ལེའུ་དང་པོ་སྡོམ་གསུམ་སྤྱིའི་བཤད་གཞིའི་རིམ་པ་ཕྱེ་བ།

གཉིས་པ་གཞུང་གི་དོན་ལ་ལེའུ་ལྔ་ཡོད་པའི་དང་པོ་སྡོམ་གསུམ་སྤྱིའི་བཤད་གཞིའི་རིམ་པར་ཕྱེ་བ་ལའང་ལྔ་ལས། དང་པོ། དེ་ལྟར་ཐར་པ་ལ་བསྐུལ་བའི་འབྲས་བུ་མཆོག་མཐར་ཐུག་པ་བྱང་ཆུབ་ཆེན་པོའི་ངོ་བོ་སྦྱང་གཞི་དང་བཅས་པ་ངོས་བཟུང་བ་ནི།

རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས།།

ཡོངས་སུ་དག་སྐུ་རྡོ་རྗེ་འཆང་ཆེན་པོ།།

འབྲས་བུའི་མཐར་ཐུག་སངས་རྒྱས་ཉག་གཅིག་དེ།།

སྦྱང་གཞི་བདེ་གཤེགས་སྙིང་པོ་ཡིན་ཞིང༌།དེ་ལ་བསྟན་བཅོས་རྣམས་སུ་རིགས་ཞེས་བཤད་ཅིང་གྲུབ་མཐའི་དབང་གིས་འདོད་པ་མི་འདྲ་བ་ཡོད་དེ།བྱེ་སྨྲས་སྲིད་པ་དང་སྲིད་པའི་ཡོ་བྱད་ལ་མ་ཆགས་པའི་སེམས་བྱུང་ཆོག་ཤེས་པ་ལ་འཕགས་པའི་རིགས་སུ་འདོད།མདོ་སྡེ་པས་སེམས་ཀྱི་ས་བོན་ཟག་མེད་ཀྱི་ཡེ་ཤེས་འབྱུང་རུང་གི་ནུས་པ་ལ་འདོད།སེམས་ཙམ་པས་ཐོག་མེད་ནས་སེམས་རྒྱུད་ལ་གནས་པའི་ཟག་མེད་ཀྱི་ཆོས་བསྐྱེད་པར་བྱེད་པའི་ནུས་པ་ཆོས་ཉིད་ཀྱིས་ཐོབ་པ་ལ་འདོད།དེ་ཐམས་ཅད་འདུས་བྱས་ཏེ་དངོས་པོར་སྨྲ་བའི་ལུགས་སོ། །དབུ་མ་པས་ནི་དྲི་བཅས་དེ་བཞིན་ཉིད་ལ་འདོད་པ་ཕལ་ཆེར་མཐུན་ཀྱང་ངོས་འཛིན་ལུགས་མི་འདྲ་བ་མང་དུ་སྣང་མོད།འདིར་ཐེག་ཆེན་ཐུན་མོང་མ་ཡིན་པའི་ལུགས་ལྟར་ན།སེམས་ཉིད་ཡེ་ནས་རྣམ་པར་དག་པ་འདུས་མ་བྱས་པའི་ཡེ་ཤེས་སྟོང་གསལ་འཕོ་འགྱུར་མེད་པར་གནས་པ་ནི་བདེ་གཤེགས་སྙིང་པོ་སྟེ།ཏིང་འཛིན་རྒྱལ་པོ་ལས།

དག་པ་དྭངས་བ་འོད་གསལ་བ།།མི་འཁྲུགས་འདུས་མ་བྱས་པ་ཉིད།།

བདེ་བར་གཤེགས་པའི་སྙིང་པོ་སྟེ།།ཡེ་ནས་གནས་པའི་ཆོས་ཉིད་དོ།།ཞེས་གསུངས་ལ།སྙིང་པོ་དེ་ཡང་རྒྱུད་བླ་མར།

རྫོགས་སངས་སྐུ་ནི་འཕྲོ་ཕྱིར་དང༌།།དེ་བཞིན་ཉིད་དབྱེར་མེད་ཕྱིར་དང༌།།

རིགས་ཡོད་ཕྱིར་ན་ལུས་ཅན་ཀུན།།རྟག་ཏུ་སངས་རྒྱས་སྙིང་པོ་ཅན།།

ཞེས་རྒྱུ་མཚན་གསུམ་གྱིས་སེམས་ཅན་ཐམས་ཅད་བདེ་གཤེགས་སྙིང་པོ་ཅན་དུ་བསྟན་ནས་རྣམ་གཞག་རྣམ་པ་བཅུས་དེའི་དོན་གཏན་ལ་ཕབ་ཅིང་དྲི་མས་སྒྲིབ་ཚུལ་དཔེ་དགུའི་སྒོ་ནས་རྒྱས་པར་བསྟན་པ་དེ་ཉིད།རྡོ་རྗེ་ཐེག་པར་གཞི་རྒྱུད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཞེས་གྲགས་ཏེ།མི་འགྱུར་བའི་བདེ་ཆེན་དང་རྣམ་ཀུན་མཆོག་ལྡན་གྱི་སྟོང་ཉིད་དབྱེར་མི་ཕྱེད་པའི་སེམས་ཀྱི་ཆོས་ཉིད་ལ་བཤད་ཅིང༌།ཁྱད་པར་དུ་ཨ་ཏི་ཡོ་གར་སེམས་ཀྱི་ཆོས་ཉིད་རིག་པ་སྟོང་གསལ་གྱི་ངོ་བོ་ལ་སྐུ་དང་ཡེ་ཤེས་ཀྱི་ཆོས་ཐམས་ཅད་ཉི་མ་དང་འོད་ཟེར་བཞིན་འདུ་འབྲལ་མེད་པར་ཡོངས་སུ་རྫོགས་པས་རྫོགས་པ་ཆེན་པོ་སྟེ།ཡེ་ཤེས་དེ་ཉིད་ལས་གཞིར་གནས་ཀྱི་ཡེ་ཤེས་གསུམ་དང༌།མཚན་ཉིད་འཛིན་པའི་ཡེ་ཤེས་ལྔ་དང༌།ཡུལ་ལ་འཇུག་པའི་ཡེ་ཤེས་གཉིས་ལ་སོགས་པའི་གཞི་འབྲས་ཀྱི་ཡེ་ཤེས་ཐམས་ཅད་གཞན་མ་ཡིན་པ་དང༌།འཁོར་བའི་ཆོས་ཐམས་ཅད་ཀྱང་མེད་སྣང་གློ་བུར་བ་ཡིན་ཡང་ཆོས་ཉིད་དེ་ལས་གཞན་དུ་བརྗོད་དུ་མེད་པས་སྲིད་ཞི་ཀུན་ལ་ཁྱབ་པའི་ཕྱིར་ཡེ་ཤེས་སྤྱི་ཡི་གཟུགས་ཞེས་བརྗོད་ཅིང༌།དེ་ལྟ་བུའི་སྦྱང་གཞི་ཆོས་ཉིད་ཀྱི་མདངས་འོད་སྦྱང་བྱའི་དྲི་མ་འཁོར་བའི་ཆོས་དང་འཛོམས་པ་ལས།སྦྱོང་བྱེད་ལམ་གྱི་རྣམ་པར་ཤར་ནས་དེས་སྦྱང་བྱའི་དྲི་མ་སྦྱོང་བའི་གཉེན་པོར་འགྲོ་བ་ཡིན་པས་འདིར་མཐར་ཐུག་གི་འབྲས་བུའི་དབང་དུ་བྱས་ཏེ་སྡོམ་པ་གསུམ་གྱི་ལམ་གྱི་སྙིང་པོ་རིག་པ་འཛིན་པ་སྔགས་ཀྱི་ལམ་གྱིས་ཁམས་ཀྱི་དྲི་མ་ཡོངས་སུ་དག་པར་བྱས་པས་གཞི་ཇི་ལྟ་བ་བཞིན་མངོན་དུ་གྱུར་པ་མཐར་ཐུག་པ་ན།སྐུ་ལྔ་དང་ཡེ་ཤེས་ལྔ་རིག་པའི་ངང་དུ་འདུ་འབྲལ་མེད་པར་འཆང་བས་རྡོ་རྗེ་འཆང་སྟེ།དེ་ལ་སྐུ་ལྔ་ནི།ཆོས་ཐམས་ཅད་མཚན་མ་མེད་པར་ཐུགས་སུ་ཆུད་པའི་སྤྲོས་བྲལ་གྱི་ཡེ་ཤེས་རང་བཞིན་རྣམ་དག་མངོན་དུ་གྱུར་པའི་ཆ་ནི་ཆོས་སྐུ།དེའི་རྩལ་ལས་སྣང་བ་དག་པ་རབ་འབྱམས་སུ་ཤར་བའི་ཆ་ནི་ལོངས་སྐུ།དེ་ལས་དག་མ་དག་གི་གདུལ་བྱ་རྣམས་ལ་རང་རང་གི་མོས་པ་བཞིན་གང་ལ་གང་འདུལ་དུ་སྣང་བའི་ཆ་ནི་སྤྲུལ་པའི་སྐུ།སྐུ་གསུམ་སྣང་ཆ་མ་འདྲེས་པའི་ཆ་ནི་མངོན་བྱང་གི་སྐུ།སྐུ་གསུམ་དབྱེར་མེད་པའི་ཆ་ནི་དབྱེར་མེད་རྡོ་རྗེའི་སྐུའོ། །ཡེ་ཤེས་ལྔ་ནི།ཆོས་ཀྱི་དབྱིངས་ཇི་ལྟ་བ་བཞིན་ཐུགས་སུ་ཆུད་པ་ནི་ཆོས་དབྱིངས་ཡེ་ཤེས།མཁྱེན་ཆ་འགགས་པ་མེད་པ་ནི་མེ་ལོང་ཡེ་ཤེས།ཆོས་ཐམས་ཅད་མཉམ་པ་ཉིད་དུ་རྟོགས་པ་ནི་མཉམ་ཉིད་ཡེ་ཤེས།ཤེས་བྱ་ཐམས་ཅད་མ་འདྲེས་པར་ཅིག་ཆར་དུ་མཁྱེན་པ་ནི་སོར་རྟོགས་ཡེ་ཤེས།དམིགས་མེད་སྙིང་རྗེ་ཆེན་པོས་འགྲོ་དོན་ཐོགས་པ་མེད་པར་མཁྱེན་པ་ནི་བྱ་གྲུབ་ཡེ་ཤེས་སོ། །དེ་ཐམས་ཅད་ཀྱང་སྤོང་བ་དང༌།རྟོགས་པ་དང༌།སེམས་ཏེ་ཆེན་པོ་གསུམ་གྱི་རང་བཞིན་ཡིན་ཏེ་མངོན་རྟོགས་རྒྱན་ལས།

སེམས་ཅན་ཀུན་མཆོག་ཉིད་སེམས་དང༌།།སྤོང་དང་རྟོགས་དང་གསུམ་པོ་ལ།།

ཆེན་པོ་གསུམ་གྱི་རང་བྱུང་གི།ཆེད་དུ་བྱ་བ་འདི་ཤེས་བྱ།།ཞེས་སོ།།

དེ་བས་ན་བླ་ན་མེད་པའི་བྱང་ཆུབ་དོན་དུ་གཉེར་བ་རྣམས་བསམ་པ་ཡོངས་སུ་རྫོགས་པའི་འབྲས་བུའི་མཐར་ཐུག་ཏུ་ངེས་པ་ནི་སངས་རྒྱས་ཉག་གཅིག་ཡིན་ལ།དེ་ནི་འཆད་འགྱུར་ལྟར་གསང་སྔགས་བླ་མེད་ཀྱི་ལམ་ཁོ་ནས་ཐོབ་དགོས་པ་ཡིན་ནོ།།

གཉིས་པ་ཐོབ་བྱེད་བགྲོད་པ་གཅིག་པའི་ལམ་མདོར་བསྟན་པ་ནི།

ཟབ་རྒྱས་ཆོས་ཀྱི་སྒོ་འཕར་བགྲང་ཡས་ཀྱང༌།།

གསང་ཆེན་སྨིན་གྲོལ་ལམ་མཆོག་མ་བསྟེན་པར།།

ཐོབ་པ་མིན་ཞེས་རྫོགས་སངས་རྒྱས་དེས་གསུངས།།

གོང་དུ་ཇི་སྐད་བཤད་པ་དེའི་རྒྱུ་མཚན་ཆོས་ཉིད་ཇི་ལྟ་བ་སྟོན་པ་ཟབ་པ་དང༌།ཆོས་ཅན་ཇི་སྙེད་པ་སྟོན་པ་རྒྱས་པ་སྟེ།ཆོས་ཀྱི་སྒོ་འཕར་བགྲང་བ་ལས་འདས་ཤིང་མཐའ་ཡས་པ་དག་ཡོད་ཀྱང༌།གསང་ཆེན་རྡོ་རྗེ་ཐེག་པའི་སྨིན་བྱེད་ཀྱི་དབང་དང་གྲོལ་བྱེད་བསྐྱེད་རྫོགས་ཀྱི་ལམ་མཆོག་ལ་ཚུལ་བཞིན་དུ་མ་བསྟེན་པར།ལམ་འོག་མ་རྣམས་ཀྱིས་ཐོབ་པར་བྱ་བ་མིན་ཏེ།ཅིའི་ཕྱིར་ན་འཁོར་བར་འཆིང་བྱེད་ཀྱི་བག་ཆགས་ཤིན་ཏུ་ཕྲ་བ་དཀར་དམར་རླུང་གསུམ་གྱིས་བསྐྱེད་པའི་སྣང་གསུམ་འཕོ་བའི་སྒྲིབ་པ་སྦྱོང་བྱེད་ཀྱི་ཐབས་དངོས་ལམ་དེ་དག་ཏུ་མ་བསྟན་པའི་ཕྱིར་ཏེ།ཀླུ་བྱང་གི་ལས་མཐའ་རྣམ་འབྱེད་ལས།

མགོ་དང་རྐང་ལག་སོགས་བྱིན་ཀྱང༌།།སྣང་བ་རྣམ་པར་མ་དག་ཕྱིར།།

བྱང་ཆུབ་འབྲས་བུ་ཐོབ་མི་འགྱུར།།ཞེས་ཤེས་བྱ་ཐམས་ཅད་ལ་ཆགས་ཐོགས་མེད་པའི་ཡེ་ཤེས་མངའ་ཞིང་བདེན་པ་ཉག་གཅིག་ཏུ་སྨྲ་བ་རྫོགས་པའི་སངས་རྒྱས་དེས་གསུངས་པའི་ཕྱིར།སྔགས་བླ་མེད་ལ་བརྟེན་ནས་ཐོབ་པའི་ཚུལ་ཡང་གསང་སྙིང་ལས།

འཇིག་རྟེན་དྲུག་གི་ཕྱོགས་བཅུ་ན།།འདས་དང་ད་ལྟར་བྱུང་བ་ཡི།།

རྒྱལ་བའི་དཀྱིལ་འཁོར་མ་ལུས་པ།།བསྙེན་ནས་སྐུ་ལྔ་ལྷུན་གྱིས་རྫོགས།།

ཞེས་སོ།།འོན་ཀྱང་ལམ་འོག་མ་དག་ལ་དགོས་པ་མེད་པའང་མ་ཡིན་ཏེ།གནས་སྐབས་རང་འབྲས་ཐོབ་པར་མ་ཟད་སྔགས་བླ་མེད་ཀྱི་ལམ་སྟེགས་སུ་བགྲོད་དགོས་པའི་ཕྱིར།ཞེས་སོ།།

གསུམ་པ་ལམ་སྟེགས་ཀྱི་ཐེག་པའི་དབྱེ་བསྡུ་སྟོན་པ་ནི།

ཇི་སྲིད་སེམས་ཀྱི་འཇུག་པ་མ་ཟད་བར།།བསམ་ཡས་ཐེག་པའི་གྲངས་མཐར་ཐུག་པ་མེད།།

བགྲོད་གཅིག་ལམ་ལ་བཀྲི་བའི་ངལ་སྟེགས་ཏེ།།རང་རང་རྗེས་མཐུན་འབྲས་བུ་བླ་དང་བཅས།།

ཐོབ་ཀྱང་ཐེག་པ་སོ་སོའི་ངེས་འབྱུང་ལས།།ཐེག་གཅིག་ལམ་ལ་མ་ཞུགས་འབྲས་ཐོབ་ཅི།།

འདིར་ནི་རྫོགས་པ་ཆེན་པོའི་རིང་ལུགས་ལྟར།།ཉན་ཐོས་རང་རྒྱལ་བྱང་ཆུབ་སེམས་དཔའ་ལ།།

མཚན་ཉིད་རྒྱུ་ཡི་ཐེག་པ་གསུམ་ཞེས་གསུངས།།ཀྲི་ཡ་ཨུ་པ་ཡོ་ག་ཕྱི་རྒྱུད་གསུམ།།

བླ་མེད་ཕ་རྒྱུད་མ་ཧཱ་ཡོ་ག་དང༌།།མ་རྒྱུད་ཨ་ནུ་ཡོ་གར་གྲགས་པ་དང༌།།

གཉིས་མེད་རྒྱུད་སྡེ་ཨ་ཏི་ཡོ་ག་ལ།།ནང་རྒྱུད་གསུམ་ཞེས་ཐེག་པ་རིམ་དགུར་བསྡུ།།

ཇི་སྲིད་གདུལ་བྱའི་སེམས་དང་སེམས་བྱུང་ཕྲ་རགས་ཀྱི་རྒྱུན་གཅིག་ནས་གཅིག་ཏུ་འཇུག་པ་ཆོས་ཀྱི་དབྱིངས་སུ་མ་ཟད་བར་དེ་འདུལ་བྱེད་ཀྱི་གཉེན་པོ་བསམ་གྱིས་མི་ཁྱབ་པར་མཐའ་ཡས་པའི་ཐེག་པའི་གྲངས་འདིའོ་ཞེས་བརྗོད་པའི་མཐར་ཐུག་པ་མེད་ལ།སེམས་ཀྱི་འཇུག་པ་ཟད་པའི་ཚེ་ན་འགྲོ་བའང་མེད་ལ་ཐེག་པའང་མེད་དེ།ལང་ཀར་གཤེགས་པ་ལས།

ཇི་སྲིད་སེམས་ནི་འཇུག་པའི་བར།།ཐེག་པའི་མཐའ་ལ་ཐུག་པ་མེད།།

སེམས་ནི་ནམ་ཞིག་གྱུར་པ་ན།།ཐེག་པ་མེད་ཅིང་འགྲོ་བའང་མེད།།ཅེས་སོ།།

དེ་ལྟར་ཐེག་པའི་རྣམ་གྲངས་དེ་དག་ལས་འོག་མ་རྣམས་ནི་སངས་རྒྱས་རྣམས་ཀྱི་བགྲོད་པ་གཅིག་པུའི་ལམ་གསང་སྔགས་རྡོ་རྗེ་ཐེག་པ་ཐམས་ཅད་ཀྱི་ནང་ནས་རྩེ་མོར་གྱུར་པ་ནང་རྒྱུད་བླ་ན་མེད་པ་ལ་བཀྲི་བའི་ངལ་སྟེགས་ཙམ་ཡིན་ཏེ།ཅིའི་ཕྱིར་ན་ལམ་རང་རང་དང་རྗེས་སུ་མཐུན་པའི་འབྲས་བུ་རེ་ཐོབ་མོད།ད་དུང་བླ་སྟེ་གོང་དུ་བགྲོད་བྱ་དང་བཅས་པས་རང་འབྲས་ཐོབ་པ་དེ་ཉིད་ཀྱང་ལྷ་མི་ངན་སོང་དང་ཉན་རང་འཁོར་བའི་མཐའ་དང༌།བྱང་སེམས་དང་ཀྲི་ཡོག་སྡེ་གསུམ་མཐའ་གཉིས་ཏེ་ཐེག་པ་སོ་སོའི་རང་རང་གི་སྤང་བྱ་ལས་ངེས་པར་འབྱུང་བ་ཙམ་ལས།མཐར་ཐུག་གི་ཐེག་པ་གཅིག་པུ་སྔགས་བླ་མེད་ཀྱི་ལམ་ལ་མ་ཞུགས་པར་མཐར་འབྲས་བྱང་ཆུབ་ཆེན་པོ་ཐོབ་པ་ཅི་ཞིག་ཡོད་དེ་མེད་དོ། །ཐེག་པ་དེ་དག་གི་དོན་བསྡུ་ཚུལ་གྱི་རྣམ་གཞག་དུ་མ་ཡོད་ཀྱང་བསྟན་བཅོས་འདིར་ནི་ཐུན་མོང་མ་ཡིན་པ་རྫོགས་པ་ཆེན་པོའི་ལམ་སྲོལ་འཛིན་པའི་སྔ་འགྱུར་རྙིང་མ་བའི་རིང་ལུགས་ལྟར་ན།རང་གི་ཡོངས་འཛིན་ལས་ཉན་ཅིང་ཐོས་པའི་དོན་གཞན་ལ་སྒྲོགས་པས་ཉན་ཐོས་དང༌།སྲིད་པ་ཐ་མ་བའི་ཚེ་གཞན་ལ་མ་བརྟེན་པར་རང་ཉིད་སྲིད་པ་ལས་རྒྱལ་བའི་འབྲས་བུ་མངོན་དུ་བྱས་པས་རང་རྒྱལ་དང༌།རྫོགས་པའི་བྱང་ཆུབ་སྒྲུབ་པའི་ཆེད་དུ་གཞན་དོན་ལ་སེམས་མི་ཞུམ་པར་དཔའ་བས་བྱང་ཆུབ་སེམས་དཔའ་སྟེ།དེ་དག་གི་ཉམས་སུ་བླང་བྱའི་ཐེག་པ་གསུམ་ལ་འབྲས་བུར་སྦྱོར་བའི་ལམ་མཚོན་པས་མཚན་ཉིད་དང༌།རང་འབྲས་ཐོབ་པའི་དངོས་རྒྱུ་དང༌།མཐར་འབྲས་བྱང་ཆུབ་ཆེན་པོ་ཐོབ་པའི་ བརྒྱུད་རྒྱུ་ཙམ་ལས་འབྲས་བུ་ལམ་དུ་བྱེད་པ་མིན་པས་ན་རྒྱུ་ཡི་ཐེག་པ་གསུམ ་ཞེས་གསུངས་ལ།ཀྲི་ཡ་སྟེ་ཕྱིའི་བྱ་བ་གཙོ་བོར་སྟོན་པས་བྱ་བའི་རྒྱུད་དང༌།ཨུ་པ་སྟེ་ལྟ་སྤྱོད་ཆ་མཉམ་པར་སྤྱོད་པས་སྤྱོད་པའི་རྒྱུད་དང༌།ཡོ་ག་སྟེ་ནང་གི་སྒོམ་པ་གཙོ་བོར་སྟོན་པས་རྣལ་འབྱོར་གྱི་རྒྱུད་དེ།དེ་གསུམ་མཚན་ཉིད་ཐེག་པ་དང་ཚུལ་འདྲ་ཞིང་དངོས་གྲུབ་གཞན་ནས་ཚོལ་བས་ཕྱི་རྒྱུད་གསུམ་ཞེས་བཤད་ཅིང༌།ཕྱི་རྒྱུད་ལས་ཁྱད་པར་འཕགས་ཆོས་དུ་མ་ཡོད་ཀྱང་མདོར་བསྡུས་ན་ལྟ་སྒོམ་སྤྱོད་གསུམ་ཐུན་མོང་མ་ཡིན་པའི་དབང་གིས་བླ་ན་མེད་པའི་རྒྱུད་སྡེ་སྟེ།དབྱེ་ན་ཐབས་བསྐྱེད་པའི་རིམ་པ་གཙོ་བོར་སྟོན་པས་ཕ་རྒྱུད་ལ་མ་ཧཱ་ཡོ་ག་སྟེ་རྣལ་འབྱོར་ཆེན་པོ་ཞེས་བཤད་པ་དང༌།ཤེས་རབ་རྫོགས་པའི་རིམ་པ་གཙོ་བོར་སྟོན་པས་མ་རྒྱུད་ལ་ཨ་ནུ་ཡོ་ག་སྟེ་རྗེས་སུ་རྣལ་འབྱོར་ཞེས་བྱ་བར་གྲགས་པ་དང༌།ཟུང་འཇུག་འོད་གསལ་གྱི་རིམ་པ་གཙོ་བོར་སྟོན་པས་གཉིས་སུ་མེད་པའི་རྒྱུད་སྡེ་ལ་ཨ་ཏི་ཡོ་ག་སྟེ་ཐིག་ལེའི་རྣལ་འབྱོར་ཞེས་གསུངས་ཏེ།དེ་གསུམ་ལ་འཁོར་འདས་དག་མཉམ་དུ་རྟོགས་ཤིང་དངོས་གྲུབ་གཞན་ནས་མི་ཚོལ་བས་ནང་རྒྱུད་གསུམ་ཞེས་བཤད་པས་ཐེག་པའི་དབྱེ་བ་དེ་ཐམས་ཅད་ཐེག་པ་རིམ་པ་དགུ་པོ་དེར་བསྡུ་བ་ཡིན་ཏེ།སྤྱི་མདོ་ལས།

དོན་དམ་ངེས་པའི་ཐེག་པ་ནི།།གསུམ་དུ་ངེས་པར་སྣང་བ་སྟེ།།

ཀུན་འབྱུང་འདྲེན་དང་དཀའ་ཐུབ་རིག།དབང་བསྒྱུར་ཐབས་ཀྱི་ཐེག་པའོ།།

ཞེས་པ་ལྟར་གསུམ་པོ་རེ་རེ་ལའང་གསུམ་གསུམ་དུ་དབྱེ་བས་དགུར་ངེས་སོ། །དེ་ལྟ་བུའི་ཐེག་པ་རིམ་པ་དགུ་པོ་དེ་ཅུང་ཟད་སྤྲོས་ཏེ་བཤད་ན།སྤྱིར་ཐེག་པ་སོ་སོ་བ་དགུ་ཡོད་པ་མ་ཡིན་ཏེ།ཉན་རང་གི་སྐབས་འབྲས་བུ་གནས་སྐབས་ཀྱི་ཐར་པ་ཙམ་ཞིག་དང༌།དེ་འཐོབ་བྱེད་ཀྱི་ལམ་ཙམ་བསྟན་ཡང་དེ་ཉིད་ཐེག་ཆེན་དུ་འདུ་བའི་ཕྱིར་དེ་ལས་གཞན་མིན་ཞིང༌།བྱང་ཆུབ་སེམས་དཔའི་སྡེ་སྣོད་དང་ཕྱི་རྒྱུད་སྡེ་གསུམ་གྱི་སྐབས་མཐར་འབྲས་བྱང་ཆུབ་དང་དེ་ཐོབ་བྱེད་ཀྱི་ལམ་ཕྱོགས་ཙམ་བསྟན་ཡང་ཡོངས་རྫོགས་མ་བསྟན་པས་སྔགས་བླ་མེད་དུ་འདུ་ཞིང་དེ་ལས་གཞན་མིན་ལ།ནང་རྒྱུད་སྡེ་གསུམ་པོ་ལས་འོག་མ་གཉིས་ཀ་ཨ་ཏིར་འདུ་ཞིང་དེ་ལས་གཞན་མིན་པས།མཐར་ཐུག་པ་ཨ་ཏི་ཡོ་གའི་ཐེག་པ་གཅིག་པུ་ནི་བྱང་ཆུབ་ཆེན་པོའི་དངོས་རྒྱུར་ངེས་ཏེ།རྒྱ་མཚོ་ལས།

སོ་སོར་བསྟན་པ་རྒྱ་མཚོའི་རྒྱུད།།འདིར་སྟོན་འདིས་སྟོན་འདི་ཕྱིར་སྟོན།།

དོན་ཀུན་འདི་ལ་ཡོངས་རྫོགས་པས།།ལུང་གི་སྤྱི་ཞེས་བཤད་པ་ཡིན།།

ཞེས་པ་དང་མཐུན་ནོ། །དེ་ལྟར་ནའང་སོ་སོའི་བསྟན་དོན་ལྟར་དབྱེ་ན།མཚན་ཉིད་སྡེ་གསུམ་ལས།དང་པོ་ཉན་ཐོས་ཀྱི་ཐེག་པའི་འཇུག་སྒོ་སོ་ཐར་རིགས་བདུན་གང་རུང་གི་ཚུལ་ཁྲིམས་བླངས་ནས་མ་ཉམས་པར་སྲུང་ལ།ལྟ་བ་ཕུང་ལྔས་བསྡུས་པའི་ཆོས་ཐམས་ཅད་གང་ཟག་གི་བདག་གིས་སྟོང་པར་ཤེས་ཀྱང་ཆོས་བདག་ཕྲ་བ་ཆ་མེད་གཉིས་བདེན་པར་འདོད་པ།སྒོམ་པ་ཞི་གནས་བཞག་ཐབས་དགུ་དང་ལྷག་མཐོང་བདེན་བཞི་བཅུ་དྲུག་བསྒོམ་ཞིང༌།སྤྱོད་པ་སྦྱང་ཡོན་བཅུ་གཉིས་སོགས་ལ་གནས་པས།འབྲས་བུ་རྒྱུན་ཞུགས་ཕྱིར་འོང་ཕྱིར་མི་འོང་དགྲ་བཅོམ་པ་སྟེ་བཞི་པོ་རེ་རེ་ལ་ཞུགས་གནས་གཉིས་རེ་བྱས་པས་བརྒྱད་ཐོབ་པར་འདོད་པ་ཡིན་ནོ། །རང་རྒྱལ་གྱི་ཐེག་པའི་འཇུག་སྒོ་ཉན་ཐོས་དང་འདྲ་ལ།ལྟ་བ་གང་ཟག་གི་བདག་མེད་རྟོགས་པའི་སྟེང་གཟུང་བ་རང་བཞིན་མེད་པར་རྟོགས་པས་བདག་མེད་ཕྱེད་དང་གཉིས་རྟོགས་ཤིང༌།སྒོམ་པའི་སྒོས་ཆོས་རྟེན་འབྲེལ་བཅུ་གཉིས་ལུགས་འབྱུང་བཀག་ནས་ལུགས་ལྡོག་སྟོང་པ་བཅུ་གཉིས་ཁྲིགས་ཆགས་སུ་བསྒོམ་ཞིང༌།སྤྱོད་པ་ཉན་ཐོས་དང་འདྲ་བས་འབྲས་བུ་དབང་རྣོན་བསེ་རུ་ལྟ་བུ་དང་དབང་རྟུལ་ནེ་ཙོ་ལྟ་བུ་གཉིས་ཐོབ་པར་འདོད་དོ། །བྱང་སེམས་ཀྱི་ཐེག་པའི་འཇུག་སྒོ་སྨོན་འཇུག་གཉིས་ཀྱི་སྡོམ་པ་བླངས་ནས།ལྟ་བ་སེམས་ཙམ་པས་གཟུང་བ་རང་བཞིན་མེད་པ་དང༌།དེ་འཛིན་བྱེད་ཀྱི་ཤེས་པའང་སྟོང་པར་རྟོགས་ཀྱང་རང་གསལ་གྱི་ཤེས་པ་ངོ་བོས་མི་སྟོང་པར་འདོད་པས་རང་ལུགས་ལ་བདག་མེད་གཉིས་རྟོགས་པར་འདོད་ཀྱང༌།དབུ་མ་པས་གཞལ་ན་ཆོས་ཀྱི་བདག་མེད་ཕྲ་བ་མ་རྟོགས་ལ།དབུ་མ་པས་ནི་ཆོས་ཐམས་ཅད་བདག་གཉིས་ཀྱིས་སྟོང་པར་རྟོགས་ཤིང༌།གཉིས་ཀས་ཀྱང་སྒོམ་པ་ཐུན་མོང་མ་ཡིན་པའི་བྱང་ཕྱོགས་སོ་བདུན་བསྒོམ་ཞིང༌།སྤྱོད་པ་ཕར་ཕྱིན་དྲུག་ལ་བསླབས་ནས།འབྲས་བུ་གནས་སྐབས་ས་བཅུ་དང་མཐར་ཐུག་བཅུ་གཅིག་པ་ཀུན་ཏུ་འོད་ཀྱི་ས་ཐོབ་པར་འདོད་དོ། །ཐེག་པ་དེ་གསུམ་པོ་སངས་རྒྱས་ཀྱི་ཞིང་ཀུན་ཏུ་འབྱུང་ཞིང་གདུལ་བྱ་ཐར་པར་འདྲེན་པའི་ལམ་ཡིན་པས་ཀུན་འབྱུང་འདྲེན་པའི་ཐེག་པ་ཞེས་ཀྱང་བྱའོ།།

ཕྱི་རྒྱུད་སྡེ་གསུམ་ལས་དང་པོ་བྱ་རྒྱུད་ཀྱི་འཇུག་སྒོ་ཆུ་དང་ཅོད་པན་གྱི་དབང་གིས་སྨིན་པར་བྱས་ནས།ལྟ་བ་ཆོས་ཉིད་དག་པའི་ལྷ་ཞེས་རང་གི་སེམས་ཉིད་སྟོང་གསལ་གྱི་ཡེ་ཤེས་སྤྲོས་པའི་མཐའ་དང་བྲལ་བར་རྟོགས་ནས་ཀུན་རྫོབ་ཀྱི་སྣང་ཆ་ཡོངས་སུ་དག་པའི་ལྷའི་རང་བཞིན་དུ་བསྒོམ་ན་མཐར་ཐུག་དེར་འགྱུར་བར་བལྟ་བས།སྒོམ་པ་དེ་ཁོ་ན་ཉིད་བཞི་སྟེ།བདག་གི་དེ་ཁོ་ན་ཉིད་ལྟ་བའི་ངང་དུ་འཇོག་པ།ལྷའི་དེ་ཁོ་ན་ཉིད་བྱ་རྒྱུད་ཙམ་པོ་བ་ལ་བདག་བསྐྱེད་མེད་པས་མདུན་བསྐྱེད་ཙམ་དང༌།ཁྱད་པར་བས།

སྟོང་པ་ཡི་གེ་སྒྲ་གཟུགས་དང༌།།ཕྱག་རྒྱ་མཚན་མ་ལྷ་དྲུག་གོ།ཞེས་ཀྲི་ཡ་ལྷ་དྲུག་གི་སྒོ་ནས་བདག་ཉིད་ལྷར་བསྐྱེད་པའི་མདུན་དུ་ཡེ་ཤེེས་པ་སྤྱན་དྲངས་ཤིང་རྗེ་ཁོལ་གྱི་ཚུལ་དུ་བལྟས་ནས་དངོས་གྲུབ་སྒྲུབ་པ་ལའོ། །བཟླས་བརྗོད་ཀྱི་དེ་ཁོ་ན་ཉིད་འདི་ལྟར་གཞི་ལ་གཞོལ་བ་བདག་མདུན་ལྷར་གསལ་བ་ལ་དམིགས་ནས།སེམས་ལ་གཞོལ་བ་ལྷའི་ཐུགས་ཀར་ཟླ་དཀྱིལ་བསྒོམ་ཞིང༌།སྒྲ་ལ་གཞོལ་བ་ཟླ་དཀྱིལ་གྱི་སྟེང་དུ་སྔགས་ཕྲེང་རང་སྒྲ་དང་བཅས་པ་ལ་སེམས་གཏད་ནས་སྲོག་རྩོལ་བསྡམས་ཏེ་བཟླས་པ་བྱ་བའོ། །བསམ་གཏན་གྱི་དེ་ཁོ་ན་ཉིད་རང་ཉིད་ལྷར་གསལ་བའི་ཐུགས་ཀར་མེ་འབར་བའི་དབུས་སུ་ཟླ་བ་ལ་སྔགས་ཕྲེང་བཀོད་པ་མེ་གནས་ཏེ་ལས་བཞི་འགྲུབ་པའི་གཞི་དང༌།དེ་ལས་སྔགས་ཀྱི་རང་སྒྲ་སྒྲོགས་པར་བསམ་པ་སྒྲ་གནས་ཏེ་ཞི་གནས་སྒྲུབ་པའི་གཞི་དང༌།སྒྲ་དེ་ལ་དཔྱད་ཅིང་གཞིག་ནས་མཐར་མི་རྟོག་པའི་ངང་དུ་འཇོག་པ་སྒྲ་མཐའི་ཐར་པ་སྟེར་བ་སྟེ་ལྷག་མཐོང་འཆར་བའི་རྒྱུའོ། །སྤྱོད་པ་ཁྲུས་དང་གཙང་སྦྲ་སོགས་ཕྱིའི་བྱ་བ་ལ་གཙོ་བོར་སྤྱོད་པས།འབྲས་བུ་རིགས་གསུམ་རྡོ་རྗེ་འཛིན་པའི་ས་ཐོབ་པར་འདོད་དོ། །སྤྱོད་རྒྱུད་ཀྱི་འཇུག་སྒོ་རིག་པའི་དབང་ལྔས་སྨིན་པར་བྱས་ནས།ལྟ་བ་རྣལ་འབྱོར་གྱི་རྒྱུད་དང་འདྲ་ཞིང༌།སྒོམ་པ་ནི་རྣམ་སྣང་མངོན་བྱང་ལས།

ཡི་གེ་དང་ནི་ཡི་གེ་སྦྱར།།དེ་བཞིན་གཞི་ལས་གཞིར་གྱུར་ཉིད།།

ཤིན་ཏུ་བསྡམས་པའི་ཡིད་ལས་ནི།།བཟླས་བརྗོད་འབུམ་ཕྲག་གཅིག་བྱའོ།།

ཞེས་པ་ལྟར་ཡི་གེ་དང་པོ་དོན་དམ་བྱང་ཆུབ་ཀྱི་སེམས་སྟོང་པ་ཉིད་དང་དེའི་སྣང་ཆ་ཀུན་རྫོབ་བྱང་ཆུབ་ཀྱི་སེམས་ཟླ་དཀྱིལ་བསྒོམ་པ་དང༌།ཡི་གེ་གཉིས་པ་དེའི་སྟེང་བཟླ་བྱའི་སྔགས་རང་སྒྲ་དང་བཅས་པ་བསྒོམ།དེ་ཐམས་ཅད་ལས་གཞིའི་ཡན་ལག་དང་པོ་བདག་ཉིད་ལྷར་བསྐྱེད།དེ་ནས་གཞིའི་ཡན་ལག་གཉིས་པ་མདུན་བསྐྱེད་བསྒོམས་ནས་སྤུན་གྲོགས་ཀྱི་ཚུལ་དུ་དངོས་གྲུབ་སྒྲུབ་པ་མཚན་བཅས་དང༌།ཕུང་སོགས་ཀྱི་ཆོས་ཐམས་ཅད་ལ་རྣམ་པར་དཔྱད་དེ་སྐྱེ་མེད་དུ་རྟོགས་པ་འཇུག་པ་དང༌།མི་རྟོག་པའི་ངོ་བོ་མངོན་དུ་གྱུར་པ་གནས་པ་དང༌།དེ་ལས་མ་རྟོགས་པའི་འགྲོ་བ་རྣམས་ལ་སྙིང་རྗེ་ཆེན་པོ་ལྷག་པར་འཇུག་པ་ནི་ལྡང་བ་སྟེ།འཇུག་གནས་ལྡང་གསུམ་གྱིས་ཁྱད་པར་དུ་བྱས་པའི་དོན་དམ་བྱང་ཆུབ་ཀྱི་སེམས་བསྒོམ་པ་མཚན་མེད་ཀྱི་རྣལ་འབྱོར་རོ། །སྤྱོད་པ་ནི་བྱ་རྒྱུད་དང་འདྲ་ལ།དེ་ལྟར་བསྒྲུབས་པས་འབྲས་བུ་རིགས་བཞི་རྡོ་རྗེ་འཛིན་པའི་ས་ཐོབ་པར་འདོད་དོ།།

རྣལ་འབྱོར་རྒྱུད་ཀྱི་འཇུག་སྒོ་རིག་དབང་ལྔ་དང༌།སློབ་དཔོན་གྱི་དབང་སྟེ་དྲུག་ཐོབ་པར་བྱས་ནས།ལྟ་བ་དོན་དམ་པར་ཆོས་ཐམས་ཅད་མཚན་མ་མེད་པར་རྟོགས་པའི་བྱིན་རླབས་ལས་ཀུན་རྫོབ་རྡོ་རྗེ་དབྱིངས་ཀྱི་ལྷར་བལྟས་ནས།སྒོམ་པ་ནི་གལྤོ་ལས།

མི་རྟོག་ཟླ་བ་གསུང་རྡོ་རྗེ།།སྤྲོ་བསྡུ་བསྒོམས་པས་ལྷ་རུ་གསལ།།

ཞེས་པ་ལྟར་གཞི་སྟོང་པ་ཉིད།གདན་ཟླ་བ།གསུང་ཡིག་འབྲུ།ཐུགས་ཕྱག་མཚན།སྐུ་ཡོངས་རྫོགས་ལ་མངོན་པར་བྱང་ཆུབ་པ་ལྔའི་སྒོ་ནས་ལྷར་བསྐྱེད་ལ།ཡང་དེ་ཉིད་ལས།ཏིང་འཛིན་བྱིན་བརླབས་དབང་བསྐུར་མཆོད། །ཅེས་པ་ལྟར་འཁོར་གྱི་ལྷ་བཀོད་པ་དང༌།རང་རིགས་ཀྱིས་བྱིན་གྱིས་བརླབས་པ་དང༌།རིགས་གང་ཡིན་གྱི་དབང་བསྐུར་བ་དང༌།ཕྱག་མཆོད་བསྟོད་པ་བྱ་བ་སྟེ་ཆོ་འཕྲུལ་བཞི་དང༌།ཐུགས་དམ་ཚིགགསུང་ཆོས་ཀྱི།སྐུ་ཕྱག་ཆེན།ཕྲིན་ལས་ལས་ཀྱི་ཕྱག་རྒྱ་སྟེ་བཞིས་རྒྱས་བཏབ་ནས་ཡེ་ཤེས་པ་དགུག་བསྟིམས་བྱས་ཏེ།དམ་ཡེ་དབྱེར་མེད་ཀྱི་ངང་ནས་བཟླས་པ་ཚུལ་བཞིན་དུ་བྱས་མཐར་ཡེ་ཤེས་པ་གཤེགས་པ་ལ་སོགས་པའི་སྒོ་ནས་སྒྲུབ་པ་མཚན་བཅས་དང༌།ལྟ་བའི་ངང་ལ་འཇོག་པ་མཚན་མེད་ཀྱི་རྣལ་འབྱོར་གཉིས་བསྒོམ་ཞིང༌།སྤྱོད་པ་ཁྲུས་དང་གཙང་སྦྲ་སོགས་གྲོགས་ཙམ་དུ་བསྟེན་ནས།འབྲས་བུ་རིགས་ལྔ་སྟུག་པོ་བཀོད་པར་འཚང་རྒྱ་བར་འདོད་དོ། །དེ་གསུམ་གྱིས་ཕྱིའི་དཀའ་ཐུབ་ལ་བརྟེན་ནས་ནང་གི་དོན་རིག་པར་བྱེད་པས་དཀའ་ཐུབ་རིག་བྱེད་ཀྱི་ཐེག་པ་ཞེས་བྱའོ།།

ནང་རྒྱུད་སྡེ་གསུམ་ལས།དང་པོ་མ་ཧཱའི་འཇུག་སྒོ་ནི།ཕྱི་ཕན་པའི་དབང་བཅུ།ནང་ནུས་པའི་དབང་ལྔ།གསང་བ་ཟབ་མོའི་དབང་གསུམ་སྟེ།དབང་མཆོག་བཅོ་བརྒྱད་ཀྱིས་རྒྱུད་སྨིན་པར་བྱས་ནས།ལྟ་བ་དོན་དམ་དཀོར་བདུན་ངོ་བོ་ཉིད་མེད་པའི་ངང་ལས་རྩལ་སྣང་གདན་གསུམ་ལྷའི་དཀྱིལ་འཁོར་དུ་རང་བཞིན་གྱིས་ལྷུན་གྱིས་གྲུབ་ཅིང་དེ་གཉིས་ལྡོག་པ་ཙམ་ལས་རང་བཞིན་དབྱེར་མེད་པ་ལྷག་པའི་བདེན་པ་དབྱེར་མེད་ཆོས་སྐུ་ཆེན་པོར་གཏན་ལ་ཕབ་ནས།སྒོམ་པ་ནི་བསྐྱེད་རྫོགས་གཉིས་ལས་བསྐྱེད་རིམ་གཙོ་བོར་སྟོན་ལ།དེ་ཡང་སྒོང་སྐྱེས་དང་མངལ་སྐྱེས་སྦྱོང་བའི་བསྐྱེད་རིམ་གཙོ་ཆེ་བར་བསྒོམ་ཞིང་དེ་ཐམས་ཅད་ཏིང་ངེ་འཛིན་རྣམ་པ་གསུམ་གྱིས་ཁོག་དབུབ།ངོ་བོ་དག་རྫོགས་སྨིན་གསུམ་ཚང་བ་དང༌།སྲོག་སྡོམ་གཟེར་བཞིས་རྒྱས་བཏབ་སྟེ་བསྒོམ་པ་དང༌།རྫོགས་རིམ་མ་ཧཱ་རང་གི་ནང་གསེས་ཀྱི་ཕ་རྒྱུད་རྣམས་སུ་རླུང་གི་དང༌།མ་རྒྱུད་རྣམས་སུ་ཐིག་ལེའི་དང༌།གཉིས་མེད་ཀྱི་རྒྱུད་རྣམས་སུ་དོན་དམ་འོད་གསལ་གྱི་རྫོགས་རིམ་རྣམས་བསྒོམ་ལ།སྤྱོད་པ་སྤྲོས་བཅས།སྤྲོས་མེད།ཤིན་ཏུ་སྤྲོས་མེད་གསུམ་གྱི་ཉེ་རྒྱུ་ལ་བརྟེན་ནས།འབྲས་བུ་རིག་འཛིན་རྣམ་པ་བཞིས་བསྡུས་པའི་ལམ་ལྔ་མཐར་ཕྱིན་ཏེ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པར་འདོད་དོ།།

གཉིས་པ་ཨ་ནུའི་འཇུག་སྒོ་ཕྱི་དབང་རྒྱུད་ཀྱི་ཆུ་བོ་བཅུ།ནང་དབང་འབྱུང་བའི་ཆུ་བོ་བཅུ་གཅིགསྒྲུབ་དབང་གྲགས་པའི་ཆུ་བོ་བཅུ་གསུམ།གསང་དབང་རྫོགས་པའི་ཆུ་བོ་གཉིས་ཏེ།དབང་མཆོག་སུམ་ཅུ་རྩ་དྲུག་གིས་སྨིན་པར་བྱས་ནས།ལྟ་བ་དབྱིངས་སྐྱེ་མེད་སྤྲོས་པ་དང་བྲལ་བ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར་དང༌།ཡུལ་ཅན་རང་བྱུང་གི་ཡེ་ཤེས་རང་བཞིན་ལྷུན་གྲུབ་ཀུན་ཏུ་བཟང་པོའི་དཀྱིལ་འཁོར་དང༌།དེ་གཉིས་ངོ་བོ་དབྱེར་མེད་པ་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཏེ་དཀྱིལ་འཁོར་གསུམ་དུ་རྟོག་དཔྱོད་ཀྱི་རྗེས་སུ་འཇུག་པས་གཏན་ལ་ཕབ་ནས།སྒོམ་པ་ནི་དོན་གྱི་རྗེས་སུ་འཇུག་པ་རྣམ་པར་མི་རྟོག་པའི་ངང་ལ་འཇོག་པ་དང༌།ཡི་གེའི་རྗེས་སུ་འཇུག་པ་བསྐྱེད་སྔགས་བརྗོད་པ་ཙམ་གྱིས་རྩལ་སྣང་ལྷའི་དཀྱིལ་འཁོར་དུ་གསལ་བ་གྲོལ་ལམ་དང༌།ཐབས་ལམ་སྟེང་འོག་གི་སྒོ་ལ་བརྟེན་ནས་ལྷན་སྐྱེས་ཀྱི་ཡེ་ཤེས་བསྐྱེད་པར་བྱེད་ཅིང༌།སྤྱོད་པ་སྣང་སེམས་ཐམས་ཅད་བདེ་བ་ཆེན་པོའི་ཡེ་ཤེས་ཀྱི་རོལ་པར་ཤེས་པའི་སྒོ་ནས་བླང་དོར་མེད་པར་སྤྱོད་པའི་ཉེ་རྒྱུས་འབྲས་བུ་ལམ་ལྔའི་ངོ་བོར་གྱུར་པའི་རྣལ་འབྱོར་ལྔ་དང༌།ས་བཅུ་མཐར་ཕྱིན་པར་བྱེད་དེ།དེ་ཡང་ཆོས་ཉིད་ཀྱི་སྙིང་པོ་ཇི་བཞིན་པའི་རྗེས་སུ་འཇུག་པའི་རང་སའི་ལམ་ན་འཕར་བའི་རིམ་པ་ལྟར་སྒོམ་པ་ས་བཅུ་རང་རང་གི་སྦྱང་བྱ་བཅུ་སྦྱངས་ཤིང་རང་སའི་ཡོན་ཏན་རྣམས་འཆར་བར་འགྱུར་ཏེ།འདི་ལྟར་ཚོགས་ལམ་འདུན་པ་སེམས་པའི་རྣལ་འབྱོར་གྱིས་དང་པོ་འགྱུར་བ་མ་ངེས་པའི་ས་དང༌།གཉིས་པ་བརྟེན་པ་གཞིའི་ས་གཉིས་བསྡུས་ཏེ།དེར་རྐྱེན་འགྱུར་ལས་ཀྱི་བག་ཆགས་རགས་ཕྲ་གཉིས་དག་ནས།སྤྱན་དང་མངོན་ཤེས་དང་རྫུ་འཕྲུལ་ཕྲ་མོས་སྤྲུལ་བསྒྱུར་ནུས་པ་སོགས་ཐུན་མོང་གི་དངོས་གྲུབ་རྣམས་རིམ་གྱིས་གྲུབ་ཅིང་སངས་རྒྱས་སྤྲུལ་པའི་སྐུའི་ཞལ་མཐོང་བ་སོགས་ཚོགས་ལམ་གྱི་ཡོན་ཏན་རྣམས་འཆར་རོ། །སྦྱོར་ལམ་རིགས་ཆེན་འབྱེད་པའི་རྣལ་འབྱོར་གྱིས་གསུམ་པ་གལ་ཆེན་སྦྱོང་བའི་ས།བཞི་པ་བསླབ་པ་རྒྱུན་གྱི་ས།ལྔ་པ་བསོད་ནམས་རྟེན་གྱི་ས་གསུམ་བསྡུས་ཏེ།དེར་མངོན་དུ་རྒྱུའི་བག་ཆགས་རགས་འབྲིང་ཕྲ་གསུམ་དག་ནས་རླུང་སེམས་ཙམ་གྱིས་ལྷ་སྐུ་གྲུབ་ཅིང༌།ཉིན་སྣང་མཚན་སྣང་གི་བར་མཚམས་མེད་པར་ཐམས་ཅད་སྒྱུ་མ་ལྟ་བུར་རྟོགས་པ་སོགས་སྦྱོར་ལམ་གྱི་ཡོན་ཏན་རྣམས་འཆར་རོ། །དེ་ཉིད་དུ་ཚོགས་ཀྱི་སྤྱོད་པའི་ཉེ་རྒྱུ་སྤྱད་པས་ཁུ་རྡུལ་རླུང་ཡིད་ཀྱི་འགྱུར་བདེ་རགས་པ་བཅོམ་སྟེ།འཇིགས་པ་ལྔ་དང་བྲལ་ཞིང་ཟག་པ་ཟད་ནས་མཐོང་ལམ་དབུགས་ཆེན་འབྱིན་པའི་རྣལ་འབྱོར་ཐོབ་སྟེ།དེས་དྲུག་པ་བརྟེན་པས་ཁྱད་པར་དུ་འགྲོ་བའི་ས་བསྡུས་ཏེ།དེར་ཀུན་འགྲོའི་སྒྲིབ་པ་དག་ཅིང་ཆོས་ཉིད་རང་མཚན་པ་མངོན་སུམ་དུ་མཐོང་བའི་སྟོབས་ཀྱིས་བདེ་སྟོང་ཡེ་ཤེས་འོད་གསལ་གྱི་ལྷ་སྐུ་གྲུབ་ཅིང༌།ཡོན་ཏན་བརྒྱ་ཕྲག་བཅུ་གཉིས་ལ་དབང་ཐོབ།ལོངས་སྐུ་རིགས་ལྔའི་ཞིང་བགྲོད་ནས་ཆོས་ཉན་པ་སོགས་མཐོང་ལམ་གྱི་ཡོན་ཏན་ཐམས་ཅད་འཆར་རོ། །དེ་ནས་མཐོང་ལམ་འོད་གསལ་ལས་ལངས་པའི་རྗེས་ལ་མངོན་རྟོགས་སྒོམ་ལམ་ལུང་ཆེན་ཐོབ་པའི་རྣལ་འབྱོར་གྱིས།བདུན་པ་དམིགས་པས་འབྲས་བུ་སྐྱེ་བའི་ས་བསྡུས་ཏེ།དེར་ལྷན་ཅིག་གནས་པའི་སྒྲིབ་པ་དག་ནས་ཆོས་ཉིད་རྟོགས་པའི་ཡེ་ཤེས་དང་དག་པ་ལྷ་སྐུའི་སྣང་བ་རྒྱུན་མི་ཆད་པ་ཟུང་འཇུག་གི་སྐུར་གྲུབ་ཅིང༌།དེ་ནས་མཐར་ལམ་རྩལ་ཆེན་རྫོགས་པའི་རྣལ་འབྱོར་ཐོབ་སྟེ།དེས་ནི་བརྒྱད་པ་གནས་པ་མི་འགྱུར་བའི་ས་དང༌།དགུ་པ་བརྡལ་བ་ཆོས་ཉིད་ཀྱི་ས་དང༌།བཅུ་པ་རྫོགས་པ་ཅིར་ཆུབ་ཀྱི་ས་གསུམ་བསྡུས་པ་ཡིན་ཏེ།དེར་བག་ཉལ་རགས་འབྲིང་ཕྲ་གསུམ་གྱི་སྒྲིབ་པ་རིམ་པར་དག་ཅིང༌།དེ་ལྟར་སྒོམ་མཐར་གྱི་ལམ་གྱི་ས་བཞི་པོ་དེ།ཐུན་མོང་བ་ལྟར་ན་སྒོམ་ལམ་ས་དགུས་བསྡུས་པས་ན།དེ་རྣམས་སུ་སྔར་མཐོང་ལམ་གྱི་ཡོན་ཏན་བརྒྱ་ཕྲག་བཅུ་གཉིས་པོ་དེ་སྟོང་འགྱུར་ནས།ཞིང་ཁམས་བརྗོད་དུ་མེད་པའི་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དང་མཉམ་པའི་བར་དུ་རིམ་པར་འཕེལ་ཞིང༌།ཆོ་འཕྲུལ་བཞི་དང་དབང་བཅུ་ལ་སོགས་པའི་ཡོན་ཏན་རྣམས་འཆར་བ་ཡིན་ནོ། །དེ་ལྟར་སློབ་པའི་ལམ་བཞི་མཐར་ཕྱིན་ནས་འབྲས་བུའི་དབང་བསྐུར་བའི་མཐའ་རྟེན་ཁུ་རྡུལ་རླུང་གསུམ་གྱི་རྒྱུ་བ་ཕྲ་བ་རྒྱུན་ཆད་པས་བརྟེན་པ་ཤེས་རིག་ཕྲ་བའང་དག་སྟེ།འབྲས་ཆོས་ཉེར་ལྔ་དབྱེར་མེད་ལྷུན་གྱིས་གྲུབ་པའི་བདེ་བ་ཆེན་པོའི་སྐུ་མངོན་དུ་འགྱུར་བར་འདོད་པ་ཡིན་ནོ། །དེ་ལྟར་བཤད་པའི་རྣལ་འབྱོར་ལྔ་དང༌།ས་བཅུ་པོ་དེ་རྣམས་ཀྱི་ངེས་ཚིག་ནི་མདོའི་རྩ་བཤད་ཀྱི་རྒྱུད་དང༌།མན་ངག་དག་ལས་གསལ་བར་བསྟན་པ་མ་མཐོང་ཡང༌།སྤྱི་ཙམ་ལ་དཔག་ན།

རྣལ་འབྱོར་ལྔའི་དང་པོ་ནི།ཚོགས་ལམ་གྱི་དུས་སུ་འོད་གསལ་དང་ལྷ་སྐུ་གཉིས་ཀ་འདུན་པས་དྲངས་པའི་མོས་པ་ཙམ་གྱི་ཡུལ་དུ་བྱེད་པས་འདུན་པ་སེམས་པའི་དང༌།

གཉིས་པ་ནི།སྦྱོར་ལམ་ཐོབ་ཚེ་ཟག་པ་ཡོད་ཀྱང་ལྡོག་པ་མེད་པས་རིགས་ངེས་པའི་ཕྱིར་རིགས་ཆེན་འབྱེད་པའི་དང༌།

གསུམ་པ་ནི།མཐོང་ལམ་དུ་འཇིགས་པ་ལྔ་དང་བྲལ་བ་སོགས་དང༌།ཆོས་ཉིད་མངོན་སུམ་མཐོང་བས་འཇིག་རྟེན་གྱི་ཆོས་ཐམས་ཅད་ལས་འདས་པས་དབུགས་ཆེན་འབྱིན་པའི་དང༌།

བཞི་པ་ནི།སྒོམ་ལམ་དུ་དུས་དང་གནས་སོགས་ངེས་པ་ཅན་གྱི་སྒོ་ནས་ལུང་བསྟན་ཆེན་པོ་ཐོབ་པས་ལུང་ཆེན་ཐོབ་པའི་དང༌།

ལྔ་པ་ནི།མཐར་ལམ་དུ་སློབ་པའི་ཟུང་འཇུག་གི་ཡོན་ཏན་གྱི་རྩལ་མཐར་ཐུག་པ་རྫོགས་པའི་ཕྱིར་རྩལ་ཆེན་རྫོགས་པའི་རྣལ་འབྱོར་རོ།།

ས་ཡང་རྣམ་པ་བཅུ་ལས།དང་པོ་ལ།ཚོགས་ལམ་དུ་ཟག་ལྡོག་གཉིས་ཀ་ཡོད་པས་འགྱུར་བ་མ་ངེས་པའི་ས་དང༌།རྣལ་འབྱོར་དང་པོ་འདིའི་སྐབས་ཀྱི་མངོན་རྟོགས་རྣམས་བརྟེན་པ་སྦྱོར་ལམ་སོགས་བསྐྱེད་པའི་གཞི་ཡིན་པས་གཉིས་པ་ལ་བརྟེན་པ་གཞིའི་ས་ཞེས་བྱ་ཞིང༌།སྦྱོར་བའི་ལམ་དུ་མཐོང་ལམ་དོན་གྱི་འོད་གསལ་ལ་སྒྲིབ་པའི་མངོན་རྒྱུའི་བག་ཆགས་ཐམས་ཅད་སྦྱོང་བས་གསུམ་པ་ལ་གལ་ཆེན་སྦྱོང་བའི་ས་དང༌།ཉིན་མཚན་བར་མེད་པར་སྒྱུ་མ་ལྟ་བུའི་ཚུལ་གྱིས་ཟུང་འཇུག་གི་རྒྱུ་ལ་བསླབ་པས་བཞི་པ་ལ་བསླབ་པ་རྒྱུན་གྱི་ས་དང༌།ཉེ་རྒྱུའི་སྤྱོད་པའི་བསོད་ནམས་ལ་བརྟེན་ནས་ཟག་མེད་ཀྱི་ཡེ་ཤེས་ལ་སྦྱོར་བས་ལྔ་པ་ལ་བསོད་ནམས་རྟེན་གྱི་ས་ཞེས་བྱའོ། །མཐོང་ལམ་དུ་དོན་གྱི་འོད་གསལ་མངོན་སུམ་དུ་མཐོང་བ་དེ་ལ་བརྟེན་པ་ཟག་མེད་ཀྱི་ཡོན་ཏན་གོང་ནས་གོང་དུ་ཁྱད་པར་དུ་འགྲོ་བས་དྲུག་པ་ལ་བརྟེན་པས་ཁྱད་པར་དུ་འགྲོ་བའི་ས་ཞེས་བྱའོ། །སྒོམ་ལམ་དུ་སློབ་པའི་ཟུང་འཇུག་གི་དོན་དེ་ལ་དམིགས་ཤིང་གོམས་པས་འབྲས་བུ་མི་སློབ་པའི་ཟུང་འཇུག་གི་སྐུ་འགྲུབ་པས་བདུན་པ་ལ་དམིགས་པས་འབྲས་བུ་སྐྱེ་བའི་ས་ཞེས་བྱའོ། །མཐར་ལམ་དུ་དབྱིངས་ཡེ་དབྱེར་མེད་ཀྱི་དགོངས་པ་ལ་རྟག་ཏུ་གནས་ཤིང་འཕོ་འགྱུར་མེད་པས་བརྒྱད་པ་ལ་གནས་པ་མི་འགྱུར་བའི་ས་དང༌།ཆོས་ཉིད་དོན་གྱི་འོད་གསལ་དང་ཆོས་ཅན་ལྷ་སྐུའི་སྣང་བ་གཉིས་འདུ་འབྲལ་མེད་པའི་ཆོས་ཉིད་ཀྱི་ཕྱག་རྒྱས་སྣང་སྤྱོད་ཐམས་ཅད་ལ་ཁྱབ་པར་བརྡལ་བས་དགུ་པ་ལ་བརྡལ་བ་ཆོས་ཉིད་ཀྱི་ས་དང༌།རྩལ་སྣང་གཟུགས་སྐུའི་བཀོད་པ་ཐམས་ཅད་སྐྱེ་བ་མེད་པའི་དབྱིངས་སུ་འུབ་ཆུབ་པར་ཡོངས་སུ་རྫོགས་ཤིང་མཐར་ཕྱིན་པས་བཅུ་པ་ལ་རྫོགས་པ་ཅིར་ཆུབ་ཀྱི་ས་ཞེས་བྱའོ། །ས་འདི་རྣམས་ཕལ་ཆེར་ལ་མ་ངེས་པ་ཞེས་པའི་སྒྲ་སྦྱར་བ་ལྟར་ན།འདི་དག་སློབ་པའི་ས་ཡིན་པས་རང་རང་གི་གནས་སྐབས་ཀྱི་སྒྲིབ་པ་དག་ཅིང་ས་གོང་མའི་ཡོན་ཏན་ལ་སྦྱོར་དུ་ཡོད་པས་རང་རང་གི་སྐབས་སུ་བཞག་པའི་ངེས་ཚིག་དེ་ཉིད་ས་དང་ལྡན་པའི་གང་ཟག་དེ་ལ་རྣམ་པ་ཐམས་ཅད་དུ་མ་ངེས་པའོ། །ཡང་ས་ཕྱི་མ་ལ་མི་སློབ་པའི་སར་བཤད་པ་ལྟར་ན།དགྲ་བཅོམ་ཞུགས་པ་བཞིན་བཏགས་པ་ཡིན་གྱི་དངོས་ནི་མིན་ནོ།།

གསུམ་པ་ཨ་ཏིའི་འཇུག་སྒོ་དབང་བཞི་པ་རྩལ་དུ་བཏོན་ཏེ་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་རབ་ཏུ་སྤྲོས་མེད་དེ་བཞི་ཐོབ་པར་བྱས་ནས།ལྟ་བ་ཆོས་ཐམས་ཅད་རིག་པའི་ངོ་བོར་ཡེ་ནས་སངས་རྒྱས་ཟིན་པས་ལམ་གྱིས་ད་གདོད་སྒྲུབ་མི་དགོས་པར་ཐག་བཅད་ནས།སྒོམ་པ་ལེ་ལོ་ཅན་འབད་མེད་དུ་གྲོལ་བ་ཀ་དག་ཡེ་བབས་སོར་བཞག་གི་ངང་སྐྱོང་བ་དང༌།བརྩོན་འགྲུས་ཅན་འབད་བཅས་སུ་གྲོལ་བ་ལྷུན་གྲུབ་ཐོད་རྒལ་གྱི་གནད་དྲུག་ལ་བརྟེན་ནས་དེ་བཞིན་གཤེགས་པའི་གསང་མཛོད་ཀྱི་སྒོ་ཕྱེ་ནས་མངོན་སུམ་དུ་མཐོང་བ་དང༌།སྤྱོད་པ་ཅིར་སྣང་ཐམས་ཅད་ཆོས་ཉིད་ཀྱི་རོལ་པར་ཤར་བས་དགག་སྒྲུབ་འཛིན་ཞེན་ལས་འདས་པར་བཞག་པས།འབྲས་བུ་སྣང་བཞི་མཐར་ཕྱིན་ཏེ་ལྷུན་རྫོགས་ཀུན་ཏུ་བཟང་པོ་དབྱེ་བ་མེད་པའི་སའམ་ཡེ་ཤེས་བླ་མའི་ས་མཐར་ཕྱིན་པར་བྱེད་པའོ། །དེ་གསུམ་གྱིས་ཉོན་མོངས་ཐམས་ཅད་ཆེད་དུ་གཉེན་པོས་སྤོང་མི་དགོས་པར་རིག་པའི་ཡེ་ཤེས་ཀྱིས་དབང་བསྒྱུར་ཏེ་ལམ་དུ་བྱེད་པའི་ཐབས་དང་ལྡན་པས་དབང་བསྒྱུར་ཐབས་ཀྱི་ཐེག་པ་ཞེས་བྱའོ།།

སོ་བྱང་གཉིས་སྔགས་སྡོམ་གྱི་ཡན་ལག་ཏུ་འགྱུར་ཚུལ།

བཞི་པ་སོ་བྱང་གཉིས་སྔགས་སྡོམ་གྱི་ཡན་ལག་ཏུ་འགྱུར་ཚུལ་ལ་གསུམ་ལས། དང་པོ་རིགས་ཅན་གསུམ་ལ་སྔགས་ཀྱི་ལམ་ཞུགས་ཡོད་པར་སྒྲུབ་པ་ནི།

ཉན་རང་བྱང་སེམས་རིགས་ཅན་སོ་སོ་ལ།།རྡོ་རྗེ་འཛིན་པའི་ལམ་ཞུགས་ཡོད་དོ་ཞེས།།

འབུམ་ལྔའི་རྒྱུད་ཀྱི་ལུང་ལས་གསལ་བར་གྲུབ།།

དེ་ལྟར་ཐེག་པ་རིམ་པ་དགུའི་སྔ་མ་དྲུག་གི་གདུལ་བྱར་གྱུར་པའི་རིགས་ཅན་གསུམ་སྔགས་བླ་མེད་དུ་འཇུག་པའི་ཚུལ།སྤྱིར་གདུལ་བྱ་རྣམས་ཀྱི་ཁམས་སམ་རིགས་ཀྱི་དབྱེ་བ་དུ་མ་ཞིག་ཡོད་ནའང༌།བསྡུ་ན་དམན་འབྲིང་མཆོག་གསུམ་སྟེ།རིམ་བཞིན་ཉན་ཐོས་དང་རང་རྒྱལ་དང་བྱང་ཆུབ་སེམས་དཔའི་རིགས་ཅན་གསུམ་ཡིན་ལ།དེ་དག་སོ་སོ་ལ་བླ་མེད་རྡོ་རྗེ་ཐེག་པའི་རིག་པ་འཛིན་པའི་ལམ་ལ་ཞུགས་པ་ཡོད་དོ་ཞེས་འབུམ་ཕྲག་ལྔ་པ་དེ་ཁོ་ན་ཉིད་ཡེ་ཤེས་གྲུབ་པའི་རྒྱུད་ཀྱི་ལུང་ལས།

རྡོ་ཡི་རིགས་ཀྱི་བྱེ་བྲག་ཞིག།བཞུ་བས་ལྕགས་དང་ཟངས་དངུལ་འབྱུང༌།།

གསེར་འགྱུར་རྩི་ཡི་དངོས་པོ་ཡིས།།ཀུན་ཀྱང་གསེར་དུ་བསྒྱུར་བར་བྱེད།།

དེ་བཞིན་སེམས་ཀྱི་བྱེ་བྲག་གིས།།རིགས་ཅན་གསུམ་གྱི་སྡོམ་པ་ཡང༌།།

དཀྱིལ་འཁོར་ཆེན་པོ་འདིར་ཞུགས་ན།།རྡོ་རྗེ་འཛིན་པ་ཞེས་བྱའོ།།

ཞེས་པས་གསལ་བར་གྲུབ་སྟེ།དེ་ཡང་དཔེར་བསྟན་པའི་རྡོ་ཁམས་དམན་འབྲིང་མཆོག་གསུམ་པོ་དེ་གྲུབ་མཐས་བློ་མ་བསྒྱུར་བའི་རིགས་ཅན་གསུམ་གྱི་དཔེ་ཡིན་ལ།ལྕགས་ཟངས་དངུལ་གསུམ་ནི་རིགས་ཅན་གསུམ་སོ་སོའི་ལམ་ལ་ཞུགས་བཞིན་པ་དང༌།འབྲས་བུ་ཐོབ་ཟིན་པའི་གནས་སྐབས་ཀྱི་དཔེ་ཡིན་ཞིང༌།དེ་གསུམ་གསེར་འགྱུར་རྩིས་གསེར་དུ་འགྱུར་བ་ལྟ་བུ་ནི་སྔགས་བླ་མེད་ལ་ཞུགས་པའི་གནས་སྐབས་ན་ཐམས་ཅད་རིག་པ་འཛིན་པ་ཡིན་པ་ལ་ཁྱད་པར་མེད་པའི་དཔེར་སོང་བས་སོ།།

གཉིས་པ་བསམ་པའི་དབྱེ་བས་འཇུག་ཚུལ་གྱི་དབྱེ་བསྡུ་བཤད་པ་ནི།

བསམ་པའི་དབྱེ་བས་སྔགས་ལ་འཇུག་པའིཚུལ།།ཆོས་སྒོ་མང་ཡང་དེ་དག་སྤྲོ་བྱ་མིན།།

བསམ་པའི་བྱེ་བྲག་གི་དབྱེ་བས་ནང་རྒྱུད་བླ་ན་མེད་པའི་སྔགས་ལམ་ལ་འཇུག་པ་ན།ཇི་སྐད་དུ།

གཞི་རིགས་གཅིག་དང་ལམ་རིགས་བཞི། །གསང་ཆེན་བླ་མེད་མི་ལྡོག་བརྟེན།།

ཞེས་པ་ལྟར་གཞི་ནས་འཇུག་པ་རང་རང་གི་ལམ་ལ་མ་ཞུགས་པར་དང་པོ་ནས་འཇུག་པ་དང༌།ལྷ་མི་ཉན་རང་བྱང་སེམས་ཀྲི་ཡོག་སྡེ་གསུམ་སྟེ་ལམ་བཞི་པོ་ལ་སློབ་བཞིན་པ་ནས་འཇུག་པ་དང༌།ལམ་དེ་དག་གི་རང་འབྲས་མཐར་ཕྱིན་ནས་འཇུག་པ་ལ་སོགས་པའི་ཚུལ་བརྗོད་པའི་ཆོས་སྒོ་མང་དུ་ཡོད་ན་ཡང་འདིར་དོན་གྱི་སྙིང་པོ་ལ་སྒྲིབ་པའི་ཕྱིར་དེ་དག་སྤྲོས་ཏེ་བརྗོད་པར་བྱ་བ་མིན་པས་མ་བཤད་དོ།།

གསུམ་པ་སྐབས་འདིར་གཏན་ལ་དབབ་བྱའི་དོན་ངོས་བཟུང་བ་ནི།

འདིར་ནི་དབང་པོ་རབ་འབྲིང་ཐ་གསུམ་ལས།།

རབ་མཆོག་སྦྱངས་པ་མཐར་སོན་སྐལ་ལྡན་ཏེ།།

དབང་བསྐུར་ཐོབ་པས་སྡོམ་གསུམ་ཅིག་ཅར་སྐྱེས།།རྟོགས་གྲོལ་དུས་མཉམ་ཨིནྡྲ་བོ་དྷི་བཞིན།།

འབྲིང་ནི་སྡོམ་གསུམ་སོ་སོའི་ཆོ་ག་ལ།།བརྟེན་ནས་རིམ་ཐོབ་ནཱ་གརྫུ་ན་ལྟར།།

ཐ་མ་སྐལ་དམན་ཤིན་ཏུ་གདུལ་དཀའ་དེ།།

གསོ་སྦྱོང་བསླབ་པའི་གནས་བཅུ་གྲུབ་མཐའ་བཞི།།

བྱ་སྤྱོད་རྣལ་འབྱོར་རྒྱུད་ཀུན་རིམ་ཤེས་ནས།།བླ་མེད་འཇུག་པ་བརྟག་པ་གཉིས་པར་གསུངས།།

འདིར་ནི་དབང་པོ་འབྲིང་གི་ཚུལ་འཆད་དེ།།དགེ་སློང་དགེ་ཚུལ་དགེ་བསྙེན་སྡོམ་ལྡན་དེ།།

རྡོ་རྗེ་འཛིན་པའི་རབ་འབྲིང་ཐ་ཡིན་ཞེས།།

ཕུར་པའི་རྒྱུད་དང་དུས་འཁོར་ལས་གསུངས་ཤིང༌།།

འོན་ཀྱང་ཡེ་ཤེས་ལྡན་པ་གཙོ་བོར་བཟུང༌།།སྔ་འགྱུར་རྒྱུད་སྡེའི་རྩ་བ་ཀུན་འདུས་ལས།།

རང་དང་གཞན་དོན་ཕན་པ་ཆེ་བཤད་པ།།སོ་ཐར་སེམས་བསྐྱེད་དབང་བསྐུར་ཉིད་ཡིན་ཏེ།།

སོ་སོར་འཛིན་ན་ཉན་ཐོས་བྱང་སེམས་དང༌།།

རིག་པ་འཛིན་པ་ཞེས་སུ་མཁས་ལ་གྲགས།།

དེ་ལྟར་ཐུན་མོང་སྡོམ་པ་འོག་མ་གཉིས།།འདིར་ནི་བླ་མེད་དབང་གི་ཡན་ལག་ཏུ།།

རྒྱུད་སྡེ་རྒྱ་མཚོར་བཤད་ལྟར་འདིར་འཆད་དོ།།

སྐབས་འདིར་ནི་ཐེག་པ་ཐམས་ཅད་ཀྱི་ལམ་གྱི་གནད་སྡོམ་པ་གསུམ་དུ་འདུས་ཤིང༌།དེ་ལ་བཀྲི་ཚུལ་དབང་པོའི་ཁྱད་པར་གྱིས་རབ་འབྲིང་ཐ་གསུམ་དུ་ཡོད་ལ།དེ་དག་ལས་སྔགས་ལ་འཇུག་པའི་ཚུལ་དབང་པོ་ཡང་རབ་མཆོག་ཏུ་གྱུར་པ་སྔོན་ཚོགས་གཉིས་ཀྱི་སྦྱངས་པ་མཐར་སོན་པའི་སྐལ་བ་དང་ལྡན་པ་དེ།ཚེ་འདིར་ལམ་ཐུན་མོང་བས་རྒྱུད་སྦྱོང་བ་ལ་མ་ལྟོས་པར་དབང་བསྐུར་ཐོབ་པ་ཙམ་གྱིས་སྡོམ་པ་གསུམ་ཅིག་ཆར་དུ་སྐྱེ་བ་ཡིན་ཏེ།སྔགས་བླ་མེད་ཀྱི་སྡོམ་པ་གང་ཞིགགཞན་གནོད་གཞི་བཅས་སྤངས་པ་སོ་ཐར།གཞན་ཕན་གཞི་བཅས་སྒྲུབ་པ་བྱང་སེམས།དེ་ཉིད་མཉམ་པ་ཆེན་པོའི་ཡེ་ཤེས་ཀྱིས་ཟིན་པ་གསང་སྔགས་ཀྱི་སྡོམ་པའི་ངོ་བོ་ཡིན་པས།དཔེར་ན་དབང་དོན་གྱི་ཡེ་ཤེས་རྟོགས་པ་དང་རྒྱུད་གྲོལ་བ་དུས་མཉམ་པ་ཨོ་རྒྱན་གྱི་རྒྱལ་པོ་ཨིནྡྲ་བྷུ་ཏིས་ཐུབ་པའི་དབང་པོ་ལ་འདོད་ཡོན་མ་སྤང་བར་སངས་རྒྱས་ཐོབ་པའི་ཐབས་ཞུས་པས།སྟོན་པས་དེར་དཀྱིལ་འཁོར་སྣང་བར་མཛད་ནས་དབང་བསྐུར་བའི་དུས་དེ་ཉིད་དུ་ཟུང་འཇུག་གི་སྐུ་བརྙེས་པ་བཞིན་ནོ། །དབང་པོ་འབྲིང་ནི་འདུལ་བ་ལས་བྱུང་བའི་ལས་ཆོག་ལ་བརྟེན་ནས་སོ་ཐར་རིགས་བདུན་གྱི་སྡོམ་པ་གང་རུང་ནོད་དེ།སྲོལ་གཉིས་གང་རུང་གི་ཆོ་གས་བྱང་སྡོམ་དང༌།གསང་སྔགས་ཕྱི་ནང་གི་ཆོ་གས་སྔགས་སྡོམ་སྟེ།གསུམ་པོ་སོ་སོའི་གཞུང་གི་ཆོ་ག་ལ་བརྟེན་ནས་རིམ་པ་བཞིན་ཐོབ་པའི་ཚུལ་མགོན་པོ་ནཱ་ག་རྫུ་ནའི་རྣམ་པར་ཐར་པ་ལྟར་རིག་པར་བྱའོ། །དབང་པོ་ཐ་མ་སྔོན་དང་ད་ལྟར་ཚོགས་གཉིས་བསགས་པའི་སྐལ་བ་དམན་པ་ཤིན་ཏུ་གདུལ་བར་དཀའ་བ་དེ་རྣམས་རིམ་གྱིས་ལམ་ལ་བཀྲི་དགོས་པས།དང་པོ་འཁོར་བའི་ཉེས་དམིགས་དང་ཐར་པའི་ཕན་ཡོན་བཤད་ནས་གསོ་སྦྱོང་ཡན་ལག་བརྒྱད་པའི་དུས་ཁྲིམས་ནོད་ཅིང་དེའི་རྗེས་སུ་དགེ་བསྙེན་གྱི་སྡོམ་པ་དང༌།དགེ་ཚུལ་གྱི་བསླབ་པའི་གནས་བཅུ་ནས་དགེ་སློང་གི་སྡོམ་པའི་བར་བྱིན་ནས་གྲུབ་མཐའ་བཞིའི་དང་པོ་བྱེ་མདོ་གཉིས་ཀྱིས་བདག་མེད་གཏན་ལ་དབབ་ཚུལ་ལ་གོམས་སུ་བཅུགདེ་རྗེས་སེམས་བསྐྱེད་ནས་དབུ་སེམས་གཉིས་ཀྱི་ལྟ་བ་ལ་སེམས་སྦྱོང་མཐར།རང་རང་གི་དབང་བསྐུར་སྔོན་དུ་འགྲོ་བས་གཙང་སྦྲའི་སྤྱོད་ལམ་དང༌།བཟླས་བརྗོད་སོགས་ལུས་ངག་གི་བྱ་བ་གཙོ་བོར་སྟོན་པ་བྱ་བའི་རྒྱུད་དང༌།ལུས་ངག་གི་བྱ་བ་དང་སེམས་ཀྱི་ཏིང་ངེ་འཛིན་མཉམ་དུ་སྟོན་པ་སྤྱོད་པའི་རྒྱུད།སེམས་ཀྱི་ཏིང་ངེ་འཛིན་གཙོ་བོར་སྟོན་པ་རྣལ་འབྱོར་གྱི་རྒྱུད་ཀུན་གྱི་ལྟ་སྒོམ་སྤྱོད་གསུམ་གྱིས་བསྡུས་པའི་ཉམས་ལེན་རྣམས་རིམ་པར་ཤེས་ཤིང་ཉམས་འོག་ཏུ་ཆུབ་པར་བྱས་ནས་ཐབས་ཤེས་གཉིས་སུ་མེད་པའི་རྣལ་འབྱོར་བདེ་བ་ཆེན་པོས་ཁྱད་པར་དུ་བྱས་པའི་ཐབས་སྟོན་པ་ནང་རྒྱུད་བླ་མེད་ཀྱི་དབང་གིས་སྨིན་པར་བྱས་ནས་བསྐྱེད་རྫོགས་ཟུང་འཇུག་གསུམ་གྱི་རྒྱུད་སྡེ་ལ་རིམ་གྱིས་འཇུག་པར་བྱ་བའི་ཚུལ།ཀྱེ་རྡོ་རྗེ་བརྟག་པ་གཉིས་པའི་ཕྱི་མ་འདུལ་བའི་ལེའུ་ལས་གསལ་བར་གསུངས་ཏེ།དེ་ལས།

དང་པོ་གསོ་སྦྱོང་སྦྱིན་པར་བྱ།།དེ་རྗེས་བསླབ་པའི་གནས་བཅུ་ཉིད།།

དེ་ལ་བྱེ་བྲག་སྨྲ་བ་བསྟན།།མདོ་སྡེ་པའང་དེ་བཞིན་ནོ།།

དེ་ནས་རྣལ་འབྱོར་སྤྱོད་པ་ཉིད།།དེ་ཡི་རྗེས་སུ་དབུ་མ་བསྟན།།

སྔགས་ཀྱི་རིམ་པ་ཀུན་ཤེས་ནས།།དེ་རྗེས་ཀྱེ་ཡི་རྡོ་རྗེ་བསྟན།།ཞེས་སོ།།

དེ་དང་མཐུན་པར་ཕུར་པ་ཞེ་སྡང་ཁྲོས་པའི་རྒྱུད་ལས་ཀྱང༌།

སོ་སོར་ཐར་པ་དང་པོར་སྦྱིན།།དེ་ལ་ཉན་ཐོས་ཆོས་རྣམས་བསྟན།།

དེ་ནས་བྱང་ཆུབ་སྡོམ་ཆེན་སྦྱིན།།དེ་ལ་དབུ་མའི་ཆོས་རྣམས་བཤད།།

མཐར་ནི་འབྲས་བུ་ཐེག་ཆེན་གྱི།།དབང་སྦྱིན་འབྲས་བུའི་རྒྱུད་འདི་བཤད།།ཅེས་སོ།།

དེ་དག་ལས་བསྟན་བཅོས་འདིར་ཇི་སྐད་བསྟན་པའི་དོན་ངོས་བཟུང་བ་ནི།སྐབས་འདིར་ནི་བསྟན་པར་བྱ་བ་དབང་པོ་འབྲིང་གི་ཚུལ་ཡིན་པས་དེ་འཆད་པར་བྱ་བ་ཡིན་ཏེ།སོ་ཐར་གྱི་རྟེན་ལ་དབང་བསྐུར་ཐོབ་པའི་གང་ཟག་དགེ་སློང་དང༌།དགེ་ཚུལ་དང༌།དགེ་བསྙེན་གྱི་སྡོམ་པ་དང་ལྡན་པ་དེ་རྡོ་རྗེ་འཛིན་པའི་རབ་དང༌།འབྲིང་དང་ཐ་མ་ཡིན་ནོ་ཞེས་རྟེན་གྱི་དབང་གིས་རིམ་པ་བཞིན་ཕུར་པའི་རྒྱུད་དང་དུས་འཁོར་རྩ་རྒྱུད་ལས་མཐུན་པར་ཇི་སྐད་དུ།

གསུམ་ལས་དགེ་སློང་མཆོག་ཡིན་འབྲིང༌།།དགེ་ཚུལ་ཞེས་བྱ་དེ་དག་ལས།།

ཁྱིམ་ན་གནས་པ་ཐ་མའོ།།ཞེས་གསུངས་ཤིང༌།སྔགས་སུ་མ་ཟད་བྱང་སྡོམ་གྱི་རྟེན་ཀྱང་ཁྱིམ་པ་ལས་རབ་ཏུ་བྱུང་བ་འཕགས་ཏེ།མདོ་སྡེའི་རྒྱན་ལས།

རབ་ཏུ་བྱུང་བའི་ཕྱོགས་དག་ནི།།ཡོན་ཏན་ཚད་མེད་རྣམས་དང་ལྡན།།

དེ་ལྟས་སྡོམ་བརྩོན་ཁྱིམ་པ་ཡི།།བྱང་སེམས་རྣམས་ལས་མཆོག་ཏུ་བཤད།།ཅེས་སོ།།

དེ་དག་ནི་སྤྱིར་བཏང་ཡིན་ལ།འོན་ཀྱང་ཡེ་ཤེས་དང་ལྡན་པ་སྟེ་ས་ཐོབ་པ་ལ་སོགས་པའི་ཡོན་ཏན་ཁྱད་པར་ཅན་རྒྱུད་ལ་ཡོད་པ་ནི་གཙོ་བོར་གཟུང་བར་བྱ་བ་དམིགས་བསལ་ཏེ།དུས་འཁོར་ལས།

ས་ཐོབ་མ་གཏོགས་ཁྱིམ་པ་ནི།།རྒྱལ་པོའི་བླ་མར་མི་བྱ་སྟེ།།

ཞེས་གསུངས་པའི་ཕྱིར་དང༌།འདུལ་བ་ལུང་ལས།

རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ཅིང༌།།

དུལ་ཞིང་ཡང་དག་སྡོམ་ལ་ཚངས་པར་སྤྱོད།།

འབྱུང་པོ་ཀུན་ལ་ཆད་པ་སྤང་བ་སྟེ།།

དགེ་སློང་དགེ་སྦྱོང་དེ་ཡིན་་་་་་་་་་།ཞེས་གསུངས་པའི་ཕྱིར་རོ།།དེ་ལྟར་བསྟན་པའི་སྡོམ་པ་གསུམ་པོ་ངོས་བཟུང་བ་ནི།སྤྱིར་སྡོམ་པ་གསུམ་གྱི་ཐ་སྙད་སོ་ཐར་གྱི་སྐབས་བསླབ་ཚིགས་གསུམ་དང༌།བྱང་སྡོམ་གྱི་སྐབས་སྡོམ་སྡུད་དོན་བྱེད་གསུམ་དང༌།སྔགས་སུ་སྐུ་གསུང་ཐུགས་ཀྱི་དམ་ཚིག་གསུམ་ལ་བཞག་པ་སོགས་མང་དུ་སྣང་མོད་ཀྱང༌།སྐབས་འདིར་བསྟན་པར་བྱ་བ་ནི་སྔ་འགྱུར་གྱི་རྒྱུད་སྡེའི་རྩ་བར་གྱུར་པ་ཀུན་འདུས་རིག་པའི་མདོ་ལས།རང་དོན་ཞི་བདེ་ཙམ་དང༌།གཞན་དོན་དུ་རྫོགས་པའི་བྱང་ཆུབ་སྒྲུབ་པར་འདོད་པ་དང༌།གཞན་ལ་ཕན་པ་རླབས་ཆེན་པོ་སྒྲུབ་པའི་ཕྱིར་མྱུར་དུ་ཟུང་འཇུག་གི་གོ་འཕང་སྒྲུབ་པར་འདོད་པ་གསུམ་ལ་སྡོམ་པ་གསུམ་ཞེས་ཇི་སྐད་དུ།

དེ་ལྟར་སྡོམ་པ་གསུམ་པོ་ཡང༌།།རང་དང་གཞན་དོན་ཕན་པ་ཆེ།།ཞེས་བཤད་པ་ནི།སོ་ཐར་གྱི་སྡོམ་པ་དང༌།སེམས་བསྐྱེད་ཀྱི་སྡོམ་པ་དང༌།དབང་བསྐུར་བ་ལས་ཐོབ་པའི་སྔགས་ཀྱི་སྡོམ་པ་སྟེ་གསུམ་པོ་ཉིད་ཡིན་ལ།དེ་ཡང་འདུལ་བ་དང༌།མདོ་སྡེ་དང༌།སྔགས་ཀྱི་སྡེ་སྣོད་དེ།སོ་སོའི་བསྟན་དོན་ལྟར་ཀུན་སློང་དང༌།ཆོ་ག་དང༌།དུས་དང༌།སྤང་བྱ་རྣམས་གང་ཟག་ཐ་དད་པས་སོ་སོར་འཛིན་ན་སྔ་མས་ཉན་ཐོས་དང༌།བར་པས་བྱང་ཆུབ་སེམས་དཔའ་དང་།ཕྱི་མ་ལ་རིག་པ་འཛིན་པ་ཞེས་སུ་མཁས་པ་རྣམས་ལ་གྲགས་མོད།འོན་ཀྱང་ཀུན་སློང་གི་དབང་གིས་མ་ངེས་ཏེ།སྡོམ་གསུམ་རབ་དབྱེར།

བསམ་པ་སེམས་བསྐྱེད་ཀྱིས་ཟིན་པའི། །ཆོ་ག་ཉན་ཐོས་ལུགས་བཞིན་གྱིས།།

སོ་སོར་ཐར་པ་རིགས་བརྒྱད་པོ། །བྱང་སེམས་སོ་སོ་ཐར་པར་འགྱུར།།

ཞེས་གསུངས་ལ།དེའི་ཤུགས་ཀྱིས་སྔགས་སྡོམ་རྒྱུད་ལྡན་གྱིས་སོར་སྡོམ་བླངས་ན་སྔགས་ཀྱི་ཐུན་མོང་མ་ཡིན་པའི་སོར་སྡོམ་དུ་འགྱུར་དགོས་པ་བཞིན་ནོ། །བཤད་མ་ཐག་པ་དེ་ལྟར་རྒྱུའི་ཐེག་པ་གོང་འོག་དང༌།བྱང་སྔགས་གཉིས་ཀྱི་ཐུན་མོང་དུ་གྱུར་པའི་སྡོམ་པ་འོག་མ་སོ་བྱང་གཉིས་པོ་སྐབས་འདིར་ནི་སྔགས་བླ་མེད་ཀྱི་དབང་གི་ཡན་ལག་ཏུ་འགྲོ་བའི་ཚུལ་བསྟན་པ་ཡིན་ཏེ།སོ་བྱང་གི་སྡོམ་ལྡན་དེས་སྔགས་སྡོམ་བླང་བའི་ཚེ་སོ་ཐར་སྔགས་ཀྱི་ཉེས་སྤྱོད་སྡོམ་པ་དང༌།བྱང་སྡོམ་རྣམ་སྣང་གི་དམ་ཚིག་ཏུ་འགྱུར་བ་གང་ཞིགསྔགས་བླ་མེད་ཀྱི་སྤྱི་དང་ཁྱད་པར་ལྷག་པའི་དམ་ཚིག་ལས་སྤྱིའི་དམ་ཚིག་ཏུ་སོ་བྱང་དང་སྔགས་ཕྱི་རྒྱུད་ཀྱི་དམ་ཚིག་ཐམས་ཅད་ཚང་བའི་ཕྱིར་དང༌།དེར་མ་ཟད་སྡོམ་པ་འོག་མ་གཉིས་སྔོན་དུ་མ་སོང་བའི་རྡོ་རྗེ་འཛིན་པའི་རྒྱུད་ལའང༌།དབང་བསྐུར་བ་ཁོ་ནས་ཐོབ་པའི་སོ་བྱང་གི་སྡོམ་པ་ཡོད་པར་འགྱུར་ཏེ།ཇི་སྐད་དུ།

སོ་སོར་ཐར་དང་བྱང་ཆུབ་སེམས།།རིག་འཛིན་ནང་གི་སྡོམ་པའི་ཚོགས།།

མ་ལུས་བདག་གིས་ཡོངས་སུ་བཟུང༌།།ཞེས་པ་ལ་སོགས་པས་དབང་གི་སྔོན་འགྲོའི་དུས་སུ་ཁས་བླངས་པའི་ཕྱིར་དང༌།མཉམ་པ་ཆེན་པོའི་དམ་ཚིག་དང་ལྡན་པའི་རིག་པ་འཛིན་པའི་རྒྱུད་ལ་འོག་མའི་འདུལ་སྡོམ་ཐམས་ཅད་ངང་གིས་འདུ་བའང་ཡིན་ཏེ།རྩ་རྒྱུད་སྙིང་པོ་ལས།

བླ་མེད་མཆོག་གི་དམ་ཚིག་ཏུ།།འདུལ་བའི་དབང་གིས་ཚུལ་ཁྲིམས་དང༌།།

ཇི་སྙེད་སྡོམ་པ་བསམ་ཡས་པ།།མ་ལུས་ཀུན་འདུས་རྣམ་པར་དག།ཅེས་དང༌།

རྔམ་གློག་ལས།

དགེ་སློང་བྱང་ཆུབ་སེམས་དཔའ་དང༌།།རྣལ་འབྱོར་རྣལ་འབྱོར་ཆེན་པོ་ཡིན།།ཞེས་དང༌།འཁོར་ལོ་སྡོམ་པའི་རྒྱུད་ལས།

སོ་སོ་ཐར་དང་བྱང་ཆུབ་སེམས།།རིག་འཛིན་ཉིད་ཀྱི་དགེ་སློང་ངོ༌།།

ཞེས་པ་ལ་སོགས་པའི་རྒྱུད་སྡེ་རྒྱ་མཚོ་ནས་ཇི་ལྟར་བཤད་པ་ལྟར་བསྟན་བཅོས་འདིར་ཡང་འཆད་པར་བྱེད་དོ།།

ལྔ་པ་ལེའུ་འོག་མ་གསུམ་གྱི་སྡོམ་ནི།

སྡོམ་གསུམ་སོ་སོར་ཁོག་དབུབ་གླེང་གཞི་དང༌། །དང་པོར་སྡོམ་པ་མ་ཐོབ་ཐོབ་པའི་ཚུལ།།

བར་དུ་ཐོབ་པ་མི་ཉམས་སྲུང་བའི་ཐབས། །ཐ་མར་ཉམས་ན་གསོ་ཚུལ་བཞི་རེས་སྡོམ།།

དེ་ལྟར་སྡོམ་གསུམ་སྤྱིའི་རྣམ་གཞག་བསྟན་ནས།སོ་སོའི་དོན་བསྡུས་པའི་སྒོ་ནས་ཤེས་པའི་ཕྱིར་སྡོམ་བསྟན་པ་ནི།སྡོམ་པ་གསུམ་པོ་སོ་སོའི་བྱུང་ཚུལ་དང༌།ངོ་བོ་དང་དབྱེ་བའི་སྒོ་ནས་ཁོག་དབུབ་པའི་གླེང་གཞི་དང༌།དང་པོ་སྡོམ་པ་མ་ཐོབ་པ་ཆོ་ག་ལ་སོགས་པའི་སྒོ་ནས་ཐོབ་པའི་ཚུལ་དང༌།བར་དུ་ཐོབ་པའི་སྡོམ་པ་དེའི་བསྲུང་བྱའི་རྣམ་གྲངས་བཤད་པས་མི་ཉམས་པར་སྲུང་བའི་ཐབས་དང༌།ཐ་མར་ལྟུང་བ་འབྱུང་བའི་སྒོ་བཞིའི་དབང་གིས་ཉམས་ན་སླར་གསོ་བའི་ཚུལ་ཏེ་བཞི་རེས་སྡོམ་དུ་བསྡུས་ནས་བཤད་པ་ཡིན་ནོ།།

སྡོམ་གསུམ་སྤྱིའི་བཤད་གཞིའི་རིམ་པར་ཕྱེ་བ་སྟེ་དང་པོའོ།།།།

སྡོམ་གསུམ་སྤྱིའི་བཤད་གཞིའི་རིམ་པར་ཕྱེ་བ་སྟེ་དང་པོའི་རྣམ་པར་བཤད་པའོ།།།།