༄༅།། སྲོག་སྡོམ་གཟེར་བཞིའི་དམིགས་པའི་གནད་འགགས་ཁམས་གསུམ་རོལ་པའི་ཚངས་པའི་སྒྲ་དབྱངས་ཞེས་བྱ་བ་བཞུགས་སོ།། དཔལ་སྤྲུལ་རིན་པོ་ཆེ།

གསང་བ་མཆོག་གི་དགྱེས་པ་ན།།

མི་འགྱུར་ཀུན་ཁྱབ་རྟག་ཏུ་བཞུགས།།

རྡོ་རྗེ་སེམས་དཔའ་བདེ་བ་ཆེ།།

རིགས་ཀྱི་བདག་པོ་ལ་ཕྱག་འཚལ།།

གང་ཞིག་གང་གིས་རྣམ་གྲོལ་སར།།མི་ངལ་ལྕགས་ལ་རྩི་བཞིན་དུ།།

ཡུད་ཀྱིས་གྲོལ་བའི་ཐབས་རྨད་བྱུང༌།།ཐེག་མཆོག་རྡོ་རྗེ་འདི་ཁོ་ན།།

ཟུང་དུ་འཇུག་པ་རྡོ་རྗེའི་ལམ།།ཐབས་དང་ཤེས་རབ་བསྐྱེད་དང་རྫོགས།།

རིམ་པ་གཉིས་སུ་གང་སྨོས་པ།།དང་པོའི་སྲོག་ནི་གཟེར་བཞིས་སྡོམ།།

དེ་ལ་འདི་སྐད་ཅེས་བྱ་སྟེ།།རྒྱལ་ཀུན་ཐུགས་ཀྱི་གསང་མཆོག་གང་ཡིན་པ།།རྡོ་རྗེའི་རང་བཞིན་བདེ་བ་ཆེན་པོ་དགྱེས།།འཁོར་འདས་ཀུན་ལ་གནས་ཏེ་འཕོ་འགྱུར་མེད།།རྡོ་རྗེ་སེམས་དཔའ་རིགས་བདག་ལ་ཕྱག་བྱས།།སྐལ་ལྡན་ལམ་འདིས་རྣམ་གྲོལ་སར་ཡུད་ཀྱིས།།གྲོལ་ནུས་གསང་ཆེན་ཆོ་ག་ཐབས་རྨད་པོ།།བསྐྱེད་དང་རྫོགས་དང་ཟུང་འཇུག་ལམ་གསུམ་ལས།།བསྐྱེད་རིམ་ལམ་ཀུན་སྲོག་སྡོམ་གཟེར་བཞིར་འདུས།།དེ་ཡང་འདི་སྐད་ཅེས་དང་པོ་རྡོ་རྗེ་སེམས་དཔའ་ལ་ཕྱག་བྱས་ནས་དོན་དུ་འདི་སྨོས་ཏེ།གང་ཞིག་སྐལ་པ་དང་ལྡན་པའི་གང་ཟག་གང་གིས་ན་རྡོ་རྗེ་ཐེག་པའི་ལམ་གྱིས།གང་དུ་ན་རྣམ་པར་གྲོལ་བ་སངས་རྒྱས་ཀྱི་སར།ཚུལ་ཇི་ལྟ་བར་དཀའ་ཚེགས་མེད་པར་མི་ངལ་བར།དཔེ་ཇི་ལྟར་ན་ལྕགས་ལ་གསེར་འགྱུར་རྩི་བཏབ་པ་བཞིན་དུ།དུས་ནམ་གྲོལ་ན་ཡུན་དུ་མི་འགོར་བར་ཡུད་ཀྱིས་ཚེ་ལུས་གཅིག་གིས་གྲོལ་ནུས་པའི་ཐབས་རྨད་དུ་བྱུང་བ་དེ་ནི་ཐེག་པ་ཀུན་གྱི་མཆོག་རབ་གསང་སྔགས་རྡོ་རྗེ་ཐེག་པ་འདི་ཁོ་ན་ཡིན་ཏེ།འདིའི་ལམ་ཐམས་ཅད་བསྡུས་ན་ཟུང་དུ་འཇུག་པ་རྡོ་རྗེའི་ལམ་དུ་འདུ་སྟེ།གང་ཟུང་དུ་འཇུག་ན་ཐབས་དང་ཤེས་རབ་བསྐྱེད་རིམ་དང་རྫོགས་རིམ་སྟེ་རིམ་པ་གཉིས་སུ་འདུ་བ་ལས།དང་པོ་ཐབས་བསྐྱེད་པའི་རིམ་པ་ཐམས་ཅད་ཀྱི་སྲོག་ནི་སྲོག་གི་གཟེར་བཞིས་སྡོམ་པས་ན་བསྐྱེད་རིམ་གྱི་ལམ་ཐམས་ཅད་འདིར་མ་འདུས་པ་ཅུང་ཟད་ཀྱང་མེད་ལ་འདི་མ་ཤེས་ན་བསྐྱེད་རིམ་མ་ཤེས་པ་ཡིན་པས་དེའི་ཚུལ་གོ་བདེ་མདོར་བསྡུས་སུ་བཤད་ན།ཐ་མལ་ལུས་སེམས་བྱ་བ་དག་ནས་སྐུ་གསུང་ཐུགས་ཕྲིན་ལས་མངོན་དུ་བྱེད་པ་རྡོ་རྗེའི་ལམ་ལ་ལྷ་སྔགས་ཆོས་ཉིད་འཕྲོ་འདུར་འདུས།ལུས་སྦྱོང་རྒྱལ་བའི་སྐུར་སྨིན་ཏིང་ངེ་འཛིན་ནི་རྡོ་རྗེའི་ལམ།ངག་གི་སྒྲིབ་སྦྱོང་བཟླས་པས་རྒྱལ་བའི་གསུང་ཉིད་ཐོབ།སེམས་ཉིད་གྲོལ་བྱེད་དགོངས་པ་མི་འགྱུར་ཐུགས་ཀྱི་སྒྲུབ་བྱེད་གསང་བ་སྟེ།བྱ་བ་གནས་དག་ཕྲིནལས་མཆོག་སྒྲུབ་འཕྲོ་འདུའི་གཟེར་བཞིར་འདུས།ཞེས་བྱ་སྟེ།བསྐྱེད་རིིམ་གྱི་ལམ་ཐམས་ཅད་མར་འཁོར་བ་དང་གནས་ཚུལ་མཐུན་པས་དེ་དང་དེའི་བག་ཆགས་སྦྱངས་ཤིང་དགཡར་མྱང་འདས་དང་བཞུགས་ཚུལ་མཐུན་པས་སངས་རྒྱས་ཀྱི་མཛད་པ་ལམ་དུ་བྱེད་པས་འབྲས་བུ་གཞི་ལ་རྫོགས།བར་དུ་རྫོགས་རིམ་གྱི་གནད་དང་མཐུན་པས་ལམ་རིམ་པ་གཉིས་པའི་སྨིན་བྱེད་དུ་འགྲོ་བ་སྟེ་དག་རྫོགས་སྨིན་གསུམ་ཤེས་དགོས་ལ།དེ་ལྟར་ཐབས་བསྐྱེད་རིམ་གྱི་ལམ་ནི་སྲོག་སྡོམ་གཟེར་བཞིར་འདུ་བ་ལས།དང་པོ་ཏིང་ངེ་འཛིན་ལྷ་ཡི་གཟེར།

གཉིས་པ་བཟླས་པ་སྔགས་ཀྱི་གཟེར།གསུམ་པ་ཆོས་ཉིད་ཀྱི་གཟེར།བཞི་པ་འཕྲོ་འདུ་ཕྲིན་ལས་ཀྱི་གཟེར་ཏེ་བཞི་ཡིན་ལ།དང་པོ་ཏིང་ངེ་འཛིན་གྱི་གཟེར་ནི།དབྱིངས་སྟོང་པ་ཆེན་པོའི་ངང་སྤྲོས་བྲལ་དུ་མཉམ་པར་འཇོག་པ་དེ་བཞིན་ཉིད་རྡོ་རྗེ་ལྟ་བུ།དེ་ལྟར་མ་རྟོགས་པའི་འགྲོ་ལ་སྙིང་རྗེ་སྒྱུ་མ་ལྟར་སྒོམ་པ་ཀུན་སྣང་སྒྱུ་མ་ལྟ་བུ།དེའི་རྩལ་ལྷ་གང་ཡང་རུང་བའི་ཐུགས་སྲོག་གི་ཡི་གེ་ལྟར་སྒོམ་པ་རྒྱུ་དཔའ་བར་འགྲོ་བའི་ཏིང་ངེ་འཛིན།དེ་གསུམ་ལ་གཞི་བྱས་ནས་སྐྱེ་གནས་བཞི་གང་རུང་གི་བག་ཆགས་སྦྱོང་བ་དང་འབྲེལ་བར་ཕྱི་སྣོད་གཞལ་ཡས་དང་ནང་བཅུད་ལྷ་རུ་གསལ་བའི་རང་ལུས་ལྷ་སྐུ་སྒྱུ་མ་ལྟ་བུ་སྣང་ཆ་ནས་སྤྱན་གྱི་དཀར་ནག་ཚུན་མ་འདྲེས་ཡོངས་རྫོགས་སུ་གསལ་ལ་སྟོང་ཆ་ནས་རང་བཞིན་དུ་གྲུབ་པ་སྤུ་ཙམ་ཡང་མེད་པར་སྣང་སྟོང་ཟུང་འཇུག་ཆེན་པོ་བཀྲ་ལམ་གྱིས་གསལ་བཏབ་ལ།ཡེ་ཤེས་ལྔའི་དབང་བསྐུར་ཞིང་སྐུ་གསུང་ཐུགས་ཀྱི་རྒྱས་གདབ་སོགས་ཡན་ལག་ཚང་བར་བྱེད་པ་ཡིན་ཏེ།དེས་ནི་མར་འཁོར་བའི་གནས་སྐབས་ན་སྐྱེ་གནས་བཞིར་སྐྱེས་པའི་ལུས་ཀྱི་བག་ཆགས་སྦྱངས་ཤིང་དག་པར་བྱེད།ཡར་སངས་རྒྱས་ཀྱི་གནས་སྐབས་ན་སྐུའི་གསང་བ་བསམ་གྱིས་མི་ཁྱབ་པ་ཞལ་ཕྱག་མཚན་མ་ལས་འདས་པ་དང༌།སྐུ་རྣམ་པ་ཐམས་ཅད་པ་གང་ལ་གང་འདུལ་དུ་སྣང་བའི་འབྲས་བུ་གཞི་ལ་རྫོགས།བར་ལམ་གྱི་གནས་སྐབས་ན་རྩ་ཡི་དྲྭ་བ་དག་པ་ལྷ་རུ་སྦྱངས་པས་རྡོ་རྗེའི་ལུས་ལ་གནད་དུ་བསྣུན་པའི་རྫོགས་རིམ་ཐམས་ཅད་ཀྱི་སྨིན་བྱེད་དུ་འགྲོ།།གཉིས་པ་སྙིང་པོ་སྔགས་ཀྱི་གཟེར་ནི།དེ་ལྟར་གསལ་བའི་ལྷ་ཚོགས་ཐམས་ཅད་ཀྱི་ཐུགས་ཀར་རང་འདྲའི་ཡེ་ཤེས་སེམས་དཔའ་རྒྱན་དང་ཕྱག་མཚན་སྤངས་པ་རེ་རེའི་ཐུགས་ཀར་ཏིང་ངེ་འཛིན་སེམས་དཔའ་ཐུགས་སྲོག་ཡི་གེའི་རྣམ་པར་གནས་པའི་མཐའ་བསྐོར་དུ་མདུན་ནས་བརྩམ་སྟེ་ལྷ་རང་རང་གི་སྙིང་པོ་བཟླས་པ་ལས་ཀྱི་སྔགས་ཕྲེང་གིས་མཐའ་བསྐོར་བ་ལ་སེམས་རྩེ་གཅིག་ཏུ་གཏད་དེ་ངག་བཟླས་འབྲུ་འབུམ་ལྟ་བུ་གྲངས།ཟླ་བ་ལྟ་བུ་དུས།ཞལ་མཐོང་ལ་སོགས་མཚན་མ་དང་སྦྱར་ནས་བཟླས་ཤིང༌།ཁྱད་པར་འབྱིན་འཇུག་གནས་གསུམ་སྔགས་སུ་ཤེས་པས་རྡོ་རྗེའི་བཟླས་པ་ལ་བརྩོན་པར་བྱེད་པ་ཡིན་ཏེ།དེས་ནི་མར་འཁོར་བའི་གནས་སྐབས་ན་བརྗོད་པ་སྒྲའི་རང་བཞིན་འགྲོ་བའི་ངག་གི་བག་ཆགས་དག་པར་བྱེད།ཡར་དག་པ་སངས་རྒྱས་ཀྱི་དུས་ན་གསུང་གི་གསང་བ་བསམ་གྱིས་མི་ཁྱབ་པ་སྒྲ་ཚིག་བརྗོད་པ་ལས་འདས་པ་གསུང་རྣམ་པ་ཐམས་ཅད་པ་ཐེག་པ་བསམ་གྱིས་མི་ཁྱབ་པར་འཆར་བའི་འབྲས་བུ་གཞི་ལ་རྫོགས།བར་ལམ་ཉམས་སུ་ལེན་པའི་དུས་ན་ངག་རླུང་གི་རང་བཞིན་སྙིང་པོ་སྔགས་ཀྱི་རང་བཞིན་དུ་སྦྱངས་པས་ཕ་རྒྱུད་ལྟར་རླུང་ལ་བརྟེན་པའི་རྫོགས་རིམ་ཐམས་ཅད་ཀྱི་སྨིན་བྱེད་དུ་འགྲོ།

གསུམ་པ་དགོངས་པ་མི་འགྱུར་བའི་གཟེར་ནི།ཆོས་ཉིད་ཀྱི་ལྟ་བས་རྩིས་ཟིན་པ་ལ་བྱ་སྟེ།དེ་ལྟར་སྣང་གྲགས་སྣོད་བཅུད་ཐམས་ཅད་ལྷ་སྔགས་གཞལ་ཡས་སུ་ལྷུན་གྱིས་གྲུབ་པར་གསལ་བ་དེ་ཡང་འདུས་བྱས་བློས་སྤྲུལ་གྱི་བཀོད་པ་མིན་པར་དོན་དམ་པའི་ཆོས་ཉིད་དག་མཉམ་སྟོང་པ་ཆེན་པོའི་རང་རྩལ་སྣང་སྲིད་གཞིར་བཞེངས་ཀྱི་དཀྱིལ་འཁོར་དུ་གནས་པ་ལ་བདག་གཞན་དང༌།དམ་ཡེ་བསྒྲུབ་བྱ་སྒྲུབ་བྱེད།དག་དང་མ་དག་ཐ་དད་གཉིས་ཆོས་སུ་འཛིན་པ་ཅུང་ཟད་ཀྱང་མེད་པར་གཉིས་མེད་མཉམ་པ་ཆེན་པོའི་ཀློང་དུ་འཁོར་འདས་ཡེ་སངས་རྒྱས་པའི་དཀྱིལ་འཁོར་ན་བདག་དང་ལྷ་ཞེས་ཐ་དད་དུ་འཛིན་པ་ཅུང་ཟད་ཀྱང་མེད་དེ།བདག་གི་ཆོས་ཉིད་རྣམ་པར་དག་པ་ལྷ་ཡི་རང་བཞིན་དུ་ལྷའི་ཐུགས་ཡེ་ཤེས་ཆེན་པོ་རང་དང་ཡེ་ནས་དབྱེར་མེད་དུ་གནས་པ་སྟེ་དོན་དུ་ནི་1མཉམ་ཉིད་རྡོ་རྗེ་དབྱིངས་ཀྱི་དཀྱིལ་འཁོར་ལ་བསླབ་པ་སྟེ།

འདིའི་ཚུལ་ཚིགས་སུ་བཅད་པ།

གང་གི་རང་བཞིན་གཉིས་མེད་བདེ་བ་ཆེ།།

རྡོ་རྗེ་སེམས་དཔའ་ནམ་མཁའ་ལྟ་བུའི་ཀློང༌།།

ནམ་མཁས་མི་མཚོན་མཚོན་པ་ཐ་སྙད་ཙམ།།

དོན་འདི་རྟོགས་ན་འཁོར་འདས་གཉིས་མེད་དེ།།

ཡེ་ནས་སངས་རྒྱས་སྲིད་པ་མིང་ཙམ་ལུས།།

སྐྱེ་མེད་ཀློང་ན་རྒྱལ་ཀུན་ཐུགས་རྡོ་རྗེ།།

འདུ་འབྲལ་མེད་པའི་ཆོས་ཉིད་དབྱིངས་དག་པ།།

སྣང་བ་ལྷ་ཡིན་ལྷ་ལས་སྣང་མི་དམིགས།།

གྲགས་པ་སྔགས་ཡིན་སྔགས་ལས་སྒྲ་མེད་དོ།།

ལྷ་སྔགས་མ་གྲུབ་དག་མཉམ་ཆོས་སྐུའི་ངང༌།།

བདག་དང་གཞན་དུ་འཛིན་པ་ཡོད་མིན་ཏེ།།

སྟོང་དང་མི་སྟོང་འདི་ལ་ཅི་ཞིག་ཡོད།།

བློ་ལས་འདས་སོ་ཐེག་པའི་རྒྱལ་པོའི་ལམ།།

འདི་དང་རྣམ་པ་ཀུན་དུ་འབྲལ་མི་བྱ།།

འདི་བྲལ་བསྐྱེད་པའི་ལྷ་དེ་འཆིང་བའི་རྒྱུ།།

འདིས་མར་འཁོར་བའི་གནས་སྐབས་ནང་ན་སེམས་བག་ཆགས་ རང་རིག ་རང་གསལ་དུ་གནས་པའི་ཆ་དག་པར་བྱེད།ཡར་སངས་རྒྱས་ཀྱི་དུས་ན་ཐུགས་ཀྱི་གསང་བ་བསམ་གྱིས་མི་ཁྱབ་པ་དམིགས་བསམ་སྤྲོས་དང་བྲལ་བའི་ཆོས་ཉིད་དང༌།ཐུགས་རྣམ་པ་ཐམས་ཅད་པ་མངོན་ཤེས་བསམ་གྱིས་མི་ཁྱབ་པའི་འབྲས་བུ་གཞི་ལ་རྫོགས།བར་ཉམས་སུ་ལེན་པའི་གནས་སྐབས་ན་སྣང་སྟོང་གཉིས་སུ་མེད་པའི་ཆོས་ཉིད་ལ་གོམས་པའི་ཀུན་རྫོབ་དང་དོན་དམ་བྱང་ཆུབ་ཀྱི་སེམས་ལ་བསྟེན་པའི་བདེ་གསལ་སྟོང་པ་ཉིད་ཀྱི་རྫོགས་རིམ་བསྒོམ་པའི་སྨིན་བྱེད་དུ་འགྲོ།

བཞི་པ་འཕྲོ་འདུ་དམིགས་པའི་གཟེར་ནི།མཆོག་ཐུན་ཕྲིན་ལས་བཞི་སྒྲུབ་པའི་ཐབས་ཀྱི་བྱེ་བྲག་ལ་བྱ་སྟེ་སྣོད་བཅུད་ལྷའི་དཀྱིལ་འཁོར་དུ་གསལ་བ་ཐམས་ཅད་ཐུགས་ཆོས་ཉིད་ཀྱི་དགོངས་བ་ལས་གཡོ་འགུལ་མེད་པ།གསུང་སྙིང་པོ་སྔགས་ཀྱི་སྒྲ་གདངས་གཞོམ་མེད་ཡན་ལག་དྲུག་ཅུའི་དབྱངས་སུ་བསྒྱུར་ཞིང་སྐུ་ཞི་བའི་ཚུལ་དགུ་དང་ཁྲོ་བོ་གར་དགུའི་རྣམ་རོལ་དུ་བཞུགས་པའི་སྐུའི་ཆ་དང༌།ཐུགས་ཀའི་སྔགས་ཕྲེང་ལས་འོད་ཟེར་གྱི་ཕུང་པོ་དཀར་ལ་འཚེར་བ་སེར་ལ་སྣུམ་པ་དམར་ལ་བཀྲག་པ་ལྗང་ལ་གནག་པ་དཔག་ཏུ་མེད་པ་འཕྲོས།དུས་གསུམ་ཕྱོགས་བཅུའི་རྒྱལ་བ་སྲས་དང་བཅས་པ་དཀྱིལ་འཁོར་གྱི་འཁོར་ལོའི་རྣམ་པར་གནས་པ་ལ་མཆོད་བྱ་དང་མཆོད་བྱེད་ཐ་དད་དུ་མེད་པ་འཕྲུལ་དགའི་རྣམ་རོལ་དུ་མཆོད་པས་བདེ་སྟོང་ཡེ་ཤེས་ཆེན་པོའི་རོས་ཚིམས།རང་སྣང་ཡེ་ཤེས་ཀྱི་སྣང་ཆར་འཁོར་བ་མིང་ཙམ་ཡང་མི་དམིགས་ཀྱང༌།གཞན་སྣང་སེམས་ཀྱི་སྣང་བར་ཡུལ་དོན་ལུས་སུ་ཨ་འཐས་པའི་མེད་སྣང་སྒྱུ་མའི་འགྲོ་ཁམས་རིགས་དྲུག་གི་གནས་རིས་བསམ་གྱིས་མི་ཁྱབ་པ་ཇི་སྙེད་ཡོད་པ་ཀུན་ཏུ་ཐབས་ལ་མཁས་པའི་འོད་ཟེར་དེས་རེག་པས་འཁྲུལ་འཛིན་མ་རིག་པའི་ཆ་ཐམས་ཅད་སྐད་ཅིག་ལ་སངས་ཏེ།ལུས་ཐམས་ཅད་ལྷ་སྐུ།ངག་ཐམས་ཅད་སྙིང་པོ།ཡིད་ཐམས་ཅད་ཆོས་སྐུའི་དགོངས་པ་འཕོ་འགྱུར་མེད་པར་སངས་རྒྱས་པ་སྟེ་སྲིད་པ་ཞེས་བྱ་བའི་མིང་ཡང་མེད་པར་ཤེས་པ་ནི་མཆོག་གི་དངོས་གྲུབ་གཙོ་བོར་བྱེད་པ་དོན་གཉིས་ལྷུན་གྲུབ་ཀྱི་རྣལ་འབྱོར་པ་ཞེས་བྱ།འོད་ཟེར་དེ་དག་གི་བྱེད་པས་གནས་སྐབས་སུ་དཀར་པོ་ཞི་བ།སེར་པོ་རྒྱས་པ།དམར་པོ་དབང༌།ལྗང་གུས་དྲག་པོའི་ཕྲིན་ལས་སྒྲུབ་པ་དང་དམིགས་པའི་སྤྲོ་བསྡུ་དང་ཕྲིན་ལས་ཀྱི་མདེ་ཁ་བསྒྱུར་བ་ཐུན་མོང་གི་གྲུབ་པ་བརྒྱད་ལ་སོགས་བསྒྲུབ་པ་སྟེ་འདིས་མར་འཁོར་བའི་གནས་སྐབས་ན་ལུས་ངག་ཡིད་ཀྱི་བྱ་བ་དགྲ་འདུལ་གཉེན་སྐྱོང་ཚོང་སོ་ནམ་ལ་སོགས་པའི་རྣམ་པ་སྦྱངས་ཤིང་དག་པར་བྱེད།ཡར་དག་པ་སངས་རྒྱས་ཀྱི་གནས་སྐབས་ན་སྐུ་གསུང་ཐུགས་རྣམ་པ་ཐམས་ཅད་པའི་ཕྲིན་ལས་བསམ་གྱིས་མི་ཁྱབ་པའི་འབྲས་བུ་གཞི་ལ་རྫོགས།བར་ཉམས་སུ་ལེན་པའི་གནས་སྐབས་ན་དོན་གཉིས་ལྷུན་གྱིས་གྲུབ་པའི་བྱེད་རྩོལ་དག་པའི་ལམ་ལ་བསླབ་པའི་རྫོགས་རིམ་གྱི་གནས་སྐབས་ན་ལུས་ངག་ཡིད་ཀྱི་བྱེད་ལས་ལ་ལྟོས་པའི་དམིགས་བཅས་ཐུན་མོང་གི་ལམ་དང་དམིགས་མེད་ཡེ་ཤེས་ཀྱི་དགོངས་པ་མངོན་སུམ་འོད་གསལ་གྱི་རྣལ་འབྱོར་སྣང་སྲིད་འོད་སྐུར་སྦྱོང་བའི་སྨིན་བྱེད་དུ་འགྲོ།དེ་ཡང་འདི་སྐད་དུ།ཐ་དད་མ་ཡིན་གཞི་ལམ་འབྲས།།ཟུག་དུ་འཇུག་པ་སངས་རྒྱས་ལམ།།དང་པོ་ཉིད་ནས་དུ་མར་མེད།།རོ་གཅིག་ཉིད་དུ་འབྲས་བུ་རྫོགས།།འདིས་ཅི་བསྟན་ན།ལྟ་བ་དགོངས་པ་མི་འགྱུར་གཞི་སྟེ་སྒོམ་པ་ལམ།།ལྷ་དང་སྔགས་ཡིན་སྤྱོད་ལ་ཤུགས་ཡིན་ཏེ།།ཕྲིན་ལས་མཆོག་ཐུན་འབྲས་བུ་གང་གནས་པ།།དང་པོ་ཉིད་ནས་ཟུང་འཇུག་ལམ་ཞེས་བྱ།།ཞེས་སྨོས་ཏེ།འདི་ལྟར་དགོངས་པ་མི་འགྱུར་བའི་གཟེར་ནི་ལྟ་བ་ཡིན་པས་ན་གཞི།ཏིང་འཛིན་ལྷའི་གཟེར་ནི་སྒོམ་པ།སྙིང་པོ་སྔགས་ཀྱི་གཟེར་ནི་སྒོམ་པ་ཡང་ཡིན་ལ་ཤུགས་ཀྱི་སྤྱོད་པ་ཡིན་པས་དེ་ཉིད་ལམ།འཕྲོ་འདུ་དམིགས་པའི་གཟེར་ནི་མཆོག་ཐུན་གྱི་དངོས་གྲུབ་བསྒྲུབས་ཤིང་སངས་རྒྱས་ཀྱི་ཕྲིན་ལས་ད་ལྟ་ནས་བྱེད་པའི་འབྲས་བུ་ཡིན་ཏེ།

དེ་ལྟར་སྲོག་སྡོམ་གཟེར་བཞིའམ་ལྟ་སྒོམ་སྤྱོད་འབྲས།གཞི་ལམ་འབྲས་བུ་གང་ཡིན་པ་དེ་དག་ཀྱང་ཐ་དད་དམ།ཡ་བྲལ་ལམ།རེས་འཇོག་ཅན་ནམ།རིམ་པ་ཅན་དུ་མི་ལྟ་སྟེ།དང་པོ་ཉིད་ནས་གཅིག་དང་དུ་མ་མེད་པར་དབྱེར་མེད་ཟུང་འཇུག་ཏུ་ཤེས་དགོས་ཏེ།འདི་ལྟར་དགོངས་པ་མི་འགྱུར་བ་ཆོས་ཉིད་དག་མཉམ་ཆེན་པོར་དབྱིངས་ཡེ་སངས་རྒྱས་པའི་རང་རྩལ་ཀུན་རྫོབ་རྡོ་རྗེ་དབྱིངས་ཀྱི་དཀྱིལ་འཁོར་དུ་རང་ཤར་བའི་བསྐྱེད་རྫོགས་ཟུང་དུ་འཇུག་པའི་ངང་ནས་གྲགས་སྟོང་སྔགས་ཀྱི་རང་སྒྲ་ཅིར་ཡང་བསྒྱུར་ཞིང་འཕྲོ་འདུ་ཕྲིན་ལས་ཀྱི་རོལ་པ་ལ་སློབ་སྟེ།སངས་རྒྱས་རྣམས་ཀྱི་སྐུ་གསུང་ཐུགས་ཡེ་ཤེས་ཆེན་པོ་བྱེད་རྩོལ་སྤྲོས་པ་དང་བྲལ་བཞིན་དོན་གཉིས་ལྷུན་གྱིས་གྲུབ་པར་བཞུགས་པའི་འབྲས་བུ་ད་ལྟ་ནས་གསང་སྔགས་རྡོ་རྗེའི་ཐེག་པའམ་འབྲས་བུའི་ཐེག་པ་ཞེེས་སྨོས་པ་ཡིན་ལ།དེ་ཡང་གཞི་ལྟ་བ་ཡེ་ཤེས་ཀྱི་འཁོར་ལོ་འཁོར་འདས་མཉམ་ཉིད་དུ་རྟོགས་པས་སྲིད་ཞི་གཉིས་ཀའི་སྲོག་ལ་རང་དབང་བསྒྱུར་ཞིང༌།ལམ་བསྒོམ་པ་ལྷ་སྔགས་ཀྱི་འཁོར་ལོ་བསྐྱེད་རྫོགས་གཉིས་ཀའི་སྲོག་ལ་རང་དབང་ཞིང༌།དོན་གཉིས་ལྷུན་གྲུབ་ཀྱི་སྤྱོད་པས་ཐབས་ཆེན་བསམ་གྱིས་མི་ཁྱབ་པའི་སྲོག་ལ་རང་དབང་བ་སྟེ་དཔེར་ན་སྒྲ་གཅན་གྱི་ཁས་ནམ་མཁའི་ཟླ་བ་གཅིག་བཟུང་བས་ཆུ་ནང་གི་ཟླ་བ་ཇི་སྙེད་པ་རང་ཟིན་པ་ལྟར་སྲོག་སྡོམ་གཟེར་བཞིའི་མན་ངག་གཅིག་ཤེས་པས་མདོ་རྒྱུད་བསམ་གྱིས་མི་ཁྱབ་བའི་དགོངས་གནད་དུས་གཅིག་ལ་ཉམས་སུ་ལོང་བས་ན་རེ་རེའང་གནད་ཀྱི་ཁྱད་པར་དུ་མ་དང་བཅས་པ་སྟེ།དང་པོ་དགོངས་པ་མི་འགྱུར་བའི་གཟེར་འཁོར་འདས་མཉམ་ཉིད་དུ་ཤེས་པས་སྤང་བླང་གཞི་ནས་དག་པའི་གནད།རོ་མཉམ་སྟོང་པ་ཉིད་ཤེས་པས་དངོས་འཛིན་བདེན་ཞེན་འཇིག་པའི་གནད།སྣང་སྟོང་ཟུང་འཇུག་དུ་ཤེས་པས་ཚོགས་གཉིས་མཉམ་དུ་རྫོགས་པའི་གནད།ལྟ་བའི་རྩིས་ཟིན་པས་བསྐྱེད་རྫོགས་ཡ་བྲལ་དུ་མི་འགྱུར་པའི་གནད།དགོངས་པའི་ངང་ལས་མི་གཡོ་བས་ལྟ་ཐོག་ཏུ་སྒོམ་པ་འཁྱོལ་བའི་གནད།གྱ་ནོམ་ལྷར་ཞེན་ལས་གྲོལ་བས་བསྐྱེད་རིམ་གྱི་གོལ་ས་སྤོང་བའི་གནད།སྣང་སྲིད་གཞིར་བཞེངས་སུ་རྫོགས་པས་བདག་གཞན་གྱི་གཉིས་འཛིན་མེད་པའི་གནད།ཡེ་གྲོལ་གཞི་རྫོགས་སུ་རྟོགས་པས་དུག་ལྔ་གོལ་ས་མེད་པའི་གནད།ཆོས་སྐུའི་དགོངས་པ་བརྙེས་པས་སྐུ་གསུམ་རང་ལ་རྫོགས་པའི་གནད།གཞི་འབྲས་རོ་གཅིག་ཏུ་ཤེས་པས་ས་ལམ་གྱི་རྩོལ་བསྒྲུབ་མི་དགོས་པའི་གནད།སྒོམ་པ་འབྲས་བུར་འཁྱོལ་བས་སངས་རྒྱས་གཞན་ནས་མི་ཚོལ་བའི་གནད།འབྲས་བུ་གཞི་ལ་འཁྱོལ་བས་ཐོབ་བྱའི་གཞན་འཛིན་གྲོལ་བའི་གནད།ཆོས་ཉིད་ཀློང་དུ་གཅིག་པས་དམ་ཡེའི་འཛིན་པ་དག་པའི་གནད།རིགས་བརྒྱའི་ཁྱབ་བདག་རྟོགས་པས་ལྷ་གཅིག་བསྒྲུབ་པས་ཐམས་ཅད་འགྲུབ་པའི་གནད།མཆོག་གི་དངོས་གྲུབ་བརྙེས་པས་དོན་གཉིས་ལྷུན་གྱིས་གྲུབ་པའི་གནད།བཟང་ངན་སྤང་བླང་ལས་འདས་པས་གཙང་སྦྲ་ཀུན་སྤྱོད་ལ་མ་ལྟོས་པའི་གནད།བྱར་མེད་ཡེ་ཟིན་དུ་ཤེས་པས་ཆོ་གའི་ཁྲིགས་རིམ་མི་དགོས་པའི་གནད།གྲུབ་མཐའི་འཛིན་པ་དག་པས་ཐེག་པའི་རྩེ་མོར་ཕྱིན་པའི་གནད་དེ་གནད་ཆེན་པོ་བཅོ་བརྒྱད་དང་ད་དུང་ཡང་དུ་མ་ལྡན་པས་ན་འདི་ནི་སྲོག་གི་སྲོག་སྟེ་སྲོག་གཞན་གསུམ་གྱི་སྲོག་ཀྱང་འདིའི་སྡོམ་པས་མེད་ཐབས་མེད་པ་ཉིད་དུ་དང་པོར་བཞག་ལ།གཉིས་པ་བསྐྱེད་རིམ་ལྷའི་གཟེར་གྱིས་སྣང་ཆ་ལྷ་རུ་གསལ་བས་སྟོང་པ་ཕྱོགས་གཅིག་ཏུ་མི་གོལ་བའི་གནད།ཀུན་རྫོབ་ལམ་དུ་བྱེད་པས་བདེན་གཉིས་ཟུང་དུ་འཇུག་པའི་གནད།དངོས་པོའི་ཨ་འཐས་སྦྱོང་བས་ཐ་མལ་གྱི་བདེན་ཞེན་སྤོང་པའི་གནད།ཆོ་གའི་ཡན་ལག་རྫོགས་པས་བསོད་ནམས་ཀྱི་ཚོགས་ཆེན་རྫོགས་པའི་གནད།སྐུའི་རྣམ་པ་གསལ་བས་གཟུགས་སྐུའི་ཉེ་རྒྱུར་གྱུར་བའི་གནད།འབྲས་བུའི་བཞུགས་ཚུལ་དང་མཐུན་པས་སྐུ་གསུམ་ལྷུན་གྱིས་གྲུབ་པའི་གནད་དེ་དྲུག་དང༌།

གསུམ་པ་སྙིང་པོ་སྔགས་ཀྱི་གཟེར་ལའང༌།གསུང་རྡོ་རྗེ་ལམ་དུ་བྱེད་པས་ངག་གི་སྒྲིབ་པ་སྦྱོང་བའི་གནད།སེམས་དཔའ་སུམ་བརྩེགས་སུ་བསྒོམས་པས་སྒོ་གསུམ་མཉམ་དུ་གྲོལ་བའི་གནད།དམིགས་པའི་སྔགས་ཕྲེང་ལ་གཏད་པས་ཐ་མལ་གྱི་རྣམ་རྟོག་སྤོང་བའི་གནད།ཟླ་བ་སྐར་འཕྲེང་ལྟར་བཟླས་པས་རང་བབས་ཀྱི་ཏིང་ངེ་འཛིན་ལ་གནས་པའི་གནད།མགལ་མེའི་འཁོར་ལོ་ལྟར་བཟླས་པས་བདེ་སྟོང་གི་ཡེ་ཤེས་བསྐྱེད་པའི་གནད།བུང་བ་ཚང་ཞིག་ལྟར་བཟླས་པས་སྒྲ་གྲགས་སྔགས་སུ་གྲོལ་བའི་གནད།སྙིང་པོའི་སྲོག་གནས་བགྲངས་པས་ལྷ་ཡིས་བྱིན་གྱིས་རློབས་པའི་གནད།ངག་གི་ནུས་པ་འཕེལ་བས་ཅི་སྨྲས་གཞན་དོན་དུ་འགྱུར་བའི་གནད།རིགས་སྔགས་ཀྱི་བདེན་ཚིག་གྲུབ་པས་སྨོན་ལམ་གང་བཏབ་འགྲུབ་པའི་གནད།རྒྱལ་བའི་གསུང་ལ་དབང་བས་སྣང་སྲིད་ལྷ་འདྲེས་བཀའ་བཞིན་སྒྲུབ་པའི་གནད་དེ་བཅུ་དང༌།བཞི་པ་འཕྲོ་འདུ་ཕྲིན་ལས་ཀྱི་གཟེར་གྱིས་མཆོག་གི་དངོས་གྲུབ་གྲུབ་པས་ཐུན་མོང་ཤུགས་ཀྱིས་འབྱུང་བའི་གནད།དམིགས་པའི་མགོ་ཁ་2བསྒྱུར་པས་ལས་ཚོགས་གཞན་ལ་མི་ལྟོས་པའི་གནད།ཕྲིན་ལས་མཐའ་རུ་ཕྱིན་པས་གཞན་དོན་འབད་མེད་འབྱུང་བའི་གནད།འགྲོ་དོན་ལྷུན་གྱིས་གྲུབ་པས་སངས་རྒྱས་ཀྱི་མཛད་པ་འགྲུབ་པའི་གནད།སེམས་བསྐྱེད་ཀྱི་འཕེན་པས་འཕངས་པས་ཐེག་པ་དམན་པར་མི་གོལ་བའི་གནད།གདུལ་བྱ་སྨིན་ཞིང་གྲོལ་བས་གདུང་རྒྱུད་འཛིན་པའི་གནད་དེ་དྲུག་དང་ལྡན་པ་ཡིན་ལ།དེ་ལྟར་རྩ་བ་བཞི་ལས་གནད་ཀྱི་ཁྱད་ཆོས་བཞི་བཅུ་དང་ལྡན་པས་ན་གསང་སྔགས་རྡོ་རྗེ་ཐེག་པའི་ལམ་གནད་མ་ལུས་པ་འདིར་འདུ་ཞིང་འདི་དང་མི་ལྡན་པའི་ལམ་ནི་ཤི་བའི་རོ་དང་འདྲ་བར་ངེས་པས་ན་སྲོག་སྡོམ་གཟེར་ཞེས་བྱ་སྟེ།གཉིས་ཀའི་ཆ་ཐམས་ཅད་གཉིས་མེད་ཡེ་ཤེས་གཅིག་ཏུ་སྡོམ་པའི་གཟེར་བུའང་ཡིན་ལ།འདི་དག་གི་དོན་རྒྱས་སྤྲོས་སུ་བཀྲལ་ན་དུ་མ་ཞིག་མཆིས་ཀྱང་རེ་ཞིག་དེ་ཙམ་མོ།།

གསང་སྔགས་ལམ་གནད་འདུས་པ་གསང་བའི་གཏམ།།

གསང་བར་མི་འོས་རྡོ་རྗེའི་མཆེད་དེའི་བཀས།།

བསྐུལ་བས་རང་བློར་ངེས་བཞིན་འདིར་བཀོད་མོད།།

དངོས་ཤུགས་ཚིག་གི་གཞུང་དང་བསྟུན་མོད་ཀྱང༌།།

དོན་དུ་རྒྱུད་སྡེ་རྒྱ་མཚོའི་དགོངས་པ་དང༌།།

མི་འགལ་ཨ་བུ་ཤྲའི་གསང་ཚིག་ཡིན།།

ཉེས་པ་མཆིས་ན་ལྷ་དང་སྲུང་མར་བཤགས།།

དགེ་ཚོགས་རྣམ་མཁྱེན་རྒྱ་མཚོར་རོ་གཅིག་ཤོག།།།

རྫོང་འཕྲང་སྲོག་གསུམ་ཞེས་པའི་དོན།ལྟ་བའི་རྫོང་ཟིན་ཅིང༌།སྒོམ་པའི་འཕྲང་ལས་གྲོལ་བས།སྤྱོད་པའི་སྲོག་མཁར་བཙུག་པ་ཞིག་ལ་སྔགས་ཀྱི་རྣལ་འབྱོར་སྤྱོད་པ་ཞེས་བྱའོ།།དེ་ཡང་སྤྱི་དང་བྱེ་བྲག་གཉིས་ལས།དང་པོ་ནི་ཐེག་ཆེན་གྱི་མདོ་དང་སྔགས་ཀྱི་རྒྱུད་སྡེ་རབ་འབྱམས་མཐའ་དག་གི་དགོངས་དོན་ལྟ་སྒོམ་སྤྱོད་པའི་ཁོངས་སུ་འདུ་བ་ལ་ངོས་འཛིན་ཇི་ལྟར་གནང་ན།ལྟ་བ་ནི་སྟོང་ཉིད་བཅོ་བརྒྱད་ཡིན།ཐེ་ཚོམ་དང་བྲལ་བའི་རྫོང་ཞིག་དགོས།སྒོམ་པ་ནི་ཕྱོགས་ཆོས་སོ་བདུན་ཡིན།བྱིང་རྒོད་ཀྱི་འཕྲང་ལས་འདའ་བ་དགོས།སྤྱོད་པ་ནི་ཕ་རོལ་ཕྱིན་དྲུག་ཡིན།རང་འདོད་དང་བྲལ་བའི་སྲོག་ཚུགས་དགོས།ཞེས་བླ་མ་གོང་མ་དག་གིས་གསུངས་པ་ལྟར་ལྟ་བ་ལ་ཡིན་པ་མེད་པའི་དོན་ཆོས་ཅན་བློས་བཏགས་ཀྱི་ཚོགས་པ་ཆོས་ཉིད་བསམ་གྱིས་མི་ཁྱབ་པའི་ཀློང་དུ་རང་བཞིན་མེད་པར་སངས་ཚེ་སྟོང་ཉིད་བློ་འདས་ཀྱི་རྫོང་ཆེན་རྙེད་པ་ཞེས་བྱ་བའོ།།

དེ་ལྟར་རྟོགས་པའི་ལྟ་བ་དེ་ཉིད་ཀྱི་ངང་ལ་རྒྱུན་དུ་མཉམ་པར་བཞག་པ་ནི་སྒོམ་པ་ཞེས་བྱ་སྟེ།བྱིང་རྒོད་དང་གསལ་འགྲིབ་ཀྱི་འཕྲང་ལས་གྲོལ་བས་འབད་རྩོལ་ལ་མ་ལྟོས་པར་བསྒོམ་མེད་རྒྱུན་གྱི་རྣལ་འབྱོར་ཅན་ལ་སྣང་སེམས་གཉིས་སུ་མ་གྲུབ་པས་ཡུལ་སྣང་སྒོམ་དུ་ཤར་བའམ།སྣང་སྲིད་དཔེ་ཆར་ཤར་བའི་ཚེ་སྒོམ་པ་ལ་མིན་པ་མེད་པའི་ཐ་སྙད་བརྗོད་པའོ།།དེ་ལྟར་ལྟ་སྒོམ་ཀློང་དུ་གྱུར་པའི་སྐབས་ཙམ་ན་སྤང་བླང་རང་གྲོལ་དུ་སོང་བས་ཡིན་མིན་མེད་པའི་སྤྱོད་པ་ཞེས་མི་བསྲུང་བའི་བསྲུང་བ་ཆེན་པོ་ཆོས་སྐུ་ཐིག་ལེ་ཉག་གཅིག་གི་སྲོག་མཁར་ཚུགས་པ་ནི་སྤང་ཐོབ་ཞིག་པའི་འབྲས་བུ་རེ་དོགས་དང་བྲལ་བའི་བྱང་ཆུབ་སེམས་ཀྱི་ཡིན་ལུགས་གཤིས་ཕྱིན་པ་སྟེ།རྫོང་འཕྲང་སྲོག་གསུམ་འདི་རྣལ་འབྱོར་པ་གཅིག་གིས་སྨིན་གྲོལ་ཐོབ་པ་ནས་ས་ལམ་མཐར་ཕྱིན་བར་གྱི་ཆིངས་ཡིན་པས་ཤེས་དགོས་སོ།།གཞན་ཡང་བདག་ཉིད་ལྷའི་རྣལ་འབྱོར་དུ་གསལ་ཐེབ་པ་བསྐྱེད་རིམ་གྱི་རྫོང༌།སྣང་སྟོང་ཟུང་དུ་འཇུག་པ་ཆོས་ཉིད་འདུས་མ་བྱས་ཀྱི་གནས་ལུགས་ནི་རྫོགས་རིམ་གྱི་སྲོགབྱིང་རྒོད་དང་དམན་པའི་སེམས་སོགས་གཉིས་ཀའི་འཕྲང་རྣམས་བསལ་བ་ལ་ཀུན་ཏུ་བཟང་པོའི་སྤྱོད་པ་ཞེས་དེ་ལྟར་བཞེད་དོ།།

གསལ་བ་གསུམ་ནི།ལས་སྦྱོར་གྱི་སྐབས་སུ་ཡུལ་གསུམ་གསལ་བ་ལའང་འདོད་དེ་ཕྱི་ཡུལ་སྣང་ཆའི་མཚན་མ་རུ་ཊར་གསལ།ནང་ཡུལ་རྟགས་ཀྱི་མཚོན་ཆ་སྲས་མཆོག་ཏུ་གསལ་བ།གསང་ཡུལ་རྟོགས་པའི་འཁྲུལ་འཁོར་ལྷར་སྣང་ཕྱག་རྒྱར་གསལ་བ་དང་གསུམ་སྟེ་བདག་དཔལ་ཆེན་པོར་གསལ་བས་མི་ལྡོག་པའི་དགོས་པ།ཕུར་པ་སྲས་མཆོག་ཏུ་གསལ་བས་མི་སྡུག་པའི་དགོས་པ།ཡུལ་གྱི་མཚན་མར་དགྲ་དངོས་སུ་གསལ་བས་མི་འབྱམས་པའི་དགོས་པ་ཡོད་དོ།།

གང་ཡང་བསྒྲུབ་བྱའི་སྙིང་དཀྱིལ་དུ་ཁྲག་གི་དྭངས་མ་བྱེའུ་ལེབ་མའི་མགོ་ཙམ་པའི་དཀྱིལ་ན་ཚེ་བསོད་བཀྲག་མདངས་ཀྱི་རྟེན་ཨ་དཀར་གསལ་བ་ཕུར་རྩེའི་ཧཱུྃ་གསུམ་ལ་བསྡུས་ཏེ་རང་གི་ཐུགས་སྲོག་ལ་བསྟིམ་པ་ཚེ་ལུང༌།ཨ་དཀར་དང་མཉམ་དུ་ཉོན་ཡིད་རྣམ་ཤེས་ཀྱི་རྟེན་ནྲིའམ་ཏྲིར་གསལ་བ་དེ་ལ་ཕུར་པ་གཏད་པས་དྲན་མེད་དུ་བརྒྱལ་ནས་རྟོག་ཚོགས་ཆོས་ཉིད་དུ་ཐིམ་ཞིང་ས་བོན་འོད་ཀྱི་ཐིག་ལེ་རུ་གྱུར་པ་ཁྲུས་ལུང༌།ཐིག་ལེ་དེ་ཉིད་ཕུར་རྩེའི་ཧཱུྃ་གསུམ་ལ་བསྟིམ་ཞིང་ཕཊ་གསུམ་གྱིས་འཕངས་པས་ཧེ་རུ་ཀའི་ཐུགས་ཀར་བསྟིམ་པ་སྐུའི་དབྱིབས་བརྒྱུད་ཡུམ་གྱི་མཁར་སྲས་སུ་བསྐྲུན་པ་ནི་གནས་ལུང་ངོ༌།།བསྐྱེད་རིམ་གྱི་མངོན་བྱང་ལྔ་ནི།གསར་ལུགས་ལྟར་ན་གདན་པད་ཟླ་ལ་བྱང་ཆུབ་པ།གསུང་ཡིག་འབྲུ་ལ་བྱང་ཆུབ་པ།ཐུགས་ཕྱག་མཚན་ལ་བྱང་ཆུབ་པ།སྐུ་ཡོངས་རྫོགས་ལ་བྱང་ཆུབ་པ།ཡེ་ཤེས་སེམས་དཔའ་ལ་བྱང་ཆུབ་པ་དང་ལྔའོ།།

རྙིང་ལུགས་ལ་མངོན་བྱང་དང་པོ་ཟླ་བའི་དཀྱིལ་འཁོར།གཉིས་པ་ཉི་མའི་དཀྱིལ་འཁོར།གསུམ་པ་ས་བོན་ཕྱག་མཚན།བཞི་པ་ས་བོན་ཕྱག་མཚན་བཅས་འོད་ཀྱི་གོང་བུར་གྱུར་པ།ལྔ་པ་སྐུ་ཡོངས་སུ་རྫོགས་པར་སྣང་བའོ།། ཞེས་ཆོས་ཀྱི་དབང་པོས་སོ།། །།