གཙུག་ཕུད་རིས་བཟང་གི་སྲས་སུ་འཁྲུངས་པའི་ལེའུ།
དེ་ནས་ཀུན་མཁྱེན་ཀུན་གཟིགས་ཀུན་ཏུ་འཆང་ཿ དད་པ་ཅན་གྱི་ལྷ་གནས་ཕོ་མོ་རྣམསཿ གསང་སྔགས་བླ་མེད་རྡོ་རྗེ་ཐེག་པ་བསྟནཿ བྲམ་ཟེའི་ཁྱིའུ་བླ་མ་ཚེ་འཕོས་པཿ ལྷའི་བུ་དམ་པ་ཏོག་དཀར་ཞེས་བྱ་ལཿ དབང་གི་ཆུ་བོ་ཆེན་པོ་བཞི་ཕབ་སྟེཿ ཡོངས་སུ་འཛིན་པ་དགེ་བའི་བཤེས་གཉེན་དབང་ཿ ཕྱི་ཡི་ཆས་བརྒྱད་སྤྲུལ་པའི་སྐུ་རུ་བསྐུརཿ ཆོས་བཀའ་གཏད་པ་པོ་ཏི་གླེགས་བམ་དབང་ཿ ནང་གི་ཆས་བརྒྱད་ལོངས་སྤྱོད་རྫོགས་སྐུར་བསྐུརཿ རིག་པའི་རྩལ་དབང་ཡི་དམ་ལྷ་ཡི་དབང་ཿ གསང་བའི་ཆས་བརྒྱད་ཆོས་ཀྱི་སྐུ་རུ་བསྐུརཿ ཡོངས་རྫོགས་ཕྱག་རྒྱ་ཆེན་པོ་མཆོག་གི་དབང་ཿ དབང་གི་ཆས་བཅུ་མི་འགྱུར་རྡོ་རྗེར་བསྐུརཿ སྐུ་ལྔའི་བདག་ཉིད་བླ་མེད་རྡོ་རྗེ་འཆང་ཿ ཡུམ་འཁྲིལ་ལྟ་བ་སྤྱི་འབྱམ་མངོན་བྱང་བསྐུརཿ དེ་ལྟར་སྒོས་དབང་རྫོགས་པར་བསྐུར་བྱས་ནསཿ དེ་ནས་སྤྱི་དབང་བཅུ་པོ་བསྐུར་བ་ནིཿ བདུད་རྩི་ཐོབ་ཕྱིར་ཚེ་ལ་དབང་བར་བསྐུརཿ སེམས་ཤེས་ཕྱིར་ན་སེམས་ལ་དབང་བར་བསྐུརཿ ནམ་མཁའ་མཛོད་ཕྱིར་ཡོ་བྱད་བརྙེས་དབང་བསྐུརཿ བག་ཆགས་དང་བཅས་ལས་ཀྱི་ལམ་བཅད་ཕྱིརཿ
༼༣༡བ༽ལས་ལམ་བཅད་པ་ཏིང་ངེ་འཛིན་དབང་བསྐུརཿ བསམ་གཏན་བསྐྱེད་ཕྱིར་སྐྱེ་བའི་དབང་ནི་བསྐུརཿ ལྷུན་གྲུབ་འཇུག་པ་ཐོབ་ཕྱིར་རྫུ་འཕྲུལ་བསྐུརཿ ཟད་པར་སྐྱེ་མཆེད་ཐོབ་ཕྱིར་མོས་པ་བསྐུརཿ བསམ་པ་དོན་ཐོབ་བྱ་ཕྱིར་སྨོན་ལམ་བསྐུརཿ ལུས་ངག་ཡིད་ཀྱི་ལས་ཐོབ་ཡེ་ཤེས་བསྐུརཿ ཆོས་དབྱིངས་ཡང་དག་མཐའ་མཉམ་དྲི་མེད་ཕྱིརཿ ཆོས་ལ་དབང་བའི་དབང་དང་བཅུ་བསྐུར་རོཿ ཁྱད་པར་དབང་ནི་ཉི་ཤུ་རྩ་ལྔ་བསྐུརཿ སྐུ་ཡི་དབང་ལྔ་སྤྱི་བོའི་གཙུག་ཏུ་བསྐུརཿ གསུང་གི་དབང་ལྔ་མགྲིན་པའི་གནས་སུ་བསྐུརཿ ཐུགས་ཀྱི་དབང་ལྔ་སྙིང་གའི་གནས་སུ་བསྐུརཿ ཡོན་ཏན་དབང་ལྔ་ལྟེ་བའི་གནས་སུ་བསྐུརཿ འཕྲིན་ལས་དབང་ལྔ་ཡན་ལག་ཀུན་ལ་བསྐུརཿ ལྷ་བརྒྱ་སྟོང་གིས་བསྟོད་ཅིང་བསྐུར་ཏེ་བསྔགསཿ སིལ་སྙན་སྒྲ་དང་གླུ་དབྱངས་སྒྲ་ཡིས་བསྐུལཿ དེ་ནས་ཏོག་དཀར་མི་ཡུལ་བྱོན་པ་ལསཿ ལྷ་འཁོར་རྣམས་ལ་བྱམས་པས་ཆོས་སྟོན་འགྱུརཿ དེ་ཕྱིར་ཏོག་དཀར་རང་གི་མགོ་ནས་ནིཿ ཐོད་དང་ཅོད་པན་བྱམས་པའི་མགོ་ལ་བཞགཿ ཁྱེད་ནི་ང་ཡི་འོག་ཏུ་སངས་རྒྱས་འགྱུརཿ ཞེས་པའི་ལུང་བསྟན་དབང་བསྐུར་གཟེངས་བསྟོད་ནསཿ སེར་སྐྱའི་རྒྱལ་པོ་ཟས་གཙང་སྲས་ལ་གཤེགསཿ དེ་ནས་བླ་མེད་སྟོན་པ་ཀུན་ཏུ་འཆང་ཿ མི་ཡུལ་ཡོ་ག་གསུམ་གྱིས་འདུལ་བར་གཟིགསཿ འབྲས་བུ་གསང་སྔགས་རྡོ་རྗེ་ཐེག་པ་དེཿ
༼༣༢ན༽ལྷའི་བུ་ཡེ་ཤེས་ཏོག་གི་རྒྱལ་མཚན་ཞེསཿ དབང་གི་ཆུ་བོ་ཆེན་པོ་བཞི་ཕབ་ནསཿ ལྷ་མང་དབུས་ཀྱི་ཁྱུ་མཆོག་མངའ་གསོལ་ཏེཿ རྒྱལ་པོ་གཙུག་ཕུད་རིས་བཟང་སྲས་ལ་གཤེགསཿ དེ་ཡི་གཤེགས་ཡུལ་ནུབ་ཕྱོགས་ཨུ་རྒྱན་ཡུལཿ ཡུལ་གླིང་ཉི་ཤུ་རྩ་གཅིག་ཡོད་པའི་དབུསཿ ཨུ་རྒྱན་སྤྲིན་ནག་འདུས་པའི་དུར་ཁྲོད་བྱང་ཿ ཧེ་རུ་ཀ་ཡི་གཙུག་ལག་ཁང་ཞེས་པཿ རྒྱུ་ནི་རིན་ཆེན་སྣ་ཚོགས་ལས་གྲུབ་ཅིང་ཿ དབྱིབས་ནི་ཟླུམ་པོ་མདོག་ནི་མཐིང་ཁ་སྟེཿ ལྷ་ཁང་ཚད་ནི་ཚངས་པའི་འདོམ་གང་པཿ ཕྱོགས་བཞི་དག་ལ་སྒོ་ནི་བཅུ་དྲུག་པཿ འབྱེད་གཅོད་ཐམས་ཅད་དུས་གཅིག་བྱེད་པ་ཡོདཿ མཁའ་འགྲོས་བདག་བྱེད་རང་བྱུང་གཙུག་ལག་ཁང་ཿ ཨུ་ཏ་ལ་ཡེ་གཙུག་ལག་ཁང་ཡང་ཟེརཿ ལུང་བསྟན་གྱི་ནི་ལྷ་ཁང་ཞེས་ཀྱང་ཟེརཿ གྷནྡྷོ་ལ་ཡི་གཙུག་ལག་ཁང་ཡང་ཟེརཿ དེ་ཡི་བདག་པོ་འདོད་པ་བཞིན་བྱེད་པཿ རྒྱལ་པོ་གཙུག་ཕུད་རིས་བཟང་ཞེས་བྱ་སྟེཿ བཙུན་མོ་མཆོད་འོས་མ་ཞེས་བྱ་བ་ལཿ རྒྱལ་བུ་མཚེ་མ་གཉིས་ནི་དུས་གཅིག་སྐྱེསཿ རྒྱལ་བུ་གཉིས་ཀར་དུས་གཅིག་ཁབ་བཞེས་ནསཿ སྲས་གང་སྔ་དེ་རྒྱལ་སར་འདོན་ནོ་གསུང་ཿ བག་མ་གཉིས་ནི་ཉིན་གཅིག་དུས་གཅིག་བླངསཿ རྒྱལ་པོ་གཙུག་ཕུད་རིས་བཟང་ཞལ་ན་རེཿ རྒྱལ་བུ་དུས་གཅིག་སྐྱེ་ཉེན་ཡོད་པས་ནཿ སྐད་ནི་གང་སྔ་ཞིག་གིས་བྱེད་པ་
༼༣༢བ༽ཡིནཿ ངའི་ཁྲིའི་གཡས་གཡོན་ཉོལ་ཅིག་གསུངས་ནས་བསྙལཿ ཐོར་ཚུགས་ཅན་གྱི་བཙུན་མོ་གུ་ན་མཿ གཉིད་ལོག་པ་ཡི་རྨི་ལམ་ཟ་ཟིནཿ ལུས་ནས་མི་ཆེན་དཀར་པོ་ཞིག་འཐོན་ནསཿ རྩི་ཤིང་དགས་ཚལ་ཐམས་ཅད་བཅད་པའི་ཤུལཿ ས་དཀར་བྱུགས་ཏེ་རྣམ་པར་དཀར་བར་རྨིསཿ གཅིག་ལ་མོ་ཡི་ལུས་ནས་མི་ནག་འཐོནཿ མགོ་བོ་ཉི་ཟླའི་གསེབ་ཏུ་འཆངས་བ་རྨིསཿ རྒྱལ་པོ་ཉིད་ལ་ཐུགས་ནས་འོད་ཟེར་ནིཿ ཁ་དོག་ལྔ་སོང་ཉི་ཟླའི་གསེབ་སོང་རྨིསཿ ནང་པར་རྨི་ལྟས་ང་བཟང་ང་བཟང་ཟེརཿ རྨིས་ལྟས་མཁན་པོ་བོས་ནས་དྲིས་པ་ཡིསཿ མི་དཀར་དེ་ནི་འགྲོ་བའི་དོན་བྱེད་པའིཿ རྒྱལ་བུ་སྤྲུལ་པའི་སྐུ་ཞིག་སྐྱེ་བའི་རྟགསཿ རྩི་ཤིང་བཅད་པ་གདུག་པ་འདུལ་བ་ཡིནཿ ས་དཀར་བསྟན་པ་རྒྱས་པའི་རྟགས་ཡིན་ནོཿ གཅིག་གི་ལུས་ནས་མི་ནག་ཆེན་པོ་དེཿ རྒྱལ་ས་འཛིན་རྟགས་སྲས་འོང་ལུང་བསྟན་ནོཿ ལོ་དེའི་དཔྱིད་ཟླ་ར་བའི་རྒྱལ་གྱི་ཉིནཿ བུ་རེ་སྐྱེས་ཏེ་སྐད་ཀྱང་མཉམ་པོར་བཏོནཿ ལྟས་བཟང་བྱུང་བས་ཐོར་ཅོག་ཅན་ན་རེཿ དེ་མ་ཐག་ཏུ་ངའི་བུའི་ལྟས་ཡིན་ཟེརཿ རབ་རྩལ་ན་རེ་ངའི་བུའི་ལྟས་ཡིན་ཟེརཿ རྒྱལ་པོའི་རྒྱལ་ས་ང་ཡི་བུས་ཐོབ་ཟེརཿ དེ་ནས་རྒྱལ་པོས་རྒྱལ་སྲིད་མི་དམངས་བསྡུསཿ རྒྱལ་བུ་གཉིས་ལ་བཙལ་སྟོན་ཆེན་པོ་བྱསཿ བྲམ་ཟེ་མཚན་མཁན་བུ་ཡི་མཚན་བརྟགས་ནསཿ རབ་རྩལ་བུ་ལ་
༼༣༣ན༽ཐོར་ཅོག་ཅན་དུ་བཏགསཿ ཐོར་ཚུགས་བུ་ལ་ཤཱནྟ་རཀྵིར་བཏགསཿ བློན་རྣམས་རྒྱལ་པོ་གང་བྱེད་གྲོས་དྲིས་པསཿ བཞིན་བཟང་བཀྱེལ་ཆེ་ཞིག་གིས་རྒྱལ་པོ་གྱིསཿ ཟེར་བས་ཐོར་ཅོག་ཅན་ནི་རྒྱལ་སར་བཏོནཿ ཤཱནྟ་རཀྵི་ཐང་མཚམས་འཛིན་དུ་བཅུགཿ དེ་ནས་ཤཱནྟས་རྒྱལ་སྲིད་མ་ཐོབ་པརཿ གང་ལའང་ཁོ་དང་གཉིས་མཉམ་པ་ལཿ ཁོ་ཡིས་རྒྱལ་པོ་ང་ཉིད་དམངས་བྱེད་པཿ འདི་འདྲ་མི་འོང་མི་འོས་སྙམ་ནས་སུཿ རྒྱལ་སྲིད་དག་ལ་ཅི་གནོད་བྱས་པ་ཡིསཿ ཆད་པ་བྱུང་ནས་མཐའ་ལ་སྐྱུགས་པར་གྱུརཿ དེ་ནས་རྒྱ་གར་རྡོ་རྗེ་གདན་གྱི་ནུབཿ དུར་ཁྲོད་ཆེན་པོ་སོ་ས་གླིང་བྱ་བཿ མཐའ་སྐོར་དུ་ནི་དཔག་ཚད་གཅིག་ཡོད་པཿ དེ་ཉིད་དབུས་ན་རང་བྱུང་མཆོད་རྟེན་ནིཿ རྒྱ་ཆེ་གཏིང་རིང་འཁོར་ལོ་གདུགས་དང་བཅསཿ རྒྱུ་ནི་རིན་ཆེན་དངུལ་ལས་བྱས་པ་ཡིཿ དྲིལ་བུ 
་གཡེར་ཁའི་དྲ་བ་དྲ་ཕྱེད་སྤྲསཿ ཉི་མ་དང་ནི་ཟླ་བས་བརྒྱན་པ་ལཿ དེ་ལོག་ཀེ་རེའི་མ་བརྒྱད་རང་བྱུང་གནསཿ དེ་ཡི་བྱང་ཤར་མུན་ཐང་ཞེས་བྱའི་མཚོཿ ནང་ན་ཆུ་སྲིན་ལ་སོགས་སྲོག་ཆགས་གཟུགསཿ ཐ་མ་སྣ་ཚོགས་འདུས་པའི་བྲག་གིས་བསྐོརཿ དེ་ཡི་ལྷོ་ནུབ་འཇིག་རྟེན་ལྷ་རྟེན་ནིཿ ཤིང་ནགས་ནྱ་གྲོ་དྷ་ཞེས་བྱ་བ་ལཿ སྟེང་ན་དུར་བྱ་ནག་པོའི་ཚང་ཡོད་པཿ སྐེད་པར་དུག་སྦྲུལ་ནག་པོའི་ཚང་བཅས་ཤིང་ཿ རྩ་བར་དུར་ཕག་
༼༣༣བ༽ནག་པོའི་ཚང་ཡོད་པརཿ འཇིག་རྟེན་ལྷ་ནི་དགའ་བྱེད་གཞོན་དུ་ཞེསཿ གདོང་པ་སེང་གེ་ལག་བཞིས་རལ་གྲི་དང་ཿ མི་མགོ་གཏུན་ཤིང་རྩེ་གསུམ་རོ་བཀལ་འཛིནཿ ཐོད་པའི་འཕྲེང་བས་ལུས་ཀུན་བརྒྱན་པ་ལཿ ལུས་ལ་དར་ཆེན་སྔོ་ཁྲའི་འཇོལ་བེར་གསོལཿ གསོད་བྱེད་མ་མོ་འབུམ་གྱིས་བསྐོར་ནས་ནིཿ གླང་པོ་ཆེ་ཞོན་ཤ་དང་ཁྲག་ལ་དདཿ དེ་ན་མཁའ་འགྲོ་མ་ཚོགས་དཔག་མེད་དེཿ ལ་ལ་སེང་གེ་ཞོན་ནས་སྐྲ་གྲོལ་བཿ ལག་ཏུ་ཐོད་པ་དགུ་བརྩེགས་རྒྱལ་མཚན་ཕྱརཿ ལ་ལ་བྱ་ཚོགས་ཞོན་ནས་ཀུ་ཅོ་འདོནཿ ལག་ཏུ་སེང་གེ་དག་གི་རྒྱལ་མཚན་ཕྱརཿ ལ་ལ་ལུས་གཅིག་གདོང་བཅུ་རྒྱུ་སྙིང་ཟཿ ལ་ལ་བུད་མེད་ནག་མོ་རལ་བསྙིགས་མཿ ཁ་ཡི་ནང་ནས་ཁྱི་སྤྱང་འབྱུང་བར་བྱེདཿ ལ་ལ་མི་ལུས་གཤོགས་པ་ནམ་མཁའ་མཉམཿ གནམ་ལྕགས་ཐོག་གི་ཆར་པ་འབེབས་པར་བྱེདཿ ལག་པ་དག་ན་སྟག་གི་རྒྱལ་མཚན་ཐོགསཿ ལ་ལ་རང་གི་ལུས་ཀྱི་སྟོད་སྨད་འབྲལཿ ལ་ལ་རང་གི་ཡན་ལག་བཅད་ནས་སུཿ ཕྱོགས་བཞི་མཚམས་བརྒྱད་དག་ལ་གཏོར་བ་ཡོདཿ དེ་ལྟར་རྫུ་འཕྲུལ་སྣ་ཚོགས་སྟོན་བྱེད་པཿ དཔག་ཏུ་མེད་པ་བརྗོད་ཀྱིས་མི་ལོང་ངོ་ཿ དེ་ན་དུར་བྱ་དུར་ཕག་དུག་སྦྲུལ་དང་ཿ ལྕེ་སྤྱང་ཁ་དོག་མི་འདྲ་མང་པོ་དང་ཿ སྤྱང་ཀི་ཀ་ལི་ཀ་ལ་སོགས་པ་དང་ཿ མི་རོ་གསར་རྙིང་དཔག་ཏུ་མེད་པ་དང་ཿ ཤ་དང་རུས་པ་ཁྲག་གི་
༼༣༤ན༽རྒྱ་མཚོ་དང་ཿ མི་མགོ་སྐམ་པོ་རྙོན་པ་རྙིང་པ་དང་ཿ གཅན་གཟན་ལ་ལ་རོ་འདྲད་ལ་ལ་ཟཿ ལ་ལ་རྒྱུག་ཅིང་ལ་ལ་ངུ་བ་དང་ཿ ལ་ལ་མིག་འབྱིན་ལ་ལ་རྐང་པ་འཆའཿ རུས་པ་མུར་དང་ཤ་ཟ་རྒྱུ་མ་འཐེནཿ རབ་ཏུ་འཇིགས་ཤིང་སྐྱི་བུད་དུར་ཁྲོད་དེརཿ ཤཱནྟ་རཀྵི་ཏ་ཡིས་ཕྱིན་ནས་སུཿ འོད་མ་ལས་བྱས་ཤིང་གཞུ་ཤིང་མདའ་ཐོགསཿ ཕོ་བྱུང་བསད་ཅིང་མོ་བྱུང་སྤྱད་པ་ལསཿ མཁའ་འགྲོ་མ་ཡི་ཚོགས་ཀྱིས་ཡོངས་སུ་བསྐོརཿ ཏིང་འཛིན་སྐྱོང་ཞིང་བརྒྱ་དང་དགུ་བཅུ་བཞུགསཿ དེ་ནས་སྤྲིན་ལྡན་རྒྱལ་ཁམས་འདུལ་བར་དགོངསཿ ཚོགས་ནས་ཕུང་པོ་ལྷག་མེད་འཇའ་ལྟར་ཡལཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ གཙུག་ཕུད་རིས་བཟང་གི་སྲས་སུ་འཁྲུངས་པའི་ལེའུ་སྟེ་དགུ་པའོཿ ཿཐ་ཐ་ཉྲ་རྒྱ་རྒྱཿ ཿ