སྒྲུབ་གནས་ཡུལ་དགོན་ས་ཡི་མདོ་ཆིངས།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ སྒྲུབ་གནས་ཡུལ་དགོན་ས་ཡི་མདོ་ཆིངས་བཞུགས་སོ༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ ད་ལྟ་བོད་ཀྱི་རྒྱལ་ཁམས་ཡུལ་ཕྱོགས་འདིར༔ མདོ་སྔགས་ཆོས་དར་སངས་རྒྱས་བསྟན་པ་རྒྱས༔ ཡུལ་ཕྱོགས་བྱིན་གྱིས་བརླབས་ཡོད་པུར་རྒྱལ་བོད༔ འོན་ཀྱང་མ་འོངས་ལྔ་བརྒྱའི་ཡང་མཐའ་ལ༔ ས་གནད་གསོས་པའི་མཆོད་རྟེན་གཙུག་ལག་ཉམས༔ སེམས་ཅན་སྤྱི་མཐུན་མི་དགེའི་འབྲས་སྨིན་པས༔ དཀར་ཕྱོགས་ལྷ་འདྲེ་གྱེས་ནས་ནག་ཕྱོགས་དར༔ དེ་ཚེ་ལྷ་སྲིན་ཀོ་ལོང་ཕྲག་དོག་དམ༔ དེ་ཡི་ཕྱིར་ན་ས་ཡི་མདོ་ཆིངས་གནད༔ རབ་ཏུ་གཅེས་སོ་མ་འོངས་ཚུལ་བཞིན་སྤྱོད༔ ས་མ་ཡཱ༔ རྒྱ་རྒྱ་རྒྱ༔ ས་བཙལ་སྐྱོན་སྤང་ཡོན་ཏན་ལྡན་པ་བཟུང་༔ ཕྱི་ནང་དགྲ་གཤེད་རྟེན་འབྲེལ་གནད་ཀྱིས་གཅོས༔ བྱེ་བྲག་སོ་སོའི་འཕྲིན་ལས་བཞི་དང་བསྟུན༔ གནས་སྐབས་མཐར་ཐུག་ཡོན་ཏན་བརྗོད་ལས་འདས༔ ས་མ་ཡཱ༔ རྒྱ་རྒྱ་རྒྱ༔ དང་པོ་ས་ཚོལ་མཁན་པོ་ཐོས་བསམ་ཅན༔ མཐོང་བ་ལག་འཁྲིད་ཤེས་རབ་ཡང་དག་ལྡན༔ ཟ་འདོད་དེས་ཆོག་གཡོ་ཟོལ་ཕྱིན་ལོག་བྲལ༔ སྟོན་ཆེན་སྔགས་པས་ས་དཔྱད་གཏན་ལ་འབེབས༔ ཡོན་ཏན་ཀུན་འཐོབ་བདག་གཞན་ཐམས་ཅད་འཚེང་༔ དེ་ལྟར་མི་ལྡན་ཕྱིན་ཅི་ལོག་གྱུར་ན༔ བདག་གཞན་ཐམས་ཅད་འདི་ཕྱིར་སྡུག་བསྔལ་སྤྱོད༔ དེ་ཡི་ཕྱིར་ན་ཚད་ལྡན་མཁན་པོ་གཅེས༔ གཉིས་པ་ས་ཡི་སྐྱོན་རྣམས་སྤོང་བ་ནི༔ ཤར་རི་མཐོ་ན་ཚེ་སྲོག་དག་ལ་གཟན༔ ལྷོ་རི་རྒྱབ་གཏད་འདྲ་ན་དགྲ་སྣ་སྡང་༔ ནུབ་རི་ཧར་པོར་སོངས་ན་བཀྲ་མི་ཤིས༔ ཆེས་ཆེར་ཧར་པོར་སོང་ན་ནད་གདོན་མང་༔ བྱང་རི་བརྡལ་ན་ལོངས་སྤྱོད་དབུལ་ཞིང་རྨུག༔ ཡུད་ཙམ་བརྡལ་ཀྱང་ཕྱི་ཐག་ཐུང་བ་ཡིན༔ ཉི་ཟླའི་འགྲོས་ལམ་དོག་ན་བསོད་ནམས་ཆུང་༔ ཕྱོགས་བཞིའི་རི་ལུང་ཤར་ནུབ་གོ་ལོག་ན༔ འབངས་གྱི་གྱེན་ལོག་རྗེ་ལ་བཙན་འབེབས་ཡོང་༔ བྱང་ནུབ་ལམ་གྱི་སྣ་ཟུག་དགྲ་འདྲེ་སྡང་༔ རྒྱབ་རི་ཤར་ལ་གཏད་ན་སྙན་གྲགས་ཆུང་༔ མདུན་རི་ནུབ་ལ་གཏད་ན་ཚེ་ཐག་ཐུང་༔ རྒྱབ་རིས་མནན་པ་འདྲ་ན་དཔོན་འཁུར་ལྕི༔ རྒྱབ་རི་གྱེས་པ་འདྲ་ན་མགོན་སྐྱོབས་ཆུང་༔ སྟེང་ནས་ལྷུང་ཐབས་འདྲ་བའི་བྲག་དང་རི༔ མ་ཉེས་ཁ་ཡོགས་བྱུར་རྡོ་ཡིན་པས་ངན༔ མཆི་རིས་འདྲ་བ་ཤར་ན་མྱ་ངན་ཆེ༔ སྦར་སེན་བྲད་པ་འདྲ་ན་ཟོག་མི་གསོགས༔ པགས་པ་རྒྱངས་པ་འདྲ་བ་གོད་ཡམས་མང་༔ སྒོ་ཐད་རི་བྲག་ཕ་བོང་སྐེད་ཆད་དང་༔ སྒོ་ཁྱིས་གཟན་བསྒུག་གཅན་གཟན་ངུ་ཟུག་ཚུལ༔ སྐྱིད་སྡུག་སྒང་གཤོང་ཆེ་ཞིང་གོད་ཀ་སྡང་༔ སྐྱེས་པའི་ཚེ་སྲོག་ལ་གཟན་སྤང་བར་བྱ༔ ཡུག་སས་སྡུག་འདུག་བྱས་འདྲའི་རི་བྲག་རྣམས༔ གཟའ་མི་ཁ་འབྱེ་ཤི་ཆད་ཡོང་བས་སྤང་༔ ཕྱི་རུ་གས་པ་འདྲ་ན་ཟས་གཡང་ཉམས༔ གཡང་ལ་ལྷུང་བ་འདྲ་ན་ནོར་གཡང་ཉམས༔ ཆུ་སྲིན་འདྲ་ན་ཀླུ་ཡི་གནོད་པ་སྡང་༔ སྦལ་བ་འདྲ་ན་ས་བདག་གདུག་རྩུབ་གཡོ༔ མོ་མཚན་འདྲ་ན་བསེན་མོས་ཐིག་ལེ་འཕྲོག༔ བྲག་དང་གད་པ་སྦྲ་ཙམ་ས་དགྲ་ངན༔ དེའུ་གླང་གི་སྣ་འདྲ་སྒོར་ཟུག་ན༔ ཕ་རོལ་གཞན་གྱིས་ཉེར་འཚེ་ཤིན་ཏུ་མང་༔ བྲག་ཕུག་མ་མོ་དང་ནི་བསེན་མོ་གནས༔ ནགས་ཁྲོད་དག་ན་ཀླུ་དང་གནོད་སྦྱིན་གནས༔ དུར་ཁྲོད་དག་ལ་སྡེ་བརྒྱད་ཕལ་ཆེར་འཚུབ༔ ཤིང་གཅིག་པ་ལ་དབང་ཕྱུག་ཆེན་པོ་གནས༔ ས་ཕུག་གད་རོང་ཐེའུ་རང་དམ་སྲི་གནས༔ གནམ་ས་གྲུ་གསུམ་ཤིན་ཏུ་ནོན་པར་དཀའ༔ ལུང་པའི་མདོ་ཤོར་དར་རྒྱས་ཆུང་བར་ཡོང་༔ གངས་རི་བརྟན་ཆགས་མགུར་ལྷ་དགེ་བསྙེན་གནས༔ ས་བྲག་རི་རླུང་དམར་པོ་བཙན་གྱི་ཡུལ༔ དེ་རྣམས་ནགས་དང་འདྲེས་ན་ཀླུ་བཙན་གནས༔ བྲག་དཀར་སྤང་དང་འདྲེས་པར་དཀར་ཕྱོགས་གནས༔ དེ་ལ་ནགས་ཚལ་རྒྱས་ན་མ་སངས་གནས༔ བྲག་དཀར་རིགས་ལ་སྤ་མ་ཕུག་པ་མང་༔ ཀླུ་སྨན་གནས་པས་ཐབ་གཞོབ་སྤང་བར་བྱ༔ བྲག་དཀར་བྲག་དམར་བྲག་ནག་གསུམ་འདྲེས་ན༔ ལྷ་བཙན་བདུད་གསུམ་ཆེ་ཆུང་གང་རིགས་གནས༔ མདོག་ནག་བྲག་ཁྲེབ་སྤང་དང་ཤིང་སྤུན་ཅན༔ གཞི་བདག་དམུ་དང་བྲག་གི་སྨན་མོ་གནས༔ བྲག་ནག་རི་ནག་དག་ལ་བདུད་གནས་ཤིང་༔ ཤིང་དང་ནགས་ཚལ་ཅན་ལ་ཀླུ་བདུད་གནས༔ གཡའ་རི་སྨུག་པོ་གཡའ་ཡི་བཙན་གནས་ཤིང་༔ གཡའ་རི་ཤིན་ཏུ་འཇམ་ན་གཡའ་སྨན་གནས༔ རི་ལུང་རྩུབ་ཅིང་ལུང་གསུམ་འདུས་པའི་མདོ༔ སྡེ་བརྒྱད་ཕལ་ཆེར་འཚུབ་པས་ཤིན་ཏུ་གཉན༔ བྲག་ནག་རི་ནག་བདུད་ཀྱི་ཕོ་བྲང་ཡིན༔ དམར་ནག་རི་བྲག་ཁྲལ་ཁྲོལ་ཀླུ་སྲིན་གནས༔ ཆུ་བོ་རྣམས་ལ་ཀླུ་བཙན་དམུ་བཙན་གནས༔ རྒྱལ་རིགས་རྗེའུ་རིགས་བྲམ་ཟེ་གདོལ་བ་སོགས༔ ཀླུ་རིགས་རྣམ་བཞི་ཕྱོགས་བཞིའི་འབབ་ཆུར་གནས༔ དགོན་གནས་ཕོ་བྲང་དག་ལ་རྒྱལ་པོ་དང་༔ གྲོང་བརྡལ་ཚོང་དུས་རྣམས་ལ་བསེན་མོ་གནས༔ གསུམ་པ་ཡོན་ཏན་ལྡན་པ་བརྟག་དང་བཟུང་༔ གནམ་ས་འཁོར་ལོ་རྩིབས་བརྒྱད་རྣམ་པ་ལ༔ རྒྱབ་རི་མཐོ་ཞིང་གཡས་རི་ཡོལ་བ་འདྲ༔ ཉི་ཟླའི་འགྲོས་ལམ་ཡངས་ཤིང་བྱང་རི་སྐྱོར༔ མདུན་རི་རིན་ཆེན་སྣ་ཚོགས་སྤུངས་པ་འདྲ༔ ཆུ་བོ་ནུབ་ཕྱོགས་དབང་གི་ཕྱོགས་ནས་འབབ༔ ས་མདོག་སྣུམ་ཞིང་རྩི་ཤིང་མེ་ཏོག་ཅན༔ དབྱར་བསིལ་དགུན་དྲོ་གོང་མས་ཞབས་ཀྱིས་བཅགས༔ འགྱུ་སྲང་མི་རྒོད་འཚེ་བ་མེད་པའི་ལུང་༔ བགྲོད་ལམ་ཉེ་རིང་འཚམས་ལ་རིག་པ་དང་༔ ཡོན་ཏན་ཀུན་ཚང་དངོས་གྲུབ་འབྱུང་བའི་ས༔ སྐྱིལ་ཀྲུང་བསྣོལ་འདྲའི་རི་ལ་བསམ་གཏན་སྐྱེ༔ བྱང་རི་མཐོ་ན་དགྲ་ཡི་འཚེ་བ་ཉུང་༔ རྒྱབ་རི་མཐོ་ན་བྱིན་ཆགས་ཉམས་རྟོགས་འཕེལ༔ ལྷོ་རི་སྐྱོར་ན་ལོངས་སྤྱོད་མཁོ་དགུར་ལྡན༔ གནམ་ས་པདྨ་འདྲ་ན་ཉམས་རྟོགས་འཆར༔ མདུན་རི་ཐལ་སྦྱར་འདྲ་ན་འཁོར་གཡོག་གུས༔ ཉེ་བ་བྱམས་ཤིང་དགྲ་སྣ་ཆུང་བ་ཡོང་༔ དེ་ལྟར་བརྟགས་ནས་ཡོན་ཏན་ལྡན་པ་བཟུང་༔ གནམ་ས་འཁོར་ལོ་རིས་དང་པདྨ་ཅན༔ ལྟེ་བར་བཏབ་ན་བཀྲ་ཤིས་ཡོན་ཏན་འཐོབ༔ བྱ་ཁྱུང་འདྲ་བའི་རི་ལ་གཤོག་པར་གདབ༔ དར་དཀར་ཡོལ་བ་འཐེན་འདྲའི་སྟོད་དུ་བཟང་༔ ཆོས་འབྱུང་འདྲ་བའི་མཚམས་སུ་གདབ་པར་བྱ༔ མཉམ་བཞག་འདྲ་ན་དཀྱིལ་དུ་བཟང་བ་ཡིན༔ གླང་ཆེན་འདྲ་ན་སྤྱི་སྟེང་དག་ན་བཟང་༔ འབྲི་ཡག་འདྲ་བའི་མཁལ་ཁུང་དག་ ཏུ་བཟང ་༔ ཕག་མོ་འདྲ་བའི་ལྟོ་བ་ཤིན་ ཏུ་བཟང ་༔ རྒྱལ་པོ་གདན་ལ་བཞུགས་འདྲའི་པང་ན་བཟང་༔ མོ་བཙུན་འདྲ་བའི་བྲང་ལ་བཏབ་ན་བཟང་༔ དུག་སྤྲུལ་འདྲ་བའི་མགོ་ལ་བཏབ་ན་ བཟང་༔ སེང་གེ་འདྲ་བའི་རྒལ་བའི་སྟེང་དུ་མཆོག༔ ཆོས་བརྒྱུད་མེད་ན་ནོན་པར་ཤིན་ཏུ ་དཀའ༔ གཅན་གཟན་འདྲ་བའི་རི་ལ་སྣ་འགོར་གདབ༔ མཐོ་བ་དག་གི་དམའ་ས་བཟུང་བར་བྱ༔ དམའ་བ་དག་གི་མཐོ་ས་ཤིས་པ་ཡིན༔ ལྔ་བ་ཕྱི་ཡི་དགྲ་གཤེད་བཅོས་པ་ནི༔ འབྱུང་བཞིའི་དགྲ་གཤེད་གང་དང་གང་ཤར་ཡང་༔ འབྱུང་བ་མ་བུ་དགྲ་གྲོགས་ཁམས་བསྟུན་ཏེ༔ འབྱུང་བཞིའི་ས་བོན་རི་མོ་བྲིས་པ་གཟུགས༔ ཕ་རོལ་ས་དགྲ་ཚུར་ལ་མ་སྡང་ཡང་༔ རང་གི་ས་གཡང་ཆུང་དང་མི་ནོན་དང་༔ མཐུ་བ་ཤོར་དང་དམུ་ཐག་ཆད་པ་སོགས༔ མི་མཐུན་གནོད་པའི་ཚོགས་རྣམས་གསོ་བའི་ཐབས༔ ས་གཡང་ཆུང་ན་རྫས་བརྒྱད་རི་མོས་གསོ༔ ནོན་པར་དཀའ་ན་མཆོད་རྟེན་དཀྱིལ་དུ་རྒྱག༔ མཐུ་བ་ཤོར་ན་སཱཙྪ་བཞག་པས་བཟློག༔ དམུ་ཐག་ཆད་ན་རྩེ་སྟོད་དམུ་ཐག་འཐེན༔ ཀླུ་ས་ཆེ་ན་བྱ་ཁྱུང་རི་མོ་འབྲི༔ རྒྱབ་རི་ལྷུང་ཐབས་འདྲ་ན་མཆོད་རྟེན་བརྩེག༔ མོ་ཡི་མཚན་མ་འདྲ་ན་ཕོ་རྟགས་གཟུགས༔ གཞན་ཡང་ས་དགྲ་ཆེ་ཆུང་སྣ་ཚོགས་ལ༔ འབྱུང་བའི་ཁམས་དང་དགྲ་གྲོགས་ཕྱོགས་མི་མཐུན༔ གཞན་གྱི་བཟློག་ཐབས་མེད་པའི་རིགས་རྣམས་ལ༔ རིན་ཆེན་འབར་བ་ཉི་ཟླ་ལ་སོགས་པའི༔ བཀྲ་ཤིས་ཡོན་ཏན་ལྡན་པའི་རི་མོ་བྱ༔ དྲུག་པ་ནང་གི་དགྲ་སྤང་རྟེན་འབྲེལ་བཅོས༔ ཤར་དུ་མཆོད་རྟེན་བརྩིགས་ན་ནུབ་ཕྱོགས་བརླག༔ ལྷོ་ནས་གད་སྣ་བཅད་ན་མི་གཡང་ཉམས༔ ནུབ་ནས་ཆུ་ལམ་བཅད་ན་གྲོགས་སྣ་ཆད༔ གཤིན་རྗེ་ཐབ་ཁ་གཏད་ན་དུར་སྲི་སྡང་༔ སྲིན་པོར་ཉལ་མལ་བྱས་ན་གཅོང་གིས་འཛིན༔ མགོ་ཞབས་ལྡོག་སྟེ་ཉལ་ན་ལྷ་ལྔ་ཉམས༔ བྱང་ཤར་དབང་ལྡན་ཉལ་མལ་རྟེན་འབྲེལ་བཟང་༔ ཤར་ལྷོ་མེ་ལྷ་ཐབས་ཀྱི་རྟེན་འབྲེལ་བཟང་༔ བྱང་ཕྱོགས་གནོད་སྦྱིན་དཀོར་མཛོད་རྟེན་འབྲེལ་བཟང་༔ ནུབ་ཕྱོགས་ཀླུ་ཡུལ་དུད་འགྲོའི་དཀོར་ཁང་བཟང་༔ བདུན་པ་ལས་བཞི་དང་མཐུན་རིམ་པ་རྣམས༔ འཕྲིན་ལས་སོ་སོའི་གཞུང་དང་མཐུན་པར་དཔྱད༔ བརྒྱད་པ་གནས་སྐབས་མཐར་ཐུག་བཀྲ་ཤིས་ཏེ༔ སྐྱོན་རྣམས་སྤངས་ཏེ་རྟེན་འབྲེལ་གནད་གཟབས་པས༔ ཉེས་པ་བཟློག་ཅིང་ཡོན་ཏན་གོང་དུ་འཕེལ༔ ཚེ་བསོད་ཉམས་རྟོགས་མཆོག་གི་དངོས་གྲུབ་འཐོབ༔ དེ་ཕྱིར་ཡོན་ཏན་ཀུན་འབྱུང་ས་དཔྱད་གཅེས༔ ཕྱི་རབས་རྣམས་ཀྱིས་ལེགས་པར་བརྟག་མཁས་བྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པ་རྩལ་གྱིས་གངས་རིའི་རྒྱལ་པོ་ཏེ་སེ་ནས་གདན་དྲངས་ཤིང་ཤོག་སེར་ལས་ཞལ་བཤུས་པ་ལགས་སོ། །མངྒ་ལཾ།། །།