟེན་རྒྱང་མར་འཕང་བ་དང་། །བསྲེག་པའི་བསྐལ་པ་གཞིལ་བ་ལ།། སོགས་པའི་ཆོ་འཕྲུལ་ཐམས་ཅད་ཀུན། །ཁྱད་པར་རྩལ་གྱིས་སྟོན་པར་ནུས།།

དེ་ལྟར་ས་བགྲོད་པས་རིག་འཛིན་ཐོབ་ནས་མཐུའི་རྩལ་ཇི་ལྟ་བུ་འབྱུང་སྙམ་པ་ལ། དེ་ལྟར་རིགས་འཛིན་དམ་པའི་ས་བཅུ་ལ་རྩལ་དང་སྦྱར་ཏེ་ལྟས་ཤར་ནས་བགྲོད་དེ་རྩལ་ཆེན་རྫོགས་པའི་རྣལ་འབྱོར་ཕྱག་རྒྱ་ཆེན་པོའི་རིགས་འཛིན་ཐོབ་པའི་སྐབས་སུ་བྱིན་རླབས་མཐུ་ཡི་ཆོ་འཕྲུལ་འབྱུང་བ་ཡང༌། རྣམ་གྲངས་བཞི་ལས། དང་པོ་རྫུ་འཕྲུལ་གྱི་ཆོ་འཕྲུལ་བསྟན་ཏེ། ཉི་མ་དང་ཟླ་བ་ཞོན་ཏེ་འགྲོ་བ་དང༌། རི་བོ་མཆོག་རབ་སྐེད་ནས་གསོར་བ་དང༌། འཇིག་རྟེན་གྱི་ཁམས་རྒྱང་མར་འཕེན་པ་དང༌། བསྲེག་པའི་བསྐལ་པ་གཞི་བ་ལ་སོགས་པའི་མཐུ་ཡི་ཆོ་འཕྲུལ་ཉི་ཤུ་ཐོབ་པ་ཐམས་ཅད་ཀུན་རྫུ་འཕྲུལ་གྱི་༼༢༦༦༽ཁྱད་པར་ལ་གནས་པའི་རྩལ་གྱིས་སྟོབས་ལས་སྟོན་པར་ནུས་པ་ཡིན་ཏེ། དེ་ཉིད་ལས། རིགས་འཛིན་ས་ལ་གནས་པ་དང༌། །ས་ལ་རྩལ་ཆེན་སྦྱོང་བའི་ཚེ། །རྩལ་གྱི་ཆོ་འཕྲུལ་སྣ་ཚོགས་འབྱུང༌། །ཉི་ཟླ་ཞོན་ནས་འགྲོ་བ་དང༌། །རི་རབ་སྐྱེད་ནས་གསོར་བ་དང༌། །འཇིག་རྟེན་རྒྱང་མར་འཕང་བ་དང༌། །སྲེག་པའི་བསྐལ་པ་གཞིལ་བ་ལ། །སོགས་པའི་ཆོ་འཕྲུལ་ཐམས་ཅད་ཀུན། །ཁྱད་པར་རྩལ་གྱི་སྟོན་པར་ནུས། །དེ་ལ་སོགས་པའི་རྫུ་འཕྲུལ་རྣམས། །རྫུ་འཕྲུལ་གྱི་ནི་ཆོ་འཕྲུལ་ཡིན། །ཞེས་སོ།།

གཉིས་པ་རྗེས་སུ་བསྟན་པའི་ཆོ་འཕྲུལ་ནི།

འདུལ་བའི་འགྲོ་བ། ཞེས་པ་ནས། དེ་ལྟར་སྟོན་པར་ནུས། །ཞེས་པའི་བར་གྱིས་བསྟན་ཏེ།

འདུལ་བའི་འགྲོ་བ་ཐམས་ཅད་ལ། །སོ་སོའི་སྐད་དང་ཆོས་མཐུན་པས།།

འདུལ་བའི་སྒོ་ནི་སྣ་ཚོགས་སུ། །གང་ལ་དེ་ལྟར་སྟོན་པར་ནུས།།

གང་འདུལ་བའི་སྣོད་དུ་རུང་བའི་གདུལ་བྱའི་འགྲོ་བ་ཐམས་ཅད་ཀུན་ལ། རང་རང་སོ་སོའི་སྐད་དང་ཆོས་མཐུན་པར་ཇི་ལྟར་འདུལ་བའི་ཐབས་ཀྱི་སྒོ་ནི་སྣ་ཚོགས་པ་རྣམས་སུ་གང་ལ་གང་གྱིས་ཇི་ལྟར་འདུལ་བ་དེ་ལྟར་སྟོན་པར་ནུས་པ་ནི་གསུང་རྗེས་སུ་བསྟན་པའི་ཆོ་འཕྲུལ་ཏེ། སྔ་མ་ལས། རྗེས་སུ་བསྟན་པའི་ཆོ་འཕྲུལ་ནི། །འདུལ་བའི་འགྲོ་བ་ཐམས་ཅད་ལ། །སོ་སོའི་སྐད་དུ་ཆོས་མཐུན་པར། །འདུལ་བའི་སྒོ་ནི་སྣ་ཚོགས་སུ། །སོ་སོའི་སྐད་དུ་སྟོན་པར་ནུས། །དེ་དག་རྗེས་སུ་བསྟན་པ་ཡིན། །ཞེས་སོ།།

གསུམ་པ་ཆོས་སྣང་བའི་ཆོ་འཕྲུལ་ནི།

རྣལ་འབྱོར་རྩལ་གྱི། ཞེས་པ་ནས། རངས་པའི་རོ་མྱོང་འགྱུར། །ཞེས་པའི་བར་གྱིས་བསྟན་ཏེ།

རྣལ་འབྱོར་རྩལ་གྱི་ཁྱད་པར་གྱིས། །འཇིག་རྟེན་ཁམས་ཀུན་གཡོས་ནས་ཀྱང་།།

ཐམས་ཅད་ངོ་མཚར་ཆེར་གྱུར་ཏེ། །དགའ་མགུ་རངས་པའི་རོ་མྱོང་འགྱུར།།

རྣལ་འབྱོར་མཆོག་གི་རྟོགས་པའི་ཏིང་ངེ་འཛིན་གྱི་རྩལ་གྱི་ཁྱད་པར་ལ་བརྟེན་པའི་ཐབས་ཀྱིས་སྟོང་ཆེན་པོའི་འཇིག་རྟེན་གྱི་ཁམས་ཀུན་གྱི་ཕྱི་ནང་ཐམས་ཅད་རབ་ཏུ་གཡོས་ནས་ཀྱང་གདུལ་བྱ་མ་ལུས་པ་ཐམས་ཅད་མཆོག་ཏུ་ངོ་མཚར་ཆེར་སྐྱེས་པར་གྱུར་ཏེ་དགའ་མགུ་དང་རངས་པའི་རོ་མྱོང་བར་གྱུར་པ་ནི་ཆོས་སྣང་བའི་ཆོ་འཕྲུལ་ཉིད་ཡིན་ཏེ། དེ་ཉིད་ལས། ཆོས་ཀྱི་སྒོ་ནས་སྣང་བ་ཡི། །ངེས་པའི་ཆོ་འཕྲུལ་བསྟན་པ་ནི། །ཏིང་འཛིན་རྩལ་གྱི་ཁྱད་པར་གྱིས། །འཇིག་རྟེན་ཁམས་ཀུན་གཡོས་ནས་ཀྱང༌། །ཐམས་ཅད་ངོ་མཚར་སྐྱེ་གྱུར་ཏེ། །སེམས་ཀྱི་བསམ་པ་རངས་བྱས་ནས། །སོ་སོ་དགའ་བའི་རོ་མྱོང་འགྱུར། །ཆོས་སྣང་བ་ཡི་ཆོ་འཕྲུལ་ཡིན། །ཞེས་སོ།།

བཞི་པ་ཀུན་བརྗོད་པའི་ཆོ་འཕྲུལ་ནི།

གསང་བའི་ཡི་གེ ཞེས་པ་ནས། སྔགས་སུ་མ་གྱུར་མེད། །ཅེས་པའི་བར་གྱིས་བསྟན་ཏེ།

གསང་བའི་ཡི་གེ་འཕྲེང་བ་ལས། །རྫུ་འཕྲུལ་ཆོས་ཀྱི་སྒྲ་བསྒྲགས་པས།།

ཡོད་མཐོང་སྣང་གྲགས་ཆོས་རྣམས་ཀུན། །སྔགས་སྣང་སྔགས་སུ་མ་གྱུར་མེད།།

གསང་བའི་ཡི་གེ་སྣ་ཚོགས་ཀྱི་ཕྲེང་ལས། རྫུ་འཕྲུལ་ཆོས་ཀྱི་སྒྲ་དབྱངས་རྒྱ་མཚོ་རྣམ་པར་བསྒྲགས་པས་ཡོད་མཐོང་སྣང་གྲགས་ཀྱི་ཆོས་རྣམས་ཀུན་ཀྱང་གསང་སྔགས་མཚོན་པའི་སྒོར་སྣང་སྟེ་ཟབ་གསང་སྟོན་པའི་སྔགས་སུ་མ་གྱུར་པའི་བརྗོད་པ་གང་ཡང་མེད་པ་ནི་ཀུན་བརྗོད་པའི་ཆོ་འཕྲུལ་ཏེ། སྔ་མ་ལས། ཀུན་ནས་ཀུན་ཏུ་བརྗོད་པ་ནི། །གསང་བའི་ཡི་གེའི་ཕྲེང་བ་ལས། །རྫུ་འཕྲུལ་ཆོས་ཀྱི་སྒྲ་སྒྲོགས་པས། །མཐོང་ཡོད་སྣང་གྲགས་ཆོས་རྣམས་ཀུན། །ཀུན་ཀྱང་སྔགས་ཀྱི་སྒྲ་གྲགས་པས། །སྔགས་སུ་མ་གྱུར་གང་ཡང་མེད། །དེས་ན་རྩལ་གྱི་ཁྱད་པར་ལ། །སོགས་པའི་ཡོན་ཏན་ཐམས་ཅད་འབྱུང༌། །ཞེས་སོ།།

བཞི་པ་མཚན་བཅས་ཀྱི་ཏིང་ངེ་འཛིན་ལྷ་བསྒོམ་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

རྣལ་འབྱོར་ཆེ་ཆུང༌། ཞེས་པ་ནས། འཇུག་དང་ཅིག་ཆར་བ། །ཞེས་པའི་བར་གྱིས་བསྟན་ཏེ།

རྣལ་འབྱོར་ཆེ་ཆུང་རིམ་པ་དག །རྩལ་གྱི་ཁྱད་པར་དག་ལས་བྱུང་། །རིམས་ཀྱིས་འཇུག་དང་ཅིག་ཅར་བ།།

རྣལ་འབྱོར་པས་ཀུན་བརྗོད་པ་ལ་སོགས་པ་བཞི་ཡི་རྒྱུ་བཟླས་པའི་འཕྲོ་འདུ་ལ་སོགས་པ་རྣམས། ལམ་པའི་ཤེས་རབ་ཆེ་ཆུང་གི་རིམ་པའི་ཁྱད་པར་ལས་བྱུང་བ་དག་ནི། མི་རྟོག་པའི་ཤེས་རབ་ལ་སྦྱངས་པས་བློ་གྲོས་ཀྱི་རྩལ་གྱི་ཁྱད་པར་དག་ལས་བྱུང་སྟེ་ལས་དང་སོ་སོའི་མཚན་མ་གྲུབ་པ་ཡིན་པས་སྣང་བ་ལ་རིམ་གྱིས་འཇུག་པའི་ས་ཡི་རིམ་པ་དང༌། བློ་མཆོག་ཅིག་ཆར་དུ་འཇུག་པའི་ཁྱད་པར་གཉིས་སུ་བསྟན་པའོ།།

གཉིས་པ་རྒྱས་པར་བཤད་པ་ལ་གསུམ་སྟེ། རིམ་གྱིས་པ་བསྟན་པ། ཅིག་ཆར་བ་བཤད་པ། ཆོ་འཕྲུལ་སྒྲུབ་པའི་ཏིང་ངེ་འཛིན་བཤད་པའོ། དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི།

དབུགས་ཀྱི་ཡུལ་དང༌། ཞེས་པ་ནས། པ་ཡང་ཕྱག་རྒྱ་འབྱུང༌། །ཞེས་པའི་བར་གྱིས་བསྟན་ཏེ།

དབུགས་ཀྱི་ཡུལ་དང་ཚོར་བ་དང་། །ཐོས་དང་མཐོང་བ་ལ་སོགས་ཏེ། །སེམས་ཀྱི་ཡུལ་དང་ནམ་མཁའི་དབྱིངས།། ཆོས་ཀྱི་དབྱིངས་ཀྱི་མཐའ་ཀླས་པར། །རང་བཞིན་ཡི་གེ་བསྒྱུར་ཡི་གེ །ཡན་ལག་ཡི་གེ་སོ་སོ་ཡི།།

རྩ་བ་ལ་སོགས་གཞི་གཅིག་བཅས། །འཕྲོ་འདུའི་ཚད་དང་ཕྱག་རྒྱའི་ཁྱོན། །ཚོམ་བུའི་གྲངས་ཀྱང་དེ་བཞིན་ནོ།།

འདི་ནི་དང་པོ་འཇུག་རིམས་ཏེ། །མཐར་གྱིས་འདྲིས་ཤིང་གོམས་བྱེད་པའོ། །ཡི་གེ་ཡེ་ཤེས་ལས་བསྐྲུན་ཏེ།།

དོན་བྱེད་པ་ཡང་ཕྱག་རྒྱར་འབྱུང་།།

དེ་ལ་རིམ་གྱིས་པ་དང་ཅིག་ཆར་བའི་ས་བཅུ་ཉིད་ཀྱི་ཁྱད་པར་གྱི་ཚུལ་བསྟན་པ་གང་སྙམ་པ་ལ། འདུན་པའི་རྣལ་འབྱོར་པས་དབུགས་ཀྱི་ཡུལ་ཙམ་དང༌། ལས་དང་པོའི་རྣལ་འབྱོར་གྱིས་སྣ་ཡིས་དྲི་ཚོར་བ་ཚུན་ཆད་དང༌། རིགས་ཆེན་པས་རྣ་བས་སྒྲ་ཐོས་པ་ཙམ་དང༌། མཚན་མ་རྟགས་ཀྱི་རྣལ་འབྱོར་པས་མིག་གིས་གཟུགས་མཐོང་བ་ཙམ་དང༌། ལ་སོགས་ཏེ་ཞེས་པས་བསྡུ་བ་སྤྱོད་པ་རྒྱུན་གྱི་རྣལ་འབྱོར་པས་གླིང་གཅིག་གང་བ་ཙམ་དང༌། དབུགས་ཆེན་པས་ཁོར་ཡུག་ཆེན་པོས་ཁྱབ་པ་ཙམ་དང༌། ལུང་ཆེན་པས་སྟོང་གསུམ་གྱི་ཁམས་གང་བ་ཙམ་དང་། རྩལ་༼༢༦༨༽ཆེན་པས་སེམས་ཀྱི་ཡུལ་དང༌། བདེ་བ་ཆེན་པོས་ནམ་མཁའི་དབྱིངས་དང༌། ལྷུན་གྱིས་གྲུབ་པས་ཆོས་ཀྱི་དབྱིངས་ཀྱི་མཐའ་ཀླས་པར་ཁྱབ་པའི་བར་གསལ་བར་མན་ཆད་ཀྱི་གོ་རིམ་མདོར་བསྟན་པའོ།།

དེ་ཉིད་སྒོམ་པའི་ཚུལ་གང་ཞེ་ན། བདག་གི་སྒོ་གསུམ་ལ་རང་བཞིན་ལྷུན་གྲུབ་ཏུ་ཡོད་པའི་ཡི་གེ་ཨ་མ་སྐྱེས་པ་དེ་ལས་ཏིང་ངེ་འཛིན་གྱི་དབང་བསྒྱུར་ཏེ་ཡི་གེ་སོ་སོར་གསལ་ནས་སེམས་ཉིད་ཡན་ལག་གི་ཡི་གེ་ཀ་ཁ་ལ་སོགས་པ་ལྷ་སོ་སོ་ཡི་རྩ་བའི་སྙིང་པོར་གྱུར་པ་དང༌། ལ་སོགས་པ་ཞེས་དངོས་པོ་གཞན་བསྡུ་བའི་དོན་གྱིས་བསྐྱེད་པའི་སྙིང་པོ་དང་བཟླས་པའི་བསྙེན་སྔགས་ལས་དང་བཅས་པ་དང༌། རྒྱུའི་ཡི་གེའམ་རྩ་བའི་སྙིང་པོའི་ཡིག་འབྲུ་ཐུགས་ཀར་གདན་གྱི་དཀྱིལ་དུ་གཞི་གཅིག་ཏུ་བཞག་པ་ལ་བཟླས་སྔགས་ཕྲེང་བ་དང་བཅས་པས་བསྐོར་བའོ།།

དེ་དག་བསྒོམ་པའི་ཚུལ་གོང་འོག་གི་ཁྱད་པར་ནི། དེ་ནས་འཕྲོ་འདུའི་ཚད་རིང་ཐུང་དང༌། སྐུ་ཕྱག་རྒྱའི་ཁྱོན་ཆེ་ཆུང་དང༌། ལྷ་མང་པོ་བློས་མི་འཕྱོགས་པ་དང་འཕྱོགས་པས་ཚོམ་བུའི་གྲངས་མང་ཉུང་དུ་སྒོམ་པ་ཉིད་ཀྱང་དེ་བཞིན་ཏེ་རིམ་པ་ཡོད་པ་ཡིན་ནོ། །དེ་བས་ན་སྔར་ཚོགས་ཀྱི་དཀྱིལ་འཁོར་བའི་སྐབས་ཤིག་ཏུ་བཤད་པའང་གཙོར་སྤྱོད་པའི་དབང་ཙམ་སྟེ་ཐུན་མོང་དུ་འགྱུར་རོ། །དེ་ལྟར་བཤད་པ་འདི་ནི་ལས་དང་པོའི་རྣལ་འབྱོར་པ་ཡི་གེའི་ཕྱག་རྒྱ་ལ་འཇུག་པའི་བློ་རིམས་ཀྱི་དབང་དུ་བསྟན་པར་ངེས་ཏེ། དེ་ལྟར་མཐར་གྱིས་འདྲིས་ཤིང་གོམས་པར་བྱེད་པ་ཉིད་དུ་བསྟན་པའོ། །ལྟས་ཤར་ནས་མཐུའི་རྩལ་ཆོ་འཕྲུལ་བཤད་པ་རྣམས་ཀྱི་ཁྱད་པར་གྱི་རྒྱུ་མདོར་བསྟན་པའི་ཕྱིར། ཡི་གེ་ཀུན་རིག་པའི་ཡེ་ཤེས་ཀྱི་ངོ་བོར་གསལ་བ་ལས་ཕྱག་རྒྱའི་ལྷར་བསྐྲུན་ཏེ་ཡི་གེའི་གཟུགས་སུ་རང་ཤར་བར་བསྒོམ་པའོ། །ཚིག་ལྷག་མ་ནི། དེས་བདག་གཞན་གྱི་དོན་བྱེད་པ་ཉིད་ཀྱི་ཕྱིར་ཡང་དེ་ལས་འཕྲོ་འདུ་དང་བཅས་པའི་སྐུ་ཕྱག་རྒྱར་བསྐྱེད་དེ་སྒོམ་པ་འབྱུང་བའོ།།

གཉིས་པ་རྒྱས་པར་བཤད་པ་ལ་བཞི་སྟེ། ས་དང་པོའི་ཏིང་ངེ་འཛིན་བསྟན་པ། ས་གཉིས་པའི་ཏིང་ངེ་འཛིན་བཤད་པ། ས་གསུམ་པ་དང་བཞི་པའི་ཏིང་ངེ་འཛིན་ཐུན་མོང་དུ་བསྟན་པ། ས་ལྔ་པ་ཡན་ཆད་ཀྱི་ཏིང་ངེ་འཛིན་བཤད་པའོ། །དང་པོ་ནི།

འོག་ནས། དེས་ན་ཏིང་འཛིན་ཁྱད་པར། ཞེས་པ་ནས། ཁྱོན་ཡང་དེ་ཙམ་མོ། །ཞེས་པའི་བར་གྱིས་བསྟན་ཏེ།

དེས་ན་ཏིང་འཛིན་ཁྱད་པར་ཡང་། །དེ་ཉིད་ཅིག་ལ་བསྒོམ་མོད་ཀྱི། །རྣལ་འབྱོར་རྩལ་གྱི་ཁྱད་པར་ནི། །བསམ་པའི་ཡུལ་ནི་སྣ་ཚོགས་ཏེ། །དང་པོའི་ས་ལ་གནས་པ་ཡི། །བཙལ་བ་ལས་ཀྱི་རྣལ་འབྱོར་པར། །འདུན་པ་སེམས་དཔའི་རྣལ་འབྱོར་ལ། །སོགས་པའི་རྣལ་འབྱོར་རྣམ་དྲུག་པོ། །ཤེས་རབ་རྩལ་གྱི་མདའ་འཕང་པས། །ཏིང་འཛིན་རྩལ་ཡང་ཆུང་བ་སྟེ། །དེ་ཉིད་མཐོང་བར་མི་འགྱུར་བར། །རང་གི་མོས་པ་གང་དམིགས་ན། །དེ་ཡི་ས་བོན་གང་ཡིན་པ། །ཁ་དོག་དབྱིབས་ཀྱིས་ཕྱེ་ནས་ནི། །སྣ་ཡི་སྦུགས་ལ་རྒྱུ་བྱས་ཏེ། །དེ་ཡི་ཡུལ་དུ་གྱུར་ཚད་དུ།།

འོད་ཟེར་འབར་འཕྲོ་གསལ་བ་ལས། །འཕྲོ་འདུ་གནས་སུ་བསྐྱེད་པར་བྱ། །རང་གི་ཕྱག་ཚད་དང་སྦྱར་བའི།།

སྐུ་ཡི་ཁྱོན་ཡང་དེ་ཙམ་མོ།།

དེའི་ཚུལ་གང་ཞེ་ན། དེས་ན་ཞེས་ཚུལ་སྔ་མ་ལ་སྙེགས་པ་ནི་གཏན་༼༢༦༩༽ཚིགས་སུ་བཞག་པ་སྟེ། དོན་གྱི་གཙོ་བོ་ཏིང་ངེ་འཛིན་གྱི་ཁྱད་པར་ཡང༌། ལྷ་དེ་ཉིད་དམ་དེ་ཁོ་ན་ཉིད་དོན་གྱི་ངོ་བོ་གཅིག་ལ་བསྒོམ་པར་བྱེད་མོད་ཀྱི། འོན་ཀྱང་མི་མཐུན་པའི་དོན་གྱིས་རྣལ་འབྱོར་པས་ཏིང་ངེ་འཛིན་གྱི་རྩལ་འཕངས་ཆེ་ཆུང་དང་མཐོ་དམན་གྱི་ཁྱད་པར་ཅན་དུ་སྣང་བ་ནི་མི་གཅིག་པར་བསམ་པའི་ཡུལ་ནི་སྣ་ཚོགས་སུ་རང་བློ་དང་འཚམས་པར་སྒོམ་པའི་དོན་ཏེ། དེ་ཉིད་གསལ་བར་བསྟན་པ་གང་སྙམ་པ་ལ། ཁས་བླངས་པའི་ཐུན་མོང་མ་ཡིན་པའི་གསང་བའི་ལམ་འབའ་ཞིག་ཏུ་འཆད་པའི་དོན་ཉིད་དེ། དང་པོ་འགྱུར་དབང་མ་ངེས་པའི་ས་ལ་གནས་པ་ཡི་འབད་རྩོལ་ལྷུར་ལེན་པའི་བརྩམས་པ་ལས་ཀྱི་རྣལ་འབྱོར་པ་ཡིས། འདུན་པ་སེམས་པའི་རྣལ་འབྱོར་དང་། ལ་སོགས་པ་ཞེས་བཅོས་མའི་རྣལ་འབྱོར་དང༌། ཕྲ་མེན་པའི་སྤྱོད་པའི་རྣལ་འབྱོར་དང༌། ཚུལ་རྟགས་འཛིན་པའི་རྣལ་འབྱོར་དང༌། མོས་པའི་རྣལ་འབྱོར་དང༌། དགེ་བར་འདུན་པའི་རྣལ་འབྱོར་དང་རྣམ་གྲངས་དྲག་པོ་དག་གི་སྐབས་སུ། དངོས་པོ་ལྷའི་དཀྱིལ་འཁོར་དུ་སྣང་བ་དང༌། དེ་ཉིད་རང་སེམས་སྣང་བའི་དོན་ཡིད་ལ་བྱེད་པ་ཙམ་གྱི་ལྟ་བ་ཡིན་པས་ཤེས་རབ་ཀྱི་རྩལ་གྱི་འཕངས་དམས་པའམ་དམའ་བས་ན། ཏིང་ངེ་འཛིན་གྱི་རྩལ་ཡང་ཆུང་བ་སྟེ། དེ་ཁོ་ན་ཉིད་རང་གི་མཚན་ཉིད་མཐོང་བར་མི་འགྱུར་བས་ན། རང་གི་བསམ་པས་མོས་ཤིང་དད་པ་ཡི་རྟོག་པའི་ལྷ་གང་ལ་དམིགས་པ་ནའང༌། ལྷ་དེ་ཡི་ས་བོན་ཨ໋་ཧཱུྃ་ལ་སོགས་པའི་རྩ་བའི་ཡི་གེ་གང་ཡིན་པ་ལས་རིགས་ཀྱི་ཁ་དོག་དང་དབྱིབས་ཀྱིས་རྣམ་པར་ཕྱེ་ནས་ནི། འཕྲོ་འདུ་བྱེད་པའི་ཐབས་ཀྱང་སྣ་ཡི་དབུགས་ལ་རྒྱུ་བ་དང་ཡིག་འབྲུ་མཐུན་པར་བྱས་ཏེ་འཕྲོ་བ་ཡང་ཕྱི་རོལ་དུ་དབུགས་དེ་ཡི་ཕྱིན་པས་ཡུལ་དུ་གྱུར་པ་ཚུན་ཆད་ཀྱི་ཚད་ཙམ་དུ་ཡབ་ཡུམ་གྱི་ཡི་གེ་ཟུང་སྒྲིལ་དུ་འོད་ཟེར་འབར་ཞིང་འཕྲོ་བ་གསལ་བར་བྱས་པ་ལས་འཕྲོ་འདུ་དང་བཅས་པས་དོན་རྫོགས་པ་དང་སླར་རང་གནས་སུ་འདུས་ནས་ནང་དུ་ཙིཏྟའི་དཀྱིལ་དུ་རྩ་བའི་ཡི་གེ་ལ་བསྟིམས་ནས་བྱིན་རླབས་གསལ་བར་བསྐྱེད་པར་བྱའོ། །སྐུ་ཡང་རང་གི་རྣམ་པར་སྨིན་པའི་ལུས་ཀྱི་ཆག་ཚད་དང་སྦྱར་ཏེ་ཁྲུ་བཞི་ཙམ་དུ་སྒོམ་པའི། ལྷ་གཅིག་གི་སྐུ་ཡི་ཁྱོན་ཡང་དེ་ཙམ་ཞིག་འཕྱོགས་པར་བསམ་ཞིང་སྒོམ་མོ།།

གཉིས་པ་ས་གཉིས་པའི་ཏིང་ངེ་འཛིན་བཤད་པ་ནི།

གཉིས་པའི་ས་ལ། ཞེས་པ་ནས། ཁྱོན་ཡང་དེ་ཙམ་མོ། །ཞེས་པའི་བར་གྱིས་བསྟན་ཏེ།

གཉིས་པའི་ས་ལ་གནས་པ་ཡི། །བཀའ་སྡོད་ལས་ཀྱི་རྣལ་འབྱོར་ལ། །སོགས་པའི་རྣལ་འབྱོར་རྣམ་བཞི་པོ།།

ཏིང་འཛིན་རྩལ་གྱི་ཁྱད་པར་ནི། །ས་བོན་རང་བཞིན་ཡི་གེ་ལ། །འོད་ཟེར་འབར་བར་བཅས་པ་སྟེ།།

དྲི་འབྱུང་སྒོ་ནི་ཚུན་ཚད་དུ། །འཕྲོ་འདུ་གསལ་བར་སྐྱེད་པ་ལས། །རང་གྱི་ཕྱག་ཚད་གཉིས་བསྒྱུར་བའི།།

སྐུ་ཡི་ཁྱོན་ཡང་དེ་ཙམ་མོ།།

ས་གཉིས་པར་གྱུར་༼༢༧༠༽པའི་རྟེན་པ་གཞི་ཡི་ས་ལ་གནས་པ་ཡི་རྣལ་འབྱོར་པས། བཀའ་སྡོད་ལས་ཀྱི་རྣལ་འབྱོར་དང༌། ལ་སོགས་པ་ཞེས་དང་པོ་ལས་ཀྱི་རྣལ་འབྱོར་དང་བསླབ་པ་སྦྱོར་བའི་རྣལ་འབྱོར་དང༌། ངེས་པའི་རྣལ་འབྱོར་དང་རྣམ་པ་བཞི་པོ་རྣམས་ཀྱི་ཏིང་ངེ་འཛིན་གྱི་རྩལ་གྱི་ཁྱད་པར་ནི། རིགས་ཀྱི་ས་བོན་གང་ཡིན་པའི་རང་བཞིན་གྱི་ཡི་གེ་སྒོམ་པ་ལའང་འོད་ཟེར་འབར་ཞིང་འཕྲོ་བར་བཅས་ཏེ་སྒོམ་པ་དེ་ཡི་འཕྲོ་འདུ་ཡང་དྲི་འབྱུང་བའི་སྒོ་དྲི་མ་བསྣམས་པའི་སྣའི་ཡུལ་ནི་ཚུན་ཆད་ཙམ་དུ་གསལ་ཏེ་འཕྲོ་འདུ་གསལ་བར་བསྐྱེད་པར་ལས་སྐུ་ཡང་རང་གི་ཆག་ཚད་གཉིས་འགྱུར་དུ་བསྒྱུར་བའི་ཁྲུ་བརྒྱད་ཙམ་དུ་ལྷ་ཡབ་ཡུམ་གཉིས་ཡན་ལག་དང་བཅས་པའི་སྐུ་ཡི་ཁྱོན་ཡང་དེ་ཙམ་དུ་གསལ་ཞིང་སྒོམ་མོ།།

གསུམ་པ་ས་གསུམ་པ་དང་བཞི་པའི་ཏིང་ངེ་འཛིན་ཐུན་མོང་དུ་བསྟན་པ་ནི།

གསུམ་པའི་ས་ལ། ཞེས་པ་ནས། ཁྱོན་ཡང་དེ་ཙམ་མོ། །ཞེས་པའི་བར་གྱིས་བསྟན་ཏེ།

གསུམ་པའི་ས་ལ་གནས་པ་ཡི། །རྣལ་འབྱོར་ལུང་གི་བཀའ་བསྒོ་ལ། །སོགས་པའི་རྣལ་འབྱོར་རྣམ་གསུམ་པོ།།

དམིགས་པའི་ཏིང་འཛིན་འདི་ལྟར་འདོད། །ལྷ་ཡི་ས་བོན་གང་ཡིན་པ། །རང་བཞིན་ཡི་གེ་བསྒྱུར་བྱས་ཏེ།།

འོད་ཟེར་འབར་དང་བཅས་པ་ཡིས། །ཐོས་པའི་ཡུལ་ནི་ཚུན་ཚད་དུ། །འཕྲོ་འདུ་གསལ་བར་བྱས་པ་ལས།།

རང་གི་ཕྱག་ཚད་བཞི་འགྱུར་ཙམ། །སྐུ་ཡི་ཁྱོན་ཡང་དེ་ཙམ་མོ།།

འདིར་ས་གསུམ་པ་དང་བཞི་པའི་ངོ་བོ་བསྟན་པ་ནི། ལོ་ཙཱ་བས་རྩ་བ་དང་བཤད་རྒྱུད་གཉིས་ཀ་ལས་བཀའ་ཆག་པའི་དོན་ཏེ། དེས་ན་གསུམ་པར་གྱུར་པའི་གལ་ཆེན་སྦྱོང་བའི་ས་ལ་གནས་པ་ཡི་རྣལ་འབྱོར་པ་ལ། རིགས་ཆེན་འབྱེད་པ་གཅིག་སྒོམ་ཞིང༌། ཞེས་པ་ལྟ་བུར། རིགས་ཆེན་འབྱེད་པའི་རྣལ་འབྱོར་གཅིག་ལས་མེད་པས། ལྷའི་ས་བོན་རྩ་བའི་ཡི་གེ་ཡང་ཆུ་དང་ཆབ་རོམ་ལྟར་རང་རིག་པ་ཉིད་ཡི་གེར་གསལ་བས་སྐུའི་ཁྱོན་ཆག་ཚད་བཞི་འགྱུར་ཙམ་དུ་བསྐྱེད་ནས་འོད་ཟེར་དང་བཅས་པའི་འཕྲོ་འདུ་སྒྲ་ཐོས་པའི་ཡུལ་ཚུན་ཆད་དུ་གསལ་བའོ། །བཞི་པའི་ས་ལ་གནས་པ་ཡི། །ཞེས་པ་ལྟ་བུར། ས་བཞི་པ་བསླབ་པ་རྒྱུན་གྱི་ས་ཡི་རྣལ་འབྱོར་པས་གསང་སྒོ་མཚོན་པའི་ལུང་གི་བཀའ་ཡི་སྒོ་ལ་རྟེན་པའི་རྣལ་འབྱོར་དྲོད་རྟགས་གཡོ་བ་དང༌། ལ་སོགས་པའི་དོན་གྱིས་བསྡུ་བ། སྤྱོད་པ་རྒྱུན་གྱི་རྣལ་འབྱོར་དྲོད་རྟགས་ཐོབ་པ་དང༌། མཚན་མ་རྟགས་ཀྱི་རྣལ་འབྱོར་དྲོད་རྟགས་ཤིན་ཏུ་བརྟན་པ་དང་གསུམ་སྟེ། རྣལ་འབྱོར་རྣམ་པ་གསུམ་པོ་རྣམས་སུ་དམིགས་པའི་ཏིང་ངེ་འཛིན་སྒོམ་པའི་འདི་ལྟར་འདོད་དེ། ལྷ་ཡི་ས་བོན་གང་ཡིན་པ་ཡང་རིགས་ཀྱི་རང་བཞིན་གྱི་ཡི་གེར་བསྒྱུར་བར་བྱས་ཏེ་འོད་ཟེར་འབར་བ་དང་བཅས་ཏེ་གསལ་བར་སྒོམ་པ་ཡིས་དོན་གཉིས་སྒྲུབ་སྟེ། ཐོས་པའི་ཡུལ་ནི་ཚུན་ཆད་དུ། །ཞེས་པ་ས་གསུམ་པའི་འཕྲོ་འདུ་ཡིན་པས། ས་འདིར་ནི། གཟུགས་༼༢༧༡༽མཐོང་ཚད་ཀྱི་ཡུལ་ཚུན་ཆད་དུ་འཕྲོ་འདུ་གསལ་བར་བྱས་པ་ལས། ས་གསུམ་པ་ལ། རག་གི་ཆག་ཚད་བཞི་འགྱུར་ཙམ་གྱི་རིགས་གཅིག་འཁོར་དང་བཅས་པ་སྒོམ་པ་ཡིན་ཞིང༌། བཞི་པ་འདིར་ནི། རིགས་གསུམ་འཁོར་དང་བཅས་པ་ཡི་ལྷ་རྣམས་ཆག་ཚད་བརྒྱད་འགྱུར་ཙམ་དུ་བསྐྱེད་དེ་སྐུ་ཡི་ཁྱོན་ཡང་དེ་ཙམ་ཉིད་དུ་གསལ་བར་སྒོམ་མོ། །འོན་ཀྱང་རྣལ་འབྱོར་གསུམ་ཉིད་ལའང་དེ་གསལ་མི་གསལ་གྱི་ཆ་ཡོད་དེ་བཤད་པ་དང་འཆད་པར་སྦྱར་རོ།།

བཞི་པ་ས་ལྔ་པ་ཡན་ཆད་ཀྱི་ཏིང་ངེ་འཛིན་བཤད་པ་ནི།

དེ་བཞིན་རྣལ་འབྱོར། ཞེས་པ་ནས། ཁྱོན་གྱིས་གང་བའོ། །ཞེས་པའི་བར་གྱིས་བསྟན་ཏེ།

དེ་བཞིན་རྣལ་འབྱོར་རིམ་པ་བཞིན། །ལྷ་ཡི་ཁྱད་པར་གང་ཡིན་པ། །ཡི་གེའི་རིམ་པ་བཞིན་སྦྱར་ནས།།

འཕྲོ་འདུའི་ཚད་ཀྱང་དེ་བཞིན་ཏེ། །རིམ་པ་བཞིན་དུ་སྦྱར་ནས་ཀྱང་། །འཕྲོ་འདུ་གསལ་བར་གྱུར་པ་དང་།།

སེམས་ཀྱི་ཡུལ་ནི་ཅི་ཙམ་པར། །སྐུ་ཡི་ཁྱོན་གྱི་ཁྱད་པར་ཡང་། །ཆོས་ཀྱི་དབྱིངས་ཀྱི་མཐས་ཀླས་པར།།

སྐུ་ཡི་ཁྱོན་གྱིས་གང་བའོ།།

དེ་བཞིན་དུ་ས་ལྔ་པ་ལ་སོགས་རྣལ་འབྱོར་གྱི་རིམ་པ་བཞིན་དུ་ལྷ་ཡི་ཁྱད་པར་གང་ཡིན་པ་ཡང་ཡི་གེའི་རིམ་པ་བཞིན་དུ་སྦྱར་ནས་འཕྲོ་འདུའི་ཚད་ཀྱང་དེ་བཞིན་དུ་སྒོམ་པ་ཡིན་ཏེ་ས་ལྔ་པ་བསོད་ནམས་གཏེར་གྱི་ས་ལ་སྤྱོད་པ་རྒྱུན་གྱི་རྣལ་འབྱོར་པས་ལྷའི་སྐུ་ཆག་ཚད་བཅུ་དྲུག་འགྱུར་དུ་སྒོམས་ནས་འཕྲོ་འདུ་རྒྱང་གྲགས་གཅིག་ཚུན་ཆད་དོ། །འོ་ན་དེ་བས་འོག་གི་མཐོང་ཐོས་རིང་ངོ་ཞེ་ན། དེ་ནི་མཐོ་ས་དང་སྒྲ་ཆེན་པོའི་དབང་མ་ཡིན་ཏེ་རྣལ་མའི་དབང་དུ་བརྗོད་པའོ།།

ས་དྲུག་པ་རྟེན་པས་ཁྱད་པར་དུ་འགྲོ་བའི་ས་ལ། དབུགས་ཆེན་འབྱིན་པའི་རྣལ་འབྱོར་དང་། རིགས་ཆེན་འབྱེད་པའི་རྣལ་འབྱོར་དང་། མཉམ་རྫོགས་ཆེན་པོའི་རྣལ་འབྱོར་དང༌། ངེས་པར་སྤྱོད་པའི་རྣལ་འབྱོར་དང༌། རྩལ་ཆེན་སྦྱོར་བའི་རྣལ་འབྱོར་དང་། ཡུལ་ལ་འཇུག་པའི་རྣལ་འབྱོར་དང༌། རིག་པར་སྦྱོར་བའི་རྣལ་འབྱོར་དང་བདུན་ནི། སྐུའི་ཆག་ཚད་སུམ་ཅུ་རྩ་གཉིས་འགྱུར་དུ་གསལ་ལ། འཕྲོ་འདུ་དཔག་ཚད་གཅིག་ཚུན་དུ་གསལ་བའོ།།

ས་བདུན་པ་དམིགས་པས་འབྲས་བུ་སྐྱེ་བའི་ས་ལ། གྲུབ་པའིརྣལ་འབྱོར་དང་། རྣལ་འབྱོར་ཆེན་པོ་དང༌། ངེས་པར་འབྱུང་བའི་རྣལ་འབྱོར་དང་གསུམ་གྱིས་འཕྲོ་འདུ་གླིང་གཅིག་ཚུན་ཆད་དུའོ། །ཁྱོན་ཆག་ཚད་དྲུག་ཅུ་རྩ་བཞི་འགྱུར་དུ་གསལ་བའོ།།

བརྒྱད་པ་གནས་པ་མི་འགྱུར་བའི་ས་ལ། རྨད་བྱུང་རོལ་པའི་རྣལ་འབྱོར་དང༌། ཚོགས་ཆེན་འདུས་པའི་རྣལ་འབྱོར་དང༌། རྩལ་ཆེན་རྫོགས་པའི་རྣལ་འབྱོར་དང་གསུམ་གྱིས་འཕྲོ་འདུ་སེམས་ཀྱིས་ལྕོགས་ཚད་དམ་ཁོར་ཡུག་གཅིག་ཚུན་ཆད་དུ་གསལ་ལོ། །ཁྱོན་ནི་ཆག་ཚད་ཀྱང་སེམས་ཀྱི་ཡུལ་ཚུན་ཆད་དུའམ་༼༢༧༢༽བརྒྱ་ཉི་ཤུ་རྩ་བརྒྱད་འགྱུར་དུ་གསལ་ལོ།།

ས་དགུ་པ་གདལ་བ་ཆོས་ཉིད་ཀྱི་ས་ལ། རོལ་པ་རྒྱན་གྱི་རྣལ་འབྱོར་དང༌། བདེ་བ་ཆེན་པོའི་རྣལ་འབྱོར་དང་། ཐིག་ལེར་རྫོགས་པའི་རྣལ་འབྱོར་དང་གསུམ་གྱིས་འཕྲོ་འདུ་བྱེད་པའི་རིང་ཐུང་ཡང༌། ནམ་མཁའི་ཁམས་གང་བ་ཚུན་ཆད་དེ། སྟོང་གསུམ་གཅིག་དང་བརྒྱ་སྟོང་བྱེ་བ་ལ་སོགས་པ་མཐའ་ཚད་མེད་པ་མ་ཆད་པར་གསལ་ལོ། །སྐུའི་ཁྱོན་ཡང་ནམ་མཁའི་ཁམས་སྐུ་ཡིས་གང་བའི་ངོ་བོ་ཉིད་དུ་སྒོམས་ཏེ། ས་འདིར་སྤྱོད་ཡུལ་ཡེ་ཤེས་སྒྱུ་མའི་ངོ་བོར་གསལ་བའི་ཕྱིར། རྩ་བའི་རྒྱུད་ལས། སྒྱུ་མའང་སྒྱུ་མ་ཡིན་སྤྱོད་པའོ། །ཞེས་པས་སོ།།

ས་བཅུ་པ་རྫོགས་པ་སྤྱིར་ཆིབས་ཀྱི་ས་ལ་བདག་ཉིད་ཆེན་པོའི་རྣལ་འབྱོར་དང་། ལྷུན་གྱི་གྲུབ་པའི་རྣལ་འབྱོར་དང་། ཀློང་ཡངས་ཆུབ་པའི་རྣལ་འབྱོར་དང་གསུམ་གྱིས་ན། སེམས་ཀྱི་དབྱིངས་ཁྱོན་ཚད་མེད་པ་ནི། སྐུ་ཡི་ཁྱོན་གྱི་ཁྱད་པར་ཡང་། །ཆོས་ཀྱི་དབྱིངས་ཀྱི་མཐའ་ཀླས་པར། །སྐུ་ཡི་ཁྱོན་གྱིས་གང་བར་བསྒོམ། །ཞེས་པ་འཕྲོ་འདུ་དང་ཁྱོན་གཉིས་ཀ་ས་དགུ་པར་སྦྱངས་པའི་སྟོབས་ལས་བྱུང་བའི་ཚད་དང་བྲལ་བའོ། །དེས་ན་ནམ་མཁའི་ཁོངས་སུ་ཆོས་ཉིད་མ་འདུས་པའི་ཁྱད་པར་ཡོད་པའོ། །བཤད་པ་དེ་ལྟར་རིམ་པ་བཞིན་དུ་སྦྱར་ནས་ཀྱང་སོ་སོའི་འཕྲོ་འདུ་གསལ་བར་གྱུར་བ་དང༌། སེམས་ཀྱི་ཡུལ་ནི་ཇི་ཙམ་དུ་ཁྱབ་པར་སྤྲོ་ཞིང་སྐུ་ཡི་ཁྱོན་གྱི་ཁྱད་པར་ཡང་དེ་ལྟར་གསལ་ཏེ་མཐར་ཆོས་ཀྱི་དབྱིངས་ཀྱི་མཐའ་ཀླས་པར་གདལ་བའི་བར་དུ་སྐུ་ཡི་ཁྱོན་གྱིས་གང་བར་བསྒོམ་པར་བྱེད་དེ་མཐར་ཕྱིན་པའོ། །འོ་ན་འདིར་ས་བཅུ་བསྐྱེད་པའི་རིམ་པ་ལ་འདི་ཁོ་ན་ལྟར་བརྒྱུད་པ་ནི་ཤིན་ཏུའང་ལམ་རིང་བས། རྒྱུའི་ཐེག་པ་དང་བྱེ་བྲག་མེད་པར་འགྱུར་རོ་ཞེ་ན། འདིར་ལན་གསོལ་པ། གཅིག་ཆར་ལྟ་ཅི་སྨོས། འདི་ལྟར་རིམས་གྱིས་སློབ་པ་ཡང་རྒྱ་གར་གྱི་འཕོང་སློབ་པ་དང་མཚུངས་ཏེ། འདིར་ས་དང་པོ་བརྟན་པར་བྱ་བའི་སྟོབས་ཀྱིས་གཉིས་པ་ཡན་ཆད་དུ་སྦྱངས་དགོས་ཀྱང་བྱིང་རྒོད་བྲལ་བས་དཀའ་བ་མེད་པར་གྱུར་པ་དང༌། རྒྱུ་ལ་གནས་པ་ལྟར་བསོད་ནམས་ལ་རེ་བ་མེད་པས་བསྒོམ་པའི་ཏིང་ངེ་འཛིན་འབྲས་བུ་ལམ་དུ་བྱས་པ་ཉིད་ཀྱིས། ཚེ་འདི་ཉིད་ལ་ངེས་པར་འབྱུང་བས་ཐེ་ཚོམ་མེད་པ་དག་གོ།

གསུམ་པ་ཞབས་བསྡུ་བ་ནི།

ཇི་ལྟར་གསེར་སྦྱངས། ཞེས་༼༢༧༣༽པ་ནས། སྦྱོངས་ལས་གཅིག་ཆར་དྲོད། །ཅེས་པའི་བར་གྱིས་བསྟན་ཏེ།

ཇི་ལྟར་གསེར་སྦྱངས་འཚེར་པ་བཞིན། །སེམས་ཉིད་སྦྱངས་པས་དེ་ཉིད་གསལ།།

འཕྲོ་འདུ་སྦྱོར་བའི་ཏིང་འཛིན་འདི། །རིམས་ཀྱིས་སྦྱོར་ལས་ཅིག་ཅར་བྲོད།།

རིམ་གྱིས་པས་འགྲུབ་ཏུ་བཏུབ་པའི་ཚུལ་གང་སྙམ་པ་ལ། མཐུན་པའི་དཔེ་ཉེ་བར་བཟུང་སྟེ་ཇི་ལྟར་གསེར་སྦྱངས་ཤིང་དྲི་མ་དག་པ་ན་ཁ་དོག་གསལ་ཞིང་འཚེར་བ་བཞིན་དུ། དེ་ལྟར་རིམ་པར་རིག་པའི་སེམས་ཉིད་རྩལ་སྦྱངས་པས་སྒྲིབ་པའི་དྲི་མ་རགས་པ་ནས་རིམ་པར་དག་པས་ཏིང་ངེ་འཛིན་དེ་ཉིད་གསལ་ཞིང་འཕྲོ་འདུ་སྦྱོར་བའི་ཏིང་ངེ་འཛིན་འདི་ལྟར་སྒོམས་ཏེ་རིམས་ཀྱིས་སྦྱོངས་ནས་གོམས་པ་ལས་མཇུག་ཏུ་གཅིག་ཆར་དུ་གསལ་བའི་དྲོད་ཐོབ་པར་འགྱུར་བ་ལ་ཐེ་ཚོམ་མེད་དེ། ཤིང་ཐོག་མ་ལེ་ཀའི་འབྲུ་དང་འདྲའོ།།

གཉིས་པ་ཅིག་ཆར་བ་བཤད་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

ལང་ཀའི་བདག་པོ། ཞེས་པ་ནས། འཕྲོ་འདུའི་རྒྱུན་ཞེས་བྱ། །ཞེས་པའི་བར་གྱིས་བསྟན་ཏེ།

ལངྐའི་བདག་པོ་འདི་ལྟ་སྟེ། །ཆོས་རྒྱུན་ཆེན་པོའི་ཏིང་འཛིན་འདི།།

སེམས་དཔའ་རྡོ་རྗེ་དམ་པས་བཤད། །འདི་ཀུན་འཕྲོ་འདུའི་རྒྱུན་ཞེས་བྱ།།

གཅིག་ཆར་འཇུག་པའི་རྒྱུན་གྱི་ཏིང་ངེ་འཛིན་གང་སྙམ་པ་ལ། སྟོན་པ་གསང་བདག་སྐྱེས་བུས་སྡུད་པ་པོ་ལང་ཀའི་བདག་པོ་ལ་བོས་ཏེ། གཅིག་ཆར་བའི་མཚན་བཅས་ཀྱི་རྣལ་འབྱོར་ཉེ་བར་བསྟན་པ་འདི་ལྟ་སྟེ། བློ་ཆེ་བ་ལ་དོན་དང་འདུ་འབྲལ་མེད་པས་ཆོས་རྒྱུན་ཆེན་པོའི་ཏིང་ངེ་འཛིན་གྱི་ངོ་བོ་འདི་ནི་ཐོག་མར་གསང་བདག་ཉིད་ལ་སྟོན་པ་སེམས་དཔའ་རྡོ་རྗེའམ་རྡོ་རྗེ་སེམས་དཔའ་དམ་པར་བཤད་ཅིང་བཀའ་སྩལ་བར་མཛད་དེ། དོན་འདི་རྒྱུན་དུ་འབྲལ་བར་མེད་པ་ནི་རྒྱུན་གྱི་ཏིང་ངེ་འཛིན་ཆེན་པོའོ། །དེས་ན་ཏིང་ངེ་འཛིན་འདི་ཀུན་གཅིག་ཆར་བ་ལ་རེས་མོས་སུ་བསྟན་དུ་མེད་དེ། ལྷུན་གྱིས་གྲུབ་པའི་ཀློང་དུ་རིག་པ་འཕྲོ་འདུའི་ཐག་ཆོད་པས་རྒྱུན་གྱི་དུས་གཅིག་ཏུ་མི་གཡོ་བར་གསལ་བ་ཞེས་བྱའོ།།

གཉིས་པ་རྒྱས་པར་བཤད་པ་ལ་བརྒྱད་དེ། བརྟན་པ་རྒྱུན་གྱི་ཏིང་ངེ་འཛིན། བདུད་རྩི་རྒྱུན་གྱི་ཏིང་ངེ་འཛིན། མཆོད་པ་རྒྱུན་གྱི་ཏིང་ངེ་འཛིན། སངས་རྒྱས་རྒྱུན་གྱི་ཏིང་ངེ་འཛིན། བཟླས་པ་རྒྱུན་གྱི་ཏིང་ངེ་འཛིན། སྦྱོར་བ་རྒྱུན་གྱི་ཏིང་ངེ་འཛིན། སྒྲོལ་བ་རྒྱུན་གྱི་ཏིང་ངེ་འཛིན། དཀྱིལ་འཁོར་རྒྱུན་གྱིི་ཏིང་ངེ་འཛིན་ནོ། །དང་པོ་ནི།

ནམ་མཁའ་དོན་གྱི། ཞེས་པ་ནས། གསང་སྔགས་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

ནམ་མཁའི་དོན་གྱི་གླེགས་བམ་ལ། །སྣ་ཚོགས་རིག་པའི་ཡི་གེ་བྲིས།།

འབྱུང་ཆེན་བཞི་ཡི་སྒྲ་བསྒྲགས་པས། །ཐེག་ཆེན་གསང་སྔགས་རྒྱུན་མི་འཆད།།

ཆོས་ཐམས་ཅད་རིལ་སེམས་ཉིད་འོད་གསལ་བའི་ངོ་བོར་གྱུར་པས། ནམ་མཁའ་དོན་གྱི་གླེགས་བམ་ལ་སྣ་ཚོགས་རིག་པས་ཡི་གེ་རང་གསལ་དུ་བྲིས་ཏེ་འབྱུང་བ་ཆེན་པོ་བཞི་ཡི་༼༢༧༤༽སྒྲ་བསྒྲགས་པས་སྒྲ་རིལ་གསང་བ་མཆོག་གི་རང་སྒྲ་སྟེ་ཐེག་ཆེན་གསང་སྔགས་ཀྱི་སྒྲ་དབྱངས་རྒྱུན་མི་འཆད་པ་ཉིད་དེ་བློ་ཆེ་བའི་ཏིང་ངེ་འཛིན་དང་དངོས་པོའི་གནས་ཐབས་སྟོན་པའོ།།

གཉིས་པ་བདུད་རྩི་རྒྱུན་གྱི་ཏིང་ངེ་འཛིན་ནི།

ཆོས་སོ་ཅོག་གི ཞེས་པ་ནས། བདུད་རྩི་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

ཆོས་སོ་ཅོག་གི་རང་བཞིན་ནི། །དེ་བཞིན་ཉིད་ལས་མ་གཡོས་པས།།

ཐམས་ཅད་བདུད་རྩི་ར་ས་ཡན། །རང་བྱུང་བདུད་རྩི་རྒྱུན་མི་འཆད།།

འཁོར་འདས་ཀྱི་ཆོས་སོ་ཅོག་གི་རང་བཞིན་ནི། བྱང་ཆུབ་སེམས་ཀྱི་ཆོས་ཉིད་དེ་བཞིན་ཉིད་མ་གཡོས་པས་རྟག་ཆད་ཀྱི་འཇིགས་པ་ཐམས་ཅད་སེལ་བའི་སེམས་ཉིད་སྐྱེ་ཤིའི་མཐའ་ལས་འདས་པའི་བདུད་རྩི་ར་ས་ཡན་དུ་ངེས་པས་རང་བྱུང་དོན་གྱི་བདུད་རྩི་ཆེན་པོ་རྒྱུན་མི་འཆད་པ་གྱུར་བའོ།།

གསུམ་པ་མཆོད་པ་རྒྱུན་གྱི་ཏིང་ངེ་འཛིན་ནི།

འཁོར་བ་རྒྱ་མཚོའི། ཞེས་པ་ནས། མཆོད་སྤྲིན་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

འཁོར་བ་རྒྱ་མཚོའི་ཡོ་བྱད་རྣམས། །མཆོད་པ་རྒྱ་མཚོའི་རང་བཞིན་པས།།

སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་རྒྱུན་མི་འཆད།།

འཁོར་བ་རྒྱ་མཚོའི་ཡོ་བྱད་མ་ལུས་པ་རྣམས་ཀྱང༌། མཉེས་བྱེད་མཆོད་པ་རྒྱ་མཚོའི་རང་བཞིན་དུ་བཀོད་པ་ཡིན་ཏེ། སྲིད་པ་རྒྱ་མཚོ་མཐའ་ཡས་པ་ཀུན་ཏུ་སྣང་བ་ཉིད་ཇི་བཞིན་པའི་གནས་སུ་སྟོབས་པ་ལས་སྤྱོད་ཡུལ་ཡོངས་སུ་དག་པ་ཉིད་ཀྱི་ཕྱིར། ཀུན་ཏུ་བཟང་པོའི་མཆོད་སྤྲིན་རྒྱུན་མི་འཆད་པ་ཁོ་ནའོ།།

བཞི་པ་སངས་རྒྱས་རྒྱུན་གྱི་ཏིང་ངེ་འཛིན་ནི།

ཀུན་གྱི་དེ་བཞིན། ཞེས་པ་ནས། སངས་རྒྱས་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

ཀུན་གྱི་དེ་བཞིན་ཉིད་དབྱིངས་ལས། །སེམས་ཅན་སངས་རྒྱས་སྙིང་པོར་ཤར།།

འགྲོ་བ་བསམ་གྱིས་མི་ཁྱབ་པ། །རང་བྱུང་སངས་རྒྱས་རྒྱུན་མི་འཆད།།

ཆོས་སོ་ཅོག་ཀུན་གྱི་རང་བཞིན་དེ་ཁོ་ན་ཉིད་ཀྱི་ཆོས་ཉིད་དེ་བཞིན་ཉིད་ཀྱི་དབྱིངས་སུ་ངེས་པའི་ཕྱིར། ངང་ལས་ཤར་བའི་འགྲོ་བ་རིགས་དྲུག་གི་སེམས་ཅན་ཐམས་ཅད་མཐའ་གཉིས་ངང་གིས་བྲལ་བའི་ཕྱིར་སངས་རྒྱས་ཀྱི་སྙིང་པོ་ཆོས་སྐུ་ཆེན་པོར་སུས་ཀྱང་མ་བྱས་བྱས་པ་མེད་པར་རང་ཤར་བ་ལ་འགྲོ་ལ་གང་ཞིག་བསམ་གྱིས་མི་ཁྱབ་པ་ཀུན་ཀྱང་རང་བྱུང་དོན་གྱི་སངས་རྒྱས་སྒོམ་པ་རྒྱུན་གྱི་ཏིང་ངེ་འཛིན་དམ་པར་དུས་གསུམ་དུ་རྒྱུན་མི་འཆད་པ་ཉིད་དུ་འཇལ་བའོ།།

ལྔ་པ་བཟླས་པ་རྒྱུན་གྱི་ཏིང་ངེ་འཛིན་ནི།

དངོས་པོ་བརྟན་གཡོ། ཞེས་པ་ནས། རྒྱ་མཚོ་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

དངོས་པོ་བརྟན་གཡོ་ལ་སོགས་པའི། །སྒྲ་སྐད་བསམ་གྱིས་མི་ཁྱབ་པའི།།

ཀུན་ཀྱང་གསང་སྔགས་གསང་བའི་ཚིག །བཟླས་པ་རྒྱ་མཚོ་རྒྱུན་མི་འཆད།།

དངོས་པོ་སྣོད་བཅུད་དུ་སྣང་བའི་བརྟན་གཡོ་ཐམས་ཅད་དང༌། ལ་སོགས་པ་ཞེས་དེ་ལས་གྱུར་པ་རིལ་རང་བྱུང་རྒྱལ་བའི་དཀྱིལ་འཁོར་དུ་གནས་པའི་ཕྱིར་སྒྲ་སྐད་བསམ་གྱིས་མི་ཁྱབ་པར་ཇི་ལྟར་གྲགས་པ་ཀུན་ཀྱང་གསང་སྔགས་གསང་བ་དམ་པའི་ཚིག་ཏུ་ཤར་བར་རྟོགས་པས་བཟླས་པ་དང་བརྗོད་པ་རྒྱ་མཚོ་རྒྱུན་མི་འཆད་པར་གསལ་བའོ།།

དྲུག་པ་སྦྱོར་བ་རྒྱུན་གྱི་ཏིང་ངེ་འཛིན་ནི།

དེ་དང་དེ་ཡི། ཞེས་པ་ནས། ཆེན་པོ་རྒྱུན་མི་འཆད། ༼༢༧༥༽།ཅེས་པའི་བར་གྱིས་བསྟན་ཏེ།

དེ་དང་དེ་ཡི་དབྱིངས་ཉིད་ལ། །གང་དང་གང་གི་ཐབས་སྦྱོར་བ།།

ཡེ་ནས་འདུ་འབྲལ་མེད་པས་ན། །སྦྱོར་བ་ཆེན་པོ་རྒྱུན་མི་འཆད།།

སྣོད་དུ་གྱུར་པ་དེ་དང་བཅུད་དུ་སྣང་བ་དེ་ཡི་ངོ་བོ་རིལ་ཉིད་དབྱིངས་མུ་མཐའ་མེད་པ་ཉིད་ལ། རང་གི་རིག་པའང་དེ་ཁོ་ན་ཉིད་ཡིན་པས་དངོས་པོ་གང་དང་དེ་ཉིད་རྟོགས་པར་བྱེད་པ་གང་གི་ཐབས་གཞན་སྦྱོར་བ་མེད་དེ། དེ་ཉིད་ཡེ་ནས་ཡིན་པར་ཐག་ཆོད་དེ་གཞན་དུ་མི་ཚོལ་བས་ཤེས་རབ་རང་རིག་མུ་མཐའ་བྲལ་བ་ལས། ཐབས་དེ་ཉིད་ཡེ་ཤེས་སུ་མ་འགགས་པར་རང་གསལ་བ་ཉིད་འདུ་འབྲལ་མེད་པར་རྟོགས་པས་ན་དུས་གསུམ་དུ་གཉིས་སུ་མེད་པས་སྦྱོར་བ་ཆེན་པོ་རྒྱུན་མི་འཆད་པར་འཇལ་བ་ཉིད་དོ།།

བདུན་པ་སྒྲོལ་བ་རྒྱུན་གྱི་ཏིང་ངེ་འཛིན་ནི།

སྲིད་གསུམ་བསྒྲལ་བའི། ཞེས་པ་ནས། ཆེན་པོ་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

སྲིད་གསུམ་བསྒྲལ་བའི་ཞིང་འདི་དག །སྟོང་ཉིད་མཚོན་ཆའི་རྒྱལ་པོ་ཡིས།།

དངོས་པོ་མེད་པར་བསད་པས་ན། །ཡེ་སྒྲོལ་ཆེན་པོ་རྒྱུན་མི་འཆད།།

སྲིད་པ་ཁམས་གསུམ་པོ་ཉིད་བསྒྲལ་བའི་ཞིང་དུ་གྱུར་པ་ཡིན་ཏེ་མཉམ་པ་ཉིད་དང་འགལ་བའི་རྟག་ཆད་ཀྱི་འཁྲུལ་མཐའ་འཛིན་པ་ཡིན་པས་འདི་དག་ཐམས་ཅད་སྟོང་པ་ཉིད་དུ་ཇི་ལྟ་བར་རྟོགས་པའི་ཤེས་རབ་མཆོག་ནི་དེ་དག་སྐད་ཅིག་གིས་མི་གནས་པར་བྱེད་པས་མཚོན་ཆའི་རྒྱལ་པོ་རབ་ཏུ་རྣོན་པོ་ཡིན་པས། རྟོགས་པ་དེ་ཡིས་འཇིག་རྟེན་གསུམ་པོ་ཐམས་ཅད་དངོས་པོ་མེད་པར་བསད་དེ་འབྲས་བུའི་ལས་མཐར་ཕྱིན་པའམ་མཐའ་ལས་འདས་པའི་ཡེ་ཤེས་སུ་བྱུང་ཐེབས་པས་ན། ཡེ་ནས་སྒྲོལ་བྱ་སྒྲོལ་བྱེད་མེད་པར་མཉམ་པའི་དབྱིངས་སུ་སྒྲོལ་བ་ཆེན་པོ་རྒྱུན་མི་འཆད་དེ་དེའི་ངང་ལས་འདའ་མ་མྱོང་བའོ།།

བརྒྱད་པ་དཀྱིལ་འཁོར་རྒྱུན་གྱིི་ཏིང་ངེ་འཛིན་ལ་གཉིས་ཏེ། གཞལ་ཡས་ཁང་གི་ཏིང་ངེ་འཛིན། སྐུ་གདུང་རྒྱུན་གྱི་ཏིང་ངེ་འཛིན་ནོ། །དང་པོ་ལ་གཉིས་ཏེ། གཞལ་ཡས་ཁང་གི་ངོ་བོ་བསྟན་པ། དེ་ཡི་དོན་རྫོགས་ལུགས་བཤད་པའོ། དང་པོ་ནི།

སྣང་སྲིད་དག་པའི། ཞེས་པ་ནས། དཀྱིལ་འཁོར་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

སྣང་སྲིད་དག་པའི་གཞལ་ཡས་སུ། །ཀུན་གཞི་དཔལ་གྱི་མཎྜལ་ལ།།

རྣམ་ཤེས་ཐིག་ཆེན་སྲད་བུ་བརྒྱད། །ཡེ་བཏབ་དཀྱིལ་འཁོར་རྒྱུན་མི་འཆད།།

དཀྱིལ་འཁོར་གྱི་ངོ་བོ་སྣང་སྲིད་རྣམ་པར་དག་པའི་གཞལ་ཡས་ཁང་གི་གནས་སུ་གཞི་དོན་གྱི་ཀུན་གཞི་དཔལ་གྱི་མཎྜལ་ལ། རྣམ་ཤེས་ཚོགས་བརྒྱད་ཀྱིས་ཐིག་ཆེན་པོའི་སྲད་བུ་བརྒྱད་དུ་གསལ་བ་ཉིད། ཡེ་ཤེས་ཀྱི་ཚོགས་བརྒྱད་དུ་མ་སྤངས་རང་ཤར་བར་རྟོགས་ཏེ་ཐག་ཆོད་པས་རང་རིག་ཅིར་ཡང་གསལ་བར་ཡེ་ནས་བཏབ་པའི་དཀྱིལ་འཁོར་ཆེན་པོ་རྒྱུན་མི་འཆད་པར་མཇའ་བ་ཉིད་དོ།།

གཉིས་པ་དེ་ཡི་དོན་རྫོགས་ལུགས་བཤད་པ་ནི།

འོག་གི དེ་བཞིན་ཉིད་ཀྱི། ཞེས་པ་ནས། རྒྱ་མཚོ་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

དེ་བཞིན་ཉིད་ཀྱི་ས་གཞི་ལ། །ཇི་བཞིན་པ་ཡི་གཞལ་ཡས་ཁང། །མ་ནོར་མ་བཅོས་རྨང་ཆེན་བརྟེན། །བྱང་ཆུབ་སེམས་ཀྱི་རྩིག་ཆེན་གཏམས། །ཡེ་ཤེས་ལྔ་ཡི་སྐར་མཐོངས་གསལ། །བསྡུ་བ་ཚད་མེད་རྣམ་ཐར་སྒོ། །དྲན་པ་ཡང་དག་ཐེམ་སྐས་བརྒྱད། །རྫུ་འཕྲུལ་རྟ་བབས་དག་གིས་བརྒྱན། །མི་འཇིགས་རིགས་པའི་གདུང་ཆེན་ལ། །ཡན་ལག་བརྒྱད་ཀྱི་ཀ་བས་མཛེས། །རང་བྱུང་ཡེ་ཤེས་དབུ་རྩེར་འཕགས། །བདེན་གཉིས་ཁྱམས་ཀྱིས་ངེས་པར་མཛེས། །ཡེ་ཤེས་ཐུགས་རྗེའི་ཡོན་ཏན་ལས། །བྱིན་རླབས་རྒྱན་གྱིས་མཛེས་པར་བྱས། །ཆོས་ཉིད་རླབས་ཀྱི་བླ་རེ་བྲེས། །སིལ་སྙན་སྒྲ་སྒྲོག་ཐེག་ཆེན་སྔགས། །ཇི་བཞིན་ཆོས་ཀྱི་ཕོ་བྲང་འདིར། །རྒྱལ་བ་བཞུགས་པ་འདི་ལྟར་རིམ། །ཀུན་བཟང་སེམས་ཀྱི་ཆོས་ཉིད་ལས། །ཀུན་གཞི་མ་འདྲེས་ཡོངས་རྫོགས་ཆོས། །སེམས་དཔའ་ཡིད་ཀྱིས་ངེས་ཐོབ་པས། །བརྟན་པ་རྒྱ་མཚོ་རྒྱུན་མི་འཆད།།

བཞུགས་གནས་ཀྱི་རྨང་གཞིའི་ངོ་བོ་དེ་༼༢༧༦༽བཞིན་ཉིད་ཀྱི་ས་གཞི་དེ་ཁོ་ན་ཉིད་དུ་ཡེ་ནས་གནས་པ་ལ། ཀུན་གཞི་མ་བཅོས་པའི་བཞུགས་གནས་ཇི་བཞིན་པ་ཡི་གཞལ་ཡས་ཁང་ཚད་དང་བྲལ་བའི་ངོ་བོ་ཉིད་དུ་རང་སྣང་བའི་རྨང་ནི་ཡང་དག་པའི་དོན་མ་ནོར་མ་བཅོས་པའི་རང་བཞིན་མི་འགྱུར་བའི་ཆོས་ཉིད་དུ་རང་སྣང་བའི་རྨང་ཆེན་གྱིས་བརྟེན་པ་ལ། རྩིག་པ་ནི། བྱང་ཆུབ་ཀྱི་སེམས་བཅུའི་རིམ་པ་བཤད་པ་བཞིན་གྱི་རྩིག་པ་ཆེན་པོས་གཏམས་པ་དང༌། སྐར་མཐོང་ནི་རང་བྱུང་གི་ཡེ་ཤེས་ཆེན་པོ་ལ་ཡེ་ཤེས་ལྔ་ཡི་ངོ་བོ་ཐ་དད་མེད་པར་ཤར་བ་ཉིད་ཀྱི་དོན་ཏེ་ཕྱོགས་བཞི་ནས་དབུས་དང་སྔར་སྣང་བའི་སྐར་མཐོང་དུ་གསལ་བའོ། །སྒོ་ནི། བསྡུ་བའི་དངོས་པོ་རྣམ་པ་བཞི་དང༌། ཚད་མེད་པ་བཞི་དང༌། རྣམ་པར་ཐར་པ་བཞིའི་སྒོ་བཞི་བསྣོལ་མ་རིམ་གསུམ་དུ་ཤར་བའོ། །དྲན་པ་ཉེ་བར་བཞག་པ་བཞི་དང་ཡང་དག་པར་78སྤང་བ་བཞི་ལྷུན་གྱིས་རྫོགས་པའི་ཕྱིར་ཕྱི་ནང་གི་ཐེམ་སྐས་བརྒྱད་དོ། །རྫུ་འཕྲུལ་གྱི་རྐང་པ་བཞིའི་ཕྱིར་རྟ་བབས་རྣམ་བཞི་དག་གིས་བརྒྱན་པའོ། །མི་འཇིགས་པ་བཞི་ལྷུན་གྱིས་རྫོགས་པའི་ཕྱིར་སྟེང་གི་རིག་པའི་གདུང་ཆེན་བཞི་བསྣོལ་མའི་དོན་ལ། ཡང་དག་པའི་79རྟོག་པ་ལ་སོགས་པ་འཕགས་པའི་ལམ་ཡན་ལག་བརྒྱད་ཀྱིས་འབྲས་བུར་འདེགས་པས་བརྒྱད་ཀྱི་ཀ་བས་མཛེས་པར་གདུང་སྣ་ནས་བཏེགས་པའི་དོན་ཏོ། །རྒྱུ་རྐྱེན་ལས་མ་བྱས་པའི་རང་བྱུང་གི་ཡེ་ཤེས་ཆེན་པོའི་ངོ་བོ་ཉིད་རིལ་འདུས་པའི་དབུ་རྩེར་འཕགས་ཏེ་བླར་གྱུར་པ་ཉིད་དོ། །དོན་དམ་དང་ཀུན་རྫོབ་ཀྱི་བདེན་པ་གཉིས་ལྷུན་གྱིས་རྫོགས་པས་བར་ཁྱམས་གཉིས་ཀྱིས་ངེས་པར་མཛེས་པའི་དོན་ཏོ། །རང་བྱུང་གི་ཡེ་ཤེས་འབྱུང་འཇུག་མེད་པའི་ངོ་བོ་ཐུགས་རྗེའི་ཀུན་ལ་སྙོམས་པས་ཅིར་ཡང་སྣང་བའི་ཡོན་ཏན་གཡོ་བ་མེད་པ་ལས་བྱིན་རླབས་ཀྱི་སྣང་བ་ཕྲིན་ལས་བསམ་གྱིས་མི་ཁྱབ་པའི་རྒྱན་གྱིས་མཛེས་པར་བརྒྱན་པའི་དོན་དང༌། ཆོས་ཉིད་ཀྱི་ངོ་བོ་མུ་མཐའ་མེད་པར་གདལ་བའི་བྱིན་རླབས་ཀྱི་བླ་རེར་བྲེས་པའི་དོན་ཏོ། །དྲིལ་བུ་དང་གཡེར་ཁ་ལ་སོགས་པ་སིལ་སྙན་གྱི་སྒྲ་སྒྲོགས་པ་གསུང་ལྔ་ལྷུན་གྱིས་རྫོགས་པའི་བྱིན་རླབས་ཀྱིས་གསང་བའི་ཐེག་པ་སྟོན་པའི་ཐེག་ཆེན་སྔགས་ཀྱི་རང་སྒྲ་འཆར་བའི་དོན་ཏོ། །དེ་ལྟར་གདུལ་བྱའི་བསམ་པ་ལ་སྣང་བའི་དོན་མ་བྲལ་བར་དུས་ཀུན་ཏུ་གསལ་བའང་རྒྱུན་གྱི་བསམ་པ་སྟེ་དངོས་དོན་རྒྱུ་འབྲས་ཀྱི་ཆོས་དེ་དག་ལྷུན་གྱི་རྫོགས་༼༢༧༧༽པའི་ངོ་བོར་གསལ་བའི་རིག་པ་ཉིད་རྒྱལ་བའི་གཞུགས་གནས་དམ་པར་གྱུར་པས་རྒྱུན་གྱི་བསམ་པ་ཆེན་པོར་འཆར་ཏེ། གནས་ལུགས་ཇི་བཞིན་པ་ཡེ་མ་བསླད་པར་ལྷུན་གྱི་རྫོགས་པའི་ཆོས་ཀྱི་དབྱིངས་དེ་ཁོ་ན་ཉིད་ནི། རྒྱལ་བའི་བཞུགས་གནས་ཕོ་བྲང་གི་དོན་ཏེ། བཞུགས་གནས་འདིར་ནི་རྒྱལ་བ་རྣམས་བཞུགས་པ་ཉེ་བར་བཟུང་བའི་རིམ་པའི་དོན་དེ་ལྟར་ངོ་བོའི་ཚུལ་འདི་ལྟར་བཞུགས་པར་རིགས་ཏེ། ངོ་བོ་ཉིད་ཀྱི་དབྱིངས་ནི་མཐའི་དྲི་མ་དང་བྲལ་བས་སྤྱོད་ཡུལ་ཡོངས་སུ་དག་པས་ཀུན་ཏུ་བཟང་པོ་བྱང་ཆུབ་སེམས་ཀྱི་ངོ་བོའི་ཆོས་ཉིད་མ་བཅོས་མ་བསླད་པ་ཉིད་རིལ་གྱི་བཞུགས་གནས་སུ་གྱུར་པའི་ངང་ལས། ཀུན་གཞི་བྱང་ཆུབ་ཀྱི་སེམས་ཡོན་ཏན་རྒྱུ་དང་འབྲས་བུའི་ཆོས་ཇི་སྙེད་པར་མ་འདྲེས་སོ་སོར་གསལ་བ་ལ། ངོ་བོ་འདི་འདྲར་མི་ཟིན་པས་ཡོངས་རྫོགས་ཐིག་ལེ་ཉག་གཅིག་ཏུ་གྱུར་པ་ནི་གཅིག་དང་དུ་མའི་མཐའ་ལས་གྲོལ་བའི་ཆོས་ཆེན་པོ་གསང་སྔགས་བླ་ན་མེད་པའི་ཐེག་པ་ཆེན་པོ་ཉིད་དོ། །དོན་དེ་འདུ་བྱེད་སེམས་པ་ལ་སོགས་པ་ལྔ་བཅུ་རྩ་གཉིས་ཀྱི་སེམས་དཔའ་མཆོག་གི་འཁོར་དང་མཚུངས་པར་ལྡན་པའི་ཡིད་ཀྱི་རྣམ་པར་ཤེས་པ་མ་སྤང་བྲལ་བའི་ཡིད་ཡང་དག་པའི་ཡེ་ཤེས་ཀྱིས་ཡུད་ཙམ་གྱི་ཡུན་ལ་དོན་མཐོང་བ་ཉིད་ཀྱིས་རྣ་བ་ལ་བརྟེན་ནས་སྒྲ་ཡང་ངེས་པར་ཆོད་དེ་ཐོས་པས་ན་བསྟན་པ་རྒྱ་མཚོ་ལྟ་བུའི་ཆོས་ཀྱི་མཆོག་ཡང་གསང་ངེས་པའི་སྙིང་པོ་ཡིན་པས་དོན་ཇི་ལྟ་བ་བཞིན་མཇལ་བ་ཉིད་རྒྱུན་མི་འཆད་ལ་བྲལ་བའང་མེད་པ་ནི་བཤད་པ་ལྟར་རྒྱུན་གྱི་ཏིང་ངེ་འཛིན་ཆེན་པོའོ།།

གཉིས་པ་སྐུ་གདུང་རྒྱུན་གྱི་ཏིང་ངེ་འཛིན་ལ་གསུམ་སྟེ། ཁམས་གསུམ་མཆོད་རྟེན་དུ་བསྟན་པ། ཕྱི་སྣོད་ཀྱི་འཇིག་རྟེན་མཆོད་རྟེན་དུ་བསྟན་པ། ནང་བཅུད་ཀྱི་སེམས་ཅན་མཆོད་རྟེན་དུ་བསྟན་པའོ། །དང་པོ་ནི།

གོང་གི འདོད་ཁམས་རྨང་གི ཞེས་པ་ནས། ཆོས་སྐུ་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

འདོད་ཁམས་རྨང་གི་རི་རབ་ལ། །གཟུགས་ཁམས་བང་རིམ་ཁྲི་འཕང་བརྟན།།

གཟུགས་མེད་བུམ་རྟེན་བུམ་པར་བཅས། །གདུང་ཆེན་ཆོས་སྐུ་རྒྱུན་མི་འཆད།།

འདོད་པའི་ཁམས་ཀྱི་རྨང་གི་རི་རབ་གྱི་གཞི་ལ། གཟུགས་ཀྱི་ཁམས་རྣམས་བང་རིམ་ཁྲི་འཕང་དུ་བརྟན་ཅིང༌། གཟུགས་མེད་ཁམས་ཀྱི་བུམ་རྟེན་བུམ་པར་བཅས་པའི་ཁམས་གསུམ་གྱི་སྣོད་བཅུད་གཉིས་ཀའི་རིམ་པ་མ་སྤངས་བྲལ་བས་ཡེ་ཤེས་ཀྱི་ཁམས་གསུམ་ཉིད་གདུང་ཆེན་ཆོས་ཀྱི་སྐུར་མ་འགག་པར་གསལ་བ་ཉིད་དུས་གསུམ་རྒྱུན་མི་འཆད་པའི་རང་སྣང་དུ་མཇལ་བའོ།།༼༢༧༨༽

གཉིས་པ་ཕྱི་སྣོད་ཡི་འཇིག་རྟེན་མཆོད་རྟེན་དུ་བསྟན་པ་ནི།

ནམ་མཁའ་མེ་ཆུ། ཞེས་པ་ནས། གདུང་ཆེན་རྒྱུན་མི་འཆད། །ཅེས་པའི་བར་གྱིས་བསྟན་ཏེ།

ནམ་མཁའ་མེ་ཆུ་ས་རླུང་རྣམས། །རྨང་གཞི་རི་རབ་རྟེན་དུ་སྣང་། །བང་རིམ་རིམ་བདུན་བཅས་པ་རྣམས།།

དེ་ཉིད་བང་རིམ་ཁྲི་འཕང་བརྟན། །རི་བོ་བུམ་རྟེན་བུམ་པར་བཅས། །འདི་ཡང་གདུང་ཆེན་རྒྱུན་མི་འཆད།།

ཕྱི་སྣོད་ཀྱི་གནས་འབྱུང་བ་ཆེན་པོ་ནམ་མཁའ་དང་མེ་ཆུ་ས་རླུང་ལྔ་པོ་རྣམས་ལས་གྲུབ་པའི་རྨང་གི་གླིང་བཞི་ནི་རི་རབ་ཀྱི་རྟེན་དུ་སྣང་ལ། བང་རིམ་གྱི་རྣམ་པ་ཅན་གྱི་གསེར་གྱི་རི་བདུན་དང་བཅས་པ་རྣམས་ནི་རི་རབ་དེ་ཉིད་ཀྱི་འོག་གི་བང་རིམ་དང་ཁྲི་འཕང་དུ་བརྟན་པར་གནས་ལ་རི་བོ་མཆོག་རབ་ཆེན་པོ་ཡར་འཕགས་པ་ནི་བུམ་རྟེན་དང་བུམ་པར་བཅས་པ་ཉིད་དེ། དེ་ལྟར་སྣང་བ་ཉིད་ཡེ་དག་པའི་ཡེ་ཤེས་ཀྱི་སྐུར་གསལ་བའི་དོན་ཇི་ལྟ་བར་མཇལ་བ་འདི་ཡང་གདུང་ཆེན་པོའི་ཆོས་སྐུ་རྒྱུན་མི་འཆད་པའོ།།

གསུམ་པ་ནང་བཅུད་ཀྱི་སེམས་ཅན་མཆོད་རྟེན་དུ་བསྟན་པ་ནི།

འཛུགས་པའི་ཡན་ལག ཅེས་པ་ནས། ཅོད་པན་ཕྲེང་བས་ཀླུབས། ཞེས་པའི་བར་གྱིས་བསྟན་ཏེ།

འཛུགས་པའི་ཡན་ལག་བཞི་རྨང་བརྟན། །འཁོར་ལོོ་ཚོགས་ཆེན་ཁྲི་འཕང་བརྟན།།

ཡན་ལག་དང་པོ་བུམ་རྟེན་བཅས། །ལྕང་ལོ་ཅོད་པན་འཕྲེང་བས་ཀླུབ།།

ནང་བཅུད་ཀྱི་དབང་དུ་བྱས་ཏེ། འཛུགས་པར་བྱེད་པའི་རྐང་ལག་གི་ཡན་ལག་བཞི་ནི་རྨང་རྟེན་དང༌། འཁོར་ལོ་རིམ་པར་རྟེན་པའི་རྒལ་ཚིགས་ཀྱི་ཚོགས་ཆེན་པོ་ཉིད་ཁྲི་འཕང་དུ་བརྟན་ལ། ཡན་ལག་གི་དང་པོ་མགོ་བོ་ཉིད་དབང་པོ་དང་ལྡན་པའི་བུམ་རྟེན་བུམ་པ་དང་བཅས་ཏེ། སྐྲའི་ལྕང་ལོ་ཅོད་པན་གྱི་ཕྲེང་བས་ཀླུབས་པའི་དངོས་པོའི་ལུས་ཉིད་ཡེ་མ་སྤངས་དག་པ་ཡེ་ཤེས་ཀྱི་ལུས་སུ་བྱུང་བ་ཉིད་སྐུ་གདུང་ཆེན་པོར་རྟོགས་པའོ།།

གསུམ་པ་ཆོ་འཕྲུལ་སྒྲུབ་པའི་ཏིང་ངེ་འཛིན་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

སྔར་གོང་ནས་བཞག་པའི། རྒྱ་མཚོ་གནོན་དང༌། ཞེས་པ་ནས། ཡུལ་ལ་སོ་སོར་སྣང༌། །ཞེས་པའི་བར་གྱིས་བསྟན་ཏེ།

རྒྱ་མཚོ་གནོན་དང་ནམ་མཁའི་སྐས། །རླུང་བཅིང་བ་དང་རྒྱན་བཟློག་དང་། །བསྲེག་པའི་བསྐལ་པ་གཞིལ་བ་དང་། །ཉི་ཟླ་ཞོན་ནས་འཇིག་རྟེན་འཕང་། ས་ལ་འཛུལ་དང་རི་རབ་འདེགས། །སྟོང་གསུམ་ཡུངས་འབྲུར་འཇུག་ཚུལ་དང་། །གཞིག་དང་སྤར་བ་ལ་སོགས་ཏེ། །བསམ་བྱ་བསམ་གྱིས་མི་ཁྱབ་པ། །གོམས་པ་ལས་སུ་རུང་བ་ཡི། །རྣལ་འབྱོར་རྩལ་ཆེན་སྦྱང་བར་ཟད། །བཟླས་པ་མཐར་ཕྱིན་གྲུབ་པ་དང་། །བཅིང་བ་ཡོངས་སུ་རྫོགས་པ་དང་། །བསམ་པ་ལས་སུ་རུང་བ་དང་། །དོན་མཐོང་བ་དང་ཚིག་གྲུབ་པ། །བྱ་བ་ཡོངས་སུ་དག་པ་དག།

དོན་གཅིག་ཡུལ་ལ་སོ་སོར་སྣང།།

དེའང་ཆོ་འཕྲུལ་ཐ་དད་ལ་ཏིང་ངེ་འཛིན་དུ་བསྒོམ་པས་རྩལ་སྦྱང་བ་འགྲུབ་པའི་ཕྱིར། རྒྱ་མཚོ་རྐང་པས་གནོན་པའི་ཏིང་ངེ་འཛིན་ནི། བཤད་པ་ལྟར་རྣམ་གསུམ་རིམ་པར་བསྐྱེད་པའི་རྒྱུ་ལས་ལྷར་གསལ་བས། རྒྱ་མཚོ་རྡོ་རྗེ་གཏམས་པར་སྒོམས་ཏེ། དེ་གསལ་བ་སྟོབས་ཅན་དུ་གྱུར་པ་དང༌། རྒྱ་མཚོ་རྐང་པས་བགྲོད་དེ། དེ་ལ་གནས་པའི་འགྲོ་བ་རྣམས་འོད་ཟེར་དུ་སྤྲུལ་པས་སྒོ་གསུམ་སྦྱངས་ཏེ་ཐར་པ་ལ་བསྐྱལ་བར་བྱ་བ་དང༌། ནམ་མཁའི་སྐས་ལ་འཛེགས་པ་ནི། ལྷར་གསལ་བ་ལས་ནམ་མཁའ་ལ་ཧཱུྃ་ལས་རྡོ་རྗེའི་སྐས་དང་ས་གཞི་སྒོམས་པས་སྟོབས་ཅན་དུ་གྱུར་བ་དང་། ཕན་ཚུན་འགྲོ་བའི་ཚུལ་གྱིས་བགྲོད་ནས་སྣང་སྲིད་ལྟ་ཞིང་བཤད་པ་ལྟར་དེ་ན་གནས་༼༢༧༩༽པའི་འགྲོ་དོན་བྱ་བ་དང༌། རླུང་འཆིང་བའི་ཏིང་ངེ་འཛིན་ནི། ནམ་མཁའི་གཞི་ལ་ཨ་ལས་ཟླ་བའི་དཀྱིལ་འཁོར་བསྐྱེད་པའི་དབུས་སུ་བདག་གནས་ཏེ་བསྒོམ་པ་ཤིན་ཏུ་བརྟན་པ་དང༌། ཟླ་བའི་འོག་ནས་ཡེ་ཤེས་ཀྱི་རླུང་གིས་བཏེགས་ཏེ་ཤིན་ཏུ་རླུང་མགྱོགས་པའི་ཤུགས་ཀྱིས་རྒྱལ་བའི་ཞིང་ཀུན་ཏུ་བགྲོད་པ་དང༌། ནམ་མཁའ་གཏོས་རྡོ་རྗེ་གཏམས་པར་སྒོམས་ཏེ་རླུང་གིས་བསྒུལ་མི་ནུས་པར་བྱ་བ་དང༌། ཆུ་བོ་ཆེན་པོའི་རྒྱུན་བཟློག་པའི་ཏིང་ངེ་འཛིན་ནི་རྗེས་སུ་མཐུན་པར་སྦྱར་བ་དང༌། བསྲེག་པའི་བསྐལ་པ་གཞིལ་བ་ནི། བསྐལ་པའི་མེ་གཞིལ་བ་དང་དམྱལ་བའི་མེ་གཞིལ་བའོ།།

བསྐལ་པའི་མེ་གཞིལ་བ་ནི། ལྷར་གསལ་བའི་སྡིགས་མཛུབ་ཀྱི་རྩེ་མོ་ལ། ཨ་ལས་ཟླ་བ་བསམ་པ་ཤིན་ཏུ་བརྟན་པ་ལས་ཆུ་རྒྱུན་ཕབ་ལ་གཞིལ་བའོ། །དམྱལ་བའི་མེ་གཞིལ་བ་ནི། རྣལ་འབྱོར་པའི་ལག་མཐིལ་དུ་འཁོར་ལོ་བསམ་པའི་ལྟེ་བ་ལ། ཨ་ལས་ཟླ་བའི་སྟེང་དུ་ཁ་སྔོན་པོ་བསམ་པ་ལས་བདུད་རྩིའི་ཆུ་རྒྱུན་ཕབ་ལ་དམྱལ་བའི་མེ་བསད་པ་དང༌། ཉི་ཟླ་ཞོན་པ་ནི། ནམ་མཁའི་གཞི་ཉི་མའི་དཀྱིལ་འཁོར་མའི་ས་བོན་ལས་བསྐྱེད་པའི་དབུས་སུ་བདག་གནས་པར་བསྒོམ་པ་བརྟས་པ་དང་དེ་ལས་ཉི་མ་འབུམ་གྱི་འོད་བཀྱེ་ནས་མུན་པ་བསལ་བ་སྟེ་ཟླ་བའང་ཇི་ལྟར་རིགས་པར་སྦྱར་བ་དང༌། འཇིག་རྟེན་རྒྱང་མར་འཕང་བ་ནི། རྣལ་འབྱོར་པའི་ལག་མཐིལ་དུ་སྟོང་གི་འཇིག་རྟེན་སྒོམས་པ་དེ་ཤིན་ཏུ་བརྟན་པ་དང༌། ནམ་མཁའི་ཁམས་སུ་འཕངས་ཏེ་ས་ནས་སར་འཕར་བར་བྱ་སྟེ་འོག་ནས་འཆད་པར་འགྱུར་རོ།།

གཞན་ཡང་ས་དང་ལུས་མི་དམིགས་པའི་སྟོབས་ཀྱིས་ས་ལ་བྱི་བ་ལྟར་འཛུལ་བ་དང༌། རི་རབ་འདེགས་པ་དང༌། སྟོང་གསུམ་ཡུངས་འབྲུར་རམ་དེ་ཙམ་དུ་འཇུག་ཅིང་ཚུད་པའི་ཚུལ་དུ་བྱ་བ་དང༌། ཕ་རོལ་གྱི་དཔུང་གཞིག་ཅིང་གཞིལ་བ་དང་། གནས་རྣམས་སྤར་བ་དང༌། ལ་སོགས་པ་ཞེས་དངོས་པོ་གཞན་བསྡུ་བ་ནི། གསོ་གསད་ཕམ་རྒྱལ་དང་དགུག་བཅིང་དགྲོལ་བ་ལ་སོགས་པའི་ལས་མཐའ་ཡས་པ་རྣམས་ཏེ། བསམ་བྱ་བསམ་གྱིས་མི་ཁྱབ་པ་སྣ་ཚོགས་ཏིང་ངེ་འཛིན་ལ་གོམས་པས་ལས་སུ་རུང་བ་ཡི་སྐབས་ན་འགྲུབ་པས་རྣལ་འབྱོར་པ་རིག་པ་འཛིན་པའི་ས་ལ་ཏིང་ངེ་འཛིན་གྱི་རྩལ་ཆེན་པོ་སྦྱོང་བའི་ཕྱིར་བསམ་བྱ་དེ་དག་བསྒོམ་པར་ཟད་༼༢༨༠༽དོ། །ཆོ་འཕྲུལ་འདི་དག་ཡི་གེའི་རྣལ་འབྱོར་པས་ལྷ་དགུ་ཉིད་དང་བཅུ་ལ་གོམས་ནས་འགྲུབ་ལ། མཚན་མེད་པས་ཟག་མེད་མ་ཐོབ་པར་དུ་མི་འགྲུབ་སྟེ། ཕྱིའི་མངོན་རྟགས་ཤས་ཆེ་བས་སོ། །ཞེས་ཀུན་མཁྱེན་ཀཿཐོག་པ་ཆེན་པོས་གསུངས།

དེས་ན་དཔེར་འཇིག་རྟེན་གྱི་བྱ་བ་བསྒྲུབ་པ་དང་འདྲ་བའོ། །དེ་དག་གི་རྒྱུ་དང་ཁྱད་པར་ཐུན་མོང་དུ་བསྟན་པའི་ཕྱིར། བཟླས་པ་མཐར་ཕྱིན་ཏེ་ཚད་དུ་ཕྱིན་པར་གྲུབ་པ་དང༌། ཕྱག་རྒྱ་བཅིང་ཞིང་སྒོམ་པ་ཡོངས་སུ་རྫོགས་པ་དང༌། ཏིང་ངེ་འཛིན་གྱི་བསམ་པ་ལས་སུ་རུང་བ་དང༌། ལྟ་བས་སེམས་ཀྱི་དོན་མཐོང་ཞིང་རྟོགས་པ་དང༌། ངག་གི་བདེན་པའི་ཚིག་གྲུབ་པ་དང་། འགྲོ་དོན་བྱ་བའི་ལུས་ཀྱི་སྤྱོད་པ་ཡོངས་སུ་དག་པ་དག་ལ་བཤད་པའི་རྩལ་རྣམས་འབྱུང་བའང་གཞི་དོན་བསམ་བྱ་གཅིག་གི་ཡུལ་ལ་གོམས་པ་དང་མ་གོམས་པའི་བློའི་སྟོབས་ཀྱིས་སའི་ཁྱད་པར་གོང་འོག་སོ་སོར་སྣང་བར་བྱུང་བའོ།།

གཉིས་པ་རྒྱས་པར་བཤད་པ་ལ་བདུན་ཏེ། ནམ་མཁའི་སྐས་བགྲོད་པའི་ཏིང་ངེ་འཛིན། རྒྱ་མཚོ་གནོན་པའི་ཏིང་ངེ་འཛིན། རླུང་བཅིང་བ་དང་ཟླ་བ་ཞོན་པའི་ཏིང་ངེ་འཛིན། ཉི་མ་ཞོན་པའི་ཏིང་ངེ་འཛིན། ཆུ་རྒྱུན་བཟློག་པའི་ཏིང་ངེ་འཛིན། སྲེག་པའི་བསྐལ་པ་གཞིལ་བའི་ཏིང་ངེ་འཛིན། འཇིག་རྟེན་འཕང་བའི་ཏིང་ངེ་འཛིན་ནོ། །དང་པོ་ནི།

རྡོ་རྗེ་ནམ་མཁའི། ཞེས་པ་ནས། དེ་ཡུལ་ཡངས་པར་འགྱུར། །ཞེས་པའི་བར་གྱིས་བསྟན་ཏེ།

རྡོ་རྗེ་ནམ་མཁའི་སྐས་བགྲོད་ནས། །ནམ་མཁའི་དབྱིངས་ཀྱི་དབུས་གནས་པར།།

སྣང་སྲིད་མཐར་ཐུག་མེད་པར་ལྟ། །དེས་ནི་དེ་ཡུལ་ཡངས་པར་འགྱུར།།

ལྟས་དང་སྦྱོར་བས་ཆོ་འཕྲུལ་དང་ས་གོང་མ་སྒྲུབས་པས་རྒྱལ་བར་བསྟན་པའི་ཕྱིར། མི་དམིགས་པའི་ངང་ལས་ནམ་མཁའ་ལ་ཧཱུྃ་ལས་རྡོ་རྗེའི་ཐེམ་པ་དང་སྐས་བསྒོམ་ནས་བརྟན་པ་དང༌། ནམ་མཁའི་སྐས་དེར་བགྲོད་ནས་བདག་ནམ་མཁའི་དབྱིངས་ཀྱི་དབུས་སུ་འདུག་ཅིང་གནས་པར་གྱུར་ནས་སྣང་སྲིད་མཐའ་ཡས་ཐུག་པ་མེད༌པ་ལ་བལྟ་བར་བྱས་པ་དེས་ནི་རྣལ་འབྱོར་པ་དེ་ཡིས་སེམས་ཀྱི་ཡུལ་ཡངས་ཤིང་རྒྱ་ཆེ་བར་འགྱུར་རོ། དེ་ནི་བཤད་པ་བཞིན་ནམ་མཁར་བགྲོད་པའི་ཏིང་ངེ་འཛིན་ནོ།།

གཉིས་པ་རྒྱ་མཚོ་གནོན་པའི་ཏིང་ངེ་འཛིན་ནི།

རྒྱ་མཚོ་རྡོ་རྗེས། ཞེས་པ་ནས། དམ་པའི་རྡོ་རྗེར་བྱ། །ཞེས་པའི་བར་གྱིས་བསྟན་ཏེ།

རྒྱ་མཚོ་རྡོ་རྗེས་གཏམ་བྱས་ནས། །དེ་ལ་གནས་པའི་སེམས་ཅན་ལ།།

རྡོ་རྗེ་སེམས་དཔའ་བརྟན་བྱས་ཏེ། །ཐམས་ཅད་དམ་པའི་རྡོ་རྗེར་བྱ།།

རྐང་པའི་ཞབས་སུ་རྒྱ་མཚོ་ལ་རྡོ་རྗེ་རྒྱ་གྲམ་བསམ་པས་གཏམས་པ་དང་སྡིགས་མཛུབ་ལ་ཧཱུྃ་ལས་རྡོ་རྗེ་བསམ་པས་གཏམས་པ་གཉིས་བྱས་ཏེ། མཚོ་དེ་ལ་གནས་པའི་སེམས་ཅན་༼༢༨༡༽རྣམས་ལ། དཔལ་རྡོ་རྗེ་སེམས་དཔའ་ཉིད་ཀྱིས་བྱིན་གྱིས་བརླབས་པ་བརྟན་པར་བྱས་ཏེ། གདུལ་བྱ་ཐམས་ཅད་དམ་པའི་རྡོ་རྗེར་བྱ་ཞིང་དོན་བྱེད་པའོ།།

གསུམ་པ་རླུང་བཅིང་བ་དང་ཟླ་བ་བཞོན་པའི་ཏིང་ངེ་འཛིན་ནི།

ནམ་མཁའ་དབྱིངས་ཀྱི། ཞེས་པ་ནས། ཀུན་ཏུ་བགྲོད་པརབྱ། །ཞེས་པའི་བར་གྱིས་བསྟན་ཏེ།

ནམ་མཁའི་དབྱིངས་ཀྱི་ལིང་ག་ལ། །ཟླ་བའི་དཀྱིལ་འཁོར་དབུས་གནས་པར།།

མྱུར་མགྱོགས་རླུང་མདའི་འཕེན་ཤུགས་ཀྱིས། །ཞིང་ཁམས་ཀུནཏུ་བགྲོད་པར་བྱ།།

བདག་ཉིད་ནམ་མཁའ་དབྱིངས་ཀྱི་ལིང་ག་ལ་ཟླ་བའི་དཀྱིལ་འཁོར་ཀྱི་དབུས་སུ་གནས་པར་སྒོམ་པ་ཉིད། མྱུར་མགྱོགས་ཡེ་ཤེས་ཀྱི་རླུང་ཟླའི་འཕེན་ཤུགས་ཀྱིས་ཞིང་ཁམས་རྣམས་ཀུན་ཏུ་བགྲོད་དེ་གདུལ་བྱའི་དོན་སྒྲུབ་པར་བྱ་བ་དང༌། ནམ་མཁའ་གཏོས་རྡོ་རྗེས་གཏམས་པས་རླུང་མི་འགུལ་བའོ།།

བཞི་པ་ཉི་མ་ཞོན་པའི་ཏིང་ངེ་འཛིན་ནི།

ནམ་མཁའི་དབྱིངས་ཀྱི། ཞེས་པ་ནས། གནས་རྣམས་ཐམས་ཅད་གསལ། ཞེས་པའི་བར་གྱིས་བསྟན་ཏེ།

ནམ་མཁའ་དབྱིངས་ཀྱི་ལིང་ག་ལ། །ཉི་མའི་དཀྱིལ་འཁོར་དབུས་གནས་པར།།

ཤིན་ཏུ་ངེས་པར་གྱུར་པ་དང་། །མུན་པའི་གནས་རྣམས་ཐམས་ཅད་བསལ།།

ནམ་མཁའ་ཀུན་ཏུ་དྭངས་པའི་དབྱིངས་ཀྱི་ལིང་ག་ལ་མུན་པ་གསལ་བའི་ཉི་མའི་དཀྱིལ་འཁོར་བསམ་ནས་དེའི་དབུས་སུ་རྣལ་འབྱོར་པ་གནས་པར་བྱས་ཏེ། ཉིད་ལ་ཉིད་ཤིན་ཏུ་གསལ་ཞིང་ངེས་པར་གྱུར་པ་དང༌། ཕྱི་ནང་གི་མུན་པ་རྣམ་པར་དག་པའི་གནས་རྣམས་ཐམས་ཅད་སྣང་ཞིང་གསལ་བར་བྱེད་པའོ།།

ལྔ་པ་ཆུ་རྒྱུན་བཟློག་པའི་ཏིང་ངེ་འཛིན་ནི།

འོག་གི རྣལ་འབྱོོར་སྡིགས་པའི། ཞེས་པ་ནས། མུན་པ་ཐམས་ཅད་བསལ། །ཞེས་པའི་བར་གྱིས་བསྟན་ཏེ།

རྣལ་འབྱོར་སྡིགས་པའི་མཛུབ་མོ་ལ། །ཉི་མའི་དཀྱིལ་འཁོར་གསལ་བ་ལས།།

ཟེར་ལས་ཉི་མ་འབུམ་འཕྲོ་པས། །ཕྱི་ནང་མུན་པ་ཐམས་ཅད་བསལ།།

རྣལ་འབྱོར་པས་ཕྱག་གི་སྡིགས་པའི་མཛུབ་མོ་ལ་ཉི་མའི་དཀྱིལ་འཁོར་འབར་བ་རེ་བསམ་པ་ལས། དེའི་ཟེར་ལས་ཉི་མ་འབུམ་ཕྲག་མང་པོ་འཕྲོས་པས། ཕྱི་བསྐལ་པའི་མུན་པ་དང་ནང་མ་རིག་པའི་མུན་པ་ཐམས་ཅད་བསལ་ནས་འབྱུང་བའི་ཆུ་བོའི་རྒྱུན་དང་འཁོར་བའི་ཆུ་རྒྱུན་ཟློག་སྟེ་དོན་མཆོག་གསལ་བར་བྱེད་པའོ།།

དྲུག་པ་སྲེག་པའི་བསྐལ་པར་གཞིལ་བའི་ཏིང་ངེ་འཛིན་ལ་གཉིས་ཏེ། ནང་གི་སྲེག་པ་གཞིལ་བ། ཕྱིའི་སྲེག་པ་གཞིལ་བའོ། །དང་པོ་ནི།

རྣལ་འབྱོར་ལག་གི ཞེས་པ་ནས། དམྱལ་བའི་མེ་ཆེན་གསད། །ཅེས་པའི་བར་གྱིས་བསྟན་ཏེ།

རྣལ་འབྱོར་ལག་གི་དཀྱིལ་འཁོར་ལས། །ཆུ་ཟླའི་དཀྱིལ་འཁོར་རབ་གསལ་བས།།

བདུད་རྩི་ཆུ་བོའི་རྒྱུན་བྱུང་བས། །བསྲེག་པའི་དམྱལ་བའི་མེ་ཆེན་བསད།།

རྣལ་འབྱོར་པས་ལག་གི་དཀྱིལ་འཁོར་གྱི་མཐིལ་དུ་འཁོར་ལོ་བསམ་པ་ལས། དེའི་ལྟེ་བར་ཨ་ལས་ཆུ་ཟླའི་དཀྱིལ་འཁོར་རབ་ཏུ་གསལ་བ་ལ་ཁ་སྔོན་པོ་བསམ་པས། དེ་ལས་བདུད་རྩིའི་ཆུ་བོ་ཆེན་པོའི་རྒྱུན་བྱུང་བས་སྲེག་ཅིང་འབར་བ་དམྱལ་བའི་མེ་ཆེན་པོ་གསད་དེ་རབ་ཏུ་ཞི་བར་བྱེད་པའོ།།

གཉིས་པ་ཕྱིའི་སྲེག་པ་གཞིལ་བ་ནི།

གོང་གི རྣལ་འབྱོར་སྡིགས་མཛུབ། ཅེས་པ་ནས།༼༢༨༢༽སྲེག་པའི་བསྐལ་པ་གཞིལ། །ཞེས་པའི་བར་གྱིས་བསྟན་ཏེ།

རྣལ་འབྱོར་སྡིགས་མཛུབ་རྩེ་མོ་ལ། །ཟླ་བའི་དཀྱིལ་འཁོོར་འོད་གསལ་འབར།།

ཤིན་ཏུ་བརྟན་པར་རེད་པ་དང་། །ཆུ་དེས་བསྲེག་པའི་བསྐལ་པ་གཞིལ།།

རྣལ་འབྱོར་པས་སྡིགས་མཛུབ་ཀྱི་རྩེ་མོ་ལ་ཨ་ལས་ཟླ་བའི་དཀྱིལ་འཁོར་འོད་འབར་བ་གསལ་ཏེ་ཤིན་ཏུ་བརྟན་པར་གྱུར་པ་དང༌། དེ་ལས་ཆུ་རྒྱུན་ཕབ་བ་དེས་འཇིག་རྟེན་སྲེག་པའི་མེ་ཡི་བསྐལ་པ་གཞིལ་བར་བྱེད་པའོ།།

བདུན་པ་འཇིག་རྟེན་འཕང་པའི་ཏིང་ངེ་འཛིན་ནི།

རྣལ་འབྱོར་ལག་གི ཞེས་པ་ནས། སར་ནི་སྤར་བར་བྱ། །ཞེས་པའི་བར་གྱིས་བསྟན་ཏེ།

རྣལ་འབྱོར་ལག་གི་དཀྱིལ་འཁོར་དུ། །སྟོང་གསུམ་འཇིག་རྟེན་ཁོར་ཡུག་བཅས།།

ནམ་མཁའི་ཁམས་སུ་འཕང་ནས་ནི། །ས་ནས་སར་ནི་སྤར་བར་བྱ།།

རྣལ་འབྱོར་པས་ལག་གི་དཀྱིལ་འཁོར་གྱི་མཐིལ་དུ་སྟོང་གསུམ་གྱི་འཇིག་རྟེན་ཁོར་ཡུག་དང་བཅས་པ་སྒོམ་སྟེ་ཤིན་ཏུ་བརྟན་པ་ན་ནམ་མཁའི་ཁམས་སུ་རྒྱང་མར་འཕངས་ནས་ནི་དེ་ཡི་ཡོན་ཏན་གྱིས། དེ་ན་གནས་པའི་སེམས་ཅན་རྣམས་ཀྱང་རང་རང་གི་སྐལ་བ་བཞིན་ས་ནས་སར་ནི་སྤར་བར་བྱ་བའོ། །དེ་ལྟར་བཤད་པ་དང་མདོ་རྒྱས་ཀྱི་དབང་དུ་བཀའ་སྩལ་ཀྱང་བསམ་པ་ལ་མི་འདྲ་བ་མེད་པས་སྦྱར་ཏེ་ཤེས་པར་བྱའོ།།

ལྔ་པ་མདོ་སེམས་སུ་འདུས་པར་བསྟན་པ་ནི།

གཞན་ཡང་ལང་ཀའི། ཞེས་པ་ནས། ཏིང་འཛིན་སེམས་ཉིད་གཙོ། །ཞེས་པའི་བར་གྱིས་བསྟན་ཏེ།

གཞན་ཡང་ལངྐའི་བདག་པོ། ཏིང་ངེ་འཛིན་གྱི་མདོ་ནི་འདི་ཁོ་ནར་འདུས་པར་གསུངས་པས། འདི་ཁོ་ན་ལྟར་ཤེས་པར་བྱའོ། །སེམས་ནི་སྒྱུ་མའི་རང་བཞིན་ཏེ། །ཇི་ལྟར་བརྟགས་པ་དེ་ལྟར་སྣང་། །དེ་མ་ཐག་པར་མ་གྱུར་ཀྱང་། །དེ་ཉིད་གང་བརྟགས་དེ་ལྟར་སྣང་། །གདོས་བཅས་ཡུལ་ན་མི་སྣང་ཡང་། །ཡིད་གཟུགས་མངོན་ཤེས་ཀུན་མཁྱེན་སྣང་། །གང་བརྟགས་དེ་ལྟར་དེ་ལྟས་ན། །མངོན་སུམ་གསལ་པོར་རེད་པར་འགྱུར། །ཡོད་མེད་ལེགས་ཉེས་རང་བཞིན་རྣམས། །ཆུ་ཁམས་ཟད་པ་ལྟ་བུར་ཟད། །ཐམས་ཅད་འདི་ཡི་བྱེད་པར་འགྱུར། །དེས་ན་ཏིང་འཛིན་སེམས་ཉིད་གཙོ།།

གཞན་ཡང་ལང་ཀའི་བདག་པོ། ཞེས་བོས་ནས། ཏིང་ངེ་འཛིན་མི་མཐུན་པའི་དོན་ཀུན་གྱི་མདོ་གང་དུ་འདུས་པ་ངེས་པར་གཟུང་ནས་ཉེ་བར་བསྟན་པ་ནི། འདི་ཁོ་ནར་འདུས་པར་གསུངས་པས། སྟོན་པར་འགྱུར་པ་འདི་ཁོ་ན་ལྟར་ཤེས་པར་བྱའོ། །ཏིང་ངེ་འཛིན་གྱི་སྒོ་ཇི་སྙེད་ཅིག་ཏུ་བསྟན་པའི་རྩ་བ་སེམས་ཀྱི་དཀྱིལ་འཁོར་འོད་གསལ་བའི་ངོ་བོ་ཉིད་ནི། མཚན་ཉིད་ཅིར་ཡང་སྣང་ལ་གཅིག་ཏུ་མ་ངེས་པར་གྱུར་པས་སྒྱུ་མའི་རང་བཞིན་དང་ཆོས་མཐུན་པ་ཁོ་ན་ཡིན་ཏེ། དེ་བས་ན་རིག་པས་ཇི་ལྟར་བརྟགས་ཤིང་བསྒོམ་པ་དེ་ལྟར་ཆོས་སྣ་ཚོགས་པ་རྣམས་སུ་སྣང་བའི་ཕྱིར་རྩ་བའི་མདོ་སེམས་སུ་ངེས་པའོ། །བསྒོམ་པའི་དོན་སྣ་ཚོགས་པ་ཇི་ལྟ་བུར་འབྱུང་ཞིང་ཤར་བའི་ཆོས་རྣམས་ཀུན། བསམ་པ་ཙམ་གྱིས་སྐད་ཅིག་དེ་མ་ཐག་པར་མངོན་དུ་མ་གྱུར་ཀྱང༌། བསྒོམ་བྱ་དེ་ཁོ་ན་ཉིད་ལ་དངོས་པོ་ཇི་ལྟར་བསམ་ཞིང་གང་ལྟར་བརྟགས་པ་དེ་ལྟར་མཐུ་བརྟས་ཤིང་གོམས་པའི་དབང་གིས་ཅིར་ཡང་སྣང་དུ་བཏུབ་པར་འགྱུར་རོ།།

དེ་ལྟར་གསལ་བ་ཡང༌། འགྲོ་བའི་སྐྱེ་བོ་བརྟགས་པར་ཞེན་པས་གདོས་བཅས་ཀྱི་སྤྱོད་ཡུལ་ཅན་ལ་བེམས་པོ་ཐེར་ཟུག་ཏུ་སྣང་བས་༼༢༨༣༽ན་ཏིང་འཛིན་གྱི་འབྲས་བུ་མངོན་ཤེས་མེད་པའི་མཐོང་ཡུལ་དུ་མི་སྣང་ཡང༌། མི་མཐུན་པ་སྟོན་པའི་དོན་ནི་ཡིད་ཀྱི་གཟུགས་ཅན་མངོན་ཤེས་ཡོད་པའི་སྡེ་བརྒྱད་ཀྱིས་མཐོང་ཞིང༌། ཀུན་མཁྱེན་རྒྱལ་བ་དང་མངོན་ཤེས་ཅན་གྱི་དམ་པ་དག་ལ་སྣང་བའི་ཆ་ཡོད་པས་ཀྱང་གསལ་བར་བསྒོམ་དགོས་ཏེ། དེ་ལྟར་གསལ་པོར་ཡུན་བསྲིངས་ཏེ། བསྒོམ་བྱའི་དངོས་པོ་གང་ལ་ཡང་ནས་ཡང་དུ་བརྟགས་ཤིང་གོམས་པས་དེ་ལྟར་ཏིང་ངེ་འཛིན་དེ་ཡི་མཐུ་བརྟས་པར་གྱུར་ན། མཇུག་ཏུ་རིག་པའི་མངོན་སུམ་དུ་བྱས་པ་དེ་ཉིད་དབང་པོའི་མངོན་སུམ་དུ་གསལ་པོར་རེད་དེ་སྣང་བར་འགྱུར་པ་ངེས་པར་འབྱུང་བས་ཐེ་ཚོམ་མི་ཟ་བར་བསྒོམ་པར་བྱའོ། །ཡང་ན་མི་མཐུན་པ་སྟོན་པའི་དོན་ནི་མ་ནོར་བའི་ལམ་པ་ལ་སྣང་བཏུབ་པ་སྟེ། འགྲོ་བས་བརྟགས་པའི་རྟོག་ཡུལ་རིལ་རང་རྒྱུད་པ་གཞི་ནས་མེད་དེ་རང་རིག་པ་ཉིད་སྣང་བས་སྣང་བ་རིལ་རང་རིག་པའི་སྐུའི་ངོ་བོར་གསལ་བས་ཐ་དད་མེད་ཅིང་འབྲེལ་བ་ཅན་པས་མངོན་སུམ་བཞི་ཀར་གསལ་ཞིང་རིག་པའང་རིག་པ་ཉིད་སྣང་བ་སྟེ། རིག་པ་རིལ་གྱི་དངོས་གཞི་བས་གང་ལྟར་བསམ་པ་སྣང་ཞིང་དེ་ལ་འདྲིས་ཤིང་གོམས་པ་བརྟན་པ་དང་མཇུག་མངོན་ཤེས་དང་རྣམ་པ་ཐམས་ཅད་མཁྱེན་པ་འབྱུང་བར་འགྱུར་རོ། །དེའི་ཕྱིར་ཡོད་མེད་དང་ལེགས་ཉེས་ལ་སོགས་པ་མཐའ་གཉིས་པའི་ཆོས་སོ་ཅོག་གི་རང་བཞིན་རྣམས་རང་རྒྱུད་པ་མེད་པར་བརྟགས་པ་ཙམ་བརྡ་ཡིས་སྣང་བ་ལས་ངོ་བོ་མ་ངེས་པ་ནི། དཔེར་ན་ཆུ་ཁམས་ཀྱི་རྒྱུན་བརྟས་པ་ཉིད་འགྲོ་བར་བཏུབ་པ་དང་གྲང་རེག་གིས་ཆབ་རོམ་དུ་འགྱུར་བ་ལྟ་བུར་ངེས་པར་ཟད་དེ། འཁོར་འདས་ཅིར་ཡང་སྣང་བ་ཐམས་ཅད་རིལ་སེམས་ཉིད་འདི་ཡིས་དབང་དུ་བསྒྱུར་བར་བྱེད་ནས་སྣང་བར་འགྱུར་བའི་ཕྱིར་ཏེ། དེས་ན་རྩ་བ་ཏིང་ངེ་འཛིན་གྱི་སེམས་ཉིད་ལ་རག་ལས་པ་ཡིན་པས་འབྲས་བུའི་གཙོ་བོའི་རྒྱུ་ཁོ་ནར་གཞག་སྟེ་བསྟན་པར་མཛད་པའོ།།

གསུམ་པ་གཅེས་པར་གདམས་པ་ནི།

དཔེར་ན་རྒྱ་མཚོར། ཞེས་པ་ནས། བྱ་བ་རབ་ཏུ་གཅེས། །ཞེས་པའི་བར་གྱིས་བསྟན་ཏེ།

དཔེར་ན་རྒྱ་མཚོར་ནོར་ལེན་མི། །སྦྲུལ་དང་ཆུ་སྲིན་སྦྲང་མ་ལ། །སོགས་པ་གདུག་པའི་སྡུག་བསྔལ་ཀུན།།

དཀའ་བ་ཉམས་སུ་བླངས་པས་གྲུབ། །དེ་བཞིན་རྣལ་འབྱོར་དེ་འཚོལ་བ། །རྣམ་རྟོག་བྱིང་རྨུགས་འཕྱར་གཡེང་དགྲ། །གཞོམ་པར་དཀའ་བའི་ལས་འདི་དག །ཉམས་སུ་བླངས་ཏེ་དེ་ཐོབ་ཉིད། །འདི་ཉིད་ཏིང་འཛིན་དམ་པ་ཡི།། ཉམས་སུ་བླང་བའི་བསླབ་པ་སྟེ། །སེམས་ཀྱིས་གོམས་པར་བྱ་བ་ལ། །འདྲིས་པར་བྱ་བ་རབ་ཏུ་གཅེས།།

དཔེར་ན་རྒྱ་མཚོར་ཕྱིན་ཏེ་ནོར་བུ་ལེན་པའི་མི་དག་ནི། སྦྲུལ་དང་ཆུ་སྲིན་དང་སྦྲང་མ་ལ་སོགས་པ་ཤིན་ཏུ་གདུག་པའི་སྡུག་བསྔལ་ཀུན་ཁྱད་དུ་བསད་དེ་དཀའ་བས་ཉམས་སུ་བླངས་པས་དོན་འགྲུབ་པ་ཉིད་དེ། འདི་ནི་ཏིང་ངེ་འཛིན་གྱི་ཆོས་མཐུན་པ་༼༢༨༤༽སྟེ་དཀའ་བས་འབད་པར་བྱེད་པའོ། །དཔེ་དེ་བཞིན་དུ་མཚོན་པར་བྱ་བའི་དོན་ནི། རྣལ་འབྱོར་དམ་པ་བདེ་བ་ཆེན་པོའི་ཡེ་ཤེས་རབ་ཏུ་གསང་བ་ཉིད་ཡང་དག་པར་ཚོལ་བར་བྱེད་པ་དེ་ཡིས། རྣམ་པར་རྟོག་པ་བྱིང་རྨུགས་དང་འཕྱར་གཡེང་ལ་སོགས་པ་ཏིང་ངེ་འཛིན་གྱི་དགྲ་གཞོམ་པར་དཀའ་བའི་བྱེད་ལས་ཅན་འདི་དག་གཞོམ་སྟེ་དོན་ལ་མཁས་པས་ཉམས་སུ་བླངས་ན་ཏིང་ངེ་འཛིན་གྱི་བདེ་བ་དམ་པ་ཐོབ་ཅིང་རྙེད་ནས་ཡོན་ཏན་རྒྱ་མཚོ་ལྟ་བུའི་གཏེར་མཛོད་དུ་འགྱུར་རོ། །ཇི་སྐད་བསྟན་པ་འདི་ནི་ཏིང་ངེ་འཛིན་དམ་པ་ཡི་སྙིང་པོ་རབ་ཏུ་གསང་བ་ཉིད་ཚུལ་བཞིན་དུ་ཉམས་སུ་བླངས་པའི་བསླབ་པ་ཕུལ་དུ་བྱུང་བ་སྟེ། དེ་ལྟར་སེམས་ཉིད་ཀྱིས་སྙིང་པོའི་དོན་ལ་གོམས་པར་བྱ་བའི་ལས་ལ་བརྩོན་པར་འབད་དེ་འདྲིས་པར་བྱ་བ་ཉིད་རབ་ཏུ་གཅེས་པ་ཡིན་ནོ། །ཞེས་གདམས་པར་མཛད་དོ།།

བཞི་པ་ཞབས་བསྡུ་བ་ནི།

གྲོགས་པོ་དག ཅེས་པ་ན། རྙེད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་ཉམས་རྙེད་པ་ཉིད་དུ་ཤེས་པར་བྱའོ། །དེ་སྐད་ཅེས་སྨྲས་པས།

དམན་པ་དམ་པ་རྣམས་གང་གི་དགོངས་པ་དམ་པའི་ཉམས་དྲོད་རྙེད་པར་གྱུར་ཏོ།།

གྲོགས་པོ་དག ཅེས་བོས་ནས། བཤད་པའི་དོན་བསྟན་པ་དེ་དག་ནི་ཉམས་སུ་ཏིང་ངེ་འཛིན་གྱིས་བླངས་པས་དགོངས་པའི་ཉམས་རྙེད་པར་ཉིད་དུ་ཤེས་པར་བྱའོ། །ཞེས་སྟོན་པ་གསང་བདག་ཆེན་པོས་དེ་སྐད་ཅེས་སྨྲས་ཏེ་དོན་བསྟན་པས། རིག་འཛིན་འགྲོ་བའི་ལུས་ཅན་གྱི་དམན་པ་དམ་པ་དེ་རྣམས་གང་གི་དགོངས་པ་དེ་ཁོ་ན་ཉིད་དམ་པའི་ཉམས་དྲོད་དྲུག་རྙེད་པར་གྱུར་ཏེ་མཐར་ཐུག་གི་རྟོགས་པའི་གདེངས་ཐོབ་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

རྣལ་འབྱོར་དབང་སྒྱུར་གྱི་ལེའུ་སྟེ་བདུན་ཅུ་གསུམ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྣལ་འབྱོར་པས་ལྟ་བ་རྟོགས་པའི་ངང་ལས་སེམས་ལས་སུ་རུང་བའི་ཏིང་ངེ་འཛིན་གྱིས་དབང་བསྒྱུར་ནས་དོན་གྱི་རྩལ་སྦྱངས་པས་འབྲས་བུ་མངོན་པར་འགྲུབ་པའི་ཚུལ་བསྟན་པའི་ལེའུ་ཞེས་བྱ་སྟེ་བདུན་ཅུ་རྩ་གསུམ་པ་ཉིད་གསལ་བར་བཀྲོལ་ཏེ་བཤད་པའོ།། །།

ལེའུ་དོན་བཞི་པ་དོན་ངེས་པར་བསྒྲུབ་པ།

༈ དགུ་པ་དོན་མན་ངག་གིས་སྒྲུབ་པ་གསེར་འགྱུར་གྱི་རྩི་ལྟར་བཤད་པ་ལ་བཞི་སྟེ། མདོར་བསྟན་པ། རྒྱས་པར་བཤད་པ། གཅེས་པར་གདམས་པ། མཇུག་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། དེ་བཞིན་ཉིད་དོ། །ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོ་དེས། དམན་པའི་ལུས་ཀྱི་སེམས་དཔའ་རྣམས་ལ་འདི་སྐད་ཅེས་བགྲོས་སོ། །གྲོགས་པོ་དག་གང་འདི་ལ་ཚེགས་ཆུང་བར་བྱ་བ་ནི་གང་ཞེ་ན། འདི་ལྟ་སྟེ། གང་ཅི་ཡང་བྱ་བ་མེད་པ་ཉིད་དོ། །གང་ཅི་ཡང་བྱ་བ་མེད་པ་དེ་གང་ཞེ་ན། འདི་ལྟ་སྟེ། དེ་བཞིན་ཉིད་དོ།།

ལེའུ་འདིས་ངེས་དོན་སྟོན་ནོ། །དེ་ཡང་སྤྱིར་མན་ངག་ལ་ལྔ་སྟེ། སྦྱངས་པའི་སྟོབས་ཀྱི་མན་ངག་སྦྱང་སྟོབས་ཆེ་ཆུང་དང་སྦྱར་བར་སྣོད་དང་བསྟུན་ཏེ་༼༢༨༥༽འཇུག་པ་དང༌། འཇུག་པ་སྒོའི་མན་ངག་རང་རང་གི་བློས་གདམས་པའི་མཚོན་ཐབས་གང་མོས་སུ་འཇུག་པ་དང༌། འགྲུབ་བྱེད་ཐབས་ཀྱི་མན་ངག་དོན་དང་ཡི་གེའི་རྣལ་འབྱོར་དང༌། གྲུབ་པ་འབྲས་བུའི་མན་ངག་རང་སྣང་གི་སངས་རྒྱས་མངོན་དུ་བྱས་པ་དང༌། ལ་བཟླ་བའི་མན་ངག་ལེའུ་འདི་ཉིད་ཀྱི་བསྟན་པའི་དོན་ནོ། དེ་ལ་ཉམས་སུ་ཏིང་ངེ་འཛིན་གྱིས་བླང་པའང་དོན་ཆེ་ལ། དེ་ཉིད་ཚེགས་ཆུང་བར་བྱ་བའི་ཕྱིར། དེ་ནས་ཡང་སྟོན་པ་གསང་བ་པའི་བདག་པོ་འཆད་པའི་སྐྱེས་བུ་ཆེན་པོ་དེས། དམན་པའི་ལུས་ཀྱི་བྱང་ཆུབ་སེམས་དཔའ་རྣམས་ལ་འདི་སྐད་ཅེས་རྗེས་སུ་བསྟན་ཏེ་བགྲོས་སོ། །གཏན་ཚིགས་བྱུང་ཁུངས་ཀྱི་གླེང་གཞིའི་དབང་དུ་གྲོགས་པོ་དག་ཅེས་བོས་ནས། གང་འདི་ལ་ཚེགས་ཆུང་བར་བྱ་བ་དོན་མན་ངག་གིས་སྒྲུབ་པ་ཉེ་བར་བསྟན་པ་གང་ཞེ་ན། འདི་ལྟ་སྟེ། གང་བསྒོམ་བྱའི་དངོས་པོ་ཅི་ལ་ཡང་བསྒོམ་པའི་ཚེ་སེམས་ཀྱིས་ཆེད་དུ་ཐོབ་པར་བྱ་བའི་ཕྱིར་འབད་པ་དང་དམིགས་སུ་མེད་པའི་ཐབས་ཁྱད་པར་ཅན་ལས་གཞན་པ་མ་ཡིན་པ་ཉིད་དེ། དེ་ཡང་གང་ལ་སེམས་ཀྱིས་ཆེད་དུ་འབད་ཅིང་དམིགས་པའི་བྱ་བ་མེད་པ་དེ་ཉིད་གང་ཞེ་ན། ངོ་བོ་ཉིད་བསྟན་པ་ནི་འདི་ལྟ་སྟེ། དེ་བཞིན་ཉིད་རྟོགས་ཏེ་དེ་ཁོ་ན་ཉིད་ཇི་ལྟ་བར་ཐག་ཆོད་པའི་ཐབས་དམ་པ་ཉིད་དོ། །དེས་ན་སེམས་ལུང་ཆེན་པོ་ལས།

དོན་རྣམས་ཇི་བཞིན་མི་བསྐྱོད་དེ། །ཆོས་ཉིད་ནམ་མཁའ་ལྟ་བུའི་དངོས། །སྐྱོན་རྣམས་མ་ལུས་དག་པའོ། །བྱ་བའི་ཡལ་རྣམས་ངང་གིས་སྟོང༌། །བྱ་བ་མེད་པས་རང་བཞིན་གྲོལ། །ཞེས་སོ།།

གཉིས་པ་རྒྱས་པར་བཤད་པ་ལ་བཞི་སྟེ། དོན་མན་ངག་གིས་ཟིན་པའི་ཡོན་ཏན་བསྟན་པ། དེ་ལྟར་མན་ངག་གིས་མ་ཟིན་པའི་སྐྱོན་བཤད་པ། ལ་བཟླ་བའི་དོན་གྱི་མན་ངག་གི་ངོ་བོ་བཤད་པ། དེ་བློ་ཆུང་བའི་ཡུལ་མ་ཡིན་པར་བསྟན་པའོ། །དང་པོ་ནི། དེ་ཅིའི་ཕྱིར་ཞེ་ན། ཞེས་པ་ལ་སོགས་ཡོན་ཏན་དྲུག་གི་སྒོ་ནས་བསྟན་ཏེ། དེ་ཡང་ཞིབ་ཏུ་བསྟན་ན། ལྟ་བའི་ངེས་གསང་གིས་ཟིན་པའི་ཐབས་ཀྱི་ཡོན་ཏན། སྒོམ་པས་ཡོངས་གྲོལ་དུ་འཇུག་པའི་ཐབས་ཀྱི་ཡོན་ཏན། སྤྱོད་པས་དོན་ཆེན་པོར་བོགས་དབྱུང་བའི་ཐབས་ཀྱི་ཡོན་ཏན། རྟོགས་པའི་རྩལ་གྱིས་ཚེགས་དང་བྲལ་བའི་ཐབས་ཀྱི་ཡོན་ཏན། བློ་གྲོས་དམ་པའི་ཐབས་དང་ལྡན་པའི་མན་ངག་གི་ཡོན་ཏན། དེའི་ཕྱིར་༼༢༨༦༽མན་ངག་དག་གི་བབས་ལ་མཁས་ན་དོན་མཆོག་ཀུན་མ་བཙལ་ལྷུན་གྲུབ་ཏུ་འབྱུང་བའི་ཡོན་ཏན་ནོ།།

དང་པོ་ལྟ་བའི་ངེས་གསང་གིས་ཟིན་པའི་ཐབས་ཀྱི་ཡོན་ཏན་ནི།

དེ་ཅིའི་ཕྱིར་ཞེ་ན། ཞེས་པ་ནས། དུག་ལྔས་གནོད་མི་འགྱུར། །ཞེས་པའི་བར་གྱིས་བསྟན་ཏེ།

དེ་ཅིའི་ཕྱིར་ཞེ་ན། འདི་ལྟ་སྟེ། སྔགས་ཀྱིས་ཡོངས་སུ་ཟིན་པའི་དུག །གང་ལ་གནོད་པར་བྱེད་མི་ནུས།།

དེ་བཞིན་ཉིད་ཀྱིས་ཟིན་པ་ཡི། །དུག་གསུམ་དུག་ལྔས་གནོད་མི་འགྱུར།།

དེ་ཅིའི་ཕྱིར་ཞེ་ན། གཏན་ཚིགས་ཀྱིས་ཡིད་ཆེས་པར་བྱ་བ་ནི། འདི་ལྟ་སྟེ། དཔེར་ན་དུག་ཧ་ལ་ནག་པོ་ཡང་སྔགས་ཀྱིས་ཡོངས་སུ་ཟིན་པའི་ཐབས་ཀྱིས་སྤྱད་ན་དུག་གི་ནད་ཀྱིས་གང་ལ་ཡང་གནོད་པར་བྱེད་མི་ནུས་པ་ལྟར། དེ་ཁོ་ན་ཉིད་ཇི་བཞིན་པར་གདེང་ཆུད་པའི་དེ་བཞིན་ཉིད་ཀྱིས་རྟོགས་པས་ཟིན་པ་ཡི་ལྟ་བ་ཅན་ལ། ཉོན་མོངས་པ་འདོད་ཆགས་ཞེ་སྡང་གཏི་མུག་གི་དུག་གསུམ་མམ་ང་རྒྱལ་ཕྲག་དོག་དང་བཅས་པའི་དུག་ཆེན་ལྔས་མི་ཚུགས་པས་གནོད་པར་མི་འགྱུར་ཏེ་དེ་ཉིད་ཡེ་ཤེས་ཆེན་པོའི་ཀློང་དུ་གསལ་བས་སླར་ལ་ལམ་དུ་འགྱུར་བའོ། །དེ་བས་ན་ཐག་ཆོད་པས་གང་ལའང་སྤང་བླང་མེད་པ་དེ་ཉིད་ཀྱང་མི་ལེན་མི་འདོར་བས་རྟོག་རྒྱུན་རིལ་དེ་བཞིན་ཉིད་ཀྱི་ངང་ལ་རྟོག་པ་སྐྱེས་ཀྱང་མི་འགེགས་ཤིང་ཞེ་སྡང་བར་ཡང་མི་བྱེད་ལ། མཐོང་ཐོས་ཀྱི་རྗེས་སུ་འབྲང་བར་བྱ་བའང་མེད་པར་རྟོགས་པའི་ཐབས་ཁྱད་པར་ཅན་ནི་ཤིན་ཏུ་གཅེས་པའི་ཕྱིར་འཆད་པ་ལྟར་དང་དུ་བླང་བར་བྱ་སྟེ། ཀུནཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། ཐབས་ཀྱི་རྒྱལ་པོར་གང་ཤེས་པ། །དེ་ཉིད་དོན་རྫོགས་ཐབས་ཀྱི་སྐུ། །མ་སྐྱེས་ཤེས་རབ་དོན་ཤེས་པས། །དེ་ཉིད་བཅོས་མེད་མན་ངག་ཚང༌། །ཞེས་དང༌། སྐྱོན་གྱི་རྒྱུན་ལས་མ་གཏོགས་པའི། །སངས་རྒྱས་གཞན་ནས་ཡོངས་མེད་དེ། །སྨན་མཆོག་བདུད་རྩི་འབྱུང་བ་ཡང༌། །དུག་ཡོད་པ་ལས་སྨན་དུ་འབྱུང༌། །དུག་ལ་སྨན་གྱི་རྒྱུ་མེད་ན། །ཐམས་ཅད་སྨན་ལ་སྨན་མིང་མེད། །ལེགས་པ་ཐམས་ཅད་འབྱུང་བ་ཡང༌། །སྐྱོན་གྱིས་ལེགས་པར་འབྱུང་བར་བྱེད། །ཅེས་དང༌། སྐྱོན་གྱི་རྒྱུ་འདི་མ་རིག་པ། །མ་རིག་པ་ནི་དབྱིངས་ཀྱི་མཛོད། །དེ་ཡི་གོང་ན་ཆེ་བ་མེད། །སྐྱོན་གྱི་རྒྱུ་ནི་འཛིན་རྟོག་གཉིས། །འཛིན་རྟོག་ཐབས་དང་ཤེས་རབ་ན། །སྐྱོན་གྱི་རྒྱུ་ལས་ཚེ་བ་མེད། །སྐྱོན་གྱི་རྒྱུ་ནི་ཉོན་མོངས་ལྔ། །ཉོན་མོངས་ཡེ་ཤེས་ལྔར་སྣང་ན། །སྐྱོན་གྱི་རྒྱུ་ལས་ཆེ་བ་མེད། །ཅེས་སོགས་ཤིན་ཏུ་མང་ངོ༌།།

གཉིས་པ་སྒོམ་པས་ཡོངས་གྲོལ་དུ་འཇུག་པའི་ཐབས་ཀྱི་ཡོན་ཏན་ནི།

ཚིགས་བཅད་གཅིག་གི་འོག་ནས། དེ་བཞིན་ཉིད་ཀྱིས། ཞེས་པ་ནས། ཉོན་མོངས་རྣམ་པར་གྲོལ། །ཞེས་པའི་བར་རྐང་པ་༼༢༨༧༽གཉིས་ཀྱིས་བསྟན་ཏེ།

དེ་བཞིན་ཉིད་ཀྱི་ཀུན་གནས་པར། །གང་ཤེས་ཉོན་མོངས་རྣམ་པར་གྲོལ།།

དེ་བས་ན། ཇི་བཞིན་པའི་ངོ་བོར་ཐག་ཆོད་པའི་དེ་བཞིན་ཉིད་ཀྱིས་ཆོས་སོ་ཅོག་ཀུན་ལ་ཁྱབ་པས་ཐམས་ཅད་རིལ་དེ་ཉིད་ཀྱི་དོན་དུ་གནས་པར་གང་སུ་ཞིག་གིས་ཤེས་སམ་རྟོགས་པ་ན་ཉོན་མོངས་པའི་འཆིང་བ་ལྔ་གསུམ་ལ་སོགས་པ་ཉིད་རྣམ་པར་གྲོལ་བའི་ཡེ་ཤེས་སུ་ཤར་བར་འགྱུར་བ་ནི་ཡང་དག་པར་རྟོགས་པའི་ཡོན་ཏན་ཏེ། སེམས་ལུང་ཆེན་པོའི་མདོ་ལས། འགྲོ་བ་ཞི་བ་ཆེན་པོའི་ངང༌། །དེ་ཕྱིར་རང་བཞིན་གྲོལ་བ་སྟེ། །གཞན་ནས་འབྱུང་བར་འགྱུར་མ་ཡིན། །རང་བྱུང་ཡེ་ཤེས་བཙལ་མེད་པས། །བཙལ་མེད་དམ་པ་ཞི་བ་ཡིན། །གྲོལ་ནས་གྲོལ་བའི་ལམ་ཡང་སྟོན། །སྣང་ཕྱིར་གྲོལ་བ་ཆེན་པོ་སྟེ། །གྲོལ་དང་མ་གྲོལ་གཉིས་མེད་དོ། །འཁོར་བ་མྱ་ངན་འདས་ཉིད་དུ། །གཉིས་སུ་སྒྲོ་བཏགས་ཡོད་མ་ཡིན། །དེ་ལྟ་བུར་ནི་སུས་མཐོང་བ། །མཚན་མའི་གཡུལ་ལས་རྒྱལ་བ་ཡིན། །དེ་ལྟ་བུ་ནི་སུས་འཛིན་པ། །སངས་རྒྱས་ཡིན་ཏེ་རྒྱལ་བའི་སྲས། །ཞེས་སོ།།

གསུམ་པ་སྤྱོད་པས་དོན་ཆེན་པོར་བོགས་དབྱུང་བའི་ཐབས་ཀྱི་ཡོན་ཏན་ནི།

རྐང་པ་གཉིས་ཀྱི་འོག་ནས། རྣལ་འབྱོར་དེ་ཉིད། ཞེས་པ་ནས། གྱིན་འདའ་དོན་པོ་ཆེ། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

རྣལ་འབྱོར་དེ་ཉིད་བློོ་ལྡན་པས། །ཉོན་མོངས་ཟིན་པས་གང་སྤྱད་ཀྱང་།།

རྣལ་འབྱོར་རང་བྱུང་མྱ་ངན་འདས། །ཚེགས་མེད་གྱི་འདའ་དོན་པོ་ཆེ།།

མན་ངག་དང་ལྡན་པའི་ཡོན་ཏན་ནི། རྣལ་འབྱོར་གང་ཞིག་མན་ངག་དམ་པའི་དེ་ཉིད་ལ་མཁས་པའི་སྐྱེས་བུ་བློ་དང་ལྡན་པས་འཆིང་བའི་ཆོས་ཉོན་མོངས་པའི་རྟོག་ཚོགས་རྣམས་ལ་ཐབས་ཀྱིས་ཟིན་པས་གང་ལྟར་སྤྱད་ཀྱང་སྤྱོད་ལམ་འགགས་སྤྱོད་རྒྱུས་མི་འཆིང་བར་མ་ཟད་དེ། དེ་ལ་ནི་ལས་གྲོན་དུ་མ་གྱུར་པས་ཅི་སྤྱོད་ཚོགས་སུ་གྱུར་པས་རྣམ་གྲོལ་ཆེན་པོ་རང་བྱུང་གི་མྱ་ངན་ལས་འདས་པ་ཡང་གཞན་ནས་ཚོལ་བའི་སེམས་བྲལ་བས་ཚེགས་མེད་པའི་ཐབས་སྤྱོད་གྱིན་འདའ་ཙམ་གྱིས་ཀྱང་སྤྱོད་ཡུལ་རྒྱལ་བའི་ཞིང་ཁམས་ཡང༌དག་པའི་ས་མཆོག་མ་བགྲོད་པར་ནོན་པས་དོན་པོ་ཆེའམ་དོན་ཆེན་པོ་བླ་ན་མེད་པའོ། །འོ་ན་མན་ངག་ནི་སྤྱོད་པ་ཟིན་བྱེད་ཀྱི་ལྟ་བ་ཡིན་པས་བསླབ་པའང་དགུར་འགྱུར་རོ་ཞེ་ན། འདིར་རྟོགས་ན་འབད་པའང་བྱར་མེད་པའི་ཐབས་ཁྱད་པར་ཅན་ལ་ངོ་བོ་ངེས་པར་བཟུང་བས་ཐག་ལྟ་བས་བཅད་པ་དང་འདྲེ་བར་མི་འགྱུར་ཏེ་བསླབ་པ་ནི་བཅུ་ཉིད་དོ།།

བཞི་པ་རྟོགས་པའི་རྩལ་གྱིས་ཚེགས་དང་བྲལ་བའི་ཐབས་ཀྱི་ཡོན་ཏན་ནི།

ཚིགས་བཅད་གཅིག་གི་འོག་ནས། ཐམས་ཅད་སྟོང་པར། ཞེས་པ་ནས། དཀའ་བའི་ལས་དང་བྲལ། །ཞེས་པའི་བར་རྐང་པ་བཞིས་བསྟན་ཏེ།

ཐམས་ཅད་སྟོང་པར་ཤེས་པ་ནི། །བློ་ཅན་མྱ་ངན་འདས་པ་སྟེ།།

བྱ་བའི་ལས་ལ་ཤ་ཐང་བའི། །ཚེགས་ཆེན་དཀའ་བའི་ལས་དང་བྲལ།།

ཆོས་ཐམས་ཅད་སྟོང་པ་ཆེན་པོར་ཡང་དག་པར་གདེངས་༼༢༨༨༽སུ་ཆུད་དེ་མ་ནོར་བར་ཤེས་པ་ཡི་སྐྱེས་བུ་དམ་པ་སྤྱོད་ཡུལ་དག་པར་རྟོགས་པའི་བློ་ཅན་ནི་རིལ་ད་ལྟ་ཉིད་དུ་མྱ་ངན་ལས་འདས་པ་ཉིད་དུ་གསལ་བ་སྟེ། དོན་དུ་གཉེར་བའི་ཚོལ་སེམས་ཀྱིས་བྱ་བའི་ལས་ལ་ཤ་ཐང་བའི་འབད་པར་དྲག་པོས་ཚེགས་ཆེན་གྱིས་དཀའ་བའི་ལས་དང་བྲལ་ཏེ་བྱ་རྩོལ་མང་པོའི་ལས་ཀྱི་ཀུན་སྤྱོད་ཉིད་མི་དགོས་པས་མན་ངག་ཅན་གྱི་བླ་མ་ལ་ལུས་སྲོག་གིས་བླུ་བར་བྱེད་པ་ནི་ངེས་པར་རིགས་ཤིང་འོས་པའོ།།

ལྔ་པ་བློ་གྲོས་དམ་པའི་ཐབས་དང་ལྡན་པའི་མན་ངག་གི་ཡོན་ཏན་ནི།

ཚིགས་བཅད་གཅིག་གི་འོག་ནས། དམ་པའི་བློ་གྲོས། ཞེས་པ་ནས། རང་བྱུང་གཞན་ལས་མིན། །ཞེས་པའི་བར་གྱིས་བསྟན་ཏེ།

དམ་པའི་བློ་གྲོས་ཐབས་ཡོད་ན། །འཁོར་བ་དམན་པའི་དངོས་པོ་ཡང་།།

སྐྱེས་བུ་དམ་པར་གྲོལ་བར་འགྱུར། །གྲོལ་བ་རང་བྱུང་གཞན་ལས་མིན།།

བཤད་པར་ལྟར་དམ་པའི་མན་ངག་བློ་དང་ལྡན་པར་བྱ་བ་དང༌། གྲོས་ཀྱིས་ཆོད་པར་བྱ་བ་དང༌། ཐབས་ཀྱིས་ཟིན་པར་བྱ་བའི་འཕྲུལ་གྱི་ངེས་གསང་དོན་གྱི་སྙིང་པོ་འདི་གསུམ་འཆང་སྟེ་གནད་གྱི་མན་ངག་ཡོད་ན་འཇིག་རྟེན་འཁོར་བ་དམན་པའི་གནས་ཀྱི་དངོས་པོ་འཁྲུལ་པའི་སྣང་བ་ཡང་ཡོངས་སུ་རྫོགས་པར་མཉམ་པའི་ཆོས་དབྱིངས་རང་བཞིན་མེད་པའི་ངང་དུ་རྟོགས་པའི་སྐྱེས་བུ་དམ་པ་ནི་འབྲས་བུ་ཆེན་པོར་མ་བྱས་པར་རང་ཤར་རང་གྲོལ་དུ་གསལ་བའི་དཔལ་དང་ལྡན་པར་འགྱུར་ཏེ། རྣམ་གྲོལ་དག་པ་ཆེན་པོའི་ངོ་བོ་ནི་རང་བྱུང་གི་ཡེ་ཤེས་ཡིན་གྱི། རྒྱུ་རྐྱེན་དང་ངོ་བོ་གཞན་གྱིས་བྱས་པ་ལས་བྱུང་བ་མིན་ཏེ། སེམས་ལུང་ཆེན་པོའི་མདོ་ལས། འཁོར་བ་ཐམས་ཅད་བྱང་ཆུབ་སྟེ། །འབྱུང་བ་ཆེན་པོ་བཅོམ་ལྡན་འདས། །ས་ཆུ་མེ་རླུང་ནམ་མཁའ་ཆེ། །དོན་ཉིད་ཡེ་ནས་སངས་རྒྱས་ཏེ། །སྣང་བ་ཉིད་ན་དག་པ་ཡིན། །སེམས་ཅན་ཐམས་ཅད་རང་བཞིན་གྲོལ། །དེ་ཕྱིར་ཆོས་ཉིད་གྲོལ་བ་ཡིན། །འགྲོ་བ་ཀུན་ལ་རང་བཞིན་གནས། །མི་ཤེས་པས་སུ་བསླད་མི་ནུས། །དེ་ལ་འཁྲུལ་འཁོར་འབྱུང་བ་མིན། །ཕྱིན་ཅི་ལོག་གི་རྗེས་མི་འབྲང༌། །ཕྱིན་ཅི་ལོག་ཏུ་རྣམ་བསླད་ཀྱང༌། །གྲོལ་བ་རང་བཞིན་གཞན་ལས་མིན། །ཡང་དག་ཡེ་ཤེས་དག་པ་སྟེ། །ཆོས་རྣམས་ཐམས་ཅད་ངང་གིས་སྟོང༌། །དེ་ཕྱིར་རང་བཞིན་བཅོམ་ལྡན་འདས། །ཞེས་སོ།།

དྲུག་པ་དེའི་ཕྱིར་མན་ངག་དག་གི་བབས་ལ་མཁས་ན་དོན་མཆོག་ཀུན་མ་བཙལ་ལྷུན་གྲུབ་ཏུ་འབྱུང་བའི་ཡོན་ཏན་ནི།

ཚིགས་བཅད་གཉིས་ཀྱི་འོག་ནས། དེ་ཕྱིར་བློ་གྲོས། ཞེས་པ་ནས། ལྷུན་གྱིས་གྲུབ་པ་ཡིན། །ཞེས་པའི་བར་ཚིགས་བཅད་བཞི་ཡིས་བསྟན་ཏེ།

དེ་ཕྱིར་བློ་གྲོས་ཐབས་ལྡན་ན། །རྩོལ་སྒྲུབ་ཡོ་བྱད་གཙོར་མ་གསུངས། །གལ་ཏེ་བྱས་ན་འགག་པ་མེད། །མ་བྱས་ན་ཡང་དེ་ལྟར་ངེས། །དེ་ལྟར་བློ་གྲོས་ཐབས་ལྡན་ན། །མཚམས་མེད་ལྔ་ཡི་སེམས་ཅན་ཀུན། །བྱང་ཆུབ་སྙིང་རྗེ་མཚོན་གྱིས་བསད། །དཔག་མེད་དགེར་འགྱུར་མ་བསད་ན། །ཀུན་གྱི་དོན་དུ་གཉེར་བ་ནི། །གང་གི་སེམས་ཀྱི་དབྱིངས་ཉིད་ཀྱི། །གང་གིས་བསྐལ་པ་དཔག་མེད་དུ། །སྲིད་གསུམ་དཀྲུགས་པས་་དེ་མི་རིག །འདིར་ནི་བློ་གྲོས་ཐབས་ལྡན་པས། །བྱ་མེད་གྱི་འདར་རང་རིག་པས། །དོན་ཆེན་རྣལ་འབྱོར་ཉལ་མོ་བཙུན།།

མ་བཙལ་ལྷུན་གྱིས་གྲུབ་པ་ཡིན།།

དེ་ཕྱིར་ཞེས་སྙེགས་པས་སྔ་མ་གཏན་ཚིགས་སུ་གྱུར་པ་ནི། མཐའ་གང་ལའང་མི་གནས་པས་བྱ་བ་མེད་པའི་༼༢༨༩༽དོན་བསྟན་ལ་སྙེགས་པའོ། །འོན་ཀྱང་མན་ངག་གི་བློ་གྲོས་ཐབས་གསུམ་འཆང་ཞིང་ལེགས་པར་ལྡན་ན། འབད་རྩོལ་གྱིས་སྒྲུབ་པའི་བརྩོན་འགྲུས་ཀྱི་དོན་དུ་གཉེར་བ་དང༌། ཕྱི་ནང་གི་ཡོ་བྱད་ལ་བརྟེན་པ་ཁོ་ན་གཙོར་མ་གསུངས་པས་བརྟེན་མི་དགོས་ཏེ་དེ་ལ་རག་མི་ལས་པས་སོ། །འོ་ན་སྐྱོན་དུ་དགག་གོ་ཞེ་ན། །གལ་ཏེ་རྩོལ་སྒྲུབ་དང་ཡོ་བྱད་ལ་བརྟེན་པར་བྱས་ནའང་འགག་པ་མེད་དེ་རོལ་པ་ལ་དགག་བྱའང་མེད་པའི་ཕྱིར་རོ། །བརྟེན་པར་མ་བྱས་ནའང་དེ་ལྟར་དེ་ཁོ་ན་ཉིད་དུ་ངེས་པས་ཐག་རིང་བ་མེད་པའོ། །བཤད་པ་དེ་ལྟར་བློ་གྲོས་ཐབས་གསུམ་གྱི་མན་ངག་གི་དོན་དང་ལྡན་ན་མཚམས་མེད་ལྔ་ཡི་ལས་བྱེད་པ་དང་བསྒྲལ་བའི་ཞིང་བཅུར་གྱུར་བའི་སེམས་ཅན་ཀུན་བྱང་ཆུབ་ཀྱི་སེམས་སྙིང་རྗེ་ཆེན་པོ་དང༌། དོན་དམ་ཆོས་ཉིད་རྟོགས་པའི་རྡོ་རྗེའི་མཚོན་རྣམ་པ་གཉིས་ཀྱིས་དངོས་པོར་སྤྱོད་པ་ཡན་ཆད་དུ་གསད་ཅིང་བསྒྲལ་ན་ཐུགས་རྗེ་དཔག་ཏུ་མེད༌པའི་དགེར་ཞེས་དགེ་བར་འགྱུར་ལ། གལ་ཏེ་ཐུགས་རྗེ་དང་བྲལ་བས་མ་བསད་ན་དེ་ལྟར་མིན་པར་གཉིས་ཀ་ལྟུང་བའི་སྐྱོན་ནོ། །ཇི་བཞིན་པའི་དོན་རྟོགས་དཀའ་བར་བསྟན་པའི་ཕྱིར། ལམ་རིལ་ཀུན་གྱིས་དོན་དུ་གཉེར་ཞིང་ཆེད་དུ་བྱ་བའི་རྟོགས་བྱའི་དངོས་པོ་དམ་པ་ནི། གང་ཞིག་ཏུ་ངེས་ན་རང་གི་ཀུན་གཞི་བྱང་ཆུབ་སེམས་ཀྱི་ངོ་བོ་མུ་མཐའ་ལས་འདས་པའི་དབྱིངས་ཀྱི་ཆོས་ཉིད་རིལ་གྱི་འབྱུང་གནས་མཚན་གཞི་ལས་འདས་པ་ནི། རྣལ་འབྱོར་པ་དམིགས་ལྟ་ཅན་གང་ཞིག་གིས་བསྐལ་པ་གྲངས་མེད་དཔག་ཏུ་མེད་པ་ཉིད་དུ་སྲིད་པ་གསུམ་པོ་གཡེངས་བཤིགས་རྨལ་བར་བྱས་ཏེ་དཀྲུགས་པས་བཙལ་བར་བྱས་ན་ཡང་། དེ་ཉིད་ཀྱི་ངོ་བོ་ལྷན་པ་མེད་པའི་དོན་ཏེ་རེག་ཅིང་རྟོགས་པར་འགྱུར་བ་མིན་ནོ། །འོ་ན་གཏན་ནས་རྟོགས་པར་བྱ་བའི་ཐབས་མེད་དོ་བར་དོགས་པ་ལ། ཟབ་མོ་གསང་བའི་སྒོ་ཇི་བཞིན་དུ་ངེས་པ་འདིར་ནི། རྣལ་འབྱོར་པ་བློ་གྲོས་ཐབས་གསུམ་གྱི་མན་ངག་དང་ལྡན་པ་ཞིག་ཏུ་གྱུར་པས། དོན་ཡང་དག་པ་ཉིད་དུ་རྟོགས་ན། དེ་ལ་ནི་དཔེར་ན་ཆུ་ཡིས་རླན་མི་ཚོལ་བ་ལྟར། བདག་ཉིད་དེ་ཁོ་ན་ཉིད་ཀྱི་བདག་ཉིད་པས་ཇི་བཞིན་པས་ཇི་བཞིན་པ་གསང་བའི་དོན་ཉིད་བཙལ་བའི་བྱ་བྱེད་དང་བྲལ་ཏེ་བྱ་བ་མེད་པའི་དགོངས་པ་ལ། ཡལ་བར་འདུག་པའང་གྱིན་འདའ་བའི་བཏང་སྙོམས་ཆེན་པོ་སྟེ། དེ་ལྟར་རང་རིག་པ་༼༢༩༠༽གཏིང་ནས་མཇལ་བས་དོན་ཆེན་པོ་མ་སྒྲུབ་པར་གྲུབ་ཅིང་མ་ཡེངས་པར་རྣལ་དུ་འབྱོར་ཏེ་འབད་པ་མེད་པར་ཐོབ་པའི་ཐབས་ཆེན་པོ་ཉལ་མོ་བཙུན་དུ་ཆོས་ཀྱི་དབྱིངས་དང་འདུ་འབྲལ་མེད་པར་མ་བཙལ་བར་འབྲས་བུ་ལྷུན་གྱིས་གྲུབ་པའི་ཐབས་མཆོག་དམ་པ་བླ་ན་མེད་པར་གྱུར་པ་ཡིན་ནོ། དེ་ལྟར་ཡང་ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། བྱང་ཆུབ་སེམས་ཉིད་བདེ་ཆེན་པོ། །རྒྱུ་ཉིད་དག་པ་འབྲས་བུ་སྟེ། །ཚིག་དང་ཡི་གེ་ལས་འདས་པ། །བཙལ་མེད་ལྷུན་གྲུབ་རང་གནས་པའོ། །ཞེས་དང༌། རྫོགས་ཆེན་འདི་ལ་གང་སྤྱོད་པ། །ཡེ་ཤེས་ཀུན་བཟང་ཉིད་ཡིན་པས། །བཟང་ངན་གཙང་སྨེ་གཉིས་སུ་མེད། །མན་ངག་དོན་དང་ལྡན་པའི་གདིང༌། །སེམས་ལས་མ་ཡེངས་དགོངས་པའི་ཀློང༌། །འདི་ལྟར་སྤྱོད་པའི་རྣལ་འབྱོར་པ། །སངས་རྒྱས་ཉིད་དུ་རང་གནས་པའོ། །ཞེས་སོགས་ཤིན་ཏུ་མང་ངོ༌།།

གཉིས་པ་དེ་ལྟར་མན་ངག་གིས་མ་ཟིན་པའི་སྐྱོན་བཤད་པ་ནི། དེ་བཞིན་ཉིད་ཀྱིས་མ་ཟིན་སོགས་སྐྱོན་བཞིའི་སྒོ་ནས་བསྟན་ཏེ། དེ་ཡང་རྣམ་གྲངས་ངོས་བཟུང་ན། མན་ངག་གི་ཐབས་ཀྱིས་མ་ཟིན་པའི་རྣམ་པར་དཀར་བའི་ལས་ཀྱིས་ཀྱང་གོ་འཕང་དམ་པར་མི་འགྱུར་བའི་ཚུལ། ཐབས་ཀྱི་མན་ངག་མེད་ན་ཡང་དག་པའི་སྤྱོད་པ་ལ་འབད་ཀྱང་རང་གི་རྟོག་པས་རང་འཆིང་ཚུལ། མན་ངག་གི་ཐབས་ཀྱིས་དོན་མཐོང་བ་མེད་པར་འཆིང་བའི་ལས་ལ་སྤྱད་ན་སླར་འཁོར་བར་ལྟུང་བ་ལས་ཐར་པ་མེད་ཚུལ། དེ་བས་ན་ཐབས་དང་མི་ལྡན་པ་འཆིང་བར་འགྱུར་གྱི་ཐབས་དང་ལྡན་ན་དེ་ལྟར་མི་འགྱུར་བའི་ཚུལ་བསྟན་པའོ། །དང་པོ་ནི།

གོང་དུ་བཞག་པའི། དེ་བཞིན་ཉིད་ཀྱིས་མ་ཟིན། ཞེས་པ་ནས། དམ་པར་ག་ལ་འགྱུར། །ཞེས་པའི་བར་ཚིགས་བཅད་གཅིག་གིས་བསྟན་ཏེ།

དེ་བཞིན་ཉིད་ཀྱིས་མ་ཟིན་ན། །ལམ་གྱི་ཕྱོགས་རྣམས་ཀུན་སྤྱད་ཀྱང་། །བདེ་འགྲོ་ཙམ་གྱི་ངེས་འབྱུང་གི།

གོ་འཕང་དམ་པ་ག་ལ་འགྱུར།།

གལ་ཏེ་དོན་གྱི་མན་ངག་དང་ལྡན་པའི་དམིགས་མེད་པས་ཆོས་ཉིད་དེ་བཞིན་ཉིད་རྟོགས་པའི་ཐབས་ཀྱི་དགོངས་པའི་རྩི་མཆོག་ཉིད་ཀྱིས་མ་ཟིན་ན། རྣམ་པར་དཀར་བའི་ལས་ཀྱི་ཕྱོགས་བཟང་པོ་རྣམས་ལ་ཀུན་ཏུ་འབད་པར་སྤྱད་ཀྱང༌། བདེ་འགྲོ་ལྷ་མིའི་གོ་འཕང་ཙམ་དུ་ངེས་པར་འབྱུང་བའི་ཐབས་སུ་རུང་གི མཐར་ཐུག་གི་འབྲས་བུ་རྒྱལ་བའི་གོ་འཕང་དམ་པ་ཐོབ་པར་ག་ལ་འགྱུར་ཏེ་མི་འགྱུར་རོ།།

གཉིས་པ་ཐབས་ཀྱི་མན་ངག་མེད་ན་ཡང་དག་པའི་སྤྱོད་པ་ལ་འབད་ཀྱང་རང་གི་རྟོག་པས་རང་འཆིང་ཚུལ་ནི།

རྐང་པ་གཉིས་ཀྱི་འོག་ནས། གང་དེ་ཟིན་པར། ཞེས་པ་ནས། ལས་རྣམས་གྲོལ་མི་འགྱུར། །ཞེས་པའི་བར་གྱིས་བསྟན་ཏེ།

གང་དེ་ཟིན་པར་མ་ཤེས་ན། །དམ་པའི་ལམ་རྣམས་གྲོལ་མི་འགྱུར།།

རྣལ་༼༢༩༡༽འབྱོར་པ་གང་སུ་ཞིག་གིས་ཉོན་མོངས་པ་དེ་ཉིད་ཆོས་ཉིད་ཀྱིས་ཟིན་ནས་རང་གྲོལ་བར་མ་ཤེས་པས་དེ་ཁོ་ན་ཉིད་མཐོང་བའི་བྱ་བ་མེད་པའི་ཐབས་དང་མ་ལྡན་ན། ཡང་དག་དམ་པའི་སྤྱོད་པ་སྒོ་གསུམ་དག་པའི་ལས་རྣམས་ལ་འབད་པར་བྱས་ཀྱང་དར་གྱི་སྲིན་བུ་བཞིན་དུ་རང་གི་ཆེད་དུ་བྱས་པའི་རྟོག་པ་དེས་བཅིངས་ནས་ཐར་དམ་པའི་གོ་འཕང་དུ་རྣམ་པར་གྲོལ་བར་མི་འགྱུར་ཏེ། ཀུན་ཏུ་བཟང་པོ་ཆེ་བ་རང་ལ་གནས་པ་ལས། ཚི་ཆད་ལས་ལ་གྲུབ་པ་མེད། །གཞན་དུ་རྣལ་འབྱོར་མ་ཚོལ་ཅིག །དོན་མེད་སྒྲ་ཚིག་སྒྲ་ཕྱིར་འབྲངས། །ཐེག་པ་ངེས་མེད་ས་མ་ཟིན། །ངེས་པའི་མན་ངག་རྟོག་པར་གོལ། །དོན་མེད་དེ་འདྲ་མནོས་ན་འཁྱལ། །ཞེས་གསུངས་པ་ལྟར་མན་ངག་ཟབ་མོའི་གོལ་སར་ལྟུང་བ་སྲིད་པ་ཡིན་ནོ།།

གསུམ་པ་མན་ངག་གི་ཐབས་ཀྱིས་དོན་མཐོང་བ་མེད་པར་འཆིང་བའི་ལས་ལ་སྤྱད་ན་སླར་འཁོར་བར་ལྟུང་བ་ལས་ཐར་པ་མེད་ཚུལ་ནི།

ཚིགས་བཅད་གཅིག་གི་འོག་ནས། གང་འདིར་བློ་དང༌། ཞེས་པ་ནས། ཐ་མར་འཁོར་བའི་དངོས། །ཞེས་པའི་བར་གྱིས་བསྟན་ཏེ།

གང་ཞིག་དོན་བློ་མི་ལྡན་པས། །བློ་ལྡན་ཚུལ་དུ་གང་བྱེད་པ།།

དམ་པར་གྲོལ་བར་མི་འགྱུར་གྱི། །འཆིང་བ་ཐ་མར་འཁོར་བའི་གདོས།།

གསང་བ་ཟབ་མོ་བློ་དམན་པའི་ཡུལ་མ་ཡིན་པའི་ཕྱིར། གང་སུ་ཞིག་གིས་ཟབ་མོ་གསང་བའི་སྒོ་འདིར་དེ་བཞིན་ཉིད་མཐོང་བའི་བློ་གྲོས་ཀྱི་མིག་དང་མི་ལྡན་པས། སྤྱོད་པ་བློ་གྲོགས་ཀྱི་སྤྱན་དང་ལྡན་པའི་ཚུལ་དུ་འཆོས་ཏེ་བྱ་བ་མེད་པར་འཇོག་པ་དང༌། གང་འཆིང་བའི་ལས་ལ་སྤྱོད་པར་བྱེད་པ་དག་ནི། དོན་མཆོག་དམ་པའི་གོ་འཕང་དུ་རྣམ་པར་གྲོལ་བར་མི་འགྱུར་གྱི། །སླར་ཡང་སྲིད་པར་འཆིང་བ་ཁོ་ན་ལས་མེད་པས་འདོད་པའི་གནས་ཀྱི་ཐ་མར་ངན་སོང་གསུམ་དུ་ལྟུང་ཞིང་འཁོར་བའི་དངོས་པོར་འགྱུར་གྱི། ཐར་ཞིང་གྲོལ་བར་མི་འགྱུར་རོ། །དེ་བས་ན་རིམ་སློབ་ཚད་དུ་ཕྱིན་པ་དང་གཅིག་ཆར་བའི་ཡུལ་དུ་གྱུར་པས་གང་ཟག་གཉིས་ཀའི་བསླབ་པར་བརྒྱུད་པ་དང་མངོན་སུམ་པའི་སྒོ་ནས་འགྱུར་རོ།།

བཞི་པ་དེ་བས་ན་ཐབས་དང་མི་ལྡན་པ་འཆིང་བར་འགྱུར་གྱི་ཐབས་དང་ལྡན་ན་དེ་ལྟར་མི་འགྱུར་བའི་ཚུལ་བསྟན་པ་ནི།

ཚིག་བཅད་གཅིག་གི་འོག་ནས། དམ་པའི་བློ་གྲོས། ཞེས་པ་ནས། བྱེད་པའང་ལྟུང་བར་འགྱུར། །ཞེས་པའི་བར་གྱིས་བསྟན་ཏེ།

དམ་པའི་བློ་གྲོས་ཐབས་མེད་ན། །སྐྱེས་བུ་དམ་པ་རྣམས་ཀྱང་ནི།།

འདུལ་བའི་དབང་གིས་དམན་པའི་ལུས། །རྟེན་པར་བྱེེད་པའང་ལྟུང་བར་འགྱུར།།

གལ་ཏེ་ཐབས་དང་ལྡན་ཀྱང་འཆིང་བ་ལ་སྤྱད་ན་གྲོལ་བར་མི་འགྱུར་རོ་སྙམ་དུ་དོགས་པ་ལ། བཤད་པ་ལྟར་དམ་པའི་བློ་དང་ལྡན་པར་བྱ་བ་དང་། གྲོས་ཀྱིས་ཆོད་པར་བྱ་བ་དང༌། ཐབས་ཀྱིས་ཟིན་པར་བྱ་བའི་མན་ངག་དམ་པ་གསུམ་དང་མི་ལྡན་པར་མེད་པར་གྱུར་ན་དམན་སྤྱད་ཀྱིས་སླར་ཡང་འཆིང་བ་ཡིན་གྱི། གཞན་དུ་ན་ཟག་༼༢༩༢༽མེད་མངོན་དུ་བྱས་པའི་བྱང་ཆུབ་སེམས་དཔའ་དམ་པའི་སྐྱེས་བུ་སྒོམ་ལམ་པ་རྣམས་ཀྱང་ནི། སྙིང་རྗེ་ཆེན་པོས་གདུལ་བྱ་འདུལ་བའི་ཐབས་མཁས་ཀྱིས་དོན་མཛད་པའི་དབང་གིས་སྐྱེ་བ་རང་དབང་ཅན་དུ་བཞེས་ནས་སེམས་ཅན་དམན་པའི་ལུས་ཤན་པ་དང༌། སྨད་འཚོང་ལ་སོགས་པ་ལྟ་བུའི་ཚུལ་དུ་སྟེན་པའམ་སྟོན་པར་བྱེད་པའང་ལྟུང་བར་འགྱུར་རིགས་ན་ཡང་མི་ལྟུང་བས་གསལ་ལོ། །དེ་བས་ན་ཐབས་དེ་དང་མི་ལྡན་ན་དེ་ཉིད་ཀྱང་ལྟུང་ངོ༌།།

གསུམ་པ་ལ་བཟླ་བའི་དོན་གྱི་མན་ངག་གི་ངོ་བོ་བཤད་པ་ནི།

ཚིག་བཅད་གཅིག་གི་འོག་ནས། གྲོལ་དང་མ་གྲོལ། ཞེས་པ་ནས། གྲོལ་མེད་གྲོལ་བའོ། །ཞེས་པའི་བར་གྱིས་བསྟན་ཏེ།

གྲོལ་དང་མ་གྲོལ་ལ་སོགས་པ། །གཉིས་སུ་རྟོགས་པ་ཐམས་ཅད་མཐའ།།

ཀུན་མཁྱེན་རྣམས་ནི་དབུས་ལའང་མིན། །དེ་ནི་གྲོལ་མེད་གྲོལ་བའོ།།

འོ་ན་གྲོལ་བ་ཁོ་ནའོ་ཞེ་ན། གྲོལ་བར་འཛིན་པ་དང་མ་གྲོལ་བར་འཛིན་ཞིང་རྟོག་པ་དང་ལ་སོགས་པ་ཞེས་དངོས་པོ་གཞན་བསྡུ་བ་ནི། བཅིང་བ་དང་ཐར་པ་དང༌། མཐོང་བ་དང་མ་མཐོང་བ་ལ་སོགས་པ་གཉིས་སུ་རྟོག་པར་བསྙད་པ་རིལ་ཐམས་ཅད་དེ། གང་ཕྱོགས་གཅིག་ཏུ་བསམ་པ་ངེས་པ་ཀུན་མཐའ་ལ་ཐུག་པ་ཞེས་བྱའོ། །དེ་བས་ན་རྣམ་པ་ཐམས་ཅད་ཀུན་མཁྱེན་པའི་ཡེ་ཤེས་མངའ་བ་རྣམས་ནི། གྲོལ་བ་ལ་གྲོལ་བར་འཛིན་པའང་བྲལ་བས་བཅིངས་པ་སྨོས་སུ་མེད་པའི་ཕྱིར་དབུ་མ་ཞིག་ཏུ་འཛིན་པའི་དུས་ཤེས་པའང་མི་མངའ་བས་ཡང་དག་པའི་དོན་གྱི་དབུས་ལའང་གནས་པ་མིན་ཏེ། དེ་ལྟར་རྟོགས་ཏེ་རང་གསལ་ཡེ་ནས་མ་བཅོས་པའི་ངང་ལ་ནི་ཡེ་ནས་གྲོལ་བ་མངོན་དུ་བྱས་པ་ལས་གསར་དུ་གྲོལ་བར་འདོད་པའང་མེད་པ་ཉིད་དེ་དེ་ཉིད་ཐུག་པ་མེད་པའི་གྲོལ་བ་ཆེན་པོའོ། །དེས་ན་སེམས་ལུང་ཆེན་པོ་ལས། མཉམ་ཉིད་ཆོས་དབྱིངས་ཀུན་ཏུ་བཟང༌། །ཕྱོགས་བྲལ་ཆོས་ཉིད་ཡོངས་རྫོགས་ཕྱིར། །དུས་གསུམ་རྣམ་པ་ཞི་བའི་ཚུལ། །མཉམ་པས་རིམ་པར་བཀོད་པ་མེད། །གཅིག་པས་ཕྱོགས་སུ་བསྔོ་དང་བྲལ། །དྲི་མེད་རང་བཞིན་དག་པའི་ཚུལ། །ཞེས་དང༌། གླེང་བྲལ་འདི་ལ་གནས་པ་ཡིས། །རྣལ་འབྱོར་འདི་ནི་སྐལ་པ་བཟང༌། །ཆོས་ཉིད་གཏེར་ལྡན་ནམ་མཁའི་ཚུལ། །རྣལ་འབྱོར་ཆོས་ཉིད་ཡིན་པའི་ཕྱིར། །བདག་དང་གཞན་དག་མེད་པའི་ཕྱིར། །བདག་དང་གཞན་དོན་མི་བྱེད་པས། །སྒྱུ་མ་ལྷུན་གྲུབ་ཡུལ་ལ་རོལ། །མི་གནས་དབྱིངས་ལས་ཅིར་སྣང་ཡང༌། །སྣང་བ་སྒྱུ་མ་ཆེན་པོ་སྟེ། །ཡུལ་ལ་རོལ་པས་ལྷུན་གྱིས་གྲུབ། །ཅེས་སོ། །དེས་ན་༼༢༩༣༽གྲོལ་བར་འདོད་པ་ཉིད་ནི་འཆིང་བ་ཆེན་པོ་ཡིན་པས་མཆོག་གསང་རིན་པོ་ཆེ་སྣང་བའི་ཐབས་ཀྱི་མན་ངག་མཐར་ཐུག་པ་ལ་མཁས་པར་བྱ་སྟེ། ཡེ་ཤེས་རྫོགས་པ་ལས། ཡེ་ཤེས་རྫོགས་པ་བདེ་བ་ཆེ། །མཐའ་ཡས་འགྲོ་བ་ཀུན་ལ་ལྡན། །རིག་པ་དབྱེར་མེད་ཀུན་ཏུ་བཟང༌། །གང་ཡང་མ་ཡིན་རིག་པར་གསལ། །རྩོལ་བའི་སེམས་བྲལ་མངོན་སངས་རྒྱས། །རྒྱུ་འབྲས་གཉིས་མེད་འགྱུར་བ་བྲལ། །རྣམ་བྱང་ཤེས་པ་རང་གནས་པ། །བྱེད་པ་ཉིད་ཀྱིས་མཐོང་བར་གྱིས། །ཞེས་གསུངས་པ་ལྟར་མན་ངག་གི་གནད་ཁྱད་པར་ཅན་ལ་བརྟེན་པ་གལ་ཆེའོ།།

བཞི་པ་དེ་བློ་ཆུང་བའི་ཡུལ་མ་ཡིན་པར་བསྟན་པ་ནི།

འདི་ནི་གསང་བ། ཞེས་པ་ནས། རྣམས་ལ་ཕན་ཕྱིར་རོ། །ཞེས་པའི་བར་གྱིས་བསྟན་ཏེ།

འདི་ནི་གསང་བ་དམ་པ་སྟེ། །མ་རྟོགས་བློ་ཆུང་ཀུན་ལ་གསང་།།

སྐྱོན་ཡོད་ཉེས་པ་མ་ཡིན་ཏེ། །བློ་ཆུང་རྣམས་ལ་ཕན་ཕྱིར་རོ།།

མན་ངག་སྙིང་པོའི་དོན་འདི་ཉིད་བཙའ་བའི་ཕྱིར། །དེ་ལྟར་མཐའ་རིལ་མ་སྤངས་ཀ་ནས་དག་པའི་དོན་མཆོག་ཟབ་མོ་འདི་ནི་བློ་ཆུང་གི་སྤྱོད་ཡུལ་དུ་མ་གྱུར་པའི་གསང་སྔགས་གསང་བ་དམ་པའི་དགོངས་དོན་བླ་མེད་མཆོག་ཏུ་གྱུར་པ་སྟེ། དེས་ན་ཐབས་ཀྱི་ཁྱད་པར་འདི་ལྟར་དུ་མ་རྟོགས་པའི་སྐྱེ་བོ་དང༌། མུ་སྟེགས་ཀྱི་རིས་ཀུན་དང༌། ཉན་ཐོས་ནས་ཡོ་ག་ཕྱི་པའི་བར་གྱི་བློ་ཆུང་བ་དེ་དག་ཀུན་ལ་མི་བསྟན་པར་རབ་ཏུ་གསང་བར་བྱའོ། །འོ་ན་བསྟན་མི་བཟོད་པའི་ངན་པ་ཞིག་གོ་ཞེ་ན། གསང་དོན་ཟབ་མོ་ནི་སྐྱོན་ཡོད་པའི་ཉེས་པས་བསྟན་དུ་མི་རུང་བར་སྙད་ཅན་དུ་གྱུར་པ་མ་ཡིན་ཏེ་བཤད་པ་ལྟར་དོན་དུ་མི་འགྱུར་བ་བཞིའི་ཕྱིར་མཆོག་ཏུ་གཞན་དོན་དུ་མི་འགྱུར་བས་ན་མི་བསྟན་པར་བཀའ་རྒྱས་བཏབ་པ་སྟེ། བློ་ཆུང་རྣམས་ལ་བརྒྱུད་ནས་ཕན་གདགས་པའི་ཕྱིར་རོ།།

གསུམ་པ་གཅེས་པར་གདམས་པ་ནི།

ཇི་ལྟར་མུན་པ། ཞེས་པ་ནས། འདི་དག་རབ་ཏུ་གཅེས། །ཅེས་པའི་བར་གྱིས་བསྟན་ཏེ།

ཇི་ལྟར་མུན་པ་དུག་དང་རྫས། །སྨན་སྣང་གསེར་དུ་བསྒྱུར་བ་ན། །འགྱུར་རྩི་མན་ངག་མེད་པའི་མིས། །དཀའ་བའི་ལས་ཆེན་སྣ་ཚོགས་པ། །སྡུག་བསྔལ་སྤྱད་ཀྱང་མི་འགྲུབ་སྟེ། །སུ་ཞིག་མན་ངག་ལྡན་པའི་མིས། །ཚེགས་མེད་གྱི་འདའི་ཚུལ་གྱིས་ན། །བསྒྱུར་བས་སྨན་སྣང་གསེར་འགྱུར་ལྟར། །རྣལ་འབྱོར་ཆེན་པོ་དོན་གྲུབ་པ། །དེ་ཉིད་བློ་གྲོས་ཐབས་དག་དང་། །གང་དང་མི་ལྡན་པ་དག་གིས། །དཀའ་བ་སྤྱད་ཀྱང་འགྲུབ་པ་མིན། །སེམས་ཀྱི་གསང་འདི་སུས་མཐོང་པ། །བློ་གྲོས་ཐབས་དང་ལྡན་པ་སྟེ། །འདོད་པའི་དོན་མཆོག་གང་ཡིན་པ། །དེ་དག་ཚེགས་མེད་གྱི་འདས་འགྲུབ། །དོན་རྣམས་གྲུབ་པར་གང་བྱེད་པ། །བློ་གྲོས་ཐབས་ཀྱིས་གྲུབ་པའི་ཕྱིར། །དོན་རྣམས་གྲུབ་པར་འགྱུར་པ་ཡི། །བསླབ་པ་འདི་དག་རབ་ཏུ་གཅེས།།

དཔེ་ཇི་ལྟར་ན་མུན་པ་དང་དུག་དང་ལྕགས་ལ་སོགས་པའི་རྫས་རྣམས་སྨན་དང་སྣང་བ་དང་གསེར་དུ་གྱུར་བ་ན་ཡང༌། ཐབས་མེད་ན་འགྲུབ་ཏུ་མི་བཏུབ་པའི་དཔེ་སྟེ། གོང་མ་གསུམ་གྱི་འགྱུར་རྫས་སམ་གསེར་འགྱུར་གྱི་རྩི་ལ་མཁས་པའི་མན་ངག་གི་གནད་མེད་པའི་མིས་དཀའ་བའི་ལས་ཆེན་སྣ་ཚོགས་པ་བྱས་ཏེ་སྡུག་བསྔལ་མང་པོ་སྤྱད་ཀྱང་མི་འགྲུབ་སྟེ། དེ་གསུམ་གྱི་འགྱུར་རྫས་སམ་ཁྱད་པར་དུའང་གསེར་འགྱུར་གྱི་རྩི་འཆང་བ་དང་མི་འཆང་བའི་ཚུལ་ཇི་ལྟ་བའོ། །དེས་ན་མཁས་པ་སུ་ཞིག་འགྱུར་རྩི་གསུམ་གྱི་མན་ངག་དང་ལྡན་པའི་མིས་༼༢༩༤༽ནི། ཚེགས་ཆེན་པོ་མེད་ཅིང་དཀའ་བ་སྣ་ཚོགས་མི་དགོས་པར་སྒྲོན་མ་དང༌། སྔགས་སམ་རྩི་སྦྱོར་དང༌། གསེར་འགྱུར་བྱེད་པའི་རྩི་ཡིས་ཐབས་ཆེན་པོ་གྱིན་འདའི་ཚུལ་གྱིས་ན་དེ་གསུམ་བསྒྱུར་བས་དུག་སྨན་དང་མུན་པ་སྣང་བ་དང་རྫས་རྣམས་གསེར་དུ་འགྱུར་བའི་དཔེ་ལྟར་དེ་བཞིན་དུ་མཚོན་པར་བྱ་བའི་དོན་ཡང༌། རྣལ་འབྱོར་ཆེན་པོ་གང་གིས་འབྲས་བུ་བླ་ན་མེད་པའི་དོན་མཆོག་གསང་བ་ཡང་དག་པར་གྲུབ་པ་ཡང༌། དེ་ཉིད་མཐོང་བའི་བློ་དང་གྲོས་དང་ཐབས་དག་དང་གང་དག་ཡང་དག་པར་མི་ལྡན་པ་དག་གིས་ནི་དཀའ་བ་སྣ་ཚོགས་པ་སྤྱད་དེ་བྱ་རྩོལ་གྱིས་འབད་ཀྱང་ངེས་པའི་དོན་གྲུབ་པ་མིན་ནོ། །གང་ཞིག་སེམས་ཀྱི་རང་བཞིན་ཤིན་ཏུ་རིག་ཅིང་ཤེས་པར་དཀའ་བའི་གསང་བ་མཆོག་གི་དོན་འདི་དམ་པ་སུས་རྟོགས་ཤིང་མཐོང་བ་དེ་ནི། བློ་གྲོས་ཐབས་ཀྱི་མན་ངག་གསུམ་དང་ལྡན་པ་སྟེ། དེ་ཡིས་གང་འདོད་པའི་དོན་མཆོག་གི་འབྲས་བུ་དམ་པ་གང་ཡིན་པ་དེ་ཡང༌། དེ་དག་གིས་ཚེགས་ཆེན་པོ་མེད་པར་ཐབས་ཀྱི་མན་ངག་གྱིན་འདས་ཀྱང་ངེས་པར་འགྲུབ་པ་ཡིན་ནོ། །ཁས་བླངས་པ་ལྟར་གཅེས་པར་གདམས་པའི་དོན་ཏེ། དེ་ལྟར་བསྒྲུབ་པའི་འབྲས་བུའི་དོན་རྣམས་ཡང་དག་པར་གྲུབ་པར་དམ་པ་གང་གིས་བྱེད་དེ་མངོན་དུ་གྱུར་པ་ནི་མན་ངག་གི་གསང་བ་ཟབ་མོ་བློ་གྲོས་ཐབས་གསུམ་གྱིས་ངེས་པར་འགྲུབ་པར་འགྱུར་བའི་ཕྱིར། གཏན་ཚིགས་ཚད་མར་འབྱུང་བའི་དགོས་པ་དེ་བས་ན་སྙིང་པོའི་དོན་མཆོག་གསང་བ་ཟབ་མོ་རྣམས་མན་ངག་གི་ཐབས་ཁྱད་པར་ཅན་གྱིས་གྲུབ་པར་འགྱུར་པ་ཡི་བསླབ་པ་འདི་དག་སྙིང་ནོར་དུ་བྱེད་པ་རབ་ཏུ་གཅེས་པ་ཡིན་ནོ། །ཞེས་གདམས་པར་མཛད་དེ། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། རང་བྱུང་རྒྱལ་པོ་སེམས་ཅན་ལ། །རིག་པའི་རྒྱལ་པོ་རྣམ་ཤེས་ཤར། །ཕུང་པོའི་ཐིག་ལེ་ཆེན་པོ་ལ། །རྣམ་པར་དག་པའི་ཐིག་ལེ་ཤར། །སྐྱེ་མཆེད་ཏིང་འཛིན་གསལ་བ་ལ། །ཐབས་ཀྱི་འཕྲོ་འདུ་གསལ་བར་སྟོན། །གང་ལ་དཔེས་བསྟན་དེ་བཞིན་དུ། །དེ་བཞིན་སེམས་ཅན་དཔེ་བསྟན་པར། །བདེ་བ་ཆེན་པོའི་མན་ངག་འབྱུང༌། །དག་པས་བརྟགས་ཀྱང་ཀུན་ཀྱང་གཙང༌། །རྟོགས་པས་བསམ་པས་གང་ཡང་འགྲུབ། །ཞེས་སོ། །དེས་ན་མན་ངག་གི་གནད་ལ་བརྟེན་ནས་དོན་མ་ནོར་བར་རྟོགས་པ་ནི་མཆོག་ཏུ་གལ་ཆེ་སྟེ། དེ་ཉིད་ལས། མཁས་པ་མི་གཙོ་རྟོགས་པ་༼༢༩༥༽གཙོ། །མཁས་པ་ཚིག་གི་ཐན་ཡིན་ནོ། །རྟོགས་པས་ཆོས་ཉིད་ཀློང་ན་འཕྱོ། །བཤད་པ་མི་གཙོ་བསྒོམ་པ་གཙོ། །བཤད་པའི་ཚིག་གི་བཤད་ར་ཡིན། །བསྒོམས་པས་ལྷ་དང་གཉིས་སུ་མེད། །བསྒྲུབ་པ་བས་ཀྱང་རྟོགས་པ་གཙོ། །རྟོགས་པ་གདེང་དུ་མ་ཆུད་ན། །བསྒྲུབ་པ་རྟོག་པའི་རྒྱུན་ལ་བསྒྲུབ། །བསྒོམ་པ་མཚན་མའི་ངང་ལ་བསྒོམ། །རྩོལ་བ་ཉོན་མོངས་ཞེན་པ་ཚོལ། །རྟོགས་པ་ཡེ་ནས་ཆེ་བ་ནི། །སྣང་སྲིད་རྟོགས་པས་ཡེ་ཤེས་ཆེ། །ཕྱི་ནང་རྟོགས་པས་ཐིག་ལེ་ཆེ། །ཆེ་ཆུང་རྟོགས་པས་མཉམ་ཉིད་ཆེ། །ཡང་དག་རྟོགས་པས་ཡེ་ཤེས་ཆེ། །བཟང་ངན་རྟོགས་པས་བདེ་ཆེན་ཆེ། །བྱ་བཙལ་རྟོགས་པས་བདེ་ཆེན་ཆེ། །བདེ་ཆེན་རྟོགས་པས་བྱང་ཆུབ་ཆེ། །རྟོགས་པའི་གླང་ཆེན་ཕྱོགས་རིས་མེད། །ཡང་དག་དོན་ལྡན་བསྙེན་བསྲིང་མེད། །བདེན་པའི་དོན་འཆང་འཛིན་རྟོག་མེད། །རང་བྱུང་རང་ཤར་བྱ་བཙལ་མེད། །ཐར་པའི་གནས་རིས་སྤང་ལེན་མེད། །དབྱིངས་ཀྱི་བདེ་གདལ་ཕྱོགས་རིས་མེད། །རྟོགས་ན་བཅོས་མེད་སྙིང་པོ་རྟོགས། །སྟོན་ན་རང་བྱུང་འབྲས་བུ་སྟོན། །ཐོབ་ན་རྣམ་དག་བཅོས་མེད་ཐོབ། །ཉི་མ་ཤར་བས་མུན་པ་སངས། །ཞེས་པ་ལ་སོགས་ཤིན་ཏུ་མང་ངོ༌།།

བཞི་པ་མཇུག་བསྡུ་བ་ནི།

གྲོགས་པོ་དག ཅེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་དག་ནི་ཚེགས་ཆུང་ལ་དོན་ཆེ་བ་ཉིད་དུ་ཤེས་པར་བྱའོ། །དེ་སྐད་ཅེས་སྨྲས་པས།

དམན་པ་དམ་པ་རྣམས་བློ་དང་ལྡན། གྲོས་ཀྱི་ཆོད་དེ་ཐབས་ཀྱིས་ཟིན་པར་གྱུར་ཏོ།།

གྲོགས་པོ་དག ཅེས་བོས་ནས། ཇི་སྐད་བགྲོས་པ་དེ་དག་ནི་ཚེགས་ཆུང་ལ་དོན་ཆེ་བ་མན་ངག་གི་ངོ་བོ་ཉིད་དུ་ཡང་དག་པར་ཤེས་ཤིང་རིག་པར་བྱའོ། །དེ་སྐད་ཅེས་སྟོན་པ་གསང་བདག་ཆེན་པོས་སྨྲས་ཏེ་བཀའ་སྩལ་པས། དམན་པ་དམ་པ་རྣམས་རྟོགས་པའི་བློ་དང་ལྡན། ཤེས་བྱ་གྲོས་ཀྱིས་ཆོད་དེ། མན་ངག་གི་ཐབས་ཀྱིས་ཟིན་ཏེ་གོ་ཞིང་རྟོགས་པའི་ཡོན་ཏན་དང་ལྡན་པར་གྱུར་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོང་པ་འདུས་པའི་མདོ་ཆེན་པོ་ལས།

དོན་ངེས་པར་བསྒྲུབ་པའི་ལེའུ་སྟེ་བདུན་ཅུ་བཞི་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྟོགས་པའི་མན་ངག་གིས་འབྲས་བུའི་དོན་ཆེན་པོ་ངེས་པར་སྒྲུབ་པ་ཞེས་བྱ་བའི་ལེའུ་སྟེ་བདུན་ཅུ་རྩ་བཞི་པ་ཉིད་རྣམ་པར་བཤད་དེ་ལེགས་པར་བཀྲོལ་བའོ།། །།

ལེའུ་དོན་ལྔ་པ་སངས་རྒྱས་ཀུན་གྱི་དགོངས་པ་འདུས་པ།

༈ བཅུ་པ་མདོ་དོན་གཅིག་ཏུ་བསྡུ་བ་ལ་བསླབ་པ་ཚོང་པ་ཁེ་སྤོགས་སྡུད་པ་ལྟར་བཤད་པ་ལ་བཞི་སྟེ། མདོར་བསྟན་པ། རྒྱས་པར་བཤད་པ། བསླབ་པ་གཅེས་པར་གདམས་པ། ཞབས་བསྡུ་བའོ། །དང་པོ་ནི།

དེ་ནས་ཡང༌། ཞེས་པ་ནས། འདི་ལྟ་སྟེ། ༼༢༩༦༽ཞེས་པའི་བར་གྱིས་བསྟན་ཏེ།

དེ་ནས་ཡང་གསང་བ་པའི་བདག་པོ་དེས། ལངྐའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ལ་ཤིན་ཏུ་རྔོམ་བརྗིད་ཚུལ་དུ་བོས་ཏེ་སྨྲས་པ། ཀྱེ་གྲོགས་པོ་དག་མདོ་གཅིག་ཏུ་འདུས་པ་ནི་གང་ཞེ་ན། འདི་ལྟ་སྟེ།

ལེའུ་འདིས་ངེས་དོན་སྟོན་ནོ། །དེ་ནས་ཡང་སྐྱེས་བུ་ཆེན་པོ་གསང་བ་པའི་བདག་པོ་དེས། ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་རྣམས་ལ་སྐུ་ཤིན་ཏུ་རྔམས་བརྗིད་ཀྱི་ཚུལ་དུ་བོས་ཏེ་སྨྲས་པ། ཀྱེ་གྲོགས་པོ་དམ་པ་དག མདོ་དོན་གཅིག་ཏུ་འདུས་པའི་བསླབ་པ་ཆེན་པོ་བཅུ་པའི་ངོ་བོ་ཉེ་བར་བསྟན་པ་ནི་གང་ཞེ་ན། འདི་ལྟ་སྟེ། ཞེས་པའོ།།

གཉིས་པ་རྒྱས་པར་བཤད་པ་ལ་ལྔ་སྟེ། སྐུ་ལྔའི་དགོངས་པ་གཅིག་ཏུ་བསྡུས་ཏེ་བསྟན་པ། རིགས་ལྔའི་དགོངས་པ་གཅིག་ཏུ་བསྡུས་ཏེ་བསྟན་པ། ཞིང་ཁམས་ལྔ་བཅུ་རྩ་བརྒྱད་ཀྱི་སྒྲོན་མའི་དགོངས་པ་གཅིག་ཏུ་བསྡུས་ཏེ་བསྟན་པ། ཞིང་ཁམས་བསམ་གྱིས་མི་ཁྱབ་པའི་སྒྲོན་མའི་དགོངས་པ་གཅིག་ཏུ་བསྡུས་ཏེ་བསྟན་པ། དེ་བཞིན་གཤེགས་པ་ཐམས་ཅད་ཀྱི་དགོངས་པ་བྱ་བ་ མེད་པ་ཡེ་ནས་སངས་རྒྱས་པར་བསྡུས་ཏེ་བསྟན་པའོ། །དང་པོ་ནི།

འདི་སྐད་བདག ་གིས། ཞེས་པ་ནས། རྒྱུན་གྱི་འབྱུང་བ་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཞེས་པའི་བར་གྱིས་བསྟན་ཏེ།

འདི་སྐད་བདག་གིས་ཐོས་པའི་དུས་གཅིག་ན། དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས། ངོ་བོ་ཉིད་རྣམ་པར་དག་པའི་དེ་བཞིན་གཤེགས་པ་ཐམས་ཅད་འདུས་པར་གྱུར་ནས། དེ་བཞིན་གཤེགས་པ་ཐམས་ཅད་ཀྱིས། དེ་བཞིན་གཤེགས་པ་ཐམས་ཀྱི་དགོངས་པ་གཅིག་ཏུ་འདུས་པར་བཤད་པ། ཆོས་ཉིད་རྣམ་པར་དག་པས་ན། ཆོས་ཀུན་རང་བཞིན་རྣམ་པར་དག །དེ་བཞིན་བཤེགས་པ་ཐམས་ཅད་ཀྱི། །ཐུགས་དམ་དབྱིག་མཆོག་རབ་ཉིད་དོ། །ཞེས་བཅོམ་ལྡན་འདས་ངོ་བོ་ཉིད་དག་པ་ལས་དེ་སྐད་ཅེས་འབྱུང་བའོ། །དེ་ལྟར་ན་ཡང་འདི་ལྟ་སྟེ། །མི་ཕྱེད་རྡོ་རྗེ་དམ་ཚིག་ནི། །རྡོ་རྗེ་དེ་བཞིན་ཉིད་ལས་བྱུང་། །ཆོས་ཉིད་རྡོ་རྗེའི་དམ་ཚིག་ནི། །གྲུབ་ན་འཇིག་པའི་དུས་མེད་དོ། །གྲོགས་པོ་དག་བཅོམ་ལྡན་འདས་རྣམ་པར་དག་པའི་ངོ་བོ་ཉིད་ལས་དེ་སྐད་ཅེས་གསུངས་སོ། །གྲོགས་པོ་དག་ཡང་འདི་ལྟ་སྟེ། རྒྱལ་བ་ཀུན་གྱི་ཐུགས་དམ་ནི། །ཐམས་ཅད་དམ་པ་དེ་ཉིད་ལས། །མི་གཞན་གཞན་མེད་ཡོད་མ་ཡིན། །དེ་ལས་གང་ཡང་འདའ་མི་འགྱུར། །བཅོམ་ལྡན་འདས་རྫོགས་ལོངས་སྤྱོད་པའི་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཡང་གྲོགས་པོ་དག་འདི་ལྟ་སྟེ། དམ་པ་རྣམས་ཀྱིས་གསུང་བའི་ཚིག །རྡོ་རྗེ་གོ་ཆ་དམ་བཅས་པ། །ཤིན་ཏུ་དམ་པའི་ཐ་ཚིག་འདི། །གལ་ཏེ་འདས་ན་འཚིག་པར་འགྱུར། །བཅོམ་ལྡན་འདས་གསང་བའི་སྐུ་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཡང་གྲོགས་པོ་དག་འདི་ལྟ་སྟེ། རྒྱལ་བ་རྣམས་ཀྱི་དམ་པ་འདི། །བསྲུང་བའི་དམ་ཚིག་མཐའ་ཡས་ཀུན། །ཐམས་ཅད་ཐམས་ཅད་བསྲུང་བ་སྟེ། །བསྲུང་བ་འདི་ནི་རྙེད་པར་དཀའ་འོ། །བཅོམ་ལྡན་འདས་རྒྱུན་གྱི་འབྱུང་བ་ངོ་བོ་ཉིད་དག་པས་དེ་སྐད་ཅེས་གསུངས་སོ།།

ལུང་བསྟན་བརྒྱུད་པའི་གླེང་གཞིའི་དབང་དུ་འདི་སྐད་བདག་གིས་ཐོས་པའི་དུས་གཅིག་ན། ཞེས་གསང་བདག་ཆེན་པོ་ཉིད་ཀྱིས་སྐུ་གསུམ་མམ་བཞི་དང་ངོ་བོ་ཉིད་ཀྱི་སྐུ་ལས་ཐོས་པ་ཉིད་འཆད་པ་སྟེ་དེ་དག་བཤད་པ་བཞིན་འགྲེལ་ཏོ། །དེ་ཡང་རྒྱལ་བ་རེ་རེའི་དགོངས་པའི་མདོ་དོན་བསྡུས་པས་མཚན་ངེས་པར་འགྲུབ་པ་ནི། དེ་ཁོ་ན་ཉིད་ལྷུན་གྱིས་གྲུབ་པའི་ལམ་དང་འབྲས་བུ་རིལ་གྱི་དངོས་གཞི་བས་དེར་འདུས་པ་ཐུན་མོང་དུ་བསྟན་པའི་ཕྱིར། དེ་བཞིན་གཤེགས་པ་སྐུ་ལྔ་ཐམས་ཅད་ཀྱི་དགོངས་པའི་གསང་བ་དཀྱིལ་འཁོར་གསུམ་དབྱེར་མེད་པར་ཆོས་ཉིད་རང་སྣང་དུ་མངོན་པར་གྱུར་པས་བཅོས་ལྡན་འདས་ངོ་བོ་ཉིད་དག་པའི་ཆོས་ཉིད་ཀྱི་སྐུ་མ་འདྲེས་ཡོངས་རྫོགས་དག་པ་གཉིས་ལྡན་གྱི་གསང་སྔགས་ཇི་བཞིན་པ་ནི་རྒྱལ་བའི་སྤྱི་མྱེས་དམ་པར་གྱུར་པས། དབྱིངས་རྣམ་པར་དག་པ་ཆེན་པོ་དེ་ཉིད་དུ་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀུན་གྱི་དགོངས་པའི་དངོས་གཞི་རབ་ཏུ་གསང་བ་མ་ལུས་པ་ཀུན་འདུས་ཤིང་རྫོགས་ལ་མཐའ་རིལ་ངང་གིས་དག་པའི་ངོ་བོར་གཅིག་དང་དུ་མ་ལས་འདས་པར་གྱུར་པའིཀློང་ཆེན་པོ་ནས། རྒྱུད་དག་པའི་དེ་བཞིན་གཤེགས་པ་རྒྱལ་༼༢༩༧༽བ་སྐྱོབ་པའི་དབང་ཕྱུག་ཐམས་ཅད་ཀྱིས་ཀྱང་དགོངས་པ་དེ་ཁོ་ན་ཉིད་ཀྱི་ངང་དེར་སོན་པར་གྱུར་ཏེ། རྒྱལ་བ་དེ་དག་རིལ་གྱིས། དེ་བཞིན་གཤེགས་པ་ཐམས་ཅད་ཀྱི་དགོངས་པ་ཆོས་རྣམས་ཀྱི་དེ་ཁོ་ན་གཅིག་ཏུ་འདུས་པར་གྱུར་པའི་དོན་མཆོག་རབ་ཏུ་གསང་བ་ཉིད་ཇི་ལྟར་བཀའ་སྩལ་པ་བཞིན་དུ་མ་ནོར་བར་བཤད་པར་མཛད་པ་ནི། རང་བཞིན་གྱི་གཏན་ཚིགས་ལ་བརྟེན་ནས་དངོས་པོ་རྣམས་ཀྱི་ཆོས་ཉིད་དེ་ཁོ་ན་ཉིད་རང་རིག་པ་ཉིད་ནི་མཐའ་ཀུན་ལས་གྲོལ་བའི་རྣམ་པར་དག་པ་ཡིན་པས་ན་ཆོས་ཅན་ཐམས་ཅད་ཀུན་ཀྱང་དེ་ལྟར་རང་བཞིན་རྣམ་པར་དག་པ་ཡིན་ཏེ་ཆུ་གཤེར་བ་ཡིན་པས་རླན་དང་ཆབ་རོམ་ཡང་གཤེར་བ་ལྟ་བུའོ། །དོན་དེ་ནི་རྒྱལ་བ་དེ་བཞིན་གཤེགས་པ་ཐམས་ཅད་ཀྱི་ཐུགས་དམ་མཐར་ཐུག་གི་དབྱིངས་མཆོག་དགོངས་པའི་ཞེ་ཕུགས་རབ་དང་ཁྱད་པར་དུ་གྱུར་པ་ཉིད་དོ། །ཞེས་བཅོམ་ལྡན་འདས་ངོ་བོ་ཉིད་ཀྱི་སྐུ་ཤིན་ཏུ་རྣམ་པར་དག་པ་ལས་རང་བཞིན་མཉམ་པ་ཆེན་པོའི་དགོངས་པ་དེ་སྐད་ཅེས་འབྱུང་བའོ། །དེ་ལྟར་ན་ཡང་འདི་ལྟ་སྟེ། དབྱིངས་དང་ཡེ་ཤེས་དུས་གསུམ་དུ་རང་གི་ངོ་བོས་དབྱེར་མི་ཕྱེད་པ་རྡོ་རྗེ་ལྟ་བུར་འདུ་འབྲལ་མེད་པའི་དམ་ཚིག་ཆེན་པོ་ནི་སྣང་སྟོང་གཉིས་སུ་མེད་པའི་རྡོ་རྗེ་གསང་བའི་དེ་བཞིན་ཉིད་ཀྱི་ངང་ལས་རང་བྱུང་རང་ཤར་བའི་དེ་ཉིད་ཡིན་པས་རྒྱུ་འབྲས་མེད་པའོ། །དེ་ཡང་རང་གི་སེམས་ཀྱི་ཆོས་ཉིད་མི་ཕྱེད་རྡོ་རྗེ་དམ་ཚིག་ཏུ་ངེས་ནས་དགོངས་པ་དེ་ཉིད་ཇི་ལྟ་བར་ནི་མངོན་དུ་གྱུར་ཏེ་རང་རིག་འདུས་མ་བྱས་པའི་ངང་དུ་ལྷུན་གྱིས་གྲུབ་པར་རྟོགས་ན་འཕོ་འགྱུར་མེད་པས་ནམ་ཡང་འདུས་བྱས་ལྟར་འཇིག་པའི་དུས་མེད་པ་ཉིད་དོ། །གྲོགས་པོ་དག བཅོམ་ལྡན་འདས་ཆོས་ཀྱི་སྐུ་རྣམ་པར་དག་པའི་ངོ་བོ་ཉིད་ལས་ཆོས་ཉིད་འགྱུར་བ་མེད་པའི་དགོངས་པ་དེ་སྐད་ཅེས་གསུངས་སོ། །གྲོགས་པོ་དག དེ་ནས་ཡང་འདི་ལྟ་སྟེ། དུས་གསུམ་གྱི་རྒྱལ་བ་ཀུན་གྱི་དགོངས་པའི་ཐུགས་དམ་ཆེན་པོ་ནི། འཁོར་འདས་ཀྱི་དངོས་པོ་གཉིས་ཀྱི་ལོངས་སྤྱོད་ཐམས་ཅད་སེམས་ཀྱི་ཆོས་ཉིད་ཀྱི་རང་སྣང་དམ་པ་དེ་ཁོ་ན་ཉིད་ལས་རང་ཤར་ཞིང་དེ་ཉིད་དུ་རྫོགས་པས་ཐམས་ཅད་སེམས་ཀྱི་དབྱིངས་ལས་མི་གཞན་ཏེ་སེམས་ཉིད་ལས་གཞན་དུ་གྱུར་པའི་ཆོས་དོན་ལ་མེད་པས་བཙལ་ཡང་རྙེད་པ་ཡོད་པ་མ་ཡིན་ནོ། །དེ་ལྟ་བུའི་གཉིས་མེད་ཡུལ་དང་བྲལ་བའི་རོལ་པ་དེ་ལས་གང་དུ་ཡང་འདའ་བར་མི་འགྱུར་བར་རང་སྣང་བདེ་བ་ཆེན་༼༢༩༨༽པོར་གསལ་བའོ། །ཞེས་བཅོམ་ལྡན་འདས་རྫོགས་ལོངས་སྤྱོད་པ་ངོ་བོ་ཉིད་དག་པས་རང་སྣང་སྦྱོང་ཡུལ་ཕྲལ་བའི་དགོངས་པ་དེ་སྐད་ཅེས་གསུངས་སོ། །ཡང་གྲོགས་པོ་དག འདི་ལྟ་སྟེ། རྒྱལ་བའི་དབང་པོ་དམ་པ་རྣམས་ཀྱིས་བཀའ་སྩལ་ཏེ་གསུངས་པའི་ཚིག་ནི་གང་ཞེ་ན། སྐུ་གསུང་ཐུགས་ཀྱི་རྡོ་རྗེ་མི་ཕྱེད་ཅིང་མི་འཇིག་པའི་ངོ་བོ་ལས་མི་གཡོ་བར་དོན་མཛད་པའི་གོ་ཆ་ཆེན་པོའི་ཐུགས་དམ་བཅས་པ་ཡི་ཤིན་ཏུ་དམ་པའི་རྒྱལ་བའི་ཐ་ཚིག་འདི་ལྟར་ནི་ལམ་པས་ཀྱང་གལ་ཏེ་མ་སྤྱད་པར་འདས་ན་ལྟུང་ཞིང་བསྲེག་སྟེ་འཚིག་པར་འགྱུར་བ་ཁོ་ནའོ། །ཞེས་བཅོམ་ལྡན་འདས་གསང་བའི་སྐུ་ངོ་བོ་ཉིད་དག་པས་གསང་དོན་འདའ་བར་དཀའ་བའི་དགོངས་པ་དེ་སྐད་ཅེས་གསུངས་ཏེ་འདི་ནི་རྡོ་རྗེའི་སྐུའི་དགོངས་པ་དང་ཡང་ཆ་མཐུན་པར་གསུངས་སོ། །ཡང་གྲོགས་པོ་དག འདི་ལྟ་སྟེ། ཐེག་པ་ཆེན་པོ་མཉམ་པའི་དམ་ཚིག་ནི་རྒྱལ་བ་རྣམས་ཀྱི་ཐུགས་དམ་དམ་པ་སྟེ། མཉམ་པའི་དམ་ཚིག་འདི་ལས་མ་ཉམས་པར་བསྲུངས་པས་ཐེག་པ་ཆེན་པོའི་སྒོ་སོ་སོར་གྲགས་པ་ཀུན་གྱི་འདུལ་བའི་སྡོམ་པ་དང་། དམ་ཚིག་དམ་པ་མཐའ་ཡས་པ་ཀུན་ཐམས་ཅད་ནས་ཐམས་ཅད་དུ་བསྲུངས་ཤིང་དག་པར་གྱུར་པ་སྟེ། དེ་ལྟར་བསྲུང་བ་འདི་ཡི་དོན་དང་འཕྲད་ཅིང་ངེས་པར་རྟོགས་པ་ནི་ཤིན་ཏུ་རྙེད་པར་དཀའ་བའོ། །ཞེས་བཅོམ་ལྡན་འདས་སྤྲུལ་པའི་སྐུ་རྒྱུན་གྱི་འབྱུང་བ་ངོ་བོ་ཉིད་དག་པས་དམ་ཚིག་ཆེན་པོའི་དགོངས་མདོ་དེ་སྐད་ཅེས་གསུངས་སོ། །དེ་དག་ནི་རྒྱལ་བ་སྐུ་ལྔས་མཉམ་པ་ཆེན་པོའི་དམ་ཚིག་བསྟན་པའོ།།

གཉིས་པ་རིགས་ལྔའི་དགོངས་པ་གཅིག་ཏུ་བསྡུས་ཏེ་བསྟན་པ་ནི།

ཀྱེ་གྲོགས་པོ་དག ཅེས་པ་ནས། ཡོན་ཏན་ཀུན་གྱི་འབྱུང་གནས་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཅེས་པའི་བར་གྱིས་བསྟན་ཏེ།

ཀྱེ་གྲོགས་པོ་དག་ཡང་འདི་ལྟ་སྟེ། ཞེ་སྡང་ངོ་བོ་ཐ་དད་པ། །བྱང་ཆུབ་སེམས་སུ་མཉམ་པས་ན། །དེ་བཞིན་ཉིད་ལས་གཞན་མ་ཡིན། །མ་སྤངས་རྣམ་དག་རྡོ་རྗེ་དམ། །བཅོམ་ལྡན་འདས་སེམས་དཔའ་རྡོ་རྗེ་ངོ་བོ་ཉིད་དག་པས་དེ་སྐད་ཅེས་གསུངས་སོ། །གྲོགས་པོ་དག་ཡང་འདི་ལྟ་སྟེ། །འདོད་དང་ཆགས་པའི་ཡུལ་ཉིད་ནི། །རང་བཞིན་གང་ཡིན་དེ་བཞིན་ཉིད། །ལོངས་སྤྱོད་མྱོང་ཚོར་རྣམ་པར་དག །སྤྱོད་ལ་མ་ཆགས་རྡོ་རྗེ་དམ། །བཅོམ་ལྡན་འདས་འོད་མཐའ་ཡས་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཡང་འདི་ལྟ་སྟེ། ཐམས་ཅད་དེ་བཞིན་དེར་མཚུངས་པས། །ཁྱད་པར་བྱེ་བྲག་དབྱེར་མེད་པའི། །རྡོ་རྗེ་ནམ་མཁར་འོད་གསལ་བས། །རྨོངས་པའི་མུན་ནག་རྣམ་པར་དག །བཅོམ་ལྡན་འདས་སྣང་ཁྱབ་མཛད་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཡང་འདི་ལྟ་སྟེ། རྣམ་དག་ཐུགས་མཐའ་མུ་མེད་པས། །ཡངས་དོག་ཚིག་གི་ལམ་དང་བྲལ། །ཀུན་བཟང་ཡངས་པའི་ལམ་དུ་གཅིག །བདེ་ཆེན་ཀློང་ཡངས་རྡོ་རྗེ་དམ། །བཅོམ་ལྡན་འདས་ཐམས་ཅད་གྲུབ་པས་དེ་སྐད་ཅེས་གསུས་སོ། །ཡང་འདི་ལྟ་སྟེ། དེ་བཞིན་ཉིད་ལས་མེད་པས་ན། །ཡིན་དང་མ་ཡིན་གཉིས་ལས་འདས།། བདག་མེད་རྡོ་རྗེ་དེ་བཞིན་ཉིད། །ང་མེད་མི་འགྱུར་རྡོ་རྗེ་དམ། །བཅོམ་ལྡན་འདས་ཡོན་ཏན་ཀུན་གྱི་འབྱུང་གནས་ངོ་བོ་ཉིད་དག་པས་དེ་སྐད་ཅེས་གསུངས་སོ།།

ཀྱེ་གྲོགས་པོ་དག་ཅེས་བོས་ནས་ཡང་འདི་ལྟ་སྟེ་མི་སྤངས་པའི་དམ་ཚིག་འདུས་པ་གང་ཞེ་ན། རྡོ་རྗེ་སེམས་དཔའི་དགོངས་པ་ནི། ཞེ་སྡང་རིལ་གྱི་ངོ་བོ་གསང་བའི་དབྱིངས་ལས་ཐ་དད་པ་མ་ཡིན་ཏེ་རང་རིག་པ་མཐའ་ལས་བྲལ་བའི་བྱང་ཆུབ་ཀྱི་སེམས་སུ་མཉམ༌པས་ན་ཆོས་ཉིད་དེ་བཞིན་ཉིད་ལས་གཞན་པའི་རང་རྒྱུད་པ་མ་ཡིན་པས་དོན་ལ་གཉིས་སུ་མེད་པའོ། །དགོངས་པ་དེ་ལྟ་བུར་རྟོགས་ཏེ་ཞེ་སྡང་མ་སྤངས་བྲལ་བས་མནར་སེམས་ཀྱི་དངོས་པོ་བཅོམ་ནས་རང་རིག་པའི་ངང་དུ་རྣམ་པར་དག་པ་ནི་རྡོ་རྗེ་གསང་བའི་དམ་ཚིག་ཆེན་པོ་ཕུལ་དུ་བྱུང་བའོ། །༼༢༩༩༽ཞེས་བཅོམ་ལྡན་འདས་རྡོ་རྗེ་སེམས་དཔའ་ངོ་བོ་ཉིད་དག་པས་དེ་སྐད་ཅེས་གསུངས་སོ། །གྲོགས་པོ་དག ཡང་འདི་ལྟ་སྟེ། འོད་མཐའ་ཡས་ཀྱི་དགོངས་པ་ནི། འདོད་ཆགས་ཀྱི་ཤེས་པ་དང་ཆགས་པའི་ཡུལ་གྱི་ངོ་བོ་ཉིད་ན། རང་བཞིན་ཡེ་ནས་མ་བཅོས་པའི་ཆོས་ཉིད་དུ་ཀ་ནས་དག་པ་གང་ཡིན་པ་སྟེ། དོན་ལ་གཉིས་སུ་མེད་པའི་དེ་བཞིན་ཉིད་བྱང་ཆུབ་ཀྱི་སེམས་སུ་རྟོགས་པ་ནི། འདོད་པའི་ལོངས་སྤྱོད་ལ་རོ་མྱོང་བ་དང་ཚོར་བའི་ངོ་བོ་མ་སྤངས་བྲལ་ཏེ་རྣམ་པར་དག་པས་སྤྱོད་ལ་མ་ཆགས་པའི་ཡེ་ཤེས་དང་ལྡན་ནས་ཟིན་ཆགས་ཀྱི་སྐྱོན་མེད་པ་ཉིད་རྡོ་རྗེ་གསང་བའི་དམ་ཚིག་དམ་པ་དེ་ཁོ་ཉིད་དོ། །ཞེས་བཅོམ་ལྡན་འདས་འོད་མཐའ་ཡས་ངོ་བོ་ཉིད་རྣམ་པར་དག་པས་དེ་སྐད་ཅེས་གསུངས་སོ། །ཡང་འདི་ལྟ་སྟེ། རྣམ་པར་སྣང་མཛད་ཀྱི་དགོངས་པ་ནི། ཐ་སྙད་ཐམས་ཅད་རིལ་བྱང་ཆུབ་ཀྱི་སེམས་དེ་བཞིན་ཉིད་དེར་མཚུངས་ཤིང་ངོ་བོ་དེ་ཁོ་ན་ཉིད་དུ་གཅིག་པས་ཁྱད་པར་སོ་སོའི་བྱེ་བྲག་གི་རིས་སུ་འབྱེད་པ་དང་བྲལ་བས་དབྱེར་མེད་ཆེན་པོ་མཚན་ཉིད་སོ་སོར་མི་ཕྱེད་པའི་རྡོ་རྗེ་གསང་བའི་ནམ་མཁའ་གཉིས་སུ་མེད་པར་འོད་གསལ་བའི་ཡེ་ཤེས་ཡང་དག་པའི་གཏི་མུག་རྣམ་པར་དག་པས་རྨོངས་པའིམུན་ནག་རྣམ་པར་གསལ་ཏེ་མ་རིག་པ་མ་སྤངས་བྲལ་བ་ཉིད་དུ་བསྟན་པའོ། །བཅོམ་ལྡན་འདས་སྣང་ཁྱབ་མཛད་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཡང་དོན་ཡོད་གྲུབ་པའི་དགོངས་པ་ནི་འདི་ལྟ་སྟེ། སེམས་ཀྱི་དེ་ཁོ་ན་ཉིད་སྤྲོས་པ་དང་བྲལ་བས་རྣམ་པར་དག་པ་ལ་ཕྱོགས་རིས་སུ་ཐུག་པའི་མཐའ༌ཡི་མུ་མེད་ཅིང་རྒྱ་ཁྱོན་དག་བྲལ་བས་ཀློང་ཡངས་པ་ལ་ཕྲག་དོག་དང་དེ་ཉིད་སྤངས་པར་བརྗོད་པའི་ཚིག་གི་ལམ་གྱི་བརྗོད་པ་དང་ཡང་བྲལ་ཏེ་སྤྱོད་ཡུལ་དག་པས་ཀུན་ཏུ་བཟང་པོ་ལ་གང་ཡང་མ་བཀོལ་བར་ཡངས་པའི་དེ་བཞིན་ཉིད་ཀྱི་ངང་རྟོགས་པའི་ལམ་དུ་ཐམས་ཅད་དུ་བྱང་ཆུབ་ཀྱི་སེམས་སུ་གཅིག་པས་ཕྲག་དོག་མ་སྤངས་བྲལ་ཏེ་བདེ་བ་ཆེན་པོའི་ཀློང་ཡངས་པར་དག་པས་སྤངས་པ་ཆེན་པོ་སྟེ། དེ་ཉིད་རྡོ་རྗེ་གསང་བའི་ཐེག་པ་ཆེན་པོའི་ཐབས་ཀྱི་དམ༌ཚིག་དམ་པའོ། །ཞེས་བཅོམ་ལྡན་འདས་ཐམས་ཅད་གྲུབ་པ་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཡང་རིན་ཆེན་འབྱུང་ལྡན་གྱི་དགོངས་པ་ནི་འདི་ལྟ་སྟེ། དངོས་པོ་གཉིས་པ་རིལ་མཉམ་པའི་དེ་བཞིན་ཉིད་དུ་བྱུང་ཐེབས་ཏེ་བྱང་ཆུབ་སེམས་ཀྱི་ངང་ལས་མེད་༼༣༠༠༽པས་ན་ང་ཡི་ལྟར་ཡིན་དང་མ་ཡིན་བྱ་བའི་བདེན་རྫུན་གྱི་ང་རྒྱལ་གཉིས་ལས་འདས་ཏེ་ངང་གིས་བྲལ་བ་ལ་ང་ བདག་གི་ངོ་བོ་མེད་པར་རྟོགས་ནས་རྟོག་པས་མ་ཟིན་པ ་ནི། མི་ཕྱེད་པའི་རྡོ་རྗེ་གསང་བའི་ངོ་བོ་མ་བཅོས་མ་བསླད་པའི་དེ་བཞིན་ཉིད་ཡིན་པས་དེ་ལ་ཁེངས་དྲེགས་ཀྱི་ང་ བདག་ཏུ་འཛིན་པ་མེད ་པས་ངོ་བོ་མི་འགྱུར་བ་ནི་ང་རྒྱལ་ཆེན་པོའི་རྡོ་རྗེ་ཐབས་ཀྱི་དམ་ཚིག་གོ །ཞེས་བཅོམ་ལྡན་འདས་ཡོན་ཏན་ཀུན་གྱི་འབྱུང་གནས་ངོ་བོ་ཉིད་དག་པས་དེ་སྐད་ཅེས་གསུངས་སོ། །འོ་ན་རིགས་ཀྱི་སྐུ་ལྔ་པོ་དེ་དག་བསྟན་པ་གཅིག་ཏུ་མཐུན་པར་གསུངས་ན། སྐུ་ལྔར་ཕྱེ་བ་ལ་དགོས་པ་མེད་དོ་ཞེ་ན། འཁོར་སོ་སོ་ལ་རིགས་སོ་སོས་འདུལ་བའི་དབང་གིས་བསྟན་པར་ཟད་ཀྱི། དོན་སོ་སོར་མི་གནས་པས་འགལ་བ་མེད་དོ། །དེ་བས་ན། འདི་དག་གཞི་དམ་ཚིག་གིས་གཟུང་བར་བསླབ་པའི་མདོ་འདུས་པར་ཡང་འགྲེལ་ཏོ།།

གསུམ་པ་ཞིང་ཁམས་ལྔ་བཅུ་རྩ་བརྒྱད་ཀྱི་སྒྲོན་མའི་དགོངས་པ་ལ་གསུམ་སྟེ། སེམས་ཉིད་ཀྱི་དཀྱིལ་འཁོར་གསུམ་དུ་བསྟན་པ། སེམས་ཉིད་གླེང་གཞིར་བསྟན་པ། སེམས་ཉིད་མཚན་ཉིད་གསུམ་དུ་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གྲོགས་པོ་དག་གཞན་ཡང༌། ཞེས་པ་ནས། དྲི་མེད་སྒྲ་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་གཞན་ཡང་འདི་ལྟ་སྟེ། ཡོད་མཐོང་སྣང་གྲགས་ཆོས་སོ་ཅོག །ཐ་དད་སྣ་ཚོགས་མཐའ་ཡས་ཀྱང་། །རང་བཞིན་མ་བཅོས་དེ་བཞིན་ཉིད། །མ་བསྒྲིལ་འོད་གསལ་རྣམ་དག་ཞིང། །བཅོམ་ལྡན་འདས་དྲི་མེད་སྒྲའི་ངོ་བོ་ཉིད་དག་པས་དེ་སྐད་ཅེས་གསུངས་སོ།།

གྲོགས་པ་དག གཞན་ཡང་དྲི་མེད་སྒྲའི་དགོངས་པ་གང་ཞེ་ན་འདི་ལྟ་སྟེ། དབང་པོ་དྲུག་དང་ཡུལ་དྲུག་ལ་སོགས་པ་ཡོད་མཐོང་སྣང་གྲགས་ཀྱི་ཆོས་འཁྲུལ་པ་ལ་སྣང་ཞིང་གྲགས་སོ་ཅོག་གི་ཆོས་ཅན་རྣམས་ལ་བརྟགས་པས་རང་བཞིན་ལྷུན་གྲུབ་ཀྱི་རོལ་པ་ལ་ངོ་བོ་ཐ་དད་མི་མཐུན་པ་སྣ་ཚོགས་མཐའ་ཡས་ཇི་སྙེད་པ་མང་པོར་སྣང་ཀྱང༌། རིལ་གྱི་རང་བཞིན་ཡེ་ཇི་བཞིན་པའི་ངང་དུ་འཕྲལ་དུ་མ་བཅོས་མ་བྱས་པར་ཡེ་ནས་དག་པའི་དེ་ཁོ་ན་ཉིད་གསང་བའི་ཆོས་ཉིད་ཀྱི་དབྱིངས་དེ་བཞིན་ཉིད་དུ་དྲི་མས་མ་སྒྲིབ་པར་གཉིས་སུ་མེད་པའི་བྱང་ཆུབ་སེམས་སུ་འོད་གསལ་བར་གྱུར་པས་རང་སྣང་རྣམ་པར་དག་པའི་རྒྱལ་བའི་ཞིང་ཁམས་ཀྱི་བཀོད་པའང་དེ་ལྟར་དཀྱིལ་འཁོར་གསུམ་གྱི་དེ་བཞིན་ཉིད་དུ་དག་པ་གང་ཡིན་པའོ། །ཞེས་བཅོས་ལྡན་འདས་དྲི་མེད་སྒྲ་ངོ་བོ་ཉིད་དག་པས་དེ་སྐད་ཅེས་གསུངས་སོ།།

གཉིས་པ་རྒྱས་པར་བཤད་པ་ལ་གསུམ་སྟེ། རྩ་བ་བྱང་ཆུབ་༼༣༠༡༽སེམས་ཀྱི་དཀྱིལ་འཁོར། ཡེ་ཇི་བཞིན་པའི་དཀྱིལ་འཁོར། རང་བཞིན་ལྷུན་གྱིས་གྲུབ་པའི་དཀྱིལ་འཁོར་རོ། །དང་པོ་ནི།

དེ་བཞིན་དུ་འདི་ལྟ་སྟེ། ཞེས་པ་ནས། དཀོན་མཆོག་སྤྲིན་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཞེས་པའི་བར་གྱིས་བསྟན་ཏེ།

དེ་བཞིན་དུ་འདི་ལྟ་སྟེ། ཀུན་ཏུ་སྣང་བའི་ཡེ་ཤེས་འདི། །སུས་ཀྱང་མ་བྱས་རང་བྱུང་སྟེ། །ཐམས་ཅད་འབྱུང་བའི་རྩ་བས་ན། །རང་ལས་བྱུང་བའི་དཀྱིལ་འཁོར་རྫོགས། །བཅོམ་ལྡན་འདས་དཀོན་མཆོག་སྤྲིན་ངོ་བོ་ཉིད་དག་པས་དེ་སྐད་ཅེས་གསུངས་སོ།།

དེ་བཞིན་དུ་རྒྱལ་བ་དཀོན་མཆོག་སྤྲིན་གྱི་དགོངས་པ་ནི་འདི་ལྟ་སྟེ། སྣ་ཚོགས་པའི་དངོས་པོ་ཀུན་ཏུ་མ་འགགས་པར་རང་ཤར་ཞིང་སྣང་བའི་ཡེ་ཤེས་འདི་ནི་སུས་ཀྱང་མ་བྱས་པར་རང་བྱུང་གི་ཡེ་ཤེས་ཆེན་པོ་སྟེ། ཐམས་ཅད་དེ་ཉིད་དུ་འདུས་སོ། །དེས་ན་ཡེ་ཤེས་ཆེན་པོ་ནི་ཆོས་ཐམས་ཅད་ཀྱི་འབྱུང་བའི་གནས་ཀྱི་རྩ་བ་ཡིན་པས་ན། ཆོས་སོ་ཅོག་ཐམས་ཅད་རང་རིག་པ་བྱང་ཆུབ་ཀྱི་སེམས་ལས་རང་བྱུང་བའི་ཡེ་ཤེས་ཉིད་དུ་གཉིས་སུ་མེད་པར་རང་འཆར་བ་ནི་སྙིང་པོ་དང་ཆོས་ཐམས་ཅད་འདུས་པས་དཀྱིལ་འཁོར་ཆེན་པོར་རྫོགས་པའི་རྩ་བའོ། །ཞེས་བཅོམ་ལྡན་འདས་དཀོན་མཆོག་སྤྲིན་ངོ་བོ་ཉིད་དག་པས་དེ་སྐད་ཅེས་གསུངས་སོ།།

གཉིས་པ་ཡེ་ཇི་བཞིན་པའི་དཀྱིལ་འཁོར་ནི།

གཞན་ཡང་དགོངས་པ། ཞེས་པ་ནས། བཀོད་པའི་འབྱུང་གནས་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཞེས་པའི་བར་གྱིས་བསྟན་ཏེ།

གཞན་ཡང་དགོངས་པ་རྣམ་པར་བཤད་པ་ནི་འདི་ལྟ་སྟེ། ཡེ་ནས་མ་ཅོས་ཇི་བཞིན་པ། །ཆོས་སོ་ཅོག་གི་སྙིང་པོ་སྟེ། །མེད་པ་ལས་བྱུང་སྣ་ཚོགས་སྣང་། །སྣང་མེད་དེ་བཞིན་དཀྱིལ་འཁོར་རྫོགས། །བཅོམ་ལྡན་འདས་བཀོད་པའི་འབྱུང་གནས་ངོ་བོ་ཉིད་དག་པས་དེ་སྐད་ཅེས་གསུངས་སོ།།

གཞན་ཡང་བཀོད་པའི་འབྱུང་གནས་ཀྱི་དགོངས་པ་རྣམ་པར་བཤད་པ་ནི་འདི་ལྟ་སྟེ། དེ་བཞིན་ཉིད་ནི་ཡེ་ནས་མ་བཅོས་པས་བྱེད་པ་པོ་མེད་ལ་རང་བཞིན་མ་བསླད་པས་ཇི་བཞིན་པ་སྣང་ཞིང་གྲགས་པའི་ཆོས་སོ་ཅོག་ཀུན་གྱི་ཡང་གསང་གི་རྩ་བའི་སྙིང་པོ་དམ་པ་སྟེ། དེའི་མཚན་ཉིད་ནི་ངོ་བོ་བསྟན་དུ་མེད་པ་ལས་རང་རྩལ་དུ་བྱུང་བའི་ཆོས་སྣ་ཚོགས་ཅིར་ཡང་སྣང་ལ། དེ་ཉིད་ལའང་ངོ་བོ་ལ་སྣང་བ་མེད་པས་ཐམས་ཅད་མ་བསྒོས་པ་ནི་ཡེ་ཇི་བཞིན་པ་དེ་བཞིན་ཉིད་ཀྱི་དཀྱིལ་འཁོར་རྫོགས་པའོ། །ཞེས་བཅོམ་ལྡན་འདས་བཀོད་པའི་འབྱུང་གནས་ངོ་བོ་ཉིད་དག་པས་དེ་སྐད་ཅེས་གསུངས་སོ།།

གསུམ་པ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ནི།

གཞན་ཡང་འདི་ལྟ་སྟེ། ཞེས་པ་ནས། སེང་གེ་སྒྲ་ངོ་བོ་ཉིད་དག་པས་དེ་སྐད་ཅེས་གསུངས་སོ། །ཞེས་པའི་བར་གྱིས་བསྟན་ཏེ།

གཞན་ཡང་འདི་ལྟ་སྟེ། རང་བྱུང་རིག་པའི་སེམས་ཉིད་ཀྱིས། །མ་བཅོས་ཆོས་ཉིད་དབྱིངས་ཀྱི་དོན། །ལྷུན་གྲུབ་ཐབས་དང་ཤེས་རབ་ལས། །ཡང་དག་རང་བཞིན་དཀྱིལ་འཁོར་གསལ། །བཅོམ་ལྡན་འདས་སེངྒེ་སྒྲ་ངོ་བོ་ཉིད་དག་པས་འདི་སྐད་ཅེས་གསུངས་སོ།།

གཞན་ཡང་སེང་གེའི་སྒྲའི་དགོངས་པ་ནི་འདི་ལྟ་སྟེ། དུས་གསུམ་དུ་འགག་པ་མེད་པར་རང་བྱུང་ཞིང་རང་གི་ངོ་བོ་རིག་པར་གསལ་བའི་སེམས་ཉིད་ཀྱིས་མ་བཅོས་མ་བསླད་པར་ཆོས་ཉིད་ཆེན་པོ་གསང་བའི་དབྱིངས་ཀྱི་དོན་ཉིད་ཐ་དད་པ་མེད་པར་གཉིས་མེད་དུ་ལྷུན་༼༣༠༢༽གྱིས་གྲུབ་པའི་ཡེ་ཤེས་ནི་དབྱིངས་དང་ཡེ་ཤེས་ཐབས་དང་ཤེས་རབ་གཉིས་སུ་མེད་པའི་རང་བཞིན་ཁོ་ན་སྟེ། དེ་ལྟར་གཉིས་སུ་མེད་པའི་ངང་ལས་ཡང་དག་པའི་དོན་མ་ནོར་བར་མ་འདྲེས་ལྷུན་རྫོགས་སུ་ཤར་བ་ནི་རང་བཞིན་གྱི་དཀྱིལ་འཁོར་རང་གསལ་དུ་རྫོགས་པ་སྟེ་རྩ་བའི་དཀྱིལ་འཁོར་རྣམ་གསུམ་ཡང་དེ་ཁོ་ན་ཉིད་དོ། །ཞེས་བཅོམ་ལྡན་འདས་སེང་གེ་སྒྲ་ངོ་བོ་ཉིད་དག་པས་དེ་སྐད་ཅེས་གསུངས་སོ།།

གཉིས་པ་སེམས་ཉིད་སྟོན་འཁོར་ཐ་དད་མེད་པར་གླེང་གཞིའི་མདོ་དོན་གཅིག་ཏུ་འདུ་བ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

གཞན་ཡང་བཅོམ་ལྡན་འདས་མཛེས་པའི་ཏོག ཅེས་པ་ནས། ཉིད་གླེང་ཁོ་ནར་ཟད། །ཅེས་གསུངས་སོ། །ཞེས་པའི་བར་ཚན་གཉིས་ཀྱིས་བསྟན་ཏེ།

གཞན་ཡང་བཅོམ་ལྡན་འདས་མཛེས་པའི་ཏོག་ངོ་བོ་ཉིད་དག་པས་གསུངས་པ། འཇིག་རྟེན་འཇིག་རྟེན་འདས་པ་ཡི། །བདེ་དང་མི་བདེ་རྣམ་པ་ཀུན། །དེ་བཞིན་ཉིད་ཀྱི་རོ་གཅིག་པས། །ཚོར་བ་བདེ་སྡུག་གང་ཡང་མེད། །ཅེས་གསུངས་སོ། །གཞན་ཡང་བཅོམ་ལྡན་འདས་མཛེས་པའི་རྒྱན་ངོ་བོ་ཉིད་དག་པས་དེ་སྐད་དུ། དེ་བཞིན་ཉིད་ཀྱི་དོན་བསྟན་དུ། །དེ་བཞིན་ཉིད་དུ་ཀུན་གཅིག་པས། །གང་གིས་གང་ལ་གང་ཞིག་བསྟན། །ཉིད་ལ་ཉིད་གླེང་ཁོ་ནར་ཟད། །ཅེས་གསུངས་སོ།།

གཞན་ཡང་བཅོམ་ལྡན་འདས་མཛེས་པའི་ཏོག་ངོ་བོ་ཉིད་དག་པས་ཉིད་ཀྱི་དགོངས་པ་གསུངས་པ། འཇིག་རྟེན་པའི་ཆོས་དང་འཇིག་རྟེན་ལས་འདས་པ་ཡི་ཆོས་རྣམས་ཀྱི། ཕྱི་མ་ལ་སྐྱེ་རྒ་ན་འཆི་དང༌། འཇིག་ཆགས་སྟོངས་གནས་དང་བཅས་པ་དག་བྲལ་བར་བདེ་ཞིང་སྐྱིད་པའི་ལྷུན་ལ་གནས་པ་དང༌། སྔ་མ་ལ་དེ་དག་གིས་མི་བདེ་བར་ཉམ་ཐག་པའི་རྣམ་པར་སྣང་བ་རིལ་ཀུན་གྱི་ངོ་བོ་ཡང་སེམས་ཀྱི་དེ་བཞིན་ཉིད་དེ་ཁོ་ན་ཉིད་དུ་དབྱེར་མེད་པར་རོ་གཅིག་ཏུ་གྱུར་པས་ཚོར་བ་བདེ་སྡུག་ཉིད་མ་འགགས་པར་གང་ཡང་དམིགས་སུ་མེད་པར་རང་རིག་པ་གཅིག་གི་ངོ་བོར་བསྟན་པ་ཡིན་ནོ། །ཞེས་གསུངས་སོ། །ཡང་བཅོམ་ལྡན་འདས་མཛེས་པའི་རྒྱན་ངོ་བོ་ཉིད་དག་པས་ཉིད་ཀྱི་དགོངས་པ་ནི་འདི་སྐད་དུ། གསང་སྔགས་ཇི་བཞིན་པ་དེ་བཞིན་ཉིད་ཀྱི་དོན་ནི་གླེང་གཞིའི་ངོ་བོར་བསྟན་དུ་མི་བཏུབ་སྟེ། ཇི་སྟེ་ཞེ་ན། སྟོན་པ་དང་འཁོར་རིལ་དེ་བཞིན་ཉིད་དེ་ཁོ་ན་ཉིད་དུ་ཀུན་ནས་མཉམ་པར་གཅིག་པས་ན། སྟོན་པ་གང་གིས་འཁོར་གང་ལ་ཆོས་གང་ཞིག་བསྟན་ཏེ་བཤད་པ་དང་བྲལ་བའོ། །འོ་ན་གཏན་བཤད་པ་འགོག་གོ་ཞེ་ན། སྟོན་འཁོར་སོ་སོར་སྣང་བ་ཉིད་ངོ་བོ་ཐ་དད་མེད་པས་ཉིད་ལ་ཉིད་གླེང་ཞིང་འཆད་པ་ཁོ་ནར་ཟད་དེ་གླེང་གཞི་ཡང་འདུས་སོ། །ཅེས་གསུངས་སོ།།

གཉིས་པ་རྒྱས་པར་བཤད་པ་ལ་གསུམ་སྟེ། དུས་ཀྱི་མཉམ་ཉིད་བཤད་པ། གནས་ཀྱི་རང་བཞིན་བསྟན་པ། བསྟན་པའི་དེ་ཉིད་བཤད་པའོ། །དང་པོ་ལ་གཉིས་ཏེ། དུས་ཀྱི་མཚན་ཉིད་མཉམ་པ་དངོས་བཤད་པ། དུས་བཞི་མཉམ་པར་རྟོགས་པའི་ཡོན་ཏན་བསྟན་༼༣༠༣༽པའོ། །དང་པོ་ནི།

གཞན་ཡང་བཅོམ་ལྡན་འདས་དྲིའི་རྒྱལ་པོ། ཞེས་པ་ནས། བསྐལ་པ་དེ་སྐད་ཅིག །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

གཞན་ཡང་བཅོམ་ལྡན་འདས་དྲིའི་རྒྱལ་པོ་ངོ་བོ་ཉིད་དག་པས་འདི་སྐད་དུ། དེ་བཞིན་ཉིད་ཀྱི་དབྱིངས་ཉིད་ལ། །དུས་གསུམ་དུས་བཞིར་མི་དམིགས་ཏེ། །ཡེ་ཤེས་རིག་པའི་ཁྱད་པར་ལས། །སྐད་ཅིག་བསྐལ་པ་དེ་སྐད་ཅིག །ཅེས་གསུངས་སོ།།

གཞན་ཡང་བཅོམ་ལྡན་འདས་དྲིའི་རྒྱལ་པོ་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། དེ་བཞིན་ཉིད་ཀྱི་གནས་ལུགས་མུ་མཐའ་དང་བྲལ་བའི་དབྱིངས་ཀྱི་ངང་ཉིད་ལ། སྔ་ཕྱིའི་དུས་ཀྱི་རྒྱུད་གསུམ་དང་དུས་གཞིར་སྣང་བ་མ་འགགས་ཀྱང་ངོ་བོ་མི་དམིགས་ཏེ་རང་བཞིན་གང་དུའང་མ་གྲུབ་དོན་རང་སྣང་གི་ཡེ་ཤེས་ཇི་ལྟ་བར་རིག་པའི་ངོ་བོ་རང་གསལ་དུ་ཁྱབ་ཅིང་གདལ་བའི་ཁྱད་པར་ལས། དུས་སྐད་ཅིག་དང་བསྐལ་པ་ཆེན་པོར་སྣང་བ་དང༌། དེ་ཡི་ཡུན་དང་སྐད་ཅིག་མ་ཀུན་སེམས་ཉིད་དུ་དབྱེར་མེད་ཡིན་པས་སྡུད་པ་པོས་ཀྱང་བཀའ་རྣམས་བསྡུ་བར་བཏུབ་པའོ། །ཞེས་གསུངས་སོ།།

གཉིས་པ་དུས་བཞི་མཉམ་པར་རྟོགས་པའི་ཡོན་ཏན་བསྟན་པ་ནི།

གཞན་ཡང་བཅོམ་ལྡན་འདས་སྙིང་རྗེའི། ཞེས་པ་ནས། ལྷུན་གྲུབ་ཚོགས་གཉིས་རྫོགས། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

གཞན་ཡང་བཅོམ་ལྡན་འདས་སྙིང་རྗེའི་རྒྱལ་པོ་ངོ་བོ་ཉིད་དག་པས་འདི་སྐད་དུ། འཁོར་བ་མྱ་ངན་འདས་རྟག་པ། །དེ་བཞིན་ཉིད་ཀྱི་དབྱིངས་ཉིད་དུ། །ཡེ་ནས་མྱ་ངན་འདས་པས་ན། །རང་བཞིན་ལྷུན་གྲུབ་ཚོགས་གཉིས་རྫོགས། །ཞེས་གསུངས་སོ།།

གཞན་ཡང་བཅོམ་ལྡན་འདས་སྙིང་རྗེའི་རྒྱལ་པོ་ངོ་བོ་ཉིད་དག་པས་ཉིད་ཀྱི་དགོངས་པ་ནི་འདི་སྐད་དུ། འཁོར་བ་དང་མྱ་ངན་ལས་འདས་པ་གཉིས་ཀྱི་དངོས་པོ་དང༌། དེ་གཉིས་དབྱེར་མེད་པའི་ཆོས་ཉིད་ཀྱི་ངོ་བོ་མི་འགྱུར་བས་རྟག་པ་ཆེན་པོ་ནི་དེ་བཞིན་ཉིད་དམ་དེ་ཁོ་ན་ཉིད་ཀྱི་དབྱིངས་རིལ་གྱི་འབྱུང་གནས་ཆེན་པོའི་ངོ་བོ་ཉིད་ཀྱི་ངང་དུ་རང་ཤར་ཏེ་ཡེ་ནས་མྱ་ངན་ལས་འདས་པར་གྱུར་པས་ན་སྲིད་པ་འཁོར་བའི་མིང་ཡང་མེད་པས་འབྲས་བུ་རང་བཞིན་ལྷུན་གྱིས་གྲུབ་སྟེ་ཚོགས་གཉིས་མ་བཙལ་བར་ཡེ་ནས་རྫོགས་པ་ཉིད་དོ། །ཞེས་གསུངས་སོ།།

གཉིས་པ་གནས་ཀྱི་རང་བཞིན་བསྟན་པ་ལ་གསུམ་སྟེ། ཕྱིའི་ཡུལ་སྐྱེ་མེད་ཆོས་ཀྱི་དབྱིངས་སུ་བསྟན་པ། ཞིང་ཁམས་ཆོས་ཉིད་ཀྱི་ཡོན་ཏན་རིན་པོ་ཆེའི་སྤྲིན་དུ་བཀོད་པར་བཤད་པ། གཞལ་ཡས་ཁང་དེ་བཞིན་ཉིད་ལས་རྒྱལ་བའི་ཕོ་བྲང་དུ་བཀོད་པར་བསྟན་པའོ། །དང་པོ་ནི།

ཡང་བཅོམ་ལྡན་འདས་དགའ་བའི་སྤྱན། ཞེས་པ་ནས། རྡོ་རྗེ་སྐྱེ་གནས་དམ། །ཞེས་གསུངས་སོ། །ཞེས་པའི་བར་དང༌།

ཡང་བཅོམ་ལྡན་འདས་དགའ་བའི་སྤྱན་ངོ་བོ་ཉིད་དག་པས་འདི་སྐད་དུ། ཆོས་སོ་ཅོག་གི་རང་བཞིན་ནི། །མ་སྐྱེས་པ་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །རིགས་མཆོག་རྡོ་རྗེ་སྐྱེ་གནས་དམ། །ཞེས་གསུངས་སོ།།

ཚན་གཅིག་གི་འོག་ནས། ཡང་བཅོམ་ལྡན་འདས་གསེར་གྱི་འོད་ཟེར། ཞེས་པ་ནས། འཁོར་བའི་རང་བཞིན་མེད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་གསེར་གྱི་འོད་ཟེར་ངོ་བོ་ཉིད་དག་པས་འདི་སྐད་དུ། དཔག་ཏུ་མེད་པའི་རྒྱལ་བ་རྣམས། །ཇི་བཞིན་དེ་བཞིན་ཉིད་ལ་བཞུགས། །དེ་བཞིན་ཉིད་དང་ཐམས་ཅད་ཀྱང་། །གཉིས་མེད་དེ་བཞིན་དེ་ཉིད་དོ། །ཞེས་གསུངས་སོ། །ཡང་བཅོམ་ལྡན་འདས་འོད་ཀྱི་དཔལ་ངོ་བོ་ཉིད་དག་པས་འདི་སྐད་དུ། འཁོར་བ་དང་ནི་མྱ་ངན་འདས། །སོ་སོར་སྣང་བ་མ་ཡིན་ཏེ། །ཇི་བཞིན་དེ་བཞིན་ཉིད་ངེས་ན།།

དེ་ལ་འཁོར་བའི་རང་བཞིན་མེད། །ཅེས་གསུངས་སོ།།

༼༣༠༤༽ཡང་བཅོམ་ལྡན་འདས་དགའ་བའི་སྤྱན་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། འདུས་བྱས་དང་འདུས་མ་བྱས་པའི་ཆོས་སོ་ཅོག་གི་རང་བཞིན་ནི་དུས་གསུམ་དུ་ངོ་བོ་ཉིད་ཀྱིས་མི་རྙེད་པར་འབྱུང་འཇུག་མེད་པའི་མ་སྐྱེས་པ་ལས་ཐམས་ཅད་དུ་སྐྱེས་ཏེ་ཅིར་ཡང་སྣང་ལ། དེ་ལྟར་སྐྱེས་པ་ཉིད་ནའང་ངོ་བོ་སྐྱེ་བ་མེད་པ་ནི་བདེ་བ་ཆེན་པོའི་གནས་ཏེ། དེས་ན་རིགས་མཆོག་གཉིས་མེད་མཉམ་པ་དེ་ཉིད་ཇི་ལྟ་བར་རིག་ན་རྡོ་རྗེ་ཐེག་པའི་སྐྱེ་གནས་དམ་པར་གྱུར་པའོ། །ཞེས་གསུངས་སོ། །ཡང་བཅོམ་ལྡན་འདས་གསེར་གྱི་འོད་ཟེར་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། དཔག་ཏུ་མེད་པའི་རྒྱལ་བ་རྫོགས་པའི་སངས་རྒྱས་རྣམས་ཀྱང་ངོ་བོ་ཇི་བཞིན་པའི་དེ་བཞིན་ཉིད་ཀྱི་ངང་ལ་མ་འདྲེས་ཡོངས་རྫོགས་སུ་བཞུགས་པས་དེ་བཞིན་ཉིད་དང་གཅིག་དང་དུ་མ་ལས་གྲོལ་བའི་ཚུལ་དུ་ཐམས་ཅད་ཀྱང་གཉིས་སུ་མེད་པའི་དེ་བཞིན་ཉིད་དང་ཐ་མི་དད་པར་བཞུགས་པས་ན་ཆོས་ཀྱི་དབྱིངས་ཀྱི་གནས་སམ་གཞལ་ཡས་ཁང་དམ་པ་དེ་ཉིད་དོ། །ཞེས་གསུངས་སོ། །ཡང་བཅོམ་ལྡན་འདས་འོད་ཀྱི་དཔལ་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། འཁོར་བ་དང་ནི་མྱ་ངན་ལས་འདས་པའི་དངོས་པོ་གཉིས་པ་རིལ་དེ་ཁོ་ན་ཉིད་དུ་གནས་པས་སོ་སོར་ཐ་དད་དུ་སྣང་བའི་རང་རྒྱུད་པའི་དངོས་པོ་ཡོད་པ་མ་ཡིན་ཏེ། ཇི་བཞིན་པའི་ཆོས་ཉིད་དེ་བཞིན་ཉིད་དུ་ཡང་དག་པར་ངེས་པའི་དོན་རྟོགས་ན། རིག་པ་དེེ་ལ་འཁོར་བའི་རང་བཞིན་མ་དག་པའི་སྣང་བ་མེད་པར་ཆོས་ཉིད་དུ་གསལ་བས་མྱ་ངན་ལས་འདས་པའང་འདི་ཉིད་ཡིན་པའོ། །ཞེས་གསུངས་སོ།།

གཉིས་པ་ཞིང་ཁམས་ཆོས་ཉིད་ཀྱི་ཡོན་ཏན་རིན་པོ་ཆེའི་སྤྲིན་དུ་བཀོད་པར་བཤད་པ་ནི།

གོང་གི ཡང་བཅོམ་ལྡན་འདས་ཡོངས་སུ་དགོངས་པའི་རྒྱལ་པོ། ཞེས་པ་ནས། ཅི་ཡང་མེད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ཡོངས་སུ་དགོངས་པའི་རྒྱལ་པོ་ངོ་བོ་ཉིད་དག་པས་འདི་སྐད་དུ།

དེ་བཞིན་ཉིད་དུ་ཀུན་རིག་ན། །དེས་ཁྱབ་གར་གནས་སངས་རྒྱས་ཞིང་།།

ཡོན་ཏན་རིན་ཆེན་སྤྲིན་བཀོད་པ། །བགྲོད་པ་བྱ་བ་ཅི་ཡང་མེད། །ཅེས་གསུངས་སོ།།

ཡང་བཅོམ་ལྡན་འདས་ཡོངས་སུ་དགོངས་པའི་རྒྱལ་པོ་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། ཆོས་སོ་ཅོག་དེ་བཞིན་ཉིད་དེ་ཁོ་ན་ཉིད་དུ་ཀུན་ནས་གནས་པར་རིག་ཅིང་རྟོགས་ནས་གཉིས་མེད་དུ་ཐག་ཆོད་ན། དེ་བཞིན་ཉིད་མུ་མཐའ་མེད་པ་དེས་ཁྱབ་པའི་གར་གནས་པ་ཉིད་སངས་རྒྱས་ཀྱི་ཞིང་ཁམས་རྣམ་པར་དག་པའི་ཡོན་ཏན་ལྷུན་གྱིས་གྲུབ་པ་ཉིད་འདོད་རྒུ་འབྱུང་བ་རིན་ཆེན་གྱི་སྤྲིན་དུ་བཀོད་པ་ཡིན་པས་དེ་ལའང་དབྱིངས་ཀྱི་ངང་ལ་བཀོད་པར་བྱ་བ་ཅི་ཡང་མེད་པས་མ་བགྲོད་པར་ཕྱིན་པ་ཁོ་ནའོ། །ཞེས་གསུངས་སོ།།༼༣༠༥༽

གསུམ་པ་གཞལ་ཡས་ཁང་དེ་བཞིན་ཉིད་ལས་རྒྱལ་བའི་ཕོ་བྲང་དུ་བཀོད་པར་བསྟན་པ་ནི།

འོག་ནས། ཡང་བཅོམ་ལྡན་འདས་ཞི་བའི་དབང་པོ། ཞེས་པ་ནས། ཀུན་བཀོད་དེར་གཅིག་གནས། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ཞི་བའི་དབང་པོ་ངོ་བོ་ཉིད་དག་པས་འདི་སྐད་དུ། དེ་བཞིན་ཉིད་ཀྱི་དེ་ཉིད་ནི།།

དཔག་ཅིང་གཞལ་བ་མཐའ་ཡས་པས། །དཔག་མེད་རྒྱལ་བའི་ཕོ་བྲང་ཡིན།།

དེ་ན་ཀུན་བཀོད་དེར་གཅིག་གནས།། ཞེས་གསུངས་སོ།།

ཡང་བཅོམ་ལྡན་འདས་ཞི་བའི་དབང་པོ་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། སེམས་ཉིད་དེ་བཞིན་ཉིད་ཀྱི་དེ་ཁོ་ན་ཉིད་ནི་མུ་མཐའི་ཚད་དང་བྲལ་བས། དཔག་ཅིང་གཞལ་བར་བྱེད་པའི་མཐའ་ལས་འདས་ཏེ་གཞལ་ཡས་ཁང་ཞེས་པའི་མིང་ཡང་འགྲུབ་པས་གཞུགས་གནས་དམ་པ་ཉིད་དེ་དཔག་ཏུ་མེད་པའི་རྒྱལ་བའི་ཕོ་བྲང་ཡིན་པས་དེ་ན་སངས་རྒྱས་རིལ་ཀུན་ཆེད་དུ་མ་བཙལ་བར་རང་སྣང་གི་བཀོད་པར་ལྷུན་གྱིས་གྲུབ་པའི་ངང་དེར་གཅིག་ཏུ་གནས་ཤིང་དབྱེར་མེད་པར་བཞུགས་པའི་དོན་དུ་ངེས་སོ། །ཞེས་གསུངས་སོ།།

གསུམ་པ་བསྟན་པའི་དེ་ཉིད་བཤད་པ་ལ་གཉིས་ཏེ། བརྗོད་བྱ་དོན་གྱི་བསྟན་པ། རྗོད་བྱེད་ཚིག་གི་བསྟན་པའོ། །དང་པོ་ལ་གསུམ་སྟེ། རྒྱ་ཆེ་བའི་བསྟན་པ། ཟབ་པའི་བསྟན་པ། གཉིས་སུ་མེད་པའི་བསྟན་པའོ། །དང་པོ་ནི།

ཡང་བཅོམ་ལྡན་འདས་སྤྲིན་གྱི་དཔལ། ཞེས་པ་ནས། དམིགས་པ་བཞིན་དུ་འབྱུང༌། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་སྤྲིན་གྱི་དཔལ་ངོ་བོ་ཉིད་དག་པས་འདི་སྐད་དུ།

ཐམས་ཅད་འབྱུང་བའི་ཆོ་འཕྲུལ་ཡང་། །ཅིར་ཡང་འགྱུར་བའི་ཡེ་ཤེས་ཏེ།།

གདོད་པར་གྱུར་པའི་ཆོས་མེད་པས། །ཇི་ལྟར་དམིགས་པ་བཞིན་དུ་གྲུབ། །ཅེས་གསུངས་སོ།།

ཡང་བཅོམ་ལྡན་འདས་སྤྲིན་གྱི་དཔལ་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། ཆོས་ཉིད་ཅི་ཡང་མེད་པ་ལས་ཆོས་ཐམས་ཅད་ཅིར་ཡང་འབྱུང་ཞིང་འཆར་བའི་ཆོ་འཕྲུལ་ཡང༌། ཅིར་ཡང་འགྱུར་བའི་ཡེ་ཤེས་ཆེན་པོ་ཐམས་ཅད་ཀྱི་དངོས་གཞི་ངོ་བོ་མ་ངེས་པ་ཉིད་སྣང་བ་སྟེ། དེ་ལ་གདོས་པར་གྱུར་པའི་ཆོས་མེད་ཅིང་ཐེར་ཟུག་དང་བྲལ་བས་གང་ཇི་ལྟར་དམིགས་ཤིང་བསམ་པ་བཞིན་དུ་སྣ་ཚོགས་སུ་སྣང་བ་འབྱུང་བ་ནི་དཔེ་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའོ། །ཞེས་གསུངས་སོ།།

གཉིས་པ་ཟབ་པའི་བསྟན་པ་ནི།

ཡང་བཅོམ་ལྡན་འདས་ཡིད་འོང་དབྱངས། ཞེས་པ་ནས། རིག་ན་བདེ་ཆེན་གནས། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ཡིད་འོང་ངོ་བོ་ཉིད་དག་པས་འདི་སྐད་དུ། འཇིག་རྟེན་འཁོར་བའི་ཁ་བརྒྱུད་པས། །མ་རིག་ངོ་བོ་དེ་བཞིན་པ། །གཞི་རྩ་མེད་པའི་སྐད་ཅིག་མ། །དེ་ཉིད་རིག་ན་བདེ་ཆེན་གནས། །ཞེས་གསུངས་སོ།།

ཡང་བཅོམ་ལྡན་འདས་ཡིད་འོང་དབྱངས་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། འཇིག་རྟེན་འཁོར་བའི་སྐྱེ་གནས་སུ་ཁ་བརྒྱུད་ཅིང་སྐྱེ་བར་བྱེད་པའི་རྩ་བ་ནི་མ་རིག་པའོ། །མ་རིག་པའི་ངོ་བོ་ཉིད་གདོད་ནས་དེ་བཞིན་ཉིད་ཀྱི་ཡེ་ཤེས་ཡིན་པས་རྟེན་པ་ཡི་གཞི་དང་བསྐྱེད་པའི་རྩ་བ་མེད་པར་ཅི་ཡང་མི་འགོག་པའི་སྐད་ཅིག་མ་ཡིན་ལ། དོན་དེ་ཉིད་ཕྱིན་ཅི་མ་ལོག་པར་རིག་ཅིང་རྟོགས་ན་འཁོར་བ་ཉིད་བདེ་བ་༼༣༠༦༽ཆེན་པོའི་གནས་ཏེ། གཞན་དུ་བགྲོད་དུ་མེད་པའོ། །ཞེས་གསུངས་སོ།།

གསུམ་པ་གཉིས་སུ་མེད་པའི་བསྟན་པ་ནི།

ཡང་བཅོམ་ལྡན་འདས་མེ་ལོང་འོད་སྣང༌། ཞེས་པས་ནས། དེ་ཉིད་ཡང་དག་ལམ། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་མེ་ལོང་འོད་སྣང་ངོ་བོ་ཉིད་དག་པས་འདི་སྐད་དུ།

ཉོན་མོངས་ཡེ་ཤེས་ལྔ་རྟོག་པ། །ཇི་བཞིན་དེ་ལ་གཉིས་ཀ་སྒྲིབ།།

རྟོག་དང་མི་རྟོག་གཉིས་མེད་དེ། །རྟོག་པ་དེ་ཉིད་ཡང་དག་ལམ། །ཞེས་གསུངས་སོ།།

ཡང་བཅོམ་ལྡན་འདས་མེ་ལོང་འོད་སྣང་ངོ་བོ་ཉིད་དག་པས། ཉིད་ཀྱི་དགོངས་པ་འདི་སྐད་དུ། སེམས་ཀྱི་དེ་ཁོ་ན་ཉིད་ལ་ཉོན་མོངས་པ་ལྔར་རྟོག་པ་དང་ཡེ་ཤེས་ལྔ་རུ་རྟོག་པ་གཉིས་ནི། སྤྲིན་དཀར་ནག་གཉིས་ཀས་ཉི་མ་ལ་སྒྲིབ་པ་ལྟར། ཇི་བཞིན་པ་དེ་ལ་རྟོག་པ་བཟང་ངན་གཉིས་ཀ་སྒྲིབ་པ་ཡིན་པས་དེ་ཁོ་ན་ཉིད་མི་མཐོང་བ་དེས་ན། རྟོག་པ་དང་མི་རྟོག་པ་གཉིས་སུ་མེད་པར་གཉིས་ཀའི་ཐ་སྙད་ལས་གྲོལ་བ་ནི་མི་རྟོག་པ་ཆེན་པོ་ཉིད་དེ། དེ་ལྟར་རྟོགས་པ་ན་རྟོག་པ་དེ་ཡི་ངོ་བོ་ཉིད་ཡང་དག་པའི་ལམ་ཆེན་པོ་ཡིན་པས་ལམ་གཞན་ནས་བཙལ་དུ་མེད་པ་ཉིད་དོ། །ཞེས་གསུངས་སོ།།

གཉིས་པ་རྗོད་བྱེད་ཚིག་གི་བསྟན་པ་ནི།

ཡང་བཅོམ་ལྡན་འདས་ཟླ་འོད་དཔལ། ཞེས་པ་ནས། ཐེག་པ་ཉིད་ལས་མེད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ཟླ་འོད་དཔལ་ངོ་བོ་ཉིད་དག་པས་འདི་སྐད་དུ། ཐེག་པ་དཔག་མེད་བསྟན་པ་ཡང་།། ཇི་ལྟར་མོས་པ་ཐ་དད་པ། །ཁྲིད་པར་བྱ་བའི་ཐབས་སུ་ཟད། །རྡོ་རྗེ་ཐེག་པ་ཉིད་ལས་མེད། །ཅེས་གསུངས་སོ།།

ཡང་བཅོམ་ལྡན་འདས་ཟླ་འོད་དཔལ་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། ཐེག་པའི་སྒོ་ཇི་སྙེད་པ་དཔག་ཏུ་མེད་པར་བསྟན་པ་ཡང་ཇི་ལྟར་གདུལ་བྱའི་མོས་པ་ཐ་དད་པ་ལྟར་དྲང་ཞིང་ཁྲིད་པར་བྱ་བའི་ཐབས་སུ་རིམ་པ་སྣ་ཚོགས་སུ་བསྟན་པར་མཛད་པ་ཙམ་དུ་ཟད་པས། རྩ་བ་མཐར་ཐུག་ཐེག་པའི་ངེས་དོན་ནི་རྡོ་རྗེ་ཐེག་པ་ཉིད་ལས་མེད་པས་དེ་ལ་འདུས་པ་ཁོ་ནར་ཟད་དོ། །ཞེས་གསུངས་སོ།།

གསུམ་པ་སེམས་ཉིད་མཚན་ཉིད་གསུམ་དུ་བསྟན་པ་ལ། རྒྱས་པར་བཤད་པ། དོན་བསྡུས་པའོ། །དང་པོ་ལ་གསུམ་སྟེ། རྒྱུ་ཤེས་པའི་མཚན་ཉིད། རྐྱེན་འཇུག་པའི་མཚན་ཉིད། འབྲས་བུ་མཐར་ཕྱིན་པའི་མཚན་ཉིད་དོ། །དང་པོ་ནི།

ཡང་བཅོམ་ལྡན་འདས་ཉི་མའི་སྙིང་པོ་དཔལ། ཞེས་པ་ནས། དབང་སྒྱུར་ཐོབ་པ་ཡིན། །ཞེས་གསུངས་སོ། །ཞེས་པའི་བར་ཚན་པ་བཞིས་བསྟན་ཏེ།

ཡང་བཅོམ་ལྡན་འདས་ཉི་མའི་སྙིང་པོ་དཔལ་ངོ་བོ་ཉིད་དག་པས་འདི་སྐད་དུ། གང་གི་དེ་མཐོང་མཐོང་མ་ཐག །ཇི་ལྟར་མཐོང་བ་ཐ་དད་པ། །མི་ཤེས་ཆོད་པའི་དྲ་བ་གཅོད། །ཁྱུང་དང་སེང་གེ་ཇི་བཞིན་དུ། །མངལ་ལྟར་ལུས་ཀྱི་མངལ་གྱིས་བསྒྲིབས། །ཞེས་གསུངས་སོ། །ཡང་བཅོམ་ལྡན་འདས་སྤོས་ཀྱི་རྒྱལ་པོ་ངོ་བོ་ཉིད་དག་པས་འདི་སྐད་དུ། དབང་སྒྱུར་ཐབས་ཀྱི་ཡེ་ཤེས་ཀྱི། །སྒྱུ་མའི་ཆོས་ལ་དབང་ཐོས་ནས། །མུན་ལ་སྣང་འབྱུང་ཇི་བཞིན་དུ། །ཐམས་ཅད་དབང་སྒྱུར་རང་རིག་ཡིན། །ཅེས་གསུངས་སོ། །ཡང་བཅོམ་ལྡན་འདས་མངོན་པར་སྤྲོ་བའི་རྒྱལ་པོ་ངོ་བོ་ཉིད་དག་པས་འདི་སྐད་དུ། རྣམ་དག་ཡེ་ཤེས་སྒྱུ་མ་དང་། །ལོག་རྟོག་མཚན་མའི་སྒྱུ་མ་གཉིས། །རང་བཞིན་དེ་བཞིན་ཉིད་པས་ན། །གཉིས་སུ་ཤེས་པ་ཉིད་ཚོགས་རྫོགས། །ཞེས་གསུངས་སོ། །ཡང་བཅོམ་ལྡན་འདས་རིན་ཆེན་རྒྱལ་པོ་ངོ་བོ་ཉིད་དག་པས་འདི་སྐད་དུ། བསམ་གྱིས་མི་ཁྱབ་ཆོས་འདི་རྣམས། །དེ་བཞིན་ཉིད་དུ་གཅིག་པས་ན། །གང་གི་དེ་བཞིན་དེ་ཤེས་པ། །ཀུན་ལ་དབང་སྒྱུར་ཐོབ་པ་ཡིན། །ཅེས་གསུངས་སོ།།

ཡང་བཅོམ་ལྡན་འདས་ཉི་མའི་སྙིང་པོ་དཔལ་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། གང་སུ་ཞིག་གིས་གསང་སྔགས་ཀྱི་ངོ་བོ་དེ་ཉིད་ཇི་ལྟར་བར་མཐོང་ཞིང་མཇལ་བའི་སྐད་ཅིག་དེ་མ་ཐག་པ་ལ་ཤེས་བྱ་དང་ལྟ་བ་ཟབ་མོ་མི་ཤེས་པའི་སྒྲིབ་པས་ཆོད་པའི་དྲྭ་བ་མ་རིག་པའི་ཆར་གཏོགས་པ་དེ་ཉིད་གཅོད་ཅིང་༼༣༠༧༽འཇོམས་པར་བྱེད་དོ། །དེ་ལྟ་བུ་ནི་ཁྱུང་དང་སེང་གེ་ཇི་བཞིན་དུ་མངལ་དང་སྒོ་ངའི་དཔེ་ལྟར་ལུས་ཀྱི་མངལ་གྱི་རྒྱ་མདུད་ཀྱིས་བསྒྲིབས་ཀྱང༌། ཡང་དག་པའི་ས་ལ་ངེས་པར་འབྱུང་མ་རག་པའོ། །ཞེས་གསུངས་སོ། །ཡང་བཅོམ་ལྡན་འདས་སྤོས་ཀྱི་རྒྱལ་པོའམ་གླང་པོ་ངོ་བོ་ཉིད་དག་པས་ཉིད་ཀྱི་དགོངས་པ་འདི་སྐད་དུ། རིག་པའི་སེམས་ཉིད་ལ་དབང་བསྒྱུར་ཐོབ་པའི་ཐབས་ཀྱི་ཡེ་ཤེས་ཀྱིས་སྣང་བ་གང་ཡང་མ་གྲུབ་པར་སྒྱུ་མའི་ཆོས་ལ་དབང་ཐོབ་པས་མུན་པ་ལ་སྣང་བ་འབྱུང་བ་ཇི་ལྟ་བ་བཞིན་དུ་འཁོར་བའི་མུན་པ་ཐམས་ཅད་ལ་ཡེ་ཤེས་ཆེན་པོས་དབང་བསྒྱུར་ཏེ་རང་རིག་པའི་ཆོས་ཉིད་ཀྱི་ཀློང་དུ་གསལ་བར་བྱེད་པ་ཡིན་ཀྱང་མིན་པ་ལས་ཡིན་པར་བསྒྱུར་པ་ནི་གང་ཡང་མེད་པའོ། །ཞེས་གསུངས་སོ། །ཡང་བཅོམ་ལྡན་འདས་མངོན་པར་སྤྲོ་བའི་རྒྱལ་པོ་ངོ་བོ་ཉིད་དག་པས་འདི་སྐད་དུ་གསུངས་པ། སྒྱུ་མ་ཙམ་དུ་སྣང་ལ་མི་དམིགས་པའི་དངོས་པོ་རྣམ་དག་ཡེ་ཤེས་སྒྱུ་མ་དང་ལོག་རྟོག་མཚན་མའི་སྒྱུ་མ་གཉིས་བཟང་ངན་དུ་སྣང་ཡང་གཉིས་ཀའི་ངོ་བོ་རང་བཞིན་གཉིས་སུ་མེད་པའི་དེ་བཞིན་ཉིད་དུ་གཅིག་པས་ན། དེ་གཉིས་མ་འགགས་ལ་མི་དམིགས་པ་གཉིས་སུ་ཤེས་ཤིང་རང་བཞིན་དབྱེར་མེད་པར་མཉམ་པ་ཉིད་དུ་རྟོགས་པ་ནི་ཚོགས་གཉིས་ལྷུན་རྫོགས་སུ་གྱུར་བའོ། །ཞེས་གསུངས་སོ། །ཡང་བཅོམ་ལྡན་འདས་རིན་ཆེན་རྒྱལ་པོ་ངོ་བོ་ཉིད་དག་པས་འདི་སྐད་དུ་གསུངས་པ། ཐ་སྙད་བསམ་གྱིས་མི་ཁྱབ་ཅིང་མཐའ་ཡས་པའི་ཆོས་འདི་རྣམས་ཇི་བཞིན་པ་དེ་བཞིན་ཉིད་ཀྱི་ངང་དུ་ཡེ་ནས་ཐ་མི་དད་པར་གཅིག་པས་ན། དམ་པ་གང་གིས་དེ་ལྟ་བུའི་དེ་བཞིན་ཉིད་ཀྱི་དོན་དེ་ཉིད་མ་ནོར་བར་ཤེས་ཤིང་རྟོགས་པ་ནི་ཆོས་རྣམས་ཀུན་ལ་དབང་སྒྱུར་བའི་མ་འདྲེས་ཡོངས་རྫོགས་ཀྱི་རྟོགས་པ་ངེས་པར་ཐོབ་པ་ཡིན་ནོ། །ཞེས་གསུངས་སོ།།

གཉིས་པ་རྐྱེན་འཇུག་པའི་མཚན་ཉིད་ནི།

ཡང་བཅོམ་ལྡན་འདས་འོད་ཟེར་དཔལ། ཞེས་པ་ནས། རིག་པ་འཛིན་པ་ཉིད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་འོད་ཟེར་དཔལ་ངོ་བོ་ཉིད་དག་པས་འདི་སྐད་དུ།

སངས་རྒྱས་ཀུན་གྱི་དགོངས་པ་འདི།། ཤེས་ནས་དེ་ལ་གང་གནས་པ།།

རང་རིག་ཉིད་ལ་དབང་ཐོབ་པའི། །དེ་བཞིན་རིག་པ་འཛིན་པ་ཉིད། །ཅེས་གསུངས་སོ།།

ཡང་བཅོམ་ལྡན་འདས་འོད་ཟེར་དཔལ་ངོ་བོ་ཉིད་དག་པས་འདི་སྐད་དུ་གསུངས་པ། སངས་རྒྱས་རྣམས་ཀྱི་དགོངས་པ་གསང་བ་འདི་ཉིད། ལྟ་བས་ཤེས་ཤིང་རྟོགས་ནས་སྒོམ་པས་ངང་དེ་ལ་གང་གནས་པ་ནི་རང་བྱུང་གི་རིག་པ་ཉིད་ལ་དབང་ཐོབ་པའི་རྣལ་འབྱོར་པ་ཡིན་པས། དེ་༼༣༠༨༽ལྟར་དོན་བཞིན་དུ་ངེས་པར་རྟོགས་པ་ཉིད་ནི་རིག་པ་འཛིན་པའི་ས་མཆོག་དམ་པ་ཉིད་ཡང་དག་པར་ནོན་པ་ཡིན༌ནོ། །ཞེས་གསུངས་སོ།།

གསུམ་པ་འབྲས་བུ་མཐར་ཕྱིན་པའི་མཚན་ཉིད་ལ་ལྔ་ཕྲག་ལྔ་ལས། ལྔ་ཕྲག་དང་པོ་ལའང་ལྔ་སྟེ། ཡོན་ཏན་མི་ཟད་པ་ལོགས་ནས་མི་འབྱུང་བ། ཞི་བའི་ལས་གྲུབ་པ། ཆོས་སྐུའི་གསུང་བཤད་པ། ཡོན་ཏན་རིན་ཆེན་གཏེར་དུ་བསྟན་པ། ལོངས་སྐུའི་གསུང་བཤད་པའོ། །དང་པོ་ནི།

ཡང་བཅོམ་ལྡན་འདས་དཀའ་ཐུབ་རྒྱལ་པོ། ཞེས་པ་ནས། སྒྲུབ་པ་ག་ལ་ཡོད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་དཀའ་ཐུབ་རྒྱལ་པོ་ངོ་བོ་ཉིད་དག་པས་འདི་སྐད་དུ། དེ་ཉིད་ཇི་བཞིན་མངོན་གྱུར་ན། མེད་ལ་མི་ཟད་འབྱུང་བ་ཡི། །ཆེ་བའི་ཡོན་ཏན་རྒྱུན་མི་འཆད། །ཅིར་སྣང་ཀུན་འབྱུང་རིན་ཆེན་གཏེར། །ཞེས་གསུངས་སོ། །ཡང་བཅོམ་ལྡན་འདས་གཙུག་ཏོར་སྙིང་པོ་ངོ་བོ་ཉིད་དག་པས་འདི་སྐད་དུ། ཇི་བཞིན་མ་བཅོས་དེ་ཉིད་ལ། །ཇི་བཞིན་པ་ཡི་བློ་གནས་པ། །དེ་བཞིན་དེ་ཉིད་མ་ཡིན་པའི། །བསྒྲུབ་དང་བསྒྲུབ་པ་ག་ལ་ཡོད། ཅེས་གསུངས་སོ།།

ཡང་བཅོམ་ལྡན་འདས་དཀའ་ཐུབ་རྒྱལ་པོ་ངོ་བོ་ཉིད་དག་པས་འདི་སྐད་དུ་གསུངས་པ། སེམས་ཀྱི་དེ་ཁོ་ན་ཉིད་ཇི་བཞིན་པའི་ངོ་བོ་མངོན་དུ་གྱུར་པ་ན་མེད་ལ་མི་ཟད་པར་འབྱུང་བ་ཡི་འབྲས་བུའི་རྒྱལ་པོར་ཆེ་བའི་ཡོན་ཏན་རྒྱུན་མི་ཆད་པར་ཅིར་ཡང་སྣང་ཞིང་ཀུན་ཏུ་འབྱུང་བ་ནི་རིན་ཆེན་མཆོག་གི་གཏེར་ལ་དབང་བསྒྱུར་བ་ལྟ་བུར་གྱུར་པས་ཚོགས་ལ་རག་ལས་པ་མེད་པའོ། །ཞེས་གསུངས་སོ། །ཡང་བཅོམ་ལྡན་འདས་གཙུག་ཏོར་སྙིང་པོ་ངོ་བོ་ཉིད་དག་པས་འདི་སྐད་དུ་གསུངས་པ། ཇི་བཞིན་པའི་ཆོས་ཉིད་མ་བཅོས་པའི་དེ་ཁོ་ན་ཉིད་ཀྱི་དོན་བསྒོམ་པ་ལ་ཡང་རང་རིག་པ་ཉིད་ཇི་བཞིན་པ་དེ་བཞིན་དུ་སྒོམ་པ་ཡིས་བློ་བཞག་སྟེ་གནས་པ་ཡིན་པས། བསྒོམ་བྱ་སྒོམ་བྱེད་མེད་པར་དེ་བཞིན་ཉིད་དུ་རང་གསལ་བའི་མི་རྟོག་པ་ཉིད་འབྲས་བུ་ཡིན་ལ། དེ་ཉིད་མ་ཡིན་པ་ཡི་བསྒྲུབ་པར་བྱ་བའི་འབྲས་བུ་དང་དེ་ལྟར་དོན་དུ་གཉེར་བའི་སྒྲུབ་པ་གཞན་ག་ལ་ཡོད་དེ་མེད་པ་ཉིད་དོ། །ཞེས་གསུངས་སོ།།

གཉིས་པ་ཞི་བའི་ལས་གྲུབ་པ་ནི།

ཡང་བཅོམ་ལྡན་འདས་ངེས་པར་གཤེགས་ལ། ཞེས་པ་ནས། སྟོང་པར་ངང་གིས་སངས། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ངེས་པར་གཤེགས་པའི་ངོ་བོ་ཉིད་དག་པས་འདི་སྐད་དུ།

མཁའ་ལ་གློ་བུར་སྤྲིན་འཐིབས་ལྟར། །དེ་ཉིད་གློ་བུར་རྟོག་པས་བསྒྲིབས།།

མཁའ་དག་ངང་དུ་སྤྲིན་སངས་ལྟར། །རྣམ་རྟོག་སྟོང་པར་ངང་གིས་སངས། །ཞེས་གསུངས་སོ།།

ཡང་བཅོམ་ལྡན་འདས་ངེས་པར་གཤེགས་པ་ངོ་བོ་ཉིད་དག་པས་འདི་སྐད་དུ་གསུངས་པ། དཔེར་ན་ནམ་མཁའ་ལ་གློ་བུར་དུ་སྤྲིན་འཐིབས་ནས་སྒྲིབ་པ་ལྟར་དུ་སེམས་ཀྱི་དེ་ཁོ་ན་ཉིད་ལའང་མ་རིག་པའི་དབང་གིས་གློ་བུར་གྱི་རྟོག་པ་སྣ་ཚོགས་པས་སྒྲིབ་པ་ཡིན་པས་འཁོར་བའི་ཚུལ་གྱི་དཔེ་དོན་དང༌། དེ་བཞིན་དུ་དཔེར་ན་ནམ་མཁའ་དག་པའི་ངང་དུ་སྤྲིན་སངས་ཏེ་མཁའ་དབྱིངས་དྭངས་པར་གསལ་བ་ལྟར། རྣམ་པར་རྟོག་པའི་ཟུག་རྔུ་གཟུང་བ་དང་འཛིན་པའི་སྒྲིབ་པ་རྣམས་ཆོས་ཉིད་སྟོང་པར་རྟོགས་ནས་རིག་པའི་མཁའ་ལ་ངང་གིས་སངས་པ་ཉིད་༼༣༠༩༽སྒྲིབ་པ་ལས་གྲོལ་ཏེ་ཞི་བའི་ཕྲིན་ལས་དག་པར་རྫོགས་པའི་དཔེ་དོན་དུ་བསྟན་པའོ། །ཞེས་གསུངས་སོ།།

གསུམ་པ་ཆོས་སྐུའི་གསུང་བཤད་པ་ནི།

ཡང་བཅོམ་ལྡན་འདས་ངེས་པར་གསུངས་པའི། ཞེས་པ་ནས། པ་ཉིད་རྒྱ་ཆེར་བཤད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ངེས་པར་གསུངས་པའི་ངོ་བོ་ཉིད་དག་པས་འདི་སྐད་དུ།

ཇི་སྙེད་དག་པའི་གསུང་བརྗོད་ཀྱང་། །རྡོ་རྗེའི་གསུང་ལ་སྤྲོས་པ་མེད།།

སྤྲོས་མེད་གསུང་ཉིད་མངོན་ཁྱབ་གསལ། །མ་གསུང་པ་ཉིད་རྒྱ་ཆེར་བཤད། །ཅེས་གསུངས་སོ།།

ཡང་བཅོམ་ལྡན་འདས་ངེས་པར་གསུངས་པའི་ངོ་བོ་ཉིད་དག་པས་འདི་སྐད་དུ་བཀའ་སྩལ་པ། རྒྱུ་འབྲས་ཀྱི་ཐེག་པ་སྣ་ཚོགས་ཇི་སྙེད་པ་རྣམས། རྣམ་པར་དག་པའི་གསུང་གི་བརྗོད་དེ་བཀའ་སྩལ་པ་ལྟར་སྣང་བ་ཀུན་ཀྱང་དོན་གྱི་ངོ་བོ་གསུང་ལྔ་མི་ཕྱེད་པའི་རྡོ་རྗེ་ལྟ་བུའི་ཆོས་སྐུའི་གསུང་ལ་རྫོགས་པ་ལས་འབྱུང་འཇུག་དང་འགྲོ་འོང་གི་སྤྲོས་པ་མེད་དོ། །དེ་ལྟར་འབྱུང་འཇུག་དང་འགྲོ་འོང་གི་སྤྲོས་པ་མེད་པ་ཉིད་སྐྱེ་མེད་ལྷུན་གྲུབ་ཀྱི་གསུང་མཆོག་དམ་པ་ཉིད་ཡིན་པས་བྲག་ཆ་ལྟར་འགྲོ་འོང་མེད་པར་གདུལ་བྱའི་ངོ་ལ་ཀུན་ཏུ་མ་འདྲེས་པར་དོན་སོ་སོར་གསལ་ཞིང་གདལ་ཁྱབ་ཆེན་པོའི་གསུང་དུ་ཤར་བས་ངོ་བོ་ཉིད་བརྗོད་པ་དང་བྲལ་བས་མ་གསུངས་པ་ཉིད་གདུལ་བྱའི་དོན་ཀུན་གྲུབ་པས་རྒྱ་ཆེར་བཤད་པའི་གསུང་གི་གསང་བ་ཟབ་མོ་རྒྱ་ཆེན་པོའི་ཕུལ་དུ་གྱུར་པ་ཉིད་དོ། །ཞེས་གསུངས་སོ།།

བཞི་པ་ཡོན་ཏན་རིན་ཆེན་གཏེར་དུ་བསྟན་པ་ནི།

ཡང་བཅོམ་ལྡན་འདས་བདེ་བ་ཆེན་པོ། ཞེས་པ་ནས། གཏེར་ལྡན་རིན་ཆེན་འབྱུང༌། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་བདེ་བ་ཆེན་པོ་ངོ་བོ་ཉིད་དག་པས་འདི་སྐད་དུ།

ཐམས་ཅད་ཡུལ་ལ་འཇུག་པ་ཡི། །ཐོགས་མེད་མ་ཆགས་དེ་བཞིན་བློས།།

ཇི་སྙེད་ཇི་བཞིན་ཉིད་དུ་བསྒྱུར། །ཟད་མེད་གཏེར་ལྡན་རིན་ཆེན་འབྱུང་། །ཞེས་གསུངས་སོ།།

ཡང་བཅོམ་ལྡན་འདས་བདེ་བ་ཆེན་པོ་ངོ་བོ་ཉིད་དག་པས་འདི་སྐད་དུ་གསུངས་པ། སྤྱད་པར་བྱ་བ་ཐམས་ཅད་པའི་ཡུལ་ཀུན་ལ་འཇུག་པ་ཡེ་ཤེས་པ་ཡང་དོན་ཡང་དག་པའི་གསང་བ་ཆེན་པོ་རྟོགས་པ་ཟིན་ཆགས་མེད་པར་གང་ལ་ཡང་ཐོགས་པ་མེད་ཅིང་མ་ཆགས་པའི་དེ་བཞིན་ཉིད་ཀྱི་ཤེས་རབ་ཀྱི་བློས། དངོས་པོར་སྣང་བ་ཇི་སྙེད་པ་ཀུན་ཇི་བཞིན་པའི་དེ་བཞིན་ཉིད་ཡིན་པའི་གཉིས་མེད་ཀྱི་དོན་དུ་དབང་སྒྱུར་ཏེ་གསལ་བར་བྱེད་དོ། །དེ་ལ་ནི་རྒྱལ་བའི་ཡོན་ཏན་ཟད་པ་མེད་པའི་གཏེར་དང་ལྡན་ཏེ་ནོར་བུ་རིན་ཆེན་ལས་དགོས་འདོད་འབྱུང་བ་ལྟ་བུའོ། །ཞེས་གསུངས་སོ།།

ལྔ་པ་ལོངས་སྐུའི་གསུང་བཤད་པ་ནི།

ཡང་བཅོམ་ལྡན་འདས་མེ་ཏོག་དབང་པོའི་དབྱངས། ཞེས་པ་ནས། འདོད་པས་སོ་སོར་མཇལ། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་མེ་ཏོག་དབང་པོ་དབྱངས་ངོ་བོ་ཉིད་དག་པས་འདི་སྐད་དུ།

ཇི་བཞིན་ཉིད་ལ་བཞུགས་པས་ན། །འདི་ཞེས་ཚིག་ཏུ་མ་གསུངས་ཀྱང་།།

ཁྱབ་པས་གཅིག་པའི་བྱིན་རླབས་ཀྱིས། །ཇི་ལྟར་འདོད་པ་སོ་སོར་མཇལ། །ཞེས་གསུངས་སོ།།

ཡང་བཅོམ་ལྡན་འདས་མེ་ཏོག་དབང་པོ་དབྱངས་ངོ་བོ་ཉིད་དག་པས་འདི་སྐད་དུ་གསུངས་པ། རྒྱལ་བ་རིལ་ཐམས་ཅད་ཇི་བཞིན་པ་དེ་བཞིད་ཉིད་ཀྱི་ངང་ལ་བཞུགས་པས་༼༣༡༠༽ན། དོན་གྱི་ངོ་བོ་ཉིད་ནི་འདི་ཁོ་ནའོ་ཞེས་དངོས་སུ་ཚིག་ཏུ་བརྗོད་དེ་མ་གསུངས་ཀྱང༌། བདེ་བར་གཤེགས་པའི་སྙིང་པོའམ་ཐུགས་རྗེ་ཆེན་པོས་ཀུན་ལ་ཁྱབ་པས་ངོ་བོ་གཅིག་གིས་བསྣུམས་པའི་རང་བཞིན་དང་བྱིན་རླབས་ཀྱིས་བདག་ཉིད་གཅིག་པར་འབྲེལ་བས་ཇི་ལྟར་འདོད་པ་བཞིན་དགོངས་པ་ལྷུན་གྱིས་གྲུབ་པ་ཉིད་སྣང་དུ་བཏུབ་པའི་དོན་གྱིས་ན་རྒྱུད་དག་པའི་མོས་པ་དང་འཚམས་པར་བློ་ལ་སོ་སོར་མཇལ་ཏེ་དགོངས་པ་གཉིས་མེད་དུ་ཤར་བར་འགྱུར་བས། ལོངས་སྤྱོད་རྫོགས་པས་གསུང་མཆོག་མི་སྨྲ་བར་ཇི་བཞིན་པའི་སྐུ་ཡིས་ཆོས་རྣམས་འཇལ་བར་སྟོན་པའོ། །ཞེས་གསུངས་སོ།།

ལྔ་ཕྲག་གཉིས་པ་ལ་ལྔ་སྟེ། སོ་སོར་རྟོག་པའི་ཡེ་ཤེས། མངོན་པར་བྱང་ཆུབ་པའི་སྐུའི་གསུང༌། དྲག་པོའི་ཕྲིན་ལས་གྲུབ་པ། རྒྱས་པའི་ཕྲིན་ལས་རྫོགས་པ། སྤྲུལ་སྐུའི་གསུང་བསྟན་པའོ། །དང་པོ་ནི།

ཡང་བཅོམ་ལྡན་འདས་གྲགས་པའི་དཔལ། ཞེས་པ་ནས། རང་བྱུང་ཡེ་ཤེས་ཉིད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་གྲགས་པའི་དཔལ་ངོ་བོ་ཉིད་དག་པས་འདི་སྐད་དུ།

སངས་རྒྱས་སེམས་ཅན་ལ་སོགས་པ། །ཐམས་ཅད་མ་ལུས་ལུས་པ་མེད།།

རང་རིག་མ་རིག་རྟོག་པ་ཉིད། །ཀུན་ཀྱང་རང་བྱུང་ཡེ་ཤེས་ཉིད། །ཅེས་གསུངས་སོ།།

ཡང་བཅོམ་ལྡན་འདས་གྲགས་པའི་དཔལ་ངོ་བོ་ཉིད་དག་པས་འདི་སྐད་དུ་གསུངས་པ། སངས་རྒྱས་དང་སེམས་ཅན་ལ་སོགས་པ་མཐོ་དམན་དུ་གྲགས་པའི་ཆོས་ཐམས་ཅད་ཀུན་ཀྱང༌། བློའི་ངོ་ལ་མཐོན་པོ་མ་ལུས་པ་དང་དམའ་བ་ལུས་པ་མེད་པར་རང་སྣང་བ་ནའང༌། རང་རིག་པ་དང་མ་རིག་པ་གཉིས་སུ་སོ་སོར་སྣང་བ་ནི་རྟོག་པ་ཉིད་ཡིན་ལ། དེ་དག་ཀུན་ཀྱང་ངོ་བོ་རང་བྱུང་ཆེན་པོའི་ཡེ་ཤེས་ཀྱི་ཀློང་ཉིད་དུ་སངས་རྒྱས་པར་ཀུན་ནས་མཉམ་པར་བསྟན་པ་ཡིན་ནོ། །ཞེས་ཐུགས་མཁྱེན་པའི་ཡེ་ཤེས་ཀྱི་ངོ་དེ་སྐད་དུ་གསུངས་སོ།།

གཉིས་པ་མངོན་པར་བྱང་ཆུབ་པའི་སྐུའི་གསུང༌ནི།

ཡང་བཅོམ་ལྡན་འདས་སྤྲུལ་པའི་རྒྱལ་པོ། ཞེས་པ་ནས། གསུང་ཉིད་མི་གནས་པའོ། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་སྤྲུལ་པའི་རྒྱལ་པོ་ངོ་བོ་ཉིད་དག་པས་འདི་སྐད་དུ།

ཡི་གེ་ཕྱག་རྒྱ་ཡེ་ཤེས་ལྔ། །ཚིག་ལམ་འབྱུང་བའི་གཞི་ཡིན་ཏེ།།

དེ་ཉིད་དག་པས་ཐམས་ཅད་དག །གསུང་ལ་གསུང་ཉིད་མི་གནས་པའོ། །ཞེས་གསུངས་སོ།།

ཡང་བཅོམ་ལྡན་འདས་སྤྲུལ་པའི་རྒྱལ་པོ་ངོ་བོ་ཉིད་དག་པས་འདི་སྐད་དུ་གསུངས་པ། ཡི་གེ་གསུང་གི་ཕྱག་རྒྱ་རྣམས་འདུས་པའི་རིག་པའི་གསུང་གི་ཡེ་ཤེས་ཀྱང་བསྟན་པ་རྒྱ་མཚོའི་ཚིག་ལམ་ཀུན་འབྱུང་བའི་གཞི་ཡིན་ཏེ། དེ་ལས་གདུལ་བྱ་ལ་ཆོས་སྒོ་ཇི་སྙེད་དུ་གསལ་བའོ། །དེ་ཡང་ཡི་གེ་ཉིད་རང་རིག་པའི་ངང་དུ་ཡེ་ནས་དག་པས་བསྟན་པའི་ཚིག་ལམ་ཇི་སྙེད་པ་ཐམས་ཅད་ཀྱང་མཐའ་༼༣༡༡༽དག་པའི་ཕྱིར་གསུང་གི་ངོ་བོ་ཉིད་ལ་གསུང་གི་མཐའ་ཉིད་གང་ཡང་མི་གནས་ཤིང་མི་བརྟེན་པས་མཐའོ་ཅོག་དང་བྲལ་བའོ། །ཞེས་གསུངས་སོ།།

གསུམ་པ་དྲག་པོའི་ཕྲིན་ལས་གྲུབ་པ་ནི།

ཡང་བཅོམ་ལྡན་འདས་སྒྲ་དབྱངས་མི་ཟད་པ། ཞེས་པ་ནས། ངོ་བོ་ཉིད་དུ་བཅོམ། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་སྒྲ་དབྱངས་མི་ཟད་པའི་ངོ་བོ་ཉིད་དག་པས་འདི་སྐད་དུ།

དེ་བཞིན་ཉིད་ཀྱི་རང་བཞིན་དུ། །ལྔ་ཕུང་ཉོན་མོངས་རྣམ་པར་དག།

རྣམ་རྟོག་རྡུལ་བྲལ་སྐྱེ་འགག་མེད།།ཐམས་ཅད་ངོ་བོ་ཉིད་དུ་བཅོམ། །ཞེས་གསུངས་སོ།།

ཡང་བཅོམ་ལྡན་འདས་སྒྲ་དབྱངས་མི་ཟད་པ་ངོ་བོ་ཉིད་དག་པས་འདི་སྐད་དུ་གསུངས་པ། ཆོས་ཉིད་དེ་བཞིན་ཉིད་ཀྱི་རང་བཞིན་དེ་ཁོ་ན་ཉིད་ཀྱི་ངང་དུ་ལྔ་ཕུང་གི་ངོ་བོ་ཉོན་མོངས་པའི་རྟོག་ཚོགས་རིལ་ཐམས་ཅད་རྣམ་པར་དག་སྟེ་བྱུང་ཐེབས་པས་དེ་ལྟར་མངོན་དུ་གྱུར་ནས་རྣམ་པར་རྟོག་པའི་ཕུང་པོ་ཉོན་མོངས་པའི་དྲི་མ་དང་བཅས་པའི་རྡུལ་རྣམས་གདོད་ནས་བྲལ་ཏེ་མ་བྱུང་བའི་ངང་དུ་སྐྱེ་འགག་མེད་པ་ཉིད་དུ་དབྱེར་མེད་པར་གྱུར་པ་ནི་རྟོག་པ་ཐམས་ཅད་ངོ་བོ་ཉིད་དུ་བཅོམ་སྟེ་ཕྱི་ནང་གི་རྣམ་རྟོག་ཇི་སྙེད་པ་བསྒྲལ་བས་དྲག་པོའི་ཕྲིན་ལས་མཐར་ཕྱིན་པའོ། །ཞེས་གསུངས་སོ།།

བཞི་པ་རྒྱས་པའི་ཕྲིན་ལས་རྫོགས་པ་ནི།

ཡང་བཅོམ་ལྡན་འདས་སྨན་གྱི་རྒྱལ་པོ། ཞེས་པ་ནས། མར་གྱིས་ཁྱབ་ལྟར་གནས། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་སྨན་གྱི་རྒྱལ་པོ་ངོ་བོ་ཉིད་དག་པས་འདི་སྐད་དུ།

དཔག་མེད་འཇིག་རྟེན་རྡུལ་སྙེད་དུ། །འགྲོ་བ་རྡུལ་ཕྲན་བསམ་ཡས་ལ།།

ཁྱད་པར་དེ་བཞིན་ཉིད་སྣང་བས། །ཏིལ་འབྲུ་མར་གྱིས་ཁྱབ་ལྟར་གནས། །ཞེས་གསུངས་སོ།།

ཡང་བཅོམ་ལྡན་འདས་སྨན་གྱི་རྒྱལ་པོ་ངོ་བོ་ཉིད་དག་པས་འདི་སྐད་དུ་གསུངས་པ། མུ་མཐའ་མེད་ཅིང་དཔག་ཏུ་མེད་པའི་འཇིག་རྟེན་གྱི་ཁམས་རྡུལ་སྙེད་དུ་གྱུར་པ་ན། འགྲོ་བ་སེམས་ཅན་རྡུལ་ཕྲན་སྙེད་དུ་སྣང་བ་བསམ་ཡས་པ་ཇི་སྙེད་པར་གྱུར་པ་ཀུན་ལ་སེམས་ཀྱི་དེ་ཁོ་ན་ཉིད་མཐའ་རྣམ་པར་དག་པས་ཀུན་ཏུ་ཁྱབ་པར་ངོ་བོ་དེ་བཞིན་ཉིད་ཀྱི་སྙིང་པོར་ཡེ་སངས་རྒྱས་པར་རང་སྣང་བས་དཔེར་ན་ཏིལ་འབྲུ་ལ་མར་གྱིས་ཁྱབ་པ་ལྟར་གནས་པ་ཁོ་ནའོ། །ཞེས་གསུངས་སོ།།

ལྔ་པ་སྤྲུལ་སྐུའི་གསུང་བསྟན་པ་ནི།

ཡང་བཅོམ་ལྡན་འདས་གསེར་གྱི་འོད་འཕྲོ་བ། ཞེས་པ་ནས། ཀུན་ཐོས་རྣམ་པར་གྲོལ། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་གསེར་གྱི་འོད་འཕྲོ་ངོ་བོ་ཉིད་དག་པས་འདི་སྐད་དུ།

རྡུལ་ཕྲན་གཅིག་ཙམ་གང་ཟག་ལ། ། དགོངས་ཏེ་མདུན་དུ་གསུང་བརྗོད་པ།།

དཔག་མེད་མཐའ་ཡས་རྡུལ་སྙེད་ཙམ། །དེ་སྙེད་ཀུན་ཐོས་རྣམ་པར་གྲོལ། །ཞེས་གསུངས་སོ།།

ཡང་བཅོམ་ལྡན་འདས་གསེར་གྱི་འོད་འཕྲོ་བ་ངོ་བོ་ཉིད་དག་པས་འདི་སྐད་དུ་གསུངས་པ། དཔེར་ན་རྡུལ་ཕྲན་གཅིག་ཙམ་གྱི་མཚན་ཉིད་བསྟན་པས་གང་ཟག་གཅིག་དོན་ལ་དྲང་པར་དགོངས་ཏེ་ཉིད་ཀྱི་མདུན་དུ་ཚངས་པའི་གསུང་གི་ཚིག་གཅིག་བརྗོད་དེ་བཀའ་སྩལ་པ་ལས་ཀྱང་ལྷུན་གྱིས་གྲུབ་པའི་གསུང་གི་བྱིན་རླབས་ཀྱིས་དཔག་ཏུ་མེད་ཅིང་མཐའ་ཡས་པའི་གདུལ་བྱ་༼༣༡༢༽རྡུལ་སྙེད་ཙམ་དུ་གྱུར་པའི་རིགས་ཅན་དག་གིས་ཇི་ལྟར་འཚམས་པ་དེ་སྙེད་དུ་སོ་སོར་ཀུན་ནས་ཐོས་ཤིང་འདོད་པའི་དོན་དུ་གོ་བས་འཆིང་བ་ལས་དེ་ལྟར་རྣམ་པར་གྲོལ་ཏེ་ཐར་དུ་བཏུབ་པའོ། །ཞེས་གསུངས་སོ།།

ལྔ་ཕྲག་གསུམ་པ་ལ་ལྔ་སྟེ། དབྱེར་མེད་རྡོ་རྗེའི་གསུང༌། ཆོས་ཀྱི་དབྱིངས་ཀྱི་ཡེ་ཤེས། དབང་གི་ཕྲིན་ལས་གྲུབ་པ། རྡོ་རྗེའི་སྐུ་བསྟན་པ། སྤྲུལ་པའི་སྐུ་བཤད་པའོ། །དང་པོ་ནི།

ཡང་བཅོམ་ལྡན་འདས་བཀོད་པའི་རྒྱལ་པོ། ཞེས་པ་ནས། དངོས་མེད་དེ་བཞིན་ཉིད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་བཀོད་པའི་རྒྱལ་པོ་ངོ་བོ་ཉིད་དག་པས་འདི་སྐད་དུ།

གསུང་གཅིག་མི་ཟད་བསམ་ཡས་གསུང་། །མཐའ་དབུས་མེད་པར་ཀུན་ཏུ་ཁྱབ།།

ཁྱབ་དང་ཁྱབ་མེད་རྡོ་རྗེ་གསུང་། །སྣ་ཚོགས་དངོས་མེད་དེ་བཞིན་ཉིད། །ཅེས་གསུངས་སོ།།

ཡང་བཅོམ་ལྡན་འདས་བཀོད་པའི་རྒྱལ་པོ་ངོ་བོ་ཉིད་དག་པས་འདི་སྐད་དུ་གསུངས་པ། རྒྱལ་བའི་གསུང་གཅིག་ཀྱང་ལྔ་ཡི་ བདག་ཉིད་ཡིན་པས་སྤྲོས་བྲལ་རྡོ་རྗེའི་གསུང་མི་ཟད་པ་ཉིད་སྤྲོས་པས་འགྲིབ་པ་མེད ་པར་ཇི་ལྟར་འདུལ་བ་བཞིན་བསམ་ཡས་པའི་གསུང་དུ་སྣང་ཞིང་འབྱུང་དུ་རུང་ལ། དེ་ཉིད་ཀྱང་མཐའ་གསུམ་དང་དབུས་ཀྱི་རྣམ་པ་ཀུན་མ་སྤངས་བྲལ་ཏེ་རིས་ཆད་དུ་སྣང་བ་མེད་པར་རང་བཞིན་གདལ་བ་ཆེན་པོར་ཀུན་ཏུ་ཁྱབ་པ་ལ་ཆེད་དུ་བྱས་པས་ཁྱབ་པ་དང་མ་ཁྱབ་པ་གང་ཡང་མེད་དེ་སྤྲོ་བསྡུ་དང་བྲལ་བ་དབྱེར་མེད་རྡོ་རྗེའི་གསུང་ངོ༌། །དེ་ལ་གསུང་ཐ་དད་དུ་ཚངས་དབྱངས་སྣ་ཚོགས་སུ་གྲགས་ཀྱང་ངོ་བོའི་དངོས་པོ་མེད་པ་ནི་དེ་བཞིན་ཉིད་ཆོས་ཉིད་དོན་གྱི་གསུང་ཡིན་ནོ། །ཞེས་གསུངས་སོ།།

གཉིས་པ་ཆོས་ཀྱི་དབྱིངས་ཀྱི་ཡེ་ཤེས་ནི།

ཡང་བཅོམ་ལྡན་འདས་གསེར་གྱི་གཟུ་བ། ཞེས་པ་ནས། རང་རིག་རང་ཉིད་དོ། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་གསེར་གྱི་གཟུ་བ་ངོ་བོ་ཉིད་དག་པས་འདི་སྐད་དུ།

གང་ཡང་མ་བཅོས་དེ་བཞིན་ལ། །ཕྱོགས་དང་སྔ་ཕྱི་དུས་མེད་དེ།།

ཐམས་ཅད་དེ་བཞིན་ཉིད་ཀྱི་དབྱིངས།།དེ་ཉིད་རང་རིག་རང་ཉིད་དོ། །ཞེས་གསུངས་སོ།།

ཡང་བཅོམ་ལྡན་འདས་གསེར་གྱི་གཟུ་བ་ངོ་བོ་ཉིད་དག་པས་འདི་སྐད་དུ་གསུངས་པ། རང་བཞིན་གང་དུ་ཡང་མ་བཅོས་པ་ཡི་ཆོས་ཉིད་ཇི་བཞིན་པ་དེ་ཁོ་ན་ཉིད་ཀྱི་ངང་ལ་ཕྱོགས་བཅུ་དང་སྔ་ཕྱི་ཐ་སྙད་ཀྱི་དུས་བཞིའི་རིས་སུ་མེད་ལ་མ་འགགས་པར་ངོ་བོ་ལ་དབྱེ་བ་མེད་དོ། །དེ་ཉིད་ཆོས་ཐམས་ཅད་ཀྱི་ངོ་བོ་དེ་བཞིན་ཉིད་ཀྱི་དབྱིངས་སུ་རང་གསལ་དུ་ཤར་བ་ནི། དེ་ཁོ་ན་ཉིད་དུ་ངེས་པས་གཞན་མིན་ཏེ་རང་རིག་པའི་ཡེ་ཤེས་རབ་ཏུ་གསང་བ་རང་གི་ངང་ཉིད་དོ། །ཞེས་གསུངས་སོ།།

གསུམ་པ་དབང་གི་ཕྲིན་ལས་གྲུབ་པ་ནི།

ཡང་བཅོམ་ལྡན་འདས་དཔལ་གྱི་རྒྱལ་པོ། ཞེས་པ་ནས། གཉིས་སུ་དབྱེར་མེད་དོ། །ཞེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་དཔལ་གྱི་རྒྱལ་པོ་ངོ་བོ་ཉིད་དག་པས་འདི་སྐད་དུ། དེ་ཉིད་དེ་སྙེད་རང་བཞིན་ཏེ། །དེ་སྙེད་དེ་ཉིད་ཡིན་པ་ལ། །བྱིས་པ་རྣམས་ཀྱིས་གཉིས་སུ་གཟུང་། །དེ་ལ་གཉིས་སུ་དབྱེར་མེད་དོ། །ཞེས་གསུངས་སོ།།

ཡང་བཅོམ་ལྡན་འདས་དཔལ་གྱི་རྒྱལ་པོ་ངོ་བོ་ཉིད་དག་པས་འདི་སྐད་དུ་གསུངས་པ། ༼༣༡༣༽དཀྱིལ་འཁོར་གསུམ་དབྱེར་མེད་པའི་དེ་ཁོ་ན་ཉིད་ནི་ཆོས་ཅན་དེ་སྙེད་པ་སྣ་ཚོགས་ཀྱི་རང་བཞིན་ཡིན་ཏེ། དེ་བས་ན་རྟོགས་པའི་རིག་པ་ལ་ཆོས་ཅན་དེ་སྙེད་པ་ཡང་དེ་ཁོ་ན་ཉིད་ཀྱི་ངོ་བོར་གསལ་ཏེ་དབྱེར་མེད་པར་མཉམ་པ་ཡིན་པ་ལ་བྱིས་པ་དོན་ལ་ཤེད་མ་བྱེ་བ་རྣམས་ཀྱིས་ཡུལ་དང་ཡེ་ཤེས་གཉིས་སུ་བཟུང་ནས་དེ་ལ་ངན་རྟོག་ཅན་གྱིས་གཟུང་འཛིན་དུ་བརྟགས་པར་བྱས་ཀྱང་ངོ་བོ་ལ་གཉིས་སུ་དབྱེ་བ་རྡུལ་ཙམ་ཡང་མེད་པར་དབྱེར་མེད་ཆེན་པོའི་ཆོས་ཉིད་དོ། །ཞེས་གསུངས་སོ།།

བཞི་པ་རྡོ་རྗེའི་སྐུ་བསྟན་པ་ནི།

ཡང་བཅོམ་ལྡན་འདས་སྣང་བ་བརྩེགས་པའི་དཔལ། ཞེས་པ་ནས། འཇིགས་པ་ག་ལ་ཡོད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་སྣང་བ་བརྩེགས་པའི་དཔལ་ངོ་བོ་ཉིད་དག་པས་འདི་སྐད་དུ།

སྟོང་ཉིད་ནམ་མཁའ་རང་བཞིན་དུ། །མི་མཐུན་པ་དང་གཉེན་པོ་གཉིས།།

ཡེ་ནས་དབྱེར་མེད་གཅིག་པས་ན། །གནོད་པས་འཇིགས་པ་ག་ལ་ཡོད། །ཅེས་གསུངས་སོ།།

ཡང་བཅོམ་ལྡན་འདས་སྣང་བ་བརྩེགས་པའི་དཔལ་ངོ་བོ་ཉིད་དག་པས་འདི་སྐད་དུ་གསུངས་པ། སྟོང་པ་ཆེན་པོ་ཆོས་ཉིད་ཀྱི་ནམ་མཁའི་རང་བཞིན་དུ་མི་མཐུན་པ་ཡི་སྤང་བྱ་རྟོག་པའི་ཚོགས་དང་གཉེན་པོ་ལམ་གྱི་ཡེ་ཤེས་གཉིས་ངོ་བོས་ཐ་མི་དད་པར་ཡེ་ནས་དབྱེར་མེད་པར་གཅིག་པས་ན་མི་མཐུན་པའི་གནོད་པས་འཇིགས་ཏེ་གཉེན་པོས་སྤངས་པར་བྱ་བའམ་གཞོམ་པར་བྱ་བ་ག་ལ་ཡོད་དེ་མེད་པར་ངེས་སོ། །ཞེས་བཀའ་སྩལ་ཏེ་གསུངས་སོ།།

ལྔ་པ་སྤྲུལ་པའི་སྐུ་བཤད་པ་ནི།

ཡང་བཅོམ་ལྡན་འདས་མྱ་ངན་མེད་པའི་དཔལ། ཞེས་པ་ནས། དེར་སྣང་ཅི་ཡང་མེད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་མྱ་ངན་མེད་པའི་དཔལ་ངོ་བོ་ཉིད་དག་པས་འདི་སྐད་དུ།

མི་འགྱུར་ནམ་མཁའི་རང་བཞིན་ཏེ། །དག་པ་དག་ལ་དག་པ་ཉིད།།

རྟོག་པ་དག་ལ་རྟོག་པར་སྣང་། །ཅིས་འདུལ་དེར་སྣང་ཅི་ཡང་མེད། ། ཅེས་གསུངས་སོ།།

ཡང་བཅོམ་ལྡན་འདས་མྱ་ངན་མེད་པའི་དཔལ་ངོ་བོ་ཉིད་དག་པས་འདི་སྐད་དུ་གསུངས་པ། ངང་ཆེན་པོའི་ངོ་བོ་ཉིད་རྟག་ཏུ་མི་འགྱུར་བའི་ཆོས་ཉིད་ནམ་མཁའི་རང་བཞིན་ལྟ་བུ་ཡིན་ཏེ། གདུལ་བར་བྱ་བ་ཡང་དག་པར་རྟོགས་པས་དག་པ་ཉིད་ལ་དག་པར་སྣང་བས་དོན་མཛད་པ་ཉིད་དང༌། མ་རྟོགས་པས་རྟོག་པ་ཅན་དག་ལ་རྟོག་པ་ཅན་དུ་རྣམ་པར་སྣང་ནས་རྒྱུད་དང་མཐུན་པར་མཛད་པ་སྣ་ཚོགས་སུ་རང་སྣང་བར་སྤྲུལ་པའི་སྐུ་ཡིས་དོན་བྱེད་ཀྱང༌། ཅིས་འདུལ་བ་ལ་ངོ་བོ་ཉིད་དེ་ལྟར་སྣང་ཞིང་འབྱུང་བའི་རྒྱུ་སྣང་བདོ་བ་ཙམ་ཉིད་ནའང་དེར་སྣང་བ་ལྟར་གྲུབ་པ་ཅི་ཡང་མེད་པས་རང་བཞིན་བཙལ་གྱིས་མི་རྙེད་པའོ། །ཞེས་རྟོགས་མ་རྟོགས་ལ་སྣང་ཚུལ་མི་འདྲ་བར་བྱུང་ཡང་ངོ་བོ་ལ་འཕེལ་འགྲིབ་མེད་པའི་དོན་དེ་སྐད་ཅེས་གསུངས་སོ།།

ལྔ་ཕྲག་བཞི་པ་ལའང་ལྔ་སྟེ། མེ་ལོང་ལྟ་བུའི་ཡེ་ཤེས། ལྷུན་གྱིས་གྲུབ་པའི་ཕྲིན་ལས། ལོངས་༼༣༡༤༽སྤྱོད་རྫོགས་པའི་སྐུ། གཉིས་མེད་ཀྱི་ཡོན་ཏན་ལ་ཟད་འཕེལ་མེད་པ། མཉམ་པ་ཉིད་ཀྱི་ཡེ་ཤེས་བསྟན་པའོ། །དང་པོ་ནི།

ཡང་བཅོམ་ལྡན་འདས་དགའ་མཆོག་དཔལ། ཞེས་པ་ནས། མ་བསྒྲིབས་ནམ་མཁའ་ཆེ། །ཞེས་གསུངས་སོ། །ཞེས་པའི་བར་བར་གྱིས་བསྟན་ཏེ།

ཡང་བཅོམ་ལྡན་འདས་དགའ་མཆོག་དཔལ་ངོ་བོ་ཉིད་དག་པས་འདི་སྐད་དུ།

རང་བཞིན་རང་གིས་མ་བཅོས་པ། །ཡོངས་ཀྱི་འོད་གསལ་དེ་བཞིན་ཉིད།།

ཀུན་གྱི་སྙིང་པོ་དེ་ཉིད་པས། །ཅིས་ཀྱང་མ་བསྒྲིབས་ནམ་མཁའ་ཆེ། །ཞེས་གསུངས་སོ།།

དེ་ནས་ཡང་མཅོམ་ལྡན་འདས་དགའ་མཆོག་དཔལ་ངོ་བོ་ཉིད་དག་པས་འདི་སྐད་དུ་གསུངས་པ། རང་བཞིན་གཉིས་ཀྱི་ཆོས་རྣམས་ཐམས་ཅད་ཡེ་ནས་ངང་གིས་མ་བཅོས་པའི་ཐིག་ལེ་ཆེན་པོར་བྱུང་ཐེབས་པས་གཏན་ཚིགས་ཀྱིས་མ་བྱས་པར་ཡོང་གིས་རང་འོད་གསལ་བ་ནི་ལྷུན་གྱིས་གྲུབ་པའི་དེ་བཞིན་དེ། དེ་ཉིད་ཆོས་རྣམས་ཀུན་གྱི་སྙིང་པོ་དང་རྩ་བའི་བཅུད་མཆོག་མ་ནོར་བའི་དེ་ཁོ་ན་ཉིད་ཡིེན་པས། སྒྲིབ་བྱེད་ངང་གིས་བྲལ་ཏེ་ཅིས་ཀྱང་མ་བསྒྲིབས་པའི་ཐིག་ལེ་ཉག་གཅིག་ནམ་མཁའ་མེ་ལོང་དུ་ཤར་བ་ལྟ་བུར་ཆོས་ཉིད་དབྱིངས་ཀྱི་ཀློང་ཆེ་བ་ལྔ་དང་ལྡན་པའི་གསང་བ་ཆེན་པོའོ། །ཞེས་གསུངས་སོ།།

གཉིས་པ་ལྷུན་གྱིས་གྲུབ་པའི་ཕྲིན་ལས་ནི།

ཡང་བཅོམ་ལྡན་འདས་གཟི་བརྗིད་དཔལ། ཞེས་པ་ནས། བགྲོད་དུ་ག་ལ་ཡོད། །ཅེས་གསུངས་སོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་གཟི་བརྗིད་དཔལ་ངོ་བོ་ཉིད་དག་པས་འདི་སྐད་དུ། ཇི་བཞིན་པ་ཉིད་ས་མཆོག་སྟེ།། དེ་རིག་ཡེ་ཤེས་བླ་མའི་ས། །ཡེ་ནས་དེ་བཞིན་ཉིད་ལ་གནས། །ད་གཟོད་བགྲོད་དུ་ག་ལ་ཡོད། །ཅེས་གསུངས་སོ།།

ཡང་བཅོམ་ལྡན་འདས་གཟི་བརྗིད་དཔལ་ངོ་བོ་ཉིད་དག་པས་འདི་སྐད་དུ་གསུངས་པ། ཇི་བཞིན་པ་མ་བསླད་པའི་ཆོས་ཉིད་ནི་རྫོགས་པ་སྤྱིར་ཆིབས་ཀྱིས་མཆོག་དམ་པ་སྟེ། དེ་ཉིད་ཇི་ལྟ་བར་རིག་ཅིང་གདེང་དུ་ཆུད་པ་ཉིད་ན་རང་སྣང་ཡེ་ཤེས་བླ་མའི་ས་ཆེན་མ་བགྲོད་པར་ནོན་ཏེ་ཡེ་ནས་དེ་བཞིན་ཉིད་ལ་གནས་པ་ཡིན་པས་ད་གདོད་ས་གཞན་ལ་འཕྲལ་དུ་བགྲོད་དུ་ག་ལ་ཡོད་དེ་མེད་ཅིང་བགྲོད་ཡང་མི་དགོས་པའོ། །ཞེས་གསུངས་སོ། །དེ་ཉིད་དེ་ཁོ་ན་ཉིད་དུ་སངས་རྒྱས་ཀྱི་ས་འདུས་པར་བཀའ་སྩལ་པ་སྟེ་བཤད་པ་དང་འཆད་པ་ལའང་དེ་ཁོ་ན་ཉིད་དུ་དངོས་པོ་གང་འདུས་པར་སྦྱར་བར་བྱའོ།།

གསུམ་པ་ལོངས་སྤྱོད་རྫོགས་པའི་སྐུ་ནི།

ཡང་བཅོམ་ལྡན་འདས་སངས་རྒྱས་ཀུན་གྱི་དགེ་བའི་བཤེས་གཉེན། ཞེས་པ་ནས། པ་ཡི་དཀྱིལ་འཁོར་ཉིད། །ཅེས་གསང་བའི་ཚིག་ཏུའོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་སངས་རྒྱས་ཀུན་གྱི་དགེ་བའི་བཤེས་གཉེན་ངོ་བོ་ཉིད་དག་པས་གསང་ལས་འདི་སྐད་དུ། སྟོང་པ་ཉིད་ཀྱི་སྙིང་པོ་ལ། །སྣ་ཚོགས་སྣང་བའི་འཁོར་གྱིས་བསྐོར།།

སུས་ཀྱང་མ་བྱས་རང་བྱུང་བས། །ཇི་བཞིན་པ་ཡི་དཀྱིལ་འཁོར་ཉིད། །ཅེས་གསང་བའི་ཚིག་ཏུའོ།།

ཡང་བཅོམ་ལྡན་འདས་སངས་རྒྱས་ཀུན་གྱི་དགེ་བའི་བཤེས་གཉེན་ངོ་བོ་ཉིད་དག་པས་འདི་སྐད་དུ་གསུངས་པ། ཡེ་ནས་སྣང་སྟོང་གི་མཐའ་དང་བྲལ་བས་སྟོང་པ་ཉིད་ཀྱི་སྙིང་པོ་རང་བྱུང་འོད་གསལ་བའི་ངོ་བོ་ལ། གང་༼༣༡༥༽ཡང་མི་ལྡན་ལ་མ་བྲལ་བར་སྣ་ཚོགས་སུ་སྣང་བའི་འཁོར་གྱིས་བསྐོར་བ་ནི་སུས་ཀྱང་མ་བྱས་པར་རང་བྱུང་དུ་ཤར་བ་ཡིན་པའི་ཕྱིར་ཆོས་ཉིད་ཇི་བཞིན་པ་ཡི་ངང་དུ་རང་གསལ་ལོངས་སྤྱོད་རྫོགས་པའི་དཀྱིལ་འཁོར་ཉིད་ཀྱི་ངེས་ཚིགས་ཀྱང་ཡང་དག་པར་སྒྲུབ་པའོ། །ཞེས་རང་བཞིན་གྱི་དཀྱིལ་འཁོར་ངང་དུ་གདལ་བར་གསང་བའི་ཚིག་ཏུ་བཀའ་སྩལ་པའོ།།

བཞི་པ་གཉིས་མེད་ཀྱི་ཡོན་ཏན་ལ་ཟད་འཕེལ་མེད་པ་ནི།

ཡང་བཅོམ་ལྡན་འདས་ངན་སོང་ཐམས་ཅད་སྦྱོང་བ། ཞེས་པ་ནས། སྒྲུབ་ཏུ་ག་ལ་ཡོད། །ཅེས་གསང་བའི་ཚིག་ཏུའོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ངན་སོང་ཐམས་ཅད་སྦྱོང་བ་ངོ་བོ་ཉིད་དག་པ་གསང་བས་འདི་སྐད་དུ།

ཟག་མེད་ཡེ་ཤེས་དངོས་གྲུབ་ནི། །དེ་བཞིན་ཉིད་དུ་དངོས་གྲུབ་པས། །ཟད་པ་མེད་ཅིང་འཕེལ་བ་མེད།།

ད་གདོད་སྒྲུབ་ཏུ་ག་ལ་ཡོད། །ཅེས་གསང་བའི་ཚིག་ཏུའོ།།

ཡང་བཅོམ་ལྡན་འདས་ངན་སོང་ཐམས་ཅད་སྦྱོང་བའི་ངོ་བོ་ཉིད་དག་པ་གསང་བས་འདི་སྐད་དུ་གསུངས་པ། ཉོན་མོངས་པ་དང་ཡུལ་ལ་སོགས་པའི་ཟག་པ་ཀུན་དང་བྲལ་ཏེ་མེད་པའི་འབྲས་བུ་ཡེ་ཤེས་ཆེན་པོའི་དངོས་གྲུབ་ནི། དེ་བཞིན་ཉིད་ཀྱི་ངོ་བོ་དེ་ཁོ་ན་ཉིད་མངོན་དུ་གྱུར་པའི་དངོས་གྲུབ་ཡིན་པས་དེའི་ངོ་བོ་ལ་ཡེ་ནས་གྲུབ་པས་ཟད་པ་དང་ལྟུང་བ་མེད་ཅིང་ཐོབ་པ་ལ་འཕེལ་བ་དང་འགྲིབ་པ་ཉིད་ཀྱི་རྒྱུ་མེད་དེ། ད་གདོད་སྒྲུབ་ཏུ་ག་ལ་ཡོད་དེ་མེད་པས་གཞན་ལས་མི་ཚོལ་བའོ། །ཞེས་སེམས་ཉིད་རྟོགས་ན་དངོས་གྲུབ་རིན་པོ་ཆེ་ལྟར་འཕེལ་འགྲིབ་མེད་པར་སྣང་བ་ཉིད་གསང་བའི་ཚིག་ཏུ་གསུངས་པའོ།།

ལྔ་པ་མཉམ་པ་ཉིད་ཀྱི་ཡེ་ཤེས་བསྟན་པ་ནི།

ཡང་བཅོམ་ལྡན་འདས་འཇིག་རྟེན་ཀུན་གྱི་སློབ་དཔོན། ཞེས་པ་ནས། མི་གནས་བྱང་ཆུབ་སེམས། །ཅེས་གསང་བའི་ཚིག་ཏུའོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་འཇིག་རྟེན་ཀུན་གྱི་སློབ་དཔོན་ངོ་བོ་ཉིད་དག་པས་འདི་སྐད་དུ།

ཆོས་ཀུན་རང་བཞིན་མེད་པ་ཉིད། །མྱ་ངན་འདས་ཞེས་དེ་ལ་བྱ། །སྟོང་ཉིད་རབ་བཞིན་རྣམ་དག་པ།།

དེ་ཉིད་མི་གནས་བྱང་ཆུབ་སེམས། །ཞེས་གསང་བའི་ཚིག་ཏུའོ།།

ཡང་བཅོམ་ལྡན་འདས་འཇིག་རྟེན་ཀུན་གྱི་སློབ་དཔོན་ངོ་བོ་ཉིད་དག་པས་འདི་སྐད་དུ་གསུངས་པ། འཇིག་རྟེན་གྱི་ཆོས་ཀུན་ཏུ་སྣང་བ་སྣ་ཚོགས་པ་ཉིད་སེམས་ཀྱི་དེ་ཁོ་ན་ཉིད་དུ་རང་བཞིན་མེད་པར་མཐའ་དང་བྲལ་བ་ཉིད་ཡིན་ཏེ། རྣམ་པར་གྲོལ་བ་མྱ་ངན་ལས་འདས་པ་ཞེས་བྱའང་དེ་ཉིད་ལ་བརྗོད་པར་བྱ་བ་ཁོ་ན་སྟེ།

དེས་ན་སྟོང་ཉིད་ཆེན་པོ་ནི་མཐའ་གཉིས་གང་གིས་ཀྱང་མ་གོས་པར་རང་བཞིན་རྣམ་པར་དག་པ་ཡིན་པས་དེ་ཉིད་བསྒོམ་པའི་ངོ་བོར་མི་ཟིན་པས་གང་དུའང་མི་གནས་པའི་བྱང་ཆུབ་ཀྱི་སེམས་བདེ་བ་ཆེན་པོ་འཛིན་མེད་དེ་བཞིན་ཉིད་དུ་མཉམ་པ་ཉིད་ཞེས་སུ་བྱའོ། །ཞེས་འོད་གསལ་སྟོང་པ་ཉིད་ལ་མཐའ་ཡིས་མ་གོས་པར་རྟོགས་པས་ཡེ་ཤེས་མཉམ་ཆེན་ཟབ་མོ་ཉིད་གསང་བའི་ཚིག་ཏུ་བསྟན་པའོ།།

ལྔ་ཕྲག་ལྔ༼༣༡༦༽་པ་ལ་ལྔ་སྟེ། རྟོགས་པ་ཆོས་སྐུའི་ངོ་བོ་བསྟན་པ། ཡོན་ཏན་ལྷུན་རྫོགས་ཀྱི་རང་བཞིན་བཤད་པ། རང་སྣང་ངོ་བོ་ཉིད་ཀྱི་སྐུ། བྱ་བ་གྲུབ་པའམ་རང་བྱུང་ཡེ་ཤེས། གསང་བའི་ཐབས་ཀྱིས་མཚོན་པའི་རིག་པའི་གསུང་བཤད་པའོ། །དང་པོ་ནི།

ཡང་བཅོམ་ལྡན་འདས་རྣམ་པར་རྒྱལ་བ། ཞེས་པ་ནས། ཤེས་པ་དེ་ལྟར་སྣང༌། །ཞེས་གསང་བའི་ཚིག་ཏུའོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་རྣམ་པར་རྒྱལ་བའི་ངོ་བོ་ཉིད་དག་པས་འདི་སྐད་དུ། རྣམ་རྟོག་ཆུ་བོའི་སྐ་མགོ་དེ།། སྟོང་ཉིད་ཞིང་དུ་མ་བསྒྱུར་ན། །འཁོར་བའི་རྒྱ་མཚོས་གཡང་འགྱུར་ལ།།

དེ་མི་ཤེས་ལ་དེ་ལྟར་སྣང་། །ཞེས་གསང་བའི་ཚིག་ཏུའོ།།

ཡང་བཅོམ་ལྡན་འདས་རྣམ་པར་རྒྱལ་བ་ངོ་བོ་ཉིད་དག་པས་འདི་སྐད་དུ་གསུངས་པ། རྣམ་པར་རྟོག་པའི་ཆུ་བོ་རྒྱུན་ཆད་མེད་པར་འབྱུང་བའི་གཞི་མ་རིག་པ་བཅས་པ་ཡི་རྐ་མགོ་དེ་ཉིད་ལྟ་བ་མཆོག་གིས་ཇི་བཞིན་པའི་སྟོང་པ་ཉིད་དུ་རྟོགས་ནས་ཁྱབ་བདག་ཆོས་སྐུའི་ཞིང་དུ་མ་བསྒྱུར་ཏེ་ཡིན་དོན་མཆོག་ཉིད་རིག་པར་མ་བྱས་ན། འཁོར་བའི་རྒྱ་མཚོར་འཁྲུལ་བའི་རྦ་ཀློང་དུ་གཡེང་བར་འགྱུར་པ་ཡིན་པས་དེ་ནི་ཆོས་ཉིད་མི་ཤེས་པར་མ་རྟོགས་པའི་བློ་ལ་དེ་ལྟར་སྣང་བ་སྟེ། དེ་བས་ན་མ་ནོར་བར་རྟོགས་པ་ཤིན་ཏུ་གཅེས་སོ། །ཞེས་རྟོགས་ན་འཁོར་བའི་རྦ་ཀློང་རང་གྲོལ་ཆོས་སྐུར་འཆར་བའི་ཐབས་གསང་བའི་ཚིག་ཏུ་བཀའ་སྩལ་པའོ།།

གཉིས་པ་ཡོན་ཏན་ལྷུན་རྫོགས་ཀྱི་རང་བཞིན་བཤད་པ་ནི།

ཡང་བཅོམ་ལྡན་འདས་མེ་ཏོག་བཀོད་པའི་རྒྱལ་པོ། ཞེས་པ་ནས། སངས་རྒྱས་ཀུན་གྱི་གནས། །ཞེས་གསང་བའི་ཚིག་ཏུའོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་མེ་ཏོག་བཀོད་པའི་རྒྱལ་པོ་ངོ་བོ་ཉིད་དག་པས་འདི་སྐད་དུ།

ཇི་བཞིན་པ་ཡི་དེ་བཞིན་ཉིད། །ཐམས་ཅད་འབྱུང་བ་མ་ཡིན་པས། །ཀུན་བཟང་ཤེས་རབ་ཕ་རོལ་ཕྱིན།།

སེམས་ཅན་སངས་རྒྱས་ཀུན་གྱི་གནས། །ཞེས་གསང་བའི་ཚིག་ཏུའོ།།

ཡང་བཅོམ་ལྡན་འདས་མེ་ཏོག་བཀོད་པའི་རྒྱལ་པོ་ངོ་བོ་ཉིད་དག་པས་འདི་སྐད་དུ་གསུངས་པ། ཇི་བཞིན་པར་ཡེ་ནས་གནས་པ་ཡི་ཆོས་ཉིད་དེ་བཞིན་ཉིད་ནི་ཆོས་ཐམས་ཅད་རིལ་གྱི་འབྱུང་གནས་དང་སྐྱེད་པར་བྱེད་པའི་དབྱིངས་མ་ཡུམ་ཆེན་མོ་ཡིན་པས་ཀུན་ཏུ་བཟང་མོ་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་དེ། སེམས་ཅན་དང་སངས་རྒྱས་རིལ་ཀུན་གྱི་མ་འདྲེས་ལ་ཡོངས་སུ་རྫོགས་པའི་ངོ་བོར་བཞུགས་པའི་གནས་ཆེན་པོའོ། །ཞེས་དུས་གསུམ་དུ་རྒྱལ་བ་ཀུན་སྐྱེད་པའི་ཡུམ་ཆེན་མོའི་ངོ་བོར་རྟོགས་པའི་ཐབས་ཆེན་གསང་བའི་ཚིག་ཏུའོ། །ཞེས་གསུངས་སོ།།

གསུམ་པ་རང་སྣང་ངོ་བོ་ཉིད་ཀྱི་སྐུ་ནི།

ཡང་བཅོམ་ལྡན་འདས་ཐམས་ཅད་སྣང་བ། ཞེས་པ་ནས། ལས་བྱུང་དངོས་མེད་སྐུ། །ཞེས་གསང་བའི་ཚིག་ཏུའོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ཐམས་ཅད་སྣང་བ་ངོ་བོ་ཉིད་དག་པས་འདི་སྐད་དུ།

སྟུག་པོ་བཀོད་པའི་སངས་རྒྱས་དང། །སེམས་ཅན་རྣམ་པ་ཐམས་ཅད་དུ།།

དངོས་པོ་བརྟན་གཡོ་ལ་སོགས་པ། །དེ་ཉིད་ལས་བྱུང་དངོས་མེད་སྐུ། །ཞེས་གསང་བའི་ཚིག་ཏུའོ།།

ཡང་བཅོམ་ལྡན་འདས་ཐམས་ཅད་སྣང་བ་ངོ་བོ་ཉིད་དག་པས་འདི་སྐད་དུ་གསུངས་པ། ༼༣༡༧༽རྒྱན་སྟུག་པོ་བཀོད་པའི་ས་ལ་བཞུགས་པའི་རྒྱལ་བ་རྫོགས་པའི་སངས་རྒྱས་དང༌། འགྲོ་བ་སེམས་ཅན་དུ་གྱུར་པའི་རྣམ་པ་ཇི་སྙེད་པ་ཐམས་ཅད་དག་དང༌། སྣོད་བཅུད་ཀྱིས་བསྡུས་པའི་དངོས་པོ་བརྟན་གཡོ་ལ་སོགས་པ་ཀུན་ཀྱང་དངོས་གཞི་ཇི་བཞིན་པ་དེ་ཉིད་ལས་བྱུང་བས་མཚན་ཉིད་ཐམས་ཅད་པ་ཉིད་ཅིར་ཡང་སྣང་བ་ལ་དངོས་པོའི་ངོ་བོ་བསྟན་དུ་མེད་པ་ནི་སྐུ་རིལ་གྱི་གཞིའི་ཕྱིར་རོ། །ཞེས་གཞིའི་ངེས་ཚིག་དང་དགོས་པ་གསང་བའི་ཚིག་ཏུ་བསྟན་པའོ།།

བཞི་པ་བྱ་བ་གྲུབ་པའམ་རང་བྱུང་ཡེ་ཤེས་ནི།

ཡང་བཅོམ་ལྡན་འདས་ཡིད་འོང་ངམ་ཡིད་དུ། ཞེས་པ་ནས། ཕྱིན་པའི་ཐབས་ཀྱིས་སོ། །ཞེས་གསང་བའི་ཚིག་ཏུའོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ཡིད་དང་ངོ་བོ་ཉིད་དག་པས་འདི་སྐད་དུ། རང་བྱུང་ཡེ་ཤེས་རྩ་བ་ནི། །བྱང་ཆུབ་སེམས་ཉིད་ཡིན་པས་ན། །དེ་ཡི་རྩ་བ་སྙིང་རྗེ་སྟེ། །ཕ་རོལ་ཕྱིན་པ་ཐབས་ཀྱིས་སོ། །ཞེས་གསང་བའི་ཚིག་ཏུའོ།།

འོ་ན་ཐབས་འགོག་གམ་ཞེ་ན། ཡང་བཅོམ་ལྡན་འདས་ཡིད་འོང་ངམ་ཡིད་དུ་འོང་བ་ངོ་བོ་ཉིད་དག་པས་འདི་སྐད་དུ་གསུངས་པ། ཡེ་ཤེས་དྲུག་པ་རང་བྱུང་གི་ཡེ་ཤེས་རིལ་གྱི་རྩ་བ་དང་གཞིར་གྱུར་པ་ནི། རང་གི་རིག་པ་བྱང་ཆུབ་སེམས་དེ་ཁོ་ན་ཉིད་ལས་གཞན་མ་ཡིན་པས་ན་དེ་ཡི་གཞིའམ་རྩ་བ་ཉིད་གཉིས་སུ་མེད་པའི་སྙིང་རྗེ་ཆེན་པོའོ། །སྟེ་ཞེས་ཚིག་ལྷག་མ་དང་བཅས་པ་ནི། ཡེ་ཤེས་དེས་ཐམས་ཅད་རིལ་ཕ་རོལ་ཏུ་ཕྱིན་པའི་ས་ལམ་བཀོད་པར་རྫོགས་པར་བྱེད་པའི་ཐབས་ཀྱི་ཁྱད་པར་གྱིས་སོ། །ཞེས་མཆོག་ཏུ་ལྷག་པའི་དོན་ཏོ། །ཞེས་རྩ་བ་གཉིས་མེད་ཀྱི་ཡེ་ཤེས་སྙིང་རྗེ་ཆེན་པོ་ལ་འདུས་པར་སྟོན་པའི་གསང་བའི་ཚིག་ཏུ་བཀའ་སྩལ་པའོ།།

ལྔ་པ་གསང་བའི་ཐབས་ཀྱིས་མཚོན་པའི་རིག་པའི་གསུང་བཤད་པནི།

ཡང་བཅོམ་ལྡན་འདས་སེང་གེ་འབུམ་གཟུགས་ངོ་བོ་ཉིད་དག །ཅེས་པ་ནས། བློ་ཡིས་རིག་པ་མེད། །ཅེས་གསང་བའི་ཚིག་ཏུའོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འ་འདས་སེང་གེ་འབུམ་གཟུགས་ངོ་བོ་ཉིད་དག་པས་འདི་སྐད་དུ།

ཇི་སྙེད་དེ་བཞིན་ཉིད་ཀྱི་དོན། །ཡི་གེའི་མིང་ཚོགས་སྒྲ་མཚོན་པ།།

མིང་ཚིག་སྒྲ་ལ་མ་བརྟན་པ། །ཉམས་དྲོད་བློ་ཡིས་རིགས་ལས་མེད།། ཅེས་གསང་བའི་ཚིག་ཏུའོ།།

ཡང་བཅོམ་ལྡན་འདས་སེང་གེ་འབུམ་གཟུགས་ངོ་བོ་ཉིད་དག་པས་འདི་སྐད་དུ་གསུངས་པ། ཚིག་དང་ཡི་གེ་སྒྲ་དང་ཐ་སྙད་ཇི་སྙེད་ཀྱིས་བསྡུས་པ་ཀུན་ངོ་བོ་དེ་བཞིན་ཉིད་ཀྱི་དོན་མ་བཅོས་པའི་ཆོས་ཉིད་དུ་རྟོགས་པར་བྱ་བ་དེ་ཡང་ཡི་གེ་མིང་ཚིག་ལ་སོགས་ཐབས་ཀྱི་སྒྲས་མཚོན་ནས་རྟོགས་པར་བྱེད་དེ་དོན་འཇལ་བར་བྱེད་པའང་སྒྲ་ཡིད་ལ་བྱེད་པ་ཡིན་ཏེ། དེས་ན་མིང་ཚིག་སྒྲ་ལ་མ་བརྟེན་པར་རྟོགས་པའི་ཉམས་དྲོད་བློ་ཡིས་རིག་པ་མེད་པས་མཛུབ་མོས་ཟླ་བ་ལྟར་དོན་མཚོན་པའི་སྒྲ་ལ་བརྟེན་ནས་རིག་པས་ཡང་དག་པར་མཇལ་བ་ཁོ་ནར་བཞག་པའོ། །ཞེས་རྟོག་གེའི་སྒྲ་ཡིད་ལ་བྱེད་པ་མེད་པར་མཛུབ་༼༣༡༨༽མོས་ཟླ་བ་མཚོན་པ་ལྟར་རྟོགས་པའི་ཐབས་ཀྱི་གསང་བ་མཆོག་ཏུ་སྟོན་པའི་ཚིག་ཏུ་བཀའ་སྩལ་པའོ། །དེ་དག་ཀྱང་སྐུ་གསུང་ཐུགས་ཡོན་ཏན་དང་ཕྲིན་ལས་ཉི་ཤུ་རྩ་ལྔར་ཤེས་པར་བྱའོ།།

གཉིས་པ་དོན་བསྡུས་པ་ནི།

ཡང་བཅོམ་ལྡན་འདས་ཐུབ་པའི་དབང་པོ། ཞེས་པ་ནས། སྟུག་པོ་བཀོད་པའི་གནས། །ཞེས་གསང་བའི་ཚིག་ཏུའོ། །ཞེས་པའི་བར་གྱིས་བསྟན་ཏེ།

ཡང་བཅོམ་ལྡན་འདས་ཐུབ་པའི་དབང་པོ་ངོ་བོ་ཉིད་དག་པས་འདི་སྐད་དུ།

ཆོས་ཀུན་ཆོས་ཀྱི་རང་བཞིན་ནི།། དེ་བཞིན་ཉིད་ལས་མི་གཞན་པས།།

དེ་ཉིད་བྱང་ཆུབ་ལམ་ཉིད་དེ། །ལམ་དེ་སྟུག་པོ་བཀོད་པའི་གནས། །ཞེས་གསང་བའི་ཚིག་ཏུའོ།།

ཡང་བཅོམ་ལྡན་འདས་ཐུབ་པའི་དབང་པོ་ངོ་བོ་ཉིད་དག་པས་འདི་སྐད་དུ་གསུངས་པ། ཆོས་སུ་གྲགས་སོ་ཅོག་ཀུན་གྱི་ཆོས་ཀྱི་རང་བཞིན་ནི་ངོ་བོ་ཉིད་རང་རིག་པའི་ཕྱིར་དེ་བཞིན་ཉིད་ཀྱི་དེ་ཁོ་ན་ཉིད་ལས་མི་གཞན་པའི་དེ་ལྟར་ཤེས་པར་བྱེད་པའི་རྐྱེན་ཉིེད་ཐར་པ་བྱང་ཆུབ་ཆེན་པོའི་ལམ་ཡིན་པས་ལམ་ཡང་དངོས་པོ་རྣམས་ཀྱི་དེ་ཁོ་ན་ཉིད་འདི་ལས་གཞན་དུ་མེད་པའོ། །དེ་ཞེས་ལྷག་མ་ནི། ལམ་དེ་ལས་གྲུབ་པའི་འབྲས་བུ་སྟུག་པོ་བཀོད་པའི་གནས་ཀྱང་གཞན་དུ་མི་འཚོལ་བས་དུས་གསུམ་དུ་འཕོ་འགྱུར་མེད་པར་བརྗོད་པས་ཁྱད་པར་གྱི་ཆེ་བ་དང་ལྡན་པ་སྟེ། ཤིན་ཏུ་བློས་རེག་དཀའ་བའོ། །ཞེས་གཞི་ལམ་འབྲས་བུ་གསུམ་ཉིད་བདག་ཉིད་གཅིག་པར་འབྲེལ་བ་དང་ལྡན་པར་རྟོགས་པ་ཐུབ་པའི་དབང་པོའི་དགོངས་པ་འདུས་པའི་མཆོག་ཏུ་གསང་བའི་ཚིག་ཏུ་བཀའ་སྩལ་པའོ།།

བཞི་པ་ཞིང་ཁམས་བསམ་གྱིས་མི་ཁྱབ་པའི་སྒྲོན་མའི་དགོངས་པ་གཅིག་ཏུ་བསྡུ་བ་ལ་བཞི་སྟེ། སེམས་ཉིད་དོན་གྱི་གཞིར་བསྟན་པ། སྙིང་པོའི་ལམ་དུ་བསྟན་པ། གྲུབ་པའི་འབྲས་བུར་བསྟན་པ། དེ་དག་གི་དོན་བསྡུས་ཏེ་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཀྱེ་གྲོགས་པོ་དག ཅེས་པ་ནས། མ་དག་གཉིས་སུ་སྣང༌། །ཞེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ཀྱེ་གྲོགས་པོ་དག་གཞན་ཡང་དེ་དག་ལ་སོགས་པ། རྡོ་རྗེ་སེམས་དཔའི་སྤྲུལ་པའི་སྒྲོལ་མ་བྱེ་བ་ས་ཡ་སྙེད་ངོ་བོ་ཉིད་དག་པ་དང་། ཆོས་ཀྱི་ཕོ་བྲང་ན་བཞུགས་པ་མཐའ་ཐུག་པ་མེད་པའི་ངོ་བོ་ཉིད་དག་པས། གསང་བའི་ཚིག་འདི་སྐད་དུ། ལ་ལ་ནི་འདི་ལྟར། རྟོག་མེད་རང་རིག་སྐད་ཅིག་མ། །སེམས་ཅན་སངས་རྒྱས་གཉིས་ཀྱི་དབྱིངས།། རིག་དང་མ་རིག་གཉིས་ཁོ་ན། །དག་དང་མ་དག་གཉིས་སུ་སྣང་། །ཞེས་གསང་བ་དམ་པར་བསྔགས་སོ།།

སྟོན་པ་གསང་བ་པས་སྒྲོན་མ་དཔག་ཏུ་མེད་པའི་དགོངས་པ་བསྟན་པའི་ཕྱིར། ཀྱེ་གྲོགས་པོ་དག་ཅེས་བོས་ནས། གཞན་ཡང་ཕྱོགས་མི་མཐུན་པའིདགོངས་པ་སྔར་བཤད་པ་དེ་དག་ལ་སོགས་པ་རྣམས་དང་དེ་མ་ཡིན་པ་ཞིང་ཁམས་བསམ་གྱིས་མི་ཁྱབ་པར་རྡོ་རྗེ་སེམས་དཔའི་སྤྲུལ་པའི་སྒྲོན་མ་སྙེད་འབུམ་ཕྲག་བཅུ་བྱེ་བ་དང༌། བྱེ་བ་བཅུ་ས་ཡ་སྙེད་ངོ་བོ་ཉིད་དག་པ་དང་ཆོས་ཀྱི་དབྱིངས་ཀྱི་ཕོ་བྲང་ན་བཞུགས་པ་མཐའ་ཐུག་པ་མེད་པའི་སོ་སོའི་གནས་ན་ཆོས་སྟོན་པ་མཚན་༼༣༡༩༽བརྗོད་པར་དཀའ་བ་ངོ་བོ་ཉིད་དག་པའི་རྒྱལ་བ་ཚད་མེད་པས་དགོངས་པ་གསང་བའི་དོན་ཟབ་མོ་ཐོས་པ་རྣམས་བགྲོ་བའི་ཚིག་ཀྱང་འདི་སྐད་དུ་གྲགས་པའོ།།

དེ་དག་གང་ཞེ་ན། རྒྱལ་བ་ཇི་སྙེད་པ་ལས་ལ་ལ་དགར་བ་ནི་འདི་ལྟར་རེ་རེའི་དགོངས་པ་འཆད་པ་སྟེ། ཐེར་ཟུག་གི་རྟོག་པ་མེད་པའི་བྱང་ཆུབ་ཀྱི་སེམས་རང་རིག་པ་གང་དུའང་གོ་མི་འགག་པར་སྐད་ཅིག་མ་ཉིད་དུ་སྣང་བ་ནི། སེམས་ཅན་དང་སངས་རྒྱས་ཉིད་ཀྱི་འབྱུང་གནས་ཆེན་པོའི་དབྱིངས་སུ་གྱུར་པར་སྣང་ལ། དེའང་ཇི་བཞིན་པར་རིག་ཅིང་རྟོགས་པ་དང་མ་རིག་སྟེ་མ་རྟོགས་པ་གཉིས་ཀྱི་དབང་ཁོ་ནས་རིག་པ་དག་པ་དང་མ་དག་པ་གཉིས་སུ་སྣང་བ་ལས་རང་རྒྱུད་པ་ནི་མེད་པའོ། །ཞེས་དོན་གྱི་ངོ་བོ་ལ་ཐེར་ཟུག་པ་མེད་པས་གང་དུའང་སྣང་བཏུབ་པའི་མི་འགག་པའི་དགོངས་པ་མདོ་དོན་གཅིག་ཏུ་བསྡུ་བའི་གསང་བ་དམ་པར་བསྔགས་སོ།།

གཉིས་པ་རྒྱས་པར་བཤད་པ་ལ་གཉིས་ཏེ། འཁོར་བའི་གཞི་བསྟན་པ། མྱ་ངན་ལས་འདས་པའི་གཞིར་བསྟན་པའོ། །དང་པོ་ནི།

ཚན་གཅིག་གི་འོག་ནས། ལ་ལ་ནི་འདི་སྐད་དུ། དེ་ཉིད་ཅིར་ཡང༌། ཞེས་པ་ནས། ཉིད་ནའང་སྣང་བ་མེད། །ཅེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། དེ་ཉིད་ཅིར་ཡང་མི་སྣང་ན། །གློ་བུར་རྣམ་རྟོག་ཐ་དད་པའི།།

རྣམ་རྟོག་དེ་ཉིད་སྣང་བར་ཟད། །སྣང་བ་ཉིད་ན་སྣང་བ་མེད། །ཅེས་གསང་བ་དམ་པར་བསྔགས་སོ།།

ཡང་རྒྱལ་བ་ལ་ལ་ནི་འདི་སྐད་དུ་གསུངས་ཏེ། དེ་བཞིན་ཉིད་ནི་གང་དུའང་ཅིར་ཡང་མི་སྣང་བ་སྟེ་སྣང་མ་མྱོང་བའོ། །འགྱུར་བའི་དོན་ནི་གློ་བུར་གྱི་རྣམ་རྟོག་རྣམས་སྨིན་པས་བག་ཆགས་ཐ་དད་པའི་དངོས་པོ་ཅིར་ཡང་སྣང་བའོ། །འོ་ན་དེ་རྟག་པ་ཞིག་གོ་ཞེ་ན། རྣམ་རྟོག་དེ་ཁོ་ན་ཉིད་ཀྱི་རྒྱས་བཏབ་པས་དེ་ལྟར་སྣང་བར་ཟད་དེ། དེས་ན་སྣང་བདོ་བ་ཉིད་ནའང་དོན་ལ་སྣང་བ་མེད་པ་སྟེ་གཉིས་པ་ལས་གྲོལ་བའི་དོན་ཏོ། །ཞེས་རྟོག་པའི་སྣང་བའང་གཞི་ལས་མི་གཞན་པའི་གསང་བ་དམ་པར་བསྔགས་སོ།།

གཉིས་པ་མྱ་ངན་ལས་འདས་པའི་གཞིར་བསྟན་པ་ལ་ལྔ་སྟེ། རྡོ་རྗེའི་རིགས་ཀྱི་གཞི། ལས་ཀྱི་རིགས་ཀྱི་གཞི། པདྨའི་རིགས་ཀྱི་གཞི། རིན་པོ་ཆེའི་རིགས་ཀྱི་གཞི། དེ་བཞིན་བཤེགས་པའི་རིགས་ཀྱི་གཞིར་བསྟན་པའོ། །དང་པོ་ནི།

གོང་གི ལ་ལ་ནི་འདི་སྐད་དུ། དེ་ཉིད་སྨྲ་བརྗོད། ཅེས་པ་ནས། སྤྲོས་མེད་རྡོ་རྗེའི་དོན། །ཞེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། དེ་ཉིད་སྨྲ་བརྗོད་མེད་པ་ལས། །དེ་མཚོན་ཕྱིར་ན་ཐ་དད་བརྗོད། །གང་བརྗོད་དེ་ཉིད་དེ་བཞིན་ཉིད། །དེ་ཉིད་སྤྲོད་མེད་རྡོ་རྗེ་དོན། །ཞེས་གསང་བ་དམ་པར་བསྔགས་སོ།།

ཡང་སྟོན་པ་ལ་ལ་ནི་འདི་སྐད་དུ་གསུངས་༼༣༢༠༽ཏེ། དེ་ཁོ་ན་ཉིད་ནི་སྨྲ་བསམ་བརྗོད་པ་མེད་པ་ལ་ཚིག་གིས་ངོ་བོ་ཇི་བཞིན་དུ་ལྷན་པར་གཏན་ལ་མི་ཕེབས་པ་ལས་འོན་ཀྱང་དེ་ཉིད་བརྒྱུད་པས་མཚོན་པའི་ཕྱིར་ན་ཚིག་གི་ཐ་སྙད་ཐ་དད་པར་བརྗོད་དེ་བཀའ་སྩལ་པ་ཉིད་དོ། །འོ་ན་སྒྲ་དོན་དུ་གསུངས་སམ་ཞེ་ན། གང་སྒྲ་ཚིག་ཏུ་བརྗོད་པ་དེ་ཉིད་ངང་རིག་པའི་དེ་བཞིན་ཉིད་ཡིན་པས་མཐའ་ཐམས་ཅད་དང་བྲལ་བའི་ཕྱིར་བརྗོད་པ་དེ་ཉིད་ལ་སྤྲོས་བརྗོད་ཅི་ཡང་མེད་དེ་གཉིས་སུ་མེད་པ་ནི་རྡོ་རྗེ་རིགས་ཀྱི་དགོངས་དོན་གསང་བའི་ཐེག་པ་ཆེན་པོའོ། །ཞེས་ཚིག་གིས་དངོས་སུ་མི་ཕེབས་ཀྱང་བརྒྱུད་ནས་མཚོན་དུ་བཏུབ་པས་གསང་བ་དམ་པར་བསྔགས་སོ།།

གཉིས་པ་ལས་ཀྱི་རིགས་ཀྱི་གཞི་ནི།

འོག་གི ལ་ལ་ནི་འདི་སྐད་དུ། ཇི་བཞིན་པ་ཡི། ཞེས་པ་ནས། པོ་ཞིག་ག་ལ་ཡོད། །ཅེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། ཇི་བཞིན་པ་ཡི་དེ་ཁོ་ན། །སངས་རྒྱས་ཀྱིས་ཀྱང་བྱར་མེད་ན།།

གང་གིས་བཅོས་ཏེ་སུ་ཡིས་བྱས། །བྱེད་པ་པོ་ཞིག་ག་ལ་ཡོད། །ཅེས་གསང་བ་དམ་པར་བསྔགས་སོ།།

ཡང་རྒྱལ་བ་ལ་ལ་ནི་འདི་སྐད་དུ་གསུངས་ཏེ། སེམས་ཀྱི་ཆོས་ཉིད་ཇི་བཞིན་པ་ཡི་དེ་ཁོ་ན་ཉིད་ན་སངས་རྒྱས་ཀྱིས་ཀྱང་བཅོས་ཏེ་བྱར་མེད་པའི་མ་བཅོས་པ་ཡིན་ན་བྱེད་པ་པོ་གང་གིས་བཅོས་ཏེ་སུ་ཡིས་བྱས་ཏེ་མ་བྱས་པས་ན་བྱེད་པ་པོ་ཞིག་ག་ལ་ཡོད་དེ་མེད་པའི་ཕྱིར་མ་བསླད་པ་ཁོ་ནར་གསུངས་སོ། །དེ་ཡང་བྱ་བྱེད་མ་དམིགས་པ་དང༌། ངོ་བོ་མི་ཕྱེད་མི་ཟིན་པས་བྱར་མི་བཏུབ་པའི་ཕྱིར་རོ། །ཞེས་སེམས་ཀྱི་ཆོས་ཉིད་ལ་བྱེད་པ་པོ་མེད་པས་རྟག་ཆད་ལས་གྲོལ་བའི་གསང་བ་དམ་པར་བསྔགས་སོ།།

གསུམ་པ་པདྨའི་རིགས་ཀྱི་གཞི་ནི།

ལ་ལ་ནི་འདི་སྐད་དུ། ཡེ་ཤེས་ཅན་གྱི། ཞེས་པ་ནས། དག་པས་སྒྲིབ་པ་མེད། །ཅེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། ཡེ་ཤེས་ཅན་གྱི་སྤྱོད་ཡུལ་ནི། །དེ་བཞིན་དེ་ཉིད་ཡིན་པས་ན། །དེས་ཁྱབ་གང་གི་ཆོས་རྣམས་ཀུན། །རང་བཞིན་དག་པས་སྒྲིབ་པ་མེད། །ཅེས་གསང་བ་དམ་པར་བསྔགས་སོ།།

ཡང་རྣམ་འདྲེན་ལ་ལ་ནི་འདི་སྐད་དུ་གསུངས་ཏེ། ཡེ་ཤེས་ཆེན་པོ་དང་ལྡན་པ་ཅན་གྱི་རྒྱལ་བ་ཉིད་དེའི་སྤྱོད་ཡུལ་ནི་དེ་བཞིན་ཉིད་ཀྱི་དབྱིངས་དེ་ཁོ་ན་ཉིད་ཡིན་པས་ན་དེ་ཁོ་ན་ཉིད་དེས་བསྣུམས་ཤིང་ཁྱབ་པ་གང་གི་ཆོས་རྣམས་རིལ་ཀུན་མཐས་མ་གོས་པར་རང་བཞིན་རྣམ་པར་དག་པས་ན་སྒྲིབ་པ་མེད་དེ་ཐམས་ཅད་ཀྱང་གསང་དོན་འབའ་ཞིག་པའོ། །ཞེས་ཡེ་ཤེས་ཆེན་པོས་ཀུན་ལ་ཁྱབ་ཀྱང་མཐས་མ་གོས་པར་དག་པའི་གསང་བ་དམ་པར་བསྔགས་སོ།།

བཞི་པ་རིན་པོ་ཆེའི་རིགས་ཀྱི་གཞི་ནི།

ལ་ལ་ནི་འདི་སྐད་དུ། དེ་ཉིད་མཚན་ཉིད། ཅེས་པ་ནས། ཟད་མི་ཤེས་པས་མཛོད། །ཅེས་གསང་བ་དམ་པར་བསྔགས་སོ། །ཞེས་པའི་བར་གྱིས་༼༣༢༡༽བསྟན་ཏེ།

ལ་ལ་ནི་འདི་སྐད་དུ། དེ་ཉིད་མཚན་ཉིད་མེད་པ་ལས། །མཚན་ཉིད་སྣ་ཚོགས་པར་སྣང་བས། །ཀུན་འབྱུང་དབྱིངས་ཀྱི་རང་བཞིན་པས། །མེད་ལ་ཟད་མི་ཤེས་པར་མཛོད། །ཅེས་གསང་བ་དམ་པར་བསྔགས་སོ།།

ཡང་བདེ་བར་གཤེགས་པ་ལ་ལ་ནི་འདི་སྐད་དུ་གསུངས་ཏེ། ཆོས་ཉིད་ཇི་བཞིན་པའི་དེ་ཁོ་ན་ཉིད་ནི་མཚན་ཉིད་ཐམས་ཅད་པ་ཡིན་པས་སྤྲོས་མཚན་གྱི་རྣམ་པའི་མཚན་ཉིད་མེད་པ་ལས་བསམ་གྱིས་མི་ཁྱབ་པའི་རྣམ་པའི་མཚན་ཉིད་ཀྱི་རྣམ་པ་སྣ་ཚོགས་པར་མ་འགགས་ཏེ་ཀུན་ཏུ་སྣང་བས་ཀུན་གྱི་འབྱུང་གནས་སུ་གྱུར་པའི་རྒྱུ་ཡི་དབྱིངས་ཀྱི་རང་བཞིན་ཁོ་ན་ཡིན་པས་ངོ་བོ་མེད་ལ་ཟད་མི་ཤེས་ཤིང་འཕེལ་བ་མེད་པས་ཟད་འཕེལ་དང་བྲལ་བའི་མཛོད་དུ་གྱུར་བའི་དོན་ཏོ། །ཞེས་དབྱིངས་མཚན་ཉིད་མེད་པ་ཉིད་མཚན་ཉིད་ཀུན་གྱི་རྒྱུར་གྱུར་པའི་གསང་བ་དམ་པར་བསྔགས་སོ།།

ཡང་གོང་གི་གསུམ་པ་པདྨའི་རིགས་ཀྱི་མཚན་ཉིད་དག་པའི་གཞིའི་ཟུར་གཉིས་པ་ནི།

ལ་ལ་ནི་འདི་སྐད་དུ། སྣ་ཚོགས་ཐེག་པའི། ཞེས་པ་ནས། མ་འདྲེས་ཡོངས་སུ་རྫོགས། །ཞེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། སྣ་ཚོགས་ཐེག་པའི་ལྟ་བ་དང། །སྡོམ་པ་བསྲུང་བའི་བྱ་བ་ཀུན།།

སྤྱད་པར་བྱ་བ་མ་ཡིན་ཀྱང། །ཀུན་ཀྱང་མ་དྲེས་ཡོངས་སུ་རྫོགས། །ཞེས་གསང་བ་དམ་པར་བསྔགས་སོ།།

ཡང་དེ་བཞིན་གཤེགས་པ་ལ་ལ་ནི་འདི་སྐད་དུ་གསུངས་ཏེ། རྣམ་གྲངས་སྣ་ཚོགས་ཀྱི་ཐེག་པའི་སྒོ་མང་པོའི་ལྟ་བ་རྟོགས་པའི་ཤེས་རབ་དང༌། དམ་ཚིག་དང་འདུལ་བའི་སྡོམ་པ་སྲུང་བའི་ཉན་ཐོས་དང༌། བྱང་སེམས་སོགས་ཀྱི་སྤྱོད་པར་བྱ་བ་ཀུན་ཀྱང་གསང་སྒོ་ཆེན་པོ་འདིར་དང་དུ་བླང་སྟེ་ཆེད་དུ་སྤྱད་པར་བྱ་བ་མ་ཡིན་ན་ཡང༌། རིལ་ཐམས་ཅད་ཀུན་ཀྱང་བྱ་བ་མེད་པ་འདི་ལས་ཤར་བས་མ་འདྲེས་ལ་ཡོངས་སུ་རྫོགས་པར་གསལ་བ་ཡིན་ཏེ་དེ་དག་ལས་གུད་ན་མེད་པའི་ཕྱིར་རོ། །ཞེས་སྒོ་ཐམས་ཅད་གསང་བ་ཉིད་ཀྱི་སྒོར་འདུས་པའི་གསང་བ་དམ་པར་བསྔགས་སོ།།

ལྔ་པ་དེ་བཞིན་བཤེགས་པའི་རིགས་ཀྱི་གཞིར་བསྟན་པ་ནི།

ལ་ལ་ནི་འདི་སྐད་དུ། དེ་ལ་ཕྱོགས་དང༌། ཞེས་པ་ནས། ཀྱིས་ནི་དེ་མི་མཁྱེན། །ཞེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། དེ་ལ་ཕྱོགས་དང་དུས་མེད་པར། །གང་གིས་ཕྱོགས་དང་དུས་བརྟག་པའི།།

དེ་ཉིད་དེ་ལ་རྣམ་པ་སྣང་། །སངས་རྒྱས་ཀྱིས་ནི་དེ་མི་མཁྱེན། །ཅེས་གསང་བ་དམ་པར་བསྔགས་སོ།།

ཡང་རྒྱལ་བ་ལ་ལ་ནི་འདི་སྐད་དུ་གསུངས་ཏེ། མཉམ་པ་ཆེན་པོའི་དེ་ཉིད་ཀྱི་ངང་ལ་ཕྱོགས་བཅུ་དང་དུས་བཞིའི་ཐ་སྙད་ཀྱི་ཆོས་མེད་པར་མ་སྤངས་བྲལ་བ་ལ། འགྲོ་བ་གང་གིས་ཕྱོགས་དང་དུས་ཀྱི་དངོས་པོ་བཅུ་བཞིར་བརྟགས་པའི་དབང་ལས་དེ་ཉིད་རྟོག་པ་དེ་ལ་རྣམ་པར་མཐུན་པར་སྣང་བ་དེ་ལྟར་རྒྱལ་བ་སངས་རྒྱས་ཀྱིས་ནི་ངན་རྟོག་གི་འཛིན་པ་དེ་ཉིད་མི་མཁྱེན་པའི་ཕྱིར་ཏེ་ཐམས་ཅད་དེ་བཞིན་ཉིད་དུ་མཁྱེན་པའི་ཕྱིར་རོ། །འོན་ཀྱང་སངས་རྒྱས་སྤྲུལ་༼༣༢༢༽སྐུས་ཇི་སྙེད་པའི་ཆོས་ཀྱི་རང་སྣང་དུ་མི་གཟིགས་ཀྱང་ཀུན་ཏུ་བརྟགས་པའི་འཁྲུལ་ངོ་ལ་སྣང་ཚུལ་དང་དེ་ཉིད་འདུལ་བའི་ཁམས་དབང་བསམ་པ་དང་མཐུན་པའི་ཆོས་ཀྱི་སྒོ་རྣམས་མི་མཁྱེན་པ་མིན་ནོ། །ཞེས་རྒྱལ་བས་ངན་རྟོག་གི་དངོས་པོར་མི་མཁྱེན་པར་དེ་བཞིན་ཉིད་དུ་མཁྱེན་ཏེ་དེའི་ངང་དུ་གཤེགས་པའི་གསང་བ་དམ་པར་བསྔགས་སོ།།

གཉིས་པ་སེམས་ཉིད་ལམ་དུ་བསྟན་པ་ལ་བཞི་སྟེ། ལྟ་བ་བསྟན་པ། བསྒོམ་པ་བསྟན་པ། ལྟ་སྒོམ་ཐུན་མོང་དུ་བསྟན་པ། ལྟ་སྒོམ་ཐུན་མོང་ལ་ཡོན་ཏན་ཐམས་ཅད་རྫོགས་པར་བཤད་པའོ། །དང་པོ་ལ་གསུམ་སྟེ། ལྟ་བ་མེད་པའི་སྐྱོན། ལྟ་བའི་ངོ་བོ། རྟོགས་པའི་ཡོན་ཏན་ནོ། །དང་པོ་ལ་གཉིས་ཏེ། ཡོངས་རྫོགས་ཀྱི་ལྟ་བ་མེད་པའི་སྐྱོན། མ་འདྲེས་ཀྱི་ལྟ་བ་མེད་པའི་སྐྱོན་ནོ། །དང་པོ་ནི།

ཚན་གསུམ་གྱི་འོག་ནས། ལ་ལ་ནི་འདི་སྐད་དུ། སྣ་ཚོགས་སོ་སོར། ཞེས་པ་ནས། ངེས་པ་རྙེད་པ་མིན། །ཞེས་བཀའ་དམ་པར་གདམས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། སྣ་ཚོགས་སོ་སོར་ཀུན་རིག་ཀྱང་། །ཀུན་གྲོལ་རྣམ་དག་ལམ་མེད་ན།།

དམ་པ་ཉིད་ལས་ཤིན་ཏུ་གོལ། །ནམ་ཡང་ངེས་པ་རྙེད་པ་མིན། །ཞེས་བཀའ་དམ་པར་གདམས་སོ།།

དེ་ཡང་སངས་རྒྱས་ལ་ལ་ནི་འདི་སྐད་དུ་གསུངས་ཏེ། སོ་སོར་རྟོག་པའི་ཤེས་རབ་ཀྱིས་དངོས་པོ་སྣ་ཚོགས་པ་རྣམས་ཀྱི་རང་གི་མཚན་ཉིད་སོ་སོར་མ་འདྲེས་པ་ཙམ་ཀུན་ནས་རིག་སྟེ་ཤེས་ཀྱང་ཇི་བཞིན་པ་ཡོངས་རྫོགས་ཆེན་པོའི་ངང་དུ་རྣམ་པར་གྲོལ་བར་མ་མཐོང་ནས་རང་རིག་རྣམ་པར་དག་པའི་ལམ་མེད་ན། ལམ་དམ་པ་མ་ནོར་བ་ཉིད་ལས་ཤིན་ཏུ་གོལ་བས་དུས་ནམ་དུ་ཡང་ངེས་དོན་དམ་པ་ཉིད་རྙེད་པ་མིན་པས་ཇི་བཞིན་པ་རྟོགས་པར་གྱིས་ཤིག་ཅེས། སོ་སོར་རྟོག་པའི་ཤེས་རབ་ཙམ་གྱིས་ངེས་དོན་མི་རྙེད་པས་མི་དམིགས་པའི་ཤེས་རབ་ལ་འདུས་པར་སྟོན་པའི་བཀའ་དམ་པར་གདམས་སོ།།

གཉིས་པ་མ་འདྲེས་ཀྱི་ལྟ་བ་མེད་པའི་སྐྱོན་ནི།

ཚན་གཅིག་གི་འོག་ནས། ལ་ལ་ནི་འདི་སྐད་དུ། སྣ་ཚོགས་སོ་སོར་མ་རིག ཅེས་པ་ནས། སྨྲ་བ་རུང་མ་ཡིན། །ཞེས་ནན་ཏན་དམ་པར་གདམས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། སྣ་ཚོགས་སོ་སོར་མ་རིག་པར། །དེ་བཞིན་ཉིད་དུ་ངེས་མི་རྙེད།།

དེ་གཉིས་ངེས་པར་མ་རྙེད་ན། །སྣ་ཚོགས་སྨྲ་བ་རུང་མ་ཡིན། །ཞེས་ནན་ཏན་དམ་པར་གདམས་སོ།།

འོན་ཏེ་བཤད་པ་ལྟར་རང་གི་མཚན་ཉིད་བཤད་པ་ཡང་དོན་མེད་པ་མ་ཡིན་པའི་ཕྱིར། སྟོན་པ་ལ་ལ་ནི་འདི་སྐད་དུ་གསུངས་ཏེ། དངོས་པོ་སྣ་ཚོགས་ཇི་སྙེད་པའི་མཚན་ཉིད་སོ་སོར་མ་ཤེས་ཏེ་རང་ས་ནས་ཡང་དག་པའི་དོན་དུ་མ་རིག་པར་ཀུན་ཁྱབ་གདལ་བ་ཆེན་པོའི་དེ་བཞིན་ཉིད་དུ་ངེས་པ་མི་རྙེད་དེ་དེ་ཁོ་ན་ཉིད་མ་༼༣༢༣༽ནོར་བར་མཐོང་དཀའ་བས་རྟོགས་པ་དེ་ཡང་གཅེས་སོ། །གལ་ཏེ་སྣ་ཚོགས་ཤེས་པ་ཁོ་ནས་ཆོག་གོ་ཞེ་ན། ཡོངས་རྫོགས་ཇི་བཞིན་པའི་བདེན་པ་དེ་ཉིད་ལ་ངེས་པ་མ་རྙེད་ནས་ཡང་དག་པར་མ་མཐོང་ན་ཐ་སྙད་སྣ་ཚོགས་སུ་སྨྲ་བ་ཉིད་མ་འདྲེས་པའི་ལྟ་བར་རུང་བ་མ་ཡིན་ཏེ་ཇི་ལྟར་བྱར་ཡང་དོན་མེད་པ་ཡིན་པས་དོན་གྱི་ཚིག་དང་ལྡན་པར་གྱིས་ཤིག་ཅེས་རྒྱལ་བའི་གསུང་གི་ངེས་པ་ཕྱོགས་གཅིག་ཏུ་མ་ངེས་པ་ལ་བརྟེན་ནས་མཐའ་དང་བྲལ་བའི་སྙིང་པོ་ལ་ནན་ཏན་དམ་པར་གདམས་སོ།།

གཉིས་པ་ལྟ་བའི་ངོ་བོ་ལ་གསུམ་སྟེ། ལྟ་བའི་ངོ་བོ་སྤྱིར་བཤད་པ། ཤེས་རབ་གསུམ་བྱེ་བྲག་ཏུ་བསྟན་པ། ལྟ་བའི་ངེས་ཚིག་བཤད་པའོ། །དང་པོ་ནི།

ལ་ལ་ནི་འདི་སྐད་དུ། མཁའ་ལ་འཇའ་སྣང༌། ཞེས་པ་ནས། འབྱུང་བ་དེ་ལྟར་ཡིན། །ཞེས་དཔག་དཀའ་བ་དམ་པར་གདམས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། མཁའ་ལ་འཇའ་སྣང་ཇི་བཞིན་དུ། །བསམ་ཡས་བསམ་སྣང་དེ་བཞིན་ནོ།།

གཅིག་ཏུ་ངེས་པ་མེད་པའི་གསུང་། །ཇི་ལྟར་བྱུང་བ་དེ་ལྟར་ཡིན། །ཞེས་དཔག་དཀའ་བ་དམ་པར་གདམས་པའོ།།

ཡང་རྣམ་འདྲེན་ལ་ལ་ནི་འདི་སྐད་དུ་གསུངས་ཏེ། དཔེར་ན་མཁའ་ལ་འཇའ་སྣང་གི་མཐུན་དཔེས་མཚོན་ཚུལ་ཇི་ལྟ་བ་བཞིན་དུ་བསམ་ཡས་མ་འདྲེས་པའི་ཆོས་རྣམས་ཆོས་ཉིད་བསམ་མེད་ཀྱི་ངང་དུ་ཡོངས་སུ་རྫོགས་པར་སྣང་བའང་ཚུལ་དེ་བཞིན་དུ་སྟོན་པ་ཡིན་ནོ། །དེ་བས་ན་རྒྱལ་བའི་གསུང་ཅིར་ཡང་གཅིག་ཏུ་ངེས་པ་མེད་པའི་རང་བཞིན་ཡིན་ཡང༌། གསུང་དེ་ལས་གང་ཇི་ལྟར་འཚམས་པའི་འདུལ་བ་འབྱུང་བ་དེ་ལྟར་ཡང་དོན་དུ་འགྱུར་བ་ཡིན་པས་ངོ་བོ་དབྱེར་མེད་པའི་དེ་ཁོ་ན་ཉིད་དུ་ངེས་པའང་ཡིན་ནོ། །ཞེས་ལྟ་བ་རྟོགས་པའི་གདིང་མ་འདྲེས་ཡོངས་རྫོགས་ཀྱི་ཤེས་རབ་ལ་འདུས་པས་ཟབ་ཅིང་དཔག་བར་དཀའ་བ་དམ་པར་གདམས་སོ།།

གཉིས་པ་ཤེས་རབ་གསུམ་བྱེ་བྲག་ཏུ་བསྟན་པ་ལ་གསུམ་སྟེ། ཐོས་པའི་ཤེས་རབ། བསམ་པའི་ཤེས་རབ། སྒོམ་པའི་ཤེས་རབ་བསྟན་པའོ། །དང་པོ་ནི།

ལ་ལ་ནི་འདི་སྐད་དུ། ཀུན་གྱི་རྩ་བ། ཞེས་པ་ནས། ཀུན་ཤེས་ཤེས་རབ་མཆོག །ཅེས་ཤེས་རབ་མཆོག་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། ཀུན་གྱི་རྩ་བ་འདིར་བཅད་པས། །འདི་དོན་གང་རིག་ཐོས་པའི་མཆོག །ཐམས་ཅད་འདི་ལས་འབྱུང་བས་ན། །འདི་ཤེས་ཀུན་ཤེས་ཤེས་རབ་མཆོག །ཅེས་ཤེས་རབ་མཆོག་དམ་པར་བསྔགས་སོ།།

ཡང་ཐུབ་པ་ལ་ལ་ནི་འདི་སྐད་དུ་གསུངས་ཏེ། ཐེག་པའི་སྒོ་ཀུན་གྱི་གྲུབ་པའི་མཐའི་རྩ་བ་ནི་ཇི་བཞིན་པ་ཡིན་པའི་ཕྱིར་གསང་དོན་འདིར་བཅད་པས། འདི་ཡི་དོན་གང་གི་ཡང་དག་པར་རིག་པ་ཁོ་ན་བསྟན་པ་རྒྱ་མཚོ་ཐོས་པའི་མཆོག་དམ་པར་གྱུར་པའོ། །དེ་ཅིའི་ཕྱིར་ཞེ་ན། ཐམས་ཅད་ཀུན་འདི་ལས་ཤར་ཞིང་འབྱུང་བས་ན་འདི་ཉིད་མ་ནོར་བར་ཤེས་ཤིང་རྟོགས་པས་གཞན་ཀུན་༼༣༢༤༽ཀྱང་ལྷག་མ་མེད་པར་ཤེས་ཤིང་རྟོགས་པའི་ཤེས་རབ་ཀྱི་མཆོག་སྟེ། དེ་ལས་ལྷག་པའི་དོན་མེད་པའི་ཕྱིར་རོ། །ཞེས་གསང་དོན་ཇི་བཞིན་པར་ཐོས་པ་ལ་རྟོགས་པའི་གདེང་འདུས་པའི་ཤེས་རབ་མཆོག་དམ་པར་བསྔགས་སོ།།

གཉིས་པ་བསམ་པའི་ཤེས་རབ་ནི།

ལ་ལ་ནི་འདི་སྐད་དུ། གསང་བའི་ནང་ནས། ཞེས་པ་ནས། དམ་པ་རྣམས་ཀྱིས་བསྔགས། །ཞེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། གསང་བའི་ནང་ནས་གསང་ཆེན་འདི། །ཉིད་ཀྱིས་ཉིད་ཀྱང་མི་མཐོང་བར། །གཞན་གྱིས་མཐོང་བར་ག་ལ་འགྱུར། །དེ་ཉིད་དམ་པ་རྣམས་ཀྱིས་བསྔགས། །ཞེས་གསང་བ་དམ་པར་བསྔགས་སོ།།

ཡང་རྣམ་འདྲེན་ལ་ལ་ནི་འདི་སྐད་དུ་གསུངས་ཏེ། གསང་བའི་ཐེག་པའི་ནང་ན་ཡང་བླར་གྱུར་པའི་གསང་ཆེན་སྙིང་པོའི་ཐེག་པ་འདི་ཉིད་མཐོང་བར་བྱ་བ་དང་བྲལ་བ་ཉིད་ཀྱིས་རང་གི་ངོ་བོ་ཉིད་ཀྱང་འདི་འདྲར་མི་མཐོང་ཞིང་མི་རྙེད་པར་གྱུར་ན། ཐ་དད་གཞན་གྱིས་ཚོལ་བས་མཐོང་ཞིང་རྙེད་པར་ག་ལ་འགྱུར་ཏེ་མི་འགྱུར་བ་ཁོ་ནའོ། །དེ་ལྟར་རེག་དཀའ་བ་དེ་ཉིད་གསང་བ་དོན་གྱི་མཆོག་ཏུ་དམ་པ་རྣམས་ཀྱིས་ལེགས་པར་བསྔགས་ཏེ་བསྟན་པའོ། །ཞེས་ཐེག་པའི་མཆོག་རྙེད་པར་དཀའ་བས་ཚོལ་བས་མི་རྙེད་པ་ཉིད་བསམ་པའི་ཤེས་རབ་ཀྱི་སྙིང་པོ་གསང་བ་དམ་པར་བསྔགས་སོ།།

གསུམ་པ་སྒོམ་པའི་ཤེས་རབ་བསྟན་པ་ནི།

ལ་ལ་ནི་འདི་སྐད་དུ། ཆོས་རྣམས་ཀུན་གྱི། ཞེས་པ་ནས། དམ་པ་དོན་པོ་མཆོག །ཅེས་དམ་པ་ཆེན་པོར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། ཆོས་རྣམས་ཀུན་གྱི་སྙིང་པོ་འདི། །གསེར་དང་མཁའ་བཞིན་མི་འགྱུར་བས།།

མི་ནུབ་སྟོར་བྲལ་མེད་པའི་ཕྱིར། །ཆོས་ཀྱི་དམ་པ་དོན་གྱི་མཆོག །ཅེས་དམ་པ་ཆེན་པོར་བསྔགས་སོ།།

ཡང་སྟོན་པ་ལ་ལ་ནི་འདི་སྐད་དུ་གསུངས་ཏེ། ཆོས་རྣམས་ཀུན་གྱི་བཅུད་ཀྱི་སྙིང་པོ་ལྷུན་གྱིས་གྲུབ་པའི་ངོ་བོ་འདི་ནི། དཔེར་ན་གསེར་ས་ལེ་སྦྲམ་དང་ནམ་མཁའ་བཞིན་དུ་མི་འགྱུར་བ་ཡིན་པས་འཕོ་འགྱུར་དང་བྲལ་ཏེ་མི་ནུབ་པའི་རྒྱལ་མཚན་ཆེན་པོ་ངོ་བོ་སྟོར་རླག་གིས་བྲལ་བ་མེད་པའི་ཕྱིར་གྱི་གཏན་ཚིགས་དེ་བས་ན། ཤེས་པར་བྱ་བ་དང་མཐོང་བར་བྱ་བའི་ཆོས་རིལ་ཀུན་གྱི་སྙིང་པོ་དམ་པ་ཕུལ་དུ་བྱུང་བའི་དོན་ཆེན་པོ་མཆོག་ཏུ་གྱུར་བ་བླ་ན་མེད་པའོ། །ཞེས་ཤེས་བྱ་དང་ཐོབ་བྱ་ཀུན་གྱི་མཆོག་ཏུ་རྟོགས་པར་བྱ་བའི་དམ་པ་ཆེན་པོར་བསྔགས་སོ།།

གསུམ་པ་ལྟ་བའི་ངེས་ཚིག་ནི།

ཚན་སོ་དྲུག་གི་འོག་ནས། ལ་ལ་ནི་འདི་སྐད་དུ། ཆོས་ཀུན་མི་མཐོང༌། ཞེས་པ་ནས། རྟོག་པ་གློ་བུར་ཡིན། །ཞེས་མ་བསླད་པ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། ཆོས་ཀུན་མི་མཐོང་ཆོས་ཉིད་ཀྱང་། །མི་མཐོང་སེམས་ཅན་སེམས་མི་མཐོང་། །སངས་རྒྱས་མི་མཐོང་གང་མཐོང་བ། །དེ་ནི་དོན་དམ་ཡང་དག་མཐོང་། །ཞེས་མཐོང་བ་ཡོངས་སུ་དག་པར་བསྔགས་སོ། །ལ་ལ་ནི་འདི་སྐད་དུ། ཡེ་ནས་མ་བཅོས་རང་བཞིན་པ། །མི་སྐྱེ་མི་འགག་རྣམ་ཀུན་མཁྱེན། །སུས་ཀྱང་མ་བྱས་རང་བྱུང་བ། །རྣམ་པར་རྟོག་པ་བློ་བུར་ཡིན། །ཞེས་མ་བསླད་པ་དམ་པར་བསྔགས་སོ།།

ཡང་རྒྱལ་བ་ལ་ལ་ནི་འདི་སྐད་དུ་གསུངས་ཏེ། ལྟ་བའི་ངོ་བོ་དཀྱིལ་འཁོར་གསུམ་དབྱེར་མེད་པ་ཡིན་པས་ཆོས་སོ་ཅོག་ཀུན་ཀྱང་མི་མཐོང་ཆོས་ཉིད་ཀྱང་མི་མཐོང་བས་སེམས་ཅན་གྱི་སེམས་ཡང་མི་མཐོང་ལ་ཕྱོགས་གཅིག་པའི་སངས་༼༣༢༥༽རྒྱས་ཀྱང་མི་མཐོང་སྟེ། རིལ་གདོད་ནས་མ་དམིགས་པའི་ཕྱིར་རོ། །དེ་ལྟར་གང་གིས་མཐོང་བ་དེ་ནི་རང་རིག་པ་ཡུལ་མེད་པར་རང་གསལ་བའི་དོན་དམ་པ་ཉིད་ཡང་དག་པར་མཐོང་བའོ། །ཞེས་ཡུལ་དུ་མ་མཐོང་བ་ཉིད་མཐོང་བ་ཡོངས་སུ་དག་པར་བསྔགས་སོ། །ཡང་སྟོན་མཆོག་ལ་ལ་ནི་འདི་སྐད་དུ་གསུངས་ཏེ། ཇི་བཞིན་པ་ཕྱི་མོའི་ཆོས་ཉིད་ནི་ཡེ་ནས་ངོ་བོ་མ་བཅོས་པར་རང་རིག་མ་འདྲེས་ཡོངས་རྫོགས་ཉིད་ཇི་ལྟ་བ་བཞིན་དུ་གསལ་བ་ཡིན་ལ། དེ་ཉིད་ངོ་བོ་མི་ཟིན་ཅིང་སྐྱེ་ཤི་མེད་པས་མི་སྐྱེ་བ་དང་མི་འགག་པའི་ཡེ་ཤེས་ཆེན་པོར་རྣམ་པ་ཀུན་མཁྱེན་དུ་རང་གསལ་བ་སྟེ། གདོད་ནས་སུས་ཀྱང་མ་བྱས་པར་རྒྱུ་རྐྱེན་དང་བྲལ་བར་རང་བྱུང་བ་ཁོ་ན་ཡིན་ནོ། །འོ་ན་དངོས་པོ་བཟང་ངན་དུ་སྣང་བ་འདི་ཅི་ཉེས་ཞེ་ན། འཁྲུལ་པ་དག་གིས་རྣམ་པར་རྟོག་པ་བརྟས་པས་ལྟོས་པའི་གློ་བུར་བར་སྣང་བ་ཉིད་ཡིན་ནོ། །ཞེས་སྐྱེ་ཤི་མེད་པའི་དོན་རྟོགས་ན་མ་བཅོས་པའི་དགོངས་པ་འཁྲུལ་པས་མ་བསླད་པ་དམ་པ་ཡིན་པར་བསྔགས་སོ།།

གསུམ་པ་རྟོགས་པའི་ཡོན་ཏན་ནི།

སྔར་སྒོམ་པའི་ཤེས་རབ་ཀྱི་འཕྲོར། ལ་ལ་ནི་འདི་སྐད་དུ། ཐོག་མ་མེད་ནས། ཞེས་པ་ནས། ཉིད་དུ་རྣམ་པར་བསྒྲལ། །ཞེས་གསང་བ་དམ་པར་བསྔགས་སོ། །ཞེས་པའི་བར་དང༌།

ལ་ལ་ནི་འདི་སྐད་དུ། ཐོགས་མ་མེད་ནས་བསགས་པ་ཡི། །རྣམ་རྟོག་སྤྲིན་དཔུང་དཔག་མེད་པ།།

སྟོང་ཉིད་སྐད་ཅིག་རིག་པ་ཡིས། །དེ་བཞིན་ཉིད་དུ་རྣམ་པར་བསྒྲལ། །ཞེས་གསང་བ་དམ་པར་བསྔགས་སོ།།

འོག་གི་ལྟ་བའི་ངེས་ཚིག་གི་འཕྲོ་ནས། ལ་ལ་ནི་འདི་སྐད་དུ། དེ་ཉིད་དེ་དང༌། ཞེས་པ་ནས། བྱ་བ་ག་ལ་ཡོད། །ཅེས་ཡེ་ནས་སངས་རྒྱས་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། དེ་ཉིད་དེ་དང་གང་ལྡན་པ། །དམན་པའི་ལུས་ལ་སངས་རྒྱས་ཡིན།།

དེ་ལ་མ་གཏོགས་གང་ཞིག་ན། །སངས་རྒྱས་བྱ་བ་ག་ལ་ཡོད། །ཅེས་ཡེ་ནས་སངས་རྒྱས་པར་བསྔགས་སོ།།

ཡང་རྣམ་འདྲེན་ལ་ལ་ནི་འདི་སྐད་དུ་གསུངས་ཏེ། ཡུན་ཐོག་མ་མེད་པ་ཇི་སྙེད་ནས་བསགས་ཤིང་བརྩེགས་པ་ཡི་རྣམ་རྟོག་གི་སྒྲིབ་པའི་སྤྲིན་དཔུང་དཔག་ཏུ་མེད་པ་རྣམས་སྟོང་པ་ཆེན་པོ་ཉིད་གདེང་དུ་གྱུར་པའི་སྐད་ཅིག་ཏུ་གསལ་བའི་རིག་པ་ཡིས་ཀྱང་དེ་བཞིན་ཉིད་ཇི་བཞིན་པའི་ངང་དུ་རྣམ་པར་བསྒྲལ་བས་རང་གསལ་དུ་ཡོངས་སུ་དག་གོ །ཞེས་ཐོག་མ་མེད་པའི་སྒྲིབ་པ་སྟོང་པའི་གདེང་གིས་འདག་པས་གསང་བ་དམ་པར་བསྔགས་སོ། །ཡང་རྒྱལ་བ་ལ་ལ་ནི་འདི་སྐད་དུ་གསུངས་ཏེ། གསང་སྔགས་ཀྱི་ངོ་བོ་སེམས་ཀྱི་དེ་ཁོ་ན་ཉིད་སྒྲིབ་པ་མེད་པའི་དཀྱིལ་འཁོར་འོད་གསལ་བ་དེ་ཡི་རྟོགས་པ་དང་གང་ལྡན་པ་དེ་ནི་འགྲོ་བ་དམན་པའི་ལུས་ལ་རྒྱལ་བ་རྫོགས་པའི་སངས་རྒྱས་ཀྱི་དགོངས་པ་ཅན་ཡིན་པས། དེ་མ་ཡིན་པའམ་དེ་ལ་མ་གཏོགས་པ་ཡི་འབྲས་བུ་གང་ཞིག་ཡུལ་གཞན་ན་ཡོད་པ་ལས་རྒྱལ་བ་༼༣༢༦༽སངས་རྒྱས་ཉིད་ཀྱིས་ཀྱང་བགྲོད་པ་མཐར་ཕྱིན་ནས་ཐོབ་པར་བྱ་བ་ག་ལ་ཡོད་དེ་མེད་པས་རང་བྱུང་རྟོགས་པ་ཉིད་ལས་གཞན་ན་མི་བརྙེས་སོ། །ཞེས་འོད་གསལ་རྟོགས་ན་འདི་ཉིད་ཡེ་ནས་སངས་རྒྱས་པའི་དགོངས་པ་དམ་པར་བསྔགས་སོ། །ཞེས་ཡོན་ཏན་རང་རྫོགས་སུ་འགྲེལ་ཏོ།།

གཉིས་པ་བསྒོམ་པ་བསྟན་པ་ལ་ལྔ་སྟེ། རྟོགས་ནས་བསྒོམ་པའི་ཡོན་ཏན། མ་རྟོགས་ནས་བསྒོམ་པའི་སྐྱོན། བསྒོམ་པའི་ངོ་བོ། བསྒོམ་པའི་གོལ་ས། སྒོམ་གྱི་ཁྱད་པར་བསྟན་པའོ། །དང་པོ་ནི།

གོང་དུ་བཞག་པའི། ལ་ལ་ནི་འདི་སྐད་དུ། བསམ་གྱིས་མི་ཁྱབ་ཀུན་ཤེས། ཞེས་པ་ནས། ཐམས་ཅད་མཁྱེན་པ་ཡིན། །ཞེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། བསམ་གྱིས་མི་ཁྱབ་ཀུན་ཤེས་ནས། །བསམ་དུ་མེད་པ་དེ་བཞག་ན། །དཔག་ཏུ་མེད་པའི་ཡོན་ཏན་འབྱུང། །རྣམ་པ་ཐམས་ཅད་མཁྱེན་པ་ཡིན། །ཅེས་གསང་བ་དམ་པར་བསྔགས་སོ།།

ཡང་སྟོན་པ་ལ་ལ་ནི་འདི་སྐད་དུ་གསུངས་ཏེ། ཆོས་ཉིད་བསམ་གྱིས་མི་ཁྱབ་པའི་རང་བཞིན་འོད་གསལ་ཀུན་གྲོལ་ཆེན་པོར་ཤེས་ཏེ་ལྟ་བས་ཐག་ཆོད་ནས་བསམ་དུ་མེད་པར་དེ་བཞིན་ཉིད་དུ་གཞག་སྟེ་སྒོམ་ན་དཔག་ཏུ་མེད་པའི་ཐོབ་བྱའི་ཡོན་ཏན་རིལ་རང་ལས་མ་བཙལ་བར་འབྱུང་ཞིང་འཆར་ཏེ། དེ་ཉིད་རྒྱལ་བའི་ཡེ་ཤེས་རྣམ་པ་ཐམས་ཅད་མཁྱེན་པ་ཉིད་མངོན་དུ་བྱས་པ་ཡིན་ནོ། །ཞེས་ལྟ་བས་ཐག་ཆོད་ནས་སྒོམ་པའི་ཡོན་ཏན་གྱི་གསང་བ་དམ་པར་བསྔགས་སོ།།

གཉིས་པ་མ་རྟོགས་ནས་བསྒོམ་པའི་སྐྱོན་ནི།

ལ་ལ་ནི་འདི་སྐད་དུ། བསམ་གྱིས་མི་ཁྱབ། ཅེས་པ་ནས། སྐྱེ་མཆེད་ཉིད་དུ་འགྱུར། །ཞེས་ཀུན་ནས་བརྩེ་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། བསམ་གྱིས་མི་ཁྱབ་མི་ཤེས་པར། །བསམ་མེད་ངང་དུ་གང་འཇོག་པ།།

བྱིས་པ་དེ་ནི་བླུན་པ་སྟེ། །མུན་པའི་སྐྱེ་མཆེད་ཉིད་དུ་གྱུར། །ཞེས་ཀུན་ནས་རྩེ་བ་དམ་པར་བསྔགས་སོ།།

ཡང་སངས་རྒྱས་ལ་ལ་ནི་འདི་སྐད་དུ་གསུངས་ཏེ། འོ་ན་མ་རྟོགས་པར་སྒོམ་ན་མི་འཐོབ་བམ་ཞེ་ན། གང་དག་ཆོས་ཉིད་བསམ་གྱིས་མི་ཁྱབ་པ་མི་ཤེས་པར་དོན་མ་རྟོགས་ཏེ་བསམ་དུ་མེད་པའི་ངང་དུ་གང་འཇོག་སྟེ་སྒོམ་པ་ཡི་བྱིས་པ་དེ་ནི་བླུན་པས་སྒོམ་པ་དོན་མེད་པ་སྟེ་འདུ་ཤེས་མེད་པ་དང་མུན་པའི་སྐྱེ་མཆེད་བཞིའི་གནས་སུ་ལྟུང་བ་ཉིད་དུ་འགྱུར་བར་ངེས་པའོ། །ཞེས་མ་རྟོགས་པར་སྒོམ་པའི་གཡང་ས་ཉིད་ཀུན་ནས་བརྩེ་བ་དམ་པས་གདམས་པར་བསྔགས་སོ། །དེ་བས་ན་དང་པོར་རྟོགས་པ་གཅེས་སོ།།

གསུམ་པ་བསྒོམ་པའི་ངོ་བོ་ནི།

ལ་ལ་ནི་འདི་སྐད་དུ། བསམ་མེད་བསམ་གྱིས། ཞེས་པ་ནས། མཐོང་བས་ཞི་གནས་པ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། བསམ་མེད་བསམ་གྱིས་མི་ཁྱབ་ཆོས། །ལྷག་པར་མཐོང་བ་ཞི་གནས་པ།།

བདེ་གཤེགས་ལ་ལ་ནི་འདི་སྐད་དུ་གསུངས་ཏེ། ཐབས་དང་ལམ་གྱི་སྒོ་མཐའ་ཡས་པ་ཀུན་ཀྱང་བསམ་དུ་མེད་པའི་ཆོས་ཉིད་ཀྱི་ངང་དུ་བསམ་གྱིས་མི་ཁྱབ་པའི་༼༣༢༧༽ཆོས་ཀུན་མ་འདྲེས་ཡོངས་རྫོགས་སུ་ལྷག་པར་མཐོང་བས་ཞི་བ་ཆེན་པོའི་དབྱིངས་སུ་གནས་པ་ན་ཞི་གནས་དང་ལྷག་མཐོང་དབྱེར་མེད་པའི་ཏིང་ངེ་འཛིན་ཡིན་པས་དེ་ལ་འདུས་པ་ཁོ་ནའོ།།

བཞི་པ་བསྒོམ་པའི་གོལ་ས་ནི།

རྣམ་རྟོག་སྤོང་ལེན། ཞེས་པ་ནས། སྒྲིབ་པ་མུ་མཐའ་ཡས། །ཞེས་བཤེས་གཉེན་དམ་པ་ཉིད་དུ་གདམས་སོ། །ཞེས་པའི་བར་གྱིས་བསྟན་ཏེ།

རྣམ་རྟོག་སྤོང་ལེན་གང་བྱེད་པ། །དེ་དག་སྒྲིབ་པ་མུ་མཐའ་ཡས། །ཞེས་དམ་པ་ཉིད་དུ་གདམས་པའོ།།

དེ་ལྟར་གནས་པའི་ཚེ་ན་རྣམ་རྟོག་གི་སྐྱོན་སྤོང་བ་དང་རྟོག་མེད་ལེན་པར་གང་གིས་འདོད་པར་བྱེད་པ་དེ་དག་ཉིད་ནི་མུན་པའི་རྩ་བ་ཡིན་པའི་ཕྱིར་ཤིན་ཏུ་བསལ་བར་དཀའ་བའི་སྒྲིབ་པ་མུ་མཐའ་ཡས་ཤིང་འཐུབ་པར་འགྱུར་བའི་དོན་ཏོ། །དེ་བས་ན་སྤང་ལེན་མེད་པར་ཐག་བཅད་དོ། །ཞེས་ལམ་མཐའ་ཡས་པ་ཀུན་ཞི་གནས་དང་ལྷག་མཐོང་དུ་འདུས་པས་དེ་ཉིད་བསལ་བཞག་དང་བྲལ་བར་སྦྱོང་བའི་ཐབས་ཀྱི་གདམས་པ་བཤེས་གཉེན་དམ་པ་ཉིད་དུ་གདམས་སོ།།

ལྔ་པ་སྒོམ་གྱི་ཁྱད་པར་བསྟན་པ་ནི།

ཚན་གཅིག་གི་འོག་ནས། ལ་ལ་ནི་འདི་སྐད་དུ། སྣ་ཚོགས་རིམས་ཀྱིས། ཞེས་པ་ནས། པ་ཡི་དུག་ཆེན་ཡིན། །ཞེས་ཁྱད་པར་དམ་པར་གདམས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། སྣ་ཚོགས་རིམས་ཀྱིས་འཇུག་པ་དང་། །བསམ་མེད་བློ་ཡི་ནད་དུ་འགྱུར།།

བསམ་མེད་ཡོངས་སུ་རྫོགས་པའི་དོན། །རིམས་སྐྱེས་པ་ཡི་དུག་ཆེན་ཡིན། །ཞེས་ཁྱད་པར་གདམས་པའོ།།

དེ་བཞིན་གཤེགས་པ་ལ་ལ་ནི་འདི་སྐད་དུ་གསུངས་ཏེ། རིམ་གྱིས་པ་དང་གཅིག་ཆར་བའི་སྒོ་གཉིས་ནི། རང་རང་ལྟར་མ་སྤྱད་པར་བསྣོལ་ན་གཉིས་ཀ་ཉམས་པར་འགྱུར་བས་ཐབས་སྣ་ཚོགས་སུ་རིམས་ཀྱིས་འཇུག་པ་དག་གི་སློབ་ཚུལ་ནི། རྟོགས་པ་གཅིག་ཆར་བས་བསམ་མེད་དུ་འཇོག་པའི་བློ་ཡི་ནད་དུ་འགྱུར་ལ། བསམ་དུ་མེད་པའི་ཆོས་ཉིད་ཡོངས་སུ་རྫོགས་པའི་དོན་ནི་བློས་མི་འཁྱུད་པས་རིམས་ཀྱིས་པ་ཡི་དུག་ཆེན་པོར་འགྱུར་བ་ཡིན་ནོ། །དེ་བས་ན་རིམས་ཀྱིས་པས་བསམ་མེད་མི་མཐོང་བས་གསང་བའི་ལམ་གྱི་ཁྱད་པར་བཤད་པའོ། །ཞེས་ཁྱད་པར་དམ་པ་སྟོན་པའི་མཇུག་གི་སྒྲ་དོན་ནི་ངོ་ཏི་བསྟན་པ་སྟེ་བཤད་པ་དང་འཆད་པར་འགྱུར་བ་རིལ་ལ་གདམས་པར་སྦྱར་དགོས་སོ།།

གསུམ་པ་ལྟ་སྒོམ་ཐུན་མོང་དུ་བསྟན་པ་ནི།

ཚན་དྲུག་གི་འོག་ནས། ལ་ལ་ནི་འདི་སྐད་དུ། ཇི་སྙེད་བསམ་གྱིས། ཞེས་པ་ནས། ཆེན་པོའི་བསམ་གཏན་ཡིན། །ཞེས་རྣལ་འབྱོར་དམ་པར་གདམས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། ཇི་སྙེད་བསམ་གྱིས་མི་ཁྱབ་པའི། །ཆོས་ཀུན་སྟོང་པའི་ག་ངེས་ན། །སངས་རྒྱས་ཀུན་དང་མཉམ་སྦྱོར་བས། །རྣལ་འབྱོར་ཆེན་པོའི་བསམ་གཏན་ཡིན། །ཞེས་རྣལ་འབྱོར་དམ་པར་བསྔགས་སོ།།

རྣམ་འདྲེན་ལ་ལ་ནི་འདི་སྐད་དུ་གསུངས་ཏེ། ཇི་སྙེད་པའི་ཆོས་རྣམས་ཀྱི་ཆོས་ཉིད་བསམ་གྱིས་མི་ཁྱབ་པའི་གསང་བ་རྟོགས་ཏེ་ཆོས་ཀུན་སྟོང་པར་རིག་སྟེ་ངེས་དོན་གནད་དུ་ཆུད་ན། ༼༣༢༨༽མི་དེ་ནི་འགྲོ་བ་མིའི་ལུས་སུ་སྣང་ཡང་སེམས་ཉིད་དོན་གྱི་དགོངས་པ་ནི་སངས་རྒྱས་ཀུན་དང་མཉམ་པར་སྦྱོར་བས་རྒྱལ་བའི་དགོངས་པ་མི་གཡོ་བའི་རྣལ་འབྱོར་ཆེན་པོའི་ངང་ལ་བཞུགས་པའི་བསམ་གཏན་ཡིན་པས་ལྷག་པའི་མིང་འཐོབ་བོ། །ཞེས་ཆོས་ཉིད་ཀྱི་གནད་ཆུད་ན་སེམས་སངས་རྒྱས་ཀྱི་དགོངས་པར་གནས་པའི་རྣལ་འབྱོར་དམ་པར་གདམས་སོ།།

བཞི་པ་ལྟ་སྒོམ་ཐུན་མོང་ལ་ཡོན་ཏན་ཐམས་ཅད་རྫོགས་པར་བཤད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི།

ཚན་བཅོ་ལྔའི་འོག་ཏུ། ལ་ལ་ནི་འདི་སྐད་དུ། དེ་ཉིད་དེ་ལས། ཞེས་པ་ནས། རྣམ་གསུམ་ཡོངས་སུ་རྫོགས། །ཞེས་བསླབ་པ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། དེ་ཉིད་དེ་ལས་མ་ཉམས་ན། །དྲན་བསམ་རྒྱུ་བ་མེད་པ་ཡི། །ཚུལ་ཁྲིམས་ཏིང་འཛིན་ཤེས་རབ་ཉིད། །བསླབ་པ་རྣམ་གསུམ་ཡོངས་སུ་རྫོགས། །ཞེས་བསླབ་པ་དམ་པར་བསྔགས་སོ།།

ཡང་སངས་རྒྱས་ལ་ལ་ནི་འདི་སྐད་དུ་གསུངས་ཏེ། དེ་ལྟར་ངེས་པར་ཆོས་ཉིད་ཀྱི་དོན་རྟོགས་པའི་གདེང་དེ་ཉིད་ལས་མ་ཉམས་ཏེ་ངང་ལས་འགྱུར་བ་མེད་ན་ཆེད་དུ་ཚུལ་ཁྲིམས་སྲུང་བ་ལ་སོགས་པའི་དྲན་བསམ་དང་རྟོག་པ་རྒྱུ་བ་མེད་པ་ཡི། རྟེན་གཞི་ལྷག་པའི་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ཀྱི་ལྟ་སྒོམ་གཉིས་ཏེ། བསླབ་པ་རྣམ་པ་གསུམ་ཀ་དུས་གཅིག་ཏུ་ཡོངས་སུ་རྫོགས་པའོ། །ཞེས་རྟོགས་པའི་གདེང་ལ་བསླབ་པ་གསུམ་རྫོགས་པའི་དགོངས་པ་དམ་པར་བསྔགས་སོ།།

གཉིས་པ་རྒྱས་པར་བཤད་པ་ལ་གསུམ་སྟེ། ལྷག་པའི་ཏིང་ངེ་འཛིན་གྱི་བསླབ་པ་རྫོགས་པ། ལྷག་པའིཤེས་རབ་ཀྱི་བསླབ་པ་རྫོགས་པ། ལྷག་པའི་ཚུལ་ཁྲིམས་ཀྱི་བསླབ་པ་རྫོགས་པར་བསྟན་པའོ། །དང་པོ་ནི།

ལ་ལ་ནི་འདི་སྐད་དུ། དེ་ཉིད་ལས་མཐའ། ཞེས་པ་ནས། མཐའ་ཡས་བརྗོད་མི་ལང༌། །ཞེས་བཀྲི་དྲང་རྒྱུད་པ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། དེ་ཉིད་ལས་མཐའ་ཞི་གནས་དང་། །ལྷག་པའི་དོན་མཐོང་འདྲེས་པ་ཡི། །སྡེ་གསུམ་ངེས་པར་རྫོགས་པས་ན། །འབུམ་ཕྲག་མཐའ་ཡས་བརྗོད་མི་ལང་། །ཞེས་བཀྲི་བ་དང་རྒྱུད་པ་དམ་པར་བསྔགས་སོ།།

ཡང་ཐུབ་དབང་ལ་ལ་ནི་འདི་སྐད་དུ་གསུངས་ཏེ། དེ་ཁོ་ན་ཉིད་ཀྱི་དོན་ཉམས་སུ་བླང་བའི་ལས་ཀྱི་མཐའ་མ་རྣམ་རྟོག་མ་བཀག་མི་གཡོ་བའི་ཞི་གནས་དང༌། མཉམ་པ་ཆེན་པོ་ལྷག་པའི་དོན་ཅིར་ཡང་མ་མཐོང་བར་མཐོང་བའི་ལྷག་མཐོང་གཉིས་མི་གཡོ་བ་བཞིན་དུ་གསལ་བར་མཁྱེན་པས་ཟུང་དུ་འབྲེལ་བར་འདྲེས་པ་ཡི་སྡེ་གསུམ་པོ་དེར་ཏིང་ངེ་འཛིན་བསླབ་པ་ལ་རིལ་ངེས་པར་རྫོགས་ཤིང་འདུས་པས་ན། ཏིང་འཛིན་དམ་པའི་ཡོན་ཏན་འབུམ་ཕྲག་མཐའ་ཡས་བརྗོད་ཀྱིས་མི་ལང་སྟེ་གྲངས་ལས་འདས་པའི་སྒོ་ཡང་བློ་དང་མཐུན་པར་དྲང་དོན་དུ་བསྟན་པའོ། །ཞེས་བཀྲི་དྲང་གི་ཐབས་ཐམས་ཅད་ཟུང་འཇུག་ལ་འདུས་པའི་བརྒྱུད་པ་དམ་༼༣༢༩༽པར་བསྔགས་སོ།།

གཉིས་པ་ལྷག་པའིཤེས་རབ་ཀྱི་བསླབ་པ་རྫོགས་པ་ནི།

ལ་ལ་ནི་འདི་སྐད་དུ། ཚིག་ལ་དབང་བས། ཞེས་པ་ནས། གོ་བ་ཐོས་པའི་མཆོག །ཅེས་ཐོས་པ་རྒྱ་མཚོ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། ཚིག་ལ་དབང་བས་ཚིག་བསྒྱུར་ན། །ཚིག་མཐའ་ཡས་པར་བསྡུར་མི་འདུས། །ཚིག་གཅིག་རྣམ་པར་སྤྲོས་གྱུར་ན། །བརྗོད་པས་དེ་ནི་ཟད་མི་འགྱུར། །ཞེས་གསུང་མི་ཟད་པ་དམ་པར་བསྔགས་སོ། །ལ་ལ་ནི་འདི་སྐད་དུ། སྨྲ་བརྗོད་ཚིག་ལ་གང་དགའ་བས། །གང་གི་དགོངས་པ་དཔོག་མི་ནུས། །ཚིག་ཚོགས་རྒྱ་མཚོ་ཐོས་པ་མིན། །ཚིག་གཅིག་གོ་བ་ཐོས་པའི་མཆོག །ཅེས་ཐོས་པ་རྒྱ་མཚོའི་དམ་པར་བསྔགས་སོ།།

སྐྱོབ་པ་ལ་ནི་འདི་སྐད་དུ་གསུངས་ཏེ། ཚིག་ལ་དབང་ཐོབ་པས་ཚིག་སྣ་ཚོགས་སུ་བསྒྱུར་ཞིང་སྤྲོས་ན་ཡང་། ཚིག་མུ་མཐའ་ཡས་པས་དོན་གཅིག་ཏུ་བསྡུ་ན་ཡང་མི་འདུས་ཏེ་སྡུད་མི་ཤེས་པས་དོན་མེད་ལ། དོན་ཇི་ལྟར་བར་མཇལ་བ་བཞིན་ཚིག་གཅིག་གི་རྣམ་པར་འཕྲུལ་ཏེ་ཇི་སྙེད་དུ་སྤྲོས་པར་གྱུར་ན་ཡང་དེ་ལྟར་བརྗོད་པས་དེའི་མཐའ་དེ་ནི་ཟད་པའང་མེད་ལ་དོན་དང་ཡང་འགལ་བར་མི་འགྱུར་བས་རང་དབང་ཐོབ་པའོ། །ཞེས་ཚིག་ལ་དབང་ཐོབ་ན་གསུང་མི་ཟད་པ་དམ་པ་ཐོབ་པར་བསྔགས་སོ། །ཡང་རྒྱལ་བ་ལ་ལ་ནི་འདི་སྐད་དུ་གསུངས་ཏེ། སྨྲ་བརྗོད་ཀྱི་ཚིག་དང་ཡི་གེའི་སྒྲ་ལ་གང་དགའ་ཞིང་ཞེན་པ་གང་དག་གིས་རྒྱལ་བའི་དགོངས་པ་གསང་དོན་ཟབ་མོ་དཔོག་པར་མི་ནུས་པས་ཚིག་ཚོགས་རྒྱ་མཚོ་ཐོས་ཀྱང་ཐོས་པ་ཆེ་བ་མིན་ཏེ་དོན་མེད་དོ། །འོ་ན་ཐོས་པ་ཆེ་བའི་མཆོག་གང་ཞེ་ན། མ་ནོར་བའི་ཚིག་ཅིག་གོ་བས་སེམས་ཀྱི་ཆོས་ཉིད་མཐོང་བ་ནི་ཐོས་པ་རྒྱ་མཚོ་བསགས་པའི་འབྲས་བུ་བས་མཆོག་དང་ཕུལ་དུ་གྱུར་པའོ། །ཞེས་སྒྲ་ཚིག་ལ་ཞེན་པའི་ཐ་སྙད་ཀྱིས་དོན་མི་དཔོག་ཀྱང་ཚིག་སྡེབ་ལེགས་པ་གཅིག་རིག་ན་ཀུན་གྱི་དོན་གོ་བས་ཐོས་པ་རྒྱ་མཚོ་དམ་པར་བསྔགས་སོ།།

གསུམ་པ་ལྷག་པའི་ཚུལ་ཁྲིམས་ཀྱི་བསླབ་པ་རྫོགས་པར་བསྟན་པ་ལ་གསུམ་སྟེ། དགེ་བ་ཆོས་སྡུད་ཀྱི་ཚུལ་ཁྲིམས། སེམས་ཅན་དོན་བྱེད་ཀྱི་ཚུལ་ཁྲིམས། ཉེས་སྤྱོད་སྡོམ་པའི་ཚུལ་ཁྲིམས་སོ། །དང་པོ་ལ་གཉིས་ཏེ། ཐུན་མོང་གི་དགེ་བ་ཆོས་སྡུད་ཀྱི་ཚུལ་ཁྲིམས། ཐུན་མོང་མ་ཡིན་པའི་དགེ་བ་ཆོས་སྡུད་ཀྱི་ཚུལ་ཁྲིམས་སོ། །དང་པོ་ནི།

ལ་ལ་ནི་འདི་སྐད་དུ། ཁྱབ་དང་མི་གནས། ཞེས་པ་ནས། འདོན་བརྗོད་འདྲི་གློག་མཆོག །ཅེས་སྤྱོད་པ་དམ་པར་བསྔགས་སོ། །ཞེས་པའི་བར་དང་།

ལ་ལ་ནི་འདི་སྐད་དུ། ཁྱབ་དང་མི་གནས་རྣམ་མི་རྟོག །མ་བྲལ་མི་གཡོ་མ་ཆགས་པ། །དེ་ཉིད་ལས་ནི་གཞནམེད་དེ། །ཕ་རོལ་ཕྱིན་པ་དེ་ཁོ་ན། །ཞེས་མཐར་སོན་པ་དམ་པར་བསྔགས་སོ། །ལ་ལ་ནི་འདི་སྐད་དུ། འདོན་བརྗོད་འདྲི་ཀློག་དོན་བརྗོད་པ། །དམུས་ལོང་དམུ་རྒོད་རྒྱུགས་པ་འདྲ། །དབྱིངས་ཀྱི་དབྱིངས་ལ་བྲིས་པའི་དོན། །གང་ཞིག་དོན་བརྗོད་འདྲི་ཀློག་མཆོག །ཅེས་སྤྱོད་པ་དམ་པར་བསྔགས་སོ།།

ཚན་པ་ལྔའི་འོག་ནས། ལ་ལ་ནི་འདི་སྐད་དུ། དངོས་པོ་མེད་པའི། ཞེས་པ་ནས། ཡང་དག་མཆོག་ཏུ་བཤད། །ཅེས་མཆོད་པ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། དངོས་པོ་མེད་པའི་ངོ་བོ་ཉིད། །དེ་མཐོང་ངོ་བོ་ཉིད་མི་དམིགས། །དྲན་མེད་བྱ་དང་བྱེད་མེད་པས། །གནས་གསུམ་མཉམ་མེད་རྗེས་སུ་དྲན། །ཞེས་ཏིང་ངེ་འཛིན་དམ་པར་བསྔགས་སོ། །ལ་ལ་ནི་འདི་སྐད་དུ། གནས་གསུམ་དམིགས་པའི་འདུ་ཤེས་མེད། །མིང་མེད་ཚིག་གི་ལམ་དང་བྲལ། །བླ་མེད་འདུས་མ་བྱས་པ་ཡི། །མཆོད་པ་ཡང་དག་མཆོག་ཏུ་བཤད། །ཅེས་མཆོད་པ་དམ་པར་བསྔགས་སོ།།

རྣམ་འདྲེན་ལ་ལ་ནི་འདི་སྐད་དུ་གསུངས་ཏེ། ཤེས་རབ་ཆེན་པོས་གང་ལའང་ཟིན་ཆགས་མེད་པར་ཁྱབ་པ་ནི་སྦྱིན་པ་དང༌། རང་རིག་པ་མཐའ་གང་ལའང་༼༣༣༠༽བརྟེན་པ་མེད་པས་མི་གནས་པ་ཚུལ་ཁྲིམས་སོ། །བདག་གཞན་གང་དུའང་རྣམ་པར་མི་རྟོག་པ་བཟོད་པ་དང༌། མཉམ་པའི་ངང་ནས་རང་རིག་པས་འདུ་འབྲལ་མེད་པས་མ་བྲལ་བ་བརྩོན་འགྲུས་སོ། །ངང་གིས་གཡོ་བ་མེད་པས་མི་གཡོ་བ་བསམ་གཏན་དང༌། ཅི་ལའང་ཆགས་ཞེན་མེད་པས་མ་ཆགས་པ་ཤེས་རབ་སྟེ། དེ་ཉིད་ལས་ནི་ལྷག་པའི་དོན་གཞན་གང་ཡང་མེད་དེ། དེས་ན་ཕ་རོལ་ཏུ་ཕྱིན་པ་དྲུག་གི་ཡང་ངོ་བོ་ཉིད་ནི་དེ་ཁོ་ན་ཉིད་རྟོགས་པའོ། །ཞེས་མ་ནོར་བའི་རྟོགས་པ་ཆེན་པོ་ལ་རྫོགས་པའི་བར་ཕྱིན་དྲུག་གིས་བདག་གཞན་གྱི་དོན་མཐར་སོན་པའམ་མཐར་ཕྱིན་པར་བྱེད་པའི་དམ་པར་བསྔགས་སོ། །ཡང་སྟོན་པ་ལ་ལ་ནི་འདི་སྐད་དུ་གསུངས་ཏེ། ཁ་ཏོན་འདོན་པ་དང༌། སྙིང་པོའི་བཟླས་བརྗོད་དང༌། ཡི་གེ་འདྲི་བ་དང༌། གསུང་རབ་ཀློག་པ་ལ་སོགས་པའི་ཆོས་སྤྱོད་རྣམ་པ་བཅུ་ལ་ཞེན་པས་དོན་མ་གོ་བར་ཡང་དག་པའི་རྟོགས་པ་མེད་བཞིན་འབད་པར་བྱེད་པ་ནི། དཔེར་ན་དམུས་ལོང་གིས་རྟ་རྒོད་རྒྱུག་པ་དང་འདྲ་བར་ཚི་ཆད་ཅིང་ཆུད་ཟ་བར་འགྱུར་རོ། །འོ་ན་མ་ནོར་བ་གང་ཞེ་ན། སེམས་ཀྱི་དབྱིངས་ཀྱིས་སེམས་ཉིད་ཀྱི་དབྱིངས་ལ་རང་རིག་པ་ཉིད་དུ་ཡི་གེར་བྲིས་ཏེ་རང་ཤར་བའི་སེམས་ཉིད་དབྱིངས་ལ་གསལ་བའི་དོན་མཆོག་གང་ཉིད་ཡང་དག་པར་རིག་ཅིང་མ་ནོར་བར་གོ་ན་དེ་ནི་འདོན་བརྗོད་དང་འདྲི་ཀློག་རྒྱ་མཚོའི་ཚོགས་ཀྱི་བླ་མར་གྱུར་པའི་མཆོག་དང་སྙིང་པོ་དམ་པའོ། །དེ་བས་ན་སྤྱོད་པ་ཡང་དེར་འདུས་པའོ། །ཞེས་ཆོས་སྤྱོད་བཅུ་ལ་ཞེན་པས་དོན་མ་གོ་བ་ལོང་བ་རྟ་རྒྱུག་དང་འདྲ་བས་རྟོགས་པའི་མཛད་སྤྱོད་ཀྱི་དོན་ལ་སྤྱོད་པས་ལ་དོར་བ་ཡང་འདུས་པའི་དམ་པར་རབ་ཏུ་བསྔགས་སོ། །ཐུབ་པ་ལ་ལ་ནི་འདི་སྐད་དུ་གསུངས་ཏེ། བདེན་པ་གཉིས་པོ་གང་དུའང་ངོ་བོ་མི་ཟིན་པས་དངོས་པོ་མེད་པའི་གསང་དོན་གྱི་ངོ་བོ་ཉིད་དེ་ཕྱིན་ཅི་མ་ལོག་པར་མཐོང་ཞིང་རིག་ན་རིག་པའི་ངོ་བོ་ཉིད་ཀྱང་མི་ཟིན་པས་དམིགས་པ་མེད་དེ་དེ་ལ་དྲན་ཡུལ་དང་དྲན་མཁན་མེད་པས་ཡུལ་དུ་བྱ་བ་དང་ཡུལ་ཅན་གྱི་བྱེད་པ་མེད་པར་གྲོལ་བ་ཡིན་པས་བཀུར་ཞིང་མཆོད་པར་བྱ་བའི་གནས་དཀོན་མཆོག་རིན་པོ་ཆེ་རྣམ་པ་གསུམ་ཡང་རང་རིག་པ་དང་དབྱེར་མེད་པར་མཉམ་པ་ཉིད་དུ་གསལ་བ་ལ་ཡེངས་པ་དང་བྲལ་བར་རྗེས་སུ་དྲན་པ་ནི་དགོངས་པ་དམ་པ་རྨད་དུ་བྱུང་བའོ། །ཞེས་དཀོན་མཆོག་གསུམ་རང་༼༣༣༡༽རིག་པར་མཉམ་པར་རྟོགས་པ་ཉིད་ཏིང་ངེ་འཛིན་དམ་པར་བསྔགས་སོ། །ཡང་སངས་རྒྱས་ལ་ལ་ནི་འདི་སྐད་དུ་གསུངས་ཏེ། མཆོད་པའི་གནས་དམ་པ་དཀོན་མཆོག་གསུམ་ཉིད་གཞན་དུ་དམིགས་པའི་ཐ་སྙད་དུ་འདུ་ཤེས་པ་ཡང་བྲལ་བས་ཡེ་ནས་མེད་པ་ལ་འཕྲལ་དུའང་གདགས་པའི་མིང་མེད་ཅིང་ཚིག་གི་ལམ་དང་བྲལ་ཏེ་སྦྲོས་མཚན་ལས་འདས་པས་དཀོན་མཆོག་གསུམ་དང་རང་རིག་པ་གཉིས་མེད་དུ་རྟོགས་ཏེ་བླ་ན་མེད་པ་འདུས་མ་བྱས་པ་ཡི་དགོངས་པར་མཇལ་བ་ནི་ཟག་པ་མེད་པའི་མཆོད་པ་ཆེན་པོར་ཡང་དག་པའི་གསང་བ་མཆོག་ཏུ་བཤད་ཅིང་བསྟན་པའོ། །ཞེས་རྣམ་གསུམ་ངང་གི་ཐིག་ལེར་མཉམ་པར་ཉིད་དུ་རྟོགས་ན་དེ་ཁོ་ན་ཉིད་ཀྱི་མཆོད་པ་དམ་པར་བསྔགས་སོ།།

གཉིས་པ་ཐུན་མོང་མ་ཡིན་པའི་དགེ་བ་ཆོས་སྡུད་ཀྱི་ཚུལ་ཁྲིམས་ནི།

ཚན་གཉིས་ཀྱི་འོག་ནས། ལ་ལ་ནི་འདི་སྐད་དུ། མི་མཐུན་གཉེན་པོ། །ཞེས་པ་ནས། འདས་པར་ག་ལ་འགྱུར། །ཞེས་དབུས་མཐར་མི་དམིགས་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། མི་མཐུན་གཉེན་པོ་མི་དམིགས་པ། །སྟོང་པ་ཉིད་ཀྱི་ཆོས་ཉིད་ལ། །གནས་པ་གང་ཡིན་དེ་དག་གིས། །གཉེན་པོ་རྟེན་དུ་ཅི་ཡང་མེད། །ཅེས་བཅད་པ་དམ་པར་བསྔགས་སོ། །ལ་ལ་ནི་འདི་སྐད་དུ། ཐམས་ཅད་རང་བཞིན་མ་བཅོས་པ། །ཇི་བཞིན་པ་ཡི་དེ་བཞིན་དུ། །རང་རིག་བླ་ན་མེད་པ་ཡི། །བྱང་ཆུབ་མཆོག་ཏུ་སེམས་བསྐྱེད་པའོ། །ཞེས་སེམས་བསྐྱེད་པ་དམ་པར་བསྔགས་སོ། །ལ་ལ་ནི་འདི་སྐད་དུ། ཅི་ཡང་མི་སེམས་མི་གཡོ་ཞིང་། །མི་རྟོག་རྣམ་པར་མི་གཡེང་བ། །ཀུན་ལ་ཁྱབ་པར་བདལ་བའི་དབྱིངས། །ཀུན་ཤོང་བྱ་མེད་ཐེག་ཆེན་མཆོག །ཅེས་ཐེག་པ་ཆེན་པོའི་གསང་བ་དམ་པར་བསྔགས་སོ། །ལ་ལ་ནི་འདི་སྐད་དུ། ཐེག་ཆེན་གསང་བའི་སྙིང་པོ་འདི། །དབུ་མར་མི་དམིགས་མཐའ་ལས་འདས། །གང་འདིར་དབུ་མར་འདོད་པ་དག །མཐའ་ལས་འདས་པ་ག་ལ་འགྱུར། །ཞེས་དབུས་མཐར་མི་དམིགས་པར་བསྔགས་སོ།།

བདེ་གཤེགས་ལ་ལ་ནི་འདི་སྐད་དུ་གསུང་ཏེ། ཇི་བཞིན་པའི་ངང་ལ་མི་མཐུན་པའི་སྒྲིབ་པ་དང་གཉེན་པོ་ཡེ་ཤེས་གཉིས་རིས་སུ་ཕྱེ་བར་མི་དམིགས་པས་རྟོག་པ་སྟེ། དེ་ལྟར་རྟོགས་ནས་སྒོམ་པ་ན། རིལ་ཇི་བཞིན་བའི་སྟོང་པ་ཉིད་ཀྱི་ངོ་བོ་དབྱིངས་ཀྱི་ཆོས་ཉིད་དུ་གྱུར་པ་ལ་དེའི་རྗེས་སུ་འཇུག་པའི་གནས་པ་པོ་གང་ཡིན་པ་དེ་དག་གིས་ཀྱང་སྒྲིབ་པ་ལ་གཉེན་པོ་བསྟེན་ཏེ་སྦྱང་བསྒྱུར་དུ་བྱ་བ་ཅི་ཡང་མེད་དེ། ངོ་བོ་མི་ཕྱེད་པའི་ཟབ་མོའི་དོན་དུ་རྟོགས་པའི་ཕྱིར་རོ། །ཞེས་སྒྲིབ་པ་གཉེན་པོས་སྦྱང་དུ་མེད་པར་ལ་གཅད་པ་དམ་པར་བསྔགས་སོ། །ཡང་སྐྱོབ་པ་ལ་ལ་ནི་འདི་སྐད་དུ་གསུངས་ཏེ། དངོས་པོའི་རྣམ་པ་ཐམས་ཅད་ཀྱི་ཆོས་ཉིད་ནི་རང་བཞིན་མ་བཅོས་པ་ཡིན་པས། དེ་ལྟར་གནས་ལུགས་ཇི་བཞིན་པ་ཡི་དོན་དེ་ཉིད་ཇི་ལྟ་བ་དེ་བཞིན་དུ་རྟོགས་ཤིང་རང་རིག་པ་ཉིད་ན་བླ་ན་མེད་པ་ཡི་བྱང་ཆུབ་མཆོག་ཏུ་སེམས་བསྐྱེད་པ་ཆེན་པོའང་དེ་ཉིད་ཡིན་པས་སེམས་བསྐྱེད་པའང་འདུས་པའོ། །ཞེས་ཇི་བཞིན་པ་རྟོགས་པ་ལ་སེམས་བསྐྱེད་པ་གཉིས་ཀྱང་ལྷུན་རྫོགས་སུ་འདུས་པའི་དམ་པར་བསྔགས་སོ། །ཡང་དེ་བཞིན་གཤེགས་པ་ལ་ལ་ནི་འདི་སྐད་དུ་གསུངས་ཏེ། རང་གི་རིག་པ་ཉིད་བསྒོམ་བྱ་ཡིན་པས་ཡུལ་ཅི་ལའང་མི་སེམས་ཤིང་ཡིད་ལ་བྱ་བ་༼༣༣༢༽དང་བྲལ་བས་མི་གཡོ་བར་རྩོལ་བའི་བསམ་པ་མི་ལྡང་ཞིང་འདུ་ཤེས་གང་དུའང་མ་སྐྱེས་པས་མི་རྟོག་པར་གནས་ཤིང་ངང་གིས་གཡོ་བ་མེད་པས་རྣམ་པར་མི་གཡེང་བ་ཡི་རང་བཞིན་ཐམས་ཅད་ཀུན་གྱི་ངོ་བོ་རང་གསལ་བས་གང་ཡང་མ་བཀོལ་ལ་མ་འདྲེས་ཡོངས་རྫོགས་སུ་ཁྱབ་པར་གདལ་བའི་དབྱིངས་ཆེན་པོར་ཀུན་ཤོང་བས་བྱ་བཙལ་མེད་པ་ནི་གསང་སྔགས་ཐེག་པའི་རྒྱལ་པོ་ཀུན་གྱི་མཆོག་དང་ཕུལ་དུ་གྱུར་པ་ཉིད་དོ། །ཞེས་ཐེག་པ་ཆེན་པོའི་ངེས་དོན་ཇི་བཞིན་དུ་རྟོགས་ན་དགོངས་པ་ཀུན་ནས་འདུས་པའི་གསང་བ་དམ་པ་ཡིན་པར་བསྔགས་སོ། །རྒྱལ་བ་ལ་ལ་ནི་འདི་སྐད་དུ་གསུངས་ཏེ། ཐེག་པ་ཆེན་པོ་གསང་བའི་སྙིང་པོ་འདི་ཡི་ཐུན་མོང་མིན་པ་མཆོག་གི་ལུགས་ཀྱིས་ནི། མཐའ་བསལ་བའི་དབུ་མར་རྟེན་མི་འཆའ་བས་ངོ་བོ་ཉིད་མི་དམིགས་པར་མཐའ་རིལ་ལས་འདས་ཤིང་གྲོལ་བའོ། །དེ་བས་ན་གང་གི་སྐབས་འདིར་གསང་སྔགས་པར་ཁས་འཆེས་ནས་མ་སྐྱེས་པའི་དབུ་མར་ལྟ་ཞིང་འདོད་པ་དང་བཅས་པ་དག་ནི་ལྟ་བ་དེ་ཉིད་ཀྱིས་བཅིངས་ནས་མཐའ་ལས་འདས་པར་ག་ལ་འགྱུར་ཏེ་མི་འགྱུར་བས་དོན་ཆེན་པོ་མི་མཐོང་བའོ། །ཞེས་ཐེག་ཆེན་གསང་བ་དམ་པར་ཁས་འཆེས་ཀྱང་དབུ་མར་གོལ་ན་དགོངས་པ་ཀུན་འདུས་སུ་མི་འཐད་པས་དབུས་མཐར་མི་དམིགས་པའི་གསང་བའི་སྙིང་པོ་དམ་པར་བསྔགས་སོ།།

གཉིས་པ་སེམས་ཅན་དོན་བྱེད་ཀྱི་ཚུལ་ཁྲིམས་ནི།

གོང་དུ་དགེ་བ་ཆོས་སྡུད་ཀྱི་སྤྱོད་པར་བསྔགས་པའི་འཕྲོ་ནས། ལ་ལ་ནི་འདི་སྐད་དུ། མཚན་མར་བྱས་དང་སྣང་བའི་ཆོས། །ཞེས་པ་ནས། འགྲོ་དོན་རྒྱ་མཚོ་རྫོགས། །ཞེས་ཐམས་ཅད་ལྷུན་གྱིས་གྲུབ་པར་བསྔགས་སོ། །ཞེས་པའི་བར་དང༌།

ལ་ལ་ནི་འདི་སྐད་དུ། མཚན་མར་བྱས་དང་སྣང་བའི་ཆོས། །མ་འདྲེས་ཡོངས་སུ་རྫོགས་པ་ཡི། །མཁའ་དང་འཇའ་ལྟར་རྣམ་རིགས་པ། །བསྔོ་བ་བླ་མེད་བྱང་ཆུབ་རིག །ཅེས་བསྔོ་བ་དམ་པར་བསྔགས་སོ། །ལ་ལ་ནི་འདི་སྐད་དུ། ཆོས་གང་སེམས་ཀྱི་དེ་ཉིད་ལ། །གཉིས་དང་མཐའ་རུ་གར་བལྟ་བ། །མ་རིག་འཁྲུལ་པས་ཕྱིན་ཅི་ལོག །ཐེག་ཆེན་གསང་སྔགས་ལམ་ལས་ལོག །ཅེས་གདམ་ངག་དམ་པར་བསྔགས་སོ། །ལ་ལ་ནི་འདི་སྐད་དུ། རྒྱུ་རྐྱེན་རྟེན་འབྲེལ་རིམ་གྱིས་ས། །བློ་ཆུང་རྨོངས་པ་ཁྲིད་པའི་ཐབས། །མ་བཅོས་དེ་བཞིན་ཉིད་འདི་ལ། །རྟེན་འབྲེལ་རྒྱུ་འབྲས་རིམ་གྱིས་མེད། །ཅེས་ངེས་པ་དམ་པར་བསྔགས་སོ། །ལ་ལ་ནི་འདི་སྐད་དུ། མ་བཅོས་དེ་བཞིན་ཉིད་འདི་ལ། །ཡིད་བཞིན་ཅིར་ཡང་འབྱུང་བ་ཡི། །ཆོ་འཕྲུལ་འབྱུང་བས་སེམས་ཅན་རྣམས། །ཇི་ལྟར་འདུལ་བ་མཐོང་ཐོས་སྣང་། །ཞེས་ཐམས་ཅད་རྒྱུ་མེད་པ་ལས་བསྔགས་སོ། །ལ་ལ་ནི་འདི་སྐད་དུ། ཟབ་མོ་སངས་རྒྱས་སྤྱོད་ཡུལ་བ། །གསང་བའི་དབྱིངས་ན་གནས་པ་ཡི། །ཐམས་ཅད་གསང་བའི་སྙིང་པོ་ཉིད། །མཐོང་བས་འགྲོ་དོན་རྒྱ་མཚོར་རྫོགས། །ཞེས་ཐམས་ཅད་ལྷུན་གྱིས་གྲུབ་པར་བསྔགས་སོ།།

གོང་གི་སྔར་གྱི་འཕྲོར། ལ་ལ་ནི་སྐད་དུ། འཁོར་བ་ཇི་སྲིད་ཡོད་བར་དུ། །ཞེས་པ་ནས། རྒྱུན་མི་འཆད་པར་བསྐོར། །ཞེས་གསང་བ་དམ་པའི་ཐེག་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། འཁོར་བ་ཇི་སྲིད་ཡོད་བར་དུ། །བསྟན་པའི་སྙིང་པོའི་ཉི་མ་ཤར། །རང་བཞིན་ཆོས་ཉིད་འཁོར་ལོ་འདི། །མི་ནུབ་རྒྱུན་མི་འཆད་པར་བསྐོར། །ཞེས་གསང་བ་དམ་པའི་ཐེག་པར་བསྔགས་སོ།།

སྟོན་པ་ལ་ལ་ནི་འདི་སྐད་དུ་གསུངས་ཏེ། སེམས་ཀྱིས་མཚན་མར་བཟུང་བར་བྱས་པ་དང༌། དེ་ཡི་དབང་གིས་དགེ་བའི་རྩ་བར་སྣང་བའི་ཆོས་སོ་ཅོག་ཀུན་ཀྱང༌། རང་གི་མཆན་ཉིད་མ་འདྲེས་ལ་ངོ་བོ་དེ་ཁོ་ན་ཉིད་དུ་དབྱེར་མེད་པར་ཡོངས་སུ་རྫོགས་པ་ཡི་ཆོས་ཉིད་ཆེན་པོར་དཔེར་ན་ནམ་མཁའ་དྭངས་པའི་ངང་ལ་འཇའ་ཚོན་བཀྲ་བ་ལྟར་མཉམ་པ་ཉིད་ཀྱི་ཀློང་དུ་རྣམ་པར་རིག་ཅིང་རྟོགས་པས་མཇལ་བ་ནི་དགེ་རྩ་༼༣༣༣༽བསྔོ་བ་ཀུན་གྱི་ནང་ནས་བླ་ན་མེད་པའི་བྱང་ཆུབ་ཆེན་པོར་བསྔོས་པའི་མཆོག་དང་ཕུལ་དུ་གྱུར་པ་ཉིད་དོ། །ཞེས་བྱང་ཆུབ་སྙིང་པོར་རིག་ན་དགེ་རྩ་བསྔོ་བ་ཀུན་གྱི་དམ་པར་གྱུར་པས་སེམས་ཅན་དོན་བྱེད་ཀྱི་ཚུལ་ཁྲིམས་མཆོག་ཏུ་བསྔགས་སོ། །ཡང་སྐྱོབ་པ་ལ་ལ་ནི་འདི་སྐད་དུ་གསུངས་ཏེ། གོལ་བའི་རྒྱུ་ནི་ཆོས་ཐམས་ཅད་རིལ་གང་ཡང་རང་རིག་པའི་སེམས་ཀྱི་ཆོས་ཉིད་དེ་ཁོ་ན་ཉིད་ཡིན་བཞིན་དུ། ངང་དེ་ལ་གཟུང་འཛིན་གཉིས་དང་མཐའ་རུ་སྣང་བའི་སྤྲོས་པ་གཉིས་སམ་བཞི་ལ་སོགས་པར་གང་གིས་ལྟ་ཞིང་ཞེན་པ་ནི། མ་རིག་པས་མདོངས་ཏེ་འཁྲུལ་པར་འཕྱན་པས་ཕྱིན་ཅི་ལོག་ཏུ་གོལ་ཞིང་ནོར་བ་ཡིན་ཏེ། དེ་ནི་དོན་ལས་གོལ་བའི་ནང་ན་ཡང་ཐེག་ཆེན་གསང་སྔགས་དམ་པའི་ལམ་གྱི་སྙིང་པོ་ལས་ལོག་སྟེ་གོལ་བ་ཡིན་ནོ། །ཞེས་གསང་སྔགས་མ་རྟོགས་ན་གོལ་ས་ཆེ་བར་བསྟན་ཏེ་གདམས་ངག་གིས་དོན་བྱེད་ཚུལ་དམ་པར་བསྔགས་པ་གསུངས་སོ།།

ཡང་རྣམ་འདྲེན་ལ་ལ་ནི་འདི་སྐད་དུ་གསུངས་ཏེ། གང་དག་རྫས་དང་ཡོ་བྱད་དང་ཤེས་རབ་དང་ཏིང་ངེ་འཛིན་འཚོགས་པའི་རྒྱུ་རྐྱེན་རྟེན་འབྲེལ་གྱི་མཐུ་ལ་བརྟེན་ནས་རིམས་ཀྱིས་འགྲུབ་པར་བསྟན་པ་ནི། བྱིས་པ་དམན་པ་བློ་ཆུང་བའི་རྨོངས་པ་དག་དོན་ལ་དྲང་ཕྱིར་ཁྲིད་པའི་ཐབས་སུ་གསུངས་པ་ཉིད་དེ། གལ་ཏེ་བློ་མཆོག་གང་གིས་དོན་ཆེན་པོ་མ་བཅོས་ལྷུན་གྱིས་གྲུབ་པའི་དེ་བཞིན་ཉིད་འདི་ལེགས་པར་གོ་ཞིང་རྟོགས་པ་ལ་ནི། རྟེན་འབྲེལ་དང་རྒྱུ་འབྲས་ཀྱི་རིམ་པའི་ལམ་སྔ་ཕྱིའི་ཁྱད་པར་རིམས་ཀྱིས་པ་ལྟར་མེད་དེ་ངེས་དོན་མ་ནོར་བ་ཇི་བཞིན་པའི་དོན་ཉིད་མཐོང་བའོ། །ཞེས་མཚན་མ་ལ་བརྟེན་ནས་མི་འགྲུབ་པས་གཉིས་མེད་ཀྱི་དོན་ལ་དྲང་བའི་ངེས་པ་དམ་པར་བསྔགས་སོ། །ཡང་སངས་རྒྱས་ལ་ལ་ནི་འདི་སྐད་དུ་གསུངས་ཏེ། རང་གསལ་ལྷུན་གྱིས་གྲུབ་པའི་ཆོས་ཉིད་མ་བཅོས་པ་རང་སྣང་དེ་བཞིན་ཉིད་ཀྱི་ངང་འདི་ལས་སྐལ་པ་དང་འཚམས་པར་ཡིད་དང་མཐུན་པ་བཞིན་དུ་རྣམ་འཕྲུལ་ཅིར་ཡང་འབྱུང་ཞིང་རང་སྣང་བ་ཡི་ཆོ་འཕྲུལ་སྣ་ཚོགས་འབྱུང་བ་ཡིན་པས་འབྲེལ་བ་གཉིས་ཀྱི་སྒོ་ནས་གདུལ་བྱ་སེམས་ཅན་རྣམས་ལ་ཇི་ལྟར་འདུལ་བ་དང་མཚུངས་པར་སྐུ་མཐོང་བ་དང་གསུང་ཐོས་པར་སྣང་ནས་འགྲོ་དོན་ལྷུན་གྲུབ་ཏུ་མཛད་པའོ། །ཞེས་ཕྲིན་ལས་ཐམས་ཅད་སྐད་ཅིག་༼༣༣༤༽མའམ་བྱེད་པ་པོའི་རྒྱུ་མེད་པ་ལས་འབྲེལ་སྣང་ཐབས་ཀྱི་སྒོ་ལས་འཕྲུལ་པའི་གསང་བ་དམ་པར་བསྔགས་སོ། །ཡང་བཅོམ་ལྡན་འདས་ལ་ལ་ནི་འདི་སྐད་དུ་གསུངས་ཏེ། རང་བཞིན་གྱི་ཟབ་པ་ནམ་མཁའ་ལྟ་བུ་དང༌། རྣམ་གྲངས་རྟོགས་དཀའ་བས་ཟབ་པ་འབྱུང་བ་དང་རྟེན་འབྲེལ་གྱི་མཚན་ཉིད་ལྟ་བུ་དང༌། དབྱེར་མེད་པས་ཟབ་པ་མཐའ་བྲལ་ངེས་པའི་སྙིང་པོ་རྟོགས་པར་དཀའ་བའི་རྣལ་མ་དང་གསུམ་ལས། འདིར་ཐ་མ་གསང་སྔགས་ཀྱི་དོན་ཟབ་མོ་རྒྱལ་བ་རྫོགས་པའི་སངས་རྒྱས་ཀྱི་དགོངས་པའི་སྤྱོད་ཡུལ་མཐར་ཐུག་པ་འདིར་ནི་འགྲོ་བ་རིལ་ཡང་གསང་སྔགས་གསང་བའི་དབྱིངས་ན་རང་བཞིན་གྱིས་གནས་ཤིང་མ་བཀོལ་བར་རྫོགས་པ་ཡི་དོན་མཐོང་ན། སེམས་ཅན་ཐམས་ཅད་ཀུན་ཀྱང་བླ་ན་མེད་པའི་བྱང་ཆུབ་ཆེན་པོའི་གསང་བའི་སྙིང་པོ་ཉིད་དུ་སངས་རྒྱས་པར་མཐོང་བར་གྱུར་པ་ལ་ཐམས་ཅད་ཆོས་ཉིད་དུ་གསལ་ཏེ། འཁོར་བ་མིང་ཡང་མེད་པས་འགྲོ་དོན་རྒྱ་མཚོ་བྱས་ཟིན་པར་ཡོངས་སུ་རྫོགས་ཏེ་སླར་ཡང་བྱ་བ་མེད་པའོ། །ཞེས་ཐམས་ཅད་ལྷུན་གྱིས་གྲུབ་པས་འཁོར་བ་མིང་ཡང་མེད་དེ་འགྲོ་དོན་བྱས་ཟིན་པའི་རྟོགས་པ་དམ་པར་བསྔགས་སོ། །ཡང་ཐུབ་པ་ལ་ལ་ནི་འདི་སྐད་དུ་གསུངས་ཏེ། དངོས་པོ་སྣ་ཚོགས་སུ་སྣང་བའི་སེམས་ཉིད་གསང་སྔགས་ཀྱི་རང་བཞིན་ཡིན་པས་འཁོར་བའི་ངོ་བོ་ཉིད་གསང་བ་དམ་པར་ཤར་ཏེ་འཁོར་བ་ཇི་སྲིད་ཡོད་ཀྱི་བར་དུ་བསྟན་པའི་སྙིང་པོ་དྲི་བྲལ་ཉིད་སྒྲིབ་མེད་རང་གསལ་གྱི་ཉི་མར་ངོ་བོས་ཐ་མི་དད་པར་ཤར་བས་རང་བཞིན་ཆོས་ཉིད་ཀྱི་འཁོར་ལོ་འདི་ལ་དར་ནུབ་མེད་པར་རང་སྣང་མི་ནུབ་པའི་ཆོས་ཀྱི་འཁོར་ལོ་རྒྱུན་མི་འཆད་པར་བསྐོར་བས་དོན་མཛད་པར་བསྟན་པའོ། །ཞེས་རང་བཞིན་གྱི་ཆོས་འཁོར་ལ་ནུབ་པ་མེད་པར་དོན་མཛད་པའི་གསང་བ་དམ་པའི་ཐེག་པར་བསྔགས་སོ།།

གསུམ་པ་ཉེས་སྤྱོད་སྡོམ་པའི་ཚུལ་ཁྲིམས་ལ་གཉིས་ཏེ། ངེས་པའི་སྡོམ་པ་དངོས་བསྟན་པ། དག་པ་ཆེན་པོའི་བཤགས་པ་བཤད་པའོ། །དང་པོ་ནི།

ཚན་ཉེར་བདུན་གྱི་འོག་ཐུན་མོང་གི་དགེ་བ་ཆོས་སྡུད་ཀྱི་མཇུག་ནས། ལ་ལ་ནི་འདི་སྐད་དུ། བསྐལ་པ་བྱེ་བ་དཔག་མེད་དུ། །ཞེས་པ་ནས། གཅིག་གིས་ཡོངས་སུ་སངས། །ཞེས་གསང་བ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། བསྐལ་པ་བྱེ་བ་དཔག་མེད་དུ། །ལོག་ཅིང་ཞེན་པའི་མུན་པ་གསུམ། །དེ་ཉིད་ཚུལ་བཞིན་སྐད་ཅིག་མ། །ཀུན་གསལ་གཅིག་གིས་ཡོངས་སུ་སངས། །ཞེས་གསང་བ་དམ་པར་བསྔགས་སོ།།

ཡང་ཐུབ་དབང་ལ་ལ་ནི་འདི་སྐད་དུ་གསུངས་ཏེ། བསྐལ་པ་ཆེན་པོ་བྱེ་བ་གྲངས་༼༣༣༥༽ཚད་དཔག་ཏུ་མེད་པའི་བར་དུ་ལྟ་བ་ཕྱིན་ཅི་ལོག་ཅིང་མངོན་པར་ཞེན་པའི་རྨོངས་མུན་གྱི་སྒྲིབ་པ་དུག་གསུམ་ཕྲ་རགས་དང༌། ལས་དང་ཉོན་མོངས་ཤེས་བྱའི་སྒྲིབ་པ་གསུམ་དང༌། རྫས་བེམས་གུད་ན་འདུག་པར་ཀུན་ཏུ་བརྟགས་པའི་རྟོག་པ་གསུམ་ཡང་དེ་ཁོ་ན་ཉིད་ཇི་བཞིན་པ་མི་དམིགས་པ་མ་འགགས་གཉིས་མེད་ཀྱི་ངོ་བོ་མ་ནོར་བར་ཚུལ་བཞིན་དུ་རྟོགས་པའི་སྐད་ཅིག་མ་ཙམ་གྱི་ཡུན་སྒྲིབ་པ་རིལ་ཀུན་སེམས་ཉིད་དུ་གསལ་བར་མཐོང་བ་གཅིག་གིས་མ་བསྒྱུར་བར་ཡེ་ཤེས་དེ་བཞིནཉིད་དུ་དྭངས་ཤིང་ཡོངས་སུ་སངས་པར་འགྱུར་བའི་ཕྱིར་གཉེན་པོ་མི་དགོས་སོ། །ཞེས་ངེས་པར་རྟོགས་པའི་སྐད་ཅིག་གིས་སྒྲིབ་པ་ངང་དྭངས་སུ་སངས་པའི་གསང་བ་དམ་པར་བསྔགས་སོ།།

གཉིས་པ་དག་པ་ཆེན་པོའི་བཤགས་པ་བཤད་པ་ནི།

ལ་ལ་ནི་འདི་སྐད་དུ། མུན་པས་འཐིབས་པ། ཞེས་པ་ནས། ཀུན་གྱི་མཆོག་ཏུ་བཤད། ཅེས་ཚངས་པ་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། མུན་པས་འཐིབས་པ་དེ་གང་གིས། །མི་གཡོ་མི་རྟོག་དེ་ཉིད་ལྟ། །དེ་མཐོང་མུན་པ་རྣམ་དག་སངས། །འགྱོད་ཚངས་ཀུན་གྱི་མཆོག་ཏུ་བཤད། །ཅེས་ཚངས་པ་དམ་པར་བསྔགས་སོ།།

ཡང་སྟན་པ་ལ་ལ་ནི་འདི་སྐད་དུ་གསུངས་ཏེ། གང་དག་སྔར་མ་རྟོགས་པའི་དབང་གིས་སྒྲིབ་པའི་མུན་པས་རྒྱུད་ནོན་ཏེ་ཀུན་ནས་འཐིབས་པ་གང་དེ་དག་གང་གིས་ཀྱང་མ་ནོར་བའི་ལམ་ཉིད་ཐག་ཆོད་པར་བྱས་ཏེ་མི་གཡོ་མི་རྟོག་པར་དེ་ཁོ་ན་ཉིད་ལ་ལྟ་ཞིང་བསྒོམ་ན། དེ་ཉིད་ཅིར་ཡང་མ་མཐོང་བར་མཐོང་བའི་བྱིན་རླབས་ཀྱིས་སྒྲིབ་པའི་ཚོགས་ཀྱི་མུན་པ་ཐམས་ཅད་རྣམ་པར་དག་པར་སངས་པ་ནི། འགྱོད་ཚངས་ཀྱི་བཤགས་པ་ཀུན་གྱི་ཡང་མཆོག་ཕུལ་དུ་གྱུར་པར་བཤད་དོ། །ཞེས་དེ་ཁོ་ན་ཉིད་རྟོགས་ཤིང་བསྒོམ་ན་བཤགས་པའི་མཆོག་ཡིན་པས་ཡོངས་སུ་དག་པའི་ཚངས་པ་དམ་པར་བསྔགས་སོ།།

གསུམ་པ་འབྲས་བུར་བསྟན་པ་ལ་བདུན་ཏེ། རིགས་ལྔར་བསྟན་པ། སྐུ་གསུང་ཐུགས་ཡོན་ཏན་ཕྲིན་ལས་ལྔར་བཤད་པ། ཡེ་ཤེས་ལྔར་བསྟན་པ། འབྱུང་བ་ལྔ་རིགས་ཀྱི་ཡུམ་ལྔར་བཤད་པ། འདོད་ཡོན་ལྔར་ལོངས་སྤྱད་ལྔར་བསྟན་པ། ཡང་དག་པའི་དུག་ལྔ་ཡེ་ཤེས་ཀྱི་དོན་དུ་བཤད་པ། འབྲས་བུ་བསྡུས་ཏེ་བསྟན་པའོ། །དང་པོ་ནི།

གོང་གི་སྔར་གྱི་འཕྲོར། །ལ་ལ་ནི་འདི་སྐད་དུ། མི་འགྱུར་མི་འཇིག་རྡོ་རྗེའི་དོན། །ཞེས་པ་ནས། མ་བཅོས་དེ་བཞིན་ཉིད། ཅེས་ཡང་ངེས་པ་དམ་པར་བསྟན་ཏོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། མི་འགྱུར་མི་ཤིགས་རྡོ་རྗེའི་དོན། །སྣ་ཚོགས་ཀུན་བྱུང་རིན་པོ་ཆེ།།

མ་ཆགས་རྣམ་དག་པདྨོ་ཉིད། །ཐམས་ཅད་ལྷུན་གྲུབ་མཛད་པ་ཆེ། །མ་ནོར་མ་བཅོས་དེ་བཞིན་ཉིད།།

ཅེས་ཡང་ངེས་པ་དམ་པར་མནན་ནོ།།

ཡང་འདྲེན་པ་ལ་ལ་ནི་འདི་སྐད་དུ་གསུངས་ཏེ། དེ་ཁོ་ན་ཉིད་ནི་རིགས་ལྔའི་ཡང་དངོས་གཞི་ཡིན་པའི་ཕྱིར། ཇི་བཞིན་པའི་ངང་ནི་མི་འགྱུར་བ་དང་མི་ཤིགས་པས་ན་འདུས་བྱས་ལྟར་མི་འཇིག་པ་ནི་རྡོ་རྗེའི་༼༣༣༦༽རིགས་ཀྱི་དོན་ཡིན་ནོ། །ཡོན་ཏན་སྣ་ཚོགས་པ་ཀུན་ལྷུན་རྫོགས་སུ་འབྱུང་བ་ནི་རིན་པོ་ཆེ་ཡི་རིགས་དམ་པའོ། །མཐས་མ་གོས་པས་མ་ཆགས་རྣམ་པར་དག་པའི་ཆོས་ནི་པད་མོ་ཉིད་ཀྱི་རིགས་མཆོག་གོ །ལས་རྣམ་བཞི་ཐམས་ཅད་དང་འབྲས་བུ་ལྷུན་གྱིས་གྲུབ་པས་དོན་མི་འགོག་པའི་ཆོས་དེ་མཛད་པ་མཆོག་ཏུ་ཆེ་བའི་ལས་ཀྱི་རིགས་སོ། །ཕྱིན་ཅི་ལོག་པ་དང་བྲལ་བས་མ་ནོར་བའི་དོན་ཡེ་ནས་མ་བསླད་པས་མ་བཅོས་པ་ལ་རིལ་གཉིས་མེད་དུ་འདུས་པའི་ཕྱིར་དེ་བཞིན་ཉིད་ཀྱི་རིགས་དམ་པའོ། །དེ་ལྟར་འབྲས་བུའི་ངོ་བོ་རིགས་ལྔ་ཡང་རང་རིག་གི་རང་སྣང་དུ་རྫོགས་སོ། །ཞེས་དེ་ཁོ་ན་ཉིད་དུ་རིགས་ལྔ་ཡང་འདུས་པའི་ངེས་པ་དམ་པར་བསྟན་ཏོ།།

གཉིས་པ་སྐུ་གསུང་ཐུགས་ཡོན་ཏན་ཕྲིན་ལས་ལྔར་བཤད་པ་ནི།

ལ་ལ་ནི་འདི་སྐད་དུ། སྟོང་ཉིད་གཟུགས་མེད། ཅེས་པ་ནས། གང་ཐབས་ཕྲིན་ལས་མཛད། །ཅེས་ཆོ་འཕྲུལ་སྣ་ཚོགས་འབྱུང་བར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། སྟོང་ཉིད་གཟུགས་མེད་ཆོས་ཀྱི་སྐུ། །སྨོན་མེད་ཡིད་ལས་འདས་པའི་གསུང་། །མཚན་མེད་རྟོག་ལས་འདས་པའི་ཐུགས། །རྟོག་མེད་རེ་སྐོང་ཡོན་ཏན་མཛོད། །ཐབས་ཀྱི་གར་ཐབས་འཕྲིན་ལས་མཛོད།། ཅེས་ཆོ་འཕྲུལ་སྣ་ཚོགས་འབྱུང་བར་བསྔགས་སོ།།

ཡང་རྒྱལ་བ་ལ་ལ་ནི་འདི་སྐད་དུ་གསུངས་ཏེ། བཤད་པ་དེ་བས་ན་འབྲས་བུའི་མཚན་ཉིད་ལྔའི་ཡང་ བདག་ཉིད་དུ་བསྟན་པའི་ཕྱིར། མཐའ་ཀུན་གྱིས་སྟོང་པ་ཉིད་དངོས་པོ་དང་བྲལ་བས་གཟུགས་མེད་པ ་ནི་ཆོས་ཀྱི་སྐུའོ། །གསུང་ལྔ་རྫོགས་པས་གཞན་དུ་སྨོན་པ་མེད་པར་ཡིད་ལས་འདས་པ་ནི་རྣམ་པར་གྲོལ་བའི་གསུང་ངོ༌། །དེ་ཁོ་ན་ཉིད་ནི་དེ་ཉིད་ཀྱི་མཚན་མའམ་མེད་པར་རྟོག་པ་ལས་འདས་པའི་ཕྱིར་ཀུན་གྲོལ་ཆེན་པོའི་ཞུགས་སོ། །རྣམ་པར་རྟོག་པ་མི་མངའ་བས་རྟོག་པ་མེད་པར་གདུལ་བྱ་ཀུན་གྱི་འདོད་པ་འབྱུང་ཞིང་རེ་བ་སྐོང་བས་ཡོན་ཏན་གྱི་མཛོད་དམ་པའོ། །ཇི་ལྟར་འདུལ་བ་ལྟར་དོན་བྱེད་པའི་ཐབས་ཀྱི་གར་ཐབས་སྣ་ཚོགས་པ་མ་ངེས་ཅིར་ཡང་སྣང་བས་ཕྲིན་ལས་ཀྱི་མཛད་པའང་འདུས་པའི་ཕྱིར་ཡོན་ཏན་དེ་ལྔ་ཡང་རང་རིག་པ་སྙིང་པོ་བྱང་ཆུབ་ལ་རྫོགས་པ་ཡིན་ནོ། །ཞེས་འབྲས་བུ་ལྔའི་བདག་ཉིད་ཀྱི་ཆོ་འཕྲུལ་སྣ་ཚོགས་ཀྱི་གསང་བ་བསམ་གྱིས་མི་ཁྱབ་པ་འབྱུང་བར་ཡང་བསྔགས་སོ།།

གསུམ་པ་ཡེ་ཤེས་ལྔར་བསྟན་པ་ནི།

ལ་ལ་ནི་འདི་སྐད་དུ། མི་རྟོག་ཆོས་ཀྱི། ཞེས་པ་ནས། ཀུན་གྱི་རང་བཞིན་མཁྱེན། །ཞེས་ཡེ་ཤེས་རྒྱུན་དུ་འཆར་བར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། མི་རྟོག་ཆོས་ཀྱི་མེ་ལོང་གསལ། །གཉིས་སུ་མེད་པས་ཐམས་ཅད་མཉམ། །སྣ་ཚོགས་མཚན་ཉིད་མ་འདྲེས་མཁྱེན། །ནན་ཏན་ཆེན་པོ་གྲུབ་པ་མཛད། །ཡེ་ཉིད་ཀུན་གྱི་རང་བཞིན་མཁྱེན།།

ཞེས་ཡེ་ཤེས་རྒྱུན་དུ་འཆར་བར་བསྔགས་སོ།།

ཡང་སྟོན་པ་ལ་ལ་ནི་འདི་སྐད་དུ་གསུངས་ཏེ། བཤད་པ་དེ་བཞིན་དུ་ཡེ་ཤེས་ལྔའི་ངོ་བོ་ཡང་ཡིན་པས་དེ་ཁོ་ན་ཉིད་ནི་མི་རྟོག་པར་མ་བཅོས་པའི་ཆོས་ཉིད་ཀྱི་༼༣༣༧༽གཟུགས་བརྙན་ཡུལ་མེད་དུ་མཁྱེན་པས་མེ་ལོང་ལྟ་བུའི་ཡེ་ཤེས་སུ་གསལ་ལོ། །ཆེ་ཆུང་དང་བཟང་ངན་དང་རློམ་སེམས་རིལ་དང་བྲལ་ཏེ་གཉིས་སུ་མེད་པས་ཐམས་ཅད་དེ་བཞིན་ཉིད་དུ་མཁྱེན་པ་ནི་མཉམ་པ་ཉིད་ཀྱི་ཡེ་ཤེས་སོ། །ཆོས་སྣ་ཚོགས་ཀྱི་སྤྱི་དང་རང་གི་མཚན་ཉིད་ཐམས་ཅད་མ་འདྲེས་པར་མཁྱེན་པས་སོ་སོར་རྟོག་པའི་ཡེ་ཤེས་སོ། །བདག་དང་གཞན་གྱི་བྱ་བ་ཀུན་ཐུགས་རྗེའི་ངང་ལ་རྫོགས་ཏེ་ནན་ཏན་ཆེན་པོ་མ་བརྩལ་བར་ཁྱབ་ཅིང་འཇུག་པ་ཉིད་གྲུབ་པར་མཛད་པས་བྱ་བ་གྲུབ་པའི་ཡེ་ཤེས་སོ། །ཡེ་ཉིད་ནས་མཐའ་གཉིས་ཀུན་གྱི་རང་བཞིན་སྟོང་པ་ཉིད་དུ་གསལ་བར་མཁྱེན་ཏེ་ཕྱོགས་རིས་བྲལ་བའི་ཐིག་ལེར་རྫོགས་པས་སྟོང་པ་ཉིད་ཀྱི་ཡེ་ཤེས་ཀྱང་ཡིན་ནོ། །ཞེས་དེ་ཁོ་ན་ཉིད་རྟོགས་པའི་ངོ་བོར་དགོངས་པ་ཡེ་ཤེས་ལྔ་རྒྱུན་དུ་འཆར་བར་བསྔགས་སོ།།

བཞི་པ་འབྱུང་བ་ལྔ་རིགས་ཀྱི་ཡུམ་ལྔར་བཤད་པ་ནི།

ལ་ལ་ནི་འདི་སྐད་དུ། སྣང་སྟོང་གོ་འབྱེད། ཅེས་པ་ནས། ཐོགས་མེད་འཐོར་བའི་རླུང༌། །ཞེས་ཐམས་ཅད་འབྱུང་བར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། སྣང་སྟོང་གོ་བྱེད་ཀུན་ཁྱབ་མཁའ། །ཐེག་ཆེན་དབྱིངས་ལ་ཀུན་གནས་ས།།

ཞི་གནས་རྣམ་དག་ཆུ་ཆེན་པོ། །ལྷ་མཐོང་ཡེ་ཤེས་འོད་འབར་མེ།།

ཤེས་བྱ་ཐོགས་མེད་འཁོར་བའི་རླུང་། །ཞེས་ཐམས་ཅད་འབྱུང་བར་བསྔགས་སོ།།

ཡང་ཀུན་མཁྱེན་ལ་ལ་ནི་འདི་སྐད་དུ་གསུངས་ཏེ། སེམས་ཀྱི་ངོ་བོ་ཇི་བཞིན་པའི་ངང་ལས་སྣང་སྟོང་གི་ཆོས་རྣམས་ཀྱི་གོ་འབྱེད་ཅིང་སྣང་ལ་ཀུན་ལ་ཁྱབ་པར་སྣང་ཤིང་གསལ་བས་ནམ་མཁའ་ཡང་ཡིན་ནོ། །རིལ་ངང་དུ་ཐེག་པའི་ཐིག་ལེ་ཆེན་པོ་དེར་རྫོགས་ཏེ་དབྱིངས་ལ་ཀུན་རྟེན་པའི་གཞིར་གནས་པས་ས་ཡང་ཡིན་ནོ། །གང་དུ་ཡང་མི་གཡོ་བས་ཞི་བར་གནས་ཏེ་རྡུལ་དང་བྲལ་བ་ས་རྣམ་པར་དག་པ་ནི་ཆུ་ཆེན་པོ་ཉིད་དོ།།

ལྷག་མཐོང་གི་ཡེ་ཤེེས་ཆེན་པོས་མི་བསྒྲིབས་པར་གསལ་བས་འོད་ཟེར་འབར་བའི་མེའོ། །ཤེས་བྱ་རིལ་ལ་ཐོགས་པ་མེད་པར་རང་རིག་པའི་མངོན་སུམ་དུ་གསལ་བ་ལ་ཟིན་ཆགས་ཐམས་ཅད་འཐོར་ཏེ་དག་པའི་ཀློང་དུ་སྤྲོས་མཐའ་མེད་པར་བྱེད་པས་རླུང་ཆེན་པོའོ། །ཞེེས་ཆོས་ཐམས་ཅད་ཡེ་ཤེས་ཀྱི་འབྱུང་བ་ཆེན་པོ་ལྔར་འདུས་པར་རབ་ཏུ་བསྔགས་སོ།།

ལྔ་པ་འདོད་ཡོན་ལྔར་ལོངས་སྤྱད་ལྔར་བསྟན་པ་ནི།

ལ་ལ་ནི་འདི་སྐད་དུ། མ་འདྲེས་ཡོངས་རྫོགས། ཞེས་པ་ནས། དོན་ལ་རེག་པ་ཉིད། །ཅེས་ཡོན་ཏན་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ཡང་འདི་སྐད་དུ། མ་འདྲེས་ཡོངས་རྫོགས་གསལ་སྟོང་གཟུགས། །ཁྱབ་གསལ་རང་བཞིན་གོ་བའི་སྒྲ།།

དང་བས་སིམ་བྱེད་ཆོས་ཀྱི་དྲི། །དོན་བཅུད་ཉམས་སུ་མྱོང་བའི་རོ།།

བདེ་མཆོག་དོན་ལ་རེག་པ་ཉིད།།ཅེས་ཡོན་ཏན་དམ་པར་བསྔགས་སོ།།

ཡང་རྣམ་འདྲེན་ལ་ལ་ནི་འདི་སྐད་དུ་གསུངས་ཏེ། ཆོས་སོ་ཅོག་མ་འདྲེས་ལ་ཡོངས་སུ་རྫོགས་པར་གསལ་བ་ནི་སྟོང་པ་ཆེན་པོའི་གཟུགས་སོ། །རིལ་ལ་ཁྱབ་པར་གསལ་བའི་རང་བཞིན་རིག་པ་ལ་གཉིས་མེད་དུ་༼༣༣༨༽གོ་བར་བརྡ་སྤྲོད་པའི་ཚུལ་གྱིས་མཇལ་བཏུབ་པས་སྒྲའོ། །ངོ་བོ་ཉིད་རྡུལ་དང་བྲལ་ཏེ་དང་བས་ཤེས་རབ་ཚིམ་པར་བྱེད་པས་ཆོས་ཉིད་ཀྱི་དྲིའོ། །དོན་མཆོག་མཉམ་པ་ཉིད་ཀྱི་བཅུད་དམ་པ་ཉམས་སུ་མྱོང་བས་རོའོ། །ཟུག་རྔུ་ཐམས་ཅད་དང་བྲལ་བའི་བདེ་ཆེན་མཆོག་གི་དོན་ལ་བློས་རེག་པ་མེད་པ་ཉིད་རེག་བྱའོ། །ཞེས་འདོད་ཡོན་ལྔ་རང་རིག་གི་ཡོན་ཏན་དམ་པར་བསྔགས་སོ། །དེ་བས་ན་འདོད་ཡོན་ལྔ་ཡང་དེ་ཁོ་ན་ཉིད་དུ་འདུས་སོ།།

དྲུག་པ་ཡང་དག་པའི་དུག་ལྔ་ཡེ་ཤེས་ཀྱི་དོན་དུ་བཤད་པ་ལ་གཉིས་ཏེ། སྤྱིར་བསྟན་པ། ཡེ་ཤེས་ལྔ་བྱེ་བྲག་ཏུ་བཤད་པའོ། །དང་པོ་ནི།

ལ་ལ་ནི་འདི་སྐད་དུ། ཅིར་ཡང་མི་སེམས། ཞེས་པ་ནས། མི་འགྱུར་གཞན་ཕྲག་དོག །ཅེས་བླང་དོར་མེད་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། ཅི་ཡང་མི་སེམས་གཏི་མུག་ལ། །དངོས་པོ་ཀུན་བཅོམ་ཞེ་སྡང་ཉིད།།

ཡེ་འབྱམས་ང་རྒྱལ་བདག་ཉིད་ཆེ། །བདེ་ཆེན་རང་བཞིན་རྗེས་ཆགས་པ།།

གང་དུ་མི་འགྱུར་གཞན་ཕྲག་དོག །ཅེས་བླང་དོར་མེད་པར་བསྔགས་སོ།།

ཡང་སྟོན་པ་ལ་ལ་ནི་འདི་སྐད་དུ་གསུངས་ཏེ། དེ་ཁོ་ན་ཉིད་ཀྱི་ངང་གིས་ཅིར་ཡང་མི་སེམས་པས་རིས་སུ་མི་འབྱེད་པའི་མཉམ་པ་ནི་གཏི་མུག་ཡིན་ལ། སྣང་སྟོང་གི་མཐའ་ཡི་དངོས་པོ་དང་དངོས་མེད་ཀུན་དེ་ཁོ་ན་ཉིད་ཀྱི་ངང་དུ་བཅོམ་སྟེ་ཚར་གཅོད་པས་ཞེ་སྡང་ཉིད་དང༌། ཐམས་ཅད་ཡེ་ནས་འབྱམས་པའི་ཆོས་ཉིད་མ་ནོར་བའི་བདག་ཉིད་དུ་གསལ་ཏེ་ཟླ་མེད་པས་ང་རྒྱལ་བདག་ཉིད་ཆེ་བ་དང༌། བདེ་བ་ཆེན་པོ་ཉིད་དངོས་པོ་རིལ་དང་རང་བཞིན་མི་ཕྱེད་པ་རྗེས་སུ་ཆགས་པ་ཉིད་འདོད་ཆགས་དང༌། ལོག་རྟོག་དང་མཐའི་སྐྱོན་གང་དུ་ཡང་མི་འགྱུར་ཞིང་གཞན་གྱི་ལྟ་བ་སྣ་ཚོགས་ཀུན་མ་སྤང་མི་ཆུད་པའི་ཕྱིར་ཕྲག་དོག་གོ །ཞེས་ཉོན་མོངས་པ་ལྔ་ཡང་རང་རིག་པའི་ཡེ་ཤེས་སུ་བླང་དོར་མེད་པར་འདུས་པར་བསྔགས་སོ།།

གཉིས་པ་ཡེ་ཤེས་ལྔ་བྱེ་བྲག་ཏུ་བཤད་པ་ལ་ལྔ་སྟེ། མཉམ་པ་ཉིད་ཀྱི་ཡེ་ཤེས། མེ་ལོང་ལྟ་བུའི་ཡེ་ཤེས། ཆོས་ཀྱི་དབྱིངས་ཀྱི་ཡེ་ཤེས། སོ་སོར་རྟོག་པའི་ཡེ་ཤེས། བྱ་བ་གྲུབ་པའི་ཡེ་ཤེས་སོ། །དང་པོ་ནི།

ལ་ལ་ནི་འདི་སྐད་དུ། ཀུན་གྱི་རང་བཞིན། ཞེས་པ་ནས། དབྱེ་བ་རྡུལ་ཡང་མེད། །ཅེས་བདུད་རྩི་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། ཀུན་གྱི་རང་བཞིན་གཅིག་ཤེས་པས། །དེ་ཉིད་དབང་དུ་ཐམས་ཅད་འདུས། །ཀུན་ལ་དབང་སྒྱུར་ཐོབ་པས་ན། །ཡེ་དབང་ཆེན་པོ་རྫོགས་པ་འོ། །ཞེས་དབང་དམ་པར་བསྔགས་སོ། །ལ་ལ་ནི་འདི་སྐད་དུ། ཐམས་ཅད་ཀུན་འདུས་རིག་པའི་མདོ། །ཀུན་ལ་ཁྱབ་གནས་བརྟག་དཀའ་བ། །ཟབ་མོ་སངས་རྒྱས་སྤྱོད་ཡུལ་ཡིན། །རྡོ་རྗེ་ཀུན་བཀོད་རྣལ་འབྱོར་ལུང་། །ཞེས་བཀའ་དམ་པར་བསྔགས་སོ། །ལ་ལ་ནི་འདི་སྐད་དུ། དེ་ཉིད་དེར་མི་ཀུན་གཅིག་པས། །བདག་དང་གཞན་དུ་སྣང་བ་མེད། །སྟོང་ཉིད་རྣམ་དག་ནམ་མཁའ་ལ།། གཙང་སྨེར་དབྱེ་བ་རྡུལ་ཡང་མེད། །ཅེས་བདུད་རྩི་དམ་པར་བསྔགས་སོ།།

ཡང་རྒྱལ་བ་ལ་ལ་ནི་འདི་སྐད་དུ་གསུངས་ཏེ། ཆོས་རྣམས་ཀུན་གྱི་རང་བཞིན་བདག་ཉིད་ཆེན་པོ་གཅིག་ཉིད་ཤེས་ཤིང་རྟོགས་པས་དེ་ཉིད་ཀྱི་དབང་དུ་ཐམས་ཅད་འདུས་ཏེ་ཀུན་ལ་དབང་བསྒྱུར་ཐོབ་པས་ན་རིམ་པ་དབང་གིས་བགྲོད་པ་ཡང་ཡེ་དབང་ཆེན་པོར་རྫོགས་ཤིང་འདུས་པའོ། །ཞེས་ཤེས་རབ་ཀྱི་རྩལ་ལ་རིམ་པ་དབང་༼༣༣༩༽གིས་བགྲོད་པ་ཡང་འདུས་པ་དམ་པར་བསྔགས་སོ། །ཐུབ་པ་ལ་ལ་ནི་འདི་སྐད་དུ་གསུངས་ཏེ། དངོས་པོ་གཉིས་པ་ཐམས་ཅད་རིལ་གྱི་དོན་ཀུན་འདུས་པའི་རང་བཞིན་ཉིད་རིག་པའི་མདོ་ཡི་རྒྱུད་ཆེན་པོ་འདི་ཉིད་ཡིན་ཏེ། རྒྱུད་འདིའི་ངོ་བོ་གསང་བ་དམ་པས་ཆོས་ཀུན་ལ་བསྣུམས་པར་ཁྱབ་ཅིང་གནས་ལ་ངོ་བོ་བརྟགས་པར་མི་ནུས་པས་གཏིང་དཔག་དཀའ་བ་ཟབ་མོ་ནི་རྒྱལ་བ་རྫོགས་པའི་སངས་རྒྱས་ཀྱི་སྤྱོད་ཡུལ་ཡིན་གྱི། གཞན་གྱིས་ཤིན་ཏུ་རྟོགས་པར་དཀའ་བའི་རྡོ་རྗེ་ཀུན་ཏུ་བཀོད་པའི་རྒྱུད་ཀྱང་དེ་ཁོ་ན་ཉིད་རང་བཞིན་གྱི་རྣལ་འབྱོར་སྒྲོ་སྐུར་མེད་པར་གྲུབ་པའི་ལུང་ཆེན་པོ་འདིའོ། །ཞེས་རང་བཞིན་གྱི་རྒྱུད་ལ་རྐྱེན་གྱི་རྒྱུད་ཡང་འདུས་པས་མི་ཕྱེད་པའི་བཀའ་དམ་པར་བསྔགས་སོ། །འདྲེན་པ་ལ་ལ་ནི་འདི་སྐད་དུ་གསུངས་ཏེ། དེ་ཁོ་ན་ཉིད་ཐིག་ལེ་ཆེན་པོའི་ངང་དེར་ནི་ཆོས་ཀུན་མཉམ་པར་གཅིག་པས་ བདག་དང་གཞན་གྱི་རིས་ཉིད་དུ་སྣང་བ་མེད་པས་མཐའ་རྣམས་སྟོང་པ ་ཉིད་དུ་ངང་གིས་རྣམ་པར་དག་པའི་ཆོས་ཉིད་ཀྱི་ནམ་མཁའ་ལ་གཙང་སྨེར་རྟོག་པའི་དྲི་མའི་དབྱེ་བ་རྡུལ་ཙམ་ཡང་མེད་པས་བདུད་རྩི་ཆེན་པོའོ། །ཞེས་གཙང་སྨེ་མེད་པར་རྟོགས་ན་བདུད་རྩི་དམ་པའི་སྨན་ཡིན་པར་བསྔགས་སོ།།

གཉིས་པ་མེ་ལོང་ལྟ་བུའི་ཡེ་ཤེས་ནི།

ལ་ལ་ནི་འདི་སྐད་དུ། བྱང་ཆུབ་སྙིང་པོ། ཞེས་པ་ནས། མི་བསྐྱོད་ཉམ་མི་ང༌། །ཞེས་རེ་དོགས་མེད་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། བྱང་ཆུབ་སྙིང་པོ་དང་བ་ལ། །རྣམ་ཏོག་རྡུལ་གྱིས་ག་ལ་འགོ།

དེ་ཉིད་ཆེན་པོར་འུབ་ཆུབ་པས། །ཅིས་ཀྱང་མི་བསྐྱོད་ཉམས་མི་ང་། །ཞེས་རེ་དོག་མེད་པར་བསྔགས་སོ།།

ཡང་སངས་རྒྱས་ལ་ལ་ནི་འདི་སྐད་དུ་གསུངས་ཏེ། ངོ་བོ་ཉིད་ཀྱི་སྐུ་ལྔ་ལྷུན་གྱིས་གྲུབ་པས་བྱང་ཆུབ་སྙིང་པོ་མཐའི་སྐྱོན་གྱིས་རྡུལ་དང་བྲལ་བས་དྭངས་པ་ལ་རྣམ་པར་རྟོག་པའི་རྡུལ་གྱིས་ག་ལ་འགོ་སྟེ། བཟང་ངན་གྱི་རྟོག་པ་དེ་ཉིད་བྱང་ཆུབ་ཀྱི་སེམས་ཆེན་པོར་འུབ་ཆུབ་ཅིང་གཉིས་མེད་ཀྱི་ངང་དུ་གཅིག་པར་གྲོལ་བས་ཅིས་ཀྱང་མི་བསྐྱོད་དེ་འཕོ་འགྱུར་མེད་པར་ཉམ་མི་ང་ཞིང་གཡོ་བ་མེད་པའི་དོན་ཏོ། །ཞེས་རེ་དོགས་མེད་པའི་དགོངས་པ་དམ་པར་བསྔགས་སོ།།

གསུམ་པ་ཆོས་ཀྱི་དབྱིངས་ཀྱི་ཡེ་ཤེས་ནི།

ལ་ལ་ནི་འདི་སྐད་དུ། རྣམ་རྟོག་མཚན་མའི། ཞེས་པ་ནས། འཇིག་པར་ག་ལ་འགྱུར། །ཞེས་རང་བཞིན་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། རྣམ་རྟོག་མཚན་མའི་རི་བོ་འདི། །སེང་གེའི་ཁོག་པར་རང་འཇིག་ལྟར།།

སྟོང་ཉིད་རང་བཞིན་མ་ཞིག་ན། །གཞན་གྱིས་འཇིག་པར་ག་ལ་འགྱུར། །ཞེས་རང་བཞིན་དམ་པར་བསྔགས་སོ།།

ཡང་སྟོན་པ་ལ་ལ་ནི་འདི་སྐད་དུ་གསུངས་ཏེ། ཐེག་པ་མཆོག་གི་དོན་རྟོགས་པས་ནི་རྣམ་པར་རྟོག་པའི་སྒྲིབ་པ་མཚན་མའི་རི་བོ་འདི་ཉིད་གཞན་དུ་སྤང་དུ་མེད་དེ། དཔེར་ན་སེང་གེའི་ཁོག་པ་༼༣༤༠༽སེམས་ཅན་གཞན་གྱིས་འཇིག་པར་མི་ནུས་ཀྱང་རང་ལས་བྱུང་བས་འཇིག་པ་ལྟར་ཇི་བཞིན་པའི་སྟོང་པ་ཉིད་ཆེན་པོའི་ངང་དུ་སྒྲིབ་པ་ཉིད་རང་བཞིན་རང་གྲོལ་ཉིད་དུ་མ་ཞིག་ན། གཉེན་པོ་གཞན་གྱིས་འཇིག་པར་ག་ལ་འགྱུར་ཏེ་མི་འགྱུར་བས་གཉེན་པོས་སེལ་བར་མི་བཞེད་དོ། །ཞེས་མཚན་མ་རང་གྲོལ་གྱི་དགོངས་པ་ལ་གཉེན་པོ་མེད་པར་རང་བཞིན་དམ་པར་བསྔགས་སོ།།

བཞི་པ་སོ་སོར་རྟོག་པའི་ཡེ་ཤེས་ནི།

ལ་ལ་ནི་འདི་སྐད་དུ། བདེ་ཆེན་རྣམ་པར། ཞེས་པ་ནས། རྣམ་པར་རྟོག་པ་མེད། །ཅེས་ཡོངས་སུ་རྟོག་པ་ལས་འདས་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། བདེ་ཆེན་རྣམ་པར་རྟོག་མེད་པས། །ལེགས་ཉེས་གཉིས་ཀ་རྣམ་པར་རྟོག །བདེ་ཆེན་ངེས་པའི་ཀློང་ཞུགས་ན། །གང་འདིར་རྣམ་པར་རྟོག་པ་མེད། །ཅེས་ཡོངས་སུ་རྟོག་པ་ལས་འདས་པར་བསྔགས་སོ།།

ཡང་རྒྱལ་བ་ལ་ལ་ནི་འདི་སྐད་དུ་གསུངས་ཏེ། བདེ་བ་ཆེན་པོ་འཛིན་རྟོག་དང་བྲལ་ཏེ་རྣམ་པར་རྟོག་པ་མེད་པས་ན་ལེགས་ཉེས་གཉིས་ག་རུ་འཛིན་པའི་རྣམ་པར་རྟོག་པ་ནི་རང་རྩལ་དུ་དག་པར་མངོན་ལ། དེ་བས་ན་རང་རིག་པ་བདེ་བ་ཆེན་པོར་ངེས་པའི་ཀློང་ལས་མ་ཉམས་པར་ཞུགས་ན། མཐའ་སྣང་གང་ཞིག་ཏུའང་རྟོག་པའི་རྣམ་པར་རྟོག་པ་ནི་མེད་དེ་མ་སྤངས་བྲལ་བ་ཁོ་ནའོ། །ཞེས་སྣང་བ་བདེ་བ་ཆེན་པོ་ལས་མ་ཉམས་ན་ཡོངས་སུ་རྟོག་པ་ལས་འདས་ཏེ་མ་སྤངས་རང་གྲོལ་གྱི་དགོངས་པ་དམ་པར་བསྔགས་སོ།།

ལྔ་པ་བྱ་བ་གྲུབ་པའི་ཡེ་ཤེས་ནི།

ལ་ལ་ནི་འདི་སྐད་དུ། དེ་ཉིད་ཕྱིན་ཅི། ཞེས་པ་ནས། དེ་ལས་འདའ་མི་བྱ། །ཞེས་དམ་ཚིག་དམ་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། དེ་ཉིད་ཕྱིན་ཅི་མ་ལོག་པར། །བསྲུང་བྱ་མི་རྟོག་མི་གནས་པ།།

ལེ་ལོ་གཡེང་བའི་དགྲ་བསྲུངས་ཏེ། །དེ་བཞིན་དེ་ལས་འདས་མི་བྱ། །ཞེས་དམ་ཚིག་དམ་པར་བསྔགས་སོ།།

ཡང་རྣམ་འདྲེན་ལ་ལ་ནི་འདི་སྐད་དུ་གསུངས་ཏེ། སེམས་ཀྱི་དེ་ཁོ་ན་ཉིད་དེ་ཕྱིན་ཅི་མ་ལོག་པར་རྟོགས་ནས་གང་བསྲུང་བར་བྱ་བ་ལ་བློས་མི་རྟོག་ཅིང་གང་ལ་ཡང་མི་གནས་པར་བསྒོམ་པའི་ཚེ་ན། ལེ་ལོ་དང་གཡེང་བ་དྲུག་ནི་རྣལ་འབྱོར་གྱི་ནོར་འཕྲོག་པའི་དགྲ་ཡིན་པས་སྐྱོན་དུ་མི་འཛིན་པར་དབང་དུ་ཡང་མི་བཏང་ཞིང་བསྲུང་བར་བྱ་དགོས་ཏེ་ཟབ་མོ་དེ་བཞིན་ཉིད་ཀྱི་དོན་དེ་ལས་འདའ་བར་མི་བྱ་སྟེ་དམ་ཚིག་མི་ཉམས་པར་བྱའོ། །ཞེས་དགྲ་བཞི་བཟློག་པའི་དམ་ཚིག་ནི་བསྲུང་བའི་མཆོག་དང་དམ་པར་བསྔགས་སོ།།

བདུན་པ་འབྲས་བུ་བསྡུས་ཏེ་བསྟན་པ་ནི།

འོག་ཏུ་མཇུག་རྫོགས་སུ་ཉེ་བ་ན། ལ་ལ་ནི་འདི་སྐད་དུ། བརྟན་གཡོ་དཀྱིལ་འཁོར་ཕྱག་རྒྱར་རྫོགས། །ཞེས་པ་ནས། བལྟས་སྣང་འབྲས་བུའོ། །ཞེས་གསང་སྔགས་དམ་པའི་ཚིག་གོ །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། བརྟན་གཡོའི་དཀྱིལ་འཁོར་ཕྱག་རྒྱར་རྫོགས།།

རྟོག་འཛིན་སྒྲ་མཐའི་ཏིང་འཛིན་བསྔགས། །མེད་རྒྱུ་བཏགས་ཆགས་མཚོན་པའི་ཚིག།

བསྒྲུབ་འགྲུབ་ལྟས་སྣང་འབྲས་བུའོ། །ཞེས་གསང་བ་དམ་པའི་ཚིག་གོ།

ཡང་སྐྱོབ་པ་ལ་ལ་ནི་འདི་སྐད་དུ་གསུངས་ཏེ། སྣོད་བཅུད་བརྟག་གཡོ་ཐམས་ཅད་སེམས་ཀྱི་ཆོས་ཉིད་མཐའ་དང་བྲལ་བ་ཡིན་པས་དེ་ཉིད་ལྷའི་དཀྱིལ་འཁོར་ཡེ་ཤེས་ཀྱི་ཕྱག་རྒྱར་རང་ཤར་དུ་རྫོགས་པའི་ཕྱིར། འགྲོ་༼༣༤༡༽བའི་རྟོག་འཛིན་དང་སྒྲ་མཐའ་རྣམས་རིམ་པ་བཞིན་དུ་ཏིང་ངེ་འཛིན་དང་གསང་སྔགས་སྙིང་པོའི་རྒྱུན་དུ་སངས་རྒྱས་པའོ། །དེ་བས་ན་ངོ་བོ་ཉིད་མེད་པའི་རྒྱུ་ལས་ཅིར་ཡང་བཏགས་པ་ལྟར་ཆགས་པ་རྣམས་ནི་བསྟན་པ་གསུམ་མཚོན་པའི་ཚིག་ཏུ་ཤར་བས་རྒྱལ་བའི་བསྟན་པ་ཉིད་དོ། །གང་ལྟར་བསམས་ཤིང་དོན་དུ་གཉེར་ཏེ་བསྒྲུབ་པས་འགྲུབ་པ་དང་བལྟས་པ་ལྟར་སྣང་བ་ནི་རིལ་འབྲས་བུའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཡིན་པ་དང༌། གཞན་དུ་མི་རྙེད་པའི་ཕྱིར་རོ། །དེ་ནི་གསང་སྔགས་ཀྱི་ངོ་བོ་ཉིད་བསྟན་པས་མཚོན་པའོ། །ཞེས་གསང་སྔགས་དམ་པའི་ཚིག་གོ།

བཞི་པ་དེ་དག་གི་དོན་བསྡུས་ཏེ་བསྟན་པ་ནི།

གོང་དུ་བཞག་པའི། ལ་ལ་ནི་འདི་སྐད་དུ། དཔག་ཏུ་མེད་པའི་འཇིག་རྟེན་དུ། །ཞེས་པ་ནས། དོན་ནི་གཅིག་ཏུ་ཟད། །ཅེས་དགོངས་པ་གཅིག་ཏུ་འདུས་པར་བསྔགས་སོ། །ཞེས་པའི་བར་གྱིས་བསྟན་ཏེ།

ལ་ལ་ནི་འདི་སྐད་དུ། དཔག་ཏུ་མེད་པའི་འཇིག་རྟེན་དུ། །སྒྲོན་མ་བསམ་གྱིས་མི་ཁྱབ་པས། །ཇི་སྙེད་པ་ཡི་ཆོས་བསྟན་པ། །མཐའ་ཡས་དོན་དུ་གཅིག་ཏུ་ཟད། །ཅེས་དགོངས་པ་གཅིག་ཏུ་འདུས་པར་བསྔགས་སོ།།

ཡང་སྟོན་པ་ལ་ལ་ནི་འདི་སྐད་དུ་གསུངས་ཏེ། གདུལ་བྱའི་གནས་དཔག་ཏུ་མེད་པའི་འཇིག་རྟེན་གྱི་ཁམས་མང་པོ་ཉིད་དུ་སྟོན་མཆོག་སྤྲུལ་པའི་སྒྲོན་མ་མང་པོ་བསམ་གྱིས་མི་ཁྱབ་པས་ཐེག་པའི་སྒོ་ཇི་སྙེད་པ་ཡི་ཆོས་མང་པོར་གསུངས་ཏེ་ཚད་ལས་འདས་པར་བསྟན་པ་མཐའ་ཡས་པའི་དོན་ནི་དེ་ཁོ་ན་ཉིད་ཇི་བཞིན་པ་ལས་ལྷག་པ་མེད་པས་དགོངས་པ་དམ་པ་བྱང་ཆུབ་ཀྱི་སེམས་གཅིག་ཏུ་འདུས་པར་ཟད་དོ། ཞེས་ཐེག་པའི་སྒོ་དུ་མ་བསྟན་ཡང་ངེས་དོན་ཐེག་པ་མཆོག་གི་དགོངས་པ་གཅིག་ཏུ་འདུས་པ་ཁོ་ནར་ངེས་པར་བསྔགས་སོ།།

ལྔ་པ་དེ་བཞིན་གཤེགས་པ་ཐམས་ཅད་ཀྱི་དགོངས་པ་བྱ་བ་མེད་པ་ཡེ་ནས་སངས་རྒྱས་པར་བསྡུས་ཏེ་བསྟན་པ་ནི།

འོག་ནས། ཀྱེ་གྲོགས་པོ་དག དེ་ལྟར་ན། ཞེས་པ་ནས། ལྷུན་དང་བར་གྱུར་ཏོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་ལྟར་ན་དེ་བཞིན་གཤེགས་པ་ཐམས་ཅད་ཀྱི་དགོངས་པ་དེ་ཁོ་ན་ཉིད་ལས་འདི་སྐད་དུ། ཐམས་ཅད་ཐམས་ཅད་ཇི་སྙེད་པ། །ཚིག་གི་ཐ་སྙད་ཅི་དག་ལས། །འདི་ལ་བྱ་བ་ཅི་ཡང་མེད། །རང་བཞིན་དེ་ཉིད་ཡེ་སངས་རྒྱས། །ཨ་ཧོ་ཞེས་དེ་བཞིན་གཤེགས་པ་ཐམས་ཅད་ཐ་སྙད་ལས་འདས་ཏེ། བདེ་བ་ཆེན་པོ་ལྷུན་དང་ལྡན་པར་གྱུར་ཏོ།།

སྟོན་པ་འཆད་པའི་སྐྱེས་བུས། ཀྱེ་གྲོགས་པོ་དག ཅེས་བོས་ནས་བཤད་པ་ལ་སྙེགས་པའི་ཚུལ་དེ་ལྟར་ན། དུས་གསུམ་གྱི་རྒྱལ་བ་རྫོགས་པའི་སངས་རྒྱས་དེ་བཞིན་གཤེགས་པ་ཐམས་ཅད་ཀྱི་དགོངས་པ་གསང་བ་དམ་པ་དེ་ཁོ་ན་ཉིད་ལས་ཇི་སྐད་གསུངས་པ་སྤྱིའི་དོན་དུ་ཐོས་པ་ནི་འདི་སྐད་དུ་ངེས་ཏེ། འཁོར་བའི་ཆོས་ཐམས་ཅད་དང་མྱ་ངན་ལས་འདས་པར་གྱུར་པའི་ཆོས་ཐམས་ཅད་དུ་སྣང་བ་བསམ་ཡས་ཇི་སྙེད་པ་བརྗོད་པ་ལས་འདས་པ་རིལ་ནི་གདུལ་བྱའི་ངོ་ལ་ཚིག་གི་ཐ་སྙད་ལས་བཏགས་པའི་ཡོད་པ་ཙམ་དག་ལས་ངོ་བོ་འདི་འདྲར་༼༣༤༢༽བཟུང་དུ་མེད་དེ་མཐའ་ཐམས་ཅད་དང་བྲལ་བའི་ཆོས་སྐུ་ཆེན་པོར་སངས་རྒྱས་པ་འདི་ལ། འཕྲལ་དུ་རྩོལ་བའི་དགག་སྒྲུབ་ཀྱི་བྱ་བ་བྱས་ཏེ་ཐོབ་པར་བྱ་བ་ཅི་ཡང་མེད་དེ། ཆོས་སོ་ཅོག་གི་རང་བཞིན་གདོད་ནས་དེ་ལྟ་བུའི་ངོ་བོ་ཉིད་དུ་ཡེ་སངས་རྒྱས་ཏེ་འཕོ་འགྱུར་མེད་པར་གནས་པའོ། །ཞེས་པའི་དོན་གྱི་དགོངས་པ་མཐར་ཐུག་ངེས་པའི་གསང་བ་ཆེན་པོར་ཡང་དག་པར་ངེས་པའོ། །ཨ་ཧོཿ ཞེས་པའི་ཡི་གེ་གཉིས་ནི་ངོ་བོ་མེད་པ་ཉིད་ཅིར་ཡང་སྣང་བས་གཉིས་མེད་དུ་བསྟན་པའོ། །ཞེས་དེ་སྐད་སྟོན་པའི་རྒྱལ་བ་རྫོགས་པའི་སངས་རྒྱས་དེ་བཞིན་གཤེགས་པ་ཐམས་ཅད་རིལ་གྱི་ངོ་བོའང་གཅིག་དང་དུ་མའི་ཆོས་ཀྱི་ཚིག་གི་ཐ་སྙད་ལས་གྲོལ་བས་མཐའ་ཀུན་ལས་འདས་ཏེ། རང་བཞིན་བདག་ཉིད་ཆེན་པོར་དབྱེར་མེད་པའི་ངང་གིས་བདེ་སྡུག་གི་ཐ་སྙད་མེད་ཅིང་རྒྱུ་འབྲས་དང་ཆོས་སོ་ཅོག་མ་འདྲེས་ཡོངས་སུ་རྫོགས་པའི་ཕྱོགས་བྲལ་བདེ་བ་ཆེན་པོའི་ངོ་བོ་ལྷུན་མཉམ་ཡངས་པའི་ཆོས་ཉིད་རང་སྣང་གི་དེ་ཁོ་ན་ཉིད་མངོན་དུ་གྱུར་པས། གང་དང་ཡང་མ་བྲལ་ལ་རྣམ་གྲངས་ལྷན་མི་གཅིག་པར་མ་གོས་དྲི་རྡུལ་བྲལ་བའི་དྭངས་པ་ཆེན་པོའི་ངོ་བོར་བཞུགས་པར་གྱུར་ཏོ།།

གསུམ་པ་བསླབ་པ་གཅེས་པར་གདམས་པ་ནི།

དེ་ནས་ཡང་གསང་བ་པའི། ཞེས་པ་ནས། གཅིག་ཏུ་འདུས་པར་གསུངས། །ཞེས་པའི་བར་གྱིས་བསྟན་ཏེ།

དེ་ནས་གསང་བ་པའི་བདག་པོ་ཉིད་ཀྱིས་ཚིགས་སུ་བཅད་དེ་སྨྲས་པ། དཔེར་ན་ཀུན་ཏུ་རྒྱུ་བའི་མི། །འདོད་པའི་ཡུལ་དུ་གང་འགྲོ་བ། །ཡུལ་གྱི་རྣམ་པ་མཐའ་ཡས་ཀྱང་། །བགྲོད་ཡུལ་ལམ་གནས་གཅིག་ལས་མེད། །དེ་བཞིན་བསམ་གྱིས་མི་ཁྱབ་པའི། །རྣམ་གྲངས་ཆོས་སྒོ་ཇི་སྙེད་ཀྱང་། །བཀྲི་བས་དྲང་བའི་ཚིག་ཡིན་ཏེ། །བསམ་པའི་ཡུལ་དུ་གཅིག་པའོ། །དོན་རྣམས་གཅིག་ཏུ་སྡུད་པ་ཡི། །བསླབ་པར་བྱ་བ་དམ་པ་སྟེ། །ངེས་པ་གཅིག་ལས་མེད་པའི་ཕྱིར། །ཀུན་འདུས་དམ་པའི་བསླབ་པར་གཅེས། །དམ་པ་འདིར་འདུས་ཀུན་ཤེས་ན། །དེ་ཡི་ཡེ་ཤེས་མཐའ་ཡས་ཏེ། །རྣམ་པ་ཐམས་ཅད་མཁྱེན་ཉིད་པས། །མདོ་དོན་གཅིག་ཏུ་བསྡུས་པར་གསུངས།།

བསླབ་པ་ཐ་མའི་དཔེ་དོན་གསལ་བར་བསྟན་པའི་ཕྱིར། རྒྱལ་བ་རིལ་གྱི་དགོངས་པ་ཐོས་པ་མ་ནོར་བར་བགྲོས་པའི་རྗེས་ཐོག་དེ་ནས་ཡང་མདོ་དོན་གཅིག་ཏུ་བསྡུ་བའི་བསླབ་པ་ཉིད་གཅེས་པར་དཔེས་བསྟན་པ་སྐྱེས་བུ་གསང་བ་པའི་བདག་པོ་ཉིད་ཀྱིས་ཚིགས་སུ་བཅད་དེ་སྨྲས་ཤིང་གསུངས་པ་ནི། དཔེར་ན་ཆོས་མཐུན་པའི་དཔེ་ཚོང་པ་ཀུན་ཏུ་རྒྱུ་བའི་མི་དག་གིས་རང་རང་གི་ཁེ་འདོད་པའི་ཡུལ་མང་པོ་ཉིད་དུ་གང་འགྲོ་བ་རྣམས་ཀྱང་བགྲོད་པའི་ཡུལ་གྱི་རྣམ་པ་མཐའ་ཡས་པ་ཡོད་ཀྱང་ཐ་མ་བགྲོད་ཡུལ་ཀུན་གྱི་ལམ་གྱི་འདུ་ས་རང་གི་གནས་ཁང་གཅིག་ལས་མེད་པས་དེར་འདུ་བ་ལྟར། དཔེ་དེ་བཞིན་དུ་ལམ་པས་བསླབ་པ་བཅུའི་གཅིག་མ་གཏོགས་པར་བསམ་གྱིས་མི་ཁྱབ་པའི་རྣམ་གྲངས་ཀྱི་ཆོས་སྒོ་ཐེག་པའི་རིམ་པ་དང་ལམ་གྱི་བགྲོད་ཚུལ་བསམ་ཡས་པ་ཇི་སྙེད་པ་རྣམས་ཀྱང་མི་ཤེས་པ་རྣམས་བཀྲི་བས་ཐབས་ཀྱིས་དོན་ལ་དྲང་བའི་ཚིག་ཙམ་དུ་བསྟན་པ་ཡིན་པས་དེ་དག་ངེས་པའི་ལམ་དམ་པ་ཀུན་གྱི་སྙིང་པོ་གསང་བ་མ་ཡིན་ནོ། །ཏེ་ཞེས་ལྷག་མ་ནི། དེ་༼༣༤༣༽རིལ་གྱི་བསམ་པའི་ཡུལ་གྱི་རྩ་བ་ནི་ཆོས་རྣམས་ཀྱི་དེ་ཁོ་ན་ཉིད་གསང་བ་དམ་པའི་དོན་དུ་ཀུན་ཀྱང་དེ་ནས་གཅིག་པར་འདུས་པའོ། །དེས་ན་དེ་ནི་ཐམས་ཅད་ཀྱི་དངོས་གཞི་བས་དེ་ཉིད་རྟོགས་ན་བསླབ་པ་རིལ་ཆུབ་པའི་དོན་ཏོ། །དེའི་ཕྱིར་ན་དོན་རྣམས་གཅིག་ཏུ་སྡུད་པ་ཡི་བསླབ་པར་བྱ་བ་འདི་ཉིད་ཀུན་གྱི་བསླབ་བྱའི་སྙིང་པོ་དམ་པ་མཆོག་སྟེ། ངེས་པར་ཆོས་ཉིད་ཀྱི་ངོ་བོ་ཐིག་ལེ་ཉག་གཅིག་སེམས་ཀྱི་དཀྱིལ་འཁོར་འོད་གསལ་བ་ལས་གཞན་མེད་པའི་ཕྱིར་ན། ཀུན་འདུས་དམ་པའི་བསླབ་པ་ལ་སློབ་པ་གཅེས་སོ། །འདི་ཁོ་ན་གཅེས་པ་ཅིའི་ཕྱིར་སྙམ་པ་ལ། བསླབ་པ་དམ་པ་འདིར་བཤད་པ་ལྟར་རྒྱལ་བའི་དགོངས་པ་མ་འདུས་པ་མེད་པས་ཀུན་གྱི་རྩ་བ་རང་རིག་པ་འདི་ཉིད་མ་ནོར་བར་ཤེས་ན། དོན་ལ་མཁས་པའི་དམ་པ་དེ་ཡི་ཡེ་ཤེས་ནི་གྲངས་དང་ཚད་ཀྱིས་གཟུང་བའི་མཐའ་ཡས་པར་ཤེས་བྱའི་དཀྱིལ་འཁོར་ཁྱབ་པ་ཡིན་ཏེ། དེ་ཉིད་རྣམ་པ་ཐམས་ཅད་མཁྱེན་པའི་ཡེ་ཤེས་དངོས་ཉིད་དུ་གྱུར་པ་ཡིན་པས་མདོ་དོན་འདི་ཉིད་གཅིག་ཏུ་འདུས་པར་གསུངས་པ་ཁོ་ནར་ཤེས་པར་བྱ་སྟེ། གྲལ་གྱི་ཐ་མར་ངེས་པའང་དེའི་ཕྱིར་རོ།།

བཞི་པ་ཞབས་བསྡུ་བ་ནི།

གྲོགས་པོ་དག ཅེས་པ་ནས། རྙེད་པར་གྱུར་ཏོ། །ཞེས་པའི་བར་གྱིས་བསྟན་ཏེ།

གྲོགས་པོ་དག་དེ་ནི་དེ་བཞིན་གཤེགས་པ་ཐམས་ཅད་ཀྱི་དགོངས་པ་དེ་ཁོ་ན་ཉིད་གཅིག་ཏུ་འདུས་པར། དེ་བཞིན་གཤེགས་པ་ཐམས་ཅད་འདུས་ནས་བཤད་པ་སྟེ། ཐམས་ཅད་ཀྱི་མདོ་དེ་ཁོ་ན་ཉིད་དུ་འདུས་པར་ཤེས་པར་བྱའོ། །དེ་སྐད་ཅེས་སྨྲས་པ་དང་། དམན་པ་དམ་པ་རྣམས་གཅིག་ཏུ་ངེས་པ་དམ་པ་རྙེད་པར་གྱུར་ཏོ།།

གྲོགས་པོ་དག ཅེས་བོས་ནས། བསླབ་པ་བཅུ་པོ་ཇི་ལྟར་བཤད་པའི་ངོ་ཏི་བསྟན་པ་དེ་དག་ནི་སྐུ་ལྔའི་དེ་བཞིན་གཤེགས་པ་ཐམས་ཅད་ཀྱི་དགོངས་པ་ཆོས་ཉིད་དེ་ཁོ་ན་ཉིད་གཅིག་ཏུ་འདུས་པར་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་འདུས་ནས་ངེས་པ་དམ་པར་བཤད་པ་སྟེ། ཆོས་ཐམས་ཅད་ཀྱི་མདོ་དོན་སེམས་ཀྱི་དེ་ཁོ་ན་ཉིད་གཅིག་ཏུ་འདུས་པར་བཤད་པ་དེ་ཁོ་ན་ལྟར་ཤེས་པར་བྱའོ། །སྐྱེས་བུ་ཆེན་པོས་དེ་སྐད་ཅེས་སྨྲས་ཏེ་བསླབ་པ་བཅུའི་ངོ་ཏི་བགྲོས་ཤིང་བཀའ་སྩལ་པས་དམན་པ་དམ་པ་རིག་འཛིན་མི་ཡི་ཐོད་པ་ཅན་ལ་སོགས་པས་ཆོས་རྣམས་མ་འདྲེས་ཡོངས་སུ་རྫོགས་པའི་དོན་གཅིག་ཏུ་ངེས་པར་དམ་པའི་གདེངས་ཆེན་པོ་མཐར་ཐུག་པ་ཉིད་རྙེད་པར་གྱུར་ཏོ། །ཞེས་བགྲོས་པའི་ཡོན་ཏན་བསྟན་པའོ། །དེ་ལ་ཀུན་མཁྱེན་དམ་པ་རིན་པོ་ཆེའི་ཞལ་ནས། འོ་ན་ལྟ་བས་ཐག་བཅད་པར་བསླབ་པ་དང༌། དོན་མན་ངག་གིས་སྒྲུབ་པར་བསླབ་པ་དང༌། མདོ་དོན་གཅིག་ཏུ་འདུ་བར་བསླབ་པ་གསུམ་ལ་ཁྱད་ཅི་ཡོད་ཅེ་ན། ཐག་ལྟ་བས་བཅད་པ་ནི། ཤེས་བྱ་དངོས་པོའི་གནས་༼༣༤༤༽ལུགས་ཇི་ལྟ་བཞིན་རྟོགས་པའོ། །དོན་མན་ངག་གིས་སྒྲུབ་པ་ནི། སྤྱོད་ལམ་ཐམས་ཅད་ལྟ་བའི་རྩིས་ཟིན་པས་མཚན་མ་རང་ཁ་མར་མི་འགྱུར་བའོ། །མདོ་དོན་གཅིག་ཏུ་བསྡུ་བ་ནི། ཆོས་ཐམས་ཅད་ཀྱི་རྩ་བ་རང་གི་སེམས་ཉིད་དུ་འདུས་པའོ། །ཞེས་བཀའ་སྩལ་བར་མཛད་དོ། །ཨེ་མ་ལུང་མཆོག་དཔལ་ལྡན་འདུས་པ་མདོའི། །བསླབ་པའི་མཐའ་བཅུ་ངེས་པའི་ཆིངས་ཆེན་འདི། །སྒྱུ་འཕྲུལ་དྲྭ་བའི་བསླབ་བྱའི་ཡང་སྙིང་སྟེ། །ཐེག་མཆོག་རྒྱལ་པོར་འཇུག་པའི་གསང་སྒོ་ཡིན། །དེ་ཕྱིར་འདི་ན་ཕྱི་མའི་ཕྱི་མ་ཡི། །བཀའ་ཡི་ངེས་གསང་བཤད་པའི་རྒྱུད་ཆེན་གྱི། །དགོངས་དོན་འཁྲུལ་མེད་བརྒྱུད་པའི་བཀའ་སྲོལ་བཞིན། །མན་ངག་ཚད་མར་བསྟེན་ནས་གསལ་བར་བཤད། །རི་བོང་འཛིན་པས་མཚན་མོའི་མུན་ཆ་བསལ། །རྟ་བདུན་དབང་པོས་གླིང་བཞི་རིམ་སྣང་བྱས། །ལུང་རིགས་ཚད་མས་དོན་གྱི་མཇུག་སྡུད་བཀྲལ། །ངེས་གསང་འཛིན་པ་རྣམས་ལ་དགྱེས་མཆོད་འབུལ། །ཞེས་ཀྱང་སྨྲས་སོ།།

གསུམ་པ་མཇུག་གི་དོན་ལ་གཉིས་ཏེ། འཁོར་གྱིས་གུས་པས་བསྟོད་ཚུལ། ཡོངས་སུ་རྫོགས་པའི་བྱ་བའོ། །དང་པོ་ལ་གཉིས་ཏེ། བསྟོད་པ་དངོས་བཤད་པ། མཛད་པ་ཆོས་ཉིད་དུ་གྲོལ་ཞིང་བྱིན་རླབས་ལྷ་མི་ལ་གྲགས་པའོ། །དང་པོ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི།

དེ་ནས། ཞེས་པ་ནས། མངོན་པར་བསྟོད་པ། །ཞེས་པའི་བར་གྱིས་བསྟན་ཏེ།

དེ་ནས་གསང་བ་པའི་བདག་པོ་ཉིད་ལ་དམན་པ་དམ་པ་རྣམས་ཡིད་རངས་ཏེ་མངོན་པར་བསྟོད་པ།

དེ་ནས་སྟོན་པ་གསང་ཆེན་བཀའི་སྡུད་པ་པོ་འཆད་པའི་སྐྱེས་བུ་གསང་བ་པའི་བདག་པོ་ཆེན་པོ་དེ་ཉིད་ལ། འཁོར་དམན་པ་དམ་པ་རིགས་ཅན་གྱི་བྱང་ཆུབ་སེམས་དཔའ་ཆེན་པོ་དེ་རྣམས་གསང་དོན་རྨད་དུ་བྱུང་བའི་མདོ་ཆེན་པོ་བཀའ་སྩལ་བ་ལ་དགའ་བའི་སེམས་ཀྱིས་ཡིད་ཤིན་ཏུ་རངས་ཏེ། དྲིན་ལན་གྱི་ཚུལ་དུ་སྐུ་ལྔ་དང་ལྡན་པའི་ཡོན་ཏན་གྱི་སྒོ་ནས་གུས་པ་ཆེན་པོས་མངོན་པར་བསྟོད་པ་ནི།

གཉིས་པ་རྒྱས་པར་བཤད་པ་ལ་གཉིས་ཏེ། སྟོན་པ་སྐུ་ལྔའི་བདག་ཉིད་དུ་བསྟོད་པ། བསྟན་པ་ཆེ་བ་བདུན་དང་ལྡན་པར་བསྟོད་པའོ། །དང་པོ་ནི།

ཨེ་མའོ་སྐྱེས་ཆེན། ཞེས་པ་ནས། སངས་རྒྱས་ཀུན་གྱི་དངོས། །ཞེས་པའི་བར་གྱིས་བསྟན་ཏེ།

ཨེ་མའོ་སྐྱེས་ཆེན་གསང་བའི་བདག །རྩལ་ཆེན་སྨྲ་བའི་སེང་གེའི་སྒྲ། །དེ་བཞིན་གཤེགས་པ་ཀུན་གྱི་ཐུགས།། སངས་རྒྱས་ཀུན་སྔོན་ཡེ་ནས་བྱུང་། །ཁྱོད་ནི་སངས་རྒྱས་ཀུན་གྱི་མེས། །ཆེ་མཆོག་རྗེ་བཙན་དམ་པའི་སྐུ།།

བདེ་གཤེགས་ཀུན་གྱི་བཤེས་གཉེན་མཆོག །སེམས་དཔའ་སངས་རྒྱས་ཀུན་གྱི་དངོས།།

ཨེ་མའོ། ཞེས་ཤིན་ཏུ་ངོ་མཚར་བའི་ཚིག་གིས་དབུ་དྲངས་ཏེ། དུས་གསུམ་ཀུན་ཏུ་གསང་སྔགས་ཀྱི་མངའ་བདག་ཏུ་གྱུར་པ་མཐུ་རྩལ་ཁྱད་པར་༼༣༤༥༽དུ་འཕགས་པར་གྱུར་པས་ངོ་མཚར་རྨད་དུ་བྱུང་བའི་སྟོན་པ་འཆད་པའི་སྐྱེས་བུ་ཆེན་པོའི་སྐུ་གསང་བའི་ཐེག་པ་སྔགས་ཀྱི་མཆོག་གི་བདག་པོ་ཆེན་པོ་ཁྱོད་ཉིད་ཡིན་ནོ། །ཞེས་སྐུའི་སྒོ་ནས་བསྟོད་པའོ། །ཤེས་རབ་ཀྱི་རྩལ་འཕང་ཆེན་པོ་ཁྱད་པར་ཅན་གྱིས་གསང་སྔགས་གསང་བ་དམ་པ་སྨྲ་ཞིང་སྟོན་པའང་དཔེར་ན་གངས་ཀྱི་སེང་གེའི་སྒྲ་ཡི་ང་རོ་ལྟར་ཟིལ་གྱིས་གནོན་པའི་གསུང་མཆོག་རབ་ཏུ་བརྗིད་པ་མངའ་བའོ། །ཞེས་གསུང་གི་སྒོ་ནས་བསྟོད་པའོ། །ཁྱོད་ནི་གསང་སྔགས་ཟབ་མོ་མ་འདྲེས་ཡོངས་སུ་རྫོགས་པའི་དེ་ཁོ་ན་ཉིད་ཀྱི་ངོ་བོར་གྱུར་པས་རྒྱལ་བ་རྫོགས་པའི་སངས་རྒྱས་དེ་བཞིན་གཤེགས་པ་མ་ལུས་པ་ཀུན་གྱི་ཐུགས་ཀྱི་བདག་ཉིད་ཆེན་པོའང་ཡིན་ནོ། །ཞེས་ཐུགས་ཀྱི་སྒོ་ནས་བསྟོད་པའོ། །ཁྱོད་ནི་གསང་བ་ཇི་བཞིན་པའི་ངོ་བོ་རྒྱལ་བ་རྫོགས་པའི་སངས་རྒྱས་ཀུན་བས་སྔོན་རོལ་དུ་ཡེ་ནས་ངོ་བོ་ཉིད་སྐུར་བྱུང་བའི་ཡོན་ཏན་ལྷུན་གྱིས་རྫོགས་པའི་རྒྱལ་བ་རིལ་གྱི་སྟོན་པ་ཡིན་པས། ཁྱོད་ཉིད་ནི་ཆོས་ཀྱི་སྐུ་རུ་མངོན་པར་བྱང་ཆུབ་པའི་སངས་རྒྱས་ཀུན་གྱི་མེས་པོ་ཆེན་པོའང་ཡིན་ནོ། །ཞེས་ཡོན་ཏན་གྱི་སྒོ་ནས་བསྟོད་པའོ། །ཟླ་དང་བྲལ་བས་གཉེན་པོ་ མེད་པའི་བདག་ཉིད་ཅན་གྱི་དཔལ་ལྡན་ལོངས་སྤྱོད་རྫོགས་པའི་སྐྱེས་བུ་དམ་པ ་ཉིད་དུ་ངེས་པས་མཐུ་སྟོབས་ཀྱི་ཁྱད་པར་ཆེ་བའི་མཆོག་ཏུ་གྱུར་པས་རྒྱལ་པོ་དང་འདྲ་བའི་རྗེ་བཙན་དམ་པའི་སྐུ་མཆོག་ཕུལ་དུ་བྱུང་བའང་ཁྱོད་ཉིད་ཡིན་ནོ། །ཞེས་ཕྲིན་ལས་ཀྱི་སྒོ་ནས་བསྟོད་པའོ། །སྤྲུལ་པའི་སྐུའི་བཀོད་པ་ཐུན་མོང་དང་ཁྱད་པར་དུ་སྟོན་པའི་དུས་གསུམ་གྱི་བདེར་གཤེགས་རྣམ་པར་འདྲེན་པའི་རྒྱལ་བ་ཀུན་གྱི་ཡང་དག་པའི་བཤེས་གཉེན་གསང་སྔགས་དམ་པ་འཆད་པའི་མངའ་བདག་འགྲོ་བ་འདུལ་བའི་ཐབས་མཆོག་དཔག་ཏུ་ མེད་པའི་སྤྲིན་དཔུང་གི་བདག་ཉིད་ཀྱང་སྟོན་པ ་དམ་པ་ཁྱོད་ཉིད་དོ། །ཞེས་མཁྱེན་པའི་སྒོ་ནས་བསྟོད་པའོ། །གསང་བའི་མངའ་བདག་སེམས་དཔའ་ཆེན་པོའི་ཆ་ལུགས་སུ་ཞུགས་པ་ཁྱོད་ནི་དུས་གསུམ་གྱི་རྒྱལ་བ་ཐམས་ཅད་གཅིག་དུ་མ་དང་བྲལ་བའི་ཚུལ་གྱིས་རྫོགས་པས་སངས་རྒྱས་ཀུན་གྱི་དངོས་གཞི་སྐུ་ལྔ་དང་མི་ཕྱེད་པའི་བདག་ཉིད་ཀྱང་སྟོན་མཆོག་དམ་པ་ཁྱོད་དོ། །ཞེས་ངོ་བོའི་སྒོ་ནས་བསྟོད་པའོ། །དེ་ལྟ་བུའི་ངོ་བོ་མངོན་དུ་བྱེད་པའི་ཐབས་ཀྱི་གར་མཁན་ཆེན་པོ་ལགས་པས་གསང་བའི་སྐུ་ལ་༼༣༤༦༽བསྟོད་པའང་ཡིན་ནོ།།

གཉིས་པ་བསྟན་པ་ཆེ་བ་བདུན་དང་ལྡན་པར་བསྟོད་པ་ནི།

ཀུན་གྱི་འབྱུང་གནས། ཞེས་པ་ནས། མངོན་པར་བསྟོད་དོ། །ཞེས་པའི་བར་གྱིས་བསྟན་ཏེ།

ཀུན་གྱི་འབྱུང་གནས་མེེ་ལོང་གསལ། །ཕྱོགས་ཀུན་གསལ་འགྲེལ་ངེས་པའི་མདོ། །ཐེག་ཆེན་རྨད་གྲགས་ངོ་མཚར་ཆེ། །གསང་ཆེན་རྨད་བྱུང་ངོ་མཚར་ཆེ། །ཨ་ཧོ་ཞེས་ངེས་པ་དམ་པས་མངོན་པར་བསྟོད་དོ།།

རྟོགས་པའི་རྒྱུད་འདི་ལ་འཁོར་གྱིས་བསྟོད་པ་ནི་གང་ཞེ་ན། ཤིན་ཏུ་གསང་བའི་བཀའ་དམ་པ་ཐེག་པ་ཆེན་པོ་ཐུན་མོང་མ་ཡིན་པའི་རྒྱུད་འདི་ནི། བསྟན་པ་ཀུན་གྱི་འབྱུང་གནས། ཆོས་ཐམས་ཅད་ཀྱི་མེ་ལོང་རབ་ཏུ་གསལ་བ། བཀའི་ཕྱོགས་ཀུན་གསལ་བར་བྱེད་པས་ལུང་གི་སྤྱི་འགྲེལ། གསང་བ་ཆེན་པོའི་དོན་ཇི་བཞིན་པར་ངེས་པའི་མདོ་ཡིན་པས་དོན་གྱི་མཇུག་སྡུད་ཆེན་པོ་ཡིན་ནོ་བར་བསྟོད་པ་སྟེ་བཤད་པ་བཞིན་ནོ། །དེ་ལྟ་བུའི་ཐེག་པ་ཆེན་པོའི་རྒྱུད་ཀྱི་རྒྱལ་པོ་བླ་ མེད་རྨད་དུ་བྱུང་བའི་ཐེག་པ་ཡང་རྩེ་འདི་ཉིད་བདག ་ཅག་དང་ལྷ་མིའི་ཡུལ་དུ་གྲགས་པ་ངོ་མཚར་མཆོག་ཏུ་ཆེ་བའོ། །དེས་ན་མན་ངག་ཐམས་ཅད་ཀྱི་རྩ་བ་གསང་བ་ཆེན་པོ་ཟབ་ཅིང་རྒྱ་ཆེ་བ་འདི་ཉིད་བྱུང་ཚུལ་བཅུ་གཉིས་ཀྱི་དུས་སུ་དུས་ཐམས་ཅད་དུ་འབྱུང་བ་དེ་ནི་ངོ་མཚར་རབ་ཏུ་ཆེའོ། །ཞེས་པའི་དོན་ཏོ། །ཨ་ཧོཿ ཞེས་པ་གཉིས་མེད་ཀྱི་དོན་མཆོག་སྟོན་པའི་རྒྱུད་ཐོས་པས་དགའ་བ་སྟེ། ངེས་པ་དོན་གྱི་རྒྱུད་ཀྱི་ནང་ན་ཡང་མཆོག་དང་དམ་པ་ཡིན་ནོ་བར་མངོན་པར་བསྟོད་པ་ཆེད་དུ་བརྗོད་པ་ཉིད་དོ།།

གཉིས་པ་མཛད་པ་ཆོས་ཉིད་དུ་གྲོལ་ཞིང་བྱིན་རླབས་ལྷ་མི་ལ་གྲགས་པ་ནི།

དེ་ནས་ཅང་མི་དམིགས། ཞེས་པ་ནས། གྲགས་པར་གྱུར་ཏོ། །ཞེས་པའི་བར་གྱིས་བསྟན་ཏེ།

དེ་ནས་ཅང་མི་དམིགས་པར་གྱུར་ཏེ། གང་དུ་ངེས་པར་བགྲོས་པའི་གསང་བ་དག

ལྷ་དང་མིའི་འཇིག་རྟེན་དུ་རྒྱ་ཆེར་གྲགས་ཤིང་ཡོངས་སུ་གྲགས་པར་གྱུར་ཏོ།།

དེ་ནས་སྤྲོས་མཐའ་ཅང་མི་དམིགས་པར་ཆོས་ཉིད་ཀྱི་ངང་དུ་གྱུར་ཏེ། འཁོར་རྣམས་ཀྱིས་ཆོས་ཀྱི་སྐུ་ཆེན་པོ་མངོན་དུ་བྱས་པའི་ཕྱིར་རོ། །ལུང་བསྟན་བརྒྱུད་པའི་གླེང་གཞིིའི་དབང་གིས་གནས་ཀྱི་དངོས་པོ་རི་མ་ལ་ཡའི་རྩེ་གང་དུ། གསང་བདག་སྐྱེས་བུས་གསང་བ་དམ་པ་ལང་ཀའི་མངའ་བདག་ལ་སོགས་པ་ལ་ངེས་པར་བགྲོས་ཏེ་བཀའ་སྩལ་པའི་གསང་བའི་གསང་བ་དམ་པ་འདི་དག་བྱིན་གྱིས་བརླབས་པའི་རྩལ་གྱིས་ལྷ་དང་མིའི་འཇིག་རྟེན་གྱི་ཁམས་རྣམས་ཀུན་ཏུ་རྒྱ་ཆེར་ཁྱབ་པར་གྲགས་ཤིང༌། ཤིན་ཏུའང་དེ་ལ་མོས་ཏེ་སྤྱོད་པར་དཀའ་བས་དམ་པར་བྱེད་པའི་ཕྱིར་ཡོངས་སུ་གྲགས་པར་གྱུར་བ་སྟེ། དེ་ལྟར་གྲགས་པས་དམ་པའི་རིགས་ཅན་ལྔ་དང༌། དམན་པའི་ལུས་ཅན་སོ་སོས་བཟུང་ནས་མི་ནུབ་པར་བྱེད་པའི་ཕྱིར་ཆེད་དུ་གཏད་པ་མ་སྨོས་པའི་དོན་ཏོ།།

ལེའུའི་མཚན་ནི།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

སངས་རྒྱས་ཀུན་གྱི་དགོངས་པ་འདུས་པའི་ལེའུ་ཞེས་བྱ་སྟེ་བདུན་ཅུ་ལྔ་པའོ།།

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྫོགས་པའི་སངས་རྒྱས་ཀུན་གྱི་དགོངས་པ་སེམས་ཀྱི་དེ་ཁོ་ན་ཉིད་གཅིག་ཏུ་འདུས་པར་༼༣༤༧༽བསྟན་པའི་ལེའུ་ཞེས་བྱ་སྟེ་བདུན་ཅུ་རྩ་ལྔ་པ་ཉིད་གསལ་བར་འགྲེལ་ཏེ་དགོངས་དོན་ཇི་ལྟ་བ་བཞིན་དུ་ལེགས་པར་བཤད་པའོ།།

ཐེག་པ་ཆེན་པོ་ངེས་པར་བྱུང་བའི་ཚུལ་ལས། གང་གི་དགོངས་པ་རྣམ་པར་བགྲོ་བ་ན་ཡང་འབྱུང་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ།།

བྱུང་ཚུལ་བསྟན་པ་བཅུ་གཉིས་པའི་ཐ་མའོ།།

ཚུལ་དེ་དག་གི་སྒོ་ནས་ཐེག་པ་ཆེན་པོ་ངེས་པར་འབྱུང་བའི་ཚུལ་ལས། སྟོན་པ་ཕྱག་ན་རྡོ་རྗེས་རྒྱལ་བ་སྐུ་ལྔ་པོ་གང་གི་དགོངས་པ་འཁོར་དམ་པའི་རིགས་ཅན་ལྔ་ལ་རྣམ་པར་བགྲོས་པ་ན་ཡང་མ་ལ་ཡའི་རྩེར་འབྱུང་བའི་གཏམ་རྒྱུད་བརྗོད་པའི་ཚུལ་གྱིས་བརྗོད་བྱ་ཆོས་ཉིད་དོན་གྱི་ཕྱག་རྒྱའི་ཡེ་ཤེས་མ་འདྲེས་ཡོངས་རྫོགས་སུ་རྗོད་བྱེད་དགོངས་པ་འདུས་པའི་གསང་བ་ཆེན་པོའི་ཐབས་ཀྱི་ལུང་གིས་དུས་སྟོན་མཆོག་ཐུབ་པའི་དབང་པོ་འདས་ནས་ལོ་ཉེར་བརྒྱད་དུ་གྱུར་པ་ན་ལེགས་པར་རྣམ་པར་བགྲོས་ཏེ་གསལ་བར་བསྟན་པ་སྟེ། བྱུང་ཚུལ་བསྟན་པ་བཅུ་གཉིས་པའི་ཐ་མ་ཉིད་ཡོངས་སུ་རྫོགས་པའོ།།

འོ་ན་ཁྱོད་ཀྱིས་རྩ་བཤད་དུ་འཇོག་ཚུལ་འདི་ལྟར་ན། ཀུན་འདུས་ཀྱང་རྩ་རྒྱུད་དུ་བྱེད་པ་ནི་འགལ་བར་འགྱུར་ཏེ། དེར་བྱུང་ཚུལ་བཅུ་གཉིས་མ་བསྟན་པའི་ཕྱིར་ཞེ་ན། གཏན་མ་བསྟན་པ་ཡང་མིན་ཏེ། དེ་ཉིད་ལས། གཞན་གྱི་དོན་དུ་འབྱུང་ཞིང་འགྲོ་བའི་ཚུལ་དང་མཐུན་པའི་ཕྱིར་གནས་སུ་བསྐྱོད་པ་དང༌། མཉམ་པར་གྱུར་པ་དང༌། མཛེས་པར་གཤེགས་པ་དང༌། སྤྲོ་བར་སྤྱོད་པ་དང༌། གསང་བར་སྦྱོར་བ་དང༌། མཚན་མ་བཅོམ་པ་དང༌། མཛད་པ་མེད་པ་དང༌། སེང་གེའི་གསུང་སྒྲ་དང༌། ངེས་པར་རྫོགས་པ་དང༌། རྗེས་སུ་འབྱུང་བ་དང༌། ཚམ་ངམ་ཆེན་པོ་སྤྲུལ་པ་མཛད་པ་དང༌། ཡོངས་སུ་དག་པའི་ཕྱིར་འབྱུང་ཚུལ་ཆེན་པོ་ཞེས་བྱའོ། །ཞེས་གསུངས་པས། ཚུལ་འདི་ཉིད། མཛད་པ་བཅུ་གཉིས་དང༌། བྱུང་ཚུལ་བཅུ་གཉིས་དང༌། དོན་མཛད་ཚུལ་བཅུ་གཅིག་རྣམས་སུ་བཤད་པའི་ཕྱིར་རོ། །དེའང་གནས་སུ་བསྐྱོད་པ་ནི་ལྷུམས་སུ་ཞུགས་པ་དང༌། རྨོངས་པ་གདུང་བ་སེལ་བའི་བྱུང་ཚུལ་དང༌། འགྲོ་དོན་ལ་གཤེགས་པའོ། །མཉམ་པར་གྱུར་པ་ནི། སྐུ་བལྟམས་པ་དང༌། སྒྲོན་མ་བཀོད་པའི་བྱུང་ཚུལ་དང༌། ཕྱོགས་རིས་མེད་པར་དོན་མཛད་པའོ། །མཛེས་པར་གཤེགས་པ་ནི། གོམ་པ་བོར་བ་དང༌། ངེས་པ་རྙེད་པའི་བྱུང་ཚུལ་དང༌། སྐུ་གསུང་ཐུགས་ཀྱི་མཛད་པའོ། །སྤྲོ་བར་སྤྱོད་པ་ནི། གཞོན་ནུའི་རོལ་རྩེད་མཛད་པ་དང༌། སྙིང་པོ་བྱང་ཆུབ་ཏུ་ངེས་པའི་བྱུང་ཚུལ་དང༌། གདུལ་བྱ་དགའ་བར་མཛད་པའོ། །གསང་བར་སྦྱོར་བ་ནི། ཁབ་བཞེས་༼༣༤༩༽པ་དང༌། དགོངས་པ་ངེས་པར་འགྲེལ་བའི་བྱུང་ཚུལ་དང༌། གསང་སྔགས་ལ་བསྐུལ་བའོ། །མཚན་མ་བཅོམ་པ་ནི། རབ་ཏུ་བྱུང་བ་དང༌། གདུལ་བྱ་སྐབས་ལ་བབ་པའི་བྱུང་ཚུལ་དང༌། སྐུའི་ངོ་བོ་གང་དུའང་མ་ངེས་པའོ། །མཛད་པ་མེད་པ་ནི། དཀའ་ཐུབ་མཛད་པ་དང༌། བྱིན་གྱིས་བརླབས་ཀྱི་བྱུང་ཚུལ་དང༌། རྩོལ་བ་མི་མངའོ། །སེང་གེའི་གསུང་སྒྲ་ནི། ཆོས་ཀྱི་འཁོར་ལོ་བསྐོར་བ་དང༌། བརྒྱུད་པ་ཐབས་ཀྱི་གྲགས་པའི་བྱུང་ཚུལ་དང༌། ཟིལ་གྱིས་གནོན་པའོ། །ངེས་པར་རྫོགས་པ་ནི། སངས་རྒྱས་པ་དང༌། ལུང་ཆེན་ངེས་པར་བསྟན་པའི་བྱུང་ཚུལ་དང༌། གདུལ་དཀའ་འདུལ་བའི་མཛད་པའོ། །རྗེས་སུ་འབྱུང་བ་ནི། ཡིག་རྩིས་སྦྱང་བ་དང༌། གང་གི་ཆེད་དུ་མཛད་པའི་བྱུང་ཚུལ་ལོ། །ཚམ་ངམ་ཆེན་པོ་སྤྲུལ་པ་མཛད་པ་ནི། བདུད་བཏུལ་བ་དང༌། ལས་རྒྱུད་ཡོངས་སུ་གཅོད་པའི་བྱུང་ཚུལ་དང༌། སྔ་མ་དང་འདི་གཉིས་སྤྲུལ་པ་འགྱེད་པའི་མཛད་པའོ། །ཡོངས་སུ་དག་པ་ནི། མྱ་ངན་ལས་འདས་པ་དང༌། དགོངས་པ་རྣམ་པར་བགྲོ་བའི་བྱུང་ཚུལ་དང༌། ཞིང་དང་སྤྱོད་ཡུལ་ཀུན་ཏུ་དོན་མཛད་པ་རྣམས་སུ་མཁས་གྲུབ་སྔ་མ་དག་ལ་ཡོངས་སུ་གྲགས་པའི་ཕྱིར་རོ། །དེ་ལྟར་མ་འདྲེས་ཡོངས་སུ་རྫོགས་པའི་རྩ་བ་དང་བཤད་པའི་རྒྱུད་ཀྱི་ཟབ་ཅིང་རྒྱ་ཆེ་བའི་ཚུལ་གྱི་ངེས་གསང་བླ་ན་མེད་པ་ལ་བློ་གྲོས་ཀྱི་མཁྱེན་རྩལ་མཆོག་ཏུ་ཡངས་ཤིང་རྒྱས་པར་བྱས་ཏེ་རྒྱལ་བ་ཀུན་གྱི་དགོངས་པའི་གནད་ཀུན་འདུས་པའི་བཀའི་གསང་མཛོད་རྨད་དུ་བྱུང་བ་ལ་མི་འཕྲོགས་པའི་ངེས་པ་ཆེན་པོས་གཞན་དྲིང་མི་འཇོག་པར་ཡང་དག་པར་འཇུག་པར་བྱའོ།།

གཉིས་པ་ཡོངས་སུ་རྫོགས་པའི་བྱ་བ་ལ་གཉིས་ཏེ། རྣམ་འདྲེན་བཞི་པའི་ལུང་བསྟན་བརྒྱུད་པའི་བསྟན་པ་རིན་པོ་ཆེ་ཇི་ལྟར་བགྲོས་པའི་མཛད་བྱང་བསྟན་པ། མདོ་ཆེན་པོ་ཉིད་ལོ་པཎ་གང་གི་བཀའ་དྲིན་གྱིས་འཕགས་ཡུལ་དང་བྲུ་ཤའི་ཡུལ་ནས་བོད་ཡུལ་དུ་ཇི་ལྟར་ཞུས་ཏེ་གཏན་ལ་ཕབ་པའི་བསྒྱུར་བྱང་བཤད་པའོ། །དང་པོ་ནི།

སངས་རྒྱས་ཀུན་གྱི་དགོངས་པ། ཞེས་པ་ནས། ཡོངས་སུ་བགྲོས་པ་རྫོགས་སོ། །ཞེས་པའི་བར་གྱིས་བསྟན་ཏེ།

སངས་རྒྱས་ཀུན་གྱི་དགོངས་པ་འདུས་པའི་མདོ། ཐེག་པ་ཆེན་པོའི་མངོན་པར་རྟོགས་པ། ཆོས་ཐམས་ཅད་ཀྱི་མེ་ལོང་། བཀའ་ཐམས་ཅད་ཀྱི་འགྲེལ་པ། དེ་བཞིན་གཤེགས་པ་རྣམས་ཀྱི་དགོངས་པ་གསང་བ་དམ་པ། བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེས་དྲག་ཤུལ་ཅན་གྱི་རི་མ་ལ་ཡའི་རྩེར། ལངྐའི་བདག་པོ་ལ་སོགས་པ། དམན་པའི་ལུས་ཀྱི་སེམས་དཔའ་རྣམས་ལ་རྒྱ་ཆེར་ཡོངས་སུ་བགྲོས་པ་རྫོགས་སོ།།

སངས་རྒྱས་ཀུན་གྱི་དགོངས་པ་འདུས་པའི་མདོ། ཞེས་པ་ལེའུ་ཐ་མའི་དོན་ཉིད་ཀྱིས་འགྲེལ་ཏོ། །ཐེག་པ་ཆེན་པོའི་མངོན་པར་རྟོགས་པ། ཞེས་པ་ནི། གསང་ཆེན་ཐེག་མཆོག་དམ་པ་སྒྲོ་སྐུར་མེད་པར་མཚོན་༼༣༤༩༽པར་བྱེད་པའི་ཕྱིར་རོ། །ཆོས་ཐམས་ཅད་ཀྱི་མེ་ལོང༌། ཞེས་པ་ལོག་པའི་ལམ་དང་ཡང་དག་པའི་ལམ་ཀུན་གསལ་བར་སྟོན་པའི་ཕྱིར་རོ། །བཀའ་ཐམས་ཅད་ཀྱི་འགྲེལ་པ། ཞེས་པ་བཀའ་རིལ་གྱི་དོན་ཀུན་འདིས་མ་འདྲེས་ཡོངས་རྫོགས་ཀྱི་གསང་བ་ཆེན་པོར་གཏན་ལ་འབེབས་པའི་ཕྱིར་རོ། །དེ་བཞིན་གཤེགས་པ་ཀུན་གྱི་དགོངས་པ་དམ་པ་གསང་བ། ཞེས་པ་གསང་སྔགས་མཐར་ཐུག་པ་ནི་བློས་རེག་ཅིང་བསྟན་པ་དང་བརྟག་པར་དཀའ་བའོ། །སྟོན་པ་བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེ། གནས་དྲག་ཤུལ་ཅན་གྱི་རི་གནོད་སྦྱིན་འདུ་ཞིང་སྲིན་པོའི་འཁྲ་ས་མ་ལ་ཡའི་རྩེར། སྡུད་པ་པོ་ལང་ཀའི་མངའ་བདག་ཆེན་པོ་ལ་སོགས་པ་འཁོར་དམན་པའི་ལུས་ཅན་གྱི་བྱང་ཆུབ་སེམས་དཔའ་སེམས་པའ་ཆེན་པོ་རྣམས་ལ་བསྟན་པའི་གསང་བ་ཆེན་པོ་རྒྱ་ཆེར་ཡོངས་སུ་བགྲོས་ཏེ་བཀའ་སྩལ་པ་ཉིད་ཀྱི་དོན་ནི་མདོ་རྒྱུད་ཆེན་པོ་ཆོས་ཀྱི་མེ་ལོང་འདི་ཉིད་ཡིན་ནོ། །དེ་ལྟ་བུའི་གསང་བ་མཆོག་གི་ཐེག་པའི་རྒྱལ་པོ་ཉིད་ལྷག་མ་མེད་པར་ཡོངས་སུ་རྫོགས་སྷོ། །ཞེས་མ་ཚང་བ་མེད་པར་བཤད་ཅིང་གཏན་ལ་དབབ་ཟིན་པའི་དོན་ཏོ།།

གཉིས་པ་མདོ་ཆེན་པོ་ཉིད་ལོ་པཎ་གང་གི་བཀའ་དྲིན་གྱིས་འཕགས་ཡུལ་དང་བྲུ་ཤའི་ཡུལ་ནས་བོད་ཡུལ་དུ་ཇི་ལྟར་ཞུས་ཏེ་གཏན་ལ་ཕབ་པའི་བསྒྱུར་བྱང་བཤད་པ་ནི།

རྒྱ་གར་ཀྱི་མཁན་པོ། ཞེས་པ་ནས། ཞུས་ཏེ་གཏན་ལ་ཕབ་པའོ། །ཞེས་པའི་བར་གྱིས་བསྟན་ཏེ།

རྒྱ་གར་གྱི་མཁན་པོ་དྷརྨ་བོ་དྷི་དང་། རིང་ལུགས་ཆེན་པོ་ད་ན་རཀྵི་ཏ་དང་། ཞུ་ཆེན་གྱི་ལོ་ཙ་བ་ཆེ་བ་ཙན་སྐྱེས་ཀྱིས། འབྲུ་ཤའི་ཡི་གེ་ལས་འབྲུ་ཤའི་ཡུལ་གྱི་ཁྲོམ་དུ་བསྒྱུར་ཅིང་གཏན་ལ་ཕབ་པའོ།།

དང་པོ་རྒྱ་གར་གྱི་མཁན་པོ་ཆེན་པོ་པཎྜི་ཏ་དྷརྨ་བོ་དྷི་དང༌། བོད་ཀྱི་ལོ་ཙཱ་བ་དམ་པ་ཆེ་བཙན་སྐྱེས་ཀྱིས་རྒྱ་གར་ལས་བྲུ་ཤའི་སྐད་དུ་བསྒྱུར་ལ། དེ་ནས་རིང་ལུགས་པ་ཆེན་པོ་པཎྜི་ཏ་དྷ་ན་རཀྵི་ཏ་དང༌། ཞུ་ཆེན་གྱི་ལོ་ཙཱ་བ་དམ་པ་ཆེ་བཙན་སྐྱེས་ཀྱིས། བྲུ་ཤའི་ཡི་གེ་ལས་བྲུ་ཤའི་ཡུལ་གྱི་ཁྲོམ་དུ། བོད་ཀྱི་ཡི་གེར་བསྒྱུར་ཞིང་ཞུས་ཏེ་གཏན་ལ་ཕབ་པའོ།།

བཀའ་འདི་ལ་དབུ་ཞབས་སུ་བྱུང་ཚུལ་བཅུ་གཉིས། ལེའུ་བདུན་བཅུ་རྩ་ལྔ། བམ་པོ་བཅུ།

ཤོ་ལོ་ཀ་སུམ་སྟོང་ཉིས་བརྒྱ་ལྔ་བཅུ་རྩ་གཉིས་མཆིས་སོ།།

བཀའ་འདི་ལ་དབུ་ཞབས་སུ་རྩ་བ་བྱུང་ཚུལ་བཅུ་གཉིས་དང༌། ལེའུ་བདུན་ཅུ་རྩ་ལྔ་པ། བམ་པོ་བཅུ་དང༌། ཤོ་ལོ་ཀ་ཉིས་བརྒྱ་ལྔ་བཅུ་རྩ་གཉིས་སོ། །འདིར་ཀུན་མཁྱེན་དམ་པ་རིན་པོ་ཆེའི་ཕྱག་མཆན་གྱི་མཇུག་ཏུ། མདའ་གླན་ཡང་ཁྱེད་དམ་པའི་རྗེ་གསུམ་གྱི། །ཕྱག་དཔེ་འགྲེལ་ཆེན་ཀུན་དོན་ལ། །ལྷ་རྗེ་ཟུར་གྱིས་ནན་ཆགས་བྱས། །གོང་བུ་བ་དང་ཤངས་པ་ལ། །ཕྱིས་ནི་ཡང་དག་ཞུས་པའོ། །རྗེས་སུ་ལྷ་རྗེ་རྣམ་གཉིས་ལ། །བདེ་གཤེགས་ཀྱིས་ཞུས་དམ་པ་ལ། །ལྡོམ་པོ་བདག་གིས་ཞུས་པའོ། །ཞེས་གསུངས་པས། གསང་བདག་༼༣༥༠༽ཆེན་པོ་སྒྲོ་ཕུག་པས་སྔོན་དུ་མདའ་གླན་ཡང་ཁྱེད་གསུམ་ལ་གསན་པ་ནན་ཆགས་སུ་བྱས་པ་ནི་གཙོ་བོར་འགྲེལ་ཆེན་མུན་པའི་གོ་ཆའི་ལུགས་ཡིན་ལ། ཕྱིས་སུ་གོང་བུ་པ་དང་ཤངས་པ་ལས་གསན་པ་ནི་གཙོ་བོར་ལུང་བསྟན་སྐོར་གྱི་ལུགས་ཡིན་ནོ། །དེ་རྗེས་ལྷ་རྗེ་སྨར་དང་གཙང་པ་རྣམས་གཉིས་ལ་ཀུན་མཁྱེན་དམ་པ་བདེ་གཤེགས་ཀྱིས་ཞུས་ཤིང༌། ཆོས་རྗེ་དམ་པ་རིན་པོ་ཆེ་ལ་གཙང་སྟོན་རྡོ་རྗེ་རྒྱ་མཚན་གྱིས་ཞུས་པར་གསུངས་པའོ། །སྐྱབས་རྗེ་རྒྱལ་ཚབ་རིན་པོ་ཆེའི་ཞལ་ནས། སྔོན་སྨོན་ཐུགས་བསྐྱེད་སྐྱ་རེངས་ཁོ་ལོ་ཡིས། །ཉེར་དྲངས་ངེས་གསང་བསྟན་མཆོག་མཁའ་དབྱིངས་སུ། །ལེགས་བཤད་འདོད་རྒུའི་སྣང་བ་འབུམ་འཇོ་བས། །ཆོས་ཀྱི་རྒྱ་མཚོ་ཉིན་མོར་བྱེད་གང་རྒྱལ། །ཞེས་བསྔགས་པ་ལྟར་པཎ་ཆེན་སི་ཏུ་རིན་པོ་ཆེས་དྭགས་ལྷ་སྒམ་པོའི་ཕྱག་དཔེ་མཆན་ཅན་གདན་དྲངས་པའི་གཤམ་དུ། ལྷ་རྗེ་སྒྲོ་ཕུག་པ་མདའ་ཚ་ཧོར་པོའི་མཆན་འབྲིང་པོ་ལ་མདའ་གླན་ཡང་ཁྱེད་གསུམ་གྱི་གསུང་སྒྲོས་ཀྱིས་ཞབས་ཏོག་བག་ཙམ་བྱས་ཏེ། གྲུ་གུའི་བནྡེ་དབུས་པ་ཇོ་འབུམ་གྱིས་བལྟས་པས་ཆོག་པར་ནན་ཏན་བགྱིས་པ་ལགས་སོ། །འགྲོ་དོན་དུ་གྱུར་ཅིག ཅེས་གསུངས་སོ། །ཡང་དཔེ་རྙིང་མཆན་མ་གཅིག་གདན་དྲངས་པའི་མཇུག་ཏུ། མདོ་ཆེན་པོའི་འགྲེལ་པའི་བྱེ་བྲག་བཞི་ལས་མཁས་པ་ཆེན་པོ་སྠི་ར་མ་ཏིའི་ལུགས་ལྟར་འགར་སྟོན་བཟང་པོ་ལས་རོང་ཟོམ་པཎྜི་ཏས་གསན་ཞིང་དེ་ལས་རུ་ཡོང་རིན་ཆེན་འབར་གྱིས་ཞུས་པ་ལ་བདག་འདྲ་འབྲོམ་སྟོན་འཐེང་པོས་ཞུས་ཏེ་ཕྱག་དཔེ་མཆན་བཅས་གསར་དུ་བཞེངས་པར་གསུངས་སོ། །དེ་ལ་སོགས་པ་ཕྱག་དཔེ་རྙིང་པ་མཆན་ཅན་བཞི་སྟེ་མཆན་འགྲེལ་ལྔ་དང༌། གཙང་དང་འཇང་ཡུལ་ནས་མདོ་འགྲེལ་མུན་པའི་གོ་ཆ་སྤྱན་དྲངས་པ་དང༌། གཞན་ཡང་ཀུན་མཁྱེན་དམ་པ་རིན་པོ་ཆེའི་མདོ་ཡི་ཁོག་དབུབ་བཀའ་འགྲེལ། སྐུ་བཞིའི་གླེང་འགྲེལ་དང་བསྡུས་དོན་རྣམས་སྤྱན་དྲངས་པ་ལས། བདག་གིས་བཀའ་འགྲེལ་མུན་པའི་གོ་ཆ་དང་ཕྱག་མཆན་རྣམས་ཀྱིས་གཞི་བྱས། ཆོས་རྗེའི་བསྡུས་དོན་ལྟར་དཀའ་འགྲེལ་ཡང་སྐབས་སུ་ལེགས་པར་སྦྱར་ནས་ཚད་མའི་ལུང་གིས་བརྒྱན་ཏེ་རང་བཟོ་མེད་པར་ཡིད་ཆེས་ངེས་པའི་གདིང་དང་ལྡན་པར་བྲིས་པ་ཁོ་ན་ཡིན་ནོ།།

འདིར་སྨྲས་པ། རྣམ་འདྲེན་ཤཱཀྱའི་༼༣༥༡༽ཏོག་དང་གསང་བའི་བདག་པོ་རྡོ་རྗེ་འཛིན་པའི་རྒྱལ། །ཡང་སྤྲུལ་དཔའ་བོ་དགའ་རབ་རྡོ་རྗེ་ཐེག་མཆོག་བསྟན་པའི་ཤིང་རྟ་ཆེ། །མཁྱེན་གཏེར་ཐུགས་རྗེའི་དབང་ཕྱུག་དམ་ པ་རིགས་བདག་བསྟན་འགྲོའི་དཔལ་མགོན་མཆོག །བཀའ་དྲིན་གཞལ་མེད ་སྐྱབས་གནས་གང་ལ་མི་ཕྱེད་དད་པས་སླར་བཏུད་དེ། །སྐུ་བཞིའི་ཁྱབ་བདག་ལྷུན་རྫོགས་དག་པའི་ངོ་བོ་ཡེ་ཤེས་སྒྱུ་འཕྲུལ་སྤྲོ་བའི་དཔྱིད། །ཆོས་ཉིད་དབྱིངས་སུ་གཅིག་དང་ཐ་དད་མེད་བཞིན་མཛད་པའི་རོལ་མོ་འབྱམས་ཀླས་པར། །ཀུན་ནས་འགྱེད་པའི་མངོན་རྫོགས་རིག་པའི་སྟོན་པ་རྨད་བྱུང་ཆེ་བའི་སྙིང་པོ་ཅན། །གཞི་རྩ་ཀུན་གྲོལ་རང་བྱུང་དོན་གྱི་འདྲེན་པ་ངང་གི་ཐིག་ལེར་ཆེས་བཀྲ་བའི། །ཕྱོགས་དུས་རྒྱལ་བའི་ཡེ་ཤེས་བདག་ཉིད་མངའ་དབང་ཡོངས་རྫོགས་མགོན་པོ་དེས། །ཆོས་དབྱིངས་རབ་འབྱམས་ཞིང་རྣམས་ཀུན་ཏུ་སྒྲོན་མ་བཀོད་པའི་དཀྱིལ་འཁོར་ན། །རྒྱལ་ཚབ་སྐྱེས་བུའི་རྣམ་འཕྲུལ་དུ་མས་རྒྱུན་དང་གནས་སྐབས་བཅུ་གཉིས་སུ། །གསང་སྔགས་ཀུན་གྱི་དེ་ཉིད་བགྲོས་ནས་གཏན་ལ་ངེས་པར་དབབ་པའི་ཚུལ། །སྐུ་བཞིའི་སྟོན་པ་གདུལ་བྱའི་སྣོད་བཞིར་མཚོན་པའི་ཚིག་བཞིས་བསྟན་པ་གང༌། །རྒྱུད་ཀྱི་རྒྱལ་པོ་ལུང་གི་སྤྱི་འགྲེལ་མན་ངག་ཀུན་གྱི་རྩ་བ་མཆོག །བསྟན་པའི་འབྱུང་གནས་ཆོས་ཀྱི་མེ་ལོང་དོན་གྱི་མཇུག་སྡུད་ཐེག་པའི་རྩེ། །ཆེ་བ་བདུན་ལྡན་སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ། །རིག་འཛིན་ཀླུ་དབང་འབུམ་གྱི་གཙུག་རྒྱན་སྙན་རྒྱུད་དམ་པའི་དེད་དཔོན་གྱིས། །ཉེར་བླངས་སྐལ་ལྡན་དབུལ་བ་སེལ་སླད་གསང་བའི་མཛོད་དུ་རྒྱས་བཏབ་པ། །རྣམ་པར་འབྱེད་པའི་བློ་གྲོས་ལྡེའུ་མིག་རྡོ་རྗེ་རྣོན་པོས་བྱིན་པ་ལས། །སངས་རྒྱས་ཡེ་ཤེས་ཉིན་བྱེད་ཤར་བས་གངས་ཅན་མུན་པའི་གོ་སྐབས་འཕྲོག །དཔལ་མཆོག་དེ་དང་དཔལ་གཞན་གྱིས་བརྒྱན་བརྟན་པའི་འཁོར་ལོ་ཟུར་ཕུད་ཅན། །ཀུན་མཁྱེན་བླ་མ་ཤེས་རབ་སེང་གེས་ཕུལ་བྱུང་བཀའ་ཡི་སྒྲོམ་ཆེན་པོས། །ལེགས་པར་བཤད་པའི་སྒོ་མང་ཕྱེས་ཏེ་བོད་ཆེན་ལྗོངས་ཀྱི་འཛིན་པའི་གཞིར། །འཆད་ཉན་སྤྲིན་གྱི་སྣང་བས་ཁྱབ་ཅིང་ཀུན་ནས་ཡོངས་སུ་རྒྱས་པར་བྱས། །འོན་ཀྱང་དུས་མཐའ་རླུང་ཤུགས་བདོ་བས་ཆུ་ལྷའི་འཕང་བར་སྤྱན་དྲངས་ཤིང༌། །བཤད་སྒྲུབ་འོད་སྣང་ཡོངས་སུ་བསྡུས་ནས་རིང་ཞིག་ལོན་པ་དེ་ལྟ་ནའང༌། །ཆོས་༼༣༥༢༽ཀྱི་རྒྱ་མཚོ་བསྲུབ་པའི་ཐུགས་བསྐྱེད་རི་ལྟར་བརྟན་པའི་ཕྲིན་ལས་ཀྱིས། །སླར་ཡང་འགྲེལ་ཆེན་པདྨོའི་གཉེན་འདི་ལས་འཕྲོའི་མཁའ་ལ་གསལ་བར་གྱུར། །དེ་ཚེ་མཚུངས་མེད་དམ་པའི་མགོན་རྣམས་ཀྱིས། །འདི་དོན་འགྲེལ་པས་གསལ་བར་གྱིས་ཤིག་ཅེས། །བཀའ་ལུང་ཀུན་གསལ་ནོར་བུའི་འོད་ཀྱི་ཟེར། །བདག་བློ་དད་པའི་གེ་སར་ལ་ཕོག་པས། །ཐེག་མཆོག་རྒྱལ་པོ་ལུང་ཆེན་གསང་བའི་ཁང་བཟང་ཡངས་པར་རིགས་ལྡན་བློ་ཡི་སྨིན་ལེགས་མ། །ལུང་དང་བརྒྱུད་པའི་གསུང་སྒྲོས་མང་པོས་རྒྱན་གྱིས་ཉེར་སྤྲས་ལྷག་བསམ་ཟུར་མིག་གཡོ་བཞིན་དུ། །དཀྱིལ་འཁོར་རྣམ་གསུམ་མ་འདྲེས་རྫོགས་པས་རིགས་པའི་རྒྱུད་མང་རྣམ་དཔྱོད་སོར་མོས་བསྣུན་ནས་ཀྱང༌། །དཔལ་ལྡན་མདོ་ཡི་རྣམ་བཤད་གསལ་བར་མགྲིན་པའི་གླུ་དབྱངས་སྙན་པ་འདི་ཀོ་དེང་འདིར་སྤེལ། །ཚུལ་འདི་མདོ་སྔགས་བསྟན་པའི་ཡང་བཅུད་དེ། །ལེགས་པར་རྟོགས་ན་རྩོལ་བཅས་ཐེག་པའི་ཏོག །ལུང་ཆེན་གསང་བའི་དགོངས་པ་མཐར་ཐུག་སྟེ། །བློ་གྲོས་ནམ་མཁའི་མཐའ་ལྟར་དཔག་པར་དཀའ། །དེ་ཕྱིར་དོན་འདིར་མ་འདྲེས་ཡོངས་རྫོགས་པའི། །ངེས་པ་རྙེད་ཚེ་མཆོག་ཏུ་གསང་བ་ཡི། །འོད་གསལ་རྡོ་རྗེ་སྙིང་པོའི་སྒོར་ཞུགས་ཏེ། །ཟབ་མོའི་དགོངས་པ་ཚད་མའི་མིག་སྒྲུབས་མཛོད། །བློ་གསལ་བློ་ཡི་བློ་གྲོས་རྒྱས་པ་ན། །ཆོས་དང་ཆོས་མཆོག་ཆོས་ཀྱི་བཅུད་ལ་དབང༌། །དེ་བས་དེ་བཞིན་དེ་གནད་ངེས་རྣམས་ཀྱིས། །ལེགས་གསུང་ལེགས་བཤད་ལེགས་རྒུའི་མཛོད་འདི་ལོངས། །འདི་ལ་རང་བཟོའི་དྲི་མ་མ་མཆིས་ཏེ། །རྒྱལ་བའི་སྤྱོད་ཡུལ་དཔགས་དཀའི་གནས་ཡིན་ཕྱིར། །བྱིས་པའི་བློ་ཅན་བདག་འདྲེས་སྨོས་ཅི་འཚལ། །དེས་ན་ནོངས་པར་གྱུར་གང་མཐོལ་ཞིང་འཆགས། །གསང་ཆེན་རྒྱུད་ལུང་རྒྱ་མཚོའི་ཡང་སྙིང་དགོངས་པ་ཀུན་འདུས་ཡིད་བཞིན་ནོར། །ཟབ་མོའི་ལུང་གི་སྣང་བ་ལ་བརྟེན་དངོས་སྟོབས་རིགས་པའི་འཕྲུལ་ཐབས་ཀྱིས། །ལེགས་པར་དྲངས་ནས་མ་འདྲེས་གསལ་བའི་རྒྱལ་མཚན་རྩེ་མོར་ཡོངས་མཆོད་འདིས། །བློ་ལྡན་ཡོད་ན་ཟབ་དོན་འདོད་རྒུའི་གྲུབ་ཆར་འབེབས་ཤིང་སྙོམས་པར་བགྱེད། །ལེགས་བྱས་དགེ་བ་སྟོན་ཀའི་ཟླ་འདྲ་དྲི་མེད་དེས། །མཁའ་ཁྱབ་འགྲོ་ཀུན་ལམ་མཆོག་སྣང་བས་ཡོངས་གྲོལ་ནས། །འབད་རྩོལ་མེད་པར་རྩལ་ཆེན་རྫོགས་པའི་སར་སྨིན་ཏེ། །སྒྲོལ་བྱེད་༼༣༥༣༽རྒྱལ་པོ་ཐུགས་རྗེའི་མཆོག་གི་གནས་ཐོབ་ཤོག །ཁྱད་པར་དུ་ཡང་ཟབ་གསང་ཆོས་ཀྱི་བཅུད་མཆོག་འདིར། །ལེགས་པར་ཞུགས་ནས་ཐོས་བསམ་སྒོམ་གསུམ་ལ་བརྟེན་ཏེ། །འཆད་རྩོམ་ཉན་པའི་རྣམ་ཐར་བཟང་པོར་ངེས་གྱུར་ཀུན། །འགལ་རྐྱེན་མེད་པར་ལེགས་ཚོགས་མཐའ་དག་འཕེལ་གྱུར་ཅིག །བདག་ཀྱང་དེང་ནས་རྫོགས་པ་སྤྱིར་ཆིབ་ས་ཀུན་འདུས་ཤིང་དགོངས་ཀློང་དག་པའི་མཁའ་དབྱིངས་ལ། །རང་དབང་བསྒྱུར་ཏེ་གང་ལ་གང་འདུལ་ཐབས་སྤྲིན་རོལ་པས་ཟབ་རྒྱའི་ཆོས་ཚུལ་ཐམས་ཅད་ལ། །རྨོངས་པ་མེད་པར་བསྟན་པའི་ཡང་སྙིང་མདོ་སྒྱུ་སེམས་གསུམ་འོད་གསལ་སྙིང་པོའི་ཐེག་མཆོག་བཅས། །ཀུན་ནས་ཀུན་ཏུ་གསལ་བར་འགྲེལ་ཞིང་རབ་འབྱམས་ཞིང་དུ་ཡོངས་སུ་བགྲོ་བའི་དཔལ་ཐོབ་ཤོག །གདོད་ནས་རྣམ་དག་རྒྱལ་བའི་ཡེ་ཤེས་འདུས་མ་བྱས་པའི་ཆོས་སྐུ་དང༌། །འགྲོ་བའི་རང་བཞིན་སེམས་ཀྱི་དཀྱིལ་འཁོར་ངོ་བོ་ཉིད་ཀྱི་འོད་གསལ་བ། །གཉིས་སུ་མ་དམིགས་དབྱེ་བ་བྱར་མེད་སོ་སོ་མ་ཡིན་འདུས་མ་ཡིན། །བདེན་པ་དེས་ཀྱང་ཡེ་སངས་རྒྱས་པའི་གནས་ལུགས་རྟོགས་པའི་ཤིས་པ་སྩོལ། །རྒྱུད་ཀྱི་སྟོན་པ་སྐུ་ལྔའི་རྒྱལ་བ་རྒྱལ་ཚབ་འཆད་པའི་སྐྱེས་བུ་བཀའ། །གསང་ཆེན་ལུང་གི་བསྟན་པའི་མཛོད་ཁང་ཁྱད་པར་བདུན་ལྡན་འདུས་པ་མདོ། །གང་གི་དགོངས་དོན་ཇི་བཞིན་རྟོགས་ནས་གསལ་མཛད་དམ་པའི་རིགས་ཅན་སོགས། །མཆོག་གསུམ་རིན་ཆེན་འོད་ཀྱི་སྣང་བས་དགེ་ལེགས་རྒྱས་པའི་བཀྲ་ཤིས་སྩོལ། །ཉིན་མོར་བཀྲ་ཤིས་མཚན་ཡང་བཀྲ་ཤིས་ཉིན་མཚན་ཀུན་ཏུ་དགེ་ལེགས་ཀྱི། །བཀྲ་ཤིས་འཕེལ་བས་དུས་རྣམས་རྟག་ཏུ་མཆོག་གནས་དམ་པའི་དཔལ་གསུམ་གྱིས། །བཀྲ་ཤིས་བཟང་པོས་ཕྱོགས་ཀུན་ཡོངས་ཁྱབ་ཐེག་ཆེན་ལུང་དོན་རབ་གསལ་ཏེ། །ཟབ་མོ་གསང་བའི་ཆོས་མཛོད་རྒྱས་ནས་མི་ནུབ་འཕེལ་བའི་བཀྲ་ཤིས་ཤོག །ཅེས་དཔལ་སྤྱི་མདོ་དགོངས་པ་འདུས་པའི་འགྲེལ་པ་རྣལ་འབྱོར་ཉི་མ་གསལ་བར་བྱེད་པའི་གཟི་ལྡན་འཆར་ཁའི་འོད་སྣང་རིག་འཛིན་བརྒྱུད་པའི་ཞལ་ལུང་ཞེས་བྱ་བ་འདི་ཉིད། སྐྱབས་རྗེས་འཁོར་ལོའི་མགོན་པོ་བཀའ་དྲིན་མཚུངས་མེད་ཐུབ་བསྟན་དུལ་བའི་སྡེ་རྡོ་རྗེ་ལེགས་བཤད་རྩལ་གྱིས་སྔ་མོ་ཞིག་ནས་བཀའ་སྩལ་སྦྱི་བོར་སོན་པ་བཞིན། རྗེས་སུ་མཆོག་སྤྲུལ་ཕྱག་ཚ་རིན་པོ་ཆེ་ནས་ཆ་རྐྱེན་༼༣༥༤༽སྦྱར་བའི་ཞལ་བཞེས་དང་བཅས་པས་བསྐུལ་ཚེ་མཁན་ཆེན་རིན་པོ་ཆེའི་ཞལ་ནས་སླར་ཡང་ངེས་པར་བྲི་དགོས་ཞེས་ཕེབས་པ་ལྟར། རིགས་བདག་འཇམ་དབྱངས་མཁྱེན་བརྩེ་རིན་པོ་ཆེ་ཆོས་ཀྱི་བློ་གྲོས་དང༌། འཇམ་མགོན་ཀོང་སྤྲུལ་རིན་པོ་ཆེ་གཞན་ཕན་བཟང་པོ་རྣམས་ཀྱིའང་གྱ་ནོམ་པའི་སྐྱེས་དང་བཅས་ཏེ་བསྐུལ་བའི་བཀའ་ལུང་གཙུག་གི་རྒྱན་དུ་བཅིང་ཞིང༌། གྲུབ་དབང་ཐམས་ཅད་མཁྱེན་པའི་ཞལ་ནས་ཀྱང་བཀའི་གནང་བ་དངོས་སུ་ཐོབ་པས་ཤིན་ཏུ་བྲི་འདུན་ཡིད་ལ་བཅག་ཀྱང༌། བར་སྐབས་སུ་མཐུན་རྐྱེན་དཀོན་པར་མཐོང་ནས་འཇོག་པར་སེམས་པའི་ཚེ། སྐྱབས་རྗེ་སི་ཏུ་རིན་པོ་ཆེའི་ཡང་སྲིད་བྱམས་ཆེན་ཆོས་ཀྱི་ཉི་མ་དཔལ་བཟང་པོ་གང་གི་མཁྱེན་པའི་ཐུགས་ཀྱི་རྗེས་སུ་དགོངས་ཏེ་མཐུན་རྐྱེན་གནང་བའི་ཞལ་བཞེས་དང་ཆབ་གཅིག་བྲི་གཞིའི་ཤོག་བུ་ལྡེབ་བདུན་ཅུའི་ནང་ཙམ་དང་བཅས་པར་བཀའ་ཡིས་བསྐུལ་བ་ནན་ཟབ་སླར་གནང་མཛད་པ་བཞིན། དཔལ་ཡུལ་གྲུབ་དབང་པདྨ་ནོར་བུའི་ཡང་སྲིད་འཇིགས་མེད་ཐུབ་བསྟན་བཤད་སྒྲུབ་ཆོས་ཀྱི་སྒྲ་དབྱངས་དང༌། སྐུ་ཆེན་རིན་པོ་ཆེ་རིག་པ་འཛིན་པ་དཔལ་ཆེན་ཆེ་མཆོག་དྲག་པོ་རྩལ། སྐྱབས་རྗེ་འབྲུག་པ་རིན་པོ་ཆེའི་རིགས་སྲས་དམ་པ་འགྱུར་མེད་རྡོ་རྗེ་རྣམས་ཀྱིས་དངོས་རྫས་དང་བཅས་ཏེ་བཀའི་གནང་བསྐུལ་སྩལ་ཞིང༌། མཆོག་སྤྲུལ་བློ་གྲོས་བཤད་སྒྲུབ་ཉི་མ་དང༌། མཁན་སྤྲུལ་བྱང་ཆུབ་རྡོ་རྗེ་ཟུང་ནས་དངོས་པོའི་སྐྱེས་དང་བཅས་པས་བསྐུལ་བ་ནན་ཏན་མཛད་པ་དང༌། ཆོས་ཀྱི་མཆེད་པོ་མཁན་ཆེན་པདྨ་རབ་རྒྱས་དང༌། འཇམ་དཔལ་རྒྱ་མཚོ་རྣམ་གཉིས། བྱང་རེབ་ཀོང་ནས་ཨ་ལགས་རྫོང་སྔོན་གྱི་སྤྲུལ་སྐུ་ཀུན་མཁྱེན་ངག་དབང་བློ་བཟང་སོགས་དམ་པ་དུ་མས་ཡང་ཡང་བསྐུལ་བ་ལ་བརྟེན་ནས། སྐྱབས་མཆོག་པཎ་གྲུབ་རྣམ་གཉིས་ཀྱི་ཞབས་རྡུལ་ལ་སྤྱི་བོས་རེག་པའི་བཙུན་གཟུགས་ཐུབ་བསྟན་མཁྱེན་བརྩེ་བློ་གྲོས་ཐིག་ལེ་རྫོགས་པ་རྩལ་ཞེས་འབོད་པའི་སྤྲང་འཁྱམས་འོན་པ་རོལ་མོ་མཁན་གྱི་བརྟུལ་ཞུགས་ཅན་དེས་འོག་མིན་ཆེན་པོ་དཔལ་ཀཿཐོག་གི་ཡང་དབེན་གསེར་ཁང་རི་ཁྲོད་ཕྲིན་ལས་ཀུན་ཁྱབ་གླིང་དུ་དབུ་བརྩམས་ནས་བླ་མའི་གདན་ས་ལྗོན་པ་ལུང་གི་དབེན་ཁྲོད་ཁུ་བྱུག་རོལ་པའི་ལྗོངས་ཞེས་གྲགས་པའི་རང་ཉིད་སྡོད་གནས་ཀྱི་ཁང་པ་གསར་པར་ལུང་རྟོགས་སྤྲུལ་པའི་སྐུས་མཐུན་རྐྱེན་མཛད་ཅིང་བྲི་གཞིའི་ཤོག་བུ་ཡང་གནང་བ་ལ་བརྟེན་ནས་ཅི་རིགས་བྲིས་ཚེ་བར་སྐབས་སུ་ཉེར་འཚེའི་༼༣༥༥༽ཚ་གདུང་ཅུང་ཟད་བྱུང་བ་ན། སྐྱབས་མཆོག་གྲུབ་དབང་འགྲོ་འདུལ་དཔའ་བོ་རྡོ་རྗེའི་གདན་ས་ཨ་འཛོམ་ཆོས་སྒར་ཆེན་པོའི་གྲུབ་རི་དུང་དཀར་གཡས་འཁྱིལ་གྱི་དབེན་རྩེར་མིག་སྨན་ཐིག་ལེའི་ལྡིང་ཁང་ལ་གནས་ཏེ་རིགས་བདག་མཆོག་སྤྲུལ་རིན་པོ་ཆེས་ཤོག་བུ་མང་པོ་དང་མཐུན་རྐྱེན་ལེགས་པར་གནང་བའི་ཐུགས་རྗེའི་གྲིབ་བསིལ་ལ་བརྟེན་ནས་ཟླ་བ་བཞིའི་བར་དུ་བྲིས་ཤིང་སླར་ཡང་ཀུན་གཟིགས་ཡང་སྤྲུལ་རིན་པོ་ཆེའི་བཀའ་དོན་ལྟར་དཔལ་ཀཿཐོག་གི་གསེར་ཁང་ཡང་དབེན་བདུད་འདུལ་ཕྲིན་ལས་ཀུན་ཁྱབ་གླིང་དུ་དམ་པ་ཉིད་ཀྱིས་མཐུན་རྐྱེན་མཛད་ཅིང་ཤོག་བུ་གནང་བའི་བཀའ་དྲིན་ལས་གཞུང་དོན་དངོས་ལེགས་པར་ཚང་བའི་བར་དུ་བྲིས་ནས། དེ་རྗེས་དཔལ་ཡུལ་རྣམ་རྒྱལ་བྱང་ཆུབ་གླིང་ཆེན་གྱི་དབེན་གནས་བརྡ་གོ་འོད་གསལ་ཐེག་མཆོག་གླིང་གི་ཡང་དབེན་ལྷའི་བཀྲ་ཤིས་ལྷུན་པོའི་རི་ངོགས་ཙནྡན་ལྗོན་བཟང་འཁྲིགས་པའི་མ་ལ་ཡ་ཡི་ནགས་ཁྲོད་གཉིས་པ་ལྷ་བྱ་སྐད་སྙན་ཚལ་གྱི་བསྟི་གནས་མཚོ་གོང་དགེ་འཕེལ་ཆོས་སྒང་གི་སྒྲུབ་ཁང་ལྷག་པའི་ལྷ་མཆོག་དཔལ་ཆེན་བཞད་པས་ཐེལ་སྡིངས་ལུང་ཆེན་འདུས་པ་མདོ་ཡི་ཁང་བཟང་གཙུག་ལག་རྒྱ་མཚོས་བརྒྱན་པའི་བསམ་འགྲུབ་ནོར་བུའི་གླིང་མཆོག་དམ་པར་སྐྱབས་རྗེ་གྲུབ་དབང་རིན་པོ་ཆེའི་ཡང་སྲིད་མཆོག་སྤྲུལ་གསུམ་གྱིས་གསར་དུ་བཞེངས་པའི་རྡོ་རྗེ་ཁྱུང་བྲག་གི་རྫོང་གནས་དགེ་བར་མཁས་ཤིང་གྲུབ་པའི་དབང་ཕྱུག་དཔལ་ཆེན་འདུས་པ་ཆོས་ཀྱི་གླང་པོའི་ཐུགས་བསྐྱེད་དུས་སུ་སྨིན་པའི་རྟེན་འབྲེལ་བཟང་པོས་མཚམས་སྦྱར་ཏེ། ཛ་ལནྡྷ་རའི་རྒྱན་མཆོག་དམ་པ་ཡང་སྤྲུལ་ཐུབ་བསྟན་བཤད་སྒྲུབ་ཆོས་ཀྱི་སྒྲ་དབྱངས་ཀྱི་བཀའ་ལུང་བཞིན་དུ་རབ་རྒྱལ་ཆུ་འབྲུག་ལོའི་ཟླ་ ༨ ཚེས་ ༡༣ ཕུན་སུམ་ཚོགས་པ་ལ་མཇུག་ཡོངས་སུ་རྫོགས་པར་བགྱིས་པ་འདིས་ཀྱང་སྔ་འགྱུར་མདོ་སྒྱུ་སེམས་གསུམ་གྱི་རིང་ལུགས་རྨད་དུ་བྱུང་བ་ཉིད་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །དགེའོ། །དགེའོ། །དགེའོ། །སརྦ་མངྒ་ལཾ།། །།

1 བདུད་འཇོམས་བཀའ་མ། ༢ཁ-༦ ༼སྨར།༽

2 མཚམས་བྲག་དཔེ་རིང་། ༡ཁ-༡ ༼རྒྱ་གར་སྐད་དུ། སརྦ་ཏ་ཐཱ་ག་ཏ་ཙཏྟ། གུ་ཧྱ་ཛྙཱ་ན་གརྦྷ། བཛྲ་ཨུ་ཧ་ཏནྟྲ། བིན་དྷྱརྱ་ཐཱ། བྷི་དྷ་སུ་སིདྷི་ཡོ་གི མཧཱ་ཡ་ན་ས་མ་ཨརྦི། དྷརྨ་ནི་སུ་ཏྲ། གྲུ་ཞའི་སྐད་དུ། ཧོན་པན་རིལ་ཏི་ཏིལ། པི་པུ་པི་ཏི་ལ། ཏི་ཏ་སིང་། འུན་འུབ། ཧང་པང་རིམ། འུབ་པི་སུ་པང་རི་ཞེ་ཧལ་པཱ་མ་ཀྱང་ཀུའི་དང་རོད་ཏི། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་ཡེ་ཤེས། དོན་གྱི་སྙིང་པོ་རྡོ་རྗེ་བཀོད་པའི་རྒྱུད། རྣལ་འབྱོར་གྲུབ་པའི་ལུང་། ཀུན་འདུས་རིག་པའི་མདོ། ཐེག་པ་ཆེན་པོ་མངོན་པར་རྟོགས་པ། ཆོས་ཀྱི་རྣམ་གྲངས་རྣམ་པར་བཀོད་པ་ཞེས་བྱ་བའི་མདོ།༽

3 བདུད་འཇོམས་བཀའ་མ། ༥ཁ-༡ ༼པིརྱཱ༽

4 སྡེ་དགེ་པར་མ། ༼བྲུ་ཞའི་སྐད་དུ།༽

5 བདུད་འཇོམས་བཀའ་མ། ༡༢ཁ-༡ ༼ཞེས་པ།༽

6 བདུད་འཇོམས་བཀའ་མ། ༡༣ཁ-༣ ༼ཇི་བཞིན་པ།༽

7 བདུད་འཇོམས་བཀའ་མ། ༢༩ཀ-༤ ༼གནས་པ་དག་དང་ལྔ་སྟེ་འཇུག་རིམ་ལྔའོ།།༽

8 བདུད་འཇོམས་བཀའ་མ། ༣༦ཁ-༡ ༼འོས།༽

9 བདུད་འཇོམས་བཀའ་མ། ༣༨ཁ-༢ ༼གསང་སྔགས་ཐེག༽

10 སྡེ་དགེ་པར་མ། ༡༩ཁ-༢ ༼བརྒྱད་དང་བཅུ་གཉིས།༽

11 བདུད་འཇོམས་བཀའ་མ། ༨༦ཁ-༤ ༼གང་ལ་ན།༽

12 བདུད་འཇོམས་བཀའ་མ། ༩༢ཀ-༦ ༼ལྟ་ཡང་ཞོག༽

13 བདུད་འཇོམས་བཀའ་མ། ༡༠༤ཁ-༦ ༼སེམས་པར།༽

14 བདུད་འཇོམས་བཀའ་མ། ༡༡༤ཁ-༢ ༼ཞེ་ན།༽

15 བདུད་འཇོམས་བཀའ་མ། ༡༦༤ཁ-༥ ༼བསྐྲུན་དུ།༽

16 བདུད་འཇོམས་བཀའ་མ། ༡༨༥ཁ-༡ ༼མ་གྲགས་ཤིང་།༽ རྨུགས་སངས་ཤིང་པར། ༡༨༥ཁ-༡ ༼གྲགས་ཤིང་།༽

17 བདུད་འཇོམས་བཀའ་མ། ༡༩༦ཀ-༡ ༼བསྐྲུན་༽

18 བདུད་འཇོམས་བཀའ་མ། ༢༢༤ཀ-༣ ༼གལྤོའི་མཚན་ལས།༽

19 བདུད་འཇོམས་བཀའ་མ། ༢༣༥ཀ-༡ ༼གྱོར་བ།༽

20 བདུད་འཇོམས་བཀའ་མ། ༢༣༩ཀ-༡ ༼ཚན་ཏེ།༽

21 བདུད་འཇོམས་བཀའ་མ། ༢༤༧ཀ-༡ ༼བྱེ་བྲག༽

22 རྩ་བར་མི་གསལ་ཡང་འགྲེལ་པར་སྣང་བས་དེ་བཞིན་བཀོད། ༼སྒྲིག་པ་པོས།༽

23 བདུད་འཇོམས་བཀའ་མ། ༢༩༥ཀ-༥ ༼ངང་ངོ་།༽

24 བདུད་འཇོམས་བཀའ་མ། ༣༤༡ཁ-༥ ༼ཐུགས་ཆེན་པོ།༽

25 བདུད་འཇོམས་བཀའ་མ། ༣༦༣ཁ-༡ ༼སྒྲག་པར་བྱེད།༽

26 བདུད་འཇོམས་བཀའ་མ། ༣༨༣ཀ-༡ ༼སྤོད་གཏོད།༽

27 བདུད་འཇོམས་བཀའ་མ། ༣༩༥ཀ-༡ ༼དཔྲོག༽

28 བདུད་འཇོམས་བཀའ་མ། ༣༩༧ཁ-༥ ༼འཁུམས་ནས།༽

29 བདུད་འཇོམས་བཀའ་མ། ༡༡ཁ-༢ ༼ཡོངས་བྲལ།༽

30 བདུད་འཇོམས་བཀའ་མ། ༣༩ཀ-༣ ༼བིང་།༽

31 བདུད་འཇོམས་བཀའ་མ། ༣༩ཁ-༣ ༼དག༽

32 བདུད་འཇོམས་བཀའ་མ། ༥༡ཀ-༣ ༼བསྟར།༽

33 བདུད་འཇོམས་བཀའ་མ། ༦༠ཁ-༣ ༼སྦྱོང་བའི།༽

34 བདུད་འཇོམས་བཀའ་མ། ༨༠ཁ-༥ ༼མིན་པས།༽

35 བདུད་འཇོམས་བཀའ་མ། ༡༣༤ཁ-༢ ༼འཇོག༽

36 འདུད་འཇོམས་བཀའ་མ། ༡༥༩ཀ-༣ ༼དྲག༽ 

37 འདུད་འཇོམས་བཀའ་མ། ༡༨༢ཀ-༣ ༼མོས་པ།༽

38 འདུད་འཇོམས་བཀའ་མ། ༣༢༦ཁ-༢ ༼ཕྲ།༽

39 བདུད་འཇོམས་བཀའ་མ། ༢ཀ-༤ ༼སྒྲ་བརྗོད།༽

40 བདུད་འཇོམས་བཀའ་མ། ༤ཀ-༣ ༼དང་།༽

41 བདུད་འཇོམས་བཀའ་མ། ༤ཁ-༢ ༼ཁོམས།༽

42 བདུད་འཇོམས་བཀའ་མ། ༢༨ ཀ-༡ ༼གྱུར།༽

43 བདུད་འཇོམས་བཀའ་མ། ༤༠ ཁ-༣ ༼འཛོམ་པའི།༽ རྨུགས་སངས་ཤིང་པར། ༤༠ ཁ-༣ ༼འཇོམ་པའི།༽

44 བདུད་འཇོམས་བཀའ་མ། ༤༧ཀ-༡ ༼ཐེག་པ་ཆེན་པོ།༽

45 སྡེ་དགེའི་པར་མ། ༢༣ཀ-༤ ༼རྟོག་འདོད།༽

46 བདུད་འཇོམས་བཀའ་མ། ༨༤ཁ-༦ ༼ད་ཡོང་།༽

47 བདུད་འཇོམས་བཀའ་མ། ༣༦ ཀ-༡ ༼འཕགས་ན།༽

48 བདུད་འཇོམས་བཀའ་མ།༡༥༨-ཀ༢༼བརྟགས་ཤིང་།༽ རྨུགས་སངས་ཤིང་པར།༡༥༨-ཀ༢༼བརྟགས་ཤིང་།་བརྟགས་ཤིང་།༽

49 རྨུགས་སངས་དང་བདུད་འཇོམས་དཔེ་རིང་གཉིས་ཀར་༼མིའི་མངལ།༽ཞེས་བྲིས་ཡོད་ཀྱང་།༼མའི་མངལ།༽ཞེས་པ་འཐད་པར་སྣང་།

50 བདུད་འཇོམས་བཀའ་མ། ༥༢ཁ-༤ ༼མ་རིག༽ རྨུགས་སངས་ཤིང་པར། ༥༢ཁ-༤ ༼མ་རེག༽

51 རྨུགས་སངས་ཤིང་པར། ༦༡ཀ-༣ ༼ཕྱག་འཚོལ།༽ བདུད་འཇོམས་བཀའ་མ། ༦༡ཀ-༣ ༼ཕྱག་འཚལ།༽

52ཚིགས་བཅད་འདི་འགྲེལ་པར་ལན་གཉིས་བྱུང་།

53 ས་བཅད་དེའི་འཕྲོས་པའི་གཞི་ནི་པོད་གཉིས་པའི་དབྱིན་ཨང་། 375 ནང་དུ་ཡོད།

54 ས་བཅད་དེའི་འཕྲོས་པའི་གཞི་ནི་པོད་གཉིས་པའི་དབྱིན་ཨང་། 375 ནང་དུ་ཡོད།

55 ས་བཅད་དེའི་འཕྲོས་གཞི་པོད་གཉིས་པའི་དབྱིན་ཨང་། 375 ནང་དུ་ཡོད།

56 ས་བཅད་དེའི་འཕྲོས་པའི་གཞི་ནི་པོད་གཉིས་པའི་དབྱིན་ཨང་། 375 ནང་དུ་ཡོད།

57 ས་བཅད་དེའི་འཕྲོས་པའི་གཞི་ནི་པོད་གཉིས་པའི་དབྱིན་ཨང་། 375 ནང་དུ་ཡོད།

58 རྨུགས་སངས་ཤིང་པར། ༣༤༩ཁ-༤ ༼དྲོད་ཚོར་༽

59 ས་བཅད་དེའི་འཕྲོས་པའི་གཞི་ནི་པོད་གཉིས་པའི་དབྱིན་ཨང་། 375 ནང་དུ་ཡོད།

60 ས་བཅད་དེའི་འཕྲོས་པའི་གཞི་ནི་པོད་གཉིས་པའི་དབྱིན་ཨང་། 375 ནང་དུ་ཡོད།

61 བདུད་འཇོམས་བཀའ་མ། ༡༣ཀ-༡ ༼སྦྱར།༽

62 བདུད་འཇོམས་བཀའ་མ། ༢༢ཀ-༢ ༼གཅོང་།༽

63 བདུད་འཇོམས་བཀའ་མ། ༣༤ཀ-༣ ༼ཀཱ་ལ་སོགས།༽

64 བདུད་འཇོམས་བཀའ་མ། ༤༠ཀ-༦ ༼ཚང་།༽

65 བདུད་འཇོམས་བཀའ་མ། ༥༦ཀ-༢ ༼ཤེས།༽

66 བདུད་འཇོམས་བཀའ་མ། ༦༦ཁ-༤ ༼རས།༽

67 བདུད་འཇོམས་བཀའ་མ། ༧༢ཁ-༣ ༼རྨིང་།༽

68 བདུད་འཇོམས་བཀའ་མ། ༧༤ཁ-༥ ༼རྨང་།༽

69 རྨུགས་སངས་དང་བདུད་འཇོམས་བཀའ་མ་གཉིས་ཀར་༼རྒྱུས་མཁན་དང་འདྲ་ལ།༽ཞེས་པ་གསལ་ཡང་། སྒྱུ་མ་མཁན་དང་འདྲ་ལ། ཡིན་ནམ་སྙམ། སྒྲིག་པ་པོའི་མཆན།

70 བདུད་འཇོམས་བཀའ་མ། ༡༡༥ཀ-༡ ༼མཐར།༽

71 བདུད་འཇོམས་བཀའ་མ། ༡༡༦ཁ-༣ ༼སྲིད།༽

72 བདུད་འཇོམས་བཀའ་མ། ༡༣༤ཁ-༥ ༼བྱེད་པའི་སྙེད་པ།༽

73 བདུད་འཇོམས་བཀའ་མ། ༡༦༣ཀ-༥ ༼སྤྱོད།༽

74 བདུད་འཇོམས་བཀའ་མ། ༡༨༢ཁ-༤ ༼དེ་ཡང་།༽

75 བདུད་འཇོམས་བཀའ་མ། ༡༩༠ཀ-༦ ༼སྟང་།༽

76 བདུད་འཇོམས་བཀའ་མ། ༢༠༡ཀ-༤ ༼རིམ་གྱིས།༽

77 བདུད་འཇོམས་བཀའ་མ། ༢༢༤ཁ-༡ ༼ཟུང་།༽

78 བདུད་འཇོམས་བཀའ་མ། ༢༧༦ཀ-༥ ༼སྤོང་།༽

79 བདུད་འཇོམས་བཀའ་མ། ༢༧༦ཀ-༦ ༼རྟོགས།༽

---------------

----------------------------------------

---------------

----------------------------------------