མཁའ་སྤྱོད་བདུད་འདུལ་མའི་སྒྲུབ་ཐབས།

བཀའ་རྫོགས་པ་ཆེན་པོ་བླ་མ་བདེ་མཆོག་ལོ་ལས༔ མཁའ་སྤྱོད་བདུད་འདུལ་མའི་སྒྲུབ་ཐབས་བཞུགས༔ དཔལ་ཧེ་རུ་ཀཿལ་ཕྱག་འཚལ་ལོ༔ མ་འོངས་འགྲོ་བ་རྗེས་འཇུག་དོན༔ བདུད་འདུལ་མཁའ་འགྲོའི་སྒྲུབ་ཐབས་ཤིག༔ ཡི་གེར་འདེབས་ནས་གཏེར་དུ་སྦ༔ ལས་འཕྲོ་ཅན་གྱིས་སྤྱོད་པར་ཤོག༔ ད་ནས་བཟུང་སྟེ་ལོ་རེ་བཞིན༔ དུས་དང་བསྐལ་བ་མར་མར་འགྲིབ༔ སངས་རྒྱས་བསྟན་པའི་ཐ་མ་ལ༔ བདུད་རྣམས་དགེ་སྦྱོང་ཆས་སུ་འོང་༔ ཕྱི་ཚུལ་སྟོན་པའི་ངུར་སྨྲིག་འཆང་༔ ནང་ཚུལ་མི་དགེ་བཅུ་ལ་སྤྱོད༔ ངན་གསུམ་ཁ་རྒྱས་བཟང་གསུམ་སྤྱུགས༔ ཧོར་སོགས་དུ་རུ་ཀཿརྣམས་དར༔ གངས་ཅན་བོད་ཀྱི་རྒྱལ་ཁམས་འདིར༔ དམག་འཁྲུག་ཁྲལ་སྣ་ཨར་ལས་མང་༔ བསྟན་འགྲོའི་བདེ་བ་ཟད་རྟགས་སུ༔ སློབ་དཔོན་སློབ་མར་གྱུར་ཚད་ཀྱིས༔ དམ་ཚིག་སེལ་ལ་དམར་གཡོས་རྒྱག༔ དམག་གི་རྒྱབ་གནོན་མཐུ་ཡིས་བྱེད༔ དེ་དུས་བསྟན་འཛིན་སྐྱེས་བུ་ཡིས༔ བདུད་ཀྱི་བྱད་མ་ལྷ་བསྲུང་རྣམས༔ རྣམ་པར་གཞོམ་ཞིང་བརླག་པའི་ཕྱིར༔ བདུད་འདུལ་མཁའ་འགྲོ་སེང་གདོང་མའི༔ སྒྲུབ་པ་འདི་བཞིན་ཉམས་སུ་ལོངས༔ བདུད་ཀྱི་གཡུལ་ལས་རྒྱལ་བར་བྱེད༔ དེ་ལ་ཡེ་ཤེས་མཁའ་འགྲོ་སེང་གདོང་མའི་སྒྲུབ་པ་ཉམས་སུ་ལེན་པའི་རིམ་པ་ནི༔ སྔོན་འགྲོ་དང་དངོས་གཞི་རྗེས་སོ༔ དང་པོ་སྔོན་དུ་འགྲོ་བ་ལ་དོན་གསུམ་སྟེ༔ ཕྱི་གནས་ཀྱི་སྟ་གོན༔ ནང་དཀྱིལ་འཁོར་གྱི་སྟ་གོན༔ གསང་བ་སྒྲུབ་རྫས་ཀྱི་སྟ་གོན་ནོ༔ ས་མ་ཡཱ༔ རྒྱ༔ དང་པོ་གནས་ཀྱི་སྟ་གོན་ནི༔ རྒྱུད་ལུང་ནས་བཤད་པའི་མ་མོ་མཁའ་འགྲོ་འདུ་བའི་གནས་སམ༔ དུར་ཁྲོད་དང་བྲག་ནག་རི་ནག་ཚང་ཚིང་འཁྲིགས་པའི་ཡུལ་ཏེ༔ མདོར་ན་འཇིགས་ཤིང་བརྔམ་པ༔ ལུང་གསུམ་འདུས་པའི་མདོའམ༔ སོག་པོ་ཁྲོས་པ་འདྲ་བའི་རིའམ༔ སྲིན་མོ་རལ་པ་བསིགས་འདྲའི་བྲག་སོགས་ཏེ༔ ཤིན་ཏུ་རྩུབ་པའི་ཡུལ༔ ཕྱིན་པ་ཙམ་གྱིས་སྐྱི་བུང་བྱེད་པའི་སར་ཕྱིན་ཏེ་གཉུག་མར་གནས་པ་ལ་གཏོར་མ་སྦྱིན༔ བདེན་པ་བརྗོད༔ ས་བརྟགས་བླང་སོགས་གཞུང་གང་རིགས་ལྟར་བྱས་ཏེ་བརྟག་པར་བྱའོ༔ ས་མ་ཡཱ༔ རྒྱ༔ གཉིས་པ་ནང་གི་དཀྱིལ་འཁོར་གྱི་སྟ་གོན་ནི༔ ད་ལ་ཆེ་ཆུང་གནས་ཁང་གི་རྒྱར་དཔག་པར་བཟོས་ཏེ༔ སྐྱང་ནུལ་སོགས་ལེགས་པར་བྱས་ཤིང་ནག་ལ་འཇམ་པ་རབ་ཏུ་མཁྲེགས་པར་བྱས་པ་ལ༔ དུག་སྣ་ཚོགས་ཀྱི་ཁུ་བ་དང་ཁྲག་སྣ་ཚོགས་ཀྱིས་ཆག་ཆག་གདབ་བོ༔ དེའི་ཁར་ཞིང་གི་རྒྱུ་མས་ཐིག་སྐུད་བྱ་ཞིང་༔ ཧཱུྃ་ཨེ་ཡཾ་ར་སུཾ་ཀེཾ་རཾ་བྷྲཱུྃ༔ ཅེས་བརྗོད་ཐིག་ནས་དྲངས་ཤིང་ལྟེ་བའི་ཆོས་འབྱུང་དམར་ནག་ཟླ་གམ་གསུམ་དང་ལྡན་པའི་མུ་ཁྱུད་ཀྱི་མཐར་འཁོར་ལོ་རྩིབས་བརྒྱད་པ་མཐིང་ནག་ཏུ་བཅད༔ སྒོ་གྲུ་རྟ་བབས་ཐོད་ར་མེ་རི་སོགས་སྤྱི་འགྲོས་ལྟར་བྲི་ཞིང་༔ དུར་ཁྲོད་རྡོ་ཚོན་གྱིས་ཁ་དོག་བསྒྱུར༔ ལྷག་ཆད་མེད་པར་བྲི་ཞིང་ཚུལ་དང་མཐུན་པར་བྱའོ༔ ས་མ་ཡཱ༔ རྒྱ༔ གསུམ་པ་གསང་སྒྲུབ་རྫས་ཀྱི་སྟ་གོན་ནི༔ དཀྱིལ་འཁོར་དེའི་དབུས་སུ་བདུད་འདུལ་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་གྱི་སྐུ༔ རབ་རིན་པོ་ཆེ་ལས་གྲུབ་པ༔ འབྲིང་དུར་ཁྲོད་ཀྱི་ས་རྡོ་ལ་བཟོས་པ༔ ཐ་ནའང་མཐིང་ནག་གི་དར་རམ་རས་ལ་ལྷ་བཟོ་མཁས་པས་མངོན་རྟོགས་ལྟར་བཞེངས་པ་ལ༔ རབ་ཏུ་གནས་ཤིང་བསྙེན་བསྒྲུབ་བསྲུང་བཟློག་བསད་པ་སོགས་ཀྱི་སྔགས་རྣམས་སིན་དྷུ་རའི་ཁུ་བས་བྲིས་པ་དར་ཚོན་ལྔའི་ན་བཟའ་དང་བཅས་པ་དབུས་སུ་འགོད༔ སྐུ་གཟུགས་དེའི་མདུན་དུ་སྦ་ལྕགས་ཚིགས་གསུམ་ལ་བུ་མོ་མགོ་གཙང་གི་ལྕང་ལོ་ལ་མགྲོན་བུ་དང་མེ་ལོང་གིས་བརྒྱན་པ༔ དར་སྣ་ལྔའི་ཅོད་པན་དང་བཅས་པ་བཏགས༔ ཟ་འོག་གི་ཁུག་མའི་ནང་དུ་སྨན་སྣ་ལྔ༔ འབྲུ་སྣ་ལྔ༔ རིན་ཆེན་ལྔ༔ དྲི་བཟང་གི་སྤོས་སྣ་ལྔ༔ སྙིང་པོ་ལྔ༔ གཙང་མའི་རཀྟ༔ གནས་ཆེན་ཙ་རི་ཏྲའི་སིནྡྷུ་ར༔ བླ་རྡོའི་ཙཀྲ་རྣམས་གཞུག་པའི་ཁུག་མ་སྦ་ལྕགས་གི་མགུལ་དུ་བཏགས་པ་གཟུགས༔ སྐུ་དེའི་རྒྱབ་ཏུ་ཁ་ཊྭཱྃ་ག་མཚན་ཉིད་དང་ལྡན་པ་ཞིག་ལ༔ ཟངས་ཀྱི་གྲི་གུག༔ ཐོད་པའི་ཌཱ་མ་རུ༔ མི་རྐང་གི་གླིང་བུ༔ མི་མགོའི་ཕྲེང་བ༔ མི་ལྤགས་ཀྱི་གཡབ་མོ༔ ལྕང་ལོ་ཅན་གྱི་བྷནྡྷ་རྣམས་ཀྱིས་བརྒྱན་པ་འགོད༔ སྐུ་དེའི་གཡས་སུ་སྨན་མཆོད༔  གཡོན་དུ ་རཀྟ༔ མདུན་དུ་བྷནྡྷའི་སྣོད་དུ་བཤོས་བུ་གཙོ་འཁོར་དགུ་པ་ལ་ཤ་སྣ་སྙིང་སྣ་བསམ་གྱིས་མི་ཁྱབ་པས་བརྒྱན་པ་བཤམས༔ གཞན་ཡང་མཐའ་སྐོར་རྣམས་སུ་དབང་པོའི་མེ་ཏོག༔ ཞུན་ཆེན་གྱི་མར་མེ༔ གསུར་ཆེན་གྱི་བདུག་སྤོས༔ རཀྟའི་ཡོན་ཆབ༔ དྲི་ཆུའི་བྱུག་པ༔ དྲི་ཆེན་གྱི་ཞལ་ཟས༔ རྐང་གླིང་གི་རོལ་མོ༔ བསད་པའི་ཚོགས་ཤཿ མྱོས་པའི་ཚོགས་ཆང་༔ མདོར་ན་དབང་དྲག་ལས་ཀྱི་མཆོད་རྫས་ཅི་འབྱོར་ཚད་དུ་བསག་གོ༔ ས་མ་ཡཱ༔ རྒྱ༔ གཉིས་པ་དངོས་གཞིའི་རིམ་པ་ལ་གསུམ་སྟེ༔ ལྷ་པསྒོམ་པ་དང་༔ སྔགས་བཟླ་བ་དང་༔ ལས་ལ་སྦྱོར་བའོ༔ ས་མ་ཡཱ༔ རྒྱ༔ དང་པོ་ལྷ་སྒོམ་པ་ལ༔ དེ་བཞིན་ཉིད་ཀྱི་ཏིང་ངེ་འཛིན་ནི༔ ཆོས་ཐམས་ཅད་རྣམ་པར་དག་པ་སྐྱེ་བ་མེད་པའི་དབྱིངས་སྟོང་པ་ཉིད་དུ་བསྒོམ༔ དེ་ནས་ཀུན་ཏུ་སྣང་བའི་ཏིང་ངེ་འཛིན་ནི༔ སྐྱེ་བ་མེད་པའི་དབྱིངས་ལས༔ འགག་མེད་ཀྱི་རོལ་པ་ཁམས་གསུམ་གྱི་སེམས་ཅན་ལ་ཁྱབ་པའི་སྙིང་རྗེ་ཆེན་པོ་བསྒོམ༔ དེ་ནས་རྒྱུ་ཡི་ཏིང་ངེ་འཛིན་ནི༔ འགག་མེད་ཀྱི་རང་གདངས་གང་འདུལ་གྱི་འགྲོ་བ་སྒྲོལ་བའི་ཕྱིར་དུ༔ རང་གི་སེམས་ཉིད་ཀྱི་ངོ་བོ་གནམ་ལྕགས་ལས་གྲུབ་པའི་གྲི་གུག་གི་ལྟེ་བར་ས་བོན་ཡི་གེ་ཧཱུྃ་མཐིང་ནག་གཟི་བརྗིད་དང་ལྡན་པ་ཞིག་ཏུ་བསྒོམ༔ དེ་ནས་འབྱུང་བ་རིམ་བརྩེགས་སྒོམ་པ་ནི༔ ཐུགས་ཀྱི་ས་བོན་ཡི་གེ་ཧཱུྃ་མཐིང་ནག་ལས༔ འོག་གི་ཕྱོགས་སུ་ཨེ་མཐིང་ནག་ཞིག་ཆད་པས༔ ནམ་མཁའ་མཐའ་དབུས་མེད་པར་ཁྱབ་པར་བསྒོམ༔ ནམ་མཁའ་ཀུན་ཏུ་བཟང་མོའི་མཁའ་ཀློང་གྲུ་གསུམ་པའི་རྣམ་པ་ཤིན་ཏུ་རྒྱ་ཁྱོན་གྱིས་བརྒྱན་པའི་སྟེང་དུ༔ ཧཱུྃ་ལས་ནམ་མཁའི་སྟེང་དུ་ཡཾ་འཕྲོས་པ་ལས༔ རླུང་གི་ད་ལ་ལྗང་ནག་ཡུམ་དམ་ཚིག་སྒྲོལ་མའི་མཁའ་ཀློང་གི་རང་བཞིན་དུ་བསྒོམ༔ ཧཱུྃ་ལས་ར་འཕྲོས་པས་རླུང་གི་སྟེང་དུ་ཁྲག་གི་རྒྱ་མཚོ་དམར་པོ་ཟླུམ་པོ་ཆགས་པ་མེད་པར་ཡུམ་མཱ་མ་ཀིའི་མཁའ་ཀློང་གི་རང་བཞིན་དུ་བསྒོམ༔ ཧཱུྃ་ལས་སུྂ་འཕྲོས་པས་ཁྲག་གི་རྒྱ་མཚོའི་སྟེང་དུ་ཞིང་ཆེན་གྱི་ས་གཞི་སྲ་ལ་རབ་ཏུ་བརྟན་པ་ཡུམ་སངས་རྒྱས་སྤྱན་མའི་མཁའ་ཀློང་གི་རང་བཞིན་དུ་བསྒོམ༔ ཧཱུྃ་ལས་རཾ་འཕྲོས་པས་མེའི་ད་ལ་དམར་ནག་གྲུ་གསུམ་རབ་ཏུ་འཁྱིལ་བ་ཡུམ་གོས་དཀར་མོའི་མཁའ་ཀློང་གི་རང་བཞིན་དུ་བསྒོམ༔ ཧཱུྃ་ལས་ཀེཾ་འཕྲོས་པས་ཀེང་རུས་ཀྱི་རི་རབ་སོགས་ཁ་གྱེན་དུ་བསྟན་པ༔ ཁྲག་གི་རྒྱ་མཚོའི་ནང་དུ་རྩ་བ་ནུབ་པ༔ རྐེད་པ་ལས་ཡེ་ཤེས་ཀྱི་ཉི་ཟླ་འཆར་བར་བསྒོམ་མོ༔ དེ་ནས་གཞལ་ཡས་ཁང་བསྒོམ་པ་ནི༔ ཧཱུྃ་ལས་རི་རབ་གྱི་སྟེང་དུ་བྷྲཱུྃ་འཕྲོས་པས་བྷནྡྷ་འབར་བའི་གཞལ་ཡས་ཁང་༔ ཐོད་རློན་གྱི་རྩིགས་པ་ལ་ཐོད་སྐམ་གྱིས་ཁ་བད་བྱས་པ༔ རྙིད་བ་མང་པོས་དྲ་བ་དྲ་ཕྱེད་བྱས་པ༔ རོའི་ཀ་བ་ལ་ཞིང་ལྤགས་ཀྱིས་ཐོག་ཕུབ་པ་མི་རོ་མང་པོའི་རྒྱལ་མཚན་དང་མི་ལྤགས་ཀྱི་བ་དན་ལ་མི་སྐྲའི་ལན་ཕྲན་མི་མགོ་སྐམ་པོའི་ཏོག་གིས་བརྒྱན་པ་མང་པོ་ཕྱོགས་ཕྱོགས་སུ་བཙུགས་པ༔ གྲུ་བཞི་སྒོ་བཞི་རྟ་བབས་བཞི་བཞི་དང་ལྡན་ཞིང་ཚད་མེད་པའི་བཀོད་པས་ཡོངས་སུ་བརྒྱན་པ༔ ནང་རོལ་དབང་པོ་སྣ་ཚོགས་ཀྱིས་ལྡ་ལྡི་དང་འཕན་གདུགས་དྲ་བ་ར་བར་བྲེས་པ། དེའི་ཕྱི་རོལ་དུ་ཐོད་ཕྲེང་མེ་རིས་བསྐོར་བ༔ དེའི་ཕྱི་རོལ་དུ་དུར་ཁྲོད་བརྒྱད་ཀྱིས་བསྐོར་བར་བསྒོམ་མོ༔ གཞལ་ཡས་ཁང་དེའི་དབུས་སུ་ཆོས་འབྱུང་དམར་ནག་ཟླ་གམ་གསུམ་ལྡན་མུ་ཁྱུད་ཀྱིས་མཚན་པའི་མཐར་འཁོར་ལོ་རྩིབས་བརྒྱད་པའི་མཐར་ཐོད་རས་བསྐོར་བར་བསྒོམ༔ དེ་ནས་གདན་བསྐྱེད་པ་ནི༔ ཧཱུྃ་ལས་འོད་འཕྲོས་པས་ཆོས་འབྱུང་གི་དབུས་སུ་དྲེགས་པ་ཕོ་མོའི་སྟེང་དུ་ཉི་ཟླ་པད་གདན་བསམ༔ རྩིབས་བརྒྱད་ལ་རོ་གདན་བརྒྱད༔ སྒོ་བཞི་ལ་རོ་གདན་བཞི་བསྒོམ་མོ༔ དེ་ནས་ལྷ་བསྐྱེད་པ་ནི༔ གཞལ་ཡས་ཁང་གི་དབུས་ཆོས་འབྱུང་འབར་བའི་ཀློང་རུམ་དུ་གདན་གྱི་ཁར་རང་གི་སེམས་ཉིད་ཀྱི་ངོ་བོ་ཡི་གེ་ཧཱུྃ་མཐིང་ནག་གཟི་བརྗིད་དང་ལྡན་པ་དེ་ཁྲ་ཐབས་སུ་བབས་པ་ལས་འོད་ཟེར་འཕྲོས༔ འཕགས་པ་མཆོད༔ སེམས་ཅན་ཐམས་ཅད་ཀྱི་དོན་བྱས༔ དུས་གསུམ་གྱི་སངས་རྒྱས་ཁྲོ་བོ་ཁྲོ་མོ་མ་མོ་མཁའ་འགྲོ་ཐམས་ཅད་ཀྱི་ཐུགས་རྗེ་དང་གཟི་བརྗིད་ནུས་སྟོབས་ཡོན་ཏན་ཐམས་ཅད་ཚུར་བསྡུས༔ ཡི་གེ་ཧཱུྃ་ལ་ཐིམ་པ་ལས་གཟི་བརྗིད་ཆེས་ཆེར་འབར་ཞིང་དེ་ལས་འོད་འཕྲོས་ཚུར་འདུས་པས་བདུད་བདུལ་མཁའ་འགྲོ་སེང་གེའི་གདོང་པ་ཅན་ཞལ་གཅིག་ཕྱག་གཉིས་སྐུ་མདོག་མཐིང་ནག་ཏུ་འབར་བ༔ ཞལ་གདངས་ཤིང་ལྗགས་འདྲིལ་བ༔ མཆེ་བ་རབ་ཏུ་གཙིགས་པ༔ རལ་བ་ཁམས་ནག་སྤྲིན་ལྟར་དུ་གཏིབས་པ༔ སྤྱན་གསུམ་སྡང་མིག་ཏུ་བལྟ་བ༔ སྨ་ར་དང་སྨིན་མ་ལས་མེ་སྟག་ཏུ་འཕྲོ་བ༔ ཕྱག་གཡས་འཁོར་ལོས་མཚན་པའི་གྲི་གུག་ནམ་མཁའ་ལ་འཕྱར་བ༔ གཡོན་ལྕང་ལོས་མཚན་པའི་ཐོད་ཁྲག་ཐུགས་ཀར་བསྣམས་པ༔ ཞབས་གཡས་བསྐུམ་པའི་རྟིང་པ་བྷ་ག་ལ་གཏད་ཅིང་གཡོན་བརྐྱང་བ༔ གྲུ་མོ་ གཡོན་དུ ་ཡབ་ཧེ་རུ་ཀཿསྦས་པའི་ངོ་བོ་རྡོ་རྗེ་ཁ་ཊྭཱཾ་ག་ལ་བདེ་བར་འཁྱུད་པ༔ བཅུ་དྲུག་ལང་ཚོ་རབ་ཏུ་རྒྱས་པའི་ཉམས་བག་ཅན༔ ནུ་མ་འབུར་ཞིང་བྷ་ག་རབ་ཏུ་རྒྱས་པ༔ ཁྲོ་ལ་གཏུམ་པ༔ དཔའ་ལ་སྒེག་པའི་ཉམས་དང་ལྡན་པ་ལ་དུར་ཁྲོད་ཀྱི་རུས་རྒྱན༔ མི་ལྤགས་ཀྱི་གཡང་གཞི༔ གླང་ཆེན་གྱི་ཀོ་རློན༔ གཟིག་ལྤགས་ཀྱི་ཤམ་ཐབས༔ སྦྲུལ་རིགས་ལྔའི་ཆུན་པོ༔ ཁྲག་གི་ཐིག་ལེ༔ ཞག་གི་སོ་རིས༔ ཐལ་ཆེན་གྱི་ཚོམ་བུ༔ མི་མགོའི་ཕྲེང་བ༔ དར་སྣ་ཚོགས་ཀྱི་ཅོད་པན་འཕུར་ཞིང་མེ་རི་དམར་ནག་འབར་བའི་ཀློང་དཀྱིལ་དུ་བཞུགས་པར་བསྒོམ་མོ༔ རིགས་བདག་བསྐྱེད་པ་ནི༔ དེའི་སྤྱི་གཙུག་ཏུ་རྡོ་རྗེ་དྲག་པོ་རྩལ་མཐིང་ནག་རབ་ཏུ་ཁྲོས་པ༔ ཞལ་གཅིག་ཕྱག་གཉིས་རྡོ་རྗེ་སྡིག་མཛུབ་ཅན༔ ཡུམ་རྡོ་རྗེ་ཕག་མོ་དམར་མོ་དང་འཁྲིལ་བ༔ དུར་ཁྲོད་ཀྱི་ཆས་དང་ལྡན་ཞིང་རྟ་ཕག་གི་ངུར་སྒྲ་སྒྲོགས་པ༔ མེ་རི་འབར་བའི་ཀློང་དུ་དོར་སྟབས་ཀྱི་ཞབས་གཉིས་པད་ཉི་དང་རོ་གདན་ལ་བཞུགས་པར་བསྒོམ་མོ༔ དེ་ནས་འཁོར་བསྐྱེད་པ་ནི༔ གཙོ་མོའི་ཐུགས་ཀའི་ཕྱག་མཚན་དང་ས་བོན་བཅས་པ་ལས་འོད་ཟེར་འཕྲོས་པའི་ཆ་ལས༔ ཆོས་འབྱུང་དམར་ནག་ཟླ་གམ་གསུམ་ལྡན་གྱི་ཕྱི་རོལ་འཁོར་ལོ་རྩིབས་བརྒྱད་པའི་སྟེང་དུ༔ ཧ་རི་ནི་སའི་ཡིག་འབྲུ་རྣམས་འཕྲོས༔ གནས་གྱུར་པ་ལས་ཤར་དུ་རྡོ་རྗེ་མཁའ་འགྲོ་དཀར་མོ་གཡས་པས་གནམ་ལྕགས་ཀྱི་འཁོར་ལོ་ནམ་མཁར་འཕྱར་བ༔ ལྷོར་རིན་ཆེན་མཁའ་འགྲོ་སེར་མོ་གཡས་གནམ་ལྕགས་འབར་བའི་ཁ་ཊྭཱྃ་ག་བསྣམས་པ༔ ནུབ་ཏུ་པདྨ་མཁའ་འགྲོ་དམར་མོ་གཡས་བསྐལ་པའི་མེ་དཔུང་བསྣམས་པ༔ བྱང་ དུ་ལས་ཀྱི་མཁའ་འགྲོ་ལྗང་མོ་གཡས་གནམ་ལྕགས་ཀྱི་རལ་གྲི་བསྣམས་པ༔ གཡོན ་ཐམས་ཅད་ཐོད་པ་ཁྲག་གིས་བཀང་བ་ཐུགས་ཀར་བསྣམས་པ༔ ཀུན་ཀྱང་གར་སྟབས་འགྱིང་བག་དང་ལྡན་ཞིང་༔ རལ་པའི་ཐོར་ཅོག་ལ་ཐོད་སྐམ་དང་རིན་པོ་ཆེའི་རྩེ་བྲན་གྱིས་བརྒྱན་ཞིང་དུར་ཁྲོད་ཀྱི་ཆས་ཐམས་ཅད་རྫོགས་པ༔ ཞལ་གདངས་ཤིང་ལྗགས་འདྲིལ་བ་མཆེ་བ་རབ་ཏུ་གཙིགས་ཤིང་སྨ་ར་དང་སྨིན་མ་གློག་ལྟར་འཁྱུག་པ༔ སྤྱན་གསུམ་སྡང་མིག་ཏུ་བགྲད་དེ་ཁམས་གསུམ་དབང་དུ་བསྡུད་ཅིང་སྲིད་གསུམ་ཟིལ་གྱིས་གནོན་པ་དྲག་ཏུ་ཁྲོས་པའི་སྐུ་རུ་བསྒོམ་མོ༔ མཚམས་ཀྱི་རྩིབས་བཞིའི་སྟེང་དུ་རིམ་བཞིན་ས་བོན་ཡི་གེ་མ་བཞི་ཧཱུྃ་ལས་འཕྲོས་པ་ལས༔ ཤར་ལྷོར་དམ་ཚིག་མཁའ་འགྲོ་དཀར་ནག་ཕྱེད་མ་ཕྱག་གཉིས་ན་ཉི་ཟླ་ཆ་ལང་རྡེབ་པ༔ ལྷོ་ནུབ་ཏུ་སྣ་ཚོགས་མཁའ་འགྲོ་སེར་ནག་ཕྱག་གཉིས་ན་གསེར་གྱི་འཁོར་ལོ་རྩིབས་སྟོང་དང་ལྡན་པ་རྡེབ་པ༔ ནུབ་བྱང་ཤ་ཟ་མཁའ་འགྲོ་དམར་ནག་ཕྱག་གཉིས་ན་ཟངས་ཀྱི་འཁོར་ལོ་རྩིབས་སྟོང་དང་ལྡན་པ་རྡེབ་པ༔ བྱང་ཤར་དུ་འཇིག་རྟེན་མཁའ་འགྲོ་ལྗང་ནག་ཕྱག་གཉིས་ན་གནམ་ལྕགས་ཀྱི་འཁོར་ལོ་རྩིབས་སྟོང་ཆ་ལང་དུ་རྡེབ་པ༔ ཀུན་ཀྱང་ཕྱེད་གཟུགས་ཅན་ཞལ་གཅིག་ཕྱག་གཉིས་སྤྱན་གསུམ་དང་ལྡན་པ༔ ཞབས་གཉིས་གར་སྟབས་སུ་བཞུགས་པ༔ རྒྱན་དང་ཆ་ལུགས་རིགས་བཞིའི་མཁའ་འགྲོ་ལྟར་ལ་རབ་ཏུ་ཁྲོས་པར་བསྒོམ་མོ༔ སྒོ་མ་བསྐྱེད་པ་ནི༔ ཛཿཧཱུྃ་བཾ་ཧོཿབཞིའི་ཡིག་འབྲུའི་འཕྲོ་འདུ་ལས༔ ཤར་སྒོ་ཁ་གདོང་མ་དཀར་མོ་གཡས་ཤེལ་གྱི་ཅང་ཏེའུ་དང་གཡོན་ཤེལ་གྱི་ལྕགས་ཀྱུ་བསྣམས་པ༔ ལྷོ་སྒོར་ཕག་གདོང་མ་སེར་མོ་གཡས་གསེར་གྱི་ཅང་ཏེའུ་དང་གཡོན་གསེར་གྱི་ཞགས་པ་བསྣམས་པ༔ ནུབ་སྒོར་ཁྱི་གདོང་མ་དམར་མོ་གཡས་ཟངས་ཀྱི་ཅང་ཏེའུ་དང་གཡོན་ཟངས་ཀྱི་ལྕགས་སྒྲོག་བསྣམས་པ༔ བྱང་སྒོ་འུག་གདོང་མ་ལྗང་མོ་གཡས་གཡུའི་ཅང་ཏེའུ་དང་གཡོན་དངུལ་གྱི་དྲིལ་བུ་བསྣམས་པ༔ ཀུན་ཀྱང་ཞལ་གཅིག་ཕྱག་གཉིས་དོར་སྟབས་སུ་འགྱིང་པ་གནས་ལྔར་རུས་པའི་རྒྱན་གྱིས་བརྒྱན་ཞིང་ཁ་ཊྭཱྃ་ག་མཆན་དུ་བཅུག་པ༔ གཅེར་བུ་ནུ་མ་དང་བྷ་ག་རྒྱས་ཤིང་རལ་པ་བསིགས་པར་བསྒོམ་མོ༔ དེ་ཡན་དམ་ཚིག་གི་ལྷ་བསྐྱེད་པའོ༔ དེ་ནས་སྤྱན་འདྲེན་པ་ནི༔ བདུད་འདུལ་དཔལ་གྱི་མཁའ་འགྲོའི་ལྷ་ཚོགས་ཐམས་ཅད་ཀྱི་གནས་གསུམ་ལ་ཡིག་འབྲུ་གསུམ་གྱིས་མཚན་པ་ལས༔ འོད་ཟེར་འཕྲོས་པས་འོག་མིན་དང་མཁའ་སྤྱོད་དུར་ཁྲོད་གནས་ཡུལ༔ ཁྱད་པར་ཨོ་རྒྱན་མཁའ་འགྲོའི་གླིང་ནས་བདུད་འདུལ་དཔལ་གྱི་མཁའ་འགྲོའི་ལྷ་ཚོགས་ཐམས་ཅད་སྤྲིན་འཁྲིགས་པ་ལྟར་རམ་ཁ་ཆར་བུ་ཡུག་འཚུབ་པ་ལྟར་བྱོན་པར་བསམ་མོ༔ དེ་ནས་བཞུགས་སུ་གསོལ་བ་ནི༔ དམ་ཚིག་གི་ལྷ་ཚོགས་དང་ཡེ་ཤེས་ཀྱི་ལྷ་ཚོགས་གཉིས་ཆུ་དང་འོ་མ་འདྲེས་པ་ལྟར་གཉིས་སུ་མེད་པར་ཐིམ་པ་ལས༔ མཆོག་ཐུན་གྱི་དངོས་གྲུབ་མ་ཐོབ་བར་བརྟན་པར་བཞུགས་སུ་གསོལ་བར་བསམ་མོ༔ དེ་ནས་ཕྱག་འཚལ་བས་གཞལ་ཡས་ཁང་གི་སྒོ་བཞི་ནས་མཁའ་འགྲོ་མ་བཞིས་གར་དང་ཕྱག་རྒྱས་ཕྱག་འཚལ་ཏེ་ཡེ་ཤེས་དང་དམ་ཚིག་པ་འདུ་འབྲལ་མེད་པར་ཕྱག་འཚལ་ལོ༔ དེ་ནས་མཆོད་པ་འབུལ་ཏེ༔ གཟུགས་ཀྱི་ལྷ་མོས་མེ་ལོང་༔ སྒྲ་ཡི་ལྷ་མོས་པི་ཝང་༔ དྲི་ཡི་ལྷ་མོས་སྤོས་ཁང་༔ རོ་ཡི་ལྷ་མོས་ཞལ་ཟས༔ རེག་བྱའི་ལྷ་མོས་ན་བཟའ་སྟེ་ཕྱིའི་འདོད་ཡོན་ལྔ་དང་༔ གཟུགས་དང་༔ ཚོར་བ་དང་༔ འདུ་ཤེས་དང་༔ འདུ་བྱེད་དང་༔ རྣམ་པར་ཤེས་པ་ལ་སོགས་ཏེ་ཕུང་པོ་ལྔ་དང་༔ སེམས་དང་ནམ་མཁའ༔ ཤ་དང་རུས་པ༔ དྲོད་དང་མེ༔ ཁྲག་དང་ཆུ་སེར༔ དབུགས་དང་རླུང་སྟེ་འབྱུང་བ་ལྔ་དང་༔ བྱང་སེམས་དྲི་ཆེན་ཤ་ཆེན་རཀྟ་དྲི་ཆུ་སྟེ་བདུད་རྩི་ལྔ་དང་༔ མི་ཤ་རྟ་ཤ་གླང་ཆེན་ཤ་ཁྱི་ཤ་བ་ལང་གི་ཤ་སྟེ་ཤ་ལྔ་དང་༔ གཏི་མུག་གི་རང་བཞིན་ཤ་ཆེན༔ ཞེ་སྡང་གི་རང་བཞིན་རུས་པ༔ འདོད་ཆགས་ཀྱི་རང་བཞིན་ཁྲག༔ ང་རྒྱལ་གྱི་རང་བཞིན་ཀླད་པ༔ ཕྲག་དོག་གི་རང་བཞིན་མཁྲིས་པ་སྟེ་དུག་ལྔ་དབྱིངས་སུ་བསྒྲལ་བའི་མཆོད་པ་དང་༔ གཟུགས་སྣང་སྐུ༔ སྒྲ་གྲག་གསུང་༔ དྲན་རྟོག་ཐུགས་ཏེ་སྣང་སྲིད་འཁོར་འདས་ཀྱི་ཆོས་ཐམས་ཅད་སྒོ་གསུམ་གྱི་རང་མདངས་ལས་རང་ཤར་གྱི་ངང་ནས་རང་གྲོལ་དུ་བདུད་འདུལ་མཁའ་འགྲོའི་ལྷ་ཚོགས་ལ་མཆོད་དོ༔ དེ་ནས་བསྟོད་པ་བྱས་པས༔ ཡེ་ཤེས་མཁའ་འགྲོ་བདུད་འདུལ་མའི་ལྷ་ཚོགས་ཐམས་ཅད་རབ་ཏུ་དགྱེས་ཤིང་རང་དང་གཉིས་སུ་མེད་པར་བསམ་མོ༔ ས་མ་ཡཱ༔ རྒྱཿ གཉིས་པ་སྔགས་བཟླ་བ་ནི༔ བདག་དང་མདུན་བསྐྱེད་གཉིས་སུ་མེད་པར་སྐད་ཅིག་གི་ཡེ་ཤེས་དབྱིངས་ཀྱི་མཁའ་འགྲོ༔ དམ་ཚིག་ལས་ཀྱི་དྷཀྐི་བདུད་འདུལ་སེང་གེའི་གདོང་ཅན་གྱི་ལྷ་ཚོགས་སུ་ལྷམ་མེ་ལྷན་ནེ༔ མེ་ལོང་གི་གཟུགས་བརྙན་དང་ཆུའི་ཟླ་བ་ལྟར་སྟོང་ལ་གསལ་བ༔ གསལ་ལ་སྟོང་པ༔ སྟོང་གསལ་གཉིས་སུ་མེད་པ༔ མཚན་མར་འཛིན་པའི་དྲི་མ་ངོ་བོ་ཉིད་དུ་ཡེ་དག་ཏུ་གསལ་བའི་ལྷ་ཚོགས་ཐམས་ཅད་ཀྱི་སྤྱི་གཙུག་ཏུ་འཁོར་ལོ་རྩིབས་བཞིའི་སྟེང་དུ་ཨཱོཾཿ མགྲིན་པར་པདྨ་འདབ་བཞིའི་སྟེང་དུ་ཨཱཿདམར་པོ༔ སྙིང་གར་རྡོ་རྗེ་རྒྱ་གྲམ༔ དེའི་སྟེང་དུ་ཉི་མའི་དཀྱིལ་འཁོར༔ དེའི་སྟེང་དུ་གཙོ་མོ་ལ་འཁོར་ལོས་མཚན་པའི་གྲི་གུག༔ འཁོར་བཞི་ལ་རང་རྟགས་ཀྱིས་མཚན་པའི་གྲི་གུག་གི་ལྟེ་བར་གཙོ་མོ་ལ་ཧཱུྃ༔ འཁོར་བཞི་ལ་ཧ་རི་ནི་ས་བཞིས་མཚན་པར་བསམ་མོ༔ རིགས་བདག་བླ་མ་དབང་གི་ཐུགས་ཀར་ཧཱུྃ༔ ཡུམ་མཆོག་རྡོ་རྗེ་ཕག་མོ་དང་ཤུགས་འགྲོ་བཞིའི་ཐུགས་ཀར་མ༔ སྙིང་པོ་དེ་རྣམས་ཀྱི་མཐར་ཉི་དཀྱིལ་གྱི་སྟེང་དུ་གཡས་བསྐོར་དུ༔ ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་སརྦ་ས་མ་ཡ་ཙིཏྟ་ཧྲིང་ཛཿསིདྡྷི་ཧཱུྃ༔ ཅེས་བཟླས་པས་འོད་ཟེར་དམར་པོ་རེག་བྱ་ཚ་བའི་ཕྲེང་ཐག་གཅིག་ལ་བརྟེན་ཏེ་སྔགས་ཕྲེང་རྣམས་གཡས་སུ་འཁོར༔ ཕྲེང་ཐག་ གཡོན་དུ ་འཁོར་བས༔ རིགས་བདག་རྟ་ཕག་ཡབ་ཡུམ་གྱིས་འབུམ་ཕྲག་མཁའ་འགྲོ་ཐམས་ཅད་དབང་དུ་བསྡུས༔ ཡེ་ཤེས་བདུད་འདུལ་ནག་མོས་མཁའ་འགྲོ་ལས་ལ་བཀོལ༔ དྷཀྐིའི་སྲོག་ཡིག་རྣམས་ཀྱིས་སྲོག་རྒྱུད་བསྐུལ་ཏེ༔ བྱ་ནག་ཁྱུ་འགྲོག་པའམ་གཅན་སྤྱང་ཤ་ལ་རུབ་པ་ལྟར་བདག་གི་དབང་དུ་འདུས་ནས༔ ཅི་བཅོལ་བའི་ལས་བྱེད་ཅིང་དངོས་གྲུབ་དགོས་དགུ་སྟེར་བར་བསམ་མོ༔ གསང་བའི་སྙིང་པོ་ཡིག་འབྲུ་ཉེར་ལྔ་པ་འདི༔ མི་ཚིག་གིས་བར་མཆོད་པར་འབུམ་ཚོ་གསུམ་བཟླ་བར་བྱའོ༔ ཐུན་སྐབས་རྣམས་སུ་གཏོར་མས་མཆོད༔ བསྟོད་པས་བསྟོད་པར་བྱའོ༔ ས་མ་ཡཱ༔ རྒྱ༔ གསུམ་པ་ལས་ལ་སྦྱར་བ་ནི་གཞན་དུ་གསལ་ལོ༔ ས་མ་ཡཱ༔ རྒྱ༔ དོན་གསུམ་རྗེས་ཀྱི་རིམ་པ་ལ་གསུམ་སྟེ༔ སྒྲུབ་པའི་རྟགས་བསྟན་པ༔ དམ་ཚིག་བསྟན་པ༔ དགོས་ཆེད་བསྟན་པའོ༔ ས་མ་ཡཱ༔ རྒྱ༔ དང་པོ་རྟགས་ཀྱི་རིམ་པ་ནི༔ དད་བརྩོན་ལྡན་པའི་རྣལ་འབྱོར་པས་ཚུལ་བཞིན་ཉམས་སུ་བླངས་ཚེ༔ ཕྱི་རྟགས་ཀྱི་རིམ་པ་ཉམས་དྭངས་པ༔ རིག་པ་བརྟན་པ༔ བསྐྱེད་རིམ་གསལ་བ༔ ཐོག་འཚེག་པ༔ སྒོ་བརྡུང་བ༔ སྡེག་ཆོམ་སྣ་ཚོགས་དང་༔ སྒྲུབ་རྫས་ལ་འོད་འཁྱུག་པ༔ མེ་འབར་བ་དུད་པ་འཐུལ་བ༔ དབྱར་མི་རུལ་པ༔ དགུན་མི་འཁྱགས་པ་སོགས་འབྱུང་ངོ་༔ ནང་རྟགས་ཀྱི་རིམ་པ་རྨི་ལམ་དུ་ཉི་ཟླ་ཤར་བ༔ ཆུ་བོར་བརྒལ་པ༔ བྲག་གཤགས་པ༔ ལིངས་བཏབ་པ༔ དམག་དྲངས་པ༔ མཚོན་དང་གོ་གྱོན་པ༔ ལུས་ལས་མེ་འབར་བ༔ གཡུལ་ལས་རྒྱལ་བ༔ བན་བོན་དང་ཁྱི་སྤྱང་བརྡུང་བ༔ ལྡེར་བཟོ་བཅོམ་པ༔ ཤོ་དང་རྒྱན་རྒྱལ་བ་སོགས་ཀྱི་རྨི་ལམ་འབྱུང་ངོ་༔ གསང་བའི་རྟགས་ནི་རབ་དངོས་འབྲིང་ཉམས་ཐ་ནའང་རྨི་ལམ་དུ་ཞལ་མཇལ་བ༔ ལུང་སྟོན་པ༔ བུད་མེད་བཟང་མོས་ཁ་ཟས་དང་༔ ཁྱད་པར་ཆང་འདྲེན་པ༔ ཚོགས་ཀྱི་འཁོར་ལོ་བསྐོར་བ༔ བྱིན་པ༔ ཐོད་རྔ་རྐང་གླིང་གྲི་གུག་ཁ་ཊྭཱྃ་ག་བྷན་དྷ་མཚན་བཟང་རྡོ་རྗེ་སོགས་བྱིན་པའམ་རྙེད་པ༔ ཁྱད་པར་རིག་པ་གར་གཏད་ལ་ཆགས་ཤིང་བསྐྱེད་རྫོགས་ལ་བརྩོན་སྙིང་འདོད་པ་སོགས་འབྱུང་ངོ་༔ ཡང་ཉམས་ང་བ་བག་ཚ་བ༔ སྒྱིད་ལུག་པ༔ སྒྲུབ་ལ་བརྩོན་སྙིང་མི་འདོད་ཅིང་མཛེ་སྤྲང་མང་པོ་དང་ཡུགས་སའི་རིགས་ཀྱི་བུད་མེད་ངུད་མོ་ལྡིར་བ༔ མཚན་མ་སྟོན་པ༔ མུན་ནག་ཏུ་ཕྱིན་པ༔ སྒྲུབ་རྫས་བཀྲག་མདངས་ཞན་པ་སོགས་བྱུང་ན༔ བསྐང་བཤགས་དང་ཚོགས་འཁོར་བྱ༔ གུ་གུལ་བདུག༔ ཐུན་གྱིས་བྲབ༔ བསྐྱེད་རྫོགས་ལ་གསལ་ཡང་ཡང་དུ་གདབ༔ བཟླས་པར་བུང་བས་ཚང་འཚོལ་བ་ལྟར་འབད་པར་བྱའོ༔ བསྙེན་གྲངས་མ་རྫོགས་པ་ལ་གྲུབ་རྟགས་ཐོན་ན་གང་ཟག་སྒྲིབ་བ་བསྲབས་པའི་རིགས་སོ༔ བསྙེན་གྲངས་སོང་ཡང་རྟགས་མེད་འགྱངས་ན་སྒྲིབ་པ་མཐུག་པའི་རིགས་སོ༔ སླར་སྤོག་པའམ་ནན་ཏན་དུ་འབད་དོ༔ དེ་ལྟར་སྒྲུབ་པའི་རྟགས་རྣམས་རྫོགས་པ་དང་༔ ཐུགས་དམ་བསྐུལ༔ དབང་བཞིན་ལེན༔ དངོས་གྲུབ་ཞུའོ༔ ས་མ་ཡཱ༔ རྒྱ༔ གཉིས་པ་དམ་ཚིག་བསྟན་པ་ནི༔ མཁའ་འགྲོའི་སྐུའི་དམ་ཚིག་ཏུ་སྐུ་གཟུགས་འཆང་བ་དང་བསྐྱེད་རིམ་བསྒོམ་པ༔ གསུང་གི་དམ་ཚིག་ཏུ་སྙིང་པོ་བགྲང་བ་དང་སྒྲུབ་ཡིག་འཆང་བ༔ ཐུགས་ཀྱི་དམ་ཚིག་ཏུ་རྫོགས་རིམ་བསྒོམ་པ་དང་བླ་རྡོ་བཅང་བ༔ ཡོན་ཏན་གྱི་དམ་ཚིག་ཏུ་སྒྲུབ་རྫས་འཛོམ་པ་དང་བུད་མེད་ལ་མི་དམོད་པ༔ འཕྲིན་ལས་ཀྱི་དམ་ཚིག་ཏུ་སྦྱོར་སྒྲོལ་གསང་སྤྱོད་དང་ལྟ་སྒོམ་གསང་བའོ༔ ས་མ་ཡཱ༔ རྒྱ༔ གསུམ་པ་དགོས་ཆེད་བསྟན་པ་ནི༔ མ་འོངས་པ་ན་བོད་ཀྱི་རྒྱལ་ཁམས་འདིར༔ དགེ་བཅུའི་ཁྲིམས་ནུབ་ཅིང་མི་དགེ་བཅུ་ལ་སྤྱོད་དེ༔ མནའ་ཆད་དཔང་གསུམ་ཁྲེལ་དང་ངོ་ཚ་བཏང་ནས་མཚམས་མེད་ལས་ལ་ཆེས་ཆེར་སྤྱོད་པའི་དུས་ངན་ཞིག་འོང་ངོ་༔ དེའི་ཚེ་སྔགས་པས་མཐུ་བྱེད་ཅིང་སྐྱེ་བོས་བཟློག་པ་སློབ༔ དམག་གི་ལས་བྱེད་རྒྱབ་གནོན་མཐུ་གཏད་ལ་བརྩོན་ཞིང་༔ ཤཱཀྱའི་བསྟན་པ་འདི་ཡང་རྟགས་ཀྱིས་འཛིན༔ བདུད་དང་འགོང་པོ་ཁ་རྒྱས་པས་སློབ་དཔོན་དང་སློབ་མར་གྱུར་ཚད་དམ་སེལ་དུ་གཡོ༔ བོད་རུ་བཞིའི་གཙུག་ལག་ཁང་རྣམས་བཤིགས་ཏེ་རྫོང་ལ་འགེབས༔ ཚོང་དུས་དང་སྡེ་དགོན་བཙུན་པས་འགང་ཞིང་དད་ཟས་ཁྲལ་དུ་རྒྱུག༔ མཁན་ཆེན་བརྒྱ་རྩས་ཡུལ་སྡེ་ཁྲིམས་ཀྱིས་མནར་ཞིང་གཡོ་རྒྱུ་སུ་མཁས་ཆེ༔ དེ་དུས་བུད་མེད་མོ་ལུས་ཐོབ་ཚད་གསོན་འདྲེར་ལྡང་༔ སྐྱེས་པ་ཤི་ཚད་ཟ་འདྲེར་སྐྱེ༔ བུད་མེད་ཤི་ཚད་བསེན་མོར་སྐྱེ༔ བན་བཙུན་ཤི་ཚད་དཀོར་བདག་ཏུ་སྐྱེ༔ སྟོན་ཆེན་མཁན་ཆེན་ཕལ་ཆེར་དམ་སྲི་དང་རྒྱལ་འགོང་དུ་འགྱུར་ནས༔ ཆོས་བཞིན་སྤྱོད་པའི་སྐལ་ལྡན་ཕོ་མོ་ལ་བར་ཆད་སྣ་ཚོགས་སུ་བརྩོམ་ཞིང་ཚེ་སྲོག་འཕྲོག་པར་བྱེད་དོ༔ མི་དགེ་བ་ལ་སྤྱོད་པ་རྣམས་ཀྱི་ཁ་འཛིན་བྱེད་ཅིང་ཐ་མར་དབུགས་འགམ་བྲན་དུ་བསྐོར་རོ༔ དེའི་ཚེ་ཆོས་བཞིན་སྤྱོད་པའི་སྐལ་ལྡན་འགའི་དོན་དུ༔ བྱ་སླ་ཚེགས་ཆུང་བྱིན་རླབས་མྱུར་བའི་གདམས་པ་མང་པོ༔ ཤར་ལྷོ་ནུབ་བྱང་གི་གནས་འགའ་ལ་སྦས་པ་ཟབ་རྒྱ་འཁྲོལ་ཞིང་༔ སྐལ་ལྡན་འགའ་རེས་དངོས་གྲུབ་སྣ་རེ་འཐོབ་པར་བྱེད་ཅིང་༔ ཁྱད་པར་གསང་བ་བླ་མེད་ཀྱི་གདམས་པ་ཟབ་མོ་འདི་ནི༔ སྙིགས་མ་རྩོད་ལྡན་གྱི་དུས་ངན་དེ་ལྟ་བུ་ཤར་བའི་ཚེ༔ ཆོས་བཞིན་སྤྱོད་པའི་སྐལ་ལྡན་འགའི་རྐྱེན་སེལ་དངོས་གྲུབ་འཐོབ་ཕྱིར་ད་ལྟ་མཚོ་རྒྱལ་ཁྱོད་ལ་གདམས་ཤིང་༔ མ་འོངས་ཀྱི་དོན་དུ་སེང་གདོང་མཁའ་འགྲོའི་སྐུའི་གནས་མཆོག༔ ཏེ་སེ་གངས་ཀྱི་ཕོ་བྲང་དུ་རིན་པོ་ཆེའི་གཏེར་དུ་སྦས་པའོ༔ ས་མ་ཡཱ༔ རྒྱ༔ ཨེ་མ་གསང་བའི་སྙིང་པོ་ཟབ་པའི་མཐར་ཐུག་འདི༔ པདྨ་བདག་གི་སྙིང་གི་བརྣག་པ་སྟེ༔ བོད་འདིར་ཟབ་གཏེར་ཇི་སྙེད་སྦས་ནའང་༔ གཏེར་ཁ་འདི་མིན་གཏེར་ཁ་གཞན་དག་ཏུ༔ བདུད་འདུལ་མཁའ་འགྲོའི་བསྙེན་སྒྲུབ་བསྟན་པ་མེད༔ ཅི་ཕྱིར་འདི་ནི་ཤིན་ཏུ་ཟབ་པའི་ཆོས༔ བདག་སྔོན་རྒྱ་གར་འཕགས་པའི་ཡུལ་གནས་ཚེ༔ མུ་སྟེགས་སྟོན་པ་ལང་ཀའི་བདག་པོ་ཡིས༔ སངས་རྒྱས་བསྟན་པ་འཇིག་ལ་ཉེ་བའི་དུས༔ ཐུབ་པའི་བཞུགས་གནས་རྡོ་རྗེ་གདན་གྱི་ལྷོ༔ ཕ་བོང་རུས་སྦལ་འདྲ་བའི་གསང་མཛོད་ནས༔ མཁའ་འགྲོས་ལུང་བསྟན་བདག་ཉིད་པདྨས་ཕྱུངས༔ མུ་སྟེགས་སྟོན་པ་ལྔ་བརྒྱའི་རྩོད་པ་ཟློག༔ ངན་སྔགས་བདག་པོ་མུ་སྟེགས་ཐོག་གིས་བསྒྲལ༔ སངས་རྒྱས་བསྟན་པའི་བ་དན་ཕྱོགས་བཅུར་བསྒྲེངས༔ དེ་ཕྱིར་ཟབ་པའི་མཐར་ཐུག་གདམས་པ་འདི༔ སྨོན་ལམ་སྟོབས་ཀྱིས་ང་སྤྲུལ་བུས་རྙེད་ཅིང་༔ སངས་རྒྱས་བསྟན་པའི་བཙས་སུ་འདི་གྱུར་ཅིག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་གངས་ཏེ་སེ་ནས་གདན་དྲངས་པའོ། མངྒ་ལཾ། །