ཐོབ་པ་མི་ཉམས་པར་བསྲུང་བའི་ཚུལ།
གསུམ་པ་ལ། བསྟན་བཤད་གཉིས་ལས། དང་པོ་ནི།
བར་དུ་ཐོབ་པ་མི་ཉམས་བསྲུང་བ་ལ།།
དེ་ལྟར་ཐོབ་པ་ཙམ་གྱིས་མི་ཆོག་གི་བར་དུ་ཐོབ་ཟིན་པ་དེ་ཉིད་མི་ཉམས་པར་བསྲུང་དགོས་ཏེ།མ་བསྲུངས་ན་ཉེས་དམིགས་དང་བསྲུངས་ན་ཕན་ཡོན་ཆེན་པོ་དང་ལྡན་པའི་ཕྱིར།དགེ་སློང་ལ་རབ་ཏུ་གཅེས་པའི་མདོ་ལས།
ལ་ལའི་ཚུལ་ཁྲིམས་བདེ་བ་སྟེ། །ལ་ལའི་ཚུལ་ཁྲིམས་སྡུག་བསྔལ་ཡིན།།
ཚུལ་ཁྲིམས་ལྡན་པ་བདེ་བ་སྟེ། །ཚུལ་ཁྲིམས་འཆལ་བ་སྡུག་བསྔལ་ཡིན། །ཞེས་གསུངས་པ་དེས་ན།བསྲུང་བའི་ཐབས་སུ་དགག་སྒྲུབ་ཀྱི་བསླབ་བྱ་གཉིས་ཤེས་ནས་སྤང་བླང་ཚུལ་བཞིན་དུ་བྱ་དགོས་པས།དང་པོ་དགག་ཕྱོགས་སོ་སོའི་བསླབ་པའི་རྣམ་གྲངས་བཤད་པ་ལ་ཞེས་པའོ།།
གཉིས་པ་རྒྱས་པར་བཤད་པ་ལ་གཉིས་ཏེ། བསྲུང་བྱའི་རྣམ་གྲངས་བཤད་པ་དང༌། སྡོམ་པ་སྐྱེ་བའི་རྟེན་བཤད་པའོ། ། དང་པོ་ལ་ལྔ་ལས། དང་པོ། སྐྱབས་འགྲོའི་བསླབ་བྱ་ནི།
བསླབ་བྱ་སྐྱབས་འགྲོ་ཐུན་མོང་མིན་གསུམ་ནི།།
སྐྱབས་གཞན་མི་འཚོལ་སེམས་ཅན་འཚེ་བ་སྤང༌།།
མུ་སྟེགས་མི་འགྲོགས་སོ་སོར་གུས་སྐྱེད་དོ།།
སྲོག་དང་བྱ་དགར་དཀོན་མཆོག་གསུམ་མི་སྤང༌།།
དགོས་གལ་ཆེ་ཡང་ཐབས་གཞན་མི་འཚོལ་ཞིང༌།།
དུས་མཆོད་མི་བཅག་རང་གཞན་སྐྱབས་འགྲོར་འགོད།།
གར་འགྲོའི་ཕྱོགས་ཀྱི་སངས་རྒྱས་ལ་ཕྱག་འཚལ།།
ལྔ་རྣམས་ཐུན་མོང་བསླབ་བྱར་ཇོ་བོ་བཞེད།།
མཆོག་གསུམ་ལ་སྐྱབས་སུ་འགྲོ་བའི་གང་ཟག་གིས་ཐུན་མོང་མིན་པའི་བསླབ་བྱ་གསུམ་ནི་རིམ་པ་བཞིན་སྟོན་པ་སངས་རྒྱས་ལས་སྐྱབས་གནས་གཞན་འཇིག་རྟེན་པའི་ལྷ་སོགས་ལ་རེ་ལྟོས་བཀལ་ནས་སྐྱབས་མི་འཚོལ་བ་དང༌།སེམས་ཅན་ལ་གནོད་པའི་སེམས་ཀྱིས་འཚེ་བ་སྤང་བ་དང༌།གྲོགས་མུ་སྟེགས་ཅན་ནམ་དེའི་ཕྱོགས་དང་མཐུན་པ་ལ་མི་འགྲོགས་པ་སྟེ་དགག་བྱ་གསུམ་ནི་མྱང་འདས་ལས།
གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ།།
ནམ་དུའང་ལྷ་ནི་གཞན་དག་ལ། །སྐྱབས་སུ་འགྲོ་བ་མ་ཡིན་ནོ།།
དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གནོད་པའི་སེམས་དང་བྲལ།།
དགེ་འདུན་ལ་ཡང་སྐྱབས་འགྲོ་བ། །མུ་སྟེགས་ཅན་དང་འགྲོགས་མི་བྱ། །ཞེས་དང༌།
སངས་རྒྱས་ཀྱི་སྐུའི་རྟེན་དང་སཱཙྪ་ཆག་དུམ་ཙམ་དང༌།ཆོས་ཀྱི་རྟེན་ཡིག་འབྲུ་གཅིག་ཙམ་དང༌།དགེ་འདུན་གྱི་གཟུགས་བརྙན་ལྷན་པ་སེར་པོ་བཏབ་པ་ཡན་ཆད་ལ་སོ་སོར་དཀོན་མཆོག་དེ་དང་དེའི་འདུ་ཤེས་བཞག་ནས་གུས་པ་སྐྱེད་པར་བྱེད་དེ།དེ་རྣམས་ནི་བསྒྲུབ་པའི་བསླབ་བྱའོ། །གཞན་ཡང་གནོད་པ་སྲོག་གི་ཕྱིར་དང༌།བྱ་དགའ་རྒྱལ་སྲིད་ལ་སོགས་པའི་ཕྱིར་ཡང་དཀོན་མཆོག་གསུམ་མི་སྤང་བ་དང༌།དགོས་གལ་ཇི་ལྟར་ཆེ་ཡང་དཀོན་མཆོག་ལ་བློ་གཏོད་པ་ལས་དེས་མི་སྐྱོབ་སྙམ་དུ་འཇིག་རྟེན་པའི་ཐབས་གཞན་མི་འཚོལ་ཞིང༌།རྟག་ཏུ་ཡོན་ཏན་དྲན་པས་དུས་ཀྱི་མཆོད་པ་མི་བཅག་པ་དང༌།ཕན་ཡོན་ཤེས་པས་རང་སྐྱབས་སུ་འགྲོ་ཞིང་གཞན་སྐྱབས་འགྲོར་འགོད་པ་དང༌།གར་འགྲོ་བའི་ཕྱོགས་ཀྱི་སངས་རྒྱས་དང་དེའི་སྐུ་གཟུགས་སོགས་ལ་ཕྱག་འཚལ་བ་དང་ལྔ་པོ་རྣམས་ནི་ཐུན་མོང་གི་བསླབ་བྱ་ཡིན་པར་ཇོ་བོ་རྗེས་བཞེད་པ་ཡིན་ནོ།།
གཉིས་པ་བསྙེན་གནས་ཀྱི་བསླབ་བྱ་ནི།
རྩ་བཞི་སྤོང་བ་ཚུལ་ཁྲིམས་ཡན་ལག་བཞི།།
ཆང་སྤོང་བག་ཡོད་ཡན་ལག་མལ་ཆེ་མཐོ།།
གར་ཕྲེང་ལ་སོགས་ཕྱི་དྲོའི་ཁ་ཟས་གསུམ།།
བརྟུལ་ཞུགས་ཡན་ལག་བསྙེན་གནས་སྡོམ་པ་ཡིན།།
ཡན་ལག་འདི་བརྒྱད་གཏན་དུ་མ་ཡིན་པས། །ཡོན་ཏན་རྟེན་མིན་དེ་ཕྱིར་སོ་ཐར་ནི།།
མཚན་ཉིད་ལྡན་པ་རིགས་བདུན་ཁོ་ན་ཡིན། །འདི་བརྒྱད་ཇི་སྲིད་འཚོ་བའི་བར་བསྲུངས་ན།།
གོ་མིའི་དགེ་བསྙེན་ཡིན་ཀྱང་ཡོད་སྨྲའི་མིན།།
གནས་བརྟན་སྡེ་པའི་ལུགས་སུ་དབྱིག་གཉེན་བཞེད།།
དུས་ཁྲིམས་ཀྱི་བསྲུང་བྱ་སྟེ།དེ་ནི་མཛོད་ལས།
ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ།།
བཞི་གཅིག་དེ་བཞིན་གསུམ་རིམ་བཞིན། །ཞེས་པ་ལྟར་མི་ཚངས་སྤྱོད་པ་སོགས་རྩ་བ་བཞི་ཕྱོགས་མཐུན་དང་བཅས་པ་སྤོང་བ་ཚུལ་ཁྲིམས་བརྟན་པར་བྱེད་པའི་ཡན་ལག་བཞི་དང༌།དྲན་པ་ཉེར་བཞག་ལས།
བདག་ལ་འདི་ཡིས་མི་གནོད་ཅེས། །བློ་ལྡན་ཆང་ལ་ཡིད་མི་རྟོན།།
མྱོང་ཚེ་བསིལ་ཡང་རྣམ་སྨིན་ཚ། །ཆང་གིས་དམྱལ་བར་འགྲོ་བར་བྱེད། །ཅེས་པ་ལྟར་ཉེས་དམིགས་ཤེས་ནས་ཆང་གི་བཏུང་བ་སྤོང་བ་བག་ཡོད་གོང་འཕེལ་དུ་བྱེད་པའི་ཡན་ལག་དང༌།མལ་ཆེ་མཐོ་དང་གར་ཕྲེང་ལ་སོགས་པ་དང༌།དུས་མིན་པ་ཕྱི་དྲོའི་ཁ་ཟས་ཏེ་གསུམ་སྤོང་བ་བརྟུལ་ཞུགས་དག་པར་བྱེད་པའི་ཡན་ལག་སྟེ་བརྒྱད་པོ་སྲུང་བ་ནི་བསྙེན་གནས་ཀྱི་སྡོམ་པ་ཡིན་ཞིང༌།ཡན་ལག་འདི་བརྒྱད་པོ་གཏན་དུ་བ་མ་ཡིན་པས་སྡོམ་པ་གོང་མ་རྣམས་ཀྱི་ཡོན་ཏན་གྱི་རྟེན་དུ་རིགས་པ་མིན་པ་དེའི་ཕྱིར་ན་གོང་མའི་ཡོན་ཏན་གྱི་རྟེན་དུ་གྱུར་པའི་སོ་ཐར་ནི།མཚན་ཉིད་དང་ལྡན་པར་རིགས་བདུན་ཁོ་ན་ཡིན་པར་ངེས་ཏེ།ལམ་སྒྲོན་ལས།
སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ།།
བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཞེས་གསུངས་པས་སོ། །གལ་ཏེ་ཡན་ལག་འདི་བརྒྱད་པོ་ཇི་སྲིད་འཚོ་བ་ཡི་བར་དུ་ཁས་བླངས་ནས་བསྲུངས་ན།སློབ་དཔོན་ཙནྡྲ་པས་འདི་ལྟར་བླངས་པས་ཙནྡྲ་གོ་མི་ཞེས་གྲགས་པ་ལྟར་གོ་མིའི་དགེ་བསྙེན་ཡིན་ཡང་གཞི་ཐམས་ཅད་ཡོད་པར་སྨྲ་བའི་འདུལ་བ་ལས་བཤད་པ་མིན་ནའང༌།འཕགས་པ་གནས་བརྟན་སྡེ་པའི་ལུགས་སུ་སློབ་དཔོན་དབྱིག་གཉེན་གྱིས་བཞེད་དེ།གོ་མིའི་དགེ་བསྙེན་ཞེས་བྱ་བ་འདི་ནི་འཕགས་པ་གནས་བརྟན་པའི་མན་ངག་བརྒྱུད་པ་ལས་ཐོས་ཀྱི་བདེ་བར་གཤེགས་པས་གསུངས་པ་ནི་མ་མཐོང་ངོ་ཞེས་གསུངས་པའི་ཕྱིར།འོན་ཀྱང་ཐེག་ཆེན་གྱི་སྡེ་སྣོད་ལས་གསུངས་ཏེ།རྒྱལ་བུ་སྙིང་རྗེ་ཆེར་སེམས་ཀྱིས་འདི་ལྟར་ཁས་བླངས་པར་དཀོན་བརྩེགས་ལས་བཤད་པའི་ཕྱིར་རོ།།
གསུམ་པ་དགེ་བསྙེན་གྱི་བསླབ་བྱ་བཤད་པ་ནི།
གསོད་རྐུ་རྫུན་སྨྲ་འདོད་པས་ལོག་པར་གཡེམ།།
མྱོས་འགྱུར་སྤོང་རྣམས་དགེ་བསྙེན་སྡོམ་པ་སྟེ།།
གང་འདོད་ཁས་ལེན་གྲངས་ལྟར་སྣ་གཅིག་སྤྱོད།།
སྣ་འགའ་ཕལ་ཆེར་སྤྱོད་དང་ཡོངས་རྫོགས་སྤྱོད།།
གཅིག་གཉིས་གསུམ་དང་ལྔ་སྤོང་དེ་ཡི་སྟེང༌། །མི་ཚངས་སྤྱོད་སྤོང་ཚངས་སྤྱོད་དགེ་བསྙེན་ནོ།།
འདི་དང་གོ་མི་གཉིས་ནི་ཁྱིམ་པ་དང༌། །རབ་བྱུང་གཉིས་ཀ་མིན་ཞེས་མཁས་རྣམས་བཞེད།།
མི་དགེ་ལྷག་དྲུག་ཕྱོགས་མཐུན་སྤང་བྱ་དང༌།།
དགེ་བསྙེན་སྡོམ་ལྡན་རིག་པ་འཛིན་པས་ཀྱང༌།།
རབ་བྱུང་རྟགས་དང་ཆོ་ག་མ་གཏོགས་པ།།
ལྷག་རྣམས་ཉམས་སུ་ལེན་པར་དཔུང་བཟང་བཤད།།
གཏན་ཁྲིམས་ལ་བསླབ་ཚིགས་གསུམ་ལས་དང་པོ་བསྲུང་བྱ་ནི།གསོད་པ་སྟེ་སྲོག་གཅོད་པ་དང༌།རྐུ་བ་སྟེ་མ་བྱིན་པ་ལེན་པ་དང༌།མིི་ཆོས་བླ་མའི་རྫུན་སྨྲ་བ་དང༌།འདོད་པས་ལོག་པར་གཡེམ་པ་སྟེ་རྩ་བ་བཞི་ཡིན་ཞིང༌།འདི་དག་ལ་ཡུལ་གྱི་ཡན་ལག་ཏུ་མི་ཡིན་པ་དགོས་ཏེ།དེ་མ་ཚང་ན་རྩ་བར་གཏོགས་པའི་ཉེས་པ་ཙམ་དུ་ཟད་ཀྱི་རྩ་བ་དངོས་མ་ཡིན་པས་སྡོམ་པ་ཉམས་པར་མི་འགྱུར་ལ།འདིར་མི་ཚངས་སྤྱོད་མི་འཇོག་པར་འདོད་ལོག་འཇོག་པ་ནི་ཁྱིམ་པས་སྲུང་སླ་བ་ལ་སོགས་པའི་ཕྱིར་ཏེ།མཛོད་ལས།
ལོག་གཡེམ་ཤིན་ཏུ་སྨད་ཕྱིར་དང༌། །སླ་ཕྱིར་མི་བྱེད་ཐོབ་ཕྱིར་རོ། །ཞེས་སོ། །དེ་དག་གི་ཡན་ལག་མྱོས་འགྱུར་སྤོང་བ་སྟེ།དེ་མ་སྤོང་ན་བསླབ་པ་གཞན་སྲུང་མི་ནུས་པའི་ཕྱིར་རོ། །བསླབ་གཞི་ལྔ་པོ་དེ་རྣམས་ནི་དགེ་བསྙེན་གྱི་སྡོམ་པ་སྟེ།དེ་ཡང་རང་གིས་གང་སྲུང་འདོད་པ་ལྟར་ཁས་ལེན་པའི་གྲངས་ཇི་ལྟ་བར་སྲོག་གཅོད་ཙམ་སྤོང་བ་ལྟ་བུ་སྣ་གཅིག་སྤྱོད་པ་དང༌།དེའི་སྟེང་མ་བྱིན་ལེན་ཙམ་སྤོང་བ་ལྟ་བུ་སྣ་འགའ་སྤྱོད་པ་དང༌།དེ་གཉིས་ཀྱི་སྟེང་རྫུན་སྤོང་བ་ལྟ་བུ་ཕལ་ཆེར་སྤྱོད་པ་དང༌།དེ་གསུམ་གྱི་སྟེང་དུ་འདོད་ལོག་ཆང་དང་བཅས་པ་སྤོང་བ་ཡོངས་རྫོགས་སྤྱོད་པ་སྟེ།དེ་དག་རིམ་བཞིན་སྤང་བྱ་གཅིག་དང༌།གཉིས་དང༌།གསུམ་དང༌།ལྔ་སྤོང་བའི་རིམ་པའོ། །དེ་ཡང་བྱེ་སྨྲས་དགེ་བསྙེན་ཙམ་དུ་ཁས་བླངས་ནས་སྣ་གཅིག་སོགས་གང་འདོད་སྲུང་བ་ལ་དེ་དག་སྤྱོད་ཅེས་འདོད་ཅིང༌།མདོ་སྡེ་པས།སྣ་གཅིག་སོགས་གང་འདོད་པ་དེ་ཁས་ལེན་པ་ལས།དགེ་བསྙེན་དུ་ཁས་བླངས་ན་ཡོངས་རྫོགས་སུ་འགྲོ་བས།གཞན་མ་བསྲུངས་པའི་ཉེས་པས་ཚུལ་འཆལ་དུ་འགྱུར་ཞེས་འདོད་དོ། །འདི་ཡན་ཆད་ཀྱི་ཁྱིམ་པའི་ཕྱོགས་ཀྱི་བསླབ་བྱ་བསྟན་ལ།བསླབ་གཞི་ལྔ་པོ་དེ་ཡི་སྟེང་མི་ཚངས་སྤྱོད་སྤོང་བ་ནི་ཚངས་སྤྱོད་དགེ་བསྙེན་ཏེ།རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ལ། །ཞེས་སོགས་ཀྱིས་བསྟན་པར་མདོ་སྡེ་པས་འདོད་པ་ཡིན་ནོ། །འདི་དང་གོ་མིའི་དགེ་བསྙེན་གཉིས་ནི་ཆོ་འཕྲུལ་བསྟན་པའི་མདོ་ལས་ཀྱང་གསུངས་ཏེ།ཇི་སྐད་དུ།
རབ་བྱུང་ཡོན་ཏན་དུ་མ་ལྡན་པ་ཞེས།།
དེ་བཞིན་གཤེགས་པ་རྣམས་ཀྱིས་བསྔགས་མོད་ཀྱི།།
སེམས་ཅན་ཀུན་ལ་སྙིང་རྗེར་གྱུར་པས་ན།།
འགྲོ་ལ་ཕན་ཕྱིར་བདག་གིས་རྒྱལ་སྲིད་སྒྲུབ།།
ཇི་སྲིད་འཚོའི་བར་ཚངས་པར་སྤྱོད་བྱེད་ཅིང༌།།
གསོ་སྦྱོང་ཡན་ལག་བརྒྱད་པའང་བླང་བར་བགྱི། །ཞེས་གསུངས་པའི་ཕྱིར།འདི་གཉིས་ཀྱིས་ཁྱིམ་ཐབས་སྤངས་པས་འདོད་པ་འཁྲིག་བཅས་ཀྱི་ཁྱིམ་པ་དང༌།ངུར་སྨྲིག་སོགས་ཀྱི་རྟགས་མ་བླངས་པས་རབ་བྱུང་གཉིས་ཀ་མིན་ནོ་ཞེས་མཁས་པ་རྣམས་བཞེད་དོ། །མི་དགེ་བ་བཅུ་ལས།ལུས་ཀྱི་གསུམ་དང༌།ངག་གི་རྫུན་དོར་བའི་ལྷག་མ་གསུམ་དང༌།ཡིད་ཀྱི་གསུམ་སྟེ་དྲུག་དང༌།རྩ་བ་བཞིའི་ཕྱོགས་སུ་མཐུན་པའི་དུད་འགྲོ་གསོད་པ་ལ་སོགས་པའི་སྤང་བྱ་རྣམས་ནི་སྡོམ་པ་མི་གཏོང་ཡང་འགྱོད་སྡོམ་དང་བཅས་པས་ཕྱིར་བཅོས་པར་བྱ་དགོས་པའི་བསླབ་བྱ་ཡིན་ནོ། །དེར་མ་ཟད་དགེ་བསྙེན་གྱི་སྡོམ་ལྡན་སྔགས་ལ་ཞུགས་པའི་རིག་པ་འཛིན་པ་དེས་ཀྱང་ངུར་སྨྲིག་བགོ་བ་དང༌།ལྷུང་བཟེད་འཆང་བ་སོགས་རབ་བྱུང་གི་རྟགས་རྣམས་དང༌།ལས་ཀྱི་ཆོ་ག་དང་བཅས་རྐྱང་འགའ་ཞིག་མ་གཏོགས་པའི་ལྷག་མ་རྣམས་འདུལ་བ་ལས་ཇི་ལྟར་བྱུང་བ་བཞིན་དུ་ཉམས་སུ་ལེན་དགོས་པར་དཔུང་བཟང་ལས།
རྒྱལ་བ་ངས་གསུངས་སོ་སོ་ཐར་པ་ཡི།།ཚུལ་ཁྲིམས་རྣམ་དག་འདུལ་བ་མ་ལུས་ལས།།
སྔགས་པ་ཁྱིམ་པས་རྟགས་དང་ཆོ་ག་སྤང༌།།ལྷག་མ་རྣམས་ནི་ཉམས་སུ་བླང་བར་བྱ།།
ཞེས་བཤད་པས་སྔགས་པ་རབ་བྱུང་གིས་ལྟ་སྨོས་ཀྱང་ཅི་དགོས་སོ།།
བཞི་པ་དགེ་ཚུལ་གྱི་བསླབ་བྱ་བཤད་པ་ལ། དངོས་དང་ཞར་བྱུང་གཉིས་ལས། དང་པོ་ནི།
སྲོག་གཅོད་རྐུ་དང་མི་ཚངས་སྤྱོད་དང་རྫུན།།
ཆང་འཐུང་གར་སོགས་ཕྲེང་སོགས་མལ་ཆེ་མཐོ།།
ཕྱི་དྲོའི་ཁ་ཟས་གསེར་དངུལ་སྤོང་བ་སྟེ།།
ཞུམ་པ་སྤོང་ཕྱིར་རགས་པ་བཅུར་དྲིལ་གསུངས།།
ཆོས་གོས་ལྷུང་བཟེད་འཆང་བ་འབྲལ་བ་དང༌།།
ས་རྐོ་རིན་ཆེན་རེག་དང་མེ་ལ་རེག།
བཏང་ནས་ཟ་དང་ཤིང་འཛེགས་ཤིང་གཅོད་དང༌།།
བྱིན་ལེན་རྩྭ་སྔོན་ཁྲོད་དུ་མི་གཙང་འདོར།།
གསོག་འཇོག་ཟ་དང་ས་བོན་འཇོམས་པ་རྣམས།།
གནང་བའི་ཉེས་མེད་བཅུ་གསུམ་མ་གཏོགས་པ།།
དགེ་སློང་ཇི་བཞིན་སྤང་བླང་མཐའ་དག་གཅིག།
འཆང་བའི་ཟླར་བསྡུ་གོས་རྒྱུ་ཟླ་བར་འཇོག།
འབྲལ་བའི་ཟླར་བསྡུ་དགོན་པའི་འབྲལ་སྤང་བྱེད།།
གསོག་འཇོག་ཟླར་བསྡུ་གསོག་འཇོག་བྱེད་པའང་གནང༌།།
ཁྱིམ་རྟགས་སྤངས་ཉམས་རབ་བྱུང་རྟགས་ལེན་ཉམས།།
བརྙས་པས་མཁན་པོར་ཉམས་ཏེ་ཉམས་པ་གསུམ།།
སྤངས་པ་དགེ་ཚུལ་སྡོམ་པའི་བསླབ་བྱའོ།།
དེ་ནས་རབ་ཏུ་བྱུང་བའི་ཕྱོགས་སུ་གཏོགས་པའི་བསླབ་བྱ་ཚིགས་ཕྱི་མ་གཉིས་ཀྱི་དང་པོ་དགེ་ཚུལ་གྱི་བསྲུང་བྱ་ནི།མིའམ་མིར་ཆགས་པའི་སྲོག་གཅོད་པ་དང༌།རིན་ཐང་ཚང་བའི་དངོས་པོ་རྐུ་བ་དང༌།ལམ་གསུམ་གང་རུང་ལ་བརྟེན་ནས་མི་ཚངས་པར་སྤྱོད་པ་དང༌།མིའི་ཆོས་བླ་མའི་རྫུན་སྨྲ་བ་སྟེ་བཞི་པོ་ནི་བསྲུངས་ན་ཚུལ་ཁྲིམས་སུ་འགྱུར་ཞིང༌།མ་བསྲུངས་ན་ཁྲིམས་འཆལ་དུ་འགྱུར་བས་རྩ་བ་ཞེས་བྱ་སྟེ།དེ་ཡང་འཆབ་མེད་གསོར་རུང་དང༌།འཆབ་བཅས་གསོར་མི་རུང་བའང་དགེ་སློང་དང་འདྲ་སྟེ།སུམ་བརྒྱ་པ་ལས།
མི་གསོད་ལ་སོགས་བཞི་རྣམས་ཀྱིས། །དགེ་ཚུལ་ལས་ནི་ཉམས་གྱུར་ན།།
དགེ་སློང་བཞིན་དུ་དགེ་ཚུལ་ལའང༌། །ཕྱི་ནས་སྡོམ་སྐྱེའི་སྐལ་བ་མེད། །ཅེས་སོ། །མྱོས་འགྱུར་གྱི་ཆང་འཐུང་བ་དང༌།རྒོད་བག་གིས་རང་དགར་གླུ་གར་སོགས་རྩེད་མོའི་རིགས་བྱེད་གསུམ་དང༌།འཕྱོར་སྒེག་གིས་རྒྱན་ཕྲེང་འདོགས་པ་སོགས་རྒྱན་གྱི་རིགས་བྱེད་གསུམ་དང༌།རྒྱུ་རིན་ཐང་ཅན་གྱི་མལ་ཆེན་པོ་དང༌།རིན་ཐང་ཆུང་ཡང་ཁྲུ་གང་ལས་ལྷག་པའི་མཐོ་བ་ལ་སྐབས་མ་ཡིན་པར་འདུག་པ་དང༌།རང་གླིང་གི་ཉི་མ་ཕྱེད་ཡོལ་ནས་ཕྱི་དྲོའི་དུས་སུ་ཁ་ཟས་ཟ་བ་དང༌།རེག་པ་ཙམ་རུང་ཡང་ཆགས་སྲེད་ཀྱིས་གསེར་དངུལ་བླངས་ཏེ་ཕུགས་ནོར་དུ་འཆང་བ་སྤོང་བ་སྟེ།དྲུག་པོ་ལ་ཡན་ལག་ཅེས་བྱ་སྟེ་རྩ་བ་སྲུང་བའི་ཐབས་ཡིན་པས་སོ། །དེ་ཡང་ཆང་ནི་བག་ཡོད་ཀྱི་ཡན་ལག་དང༌།གཞན་ལྔ་བརྟུལ་ཞུགས་ཀྱི་ཡན་ལག་སྟེ།བྲི་ཛའི་བུ་བཞིན་དུ་བསླབ་གཞི་མང་པོ་ཐོས་པས་སེམས་ཞུམ་སྟེ་སྡོམ་པ་ལེན་པ་ལས་ལྡོག་པ་སྤོང་བའི་ཕྱིར་དུ།རགས་པ་བཅུ་པོ་འདིར་དྲིལ་ནས་གསུངས་པ་ཡིན་ལ།དེ་རྣམས་ཆར་གཏོགས་དང་བཅས་པའི་སྒོ་ནས་དབྱེ་ན།རྩ་བཞི་གསོད་གསུམ་གཞི་མེད་ནས། །སུན་འབྱིན་བར་ལྔ་ཤེས་བཞིན་བཤེས། །འཕྱ་དང་ཟས་ཅུང་ལྷག་མས་སྐུར། །ཉེར་འཇོག་འབྲས་ཆེན་འགེབས་དང་ཆང༌། །གར་གསུམ་ཕྲེང་གསུམ་མལ་ཆེ་མཐོ། །དུས་མིན་རིན་ཆེན་བར་མ་གསུམ། །དེ་ལྟར་སུམ་ཅུ་རྩ་གསུམ་མོ། །ཞེས་པ་ལྟར་རྩ་བ་བཞི་དང༌།སྲོག་གཅོད་ཀྱི་ཕམ་འདྲའི་ཆར་གཏོགས་དུད་འགྲོ་གསོད་པ།སྲོག་ཆགས་དང་བཅས་པའི་རྩྭ་དང་ཆུར་འདེབས་པ།སྲོག་ཆགས་དང་བཅས་པའི་ཆུར་སྤྱོད་པ་སྟེ་གསོད་པ་གསུམ།རྫུན་གྱི་ཆར་གཏོགས་གཞི་མེད་པ་དང༌།བག་ཙམ་གྱིས་ཕམ་པའི་སྐུར་འདེབས།དགེ་འདུན་དབྱེན།དེའི་རྗེས་ཕྱོགས།ཁྱིམ་སུན་འབྱིན་པ།ཤེས་བཞིན་དུ་རྫུན་སྨྲ།བཤེས་ངོར་འཕྱ་བ།ཞལ་ཏ་བར་འཕྱ་བ།ཟས་ཅུང་ཟད་ཀྱི་ཕྱིར་ཆོས་སྟོན་ཞེས་སྐུར་པ་འདེབས་པ།ལྷག་མའི་སྐུར་འདེབས།བསླབ་པ་ཁྱད་གསོད།ལྷག་པོ་ལེན་ཕྱིར་འབྲས་ཆེན་འགེབས་པ་སྟེ་བཅུ་གཉིས་དང༌།ཆང་འཐུང་བ་དང༌།གླུ་དང༌།གར་དང༌།རོལ་མོ་སྟེ་གསུམ་དང༌།ཕྲེང་བ་ལ་སོགས་པའི་རྒྱན་དང༌།སྤོས་ཉུག་པ་དང༌།ཁ་དོག་འཆང་བ་སྟེ་གསུམ་སོ་སོར་བགྲང་བས་དྲུག་དང༌།མལ་ཆེན་པོ་དང་མཐོ་བ་དང༌།ཕྱི་དྲོའི་ཁ་ཟས་དང༌།གསེར་དངུལ་ལེན་པ་རྣམས་བསྣན་པ་སུམ་ཅུ་དང༌།འཆད་འགྱུར་གྱི་རྣམ་པ་ཁྱིམ་རྟགས་སྤོང་ཉམས།རབ་བྱུང་རྟགས་ལེན་ཉམས།བརྙེས་སེམས་ཀྱིས་མཁན་པོར་ཉམས་སྟེ།མཆན།གསུམ་དང་བཅས་པས་བླངས་འདས་སུམ་ཅུ་རྩ་གསུམ་པོ་ཡིན་ལ།ལུང་རིགས་གཏེར་མཛོད་དུ་ནི་སྲོག་གཅོད་གསུམ་དང༌།རྫུན་ལས་འབྲས་ཆེན་འགེབས་པ་དོར་བའི་ལྷག་མ་བཅུ་གཅིག་སྟེ།བཅུ་བཞི་པོ་སྔར་ལྟར་ལས།དེའི་སྟེང་དུ་མ་བྱིན་ལེན་གྱི་ཆར་གཏོགས་ཁང་པ།ཁང་ཆེན།རིན་ཆེན་ཁབ་རལ་བྱེད་པ་གསུམ་དང༌།མི་ཚངས་སྤྱོད་ཀྱི་ཆར་གཏོགས་དགེ་འདུན་གྱིས་སྤོང་བའི་མཚན་མི་མཐུན་པ་དང་ལྷན་ཅིག་ཉལ་བ།རྩ་བ་བཞི་ཀའི་ཆར་གཏོགས་གསོ་སྦྱོང༌།དབྱར་གནས།དགག་དབྱེ་རྣམས་མི་བྱེད་པ་དང༌།གནས་སློབ་ལ་མི་བསྟེན་པ་རྣམས་ཏེ་རྩ་བཞིའི་ཆར་གཏོགས་ཉེར་གཉིས་སུ་བཞེད་དོ། །དེ་ནས་དགེ་སློང་གི་སྤང་བྱ་རྣམས་ལས་བཅས་རྐྱང་འགའ་ཞིག་བག་ཡངས་སུ་འཇོག་རུང་ལ།དེ་ལས་གཞན་ཐམས་ཅད་སྲུང་དགོས་པའི་ཚུལ་བསྟན་པ་ནི།ཆོས་གོས་ལྷག་པོ་འཆང་བ་དང༌།ལྷུང་བཟེད་ཟུང་འཆང་བ་དང༌།ཆོས་གོས་དང་བྲལ་བ་དང༌།ས་རྐོ་བ་དང༌།རིན་ཆེན་གྱི་རིགས་ལ་རེག་པ་དང༌།མེ་ལ་རེག་པ་དང༌།བློས་བཏང་ནས་ཡང་ཟ་བ་དང༌།ཤིང་ལ་མི་གང་ལས་མཐོར་འཛེགས་པ་དང༌།ཤིང་སོགས་སྐྱེ་བ་གཅོད་པ་དང༌།བྱིན་ལེན་མ་བྱས་པར་ཟ་བ་དང༌།རྩྭ་སྔོན་གྱི་ཁྲོད་དུ་མི་གཙང་བ་འདོར་བ་དང༌།གསོག་འཇོག་ཏུ་སོང་བ་ཟ་བ་དང༌།རུང་བ་མ་བྱས་པར་ས་བོན་འཇོམས་པ་རྣམས་དགེ་ཚུལ་རྣམས་ལ་རྗེས་སུ་གནང་བའི་ཉེས་མེད་བཅུ་གསུམ་པོ་འདི།བསྟན་བཅོས་བྱེ་བྲག་བཤད་པ་ལས་གསུངས་ལ།དེའི་སྟེང་དུ་བོད་ཀྱི་འདུལ་འཛིན་རྣམས་ཀྱིས་རུང་མཐུན་སྡུར་བ་ལ།
ཟླ་འཇོག་གསོག་འཇོག་དགོན་པ་འབྲལ། །མ་སྨྲས་འདུན་བསྒྱུར་མ་རྫོགས་ཉལ།།ཞེས་པ་ལྟར་དྲུག་བསྣན་ནས་བཅུ་དགུར་འདོད་པས་ཉེས་མེད་དེ་རྣམས་མ་གཏོགས་པ་དགེ་སློང་ཇི་ལྟ་བ་བཞིན་དུ་སྤང་བླང་མཐའ་དག་ཐུན་མོང་བ་ཡིན་པས་གཅིག་ཏུ་འགྱུར་ཏེ།དེ་ཡང་དགེ་ཚུལ་གྱི་ལྟུང་བ་ཐམས་ཅད་ཉེས་བྱས་ཁོ་ནར་འདུ་བས།རྩ་བ་བཞི་ནི་སྡོམ་པའི་ཉམས་རྒྱུ་ཡིན་པས་ཕམ་འདྲའི་ཉེས་བྱས།དེ་ལས་གཞན་པའི་བླངས་འདས་རྣམས་ཚུལ་བཞིན་དུ་བཤགས་པར་བྱ་དགོས་པས་བཤགས་བྱའི་ཉེས་བྱས།དེ་གཉིས་མ་ཡིན་པའི་དགེ་སློང་གི་སྤང་བྱ་རྣམས་ཡིད་ཀྱིས་བསྡམ་པར་བྱ་དགོས་པས་བསྡམ་བྱའི་ཉེས་བྱས་ཡིན་པས་སོ། །ཡང་ལུང་ཞུ་བ་ཁ་ཆེ་ལས་ཉེས་མེད་དུ་དངོས་སུ་བཤད་ཅེས་མཁས་མཆོག་བུ་སྟོན་རིན་པོ་ཆེས་གསུངས་པ་ལྟར་འདིར་བཀོད་པའི་ཟླར་བསྡུ་གསུམ་ནི།གོས་ལྷག་པོ་འཆང་བའི་ཟླར་བསྡུ་བ་གོས་རྒྱུ་ཟླ་བ་ལས་ལྷག་པར་འཇོག་པ་དང༌།ཆོས་གོས་དང་འབྲལ་བའི་ཟླར་བསྡུ་བ་འཇིགས་པ་དང་བྲལ་ཀྱང་དགོན་པའི་གནས་སུ་འབྲལ་སྤོང་བྱེད་པ་དང༌།གསོག་འཇོག་ཟ་བའི་ཟླར་བསྡུ་བ་འཚོ་བ་ཙམ་གྱི་ཕྱིར་གསོག་འཇོག་བྱེད་པའང་གནང་བ་ཡིན་པས་ཉེས་མེད་དུ་འཇོག་པ་ནི།འདི་ནི་སྔར་བཤད་པའི་དྲུག་པོའི་སྔ་མ་གསུམ་དང་དོན་གཅིག་གོ།དགེ་ཚུལ་གྱིས་བར་མའི་དུས་སུ་ཁས་བླངས་པའི་སྤང་བྱ་གསུམ་ནི།གོས་དཀར་པོ་གཡོགས་མེད་པ་གྱོན་པ་སོགས་ཁྱིམ་པའི་རྟགས་སྤོང་བ་ལས་ཉམས་པ་དང༌།ཆོས་གོས་སོགས་རབ་བྱུང་གི་རྟགས་ལེན་པ་ལས་ཉམས་པ་དང༌།བརྙས་པའི་སེམས་ཀྱིས་མཁན་པོར་གསོལ་བ་འདེབས་པ་ལས་ཉམས་པ་སྟེ་ཉམས་པ་གསུམ་མོ། །གལ་ཏེ་འདི་གསུམ་བར་མ་ཙམ་དང་ཁྱད་པར་ཅི་ཡོད་ཅེ་ན།མཛོད་ལས།
བར་མ་ཤུགས་ཀུན་སློང་ཆད་པ།ཁས་བླངས་ལས་འདས་པ།བྱ་བ་ཆད་པ་དང༌།དོན་ཡུལ་བ་མེད།ཚེ་ཤི་བ།རྩ་བ་ལོག་ལྟས་ཆད་པ་ལས།ཞེས་པ་ལྟར་བར་མའི་གཏོང་རྒྱུ་དང༌།དགེ་ཚུལ་གྱི་བཤགས་བྱ་ཡིན་པའི་ཁྱད་པར་ཡོད་དོ། །དེ་ལྟར་བཤད་པའི་སྤང་བར་བྱ་བ་རྣམས་ཚུལ་བཞིན་སྲུང་བ་དགེ་ཚུལ་གྱི་སྡོམ་པ་དང་ལྡན་པའི་བསླབ་པར་བྱ་བའོ།།
གཉིས་པ་ཞར་བྱུང་དགེ་སློབ་མའི་བསླབ་བྱ་བཤད་པ་ནི།
དགེ་སློབ་མ་ནི་དགེ་ཚུལ་ཐོབ་པའི་སྟེང༌།།
གཅིག་འགྲོ་ཆུར་རྐྱལ་སྐྱེས་རེག་ལྷན་ཅིག་འདུག།
སྨྱན་བྱ་ཉེས་འཆབ་རྩ་བའི་ཆོས་དྲུག་གོ།
གསེར་བཟུང་འདོམས་སྤུ་འདྲེག་དང་ས་རྐོ་སྤོང༌།།
བྱིན་ལེན་མེད་དང་གསོག་འཇོག་བྱས་མི་ཟ།།
རྩྭ་སྔོན་མི་གཅོད་འདི་རྣམས་རྗེས་མཐུན་དྲུག།
དགེ་ཚུལ་མའི་སྡོམ་པ་ཐོབ་པའི་སྟེང་གཅིག་པུར་ལམ་དུ་འགྲོ་བ་དང༌།ཆུར་རྐྱལ་བ་དང༌།སྐྱེས་པ་ལ་རེག་པ་དང༌།དེ་དང་ལྷན་ཅིག་འདུག་པ་དང༌།ཕོ་མོ་ཕན་ཚུན་སྨྱན་བྱས་པ་དང༌།ཟླ་མོའི་ཉེས་པ་འཆབ་པ་སྤང་བ་སྟེ་རྩ་བའི་ཆོས་དྲུག་གོ།གསེར་ལ་སོགས་པའི་རིན་པོ་ཆེ་བཟུང་བ་དང༌།འདོམས་ཀྱི་སྤུ་འབྲེག་པ་དང༌།ས་རྐོ་བ་རྣམས་སྤོང་བ་དང༌།བྱིན་ལེན་མེད་པར་ཟ་བ་སྤོང་བ་དང༌།གསོག་འཇོག་བྱས་ཏེ་མི་ཟ་བ་དང༌།རྩྭ་སྔོན་མི་གཅོད་པ་སྟེ་འདི་རྣམས་རྗེས་མཐུན་གྱི་ཆོས་དྲུག་ཡིན་ནོ།།
དེ་ནས་ལྔ་པ་ཚིགས་ཕྱི་མ་བསྙེན་རྫོགས་ཀྱི་བསླབ་བྱ་བཤད་པ་ལ་གཉིས་ལས། དང་པོ་ནི།
སྲུང་བྱེད་ཀྱི་ཐབས་ཏེ་བསྙེན་པར་རྫོགས་ནས་ལོ་བཅུ་བར་མ་ཆད་དུ་རང་ཉིད་བརྟན་མཁས་ཀྱི་ཡོན་ཏན་གཉིས་དང་ལྡན་པ་མ་བྱུང་གི་བར་དུ་མཁན་པོའམ།གནས་ཀྱི་སློབ་དཔོན་མཚན་ཉིད་དང་ལྡན་པ་ལ་བརྟེན་ནས་བླང་དོར་གྱི་གནས་མ་ནོར་བར་སྟོན་པའི་གདམས་ངག་ནོད་པ་དང༌།དམིགས་བསལ་མ་གཏོགས་པ་བྱ་བ་ཐམས་ཅད་དེ་ལ་ཞུ་བའི་སྒོ་ནས་རང་ཉམས་སུ་མི་གཏོང་བ་སྟེ་གང་ཟག་གཞན་ལ་བརྟེན་ནས་དང༌།བསླབ་པ་ལ་སྤྲོ་བའི་བརྩོན་འགྲུས་ཀྱིས་འདུལ་བའི་སྡེ་སྣོད་ལ་ཐོས་བསམ་བྱ་ཞིང་བླང་དོར་གྱི་སྒོ་ནས་ཉམས་སུ་ལེན་པ་དང༌།འཇུག་ལྡོག་གི་གནས་ལ་གཟོབ་པ་ལྷུར་ལེན་པའི་བག་ཡོད་པ་དང༌།བསླབ་པའི་གནས་མི་བརྗེད་པའི་དྲན་པ་དང༌།རང་རྒྱུད་ལ་ཉེས་པ་བྱུང་མ་བྱུང་རྟོག་པའི་ཤེས་བཞིན་ལ་སོགས་པའི་སྒོ་ནས་རང་རྒྱུད་ཀྱི་གཉེན་པོ་ལ་བརྟེན་ནས་སྲུང་བའི་ཐབས་ཏེ་ཤིན་ཏུ་གལ་ཆེ་བས་འབད་དགོས་སོ།།
གཉིས་པ་བསྲུང་བྱའི་རྣམ་གྲངས་ལ་སྤང་སྒྲུབ་ཀྱི་བསླབ་བྱ་གཉིས། རུང་མཐུན་བསྡུས་ཏེ་བསྟན་པ་དང་གསུམ་གྱི། དང་པོ་སྤང་བའི་བསླབ་བྱ་ལ། དངོས་དང་ཞར་བྱུང་གཉིས་ལས། དང་པོ་ནི།
དགེ་སློང་ཁྲིམས་ལ་ཉིས་བརྒྱ་ལྔ་བཅུ་གསུམ། །སྡོམ་པའི་རྩ་བ་ཕམ་པ་བཞི་ཞེས་པ།།
དགེ་སློང་གི་ཁྲིམས་ལ་ཕམ་པའི་སྡེ་དང༌།ལྷག་མའི་སྡེ་དང༌།ལྟུང་བྱེད་ཀྱི་སྡེ་དང༌།སོར་བཤགས་ཀྱི་སྡེ་དང༌།ཉེས་བྱས་ཀྱི་སྡེ་ལྔ་པོ་ལ་ནང་གསེས་ཀྱི་དབྱེ་བ་ཉིས་བརྒྱ་ལྔ་བཅུ་རྩ་གསུམ་ཡོད་ལ།དེ་ཡང་སྤྱིར་དགེ་སློང་གི་སྤང་བའི་བསླབ་བྱ་ཐམས་ཅད་སྡེ་ལྔའི་ཁོངས་སུ་འདུ་སྟེ།སྦོམ་པོ་རྣམས་ནི་ཕམ་ལྷག་གང་རུང་དང༌།སྦྱོར་བའི་ཉེས་བྱས་རྣམས་རང་རང་གི་སྡེ་ཚན་དུ་གཏོགས་ལ།གཞི་བཅུ་བདུན་ནས་བཤད་པའི་ཉེས་བྱས་རྣམས་ཀྱང་ཉེས་བྱས་ཀྱི་སྡེར་གཏོགས་པས་སོ། །དེས་ན་ཉེས་བྱས་ཡིན་ན་སོར་མདོའི་སྡོམ་གྱིས་བསྡུས་པའི་ཉེས་བྱས་ཡིན་པས་མ་ཁྱབ་བོ།།
དེ་ལ་དང་པོ་ཕམ་པའི་སྡེ་ནི།
བཅས་ལྡན་དགེ་སློང་གིས་འདི་བཞི་གང་རུང་ལ་སྤྱད་ནས་སྐད་ཅིག་མ་གཅིག་ལ་བཅབས་ཀྱང་སྡོམ་པ་རྣམ་པར་དག་པའི་ལྷག་མ་ཙམ་ཡང་མེད་པར་གཅོད་པར་བྱེད་པས་རྩ་བའི་ལྟུང་བ་དང༌།མི་མཐུན་ཕྱོགས་ཀྱིས་གཉེན་པོ་མཐུ་མེད་པར་བཅོམ་པའི་ཕྱིར་ཕམ་པ་བཞི་ཞེས་པ་སྟེ། དེ་ལ་དང་པོ་ནི།
གཞི་ཡི་ཡན་ལག་ཆ་ཀུན་གཟུང་འོས་པའི། །སྐྱེ་གནས་ལམ་དུ་ཕོ་དབང་ལས་རུང་ནི།།
བསམ་པ་ངོ་ཚ་འཇིགས་མེད་ཆགས་སེམས་ཀྱིས། །སྦྱོར་བ་དྲུད་པ་མཐར་ཐུག་སིམ་པ་ཐོབ།།
དེས་ནི་ཚངས་པར་སྤྱོད་ལས་རྣམ་པར་ཉམས།།
གཞན་གྱི་གཞི་ཡི་ཡན་ལག་ལུས་ཕྱེད་དུ་ལོངས་པ་ཡན་ཆད་ཆ་ཤས་ཀུན་བཟུང་བར་འོས་པའི་སྐྱེ་གནས་སུ་གཏོགས་ཤིང་མ་ཉམས་པ་དོན་བྱེད་ནུས་པའི་ཁའམ།བཤང་ལམ་མམ།ཆུ་ལམ་གསུམ་པོ་གང་རུང་དུ་རང་གི་གཞིའི་ཡན་ལག་རྟེན་བྱེད་ཕོའི་དབང་པོ་ནད་མེད་ཅིང་ལས་སུ་རུང་བ་ནི།བསམ་པ་རང་ངོར་ལྟོས་པའི་ངོ་ཚ་ཤེས་པ་དང༌།གཞན་ངོར་ལྟོས་པའི་འཇིགས་པ་སྟེ་ཁྲེལ་མེད་པར་རེག་བདེ་ཉམས་སུ་མྱོང་འདོད་ཀྱི་ཆགས་པའི་སེམས་ཀྱིས་སྦྱོར་བ་བསྟེན་བྱར་རྩལ་ཞིང་དྲུད་པས་མཐར་ཐུག་ལམ་གསུམ་གྱི་མཚམས་ལས་འདས་ནས།བདེ་བའི་སིམ་པ་ལུས་ཀྱིས་མྱོང་ཞིང་ཡིད་ཀྱིས་བདག་གིར་བྱས་ནས་ཐོབ་པ་སྟེ།ཡན་ལག་བཞི་པོ་ཚང་ན་དངོས་གཞིར་འགྱུར་བས།དེས་ནི་ཚངས་པར་སྤྱོད་པ་ལས་རྣམ་པར་ཉམས་པར་འགྱུར་ཏེ།ས་གའི་ལྷས།
ཁ་ཤུན་སོ་དང་པགས་པ་ལས། །ནོར་བུ་འདས་ན་ཕས་ཕམ་སྟེ།།
ཕྱི་རོལ་ཆར་ནི་ཅི་རིགས་པར། །སྦོམ་པོའམ་དགེ་འདུན་ལྷག་མ་འོ། །ཞེས་སོ།།
གཉིས་པ་ལ།
བརྐུ་བའི་གཞི་ནི་མི་གཞན་ནོར་ཡིན་པ།།
བསམ་པ་རང་ཉིད་འཚོ་ཕྱིར་རྐུ་སེམས་ཀྱིས།།
ཡུལ་དུས་རིན་ཐང་ཚང་བ་སྦྱོར་བ་བརྐུས།།
མཐར་ཐུག་བརྐུས་སམ་རྐུར་བཅུག་བརྩད་ནས་ཐོབ།།
བརྐུ་བར་བྱ་བའི་གཞི་ནི།རང་དང་ནོར་མི་གཅིག་པའི་མི་གཞན་གྱིས་བདག་ཏུ་བཟུང་བའི་ནོར་རྫས།ཁ་ཟས་གཡོས་སུ་བྱས་པ་དང༌།དུར་ཁྲོད་ཀྱི་རྫས་སོགས་དམན་པ་མ་ཡིན་པ།བསམ་པ་དེ་ཡིན་པར་འདུ་ཤེས་པའམ།ཡིད་གཉིས་ཟ་བས་རང་ཉིད་འཚོ་བའི་ཕྱིར་རྐུ་བར་འདོད་པའི་སེམས་ཀྱིས་ཡུལ་གང་དུ་དུས་དེར་བརྐུ་བྱ་རྐུ་བྱེད་གཉིས་ཀ་ལ་ལྟོས་པའི་འཇོག་རྫས་དང་བགོ་རྫས་ཀྱི་ཁྱད་པར་ལས་རིན་ཐང་ཚང་བ།སྦྱོར་བ་དུས་གཅིག་གིས་བརྐུས་པ་སྟེ།དེ་ཡང་རིན་ཐང་གི་ཚད་ནི།ཀཱ་རི་ཀཱ་ལྔ་བཅུ་པ་ལས།
ཀརྵ་པ་ཎི་བཞི་ཆ་བརྐུས། །དེ་བརྐུས་ཚུལ་ཁྲིམས་ཞིག་པར་འགྱུར། །ཞེས་གསུངས་ལ།དེ་ལ་ཀརྵ་པ་ཎ་ཞེས་པ་ནི།རྒྱལ་པོ་པདྨ་ཆེན་པོའི་རིང་ལ་བྱས་པའི་གསེར་གྱི་དོང་ཙེ་ནི་དངོས་དང༌།བཏགས་པ་བ་ནི་མགྲོན་བུའི་རིན་ཐང་མགྲོན་བུ་བརྒྱད་ཅུ་ལ་མ་ཤ་ཀདེ་ཉི་ཤུ་ལ་ཀརྵ་པ་ཎི།མཆན།ལ་བརྩི་བ་ཡིན་ཞེས་གྲགས་ཤིང༌།མདོ་རྩ་བ་ལས་འབྲིང་ཚད་མ་ཤ་ཀ་ལྔར་མཛད་ལ།འདིར་ཚད་ཀྱི་དབང་གིས་མཐའ་གཅིག་ཏུ་མ་ངེས་ཀྱང་དངུལ་ཞོ་གང་ཙམ་རིན་ཐང་གི་ཚད་དུ་གྲགས་སོ། །གང་ལྟར་ཡང་མཐར་ཐུག་རང་གིས་བརྐུས་སམ་གཞན་ལ་རྐུར་བཅུག་པའམ།བརྩད་པ་གང་ཡང་རུང་བས་བདག་པོ་དང་ཕྲལ་ནས་བདག་གིར་བྱས་པའི་ཚུལ་གྱིས་ཐོབ་བློ་སྐྱེས་པའོ། །དེར་མ་ཟད་མཐུའམ་ནན་ཁུག་དང༌།གཏམས་པ་བསྣོག་པ་དང༌།བསྐྱིས་པ་བདོ་བའམ་ཕྱིར་བསབས་པ་བརྐུས་པ་དང༌།རྒྱན་འདོར་བ་སོགས་རྒྱུས་ལེན་པ་དང༌།དངན་འཐེན་ཏེ་ཁྱེར་བ་སླར་མི་སྟེར་ཤྭ་གམ་དང་གྲུ་གླ་སོགས།བ་ལ་སོགས་པའི་རྣམ་གྲངས་ཞིབ་མོར་བྱས་ཏེ་ཤེས་དགོས་སོ།།
གསུམ་པ།
སྲོག་གཅོད་གཞི་ནི་མི་གཞན་མ་འཁྲུལ་བར། །བསམ་པ་གསོད་སེམས་གསད་བྱ་དེར་ཤེས་པ།།
སྦྱོར་བ་གསོད་པར་བརྩམས་ནས་མ་བཟློག་པ། །མཐར་ཐུག་སྲོག་གི་དབང་པོ་འགགས་པ་དང༌།།
གསོད་བཅུག་ཡི་རང་བསྔགས་སོགས་རྐྱེན་བྱས་ཀྱང༌།།
སྲོག་གཅོད་ལ་གཞི་ནི་མིའམ་མིར་ཆགས་པ་རང་ལས་རྒྱུད་ཐ་དད་པའི་མི་གཞན་མྱོས་པ་ལ་སོགས་པའམ་གཞན་དང་མ་འཁྲུལ་བ།བསམ་པས་བརྡུང་སེམས་ལ་སོགས་པ་མ་ཡིན་པར་གསོད་པར་བྱའོ་སྙམ་པའི་སེམས་ཀྱིས་གསད་པར་བྱ་བ་དེ་དེར་ངེས་པའམ།ཡིད་གཉིས་ཡན་ཆད་ཀྱི་འདུ་ཤེས་པས་སྦྱོར་བ་སྔགས་དང་མཚོན་ཆ་ལ་སོགས་པས་གསོད་པར་བརྩམས་ནས་མ་ཟློག་པར།མཐར་ཐུག་རང་མ་ཤི་བའི་གོང་དུ་སྦྱོར་བ་དེའི་ཚེའམ་གཞན་གྱི་ཚེ་སྲོག་གི་དབང་པོ་འགགས་པ་ན་དངོས་གཞི་སྟེ།སུམ་བརྒྱ་པར།
གང་ཞིག་རང་བཞིན་གནས་ལ་བསླབ་བཅས་པས།།
མི་གཞན་ཡིན་ལ་མིར་ནི་འདུ་ཤེས་དང༌།།
བསད་པའི་བསམ་པས་འཁྲུལ་མེད་གསོད་བྱེད་ཅིང༌།།
མི་ཤི་རྨི་ལམ་མ་གཏོགས་དེར་བརླག་འགྱུར། །ཞེས་གསུངས་པའི་ཕྱིར་དང༌།གཞན་ཡང་གཞན་ལ་གསོད་དུ་བཅུག་པ་དང༌།གསོད་པ་ལ་ཡི་རང་བའི་བསྔགས་པ་བརྗོད་པ་སོགས་ཀྱིས་རྐྱེན་བྱས་པས་ཀྱང་གསོད་སེམས་ཡོད་ཅིང་ཤི་ན་དངོས་གཞིར་འགྱུར་ལ།དེར་མ་ཟད་དགེ་སློང་མང་པོས་གྲོས་བྱས་ནས་གཅིག་གིས་བསད་ཀྱང་ཐམས་ཅད་ལ་ཕམ་པར་འགྱུར་ཏེ་མཛོད་ལས།
དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་གསུངས་པའི་ཕྱིར་རོ།།
བཞི་པ།
རྫུན་གྱི་གཞི་ནི་སྨྲ་ཤེས་དོན་གོའི་མིར། །བསམ་པ་འདུ་ཤེས་བསྒྱུར་ནས་བརྗོད་བློ་སྐྱེས།།
སྦྱོར་བ་མངོན་ཤེས་ལ་སོགས་ཡོན་ཏན་ཚོགས། །མེད་ཀྱང་ཡོད་ཅེས་བླ་མའི་རྫུན་སྨྲས་པ།།
མཐར་ཐུག་གཞན་གྱིས་རྫུན་དེ་གོ་ན་ཉམས། །འདི་བཞི་གང་སྤྱད་དགེ་སློང་དེ་ཕམ་ཕྱིར།།
ཕས་ཕམ་བཞི་ཞེས་ཐམས་ཅད་མཁྱེན་དེས་གསུངས།།
རྫུན་གྱི་གཞི་ནི་གང་ལ་སྨྲ་བའི་ཡུལ་རང་ལས་རྒྱུད་གཞན་པའི་སྨྲ་ཤེས་པ།དོན་གོ་བ།ཤེས་པ་རང་བཞིན་དུ་གནས་པ།མ་ནིང་དང་མཚན་གཉིས་མ་ཡིན་པ་སྟེ་ཐ་སྙད་ལྔ་དང་ལྡན་པའི་མིར།བསམ་པ་དེའི་འདུ་ཤེས་བསྒྱུར་ནས་བསླུ་འདོད་ཀྱིས་བརྗོད་པའི་བློ་སྐྱེས་ཏེ།སྦྱོར་བ་འདོད་ཁམས་ལས་གོང་དུ་འཕགས་པ་བསམ་གཏན་དང་པོ་ནས་སངས་རྒྱས་ཀྱི་བར་གྱི་མངོན་ཤེས་ལ་སོགས་པའི་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་གྱི་ཚོགས་རང་ལ་མེད་པ་ཤེས་ཀྱང་ཡོད་ཅེས་བླ་མའི་རྫུན་སྨྲས་པ་སྟེ།ས་གའི་ལྷས།
འདིར་ནི་སྒྲིབ་པ་རྣམ་པ་ལྔ། །མི་རྣམས་ཀྱི་ནི་ཆོས་སུ་ཐོས།།
དེ་ཟད་བླ་མའི་ཆོས་སུ་འདོད། །ཅེས་གསུངས།མཐར་ཐུག་གཞན་གྱིས་རང་གི་སྨྲས་པའི་རྫུན་དེས་འདུ་ཤེས་བསྒྱུར་མ་ནུས་ཀྱང་གོ་བར་གྱུར་ན་དགེ་སློང་རང་གི་སྡོམ་པ་ཉམས་པར་འགྱུར་རོ། །དེ་ཡང་སྤྱིར་ངག་ཡིན་པ།རང་གི་ཡིན་པ།བདག་ཉིད་དང་འབྲེལ་བ།མ་ནོར་བ།གསལ་པོར།མངོན་སུམ་དུ་སྨྲས་ཏེ་ངག་མཚན་ཉིད་དྲུག་ལྡན་གྱིས་མངོན་པའི་ང་རྒྱལ་མེད་བཞིན་རང་གིས་སྨྲས་པའམ།གཞན་གྱིས་སྨྲས་པ་དང་དུ་ལེན་པར་རྩོམ་པ་ལ།བཤད་ཀྱང་ཞིབ་མོར་བྱས་ན་འབྲས་བུ་དང༌།གདན་དང་གདན་ཁྲ་བོའི་སྟེང་དུ་འདུག་པ་སོགས།ངོ་བོ་རྒྱུའི་སྒོ་ནས་རྫུན་དུ་འགྱུར་བ་ཡོད་པའང་ཤེས་དགོས་སོ། །འདི་དག་གི་སྦྱོར་བའི་དུས་དང་དངོས་གཞིའི་ཡན་ལག་མ་ཚང་ན་ཅིར་འགྱུར་སྙམ་ན།སྦྱོར་བའི་སྦྱོར་བ་བྱ་བ་དེ་བྱེད་འདོད་པ་ཙམ་དང༌།སྟན་ལས་ལྡང་བ་ལ་སོགས་པ་ཙམ་ནི་ཉེས་བྱས་ཁོ་ན་ཡིན་ལ།བྱ་བ་དེའི་དོན་དུ་འགྲོ་བ་སོགས་སྦྱོར་བ་ནི་སྦྱོར་བའི་སྦོམ་པོ་དང༌།དངོས་གཞིའི་དུས་སུ་ལྟུང་བ་དངོས་མི་བསྐྱེད་ཀྱང༌།དེ་དང་ཆ་འདྲ་བ་གསོད་སེམས་མེད་པས་མི་ལ་འཆི་ངེས་ཀྱི་མཚོན་བསྣུན་པ་ལྟ་བུ་སྦྱོར་བའི་རྣམ་པའི་སྦོམ་པོ་དང༌།དངོས་གཞིའི་ལས་མཐར་ཕྱིན་ཀྱང་ཡན་ལག་གང་རུང་མ་ཚང་བ་མི་མ་ཡིན་གསོད་སེམས་ཀྱིས་གསོད་པ་ལྟ་བུ་དངོས་གཞིའི་རྣམ་པའི་སྦོམ་པོ་ཡིན་ལ།ལྷག་མ་རྣམས་ལའང་དེས་རིགས་འགྲེ་བར་བྱ་ཞིང༌།དེ་ལྟ་བུ་ལྟུང་བྱེད་སོགས་གཞན་ལ་ཉེས་བྱས་སུ་འགྱུར་རོ། །དེ་ཡང་ཡིད་ཀྱིས་བསམ་པ་ཙམ་ནི་བསྡམ་བྱ་དང༌།ལུས་ངག་ཏུ་ཐོན་པ་རྣམས་བཤགས་བྱ་ཡིན་ནོ། །དེས་ན་འདི་བཞི་པོ་རང་རང་གི་ཡན་ལག་ཐམས་ཅད་ཚང་ན་གང་སྤྱད་ཀྱང་དགེ་སློང་དེ་ཉེས་པ་ལས་ཕམ་པའི་ཕྱིར།ཕས་ཕམ་པ་བཞི་ཞེས་ཐམས་ཅད་མཁྱེན་པ་དེས་གསུངས་ཏེ།སོ་སོར་ཐར་པ་ལས།དགེ་སློང་དག་གིས་དེ་དག་ལས་ལྟུང་བ་གང་ཡང་རུང་བ་ཞིག་བྱས་ན་ཐོག་མ་ཇི་ལྟ་བར་ཕྱིས་ཀྱང་དེ་བཞིན་དུ་ཕམ་པར་འགྱུར་བ་ཡིན་ཏེ།དགེ་སློང་རྣམས་དང་ལྷན་ཅིག་གནས་པ་དང༌།ལོངས་སྤྱོད་དུ་མི་དབང་གིས་གནས་པར་མི་བྱའོ། །ཞེས་གསུངས་སོ།།
དེ་ནས་གཉིས་པ་ལྷག་མའི་སྡེ་བཤད་པ་ནི།
དགེ་འདུན་ལྷག་མ་བཅུ་གསུམ་ཞེས་གྲགས་པ།།
གསོ་བ་དགེ་འདུན་ལ་རག་ལས་ཤིང་སྡོམ་པ་རྣམ་དག་གི་ལྷག་མ་ལུས་པ་དང་གྲངས་བཅུ་གསུམ་ཡོད་པས་དགེ་འདུན་ལྷག་མ་བཅུ་གསུམ་ཞེས་གྲགས་པ་ལས།
དང་པོ་ནི།
བསྒྲོད་མིན་གནས་སུ་ཁུ་བ་འབྱིན་པ་དང༌།།
བསྒྲོད་བྱའི་ཡུལ་ལམ་གསུམ་གང་རུང་མིན་པའི་རང་ངམ་གཞན་གྱི་ཡན་ལག་གི་གནས་སུ་དབྱུང་འདོད་ཀྱི་བསམ་པས་རང་གི་ནོར་བུ་རེག་ཅིང་རྩལ་བ་ལས་ཁུ་བ་འབྱིན་པས་བདེ་བ་མྱོང་བ་དང༌།
གཉིས་པ་ནི།
ཆགས་པས་བུད་མེད་ལུས་ཀྱི་ཆ་ཤས་འཛིན།།
ཆགས་པའི་སེམས་ཀྱིས་ཡུལ་བསྟེན་རུང་གི་བུད་མེད་ལ་རེག་འདོད་ཀྱིས་དེའི་ལུས་ཀྱི་སྤུ་ལ་རེག་ན་སྦོམ་པོའོ་ཞེས་བཤད་པས་ལན་བུ་ཤ་དང་བཅས་པ་སོགས་ཆ་ཤས་སམ་དངོས་ལ་བར་ཆོད་པ་མེད་པར་འཛིན་པ་ལས་བྱུང་བའི་བདེ་བ་ཉམས་སུ་མྱོང་བ་དང༌།
གསུམ་པ་ནི།
འཁྲིག་ཚིག་རྗེན་སྨྲ་་་་་༌།
བརྡ་འཕྲོད་པའི་བུད་མེད་བསྟེན་རུང་ལ་ཡུལ་དུས་དེར་གྲགས་པའི་འཁྲིག་པའི་དངོས་མིང་ཚིག་ཏུ་རྗེན་པ་སྨྲས་པ་ཡུལ་དེས་གོ་བ་དང༌།
བཞི་པ་ནི།
་་་་་་བུད་མེད་ཆགས་ཕྱིར་བཀུར།།
ཡུལ་བུད་མེད་ལ་ཆགས་པའི་སེམས་ཀྱིས་འཁྲིག་པ་དོན་དུ་གཉེར་བའི་ཕྱིར་བདག་ལྟ་བུའི་དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ཚངས་པར་སྤྱོད་པ་ལ་འཁྲིག་པས་བསྙེན་བཀུར་ན་མཆོག་གོ་ཞེས་སྨྲས་སམ།ཡུལ་གྱིས་སྨྲས་པ་དང་དུ་བླངས་ནས་དེ་ལ་བརྡ་འཕྲོད་པ་དང༌།
ལྔ་པ་ནི།
ཕོ་མོ་ཕན་ཚུན་སྨྱན་བྱས་འདུས་ཏེ་ཕྲད།།
སྤྲད་བྱ་རང་ལས་གཞན་པའི་ཕོ་མོ་སྤྲད་རུང་བ་ཕན་ཚུན་སྦྱོར་འདོད་ཀྱིས་རང་ངམ་བསྐོས་པས་ཕྲིན་གསུམ་གྱི་སྒོ་ནས་སྨྱན་བྱས་པས།དེ་གཉིས་འདུས་ཏེ་དབང་པོ་ཕྲད་པ་ན་སྟེ་དེ་ལྔ་ནི་ནང་སེམས་ཅན་ལ་ཆགས་པ་ལས་གྱུར་པའོ།།
དྲུག་པ་ནི།
རང་དོན་ཚད་ལྷག་ཁང་པ་་་་་༌།
གཞི་སྲོག་ཆགས་མང་ཞིང་རྩོད་པ་ཅན་འཇིག་རྐྱེན་ཡོད་པས་མི་རུང་བ་གསུམ་དང་ལྡན་པའི་སར་རང་གི་དོན་དུ་གཞན་ལ་འབད་པས་བཙལ་བའི་ཡོ་བྱད་ཀྱིས་དགེ་འདུན་ལས་གནང་བ་མ་ཐོབ་བཞིན་དུ་སྲིད་དུ་ཁྲུ་བཅོ་བརྒྱད་དང༌།ཞེང་དུ་ཁྲུ་ཕྱེད་དང་བཅུ་གཅིག་གི་ཚད་ལས་ལྷག་པའི་ཁང་པ།རང་ངམ་བསྐོས་པས་བརྩིགས་ཏེ་ཐོག་ཕུབ་པ་དང༌།
བདུན་པ་ནི།
་་་་་་ཁང་ཆེན་བརྩིགས།།
གང་ཟག་བཞིར་ལོངས་པ་ཡན་ཆད་ཀྱི་དོན་དུ་བཙལ་བ་དང༌།ཚད་ལྷག་མ་གཏོགས་པའི་ཡན་ལག་གཞན་རྣམས་ཚང་བས་བརྩིགས་པ་ལ་ཁང་ཆེན་ཞེས་གྲགས་ཏེ།དེ་ཉིད་རྩིག་པས་བསྐོར་ཞིང་ཐོག་ཕུབ་པ་ན་སྟེ་དེ་གཉིས་ནི་ཕྱི་ཡོ་བྱད་ལ་ཆགས་པ་ལས་གྱུར་པའོ། །
བརྒྱད་པ་ནི།
བརྗོད་གཞི་མེད་དང་་་་་༌།
ཡུལ་དགེ་སློང་གཞན་ལ་བརྗོད་པའི་གཞི་མཐོང་ཐོས་དོགས་གསུམ་མེད་བཞིན།ཕམ་བཞི་གང་རུང་གི་སྒོ་ནས་སྐུར་འདེབས་ཀྱི་ཚིག་གསལ་པོར་སྨྲས་པ་ཡུལ་གྱིས་གོ་བ་དང༌།
དགུ་པ་ནི།
་་་་་་སྙད་ཀ་བག་ཙམ་ལ།།བརྟེན་ནས་དགེ་སློང་སྐུར་བཏབ་་་་་༌།
གླེང་བའི་སྙད་ཀ་བག་ཙམ་ཡོད་པ་ལ་བརྟེན་ནས་ཡུལ་དགེ་སློང་གཞན་ལ་ཚིག་ཟུར་གྱི་ཤུགས་ཀྱིས་ཕམ་བཞི་གང་རུང་གི་སྒོ་ནས་སྐུར་པ་བཏབ་པ་ཡུལ་གྱིས་གོ་བ་ན་སྟེ་དེ་གཉིས་ནི་གནོད་པ་ལས་གྱུར་པའོ།།
བཅུ་པ་ནི།
་་་་་་དགེ་འདུན་དབྱེན།།
མཚམས་ནང་གཅིག་ཏུ་བཅས་ལྡན་དགེ་སློང་གིས་རང་མི་ཐེ་བའི་དབྱེ་བྱ་དགེ་འདུན་དུ་ལོངས་པ་གཉིས་ཆོས་མིན་གྱི་ལྟ་བས་ཕན་ཚུན་དབྱེན་བྱེད་པ་ལ་དགེ་འདུན་གྱིས་གཞམས་བསྒོ།གསོལ་བ།བརྗོད་པ་གསུམ་སྟེ་ཟློག་བྱེད་ལྔ་བྱས་ཀྱང་མ་བཏང་ན་དང་པོ་བཞིའི་མཐར་སྦོམ་པོ་རེ་རེ་དང༌།ལྔ་པའི་མཐར་མ་བཏང་ན་དངོས་གཞི་སྟེ་འོག་མ་གསུམ་ཡང་འདིའི་རིགས་འགྲེ་ཤེས་པར་བྱ་ཞིང༌།འདི་དང་དབྱེན་གྱི་མཚམས་མེད་ཀྱི་ཁྱད་པར་དབྱེན་ལ་དགེ་འདུན་ཕྱེ་བ་ཞིག་དགོས་ཤིང༌།འབྱེད་པོའང་དགེ་སློང་དུ་ངེས་ལ།འདི་ཕྱེ་བར་མ་ནུས་ཀྱང་ཟློག་བྱེད་ལྔའི་མཐར་མ་བཏང་བས་ཆོག་ཅིང་འབྱེད་པ་པོ་དགེ་སློང་དུ་མ་ངེས་ཏེ།དགེ་སློང་མ་ལའང་འབྱུང་ངོ༌།།
བཅུ་གཅིག་པ་ནི།
དབྱེན་དེའི་རྗེས་ཕྱོགས་་་་་༌།
དགེ་འདུན་དབྱེན་ལ་ཞུགས་པའི་དགེ་སློང་དེའི་རྗེས་སུ་ཕྱོགས་ནས་གྲོགས་བྱེད་པ་ཟློག་བྱེད་ལྔའི་མཐར་མ་བཏང་བ་དང༌།
བཅུ་གཉིས་པ་ནི།
་་་་་་བསླབ་པ་དང་འགལ་བ།།
ཁྱིམ་སུན་འབྱིན་ཚེ་སྐྲོད་བྱེད་ལ་བསྙོན་པ།།
བུད་མེད་དང་ལྷན་ཅིག་རྩེ་འཇོ་བྱེད་པ་སོགས་བསླབ་པ་དང་འགལ་བའི་ངན་སྤྱོད་ཀྱིས་ཁྱིམ་པ་རྣམས་ཀྱི་སེམས་སུན་འབྱིན་པར་བྱས་ཏེ།མ་དད་པ་བྱེད་པའི་ཚེ་དགེ་འདུན་གྱིས་བསྐྲད་པ་ན་སྐྲོད་བྱེད་དགེ་འདུན་ལ་འགྲོ་མིན་བཞིའི་བསྙོན་ཚིག་གིས་སྐུར་བ་འདེབས་པ་ཟློག་བྱེད་ལྔའི་མཐར་མ་བཏང་བ་དང༌།
བཅུ་གསུམ་པ་ནི།
ལྟུང་བྱུང་བསྐུལ་ཚེ་བཀའ་བློ་མི་བདེ་བའོ།།
ལྟུང་བ་བྱུང་བར་གླེང་དྲན་བྱས་ལ་ཆགས་པའི་དགེ་སློང་ལ་ལྷག་པའི་ཚུལ་ཁྲིམས་ཀྱི་དབང་དུ་བྱས་ཏེ།དགེ་འདུན་གྱིས་ཕྱིར་བཅོས་བྱ་བར་བསྐུལ་བའི་ཚེ།ཁྱེད་ཅག་དགེ་ཡང་རུང༌།སྡིག་ཀྱང་རུང་ཁོ་བོ་ལ་ཅི་ཡང་མ་སྨྲ་ཞིག་ཅེས་བཀའ་བློ་མི་བདེ་བའི་གཞིར་ཞུགས་པ་ཉིད་ཟློག་བྱེད་ལྔའི་མཐར་མ་བཏང་བའོ། །དེ་བཞི་ནི་བསྒོ་བ་ལས་གྱུར་པའོ། །སོ་སོར་ཐར་པའི་མདོ་ལས།
དབེན་པར་སྐྱབས་ཡོད་འདུག་པའོ། །ཞེས་མ་ངེས་པ་གཉིས་གསུངས་ཏེ།ཁྲིམས་གྲོགས་མེད་པའི་དབེན་པ་སྒྲིབ་བྱེད་ཀྱི་སྐྱབས་ཡོད་པའི་གནས་སུ་དགེ་སློང་དང་བུད་མེད་ལྷན་ཅིག་ཏུ་འདུག་པའི་ཚེ།གནས་དེར་མི་ཚངས་སྤྱོད་བྱར་རུང་མི་རུང་གི་ཁྱད་པར་ལས་དགེ་སློང་དེ་ལ་ཕམ་ལྷག་ལྟུང་བྱེད་གསུམ་གང་རུང་ངམ།ལྷག་མ་དང་ལྟུང་བྱེད་གཉིས་ཀར་མ་ངེས་པའམ་དངོས་པོ་ལ་མཐའ་གང་དུ་འགྱུར་མ་ངེས་པའོ། །དེས་ན་འདུག་ཙམ་ལྟུང་བྱེད་དང་འབྲས་བུ་ཕམ་ལྷག་གང་རུང་དུ་འདུ་བས་ལོགས་སུ་མ་བཤད་དོ།།
སྡེ་ཚན་གསུམ་པ་ལྟུང་བྱེད་ཀྱི་སྡེ་ལ་གཉིས་ཀྱི། དང་པོ།
སྤང་བའི་ལྟུང་བྱེད་སུམ་ཅུའི་སྡེ་བཤད་པ།།
གང་ལ་ལྟུང་བ་བྱུང་བའི་དངོས་པོ་དེ་སྤང་བའི་སྒོ་ནས་ཕྱིར་བཅོས་དགོས་ཤིང༌།མ་བཅོས་ན་རྣམ་སྨིན་ངན་སོང་དུ་ལྟུང་བར་བྱེད་པ་དང༌།གྲངས་སུམ་ཅུ་ཡོད་པའི་སྡེ་བཤད་པ་ལ་གསུམ་ལས།དང་པོ་གོས་སོགས་ཀྱི་བཅུ་ཚན་ལས།
དང་པོ་ནི།
རང་གི་གོས་ལྷག་ཞག་བཅུ་འདས་པར་འཆང༌།།
སྲ་བརྐྱང་མ་བཏིང་བའི་གང་ཟག་གིས་རང་གི་དབང་བྱར་ཡོད་ཅིང་བདག་ཏུ་བཟུང་བའི་གོས་ལྷག་པོ་འཁོར་གསུམ་ཁེབས་པའི་མཐའི་ཚད་དུ་ལོངས་པའམ།གལ་ཏེ་བྱིན་གྱིས་བརླབ་རུང་གི་ཆོས་གོས་གསུམ་ཡོད་པ་དང་མེད་ཀྱང་ཆོས་གོས་ཀྱི་ཁ་སྐོང་བའི་རེ་བ་མེད་ན་ཁྲུ་གང་གི་ཚད་དུ་ལོངས་པ་བྱིན་གྱིས་མ་བརླབ་པའམ།བརླབས་ཀྱང་ཤན་དང་རྗེས་སུ་འབྲེལ་བས་རང་སྟོབས་སམ་ཤན་སྟོབས་གང་རུང་གིས་ཞག་བཅུ་འདས་པར་འཆང་ནས་བཅུ་གཅིག་པའི་སྐྱ་རེངས་དང་པོ་ཤར་བ་ནའམ།དེ་ལ་ཤན་གྱི་རྣམ་གྲངས་ནི་བཞི་སྟེ།གོས་ཀྱི།ལྷུང་བཟེད་ཀྱི།སྨན་གྱི།ལྟུང་ཤན་རྣམས་ཡོད་པ་ལས།ཕྱི་མ་གསུམ་པོ་འོག་ཏུ་འཆད་པར་འགྱུར་ལ།འདིར་གོས་ཤན་ལ་ཞག་བཅུ་པའི་དང༌།ཟླ་འཇོག་གི་ཤན་གཉིས་ལས།དང་པོ་ཞག་བཅུ་པའི་གོས་ཀྱི་ངོས་འཛིན་སྔར་ལྟར་ལ།དེ་འདྲའི་གོས་དེ་བྱིན་གྱིས་མ་བརླབ་པ་རྡེག་བྱེད་དུ་འགྱུར་བས་དེ་རང་དང་དུས་མཉམ་པའམ་མི་མཉམ་པ་ཕྱིེས་སུ་ལོན་པ་གང་ཡིན་ཡང་བརྡེག་བྱར་འགྱུར་བས་ཤན་མ་འདྲེས་གོང་དུ་བྱིན་གྱིས་མ་བརླབས་ན་ཤན་འདྲེས་ཟིན་པའི་རྗེས་བརྡེག་བྱ་བྱིན་གྱིས་བརླབས་ཀྱང་ཞག་བཅུ་འདས་པ་ན་རྡེག་བྱེད་ཀྱིས་རང་སྟོབས་དང༌།བརྡེག་བྱས་རང་དུས་མ་ལོན་ཀྱང་ཤན་སྟོབས་ཀྱིས་ལྟུང་བ་བསྐྱེད་དོ། །ཟླ་འཇོག་གི་གོས་ཀྱི་ཤན་ནི།ཟླ་འཇོག་རང་གི་ངོས་འཛིན་འཆད་མ་ཐག་པ་ལ།ཤན་རྡེག་ཚུལ་སྤྱིར་བཏང་ཞག་གྲངས་མ་གཏོགས་སྔ་མ་དང་འདྲ་བ་ལས།དམིགས་བསལ་ལ་མུ་བཞིར་འགྱུར་ཏེ་སྔར་རྙེད་པའི་ཟླ་འཇོག་དེ།ཕྱིས་ཆོས་གོས་ཡོངས་རྫོགས་རྙེད་སྟོབས་ཀྱིས་ཞག་བཅུ་པའི་གོས་སུ་རིགས་ལོག་ཅིང༌།ཕྱི་མ་དེ་སྔ་མའི་ཕྱི་དྲོ་དེ་ཀ་རྙེད་པ་ཡིན་ན་ཤན་མི་འབྱུང་ལ།ཞག་ཕྱི་མ་རྣམས་ལ་རྙེད་ན་ཤན་ཀྱང་འབྱུང་བ་དང༌།ཡང་གོས་སྔ་རྟིང་གཉིས་ཀ་ཟླ་འཇོག་ཡིན་ན་སྔ་མ་བྱིན་གྱིས་མ་བརླབས་ན་རིགས་མ་ལོག་ཀྱང་ཤན་འབྱུང་བ་དང༌།ཡང་ཟླ་འཇོག་གི་གོས་ཤིག་རྙེད་ནས་ཞག་སུམ་ཅུའི་བར་འཆང་ཡང་གོས་གཞན་མ་རྙེད་ན་རིགས་ཀྱང་མ་ལོག་ཤན་ཀྱང་མི་འབྱུང་སྟེ་བརྡེག་བྱ་མེད་པའི་ཕྱིར་རོ།།
གཉིས་པ་ནི།
ཆོས་གོས་དང་བྲལ་ཞག་གཅིག་ལོན་པ་དང༌།།
སྣམ་སྦྱར་ལ་འབྲལ་བའི་གནང་བ་མ་ཐོབ་ཅིང་སྲ་བརྐྱང་མ་བཏིང་བའི་དགེ་སློང་གིས་འཇིགས་བཅས་ཀྱི་དགོན་པ་ལས་གཞན་དུ་བྱིན་གྱིས་བརླབས་པའི་ཆོས་གོས་གསུམ་པོ་ཐམས་ཅད་དམ་གང་རུང་དང་བྲལ་ནས་ཆོས་གོས་བཞག་པའི་གནས་ཉེ་འཁོར་དང་བཅས་པ་ལས་འདས་ཏེ།ཞག་གཅིག་ལོན་པས་ཕྱི་མའི་སྐྱ་རེངས་ཤར་བ་ན་དང༌།
གསུམ་པ་ནི།
གོས་རྒྱུ་ཟླ་གཅིག་འཇོག་དང་་་་་༌།
སྲ་བརྐྱང་མ་བཏིང་ཞིང་ཆོས་གོས་གསུམ་གང་རུང་མེད་པའི་དགེ་སློང་གིས་ཁ་བསྐང་བའི་རེ་བ་དང་བཅས་པའི་ཆོས་གོས་ཀྱི་རྒྱུ་ཁྲུ་ཚད་དུ་ལོངས་ཤིང༌།འཁོར་གསུམ་མི་ཁེབས་པ་བྱིན་གྱིས་མ་བརླབས་པའམ་བརླབས་ཀྱང་ཤན་དང་རྗེས་སུ་འབྲེལ་བས་རང་སྟོབས་སམ་ཤན་སྟོབས་གང་རུང་གིས་ཟླ་བ་གཅིག་ཏུ་འཇོག་པ་ལས་ཐལ་ནས་སོ་གཅིག་པའི་སྐྱ་རེངས་ཤར་བའི་ཚེ་ན་དང༌།
བཞི་པ་ནི།
་་་་་་དགེ་སློང་མར། །ཆོས་གོས་འཁྲུར་འཇུག་་་་་༌།
བདུན་རྒྱུད་ཚུན་ཆད་ཀྱི་ཉེ་དུ་མ་ཡིན་པའི་དགེ་སློང་མར་དགེ་སློང་རང་གི་ཆོས་གོས་གསུམ་དང་གདིང་བ་རྙིང་པ་ལས་གང་རུང་འཁྲུར་འཇུག་པ་ན་དེས་གོས་ཀྱི་ཕྱོགས་གཅིག་ཙམ་འཁྲུ་བའི་ལས་བྱེད་པ་ན་དང༌།
ལྔ་པ་ནི།
་་་་་་དེ་ལ་གོས་རྒྱུ་ལེན།།
ཆོས་གོས་རྣམ་གསུམ་ཡོད་པའི་དགེ་སློང་གིས་ཉེ་དུ་མ་ཡིན་པའི་དགེ་སློང་མ་དེ་ལ་འཁོར་གསུམ་ཁེབས་པའི་མཐའི་ཚད་དུ་ལོངས་པ་ཡན་ཆད་ཀྱི་གོས་དངོས་སམ་དེའི་རྒྱུ་བསླངས་ནས་ལེན་པ་ན་ལག་ཏུ་ཐོབ་པ་ན་དང༌།
དྲུག་པ་ནི།
ཉེ་མིན་ཁྱིམ་པར་གོས་རྒྱུ་སློང་བ་དང༌།།
ཆོས་གོས་རྣམ་གསུམ་ཡོད་པའི་དགེ་སློང་གིས་ཉེ་མིན་ཁྱིམ་པར་འཁོར་གསུམ་ཁེབས་པའི་གོས་དངོས་སམ།རྒྱུ་སློང་བར་བྱས་ནས་ལག་ཏུ་ཐོབ་པ་ན་དང༌།
བདུན་པ་ནི།
སྟེར་ན་སྟོད་གཡོགས་སྨད་གཡོགས་ལྷག་པོར་ལེན།།
ཆོས་གོས་རྣམ་གསུམ་མེད་པའི་དགེ་སློང་གིས་ཉེ་མིན་ཁྱིམ་པར་གོས་བསླངས་པས་མང་པོ་སྟེར་ནའང༌།སྟོད་གཡོགས་དང་སྨད་གཡོགས་ཙམ་བླང་རིགས་ཀྱི།དེ་ལས་ལྷག་པོར་ལེན་པ་ན་དང༌།
བརྒྱད་པ་ནི།
རང་ལ་སྟེར་བསམ་ཆོས་གོས་གནས་དཔགས་པ།།རིན་དང་ཁྲུ་ཚད་ཀྱིས་སློང་་་་་༌།
ཉེ་མིན་ཁྱིམ་པས་དགེ་སློང་རང་ཉིད་ལ་སྟེར་བར་བསམ་པའི་ཆོས་གོས་དངོས་སམ།དེའི་རྒྱུ་འདི་འབུལ་ཞེས་གནས་སམ་བློས་དཔགས་པ་ལས་དངོས་སུ་འབུལ་ལོངས་མེད་པར་སྔ་ཚོམ་དུ་རིན་དང་ཁྲུ་ཚད་ཀྱིས་དྲན་པ་བརྗོད་ནས་སློང་བར་བྱས་ཏེ་ལག་ཏུ་ཐོབ་པ་ན་དང༌།
དགུ་པ་ནི།
་་་་་་རྟགས་དྲན་སློང༌།།
ཉེ་མིན་ཁྱིམ་བདག་ཕོ་མོ་སོ་སོ་ནས་གོས་མང་པོའམ་རེ་རེ་དགེ་སློང་རང་ལ་འབུལ་བར་དཔག་པ་དེ་ཐོས་ནས་འབུལ་མི་འབུལ་བརྟག་པའི་བསམ་པས་དྲན་པ་བརྗོད་དེ་སློང་བར་བྱས་ཏེ་ཐོབ་པ་ན་དང༌།
བཅུ་པ་ནི།
གོས་རིན་རིན་ཆེན་བསྐུར་བ་ལེན་རྣམས་སོ།།
སྦྱིན་བདག་གིས་གོས་ཀྱི་རིན་རུང་བ་མ་ཡིན་པའི་རིན་ཆེན་གསེར་དངུལ་སོགས་ཕོ་ཉ་བ་ལ་བསྐུར་བ་དགེ་སློང་གིས་ལེན་དུ་མི་རུང་བས་ཁྱིམ་པ་ཞལ་ཏ་བྱེད་པ་ལ་གཏད་དེ་གོས་སྒྲུབ་ཏུ་བཅུག་པ་ལས་གོས་དུས་སུ་མ་བྱུང་ན་དགེ་སློང་གིས་ཞལ་ཏ་བ་ལ་དངོས་སུ་བསྐུལ་བ་གསུམ་བྱ།དེས་མ་བྱུང་ན་མཐོང་སར་མི་སྨྲ་བས་ལན་གསུམ་བསྡད་དེ་བསླངས་པ་ལ་ཉེས་པ་མེད་ཅིང་དེ་ལས་ལྷག་པར་བསླངས་པས་གོས་ཐོབ་པ་ལེན་པ་ན་ལྟུང་བར་འགྱུར་བ་རྣམས་སོ།།
བཅུ་ཚན་གཉིས་པ་ལ།དང་པོ་ནི།
སྲིན་བལ་ནང་ཚངས་བྱས་པའི་སྟན་བྱེད་དང༌།།
རིན་ཐང་ཆེ་བའི་དངོས་པོ་སྲིན་བལ་སོགས་ཀྱི་ནང་ཚངས་བྱས་པའི་སྟན་བྱེད་པ་ན་དང༌།
གཉིས་པ་ནི།
དཀོན་སར་བལ་ནག་འབའ་ཞིག་སྟན་དུ་འདིང༌།།
གནས་གང་དུ་དཀོན་སར་བལ་ནག་འབའ་ཞིག་གིས་ནང་ཚངས་བྱས་པ་སྟན་དུ་འདིང་པ་དང༌།
གསུམ་པ་ནི།
བལ་ནག་ཆ་གཉིས་སྟན་བྱེད་་་་་༌།
ཆ་གཅིག་རྐང་བལ།གཅིག་འཁོབ་བལ།བལ་ནག་ཆ་གཉིས་རྣམས་བསྲེས་ཏེ་བྱེད་དུ་རུང་བར་གསུངས་པ་ལ།བལ་ནག་དེ་ལས་ལྷག་པའི་ནང་ཚངས་བྱས་པའི་སྟན་བྱེད་པའམ་བྱེད་དུ་འཇུག་ན་སྟེ།འདི་གསུམ་བཀྲམ་པ་ཙམ་གྱིས་ལྟུང་བའོ།།
བཞི་པ་ནི།
་་་་་་ལོ་དྲུག་ནི།།མ་སོང་སྟན་གསར་བྱེད་དང་་་་་༌།
སྟན་སྔ་མ་ཡོད་བཞིན་དུ་ལོ་དྲུག་ནི་མ་སོང་བར་གནང་བ་མ་ཐོབ་པར་སྟན་གསར་པ་ནང་ཚངས་ཅན་བྱེད་དམ་བྱེད་དུ་བཅུག་ནས་ཟིན་པ་ན་དང༌།
ལྔ་པ་ནི།
་་་་་་ཚད་ལྡན་གྱི། །གདིང་བ་ཡོད་ཀྱང་སླར་བཟོ་་་་་༌།
ཚད་ལྡན་གྱི་གདིང་བ་རྙིང་པ་ཡོད་ཀྱང་གསར་པ་སླར་བཟོ་བ་ན་རྙིང་པ་ནས་ཆུང་མཐའ་ཡང་བདེ་བར་གཤེགས་པའི་མཐོ་གང་སྟེ་མིའི་ཁྲུ་ཕྱེད་དོ་གསར་པ་ལ་མ་བསླན་པར་ལོངས་སྤྱོད་པ་ན་དང༌།
དྲུག་པ་ནི།
་་་་་་བལ་ནག་ནི། །རྙེད་ནས་ལམ་གྱི་དཔག་ཚད་གསུམ་མཐར་བྱེད།།
རང་དབང་བའི་དངོས་པོ་བལ་ནག་ལ་སོགས་པའི་ཁུར་ཆེན་པོ་ནི་རྙེད་ནས་ཉི་མ་གཅིག་གི་ནང་དུ་ཆགས་སེམས་ཀྱིས་ཁྱེར་ན་དགེ་ཚུལ་སོགས་ཁྱེར་གྲོགས་ཡོད་ན་དང་པོ་ནས་བརྩམས་ཏེ་དང༌།མེད་ན་ལམ་གྱི་དཔག་ཚད་གསུམ་ཚུན་ཆད་དུ་གནང་བས།དེ་ཕན་ཆད་ནས་བརྩམས་ཏེ་རྒྱང་གྲགས་གཅིག་གི་མཐར་འདས་ཏེ་འགྲོ་བར་བྱེད་པ་ན་དང༌།
བདུན་པ་ནི།
དགེ་སློང་མར་ནི་བལ་འཁྲུ་རྨེལ་བཅུག་དང༌།།
ཉེ་མིན་དགེ་སློང་མ་ལ་དགེ་སློང་གིས་བལ་འཁྲུ་བ་དང༌།རྨེལ་བ་དང༌།འཚེད་དུ་བཅུག་པ་ལས་དེས་དེ་དང་དེ་བྱས་པ་ན་དང༌།
བརྒྱད་པ་ནི།
གསེར་དངུལ་ལེན་དང་་་་་༌།
དགེ་སློང་གིས་གསེར་དངུལ་སོགས་རུང་བ་མ་ཡིན་པ་ལ་རུང་བ་མ་བྱས་པར་ཆུད་ཟ་བ་སོགས་ཀྱི་རྐྱེན་མེད་བཞིན་ཆགས་སེམས་ཀྱིས་རེག་གམ་རེག་ཏུ་བཅུག་ནས་ལེན་པ་ན་དང་སྟེ་རུང་བ་བྱ་ཚུལ་ནི་སྦྱིན་བདག་བདག་པོ་ཉིད་དུ་མོས་སུ་གཞུག་པ་དང༌།ཞལ་ཏ་བྱེད་པ་བདག་པོ་ཉིད་དུ་ཁས་ལེན་དུ་གཞུག་པ་དང་བྱིན་གྱིས་བརླབས་པའོ།
དགུ་པ་ནི།
་་་་་་ཚོང་འབུན་མངོན་ཚན་ཅན།།
དགེ་སློང་གིས་ཉེ་མིན་ཁྱིམ་པར་ཁེ་སྤོགས་འདོད་ཀྱིས་རིན་པོ་ཆེ་སོགས་ཚོང་འབུན་མངོན་ཚན་ཅན་སྐྱེད་དུ་བཏང་ནས་དེ་ལས་སྐྱེད་གོས་ཁྲུ་གང་དུ་ལོངས་པ་ཡན་ཆད་ལག་ཏུ་ཐོབ་པ་ན་དང༌།
བཅུ་པ་ནི།
ཆེད་དུ་ཚོང་བྱེད་་་་་༌།
དགེ་སློང་གིས་ཁེ་སྤོགས་འདོད་པས་ཆེད་དུ་ཉེ་མིན་ཁྱིམ་པ་ལ་རིན་པོ་ཆེ་ལས་གཞན་པའི་དངོས་པོ་འབྲུ་དང་གོས་སོགས་མོད་ན་ཉོ་ཞིང་དཀོན་ན་ཚོང་བར་བྱེད་པས་སྐྱེད་ཐོབ་པ་ན་ལྟུང་བར་འགྱུར་རོ།།
བཅུ་ཚན་གསུམ་པ་ལ།དང་པོ་ནི།
་་་་་་ལྷུང་བཟེད་བྱིན་མ་བརླབས། །ཞག་བཅུ་འདས་འཆང་་་་་༌།
དགེ་སློང་རང་གི་ལྷུང་བཟེད་ཚད་ལྡན་བྱིན་གྱིས་མ་བརླབས་པའམ་བརླབས་ཀྱང་ཤན་སྟོབས་ཀྱིས་ཞག་བཅུ་འདས་པར་འཆང་ནས་བཅུ་གཅིག་པའི་སྐྱ་རེངས་ཤར་བ་ན་དང་སྟེ།འདིས་ཤན་རྡེག་ཚུལ་ནི་འདོན་པ་བརྗེ་བ་མ་གཏོགས་ཞག་བཅུ་པའི་གོས་ཤན་དང་འདྲའོ།།
གཉིས་པ་ནི།
་་་་་་ལྷུང་བཟེད་ཟུང་འཆང་བ།།
རྒྱུ་དབྱིབས་ཁ་དོག་གིས་རུང་ཞིང་མཐེ་བོའི་ལྟོ་གང་གི་ལྷག་མར་ཕུལ་དགུ་ཤོང་བ་ཡན་ཆད་ཀྱི་ལྷུང་བཟེད་སྤྱད་བཟོད་ཡོད་བཞིན་དུ་ཉེ་མིན་ཁྱིམ་པ་ལ་ལྷུང་བཟེད་གཞན་བསླངས་པས་ཐོབ་ན་ཟུང་དུ་འགྱུར་བས་དེ་འཆང་བ་སྟེ་ལག་ཏུ་ཐོབ་པ་ན་ལྟུང་བ་ཡིན་ཞིང༌།འདི་ཡང་བྱིན་གྱིས་མ་བརླབས་པར་ཞག་བཅུ་འདས་ན་ལྟུང་བ་སྔ་མར་འགྱུར་རོ།།
གསུམ་པ་ནི།
གླ་རྔན་མེད་པར་འཐག་འཇུག་་་་་༌།
ཉེ་དུ་མ་ཡིན་པའི་ཐགས་མཁན་ལ་གླ་རྔན་མེད་པར་རང་ངམ་བསྐོས་པས་གོས་འཐག་ཏུ་འཇུག་སྟེ་ལག་ཏུ་ཐོབ་པ་ན་དང༌།
བཞི་པ་ནི།
་་་་་་ཐགས་རྒྱ་བསྐྱེད།།
ཉེ་མིན་ཁྱིམ་པས་རང་ལ་འབུལ་རྒྱུའི་གོས་འཐག་ཏུ་བཅུག་པ་ན་བདག་པོས་མ་གནང་བར་བསྔོས་ཚོད་ལས་ལྷག་པའི་ཐགས་རྒྱ་བསྐྱེད་དུ་བཅུག་སྟེ་ཐོབ་པ་ན་དང༌།
ལྔ་པ་ནི།
དགེ་སློང་གོས་བྱིན་སླར་ཕྲོགས་་་་་༌།
རང་དང་ལྟ་མཚན་མཐུན་པའི་དགེ་སློང་གཞན་ལ་གོས་སམ་ལྷུང་བཟེད་སོགས་ཡོ་བྱད་སྔར་བྱིན་པ་སླར་འཕྲོག་སྟེ་དེ་ལས་བྲལ་བ་ན་དང༌།
དྲུག་པ་ནི།
་་་་་་བརྟད་བྱུང་གོས། །སྦྱིན་དུས་བཤད་ལས་སྔ་བར་བདག་གིར་བྱས།།
དབྱར་གནས་པའི་དགེ་འདུན་ལ་ཕུལ་བའི་བརྟད་པ་ལས་བྱུང་བའི་གོས་སོ་སོར་སྦྱིན་པའི་དུས་བཤད་པ་དགག་དབྱེ་བྱས་པའི་ཕྱི་དེ་ཉིན་ལས་སྔ་བར་དབྱར་ནང་དུ་བདག་གིར་བྱས་པ་དང༌།སོ་སོར་བགོས་པ་དང༌།དགག་དབྱེའི་ཕྱི་དེ་ཉིན་དུ་མ་བསྒོས་པ་སྟེ།དེ་ལྟར་སྔ་ཕྱིས་ཀྱི་ལྟུང་བ་གསུམ་མོ། །གལ་ཏེ་ལུང་ལས།
བརྟད་པ་ལས་བྱུང་བའི་གོས་ལྔ་པོ།ནད་པ་དང་ནད་པའི་ཕྱིར་དང༌།འཆི་བ་དང་འཆི་བའི་ཕྱིར་དང༌།འགྲོ་བར་ཆས་པ་ལ་སྦྱིན་པ།ཞེས་གསུངས་པ་ལྟར།རྐྱེན་ལྡན་དེ་དག་ལ་དབྱར་མཐའི་ཞག་བཅུའི་ནང་དུ་སོ་སོར་སྦྱིན་ན་ཉེས་པ་མེད་ཅིང༌།ཡང་དབྱར་ནང་དུ་ཆོས་སྨྲ་བའི་རྙེད་པ་དང༌།ནད་པའི་རིམ་གྲོ་ལ་སོགས་པའི་ཆེད་དུ་བྱིན་པའི་རྙེད་པ་ནི་འདིར་མི་གཏོགས་སོ།།
བདུན་པ་ནི།
དགོན་པར་འཇིགས་བཅས་གོས་བྲལ་ཞག་བདུན་འདས།།
དགེ་སློང་དགོན་པར་གནས་པས་འཇིགས་པ་དང་བཅས་ན་བྱིན་བརླབས་ཅན་གྱི་ཆོས་གོས་གསུམ་དང་ཞག་དྲུག་ཚུན་ཆད་བྲལ་ཀྱང་ཉེས་པ་མེད་པར་གནང་ལ།འཇིགས་པ་དང་བྲལ་ནས་ཀྱང་ཞག་བདུན་འདས་ཏེ་སྐྱ་རེངས་ཤར་བ་དང༌།
བརྒྱད་པ་ནི།
རས་ཆེན་དགག་དབྱེ་ཟིན་ཀྱང་ཟླ་ཕྱེད་འདས།།
དབྱར་གྱི་གོས་རས་ཆེན་དགེ་སློང་རང་ཉིད་དབྱར་སྔ་ཕྱི་གང་ཁས་ལེན་པ་དེའི་ཟླ་བ་གཅིག་གི་སྔ་རོལ་དུ་བཙལ་ཞིང་རྙེད་ན་འཚོལ་སྔས་པའི་སྤང་བ་དང༌།དགག་དབྱེ་ཟིན་ནས་ཀྱང་ཟླ་བ་ཕྱེད་ལས་འདས་པར་འཆང་ན་བཞག་འཕྱིས་ཀྱི་སྤང་བ་དང༌།
དགུ་པ་ནི།
དགེ་འདུན་བསྔོས་པའི་རྙེད་པ་བདག་ཏུ་བཟུང༌།།
ཁྱིམ་པས་དགེ་འདུན་ནམ་དགེ་སློང་གཞན་ལ་བསྔོས་པའི་གོས་དང་ལྷུང་བཟེད་ལྟ་བུའི་རྙེད་པ་དགེ་སློང་རང་ཉིད་ལ་བསྒྱུར་ཏེ་བདག་ཏུ་བཟུང་བ་ན་དང༌།
བཅུ་པ་ནི།
ན་སྨན་ཞག་བདུན་འདས་ནས་གསོག་འཇོག་གོ།
རླུང་གིས་ན་བ་ལ་ཕན་པའི་སྨན་བྱིན་བརླབས་ཀྱི་རང་དུས་ཞག་བདུན་འདས་ནས་གསོག་འཇོག་ཏུ་སོང་བ་བཅངས་པ་ལ་སྤང་བ་ཐ་མར་བཞག་གོ།འདི་ནི་མཚོན་པ་ཙམ་སྟེ་སྨན་བཞི་གང་ཡིན་ཡང་བྱིན་ལེན་བྱས་པ་མ་ཞིག་པ་བྱིན་ལེན་གྱི་མཐའ་འདས་ནས་བཅངས་ན་སྤང་བར་འགྱུར་ཏེ།བྱིན་ལེན་གྱི་མཐའ་ནི་གུང་ཚིགས་ལས་འདས་པ་དང༌།ཕྱི་དྲོ་དང༌།འོད་དམར་གྱི་མཐའ་དང༌།སྲོད་མཐའ་དང༌།མཚན་མོའི་ཐུན་ཐ་མའི་མཐའོ། །དུས་རུང་ལ་བྱིན་བརླབས་མ་བཤད་ཅིང་འཚོ་བཅངས་ཀྱི་སྨན་ཇི་སྲིད་འཚོའི་བར་བྱིན་གྱིས་བརླབས་པ་ནི་གསོག་འཇོག་ཏུ་མི་འགྱུར་ཡང༌།ཐུན་ཚོད་དུ་རུང་བ་དང༌།ཞག་བདུན་པའི་སྨན་དང༌།འཚོ་བཅངས་ཀྱི་སྨན་ནད་སོས་ཀྱི་བར་དུ་སྟེ།དེ་གསུམ་བྱིན་གྱིས་བརླབས་ན་རང་སྟོབས་སམ་ཤན་སྟོབས་ཀྱིས་རང་རང་གི་དུས་འདས་ནས་བཅངས་ན་སྤང་བར་འགྱུར་རོ། །དེ་ལ་སྨན་ཤན་ནི་རྡེག་བྱེད་བྱིན་གྱིས་བརླབས་པ་ཉིད་ཀྱིས་བརྡེག་བྱ་རང་རང་དང་དུས་མཉམ་པའམ་མི་མཉམ་ཕྱིས་རྙེད་པ་ལ་ཤན་འཇུག་པས་རྡེག་བྱེད་ཀྱི་རང་དུས་འདས་ནས་དང༌།བརྡེག་བྱ་རང་དུས་མ་འདས་ཀྱང་སྔ་མའི་བྱིན་བརླབས་ཀྱི་མཐའ་འདས་ན་རང་སྟོབས་སམ་ཤན་སྟོབས་གང་རུང་གིས་ལྟུང་བ་བསྐྱེད་དོ། །ལྟུང་བའི་ཤན་ནི་དེ་ལྟར་སྤང་ལྟུང་སུམ་ཅུ་ལས་གང་རུང་བྱུང་བ་ཕྱིར་བཅོས་མ་བྱས་ཀྱི་བར་གོས་སོགས་ཡོ་བྱད་གང་རྙེད་ཀྱང་ལྟུང་བ་སྔ་མ་དེ་ཕྱིར་བཅོས་བྱེད་པའི་ཚེ་དེའི་རྒྱུར་གྱུར་པའི་རྫས་དེ་ཉིད་དུ་མ་ཟད་ཡོ་བྱད་རྟིང་མ་རྣམས་ཀྱང་སྔ་མའི་ཤན་གྱིས་སྤང་དགོས་པ་ཡིན་ཏེ།ལྟུང་བ་དེ་ཡོད་ན་ཡོ་བྱད་ཙམ་བདག་གིར་བྱས་པ་ལ་སྤང་བ་ཉིད་དོ། །ཞེས་གསུངས་པའི་ཕྱིར་རོ། །སྤང་ལྟུང་དེ་དག་ཕྱིར་བཅོས་པའི་ཚེ་བྱིན་འཕྲོག་དང་ལྷུང་བཟེད་ལྷག་པོ་ཚོལ་བ་གཉིས་ཀྱི་རྫས་རྩ་བ་ནས་སྤང་དགོས་ཤིང༌།གཞན་རྣམས་ཞག་གཅིག་གི་རིང་སྤང་བ་སྔོན་དུ་བཏང་བས་ཆོག་གོ།
གཉིས་པ་ལྟུང་བྱེད་ཀྱི་སྡེ་ཕྱི་མ་ནི།
ལྟུང་བྱེད་འབའ་ཞིག་དགུ་བཅུ་ཐམ་པ་ནི།།
འདི་དག་སྤྱད་ན་ངན་སོང་དུ་ལྟུང་བར་བྱེད་ཅིང་བཤགས་པའི་ཚེ་ཡང་སྤང་བྲལ་སྔོན་དུ་བཏང་མི་དགོས་པས་འབའ་ཞིག་པ།གྲངས་དགུ་བཅུ་ཐམ་པ་ལས།དེ་བཤད་པ་ནི།རྩ་བའི་མདོར།
ཤེས་བཞིན་དང་ནི་ས་བོན་དང༌། །མ་བསྐོས་པ་དང་ཡང་ཡང་དང༌།།
ཆུ་དང་ཁྱིམ་དང་བསམ་བཞིན་དང༌། །མགྲོན་མང་རྐུན་མ་ཆོས་སྟོན་ནོ།།
ཞེས་པའི་སྡོམ་ལྟར་བཅུ་ཚན་དགུ་ལས།དང་པོ་ཤེས་བཞིན་གྱི་སྡེ་ཚན་ལས།
དང་པོ་ནི།
ཤེས་བཞིན་རྫུན་སྨྲ་་་་་༌།
རྫུན་སྨྲའི་ཕམ་པ་དང༌།གཞི་མེད་དང་བག་ཙམ་གྱི་ལྷག་མ་དང༌།ཤེས་བཞིན་དུ་ཆོས་མིན་ཆོས་དང༌།ཆོས་ཆོས་མ་ཡིན་པར་སྨྲ་བའི་སྦོམ་པོའི་རྫུན་དང༌།ཡང་དག་དྲི་བའི་དུས་ལྟུང་བ་ཡོད་བཞིན་མི་སྨྲ་བ་ཉེས་བྱས་ཀྱི་རྫུན་ཏེ་བཞི་དང༌།བཤེས་ངོར།འཕྱ་བ།ཟས་ཅུང༌།སྐུར་འདེབས།ཉེར་འཇོགཁྱད་གསོད་དེ་ལྟུང་བྱེད་རང་གི་ནང་ཚན་གྱི་རྫུན་དྲུག་པོ་དེ་རྣམས་ལས་གཞན་པའི་ཤེས་བཞིན་དུ་རྫུན་སྨྲས་པ་ཉན་པ་པོས་བརྡ་འཕྲོད་ཅིང་གོ་བ་ན་དང༌།
གཉིས་པ་ནི།
་་་་་་དགེ་སློང་སྐྱོན་བརྗོད་པ།།
ཡུལ་དགེ་སློང་ལ་ཡུལ་དུས་དེར་སྐྱོན་དུ་གྲགས་པའི་ཚིག་ཕན་སེམས་མ་ཡིན་པར་བརྗོད་པ་ཕ་རོལ་པོས་གོ་བ་ན་དང༌།
གསུམ་པ་ནི།
ཕྲ་མས་འབྱེད་དང་་་་་༌།
ཡུལ་དགེ་སློང་མཐུན་པ་དག་ཕྲ་མའི་ཚིག་གིས་འབྱེད་པར་བྱེད་པ་གོ་བ་ན་དང༌།
བཞི་པ་ནི།
་་་་་་སྐྱོ་སྔོགས་བཟླུམས་ཀྱང་དབྱེ།།
དགེ་སློང་གཉིས་རྩོད་པ་དགེ་འདུན་གྱིས་ཆོས་ཕྱོགས་སུ་ཞི་བར་བྱས་ཟིན་ཅིང་རང་དང་གོ་བྱ་ཞི་བྱེད་ཀྱི་ལས་དེ་བྱེད་པ་ལ་གཏོགས་པས་སྐྱོ་སྔོགས་ཀྱིས་རྩོད་པ་སྔར་བཟླུམས་པ་དེ་ཉིད་ཀྱང་དབྱེ་འདོད་ཀྱི་བསམ་པས་བཤིག་པར་རྩོམ་པའི་ཚིག་སྨྲས་ཤིང་གོ་བ་ན་དང༌།
ལྔ་པ་ནི།
བུད་མེད་ཆོས་སྟོན་་་་་༌།
ཁྲིམས་གྲོགས་མེད་པར་ཡུལ་ཉན་འདོད་ཀྱི་བུད་མེད་ལ་དེས་མི་ཤེས་པའི་ཆོས་ཚིག་ལྔའམ་དྲུག་ལས་ལྷག་པར་སྟོན་པ་ན་དང༌།
དྲུག་པ་ནི།
་་་་་་བསྙེན་པར་མ་རྫོགས་དང༌། །ལྷན་ཅིག་ཆོས་འདོན་་་་་༌།
རྒོད་བག་གི་བསམ་པས་བསྙེན་པར་མ་རྫོགས་པ་དང་ལྷན་ཅིག་ཏུ་གདངས་སྣ་ཚོགས་ཀྱིས་ཆོས་འདོན་པར་བྱས་པ་ན་དང༌།
བདུན་པ་ནི།
་་་་་་གནས་ངན་ལེན་ལྟུང་བརྗོད།།
ཕམ་ལྷག་གང་རུང་བྱུང་བའི་དགེ་སློང་ལ་གླེང་བར་མ་བསྐོས་བཞིན་དུ་ཡུལ་དགེ་སློང་མིན་པ་བསླབ་བྱ་ལ་མི་མཁས་པའི་གནས་ངན་ལེན་གྱི་ལྟུང་བ་དེ་བརྗོད་ཅིང་གོ་བ་ན་དང༌།
བརྒྱད་པ་ནི།
མི་ཆོས་བླ་མ་བདེན་སྨྲ་་་་་༌།
མི་ཆོས་བླ་མའི་ཡོན་ཏན་ཐོབ་པའི་དགེ་སློང་གིས་ཡུལ་བསྙེན་པར་མ་རྫོགས་པ་ལ་དགོས་པ་ཁྱད་པར་ཅན་མེད་བཞིན་དུ་དེ་ཐོབ་བོ་ཞེས་བདེན་པར་སྨྲས་པ་ཡུལ་གྱིས་གོ་བ་ན་དང༌།
དགུ་པ་ནི།
་་་་་་བཤེས་ངོར་འཕྱ།།
དགེ་འདུན་གྱི་བྱ་བ་བྱས་པའི་དགེ་སློང་ལ་ཟས་ལས་གཞན་པའི་རུང་བ་ཚད་ལྡན་གྱི་ཡོ་བྱད་ཅུང་ཟད་བྱིན་པ་ལ་མི་བཟོད་པས་དགེ་འདུན་གྱི་རྫས་གང་ཟག་ལ་བཤེས་ངོར་བྱས་ནས་བྱིན་ནོ་ཞེས་འཕྱས་པ་ཕ་རོལ་པོས་གོ་བ་ན་དང༌།
བཅུ་པ་ནི།
བསླབ་གཞི་ཁྱད་གསོད་་་་་༌།
གསོ་སྦྱོང་གི་དུས་ལྟ་བུ་སོ་ཐར་གྱི་མདོ་འདོན་པའི་ཚེ་བསླབ་གཞི་ཕྲ་ཞིང་ཕྲ་བ་འདི་དག་འདོན་པས་ཅི་བྱ་ཞེས་ཁྱད་དུ་གསོད་པའི་ཚིག་སྨྲས་པ་གཞན་གྱིས་གོ་བ་ན་ལྟུང་བར་འགྱུར་བ་རྣམས་སོ།།
གཉིས་པ་ས་བོན་གྱི་སྡེ་ཚན་ལས། དང་པོ་ནི།
་་་་་་ས་བོན་སྐྱེ་བ་གཅོད།།
ནས་སོགས་ས་བོན་དང་མྱུ་གུ་སོགས་སྐྱེ་བ་གང་རུང་རང་གི་ཆོས་སུ་གྲུབ་ལ།མ་ཉམས་པ།རུང་བ་མ་བྱས་པ།རང་རྩྭས་བཅིངས་པ་སོགས་ཀྱི་རྐྱེན་དང་ལྡན་པ་མ་ཡིན་པར་ནས་རྔོ་བ་སོགས་ས་བོན་འཇོམས་པ་དང༌།རྩྭ་ཤིང་སོགས་ཀྱི་སྐྱེ་བ་གཅོད་པར་བྱེད་དམ་བྱེད་དུ་འཇུག་ཀྱང་རུང་སྟེ།ཉམས་པའི་ཚེ་རྩྭ་དང་ནས་སོགས་རེ་རེའི་གྲངས་བཞིན་ལྟུང་བར་འགྱུར་ཞིང༌།སྟར་ཀ་ལ་སོགས་པའི་འབྲས་བུ་སྨིན་པ་སྡོང་བུ་ལས་ཕྲལ་བར་བྱས་པ་སོགས་ཉེས་བྱས་སོ། །རུང་བ་བྱ་ཚུལ་ནི་མེས་རེག་པ་དང་མཚོན་དང་སེན་མོ་དང་ནེ་ཙོ་སོགས་ཀྱིས་རྨ་བཏོད་པ་སོགས་དང༌།དུས་རུང་མ་གཏོགས་པའི་སྨན་གཞན་གསུམ་ཕྱི་དྲོ་ལོངས་སྤྱོད་པའི་ཚེ་ཆུ་གྲང་མོ་གཏོར་བས་རུང་བར་བྱ་བ་རྣམས་སོ།།
གཉིས་པ་ནི།
བདག་གི་ངོར་འཕྱ་་་་་༌།
དགེ་འདུན་གྱི་ཞལ་ཏ་ཆོས་དང་མཐུན་པར་བྱས་སམ་བྱེད་བཞིན་པའི་དགེ་སློང་ལ་བདག་གི་ངོར་འདིས་ངན་པ་སྟོབ་བོ་ཞེས་སོགས་དངོས་སམ།ཁ་ཅིག་འདི་ལྟར་བྱེད་དོ་ཞེས་ཟུར་གྱིས་འཕྱས་པ་གོ་བ་ན།དེ་ཉིད་ཀྱིས་དགེ་འདུན་གྱིས་གསོལ་བའི་ལས་ཀྱིས་ངན་པའི་གྲངས་སུ་བཅུག་པ་དེའི་ཚེ་ན་དང༌།
གསུམ་པ་ནི།
་་་་་་བསྒོ་བ་རྣར་གཟོན་ནི། །ལྟུང་བྱུང་གླེང་ལ་མ་ཐོས་ལན་གཞན་འདེབས།།
རང་ལ་ལྟུང་བ་བྱུང་བ་བསྒོ་བ་རྣར་གཟོན་པའི་སྒོ་ནས་ནི་དགེ་སློང་གཞན་གྱིས་ཕྱིར་བཅོས་སུ་གཞུག་པའི་ཕྱིར་ལྟུང་བ་བྱུང་བ་དེ་གླེང་བ་ལྟ་བུ་ཆོས་མཐུན་གྱི་བསྒོ་བ་དང་དྲི་བ་དྲིས་པ་ལ་དེ་མ་ཐོས་པ་ལྟར་དེའི་ལན་མི་སྨྲ་བར་ལན་གཞན་ལོག་པར་འདེབས་པའི་ཚིག་སྨྲས་པ་ཡུལ་གྱིས་གོ་བ་ན་སྔར་ངན་པའི་གྲངས་སུ་བཅུག་པ་དེའི་ཚེ་ན་དང༌།
བཞི་པ་ནི།
ཁྲི་དང་་་་་༌།
དགེ་འདུན་གྱི་ཁྲི་དང་ཁྲིའུ་སོགས་གནས་མལ་ལ་སྤྱད་ནས་རང་གིས་མ་བསྡུས་ཤིང༌།གཞན་ལའང་མ་བཅོལ་བར་བླ་གབ་མེད་པར་བོར་བས་ཆུད་ཟོས་སམ་མ་ཟོས་ཀྱང་དེའི་ཉེ་འཁོར་ནས་འདོམ་ཞེ་དགུ་འདས་ཏེ་ཕྱིན་པ་ན་དང༌།
ལྔ་པ་ནི།
་་་་་་གདིང་བ་མ་བསྡུས་བཏིང་སོང་དང༌།།
དགེ་འདུན་གྱིས་གཙུག་ལག་ཁང་སྲོག་ཆགས་སྐྱེ་བའི་ཉེས་དམིགས་ཡོད་པར་རྩྭ་ལ་སོགས་པའི་གདིང་བ་ལ་ལོངས་སྤྱད་ནས་རང་ངམ་བསྐོས་པས་མ་བསྡུས་པར་བཏིང་བཞིན་བོར་བས་ཆུད་ཟོས་སམ་མ་ཟོས་ཀྱང་ཉེ་འཁོར་ལས་འདས་ཏེ་སོང་བ་ན་དང༌།
དྲུག་པ་ནི།
དགེ་སློང་སྐྲོད་དང་་་་་༌།
གཙུག་ལག་ཁང་ནས་དགེ་སློང་གཞན་ཞེ་སྡང་གིས་སྐྲོད་དམ་སྐྲོད་དུ་བཅུག་པས་དེ་ཕྱི་རོལ་དུ་འཐོན་པ་ན་དང༌།
བདུན་པ་ནི།
་་་་་་་ཐོ་འཚམ་ཕྱིས་གནོན་བྱས།།
གཙུག་ལག་ཁང་དུ་སྔར་ཞུགས་པའི་དགེ་སློང་གཞན་ལ་ཐོ་འཚམ་པའི་བསམ་པས་ཕྱིས་གནོན་བྱས་ཏེ་ལུས་ངག་ཟིལ་གྱིས་གནོན་པ་ན་དང༌།
བརྒྱད་པ་ནི།
མལ་ཁྲིས་བུག་དབྱུང་་་་་༌།
གཙུག་ལག་ཁང་གི་སྟེང་ཐོག་སྙི་བ་ལ་གནས་མལ་གྱི་ཁྲི་རྐང་རྣོན་པོས་བཙུགས་ཏེ་སྟེང་དུ་ལྕིད་ཕབ་ནས་འདུག་པས་བུག་པ་བྱུང་བ་ན་དང༌།
དགུ་པ་ནི།
་་་་་་སྲོག་ཆགས་ལྡན་པའི་ཆུ། །རྩྭར་འདེབས་་་་་༌།
སྲོག་ཆགས་དང་ལྡན་པའི་ཆུ་དང་རྩྭ་ཤིང་སོགས་ལ་དེར་ཤེས་བཞིན་དུ་ཆུ་ནས་རྩྭ་སོགས་སྐམ་སར་འདེབས་པ་དང༌།རྩྭ་སོགས་ཆུར་འདེབས་པར་བྱེད་དམ་བྱེད་དུ་བཅུག་པས་སྲོག་ཆགས་ཇི་སྙེད་ཤི་བ་དེ་སྙེད་ཀྱི་དང༌།
བཅུ་པ་ནི།
་་་་་་གཙུག་ལག་ཕ་གུ་རིམ་གཉིས་བརྩིགས།།
ཤེས་བཞིན་བགྱིས་སོ་འདི་མན་དགེ་སློང་མར།།
གཞི་མི་བརྟན་པ་དང་ཆུ་ཁུང་མ་བཏོད་པ་སོགས་འཇིགས་རྐྱེན་ཡོད་པར་སྤྱོད་ལམ་བཞི་ཤོང་ཡན་ཆད་ཀྱི་གཙུག་ལག་ཁང་རང་ངམ་བསྐོས་པས་ཉིན་གཅིག་ལ་ཕ་གུའི་རིམ་པ་འཇིམ་པ་དང་བཅས་པ་གཉིས་སམ་གསུམ་ལས་ལྷག་པ་རྩིག་པ་ཤེས་བཞིན་དུ་བགྱིས་ན་ལྟུང་བར་འགྱུར་བ་རྣམས་སོ།།
གསུམ་པ་མ་བསྐོས་པའི་སྡེ་ཚན་ལས།འདི་མན་ཞེས་པ་བཅུ་ཚན་འདི་དགེ་སློང་མ་ཉིད་ལ་བརྟེན་པར་ཤེས་པའིཆེད་དུ་སྟེ།
དང་པོ་ནི།
མ་བསྐོས་ཆོས་སྟོན་་་་་༌།
དགེ་སློང་མའི་སྟོན་པར་མ་བསྐོས་སམ་བསྐོས་ཀྱང་མཚན་ཉིད་དང་མི་ལྡན་པའི་དགེ་སློང་གིས་དགེ་སློང་མ་ལ་ཆོས་སྟོན་ཅིང་དེས་གོ་བ་ན་དང༌།
གཉིས་པ་ནི།
་་་་་་བསྐོས་ཀྱང་ཉི་ནུབ་དང༌།།
དགེ་སློང་མའི་སྟོན་པར་བསྐོས་ཀྱང་འཇིགས་པ་དང་བཅས་པའི་གནས་སུ་ཉི་མ་ནུབ་ནས་ཀྱང་ཆོས་བསྟན་པ་དེས་གོ་བ་ན་དང༌།
གསུམ་པ་ནི།
ཁ་ཟས་ཕྱིར་སྟོན་་་་་༌།
དགེ་སློང་མའི་སྟོན་པར་འོས་ཤིང་བསྐོས་པས་རྙེད་པའི་ཕྱིར་ཆོས་མི་སྟོན་ཀྱང༌།ཕྲག་དོག་གིས་ཁ་ཟས་ཅུང་ཟད་ཙམ་གྱི་ཕྱིར་ཆོས་སྟོན་ནོ་ཞེས་སྐུར་པ་བཏབ་པ་ཡུལ་གྱིས་གོ་བ་ན་དང༌།
བཞི་པ་ནི།
་་་་་་གོས་བཙེམས་་་་་༌།
ཉེ་མིན་དགེ་སློང་མའི་གོས་བཙེམས་ཏེ་གྲུབ་པ་ན་དང༌།
ལྔ་པ་ནི།
་་་་་་་་ཆོས་གོས་སྦྱིན།།
ཉེ་མིན་དགེ་སློང་མ་ལ་བཤེས་ངོ་ཙམ་གྱི་ཕྱིར་རང་གི་ཆོས་གོས་རུང་བ་ཚད་ལྡན་སྦྱིན་པ་དེས་ལག་ཏུ་ཐོབ་པ་ན་དང༌།
དྲུག་པ་ནི།
དོན་མཐུན་ལམ་འགྲོགས་་་་་༌།
ཉེ་མིན་དགེ་སློང་མ་དང་ལྷན་ཅིག་དོན་མཐུན་པས་མགྲོན་ཐབས་སུ་ལམ་དུ་འགྲོགས་ཏེ་འགྲོ་ན་རྒྱང་གྲགས་རེ་རེ་འདས་པ་ལ་ལྟུང་བ་རེ་རེ་དང་ཕྱེད་ལ་ཉེས་བྱས་དང༌།
བདུན་པ་ནི།
་་་་་་གྲུ་དེ་གྱེན་ཐུར་འགྲོ།།
སྔར་བཞིན་དགེ་སློང་མ་དང་ལྷན་ཅིག་གྲུར་ཞུགས་ནས་ཐད་ཀ་དེ་ཉིད་དུ་མིན་པར་རྒྱུན་ལས་ལྡོག་སྟེ་གྱེན་དང༌།རྒྱུན་ཕྱོགས་སུ་མཐུར་དུ་འགྲོ་ན་སྔར་བཞིན་རྒྱང་གྲགས་རེ་རེ་འདས་པ་ན་དང༌།
བརྒྱད་པ་ནི།
དབེན་པར་གཅིག་འདུག་པ་དང་་་་་༌།
ཉེ་དུ་མིན་པའི་བུད་མེད་དང་དབེན་པ་སྐྱབས་ཡོད་པར་ཁྲིམས་གྲོགས་མེད་པར་གནས་གཅིག་ཏུ་འདོམ་གང་ཙམ་གྱིས་བར་ཆོད་ཀྱང་གཉིས་ཀ་ས་ལ་འདུག་པ་ན་དང༌།
དགུ་པ་ནི།
་་་་་་་འགྲེང་བ་དང༌།།
དབེན་པར་བུད་མེད་དམ་ཁྱད་པར་དགེ་སློང་མ་དང༌།སྔར་བཞིན་ལས་གཉིས་ཀ་འགྲེང་བའི་སྤྱོད་ལམ་གྱིས་གནས་པ་ན་དང༌།
བཅུ་པ་ནི།
སྦྱོར་བཅུག་ཟས་ཟ་རྣམས་ནི་སྤང་བར་བྱ།།
དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་སྦྱིན་བདག་ཁྱིམ་པ་ལ་རང་དང་མི་འབྲེལ་བའི་ཡོན་ཏན་བརྗོད་ཅིང་སྦྱོར་དུ་བཅུག་པའི་དུས་རུང་གི་ཟས་ཟ་བ་ན་ལྟུང་བར་འགྱུར་བ་རྣམས་ནི་སྤང་བར་བྱའོ།།
བཞི་པ་ཡང་ཡང་གི་སྡེ་ཚན་ནི། དང་པོ་ནི།
ཡང་ཡང་ཟས་ཟ་་་་་༌།
བསོད་སྙོམས་ལན་གཅིག་གིས་གསོ་མི་ནུས་པའི་ནད་ཀྱིས་བཏབ་པ་དང༌།དགེ་འདུན་དང༌།མཆོད་རྟེན་གྱི་ལས་དང༌།མུ་གེའི་དུས་དང༌།དཔག་ཚད་ཕྱེད་དུ་ཕྱིན་པ་མ་ཡིན་ཞིང༌།སྲ་བརྐྱང་མ་བཏིང་བའི་དགེ་སློང་གིས་ཁྱིམ་པ་ཉེ་དུ་མ་ཡིན་པ་ལ་ཁྲུ་གང་ཡན་ཆད་ཀྱི་གོས་ཀྱི་རྙེད་པ་མེད་པའི་དུས་རུང་གི་ཟས་ཉི་མ་གཅིག་ལ་ཁྱིམ་གཞན་དུ་ཟོས་ཟིན་ཀྱང་ཁྱིམ་གཉིས་དང་གསུམ་ལ་སོགས་པ་ལས་བསླངས་ཏེ་ཡང་ཡང་ཁ་ཟས་ཟ་བ་ན་དང༌།
གཉིས་པ་ནི།
་་་་་་མུ་སྟེགས་འདུག་པའི་སར། །ཞག་གཅིག་ལྷག་བསྡད་ཟ་དང་་་་་༌།
ཉེ་མིན་ཁྱིམ་པ་མུ་སྟེགས་པ་འདུག་པའི་སར་སྦྱིན་བདག་གིས་མ་བཏབ་པར་ཞག་གཅིག་ལས་ལྷག་པར་བསྡད་དེ་ཉི་མ་གཉིས་པའི་ཟན་ཟ་བ་ན་དང༌།
གསུམ་པ་ནི།
་་་་་་ལྷུང་བཟེད་དོ།།ཟ་དང་་་་་༌།
ཉེ་མིན་ཁྱིམ་པས་ཅི་བདེར་སྟོབ་པ་མ་ཡིན་པར་དུས་རུང་གི་ཟས་ལྷུང་བཟེད་ཆེ་ཚད་གང་ངམ།འབྲིང་ཚད་དོ།ཆུང་ཚད་གསུམ་སྟེ་བྲེ་ཕྱེད་དང་ལྔ་ལས་ལྷག་པ་བསླངས་ནས་གནས་གཞན་དུ་ཁྱེར་ཏེ་ཟ་བ་ན་དང༌།
བཞི་པ་ནི།
་་་་་་ཟོས་རྗེས་བཟའ་བཅའ་ཟ་བ་དང༌།།
མུ་གེའི་དུས་དང་ནད་པ་མ་ཡིན་པས་དུས་རུང་གི་ཟས་ཟོས་ཏེ་བློས་བཅད་ཅིང་ངག་ཏུ་བརྗོད་ནས་དེའི་རྗེས་སུ་བཟའ་བཅའ་གང་རུང་ལྷག་པོ་མ་བྱས་པར་སྔར་གྱི་བཟའ་བཅའ་གང་རུང་ཟ་བ་ན་དང༌།ལྷག་པོ་བྱ་ཚུལ་ནི་ཡུལ་དགེ་སློང་གནས་མ་བཏང་བའི་མདུན་དུ་ཙོག་པུས་སྤང་ཟས་བཟུང་ནས་གསོལ་བ་བཏབ་པས་ཡུལ་དེས་བླངས་ཏེ་ཁམ་གཉིས་སམ་གསུམ་མམ་ཕུད་ཟ་ཞིང་གལ་ཏེ་ཟས་སྤངས་པ་ཡིན་ན་ཟ་མི་དགོས་ལ།གང་ལྟར་ཡང་དེས་དེ་ལ་གཏད་པའོ། །འདིར་བྱིན་ལེན་བྱས་པའི་ཟས་ཟ་བའི་འཕྲོ་མ་རྫོགས་པར་ལོང་ནས་ཡང་ཟ་ན་བརྩམས་ལྡང་ངོ༌།།
ལྔ་པ་ནི།
སྤང་ཟས་ལྟུང་འབྱུང་ཆེད་དུ་རྗུན་གྱིས་སྟོབ།།
ཡུལ་དགེ་སློང་གཞན་གྱིས་སྤང་བའི་ཟས་ལྷག་པོར་མ་བྱས་བཞིན་དུ་དེ་ལ་ངན་སེམས་ཀྱིས་ལྟུང་བ་འབྱུང་བའི་ཆེད་དུ་ལྷག་པོར་བྱས་སོ་ཞེས་རྫུན་གྱིས་སྟོབ་པའི་ཚིག་སྨྲས་པ་དེས་གོ་ནས་ཟོས་ན་སྟོབ་པ་པོ་ལ་དང༌།
དྲུག་པ་ནི།
གནང་མིན་མཚམས་ནང་ལོགས་སུ་འདུས་ནས་ཟ།།
ན་བ་སོགས་གནང་བའི་དུས་མིན་པར་མཚམས་ནང་དུ་བསམ་པ་མི་མཐུན་པས།དགེ་འདུན་སྤྱི་ལས་ལོགས་སུ་དགེ་སློང་གསུམ་ཡན་ཆད་ལྷན་ཅིག་ཏུ་འདུས་ནས་དུས་རུང་གི་ཟས་ཟ་བ་ན་དང༌།
བདུན་པ་ནི།
དུས་མིན་ཕྱེད་ཡོལ་ཟ་དང་་་་་༌།
ན་བ་སོགས་ཀྱི་རྐྱེན་མེད་པར་དུས་རུང་གི་ཟས་ཟ་བའི་དུས་མིན་པ་རང་གང་དུ་གནས་པའི་རང་གླིང་གི་ཉི་མ་ཕྱེད་ཡོལ་ནས་སྐྱ་རེངས་དང་པོ་མ་ཤར་གྱི་བར་དུ་ཟས་མགུལ་དུ་ཇི་ཙམ་མིད་པ་དེ་སྙེད་ཀྱི་དང༌།ནད་པས་ཀྱང་ཟ་བའི་ཚེ་དུས་དྲན་བྱ་དགོས་སོ།།
བརྒྱད་པ་ནི།
་་་་་་གསོག་འཇོག་ཟ།།
ན་བ་སོགས་ཀྱི་རྐྱེན་དང༌།མིད་པ་གཉིས་པ་སོགས་ལྟ་བུ་མ་ཡིན་པར་སྨན་བཞི་གང་རུང་བྱིན་ལེན་བྱས་པ་རང་དུས་ལས་འདས་པས་གསོག་འཇོག་ཏུ་སོང་ཞིང་མ་ཞིག་པ་ཟ་བ་ན་དང༌།འདིར་གསོག་འཇོག་ཏུ་འཕྲོས་པ་བཞི་སྟེ་ཆུད་ཟ་བ་སོགས་ཀྱི་རྐྱེན་མེད་པར་ཟས་གང་ལ་བྱིན་ལེན་མ་བྱས་པའི་གོང་དུ་དགེ་སློང་རང་གིས་རེག་པ་དང༌།དགེ་སློང་རང་དབང་བའི་མཚམས་དངོས་སམ་དེའི་ཉེ་འཁོར་གྱི་ནང་དུ་ཟས་རྗེན་པ་ཞིག་བཙོས་པ་དང༌།མཚམས་ནང་དེར་དེ་འདྲའི་དངོས་པོས་ཞག་ལོན་པ་དང༌།དེ་འདྲའི་དངོས་པོ་རྗེན་པར་མཚམས་ཀྱི་ཕྱི་ནང་གང་རུང་དུ་དགེ་སློང་གིས་བཙོས་པའོ། །དེ་བཞིན་དུ་ནད་ལ་ཕན་པའམ།མུ་གེའི་དུས་མིན་པར་ཟོས་ན་ཉེས་བྱས་སོ།།
དགུ་པ་ནི།
བྱིན་ལེན་མ་བྱས་སྨན་བཞི་ཁར་མིད་པ།།
བདག་ཉིད་ཟན་ཆད་པ་དང་ནད་པ་ལ་ཕན་པ་སོགས་ཀྱི་རྐྱེན་མེད་པར་བྱིན་ལེན་མ་བྱས་པ་ལ་དེར་འདུ་ཤེས་པས་ཆུ་དང་སོ་ཤིང་མ་གཏོགས་སྨན་བཞི་གང་རུང་ཁམ་གཅིག་ཡན་ཆད་ཁར་མིད་པ་ན་དང༌།བྱིན་ལེན་ནི།ནོད་པ་པོའི་གློ་དང་རྒྱབ་མ་ཡིན་པ་དང༌།མཚམས་གཞན་གྱིས་མ་ཆོད་པར་མདུན་དུ་སྟོབ་པ་པོས་ལག་གཉིས་བཀན་ཏེ་བསྟབ་ཅིང་ནོད་པ་པོས་ཀྱང་ལག་གཉིས་གན་རྐྱལ་དུ་བཀན་ནས་བླང་ངོ༌། །དེ་ལྟར་བྱིན་ལེན་བྱས་པ་འཇིག་པའི་རྒྱུ་ནི་ལུང་རྣམ་འབྱེད་ལས།
འཕྲོག་དང་འདྲིལ་དང་རེག་པ་དང༌། །བསྔོས་དང་དགེ་སློང་མིན་གྱུར་དང༌།།
ངོ་བོ་འགྱུར་དང་སྐྱེ་བ་འགྱུར། །དོར་བ་ཡིས་ནི་བྱིན་ལེན་འཇིག།ཅེས་སོ།།
བཅུ་པ་ནི།
བསོད་པ་ཞིམ་པའི་ཟས་སློང་་་་་༌།
ནད་པ་ལ་ཕན་པ་སོགས་ཀྱི་རྐྱེན་མེད་པར་འོ་མ་སོགས་ཡུལ་དུས་དེར་བསོད་པར་གྲགས་ཤིང་ཞིམ་པའི་ཟས་བཟང་པོ་ཉེ་མིན་ཁྱིམ་པས་ཅི་བདེར་མ་བསྟབས་ཀྱང༌།ཆོག་མི་ཤེས་པས་སློང་སྟེ་ཟོས་ན་ལྟུང་བར་འགྱུར་བ་རྣམས་སོ།།
ལྔ་པ་ཆུ་དང་གི་སྡེ་ཚན་ལས། དང་པོ་ནི།
་་་་་་སྲོག་ཆགས་བཅས།།ཆུར་སྤྱོད་་་་་༌།
རང་དོན་དུ་སྲོག་ཆགས་དང་བཅས་པའི་ཆུར་ལུས་དང་གོས་སོགས་འཁྲུད་པ་དང་འགོག་ཅིང་བསྒྱུར་བ་སོགས་བྱེད་པ་དང༌།བཏུང་བ་སོགས་ལོངས་སྤྱོད་པ་དང༌།སྲོག་ཆགས་ཡོད་པའི་རྩྭ་ཤིང་སོགས་མེར་འཇུག་པ་སོགས་བྱས་ཏེ་ལོངས་སྤྱོད་ན་སྲོག་ཆགས་སོགས་ཇི་སྙེད་ཤི་བ་དེ་སྙེད་ཀྱི་དང༌།དེས་ན་མར་མེའི་འོད་ཁང་དང༌།ཆུ་ཚགས་ཀྱི་དབྱེ་བ་དཔྱངས་ཚགས་དང༌།བུམ་ཚགས་ལྕེའུ་ཅན་དང༌།གྲུ་གསུམ་དང༌།རིལ་བ་ཞབས་ཚགས་ཅན་དང༌།གསལ་ཚགས་རྣམས་གང་རུང་བཅང་བར་བྱ་དགོས་སོ།།
གཉིས་པ་ནི།
་་་་་་ཉལ་པོ་བྱེད་པའི་ཤུལ་དུ་ཉལ།།
ཁྱིམ་པ་ཕོ་མོ་རང་ཁྱིམ་དུ་ཉལ་པོ་བྱེད་པ་ལ་ཞུགས་པའམ།དེར་ཕྱོགས་པ་ལ་དེ་དང་ཉེ་བའི་ཤུལ་དུ་སྟེ།ས་དེར་ཉལ་ལམ་འདུག་སྟེ་དེ་དག་གིས་དགེ་སློང་དེར་ཡོད་པ་ཚོར་བ་ན་དང༌།
གསུམ་པ་ནི།
དབེན་པའི་སྐྱབས་སུ་འགྲེང་དང་་་་་༌།
དེར་དབེན་པའི་སྐྱབས་སུ་འགྲེངས་ཏེ་གནས་པ་ཚོར་བ་ན་དང༌།
བཞི་པ་ནི།
་་་་་་གཅེར་བུར་རྒྱུ།།
མུ་སྟེགས་གཅེར་བུ་རྒྱུ་བ་ཕོ་མོ་གང་རུང་ལ་ནད་པ་དང༌།ཉེ་དུ་དང༌།དགེ་བ་ལ་སྦྱོར་བའི་དོན་མ་ཡིན་པར་རང་དང་དེ་གཉིས་ཀས་ཟར་རུང་བའི་དུས་རུང་གི་ཟས་རང་གི་ལག་ནས་བྱིན་ཅིང་དེས་ཐོབ་པ་ན་དང༌།
ལྔ་པ་ནི།
དམག་ལྟ་་་་་༌།
རྒྱལ་པོས་བོས་པ་སོགས་རྐྱེན་དགོས་མེད་པར་དགེ་སློང་རང་གི་གནས་ཀྱི་ཉེ་འཁོར་ལས་འདས་ཏེ་དམག་གི་དཔུང་ལ་ལྟ་བར་ཕྱིན་པས་མཐོང་བ་ན་དང༌།
དྲུག་པ་ནི།
་་་་་་དམག་སར་ཞག་གཉིས་ལྷག་པར་བསྡད།།
རྐྱེན་དགོས་མེད་པར་དམག་གི་དཔུང་ཡོད་པའི་སར་ཞག་གཅིག་གམ་གཉིས་ལས་ལྷག་པར་བསྡད་པ་ན་དང༌།
བདུན་པ་ནི།
དམག་གི་རུ་བཀོད་བྱེད་དང་་་་་༌།
རྐྱེན་དགོས་ཀྱིས་དམག་ནང་དུ་སྡོད་དགོས་པའི་ཚེ་ཡང་རང་དགར་གོ་མཚོན་ལ་རེག་པ་དང༌།དམག་དཔུང་གི་རུ་བཤམས་བཀོད་སོགས་བྱེད་པ་ན་དང༌།
བརྒྱད་པ་ནི།
་་་་་་དགེ་སློང་བརྡེག།
ཁྲོས་པས་དགེ་སློང་གཞན་ལ་བརྡེག་གམ་བརྡེག་ཏུ་བཅུག་པས་ཕོག་པ་ན་རྡེག་ཐེངས་དེ་སྙེད་ཀྱི་དང༌།
དགུ་པ་ནི།
བརྡེག་བརྩམས་་་་་༌།
ཁྲོས་པས་དགེ་སློང་གཞན་ལ་བརྡེག་པར་བརྩམ་པ་སྟེ་བརྡེག་ཚུལ་བྱས་པ་དེས་གོ་བ་ན་དང༌།
བཅུ་པ་ནི།
་་་་་་གནས་ངན་ལེན་གྱི་ལྟུང་བ་འཆབ།།
མཐོལ་ཡུལ་མཚན་ཉིད་དང་ལྡན་པ་ཡོད་པའི་དབུས་སུ་དགེ་སློང་གཞན་ལ་གནས་ངན་ལེན་གྱི་ལྟུང་བ་ཕམ་ལྷག་གང་རུང་བྱུང་བ་ངོ་ཤེས་སམ་ཡིད་གཉིས་ཟ་བ་དགོས་པ་ཁྱད་པར་ཅན་མེད་བཞིན་འཆབ་སྟེ་མཚན་མཐའ་འདས་ན་ལྟུང་བར་འགྱུར་བ་རྣམས་སོ། །ཕམ་ལྷག་ལས་གཞན་པའི་ལྟུང་བ་འཆབ་ན་ཉེས་བྱས་སོ།།
དྲུག་པ་ཁྱིམ་དང་གི་སྡེ་ཚན་ལས། དང་པོ་ནི།
དགེ་སློང་ཟས་གཅོད་་་་་༌།
ཁྱིམ་པས་དགེ་སློང་གཞན་ལ་ཟས་འདྲེན་པ་ན་དགེ་སློང་དེ་ལ་ངན་སེམས་ཀྱིས་ཟས་སྦྱོར་བ་འགོག་པའི་ཚིག་སྨྲས་ནས་གཅོད་དུ་བཅུག་སྟེ་ཁྱིམ་པས་དོན་གོ་བ་ན་དང༌།
གཉིས་པ་ནི།
་་་་་་མེ་ལ་རེག་ཏུ་བཅུག།
རྒོད་བག་གི་བསམ་པས་མེ་ལ་རེག་གམ་རེག་ཏུ་བཅུག་པ་ན་དང༌།དེ་ཡང་ཆོས་ལྡན་གྱི་བྱ་བའི་ཆེད་དུ་དུས་དྲན་བྱས་ན་ལྟུང་བ་མེད་དོ།།
གསུམ་པ་ནི།
དགེ་འདུན་ལས་ལ་འདུན་ཕུལ་ཕྱིར་ལྡོག་སྨྲ།།
དགེ་འདུན་གྱིས་དགེ་སློང་གི་ཆེད་དུ་ལས་བྱས་ཤིང་ཆགས་པ་ལ་འདུན་པ་ཕུལ་ནས་སླར་བདག་གི་འདུན་པ་ཕྱིར་བྱིན་ཅིག་ཅེས་ལྡོག་པའི་ཚིག་སྨྲས་ཏེ་དོན་གོ་བ་ན་དང༌།ལས་མ་ཟིན་གོང་དུ་འདུན་པ་ཕྱིར་བསྒྱུར་ན་ལས་དེ་མི་ཆགས་པ་ཙམ་ལས་ལྟུང་བ་འདི་མ་ཡིན་ནོ།།
བཞི་པ་ནི།
བསྙེན་མ་རྫོགས་དང་ནུབ་གཉིས་ལྷག་པར་ཉལ།།
བསྙེན་པར་མ་རྫོགས་པ་དང་ལྷན་ཅིག་གནས་གཅིག་ཏུ་རྐྱེན་དགོས་མེད་པར་ནུབ་གཉིས་ལས་ལྷག་པར་ཉལ་བས་ནུབ་གསུམ་འདས་ཏེ་བཞི་པའི་སྐྱ་རེངས་ཤར་བ་ན་དང༌།དེ་ཡང་གནས་ཁང་གཅིག་ཡིན་ཡང་ཁྲུ་ཕྱེད་དང་དགུས་ཆོད་པ་ན་ལྟུང་བ་མེད་དོ།།
ལྔ་པ་ནི།
སྡིག་ལྟའི་ཆོས་ལུགས་མི་གཏོང་་་་་༌།
ཆང་འཐུང་བ་དང་ཕྱི་དྲོ་ཟ་བ་སོགས་ལ་ཉེས་པ་མེད་དོ་ཞེས་སྡིག་པ་ཅན་གྱི་ལྟ་བའི་ཆོས་ལུགས་སྨྲ་བ་ཉིད་ཟློག་བྱེད་ལྔའི་མཐའ་ལ་མི་གཏོང་བ་ན་དང༌།
དྲུག་པ་ནི།
་་་་་་ཕེབས་པར་སྨྲ།།
དགེ་འདུན་གྱིས་གནས་ནས་ཕྱུང་བའི་དགེ་སློང་དང་ལྷན་ཅིག་གཏམ་ཕེབས་པར་སྨྲ་བ་སོགས་སྤྱོད་ལམ་མཐུན་པས་མཚན་མཐའི་སྐད་ཅིག་འདས་པ་ན་དང༌།
བདུན་པ་ནི།
དགེ་ཚུལ་སྡིག་ལྟ་མི་གཏོང་ལྷན་ཅིག་ཉལ།།
དགེ་ཚུལ་སྡིག་ལྟ་མི་གཏོང་བ་དགེ་འདུན་གྱིས་བསྙིལ་བ་དང་ལྷན་ཅིག་ཉལ་བ་སོགས་སྤྱོད་ལམ་མཐུན་པས་མཚན་མཐའ་འདས་པ་ན་དང༌།
བརྒྱད་པ་ནི།
རུང་བའི་ཚོན་མིན་ཁ་དོག་ཅན་གོས་གྱོན།།
ཆུ་ཚགས་མ་གཏོགས་རུང་བའི་ཚོན་གསུམ་གྱིས་ཁ་བསྒྱུར་བ་མིན་པའི་ཁྲུ་གང་ཡན་ཆད་ཁ་དོག་དཀར་པོ་ཅན་གྱི་གོས་གཡོགས་མེད་པར་གྱོན་པ་ན་དང༌།ནག་པོ་དང་ཁྲ་བོ་དང་ཚོན་ཆེན་བརྒྱད་ཀྱིས་བསྒྱུར་བ་གྱོན་ན་ཉེས་བྱས་སོ།།
དགུ་པ་ནི།
རིན་ཆེན་དམག་ཆས་རོལ་མོའི་ཆས་ལ་རེག།
ཆུད་འཛའ་བ་དང༌།སྦྱིན་བདག་བསོད་ནམས་འདོད་པས་བསྟབས་པ་དང༌།ཆོས་འཆད་པ་སོགས་དོན་ཁྱད་པར་ཅན་སྒྲུབ་པའི་སྐབས་མ་ཡིན་པར་རང་མི་དབང་བའི་ནོར་བུ་དང་མུ་ཏིག་སོགས་རིན་ཆེན་ནམ།དེའི་མིང་གིས་སྨོས་པ་མདའ་མདུང་སོགས་དམག་ཆས་དང༌།རྔ་བོ་ཆེ་སོགས་རོལ་མོའི་ཆས་ལ་རྒོད་བག་གི་བསམ་པས་རང་ངམ་བསྐོས་པས་རེག་པ་ན་དང༌།
བཅུ་པ་ནི།
ཚ་དུས་རང་དགར་ཁྲུས་བྱེད་་་་་༌།
ཚ་བའི་དུས་དབྱར་ཟླ་གསུམ་དང་ནད་ལ་ཕན་པ་སོགས་གནང་བའི་དུས་མ་ཡིན་པར་སྔར་ཁྲུས་བྱས་ནས་ཟླ་བ་ཕྱེད་མ་འདས་པའི་སྔ་རོལ་དུ་རང་དགར་ཁྲུས་བྱེད་ཅིང་ལུས་ཕྱེད་ཆུར་ནུབ་པ་ན་ལྟུང་བར་འགྱུར་བ་རྣམས་སོ།།
བདུན་པ་བསམ་བཞིན་གྱི་སྡེ་ཚན་ལས། དང་པོ་ནི།
་་་་་་དུད་འགྲོ་གསོད།།
གསོད་སེམས་ཀྱིས་དུད་འགྲོའི་རིགས་སུ་གཏོགས་པ་གསོད་དམ་གསོད་དུ་བཅུག་ནས་ཇི་སྙེད་ཤི་བ་དེ་སྙེད་ཀྱི་དང༌།
གཉིས་པ་ནི།
དགེ་སློང་བྱས་ལ་འགྱོད་སྐྱེད་་་་་༌།
དགེ་སློང་བསྒྲུབས་ཟིན་པར་བྱས་པ་གཞན་ལ་ཡིད་མི་བདེ་བའི་ཕྱིར་ཁྱོད་ལ་སྡོམ་པ་མ་སྐྱེས་ཞེས་སམ་ཉམས་སོ་ཞེས་སོགས་འགྱོད་པ་སྐྱེད་པའི་ཚིག་སྨྲས་པ་དེས་གོ་བ་ན་དང༌།
གསུམ་པ་ནི།
་་་་་་གག་ཚིལ་སྒོག།
དགེ་སློང་གཞན་གྱི་ལུས་སྐྱི་གཡའ་བར་བྱ་བའི་ཕྱིར་མཆན་ཁུང་སོགས་ལ་གག་ཚིལ་སྒོག་པ་ན་དང༌།
བཞི་པ་ནི།
ཆུར་རྩེ་་་་་༌།
ལུས་ཕྱེད་ནུབ་པའི་ཆུར་རྩེ་བའམ་རྩེར་བཅུག་པ་ན་དང༌།
ལྔ་པ་ནི།
་་་་་་བུད་མེད་གནས་གཅིག་ཉལ་བ་དང༌།།
ཁྲིམས་གྲོགས་མེད་པར་བུད་མེད་དང་ལྷན་ཅིག་གནས་གཅིག་ཏུ་གཉིས་ཀ་ཉལ་བའི་སྤྱོད་ལམ་གྱིས་མཚན་མཐའ་འདས་པ་ན་དང༌།
དྲུག་པ་ནི།
དགེ་སློང་དངངས་བྱེད་་་་་༌།
དགེ་སློང་གཞན་དངངས་པར་བྱེད་འདོད་པས་ཡིད་དུ་མི་འོང་བའི་འཇིགས་པ་སྣ་ཚོགས་སྟོན་ནམ་སྟོན་དུ་བཅུག་པས་དེས་གོ་བ་ན་དང༌།
བདུན་པ་ནི།
་་་་་་དེ་ཡི་ཡོ་བྱད་སྦེད།།
དགེ་སློང་སོགས་རབ་བྱུང་སྡེ་ལྔ་གང་ཡང་རུང་བ་དེ་ཡི་ཆོས་གོས་དང་ལྷུང་བཟེད་སོགས་འཚོ་བའི་ཡོ་བྱད་གང་རུང་རྐུ་འདོད་དང་ཕན་སེམས་མིན་པར་སྦེད་དམ་སྦེད་དུ་བཅུག་ནས་སྦས་པ་ན་དང༌།
བརྒྱད་པ་ནི།
སྔར་བྱིན་གདེང་མེད་སླར་བླངས་སྤྱོད་པ་དང༌།།
དགེ་སློང་གཞན་ལ་སྔར་རང་གི་གོས་བྱིན་པ་རྐུ་སེམས་དང་ཡིད་གཅུགས་མིན་པར་དེས་གནང་བའི་གདིང་མེད་བཞིན་སླར་བླངས་ནས་ཅི་དགར་ལོངས་སྤྱོད་པ་ན་དང༌།
དགུ་པ་ནི།
གཞི་མེད་སྐུར་བཏབ་་་་་༌།
མཐོང་ཐོས་དོགས་གསུམ་གྱི་གཞི་མེད་པའི་དགེ་སློང་གཞན་ལ་ལྷག་མ་བཅུ་གསུམ་གང་རུང་གི་སྐུར་པ་བཏབ་པ་དེས་གོ་བ་ན་དང༌།
བཅུ་པ་ནི།
་་་་་་བུད་མེད་ལྷན་ཅིག་ཏུ། །སྐྱེས་པ་མེད་པར་ལམ་འགྲོ་་་་་༌།
ཉེ་མིན་བུད་མེད་དང་ལྷན་ཅིག་ཏུ་སྐྱེས་པའི་ཁྲིམས་གྲོགས་མེད་པར་ལམ་དུ་འགྲོ་ན་རྒྱང་གྲགས་རེ་ལ་ལྟུང་བ་རེ་དང༌།དེའི་ཕྱེད་ལ་ཉེས་བྱས་སུ་འགྱུར་བ་རྣམས་སོ།།
བརྒྱད་པ་མགྲོན་མང་རྐུན་མ་ཞེས་པའི་སྡེ་ཚན་ལས། དང་པོ་ནི།
་་་་་་རྐུན་མའང་མཚུངས།།
ཆོམ་པོ་དང་རྐུན་མ་དང་ཤོ་གམ་མ་བྱིན་པའི་ཚོང་པ་སོགས་དང་ལྷན་ཅིག་ལམ་དུ་འགྲོ་ནའང་སྔ་མ་དང་མཚུངས་ཏེ་རྒྱང་གྲགས་རེ་རེ་ལ་དང༌།
གཉིས་པ་ནི།
ཉི་ཤུ་མ་ལོན་པ་ལ་བསྙེན་རྫོགས་ཕོག།
བསྒྲུབ་བྱ་སྐྱེས་པ་མངལ་བཤོལ་བརྩིས་ཀྱང་ལོ་ཉི་ཤུ་མ་ལོན་པ་ལ་དེར་འདུ་ཤེས་སམ་ཐེ་ཚོམ་ཟ་བས་བསྙེན་རྫོགས་ཕོག་ན་ལས་བརྗོད་པ་གསུམ་པའི་བྱ་བ་བརྗོད་པ་རྫོགས་ནས་བྱེད་པ་བརྗོད་པའི་འགོ་རྩོམ་པའི་ཚེ་མཁན་པོ་ལ་ལྟུང་བྱེད་དང༌།སློབ་དཔོན་དང་དགེ་འདུན་ལ་ཉེས་བྱས་སུ་འགྱུར་བ་དང༌།
གསུམ་པ་ནི།
ས་རྐོ་་་་་༌།
འཇིག་རྟེན་ལ་གྲགས་པའི་ས་སྲ་ཞིང་འཐས་པར་གནས་པ་སོར་བཞི་ཡན་ཆད་དགོས་པ་ཁྱད་པར་ཅན་མེད་པར་རྐོའམ་རྐོར་བཅུག་པ་ན་དང༌།
བཞི་པ་ནི།
་་་་་་མགྲོན་བོས་ཟླ་བཞི་ལྷག་པར་ཟོས།།
སྦྱིན་བདག་གིས་དུས་ཇི་ཙམ་མགྲོན་དུ་བོས་པ་ལས་ལྷག་པར་འདུག་པའམ་ཚིག་བཞག་པ་མེད་ན་ཟླ་བ་བཞི་ལས་ལྷག་པར་བསྡད་དེ་ཟན་ཟོས་པ་ན་དང༌།
ལྔ་པ་ནི།
མི་ཤེས་བརྗོད་དང་་་་་༌།
དགེ་སློང་གཞན་གྱིས་རང་ཉིད་བསླབ་པ་སློབ་པར་བསྐུལ་བ་ན་ཁྱོད་ཀྱིས་མི་ཤེས་པས་གཞན་ཤེས་པ་ལ་མ་དྲིས་ཀྱི་བར་དུ་མི་སློབ་བོ་ཞེས་པ་ལྟ་བུའི་ཁྱད་གསོད་ཀྱིས་སྤོང་བའི་ཚིག་བརྗོད་ཅིང་གོ་བ་ན་དང༌།
དྲུག་པ་ནི།
་་་་་་འཐབ་པའི་ཉན་རྣ་བྱེད།།
རང་དང་རྩོད་ཟླར་གྱུར་པའི་དགེ་སློང་གཞན་གཉིས་ཡན་ཆད་གྲོས་བྱེད་པ་ལ་འཐབ་མོ་དེ་ཞི་འདོད་མ་ཡིན་པར་དེ་སྦར་བའི་ཆེད་དུ་ཉན་རྣ་བྱེད་པས་རང་གིས་དོན་གོ་བ་ན་དང༌།
བདུན་པ་ནི།
ཉེས་མེད་མི་སྨྲ་འགྲོ་དང་་་་་༌།
རང་ཁ་སྐོང་དུ་འོས་པས་གསོ་སྦྱོང་སོགས་ཆོས་ལྡན་གྱི་ལས་གྲལ་དུ་དང་པོར་འདུས་པས་གསོལ་བ་ཙམ་ཡང་མ་བྱས་པའི་གོང་དུ་དགེ་འདུན་མཐུན་པ་སྒྲུབ་བྱེད་ཀྱི་འདུན་པ་མ་ཕུལ་བའམ་ལྟག་འོག་གི་དགེ་སློང་ལ་ཉེས་པ་མེད་པར་མི་སྨྲ་བར་ཉེ་འཁོར་ལས་འདས་ཏེ་འགྲོ་བ་ན་དང༌།གསོལ་བ་ཐོས་ནས་ཕྱིན་ན་ཉེས་བྱས་དང་རང་ཁ་སྐོང་དུ་མི་འོས་པ་སོགས་ལ་ལྟུང་བ་མེད་དོ།།
བརྒྱད་པ་ནི།
་་་་་་མི་གུས་འགལ།།
སངས་རྒྱས་དངོས་སུ་བཞུགས་པ་དང་དགེ་སློང་གི་དགེ་འདུན་དང༌།དགེ་འདུན་གྱི་ཐ་སྙད་པ་དགེ་བསྐོས་ཏེ་གསུམ་པོ་གང་ཡང་རུང་བས་ཆོས་ལྡན་གྱི་བཀའ་བསྒོ་བའི་དོན་ལ་ཤད་སྦྱངས་མེད་པར་མི་གུས་པས་དེ་ལས་ལྡོག་སྟེ་འགལ་བར་བྱས་པ་དང༌།
དགུ་པ་ནི།
ཆང་འཐུང་་་་་༌།
ཕབ་བཏབ་པ་འབྲུའི་ཆང་དང༌།རྒུན་ཆང་སོགས་བཅོས་པའི་དང༌།ཐང་ཕྲོམ་སོགས་ཆང་གི་རིགས་མྱོས་འགྱུར་རྣམས་འཐུང་ངམ་ཟ་བར་འདོད་པས་མགུལ་དུ་ཇི་ཙམ་མིད་པ་ན་དང༌།གལ་ཏེ་བསྐོལ་བས་ཆང་གི་རོ་ནུས་ཉམས་པར་བྱས་པ་དང༌།ནད་པ་ལ་ཕན་པའི་ཕྱིར་ཁར་བསྲེལ་བ་ཙམ་དང་ལུས་ལ་སྐུད་པ་ཙམ་བྱས་ན་ཉེས་པ་མེད་དོ།།
བཅུ་པ་ནི།
་་་་་་དུས་མིན་ཕྱི་དྲོ་གྲོང་དུ་རྒྱུ།།
དུས་མིན་པར་རང་གླིང་གི་ཉི་མ་ཕྱེད་ཡོལ་ནས་ཕྱི་དྲོ་ཕན་ཆད་སྐྱ་རེངས་མ་ཤར་གྱི་བར་དུ་རྐྱེན་དགོས་མེད་པར་དེར་འཁོད་ཀྱི་གྲོགས་ལ་མ་སྨྲས་པར་ཁྱིམ་པའི་གྲོང་དུ་རྒྱུ་བར་བྱེད་པས་རང་གི་སྒོ་གཏན་དང་ཉེ་འཁོར་ལས་འདས་པ་ན་ལྟུང་བར་འགྱུར་བ་རྣམས་སོ།། དགུ་ དགུ་པ་ཆོས་སྟོན་གྱི་སྡེ་ཚན་ལས། དང་པོ་ནི།
ཟས་བཅས་ཕྱི་དྲོ་རྒྱུ་དང་ཁྱིམ་གསུམ་འདས།།
དགེ་སློང་གི་སྔ་དྲོ་རང་ཚིག་གིས་དགེ་འདུན་པ་རྣམས་ཟས་དང་བཅས་པས་ཁྱིམ་པའི་གནས་སུ་སྤྱན་དྲངས་ནས་དུས་ལ་བྲིམ་ཞེས་མ་བསྒོས་པར་རང་ཉིད་ཁྱིམ་ནས་ཁྱིམ་དུ་རྒྱུ་ཞིང་དགེ་འདུན་གྱི་གདུགས་ཚོད་ལ་གནོད་པ་དང༌།ཕྱི་དྲོ་ཁྱིམ་ནས་ཁྱིམ་དུ་རྒྱུ་བ་དང་བཅས་པས་ཁྱིམ་གསུམ་བཞི་ཕན་ཆད་འདས་ཏེ་དགེ་འདུན་གྱི་ཆོས་ཀྱི་ལོངས་སྤྱོད་ལ་གནོད་པ་ན་དང༌།
གཉིས་པ་ནི།
རྒྱལ་པོ་བཙུན་མོར་རྩེ་བའི་ཁབ་ཏུ་ཉལ།།
ཆོས་ལྡན་གྱི་དོན་དུ་བོས་པ་སོགས་དགོས་པ་ཁྱད་པར་ཅན་མེད་བཞིན་རྒྱལ་པོ་དང་བཙུན་མོ་རྩེ་བའི་ཁབ་ཏུ་སྟེ་བཙུན་མོ་དང་བཅས་པའི་ཕོ་བྲང་གི་ནང་དག་ཏུ་ཉི་མ་དམར་ཐག་ཆོད་ནས་སྐྱ་རེངས་ཐ་མ་མ་ཤར་གྱི་བར་འགྲོ་ན་གནས་དེའི་སྒོ་གཏན་ནམ་ཉེ་འཁོར་འདས་པར་སླེབས་པའམ་དེར་མ་ཟད་ཉིན་མོ་ཕྱིན་ནས་མཚན་ལ་དེར་ཉལ་བ་ན་དང༌།
གསུམ་པ་ནི།
མདོ་སོགས་འདོན་ལ་ད་གདོད་ཤེས་ཟེར་དང༌།།
སོ་ཐར་གྱི་མདོ་ལན་གཉིས་ཡན་ཆད་ཐོས་ཤིང་དེ་ལ་དོན་དེ་ཡོད་པ་སྔར་ནས་ཤེས་ཀྱང་ཤེས་རིན་མི་ཆོག་པར་སྟོན་པའི་ཕྱིར།གསོ་སྦྱོང་གི་དུས་སུ་སོར་མདོ་སོགས་འདོན་པ་ལ་འདི་ལ་དོན་འདི་ཡོད་པར་ད་གདོད་ཤེས་སོ་ཞེས་ཟེར་ཞིང་འདུལ་བར་གཏོགས་པའི་བསླབ་པ་ཁྱད་གསོད་ཀྱི་ཚིག་སྨྲས་པ་ཕ་རོལ་པོས་གོ་བ་ན་དང༌།མདོ་སྡེ་སོགས་ལ་ཉེས་བྱས་སོ།།
བཞི་པ་ནི།
རིན་ཆེན་ཁབ་རལ་་་་་༌།
དཀོན་ཞིང་རིན་ཆེན་པོ་ཅན་གྱི་བ་སོ་སོགས་ལ་ཁབ་རལ་བྱེད་དུ་བཅུག་སྟེ་ཟིན་པ་ན་དང༌།
ལྔ་པ་ནི།
་་་་་་ཁྲི་རྐང་ཚད་ལྷག་བཟོས།།
དགེ་སློང་གིས་དགེ་འདུན་གྱི་ཁྲིའམ་ཁྲིའུའི་རྐང་པ་བུ་གར་གཞུག་པ་མན་ཆད་ཁྲུ་གང་ཚད་ཡིན་པས་དེ་ལས་ལྷག་པ་བཟོའམ་བཟོར་བཅུག་སྟེ་བཟོས་ཟིན་པ་ན་དང༌།
དྲུག་པ་ནི།
ངན་སེམས་ཤིང་བལ་ཁྲི་སྟེང་བརྡལ་ཏེ་བགོས། །གདིང་གཡན་རས་ཆེན་་་་་༌།
དགེ་སློང་གིས་ངན་སེམས་ཀྱི་ཤིང་བལ་དགེ་འདུན་གྱི་ཁྲིའམ་ཁྲིའུའི་སྟེང་དུ་བརྡལ་ཏེ་བསྒོོས་ཤིང་གོས་པར་བྱས་ན་དང༌།སྤྱིར་གདིང་བ་སྲིད་དུ་ཁྲུ་གསུམ་དང་ཞེང་དུ་ཁྲུ་དོ་དང་སོར་དྲུགགཡན་དགབ་སྲིད་དུ་ཁྲུ་དྲུག་དང་ཞེང་དུ་ཁྲུ་གསུམ།རས་ཆེན་སྲིད་དུ་ཁྲུ་དགུ་དང་ཞེང་དུ་ཁྲུ་གསུམ་དང་སོར་བཅོ་བརྒྱད་ཚད་ཡིན་ལ།རང་རང་གི་འཇལ་བྱེད་ཀྱི་ཕྱེད་ཀྱིས་ལྷག་ན་ལྟུང་བ་བདུན་པ་དང་བརྒྱད་པ་དང་དགུ་པར་འགྱུར་ལ།འདི་དག་བཤགས་པའི་ཚེ་ཁབ་རལ་བཅག་ཅིང་ཤིང་བལ་བསྡུས་ལ།ཁྲི་རྐང་དང་གོས་ཚད་ལྷག་སོང་བ་རྣམས་བཅད་ནས་བཤགས་ཡུལ་གྱིས་བཅག་གམ་བསྡུས་སམ་བཅད་དམ་ཞེས་དྲིས་ནས་མ་བཤགས་ན་ཉེས་བྱས་སོ།།
བཅུ་པ་ནི།
་་་་་་ཆོས་གོས་ཚད་ལྷག་གོ།
སྟོན་པའི་སྐུ་ལུས་ཀྱི་ཚད་ཙམ་མེད་པར་དེའི་ཆོས་གོས་ཀྱི་ཚད་དམ་དེ་ལས་ལྷག་པར་བྱེད་དམ་བྱེད་དུ་བཅུག་སྟེ་ཟིན་པ་ན་ལྟུང་བར་གྱུར་པ་དག་གོ།དེ་ལ་སྟོན་པའི་ཆོས་གོས་ཀྱི་ཚད་ནི་སྲིད་དུ་སྟོན་པ་རང་གི་ཁྲུ་ལྔ་ཡིན་པས་མི་ཕལ་པའི་ཁྲུ་བཅོ་ལྔ་དང༌།ཞེང་དུ་སྟོན་པའི་ཁྲུ་གསུམ་ལ་ཕལ་པའི་ཁྲུ་དགུ་ཡོད་དོ།།
བཞི་པ་སོར་བཤགས་ཀྱི་སྡེ་ལ།
སོ་སོར་བཤགས་བྱའི་སྡེ་ནི་བཞི་ཡིན་ཏེ།།
སྨྲེ་ངག་གི་རྣམ་པས་སོ་སོར་བཤགས་པར་བྱ་བའི་སྡེ་ཞེས་བྱ་སྟེ།དེ་བཤད་པ་ནི།རབ་བྱུང་དང་ཁྱིམ་པའི་གཞི་ལས་གྱུར་པ་གཉིས་གཉིས་ཀྱི་བཞིར་འགྱུར་བ་ཡིན་ཏེ།
དེ་ལ་དང་པོ་ནི།
དགེ་སློང་མ་ལས་གྲོང་དུ་ཟས་བླངས་ཟོས།།
ཉེ་མིན་དགེ་སློང་མས་རང་ཉིད་བཟའ་བའི་ཆེད་དུ་བསྒྲུབས་པའི་དུས་རུང་གི་ཟས་དགེ་སློང་གིས་དེ་ལས་གྲོང་ངམ་དེའི་ཉེ་འཁོར་རམ་ལམ་པོ་ཆེ་གང་རུང་དུ་ཟས་དེ་ཉིད་བསླངས་ཏེ་ཟོས་པ་ན་དང༌།
གཉིས་པ་ནི།
ཁྱིམ་དུ་དགེ་སློང་མས་བསྒོས་མ་བཟློག་ཟོས།།
སྦྱིན་བདག་གིས་མགྲོན་དུ་བོས་པའི་ཁྱིམ་དུ་དགེ་སློང་མས་བསྒོ་བཤམས་ཏེ་བསྒོས་ནས་གྲལ་རིམ་པར་བྲིམ་དུ་མི་འཇུག་པར་ངོས་མགྲོན་གྱིས་འདི་ལ་ཕུལ་ཅིག་ཅེས་ཟེར་ན་དགེ་སློང་གཅིག་གིས་མ་བཟློག་པར་དགེ་སློང་ཇི་སྙེད་པས་ཟོས་པ་དེ་ཐམས་ཅད་ལ་དང༌།
གསུམ་པ་ནི།
བསླབ་སྡོམ་སྦྱིན་ལས་རུང་མིན་བླངས་ཏེ་ཟོས།།
དགེ་འདུན་བློ་མཐུན་པས་གསོལ་བའི་ལས་ཀྱིས་ཁྱིམ་པ་ཅི་རིགས་ལས་དགག་བྱ་དང་དགོས་པའི་དབང་གིས་ཟས་མི་སློང་བའི་བསླབ་སྡོམ་སྦྱིན་པ་ན་ཁྲིམས་དེར་གཏོགས་པའི་དགེ་སློང་གིས་དེ་ལས་ལེན་རུང་བ་ལོ་མ་སོགས་མོད་པ་མིན་པའི་དུས་རུང་གི་ཟས་བསླངས་ཏེ་ཟོས་པ་ན་དང༌།
བཞི་པ་ནི།
ནགས་མ་མྱུལ་བར་དགོན་པར་བླངས་ཟོས་བཞིའོ།།
གྲོང་ལས་རྒྱང་གྲགས་དཔག་པའི་འཇིགས་བཅས་ཀྱི་གནས་སུ་བསྐོས་པའི་དགེ་སློང་གིས་དགེ་འདུན་དང་སྦྱིན་བདག་གི་གནོད་པ་སྲུང་བའི་བྱ་བ་འདིས་ཅི་བྱ་སྙམ་པས་ནགས་མ་ཉུལ་བར་དགོན་པར་ཁྱིམ་པ་ལས་དུས་རུང་ཟས་བསླངས་ཏེ་ཟོས་པ་ན་ལྟུང་བར་འགྱུར་བ་བཞིའོ།།
ལྔ་པ་ཉེས་བྱས་ཀྱི་སྡེ་ཚན་ལ་ནི།
ཉེས་བྱས་བརྒྱ་དང་བཅུ་གཉིས་ཞེས་གྲགས་པ།།
ཉེས་པ་ཕྲ་མོའི་རང་བཞིན་ཡིན་པས་ཉེས་བྱས་ཞེས་བྱ་སྟེ།གྲངས་ནི་མདོའི་སྡོམ་གྱིས་བསྡུས་པ་བརྒྱ་དང་བཅུ་གཉིས་ཞེས་གྲགས་པ་ལ་སྡེ་ཚན་དགུ་ལས།
དང་པོ་ནི། གོས་བགོ་བའི་སྡེ་ནི།
ཤམ་ཐབས་ཟླུམ་མིན་བརྩེངས་འཇོལ་གླང་སྣ་འདྲ།།
ལྟེབ་དང་ཕུར་མ་གདེངས་ཀ་ལྟ་བུ་བདུན།།
ཟླུམ་མིན་རིང་ཐུང་སྟོད་གསུམ་གོས་ཀྱི་བཅུའོ།།
ཤམ་ཐབས་ཡ་མཐའ་དང་མ་མཐའ་མཐོ་དམན་མི་མཉམ་པས་ཟླུམ་པ་མིན་པར་དང༌།ཧ་ཅང་བརྩེངས་པས་པུས་མོར་མ་སླེབས་པ་དང༌།ཧ་ཅང་འཇོལ་བས་ལོང་བུ་ལ་རེག་པ་དང༌།གླང་པོའི་སྣ་དང་འདྲ་བར་མས་ཟུར་གྱི་གྲྭ་མདུན་དུ་འཕྱང་བ་དང༌།སྐ་རགས་ཀྱི་གོང་ཏ་ལའི་ལོ་མ་ལྟར་ལྟེབ་པ་དང༌།སྐ་རགས་ཀྱི་བར་ནས་འབྲུའི་ཕུར་མ་ལྟར་འབུར་བ་དང༌།སྐ་རགས་ཀྱི་སྟེང་དུ་སྦྲུལ་གྱི་གདེངས་ཀ་ལྟ་བུར་འདུག་པ་རྣམས་ཏེ་བདུན་དང༌།སྣམ་སྦྱར་དང་བླ་གོས་ཟླུམ་པོར་བགོ་བ་མིན་པ་དང༌།ཧ་ཅང་རིང་བ་དང༌།ཧ་ཅང་ཐུང་བ་མ་ཡིན་པ་སྟེ་སྟོད་ཀྱི་གྱོན་ལུགས་གསུམ་དང་བཅས་པའི་གོས་ཀྱི་བགོ་ཚུལ་ཉེས་པའི་ཆ་བཅུ་པོ་དེ་རྣམས་སྤངས་ཏེ་ལེགས་པར་བགོ་བ་ལ་བསླབ་པར་བྱའོ།།
གཉིས་པ་སྤྱོད་ཡུལ་དུ་འགྲོ་བའི་སྡེ་ནི།
མ་བསྡམས་བསྒོ་བ་ཅ་ཅོ་མིག་གཡེངས་དང༌།།
རིང་བལྟ་མགོ་བསྟུམས་གོས་བརྫེས་ཕྲག་ལ་གཟར།།
ལག་པ་གཉའ་གོང་བསྣོལ་དང་ལྟག་པར་བསྣོལ།།
མཆོང་རྐྱོང་རྐང་པའི་བྲང་དང་རྟིང་བཙུགས་འགྲོ།།
ལག་པ་དཀུར་བརྟེན་ལུས་བསྒྱུར་ལག་པ་གཡུག།
མགོ་བསྒྱུར་ཕྲག་པ་སྤྲད་དང་ལག་སྦྲེལ་རྣམས།།
མི་བྱེད་ཁྱིམ་འགྲོའི་སྤྱོད་ཡུལ་ཉི་ཤུའོ།།
དྲན་ཤེས་ཀྱིས་ལུས་ངག་མ་བསྡམས་པར་དང༌།བླ་གོས་དང་མཐང་གོས་མེད་པར་རམ་ལེགས་པར་བགོ་བ་མ་ཡིན་པ་དང༌།ཅ་ཅོའི་སྒྲ་དང་བཅས་པ་དང༌།མིག་གཡས་གཡོན་དུ་གཡེངས་པས་བལྟ་བར་དང༌།མིག་གཉའ་ཤིང་གང་ལས་རིང་དུ་བལྟ་བར་དང༌།མགོ་གོས་ཀྱིས་བསྟུམས་པར་དང༌།ཤམ་ཐབས་སོགས་གོས་འདོམས་སྣང་བར་བརྫེས་ཏེ་དང༌།བླ་གོས་ཕྲག་པའི་ཕྱོགས་གཉིས་ལ་གཟར་ནས་དང༌།ལག་པ་གཉིས་མདུན་ནས་གཉའ་གོང་དུ་བསྣོལ་ནས་དང༌།རྒྱབ་ནས་ལྟག་པར་བསྣོལ་ནས་དང༌།རང་དགར་མཆོང་ཞིང་དང༌།ཧ་ཅང་གོམ་པ་ཆེ་བས་སྒྱིད་པ་རྐྱོང་བསྐུམ་བྱེད་ཅིང་དང༌།རྟིང་པ་བཏེགས་ནས་རྐང་པའི་བྲང་གིས་དང༌།རྟིང་པ་བཙུགས་ཏེ་ཙོག་པུས་འགྲོ་བ་དང༌།ལག་པ་དཀུར་བརྟེན་ནས་གྲུ་རྒྱངས་ཏེ་དང༌།ལུས་དཀྱོགས་པོར་བསྒྱུར་ཞིང་དང༌།ལག་པ་གཡུག་བཞིན་དང༌།མགོ་གཅོག་ཅིང་བསྒྱུར་ནས་དང༌།གཞན་དང་ཕྲག་པ་སྤྲད་དེ་དང༌།གཞན་དང་ལག་པ་སྦྲེལ་ནས་འགྲོ་བ་རྣམས་མི་བྱེད་པར་ཞི་དུལ་གྱིས་ཁྱིམ་དུ་འགྲོ་བའི་སྤྱོད་ཡུལ་ཉི་ཤུ་པོ་རྣམས་ལ་བསླབ་པར་བྱའོ།།
གསུམ་པ་སྟན་ལ་འདུག་པའི་སྡེ་ནི།
སྟན་ལ་མ་བསྒོས་མ་བརྟགས་འཕོངས་རྡེབ་དང༌།།
རྐང་བརྐྱངས་བསྣོལ་དང་བརླ་བསྣོལ་ལོང་བུ་བརྩེགས།།
ཁྲི་འོག་རྐང་དགུག་རྐང་པ་གདངས་ཏེ་འདུག།
འདོམས་མཐོང་རྣམས་སྤང་འདུག་ཚུལ་དགུ་ཡིན་ནོ།།
ཁྱིམ་གཞན་དུ་སྟན་ལ་ཁྱིམ་བདག་གིས་མ་བསྒོས་པར་དང༌།སྲོག་ཆགས་ཡོད་མེེད་སོགས་མ་བརྟགས་པར་དང༌།ལུས་ཀྱི་ལྕིད་ཕབ་ནས་འཕོངས་རྡེབ་ཀྱིས་དང༌།རྐང་པ་བརྐྱངས་ཏེ་བསྣོལ་ནས་དང༌།བརླ་བསྣོལ་ནས་དང༌།ལོང་བུའི་སྟེང་དུ་ལོང་བུ་བརྩེགས་ནས་དང༌།ཧོར་འདུག་གི་རྣམ་པས་ཁྲི་འོག་ཏུ་རྐང་པ་དགུག་ནས་དང༌།རྐང་པ་ཕན་ཚུན་གདངས་ཏེ་འདུག་པ་དང༌།འདོམས་མཐོང་བར་བྱས་ནས་འདུག་པ་རྣམས་སྤངས་ཏེ་སྐྱིལ་ཀྲུང་སོགས་འདུག་ཚུལ་ལེགས་པར་འདུག་པ་དང་དགུ་པོ་ལ་བསླབ་པར་བྱ་བ་ཡིན་ནོ།།
བཞི་པ་ཟས་བླང་བའི་སྡེ་ནི།
ལེགས་པར་མི་ལེན་མུ་ཁ་མཉམ་པར་ལེན། །མཐར་ཆགས་མི་ལེན་ལྷུང་བཟེད་ཟུར་མིག་བལྟ།།
བཟེད་སྔས་སྔར་བྱུང་སྦས་ནས་བཟེད་པ་དང༌། །སྣོད་གཞན་སྟེང་བཟེད་སྤང་བ་ཟས་བླང་བརྒྱད།།
གྲོང་དང་གཙུག་ལག་ཁང་སོགས་ཐམས་ཅད་དུ་འདུལ་བ་དང་མི་འགལ་བར་ཟས་ལེགས་པར་མི་ལེན་པ་དང༌།སྣོད་ཀྱི་མུ་དང་ཁ་ད་ཆད་དུ་ལེན་པ་དང༌།འབྲས་ཆན་དང་ཚོད་མ་ལྟ་བུ་ཟན་༼ཕུག་ཟན༽དང་བྱན་མཉམ་པར་ལེན་པ་དང༌།གྲལ་རིམ་ལྟར་མཐར་ཆགས་སུ་མི་ལེན་པ་དང༌།ལྷུང་བཟེད་ལ་ཡིད་གཏད་དེ་མི་ལེན་པར་ཟུར་མིག་གིས་བལྟ་བ་དང༌།ཟས་འདྲེན་པ་མ་སླེབས་པར་སྣོད་བཟེད་སྔས་པ་དང༌།ལྷག་པོ་འདོད་པས་ཟས་སྔར་བྱུང་སྦས་ནས་ཡང་བཟེད་པ་དང༌།སྣོད་གཞན་གྱི་སྟེང་དུ་བཟུང་ནས་བཟེད་པ་སྟེ།དེ་ལྟར་སྐྱོན་རྣམས་སྤང་བར་བྱས་ཏེ་ཟས་བླང་བ་ལ་བསླབ་པར་བྱ་བ་བརྒྱད་དོ།།
ལྔ་པ་ཟས་ཟ་བའི་སྡེ་ནི།
འགལ་ཟ་ཁམ་ཆེ་ཆུང་དང་རན་པར་མིན། །ཁ་གདངས་ཟ་བཞིན་སྨྲ་དང་ཙུག་ཙུག་དང༌།།
ཅག་ཅག་ཧུ་ཧུ་ཕུ་ཕུ་ལྕེ་ཕྱུང་ཟ། །འབྲུ་ནས་གུད་ཕྱེ་ཟས་ལ་སྐྱོན་འཕྱ་དང༌།།
ཁམ་གཅིག་མཁུར་སྤོ་རྐན་ཏོག་ཁམ་འཕྲོ་བཅད།།
ལག་པ་ལྡག་འབྱོག་ལག་སྤྲུག་སྐྱོམ་སྐྱོམ་བྱེད།།
མཆོད་རྟེན་འདྲར་བྱེད་ཉེར་གཅིག་ཟ་ཚེ་སྤང༌།།
ཐམས་ཅད་དུ་འདུལ་བ་དང་འགལ་བས་ལེགས་པར་མི་ཟ་བ་དང༌།ཟས་ཀྱི་ཁམ་ཧ་ཅང་ཆེ་བ་དང༌།ཧ་ཅང་ཆུང་བ་དང༌།རང་ངམ་འཇིག་རྟེན་དང་མཐུན་པའི་ཁམ་རན་པར་མིན་པ་དང༌།ཁམ་ཁ་སྒོར་མ་སླེབས་པར་ཁ་གདངས་པ་དང༌།ཟ་བཞིན་དུ་གཏམ་སྨྲ་བ་དང༌།ཟ་བའི་ཚེ་སྐྱུར་བ་ལ་ཙུག་ཙུག་དང༌།མངར་བ་ལ་ཅག་ཅག་དང༌།གྲང་བ་ལ་ཧུ་ཧུ་དང༌།ཚ་བ་ལ་ཕུ་ཕུའི་སྒྲ་དང་བཅས་པ་དང༌།ལྕེ་ཕྱིར་ཕྱུང་ནས་ཟ་བ་དང༌།སྲོག་ཆགས་ཡོད་མེད་བརྟགས་པ་མིན་པར་ཡོས་སོགས་འབྲུ་རེ་རེ་ནས་གུད་དུ་ཕྱེ་ནས་ཟ་བ་དང༌།སྦྱིན་བདག་གི་ཟས་ལ་ཁའོ་སྐྱུར་རོ་ཞེས་པ་ལ་སོགས་པའི་སྐྱོན་བརྗོད་ནས་འཕྱ་སྨོད་བྱས་པ་དང༌།ཁམ་གཅིག་མཁུར་བ་གཡས་གཡོན་དུ་སྤོ་ཞིང་ཟ་བ་དང༌།རྐན་ཏོག་ཅིང་ཟ་བ་དང༌།དུད་འགྲོ་ལྟར་ཁམ་འཕྲོ་བཅད་དེ་ཟ་བ་དང༌།ལག་པ་ཟས་ཆགས་པ་ལྡག་པ་དང༌།ལྷུང་བཟེད་དང་ཕོར་བུ་སོགས་ལ་ཟས་ཆགས་པ་ལྕེས་ལྡག་ཅིང་མཛུབ་མོ་དང་ཐུར་མ་སོགས་ཀྱིས་བྲད་ནས་འབྱོག་པ་དང༌།ལག་པ་ལ་ཟས་ཆགས་པ་སྤྲུག་པ་དང༌།ཟས་དང་བཅས་པའི་ལྷུང་བཟེད་སོགས་སྐྱོམ་སྐྱོམ་བྱེད་པ་དང༌།ཟས་ལ་མཆོད་རྟེན་གྱི་གཟུགས་འདྲ་བར་བཅོས་ཏེ་གཞོལ་ཞིང་ཟ་བར་བྱེད་པ་སྟེ་ཉེར་གཅིག་པོ་ཟས་ཟ་བའི་ཚེ་སྤང་ལ་ཚུལ་བཞིན་དུ་ཟ་བ་ལ་བསླབ་པར་བྱའོ།།
དྲུག་པ་ལྷུང་བཟེད་ལ་སྤྱོད་པའི་སྡེ་ནི།
ལྷུང་བཟེད་ལ་འཕྱ་ཕྱིར་བལྟ་ལག་པ་ནི། །ཟས་འབགས་ཆུ་སྣོད་མི་རེག་ཆུ་མི་གཏོར།།
མ་དྲིས་འབགས་ཆུ་འབོ་དང་ཟས་ལྷག་བཞག།ས་རྗེན་གད་ཁ་རི་གཟར་བང་རིམ་བཞིར།།
མི་བཞག་གད་གཡང་དཀན་གཟར་དུ་མི་འཁྲུ།།
ལངས་དང་ཆུ་དྲག་མི་བཅུ་བཅུ་བཞིའོ།།
གཞན་གྱི་ལྷུང་བཟེད་ལ་འཕྱ་བའི་ཕྱིར་མི་བལྟ་བ་དང༌།ལག་པ་ནི་ཟས་ཀྱིས་འབགས་པས་ཆུ་སྣོད་ལ་མི་རེག་པ་དང༌།ཟས་དང་བཅས་པའི་འབགས་ཆུ་དྲུང་ན་གནས་པའི་དགེ་སློང་ལ་མི་གཏོར་བ་དང༌།ཁྱིམ་བདག་ལ་མ་དྲིས་པར་ཟས་དང་འབགས་པའི་ཆུ་དེའི་ཁྱིམ་དུ་མི་འབོ་བར་བྱེད་པ་དང༌།ཟས་ལྷག་ལྷུང་བཟེད་དུ་བཞག་ནས་མི་འདོར་བ་དང༌།ལྷུང་བཟེད་འོག་གཞི་མེད་པར་ས་རྗེན་དང༌།གད་ཁ་དང་རི་དོ་ཆད་ཀྱི་གཡང་གཟར་པོ་དང༌།བང་རིམ་གཞོལ་པོའི་དཀན་ཏེ་བཞིར་མི་བཞག་པ་དང༌།དེ་བཞིན་དུ་ལྷུང་བཟེད་གད་ཁ་དང༌།གཡང་ས་དང༌།དཀན་གཟར་དུ་མི་འཁྲུ་བ་དང༌།ལངས་ཏེ་ལམ་གྱི་བཞི་མདོ་རྣམས་སུ་མི་བཀྲུ་བ་དང༌།འབབ་ཆུ་དྲག་པོའི་རྒྱུན་ལས་ལྡོག་སྟེ་ལྷུང་བཟེད་ཀྱིས་ཆུ་མི་བཅུ་བ་སྟེ་བཅུ་བཞི་པོ་ལ་བསླབ་པར་བྱའོ།།
བདུན་པ་ཆོས་སྟོན་པའི་སྡེ་ཚན་ནི།
ཆོས་སྟོན་སྡེ་ནི་ལངས་ཉལ་རང་དམར་འདུག།
མདུན་ནས་འགྲོ་ལ་ཕྱི་བཤད་ལམ་པོའི་འགྲམ།།
མགོ་གཡོགས་བརྫེས་གཟར་ལག་པ་གཉའ་ལྟག་བསྣོལ།།
དོ་ཀེར་བཅིངས་དང་ཞྭ་གྱོན་ཅོད་པན་བཏགས། །ཕྲེང་བ་དང་ནི་མགོ་དཀྲིས་གླང་རྟ་ཞོན།།
ཁྱོགས་དང་བཞོན་པ་མཆིལ་ལྷམ་གྱོན་པ་དང༌།།
འཁར་བ་གདུགས་མཚོན་རལ་གྲི་དགྲ་ཆ་མདའ། །གོ་ཆ་གྱོན་ལ་མི་བཤད་ཉེར་དྲུག་གོ།
ཉན་པ་པོ་མི་ན་བཞིན་དུ་འདུག་པ་ལས་འཆད་པ་པོ་ལངས་ཏེ་ཆོས་མི་འཆད།དེ་བཞིན་དུ་ཉལ་མལ་དུ་འདུག་པ་དང༌།སྟན་མཐོན་པོར་འདུག་པ་ལ་རང་དམའ་བར་འདུག་ནས་དང༌།མདུན་ནས་འགྲོ་བ་ལ་ཕྱི་བཞིན་འོང་ནས་མི་བཤད་པ་དང༌།ལམ་གྱི་དབུས་ནས་འགྲོ་བ་ལ་ལམ་པོའི་འགྲམ་ནས་འགྲོ་ཞིང་མི་འཆད་པ་དང༌།མི་ན་བར་མགོ་གཡོགས་པ་དང༌།གོས་ཧ་ཅང་བརྫེས་པ་དང༌།གོས་ཕྲག་པར་གཟར་བ་དང༌།ལག་པ་གཉའ་གོང་དུ་བསྣོལ་བ་དང༌།ལྟག་པར་བསྣོལ་བ་དང་།སྐྲ་སྤྱི་བོར་བསྡུས་ཏེ་དོ་ཀེར་བཅིངས་པ་དང༌།ཞྭ་གྱོན་པ་དང༌།མགོ་ལ་ཅོད་པན་བཏགས་པ་དང༌།མགོ་ལ་ཕྲེང་བ་བཅིངས་པ་དང་ནི།མགོ་ལ་ཐོད་ཀྱིས་དཀྲིས་པ་དང༌།གླང་པོ་ཞོན་པ་དང༌།རྟ་ཞོན་པ་དང༌།ཁྱོགས་ཀྱིས་བཏེགས་པ་དང༌།བཞོན་པ་གཞན་ཤིང་རྟ་སོགས་ལ་ཞོན་པ་དང༌།མཆིལ་ལྷམ་གྱོན་པ་དང༌།ལག་ན་འཁར་བ་ཐོགས་པ་དང༌།གདུགས་ཐོགས་པ་དང༌།མདུང་ལ་སོགས་པའི་མཚོན་ཆ་ཐོགས་པ་དང༌།རལ་གྲི་ཐོགས་པ་དང༌།དགྲ་ཆ་སྟེ་མདའ་གཞུ་ཐོགས་པ་དང༌།གོ་ཆ་གྱོན་པ་རྣམས་ལ་མི་བཤད་པ་སྟེ་ཉེར་དྲུག་པོ་ལ་བསླབ་པར་བྱས་ཏེ་ཚུལ་བཞིན་དུ་བཤད་པ་དག་གོ།དེ་ཡང་ཉན་པ་པོོ་ན་བའི་རྐྱེན་དབང་དུ་གྱུར་པ་སོགས་ལ་ནི་ཉེས་པ་མེད་དོ།།
སྡེ་ཚན་བརྒྱད་པ་གཙང་སྦྲ་སྒྲུབ་པའི་ཚུལ་གསུམ་ནི།
སྒྲུབ་ཚུལ་གསུམ་ནི་འགྲེང་སྟེ་བཤང་གཅི་འདོར།།
ཆུ་དང་རྩྭ་ལ་བཤང་གཅི་སྣབས་མི་འདོར།།
མི་ན་བར་འགྲེངས་ཏེ་བཤང་གཅི་མི་འདོར་བ་དང༌།གཞན་དུ་འདོར་ས་མ་རྙེད་པའི་རྐྱེན་མེད་པར་ཆུའི་ནང་དང༌།རྩྭ་སྔོན་པོ་ཡོད་པའི་ཕྱོགས་ལ་བཤང་གཅི་དང་མཆིལ་སྣབས་སྐྱུགས་པ་སོགས་མི་འདོར་བ་ལ་བསླབ་པར་བྱའོ།།
དགུ་པ་ནི།
ཤིང་ལ་མི་གང་མཐོར་འཛེག་རྒྱུ་གཅིག་གོ།
སྟག་ལ་སོགས་པའི་གནོད་པ་མེད་པར་ཤིང་ལ་མི་གང་ཙམ་ལས་མཐོ་བར་འཛེག་པར་མི་བྱ་བ་སྟེ་རྒྱུ་བའི་བསླབ་བྱ་གཅིག་གོ།
གཉིས་པ་ཞར་བྱུང་དུ་དགེ་སློང་མའི་སྤང་བའི་བསླབ་བྱའི་རྣམ་གྲངས་བཤད་པ།
གཉིས་པ་ཞར་བྱུང་ནི།
དགེ་སློང་མ་ལ་ཕམ་བརྒྱད་ལྷག་ཉི་ཤུ། །སྤང་ལྟུང་སོ་གསུམ་ལྟུང་བྱེད་བརྒྱ་བརྒྱད་ཅུ།།
སོར་བཤགས་བཅུ་གཅིག་ཉེས་བྱས་བརྒྱ་བཅུ་གཉིས། །སུམ་བརྒྱ་དྲུག་ཅུ་རྩ་བཞི་མདོ་ཙམ་མོ།།
དགེ་སློང་མའི་བསླབ་བྱ་ལ་མི་ཚངས་པར་སྤྱོད་པ་སོགས་ཐུན་མོང་བ་བཞི་དང༌།རེག་པ་ལུས་བཀན་འཆབ་དང་བཟློག་པའོ། །ཞེས་ཐུན་མིན་བཞི་སྟེ་ཕམ་པ་བརྒྱད་དང༌།སྨྱན་བྱས་པ་གཞི་མེད་ནས་བཀའ་བློ་མི་བདེ་བའི་བར་ཐུན་མོང་བ་བདུན་དང༌།ཅི་ཡང་ལེན་པ་སོགས་ཐུན་མིན་བཅུ་གསུམ་སྟེ་ལྷག་མ་ཉི་ཤུ་དང༌།འཆང་བྲལ་འཇོག་གསུམ་ཐུན་མོང་བ་བཅུ་དགུ་དང༌།ལྷུང་བཟེད་ལྷག་པོ་ཞག་གཅིག་འདས་པར་འཆང་བ་སོགས་ཐུན་མིན་བཅུ་བཞི་སྟེ་སྤང་བའི་ལྟུང་བ་སོ་གསུམ་དང༌།ཤེས་བཞིན་རྫུན་སྨྲ་སོགས་ཐུན་མོང་བ་བདུན་ཅུ་རྩ་གཉིས་དང༌།བསྙེན་པར་རྫོགས་ནས་ལོ་བཅུ་གཉིས་མ་ལོན་པར་གཞན་གྱི་མཁན་མོ་བྱེད་པ་སོགས་ཐུན་མིན་བརྒྱ་དང་བརྒྱད་དེ།ལྟུང་བྱེད་བརྒྱ་དང་བརྒྱད་ཅུ་དང༌།བསླབ་པ་དྲལ་ཏེ་ཁྱིམ་དུ་འཇུག་པ་ཐུན་མོང་བ་གཅིག་དང༌།འོ་ཞོ་མར་ཞུན་སློང་བ་སོགས་ཐུན་མིན་བཅུ་སྟེ་སོར་བཤགས་བཅུ་གཉིས་པོ་དང༌།མ་བསྒོས་པར་སྟན་ལ་འདུག་པ་དང༌།རྩྭ་སྔོན་ཁྲོད་དུ་མི་གཙང་བ་འདོར་བ་མ་གཏོགས་པའི་ཐུན་མོང་བ་བརྒྱ་དང་བཅུ།ཤམ་ཐབས་རྐེད་པ་སྣང་བར་དཀྲི་བ་དང༌།ཆགས་པས་ཁྱིམ་གཞན་དུ་འགྲོ་བ་སྟེ་ཐུན་མིན་གཉིས་དང་བཅས་ཉེས་བྱས་བརྒྱ་དང་བཅུ་གཉིས་ཏེ།ཐམས་ཅད་བསྡོམས་པས་སུམ་བརྒྱ་དང་དྲུག་ཅུ་རྩ་བཞི་བསྲུང་བར་བྱ་བ་ཡིན་ནའང༌།བོད་འདིར་དགེ་སློང་མའི་སྡོམ་རྒྱུན་མ་དར་བས་མདོར་བསྡུས་པ་དེ་ཙམ་མོ།།
གཉིས་པ་མཐུན་ཕྱོགས་བསྒྲུབ་པའི་བསླབ་བྱ་ནི།
སྒྲུབ་པའི་བསླབ་བྱ་ཡོངས་སུ་སྦྱོང་བའི་ཚུལ།།གསོ་སྦྱོང་དབྱར་གནས་དགག་དབྱེ་གོས་ཀྱི་གཞི།།
ཀོ་ལྤགས་གནས་མལ་སྨན་སོགས་གཞན་དུ་ཤེས།།
སྐྱོན་ཡོངས་སུ་སྦྱོང་བའི་ཚུལ་གྱིས་བསླབ་པ་གསུམ་གོང་ནས་གོང་དུ་འཕེལ་བའི་ཐབས་གཞི་བཅུ་བདུན་ཏེ།གཉེན་པོ་བསླབ་པ་གསོ་ཞིང་སྤང་བྱ་སྡིག་པ་སྦྱོང་བའི་གཞི་དང༌།དགོས་ཆེད་རྣམ་པ་བཅུའི་ཕྱིར་དབྱར་སྔ་ཕྱི་གང་རུང་ལ་ཟླ་བ་གསུམ་དུ་གནས་པའི་དང༌།དེའི་རིང་ལ་ལྟུང་བ་གླེང་བ་དང་རྫས་བགོ་བ་དགག་པར་སྐབས་དབྱེ་བའི་དང༌།ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་འགྱུར་ཞིང་དགེ་སྦྱོང་གི་དྲན་པ་གསོ་བ་དང༌།ཚ་གྲང་གི་རེག་པ་སྐྱོབ་པའི་ཕྱིར་མཐའ་གཉིས་སུ་མ་ལྷུང་བའི་གོས་ཇི་ལྟར་སྒྲུབ་པའི་ཚུལ་སོགས་བསྟེན་པ་གོས་ཀྱི་གཞི་དང༌།དེ་ཉིད་དམིགས་བསལ་དང་འབྲེལ་བ་ཀོ་ལྤགས་ཀྱི་གཞི་དང༌།དགེ་འདུན་གྱི་གནས་མལ་ཇི་ལྟར་བྱ་བ་དང༌།དེ་ལ་ལོངས་སྤྱོད་པའི་ཚུལ་སོགས་སྟོན་པའི་དང༌།སོ་སོའི་ནད་ལ་ཕན་པའི་སྨན་བཞི་བསྟེན་ཚུལ་ཏེ།སོགས་ཀྱི་སྒྲས་འདིར་བསྟན་པའི་ལྷག་མ་རྣམས་གཞུང་གཞན་དུ་ཤེས་པར་བྱ་ཞེས་པའོ། །འདིར་དེ་དག་གི་སྤྱི་དོན་ཅུང་ཟད་བཤད་ན།ལུང་ལས།
རབ་བྱུང་གསོ་སྦྱོང་གཞི་དང་ནི། །དགག་དབྱེ་དབྱར་དང་ཀོ་ལྤགས་གཞི།།
སྨན་དང་གོས་དང་སྲ་བརྐྱང་དང༌། །ཀོ་ཤམྦྷི་དང་ལས་ཀྱི་གཞི།།
དམར་སེར་ཅན་དང་གང་ཟག་དང༌། །སྤོ་དང་གསོ་སྦྱོང་བཞག་པ་དང༌།།
གནས་མལ་དང་ནི་རྩོད་པ་དང༌། །དགེ་འདུན་དབྱེན་རྣམས་བསྡུས་པ་ཡིན། །ཞེས་པ་ལྟར་བཅུ་བདུན་ལས།
དང་པོ་ནི།རབ་བྱུང་གི་བསླབ་པ་རྣམས་སྟོན་པ་ལ་རྟེན་གྱི་གང་ཟག་གཞི་གྲུབ་དགོས་པའི་ཕྱིར།ཐོབ་བྱེད་ཀྱི་གཞི་སྟེ་གཅིག་ཡིན་ལ་དེ་ནི་སྔར་བཤད་གྲུབ་པས་འདིར་མི་སྤྲོའོ། །དེ་ལྟར་ཐོབ་པའི་བསླབ་པ་སྲུང་བྱེད་ཀྱི་གཞི་ལ་བརྒྱད་དུ་ཡོད་པ་ལས།བསླབ་པ་ཡོངས་སྦྱོང་གི་གཞི་ནི་རྣམ་པ་གསུམ་སྟེ།དེ་ལས་དང་པོ་གསོ་སྦྱོང་ལ་སྔར་བསགས་ཀྱི་སྒྲིབ་པ་སྦྱོང་ཞིང་ལྷག་པ་སེམས་དང་ཤེས་རབ་དག་པར་བྱ་བའི་ཕྱིར་ཞི་གནས་ཀྱི་གསོ་སྦྱོང་སྟེ།དེ་ཡང་དང་པོ་འདོད་ཆགས་ཀྱི་གཉེན་པོ་མི་སྡུག་པ་སྒོམ་པ་ནི།མདོག་དབྱིབས་རེག་བྱ་བསྙེན་བཀུར་ལ། །ཆགས་པའི་གཉེན་པོ་འདུ་ཤེས་དགུ།རིམ་བཞིན་རྣམ་པར་སྔོ་དམར་ཚིག།རྣམ་པར་གནག་ཟོས་འཐོར་བ་དང༌། །འབུས་གཞིག་རུས་གོང་རྒྱུས་པས་འབྲེལ། །བེམ་པོའི་རང་བཞིན་གཡོ་བ་མེད། །ཅེས་པའི་སྡོམ་ལྟར་དང༌།ཞེ་སྡང་གི་གཉེན་པོར་བྱམས་པ་བསྒོམ་པ་དང༌།གཏི་མུག་གི་གཉེན་པོར་རྟེན་ཅིང་འབྲེལ་བར་འབྱུང་བ་བསྒོམ་པ་དང༌།རྣམ་རྟོག་གི་གཉེན་པོ།བགྲངས་དང་རྗེས་འགྲོ་འཇོག་པ་དང༌། །རྟོག་པ་ཡོངས་སུ་བསྒྱུར་བ་དང༌། །ཡང་དག་རྣམ་པ་དྲུག་ཏུ་འདོད། །ཅེས་པ་ལྟར་དབུགས་འབྱིན་འཇུག་དྲན་པའི་སྒོམ་ཚུལ་རྣམས་མདོ་ལས།དམིགས་པ་གཏད་ནས་སེམས་འཇོག་པར་བྱེད།དེའི་རྒྱུན་གཡེང་བར་མི་འགྱུར་བས་ཀུན་ཏུ་འཇོག་པར་བྱེད།རྣམ་པར་གཡེང་ན་སླར་ཡང་ངེས་པར་འཇོག་པར་བྱེད།ཡང་ཡང་སེམས་ནང་དུ་བསྡུས་པས་ཉེ་བར་འཇོག་པར་བྱེད།ཏིང་ངེ་འཛིན་ལ་སེམས་མི་དགའ་བ་དུལ་བར་བྱེད།ཉོན་མོངས་པ་དང་རྣམ་རྟོག་ཞི་བར་བྱེད།སྒྲིབ་པ་ལྔ་ཉེ་བར་ཞི་བར་བྱེད།འདུ་བྱེད་དང་བཅས་པས་རྒྱུད་གཅིག་ཏུ་བྱེད།འདུ་བྱེད་པ་མེད་པར་མཉམ་པར་འཇོག་པར་བྱེད།ཅེས་པ་ལྟར་སེམས་གནས་པའི་ཐབས་དགུས་འདོད་པའི་སེམས་རགས་པ་ཞི་བར་བྱས་ནས།བསམ་གཟུགས་བརྒྱད་ཀྱི་དངོས་གཞི་སྒྲུབ་པའི་ཞི་གནས་དང༌།དྲན་པ་ཉེ་བར་བཞག་པ་སོགས་ཐར་པའི་ལམ་བྱང་ཕྱོགས་བསྒོམ་པ་རྣམས་སོ། །ཕྱིས་འབྱུང་གི་རྒྱུན་ཚེ་འདིའི་ཟག་པ་བསྡམས་ཤིང་ལྷག་པའི་ཚུལ་ཁྲིམས་དག་པར་བྱ་བའི་ཕྱིར་མཐུན་པའི་གསོ་སྦྱོང་སྟེ།དེ་ཉིད་ཇི་ལྟར་བྱ་བ་ནི།ལྟུང་བ་བཤགས་སྡོམ་བྱིན་རླབས་བྱ་བ་སོགས་ནས་བག་ཡོད་པར་གདམས་པ་དང༌།མ་ལྷགས་པ་ཡོད་ན་འདུན་པ་བླངས་ནས་བརྗོད་པའི་བར་སྦྱོར་བའི་ཆོས་རྣམས་སྔོན་དུ་སོང་ནས།དགེ་འདུན་ཐུགས་བསྟུན་ཏེ་མདོ་འདོན་པ་དངོས་གཞི་སྟེ།དེ་ལ་དུས་ངེས་པ་ནི།ལོ་དྲི་ལས།
རྒྱལ་དང་དབོ་དང་ས་ག་དང༌། །ཆུ་སྟོད་ཁྲུམས་སྨད་སྨིན་དྲུག་བཅས།།
འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པའོ། །ཞེས་པ་ལྟར་ལོ་གཅིག་གི་ནང་བཅུ་བཞི་པ་དྲུག་དང༌།ཟླ་བ་དེ་རྣམས་ཀྱི་ཡར་ངོའི་དྲུག་དང༌།ཟླ་བ་གཞན་དྲུག་པོའི་ཡར་ངོ་མར་ངོའི་དྲུག་དྲུག་སྟེ་བཅོ་བརྒྱད་ལ་གསོ་སྦྱོང་བཅོ་ལྔ་པ་བྱེད་པ་ནི་ཞག་མི་ཐུབ་པ་དོར་བའི་དབང་གིས་སོ། །མ་ངེས་པ་ནི་རབ་གནས་སོགས་བཀྲ་ཤིས་པའི་དུས་སུ་བྱ་བ་བཀྲ་ཤིས་པ་དང༌།ནད་ཡམས་སོགས་གནོད་པ་བྱུང་ཟིན་ཟློག་པའམ།སླར་མི་འབྱུང་བའི་ཕྱིར་བྱེད་པ་གནོད་པ་ཟློག་པ་དང༌།དགེ་འདུན་དབྱེ་བ་ཟླུམ་པའི་ཕྱིར་བྱ་བ་འཁོན་པ་ཟླུམ་པའི་གསོ་སྦྱོང་སྟེ་གསུམ་མོ། །དམིགས་བསལ་དགེ་སློང་གསུམ་མན་ཆད་ལས་མེད་ན་དུས་ཀྱི་བར་དུ་སྒུག་པའམ།གསོ་སྦྱོང་ཡོད་སར་འགྲོ་བའམ།ཡང་ན་གསོ་སྦྱོང་བྱིན་གྱིས་བརླབས་ཤིང༌།རང་ཉིད་གཅིག་པུ་ལས་མེད་ན་སྔོན་གྱི་གསོ་སྦྱོང་ཚིགས་སུ་བཅད་པ་ཕྱེད་དང་བཞི་ཙམ་འདོན་པར་བྱའོ།།
གཉིས་པ་དབྱར་གནས་ལ།འཕྱ་དང་སྲོག་ཆགས་གནོད་སྤོང་དང༌། །ལུས་སྲོག་གནོད་སྤོང་རལ་འདི་དག་སོ་སོར་བགྲང་ན་བཅུར་འགྱུར་རོ་གྲུམ་བཅོས། །དོན་བྱ་ཉུང་དང་ཐོས་སོགས་འཕེལ། །དགག་དབྱེ་སྲ་བརྐྱང་འབྱུང་བའོ། །ཞེས་པ་ལྟར།ཕན་ཡོན་བརྒྱད་དང་ལྡན་པས་དེ་ཇི་ལྟར་བྱ་བ་ལ་གཉིས་ཏེ།ས་གའི་ལྷས།
གྲོ་ཞུན་ཟླ་བའི་ཚེས་གཅིག་ནས། །སྔ་མའི་དབྱར་དེ་གཙོ་བོ་ཡིན།།
དེ་ཉིད་ཁྲུམས་ཀྱི་ཟླ་བ་ཡི། །ཚེས་གཅིག་ནས་ནི་ཕྱི་མར་གྲགས། །ཞེས་པ་ལྟར་དབྱར་སྔ་ཕྱི་གང་ཡིན་ཡང་ཟླ་བ་ཕྱེད་ཙམ་གྱི་སྔ་རོལ་ནས་གཙུག་ལག་ཁང་རལ་གྲུམ་བཅོས་པ་དང༌།བྱི་དོར་བྱ་བ་སོགས་རིང་སྦྱོར་དང༌།སྔ་ཕྱི་གང་ཁས་ལེན་པའི་ཟླ་བ་དེའི་སྔ་མའི་ཟླ་བ་རྫོགས་པའི་ཉ་ལ་གསོ་སྦྱོང་བྱས་ཏེ་གནས་མལ་སྟོབ་པ་སོགས་ནས་ཁས་བླངས་པ་གོ་བར་བྱ་བའི་བར་རྣམས་ཉེ་སྦྱོར་ཏེ།དེ་ནས་དངོས་གཞི་མར་ངོའི་ཚེས་གཅིག་གི་སྔ་ཞོགས་དགེ་སློང་གི་མདུན་དུ་སྔགས་ལན་གསུམ་བརྗོད་པས་ཁས་བླང་ངོ༌། །དམིགས་བསལ་ཡུལ་མེད་ན་དམ་བཅས་པས་ཀྱང་ཆོགདེ་ལྟར་དབྱར་གནས་པའི་ཚེ་དམ་ཚིག་སྲུང་བ་རྣམ་དྲུག་སྟེ།དམ་བཅའ་གནས་སུ་འབྲེལ་བ་དང༌། །འཁྲུག་ལོང་མི་བྱ་ཐོས་སོགས་བརྩོན། །རལ་གྲུམ་བཅོས་དང་ཡུན་རིང་གནས། །གསོ་སྦྱོང་སོགས་ཀྱི་ཡུན་དུ།འབྲལ་བ་སྤོང་སྟེ་འདི་ལ་གཉིས། །དགེ་འདུན་དང་བྱིན་རླབས།ཞེས་པའི་སྡོམ་ལྟར།ནང་ཁྲིམས་བཅས་པ་ལས་མི་འགལ་བར་བྱའོ།།
གསུམ་པ་དགག་དབྱེ་ལ།དུས་ངེས་པ་ནི་ཞག་བདུན་ལ་སོགས་པའི་སྔ་རོལ་ནས་སྤྱོད་ཡུལ་དུ་གོ་བར་བྱ་བ་སོགས་རིང་སྦྱོར་དང༌།དབྱར་སྔ་མ་ཡིན་ན་དབྱུག་ཟླ་དང༌།ཕྱི་མ་ཡིན་ན་སྨིན་དྲུག་ཟླ་བའི་ཚེས་བཅོ་ལྔའི་སྔ་དྲོ་དགེ་འདུན་རྣམས་འདུས་ནས་བཟོད་གསོལ་དང་རྒྱུན་ཆགས་གསུམ་པ་ནས་དགེ་ཚུལ་གྱི་བཤགས་པའི་བར་གསོ་སྦྱོང་ལྟར་བྱས་ལ།འདུ་བར་མ་ནུས་པ་ཡོད་ན་འདུན་པ་དང་དགག་དབྱེ་བླངས་ནས་བརྗོད་པ་དང༌།ལྟུང་མཐུན་བྱིན་རླབས་དང༌།དགག་དབྱེ་ལ་ཐུགས་བསྟུན་པ་རྣམས་ཉེ་སྦྱོར་རོ། །དེ་ནས་དངོས་གཞི་རྩྭ་དུརྦྷ་བྲིམས་ཤིང༌།དགག་དབྱེའི་སྔགས་ལན་གསུམ་བརྗོད་པ་དང༌།རྫས་ཀྱི་དགག་དབྱེ་བྱའོ། །དེ་ལ་ཡུལ།དངོས་པོ།གནས།དུས།ཆོ་གབྱེད་པ་པོ་སྟེ་དྲུག་གིས་དབྱེ་བའི་དམིགས་བསལ་རྣམས་ཀྱང་ཤེས་པར་བྱའོ།།
དུས་མ་ཡིན་པ་ནི།ཟླ་བ་ཕྱེད་དང་གཉིས་འདས་པའི་ཉ་ཤི་གང་རུང་ལ་རྐྱེན་དབང་གིས་དགག་དབྱེ་བྱར་རུང་ཞིང་དམག་འཁྲུག་སོགས་བྱུང་ནས་དགེ་འདུན་ཐམས་ཅད་འགྱེས་དགོས་ན་ཚོགས་ཀྱི་དགག་དབྱེ་བྱ་བ་དང༌།དགེ་སློང་གང་རུང་རྐྱེན་དབང་གིས་འགྲོ་དགོས་ནའང་འདི་བྱར་རུང་ངོ༌། །བདེ་བར་གནས་པ་རྐྱེན་གྱི་གཞི་ལ་ལྔ་ཡོད་པ་ལས།དང་པོ་སྨན་གྱི་གཞི་སྟེ།དེ་ཡང་ལོག་འཚོ་དང་བྲལ་ཞིང་མཐའ་གཉིས་སྤང་བའི་སྒོ་ནས་བསྒྲུབས་པའི་སྨན་བཞི་ཡིན་ཞིང༌།དེ་ལ་དུས་རུང་ནི་བཀྲེས་པའི་ནད་སེལ་བ་ལ་གཙོ་བོར་གནང་བའི་སྨན་དགེ་སློང་གིས་སྤྱིར་བཏང་ལ་ཕྱི་དྲོ་ལོངས་སྤྱོད་དུ་མི་རུང་བའི་བཟའ་བ་ལྔ་དང་བཅའ་བ་ལྔ་སྟེ།ས་གའི་ལྷས།
འབྲས་བུ་སྣ་ཚོགས་བཙོས་པ་སྣ་ཚོགས་འབྲས་ཆན་ཆུ་དང་སྦྱར་བ་ཟན་དང་ལས་ཀྱིས་ཤི་བ་དང་ཚོང་འདུས་གསུམ་བརྒྱུད་པ་ཤ།ཕྱེ་དང་སྣུམ་ནང་བཙོས་པ་ཁུར་བ་བཟའ་བ་ལྔ། །ཞེས་དང༌།རྩ་བ་སྡོང་བུ་མེ་ཏོག་འབྲས། །ལོ་མ་ཡང་ནི་བཅའ་བ་ལྔ། །ཞེས་སོ། །ཐུན་ཚོད་དུ་རུང་བ་ནི།སྐོམ་པའི་ནད་སེལ་བ་ལ་གཙོ་བོར་གནང་བའི་སྨན་བཅས་ལྡན་དགེ་སློང་གིས་ཐུན་ཚོད་ཀྱི་མཐའི་བར་བྱིན་གྱིས་བརླབས་ནས་ལོངས་སྤྱད་དུ་རུང་བ་བཏུང་བའི་རྒྱུ་བརྒྱད་ལྟ་བུ་སྟེ།སྨན་གྱི་གཞི་ལས།
ཆུ་ཤིང་འབྲས་དང་ཀུ་ཤུ་གོ་ལ་དང༌། །ཨ་ཤྭཏྠ་དང་ཨུ་དུམྦ་ར་དང༌།།
པ་རི་ཤ་ཀ་དང་ནི་རྒུན་འབྲུ་དང༌། །བརྒྱད་པ་འབྲ་གོ་དག་ནི་ཡིན་པར་བཤད། །ཅེས་དང༌།གཞན་ཡང་བཙོས་པའི་ཚྭ་རྒུན་ཆང་སོགས་ཀྱི་སིང་པོ།འབྲུའི་ཚྭ་ནས་ཆང་སོགས་ཀྱི་སིང་པོ།ཞོའི་ཁ་ཆུ།དར་བའི་དྭངས་མ།རྩབ་མོའམ་ཙང་ཤུར་འབྲས་བུ་སོགས་བཙོས་ནས་ཕབ་མ་བཏབ་པར་མནན་པ་གྲགས་པ་རྣམས་ཆུས་བཏབ་པ།ཚགས་ཀྱིས་བཙགས་པ་དང༌།ཤིན་ཏུ་སླ་བ།བཞིན་སྣང་བ།འདམ་བུ་ཉག་མའི་མདོག་ལྟར་དྭངས་པ་སྟེ་མཚན་ཉིད་ལྔ་ལྡན་གྱི་བཏུང་བ།
དེ་ཡང་སྨན་གཞན་གསུམ་སྦྱར་བའི་དབྱེ་བས་གསུམ་ཡོད་དོ།།
ཞག་བདུན་པ་ནི།རླུང་ནད་སེལ་བ་ལ་གཙོ་བོར་གནང་བའི་སྨན་དང་དགེ་སློང་གིས་ཞག་བདུན་པའི་མཐའི་བར་བྱིན་གྱིས་བརླབས་ནས་ལོངས་སྤྱད་དུ་རུང་བ་སྟེ།དེ་ཡང༌།
ཞུན་མར་འབྲུ་མར་སྦྲང་རྩི་བུ་རམ་དང༌། །བུ་རམ་གྱི་ཁ་ཤུན་བསྡུས་པ་ཕྱེ་ཧྭགས་དེ་རྡོག་པོར་བྱས་པ་ལི་ཁར་ཞུན་མར་དང་ངོ་བོ་འདྲ་བའི་ལྷའི་བདུད་རྩི་འབྲུ་མར་དང་འདྲ་བའི་སེམས་ཅན་ལྔའི་ཞགཅེས་པའི་སྡོམ་གྱིས་བསྟན་པ་ལ་སོགས་པ་རྣམས་སོ།།
འཚོ་བཅངས་ནི།འདུ་བའི་ནད་སེལ་བ་ལ་གཙོ་བོར་གནང་བའི་སྨན་དགེ་སློང་གིས་ཇི་སྲིད་འཚོའི་བར་བྱིན་གྱིས་བརླབས་ནས་ལོངས་སྤྱད་དུ་རུང་བ་སྟེ།དེ་ཡང༌།རྩ་བ་སྡོང་བུ་འདབ་མ་དང༌། །མེ་ཏོག་འབྲས་བུའི་སྨན་ལ་སོགས། །ཞེས་པ་རྣམས་སོ། །ཞར་བྱུང་དེ་དག་བཞག་པའི་གནས་མཚམས་ནང་ཡིན་ཡང་རྗེན་བཙོས་དང་ཞག་ལོན་སོགས་རུང་བའི་ཁང་པ་བྱེད་པའི་ཚུལ་ལ།གསར་པ་བརྩིགས་པ་དང༌།བྱས་ཟིན་པའི་རྙིང་པ་དང༌།མཚམས་ནང་གཅིག་ཏུ་གཙུག་ལག་ཁང་དུ་མའི་རུང་ཁང་གཅིག་ཏུ་བྱས་པ་བ་ལང་གི་ལྷས་ལྟ་བུ་གསུམ་སྟེ།དེ་དག་གི་མཚན་ཉིད་དང་བྱིན་གྱིས་བརླབ་ཚུལ་ནི།རང་བཞིན་ཉེ་འཁོར་རང་དབང་བ། །ཐུན་མོང་གཉིས་མིན་མ་འབྲེལ་དང༌། །འཚེད་ལ་བླ་གབ་དང་བཅས་དྲུག།འདེགས་བསྡུ་ལས་ཕྲལ་བྱུང་བ་བཞི། །ཞེས་པའི་སྡོམ་ལྟར་རོ།།
གཉིས་པ་གོས་ཀྱི་གཞི་ནི།རྒྱུ་ལོག་འཚོ་མེད་ཅིང་འདུལ་བ་དང་མཐུན་པའི་སྒོ་ནས་བསྒྲུབས་ཤིང༌།སྤྱིར་བཏང་ལ་རུང་བའི་ཚོན་གསུམ་གྱིས་ཁ་དོག་བསྒྱུར་བའི་གོས་ཏེ།དེ་ལ་འཚོ་མཁོ་ལྷག་གསུམ་ལས།དང་པོ་ནི་དགེ་སློང་གི་ལུས་འཚོ་བའི་ཆེད་དུ་གནང་བའི་གོས་རུང་བ་ཚད་ལྡན་རེ་རེ་ངེས་པ་རང་མིང་གིས་བྱིན་གྱིས་བརླབ་རུང་བ་སྟེ།དབྱེ་ན་སྣམ་སྦྱར།བླ་གོས།མཐང་གོས།ཤམ་ཐབས།དེའི་གཟན།རྔུལ་གཟན།དེའི་གཟན།གདོང་ཕྱིས།རྣག་གཟན།གཡན་དགབ།སྐྲ་བཟེད།གདིང་བ།རས་ཆེན་ཏེ་ཡོ་བྱད་བཅུ་གསུམ་མོ། །གནས་སྐབས་འབྲལ་སྤང་ཁེགས་པའི་སྔགས་རྟེན་ལ་ཆོས་གོས་གསུམ་གང་རུང་གི་རྒྱུ་དང༌།ཁྱིམ་པའི་གོས་ལྟ་བུ་གང་རུང་ཁྲུ་གང་ཡན་ཆད་དོ།།
གཉིས་པ་མཁོ་བའི་ཡོ་བྱད་ཀྱི་གོས་ནི།འཚོ་བའི་ཡོ་བྱད་གང་རུང་གི་དབྱིབས་སུ་མ་གྲུབ་པའི་གོས་ཁྲུ་གང་ཡན་ཆད་རང་གཞན་གཉིས་ཀའི་མིང་གིས་བྱིན་གྱིས་བརླབས་ནས་བཅང་རུང་བ་སྟེ།དར་གོས་སོགས་ནོར་གྱི་འདུ་ཤེས་དང༌།ཞྭ་ལ་སོགས་པ་གོས་ཀྱི་འདུ་ཤེས་སྐྱེ་བ་གཉིས་སོ།།
གསུམ་པ་ལྷག་པོའི་གོས་ནི།གཞན་མིང་ཉིད་ཀྱིས་བརླབས་པའམ་ཡིད་གཏད་དེ་བཅང་རུང་གི་གོས་འཚོ་བའི་དང་མཁོ་བའི་ཡོ་བྱད་ཀྱི་ལྷག་པོ་དག་གོ།དེ་རྣམས་ལ་ཞེན་ཆགས་སྤོང་བའི་སྒོ་ནས་ལུས་ལ་རྨ་དང་གོས་ལ་རྨ་དཀྲིས་ཀྱི་འདུ་ཤེས་སོགས་དགེ་བའི་བསམ་པས་ལོངས་སྤྱད་ནས་བཅོས་སུ་མི་རུང་བའི་དུས་སྦྱིན་བདག་གི་བསོད་ནམས་སྤེལ་བ་སོགས་ཀྱི་ཆེད་དུ་མཆོད་རྟེན་སོགས་ཀྱི་སེར་ཁ་ལ་བསླན་པར་བྱའོ།།
གསུམ་པ་སྲ་བརྐྱང་གི་གཞི་ནི།ཆོས་གོས་དྲས་དྲུབ་བྱེད་པའི་གཞི་སྤང་ལེབ་ལ་འདྲ་བ་རྒྱུ་མཚན་དུ་བྱས་ནས་བཏགས་པ་སྟེ་དབྱར་རྙེད་ཀྱི་རྒྱུ་ལས་བྱུང་བའི་ཆོས་གོས་སུམ་ཕྲུགས་ཡན་ཆད་ལ་དགེ་སློང་རྣམས་ཀྱི་ཆོས་གོས་ཀྱི་བྱིན་རླབས་ཕྱུང་ནས་ཐུགས་བསྟུན་པ་དང༌།འདིང་བ་པོ་བསྐོ་བ་སོགས་སྦྱོར་བ་དང༌།དབྱར་སྔ་མ་ཁས་བླངས་པའི་དགེ་སློང་རྣམས་ཀྱིས་གནས་དེར་སྨིན་ཟླའི་ཚེས་བཅུ་དྲུག་གི་ནངས་པར་ལྷན་ཅིག་ཏུ་འདུས་པ་ལ་བསྐོས་པས་སྔགས་ལན་གསུམ་བརྗོད་ནས་གོ་བར་བྱ་བ་དངོས་གཞི་དང༌།དགེ་འདུན་གྱིས་ཡི་རང་བརྗོད་ནས་བསྐོས་པས་དམ་ཚིག་སྲུང་བ་རྗེས་སོ། །དེ་དབྱུང་བ་ལ་སྲ་བརྐྱང་དང༌།བསྐོས་པས་མཚམས་གཞན་དུ་སྐྱ་རེངས་ཤར་བ་དང༌།དེར་གཏོགས་ཀྱི་དགེ་འདུན་ཐམས་ཅད་མཚམས་ཁོངས་སུ་མི་གཏོགས་པར་ཆད་པ་སོགས་ནི་རང་འཇུག་བྲལ་ཡིན་ལ།དབོ་ཟླའི་ཉའམ་རྐྱེན་དབང་གིས་དེའི་སྔ་རོལ་དུ་དབྱུང་བ་ནི་བཅོས་མས་སོ།།
བཞི་པ་ཀོ་ལྤགས་ཀྱི་གཞི་ནི།ཡུལ་དབུས་སུ་གནས་མལ་སྐྱོབ་པའི་ཕྱིར་ཀོ་ལྤགས་ཀྱི་ལྷམ་ཙམ་དང་གཙུག་ལག་ཁང་ལས་གཞན་པའི་ཁྱིམ་དུ་སྟན་གཞན་མེད་ན་ཀོ་ལྤགས་ལ་འདུག་པ་ཙམ་དང༌།མཐའ་འཁོབ་ཏུ་གྲང་བ་སྐྱོབ་པའི་ཕྱིར་ལྷམ་དང་མལ་སྟན་གཉིས་ཀ་བསྟེན་པར་གནང་ཞིང༌།ཤིན་ཏུ་གྲང་བ་ཆེ་སར་ཅི་དགར་བསྟེན་པ་བསླབ་བྱར་གསུངས་པ་རྣམས་སོ།།
ལྔ་པ་གནས་མལ་གྱི་གཞི་ནི།མདོ་རྩར་གཙུག་ལག་ཁང་བྱའོ། །ངོས་གཅིག་གི་དབུས་སུ་དྲིའི་གཙང་ཁང་བྱ་བ་ཉིད་དོ། །དེའི་མདུན་དུ་སྒོ་ཁང་ངོ༌། །གྲུ་བཞི་བཟང་བ་ཉིད་དོ། །ཞེས་པ་ལྟར་གཙུག་ལག་ཁང་བརྩིགས་ནས།སྒོར་གནོད་སྦྱིན་ལག་ན་རྡོ་རྗེ་དང༌།འཁོར་བའི་འཁོར་ལོ་ཆ་ལྔ་པ་སོགས་བྲི་བར་བྱའོ། །དེར་ཕྱག་བྱ་བའི་ཚུལ་ནི་ཁྱིམ་པས་རབ་བྱུང་ཐམས་ཅད་དང༌།རབ་བྱུང་རྣམས་ཀྱིས་བསླབ་ཐོབ་བཞིན་དང༌།ཐམས་ཅད་ཀྱིས་སྟོན་པ་ལའོ། །གཙུག་ལག་ཁང་དང་དེར་ཡོད་པའི་གནས་མལ་སོགས་ཡོ་བྱད་ཐམས་ཅད་ལ་ལོངས་སྤྱོད་པའི་ཚུལ།ས་གའི་ལྷས།
མི་སློབ་པ་ནི་བདག་པོར་སྤྱོད། །སློབ་པ་བྱིན་པ་སྤྱོད་པ་སྟེ།།
བསམ་གཏན་ཀློག་དང་ལྡན་པ་ནི། །རྗེས་གནང་སྤྱོད་པས་ཉེས་པ་མེད།།
ལྷག་མ་ལེ་ལོས་བཅོམ་པ་ཡི། །བདག་ཉིད་རྣམས་ནི་བུ་ལོན་སྤྱོད།།
ཁྲིམས་འཆལ་རྣམས་ལ་ནམ་དུ་ཡང༌། །གཙུག་ལག་ཁང་སོགས་ཉེར་སྤྱོད་བཀག།ཅེས་པ་ལྟར་དང༌།ཁྱད་པར་ཁྲིམས་འཆལ་ལ་བཀག་པའི་ཚུལ་ཡང་སྙིང་གི་ཐུར་མ་ལས།
ཚུལ་ཁྲིམས་འཆལ་བས་ས་ནི་གོམ་པ་གང༌།།ཟས་ནི་ཁམ་གཅིག་བཏུང་བ་ཆུ་ཕོར་གང༌།།
ཙམ་ཞིག་དགེ་འདུན་རྫས་ལ་ལོངས་སྤྱོད་ན།།ལོག་འཚོ་ཡིན་ཏེ་དམྱལ་བར་སྐྱེ་བར་གསུངས།།ཞེས་པ་ལ་སོགས་པའི་ཚུལ་ལ་སྤང་བླང་བྱེད་པའོ།།
ཉམས་ན་ཕྱིར་བཅོས་པའི་གཞི་ལ།ལྟུང་བ་དང་རྩོད་པ་ཕྱིར་བཅོས་གཉིས་ཀྱི་ལྟུང་བ་ཕྱིར་བཅོས་ལ་བཞི་ཡོད་པ་ལས།དང་པོ་ནི།
དམར་སེར་ཅན་གྱི་དགེ་སློང་མང་པོ་ལ་བཅས་པས་ དེའི་གཞིར་གྲགས་ཏེ།འདི་ལ་གཉིས་ཏེ།དང་པོ་མི་སྤྲོ་བ་འོག་ཏུ 
་གཞུག་ཅིང་བཤུངས་པའི་དོན་གྱིས་ནན་ཏུར་བྱེད་པའི་ཚུལ་ནི།འཐབ་ཀྲོལ་བྱེད་པ་ལ་ཁྱད་སྤྱོད་སྤང་བའི་ཆད་ལས་བཀལ་ཀྱང་མ་བཏང་ན་གནས་ནས་དབྱུང་ངོ༌། །ཞེས་བསྡིགས་པ་དང༌།ལྷག་ལྟུང་བྱུང་བ་ལ་སྤོ་བ་སོགས་བྱས་ཀྱང་ཡང་ཡང་བྱུང་ན་གཞན་ལ་གནས་ཆོས་ཤིག་ཅེས་གཉེན་པོ་ཆུང་བའི་སྒོ་ནས་དམད་པ་དང༌།ཁྱིམ་སུན་འབྱིན་པ་གནས་དེ་ནས་མ་དད་པ་ཟློག་པའི་ཕྱིར་བསྐྲད་པ་དང༌།ཁྱིམ་པ་ལ་བརྙས་ཐབས་བྱེད་པ་ལ་དགེ་འདུན་གྱི་མཛའ་གཅུགས་ཀྱིས་སྦྱངས་ནས་ཕྱིར་འགྱེད་པ་དང༌།གནས་དབྱུང་དང་ལྔའོ། །གནས་དབྱུང་འདི་ལ་ལྟུང་བ་ཡོད་ཀྱང་མེད་དོ་ཞེས་སྨྲ་ན་མ་མཐོང་བ་དང༌།ལྷག་མ་སོགས་ལྟུང་བ་བྱུང་བ་ཀུན་ལ་གྲགས་ཀྱང་ཕྱིར་མི་འཆོས་པ་དང༌།ཆང་འཐུང་བ་ལ་ཉེས་པ་མེད་དོ་ཞེས་པ་སོགས་སྡིག་ལྟ་ཅན་དང༌།འཐབ་ཀྲོལ་བྱེད་པ་ལ་འབད་པས་མ་ལོག་པ་དང༌།འཕྲལ་ལུས་ངག་བཙུན་པ་ལྟར་བྱེད་ཀྱང་འཐབ་ཀྲོལ་གྱི་རྒྱུ་དམ་དུ་བཟུང་ནས་ཉེ་བར་སྒྲུབ་པ་དང༌།དགེ་སློང་མ་དང་འཕྱར་གཡེང་དང༌།རྩ་ཧྲལ་གྱིས་འདྲེས་ཤིང་གནས་པ་དང༌།ཆོས་རྣམ་པར་གཏན་ལ་དབབ་པས་རྩོད་པ་ཞི་བའི་ཐབས་བྱས་ཀྱང་ཞི་བར་མ་གྱུར་པ་དང་བདུན་པོ་དེ་རྣམས་རེ་ཞིག་རང་བཞིན་དུ་གནས་པ་རྣམས་ཀྱིས་གནས་ནས་གཞན་དུ་དབྱུང་ལ།སླར་བཟོད་པར་གསོལ་ན་བཟོད་པ་དང་མཐུན་པའི་གསོ་སྦྱོང་བྱིན་པས་རང་བཞིན་དུ་གནས་པ་ཐོབ་བོ།།
གཉིས་པ་སྤྲོ་བ་མཐོལ་བཤགས་ཀྱིས་ཕྱིར་བཅོས་ཚུལ་ནི་འོག་མ་གསུམ་གྱི་སྐབས་སུ་འཆད་འགྱུར་དང་དོན་གཅིག་གོ།
གཉིས་པ་ནི།ལྷག་ལྟུང་དངོས་གཞི་དང་འཆབ་ཉེས་འདག་བྱེད་ཟླ་ཕྱེད་ལ་སོགས་པར་སྤོ་ཞིང་མགུ་བ་སྤྱོད་པ་སོགས་ནོད་དགོས་པས་སྤོ་བ་སྤྱོད་པ་ས་གཞན་ན་གནས་པའི་གཞི་ཞེས་གྲགས་ཏེ།དེ་ཡང་གང་ཟག་ཁྱད་པར་ཅན་མིན་པས་ལྷག་ལྟུང་ཅི་ཙམ་བཅབས་པའི་ཞག་གྲངས་དང་མཉམ་པར་སྤོ་བ་དང༌།སྤོ་བ་བྱེད་བཞིན་པར་རིགས་འདྲའི་ལྷག་མ་གཉིས་པ་བྱུང་ན་གཞི་ནས་སྤོ་བ་དང༌།
གསུམ་པ་བྱུང་ན་གཞི་ནས་བསླང་སྟེ་སྤོ་བའོ།།
བཞི་པ་བྱུང་ན་དམད་པ་ནན་ཏུར་བྱ་དགོས་སོ། །མགུ་བའི་ལྷག་ལྟུང་དངོས་གཞི་དག་ཆེད་དེ་དགེ་སློང་གིས་ཞག་དྲུག་དང༌།དགེ་སློང་མས་ཟླ་ཕྱེད།ལྕི་ཆོས་ལས་འདས་པའི་ཕྱིར་བཅོས་ཀྱང་ཡིན་ལ།གང་ལྟར་ཡང་མགུ་བ་བྱིན་ནས་དགེ་འདུན་ལ་བསྙེན་བཀུར་ཞག་གྲངས་དེ་སྙེད་དུ་བྱའོ། །དེ་ལ་ཡང་གཞི་ནས་མགུ་བ་དང་གཞི་ནས་བསླངས་ཏེ་མགུ་བ་དང་བཞི་པ་བྱུང་ན་ནན་ཏུར་བྱེད་པ་རྣམས་སྔར་དང་འདྲའོ། །དེ་དག་གི་ཀུན་སྤྱོད་ནི།བདག་གིར་བྱེད་དང་མཉམ་པོར་སྤྱོད། །བླ་མའི་གནས་དང་ཆད་པའི་ལས། །བརྟེན་པའི་ཁྱད་པར་ཉེས་རྣམས་སྤོང༌། །རང་བཞིན་དུ་གནས་པ་རྣམས་དང་ལྷན་ཅིག་ཏུ་འདྲ་བ་མི་འགྲོ་བ།ནངས་པར་ཆོས་སྟོན་ལ་སོགས་དུས། །འདུ་བའི་དུས་དང་དགོང་ཀའི་དུས། །ཐམས་ཅད་དུས་སུ་ཇི་ལྟར་སྒྲུབ། །ཅེས་པའི་སྡོམ་ལྟར།ཁྱད་པར་གྱི་སྤྱོད་པ་ལྔ་སྤངས་ཤིང་དམན་པའི་སྦྱོར་བ་ལྔ་དང་དུ་བླང་ངོ༌། །དེ་ནས་དེ་དག་དབྱུང་བ་ནི།དགེ་སློང་ལ་ཉི་ཤུ་དང༌།དགེ་སློང་མ་ལ་བཞི་བཅུའི་ཚོགས་ཀྱིས་བསྡིགས་པ་དང་གཟེངས་བསྟོད་པ་དང་བཅས་ནས་བཀུར་གནས་སུ་བྱེད་དོ།།
གསུམ་པ་ནི།གང་ཟག་རེ་རེ་ལ་ལྟུང་བ་དང༌།དེ་བཅས་པ་དང་མ་བཅས་པའི་བྱེ་བྲག་སྟོན་པ་དང༌།ལྟུང་བ་ལས་ལྡང་བའི་དུས་དང༌།ལྟུང་བ་རྣམས་ཀྱི་ཆོ་ག་མདོར་བསྡུས་པའི་སྒོ་ནས་སྟོན་པའི་ཕྱིར།གང་ཟག་དུས་དང་དུས་མ་ཡིན་པ་བསྡུ་བའི་གཞི་ཞེས་གྲགས་ཏེ།དེ་ལ་རང་རྒྱུད་འབྲེལ་བའི་ལྷག་ལྟུང་ངོ་ཤེས་སམ་ཡིད་གཉིས་ཟ་བ་མཐོལ་ཡུལ་ཡོད་བཞིན་མཚན་མཐའ་འདས་པར་བཅས་པ་དང༌།ཉེས་པ་བྱས་སམ་མ་བྱས་དང༌།བྱས་ཀྱང་ཅི་བྱས་དང༌།བསམ་བཞིན་དུ་བྱས་མ་བྱས་སོགས་མི་ཤེས་པ་དང༌།སྤོ་མགུ་སྤྱོད་འཕྲོ་ལ་ཁྱིམ་པ་ལ་སོགས་པར་བབས་ཏེ་དགེ་སློང་དུ་ཕྱིར་འོང་བ་ན་སྔར་གྱི་དེའི་འཕྲོ་སྤྱོད་པ་དང༌།བཅས་པའི་དུས་དང་ལྟུང་བའི་ཚད་མ་ངེས་པ་དང༌།གནས་པ་དང་གཞི་ནས་ཡོངས་སུ་གནས་པ་དང༌།མགུ་བ་དང་གཞི་ནས་ཡོངས་སུ་མགུ་བ་དང༌།དབྱུང་བ་སྟེ་ལས་ཀྱི་སྡེ་ཚན་ལྔ་དང༌།དུས་དང་ལྟུང་བའི་ཚད་མ་ངེས་པ་ཉུང་བ་ཉིད་དུ་མི་འགྱུར་བ་དག་པའི་མཐའ་ཅན་ཟླ་བ་བཞི་ལ་སོགས་པར་མང་པོ་གང་བཅོས་པ་དྲུག་པོ་རྣམས་སོ།།
བཞི་པ་ནི་ཉེས་པ་དུ་མ་ལ་བརྟེན་ནས་གདམས་ངག་དང༌།གསོ་དགག་གཞག་དགོས་པའི་ཕྱིར་དེར་གྲགས་ཏེ་གཞི་བཅས་ཆོས་དང་གཞི་མེད་ཆོས་མ་ཡིན་པ་དེ་གང་ལས་འབྱུང་བའི་དགེ་འདུན་ནོ།།
གཉིས་པ་རྩོད་པ་ཕྱིར་བཅོས་པའི་ཚུལ་ནི་གསུམ་དུ་ཡོད་པ་ལས།དང་པོ་ནི།དགེ་འདུན་གྱི་རྩོད་པ་ཕལ་ཆེར་ཆོས་ཕྱོགས་སུ་ཞི་བར་བྱེད་པས་རྩོད་པའི་གཞི་ཞེས་གྲགས་ཏེ།དེ་ལ་འདུས་བྱས་རྟག་མི་རྟག་ལ་སོགས་པ་རྩོད་པ་འགྱེད་ཕྱིར་དང༌།གདམས་ངག་གསོ་དགག་བཞག་པ་ལ་འཇོག་པ་པོ་དང༌།གཞག་བྱ་རྩོད་པ་ལྟ་བུ་མི་གདམས་ཕྱིར་དང༌།ལྟུང་བ་གླེང་བ་ན་ཁས་མི་ལེན་པ་གླེེང་བྱ་གླེང་བྱེད་རྩོད་པ་ལྟ་བུ་ལྟུང་ཕྱིར་དང༌།རྩོད་པ་དེ་གསུམ་གྱི་དབང་གིས་གསོ་སྦྱོང་སོགས་ཀྱི་ལས་ལ་མཐུན་པ་མི་སྦྱིན་པས་རྩོད་པར་གྱུར་པ་བྱ་ཕྱིར་ཏེ་བཞི་པོ་ནི་ཞི་བྱ་ཡིན་ལ།དེ་དག་ཞི་བྱེད་ནི་ཤི་བའམ་བབས་པའམ་ཤེས་རབ་དང་སྙིང་རྗེ་ཁྱད་པར་ཅན་རྒྱུད་ལ་སྐྱེས་པ་སོགས་ནི་རང་གི་ངང་གིས་ཞི་བར་འགྱུར་ལ།དེ་ལས་གཞན་ཞི་བར་བྱེད་པའི་ཚུལ་ནི་བདུན་ཏེ།མངོན་སུམ་དྲན་པ་མ་སྨྱོས་དང༌། །དེ་བཞིན་གང་མང་ངོ་བོ་ཉིད། །རྩྭ་རྣམས་བཀྲམ་པ་ལྟ་བུ་དང༌། །ཁས་བླངས་པར་ནི་བྱ་བའོ། །ཞེས་སོ། །མངོན་སུམ་ལའང་བརྒྱད་དེ།རྒོལ་དང་གཟུ་དང་དགེ་འདུན་བཞི་པོ་དང༌།གསལ་བ་རང་སྡེའི་དགེ་འདུན་ལས་གཞན་དང་ནི་གསལ་བའི་དེ་ལས་གཞན་གསལ་བ་དང༌།དགེ་འདུན་གཞན་ཕྱོགས་གཞན་གྱིས་དང་སྡེ་སྣོད་འཛིན་པ་དང་གནས་བརྟན་མཐུ་དང་ལྡན་པས་མངོན་སུམ་མོ། །ཞེས་པ་ལྟར།སྔ་མ་སྔ་མས་མ་ཞི་ན་ཕྱི་མ་ཕྱི་མས་ཞི་བར་བྱེད་དོ། །དེ་ཡང་འགྱེད་ཕྱིར་ལ་མངོན་སུམ་བརྒྱད་དང༌།དགེ་འདུན་གྱིས་ཚུལ་ཤིང་བྲིམས་ཏེ་གང་མང་ཕྱོགས་ལ་དག་པ་བྱིན་ནས་ཞི་བ་སྟེ་གཉིས་པོ་འཇུགམི་གདམས་ཕྱིར་ལ་ལྟུང་བ་གླེང་རྒྱུ་ཡོད་ན་མངོན་སུམ་དང༌།མེད་པ་གཞི་མེད་གཞི་གཞན།ཕྱིར་བཅོས་ཟིན་གསུམ་པོ་ཡང་དེ་དང་དེ་དྲན་པར་བྱ་བའི་སྒོ་ནས་ཞི་བར་བྱེད་པ་དང༌།སྨྱོན་པས་བྱས་པ་གླེང་བ་ལ་མ་སྨྱོས་པའི་དུས་སུ་ལྟུང་བ་མེད་ཅེས་སྦྱིན་པས་དེ་གསུམ་འཇུགལྟུང་ཕྱིར་ལ་གཉིས་ལས་ཉེས་པར་རང་གི་ངོ་བོ་མི་ཤེས་པ་ལ་ངོ་བོ་ཉིད་ཚོལ་བ་སྦྱིན་པ་དང༌།ཤེས་པ་ལ་གླེང་བྱ་གླེང་བྱེད་ལས་མ་འཕྲོས་པ་ཁས་བླངས་པས་དང༌།གང་ཟག་ཉི་ཚེ་བ་དང་འབྲེལ་བ་མངོན་སུམ་དང༌།དགེ་འདུན་མཐའ་དག་དང་འབྲེལ་བ་རྩྭ་བཀྲམ་པ་ལྟ་བུ་ཐམས་ཅད་ཐུགས་བསྟུན་པས་ཞི་བར་བྱེད་པ་སྟེ་བཞི་འཇུགབྱ་ཕྱིར་ལ་དགེ་འདུན་རྣམས་ལ་མཐུན་པ་སྦྱིན་པས་དངོས་སུ་ཞི་བར་བྱ་བ་དང༌།བརྒྱུད་ནས་ཞི་བྱེད་བདུན་ཀ་འཇུག་པའོ།།
གཉིས་པ་ནི།ཀཽ་ཤམྦྷི་བ་དང་ཡངས་པ་ཅན་རྣམས་མ་མཐུན་པས་མཚམས་ནང་གཅིག་ཏུ་ལས་སོ་སོར་ཕྱེ་སྟེ་བྱས་པས་ཀཽ་ཤམྦྷི་ལས་ཕྱེ་བའི་གཞི་ཞེས་གྲགས་ཏེ།དེ་ལ་དགེ་འདུན་དབྱེ་བའི་དགག་བྱ་ཡོད་པའི་ལྟུང་བ་གླེང་བ་ནན་ཏུར་བསྒོ་གྱུར།གྲངས་འཇུག་སོགས་རྒྱུ་སྤངས་པ་དང༌།དགེ་སྦྱོང་གི་ཆོས་བཞི་ལས་མི་འདའ་བ་དང༌།དགེ་འདུན་ལ་བཟོད་པར་གསོལ་ནས་བཟོད་པ་དང་མཐུན་པའི་གསོ་སྦྱོང་བྱིན་ལ་མཐུན་པའི་གསོ་སྦྱོང་བྱ་བ་སྟེ་གཉེན་པོ་བསྟེན་པ་གཉིས་སོ།།
གསུམ་པ་ནི།དགེ་འདུན་དབྱེན་གྱི་གཞི་སྟེ།དེའི་མཚན་ཉིད་ནི་མཛོད་ལས།
དགེ་སློང་ལྟ་སྤྱོད་ཚུལ་ལྡན་པས། །འབྱེད་དོ་གཞན་དུའོ་བྱིས་པ་རྣམས།།
སྟོན་དང་ལམ་གཞན་ལ་བཟོད་པར། །ཕྱེ་བའོ་དེ་ནི་མི་གནས་སོ།།
དེ་ནི་འཁོར་ལོའི་དབྱེན་དུ་འདོད། །འཛམ་བུའི་གླིང་ནའོ་དགུ་སོགས་ཀྱིས། །ཞེས་པ་ལྟར།སྟོན་པའི་མདུན་ལས་གཞན་དུ་བྱིས་པའི་དགེ་འདུན་རྣམས་སངས་རྒྱས་དང་ཆོས་ལས་གཞན་པའི་སྟོན་པ་དང་བསྟན་པ་ལ་བཟོད་ཅིང་ཚུལ་ཤིང་བླངས་པས་ཕྱེ་ནས་ཡུན་རིང་བར་མི་གནས་ཤིང་འཛམ་གླིང་ལས་གཞན་ན་མེད་ལ།དབྱེ་བྱ་བཞི་ཚན་གཉིས་ཡན་ཆད་འབྱེད་པ་པོ་གཅིག་སོགས་ཀྱིས་སོ། །དེ་ཡང་མཛོད་ལས།
དང་པོ་མཐའ་སྐྱོན་ཟུང་གཅིག་གི།སྔ་རོལ་ཐུབ་པས་ནོངས་པ་དང༌།།
མཚམས་མ་བཅད་པ་དག་ཏུ་ཡང༌། །འཁོར་ལོའི་དབྱེན་ནི་མི་འབྱུང་ངོ༌། །ཞེས་པ་ལྟར།སྟོན་པ་བཞུགས་ཤིང་བསྟན་པ་ལ་སྐྱོན་མ་བྱུང་བ་དང༌།མཆོག་ཟུང་གཅིག་བསྐོས་པའི་དུས་དང༌།མཚམས་བཅད་པའི་ཚེ་མ་གཏོགས་གཞན་དུ་མི་འབྱུང་ངོ༌། །འདིའི་ཕྱིར་བཅོས་ནི།ལུང་ལས་མཆོག་ཟུང་གཅིག་གིས་འདུམས་པར་མཛད་པ་དེའོ། །དབྱེན་གྱི་ཉེས་དམིགས་ནི།མ་འདུམས་ཀྱི་བར་དུ་སྟོན་པ་གཅིག་གི་ཞིང་ཁམས་སུ་ལམ་ལྔ་གང་ཡང་མི་སྐྱེའོ། །ཐ་མ་ནི།ཐོབ་བྱེད་སྲུང་ཐབས་ཕྱིར་བཅོས་ཀུན་ལ་ཁྱབ་པའི་ལས་ཀྱི་གཞི་ཡིན་ལ།དེ་ཡང་ལས་བྱེད་པའི་དགེ་འདུན་གྱི་གྲངས་བཞི་བཅུ་ནས་བཞིའི་བར་བཅུ་གཅིག་གསུངས་པའི་གྲངས་ཚང་ཞིང༌།ཁ་སྐོང་གི་ཆོས་དང་ལྡན་ལ།མི་མཐུན་པ་གཉིས་དང་བྲལ་བ་དང༌།ལས་མཁན་སྤྱིར་བཏང་ཁ་སྐོང་དང་ལྡན་ཞིང་ཆོ་ག་ཤེས་པ་དང༌།དམིགས་བསལ་ལ་ཆ་ོག་ཤེས་པ་ཙམ་གྱིས་ཆོག་ལ།བསྒྲུབ་བྱ་མཚམས་ཆེ་ཆུང་བཅད་པ་སོགས་སེམས་ཅན་དུ་མི་གཏོགས་པ་ལ་བྱ་བ་དང༌།སེམས་ཅན་དུ་གཏོགས་པ་ལ་ལྷུང་བཟེད་ཁ་སྦུབ་སོགས་ཁྱིམ་པ་ལ་བྱ་བ་དང༌།དབྱར་མཚམས་ཀྱི་ཕྱི་རོལ་དུ་འགྲོ་བའི་གནང་བ་སྦྱིན་པ་སོགས་དགེ་ཚུལ་ལ་དང༌།སྦྱིན་ལས།བསྐོ་བའི།ནན་ཏུར།བསྒོ་གྱུར།གྲངས་འཇུག་སྟེ་དགེ་སློང་ལ་བྱ་བ་རྣམས་སོ། །དེ་ཐམས་ཅད་ལ་ཡང་ཆོས་དང་ཆོས་མ་ཡིན་པ་དང༌།མཐུན་པ་དང་མི་མཐུན་པའི་བྱ་བ་སྟེ་སྔ་མ་གཉིས་བསྒྲུབ་བྱ་དང་ཕྱི་མ་གཉིས་སྤང་བྱའོ། །ལས་དེ་རྣམས་ལ་དབྱེ་ན་བརྒྱ་རྩ་གཅིག་ལས།གསོལ་བ་འབའ་ཞིག་པའི་སྡོམ་ནི།གསང་སྟོན་པ་བསྐོ་བ་དང་དགེ་འདུན་གྱི་ནང་དུ་བར་ཆད་དྲི་ཕྱིར་དང༌། །གསོ་སྦྱོང་གི་ལས་དང་ལྟུང་མཐུན་བྱིན་གྱིས་བརླབས་པའི་ལས་བཞི་སྟེ།དེ་ལ་ལྟུང་བ་འབྱུང་བར་ངེས་པ་དང་བཅས་པ་དང༌། །དེ་ལ་ལྟུང་བ་བྱུང་མ་བྱུང་བ་ལ་དགེ་འདུན་ཡིད་གཉིས་དང༌།།དགེ་འདུན་ཐམས་ཅད་ལྟུང་ཕྱིར་རྩོད་པ་དང་ལྟུང་བ་བྱུང་བར་ངེས་པ་ཉིད་ཀྱང་ངོ་བོ་གང་ཡིན་མ་ངེས་པ་ཡིན་པ་དེའི་ཚེ་བྱིན་གྱིས་བརླབས་པ་དང༌། །དེ་ཡི་དོན་དུ་དགག་དབྱེའི་ལས་དངོས་དང༌།སྦྱོར་བའི་ཚེ་ལྟུང་བ་བྱིན་རླབས་བཞི་སྟེ་ལྔ་པོ་དག།ཐམས་ཅད་དགག་དབྱེ་གཏོགས་པ་ཡིན། །དབྱར་གནས་ཁས་བླངས་ཉིད་དང་ནི། །ཤི་བའི་རྫས་དང་དེ་བཞིན་དུ་ནོར་འདྲེས་འདི་གཉིས་གཅིག་ཏུ་བགྲངས་པ་དང༌། །ཆོས་གོས་སྲ་བརྐྱང་གཏད་པ་དང༌། །ཆོས་གོས་ངན་པ་ཅན་ལ་ཆོས་གོས་ཏེ་སྦྱིན་པར་བྱ་བ་འདི་གཉིས་གཅིག་ཏུ་བརྩི་བ་དང༌། །དགེ་སློང་དང་དགེ་སློང་མ་སྡིག་ལྟ་ཅན་གྱི་གནས་ངན་ལེན་ནི་བརྗོད་པ་དང༌།།ངན་པའི་གྲངས་སུ་གཞུག་པ་ཞལ་ཏ་བ་འཕྱ་བ།ཟུར་གྱིས་འཕྱ་བ།རྣར་གཟོན།ཅང་མི་སྨྲ་བ་སྟེ་བཞི་དག་དང༌། །ཁྱིམ་གྱི་བསླབ་སྡོམ་སྦྱིན་པ་དང་དེ་གཞིག་པ་དང༌། །ལྷུང་བཟེད་ཁ་སྦུབ་བྱ་བ་དང༌། །དེ་ཉིད་བཟློག་པར་བྱ་བ་དག།གསོལ་བ་འབའ་ཞིག་ལས་ཡིན་ནོ།།
གསོལ་གཉིས་ཀྱི་སྡོམ་ནི།གསོ་སྦྱོང་གི་གནས་ལ་བློ་མཐུན་བྱ་བ་དང་དཀྱིལ་འཁོར་བ་དང་མཚམས་ཆེ་ཆུང་བཅད་པ་ནི་གཉིས་པོ་གཅིག་ཏུ་བགྲངས་པ་དང༌།།མཚམས་ཆེན་གྱི་ནང་དུ་དགེ་འདུན་ཐམས་ཅད་ཆོས་གོས་དང་མི་འབྲལ་བའི་དང་མྱོས་པ་ལ་ལས་ལ་མི་མཐུན་པའི་གནང་བ་སྦྱིན་པ་དང་དགག་དབྱེ་བྱེད་པ་བསྐོ་བ་དང༌། །གནས་མལ་སྟོབ་པར་བྱེད་པ་བསྐོ་བ་དང༌། །རུང་བའི་ས་གཞི་བསྐོ་བ་སྟེ་ཁང་པ་བྱིན་གྱིས་རློབ་པ་དང༌། །སྲ་བརྐྱང་ལ་བློ་མཐུན་པར་བྱ་བ་དང་ནི་དེ་འདིང་བ་པོ་བསྐོ་བ་དང༌། །སྤོང་བའི་ཞལ་ཏ་བ་བསྐོ་བ་དང་ལག་གི་བླ་བསྐོ་བ་དང་ལག་དཔོན་བསྐོ་བ་གཉིས་གཅིག་ཏུ་བགྲངས་པ་དང་ནི། །གནས་ཁང་བསྐོ་བ་ལ་སོགས་པ་བཅུ་གཉིས་དང༌།།རྩོད་པ་ཞི་བའི་ཕྱིར་གཟུ་བོ་བསྐོ་བ་དང་དེའི་ཆེད་དུ་གསལ་བ་བསྐོ་བ་དང་གསལ་བའི་གསལ་བ་བསྐོ་བ་གཉིས་གཅིག་ཏུ་བགྲངས་པ་དང༌།རྩོད་པ་སྦེད་པའི་གང་ཟག་བསྐོ་བ་དང༌།།རྩོད་པ་མ་ཞི་ན་གང་ཕྱེ་བའི་ཕྱིར་ཚུལ་ཤིང་འབྲིམ་པར་བྱེད་པ་པོ་བསྐོ་བ་དང༌། །ཁང་པ་ཁང་ཆེན་གྱི་གཞི་རུང་བ་བསྟན་པ་ལ་གནང་བ་སྦྱིན་པ་དང༌། །ཁྱིམ་སུན་འབྱིན་པ་ལ་གླེང་བའི་གང་ཟག་བསྐོ་བ་དང་ཆོས་གོས་སྣམ་སྦྱར་དང་འབྲལ་བར་མི་འགྱུར་བའི་གནང་བ་སྦྱིན་པ་དང༌།།ལག་བླ་ལ་ལོ་དྲུག་གི་ནང་དུ་སྟན་གཞན་གྱི་གནང་བ་སྦྱིན་པ་དང་ལྷུང་བཟེད་འབྲེལ་མེད་འབྲིམ་པ་བསྐོ་བ་དང༌། །དགེ་སློང་དང་དགེ་སློང་མ་སྡིག་ལྟ་ཅན་དེ་དག་ཁྱིམ་རྣམས་སུ་སོ་སོར་མ་དད་གོ་བར་བྱ་བ་བསྐོ་བ་དང༌།།དགེ་སློང་མའི་སྟོན་པ་དང་ནི་ནགས་ཉུལ་བ་བསྐོ་བ་དང༌། །དགེ་སློོང་གནས་ནས་དབྱུང་བ་ལ་དགེ་སློང་མ་རྣམས་ཕྱག་མི་བྱ་བའི་སྡོམ་པ་སྦྱིན་པ་དང་ལོ་བཅུ་གཉིས་ལོན་ཅིང་འཁོར་དང་འཁོར་མང་སྐྱོང་ནུས་པའི་དགེ་སློང་མ་ལ་འཁོར་དང་འཁོར་མང་འཇོག་པའི་གནང་བ་སྦྱིན་པའི་ཕྱིར་དང༌། །རྒན་པོ་དང་ནད་པ་ལ་འཁར་བའི་གནང་བ་སྦྱིན་པ་དང་དེ་དག་ལ་དྲ་བའི་གནང་བ་སྦྱིན་པའི་ཕྱིར་དང་ནི།།
གསོ་སྦྱོང་ཐ་དད་པའི་གཙུག་ལག་ཁང་གཉིས་རྙེད་པ་གཅིག་ཏུ་བྱ་ཕྱིར་དང༌།།དགེ་སློབ་མའི་བསླབ་པའི་སྡོམ་པ་སྦྱིན་པ་དང་ཚངས་སྤྱོད་ལ་ཉེར་གནས་ཀྱི་སྡོམ་པ་སྦྱིན་པ་དང༌།།དགེ་སློང་མ་བུ་དང་ལྷན་ཅིག་ཉལ་བའི་གནང་བ་སྦྱིན་པ་དང༌།མུ་གེའི་ཚེ་ཉེ་དུའི་ཁྱིམ་དུ་འགྲོ་བའི་གནང་བ་སྦྱིན་པའི་ཕྱིར་དང་དབྱར་མཚམས་ཀྱི་ཕྱི་རོལ་དུ་འགྲོ་བའི་གནང་བ་སྦྱིན་པ་སྟེ། །གསོལ་དང་གཉིས་ཀྱི་ལས་ཡིན་ནོ། །གནས་ཁང་བསྐོ་ལ་སོགས་པ་ནི། །གནས་ཁང་ཟས་ལ་བསྐོ་བ་གཉིས། །ཐུག་པ་བག་ཚོས་འབྲིམ་པ་གཉིས། །ཕྲན་ཚེགས་འབྲིམ་པར་བྱེད་པ་དང༌། །སྣོད་སྤྱད་འགྲུབ་དང་གོས་ཀྱི་སྦེད་པ་དང་འགྱེད་པ་གཉིས། །དབྱར་གྱི་རས་ཆེན་སྦེད་དང་འགྱེད། །མངག་གཞུག་པ་དང་མཛེས་འཆོས་ཏེ། །གང་ཟག་བཅུ་དང་གཉིས་པོ་དང༌། །སྟོན་པས་ཡང་དག་གསུངས་པ་ཡིན།།
གསོལ་བཞིའི་སྡོམ་ནི།བསྙེན་པར་རྫོགས་པར་བྱ་བ་དང༌། །མུ་སྟེགས་ཅན་ལ་ཟླ་བ་བཞིར་གནས་པ་སྦྱིན་པ་དང་མཚམས་ཆེ་ཆུང་དགྲོལ་བ་དང༌།།ཕན་ཚུན་མི་མཐུན་པ་ལ་མཐུན་པ་སྦྱིན་པ་དང་མཐུན་པའི་གསོ་སྦྱོང་སྦྱིན་པ་དང༌།བསྡིགས་དམད་བསྐྲད་པ་ཕྱིར་བཀྱེད་པ་སོགས་ནན་ཏུར་བདུན་པོ་གཅིག་ཏུ་བྱས་པ་དང༌།།དེ་ཀུན་ལ་བཟོད་པ་བླང་བ་དང༌།སྤོ་བ།མགུ་བ།དེ་དབྱུང་བ།སྲ་བརྐྱང་དབྱུང་བ།བརྒྱད་དང་དྲན་པས་འདུལ་བ་སྦྱིན་པ་དང་མ་སྨྱོས་པས་འདུལ་བ་སྦྱིན་པ་དང༌། །དེའི་ངོ་བོ་ཉིད་ཚོལ་དུ་གཞུག་པ་དང༌། །དབྱེན།རྗེས་ཕྱོགས།ཁྱིམ་པ་སུན་འབྱིན།བཀའ་བློ་མི་བདེ་བ།སྡིག་ལྟ་མི་འདོར་བ།གནས་ནས་དབྱུང་བའི་རྗེས་སུ་ཕྱོགས་པའི་དགེ་སློང་མ།དཀོན་མཆོག་གསུམ་གཏོང་བའི་དགེ་སློང་མ།འཐབ་ཀྲོལ་བྱེད་པ།བདེ་ཞིང་གནས་པ།དགེ་ཚུལ་བསྙིལ་བ་དང༌།བདེ་ཞིང་གནས་སུ་འཇུག་པ་རྣམས་ལ།བསྒོ་བར་བྱ་བ་རྣམས་དང་ནི།།ཕམ་པས་ཉམས་པ་ལ་བསླབ་པ་སྦྱིན་པར་བྱ་བ་དག།གསོལ་དང་བཞི་ཡི་ལས་ཡིན་ནོ། །ཞེས་པ་རྣམས་སོ།།
གསུམ་པ་རུང་མཐུན་བསྡུས་ཏེ་བསྟན་པ་ནི།
མདོར་ན་ཡེ་ནས་གནང་དང་བཀག་པ་མེད། །བྱར་རུང་དང་ཉེ་མི་རུང་ཟློག་བྱེད་ན།།
དེ་དག་སྤྱོད་ཅིག་མི་རུང་དང་ཉེ་ཞིང༌། །རུང་བ་ཟློག་ན་ཀུན་ཏུ་སྤོང་ཞེས་གསུངས།།
དེ་ལྟར་བཤད་པའི་སྤང་བླང་རྣམས་ངེས་པར་བྱས་ནས།དངོས་སུ་མ་སྨོས་པའི་གནང་བཀག་གི་བསླབ་བྱ་རྣམས་ལ་ཇི་ལྟར་སློབ་པའི་ཚུལ་མདོར་བསྡུས་ན་གཞི་གང་ལ་སྟོན་པས་ཡེ་ནས་ཏེ་ཐོག་མ་ཉིད་ནས་གནང་བ་དང་བཀག་པའི་གསལ་ཁ་བཏོད་པ་མེད་པ་རྣམས་ནི་བྱ་བ་གང་ཞིག་བྱར་རུང་བར་གསུངས་པ་དང་ཉེ་ཞིང་མི་རུང་བར་གསུངས་པ་ལས་ཟློག་པར་བྱས་ན་བྱ་བ་དེ་དག་དཔེར་ན་དགེ་ཚུལ་ལ་དགག་དབྱེ་གསུངས་པས་མཚོན་ནས་གསོ་སྦྱོང་བྱ་དགོས་པ་བཞིན།ཐེ་ཚོམ་མེད་པར་སྤྱོད་ཅིག་དང་ཉེས་པར་མི་འགྱུར་བ་མ་ཟད་ཡོན་ཏན་ཀྱང་ཐོབ་པར་འགྱུར་རོ།།
གང་མི་རུང་བ་གསུངས་པ་དང་ཉེ་ཞིང་རུང་བར་གསུངས་པ་ལས་བཟློག་ན་བྱ་བ་དེ་དག་གི་ནི་དཔེར་ན་སྲིན་བལ་ལ་སྟན་བྱེད་པ་བཀག་པ་ལས་དེ་དང་མཉམ་པའི་ལྷག་པ་ལ་སྟན་བྱར་མི་རུང་བར་མཐུན་པ་བཞིན་ཡིན་པས་རྣམ་པ་ཀུན་ཏུ་སྤོང་དགོས་སོ་ཞེས་པའི་དོན་ལུང་ཕྲན་ཚེགས་ལས་གསུངས་ཏེ།བཅོམ་ལྡན་འདས་ཀྱིས་ཡོངས་སུ་མྱ་ངན་ལས་འདས་པའི་དུས་དེའི་ཚེ་ཉིད་ན་དགེ་སློང་རྣམས་ལ་བཀའ་སྩལ་པ།དགེ་སློང་དག་ངས་ཁྱེད་ལ་འདུལ་བ་རྒྱ་ཆེར་ནི་བསྟན་ན།མདོར་བསྡུས་ཏེ་མ་ཡིན་ནོ། །འོན་ཀྱང་མདོར་བསྡུས་པ་ཡང་ཉོན་ཅིགདགེ་སློང་དག་ངས་ཁྱེད་ལ་གང་ཞིག་ཐོག་མ་ཉིད་ནས་གནང་བ་ཡང་མེད་བཀག་པ་ཡང་མེད།གལ་ཏེ་རུང་བ་དང་ཉེ་བ་ཡིན་ཞིང་མི་རུང་བ་ཟློག་པར་བྱེད་པ་ཡིན་ན་རུང་བ་ཡིན་པར་གཟུང་བར་བྱའོ། །གལ་ཏེ་མི་རུང་བ་དང་ཉེ་བ་ཡིན་ཞིང་རུང་བ་ཟློག་པར་བྱེད་པ་ཡིན་ན་མི་རུང་བ་ཡིན་པས་ཀུན་ཏུ་སྤྱད་པར་མི་བྱའོ། །ཞེས་སོ།།
གཉིས་པ་སྡོམ་པ་སྐྱེ་བའི་རྟེན་བཤད་པ་ནི།
སྐྱེ་བའི་རྟེན་ནི་མུ་སྟེགས་མཚམས་མེད་བྱས། །སྒྲ་མི་སྙན་དང་ཟ་མ་མཚན་གཉིས་དང༌།།
མ་ནིང་རིགས་ལྔ་མཚན་གསུམ་གྱུར་པ་དང༌། །སྤྲུལ་པ་མ་གཏོགས་གླིང་གསུམ་སྐྱེས་པ་ཡི།།
སྐྱེས་པ་བུད་མེད་སྡོམ་པའི་རྟེན་དུ་འདོད།།
དེ་ལྟ་བུའི་སོ་ཐར་གྱི་སྡོམ་པ་དེ་སྐྱེ་བའི་ལུས་རྟེན་ནི་ལས་ཀྱི་སྒྲིབ་པ་ཤས་ཆེ་བ་མུ་སྟེགས་ཅན་ནམ་དེར་ཞུགས་པ་དང༌།མཚམས་མེད་པ་ལྔ་བྱས་པ་ལ་སོགས་པ་དང༌།རྣམ་སྨིན་གྱི་སྒྲིབ་པ་ཤས་ཆེ་བ་སྒྲ་མི་སྙན་པ་ལྟ་བུ་གནས་རིགས་ཉམས་པ་དང༌།གང་ཞིག་གྲོང་པའི་ཆོས་མེད་པ། །དེ་ནི་ཟ་མ་ཞེས་སུ་བརྗོད། །ཅེས་པ་ལྟར་ཟ་མ་དང༌།མཚན་གཉིས་ཅིག་ཆར་དུ་བྱུང་བ་དང༌།སྐྱེས་ནས།ཟླ་ཕྱེད།འཁྱུད་ནས་ལྡང་བ།ཕྲག་དོག་ཅན།ཉམས་པ་སྟེ་མ་ནིང་རིགས་ལྔ་དང༌།མཚན་ལན་གསུམ་དུ་གྱུར་པ་སོགས་མཚན་ཉམས་པ་དང༌།མི་མ་ཡིན་པ་ལ་མིའི་རྣམ་པར་སྤྲུལ་པ་དང༌།མི་མ་ཡིན་པའི་འགྲོ་བ་ལ་སོགས་པ་ནི་འགྲོ་བ་ཉམས་པ་སྟེ།མཛོད་ལས།
ཟ་མ་མ་ནིང་སྒྲ་མི་སྙན། །མཚན་གཉིས་མ་གཏོགས་མི་རྣམས་ལ།།
སྡོམ་མིན་སྡོམ་པའང་དེ་བཞིན་ལ། །ཞེས་བཤད་པས་དེ་རྣམས་སྡོམ་པ་སྐྱེ་བའི་བར་ཆད་ཡིན་པས་མ་གཏོགས་ལ།དེ་ལས་གཞན་ཤར་ནུབ་ལྷོའི་གླིང་གསུམ་དུ་སྐྱེས་པ་ཡི་སྐྱེས་པ་དང་བུད་མེད་རྣམས་སོ་ཐར་ཀྱི་སྡོམ་པ་སྐྱེ་བ་དང་གནས་པ་གཉིས་ཀའི་རྟེན་དུ་འདོད་དེ།རབ་དབྱེར།
གླིང་གསུམ་སྐྱེས་པ་བུད་མེད་ལས། །འགྲོ་བ་གཞན་ལ་སྡོམ་པ་བཀག།ཅེས་གསུངས་པའི་ཕྱིར་རོ།།