མ་རིག་པའི་མུན་པ་ཐམས་ཅད་རབ་ཏུ་སེལ་བ་རིན་པོ་ཆེ་འདུས་པའི་རྒྱུད།

ཐུགས་རྗེ་ཆེན་པོ་མ་རིག་མུན་སེལ་ལས༔ མ་རིག་པའི་མུན་པ་ཐམས་ཅད་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་བཞུགས༔ རྒྱ་གར་སྐད་དུ༔ རཏྣ་ཨ་ཀ་སརྦ་ཤྭ་ར་གྷ་གྷ་རས་མི་ནཱ་མ༔ བོད་སྐད་དུ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ཅེས་བྱ་བ༔ ཆོས་ཀྱི་སྐུ་འོད་སྣང་དཔག་ཏུ་མེད་པ་ལ་ཕྱག་འཚལ་ལོ༔ དེ་ཡང་ནུབ་ཕྱོགས་བདེ་ཆེན་བཀོད་པའི་ཞིང་མཆོག་ཆེན་པོ་ཞེས་བྱ་བ༔ ཕྱི་དང་ནང་མེད་པའི་གཞལ་ཡས་ཁང་ཆེན་པོ་ཀུན་ཏུ་ཡང་ནང་དུ་གྱུར་པ༔ ཡེ་ཤེས་ཀྱི་འོད་དང་འོད་ཟེར་གྱི་ཚོགས་ནི་ཀུན་ཏུ་འཁྲུག་པ༔ ལྟ་ན་སྡུག་ཅིང་བཀོད་པའི་ཚོགས་བསམ་གྱིས་མི་ཁྱབ་ཅིང་དཔག་པར་དཀའ་བ་མང་པོས་ཡོངས་སུ་བརྒྱན་པ༔ རྣམ་པར་དག་པའི་སྤོས་ཀྱི་དྲི་ངད་ལྡང་བ༔ ཡན་ལག་བརྒྱད་དང་ལྡན་པའི་ཆུ་བོ་བབས་པ༔ འཆི་མེད་བདུད་རྩི་ཟས་སུ་ཟ་བ༔ བདེ་ཆེན་གྱི་ཆུ་རྒྱུན་འཐུང་བ༔ ཚུལ་ཁྲིམས་གཙང་མའི་གོས་བཟང་གྱོན་པ༔ འཛད་པ་མེད་པའི་ནོར་ལ་སྤྱོད་པ་དེར་སྐྱེ་ཤི་མེད་པའི་ཚེ་དང་ལྡན་པའི་སངས་རྒྱས་ཆེན་པོ་སྣང་བ་འོད་བྱེད་ཅེས་ཀྱང་བྱ༔ འོད་དཔག་ཏུ་མེད་པ་ཞེས་ཀྱང་བྱ༔ གཟི་བརྗིད་འབར་བའི་རྒྱལ་པོ་ཞེས་ཀྱང་བྱ༔ མགོན་པོ་འོད་སྣང་རབ་ཏུ་མཐའ་ཡས་པ་ཞེས་བྱ་བའི་སངས་རྒྱས་དེ་ཕྱོགས་ལྷུང་བྲལ་བའི་ཁྲི་ལ་རིས་སུ་མ་གྲུབ་པའི་འཁོར་རྒྱལ་བ་རྒྱ་མཚོ་དཔག་ཏུ་མེད་པའི་ཚོགས་དང་༔ བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་བརྗོད་ལས་འདས་པ་མང་པོས་བསྐོར་ནས་དུས་གསུམ་འགྱུར་མེད་ཀྱི་ངང་དུ་ཡོངས་སུ་བཞུགས་སོ༔ བཞུགས་པར་གྱུར་ཏོ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ གླེང་གཞིའི་ལེའུ་སྟེ་དང་པོའོ༔ ས་མ་ཡཱ༔ རྒྱ་རྒྱ་རྒྱ༔ དེའི་ཚེ་དེའི་དུས་ན་རྒྱལ་བ་འོད་དཔག་ཏུ་མེད་པ་དེ་ཉིད་ཆོས་ཀྱི་དབྱིངས་ལས་མ་གཡོས་བཞིན་དུ༔ སོ་སོར་རྟོག་པའི་ཏིང་ངེ་འཛིན་ལ་སྙོམས་པར་ཡོངས་སུ་ཞུགས་ནས༔ རྒྱུ་དྲུག་འཁྲུལ་པའི་འཇིག་རྟེན་རྣམ་པ་དྲུག་གི་ཁམས་རྣམས་ཡོངས་སུ་གཟིགས་པས༔ ལས་དྲུག་འཁྲུལ་པའི་སྡུག་བསྔལ་གྱི་མུན་པ་སེལ་བར་དགོངས་ནས་ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ཞེས་ཆོས་ཉིད་རང་བྱུང་གི་སྒྲ་ལས་རང་ཤར་གྲགས་སྟོང་བརྗོད་མེད་ཀྱི་དབྱིངས་སུ་འབྲུག་སྟོང་ལྡིར་བ་ཙམ་དུ་བསྒྲགས་པས༔ སྐད་ཅིག་དེ་ཉིད་ལ་སྟོན་པ་ཉིད་ཀྱི་མདུན་གྱི་ནམ་མཁར་ཆུ་ལས་ཆུ་བུར་རྡོལ་བ་ལྟར༔ ལོངས་སྤྱོད་རྫོགས་པའི་སྐུ་འཕགས་པ་སྤྱན་རས་གཟིགས་དབང་ཕྱུག་ཞེས་བྱ་བ་ཐུགས་ལས་སྤྲུལ་ཏེ་མངོན་པར་བཞུགས་མ་ཐག་ཏུ༔ དེར་འདུས་པའི་སངས་རྒྱས་དང་བྱང་ཆུབ་སེམས་དཔའ་ཆེན་པོ་དེ་དག་ཐམས་ཅད་ཆོས་ཉིད་རོ་གཅིག་མཉམ་པ་ཉིད་ཀྱི་ཡེ་ཤེས་ཀྱི་ངང་ནས༔ དབྱངས་གཅིག་གིས་ཚིག་གི་སྒྲར་ཡོངས་སུ་གྲགས་པ་སྟོན་པ་འོ ད་སྣང་བྱེད་ཀྱི་རྒྱལ་པོ་ལ་འདི་སྐད་ཅེས་གསོལ་ཏོ༔ ཀྱེ་མ་མགོན་པོ་འོད་དཔག་མེད༔ ཆོས་དབྱིངས་ཀུན་ཁྱབ་ཐུགས་རྗེ་ལས༔ འགག་མེད་ལོངས་སྤྱོད་རྫོགས་སྐུ་ཤར༔ འབྲུ་བཅུ་སྤྲུལ་སྐུའི་སྒྲ་དབྱངས་ལྡིར༔ རྒྱུ་རྐྱེན་མཚན་མ་ཇི་ལྟར་ལགས༔ འདུས་པའི་འཁོར་ལ་བཤད་དུ་གསོལ༔ ཅེས་གསོལ་མགོན་པོ་འོད་སྣང་གིས༔ ཚངས་དབྱངས་གསུང་གི་སྒོ་ཕྱེ་ནས༔ འདུས་པའི་འཁོར་ལ་བཀའ་སྩལ་པ༔ ཉོན་ཅིག་རྒྱལ་བ་འདུས་པའི་འཁོར༔ ཆོས་དབྱིངས་ཀུན་ཁྱབ་ངོ་བོ་ལས༔ མ་འགགས་འཕགས་པ་ལོངས་སྤྱོད་རྫོགས༔ སྤྲུལ་པའི་སྔགས་སྒྲ་སྤྲུལ་པའི་མཆོག༔ མ་རིག་མུན་འཁྲུལ་སེམས་ཅན་དྲུག༔ རང་རིག་ཡེ་ཤེས་མུན་བསལ་ཕྱིར༔ སྐུ་གསུམ་མཆོག་སྤྲུལ་སྣ་ཚོགས་སྣང་༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ གླེང་བསླངས་བའི་ལེའུ་སྟེ་གཉིས་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་མགོན་པོ་འོད་དཔག་ཏུ་མེད་པ་ལ་འདི་སྐད་ཅེས་གསོལ་ཏོ༔ ཨེ་མ་མགོན་པོ་ཆོས་ཀྱི་སྐུ༔ རྒྱལ་བ་ཐམས་ཅད་འདུས་པའི་བདག༔ བདེ་ཆེན་བདེ་བའི་ཞིང་ཁམས་འདིར༔ བདེ་ལྡན་མཆོག་གི་བདེ་བར་ལྡན༔ འདི་ལྟར་མར་གྱུར་འགྲོ་དྲུག་ཞེས༔ སྡུག་བསྔལ་གནས་དྲུག་གང་དུ་མཆིས༔ མ་རིག་མུན་པ་ཇི་ལྟར་བསལ༔ དེ་ནས་སྟོན་པས་བཀའ་སྩལ་པ༔ འཕགས་པ་ཆེན་པོ་བདག་ལ་ཉོན༔ དང་པོ་གཞི་མེད་ཕྱོགས་ལྷུང་མེད༔ འཁོར་འདས་གང་དུའང་མི་དམིགས་ཀྱང་༔ གློ་བུར་མ་རིག་རླུང་གིས་སྣུན༔ འགྱུ་རྟོག་ཚོར་བའི་ཕུང་པོ་ལངས༔ འཁོར་བ་མྱང་འདས་གཉིས་སུ་གྲུབ༔ རང་སྣང་མ་རིག་མུན་པས་སྒྲིབས༔ ཕྱི་སྣོད་འབྱུང་བའི་ཁམས་ལྔ་དང་༔ ནང་གི་ཉོན་མོངས་དུག་ལྔ་བོ༔ མ་རིག་ལས་ཀྱིས་བདག་ཏུ་བཟུང་༔ དེ་ལས་འགྲོ་དྲུག་ས་བོན་གྲུབ༔ ལས་དྲུག་འབྲས་བུས་འགྲོ་དྲུག་མནར༔ སྲིད་རྩེ་མནར་མེད་བར་དག་ཏུ༔ སྡུག་བསྔལ་མི་བཟོད་རྦ་ཀློང་འཁྲུག༔ དམྱལ་བ་དམྱལ་མེ་འབར་པས་འཇིགས༔ ཡི་དྭགས་བཀྲེས་དང་སྐོམ་པས་གདུང་༔ དུད་འགྲོ་གཅིག་གི་གཅིག་ཟས་འཇིགས༔ མི་རྣམས་སྐྱེ་རྒ་ན་དང་འཆི༔ ལྷ་རྣམས་བག་མེད་པ་ཡིས་འཇིགས༔ ལྷ་མིན་མཚོན་ཆའི་འཁོར་ལོ་འབར༔ འཁོར་བ་དག་ནི་སྡུག་བསྔལ་རྒྱུ༔ མ་རིག་མུན་པ་འཐིབས་པོ་ཆེར༔ འཕགས་པའི་ཐུགས་རྗེའི་འོད་ཟེར་གྱིས༔ གང་ལ་གང་འདུལ་འཕྲིན་ལས་ཀྱིས༔ འགྲོ་དྲུག་མུན་པ་ཐབས་ཀྱིས་སོལ༔ མ་རིག་མུན་པ་རབ་ཏུ་སེལ་པ་རིན་པོ་ཆེ་འདུས་པའི་རྒྱུད་ལས༔ གདུལ་བྱ་འགྲོ་དྲུག་གི་རྒྱུ་འབྲས་དང་འདུལ་བྱེད་འཕགས་པའི་ཐུགས་རྗེ་ལུང་བསྟན་པའི་ལེའུ་སྟེ་གསུམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ ཆོས་སྐུ་འོད་མི་འགྱུར་བའི་སྐུ༔ འགྲོ་དྲུག་གཟུགས་ཀྱི་བག་ཆགས་དྲུག༔ འདུལ་བའི་འཕྲིན་ལས་གང་ལྟར་ཟབ༔ འདུས་པའི་འཁོར་ལ་བསྟན་དུ་གསོལ༔ ཅེས་གསོལ་སྟོན་པས་བཀའ་སྩལ་པ༔ ཀྱེ་ཧོ་ཚུར་ཉོན་འདུས་པའི་འཁོར༔ འགྲོ་དྲུག་གཟུགས་སྣང་ཕུང་པོ་དྲུག༔ དམ་ཚིག་འཕགས་པའི་སྐུ་རུ་བསྒོམ༔ ཡེ་ཤེས་སྨིན་གྲོལ་ནུས་དབང་བསྐུར༔ རང་དང་འཕགས་པ་དབྱེར་མེད་གསལ༔ མཆོད་པ་སྣ་ཚོགས་མཆོད་པས་མཆོད༔ བསྟོད་པ་བརྡ་དང་རྟགས་ཀྱིས་བསྟོད༔ ཕྱི་སྣོད་འཇིག་རྟེན་གཞལ་ཡས་ཁང་༔ ནང་བཅུད་འགྲོ་དྲུག་འཕགས་པའི་སྐུ༔ སྣང་སྟོང་ཆུ་ཟླ་ལྟ་བུར་བསྒོམ༔ འགྲོ་དྲུག་གཟུགས་སྣང་ལྷ་སྐུར་གྲོལ༔ སྤྲུལ་པའི་སྐུ་རུ་བྱང་ཆུབ་ནས༔ གཟུགས་ཀྱི་སྤྲུལ་པས་འགྲོ་བ་འདུལ༔ འཕགས་པ་ཁྱོད་ཀྱི་སྐུ་སྤྲུལ་ཡིན༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ འགྲོ་དྲུག་གཟུགས་ཀྱི་ཕུང་པོ་དྲུག་འཕགས་པའི་སྐུའི་བསྐྱེད་རིམ་གྱིས་འདུལ་བར་བསྟན་པའི་ལེའུ་སྟེ་བཞི་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་ཆོས་སྐུ་འོད་མི་འགྱུར༔ འགྲོ་དྲུག་ངག་གི་བག་ཆགས་དྲུག༔ སྦྱོང་བྱེད་འཕྲིན་ལས་གང་ལྟར་ལགས༔ ཅེས་གསོལ་སྟོན་པས་བཀའ་སྩལ་པ༔ ཀྱེ་ཧོ་ཚུར་ཉོན་འདུས་པའི་འཁོར༔ ངག་གི་བག་ཆགས་སྦྱང་བའི་ཐབས༔ བག་ཆགས་ཚིག་ནི་ཉོན་མོངས་རླུང་༔ རླུང་ནི་དུས་གསུམ་ཀུན་ཏུ་སྟོང་༔ སྟོང་པའི་རང་རྩལ་མ་འགགས་སྒྲ༔ ཡེ་ཤེས་དབྱངས་གསལ་ཡི་གེ་ཤར༔ ཡི་གེ་འཁོར་ལོ་གསང་སྔགས་སྒྲ༔ སྔགས་བདག་སྔགས་མཆོག་རིགས་སྔགས་འཆང་༔ གསང་སྔགས་རྒྱལ་པོ་དོན་ཆེན་བྱེད༔ བཅུ་དྲུག་འཁོར་ལོ་ཚོགས་ཆེན་ས༔ ལོངས་སྤྱོད་རབ་རྫོགས་ལོངས་སྐུ་གྲོལ༔ སྒྲ་རུ་གྲགས་པ་འཕགས་པའི་གསུང་༔ གྲག་སྟོང་བརྗོད་མེད་འཁྱེར་སོས་བཟླས༔ ཨཱོཾ་ཨཱཿཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ འགྲོ་དྲུག་ངག་གི་འཁྲུལ་པ་སྦྱོང་བའི་ཐབས་བསྟན་པའི་ལེའུ་སྟེ་ལྔ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ འོད་མཛད་སྣང་བ་ཆོས་ཀྱི་སྐུ༔ འགྲོ་དྲུག་སེམས་ཉིད་ཉོན་མོངས་དྲུག༔ སྦྱོང་བྱེད་གདམས་ངག་གང་ལྟར་ལགས༔ འདུས་པའི་འཁོར་ལ་བཀའ་སྩོལ་ཞིག༔ ཅེས་གསོལ་སྟོན་པས་བཀའ་སྩལ་པ༔ ཨེ་མ་འདུས་པའི་འཁོར་ཚོགས་ཉོན༔ འགྲོ་དྲུག་ཁམས་གསུམ་སེམས་ཀྱིས་བྱས༔ སེམས་འབྱུང་སེམས་ནི་རིགས་དྲུག་རྒྱུ༔ མ་རིག་ཉོན་མོངས་མུན་པས་བསྒྲིབས༔ རང་བྱུང་ཡེ་ཤེས་འོད་པོ་ཆེ༔ འོད་ཆེན་སྣང་བ་ལམ་མེ་བ༔ ཡེ་ཤེས་མིག་གཅིག་དྲི་མ་མེད༔ མ་རིག་ཉོན་མོངས་གཡུལ་ལས་རྒྱལ༔ ཟང་ཐལ་སྟོང་པ་འོད་མི་འགྱུར༔ མགོན་པོ་སྣང་བ་ཡེ་ཤེས་ཆེ༔ ཆོས་སྐུ་ཀུན་བདག་ཀུན་ལས་རྒྱལ༔ འཁོར་འདས་གཉིས་ཀ་མིང་ཙམ་ཉིད༔ སེམས་ནི་སྤྲོས་བྲལ་གདོད་ནས་དག༔ རང་མདངས་རོལ་པའི་རྩལ་སྣང་ལས༔ མ་འགགས་རོལ་པ་འཕགས་པའི་སྐུ༔ རང་ སེམས་འཆར ་སྒོ་ཡེ་ཤེས་ལྔ༔ ལོངས་སྐུ་གཙོ་དང་སྤྲུལ་པའི་འཁོར༔ རང་བྱུང་རང་ཤར་ཅིར་ཡང་སྣང་༔ རིག་རྩལ་ཐུགས་རྗེ་སྤྲུལ་པའི་སྐུ༔ འགྲོ་བའི་ཁམས་ལ་སྣ་ཚོགས་སྟོན༔ དཔེར་ན་བར་སྣང་འཇའ་ལྟར་ཤར༔ ཉི་མ་དང་ནི་འོད་ཟེར་བཞིན༔ མི་གནས་མི་དམིགས་བློ་ལས་འདས༔ མི་བསྒོམ་མ་ཡེངས་རང་སར་བསྐྱངས༔ རྒྱུ་རྐྱེན་མཚན་མ་ངོ་བོར་དག༔ སྟོང་ཉིད་ཆོས་སྐུ་རང་ཞལ་མཇལ༔ མཐོང་མེད་མཐོང་བ་ཐུགས་རྗེ་ཆེ༔ བདེ་བ་ཆེན་པོར་ཡེ་སངས་རྒྱས༔ རྒྱུ་དྲུག་སེམས་འཁྲུལ་རང་མཚང་རྡིབ༔ ལས་དྲུག་རྨི་ལམ་འཁྲུལ་པ་འདྲ༔ འགྲོ་དྲུག་འཁོར་བ་ཆོས་ཀྱི་དབྱིངས༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ འགྲོ་དྲུག་སེམས་ཀྱི་ཉོན་མོངས་སྦྱོང་བའི་ཐབས་བསྟན་པའི་ལེའུ་སྟེ་དྲུག་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ སྣང་བ་མཐའ་ཡས་འོད་དཔག་མེད༔ དེ་ལྟར་དོན་རྟོགས་སྐྱེས་བུ་ཡི༔ སྒོ་གསུམ་འཁྱེར་སོ་གང་ལྟར་བགྱིད༔ ཅེས་གསོལ་སྟོན་པས་བཀའ་སྩལ་པ༔ འདུས་པའི་འཁོར་རྣམས་མ་ཡེངས་ཉོན༔ སྣང་བ་ཐམས་ཅད་སྐུ་རུ་འཁྱེར༔ གཟུགས་སྣང་ཐུགས་རྗེ་ཆེན་པོའི་སྐུ༔ སྣང་ལ་སྟོང་ཞིང་སྟོང་ལ་སྣང་༔ སྣང་སྟོང་གཉིས་མེད་ཟུང་དུ་འཇུག༔ སྒྲ་གྲག་ཐམས་ཅད་གསུང་དུ་འཁྱེར༔ འགྲོ་དྲུག་སྐད་དང་འབྱུང་བཞིའི་སྒྲ༔ རང་བྱུང་ཐུགས་རྗེ་ཆེན་པོའི་གསུང་༔ གྲགས་སྟོང་བརྗོད་མེད་ལྷན་ཅིག་སྐྱེས༔ དྲན་སེམས་ཐམས་ཅད་ཐུགས་སུ་འཁྱེར༔ དུག་ལྔ་རང་གྲོལ་ཡེ་ཤེས་ལྔ༔ དུག་གསུམ་སྐུ་གསུང་ཐུགས་རྡོ་རྗེ༔ ཐམས་ཅད་རང་གྲོལ་ཆོས་ཀྱི་སྐུ༔ སྒོ་གསུམ་འཁྱེར་སོ་འདི་གསུམ་གྱིས༔ དུག་གསུམ་དུག་ལྔ་རྒྱུ་དང་བཅས༔ སྐུ་གསུམ་ཡེ་ཤེས་མངོན་དུ་བྱེད༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ སྒོ་གསུམ་གྱི་འཁྱེར་སོ་བསྟན་པའི་ལེའུ་སྟེ་བདུན་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་བཅོམ་ལྡན་དེ་བཞིན་གཤེགས༔ དབང་གི་ཆོ་ག་ཇི་ལྟར་ལགས༔ ཅེས་གསོལ་སྟོན་པས་བཀའ་སྩལ་པ༔ རྒྱལ་བ་འདུས་པའི་འཁོར་རྣམས་ཉོན༔ དབང་མཆོག་དམ་པ་དབང་གི་རྒྱལ༔ དངོས་གྲུབ་ཐོབ་པའི་སློབ་དཔོན་གྱིས༔ མཚན་ཉིད་ལྡན་པའི་སློབ་མ་ལ༔ སྤྲོས་བཅས་བུམ་པའི་ལྷ་དབང་སྐུར༔ སྐུ་ཡི་དམ་ཚིག་ཡང་དག་སྲུངས༔ སྤྲུལ་པའི་སྐུ་སྟེ་སྐུ་ཡི་མཆོག༔ སྤྲོས་མེད་ནང་གི་གསང་དབང་བསྐུར༔ གསུང་གི་དམ་ཚིག་ཡང་དག་བསྲུངས༔ ལོངས་སྤྱོད་རྫོགས་སྐུ་ལོངས་སྤྱོད་བརྒྱན༔ ཤིན་ཏུ་སྤྲོས་མེད་ཚིག་དབང་བསྐུར༔ ཐུགས་ཀྱི་དམ་ཚིག་ཡང་དག་བསྲུངས༔ ཆོས་སྐུ་དེ་བཞིན་དེ་བཞིན་གཤེགས༔ དབང་མཆོག་དབང་བཅུ་དབང་གི་རྒྱལ༔ རྣམ་པ་བཅུ་ཡི་དོན་དང་ལྡན༔ ཕྱིར་མི་ལྡོག་སྟེ་ཕྱིར་མི་འོང་༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ དབང་གི་ཆོ་ག་བསྟན་པའི་ལེའུ་སྟེ་བརྒྱད་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་ཆོས་སྐུ་དེ་བཞིན་གཤེགས༔ མཆོད་བསྟོད་ཆོ་ག་ཇི་ལྟར་ལགས༔ འདུས་པའི་འཁོར་ལ་བསྟན་དུ་གསོལ༔ ཅེས་གསོལ་སྟོན་པས་བཀའ་སྩལ་པ༔ སྨན་གཏོར་མཆོད་རྫས་འབྱོར་ཚད་བཤམས༔ བྱིན་བརླབས་ཏིང་འཛིན་རྣམ་གསུམ་གྱི༔ ས་བོན་ཧྲཱིཿལས་འཕགས་པར་བསྒོམ༔ རིན་ཆེན་སྣ་ཚོགས་གཞལ་ཡས་སུ༔ གཙོ་འཁོར་ཚོམ་བུ་བཀའ་ཉན་བཅས༔ གསལ་བར་བསྐྱེད་ཅིང་སྤྱན་འདྲེན་བཞུགས༔ མཆོད་པ་སྣ་ཚོགས་བསྟོད་པས་བསྟོད༔ འཛབ་ཀྱིས་བསྐུལ་ཞིང་དངོས་གྲུབ་ཞུ༔ ཚོགས་འཁོར་དགའ་སྟོན་བཀྲ་ཤིས་བརྗོད༔བསྔོ་བ་སྨོན་ལམ་མཐའ་རྒྱས་གདབ༔ ལྷ་གཤེགས་དལ་བསྡུ་རྒྱུན་སྤྱོད་བྱ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ མཆོད་ཅིང་བསྟོད་པའི་ཆོ་ག་བསྟན་པའི་ལེའུ་སྟེ་དགུ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་བཅོམ་ལྡན་འོད་མི་འགྱུར༔ ལས་སྣང་འགྲོ་བ་འཕྲིན་ལས་ཀྱིས༔ སྒྲོལ་བའི་ཁོག་ཕུབ་ཇི་ལྟར་ལགས༔ སྟོན་པས་འཁོར་ལ་བཀའ་སྩལ་པ༔ ཉོན་ཅིག་རྒྱལ་བ་འདུས་པའི་འཁོར༔ འགྲོ་དྲུག་སྒྲོལ་བའི་འཕྲིན་ལས་ཀྱི༔ སྒྲུབ་པའི་ཁོག་ཕུབ་འདི་ལྟ་སྟེ༔ སྔོན་འགྲོ་དངོས་གཞི་རྗེས་གསུམ་གྱི༔ གནས་དང་དཀྱིལ་འཁོར་ཡོ་བྱད་དང་༔ སློབ་དཔོན་སློབ་མ་བརྟག་དང་བསྟན༔ གསོལ་བ་བཏབ་ཅིང་གནང་བ་སྦྱིན༔ བསྙེན་དང་སྒྲུབ་པ་དབང་ལ་འཇུག༔ མཐའ་སྐྱོང་བཀྲ་ཤིས་གླུ་གར་དབྱངས༔ ལས་ཀྱི་མཚམས་དབྱེ་གབ་འཁྲུགས་བསལ༔ ཚོམ་བུ་དང་བཅས་གྲོལ་ལམ་འགོད༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ སྒྲུབ་པའི་ལས་ཆོག་ཁོག་ཕུབ་བསྟན་པའི་ལེའུ་སྟེ་བཅུ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་བཅོམ་ལྡན་དེ་བཞིན་གཤེགས༔ ཤེས་རྒྱུད་རྨོངས་པའི་སེམས་ཅན་རྣམས༔ མྱོང་བས་གྲོལ་ཐབས་ཇི་ལྟར་ལགས༔ སྟོན་པས་འཁོར་ལ་བཀའ་སྩལ་པ༔ རཏྣའི་བུམ་པ་མཚན་ལྡན་དུ༔ ཡབ་ཡུམ་བྱང་སེམས་བདུད་རྩི་ལྔ༔ ཤ་སྣ་འབྲུ་སྣ་སྨན་སྣ་དང་༔ སྙིང་པོ་ལྔ་དང་རིན་ཆེན་ལྔ༔ དཀར་གསུམ་མངར་གསུམ་རྒྱ་མཚོའི་ཆུས༔ རིལ་བུ་སྒྲིལ་ཏེ་བུམ་པར་བླུགས༔ ཁ་རྒྱན་མགུལ་ཆིངས་གཟུངས་ཐག་བཏགས༔ སྟོང་པར་སྦྱངས་ནས་ལྷ་རུ་བསྒོམ༔ དཀྱིལ་འཁོར་དབུས་འགོད་བསྙེན་ཞིང་བསྒྲུབ༔ རིལ་བུ་འཕུར་དང་འཕེལ་དང་འཁྲབ༔ འཇའ་འོད་འཁྲུག་ཅིང་དྲི་བཟང་འཐུལ༔ ཞལ་མཇལ་གསུང་ཐོས་ཉམས་རྟོགས་རྒྱས༔ ལྷ་མི་དུད་འགྲོ་གཟུགས་ཅན་དང་༔ གཟུགས་མེད་འགྲོ་བ་ཐམས་ཅད་ལ༔ ལྟོ་རུ་ཐེངས་སམ་གྲིབ་མས་འགོང་༔ དུད་པས་ཕོག་གམ་རླུང་གིས་རེག༔ ཐམས་ཅད་འཕགས་པའི་སྐུ་རུ་གྲོལ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ མྱོང་གྲོལ་བསྟན་པའི་ལེའུ་སྟེ་བཅུ་གཅིག་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་བཅོམ་ལྡན་དེ་བཞིན་གཤེགས༔ མཐོང་པས་གྲོལ་ཐབས་ཇི་ལྟར་ལགས༔ སྟོན་པས་འཁོར་ལ་བཀའ་སྩལ་པ༔ རྒྱལ་བ་འདུས་པའི་འཁོར་རྣམས་ཉོན༔ གཟའ་སྐར་ཤིས་པའི་ཉི་མ་ལ༔ དར་ཟབ་ཤོག་བུ་གང་རུང་ངོས༔ འཕགས་པའི་ལྷ་དང་སྔགས་འཁོར་འགོད༔ ལྷ་ཚོགས་དཀྱིལ་འཁོར་ཚོམ་བུར་བསྐྱེད༔ དྲི་བཟང་བྱུག་ཅིང་མེ་ཏོག་འཐོར༔ ཤིས་བརྗོད་རབ་གནས་ཚོང་འདུས་སམ༔ མགྲོན་ཁང་བཞི་མདོ་དག་ཏུ་བཞུགས༔ དེ་མཐོང་འཕགས་པའི་སྐུ་རུ་གྲོལ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ མཐོང་གྲོལ་བསྟན་པའི་ལེའུ་སྟེ་བཅུ་གཉིས་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་འོད་མི་འགྱུར་བ་ཆེ༔ ཐོས་པས་གྲོལ་བའི་གདམས་པ་གསུངས༔ འདུས་པའི་འཁོར་ལ་བཀའ་སྩོལ་ཞིག༔ སྟོན་པས་འཁོར་ལ་བཀའ་སྩལ་པ༔ རྒྱལ་བ་འདུས་པའི་འཁོར་རྣམས་ཉོན༔ ཨེ་མ་རང་བྱུང་ཡེ་ཤེས་སྒྲ༔ ཨཱོཾ་ཨཱཿ་ཧཱུྃ་ཧྲཱི༔ ཨཱོཾ་ན་ཎི་པདྨེ་ཧཱུྃ༔ ཨཱོཾ་བྷཻ་རོ་ཙ་ན་ཧཱུྃ༔ ཨཀྵོ་བྷྱ༔ རཏྣ་སཾ་བྷ་ཝ༔ ཨ་མི་དྷེ་ཝ༔ ཨ་མོ་གྷ་སིདྡྷི་ཧཱུྃ༔ པདྨ་ཧ་ས་ཏ་མ་ཧཱ་ཨ་མོ་གྷ་པ་ཤ༔ ས་ཧ་ཡཾ་ས་མ་ཡ་ཧྲི་ཡཾ་ཙ་ར་ཙ་ར་ཧཱུྃ༔ ན་མོ་བྷ་ག་ཝ་ཏེ་ཨཱརྱ་ཨ་ཝ་ལོ་ཀི་ཏེ་ཤྭ་ར་ཡ༔ བྷོ་དྷི་སཏྭ་ཡ༔ མ་ཧཱ་སཏྭ་ཡཱ༔ མ་ཧཱ་ཀ་རུ་ནི་ཀཱ་ཡ༔ སིདྡྷི་མཎྜ་པ་ཡ་ནི་སྭཱ་ཧཱ༔ ཅེས་བརྗོད་སྒྲ་ཐོས་སེམས་ཅན་ཀུན༔ འཕགས་པའི་ཞིང་དུ་ངེས་པར་གྲོལ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ ཐོས་པས་གྲོལ་བའི་གདམས་པ་བསྟན་པའི་ལེའུ་སྟེ་བཅུ་གསུམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་བ༔ མགོན་པོ་འོད་བྱེད་ཞིང་གི་མཆོག༔ རེག་པས་གྲོལ་བའི་གདམས་པ་སྩོལ༔ འདུས་པའི་འཁོར་ལ་བཤད་དུ་གསོལ༔ དེ་ནས་སྟོན་པས་བཀའ་སྩལ་པ༔ མ་ཡེངས་འདུས་པའི་འཁོར་རྣམས་ཉོན༔ རབ་ནི་རིན་ཆེན་སྣ་ལྔའམ༔ ས་འམ་རྡོ་ལ་སོགས་ཀྱང་རུང་༔ འཕགས་པའི་སྐུ་རྟེན་འདྲ་འབག་དང་༔ རང་བྱུང་སྙིང་པོ་ཡི་གེ་བཅུ༔ བྱང་ཆུབ་རྣམ་རྒྱལ་མཆོད་རྟེན་གསུམ༔ ལེགས་པར་བཞེངས་ཤིང་རབ་ཏུ་གནས༔ གྲིབ་མས་འགོམ་དང་ཆུ་འཐུང་བཀྲུས༔ རླུང་གིས་རེག་གམ་འོག་ཏུ་འཛུལ༔ འབྱུང་བ་བཞི་ལ་ལས་སྦྱོར་བརྩམ༔ རེག་པའི་སྐྱེ་འགྲོ་གཟུགས་ཅན་དང་༔ གཟུགས་མེད་ཐམས་ཅད་གྲོལ་བར་འགྱུར༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ རེག་པས་གྲོལ་བའི་གདམས་པ་བསྟན་པའི་ལེའུ་སྟེ་བཅུ་བཞི་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ འགྲོ་བའི་མགོན་པོ་ཆོས་ཀྱི་སྐུ༔ སྐུ་གསུང་ཐུགས་ཀྱི་རྟེན་རྣམས་ལ༔ རབ་གནས་ཆོ་ག་གང་ལྟར་བགྱིད༔ ཞེས་ཞུས་སྟོན་པས་བཀའ་སྩལ་པ༔ སེམས་དཔའ་མཆོག་ཁྱོད་བདག་ལ་ཉོན༔ རང་ཉིད་འཕགས་པའི་སྐུ་རུ་བསྒོམ༔ རྟེན་ལ་བགེགས་བསྐྲད་ཐུན་གྱིས་བྲབ༔ སྟོང་པར་རྒྱས་གདབ་ལྷ་རུ་བསྐྱེད༔ ཁྲུས་གསོལ་སྤྱན་དབྱེ་ན་བཟའ་དབུལ༔ ཡེ་ཤེས་བསྟིམ་ཞིང་མཆོད་བསྟོད་བྱ༔ མི་དམིགས་རྒྱས་གདབ་དགེ་བ་བསྔོ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ རབ་ཏུ་གནས་པའི་ཆོ་ག་བསྟན་པའི་ལེའུ་སྟེ་བཅོ་ལྔ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མི་གཡོ་འགྲོ་བའི་མགོན་པོ་མཆོག༔ མ་བསྒོམ་གྲོལ་ཐབས་གང་ལྟར་ལགས༔ ཞེས་ཞུས་སྟོན་པས་བཀའ་སྩལ་པ༔ སེམས་དཔའ་མཆོག་ཁྱོད་ཚུར་ཉོན་ཅིག༔ རྨོངས་ཤིང་རབ་ཏུ་རྨོངས་པའི་འགྲོ༔ སྡིག་པར་ལྡན་པའི་འགྲོ་བ་གང་༔ མི་དམིགས་འཕགས་པའི་སྐུ་རུ་བསྒོམ༔ སྐྱབས་སེམས་ཡན་ལག་བདུན་པས་འཇུག༔ གསོལ་བ་རྩེ་གཅིག་ངང་ནས་གདབ༔ དབྱིངས་རིག་ཐིག་ལེ་དབུ་མ་ནས༔ སྣང་མཐའ་བླ་མའི་ཐུགས་ཀར་བསྟིམ༔ སྔགས་ཀྱི་ཐབས་ལ་རིག་པའི་མདས༔ ཡང་ཡང་སྦྱང་བས་ཟ་དང་འཚིག༔ མི་གནས་ཕ་རོལ་མྱ་ངན་འདའ༔ བུ་ག་དགུ་ཡི་སྟེང་རོལ་ན༔ བདེ་བ་ཅན་དུ་བགྲོད་པའི་སྒོ༔ བག་ཆགས་ལུས་རྒྱ་ཞིག་པའི་ཚེ༔ མཚམས་མེད་ལྔ་ལ་སྤྱོད་པ་ཡང་༔ གྲོལ་འགྱུར་འདི་ལ་ཐེ་ཚོམ་མེད༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ མ་བསྒོམས་གྲོལ་བའི་ཐབས་ལམ་བསྟན་པའི་ལེའུ་སྟེ་བཅུ་དྲུག་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་བཅོམ་ལྡན་མཆོག་གི་སྐུ༔ ཆོས་ལ་སྤྱོད་པའི་གང་ཟག་གི༔ ཚེ་མཐར་ཕྱིན་ཐབས་ཇི་ལྟར་ལགས༔ ཅེས་གསོལ་སྟོན་པས་བཀའ་སྩལ་པ༔ འདུས་པའི་འཁོར་རྣམས་ལེགས་པར་ཉོན༔ མཎྜལ་དབུས་སུ་བུམ་པ་འགོད༔ ཁ་རྒྱན་མགུལ་ཆིངས་བཅུད་ཀྱིས་བཀང་༔ རང་ཉིད་འཕགས་པའི་སྐུ་རུ་བསྒོམ༔ བུམ་པ་སྣང་མཐའ་ཚེ་དཔག་མེད༔ ཕྱི་ནང་གསང་བ་དེ་ཁོ་ནས༔ ཚེ་བསྒྲུབ་ཚེ་ཡི་རིག་འཛིན་རྙེད༔ ཨཱོཾ་ཨ་མི་དྷེ་ཝ་ཚེ་བྷྲཱུྃ་སྭཱ་ཧཱ༔ ཞེས་བཟླས་ཚེ་ཡི་དབང་བླང་ཞིང་༔ ཚེ་ཆང་འཐུངས་པས་དངོས་གྲུབ་འཐོབ༔ བར་ཆད་ཙམ་ལ་སྨོས་ཅི་དགོས༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ ཚེ་སྒྲུབ་བསྟན་པའི་ལེའུ་སྟེ་བཅུ་བདུན་པའོ༔ ས་མ་ཡཱ༔ རྒྱ་རྒྱརྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ སྟོན་པ་བཅོམ་ལྡན་དེ་བཞིན་གཤེགས༔ རྩ་རླུང་རིམ་པ་ཇི་ལྟར་ལགས༔ ཅེས་གསོལ་སྟོན་པས་བཀའ་བསྩལ་པ༔ རྡོ་རྗེ་ལུས་ཀྱི་ཕུང་པོ་ལ༔ སྟོང་ཕྲག་བརྒྱད་ཅུའི་རྩ་གནས་པས༔ རླུང་དང་རིག་པ་བྱང་ཆུབ་སེམས༔ དཀར་དམར་བདེ་སྟོང་འབར་འཛག་སྦྱང་༔ ལུས་གནད་ངང་ནས་སྟེང་རླུང་བཟུང་༔ འོག་རླུང་བསྡམས་ཤིང་མཉེ་བསྲུབ་འཕུར༔ བརྩོན་འགྲུས་བསྐྱེད་དེ་ཉམས་བླངས་པས༔ ལས་རླུང་མི་རྟོག་དབྱིངས་སུ་ཐིམ༔ དབུ་མར་རླུང་དང་མངོན་འཚང་རྒྱ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ རྩ་རླུང་བསྟན་པའི་ལེའུ་སྟེ་བཅོ་བརྒྱད་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་བཅོམ་ལྡན་འོད་མི་འགྱུར༔ སྦྱིན་སྲེག་འཕྲིན་ལས་ཇི་ལྟར་ལགས༔ ཅེས་གསོལ་སྟོན་པས་བཀའ་སྩལ་པ༔ མཎྜལ་ལས་བཞིའི་ཐབ་ཁུང་དུ༔ མེ་ལྷའི་ལྟོ་བར་འཕགས་པ་བསྐྱེད༔ ལས་བཞིའི་སྔགས་ཀྱི་ཤམ་བུ་བཏགས༔ སྲེག་རྫས་སྣ་ཚོགས་བྱིན་རླབས་འབུལ༔ གཤེགས་གསོལ་རྗེས་ཆོག་རྒྱས་འདེབས་བྱ༔ ནད་གདོན་ཞི་དང་སྡིག་སྒྲིབ་འདག༔ ཚེ་བསོད་རྒྱས་ཤིང་དགྲ་བགེགས་འཇོམས༔ གང་བརྩམས་འཕྲིན་ལས་མྱུར་དུ་འགྲུབ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ སྦྱིན་སྲེག་བསྟན་པའི་ལེའུ་སྟེ་བཅུ་དགུ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་སྣང་མཐའ་འོད་དཔག་མེད༔ གཤིན་གྱི་མཚན་བྱང་ཇི་ལྟར་ལགས༔ ཅེས་གསོལ་སྟོན་པས་བཀའ་སྩལ་པ༔ འདུས་པའི་འཁོར་རྣམས་ང་ལ་ཉོན༔ དྲི་གོས་མིང་བྱང་མེ་ལོང་གསུམ༔ ལུས་ངག་ཡིད་གསུམ་རྟེན་དུ་དགྲམ༔ རང་ཉིད་འཕགས་པའི་སྐུ་རུ་བསྒོམ༔ ཚེ་འདས་རྣམ་ཤེས་དགུག་གཞུག་བསྟིམ༔ བུམ་པའི་ཆུས་བཀྲུ་སྐྱེ་སྒོ་བགགས༔ དཀྱིལ་འཁོར་གཞུག་སྟེ་དབང་ཡང་བསྐུར༔ འདོད་ཡོན་བསྔོ་ཞིང་རྣམ་ཤེས་སྤར༔ བདེ་བ་ཅན་འདིར་རྒྱངས་ཀྱིས་འཕངས༔ ཕུང་པོའམ་ནི་མཚན་བྱང་བསྲེག༔ ཐལ་བར་སྐུ་གདུང་སཱཙྪ་གདབ༔ ཆོས་རྣམས་དམིགས་མེད་ངང་ལ་བཞག༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ གཤིན་གྱི་མཚན་བྱང་བསྟན་པའི་ལེའུ་སྟེ་ཉི་ཤུ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་པ༔ མགོན་པོ་འགྲོ་བ་ཡོངས་ཀྱི་སྐྱབས༔ སཱཙྪའི་ཆོ་ག་ཇི་ལྟར་ལགས༔ ཅེས་གསོལ་སྟོན་པས་བཀའ་སྩལ་པ༔ འཁོར་རྣམས་མ་ཡེངས་ལེགས་པར་ཉོན༔ གསེར་དངུལ་ཟངས་ལྕགས་རིན་ཆེན་ལ༔ སྐུ་གདུང་མཆོད་རྟེན་རི་མོ་བཀོད༔ རྩེ་ལ་སྐུ་གསུམ་ས་བོན་འདེབས༔ མཐའ་ལ་འཕགས་པའི་སྙིང་པོ་དྲི༔ བརྐོས་ཕོར་ཆོས་དབྱིངས་ཞིང་ཁམས་ན༔ རིན་ཆེན་བརྡར་བའི་འཇིམ་པ་ལ༔ འབི་འབི་བཟོས་པ་ལོངས་སྐུར་བསམས༔ ལན་གསུམ་སྐུ་གསུམ་སྔགས་བཟླས་གདབ༔ སྤྲུལ་པའི་སྐུ་རུ་ལམ་སྟེ་བྱོན༔ འགྲོ་བའི་མུན་པ་བསལ་བར་བསྒོམ༔ ཡི་གེ་བཅུ་བཟླས་མེ་ཏོག་གཏོར༔ འཇིགས་པ་མེད་པའི་གནས་སུ་བཞུགས༔ ཕྱག་འཚལ་མཆོད་འབུལ་སྐོར་བ་བསྐོར༔ ཕན་ཡོན་མཐའ་ཡས་བླ་མེད་འཐོབ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ སྐུ་གདུང་སྭཙྪ་བསྟན་པའི་ལེའུ་སྟེ་ཉེར་གཅིག་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས། སྟོན་པ་ཉིད་ལ་ཡང་གསོལ་པ༔ འགྲོ་བའི་མགོན་པོ་འོད་དཔག་མེད༔ གཏོར་མའི་ཆོ་ག་ཇི་ལྟར་ལགས༔ ཅེས་ཞུས་སྟོན་པས་བཀའ་སྩལ་པ༔ རང་ཉིད་འཕགས་པའི་སྐུ་རུ་བསྒོམ༔ རིན་ཆེན་སྣོད་དུ་ཆུ་གཙང་བཤམས༔ མཆོད་རྫས་ལོངས་སྤྱོད་བདུད་རྩིར་བསྒྱུར༔ ཨཱོཾ་ཨཱཿ ཧཱུྃ་ཧྲཱི༔ ཨཱོཾ་མ་ཎི་པདྨེ་ཧཱུྃ༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ༔ ཨོཾ་སཾ་ར་བྷ་སཾ་བྷ་ར་ཧཱུྃ༔ སྔགས་ཀྱིས་སྤེལ་ཞིང་མགྲོན་ལ་འབུལ༔ མི་དགེ་སྡིག་སྒྲིབ་དྲུང་ནས་ཕྱུང་༔ ཚོགས་གཉིས་རྫོགས་ཤིང་སྒྲིབ་གཉིས་འདག༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ ཆུ་གཏོར་བསྟན་པའི་ལེའུ་སྟེ་ཉེར་གཉིས་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་རས་གཟིགས་དབང་གིས༔ སྟོན་པ་ཉིད་ལ་ཡང་གསོལ་བ༔ མགོན་པོ་བཅོམ་ལྡན་དེ་བཞིན་གཤེགས༔ ཆོས་སྤྱོད་རིམ་པ་ཇི་ལྟར་ལགས༔ ཅེས་གསོལ་སྟོན་པས་བཀའ་སྩལ་པ༔ འདུས་པའི་འཁོར་རྣམས་ལེགས་པར་ཉོན༔ སྐྱབས་གནས་འཕགས་པའི་ལྷ་ཚོགས་རྣམས༔ མདུན་གྱི་ནམ་མཁར་སྤྱན་དྲངས་ཏེ༔ སྐྱབས་གནས་དམ་པ་སྐྱབས་ཀྱི་མཆོག༔ བྱང་ཆུབ་བར་དུ་སྐྱབས་གསོལ་ཞིང་༔ མ་གྱུར་འགྲོ་བ་སེམས་ཅན་ཀུན༔ བྱང་ཆུབ་ལམ་འགོད་སེམས་ཀྱང་བསྐྱེད༔ ཕྱག་འཚལ་མཆོད་ཅིང་སྡིག་པ་བཤགས༔ དགེ་ལ་ཡི་རང་ཆོས་འཁོར་བསྐོར༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་དོན་དུ་བསྔོ༔ ཕྱི་ནང་གསང་གསུམ་དེ་ཁོ་ནའི༔ མཎྜལ་རྣམ་པར་དག་པས་མཆོད༔ བླ་མ་འཕགས་པའི་ལྷ་ཚོགས་ལ༔ ཐུན་དུ་བཅད་ཅིང་གསོལ་བ་གདབ༔ བསྙེན་སྒྲུབ་ལྟ་སྒོམ་སྤྱོད་གསུམ་གཟིར༔ ཐུན་སྐབས་ཚོགས་རྫོགས་དགེ་བ་བསྐུལ༔ སྒྱུ་ལུས་མཆོད་སྦྱིན་རྨི་ལམ་བཟུང་༔ སྤྲུལ་སྒྱུར་བར་དོའི་འཁྲུལ་པ་སྦྱང་༔ མ་དག་བག་ཆགས་ཕྱིར་བསྙིལ་ཏེ༔ འཕགས་པ་ཁྱོད་དང་གཉིས་མེད་གྲོལ༔ ང་ཡི་ཞིང་འདིར་མངོན་འཚང་རྒྱ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ ཆོས་སྤྱོད་བསྟན་པའི་ལེའུ་སྟེ་ཉེར་གསུམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྤྱན་ར ས་གཟིགས་དབང་གིས། སྟོན་པ་ཉིད་ལ་ཡང་གསོལ་བ༔ སྟོན་པ་འོད་སྣང་དེ་བཞིན་གཤེགས༔ རྒྱུད་ཆེན་རྒྱུད་མཆོག་དམ་པ་འདིའི༔ བཀའ་བབས་ཆོས་བདག་གང་གིས་བྱེད༔ ཅེས་གསོལ་སྟོན་པས་བཀའ་སྩལ་པ༔ འདུས་པའི་འཁོར་རྣམས་ང་ལ་ཉོན༔ རྒྱུད་ཆེན་རྒྱུད་མཆོག་དྲི་མེད་འདི༔ ད་ལྟ་འཕགས་པའི་ཐུགས་ལ་བསྟིམ༔ རྩོད་ལྡན་ཚེ་ལོ་བརྒྱ་པའི་ཚེ༔ ཤཱཀྱ་ཐུབ་པའི་བསྟན་པ་ལ༔ གསང་སྔགས་ཆོས་ཀྱི་འབྲས་བུ་སྨིན༔ དེ་དུས་ང་ཡི་ཐུགས་ཀྱི་སྤྲུལ༔ མཚོ་སྐྱེས་པདྨའི་སྡོང་པོ་ལས༔ པདྨ་འབྱུང་གནས་ཞེས་བྱ་འབྱུང་༔ སངས་རྒྱས་སྟོང་གི་འཕྲིན་ལས་སྐྱོང་༔ འཕགས་པ་ཁྱོད་དང་བཀའ་བགྲོས་བྱེད༔ དེ་ཚེ་རྒྱུད་མཆོག་དམ་པ་འདི༔ རྡོ་རྗེ་པདྨ་འབྱུང་ལ་ཐིམ༔ མི་མཇེད་འགྲོ་དྲུག་ཐབས་ཀྱིས་འདུལ༔ ཁྱད་པར་མཐའ་འཁོབ་གངས་ཁྲོད་དུ༔ འཕགས་པའི་སྤྲུལ་པས་རྐྱེན་བྱེད་དེ༔ འགྲོ་བ་མི་ཡི་གླིང་ཞིག་འབྱུང་༔ མདོ་སྔགས་ཆོས་ཀྱི་བསྟན་པ་དང་༔ རྩོད་ལྡན་སྙིགས་མ་ལྔ་བདོའི་ཚེ༔ ལོག་འདྲེན་འགོང་པོ་སྟོབས་རྒྱས་པས༔ གཡོ་ཟོག་ཁྲམ་གསུམ་འཁོར་ལོ་བསྐོར༔ བསྟན་པ་ཐབས་ཀྱིས་བརླགས་པའི་ཕྱིར༔ བདུད་སྤྲུལ་གོས་སེར་གྱོན་པ་མང་༔ སེམས་ཅན་བསོད་ནམས་ཟད་པའི་ཕྱིར༔ ཧོར་སོག་དུ་རུ་ཀ་རྣམས་དང་༔ མུ་སྟེགས་བསྟན་པ་ཤར་བའི་རྟགས༔ དགེ་བཤེས་རྣམས་ཀྱིས་དམག་དཔོན་བྱེད༔ འགོང་སྤྲུལ་མང་པོས་ཤེས་རྒྱུད་གཡོ༔ སེམས་བསྐྱེད་སྙིང་རྗེ་ཆུ་རུ་འཕོ༔ བྱང་སེམས་མང་པོ་གྲི་རུ་བཀུམས༔ བདུད་ཀྱི་བྱིན་བརླབས་འཁྲུག་རྩོད་དར༔ འཕགས་པའི་ཐུགས་རྗེས་སྐྱོབ་དཀའ་ཡང་༔ སྨོན་ལམ་དག་པའི་སྟོབས་ཤུགས་ཀྱིས༔ ཆོས་འདིས་སྙིགས་དུས་འགྲོ་དོན་བྱེད༔ པད་འབྱུང་སྤྲུལ་པས་གཏེར་འདོན་ཞིང་༔ འཕགས་པའི་སྤྲུལ་པས་ཆོས་འདི་སྤེལ༔ སྐབས་ཤིག་འགྲོ་བ་བདེ་ལ་འགོད༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ བཀའ་བབས་ལུང་བསྟན་པའི་ལེའུ་སྟེ་ཉེར་བཞི་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་འཕགས་པ་སྤྱན་རས་གཟིགས་དབང་ཕྱུག་དང་༔ སངས་རྒྱས་དང་བྱང་ཆུབ་སེམས་དཔའ་སྐུ་གསུང་ཐུགས་ཀྱི་སྤྲུལ་པ་གྲངས་མེད་དཔག་ཏུ་མེད་པ་ཐམས་ཅད་རྗེས་སུ་ཡི་རང་ཞིང་༔ བཅོམ་ལྡན་འདས་འོད་མི་འགྱུར་བ་ཆེན་པོ་ལ་སྒོ་གསུམ་གུས་པ་ཆེན་པོས་བསྟོད་ཅིང་མཆོད་པ་སྣ་ཚོགས་ཀྱིས་མཆོད་དེ༔ དཔལ་ཆེན་པོ་མ་ཧཱ་ཀཱ་ལས་བཀའ་དང་བསྟན་སྲུང་དུ་སྲོག་སྙིང་ཕུལ༔ འཕགས་པའི་སྤྲུལ་པ་ཡང་སྤྲུལ་ཉིང་སྤྲུལ་གྲངས་མེད་དཔག་ཏུ་མེད་པ་འཇིག་རྟེན་དྲུག་གི་ཁམས་ཐམས་ཅད་ཡོངས་སུ་ཁྱབ་པར་སྤྲུལ་ཞིང་༔ འགྲོ་དྲུག་སེམས་ཅན་གྱི་དོན་དཔག་ཏུ་མེད་པ་མཛད་དེ༔ མ་རིག་མུན་པའི་ཚོགས་ཐམས་ཅད་ཡོངས་སུ་བསལ་ནས་འཁོར་བ་དོང་ནས་སྤྲུགས་པར་མ་གྱུར་གྱི་བར་དུ་འགྲོ་བའི་དོན་དུས་གསུམ་དུ་རྒྱུན་ཆད་མེད་པར་མཛད་དོ༔ མ་རིག་མུན་པ་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་ལས༔ སངས་རྒྱས་དང་བྱང་ཆུབ་སེམས་དཔའི་འཁོར་ཐམས་ཅད་བཅོམ་ལྡན་འདས་འོད་མི་འགྱུར་བ་ཆེན་པོ་ལ་རྗེས་སུ་ཡི་རང་ཞིང་༔ འཕགས་པའི་སྤྲུལ་པས་འགྲོ་བའི་མུན་པ་རབ་ཏུ་བསལ་བའི་ལེའུ་སྟེ་ཉེར་ལྔ་པའོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་གསང་བ་བླ་མེད་ཀྱི༔ རྒྱུད་མཆོག་སྙིང་པོ་དྲི་མེད་འདི༔ འཕགས་པ་ཐུགས་རྗེ་ཆེན་པོ་ཡིས༔ རི་བོ་ཏ་ལའི་དབང་ཕུག་ཏུ༔ པདྨ་འབྱུང་གནས་བདག་ལ་གནང་༔ ད་ལྟ་རྗེ་འབངས་རྣམས་ལ་གདམས༔ མ་འོངས་དོན་དུ་གཏེར་དུ་བཅོལ༔ ཡེ་ཤེས་མགོན་པོས་བཀའ་འདི་སྲུངས༔ བྱ་རོག་གདོང་ལ་གཏེར་འདི་བཅོལ༔ སྐལ་མེད་བྱུང་ན་དབང་པོ་སྣུབས༔ དུས་ལ་བབས་ཚེ་མྱུར་དུ་སྤྲོད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་མེ་ཕོ་འབྲུག་གི་ལོ་ཧོར་ཟླ་བཅུ་པའི་ཡར་ཚེས་ལ་མང་ཡུལ་བྱམས་སྤྲིན་རྡོ་རྗེ་སྙིང་རྫོང་ནས་བྱ་རོག་གདོང་གི་ཆོ་འཕྲུལ་ལས་མི་ནག་ཤིན་ཏུ་འཇིགས་པ་ཞིག་གི་ལག་ནས་ཤོག་དྲིལ་གཅིག་གཏད་བྱུང་བ་དང་། སྐྱེས་མཆོག་ཆེན་པོ་རིག་འཛིན་བསྟན་གཉིས་གླིང་པའི་གདུང་དྲི་མ་མེད་པ་ཆོས་རྗེ་གུ་རུ་བདུད་འདུལ་ལ་ཤོག་སེར་གྱི་བཀའ་གཏད་སྨོན་ལམ་དུ་ཕུལ་ཞིང་། དེ་ནས་དམ་དུ་ཚགས་བྱས་ཏེ་ཁམས་སྲིང་མོ་རྫོང་གི་གུ་རུ་རིན་པོ་ཆེའི་སྒྲུབ་གནས་ཆགས་རུ་ཕུག་ནག་ཏུ་ཤོག་སེར་ལས་བོད་ཡིག་ཏུ་ཕབ་པའོ།། སརྦ་མངྒལཾ།།