གདན་རབས་དགུ་པ་གྲུབ་དབང་དཔལ་ཆེན་འདུས་པ་ནི།

༈གདན་རབས་དགུ་པ་གྲུབ་དབང་རིན་པོ་ཆེ་པདྨ་ཀུན་བཟང་བསྟན་འཛིན་ནོར་བུ་ནི།རྗེ་ཆོས་ཀྱི་ཉི་མའི་མནལ་ལམ་ལས།སྐུ་གདུང་བར་ཁང་ལྟ་བུ་རང་བཞུགས་པར་རྫོང་ནང་བླ་མ་ལྟ་བུ་ཞིག་གིས་འདིར་པདྨ་ནོར་བུ་བཞུགས་འདུག་གསུངས་པར་ཡར་གཟིགས་པས་མཆོད་རྟེན་བུམ་སྒོའི་ནང་པདྨ་ནོར་བུ་དབུ་དཀར་ཐིང་ངེ་བ་སོགས་ཇི་ལྟ་བར་བཞུགས་འདུག་པ་བཞེངས་ནས་སྐུ་རྩར་ཕེབས་པའི་ཚེ་བྱིས་པ་ཆུང་ངུ་ཞིག་ཏུ་སོང་བ་རྨིས་པས་ད་ལྟའི་སྤྲུལ་སྐུ་འདི་ཇི་ལྟ་བར་འདུག་པ་དང༌།གོང་མ་གྲུབ་དབང་པདྨ་ནོར་བུ་གཤེགས་ཁར་ཉིད་ཀྱི་གཟིམ་སྐྱིལ་རྩར་ཤུག་སྡོང་ཡོད་པ་འདི་ལ་ཤུག་འབྲས་ཆགས་འོང་དུས་འདིར་ངའི་སྐྱེ་བ་ཞིག་གདན་ས་འདིར་འོང་གསུངས་པ་ལྟར་ཤུག་འབྲས་བྱུང་ནས་ལོ་ཤས་གྱུར་པ་དང་འགྲིགས།

འཇམ་མགོན་རྡོ་རྗེ་འཆང་སོགས་བླ་མ་དམ་པ་རྣམས་ཀྱི་དགོངས་བརྟགས་ཕྱོགས་མཐུན་ཐག་བཅད།མཁན་ཆེན་ངག་དགའ་རིན་པོ་ཆེས།སྤྲུལ་གཞི་ཕྱག་ན་རྡོ་རྗེ།ཆོས་བློན་མགར་དམ་པ།རྒྱལ་སྲས་དམ་འཛིན་ལྷ་རྗེ།ལྷ་ལུང་དཔལ་གྱི་རྡོ་རྗེ།གཏེར་ཆེན་སངས་རྒྱས་གླིང་པ།གྲུབ་དབང་པདྨ་ནོར་བུ།རྡོ་གྲུབ་ཀུན་བཟང་གཞན་ཕན།དེའི་ཡང་སྲིད་གྲུབ་ཆེན་ཕུན་ཚོགས་འབྱུང་གནས་སོགས་ཀྱི་སྐྱེ་བ་ཡིན་པར་ལུང་བསྟན་པ་ཉིད་རབ་ཚེས་མེ་ཕག་ལ་མཚན་དཔེ་གསར་དུ་བཞད།དགུང་གྲངས་བདུན་པ་ནས་དཔལ་ཡུལ་གདན་སར་སྤྱན་དྲངས།དགུང་གྲངས་དགུ་ནས་ཨོ་རྒྱན་རིན་པོ་ཆེས་ཞལ་གཟིགས་ཤིང་བྱིན་གྱིས་བརླབས་པའི་མཚན་མ་བརྙེས།རྗེ་ཆོས་ཀྱི་ཉི་མ་ལས་རབ་ཏུ་བྱུང་ཞིང་མཚན་པདྨ་ཀུན་བཟང་བསྟན་འཛིན་ནོར་བུ་ཞེས་པ་གསོལ།རཏྣའི་གཏེར་ཆོས།གནམ་ཆོས་སོགས་ཀྱི་སྨིན་གྲོལ་ལན་མང་དང༌།དགོངས་འདུས།བཀའ་བརྒྱད་གཉིས།འཇའ་ཚོན།ཀར་གླིང་ཞི་ཁྲོ་སོགས་གདན་ས་འདིའི་རྒྱུན་ཡོད་རིགས་ཐམས་ཅད་དང༌།འདུས་མདོ་ཁམས་དབུས་གཉིས་ཀའི་ལུགས་སྲོལ་དང་བཀའ་མའི་སྐོར་རྒྱུན་ཡོད་པ་ཐམས་ཅད་གསན།དཔལ་སྤུངས་བླ་མ་བཀྲ་ཤིས་ཆོས་འཕེལ་ལས་རྒྱལ་བའི་བཀའ་འགྱུར་རིན་པོ་ཆེ་གསན།མཁན་རྒྱལ་མཚན་འོད་ཟེར་ལས་དཔལ་སྤུངས་སྐྱབས་མགོན་རིན་པོ་ཆེ་དང་མཉམ་པོར་རིན་ཆེན་གཏེར་མཛོད་སྨིན་གྲོལ་རྒྱབ་རྟེན་བཅས་གསན།དཔལ་ཀཿཐོག་ཏུ་ཕེབས་ནས་མཁན་རིན་པོ་ཆེ་ཀུན་དཔལ་མདུན་དང༌།མཁན་རིན་པོ་ཆེ་ངག་དགའ་རྣམ་གཉིས་མདུན་ནས་མདོ་སྔགས་ཀྱི་གཞུང་བརྒྱ་ཕྲག་ཉེ་བ་གསན་ནས་དེའི་དོན་རྣམས་རྣམ་དཔྱོད་བསམ་པས་གཏན་ལ་ཕབ།ཀཿཐོག་སི་ཏུ་རིན་པོ་ཆེ་ཆོས་ཀྱི་རྒྱ་མཚོ་ལས་གདམས་ངག་མཛོད་སོགས་དང་གཏེར་རྙིང་རྒྱུན་དཀོན་པ་མང་པོ་གསན།

ཁྱད་པར་ཉིད་ཀྱི་རིགས་བདག་ཐུན་མོང་མ་ཡིན་པ་མཁན་ཆེན་ངག་དབང་དཔལ་བཟང་པ་ོལས་ཞི་མཚོའི་སྡོམ་རྒྱུན་ལས་བསྙེན་པར་རྫོགས།མཚན་ཐུབ་བསྟན་ཆོས་ཀྱི་གླང་པོར་གསོལ།འདུལ་བའི་གནང་བཀག་ལ་སྲུང་སྡོམ་མིག་ལྟར་གནང་བས་ཀུན་སྤྱོད་གཙང༌།རྫོགས་ཆེན་སྙན་བརྒྱུད་ཀྱི་ཁྲིད་བཏབ་པས་ཐེག་མཆོག་རྡོ་རྗེ་རྩེ་མོའི་དགོངས་པའི་རྩལ་རྫོགས།སྔོན་ཆད་ཟབ་ཁྲིད་གསན་པ་ཐམས་ཅད་གོ་བ་ཙམ་དུ་མ་གྱུར་ཅིང་ཀ་དག་གི་རིག་སྟོང་རྗེན་པའི་ཡེ་ཤེས་མངོན་དུ་གྱུར།འོད་གསལ་ཐོད་རྒལ་གྱི་ཉམས་སྣང་གོང་དུ་འཕེལ་བའི་མངོན་རྟགས་བརྙེས།རིག་འཛིན་འགྲོ་འདུལ་དཔའ་བོ་རྡོ་རྗེའི་མདུན་ནས་ཀློང་ཆེན་སྙིང་ཐིག་གི་ཟབ་ཁྲིད་ཡང་བསྐྱར་དུ་གསན་པས་ཐུགས་དམ་ལ་བོགས་ཐོན།ཕར་ལ་བཀའ་བརྒྱད།དགོངས་འདུས།ཁམས་ལུགས་འདུས་པ་མདོ་དབང་སོགས་ཕུལ།དགུང་ལོ་བཅོ་བརྒྱད་སྐོར་རྒྱ་ཕུ་བྲག་དཀར་དུ་ཀུན་མཁྱེན་མི་ཕམ་རིན་པོ་ཆེའི་མདུན་དུ་ཆོས་ཀྱི་ཉི་མ་དང་མཉམ་པོར་ཕེབས་ནས་ཞལ་མཇལ།ཁོང་གི་འཇམ་དཔལ་ཡེ་ཤེས་སེམས་དཔའི་སྐུ་རྟེན་དེས་དབང་རྫས་ཐམས་ཅད་ཀྱི་གོ་ཆོད་པར་མཛད་ནས།འཇམ་དཔལ་ཞི་བ།དྲག་པོ་ཚེ་བདག་བཅས་ཀྱི་དབང་གནང་ནས།ཐུགས་རྒྱུད་བྱིན་གྱིས་བརླབས།ཕྱིན་ཆད་སློབ་གཉེར་སྦྱོང་ནས་རྙིང་བསྟན་ལ་ཕན་པ་བྱ་དགོས་ཞེས་བཀའ་སློབ་གནང༌།དེ་ནས་དཔལ་སྤུངས་རི་ཁྲོད་དུ་འཇམ་མགོན་རིན་པོ་ཆེའི་མདུན་བཅར།མཆོག་གླིང་ཐུགས་སྒྲུབ་ཀྱི་དབང་གནང༌།ད་ཕྱིན་དབང་བྱེད་སྐབས་འདི་དང་འདི་འདྲ་བ་དགོས་ཞེས་བསླབ་སྟོན་མང་པོ་བསྩལ།ཕྱིན་ཆད་དབང་ལུང་འཆད་སྤེལ་དགོས་གསུངས།དགུང་གྲངས་ཉི་ཤུ་ལོར་རྗེ་ཆོས་ཀྱི་ཉི་མ་སྐུ་གཤེགས་པས་ཁོང་གི་མདུན་ནས་བདེར་འདུས་ཀྱི་ལུང་དེ་མ་ཐོབ་པའི་འགྱོད་པ་རྒྱུན་ལྡན་ཡོད་པས་བག་ཆགས་ལྟ་བུས་ནུབ་གཅིག་རྗེ་ཆོས་ཀྱི་ཉི་མས་བཀའ་བརྒྱད་ཀྱི་ལུང་ཡོངས་རྫོགས་ཞག་གསུམ་གྱི་བར་དུ་ལྷག་ཆད་མེད་པར་གནང་བའི་རྨི་ལམ་རྨིས་པས་སྔོན་ཆད་ཀློག་འདི་དེ་ཙམ་ལས་ལེགས་པོ་མི་ཤེས་པ་ཞིག་ཡིན་ཀྱང་དེ་ཕྱིས་ཡི་གེ་འདོན་ཤེས་པ་འདི་བྱུང་ཞེས་བདག་ལ་གསུངས།

ལུང་གི་བརྒྱུད་པ་རྗེ་ཆོས་ཀྱི་ཉི་མ་ལ་གཏུགས་ཀྱང་ཆོག་མོད་དེ་མ་བྱས་ན་ཤ་ཐང་བླ་མ་རྡོ་རྗེ་སློབ་དཔོན་ཚེ་བརྟན་མདུན་ནས་ཞུས་པ་ཡིན་གསུངས།ཀཿཐོག་སི་ཏུ་ནས་རྗེ་ཆོས་ཀྱི་ཉི་མས་ཐུགས་རྒྱུད་ཀྱི་ཡེ་ཤེས་རྗེ་འདི་ལ་འཕོས་པ་ཡིན་ཅེས་གསུངས།སློབ་མ་ཕྱོགས་ཐམས་ཅད་ནས་མང་དུ་འདུས་པ་རྣམས་ལ་གནམ་ཆོས་རྫོགས་ཆེན་དང༌།ཁྱད་པར་བླ་མ་ལུང་རྟོགས་ཀྱི་ཁྲིད་རྒྱུན་མཁན་ངག་གི་དབང་པོའི་གསུངས་ལྟར་གནང་བས་བརྒྱུད་འཛིན་མང༌།གནམ་ཆོས།རཏྣ།བཀའ་དགོངས།འདུས་མདོ་སོགས་སྨིན་གྲོལ་རྒྱུན་པར་ཉིན་མཚན་སྦྲེལ་ནས་གནང་བའི་ཐུགས་བརྩོན་མཛད།རིན་ཆེན་གཏེར་མཛོད་ཆེན་པོའི་དབང་ལུང་ཁས་ལེན་མཛད་པ་དང་པོར་གནང་དུས་སྔོན་དུ་རྡོར་སེམས་སྒྲུབ་པ་མཛད།དེའི་དངོས་གྲུབ་ལེན་སྐབས་ཤིག་གཟིམ་ལམ་དུ་མཁན་རིན་པོ་ཆེ་རྒྱལ་མཚན་འོད་ཟེར་ནས་མཁར་རྔ་ཞིག་གི་ནང་དུ་དུང་དཀར་ལྔ་བཞག་གནང་བའི་སྤྱན་ལམ་གསལ་བས་བླ་མས་གནང་བ་ཐོབ་པའི་ངེས་ཤེས་སྐྱེས།དེ་རྗེས་གོ་འཇོ་སྐྱིད་པོ་དགོན་དུ་སྨིན་གྲོལ་ལན་གཅིགའདི་སྐབས་ལུང་གསུངས་མི་ཁང་སྤྲུལ་རིན་པོ་ཆེས་མཛད།གོ་འཇོ་རྒྱ་ར་དགོན་དུ་ལན་གཅིགའདི་སྐབས་རྨུགས་སངས་བླ་མ་ཀུན་བཟང་དཔལ་འབྱོར་ནས་ལུང་གསུངས།མཆོག་སྤྲུལ་རིན་པོ་ཆེ་དང༌།སྐུ་ཆེན་རིན་པོ་ཆེ་གཉིས་གཙོས་འདུས་པ་མང་བར་ས་ལུག་ལོར་ཚར་གཅིག་གནང་སྐབས་ལུང་ཡང་རིན་པོ་ཆེ་ཉིད་ནས་གསུངས།

མཁན་རིན་པོ་ཆེ་ངག་དབང་དཔལ་བཟང་ནས་མ་གསན་པའི་རིགས་ཕུལ་བ་བཅས་བརྩིས་པའི་གཏེར་མཛོད་དབང་ལུང་ཚར་ལྔ་གསུངས་པ་དུང་དཀར་ལྔ་གནང་བའི་རྟེན་འབྲེལ་དེ་ཡིན་འདྲ་གསུངས།ཆུང་དུས་གནས་རྒྱབ་འཚོ་བྱེད་དོན་གྲུབ་ལས་གསོ་རིག་གསན།དཔལ་སྤུངས་གྲང་ཉིན་ཚེ་དབང་མདུན་ནས་སྒྲ་ཀཱ་ལ་པཱ་སྡེབ་སྦྱོར་བཅས་གསན།ཀཿཐོག་དགེ་ཚ་འདུལ་འཛིན་བླ་མ་མཁྱེན་རབ་འོད་ཟེར་ལས་སྐར་རྩིས་ཡོངས་རྫོགས།ནག་རྩིས་སྐོར་དང༌།རྒྱ་དཀར་ནག་གི་ས་དཔྱད་བཅས་གསན།ཕྱིས་ཆུ་བླ་བསོད་ནམས་ཚེ་བརྟན་ལས་སྙན་ངག་གསན་ནས་ཀུན་མཁྱེན་འཇིགས་གླིང་ཁོ་ནར་བསྔགས་པའི་དཔེ་བརྗོད་མཛད།ཤ་ཐང་ཚེ་བརྟན་བླ་མ་དང༌།དིས་བླ་མདོ་སྔགས་བསྟན་དར་སོགས་ལས་དཔལ་ཡུལ་རང་ལུགས་ཀྱི་དཀྱིལ་འཁོར་ལག་ལེན།གདངས་དབྱངས་རྣམས་གསན་ནས།དཔལ་ཡུལ་དབྱངས་ཡིག་གསར་བཀོད་མཛད་པ་སྤར་དུ་བསྒྲུབས།ཀཿཐོག་དབུ་མཛད་རྨོངས་ཕན་དང༌།གྱོ་ཁར་དབུ་མཛད་གྲགས་མཆོགབྲག་ནག་དབུ་མཛད་ཀུན་བཟང་མཐུ་སྟོབས་སོགས་ལས་སྨིན་གླིང་ཁམས་དབུས་གཉིས་ཀྱི་གདངས་དབྱངས་ལག་ལེན་རྣམས་གཟིགས་པས་དཀྱིལ་འཁོར་ལག་ལེན་དབུ་མཛད་ཅིག་ལ་སུས་ཀྱང་འགྲན་ཟླ་མེད་ཅིང་གཞན་ལའང་སློབ་སྦྱོང་གི་བསྐུལ་མ་མཛད།རྒྱུན་པར་རྒྱུད་གསང་སྙིང༌།ཡོན་མཛོད།སྡོམ་གསུམ་བཅས་ནི་ཆད་མེད་དུ་གནང༌།སློབ་ཚོགས་མང་དུ་འཛོམས་སྐབས་ཉིན་མཚན་སྦྲེལ་ནས་སྔོན་འགྲོ་རྒྱས་བཤད་དང༌།ཁྲིད་འདེབས་པ་སོགས་ལ་ཐུགས་བརྩོན་ཆེན་པོས་འོ་བརྒྱལ་ལ་མི་འཛེམ།གཞན་གྱིས་ཅི་ཞུས་ཀྱང་དེ་ལྟར་གནང་བ་ལས་བློ་སུན་པ་གཅིག་ཀྱང་མི་མཛད།ཐ་ན་ཡིག་བྲིས་ནས་བཟུང༌།ཐུན་མོང་རིག་གནས་སྒྲ་སྙན་རྩིས་སོགས་ལན་གྲངས་མང་པོ་གནང༌།ཅུང་ཟད་ཤེས་པ་ལའང་ལེགས་པོའི་བསྔགས་བརྗོད་མཛད།བརྡ་གོའི་གཙུག་ལག་ཁང་རྟེན་བརྟེན་པར་བཅས་ལ་གོས་དཀར་མོས་གསོལ་བ་ལ་ལྷ་སྤྲུལ་རིན་པོ་ཆེས་ཆ་རྐྱེན་གནང་བ་བཅས་ཀྱི་ལྷ་ཁང༌།མགོན་ཁང༌།གཟིམས་ཁང་བཅས་རྟེན་དང་བརྟེན་པར་གསར་བཞེངས་གནང༌།སྙིང་ཐིག་གཏེར་པོད།མཁན་ངག་དགའི་གསུང་སྐོར།ཉེར་མཁོའི་འདོན་ཆ་སོགས་གསུང་རབ་སྤར་མང་པོ་གསར་བཞེངས་མཛད།མཛོད་ཆེན་རྣམ་ལྔ་སོགས་སྤར་བྲིས་ཀྱི་གསུང་རྟེན་ཤིན་ཏུ་མང་པོ་བཞེངས།རབ་ཚེས་ཆུ་ཁྱི་ལོར་དཔལ་ཡུལ་བཤད་གྲྭ་གསར་འཛུགས་མཛད།གསང་སྔགས་གླིང་པའི་ལུང་བསྟན་ལས།

དཔལ་ཡུལ་སྒྲུབ་པའི་སྡེ་ལ་བཤད་གྲྭ་འབྱུང་༔

སྔར་མེད་མདོ་ཆོས་མང་པོ་དར་ནས་འོང་༔

གསུངས་པ་ལྟར་མདོ་སྔགས་གཞུང་ལུགས་མང་པོ་འཆད་ཉན་མཛད་པའི་དགེ་འདུན་ལྔ་བཅུ་ཐོག་མར་བཙུགས།དེ་ལ་ཕོག་ཐེབས་དགོས་འདོད་སྦྱོར་འཇགས་མཛད།སྙིང་ཐིག་ཆོས་བཀའ་གཙང་མར་འཛིན་པའི་གོ་འཇོ་སྦ་ནག་དགོན་གསར་འདེབས་མཛད།དེའི་དབུ་འཛིན་དུ་ཁང་ནང་བཀྲ་ཤིས་ཕུན་ཚོགས་ཀྱི་སྤྲུལ་སྐུ་དཔེ་ཝར་ནང་དུ་འཁྲུངས་པ་བཤད་སྒྲུབ་རྒྱ་མཚོ་བསྐོས་བཞག་མཛད།འདི་ནི་འདུལ་བའི་ཀུན་སྤྱོད་གཙང་ཞིང༌།རྩ་གསུམ་རབ་འབྱམས་ཀྱི་བསྙེན་པ་རྟགས་ཐོན་ཐེབས་ཅིང༌།ཁྱད་པར་གནམ་བྲག་དགོན་དུ་བཀའ་བརྒྱད་བསྙེན་ཆེན་གཏོང་སྐབས།རིག་སྟོང་རྗེན་པའི་ཡེ་ཤེས་མངོན་དུ་མཐོང་བས་གྲུབ་དབང་བླ་མ་དམ་པས་ངོ་སྤྲོད་དང་ལེགས་པོས་མངའ་གསོལ།དེང་ཕྱིན་ཆད་བཀའ་བརྒྱད་དང༌།འཇམ་དཔལ་ཚེ་བདག་ཡི་དམ་དུ་བཟུང་བས་ནུས་པ་ཤིན་ཏུ་ཆེ་བས་ཁང་ནང་འདྲེ་འདུལ་དུ་གྲགས།དེའི་ཡང་སྲིད་ད་ལྟ་འཚོ་གཞེས་བརྟན་པའོ།།

བསམ་འགྲུབ་གཞུང་དུ།གྲུབ་དབང་དམ་པའི་རྩ་བའི་སློབ་མ་མཁན་ཀརྨ་བཀྲ་ཤིས་ལ་ཞལ་བཀོད་གནང་བས་རི་ཁྲོད་གསར་འདེབས་དང༌།ཆོས་འཆད་ཉན་ཡོད་པའི་བཤད་གྲྭ།སྒྲུབ་གྲྭ་བཅས་སྙིང་ཐིག་རང་ལུགས་ཀྱི་དགོན་སྡེ་གྲྭ་གཙང་ཉུང་ངུ་ཞིག་ལ་ངོ་མཚར་བ་གྲུབ་དབང་ཡང་སྲིད་རིན་པོ་ཆེའི་གཅུང་ཨ་འཇམ་བསྐོས་བཞག་གནང༌།བརྡ་གོར་སྙིང་ཐིག་དཔལ་ཆེན་འདུས་པའི་སྒྲུབ་ཆེན་ཉིན་བཅུ་མ།རིགས་བཞིའི་སྒོས་སྒྲུབ་ཀྱི་ཟུར་འཚོགས།སྦྱིན་སྲེག་ཁག་ལྔ་བཅས་ཀྱི་ལག་ལེན་ཐམས་ཅད་སྨིན་ལུགས་ཕྱག་བཞེས་དངོས་གཙང་དང༌།སྒྲུབ་ཆེན་ཟིན་བྲིས་ཆེན་མོ་བཅས་གསར་གནང་མཛད།ཐུགས་ཆེན་སྡུག་བསྔལ་རང་གྲོལ་སྒྲུབ་པ་ཞག་བདུན་མ་དང༌།སྙིང་ཐིག་གི་འདོན་ཆ།སྒྱུ་འཕྲུལ་ཞི་དྲགདཔག་མེད་མྱུར་ལམ་བླ་མཆོད།ཞི་ཁྲོ་ངན་སོང་སྦྱོང་བ་སོགས་ཀྱི་སྒྲུབ་མཆོད་ཉིན་གསུམ་མ་སོགས་བཙུགས།དེ་རྣམས་ལ་མཆོད་ཐེབས་ཡོ་བྱད་སོགས་གསར་བསྐྲུན་མཛད།མགོན་ཁང་དུ་སྔར་ལུགས་ཀྱི་བསྐང་གསོ་དུས་དྲུག་ཆ་འཕར་བཅས་འདོན་རྒྱུན་བཙུགས་ཤིང་བསྐང་གསོ་པོད་ཆེན་གསར་བསྒྲིགས་མཛད།ཉི་ལོག་དང༌།ལོ་མཇུག་སོགས་ལ་བཀའ་བརྒྱད་བདེ་གཤེགས་འདུས་ཆེན།བྱང་གཏེར་ཚེ་བདག་ཁྲོ་ཀིང་གཉིས༌།བདུད་འདུལ་ཕུར་པ།ཡུམ་ཀའི་སེང་གདོང༌།རོལ་པ་ཆེན་པོའི་གཏོར་བཟློག་སོགས་ལོ་བསྟར་གྱི་འདོན་རྒྱུན་བཙུགས།རྒྱུན་པར་ཡར་མར་ཚེས་བཅུ་ལ་རིག་འདུས།ཡུམ་ཀསྙིང་ཐིག་བསྐང་གསོ་རྒྱུན་འདོན་བཅས་སྙིང་ཐིག་གི་དགོན་པ་དངོས་གཙང་བཙུགས་པར་མཛད།དཔལ་ཡུལ་ཉེ་ཕྱོགས་སུ་སོ་སོས་སྒྲུབ་པ་འཛུགས་ཡུལ་ལྷ་ཁང་གསར་བཞེངས་རྣམས་ལ་ཚོགས་ཐེབས་གནང༌།རག་ཆབ་དགོན་དུ་འདུ་ཁང་སྒྲོས་ལེགས་གསར་བཞེངས་ནང་སྟོན་པ་རིན་པོ་ཆེ་དང༌།གནས་རྟེན་བྲག་རི་མ་གསེར་ལྗིབ་བྱུག་ཅན་དངོས་གཙང་བ་བཞེངས།དེ་ལ་མཆོད་རྫས་སོགས་ཉེར་མཁོ་རྣམས་ཀྱིས་བཀོད་བསྒྲིགས་མཛད།

མདོ་སྔགས་གཞུང་འགྲེལ་ཆོག་ཁྲིགས་སོགས་གསུང་རྩོམ་ཡང་པོད་ཆེན་དྲུག་ཙམ་བཞུགས།དབང་ལུང་འཆད་སྤེལ་དང་དུས་མཆོད་སྐབས་སོགས་མ་གཏོགས་བཅད་རྒྱ་ཁོ་ན་དང༌།ཁྱད་པར་ལྕགས་འབྲུག་ལོ་ནས་བཟུང་ལོ་གསུམ་བར་སྡུག་བསྔལ་རང་གྲོལ་བསྙེན་པ་ཁོ་ནར་བཏང་ནས་བཅད་རྒྱར་བཞུགས།ལྕགས་ལུག་ལོར་བཞེངས་ནས་དགོན་དུ་བཀའ་བརྒྱད་སྨིན་གླིང་ལུགས་ལྟར་གྱི་སྨན་སྒྲུབ་འཛུགས་པའི་ཚོགས་དབུར་ཕེབས།དེ་ནས་ཀཿགནས་ཀྱི་ཆིངས་བསྡུམ་དུ་ཚེས་བཅུ་གཤིས་ཕེབས།དེའི་སྟོན་པོར་ཕྱག་རྫས་ཐམས་ཅད་སྤང་དག་གི་ཚུལ་དུ་བརྡ་གོར་དཔལ་ཆེན་འདུས་པའི་ཐེབས་དང༌།དགོན་པའི་རྒྱ་ཚོ་བཞིར་ལོ་ལྟར་སྨིན་གླིང་རྡོར་སེམས་སྒྲུབ་ཆེན་དངོས་རོལ་བཅས་བཏང་བའི་ཐེབས་རྒྱ་སྒོར་སྟོང་ལྷག་རེ་བཞག་པ་སོགས་དགེ་རྩར་སྨིན་པར་མཛད།སྐུ་ཉིད་བྱ་བྲལ་ཀུན་སྤངས་ཀྱི་ཚུལ་དུ་དབེན་གནས་མཁར་ཆུ་བྲག་ཏུ་བཞུགས་ནས་སྐུ་སྙུང་པའི་ཚུལ་མཛད།དེ་ནས་མཁན་རྡོ་རྗེ་འཆང་གི་ཆོས་སྒར་སྙན་ཤུལ་དུ་ཕེབས་ནས་དགུང་གྲངས་ཞེ་དྲུག་རབ་རྒྱལ་ཆུ་སྤྲེལ་ནག་པ་ཟླ་བའི་ཚེས་གསུམ་ལ་དགོངས་པ་ཞི་དབྱིངས་སུ་གཏད།དགོངས་རྫོགས་སུ་སྐུ་ཆེན་རིན་པོ་ཆེ་དང༌།རྒྱལ་སྲས་འགྱུར་མེད་རྡོ་རྗེ་གཉིས་ཕེབས་ནས་སྐུ་གདུང་ཞུགས་ལ་འབུལ་བའི་ཚེ་ངོ་མཚར་རྟགས་དང་རིང་བསྲེལ་མང་ དུ་བྱུང༌།གདན་ས་འདིར་དགོངས་རྫོགས་མཆོད་འབུལ་དང༌།གསེར་གདུང་ཐོག་ཚད་བཞེངས་ནས་འདུ་ཁང་ཆེན་པོའི་གཡོན ་ཕྱོགས་སུ་བཞུགས་པའོ།།

བཀའ་གཏེར་ཆོ༵ས་ཀྱི༵་ཁུར་ཆེན་པོ།།འདེགས་བཟོད་སྤོས་ཀྱི་གླང༵་པོ༵་ནི།།

རིས་མེད་རྒྱལ་བསྟན་པད་ཚལ་དུ། །མཛེས་པར་བྱུང་བའི་ངོ་མཚར་སྣང༌།།

ཞེས་གདན་རབས་དགུ་པའོ།།།།

མཆོག་སྤྲུལ་ཐུབ་བསྟན་ཆོས་ཀྱི་ཟླ་བ་ནི།

༈གདན་རབས་དངོས་སུ་མི་བགྲངས་ཀྱང་གདན་ས་འདིར་བཀའ་དྲིན་ཆེ་བ་མཆོག་སྤྲུལ་རིན་པོ་ཆེ་ཐུབ་བསྟན་འཇིགས་མེད་བཤད་སྒྲུབ་ཆོས་ཀྱི་ཟླ་བ་འཇམ་དཔལ་དགྱེས་པའི་རྡོ་རྗེ་ནི།ཀུན་བཟང་ཤེས་རབ་ཀྱི་དབོན་རྒྱུད་རྫོང་ནང་བླ་མ་ཀརྨ་ལྷ་དབང་གི་སྤྲུལ་པ་གཟི་སྤྲུལ་འཇམ་དབྱངས་ཤེས་རབ་ཆོས་ཀྱི་སྣང་བའི་སྤྲུལ་པའི་སྐུ་རིན་པོ་ཆེ་རབ་ཚེས་ཤིང་རྟ་ལ།རྒྱ་སྤྲུལ་རིན་པོ་ཆེ་འཁྲུངས་ཡུལ་རྒྱ་རོང་རྒྱ་ཁ་ཕྱོགས་སུ་འཁྲུངས།ལྷ་སྤྲུལ་རིན་པོ་ཆེ་སོགས་ཀྱིས་གཟི་སྤྲུལ་ཆོས་ཀྱི་སྣང་བའི་སྤྲུལ་པར་ངོས་བཟུང་མཛད་ནའང༌།གཙང་སྐོར་གྲུབ་ཆེན་བྱམས་པ་ཆོས་འཛིན་སོགས་ཕལ་ཆེ་བས་རྒྱ་སྤྲུལ་རིན་པོ་ཆེའི་སྤྲུལ་པ་འཁྲུལ་མེད་ཡིན་པར་གསུངས།སྐུ་ན་ཕྲ་བ་ནས་དཔལ་ཡུལ་དུ་གོང་མའི་གདན་སར་གསེར་ཁྲིར་མངའ་གསོལ།རྗེ་ཆོས་ཀྱི་ཉི་མ་ལས་བཀའ་ཆོས་ཅི་རིགས་པ་གསན།ཁྱད་པར་ལྷ་སྤྲུལ་རིན་པོ་ཆེ་ལས་དཔལ་ཡུལ་རང་ལུགས་ཀྱི་སྨིན་ཁྲིད་དང་དབང་ལུང་གི་རྒྱུན་གང་བཞུགས་གསན།མཁས་དབང་བསོད་ནམས་དཔལ་ལྡན་དང༌།རྡོ་གྲུབ་མཁན་པོ་ཀམ་མེ་སོགས་ལས་མདོ་སྔགས་ཀྱི་གཞུང་ལུགས་རབ་འབྱམས་གསན་ནས་སྐྱེས་ཐོབ་ཀྱི་མཁྱེན་རབ་ཚད་ལས་འདས་པའི་སྟེང་སྦྱང་སྟོབས་ཀྱི་ཐུགས་བརྩོན་ཆེ་བས་མཁས་པའི་ཕུལ་དུ་ཕྱིན།སེ་ར་རྗེ་བཙུན་གྱི་བག་ཆགས་སད་པའི་རྐྱེན་གྱིས་གསར་ཕྱོགས་ལ་ཐུགས་འདུན་ཆེ་བས་རྗེ་རིན་པོ་ཆེའི་བཀའ་འབུམ་དང་མཛོད་བདུན་ཚང་མ་རེ་འབྲལ་སྤང་མཛད།ཀཿཐོག་སི་ཏུ་རིན་པོ་ཆེ་ལས་ཞི་འཚོའི་སྡོམ་རྒྱུན་ལས་བསྙེན་པར་རྫོགས་པས་མཚན་ཐུབ་བསྟན་འཇིགས་མེད་བཤད་སྒྲུབ་ཆོས་ཀྱི་ཟླ་བ་ཕྲིན་ལས་རབ་རྒྱས་དཔལ་བཟང་པོར་གསོལ།འདུལ་བ་འཛིན་པའི་དཔེར་འོས་ཤིང༌།དགོངས་འདུས་སྒྲུབ་དབང་གསན།གྲུབ་དབང་ཐུབ་བསྟན་ཆོས་ཀྱི་གླང་པོ་ལས་ཕྱག་རྫོགས་ཀྱི་ཁྲིད་ཡོངས་རྫོགས་དང༌།རིན་ཆེན་གཏེར་མཛོད་སྨིན་གྲོལ་རྒྱབ་བརྟེན་བཅས་གཙོར་བྱས་པའི་བཀའ་གཏེར་གྱི་སྨིན་གྲོལ་རྒྱ་མཚོ་ལྟ་བུ་གསན།གཞི་བྱེས་གོང་དུ་བྱོན་བཞུགས་མཛད་ཀྱང་ཉིན་གཅིག་ལྟར་གྱི་ཐུགས་དམ་བཅས་ཁྲིད་ལས་དུས་ནམ་ཡང་འདའ་བ་མེད།བཀའ་གཏེར་རྩ་གསུམ་སྲུང་མ་བཅས་པ་ལ་བསྙེན་སྒྲུབ་མཛད་པ་གྲངས་ཀྱིས་མི་ཆོད།དེ་དག་གི་སྐབས་སུ་སྒྲུབ་པའི་རྟགས་མཚན་གསལ་བ་གོར་མ་ཆགས་ཀྱང་གསང་བ་བརྟན་པས་ཟུར་ཙམ་ཡང་མི་གསུངས།སྔ་ཕྱི་མགོ་ལོགགསེར་ཐར།རྒྱ་རོང་ཕྱོགས་སུ་འགྲོ་དོན་ལ་བྱོན་སྐབས་དབང་ཁྲིད་སོགས་གནང་བ་གྲངས་ཀྱིས་མི་ཆོད།དེ་ཕྱོགས་དགོན་པ་རྣམས་བདེ་གཟར་སྐབས་སོགས་སུ་ཉམས་གུད་སོང་བ་སླར་གསོ་བའི་རྟེན་ཐེབས་གནང་བ་རྒྱ་ཆེ་བས་དཔལ་ཡུལ་བའི་བསྟན་རྒྱུན་ལ་བཀའ་དྲིན་ཚད་ལས་འདས།

དཔལ་ཡུལ་དགོན་ལ་ཕྱག་ཕྲེང་གིས་རྟེན་གསུམ་ལ་གནོད་ཚེ་བྱུང་བ་རྣམས་སླར་གསོས།ལྕགས་དྲྭ་ལྷ་གསར་ཁང་སྟེང་དུ་གསེར་བཟང་གི་རྒྱ་ཕིབས་སྒྲོས་གདན་བཙུགས།རྟེན་ལ་རབ་གནས་དང༌།འདུས་པར་ཕྱག་འགྱེད་ལན་གྲངས་མཛད།ཨ་མདོའི་ཡུལ་ཚུན་གསར་རྙིང་རིས་མེད་ཀྱི་ཆོས་སྡེ་རྣམས་ལ་བསྙེན་བཀུར་དང་ཕྱག་འགྱེད་གནང༌།དར་ཐང་དགོན་དུ་གསེར་ཁང་ལྷ་ཁང་གསར་བཞེངས་ནང་རྟེན་གསུམ་གྱིས་བཀང༌།བར་སྐབས་རྒྱ་མིའི་འཚེ་བས་དགོན་པ་སྟོངས་ལ་ཉེ་བ་ཙམ་བྱུང་བ་ཉམས་གསོས་དང༌།སྐུ་རྟེན་མང་པོ་དང༌།བཀའ་བསྟན་གཙོས་པའི་ཡི་གེ་པོད་བརྒྱ་ཕྲག་མང་པོ་བཞེངས།མཐོན་མགོ་བླ་བྲང་གསར་དུ་བཞེངས་ནས་སྐུ་ཚེ་དེར་བཞུགས།དགོན་དེར་དགེ་ཚུལ་སློང་སུམ་བརྒྱ་ཙམ་གྱིས་དབྱར་གནས་ཚུགས།བཤད་གྲྭ་གསར་དུ་བཞེངས་ནས་མདོ་སྔགས་གཞུང་ལ་འཆད་སྤེལ་མཛད།ལྕགས་འབྲུག་ལོར་དཔལ་ཡུལ་དུ་བྱོན།ཀཿཐོག་མཁན་རིན་པོ་ཆེ་ལེགས་བཤད་འབྱོར་ལྡན་མདུན་ནས་མདོ་དབང་སྦྲང་རྩིའི་ཆུ་རྒྱུན་སོགས་དབང་ཆོས་མང་དུ་གསན།ལྕགས་སྦྲུལ་ལོར་གོ་འཇོའི་ཕྱོགས་སུ་བྱོན་ནས་དགོན་སྡེ་རྣམས་ལ་དབང་ཆོས་ཀྱི་འབྲེལ་པ་བཞགརག་སྤྲུལ་རིན་པོ་ཆེའི་མདུན་ཕེབས་ནས་ཐུགས་ནང་གཤིན་པའི་གསུང་ཕྲོས་དང་དབང་ཆོས་ཕྲན་བུ་གནང༌།ཡུལ་དབུས་དག་པའི་ཞིང་དུ་གནས་གཟིགས་ལ་ཕེབས།ཆོས་འཁོར་གསུམ་སོགས་གནས་དང་རྟེན་ལ་མཆོད་འབུལ་གཟབ།སེ་འབྲས་དགའ་གསུམ།བཀྲ་ཤིས་ལྷུན་པོ།མཚུར་ཕུ།རྒྱུད་སྟོད་སྨད་སོགས་ལ་མང་ཇ་དང་ཕྱག་འགྱེད་གནང༌།རྡོར་སྨིན་དཔལ་རི་གཙོས་རྙིང་ལུགས་ཀྱི་ཆོས་སྡེ་ཆེ་ཕྲ་རྣམས་ལ་འོས་བབས་དང་བསྟུན་པའི་བསྙེན་བཀུར་རྒྱས་སྤྲོས།མང་ཇ་དང་ཕྱག་འགྱེད་གནང་ནས་ཕྱིར་ཕེབས།

ཆུ་ལུག་ལོར་དཔལ་ཡུལ་གྲུབ་དབང་ཡང་སྲིད་རིན་པོ་ཆེ་གཙོས་སྒོ་ཆེན་སྤྲུལ་སྐུ་གཉིས་དང༌།གོ་དགོན་སྤྲུལ་སྐུ་རྣམས་དང༌།ཀཿདཔལ་མཁན་པོ་རྣམས་བཅས་འདུས་པ་སུམ་བརྒྱ་སྐོར་ལ་རིན་ཆེན་གཏེར་མཛོད་ཀྱི་སྨིན་གྲོལ་གནང༌།ལུང་ཐམས་ཅད་དཔལ་ཡུལ་མཁན་པོ་བློ་གྲོས་ནས་གསུངས།བརྡ་གོར་གྲུབ་དབང་རིན་པོ་ཆེ་ཡང་སྲིད།རྫོང་ནང་མཆོག་སྤྲུལ་འཇམ་བློ་སོགས་ལ་གནམ་ཆོས་སྔོན་འགྲོ་གསུངས།མཁན་རིན་པོ་ཆེ་ལེགས་འབྱོར་ཕེབས་པ་སོགས་ལ་གཏེར་མཛོད་བཀའ་རྒྱའི་སྐོར་གྱི་དབང་ལུང་དང༌།བཀའ་མ་སྨན་ལྷའི་དབང་སྨྱོས་སྟོན་ཡིག་ཆ་ལྟར་གསུངས།གྲུབ་དབང་ཡང་སྲིད་རིན་པོ་ཆེ་སོགས་ལ་རབ་བྱུང་དང༌།གཞན་མང་ཙམ་ལ་བསྙེན་རྫོགས་གནང༌།ཤིང་སྤྲེལ་ལོར་དར་ཐང་དགོན་དུ་བྱོན།གྲུབ་དབང་རིན་པོ་ཆེ་དང༌།མཆོག་སྤྲུལ་སོགས་ལ་གནམ་ཆོས་དབང་ལུང༌།སངས་རྒྱས་ལག་འཆང་གི་ཁྲིད།འོད་གསལ་ཐོད་རྒལ་དང་བཅས་པ།རཏྣའི་སྐོར་སོགས་ཀྱི་དབང་ལུང་སོགས་གནང༌།བླ་མ་པདྨ་འཇིགས་མེད་མདུན་ནས་རྒྱལ་བཀའ་རིན་པོ་ཆེ་གསན།རྒྱ་རོང་སྤྱན་གཟིགས་ཀྱི་གནས་དུང་རི་མཇལ་དུ་ཕེབས།དེ་ཙམ་ལས་བྱོན་བཞུད་མེད་པར་སྐུ་མཚམས་བཅད་རྒྱ་ཁོ་ནར་བཞུགས།ལྕགས་བྱ་ལོར་དུས་ཀྱི་འགྱུར་ལྡོག་སྐབས།ད་ནི་ཁོང་བསྡད་པས་ཕན་མི་འདུག་གསུངས་ནས་དགོངས་པ་གཞན་དུ་གཏད་པར་གསུངས་སྐབས།དར་ཐང་མཁན་རྒན་སོགས་ནས་བཞུགས་ཞུས་ཕུལ་བས་སྐབས་ཤིག་བཞུགས་པའི་ཞལ་གྱིས་བཞེས།ཕྱིས་དགུང་གྲངས་དྲུག་ཅུ་རེ་ལྔ་དྲུག་ཁེལ་དུས་བཅོས་བསྒྱུར་གྱི་དུས་འགྱུར་སྐབས་ད་ནི་བྱོན་རན་པའི་སྙན་འབུལ་བགྱིས་ཚེ་བཟང་སྤྱོད་དབུ་ནས་གསུངས་ཏེ།དེ་ཙམ་མོ། །ཞེས་པའི་མཚམས་སྐུ་ལ་སྙུན་ཟུག་ཆེར་མེད་པར་དགོངས་པ་ཆོས་དབྱིངས་སུ་བསྡུས་སོང་ཞེས་གསོལ་དཔོན་ཆུང་བ་ཁྲོ་ཆུ་བ་པདྨ་རྡོ་རྗེའི་ངག་འཕྲོས་ལས་ཐོས་སོ། །དེའི་ཡང་སྲིད་མེ་རྟ་ལོ་པ་འཕགས་ཡུལ་དུ་སྐུ་འཁྲུངས་པ་གྲུབ་དབང་ཡང་སྲིད་རིན་པོ་ཆེས་དབུ་འདོན་མཛད་བཞིན་བཞུགས་པའོ།།།།

རག་དགོན་མཆོག་སྤྲུལ་ཐུབ་བསྟན་བཤད་སྒྲུབ་རྒྱ་མཚོ་ནི།

༈དཔལ་ཡུལ་གདན་རབས་སུ་མི་བཞུགས་ཀྱང་རྗེ་ཆོས་ཀྱི་ཉི་མའི་ཐུགས་ཀྱི་བུ་ཆེན་གོ་འཇོ་རག་དགོན་མཆོག་སྤྲུལ་རིན་པོ་ཆེ་ཐུབ་བསྟན་བཤད་སྒྲུབ་རྒྱ་མཚོ་ནི་རབ་བྱུང་བཅོ་ལྔ་པ་ས་ཡོས་ལོར་འཁྲུངས།རྗེ་ཆོས་ཀྱི་ཉི་མ་ལས་རབ་བྱུང་བསྙེན་རྫོགས་ནས་བཟུང༌།ཐུན་མོང་སྔོན་འགྲོ།ཐུན་མིན་རྫོགས་ཆེན་སངས་རྒྱས་ལག་འཆང་གི་སྨིན་ཁྲིད།རིན་ཆེན་གཏེར་མཛོད་གཙོས་པའི་དཔལ་ཡུལ་བའི་ཆོས་རྒྱུན་བཀའ་གཏེར་ཡོངས་རྫོགས་གསན།བླ་མ་རྡོ་རྗེ་འཆང་འགྲོ་འདུལ་པའི་མདུན་ནས་སྙིང་ཐིག་གི་སྨིན་ཁྲིད་དང༌།གསང་མཛོད་སྐོར་དང༌།ཨོ་རྒྱན་རིན་ཆེན་གླིང་པའི་མདུན་ནས་རང་གཏེར་ཐུགས་སྒྲུབ་སོགས་གསན།རྨུགས་སངས་མཁན་པོ་ཤེས་བཟང་མདུན་ནས་སྤྱོད་འཇུགསྡོམ་གསུམ།མངོན་མཛོད།བྱམས་ཆོས་སྐོར་སོགས་གསན་པས་མཁས་པའི་གྲགས་པ་ཐོབ།མཁྱེན་སྤྲུལ་རིན་པོ་ཆེ་ཆོས་ཀྱི་བློ་གྲོས་མདུན་ནས་གདམས་ངག་མཛོད་གསན།རྨུགས་སངས་མཆོག་སྤྲུལ་བློ་གྲོས་མདུན་ནས་རྒྱལ་བཀའ་རིན་པོ་ཆེའི་ལྗགས་ལུང་གསན།མཁས་དབང་ཀརྨ་ཚེ་དཔལ་ལས་སུམ་རྟགས་དང་སྙན་ངག་གཟིགས་པ་སོགས་མདོར་ན་རྙིང་ཕྱོགས་ཀྱི་ཆོས་རྒྱུན་གཙོ་ཆེ་བ་རྣམས་མ་གསན་པ་མེད།ཕྱིས་སུ་སོག་ར་ནང་རྒྱུན་བཞུགས་དང༌།དབང་ལུང་འཆད་སྤེལ་མང་པོ་མཛད།སློབ་གྲྭ་གསར་འཛུགས་གནང༌།སྤྲོས་མེད་བྱ་བཏང་ཁོ་ནས་དུས་འདའ་བ་ཕྱིས་སུ་གང་ནའང་དེ་འདྲ་དཀོན།བདོག་པ་ཅུང་ཡོད་པ་ཡང་སྐུ་གསུང་ཐུགས་རྟེན་མང་པོ་བཞེངས།གཞན་བསྐུལ་མཛད་པ་རྣམས་ཀྱང་ཀུན་ནས་ཅི་གསུངས་བསྒྲུབས་པས་བསྟན་པ་ལ་བརྒྱུད་ནས་ཞབས་འདེགས་རྒྱ་ཆེ།ཁྱད་པར་དཔལ་ཡུལ་བའི་བསྟན་ཇུས་འདི་ལ་ཐུགས་ཀྱི་དཀྱིལ་ནས་གོང་འཕེལ་འབྱུང་ཐབས་དངོས་དང་བརྒྱུད་ནས་ཐུགས་བསྐྱེད་གནང༌།མང་ཐོས་འདུལ་འཛིན་འདི་འདྲ་ཞེས་བོད་ལྗོངས་ཡོངས་ལ་གྲགས་པས་ཁྱབ།སྐུ་ཚེ་དང་མཛད་པ་མཐར་ཕྱིན་གསུང་རྩོམ་ཡང་པོད་བཞི་ཙམ་བཞུགས།དུས་འགྱུར་སྐབས་ཀྱང་སྐྱོན་ཆེར་མ་ཤོར་བ་དགུང་གྲངས་གྱ་བཞི་ཆུ་བྱི་ལོའི་ཟླ་བ་ལྔ་པའི་ཚེས་བརྒྱད་ལ་དགོངས་པ་རྫོགས་སོ། །དེ་ནི་གདན་རབས་དངོས་མིན་ཀྱང་གདན་ས་འདི་དང་འདིར་གཏོགས་པ་རྣམས་ལ་བཀའ་དྲིན་ཆེ་བས་འཕྲོས་དོན་སྨོས་པའོ།།།།

རྫོང་ནང་རྗེ་དབོན་བླ་མ་ཀུན་བཟང་འགྱུར་མེད་ནི།

༈ཀུན་བཟང་ཤེས་རབ་ཀྱི་དབོན་བརྒྱུད་དུ་འཁྲུངས་པ་རྫོང་ནང་རྗེ་དབོན་བླ་མ་ཀུན་བཟང་འགྱུར་མེད་ནི་དཔལ་ཡུལ་གྲོ་བཞིན་ཕུག་ཐོག་ཅེས་པའི་ཁྱིམ་དུ་འཁྲུངས།སྐུ་ཆུང་ངུ་ནས་བསྟན་པའི་སྒོར་ཞུགས་ནས་རྗེ་ཆོས་ཀྱི་ཉི་མ་ལས་རབ་ཏུ་བྱུང༌།རྫོང་ནང་བླ་མ་བཀྲ་ཤིས་ཀྱི་དབུ་འདོན་མཛད།དཔལ་ཡུལ་རང་ལུགས་ཀྱི་དབང་ལུང་ཁྲིད་སོགས་གསན་ནས་ཉམས་བཞེས་མཛད།རྗེ་ཆོས་ཀྱི་ཉི་མ་གཤེགས་པའི་ཤུལ་དུ་གདན་ས་འདིའི་བསྟན་དོན་གྱི་འགན་ཁུར་བཞེས།རྗེ་གྲུབ་དབང་རིན་པོ་ཆེའི་ཞལ་ནས་རྗེ་ཆོས་ཀྱི་ཉི་མ་གཤེགས་ཤུལ་བླ་མ་ཁོང་ནས་བསྟན་དོན་བཞེས་པས་ཁོང་སོས་དལ་ཞིང་དབང་ལུང་འཆད་སྤེལ་གསན་བཞེས་སོགས་རང་གང་མོས་ཀྱི་དབང་ཆ་ཡོད་པ་འདི་བླ་མ་ཁོང་གི་བཀའ་དྲིན་ཡིན་ཞེས་ཡང་ཡང་གསུངས།ཐུགས་བསྐྱེད་ལྷག་བསམ་དཀར་བས་བསྟན་པར་ཕན་ཆེ།དཔལ་ཡུལ་དང༌།རྨུགས་སངས་གཉིས་སུ་དུང་འཁོར་རེ་གསར་བཞེངས་མཛད།དཀྱིལ་འཁོར་གྱི་ཕྱག་ལེན་གདངས་དབྱངས་འཆམ་རྣམས་ཤིན་ཏུ་མཁས།ལོ་མང་བར་སྒྱུ་འཕྲུལ་རྩ་འཆམ་གྱི་སློབ་དཔོན་མཛད།ལྕགས་ཁྱི་ལོར་རྒྱ་མི་ཨཾ་བྷན་དར་ནས་མདོ་སྨད་འདི་ཆོས་སྲིད་གཉིས་ཀྱི་དབང་ཆ་འཕྲོག་པའི་དུས་འབུལ་སྡུད་སོགས་ཀྱིས་དགོན་པའི་ཚེས་བཅུ་བུམ་སྒྲུབ།སྒྲུབ་མཆོད།ལྷ་ཕོག་སོགས་དགོས་མཁོ་རྣམས་ཁོང་ནས་ཕྱག་བསྟར་མཛད།གྲུབ་དབང་རིན་པོ་ཆེ་ལ་བརྩི་བཀུར་དང་དད་འདུན་ཆེ་ཞིང་ཞབས་འདེགས་གང་དགོས་བསྒྲུབས།གདན་ས་འདིའི་སྒྲིགས་སོགས་ལ་འཐུས་ཤོར་མེད་པར་མཛད།ཕྱིས་གཞུང་ས་ཆེན་པོས་རྒྱ་མི་མཐར་བསྐྲད་བཏང་ནས་མདོ་སྨད་སྲིད་པ་བདེ་བཀོད་དུས་མཆོད་ཐེབས་ཀྱིས་ཞིང་རྣམས་གོང་འཕེལ་འོང་བའི་ཐུགས་བསྐྱེད་དང་ལས་དོན་ལེགས་བསྒྲུབས་མཛད།རྗེ་ཆོས་ཀྱི་ཉི་མའི་ཡང་སྲིད་རིན་པོ་ཆེ་བསླུ་བདག་དང༌།གདན་སར་བཀོད་ཅིང་སྦྱོང་བརྩོན་དང༌།དབང་ལུང་གསན་བཞེས་ལ་བསྐུལ་ནན་མཛད།སྒྲུབ་མཆོད་ཀྱི་མཆོད་རྫས་གསེར་དངུལ་བཀྲ་མའི་བུམ་པ་ཆ་བཅུ་ཁ་རྒྱན་བཅས་པ་དང༌།མཆོད་ཏིང་ལྔ་བརྒྱ་སོགས་ཉེར་མཁོ་མང་པོ་བཞེངས།བསྟན་པའི་བྱ་བ་མཐར་ཕྱིན་ནས་གཤེགས།དགོངས་རྫོགས་ཐུགས་དམ་གསོ་བཀྲོལ་སོགས་གྲུབ་དབང་རིན་པོ་ཆེས་མཛད།

དེའི་ཡང་སྲིད་འཇམ་དཔལ་བློ་གྲོས་ནི།

དེའི་ཡང་སྲིད་རིན་པོ་ཆེ་འཇམ་དཔལ་བློ་གྲོས་བླ་མ་གོང་མའི་ཉེ་གནས་ཀྱི་གཞིས་ཉིན་མོ་ཚང་རྩར་འཁྲུངས་པ།གྲུབ་དབང་རིན་པོ་ཆེས་ངོས་འཛིན་གསལ་པོར་མཛད།སྐུ་ཆུང་ངུ་ནས་སྐུ་གཤིས་རང་བཞིན་གྱིས་བཟང༌།ཁུ་བོ་བླ་མ་འཇམ་དབྱངས་དང༌།མཁན་བློ་གྲོས་སོགས་ནས་སློབ་དཔོན་མཛད།སྐུ་ཆེན་རིན་པོ་ཆེའི་མདུན་གནམ་ཆོས།རཏ་གླིང༌།བཀའ་བརྒྱད་གསང་རྫོགས་དགོངས་འདུས་སྒྲུབ་དབང་སོགས་མང་པོ་དང༌།མཆོག་སྤྲུལ་རིན་པོ་ཆེ་ལས་རིན་ཆེན་གཏེར་མཛོད།མཁན་ལེགས་བཤད་འབྱོར་ལྡན་ལས་གདམས་ངག་མཛོད་སོགས་དང༌།མཁན་རིན་པོ་ཆེ་ནུས་ལྡན་མཁྱེན་བརྩེ་བློ་གྲོས་ཀྱི་གསར་བརྩམས་མདོ་འགྲེལ་གསན།ཀཿཐོག་མཁན་པོ་ཨ་ཤེར།ཞེ་ཆེན་མཁན་པོ་གང་ཤར།དཔལ་ཡུལ་མཁན་པོ་བློ་གྲོས་དང་མགོན་འགྲུབ་སོགས་ལས་གཞུང་དོན་མང་པོ་གཟིགས།ཡིག་བྲིས་ནས་བཟུང༌།དག་སྡེབ།སྙན་ངགནག་རྩིས།དཀྱིལ་འཁོར་གྱི་ལག་ལེན།གདངས་དབྱངས་སོགས་རང་ནས་ཕུལ་བས་རྣམ་དཔྱོད་བཟང༌།དར་ཐང་དགོན་དུ་སྔོན་མ་ལོ་གསུམ་ལ་མཆོག་སྤྲུལ་རིན་པོ་ཆེ་ལས་གནམ་ཆོས་རྫོགས་ཆེན་གྱི་ཁྲིད་སོགས་དབང་ལུང་རྒྱ་ཆེར་གསན།བླ་མ་པད་འཇིགས་ལས་རྒྱལ་བཀའ་རིན་ཆེན་སོགས་དང༌།མཁན་ངག་དགའི་གསུང་འཐོར་སྐོར་སོགས་མང་པོ་གསན།ཕྱིས་དར་ཐང་དགོན་ལོ་གསུམ་བཞུགས་ནས་བསྟན་པའི་ལས་འགན་བཞེས།དཔལ་ཡུལ་དུ་ལོ་མཇུག་དགུ་གཏོར་གྱི་འཆམ་ཆས་ཡོངས་རྫོགས་གསར་བཞེངས་མཛད།གུར་མོ་ཆེ་བཞེངས་པའི་རས་ཡོངས་རྫོགས་ལོན་ཀྱང་དུས་དབང་གིས་དངོས་བཞེངས་མ་གྲུབ་ནས་རྒྱུ་རྩ་དགོན་པ་སྤྱི་ལ་གནང༌།དུས་རྒུད་ཀྱིས་རྐྱེན་ནས་མེ་བྱ་ལོར་གོ་འཇོ་བརྒྱུད་རིམ་པར་འཕགས་ཡུལ་དུ་བྱོན་ནས་ད་ལྟ་རྒྱ་གར་བྱང་ཕྱོགས་སུ་ངེས་དོན་དགའ་ཚལ་གླིང་གསར་བཞེངས་དང་བསྟན་འགྲོའི་དོན་རླབས་ཆེན་པོ་སྒྲུབ་བཞིན་སླར་ཡང་ཐུགས་བསྐྱེད་བཟང་པོའི་དགྱེས་བརྩེའི་ཞལ་རས་དྲི་མེད་དངོས་མཇལ་འབྱུང་རྒྱུར་དགའ་བ་ཚད་མེད་དད་མོས་ཀྱི་སྤྲོ་བ་ཆེ་ཞིང༌།ཞབས་པད་བསྐལ་བརྒྱར་བརྟན་པར་སྙིང་ནས་གསོལ་བ་འདེབས་པའོ།།།།

དཔལ་ཡུལ་རྒན་མཁན་འཇམ་དཔལ་རྡོ་རྗེ་ནི།

༈དཔལ་ཡུལ་མཁན་རྒན་འཇམ་དཔལ་རྡོ་རྗེ་ནི།ཀུན་བཟང་ཤེས་རབ་ཀྱི་དབོན་རིགས་སུ་དཔལ་ཡུལ་ཨ་མཆོག་གདོང་མགུ་ཚང་རྩར་འཁྲུངས།ཆུང་ནས་ཨོ་རྒྱན་ཆོས་ཀྱི་ཉི་མ་ལས་རབ་ཏུ་བྱུང༌།རྨུགས་སངས་མཁན་ལས་རབ་རྡོ་རྗེ་ལས་ཐོག་མར་སྤྱོད་འཇུག་སྦྱངས།དེ་ནས་རྫོགས་ཆེན་མཁན་གཞན་དགའ་རིན་པོ་ཆེ་དང༌།མཁན་བསོད་ཆོས་སོགས་ལས་མདོ་སྔགས་གཞུང་ལུགས་མང་པོ་གསན་སྦྱོང་མཛད།ཁྱད་པར་ཀུན་མཁྱེན་བླ་མ་མི་ཕམ་རིན་པོ་ཆེའི་མདུན་ཡུན་རིང་ཙམ་བཞུགས་ནས་ཆོས་ཁྲིད་གསན།དཔལ་ཡུལ་དགོན་འདིར་གྲུབ་དབང་བླ་མས་སློབ་གྲྭ་ཆོས་འཁོར་ནོར་བུ་གླིང་གསར་བཞེངས་མཛད་པའི་ཐོག་མའི་མཁན་ངག་དགའ་རིན་པོ་ཆེས་མཛད།དེ་ནས་གྲུབ་དབང་རིན་པོ་ཆེ།དེ་མཚམས་རྫོགས་ཆེན་མཁན་རིག་འཛིན་འོད་ཟེར།དེ་མཚམས་ཁྲོ་སྐྱབས་དགེ་བཤེས།དེ་ནས་མཁན་རྒན་འདིས་ཡུན་རིང་ཙམ་དང༌།དེ་ནས་རྩ་མདོ་མཁན་པོ་དོན་གྲུབ།དེ་ནས་གདན་ས་འདིའི་མཁན་པོ་རྣམས་ཀྱིས་མཛད་ཀྱང་སློབ་གྲྭ་འདིའི་ཡ་ཕུག་འགོ་འཛིན་དང༌།ཁྱད་པར་དབྱར་གནས་ཀྱི་དབུ་འཛིན་སྐུ་མ་གཤེགས་བར་མཁན་རྒན་འདིས་མཛད།དབྱར་གནས་ཀྱི་ཉེར་མཁོ་རྣམས་གསར་བཞེངས་དང་བཏང་སྒོ་རྣམས་ལག་བསྟར་མཛད།སློབ་གྲྭ་ལྔ་བཅུ་ལ་ཆོས་གོས་དམར་སེར་རེ་དང༌།དགོངས་འདུས་གཙུག་ཞྭ་བཅས་ཆ་འགྲིགས་ལྔ་བཅུ།དབྱར་གནས་ཀྱི་སྟོང་མཆོད་གྲས་དངུལ་གྱི་བདུན་ཚར་སུམ་བརྒྱ།དངུལ་གྱི་མཚན་ཀོང་ཆེན་ལྔ་བཅུ།གསེར་ཀོང་ལྔ་བཅུ།དངུལ་གྱི་སྤོས་འཛིན་ལྔ་བཅུ།ཁུག་དྲུག་སྤོས་འཛིན་ལྔ་བཅུ།ཆུ་སྐྱེས་བུམ་པ་བླུག་མ་བརྒྱ།བཟང་གོས་ཀྱི་མེ་ཏོག་དེ་གྲངས།གསེར་དངུལ་བཀྲ་མའི་སྨན་རཀ་ཆ་བརྒྱ།སྨན་རཀ་མི་ཐོད་ཅན་དང་གཏོར་མ་བཅས་ཆ་འཛོམས་སྤུས་ལེགས་གསར་བཞེངས་མཛད།བསྟན་སྲིད་ལ་རྒྱར་འགན་ཁུར་ཆེ་བཞེས་དང༌།རྒྱ་མིའི་དབང་བསྒྱུར་སྐབས་སོགས་དགོན་པ་དབུ་ཐོན་པའི་ཐུགས་འགན་བཞེས།ཀརྨ་ཡང་སྲིད་རིན་པོ་ཆེ་ལ་གསང་ཆེན་རྙིང་རྒྱུད་རིན་པོ་ཆེའི་བཀླག་ལུང་ཕུལ།སྐབས་སུ་ཆོས་འཆད་ཉན་བཀའ་དྲིན་བསྐྱངས།མདོ་སྔགས་ཀྱི་གཞུང་སྤྱི་ལ་མཁས་ཤིང༌།ཁྱད་པར་ཕྱག་རྫོགས་ཀྱི་དམར་ཁྲིད་ལ་རང་བྱན་ཚུད་པས་སྒྲུབ་ཁང་གི་ཆོས་ཁྲིད་སྔོན་འགྲོ་དངོས་གཞི།ཁྲ་མུན་ཁྲིད་སོགས་ལ་ཐུགས་འགན་བཞེས་པས་སྒྲུབ་པའི་བསྟན་པར་ཕན་རླབས་ཆེ།སྐུ་ཚེ་དང་མཛད་ཕྲིན་མཐར་ཕྱིན་པའི་ངང་གཤེགས་པས་མཁན་རྒན་འདི་གལ་ཆེ་བས་སྨོས་པའོ།།།།