གཉིས་པ་བསྟན་བཅོས་དངོས་ལ།
གཉིས་པ་བསྟན་བཅོས་དངོས་ལ། གཞུང་སྤྱིའི་ཡན་ལག་ཏུ་མཆོད་པར་བརྗོད་ཅིང་བཤད་པར་དམ་བཅའ་བ་དང་། སྐབས་དོན་སུམ་ཅུ་པ་དངོས་རྒྱས་པར་བཤད་པའོ། །དང་པོ་ལ་མཆོད་བརྗོད་དང་། བཤད་པར་དམ་བཅའ་བ་གཉིས། དང་པོ་ལའང་། དཀོན་མཆོག་གསུམ་ལ་སྤྱིར་ཕྱག་འཚལ་བ། བྱེ་བྲག་ཏུ་འཇམ་པའི་དབྱངས་ལ་ཕྱག་འཚལ་བ། དགོས་པའི་དབང་གིས་རྟག་ཞི་བ་ལ་ཕྱག་འཚལ་བ། དྲིན་གཟོ་བའི་ཕྱིར་མཁས་པ 
་སྤྱི་དང་བྱེ་བྲག་ལ་ཕྱག་འཚལ་བའོ། །དང་པོ་ནི།
གང་ལ་ཡོན་ཏན་མཆོག་མངའ་བའི།།
དཀོན་མཆོག་དེ་ལ་ཕྱག་འཚལ་ལོ།།
ཞེས་པས་བསྟན་ཏེ། དཀོན་མཆོག་གང་ལ། རྒྱུད་བླ་མ་ལས།
འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི།།
རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་ཅོག་ཉིད། །ཅེས་ཆོས་མཚུངས་དྲུག་གིས་ནོར་བུ་རིན་པོ་ཆེ་ལྟར་ཡོན་ཏན་མཆོག་ཏུ་གྱུར་པ་མངའ་བའི་དཀོན་མཆོག་དེ་ཡི་ཞབས་ལ་བསྟན་བཅོས་རྩོམ་པ་པོས་བསོད་ནམས་བསོག་ཕྱིར་ཕྱག་འཚལ་ལོ། །ཞེས་པའོ།།
གཉིས་པ་ནི།
གང་གིས་སྒྲ་དབྱངས་ཀུན་གསུངས་པའི།།
འཇམ་པའི་དབྱངས་ལ་ཕྱག་འཚལ་ལོ།།
ཞེས་པས་བསྟན་ཏེ། རྗེ་བཙུན་འཇམ་པའི་དབྱངས་གང་གིས་འཇིག་རྟེན་ན་ཁྱད་གཞི་སྒྲ་དང༌། ཁྱད་ཆོས་དབྱངས་མ་ལུས་པ་ཀུན་བྱིན་གྱིས་བརླབས་པའི་ཚུལ་གྱིས་གསུངས་པར་མཛད་པ་སྟེ། དེ་ལྟ་བུའི་ཐུགས་རྒྱུད་ལ་སྒྲིབ་པའི་རྩུབ་རེག་མི་མངའ་བ་འཇམ་པའི་དཔལ་དང་ལྡན་པ་མཆོག་གིས་གདུལ་བྱའི་ཁམས་ལ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སོགས་ཚངས་པའི་དབྱངས་ཀྱིས་བསྙད་པར་མཛད་པོའི་ཞབས་ལའང་དམིགས་ཀྱིས་བཀར་ནས་རྩོམ་པ་པོས་ཕྱག་འཚལ་ལོ་ཞེས་ཤེས་རབ་ཅན་གྱི་ལྷག་པའི་ལྷ་ལ་མཆོད་པར་བརྗོད་པའོ།།
གསུམ་པ་ནི།
གང་གིས་མིང་གཞི་སྔོན་གསུངས་པ། །རྟག་ཞི་བ་ལ་ཕྱག་འཚལ་ལོ།།
ཞེས་པས་བསྟན་ཏེ། ལྷ་དབང་ཕྱུག་ཆེན་པོ་གང་གིས་མིང་གི་གཞི་མ་ཡི་གེ་འཇིག་རྟེན་ན་སྔོན་དུ་གསུང་བ་པོ་ཡིན་ཞེས་རིག་བྱེད་ཀྱི་གཞུང་དུ་གྲགས་པའི་གཏམ་དང་སྦྱར་ཏེ་བྲམ་ཟེའི་སློབ་དཔོན་ངོ་བསྲུང་བའི་
དགོས་པ ་དང་བཅས་ཏེ་ལེགས་སྦྱར་ལ་ས་དཱ་ཤི་བ་ཞེས་གྲགས་པའི་རྟག་ཞི་བ་དེ་ལའང་ཕྱག་འཚལ་ལོ་ཞེས་པའོ།།
བཞི་པ་ནི།
སྡེབ་སྦྱོར་ལེགས་མཛད་མཁས་རྣམས་དང༌།།
བླ་མ་ལ་ཡང་ཕྱག་འཚལ་ནས།།
ཞེས་པས་བསྟན་ཏེ། རྗོད་བྱེད་ཀྱི་ཚིག་དང་བརྗོད་བྱའི་དོན་གཉིས་སྡེབ་པའི་ཚིག་སྦྱོར་ལེགས་པར་མཛད་པའི་རྒྱ་གར་འཕགས་ཡུལ་གྱི་མཁས་པ་ཆེན་པོ་ཙནྡྲ་གོ་མི་དང་སློབ་དཔོན་དཔའ་བོ་ལ་སོགས་པ་རྣམས་དང༌། ཐུ་མི་རང་གི་བླ་མ་པཎ་ཌི་ཏ་ལྷ་རིག་པའི་སེང་གེ་སོགས་ལའང་དྲིན་གཟོ་བའི་ཕྱིར་ཕྱག་འཚལ་བར་བྱས་ནས་བསྟན་བཅོས་རྩོམ་པར་དམ་བཅའོ་ཞེས་ནས་ནི་ལྷག་བཅས་ཀྱི་སྒྲའོ།།
གཉིས་པ་རྩོམ་པར་དམ་བཅའ་བ་ནི།
བསླབ་པ་ཀུན་གྱི་གཞི་འཛིན་ཅིང༌། །རིག་བྱེད་སྨྲ་བ་རྣམས་ཀྱི་རྒྱུ།།
མིང་ཚིག་བརྗོད་པ་ཀུན་གྱི་གཞི། །ཡི་གེའི་སྦྱོར་བ་བཤད་པར་བྱ།།
ཞེས་པས་བསྟན་ཏེ། ནང་པ་སངས་རྒྱས་པའི་བསླབ་པ་གསུམ་ལ་སོགས་པའི་བསླབ་པར་བྱ་བ་ཀུན་གྱི་གཞི་ལྟོས་པའི་སྒོ་ནས་འཛིན་ཅིང༌། རིག་པའི་གནས་བཅུ་དང༌། ཕྱི་རོལ་པའི་རིག་བྱེད་བཞི་ཡན་ལག་དང་བཅས་པ་སྨྲ་བ་རྣམས་ཀྱི་རྒྱུར་གྱུར་པ་དང༌། དོན་གྱི་ངོ་བོ་སྟོན་པའི་མིང་དང༌། དོན་གྱི་ངོ་བོ་ཁྱད་པར་དང་བཅས་པ་སྟོན་བྱེད་ཀྱི་ཚིག་དང༌། མིང་ཚིག་ཡི་གེའི་ཕྲེང་བ་སྤེལ་བའི་ངག་གི་རྒྱུན་དོན་མཚོན་བྱེད་བརྗོད་པ་དང་བཅས་པ་ཀུན་གྱི་གཞི་མ་ཡི་གེའི་སྦྱོར་བ་འོག་ནས་འབྱུང་བ་བཞིན་བཤད་པར་བྱའོ་ཞེས་སོ།།
དེ་ལ་བསླབ་པ་གསུམ་ནི། ལྷག་པ་ཚུལ་ཁྲིམས་ཀྱི་བསླབ་པ། ལྷག་པ་ཏིང་ངེ་འཛིན་གྱི་བསླབ་པ། ལྷག་པ་ཤེས་རབ་ཀྱི་བསླབ་པ་དང་གསུམ་མོ། །རིག་པའི་གནས་བཅུ་ནི། སྒྲ། ཚད་མ། བཟོ། གསོ་བ། ནང་དོན་རིག་པ། མངོན་བརྗོད། ཟློས་གར། སྐར་རྩིས། སྡེབ་སྦྱོར། སྙན་ངག་སྟེ་བཅུའོ། །ཕྱི་རོལ་པའི་རིག་བྱེད་བཞི་ནི། ངེས་བརྗོད། མཆོད་སྦྱིན། སྙན་ཚིག སྲིད་སྲུང་རྣམས་སོ། རིག་བྱེད་ཀྱི་ཡན་ལག་དྲུག་ནི། བསླབ་པ་རྟོག་པ་བརྡ་སྤྲོད་པ། །ངེས་ཚིག་སྐར་རྩིས་ཐོས་པ་དང༌། །སྡེབ་སྦྱོར་རྣམ་པར་ཕྱེ་བ་དྲུག །རིག་བྱེད་ཡན་ལག་དྲུག་ཏུ་འདོད། །ཅེས་སོ། མཆན་བསླབ་པ་ཆོ་ག་ལུང་སྟོན་དང༌། །ངེས་ཚིག་སྐར་དཔྱད་ཐོས་པ་དང༌། །སྡེབ་སྦྱོར་རྣམ་པར་སེམས་པ་སྟེ། །རིག་བྱེད་ཡན་ལག་དྲུག་ཏུ་འདོད། །ཅེས་འགྱུར་གཞན་ཡིན། ནང་པ་སངས་རྒྱས་པ་དང༌། གཅེར་བུ་པ། རྒྱང་འཕེན་པ་གསུམ་གྱིས་རིག་བྱེད་ཚད་མ་མིན་ཞེས་འདོད་ཅིང་དགག རིག་བྱེད་འདོད་པ་རྣམས་ཀྱིས་དེ་གསུམ་ལ་ཆད་ལྟ་བ་ཡིན་ཞེས་ཟེར་རོ།།
བོད་ཡིག་གི་དབྱངས་གསལ་ངོས་གཟུང་བ།
༈ གཉིས་པ་སྐབས་དོན་སུམ་ཅུ་པ་དངོས་ལ། ཡི་གེའི་སྦྱོར་བ་རྒྱས་པར་བཤད་པ་དང༌། གདམས་ངག་བརྗོད་པས་མཇུག་བསྡུ་བའོ། །དང་པོ་ལ། སྦྱར་བྱ་ཡི་གེའི་རྣམ་གཞག་དང༌། སྦྱོར་ཚུལ་ཚིག་ཕྲད་ཀྱི་འཇུག་པ་བཤད་པའོ། །དང་པོ་ལ། བོད་ཡིག་གི་དབྱངས་གསལ་ངོས་གཟུང་བ་དང༌། ཁྱད་པར་གྱི་དབྱེ་བ་བསྟན་པ་གཉིས། དང་པོ།
ཡི་གེ་ཨཱ་ལི་ཀཱ་ལི་གཉིས། །ཨཱ་ལི་གསལ་བྱེད་ཨི་སོགས་བཞི།།
ཀཱ་ལི་སུམ་ཅུ་ཐམ་པའོ།།
ཞེས་པས་བསྟན་ཏེ། མིང་ཚིག་གཉིས་ཀྱི་རྩོམ་གཞིར་གྱུར་པའི་སྐད་ཀྱི་གདངས་ཡི་གེའི་མཚན་ཉིད། ངེས་ཚིག་ནི། ལེགས་སྦྱར་གྱི་སྐད་དུ། ཨ་ཀྵར་ཞེས་པ་འགྱུར་མེད་ཀྱི་དོན་དང༌། བྱཉྫན་ཞེས་པ་གསལ་བྱེད། ཝརྞ་ཞེས་པ་རྗོད་བྱེད་དང་གསུམ་ཡོད་དེ། སྨྲ་སྒོ་ལས།
རྣམ་གྲངས་དུ་མ་མེད་པ་དང༌། །མིང་ཚིག་གསལ་བར་བྱེད་ པ་དང༌།།
དོན་རྣམས་རྗོད་པར་བྱེད་པའི་ཕྱིར། །རང་བཞིན་ལས་དང་དགོས ་ཆེད་ཀྱི།།
མིང་ཚིག་ཡིན་ཏེ་གོ་རིམ་བཞིན། །ཞེས་གསུངས་སོ། །དེ་ལ་ངོ་བོའི་སྒོ་ནས་དབྱེ་ན་ཨཱ་ལི་ཀཱ་ལི་གཉིས་སོ། །དང་པོ་ཨཱ་ལིའི་བྱ་བ་གསལ་བྱེད་གི་གུ་དང་ཞབས་ཀྱུ་འགྲེང་བུ་རྣ་རུ་སྟེ་ཨི་དང་སོགས་སྒྲས་ཨུ་ཨེ་ཨོ་བཅས་མཚོན་བྱེད་བཞི་རུ་ངེས་པ་དང༌། གཉིས་པ་ལ་ཀཱ་ལི་ཀ་ནས་ཨའི་བར་གྱི་སུམ་ཅུ་ཐམ་པ་རུ་གྲངས་ངེས་པའོ་ཞེས་སོ།།
གཉིས་པ་ཁྱད་པར་གྱི་དབྱེ་བ་བསྟན་པ།
གཉིས་པ་ཁྱད་པར་གྱི་དབྱེ་བ་བསྟན་པ་ལ། མདོར་བསྟན་དང༌། རྒྱས་བཤད་གཉིས། དང་པོ་ནི།
དེ་ལས་རྗེས་འཇུག་བཅུ་ཡིན་ཏེ། །དེ་ལས་ལྔ་ནི་སྔོན་དུའང་འཇུག།
མི་འཇུག་པ་ནི་ཉི་ཤུ་འོ།།
ཞེས་པས་བསྟན་ཏེ། ཀཱ་ལི་སུམ་ཅུ་པོ་དེ་ལ་ནང་གསེས་སུ་དབྱེ་ན་རྗེས་འཇུག་གི་ཡི་གེ་བཅུ་ཡོད་པ་ཡིན་ཏེ། རྗེས་འཇུག་བཅུ་པོ་དེ་དག་ལས་ཀྱང་ལྔ་ནི་སྔོན་དུའང་འཇུག་པའི་ཡི་གེ་ཡིན་ཅིང༌། སྔོན་རྗེས་གང་དུའང་མི་འཇུག་པ་ནི་ཉི་ཤུ་ཐམ་པའོ་ཞེས་སོ།།
གཉིས་པ་རྒྱས་བཤད་ལ། དབྱེ་སྒོ་སྤྱིར་བསྟན་པ་དང༌། བྱེ་བྲག་སོ་སོར་བཤད་པའོ། །དང་པོ་ནི།
ཀཱ་ལི་ཕྱེད་དང་བརྒྱད་སྡེ་ནི། །བཞི་བཞི་དག་ཏུ་ཕྱེ་བ་ལས།།
ཞེས་པས་བསྟན་ཏེ། ཀཱ་ལི་སུམ་ཅུ་པོ་དེ་དག་ཡི་གེ་བཞི་བཞི་སྡེ་པ་རེ་རེ་བྱས་པས་སྡེ་པ་ཕྱེད་དང་བཅས་བརྒྱད་ཚན་གྱི་སྡེ་ཡོད་པ་དེ་ནི་ཡི་གེ་བཞི་བཞི་སྡེ་པ་རེ་རེ་དག་ཏུ་ཕྱེ་བ་ལས་ཞེས་པའོ། །དེའང་ཀ་ཁ་ག་ང་ཀ་སྡེ་སྟེ་སྡེ་པ་དང་པོའོ། །སོགས་ནས་ཧ་ཨ་སྡེ་པ་ཕྱེད་པ་སྟེ་བརྒྱད་པའོ།།
གཉིས་པ་བྱེ་བྲག་སོ་སོར་བཤད་པ་ལ། རྗེས་འཇུག་བཤད་པ། སྔོན་འཇུག་བཤད་པ། མི་འཇུག་པ་བཤད་པ་དང་གསུམ་ལས། དང་པོ་ནི།
དང་པོ་གསུམ་པ་བཞི་པ་ཡི། །མས་གཉིས་དྲུག་པའི་གསུམ་པ་དང༌།།
བདུན་པ་ལ་ནི་ཤ་མ་གཏོགས། །རྗེས་འཇུག་ཡི་གེ་བཅུ་རུ་འདོད།།
ཞེས་པས་བསྟན་ཏེ། སྡེ་པ་དང་པོ་དང༌། གསུམ་པ་དང༌། བཞི་པ་ཡི་མས་ཀྱི་ཡི་གེ་གཉིས་གཉིས་ཏེ་ཀ་སྡེའི་ག་ང་གཉིས། ཏ་སྡེའི་ད་ན་གཉིས། པ་སྡེའི་བ་མ་གཉིས་ཏེ་དྲུག་དང༌། སྡེ་པ་དྲུག་པའི་གསུམ་པ་སྟེ་ཞ་སྡེའི་འ་དང་བདུན། སྡེ་པ་བདུན་པ་ལ་ནི་ཤ་མ་གཏོགས་ཏེ་ར་སྡེའི་ར་ལ་ས་གསུམ་བཅས་བཅུ་ནི་མིང་གཞི་རྣམས་ཀྱི་རྗེས་སུ་འཇུག་པའི་མཐའ་རྟེན་གྱི་ཡི་གེ་བཅུ་རུ་འདོད་དོ་ཞེས་སོ། །སྡོམ་ནི། ག་ང་ད་ན་བ་མ་དང༌། །འ་ར་ལ་ས་རྗེས་འཇུག་བཅུ། །ད་དང་ས་གཉིས་ཡང་འཇུག་སྟེ། །ད་ནི་ན་ར་ལ་གསུམ་དང༌། །ས་ནི་ག་ང་བ་མར་འཐོབ། །ཅེས་སོ། །རྟགས་འཇུག་ལས།
གང་ལ་ཡི་གེ་ཐམས་ཅད་ལ། །ཞེས་གསུངས་བ་ལྟར་རྗེས་འཇུག་གི་འཇུག་ཡུལ་ནི་ཡི་གེ་ཐམས་ཅད་ཡིན་ནོ། །ཀེག་ཀོང༌། ཀླད། བཀན། ཀབ། ཀམ། དཀའ། ཀོར། སྐལ། སྐོས་ལྟ་བུ་སོགས་སོ།།
གཉིས་པ་སྔོན་འཇུག་ལྔ་བཤད་པ་ནི།
རྗེས་འཇུག་ཡི་གེ་བཅུ་ཉིད་ལས། །དང་པོ་གསུམ་པ་ལྔ་པ་དྲུག།
བདུན་པ་རྣམས་ནི་སྔོན་དུའང་འཇུག།
ཞེས་པས་བསྟན་ཏེ། གོང་དུ་ངོས་འཛིན་མ་ཐག་པའི་རྗེས་འཇུག་གི་ཡི་གེ་བཅུ་པོ་དེ་ཉིད་ལས་དང་པོ་ག་གསུམ་པ་ད་ལྔ་པ་བ་དྲུག་པ་མ་བདུན་པ་འ་རྣམས་ནི་མིང་གཞིའི་ཡི་གེ་རྣམས་ཀྱི་སྔོན་དུའང་འཇུག་པ་ཡིན་ནོ་ཞེས་སོ། །ག་ད་བ་མ་འ་སྔོན་འཇུག །སྡོམ་མོ། སྔོན་འཇུག་ལྔ་ཡི་འཇུག་ཡུལ་ནི། གས་འཕུལ་བཅུ་གཅིག་སྟེ། ཅ་ཏ་ཙ་ཉ་ད་ན་ཞ་ཟ་ཡ་ཤ་ས་བཅུ་གཅིག་གོ །དས་འཕུལ་དྲུག་སྟེ། ཀ་པ་ག་མ་ང་བ་སྟེ་དྲུག་གོ བས་འཕུལ་བཅུ་དྲུགསྟེ། ཀ་ཅ་ཏ་ཙ་ག་ང་ཇ་ཉ་ད་ན་ཛ་ཞ་ཟ་ར་ཤ་ས་སྟེ་བཅུ་དྲུག་གོ །མས་འཕུལ་བཅུ་གཅིག་ནི། ཁ་ཆ་ཐ་ཚ་ག་ཇ་ད་ཛ་ང་ཉ་ན་སྟེ་བཅུ་གཅིག་གོ །འས་འཕུལ་བཅུ་ནི། ག་ཇ་ད་བ་ཛ་ཁ་ཆ་ཐ་ཕ་ཚ་སྟེ་བཅུའོ། །དེ་ལྟར་བསྡོམས་པས་འཕུལ་ཅན་གྱི་ཡི་གེ་ལྔ་བཅུ་ང་བཞིའོ།།
འདིར་ཅུང་ཟད་དཔྱད་ན། དཔེར་ན། བསྒྲུབས་ལྟ་བུའི་བ་སྔོན་འཇུག་དང་རྗེས་འཇུག་ཡང་འཇུག་བཅས་ཀྱི་འཇུག་ཡུལ་མིང་གཞི་དངོས་ནི་ས་ག་ར་གསུམ་དང༌། དེ་ཡང་ག་འཇུག་ཡུལ་གྱི་གཙོ་བོ་དང༌། ས་མགོ་དང་ར་བཏགས་གཉིས་ཕལ་པ་དང༌། ཞབས་ཀྱུ་མིང་གཞིའི་ཡན་ལག་ཏུ་གསུངས་པ་ལྟར་ཤེས་པར་བྱའོ། །དེ་ཡང་མིང་ཚིག་གཉིས་ཀྱི་རྩོམ་གཞིར་གྱུར་པའི་མིང་གཞི་དབྱངས་གསལ་གཉིས་ཀ་ལ་གོ་ དགོས་པ ་དང༌། སྔོན་རྗེས་གཉིས་ཀྱི་འཇུག་ཡུལ་དུ་གྱུར་པའི་མིང་གཞི་ནི་གསལ་བྱེད་ཀཱ་ལི་སུམ་ཅུ་ཐམ་པའོ། །སྔོན་རྗེས་མིང་གསུམ་གྱི་ཟླས་ཕྱེ་བའི་མིང་གཞི་ཁོ་ན་ཡིན་པའམ་མི་འཇུག་པ་ནི། ཀ་ཁ་ཅ་ཆ་ཇ་ཉ་ཏ་ཐ་པ་ཕ་ཙ་ཚ་ཛ་ཝ་ཞ་ཟ་ཡ་ཤ་ཧ་ཨ་སྟེ་ཉི་ཤུ་ཐམ་ པ་ཁོ་ན་ལ་གོ་དགོས ་སོ། །འདི་ཅུང་ཟད་གལ་ཆེ་བ་ཡིན་སྙམ་མོ།།
གསུམ་པ་མི་འཇུག་པ་བཤད་པ་ནི།
མིང་གཞི་གཉིས་སམ་སུམ་སྦྲེལ་ལམ། །དེ་ལ་དབྱངས་ཀྱི་བཞིར་ལྡན་ཡང༌།།
གང་དུའང་འཇུག་མིན་སྦྱར་བའང་མིན།།
ཞེས་པས་བསྟན་ཏེ། མིང་གཞི་ཁོ་ན་ཡིན་པ་ཉི་ཤུ་པོ་དེ་དག ཀཁ་ལྟ་བུ་གཉིས་སམ། ཀགཕ་ལྟ་བུ་སུམ་སྦྲེལ་ལམ། ཀཁིཕ་ལྟ་བུ་དེ་ལ་དབྱངས་གང་ཡང་རུང་བ་ཉིད་ཀྱི་བཞི་ལྡན་ན་ཡང་བོད་ཀྱི་ཐ་སྙད་གང་དུའང་འཇུག་པ་མིན་ལ་དེ་དག་ནང་ཕན་ཚུན་སྔོན་རྗེས་མིང་གསུམ་བྱས་ནས་སྦྱར་རུང་བའང་མིན་ཞེས་པའོ། །མི་འཇུག་པ་ཁོ་ནའི་སྡོམ་ནི། ཀ་ཁ་ཅ་ཆ་ཇ་ཉ་ཏ། །ཐ་པ་ཕ་ཙ་ཚ་ཛ་ཝ། །ཞ་ཟ་ཡ་ཤ་ཧ་ཨ་སྟེ། །ཉི་ཤུ་མི་འཇུག་པ་ཁོ་ནའོ།།
རྗེས་འཇུག་ལ་ལྟོས་པའི་ཕྲད་རྣམ་དབྱེ་དང་བཅས་པ་བཤད་པ།
༈ གཉིས་པ་སྦྱོར་ཚུལ་ཚིག་ཕྲད་ཀྱི་འཇུག་པ་བཤད་པ་ལ། རྗེས་འཇུག་ལ་ལྟོས་པའི་ཕྲད་རྣམ་དབྱེ་དང་བཅས་པ་དང༌། ཕྲད་རང་དབང་ཅན་བཤད་པ་གཉིས། དང་པོ་ལ། སླར་བསྡུ། ལ་དོན། ཨི་ལྡན་གྱི་རྣམ་དབྱེ། རྒྱན་སྡུད། ལྷག་བཅས། འབྱེད་སྡུད། འབྱུང་ཁུངས། བོད་པའི་སྒྲ་བསྟན་པ་སྟེ་བརྒྱད་དོ། །དང་པོ་ལ།
རྗེས་འཇུག་ཡི་གེ་བཅུ་པོ་ནི། །མིང་གང་གི་ནི་མཐར་སྦྱར་བ།།
དེ་ལ་ཨཱ་ལི་བཞི་པ་སྦྱར། །སླར་བསྡུ་བར་ནི་ཤེས་པར་བྱ།།
ཞེས་པས་བསྟན་ཏེ། གོང་དུ་བཤད་མ་ཐག་པའི་རྗེས་འཇུག་གི་ཡི་གེ་བཅུ་པོ་དེ་དག་ནི་མིང་དང་ཚིག་གང་གི་མཐར་སྦྱར་བ་དེ་ལ་ཨཱ་ལི་བཞི་པ་ཨོ་སྟེ་རྣ་རུ་སྦྱར་བས་གོ་ངོ་དོ་ནོ་བོ་མོ་འོ་རོ་ལོ་སོ་བཅུ་དངོས་བསྟན། ད་དྲག་ཅན་གྱི་མཐར་ཏོ་ཤུགས་བསྟན་བཅས་བཅུ་གཅིག་པོ་དེ་ནི་སླར་བསྡུའམ་རྫོགས་ཚིག་གམ་ཟླ་སྡུད་ཅེས་བྱ་བ་ནི་ཡིན་པ་ཤེས་པར་བྱའོ། །སྡོམ་ནི། གོ་ངོ་དོ་ནོ་བོ་མོ་དང༌། །འོ་རོ་ལོ་སོ་དངོས་བསྟན་བཅུ། །ཤུགས་བསྟན་ཏོ་བཅས་བཅུ་གཅིག་ནི། །སླར་བསྡུའི་རྐྱེན་གྱི་ཡི་གེའོ། །དེ་དག་ལའང་སྒྲ་སྦྱོར་ཚུལ་ནི། འདུག་གོ །བྱུང་ངོ༌། །ཡོད་དོ། །ཡིན་ནོ། །ཐོབ་བོ། །སྙམ་མོ། །འདའ་འོ། །འགྱུར་རོ། །འཕེལ་ལོ། །བྱས་སོ། །ཞེས་པ་ལྟ་བུ་རྗེས་འཇུག་བཅུ་པོ་རང་རང་གི་མཐར་སྒྲ་མཐུན་རང་རང་སྦྱར་ དགོས་པ ་དང༌། འདས་ཚིག་མང་ཚིག ཞེ་སའི་ཚིག་དང༌། སྐུལ་ཚིག་ལ་ན་ར་ལ་གསུམ་གྱི་རྗེས་སུ་ཡང་འཇུག་ད་དྲག་མཐར་ཏོ་ཡིག་གི་སྒྲ་སྦྱོར་ཚུལ་ཡང༌། དེར་ཕྱིནད་ཏོ། །གྱུརད་ཏོ། །བྲལད་ཏོ། །ལྟ་བུ་སྦྱར་དགོས་སོ། །དོན་སྦྱོར་ཚུལ་ཡང་དེ་དག་དང་མཚུངས་པ། འདུས་བྱས་ཐམས་ཅད་ནི་མི་རྟག་གོ །ཟག་བཅས་ཐམས་ཅད་ལས་ནི་སྡུག་བསྔལ་འབྱུང་ངོ༌། །ཆོས་ཐམས་ཅད་ནི་སྟོང་ཞིང་བདག་མེད་པ་ཉིད་དོ། །མྱ་ངན་ལས་འདས་པ་ནི་ཞི་བ་ཉིད་ཡིན་ནོ། །ཆོས་ཀྱི་སྡོམ་བཞི་པོ་དེ་ཤེས་ཤིང་སྒོམ་ན་ཐར་པ་གསུམ་གང་རུང་ཐོབ་བོ། དེའི་ཕྱིར་ན་དེ་དག་གི་དོན་སྒོམ་མོ། །དེ་དག་ལ་ཡང་དང་ཡང་དུ་འདྲིས་པར་བྱའོ། །ཐབས་དེས་གོམས་པ་མཐར་ཕྱིན་པར་འགྱུར་རོ། གོམས་པའི་ཤུགས་དག་ཀྱང་ཆེས་ཆེར་འཕེལ་ལོ། །དེ་ལྟར་བྱས་ན་མཐར་སངས་རྒྱས་པར་གསུངས་སོ། །ན་ར་ལ་གསུམ་གྱི་རྗེས་སུ་ཏོ་ཡིག་འཐོབ་པའི་དཔེར། རིག་གནས་ཀུན་སྦྱངས་ཟིནད་ཏོ། །དེས་མཁས་པར་གྱུརད་ཏོ། །བློ་གྲོས་ཡང་དག་པར་འཕེལད་ཏོ། །ལྟ་བུ་གང་བདེར་སྦྱར་བར་བྱའོ།།
གཉིས་པ་ལ་དོན་བཤད་པ་ནི།
རྗེས་འཇུག་ཡི་གེ་བཅུ་རྣམས་ལས། །གང་མིང་མཐའ་ན་བཅུ་པ་གནས།།
དེ་ལ་ཨཱ་ལི་གཉིས་པ་སྦྱར། །གང་མིང་མཐའ་ན་བརྒྱད་པ་གནས།།
དེ་ལ་གཉིས་པ་ཨུ་ཡང་སྦྱར། །གང་མིང་མཐའ་ན་གསུམ་པ་གནས།།
དེ་ལ་ཨཱ་ལི་གཉིས་པ་སྦྱར། །བཞི་པ་དགུ་པ་དངོས་ཀྱང་སྟེ།།
ལས་དང་ཆེད་དང་རྟེན་གནས་དང༌། །དེ་ཉིད་ཚེ་སྐབས་ལ་སྒྲ་ཡིན།།
ཞེས་པས་བསྟན་ཏེ། རྗེས་འཇུག་གི་ཡི་གེ་བཅུ་པོ་དེ་རྣམས་ལས་གང་ཡང་རུང་བའི་མིང་དང་ཚིག་གི་མཐའ་སྟེ་ཕ་རོལ་ན་རྗེས་འཇུག་བཅུ་པ་ས་ཡིག་གནས་པ་དེ་ལ་ཨཱ་ལི་གཉིས་པ་ཨུ་སྟེ་ཞབས་ཀྱུ་སྦྱར་བས་སུ་ཞེས་གྲུབ་པ་དང༌། དེ་བཞིན་གང་ཡང་རུང་བའི་མིང་ཚིག་གི་མཐའ་ན་རྗེས་འཇུག་བརྒྱད་པ་ར་ཡིག་གནས་པ་དང༌། མིང་ཚིག་དེའི་ཕ་རོལ་ན་ར་ཡིག་གནས་པ་དེ་ལ་ཨཱ་ལི་གཉིས་པ་ཨུ་ཡང་སྟེ་ཞབས་ཀྱུ་སྦྱར་བས་རུ་ཞེས་གྲུབ་པ་དང༌། ཡང་སྒྲས་ར་དང་རུ་གཉིས་དོན་གཅིག་ཏུ་སྡུད་པའོ། །ཡང་གང་ཡང་རུང་བའི་མིང་ཚིག་གི་མཐའ་འམ་ཕ་རོལ་ན། རྗེས་འཇུག་གསུམ་པ་ད་ཡིག་གནས་པ་དེ་ལ་ཨཱ་ལི་གཉིས་པ་ཨུ་སྟེ་ཞབས་ཀྱུ་སྦྱར་བས་དུ་ཞེས་གྲུབ་པ་དང༌། རྗེས་འཇུག་བཞི་པ་ན་དང་དགུ་པ་ལ་གཉིས་ནི་དབྱངས་ཀྱིས་མ་བརྒྱན་པའི་དངོས་པོའང་སྟེ་སུ་ར་རུ་དུ་ན་ལ་དྲུག་དང་ཀྱང་སྒྲས་བསྟན་པ་ཏུ་སྟེ་ཡི་གེ་བདུན་པོ་དེ་ནི་ལ་དོན་གྱི་རྐྱེན་གྱི་ཡི་གེ་ཡིན་ལ། སྒྲ་སྦྱོར་ཚུལ་རྩ་བ་ལས་དངོས་སུ་མ་གསུངས་མོད་འོན་ཀྱང་སྔོན་གྱི་མཁས་པ་རྣམས་ཀྱིས་བཀྲལ་བ་ལྟར་ན། སྡོམ་ནི། ས་སུ་ག་བ་དྲག་མཐར་ཏུ། །ང་ད་ན་མ་ར་ལ་དུ། །འ་དང་མཐའ་མེད་ར་དང་རུ། །ན་ལ་གཉིས་ནི་ཅི་བདེར་སྦྱོར། །ཞེས་སོ།།
དེའི་དཔེར་བརྗོད་ནི། ཤར་ཕྱོགས་སུ། ཤར་ཕྱོགས་དག་ཏུ། རྒྱབ་ཏུ། ཤིནད་ཏུ། བསྒྱུརད་ཏུ། འཕེལད་ཏུ། ནང་དུ། ཉིད་དུ། མདུན་དུ། ལམ་དུ། བར་དུ། ཕྲལ་དུ། དེར། དེ་རུ། ཤར་ཕྱོགས་ལ། ཤར་ཕྱོགས་ན་ལྟ་བུའོ། །དོན་སྦྱོར་ཚུལ་ནི། རྣམ་དབྱེ་གཉིས་པ་ལས་སུ་བྱ་བ་ལ་སྦྱར་བ་ནི། ཤར་ཕྱོགས་སུ་འགྲོ་ལྟ་བུ། དེ་ཡང་ཤར་ཕྱོགས་ནི་འགྲོ་བའི་བྱ་བ་བྱ་བའི་ཡུལ་ལམ་ལས། འགྲོ་བ་ནི་རྐང་པས་གོམ་པ་འདོར་བའི་བྱ་བ། སུ་སྒྲ་ནི་དེ་ལྟ་བུའི་བྱ་བ་དེ་བྱ་ཡུལ་ཤར་ཕྱོགས་ཡིན་པའི་དོན་གཙོ་བོར་སྟོན་པས་ན་ལས་སུ་བྱ་བ་ཞེས་ཐ་སྙད་ཆགས་སོ། །དེ་ལའང་རྒྱུ་མཚན་ལྔ་ཚང་ དགོས་ཏེ། ༡སྤྱིར་བྱ་བ་ཡོད་པ།༢ བྱ་ཡུལ་ཡོད་པ།༣ སུ་ལ་སོགས་པ ་བདུན་པོ་གང་རུང་འཐོབ་པ།༤ བྱ་བ་དང་བྱ་ཡུལ་ཐ་དད་པ།༥ བྱ་བས་བྱ་ཡུལ་དང་བྱ་ཡུལ་དང་འབྲེལ་བའི་ལས་ལ་ཕན་མི་ཐོགས་པ་དང་ལྔའོ།།
དེ་བཞིན་རྣམ་དབྱེ་བཞི་ པ་དགོས ་ཆེད་ལ་ལ་དོན་འཇུག་པ་ནི། ནད་པ་ལ་སྨན་སྦྱིན། ཚོགས་རྫོགས་པའི་ཕྱིར་དུ་དཀོན་མཆོག་མཆོད་ལྟ་བུ་སྟེ། དེ་ཡང་ནད་པ་ནི་སྨན་སྦྱིན་པའི་བྱ་བ་བྱ་ཡུལ་དང༌། སྨན་སྤྲད་པ་ནི་སྦྱིན་པའི་བྱ་བ། ལ་སྒྲས་ནི་སྨན་སྦྱིན་པའི་བྱ་བ་དེས་བྱ་ཡུལ་ནད་པ་ལ་ཕན་ཐོགས་ པ་གཙོ་བོར་སྟོན་པས་དགོས ་ཆེད་ཅེས་བྱ་བ་ཡིན་ཞིང༌། དཔེར་བརྗོད་ཕྱི་མ་ལ་ཡང༌། མཆོད་པ་འབུལ་བ་ནི་བྱ་བ། དཀོན་མཆོག་ནི་མཆོད་ པ་འབུལ་བའི་བྱ་བ་བྱ་ཡུལ། ཆེད་དུ་ཞེས་པའི་དགོས ་ཆེད་གསལ་བྱེད་ཀྱི་སྒྲས་ནི་མཆོད་པའི་བྱ་བ་དེས་བྱ་ཡུལ་དཀོན་མཆོག་ལ་ཕན་མི་ཐོགས་ནའང་བྱ་ཡུལ་དཀོན་མཆོག་དེ་དང་འབྲེལ་བའི་ལས་ཚོགས་རྫོགས་པ་ལ་ཕན་ཐོགས་ པ་གཙོ་བོར་སྟོན་པས་ན་དེའང་དགོས ་ཆེད་ཡིན་ནོ། །དེ་ལའང་རྒྱུ་མཚན་ལྔ་ཚང་ དགོས་ཏེ། ༡སྤྱིར་བྱ་བ་ཡོད་པ། ༢བྱ་ཡུལ་ཡོད་པ། ༣སུ་ལ་སོགས་པ ་བདུན་པོ་གང་རུང་འཐོབ་པ། ༤བྱ་བ་དང་བྱ་ཡུལ་ཐ་དད་པ། ༥བྱ་བས་བྱ་ཡུལ་དང་བྱ་ཡུལ་དང་འབྲེལ་བའི་ལས་ལ་ཕན་ཐོགས་པ་དང་ལྔའོ།།
རྣམ་དབྱེ་གཉིས་པ་བཞི་པ་འདི་གཉིས་ཀ་ལ་གོ་རུང་བ། ཀ་བ་ལ་ཚོན་བྱུག་ལྟ་བུ་ནི་སྒྲ་དངོས་དབང་གིས་འཇུག་པ་མེད་པས་རྗོད་པ་པོའི་བསམ་ངོ་ལ་ལྟོས་ དགོས་པ ་ནི། དཔལ་ཆོས་ཀྱི་གྲགས་པས། སྒྲ་ནི་བརྗོད་འདོད་རྗེས་འབྲང་ཕྱིར། །ཞེས་གསུངས་པ་ལྟར་ཡིན་པས་ངག་དེ་ཀ་བ་མཛེས་པའི་ཆེད་དུ་བསམ་སྟེ་བྱུགས་ པ་བརྗོད་ན་དགོས ་ཆེད་དང༌། ཀ་བ་ལ་ཚོན་བྱུག་རུང་བའི་བྱ་བ་ལ་བསམ་སྟེ་བརྗོད་ན་ལས་སུ་བྱ་བ་ཡིན་ དགོས་པ ་འདྲ་སྙམ་མོ།།
རྣམ་དབྱེ་བདུན་པ་རྟེན་གནས་ལ་ལ་དོན་སྦྱོར་ཚུལ་ནི། ཤིང་ལ་བྱ་གནས་ལྟ་བུ་ཤིང་རྟེན་བྱ་དེ་ལ་བརྟེན་པ་སྟེ། ལ་སྒྲས་བྱ་བརྟེན་པའམ་གནས་པའི་གཞི་ཤིང་ཡིན་པ་གཙོ་བོར་སྟོན་པས་ན་རྟེན་གནས་སུ་གྲགས་པ་དང༌། རྣམ་དབྱེ་གཉིས་པ་ལ་གཙོ་བོ་དང་ཕལ་པ་གཉིས་ཡོད་པ་ལས་ཕལ་པ་བྱ་ཡུལ་དང་བྱ་བ་གཉིས་གཅིག་ཡིན་པ་དཔེར་ན་ལྷ་རུ་གྱུར་ལྟ་བུ། ཚིག་སྦྱོར་ཚུལ་ལ་ལས་དང་བྱ་བ་གཉིས་ཐ་དད་པར་འདྲ་ཡང༌། དོན་དུ་བྱ་ཡུལ་གང་ཡིན་པ་དེ་ཉིད་བྱ་བའང་ཡིན། བྱ་བ་གང་ཡིན་དེ་ཉིད་བྱ་ཡུལ་ཡང་ཡིན་པས་དེ་ཉིད་དུ་གྲགས་པ་ལ་འཇུག་པའོ། །འདི་རྣམ་དབྱེ་གཉིས་པའི་བྱེ་བྲག་ཏུ་བཤད་ཀྱང་དངོས་མ་ཡིན་ཏེ་རྒྱལ་པོའི་འཁོར་ལ་རྒྱལ་པོར་བཏགས་པ་ལྟར་ཤེས་པར་བྱའོ།།
རྣམ་དབྱེ་བདུན་པའི་བྱེ་བྲག་དུས་བརྗོད་པ་ཚེ་སྐབས་ལ་སྦྱར་བ་ནི། ཚེས་གསུམ་ལ་ཚོགས་འཁོར་བསྐོར་ལྟ་བུ་དུས་སྒྲས་ཟིན་པ་བརྗོད་པ་དང༌། སློབ་གྲྭ་ཚོགས་པ་ན་དཔེ་ཆ་སྦྱོང་ལྟ་བུ་དུས་ཤུགས་ལ་བརྗོད་པ་གཉིས་ཡོད་པ་སྟེ། དེ་ལྟ་བུའི་འཇུག་ཡུལ་ལྔ་པོ་དེ་ལ་ལ་སྒྲས་སྨོས་པའི་ལ་དོན་གྱི་རྐྱེན་སུ་ར་རུ་དུ་ན་ལ་ཏུ་བདུན་པོ་འཇུག་པ་ཡིན་པས་གོང་བཤད་རྣམས་ཀྱིས་སྒྲ་སྦྱོར་ཚུལ་དང་བསྟུན་ཏེ་དཔེར་བརྗོད་རྒྱས་པ་རིག་པའི་འཕྲུལ་གྱིས་ཤེས་པར་བྱ་ དགོས་སོ། །ན་ལ་གཉིས་ཀྱི་འཇུག་པ ་གཞན་འདིར་བཤད་པའི་ནང་དུ་མ་འདུས་པའང་ཡོད་པ་ནི་སྨྲ་སྒོ་མཚོན་ཆ་སོགས་སུ་བལྟ་བར་གྱིས་ཤིག །ལ་དོན་གྱི་གཞུང་འདིར་སྒྲའི་སྦྱོར་ཚུལ་རྩ་བ་ནས་དངོས་སུ་མ་གསུངས་ཤིང་སུམ་ཅུ་པ་འཆད་ཉན་གྱི་སྲོལ་ཡང་ནུབ་ནས་ཡུན་རིང་ལོན་རྐྱེན་བོད་འགྲེལ་སྔ་མ་རྣམས་ལ་ཇི་བཞིན་མ་བཤད་པའི་སྐྱོན་ཡོད་པ་དག་བསལ་ནས་སྔོན་གནས་རྗེས་དྲན་དང་མཁྱེན་རབ་ཀྱི་རྩལ་གྱིས་སི་ཏུ་ཆོས་འབྱུང་གིས་ལེགས་པར་བཀྲལ་བས་ན་ཁོང་བཀའ་དྲིན་ཆེ་བ་ཡིན་ནོ།།
གསུམ་པ་ཨི་ལྡན་གྱི་རྣམ་དབྱེ་བཤད་པ་ལ། མདོར་བསྟན་པ་དང༌། རྒྱས་པར་བཤད་པ་གཉིས་སོ། དང་པོ་ནི།
རྗེས་འཇུག་ཡི་གེ་བཅུ་པོ་ནི། །ཨི་དང་མཐུན་ལུགས་འདི་ཞེས་བྱ།།
ཞེས་པས་བསྟན་ཏེ། གོང་ལྟར་རྗེས་འཇུག་གི་ཡི་གེ་བཅུ་པོ་དང་ནི་ཨི་ལྡན་གྱི་རྐྱེན་གྱི་ཡི་གེ་རྣམས་དང་སྒྲ་མཐུན་པར་སྦྱོར་ལུགས་རྟགས་མཚུངས་འདྲེན་པ་དང་བརྗོད་བདེ་འདྲེན་པ་གཉིས་ཀྱི་དབང་དུ་བྱས་པ་ནི་འདི་ལྟ་བུ་ཞེས་བྱའོ་ཞེས་སོ།།
གཉིས་པ་རྒྱས་བཤད་ལ། འབྲེལ་སྒྲ་བཤད་པ་དང༌། བྱེད་པ་པོའི་སྒྲ་བཤད་པའོ། །དང་པོ་ནི།
དང་པོ་གཉིས་ལ་དང་པོ་མཐུན། །གསུམ་ལྔ་བཅུ་ལ་ཀྱ་དང་སྦྱར།།
བདུན་པ་ཉིད་ལ་བདུན་པ་སྟེ། །ལྷག་མ་རྣམས་ལ་གྱ་སྦྱར་བ།།
དེ་དག་ཨི་སྦྱར་འབྲེལ་བའི་ས།།
ཞེས་པས་བསྟན་ཏེ། རྗེས་འཇུག་ཡི་གེ་བཅུ་པོའི་དང་པོ་ག་ང་གཉིས་ལ་རྗེས་འཇུག་དང་པོ་ག་དང་སྒྲ་མཐུན་པ་སྟེ། དེ་ཡང་ག་མཐར་གི་འདྲེན་པ་རྟགས་མི་མཚུངས་པས་བརྗོད་བདེ་འདྲེན་པ་དང༌། ང་མཐར་གི་འདྲེན་པ་རྟགས་མཚུངས་ཤིང་བརྗོད་བདེ་བའང་ཡིན་ནོ། །རྗེས་འཇུག་གི་ཡི་གེ་གསུམ་པ་ད་དང་ལྔ་པ་བ་བཅུ་པ་ས་གསུམ་ལ་ཀྱ་ཉིད་དང་སྒྲ་མཐུན་པ་སྟེ། དེ་ཡང་དེ་གསུམ་རྟགས་མཚུངས་དང་བརྗོད་བདེ་འདྲེན་པ་གཉིས་ཀ་ཡིན་ནོ། །རྗེས་འཇུག་གི་ཡི་གེ་བདུན་པ་འ་ཉིད་ཀྱི་མཐའ་ལ་རྐང་ པ་ཁ་སྐོང་མི་དགོས ་ཚེ་གཞུང་ནས་དངོས་སུ་བསྟན་པའི་རྗེས་འཇུག་བདུན་པ་འ་ཉིད་སྦྱར་བ་དང༌། རྐང་ པ་ཁ་སྐོང་དགོས ་པའི་ཚེ་དེ་དང་སྒྲ་མཐུན་པ་ཡི་ཉིད་སྦྱར་བ་སྟེ། དེ་ལྟར་འ་མཐར་འི་དང་ཡི་འདྲེན་པ་ནི་རྟགས་མཚུངས་འདྲེན་པ་དང་བརྗོད་བདེ་བའང་ཡིན་ནོ། །གོང་དུ་བཤད་ཟིན་རྗེས་འཇུག་ལྷག་མ་ན་མ་ར་ལ་བཞི་རྣམས་ཀྱི་མཐའ་ལ་གྱ་སྒྲ་མཐུན་པར་སྦྱར་བ་སྟེ། དེ་ཡང་ན་ར་ལ་གསུམ་གྱི་མཐར་གྱ་སྦྱར་བ་རྟགས་མི་མཚུངས་པས་བརྗོད་བདེ་འདྲེན་པ་ཁོ་ན་དང༌། མ་མཐར་གྱ་སྦྱར་བ་རྟགས་མཚུངས་ཤིང་བརྗོད་བདེ་བའང་ཡིན་ནོ། །ག་ཀྱ་གྱ་འ་ཡ་དེ་དག་ལ་ཨི་སྟེ་གི་གུ་སྦྱར་བར་བྱས་ན་ཆོས་གཉིས་ཀྱི་འབྲེལ་བ་བརྗོད་པའི་སའམ་སྒྲ་ཡིན་ནོ། །ཞེས་སོ། །དེ་དག་གིས་རིགས་བསྒྲེས་ནས་སུམ་རྟགས་ཀྱི་གཞུང་གི་སྐབས་གོང་འོག་རྣམས་སུ་རྣམ་དབྱེ་དང་ཚིག་ཕྲད་ཀྱི་རྐྱེན་གྱི་ཡི་གེ་སྒྲ་སྦྱོར་ཚུལ་ལམ་སྒྲ་མཐུན་འདྲེན་ཚུལ་དེ་ལྟར་ཡིན་ པ་ཤེས་པར་བྱ་དགོས ་སོ།།
སྒྲ་མཐུན་སྦྱོར་ཚུལ་གྱི་དཔེར་བརྗོད་ནི། བདག་གི གང་གི ཁྱོད་ཀྱི། རྒྱབ་ཀྱི། གཡས་ཀྱི། མདུན་གྱི། ལམ་གྱི། བར་གྱི། འཁྲུལ་གྱི། དེའི། དེ་ཡི། ལྷ་ཡི་དཔལ་དང་ནི། ཞེས་པ་ལྟ་བུའོ། །སྡོམ་ནི། ད་བ་ས་ཀྱི་ག་ང་གི །ན་མ་ར་ལ་བཞི་མཐར་གྱི། །འ་དང་མཐའ་མེད་འི་དང་ཡི། །ཞེས་སོ། །དོན་སྦྱོར་ཚུལ་ནི། ༡གསེར་གྱི་ཁ་དོག་ཅེས་པ་ལྟ་བུ་ཁྱད་གཞི་དང་ཁྱད་ཆོས་ཀྱི་འབྲེལ་བ་དང༌། ༢ལྗོན་ཤིང་གི་འདབ་མ་ལྟ་བུ་ཡན་ལག་དང་ཡན་ལག་ཅན་གྱི་འབྲེལ་བ། ༣བདག་གི་གོས་ཞེས་པ་ལྟ་བུ་བདག་པོ་དང་ནོར་གྱི་འབྲེལ་བ། ༤སྒྲ་ཡི་ཤེས་པ་ལྟ་བུ་ཡུལ་དང་ཡུལ་ཅན་གྱི་འབྲེལ་བ། ༥ནས་ཀྱི་མྱུ་གུ་ཞེས་པ་ལྟ་བུ་རྒྱུ་འབྲས་ཀྱི་འབྲེལ་བ་དང༌། ༦སྒྲ་ཡི་མི་རྟག་པ་ཞེས་པ་ལྟ་བུ་ཆོས་བརྗོད་པའི་འབྲེལ་སྒྲ་དང༌། ༧མི་རྟག་པའི་སྒྲ་ལྟ་བུ་ཆོས་ཅན་བརྗོད་པའི་འབྲེལ་སྒྲ་སོགས་ཡོད་པ་སྟེ། མདོར་ན་རྣམ་དབྱེ་དྲུག་པ་འདི་ལ་ཆོས་ཐ་དད་པ་གཉིས་འབྲེལ་བ་ཡོད་པ་བརྗོད་བྱར་བྱེད་པ་ཞིག་ཏུ་འདོད་པས་གྲུབ་བོ།།
གཉིས་པ་བྱེད་པ་པོའི་སྒྲ་ནི།
དེ་ཉིད་ལ་ནི་བཅུ་པ་སྦྱར། །བྱེད་པ་པོ་རུ་ཤེས་པར་བྱ།།
ཞེས་པས་བསྟན་ཏེ། གོང་དུ་བཤད་མ་ཐག་པའི་རྣམ་དབྱེ་དྲུག་པའི་རྐྱེན་གྱི་ཡི་གེ་གི་ཀྱི་གྱི་འི་ཡི་ལྔ་པོ་དེ་ཉིད་ལ་ནི་རྗེས་འཇུག་བཅུ་པ་ས་ཡིག་སྦྱར་བས། གིས་ཀྱིས་གྱིས་འིས་ཡིས་ལྔ་གྲུབ་པ་ནི་རྣམ་དབྱེ་གསུམ་པ་བྱེད་པ་པོ་སྟོན་པའི་སྒྲ་རུ་ཤེས་པར་བྱའོ། །ཞེས་སོ། །བྱེད་སྒྲའི་སྒྲ་སྦྱོར་ཚུལ་ནི་འབྲེལ་སྒྲ་དང་འདྲ་ལ། དོན་སྦྱོར་ཚུལ་ནི། སངས་རྒྱས་ཀྱིས་ཆོས་གསུངས་ཞེས་པ་ལྟ་བུ་དང༌། གཞན་ཡང་དུ་བ་མཐོང་བས་མེ་ཡོད་པར་ཤེས་ཞེས་པ་ལྟ་བུ་རྒྱུ་མཚན་དང་འབྲེལ་བའི་བྱེད་སྒྲའོ། །གོང་བཤད་གིས་གྱིས་སོགས་ཡིན་ཚད་རྣམ་དབྱེ་གསུམ་པའི་རྐྱེན་དུ་འཁྲུལ་བར་མི་བྱ་སྟེ། ལས་གྱིས་ཤིག་ལྟ་བུ་སྐུལ་ཚིག་དང་ཚིག་ཕྲད་གཞན་ཡང་ཡོད་པར་ཤེས་པར་བྱ་ དགོས་སོ། །འདི་ལ་བདག་གིས་རིག་སྔགས་ཀྱིས་ཚེ་སྒྲུབ་ཅེས་པ ་ལྟ་བུའི་སྐབས་བདག་བྱེད་པོ་གཙོ་བོ་དང༌། རིགས་སྔགས་བྱེད་པ་པོ་ཕལ་པ་ཡིན་པས་གཉིས་ཀར་བྱེད་སྒྲ་སྦྱར་ དགོས་ཞེས་ཀུན་མཁྱེན་སི་ཏུས་བཞེད་པ ་ལགས་སོ།།
བཞི་པ་རྒྱན་སྡུད་ཀྱི་སྒྲ་ནི།
ཨཱ་ལི་ཕྱིས་ནས་གཉིས་པ་སྦྱར། །ཚིག་རྒྱན་གཉིས་དང་སྡུད་པར་འགྱུར།།
ཞེས་པས་བསྟན་ཏེ། གོང་གི་ཀྱི་འི་ཡི་གསུམ་གྱི་ཨཱ་ལི་དང་པོ་སྟེ་གི་གུ་ཕྱིས་ནས་རྗེས་འཇུག་གཉིས་པ་ང་སྦྱར་བས་ཀྱང་འང་ཡང་ཞེས་གྲུབ་པ་དེ་ནི། མཛེས་ཀྱང་མཛེས་ཞེས་པ་ལྟ་བུ་ཚིག་སྔ་ཕྱི་མཐུན་པའི་ཚིག་རྒྱན་དང༌། ཁོང་ཁྲོ་ཡང་བྱམས་ལྟ་བུ་ཚིག་སྔ་ཕྱི་མི་མཐུན་པར་བརྗོད་པའི་ཚིག་རྒྱན་ཏེ་དེ་ལྟར་ཚིག་རྒྱན་གཉིས་དང༌། གཞན་ཡང་ལྷའང་རུང་སྟེ་བདུད་ཀྱང་རུང་ཞེས་པ་ལ་སོགས་པ་ལྟ་བུ་ཚིག་དོན་སྔ་ཕྱིའི་དོན་ཕྱོགས་གཅིག་ཏུ་སྡུད་པ་དང༌། གཡེངས་དང་སེམས་མེད་པ་ཡི་ཡང༌། །ཞེས་པ་ལྟ་བུ་ཚིག་དེའི་ཤུགས་ལ་དོན་གཞན་ཞིག་སྡུད་པའི་སྒྲ་རུ་འགྱུར་རོ་ཞེས་སོ།།
སྒྲ་སྦྱོར་ཚུལ་གྱི་དཔེར་བརྗོད་ནི། རྟག་ཀྱང༌། འཐད་ཀྱང༌། ཐོབ་ཀྱང༌། ཤེས་ཀྱང༌། ཕྱིནད་ཀྱང༌། གྱུརད་ཀྱང༌། བྲལད་ཀྱང༌། གང་ཡང༌། སྔོན་ཡང༌། ལམ་ཡང༌། མཐའ་ཡང༌། འགྱུར་ཡང༌། འཕེལ་ཡང༌། དེའང༌། དེ་ཡང༌། ཞེས་པ་ལྟ་བུའོ།། སྡོམ་ནི། ག་ད་བ་ས་དྲག་མཐར་ཀྱང༌། །ང་ན་མ་འ་ར་ལ་ཡང༌། །མཐའ་རྟེན་མེད་མཐར་འང་དང་ཡང༌། །ཞེས་སོ།།
ལྔ་པ་ལྷག་བཅས་ཀྱི་སྒྲ་བཤད་པ་ནི།
ལ་དོན་སུ་ལ་ཨུ་ཕྱིས་ནས། །དེ་ལ་གསུམ་པའི་དང་པོ་སྦྱར།།
དེ་ལ་ཨཱ་ལི་གསུམ་པ་སྦྱར། །དེ་ནི་ལྷག་དང་བཅས་པའོ།།
ཞེས་པས་བསྟན་ཏེ། ལ་དོན་གྱི་རྐྱེན་གྱི་ནང་ཚན་སུ་ཡིག་ལ་ཨུ་སྟེ་ཞབས་ཀྱུ་ཕྱིས་ནས་ས་རྐྱང་གྲུབ་པ་དེ་ལ། སྡེ་པ་གསུམ་པ་ཏ་སྡེའི་ཡི་གེ་དང་པོ་ཏ་སྦྱར་བས་སྟ་ཞེས་གྲུབ་པ་དེ་ལ་ཨཱ་ལི་གསུམ་པ་སྟེ་འགྲེང་བུ་སྦྱར་བས་སྟེ་ཞེས་གྲུབ་པ་དངོས་བསྟན་དང༌། ཏེ་རྐྱང་དང་དེ་གཉིས་ཤུགས་ལ་གོ་བས་དེ་གསུམ་ནི་དྲང་བྱ་དོན་ལྷག་མ་དང་བཅས་པའི་སྒྲའོ་ཞེས་སོ། །སྒྲ་སྦྱོར་ཚུལ་གྱི་དཔེར་བརྗོད་ནི། བྱོན་ཏེ། གྱུར་ཏེ། འཁྲུལ་ཏེ། བྱས་ཏེ། ཕྱིནད་ཏེ། འབྱོརད་ཏེ། འཕུལད་ཏེ། འཐད་དེ། དག་སྟེ། བཟང་སྟེ། བཏབ་སྟེ། སྒོམ་སྟེ། འདའ་སྟེ། སྐྱེ་སྟེ་ལྟ་བུའོ། །སྡོམ་ནི། ན་ར་ལ་ས་དྲག་མཐར་ཏེ། །ད་དེ་ག་ང་བ་མ་འ། །མཐའ་མེད་རྣམས་ལ་ས་སྟེ་འཐོབ། །ཅེས་སོ། །དོན་སྦྱོར་ཚུལ་ནི། སྨྲ་སྒོ་མཚོན་ཆ་རྩ་འགྲེལ་གཉིས་ལས་ཇི་ལྟར་གསུངས་པ་བཞིན། སི་ཏུ་འགྲེལ་ཆེན་ལས་དེ་ལྟར་གསུངས་པ་ལྟར་ན། ལྷག་མ་འདྲེན་ཚུལ་ལ་མཚམས་སྦྱོར་འདྲེན་པ། དམ་བཅའ་འདྲེན་པ། ལྷག་མ་གཞན་འདྲེན་ཏེ་རྩ་བའི་དབྱེ་བ་གསུམ་ཡོད་པའི་དང་པོ་མཚམས་སྦྱོར་འདྲེན་པ་ལའང༌། བྱེད་པས་བྱ་བ་དུས་རིམ་ཅན་དུ་འདྲེན་པ། དཔེར་ན། མིག་གིས་བལྟས་ཏེ་གཟུགས་མཐོང༌། གདམས་ངག་བཏབ་སྟེ་སེམས་ལ་ཕན་ལྟ་བུ་དང༌། བྱ་བ་གཉིས་དུས་རིམ་ཅན་དུ་འདྲེན་པ་དཔེར་ན། སློབ་གྲྭ་ཚོགས་ཏེ་ཆོས་ཉན་ལྟ་བུ་དང༌། བྱ་བ་གཉིས་དུས་གཅིག་ཅར་འདྲེན་པ། དཔེར་ན། ཁ་གདངས་ཏེ་མིག་བགྲད་ལྟ་བུ་གསུམ་ཡོད་པའོ། །དེ་བཞིན་དམ་བཅའ་འདྲེན་པ་ལའང༌། དབྱེ་བ་འདྲེན་པ། གཏན་ཚིགས་འདྲེན་པ། ངེས་ཚིག་འདྲེན་པ། རྒྱས་བཤད་འདྲེན་པ་སོགས་ཡོད་པ་ལས། དང་པོ་ནི། དཀོན་མཆོག་གསུམ་སྟེ། སངས་རྒྱས་དཀོན་མཆོག ཆོས་དཀོན་མཆོག དགེ་འདུན་དཀོན་མཆོག་གསུམ་མོ་ལྟ་བུའོ། །གཉིས་པ་ནི། སྒྲ་མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ལྟ་བུ་དང༌། གསུམ་པ་ནི། དཀོན་མཆོག་སྟེ། འཇིག་རྟེན་འདི་ན་ཤིན་ཏུ་དཀོན་ཞིང་མཆོག་ཏུ་གྱུར་པས་སོ་ལྟ་བུ་དང༌། བཞི་པ་ནི། དག་དང་རང་ལས་དེ་ལས་གཉིས། །ཞེས་གསུངས་ཏེ། སྤྲུལ་སེམས་ནི་སྤྲུལ་པ་འཇུག་ཚེ་བསམ་གཏན་དག་པ་བ་དང༌། རྒྱུན་གྱི་ཚེ་རང་གཉིས་ལས་འབྱུང་ལ། སྤྲུལ་སེམས་དེ་ལས་སྤྲུལ་པ་ལས་ལྡང་ཚེ་སྙོམས་འཇུག་དག་པ་བ་དང༌། རྒྱུན་གྱི་ཚེ་རང་ཉིད་དེ་གཉིས་འབྱུང་ངོ་ཞེས་ཚིག་དོན་རྒྱས་པར་འགྲེལ་བ་འདྲེན་པ་ལ་བྱའོ། །ལྷག་མ་གཞན་འདྲེན་ནི། དེ་དག་ཏུ་མ་འཐུས་པ་ལྷག་མ་ཡོད་ཙམ་སྟོན་པ་སྟེ། ཤིང་ལ་བྱ་གནས་ཏེ་སྤྲེའུ་ཡང་གནས། མཁའ་ལ་ཉི་མ་ཤར་ཏེ་ཟླ་བའང་ཤར། ཞེས་པ་ལ་སོགས་པ་ལྟ་བུའོ།།
དྲུག་པ་འབྱེད་སྡུད་ནི།
རྗེས་འཇུག་ཡི་གེ་བཅུ་པོ་ལ། །དྲུག་པ་སྦྱར་ན་འབྱེད་སྡུད་ཡིན།།
ཞེས་པས་བསྟན་ཏེ། རྗེས་འཇུག་གི་ཡི་གེ་བཅུ་པོ་དེ་དག་གི་མཐའ་ལ། རྗེས་འཇུག་དྲུག་པ་མ་ཡིག་སྦྱར་བར་བྱས་ན་གམ་ངམ་དམ་ནམ་བམ་མམ་འམ་རམ་ལམ་སམ་བཅུ་དངོས་བསྟན་དང༌། ཤུགས་ལ་གོ་བ་ཏམ་བཅས་བཅུ་གཅིག་པོ་ནི་རྣམ་གྲངས་སོ་སོར་འབྱེད་པ་དང༌། དོན་དུ་མ་ཕྱོགས་གཅིག་ཏུ་སྡུད་བའི་སྒྲའང་ཡིན་ནོ་ཞེས་སོ། །དེ་ལ་སྒྲ་སྦྱོར་ཚུལ་ནི། སླར་བསྡུའི་སྐབས་བཞིན་རྗེས་འཇུག་བཅུ་པོ་རང་རང་གི་མཐར་རང་རང་སྦྱར་བ་དང་ད་དྲག་ཅན་གྱི་མཐར་ཏམ་སྦྱར་དགོས་ཏེ། དཔེར་ན། རྟག་གམ། བྱུང་ངམ། ཡོད་དམ། ཡིན་ནམ། ཁྱབ་བམ། སྒོམ་མམ། བྱ་འམ། ཕྱིར་རམ། འབྲལ་ལམ། བྱས་སམ། གྱུརད་ཏམ། ཕྱིནད་ཏམ། འཁྲུལད་ཏམ་ལྟ་བུའོ། །དོན་སྦྱོར་ཚུལ་ནི། དབྱེ་གཞི་ཆོས་གཅིག་ལས་དབྱེ་བ་གཉིས་འབྱེད་པ། དཔེར་ན། ཤེས་བྱ་ནི་གཉིས་ཏེ། ཟག་བཅས་སམ་ཟག་མེད་དོ་ལྟ་བུ་དང༌། ཡང་དབྱེ་གཞི་ཆོས་གཅིག་ལས་དུ་མ་འབྱེད་པ། དཔེར་ན། ཕུང་པོ་ནི་ལྔ་སྟེ། གཟུགས་སམ། ཚོར་བའམ། འདུ་ཤེས་སམ། འདུ་བྱེད་དམ། རྣམ་པར་ཤེས་པའི་ཕུང་པོའོ་ལྟ་བུ་དང༌། ཆོས་གཉིས་གཅིག་ཏུ་སྡུད་པའི་དོན་ལ་འཇུག་པ། དཔེར་ན། འདུས་བྱས་སམ་འདུས་མ་བྱས་ནི་ཆོས་སོ་ལྟ་བུ། ཆོས་དུ་མ་གཅིག་ཏུ་སྡུད་པ། དཔེར་ན། མིག་གམ། རྣ་བའམ། སྣའམ། ལྕེའམ། ལུས་སམ། ཡིད་ནི་དབང་པོའོ་ལྟ་བུའོ། །གཞན་ཡང་དཔེ་ཆ་སྦྱངས་ན་ཤེས་སམ་མི་ཤེས་ལྟ་བུ་ཐེ་ཚོམ་གྱི་དོན་ལ་འཇུག་པ་དང༌། གངས་ཅན་ལ་འགྲོ་བའི་ལམ་འདི་ནས་ཡིན་ནམ་མིན་ལྟ་བུ་དྲི་བའི་དོན་ལའང་འཇུག་པར་བཤད་དོ།།
བདུན་པ་འབྱུང་ཁུངས་ལ། དངོས་དང༌། དེ་དགར་སྡུད་ལ་འཇུག་པའི་ཚུལ་གཉིས་ལས། དང་པོ་ནི།
རྗེས་འཇུག་ཡི་གེ་བཅུ་པོ་ཡི། །བཞི་པ་དགུ་པ་ལ་བཅུ་པ།།
སྦྱར་བ་འབྱུང་ཁུངས་ས་ཡིན་ཏེ།།
ཞེས་པས་བསྟན་ཏེ། རྗེས་འཇུག་གི་ཡི་གེ་བཅུ་པོ་ཡི་ནང་ཚན་བཞི་པ་ན་དགུ་པ་ལ་གཉིས་ལ་བཅུ་པ་ས་སྦྱར་བས་ནས་ལས་ཞེས་གྲུབ་པ་ནི་ཆོས་གང་ཞིག་གང་ལས་བྲལ་བའམ་འབྱུང་བའི་ཁུངས་སྟོན་པའི་སའམ་སྒྲ་ཡིན་ཏེ་ཞེས་ལྷག་བཅས་ཀྱི་ཚིག་ཕྲད་དོ། །དེ་ལ་སྒྲ་སྦྱོར་ཚུལ་མེད་ལ་དོན་སྦྱོར་ཚུལ་ནི། དཔེར་ན། སངས་རྒྱས་ལས་ཆོས་འབྱུང༌། མཁས་པ་ལས་རིག་པ་འབྱུང༌། རྒྱ་མཚོ་ལས་ནོར་བུ་འབྱུང༌། བའི་ནུ་མ་ལས་འོ་མ་འབྱུང༌། ཞེས་པ་ལྟ་བུ་འབྱུང་ཁུངས་ཀྱི་ཚིག་ཕྲད་དངོས་དང༌། དེ་དང་ཆ་འདྲ་བ། རྟ་ལས་ལྷུང༌། རི་ལས་འགྲིལ། ཤར་ནས་འོད་འབྱུང༌། ས་བོན་ལས་མྱུ་གུ་འབྱུང༌། སྐས་ཐོག་ནས་བབ་ཅེས་པ་ལྟ་བུ་དང༌། དུ་བ་མཐོང་བ་ལས་མེ་ཡོད་པར་ཤེས། ལྟ་བུ་རྒྱུ་མཚན་དང་འབྲེལ་བའི་འབྱུང་ཁུངས་སུ་བཞེད་དོ།།
གཉིས་པ་དེ་དགར་སྡུད་ལ་འཇུག་པ་ནི།
དགར་དང་སྡུད་པའང་དེ་བཞིན་ཡིན།།
ཞེས་གསུངས་ཏེ། གཞི་གང་ལས་ཆོས་གང་ཞིག་ལོགས་སུ་དགར་བ་དང༌། གང་ཞིག་ནས་མཚམས་འཛིན་ཏེ་གང་ཞིག་གི་བར་གྱི་ཆོས་རྣམས་སྡུད་པའང་གོང་དུ་བཤད་པའི་འབྱུང་ཁུངས་དེ་བཞིན་ནས་ལས་གཉིས་འཇུག་པ་ཡིན་ནོ་ཞེས་སོ། །དོན་སྦྱོར་ཚུལ་ནི། སྔོན་པོ་ལས་སེར་པོ་ཐ་དད། ནེ་ཙོ་ལས་རྨ་བྱ་ཐ་དད། ལྷ་ལས་མི་ཐ་དད་ལྟ་བུ་རིགས་དགར་བ་དང༌། ཕྱག་འཚལ་བ་ལས་ཏིང་འཛིན་བསྒོམ་པ་འཐད། ཚོང་བྱེད་པ་ལས་སོ་ནམ་བྱས་ན་སྙམ་ལྟ་བུ་བྱ་བ་དགར་བ་དང༌། མཁས་པའི་ཡོན་ཏན་ལས་བཟང་པོའི་ཡོན་ཏན་མཆོག རིགས་མཐོ་བ་ལས་རིག་གནས་ཤེས་པ་བཟང་ལྟ་བུ་ཡོན་ཏན་དགར་བའོ། །དེ་ལའང་བྱང་སེམས་ལས་སངས་རྒྱས་མཆོག་ལྟ་བུ་མཆོག་ཏུ་དགར་བ་དང༌། མཁས་པ་ལས་བླུན་པོ་དམན་ལྟ་བུ་དམན་པར་དགར་བ་དང༌། ནས་ལས་གྲོ་ཐ་དད་ལྟ་བུ་ཐ་དད་པ་ཙམ་དུ་དགར་བ་གསུམ་དུ་དབྱེར་ཡོད་པ་དང༌། ཡང༌། ལྷ་དང༌། ཀླུ་དང༌། དྲི་ཟ་ལས་མི་འམ་ཅི་ཐ་དད་ལྟ་བུ་གཞི་རིགས་དུ་མ་ལས་རིགས་གཅིག་དགར་བ་དང༌། ལྷ་ལས་མི་འམ་ཅི་འམ་གནོད་སྦྱིན་ནམ་དྲི་ཟ་རྣམས་ཐ་དད་ལྟ་བུ་དགར་གཞི་རིགས་གཅིག་ལས་དུ་མ་དགར་བའང་ཡོད་པ་ཡིན་ནོ། །ཚོགས་ཀྱི་ནང་ནས་དགར་བ་ལ་ནས་སྒྲ་ཁོ་ན་འཇུག་པའི་དཔེར་བརྗོད་པ་ཡང༌། ལྷ་རྣམས་ཀྱི་ནང་ནས་བརྒྱ་བྱིན་དཔའ། མི་རྣམས་ཀྱི་ནང་ནས་འཁོར་ལོས་བསྒྱུར་རྒྱལ་མཆོག ཆོས་རྣམས་ཀྱི་ནང་ནས་རྫོགས་པ་ཆེན་པོ་ཟབ་ལྟ་བུའོ། །འདི་ལ་ལས་སྒྲ་མི་འཇུག་པ་སི་ཏུས་གསུངས། ནས་སྒྲ་སྡུད་པ་ལ་འཇུག་པའི་དཔེར། རྒྱ་གར་ནས་རྒྱ་ནག་བར་ཞེས་པ་ལྟ་བུ་ཡུལ་གྱི་མཚམས་འཛིན་ཅིང་སྡུད་པ་དང༌། མིག་ནས་ཡིད་བར་ལྟ་བུ་དངོས་པོའི་མཚམས་འཛིན་ཅིང་སྡུད་པ་ལ་འཇུག་པ་དང༌། གཅིག་ནས་བཅུའི་བར་ཞེས་པ་ལྟ་བུ་གྲངས་ཀྱི་མཚམས་འཛིན་ཅིང་སྡུད་པ་ལ་འཇུག་པའོ། །དེ་ལས་གཞན་ནས་སྒྲ་ལྷག་བཅས་ལ་འཇུག་པ་ཡང༌། བླ་མ་ལ་ཡང་ཕྱག་འཚལ་ནས། །ཞེས་གོང་དུ་མཆོད་བརྗོད་ཀྱི་གཞུང་དུ་ཡོད་པ་ལྟ་བུའང་ཤེས་པར་བྱའོ།།
བརྒྱད་པ་བོད་པའི་སྒྲ་ནི།
གང་མིང་བརྗོད་པའི་དང་པོ་རུ། །ཀྱེ་སྦྱར་བ་ནི་བོད་པ་ཡིན།།
ཞེས་པས་བསྟན་ཏེ། གང་ཡང་རུང་བའི་མིང་བརྗོད་པའི་དང་པོ་སྟེ་ཐོག་མའམ་བར་རམ་མཐའ་མ་རུ་ཀྱེ་ཞེས་སྦྱར་བ་ནི་ཡུལ་དེ་ལ་བོད་པའི་སྒྲའམ་བརྡ་ཡིན་ནོ་ཞེས་སོ། །དེ་ཡང་ཀྱེ་ལྷའི་ལྷ་ཞེས་པ་ལྟ་བུ་མིང་གི་ཐོག་མར་སྦྱར་བ་དང༌། ལྷ་ཡི་ལྷ་ཀྱེ་བདག་ལ་དགོངས། །ལྟ་བུ་བར་ལ་སྦྱར་བ་དང༌། བདག་ལ་ཉེར་དགོངས་ལྷའི་ལྷ་ཀྱེ། ཞེས་པ་ལྟ་བུ་མཐའ་མ་ལ་སྦྱར་ཚུལ་ཡིན་ནོ། །དེ་ཡང་མཆོག་དང་འདྲ་མཉམ་ལ་བོད་སྒྲ་ཡིན་གྱི་དམན་པ་ལ་ཀ་ཡེ་ཞེས་པའི་བོད་སྒྲ་སྦྱར་བར་གསུངས་ཀྱང་དྲག་ཤུལ་དང་སྐུལ་ཚིག་གི་སྐབས་མཆོག་ལའང་ཀ་ཡེ་ཞེས་པའི་བོད་སྒྲའང་སྦྱར་རུང་བ་ཡིན་པ་ནི་འབྲུག་པ་པད་དཀར་གྱི་གུར་དྲག་སྐུལ་ཚིག་སྐབས་སུ་གསལ་ལོ། །དེས་རྗེས་འཇུག་ལ་ལྟོས་པའི་ཕྲད་རྣམ་དབྱེ་དང་བཅས་པ་བཤད་ པ་སོང་ལ། རྣམ་དབྱེ་མཐའ་དཔྱད་པ། སྤྱིར་རྣམ་དབྱེ་ཡིན་ན་ཚིག་ཕྲད་ཡིན་དགོས ་ལ། ཚིག་ཕྲད་ཡིན་ན་རྣམ་དབྱེ་ཡིན་མི་དགོས་ཏེ་རྣམ་དབྱེ་རྣམས་ཚིག་སྔ་ཕྱིའི་བར་མཚམས་སྦྱོར་བའི་ཕྲད་ཡིན་པས་དང༌། རྣམ་དབྱེ་མ་ཡིན་པའི་ཚིག་ཕྲད་དུ་མ་ཡོད་པའི་ཕྱིར་རོ། །སྐབས་འདིར་རྣམ་དབྱེའི་མཐའ་ཅུང་ཟད་དཔྱད་ན་ལེགས་སྦྱར་དང་བོད་གཉིས་ཀ་མཚུངས་པར་རྣམ་དབྱེ་ལ་བརྒྱད་གསུམ་ཉི་ཤུ་རྩ་བཞི་ཡོད་པ་སྟེ། དཔང་ལོ་ཙ་བའི་ཚོགས་གསུམ་གསལ་བྱེད་དུ།
མིང་ལ་རྣམ་དབྱེ་བརྒྱད་ཕྱེ་བ། །ཉི་ཤུ་རྩ་བཞི་སྦྱར་བ་དང༌།།
བྱིངས་ལ་ཏི་སོགས་སྦྱར་བ་ཡིས། །རང་རང་དོན་རྣམ་འབྱེད་པའི་ཚིག །ཅེས་གསུངས་ཏེ། དེ་ཡང་བྱིངས་ལ་ཏི་སོགས་སྦྱར་བ་ལེགས་སྦྱར་ཁོ་ན་ཡིན་ཡང་མིང་ལ་རྣམ་དབྱེ་བརྒྱད་ཕྱེ་བ་བོད་ལའང་ཡོད་པ་ནི། རྣམ་དབྱེ་དང་པོ་རང་གི་ངོ་བོ་ཙམ་སྟོན་པ། གཉིས་པ་ལས་སུ་བྱ་བ། གསུམ་པ་བྱེད་པ་པོ། བཞི་ པ་དགོས ་ཆེད། ལྔ་པ་འབྱུང་ཁུངས། དྲུག་པ་འབྲེལ་སྒྲ། བདུན་པ་རྟེན་གནས་རྣམས་བཤད་ཟིན་པ་ལྟར་ངོ་བོའི་སྒོ་ནས་དབྱེ་བ་དང༌། བརྒྱད་པ་བོད་པ་རྣམ་དབྱེ་མགོ་ཐུབ་མ་ཡིན་ཡང་རྣམ་དབྱེ་དང་པོའི་ཡན་ལག་ཏུ་འགྱུར་བ་བཅས་རྩ་བ་བརྒྱད་པོ་དེ་ལ་ཡན་ལག་གི་དབྱེ་བ་རེ་རེ་ལའང་གཅིག་ཚིག་ཉིས་ཚིག་མང་ཚིག་གསུམ་དུ་ཕྱེ་བས་ཉི་ཤུ་རྩ་བཞིར་འགྱུར་བ་ཡིན་ཏེ། དེ་དག་གི་དཔེར། བུམ་པ་ལྟ་བུ་མིང་རྐྱང་དང༌། རྣམ་དབྱེ་དང་པོའི་གཅིག་ཚིག་གཉིས་བོད་ལ་ཁྱད་པར་མེད་པ་དེས་ན་མིང་ཐམས་ཅད་རྣམ་དབྱེ་དང་པོའི་གཅིག་ཚིག་གི་དཔེར་བརྗོད་དུ་འགྱུར་བས། སངས་རྒྱས། ཆོས། དགེ་འདུན་ལྟ་བུ་དང༌། དེ་ལ་སངས་རྒྱས་དག ཆོས་དག དགེ་འདུན་དག་ལྟ་བུ་དག་སྦྱར་ན་རྣམ་དབྱེ་དང་པོའི་ཉིས་ཚིག་དང༌། སངས་རྒྱས་རྣམས། ཆོས་རྣམས། དགེ་འདུན་རྣམས་ལྟ་བུ་རྣམས་སྦྱར་བ་མང་ཚིག་ཡིན་པ་ཤེས་པར་བྱའོ། །དེས་ན་རྣམ་དབྱེ་དང་པོའི་གཅིག་ཚིག་ཡིན་ན་དོན་གྱི་ངོ་བོ་ཙམ་སྟོན་པ་ཡིན་ཀྱང་ཉིས་ཚིག་དང་མང་ཚིག་ལ་དེས་མ་ཁྱབ་སྟེ་ལྡོག་པ་ཅུང་ཟད་བཅས་སྟོན་པ་ཡིན་ནོ།།
དེ་བཞིན་རྣམ་དབྱེ་གཉིས་པ་ལའང༌། སངས་རྒྱས་ལ་ཕྱག་འཚལ་ལྟ་བུ་གཅིག་ཚིག སངས་རྒྱས་དག་ལ་ཕྱག་འཚལ་ལྟ་བུ་ཉིས་ཚིག་སངས་རྒྱས་རྣམས་ལ་ཕྱག་འཚལ་ལྟ་བུ་མང་ཚིག་གོ །རྣམ་དབྱེ་གསུམ་པ་ལའང༌། སངས་རྒྱས་ཀྱིས་ཆོས་གསུངས་ལྟ་བུ་གཅིག་ཚིག་སངས་རྒྱས་དག་གིས་ཆོས་གསུངས་ལྟ་བུ་ཉིས་ཚིག སངས་རྒྱས་རྣམས་ཀྱིས་ཆོས་གསུངས་ལྟ་བུ་མང་ཚིག་ཡིན། རྣམ་དབྱེ་བཞི་པ་ལའང༌། ནད་པ་ལ་སྨན་སྦྱིན་ལྟ་བུ་གཅིག་ཚིག །ནད་པ་དག་ལ་སྨན་སྦྱིན་ལྟ་བུ་ཉིས་ཚིག །ནད་པ་རྣམས་ལ་སྨན་སྦྱིན་ལྟ་བུ་མང་ཚིག་གོ །རྣམ་དབྱེ་ལྔ་པ་འབྱུང་ཁུངས་ལའང༌། སངས་རྒྱས་ལས་ཆོས་འབྱུང་ལྟ་བུ་གཅིག་ཚིག །སངས་རྒྱས་དག་ལས་ཆོས་འབྱུང་ལྟ་བུ་ཉིས་ཚིག །སངས་རྒྱས་རྣམས་ལས་ཆོས་འབྱུང་ལྟ་བུ་མང་ཚིག་གོ །རྣམ་དབྱེ་དྲུག་པ་ལའང༌། སངས་རྒྱས་ཀྱི་སྐུ་ལྟ་བུ་གཅིག་ཚིག །སངས་རྒྱས་དག་གི་སྐུ་ལྟ་བུ་ཉིས་ཚིག སངས་རྒྱས་རྣམས་ཀྱི་སྐུ་ལྟ་བུ་མང་ཚིག་གོ །རྣམ་དབྱེ་བདུན་པ་ལའང༌། ཤིང་ལ་བྱ་གནས་ལྟ་བུ་གཅིག་ཚིག །ཤིང་དག་ལ་བྱ་གནས་ལྟ་བུ་ཉིས་ཚིག །ཤིང་རྣམས་ལ་བྱ་གནས་ལྟ་བུ་མང་ཚིག་གོ །རྣམ་དབྱེ་བརྒྱད་པ་ལའང༌། ཀྱེ་སངས་རྒྱས་ལྟ་བུ་གཅིག་ཚིག །ཀྱེ་སངས་རྒྱས་དག་ལྟ་བུ་ཉིས་ཚིག །ཀྱེ་སངས་རྒྱས་རྣམས་ལྟ་བུ་མང་ཚིག་གོ། དེ་ཡང་དག་ཅེས་པས་གཉིས་ཡན་ཆད་དང༌། རྣམས་ཞེས་པས་གསུམ་ཡན་ཆད་ཅིག་ཡོད་པར་སྟོན་པ་ཡིན་གྱི། གཉིས་དང་གསུམ་ཁོ་ན་མ་གཏོགས་མེད་པར་སྟོན་པ་མིན་པ་ནི། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །ཞེས་དང༌། གང་དག་ཕྱོགས་བཅུ་སྟོང་གི་འཇིག་རྟེན་ན། །ཞེས་པ་ལྟ་བུས་ཤེས་སོ། །གཉིས་པ་སོགས་ཀྱིས་ནི་གཙོ་བོར་དོན་གྱི་ལྡོག་པ་སྟོན་པ་ཡིན་ པ་ཤེས་པར་བྱ་དགོས ་སོ།།
ཕྲད་རང་དབང་ཅན་ཁོ་ན་བཤད་པ།
༈ གཉིས་པ་ཕྲད་རང་དབང་ཅན་ཁོ་ན་བཤད་པ་ལ། ནི་སྒྲ། དང་སྒྲ། དེ་སྒྲ། གང་སྒྲ། བདག་སྒྲ། དགག་སྒྲ་བཤད་པ་དང་དྲུག་ལས། དང་པོ་ནི།
གང་མིང་མཐའ་དང་མཐུན་པ་ཡི། །བཞི་པ་ལ་ནི་ཨི་སྦྱར་བ།།
དགར་དང་བརྣན་པའི་ཚིག་ཏུ་གྱུར།།
ཞེས་པས་བསྟན་ཏེ། གང་ཡང་རུང་བའི་མིང་དང་ཚིག་གི་མཐའ་དང་རྗེས་སུ་མཐུན་པ་ཡི་རྗེས་འཇུག་བཞི་པ་ན་ཡིག་ལ་ནི་ཨི་ཡིག་སྟེ་གི་གུ་སྦྱར་བས་ནི་ཞེས་གྲུབ་པའི་ཚིག་ཕྲད་དེ་ནི་དགར་གཞི་གང་ལས་མཆོག་དམན་བར་མ་གང་ཡང་རུང་བའི་དགར་བྱ་ཞིག་དགར་བ་དང་དོན་གང་ཡིན་པ་དེ་ཉིད་ལ་ནན་ཏན་དུ་བརྣན་པའི་ཚིག་ཕྲད་དག་ཏུ་འགྱུར་རོ་ཞེས་སོ། །འདི་ཡི་རིགས་ལ་སྒྲ་སྦྱོར་ཚུལ་མེད་དེ་ཕྲད་རང་དབང་ཅན་ཡིན་པས་སོ།།
དོན་སྦྱོར་ཚུལ་གྱི་དཔེར་བརྗོད་ནི། མཆོག་ཏུ་དགར་བ། རྐང་གཉིས་རྣམས་ཀྱི་ནང་ནས་ནི་སངས་རྒྱས་མཆོག་གོ ཞེས་པ་ལྟ་བུ་དང༌། དམན་པར་དགར་བ། འགྲོ་བ་རིགས་དྲུག་ལས་ནི་དམྱལ་བའི་འགྲོ་བ་དམན་པའོ་ལྟ་བུ་དང༌། ཐ་དད་དམ་བར་མར་དགར་བ། ཁ་དོག་སྔོན་པོ་ལས་ནི་སེར་པོ་ཐ་དད་ཅེས་པ་ལྟ་བུ། དགར་གཞི་དངོས་སུ་སྨོས་པ། ལྷ་རྣམས་ལས་ནི་བརྒྱ་བྱིན་མཆོག་ལྟ་བུ་དང༌། དགར་གཞི་དངོས་སུ་མ་སྨོས་པ། བརྒྱ་བྱིན་ནི་མཆོག་གོ་ལྟ་བུའོ། །རྫས་ཁོ་ན་དགར་བ་མེད་ཀྱང་རྫས་ཅན་དང་འབྲེལ་ཚེ་དགར་རྒྱུ་ཡོད་པར་ཤེས་ དགོས་སོ། །རྡོ་རྗེ་རྩེ་བརྒྱ་པ ་འཛིན་པ་ནི་བརྒྱ་བྱིན་ནོ་ཞེས་པ་ལྟ་བུ་རྫས་དགར་བའང་ཡིན་པར་གོ་ དགོས་སོ། །གཞན་ཡང་ནི་སྒྲ་ཚིག་རྐང་པ ་ཁ་སྐོང་དུ་འཇུག་པ། རིག་པའི་གནས་བཅུ་སྦྱངས་ནས་ནི། །ཞེས་པ་ལྟ་བུ་དང༌། བརྣན་པ་ལ་འཇུག་པ། རིག་པ་ནི་ཡོད། བརྩོན་འགྲུས་ནི་ཆེ། སློབ་སྦྱོང་ནི་བྱས། ད་ནི་མཁས་པར་འོས་སོ་ཞེས་པ་ལྟ་བུ་དང༌། ཇ་ནི་ལེགས། འོ་མ་ནི་བླུགས། ༼བྱེ་མ་ཀ་ར་༽ ཅི་ནི་ནི་བརྒྱབས། ད་ནི་མངར་ཇ་མ་ཞིམ་ཡང་ཅི་བྱེད་ལྟ་བུའོ།།
གཉིས་པ་དང་སྒྲ་བཤད་པ་ནི།
མིང་གང་རུང་བའི་བར་མཚམས་སུ། །གསུམ་པ་ལ་ནི་གཉིས་པ་སྦྱར།།
དེ་ནི་སྡུད་དང་འབྱེད་པད་ང༌། །རྒྱུ་མཚན་ཚེ་སྐབས་གདམས་ངག་ལྔའོ།།
ཞེས་པས་བསྟན་ཏེ། རྗེས་འཇུག་ལ་མ་ལྟོས་པར་མིང་དང་ཚིག་གང་ཡང་རུང་བའི་བར་མཚམས་སུ་རྗེས་འཇུག་གི་ཡི་གེ་བཅུ་ཡོད་པའི་གསུམ་པ་ད་ཉིད་ལ་ནི་གཉིས་པ་ང་ཡིག་སྦྱར་བས་དང་ཞེས་གྲུབ་པ་དེ་ནི་དོན་དུ་མ་གཅིག་ཏུ་སྡུད་པ་དང༌། དོན་སོ་སོར་འབྱེད་པ་དང༌། རྒྱུ་མཚན་བསྟན་པ་དང༌། ཚེ་སྐབས་དང༌། གདམས་ངག་རྗེས་སུ་བསྟན་པ་ལྔ་ལ་འཇུག་པའོ་ཞེས་སོ། །དེ་ལས་དང་པོ་སྡུད་པ་ལ་འཇུག་པ་ནི། གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ནི་ཕུང་པོའོ། །རྟག་པ་དང་མི་རྟག་པ་གཉིས་ནི་ཤེས་བྱའོ་ལྟ་བུ་དང༌། འདི་དང་ཕྱི་མར་ཕན་པ་དེ་དང་དགའ། །སྙན་དང་གྲགས་དང་དཔལ་དང་ལྡན་པ་འཐོབ། །ཅེས་པ་ལྟ་བུ་དང༌།
གཉིས་པ་འབྱེད་པ་ལ་འཇུག་པ་ནི། ཆོས་ནི་གཉིས་ཏེ། ཟག་བཅས་དང་ཟག་མེད་དོ་ལྟ་བུ་དབྱེ་གཞི་གཅིག་ལས་གཉིས་སུ་འབྱེད་པ་དང༌། རིག་གནས་ནི་ལྔ་སྟེ། སྒྲ་རིག་པ་དང༌། ཚད་མ་རིག་པ་དང༌། བཟོ་རིག་པ་དང༌། གསོ་བ་རིག་པ་དང༌། ནང་དོན་རིག་པའོ་ཞེས་པ་ལྟ་བུ་དབྱེ་གཞི་གཅིག་ལས་དབྱེ་བ་དུ་མ་འབྱེད་པ་ལ་འཇུག་པའོ། །རྒྱུ་མཚན་ལ་འཇུག་པ་ནི། སྨན་ལེགས་པར་ཟོས་པ་དང་ནད་ལས་གྲོལ། བསྟན་བཅོས་རྩོམ་པ་ལ་ལྟོས་དང་མཁས་པ་ཡིན་པར་འདུག་གོ་ལྟ་བུ་དང༌། དུ་བ་འཕྱུར་བ་མཐོང་བ་དང་གྲོང་སོགས་ཡོད་པར་ཤེས་ཞེས་པ་ལྟ་བུའོ། །ཚེ་སྐབས་ལ་འཇུག་པ་ནི། ཆུ་ཚོད་དགུ་ཟིན་པ་དང་མལ་དུ་ཉལ། སྐྱ་རེངས་ཤར་བ་དང་མལ་ནས་ལྡང༌། གཟའ་ཉི་མ་ཤར་བ་དང་ཆུ་ཁྲུས་ ༼གུང་སེང་།༽ ཡོད་ཅེས་པ་ལྟ་བུའོ།།
གདམས་ངག་ལ་འཇུག་པ་ནི། ལེགས་པར་སྦྱོངས་དང༌། ཆོས་སྒྲུབས་དང༌། སྐྱབས་འགྲོ་གྱིས་དང༌། ཞི་དུལ་མཛོད་དང༌། སེམས་ལ་ཞོག་དང་ཞེས་པ་ལྟ་བུའོ།།
གསུམ་པ་དེ་སྒྲ་བཤད་པ་ནི།
གང་མིང་གི་ནི་ཡ་མཐའ་རུ། །གསུམ་པ་ལ་ནི་ཨེ་སྦྱར་བ།།
ཐ་སྙད་དབང་དུ་གསུམ་ཡིན་ཏེ། །དངོས་པོའི་དབང་དུ་བཞི་རུ་འགྱུར།།
དུས་ཀྱི་དབང་དུ་གཉིས་ཡིན་ནོ།།
ཞེས་པས་བསྟན་ཏེ། གང་ཡང་རུང་བའི་མིང་ཚིག་གི་ནི་ཡ་མཐའ་སྟེ་ཐོག་མ་རུ་རྗེས་འཇུག་གསུམ་པ་ད་ཡིག་ལ་ནི་ཨེ་ཡིག་སྟེ་འགྲེང་བུ་སྦྱར་བས་དེ་ཞེས་གྲུབ་པའི་ཚིག་ཕྲད་དེ་ནི་ཤེས་བརྗོད་འཇུག་པའི་ཐ་སྙད་ཀྱི་དབང་དུ་བྱས་ན་རྣམ་གྲངས་གཞན་ཅན་དང༌། ལྷག་མ་འདྲེན་པ་དང༌། དུས་འདས་པ་སྟེ་གསུམ་ལ་འཇུག་པ་ཡིན་ཏེ། དེ་ཡང་དུས་འདས་པ་ལ་འཇུག་པ་ནི་སྤྱི་དང༌། རྣམ་གྲངས་གཞན་ཅན་དང་ལྷག་མ་ཡོད་ཙམ་སྟོན་པ་གཉིས་ནི་བྱེ་བྲག་ཡིན་ནོ། །དོན་རང་གི་སྡོད་ལུགས་སམ་དངོས་པོའི་གནས་ལུགས་དབང་བཙན་དུ་བྱས་ན་བདེན་པའི་དངོས་པོའམ་མངོན་གྱུར་གྱི་དངོས་པོ་དང༌། གསང་བའི་དངོས་པོའམ་ལྐོག་གྱུར་གྱི་དངོས་པོ་དང༌། བདག་དང་འབྲེལ་བའི་དངོས་པོ་བདག་གི་བའི་དངོས་པོ་དང༌། བདག་དང་མ་འབྲེལ་བ་གཞན་གྱི་དངོས་པོ་སྟེ་བཞི་རུ་འཇུག་པར་འགྱུར་བའོ། །དུས་ཁོ་ནའམ་དུས་ཉིད་ཀྱི་ནི་དབང་དུ་བྱས་ན་འདས་པའི་དུས་དང་མ་འོངས་པའི་དུས་གཉིས་ལ་འཇུག་པ་ཡིན་ནོ་ཞེས་སོ།།
དེ་ཡང་ཐ་སྙད་ཀྱི་དབང་དུ་གསུམ་ལ་འཇུག་པའི་དཔེར་བརྗོད། རྣམ་གྲངས་གཞན་ཅན་ལ་འཇུག་པ་ནི། དེ་ལས་གཞན་ཡང་མཆོད་པའི་ཚོགས། །ཞེས་པ་ལྟ་བུ་རྣམ་གྲངས་གཞན་སྦྱོར་རྒྱུ་དེ་དངོས་སུ་ཚིག་གིས་མ་ཟིན་པ་དང༌། འཕགས་ཡུལ་པཎ་གྲུབ་དེ་བཞིན་བོད་མཁས་རྣམས། །ལྟ་བུ་རྣམ་གྲངས་གཞན་སྦྱོར་རྒྱུ་དེ་ཚིག་གིས་དངོས་སུ་ཟིན་པ་གཉིས་སུ་གསུངས་སོ། །ལྷག་མ་གཞན་འདྲེན་ལ་འཇུག་པ་ནི། ཞལ་ཕྱག་འཁྲུད་དེ་རྟེན་ལ་མཆོད་འབུལ་བགྱི་ཞེས་པ་ལྟ་བུའོ། །འཇུག་པ་དེ་གཉིས་ཀ་དུས་འདས་པ་ལ་འཇུག་པ་ཡིན་པས་དུས་འདས་པ་ལ་འཇུག་པའི་དཔེར་བརྗོད་ལོགས་སུ་མི་ དགོས་ལ། དུས་འདས་པ ་ལ་འཇུག་པ་ནི་སྤྱི་དང་གཞན་གཉིས་དེའི་བྱེ་བྲག་ཡིན་པའི་ཕྱིར།
སྐབས་འདིའི་ཐ་སྙད་ཅེས་པའི་དོན་ནི། ཆོས་གང་ལ་མཚན་མཚོན་གཞི་གསུམ་གྱི་དབང་དུ་བྱས་ནས་མཚོན་བྱ་དང་ཐ་སྙད་གཉིས་སུ་གསུངས་པའི་ཐ་སྙད་དེ་ལ་གོ་དགོས་སོ། །དེ་ཡང་བརྡ་དང་ཐ་སྙད་ཀྱི་ཁྱད་པར་ཡང༌། རྣམ་འགྲེལ་ལས། སྒྲ་རྣམས་ཀྱི་ནི་བརྡར་བཏགས་དོན། །དེ་ནི་ཐ་སྙད་ཆེད་དུ་བྱས། །དེ་ཚེ་རང་གི་མཚན་ཉིད་མེད། །དེས་ན་དེ་ལ་བརྡར་མ་ཡིན། །ཞེས་དང༌། འཇམ་དབྱངས་ས་པཎ་གྱིས་མཁས་པ་ལ་འཇུག་པའི་སྒོར། མིང་ཚིག་དེ་དག་རྒན་པོ་ཡིས། །ཐོག་མར་སྦྱར་བ་བརྡ་ཡིན་ལ། །ཕྱིས་ནས་དཔྱད་པ་ཐ་སྙད་ཡིན། །ཞེས་དང༌། ལྕེ་ཁྱི་འབྲུག་གིས་གནས་བརྒྱད་རྩ་བར། ཐ་སྙད་ནི་དངོས་པོ་མེད་པར་དངོས་པོ་བཏགས་པ་སྟེ། དེ་ཡང་བཏགས་པ་དང་བརྗོད་པ་དང་འཇུག་པ་དང་བཅས་པ་ཐམས་ཅད་དོ། །དེ་ལ་བརྡ་ནི་གོ་བར་བྱེད་པའི་བདག་ཉིད་ཅན་ཡིན་ལ། ཐ་སྙད་ནི་འཇུག་པར་བྱེད་པའི་བདག་ཉིད་ཡིན་ནོ། །ཞེས་གསུངས་པ་ལྟར། ནོག་སོགས་འདུས་པའི་གོང་བུ་ལ་བ་ལང་ཞེས་བརྡ་སྦྱར་མ་ཤེས་པའི་དུས་སུ་བརྡ་སྦྱོར་བ་པོ་ཞིག་གིས་འདི་ནི་བ་ལང་ཞེས་བྱ་བ་ཡིན་ནོ་ཞེས་སྨྲས་ནས་མིང་དོན་འབྲེལ་བར་ཤེས་པའི་སྐབས་བརྡ་ཞེས་བྱ་བ་ཡིན་ནོ། །ཐབས་དེས་མིང་དོན་གྱི་འབྲེལ་བ་རྟོགས་ནས་ཕྱིས་སུ་བ་ལང་དུ་ཤེས་བརྗོད་འཇུག་པའི་སྐབས་ཐ་སྙད་ཅེས་བྱ་བ་ཡིན་ནོ། །ཐ་སྙད་དེ་ལའང་དབྱེ་ན། གནས་བརྒྱད་འགྲེལ་བར། ཐ་སྙད་ནི་དངོས་པོ་ལ་ཐ་སྙད་མེད་པ་ལ་ནན་གྱིས་བཏགས་པ་སྟེ། དེའང་བཏགས་པའི་ཤེས་པ་ནི་འདི་ཀ་བ་ཡིན་ནོ་སྙམ་པ་ལ་སོགས་པའི་ཤེས་པའོ། །བརྗོད་པ་ནི་འདི་ནི་ཀ་བའོ་ཞེས་བྱ་བའི་སྒྲའོ། །འཇུག་པ་ནི། ཀ་བ་ཡིན་པས་ཁང་ཁྱིམ་བྱེད་པར་རྩོམ་པ་ལ་སོགས་པའོ། །ཐ་སྙད་ཅེས་བྱ་བ་ནི་འཇུག་པའི་རྒྱུ་མཚན་ཡིན་ནོ་ཞེས་གསུངས་པ་དང༌། གཞན་ཡང༌། མཁས་འཇུག་སྡོམ་བྱང་དུ།
མཐོང་ཐོས་བྱེ་བྲག་ཕྱེད་པ་དང༌། །མྱོང་བའི་ཐ་སྙད་རྣམ་པ་བཞི།།
ཡིན་ཡོད་སྒྲུབ་དང་མེད་མིན་དགག །དགག་སྒྲུབ་ཐ་སྙད་རྣམ་པ་བཞི། །ཞེས་གསུངས་པ་ལྟར་བུམ་པ་ལྟ་བུ་ལ་མཚོན་ན་སེམས་ཀྱིས་འདི་བུམ་པའོ་སྙམ་དུ་ཤེས་པ་ལྟ་བུ་ཤེས་པའི་ཐ་སྙད་དང༌། ངག་གིས་བུམ་པ་ཞེས་བརྗོད་པ་བརྗོད་པའི་ཐ་སྙད་དང༌། ལུས་ཀྱིས་ཆུ་ལེན་པའི་བྱ་བ་སོགས་ལ་འཇུག་པ་འཇུག་པའི་ཐ་སྙད་དེ་ཐ་སྙད་རྣམ་པ་གསུམ་དང༌། གཞན་ཡང་མངོན་སུམ་དུ་མཐོང་བ་དང༌། ལུང་ལས་ཐོས་པ་དང༌། ཡིད་ཆེས་ཀྱིས་བྱེ་བྲག་ཕྱེད་པ་དང༌། གསལ་པོར་མྱོང་བའི་ཐ་སྙད་དེ་བཞི་དང༌། ཡང་བུམ་པ་ཡོད་ཅེས་དང༌། མི་རྟག་པ་ཡིན་ལྟ་བུ་སྒྲུབ་པའི་ཐ་སྙད་གཉིས་དང༌། ཡང་བུམ་པ་མེད། རྟག་པ་མིན་ལྟ་བུ་དགག་པའི་ཐ་སྙད་རྣམ་པ་གཉིས་ཏེ་དགག་སྒྲུབ་ཀྱི་ཐ་སྙད་བཞི་ཡོད་པར་གསུངས་སོ། །མདོར་ན་ཐ་སྙད་ཅེས་པ་ཡུལ་གང་ཞིག་གི་དངོས་པོའི་གནས་ཚོད་ལ་སྐྱེས་བུའི་ལུས་ངག་ཡིད་གསུམ་གྱིས་སྒྲོ་བཏགས་པའི་ཆ་དེ་ལ་གོ་དགོས་སོ།།
དངོས་པོའི་དབང་དུ་བཞི་རུ་འགྱུར་བའི་དཔེར་བརྗོད་ནི། བདེན་པའི་དངོས་པོའམ་མངོན་གྱུར་གྱི་དངོས་པོ་ལ་འཇུག་པ་ནི། དེ་ནི་བདེན་ནོ། །དེ་དེ་ལྟར་རོ། །དེ་རྫུན་པའོ། །དེ་ཁོ་ནའོ། །དེ་ངོ་མའོ། །དེ་དངོས་གནས་སོ། །དེ་ག་རང་ཡིན། །དེའི་ཚུལ་ནི་དེ་ལྟ་བུའོ། །དེ་ལྟར་ངེས་སོ་ལྟ་བུ་དང༌། གསང་བའི་དངོས་པོའམ་ལྐོག་གྱུར་གྱི་དངོས་པོ་ལ་འཇུག་པ་ནི། དེ་མ་སྟོན་ཅིག་དེ་མ་ཉན་ཅིག་དེ་མ་བཤད་ཅིག་གང་ཡིན་དེ་ཞེས་པ་ལྟ་བུ་དོན་ནམ་མིང་དེ་དངོས་སུ་མ་བརྗོད་པར་ཤུགས་ལ་གསང་གྲོས་སོགས་ཀྱིས་གོ་བར་བྱས་ཏེ་བརྗོད་པའོ། །བདག་གི་བའི་དངོས་པོ་ལ་འཇུག་པ་ནི། བདག་གི་ལྷ་དེ། བདག་གི་ནོར་དེ། བདག་གིས་བརྩམས་པའི་བསྟན་བཅོས་དེ། བདག་གིས་བྲིས་པའི་གླེགས་བམ་དེ། ངེད་ཀྱི་གྲོགས་དེ། རང་གི་ཉེ་འཁོར་དེ་ཞེས་པ་ལྟ་བུ་དང༌། གཞན་གྱི་དངོས་པོ་ལ་འཇུག་པ་ནི། བུམ་པ་དེ། གཟུགས་སྐུ་དེ། ལྷ་བྲིས་པ་དེ། ཁྱེད་ཀྱིས་དེ་བྱས་སམ། ཀ་བ་དེ་སྦོམ་མམ་ཞེས་པ་ལྟ་བུ་དང༌། དེ་བཞིན་དུས་གསུམ་ཀ་ལ་འཇུག་པ་ཡིན་ཏེ། དཔེར་ན། ཁ་སང་གི་བུམ་པ་དེ་ཞེས་པ་ལྟ་བུ་འདས་པ་དང༌། དེ་རིང་གི་བུམ་པ་དེ་ལྟ་བུ་ད་ལྟ་བ་དང༌། སང་ཉིན་གྱི་བུམ་པ་དེ་ལྟ་བུ་དུས་མ་འོངས་པ་ལ་འཇུག་ པ་ཡིན་པས་དེས་རིགས་འགྲེས་ནས་ཤེས་པར་བྱ་དགོས ་སོ། །མདོར་ན་ཤེས་བརྗོད་འཇུག་པའི་སྒྲོ་བཏགས་པའི་ཆ་ལ་ཐ་སྙད་དང༌། སྒྲོ་བཏགས་པའི་ཡུལ་གྱི་དངོས་པོ་ལ་དངོས་པོར་གོ་ན་རུང་སྙམ་མོ། །དངོས་པོའི་དབང་གིས་འཇུག་ཚུལ་བཞི་པོའི་སྔ་མ་གཉིས་ཀྱི་ཐ་སྙད་བཏགས་ཚུལ་འདི་ཀུན་མཁྱེན་སི་ཏུའི་འགྲེལ་ཆེན་དང་ཅུང་མི་མཐུན་པ་འདྲ་ཡང་ཕྲན་གྱིས་སྔར་ཁམས་ལ་ཡོད་དུས་ཆོས་རྗེ་མི་ཕམ་འཇམ་པའི་དབྱངས་དངོས་ཀྱི་སུམ་ཅུ་པའི་ཕྱག་མཆན་ཞིག་མཇལ་མྱོང་བ་ལས་དེ་ལྟར་གནང་འདུག་པ་ཡིན་ནོ།།
དུས་ཀྱི་དབང་དུ་གཉིས་ལ་འཇུག་པའི་དཔེ་ནི། ན་ནིང་གི་ལོ་དེ་ལ། སྔོན་གྱི་དུས་དེ་ན། བསྟན་པ་སྔ་དར་གྱི་སྐབས་དེར་ཞེས་པ་ལྟ་བུ་དུས་འདས་པ་ལ་འཇུག་པ་དང༌། སང་གི་དུས་དེར། མ་འོངས་པ་རྒྱལ་བ་བྱམས་པས་ཆོས་འཁོར་བསྐོར་བའི་དུས་དེ་ན། ནམ་ཞིག་རང་ཅག་རྣམས་འཚང་རྒྱ་བའི་དུས་དེ་ན་ཞེས་པ་ལྟ་བུ་དུས་མ་འོངས་པ་ལ་འཇུག་པ་གཉིས་སོ། །སྐབས་འདི་ལྟ་བུའི་དུས་ད་ལྟ་བ་ལ་དེ་སྒྲ་མི་འཇུག་སྟེ། དེ་རིང་གི་ཉི་མ་འདི་ལྟ་བུ་ཉེ་ཚིག་འདི་སྒྲ་སྦྱར་ དགོས་པས་སོ། །དེ་ཡང་ཐ་སྙད་ཀྱི་དབང་དུ་བྱས་པ ་དང༌། དངོས་པོའི་དབང་དུ་བྱས་པ་གཉིས་ནི་དེ་སྒྲའི་འཇུག་ཚུལ་སྤྱི་དང༌། དུས་ཀྱི་དབང་དུ་བྱས་པ་ནི་བྱེ་བྲག་གི་འཇུག་ཚུལ་ཡིན་ནོ། །དེ་ལྟར་དེ་སྒྲའི་འཇུག་པ་དགུ་པོ་དེ་སྨྲ་སྒོ་མཚོན་ཆ་ལས་དེ་བཞིན་གསུངས་ཏེ། ཇི་ལྟར་གསུངས་ན།
དེ་ཞེས་བྱ་བའི་ཚིག་གི་དོན། །ཐ་སྙད་དངོས་དང་དུས་འཇུག་གསུམ།།
འདས་དང་རྣམས་གྲངས་གཞན་ཅན་དང༌། །ལྷག་མ་དག་དང་བཅས་པའོ།།
བདེན་པ་དག་དང་གསང་བ་དང༌། །བདག་གི་བ་དང་ཕ་རོལ་པོ།།
དངོས་པོ་དག་ལ་འཇུག་པ་བཞི། །འདས་པ་དང་ནི་མ་འོངས་པའི།།
དུས་གཉིས་ལ་ནི་འཇུག་པ་ཡིན། །བདག་ཉིད་ད་ལྟ་ཉིད་ལ་སྤང༌།།
དངོས་པོ་དུས་ནི་མི་འདོར་ཏེ། །ཀུན་ལ་རབ་ཏུ་སྦྱར་བར་བྱ། །ཞེས་གསུངས་ཤིང༌། བདག་རྐྱང་པ་ལ་བདག་དེ་ཞེས་མི་འཇུག་པ་དང་ད་ལྟའི་དུས་དེ་ཞེས་རིང་ཚིག་མི་འཇུག་པས་དེ་གཉིས་ལ་དེ་སྒྲ་སྤང་ དགོས་པ ་དང༌། དངོས་པོའི་དབང་གིས་འཇུག་ཚུལ་ལ་དུས་གསུམ་ཀར་དེ་སྒྲ་མི་འདོར་བར་འཇུག་པ་བཅས་གསལ་ལོ།།
བཞི་པ་གང་སྒྲ་བཤད་པ་ནི།
གང་མིང་བརྗོད་པའི་དང་པོ་རུ། །དང་པོ་ལ་ནི་གཉིས་པ་སྦྱར།།
སྤྱི་ལ་ཁྱབ་པ་ཉིད་དུ་འགྱུར།།
ཞེས་པས་བསྟན་ཏེ། གང་ཡང་རུང་བའི་མིང་བརྗོད་པའི་དང་པོ་རུ་རྗེས་འཇུག་བཅུའི་དང་པོ་ག་ཡིག་ལ་ནི་རྗེས་འཇུག་གཉིས་པ་ང་ཡིག་སྦྱར་བས་གང་ཞེས་གྲུབ་པའི་ཚིག་ཕྲད་དེ་ནི་ཆོས་གང་བྱེ་བྲག་ཏུ་དམིགས་ཀྱིས་མ་བསལ་བ་སྤྱི་ལ་ཁྱབ་པའི་དོན་བརྗོད་པའི་སྒྲ་ཉིད་དུ་འགྱུར་རོ་ཞེས་པའོ། །དེ་ཡང་སྤྱི་སྒྲ་དངོས་དང༌། དྲི་བ་ལ་སྦྱར་བ། སྤྱི་སྒྲ་བྱེ་བྲག་ལ་འཇུག་པ་གསུམ་ཡོད་པའི་དང་པོའི་དཔེར་བརྗོད་ནི།
གང་ཞིག་གིས་ནི་དགེ་བཅུ་ལ། རྟག་ཏུ་སྤྱོད་ན་རྣམ་སྨིན་འབྲས། །བདེ་བར་འབྱུང་བ་གདོན་མི་ཟ། །བསླུ་མེད་འདི་ནི་རྒྱུ་འབྲས་ཚུལ། །ཞེས་པ་ལྟ་བུ།
གཉིས་པ་དྲི་བ་ལ་འཇུག་པའི་དཔེ་ནི། ཁྱོད་ནི་གང་ནས་འོང་ནས་ནི། །ད་ནི་ཡུལ་ཕྱོགས་གང་དུ་འགྲོ། །དོན་དག་གང་ཞིག་སྒྲུབ་ཏུ་འདོད། །དེ་ནས་གང་ལ་འགྲོ་རྒྱུ་ཡིན། །ཞེས་པ་ལྟ་བུ།
གསུམ་པ་བྱེ་བྲག་ལ་འཇུག་པ་ལ། སྐབས་ཀྱི་སྟོབས་ཀྱིས་དང༌། ཁྱད་པར་གྱི་ཚིག་དང་འབྲེལ་བའི་སྟོབས་ཀྱིས་དང༌། ཤུགས་ཀྱི་སྟོབས་ཀྱིས་དང༌། ལྡན་བྲལ་གྱི་སྟོབས་ཀྱིས་འཇུག་པ་སྟེ་བཞི་ཡོད་པར་གསུངས་ལ། དང་པོ་ནི། དཔེར་ན། རྒྱལ་པོས་སེནྡྷ་པ་གང་ཞིག་འོན་ཅིག་ཅེས་བརྗོད་ན། རྒྱལ་པོ་གཡུལ་ལ་ཆས་སྐབས་རལ་གྲི་དང༌། བཏུང་བ་བཞེས་སྐབས་ཕོར་པ་དང༌། གསོལ་ཟས་བཞེས་སྐབས་ལན་ཚྭ་དང༌། འཆག་སར་ཕེབས་སྐབས་རྟ་ལ་གོ་ དགོས་པ ་བཞིན་སྐབས་དང་བསྟུན་ཏེ་གང་སྒྲ་གང་ལ་འཇུག་ཤེས་ དགོས་པའོ།།
གཉིས་པ ་ནི། གང་གིས་སྒྲ་དབྱངས་ཀུན་གསུངས་པའི། ཞེས་པས་འཇིག་རྟེན་གྱི་སྒྲ་དབྱངས་ཇི་སྙེད་པ་ཀུན་བྱིན་གྱིས་བརླབས་ཏེ་གསུངས་པའི་ཁྱད་ཆོས་དང་ལྡན་པ་ནི་འཇམ་དཔལ་དབྱངས་ཁོ་ན་ལ་གོ་ དགོས་པ ་ལྟ་བུ་སྟེ། དཔེར་ན་བྲམ་ཟེ་རྣམས་ལས་སྨ་ར་ཨག་ཚོམ་དང་ལྡན་པ་གང་ལ་བྱིན་ཅིག་ཅེས་བརྗོད་ན། བྲམ་ཟེ་ཐམས་ཅད་ལ་མི་གོ་བར་ཁྱད་ཆོས་དེ་ལྡན་ཁོ་ན་ལ་གོ་བ་བཞིན་ཡིན་ནོ།།
གསུམ་པ་ནི། གང་དང་ཡང་དག་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདི་གསུངས་པ། །ཞེས་པའི་སྐབས་ཆོས་འཁོར་བསྐོར་བ་དངོས་སུ་བརྗོད་པའི་ཤུགས་ཀྱིས་གང་སྒྲ་དེ་རྣམ་མཁྱེན་ཁོ་ན་ལ་གོ་བ་ལྟ་བུའོ།།
བཞི་པ་ནི། བེའུ་དང་བཅས་པའི་བ་དྲུས་མ་གང་འོན་ཅིག་ཅེས་བརྗོད་པ་བེའུ་དང་ལྡན་པའི་བ་ལ་གོ་ཡི་དེ་དང་བྲལ་བའི་བ་ལ་མི་གོ་བ་ལྟ་བུའོ། །གཞུང་ནས་གང་སྒྲ་མིང་གི་ཐོག་མར་སྦྱར་བ་གསུངས་པ་ནི་གཙོ་ཆེ་བའི་དབང་དུ་བྱས་པ་ཡིན་གྱི། དེ་ཐོབ་བྱ་ཕྱིར་གང་དང་བསྟན་བཅོས་གང༌། །ཞེས་ པ་ལྟར། བར་དང་མཐར་སྦྱར་བའང་ཤེས་དགོས ་སོ། །སུམ་ཅུ་པའི་གཞུང་འདི་ལས་གང་སྒྲ་ཙམ་ལས་སྤྱི་ལ་འཇུག་པའི་ཚིག་ཕྲད་མ་གསུངས་ཀྱང༌། དག་ཡིག་སོགས་ལས་བསྟན་པ་ལྟར་སྤྱིར་ཅི་དང་ཇི་དང་སུ་ཡང་སྤྱི་སྒྲ་ཡིན་ཏེ། ཅི་ཞིག་དང༌། ཇི་སྙེད། ཇི་ལྟར། སུ་དག་ཅེས་པ་ལྟ་བུའོ།།
ལྔ་པ་བདག་སྒྲ་བཤད་པ་ནི།
གང་མིང་གི་ནི་མ་མཐའ་ན། །པུ་ལིངྒ་ཡི་སྒྲ་མེད་པ།།
དེ་ལ་པུ་ལིངྒ་སྦྱར་ན། །བདག་པོའི་སར་ནི་ཤེས་པར་བྱ།།
ཞེས་པས་བསྟན་ཏེ། གང་ཡང་རུང་བའི་མིང་གི་ནི་མ་མཐའ་ན་པུ་ལིང་ག་སྟེ་སྐྱེས་པ་ཡི་རྟགས་ཀྱི་སྒྲ་པ་པོ་གཉིས་སྔར་མེད་པ་དེ་ལ། གསར་དུ་པ་པོ་གཉིས་པུ་ལིང་ག་ཡི་སྒྲ་ཡིན་པས་དེ་སྦྱར་ན་དངོས་པོ་གང་ཡིན་པ་དེའི་བདག་པོ་སྟོན་པའི་སར་རམ་སྒྲ་ནི་ཡིན་ པ་ཤེས་པར་བྱ་དགོས ་སོ་ཞེས་པའོ། །དེ་ལ་དཔེར་ན། རྟ་ལྟ་བུའི་མིང་གི་མཐའ་ན་སྔར་མེད་པ་ལ་པ་ཞིག་གསར་དུ་སྦྱར་ན་རྟ་པ་ཞེས་གྲུབ་པ་དེས་ནི་རྟ་དེ་ཡི་བདག་པོ་སྟོན་པ་ལྟ་བུ་སྟེ། དེས་མཚོན་གསེར་པ། ལྷ་ས་པ། འབྲས་ལྗོངས་པ། རྒྱ་གར་པ། རྒྱ་ནག་པ། སློབ་གྲྭ་པ་ཞེས་པ་སོགས་དང༌། ཟ་བ་པོ། འཐུང་བ་པོ། ལས་བྱེད་པ་པོ། འགྲོ་བ་པོ། ཆོས་འཆད་པ་པོ། ཡི་གེ་འབྲི་བ་པོ། ཆོས་ཉན་ པ་པོ། ལྟ་བུ་སོགས་ཀྱིས་རིགས་བསྒྲེས་ནས་རྟོགས་པར་བྱ་དགོས ་སོ།།
འདི་སྐབས་སྤྱིར་ལེགས་སྦྱར་དང་ཧིནྡི་སོགས་ལ་མིང་ཐམས་ཅད་རྟགས་གསུམ་གྱི་དབྱེ་བ་ཡོད་ཀྱང༌། བོད་སྐད་ལ་དེ་ལྟར་མི་འབྱུང་ཞིང༌། སྐབས་འདིར་བསྟན་གྱི་བདག་སྒྲ་སྐྱེས་བུའི་རྟགས་དེས་གང་ཟག་ཕོ་ཞིག་སྟོན་བྱེད་དུ་འགྲོ་བའི་སྒྲ་པ་དང་པོ་གཉིས་གང་རུང་ཡིན་པའི་གཞི་མཐུན་ཞིག་ལ་འདོད་ དགོས་ཀྱི། པ ་པོ་གཉིས་ཡིན་ཚད་སྐབས་འདིའི་བདག་སྒྲ་མ་ཡིན་ཏེ། དཔེར་ན། ཆུ་སྐྱོར་བ་པོ་བུམ་པ། གདུང་མ་འདེགས་པ་པོ་ཀ་བ། སྔོན་དུ་འཇུག་པ་པོ་བ་ཡིག་ལྟ་བུ་འདིར་བསྟན་གྱི་བདག་སྒྲ་དངོས་མ་ཡིན་ལ། བདག་པོ་སྟོན་བྱེད་ཀྱི་སྒྲ་ཡིན་ཚད་འདིར་བསྟན་གྱི་བདག་སྒྲའང་མ་ཡིན་པ་ནི། ཇ་མ། ཆང་མ། ལས་བྱེད་པ་མོ་ལྟ་བུ་སྟེ། སྔ་མས་ནི་གང་ཟག་མི་སྟོན་པས་བདག་སྒྲ་མ་ཡིན་ལ། ཕྱི་མ་ནི་སྐྱེས་བུའི་རྟགས་མ་ཡིན་པས་བདག་སྒྲ་མ་ཡིན་པ་ཡིན་པས། དེ་ལྟ་བུ་འདི་ནི་ཀུན་མཁྱེན་སི་ཏུས་དགོངས་པ་ཡིན་པར་འདུག་ཀྱང་ཇི་བཞིན་མ་རྟོགས་ནས་མིང་མཐའི་པ་པོ་དང་བདག་སྒྲ་ཤན་མ་ཕྱེད་པ་སོགས་ནོར་འཁྲུལ་བ་ཐག་འཛིང་བ་ལྟ་བུ་ཞིག་བྱུང་ཡོད་པ་ནི་གཞུང་སོ་སོའི་སྐབས་སུ་དཔྱོད་དང་གསལ་པོར་ངེས་སོ།།
དྲུག་པ་དགག་སྒྲ་བཤད་པ་ནི།
གང་མིང་བརྗོད་པའི་ཡ་མཐའ་རུ། །སྟྲི་ལིངྒ་ཡི་སྒྲ་མེད་པ།།
དེ་ལ་སྟྲི་ལིངྒ་སྦྱར་ན། །དགག་པའི་གནས་སུ་ཤེས་པར་བྱ།།
ཞེས་པས་བསྟན་ཏེ། གང་ཡང་རུང་བའི་མིང་བརྗོད་པའི་ཡ་མཐའ་སྟེ་ཐོག་མ་རུ། སྟྲི་ལིང་ག་ཡི་སྒྲ་སྟེ་བུད་མེད་ཀྱི་རྟགས་མ་དང་མི་གཉིས་སྔར་མེད་པ་དེ་ལ་གསར་དུ་སྟྲི་ལིང་ག་ཡི་སྒྲ་བུད་མེད་ཀྱི་རྟགས་མ་དང་མི་གཉིས་སྦྱར་ན་མིང་གིས་གསལ་བའི་དངོས་པོ་དེ་ཉིད་དགག་པའི་གནས་སུ་ཤེས་པར་བྱའོ་ཞེས་སོ། །དཔེར་ན། མ་ཡིན་ཞེས་པའི་མ་དགག་སྒྲས་ཡིན་པ་དགག་པ་དང༌། མི་འགྱུར་ཞེས་པའི་མི་དགག་སྒྲས་དགག་བྱ་འགྱུར་བ་དགག་པ་ལྟ་བུའོ། །མིང་གི་ཐོག་མ་རུ་སྦྱར་བ་གཞུང་ལས་གཙོ་ཆེ་བའི་དབང་དུ་བྱས་ཀྱི། བྱ་མ་རྟ་ལྟ་བུ་མིང་གི་བར་དང༌། འདུས་བྱས་མ་ཡིན་ལྟ་བུ་མིང་གི་མཐའ་ནའང་ཡོད་པ་གསལ་ལ། བུམ་པ་མེད་ལྟ་བུ་དང་བུམ་པ་མིན་ལྟ་བུ་སྤྱིར་དགག་སྒྲ་ཡིན་ཀྱང་སྐབས་འདིར་བསྟན་པ་ནི་གོང་ལྟར་མ་མི་གཉིས་ཁོ་ནར་སི་ཏུས་བཞེད་པའོ།།
གདམས་ངག་བརྗོད་པས་མཇུག་བསྡུ་བ།
༈ གཉིས་པ་གདམས་ངག་བརྗོད་པས་མཇུག་བསྡུ་བ་ལ་བཞི་སྟེ། ཚིགས་བཅད་འགྲེལ་ཚུལ་ལ་འདོམས་པ། ཉན་པོ་སྤྲོ་བསྲིང་བའི་སྒོ་ནས་འདོམས་པ། བསླབ་ཚུལ་གྱི་གོ་རིམ་ལ་འདོམས་པ། གདམས་ངག་སྣོད་རུང་ལ་བསྟན་ དགོས་པར་འདོམས་པའོ། །དང་པོ་ནི།
ཚིགས་སུ་བཅད་པའི་མཚམས་སྦྱོར་རྣམས། །ཅུང་ཟད་བསྡུས་པ ་ཡོད་ན་ཡང༌།།
དེ་ནི་དེ་བཞིན་སྦྱར་བར་བྱ།།
ཞེས་པས་བསྟན་ཏེ། ཚིགས་སུ་བཅད་པའི་མཚམས་སྦྱོར་བསྡུས་པ་མང་བ་ཚིག་ལྷུག་པ་ལའང་རུང་སྟེ་རྣམ་དབྱེ་དང་ཚིག་ཕྲད་ནི་ཚིག་སྔ་ཕྱི་བར་མཚམས་སྦྱོར་བྱེད་ཡིན་པས་དེ་རྣམས་ཚིག་སྡུད་དྲུག་སོགས་ཀྱི་སྒོ་ནས་རྒྱ་ཆེན་པོ་བསྡུས་པ་ཡོད་ན་ལྟ་ཅི་སྨོས་ཅུང་ཟད་ཙམ་ཞིག་བསྡུས་པ་ཡོད་ན་ཡང་དེ་ནི་གོང་དུ་བཤད་ཟིན་རྣམས་མ་བསྡུས་པ་དེ་བཞིན་དུ་སྦྱར་ནས་བདེ་བར་གཤེགས་པའི་གསུང་རབ་དགོངས་འགྲེལ་དང་བཅས་པ་དང་ཐུན་མོང་དང་ཐུན་མིན་གྱི་རིག་གཞུང་རྒྱ་མཚོ་ལྟ་བུའི་ཚིག་དོན་ལྷུག་པར་འགྲོལ་ཞིང་འཆད་པ་དང༌། རྩོད་པ་དང༌། རྩོམ་པ་སོགས་ལ་འཇུག་ཅིང་སྤེལ་བར་བྱའོ་ཞེས་སོ། །དཔེར་ན། རྒྱལ་གསུང་དགོངས་འགྲེལ་འཆད་རྩོམ་ཚེ། །ཕྲད་རྣམས་ལེགས་བསྡུས་ཚུལ་ཤེས་པ། །སྙན་ངག་ཡོན་ཏན་རྣམ་བཅུ་ཡི། །ནང་ཚན་བརྗིད་ཉམས་ཅིས་མི་ལྡན། །ལྟ་བུ་ལ། རྒྱལ་བའི་གསུང་རབ་དང་དེའི་དགོངས་པ་འགྲེལ་བ་བསྟན་བཅོས་ཀྱི་གཞུང་ལུགས་རྣམས་གཞན་ལ་འཆད་པ་དང༌། གསར་དུ་རང་གིས་གཞུང་ལུགས་རྩོམ་པ་སོགས་ཀྱི་ཚེ། རྣམ་དབྱེ་བརྒྱད་དང་ཚིག་ཕྲད་བཅུ་གཅིག་སོགས་ཚིག་སྔ་ཕྱིའི་མཚམས་སྦྱོར་གྱི་ཕྲད་རྣམས་ཚིག་སྡུད་དྲུག་སོགས་ནས་ལེགས་པར་བསྡུས་པའི་ཚུལ་ཇི་ལྟ་བ་བཞིན་དུ་ཤེས་པ་དེ་ནི་སྤྱིར་སྙན་ངག་གི་ཡོན་ཏན་བཅུ་ཡོད་པའི་ནང་ཚན་གྱི་བརྗིད་པ་ཞེས་བྱ་བའི་ཉམས་དང་ཅིས་ཕྱིར་ན་མི་ལྡན་ཏེ་ངེས་པར་ལྡན་ནོ་ཞེས་ཕྲད་རྣམས་ཕྲལ་ནས་དོན་དག་འགྲེལ་ དགོས་པ ་ལྟ་བུའོ།།
འདི་ལ་བློའི་ནུས་པ་ཡོད་ན་ཚིག་ཕྲད་བསྡུས་པའི་ཚིགས་བཅད་གཅིག་འདི་ལྟར་གསར་དུ་རྩོམ་ནས་དེའི་ཕྲད་རྣམས་ཕྲལ་ནས་དཔེར་བརྗོད་འབྲི་སྲོལ་ཡོད་ལ། དེ་ལྟར་མ་ནུས་ན། ཟག་བཅས་ཟག་པ་མེད་ཆོས་རྣམས། །ཞེས་པ་ལ། ཟག་པ་ཉོན་མོངས་པ་དང་བཅས་པའི་ཆོས་དང་ཟག་པ་ཉོན་མོངས་པ་མེད་པའི་ཆོས་ཞེས་ཕྲལ་ཏེ་དཔེར་བརྗོད་བྱ་ དགོས་སོ།།
གཉིས་པ ་ལ། རྗེས་འཇུག་མེད་མི་རུང་དུ་བསྟན་པ། རྗེས་འཇུག་ཤེས་པའི་ དགོས་པ ་བསྟན་པ། དེ་དོན་ལ་དབབ་པའི་ཚུལ་བསྟན་པའོ། །དང་པོ་ནི།
སྔོན་འཇུག་ཡོད་དམ་མེད་ཀྱང་རུང༌། །མིང་གཞིའི་ཡི་གེ་གང་ཡིན་ལ།།
ཉིས་འབྲེལ་ཡོད་དམ་སུམ་འབྲེལ་ཡོད། །ཨཱ་ལི་བཞི་ལས་གང་ལྡན་ཡང༌།།
རྗེས་འཇུག་བཅུ་པོ་མ་ཞུགས་ན། །མིང་གཞན་སྦྱོར་བ་ཡོད་མི་སྲིད།།
ཞེས་པས་བསྟན་ཏེ། ཚིག་སྦྱོར་གང་ཞིག་ལ་སྔོན་འཇུག་གི་ཡི་གེ་རྣམས་ཞུགས་པ་ཡོད་པ་ཉིད་དམ་ཡང་ན་མ་ཞུགས་པའམ་མེད་ཀྱང་རུང༌། མིང་གཞིའི་ཡི་གེ་གང་ཡིན་པ་དེ་ལ་སྐ་ལྟ་བུ་ཉིས་འབྲེལ་ཡོད་པ་ཉིད་དམ་ཡང་ན་ནི་སྐྱ་ལྟ་བུ་སུམ་འབྲེལ་ཡོད་པའམ་དེ་དག་ལ་ཨཱ་ལི་གི་གུ་ཞབས་ཀྱུ་འགྲེང་བུ་རྣ་རུ་བཞི་ལས་གང་ཡང་རུང་བ་ཞིག་ལྡན་པ་སྐྱུ་ལྟ་བུ་ཡང༌། རྗེས་འཇུག་གི་ཡི་གེ་བཅུ་པོ་ལས་གང་ཡང་རུང་བ་ཞིག་རྗེས་སུ་མ་ཞུགས་ན། ཡི་གེ་འདུས་པ་ལས་བྱུང་བའི་དོན་གྱི་ངོ་བོ་སྟོན་བྱེད་ཀྱི་མིང་གཞན་ཞིག་འགྲུབ་པའམ་སྦྱོར་བ་ནི་ནམ་ཡང་ཡོད་པ་མི་སྲིད་པ་ཡིན་ནོ། །གོང་གི་སྐྱུ་ལྟ་བུ་ལ་རྗེས་འཇུག་ར་ཞུགས་ན་སྐྱུར་ཞེས་དོན་སྟོན་པའི་མིང་དུ་གྲུབ་པ་ཡིན་པ་ལྟར་ཤེས་ དགོས་སོ།།
གཉིས་པ ་རྗེས་འཇུག་ཤེས་པའི་ དགོས་པ ་བསྟན་པ་ནི།
རྗེས་འཇུག་བཅུ་ཡི་དོན་ཤེས་ན། །འབྲི་དང་ཀློག་དང་བཤད་རྣམས་ཀྱི།།
མཚམས་སྦྱོར་སྒྲ་ལ་ཐོགས་མེད་ཅིང༌། །འབྲེལ་པ་སྨྲ་བའི་མཆོག་ཏུ་གྱུར།།
གཞན་ཡང་རྗེས་འཇུག་ཤེས་པ་ཡིས། །དོན་གྱི་སྦྱོར་བ་མ་མཐོང་ཡང༌།།
དོན་དང་མཐུན་པའི་སྦྱོར་བ་ཤེས།།
ཞེས་པས་བསྟན་ཏེ། གོང་དུ་བཤད་པའི་རྗེས་འཇུག་བཅུ་ཡི་དོན་མིང་གྲུབ་ཚུལ་མིང་མཐའ་འདྲེན་ཚུལ་རྣམ་དབྱེ་དང་ཚིག་ཕྲད་འདྲེན་ཚུལ་སོགས་ཐམས་ཅད་རྗེས་འཇུག་ལ་རག་ལས་པ་དང༌། རྟགས་འཇུག་ནས་བཤད་པ་ལྟར་གྱི་རྗེས་འཇུག་གི་འཇུག་པ་བཞིའི་སྦྱོར་བ་དང༌། དེ་དག་སྔོན་འཇུག་གི་འཇུག་ པ་བཞི་དང་ཡང་འབྲེལ་དགོས ་པས་མདོར་ན་སུམ་ཅུ་པ་ནས་བཤད་པའི་རྣམ་དབྱེ་དང་ཚིག་ཕྲད་རྟགས་འཇུག་ནས་བཤད་པའི་བདག་བཞན་དུས་གསུམ་སྟོན་ཚུལ་སོགས་ཀུན་ཀྱང་རྗེས་འཇུག་བཅུ་དང་མ་འབྲེལ་བ་མེད་པས་མ་ལུས་པ་ཡིན་ལ་དེ་དག་ཚུལ་བཞིན་དུ་ཤེས་ན་རང་གིས་ཡི་གེ་འབྲི་བ་དང༌། གཞན་གྱིས་བྲིས་ཟིན་པ་རྣམས་དག་པར་ཀློག་པ་དང༌། གསུང་རབ་དགོངས་འགྲེལ་དང་བཅས་པས་མཚོན་རིག་གཞུང་གཞན་ལ་བཤད་པ་བྱེད་པ་རྣམས་ཀྱི་སྐབས་སུ་ཕྲད་དང་རྣམ་དབྱེ་ལ་སོགས་པའི་ཚིག་སྔ་ཕྱི་མཚམས་སྦྱོར་བའི་སྒྲ་དོན་ལ་བློ་གྲོས་ཐོགས་པ་མེད་པ་འཇུག་ཅིང་བརྗོད་བྱའི་དོན་ཕུན་སུམ་ཚོགས་པ་དང་རྗོད་བྱེད་ཀྱི་ཚིག་ཕུན་སུམ་ཚོགས་པ་གཉིས་དང་ལྡན་པའི་དོན་འབྲེལ་ཆགས་པ་འབྱུང་བ་ཉིད་ཀྱི་སྒོ་ནས་འཆད་པ་དང་རྩོད་པ་དང་རྩོམ་པ་ལ་དབང་འབྱོར་ཞིང་གཞུང་ལུགས་རབ་འབྱམས་སྨྲ་བའི་མཁས་པ་མཆོག་ཏུ་འགྱུར་རོ་ཞེས་དང༌། དགོས་པ ་གཞན་ཡང་གོང་བཤད་རྗེས་འཇུག་བཅུ་ཡི་དོན་ཤེས་པ་དེ་ཡིས། བདེ་བ་ཅན་གྱི་ཞིང་གི་བཀོད་པ་ལྟ་བུ་དོན་གྱི་སྦྱོར་བ་སྔར་མ་མཐོང་བ་ཞིག་ཡིན་ན་ཡང༌། རང་གི་བློའི་ནུས་པས་དོན་དེ་དང་རྗེས་སུ་མཐུན་པའི་མིང་ཚིག་གི་སྦྱོར་བ་དག་ པ་ཤེས་པར་འགྱུར་ཞིང་དགོས ་པའང་ཡོད་པའོ་ཞེས་སོ།།
གསུམ་པ་དེ་དོན་ལ་དབབ་པའི་ཚུལ་ནི།
རྗེས་འཇུག་སྦྱོར་བ་མཁས་པ་ན། །ལུང་གི་དོན་དང་སྦྱོར་བ་དང༌།།
བླ་མའི་མན་ངག་གསུམ་སྦྱར་ནས། །དོན་གྱི་ཐོག་ཏུ་དབབ་པར་བྱ།།
ཞེས་པས་བསྟན་ཏེ། གོང་དུ་བཤད་མ་ཐག་པ་ལྟ་བུའི་རྗེས་འཇུག་གི་སྦྱོར་བ་ལ་མཁས་པར་གྱུར་ན་གཞུང་ལུགས་གང་ཡིན་གྱི་དོན་རགས་པ་རྣམས་ཚུལ་དེས་རྟོགས་ནུས་ལ། དེ་ལས་ཀྱང་རྟོགས་དཀའ་བའི་དོན་ཕྲ་བ་རྣམས་རྩ་བའི་གཞུང་འགྲེལ་བའི་ལུང་གིས་བཀྲལ་བ་ལྟ་བུས་མཚོན་ལུང་ཚད་མ་གཞན་དག་གི་དོན་དང་སྦྱོར་བའི་སྒོ་ནས་རྟོགས་ནུས་པ་དང༌། དེ་ལས་ཀྱང་ཆེས་ཕྲ་བ་རྟོགས་དཀའ་བ་རྣམས་བླ་མ་མཁས་པའི་མྱོང་ཁྲིད་ལས་བྱུང་བ་ལྟར་གྱི་མན་ངག་བཅས་གསུམ་པོ་དེ་སྦྱར་བར་བྱས་ནས་གང་ཡིན་པའི་གཞུང་ལུགས་དེ་ཉིད་ཀྱི་དོན་གྱི་ཐོག་ཏུ་ཚད་མས་ངེས་པ་རྙེད་པར་བྱས་ཏེ་གཏན་ལ་དབབ་པར་བྱ་ དགོས་སོ་ཞེས་འདོམས་པའོ།།
གསུམ་པ ་བསླབ་ཚུལ་གྱི་གོ་རིམ་ལ་འདོམས་པ་ནི།
བསླབ་ལ་བརྩོན་པའི་གང་ཟག་གིས། །དང་པོ་ང་རོ་རྣམས་ལ་སྦྱང༌།།
སྔོན་འཇུག་མིང་གཞི་རྗེས་འཇུག་གསུམ། །ཀློག་གི་ཆེད་དུ་བསླབ་པ་ཡིན།།
རྗེས་འཇུག་བཞི་ཡི་སྦྱོར་བ་ནི། །མཉན་བསམ་བསྟན་པའི་དོན་དུ་སྦྱར།།
ཡན་ལག་དེ་དག་མཐུ་ཡིས་ནི། །འབྲས་བུའི་ཆེད་དུ་དོན་ལ་དབབ།།
བསླབ་པའི་རིམ་པ་འདི་ཡིས་ནི། །གང་ཞིག་འབད་པ་ཆུང་ངུས་ཀྱང༌།།
ཤེས་རབ་མྱུར་དུ་གྲོལ་བར་འགྱུར། །དེ་ཕྱིར་དང་པོར་འདི་ཉིད་བསླབ།།
དེ་ནས་རྒྱས་པའང་མཉན་བྱས་ཏེ། །བསླབ་པ་གང་ལ་དད་པ་ཡི།།
གཞུང་ཉིད་བླ་མ་དག་ལས་མཉན།།
ཞེས་པས་བསྟན་ཏེ། རིག་གཞུང་བསླབ་པ་ལ་བརྩོན་པའི་གང་ཟག་གིས་དང་པོ་དབྱངས་དང་གསལ་བྱེད་རྣམས་རེ་རེ་ནས་བཀླག་པའི་སྒྲ་གདངས་དང་གསལ་བྱེད་སུམ་ཅུ་ལ་དབྱངས་བཞི་སྦྱར་བའི་སྒྲ་གདངས་དང་མགོ་ཅན་དང་འདོགས་ཅན་སོགས་བཀླག་པའི་སྒྲ་གདངས་སམ་ང་རོ་རྣམས་ལ་དཔྱིས་ཕྱིན་པ་སྦྱང་བར་བྱ་ཞིང༌། དེ་རྗེས་སྔོན་འཇུག་དང་མིང་གཞི་དང་རྗེས་འཇུག་དང་གསུམ་སྦྱར་བའི་སྒྲ་གདངས་ཀློག་ཚུལ་ལེགས་པར་འབྱུང་བ་དག་གི་ཆེད་དུ་བསླབ་པར་བྱ་ དགོས་པ ་ཡིན། དེ་ནས་རྟགས་འཇུག་ལས་བྱུང་བ་ལྟར་གྱི་རྗེས་འཇུག་བཞི་ཡི་སྦྱོར་བ་ནི་གཞུང་ལུགས་གང་དག་གཞན་ལས་མཉན་པ་དང༌། དེའི་དོན་བསམ་པ་དང༌། དེ་དག་གཞན་ལ་བསྟན་པའི་དོན་དུ་སྦྱར་བར་བྱ་བ་ཡིན་ལ་ཡན་ལག་དེ་གསུམ་པོ་དག་གི་མཐུ་ཡིས་ནི། འབྲས་བུའམ་དགོས་པའི་ཆེད་དུ་དོན་དེ་དག་གཏན་ལ་དབབ་པར་བྱ་ དགོས་ལ། དེ་ལྟར་བསླབ་པའི་གོ་རིམ་ཇི་བཞིན་པ ་མ་ནོར་བ་འདི་ཡིས་ནི་གང་ཟག་གང་ཞིག་གིས་འབད་པ་ཆུང་དུ་ཙམ་བྱས་པས་ཀྱང་ཐོས་བསམ་སྒོམ་པའི་ཤེས་རབ་ཀྱི་པདྨོ་མྱུར་དུ་གྲོལ་བར་འགྱུར་རོ། །དེ་ཡི་ཕྱིར་ན་དང་པོ་སུམ་ཅུ་པའི་གཞུང་འདི་ཉིད་ལ་བསླབ་ཅིང་དེ་ནས་རྟགས་འཇུག་སོགས་སྒྲ་རིག་པའི་གཞུང་ལུགས་རྒྱས་པའང་མཉན་པར་བྱས་ཏེ། དེ་ནས་རང་གིས་བསླབ་པར་བྱ་བ་གང་ཞིག་ལ་དད་པ་ཡི་བློས་ཐུན་མོང་དང་ཐུན་མིན་གྱི་རིག་གཞུང་གང་ཉིད་བླ་མ་མཁས་པ་དག་ལས་མཉན་པར་བྱ་ དགོས་སོ་ཞེས་གདམས་པའོ།།
བཞི་པ ་གདམས་ངག་སྣོད་རུང་ལ་བསྟན་ དགོས་པར་འདོམས་པ ་ནི།
སློབ་དཔོན་དེ་ཉིད་དུ་འཛིན་ཅིང༌། །ལེ་ལོ་གཡེང་བ་རྣམ་པར་སྤངས།།
ཟོ་བཟང་དད་པ་ལ་བརྟེན་པ། །སྐྱེས་བུ་དེས་ནི་མྱུར་རྟོགས་ཏེ།།
དེ་ལ་དུས་སུ་འདོམས་པར་བྱ། །ཅིག་ཤོག་དེ་ལས་ལྡོག་པ་འོ།།
ཞེས་པས་བསྟན་ཏེ། སྒྲ་རིག་པའི་གཞུང་ལུགས་འདི་དག་གཞན་དག་རྣམས་ཀྱིས་གདམས་ངག་ཡང་དག་བསྟན་དུ་རུང་བའི་སྣོད་ལྡན་གྱི་གདུལ་བྱའམ་ཆེད་དུ་བྱ་བའི་ཡུལ་ནི། སློབ་དཔོན་ལ་སློབ་དཔོན་དེ་ཉིད་དུ་འཛིན་ཅིང་བཀའ་དྲིན་ཤེས་ཤིང་བྱས་པ་གཟོ་བ་དང༌། བསླབ་པའི་གེགས་ལེ་ལོ་དང་གཡེང་བ་རྣམ་པར་སྤངས་བའི་བརྩོན་འགྲུས་དང་ལྡན་པ་དང༌། ཟོ་བཟང་སྟེ་མི་གཤིས་རང་བཞིན་གྱིས་བཟང་བ་དང༌། བསླབ་པར་བྱ་བའི་གནས་ལ་དད་པ་མཆོག་ཏུ་གྱུར་པ་ཡོད་པ་ལ་བརྟེན་པའི་སྐྱེས་བུ་དེས་ནི་བརྡ་སྤྲོད་པའི་གཞུང་གི་དོན་མྱུར་དུ་རྟོགས་པ་ཡིན་ཏེ། རྒྱུ་མཚན་དེས་ན་དེ་ལྟ་བུའི་སྣོད་ལྡན་དེ་ལ་གདམས་ངག་སྟོན་པའི་དུས་སུ་རིག་ནས་མན་ངག་འདོམས་པའམ་བཤད་པར་བྱ་ དགོས་ལ། དེ་ཡི་ཅིག་ཤོས་སློབ་དཔོན་ལ་སློབ་དཔོན་དུ་མི་འཛིན་པ ་དང༌། གེགས་ལེ་ལོ་རྣམ་གཡེང་མི་སྤངས་པ་དང་མི་གཞི་རང་བཞིན་གྱིས་ངན་པ་དང༌། བསླབ་པའི་གནས་ལ་དད་པ་མེད་པ་དེ་ལ་དུས་མིན་དུ་ཤེས་ནས་གདམས་ངག་སྟོན་པར་མི་བྱ་ཞེས་གོང་གི་དངོས་བསྟན་གྱི་དོན་དེ་ལས་ལྡོག་པ་ཡིན་པར་ཤེས་པར་བྱའོ། །དེ་ཡང་གནས་སྐབས་ཙམ་དུ་གདམས་ངག་བསྟན་མི་རུང་བ་ཡིན་ཀྱང་སླར་སྐྱོན་སྤངས་ཤིང་ཡོན་ཏན་དང་ལྡན་པར་བྱས་ན་འདོམས་རུང་བའང་གསུངས་སོ།། །།