བཅུ་པ་སྔགས་དང་ཕྱག་རྒྱ་བཤད་པ།

བཅུ་པ་སྔགས་རྒྱ་ལ་གཉིས་ལས། དང་པོ་སྔགས་ནི།ཐབས་ཤེས་ཀྱི་ཡི་གེ་ཨ་ལི་ཀ་ལི་ཚོགས་པའམ་རྐྱང་པ་ཅི་རིགས་ལ་བཞག་པའི་གྲུབ་པ་བཞི་ལྡན་གྱི་ངག་གཙོ་བོར་གྱུར་པ་སྟེ། ཐུགས་ཐིག་ལས།ཡི་གེ་འདུས་པ་གྲུབ་པ་བཞི། །མཐུ་ཆེན་རེད་པ་གང་ཡིན་པ། །ཞེས་སོ། །གྲུབ་པ་བཞིའི་གྲངས་འདྲེན་ནི་སྔར་བཤད་པ་བཞིན་ཏེ། ཡི་གེའི་རང་བཞིན་མཐུ་བསམ་གྱིས་མི་ཁྱབ་པའི་ཆོས་དབྱིངས་སུ་གནས་པ་དང༌། སྒྱུ་མ་ཙམ་དུ་མིང་ཚིག་ཡི་གེ་ལ་བརྟེན་ནས་ཕན་གནོད་ཀྱི་བྱ་བ་སྣ་ཚོགས་འབྱུང་བ་བ་ལང་རྫིའི་བར་ལ་གྲགས་པ་དང༌། སྔགས་པས་སངས་རྒྱས་བྱང་སེམས་སོགས་མཐུ་ལྡན་རྣམས་ཀྱི་སྔགས་ཚིག་ཏུ་བྱིན་གྱི་བརླབས་པའི་རྗེས་སུ་འབྲངས་ནས་བཟླས་པས་ངག་ལ་ནུས་པ་ཕུལ་བྱུང་སྐྱེ་བ་དང༌། དེས་སྔགས་ཀྱི་ལྷའི་ཐུགས་རྒྱུད་འཁུལ་ནས་སྒོ་གསུམ་བྱིན་གྱིས་རློབ་པ་རྣམས་སོ།།སྤྱིར་ནི་སྔགས་ལ་ངག་ཁོ་ནས་མ་ཁྱབ་ཅིང༌། གསང་བདག་ཞལ་ལུང་ལས། ཐབས་ཤེས་ཀྱི་བདག་ཉིད་དེའི་སྒོ་ཡིག་འབྲུར་སྣང་བས་གསང་སྟེ་ངགཏུ་བརྗོད་པ་དང་བཅས་ཤིང་ཤེས་སྐྱོབ་ཀྱི་ལས་ཀྱིས་ལོག་རྟོག་གི་གཉེན་པོ་འགྱུར་བ་ནི་གསང་སྔགས། ཤེས་རབ་དང་ཡེ་ཤེས་ཀྱི་བདག་ཉིད་དངོས་པོའི་དོན་རིག་པར་བྱེད་པའི་ལས་ཀྱིས་མ་རྟོགས་པའི་གཉེན་པོར་གྱུར་པ་ནི་རིག་སྔགས། དྲན་པ་དང་ཤེས་རབ་ཀྱི་བདག་ཉིད་ཆོས་ཀྱི་ཚིག་དོན་མི་བརྗེད་པར་འཛིན་པའི་ལས་ཀྱིས་དྲན་ཉམས་ཀྱི་གཉེན་པོར་གྱུར་པ་ནི་གཟུངས་སྔགས་ཏེ། འདི་གསུམ་གྱི་རྟགས་ཀྱང༌། དང་པོ་ལྷ་ཕོའི་དབྱིབས་དང༌། ཕྱི་མ་གཉིས་ལྷ་མོའི་གཟུགས་སུ་བཞུགས་ཞེས་འབྱུང་ངོ་།།ཞེས་པ་ལྟར་གསུམ་དུ་དབྱེ་བ་སོགས་ཡོད་ཀྱང༌། རྩ་རྒྱུད་འདི་ཉིད་ལས་གསུངས་པའི་སྔགས་ཀྱི་རྣམ་གྲངས་ནི། གཞལ་ཡས་ཁང་བསྐྱེད་པའི་དང༌། ལྷ་བསྐྱེད་པའི་དང༌། ལས་ཀྱི་རིམ་པའི་སྔགས་ཏེ་གསུམ་ལས། དང་པོ་ནི། ཕོ་བྲང་གི་ས་བོན་དང༌། རྐྱེན་གྱི་སྔགས་གཉིས་རིམ་བཞིན་བྷྲཱུྃ་ཞེས་པ་དང་བི་ཤྭ་བི་ཤུ་དྡྷེ་ཞེས་པའོ།།གཉིས་པ་ལ་ཞི་ཁྲོའི་སྔགས་གཉིས་ལས། དང་པོ་ལའང༌། རྒྱུ་མ་ནོར་བ་རྩ་བའི་དང༌། བསྐྱེད་པ་རྐྱེན་གྱི་དང༌། བཟླས་པ་ལས་ཀྱི་སྔགས་སོ།།དང་པོ་ནི། གང་ཞིག་ཡོངས་སུ་གྱུར་པ་ལས་ལྷར་བསྐྱེད་པའི་ས་བོན་གྱི་སྔགས་ལ་ལྷ་སྐུའི་རྩ་བར་གྱུར་པའི་སྔགས་ཞེས་བརྗོད་པ་ཡིན་པས་གཞན་དུ་ཕྲེང་བའི་སྔགས་རྩ་བའི་སྔགས་སུ་བཤད་པ་སོགས་དང་མི་འདྲའོ། །དེ་ལའང༌། ལེའུ་བཞི་པ་ལས་གསུངས་པའི་ཡི་གེ་སྒྱུ་འཕྲུལ་དང༌། བདུན་པ་ལས་གསུངས་པའི་ཧཱུྃ་མཱུཾ་སོགས་རིགས་ཀྱི་ས་བོན་དུ་གྲགས་པ་གཉིས་དང༌། ཕྱི་མ་ལའང་མིང་ཡིག་དང་པོ་ཡིན་མིན་གཉིས་ཡོད་དོ།།གཉིས་པ་ནི། གང་ཞིག་བརྗོད་པའི་རྐྱེན་གྱིས་ཕྱག་མཚན་རྡོ་རྗེ་སོགས་ལས་ལྷའི་སྐུར་འགྱུར་བའི་རྐྱེན་གྱི་སྔགས་ཏེ། འདི་ལ་སྒྲུབ་ཐབས་སུ། ཧཱུྃ་སོགས་ས་བོན་དང་བཛྲ་དྷྲིཀ་སོགས་གཉིས་ཆར་ཚོགས་པ་འབྱུང་ཡང༌། འགྲེལ་པ་ལས་བཛྲ་དྷྲིཀ་སོགས་ཙམ་ལས་མ་བཤད་པས་བསྐྱེད་སྔགས་དང་བསྐྱེད་སྔགས་རྐྱང་པ་གཉིས་ལས་གསུམ་དུ་ཕྱེ་བའི་བསྐྱེད་སྔགས་ལ་རྐྱང་པ་ཁོ་ན་འཇོག་དགོས་སམ་སྙམ་མོ།། གསུམ་པ་ནི། ས་བོན་དང་བསྐྱེད་སྔགས་སྦྲེལ་བ་སྟེ། འདི་ནི་འཛབ་ཀྱི་ལས་ལ་འཇུག་ཆེ་བས་ལས་སྔགས་ཞེས་བཏགས་སམ་བརྟག་གོ།གཉིས་པ་ལའང་གསུམ་ལས། རྩ་སྔགས་ནི། ཧཱུྃ་ཧ་ཧེ་ཕཊ་བྷྱོ་རྣམས་ཁྲག་འཐུང་གནས་ཡུལ་སྒོ་དབང་རྣམས་ཀྱིའོ།།བསྐྱེད་སྔགས་ནི། ཁྲག་འཐུང་ལྔ་ལ་ༀ་བཛྲ་མ་ཧཱ་ཤྲཱི་སོགས་དང༌། གནས་ཡུལ་སྒོམ་ལ་བཛྲ་སྟེ་དབང་རྟགས་རྡོ་རྗེ་མཚོན་པའི་མཐར་གཽ་རི་སོགས་སོ་སོའི་མིང་སྦྱར་བ་དང༌། དབང་ཕྱུག་མའི་བསྐྱེད་སྔགས་རྩ་བའི་རྒྱུད་ལས་མ་གསུངས་ཀྱང་བཤད་རྒྱུད་རྡོ་རྗེར་མ་ནུ་རཀྵ་སཱི་སོགས་བྱུང་བས་ཁ་བསྐོང་ངོ༌།།བཟླས་སྔགས་ནི། བཛྲ་མ་ཧཱ་ཤྲཱི་སོགས་བསྐྱེད་སྔགས་ལ་མ་ཧཱ་ཙཎྜ་སོགས་ལས་སྔགས་བཏགས་པ་སྟེ། འདི་རྩ་བསྐྱེད་ལས་གསུམ་གྱི་ནང་གི་ལས་སྔགས་ཡིན་ལ། མ་ཧཱ་ཙཎྜ་མན་ཆད་མ་གཏོགས་ལས་སྔགས་སུ་མི་འཇོག་པར་བཤད་པ་ནི་ལས་ལ་སྐུལ་བའི་སྔགས་ཀྱི་དབང་དུ་བྱས་པར་མངོན་པས་ལས་སྔགས་ཀྱི་འཇོག་ཚུལ་གཉིས་སུ་འགྱུར་བ་འདྲའོ།།ཁ་ཅིག་རྩ་བསྐྱེད་ལས་གསུམ་ཕྲིན་ལས་སྐུལ་བའི་སྔགས་དང་བཞིར་བཞེད་པའང་སྣང་ངོ༌། །འཁོར་རྣམས་ལ་རྩ་བསྐྱེད་སྦྲེལ་བ་ལས་སྔགས་སུ་འཇོག་པ་སྔར་དང་འདྲ་ལ། དེ་རྣམས་སོ་སོའི་མཐར། ཆེ་གེ་མོ་ཧཱུྃ་ཛཿ་ལྟ་བུ་གང་འདོད་ཀྱི་སྔགས་ཤམ་བཏགས་ན་ལས་ལ་སྐུལ་བའི་སྔགས་སུའང་འགྱུར་གསུངས་སོ།།གསུམ་པ་ནི། ལེའུ་བདུན་པ་དང་བཅུ་དྲུག་པ་ལས་སྙན་གསན་དབབ་པ་དང༌། སྤྱན་དྲངས་པ་དང༌། རིག་མེ་དོར་བ། བསྐུལ་ཞིང་བསྟིམ་པ། དབང་བསྐུར་བྱིན་རློབ་ཀྱི་སྔགས་དང༌། ཁྲོ་བོ་མཆོད་པའི་གླུ་རྣམས་སོ། །གསལ་བཀྲ་ལས།རྟག་ཏུ་བཟླས་པ་བྱས་པ་ནི། །བྱང་ཆུབ་གཟུངས་ལ་ཞུགས་པ་ཡིན། །ཞེས་པ་ལྟར་དངོས་གྲུབ་སྤྱི་དང་ཁྱད་པར་གསུང་རྡོ་རྗེ་སྒྲུབ་པའི་ཆེད་དུ་གསུངས་པའི་གཙོ་བོ་ནི་བཟླས་སྔགས་ཡིན་པས། བཟླས་བརྗོད་ཇི་ལྟར་བྱ་བའི་ཚུལ་ཡང་བཤད་ན། ལམ་རིམ་ལས།སྐྱོན་བཅུ་སྤངས་ཏེ་རྣམ་གསུམ་གྱིས། །བཟླས་པ་གྲངས་བཞིན་རྫོགས་པར་བྱ། །ཞེས་བཤད་དེ། དེ་ལ་སྐྱོན་བཅུ་ནི། རྔམ་གློག་ལས།སྒྲ་ཆེན་མ་ཡིན་ཆུང་བ་མིན། །མགྱོགས་པར་མ་ཡིན་བུལ་བར་མིན།།དྲག་པོར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པ་མིན།།ཡེངས་པས་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པས་མིན། །ཞེས་པ་ལྟར་ཧ་ཅང་སྒྲ་ཆེ་བ་དང་ཆུང་བ་སོགས་སོ། །རྣམ་པ་གསུམ་ནི་བཟླ་ཚུལ་ཏེ། དེ་ལའང་གསལ་བ་གསུམ་དང༌། ཕྱི་ནང་གསང་གསུམ་དང༌། ཕྲ་མོ་གསུམ་གྱི་བཟླ་ལུགས་རྣམས་ལས།དང་པོ་ནི། བདག་དམ་ཚིག་སེམས་དཔའ་གསལ་བ་དང༌། དེ་ལས་མདུན་དུ་ཕྱེ་བའི་ཡེ་ཤེས་སེམས་དཔའ་གསལ་བ་དང༌། དམ་ཚིག་པ་ལས་ཡེ་ཤེས་པ་ལ་འོད་ཟེར་སྤྲོ་བསྡུ་མགལ་མེའི་འཁོར་ལོ་ལྟ་བུར་གསལ་བ་སྟེ། དེ་ལྟ་བུའི་ཚུལ་གྱིས་བཟླས་པ་བྱ་བའོ།།གཉིས་པ་ནི། དམ་ཡེ་ཕྱེ་ནས་སྤྲོ་བསྡུ་ཞལ་ནས་ཞལ་དང་གསང་བ་ནས་གསང་བར་འཁོར་བའི་ཚུལ་གྱིས་བཟླ་བ་དང༌། ཕར་སྤྲོས་སྒྲིབ་པ་སྦྱང་བར་སྐུལ་ཞིང་ཚུར་བསྡུས་སྒྲིབ་པ་སྦྱངས་ནས་དངོས་གྲུབ་ཀྱི་སྣོད་རུང་དུ་བྱ་བ་སྟེ་ཕྱི་ལྟར་བཟླ་བའི་སྒོ་གཉིས་དང༌། ཡེ་ཤེས་སེམས་དཔའ་འབྱེད་དམ་མི་འབྱེད་ཀྱང་རུང་སྟེ། ཕར་སྤྲོས་དངོས་གྲུབ་བསྐུལ་ནས་ཚུར་བསྡུས་དངོས་གྲུབ་ཐོབ་པར་བསམ་པ་ནང་ལྟར་བཟླ་ཚུལ་དང༌། ཕར་མི་སྤྲོ་བར་ཚུར་དངོས་གྲུབ་བསྡུ་དམིགས་ཁོ་ན་བྱ་བ་དང༌། ཡབ་ཡུམ་གཉིས་ཀྱི་ཞལ་ནས་ཞལ་དང་མཁའ་ནས་གསང་བར་འཁོར་བ་ལ་དམིགས་པ་སྟེ་གསང་བ་ལྟར་བཟླ་ཚུལ་གཉིས་སོ།།གསུམ་པ་ལའང་ཚུལ་གཉིས་ཏེ། ཡིག་འབྲུ་དང༌། ཕྱག་མཚན་དང༌། ལྷ་སྐུ་ཕྲ་མོ་སྤྲོ་བསྡུ་རིམ་བཞིན་བྱ་བ་ལ་དམིགས་པའི་བཟླས་བརྗོད་དང༌། དབུགས་འཇུག་གནས་ལྡང་གསུམ་སྔགས་དང་སྦྱར་བའི་རྡོ་རྗེའི་བཟླས་པའོ། །དེ་ལྟར་གང་མོས་ཀྱི་སྒོ་ནས་རབ་ལྷས་བྱིན་གྱིས་བརླབས་པའི་མཚན་མ་རྙེད་པའམ་སེམས་བརྟན་པའི་དྲོད་ཚད་ཐོབ་པ་དང༌། འབྲིང་ལོ་གཅིག་གམ་ཟླ་བར་དྲུག་སོགས་ཇི་སྲིད་བཟླ་བར་དམ་བཅས་པ་དེ་སྲིད་དུ་བཟླ་བ་དང༌། ཐ་མ་གཙོ་བོ་ལ་བྱེ་བ་དང༌། འཁོར་རྣམས་ལ་ཁྲི་ཕྲག་རེ་བཟླ་བར་གསུངས་སོ།།

གཉིས་པ་ཕྱག་རྒྱ་ནི། རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ལས་མི་འདའ་བ་ཞེས་བཤད་དེ། སྒོ་གསུམ་བྱ་བ་དང་བཅས་པ་ཡོངས་དག་གི་ངོ་བོར་བརྟན་ཅིང་མི་ཤིགས་པར་བྱེད་པ་བདག་ཉིད་ཆེན་པོ་རྣམས་ཀྱི་མཚན་མར་གྱུར་པ་སྟེ། རྒྱས་པ་ལས།འདའ་དཀའ་ཇི་བཞིན་མི་ཤིགས་པའི། །རྒྱལ་པོའི་ཕྱག་རྒྱ་མཆོག་གི་གནས།།བདག་ཉིད་ཆེན་པོའི་མཚན་མའི་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན།།ཞེས་གསུངས་ཏེ། གཙོ་བོར་ལྷག་པའི་ཏིང་ངེ་འཛིན་གྱི་ཕྱག་རྒྱའི་དབང་དུ་བྱས་པའོ།།དེ་ལ་ཞི་ཁྲོའི་ཕྱག་རྒྱ་གཉིས་ལས། དང་པོ་ལ། ཕྱག་རྒྱ་འབྱུང་བའི་རྒྱུ་ནི། ལག་པ་གཡས་པའི་སོར་མོ་ལྔ་ལ་དཔའ་བོ་འབྲུ་ལྔ་དང༌། གཡོན་གྱི་སོར་མོ་ལྔ་ལ་དཔའ་མོ་འབྲུ་ལྔ་བཀོད་ནས་ཐལ་མོ་སྦྱར་བ་སྟེ། འདི་ཕྱག་རྒྱ་ཐམས་ཅད་སྔོན་དུ་འགྲོ་བ་ནི་ཕྱག་རྒྱའི་དངོས་གྲུབ་ཐམས་ཅད་ཀྱི་གཞི་ཐབས་དང་ཤེས་རབ་མཉམ་པར་སྦྱོར་བའི་རྣལ་འབྱོར་དུ་མཚོན་པའོ། །དེ་ནས་རིགས་ལྔ་སྤྱིའི་དམ་རྒྱ་ནི། ལེའུ་བརྒྱད་པར།ༀ་དང་མཱུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོས་ནས་རྩེ་སྤྲད་པ།།རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །ཞེས་པ་ལྟར་རོ། །སོར་མོ་འདི་ལྟར་བསྣོལ་བའི་རྒྱུ་མཚན་ལ་གསུང་རྒྱུན་དུ་གྲགས་པ་འགར་ལྷ་རྣམས་གཞན་རིགས་ལ་འཁྱུད་པར་རིགས་པའི་ཕྱོགས་ནས་བཤད་པ་མཐོང་ཡང༌། འདི་སྐོར་གྱི་ཁུངས་ཚད་ལྡན་མ་རྙེད་ལ། ཐལ་བ་ལས།དབྱིངས་དང་ཡེ་ཤེས་བདག་པོ་ཉིད། །ༀ་དང་མཱུཾ་དུ་རང་བཞིན་གནས།།རྭ་དང་འདབ་མའི་ཐིག་ལེ་རྣམས། །རང་གི་གནས་ཀྱི་བསྣོལ་མར་འགྱུར།།རབ་ཏུའང་འདྲེས་པར་འགྱུར་བ་ལས། །རྒྱལ་བའི་ཡེ་ཤེས་བདེ་ཆེན་པོ།།མྱོང་ཕྱིར་ཐོབ་པ་ཞེས་སུ་གསུངས། །ཞེས་བྱུང་བ་ལས་དཔགས་ན། དབྱིངས་སྟོང་ཕྱོགས་མཚོན་པའི་ལྷའི་གཙོ་བོ་དབྱིངས་ཕྱུག་མ་དང༌། ཡེ་ཤེས་སྣང་ཕྱོགས་མཚོན་པ་ལ་གཙོ་ཤོས་རྣམ་སྣང་གི་ཡི་གེ་གཉིས་མཉམ་སྦྱོར་དུ་བཅིངས་ཤིང༌། སངས་རྒྱས་ཀྱི་རིགས་ཐ་དད་མང་པོ་ཐབས་ཤེས་བསྲེས་པའི་བདེ་བས་མི་ཕྱེད་པར་བསྡམས་ནས་ལྷ་རྟོག་དབྱེར་མེད་དུ་བརྟན་པར་རྒྱས་འདེབས་པའི་ཆེད་དུ་སོར་མོ་ཕལ་ཆེར་བསྣོལ་མར་སྦྱར་ལ། མ་བསྣོལ་བ་ཟུང་གཅིག་ཡོད་ཀྱང་རིགས་འདྲེས་པ་དང་མ་འདྲེས་པའི་བདེ་བ་འདུས་ཤིང་བསྲེས་པར་འགྱུར་བས་མདོར་ན་རིགས་ཐམས་ཅད་ཀྱི་བདེ་བ་བསྡམས་པའི་ཕྱག་རྒྱ་ཡིན་ཞེས་བཤད་དུ་རུང་ངམ་སྙམ་སྟེ་དཔྱད་གཞི་ཙམ་མོ།།སོ་སོའི་ཕྱག་རྒྱ་ནི། རེ་རེའང་ཕྱག་རྒྱ་བདུན་སྦྲགས་སུ་བྱ་སྟེ། མི་བསྐྱོད་པ་ལ་མཚོན་ན། རང་ལྷ་དེའི་སྐུར་སྒོམ་པ་ཕྱག་ཆེན། ལག་པ་གཡས་པའི་གུང་མོ་ཐུགས་ཀར་བསྒྲེང་བ་བཅའ་བ་དམ་རྒྱ། དེའི་རྩེ་མོ་ཧཱུྃ་ཡིག་བསམ་པ་བསམ་པ་ཆོས་རྒྱ། དེ་ལས་རྡོ་རྗེ་རྩེ་ལྔ་བསམ་པ་བསམ་པ་དམ་རྒྱ། གཡོན་པའི་འབྲུ་ལྔ་སྦས་ནས་ དྲིལ་བུ ་གསིལ་ཞིང་ལྷ་མོ་ལ་འཁྱུད་པའི་ཚུལ་གྱིས་ཞབས་གཡོན་ལ་བརྟེན་པ་བཅའ་བ་ལས་རྒྱ། དེ་ལྟར་བསམ་པ་བསམ་པ་ལས་རྒྱ། ཕྱག་རྒྱ་གཡས་ནས་བཅས་ཏེ་མདུན་དུ་བསྒྱུར་ནས་གཡོན་དུ་ཡུམ་གྱི་ཐུགས་ཀར་དགྲོལ་བ་དང་ལྷན་ཅིག་བཛྲ་དྷྲིཀ་ཅེས་བརྗོད་པ་བརྗོད་པ་ཆོས་རྒྱ་སྟེ། ཕྱི་མ་འདིའི་བསྒྱུར་ཞིང་དགྲོལ་བ་ནི་བཅའ་བ་དང་བསམ་པ་ལས་རྒྱའི་ཁོངས་སུ་གཏོགས་པ་འདྲའོ། །དེ་ནི་ཤེས་རབ་ལ་ཐབས་ཀྱིས་རྒྱས་འདེབས་པའོ།།དེ་བཞིན་དུ། མཱུཾ་བསྒྲེང་རྩེ་མོར་དྲིལ་བསིལ་འབར། །ཞེས་སོགས་ལྟར་དབྱིངས་ཕྱུག་མའི་ཕྱག་རྒྱ་བདུན་ལྡན་གྱིས་ཐབས་ལ་ཤེས་རབ་ཀྱིས་རྒྱས་འདེབས་པ་སོགས་ལྷག་མ་རྣམས་ལའང་ཅི་རིགས་སུ་སྦྱར་རོ། །བསྡུས་པ་ལ་དགའ་བས་སྤྱིའི་དམ་རྒྱ་ཙམ་བཅིངས་པས་ཀྱང་དཀྱིལ་འཁོར་ཡོངས་རྫོགས་མཉེས་པ་དང་རྒྱས་འདེབས་ཀྱི་དགོས་པ་འགྲུབ་པར་གསུངས་སོ།།ཁྲོ་བོའི་ཕྱག་རྒྱ་ནི། རྩ་བའི་རྒྱུད་འདིར་མ་གསུངས་ཀྱང༌། བཤད་རྒྱུད་རྒྱས་པ་དང་རྡོ་རྗེ་མེ་ལོང་སོགས་ནས་ཁ་སྐོང་བ་སྟེ་མ་སྤྲོས་སོ། །སྒྲུབ་ཐབས་ཀྱི་མཆོད་པའི་ཡན་ལག་ཏུ་ལྷག་པར་བསྔགས་པའི་ཕྱག་རྒྱ་དེ་ལྟར་ཡིན་ཡང༌། སྤྱིར་ལྷག་པའི་བདེན་པ་དབྱེར་མེད་ཀྱི་གནད་ལ་རྟོགས་གོམས་ལས་སུ་རུང་བའི་སྔགས་པས་ཡན་ལག་གི་བསྒུལ་བསྐྱོད་ཕྲ་མོ་ཚུན་ཆད་དེ་བཞིན་གཤེགས་པའི་ཕྱག་རྒྱ་འབའ་ཞིག་ཏུ་བྱེ་བྲག་མེད་པར་འགྱུར་བའི་ཚུལ། ལེའུ་བརྒྱད་པར།མདོར་ན་བསྒུལ་བསྐྱོད་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །ཞེས་སོགས་གསུངས་སོ། །དངོས་པོ་བཅུའི་ཡ་གྱལ་གྱི་སྔགས་རྒྱ་གཉིས་ཀའི་གཞི་མཐུན་ཡང་ཡོད་མོད་ཀྱི། གཉིས་སུ་ཕྱེ་བ་ནི་ངག་ཏུ་བརྗོད་པ་དང་ལག་པས་བཅའ་བ་གཙོ་བོར་གྱུར་པའི་ཁྱད་པར་གྱིས་ཡིན་ཞེས་རོང་ཟོམ་ཆེན་པོ་བཞེད་དོ།།

བཞི་པ་རྒྱུད་ཀྱི་དགོས་འབྲེལ་ནི། ཐུགས་ཐིག་ལས།བརྗོད་འབྲེལ་དགོས་པ་ཡང་དགོས་དང༌། །རྒྱུ་རྐྱེན་ཡན་ལག་བཞི་རུ་འགྱུར། །ཞེས་པ་ལྟར་ཡན་ལག་བཞི་སྟེ། གཞི་ལམ་འབྲས་བུའི་རྒྱུད་གསུམ་བརྗོད་བྱ། དེ་མཚོན་བྱེད་ཡི་གེའི་རྒྱུད་ནི་རྗོད་བྱེད་དེ། བརྗོད་བྱ་གང་སྟོན་ལ་མི་ལྟོས་པར་རྗོད་བྱེད་དང་དགོས་པའི་འབྲེལ་བ་བརྩིར་མི་བཏུབ་པས་དེ་ལྟར་སྨོས་ཀྱི། ཡན་ལག་བཞིའི་དང་པོ་དངོས་ནི་རྗོད་བྱེད་དོ། །རྗོད་བྱེད་དེ་ལ་བརྟེན་ནས་བརྗོད་བྱའི་དོན་དེ་ཚང་ལ་མ་ནོར་བར་ཤེས་པ་ནི་དགོས་པ། དེ་ལྟར་ཤེས་ནས་ཉམས་སུ་བླངས་པས་ལས་བཞི་དང་འབྱུང་ལྔའི་དངོས་གྲུབ་སོགས་ཐུན་མོང་གི་དངོས་གྲུབ་བསམ་པ་བཞིན་དུ་འབྱུང་བ་ནི་ཉིང་དགོས་སམ་དགོས་པའི་དགོས་པ་ཕྲ་མོ་དང༌། སློབ་པ་དང་མི་སློབ་པའི་ཟུང་འཇུག་ཕྱག་རྒྱ་ཆེན་པོ་མཆོག་གི་དངོས་གྲུབ་འགྲུབ་པ་ནི་ཉིང་དགོས་གཙོ་བོ། འབྲེལ་པ་ལ་བརྗོད་བྱ་རྗོད་བྱེད་གཉིས་ཤེས་བྱ་ཤེས་བྱེད་དང༌། རྗོད་བྱེད་དང་དགོས་པ་ཐབས་ལས་ཐབས་བྱུང་དང་དགོས་པ་དང་ཉིང་དགོས་དེ་ལས་དེ་བྱུང་དང༌། ཉིང་དགོས་དང་བརྗོད་བྱ་ངོ་བོ་བདག་གཅིག་གིས་འབྲེལ་ཞེས་གསུངས་ཏེ། འདི་དག་ལ་འབྲེལ་བ་དངོས་བཏགས་ཅི་རིགས་ཡོད་ཅིང༌། སྐབས་དོན་དངོས་ནི་ཉིང་དགོས་དགོས་པ་ལས་འབྱུང༌། དགོས་པ་རྗོད་བྱེད་ལས་འབྱུང་བའི་དེ་བྱུང་འབྲེལ་ཉིད་ཡིན་ཏེ། ཉིང་དགོས་དོན་དུ་གཉེར་བའི་འཁོར་རྣམས་དེ་ལྟ་བུའི་འབྲེལ་བ་མཐོང་ནས་རྗོད་བྱེད་རྒྱུད་གཞུང་ལེན་ཅིང་འཛིན་པ་ལ་འཇུག་པ་ཡིན་པའི་ཕྱིར་རོ།།འོན་ཏེ་གྲོལ་ལམ་གྱིས་དངོས་གྲུབ་སྒྲུབ་ཚུལ་ལྟ་བུ་དང་བསྟུན་ན་ཉིང་དགོས་དང་བརྗོད་བྱ་ལ་བདག་གཅིག་འབྲེལ་བརྩིས་པ་འདིར་ཡང་གོ་རྒྱུ་དམིགས་བསལ་ཞིག་ཡོད་དམ་སྙམ་མོ།།སྤྱིར་ནི་དགོས་སོགས་ཆོས་བཞི་བསྟན་པ་གདུལ་བྱ་གཞུང་དེ་ལ་དང་པོར་འཇུག་པའི་ཆེད་ཡིན་པས་གཞུང་གི་སྔོན་དུ་བཤད་པར་བྱ་བ་ཡིན་ཡང་འདིར་རྒྱུད་ཀྱི་དངོས་པོ་རྫོགས་པའི་མཐར་སྨོས་པ་ནི། ཇི་སྲིད་རྒྱུད་འདི་མ་ནུབ་པར་འཇིག་རྟེན་ན་གནས་ཤིང་སྤྱོད་པ་དེ་སྲིད་དུ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཀྱི་འབྱོར་བ་བསམ་གྱིས་མི་ཁྱབ་པ་རྒྱུན་མི་འཆད་པར་བྱུང་བས་དངོས་སམ་བརྒྱུད་ནས་སེམས་ཅན་རྣམས་ལ་དོན་ཆེན་པོའི་སྒོར་འགྱུར་བར་གཟིགས་ཏེ། སྟོན་པས་འཁོར་རྣམས་ལ་རྒྱུད་ཀྱི་རྒྱལ་པོ་འཛིན་པར་ནན་གྱིས་གདམས་ཤིང་བཀས་གཏད་པ་ཡིན་ཞེས་གདམས་གཏད་ཀྱི་འཕྲོས་བཙལ་བ་ལ་བཤད་ན་ལེགས་པར་མངོན་ནོ།།

ལྔ་པ་འཁོར་ལ་གདམས་ཤིང་གཏད་པ་ནི། གདམས་པ་བཞི་དང་གཏད་པ་གསུམ་སྟེ། དང་པོ་ནི། རྒྱུད་འདིར་གནས་ལུགས་ངོ་བོ་ཉིད་ཀྱི་གཞི་ཇི་ལྟར་བསྟན་པ་བཞིན་དུ་རྟོགས་པར་གྱིས་ཤིག་ཅེས་གཞི་རང་བཞིན་གྱི་སྣང་བ་རྟོགས་བྱར་གདམས་པ་དང༌། འདིར་གཟུང་འཛིན་འཁྲུལ་པའི་རྒྱུ་འབྲས་བཤད་པ་རྣམས་ནི་དག་བྱའམ་སྦྱོང་བྱ་ངོས་བཟུང་བའི་ཆེད་ཡིན་པས་འཁྲུལ་པའི་ཀུན་རྟོག་སྦྱང་བ་ལ་བརྩོན་པར་གྱིས་ཤིག་ཅེས་ལོག་རྟོག་འཁྲུལ་པའི་སྣང་བ་དག་བྱར་གདམས་པ་དང༌། འདི་ནས་བཤད་པའི་ལམ་འདི་ཐེག་པ་ཐམས་ཅད་ཀྱི་སྐྱེལ་སོ་དང་ས་ལམ་གང་ནས་ཞུགས་ཀྱང་གྲུབ་དོན་གཅིག་ཏུ་འབབ་པ་ཆུ་ཀླུང་མཐའ་དག་འདུ་བའི་རྒྱ་མཚོ་ལྟ་བུ་ཡིན་པས་འདི་ཁོ་ན་ལ་སྐྱེས་བུའི་རྩལ་ཅི་ཡོད་ཕྱུང་ནས་སློབ་པར་གྱིས་ཤིག་ཅེས་གདུལ་བྱ་ལམ་གྱི་སྣང་བ་བགྲོད་བྱར་གདམས་པ་དང༌། དེ་ལྟར་ལམ་འདི་མཐར་ཕྱིན་པ་ན་བདག་དོན་བླ་ན་མེད་པའི་ཡེ་ཤེས་ལ་དབང་འབྱོར་ཞིང་ཅི་མཛད་གཞན་ཕན་གྱི་ཕྲིན་ལས་ནམ་མཁའ་དང་མཉམ་པར་འཇུག་པས་དོན་གཉིས་ཀྱི་བསམ་པ་ཡོངས་སུ་རྫོགས་པ་ཡིན་ནོ་ཞེས་འབྲས་བུ་བདེ་གཤེགས་ཀྱི་སྣང་བ་ཐོབ་བྱར་གདམས་པའོ།། གཉིས་པ་གཏད་པ་གསུམ་ནི། ཁོག་གཞུང་ལས།སྡུད་པ་པོ་དང་བུད་མེད་དང༌། །རྣལ་འབྱོར་མིག་ལྡན་སོགས་ལ་འོ། །ཞེས་པ་བཞིན་ཏེ། དེ་བཞིན་གཤེགས་པ་ཐམས་ཅད་ཀྱི་གསང་བའི་ཆོས་མཛོད་འཛིན་པ་པོ་ཁྱོད་ཡིན་ན་གསང་དོན་འདི་ལས་མཐར་ཐུག་པ་གཞན་མེད་པས་འདི་ཉིད་བརྟན་པོར་ཟུངས་ཤིག་ཅེས་བཀའི་སྡུད་པ་པོ་འཕགས་པ་ཕྱག་ན་རྡོ་རྗེ་ལ་གཏད་པ་དང༌། གང་ཞིག་རྒྱུད་འདི་ཕྱིན་ཅི་མ་ལོག་པར་གཞན་ལ་འདོམས་པ་དེ་ནི་བླ་མེད་བྱང་ཆུབ་ཏུ་ལུང་བསྟན་ཐོབ་པ་དང༌། དེར་མ་ཟད་སྟོན་པ་ཀུན་ཏུ་བཟང་པོ་དངོས་དང་འདྲ་བར་བལྟ་བར་བྱ་བ་ཡིན་ནོ་ཞེས་ཕྱི་རབས་ཀྱི་གང་ཟག་སྐལ་བ་མཆོག་དང་ལྡན་པ་རྣམས་སྣོད་ལྡན་ལ་རྒྱུད་འཆད་པར་སྤྲོ་བ་བསྐྱེད་ནས་གཏད་པ་དང༌། བུད་མེད་ལ་གཏད་པ་ནི། རིག་པ་འཛིན་པའི་ཞིང་ཁྱད་པར་ཅན་སོགས་ན་བཞུགས་པའི་རྡོ་རྗེ་རྣལ་འབྱོར་མའི་ཚོགས་ལ་གཏད་པ་སྟེ། རྒྱུད་འདིའི་ཚིག་ཟིན་ལ་མེད་ཀྱང་སྒྱུ་འཕྲུལ་རྒྱས་པ་ལས་གསུངས་ཏེ། ཇི་སྐད་དུ།ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་ཏུ་སྤེལ་བ་དང༌།། དེ་ཡི་གཟུངས་ལ་གཏད་པ་ནི། །ཞེས་སོགས་སོ། །དོན་བསྡུས་ནས་དེ་དག་རྗེས་འཇུག་ལ་སྦྱར་ན། རྒྱུད་ནས་བཤད་པ་མཆོག་ཐུན་མོང་གི་དངོས་གྲུབ་གང་ཡང་སྒྲུབ་པ་ནན་ཏན་དང་བྲལ་ན་འགྲུབ་པའི་གོ་སྐབས་མེད་པས་རྒྱུད་སྡེ་མཉན་ནས་གོ་ཡུལ་ཙམ་དུ་མ་བཞག་པར་རྒྱུད་ཉིད་ནས་ཇི་སྐད་བཤད་པ་བཞིན་སྒྲུབ་པ་སྙིང་པོར་བྱོས་ལ་རང་གི་རྒྱུད་གྲོལ་བར་གྱིས་ཤིག་ཅེས་པ་ནི་གདམས་པའི་དོན་དང༌། བཅོམ་ལྡན་འདས་ཀྱི་ཆོས་ཀྱི་འཁོར་ལོ་སེམས་ཅན་དཔག་ཏུ་མེད་པའི་རྒྱུད་ལ་གཅིག་ནས་གཅིག་ཏུ་བར་མ་ཆད་པར་བརྒྱུད་པའི་ཚུལ་གྱིས་འཁོར་ཞིང་འཇུག་པ་ནི་ཉན་བཤད་ལ་རག་ལས་པས་སྣོད་ལྡན་ལ་མ་སྦས་པར་རྒྱུད་སྨིན་པའི་རིམ་པ་བཞིན་དུ་ལེགས་པར་ཤོད་ཅིག་ཅེས་པ་ནི་གཏད་པའི་དོན་གཙོ་བོ་ཡིན་ལ། བསྟན་པ་ལ་སྡང་བ་ཚར་གཅོད་པ་དང༌། བསྟན་འཛིན་རྣམས་ཀྱི་དཔུང་དང་གྲོགས་བྱེད་པ་སོགས་ཕྲིན་ལས་རྣམ་པ་བཞི་ཇི་ལྟར་རིགས་པའི་ཐབས་ཀྱིས་བསྟན་པའི་དོན་བྱ་བའང་དེའི་འཁོར་དུ་ཡོད་དོ།།

གཉིས་པ་ཚིག་གི་རྣམ་གྲངས་རྣམ་པར་དབྱེ་བ་ནི། ཡི་གེ་འདུས་པ་ལས་མིང༌། མིང་འདུས་པ་ལས་ཚིག དེ་ལས་ཚིགས་སུ་བཅད་པ་དང༌། ལྷུག་པ་དང༌། སྤེལ་མ་དང༌། ལེའུ་ལ་སོགས་པའི་རིམ་པས་བརྗོད་བྱ་དོན་གྱི་རྒྱུད་མཚོན་པར་ནུས་པའི་རྗོད་བྱེད་སྒྲའི་རྒྱུད་ཀྱི་གཞུང་དུ་གྲུབ་པ་ཡིན་ཏེ། འདི་ཉིད་ལས།ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཞེས་གསུངས། དེ་ལའང་སྒྲར་སྣང་བ་དང༌། སྒྲར་གྲགས་པ་དང༌། བརྡར་གྱུར་པའི་རྒྱུད་གཞུང་གསུམ་ཡོད་ཅིང༌། རྩ་རྒྱུད་ཀྱི་ཆ་གང་དང་གང་གིས་18དོན་གང་སྟོན་ཆེ་ལོང་ཙམ་ནི། ལེའུ་དང་པོ་དང༌། གསུམ་པའི་སྟོད་དང༌། བཅོ་ལྔ་པ་རྣམས་ཀྱིས་གླེང་གཞི་དང༌། ལེའུ་གཉིས་པས་གླེང་བསླང་དང༌།བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་པས་གཞི་རྒྱུད་ཀྱང་བསྟན། ལམ་རྒྱུད་ལས་མཚན་ཉིད་གསུམ་མདོ་ཙམ་བཅུ་གཉིས་པ་དང༌། རྒྱས་པ་ལེའུ་ལྔ་པ་ལས་བསྟན། ལྟ་བ་ལེའུ་གསུམ་པའི་སྨད་དང་བཅུ་གཅིག་པས་བསྟན། སྤྱོད་པ་ལེའུ་བཅུ་གཅིག་པ་དང་བཅུ་གཉིས་པས་བསྟན། དཀྱིལ་འཁོར་སྟོན་པ་ལ་ཞི་དཀྱིལ་དང་པོ་དང་དྲུག་པས་བསྟན། ཁྲོ་དཀྱིལ་བཅོ་ལྔ་པ་དང་བཅུ་བདུན་པས། ཞི་ཁྲོའི་ལྷག་པ་གཟུགས་བརྙན་གྱི་དཀྱིལ་འཁོར་དགུ་པས། ཚོགས་དཀྱིལ་བཅུ་གཅིག་པ་དང་བཅུ་གཉིས་པས་སྟོན། དབང་གི་དཀྱིལ་འཁོར་དང་དེར་འཇུག་པ་དང་སྣོད་དང་འཚམས་པར་བསྐུར་ཚུལ་སོགས་དགུ་པས། དབང་བསྐུར་ཐབས་དངོས་བཅུ་པས། དམ་ཚིག་བཅུ་དགུ་པས། ཕྲིན་ལས་ལ་མེའི་ཕྲིན་ལས་ཟུར་ཙམ་དགུ་པར་དང་གཙོ་བོར་ཉི་ཤུ་པས་སྟོན། སྒྲུབ་པ་བཞི་པ་དང་ལྔ་པས། ཏིང་ངེ་འཛིན་ལ་ཏིང་ངེ་འཛིན་གྱི་ཕན་ཡོན་དང་སྒོམ་ཐབས་སོགས་ལྔ་པས། བསྐྱེད་རྫོགས་གཉིས་དང་རྫོགས་རིམ་ཐབས་གྲོལ་གྱི་ཏིང་ངེ་འཛིན་རྒྱས་པར་བཅུ་གསུམ་པས།བསྐྱེད་རིམ་གྱི་དམིགས་རྟེན་དང་བརྟེན་པའི་དཀྱིལ་འཁོར་དྲུག་པ་སོགས་ཀྱིས་སྟོན། མཆོད་པ་ལ། ཞི་བ་ཕྱག་རྒྱའི་མཆོད་པ་བརྒྱད་པས། ལྷག་ཏིང་གི་མཆོད་པ་དགུ་པས། གླུ་ཡེ་ཤེས་བཅུ་བཞི་པས། སྦྱོར་སྒྲོལ་དང་དམ་རྫས་ཀྱི་མཆོད་པ་བཅོ་བརྒྱད་པས། ཁྲོ་བསྟོད་ཉེར་གཅིག་པས་སྟོན། སྔགས་རྒྱ་གཉིས་ལས་སྔགས་ཀྱི་རྩ་བ་ཡི་གེའི་འཁོར་ལོ་བཞི་པས། ཞི་བའི་སྔགས་བདུན་པས། ཁྲོ་བོའི་སྔགས་བཅུ་དྲུག་པས། ཕྱག་རྒྱ་བརྒྱད་པས། གདམས་གཏད་ཉེར་གཉིས་པས་བསྟན་ཏེ། འདི་དང་ཞལ་ལུང་གི་ཚིག་ཟིན་ལ་མི་འདྲ་བ་ཅུང་ཟད་ཡོད་ཀྱང་དོན་གྱི་གནད་གཅིག་པ་ཁོ་ན་ཡིན་ནོ།།དེ་དག་ལ་སོགས་པ་རྒྱུད་ཀྱི་དགོངས་དོན་མཐའ་དག་ཞིབ་པར་ནི། ལེའུ་བཅུ་གསུམ་པ་ལས།ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེ་ཐུགས་ལ་གནས། །ཞེས་བཀའ་སྩལ་པ་ལྟར་སྟོན་པ་ཀུན་ཏུ་བཟང་པོ་ནས་མན་ངག་གི་བརྒྱུད་པ་བར་མ་ཆད་པ་མངའ་བའི་རྡོ་རྗེ་སློབ་དཔོན་མཚན་ཉིད་དང་ལྡན་པས་རྒྱུད་གཞུང་འཁྲུགས་པ་བསྡེབས། གཅུས་པ་བསྲང༌། གབ་པ་མངོན་དུ་ཕྱུང་བའི་ཚུལ་གྱིས་ལེགས་པར་ཕྱེ་བའི་ཉི་ཟེར་ལ་བརྟེན་ནས་སྐལ་བཟང་རྣམས་ཀྱི་བློའི་པདྨོ་སད་པར་བྱས་ཏེ་ཁྱབ་བདག་དྲུག་པའི་ཕྲིན་ལས་ཕྱོགས་དུས་ཐམས་ཅད་དུ་རྒྱས་པར་བྱའོ།།བཤད་རྒྱུད་ཆུ་བོ་བཞི་ཡིས་རྒྱས་བྱས་ཤིང༌།།དངོས་གྲུབ་ནོར་བུའི་ཁ་དོག་སྟོང་གིས་བཀྲ།།རིག་འཛིན་ཀླུ་དབང་རྣམས་ཀྱི་རྩེ་དགའི་གནས།།དཔལ་ལྡན་སྙིང་པོའི་རྒྱུད་རྒྱལ་ཟབ་མོའི་མཚོར།།ཞུགས་ནས་དོན་ཐོབ་གནའ་དུས་མང་བྱུང་ཡང༌།།དུས་ཀྱི་དབང་གིས་ཉུང་ངུར་གྱུར་མཐོང་སྟེ།།དེད་དཔོན་མཁས་པའི་མན་ངག་ལ་བརྟེན་ནས།།ལེགས་བཤད་གྲུ་ཡི་འཁྲུལ་འཁོར་གསར་པ་བྱས།།འོན་ཀྱང་མཆོག་ཏུ་བརླིང་བའི་རྡོ་རྗེ་གནས།།ཉམས་ཆུང་བྱིས་པའི་རྩལ་གྱིས་དབྱེ་དཀའ་བས།།ནོངས་པར་གང་གྱུར་རྡོ་རྗེ་ཅན་ལ་འཆགས།།བཟོད་པར་དགོངས་ནས་ཚངས་པའི་མཆོག་སྦྱིན་མཛོད།།ཆོས་མཆོག་ཞིང་ལ་ངལ་བའི་ས་བོན་འགའ།།བསྐྱེད་ལས་རྒྱུ་མཐུན་སྡོང་པོ་ཆེར་རྒྱས་ཏེ།།ཟབ་ལམ་རོ་བདེའི་འབྲས་སྟེར་ཉན་བཤད་ཀྱི།།ཡལ་འདབ་ཕྱོགས་དུས་ཁྱབ་པར་བྲེ་གྱུར་ཅིག།ཕྱི་སྣོད་གསང་ཆེན་རྒྱུད་སྡེའི་མཛོད་དུ་གྱུར།།ནང་བཅུད་འགྲོ་ཀུན་རིག་འཛིན་ཚོམ་བུར་སད།།བརྟན་གཡོ་མཐའ་དག་སྒྱུ་འཕྲུལ་དྲྭ་བ་ཡི།།དཀྱིལ་འཁོར་འཁོར་ལོ་གཅིག་ཏུ་བྱང་ཆུབ་ཤོག།དཔལ་གསང་བ་སྙིང་པོའི་རྒྱུད་ཀྱི་སྤྱི་དོན་ཉུང་ངུའི་ངག་གིས་རྣམ་པར་འབྱེད་པ་རིན་ཆེན་མཛོད་ཀྱི་ལྡེ་མིག་ཅེས་བྱ་བ་འདི་ནི། སྔོན་ཆད་རྙིང་བསྟན་རིན་པོ་ཆེར་གཅིག་ཏུ་སྨན་པའི་ལྷག་བསམ་ཅན་བླ་མ་དམ་པ་ཡེ་ཤེས་འོད་ཟེར་རྒྱ་མཚོས་བསྐུལ་ངོར་སྤྱི་དོན་ཞིག་བྲིས་པ་དེ་དུས་རང་ཉིད་ན་ཚོད་མ་རྫོགས་ཤིང་རྒྱུད་གཞུང་ལ་འདྲིས་ཆ་ཆུང་བའི་སྐབས་ཡིན་པས་འདུས་གསལ་ཞིག་མ་བྱུང་བའི་ཚུལ་སྨྲས་པ་སོགས་ལ་བརྟེན་ནས། དད་བརྩོན་རྣམ་དཔྱོད་ཡངས་ཤིང་ཐོས་བསམ་གྱི་ནོར་དང་ལྡན་པའི་སྡོམ་བརྩོན་ཀུན་དགའ་བློ་གྲོས་ཀྱིས་རྒྱུད་བཤད་ལ་ངལ་བ་དང་ལེན་གྱི་ཞབས་ཏོག་བཟང་པོ་སྒྲུབ་སྐབས། རིན་ཆེན་དཀར་པོ་དང༌། གོས་དབང་མདོག མྱུར་བདེའི་བཞོན་པ་འཆར་ཀའི་སྣང་བ་ལྟ་བུའི་ཁ་དོག་ཅན་སོགས་མཎྜལ་དུ་ཕུལ་ཏེ་ནན་ཏན་ཆེན་པོས་བསྐུལ་བ་དང༌། རྩོད་བྲལ་དུས་བབས་ཀྱི་འགྲོ་འདུལ་སྤྲུལ་པའི་གཏེར་སྟོན་ཆེན་པོ་རིག་འཛིན་ལས་རབ་གླིང་པའི་བཀའ་སྩལ་རིན་པོ་ཆེའི་ཕྲེང་བས་བསྐུལ་ཞིང༌། ཡི་གེའི་གྲོགས་དན་མཛད་པས་མཚམས་སྦྱར་ཏེ། བསྟན་པ་རྒྱ་མཚོའི་མངའ་བདག་སྙིགས་དུས་ཀྱི་སངས་རྒྱས་མཚན་བརྗོད་པར་དཀའ་བ་ཀུན་མཁྱེན་བླ་མ་རྡོ་རྗེ་གཟི་བརྗིད་ཀྱི་ཞབས་རྡུལ་སྤྱི་བོས་བླངས་ཤིང༌། དཀྱིལ་འཁོར་ཆེན་པོའི་རྡོ་རྗེ་སློབ་དཔོན་མཁས་ཤིང་དངོས་གྲུབ་ཀྱིས་བརྒྱན་པ་པདྨ་བཛྲ་ཞབས་སོགས་རྡོ་རྗེ་འཛིན་དབང་དུ་མའི་སྤྱན་སྔར་དཔལ་ལྡན་སྒྱུ་འཕྲུལ་དྲྭ་བའི་དབང༌། རྒྱུད་བཤད། མན་ངག་དང་བཅས་པའི་བཀའ་དྲིན་ཐོབ་པ་མདོ་ཁམས་རྡོ་ཡུལ་གྱི་ཆོས་སྨྲ་བའི་གཟུགས་བརྙན་འཇིགས་མེད་བསྟན་པའི་ཉི་མས་རབ་ཚེས་མེ་འབྲུག་གི་ལོ་རྒྱུ་དང་མི་རྒྱུའི་འཇིག་རྟེན་དབྱར་གྱི་དགའ་སྟོན་ལ་རོལ་པ་རྫོགས་ལྡན་གཉིས་པའི་དུས་སུ་སྦྱར་བ་འདིས་ཀྱང་ཕན་བདེའི་འབྱུང་གནས་རྒྱལ་བའི་བསྟན་པ་སྤྱི་དང་བྱེ་བྲག་གསང་ཆེན་སྙིང་པོའི་རིང་ལུགས་དྲི་མ་མེད་པ་སྒོ་ཐམས་ཅད་ནས་ཕྱོགས་ཐམས་ཅད་དང་དུས་ཐམས་ཅད་དུ་དར་ཞིང་རྒྱས་པར་གྱུར་ཅིག། །།མངྒལཾ།ༀ་སྭསྟི། འཕགས་པའི་ཞིང་ཁམས་བོད་ཡུལ་གངས་ཅན་འདིར། །པཎ་གྲུབ་ཆོས་རྒྱལ་སྨོན་ལམ་ནང་འཛོམས་པས། །དང་པོར་གསང་སྔགས་བསྟན་པའི་ཀློང་རྡོལ་བ། །སྔ་འགྱུར་རྙིང་མ་ཞེས་བྱར་གྲགས་འདི་ཡིན། །རྨ་གཉགས་བཻ་རོ་གནུབས་ཆེན་ཁུ་དབོན་དང་། །ཟུར་པ་མེས་དབོན་ཉང་རོག་རོང་ཟོམ་སོགས། །གྲུབ་བརྙེས་རིག་འཛིན་རྒྱལ་བ་དངོས་འདྲ་བ། །གྲངས་མེད་བརྒྱུད་པ་རིན་ཆེན་འདི་ནང་བྱུང་། །དེ་རྣམས་ཀུན་གྱི་ཕ་ནོར་གཅེས་པའི་དབྱིག །ཡོ་ག་གསུམ་གྱི་དོན་བསྡུས་རྩ་བའི་རྒྱུད། །ད་ལྟའི་བར་དུ་བཤད་རྒྱུན་མ་ནུབ་པར། །ལེགས་གནས་དཔལ་ལྡན་གསང་བའི་སྙིང་པོར་ངེས། །དོན་དེ་དགོངས་ནས་ལྔ་བདོའི་དུས་མཐར་ཡང་། །རྒྱུ་བའི་ཕྲིན་ལས་སྤེལ་ལ་ཟླ་བྲལ་བ། །གཞན་ཕན་མཐའ་ཡས་འོད་ཟེར་ཡབ་སྲས་ཀྱིས། །རྒྱུད་འདིའི་བཤད་སྲོལ་འབད་པ་བརྒྱ་ཡིས་བཟུང་། །བདག་འདྲའང་བཀའ་བརྒྱུད་དེ་ཡི་རྗེས་སྐྱེས་ཤིང་། །ཀུན་མཁྱེན་དགྱེས་པའི་བཀའ་ལུང་ཐོབ་གྱུར་པས། །གསར་བུའི་བློ་ཅན་རང་འདྲ་འགའ་ཡི་ཆེད། །སྤྱི་དོན་རྣམ་བཤད་ཉུང་ལ་གསལ་བ་བརྩམས། །གང་དེ་དད་འདུན་ལྷག་བསམ་ལྡན་པ་འགས། །འབད་པས་སྤར་དུ་བཞེངས་པའི་ལེགས་ཚོགས་རྒྱུན། །སྙིང་པོའི་བསྟན་པའི་ཟུངས་སུ་སྨིན་གྱུར་ཏེ། །དཔལ་ལྡན་བླ་མའི་ཕྲིན་ལས་རྒྱས་བྱེད་ཤོག །འབྲེལ་ཐོགས་ཀུན་ཀྱང་དམ་ཆོས་སྤྱོད་པ་ལ། །མི་མཐུན་རྒུད་པའི་མིང་ཡང་མི་འབྱུང་ཞིང་། །མཐུན་རྐྱེན་ལེགས་དགུའི་རྟེན་འབྲེལ་ཕུན་ཚོགས་ཏེ། །དོན་གཉིས་འབྱོར་བ་རྒྱ་མཚོ་རྒྱས་གྱུར་ཅིག །ཅེས་པའང་ཆོས་སྐོར་བླ་མ་ཀུན་དགའ་བློ་གྲོས་དང་། གཡུང་ཤུལ་བླ་མ་གསུང་མཆོག་རྡོ་རྗེ་སོགས་ནས་རྒྱུ་ཡོན་བསྟབས་ཤིང་། མཁྱེན་དབང་ཨ་མདོ་ཞབས་དྲུང་མཁས་བཙུན་བསྟན་འཛིན་རྒྱ་མཚོ་དང་། དགེ་ཚུལ་བདེ་ལོ་སོགས་གཞན་འགའ་རེས་ཀྱང་མཐུན་རྐྱེན་ཟུར་གསོས་སྦྱར་བ་ལ་བརྟེན་ནས། ཉེ་གནས་བློ་གྲོས་ཆོས་ལྡན་གྱིས་དོ་དམ་པ་བྱས་ཏེ། སྤྱི་དོན་མཛོད་ལྡེ་སྤར་དུ་བརྐོས་པའི་སྤར་བྱང་དུ་བསྟན་པའི་ཉི་མས་སྦྱར་བ་དགེ་ལེགས་འཕེལ།།