བསྐང་བ་བདེ་ལེགས་ཀུན་སྩོལ།

ཟབ་ཆོས་པདྨ་དྲག་ཁྲོས་ལས༔ བསྐང་བ་བདེ་ལེགས་ཀུན་སྩོལ་བཞུགས༔ དྲག་པོ་རྩལ་ལ་ཕྱག་འཚལ་ལོ༔ དབེན་པའི་གནས་སུ་དཀྱིལ་འཁོར་བཤམས༔ སྐུ་གསུང་ཐུགས་རྟེན་སྤྱན་གཟིགས་བཀྲམས༔ སྨན་གཏོར་རཀྟ་གྷ་ན་དང་༔ ཕྱི་ནང་གསང་མཆོད་རྒྱས་པར་བཤམས༔ རྣལ་འབྱོར་བདེ་བའི་གདན་ལ་འདུག༔ ལས་གཞུང་བསྲང་ཞིང་བསྐྱེད་རིམ་བསྒོམ༔ མཆོད་བསྟོད་བསྙེན་པ་སྔགས་དམིགས་གསལ༔ དྲག་སྒྲུབ་དབང་གི་ལྷ་ཚོགས་ལ༔ ཉམས་ཆག་འགལ་འཁྲུལ་ཅི་མཆིས་པ༔ མཐོལ་བཤགས་གདུང་བའི་ཤུགས་བསྐྱེད་ནས༔ རོལ་མོ་འཁྲོལ་ཞིང་གླིང་བུ་འབུད༔ སྨན་རག་སྦྲེང་ཞིང་སྤོས་གསུར་བདུག༔ སྙན་པའི་དབྱངས་ཀྱིས་འདི་སྐད་དོ༔ ཧཱུྃ༔ མི་མངོན་དབྱིངས་ཀྱི་ཞིང་ཁམས་ནས༔ སྐྱེ་མེད་ཆོས་སྐུའི་ལྷ་ཚོགས་རྣམས༔ བསྐང་བའི་གནས་འདིར་གཤེགས་སུ་གསོལ༔ དག་པ་དབྱིངས་ཀྱི་ཕོ་བྲང་ནས༔ ལྷུན་གྲུབ་ལོངས་སྐུའི་ལྷ་ཚོགས་རྣམས༔ བསྐང་བའི་གནས་འདིར་གཤེགས་སུ་གསོལ༔ འགྲོ་བ་འདུལ་བའི་ཞིང་ཁམས་ནས༔ སྣ་ཚོགས་སྤྲུལ་སྐུའི་ལྷ་ཚོགས་རྣམས༔ བསྐང་བའི་གནས་འདིར་གཤེགས་སུ་གསོལ༔ ཧཱུྃ༔ འཇིགས་སུ་རུང་བའི་དུར་ཁྲོད་ནས༔ པདྨ་དྲག་པོའི་ལྷ་ཚོགས་རྣམས༔ བསྐང་བའི་གནས་འདིར་གཤེགས་སུ་གསོལ༔ གནས་དང་ཡུལ་གྱི་དུར་ཁྲོད་ནས༔ འབུམ་ཕྲག་དཔའ་བོ་དཔའ་མོ་རྣམས༔ བསྐང་བའི་གནས་འདིར་གཤེགས་སུ་གསོལ༔ དམ་ཚིག་བཀའ་ཡི་གཞལ་ཡས་ནས༔ ཆོས་སྐྱོང་བཀའ་བསྲུང་གཏེར་བདག་རྣམས༔ བསྐང་བའི་གནས་འདིར་གཤེགས་སུ་གསོལ༔ ཧཱུྃ༔ དུར་ཁྲོད་དྲག་པོའི་གཞལ་ཡས་སུ༔ དགྱེས་པའི་གདན་ལ་བཞུགས་སུ་གསོལ༔ དམ་ཚིག་དབང་གིས་ཕྱག་འཚལ་མཆོད༔ ཕྱི་ནང་གསང་བའི་འདོད་ཡོན་བཞེས༔ ལུས་ངག་ཡིད་གསུམ་གུས་པས་བསྟོད༔ དེ་ནས་ཐུགས་དམ་བསྐང་བ་ནི༔ ཧཱུྃ༔ འཇིགས་སུ་རུང་བའི་དུར་ཁྲོད་ནས༔ བསྐལ་བའི་མེ་རི་དམར་ནག་ཀློང་༔ སྲིན་པོ་སྡེ་བརྒྱད་དྲེགས་པའི་གདན༔ ཉི་ཟླ་པདྨའི་གདན་སྟེང་ན༔ ཁྲོ་རྒྱལ་ཀུན་འདུས་དྲག་པོའི་སྐུ༔ སྐུ་མདོག་དམར་སྨུག་གཟི་བརྗིད་འབར༔ དབུ་དགུ་ཕྱག་ནི་བཅོ་བརྒྱད་སྟེ༔ དབུས་གསུམ་སྨུག་ནག་ཁྲོ་གཏུམ་སྒེག༔ གཡས་གསུམ་དཀར་པོ་ཞི་མ་ཁྲོ༔ གཡོན་གསུམ་སྔོ་ནག་ཁྲོས་པའི་ཞལ༔ ཞབས་བརྒྱད་དྲེགས་པ་སྡེ་བརྒྱད་མནན༔ དཔལ་དང་དུར་ཁྲོད་ཆས་རྣམས་རྫོགས༔ ཞལ་གདངས་མཆེ་གཙིགས་རྐན་སྒྲ་རྡེབ༔ དབུ་སྐྲ་གྱེན་བརྫེས་ཐོད་པས་བརྒྱན༔ སྤྱན་བགྲད་སྡང་མིག་ཕྱོགས་བཅུར་གཟིགས༔ ཁམས་གསུམ་སྲིད་གསུམ་དབང་དུ་སྡུད༔ དྲེགས་པའི་ལྷ་སྲིན་བྲན་དུ་ཁོལ༔ རྒྱལ་འགོང་དམ་སྲི་རྡུལ་དུ་བརླག༔ དབང་ཆེན་པདྨ་ཁྲོས་པའི་སྐུ༔ དྲག་པོ་ཐོད་ཕྲེང་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ འབྲུ་སྨན་རྩི་བཅུད་བསྡུས་ཤིང་སྤུངས༔ དཔལ་གྱི་གཏོར་མས་ཐུགས་དམ་བསྐང་༔ རྩ་བརྒྱད་ཡན་ལག་སྟོང་དང་སྦྱར༔ བདུད་རྩི་སྨན་གྱིས་ཐུགས་དམ་བསྐང་༔ ཉོན་མོངས་ཞིང་བཅུ་བསྒྲལ་བའི་ཁྲག༔ རཀྟ་ཁྲག་གིས་ཐུགས་དམ་བསྐང་༔ འདབ་ལྡན་མེ་ཏོག་དབང་པོ་ལྔ༔ ཡིད་འོང་པུཥྤེས་ཐུགས་དམ་བསྐང་༔ དྲི་ཞིམ་སྨན་སྤོས་གསུར་ཆེན་དུད༔ བདུག་སྤོས་དྲི་ཡིས་ཐུགས་དམ་བསྐང་༔ འབྲུ་མར་རྩི་སྣུམ་ཞུན་ཆེན་མེ༔ སྣང་གསལ་སྒྲོན་མེས་ཐུགས་དམ་བསྐང་༔ རྡོ་རྗེ་དྲི་ ཆུ་དྲི་བཟང ་ཆབ༔ བྱུག་པའི་ཚོགས་ཀྱིས་ཐུགས་དམ་བསྐང་༔ རྡོ་རྗེ་དྲི་ཆེན་ཞལ་ཟས་བཤོས༔ རོ་ལྡན་ནཻ་ཝི་ཏེས་ཐུགས་དམ་བསྐང་༔ རྐང་གླིང་རོལ་མོ་ཐོད་རྔའི་སྒྲ༔ སྒྲ་སྙན་མཆོད་པས་ཐུགས་དམ་བསྐང་༔ བཟའ་བཏུང་ལོངས་སྤྱོད་ཤ་ཆང་སྒོག༔ ཞལ་ཟས་ཚོགས་ཀྱིས་ཐུགས་དམ་བསྐང་༔ དགའ་བཞི་བདེ་སྟོང་ཕ་རོལ་ཕྱིན༔ སྦྱོར་བའི་མཆོད་པས་ཐུགས་དམ་བསྐང་༔ ཞིང་བཅུ་མ་རིག་སྙིང་རྗེས་བསྒྲལ༔ བསྒྲལ་བའི་མཆོད་པས་ཐུགས་དམ་བསྐང་༔ ཆོས་དབྱིངས་སྐྱེ་མེད་བློ་ལས་འདས༔ ཡང་དག་ལྟ་བས་ཐུགས་དམ་བསྐང་༔ ཐུགས་དམ་བསྐང་ལ་དངོས་གྲུབ་སྩོལ༔ ཧཱུྃ༔ སྐུ་མཆོག་དེ་ལ་སྦྱོར་བའི་ཡུམ༔ མ་བརྒྱུད་མཁའ་འགྲོ་ཡོངས་ཀྱི་གཙོ༔ ནག་མོ་ཆེན་མོ་ཕག་གདོང་མ༔ གྲི་ཐོད་ཕྱག་རྒྱས་འཁྱུད་ཅིང་འཁྲིལ༔ བརྐྱང་བསྐུམ་གར་གྱིས་སྦྱོར་ཞིང་འདེགས༔ དུར་ཁྲོད་ཆས་ལྡན་གཟིག་ཤམ་འཕྱོ༔ འབུམ་ཕྲག་མཁའ་འགྲོའི་དབང་ཕྱུག་མོ༔ སངས་རྒྱས་ཀུན་གྱི་གསང་བ་འཛིན༔ རྡོ་རྗེ་ཕག་མོའི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ རིགས་བདག་དམར་པོ་ཆོས་ཀྱི་སྐུ༔ སྣང་བ་མཐའ་ཡས་ལོངས་སྤྱོད་རྫོགས༔ སྐྱེ་འཆིའི་འཇིག་བྲལ་རྡོ་རྗེའི་སྐུ༔ སྐུ་གསུམ་སངས་རྒྱས་འདུས་པའི་དཔལ༔ ཚེ་དཔག་མེད་ཀྱི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དུང་ཁང་འབར་བའི་གཞལ་ཡས་ནས༔ སྐུ་ཡི་ངོ་བོར་ལྷུན་གྱིས་གྲུབ༔ འཇམ་དཔལ་གཤིན་རྗེ་ཁྲོས་པའི་སྐུ༔ ཐོད་དབྱུག་འཁོར་ལོའི་ཕྱག་རྒྱ་ཅན༔ སྟངས་སྟབས་སྒྱུར་ཞིང་དོར་སྟབས་བགྲད༔ དུར་ཁྲོད་དྲག་པོའི་ཆས་རྣམས་རྫོགས༔ བདུད་བཞི་འཇོམ་མཛད་གཤིན་རྗེའི་གཤེད༔ འཇམ་དཔལ་དབྱངས་ཀྱི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དབང་དྲག་གསུང་གི་དཀྱིལ་འཁོར་ནས༔ གསུང་གི་དབང་ཕྱུག་ཧེ་རུ་ཀ༔ རྟ་མགྲིན་དམར་པོ་ཁྲོས་པའི་སྐུ༔ རྡོ་རྗེ་དྲིལ་བུའི་ཕྱག་རྒྱ་ཅན༔ དཔའ་བོ་དབང་གི་རྟ་སྐད་འཚེར༔ དུར་ཁྲོད་ཆས་ལྡན་དོར་སྟབས་བགྲད༔ མ་རུངས་ཚར་གཅོད་ཁྲོ་བོའི་རྒྱལ༔ ཧྱ་གྷྲཱི་ཝའི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དྲག་རྩལ་ཐུགས་ཀྱི་དཀྱིལ་འཁོར་ནས༔ ཐུགས་ཀྱི་ངོ་བོ་རྡོ་རྗེ་འཆང་༔ མཐིང་ནག་དྲག་པོ་འབར་བའི་སྐུ༔ རྡོ་རྗེ་སྡིགས་མཛུབ་དོར་སྟབས་བགྲད༔ སྦྲུལ་དང་ཐོད་ཕྲེང་ཆས་ཀྱིས་བརྒྱན༔ སངས་རྒྱས་ཐམས་ཅད་འདུས་པའི་ཐུགས༔ གདུག་པ་འདུལ་མཛད་བཅོམ་ལྡན་འདས༔ ཕྱག་ན་རྡོ་རྗེའི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དབང་མཛད་ཡོན་ཏན་དཀྱིལ་འཁོར་ནས༔ རྟེན་ཅིང་འབྲེལ་འབྱུང་དྷཀྐི་ལྔ༔ དཀར་སེར་དམར་ལྗང་མཐིང་འོད་འབར༔ ཐབས་ཤེས་དབྱེར་མེད་གྲི་ཐོད་འཆང་༔ རུས་པ་དར་དང་རཏྣས་བརྒྱན༔ གར་སྟབས་བདེ་སྟོང་ཡེ་ཤེས་འབར༔ མཁའ་འགྲོ་སྡེ་ལྔའི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ ཐོགས་མེད་ཕྲིན་ལས་དཀྱིལ་འཁོར་ནས༔ དྲག་རྩལ་ལས་མཛད་ཧེ་རུ་ཀ༔ ཡཀྴ་མེ་དབལ་སྨུག་ནག་འཇིགས༔ མེ་ཡི་ཐོ་བ་མེ་ཞགས་བསྣམས༔ དུར་ཁྲོད་ཆས་དང་ཐོད་ཕྲེང་གསོལ༔ དཀོར་བདག་སྡེ་བརྒྱད་ཀླད་པ་འགེམས༔ གཅེར་བུ་སྟངས་སྟབས་གློག་ལྟར་འཁྱུག༔ ཡཀྴ་མེ་དབལ་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ སྟེང་ཕྱོགས་ནམ་མཁའི་དཀྱིལ་འཁོར་ནས༔ སྤྲུལ་པའི་བྱ་ཁྱུང་གྷ་རུ་ཊ༔ གནམ་ལྕགས་རྭ་སྡེར་རྡོ་རྗེའི་མཆུ༔ རིགས་ལྔ་འབར་བའི་གཤོག་སྒྲོ་ལས༔ ཚ་ཟེར་བསྐལ་པའི་མེ་ཆེན་མཆེད༔ སྤུ་སྤྲུགས་སྤྲུལ་པས་ཁམས་གསུམ་ཁྱབ༔ ཀླུ་གདོན་འདུལ་བའི་མཐུ་བོ་ཆེ༔ བྱ་ཁྱུང་རྒྱལ་པོའི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ ཕྱི་རིམ་འཁོར་ལོའི་རྩིབས་སྟེང་ན༔ འབར་བའི་དབང་ཆེན་ཁྲོ་བོའི་རྒྱལ༔ རིགས་བཞིའི་དྲག་པོ་ཁྲོས་པའི་སྐུ༔ རང་རྟགས་སྐུ་མདོག་ཕྱག་མཚན་འབར༔ མཆོག་ཐུན་དངོས་གྲུབ་འཕྲིན་ལས་བདག༔ དྲག་པོ་རིགས་བཞིའི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ སྟེང་འོག་ཕྱོགས་བཞི་མཚམས་བརྒྱད་ནས༔ འབར་བའི་ཁྲོ་བོ་ཆེན་པོ་བཅུ༔ དྲག་པོའི་གཟུགས་ཀྱིས་གདུག་པ་འདུལ༔ མཐིང་ནག་གྲི་ཐོད་དཀྲུག་ཅིང་འགྱིང་༔ དགྲ་བགེགས་ཀུན་འདུལ་མཐུ་བོ་ཆེ༔ སྤྲུལ་པའི་ཁྲོ་བཅུའི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དབང་དྲག་ཁྲོས་པའི་བཀའ་འཁོར་ནས༔ ཤར་ཕྱོགས་ལས་མཛད་ཕྲ་མེན་མ༔ སེང་གདོང་དཀར་མོ་ལྕགས་ཀྱུ་ཅན༔ འགུགས་པའི་དབང་མོ་སྤྲུལ་པའི་བདག༔ བཛྲ་སེདྷའི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དབང་དྲག་ཁྲོས་པའི་བཀའ་འཁོར་ནས༔ ལྷོ་ཕྱོགས་ལས་མཛད་ཕྲ་མེན་མ༔ སྟག་གདོང་སེར་མོ་ཞགས་པ་ཅན༔ འཆིང་བྱེད་ཆེན་མོ་སྤྲུལ་པའི་བདག༔ སྟག་གདོང་མ་ཡི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དབང་དྲག་ཁྲོས་པའི་བཀའ་འཁོར་ནས༔ ནུབ་ཕྱོགས་ལས་མཛད་ཕྲ་མེན་མ༔ ཁྱུང་གདོང་དམར་མོ་ལྕགས་སྒྲོག་ཅན༔ སྡོམ་བྱེད་ཆེན་མོ་སྤྲུལ་པའི་བདག༔ ཁྱུང་གདོང་མ་ཡི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དབང་དྲག་ཁྲོས་པའི་བཀའ་འཁོར་ནས༔ བྱང་ཕྱོགས་ལས་མཛད་ཕྲ་མེན་མ༔ ཕག་གདོང་ལྗང་མོ་དྲིལ་བུ་ཅན༔ མྱོས་བྱེད་ཆེན་མོ་སྤྲུལ་པའི་བདག༔ ཕག་གདོང་མ་ཡི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དབང་དྲག་པདྨའི་བཀའ་འཁོར་ནས༔ བཀའ་དང་བསྟན་སྐྱོང་བྱེ་བ་འབུམ༔ སོ་སོའི་གཡོག་འཁོར་བྲན་དང་བཅས༔ སངས་རྒྱས་བསྟན་སྐྱོང་འཕྲིན་ལས་བདག༔ བསྟན་སྲུང་རྒྱ་མཚོའི་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ སོགས༴ ཧཱུྃ༔ དེ་ལྟར་ཐུགས་དམ་བསྐང་བའི་མཐུས༔ རྣལ་འབྱོར་བདག་ཅག་འཁོར་བཅས་ཀྱིས༔ ཚེ་རབས་སྔོན་ལས་བག་ཆགས་བགེགས༔ མི་མཐུན་གནོད་པ་ཞི་བ་དང་༔ ཚེ་དང་བསོད་ནམས་དཔལ་འབྱོར་རྒྱས༔ མི་དང་མི་མིན་དབང་དུ་བསྡུས༔ དགྲ་བགེགས་འབྱུང་པོ་རྡུལ་དུ་རློགས༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་མི་རྟོག་ངང་ལ་བཞག༔ ཡིག་བརྒྱ་བཤགས་ཚིག་ཅི་མང་བརྗོད༔ བར་ཆད་རྐྱེན་ངན་ཐམས་ཅད་བྱང་༔ མཆོག་ཐུན་དངོས་གྲུབ་གང་བརྩམས་འགྲུབ༔ དེ་ཕྱིར་གཅེས་པས་ཉམས་སུ་ལོང་༔ གསང་བའི་རྒྱ་སྡོམས་སྒྲུབ་པ་འབུངས༔ ཐུགས་ཀྱི་སྲས་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་ཤངས་ཟབ་བུ་ལུང་གི་བར་སྒོ་ནས་གདན་དྲངས་ཤིང་ཤོག་སེར་ལས་བོད་ཡིག་ཏུ་བསྒྱུར་བའོ། མངྒ་ལཾ།། །།